The Old Testamen of the Holy Bible
Winonsoi o Koinsanai'd Nunu Nopo
1 Tontok di timpuun i' om wonsoyo' nod Kinorohingan o tawan om pomogunan. 2 Aiso' po suang do pomogunan, om aiso' o poimpasi; om noolitan di rahat dot opuhod, om odondom o kotuongo'. Nga' mintongkop i' i Rusod do Kinorohingan do hiri'd soibau di waig. 3 Om pomoros no o Kinorohingan do poingkaa, “Nawau no,” ka --- om haro noddi o tanawau. 4 Om kokito nod Kinorohingan dot osonong i tanawau, om potongkiado' no dau i tanawau do mantad id totuong. 5 Om pungaranai nod Kinorohingan do “Dangadau” i tanawau, om “Dongotuong” i totuong. Om korikot no sosodopon om korikot nogiddi kosuabon --- iri no tadau do koiso'. 6-7 Om boros kad Kinorohingan, “Pohoroon ku o kulung do popitongkiad dilo waig om duwo indo o koiyonon,” ka --- om kowonsoi no o miagal diri. Om iyo noddi o kinowoyo-woyoon do Kinorohingan do minomonsoi di kulung. Om iri no i kulung o pinopitongkiad di waig do hiti'd siriba' do mantad di waig di hilo'd sawat. 8 Om pungaranai nod Kinorohingan i kulung do, “Tawan”. Om korikot no sosodopon om korikot nogiddi kosuabon --- iri no tadau do koduwo. 9 Om boros kad Kinorohingan, “Potimungon ilo waig do hilo'd sahau do tawan dot id iso' o koiyonon, om okito indo o tana',” ka. Om kowonsoi no o miagal diri. 10 Om pungaranai nod Kinorohingan i tana' do “Katanaan”. Om iri no kinotimungon di waig om pinungaranan dau do “Rahat”. Om kokito nod Kinorohingan dot osonong i nowonsoi dau. 11 Om boros kad Kinorohingan, “Poposuni iti tana' do mogisuayan o sumuni di kilinsou om i kitua',” ka. Om kosiliu no o miagal diri. 12 Om posuni noddi i tana' do mogisuayan i sumuni. Om kokito nod Kinorohingan dot osonong i nowonsoi dau. 13 Om korikot no sosodopon om korikot nogiddi kosuabon --- iri no tadau do kotolu. 14 Om boros kad Kinorohingan, “Mimbulai o mogulinau do hilo'd tawan do potongkiad di tanawau do mantad id totuong, om oilaan i' o koimpuunon do tadau, om toun, om tadau'd agayo do don tugama'; 15 om iri nondo i mogulinau do hilo'd tawan o mamanawau diti pomogunan,” ka --- om kosiliu no o miagal diri. 16 Om iyo noddi o Kinorohingan do minomonsoi di duwo o mogulinau dit agayo: i tadau o mulinau do dangadau, om i tulan o mulinau do dongotuong; om winonsoi ngai' nogi' dau i rombituon. 17 Om poiyono' no dau i piro-piro mogulinau diri do hilo'd tawan do mamanawau diti pomogunan, 18 do mogulinau do dangadau, om mogulinau do dongotuong, om popitongkiad do tanawau do mantad id totuong. Om kokito nod Kinorohingan dot osonong i nowonsoi dau. 19 Om korikot no sosodopon om korikot nogiddi kosuabon --- iri no tadau do kaapat. 20 Om boros kad Kinorohingan, “Oponu' ilo waig do koinsanai di kipinuhobo, om oponu' do tombolog o hilo'd sawat diti pomogunan,” ka dau. 21 Om wonsoyo' noddi do Kinorohingan i nintorusan dit angagayo do hilo'd rahat, om koinsanai di kipinuhobo do miyon dot id waig, om koinsanai do bansa' do tombolog. Om kokito nod Kinorohingan dot osonong i nowonsoi dau. 22 Om barakatai no dau o koinsanai'ddi om sinunudan dau do sumakag i kipinuhobo di poingiyon do hilo'd waig, om momonu' di rahat, om sinunudan ngai' nogi' dau do gumumu' i tombolog. 23 Om korikot no sosodopon om korikot nogiddi kosuabon --- iri no tadau do kolimo. 24 Om boros kad Kinorohingan, “Popoimbulai iti pomogunan do mogisuayan o nintorusan dit alaya' om i lalang, om it angagayo om it ongokoro',” ka --- om kosiliu no o miagal diri. 25 Om iyo noddi o Kinorohingan do minomonsoi do koinsanai'ddi. Om kokito nod Kinorohingan dot osonong i nowonsoi dau. 26 Om boros kad Kinorohingan, “Dinondo no, om momonsoi toko' do tulun; om paagalon toko' dati' iyolo' om iyo nondo dati' iyolo'. Om kikuasa' nondo iyolo' dot id sawat do koinsanai'd sada', om tombolog, om koinsanai do nintorusan dit angalaya' om i lalang, om it angagayo om it ongokoro',” ka dau. 27 Om pomonsoi noddi o Kinorohingan do tulun do pinoiyo dau. Om winonsoi dau iyolo' do kusai om tondu'. 28 Om barakatai nod Kinorohingan iyolo' do mikuwo'd minomoros do poingkaa, “Paganak kou nod ogumu' om kopomogun i' o sinakagon dokoyu do pointongkop diti pomogunan om oporinta' indo diyolo' o koinsanai do sada', om tombolog, om koinsanai do bansa'd nintorusan do hilo'd gouton. 29 Om nokosodia' ku no o mogisuayan o linsou om mogisuayan o tua-ua' do maan dokoyu'd kanon; 30 nga' iri nopo i nintorusan di hilo'd gouton om i tombolog om nosodiaan ku no do sakot om i songinsuni dit ongkiroun do maan do diyolo'd kanon,” ka dau --- om kosiliu noddi o miagal diri. 31 Om ontong no o Kinorohingan do koinsanai di winonsoi dau, om osonong ngai' nopo. Om korikot no sosodopon om korikot nogiddi kosuabon --- iri no tadau do koonom.
1 Om kopongo ngai' noddi do minomonsoi o tawan, om pomogunan om koinsanai do nunu nopo. 2 Tontok di koturu' do tadau om undorong no o Kinorohingan tu' nopongo ngai' noddi dau i wonsoyon dau. 3 Om barakatai noddi dau i tadau do koturu' om siliho' no dau o tadau'ddi do tadau dot agayo, tu' tontok no do tadau'ddi do minundorong iyau tu' nopongo ngai' no dau i wonsoyon dau. 4 Om iyo noddi o kinowoyo-woyoon do minomonsoi do tawan, om tana' om koinsanai do nunu nopo.
I Kabun dot Idon
Tontok di winonsoi i' do TUHAN, i Kinorohingan o tawan, om pomogunan, om koinsanai do nunu nopo, 5 om aiso' po o songinsuni do hiti'd tana', om aiso' o linsou do nokosobul tu' a' po dau nokolintuhun o rasam, om aiso' po o tulun do momutanom di tana'; 6 nga' haro i' o waig do mimbulai do mantad hiri'd saalom do tana' do momoyopos di tana'. 7 Om panganu noddi do lagit dot okooro' do mantad hiri'd tana' o TUHAN, i Kinorohingan om wonsoyo' no dau iri do songulun o tulun; om obusai no dau do pinuhobo di kapasi o luang do todung di tulun diri om kipinuhobo noddi i tulun. 8 Om pomukabun noddi o TUHAN,i Kinorohingan do hilo'd Idon, i ponong id koulayon, om hilo' no o pinoiyanan dau di tulun di winonsoi dau'ddi. 9 Om mogisuayan nopo o kayu dit ongolumis om it ongosonong o tua' do pinosuni dau do hilo'. Om hiri nopod kabun diri om haro o songguas o kayu di manahak do koposion om haro o songguas o kayu di manahak do toilaan ondung nunu it osonong om nunu it araat. 10 Hilo' nopod Idon om haro o bawang do muyung-luyung, om iri no i momuwaig di kabun; om hiri nopod soliwan di kabun dot Idon om nabahagi' diri i bawang dot apat o bawang. 11 Ngaran nopo di bawang do koiso' om Pison; i lumuyung do posorili' di pomogunan do Hawila. 12 (Hilo' nopo om haro o tamas dit osompipi', om haro o tumau dit osonong kopio o kosingudan, om haro o watu dot olumis dit agayo o gatang.) 13 Ngaran no di bawang do koduwo om Gihon; i lumuyung do posorili' do pomogunan do Kus. 14 Om ngaran nopo di bawang do kotolu om Tigris, i lumuyung do ponong id koulayon do mantad id pomogunan dot Asur, om ngaran no di bawang do kaapat om Iprat. 15 Om poiyono' noddi do TUHAN i Kinorohingan i tulun di winonsoi dau'ddi do hiri'd Kabun dot Idon, do mananom-tanom om momogompi' di kabun. 16 Om sunudai no do Kinorohingan i tulun diri do poingkaa, “Koino-ino nu i' do kanon o koinsanai'd tua' do kayu do hiti'd kabun, 17 nga' iri po i tua' di kayu di manahak do toilaan ondung nunu it osonong om nunu it araat ot a' nu koino-ino do kanon. Kada' nogi' kopio pangakan do tua' do kayu'ddi. Tu' ondung mangakan ko, om tontok no do tadau'ddi do matai ko,” ka dau. 18 Om pomoros noddi o Kinorohingan do poingkaa, “A' i' osonong do songulun-ngulun iti tulun. Momonsoi oku po do koruhang dau di kosudong kopio dau do monguhup dau,” ka. 19 Om panganu no o Kinorohingan do lagit dot okooro' do mantad hiri'd tana', om woruno' no dau o koinsanai do nintorusan om tombolog. Om igitai ngai' no dau iri do pinaantangan di tulun, om oilaan i' ondung nunu o pomungaran di tulun do koinsanai'ddi; om iyo noddi o kinoonuan do koinsanai di nintorusan om i tombolog do ngaran diyolo'. 20 Om pungaranai ngai' noddi di tulun i tombolog om i nintorusan diri; nga' iso' poddi nga' aiso' i o kosudong kopio dau do sumiliu do koruhang dau do monguhup dau. 21 Om poodopo' noddi do TUHAN, i Kinorohingan i tulun diri do gisom do nokoolong. Om daamot poddi di tulun do koodop, om ngoyo' no do Kinorohingan onuo' o tiso' di tulang do tikagang dau, om piromuto' nogiddi kawagu dau i tonsi di pinongonuan dau'ddi. 22 Om wonsoyo' no do Kinorohingan do tondu' i tulang do tikagang diri, om pootodo' nogiddi dau do hiri'd tulun diri. 23 Om boro-boros noddi i tulun diri do poingkaa, “Hati nogiddi o sagalai kopio ku --- i tulang do nanu do mantad id tulang ku, om i tonsi do mantad id tonsi ku. Pomungaran ku nopo dau om 'Tondu” tu' nanu i' iyau do mantad id kusai,” ka dau. 24 Om iri no kotongkiadan do kusai do mantad id tina' om tapa' dau, om kopiiso' i' iyau di sawo dau, om osiliu indo iyolo' dot iso-iso' o tonsi. 25 Iri nopo kusai om i tondu' diri om poillabas i' goduwo, nga' amu' i' iyolo' kopuriman dot ointingayaman.
Amu' i Tulun Minumboyo' do Kinorohingan
1 Id pogialatan nopo do nintorusan di winonsoi do TUHAN, i Kinorohingan om iri no i tulanut ot obilut kopio. Om uhoto' no di tulanut i tondu' do poingkaa, “Noduhan kou no kopio do Kinorohingan do mangakan do tua' do koinsanai diti kayu do hiti'd kabun?” ka dau. 2 Om boros ka di tondu' do suminimbar, “Koino-ino i' bo iyahai do mangakan do tua' do koinsanai diti kayu do hiti'd kabun, 3 nga' iri po i tua' di songguas o kayu do hilo'd tanga' diti kabun ot a' dahai koino-ino dot akanon. Kumama' piya nga' a' i' iyahai koino-ino; tu' owonsoi nopo dahai o miagal diri om apatai no iyahai,” ka dau. 4 Om boros ka di tulanut do suminimbar, “A' i' otopot ino; a' kou i' bo apatai. 5 Minomisunud pogi' o Kinorohingan do miagal diri nga' oilaan dau do kaakan kou nopo di tua'ddi om koiyo kou nondo do Kinorohingan om koilo kou nondo ondung nunu it osonong om nunu it araat,” ka di tulanut. 6 Om kokito no di tondu' dot olumis i' i guas do kayu'ddi, om i tua' nga' osonong i' kopio dot akanon. Om pomusorou noddi iyau dot osonong i' kopio dot osiliu do tulun di kitoilaan. Om pongupu' noddi iyau di tua' om akano' no dau. Om onuwai noddi dau i sawo dau om iri'ddi sawo dau nga' minangakan i'. 7 Kaakan poddi diyolo' iri, om kaanu no iyolo' do toilaan, om kopuriman diri iyolo' do poillabas iyolo'. Om pogitombir-tombiro' noddi diyolo' i roun do kayu om potirungo' no diyolo' do tinan diyolo'. 8 Tontok do sosodopon diri om korongou no diyolo' o TUHAN, i Kinorohingan do manau-panau do hiri'd kabun, om lisok no iyolo' do hiri'd salag di kokoyuan, om a' indo iyolo' okito do Kinorohingan. 9 Nga' lohowo' no do Kinorohingan i kusai, “Hinonggo ko'ndo?” ka dau. 10 Om boros ka di kusai do suminimbar, “Tontok di norongou ku do hiti ko'd kabun om minodosi oku'ddi, om lisok oku no tu' poillabas oku i',” ka dau. 11 Om uhoto' noddi iyau do Kinorohingan do poingkaa, “Isai o minomisunud diya' do poillabas ko? Minangakan ko di tua' di pinogoduhan ku diya' do mangakan?” ka dau. 12 Om boros ka di kusai do suminimbar, “Ilo' i tondu' di pinokoruhang nu doho' o minanahak doho' di tua', om akano' ku noddi,” ka dau. 13 Om uhoto' no do TUHAN, i Kinorohingan i tondu' do poingkaa, “Nokuro tu' winonsoi nu o miagal diri?” ka dau. Om boros ka di tondu' do suminimbar, “Nudutan oku di tulanut om gowoi poddi om minangakan oku di tua',” ka dau.
Minomohukum o Kinorohingan
14 Om boros ka'ddi do TUHAN, i Kinorohingan dot id tulanut diri, “Ohukuman ko no tu' minomonsoi ko i' do miagal diri; iya-iya' no o mamabo do kousungan diti dot id pogialatan do koinsanai do nintorusan do suwai. Mantad pondo do baino' om poluhadon nu no o tian nu do mamanau, om pupuk no do tana' o kanon nu do gisom do tikapatai nu. 15 Pitogodon ku nondo iyokoyu di tondu'; misangod kasai' nopondo i sinakagon nu om i sinakagon di tondu'. Om babakon nondo di sinakagon di tondu' o tulu nu, om kutukan di sinakagon nu o tatad diyolo',” ka dau. 16 Om boros ka do Kinorohingan dot id tondu' diri, “Ruhangan ku nondo o koinggoriton nu do maso do monontian, om ruhangan ku o koinggoritan nu do mogkosusu. Nga' mulong piya do miagal diri nga' orohian kasai' ko i' di sawo nu, om minsiriba' ko po dot id dau,” ka dau. 17 Om boros ka do Kinorohingan dot id kusai'ddi, “Minokinongou ko di boros di sawo nu om minangakan ko di tua' di pinogoduhan ku diya' do mangakan. Om iri no i winonsoi nu'ddi o kousung-usung dilo tana'. Om solinaid nu nopondo do poimpasi om a' no milo dot a' ko monotos do morobuat om koihum ko nogi' do kaakan-akanan di kabagal nu. 18 Om sumuni ngai' nopondo o sakot om rugi do hilo'd tana', om iri no i songinsuni dot id talun o kanon nu. 19 Om kototos ko po do morobuat do gisom do koulai o lasu' nu, om koihum ko nogi' do kaakan-akanan nu. Om iyo ko no kasai'ddi do gisom do koguli' ko kawagu do hilo'd tana'; tu' tana' ko i' do winonsoi. Tana' ko i' do winonsoi, om sumiliu ko indo kawagu do tana',” ka dau. 20 Om pungaranai no di Adam i sawo dau dot i Hawa, tu' iyau no o tina' do koinsanai do tulun. 21 Om pomonsoi no o TUHAN do pakayan di Adam om i sawo dau, do kulit do nintorusan o winonsoi, om papakayai noddi dau diyolo' iri.
Nuyung i Adam om i Hawa do Mantad Hilo'd Idon
22 Om boro-boros noddi o TUHAN, i Kinorohingan do poingkaa, “Nosiliu noddi i tulun do miagal dati' tu' koilo no dit osonong om it araat. Om a' no iyau pabanaron do mongoi pangakan di tua' do kayu di manahak do koposion om a' indo iyau poimpasi do gisom do poingompus,” ka dau. 23 Om uyungo' noddi iyau do TUHAN, i Kinorohingan do mantad hiri'd Kabun dot Idon om suhuo' no do momutanom do hiri'd tana', i tana' di tadon dau. 24 Om hiri nopod ponong id koulayon di Kabun dot Idon, om pinoundarangan do Kinorohingan do piro-piro o moloikat di roitan do kerub om pinoundarangan dau dot iso' o gayang di kitapui do miwor-hiwor nopo do mangantob dot isai nopo o tulun, om aiso' indo o koinsomok di kayu di manahak do koposion.
I Kain om i Habil
1 Om duduno' noddi di Adam i Hawa, om ponontian no i Hawa, i sawo dau. Om kosusu no iyau do tanak do kusai. Om boros kaddi di Hawa, “Haro no o tanak ku'd kusai, tu' nuhupan oku i' do TUHAN,” ka dau. Om pungaranai no di Hawa i tanak dau'ddi dot i Kain. 2 Alaid noddi om paganak po kawagu i Hawa do tanak do kusai; om ngaran nopo di tanak diri om i Habil. I Habil nopo om suminiliu do gompomogompi' do dumba', om i Kain no om momutanom-tanom. 3 Piro-piro poddi o koloido' do mantad diri om panganu no i Kain do wookon do tua' di tinanom dau om patahako' no dau do maan do porsombahan dot id TUHAN. 4 Om ongoi noddi i Habil pamagamit do tanak do dumba' dau dit id gulu kosusu. Om sumbolio' no di Habil iri, om patahako' no do numaan do porsombahan dot id TUHAN i popot dit osonong kopio. Om nasanangan i' o TUHAN di Habil om nasanangan di porsombahan dau, 5 nga' i Kain nopo om i porsombahan dau om niada' i' do TUHAN. Om kotogod noddi kopio i Kain om orodtu po tomod o rabas dau dot atatagadan. 6 Om boros kaddi do TUHAN dot id di Kain, “Nokuro tu' otogod ko? Nokuro tu' orodtu kopio ko? 7 Otopot nopo o winonsoi nu om koirak ko i' daa, nga' araat i' o winonsoi nu, om dusa nga' poingandad noddi dot id wawayaan do sumuang daa dot id ginawo nu. Orohian daa i dusa do momorinta' diya'. Nga' alao' no kopio iri,” ka dau. 8 Om ongoi noddi i Kain boro-boros di Habil, i tadi' dau do poingkaa, “Kaino mongoi pihombo-hombo do hilo'd talun,” ka dau. Nga' maha' di nokorikot iyolo' do hilo'd talun om umangai noddi di Kain i Habil do gisom do napatai i Habil. 9 Om uhoto' nod TUHAN i Kain do poingkaa, “Hinonggo i Habil, i tadi' nu?” ka dau. Om simbar ka di Kain, “A' oku i' koilo. Iyoho' toi o mitamong di tadi' ku?” ka dau. 10 Om boros kaddi do TUHAN, “Nokuro tu' araat tomod o winonsoi nu? Millohou doho' i raha' di tadi' nu do hilo'd tana' dot iyo po di giak do monuhu' do sumuli'. 11 Ousung ko no, om a' ko nondo milo do mananom-tanom dilo tana'. Tu' ilo' no tana' i minonosop do raha' di tadi' nu do tontok di patayo' nu iyau. 12 Mulong piya do mananom-tanom ko nga' aiso' i' o nunu-nunu do motus; om minghombo ko pondo do hiti'd pomogunan tu' aiso' no o walai nu,” ka dau. 13 Om boros kaddi di Kain dot id TUHAN, “Adalaan no kopio kawagat iti tihukum nu doho', om a' ku no ooyit. 14 Tu' uyungon oku diya' do mantad id tana' diti om koinsodu' oku pondo diya'. Om mombo-hombo oku pondo do hiti'd pomogunan, tu' aiso' no o walai ku. Om isai nopondo o kosolowot doho' nga' mamatai no doho',” ka dau. 15 Nga' boros kad Kinorohingan do suminimbar, “A' i'. Suwai ko' ondung haro o tulun do mamatai diya', om turu' no o tulun do patayon do pomolokop,” ka dau. Om tandaai noddi do TUHAN i Kain do popoilo dot isai nopo o tulun do kosolowot di Kain dot a' mamatai dau. 16 Om tongkiad noddi i Kain do mantad id toguang do TUHAN, om ongoi no undorong do hilo'd tana' di roitan do, “Pinghambaan”, i ponong id koulayon do mantad id Kabun dot Idon.
Sinakagon di Kain
17 Om paganak no iyo Kain di sawo dau, om kusai o tanak diyolo', om ngaran nopo di tanak om i Hinok. Om popoingkakat noddi i Kain dot iso' o bandar di rinoitan dau do Hinok, tu' pinasangai do ngaran di tanak dau. 18 Om kianak diri i Hinok do kusai, dot i Irad o ngaran. I Irad nopo om tapa' di Mikuyail. Om kianak i Mikuyail dot i Motusail o ngaran. I Motusail nopo om tapa' di Lamik. 19 I Lamik nopoddi om duwo o sawo dau, i Ada om i Sila. 20 Om paganak no i Ada, om i Yabal, om sinakagon nopo di Yabal om i bansa' di momogompi' do tayam-tayam om i miyon dot id kiim. 21 Tadi' nopo di Yabal, om i Yubal. Om i Yubal no o taki-aki do koinsanai'd tulun di milo do mongombit do tuunion, i roitan do kecapi om suling. 22 Om paganak no i Sila, om i Tubal Kain, i momomonsoi do mogisuayan o pakakas, do tambaga' om basi' o wonsoyon. Tobpinai nopo di Tubal Kain do tondu' om i Naama o ngaran. 23 Om boros ka di Lamik dot id duwo o sawo dau'ddi, “Ada, Sila, pokinongou kou no diti poboroson ku: Minamatai oku do songulun o tanakwagu tu' binobog oku dau. 24 Om ondung turu' o tulun do patayon do pomolokop do kapatayon di Kain, om turu' nohopod om turu' o tulun do patayon ondung haro no o tulun do mamatai doho',” ka dau.
I Sit om i Inos
25 Om kianak poddi kawagu do kusai iyo Adam di sawo dau. Om boros ka di Hawa, “Nonuan oku po kawagu do Kinorohingan do tanak do kusai do pinoningolon di Habil, i pinatai di Kain,” ka dau. Om pungaranai no di Hawa i tanak dau'ddi dot i Sit. 26 Om kianak diri i Sit dot iso' o kusai, i pinungaranan dau dot i Inos. Om diri noddi do tuminimpuun o tulun do mamarait do ngaran do TUHAN dit olidang do tontok do sumambayang iyolo' dot id dau.
Sinakagon di Adam
1 It no ngai' o sinakagon di Adam. Tontok di wonsoyo' i' do Kinorohingan o tulun, om pinoiyo dau iyolo' dau. 2 Om minomonsoi iyau do kusai om tondu', om binarakatan dau iyolo', om pinungaranan dau iyolo' do “tulun”. 3 Tontok di hatus om tolu nohopod o toun di Adam, om haro nogiddi o tanak dau do kusai di koiyo-iyo dau. Om pungaranai no dau i tanak diri dot i Sit. 4 Mantad nopoddi om walu' po nahatus o toun di Adam do poimpasi. Om haro po o tangaanak dau do suwai. 5 Om kapatai noddi i Adam di siam nahatus om tolu nohopod o toun dau. 6 Tontok di hatus om limo o toun di Sit om kianak diri iyau do kusai dot i Inos o ngaran. 7 Mantad nopoddi om walu' po nahatus om turu' o toun dau do poimpasi. Om haro po o tangaanak dau do suwai. 8 Om kapatai noddi iyau di siam nahatus om hopod om duwo o toun dau. 9 Tontok di siam nohopod o toun di Inos, om kianak diri iyau do kusai dot i Kinan o ngaran. 10 Mantad nopoddi om walu' po nahatus om hopod om limo o toun dau do poimpasi. Om haro po o tangaanak dau do suwai. 11 Om kapatai noddi iyau di siam nahatus om limo o toun do tumur dau. 12 Tontok di turu' nohopod o toun di Kinan, om kianak diri iyau do kusai dot i Mahalaliil o ngaran. 13 Mantad nopoddi om walu' po nahatus om apat nohopod o toun dau do poimpasi. Om haro po o tangaanak dau do suwai. 14 Om kapatai noddi iyau di siam nahatus om hopod o toun dau. 15 Tontok dit onom nohopod om limo o toun di Mahalaliil, om kianak diri iyau do kusai dot i Yarod o ngaran. 16 Mantad nopoddi om walu' po nahatus om tolu nohopod o toun dau do poimpasi. Om haro po o tangaanak dau do suwai. 17 Om kapatai noddi iyau di walu' nahatus om siam nohopod om limo o toun dau. 18 Tontok di hatus om onom nohopod om duwo o toun di Yarod, om kianak diri iyau do kusai dot i Hinok o ngaran. 19 Mantad nopoddi om walu' po nahatus o toun dau do poimpasi. Om haro po o tangaanak dau do suwai. 20 Om kapatai noddi i Yarod di siam nahatus om onom nohopod om duwo o toun dau. 21 Tontok dit onom nohopod om limo o toun di Hinok om kianak diri iyau do kusai dot i Motusala o ngaran. 22 Mantad nopoddi om tolu po nahatus o toun di Hinok do poimpasi, do miulud do Kinorohingan. Om haro po o tangaanak dau do suwai. 23 Koloido' nopo di Hinok do poimpasi om tolu nahatus om onom nohopod om limo o toun. 24 Solinaid nopo dau do poimpasi om poingulud kasai' nopo iyau do Kinorohingan. Om sigog nopoddi dot a' iyau hino, tu' nongoi iyau do Kinorohingan. 25 Tontok di hatus om walu' nohopod om turu' o toun di Motusala, om kianak diri iyau do kusai' dot i Lamik o ngaran. 26 Om mantad nopoddi om turu' po nahatus om walu' nohopod om duwo o toun dau do poimpasi. Om haro po o tangaanak dau'd suwai. 27 Om kapatai noddi i Motusala di siam nahatus om onom nohopod om siam o toun dau. 28 Tontok di hatus om walu' nohopod om duwo o toun di Lamik, om kianak diri iyau do kusai. 29 Om boros kaddi di Lamik, “Iti no o tanak di popoidu' dati' do mantad id karaja' toko' dit awagat do morobuat diti tana' di nousung do TUHAN i Kinorohingan,” ka dau. Om pungaranai no dau i tanak diri dot i Nuu. 30 Om mantad nopoddi om limo po nahatus om siam nohopod om limo o toun di Lamik do poimpasi. Om haro po o tangaanak dau do suwai. 31 Om kapatai noddi iyau di turu' nahatus om turu' nohopod om turu' o toun dau. 32 Korikot po do limo nahatus o toun di Nuu om kianak nogiddi iyau do tolu o kusai. Ngaran nopo di tangaanak dau om i Sim, i Ham, om i Yapit.
Karaaton do Tulun
1 Tontok di nokotongkop o tulun do hiti'd pomogunan, om tongoondu' diri nga' ogumu'. 2 Om kokito noddi di tongokusai do mantad hilo'd surga dot ongolumis i kosumandakan do mantad hiti'd pomogunan. Om ongoi no iyolo' panansawo di tongoondu'ddi di kouhangan diyolo'. 3 Om boros kaddi do TUHAN, “A' ku nondo pologoson o tulun do poimpasi kasai'; a' no milo dot a' iyolo' matai. Om mantad pondo do baino' om a' no ponoruon ko' hatus om duwo nohopod o toun diyolo' do poimpasi,” ka dau. 4 Tontok nopoddi om dit id tohuri ko' iri, om haro o tulun dit angawaa om angagayo o tinan do hiti'd pomogunan. Iyolo' nopo om sinakagon di tongoondu' do mantad id pomogunan di nangkasawo di tongokusai do mantad hilo'd surga. Om iyolo' no i gunsiou om i tulun dot angabantug do maso'ddi. 5 Tontok di nokito do TUHAN dot adalaan noddi kopio o kararaat do koinsanai'd tulun do hiti'd pomogunan om araat kasai' o pomusorou diyolo', 6 om monosol diri o TUHAN do winonsoi dau iyolo' om monosol iyau do pinoiyon dau iyolo' do hiti'd pomogunan. Om monosol tomod diri o TUHAN 7 gisom do minomoros iyau do poingkaa, “Punsoon ngai' ku nogi' iti tulun do winonsoi ku, om ilo nintorusan om ilo tombolog, tu' monosol oku no kopio do winonsoi ku iyolo',” ka dau. 8 Nga' asanangan i' o TUHAN di Nuu.
I Nuu
9-10 Poingkaa o kinowoyo-woyoo' do koposi-posion di Nuu. Iyau nopo om kianak do tolu o kusai; i Sim, om i Ham, om i Yapit. I Nuu nopo om tulun dit a' i' momonsoi di kasala'; om iyau poo o tulun dit osonong do maso'ddi. Iyau nopo om poingulud kasai' i' do Kinorohingan. 11 Nga' tulun nopod suwai om oinsanan nopo dot angaraat dot id pagantangan do Kinorohingan. Om kororongit nga' nokotongkop no do hinonggo nopo. 12 Om ontong no o Kinorohingan diti pomogunan om kokito no dau dot araat no kopio, tu' angaraat ngai' nopo o kowoyo-woyoon di tulun do hiri. 13 Om boros kaddi do Kinorohingan dot id di Nuu, “Natantu' ku no dot id suang do ginawo ku do punsoon ngai' ku o tulun. Insanan ku nopo iyolo' do mamatai tu' noponu' no iti pomogunan do kororongit diyolo'. 14 Nga' iya' nopo om momonsoi nod kapal do rahat dot i kayu dot ongotiru' o wonsoyon; om pogibilik-bilikon no o hiri'd suang, om saaton no do tir o ponong id suang om ponong id soliwan di kapal. 15 Konoruo' nopo di kapal do wonsoyon nu om hatus om tolu nohopod om tolu o mito, om duwo nohopod om duwo o mito do kalaabo', om hopod om tolu o mito do kasawato'. 16 Om wansayan no do taap i kapal, om pialatan nopo di taap om i tolig om apat nohopod om apat o sontimito. Om wansayan no do tolu o rinantai di mogisimbau-simbau, om wansayan no do wawayaan o ponong id bombong. 17 Poporikot oku nondo do sakob do hiti'd pomogunan do pamaraag do koinsanai di kipinuhobo. Om oinsanan nopondo dot apatai i hiti'd pomogunan. 18 Nga' momonsoi oku i' do tumpongo dot id diya'. Sumuang no do hiri'd kapal, do miwoyo' di sawo nu, om i tangaanak nu'd kusai, om koinsanai di sawo diyolo'. 19-20 Om posuang no do hiri'd kapal do sarampasang-pasang o pointikid-tikid do bansa' do nintorusan om tombolog, om a' i' iyolo' apatai. 21 Om migit nogi' do mogisuayan o taakanon dokoyu om taakanon di nintorusan,” ka dau. 22 Om tonudo' ngai' nopo di Nuu i pinonuhuan do Kinorohingan diri.
I Sakob
1 Om boros kaddi do TUHAN dot id di Nuu, “Suang no do hilo'd kapal do miwoyo' di sompiiyon nu. Tu' iya' poo i momonsoi do korohian ku do hiti'd pomogunan. 2 Om mongigit no do turu' o pasang do pointikid-tikid do nintorusan di koino-ino dot akanon, om sapasang o pointikid-tikid do nintorusan dit a' koino-ino dot akanon. 3 Om migit nogi' do turu' o pasang do pointikid-tikid do bansa' do tombolog. Wonsoyon no o miagal diri om angapasi i' om angasakag kawagu o koinsanai di bansa' do nintorusan om tombolog do hiti'd pomogunan. 4 Turu' po tadau do mantad baino' om parasamon ku no dot a' tumodu-todu' do solinaid dot apat nohopod o tadau om apat nohopod o totuong, om angapatai i' o koinsanai dit ongkipinuhobo do winonsoi ku,” ka dau. 5 Om tonudo' ngai' nopo di Nuu i pinonuhuan do Kinorohingan diri. 6 Tumur nopo di Nuu do tontok di minadsakob o hiti'd pomogunan om onom nahatus o toun. 7 Om suang no i Nuu om i sawo dau, om i tangaanak dau'd kusai, om koinsanai di sawo di tangaanak dau do hiri'd kapal, om a' i' iyolo' apatai di sakob. 8 Koinsanai'ddi tontoluhan om tondu', om tandaha' om golupo do pointikid-tikid do bansa' do nintorusan om tombolog dit a' sosomu' om i sosomu' 9 nga' suminuang ngai' nopo do hiri'd kapal do tuminanud di Nuu, tu' iyo noddi o pinonuhuan do Kinorohingan. 10 Turu' poddi o tadau do mantad diri, om timpuun no do minadsakob. 11 Tontok dit onom no nahatus o toun di Nuu, do koontok di tadau do kohopod om turu' do tulan do koduwo, om oinsanan nopo i tudan do waig do suminimpulak do mantad id saalom do tana', om miniwang ngai' i totobon do waig do hilo'd tawan. 12 Om sondot noddi o rasam dot asapou do hiti'd pomogunan dot apat nohopod o tadau om apat nohopod o totuong do koloido'. 13 Om tontok i' do tadau'ddi do suminuang i Nuu, om i sawo dau, om i tolu o tanak dau'd kusai: i Sim, om i Ham, om i Yapit, om koinsanai di sawo diyolo' do hiri'd kapal do rahat. 14 Om tuminanud ngai' diyolo' o pointikid-tikid do bansa' do nintorusan dit angalaya' om i lalang, om it angagayo om it ongokoro', om koinsanai do bansa' do tombolog. 15 I tontoluhan om i tondu', om i tandaha' om i golupo, do pointikid-tikid do bansa' di kipinuhobo nga' tuminanud ngai' nopo di Nuu do suminuang di kapal. 16 Tu' miagal noddi o pinonuhuan do Kinorohingan. Om kosuang ngai' poddi iri om tabanai nogiddi do TUHAN i wawayaan di kapal. 17 Om padsakob no dot apat nohopod o tadau, om aralom noddi i waig tu' kahampung no i kapal do rahat. 18 Om marom-ralom nopoddi i waig do gisom do mampung-hampung poo i kapal do hiri'd waig. 19 Om murut-surut nopo o kogoyoo' di waig, gisom do nongoolitan ngai'ddi i nuluhon dit angakawas tomod. 20 Om a' nopo tumingkod i waig do gumayo do gisom do turu' o mito do nokosoibau di timpak do konuluhanan dot angakawas. 21 Om kapatai ngai' nopoddi it ongkipinuhobo di songingiyon do hiti'd pomogunan --- koinsanai di bansa' do tombolog, om nintorusan om tulun. 22 Nunu nopo i kipinuhobo do hiti'd pomogunan nga' nangapatai ngai' no. 23 Tu' rinaag ngai' no do Kinorohingan it ongkipinuhobo di songingiyon do hiti'd pomogunan --- koinsanai'd tulun, om nintorusan, om tombolog. Om i Nuu poo om koinsanai di poinsugku' dau do hiri'd kapal o napasi. 24 Om a' i' numinonos i waig do solinaid do hatus om limo nohopod o tadau.
Nononos I Sakob
1 Om a' i' do Kinorohingan nolihuan i Nuu om koinsanai di nintorusan do poinsugku' dau do hiri'd suang di kapal do rahat; om potonguso' noddi do Kinorohingan o tongus, om timpuun no do numinonos i waig. 2 Om koinsanai di tudan do waig do hilo'd saalom do tana', om i wawayaan do waig do hilo'd tawan nga' kosompon ngai' nopoddi. Om todu' noddi i rasam, 3 om monos-nonos nopoddi i waig do solinaid do hatus om limo nohopod o tadau. 4 Tontok di tadau do kohopod om turu' do tulan do koturu', om kosorod noddi i kapal do rahat dot id iso' o nuluhon do hilo'd konuluhanan dot Ararat. 5 Om monos-nonos nopoddi i waig, om tontok di tadau do koiso' do tulan do kohopod om ongkoulai nogi' o tompok di konuluhanan. 6 Katalib poddi ot apat nohopod o tadau om iwangai nogi' di Nuu i liligaon di kapal do rahat. 7 Om potuludo' no di Nuu ot iso' o bangkahak nga' a' no guminuli' kawagu iri. Suwai ko' tilombus nopo do minintulud do gisom do narasak kopio i waig. 8 Om potuludo' no di Nuu ot iso' o punai do mongoi pogontong ondung narasak no kopio i waig. 9 Nga' guminuli' i' kawagu i tombolog diri do hiri'd kapal do rahat tu' poingalit pod waig iti pomogunan, om aiso' po o sokoon dau. Om gomito' no di Nuu i punai'ddi, om posuango' no kawagu dau do hiri'd kapal. 10 Om andado' no di Nuu do gisom do norikot o turu' o tadau, om potuludo' nogi' kawagu dau i punai. 11 Om poguliai po kawagu di punai dot id di Nuu di dongsosodopon, nga' kitinangau noddi i punai do roun do saitun dit omulok po. Om koilaai noddi di Nuu do narasak no i waig. 12 Om andado' po kawagu di Nuu do turu' kawagu o tadau, om potuludo' no dau kawagu i punai; nga' diri nopo om a' no guminuli' kawagu i punai dot id dau. 13 Tontok dit onom nahatus om iso' o toun di Nuu, di tadau do koiso' do tulan do koiso', om narasak noddi kopio i waig. Om ukabai no di Nuu i totobon di kapal, om pikorowo-rowo no iyau, om kokito no dau do tumuu no i tana'. 14 Korikot poddi di koduwo nohopod om turu' o tadau di tulan do koduwo, om kotuu nogi' kopio i tana'. 15 Om boros kaddi do Kinorohingan dot id di Nuu, 16 “Labus no do mantad hino'd kapal do rahat, do miwoyo' di sawo nu, om i tangaanak nu, om i sawo diyolo'. 17 Om posoliwanon ngai' no i tombolog om i nintorusan do kaandad diya' om kasakag i' iyolo' om kotongkop diti pomogunan,” ka dau. 18 Om soliwan noddi i Nuu, om i sawo dau, om i tangaanak dau, om i sawo di tangaanak dau. 19 Om oinsanan nopo i nintorusan om i tombolog do luminabus do mantad hiri'd kapal do rahat do tuminunud di diyolo'd bansa'.
Pinapatahak i Nuu do Porsombahan
20 Om pomonsoi no i Nuu dot iso' o pananaraban do porsombahan di don TUHAN; om panganu no iyau do soronginan-nginan do mantad id pointikid-tikid do bansa' di nintorusan om tombolog di koino-ino dot akanon, om songkoyuo' nopo dau do minonorob iri do hiri'd pananaraban do porsombahan do numaan do porsombahan di sinumbali'. 21 Om nasanangan diri o TUHAN di winongi' di porsombahan diri. Om boros kaddi do TUHAN dot id suang do ginawo dau, “A' ku nondo kopio papalan kawagu iti pomogunan, dot i wonsoyon do tulun o kapamapalan; tu' oilaan ku i' do mantad po dit omulok po o tulun om araat no mantad o pomusorou dau. 22 Om solinaid nopo do hino iti pomogunan, om atantu' nondo o maso do mananom om mongomot. Om haro kasai' ot osogit om alasu', om haro o maso do magadau om maso do rumasam, om haro o dangadau om dongotuong,” ka dau.
Tumpongo do Kinorohingan dot id di Nuu
1 Om barakatai noddi do Kinorohingan i Nuu om koinsanai di tangaanak dau do kusai. Boros ka dau, “Paganak kou no dot ogumu', om kotongkop i' do mongiyon-iyon do hiti'd pomogunan o sinakagon dokoyu. 2 Om koinsanai do nintorusan, om tombolog, om sada' nga' moddosi indo dokoyu, tu' iyolo' nopo om id siriba' i' do kuasa' dokoyu. 3 Angaakan ngai' i' dokoyu iri, om i songinsuni dit ongotomou nga' angaakan ngai' i' dokoyu; tu' patahakon ngai' ku no iri do maan dokoyu'd kanon. 4 Nga' iso' poo ot a' dokoyu koino-ino dot akanon; iri po i tonsi di kiraha'. Pogoduhan ku pogi' iti nga' ginawo nopo om hiri id raha'. 5 Isai nopo o tulun do mamatai dot oiyo ko' tulun, om ohukuman no. Om nunu nopo o bansa' do nintorusan di mamatai do tulun om patayon ku no. 6 Tu' tulun nopo om winonsoi i' do pinoiyo do Kinorohingan, om iri no o kokuwaan dot isai nopo o mamatai do sompi' ko' tulun, om iyau nga' patayon nondo do tulun. 7 Maganak kou no dot ogumu', om kotongkop i' do hiti'd pomogunan o sinakagon dokoyu,” ka dau. 8 Om boros kad Kinorohingan dot id di Nuu, om id tangaanak di Nuu di tongokusai, 9 “Baino' no do momonsoi oku do tumpongo dot id dokoyu om id sinakagon dokoyu, 10 om id koinsanai di kipinuhobo --- koinsanai di tombolog, om i nintorusan --- koinsanai di luminabus do mantad hiri'd kapal do rahat do minoyo' dokoyu. 11 Om iti no o boros dit osiliu do tumpongo ku dot id dokoyu: mamatos oku no dot id koinsanai di kipinuhobo dot a' nondo kopio iyolo' patayon do sakob; tu' a' nondo kawagu raagon do sakob iti pomogunan. 12 Sumiliu nopo do tanda' do poinggirot kasai' iti tumpongo ku dot id dokoyu, om id koinsanai di kipinuhobo, 13 om i buluntung do polotingon ku do hilo'd tawan. 14 Soira' nopo do kulumutan ku do haun ilo tawan, om okito nondo i buluntung, 15 om ahandaman ku no i tumpongo ku dot id dokoyu, om id koinsanai di nintorusan, dot a' no kawagu raagon do sakob o koinsanai di kipinuhobo. 16 Soira' nopo do haro o buluntung do hilo'd tawan, om okito ku nondo iri, om ahandaman ku i tumpongo di poinggirot kasai' dot id pialatan ku om koinsanai di kipinuhobo do hiti'd pomogunan. 17 Iri no o tanda' di tumpongo do winonsoi ku dot id koinsanai di kipinuhobo do hiti'd pomogunan,” ka dau.
I Nuu om i Tangaanak Dau
18 Iri nopo i tangaanak di Nuu do tongokusai, i luminabus do mantad hiri'd kapal do rahat om i Sim, i Ham, om i Yapit (I Ham nopo om tapa' di Kanaan). 19 Iri no i tolu tangaanak di Nuu diri o taki-aki do koinsanai'd tulun do hiti'd pomogunan. 20 I Nuu nopo om mongungumo, om iyau no ot id gulu kopio pomutanom dot anggur. 21 Tontok di nokoinum i Nuu do waig dit anggur dau, om kaawuk noddi iyau. Om labas no iyau, om lii no do hiri'd suang di kiim dau. 22 Om kokito nopoddi di Ham (i Ham nopo om tapa' di Kanaan), do poillabas i tapa' dau, om soliwan no iyau do minongoi pomisunud di duwo o tobpinai dau. 23 Om ongoi noddi i Sim om i Yapit do rasuk dit anaaru. Om ungkalado' no diyolo' i rasuk om polikudo' no do minongigit. Om pamanau noddi iyolo' do posunsuri do suminuang di kiim, om kumutai no diyolo' i tapa' diyolo', om a' i' iyolo' poingontong, tu' mada' iyolo' do kokito di tapa' diyolo' do poillabas. 24 Om tontok di notibanasan i Nuu om koilaai nogi' dau i winonsoi di tanak dau dit id domulok. 25 Om boros kaddi dau, “Ousung no i Kanaan! Osiliu nondo iyau do turipon di tongotobpinai dau. 26 Royohon no o TUHAN, i Kinorohingan di Sim! Osiliu nondo i Kanaan do turipon di Sim. 27 Maha' daa om posopohon do Kinorohingan o sinakagon di Yapit! Maha' daa om poinsugku' i sinakagon dau do sinakagon di Sim! I Kanaan nopondo om osiliu do turipon di Yapit,” ka dau. 28 Tontok di nolimpanus i sakob om tolu po nahatus om limo nohopod o toun di Nuu do poimpasi. 29 Om kapatai noddi i Nuu di siam nahatus om limo nohopod o toun dau.
Sinakagon di Tangaanak di Nuu
1 Iti no o sinakagon di Sim, om i Ham, om i Yapit, i tangaanak di Nuu do tongokusai. Koinsanai diyolo'd tolu om kianak ngai' nopo di nakatalib i sakob. 2 Tangaanak nopo di Yapit om i Gomor, i Magog, i Madai, i Yawan, i Tubal, i Misik, om i Tiras. Om iyolo' ngai' no o taki-aki do koinsanai di bansa' di kingaran do ngaran diyolo'. 3 Sinakagon nopo di Gomor om i bansa' dot Askinas, om Ripat om Togarma. 4 Sinakagon nopo di Yawan om i bansa' dot Ilisa, om Sepanyol, om Siprus, om Rodis. 5 Om iyolo' no o taki-aki do tulun di momogun-mogun do hilo'd potoropis do tisan do rahat om i hilo'd kopulawan. Iyolo' ngai' no i sinakagon di Yapit, nga' nokopogisuwai-suwai no o pomogunan do tiyonon diyolo' do tumanud di payat diyolo', om mogisuwai-suwai o boros diyolo'. 6 Om tangaanak no di Ham do tongokusai om i Kus, om i Masir, om i Libia, om i Kanaan. Om iyolo' ngai' no o taki-aki di bansa' di kingaran do ngaran diyolo'. 7 Sinakagon nopo di Kus, om i bansa' do Siba, om Hawila, om Sabta, om Raima, om Sabtika. Sinakagon nopo di Raima om i bansa' do Siba om Didan. 8 Om kianak i Kus do kusai dot i Nimrod o ngaran. Om iyau no o nosiliu do raja' dit okoris kopio dit id gulu kopio do hiti'd pomogunan. 9 Om nuhupan iyau'd TUHAN do gisom do nosiliu iyau do magagasu dit otorus kopio. Om iri noddi o koboro-boros do tulun do poingkaa, “Silihon ko po daa do TUHAN do magagasu do miagal di Nimrod tu' nabantug dot otorus!” ka. 10 Porintaon nopo dau dit id gulu i' kopio om Babil, Irik, om Akad. Iti nopo tolu o kinoiyonon diti om id suang ngai' do pomogunan do Babilonia. 11 Om mantad no dot id pomogunan diri, om pakayaai po di Nimrod do hilo'd pomogunan dot Asur, om wonsoyo' no dau i bandar do Niniwi, om Rihobot Ir, om Kala, 12 om Risin, it id piolitan do Niniwi om i bandar dot agayo di roitan do Kala. 13 Sinakagon nopo di Masir om i bansa' do Lidia, om Ananim, om Lihab, om Naptuhim, 14 om Patrusim, om Kasluhim, om Kaptorim. Iyolo' no i taki-aki do tulun do Pilistin. 15 Om tangaanak nopo di Kanaan do tongokusai om i Sidon, it id dotuo, om i Hit. Om iyolo' no o taki-aki di bansa' di kingaran do ngaran diyolo'. 16 Om i Kanaan nogi' o taki-aki di bansa' do Yobusi, om Amori, om Girgasi, 17 om Howi, om Arki, om Sini, 18 om Arwadi, om Somari, om Hamati. Om kotongkop noddi i piro-piro o sinakagon di Kanaan, 19 gisom do wolit nopoddi di pomogunan do bansa' do Kanaan om ruminalad do mantad hilo'd Sidon om poingkaa ponong id salatan do gisom do korikot do hilo'd Gorar, it id somok do Gasa; om ruminalad ponong id koulayon do gisom do korikot do hilo'd Sodom, om Gomura, om Adma, om Siboyim, it id somok do Lasa. 20 Iyolo' ngai' no i sinakagon di Ham, nga' nokopogisuwai-suwai no o pomogunan do tiyonon diyolo' do tumanud di payat diyolo', om mogisuwai-suwai o boros diyolo'. 21 I Sim noo, it id dotuo' ko' i Yapit, om taki-aki do bansa' dot Ibrani. 22 Iti ngai' no o tangaanak di Sim do tongokusai --- i Ilam, om i Asur, om i Arpaksad, om i Lud, om i Aram. Om iyolo' no o taki-aki di bansa' di kingaran do ngaran diyolo'. 23 Sinakagon nopo di Aram, om i bansa' dot Us, om Hul, om Gitir, om Mas. 24 I Arpaksad nopo om tapa' di Sila, i tapa' di Ibir. 25 I Ibir nopo om kianak do duwo o kusai: pinomungaran nopo di tiso' do tanak dau om i Pilig, tu' tontok nopo di poimpasi po iyau om nopogitongkiad-kiad o tulun do hiti'd pomogunan; om ngaran no di tanak dau di koduwo om i Yoktan. 26 Sinakagon nopo di Yoktan om i bansa' dot Almodad, om Silip, om Hasarmawit, om Yira; 27 om Hadoram, om Usal, om Dikla, 28 om Obal, om Abimail, om Siba, 29 om Opir, om Hawila, om Yobab. Iyolo' nopodti om sinakagon ngai' nopo di Yoktan. 30 Iri nopo tana' do kinoiyonon diyolo' om mantad po do hilo'd Misa om gisom do korikot do hilo'd Sipar, it id konuluhanan di ponong id koulayon. 31 Iyolo' ngai' no i sinakagon di Sim, nga' nokopogisuwai-suwai no o pomogunan do tiyonon diyolo', do tumanud di payat diyolo', om mogisuwai-suwai o boros diyolo'. 32 Koinsanai di bansa'ddi om sinakagon ngai' nopo di Nuu, i mogisuayan o bansa' do tumanud di diyolo' do sinolusukan. Id tohuri nopo ko' i minadsakob om sinakagon ngai' no di tangaanak di Nuu do kusai o bansa'd tulun do hiti'd pomogunan.
I Walai dot Akawas do Babil
1 Di nopo di gulu po, om iso' no o bansa' do boros do tulun do hiti'd pointongkop do pomogunan om oiyo nopo o boros diyolo'. 2 Om tontok di mininghombo iyolo' do ponong id koulayon, om kobontol no iyolo' do tana' dot arantai do hilo'd Babilonia, om pomogun-mogun noddi iyolo' do hiri. 3 Om pogiboro-boros noddi iyolo' do poingkaa, “Kainou momonsoi do bata', om uhubon toko' om okodou i',” ka diyolo'. Om haro noddi o bata' diyolo' do maan do powonsoyon, om haro o tir do popogisosokot diri. 4 Om boros kaddi diyolo', “Baino' nopo, om popoingkakat toko' dot iso' o bandar om momonsoi toko' dot iso' o walai dot akawas, i kosunggu do hilo'd tawan o kasawato', om koinggayo i' o ngaran toko', om a' toko' indo kopogitongkiad-kiad do hiti'd pomogunan,” ka diyolo'. 5 Om lintuhun noddi o TUHAN do minongoi ontong di bandar om i walai dit akawas di winonsoi di tongoulun diri. 6 Om boros kaddi do TUHAN, “Iti nopo tulun diti om iso' i' o bansa' om iso-iso' o bansa' do boros. Iti nopodti om koimpuunon nogi' di pokiwawansayan diyolo'. Om a' no alaid om owonsoi ngai' no diyolo' o nunu nopo i korohian diyolo'. 7 Osonong nogi' do lumintuhun toko' om pogisuwai-suwayon toko' i' o boros diyolo', om a' i' iyolo' kopogisuhu-suhut do mogiboro-boros,” ka dau. 8 Om pogitongkiad-kiado' noddi do TUHAN iyolo' do pinotongkop diti pomogunan. Om tingkadai noddi diyolo' do momonsoi i bandar diri. 9 Om iri nopo i bandar diri nga' pinungaranan do “Babil”. Tu' hilo' no o TUHAN do pinopogisuwai-suwai do boros do tulun, om hilo' nogi' do pinogitongkiad-kiad dau o tulun do pinotongkop diti pomogunan.
Sinakagon di Sim
10 Iti ngai' no o sinakagon di Sim. Tontok di duwo no toun do mantad di minadsakob, di hatus no o toun di Sim, om kianak diri iyau dot iso' o kusai, dot i Arpaksad o ngaran. 11 Om mantad nopoddi om limo po nahatus o toun di Sim do poimpasi. Om haro po o tangaanak dau do suwai. 12 Om tontok di tolu nohopod om limo o toun di Arpaksad, om kianak diri iyau do kusai, dot i Sila o ngaran. 13 Om mantad nopoddi om apat po nahatus om tolu o toun di Arpaksad do poimpasi. Om haro po o tangaanak dau do suwai. 14 Om tontok di tolu nohopod o toun di Sila, om kianak diri iyau do kusai, dot i Ibir o ngaran. 15 Om mantad nopoddi, om apat po nahatus om tolu o toun di Sila do poimpasi, om haro po o tangaanak dau do suwai. 16 Om tontok di tolu nohopod om apat o toun di Ibir om kianak diri iyau do kusai, dot i Pilig o ngaran. 17 Om mantad nopoddi, om apat po nahatus om tolu nohopod o toun di Ibir do poimpasi. Om haro po o tangaanak dau do suwai. 18 Om tontok di tolu nohopod o toun di Pilig, om kianak diri iyau do kusai, dot i Rohu o ngaran. 19 Om mantad nopoddi om duwo po nahatus om siam o toun di Pilig do poimpasi. Om haro po o tangaanak dau do suwai. 20 Om tontok di tolu nohopod om duwo o toun di Rohu, om kianak diri iyau do kusai, dot i Sorug o ngaran. 21 Om mantad nopoddi, om duwo po nahatus om turu' o toun di Rohu do poimpasi. Om haro po o tangaanak dau do suwai. 22 Om tontok di tolu nohopod o toun di Sorug, om kianak diri iyau do kusai, dot i Nahur o ngaran. 23 Om mantad nopoddi, om duwo po nahatus o toun di Sorug do poimpasi. Om haro po o tangaanak dau do suwai. 24 Tontok di duwo nohopod om siam o toun di Nahur, om kianak diri iyau do kusai, dot i Tira o ngaran. 25 Om mantad nopoddi, om hatus po om hopod om siam o toun di Nahur do poimpasi. Om haro po o tangaanak dau do suwai. 26 Om tontok di turu' nohopod o toun di Tira, om kianak diri iyau do tolu o kusai. Ngaran nopo di tangaanak dau'ddi om i Abram, i Nahur, om i Haran.
Sinakagon di Tira
27 Iti ngai' no o sinakagon di Tira: I Tira nopo om tapa' di Abram, om i Nahur, om i Haran. I Haran nopo om tapa' di Lut. 28 Om kapatai no i Haran do hilo'd Ur, i hilo'd Babilonia, i bandar di tadon mantad dau, di poimpasi po i tapa' dau. 29 Om panansawo no i Abram om i Sarai, om panansawo no i Nahur om i Milka, i tanak di Haran. Om kianak po i Haran do suwai, dot i Yiska o ngaran. 30 I Sarai nopo nga' a' maganak. 31 Om angatai no di Tira i Abram, i tanak dau, om i Lut i manangaki dau, om i Sarai i monongiwan dau, i sawo di Abram, do tuminongkiad do mantad hilo'd Babilonia. Ongoyon nopo daa kopio di Tira om hilo'd pomogunan do Kanaan. Nga' maha' di nokorikot iyolo' do hilo'd Haran, om pomogun-mogun no iyolo' do hilo'. 32 Om hiri noddi id kinoiyonon diri o kinapatayon di Tira di duwo nahatus om limo nohopod o toun dau.
Linohou do Kinorohingan i Abram
1 Om boros ka do TUHAN dot id di Abram, “Tongkiad nodti pomogunan nu, om i koobpinayan nu, om i walai di tapa' nu, om mongoi i' do hilo'd pomogunan do potudukon ku diya'. 2 Om onuan ku indo iya' do sinakagon dot ogumu', om iyolo' nondo o sumiliu do bansa' dot agayo. Om barakatan ku nogindo iya' om pobontugon ku o ngaran nu, om osiliu ko i' do barakat dot id tulun dot ogumu'. 3 Om barakatan ku nondo i tulun di mamarakat diya', nga' papalan ku indo i tulun di momopol diya'. Om iya' no o pawayaan ku do barakat do patahakon dot id toinsanan o bansa' do hiti'd pomogunan,” ka dau. 4-5 Tontok di turu' nohopod om limo o toun di Abram, om pamanau no iyau do tuminongkiad di bandar do Haran, do tuminanud di pinonuhuan do TUHAN dot id dau. Om angatai no di Abram i Sarai i sawo dau, om i Lut i manangaman dau, om i tongoturipon di naanu diyolo' do hilo'd Haran, om nigitan o koinsanai di dapu' dau, om pamanau nogiddi iyolo' do kuminaa do hilo'd Kanaan. Om tontok di nokorikot iyolo' do hilo'd Kanaan, 6 om pinghombo no i Abram do tuminongkop di pomogunan, gisom do nokorikot iyau do hiri'd guas do kayu di hilo'd Mori, i tiiyonon do sumambayang do hilo'd Sikim. (Om maso nopoddi nga' kakal po do tulun do Kanaan do momogun-mogun do hilo'.) 7 Om intalang no o TUHAN dot id di Abram, om boro-boros no dau do poingkaa, “Iti no i pomogunan do patahakon ku di sinakagon nu,” ka dau. Om pomonsoi noddi i Abram do pananaraban do porsombahan do hiri, do don TUHAN, i minintalang dot id dau. 8 Katalib poddi iri, om pamanau no i Abram do kuminaa ponong id salatan, do minongoi do hiri'd konulu-nuluan di ponong id koulayon do mantad id bandar do Baitol, om powonsoyo' no dau i kiim dau dot id piolitan di bandar do Baitol om i bandar dot Ai. Baitol nopo nga' ponong id kotonobon, om Ai no om ponong id koulayon. Om hilo' nga' minomonsoi nogi' i Abram do pananaraban do porsombahan, om suminambayang iyau dot id TUHAN. 9 Om lombus noddi kawagu iyau do minamanau do milombus-pilombus do mantad id iso' o kinoiyonon om kumaa dot id kinoiyonon do suwai do kuminaa ponong id salatan di tana' do Kanaan.
Hilo'd Masir i Abram
10 Om pononglous noddi o hilo'd Kanaan, dot adalaan kopio, gisom do minundaliu kawagu'ddi i Abram do kuminaa do hilo'd Masir, i ponong id salatan no kopio, do mongoi iyon do hilo' do daamot. 11 Om tontok di mirririkot no iyolo' do hilo'd Masir, om boros ka di Abram dot id di Sarai i sawo dau, “Iya' nopo om olumis kopio koondu'. 12 Om soira' nopondo do kokito diya' i tulun do Masir, om roitan ko nondo diyolo' do sawo ku. Om patayon oku nondo diyolo', om iya' po o posion. 13 Nga' sunudan no iyolo' dot iya' nopo om tobpinai ku i'. Om iya' nondo o kaantob diyolo' do mamatai doho'. Om gompion oku indo diyolo' kosonong-sonong,” ka dau. 14 Om otopot iddi kopio dot olumis i Sarai, i sawo di Abram diri do nokito di tulun do Masir di nokorikot iyolo' do hilo'd Masir. 15 Om haro'ddi o piro-piro di pagawai di raja' do nokokito di Sarai. Om ngoyo' noddi diyolo' sunudai i raja' dot olumis kopio i tondu'ddi. Om pootodo' noddi diyolo' i Sarai do hiri'd walai di raja'. 16 Om osonong tomod diri i raja' dot id di Abram, dot i Sarai o nakapamansayan dau do miagal diri dot id di Abram. Om nonuan diri di raja' i Abram dot ogumu' o turipon, om dumba', om kambing, om sapi', om kaladai om unta. 17 Om iri no i nongoi di raja' i Sarai do pinorikot diri do TUHAN o toruol dit araat kopio dot id raja' diri, om id tulun di poingiyon do hiri'd walai di raja'. 18 Om lohowo' noddi di raja' i Abram, om uhoto' no dau iyau do poingkaa, “Nunu kopio o winonsoi nu dot id doho'? Nokuro tu' a' oku diya' sinunudan do sawo nu i Sarai? 19 Nokuro tu' minomoros ko do tobpinai nu i Sarai, om pinologos oku diya' do minanansawo dau? Diya iti sawo nu! Ongoyo' ilo'! Om poggidu' kou!” ka dau. 20 Om suhuo' noddi di raja' o piro-piro di pagawai dau do popoggidu' di Abram. Om posoliwano' noddi diyolo' do mantad id pomogunan diri i Abram om i sawo dau, om koinsanai'ddi di Abram do songonuon.
Minitongkiad i Abram om i Lut
1 Om pakayaai no di Abram do ponong id utara do suminoliwan di pomogunan do Masir, om pakayaai no dau do ponong hiri'd salatan do pomogunan do Kanaan, do miwoyo' di sawo dau om koinsanai di dau do songonuon. Om i Lut nga' tuminanud nogi' dau. 2 I Abram nopo om tulun di kaya' kopio tu' kidumba', om kikambing, om kisapi' iyau. Om haro nogi' o tamas om pirok dau. 3 Om tongkiad noddi i Abram do hilo', om pamanau no do milombus-pilombus do mantad id iso' o kinoiyonon om kumaa no dot id kinoiyonon do suwai do kuminaa do hilo'd Baitol. Om korikot no iyau do hiri'd kinoiyonon dit id piolitan do Baitol om Ai, i pinomukiiman dau di gulu po, 4 om hiri no o pinoingkakatan dau do pananaraban do porsombahan. Om hilo' no iyau do suminambayang dot id TUHAN. 5 Om i Lut nga' haro nogi' o sompiiyon, om haro o susuhuon, om dumba', om kambing, om sapi'. 6 Om a' diri kabagal o pangakan-ngakanan di tayam-tayam diyolo', dot ondung misugku' kasai' iyolo', tu' sopigumuan kopio i' iyolo' do tayam-tayam. 7 Om gowoi poddi do minogisosongkiwal i tongoulun di madtamong di tayam-tayam di Abram om i tayam-tayam di Lut. (Tontok nopoddi nga' kakal po do tulun do Kanaan om tulun do Poris o momogun-mogun do hiri.) 8 Om boros kaddi di Abram dot id di Lut, “Iyato nopodti om miobpinai i', om a' i' osonong do misongkiwal ilo tulun to. 9 Nga' iyo nopodti om osonong nogi' do mitongkiad to. Pobpili' nopo do tana' di korohian nu. Om mongoi ko nopo iya' dot id iso' o kinoiyonon om mongoi oku no iyoho' dot id kinoiyonon do suwai,” ka dau. 10 Om ontong no i Lut dot id posorili' di kinoiyonon diyolo', om kokito no dau dot osima' do waig i Rantai do Yordan, om poirrikot do hilo'd Suar, do miagal po di kabun do TUHAN ko' i pomogunan do Masir. (Tontok nopodti om a' po do TUHAN naraag i bandar do Sodom om Gomura.) 11 Om pilio' no di Lut o dau, om insanai nopo dau i Rantai do Yordan do minanganu. Om pamanau noddi iyau do kuminaa ponong id koulayon. Om iyo noddi o kinowoyo-woyoo' diyo' Abram di Lut do minitongkiad. 12 I Abram nopo om tuminimporon i' do hilo'd Kanaan, nga' i Lut no om minomukiim dot id pogialatan di kabandaran di hiri'd rantai, it id somok do Sodom. 13 Iri nopo tongoulun di poingiyon dot id bandar do Sodom diri om angaraat om kidusa dot id TUHAN.
Minongoi i Abram do Hilo'd Hibron
14 Tontok di nakapamanau i Lut do mantad hiri'd kinoiyonon di Abram, om boro-boros no o TUHAN dot id di Abram do poingkaa, “Pikorowo-rowo no do hino'd kinoingkokoton nu om antangan ngai' no o posorili' nu, antangan no o ponong id koulayon om ponong id kotonobon, om antangan o ponong id utara om ponong id salatan. 15 Patahakon ku i' diya' om i sinakagon nu o toinsanan di tana' dit okito nu. Om diya' nondo kasai'ddi do gisom dot alaid. 16 Om onuan ku po iya' do sinakagon dot ogumu', gisom dot aiso' no tiso' po do kointob do kogumuon diyolo'; do miagal do pupuk do hiti'd tana' tu' aiso' no o tulun do kointob. 17 Ngoyo' ngai' no tongkopo' do mogontong ilo tana' tu' patahakon ngai' ku no diya' ilo',” ka dau. 18 Om powoliho' noddi di Abram i kiim dau, om undorong no iyau dot id somok di koguasan do kayu di tiiyonon do sumambayang do hilo'd Mamri, it id somok do Hibron. Om hiri no iyau do minomonsoi do pananaraban do porsombahan di don TUHAN.
Tinulung di Abram i Lut
1 Haro ot apat o raja': i Amrapil i mantad hilo'd Babil, om i Ariok i mantad hilo'd Ilasar, om i Kidorlamor i mantad hilo'd Ilam, om i Tidal i mantad hilo'd Goyim, 2 do suminaap do limo o raja' do suwai: i Bira i mantad hilo'd Sodom, om i Birsa i mantad hilo'd Gomura, om i Sinab, i mantad hilo'd Adma, om i Simibir i mantad hilo'd Siboyim, om i raja' do Bila (ko' Suar). 3 Iri nopo limo o raja' diri om minogiaamung om tuminimung do hilo'd Rantai do Sidim, i roitan do Rahat do Napatai do baino'. 4 Id suang i' daa iyolo' do pomorintaan di Raja' Kidorlamor do solinaid do hopod om duwo toun, nga' tontok di kohopod om tolu do toun om saap noddi iyolo' dau. 5 Om tontok di kohopod om apat do toun, om rikot no i Kidorlamor, om i ponokipakat dau do miwoyo' di soudor diyolo' dot ogumu' do minongoi pangala' di tulun do Ropaim do hilo'd Astirot-Karnaim, i tulun do Susim do hilo'd Ham, om i tulun dot Imim di hilo'd Siawi-Kiriataim, 6 om i tulun do Hori do hilo'd konuluhanan dot Idom om gusao' po diyolo' iyolo' do gisom do nokorikot do hilo'd Ilparan, it id tisan do tana' do kowotuan. 7 Om tutuk nogiddi iyolo' do hilo'd Kadis (i roitan dot In-Mispat do maso'ddi.) Om kosolod ngai' nopo diyolo' i pomogunan dot Amalik om naala' i tulun dot Amori di poingiyon do hilo'd Hasison-Tamar. 8 Om timungo' ngai' noddi di raja' do Sodom, om Gomura, om Adma, om Siboyim, om Bila i soudor diyolo' do hilo'd Rantai do Sidim do mongoi sangod di 9 raja' dot Ilam, om Goyim, om Babilonia, om Ilasar. Om limo diri o raja' do suminaap dit apat no o raja'. 10 Hiri nopod rantai diri nga' ogumu' o nukadan do pinongonuan do tir, om tontok di minumbal daa do minogidu' ngai' i raja' do Sodom om Gomura do mantad hiri'd pisangadan diri, om kongosuang nogi' iyolo' di nukadan diri, nga' iri nopo i tolu o raja' do suwai om nokopoggidu' i' do kuminaa do hiri'd konuluhanan. 11 Om onuo' ngai' nopoddi dit apat o raja' o konunu-nunuan do hiri'd pomogunan do Sodom om Gomura, om pinotonggoi ngai' nogi' o taakanon, om tongkiad nogiddi iyolo'. 12 I Lut nopo, i manangaman di Abram, om poingiyon daa do hilo'd Sodom. Om iyau nga' tinanggayan i' di piro-piro o pisangod do mitonggoi do koinsanai di dapu' dau. 13 Nga' haro o songulun po do nokopoggidu', om iyau poddi o minongoi popoilo di Abram, i tulun dot Ibrani diri, do koinsanai di nongosiliu'ddi. I Abram nopo om poingiyon do hiri'd somok di koguasan do kayu di tiiyonon do sumambayang. Om sanganu nopo di koguasan do kayu'ddi om i Mamri, i tulun dot Amori. I Mamri nopo om i tobpinai dau do tongokusai, i Iskol om i Anor, om koombolutan i' om ponokisokodung di Abram. 14 Om soira' di nokorongou i Abram do natanggayan do pisangod i manangaman dau, om timungo' ngai' no dau do hiri'd kokiiman dau i tulun dau dit ongoubas do sumangod. Om kogumuo' nopo diyolo' di notimung om tolu nahatus om hopod om walu' o tulun. Om gusao' no diyolo' it apat o raja' do gisom do nokorikot do hilo'd bandar do Dan. 15 Om pogibohogi-hogio' noddi di Abram i tulun dau do piro-piro o posukan di nokorikot iyolo'd hilo'. Om ngoyo' no diyolo' songodo' i pisangod di dongotuong, om naala' iddi diyolo' i pisangod. Om gusao' po dau iyolo' do gisom do nokorikot do hilo'd Hoba, i ponong id utara do Damsik. 16 Om naanu iddi kawagu di Abram i dapu' di tinanggayan daa di pisangod. Om i Lut, i manangaman dau nga' naahau nogi' dau do mitonggoi do koinsanai di dapu' di Lut, om i nogi' i tongoondu', om koinsanai di tulun do suwai di natanggayan daa di pisangod.
Binarakatan di Milkisidik i Abram
17 Tontok di nokoguli' i Abram do mantad id nakamanangan dau do suminaap di raja' Kidorlamor om i piro-piro o raja' do suwai, om soliwan no i raja' do Sodom do mantad hiri'd pomogunan dau do minongoi solowot di Abram do hilo'd Rantai do Siawi, (i roitan nogi' do Rantai di dong Raja'). 18 Om i Milkisidik, i raja' do Salim, om it imam po do mogobi-obi' do Kinorohingan dit Asawat Kopio, nga' minigit nogi' do roti om waig dot anggur do patahakon di Abram. 19 Om barakatai no di Milkisidik i Abram do poingkaa, “Pokionuon ku o Kinorohingan, it Asawat Kopio, i minomonsoi do tawan om pomogunan, do mamarakat di Abram! 20 Royohon no o Kinorohingan, it Asawat Kopio, i minanahak diya' do kamanangan do suminaap di pisangod nu!” ka. Om onuwai noddi di Abram i Milkisidik do sompihopod do koinsanai di dapu' di nigitan dau, i naahau kawagu dau do mantad id pisangod. 21 Om boros kaddi di raja' do Sodom dot id di Abram, “Onuo' ngai' nopo ino dapu' di naahau nu, nga' pogulion ngai' po doho' i tulun ku,” ka dau. 22 Om boros ka di Abram do suminimbar, “Sumumpa' oku no dot id toguang do TUHAN, i Kinorohingan, it Asawat Kopio, i minomonsoi do tawan om pomogunan, 23 dot ongoiso' piya nga' a' oku i' manganu di diya' mantad do songonuon. Banang-banang piya ko' tali-tali do kasut nga' a' oku i' manganu. Om a' ko indo milo do momoros dot, 'Iyoho' o pinapakaya' di Abram,' ka. 24 A' oku i' manganu do nunu nopo do maan ku'd doho'. Iri no i nangapakai di tulun ku ot onuon ku. Nga' pologoson nopo i piro-piro o ponokisokodung ku, i Anor, om i Iskol, om i Mamri, do manganu di diyolo' do gontok,” ka dau.
Tumpongo do Kinorohingan dot id di Abram
1 Om katalib poddi iri, om haro'ddi o pinointalang do nokito di Abram, om korongou no dau o TUHAN do minoro-boros dau do poingkaa, “Kada' poddosi, oi Abram, intirungan ku i' iya' do mantad id koligagaanan om onuan ku iya' dot isomuli' dot agayo,” ka. 2 Nga' boros ka di Abram do suminimbar, “Oi TUHAN, i Kinorohingan, nunu o guna' dit isomuli' nu doho', tu' iyoho' nopo om aiso' i' o tanak? Om i Iliasar noo, i tulun do Damsik, i turipon ku, o tumungkus do dapu' ku. 3 Tu' a' oku i' diya' nonuan do tanak, om gisom diri do songulun no dot id pogialatan dilo turipon ku o tumungkus do dapu' ku,” ka dau. 4 Om korongou poddi kawagu di Abram o TUHAN do minoro-boros dau do poingkaa, “Okon i' ko' i turipon nu o kotungkus dilo dapu' nu, suwai ko' tanak nu i' kopio o kotungkus,” ka. 5 Om angatai noddi do TUHAN i Abram do suminoliwan, om boro-boros no iyau dot id di Abram do poingkaa, “Tingaha' pogi' do hilo'd tawan om umbalan do mongintob ilo rombituon ondung piro no o ginumu'; om iyo noddi o kogumuon do sinakagon nu,” ka dau. 6 Om pogondos nod TUHAN i Abram. Om TUHAN diri nga' nohubayaan i' dau. 7 Om boro-boros po kawagu o TUHAN dot id di Abram do poingkaa, “Iyoho' no i TUHAN, i minomoyo' diya' do suminoliwan do mantad hilo'd Ur, i hilo'd Babilonia, do papatahak diya' diti tana' do sumiliu do diya'd songonuon,” ka. 8 Nga' boros ka di Abram, “Oi TUHAN, it Asawat Kopio, poingkuro oku do koilo dot asanganu kopio ku iti tana'?” ka dau. 9 Om boros kad TUHAN do suminimbar, “Ngoyo' oku diya' onuwai do songinan o sapi', om songinan o kambing do tondu', om songinan o dumba' di tontoluhan, dot i tolu ngai' nogi' o toun do tumur. Om songinan o punai, om songinan o sikukur,” ka. 10 Om pootodo' no di Abram i nintorusan diri dot id Kinorohingan, om pipapaso' ngai' no dau iri. Om patadsaro' ngai' nogiddi dau iri do duwo o rulud do pinogiontok-ontok i pinogipapas-papas; nga' i nopo tombolog om a' i' dau pinapas. 11 Om rikot no daa o tombolog di mangangakan do tonsi do nintorusan di napatai do mongoi daa pangakan di nintorusan di pinapas di songingiliu'ddi, nga' nougadan i' di Abram iri. 12 Tontok di motingkotonob no o tadau, om koodop no i Abram do gisom do nokoolong tomod. Om sumarat diri iyau om moddosi. 13 Om boros kad TUHAN dot id dau, “Osiliu nondo do sompogunan o sinakagon nu do hilo'd pomogunan do suwai. Om osiliu iyolo' do turipon do hilo', om inggori-goriton iyolo' do solinaid dot apat nahatus o toun. 14 Nga' hukuman ku indo o bansa' di monguripon di sinakagon nu, om soira' nopondo do tumongkiad i sinakagon nu do mantad id pomogunan diri, om ogumu' nondo o dapu' dot oigitan diyolo'. 15 Iya' nopo om otogui i', om osonong o kapatai-patayo' nu, om id lobong i' o pamalabangan diya'. 16 Ingapat po kopilombus o sinakagon di tangaanak nu, om koguli' nogindo kawagu iyolo' do hiti, tu' a' ku po uyungon i tulun dot Amori dot a' po adalaan kopio o kararaat diyolo' do gisom dot a' nondo milo dot a' hukuman,” ka dau. 17 Tontok di notonob o tadau, dit otuong noddi, om sigog i' do haro o lansang di mogolisun om haro o tata' di kitapui do mandak-bandak do tuminalib dot id pogiolitan di papas di nintorusan di songintadsar. 18 Om tontok nogiddi dot id kinoiyonon diri do minomonsoi o TUHAN do tumpongo dot id di Abram. Boros kad TUHAN, “Mamatos oku no do patahakon ku do sinakagon nu o koinsanai do tana' diti, do mantad di wolit do tana' do Masir om gisom do korikot di bawang dot Iprat, 19 om kosuang ngai' no o tana' do tulun do Kini, om Kinas, om Kadmon, 20 om Hit, om Poris, om Ripaim, 21 om Amori, om Kanaan, om Girgasi, om Yobus,” ka dau.
I Hagar om I Ismail
1 I Sarai nopo i sawo di Abram diri, om aiso' po o tanak. Nga' haro o songulun o sumandak do bansa' do Masir do nanu dau do turipon, dot i Hagar o ngaran. 2 Om boros ka di Sarai dot id di Abram, “A' nod TUHAN, i Kinorohingan pologoson diti do kianak oku. Osonong nogi' dot ongoyon nu duduno' i turipon ku, ulan toi' om kianak iyau do maan ku do tanak ku,” ka dau. Om kookunai noddi di Abram i pinoboros di Sarai. 3 Om podudunai noddi di Sarai di Abram i Hagar do maan di Abram do panakasawo. (Iti nopo nga' nosiliu di hopod no o toun di Abram do poingiyon do hilo'd Kanaan.) 4 Om duduno' noddi di Abram i Hagar, om ponontian no iyau. Nga' soira'ddi do noilaan di Hagar do monontian iyau, om oondos tomod diri iyau, om mongulok-ulok iyau di Sarai. 5 Om boros kaddi di Sarai dot id di Abram, “Iyoho' i' o pinapatahak di Hagar dot id diya' nga' soira' nopoddi do noilaan dau do monontian iyau om mongulok-ulok iddi iyau doho'! Om diya' nod kasalaan diti. Om TUHAN no o momutus dato, ondung isai dato ot otopot. Iya' tuu ko' iyoho',” ka dau. 6 Om boros ka di Abram do suminimbar, “Osonong i' bo no, dot iyau nopo om turipon nu i', om id siriba' i' iyau do kuasa' nu, om poingkuro nopo o korohian nu om wonsoyon nopo dot id dau,” ka dau. Om araat diri i Sarai dot id di Hagar. Om gowoi poddi om poggidu' no i Hagar. 7 Om ongoyo' noddi di moloikat do TUHAN solowoto' i Hagar do hiri'd somok di tudan do waig do hilo'd tana' do kowotuan do hiri'd ralan do kumaa do hilo'd tana' do kowotuan do Sur. 8 Om boros ka di moloikat do TUHAN, “Oi Hagar, i turipon di Sarai, honggo tadon nu'ndo om hinonggo o pakayaan nu?” ka dau. Om boros ka di Hagar do suminimbar, “Mogidu' oku do mantad id tondu' di kinarajaan ku,” ka dau. 9 Om boro-boros noddi i moloikat do poingkaa, “Poguliai no do hilo'd di Sarai om sumiliu nopo do turipon dau,” ka dau. 10 Om boro-boros po kawagu i moloikat do poingkaa, “Onuan ku indo iya' do sinakagon dot ogumu' gisom dot aiso' no o tiso' pod tulun do kointob diyolo'. 11 Om kianak ko nondo dot iso' o tanak do kusai, om pungaranan no dot i Ismail, tu' norongou nod TUHAN i tihad nu dot oinggoritan. 12 Nga' iri nopo i tanak nu do kusai'ddi om miagal do kaladai di lalang, om monokisaap nopondo iyau dot isai nopo o tulun, om isai nopo o tulun nga' sumaap no dau. Om posuwai-suwai nondo do mantad id koobpinayan dau o tiyonon dau,” ka dau. 13 Om minonguhot diri ot id suang do ginawo di Hagar do poingkaa, “Otopot no tuu do nokokito oku do Kinorohingan, i mamadul doho'?” ka dau. Om roitai noddi dau i TUHAN di minoro-boros dau do, “Kinorohingan di Mamadul”. 14 Om iri noddi o kinopomoroitan do tulun di torobong di hilo'd piolitan do Kadis om Birid do, “Torobong dau I Poimpasi om I Mamadul doho' “. 15 Om kosusu noddi i Hagar om kusai o tanak dau, om pungaranai no di Abram i tanak diri dot i Ismail. 16 Tontok nopoddi om walu' no nohopod om onom o toun di Abram.
I Sunat o Tanda' di Tumpongo
1 Tontok di siam nohopod om siam o toun di Abram, om intalang noddi o TUHAN dot id dau. Om boro-boros nod poingkaa, “Iyoho' no o Kinorohingan dit Asawat Kopio. Umboyo' no doho', om momonsoi no kasai' di korohian ku. 2 Om pogiroton ku o tumpongo ku dot id diya' om onuan ku iya' do sinakagon dot ogumu',” ka dau. 3 Om otud noddi i Abram do tuminuku'. Om boro-boros noddi o Kinorohingan do poingkaa, 4-5 “Iti no o tumpongo do wonsoyon ku dot id pialatan to: Mamatos oku dot osiliu ko nondo do taki-aki dot ogumu' o bansa'. Om okon nondo ko' i Abram o ngaran nu, suwai ko' i Abraham, tu' silihon tiya' no do taki-aki do tulun dot ogumu' o bansa'. 6 Om onuan tiya' nondo do sinakagon dot ogumu', om haro nogi' ot id pogialatan diyolo' dot osiliu do raja'. Om ogumu' nondo kopio o sinakagon nu gisom dot osiliu iyolo' do mogisuwai-suwai o bansa'. 7 Pogiroton ku nondo iti tumpongo ku dot id diya' om id sinakagon nu om id sinakagon diyolo' do koimbagu. Iti nopo tumpongo diti nga' poinggirot kasai' i' do gisom do poingompus. Om iyoho' nondo o Kinorohingan nu, om Kinorohingan di sinakagon nu. 8 Patahakon ku nondo diya' om id sinakagon nu iti tana' diti niyonon nu do tuminindapou. Om koinsanai'dti tana' do Kanaan nga' asanganu nondo di sinakagon nu do gisom dot alaid. Om iyoho' nondo o Kinorohingan diyolo',” ka dau. 9 Om boro-boros po kawagu o Kinorohingan dot id di Abraham do poingkaa, “Iya' om i sinakagon nu om i sumolusuk diya' do koimbagu nga' apatut nogi' dot ogirot o pongingigit diti tumpongo om tumorodok do tumanud diti. 10 Mositi' no do kaakun ngai' kou di sinakagon nu do monunat do koinsanai'd kusai dot id pogialatan dokoyu. 11-12 Mantad pondo do tadau'd baino' om sunatan no kopio o pointikid-tikid do tangaanak do kusai di walu' o tadau do mantad di kinosusuan. Om kohompit ngai' nogi' o tangaanak do turipon di nosusu dot id walai nu, om i turipon di binoli nu do mantad id tulun do bansa'd suwai. Om iti no sunat o sumiliu do tanda' do haro no o tumpongo dot id pialatan to. 13 Om mositi' no do sunatan o pointikid-tikid do tulun, tu' iri no o sumiliu do tanda' dit okito do popointalang do poinggirot kasai' i tumpongo ku dot id diya' do gisom dot alaid. 14 Isai nopo o kusai dit a' nosunatan, om a' no iyau kohompit di tulun ku, tu' a' i' iyau tuminanud di tumpongo ku,” ka dau. 15 Om boro-boros po o Kinorohingan dot id di Abraham do poingkaa, “Kada' nondo roitai dot i Sarai ilo sawo nu, tu' mantad pondo do baino' om i Sara no o ngaran dau. 16 Om barakatan ku nondo iyau om maganak nondo iyau dot iso' o kusai do patahakon ku diya'. Om barakatan ku nondo i Sara, om osiliu nondo iyau do todu' do mogisuayan o bansa'd tulun. Om haro o piro-piro do mantad id pogialatan do sinakagon dau dot osiliu do raja',” ka dau. 17 Om otud no i Abraham do tuminuku', nga' koirak i' ot id suang do ginawo dau do kosorou'ddi, tu' boros ka dot id suang do ginawo dau, “Kianak po tuu kaka o kusai di hatus no toun do tumur? Om maganak po tuu kaka i Sara tu' siam no nohopod o toun do tumur?” ka. 18 Om uhoto' no di Abraham o Kinorohingan do poingkaa, “Nokuro tu' okon nogi' ko' i' Ismail o tumungkus do dapu' ku?” ka dau. 19 Nga' boros kad Kinorohingan, “Okon i'! Tu' maganak i' do tanak do kusai i Sara i sawo nu, om pungaranan no i tanak diri dot i Isak. Pogiroton ku indo iti tumpongo dot id tanak diri om id sinakagon dau do gisom dot alaid. Iti nopo tumpongo om poinggirot kasai' i' do gisom dot alaid. 20 Norongou ku no i pinokianu nu dot i Ismail o kopokionuan nu, om barakatan ku indo iyau, om onuan ku iyau do tangaanak dot ogumu', om sinakagon dot ogumu'. Om iyau no o sumiliu do taki-aki do hopod om duwo o raja', om silihon ku o sinakagon dau dot iso' o bansa' dot agayo. 21 Nga' id di Isak i tanak nu, o pogiratan ku'dti tumpongo ku, tu' iyau no o pogkosusuon di Sara do dongiyo-iyo'dti do toun dot abantalan,” ka dau. 22 Om kongoboros ngai' poddi do Kinorohingan iri dot id di Abraham, om tongkiad nogiddi iyau dau. 23 Om tontok i' do tadau'ddi do tinanud di Abraham i pinonuhuan do Kinorohingan diri, om sunatai no dau i Ismail, i tanak dau om koinsanai di tongokusai do hiri'd walai dau, om kohompit ngai' no i turipon di pinogkosusu dot id suang do walai dau, om i turipon di binoli dau. 24 Tumur nopo di Abraham di sinunatan iyau om siam no nohopod om siam o toun. 25 Tumur no di Ismail i tanak dau, om hopod om tolu o toun. 26 Om insan-insan nopo o tadau do sinunatan iyolo'. 27 Om poingandad nogi' diyolo' do sinunatan i piro-piro o turipon di Abraham.
Pinabatos do Kinorohingan o Tanak do Kusai dot id di Abraham
1 Om intalang no o TUHAN dot id di Abraham do hilo'd koguasan do kayu di tiiyonon do sumambayang do hilo'd Mamri. Tontok nopoddi nga' alasu' kopio o tadau. Om poirikau diri i Abraham do hiri'd wawayaan di kiim dau. 2 Om hangog no i Abraham om kokito no dau o tolu tulun do poingkakat do hiri'd dotimbabaan dau. Om tontok di nokito dau iyolo' om panangkus nopo iyau do minongoi solowot diyolo'. Om otud no iyau do tuminuku', 3 om boro-boros no iyau do poingkaa, “Oi Tuan, kada' kou po talib diti kinoiyonon ku. Umbaya' kou po, tu' hiti oku i' do koobi' dokoyu. 4 Ongoi oku pod waig do pongoug dino lapap dokoyu. Om mundorong kou po do hiti'd lungung diti kayu. 5 Om ongoyon ku indo iyokoyu surungai do taakanon do gisom do kabagal dokoyu. Om okoris kou indo do lumombus do mamanau. Minomusou kou i' doho' tu' minumbaya' kou i' do hiti'd walai ku. Om paakanon ku pondo iyokoyu,” ka dau. Om boros ka diyolo' do suminimbar, “Pounsikou no kopio; tumumboyo' i' iyahai dino tiangat nu,” ka diyolo'. 6 Om arau-arau nopoddi i Abraham do suminuang di kiim, om boro-boros no iyau di Sara, “Ongoi kopio anu do sontobubut di tapung nu dit osonong om momonsoi i' do roti. Kada' kalaid,” ka dau. 7 Om panangkus no i Abraham do minongoi'd hiri'd baanan do sapi' dau om pomili' no iyau do songinan o tanak do sapi' dit omulok po om it olomu', om patahako' nogiddi dau di susuhuon dau. Om olomus nopoddi i susuhuon dau'ddi do minomuru' diri. 8 Om ongoi no i Abraham panganu di susu, om i susu di kilunok, om i tikanas, om posurungo' no dau di tulun diri. Om i Abraham i' o minodsurung diyolo' do hiri'd dolungungan di kayu. Om akan noddi iyolo'. 9 Om uhoto' noddi diyolo' i Abraham, “Hinonggo i Sara i sawo nu?” ka. Boros ka di Abraham do suminimbar, “Hilo' iyau'd suang do kiim,” ka dau. 10 Om boros kaddi di tiso' diyolo', “Siam po tulan do mantad do baino' om mongoi oku no kawagu do hiti. Om kianak nondo do kusai i Sara i sawo nu,” ka dau. Om maso nopoddi nga' mokinongou i Sara do hiri'd wawayaan di kiim dot id dolikudan di Abraham. 11 Tontok nopoddi om molohing no kopio iyo' Abraham di Sara. Om notingkod no o pomulanan di Sara. 12 Om koirak diri ot id suang do ginawo di Sara, om boros ka dau, “Molohing oku no om nokurimbit oku po tomod, om milo oku po tuu daa do monokidudun do kusai? Tu' ilo sawo ku nga' molohing no kadauu,” ka dau. 13 Nga' uhoto' noddi do TUHAN i Abraham do poingkaa, “Nokuro tu' nokoirak i Sara om minomoros dot, 'Kianak oku po tuu kopio'dti do miagal diti kolohing?' ka. 14 Nga' haro toi ot a' do TUHAN milo do wonsoyon? Do miagal di nokoboros ku di tiinu' tu' siam po tulan do mantad do baino' om gumuli' oku no kawagu do hiti. Om kianak nondod kusai i Sara do tontok diri,” ka dau. 15 Om pogolim noddi i Sara, tu' moddosi i' iyau. Boros ka dau, “A' oku i' nokoirak,” ka. Nga' boros kad TUHAN do suminimbar, “Nokoirak ko i',” ka dau.
Pinokiompunan di Abraham o Sodom
16 Om pamanau noddi i tolu o tulun diri om woyo' no i Abraham diyolo'. Om ongoi noddi iyolo' dot id iso' o kinoiyonon di koimpa' do pomogunan do Sodom, om oimpa' i' diyolo' i pomogunan diri. 17 Om boros ka dot id suang do ginawo do TUHAN, “A' ku i' lisokon dot id di Abraham iti wonsoyon ku. 18 Sinakagon nopondo dau om osiliu do bansa' dit agayo om okoris, om iyau no o pawayaan ku do barakat do patahakon ku dot id toinsanan o bansa'd tulun do hiti'd pomogunan. 19 Nopili' ku no i Abraham om milo indo iyau do momisunud do tangaanak dau om sinakagon dau do mumboyo' doho' om momonsoi dit ongotopot om it otulid. Om ondung wonsoyon diyolo' iri, om bayaanon ku no o koinsanai di nangkabatos ku dot id di Abraham,” ka dau. 20 Om boro-boros noddi o TUHAN dot id di Abraham do poingkaa, “Haro o boros dot awagat kopio do papasala' do Sodom om Gomura, om dusa diyolo' nga' nokoinggayo no kopio. 21 Om a' no milo dot a' oku lumintuhun do mongoi pongimuwai ondung ongotopot kopio ko' amu' i boros di papasala' do nongorongou ku,” ka dau. 22 Om tongkiad noddi i duwo o tulun diri om pamanau no do kuminaa do hilo'd Sodom, nga' hiri pod toning di Abraham i TUHAN. 23 Om ongoi noddi i Abraham insomok do TUHAN om ponguhot no iyau dau do poingkaa, “Raagon nu no kopio i tulun dit aiso' o sala' do potonggoyon di tulun do kisala'? 24 Ondung haro daa o limo nohopod o tulun dit aiso' o sala' dot id suang dilo bandar, om raagon nu po tuu daa o koinsanai dilo bandar? A' ko no kopio mangampun dilo bandar do mamasi daa di limo nohopod o tulun diri? 25 Atantu' no dot a' nu i' patayon o tulun dit aiso' o sala' do potonggoyon di tulun di kisala'. A' i' kopio milo do miagal diri! Tu' a' ko i' momonsoi do miagal diri. Tu' ondung wonsoyon nu o miagal diri om i tulun dit aiso' o sala' nga' ohukuman nondo do kotonggoi di tulun di kisala',” ka dau. 26 Om boros kaddi do TUHAN do suminimbar, “Ondung haro o toilaan ku do limo nohopod o tulun dit aiso' o sala' do hilo'd Sodom, om ompunan ku i' o koinsanai di hilo'd bandar dot i limo nohopod o tulun o kopongompunan ku,” ka dau. 27 Om boros ka kawagu di Abraham, “Ompunai oku no tu' katama' kopio oku i' do moro-boros kawagu diya', oi TUHAN. Iyoho' nopodti om tulun i' toomod, om a' i' daa osorupai do popoboros do nunu nopo. 28 Nga' ondung haro daa ot apat nohopod om limo o tulun dit aiso' o sala', om a' piya kolimo nohopod. Om raagon nu po tuu daa o koinsanai dilo bandar do noidu' piya i limo tulun?” ka dau. Om boros kad TUHAN do suminimbar, “A' ku i' raagon ilo bandar ondung haro po ot apat nohopod om limo o tulun dit aiso' o sala',” ka dau. 29 Om boros ka kawagu di Abraham, “Poingkuro daa ondung haro daa ot apat nohopod o tulun?” ka dau. Om boros kad TUHAN do suminimbar, “A' ku i' raagon ondung haro po ot apat nohopod o tulun,” ka dau. 30 Om boros ka kawagu di Abraham, “Kada' kotogod, oi TUHAN, tu' moro-boros oku po kawagu. Poingkuro no daa ondung haro po tolu nohopod o tulun?” ka dau. Om boros kad TUHAN do suminimbar, “A' ku i' wonsoyon o miagal diri ondung haro po o tolu nohopod o tulun,” ka dau. 31 Om boros ka kawagu di Abraham, “Ompunai oku no tu' katama' kopio oku i' do moro-boros kawagu diya', oi TUHAN. Poingkuro no daa ondung haro po duwo nohopod o tulun?” ka dau. Om boros kad TUHAN do suminimbar, “A' ku i' raagon ilo bandar dot ondung haro po duwo nohopod o tulun,” ka dau. 32 Om boros ka kawagu di Abraham, “Kada' kotogod, oi TUHAN, tu' moro-boros oku po kawagu dot ongoinsan. Poingkuro no ondung haro po daa o hopod o tulun?” ka dau. Om boros kad TUHAN do suminimbar, “A' ku i' raagon dot ondung haro po o hopod o tulun,” ka dau. 33 Om kopongo poddi o TUHAN do moro-boros di Abraham, om tongkiad noddi iyau. Om uli' noddi i Abraham do hiri'd walai dau.
Dusa do Sodom
1 Tontok di nokorikot i duwo o moloikat diri do hilo'd Sodom do totuong diri, om poirikau i Lut do hiri'd wawayaan di bandar. Om soira' di nokito di Lut i moloikat, om olomus nopo iyau do minongoi solowot diyolo'. Om otud no iyau do tuminuku' dot id toguang di moloikat. 2 Om boros ka dau, “Oi Tuan, hino oku i' do koobi' dokoyu. Om rikot kou nopo do hilo'd walai ku. Ougan nopo o lapap dokoyu, om modop kou nopod hilo'. Om sumuab kou id lumombus do mamanau'd suab,” ka dau. Nga' boros ka diyolo' do suminimbar, “A' piya minog, modop nopo iyahai do hiti'd talun-alun diti bandar,” ka. 3 Nga' sansagai i' di Lut iyolo', om tanud noddi iyolo' di Lut do minongoi do hiri'd walai dau. Om ponuhu' noddi i Lut di susuhuon dau do momonsoi do roti om posodia' do taakanon dit angawasiu do paakan di tombului dau. Om akan noddi iyolo'. 4 Tontok dit a' po nokoongoi koodop i tombului dau'ddi, om rikot no o tulun do Sodom do tuminutuk di walai di Lut. Om hino ngai' nopod hiri i tongokusai dit id bandar diri, dot i molohing no, om it ongomulok po. 5 Om lohowo' no diyolo' i Lut, om uhoto' no diyolo' iyau, “Hinonggo no i tulun di minongoi odop do hiti'd walai nu? Posoliwano' iyolo'd hiti, om ompohuon i' dahai iyolo',” ka diyolo'. 6 Om labus no i Lut do mantad hiri'd walai dau om tabanai noddi dau i wawayaan. 7 Om boros ka dau dot id tulun do Sodom diri, “Oi tobpinai-tobpinai ku, pokionuon ku no kopio dot a' kou momonsoi do miagal diri karaat! 8 Pokinongou kou po pogi', kianak oku i' do duwo o tondu' dit a' po nodudun do kusai. Om iyolo' nogi' o patahakon ku dokoyu, om nunu nopo o korohian dokoyu do wonsoyon dot id diyolo', om wonsoyon nopo dokoyu. Nga' kada' po doho' dokoyu kuroi-kuroyo' iti tulun diti; tu' iyolo' nopo om tombului i' do hiti'd walai ku, om iyoho' no ot apatut do mongintirung diyolo',” ka dau. 9 Nga' boros ka di tulun do Sodom dot id di Lut, “Undaliu oi indapou! Isai kopio ko daa tu' katama' kopio do monuduk dit apatut dahai'd wonsoyon? Undaliu! Undaliu nogi' kopio! Dot a' ko nopo moti' mundaliu, om ara-raat po moti' o wonsoyon dahai dot id diya' ko' mantad di wonsoyon dahai dot id duwo o tulun diri,” ka diyolo'. Om sudsuro' nopoddi diyolo' i Lut do pinopoundaliu, om ongoyon no daa'ddi diyolo' raago' i totobon. 10 Nga' poroloyo' no di duwo o tombului di Lut diri o longon diyolo' do minamagayat di Lut do suminuang do hiri'd walai, om tabanai nogiddi diyolo' i wawayaan. 11 Om boloho' noddi diyolo' o koinsanai do mato di tulun di hiri'd soliwan diri, gisom dot a' noddi iyolo' kotunud di wawayaan di walai.
Tuminongkiad i Lut do Sodom
12 Om boro-boros no i duwo o tombului di Lut diri dot id di Lut do poingkaa, “Ondung haro o tangaanak nu'd kusai, ko' tongoondu', ko' i monongiwan diya', ko' tanak do koworisan nu do suwai di poingiyon do hiti'd bandar diti, om angatan no iyolo' do mogidu' do mantad hiti, 13 tu' raagon moti' dahai iti bandar do Sodom. Tu' norongou nod TUHAN o boros dit awagat kopio do papasala' do tulun do hiti, om sinuhu'ddi iyahai do mongoi pamaraag diti bandar do Sodom,” ka diyolo'. 14 Om ongoyo' noddi di Lut sunudai i duwo o tanakwagu i tunang di tangaanak dau do tondu'. Om boros ka dau, “Kainou kopio sumoliwan do mantad hiti; tu' raagon no moti'd TUHAN o kinoiyonon diti,” ka dau. Nga' ondos nopo daa diyolo' om mogkoringau no toomod i Lut. 15 Tontok di minnanawau no di dongkosuabon, om ara-raho' noddi di duwo o moloikat diri i Lut. Boros ka diyolo', “Lomusai no! Angatai no ilo sawo nu, om ilo duwo tanak nu'd tondu' do mogidu', om a' kou i' apatai do raagon iti bandar,” ka. 16 Nga' mikoduwo-duwo i' daa o ginawo di Lut. Nga' osianan i' kopio o TUHAN dau, om ahako' noddi di duwo o tombului dau'ddi i Lut, om i sawo dau om i duwo tanak dau'd tondu', om posoliwano' noddi diyolo' iyolo' do mantad id bandar diri. 17 Om boros ka di tiso' di moloikat, “Panangkus kopio kou, om apasi kou i'! Kada' kou no koili dot id tohuri, om kada' kou undorong do hilo'd rantai. Manangkus kou nopo do kumaa do hilo'd nuluhon, om a' kou i' apatai,” ka dau. 18 Nga' boros kad i Lut do suminimbar, “Kada' no iyahai suhuo' do mongoi do hilo'd nuluhon, oi Tuan. 19 Agayo no kopio i kinotulungan nu doho', om napasi oku diya'. Nga' ilo' nopo konuluhanan om adalaan no kopio kosodu'. Om okosupan oku i' doti'ndo di mamaraag, om a' oku po korikot do hilo' om apatai oku no. 20 Intong pogi' nga' haro i' o bandar dot okooro' do hiti'd somok. Pologoso' oku nogi' do mongoi'd hilo', om apasi oku i',” ka dau. 21 Om boros ka di moloikat, “Okuro i' katuu, potumboyoon tiya' nopo. A' ku i' raagon ilo bandar dot okooro' dilo'. 22 Siahai no! Panangkus no! Tu' aiso' po milo ku'd wonsoyon dot a' ko po korikot do hilo',” ka dau. Om pungaranai noddi i bandar diri do Suar, tu' rinoitan i' di Lut dot okooro' i bandar diri.
Naraag o Sodom om Gomura
23 Di nopo nokorikot i Lut do hiri'd bandar do Suar, om mulai nogi' o tadau. 24 Om sigog iddi do polintuhunai do TUHAN do tana' do kitapui do miagal pod rasam kasapou o pointongkop di bandar do Sodom om Gomura, 25 gisom do naraag i duwo o bandar diri om napatai ngai' o tulun do hiri, om nosorob i songinsuni do hiri'd kinoiyonon diri. 26 Nga' iri nopo i sawo di Lut om kuminoili do hiri'd dohuri, om kosiliu noddi iyau do silaon do miagal-agal do torigi o kokitanan. 27 Osuab poddi di kosuabon kawagu, om arau-arau noddi i Abraham do minongoi do hiri'd nundorong dau di suminolowot iyau do TUHAN di sangadau no do mantad diri. 28 Om impa' no i Abraham di bandar do Sodom om Gomura om pointongkop di rantai do hilo', om kokito no dau do muntu-nguntu' nopo o lisun do mantad hiri, do miagal pod lisun do mantad id podtutudan dot agayo. 29 Nga' tontok di rinaag do Kinorohingan i kabandaran di hiri'd rantai di pinomogunan di Lut, om nosorou i' do Kinorohingan i Abraham, om tinulung iddi dau i Lut do mogidu', om napasi iddi i Lut.
Tadon do Tulun do Muab om Tulun dot Amon
30 Nga' moddosi iddi i Lut do mundorong do hilo'd Suar, om takad noddi iyau do hiri'd konuluhanan do miwoyo' di duwo o tanak dau do tondu'. Om iyon noddi iyolo' dot id suang dot iso' o luang do nuluhon do hiri. 31 Om boros ka di tanak di Lut do tondu' dit id dotuo dot id tadi' dau, “Molohing noddi ilo tapa' to, om aiso' no ot ongoiso' piya do kusai do pointongkop diti pomogunan do mangawin dato, do koonuan to'd tanak. 32 Kaino, maai to owuko' ilo tapa' to. Om milo kito i' do mongoi dudun dau do modop, om kianak to indo,” ka dau. 33 Om popoginumo' no diyolo' do waig dot anggur i tapa' diyolo' do totuong diri, om ongoi noddi dudun di Lut i tanak di Lut dot id dotuo, nga' i Lut nopo om nadalaan no do naawuk gisom dot a' no iyau nokopuriman di nosiliu dot id dau di totuong diri. 34 Tadau noddi kawagu, om boros ka di tanak di Lut dot id dotuo dot id tadi' dau, “Nokodudun oku no iyoho' di tapa' di kosodop, om owuk-owukon to po kawagu i tapa' do totuong do baino', om iya' nondo o mongoi dudun dau. Om haro i' goduwo o tanak to,” ka dau. 35 Om owuko' noddi diyolo' kawagu i tapa' diyolo' do totuong diri, om ongoi noddi dudun di Lut i tanak di Lut dit id domulok. Om diri nga' nadalaan nogi' kopio i Lut do naawuk, gisom dot a' no iyau nokopuriman di nosiliu dot id dau do totuong diri. 36 Om ponontian noddi goduwo iyolo' dot i tapa' diyolo' o nokotian diyolo'. 37 Om kosusu noddi i tanak di Lut dit id dotuo, om kusai o tanak dau, om pungaranai no dau dot i Muab. Om iyau no o taki-aki dilo tulun do Muab do dinondo. 38 Om kosusu no it id domulok, om kusai i' o tanak dau, om pungaranai no dau dot i Bin-Ami. Om i Bin-Ami no o taki-aki dilo tulun dot Amon do dinondo.
I Abraham om i Abimilik
1 Om undaliu no i Abraham do mantad hilo'd Mamri, do kuminaa ponong id salatan do Kanaan, om pomogun-mogun no iyau do hiri'd piolitan do Kadis om Sur. Alaid-laid noddi do mantad diri, di maso po di Abraham do poingiyon do hilo'd Gorar, 2 om poboroso' no dau dot i Sara nopo, i sawo dau'ddi om tadi' i' dau. Gowoi poddi om pinokiatadan di Raja' Abimilik i Sara dot id dau. I Abimilik nopoddi om raja' do Gorar. 3 Nga' insan o totuong, om intalang no o Kinorohingan dot id di Abimilik dot id nipi dau, om boro-boros no do poingkaa, “Matai ko no moti', tu' nongoi nu i' iti tondu'; tu' ilo' nopo om kisawo no,” ka. 4 Nga' a' po di Abimilik notoning i tondu'ddi. Om boros kaddi dau, “Oi TUHAN, a' oku i' nokowonsoi dot araat! Patayon oku nanu' kopio diya' do mitonggoi diti tulun ku? 5 Tu' i Abraham i' o minomoros do tobpinai dau i tondu'ddi, om iri tondu' nga' iyo iddi o pinoboros. Osimbayan i' o ginawo ku do minomonsoi'dti, om aiso' i' ot araat do nowonsoi ku,” ka dau. 6 Om id nipi iddi do sinimbar iyau do Kinorohingan do poingkaa, “Otopot, oilaan ku i' dot osimbayan o ginawo nu do minomonsoi'ddi, om iri noddi o kinapangantaban ku diya' do momonsoi do dusa dot id toguang ku, om a' tiya' pinologos do kuminama' dilo tondu'. 7 Nga' ngoyo' nogi' kopio pogulio' ilo tondu' do hilo'd sawo dau do dinondo. Iri nopo sawo diti tondu' om nabi i', om sambayangan ko indo dau, om a' ko i' apatai. Nga' ondung a' nu pogulion ilo tondu', om poinsanon mantad ku nogi' iya', do matai ko no moti' do mitonggoi do toinsanan diti tulun nu,” ka dau. 8 Om osuab poddi di kosuabon kawagu, om lohowo' no di raja' Abimilik o koinsanai di pagawai dau, om sunudai no dau iyolo' di nosiliu dot id dau, om ongooris tomod diri iyolo'. 9 Om lohowo noddi di Abimilik i Abraham om uhoto' no dau iyau, “Nunu kopio iti winonsoi nu dot id dahai? Nunu kopio ot araat do nowonsoi ku dot id diya', do gisom diri do porikatan oku diya' om iti pomorintaan ku do koligagaanan dot agayo? A' ko i' apatut do momonsoi do miagal diri dot id doho'. 10 Nokuro tu' iyo'ddi o winonsoi nu?” ka dau. 11 Om boros ka di Abraham do suminimbar, “Ondos ku nopo daa om aiso' no kopio o tulun do hiti di moddosi do Kinorohingan, om ooris oku daa'ddi do patayon oku diyolo' do sumolod dilo sawo ku. 12 Nga' otopot nopo kopio om tobpinai ku nogi' bo'lo'. Tu' ilo' nopo om tanak i' kopio di tapa' ku, nga' sopisuwai pondo o tina' dahai, om kowino' ku noddi ilo'. 13 Om soira' di sinuhu' oku do Kinorohingan do tumongkiad do mantad id walai di tapa' ku do kumaa dot id pomogunan do suwai, om sunudai ku no'lo sawo ku do poingkaa, 'Milo ko i' do popointalang do kotorodoko' nu dot id doho', do poboroson nu no dot id koinsanai'd tulun do tobpinai oku diya',' kangku,” ka dau. 14 Om pogulio' noddi di Abimilik i Sara dot id di Abraham. Om tontok nogiddi do nonuan dau i Abraham do piro-piro kogumuo' do turipon, om dumba', om sapi'. 15 Om boros kaddi di Abimilik dot id di Abraham, “Diya ngai' noti tana' ku; om mongoi nopo iyon do hinonggo nopo o diya'd korohian,” ka dau. 16 Om boros ka dau dot id di Sara, “Onuan ku ilo tobpinai nu do soribu o kaping do pirok do maan do koilaan do koinsanai'd tulun di poinsugku' diya' dot aiso' i' kopio o kasalaan nu, om koilo ngai' indo o tulun dot a' ko nokowonsoi'd araat,” ka dau. 17-18 Om iri no i nosiliu dot id di Sara diri, i sawo di Abraham, ot a' daa'ddi do TUHAN kapalagasan do koinsanai di tongoondu' di hiri'd walai di Abimilik do maganak. Nga' sambayangai noddi di Abraham i Abimilik, om lingasai iddi iyau do Kinorohingan. Om i sawo di Abimilik, om i turipon dau do tongoondu' nga' liningasan nogi' do Kinorohingan, om maganak ngai' iddi iyolo'.
Kinosusuon di Isak
1 Om barakatai noddi do TUHAN i Sara do miagal di nakabatos mantad dau. 2 Om ponontian no i Sara om kosusu no iyau do tanak do kusai, do tontok di molohing no i Abraham. Iri nopo tanak diri om nosusu do tontok di maso di nokoboros mantad do Kinorohingan do kosusuan dau. 3 Om pungaranai no di Abraham i tanak diri dot i Isak. 4 Om soira' di norikot o walu' o tadau do tumur di Isak, om sunatai no di Abraham iyau do miagal di pinonuhuan do Kinorohingan. 5 Hatus no toun di Abraham di nosusu i Isak. 6 Om boros ka di Sara, “Noonuan oku no do Kinorohingan do kataadan om koirak oku noddi. Om isai nopondo o korongou'dti om kongoirak no do miagal doho',” ka dau. 7 Om boros ka kawagu dau, “Isai po tuu daa o momoros dot id di Abraham do koumbal po i Sara do poposusu'd tanak? Nga' noonuan ku iddi i Abraham do tanak di nokolohing iyau,” ka dau. 8 Om mayo-gayo nopoddi i tanak diri, om tontok di pinotingkod iyau do sumusu, om papaharo noddi i Abraham do poginakanan dot agayo.
Sinuhu' i Hagar om i Ismail do Moggidu'
9 Insan o tadau, om mogkoringau i Ismail di Isak. I Ismail nopo om tanak diyo' Abraham di Hagar, i tondu' do Masir diri, om i Isak noo om tanak di Sara. 10 Om kokito noddi di Sara iyolo' om sunudai no dau i Abraham, boros ka dau, “Suhuon nogi' do mogidu' do mantad hiti ilo turipon ku'd tondu' om ilo tanak dau. Tu' ilo' nopo tanak dau om a' no apatut do kaanu do bahagi' di dapu' nu, tu' i Isak no, i tanak ku, ot apatut do tumungkus diri,” ka dau. 11 Om tumongob diri i Abraham do kosorou'ddi tu' i Ismail nga' tanak i' dau. 12 Nga' boros kaddi do Kinorohingan dot id di Abraham, “Kada' katangkabo do momusorou di tanak diri om i Hagar, i turipon nu. Pohubayaan nopo i pinoboros di Sara dot id diya', tu' id di Isak no o koonuan nu'd sinakagon di nakabatos mantad ku diya'ddi. 13 Om ilo tanak dilo turipon nu nga' onuan ku i' do sinakagon dot ogumu', om osiliu indo iyolo' dot iso' o bansa'. Tu' ilo' nga' tanak nu i',” ka dau. 14 Om osuab poddi di kosuabon kawagu, om onuwai no di Abraham i Hagar do taakanon, om waig do noponu' o kantung do kulit do maan diyolo' do kokoriu. Om pababaai nogiddi di Abraham di Hagar i tanak diri om suhuo' no dau iyolo' do mogidu'. Om pamanau noddi i Hagar om pinghombo no do hiri'd tana' do kowotuan do hilo'd Borsiba. 15 Om soira' di naayi' i waig diyolo' om poiliho' no di Hagar i tanak dau do hiri'd dolungungan di kokoyu-koyuan, 16 om ongoi nogiddi iyau irikau do hiri'd sodu-odu'; do haro i' doti' o hatus o mito do kosoduwo' do mantad hiri. Om boros kaddi dot id suang do ginawo dau, “A' oku no kasaap do montong-ontong dilo tanak ku'd matai,” ka dau. Om ihad noddi i Hagar di poirikau iyau'd hiri. 17 Nga' norongou i' do Kinorohingan i tihad di Ismail, om boro-boros noddi o moloikat do Kinorohingan do mantad hilo'd tawan dot id di Hagar do poingkaa, “Nunu o katangkabaan nu, oi Hagar? Kada' no kooris tu' norongou nod Kinorohingan o tihad dilo tanak nu. 18 Ingkakat nogi', om ngoyon i' kibito' ilo tanak, om insasamadan no iyau. Om silihon ku i' do bansa' dot agayo o sinakagon dau,” ka dau. 19 Om poungkalato' noddi kopio'd Kinorohingan o mato di Hagar, om kokito noddi dau o tiso' o torobong. Om ngoyo' noddi dau suangai'd waig i kantung do kulit. Om poinumo' noddi dau i tanak dau. 20 Om moyo-woyo' kasai' i' o Kinorohingan di tanak diri do gisom do nakagayo iyau. Om ongoi noddi iyau iyon do hiri'd tana' do kowotuan di hilo'd Paran. Om nosiliu'ddi iyau do magagasu dit otorus kopio. 21 Om pogihumai noddi iyau di tina' dau do sawo, dot iso' o tondu' do bansa'd Masir.
Taru' di Abraham om i Abimilik
22 Tontok nopoddi om piwoyo' no iyo Raja' Abimilik di Pikol, i boyoon do sumasangod dau do minongoi solowot di Abraham. Om boros ka diyolo', “Woyoon kasai' ko i' do Kinorohingan dot id suang do nunu nopo o wonsoyon nu. 23 Iyo nopoddi om sumpa' no dot id toguang do Kinorohingan dot a' ko monipu' doho', om i tangaanak ku, om i sinakagon ku tu' otorodok oku i' dot id diya'. Iyo nopoddi om pamatos no do tumorodok ko iya' dot id doho', om id pomogunan diti tiyonon nu,” ka dau. 24 Om boros ka di Abraham, “Mamatos oku i',” ka dau. 25 Nga' poguhangan nopo di Abraham di Abimilik om i torobong do nongoi solodo' di piro-piro o susuhuon di Abimilik. 26 Om boros ka di Abimilik, “A' oku i' nokoilo ondung isai o suminolod. Tu' a' ko i' minomisunud doho', om iti nogindo do koilo oku'dti,” ka dau. 27 Om onuwai noddi di Abraham i Abimilik do piro-piro o tinan do dumba' om sapi', om pomonsoi nogiddi iyolo' do taru'. 28 Om pamagamit no i Abraham do turu' o tinan do tanak do dumba' om potongkiado' no dau do mantad hiri'd baanan di dumba' dau. 29 Om boros kaddi di Abimilik do minonguhot dau, “Nokuro tu' miagal dino o wonsoyon nu?” ka dau. 30 Om boros ka di Abraham do suminimbar, “Romito' no iti turu' o tanak do dumba'. Tu' kapatahakan ku nopo diya'dti om maan do koilaan kopio do kotumboyo' ko dot iyoho' o minongukad diti torobong,” ka dau. 31 Om iri no o nokopomungaranan di kinoiyonon diri do Borsiba, tu' hilo' no iyolo' goduwo do minomonsoi'd batos do mikuwo'd sumpa'. 32 Om kowonsoi poddi diyolo' i pinitoruan diri do hilo'd Borsiba, om uli' nogiddi i Abimilik om i Pikol do hilo'd pomogunan do tulun do Pilistin. 33 Om pananom noddi i Abraham do songguas o kayu do roitan do tamariska do hilo'd Borsiba. Om sambayang no iyau dot id TUHAN, i Kinorohingan di Hino Kasai' do Gisom do Poingompus. 34 Om alaid i' i Abraham do momogun-mogun do hilo'd pomogunan do tulun do Pilistin.
Sinuhu' do Kinorohingan i Abraham do Patahak di Isak
1 Om alaid-laid noddi do mantad diri om pogumbalai nod Kinorohingan i Abraham, do mogontong ondung songkuro no o kotorodoko' di Abraham dot id dau. Om lohowo' no dau i Abraham, “Oi Abraham!” ka dau. Om boros ka di Abraham do suminimbar, “Diya oku i', oi TUHAN,” ka dau. 2 Om boros kad Kinorohingan, “Angatai i Isak, i tanak nu, i tanak nu'd kusai dit iso' noo, i kosianan kopio nu, om mongoi i' do hilo'd pomogunan do Moria. Om hilo' nondo, dot id timpak di nuluhon do potudukon ku diya' do patahakon nu doho' i tanak nu do maan do porsombahan di sorobon,” ka dau. 3 Osuab poddi di kosuabon kawagu om ongoi no i Abraham pamalangod do siduwon do maan do pogudung di porsombahan do sorobon diri. Om gandarai nogiddi di Abraham di siduwon diri i kaladai dau, om angatai no dau i Isak, om potonudo' dau o duwo di susuhuon dau. Om pamanau noddi iyolo' do kuminaa do hiri'd kinoiyonon di pinotuduk do Kinorohingan dot id di Abraham. 4 Tontok di kotolu'd tadau, om kokito no di Abraham i kinoiyonon diri di hiri po iyolo'd sodu'. 5 Om boros kaddi di Abraham dot id duwo o susuhuon dau'ddi, “Hiti kou nopo iyokoyu do mundorong, om ilo kaladai nga' hition nopo. Iyahai no'lo tanak ku o mongoi'd hilo' do mongoi sambayang dot id TUHAN. Om gumuli' indo kawagu iyahai'd hiti,” ka dau. 6 Om pasaanai no di Abraham di Isak i siduwon do pogudung di porsombahan do sorobon, om i Abraham no om minigit do pisau, om popou do maan do pomurakit. Om tontok di manau-panau no iyolo', 7 om boro-boros no i Isak, “Apa'!” ka dau. Om boros ka di Abraham do suminimbar, “Nunu ri'ddi, oi ondu'?” ka dau. Om boros ka di Isak do minonguhot, “Okito ku i' do nokoigit ko do tapui, nga' hinonggo'ddi o tanak do dumba' do maan do porsombahan di sorobon?” ka dau. 8 Om boros ka di Abraham do suminimbar, “Kinorohingan i' o manahak do tanak do dumba',” ka dau. Om pamanau no goduwo iyolo'. 9 Om soira' di nokorikot iyolo' di kinoiyonon di pinotuduk do Kinorohingan dot id di Abraham, om pomonsoi noddi i Abraham do pananaraban do porsombahan, om pouludo' no dau i siduwon do hiri'd sakai. Om kagasai nogiddi dau i tanak dau, om pawantayo' no dau do hiri'd pananaraban diri, dot id sakai di siduwon. 10 Om paakango' noddi dau i pisau do pamatai daa dau di Isak. 11 Nga' pomolohou no di Abraham i moloikat do TUHAN do mantad hilo'd tawan dot, “Abraham, Abraham!” ka. Om boros ka di Abraham do suminimbar, “Diya oku i', oi TUHAN,” ka dau. 12 Om boros ka di moloikat, “Kada' pokorualai ino tanak, om kada' iyau kuroi-kuroyo'. Tu' noilaan ku no dot oronok ko i' om mihuboyo-boyo' ko do boros do Kinorohingan, tu' a' nu i' pinusus-pusus do papatahak ino tanak nu dot id Kinorohingan, do mulong piya dot ino noo o tanak nu,” ka dau. 13 Om pikorowo-rowo noddi i Abraham do hiri'd posorili' dau om kokito dau o songinan o dumba' do tontoluhan do nakasait o sungu do hiri'd kokoyu-koyuan. Om ongoyo' no di Abraham i dumba' diri om patahako no dau dot id TUHAN do numaan do porsombahan di sorobon do pinotingolon di tanak dau. 14 Om pungaranai no di Abraham i kinoiyonon diri do “Poposodia' i' o TUHAN dit Apatut do Haro”. Om gisom piya'd baino' nga' momoros kasai' i' o tulun do, “Poposodia' i' o TUHAN dit Apatut do Haro do hilo'd nuluhon dau,” ka. 15 Om pomolohou no kawagu di Abraham i moloikat do TUHAN do mantad hilo'd tawan do pinopoboros di boros do TUHAN dot id di Abraham do poingkaa, 16 “Sumumpa' oku no dot id suang do ngaran ku, do barakatan ku nondo iya' do gisom dot a' aayi-ayi'. Om iri no i winonsoi nu do miagal diri om it a' kopio nu pinusus-pusus do papatahak dot id doho' i tanak nu dit iso' noo, 17 o kapamatasan ku do puhawangan ku nondo iya' do sinakagon do miagal dilo rombituon do hilo'd tawan kogumu', ko' miagal dilo togis do hilo'd tisan do rahat kogumu'. Om aala' indo di sinakagon nu o pisangod diyolo'. 18 Om oinsanan nopondo o bansa' do hiti'd pomogunan do mokianu doho'd barakat do miagal di pinabarakat ku dot id sinakagon nu --- tu' tinanud nu i' i pinonuhuan ku,” ka dau. 19 Om poguliai noddi di Abraham do hiri'd duwo o susuhuon dau, om pogiwoyo-woyo' nogiddi iyolo' do guminuli' do hilo'd Borsiba, i pinomogun-mogunan di Abraham.
Sinakagon di Nahur
20 Alaid-laid noddi do mantad diri om korongou no i Abraham do walu' no o tanak di Milka, i sawo di Nahur. I Nahur nopoddi om tobpinai di Abraham do kusai. 21 Iri nopo it id dotuo di tangaanak diri om i Us o ngaran; om iri no tobpinai dau do suwai om i Bus, om i Komuil, i tapa' di Aram, 22 om i Kisid, om i Haso, om i Pildas, om i Yidlap om i Botuil, 23 i tapa' di Robika. Om iti no i walu' o tanak do kusai diyo' Milka di Nahur, i tobpinai di Abraham do kusai. 24 Om tangaanak no di Rima, i panakasawo di Nahur, om i Tiba, i Gaham, i Tahas, om i Maaka.
Napatai i Sara om Minomoli i Abraham do Tana' do Pamalabangan
1 Di nopo di minatai i Sara om hatus no om duwo nohopod om turu' o toun dau. 2 Kinapatayon nopo di Sara om hilo'd Hibron, it id pomogunan do Kanaan. Om pinogihadan tomod diri di Abraham i Sara i sawo dau, di minatai i Sara. 3 Om tongkiadai no di Abraham i rata' di sawo dau, om ongoi noddi iyau do hiri'd tulun do Hit. Om boros ka dau, 4 “Iyoho' nopodti om tindapou i' toomod do hiti'd dokoyu; om pobolion oku daa dokoyu do tana' dot ongokooro' do pamalabangan ku di sawo ku,” ka dau. 5 Om boros ka diyolo' do suminimbar, 6 “Pokinongou po bo daa dahai, oi Tuan. Iya' nopondo om nosiliu no dahai do molohingon dit agayo dot id pogialatan dahai'd hiti, om lobongon nopo ino sawo nu do hilo'd pamalabangan dit osonong no kopio di naanu dahai. Ongosonong ngai' i' o ginawo dahai do manahak diya' do tana' do pamalabangan, om olobong nu i' ino sawo nu,” ka diyolo'. 7 Om otud no i Abraham do tuminuku' dot id toguang diyolo', 8 om boros kaddi dau, “Ondung osonong o ginawo dokoyu do lobongon ku i sawo ku'd hiti, om ngoyon no doho' sunudai i Ipron, i tanak di Sohar do kusai, 9 do papadagang dot id doho', di Luang do Nuluhon di hilo'd Makpila, i hilo'd tisan do tumo dau. Sunudan no iyau do momorikot di gatang kopio, do padagangon dau i tana'ddi dot id doho', do hiti'd toguang dokoyu, om asanganu ku i' i tana'ddi do maan do pamalabangan,” ka dau. 10 Om i Ipron nga' poirikau nogi' do poinsugku' di tulun do Hit do suwai do hiri'd pogititimungan kasai' do tulun, i hiri'd wawayaan di bandar. Om simbar no i Ipron di Abraham dot id toguang di tulun dot ogumu'. Boros ka dau, 11 “Patahakon ku i' diya' o koinsanai di tana' om i luang do nuluhon do hilo'. Om patahakon ku no diya' iri do hiti'd toguang do bansa' ku om olobong nu i' ino sawo nu,” ka dau. 12 Om otud noddi i Abraham do tuminuku' dot id toguang di tulun do Hit diri, 13 om boro-boros no iyau dot id di Ipron, om korongou ngai' i' i tulun dot ogumu'. Boros ka dau, “Pokionuon ku daa iyokoyu do mokinongou. Tu' bolion ngai' ku nopo i tana'. Om romito' no iti pambayar ku, om olobong ku i' i sawo ku do hilo',” ka dau. 14 Om boros ka di Ipron do suminimbar, 15 “Oi Tuan, ilo' nopo tana' om apat no nahatus o kaping do pirok do gatang --- Nga' nunu no kopio toi iri dot id dato? Ngoyon nopo pogi' lobongo' i sawo nu'd hilo',” ka dau. 16 Om kookunai noddi di Abraham o gatang dot irad diri, om timbango' no dau ot apat nahatus o kaping do pirok do miagal di pinoboros di Ipron, dot id toguang di tulun dot ogumu', do tinimbang di poninimbang di pakayon di dumadagang. 17 Om iyo noddi o kinoonu-onuan di Abraham di tana' di Ipron di hilo'd Makpila, i ponong id koulayon do mantad id Mamri. Nokosuang nopo di naanu dau om i tana', om i luang do nuluhon do hiri, om koinsanai di kayu do hiri do gisom do korikot do hiri'd tisan di tana' do naanu dau. 18 Om koinsanai nopoddi i tulun do Hit di hiri'd pitimungan diri do nongkotumboyo' dot i Abraham noddi o sanganu di tana' diri. 19 Om lobongo' noddi di Abraham i Sara i sawo dau, do hiri'd luang do nuluhon do hilo'd tana' do Kanaan. 20 Om iri nopoddi i tana' di tulun do Hit di gulu po, om i luang do nuluhon do hiri, om naanu noddi di Abraham do maan do tana' do pamalabangan.
Sawo di Isak
1 Om molohing noddi kopio i Abraham, om nabarakatan no iyau do Kinorohingan dot id suang do nunu nopo i winonsoi dau. 2 Om boros ka di Abraham dot id susuhuon dau dit otuo kopio, i mongilo-ilo do koinsanai di dapu' dau, “Pakamao' ino palad nu do hiti'd piolitan diti poo ku om sumumpa' i'. 3 Pokionuon ku do sumumpa' ko dot id suang do ngaran do TUHAN, i Kinorohingan, i momorinta' do tawan om pomogunan, dot a' nu pogihuman do sawo ilo tanak ku dot id pogialatan do tulun do hiti'd Kanaan. 4 Nga' mositi' no do gumuli' ko do hilo'd pomogunan do kinosusuon ku, om hilo' no o pogihuman nu do sawo di Isak, i tanak ku do kusai'ddi. Pogihuman no doho' iyau do sawo dot id pogialatan di koworisan ku,” ka dau. 5 Nga' boros ka di susuhuon dau do minonguhot di Abraham, “Poingkuro no ondung a' no i sumandak sitongkiad di walai dau, om a' tumanud doho' do kumaa'd hiti? Pootodon ku po tuu ilo tanak nu do hilo'd pomogunan di kinosusuon nu?” ka. 6 Om boros ka di Abraham do suminimbar, “Kada' nogi' kopio angatai ilo tanak ku do gumuli'd hilo'. 7 Tu' TUHAN i', i Kinorohingan do momorinta' do tawan, o minongigit doho' do mantad hilo'd walai di tapa' ku, i hilo' pod tana' di koworisan ku, om nokogirot no tomod do Kinorohingan o batos dau, do patahakon dau di sinakagon ku iti pomogunan diti. Monuhu' i' iyau do moloikat do mogulu diya', om koihum ko indo do tondu' do hilo' do maan do sawo di tanak ku. 8 Ondung a' tumanud diya' i tondu', om koidu' ko no do mantad diti sumpa'. Nga' poingkuro piya, nga' kada' no angatai ilo tanak ku do gumuli'd hilo',” ka dau. 9 Om pakamao' noddi di susuhuon di Abraham i palad dau do hiri'd piolitan di poo di Abraham, i tuan dau; om sumpa' nogiddi iyau do tumanud di pinonuhuan di Abraham. 10 Om panganu noddi do hopod o tinan dot unta i susuhuon di mongilo-ilo di dapu' di Abraham diri, om igitai no dau do kuminaa do hilo'd bandar di kinoiyonon di Nahur di gulu po, i ponong id utara do Misopotamia. 11 Om soira' di nokorikot iyau'd hilo', om pogupuo' ngai' no dau it unta do hiri'd somok di torobong dit id soliwan di bandar. Tontok nopoddi om sosodopon no, om kaangayan no di tongoondu' kasagahai. 12 Om sambayang noddi i susuhuon diri do poingkaa, “Oi TUHAN, i Kinorohingan di Abraham, i tuan ku, tulungo' oku no om haro i' o kootuson diti karaja' ku do tadau'd baino', om igitai no kasai' i batos nu dot id tuan ku. 13 Hati oku nod doros diti torobong, i toongoyon sagahai di koongonduan do bandar diti. 14 Om moro-boros oku nondo dot id iso' diyolo' do poingkaa, 'Potimbouko' daa ino timbauk nu, om poinumon oku po,' kangku nondo. Om sumimbar nopo iyau dot, 'Na, inum no; om ino unta nu nga' ongoyon ku i' onuwai'd waig,' ka, om iri no i tondu'ddi o pilion nu do maan do sawo di Isak, i susuhuon nu. Om ondung owonsoi o miagal diri, om oilaan ku nondo do poingigit nu i' i batos nu dot id tuan ku,” ka dau. 15 A' po iyau nokopongo do sumambayang om korikot no i Robika do kisinaan do kakanan. Iyau nopo om tanak di Botuil, om i Botuil no om tanak diyo Nahur di Milka. Om i Nahur nopo om tobpinai di Abraham. 16 I Robika nopoddi nga' olumis kopio koondu', om a' po iyau notoning do kusai. Om ongoi no iyau do hiri'd torobong om ponuo' no dau do waig i kakanan dau om poguliai noddi dau. 17 Om tangkus no i susuhuon di Abraham do minongoi solowot di Robika, om boro-boros nod, “Poinumo' oku daa dot ongokooro' dino waig nu,” ka dau. 18 Om boros ka di sumandak do suminimbar, “Minum nogi', oi Tuan,” ka dau. Om olomus nopo iyau do pinopoiliu di kakanan di poinsaan dau om poinumo' no dau i susuhuon diri. 19 Om koinum poddi i susuhuon di Abraham, om boros ka di sumandak, “Ongoyon ku po onuwai'd waig ilo unta nu do gisom dot ongourudtuu,” ka dau. 20 Om olomus nopo iyau do pinopotungu di waig dit id kakanan dau do hiri'd poiinuman di unta, om tangkus po kawagu iyau do minongoi do hiri'd torobong do minongoi kawagu'd waig do gisom do nongourudtuu ngai' it unta di susuhuon diri. 21 Om poingontong diri i susuhuon di Abraham, nga' aiso' id komi dau, tu' monoinu iyau ondung pinootus kopio do TUHAN i karaja' dau'ddi ko' amu'. 22 Kongoinum ngai' poddi di sumandak it unta, om ngoyo' no di susuhuon di Abraham i tanting-anting do tamas dit agayo o gatang, om poonting-ontingo' no dau do hiri'd todung di sumandak diri, om onuo' no dau o duwo o golong do tamas dit agayo om posulungo' no dau do hiri'd lunggayan di sumandak. 23 Om boros kaddi di susuhuon di Abraham, “Sunudai oku daa ondung isai o tapa' nu. Haro i' tuu daa o tiyonon dahai diti tulun ku do hilo'd walai dau do modop do totuong do baino'?” ka dau. 24 Om boros ka di Robika, “Tapa' ku nopo om i Botuil, i tanak diyo' Nahur di Milka,” ka dau. 25 Om boros ka kawagu dau, “Haro i' o todopon dokoyu do hilo'd walai dahai, om ogumu' i' o sakot do nokoring om taakanon do tayam-tayam do hilo',” ka dau. 26 Om otud noddi i susuhuon di Abraham do suminambayang dot id TUHAN. 27 Boros ka dau, “Royohon no TUHAN, i Kinorohingan di Abraham, i tuan ku, tu' otorodok i' do mongigit di batos dau dot id tuan ku. Om winoyo' oku i' do TUHAN do ruminikot do hiti'd koworisan di tuan ku,” ka dau. 28 Om panangkus noddi i sumandak diri do minuli' do hiri'd walai di tina' dau om posusuyo' no dau o koinsanai di nongosiliu'ddi. 29-30 I Robika nopoddi om haro o tobpinai do kusai dot i Laban o ngaran. Om nokorongou i' iyau di sinusui di tadi' dau'ddi do pasal di pinoboros di susuhuon diri. Om nokokito iyau di tanting-anting do todung om i golong do poinsulung di tadi' dau. Om panangkus noddi i Laban do suminoliwan do mantad hiri'd walai do mongoi solowot di susuhuon di Abraham diri, i poingkakat do hiri'd toning di piro-piro ot unta dau do hiri'd doros di torobong. 31 Om boros ka di Laban, “Tanud doho' do mongoi do hilo'd walai. Iya' no i noonuan do TUHAN do barakat. Om kada' no undorong do hiti'd soliwan. Tu' haro no o tiyonon do nosodia' ku dokoyu do hilo'd walai ku. Om poiyanan dilo unta nu nga' haro i'!” ka dau. 32 Om salakoi noddi i susuhuon di Abraham do hiri'd walai, om ngoyo' nod Laban takaso' i ginandar dit unta, om onuwai ngai' no dau do sakot di nokoring om susumad it unta. Om ngoyo' no dau onuwai do waig i susuhuon di Abraham om koinsanai di tulun dau do maan do pongoug do lapap diyolo'. 33 Om soira' di nokosurung o takanon, om boros ka di susuhuon di Abraham, “A' oku po makan dot a' ku po koboros iti poboroson ku,” ka dau. Om boros kad Laban, “Boro-boros nopo,” ka. 34 Om timpuun noddi i susuhuon di Abraham do minoro-boros do poingkaa, “Iyoho' nopodti om susuhuon di Abraham. 35 Om iri nopo tuan ku om binarakatan kopio'd TUHAN, gisom do nosiliu iyau do tulun do kaya'. Om nonuan iyau do TUHAN do piro-piro kogumuon do dumba', om kambing, om sapi', om unta, om kaladai, om pirok, om tamas, om susuhuon do kusai om susuhuon do tongoondu'. 36 Om tontok di molohing no i Sara, i sawo di tuan ku, om paganak no iyau do kusai. Om nakatahak ngai' no di tuan ku i dapu' dot id tanak dau'ddi. 37 Om sinuhu' oku di tuan ku do minamatos do mikuwo'd suminumpa' do tumanud oku dot isuhu' dau. Boros ka dau, 'Kada' doho' pogihumai do sawo ilo tanak ku'd kusai dot id pogialatan do kosumandakan do tulun do Kanaan. 38 Suwai ko' lumomus nogi' do mongoi do hilo'd bansa' di tapa' ku, i hilo'd koobpinayan ku. Om momili' no do tondu' do maan do sawo dilo tanak ku'd kusai,' ka dau. 39 Om uhoto' ku no iyau, 'Poingkuro no dot a' no tumanud doho' i tondu'?' kangku. 40 Om boros ka dau do suminimbar, 'Suhuon id TUHAN i moloikat dau do momoyo' diya' om monulung diya' do popootus di karaja' nu. Tu' TUHAN no it umboyoon kasai' ku. Om koihum ko indo do tondu' do mantad id bansa' ku, om mantad id koobpinayan di tapa' ku, do kowinon diti tanak ku. 41 Iso' po o ralan do koidu-idu' nu do mantad id sumpa' nu'dti: Tu' ondung a' ko di koobpinayan ku romiton, do koongoi ko do hilo'd diyolo', om koidu' ko no!' ka dau. 42 Tontok di korikot oku i' do hilo'd torobong di tadau baino' om sambayang oku no dot id suang do ginawo ku do poingkaa, 'Oi TUHAN, i Kinorohingan di Abraham, i tuan ku, tulungo' oku no om haro i' o kootuson diti wonsoyon ku. 43 Diya oku no, do poingkakat do hiti'd doros diti torobong. Om soira' nopondo do haro o sumandak do mongoi sago' do hiti'd torobong, om mokiinum oku nondo dot ongokooro' di waig do hiri'd kakanan dau. 44 Om ondung kotumboyo' iyau do popoinum doho' om ongoyon dau poinumo' ilo unta ku, om maha' daa om iri no o nopili' nu do sumiliu do sawo di tanak di tuan ku,' kangku. 45 Om a' ku poddi nopupusan i sambayang ku'ddi dot id suang do ginawo ku, om korikot no i Robika do kisinaan do kakanan, om ongoi no iyau sago' do hiri'd torobong. Om boros kangku'ddi dot id dau, 'Poinumo' oku daa,' kangku. 46 Om olomus nopo iyau do pinopoiliu di kakanan do poinsaan dau om boro-boros nod, 'Na, minum nogi'; om ilo unta nu nga' ongoyon ku i' poinumo',' ka dau. Om inum oku noddi, om ngoyo' no dau poinumo' it unta ku. 47 Om uhoto' ku noddi iyau, 'Isai o ngaran do tapa' nu?' kangku. Om boros ka dau do suminimbar, 'Tapa' ku nopo om i Botuil, i tanak diyo' Nahur di Milka,' ka. Om ongoyo' ku noddi poonting-ontingo' do todung dau i tanting-anting do tamas om sulungai ku do golong o lunggayan dau. 48 Om otud oku no do suminambayang dot id TUHAN. Om rinayou ku o TUHAN, i Kinorohingan di Abraham, i tuan ku, tu' iyau no o minomoyo' doho' do ruminikot do hiti'd koobpinayan di tuan ku, gisom do nokosolowot oku do sumandak diti do pokowinan di tanak dau. 49 Nga' dinondo nopodti, om ondung orohian kou do momonsoi dot osonong dot id tuan ku, om momonsoi dit apatut dokoyu'd wonsoyon dot id dau, tu' tobpinai i' dokoyu iyau, om poboroson no dot id doho'; om sokiro dot amu', nga' poboroson i' dot id doho' om oilaan ku i' ondung poingkuro nondo o wonsoyon ku,” ka dau. 50 Om boros ka diyo' Laban di Botuil do suminimbar, “Iti nopo om mantad i' dot id TUHAN, okon i' ko' iyahai ot apatut do sumimbar diti. 51 Diya iloi Robika, potonudon nopo dokoyu ilo'. Om ilo' no o sumiliu do sawo di tanak di tuan nu do miagal di nokoboros mantad do TUHAN,” ka diyolo'. 52 Soira' di norongou di susuhuon di Abraham o miagal diri, om otud no iyau do tuminuku' dot id TUHAN. 53 Om posoliwano' noddi dau i pakayan, om i tamas, om i pirok, om patahako' no dau di Robika. Om panahak po kawagu iyau do hino ngai' it angagayo o gatang do pinopuhawang dau di tobpinai di Robika do kusai om i tina' di Robika. 54 Om akan nogiddi om inum i susuhuon di Abraham om koinsanai di tulun dau, om odop no iyolo' do hiri do totuong diri. Om kosuabon noddi, om boro-boros no i susuhuon di Abraham, “Muli' oku no daa'ndo do hilo'd tuan ku,” ka dau. 55 Nga' boros kaddi di tina' di Robika om i tobpinai dau do kusai, “Pologoson po daa i Robika do mundorong do hiti do poinsugku' dahai dot ongoturu' o tadau ko' hopod o tadau, om mamanau nogindo iyau,” ka diyolo'. 56 Nga' boros ka di susuhuon diri, “Kada' no iyahai himpagangai. Tu' nokootus no kopio'd TUHAN iti panau ku. Om pologoso' oku no do gumuli' do hilo'd tuan ku,” ka dau. 57 Om boros ka diyolo' do suminimbar, “Lohowo' toko' nogi' i Robika om oilaan toko' i' ondung nunu ka dau,” ka diyolo'. 58 Om lohowo' noddi diyolo' i Robika om uhoto' no diyolo' iyau, “Orohian ko i' do tumanud diti tulun diti?” ka diyolo'. Om boros ka di Robika do suminimbar, “Orohian i',” ka dau. 59 Om pologoso' noddi diyolo' i Robika om i mitatamong dau di molohing no, do tumanud di susuhuon di Abraham, om i tulun dau. 60 Om barakatai noddi diyolo' i Robika diti boros do poingkaa, “Maha' daa om osiliu ko, oi Robika, do tina' do jutaan o tulun, maha' daa om angaala' di sinakagon nu i kabandaran do pisangod diyolo',” ka. 61 Om pongopi-opi' no i Robika om i piro-piro o susuhuon dau do tongoondu' dit ongomulok po, om sakai noddi iyolo' dit unta. Om pamanau ngai' noddi iyolo' do tuminanud di susuhuon di Abraham. 62 I Isak nopo om nokorikot no do mantad hiri'd tana' do kowotuan, i kawaya' di torobong di roitan dot “Iyau I Mamadul Doho' “. Om minundorong diri iyau do hiri'd ponong id salatan do Kanaan. 63 Insan o sosodopon, om soliwan no iyau do mantad hiri'd kiim dau do minongoi pipanau-panau do hiri'd koumaan om kokito no dau o piro-piro ot unta do rumikot. 64 Om soira' di nokito di Robika i Isak, om lintuhun no iyau do mantad hiri'd unta dau, 65 om uhoto' no dau i susuhuon di Abraham, “Isai ilo kusai do hoodi'd dumo dilo' do rumapou dati'?” ka dau. “Ilo' no i tuan ku,” ka di susuhuon di Abraham do suminimbar. Om onuo' noddi di Robika i kulu dau om potirungo' no do rabas dau. 66 Om sunudai no di susuhuon diri i Isak do koinsanai di winonsoi dau. 67 Om angatai no di Isak i Robika do sumuang do hiri'd kiim di niyon di Sara, i tina' dau, di gulu po. Om i Robika noddi o nosiliu do sawo dau. Om osianan tomod i' i Isak di Robika, om noinsasamadan noddi kopio iyau, do mulong piya do tumongob daa iyau tu' napatai no i tina' dau.
Sinakagon di Abraham do Suwai
1 Om panansawo noddi kawagu i Abraham do tondu' do suwai, dot i Kotura o ngaran. 2 Om paganak no i Kotura i sawo dau, om i Simran, i Yoksan, i Mudan, i Midian, i Isbak om i Sua. 3 I Yoksan nopo om tapa' di Siba om i Didan, om sinakagon nopo di Didan om tulun dot Asur, om tulun do Lotus om tulun do Lium. 4 Tangaanak nopo di Midian, om i Ipa, i Ipir, i Hinok, i Abida, om i Ildaa. Koinsanai diyolo'dti om sinakagon ngai' nopo di Kotura. 5 Nga' mulong piya dot i Isak o pinotungkusan di Abraham do koinsanai di dapu' dau; 6 nga' daamot nopo di poimpasi po i Abraham, om pinuhawangan i' dau do konunu-nunuan dot ogumu' o koinsanai di tangaanak di piro-piro o sawo dau'd suwai. Om suhuo' noddi di Abraham i tangaanak diri do mundaliu do kumaa dot id kinoiyonon di hilo'd Kanaan di ponong id koulayon, om koinsodu' i' iyolo' di Isak.
Napatai om Linobong i Abraham
7-8 Om kapatai noddi i Abraham di nokolohing kopio iyau, di hatus om turu' nohopod om limo o toun dau. 9 Om lobongo' noddi diyo' Isak di Ismail i tapa' diyolo' do hiri'd luang do nuluhon, i roitan do Makpila, it id tumo di ponong hilo'd koulayon do mantad id pomogunan do Mamri, i di Ipron di gulu po. I Ipron nopo om tanak di Sohar i tulun do Hit. 10 Om iri nopo tumo'ddi nga' binoli di Abraham do mantad id tulun do Hit. Om hilo' goduwo nopo o pinamalabangan di Abraham om i Sara, i sawo dau. 11 Di nopoddi napatai i Abraham, om barakatai nod Kinorohingan i Isak, i tanak di Abraham, i poingiyon do hilo'd somok di torobong di roitan dot, “Iyau I Mamadul Doho' “.
Sinakagon di Ismail
12 I Ismail nopo om tanak diyo' Abraham di Hagar, i tondu' do Masir, i turipon di Sara diri. 13-16 Iti ngai' no i hopod om duwo o tangaanak di Ismail do poingirus nopo do mantad id kotuahan om gisom dot id komulakan: i Nibayot, i Kidar, i Adbiil, i Mibsam, i Misma, i Duma, i Masa, i Hadad, i Tima, i Yitur, i Napis om i Kidma. Om iyolo' nopoddi om nosiliu ngai' nopo do taki-aki do hopod om duwo o bansa'. Om ngaran nopo di kampung om i pinomukiiman diyolo' nga' pinasangai ngai' nopo do ngaran diyolo'. 17 Di nopoddi minatai i Ismail om hatus no om tolu nohopod om turu' o toun dau. 18 Om iri nopo i sinakagon di Ismail om poingiyon do hilo'd kinoiyonon dit id piolitan do Hawila om Sur, i ponong id koulayon do mantad id Masir, i poingkaa do hilo'd Asur. Om poinsodu' iyolo' di pinomogun-mogunan di sinakagon di Abraham do suwai.
Kinosusuon di Isau om i Yakub
19 Om iti no susui do kinowoyo-woyoo' do koposi-posion di Isak, i tanak di Abraham. 20 Apat no nohopod o toun di Isak do tontok di kinawin dau i Robika, i tadi' di Laban, i tanak di Botuil. (I Botuil nopo om tulun dot Aram do mantad id Misopotamia.) 21 I Robika nopo om a' daa maganak. Nga' sambayang noddi i Isak dot id TUHAN do bagi' di Robika, i sawo dau. Om sinimbar i' kopio'd TUHAN i sambayang dau'ddi, tu' minonontian iddi i Robika. 22 Om iri nopo i ponontianon dau nga' miapid. Om tontok di hiri pod tian i ragang, om misaap mantad no iyolo'. Om boros kaddi di Robika, “Nokuro tu' osiliu o miagal diti dot id doho'?” ka dau. Om pokiilo noddi iyau do TUHAN. 23 Om boros kad TUHAN dot id dau, “Ino nopo ponontianon nu, om duwo o bansa'd tulun, osusu ko nondo do duwo o tulun di misangod; iri nopo tadi' om okoris i' ko' i taka', om it id dotuo ot osiliu do modsusurung dit id domulok,” ka dau. 24 Om korikot noddi i maso do kosusuan di Robika. Om kosusu no iyau, om miapid i tanak do kusai goduwo nopo. 25 Iri nopo it id gulu kasawa' om aragang-ragang o kokitanan, om kulit dau nga' miagal di rasuk di kihulu, om iri noddi o kinopomungaranan dau dot i Isau. 26 Om soira' di nasawa' i tanak do koduwo om oogot tomod o palad dau do poingigit do tatad di Isau. Om iri no o kinopomungaranan dau dot i Yakub. Om tontok nopo di nosusu iyolo', om onom no nohopod o toun di Isak.
Dinagang di Isau i Gontok Dau
27 Om mayo-gayo nopoddi goduwo i tanak diri. Om i Isau nopoddi nga' nosiliu do magagasu dit otorus kopio, om orohian iyau do hilo'd gouton. Nga' i Yakub nopo om obongung-bongung koulun om orohian iyau do poundorong dot id duwalai. 28 Om poinggayo-gayo po o kosianan di Isak di Isau; tu' orohian iyau do mangakan di nintorusan dit aanu di Isau; nga' i Robika no om poinggayo-gayo po kosianan dau di Yakub. 29 Insan o tadau, di masaan di Yakub do mogonsok do kasang dit aragang, om korikot no i Isau do mantad id pinogosuan. Om louson no kopio iyau. 30 Om boros kaddi dau dot id di Yakub, “Louson oku no kopio. Onuwai oku daa diya' dot okuuri' dino kasang nu'd aragang,” ka dau. (Iri noddi o kinopomoroitan dau dot i Idom.) 31 Om boros ka di Yakub do suminimbar, “Manahak oku i' diya' diti, do patahakon nu no doho' i gontok nu di don tanak do kotuahan,” ka dau. 32 Om boros ka di Isau, “Onuon nopo i gontok ku'ddi. Tu' motingkapatai oku nodti do louson. Om nunu poddi daa o guna' ku di gontok ku'ddi,” ka dau. 33 Om boros ka di Yakub do suminimbar, “Sumpa' poo, do patahakon kopio nu doho' i gontok nu,” ka dau. Om sumpa' noddi i Isau, om patahako' no dau i gontok dau di don tanak do kotuahan dot id di Yakub. 34 Om onuwai nogiddi di Yakub i Isau do roti om nonuan dau iyau di kasang dot aragang diri. Om akan noddi om inum i Isau, om pamanau nogiddi iyau. Om iyo noddi i Isau do pinapagaan-gaan di gontok dau di don tanak do kotuahan.
Minomogun-mogun i Isak do Hilo'd Gorar
1 Om korikatai po kawagu o pomogunan diri do mononglous do miagal di nosiliu di hino po i Abraham. Om ongoi no i Isak solowot di Abimilik, i raja' do tulun do Pilistin do hilo'd Gorar, do mongoi pokibanar do miyon iyau do hilo'. 2 Om iyo pogiddi o winonsoi dau nga' nokointalang no o TUHAN dot id di Isak om minomoros dot, “Kada' ongoi do hilo'd Masir. Undorong nopo do hiti'd pomogunan diti, do miagal di pinonuhuan ku diya'. 3 Om woyoon ku indo iya' om barakatan ku iya'. Om patahakon ngai' ku nopo diya' om i sinakagon nu o koinsanai'd watas diti. Tu' bayaanon kasai' ku i' i batos di pinabatos ku dot id di Abraham, i tapa' nu. 4 Om onuan tiya' i' do sinakagon do miagal dilo rombituon do hilo'd tawan kogumu'. Om tahakon ku do sinakagon nu o koinsanai diti tana' do hiti. Om oinsanan nopondo o bansa' do hiti'd pomogunan do mokianu doho' do barakat do miagal di barakat di pinatahak ku di sinakagon nu. 5 Om barakatan ku i' iya' tu' minihuboyo-boyo' i' i Abraham doho' om tuminanud do koinsanai dit oturan om i pinonuhuan ku,” ka dau. 6 Om pomogun-mogun noddi i Isak do hilo'd Gorar. 7 Om soira' di minonguhot di Isak i tulun do hiri, ondung isai i Robika, om poboroso' no di Isak dot i Robika nopo om tadi' i' dau, om okon i' ko' sawo dau. Tu' moddosi iyau do patayon di tulun do hiri do sumolod iyolo' di Robika. Tu' i Robika nopoddi nga' olumis koondu'. 8 Om tontok dit alaid-laid i Isak do poundorong do hiri, om liga' no i raja' Abimilik do hiri'd liligaon dau, om kokito no dau i Isak do mitungub di Robika. 9 Om lohowo' noddi di Abimilik i Isak, om boro-boros no iyau do poingkaa, “Noo, nga' sawo nu i' pama i tondu'ddi! Nokuro tu' pinoboros nu do tadi' nu iyau?” ka dau. Om boros ka di Isak do suminimbar, “Osorou ku nopo nga' patayon oku no, ondung poboroson ku do sawo ku iyau,” ka dau. 10 Om boros ka di Abimilik, “Nunu kopio iti winonsoi nu dot id dahai'dti? Tu' osoonong moti' ot isai nopo diti tulun ku do mongoi dudun dilo sawo nu, om ondung haro daa kopio ot iyo'ddi, om iya' no moti' o mamabo do kasalaan dahai,” ka dau. 11 Om poinsano' ngai' noddi di Abimilik i tulun dau do poingkaa, “Isai nopo moti' o paparaa-raat di Isak ko' ilo sawo dau om patayon no,” ka dau. 12 Om pananom-tanom noddi i Isak dot id pomogunan diri, om toun iddi do nakaanu iyau do tua' dot inghatus kopiluap ko' mantad di tinanom i' dau, tu' binarakatan i' iyau do TUHAN. 13 Om muhang-ruhang nopoddi o kakayaan di Isak do gisom do nosiliu iyau do tulun di kaya' kopio. 14 Om i Isak nopoddi nga' kidumba' om kisapi' dot ogumu', om ogumu' po o susuhuon dau. Om gowoi poddi om minosol dau i tulun do Pilistin. 15 Om ngoyo' noddi di tulun do Pilistin olitai o koinsanai di torobong di Isak, i nukadan di susuhuon di Abraham, i tapa' dau di poimpasi po iyau. 16 Om boros kaddi di Abimilik dot id di Isak, “Undaliu nogi' do mantad hiti'd pomogunan dahai. Tu' okoris ko nogiddi kopio iya' ko' iyahai,” ka dau. 17 Om tongkiad noddi i Isak di pomogunan diri. Om ongoi noddi iyau pomukiim do hiri'd Rantai do Gorar. Om hilo' noddi iyau do poingiyon do piro-piro o koloido'. 18 Om ngoyo' noddi di Isak ukadai i piro-piro i torobong di nukadan di poimpasi po i Abraham, i nongoi di tulun do Pilistin olitai di napatai i Abraham. Om pungaranai noddi di Isak i piro-piro o torobong diri do ngaran di pinomungaran mantad di tapa' dau. 19 Om ongoi no i piro-piro o susuhuon di Isak pongukad do torobong do hiri'd rantai'ddi, om kokito no iyolo' do waig. 20 Nga' pogisosongkiwal no i gompomogompi' do dumba' di mantad hilo'd Gorar, om i gompomogompi' do dumba' di Isak. Om boros ka diyolo', “Dahai idti waig,” ka. Om pungaranai noddi di Isak i torobong diri do “Pisongkiwalan”. 21 Om pongukad po kawagu i susuhuon di Isak dot iso' o torobong do suwai ko' iri. Om pungaranai noddi di Isak i torobong diri do “Pisaapan”. 22 Om undaliu no iyau do mantad hiri, om pongukad po kawagu do torobong do kotolu. Om iti nopo nga' aiso' noddi o pinisongkiwalan. Om pungaranai noddi dau i torobong diri do “Kosimbayanan”. Om boros kaddi di Isak, “Baino' nopoddi om nonuan toko' nod TUHAN do kosimbayanan do poundorong dot id pomogunan diti, om kakaya' toko' no do hiti,” ka dau. 23 Om pamanau noddi i Isak om ongoi no iyau do hilo'd Borsiba. 24 Om tontok di totuong diri om intalang no o TUHAN dot id di Isak om boro-boros no do poingkaa, “Iyoho' no i Kinorohingan di Abraham, i tapa' nu. Kada' poddosi; tu' moyo-woyo' oku i' diya'. Om barakatan ku indo iya' om onuan tiya' do sinakagon dot ogumu' tu' nakabatos mantad ku no iti dot id di Abraham, i susuhuon ku,” ka dau. 25 Om pomonsoi noddi i Isak do pananaraban do porsombahan do hiri om sambayang no iyau dot id TUHAN. Om pomukiim noddi iyau do hilo', om pongukad no kawagu do torobong i piro-piro o susuhuon di Isak.
Pinibatasan di Isak om i Abimilik
26 Insan o tadau, om korikot no i Abimilik do mantad hilo'd Gorar, do miwoyo' di Ahusat i ponosihat dau, om i Pikol i boyoon do soudor dau, do minongoi solowot di Isak. 27 Om ponguhot no i Isak diyolo' do poingkaa, “Nokuro'ddi do baino' tu' mongoi ko po solowot doho', tu' di nopo di gulu po om ongotogod kou i' doho', om minonuhu' kou do minundaliu do mantad id pomogunan dokoyu,” ka dau. 28 Om boros ka diyolo' do suminimbar, “Baino' nopoddi om oilaan no dahai do moyo-moyo' o TUHAN diya', om osorou diri dahai dot osonong nogi' do momonsoi toko' do taru'. Om pokionuon dahai do sumumpa' ko, 29 dot a' ko momonsoi dot araat dot id dahai, do miagal dahai tu' a' i' minomonsoi dot araat dot id diya'. Om osonong i' iyahai dot id diya' tu' pinologos i' dahai iya' dot osimbayan do tuminongkiad. Tu' baino' nopoddi om atalang no kopio do binarakatan ko do TUHAN,” ka diyolo'. 30 Om papaharo noddi i Isak do poginakanan do maan diyolo'. Om akan noddi iyolo' om minonginum-nginum. 31 Om osuab poddi di kosuabon kawagu, om sorompori-pori nopo iyolo' do pinopoboros di batos diyolo' do mikuwo'd sumumpa' do pinopogirot di batos diri. Om boro-boros nogiddi i Isak dot id diyolo' do poingkaa, “Sumonong-sonong kou do mamanau,” ka dau. Om pogitotongkiad noddi iyolo', nga' mogiambalut no maddi iyolo'. 32 Om tontok i' do tadau'ddi do nokorikot i piro-piro o susuhuon di Isak do minongoi popoilo dau do pasal di torobong di nukadan diyolo'. Boros ka diyolo', “Haro no waig do nokito dahai,” ka. 33 Om pungaranai noddi di Isak i torobong diri do “Sumpa' “. Om iri no o kinopomungaranan do bandar diri do Borsiba.
I Sawo di Isau do Bansa'd Suwai
34 Tontok dit apat no nohopod o toun di Isau, om panansawo noddi iyau do duwo o tondu' do mantad id payat di bansa' do Hit. Ngaran nopo diyolo' om: i Yudit i tanak di Biiri, om i Basmat i tanak di Ilon. 35 Iri nopo i duwo o tondu'ddi nga' mongudipon nopo kasai' di Isak om i Robika.
Binarakatan di Isak i Yakub
1 Insan o tadau di molohing noddi kopio i Isak, om mato dau nga' a' no kokito, om lohowo' no dau i Isau i tanak dau do kusai dit id dotuo. Boros ka dau, “Ondu' “ ka. Om boros ka di Isau do suminimbar, “Hoi, nunu'ri, oi apa',” ka dau. 2 Om boros ka di Isak, “Koilo ko i' koii, do molohing oku no, om a' oku no alaid do poimpasi. 3 Om ngoyo' no ilo pana' nu, om ongoyon oku i' pogosuwai dot ongosonginan do nintorusan do hilo'd gouton. 4 Om pagansakan oku no dot awasiu dot i korohian ku do mangakan, om ongoyon indo posurungo' doho'. Om kaakan oku pondo om barakatan ku nogindo iya' di barakat di kolimpupuson no do patahakon ku diya' dot a' oku po apatai,” ka dau. 5 Iri nopo boros di Isak dot id di Isau diri, nga' norongou i' di Robika. Om soira' di nakapamanau i Isau do minongoi pagasu, 6 om boro-boros no i Robika di Yakub do poingkaa, “Norongou ku di tiinu' i tapa' nu do minoro-boros di Isau do poingkaa, 7 'Ongoyo' oku no pogosuwai dot ongosonginan do nintorusan om onsokon no, om posurungon indo doho'. Om kaakan oku nopondoddi om barakatan tiya' nogindo dot id toguang do TUHAN dot a' oku po apatai,' ka,” ka dau. 8 Om boros ka kawagu di Robika, “Iyo nopoddi oi ondu', om pokinongou no doho', om wonsoyon no iti poboroson ku diya'. 9 Ongoi no pomili' do duwo o tinan do tanak do kambing dit olomu' do hilo'd baanan toko', om onsokon ku indo dot awasiu do miagal di korohian kopio di tapa' nu. 10 Om ngoyon nu nogindo paakanai dau, om abarakatan ko i' dau dot a' po iyau apatai,” ka dau. 11 Nga' boros ka di Yakub dot id tina' dau, “A' toi kihulu i' i Isau nga' iyoho' nopo om olunau i' o kulit. 12 Om kamaon oku nopondo di tapa', om oilaan indo dau do monipu' oku dau, om okon nogindo ko' barakat ot aanu ku, nga' kousungan nogi',” ka dau. 13 Nga' boros ka di tina' dau do suminimbar, “Kada' katangkabo, oi ondu', baya' id iyoho' piya o mamabo di kousungan nu, nga' tonudon po i pinoboros ku diya', pamanau nogi' do mongoi panganu di kambing,” ka dau. 14 Om pamanau noddi i Yakub do minongoi panganu di kambing om tahako' no dau di tina' dau. Om onsoko' noddi di Robika iri do miagal di korohian di Isak. 15 Om ngoyo' noddi di Robika i rasuk di Isau dit olumis, i pinoopi' dau do hiri'd duwalai, om porosukai no dau di Yakub. 16 Om onuo' no di Robika i kulit di tanak do kambing diri om powongkoso' no do hiri'd longon di Yakub, om hiri'd liou dau dit aiso' o hulu. 17 Om patahako' nogiddi di Robika di Yakub i nonsok dau dit awasiu'ddi, om i roti di winonsoi dau. 18 Om ongoi noddi i Yakub do hiri'd tapa' dau om boro-boros no iyau dot, “Apa'!” ka. Om simbar no i Isak do poingkaa, “Hoi! Isai ko'ndo, i Isau ko ko' i Yakub?” ka dau. 19 Om boros ka di Yakub do suminimbar, “Iyoho', i Isau i tanak nu dot id dotuo; nowonsoi ku no i pinonuhuan nu doho' di tiinu'ddi. Tungag no om akanon- i' iti tikanas do nigitan ku diya', om kaakan ko pondo om barakatan oku nogi',” ka dau. 20 Om boros ka di Isak, “Poingkuro kopio ko do nakaanu do nintorusan dot iyo kopio'ddi koruhai, oi ondu'?” ka dau. Om boros ka di Yakub do suminimbar, “TUHAN i' i Kinorohingan nu, oi apa' o minonguhup doho',” ka dau. 21 Om boros ka di Isak dot id di Yakub, “Insomok daa kopio doho' om kakama' oku i' diya'. Otopot no toi kopio dot i Isau ko?” ka dau. 22 Om insomok noddi i Yakub di tapa' dau. Om kamao' no di Isak i Yakub om boros ka dau, “Tuni nopo do boros nu om miagal i' do tuni do boros di Yakub, nga' longon nu nopo om miagal i' do longon di Isau,” ka dau. 23 A' no dau notutunan i Yakub, tu' kihulu no o longon dau do miagal do longon di Isau. Nga' tontok di potibarakatan no daa di Isak i Yakub, 24 om ponguhot po kawagu iyau do poingkaa, “Otopot no toi kopio dot i Isau ko?” ka dau. “Oo,” ka di Yakub do suminimbar. 25 Om boros kaddi di Isak, “Onuwai oku dot ongokuuri' dino tikanas. Om kaakan oku pondo om barakatan ku nogi' iya',” ka dau. Om patahako' no di Yakub di Isak i tikanas diri om patahako' dau i waig dot anggur do tinumon di Isak. 26 Om boros kaddi di Isak dot id dau, “Insomok-somok doho' om tunguban oku i' diya', oi ondu',” ka dau. 27 Om di nopo di mininsomok nogi' i Yakub do mongoi tungub di tapa' dau, om kosingud no di Isak o tawau di rasuk di Isau --- om barakatai noddi di Isak i Yakub. Boros ka dau, “Osonong no kopio o kosingudan diti tanak ku, tu' miagal po do tawau di tumo di nabarakatan do TUHAN. 28 Maha' daa om onuan ko do Kinorohingan do bolobou do mantad hilo'd tawan do popoluhub do tana' nu! Om maha' daa om onuan ko dau dot ogumu' o gandum om anggur! 29 Maha' daa om osiliu do turipon nu o piro-piro o bansa', om maha' daa om minsiriba' ngai' o payat do bansa' dot id diya'. Maha' daa om iya' o momorinta' do koinsanai di koobpinayan nu, om maha' daa om motud ngai' dot id diya' i sinakagon di tina' nu. Ousung po o koinsanai'd tulun di momopol diya'; nga' maha' daa om abarakatan o koinsanai'd tulun di mamarakat diya',” ka dau.
Mokibarakat daa i Isau di Isak
30 Om kopongo noddi i Isak do papatahak di barakat dau, nga' maha' di nokotongkiad nogi' kopio i Yakub, om korikot no i Isau, i tobpinai dau, do mantad id pogosuan. 31 Om i Isau nga' minogonsok nogi' dot awasiu do paakanan dau di tapa' dau. Boros ka dau, “Oi Apa', tungag, om akanon i' iti tikanas do nonsok ku diya', om abarakatan oku indo diya',” ka dau. 32 “Isai ko?” ka di Isak do minonguhot. “Iyoho', i Isau, i tanak nu dit id dotuo,” ka dau. 33 Nga' gagarai tomod noddi i Isak, om ponguhot no iyau, “Ondung iyo'dti om isai'ddi i minogkorot di nintorusan om i pinapatahak diri dot id doho' di tiinu'? Om naakan ku noddi iri dit a' ko po nokorikot, om nakatahak ku noddi dau i barakat ku di kolimpupuson no. Om dau no moti'ddi do gisom dot alaid,” ka dau. 34 Om soira' di norongou di Isau o miagal diri, om poronggungai nopo dau do minihad, do mikuwo'd araat tomod o ginawo dau. Om boros ka dau, “Iyoho' nga' mokibarakat i' diya', oi Apa',” ka dau. 35 Nga' boros ka di Isak, “Nokoongoi no'd hiti'd doho' i tadi' nu do minonipu' doho'. Om naanu noddi dau i barakat di patahakon mantad ku daa diya',” ka dau. 36 Om boros ka di Isau, “Koinduwo nondo'dti do monipu' iyau doho'. A' no minsala' do pinungaranan iyau dot i Yakub. Tu' onuo' po dau i gontok ku di don tanak do kotuahan, om baino' noddi om onuo' po dau i barakat di doho' daa. Aiso' no kopio o barakat nu'd suwai do patahakon nu doho', oi Apa'?” ka dau. 37 Om boros ka di Isak do suminimbar, “Nosiliu ku no iyau do tuan nu, om nosiliu ngai' ku i tobpinai dau do susuhuon dau. Om nakatahak ku no dau o gandum om anggur. Om aiso' noddi o milo ku'd wonsoyon dot id diya', oi ondu',” ka dau. 38 Om a' nopo tumingkod i Isau do mokianu di tapa' dau do barakat, boros ka dau, “Iri-iri no kopio o barakat nu, oi Apa'? Barakatai oku iyoho', oi Apa'!” ka dau. Om ihad no kawagu iyau. 39 Om boros ka di Isak dot id dau, “Aiso' no o diya' do bolobou di mantad hilo'd tawan, om aiso' no o diya'd tumo dit oluhub. 40 Ino pondo gayang nu o koposi-posion nu, nga' turipon ko i' ma kasai' di tobpinai nu. Nga' soira' nopondo do sumaap ko, om koidu' ko nondo do mantad id kuasa' dau,” ka dau. 41 Om araatan nopoddi i Isau di Yakub, tu' i Yakub i' i tadi' dau o nonuan di Isak do barakat. Om boros ka no dot id suang do ginawo di Isau, “Kada' po nanu', dot a' no bo alaid dot apatai i tapa', om mogihad toko' nondo dau; om katalib pori, om patayon ku nondo i Yakub,” ka dau.
Sinuhu' di Isak i Yakub do Mongoi Hilo'd di Laban
42 Nga' soira' di norongou di Robika i soro-sorohon di Isau do wonsoyon dau, om lohowo' noddi di Robika i Yakub. Boros ka dau, “Pokinongou no, i Isau nopo moti', i tobpinai nu'ddi, om nokopomusorou no do mamatai diya', do sumuli' diya'. 43 Oi ondu', tonudo' no iti poboroson ku. Ongoi nogi' kopio do hilo'd di Laban, i tobpinai ku do hilo'd Haran. 44 Om sumugku' nopo dau do piro-piro o koloido' do gisom po dot atanus o kototogod di tobpinai nu, 45 om gisom dot olihuan ngai' dau i nongowonsoi nu dot id dau. Om monuhu' oku indo do tulun do mongoi pouli' diya' do hiti. Tu' mada' oku i' dot atagakan oku goduwo diti tanak ku dot insan-insan kopio o tadau,” ka dau. 46 Om boros ka di Robika dot id di Isak, “Apaasan oku noddi om otukanaan oku do kokito dilo tongosawo di Isau do bansa'd suwai. Om ondung manansawo pondo i Yakub do sumandak do Hit, om osonong nogi' do matai oku,” ka dau.
1 Om lohowo' no di Isak i Yakub, om suwau no iyau dau, om boro-boros noddi do poingkaa, “Kada' nogi' kopio panansawo do tondu' do Kanaan. 2 Nga' mongoi nogi' do hilo'd Misopotamia do mongoi do hiri'd walai di Botuil, i taki nu. Om kowinon nogi' ot iso' di tanak di Laban, i tamanon nu. 3 Om maha' daa om barakatan do Kinorohingan dit Agayo Kopio o Kuasa', o pisasawaan dokoyu, om onuan ko dau do tanak dot ogumu', om osiliu ko i' do taki-aki dot ogumu' o bansa'. 4 Maha' daa om barakatan ko do Kinorohingan, om iri nogi' i sinakagon nu nga' barakatan i' dau do miagal di pinamarakat dau di Abraham. Om maha' daa om asanganu nu iti tana' do kinoiyonon nu, tu' iti no o pinatahak do Kinorohingan dot id di Abraham,” ka dau. 5 Om suhuo' noddi di Isak i Yakub do kuminaa do hilo'd Misopotamia do mongoi do hilo'd di Laban, i tanak di Botuil, i tulun dot Aram diri, i tobpinai di Robika, i tina' diyo Yakub di Isau.
Minanansawo Kawagu i Isau
6 Om koilaai noddi di Isau do nabarakatan no di Isak i Yakub, om nosuhu' nod minongoi do hilo'd Misopotamia do mongoi pogihum do tondu' do hilo', do kowinon dau. Om noilaan nogi' di Isau do tontok nopo di binarakatan di Isak i Yakub om noduhan di Isak i Yakub do manansawo do tulun do Kanaan. 7 Om koilaai noddi di Isau do tuminanud i Yakub di boros di tapa' om tina' dau, om nokoongoi noddi i Yakub do hilo'd Misopotamia. 8 Om koilaai nogiddi di Isau dot a' orohian i Isak do tongoondu' do Kanaan. 9 Om ongoi noddi i Isau do hilo'd di Ismail i tanak di Abraham, om kowino' no dau i tanak di Ismail, i roitan dot i Mahalat, i tadi' di Nibayot.
Nipi di Yakub do Hilo'd Baitol
10 Om tongkiad noddi i Yakub do mantad hilo'd Borsiba om pamanau no iyau do kuminaa do hilo'd Haran. 11 Om korikot no iyau dot id iso' o kinoiyonon di tumonob o tadau, om undorong no iyau do hiri. Om lii no iyau do minodop do poulunan dot iso' o watu. 12 Om pongipi no iyau do haro nogi' o tiso' o tukad do poinsungkad do hiti'd pomogunan om poirrikot do hilo'd tawan, om okito nogi' dau do haro o piro-piro moloikat do sumalakoi om lumintuhun di tukad diri. 13 Om hino nogi' o TUHAN do poingkakat do hiri'd toning dau. Om boros ka nogi' do TUHAN, “Iyoho' no o TUHAN, i Kinorohingan di tukuon di Abraham om i Isak. Patahakon ku indo dot id diya' om id sinakagon nu iti tana' do pasagalai diti nodopon nu. 14 Kogumuon nopondo do sinakagon nu om miagal pod pupuk do tana' do hiti'd pomogunan. Om paraladon nondo diyolo' i tana' diyolo' do poingkaa ponong id koulayon, om kotonobon, om utara om salatan. Om iya' nondo om i sinakagon nu o pawayaan ku do barakat do patahakon dot id koinsanai'd bansa' do hiti'd pomogunan. 15 Ilaai no do manud-tanud oku i' kasai' diya', om hinonggo nopo o tongoyon nu nga' intirungan kasai' ku i' iya' om pogulion tiya' i' kawagu do hiti'd pomogunan diti. A' oku i' tumongkiad diya' dot a' ku po ongowonsoi i pinabatos ku diya',” ka nogi' do TUHAN. 16 Om koposik no i Yakub om boros kaddi dau, “Haro pama o TUHAN do hiti'd kinoiyonon diti! A' ku i' daa noilaan do hiti iyau! Nga' noilaan ku nogiddi do hino iyau'd hiti,” ka dau. 17 Om ooris tomod diri iyau, om boros ka dau, “Kotompurolosi i' pama kopio o kinoiyonon diti, tu' walai i' pama do Kinorohingan o hiti, om iti no pama kopio i wayaan do kumaa do hilo'd surga,” ka dau. 18 Om tungag noddi i Yakub dit osuab po di kosuabon, om onuo' no dau i watu di nulunan dau, om poudongo' no dau do hiri do maan do kopomuhandaman. Om tuntugai noddi dau do tumau do saitun ot id timpak di watu'ddi, do koilaan do nokotobilang iri do patahakon dot id Kinorohingan. 19 Om pungaranai no dau o kinoiyonon diri do Baitol. (Ngaran nopo daa di kinoiyonon diri di gulu po om Lus.) 20 Om sumpa' nogiddi i Yakub dot id TUHAN, “Ondung manud-tanud ko doho' om mongintirung ko doho' do solinaid ku do manau-panau, om manahak ko doho' do takanon om pakayan, 21 om ondung osonong-sonong oku do koguli' kawagu do hilo'd walai di tapa' ku, om iya' no ot osiliu do Kinorohingan ku. 22 Om iti nopondo watu do pinoudong ku, om osiliu nondo do tiyonon do sumambayang dot id diya', om patahakon ku diya' o sompihopod do koinsanai di patahakon nu doho',” ka dau.
Nokorikot i Yakub do Hilo'd Walai di Laban
1 Om lombus no i Yakub do minamanau do kuminaa do hilo'd pomogunan di ponong id koulayon do mantad id Kanaan. 2 Om sigog id kobontol i Yakub dot iso' o torobong do hiri'd talun, om haro o tolu o kinoiyonon do dumba' do songinggupu' do posorili' di torobong di pongonuan kasai' do waig do poinum di dumba'. Iri nopo torobong diri om sinompon do watu dit agayo. 3 Om soira' dot ongotimung ngai' i kambing om i dumba' do hiri, om ongoyon nondo di gompomogompi' do dumba' iduwo' i watu di pinonompon, om poinumon nogindo diyolo' i kambing om i dumba'. Om kongoinum ngai' pondo i kambing om i dumba' om posomponon no kawagu diyolo' i watu. 4 Om uhoto' no di Yakub i piro-piro o gompomogompi' do dumba'ddi, “Oi kongoombolutan ku, hinonggo tadon dokoyu?” ka dau. “Mantad iyahai do hilo'd Haran,” ka diyolo'. 5 “Kotutun kou i' di Laban, i tanak di Nahur?” ka di Yakub do minonguhot diyolo'. “Oo, kotutun i' iyahai,” ka diyolo'. 6 “Osonong-sonong i' iyau?” ka di Yakub. “Osonong-sonong i' bo,” ka diyolo' do suminimbar. “Nga' hoodi i Rasil dilo', i tanak dau'd tondu' do mongoi papaatod dilo kambing om dumba' dau,” ka kawagu diyolo'. 7 Om boros ka di Yakub, “Aadau po'ti, om a' po norikot o kopokurungan dilo kambing om dumba', nga' nokuro tu' a' dokoyu poinumon do dinondo ino tayam-tayam om koongoi i' kawagu kapangakan-ngakan?” ka dau. 8 Om boros ka diyolo' do suminimbar, “A' po iyahai milo do mongoi popoinum dot a' po korikot ngai' i kambing om dumba' tu' kotimung ngai' po om iduwon nogi' ilo pinonompon; om poinumon ngai' nogindo dahai iti kambing om dumba',” ka di piro-piro o gompomogompi' do dumba'. 9 Om maso po di Yakub do monokiboro-boros diyolo' nga' korikot no i Rasil do mogiwoyo-woyo' di kambing om i dumba'. 10 Om soira' di nokito di Yakub i Rasil do mogiwoyo-woyo' di kambing om i dumba' di Laban, i tamanon di Yakub, om ongoi no i Yakub do hiri'd torobong, om iduwo' no dau i watu do pinonompon, om onuwai noddi dau do waig dot inumon i kambing om i dumba' diri. 11 Om tungubai noddi di Yakub i Rasil, om ihad no iyau dot atataadan. 12 Om sunudai no di Yakub i Rasil, boros ka dau, “Iyoho' nopodti om tanak di Robika, i tadi' di tapa' nu,” ka dau. Om panangkus noddi i Rasil do minuli' do hiri'd walai dau do mongoi popoilo di tapa' dau. 13 Om soira' di nokorongou i Laban, i tapa' di Rasil, do hino i Yakub i tanak di tobpinai dau, om panangkus nopo iyau do minongoi solowot di Yakub, mikuwo'd guminapus om tuminungub dau; om angatai noddi dau i Yakub do minuli' do hiri'd walai. Om soira' di nosunudan di Yakub i Laban do koinsanai di nongosiliu dot id dau, 14 om boros kaddi di Laban, “Otopot i' moti' kopio dot iso-iso' po o raha' om tonsi to,” ka dau. Om undorong no i Yakub do hiri'd walai'ddi do sombulan o koloido'.
Kuminaraja' i Yakub dot id di Laban
15 Om boros ka di Laban dot id di Yakub, “A' i' osonong do muhup ko doho' do kumaraja' dot aiso' kopio o nunu-nunu dot itahak ku diya'; do mulong piya do kamanakon tiya'. Nga' songkuro o pokionuon nu do pomogontok dino huyan nu?” ka dau. 16 I Laban nopoddi om kianak do duwo o sumandak. Iri nopo it id dotuo om roitan dot i Lia, om iri no i tadi' dau om roitan dot i Rasil. 17 I Lia nopo om oluot o mato, nga' i Rasil noo om olumis o tinan om olumis o rabas. 18 Om muhang diri i Yakub di Rasil. Om boros kaddi dau dot id di Laban, “Kumaraja' oku po do hiti'd diya' do solinaid do turu' o toun do pokowinan nu no daa doho' i Rasil,” ka dau. 19 Om boros ka di Laban do suminimbar, “Uhang ku nogi' bo kopio dot iya' o patahakan ku dilo tanak ku ko' mantad do tahakon ku do tulun do suwai; undorong nopod hiti,” ka dau. 20 Om karaja' noddi i Yakub dot id di Laban do solinaid do turu' o toun do panganu dau di Rasil, nga' opurimanan nopo di Yakub om iyo nori do piro-piro o tadau tu' muhang no kopio iyau di Rasil. 21 Om alaid noddi om boro-boros no i Yakub dot id di Laban, “Nopupusan no i maso'ddi om pabanaro' oku nondo do mangawin dilo tanak nu,” ka dau. 22 Om papaharo noddi i Laban do poginakanan do pikowinan, om alapo' ngai' nopo dau i tulun dit ongotutunan dau. 23 Nga' totuong noddi, om okon nogi' ko' i Rasil o pinatahak di Laban dot id di Yakub, suwai ko' i Lia nogi' o pinatahak dau. Om i Lia noddi o notoning di Yakub. 24 (Om patahako' no di Laban i Silpa, i turipon dau'd tondu' dot id di Lia, do maan dau do susuhuon.) 25 Kosuabon poddi om kotutunai nogi' di Yakub dot i Lia i' i nakawin dau. Om ongoi no i Yakub solowot di Laban, om boro-boros no iyau dau, “Nokuro tu' miagal diri o winonsoi nu dot id doho'? Kuminaraja' oku pogi' nga' panganu ku di Rasil. Nga' nokuro tu' nakalan oku diya'?” ka dau. 26 Om boros ka di Laban do suminimbar, “Tadat nopod tulun do hiti om a' i' koino-ino do pokowinon it id domulok dot a' po kakawin it id dotuo. 27 Nga' andadon po do katalib o turu' o tadau do mantad di kinopikowinan dokoyu, om tahakon ku nogi' diya' i Rasil, do kaakun ko no do kumaraja' kawagu dot id doho' do solinaid do turu' o toun,” ka dau. 28 Om kookunai no di Yakub o miagal diri. Om katalib poddi i turu' o tadau do moginakan om pokowinai nogiddi di Laban di Yakub i Rasil, i tanak dau'ddi. 29 (Om patahako' no di Laban i Bilha i turipon dau'd tondu' dot id di Rasil, do maan dau do susuhuon.) 30 Om i Rasil nga' nongoi nogi' di Yakub toningo'. Nga' osian-sianan po i Yakub di Rasil ko' i Lia. Om karaja' poddi i Yakub do hiri'd di Laban do turu' kawagu o toun.
I Tangaanak di Yakub
31 Soira' di nokito do TUHAN dot a' i Yakub osianan kopio di Lia, om onuwai noddi do Kinorohingan do tanak i Lia, nga' i Rasil nopo om a' poddi kianak. 32 Om ponontian no i Lia, om kosusu no iyau, om kusai o tanak dau. Om boros ka dau, “Nokito id TUHAN iti katangaban ku; om osianan no bondo doho' i sawo ku,” ka dau. Om pungaranai no dau i tanak diri dot i Rubin. 33 Om ponontian no kawagu i Lia, om kosusu noddi iyau om kusai i'. Om boros ka dau, “Nonuan oku po kawagu'd TUHAN do tanak tu' norongou i' dau dot a' oku kinosianan,” ka dau. Om pungaranai no dau i tanak diri dot i Simion. 34 Om ponontian po kawagu i Lia, om kosusu no iyau, om kusai i'. Om boros ka dau, “Mamadul nondo kopio doho' i sawo ku tu' tolu noddi iti tanak ku'd kusai,” ka dau. Om pungaranai no dau i tanak diri dot i Liwi. 35 Om ponontian po kawagu i Lia, om kosusu no iyau, om kusai i'. Om boros ka dau, “Baino' nopo, om TUHAN no o royohon ku,” ka dau. Om pungaranai no dau i tanak diri dot i Yohuda. Om kotingkod noddi iyau do maganak.
1 Nga' aiso' i' o tanak di Rasil, gowoi poddi om osolon i Rasil di Lia, i tobpinai dau dit id dotuo'ddi. Om boros kaddi dau dot id di Yakub, “Onuwai oku kama do tanak, dot a' nopo moti' om matai oku no,” ka dau. 2 Om kotogod no i Yakub di Rasil, om boros ka dau, “Kinorohingan oku toi'dti. Tu' a' nopo papaganak diya' om Kinorohingan i',” ka dau. 3 Om boros ka di Rasil, “Diya iloi' Bilha, i turipon ku'd tondu'. Ngoyo' nopo ilo' toningo' om kapaganak i' ilo' dot onuon ku do doho'd tanak, tu' miagal podti o koonuan ku'd tanak,” ka dau. 4 Om patahako' noddi di Rasil di Yakub i Bilha. Om toningo' no di Yakub i Bilha. 5 Om ponontian noddi i Bilha om kosusu no iyau, om kusai o tanak dau. 6 Om boros ka di Rasil, “Nobian oku iddi do Kinorohingan. Om norongou i' dau i sambayang ku, gisom do nonuan oku dau dot iso' o tanak do kusai,” ka dau. Om pungaranai noddi dau i tanak diri dot i Dan. 7 Om ponontian po kawagu i Bilha, om kosusu no iyau, om kusai i'. 8 Om boros ka di Rasil, “Osusa' oku no daa kopio do monokisaap di tobpinai ku, nga' nakamanang oku iddi,” ka dau. Om pungaranai noddi dau i tanak diri dot i Naptali. 9 Om soira' di nopurimanan di Lia do nopupusan iyau do maganak om patahako' noddi dau di Yakub i Silpa, i turipon dau'd tondu'. 10 Om ponontian no i Silpa, om kosusu no iyau, om kusai i' o tanak dau. 11 Om boros kaddi di Lia, “Nountung oku no,” ka dau. Om pungaranai noddi dau i tanak diri dot i Gad. 12 Om ponontian po kawagu i Silpa, om kosusu no iyau om kusai i'. 13 Om boros ka di Lia, “Olumaag oku noddi kopio! Baino' nopondo om mamarait ngai' nopo doho' o tongoondu' dot olumaag oku,” ka dau. Om pungaranai noddi dau i tanak diri dot i Asor. 14 Di nopoddi di dongmongomot, om ongoi no i Rubin do hiri'd dumo, om kokito no iyau dot iso' o bansa' do sakot di koubat. Om igitai no dau iri om patahako' no dau di Lia, i tina' dau. Om boros ka di Rasil, “Onuwai oku daa dot ongokuuri' dino sakot do koubat, i nanu di tanak nu,” ka dau. 15 Nga' boros ka di Lia do suminimbar, “A' nu po koumbagal i suminolod do sawo ku? Tu' baino' nga' solodon nu po iti sakot di koubat do tinahak di tanak ku,” ka dau. Om boros ka di Rasil, “Ondung onuan oku daa diya' dino sakot do koubat, i naanu di tanak nu, om pologoson tiya' no do tumoning di Yakub do totuong do baino',” ka dau. 16 Om soira' di nokorikot i Yakub do mantad id dumo di dongsosodopon, om labus no i Lia do minongoi solowot dau, om boro-boros no iyau dau, “Totuong nopod baino' om tumoning ko no doho' tu' noboli tiya' nod sakot di koubat do naanu di tanak ku,” ka dau. Om toningo' noddi di Yakub i Lia do totuong diri. 17 Om simbaro' nod Kinorohingan i sambayang di Lia, om ponontian noddi iyau. Om kosusu no i Lia, om kusai o tanak dau. Om iri no o kolimo do tanak dau. 18 Om boros ka di Lia, “Nosomulian oku noddi do Kinorohingan, tu' pinatahak ku i' i Silpa, i turipon ku dot id sawo ku,” ka dau. Om pungaranai no dau i tanak dau'ddi dot i Isakar. 19 Om ponontian po kawagu i Lia, om kosusu no iyau om kusai i'. Om iri no o koonom do tanak dau. 20 Om boros kaddi dau, “Pinuhawangan oku pod Kinorohingan dot isomuli' dit osonong. Baino' nopo om korohian oku nondo kopio di sawo ku tu' onom no o tangaanak ku'd kusai,” ka dau. Om pungaranai no dau i tanak dau'ddi dot i Sibulon. 21 Alaid noddi om paganak no iyau do tondu', om pungaranai no dau dot i Dina. 22 Om kahandamai noddi do Kinorohingan i Rasil, om simbaro' nod Kinorohingan i sambayang dau, om papaganako' noddi do Kinorohingan i Rasil. 23 Om ponontian noddi i Rasil, om kosusu no iyau do tanak do kusai. Om boros kaddi dau, “Noidu' noddi do Kinorohingan i kointingayaman ku, tu' noonuan oku no dau dot iso' o tanak do kusai. 24 Om maha' daa om onuan oku po kawagu'd TUHAN do tanak do kusai,” ka dau. Om pungaranai noddi dau i tanak dau'ddi dot i Yusup.
I Pinokianu di Yakub dot id di Laban
25 Om tontok di nosusu i Rasil di tanak dau di roitan dot i Yusup om boro-boros no i Yakub dot id di Laban. Boros ka dau, “Potumboyoo' oku nondo do muli' do hilo'd pomogunan ku. 26 Om patahako' no dot id doho' i duwo o sawo ku, om i tangaanak ku di naanu ku do daamot ku do pakaraja' do hiti'd diya', om pologoso' oku no do tumongkiad. Om iya' nga' koilo i' do tuminotos oku no kopio do kuminaraja' dot id diya',” ka dau. 27 Om boros ka di Laban do suminimbar, “Pokinongoho' po iti poboroson ku. Nosunudan oku no do songulun o mogogontong dot iya' o kinapamarakatan do Kinorohingan doho'. 28 Om poboroso' nopo o gadsi' do pokionuon nu om bayaran tiya' i',” ka dau. 29 Om boros ka di Yakub do suminimbar, “Koilo ko i' do tuminotos oku no kopio do kuminaraja' do hiti'd diya', om oilaan nu do nokoinggumu' no ilo tayam-tayam nu do gisom dit iyoho' o migompi'. 30 A' i' kosongkuro o dapu' nu dit okon oku po ko' hiti, nga' baino' noddi om nokoinggumu' tomod no, om iya' nga' nabarakatan noddi do TUHAN tu' iyoho' o kinapamarakatan. Nga' baino' nopoddi om norikot no o maso ku do mogihum do doho'd koinsanangan,” ka dau. 31 Om boros ka di Laban do minonguhot, “Om nunu nondo kopio o pamagadsi' ku diya'?” ka dau. Om boros ka di Yakub do suminimbar, “Mada' oku i' do gadsi'. Nga' tumilombus oku po do momogompi' dilo tayam-tayam nu, ondung ookunan nu no iti poboroson ku: 32 Pabanaron oku daa diya' do baino' do mongoi pogontong ngai' di kambing om dumba' nu, om onuon ngai' ku indo i tanak do dumba' dit oitom o hulu. om koinsanai di tanak do kambing nu dit ongokoro' po dit oworok ko' i garu-garut. Om iri noo ot onuon ku do gadsi' ku. 33 Koimbagu nopondo om osoonong ko do mongilo ondung otulid o winonsoi ku dot id diya' ko' amu'. Tu' tontok nopondo do mongoi ko pogontong di doho'd naanu, om haro nopo o kambing dit a' oworok om it okon ko' garu-garut, ko' haro o dumba' dot a' oitom do poirolot, om oilaan nu no do pinanakau ku i' iri,” ka dau. 34 Om boros ka di Laban do suminimbar, “Ookunan ku i' ino. Miagal no di pinoboros nu o wonsoyon to,” ka dau. 35 Nga' tontok i' do tadau'ddi, do nongoi ngai' di Laban posompipio' o koinsanai di kambing do tontoluhan di kiburi-buris, om it oworok, om koinsanai di kambing do tondu' di garu-garut, om it ongkipalang dot opurak o hulu; om nongoi nogi' ngai' dau posompipio' i dumba' dit ongoitom. Om suhuo' nogiddi dau i tangaanak dau'd kusai do minomogompi'ddi. 36 Om tongkiad no iyau di Yakub do miwoyo' di kambing om i dumba' diri do kuminaa dot id kinoiyonon di kosoduwo' nopo om tolu o tadau do mamanau do mantad hiri. Om iri nopo kambing, om i dumba' di Laban di noolu-olu', om i Yakub no o minomogompi'. 37 Om ongoi no i Yakub panganu di raan dot ongotomou di kayu do roitan do hawar, om i kayu do roitan do badam, om i kayu do roitan do berangan, om onito' no dau o wookon di kulit, om kiburis diri dot opurak i raan diri. 38 Om ngoyo' no dau poiliho' i raan diri do hiri'd doburuan di kambing dau'ddi, do pinosuang di poiinuman di kambing . Hiniri pogi' dau i raan diri nga' soira' nopo do mongoi inum i kambing om mogisasabu nondo iyolo'. 39 Om soira' nopo do mogisasabu i kambing do hiri'd dotimbabaan di raan nga' garut no ko' oworok ko' kiburis o hulu di tanak di kambing. 40 Om posompipio' no di Yakub i dumba' om potimbabao' no dau di kambing di garut, om it oworok om it oitom. Om iyo noddi o ralan di Yakub do pinopoinggumu' di kambing om dumba' dau, om pinosompipi' dau iri do mantad id baanan do dumba' om kambing di Laban. 41 Om soira' nopo do mogisasabu i dumba' om i kambing dit ongokilos om ngoyon no di Yakub poiliho' i raan di nungkonitan dau'ddi do hiri'd suang di ponginuman dit id dotimbabaan di dumba' om kambing diri. 42 Nga' a' i' dau nongoi poilihai di raan diri o hiri'd dotimbabaan di tayam-tayam dit ongokugui. Om a' iddi alaid do mantad diri, om kosompipi' no i kambing om i dumba' dit ongopurak dit ongokugui do di Laban, om iri no i di Yakub om nongosompipi' it ongokilos, it ongoitom, om ongoworok om i garut. 43 Om iyo noddi o kinosili-silihan di Yakub do tulun do kaya'. Om ogumu'ddi o baanan do kambing om dumba' dau, om unta, om kaladai dau, om ogumu' o susuhuon dau.
Minogidu' i Yakub do Mantad id di Laban
1 Om korongou noddi di Yakub i tangaanak di Laban do mimboros do poingkaa, “Nangaanu ngai' no di Yakub o koinsanai di dapu' di tapa' toko'. Tadon ngai' nopo di kakayaan di Yakub om iri i dapu' di tapa' toko',” ka diyolo'. 2 Om i Laban nogi' nga' okito i' di Yakub dot a' no miagal di gulu po o kosuahon dot id dau. 3 Om boro-boros noddi o Kinorohingan dot id di Yakub do poingkaa, “Poguliai no do hilo'd pomogunan nu, om hilo'd koobpinayan nu. Om moyo-woyo' oku indo diya',” ka. 4 Om bilinai noddi di Yakub i Rasil om i Lia do mongoi solowot dau do hiri'd kinoiyonon di kambing om i dumba' dau. 5 Om boros ka di Yakub dot id diyolo' goduwo, “Opurimanan ku'ddi dot a' no miagal di gulu po o kosuaho' di tapa' dokoyu dot id doho'; nga' iri nopo Kinorohingan di tukuon di tapa' ku om moyo-woyo' kasai' i' doho'. 6 Oilaan i' dokoyu' goduwo do tuminotos oku no, om naayi-ayi' ku no o goos ku do kuminaraja' dot id tapa' dokoyu. 7 Nga' mulong piya do miagal diri nga' nudutan oku i' dau, om ongoinghopod no dau posimbano' o gadsi' ku. Nga' a' i' iyau pinologos do Kinorohingan do minomonsoi'd araat dot id doho'. 8 Tu' soira' nopod poboroson di Laban dot, 'Iri no ngai' i kambing do garu-garut o pamagadsi' ku diya',' ka; om oinsanan nopo i kambing dau do maganak do garu-garut. Om soira' di pinoboros dau dot 'Ilo' ngai' no kambing do burisan o pamagadsi' ku diya',' ka, om oinsanan nopo i kambing do burisan ngai' o tanak. 9 Naanu nod Kinorohingan i tayam-tayam di tapa' dokoyu do pinatahak dau doho',” ka dau. 10 Om boros ka kawagu dau, “Tontok di ponobuhan o kambing, om pongipi oku no do nokokito oku nogi' do kambing do tontoluhan di burisan, om i garu-garut, om i borok do manabu di kambing do tondu'. 11 Om boro-boros nogiddi o moloikat do Kinorohingan dot id doho', dot id suang di nipi ku dot, 'Yakub!' ka. Om 'Hoi,' kangku nogi' do suminimbar. 12 'Antangai pogi',' ka dau kawagu do minoro-boros, 'Koinsanai dilo kambing do tontoluhan do mogiompanabu nga burisan ngai' nopo om borok. Om wonsoyon ku pogi' o miagal diti nga' nokito ngai' ku no i winonsoi di Laban dot id diya'. 13 Iyoho' no i Kinorohingan di minintalang dot id diya' di hilo' ko'd Baitol, i hilo'd pinonuntugan nu dit iso' o watu do tumau do saitun o pinonuntug nu, tu' pinotobilang nu iri do patahakon dot id doho', om hiri nogiddi do suminumpa' ko dot id doho'. Nga' pongopi-opi' no do dinondo om gumuli' i' do hilo'd pomogunan nu mantad,' ka nogi' di moloikat di nokito ku dot id nipi ku,” ka dau. 14 Om boros ka diyo' Rasil di Lia, “Aiso' no o nunu-nunu do tungkusan dahai do mantad id tapa' dahai. 15 Iyoon po iyahai dau do sompogunan. Pinadagang iyahai dau nga' baino' noddi om naayi' ngai' no dau i gatang dahai. 16 Om iti ngai' nopo kakayaan di nongoi'd Kinorohingan do mantad id tapa' dahai om iyahai no om iti tangaanak dahai o sanganu. Om wonsoyon nopo i pinoboros do TUHAN dot id diya',” ka diyolo'. 17-18 Om pongopi-opi' noddi i Yakub do gumuli' do hilo'd tapa' dau di hilo'd pomogunan do Kanaan. Om pasakayo' ngai' no dau dot unta i sawo om i tangaanak dau, om nigitan ngai' dau i baanan do dumba' om kambing di naanu dau do hilo'd Misopotamia. 19 Tontok nopoddi om minongoi i Laban pomugar do hulu di dumba' dau. Om tontok noddi dit okon ko' hiri'd duwalai i Laban do nongoi di Rasil panakaho' i tingolig do mongintirung do walai di Laban, i tapa' dau. 20 Om nakalan di Yakub i Laban, tu' a' i' dau sinunudan do mogidu' iyau do mantad hiri. 21 Om igitai ngai' no di Yakub i dau'd konunu-nunuan, om arau-arau no do minamanau do tuminongkiad do mantad hiri. Om soborong no i Yakub di Bawang dot Iprat, om pamanau no iyau do pinakayaan ponong id konuluhanan do Giliad.
Ginusa' di Laban i Yakub
22 Tolu poddi tadau do mantad diri, om kosunudai nogi' i Laban do nokopoggidu' i Yakub. 23 Om angatai no di Laban i tulun dau do minongoi pomogusa' di Yakub do turu' o tadau do koloido', om kokosupai nogiddi diyolo' i Yakub do hilo'd konuluhanan do Giliad. 24 Nga' pongipi no i Laban di dongotuong, do ruminikot nogi' o Kinorohingan dot id dau om boro-boros no do poingkaa, “Antaan-taan no, kada' nogi' kopio pomonsoi dot araat dot id di Yakub,” ka. 25 Om nokowonsoi no di Yakub i kiim dau do hiri'd timpak di nuluhon, om powonsoyo' noddi di Laban om i tulun dau o kiim diyolo' dot id iso' o nulu-nulu do suwai do hiri'd konuluhanan diri. 26 Om boros ka di Laban dot id di Yakub, “Nokuro tu' minagakal ko doho', om tinanggayan nu po do minogidu' ilo tangaanak ku'd tondu' do miagal di naanu do mantad id pisangadan? 27 Nokuro tu' nakalan oku diya', om tongkiad tomod ko nopo dot a' pinopoilo-ilo doho'? Ondung pinopoilo ko daa doho' om atantu' no do pologoson ku i' daa iya' do tumongkiad do mikuwo'd kaarapadan om minding-sinding do mambat do tuni do tamburin om kecapi. 28 Mogot po om pinotungub oku po diya' di manangaki doho', om i tangaanak ku'd tondu' do pongintod ku diyolo'. Dongkababasug no kopio di winonsoi nu! 29 Milo oku i' daa do pokoruol diya', nga' sigog i' do korikot o Kinorohingan di tapa' nu dot id nipi ku kosodop, do pinopoinsan doho' dot a' pokoruol diya'. 30 Oilaan ku i' o koulian nu do hilo'd diya' tu' langadon ko no kopio do hilo'd pomogunan nu, nga' nokuro'ddi tu' pinanakau nu i tingolig do walai ku?” ka dau. 31 Om boros ka di Yakub do suminimbar, “A' oku pogi' minomisunud do minamanau nga' ooris oku, tu' osorou ku nopo nga' ngoyon nu dotindo kawagu ilo tangaanak nu'd tondu' do mantad id doho'. 32 Nga' ondung haro o toilaan nu do hiti'd pogialatan dahai do minanakau dino tingolig nu, om hukuman nopo iyau do kapatayon. Diya, ihumo' nopo i diya'd songonuon, om hati ngai' iti tulun ku do sumiliu'd sasi'. Om onuon ngai' nopo i diya' do songonuon,” ka dau. Nga' a' i' di Yakub noilaan dot i Rasil o minanakau di tingolig di Laban diri. 33 Om ngoyo' noddi di Laban pinsukayo' o hiri'd kiim di Yakub, om ngoyo' dau o hiri'd kiim di Lia, om hiri'd kiim di duwo o turipon do tondu', nga' a' i' dau nokito i tingolig dau. Om ongoi noddi iyau pogihum do hiri'd kiim di Rasil. 34 Nga' noongoi no di Rasil kosuang i tingolig do walai'ddi do hiri'd kantung di pakol dit unta, om nirikahanan diri dau. Om notongkop no di Laban do mogihum o hiri'd kiim di Rasil, nga' aiso' i' o nokito dau. 35 Om boros kaddi di Rasil dot id tapa' dau, “Kada' kotogod doho', oi apa', nga' a' oku no milo do mingkakat dot id toguang nu, tu' maso ku'd pomulanan,” ka dau. Om nokototos no i Laban do mingihum, nga' a' no dau nokito i tingolig do walai dau. 36 Om kotogod noddi i Yakub, boros ka dau, “Nunu kopio o nowonsoi ku dot araat?” ka dau do minuhot do mikuwo'd otogod. Om boros ka kawagu dau, “Nunu kopio ot oturan do notolibambanan ku tu' opurimanan nu do kikuasa' kopio ko daa do momogusa' doho'? 37 Baino' nopoddi tu' nongosukai ngai' nu ilo konunu-nunuan ku, om nunu noddi o konunu-nunuan do nokito nu? Poiliho' daa iri do hiti om okito i' dilo tulun nu om ilo tulun ku, om pologoson nopo iyolo' do momutus ondung isai dato ot otopot. 38 Duwo noddi nohopod o toun ku do poinsugku' diya'; om a' i' tuminingkod do gumumu' i dumba' om i kambing nu, om a' oku nakapangakan dot ongoiso' piya di kambing nu di tontoluhan do mantad id baanan nu. 39 Om soira' nopod haro ot apatai di dumba' nu do mangan do nintorusan dot orongit, om iyoho' i' ot orugi' do moningolon diri. A' oku i' insan papaatod dot id diya' di dumba' di nangapatai do numaan do nintorusan dit orongit, do momisunud diya' dot okon ko' iyoho' o nakasala'. Om iyoho' nogi' o sinuhu' nu do moningolon di nangapanakau'd tulun di dangadau ko' di dongotuong. 40 Om asaru' tomod oku dot oinggorit dot olosuan di dangadau om osogitan do dongotuong, gisom dot a' oku no koodop. 41 Iyo noddi o kinoinggoritan ku do solinaid di duwo nohopod o toun ku do poinsugku' diya'. Hopod om apat o toun ku do kuminaraja' dot id diya' do tuminalad dilo duwo tanak nu'd tondu', om onom o toun ku do tuminalad dilo tayam-tayam nu. Nga' mulong piya do miagal diri nga' inghopod nu no simbanai o gadsi' ku. 42 Ondung a' daa moyo-woyo' doho' i Kinorohingan di tukuon di taki-aki ku, i Abraham om i Isak, om laid oku no daa diya' uyungo' do mantad hilo'd walai nu om aiso' i' ot aanu-anu ku. Nga' nokito i' do Kinorohingan i kosusaan ku, om i karaja' do winonsoi ku; om tontok no di kosodop do pinoboros do Kinorohingan it otopot,” ka dau.
Pinitoruan di Yakub om i Laban
43 Om boros ka di Laban do suminimbar di Yakub, “Iti nopo tongoondu' diti om tangaanak ku i', om ilo tangaanak diyolo' nga' doho' i', om iti kambing om iti dumba' nga' iyoho' i' o sanganu. Otopot nopo kopio om koinsanai dilo tokito nu'd hiti om iyoho' ngai' i' o sanganu. Nga' aiso' no o milo ku do wonsoyon do momusus diti tangaanak ku om ilo tangaanak diyolo', 44 om posodia' oku no do monokitaru' diya'. Om kaino, momonsoi to nogi' dot iso' o kotimungon do watu di pogitimpak-timpakon do maan to do kopomuhandaman diti taru' to,” ka dau. 45 Om ongoi noddi i Yakub pogihum dot iso' o watu om poudongo' no dau do maan do kopomuhandaman di pinitoruan diyolo'. 46 Om suhuo' no dau i tulun dau do minongoi ponimung do watu do pogitimpak-timpakon dot id iso' o koiyonon. Om akan nogiddi iyolo' do hiri'd toning di watu do pinogitimpak-timpak diri. 47 Om pungaranai no di Laban i watu di pinogitimpak-timpak diri do Yigar-Sahaduta, nga' pinomungaran nopo di Yakub diri om Galid. 48 Om boros ka di Laban dot id di Yakub, “Iti nopo watu do pinogitimpak-timpak diti om maan do poposorou dato goduwo,” ka dau. Om iri no o kinopomungaranan di kinoiyonon diri do Galid. 49 Om boros ka kawagu di Laban, “Maha' daa om piantangan goduwo to'd TUHAN do solinaid do kopitongkiad kito,” ka dau. Om pungaranai no kawagu i kinoiyonon diri do Mispa. 50 Om boro-boros po kawagu i Laban do poingkaa, “Ondung raraaton nu ilo tangaanak ku, ko' manansawo ko nod tongoondu' do suwai, do mulong piya dot a' oku koilo, nga' sorohon no do poingontong i' dato o Kinorohingan. 51 Diya noti watu di pinogitimpak-timpak ku dot id piolitan to, om diya iti watu do kopomuhandaman. 52 Iti no watu do pinogitimpak-timpak om iti watu do kopomuhandaman o maan do poposorou. A' oku indo tumolibamban diti watu do pinogitimpak-timpak diti do mongoi saap diya', om iyo ko nogiddi iya' tu' a' no tumolibamban diti watu do kopomuhandaman do mongoi saap doho'. 53 Iri indo i Kinorohingan di Abraham om i Kinorohingan di Nahur o momutus dato,” ka dau. Om kopongo poddi iri, om pamatos no i Yakub do mikuwo'd suminumpa' dot id suang do ngaran do Kinorohingan di tukuon di Isak i tapa' dau, do sulungon dau i batos dau'ddi. 54 Om ponumbali' noddi iyau dot iso' o tayam-tayam, om patahako' no dau iri do numaan do porsombahan di sorobon do hiri'd nuluhon diri, om alapo' nogiddi dau i tulun dau do minongoi pangakan-ngakan. Om kangaakan poddi iyolo', om odop no iyolo' do hiri'd nuluhon diri do totuong diri. 55 Osuab poddi di kosuabon, om tungubai ngai' no di Laban i manangaki dau, om boro-boros no do minongintod di tangaanak dau do tongoondu', om pamanau nogiddi iyau do minuli'.
Minongoi i Yakub Solowot di Isau
1 Om lombus noddi i Yakub do minamanau. Om korikot noddi o piro-piro o moloikat do minongoi solowot dau. 2 Om soira' di nokito di Yakub i moloikat diri, om boros ka dau, “Hiti no o pinomukiiman do Kinorohingan,” ka dau. Om pungaranai no dau i kinoiyonon diri do Mahanaim. 3 Om ponuhu' no i Yakub do piro-piro o tulun do mongoi poporomut do habar, do mamanau do mogulu dau do kumaa id pomogunan dot Idom, do mongoi solowot di Isau, i tobpinai dau. 4 Om bilinai no di Yakub iyolo' do poingkaa, “Poboroson no doho' di Isau, i Tuan ku, o poingkaa, 'Iyoho' nopo om i Yakub, i susuhuon nu dit otorodok. Popoilo oku diya', oi Tuan ku, do solinaid nopoddi om poingiyon oku do hilo'd di Laban, om nakalaid oku'ddi do minuli' om gisom diri do nokorikot do baino'. 5 Baino' nopoddi om haro no o sapi' om kaladai, om dumba', om kambing ku, om haro nogi' o susuhuon ku. Om popoilo mantad oku diya', oi Tuan, om mogondos oku nopo dot osonong o ginawo nu,' kanto dokoyu,” ka dau. 6 Om soira' di nokoguli' i susuhuon di Yakub diri, om boros ka diyolo', “Nokosolowot no iyahai di Isau, i tobpinai nu, om baino' nopo om hilo' no iyau id tanga'd ralan do kumaa'd hiti do mongoi solowot diya'. Om minangangat iyau dot apat nahatus o tulun,” ka diyolo'. 7 Om soira' di norongou di Yakub iri om moddosi tomod diri iyau om tumangkabo iyau. Om piduwoo' noddi di Yakub i tulun dau do duwo o bohogian, om piniduwo nogi' dau i baanan do dumba', om kambing, om sapi', om unta dau. 8 Tu' poingkaa ot osorou di Yakub, “Ondung korikot i Isau do mongoi pongumang di bohogian do koiso' om osimbayan po do mogidu' i bohogian do koduwo,” ka. 9 Om sambayang noddi i Yakub do poingkaa, “Oi Kinorohingan, i tukuon di Abraham, i taki-aki ku, om Kinorohingan di tukuon di Isak i tapa' ku, pokinongoho' oku no! Iya' i', oi TUHAN, o minonuhu' doho' do gumuli' kawagu do hilo'd pomogunan ku om hilo'd koobpinayan ku. Om nakabatos ko do mongilo-ilo kosonong-sonong do koinsanai'd nunu nopo do bagi' doho'. 10 A' oku no daa osorupai do rumamit do kosianan om kotorodoko' nu di pinointalang nu dot id doho', i susuhuon nu. Tu' tontok di suminoborong oku di Bawang do Yordan om aiso' i' o nunu-nunu do nigitan ku do suwai ko' iti no sukud ku. Om baino' noddi om nokoguli' oku no do miwoyo' diti duwo o pinuruan diti. 11 Om pokionuon ku no kopio do posion oku diya' do mantad id di Isau, i tobpinai ku. Moddosi oku --- om ooris oku do korikatan nopo dau'd hiti om mongoi i' doti' saap, om mongoi pamatai ngai' dahai om i tongoondu' om i tangaanak. 12 Hondomo' no do nakabatos ko i' dot id doho' do mongilo-ilo ko kosonong-sonong do koinsanai'd nunu nopo do bagi' doho' om manahak ko doho' do sinakagon dot ogumu'. Om aiso' nondo o songulun po do kointob diri tu' miagal pondo do togis do hilo'd tisan do rahat kogumu',” ka dau. 13-15 Om koodop poddi iyolo' dot insan o tuong do hiri, om pomili' no i Yakub di tayam-tayam dau do maan dau do pomuhawang di Isau, i tobpinai dau. Om iri nopo i popuhawangon diri om: duwo nahatus o tinan do kambing do tondu' om duwo nohopod o tinan do kambing do tontoluhan, om duwo nahatus o tinan do dumba' do tondu' om duwo nohopod o dumba' do tontoluhan, om duwo nohopod o tinan do kaladai do tondu' om hopod o tinan do kaladai do tontoluhan. 16 Om bohogio' nogiddi di Yakub i baanan diri do piro-piro o pinuruan. Om pointikid-tikid di pinuruan diri om iso' no o susuhuon dau do madtamong. Om boros ka di Yakub dot id diyolo', “Pamanau kou do mogulu doho', om kada' kou pogikosup-kosup. Mositi' no do miinsodu' o piolitan dit iso' o pinuruan om i pinuruan di sumusuhut,” ka dau. 17 Om sunudai no di Yakub i susuhuon dau di koiso' do poingkaa, “Soira' nopondo do koruba' diya' i Isau i tobpinai ku'ddi, om monguhot no iyau dot, 'Isai o tuan nu? Hinonggo o pakayaan nu? Isai o sanganu dilo tayam-tayam dot id gulu-gulu nu?' ka nopo dau, 18-20 om simbaron no do poingkaa: I Yakub i susuhuon nu o sanganu'dti. Om pootodon dau iti do patahakon dot id di Isau, i tuan dau. Nga' i Yakub nopo om hilo' pod tohuri do muhut-suhut dahai, kanto,” ka dau. Om iyo nogiddi o pinomisunud di Yakub di susuhuon dau di koduwo, om i kotolu, om koinsanai di tulun di sinuhu' dau do madtamong di tayam-tayam diri. Tu' poingkaa ot osorou di Yakub, “Oinsasamadan ku nondo o ginawo di Isau do kaanu iyau diti pomuhawang ku, om soira' nopondo do kosolowot iyau doho' om mangampun indo i Isau doho',” ka. 21 Om poguluono' noddi di Yakub i pomuhawang dau di Isau, nga' i Yakub nopo om minodop po do hiri'd pinomukiiman dau do totuong diri.
Minonokigomos i Yakub do hilo'd Poniol
22 Om tontok i' do totuong diri om tungag no i Yakub, om angatai no goduwo dau i sawo dau, om i duwo tondu' di panakasawo dau, om i tangaanak dau di hopod om iso', do suminoborong di Bawang do Yabok. 23 Om soira' di nokosoborong dau iyolo' do hiri'd soborong, om posoborongo' nogiddi dau o koinsanai di dapu' dau. 24 Nga' iyau nopo om minundorong i' do hiri'd pinomukiiman dau. Nga' bontol no dau o songulun o kusai om tabpaai no iyau di tulun diri, om gomoso' no iyau do gisom dot oruhai nod nosuaban. 25 Om kopurimanai nopoddi di tulun diri dot a' iyau kamanang dot id pigamasan diri, om bobogo' no dau o guas do poo di Yakub, om kokinsol nopoddi o langaban do poo di Yakub. 26 Om boros kaddi di tulun diri, “Poiduwo' oku tu' oruhai noddi dot anawau,” ka dau. Om boros ka di Yakub do suminimbar, “A' ku po iya' poiduwon dot a' oku po diya' abarakatan,” ka dau. 27 Om ponguhot no i tulun, “Isai o ngaran nu,” ka dau. “I Yakub,” ka di Yakub do suminimbar. 28 Om boros ka di tulun, “Okon nondo ko' i Yakub o ngaran nu. Tu' nokoponokigomos ko no do Kinorohingan om tulun, om nakamanang ko i'. Om iri noddi o kopomungaranan diya' dot i Israil,” ka dau. 29 Om boros ka di Yakub, “Sunudai oku daa do ngaran nu,” ka dau. Nga' boros ka di tulun diri do suminimbar, “A' i' minog do koilo ko do ngaran ku,” ka dau. Om barakatai noddi dau i Yakub. 30 Om boros kaddi di Yakub, “Nokotimbaba' oku no kopio do Kinorohingan. Nga' poimpasi kasai' oku i',” ka dau. Om pungaranai noddi dau i kinoiyonon diri do Poniol. 31 Tontok di nokoulai no o tadau om tongkiad noddi i Yakub do mantad hilo'd Poniol. Om kimpo' diri i Yakub tu' nokinsol no o langaban do poo dau. 32 Om gisom piya'ddi do baino' nga' a' no mangakan do tonsi do poo do nintorusan o sinakagon di Israil, tu' nobobog i' o puun do poo di Yakub.
Nokopisolowot i Yakub di Isau
1 Om kokito noddi di Yakub i Isau do hiri pod sodu' do miwoyo' di tulun dau dot apat nahatus o kogumuo', om pogitongkiad-kiado' noddi di Yakub i tangaanak dau, do suwai o hiri'd di Lia om suwai o hiri'd di Rasil om suwai o hiri'd duwo o tondu' di panakasawo dau. 2 Om poguluono' noddi dau i duwo o tondu' di panakasawo dau'ddi do mitanud di tangaanak diyolo', om posusuhutono' no dau i Lia om i tangaanak dau, om i Rasil nogiddi di Yusup o hiri'd tohuri kopio. 3 Om pogulu noddi i Yakub diyolo', om otud no iyau om tuku' no dot inturu' di mirrarapou iyau di Isau, i tobpinai dau. 4 Nga' panangkus nopo i Isau do minongoi rapou di Yakub, om gopuso' no di Isau i Yakub om tungubai no dau iyau. Om sopiihad-ihad nopoddi goduwo iyolo'. 5 Om soira' di minontong i Isau dot id posorili' dau, om kokito no dau i tongoondu' om i tangaanak, om ponguhot noddi iyau, “Isai ngai' iti tulun do tuminanud diya'dti?” ka dau. Om boros ka di Yakub do suminimbar, “Iyolo' nopo'llo' oi Tuan ku, om tangaanak ku. Tu' pinointalang i' do Kinorohingan o kosianan dau om nonuan oku'ddi dau diti tangaanak diti,” ka dau. 6 Om ongoi no rapou di Isau i duwo o tondu' di panakasawo di Yakub do miwoyo' di tangaanak diyolo' om otud no iyolo' do tuminuku'. 7 Om susuhut no i Lia do miwoyo' di tangaanak dau, om id tohuri noddi kopio do minongoi rapou di Isau om i Yusup om i Rasil, om otud no iyolo' do tuminuku'. 8 Om ponguhot noddi i Isau, boros ka dau, “Nunu o paantakan nu di piro-piro o pinuruan di mogiwoyo-woyo' di norubaan ku di tiinu'ddi?” ka dau. Om boros ka di Yakub do suminimbar, “Iri nopoddi om maan ku do poposonong do ginawo nu,” ka dau. 9 Om boros ka di Isau, “A' no minog do manahak doho', oi adi', tu' kabagal ku no i doho'ddi,” ka dau. 10 Om boros ka di Yakub, “A' id tiyo'ndo iyo. Ondung nokosonong o ginawo nu dot id doho' om romito' no iti pomuhawang ku diya'. Tu' iyoho' nopo do nokokito do rabas nu om miagal nopo do nokokito oku'd rabas do Kinorohingan tu' osuwau kopio ko i' doho'. 11 Om pokionuon ku no do romiton nu i popuhawangon ku diya' di nongoigitan ku do patahakon ku diya'. Opuhawang i' o Kinorohingan dot id doho' om minanahak iyau doho' do koinsanai di korohian ku,” ka dau. Om posonsogo' i' di Yakub do papatahak iri, om romito' iddi di Isau i pinopuhawang di Yakub diri. 12 Om boros kaddi di Isau, “Kainou sumodia' do mamanau, om iyoho' nondo o mogulu do mamanau,” ka dau. 13 Om boros ka di Yakub do suminimbar, “Osonong i' daa no, nga' oilaan nu i' dot a' i' ongokoris no iti tangaanak, om ongoyon ku po kanogi' antangai i tayam-tayam di sumusu po. Tu' ondung ara-rahon do mamanau, om sangadau nopo nga' oinsanan nod angapatai ilo baanan. 14 Nga' osonong nogi' do mogulu-gulu ko nopo do mamanau, om momilogo-logot oku i' do sumusuhut. Om tumotos oku i' daa iyo do mamanau do miwoyo' dilo tayam-tayam, om ilo tangaanak ku, om kokosup oku po daa'ndo diya' do hilo'd Idom,” ka dau. 15 Om boros ka di Isau, “Iyo nopondo om poundorongon ku o piro-piro dilo tulun ku do tumanud diya',” ka dau. Nga' boros ka di Yakub do suminimbar, “A' piya minog dino, tu' orohian oku no do pinoposonong do ginawo nu'ddi,” ka dau. 16 Om pamanau noddi i Isau do tontok do tadau'ddi do guminuli' do hilo'd Idom. 17 Nga' i Yakub nopo om kuminaa po do hilo'd Sukot. Om hilo' no o pinamansayan dau do walai do tiyonon dau, om minomonsoi nogi' iyau do polungungan di tayam-tayam dau. Om iri no o kinopomungaranan di kinoiyonon diri do Sukot. 18 Tontok di minamanau i Yakub do guminuli' do mantad hilo'd Misopotamia om aiso' i' o kinosusaan dau do gisom do nokorikot do hilo'd bandar do Sikim, i hilo'd pomogunan do Kanaan. Om powonsoyo' noddi dau o kiim dau do hiri'd ponguma-ngumaan dot id somok do bandar do Sikim. 19 Om bolio' noddi di Yakub i kinoiyonon di pinomukiiman dau do mantad id sinakagon di Hamor, i tapa' di Sikim. Om gatang nopoddi nga' hatus o kaping do pirok. 20 Om pomonsoi noddi i Yakub dot iso' o pananaraban do porsombahan do hilo', om pungaranai no dau do “Kinorohingan, i Kinorohingan dot Israil”.
Kinasou i Dina
1 Insan o tadau, om ongoi no i Dina, i tanak diyo' Yakub di Lia do tondu', ponongkoduwo do hiri'd tongoondu' do Kanaan. 2 Nga' tontok di nokokito i Sikim di Dina om ngoyo' no dau tanggayai i Dina, om kosoho' no dau. I Sikim nopoddi om tanak di Hamor, i tulun do Howi, i raja' dot id pomogunan diri. 3 Nga' kokito nopoddi dau dot olumis koondu' i Dina, om muhang diri iyau dau. Om monotos daa'ddi iyau do popouhang di Dina dau. 4 Om sunudai no di Sikim i tapa' dau do poingkaa, “Ngoyon daa doho' i sumandak diri do maan ku'd sawo ku,” ka dau. 5 Om koilaai no di Yakub do nongoi kosoho' i tanak dau do tondu'. Nga' tontok nopoddi om hiri pod dumo i tangaanak dau'd kusai do papaakan-akan di tayam-tayam dau, om aiso' poddi o nunu-nunu do winonsoi dau dit a' po iyolo' nokongorikot. 6 Om ongoi no i Hamor, i tapa' di Sikim, boro-boros di Yakub, 7 do tontok di mogionguli' no i tangaanak di Yakub do mantad id dumo. Om soira' di nokorongou iyolo' di nosiliu do miagal diri om nongkotigowo tomod diri iyolo', om ongotogod tomod iyolo' di Sikim, tu' minomonsoi i' iyau do miagal kopio'ddi. Om minongindaraat iyau di tulun dot Israil, tu' minongoi i' iyau pangasou di tanak di Yakub do tondu'. 8 Om boros ka di Hamor dot id di Yakub, “Naayi-ayi' no kopio o ginawo di tanak ku do muhang di tanak nu. Om pokionuon ku no daa diya' do pologoson nu i tanak ku do mangawin di tanak nu. 9 Kainou momonsoi do kopiokunan do koino-ino nondo do mikawin i bansa' nu om i bansa' ku. 10 Om iya' nga' koino-ino nondo do mundorong do hiti'd pomogunan dahai do poinsugku' dahai do hinonggo nopo o korohian dokoyu do mundorong. Om osimbayan ko nondo do dumagang-dagang om osimbayan do mongindapu',” ka dau. 11 Om boro-boros no i Sikim di tapa' di Dina om i tobpinai dau do tongokusai, “Patahakon no daa dokoyu doho' iti pokionuon ku. Om patahakon ku i' iyoho' o nunu nopo o dokoyu'd pokionuon. 12 Om poboroson nopo dokoyu doho' ondung nunu o korohian dokoyu do popuhawangon ku dokoyu. Om tontuon no ondung songkuro o pongopung di tondu', om patahakon ku i' o nunu nopo i pokionuon dokoyu, dot uhang po daa dokoyu do kowinon ku i tondu'ddi,” ka dau. 13 Om pongudut noddi i tangaanak di Yakub dot id di Sikim om id di Hamor i tapa' dau, tu' kinasou i' di Sikim i Dina, i tadi' diyolo'ddi. 14 Boros ka diyolo' dot id duwo o tulun diri, “Ondung pologoson dahai ilo tadi' dahai do kowinon do tulun dit a' nosunatan om ointingayam no iyahai. 15 Nga' uhang i' dahai ondung kaakun kou no do tumanud diti: Iri no tu' mositi' no do sunatan ngai' o kusai dot id pogialatan dokoyu do miagal dahai tu' sinunatan. 16 Om owonsoi po dokoyu o miagal diri om kaakun nogi' iyahai di pinoboros dokoyu'ddi do koino-ino o bansa' toko' do mogikakawin. Om mundorong nondo iyahai do hiti'd dokoyu. Om osiliu toko' nondo dot iso-iso' o bansa'. 17 Nga' ondung a' kou tumanud diri, om mada' kou no do sunatan, om ongoyon i' kawagu dahai i Dina om mundaliu nogindo iyahai,” ka diyolo'. 18 Om koinsanai di pinoboros diri om osonong i' dot osorou di Sikim om i Hamor. 19 Om olomus nopoddi i Sikim do minomonsoi do miagal di pinoboros diri, tu' aayi-ayi' no kopio o ginawo dau do muhang di Dina. Om i Sikim no i pusohon kopio dot id suang do sompiiyon dau. 20 Om ongoi no i Hamor om i Sikim do hiri'd tiiyonon do tulun do tumimung, i hiri'd wawayaan do bandar. Om boro-boros no iyolo' di tulun do hiri'd suang di bandar diyolo' do poingkaa, 21 “Iri nopo tulun dot Israil om ongosuwau kopio. Om pologoson nopo iyolo' do mundorong do hiti'd pomogunan toko', do sumugku' dati' do momogun-mogun om pologoson dot osimbayan do mimpanau do honggo nopo o ngoyon. Tu' agayo po iti tana' toko' do hiti piya iyolo'. Om kapanansawo toko' indo do tongoondu' diyolo', om iyolo' nga' pologoson nopo do manansawo do tongoondu' toko'. 22 Nga' osunatan ngai' po i tongokusai toko' do miagal diyolo', om kaakun nogi' iyolo' do mundorong do hiti'd dati', om sumagalai do bansa' toko'. 23 Om koimbagu nopondo om iri nopo i tayam-tayam diyolo' om koinsanai di dapu' diyolo' om asanganu toko' nondo. Iyo nopoddi om pogiokunai toko' no i pokionuon diyolo', om koundorong i' iyolo'd hiti do poinsugku' dati',” ka diyolo'. 24 Om koinsanai nopoddi o tulun do hiri'd bandar diri do tuminanud di pinoboros di Hamor om i Sikim, om sunatai ngai' nopoddi i tongokusai. 25 Tolu noddi o tadau do mantad diri, dit ongorualan po ngai' i tongokusai do sinunatan, om pamanau no o duwo di tangaanak di Yakub, i Simion om i Liwi, i tobpinai di Dina dot id dotuo, om abil no goduwo iyolo' do gayang, om pomolisok-lisok noddi iyolo' do suminuang di bandar. Om patayo' noddi diyolo' o koinsanai di tongokusai do hiri. 26 Om i Hamor om i Sikim nga' pinatai nogi' diyolo'. Om ngoyo' nogiddi diyolo' i Dina do mantad hiri'd walai di Sikim, om uli' noddi iyolo'. 27 Om katalib poddi i kinapamatayan diri, om ongoi no i tangaanak di Yakub do suwai do hiri'd bandar do minongoi pinganu di konunu-nunuan, tu' sumuli' iyolo' di kinointingayaman di tobpinai diyolo'. 28 Om onuo' ngai' nopo diyolo' i baanan do kambing, om dumba' om sapi', om kaladai, om koinsanai di nunu nopo do hiri'd bandar diri om i hiri'd koumaan. 29 Om nanu ngai' nogi' diyolo' it angagayo o gatang, om tinanggayan diyolo' o koinsanai di tongoondu' om i tangaanak, om nanu ngai' diyolo' o nunu nopo i hiri'd suang do walai dot id bandar diri. 30 Om boros kaddi di Yakub dot id di Simion om id di Liwi, “Iyokoyu no o poporikot do kosusaan dot id doho'. Tu' baino' nopondo om ongotogod ngai' nopo doho' o tulun do Kanaan, om tulun do Piris, om koinsanai di tulun do hiti. Om a' i' ogumu' no o tulun toko'. Om ondung mogiaamung iyolo' do sumaap om manangod doho', om oinsanan no o sompiiyon toko' dot angapatai,” ka dau. 31 Nga' boros ka di tangaanak dau, “A' no iyahai kotoron do popologos dilo tobpinai dahai do maan poiyoo' do tondu' do sundal di lumilung,” ka diyolo'.
Minongoi i Yakub do Hilo'd Baitol
1 Insan o tadau om boro-boros no o Kinorohingan dot id di Yakub do poingkaa, “Iyoho' no i Kinorohingan di minintalang dot id diya' do tontok di minogidu' ko do mantad id di Isau, i tobpinai nu. Ongoi no kopio'd oruhai do hilo'd Baitol, om mundorong i' do hilo'. Om momonsoi no dot iso' o pananaraban do porsombahan dot id doho',” ka. 2-3 Om boro-boros noddi i Yakub di sompiiyon dau om id koinsanai di tulun do manud-tanud dau. Boros ka dau, “Mamanau toko' nondo do mantad hiti om kumaa toko' do hilo'd Baitol. Om hilo' no o pamansayan ku do pananaraban do porsombahan di dong Kinorohingan, i minonguhup doho' do tontok dit id suang oku do kosusaan om i miniwoyo-woyo' doho' do hinonggo nopo o nongoi ku. Iyo nopoddi, om taamai ngai' no dokoyu i tininganak di nigitan dokoyu; om lidangan no o tinan dokoyu, om manampakai no do pakayan dot opulang,” ka. 4 Om patahako' ngai' noddi diyolo' di Yakub o koinsanai di tininganak di nigitan diyolo', om i tanting-anting di poinganting diyolo'. Om lobongo' noddi di Yakub iri do hiri'd tana', it id dolungungan di kayu dot agayo, i hiri'd somok di bandar do Sikim. 5 Om tontok di minamanau i Yakub om i tangaanak dau, om moddosi ngai' nopo i tulun do hiri'd kabandaran dit id posorili' do kinoiyonon diri, gisom dot a' noddi iyolo' minomogusa' di Yakub om i tangaanak dau. 6 Om korikot noddi i Yakub om i kinoruhangan dau do hilo'd tana' do Kanaan, do hiri'd bandar do Baitol, i roitan do Lus di gulu po. 7 Om pomonsoi no i Yakub do pananaraban do porsombahan do hiri, om pungaranai noddi dau i kinoiyonon diri do “Kinorohingan do hilo'd Baitol”, tu' hilo' no o Kinorohingan do minintalang dot id di Yakub do tontok di poggidu' iyau do mantad id tobpinai dau. 8 Om hilo' nogi' o kinapatayon di Dibora, i mitatamong di Robika, om lobongo' no iyau do hiri'd dolungungan di kayu dot agayo, i ponong id salatan do bandar diri. Om iri no o kinopomungaranan di kayu'ddi do “Kayu di Pogihadan”.
Binarakatan do Kinorohingan i Yakub
9 Om soira' di nokoguli' i Yakub do mantad hilo'd Misopotamia, om intalang po kawagu o Kinorohingan dot id dau, om barakatai no dau iyau. 10 Om boro-boros no o Kinorohingan dot id di Yakub do poingkaa, “Okon noddi ko' i Yakub o ngaran nu, nga' i Israil nondo o ngaran nu,” ka. Om iyo noddi o Kinorohingan do minomungaran di Yakub dot i Israil. 11 Om boro-boros noddi o Kinorohingan dot id di Yakub do poingkaa, “Iyoho' no o Kinorohingan dit Agayo Kopio o Kuasa'. Paganak no dot ogumu'! Om sinakagon nu nopondo om osiliu do mogisuayan o bansa' om osiliu ko do taki-aki do piro-piro o raja'. 12 Om i pomogunan di pinatahak ku di Abraham om i Isak, nga' patahakon ku nogindo diya' om i sinakagon nu,” ka. 13 Om tongkiad noddi o Kinorohingan do mantad hiri'd di Yakub. 14 Om hiri nopod kinoiyonon do Kinorohingan do minoro-boros dot id di Yakub om pinoudangan diri di Yakub dot iso' o watu do maan do kopomuhandaman. Om tuntugai noddi dau do waig dot anggur om tumau do saitun o hiri'd timpak di watu'ddi do potobilang diri do patahakon dot id Kinorohingan. 15 Om pungaranai no dau o kinoiyonon diri do “Baitol”.
Napatai i Rasil
16 Om tongkiad no i Yakub om i kinoruhangan dau do mantad hilo'd Baitol. Om tontok dit osodu' po iyolo' do hilo'd Iprata, om korikot no o kosusuan di Rasil, nga' osusa' kopio iyau do mogkosusu. 17 Om soira' di nokototos noddi kopio o koruolo' do tian dau, om boro-boros no i bidan dot id di Rasil, “Kada' kooris oi Rasil, tu' kusai po iti tanak nu,” ka dau. 18 Nga' tontok di motingkapatai no i Rasil, dit oruhai nod oputut o pinuhobo dau, om pungaranai no dau i tanak dau'ddi dot i Bin-Oni, nga' pinomungaran nopo di Yakub di tanak diri om i Binyamin. 19 Om di nopoddi napatai i Rasil, om lobongo' no iyau do hiri'd tisan di ralan do kumaa do hilo'd Iprata, i roitan do Baitlahim do baino'. 20 Om poudangai no di Yakub do watu o hiri'd pinamalabangan di Rasil do maan do kopomuhandaman. Om gisom piya'd baino' nga' poingudong kasai' po i watu do hiri. 21 Om lombus noddi i Yakub do minamanau, om powonsoyo' no dau i kiim dau do hiri'd dosompopingan di walai dot akawas do hilo'd Idir.
I Tangaanak di Yakub
22 Om hiri nod kinoiyonon diri do nongoi di Rubin duduno' i Bilha, i ponokasawo di tapa' dau, nga' koilaai noddi di Yakub i winonsoi di Rubin diri, om kotogod tomod no iyau. I Yakub nopoddi om kianak do hopod om duwo o tongokusai. 23 Tangaanak nopo di Lia do kusai om i Rubin (i tanak di Yakub dot id dotuo) om i Simion, i Liwi, i Yohuda, i Isakar, om i Sibulon. 24 Om tangaanak no di Rasil om i Yusup om i Binyamin. 25 Om tangaanak no di Bilha i turipon di Rasil, om i Dan om i Naptali. 26 Om tangaanak no di Silpa i turipon di Lia, om i Gad om i Asor. Om hilo' ngai' nopod Misopotamia o kinosusuon di tangaanak diri.
Napatai i Isak
27 Om ongoi noddi i Yakub do hiri'd di Isak i tapa' dau, i poundorong do hilo'd Mamri, it id somok do Hibron, i kinoiyonon di Abraham i tapa' di Isak, i taki di Yakub. 28-29 Om kapatai noddi i Isak di molohing kopio iyau, di hatus om walu' nohopod o toun dau. Om ngoyo' no diyo' Isau di Yakub, i tangaanak di Isak diri, lobongo' i Isak.
Sinakagon di Isau
1 Iti ngai' no o sinakagon di Isau, i rinoitan nogi' dot i Idom. 2 Om panansawo no i Isau do tongoondu' do Kanaan: i Ada i tanak di Ilon, i tulun do Hit; om i Oholibama, i tanak do tondu' di Ana, i tanak do kusai, di Sibion, i tulun do Howi; 3 om i Basmat, i tanak di Ismail, i tadi' di Nibayot. 4 Om paganak no i Ada om i Ilipas; om paganak no i Basmat om i Rohuil; 5 om paganak no i Oholibama om i Yous, i Yailam om i Kora. Om hilo' ngai' nopod pomogunan do Kanaan o kinosusuon di tangaanak diri. 6 Om angatai noddi di Isau o koinsanai di sawo dau om i tangaanak dau do kusai om tondu', om koinsanai di tulun do hiri'd walai dau, om igitai dau o koinsanai di tayam-tayam dau, om i dapu' di naanu dau do hilo'd pomogunan do Kanaan, om tongkiad noddi iyau di Yakub, i tadi' dau, om ongoi no iyau dot id pomogunan do suwai. 7 Kinotongkiadan nopo di Isau do mantad id di Yakub nga' a' koumbagal do pangakan-ngakanan di tayam-tayam diyolo', i pomogunan di kinoiyonon diyolo' tu' sopigumuan kopio iyolo' do tayam-tayam. 8 Om pomogun-mogun noddi i Isau do hilo'd konuluhanan dot Idom. 9 Iti no o sinakagon di Isau, i taki-aki do tulun dot Idom. 10-13 Om paganak no i sawo di Isau, i roitan dot i Ada dot iso' o tanak do kusai, dot i Ilipas o ngaran. I Ilipas nopo om kianak do limo o kusai: i Toman, i Omar, i Sipo, i Gaitam om i Kinas. Om hiro po o sawo di Ilipas do suwai dot i Timna o ngaran. Om paganak no iyau dot iso' o kusai, dot i Amalik o ngaran. Om iri no sawo di Isau di roitan dot i Basmat om kianak dot iso' o kusai, dot i Rohuil o ngaran. Om i Rohuil no om kianak dot apat o kusai: i Nahat, i Sira, i Saima om i Misa. 14 Iri nopo sawo di Isau, i roitan dot i Oholibama, i tanak do tondu' di Ana, i tanak do kusai, di Sibion. om kianak do tolu o kusai: i Yous, i Yailam om i Kora. 15 Iti ngai' no o sinakagon di Isau: I Ilipas, i tanak di Isau dot id dotuo, om iyau no o taki-aki do koinsanai do payat diti: Toman, Omar, Sipo, Kinas, 16 Kora, Gaitam, om Amalik. Iyolo' ngai' no o sinakagon di Ada, i sawo di Isau. 17 Om i Rohuil no, i tanak di Isau, o taki-aki do koinsanai do payat diti: Nahat, Sira, Saima, om Misa. Iyolo' ngai' no o sinakagon di Basmat, i sawo di Isau. 18 Iti ngai' nopo payat diti om sinakagon di Isau do mantad id sawo dau di roitan dot i Oholibama, i tanak di Ana: Yous, Yailam, om Kora. 19 Om oinsanan nopo i payat diri do sinakagon di Isau.
Sinakagon di Soir
20-21 Iri nopo tulun mantad do hilo'd pomogunan dot Idom om nabahagi' dot id piro-piro o payat do sinakagon di Soir, i tulun do Hori. Iti ngai' no i payat diri: Lotan, Siobal, Sibion, Ana, Dision, Isir om Disian. 22 I Lotan nopo om taki-aki di pinuruan do sompiiyon do Hori om Himan. (Om haro po o tobpinai di Lotan do tondu' dot I Timna o ngaran.) 23 I Sobal nopo om taki-aki di pinuruan do sompiiyon dot: Alwan, Manahat, Ibal, Sipo om Onam. 24 I Sibion nopo om kianak do duwo o kusai, i Aya om i ana. (I Ana no i nokobontol do piro-piro o tudan do waig dit alasu' do hilo'd tana' do kowotuan, do tontok di momogompi' iyau di kaladai di tapa' dau.) 25-26 I Ana nopo om tapa' di Dision. Om i Dision nopo om taki-aki do pinuruan do sompiiyon dot: Himdan, Isban, Yitran om Kiran. Om haro po o tanak di Ana do tondu' dot i Oholibama o ngaran. 27 I Isir nopo om taki-aki do pinuruan do sompiiyon dot: Bilhan, Saawan om Akan. 28 I Disian nopo om taki-aki do pinuruan do sompiiyon dot: Us om Aran. 29-30 Iti ngai' no o payat di Hori do hilo'd pomogunan dot Idom: Lotan, Siobal, Sibion, Ana, Dision, Isir om Disian.
I Piro-Piro Raja' dot Idom
31-39 Iti ngai' no o raja' do minogisowoli-woli do minomorinta' do pomogunan dot Idom, dit a' po nokoumbal do haro o raja' do momorinta' do hilo'd Israil: I Bila, i tanak di Bior, i mantad hilo'd Dinhaba. I Yobab, i tanak di Sira, i mantad hilo'd Bosra. I Husam, i mantad hilo'd watas do tulun do Toman. I Hadad, i tanak di Bidad, i mantad hilo'd Awit (iyau no i minangala' do tulun do Midian dit id pisangadan do hilo'd pomogunan do Muab). I Samla, i mantad hilo'd Masrika. I Saul, i mantad hilo'd Rihobot, it id tisan do bawang. I Baal-Hanan, i tanak di Akbor. I Hadar, i mantad hilo'd Pahu (sawo nopo dau nga' i Mihitabiil i tanak di Matrid, i manangaki di Misahab). 40-43 I Isau nopo om taki-aki diti piro-piro o payat dot Idom diti: Timna, Alwa, Yitit, Oholibama, Ila, Pinin, Kinas, Toman, Mibsar, Magdiol om Iram. Om oinsanan nopo i payat diri do minomungaran di watas do kinoiyonon diyolo' do pinasangai di ngaran do payat diyolo'.
I Yusup om i Tongotobpinai Dau
1 Om pomogun-mogun no i Yakub do hilo'd pomogunan do Kanaan, i pinomogunan di tapa' dau. 2 Om poingkaa no o kinowoyo-woyoo' do koposi-posion di sompiiyon di Yakub. I Yusup nopo i tanak di Yakub di tanakwagu no, om hopod no om turu' o toun dau. Om momogompi' iyau di baanan do kambing om dumba' do miwoyo' di piro-piro o tobpinai dau'd kusai, i tangaanak di Bilha om i Silpa, i duwo tondu' do ponokasawo di tapa' dau. Om pinosunud diri di Yusup di tapa' dau i pingwonsoyon di piro-piro o tobpinai dau dit angaraat. 3 Om poinggayo-gayo no o kosianan di Yakub di Yusup ko' mantad di tangaanak dau'd suwai, tu' i Yusup no i nosusu do tontok di molohing no kopio i Yakub. Om wansayai noddi di Yakub i Yusup do rasuk dit anaaru, dit olumis kopio. 4 Om soira'ddi di noilaan di piro-piro o tobpinai di Yusup, do poinggayo-gayo o kosianan di Yakub dot id di Yusup ko' mantad dot id diyolo', om karaatai noddi iyolo' di Yusup, i tobpinai diyolo'ddi, gisom dot a' no osonong-sonong o koboro-boroso' diyolo' dot id di Yusup. 5 Insan o totuong, om pongipi no i Yusup, nga' soira'ddi di pinosusui dau iri dot id piro-piro o tobpinai dau om okon nogiddi dot araatan kopio iyolo' dau. 6 Boros ka di Yusup dot id diyolo', “Pokinongou kou pogi' diti nipi ku! 7 Nokoipi oku do hilo' ngai' toko' nogid dumo do momongkos di gandum om ingkakat no nogi' i doho'd winongkos dot orindog tomod. Om iri no i dokoyu'd winongkos om tuminutuk nogi' di doho'd winongkos, om tuku' ngai' nogiddi do hiri'd doho'd winongkos,” ka dau. 8 Boros ka di piro-piro o tobpinai di Yusup, “Ondos nu no daa kopio om osiliu ko'd raja' do momorinta' dahai?” ka diyolo'. Om okon nogiddi dot araatan kopio iyolo' di Yusup, do nosubuanan di nipi di Yusup om i pinoboros dau. 9 Om pongipi po kawagu i Yusup. Om sunudai no di Yusup i piro-piro o tobpinai dau di nipi dau, boros ka dau, “Haro po kawagu o nipi ku, do nokito ku nogi' o tadau om tulan om hopod om iso' o rombituon do tuminuku' dot id doho',” ka dau. 10 Om sinusui i' di Yusup i nipi dau'ddi dot id tapa' dau, nga' togodo' nogi' iyau di Yakub, boros ka dau, “Nunu kopio konipi ino? Ondos nu daa kopio om rumikot oku om i tina' nu, om i ngai' i tobpinai nu, do mongoi tuku' dot id diya'?” ka dau. 11 Om osolon ngai' diri di Yusup i tobpinai dau, nga' iri nopo tapa' di Yusup om momusorou kasai' i' do pasal di nipi'ddi.
Dinagang i Yusup om Tinanggayan do Hilo'd Masir
12 Insan tadau, do tontok di nokoongoi ngai' no i tobpinai di Yusup do hilo'd Sikim do minongoi padtamong di kambing om i dumba' di tapa' diyolo', 13 om boro-boros no i Yakub di Yusup do poingkaa, “Suhuon tiya' do mongoi do hilo'd Sikim, i hilo'd kinoiyonon di tobpinai nu do madtamong di kambing om i dumba' toko',” ka dau. Om boros ka di Yusup do suminimbar, “Oo, mongoi oku i' oi apa',” ka dau. 14 Om boros ka di tapa' dau, “Ngoyon no kakapo' i tobpinai nu, ondung ongosonong-sonong iyolo', om antangan no ondung ongosonong-sonong i kambing om i dumba'; om gumuli' no kawagu'd hiti do mongoi pomisunud doho',” ka dau. Om suhuo' noddi di Yakub i Yusup do minamanau do mantad hilo'd Rantai do Hibron. Om a' i' alaid no om korikot no i Yusup do hilo'd Sikim, 15 om pinghombo no iyau do hiri'd talun. Om haro'ddi o songulun o kusai do nokokito dau, om boro-boros nod minonguhot dau do poingkaa, “Nunu ot ihumon nu?” ka dau. 16 “Mogihum oku di tobpinai ku di madtamong do kambing om dumba' diyolo',” ka dau do suminimbar. “Milo ko i' daa do momisunud doho' ondung hinonggo no iyolo'?” ka dau do minonguhot. 17 Om boros ka di kusai, “Nokotongkiad no moti' iyolo'd hiti. Nga' norongou ku iyolo' do minomoros do mongoi iyolo' do hilo'd Dotan,” ka dau. Om pamanau noddi i Yusup do minongoi suhut di tobpinai dau, om kabantalai no dau iyolo' do hilo'd Dotan. 18 Osodu' po i Yusup om kokito no iyau di piro-piro o tobpinai dau, om tontok dit a' po i Yusup nakarapou diyolo', om nokopogipapakat no iyolo' do sumaap om mamatai di Yusup. 19 Om boros ka diyolo' do mogiboro-boros, “Ontong pogi', nga' rumikot nod hiti ilo mongingipi. 20 Kainou maai toko' iyau patayo', om pataamon toko' nogindo o tinan dau dot id torobong di narasakan. Om poboroson toko' nopondo do numaan iyau patayo' do nintorusan dot orongit. Intangan toko' nogindo ondung nunu poo o kootuson di nipi dau,” ka diyolo'. 21 Nga' korongou no di Rubin i pakat diyolo'ddi, om umbal no daa'ddi iyau do mamasi di Yusup. Boros ka di Rubin, “Kada' toko' i' iyau patayo',” ka dau. 22 “Pataamon toko' nopo iyau do hiti'd torobong dit aiso' o waig do hiti'd tana' do kowotuan, nga' kada' toko' i' kopio pokorualai iyau,” ka dau. Kinapamarasan nopo di Rubin do miagal diri nga' osorou i' dau do ngoyon indo dau poiduwo' i Yusup, om suhuon nogindo dau do gumuli' do hilo'd tapa' dau. 23 Om tontok di nakarapou i Yusup di tobpinai dau, om gayato' nopo diyolo'd minongidu' i rasuk di Yusup dit anaru dit olumis kopio'ddi. 24 Om gayato' nogiddi diyolo' i Yusup do nongoi pataamo' do hiri'd torobong dit aiso' o waig. 25 Nga' tontok di maso no diyolo'd makan, om sigog id kokito diyolo' o tulun dot Ismail dit ogumu' santanud do mantad hilo'd Giliad om pakayaan do hilo'd Masir. Om iri nopo unta diyolo' nga' ginandaran do rampa om kismis. 26 Om boros kaddi di Yohuda dot id piro-piro o tobpinai dau, “Nunu no ot aanu-anu toko' do mamatai dilo tobpinai toko' om mogolim nondo do minamatai dau? 27 Osonong nogi' do padagangon toko' iyau dot id tulun dot Ismail. Om a' toko' i' minog do pokorualan i Yusup; tu' tobpinai toko' i' iyau, om iso-iso' i' o raha' om tonsi toko',” ka dau. Om kaakun ngai' nopo i tobpinai dau di pinoboros dau'ddi. 28 Om soira'ddi do tuminalib o piro-piro di tulun do Midian di mongingindapu' om ngoyo' no di piro-piro o tobpinai di Yusup gayato' i Yusup do pinoposoliwan do mantad hiri'd suang di torobong. Om padagango' no diyolo' i Yusup dot id tulun dot Ismail diri, om pokianu no iyolo' do duwo nohopod o kaping do pirok do gatang dau. Om tanggayai no di tulun dot Ismail i Yusup do kuminaa do hilo'd Masir. 29 Om soira'ddi di guminuli' i Rubin do hiri'd torobong diri, om a' no hino i Yusup do hiri'd suang. Om hurako' nopo dau i rasuk dau do natatangaban. 30 Om guli' noddi iyau do hiri'd piro-piro o tobpinai dau, om boro-boros nod, “A' no hino i tanak do hilo'! Nunu maddi o wonsoyon ku'dti?” ka dau. 31 Om sumbolio' noddi diyolo' o songinan di kambing, om potobungo' no i rasuk di Yusup do hiri'd raha' di kambing. 32 Om ngoyo' noddi diyolo' pointangai di Yakub i rasuk diri, om boros ka diyolo', “Diya iti nabantalan dahai. Iri tuu tanak nu o sanganu'dti, oi Apa'?” ka diyolo'. 33 Om kotutunai no di Yakub i rasuk diri, om boros ka dau, “Oo, rasuk nogi' kopio di tanak ku iti. Tinabpaan no pama iyau do nintorusan dot orongit diri. Nopogitobilang-bilang po doti' di nintorusan o tinan di Yusup, i tanak ku'ddi!” ka dau. 34 Om hurako' noddi di Yakub i rasuk dau do natatangaban om panampakai no iyau do pakayan di dong mogihad. Om alaid tomod diri i Yakub do minogihad di tanak dau. 35 Om oinsanan nopo daa'ddi i tangaanak di Yakub do kusai om tondu' do minongoi ponginsasamod dau, nga' mada' no iyau dot insasamadan. Om boros ka dau, “Gisom piya dot ikapatai ku nga' mogihad kasai' oku i' di tanak ku,” ka dau. Om a' nopoddi iyau otingkod do mogihad di Yusup, i tanak dau. 36 Nga' daamot nopoddi om nadagang no di tulun do Midian i Yusup do hilo'd Masir, dot id di Potipar, i pagawai do raja', om boyoon di madtatamong di walai do raja'.
I Yohuda om i Tamar
1 Om tontok i' do maso'ddi do tuminongkiad i Yohuda di piro-piro o tobpinai dau, om ongoi no iyau undorong do hiri'd di Hira, i kusai do mantad hilo'd bandar dot Adulam. 2 Om hilo' no o nokotutunan di Yohuda do songulun o sumandak do Kanaan; iri nopo sumandak diri om tanak di Sua. Om kowino' no di Yohuda i tondu' diri. 3 Om paganak noddi i tondu'ddi dot iso' o kusai, i pinungaranan di Yohuda dot i Or. 4 Om ponontian po kawagu i sawo di Yohuda diri, om kosusu no, om kusai i' o tanak dau. Om pungaranai no dau i tanak diri dot i Onan. 5 Om kianak po kawagu i sawo di Yohuda do kusai. Om pungaranai no dau i tanak diri dot i Sila. Om tontok nopo di nosusu i tanak diri nga' hilo'd Kosib i Yohuda. 6 Om pogihumai no di Yohuda do sawo i Or, i tanak dau dit id dotuo. Om ngaran nopo di sawo di Or diri nga' i Tamar. 7 Nga' araat kopio o kowoyo-woyoon di Or, om kotogod noddi o TUHAN dau, om patayo' no iyau do TUHAN. 8 Om boros kaddi di Yohuda dot id di Onan, i tobpinai di Or, “Ongoi dudun di sawo di tobpinai nu. Om wonsoyon no it apatut nu'd wonsoyon dot id dau, tu' tadi' ko i' di sawo dau; om haro indo o sinakagon di tobpinai nu,” ka dau. 9 Nga' oilaan i' di Onan do haro piya o tanak diyolo' nga' okon i' ko' iyau o kasanganu di tanak, om gowoi poddi do tontok nopo di ngoyon dau duduno' i sawo di tobpinai dau'ddi, om potobpuson i' dau i narot dau do hiri'd tana', om aiso' indo o tanak di tobpinai dau. 10 Nga' katagadan i' do TUHAN i winonsoi di Onan diri, om iyau'ddi nga' pinatai id TUHAN. 11 Om boros kaddi di Yohuda dot id di Tamar, i monongiwan dau'ddi, “Uli' nopo do hilo'd walai di tapa' nu om mundorong nopod hilo', nga' kada' no panansawo kawagu dot a' po kagayo i Sila, i tanak ku'd kusai,” ka dau. Kinapamarasan nopo di Yohuda do miagal diri nga' ooris iyau dot apatai i Sila do miagal di duwo o tobpinai di Sila dit id dotuo. Om uli' noddi i Tamar do hiri'd walai di tapa' dau. 12 Alaid-laid noddi om kapatai no i sawo di Yohuda. Om katalib poddi i maso di Yohuda do mogihad, om angatai no di Yohuda i Hira, i tambalut dau do mantad hilo'd Adulam diri do mongoi do hilo'd Timna, i pomugaran do hulu di dumba' dau. 13 Om haro'ddi o tulun do minomisunud di Tamar do mongoi do hilo'd Timna i tiwanon dau do mongoi pomugar do hulu di dumba' dau. 14 Om tingalanai noddi di Tamar i pakayan di papakayon do tondu' di nopuadan, om tirungo' no dau do kulu o rabas dau, om irikau no do hiri'd wawayaan di bandar dot Inaim, i kawayaon do kumaa do hilo'd Timna. Oilaan i' di Tamar do tontok nopoddi om agayo no i Sila, i tanak di Yohuda dot id domulok, nga' a' iddi iyau nongoi pokowinai di Sila. 15 Om tontok di nokito di Yohuda i Tamar, om ondos daa dau om tondu' iyau do sundal, tu' tinirung po o rabas dau. 16 Om ngoyo' no di Yohuda ropoho' i tondu' di hiri'd tisan do ralan diri, om boro-boros no iyau, “Songkuro o pokionuon nu?” ka dau. (A' i' di Yohuda oilaan dot i monongiwan dau i tondu'ddi.) Om boros ka di Tamar, “Nunu daa o tahakon nu doho',” ka dau. 17 Om boros ka di Yohuda do suminimbar, “Paatadan tiya' i' do songinan o tanak do kambing do mantad hilo'd baanan ku,” ka dau. Om boros ka di tondu', “Iyo noddi, dot ondung onuan oku no diya' do sanda' do gisom do kaatod nu doho' i kambing,” ka dau. 18 “Nunu o patahakon ku diya' do maan ku'd sanda'?” ka di Yohuda do minuhot. Om boros ka di tondu' do suminimbar, “Ino pondulung nu do kirantai, i pananaap nu om ino sukud do poingigit nu,” ka dau. Om patahako' ngai' no di Yohuda iri. Om pidudun noddi iyolo', om ponontian no i tondu'. 19 Om uli' noddi i tondu'ddi do hiri'd walai dau, om iduwo' no dau i kulu di pinonirung do rabas dau, om panampakai no kawagu iyau di pakayan do papakayon do tondu' do nopuadan. 20 Om suhuo' no di Yohuda i Hira, i tambalut dau'ddi, do minongoi paatod di kambing, om mongongoi kawagu di pinasanda' dau dot id tondu' diri, nga' a' no di Hira nokito i tondu'ddi. 21 Om pinguhot no i Hira di tongokusai do hilo'd Inaim, boros ka dau, “Hinonggo no i tondu' do sundal diri, i poundorong do hiti'd tisan do ralan?” ka dau. Om boros ka diyolo' do suminimbar, “Hiti nopo om a' i' insan do haro o tondu' do sundal,” ka diyolo'. 22 Om guli' no i Hira do hiri'd di Yohuda, om boros ka dau, “A' ku i' nokito i tondu'. Nga' boros ka di tongokusai'd hilo', om a' i' kaka insan do haro o tondu' do sundal do hilo',” ka dau. 23 Om boros ka di Yohuda, “Pologoson nopo i tondu' do popoopi' di sanda' diri. A' toko' i' orohian dot irak-irakan do tulun. Tu' umbalan ku i' daa do mambayar i tondu' nga' a' nu iddi nokito iyau,” ka dau. 24 Om haro no doti' o tolu o tulan do mantad diri, om haro'ddi o songulun do minomisunud di Yohuda do poingkaa, “I Tamar nopo, i monongiwan diya'ddi, om miningsundal-sundal, om monontian noddi iyau do dinondo,” ka. Om boros kaddi di Yohuda, “Ngoyo' iyau angatai do hiti om sorobon i' do gisom dot apatai,” ka dau. 25 Om tontok di nongoi i Tamar poropoho' di Yohuda, om poguluono' no di Tamar o boros dau do poingkaa, “Notianan oku di tulun di sanganu diti sanda': iti pondulung do kirantai, om iti sukud. Om intangan nogi' ondung disai diti,” ka dau. 26 Om kotutunai ngai' nopo di Yohuda iri, om boros kaddi dau, “A' i' i tondu'ddi kasala'. Iyoho' nogi' ot a' minomonsoi dit apatut ku'd wonsoyon dot id dau. Otopot nopo kopio om apatut daa do nopokowinan ku no iyau di Sila, i tanak ku,” ka dau. Om a' noddi di Yohuda nongoi kawagu duduno' i Tamar. 27 Om soira'ddi di norikot o kosusuan di Tamar, om koilaai no do miapid i tanak dau. 28 Om tontok di mogkosusu no iyau, om posoliwano' no di tiso' di ragang o tiso' do longon dau; om igitai no di bidan i longon di ragang diri om kagasai no dau do banang dot aragang; om boros ka di bidan, “Iti no ot id gulu kasawa',” ka dau. 29 Nga' pogogoko' no kawagu di ragang i longon dau, om kasawa' noddi iyolo' om iri iddi tiso' di ragang o gulu do suminawa'. Om boros kaddi di bidan, “Iyo pama'ddi o ralan nu'd suminiat do suminawa',” ka dau. Om iri nopoddi ragang dit id gulu kasawa' om pinungaranan dot i Piris. 30 Om kasawa' nogiddi i tobpinai dau, i kibanang dot aragang o hiri'd longon, om pungaranai no iyau dot i Sira.
I Yusup om i Sawo di Potipar
1 Om diri nopoddi, om natanggayan no di tulun dot Ismail i Yusup do kuminaa do hilo'd Masir, om nakadagang no do hiri'd di Potipar, i pagawai di raja', om boyoon do madtatamong di walai do raja'. 2 Moyo-woyo' i' o TUHAN di Yusup, om pinoundar i' dau iyau dot id suang do nunu nopo o wonsoyon dau. Om poingiyon diri i Yusup do hiri'd walai di tuan dau, i tulun do Masir. 3 Om nokito'ddi di tuan dau do moyo-woyo' i' o TUHAN di Yusup, om pinoundar i Yusup dot id suang do koinsanai di wonsoyon dau. 4 Om nasanangan tomod diri i Potipar di Yusup, om siliho' no dau i Yusup do susuhuon dau dit iyau noo o pogobi-obian; om siniliu nogi' dau iyau do mongilo-ilo do hiri'd walai dau, om mongilo-ilo do koinsanai di dapu' dau. 5 Om mantad noddi do binarakatan do TUHAN o sompiiyon di tulun do Masir diri, om koinsanai di dapu' dau do hiri'd suang do walai dau om i hiri'd tumo dau, dot i Yusup o kinapamarakatan do TUHAN. 6 Om patahako' ngai' nopo di Potipar dot id suang do palad di Yusup o koinsanai di dapu' dau, om a' noddi iyau gumangau do mongilo-ilo do nunu nopo, suwai ko' iri pondo i taakanon di potorungak dau. I Yusup nopoddi nga' okoris, om oligkang koulun. 7 Om a' poddi alaid do mantad diri om kagayat no ginawo di sawo di Potipar do rumohian di Yusup, om angatai no daa dau i Yusup do mongoi dudun dau. 8 Nga' a' i' i Yusup minangakun, om boros ka dau dot id tondu'ddi, “Antangai pogi', nga' a' no gumangau i Tuan ku do mongilo-ilo do nunu nopo do hiti'd walai dau tu' hiti oku no. Om iyoho' no o sinuhu' dau do mongilo-ilo do koinsanai di dapu' dau. 9 Kuasa' ku nopo do hiti'd walai do baino' om miagal no do kuasa' dau. Om nunu nopo nga' aiso' no ot a' dau pinatahak dot id suang do palad ku, suwai ko' iya' poo. Om poingkukuro oku daa'ndo do momonsoi do miagal dino karaat, om kowonsoi pod dusa dot id toguang do Kinorohingan?” ka dau. 10 Nga' mulong piya do monikid tadau i sawo di Potipar diri do momolugu-lugut di Yusup, nga' a' i' i Yusup minongoi dudun dau. 11 Nga' insan diri o tadau, do tontok di suminuang i Yusup do hiri'd walai do minongoi karaja', om aiso' no o tiso' di susuhuon do hiri'd walai. 12 Om ngoyo' no di sawo di Potipar gayato' o rasuk di Yusup om boro-boros nod poingkaa, “Kaino, ngoyo' oku duduno',” ka dau. Nga' idu' nopo i Yusup om poggidu' no iyau do hiri'd soliwan, om a' no dau noongoi i rasuk dau do poingigit di tondu'. 13 Nga' kokito nopoddi di tondu' dot a' di Yusup noigitan i rasuk dau, om nakatangkus noddi iyau do suminoliwan di walai, 14 om lohowo' no di tondu' i susuhuon dau do hiri'd walai, boros ka dau, “Ontong kou pogi'dti! Iri nopo tulun dot Ibrani di nangatan di sawo ku do hiti'd walai om mongintingayam dati'. Suminuang iyau do hilo'd bilik ku om numbalan oku daa'ddi dau do mangasou, nga' minomogiak oku iddi dot opuhod. 15 Om soira' nopoddi do mininggiak oku om iyadaai nopo dau iti rasuk dau do hiti'd toning ku om panangkus no do luminabus do hilo'd soliwan,” ka dau. 16 Om poopio' nopo di tondu' i rasuk di Yusup diri do gisom do nokoguli' i sawo dau do hiri'd walai. 17 Om iyo iddi o sinusui di tondu' dot id sawo dau, boros ka dau, “Ilo' nopo turipon do bansa' dot Ibrani do nigitan nu do hiti'd dati' om suminuang daa do hilo'd bilik ku do minongoi pongintingayam doho'. 18 Nga' soira' nopoddi do mininggiak oku, om tangkus no iyau do suminoliwan, om iyadaai nopo dau iti rasuk dau do hiti'd toning ku,” ka dau. 19 Om kotogod noddi kopio i tuan di Yusup, 20 om suhuo' no dau o tulun do manangkap di Yusup, om posuango' noddi iyau do hiri'd giil do poinsugku' di tulun do pinogiil di raja'. Om hiri-hiri noddid giil i Yusup. 21 Nga' moyo-woyo' i' o TUHAN di Yusup, om binarakatan iddi iyau do TUHAN, gisom dot asanangan di Yusup i boyoon di madtatamong di giil. 22 Om siliho' noddi di boyoon do madtatamong di giil i Yusup do boyoon do koinsanai di tulun do suwai di songinggiil, om i Yusup nogi' o mongilo-ilo do nunu nopo o wonsoyon do hiri'd suang di giil. 23 Om a' noddi minog i boyoon di madtatamong di giil do mongoi piontong do nunu nopo dit id suang do kuasaon di Yusup, tu' moyo-woyo' i' o TUHAN di Yusup, gisom do pinoundar dau i Yusup dot id suang do koinsanai di wonsoyon dau.
Pinosunud di Yusup o Komoyon do Nipi di Tulun do Poinggiil
1 Alaid-laid noddi om kowonsoi no do kasalaan dot id raja' do Masir i monunurung di raja' do waig dot anggur, om i monunurung di raja' do roti. 2 Om otogod tomod diri i raja' di monunurung dau do tinumon om i monunurung dau do roti. 3 Om pogiilo' noddi dau iyolo' do hiri'd walai di boyoon do madtatamong di songinggiil, i hiri'd giil di pinogiilan di Yusup. 4 Om alaid tomod diri iyolo' do poinggiil, om suhuo' no di boyoon di madtatamong do giil i Yusup do sumiliu do susuhuon diyolo'. 5 Insan diri o totuong do hiri'd giil, om pongipi no goduwo i monunurung di raja' do tinumon, om i monunurung do roti. Om misuwai-suwai o komoyon di nipi diyolo'ddi. 6 Om soira' di minongoi i Yusup solowot diyolo' di kosuabon om kokito no dau do tumongob goduwo iyolo'. 7 Om uhoto' no di Yusup iyolo', boros ka dau, “Nokuro kou tu' tumongob kopio dot okito ku'd baino'?” ka dau. 8 Om boros ka diyolo' do suminimbar, “Minongipi goduwo nopo iyahai, om iso' pod tulun do hiti nga' aiso' i' o koilo ondung nunu o komoyon di nipi dahai,” ka diyolo'. Om boros ka di Yusup, “Kinorohingan noo o milo do monuduk do tulun do popoilo do komoyon do nipi. Nga' sunudai oku daa di nipi dokoyu,” ka dau. 9 Om boros kaddi di monunurung do tinumon, “Nokoipi oku do haro nogi' o songguas ot anggur do hiri'd dotoguangan ku. 10 Om iri nopo guas dot anggur diri nga' tolu o raan. Om kopomiunduk nopori nga' susuhut no do minungkalad o tusak, om koonsok no nogi' i tua' dit anggur. 11 Om poingigit ku nogi' i sangkir di raja'; om ngoyo' ku nogiddi i tua' dit anggur om pagao' ku no i waig dit anggur do hiri'd sangkir, om patahako' ku nogiddi di raja',” ka di songulun. 12 Om boros ka di Yusup, “Poingkaa o komoyon dino: Iri nopo tolu o raan, om tolu o tadau. 13 Haro po tolu tadau om polobuson ko no di raja', tu' ompunan ko i' dau di kasalaan nu, om pogulion ko kawagu dau di karaja' nu di gulu. Potunui ko nondo di sangkir dot id raja', do miagal di wonsoyon kasai' nu di monunurung ko po dau do waig dot anggur di gulu po. 14 Nga' kada' oku no kopio diya' kolihuwai dot osonong-sonong ko iya'. Posunudon oku no diya' dot id raja' om tulungon oku no om kalabus oku i' do mantad hiti'd giil. 15 Kawagu po nga' pinanakau oku i' do mantad hilo'd pomogunan do tulun dot Ibrani, om hiti piya'd Masir nga' aiso' i' o nowonsoi ku do nunu-nunu dit araat do koposuangan doho' dot id giil,” ka dau. 16 Om soira'ddi di norongou di monunurung do roti dot osonong o komoyon di nipi di monunurung do tinumon, om boro-boros no iyau di Yusup do poingkaa, “Iyoho' nga' minongipi nogi', do kisinuun oku nogi' do tolu o bakul do kisuang do roti. 17 Om suang nopo di hiri'd soibau kopio, om mogisuayan nopo nogi' o taakanon di raja', nga' ngoyo' noddi tinduko' do tombolog,” ka dau. 18 Om boros ka di Yusup, “Poingkaa o komoyon dino: Iri nopo i tolu o bakul diri, om tolu o tadau. 19 Tu' tolu po tadau om polobuson ko no di raja', om maan nondo puloso' o tulu nu. Om pogiison nondo dau ino tinan nu dot id iso' o kayu di pinoudong, om ngoyon nondo pintinduko' do tombolog o tonsi nu,” ka dau. 20 Tolu po tadau do mantad diri om koulitai no i toun do kinosusuon di raja', om poginakan no i raja' do pinangalapan dau di pagawai dau; om polobuso' noddi dau do mantad hiri'd giil i monunurung do tinumon om i monunurung dau do roti, om potimbabao' no do koinsanai di pagawai dau. 21 Om pogulio' no di raja' i monunurung do tinumon dau di karaja' dau di gulu, 22 nga' iri nopoddi i monunurung do roti om numaan dau hukumai do kapatayon. Om poingkuro nopo i nokoboros di Yusup nga' iyo noddi o nosiliu. 23 Nga' a' iddi di monunurung do tinumon nosorou i Yusup. Om kotilombus noddi do nolihuan dau i Yusup.
Pinosunud di Yusup o Komoyon do Nipi di Raja'
1 Katalib poddi o duwo toun do mantad diri, om pongipi no i raja' do Masir, do poingkakat nogi' iyau dot id tisan di Bawang do Nil. 2 Om tindal no nogi' o turu' o tinan do sapi' dot ongolomu' om ongolunau do mantad hiri'd bawang om ongoi no pogkotop di sakot do hiri'd tisan di bawang. 3 Nga' tindal no kawagu o turu' o tinan do sapi' dit angagahui om i tulang po tomod. Om ongoi no ingkakat do hiri'd toning di sapi' dit ongolomu' do hiri'd tisan di bawang. 4 Om kano' noddi di sapi' dit angagahui i sapi' dit ongolomu'. Om koposik noddi i raja'. 5 Nga' koodop po kawagu i raja', om pongipi no kawagu iyau do haro nogi' o turu' o rawo do gandum dot oonsi tomod om noonsok no dot id iso' noo o guas. 6 Om imbulai po nogi' o turu' o rawo do gandum dit alampis om i nolonot po do nawayaan di ribut do mantad id tana' do kowotuan. 7 Om tolono' no di turu' o rawo do gandum do nolonot i rawo do gandum dit ongoonsi. Om koposik no kawagu i raja', om kopurimanai no dau do minongipi iyau. 8 Kosuabon noddi om atangkabo tomod diri i raja', om lohowo' no ngai' dau i bobolian om i tulun dot ongoilo do hilo'd Masir. Om sunudai no di raja' iyolo' di nipi dau, nga' iso' po diyolo' nga' aiso' i' o nokoilo do pinoposunud do komoyon di nipi di raja'ddi. 9 Om ongoi noddi boro-boros i monunurung do tinumon di raja' do poingkaa, “Okunon ku no kopio do baino' do nakasala' oku. 10 Tu' di nopo di notogod o raja' doho', om i monunurung do roti di gulu poddi, om pogiilo' nu no iyahai do hilo'd walai di boyoon do madtatamong do giil. 11 Insan totuong om pongipi no iyahai goduwo, om iri nopo i nipi dahai nga' sopisuwai o komoyon. 12 Tontok nopoddi om haro o tanakwagu do bansa'd Ibrani do poinsugku' dahai. Iyau nopo om susuhuon daa di boyoon do madtatamong. Om sunudai no dahai i tanakwagu'ddi di nipi dahai, om posunudo' noddi dau dahai o komoyon di nipi dahai'ddi. 13 Om nongosiliu kopio nopo o miagal di pinoboros dau: Tu' iyoho' nopo om pinoguli' nu diti karaja' ku mantad, nga' iri no i monunurung do roti, om hinukuman nu'd kapatayon,” ka dau. 14 Om ponuhu' no i raja' do mongongoi di Yusup, om tilombuso' nopoddi do nongoi iyau posoliwano' do mantad hiri'd giil. Om kopomugar poddi i Yusup do ganggut om koponingolon do pakayan, om ongoi nogi' iyau timbaba' di raja'. 15 Om boros ka di raja' dot id di Yusup, “Minongipi oku, nga' iso' pod tulun nga' aiso' i' o koilo do popoilo do komoyon diri. Om haro'ddi o tulun do minomisunud doho' do koilo ko do komoyon do nipi,” ka dau. 16 Om boros ka di Yusup do suminimbar, “A' oku i' iyoho' koilo, oi Tuan, suwai ko' Kinorohingan o milo do popoilo do komoyon dit osonong,” ka dau. 17 Om boros ka di raja', “Minongipi oku do poingkakat oku nogi' do hilo'd tisan do Bawang do Nil, 18 om tindal no o turu' o tinan do sapi' dot ongolomu' om ongolunau do mantad hiri'd bawang, om tilombus nopod minogkotop di sakot di hiri'd tisan di bawang. 19 Om tindal no kawagu o turu' o tinan do sapi' dot angagahui om i tulang po tomod. Om iri nogindo kopio o sapi' do nokito ku dot iyo kopio'ddi kagahui do hiti'd pointongkop do pomogunan do Masir. 20 Om tolono' no di sapi' dit angagahui, i sapi' dit ongolomu', 21 nga' kokitanan nopo di sapi' di minonolon diri om angagahui kasai' i' do miagal di gulu. Om koposik oku noddi. 22 Om pongipi oku po do nokokito oku nogi' do turu' o rawo do gandum dot oonsi om noonsok dot id iso' no o guas. 23 Om imbulai noddi o turu' o rawo do gandum dot alampis om nolonot po do nawayaan di ribut do mantad id tana' do kowotuan. 24 Om tolono' noddi di rawo do gandum dit alampis i rawo di gandum dit oonsi. Om nokosusui ku no iti dot id bobolian, nga' aiso' i' o tiso' diyolo' do milo do popoilo doho' do komoyon diri,” ka dau. 25 Om boros ka di Yusup dot id raja, “Iso-iso' i' o komoyon di nipi nu'ddi; nosunudan ko nod Kinorohingan di wonsoyon dau dot id dosunsudan diti. 26 Iri nopo i turu' o tinan do sapi' dit ongolomu' om turu' o toun do komoyon. Om iri turu' o rawo do gandum dit oonsi nga' turu' i' o toun do komoyon; miagal nopo o komoyon diri. 27 Om iri no turu' o tinan do sapi' dit angagahui dit id tohuri korikot, om iri turu' o rawo do gandum dit alampis om nolonot do nawayaan di ribut do mantad id tana' do kowotuan, om turu' o toun do mononglous. 28 Iyo noddi nokoboros ku diya' di tiinu' --- tu' pinokito ko'd Kinorohingan di wonsoyon dau dot id dosunsudan diti. 29 Turu' nondo o toun dot osimbayan om osima' do taakanon o hiti'd pointongkop do pomogunan do Masir. 30-31 Nga' katalib pondo iri, om sumowoli nondo o turu' o toun do mononglous om iri nopondo i piro-piro o toun di haro o kosimbayanan dit id gulu'ddi, om olihuan tomod nopod tulun, tu' adalaan no kopio i pononglous, om aiso' nopondo o sumuni do hiti'd pomogunan. 32 Duwo pogi' o nipi nu di miagal nopo o komoyon, nga' popoilo kopio do natantu' nod Kinorohingan iri, om oruhai no dau iri do wonsoyon. 33 Iyo nopoddi, om apatut no do momili' ko do songulun i kitoilaan om it aralom o toilaan do silihon do boyoon diti pomogunan. 34-35 Om apatut nogi' do momili' ko do piro-piro o pagawai'd suwai om onuan iyolo'd kuasa' do monimung do sompilimo di tomot do solinaid di turu' o toun dot osima' do taakanon. Om suhuon iyolo' do potimung diri do hiri'd kabandaran om suhuon iyolo' do madtamong diri. 36 Tu' iri nopo gandum do tinimung diri om pongumpai di turu' o toun do mononglous dit id dabantalan do hiti'd pomogunan do Masir. Iti no o wonsoyon om a' indo oinggorit do mononglous o tulun do hiti,” ka di Yusup.
Siniliu i Yusup do Gobunor do Masir
37 Om kosokodungai no di raja' om i piro-piro o pagawai dau i pinoboros di Yusup diri. 38 Om boros ka'ddi di raja' dot id diyolo', “Aiso' no ot ihumon toko' do suwai ko' i Yusup tu' iyau nopo om porintaon i' di Rusod do Kinorohingan,” ka dau. 39 Om boros ka di raja' dot id di Yusup, “Nokosunud ngai' nod Kinorohingan dot id diya' iti, om oilaan no kopio dot iya' o poinglobi o toilaan om aralom o toilaan ko' mantad dot isai nopo o tulun. 40 Iya' no o silihon ku do boyoon diti pomogunan ku, om koinsanai'd tulun ku nga' mumboyo' ngai' indo do boros nu. Om iyoho' poo ot agayo o kuasa' do mantad ko' iya'. 41 Om baino' no do pilion tiya' do sumiliu'd gobunor do pointongkop diti pomogunan do Masir,” ka dau. 42 Om oluso' noddi di raja' i pondulung dau di kinikiran do saap di don raja' om posulungo' no dau di tunturu' di Yusup. Om rinosukan nogi' dau i Yusup do rasuk dit anaru, i kain dot opurak dit aalus o winonsoi. Om karaai dau do karo do tamas i Yusup. 43 Om patahako' po di raja' di Yusup o tiso' di korita'-kuda' do don raja' do sakayon di Yusup, om pogulu-gulu no di Yusup i madtatamong do raja' do mikuwo'd mimboros dot opuhod do poingkaa, “Pawayao' dokoyu! Pawayao' dokoyu!” ka no. Om i Yusup noddi o nopili' do sumiliu'd gobunor do pointongkop di pomogunan do Masir. 44 Om boros ka di raja' dot id di Yusup, “Iyoho' no, i raja' --- om popoboros oku do songulun po do hiti'd Masir nga' a' i' koino-ino do momonsoi do nunu nopo dot a' po kouhot diya',” ka dau. 45 Om pungaranai no di raja' i Yusup do ngaran do don Masir dot i Sapinat Pania. Om pogihumai no di raja' i Yusup do sawo. Om ngaran nopo di tondu' nga' i Asnat, i tanak di Potipira, it imam do hilo'd bandar do Hiliopolis. 46 Tolu no nohopod o toun di Yusup di tuminimpuun iyau do kuminaraja' dot id raja' do Masir. Om tongkiad no i Yusup di walai do raja', om pamanau no iyau do tuminongkop di pomogunan do Masir. 47 Id suang nopo di turu' o toun dot osima' do taakanon diri, om asapou om osonong tomod o tua' do totonomon. 48 Om timungo' ngai' nopo di Yusup i gandum do solinaid di turu' o toun, om potimungo' no dau do hiri'd kabandaran. Id suang no do pointikid-tikid do bandar o potimungan dau di tomot do mantad id koumaan di potoropis di bandar. 49 Notimung nopo di Yusup do gandum om ogumu' no kopio --- miagal pod togis do rahat kogumu', om a' no dau oopudan do magadang ngai' iri. 50 A' poddi norikot i toun do mononglous, om duwo no tanak do kusai diyo' Yusup di Asnat. 51 Om boros ka di Yusup, “Pinolihu oku noddi do Kinorohingan di kinoinggoritan ku, om koinsanai di sompiiyon do tapa' ku,” ka dau. Om pungaranai noddi dau i tanak dau dot id gulu'ddi dot i Manasi. 52 Om boros ka kawagu dau, “Noonuan oku i' do Kinorohingan do tangaanak do hiti'd pomogunan di kinoinggoritan ku,” ka dau; om iri noddi o kinopomungaranan dau di tanak dau do kusai di koduwo, dot i Ipraim. 53 Om kopupusai noddi i turu' o toun dot osima' do taakanon o hilo'd pomogunan do Masir. 54 Om timpuun noddi i turu' o toun do mononglous, do miagal di nokoboros mantad di Yusup. Om mononglous ngai' nopoddi o pointongkop do pomogunan, nga' pointongkop nopo do pomogunan do Masir om haro i' o taakanon. 55 Soira'ddi dit oinggorit do louson i tulun do Masir, om ongoi no iyolo' pokianu di raja' do gandum. Om suhuo' noddi iyolo' di raja' do mongoi do hiri'd di Yusup, om tumanud do koinsanai di ponuhuan di Yusup. 56 Om tontok di nokotongkop noddi do hiri'd pomogunan o mononglous, om ukabai ngai' no di Yusup i walai do pinoopian di gandum om padagango' no dau dot id tulun do Masir i gandum diri. 57 Om rumikot ngai' nopoddi do hilo'd Masir o tulun do mantad id pointongkop do pomogunan do mongoi boli di gandum do mantad id di Yusup, tu' hinonggo-honggo nopo o kinoiyonon nga' nadalaan no kopio o pononglous.
Minongoi Pomoli'd Gandum i Tongotobpinai di Yusup
1 Om tontok di nokoilo i Yakub do haro o gandum do hilo'd Masir, om boro-boros no iyau dot id tangaanak dau do kusai, “Nokuro tu' mundorong toomod kou nopo om aiso' nopo o wonsoyon dokoyu? 2 Tu' nokorongou oku do hilo' nopod Masir om haro i' o gandum; om ongoi kou pogi' pomoli do gandum do hilo', om a' toko' i' apatai do louson,” ka dau. 3 Om ongoi noddi do hilo'd Masir i hopod o tobpinai di Yusup do mongoi pomoli do gandum. 4 Nga' a' i' di Yakub uhang do tuminanud diyolo' i Binyamin, i toput kopio'd pusod di Yusup, tu' moddosi i Yakub do haro o kosusaan do koontok di Binyamin. 5 Om ongoi noddi do hilo'd Masir i tangaanak di Yakub do mogiwoyo-woyo' di tulun do suwai do mongoi boli do gandum do hilo', tu' mononglous no o hilo'd pomogunan do Kanaan. 6 I Yusup nopo, i gobunor do pomogunan do Masir, nga' maso no do papadagang di gandum dot id tulun do mantad id pointongkop do pomogunan. Om ongoi no rapou di Yusup i piro-piro o tobpinai dau, om otud no iyolo' do tuminuku' dot id toguang di Yusup. 7 Om soira' di nokito di Yusup i piro-piro o tobpinai dau, om kotutunai no dau iyolo', nga' tinomod i' di Yusup dot a' mintutun-tutun diyolo', om uhoto' no di Yusup iyolo' dot apatog kopio. Boros ka dau, “Hinonggo tadon dokoyu?” ka dau. “Mantad iyahai do hilo'd Kanaan, om mongoi iyahai boli do gandum,” ka diyolo' do suminimbar. 8 I Yusup nopo om kotutun i' di tobpinai dau, nga' iyolo' nopo om a' i' kotutun di Yusup. 9 Om kahandamai noddi di Yusup i nipi dau do pasal diyolo'. Boros ka dau, “Iyokoyu nopo om gomponoluku' i'; mongoi kou daa ponoluku' ondung nunu o koluhayan diti pomogunan dahai,” ka dau. 10 “A' i', oi Tuan,” ka diyolo' do suminimbar. “Ruminikot iyahai'd hiti do miagal no do susuhuon nu do mongoi pomoli do gandum. 11 Iyahai nopodti, oi Tuan, om mogiobpinai i'. Om okon i' iyahai ko' gomponoluku' suwai ko' tulun i' iyahai dot osonong,” ka diyolo'. 12 Om boros ka di Yusup dot id diyolo', “Okon! Iyokoyu nopo om mongoi kou nogi' ponoluku' ondung nunu o koluhayan diti pomogunan dahai,” ka dau. 13 Om boros ka diyolo', “Iyahai nopodti, oi Tuan, om hopod om duwo songobpinai, om iso' no o tapa' dahai do hilo'd pomogunan do Kanaan. Nga' iri nopo songulun om napatai no, nga' iri nopo it id domulok dahai om hilo' id poinsugku' di tapa' dahai,” ka diyolo'. 14 Om boros ka di Yusup do suminimbar, “Iyokoyu nopodti om otopot nogi' kopio do gomponoluku' do miagal di nokoboros ku. 15 Om poingkaa nondo o ralan ku do monoinu' dokoyu. Sumumpa' oku dot id suang do ngaran do raja' dot a' ku po iyokoyu poulion dot a' po koongoi'd hiti i tobpinai dokoyu dit id domulok. 16 Mositi' no do haro o songulun do mantad id pogialatan dokoyu do mongongoi dau, om iri no suwai om giilon do gisom dot oilaan ondung ongotopot i nongkoboros dokoyu. Ondung a' otopot, om poboroson ku no kopio dot id suang do ngaran di raja', do gomponoluku' kou no kopio,” ka dau. 17 Om posuango' no di Yusup i piro-piro o tobpinai dau do hiri'd giil do solinaid do tolu o tadau. 18 Om tontok di kotolu'd tadau, om boro-boros noddi i Yusup diyolo', boros ka dau, “Iyoho' nopo om tulun i' dit ooris do Kinorohingan om iso' poo o ralan do kopomosian ku dokoyu. 19 Ondung tulun kou dot ongosonong, om tumimporon no o tiso' dokoyu do hilo'd giil, i hilo'd pinogiilan dokoyu, om iri no suwai om muli', om igitan i' ilo gandum do binoli dokoyu do maan do takanon di sompiiyon dokoyu di maso dot oinggorit do louson. 20 Om mositi' no dot angatan dokoyu do hiti'd doho' i tobpinai dokoyu dit id domulok. Om iri nondo o koilaan dot ongotopot i pinoboros dokoyu, om a' ku indo iyokoyu hukuman do kapatayon,” ka dau. Om kookunai noddi diyolo' iri, 21 om pogiboro-boros no iyolo', “Naa! Baino' noddi moti' do kababo toko' dot isuli' di kasalaan di winonsoi toko' dot id tobpinai toko' di gulu po. Tu' nokokito toko' i' do kawagato' di kinoinggoritan dau di maso dau do mokiinsian daa dati' nga' a' toko' i' pinadul iyau. Om iri noddi o kokuwaan do kopuriman toko' do koinggoritan diti,” ka diyolo'. 22 Om boros kaddi di Rubin, “A' ku toi iyokoyu sinunudan diri dot a' momonsoi'd araat dot id tanak diri? Nga' a' kou i' minokinongou. Om baino' noddi om boboon toko' no ot isuli' di kinapatayon dau,” ka dau. 23 Nga' ongosuhutan ngai' i' di Yusup i pogibara-barasan diyolo', nga' iyolo' nopo om a' i' koilo do kosuhut i Yusup tu' tontok nopo di monokiboro-boros iyolo' di Yusup om haro i' o tulun do popisuhut do boros. 24 Om tongkiad no i Yusup diyolo' om ihad no iyau. Om soira' di milo kawagu iyau do monokiboro-boros, om guli' no kawagu iyau dot id diyolo'; om pilio' noddi di Yusup i Simion do numaan kagasai dot id toguang diyolo'.
Minuli' i Tongotobpinai di Yusup
25 Om ponuhu' noddi i Yusup do tulun do poposuang di gandum do hiri'd karung di piro-piro o tobpinai dau om popoguli' kawagu do koinsanai di tusin di pinomoli diyolo' do poikidon do poposuang di karung diyolo'. Om kinokorihan po iyolo' do takanon diyolo' do hiri'd ralan. Om wonsoyo' noddi i pinonuhuan dau'ddi. 26 Om pagandaro' noddi di tobpinai di Yusup i gandum di binoli diyolo'ddi do hiri'd kaladai diyolo', om pamanau nogiddi iyolo' do minuli'. 27 Tontok di minodop iyolo' dot id iso' o kinoiyonon, om ukabai no do songulun dot id pogialatan diyolo' i karung dau do minanganu do gandum do ponumad di kaladai, nga' kokito nogi' dau i tusin dau do hiri'd soibau di gandum. 28 Om boros ka dau, “Diya iti tusin ku do pinoguli',” ka dau do pinapagarang dot id tobpinai dau. “Ontong kou pogi' nga' hiti id suang do karung ku iti tusin!” ka dau. Om tumongob tomod diri iyolo' om moddosi om mogiuhot-uhot poddi iyolo', “Nunu ma o winonsoi do Kinorohingan dot id dati'dti?” ka diyolo'. 29 Om soira' di nokorikot iyolo' do hilo'd Kanaan, om susuyo' no diyolo' dot id di Yakub, i tapa' diyolo', o koinsanai di nongosiliu dot id diyolo'. 30 Om boros ka diyolo', “Iri nopo gobunor do hilo'd Masir om apatog kopio o boros dot id dahai, om monondos po iyau do gomponoluku' iyahai di pomogunan diyolo'. 31 Nga' boros ka dahai do suminimbar, 'Okon i' ko' gomponoluku' iyahai, tu' iyahai nopo om tulun i' dot ongosonong. 32 Iyahai nopo om hopod om duwo songobpinai dot iso-iso' o tapa'. Nga' iri nopo songulun om napatai no, om iri no it id domulok om hilo'd Kanaan do poinsugku' di tapa' dahai,' ka dahai. 33 Om boros ka di gobunor do suminimbar, 'Poingkaa o wonsoyon ku om oilaan i' ondung tulun kou dot ongosonong: Mositi' no do poundorongon o songulun dokoyu do hiti'd doho'; om iri no suwai om mamanau do mongoi paatod dilo gandum do hilo'd sompiiyon dokoyu di maso dot oinggorit do louson. 34 Om pootodon no do hiti'd doho' i tobpinai dokoyu dot id domulok. Om iyo noddi o koilaan ku dot okon kou ko' tulun do gomponoluku', suwai ko' tulun i' dit ongosonong. Om pogulion ku nogindo kawagu i tobpinai dokoyu, om iyokoyu nga' pologoson ku indo do mundorong do hiti om osimbayan do dumagang-dagang,' ka di gobunor do minomisunud dahai,” ka diyolo'. 35 Om soira' di pinobubus ngai' diyolo' i karung diyolo', om kokito ngai' nopo diyolo' i poiyanan diyolo'd tusin do kisuang do tusin. Om ongooris tomod diri iyolo' om i Yakub nga' ooris nogi' do nokokito'ddi. 36 Om boros ka di Yakub dot id diyolo', “Orohian kou toi dot atagakan ngai' oku nopo di tangaanak ku? I Yusup nga' a' no hino, om i Simion nga' a' noddi hino, om baino' no om angatan po dokoyu i Binyamin. Om iyoho' indo ot oinggorit!” ka dau. 37 Om boro-boros no i Rubin di tapa' dau, “Ondung a' ku kaatod kawagu i Binyamin do hiti'd diya', om ngoyon nopo patayo' i tanak ku'd kusai. Powoyoo' nopo doho' i Binyamin, om angatan ku i' iyau do gumuli' kawagu,” ka dau. 38 Nga' boros ka di Yakub do suminimbar, “Amu'! A' ku no potonudon dokoyu i Binyamin; tu' napatai no kanogi' i tobpinai dau'd kusai, om iyau poddi o poundorong do hiti. Om a' i' oila-ilaan do sigog i' doti' do haro o kosusaan dau do hilo'd tanga'd ralan. Tu' molohing oku noddi kopio, om iri piya'ndo katangaban do porikoton dokoyu dot id doho' nga' kapatai i' doho',” ka dau.
Guminuli' i Tongotobpinai di Yusup do hilo'd Masir
1 Om hilo' nopod Kanaan nga' nadalaan no kopio o pononglous, 2 om soira' di naayi' di sompiiyon di Yakub do mangakan i gandum di binoli do mantad hilo'd Masir, om ponuhu' poddi kawagu i Yakub di tangaanak dau, boros ka dau, “Ongoi kou no kawagu do hilo' do mongoi pomoli'd gandum do kanon toko',” ka dau. 3 Om boros ka di Yohuda, “Pinopoinsan mantad i gobunor dahai om apatog kopio iyau do minomoros dot a' no iyahai posolowoton dau ondung a' no moyo-woyo' dahai i tobpinai dahai di komulakan. 4 Ondung uhang nu do tumanud dahai ilo tobpinai dahai om mongoi i' iyahai do hilo' do mongoi pomoli'd takanon. 5 Nga' a' nu nopo uhang do moyo' dahai i Binyamin om a' no iyahai mongoi, tu' nokopomisunud mantad no dahai i gobunor dot a' no iyahai posolowoton dau dot a' katanud dahai ilo tobpinai dahai,” ka dau. 6 Om boros ka di Yakub, “Nokuro tu' mamagangau kopio kou doho' tu' posunudo' no dokoyu di gobunor do haro o tobpinai dokoyu'd suwai,” ka dau. 7 Om boros ka diyolo' do suminimbar, “Iri nopo gobunor diri om minguhot nopo do pasal dahai om pasal do sompiiyon toko'. 'Poimpasi po o tapa' dokoyu? Haro po o tobpinai dokoyu'd kusai do suwai?' ka no dau. Om a' noddi dahai milo dot a' simbaron ngai' i ponguhatan dau. Om nunu daa o koilo-ilo dahai do monuhu' iyau do papatanud dilo tobpinai dahai?” ka diyolo'. 8 Om boros ka di Yohuda dot id tapa' dau, “Potonudo' nopo dahai ilo tanak nu om kapamanau i' iyahai dot oruhai, om aiso' indo ot apatai dati' do louson. 9 Om patahakon ku nopo o tinan ku do maan do pamajamin, om iyoho' no o papanganakon nu dau. A' ku nopo iyau koguli' dot id diya' om iyoho' no o kababo do kasalaan diri do gisom dot ikapatai ku. 10 Ondung a' toko' daa minandad do gisom dot iyo'ddi kalaid, om induwo toko' no daa piguli',” ka dau. 11 Om boros kaddi di tapa' diyolo', “Ondung a' kopio milo dot a' iyo'ddi om mongoi kou no posuang do hino'd karung dokoyu di tua' do totonomon dit ongosonong kopio do mantad hiti'd pomogunan diti do popuhawangon di gobunor. Migit kou no dot ongokuuri' di kismis, om ongokooro' di paha', om migit kou do rampa di mogisuayan, om tua' do kemiri, om i tua' do badam. 12 Om migit kou nod tusin dot induwo kogumu' ko' i gulu, tu' i tusin di pinoguli' dot id suang do karung dokoyu di gulu nga' mositi' no do pogulion kawagu dokoyu. Tu' nagaloi i' doti' iyolo' di guulu'ddi. 13 Om angatan nopo ilo tadi' dokoyu om gumuli' kou no kopio dot oruhai. 14 Om pokionuon ku no o Kinorohingan dit Agayo o Kuasa' do monuhu' di gobunor dot osianan dokoyu, om pogulion indo daa dau i Binyamin om i Simion dot id dokoyu. Iyoho' nodti om ondung a' no kopio milo dot a' oku atagakan do tangaanak ku, om atagakan oku no diyolo',” ka dau. 15 Om igitai noddi diyolo' i pomuhawang diri, om i tusin dot induwo kogumu' ko' mantad di nigitan diyolo' dit id gulu, om pamanau noddi iyolo' do minongoi'd hilo'd Masir do miniwoyo' di Binyamin. Om soira' di nokorikot iyolo'd hilo' om ongoi ngai' no iyolo' solowot di Yusup. 16 Om soira' di nokito di Yusup i Binyamin do manud-tanud diyolo', om boro-boros no i Yusup di susuhuon dau di mongilo-ilo do hiri'd walai dau, boros ka dau, “Angatai ngai' ilo tulun do mongoi do hilo'd walai ku. Tu' poilangon ku iyolo' doho'd makan do tangaadau diti. Om mongoi no ponumbali' dot ongoiso' di tayam-tayam om onsokon no,” ka dau. 17 Om tonudo' ngai' nopo di susuhuon diri i pinonuhuan di Yusup, om angatai ngai' no dau i tobpinai di Yusup do suminalakoi do hiri'd walai di gobunor. 18 Om tontok di posolokoyon no iyolo' do hiri'd walai om ongooris diri iyolo' om momusorou iyolo' do poingkaa, “Kinapangangatan nopo dati' diti do hiti om iri no moti' i tusin di pinoguli' dot id suang do karung toko' dit ongoi toko' i' do hiti'ddi. Om potigawaan toko' nogindo diyolo' do mumang om onuon nogindo diyolo' ilo kaladai toko', om iyati' no om silihon toko' do turipon diyolo',” ka diyolo'. 19 Om ongoi noddi iyolo' boro-boros di susuhuon di Yusup di mongilo-ilo do walai dau do hiri'd wawayaan di walai. 20 Boros ka diyolo', “Oi Tuan, nokoongoi no iyahai'd hiti di guulu do minongoi pomoli do gandum. 21-22 Om tontok di pinopowonsoi iyahai do kiim do hilo'd tanga'd ralan di minuli' iyahai, om ukabai no dahai i karung dahai om kosukai nogi' dahai i tusin do posoibau do pointikid-tikid di karung dahai, om i tusin dahai nga' hino ngai' i'. A' i' dahai noilaan ondung isai o pinoposuang di tusin diri do hiri'd suang di karung dahai. Om diya ngai' no i tusin diri do nigitan kawagu dahai do patahakon dahai diya', oi Tuan. Om nokopongigit po kawagu iyahai do tusin do suwai ko' iti do maan dahai do pomoli kawagu do gandum,” ka diyolo'. 23 Om boros ka di susuhuon, “Kada' kou katangkabo. Kada' kou kooris, tu' iri doti' i Kinorohingan dokoyu, i Kinorohingan di tukuon di tapa' dokoyu o pinoposuang di tusin diri do hiri'd karung dokoyu. Tu' naramit ku i' i pinomoli dokoyu di gandum diri,” ka dau. 24 Om ngoyo' noddi di susuhuon poropoho' diyolo' i Simion. Om posolokoyo' ngai' no dau iyolo' do hiri'd walai, om ngoyo' no dau iyolo' onuwai do waig do maan do pongoug do lapap. Om ngoyo' nogiddi dau paakano' i kaladai diyolo'. 25 Om posodiawo' no ngai' di tobpinai di Yusup i popuhawangon diyolo' di Yusup do koguli' iyau do hiri'd walai dau di tangaadau, tu' nosunudan no mantad iyolo' dot angatan iyolo' di Yusup do makan. 26 Om soira' di nokoguli' i Yusup do hiri'd walai om ngoyo' no diyolo' posolokoyo' i popuhawangon diyolo'ddi om patahako' no diyolo' di Yusup do mikuwo'd minotud dot id toguang dau. 27 Om ponguhot no i Yusup ondung ongosonong-sonong iyolo', boros ka dau, “Poingkuro-kuro no habar di tapa' dokoyu, i molohing noddi, i sinusui dokoyu dot id doho' di guulu'ddi? Poimpasi po kasai' iyau, om osonong-sonong i' iyau?” ka dau. 28 Om boros ka diyolo' do suminimbar, “Iri nopo tapa' dahai, i susuhuon nu, om poimpasi po om osonong-sonong i' iyau,” ka diyolo'. Om otud no iyolo' do tuminuku' dot id toguang di Yusup. 29 Om soira' di nokito di Yusup i Binyamin, i tadi' dau, i toput kopio dau'd pusod, om boro-boros no iyau, “Iti no i tobpinai dokoyu dot id domulok, i pinosunud dokoyu dot id doho'ddi? Kinorohingan i' o manahak diya' do barakat, oi tanak ku,” ka dau. 30 Om olisiu noddi kopio i Yusup di tadi' dau'ddi, om oruhai no dot a' dau opusus o tihad dau, om suang noddi iyau do hiri'd bilik dau, om ihad no iyau. 31 Om kopongillagup poddi i Yusup, om labus nogi' iyau om tumotos po iyau do momusus do ginawo dau do siihad, om ponuhu' noddi iyau do posurung do takanon. 32 I Yusup nopo om sinurungan dot id iso' o mija' do suwai tu' sorohon diyolo' dot aiso' nondo o ngaran-ngaran diyolo' do mongoi iyolo' torungak di tulun dot Ibrani do makan. 33 Om iruso' nopo do pinopoirikau i tobpinai di Yusup do potoguang di Yusup do pinoirus di tumur diyolo', do pinoimpuun do mantad id dotuo om gisom dot id komulakan. Om soira' di nokito diyolo' do nirus iyolo' do pinopoirikau om mogisosonsod poddi iyolo' do nosusuayan. 34 Om surungai noddi iyolo' do takanon do mantad hiri'd mija' di Yusup, nga' iri nopo i di Binyamin om inglimo kogumu' ko' mantad di pinatahak dot id piro-piro o tobpinai dau. Om akan noddi iyolo' om ponginum-nginum iyolo' do potorungak di Yusup do gisom do nangabagalan iyolo'.
I Sangkir do Natagak
1 Om sunudai no di Yusup i susuhuon dau di mongilo-ilo dot id walai dau, boros ka dau, “Suangan nod gandum ilo karung di tulun, do songkuro nopo it ooyit diyolo', om posuangon no i tusin diyolo' dot id pointikid-tikid di karung diyolo' do posoibahon di gandum. 2 Om posuangon no i sangkir ku'd pirok dot id suang di karung di tobpinai diyolo' di komulakan, om potonggoyon no i tusin do pinomoli dau,” ka dau. Om wonsoyo' no di susuhuon o miagal di pinonuhuan dau. 3 Om osuab po di kosuabon kawagu om suhuo' noddi i piro-piro o tobpinai di Yusup diri do minamanau do miwoyo' di kaladai diyolo'. 4 Nga' tontok dit a' po osodu' kopio o kinapamanahon diyolo' do mantad hiri'd Masir, om boros ka di Yusup dot id susuhuon dau di mongilo-ilo do walai dau, “Ngoyo' kopio gusao' i tulun diri. Om soira' nopo dot okosupan nu iyolo' om uhoton no iyolo' do poingkaa, 'Nokuro tu' sulian dokoyu dot araat it osonong? 5 Nokuro tu' pinanakau dokoyu i sangkir do pirok di Tuan ku? Iri nopo i sangkir diri nga' ponginuman di Tuan ku, om iri nogi' o pogogontong dau. Araat no kopio o winonsoi dokoyu,' kanto,” ka dau. 6 Om soira' di nokosupan iyolo' di susuhuon di Yusup, om poboroso' no di susuhuon diri o miagal di pinobilin di Yusup dau. 7 Om boros ka diyolo' dot id dau, “Nunu kopio o komoyon do boros do Tuan do miagal dino? Sumumpa' no iyahai dot a' i' iyahai nokowonsoi do miagal diri. 8 Noilaan nu i' dot iri nopo tusin di nokito dahai dot id suang do karung dahai di guulu'ddi om nokoguli' no dahai dot id diya' do nigitan dahai do mantad hilo'd Kanaan. Nga' nokuro nogi' daa'ddi tu' manakau po iyahai'd pirok ko' tamas do mantad id walai di Tuan nu? 9 Nga' sokiro nopo do haro o tongosongulun dot id pogialatan dahai dot oilaan nu'd kiinigit diri, oi Tuan, om patayon nopo iyau, om iyahai no om sumiliu do susuhuon nu,” ka diyolo'. 10 Nga' boros ka di susuhuon diri, “Ookunan ku i' ino, nga' iri no tulun di minanganu di sangkir o sumiliu do turipon ku; nga' iri nopo suwai om lumombus nopod mamanau,” ka dau. 11 Om olomus nopoddi iyolo' do minanakas di gandar, om sompori-pori nopo do minonukai di karung diyolo'. 12 Om ngoyo' noddi di susuhuon di Yusup sorisido' do mogontong ngai' i karung diyolo', om impuuno' no dau o mantad hiri'd dotuo om gisom dot id komulakan. Om kokito no dau i sangkir do hiri'd suang do karung di Binyamin. 13 Om hurako' nopoddi di piro-piro o tobpinai di Binyamin o rasuk diyolo' dot atatangaban. Om pagandaro' no kawagu diyolo' i gandum om poguliai nogiddi kawagu diyolo' do hilo'd bandar do Masir. 14 Om di nopoddi nokorikot i Yohuda om i piro-piro o tobpinai dau do hiri'd walai di Yusup, om hiri pod walai i Yusup. Om otud no iyolo' do tuminuku' dot id toguang di Yusup. 15 Om boros ka di Yusup, “Nunu kopio i winonsoi dokoyu'ddi? A' kou toi koilo do tulun nopo do miagal doho' o pangkat om milo i' do mogihum dokoyu dot i toilaan do dong bobolian o pakayon do mogihum?” ka dau. 16 Om boros ka diyolo', “Nunu po o milo dahai'd poboroson dot id diya' oi Tuan? Poingkuro po iyahai'd sumongkiwal? Poingkukuro po iyahai do popotopot dahai? Tu' nokoimbulai nod Kinorohingan o kasalaan dahai. Nga' baino' nopo om oinsanan nopo iyahai do sumiliu'd susuhuon nu, om okon i' ko' iri no i tulun di minanganu di sangkir,” ka di Yohuda. 17 Om boros ka di Yusup, “A' i'! A' oku i' momonsoi do miagal diri! Suwai ko' iri no i tulun di minanganu di sangkir ku o sumiliu do susuhuon ku. Nga' iri nopo suwai om milo i' do gumuli' do hilo'd tapa' dokoyu,” ka dau.
Nobian di Yohuda i Binyamin
18 Om ongoi no i Yohuda rapou di Yusup, om boro-boros nod, “Mokiampun oku no diya', oi Tuan, tu' pokionuon ku daa do milo oku do monokiboro-boros do Tuan. Kada' kotogod doho', tu' iya' nga' miagal i' di raja'. 19 Boros ka nu do minonguhot dahai, oi Tuan, om 'Haro po o tapa' om tobpinai dokoyu?' ka nu. 20 Om boros ka dahai do suminimbar, 'Haro po bo o tapa' dahai'dti nga' molohing no, om songulun po tobpinai dahai dot id domulok, i nosusu do tontok di molohing no kopio i tapa' dahai. Om haro i' daa o tobpinai kopio dau do toput kopio dau'd pusod nga' napatai no, om iyau po o poimpasi di pinaganak di tina' kopio diyolo'; om iyau noddi o kosianan kopio di tapa' dau,' ka dahai. 21 Om minonuhu' ko, oi Tuan, do mangangat dau'd hiti, om kokito ko i' dau. 22 Om posimbaro' no dahai dot iri nopo tanak diri om a' i' milo do tumongkiad di tapa' dau tu' kotongkiad nopo iyau, nga' apatai no i tapa' dau. 23 Om boros ka nu, 'A' kou no milo do sumolowot kawagu doho' dot a' no dokoyu potonudon ino tobpinai dokoyu dot id domulok,' ka nu. 24 Om soira' di nokoguli' iyahai do hilo'd tapa' dahai, om sunudai no dahai iyau di boros nu. 25 Om suhuo' no iyahai dau do gumuli' kawagu'd hiti do mongoi boli do gandum. 26 Om boros ka dahai, 'A' no iyahai milo do mongoi solowot di gobunor dot a' nu no potonudon dahai ilo tobpinai dahai dot id domulok. Mongoi nopo iyahai'd hilo' om katanud dahai i tobpinai dahai,' ka dahai. 27 Nga' boros ka di tapa' dahai, 'Koilo kou i' do tanak nopo di Rasil, i sawo ku om duwo noo. 28 Nga' iri nopo it id gulu om nokotongkiad no doho'. Om atantu' no do nopogianat-anat po iyau do numaan do nintorusan dit orongit, tu' a' oku no nokosolowot dau do mantad diri. 29 Om ondung ngoyon pondo dokoyu ilo tanak ku'd koduwo, om haro nondo o kosusaan do koontok dau om atantu' no dot iti no katangaban di porikoton dokoyu dot id doho' o kapatai doho', tu' molohing oku no kopio,' ka di tapa' dahai,” ka di Yohuda. 30-31 Om boros ka kawagu di Yohuda, “Iyo nopoddi oi Tuan, om ondung muli' oku do hilo'd tapa' ku dot a' no manud-tanud doho' ilo tanak om atantu' no dot apatai i tapa' ku. Tu' ginawo nopo dau om poinsokot po dilo tanak, om iri nopondo i katangaban di porikoton dahai dot id dau om kapatai no dau, tu' molohing no kopio iyau. 32 Om kawagu po nga' nakatahak ku no o tinan ku dot id di tapa' do maan do pamajamin dilo tanak. Om nokosunud ku no dot ondung a' koguli' ilo tanak dot id dau om iyoho' ngai' no o mamabo do kasalaan diri do gisom dot ikapatai ku. 33 Nga' baino' nopodti, oi Tuan, om pologoso' oku no do mundorong do hiti do sumiliu do turipon nu do tumingolon dilo tadi' ku. Om pologoson no iyau do muli' do tumanud dilo piro-piro o tobpinai dau. 34 Tu' poingkukuro oku pondo do muli' do sumolowot di tapa' ku dot a' manud-tanud doho' ilo tanak? Tu' a' oku no kasaap do kokito do kosusaan diti do koontok di tapa' ku,” ka di Yohuda.
Pinointutun di Yusup Iyau dot id Tongotobpinai Dau
1 Om a' noddi di Yusup opusus o ginawo dau do hiri'd toguang di susuhuon dau. Om suhuo' ngai' no dau i susuhuon dau'ddi do sumoliwan do mantad hiri'd bilik. Om aiso' noddi o tongosongulun do tulun do suwai do hiri di pinopointutun i Yusup dot id piro-piro o tobpinai dau ondung isai kopio iyau. 2 Om ihad noddi i Yusup dot opuhod kopio gisom do nokorongou i tulun do Masir. Om haro'ddi o pinoporikot do habar diri do hiri'd walai di raja'. 3 Om boros kaddi di Yusup dot id piro-piro o tobpinai dau, “Iyoho' nogi' bo i Yusup diri! Poimpasi po i tapa' ku?” ka dau. Nga' ongooris nogi' i tobpinai di Yusup do nokorongou'ddi, gisom dot a' no iyolo' kosimbar. 4 Om boros kaddi di Yusup dot id tobpinai dau'ddi, “Insomok-somok kou doho',” ka dau. Om insomok noddi iyolo' di Yusup, om boros ka kawagu di Yusup, “Iyoho' nogi' bo i Yusup, i tobpinai dokoyu'ddi, i pinadagang dokoyu do hiti'd Masir. 5 Nga' baino' nopo om kada' kou no tongob om kada' kou ponosol do pinapadagang doho'd hiti. Otopot nopo kopio om Kinorohingan i' o pinapaatod doho'd hiti, do minogulu dokoyu om kapamasi oku i' do tulun dot ogumu'. 6 Om koduwo nogi' moti'd toun diti do mononglous o hiti'd pomogunan om haro po limo toun dot id dosunsudan dot aiso' o mongumo om aiso' o mongomot. 7 Pinaatod mantad oku'd Kinorohingan do pinogulu dokoyu do mamasi dokoyu dot iyo'dti o karalan-ralano' tu' kosuayan kopio, om apasi kou i' om i sinakagon dokoyu. 8 Okon i' ko' iyokoyu kopio o pinapaatod doho' do hiti, nga' Kinorohingan i'. Iyau no i pinoposiliu doho' do pagawai di raja' dit asawat kopio. Om iyoho' no o nonuan do kuasa' do mongilo-ilo do pointongkop diti pomogunan, om iyoho' o nosiliu'd pomorinta' do pointongkop do hiti'd Masir. 9 Uli' kou nogi' kopio do hilo'd tapa' ku do dinondo om sunudan no iyau dot iti no o boros di Yusup, i tanak dau, 'Siniliu oku'd Kinorohingan do pomorinta' do pointongkop do Masir, om rumikot no do hiti'd doho' dot oruhai. 10 Om miyon kou indo do hilo'd Gusin, tu' osomok doho', --- iya' om i tangaanak nu, om koinsanai di manangaki diya'; om koinsanai di baanan do dumba', om kambing, om sapi' om koinsanai di diya'd songonuon. 11 Ondung hilo' ko'd Gusin, om milo oku indo do momogompi' diya'. Tu' haro po moti' o limo toun do mononglous dot id dosunsudan diti, om mada' oku i' dot oinggorit kou do louson --- iya', om i sompiiyon nu, om i tayam-tayam nu,' kanto,” ka di Yusup. 12 Om boros ka kawagu di Yusup, “Koinsanai dokoyu, om iya' nogi', oi Binyamin, nga' nokokito no dot i Yusup kopio oku. 13 Sunudan no kopio i tapa' do kogoyoo' do kuasa' ku do hiti'd pomogunan do Masir, om sunudan no dokoyu iyau do koinsanai diti nongokito dokoyu. Om angatan nogindo dokoyu iyau do kumaa'd hiti, om kada' kou no pingkalaid,” ka dau. 14 Om gopuso' no di Yusup i Binyamin, i tobpinai dau, om ihad no i Yusup, om i Binyamin nogiddi nga' minihad i' do mikuwo'd guminapus di Yusup. 15 Om mihad-ihad po i Yusup do guminapus om tuminungub di koobpinayan dau'd suwai. Om boro-boros nogiddi i piro-piro o tobpinai di Yusup dot id di Yusup. 16 Om soira' di nokorikot do hiri'd walai di raja' i habar do nongkorikot i koobpinayan di Yusup, om asanangan tomod diri i raja', om i tongopagawai dau do nokorongou'ddi. 17 Om boros ka di raja' dot id di Yusup, “Sunudan ngai' no kopio i tobpinai nu do mamagandar di kaladai diyolo' do gumuli' do hilo'd Kanaan. 18 Om suhuon no iyolo' do mongoi pangangat di tapa' nu om koinsanai di sompiiyon diyolo' om mongoi indo kawagu do hiti. Om onuan ku indo iyolo' do tana' dit osonong do hiti'd Masir, om a' indo diyolo' aayi-ayi' i tua' do totonomon do hiri'd tana'ddi. 19 Om sunudan no iyolo' do mongigit do piro-piro guyudan do maan do sakayon di sawo diyolo' om i tangaanak diyolo' dit ongokoro' po. Om sunudan no iyolo' do mangangat di Yakub do tumanud diyolo' do kumaa'd hiti. 20 A' no minog dot orubatan iyolo' do tumongkiad di konunu-nunuan diyolo'd hilo', tu' koinsanai dit ongosonong do hiti'd pomogunan do Masir nga' asanganu ngai' no diyolo',” ka dau. 21 Om tonudo' ngai' nopo di tangaanak di Yakub i pinonuhuan diri. Om onuwai no di Yusup iyolo' do piro-piro o guyudan do tuminanud di pinonuhuan di raja', om kinokorihan po iyolo' do taakanon do maan do hilo'd ralan. 22 Om tikidai po dau iyolo' do sarampasangan do pakayan di wagu, nga' i Binyamin nopo om nonuan dau do tolu nahatus o kaping do pirok om limo pasang do pakayan do wagu. 23 Om onuwai no di Yusup i tapa' dau do hopod o tinan do kaladai do pinagandaran do hino ngai' o konunu-nunuan dit ongosonong do mantad hilo'd Masir, om hopod o tinan do kaladai do ginandaran do gandum om roti, om taakanon po di suwai ko' iri do maan di Yakub do kokoriu do mamanau do kumaa do hilo'd Masir. 24 Om pologoso' noddi di Yusup i piro-piro o tobpinai dau do mamanau do muli' do hilo'd Kanaan, om tontok di minamanau iyolo' om bilinai no di Yusup iyolo', boros ka dau, “Kada' kou pogisosongkiwal do hilo'd ralan,” ka dau. 25 Om pamanau no iyolo' do mantad hilo'd Masir, do minuli' do hilo'd di Yakub, i tapa' diyolo' do hilo'd Kanaan. 26 Om boros ka diyolo', “Poimpasi po moti' pama i Yusup! Om i Yusup no o pomorinta' do pointongkop do hilo'd Masir,” ka diyolo'. Nga' kapagag nopo tomod i Yakub dot iyo pod sinisian iyau, om a' daa'ddi iyau monongkuyaan kopio di boros diyolo'. 27 Nga' soira' di nosunudan diyolo' i Yakub di boros di Yusup dot id diyolo', om di nokokito i Yakub di guyudan do pinoigitan di Yusup do pasakayan di Yakub do kumaa do hilo'd Masir, om kopuriman nogiddi kawagu i Yakub. 28 Om boros kaddi dau, “Poimpasi po pama i Yusup, i tanak ku! Iri no kopio i pokionu-onuon ku! Mongoi oku no kopio solowot dau do daamot pod a' oku apatai,” ka dau.
Minongoi i Yakub om i Sompiiyon Dau do Hilo'd Masir
1 Om opi-opio' no di Yakub i konunu-nunuan dau om ongoi no iyau do hilo'd Borsiba do mongoi papatahak do porsombahan dot id Kinorohingan di tukuon di Isak, i tapa' dau. 2 Om boro-boros no o Kinorohingan dot id dau dot id suang dot iso' o pinointalang di nokito di Yakub di dongotuong, om lohowo' no dau i Yakub, “Yakub! Yakub!” ka. Om boros ka di Yakub do suminimbar, “Diya oku i' oi TUHAN,” ka dau. 3 Om boros kad Kinorohingan, “Iyoho' no o Kinorohingan, i Kinorohingan di tukuon di tapa' nu. Kada' kooris do kumaa do hilo'd Masir; tu' silihon ku o sinakagon nu dot iso' o bansa' dit agayo. 4 Om woyoon ku i' iya' do kumaa do hilo'd Masir, om pogulion ku indo kawagu do hiti'd pomogunan diti o sinakagon nu. Om hiri indod doros nu i Yusup do matai ko,” ka dau. 5 Om pamanau no i Yakub do mantad hilo'd Borsiba. Om pasakayo' no iyau di tangaanak dau do hiri'd guyudan, om i sawo diyolo', om i tangaanak dit ongokoro' po nga' pinasakai nogi' diyolo' do hiri'd guyudan di pinatahak di raja' do Masir dot id diyolo'. 6 Om tanggayai ngai' no diyolo' i tayam-tayam diyolo', om koinsanai di dapu' diyolo' di naanu diyolo' do hilo'd Kanaan, nga' nigitan ngai' nogi' diyolo' do kuminaa do hilo'd Masir. Om potonudo' ngai' nopo di Yakub i sinakagon dau: 7 i tangaanak dau'd kusai, om i manangaki dau'd tongoondu'. 8 Iti ngai' no it id suang do sompiiyon di Yakub di kuminaa do hilo'd Masir: i Rubin, i tanak di Yakub do kusai dit id dotuo, 9 om i tangaanak di Rubin do kusai: i Hinok, i Palu, i Hisron, om i Karmi. 10 I Simion om i tangaanak dau'd kusai: i Yomuil, i Yamin, i Ohad, i Yakin, i Sohar, om i Saul, i tanak di tondu' do bansa' do Kanaan. 11 I Liwi om i tangaanak dau'd kusai: i Girson, i Kohat, om i Morari. 12 I Yohuda om i tangaanak dau'd kusai: i Sila, i Piris, om i Sira. (Iri nopo tangaanak di Yohuda do suwai, iyo' Or di Onan, om napatai no do hilo'd Kanaan.) Tanak nopo di Piris do kusai, om i Hisron om i Hamul. 13 I Isakar om i tangaanak dau'd kusai: i Tola, i Pua, i Ayub om i Simron. 14 I Sibulon om i tangaanak dau'd kusai: i Sirid, i Ilon, om i Yaliil. 15 Iri ngai' no i tangaanak do pinaganak di Lia, i tangaanak diyolo' di Yakub, di hilo' pod Misopotamia, om tanak no diyolo' do tondu' om i Dina. Koinsanai nopo do sinakagon di Yakub do mantad id di Lia om tolu nohopod om tolu o tulun. 16 I Gad om i tangaanak dau'd kusai: i Sipion, i Hagi, i Suni, i Isbon, i Iri, i Arodi, om i Arili. 17 I Asor om i tangaanak dau'd kusai: i Yimna, i Yiswa, i Yiswi, i Boria, om i tobpinai diyolo'd tondu' dot i Sira o ngaran. Tangaanak no di Boria do kusai om i Hibir om i Malkiol. 18 Om iri nopo hopod om onom o tulun diri om sinakagon di Yakub do mantad id di Silpa, i turipon do tondu' do pinatahak di Laban dot id di Lia, i tanak dau'd tondu'ddi. 19 Om i Rasil no, i sawo di Yakub om duwo no tanak dau'd kusai: i Yusup no om i Binyamin. 20 Om tontok di hilo' i Yusup id Masir, om kianak diri iyau do duwo o kusai: i Manasi om i Ipraim, i tanak diyolo' di Asnat, i tanak di Potipira do tondu'. I Potipira nopo om imam do hilo'd Hiliopolis. 21 Tangaanak no di Binyamin do kusai om i Bila, i Bikir, i Asibol, i Gira, i Naaman, i Ihi, i Ros, i Mupim, i Hupim, om i Arod. 22 Iri nopo hopod om apat o tulun diri om sinakagon di Yakub do mantad id di Rasil. 23 I Dan om i tanak dau'd kusai dot i Husim o ngaran. 24 I Naptali om i tangaanak dau'd kusai: i Yahsiil, i Guni, i Yisir om i Silom. 25 Iri nopo turu' o tulun diri om sinakagon di Yakub do mantad id di Bilha, i turipon do tondu' do pinatahak di Laban dot id di Rasil, i tanak dau do tondu'ddi. 26 Kogumuon nopo do tulun di sinakagon kopio di Yakub, do kuminaa do hilo'd Masir om onom nohopod om onom o tulun, nga' a' i' nokointob i sawo di tangaanak di Yakub do kusai. 27 Om tanak nopo di Yusup di nosusu do hilo'd Masir om duwo o kusai, om koinsanai nopoddi do sompiiyon di Yakub di nokoongoi do hilo'd Masir om turu' nohopod o tulun.
I Yakub om i Sompiiyon Dau do Hilo'd Masir
28 Om suhuo' no di Yakub i Yohuda do minogulu do mongoi pomisunud di Yusup do mongoi ruba' diyolo' do hilo'd Gusin. Om soira' di nokorikot iyolo' di hilo'd Gusin, 29 om sakai no i Yusup di guyudan dau om ongoi no do hilo'd Gusin do minongoi ruba' di tapa' dau. Om soira' di nokopisolowot iyolo', om gopuso' nopo di Yusup i tapa' dau, om alaid diri i Yusup do minihad. 30 Om boros ka di Yakub dot id di Yusup, “Songkoino oku nod matai, tu' nokokito oku noddi diya', om noilaan ku do poimpasi ko po,” ka dau. 31 Om boro-boros noddi i Yusup dot id tobpinai dau om id koobpinayan dau di suwai do poingkaa, “Ngoyon ku po kopio sunudai i raja' do nokorikot ngai' no i tobpinai ku om koinsanai di koobpinayan ku'd suwai di songundorong do hilo'd Kanaan. 32 Om sunudan ku nogi' i raja' dot iyokoyu nopo om gompomogompi' do dumba' om sapi' om nigitan ngai' dokoyu i tayam-tayam dokoyu, om koinsanai di dokoyu'd songonuon. 33 Om soira' nopod lohowon kou di raja', om monguhot no iyau ondung nunu o karaja' di koubasanan dokoyu, 34 om sunudan no dokoyu i raja' dot iyokoyu nopo om noubas no do momogompi' do tayam-tayam do mantad poddi tongokoro' kou po, do miagal di taki-aki dokoyu. Ondung oilaan dau do miagal diri om pologoson kou indo dau do momogun-mogun do hilo'd Gusin,” ka dau. Pinoboros pogi' di Yusup o miagal diri nga' tulun nopod Masir om a' no kopio orohian do rumolot do gompomogompi' do tayam-tayam.
1 Om angatai noddi di Yusup o limo di tobpinai dau do minongoi solowot di raja'. Om sunudai no di Yusup i raja', boros ka dau, “Nokorikot no i tapa' ku do mantad hilo'd Kanaan, om i tobpinai ku nga' tuminanud ngai' nogi', om i baanan do kambing om dumba' om sapi', om koinsanai di diyolo'd songonuon nga' nigitan ngai' no diyolo'd hiti. Om dinondo nopodti om hilo' no iyolo'd Gusin,” ka di Yusup. 2 Om ngoyo' noddi di Yusup posolowoto' di raja' i limo o tobpinai dau. 3 Om uhoto' noddi di raja' iyolo', boros ka dau, “Nunu o karaja' dokoyu,” ka dau. Om boros ka diyolo' do suminimbar, “Iyahai nopo om gompomogompi' do dumba', oi Tuan Raja', do miagal di taki-aki dahai. 4 Om kinorikatan nopo dahai do hiti'd pomogunan diti om adalaan kopio do mononglous o hilo'd Kanaan om sakot piya'ddi nga' aiso' no do pangakan-ngakanan dilo kambing om dumba' dahai. Om pokionuon no daa dahai do popotumboyo' o raja' do hilo' iyahai'd Gusin do momogun-mogun,” ka diyolo'. 5 Om boros ka di raja' dot id di Yusup, “Iyo nopodti tu' nokorikot no ilo tapa' nu, om ilo tobpinai nu do hiti, 6 om iti nopo tana' do Masir, om iyolo' no o sumanganu. Pologoson nopo iyolo' do momogun-mogun do hilo'd Gusin, i kinoiyonon dit osonong kopio do hiti'd pomogunan diti. Om ondung haro ot id pogialatan diyolo' dit oilo kopio do momogompi' do tayam-tayam, om silihon no doho' iyolo' do gompomogompi' dilo doho'd tayam-tayam,” ka. 7 Om ngoyo' noddi di Yusup posolowoto' di raja' i Yakub, i tapa' dau, om barakatai no di Yakub i raja'. 8 Om uhoto' no di raja' i Yakub, boros ka dau, “Piro no o tumur nu?” ka. 9 Om boros ka di Yakub do suminimbar, “Hatus no om tolu nohopod o toun ku do mombo-hombo. Nga' oniba' i' iri om oinggorit po dot opudolian do kotoguyon di komolohingan ku,” ka dau. 10 Om barakatai noddi di Yakub i raja' do pinongintod dau om tongkiad noddi i Yakub. 11 Om tulungo' no di Yusup i tapa' dau om koinsanai di tobpinai dau do momogun-mogun do hilo'd Masir, om onuwai no dau iyolo' do tana' dit osonong kopio dot id pomogunan diri do maan do diyolo'd songonuon, i hilo'd potoropis di bandar do Ramisis, do tumanud di pinonuhuan di raja'. 12 Om onuwai no di Yusup do taakanon i tapa' dau, om i tobpinai dau, om koinsanai di koobpinayan dau'd suwai, om nokohompit ngai' nogi' it ongokoro' po.
Minononglous
13 Om adalaan noddi kopio o pononglous tu' hinonggo-honggo nopo nga' aiso' no taakanon. Om iri'ddi tulun do Masir om i tulun do Kanaan nga' ongoluhoi no dot ouru do louson. 14 Om pointikid-tikid do momoli o tulun di gandum om timungon no di Yusup i tusin di gatang di gandum diri, om ngoyon nondo dau pootodo' do hiri'd walai di raja'. 15 Soira' di nongooyian do tusin o tulun do hilo'd Masir om hilo'd Kanaan; om rikot noddi i tulun do Masir dot id di Yusup, om boros ka diyolo', “Onuwai iyahai'd takanon! Kada' iyahai pologoso' tomod dot apatai. Wonsoyon nopo o nunu nopo i toilaan nu'd momonsoi! Tu' nangaayi' no tusin dahai,” ka diyolo'. 16 Om boros ka di Yusup do suminimbar, “Ondung nooyian kou'd tusin, om igitan no i tayam-tayam dokoyu, om onuan ku indo iyokoyu do taakanon,” ka dau. 17 Om pootodo' ngai' no diyolo' i tayam-tayam diyolo' dot id di Yusup, om onuwai no di Yusup iyolo' do taakanon do pinongolon di kuda', om dumba', om kambing, om sapi', om i kaladai diyolo'. 18 Om toun no kawagu om rikot po iyolo' dot id di Yusup, om boros ka diyolo', “A' no dahai milo do lisok-lisokon, oi Tuan do naayi' no o tusin dahai om tayam-tayam dahai nga' diya' ngai' noddi. Om aiso' no o milo dahai'd patahakon diya' suwai nondo ko' tinan po dahai om i tana' dahai. 19 Kada' no kopio iyahai pologoso' dot angapatai. Wonsoyo' nopo o nunu nopo i toilaan nu'd momonsoi. Kada' pologoso' do gumouton tomod ilo tana' dahai. Bolion nogi' iyahai om ilo tana' dahai, do maan do tolon do taakanon. Sumiliu nopo iyahai do turipon di raja', om tana' dahai nga' iyau no o sumanganu. Nga' onuwai po iyahai do gandum om a' i' iyahai angapatai, om onuwai iyahai do tonomon do potonomon do hilo'd tumo dahai,” ka diyolo'. 20 Om bolio' ngai' noddi di Yusup i tana' do tulun do Masir do pinosongonuan dau di raja' do Masir. Om pointikid-tikid do tulun do Masir nga' a' no milo dot a' pinapadagang di tana' dau, tu' adalaan no kopio i pononglous. Om koinsanai nopoddi i tana' do tulun do Masir do nasanganu di raja'. 21 Om siliho' ngai' no di Yusup do turipon i tulun do pointongkop di pomogunan do Masir. 22 Iri po tana' do dong imam ot a' di Yusup noboli, tu' a' i' minog do padagang iyolo'd tana' tu' onuan i' iyolo' di raja' do gadsi' do pomoli diyolo'd taakanon. 23 Om boros ka di Yusup dot id tulun do Masir, “Baino' nopoddi om nongoboli ngai' ku no o tinan dokoyu om koinsanai do tana' dokoyu do pinosongonuan ku di raja'. Om ongoi kou nondo anu diti linsou do maan dokoyu'd tonomon do hilo'd tumo dokoyu. 24 Om koomot kou nopondo om patahakon no di raja' o sompihopod di tomot dokoyu. Om iri nopondo toolu' om maan dokoyu'd tonomon, om maan dokoyu di sompiiyon dokoyu dot akanon,” ka di Yusup. 25 Om boros ka diyolo' do suminimbar, “Osonong ko no dot id dahai, oi Tuan; iya' po o minamasi dahai, om iyahai nopodti om sumiliu nod turipon di raja',” ka. 26 Om wonsoyo' no di Yusup ot iso' o toturan do hilo'd pomogunan do Masir, do sompilimo nopo di tomot diyolo' om mositi' no do patahakon dot id raja'. Om gisom piya do baino' nga' iyo kasai' iddi o toturan do hilo'. Om iri po i tana' do dong imam ot a' kohompit do tana' di nasanganu do raja'.
Pinokianu di Yakub dit id Tohuri no Kopio
27 Iri nopo tulun dot Israil om minundorong do hilo'd Masir do hiri'd watas do Gusin; om nosiliu'ddi iyolo' do tulun do kaya' om tangaanak diyolo' nga' guminumu'. 28 Koloidon nopo di Yakub do poundorong do hilo'd Masir om hopod om turu' o toun, do gisom do nokorikot do hatus om apat nohopod om turu' o toun dau. 29 Tontok di motingkapatai no i Yakub om lohowo' no dau i Yusup, i tanak dau, om boro-boros nod, “Pakamao' ino palad nu do hiti'd piolitan diti poo ku om sumumpa' nogindo dot a' oku diya' lobongon do hiti'd Masir. 30 Nga' lobongon oku no diya' do hilo'd pinamalabangan di taki-aki nu; posoliwanon oku no do mantad hiti'd Masir om lobongon oku no do hilo'd pinamalabangan diyolo',” ka dau. Om boros ka di Yusup do suminimbar, “Wonsoyon ku i' o miagal dino pinoboros nu,” ka dau. 31 Om boros ka di Yakub, “Sumumpa' no dot id doho' do wonsoyon nu o miagal diri,” ka dau. Om sumpa' noddi i Yusup, om pongunsikou no i Yakub do hiri'd toodopon dau.
Binarakatan di Yakub i Ipraim om i Manasi
1 Alaid-laid noddi om korongou no di Yusup do sumakit i tapa' dau. Om angatai no di Yusup i duwo o tanak dau'd kusai, i Manasi om i Ipraim, om ongoi no iyolo' kakap di Yakub. 2 Om tontok di nosunudan i Yakub do nokorikot i Yusup, i tanak dau, do mongoi kakap dau om pomilogo-logot no i Yakub do tuminungag om irikau no do hiri'd toodopon dau. 3 Om boros ka di Yakub dot id di Yusup, “Minintalang o Kinorohingan, it Agayo Kuasa', dot id doho' di hilo'd Lus, i hilo'd tana' do Kanaan, om binarakatan oku dau. 4 Boros ka dau dot id doho', 'Onuan ku indo iya' do tangaanak dot ogumu' om sinakagon nu nopondo om osiliu dot ogumu' o bansa'; om patahakon ku nondo di sinakagon nu iti pomogunan diti do maan do diyolo'd songonuon do gisom dot alaid,' ka do Kinorohingan,” ka dau. 5 Om boro-boros po kawagu i Yakub, boros ka dau, “Oi Yusup, ilo' nopo duwo tanak nu'd kusai, i nosusu do hiti'd Masir dit okon oku po ko' hiti, om doho' no om iyoho' o sanganak diyolo'; iyo' Ipraim nopo di Manasi dilo' om poiyoon ku nopo di Rubin om i Simion. 6 Ondung kianak ko kawagu do kusai, om iyolo' nopo om a' no pohompiton do tangaanak ku; tungkusan nopondo diyolo' om mantad no dot id di Ipraim om i Manasi. 7 Kapamansayan ku nopo do miagal diti nga' pongobi' ku di Rasil, i tina' nu. Tu' tumongob oku no kopio do tontok di napatai iyau do hilo'd tana' do Kanaan, i hilo'd somok dot Iprata, do tontok di hilo' oku pod tanga'd ralan do muli' do mantad hilo'd Misopotamia. Om lobongo' ku noddi iyau do hilo'd tisan di ralan do kumaa do hilo'd Iprata,” ka dau. (Iprata nopod baino' om roitan do Baitlahim.) 8 Om soira' di nokito di Yakub i tangaanak di Yusup diri, om ponguhot no iyau, “Isai ilo tangaanak dilo'?” ka dau. 9 Om boros ka di Yusup do suminimbar, “Iyolo' no i tangaanak ku'd kusai, i tinahak do Kinorohingan doho' do hiti'd Masir,” ka dau. Om boros ka di Yakub, “Angatai iyolo'd hiti'd doros ku, om barakatan ku i' iyolo',” ka dau. 10 Om a' no kokito no i Yakub tu' molohing no kopio iyau, om a' no atalang no ot okito dau. Om ngoyo' no di Yusup poinsomoko' di Yakub i tangaanak dau, om gopuso' no di Yakub iyolo' om tungubai no dau. 11 Om boros ka di Yakub dot id di Yusup, “A' ku no daa piimanan do kosolowot oku po diya', nga' nogompi' oku poddi do Kinorohingan gisom dot iti piya tangaanak nu nga' nokokito oku po,” ka dau. 12 Om ngoyo' noddi di Yusup i tangaanak dau di poingkibit di Yakub, om otud no i Yusup do tuminuku' do hiri'd toguang di Yakub. 13 Om pohirio' no di Yusup id dogibangan di Yakub i Ipraim, om i Manasi no om hiniri dau id dawananan di Yakub. 14 Nga' pikorowoliso' no di Yakub i longon dau, om iri nopoddi longon dau'd wanan nga' pinakama' di tulu di Ipraim, do mulong piya dot iyau it id domulok, om iri no longon di Yakub do gibang om pinakama' dau do tulu di Manasi, it id dotuo. 15 Om barakatai noddi dau i Yusup do poingkaa: “Iri no i Kinorohingan, i tukuon di komolohingan ku, i Abraham om i Isak, o minomogompi' doho' do gisom do baino'. 16 Iyau no i moloikat, i pinopoidu' doho' do mantad id koinsanai'd kosusaan ku, om pokionuon ku no o Kinorohingan do mamarakat do tangaanak diti! Om maha' daa do poimpasi kasai' o ngaran ku, om i ngaran di komolohingan ku i Abraham om i Isak, dot iti tangaanak diti o manampasi! Maha' daa om gumumu' o tangaanak diyolo' om ogumu' o sinakagon diyolo'!” ka dau. 17 Om a' daa'ddi kopio orohian i Yusup do nokokito do poingkama' o longon do wanan di tapa' dau di tulu di Ipraim, om ngoyo' no daa di Yusup powoliho' i longon di tapa' dau, do mantad hiri'd tulu di Ipraim, om pakamaon daa'ddi dau di tulu di Manasi. 18 Nga' boros ka di Yusup dot id tapa' dau, “Okon i' ko' miagal dino, oi apa'. Diiya iti tanak dot id dotuo; pakamao' ino longon nu'd wanan do hiti'd tulu dau,” ka dau. 19 Nga' a' i' minumboyo' i tapa' dau, boros ka dau, “Koilo oku i', oi ondu', oilaan ku i'. Sinakagon nopondo di Manasi om sumiliu do bansa' dit abantug. Nga' okon-okon pondo o sinakagon dilo tobpinai dau dot id domulok, nga' osiliu kopio do bansa' dit abantug ko' mantad di sinakagon di tobpinai dau dit id dotuo,” ka dau. 20 Om barakatai no di Yakub i Ipraim om i Manasi do tontok do tadau'ddi do poingkaa, “Soira' nopondo do mamarakat do tulun o tulun dot Israil om oroitan no o ngaran dokoyu. Boros ka nondo diyolo' om, 'Maha' daa om poiyoon ko do Kinorohingan di Ipraim om i Manasi,' ka nondo diyolo',” ka dau. Om iyo noddi i Yakub do pinopogulu di Ipraim om okon nogiddi ko' i Manasi. 21 Om boros kaddi di Yakub dot id di Yusup, “Okito nu i' dot oruhai oku no dot apatai, nga' Kinorohingan nopo om manud-tanud i' diya' om popouli' kawagu diya' do hilo'd pomogunan di komolohingan nu. 22 Iya' no o poonuan ku di pomogunan do Sikim, om okon i' ko' i piro-piro o tobpinai nu, tu' tana' nopoddi om oluhub, i naanu ku do mantad id tulun dot Amori, dot i gayang om pana' ku o pinanganu ku,” ka di Yakub.
I Pinoboros di Yakub dit id Tohuri No
1 Om lohowo' ngai' no di Yakub i tangaanak dau'd kusai, om boro-boros no iyau do poingkaa, “Timung kou nod hiti'd doros ku, om sunudan ku i' iyokoyu ondung nunu ot osiliu dot id dokoyu do koimbagu: 2 Timung kou no, oi tangaanak di Yakub; om mokinongou kou no. Pokinongou kou no do poboroson di Israil, i tapa' dokoyu. 3 Oi Rubin, i tanak ku do kotuahan, iya' no i kokorisan ku, it abantug kopio om okoris kopio dot id pogialatan do koinsanai di tangaanak. 4 Iyo ko po do luyud di magampad, nga' okon indo ko' iya' it agayo kopio, tu' nampahu' nu i' i tondu' do panakasawo ku om sinosomu' nu i toodopon do tapa' nu. 5 Iyo' Simion nopo di Liwi om miobpinai. Om pomonsoi no diyolo'd karaaton i rapo-rapo diyolo'. 6 A' oku i' humompit di piburungan diyolo', a' oku i' monongkuro di pipakatan diyolo', tu' mamatai iyolo'd tulun do tontok dit otogod iyolo', om monipu' iyolo'd gakod do sapi' di tontoluhan do maan do karamayan. 7 Ousung no i kototogod diyolo', tu' adalaan no kopio o korongito', ousung no i koburonguso' diyolo', tu' pokoruol kopio. Pogitotongkiadon ku nondo iyolo' do pointongkop do pomogunan dot Israil. Potompiason ku nondo iyolo' dot id pogialatan di tulun do hilo'. 8 Oi Yohuda, iya' no o royohon di piro-piro o tobpinai nu. Om kotolon nu i pisangod nu. Om tobpinai nu nga' tumuku' ngai' nondo dot id toguang nu. 9 I Yohuda nopo om miagal do singa, kapanabpo po iyau do nintorusan om gumuli' no iyau dot id luang dau, om lumatan nondo om lumii. Aiso' no o tulun do kasaap do mongoi pomigangau dau. 10 I Yohuda no o koigit di sukud do pomorinta', om sinakagon no dau o momorinta' do gisom dot alaid. Om oinsanan nopondo o bansa' do rumikot do paatod do sukai om tumuku' do minsiriba' dot id toguang dau. 11 Pokogoson dau i tanak do kaladai dot id guas dot anggur do hiri'd guas dot anggur dit osonong kopio. Pupuan dau i pakayan dau do hiri'd waig dot anggur di miagal pod raha' karagang. 12 Aragang po o mato dau tu' nokoinum iyau do waig dot anggur, om nipon dau nga' opurak po tu' nokoinum iyau do susu. 13 I Sibulon nopo om momogun-mogun nondo do hilo'd tisan do rahat. Pododompiran nondo do kapal do rahat i koiyonon dau. Kogisomon nopondo di dau'd watas om korikot do hilo'd Sidon. 14 I Isakar nopo om iyo nod kaladai kokoris, i poinglii dot id piolitan do kantung do pakol. 15 Nga' noilaan i' dau dot osonong kopio i kinoiyonon diri om olumis kopio i pomogunan diri. Om tumongkud nondo iyau do mamabo di binabo dau om asansagan iyau do kumaraja' do miagal po di turipon. 16 I Dan nopo om sumiliu do pomorinta' do tulun dau. Om osiliu nondo iyolo' do miagal di payat dot Israil do suwai. 17 I Dan nopo om miagal dot iso' o tulanut do hiri'd tisan do talun-alun, i tulanut do hiri'd tisan do ralan, i tulanut dit opodos kopio o tindukon i moninduk do tatad do kuda', om gowoi pondo om kataam i poinsakai di kuda'. 18 Poingandad oku no di koposion do mantad id diya', oi TUHAN. 19 I Gad nopondo om saapon do mananakau, nga' gumuli' ko indo do mongoi pomogusa' diyolo'. 20 Tana' nopondo di Asor om poposuni do taakanon dit ongosonong. Iyau no o milo do manahak do taakanon di milo do posurungon do raja'. 21 I Naptali no om miagal do tambang dit osimbayan do mintangkus, om ongolumis kopio o tangaanak dau. 22 I Yusup nopo om miagal do guas dot anggur dit orombung, i poinsuni dot id toning do tudan do waig, om agayo o koroloyon do raan. 23 Ongorongit tomod i pisangod dau do sumaap dau, om haro o pawakasan diyolo'd pana' om haro o pana' diyolo' do momogusa' dau. 24 Nga' poirrindog kasai' i' i pana' di Yusup, om okoris kasai' o longon dau tu' pokorison i' di sinundu do Kinorohingan dit Okoris Kopio, i Kinorohingan di Yakub, i Gompomogompi', om i Mongintirung do tulun dot Israil. 25 Iri i Kinorohingan di tapa' nu o monguhup diya' i Kinorohingan dit Agayo Kuasa' o mamarakat diya' do rasam do mantad hilo'd tawan, om waig do mantad id saalom do tana', om tangaanak om tayam-tayam. 26 Om barakatan ko do Kinorohingan do gandum om bunga, om koinsanai dit ongosonong do mantad hilo'd konulu-nuluan dit id gulu po kopio. Maha' daa om potuntugon o koinsanai do barakat diti dot id tulu di Yusup, om hiri'd turos dau, iyau it agayo kopio dot id pogialatan do tobpinai dau. 27 I Binyamin nopo om miagal do toni dit orongit. Monikid kosuabon nopo om monikid sosodopon do mamatai om mangakan iyau dit aanu dau,” ka di Yakub. 28 Iti no i hopod om duwo o payat dot Israil, om iti no i pinoboros di tapa' diyolo' do tontok di minoro-boros iyau do minongintod do pointikid-tikid di tangaanak dau.
Napatai om Linobong i Yakub
29 Om bilinai noddi di Yakub i tangaanak dau do poingkaa, “A' no alaid om mongoi oku no sugku' di komolohingan ku di nangapatai. Om lobongon oku no di hilo'd pinamalabangan di taki-aki ku dot id suang di luang do nuluhon do hilo'd tana' di Ipron, i tulun do Hit, 30 i hilo'd Makpila, i ponong id koulayon do mantad id Mamri, i hilo'd tana' do Kanaan. Iri nopo luang do nuluhon diri om i tana'ddi om binoli di Abraham do mantad id di Ipron, i tulun do Hit, do maan do kalabangan. 31 Hilo' no o pinamalabangan diyolo' di Abraham om i Sara, i sawo dau; om hilo' nogi' o pinamalabangan di Isak om i Robika, i sawo dau; om hilo' nogi' o pinamalabangan ku di Lia. 32 Iri nopo tana'ddi om i luang do nuluhon do hiri, nga' binoli do mantad id tulun do Hit. Om lobongon oku no iyoho' do hilo',” ka dau. 33 Om kongoboros poddi di Yakub i bilin dau dot id tangaanak dau, om lii no kawagu i Yakub, om kapatai noddi iyau.
1 Om haba' nopo i Yusup do tuminabpo do tinan di tapa' dau, om ihad no do mikuwo'd tuminungub do rabas di tapa' dau. 2 Om ponuhu' noddi i Yusup do mangapur di rata' di tapa' dau. 3 Kosoruan nopo do koloidon do mangapur do rata' om apat nohopod o tadau. Om pogihadai no di tulun do Masir i Yakub do solinaid do turu' nohopod o tadau. 4 Om katalib poddi i kinopogihadan diri om boro-boros no i Yusup di pagawai di raja', boros ka dau, “Poboroson no doho' iti dot id raja': 5 'Tontok dit oruhai no dot apatai i tapa' ku, om sinuhu' oku dau do sumumpa' dot id dau do pamalabangan ku nopo dau dot apatai iyau om hiri'd lobong di nokosodia' no dau do hilo'd tana' do Kanaan. Iyo nopoddi, om pabanaron oku no do mongoi pomolobong dilo tapa' ku do hilo', om gumuli' oku indo kawagu do hiti dot olobong ku iyau, ka dau,' kanto dokoyu,” ka di Yusup. 6 Om boros ka di raja' do suminimbar, “Ngoyon nopo lobongo' ilo tapa' nu do miagal di nookunan nu,” ka dau. 7 Om ngoyo' noddi di Yusup lobongo' i tapa' dau. Om oinsanan nopoddi i pagawai di raja', om i molohing-lohingon do hiri'd walai di raja', om i tulun dit ongkipangkat do hilo'd Masir do tuminanud di Yusup. 8 Om i sompiiyon di Yusup, om i tobpinai dau, om i koobpinayan dau'd suwai nga' tuminanud ngai' nogi' di Yusup. Iri po i tangaanak diyolo' dit ongokoro' po, om i tayam-tayam diyolo' o noolu' do hilo'd Gusin. 9 Om i soudor do songinsakai'd korita'-kuda' om i songinsakai do kuda' nga' tuminanud nogi', om ogumu' tomod diri iyolo' do mogiwoyo-woyo'. 10 Om soira' di nokorikot iyolo' do hiri'd pamagamasan do gandum di hilo'd Atad, i ponong id koulayon do mantad id Bawang do Yordan, om hilo' no iyolo' dot alaid tomod do minglompud do mihad. Om papaharo noddi i Yusup do pagadatan do mogihad do turu' o tadau do koloido'. 11 Om soira' di nokito iyolo' di tulun do Kanaan do minogihad do hiri'd Atad, om boros ka diyolo', “Ohiyo no kopio ilo tulun do Masir do mogihad!” ka. Om iri noddi o kinopomungaranan diyolo' di kinoiyonon diri dot Abil- Misraim. 12 Om iyo noddi i tangaanak di Yakub do tuminanud di pinobilin di Yakub diyolo'. 13 Om igitai no diyolo' i rata' di Yakub do hilo'd Kanaan om lobongo' no do hiri'd luang do nuluhon di hilo'd Makpila, i ponong id koulayon do mantad id Mamri, i tana' di binoli di Abraham do mantad id di Ipron, i tulun do Hit, do maan do kalabangan. 14 Om kolobong poddi di Yusup i tapa' dau, om poguliai no dau do hilo'd Masir do miwoyo' di piro-piro o tobpinai dau om koinsanai di tulun do suwai di tuminanud do minongoi pomolobong di tapa' dau.
Minonginsasamod i Yusup di Tongotobpinai Dau
15 Om di nopoddi napatai i tapa' diyolo', om boros ka di tobpinai di Yusup, “Poingkukuro toko' nondo dot otogod kasai' no i Yusup dati' om momusorou no iyau do sumuli' dati' di nongowonsoi toko' dot araat dot id dau di gulu po?” ka diyolo'. 16 Om porikoto' noddi diyolo' o boros diti dot id di Yusup, boros ka diyolo', “Di nopo dit a' po napatai i tapa' toko' 17 om minonuhu' iyau dahai do popoboros dot id diya' do poingkaa, 'Ompunai no i nongowonsoi di tobpinai nu dit araat kopio dot id diya',' ka dau. Iyo nopoddi, om pokionuon no daa dahai do mangampun ko do koinsanai di kasalaan do nowonsoi dahai, iyahai i susuhuon do Kinorohingan di tukuon di tapa' nu,” ka. Om ihad nopo i Yusup do nokorongou di boros diyolo'ddi. 18 Om rikot ngai' noddi i tobpinai di Yusup dot id di Yusup, om tuku' no iyolo' dot id toguang dau, mikuwo'd minoro-boros do poingkaa, “Iyahai nopodti om turipon nu no,” ka. 19 Nga' boros ka di Yusup dot id diyolo', “Kada' kou kooris, tu' okon oku i' ko' Kinorohingan. 20 Tu' minogiupakat kou daa do momonsoi dot araat dot id doho', nga' siniliu i' do Kinorohingan iri dot osonong, tu' iri no i nongosiliu di gulu poddi o nakapasi do tulun dot ogumu', i poimpasi po do gisom do baino'. 21 Kada' kou katangkabo. Tu' gompion ku i' iyokoyu om i tangaanak dokoyu,” ka dau. Iyo noddi o boros di Yusup do pinoposimbayan do ginawo diyolo', tu' osonong i' o boros dau om nokoinsasamod do ginawo diyolo'.
Kinapatayon di Yusup
22 Om poingiyon poddi i Yusup do hilo'd Masir do poinsugku' di koobpinayan dau; om kapatai noddi i Yusup di hatus om hopod o toun dau. 23 Om nokokito po iyau di piro-piro o manangaki di Ipraim. Om naanu po dau i tangaanak di Makir, i manangaki di Manasi, do siniliu dau do dau'd tanak. 24 Om boro-boros no iyau dot id tobpinai dau, “Oruhai oku noddi do matai, nga' Kinorohingan i' o migompi' kasai' dokoyu om momoyo' dokoyu do sumoliwan do mantad hiti'd pomogunan diti do kumaa do hilo'd tana' di pinabatos dau do mikuwo'd sumpa' dot id di Abraham, om id di Isak, om id di Yakub,” ka dau. 25 Om suhuo' noddi di Yusup i tulun do bansa' dau do sumumpa'. Boros ka dau, “Pamatos kou no dot id doho'. Soira' nopondo do woyoon kou'd Kinorohingan do kumaa do hilo'd pomogunan diri, om igitan no dokoyu o rata' ku,” ka dau. 26 Om kapatai noddi i Yusup do hilo'd Masir di hatus om hopod o toun dau. Om kopuro' noddi diyolo' i rata' di Yusup, om posuango' no dot id lungun.
Ninggorit o Tulun dot Israil do hilo'd Masir
1 Tangaanak nopo di Yakub di tuminanud dau do minongoi do hilo'd pomogunan do Masir do mogitonggoi-tonggoi di sompiiyon diyolo' om: 2 i Rubin, i Simion, i Liwi, i Yohuda, 3 i Isakar, i Sibulon, i Binyamin, 4 i Dan, i Naptali, i Gad, om i Asor. 5 Kogumuon nopo do sinakagon di Yakub om turu' nohopod o tulun. I Yusup nopo om nokopogulu mantad no do hilo'd Masir. 6 Alaid noddi om kapatai no i Yusup om i tobpinai ngai' dau om koinsanai di tulun di rampam-rampam dau. 7 Nga' guminumu' tomod diri i sinakagon diyolo', i tulun dot Israil, om oruhai po om koponu' nod sinakagon diyolo' i pomogunan do Masir tu' muhang- ruhang nopo o kogumuo' do sinakagon diyolo'. 8 Alaid noddi om timpuun nod momorinta' do pomogunan do Masir o songulun o raja' di kawawagu, it a' i' nokoilo-ilo do pasal di Yusup. 9 Om boros ka di raja' dot id rayat dau, “Adalaan noddi kopio kogumu' iti tulun dot Israil om ongokoris po kanogi' iyolo', om sumiliu i' iyolo' do koligagaanan toko'. 10 Sokiro-kiro nopo do haro o pisangadan om mongoi i' doti'ndo iyolo' ponokiuhup di pisangod do sumaap dati', om mogidu' nondo iyolo' do mantad hiti'd pomogunan diti. Nga' mogihum toko' nogi' kopio'd ralan do mangantob diyolo' do sumapou,” ka dau. 11 Om iri noddi o nokopomilian di tulun do Masir do piro-piro o mandur do monginggorit di tulun dot Israil. Om sinansagan diri i tulun dot Israil do momonsoi di bandar do Pitom om Raamsis, i bandar do poopian do rapo-rapo di don sumasangod do don raja'. 12 Nga' maha' nogi' di pawagaton kopio di tulun do Masir o ponginggorit diyolo' di tulun dot Israil, om okon nogi' do muhang-ruhang o kogumuo' diyolo' om modu-sodu' o kotongkopon diyolo' do hiri'd pomogunan diri, gowoi poddi om moddosi i tulun do Masir di tulun dot Israil. 13 Om okon nogiddi do pinadalaan kopio di tulun do Masir do monginggorit i tulun dot Israil, 14 om nudipon tomod di tulun do Masir o koposi-posion diyolo'. Om sinansagan diyolo' i tulun dot Israil do kumaraja' dit angawagat kopio, tu' sinuhu' iyolo' do momonsoi'd bata' do maan do walai, om sinuhu' do momonsoi do mogisuayan o karaja' do hiri'd koumaan diyolo'. Om aiso' no o kosianan diyolo' dot id tulun dot Israil. 15 Om boro-boros noddi i raja' do Masir dot id di Sipra om id di Pua, i duwo bidan di moninikou di tongoondu' dot Ibrani do tontok do mogkosusu. 16 Boros ka di raja' do Masir dot id duwo o bidan diri, “Mongoi kou nopo ponikou di tongoondu' dot Ibrani di mogkosusu iyolo', om soro-sorohon no kopio dokoyu iti: kusai nopo i tanak om patayon no! Nga' tondu' nopo om pologoson id poimpasi,” ka dau. 17 Nga' moddosi i' do Kinorohingan i duwo o bidan diri om a' i' diyolo' tinanud i boros di raja'. Pinologos i' diyolo' do poimpasi i tangaanak do kusai. 18 Om lohowo' noddi di raja' i duwo o bidan diri om uhoto' no dau. Boros ka dau, “Nokuro tu' pologoson dokoyu do poimpasi i tangaanak do kusai?” ka dau. 19 Om boros ka diyolo' do suminimbar, “Iri nopo tongoondu' dot Ibrani om a' i' miagal di tongoondu' do Masir, tu' iyolo' nopo om osonong i' do mogkosusu; a' po iyolo' orikatan do bidan do papaanak om asawa' no i ragang,” ka diyolo'. 20-21 Om osonong iddi o winonsoi do Kinorohingan dot id duwo o bidan diri, om nonuan dau iyolo' do sinakagon, tu' nooris i' iyolo' do Kinorohingan. Om iri'ddi tulun dot Israil nga' mumu-gumu' nopo om muhang-ruhang o kokoriso'. 22 Om poboroso' po kawagu di raja' o ponuhuan do miagal diti dot id koinsanai di rayat dau, “Koinsanai di tangaanak do kusai di tulun dot Ibrani di wagu po kosusu om mositi' no do pataamon do hilo'd Bawang do Nil, nga' iri nopo tangaanak do tongoondu' om pologoson ngai' i' do poimpasi,” ka dau.
Kinosusuon di Musa
1 Tontok nopo do maso'ddi om haro o songulun o kusai do mantad id payat do Liwi do minangawin do tondu' di mantad i' dot id payat do Liwi. 2 Om paganak noddi i tondu'ddi dot iso' o kusai. Om soira' di nokito dau dot olumis kopio i tanak dau, om lisoko' no dau iyau do solinaid do tolu o tulan. 3 Nga' soira'ddi dit a' dau milo do lisokon i tanak, om panganu no iyau do balatak di bundusan do winonsoi, om sorokoto' no dau iri do tir om a' i' osuangan do waig. Om posuango' noddi dau i tanak diri do hiri'd balatak om igitai no do hiri'd bawang om poiliho' no do hiri'd rolot di bundusan do hiri'd tisan di bawang. 4 Om iri nopoddi i taka' di tanak diri om miningkakat do hiri'd sodu-odu' do miontong ondung poingkuro ot osiliu dot id tadi' dau'ddi. 5 Om sondot no i tanak do tondu' di raja' do hiri'd bawang diri do minongoi podsu', do daamot di piro-piro o susuhuon dau'd tongoondu' do mimpanau do hiri'd tisan di bawang. Nga' sigog id kokito di tanak do raja' i balatak do hiri'd rolot di bundusan. Om suhuo' no dau o tiso' di susuhuon dau'd tondu' do mongoi panganu di balatak. 6 Om ukabai noddi di tanak di raja' i balatak, om kokito no dau o tanak do kusai do hiri'd suang. Om mihad-ihad i tanak, om kosianai noddi iyau di tanak diri. Boros ka dau, “Iti nopo om tanak do tulun dot Ibrani,” ka dau. 7 Om uhoto' noddi di tobpinai di tanak diri i tanak do raja', boros ka dau, “Orohian i' tuu daa o tanak do Raja' do mongoi oku pogihum do tondu' dot Ibrani do posusu diti tanak?” ka dau. 8 Om boros ka di tanak do raja' do suminimbar, “Orohian oku i'. Ongoi nopo pogihum,” ka dau. Om pamanau no i sumandak diri do minongoi pomolohou di tina' di tanak. 9 Om boro-boros no i tanak do raja' dot id molohing diri, boros ka dau, “Ngoyo' ilo tanak om maan no doho' posusuo' om godsian ku indo iya',” ka dau. Om tanggayai noddi di molohing i tanak om posusuo' no dau. 10 Om maha' dit agayo-gayo noddi i tanak om ngoyo' no di molohing di tanak pootodo' i tanak diri do hiri'd tanak di raja'. Om siliho' noddi di tanak do raja' i tanak diri do tanak dau. Om boros ka dot id suang do ginawo di tanak do raja'ddi, “Pungaranan ku dot i Musa iti tanak tu' pinotindal ku i' do mantad id waig,” ka.
Minogidu' i Musa do Kuminaa Hilo'd Midian
11 Tontok di nosukod noddi i Musa, om ongoi no iyau kakap di bansa' dau, iri no i tulun dot Ibrani. Om kokito no dau do pinsansagan po tomod iyolo' do kumaraja' dit angawagat. Om nokito nogi' dau o songulun o bansa' do Masir do minamatai do songulun o bansa' dot Ibrani, i bansa' di Musa. 12 Om pikoroontong no i Musa dot id posorili' dau, om soira' di nokito dau dot aiso' o tulun do kokito, om patayo' no dau i tulun do Masir om lisoko' no dau i rata' do hiri'd pasir. 13 Tontok di minongoi iyau kakap kawagu di tadau kawagu om kokito no iyau do duwo o tulun dot Ibrani do miumang. Om boros ka dau dot id tulun di nakasala', “Nokuro tu' mumang ko do sompi' ko' tulun dot Ibrani?” ka dau. 14 Om boros ka di tulun do suminimbar, “Isai o pinoposiliu diya' do pomorinta' om gompomutus dahai? Maan oku po daa diya' patayo' do miagal di tulun do Masir tu' pinatai nu?” ka dau. Om moddosi diri i Musa tu', “Noilaan i' pama do tulun i winonsoi ku'ddi,” ka dot osorou dau. 15-16 Om soira' di nokorongou i raja' di nosiliu do miagal diri, om umbal no daa iyau do mogihum do ralan do mamatai di Musa. Nga' poggidu' no i Musa om ongoi no iyau iyon do hilo'd pomogunan do Midian. Iri nopo imam do hilo'd Midian, i roitan dot i Yitro om kianak do turu' o tongoondu'. Insan tadau, di poirikau i Musa dot id toning do torobong, om rikot no i turu' o tanak di Yitro do tongoondu' do minongoi panganu di waig do posuangon di poiinuman di dumba' om kambing di tapa' diyolo'. 17 Nga' haro'ddi o piro-piro do gompomogompi'd dumba' do suwai do minongoi ponguyung di tangaanak di Yitro. Om ngoyo' noddi di Musa uhupai i tongoondu'ddi om poinumo' ngai' no dau i tayam-tayam diyolo'. 18 Om soira' di nokoguli' iyolo' do hiri'd tapa' diyolo' om uhoto' no iyolo' di tapa' diyolo', “Nokuro tu' osopung kopio kou do nokouli' baino'?” ka dau. 19 Om boros ka diyolo' do suminimbar, “Haro o tulun do Masir do minongintirung dahai do mantad id gompomogompi' do dumba' di suwai. Om iyau i' o minonimbauk di waig om pinopoinum di tayam-tayam toko',” ka diyolo'. 20 “Hinonggo noddi ino tulun?” ka di Yitro do minonguhot di tangaanak dau. “Nokuro tu' tinongkiadan dokoyu'd hilo' ino tulun? Ngoyo' dokoyu lohowo' iyau om potorungakon i' dati'd makan,” ka dau. 21 Om korohiai noddi i Musa do mundorong do hiri, om pokowinai nod i Yitro di Musa i Sipora, i tanak dau'd tondu'. 22 Om paganak noddi i Sipora, om kusai o tanak dau. Om poingkaa diri ot osorou di Musa, “Iyoho' nopodti om sompogunan i' do hiti'd pomogunan diti,” ka. Om iri noddi o kinopomungaranan dau di tanak dau'ddi dot i Girsom. 23 Piro-piro noddi o toun do mantad diri, om kapatai no i raja' do Masir. Nga' maso po di tulun dot Israil do songodoi-odoi dot oinggoritan do siniliu'd turipon, om minggiak poddi iyolo' do mokitulung. Om korikot noddi dot id Kinorohingan i giniakan diyolo'. 24 Om pinokinongou i' do Kinorohingan i giak diyolo' om nosorou i' dau i batos dau dot id di Abraham, om id di Isak, om id di Yakub. 25 Om nokito i' dau i tulun dot Israil do siniliu'd turipon, om monongkoilo iddi iyau diyolo'.
Linohou do Kinorohingan i Musa
1 Insan o tadau, di maso di Musa do madtamong di dumba' om kambing di Yitro, i tiwanon dau, it imam do hilo'd Midian, om woyoo' no dau i tayam-tayam diri do duminarapas di tana' do kowotuan, om korikot no iyau do hilo'd Sinai, i nuluhon dot olidang. 2 Om hilo' no i moloikat do Tuhan do minintalang dot id di Musa do miagal do sinikit do tapui do hiri'd tanga' di bulungkut. Om okito no kopio di Musa do molob-ngolob o tapui do hiri'd bulungkut nga' a' indo sumorob i bulungkut. 3 “Suwai-suwai iddi kopio iti,” ka dot osorou dau. “Nokuro malo' tu' a' osorob ilo bulungkut? Nga' mongoi oku nogi' kopio ontong do hilo'd somok dilo',” ka dot osorou dau. 4 Om soira' di nokito'd Tuhan do minsomok i Musa di kinoiyonon diri, om pomolohou no o Tuhan do mantad hiri'd tanga' di bulungkut, “Musa! Musa!” ka dau. “Hooi, diiya oku i',” ka di Musa do suminimbar. 5 Om boros kad Kinorohingan, “Kada' no insomok. Iduwo' ino kasut nu tu' iti nopo tana' do kinoingkokoton nu om olidang. 6 Iyoho' no i Kinorohingan do tukuon di komolohingan nu, i Kinorohingan di Abraham, om i Isak, om i Yakub,” ka dau. Om sompono' nod Musa o rabas dau tu' ooris iyau do montong do Kinorohingan. 7 Om boro-boros noddi o Tuhan do poingkaa, “Nokito ku no i koinggoritan do tulun ku do hilo'd Masir. Norongou ku no iyolo' do minggiak do mokilabus do mantad id tulun di monginggorit diyolo'. Om oilaan ngai' ku i' i koinggoritan diyolo'. 8 Om iri noddi o kinolintuhunan ku tu' mongoi oku palabus diyolo' do mantad id longon do tulun do Masir, om momoyo' oku diyolo' do sumoliwan do mantad id pomogunan diri do kumaa dot id iso' o pomogunan dit agayo. Tana' nopo do pomogunan diri om oluhub om oruak, i pomogun-mogunan do tulun do Kanaan, Hit, om Amori, om Poris, om Howi, om Yobus do dinondo. 9 Norongou ku no i tihad do tulun ku om nokito ku nogi' i ponginggorit di tulun do Masir diyolo'. 10 Om suhuon ku'ddi iya' do mongoi solowot di raja' do Masir, om owoyo' nu i' i tulun ku do sumoliwan do mantad id pomogunan diri,” ka dau. 11 Nga' boros kad Musa dot id Kinorohingan, “Isai kopio oku daa giya diti tu' milo do mongoi solowot di raja' om momoyo' di tulun dot Israil do sumoliwan do mantad hilo'd Masir?” ka dau. 12 Om boros kad Kinorohingan do suminimbar, “Moyo-woyo' oku i' diya'. Om soira' nopondo do posoliwanon nu i tulun dot Israil do mantad hilo'd Masir, om sumambayang ko nondo dot id doho' do hiti'd nuluhon diti. Om iri no o koilaan kopio dot iyoho' o minonuhu' diya',” ka dau. 13 Nga' boros kad Musa do suminimbar, “Nga' mongoi oku nopondo solowot di tulun dot Israil om poboroson ku dot 'Sinuhu' oku di Kinorohingan do komolohingan dokoyu do mongoi solowot dokoyu,’ kangku nopo, om monguhot nondo iyolo' doho' dot, ‘Isai o ngaran dau?’ ka, om isai nondo o ngaran do posunudon ku?” ka dau. 14 Om boros kad Kinorohingan, “Iyoho' nopo om IYOHO' I HINO KASAI'. Om poboroson no o poingkaa dot id diyolo', ‘I roitan dot IYOHO' I HINO KASAI' o minonuhu' doho' do minongoi'd hiti'd dokoyu,’ kanto. 15 Om sunudan no i tulun dot Israil dot iyoho' no, i Tuhan i Kinorohingan di tukuon di komolohingan diyolo', i Kinorohingan di Abraham, om i Isak om i Yakub, o minonuhu' diya' do minongoi'd hilo'd diyolo'. Iri no o ngaran ku do gisom do poingompus; om iri nondo o pamarait doho' do koinsanai'd sinakagon di sumusuhut. 16 Ngoyo' ngai' no timungo' i boyoon do tulun dot Israil om sunudan no iyolo' dot iyoho', i Tuhan, i Kinorohingan di tukuon do komolohingan diyolo', i Kinorohingan di Abraham, om i Isak, om i Yakub, o minintalang dot id diya'. Sunudan no iyolo' do nokorikot oku no dot id diyolo', om nokito ku i pingwonsoyon do tulun do Masir dot id diyolo'. 17 Om natantu' ku no do posoliwanon ku iyolo' do mantad hilo'd Masir, i kinoiyonon do pinginggoriton iyolo'. Om angatan ku nondo iyolo' do kumaa do hilo'd pomogunan di kaya' om oluhub --- i pomogunan do tulun do Kanaan, om Hit, om Amori, om Poris, om Howi, om Yobus. 18 Mokinongou indo i tulun ku di poboroson nu dot id diyolo'. Om mongoi ngai' kou nogindo di boyoon do tulun dot Israil solowot di raja' do Masir om poboroson no o miagal diti dot id dau, ‘Nokointalang no dot id dahai o Tuhan, i Kinorohingan do tulun dot Ibrani. Om potumboyoo' no iyahai do mamanau do solinai'd do tolu tadau do kumaa do hilo'd tana' do kowotuan do mongoi patahak do porsombahan di sumbolion dot id Tuhan, i Kinorohingan dahai,’ kanto dokoyu,” ka dau. 19 Om boros ka kawagu do Kinorohingan, “Oilaan ku i' dot a' i' i raja' do Masir potumboyo' dokoyu do mamanau ondung a' iyau sansagan. 20 Nga' pakayon ku indo o kuasa' ku om hukuman ku nondo o pomogunan do Masir om mingwonsoi oku do piro-piro o kosusaan di korolosi kopio do hilo'. Om owonsoi ngai' pondo iri, om potumboyo' nogi' iyau dokoyu do mamanau. 21 Om binsuhuon ku indo i tulun do Masir do momusou dokoyu do gisom do tumongkiad nopondo i tulun ku, om a' indo iyolo' mamanau tomod nopo dot aiso' kopio ot atanggai-tanggayan diyolo'. 22 Pointikid-tikid do tondu' dot Israil om mongoi nondo songkoduwo do hiri'd tulun do Masir, om sumolowot dot isai nopo o tondu' do Masir di poingiyon do hiri'd walai dau, om mokianu nogindo iyolo' di tongoondu' do Masir diri do pakayan, om tamas, om pirok do pongillumis do tinan. Om papakayan nondo di tulun dot Israil iri di tangaanak diyolo'd kusai om tondu', om iyo noddi iyolo' do mononggoi do kakayaan do tulun do Masir,” ka dau.
Nonuan do Kinorohingan i Musa do Kuasa' do Momonsoi'd Koimayaan
1 Om boros kaddi di Musa do suminimbar do Tuhan, “Nga' ondung a' monongkuyaan doho' i tulun dot Israil om a' mokinongou di poboroson ku, om nunu nondo o wonsoyon ku do poboroson no diyolo' dot a' ko minintalang dot id doho'?” ka dau. 2 Om uhoto' noddi iyau do Tuhan, “Nunu ino poingigit nu?” ka dau. “Sukud,” kad Musa do suminimbar. 3 Om boros kad Tuhan, “Poloposo' ino do hilo'd tana',” ka dau. Om poloposo' noddi di Musa i sukud diri, om siliu nori do tulanut, om panangkus no i Musa do mininsodu' di tulanut. 4 Om boros kaddi do Tuhan dot id di Musa, “Ngoyo' igitai o hilo'd pongid tikiu,” ka dau. Om ngoyo' noddi di Musa tabpaai i tulanut, om kosiliu no kawagu do sukud di poingigit dau. 5 Om boros kad Tuhan, “Wonsoyon no o miagal diri do pointalang kopio dot id tulun dot Israil do Tuhan, i Kinorohingan di tukuon di komolohingan diyolo', i Kinorohingan di Abraham, om i Isak, om i Yakub, o minintalang dot id diya',” ka dau. 6 Om boro-boros po kawagu o Tuhan dot id di Musa, “Pokokogo' do hino'd rasuk nu ino palad nu,” ka dau. Om wonsoyo' nod Musa o miagal diri; om soira' di pinokodong di Musa i palad dau, om kitoruol noddi, tu' notongkop po do miagal di tinudu-tudu' dit iyo pod kapas kopurak o palad dau. 7 Om boros kaddi do Tuhan, “Pokokog-kokogo' po ino palad nu do hino'd rasuk nu,” ka dau. Om wonsoyo' noddi di Musa o miagal diri. Nga' soira' di pinokodong dau i palad dau, om notonduli' noddi do miagal di kulit do tinan dau. 8 Om boros kad Tuhan, “Ondung a' iyolo' monongkuyaan diya' ko' a' po oimayaan di koimayaan di koiso', om monongkuyaan nondo kopio iyolo' do kokito di koimayaan do koduwo. 9 Ondung a' po iyolo' monongkuyaan diya' do kokito piya di duwo o koimayaan diri, om ondung a' po kasai' iyolo' mokinongou do poboroson nu, om mongoi no anu do waig do mantad hiri'd Bawang do Nil, om potuntugon i' do hiri'd tana'. Om sumiliu indo do raha' i waig diri,” ka dau. 10 Om boros kad Musa, “A' oku i', oi Tuhan. Kada' oku suhuo'. Tu' a' oku i' oilo do mimboros, om mantad nopo di nokoboro-boros o Tuhan doho' om gisom do dinondo om a' kasai' oku i' koilo do mimboros. A' oku i' kopio iyoho' koilo do mimboros, tu' a' oku abalantas do mimboros om moo' oku po,” ka dau. 11 Om boros kad Tuhan dot id dau, “Isai o minanahak do tulun do kabang? Isai o popobosuk ko' popobobou do tulun? Isai o popoungkalat ko' momolou do tulun? Okon toi ko' iyoho' i' tu' Tuhan? 12 Ongoi nopo do dinondo! Om uhupan ku i' iya' do mimboros, om sunudan tiya' i' ondung nunu ot apatut nu'd poboroson,” ka dau. 13 Nga' boros kad Musa do suminimbar, “A' oku i' kopio, oi Tuhan. Ponuhu' nogi' do tulun do suwai,” ka dau. 14 Om kotogod noddi o Tuhan di Musa, om boro-boros nod, “Poingkuro no i Harun, i tobpinai nu, i tulun do Liwi diri? Oilaan ku i' dot oilo iyau do mimboros. Om dinondo nopodti om mongoi no iyau ruba' diya', om asanangan tomod iyau do kosolowot diya'. 15 Om moro-boros no dau om sunudan no iyau ondung nunu it apatut dau do poboroson. Om uhupan ku indo iyokoyu goduwo om tudukan ku iyokoyu ondung nunu it apatut dokoyu'd poboroson om it apatut dokoyu'd wonsoyon. 16 Iyau nondo o popilombus do boros nu om mogobi' diya' do moro-boros dot id toguang di tulun dot ogumu'. Om iya' nopondo om miagal-agal do Kinorohingan tu' misunud dau ondung nunu it apatut dau'd poboroson. 17 Igitan no iti sukud, tu' iti no o pomonsoi nu do piro-piro o koimayaan,” ka dau.
Guminuli' i Musa do Hilo'd Masir
18 Om guli' noddi i Musa do hiri'd walai di Yitro, i tiwanon dau, om boro-boros no iyau, “Potumboyoo' oku daa do gumuli' do hilo'd koobpinayan ku di hilo'd Masir do mongoi kakap ondung songimpasi po iyolo',” ka dau. Om potumboyoo' no di Yitro i Musa, om boros ka dau, “Sumonong-sonong do mamanau,” ka. 19 Tontok di hilo' pod Midian i Musa, om boros kad Tuhan dot id dau, “Guli' no do hilo'd Masir, tu' nangapatai ngai' no i mamatai daa diya',” ka. 20 Om angatai no di Musa i sawo dau om i tangaanak dau'd kusai, om pasakayo' no dau iyolo' do kaladai. Om pamanau ngai' no iyolo' do kumaa do hilo'd Masir, om nigitan di Musa i sukud di pinonuhuan do Kinorohingan dau do mongigit. 21 Om boro-boros po o Tuhan dot id di Musa, “Noonuan ku no iya' do kuasa' do momonsoi do piro-piro o koimayaan. Om koguli' ko nopondo do hilo'd Masir, om wonsoyon ngai' no iti koimayaan diti dot id toguang di raja' do Masir. Nga' pokodohon ku indo o ginawo di raja', om a' indo dau potumboyoon i tulun dot Israil do mamanau. 22 Om mositi' nod sunudan nu i raja' dot iyoho', i Tuhan, o minomoros do poingkaa, ‘Israil no o tanak ku'd kusai dit id dotuo. 23 Sinunudan ku iya' do potumboyo' di tanak ku do mamanau, om koongoi i' iyau kasambayang dot id doho', nga' a' ko i' pinopotumboyo'. Om patayon ku nondo i diya'd tanak do kusai dit id dotuo,’ kanto,” ka dau. 24 Nga' tontok di hilo' no iyolo'd tanga'd ralan do kumaa do hilo'd Masir, di hilo' no iyolo'd iso' o kinoiyonon di pawawansayan do kiim, om rikot no o Tuhan dot id di Musa, om umbalai no daa iyau do Tuhan do mamatai. 25-26 Om ongoi noddi i Sipora, i sawo di Musa, anu do watu dit atarom, om sinsibo' no dau i kulit di tanak dau, i kulit di sisinsibon do monunat. Om gihilai noddi dau di kulit di sininsib dau o lapap di Musa. Om iri no i minonunat o nakabara-barasan di Sipora do miagal diti dot id di Musa, “Poboroson ku do mikuwo'd raha' diti dot iya' no o sawo kopio ku,” ka dau. Om pinasi iddi do Tuhan i Musa. 27 Nga' daamot nopoddi om nosunudan nod Tuhan i Harun do poingkaa, “Ongoi no solowot di Musa do hilo'd tana' do kowotuan,” ka. Om pamanau noddi i Harun do minongoi solowot di Musa do hilo'd nuluhon dit olidang; om kosolowot poddi di Harun i Musa, om tungubai no dau iyau. 28 Om posunudo' ngai' noddi di Musa dot id di Harun i pinoboros do Tuhan, do tontok di sinuhu' iyau do Tuhan do gumuli' do hilo'd Masir; om sinusui ngai' dau i piro-piro o koimayaan do pinonuhuan do Tuhan do momonsoi. 29 Om pamanau noddi iyo Musa di Harun do minongoi do hilo'd Masir, om timungo' ngai' no diyolo' i boyoon do tulun dot Israil. 30 Om poboroso' ngai' noddi di Harun dot id diyolo' i pinoboros do Tuhan dot id di Musa, om wonsoyo' no di Musa o koinsanai di koimayaan do hiri'd toguang di tulun diri. 31 Om kongotumbayaai ngai' no iyolo'ddi, om soira' di norongou diyolo' do nokorikot o Tuhan dot id diyolo', om nokito ngai' dau i koinggoritan diyolo', om otud noddi iyolo' do suminambayang.
Suminolowot i Musa om i Harun di Raja'
1 Om ongoi noddi i Musa om i Harun solowot di raja' do Masir, om boro-boros no iyolo' do poingkaa, “Poingkaa no o boros do Tuhan, i Kinorohingan do tulun dot Israil, ‘Posoliwanon no i tulun ku, om koongoi i' iyolo' kasambayang dot id doho' do hilo'd tana' do kowotuan,’ ka dau,” ka diyolo'. 2 “Isai toi o Tuhan?” ka di raja' do Masir do minuhot, “Nokuro tu' suhuon oku do tumanud do boros dau om poposoliwan do tulun dot Israil? A' oku i' kotutun do Tuhan; om a' ku i' pabanaron o tulun dot Israil do sumoliwan,” ka dau. 3 Om boros ka diyo' Musa di Harun, “Minintalang o Kinorohingan do tulun dot Israil dot id dahai. Om mokibanar diri iyahai do mamanau do tolu o tadau do koloido' do kumaa do hilo'd tana' do kowotuan, tu' hilo' no o tiyonon dahai do papatahak do porsombahan di sumbolion dot id Tuhan, i Kinorohingan dahai. Ondung a' iyahai mongoi, nga' porikatan nondo iyahai dau do toruol ko' pisangadan po do pamatai dau dahai,” ka diyolo'. 4 Om boros ka di raja' dot id di Musa om id di Harun, “Nunu daa'ddi o tosorou-sorou dokoyu do papaada' dilo tulun dilo karaja' diyolo'? Suhuo' nogi' kawagu ilo piro-piro o turipon do mongoi karaja'! 5 Nintaban nopo do bansa' dokoyu om ogumu' po ko' bansa' do Masir. Om tumingkod kou nogi' daa'ddi do kumaraja' do baino'!” ka dau. 6 Om tadau iddi do sinunudan di raja' i tulun do Masir i boyoon do mandur, om i piro-piro o mandur do bansa' dot Israil do poingkaa, 7 “Kada' nondo dokoyu onuwai iyolo' do rahami do wonsoyon do bata'. Suhuon nopo iyolo' do mongoi pogihum do rahami. 8 Nga' suhuon i' mando kasai' iyolo' do momonsoi do bata' do miagal di gulu kogumu'; kada' nod haro o tongoiso' piya do kokuri' ko' mantad di gulu. A' i' diyolo' kabagal o buruon diyolo'; gowoi poddi om mokibanar nopo iyolo' doho' do mongoi papatahak do porsombahan di sumbolion dot id Kinorohingan diyolo'! 9 Ruhangan nogi' o kawagato' do karaja' diti tongoulun diti, do gisom id akagasan iyolo' di buruon diyolo', om aiso' indo o maso diyolo' do mokinongou do susuyon dit a' otopot,” ka dau. 10 Om pamanau ngai' noddi i boyoon do mandur di bansa' do Masir, om i mandur di bansa' dot Israil do minongoi pomisunud ngai' di tulun do poingkaa, “Nokoboros no moti' di raja' dot a' noddi iyau manahak dokoyu do rahami. 11 Boros ka dau, om iyokoyu no o mimpori-pori do mongoi pogihum do hinonggo nopo o haro o pongonuan dokoyu'd rahami. Nga' iri kasai' i' ma o ginumu' do bata' do wonsoyon dokoyu, dot irad di wonsoyon kasai' dokoyu di gulu,” ka diyolo'. 12 Gowoi poddi om pogitotongkiad nopo i tulun dot Israil do tuminongkop di pomogunan do Masir do mongoi pogihum do guas do gandum do maan do ponokorahami. 13 Om sansagan i' kasai' di boyoon do mandur i turipon do momonsoi'd bata' do pointikid-tikid do tadau dot irad do kogumuon do bata' dit onuan po iyolo' do rahami. 14 Om pimbabagan po di boyoon do mandur do bansa' do Masir i mandur do bansa' dot Israil, i siniliu diyolo' do mongilo-ilo di karaja' di turipon. Boros ka diyolo', “Nokuro tu' a' kou momonsoi'd bata' dot irad di gulu kogumu'?” ka. 15 Om ongoi ngai' noddi i mandur dot Israil solowot di raja' do minongoi posunud do poingkaa, “Nokuro tu' iyoon iyahai diya'dti, oi Tuan Raja'? 16 A' i' iyahai onuan do rahami, om sansagan kasai' iddi iyahai do momonsoi'd bata'. Om pimbabagan diri'ddi iyahai do baino'! Iya' no o monongkoilo diti,” ka diyolo'. 17 Om boros ka di raja' do suminimbar, “Gungkaul kou no om tukono' kou nopo do kumaraja', om iri no daa o kopokibanaran dokoyu doho' do poposoliwan dokoyu do mongoi papatahak do porsombahan di sumbolion dot id Tuhan dokoyu. 18 Guli' kou nogi' do mongoi karaja'! A' kou no onuan do rahami, nga' iri kasai' i' mando o kogumuon do bata' do wonsoyon dokoyu,” ka dau. 19 Om kopurimanai ngai' noddi di mandur dot id suang iyolo' do kosusaan di nosunudan iyolo' di raja' dot irad kasai' di gulu po o kogumuon do bata' do wonsoyon diyolo'. 20 Om soira' di tumongkiad no iyolo' di raja', om kosolowot no diyolo' iyo Musa di Harun do poingandad diyolo'. 21 Om boros ka diyolo' dot id di Musa om id di Harun, “Nokito nod Tuhan i nowonsoi dokoyu. Hukuman kou no tu' iyokoyu no o nokobungou di raja' om i piro-piro o pagawai dau dot ongotogod dahai. Noonuan no dokoyu iyolo' do ponguwaan do mamatai dahai,” ka diyolo'.
Minoguhang i Musa do Tuhan
22 Om rikot noddi kawagu i Musa dot id Tuhan, om boros ka dau, “Oi Tuhan, nokuro tu' pinorikatan nu'd kosusaan i tulun nu? Nokuro tu' sinuhu' oku diya' do mongoi'd hiti? 23 Tu' mantad poddi minongoi oku polombus do boros nu dot id raja', om diri no do nintonod dau do minonginggorit di tulun nu. Om aiso' iddi o wonsoyon nu do ponulung diyolo'!” ka dau.
Linohou do Kinorohingan i Musa
1 Om boros kaddi do Tuhan dot id di Musa, “Kokito ko indo bo ondung nunu o wonsoyon ku dot id raja' do Masir. Sansagan ku indo iyau do poposoliwan dilo tulun ku. Om sansagan ku iyau do monguyung diyolo' do mantad id pomogunan diti,” ka dau. 2 Om boro-boros no o Kinorohingan dot id di Musa do poingkaa, “Iyoho' no o Tuhan. 3 Nokointalang oku no dot id di Abraham, om id di Isak, om id di Yakub, dot iyoho' no o Kinorohingan dit Agayo Kopio o Kuasa'. Nga' a' oku i' pinopointutun diyolo' do ngaran ku dit olidang, iri no i Tuhan. 4 Om nokopongumpongo oku nogi' dot id diyolo', do papatahak dot id diyolo' di pomogunan do Kanaan, i kinoiyonon diyolo' do tuminindapou. 5 Norongou ku noddi o todoi do tulun dot Israil, i nuripon do tulun do Masir, om nosorou ku i tumpongo ku. 6 Iyo nopoddi, om sunudan no i tulun dot Israil, om poboroson no diyolo' do poingkaa o boros ku, ‘Iyoho' no o Tuhan; poiduwon ku i' iyokoyu om polobuson ku iyokoyu do mantad id tulun do Masir di monguripon dokoyu. Paakangon ku nondo iti longon ku'd okoris do poporikot do hukuman dit awagat kopio dot id tulun do Masir, nga' iyokoyu nopo om posion ku i'. 7 Silihon ku nondo iyokoyu do tulun ku om iyoho' nondo ot osiliu do Kinorohingan dokoyu. Oilaan indo dokoyu dot iyoho' i Tuhan o Kinorohingan dokoyu do kalabus ku iyokoyu do mantad id ponguripanan do hilo'd pomogunan do Masir. 8 Om angatan ku nondo iyokoyu do kumaa do hilo'd pomogunan di nakabatos ku do mikuwo'd sumpa' do patahakon ku di Abraham, om i Isak, om i Yakub, do maan do dokoyu kopio'd songonuon. Iyoho' no o Tuhan,’ ka dau, kanto dokoyu,” ka dau. 9 Om poboroso' no di Musa iri dot id tulun dot Israil nga' a' noddi iyolo' mokinongou dau tu' aiso' no o pokukurayan dot osorou diyolo' dot ouru di pongunguripon di koinggorit tomod diyolo'. 10 Om boro-boros noddi o Tuhan dot id di Musa do poingkaa, 11 “Ngoyo' sunudai i raja' do Masir dot a' no milo dot a' dau pabanaron i tulun dot Israil do sumoliwan do mantad id pomogunan dau,” ka dau. 12 Nga' boros kad Musa do suminimbar, “Iri piya i tulun dot Israil nga' a' i' mokinongou do boros ku, om mokinongou nogindo tuu kopio i raja' do Masir? Tu' a' oku i' koilo do mimboros,” ka dau. 13 Om suhuo' nod Tuhan iyo Musa di Harun, boros ka dau, “Sunudan no i tulun dot Israil om i raja' do Masir, do nosuhu' ku no iyokoyu do momoyo' dilo tulun dot Israil do sumoliwan do mantad id pomogunan do Masir,” ka dau.
I Sinolusukan do Sompiiyon di Musa om i Harun
14 I Rubin nopo, i tanak di Yakub dot id gulu, om kianak dot apat o kusai: i Hinok, i Palu, i Hisron om i Karmi; iyolo' no i taki-aki di pinuruan do sompiiyon dot id payat di Rubin, i pinungaranan do ngaran diyolo'. 15 I Simion no om kianak dot onom o kusai: i Yomuil, i Yamin, i Ohad, i Yakin, i Sohar om i Saul, i tanak do tondu' do bansa' do Kanaan; om iyolo' no i taki-aki di pinuruan do sompiiyon dit id payat di Simion, i pinungaranan do ngaran diyolo'. 16 I Liwi no om kianak do tolu o kusai: i Girson, i Kohat, om i Morari; iyolo' no i taki-aki di pinuruan do sompiiyon dot id suang do payat di Liwi, i pinungaranan do ngaran diyolo'. Om hatus om tolu nohopod om turu' o toun di Liwi do poimpasi. 17 I Girson no om kianak do duwo o kusai: i Libni om i Simoi; om ogumu' o sinakagon diyolo'. 18 I Kohat no om kianak dot apat o kusai: i Amram, i Yisar, i Hibron, om i Usiol. Om hatus om tolu nohopod om tolu o toun di Kohat do poimpasi. 19 I Morari no om kianak do duwo o kusai: i Mali om i Musi. Iri ngai' no o pinuruan do sompiiyon om i sinakagon ngai' diyolo' dot id payat di Liwi. 20 Om kowino' no di Amram i Yokubid, i tadi' di tapa' dau. Om paganak no iyolo' om i Harun, om i Musa. Om hatus om tolu nohopod om turu' o toun di Amram do poimpasi. 21 I Yisar no om kianak do tolu o kusai: i Kora, i Nipig, om i Sikri. 22 I Usiol nogi' nga' kianak i' do tolu o kusai: i Misail, i Ilsapan om i Sitri. 23 Om kowino' no di Harun i Ilisiba, i tanak di Aminadab. I Ilisiba nopo om tobpinai di Nason do tondu'. Om tangaanak nopo diyo Ilisiba di Harun om i Nadab, i Abihu, i Iliasar om i Itamar. 24 I Kora nopo om kianak do tolu o kusai: i Yasir, i Ilkana om i Abiasap; om iyolo' no i taki-aki di piro-piro o koisaan do sompiiyon do suminolusuk di pinuruan do sompiiyon di Kora. 25 Om kowino' no di Iliasar o tiso' di tanak di Putiol do tondu'. I Iliasar nopo om tanak di Harun do kusai. Om paganak no iyo Iliasar di sawo dau om i Pinihas. Iyolo' no ngai' i boyoon do sompiiyon om pinuruan do sompiiyon dot id payat di Liwi. 26 Om iyo Harun no di Musa o sinunudan do Tuhan do poingkaa, “Woyoon no iti tulun dot Israil do sumoliwan do mantad id pomogunan do Masir,” ka. 27 Om iyolo' no goduwo i minonuhu' di raja' do Masir do poposoliwan di tulun dot Israil.
Ponuhuan do Tuhan dot id di Musa om id di Harun
28 Tontok di minoro-boros o Tuhan dot id di Musa di hilo' pod pomogunan do Masir, 29 om boros ka dau, “Iyoho' no o Tuhan. Sunudan no i raja' do Masir do koinsanai di pinoboros ku diya',” ka. 30 Nga' boros kad Musa do suminimbar, “Oilaan nu i' dot a' kopio oku koilo do mimboros; om nokuro tuu daa i raja' tu' mokinongou kopio do boros ku?” ka dau.
1 Om boros kad Tuhan dot id di Musa, “Silihon ku indo iya' do miagal do Kinorohingan dot id toguang di raja', om i Harun i tobpinai nu o silihon ku do miagal do nabi nu, do popolombus di boros nu dot id raja'. 2 Posunudon ngai' no dot id di Harun iti ponuhuan ku diya', om i Harun nondo o monuhu' di raja' do papabanar di tulun dot Israil do sumoliwan do mantad id pomogunan dau. 3 Nga' pokodohon ku nondo o ginawo di raja', om a' indo iyau mokinongou do nunu nopo o poboroson nu do mulong piya dot ogumu' o porikoton ku do kosusaan dit awagat kopio do hilo'd Masir. 4 Om porikatan ku nondo do hukuman dit awagat kopio o hilo'd Masir, om posoliwanon ku nogindo o koinsanai'd tulun dot Israil, i tulun ku, do mantad id pomogunan do Masir. 5 Om koilo nogindo i tulun do Masir dot iyoho' o Tuhan, do tontok do hukuman ku iyolo' om posoliwanon ku o tulun dot Israil do mantad id pomogunan diyolo',” ka dau. 6 Om wonsoyo' noddi diyo Musa di Harun o koinsanai di pinonuhuan do Tuhan. 7 Tumur nopo di Musa om walu' no nohopod o toun, om di Harun no om walu' no nohopod om tolu o toun do tontok dit ongoi iyolo' boro-boros di raja' do Masir.
Sukud di Harun
8 Om boros kad Tuhan dot id di Musa om id di Harun, 9 “Ondung suhuon kou di raja' do momonsoi do koimayaan, om suhuon no i Harun do manganu di sukud dau om papataam diri do hiri'd dotoguangan di raja', om sumiliu indo do tulanut i sukud,” ka dau. 10 Om ongoi noddi iyo Musa di Harun solowot di raja' om wonsoyo' no diyolo' o miagal di pinonuhuan do Tuhan dot id diyolo'. 11 Om lohowo' noddi di raja' i tulun dau dit ongkitoilaan om i bobolian, om wonsoyo' no diyolo' o miagal di winonsoi di Harun tu' iyolo' nga' ongkitoilaan i'. 12 Poloposo' no diyolo' i sukud diyolo', om siliu ngai' nopo iri do tulanut. Nga' pintalanai noddi di sukud di Harun i diyolo'd sukud. 13 Nga' okodou kasai' i' o ginawo di raja' do miagal di nokoboros mantad do Tuhan, om a' i' i raja' mokinongou do boros diyo Musa di Harun.
Noontok do Kosusaan dot Agayo o Masir
Raha'
14 Om boro-boros noddi o Tuhan dot id di Musa do poingkaa, “Okodou po kasai' o ginawo di raja', om a' i' kasai' iyau papabanar di tulun dot Israil do sumoliwan. 15 Nga' mongoi-ongoi po solowot di raja' do kosuabon do suab, di sumondot iyau do hilo'd Bawang do Nil. Om igitan no i sukud nu di noumbalan do poposiliu do tulanut, om andadon no iyau do hiri'd tisan di bawang. 16 Om poboroson no di raja' o poingkaa, ‘Sinuhu' oku'd Tuhan, i Kinorohingan do tulun dot Ibrani, do momisunud diya' do papabanar di tulun dau do sumoliwan, om koongoi indo iyolo' kasambayang dot id dau do hilo'd tana' do kowotuan. Nga' gisom piya do baino' nga' a' ko i' minokinongou dau. 17 Gowoi poddi, om baino' nopondo, oi Tuan Raja', om nokoboros nod Tuhan dot oilaan nu indo ondung isai kopio iyau do kokito ko di wonsoyon dau. Intong pogi', bobogon ku nondo diti sukud ku iti waig do bawang om osiliu indo do raha' ilo waig. 18 Om angapatai ngai' nopondo i sada' do hilo'd bawang, om outong tomod nondo gisom dot a' no milo di tulun do Masir dot inumon iti waig,’ ka,” ka dau. 19 Om boros kad Tuhan dot id di Musa, “Suhuon no i Harun do popobilid di sukud dau do hiri'd soibau do koinsanai'd bawang, om liang om kulam do hilo'd Masir. Om osiliu ngai' nopondo do raha' i waig do pointongkop do pomogunan do Masir, om iri piya i waig do hiri'd tuung do kayu om i hiri'd luping nga' osiliu ngai' id raha',” ka. 20 Om wonsoyo' noddi diyo Musa di Harun o koinsanai di pinonuhuan do Tuhan. Om pobilido' no di Harun i sukud dau om bobogo' no dau i bawang, do songingontong ngai' i raja' om i pagawai dau. Om kosiliu nopoddi do raha' i waig di bawang. 21 Om kangapatai ngai' noddi i sada' do hiri'd bawang, om ongoutong tomod diri gisom dot a' no milo di tulun do Masir dot inumon i waig. Om raha' ngai' nopoddi o waig do hilo'd Masir. 22 Om pomonsoi no do miagal diri i bobolian di raja' do minamakai di toilaan diyolo' di dong bobolian. Om okodou iddi kasai' o ginawo di raja' do miagal di gulu. Om a' i' i raja' minokinongou di boros diyo Musa di Harun do miagal di nokoboros mantad do Tuhan. 23 Okon nogi' do toingud nopo i raja' om pouliai no dau do hiri'd walai dau, om a' i' iyau opusou do nokokito'ddi. 24 Om oinsanan nopoddi i tulun do Masir do minongukad do torobong do poingompus di tisan do bawang, do pongonuan diyolo' do waig do tinumon, tu' a' no milo dot inumon i waig do bawang. 25 Om turu' noddi o tadau do mantad di pinapalan do Tuhan i Bawang do Nil.
Bonong
1 Om boro-boros noddi o Tuhan dot id di Musa do poingkaa, “Mongoi no solowot di raja' om poboroson no do poingkaa o boros do Tuhan, ‘Pabanaro' no ilo tulun ku do sumoliwan, om koongoi i' iyolo' kasambayang dot id doho'. 2 Tu' ondung a' nu uhang om hukuman ku motindo iti pomogunan nu; om ponuon ku nopondo do bonong iti pomogunan nu tu' iri no o pomohukum ku. 3 Om adalaan nopondo koponu' do bonong ilo Bawang do Nil, om tumindal nondo i bonong do mongoi do hilo'd walai nu di dong raja', om sumuang di bilik nu, om mongoi do hiri'd kawalayan di tongomontiri' nu om i rayat nu, om hiri piya'd pagansakan nu'd roti om hiri'd poriuk nu nga' ngoyon ngai' i' iyono'. 4 Om sonsimbul-simbul nopo motindo i bonong diri dot id tinan nu, om id tinan do toinsanan di rayat nu, om id toinsanan di montiri' nu,’ kanto,” ka dau. 5 Om boros kad Tuhan dot id di Musa, “Suhuo' i Harun do popobilid dilo sukud dau dot id soibau do koinsanai'd bawang, om liang, om kulam, om mimbulai i' o bonong do momonu' diti pomogunan do Masir,” ka dau. 6 Om pobilido' noddi di Harun i sukud dau dot id soibau do koinsanai di kinoiyonon do waig, om songulai-ulai nopoddi o bonong do minomonu' do pointongkop do pomogunan diri. 7 Nga' pakayo' no di bobolian i diyolo'd toilaan, om iyolo'ddi nga' milo i' do pinopoimbulai do bonong do hiri'd pomogunan do Masir. 8 Om lohowo' no di raja' i Musa om i Harun om boro-boros no do poingkaa, “Sambayang no dot id Tuhan do mokiidu' dilo bonong, om pabanaron ku indo ilo tulun dokoyu do mamanau do mongoi papatahak do porsombahan di sumbolion dot id Tuhan,” ka dau. 9 Om boros ka di Musa do suminimbar, “Osonong i' o ginawo ku do sumambayang do bagi do Tuan ku. Tontuon nopo o maso do kapanambayangan ku diya', om sambayangan ku indo o Tuan ku, om iri ngai' i pagawai nu om i rayat nu. Om oidu' nondo do mantad id Tuan ku i bonong, om aiso' nondo ot oolu', do suwai nondo ko' i hiri'd Bawang do Nil,” ka dau. 10 Om boros ka di raja', “Sambayangan oku no do suab,” ka dau. Om boros ka di Musa, “Wonsoyon ku i' ino pokionuon nu, om koilo ko i' dot aiso' no o Kinorohingan do suwai do koiyo do Tuhan, i Kinorohingan dahai. 11 Om aiso' nondo o bonong do mamagangau diya', om i tongomontiri' nu, om i rayat nu. Om aiso' nondo o toolu' di bonong do suwai nondo ko' i hilo'd Bawang do Nil,” ka dau. 12 Om pamanau noddi i Musa om i Harun do tuminongkiad di raja', om sambayang no i Musa dot id Tuhan do minokiidu' di bonong di pinorikot do Tuhan dot id raja' diri. 13 Om pohubayaai nod Tuhan i pinokianu di Musa, om kangapatai ngai' noddi i bonong di hiri'd kawalayan, om i hiri'd natad, om i hiri'd koumaan. 14 Om untuno' noddi di tulun do Masir i bonong di nangapatai, om asawat tomod diri o nokountunon do gisom do noponu' po do nutong di bonong o hiri'd pomogunan diri. 15 Nga' soira' di nokito di raja' do nangapatai i bonong, om pokodoho' i' kawagu di raja' o ginawo dau, do miagal di nokoboros mantad do Tuhan; om a' iddi i raja' minokinongou di boros diyo Musa di Harun.
Togondui
16 Om boros kad Tuhan dot id di Musa, “Suhuo' i Harun do popobobog di sukud dau do hilo'd tana', om osiliu i' do togondui ilo pupuk do tana' do pointongkop diti pomogunan do Masir,” ka dau. 17 Om bobogo' noddi di Harun di sukud dau i tana', om koinsanai nopoddi i lisohu do tana' do suminiliu do togondui, om ongoi ngai' nori taun do tulun om tayam-tayam. 18 Om umbal no daa i bobolian do mamakai di toilaan diyolo', nga' aiso' i' o togondui do minimbulai. Om hinonggo-honggo nopoddi nga' haro ngai' nopo o togondui. 19 Om boros kaddi di bobolian dot id raja', “Kinorohingan no moti' kopio o pinopoimbulai diti togondui diti,” ka diyolo'. Nga' okodou kasai' i' o ginawo di raja' do miagal di nokoboros mantad do Tuhan, om a' i' i raja' minokinongou do boros diyo Musa di Harun.
Langau
20 Om boros kad Tuhan dot id di Musa, “Osuab pod suab, om mongoi no solowot di raja' do sumondot iyau do hilo'd bawang, om sunudan no iyau do boros do Tuhan do poingkaa, ‘Pabanaron no i tulun ku do sumoliwan, om koongoi i' iyolo' kasambayang dot id doho'! 21 Ondung a' ko pabanar, om poinsanon mantad ku iya', do hukuman tiya' no moti' tu' porikatan ku nondo iyokoyu do langau, iya' om i tongomontiri' nu om i rayat nu. Kawalayan nopondod tulun do Masir om ongoponu' po do langau, om tana' piya nga' olikupan nopondo do langau. 22 Nga' a' ku i' pohompiton o watas do Gusin, i kinoiyonon di tulun ku, om aiso' indo o langau do hilo'. Om koilo kou i' dot iyoho' i Tuhan, o miwonsoi'ddi do hiti'd pomogunan diti. 23 A' ku indo piiyoon i tulun ku om i rayat nu. Om iti nopo koimayaan diti om osiliu nod suab,’ kanto,” ka dau. 24 Om porikatai noddi do Tuhan do langau dot ogumu' kopio o hiri'd walai di raja', om hiri'd kawalayan di tongomontiri' dau. Om ongoinggorit ngai' nopoddi o pointongkop di pomogunan do Masir tu' nongourunan pod langau. 25 Om lohowo' noddi di raja' i Musa om i Harun, om boro-boros no do poingkaa, “Pamanau kou, om mongoi i' patahak do porsombahan di sumbolion, dot id Kinorohingan dokoyu do hiti'd pomogunan diti,” ka dau. 26 Om boros kad Musa do suminimbar, “A' i' osonong do momonsoi do miagal diri. Tu' iri nopo i porsombahan dahai dot id Tuhan, i Kinorohingan dahai, om karaatan i' do tulun do Masir. Tu' ondung monumbali' iyahai do tayam-tayam do maan do porsombahan do sumbolion do montong-ontong i tulun do Masir, om angaraatan nondo iyolo' dahai, om dumpahon no dotindo iyahai diyolo'd watu do gisom dot angapatai iyahai. 27 A' no milo dot a' iyahai mongoi do hilo'd tana' do kowotuan do tolu o tadau do mamanau do kosoduwo', om hilo' nondo iyahai do papatahak do porsombahan di sumbolion, dot id Tuhan, i Kinorohingan dahai, do miagal di pinonuhuan dau dahai,” ka dau. 28 Om boros ka di raja', “Pabanaron ku i' iyokoyu'd mongoi do hilo'd tana' do kowotuan do mongoi papatahak do porsombahan di sumbolion dot id Tuhan, i Kinorohingan dokoyu, nga' kada' po do minsodu' kopio kou. Om sambayangan oku no dokoyu,” ka dau. 29 Om boros kad Musa do suminimbar, “Kotongkiad oku po diya'dti om sumambayang oku no dot id Tuhan, om kopoggidu' ngai' indo ilo langau do tadau'd suab do mantad id diya', om mantad id tongomontiri' nu, om mantad id rayat nu. Nga' kada' nondo pagakal dahai om kada' antabai ilo tulun dot Israil do mongoi papatahak dot id Tuhan do porsombahan di sumbolion,” ka dau. 30 Om tongkiad noddi i Musa di raja' om sambayang no iyau dot id Tuhan. 31 Om pohubayaai nod Tuhan i pinokianu di Musa. Om poggidu' ngai' noddi i langau do mantad id raja', om mantad id tongomontiri' dau, om mantad id rayat dau; om aiso' no o minolu' dot ongoiso' piya di langau. 32 Nga' baino' nga' pinokodou po di raja' o ginawo dau, om a' i' dau pinabanar i tulun dot Israil do mamanau.
Nangapatai o Tayam-Tayam
1 Om boros kad Tuhan dot id di Musa, “Ongoi-ongoi po solowot di raja' om sunudan no iyau do boros do Tuhan, i Kinorohingan do tulun dot Ibrani, do poingkaa, ‘Pabanaron no i tulun ku do mamanau, om koongoi i' iyolo' kasambayang dot id doho'. 2 Ondung a' kasai' ko pabanar do mamanau iyolo', 3 om hukuman ku no moti' iya'. Porikatan ku motindo do toruol ilo tayam-tayam nu, --- i kuda', om i kaladai, om it unta, om i sapi', om i dumba', om i kambing nu. 4 A' ku indo piiyoon ilo tayam-tayam do tulun dot Israil om ilo tayam-tayam do tulun do Masir. Tu' ilo' nopondo tayam-tayam do tulun dot Israil om aiso' i' o tongoiso' piya dot apatai. 5 Tu' iyoho' no i Tuhan, o minanantu' do suab no do wonsoyon ku iti komoyon ku,’ kanto,” ka dau. 6 Tadau poddi kawagu, om wonsoyo' nod Tuhan o miagal di pinoboros dau, om koinsanai nopo i tayam-tayam di tulun do Masir do nangapatai. Nga' iri nopo i tayam-tayam di tulun dot Israil om aiso' i' o tongoiso' piya do napatai. 7 Om ponguhot noddi i raja' ondung nunu o nosiliu, om kosunudai no iyau dot iso' po di tayam-tayam di tulun dot Israil nga' aiso' i' o napatai. Nga' pinokodou po kawagu di raja' o ginawo dau, om mada' kasai' i' iyau do mamanau i tulun dot Israil.
Kupos
8 Om boros kad Tuhan dot id diyo Musa di Harun, “Ongoi kou anu do piro-piro tonggom do tauu do mantad hilo'd ropuhan; om potiason nondo di Musa i tauu diri do hiri'd sawat dot id toguang di raja'. 9 Om tumongkop nondo i tauu do miagal do soliohuk do hilo'd pomogunan do Masir. Om iri nondo o popokupos di gumandas dot id tinan do koinsanai'd tulun om tayam-tayam,” ka dau. 10 Om ongoi noddi iyo Musa di Harun panganu do tauu, om ingkakat no iyolo' do hiri'd toguang di raja'. Om potiaso' no di Musa i tauu diri do hilo'd sawat, om iri noddi o pinopokupos di gumandas dot id tinan di tulun om i tayam-tayam. 11 Om a' noddi i bobolian kosonsog do mongoi solowot di Musa, tu' nopuli po iyolo'd kupos do miagal di tulun do Masir do suwai. 12 Nga' pinokodou i' do Tuhan o ginawo di raja', gisom dot a' i' iyau minokinongou di boros diyo Musa di Harun, do miagal di nokoboros mantad do Tuhan.
Karambatu
13 Om boros kaddi do Tuhan dot id di Musa, “Mongoi no solowot di raja' dot osuab pod suab om sunudan no iyau diti boros do Tuhan, i Kinorohingan do tulun dot Ibrani, do poingkaa, ‘Pabanaro' no ilo tulun ku do mamanau, om koongoi i' iyolo' kasambayang dot id doho'. 14 Tu' baino' nopo moti', om okon no ko' iri no i tongomontiri' nu, om i rayat nu o hukuman ku, suwai ko' iya' nga' hukuman ku i'. Om koilo ko indo dot aiso' no o koiyo doho' do pointongkop do hiti'd pomogunan. 15 Tu' ondung hinukuman tiya' daa om i rayat nu do toruol, om noinsanan kou no daa do napatai. 16 Nga' pinologos ku i' iya' do poimpasi om kokito ko i' do kogoyoo' do sinundu ku. Om kotongkop i' do hiti'd pomogunan o kogoyoo' do ngaran ku. 17 Nga' iyo piya'ddi nga' asawat kasai' po o ginawo nu om a' ko pabanar di tulun ku do mamanau. 18 Nga' kosuabon nopondod suab, om porikoton ku motindo o karambatu di korolosi kopio, it a' po nokoumbal do nosiliu do hiti'd Masir do mantad di gulu. 19 Nga' ponuhu' no do poposusut di tayam-tayam nu, om koinsanai di diya' do songonuon di hilo'd soliwan. Tu' asandatan motindo do karambatu o koinsanai'd tulun om tayam-tayam di hilo'd liwan dit aiso' o kolungung, om angapatai nondo iyolo',’ kanto,” ka dau. 20 Om ongooris diri o wookon di montiri' di raja', om ngoyo' no diyolo' posuango' do hiri'd walai i turipon om i tayam-tayam diyolo'. 21 Nga' iri nopo i tulun do suwai om a' i' minomusou di boros do Tuhan, om pologoso' nopo i turipon om i tayam-tayam diyolo' do hiri'd labus dot aiso' o kolungung. 22 Om boros kaddi do Tuhan dot id di Musa, “Pobilido' ino longon nu do pointuduk do hilo'd tawan, om sumondot i' o karambatu do pointongkop do pomogunan do Masir do mongotung do tulun, om tayam-tayam, om koinsanai di tanom-tanom do hilo'd dumo,” ka dau. 23 Om pobilido' noddi di Musa i sukud dau do pointuduk do hilo'd tawan, om porikoto' noddi do Tuhan o tinggoron om karambatu, om kodumaat nga' mungkad-sungkad po do hiti'd tana'. Om posondoto' noddi do Tuhan 24 o rasam do karambatu dit asapou kopio, do mitonggoi'd kodumaat di malab-kalab poo. Om tontok nogiddi do haro o tongus dot araat kopio do nokorikot do hilo'd Masir, do diri nogindo do nosiliu do mantad di gulu. 25 Om karaag ngai' nopo di karambatu o nunu nopo i hiri'd labus do pointongkop di pomogunan do Masir; do kohompit ngai' no o tulun om nintorusan. Om nangaraag ngai' nogi' i tanom-tanom do hiri'd dumo om nangasakat ngai' o kayu. 26 Hilo' pod pomogunan do Gusin, i kinoiyonon do tulun dot Israil, ot aiso' o karambatu. 27 Om lohowo' noddi di raja' i Musa om i Harun, om boro-boros nod poingkaa, “Iti nopo baino' om nokowonsoi oku nod dusa; Tuhan no ot otopot, om iyahai nodti rayat ku o nakasala'. 28 Sambayang no dot id Tuhan! Tu' norikot no kopio o koinggorito' dahai dot ouru diti tinggoron om karambatu. Mamatos oku no kopio do papabanar dokoyu do mamanau, om a' kou no minog do mundorong do hiti,” ka dau. 29 Om boros ka di Musa dot id dau, “Kosoliwan oku podti bandar om poinsawaton ku no o longon ku do sumambayang dot id Tuhan. Om otingkod nondo ilo tinggoron om otodu' ilo karambatu, om koilo ko i' dot iti nopo pomogunan om Tuhan i' o sanganu. 30 Nga' oilaan ku i' dot a' ko po oronok, om ilo tongomontiri' nu nga' a' po oronok do Tuhan, i Kinorohingan,” ka dau. 31 Om karaag ngai' nopoddi i guas do gapas om i barli, tu' kumupang no daa i barli om momiunduk nogi' i gapas. 32 Nga' iri po i gandum ot a' naraag tu' a' po noonsok do tontok diri. 33 Om tongkiad noddi i Musa di raja' om soliwan no di bandar. Om poinsawato' no di Musa o longon dau do suminambayang dot id Tuhan, om tingkod nopoddi i tinggoron, om i karambatu, om i rasam. 34 Om soira' di nokito di raja' i nosiliu do miagal diri om pomonsoi po kawagu iyau do dusa. Om pinokodou i' di raja' o ginawo dau om i tongomontiri' dau nga' pinokodou i' diyolo' o ginawo diyolo' do miagal di gulu. 35 Om a' iddi di raja' pinabanar i tulun dot Israil do mamanau, do miagal di nokoboros mantad do Tuhan, do pinolombus di Musa.
Katat
1 Om boro-boros noddi o Tuhan dot id di Musa do poingkaa, “Mongoi no solowot di raja'. Om pinokodou ku po o ginawo di raja' om i tongomontiri' dau, om owonsoi ku i' iti piro-piro o koimayaan dot id pogialatan diyolo', 2 om osusui indo dokoyu dot id tangaanak om id tongomanangaki dokoyu ondung poingkukuro oku do minonguntotogod di tulun do Masir do tontok di wonsoyo' ku iti piro-piro o koimayaan. Om oinsanan kou indo do koilo dot iyoho' no o Tuhan,” ka dau. 3 Om ongoi noddi iyo Musa di Harun solowot di raja', om boros ka diyolo', “Poingkaa o boros do Tuhan, i Kinorohingan do tulun dot Ibrani, ‘Soira' ko toindo do minsiriba' dot id doho'? Pabanaro' no i tulun ku do mamanau om koongoi i' iyolo' kasambayang dot id doho'. 4 Ondung a' kasai' ko kaakun, om poporikot oku no moti' do katat do hiti'd pomogunan nu do suab. 5 Om adalaan nondo kopio kogumu' o katat, gisom dot a' no okito iti tana'. Om kanon ngai' nopondo di katat it a' naraag di karambatu, om iri piya i kayu di nongoolu-olu' nga' kanon ngai' i'. 6 Om ponuon nopondo di katat i walai nu, om i kawalayan di tongomontiri' nu, om i kawalayan di rayat nu. Om iti nopo katat diti nga' araat po ko' i nongokito di komolohingan nu,’ ka dau,” ka diyolo'. Om tolikud noddi i Musa om tongkiad no di raja'. 7 Om boro-boros noddi di raja' i tongomontiri' dau, boros ka diyolo', “Songkuro po o koloido' do tulun diti do mamagangau dati'? Pologoson nopo ilo tulun dot Israil do mamanau om koongoi i' iyolo' kasambayang dot id Tuhan, i Kinorohingan diyolo'. A' nu po okito do naraag noti pomogunan do Masir?” ka diyolo'. 8 Om lohowo' poddi kawagu iyo Musa di Harun do minongoi solowot di raja'. Om boros ka di raja' dot id diyolo', “Mongoi ngai' kou nopo katuu sambayang dot id Tuhan, i Kinorohingan dokoyu. Nga' isai ngai' kopio toi dokoyu o mongoi?” ka dau. 9 Om boros ka di Musa do suminimbar, “Mongoi ngai' nopo iyahai, om katanud ngai' o tangaanak om i tongomolohing no. Angatan ngai' nopo dahai o tangaanak dahai'd kusai om tangaanak dahai'd tondu', om koinsanai di dumba' om kambing, om sapi' dahai, tu' a' no milo dot a' iyahai papaharo do poginakanan do pomusou do Tuhan,” ka dau. 10 Om boros ka di raja', “Sumumpa' oku no dot id Tuhan dot a' pabanar dokoyu do patanud do tongoondu' om tangaanak dokoyu! Atalang no kopio do haro o pakat dokoyu'd sumaap. 11 A' oku i' kopio pabanar! Kokusayan no o pabanaron ku do mamanau do mongoi sambayang dot id Tuhan, dot iri kopio o pokionuon dokoyu!” ka dau. Om uyungo' noddi iyo Musa di Harun do mantad hiri'd walai di raja'. 12 Om boro-boros noddi o Tuhan dot id di Musa do poingkaa, “Pobilido' ino longon nu dot id sawat diti tana' do Masir do poporikot do katat. Om rumikot indo o katat do mongoi pangakan do koinsanai di songinsuni dit a' naraag di karambatu,” ka dau. 13 Om pobilido' noddi di Musa i sukud dau om porikoto' nod Tuhan i tongus do mantad id koulayon do tuminongus do tuminongkop di pomogunan do nosongodou do tadau'ddi om gisom do nosuaban. Om minnanawau nogiddi nga' korikot ngai' no i katat. 14 Om ogumu' tomod diri o katat do ruminikot om tuminokop do pointongkop do pomogunan diri. Om a' po insan o tulun do nokokito'd katat do miagal kopio'ddi kogumu' om aiso' no ot okito kawagu do miagal kopio'ddi dot id maso do tabantalan. 15 Om tokop nopo i katat do hiri'd tana' gisom dot oitom po o kokitanan; om kaakan ngai' nopo di katat it a' nangaraag di karambatu, om nangaakan ngai' i tua' do kayu. Om aiso' no ot otomou do noolu' do hiri'd guas do kayu, ko' id totonomon do pointongkop do pomogunan do Masir, tu' nangaayi' no di katat do mangakan. 16 Om olomus nopoddi i raja' do minomolohou di Musa om i Harun om boro-boros no iyau diyolo' do poingkaa, “Nokowonsoi oku nod dusa dot id Tuhan, i Kinorohingan nu om nokowonsoi oku do dusa dot id diya'. 17 Ompunai po kopio doho' iti dusa ku do baino', om sambayang no dot id Tuhan, i Kinorohingan nu do mongidu' diti hukuman do kapatai do mantad id doho',” ka dau. 18 Om tongkiad no i Musa do mantad hiri'd raja' om sambayang no iyau dot id Tuhan. 19 Om posimbano' noddi do Tuhan o kotonguson di tongus do mantad id koulayon om siliho' no do tongus di mantad id kotonobon dit opuhod tomod. Om kotonggoi noddi i katat di tongus do mantad id kotonobon. Om kotilib no do hiri'd Suok do Suis. Iso' po di katat nga' aiso' no o noolu' do hilo'd pomogunan do Masir. 20 Nga' pinokodou i' kawagu do Tuhan o ginawo di raja', gisom dot a' i' iyau papabanar di tulun dot Israil do mamanau.
Tuminuong
21 Om boros kad Tuhan dot id di Musa, “Poinsawato' ino longon nu do pointuduk do hilo'd tawan, om otuong indo o pointongkop do pomogunan do Masir,” ka dau. 22 Om potuduko' noddi di Musa do hilo'd tawan i longon dau, om tuong no dot odondom tomod o pointongkop do pomogunan do Masir do solinaid do tolu o tadau. 23 Om a' noddi i tulun do Masir kopogikikito, om iso' pod tulun nga' aiso' no o suminoliwan do mantad id walai diyolo' do solinaid diri. Nga' haro kasai' i' o tanawau do hiri'd kinoiyonon di tulun dot Israil. 24 Om lohowo' noddi di raja' i Musa om boro-boros no do poingkaa, “Pamanau kou nopo do mongoi sambayang dot id Tuhan, om potonudon ngai' nopo dokoyu i tongoondu' om i tangaanak dokoyu. Nga' poopungon ngai' po dokoyu do hiti i dumba', om kambing, om sapi' dokoyu,” ka dau. 25 Om boros ka di Musa do suminimbar, “Iyo nopoddi om onuan nu no iyahai'd tayam-tayam do maan do porsombahan om porsombahan di sorobon do patahakon dot id Tuhan, i Kinorohingan dahai. 26 Tanggayan ngai' i' dahai i tayam-tayam dahai; om iso' po nga' aiso' i o poopungon dahai. Om iyahai i' ot apatut do momili' di tayam-tayam do patahakon dahai dot id Tuhan, i Kinorohingan dahai. Om a' po dahai oilaan ondung honggo'ddi o tayam-tayam do patahakon dahai dot id Tuhan, dot a' po iyahai korikot do hilo',” ka dau. 27 Om pokodoho' pod Tuhan o ginawo di raja', gisom dot a' i' iyau pinapabanar diyolo' do mamanau. 28 Om boros ka di raja' dot id di Musa, “Poggidu' do mantad hiti! A' oku no siontong diya'! Ondung kopisolowot to kawagu, om apatai ko no,” ka dau. 29 Om boros ka di Musa, “Iyo nogiddi. A' ko no bo kokito kawagu doho',” ka dau.
Pinoboros di Musa dot Apatai o Tanak do Kusai dit id Gulu Kosusu
1 Om boros kaddi do Tuhan dot id di Musa, “Iso' po o hukuman do porikoton ku dot id raja' do Masir om id rayat dau. Katalib pondo iri om pabanaron kou nondo dau do mamanau. Om uyungon ngai' kou nopondo dau do mantad hiti. 2 Boro-boros nogi' dilo tulun dot Israil, om sunudan ngai' no iyolo' do mongoi pokianu do tamas om pirok do pongillumis do tinan do mantad id songkoduwo diyolo',” ka dau. 3 Om binsuhuo' nod Tuhan i tulun do Masir do rumonok di tulun dot Israil. Om agayo tomod diri o ngaran di Musa dot osorou di tongomontiri' om koinsanai di tulun. 4 Om boros kaddi di Musa dot id raja', “Poingkaa o boros do Tuhan, ‘Pitangatuong nopondo om tumongkop oku do pomogunan do Masir, 5 om apatai ngai' nopondo i tanak do kusai dit id gulu kosusu do hiti'd Masir, do mantad nopo di tanak do kusai di raja' dit id gulu kosusu, i sumowoli daa do momorinta', om gisom di tanak do kusai dit id gulu kosusu di turipon do tondu' di monnunutu do gandum. Om tanak do tayam-tayam dit id gulu kosusu nga' angapatai ngai' nogi'. 6 Om orongou nondo do pointongkop do pomogunan do Masir o giak do mogihad dot opuhod tomod, it a' po insan kosiliu om it a' nondo osiliu kawagu do koimbagu. 7 Nga' id pogialatan nopo do tulun om id pogialatan do tayam-tayam do tulun dot Israil om aiso' i' o mamagangau. Om oilaan nu nogindo do pisuwayon ku o tulun do Masir om tulun dot Israil,’ ka do Tuhan,” ka dau. 8 Om pupusai noddi di Musa i boros dau, boros ka dau, “Rumikot ngai' nopondo i montiri' nu om tumuku' iyolo' dot id toguang ku, om monuhu' nondo iyolo' doho' do mangangat do toinsanan do tulun ku do mogidu', om mamanau nogindo iyahai,” ka dau. Om tongkiad noddi i Musa do mantad hiri'd raja' do mikuwo'd otogod tomod. 9 Nokoboros no do Tuhan dot id di Musa o boros do poingkaa, “Sumurilog kasai' indo i raja' do boros nu, om kointalang ku indo o piro-piro o koimayaan do hiti'd pomogunan do Masir,” ka. 10 Om pointalango' ngai' no diyo Musa di Harun i kongoimayaan diri do hiri'd toguang di raja', nga' pinokodou i' do Tuhan o ginawo di raja', om a' iddi di raja' pinabanar i tulun dot Israil do tumongkiad di pomogunan dau.
I Tadau'd Agayo do Paska
1 Om boro-boros no o Tuhan dot id diyo Musa di Harun do hilo'd pomogunan do Masir. Boros ka dau, 2 “Tulan nodti o sumiliu do tulan do koiso' do koimpuunon do toun dokoyu. 3 Poboroson ngai' noti ponuhuan dot id toinsanan o tulun dot Israil. Tontok nopo do tadau do kohopod do tulan diti om mositi' no do momili' o pointikid-tikid do kusai do songinan o tanak do dumba' ko' songinan o tanak do kambing do maan di sompiiyon dau. 4 Ondung okuri' kopio iyolo' songilang-ilang om a' no kaayi' do mangakan do songinan o tanak do dumba' ko' tanak do kambing, om pokoino i' do piilangan diyolo' di songkoduwo diyolo' i songinan o tanak do dumba' ko' tanak do kambing, do miontok di kogumuon do tulun, om kogoyoo' do pangakan do tikanas do pointikid-tikid di tulun. 5 Nunu nopo o pilion dokoyu, dumba' tuu ko' kambing po nga' mositi' no do tontoluhan di sontoun nogi' o tumur, om it aiso' o bohiton do tinan. 6 Om totuong nopondo di tadau do kohopod om apat do tulan diti om mositi' no dot oinsanan nopo o tulun dot Israil do monumbali' do dumba' ko' kambing. 7 Om pogihilon nondo ot ongokooro' di raha' di sinumbali' do hiri'd miampaping di wawayaan, om hiri'd sawat di wawayaan do pointikid-tikid do walai di pangakanan di sinumbali'. 1|110|HK14F| Duwo torigi do miampaping do wawayaan om i boruti do hiri'd sawat|12.7 8 Om tontok i' do totuong diri do luguon i tonsi di sinumbali' om kanon nondo do mitonggoi di rapaon dit opoit om roti dit a' naralatan do pangambang. 9 Kada' matao' iri do mangakan om kada' losuo', suwai ko' luguon do mitonggoi di tulu om gakod om i suang do tian. 10 Kada' no do haro ot oolu' do gisom do kosuabon, ondung haro ot oolu' om sorobon ngai' nopo. 11 Om lomusan no do mangakan diri, tu' apatut do kapanampakai mantad kou no do maan do mamanau om kikasut kou no, om poingigit no dokoyu o sukud. Tu' tadau nopoddi om Tadau'd Agayo do Paska do maan do pomusou doho', i Tuhan. 12 Tontok nopondo do totuong diri om tumongkop oku nondo do pomogunan do Masir do mamatai do koinsanai di tanak do kusai dit id gulu, om koinsanai di tanak do tontoluhan do tayam-tayam dit id gulu kosusu. Om hukuman ngai' ku nondo i ponokokinorohingan do hilo'd Masir, tu' iyoho' no o Tuhan. 13 Iri nondo i raha' di pinogihil do hiri'd wawayaan di walai dokoyu o tanda' di walai do niyonon dokoyu. Om soira' nopondo dot okito ku i raha' diri, om toliban ku indo iyokoyu, om a' ku i' iyokoyu patayon do tontok do momohukum oku do pomogunan do Masir. 14 Ramayon no kopio dokoyu o tadau dot agayo diri do miagal do tadau dot agayo di don Tuhan, do kopomuhandaman di nowonsoi ku, iyoho' i Tuhan. Ramayon kasai' no dokoyu o tadau'ddi do gisom dot alaid,” ka dau.
I Tadau'd Agayo do Roti dit A' Kipangambang
15 Om boros ka do Tuhan, “Turu' o tadau do koloido' dot a' kou koino-ino do mangakan do roti di rinalatan do pangambang --- iri no i roti dit a' rinalatan do pangambang ot akanon dokoyu. Tontok nopo di tadau do koiso' om taamon ngai' no dokoyu i pangambang di songingopi' do hiri'd walai dokoyu, tu' ondung haro o tulun do kapangakan do roti di naralatan do pangambang do solinaid di turu' o tadau'ddi, om a' no iyau kohompit do tulun ku. 16 Tontok nopo di tadau do koiso' om di tadau do koturu', om mositi' no do tumimung kou do sumambayang. A' no koino-ino do haro o buruon dokoyu do suwai do tontok do tadau'ddi, nga' koino-ino kou indo do mogonsok do takanon. 17 Hondomon no kasai' dokoyu iti tadau dot agayo diti, tu' tontok no do tadau diti do posoliwanon ku o koinsanai'd bansa' dokoyu do mantad id pomogunan do Masir. Om poinggoyoon kasai' no dokoyu o tadau diti do miagal do tadau dot agayo do gisom dot alaid. 18 Om kada' kou no pangakan do roti di rinalatan do pangambang do mintonod di tadau do kohopod om apat do tulan do koiso' om gisom do tadau do koduwo nohopod om iso' do tulan diri. 19-20 Om turu' o tadau dot a' kou koino-ino do poopi' do pangambang do roti dot id walai dokoyu. Tu' ondung haro o tulun do mangakan do roti di naralatan do pangambang, do tulun tuu dot Israil ko' tulun pod bansa'd suwai, om a' no kohompit do tulun ku,” ka dau.
Paska di Koinsan i'
21 Om lohowo' no di Musa o koinsanai di boyoon do tulun dot Israil, om boro-boros no iyau dot id diyolo' do poingkaa, “Momili' kou no do tanak do dumba' ko' tanak do kambing do maan sumbolio', om aramai i' di sompiiyon dokoyu i tadau do Paska. 22 Mongoi kou no panganu do songwongkos o sakot do hisop om potobungon no do hiri'd raha' di tayam-tayam, i poinsuang di mangkuk, om pogihilon nogindo i raha' do hiri'd miampaping di wawayaan om hiri'd sawat di wawayaan di walai dokoyu. Om kada' nod haro o tongosongulun piya do sumoliwan do mantad hiri'd walai do gisom do kosuabon. 1|55|HK70E| I sakot do roitan do hisop|12.22 23 Soira' nopondo do tumongkop o Tuhan do pomogunan do Masir do mongoi pamatai di tulun do Masir, om okito nondo dau i raha' do hiri'd miampaping di wawayaan, om hiri'd sawat di wawayaan do walai dokoyu. Om a' indo do Tuhan pologoson i Moloikat di Mamatai do sumuang di walai do mongoi pamatai dokoyu. 24 Mositi' no do tonudon dokoyu om tonudon di tangaanak dokoyu o toturan diti do gisom dot alaid. 25 Soira' nopondo do sumuang kou di pomogunan di nakabatos do Tuhan do patahakon dot id dokoyu, om mositi' no do wonsoyon dokoyu iti natantu' mantad do wonsoyon do tontok do Paska. 26 Soira' nopod muhot i tangaanak dokoyu do poingkaa, ‘Nunu o komoyon diti wonsoyon do miagal diti?’ ka, 27 om sunudan no dokoyu do poingkaa, ‘Iti nopo om porsombahan di sorobon do dong Paska do maan do pomusou do Tuhan, tu' tinoliban i' dau i kawalayan do tulun dot Israil di hilo'd Masir. Om pinatai dau i tulun do Masir, nga' iyati' nopo om pinologos i' dau do poimpasi,’ kanto dokoyu,” ka dau. Om otud noddi i tulun dot Israil do tuminuku: 28 Om pamanau noddi iyolo' om wonsoyo' no diyolo' i pinonuhuan do Tuhan diyo' Musa di Harun.
Nangapatai i Tanak do Kusai dit id Gulu
29 Pitangatuong noddi om patayo' ngai' no do Tuhan o tanak do kusai dit id dotuo di tulun do Masir. Impuuno' nopo i tanak do kusai di raja' dot id gulu, i sumowoli mantad daa do sumiliu do raja', om gisom di tanak do kusai dit id gulu do tanak di tulun di songinggiil; om koinsanai di tanak do tayam-tayam dit id gulu kosusu nga' pinatai nogi'. 30 Tontok nopoddi do totuong diri om koposikai no i raja' om i tongomontiri' di raja' om koinsanai di tulun do Masir. Om lompud poddi do tihad o torongou do pointongkop do pomogunan do Masir, tu' aiso' no o tiso' pod walai dot a' napatayan do tanak do kusai. 31 Om totuong iddi do linohou di raja' iyo Musa di Harun, om boro-boros no iyau do poingkaa, “Poggidu' ngai' kou do mantad hiti, iyokoyu i tulun dot Israil! Tongkiad kou no diti pomogunan ku; ongoi kou nopo sambayang dot id Tuhan dokoyu do miagal di pinokianu dokoyu. 32 Igitan ngai' nopo dokoyu i dumba' om kambing, om sapi' dokoyu, om tumongkiad no do mantad hiti. Om pokionuan oku no iyoho' do barakat,” ka dau. 33 Om odsuuron tomod diri di tulun do Masir i tulun dot Israil do marau-arau do sumoliwan di pomogunan diyolo'. Boros ka no diyolo', “Apatai ngai' no iyahai dot a' kou no tumongkiad do mantad hiti,” ka no. 34 Om ponuo' noddi di tulun dot Israil do tapung dit a' naralatan do pangambang, om i nobulugu' mantad no, i pagansakan diyolo' do roti, om lopoto' no diyolo'd kain i pagansakan diri, om saano' nogiddi diyolo'. 35 Om nowonsoi ngai' no diyolo' i nokoboros di Musa, om nokopokianu no iyolo' do tamas om pirok do pongillumis do tinan om pakayan do mantad id tulun do Masir. 36 Om pinoronok diri do Tuhan i tulun do Masir dot id toguang di tulun dot Israil, om nunu nopoddi i pinokianu di tulun dot Israil nga' patahako' ngai' nopo di tulun do Masir dot id diyolo'. Om iyo noddi i tulun dot Israil do minononggoi do kakayaan do tulun do Masir, do suminoliwan do mantad id pomogunan diri.
Tuminongkiad o Tulun dot Israil do Pomogunan do Masir
37 Om pamanau nopod gakod i tulun dot Israil do mantad id bandar do Raamsis do kuminaa do hilo'd bandar do Sukot. Kogumuon nopo diyolo' nga' haro i' doti' ot onom nahatus noribu o tongokusai nogi' om a' po kohompit i tongoondu' om i tangaanak. 38 Om ogumu' po o tulun do bansa'd suwai do nakatanud diyolo', om ogumu' o dumba' om kambing, om sapi' do nigitan diyolo'. 39 Om onsoko' noddi diyolo' i tapung di nobulugu' mantad noddi, it a' rinalatan do pangambang, i nigitan diyolo' do mantad hilo'd Masir. A' no naralatan do pangambang i tapung diri om a' no diyolo' nosodia' i takanon diyolo', tu' narau-arau tomod no iyolo' do nuyung do mantad id pomogunan do Masir. 40 Koloidon nopo di tulun dot Israil do poundorong do hilo'd Masir om apat nahatus om tolu nohopod o toun. 41 Om tontok di norikot i tadau do kinopupuson dit apat nahatus om tolu nohopod o toun, om soliwan ngai' noddi i don Tuhan do tulun do mantad hilo'd Masir. 42 Tontok no do totuong diri do tinamangan do Tuhan iyolo' do pinoposoliwan diyolo' do mantad id pomogunan do Masir; om iri nogi' o totuong di pinotobilang do maan do don Tuhan do sumiliu do kopomuhandaman do gisom dot alaid. Om tontok no do totuong diri dot apatut do mumbangan-bangan i tulun dot Israil.
Oturan do Tadau'd Agayo do Paska
43 Om boros kad Tuhan dot id diyo Musa di Harun, “Iti no ot oturan do pasal do tadau dot agayo do Paska: Tulun nopo di bansa'd suwai, om a' i' koino-ino do mangakan di taakanon do don Paska. 44 Nga' iri nopo i turipon di noboli dokoyu om koino-ino i' do mangakan, do nosunatan no iyau. 45 Tulun nopo di nokoumbaya' no toomod om i tulun di pakaraja' do gumadsi' om a' i' koino-ino do mangakan diri. 46 Akanon ngai' no i taakanon diri do hiri'd suang di walai di pinagansakan; tu' a' i' koino-ino iri do tanggayan do sumoliwan. Om kada' nod haro ot otipu' do tulang di tayam-tayam di sumbolion diri. 47 Om mositi' no do ramayon do koinsanai'd tulun dot Israil o tadau dot agayo diti. 48 Nga' tulun nopo dit a' po nosunatan om a' i' koino-ino do mangakan diri. Ondung haro o tulun do bansa'd suwai do poingiyon dot id rolot dokoyu dit orohian do tumanud do mamaramai di tadau do Paska do maan do pomusou do Tuhan, om sunatan po dokoyu ngai' i tongokusai do hiri'd sompiiyon dau. Om poiyoon nogindo dokoyu iyolo' do miagal do tulun kopio dot Israil. Om koino-ino nondo iyolo' do tumanud do mamaramai di tadau'd Paska. 49 Iyo ngai' nopoddi ot oturan do tonudon do tulun dot Israil om i tulun do bansa'd suwai di poinsugku' dokoyu,” ka dau. 50 Om oinsanan nopo i tulun dot Israil do minumboyo' om minomonsoi do koinsanai di pinonuhuan do Tuhan dot id di Musa om id di Harun. 51 Om tontok nod tadau'ddi do pinosoliwan do Tuhan o koinsanai di tulun dot Israil do mantad id pomogunan do Masir.
Siniliu do Porsombahan i Tanak do Kusai dit id Gulu
1 Om boros ka do Tuhan dot id di Musa, 2 “Patahakon no dot id doho' o koinsanai di tanak do kusai dit id gulu kosusu do maan do porsombahan. Tu' koinsanai'd tanak do kusai do tulun dot Israil dit id gulu, om koinsanai'd tanak do tontoluhan di tayam-tayam dit id gulu kosusu nga' doho' ngai' no,” ka dau.
Tadau'd Agayo do Roti dit A' Kipangambang
3 Om boros ka di Musa dot id bansa' dot Israil, “Soro-sorohon no o tadau'dti --- tu' tadau do kinotongkiadan dokoyu di pomogunan do Masir, i pomogunan di nokoiyonon dokoyu do siniliu'd turipon. Tadau nodti do pinosoliwan kou do Tuhan, dot i kuasa' dau dot agayo o pinoposoliwan. Kada' kou pangakan do roti di rinalatan do pangambang. 4 Om tontok no do tadau'dti, i tadau do koiso' do tulan dot Abib, i tulan do koiso', do tuminongkiad kou do mantad id pomogunan do Masir. 5 Nokosumpa' no o Tuhan dot id taki-aki dokoyu do papatahak dot id dokoyu di pomogunan do tulun do Kanaan, om Hit, om Amori, om Howi, om Yobus. Om soira' nopondo do kaatod kou'd Tuhan do hilo'd pomogunan di kaya' om oluhub diri, om ramayon no dokoyu iti tadau dot agayo diti do pointikid-tikid do toun, do tontok di tulan do koiso'. 6 Kanon nopo dokoyu do solinaid do turu' o tadau om roti dit a' rinalatan do pangambang, om tontok nopondo di koturu' do tadau om papaharo kou nondo do karamayan do pomusou'd Tuhan. 7 Kada' kou pangakan do roti di naralatan do pangambang do solinaid do turu' o tadau. Om kada' nod haro o pangambang om roti di naralatan do pangambang dot id pointongkop do pomogunan dokoyu. 8 Tontok nopo do tumimpuun o karamayan diti om posuhuton no dokoyu i tangaanak dokoyu, do wonsoyon pogi' dokoyu o koinsanai'ddi nga' maan do kopomuhandaman di winonsoi'd Tuhan dot id dokoyu do tontok di suminoliwan kou do mantad id pomogunan do Masir. 9 Iti nopo karamayan diti nga' sumiliu do poposorou dokoyu, do miagal dot iso' o tanda' di poingkogos dot id longon ko' i poingkogos do ponong id turos dokoyu; iti no o poposorou dokoyu do mangapal om minsingilo do koinsanai di Tourat do Tuhan, tu' iri no i sinundu do Tuhan dit agayo kopio o pinoposoliwan dokoyu do mantad hilo'd Masir. 10 Ramayon no o tadau'ddi do tontok di maso do natantu' mantad do pointikid do toun,” ka dau.
I Tanak do Kusai dit id Gulu Kosusu
11 Om boros kad Musa dot id tulun dot Israil, “Pootodon kou nondo do Tuhan do hilo'd pomogunan do tulun do Kanaan, i nakabatos mantad dau do mikuwo'd sumpa' do patahakon dot id dokoyu om id taki-aki dokoyu. Patahakon nopondo dau iri dot id dokoyu, 12 om patahakon no dokoyu dot id Tuhan o koinsanai di tanak do kusai dit id gulu kosusu, om koinsanai di tontoluhan do tayam-tayam dokoyu dit id gulu kosusu, tu' koinsanai'ddi om don Tuhan ngai' no. 13 Nga' bolion i' dokoyu kawagu do mantad id Tuhan o koinsanai di tontoluhan do kaladai dit id gulu kosusu, do pomoli nopo om tanak do dumba' di patahakon dokoyu do maan do porsombahan di sumbolion. Ondung a' dokoyu bolion kawagu i kaladai'ddi om tipuon no o liou di kaladai. Bolion no kawagu dokoyu o koinsanai di tanak dokoyu'd kusai dit id gulu kosusu. 14 Koimbagu nopondo, do muhot i tangaanak dokoyu do komoyon diti toturan, om posimbaron nopondo dokoyu om poingkaa, ‘Pinosoliwan toko'd Tuhan dot i kuasa' dau dot agayo o pinoposoliwan dati' do mantad hilo'd Masir, i kinoiyonon toko' do siniliu do turipon. 15 Tontok di pinokodou di raja' do Masir o ginawo dau, om dit a' iyau pinapabanar dati' do mamanau, om patayo' noddi do Tuhan o koinsanai di tanak do kusai dit id gulu kosusu, om koinsanai di tanak do tontoluhan do tayam-tayam dit id gulu kosusu do pointongkop do pomogunan do Masir. Om iri noddi o kapatahakan toko' do pointikid-tikid di tontoluhan do tayam-tayam dit id gulu kosusu, do maan do porsombahan di sumbolion do patahakon dot id Tuhan, nga' bolion indo kawagu i tangaanak toko'd kusai dit id gulu kosusu. 16 Iti nopo karamayan diti om poposorou dati' do miagal dot iso' o tanda' do poingkogos do longon toko' ko' poingkogos do ponong id turos toko'; om iti no o poposorou dati' do pinosoliwan toko'd Tuhan do mantad hilo'd Masir dot i kuasa' dau dit agayo o pinoposoliwan,’ kanto dokoyu,” ka dau.
I Haun om i Tapui do Poorigi
17 Tontok di pinabanar di raja' do Masir i tulun dot Israil do mamanau, om a' id Kinorohingan pinosusui iyolo' di ralan di potoropis do tisan do rahat, i poingkaa do hilo'd pomogunan do Pilistin, do mulong piya dot iri daa o ralan dit opoting. Osorou nopod Kinorohingan om poingkaa, “Mada' oku i' dot opinduwaan ilo tongoulun, om gumuli' nondo kawagu iyolo' do hilo'd Masir dot okito diyolo' dot a' iyolo' milo dot a' monokisangod,” ka. 18 Om posorilio' noddi dau iyolo' do pinawaya' di tana' do kowotuan do poingkaa do hiri'd Rahat dot Aragang. Om ongkirapo-rapo nod don sumasangod i tulun dot Israil. 19 Om tanggayai noddi di Musa i tulang di Yusup do mantad hilo'd Masir, tu' tontok nopoddi poimpasi po i Yusup om sinuhu' dau i tulun dot Israil do suminumpa' do momonsoi do miagal diri. Poingkaa o bilin di Yusup, “Posoliwanon kou nopondo do Kinorohingan, om tanggayan no kopio dokoyu o tulang ku do mantad id kinoiyonon diti,” ka. 20 Om tongkiad noddi i tulun dot Israil do mantad hilo'd Sukot om powonsoyo' no diyolo' o kiim diyolo' do hilo'd bandar dot Itam, it id tisan di tana' do kowotuan. 21 Tontok nopo do dangadau om mogulu o Tuhan diyolo' do miagal-agal do haun do poorigi do popotunud diyolo' do ralan di susuyon diyolo', om dongotuong no om miagal-agal iyau'd tapui do poorigi do hiri'd gulu-gulu diyolo' do monitiu om popotunud diyolo', om milo iddi iyolo'd mamanau do dangadau om dongotuong. 22 Om iri nopo haun do poorigi diri nga' hiri kasai' nopod gulu-gulu di tulun dot Israil do dangadau, om dongotuong nondo om i tapui di poorigi ot id gulu-gulu diyolo'.
Suminoborong di Rahat dot Aragang
1 Om boro-boros noddi o Tuhan dot id di Musa do poingkaa, 2 “Suhuon no ilo tulun dot Israil do gumuli' kawagu do gisom do korikot do hilo'd dotimbabaan di bandar do Pi-Hahirot, it id piolitan di bandar do Migdol om Rahat dot Aragang, it id somok do bandar do Baal-Sipon, om suhuon no iyolo' do popowonsoi do kiim diyolo' do hilo'. 3 Om momusorou nondo i raja' do Masir do maso diti tulun dot Israil do minghombo do hiti'd pomogunan diti, do nosorilian diti tana' do kowotuan. 4 Pokodohon ku nondo o ginawo dau gisom do mongoi nondo iyau pomogusa' dokoyu, om kamanang oku indo dot id sawat di raja' do Masir om i piro-piro o soudor dau. Om iri nondo i kamanangan ku'ddi o kopobontugan do tulun doho', om iri tulun do Masir nga' koilo nondo dot iyoho' o Tuhan,” ka dau. Om wonsoyo' noddi di tulun dot Israil o miagal di pinonuhuan do Tuhan dot id diyolo'. 5 Om soira' di nosunudan i raja' do Masir do nokopoggidu' i tulun dot Israil, om ponosol noddi iyau om i montiri' dau, om boros ka diyolo', “Nunu'ddi kopio iti winonsoi toko'dti? Tu' pinologos toko' i tulun dot Israil do minogidu', om aiso' noddi o turipon toko'!” ka diyolo'. 6 Om posodiawo' ngai' noddi di raja' i korita'-kuda' dau di don sumasangod om i soudor dau. 7 Om pamanau noddi iyau do miwoyo' do koinsanai di korita'-kuda' dau om kohompit nogi' it onom nahatus o korita'-kuda' dit ongosonong kopio do nigitan di piro-piro o gunsiou dau. 8 Om pokodoho' noddi do Tuhan o ginawo di raja', om ngoyo' no di raja' gusao' i tulun dot Israil, i maso no do manau-panau do mogidu' do mantad id pomogunan diri, do pointirung do Tuhan. 9 Om gusao' no iyolo' di soudor do Masir dit ongkikuda' om it ongkikorita'-kuda', om kokosupai no iyolo' do hiri'd pinawansayan diyolo' do kiim, it id toning di Rahat dot Aragang, it id somok do bandar do Pi-Hahirot om bandar do Baal Sipon. 10 Om tontok di nokito di tulun dot Israil i raja' do Masir om i piro-piro o soudor dau do momok-somok diyolo', om moddosi tomod diri iyolo' om pomolohou no iyolo'd Tuhan do mokitulung dau. 11 Om boros ka diyolo' dot id di Musa, “Aiso' toi o kalabangan do hilo'd Masir? Tu' minog kopio ko do minangangat dahai do hiti'd tana' do kowotuan do mongoi patai do hiti? Antangai pogiddi o kinootuson diti winonsoi nu tu' nongoi nu i' iyahai posoliwano' do mantad hilo'd Masir! 12 A' toi dahai iya' nosunudan no mantad dit a' toko' po nakapamanau dot osiliu o miagal diti? Nosunudan i' dahai iya' do monongkiad dahai om popologos dahai do turipon kasai' do tulun do Masir. Osonong-sonong nogi' do turipon kasai' do hilo' ko' apatai do hiti'd tana' do kowotuan,” ka no diyolo'. 13 Om boros kad Musa do suminimbar, “Kada' kou poddosi! Pogiroton nopo o ginawo, om kokito kou indo ondung nunu o wonsoyon do Tuhan do pamasi dau dokoyu do baino'; tu' a' kou nondo bo kokito kawagu diti tulun do Masir. 14 Tuhan i' o sumaap do mogobi' dokoyu, om iyokoyu nopo om a' i' minog do momonsoi do nunu nopo,” ka dau. 15 Om boros kad Tuhan dot id di Musa, “Nokuro tu' millohou ko do mokitulung? Suhuo' nogi' ilo tulun dot Israil do lumombus do mamanau. 16 Pobilido' ino sukud nu om potudukon i' dot id soibau dilo rahat. Om migirang indo ilo waig, om milo i' ilo tulun dot Israil do sumoborong dilo rahat, do maya' di tana' di narasakan do waig. 17 Om pokodohon ku nondo o ginawo dilo tulun do Masir gisom do mongoi po iyolo' pomogusa' do tulun dot Israil, om kamanang oku indo dot id sawat do raja' do Masir om i piro-piro o soudor dau, om i piro-piro o soudor dau dit ongkikorita'-kuda'. Om iri nondo i kamanangan ku o kopobontugan do tulun doho'; 18 om iri nondo o koilaan di tulun do Masir dot iyoho' no o Tuhan,” ka dau. 19 Om ongoi noddi i moloikat do Kinorohingan, i hiri daa id gulu-gulu di soudor dot Israil, do hiri'd ponong id tohuri. Om iri nogi' i haun di poorigi nga' minundaliu do kuminaa do hiri'd 20 piolitan di tulun do Masir om i tulun dot Israil. Om otuong diri i haun do ponong hiri'd tulun do Masir nga' mogulinau i' i haun do ponong hiri'd tulun dot Israil. Om a' iddi kopiinsomok i duwo o posukan do soudor do solinaid do totuong diri. 21 Om potuduko' no di Musa o longon dau do hiri'd soibau di rahat, om popuhodo' nod Tuhan i tongus do mantad id koulayon do gisom do noimpit i waig do rahat. Om mongus-tongus nopoddi i tongus do solinaid do totuong diri gisom do notuu i rahat. Om nopigirang diri i waig, 22 om darapas no i tulun dot Israil di rahat do minaya' di tana' di narasakan do waig; om iri nopo waig di rahat nga' poingolig do hiri'd miampaping diyolo'. 23 Om gusa' noddi di tulun dot Israil do hiri'd rahat i tulun do Masir do mogiwoyo-woyo' do koinsanai di kuda', om i soudor dit ongkikorita'-kuda'. 24 Om maha' di minnanawau no om ontong no o Tuhan do mantad hiri'd tapui om i haun di poorigi, do minontong di soudor do Masir, om gangaho' no dau iyolo'. 25 Om pasangato' ngai' nod Tuhan i ruda' di korita'-kuda' diyolo', gisom dot osusa' tomod diri iyolo' do mamanau. Om boros ka di tulun do Masir, “Obian i' pama do Tuhan o tulun dot Israil do sumaap dati'. Kainou, poggidu' toko' nogi' do mantad hiti!” ka. 26 Om boros kad Tuhan dot id di Musa, “Potuduko' ino longon nu do hilo'd soibau dilo rahat, om mikintup i' kawagu ilo waig do mangalit dilo tulun do Masir, om ilo soudor diyolo' dit ongkikorita'-kuda',” ka dau. 27 Om potuduko' no di Musa o longon dau do hiri'd soibau di rahat, om kotonduli' noddi kawagu i waig do miagal di timpuun i', di mingungulai o tadau. Om umbal no daa i tulun do Masir do mogidu' do mantad hiri'd rahat nga' pataamo' nogi' iyolo'd Tuhan do hiri'd rahat. 28 Om kopikintup noddi i waig om koolitai ngai' nopo i korita'-kuda', om i popotunud di korita'-kuda', om koinsanai di soudor do Masir di suminusuhut daa di tulun dot Israil do hiri'd rahat; om iso' po diyolo' nga' aiso' no o napasi. 29 Nga' iri nopo tulun dot Israil om otuu i' o tana' do winayaan do suminoborong di rahat, om poingolig i waig do rahat do miampaping diyolo'. 30 Om tontok no do tadau'ddi do pinasi do Tuhan i tulun dot Israil do mantad id tulun do Masir, om songingiliu poddi i rata' di tulun do Masir do hiri'd tisan di rahat do nokito di tulun dot Israil. 31 Om soira' di nokito di tulun dot Israil i kuasa' do Tuhan dit agayo kopio'ddi, om i pinangala' dau di tulun do Masir, om oimayaan tomod diri iyolo' om oronok iyolo' do Tuhan; om otumbayaan noddi iyolo' do Tuhan om monongkuyaan iyolo' di Musa, i susuhuon do Tuhan.
Sinding di Musa
1 Om sindingo' noddi di Musa om i tulun dot Israil iti sinding diti dot id Tuhan, “Modsinding oku dot id Tuhan, tu' agayo o kinamanangan dau. Pinataam ngai' dau i kuda' om i songinsakai di kuda' do hilo'd rahat. 2 Tuhan no it okoris do mongintirung doho'; iyau no i minamasi doho'. Iyau no o Kinorohingan ku, om royohon ku no iyau, iyau no o Kinorohingan di tapa' ku, om sindingon ku no o kogoyoo' dau. 3 Tuhan nopo om gunsiou; Tuhan no o ngaran dau. 4 Pinataam ngai' dau i soudor do Masir om i korita'-kuda' diyolo' do hilo'd rahat. Nongolondod do hilo'd Rahat dot Aragang i gunsiou diyolo' dit ongokilos. 5 Noolitan iyolo' di rahat dot aralom, om nolonsod iyolo' do gisom do nakananad do miagal do watu. 6 Agayo o kuasa' do longon nu'd wanan, oi Tuhan, komumuk do pisangod i longon nu. 7 Agayo no o kinamanangan nu pogitotongkiadon nu nopo o pisangod nu. Iyo pod tapui i kototogod nu do sumikit, do monorob diyolo' do miagal do rahami. 8 Sougio' nu no i rahat, om lingkum no i waig do mininsawat. Minolig i waig do miagal do tolig, om milo diri do winayaan i hiri'd nanad. 9 Boros ka di pisangod, ‘Gusaon ku nondo iyolo' om ingkosupan ku, bohogion ku nondo i dapu' diyolo', om onuon ngai' ku i korohian ku. Kodongon ku nondo o gayang ku, om ahawon ngai' ku o koinsanai di dapu' diyolo',’ ka. 10 Nga' insan ko no pomuhobo, oi Tuhan, om kongolondod ngai' no i tulun do Masir. Iyo po iyolo' do gundol do nolonsod do hiri'd waig di korolosi kopio. 11 Oi Tuhan, isai poo o ponokokinorohingan do koiyo diya'? Isai poo o koiyo diya' tu' kikagayaan om olidang? Isai poo o milo do momonsoi do koimayaan om momonsoi dit angagayo kopio do miagal di winonsoi nu? 12 Potuduko' nu no o longon nu'd wanan, om tolono' nopo do tana' i pisangod dahai. 13 Winoyo' nu i tulun di pinasi nu, tu' sumulung ko i' di batos nu. Nintirungan nu iyolo' di kokorisan nu dot agayo, om winoyo' nu iyolo' do gisom do nokorikot do hilo'd tana' nu dit olidang. 14 Nokorongou ngai' no i bansa' do suwai, om gagaran po iyolo' dot opopoddosian. Ongooris po tomod i tulun do Pilistin, 15 moddosi ngai' po i boyoon dot Idom. Gagaran ngai' po i gunsiou do Muab, a' no kotori' i tulun do Kanaan. 16 Noponu' po iyolo' do kopoddosian om koorisan, nokokito iyolo' di kokoriso' nu, oi Tuhan. Aiso' no o pokukurayan diyolo' dot opopoddosian, do gisom do nakatalib do minamanau i tulun nu --- i tulun di pinoidu' nu do mantad id ponguripanan. 17 Pootodo' nu no iyolo', om poundorongo' nu no do hilo'd nuluhon nu dit olidang, i kinoiyonon do nopili' nu dot iyonon nu, oi Tuhan, i Walai'd Sasambayangan dot Agayo di winaal nu. 18 Iya' no, oi Tuhan, o raja' do gisom dot alaid,” ka diyolo'.
Sinding di Miriam
19 Om darapas no i tulun dot Israil di rahat dot i tana' di nopigirangan di waig do rahat o winayaan. Nga' soira' di duminarapas di rahat i tulun do Masir do mogiwoyo-woyo' di korita'-kuda', om i popotunud di korita'-kuda', om poluyungo' no kawagu'd Tuhan i waig, om koolitai no iyolo'. 20 Om ngoyo' no di Miriam i tamburin dau. I Miriam nopo om nabi, i tobpinai di Harun do tondu'. Om tanud ngai' no dau i tongoondu' do monuntung di tamburin om santari-tari' iyolo'. 21 Om podsindingai no di Miriam iyolo' do sinding do poingkaa, “Kainou modsinding dot id Tuhan royoho' toko' no om pobontugo' toko' no iyau. Pinataam ngai' dau do hilo'd rahat i kuda' om i songinsakai di kuda',” ka dau.
I Waig dot Opoit
22 Om woyoo' no di Musa i tulun dot Israil do minundaliu do mantad hilo'd Rahat dot Aragang om pakayaai noddi diyolo' do hilo'd tana' do kowotuan do Sur. Om tolu no tadau diyolo' do manau-panau do hiri'd tana' do kowotuan nga' aiso' i' o waig do nabantalan diyolo'. 23 Om korikot noddi iyolo' dot id iso' o kinoiyonon di roitan do Mara, nga' iri nopo waig do hiri om adalaan tomod kopoit, om a' no diyolo' milo dot inumon. Om iri no o kinopomungaranan do kinoiyonon diri do Mara, tu' komoyon nopoddi om opoit. 24 Om sontogod-togod nopo di Musa i tulun, om ponguhot no iyolo', “Nunu no o tinumon toko'?” ka no diyolo'. 25 Om sambayang no i Musa dot id Tuhan do mikuwo'd iso-iso' no kopio o ginawo dau, om potuduko' noddi do Tuhan dot id di Musa o sallangod o kayu. Om pataamo' no di Musa i kayu'ddi do hiri'd waig, om osonong noddi dot inumon i waig. Om hilo' nod kinoiyonon diri do nonuan iyolo'd Tuhan do piro-piro o toturan om hilo' nogi' do pinogumbalan iyolo' do Tuhan. 26 Boros ka do Tuhan, “Umboyoon ngai' no dokoyu o boros ku om wonsoyon it osonong dot id pagantangan ku, om tonudon no o koinsanai di pinonuhuan ku. Ondung wonsoyon dokoyu o miagal diri, om a' kou no ohukuman di toruol di pinorikot ku dot id tulun do Masir. Iyoho' no o Tuhan, i momolingos dokoyu,” ka dau. 27 Om korikot no iyolo' dot id iso' o kinoiyonon di roitan dot Ilim. Om hiri nopo nga' haro o hopod om duwo o tudan do waig om haro turu' nohopod o guas do kurma. Om powonsoyo' no diyolo' o kiim diyolo' do hiri'd doros di waig.
Manna om I Burung Puyuh
1 Om pamanau ngai' noddi i tulun dot Israil do tuminongkiad dot Ilim, om tontok di kohopod om limo do tadau di tulan do koduwo, do mantad di kinosoliwanan diyolo' do hilo'd Masir, om korikot no iyolo' do hilo'd tana' do kowotuan do Sin, it id piolitan dot Ilim om i Nuluhon do Sinai. 2 Om di nopoddi hilo' iyolo'd tana' do kowotuan om sontogod-togod poddi iyolo' diyo Musa di Harun. 3 Boros ka diyolo', “Orohian nogi' daa iyahai do pinatai iyahai do Tuhan di hilo' po iyahai id Masir. Tu' hilo' nopo om koirikau-rikau po iyahai do mangakan do tikanas om kopimbangat do mangakan do taakanon do suwai. Nga' ngoyon nu no iyahai polikapai do hiti'd tana' do kowotuan do gisom dot angapatai ngai' iyahai,” ka diyolo'. 4 Om boros kad Tuhan dot id di Musa, “Porikoton ku no o taakanon dit a' aayi-ayi' do miagal pod rasam do mantad hilo'd tawan do patahakon ku dokoyu do baino'. Om sumoliwan ngai' nondo i tulun do pointikid-tikid do tadau do mongoi pomuhu'ddi do gisom do kabagal do tadau'ddi. Om iti no o ralan ku do mogumbal diyolo' do pongilo ku ondung tumanud kopio iyolo' do boros ku. 5 Tontok nopo do tadau do koonom om piluapon diyolo' ko' i puhuon kasai' ot onuon, om sodiaon i taakanon diri,” ka dau. 6 Om boros kaddi diyo Musa di Harun dot id toinsanan do tulun dot Israil, “Sosodopon nopod baino', om koilo kou nondo do Tuhan i' kopio o pinoposoliwan dokoyu do mantad hilo'd Masir. 7 Kosuabon nopondo om kokito kou di tulinau di kosorong kopio do mantad id koropohon do Tuhan. Norongou no dau i boros dokoyu do sontogod-togod dot id dau --- iyau i' o katagadan dokoyu, tu' iyahai nopo om momonsoi no di ponuhuan dau,” ka diyolo'. 8 Om boros kaddi di Musa, “Tuhan indo o manahak dokoyu'd tikanas do kanon do dongsosodopon, om manahak do roti do songkuro nopo o kogumuon do korohian dokoyu do dongkosuabon. Tu' norongou kou nod Tuhan do sontogod-togod dot id dau. Tontok nopo di mogod-togod kou dahai, om otopot nopo kopio om mogod-togod kou'd Tuhan diri,” ka dau. 9 Om boros kaddi di Musa dot id di Harun, “Sunudan ngai' no i tulun do mongoi timbaba' do Tuhan, tu' norongou no dau i boros diyolo'd mogod-togod,” ka. 10 Om daamot po di Harun do mimboros om ontong ngai' no i tulun do ponong hiri'd tana' do kowotuan, om sigog ka nopo dot intalang i tulinau do Tuhan di kosorong tomod do hiri'd haun. 11 Om boros kad Tuhan dot id di Musa, 12 “Norongou ku no i boros do tulun dot Israil do sontogod-togod. Om sunudan no iyolo' do dongsosodopon nopo om kaakan no iyolo'd tikanas, om dongkosuabon no om kaanu iyolo' do songkuro nopo kogumuon do roti do korohian diyolo'. Om koilo nogindo iyolo' dot iyoho' no i Tuhan, o Kinorohingan diyolo',” ka dau. 13 Sosodopon noddi om sondot no o tombolog dot ogumu' di roitan do burung puyuh do kotokop di pinomukiiman diyolo' o kogumuo', om kosuabon no om haro o bolobou do pointongkop di pinomukiiman. 1|40|HK5F| Burung puyuh|16.13 14 Om soira'ddi di notuu i bolobou, om haro'ddi ot oniipis do koiyo-iyo do sisi' do hiri'd soibau di tana' do kowotuan. Om kokitanan nopoddi nga' miagal do bolobou di nosiliu dot ais do mogibulugu-lugu' dot ongokooro'. 15 Om soira' di nokito di tulun dot Israil iri om a' i' iyolo' koilo ondung nunu o ngaran diri, om pogiuhot-uhot no iyolo', “Nunu malo'?” ka diyolo'. Om boros ka di Musa dot id diyolo', “Ilo' no i takano' do pinatahak do Tuhan dot id dokoyu, do maan dokoyu'd kanon. 16 Pinonuhuan nopo do Tuhan om momuhu ngai' kou nopo do songkuro nopo o kabagal dokoyu, do duwo o lito do puhuon do pointikid-tikid do tulun do mantad id iso' o sompiiyon,” ka dau. 17 Om tonudo' noddi di tulun dot Israil i pinonuhuan diri, om haro i' o lobi do duwo o lito do notimung om haro ot okuri' ko' iri. 18 Om tontok di nadang diyolo' i pinuhu diyolo'ddi, om i tulun dit ogumu' o nopuhu nga' a' i' adalaan kogumu' o naanu, om it okuri' o nopuhu nga' a' i' adalaan kokuri' o naanu. Miniumbagal-bagal no kopio o nopuhu do pointikid-tikid diyolo'. 19 Om boros ka di Musa dot id diyolo', “A' i' koino-ino do haro o tongosongulun piya do popoopi' diti do gisom do tadau'd suab,” ka dau. 20 Nga' haro i' o piro-piro diyolo' dot a' minokinongou di boros di Musa, om poopio' i' diyolo' o wookon di roti'ddi. Kosuabon noddi om noponu' pod giuk om outong o kosingudan di takanon diri. Om otogod diri i Musa diyolo'. 21 Pointikid-tikid do kosuabon om mongoi ngai' nopo i tulun pomuhu di takanon diri do gisom do kabagal diyolo'; om alasu' nopondo o tadau, om tumonu' nopo i noolu-olu' do hiri'd tana'. 22 Tontok nopo di tadau'd koonom, om induwo piluap o kogumuon do pinuhu diyolo'; apat o lito do puhuon dot iso' o tulun. Om rikot ngai' nopo i boyoon di tulun dot Israil do minongoi pomisunud di Musa do pasal diri. 23 Om boros ka dau dot id diyolo', “Nokoboros nod Tuhan do suab nopo om tadau do koundarangan om tadau dit olidang, i nokotobilang do maan do don Tuhan. Luguon nod baino' i luguon dokoyu, om losuon do baino' i losuon dokoyu. Om honggo nopondo it oolu', om poopion no do maan do suab,” ka dau. 24 Om poopio' no diyolo' i noolu' do maan do tadau kawagu, do miagal di pinonuhuan di Musa, om a' i' nounos i pinoopi' diri om a' giniukon. 25 Om boros kad Musa, “Iti no o takanon dokoyu'd baino', tu' baino' nopo om tadau'd Sabat, i tadau'd koundarangan do nokotobilang do maan do pomusou'd Tuhan, om aiso' no o taakanon dot okito dokoyu do hilo'd liwan diti kokiiman. 26 Momuhu kou nopo do taakanon do solinaid dot onom o tadau nga' tontok nopo di koturu' do tadau, i tadau do koundarangan, om aiso' no o ngoyon puhuo',” ka dau. 27 Tontok di koturu' do tadau, om haro po daa o piro-piro di tulun dot Israil do minongoi pomuhu do taakanon nga' aiso' no o nokito diyolo'. 28 Om boros kaddi do Tuhan dot id di Musa, “Soira' kou mando do mumboyo' do ponuhuan ku? 29 Soroho' no dokoyu, dot iyoho' i' i Tuhan, o minanahak dokoyu do tadau do koundarangan, om iri no o kapanahakan ku dokoyu do taakanon do tontok di tadau do koonom di kabagal do duwo o tadau. Tontok nopo di tadau do koturu', om mundorong ngai' nopo o tulun do hiri'd kiim diyolo', om a' no sumoliwan,” ka dau. 30 Om a' ngai' noddi kuminaraja' i tulun di tadau do koturu'. 31 Om roitai noddi di tulun dot Israil i taakanon diri do manna. Iri nopo nga' koiyo-iyo do linsou dit opurak dot okooro', om kaakanan nopo nga' koiyo-iyo di roti do rinalatan do paha'. 1|75|HK69B|Linsou nopo diti om miagal do manna|16.31 32 Om boros kad Musa, “Minonuhu' o Tuhan dati' do popoopi' dot ongokuuri' diti manna do maan di sinakagon toko', om kokito i' iyolo' di taakanon di pinatahak do Tuhan dot id dati' do kanon toko' do hiti'd tana' do kowotuan, do tontok di pinosoliwan toko' dau do mantad hilo'd Masir,” ka dau. 33 Om boros kad Musa dot id di Harun, “Ongoi anu do kakanan, om suangan i' do manna do duwo lito o kogumuo', om poilihon nori do hilo'd kinoiyonon do koropohon do Tuhan do poopion do maan di sinakagon toko',” ka dau. 34 Om poiliho' no di Harun i kakanan diri do hiri'd dotimbabaan di Kaban do Tumpongo do poopion do hiri do tumanud di pinonuhuan do Tuhan dot id di Musa. 35 Om manna poddi o kanon di tulun dot Israil do solinaid dit apat nohopod o toun di nosunsudan do gisom do nokorikot iyolo' do hilo'd pomogunan do Kanaan, i kinoundorongon kopio diyolo'. 36 (Iri nopo i pagagadang do nunu nopo it ongotuu do tontok do maso'ddi om orumpos o duwo nohopod o lito.)
Waig do Mantad id Tontolob
1 Om oinsanan nopoddi i tulun dot Israil do tuminongkiad di tana' do kowotuan do Sin, om miundaliu-daliu nopo iyolo' do mantad id iso' o kinoiyonon om kumaa no dot id kinoiyonon do suwai, do tumanud do ponuhuan do Tuhan. Om powonsoyo' no diyolo' o kiim diyolo' do hilo'd Rapidim, nga' aiso' i' o waig do tinumon do hilo'. 2 Om mogod-togod no iyolo' di Musa, boros ka diyolo', “Onuwai iyahai do waig dot inumon,” ka no. Om boros ka di Musa do sumimbar, “Nokuro tu' mogod-togod kou doho'? Nokuro tu' mogumbal kou'd Tuhan?” ka dau. 3 Nga' tuuhan no kopio i tulun om mogod-togod nopoddi kasai' iyolo' di Musa. Boros ka diyolo', “Nokuro tu' pinosoliwan nu iyahai do mantad hilo'd Masir? Mongoi ko no pomungou dahai om iti tangaanak dahai om iti tayam-tayam dahai, gisom dot apatai dot otutuuhanan!” ka. 4 Om sambayang no i Musa dot id Tuhan do mikuwo'd aayi'-ayi' no kopio o ginawo dau, boros ka dau, “Kukuroyon ku po'ti tulun diti? Tu' oruhai no iyolo' do momodumpau doho'd watu,” ka. 5 Om boros kad Tuhan dot id di Musa, “Angatai o piro-piro dilo boyoon do tulun dot Israil do moyo' diya', om mogulu kou i' diti tulun dot ogumu'. Om igitan no i sukud di pinobobog nu di Bawang do Nil. 6 Om mingkakat oku indo dot id dotimbabaan nu dot id sakai dot iso' o tontolob, do hilo'd Nuluhon do Sinai. Bobogon no i tontolob diri om kosoliwan i' o waig do mantad hiri do tinumon di tulun,” ka dau. Om wonsoyo' nod Musa o miagal diri dot id toguang ngai' di boyoon do tulun dot Israil. 7 Om pungaranai noddi i kinoiyonon diri do Masa, tu' hilo' no i tulun dot Israil do minogumbal do Tuhan, do tontok di minuhot iyolo' do poingkaa, “Moyo-woyo' tuu o Tuhan dati' diti ko' amu'?” ka. Om pinungaranan po kawagu do Moriba i kinoiyonon diri tu' hilo' no i tulun do sontogod-togod do minsosol.
Suminangod do Tulun dot Amalik
8 Om rikot noddi i tulun dot Amalik do minongoi panangod di tulun dot Israil do hilo'd Rapidim. 9 Om boros ka di Musa dot id di Yosua, “Momili' nod piro-piro o tulun do mongoi sangod di tulun dot Amalik do suab. Om mongoi oku indo ingkakat do hilo'd timpak do nulu-nulu om igitan ku i sukud di pinonuhuan doho'd Tuhan do migit,” ka dau. 10 Om tonudo' no di Yosua i pinonuhuan di Musa dau. Om ongoi no iyau sangod di tulun dot Amalik, om i Musa no om i Harun, om i Hur, o tuminakad di nulu- nulu do gisom do nokosigampot. 11 Solinaid nopo do poinsawat goduwo i longon di Musa, om kamanang no i tulun dot Israil nga' ondung poinsiribaon dau o longon dau, om kamanang no i tulun dot Amalik. 12 Om tontok di lopuhon goduwo o longon di Musa do poinsawat, om ongoi no iyo' Harun di Hur dot iso' o watu do poirikahanan di Musa; om ingkakat no iyolo' do miampaping di Musa do popoinsawat di longon dau do gisom do notonob o tadau. 13 Om iyo noddi i Yosua do minangala' di tulun dot Amalik. 14 Om boros kaddi do Tuhan dot id di Musa, “Tulison no dot id buuk o pasal do kinamanangan diti, om osorou kasai' i'. Sunudan no i Yosua do punsoon ku i' kopio i tulun dot Amalik,” ka dau. 15 Om pomonsoi no i Musa dot iso' o pananaraban do porsombahan om pungaranai no dau iri do, “Tuhan no o Bondira' ku”. 16 Om boros ka di Musa, “Poinsawaton no o pongingigit do bondira' do Tuhan! Songodon i' kasai'd Tuhan o tulun dot Amalik do gisom dot alaid!” ka dau.
Minongoi i Musa Solowot di Yitro
1 Om korongou noddi i Yitro, i tiwanon di Musa, do koinsanai di winonsoi'd Kinorohingan dot id di Musa om id tulun dot Israil, do tontok di pinosoliwan do Kinorohingan iyolo' do mantad hilo'd Masir. I Yitro nopoddi om imam do hilo'd Midian. 2 Om ongoi no i Yitro solowot di Musa, om pinowoyo' nogi' dau i Sipora, i sawo di Musa, i poundorong po do hilo'd Midian, 3 om i Girsom om i Iliosor, i tangaanak di Sipora do kusai. Pinungaranan pogi' dot i' Girsom it id dotuo nga' boros kad Musa om, “Sompogunan oku i' do hiti'd pomogunan do suwai,” ka dau; 4 om iri no tanak do koduwo om pinungaranan dot i Iliosor tu' boros kad Musa om, “Tinulung oku i' do Kinorohingan di tapa' ku, gisom dot a' oku iddi napatai di raja' do Masir,” ka dau. 5 Om rikot no i Yitro do hiri'd tana' do kowotuan di pinomukiiman di Musa, i hiri'd toning di nuluhon dot olidang, do miwoyo' di sawo di Musa om i duwo o tanak di Musa. 6 Om nokoponuhu' no i Yitro do tulun do momisunud di Musa do rumikot iyolo', 7 om soliwan noddi i Musa do minongoi solowot dau. Om otud no i Musa dot id toguang di Yitro, om tungubai no dau i Yitro. Om piuhot-uhot no iyolo' ondung osonong-sonong ngai' iyolo', om suang nogiddi iyolo' do hiri'd kiim di Musa. 8 Om posunudo' ngai' nopo di Musa di Yitro i winonsoi'd Tuhan dot id raja' om id tulun do Masir, do tontok di pinosoliwan dau o tulun dot Israil. Om sinunudan nogi' dau i Yitro di kinosusaan do tulun dot Israil do hiri'd tindalanon om i kinaralan-ralano' do Tuhan do minamasi diyolo'. 9 Om soira' di norongou ngai' di Yitro iri om osonong tomod diri o ginawo dau, 10 om boros ka dau, “Royohon no o Tuhan i pinopoidu' diya' do mantad id longon di raja' do Masir om mantad id tulun do Masir! Royohon no o Tuhan, i pinopoidu' do tulun dot Israil do mantad id kouripanan! 11 Oilaan ku noddi do baino' dot agayo no kopio o Tuhan ko' mantad do koinsanai di ponokokinorohingan do suwai, tu' winonsoi ngai' dau o miagal diri do tontok dit ulak-ulakan kopio di tulun do Masir i tulun dot Israil,” ka dau. 12 Om papatahak noddi i Yitro do piro-piro o porsombahan di sorobon om piro-piro o porsombahan di sumbolion do patahakon dot id Kinorohingan; om tanud no dau i Harun om koinsanai di boyoon dot Israil do minongoi pangakan di taakanon dot id poginakanan do maan do pomusou.
Minomili' do Piro-Piro o Gompomutus
13 Om tadau noddi kawagu om maso di Musa do manalasai do piro-piro ot a' kopogiuludan dot id pogialatan di tulun dot Israil, om agangau nopoddi iyau do mantad pod kosuabon om gisom do totuong. 14 Om soira' di nokito di Yitro o koinsanai dit apatut do wonsoyon di Musa, om uhot no iyau do poingkaa, “Nunu ngai' nopo iti wonsoyon nu dot id tulun dot ogumu'dti? Nokuro tu' iso-iso' ko do momonsoi'dti, om gisom dot ilo' piya mongoi no pokianu do nosihat nu nga' songingkakat nopod hiti?” ka dau. 15 Om boros ka di Musa do suminimbar, “A' ku no milo dot a' wonsoyon o miagal diti tu' rumikot ngai' nopo dot id doho' i tulun dot orohian do koilo do korohian do Kinorohingan. 16 Soira' nopod haro o pigulatan do duwo o tulun, om rumikot no iyolo' dot id doho', om iyoho' no o momutus ondung isai diyolo' it otopot. Om sunudan ku nondo iyolo' do koinsanai di ponuhuan om it oturan do Kinorohingan,” ka dau. 17 Om boros kaddi di Yitro, “A' i' koontok o karalan-ralano' do miagal diri. 18 Tu' iyo nopoddi om diya'd tinan nga' ouruan dot ohuyan, om iti tulun nga' ongohuyan. 19 Nga' tonudo' pogi' daa iti nosihat ku om woyoon ko i' do Kinorohingan. Osonong nogi' kopio do wokilon nu iti tulun do tumimbaba' do Kinorohingan om porikoton nu i pogigugulatan diyolo' dot id dau. 20 Apatut nogi' kopio do tudukan nu iyolo' do koinsanai di ponuhuan do Kinorohingan om posuhuton nu do kowoyo-woyoon dit osonong om it apatut diyolo'd wonsoyon. 21 Nga' suwai no ko' iri, om apatut nogi' do momili' ko do piro-piro o tongokusai dit ongoilo, om silihon iyolo' do boyoon di tulun: boyoon do sororibu-ribu tulun, om sorohatus-hatus, om sorolimo-limo nohopod, om sorohopod-hopod o tulun. Om iti nopo tulun do pilion nga' it ongoronok do Kinorohingan, om i milo do ponongkuyaanan, om it a' rumamit do ponisip. 22 Om suhuon no iyolo' do sumiliu do gompomutus diti tulun do tumikid di sinompuruan do tulun di diyolo'd ilo-iloon. Om mositi' no dot osonong o pomonsoi diyolo' di karaja' diyolo'ddi. Om iri nopo hal dit angagaan-gaan om iyolo' no o manalasai. Om iyo nopodti om oinggaan-gaanan ko no tu' kouhup noddi iyolo' diya'. 23 Ondung wonsoyon nu'ti ponuhuan do Kinorohingan diti, om a' ko no adalaan dot ohuyan, om iti tongoulun nga' ongkouli' no do mikuwo dot osimbayan o ginawo tu' angasalasai no i pogigugulatan diyolo',” ka dau. 24 Om tonudo' no di Musa i nosihat di Yitro, 25 om pomili' no iyau do tongokusai dit ongoilo dot id pogialatan di tulun dot Israil. Om siniliu dau iyolo' do boyoon do sororibu-ribu o tulun, om sorohatus-hatus, om sorolimo-limo nohopod, om sorohopod-hopod o tulun. 26 Om nosiliu'ddi iyolo' do gompomutus do tulun do solinaid diyolo' do poimpasi. Om iri nopo hal dot angawagat om porikoton i' diyolo' dot id di Musa, nga' iri nopo it agaan-gaan om iyolo' no o manalasai. 27 Om pologoso' noddi di Musa i Yitro do minamanau, om uli' no i Yitro do hilo'd pomogunan dau.
Hilo'd Nuluhon do Sinai i Tulun dot Israil
1-2 Om tongkiad noddi i tulun dot Israil do hilo'd Rapidim, om tontok di tadau do koiso' do tulan di kotolu, do mantad di kinotongkiadan diyolo' do hilo'd Masir, om korikot no iyolo' do hilo'd tana' do kowotuan do Sinai. Om powonsoyo' no diyolo' o kiim diyolo' do hiri'd guas di Nuluhon do Sinai. 3 Om takad no i Musa di Nuluhon do Sinai do mongoi solowot do Kinorohingan. Om lohowo' nod Tuhan i Musa do mantad hiri'd nuluhon diri, om suhuo' no iyau do popoboros dot id tulun dot Israil, i sinakagon di Yakub, diti boros do poingkaa, 4 “Nokokito kou i' di winonsoi ku, iyoho' i Tuhan, dot id tulun do Masir, om i kinowoyo-woyoo' ku do pinoporikot dokoyu dot id doho' dot id kinoiyonon diti do mikuwo'd kuasa' dit agayo, do miagal di kondiu do papasakai di tanak dau do hiri'd talad dau. 5 Baino' nopondo, om ondung mumboyo' kou doho' om otorodok kou dot id tumpongo ku, om osiliu kou no do tulun ku. Doho' ngai' idti pomogunan, nga' iyokoyu no o tulun di pinili' ku, 6 i tulun di nokotobilang do maan ku do doho'd tulun, om osiliu kou nondo dot imam do momonsoi do karaja' ku,” ka dau. 7 Om ruhuk noddi i Musa om lohowo' ngai' no dau i boyoon di tulun om sunudai no dau iyolo' do koinsanai di pinonuhuan do Tuhan dot id dau. 8 Om oinsanan nopoddi i tulun do suminimbar do poingkaa, “Wonsoyon ngai' i' dahai i nongkoboros do Tuhan,” ka diyolo'. Om posunudo' no di Musa dot id Tuhan i pinosimbar diyolo'ddi. 9 Om boros kad Tuhan dot id di Musa, “Rumikot oku nondo dot id diya' do pokuluput do haun dit akapal, om korongou ngai' i' ilo tulun doho' do monokiboro-boros diya', om mantad nopondoddi om monongkuyaan kasai' nondo iyolo' diya',” ka dau. Om sunudai no di Musa o Tuhan di pinosimbar ngai' di tulun, 10 om boros kad Tuhan dot id dau, “Ongoi solowot ngai' di tulun om sunudan no iyolo' do momolidang do tinan diyolo' do baino' om suab, tu' sumodia' do mongoi sambayang. Suhuon no iyolo' do momupu' do pakayan diyolo', 11 om mositi' no do kosodia' iyolo' do suabdiino. Tu' tadau nopoddi om lumintuhun oku do hilo'd Nuluhon do Sinai, om kokito ngai' i' doho' i tulun. 12 Wansayan nod tanda' o posorili' di nuluhon, om iri no o ponokowolit dot a' di tongoulun koino-ino do tolibambanan. Om sunudan no iyolo' dot a' tumakad di nuluhon om a' mongoi insomok diri. Ondung haro o tulun do kotolibamban di tanda' diri, om patayon nopo; 13 do dumpahon tuu do watu ko' panaon do mamatai i tulun, nga' kada' no do haro o koigit dau. Iyoon ngai' nopoddi o tulun om nintorusan; tu' koinsanai di tumolibamban di tanda' diri om mositi' no do hukuman do kapatayon. Nga' kouni nopondo i torumpit om mositi' no do tumakad ngai' i tulun,” ka dau. 14 Om ruhuk no i Musa di nuluhon om sunudai ngai' no dau i tulun do sumodia' do mongoi sambayang. Om pupuwai no diyolo' o pakayan diyolo', 15 om boros ka di Musa dot id diyolo', “Mositi' no do kosodia' kou dot orikot o suabdiino, om kada' kou ongoi dudun do tongoondu' do daamot podti,” ka dau. 16 Tontok di kosuabon do tadau'd kotolu om haro'ddi o tinggoron om kodumaat. Om imbulai no o haun dot akapal do hiri'd sakai di nuluhon, om haro o tuni do torumpit dot opuhod do norongou diyolo'. Om sanggagaran ngai' poddi do moddosi i tulun do hiri'd kokiiman. 17 Om woyoo' no iyolo' di Musa do sumoliwan do mantad hiri'd kokiiman do mongoi solowot do Kinorohingan. Om songingkakat diri iyolo' do hiri'd guas di nuluhon. 18 Om nolikupan pod lisun i nuluhon do Sinai, tu' luminintuhun o Tuhan do hiri dot id suang do sinikit do tapui. Om miagal pod lisun do modtutud i lisun do muntu-nguntu' do minsawat. Om oinsanan nopo i tulun do pananggagaran tomod do moddosi. 19 Om muhod-puhod diri i tuni di torumpit. Om moro-boros no i Musa om simbaron no iyau'd Kinorohingan do miwoyo' do tinggoron. 20 Om lintuhun no o Tuhan do hiri'd timpak di Nuluhon do Sinai om lohowo' no dau i Musa do mongoi do hiri'd timpak di nuluhon diri. Om sigampot noddi i Musa, 21 om boros kad Tuhan dot id dau, “Ruhuk po do mongoi popoinsan dilo tulun dot a' tumolibamban di tanda' do mongoi ontong doho'; tu' ondung tumolibamban iyolo' om ogumu' nondo ot apatai diyolo'. 22 Om iri piya tongoimam nga' apatut i' do momolidang pod tinan diyolo' do mongoi no iyolo' insomok doho', tu' a' nopo nga' hukuman ku no iyolo',” ka dau. 23 Om boros ka di Musa dot id Tuhan, “A' i' katakad ilo tongoulun tu' sinuhu' nu i' iyahai do pokolidang diti nuluhon om momonsoi do tanda' do posorili' diti,” ka dau. 24 Om boros kad Tuhan do suminimbar, “Ruhuk po, om powoyoon i' i Harun do kumaa'd hiti. Nga' iri nopo i tongoimam om i tulun dot ogumu' om a' i' koino-ino do tumolibamban diti tanda' do mongoi do hiti'd doho'. Tu' tumolibamban nopo iyolo' om hukuman ku no iyolo',” ka dau. 25 Om ruhuk noddi i Musa do hiri'd tulun dot ogumu' om sunudai no dau iyolo' di pinoboros do Tuhan.
Hopod ot Oturan
1 Om boro-boros noddi o Kinorohingan, om iti no ngai' i pinoboros dau, 2 “Iyoho' no o Tuhan, i Kinorohingan dokoyu, i pinoposoliwan dokoyu do mantad hilo'd Masir, i kinoiyonon do siniliu kou do turipon. 3 Kada' kou sambayang dot id kinorohingan do suwai, suwai ko' id doho' noo o sambayangan. 4 Kada' kou pomonsoi do tininganak do poiyoon do nunu nopo i hilo'd tawan, ko' i hiti'd pomogunan, ko' i hilo'd waig dot id saalom diti tana'. 5 Kada' kou otud do tumuku' dot id tingolig om kada' kou sambayang dot id tingolig diri, tu' iyoho' no o Tuhan, i Kinorohingan dokoyu, om mada' oku i' do haro o mongoi iyo-iyo doho'. Iri nopo tulun dit araatan doho' om hukuman ku no do gisom do sinakagon diyolo' di kointolu om koingapat. 6 Nga' pointalangan ku i' do kosianan ku i piro-piro noribu o sinakagon do tulun dit osianan doho' om i mumboyo' dot oturan ku. 7 Kada' dokoyu roito' o ngaran ku dot araat o kopomoroitan. Tu' iyoho' no i Tuhan, i Kinorohingan dokoyu, o momohukum dot isai nopo i kasala' o pamamakai do ngaran ku. 8 Poinggoyoon no o tadau'd Sabat om pokolidangon no o tadau'ddi. 9 Nonuan kou dot onom o tadau do kakarajaan dokoyu, 10 nga' iri nopo tadau'd koturu' om tadau do koundarangan, om i nokotobilang do doho'd tadau. Tontok nopo do tadau'ddi om kada' nod haro o tongoiso' piya do tulun do kumaraja', dot iyokoyu tuu ko' i tangaanak dokoyu, ko' i turipon dokoyu, ko' i tayam-tayam dokoyu, ko' i tulun do bansa'd suwai di poingiyon dot id pomogunan dokoyu. 11 Onom no tadau ku, iyoho' i Tuhan, do minomonsoi diti pomogunan, om tawan, om rahat, om koinsanai dit id suang ngai'ddi, om tontok di tadau do koturu' om undorong oku noddi. Om iri no o kinapamarakatan ku, iyoho' i Tuhan, di tadau'd Sabat om kinopotobilangan ku'ddi do doho'd tadau. 12 Pusohon no o tapa' om tina' dokoyu, om otogui kou i' do poingiyon do hilo'd pomogunan di patahakon ku dokoyu. 13 Kada' kou pamatai. 14 Kada' kou pagampahu'. 15 Kada' kou panakau. 16 Kada' kou popoboros dit a' otopot do papasala' do tulun do suwai do tontok dot onuon kou do sasi'. 17 Kada' nod haro o ginawo dokoyu do sianu di dombokon: dot iri tuu i walai diyolo', ko' i sawo diyolo', ko' i turipon diyolo', ko' i tayam-tayam diyolo', ko' i kaladai diyolo', ko' nunu nopo i haro dot id diyolo',” ka dau.
Minodosi i Tulun dot Israil
18 Tontok di norongou di tulun dot ogumu' i tinggoron om i tuni di torumpit, om di nokito diyolo' i kodumaat om i nuluhon do mogolisun, om pananggagaran poddi iyolo' dot opopoddosian, om hiri'ddi iyolo'd sodu' do songingkakat. 19 Om boros ka diyolo' dot id di Musa, “Ondung iya' o moro-boros dahai om mokinongou i' iyahai; nga' Tuhan nopo o moro-boros dahai om ooris i' iyahai dot apatai',” ka diyolo'. 20 Om boros ka di Musa do suminimbar, “Kada' kou kooris tu' kinorikatan nopo do Kinorohingan om mogumbal no dokoyu, om mumboyo' kasai' kou indo dau, om a' kou i' kopomonsoi do dusa,” ka dau. 21 Nga' hiri kasai' id sodu' o ningkakat di tulun dot ogumu', om i Musa noo o minongoi insomok di haun dot otuong, i kinoiyonon do Kinorohingan.
Oturan do Pasal di Pananaraban do Porsombahan
22 Om suhuo' no do Tuhan i Musa do popoboros dot id tulun dot Israil do boros do poingkaa, “Nokokito kou noddi ondung poingkuro oku, iyoho' i Tuhan, do minoro-boros dokoyu do mantad hilo'd surga. 23 Kada' kou pomonsoi do ponokokinorohingan do pirok ko' tamas o wonsoyon do maan dokoyu do sambayangan do suwai ko' iyoho'. 24 Momonsoi kou no do pananaraban do porsombahan dot id doho', dot ilo tana' o wonsoyon, om poilihon nogindo do hiri i dumba' om i sapi' dokoyu do maan do porsombahan di sorobon om porsombahan do piombolutan. Om honggo nopo o kinoiyonon di tontuon ku dot iyonon dokoyu do sumambayang dot id doho', om rumikot oku no dot id dokoyu do mongoi pamarakat dokoyu. 25 Ondung watu o wonsoyon dokoyu do pananaraban do porsombahan dot id doho', om kada' dokoyu sangkapo' i watu tu' ondung mamakai kou do sangkap do pamabak di watu, om a' nori milo do pakayon do maan do panaraban do porsombahan dot id doho'. 26 Kada' kou pomonsoi do pananaraban do porsombahan dot id doho' dit asawat, i minog om tukadan, om a' i' okito i bohogian do tinan dokoyu dit a' osorupai dot okito,” ka dau.
It Apatut do Wonsoyon dot id Turipon
1 Om boros kaddi do Tuhan dot id di Musa, “Patahakon no iti piro-piro o toturan dot id tulun dot Israil: 2 Soira' nopo do momoli kou do tulun di sompi' ko' bansa' dot Ibrani do silihon do turipon om onom no toun dau dot apatut do silihon dokoyu do turipon. Om koturu' nopondo do toun om mositi' no do polobuson dokoyu iyau om a' no iyau minog do mambayar do nunu-nunu dot id dokoyu. 3 Ondung aiso' po o sawo dau di nosiliu i' iyau do turipon dokoyu, om a' i' dau atanggayan i sawo dau di polobuson dokoyu iyau; nga' ondung nakasawo no iyau di nosiliu i' dokoyu iyau do turipon, om atanggayan no dau i sawo dau di polobuson dokoyu iyau. 4 Ondung nonuan iyau di tuan dau do sawo, om paganak noddi i sawo dau, om iri nopo sawo dau'ddi om i tangaanak dau om iri kasai' po tuan dau o sanganu, om iso' no i turipon o polobuson. 5 Nga' ondung poboroson di turipon diri dot osianan iyau di sawo dau om i tangaanak dau, om i tuan dau, om mada' no do polobuson, 6 om mositi' no do ngoyon iyau di tuan dau hirio'd tiyonon do sumambayang. Om hiri nondo do suhuon di tuan i turipon dau'ddi do mingkakat do poinsondiu di totobon ko' i tisan di wawayaan, om luangan nondo di tuan o tolingo di turipon dau. Om osiliu nondo iyau do turipon di tuan diri do solinaid dau do poimpasi. 7 Ondung haro o tulun do padagang di tanak dau'd tondu' do silihon do turipon, om a' no i tondu'ddi kalabus do katalib piya ot onom o toun; om miagal iddi o turipon do kusai. 8 Ondung padagangon i tondu' dot id kusai di haro o ginawo do mangawin dau, nga' a' indo orohian i kusai di tondu' diri, om mositi' no do padagangon kawagu di kusai i tondu'ddi dot id tapa' di tondu'. A' i' koino-ino do padagangon di kusai i tondu'ddi dot id tulun do bansa'd suwai tu' a' i' otulid o winonsoi dau dot id tondu'ddi. 9 Ondung haro o tulun do momoli do turipon do tondu' do silihon dau do sawo di tanak dau'd kusai, om mositi' no dot iyoon dau do dau'd tanak i tondu'ddi. 10 Ondung manansawo kawagu i kusai'ddi, om mositi' no dot onuan kasai' dau i sawo dau dit id gulu do taakanon om pakayan om it apatut dot aanu di sawo dau'ddi do miagal di timpuun i'. 11 Ondung a' dau wonsoyon o tonggungan dau do miagal diri, om mositi' no do polobuson dau i sawo dau dit id gulu diri, om a' i' kabayar i tondu'ddi do nunu-nunu dot id dau,” ka dau.
Pongoturan do Pasal do Tulun dit Orongit
12 Om boros ka kawagu do Tuhan dot id di Musa, “Isai nopo o momobog do tulun do gisom dot apatai i bobogon dau, om iyau nga' hukuman no do kapatayon. 13 Nga' ondung a' daa dau tinomod do momobog i tulun diri, om aiso' o ginawo dau do mamatai, om milo i' iyau do mogidu' dot id kinoiyonon di potudukon ku dokoyu, om hilo' nopondo om aiso' no o ligogon dau. 14 Nga' ondung haro o tulun do tumogod om tomodon dau do mamatai o tulun do suwai, om hukuman nod kapatayon i tulun di minamatai do mulong piya do koongoi daa iyau do hiri'd pananaraban do porsombahan dot id doho' do mongoi pokiintirung. 15 Isai nopo o momobog do tapa' ko' tina' dau, om mositi' no do hukuman do kapatayon. 16 Isai nopo o mongoi pononggoi do tulun do maan tuu pobolio' ko' maan po dau'd turipon, om mositi' no do hukuman do kapatayon. 17 Isai nopo o momopol do tapa' ko' tina' dau om mositi' no do hukuman do kapatayon. 18 Ondung haro o miuhod, om dumpahon no di songulun do watu i tiso' ko' tumbukan po dau, nga' a' indo apatai, om a' i' hukuman o tulun diri. Nga' ondung gisom dot a' koundaliu i tulun do binobog diri, 19 nga' alaid-laid nopondo om koingkakat indo om kapanau do mononsukud do mongoi'd hiri'd soliwan, om iri no tulun di minomobog dau o mambayar do korugian do solinaid dau dot a' nakakaraja', om iyau o momogompi' di tulun diri do gisom do kosonong kawagu iyau. 20 Isai nopo o momobog di turipon dau do tondu' ko' kusai, gisom dot apatai do diiri om diiri, om hukuman no o tulun diri. 21 Nga' ondung a' apatai i turipon diri do sangadau-ngadau poo ko' duwo-duwo po tadau, om a' i' hukuman i tuan diri. Ula' no do sumiliu do hukuman dau i natagakan iyau di turipon dau'ddi. 22 Ondung haro o piro-piro tongokusai do mogiuuhod om haro nondo o tiso' diyolo' do kopokoruol do tondu' di monontian, gisom dot oiduan i tondu'ddi, nga' aiso' i' o toruol do suwai di tondu'ddi, om apatut no do mambayar o tulun diri do danda' do songkuro nopo i pokionuon di sawo di tondu', om it ookunan do tongogompomutus. 23 Nga' ondung i tondu'ddi ot orualan, om pomohukum nopo om ginawo no o pomolokop do ginawo, 24 om mato o pomolokop do mato, om nipon o pomolokop do nipon, om longon o pomolokop do longon, om gakod o pomolokop do gakod, 25 om suhat o pomolokop do suhat, om sorobon o pomolokop di nosorob, om lonit o pomolokop do lonit. 26 Isai nopo o monodsok do mato di turipon dau'd kusai ko' i turipon dau'd tondu', gisom dot obolou i turipon diri, om mositi' no do polobuson i turipon diri do pomogontok di mato dau. 27 Ondung haro o momobog do turipon dau do gisom dot ouud o nipon di turipon diri, om mositi' no do polobuson i turipon diri do pomogontok di nipon dau di nouud,” ka dau.
Tonggungan di Sanganu
28 Om boros ka kawagu do Tuhan dot id di Musa, “Ondung haro o sapi' do tontoluhan do monungu do tulun, gisom dot apatai i tulun diri, om mositi' no do dumpahon do watu i sapi'ddi do gisom dot apatai, om a' no koino-ino dot akanon i tonsi di sapi'; nga' a' i' hukuman i sanganu di sapi'. 29 Ondung asaru' no do koponungu do tulun i sapi'ddi om nosunudan no i sanganu, nga' a' i' di sanganu pakandangon i sapi' --- om koponungu nopo kawagu i sapi'ddi do gisom dot apatai i sunguon, om turubukon nopod watu i sapi' do gisom dot apatai, om iri nogi' i sanganu nga' mositi' nod hukuman nopo do kapatayon. 30 Nga' ondung pabanaron i sanganu do mambayar do danda' do pamasi do tinan dau, om mositi' no do bayaran ngai' i danda' do songkuro nopo i pokionuon. 31 Ondung koponungu i sapi' do tanak do kusai ko' tanak do tondu' do gisom dot apatai i sinungu, om iyo iddi o pongoturan. 32 Ondung koponungu i sapi' do turipon do kusai ko' tondu', gisom dot apatai i sinungu, om mositi' nod bayaran di sanganu di sapi' i tulun do sanganu di turipon diri do tolu nohopod o kaping do pirok, om i sapi' nga' dumpahon do watu do gisom dot apatai. 33 Ondung haro o tulun do mongoi pongidu' do sompon do torobong, ko' ondung mongukad iyau do torobong om a' indo somponon, om aratu' nondod hiri o sapi' ko' kaladai, 34 om mositi' nod bayaran dau i sanganu di tayam-tayam diri. Nga' iri nopo tayam-tayam di napatai'ddi om iri i sanganu di tayam-tayam di napatai o kaanu. 35 Ondung haro o songulun do kisapi' do gonsukod, om kapamatai nod sapi' do gonsukod do tulun do suwai i sapi' dau'ddi, om mositi' nod padagangon di duwo o tulun i sapi' di poimpasi om piduwoon diyolo' i gatang; om iri tonsi di sapi' di napatai nga' piduwoon i' diyolo'. 36 Nga' ondung nopiila-ilaan no do monunungu do sapi' i sapi' do gonsukod diri, om a' iddi di sanganu pinakandang i sapi', om mositi' no do bayaran dau do songinan o sapi' do tontoluhan di miyau i sanganu di sapi' do napatai'ddi. Nga' iri no i minambayar o kaanu di sapi' di napatai,” ka dau.
Oturan do Pasal do Poningolon
1 Om boros ka kawagu'd Tuhan dot id di Musa, “Ondung haro o tulun do manakau do songinan o sapi' ko' songinan o dumba', om sumbolion nondo dau iri ko' maan padagango', om korugi' nopo dau om limo o sapi' do poningolon di songinan o sapi' di pinanakau, om apat o dumba' do poningolon di songinan o dumba' do pinanakau. 2-4 Mositi' no do tingalanan dau i pinanakau dau. Om ondung aiso' o nunu- nunu do poningolon dau, om dagangon no iyau do silihon do turipon do poningolon di nongoi dau panakaho'. Ondung poimiyau po i tayam-tayam do pinanakau dau, do sapi' tuu ko' kaladai, ko' dumba', dot abantalan do hiri'd dau, om mositi' no do duwo o tinan do patahakon dau do poningolon do songinan di pinanakau dau. Ondung haro o tulun do manakau om okosupan do monoruang do walai do dongotuong, om apatai nondo iyau, om a' i' kasala' i minamatai dau. Nga' dangadau nopo do haro o tiyo'ddi, om kasala' no i minamatai. 5 Ondung haro o tulun do papaakan-akan do tayam-tayam dot id dumo ko' id kabun dot anggur om minsodu' no i tayam-tayam diri om koongoi nondo kapangakan di tanom-tanom do hiri'd tumo do tulun do suwai, om mositi' no do bayaran dau i nangaakan, do pambayar nopo om i tua' di tanom-tanom do mantad hiri'd tumo dau ko' i hiri'd kabun dot anggur dau. 6 Ondung haro o tulun do modtutud do hiri'd tumo dau om rumalad nori dot id tumo do tulun do suwai, tu' opurokitan di sakot do hiri'd piolitan, om osorob nondo i gandum di piintangaan nogi' do sumuni ko' i koomot om it a' po narangkat, om iri no i minodtutud o mambayar do korugian di sanganu. 7 Ondung haro o tulun do kaakun do popoopi' do tusin ko' barang dit agayo o gatang do tulun do suwai, om apanakau nori do hiri'd walai dau, om ondung okito i minanakau, om induwo nondo koirad di pinanakau o bayaran di tulun di minanakau'ddi. 8 Nga' ondung a' okito i minanakau, om angatan no i tulun di pinopoopi' di barang dot agayo gatang diri do hiri'd tiyonon do sumambayang. Om hiri nondo iyau do sumumpa' dot a' iyau minanakau di barang diri. 9 Id suang nopo do nunu nopo o pigulatan do pasal do dapu', do sapi' tuu ko' kaladai, ko' dumba', ko' pakayan, ko' nunu nopo o barang di natagak, nga' nokito iddi kawagu, om iri nopo duwo o tulun di miahau do manansanganu'ddi om mositi' no dot angatan dot id tiyonon do sumambayang. Om iri nopondo i pointalangon do Kinorohingan do nakasala' om mositi' no do mambayar dot induwo kogumu' dot id tulun di ponokiahau dau. 10 Sokiro nopo do haro o tulun do mangakun do momogompi' do kaladai, ko' sapi', ko' dumba', ko' tayam-tayam di wokon o sanganu, om apatai nondo ko' orualan i tayam-tayam diri, ko' atanggayan do manakau, om ondung aiso' o sasi', 11 om mositi' no do mongoi i tulun diri do hiri'd tiyonon do sumambayang om sumumpa' dot a' iyau minanakau di tayam-tayam di pinokigompian do tulun do suwai dau'ddi. Ondung a' napanakau i tayam-tayam diri, om mositi' no do tonggungon di sanganu o korugian, om a' i' minog do mambayar dot id dau i tulun do minomogompi'ddi; 12 nga' ondung napanakau i tayam-tayam diri, om mositi' no do bayaran di minomogompi' i sanganu'ddi. 13 Ondung napatai i tayam-tayam diri do nintorusan dot orongit o minamatai, om mositi' no dot igitan di minomogompi' i noolu-olu' do tinan di tayam-tayam do maan do popointalang kopio; om a' i' iyau kabayar di tayam-tayam di napatai do nintorusan dot orongit diri. 14 Ondung haro o tulun do molos dot ongoiso' do tayam-tayam do tulun do suwai, om orualan nondo ko' apatai iri do tontok dit a' hino'd hiri i sanganu, om mositi' nod bayaran di minolos i tayam-tayam diri. 15 Nga' ondung osiliu o miagal diri do hino i sanganu, om a' i' minog do mambayar i minolos. Ondung posisiwaan i tayam-tayam diri, om id suang ngai' no di pinoniwa' o pambayar di korugian dau,” ka dau.
Oturan do Kowoyo-woyoon dot Osonong om Oturan di Don Tugama'
16 Om boros ka kawagu'd Tuhan dot id di Musa, “Ondung haro o kusai do mongoi pagampahu' do sumandak dit aiso' po o tunang, om mositi' no do bayaran dau i topungon om kowinon dau i tondu'ddi. 17 Nga' ondung mada' i tapa' di sumandak do kowinon di kusai i tanak dau'ddi om mositi' no do bayaran di kusai i tapa' di tondu'ddi do tusin dot irad do nopung do sumandak. 18 Mositi' no do patayon o koinsanai'd tongoondu' di bobolian. 19 Mositi' no do patayon o koinsanai'd tulun di mongoi pagampahu' do nintorusan. 20 Isai nopo o tulun di papatahak do porsombahan di sumbolion dot id kinorohingan do suwai ko' iyoho', i Tuhan, om mositi' no do hukuman do kapatayon. 21 Kada' dokoyu ulak-ulakai om kada' dokoyu inggorito' o tulun do bansa'd suwai; soroho' pogi' dokoyu nga' nokoumbal kou i' do sompogunan do hilo'd Masir di gulu po. 22 Kada' dokoyu ulak-ulakai ot isai nopo o tondu' do nopuadan ko' tanak dit aiso' o molohing. 23 Tu' ondung ulak-ulakan dokoyu iyolo' om iyoho' indo, i Tuhan, o sumimbar diyolo' do tontok do minggiak iyolo' do mokitulung. 24 Om otogod oku moti'ndo dokoyu om patayon ku iyokoyu dot id pisangadan. Om osiliu nondo do tongoondu' do nopuadan o sawo dokoyu om tangaanak dokoyu nga' aiso' nondo o tapa'. 25 Ondung poolos kou do tusin dot id isai nopo o tulun ku di mosikin, om kada' kou omit di tulun di miuhot do tutang tu' mokianu do bunga di tusin. 26 Ondung manganu kou do kurilib do tulun do maan do sanda' do bayaran kopio ko dau, om mositi' no do pogulion dokoyu kawagu i kurilib diri dot id dau dot a' po otonob o tadau, 27 tu' iri po i kurilibon dau do pongillasu-lasu' do tinan dau. Nunu po daa'ndo o kumuton dau do modop? Ondung lumohou iyau doho' do mokitulung, om simbaron ku i' iyau tu' obinsianan oku i'. 28 Kada' kou pomopol do Kinorohingan om kada' kou pongusung do boyoon do bansa' dokoyu. 29 Patahakon no dot id doho' do maan do porsombahan o wookon di gandum, om waig dot anggur, om tumau do saitun do tontok di maso do natantu' mantad. Patahakon no dokoyu dot id doho' i tangaanak dokoyu'd kusai dit id gulu kosusu. 30 Patahakon no dokoyu dot id doho' i tanak do sapi' om dumba' dokoyu dit id gulu kosusu. Pologoson po i tanak do tontoluhan dit id gulu kosusu do tumanud di molohing dau'd tondu' do solinaid do turu' o tadau, nga' kawalu' nopondod tadau om patahakon no doho' iri do maan do porsombahan di sumbolion. 31 Iyokoyu nopo om tulun ku, om kada' kou pangakan do tonsi do nunu nopo o nintorusan di pinatai do nintorusan dot orongit; patahakon nogi' iri do tasu,” ka dau.
It Otopot om It Otulid
1 Om boros ka kawagu'd Tuhan dot id di Musa, “Kada' kou popimboros do boros dit a' otopot, om kada' kou popoboros dit a' otopot do pogobi' di tulun di kisala'. 2 Kada' kou ponokitanud di tulun dot ogumu' do tontok do momonsoi iyolo' di kasala' ko' di sumiliu iyolo'd sasi' di goudut, gowoi pondo om a' owonsoi it otulid. 3 Kada' panampaping do tulun do mosikin do tontok do butusan iyau. 4 Ondung aampapan nu nod okito i sapi' ko' kaladai di pisangod nu do nokoidu', om ngoyon no pogulio' iri dot id dau. 5 Ondung kogupu' i kaladai di pisangod nu dot awagatan kopio do ginandar, om uhupan no i pisangod nu do popoingkakat kawagu di kaladai dau; kada' pamanau tomod do tumalib. 6 Kada' olimo' it otopot dot id tulun do mosikin do tontok do popoboros iyau di pokisalasayan dau dot id kut. 7 Kada' ponondos dot a' otopot, om kada' hukumai do kapatayon o tulun dit aiso' o sala', tu' usungon ku moti' o tulun di momonsoi dot iyo kopio'ddi karaat. 8 Kada' ramit do tusin di maan do ponisip, tu' iri nopo i ponisip diri nga' kosompon do mato do tulun, gisom dot a' nondo iyolo' kokito ondung honggo it otopot om aiso' nondo o kotutuk-tutukon di pokisalasayan do tulun dit aiso' o sala'. 9 Kada' ulak-ulakai o sompogunan; tu' koilo kou i' ondung okuro-kuro ot opurimanan do sompogunan, tu' nokoumbal kou i' do sompogunan di hilo'd Masir di gulu po,” ka dau.
I Toun do Koturu' om i Tadau'd Koturu'
10 Om boros ka kawagu'd Tuhan dot id di Musa, “Solinaid nopo dot onom o toun om momutanom-tanom kou no do hiri'd tana' dokoyu om omoton no i tua' di tinanom dokoyu. 11 Nga' koturu' nopo do toun om kada' no kopio dokoyu tanamai i tana', om kada' no dokoyu omoto' o tua' do nunu nopo i songinsuni'd hiri. Nga' iri nopo tulun do mosikin om koino-ino i' do mongoi panganu di songinsuni'd hiri, om pologoson nopo i nintorusan do mongoi pangakan di noolu-olu'. Om i kabun dot anggur om i kabun do saitun nga' iyoon nogiddi. 12 Id suang nopod sominggu om kumaraja' kou no do solinaid dot onom o tadau, nga' koturu' nopod tadau om kada' kou no karaja', om koundorong i' i turipon, om i tulun do bansa'd suwai di kumaraja' dot id dokoyu, om iri nogi' i tayam-tayam dokoyu. 13 Pokinongohon no o koinsanai di pinoboros ku dot id dokoyu, iyoho' i Tuhan dokoyu. Kada' kou sambayang dot id kinorohingan do suwai; om rumait piya do ngaran diyolo' nga' a' i' koino-ino,” ka dau.
Tolu o Tadau dot Agayo
14 Om boros ka kawagu'd Tuhan dot id di Musa, “Ramayon no dokoyu o tolu o Tadau dot Agayo dot id suang do sontoun do pomusou doho'. 15 Id suang nopo do tulan dot Abib, i tulan di kinosoliwanan dokoyu do mantad hilo'd Masir, om ramayon no i Tadau'd Agayo do Roti dit A' Kipangambang do tumanud di kowoyo-woyoon do mamaramai do pinonuhuan ku dokoyu. Kada' kou pangakan do nunu nopo o roti di naralatan do pangambang do solinaid di turu' o tadau do karamayan diti. Kada' kou nogi' kopio umbal do mongoi sambayang dot id doho' dot aiso' o porsombahan dot igitan dokoyu. 16 Ramayon no dokoyu i Tadau dot Agayo do Dongmongomot do tontok do tumimpuun kou do mongomot do tua' di tinanom dokoyu. Ramayon no dokoyu o Tadau dot Agayo do Kinuhub-Kuhub do kooyi-oiyon do toun, di mongupu' kou do tua' dot anggur om tua' di kouwaan dokoyu. 17 Pointikid-tikid do toun do koontok diti tolu o tadau dot agayo diti om mositi' no do mongoi ngai' i kokusayan dokoyu sambayang dot id doho', i Tuhan, i Kinorohingan dokoyu. 18 Kada' kou papatahak do roti di naralatan do pangambang do maan do porsombahan, do tontok do papatahak kou dot id doho' do tayam-tayam do maan do porsombahan di sumbolion. Iri nopo lunok di tayam-tayam di patahakon dot id doho' do maan do porsombahan do tontok do tadau dot agayo diti om a' no koino-ino do poingolu' do gisom do kosuabon. 19 Migit kou no di gandum dit id gulu dokoyu koomot do hilo'd walai do Tuhan, i Kinorohingan dokoyu, do pointikid-tikid do toun. Kada' kou pogonsok do dumba' ko' kambing dit okoro' po dot i gatas di molohing di dumba' ko' i kambing o pogonsok,” ka dau.
Batos om Ponuhuan
20 Om boros ka kawagu'd Tuhan dot id di Musa, “Monuhu' oku indo do moloikat do mogulu dokoyu do mongintirung dokoyu do tontok di manau-panau kou, om momoyo' dokoyu do kumaa dot id tiyonon di nokosodia' mantad ku. 21 Mokinongou kou no om mumboyo' kou no dau, om kada' kou saap dau, tu' iyau no i sinuhu' ku, om a' no iyau mangampun di sumaap dau. 22 Nga' ondung mumboyo' kou dau om wonsoyon ngai' dokoyu i ponuhuan ku, om iyoho' indo o sumaap do koinsanai di pisangod dokoyu. 23 Iri indo moloikat ku o mogulu dokoyu om paatod dokoyu do hilo'd pomogunan do tulun dot Amori, Hit, Poris, Kanaan, Howi, om Yobus. Om patayon ngai' ku nopondo iyolo'. 24 Kada' kou otud do tumuku' dot id ponokokinorohingan diyolo', om kada' kou omit di kowoyo-woyoon diyolo'd sumambayang. Raagon no dokoyu i ponokokinorohingan diyolo' om tipuon ngai' no i torigi di pakayon diyolo' do sumambayang. 25 Ondung sumambayang kou dot id doho', i Tuhan om Kinorohingan dokoyu, om barakatan ku indo iyokoyu do taakanon om waig do tinumon, om lingoson ku o koinsanai do toruo-ruol dokoyu. 26 Hilo' nopondod pomogunan dokoyu om aiso' no o tondu' dot oiduan di ponontianon dau om aiso' it a' maganak. Om potoguyon ku po iyokoyu. 27 Popoddosion ku nondo doho' i tulun di sumaap dokoyu; om porikatan ku nondo do kagangahan i tulun di ponokisangod dokoyu, om popoggiduon ngai' ku i pisangod do mantad id dokoyu gisom do santangkus-tangkus pondo iyolo' do muli' om mogidu'. 28 Gangahon ngai' ku nondo i pisangod dokoyu; om uyungon ku i tulun do Howi, om Kanaan, om Hit, om kolombus kou i' do mamanau. 29 Nga' a' ku i' iyolo' insan-insanan do monguyung dot id suang do sontoun; tu' ondung wonsoyon ku o miagal diri, om otongkiadan tomod nopondo i tana', om iri tomod indo i nintorusan ot ounsamangan. 30 Nga' borinuton ku iyolo' do monguyung, do gisom do kogumu' kou do sumanganu di tana'. 31 Om paraladon ku nondo i wolit do tana' dokoyu do mantad hilo'd Suok dot Akaba om gisom do korikot di Bawang dot Iprat, om mantad hilo'd Rahat do Tanga' om gisom do korikot do hilo'd tana' do kowotuan. Om onuan ku nondo iyokoyu do kuasa' dot id sawat di tulun mantad dot id pomogunan diri om ouyung indo dokoyu iyolo' do korikot kou. 32 Kada' kou pomonsoi do poingkuro nopo dot id diyolo' ko' id ponokokinorohingan diyolo'. 33 Kada' dokoyu pologoso' o tongoulun diri do mundorong dot id pomogunan dokoyu; tu' ondung pologoson dokoyu, om iyolo' no o kobinsuhu' dokoyu do momonsoi'd dusa dot id doho'. Ondung sumambayang kou dot id kinorohingan diyolo' om iri no o lawa' di kapatai dokoyu,” ka dau.
Pinogirot i Tumpongo
1 Om boros kad Tuhan dot id di Musa, “Takad dilo nuluhon do mongoi do hiti'd doho' om powoyoon no i Harun, om i Nadab, om i Abihu, om i turu' nohopod o boyoon do tulun dot Israil; om hiri kou pod sodu-odu' om motud kou no do tumuku'. 2 Iso' pod tulun nga' aiso' no o koino-ino do minsomok doho' suwai ko' iya' noo. Nga' iri nopo tulun do suwai om a' i' koino-ino do minsomok, om okon-okon pondo i rayat toomod nga' a' i' koino-ino do tumakad piya di nuluhon,” ka. 3 Om ngoyo' no di Musa sunudai i tulun dot ogumu' do koinsanai di pinonuhuan do Tuhan om it oturan do Tuhan. Om oinsanan nopo i tulun do suminimbar do poingkaa, “Wonsoyon ngai' i' dahai i pinoboros do Tuhan,” ka. 4 Om tuliso' ngai' no di Musa i pinonuhuan do Tuhan diri. Om osuab po di kosuabon kawagu om pomonsoi no iyau do pananaraban do porsombahan do hiri'd guas di nuluhon diri, do hopod om duwo o watu di pinogititimpak; om iri ngai' nopo watu'ddi nga' ponokowakil di hopod om duwo o payat dot Israil. 5 Om ponuhu' noddi i Musa do piro-piro o tangaanakwagu, om papatahak no iyolo' dot id Tuhan do porsombahan di sorobon om ponumbali' iyolo' do piro-piro o sapi' do maan do porsombahan do piombolutan. 6 Om onuo' no di Musa o songintanga' di raha' di sapi'ddi om posuango' no dau do mangkuk; om iri no songintanga' om pinotuntug dau do hiri'd sakai di pananaraban do porsombahan. 7 Om ngoyo' noddi dau i buuk do tumpongo, i pinotulisan do koinsanai di ponuhuan do Tuhan, om basao' no dau dot opuhod dot id bansa'ddi. Om boros ka diyolo', “Mumboyo' i' iyahai do Tuhan om wonsoyon i' dahai o koinsanai di pinonuhuan dau,” ka. 8 Om ngoyo' noddi di Musa i raha' di hiri'd mangkuk om poiyaso' no dau dot id tulun dot ogumu'ddi. Boros ka dau, “Iti no raha' diti o popogirot di tumpongo do winonsoi'd Tuhan dot id dokoyu do tontok di pinatahak dau o koinsanai'dti ponuhuan,” ka. 9 Om takad noddi di nuluhon i Musa, om i Harun, om i Nadab, om i Abihu, om i turu' nohopod o boyoon do tulun dot Israil, 10 om kokito no diyolo' i Kinorohingan do tulun dot Israil. Hiri nopod koulokon di lapap do Kinorohingan nga' koiyo-iyo do sirang di watu do roitan do nilam do winonsoi, i miagal pod tawan kotomou. 11 A' id Kinorohingan pinatai i boyoon do tulun dot Israil diri do nokokito piya iyolo' do Kinorohingan. Om akan noddi om ponginum-nginum ngai' iyolo'.
Hilo'd Nuluhon do Sinai i Musa
12 Om boro-boros noddi o Tuhan dot id di Musa do poingkaa, “Takad diti nuluhon do mongoi do hiti'd doho'. Om daamot nu nopondod hiti om onuan ku iya' do duwo o kaping do watu do poposorou diya', i pinotulisan ngai' ku dit oturan do ponuduk diti tulun dot ogumu',” ka. 13 Om sodia' noddi i Musa om i Yosua, i mongunguhup dau, om timpuun no i Musa do tuminakad di nuluhon dot olidang. 14 Om boros kad Musa dot id boyoon do tulun dot Israil, “Andad kou nopo do hiti'd pinomukiiman diti do gisom do koguli' iyahai. Om hiti iyo Harun di Hur do koruhang dokoyu, om isai nopo o haro o pigulatan do pokisalasayan om mongoi nopo solowot diyolo',” ka dau. 15 Om takad no i Musa di Nuluhon do Sinai, om kolikupai nod haun i nuluhon diri. 16-17 Om sondot no dot id nuluhon diri i tanawau do kosorong tomod do tanda' do nakarapou o Tuhan. Om kokitanan nopo di tulun dot Israil di tanawau'ddi om miagal do tapui di molob-ngolob do hiri'd timpak di nuluhon. Om iri nopo nuluhon diri nga' nolikupan di haun do solinaid dot onom o tadau. Om koturu' noddi do tadau om lohowo' nod Tuhan i Musa do mantad hiri'd haun. 18 Om takad po i Musa di nuluhon diri do gisom do nolikupan iyau di haun. Om hiri noddi iyau do minundorong do solinaid dot apat nohopod o tadau om apat nohopod o totuong.
I Porsombahan do Pomonsoi di Kinoiyonon dot Olidang
1 Om boros kad Tuhan dot id di Musa, 2 “Sunudan no i tulun dot Israil do papatahak do porsombahan dot id doho'. Romiton no o nunu nopo o porsombahan di korohian diyolo' do papatahak dot id doho'. 3 Iri nopo porsombahan do patahakon om: tamas, pirok, tambaga'; 4 om kain dit opurak dit aalus, om kain di kihulu-hulu dit otomou, om aragang doitom-itom, om aragang, om kain di hulu do kambing do winonsoi; 5 om i kulit do dumba' do tontoluhan di sinasakan dot aragang; om kulit dit osonong om kayu di roitan dot akasia; 6 om tumau do lampung, om rampa do poroloton di tumau do ponununtug, om i poroloton di kominyan dit owongi' 7 om piro-piro o watu dit agayo o gatang do podokoton do pongillumis dit ipod di Boyoon dot Agayo dot Imam, om podokoton di polokopon do kangkab dau. 8 Suhuon no iyolo' do momonsoi do kiim do maan ku'd doho', om koiyon oku i' dot id pogialatan diyolo'. 9 Om wonsoyon no i kiim diri om koinsanai di pakakas do suwai do tumanud di natantu' mantad ku do pokitanan ku diya',” ka.
I Kaban do Tumpongo
10 Om boros ka kawagu'd Tuhan dot id di Musa, “Momonsoi no dot iso' o kaban do kayu di roitan dot akasia o wonsoyon. Konoruo' nopo di kaban diri om hatus om hopod o sontimito; om kalaabo' no om onom nohopod om onom o sontimito, om kasawato' nga' onom i' nohopod om onom o sontimito. 11 Urogupan no do tamas dit osompipi' o hiri'd suang om hiri'd soibau di kaban, om oligon no do tamas o mitingisan. 12 Wansayan no dot apat o tontolingo do tamas do posulungan do pagantayang om podokoton no do hiri'd apat o sunduk di ponong id gakod di kaban do sopiduwo o tontolingo do miampaping di kaban. 13 Momonsoi no do pagantayang do kayu di roitan dot akasia o wonsoyon, om urogupan nod tamas. 14 Om posusukon nondo i kayu di pagantayang do hiri'd tontolingo di miampaping di kaban. 15 Om potimporonon nopo i kayu do pagantayang do poinsusuk di tontolingo; tu' a' nori koino-ino do kodongon kawagu. 16 Om posuangon nogindo di kaban diri i duwo o kaping do watu di patahakon ku diya', i pinotulisan do koinsanai dit oturan ku. 17 Wansayan nod sompon i kaban diri do tamas di nosompipi' o wonsoyon. Konoruo' nopo om hatus om hopod o sontimito om onom nohopod om onom o sontimito do kalaabo'. 18 Momonsoi nod duwo o kerub do tamas di tinantan o wonsoyon 19 do piomputulon di sompon di kaban. Torodokon no kopio do momonsoi i poiyo-iyoon do moloikat di roitan do kerub diri om kopisagalai i' di sompon. 20 Om mositi' nod potimbabaon i duwo o koiyo-iyo do moloikat di roitan do kerub diri do miomputul di sompon, om potokopon no di sompon i talad di koiyo- iyo'd moloikat di roitan do kerub. 21 Posuangon no i duwo o kaping do watu do hiri'd kaban om posomponon no i sompon di kaban. 22 Om hiri nondo do sumolowot oku diya', om hiri'd sakai di sompon, it id piolitan di duwo o koiyo-iyo'd moloikat di roitan do kerub o patahakan ku diya' do koinsanai dit oturan ku do patahakon nu diti tulun dot Israil,” ka.
Mija' do Pasakayan di Roti do Patahakon do Kinorohingan
23 Om boros ka kawagu'd Tuhan dot id di Musa, “Momonsoi no dot iso' o mija' do kayu di roitan dot akasia o wonsoyon. Konoruo' nopo om walu' nohopod om walu' o sontimito, om kalaabo' no om apat nohopod om apat o sontimito, om kasawato' no om onom nohopod om onom o sontimito. 24 Tongkopon nod monguragup do tamas di nosompipi' i mija'ddi, om oligon do tamas o hiri'd mitingisan. 25 Isanan nod tamas o pointutuk di mija'ddi do turu' nohopod om limo o milimito do kalaabo'. Om oligon no i pinongisan di mija' do tamas o pongolig. 26 Momonsoi nod apat o tontolingo do tamas o wonsoyon, do posusukan di pagantayang, om poikidon nori dit apat o sunduk di pinadakatan di gakod di mija'. 27 Iri nopo tontolingo di posusukan di kayu do pagantayang om podokoton do hiri'd toning di tolig di mitingisan. 28 Iri nopo pagantayang diri om mositi' no dot i kayu di roitan dot akasia o wonsoyon, om urogupan nori do tamas. 29 Momonsoi nod piring, om sangkir, om kakanan, om mangkuk, do pakayon do tontok do papatahak do porsombahan do waig dot anggur. Koinsanai'dti om mositi' nod tamas dit osompipi' o wonsoyon. 30 Iti nopo mija' diti om poiyonon do hiri'd dotimbabaan di Kaban do Tumpongo. Om mositi' nod haro kasai' o roti dit olidang do hiri'd sakai di mija' do maan do porsombahan dot id doho',” ka dau.
Potitimpakan do Lampung
31 Om boros ka kawagu'd Tuhan dot id di Musa, “Momonsoi nod iso' o potitimpakan do lampung do tamas di nosompipi' o wonsoyon. Wonsoyon nopod puun om guas di potitimpakan do lampung om tamas di tinantan om pasagalayon no di puun om i guas i koiyo-iyo do tusak di pomolumis, om kohompit ngai' no i koiyo-iyo do tusak dit a' po noungkalad om i koiyo-iyo do tusak di noungkalad no. 1|60|HK77C|Potitimpakan do lampung|25.31 32 Om wansayan dot onom o raan i guas do sopitolu o raan do miampaping. 33 Pointikid-tikid dit onom o raan diri om wansayan do tolu o koiyo-iyo'd tusak do maan do pongillumis, do poiyo-iyoon do tusak di kayu di roitan do badam; om wansayan do koiyo-iyo di tusak dit a' po noungkalad om koiyo-iyo di tusak di noungkalad no. 34 Om wansayan nod apat o koiyo-iyo'd tusak o hiri'd guas di potitimpakan do lampung do maan do pongillumis. Iri nopo tusak diri om poiyo-iyoon di tusak do kayu di roitan do badam dit a' po noungkalad om i noungkalad no. 35 Om hiri nopod puun do pointikid-tikid di tolu o raan do miampaping diri, om wansayan dot iso' o koiyo-iyo do tusak dit a' po noungkalad. 36 Iri nopo koiyo-iyo'd tusak dit a' po noungkalad diri om i raan di potitimpakan di lampung om songwatang noo o tamas dit osompipi' di tinantan o wonsoyon. 37 Momonsoi nod turu' o lampung do potimpakon do hiri'd potitimpakan do lampung, om oulinahan i' o hiri'd ponong id gulu. 38 Momonsoi nod piro-piro o pananggip di lampung om piro-piro o talam do tamas dit osompipi' o wonsoyon, 39 om kogumuon nopod tamas dit osompipi', do wonsoyon do potitimpakan do lampung om iri ngai' pakakas diri om tolu nohopod om limo o kilogram. 40 Torodokon no kopio do momonsoi iti do poiyoon di natantu' mantad ku di pinokitanan ku diya' di hilo'd nuluhon,” ka dau.
I Kiim do Tuhan
1 Om boros ka kawagu'd Tuhan dot id di Musa, “Iri nopo ponong id suang di Kiim dot Olidang, i Kiim ku, om hopod o bidang do kain linan dit aalus, i piniawol do kain di kihulu-hulu dit otomou, om aragang doitom-itom, om aragang o wonsoyon. Om rindaan nori do poiyo-iyoon di moloikat di roitan do kerub. 2|55|HK77B|Kiim do Tuhan|26.1 2 Om mositi' no dot iradon o kogoyo-goyoo' di bidang di kain; konoruo' nopod sombidang om hopod om duwo o mito om kalaabo' no om duwo o mito. 3 Om pogitombir-tombiron no i limo o bidang di kain om asangkayu i', om i limo o bidang do suwai nga' iyoon iddi. 4 Wansayan nod posuluhan i duwo o kinotombiran do kain diri. Om wonsoyon nopod posuluhan om kain dit otomou. Om padakatan nopo di posuluhan om hiri'd tisan di kain. 5 Padakatan nod limo nohopod o posuluhan o hiri'd tiso' di kinotombiran di kain, om limo kawagu nohopod o posuluhan do podokoton do hiri'd koduwo di kinotombiran di kain, om kopogiontok-ontok ngai' i' i posuluhan. 6 Momonsoi nod limo nohopod o pangait do tamas o wonsoyon do pokoiton di posuluhan di duwo o kinotombiran di kain, om kopiromut i' i duwo o kinotombiran do kain diri. 7 Wansayan nod tokop i kiim do hopod om iso' o bidang do kain di hulu do kambing do winonsoi, o wonsoyon. 8 Om mositi' no dot iradon o kogoyo-goyoo' di bidang di kain; konoruon nopo om hopod om tolu o mito om kalaabon no om duwo o mito. 9 Om pogitombir-tombiron no i limo o bidang do kain. Om iri nopo koonom di bidang do kain di pinotombir diri om pilikobon do maan do ponobon di ponong id wawayaan di Kiim. 10 Wansayan nod limo nohopod o posuluhan i tiso' di kinotombiran di kain do podokoton do hiri'd tisan, om limo kawagu nohopod o posuluhan do podokoton do hiri'd tisan di koduwo di kinotombiran di kain. 11 Momonsoi nod limo nohopod o pangait do tambaga' o wonsoyon, om pokoiton no di posuluhan om opiromut i' i duwo o kinotombiran do kain do ponokop di Kiim. 12 Iri nopo songintanga' di kain di poinghandui no om ponirung di ponong id tolikud di Kiim. 13 Om iri no kain di limo nohopod o sontimito do poinghandui do hiri'd miampaping di Kiim om pologoson nopo do poingiyo'ddi do ponirung di hiri'd tisan di Kiim. 14 Momonsoi pod duwo kawagu o ponokop di Kiim. Koiso' nopo om kulit do dumba' do tontoluhan di sinasakan dot aragang o wonsoyon, om iri no tiso' om kulit dit osonong o wonsoyon, do maan do ponokop dit id soibau. 15 Momonsoi nod papan di poturidongon do kayu di roitan dot akasia o wonsoyon. 16 Pointikid-tikid di papan om apat ngai' nopo o mito do konoruo' om onom nohopod om onom o sontimito do kalaabo'. 17 Kakalan ngai' no o hiri'd misingompok om milo i' do pitumaon i papan. 18 Powonsoyon no o duwo nohopod o papan do poturidongon do hiri'd tisan ponong id salatan di Kiim. 19 Momonsoi nod apat nohopod o posungkadan do pirok o wonsoyon, do posungkadan di papan. Iso' nopo o papan om posungkadon di posungkadan di misusun do duwo; om oinggiratan i' i papan di kinakalan. 20 Powonsoyon no o duwo nohopod o papan do hiri'd tisan ponong id utara di Kiim, 21 om apat nohopod o posungkadan do pirok o wonsoyon, om pisusunon do duwo o posungkadan dot iso' o torigi. 22 Hiri nopod ponong id tolikud di Kiim, it id dompok ponong id kotonobon, om poturidangan no dot onom o papan 23 om koduwoon o papan do hiri'd linsuk. 24 Iri nopo papan di ponong id linsuk, om mositi' no do piromuton o hiri'd siriba' do gisom do koompus do hiri'd sawat. Om iyoon goduwo nopoddi i papan di hiri'd duwo o linsuk di Kiim. 25 Om walu' diri o papan do posungkadon do hopod om onom o posungkadan di pirok do winonsoi tu' pisusunon nod duwo i posungkadan dot iso' o papan. 26 Momonsoi nod hopod om limo o tukod di potibabar do kayu di roitan dot akasia o wonsoyon; om podokoton no o limo di tukod diri do hiri'd limo o papan di pinoturidong, i ponong id rombu di Kiim dot id sampaping, 27 om limo kawagu o tukod do podokoton dot id ponong id rombu dit id sampaping, om limo o tukod do podokoton di papan di pinoturidong di ponong id tolikud; i ponong id kotonobon. 28 Iri nopo tukod di potibabar di hiri'd tanga-tanga', om podokoton do hiri'd piintangaan di papan di pinoturidong, om podopiton nopo di papan di ponong id rombu di Kiim. 29 Urogupan nod tamas i papan di pinoturidong di hiri'd Kiim om i tukod di potibabar. Om wansayan nod posusukan i papan di pinoturidong do posusukan di tukod do potibabar. Iri nopo posusukan diri om tamas o wonsoyon. 30 Wonsoyon no i kiim do tumanud di poiyaan di natantu' mantad ku, i pinokitanan ku diya' di hilo'd nuluhon. 31 Momonsoi nod tabir, do wonsoyon nopo om kain linan dit osonong do piowolon do kain di kihulu-hulu dit otomou, om aragang doitom-itom om aragang. Rindaan no i tabir diri do poiyo-iyoon di moloikat di roitan do kerub. 32 Potoidon no i tabir do hiri'd apat o torigi do kayu di roitan dot akasia, i nurogupan do tamas, om i pinadakatan do pangait di tamas do winonsoi, om i pinosungkad dot apat o posungkadan di pirok do winonsoi. 33 Podokoton no i tabir do hiri'd siriba-riba' di rinuludan do pangait, i hiri'd taap di Kiim. Om poilihon no i Kaban do Tumpongo, i kisuang di duwo o kaping do watu do hiri'd dotirung di tabir. Om iri no i tabir diri o pomiolitan di Bilik dit Olidang om i Bilik dit Olidang Kopio. 34 Om posomponon no i sompon di Kaban do Tumpongo. 35 Iri nopo mija' di pasakayan do porsombahan om hirion id soliwan di Bilik dit Olidang Kopio, do ponong id utara, om iri no potitimpakan do lampung om hirion id ponong id salatan, do hiri'd suang di Kiim dot Olidang. 36 Om potoidon no do hiri'd wawayaan di Kiim, om tabir di kain linan dit osonong, i piowolon do kain di kihulu-hulu dit otomou, om aragang doitom-itom, om aragang, om rindaan iri. 37 Om momonsoi nod limo o torigi, do kayu di roitan dot akasia o wonsoyon, do padakatan di tabir. Iri nopo torigi diri om urogupan do tamas om dakatan do limo o pangait do tamas; om wansayan do limo o posungkadan i torigi, do tambaga' o wonsoyon,” ka dau.
I Pananaraban do Porsombahan
1 Om boros ka kawagu'd Tuhan dot id di Musa, “Momonsoi nod iso' o pananaraban do porsombahan do kayu di roitan dot akasia o wonsoyon. Om posogion no o pomomonsoi, do 2.2 mito do konoruo' om 2.2 mito do kalaabo', om 1.3 mito do kasawato'. 2 Wansayan nod sinangau-sangau o pointikid-tikid dit apat o sunduk di ponong id sawat di pananaraban do porsombahan, om tongkopon nori do monguragup do tambaga'. 3 Momonsoi nod poriuk do poiyanan do tauu om momonsoi do sikup, om momonsoi do mangkuk om totodok, om momonsoi do poiyanan do tapui. Koinsanai'dti om mositi' nod tambaga' ngai' o wonsoyon. 4 Momonsoi nod pangabot di pananaraban do porsombahan do tambaga' o wonsoyon, om padakatan do tontolingo o hiri'd pointikid-tikid di sunduk di pangabot, do posusukan di pagantayang. 5 Kasawaton nopo do paabatan di pangabot do hiri'd pananaraban do porsombahan om songintanga' do kasawato' di pananaraban do porsombahan, it id siriba' di kabang di pananaraban do porsombahan. 6 Momonsoi nod pagantayang do kayu di roitan dot akasia o wonsoyon, om urogupan nori do tambaga', 7 om posusukon nori do hiri'd tontolingo di miampaping di pananaraban do porsombahan. 8 Wonsoyon no i pananaraban do porsombahan diri do papan o wonsoyon om pologoson nopo do kiguang o hiri'd tanga', do tumanud di poiyaan di natantu' mantad ku di pinokitanan ku diya' di hilo'd nuluhon,” ka dau.
Rinding di Kiim do Tuhan
9 Om boros ka kawagu'd Tuhan dot id di Musa, “Oluan nod natad i Kiim ku om rindingan nod tabir do kain linan dit osonong. Konoruo' nopod tabir do hiri'd disan ponong id salatan om apat nohopod om apat o mito, 10 om tukodon iri do duwo nohopod o torigi do tambaga' do posungkadon do duwo nohopod o posungkadan do tambaga', om dakatan do pangait do pirok o wonsoyon. 11 Om iyoon nogiddi it id disan ponong id utara di natad. 12 Id bombong ponong id kotonobon no, om rindingan do tabir di duwo nohopod om duwo o mito do konoruo' om tukodon do hopod o torigi do posungkadon do hopod o posungkadan. 13 Id bombong ponong id koulayon no, i winansayan do wawayaan, om duwo i' nohopod om duwo o mito do kalaabo' do panabir. 14-15 Miampaping nopo di wawayaan om rindingan do tabir dot 6.6 mito do konoruo', om tukodon do tolu o torigi do posungkadon do tolu o posungkadan. 16 Om iri no wawayaan om wansayan do tabir do 9 o mito do konoruon do kain linan dit osonong, i piniawol do kain di kihulu-hulu dit otomou, om aragang doitom-itom, om aragang, om rindaan. Om tukodon nori dot apat o torigi do posungkadon dot apat o posungkadan. 17 Om pogiromu-romuton ngai' no i torigi do pointutuk di natad dot i loting do pirok o popogiromu-romut; om iri nopo pokoiton di loting om pirok o wonsoyon, om iri no posungkadan om tambaga' o wonsoyon. 18 Konoruo' nopo do tansar do pointutuk di natad om 44 o mito, om 22 o mito do kalaabo', om 2.2 o mito do kasawato'. Wonsoyon nopod panabir om kain linan dit osonong, om iri no posungkadan om tambaga' o wonsoyon. 19 Koinsanai di pakakas do pakayon do hiri'd Kiim om koinsanai di gapit di Kiim om i torigi di ponukod nga' tambaga' ngai' nopo o wonsoyon,” ka dau.
Kowoyo-woyoo' do Momogompi' di Lampung
20 Om boros ka kawagu'd Tuhan dot id di Musa, “Suhuon no i tulun dot Israil do mongoi papaatod diya' do tumau do saitun dit osonong kopio do ponuang di lampung do hiri'd Kiim ku, om otutudan indo i lampung do pointikid do totuong. 21 Modtutud nopo di lampung om mositi' no dot i Harun om i tangaanak dau. Poiyanan nopo di lampung diri om hiri'd soliwan di tabir di ponirung di Kaban do Tumpongo. Om mositi' nod kitapui kasai' i lampung diri do hiri'd koropohon ku do mantad do sosodopon om gisom do kosuabon. Om mositi' nod wonsoyon kasai' do tulun dot Israil om i sinakagon diyolo' o ponuhuan diti do gisom dot alaid,” ka dau.
Pakayan di Dong Imam
1 Om boros ka kawagu'd Tuhan dot id di Musa, “Lohowo' i Harun, i tobpinai nu, om i Nadab, om i Abihu, om i Iliasar, om i Itamar, i tangaanak di Harun. Posuwai-suwayon no iyolo' do mantad id tulun dot Israil, do silihon do imam di momonsoi'd karaja' ku. 2 Wansayan no i Harun do pakayan di dong imam, om agayo i' o ngaran dau om olumis o kokitanan. 3 Lohowon ngai' no i mononombir di noonuan ku do toilaan. Om suhuon no iyolo' do momonsoi'd pakayan di Harun, om kotobilang i' iyau do sumiliu do doho'd songonuon, om sumiliu do imam di momonsoi'd karaja' ku. 4 Suhuon no iyolo' do momonsoi'd pomolokop do kangkab, om iso' ot ipod om iso' o rasuk dit anaru, om iso' o rasuk dit oniba' di rindaan, om iso' o sigar om iso' o tagkos. Om iyolo' no o momonsoi diti pakayan do dong imam do pakayon di Harun i tobpinai nu, om i tangaanak dau, om osiliu i' iyolo' do imam di momonsoi'd karaja' ku. 5-6 Iti nopo pakayan om mositi' no dot i kain di kihulu-hulu dit otomou, om aragang doitom-itom om aragang, om banang do tamas om kain linan dit osonong, o wonsoyon. Om it ipod nga' sagalai i' do kain diri o wonsoyon om rindaan iri piya. 7 Om wansayan nod togiis o hiri'd miampaping di ponong id lihawa dit ipod do maan do pikogoson. 8 Om wansayan pod tagkos it ipod, do sagalai i' dit ipod o kain dot owolon om kopisagalai indo dit ipod i tagkos. 9-12 Manganu nod duwo o watu dit agayo o gatang di roitan do delima. Om mogihum nod tulun dit oilo do mongikir do tamas do popokikir do ngaran di hopod om duwo o tanak di Yakub do hiri'd watu'ddi do poiruson di tumur diyolo', do sopionom o ngaran dot id iso' o watu. Om podokoton nogindo i duwo o watu'ddi do hiri'd padakatan di tamas do winonsoi, om podokoton nori di togiis dit ipod di hiri'd ponong id lihawa do maan do ponokowakil di hopod om duwo o payat dot Israil. Om opiigit-igitan nondo di Harun i ngaran diyolo' do hiri'd lihawa dau, om iyoho' i Tuhan nga' kosorou indo kasai' diyolo'. 13 Suwai nopo ko' i padadakatan di tamas do winonsoi, 14 om momonsoi pod duwo o rantai, do tamas dit osompipi' o wonsoyon do pitobidon do miagal do tali, om podokoton nogindo i rantai'ddi do hiri'd padadakatan di tamas do winonsoi,” ka dau.
I Lokop do Kangkab.15 Om boros ka kawagu'd Tuhan dot id di Musa, “Momonsoi nod lokop do kangkab di Boyoon dot Agayo dot Imam do maan dau do pakayon do tontok do mongilo iyau do korohian do Kinorohingan. Om iri nopo kain do wonsoyon om sagalai i' di kain di wonsoyon dot ipod, om i maan do pomorinda' nga' sagalai i' di pinomorinda' dit ipod.1|90|HK76E|Sigar om lokop do kangkab|28.15 16 Pomomonsoi nopoddi om posogion om pilopion. Konoruo' nopo om duwo nohopod om duwo sontimito om kalaabo' nga' duwo i' nohopod om duwo sontimito. 17 Padakatan no i lokop do kangkab diri dot apat o rulud do watu dit agayo o gatang; hiri nopod rulud do koiso' om dakatan do watu di roitan do delima, topas om baiduri sepah. 18 Hiri nod rulud do koduwo om dakatan do watu di roitan do samrud, nilam om intan. 19 Hiri nod rulud do kotolu om dakatan do watu di roitan do lasuardi, akik, om kecubung. 20 Hiri nod rulud do kaapat om dakatan do watu di roitan do pirus, yakut, om ratna cempaka. Om podokoton ngai' nopo iti hopod om duwo o watu dot angagayo o gatang diti di padadakatan, di tamas do winonsoi. 21 Om pointikid-tikid di hopod om duwo o watu dot angagayo o gatang diri om kikiran do ngaran di tangaanak di Yakub, do ponokowakil di hopod om duwo o payat dot Israil. 22 Wansayan nod rantai i lokop do kangkab diri, do tamas dit osompipi' o wonsoyon, om i pinitabid do miagal do tali. 23 Momonsoi nod duwo o pondulung do tamas om podokoton no do hiri'd sunduk ponong id sawat di lokop do kangkab 24 om posulungon nogindo i duwo o rantai do tamas do hiri'd duwo o pondulung do tamas diri. 25 Om pokogoson no i duwo kawagu o tompok di duwo o rantai'ddi di lokop do kangkab di togiis di lihawa dit ipod. 26 Momonsoi nod duwo kawagu o pondulung do tamas om podokoton no do hiri'd sunduk ponong id siriba' di lokop do kangkab, do hiri'd ponong id saalom, i kotopis dit ipod. 27 Momonsoi po kawagu do duwo o pondulung do tamas om podokoton do hiri'd siriba-riba' di ponong id soibau di duwo o togiis di ponong id lihawa dit ipod, it id topis di lupi di tinombir, it id sawat di tagkos dit atandai o pinangawol. 28 Ogiisanan no i pondulung di lokop do kangkab do tali dit otomou om pokogoson nondo i tali'ddi di pondulung di poindokot dit ipod, om id sawat kasai' i' di tagkos i lokop do kangkab, om a' indo tumatak. 29 Soira' nopod sumuang i Harun di Bilik dot Olidang, om mositi' nod pakayon dau i lokop do kangkab diri, i kinikiran do ngaran di hopod om duwo o payat dot Israil, om iyoho' i Tuhan nga' kosorou kasai' indo di tulun ku. 30 Posuangon no it Urim om i Tumim do hiri'd suang di lokop do kangkab, om oigitan i' di Harun iri do tontok di mongoi iyau timbaba' doho'. Om tontok nopo do maso'd miagal diri, om mositi' nod pakayon kasai' dau i lokop do kangkab, om oilaan i' dau o korohian ku do bagi di tulun dot Israil,” ka dau.
Pakayan do Dong Imam di Suwai
31 Om boros ka kawagu'd Tuhan dot id di Musa, “Iri nopo rasuk dit anaru dit osoibahan dit ipod om kain di kihulu-hulu dit otomou o wonsoyon. 32 Om wansayan nod liou i rasuk diri, om awalan nod mongisan i liou di rasuk om a' i' ohurak. 33-34 Pointutuk nopo di lupi dit id siriba' om dakatan di koiyo-iyo do tua' do kayu di roitan do delima do wonsoyon nopoddi om i kain do kihulu-hulu dit otomou, om aragang doitom-itom, om aragang, om piolot-oloton do giring do tamas. 35 Om mositi' nod pakayon di Harun i rasuk dot anaru diri do soira-ira' nopo do momonsoi iyau di karaja' di dong imam. Om soira' nopondo do mongoi iyau timbaba' doho' do hilo'd Bilik dit Olidang, ko' di tumongkiad iyau do bilik diri om orongou indo i tuni di giring diri, om a' indo iyau apatai. 36 Momonsoi nod iso' o pongillumis do tamas dit osompipi' o wonsoyon om pokikiron no o poingkaa, ‘Pinotobilang do maan do don Tuhan,’ ka. 37 Pokogoson nori do hiri'd sigar do hiri'd ponong id turos, do tali dit otomou o pongogos. 38 Om mositi' nod posigaron di Harun i tamas di pongillumis diri do hiri'd turos dau, om romiton ku indo, iyoho' i Tuhan, o koinsanai di porsombahan di patahakon di tulun dot Israil dot id doho', do mulong piya do haro ot owonsoi diyolo' do sala' dit ongokooro' do tontok do papatahak iyolo'ddi. 39 Owolon nopo do maan do rasuk di Harun om kain linan dit osonong, om i wonsoyon do sigar nga' kain linan i' dit osonong o wonsoyon, om sagalai nogi' do kain diri o wonsoyon do tagkos di rindaan. 40 Wansayan nod rasuk, om tagkos, om tupi' i tangaanak di Harun do kusai, om agayo i' o ngaran om olumis o kokitanan diyolo'. 41 Papakayan no di Harun, i tobpinai nu om i tangaanak dau'd kusai i pakayan diri. Om tuntugan no iyolo'd tumau do saitun; om iyo noddi o pomimili' diyolo' do potobilangon do silihon do imam di momonsoi'd karaja' ku. 42 Wansayan no iyolo'd soluar dit oniba' o gakod do kain linan dit osonong o wonsoyon, do konoruo' nopo om korikot dot id poo do mantad id tawak, om otirung i' i bohogian do tinan diyolo' dit a' osorupai dot okito. 43 Om mositi' nod pakayon kasai' di Harun om i tangaanak dau o pakayan diri do tontok do sumuang iyolo' do hiri'd Kiim ku ko' di mongoi iyolo' insomok di pananaraban do porsombahan do mongoi pomonsoi di karaja' di dong imam do hiri'd Bilik dit Olidang. Om a' indo iyolo' apatai tu' a' i' okito o bohogian do tinan diyolo' dit a' osorupai dot okito. Om iti kasai' no ot oturan dit apatut do tonudon di Harun om i sinakagon dau,” ka dau.
Ralan do Momili' di Harun om i Tangaanak Dau do Silihon dot Imam
1 Om boros ka kawagu'd Tuhan dot id di Musa, “Poingkaa no o kowoyo-woyoo' do momili' di Harun om i tangaanak dau do popotobilang diyolo' do silihon do imam di momonsoi do karaja' ku. Manganu no do songinan o sapi' do tontoluhan dit okoro' po om duwo o tinan do dumba' do tontoluhan dit aiso' o bohiton do tinan. 2 Momolomok nod tapung do gandum dit osonong kopio, nga' it a' naralatan do pangambang. Om iri nopo wookon di tapung diri om wonsoyon do roti do ralatan do tumau do saitun, om iri no wokon di tapung om a' ralatan do tumau, om iri nondo topod di tapung om wonsoyon do roti di gihilan do tumau. 3 Posuangon ngai' no i roti do hiri'd balatak om patahakon nogindo dot id doho' do mitonggoi di sapi' do tontoluhan om i duwo o dumba' do tontoluhan, i patahakon do maan do porsombahan di sumbolion. 4 Suhuon no i Harun om i tangaanak dau do mongoi'd hiri'd wawayaan di Kiim ku, om suhuon no iyolo' do modsu' do tumanud dit oturan di don tugama'. 5 Om pakayan nogindo i Harun di pakayan do dong imam --- i rasuk dit anaru o longon, om it ipod, om i rasuk dot anaru dit alakapan dit ipod, om i lokop do kangkab, om i tagkos. 6 Posigaron no dau i sigar om pokogoson nod hiri i tanda' dot olidang di kinikiran do poingkaa, ‘Pinotobilang do maan do don Tuhan,’ ka. 7 Om ngoyon nogindo i tumau di ponununtug om potuntugon no do hiri'd tulu dau, do tanda' do pilion iyau. 8 Om angatan no i tangaanak dau om porosukan no diyolo' i rasuk dit anganaru o longon 9 om paagkasan no diyolo' i tagkos om potupian i tupi'. Iyo noddi o kowoyo-woyoo' do momili' di Harun om i tangaanak dau. Om iyolo' nondo om i sinakagon diyolo' ot apatut do sumiliu'd imam di momonsoi do karaja' ku do gisom dot alaid. 10 Om ngoyon nondo i sapi' di tontoluhan diri om pohirion id dotimbabaan di Kiim ku. Om sunudan no i Harun om i tangaanak dau do pakabai do longon diyolo' do hiri'd tulu di sapi'ddi. 11 Om sumbolion no i sapi'ddi do hiri'd dotimbabaan ku; i hiri'd dotimbabaan di Kiim. 12 Om manu nod ongokuuri' do raha' di sapi'ddi om potuduwon no di raha' o tunturu' nu om pogihilon nogindo di sinangau-sangau di pananaraban do porsombahan. Om potuntugon nogindo i raha' di noolu' do hiri'd douwahan di pananaraban do porsombahan. 13 Om onuon ngai' nogindo i linuap di songinsokot di tinaii', om i bohogian dot osonong kopio di tundu-undu', om i duwo o lusou-lusou do mitonggoi di linuap di songinsokot. Om sorobon ngai' nori do hiri'd pananaraban do porsombahan do maan do porsombahan dot id doho'. 14 Nga' iri nopo tonsi, om i kulit, om i tinaii' di sapi'ddi om mositi' nod tutudan do hiri'd soliwan di kokiiman. Om iri no o porsombahan do pongidu' do dusa di imam. 15 Om ngoyon nondo o tiso' di dumba' do tontoluhan diri. Om suhuon no i Harun om i tangaanak dau do pakabai do longon diyolo' do hiri'd tulu di dumba'ddi. 16 Om sumbolion nondo i dumba'ddi om onuon i raha' do maan poiyaso' do hiri'd misingobik om hiri'd misingompok di pananaraban do porsombahan. 17 Om popoton no i dumba' do tontoluhan diri. Om mositi' no dot ougan i suang do tian om i gakod di dumba', om pasakayon nogindo iri di tulu om i popot do suwai di dumba'ddi. 18 Om insanan nopo do monorob i popot di dumba' do tontoluhan diri do hiri'd pananaraban do porsombahan do maan do porsombahan do taakanon. Om iri no i tawau di porsombahan do sinumbali'ddi o kasanangan ku. 19 Ngoyon no i tiso' di dumba' do tontoluhan diri, i dumba' do maan do porsombahan. Om suhuon no i Harun om i tangaanak dau do pakabai do longon diyolo' do hiri'd tulu di dumba'ddi. 20 Om sumbolion nondo i dumba' om manu no dot ongokooro' di raha' om pogihilon no do hiri'd tolingo'd wanan di Harun om i tangaanak dau, om pogihilon di posolon do tunturu' do longon diyolo'd wanan, om pogihilon di posolon do lapap diyolo'd wanan. Om poiyason nondo i noolu' di raha' do hiri'd misingobik om hiri'd misingompok di pananaraban do porsombahan. 21 Manu no dot ongokooro' di raha' di hiri'd sakai di pananaraban do porsombahan om manu dot ongokooro' di tumau di ponununtug, om powowoson nondo dot id di Harun om id pakayan dau om id pakayan di tangaanak dau. Om iyo noddi o ralan do popotobilang di Harun om i tangaanak dau, om i pakayan diyolo' do maan do doho'd songonuon. 22 Onuon no i lunok di dumba' do tontoluhan diri, om i tikiu di kilunok, om i linuap do poinsokot di suang do tian, om i bohogian dot osonong kopio di tundu-undu', om i duwo o lusou-lusou do mitonggoi di linuap di songinsokot, om i poo do wanan. 23 Om manu no di roti di hiri'd balatak di nakatahak no dot id doho', dot iso' ot onuon do pointikid-tikid di bansa' di roti: iso' ot onuon di roti di rinalatan do tumau do saitun, om iso' ot onuon di roti dit a' rinalatan do tumau, om iso' ot onuon di roti. 24 Pakahangan ngai' nopo iti di Harun om i tangaanak dau, om suhuon no iyolo' do papatahak diti dot id doho' do maan do porsombahan di potobilangon do buntuk doho'. 25 Om ngoyon nondo i roti di poingigit diyolo' om sorobon no do hiri'd pananaraban do porsombahan do maan do porsombahan do taakanon do patahakon dot id doho'. Om iri no i tawau do porsombahan diri o kasanangan ku. 26 Onuon no i kangkab di dumba' do tontoluhan diri om patahakon no dot id doho' do maan do porsombahan di potobilangon do buntuk doho'. Om iri nopo om diya' no. 27 Tontok nopo do momili' do imam, om iri nopo kangkab om i poo di dumba' do tontoluhan di maan do porsombahan do tontok diri om patahakon dot id doho' do maan do porsombahan di potobilangon do buntuk doho', om posuwai-suwayon nondo iri do patahakon di piro-piro o imam. 28 Iti no o natantu' ku dit a' milo do simbanan: Tontok nopo do mongoi papatahak i tulun ku do porsombahan do piombolutan, om iri nopo kangkab om i poo di tayam-tayam om iri no imam o kaanu. Tu' iri no o porsombahan di tulun ku dot id doho'. Iri no i natantu' ku dit a' milo do simbanan. Iyoho' no o Tuhan. 29 Apatai nopondo i Harun, om mositi' no do potungkusan dau i pakayan dau dot id tangaanak dau do maan diyolo' do pakayon dot opili' iyolo'. 30 Iri nopo tanak di Harun di sumowoli dau do sumiliu do imam, om i mongoi do hiri'd Kiim ku do momonsoi di karaja' do dong imam do hiri'd Bilik dit Olidang, om mositi' no do manampakai do pakayan diri do solinaid do turu' o tadau. 31 Onuon no i tonsi di dumba' do tontoluhan di pinatahak do numaan do porsombahan do tontok di pinili' i Harun om i tangaanak dau om losuon no i tonsi'ddi dot id kinoiyonon dit olidang. 32 Om mositi' no do kanon diyolo' i tonsi'ddi do hiri'd wawayaan di Kiim ku om kanon i topod di roti di hiri'd balatak. 33 Om mositi' no do kanon diyolo' i taakanon di pinatahak do numaan do porsombahan do tontok di pinapatahak do porsombahan do pongidu'd dusa do tontok di minomili'. Imam noo o koino-ino do mangakan di taakanon diri tu' nokotobilang nori do patahakon dot id doho'. 34 Ondung haro ot oolu' di tonsi ko' i roti'ddi do kosuabon kawagu, om mositi' nod sorobon ngai' i taakanon diri, om a' no koino-ino dot akanon, tu' olidang nori. 35 Koloidon nopo do maso do momili' di Harun om i tangaanak dau om turu' o tadau, do miagal di pinonuhuan ku diya'. 36 Pointikid-tikid do tadau om mositi' no do papatahak do porsombahan do songinan o sapi' do tontoluhan do maan do pongidu' do dusa. Om iri no i porsombahan diri o kolidang di pananaraban do porsombahan. Om tuntugan no i pananaraban do porsombahan do tumau do saitun om kotobilang i' iri do maan do doho'd songonuon. 37 Wonsoyon no o miagal diri do pointikid do tadau do solinaid do turu' o tadau. Om olidangan ngai' nondo o pointongkop di pananaraban do porsombahan. Om isai nopondo ko' nunu nopondo o kakama' diri, om orualan no tu' oontok di kuasa' do kolidango' di pananaraban do porsombahan,” ka dau.
I Porsombahan do Patahakon do Monikid Tadau
38 Om boros ka kawagu'd Tuhan dot id di Musa, “Pointikid-tikid do tadau do gisom dot alaid, om mositi' nod papatahak do porsombahan do duwo o tinan do dumba' di sontoun nogi' o tumur do maan do porsombahan di sumbolion. 39 Iri nopo songinan om maan do porsombahan do dongkosuabon om iri no tiso' om maan do porsombahan do dongsosodopon. 40 Iri nopo patahakon do maan do porsombahan do potonggoyon di dumba' di koiso', om songkilogram o tapung do gandum dit osonong kopio om piroloton do songlito o tumau do saitun dit osompipi'. Om papatahak po do songlito o waig dot anggur do maan do porsombahan. 41 Iri no tanak do dumba' di koduwo om patahakon do maan do porsombahan do dongsosodopon do mitonggoi di songkilogram o tapung, om songlito o tumau do saitun, om songlito o waig dot anggur. Iri no o porsombahan do taakanon do patahakon dot id doho'. Om iri no tawau di porsombahan diri o kasanangan ku. Iyoho' no o Tuhan. 42 Om iti nopo porsombahan do sorobon diti om mositi' nod patahakon dot id toguang ku do hiri'd wawayaan di Kiim ku. Om hilo' oku no do sumolowot di tulun ku om monokiboro-boros diya'. 43 Om hilo' oku nondo do sumolowot di tulun dot Israil, om iri indo i tanawau di karapou oku di kosorong kopio o momolidang do kinoiyonon diri. 44 Om lidangan ku nondo i Kiim om i pananaraban do porsombahan, om potobilangon ku i Harun om i tangaanak dau do sumiliu do imam di momonsoi do karaja' ku. 45 Miyon oku nondo dot id pogialatan di tulun dot Israil, om iyoho' nondo o Kinorohingan diyolo'. 46 Om oilaan nondo diyolo' dot iyoho' o Tuhan, i Kinorohingan diyolo', i pinoposoliwan diyolo' do mantad hilo'd Masir, om koiyon oku i' dot id pogialatan diyolo'. Iyoho' no o Tuhan, i Kinorohingan diyolo',” ka dau.
I Mija' di Podtutudan do Kominyan
1 Om boros ka kawagu'd Tuhan dot id di Musa, “Momonsoi no dot iso' o mija' do podtutudan do kominyan do kayu di roitan dot akasia o wonsoyon. 2 Posogion no o pomonsoi'ddi; apat nohopod om limo sontimito do konoruo' om kalaabo' nga' apat i' nohopod om limo sontimito, om kasawato' no om siam nohopod o sontimito. Om iri nopo sinangau-sangau do hiri'd apat o sunduk om pasagalayon no di mija'. 3 Urogupan nod tamas dit osompipi' o hiri'd sakai, om hiri'd misingobik om hiri'd misingompok, om hiri'd sinangau-sangau di mija'ddi, om oligon no o hiri'd mitingisan. 4 Momonsoi nod duwo o tontolingo do tamas o wonsoyon do maan do posusukan. Om podokoton no do hiri'd siriba-riba' di pinongolig di tisan do hiri'd miampaping di mija', do posusukan di kayu do pagantayang di mija'. 5 Iri nopo pagantayang diri om kayu di roitan dot akasia o wonsoyon, om urogupan nod tamas. 6 Poilihan nopo di mija' om hiri'd soliwan di tabir dit id dotimbabaan di Kaban do Tumpongo. Om hiri no o tiyonon ku do sumolowot diya'. 7 Pointikid do kosuabon, do tontok di mongoi i Harun posodia' di lampung, om mositi' no do modtutud iyau di kominyan dit osonong o kosingudan do hiri'd sakai di mija'ddi. 8 Om iyo iddi o wonsoyon dau di mongoi iyau podtutud do lampung di dongsosodopon. Om mositi' nod papatahak kasai' do porsombahan do kominyan do miagal diti do gisom dot alaid. 9 Kada' papatahak do kominyan di pogoduhan do maan do porsombahan dot id mija'ddi, om kada' papatahak do tayam-tayam do maan do porsombahan di sumbolion ko' porsombahan pod gandum, om kada' potungu do porsombahan do waig dot anggur do hiri. 10 Om mositi' nod lidangan di Harun i mija'ddi do tumanud dit oturan do don tugama', do kowoyo-woyoo' nopo do momolidang om tiyasan do raha' di tayam-tayam di pinatahak do numaan do porsombahan do maan do pongidu'd dusa it apat o sinangau-sangau, dot insan do sontoun, om mositi' nod wonsoyon o miagal diti do pointikid do toun do gisom dot alaid. Om mositi' nod olidang o pointongkop di mija'ddi om potobilangon iri do maan do doho'. Iyoho' no o Tuhan,” ka dau.
Sukai do Patahakon do Pomonsoi di Kiim do Tuhan
11 Om boros kad Tuhan dot id di Musa, 12 “Tontok nopo dot intobon i tulun dot Israil, om mositi' no do mambayar do tusin do pomogontok do tinan dau o pointikid-tikid do tongokusai, om a' i' iyau oontok do kosusaan do daamot di pongintaban. 13 Koinsanai'd tulun di kointob do tontok di pongintaban om mositi' nod papatahak do tusin do tumanud di natantu' mantad. Om mositi' no do pabayaron i tusin diri do maan do porsombahan dot id doho'. 14 Iri nopo tulun di pointobon dot id pongintaban diri, om i tongokusai di duwo no nohopod o toun, ko' it id sawat ko' iri o tumur, om mositi' nod papatahak do tusin dot irad diri dot id doho'. 15 A' i' poinggumu-gumu' o pabayaron di tulun do kaya', om a' poingkuri-kuri' o pabayaron di tulun do mosikin do tontok di mambayar iyolo' do pomogontok do tinan diyolo'. 16 Timungon no i tusin diri do mantad id tulun dot Israil om pakayon nori do pomogompi' di Kiim ku. Om iri no i sukai o pomogontok diyolo' do tinan diyolo', om osorou kasai' ku indo iyolo' do mongintirung,” ka dau.
I Mimpun do Tambaga'
17 Om boros kad Tuhan dot id di Musa, 18 “Momonsoi nod mimpun do tambaga' om wansayan nori do poimpahan do tambaga' i' o wonsoyon. Om poilihon nori do hiri'd piolitan di Kiim om i pananaraban do porsombahan, om suangan nod waig. 19 Iri nopo waig diri om pongougan di Harun om i tangaanak dau do palad om lapap diyolo' 20 do tintod diyolo' do sumuang di Kiim ko' tintod do mongoi insomok di pananaraban do porsombahan do mongoi papatahak do porsombahan do taakanon. Om ondung owonsoi o miagal diri, om a' no iyolo' apatai. 21 Mositi' no dot ougan diyolo' o palad om lapap diyolo', om a' i' iyolo' apatai. Iti no o toturan dit apatut diyolo'd tonudon om tonudon di sinakagon diyolo' do gisom dot alaid,” ka dau.
I Tumau do Ponununtug
22 Om boros kad Tuhan dot id di Musa, 23 “Manganu no do rampa dit ongosonong kopio --- onom o kilo do mur dit alanggou, om tolu o kilo do kayu manis, om tolu o kilo do tobu dit osonong o kosingudan, 24 om onom o kilo do kayu di roitan do tija (timbangon ngai' nopo iti do tumanud di poninimbang di natantu' mantad.) Om ruhangan nori dot apat o lito do tumau do saitun, 25 om momonsoi nondo do tumau di ponununtug, do pogirolo-roloton do miagal do tumau dit osonong o kosingudan. 26 Om iri no i pinogirolo-rolot diri o pongumau di Kiim ku, om i Kaban do Tumpongo, 27 om i mija' om koinsanai di pakakas do hiri, om i potitimpakan do lampung om koinsanai di pakakas do hiri, om i mija' do podtutudan do kominyan, 28 om i pananaraban do porsombahan di sorobon om koinsanai di pakakas do hiri, om i mimpun om i poimpahan di mimpun. 29 Potobilangon ngai' nori do maan do doho'd songonuon dot iyo'ddi o kowoyo-woyoo' do popotobilang, om olidang ngai' indo iri. Om isai nopo ko' nunu nopo o koigit diri om orualan no dot oontok do kuasa' di kolidango'ddi. 30 Om tuntugan nu nogindo do tumau i Harun om i tangaanak dau, om pilion no iyolo' do sumiliu do imam di momonsoi do karaja' ku. 31 Om poboroson no o poingkaa dot id tulun dot Israil, ‘Iti nopo tumau do ponununtug dot olidang diti om mositi' no do pakayon do tontok do sumambayang dot id doho' do gisom dot alaid. 32 Iti nopo om a' i' koino-ino do potuntugon dot id isai nopo o tulun. Om a' i' koino-ino dot iri kasai' o pogirolo-roloton do momonsoi'd tumau do miagal diri. Iti nopo tumau'dti om olidang, om mositi' no dot olidang o pamamakai nu'dti. 33 Isai nopo i momonsoi do tumau do miagal diri, ko' i popotuntug diri dot id isai nopo o tulun dit okon ko' imam, om a' no kohompit do tulun ku,’ kanto,” ka dau.
I Kominyan
34 Om boros kad Tuhan dot id di Musa, “Manganu no do rampa diti dot iradon nopo o kogumuon do panganganu --- pulut do damar, om i kulit do lukan, om i pulut do kayu di roitan do rasamala om i kominyan dot aiso' o rolot. 35 Iri ngai' no o pogirolo-roloton do wonsoyon do kominyan, do poiyoon di tumau dit osonong o kosingudan. Om ruhangan nori do silaon om osonong kasai' i' iri om olidang. 36-37 Iri nopo wookon di pinogirolo-rolot diri om tutuon do gisom dot outok. Om igitan nondo iri do hiri'd Kiim ku om pasasadon no do hiri'd dotimbabaan di Kaban do Tumpongo. Om sorohon no kopio dot iri nopo kominyan diri om olidang kopio, om i pinotobilang do maan do doho'. Kada' panganu di pinogirolo-rolot diri do pomonsoi'd kominyan do sagalai'ddi do maan do dokoyu. 38 Isai nopo o momonsoi do pomowongi-wongi' do sagalai'ddi o wonsoyon, om a' no kohompit do tulun ku,” ka dau.
Tukang do Momonsoi di Kiim do Tuhan
1 Om boros kad Tuhan dot id di Musa, 2 “Nopili' ku no i Bisaliil, i tanak di Uri, i manangaki di Hur, i mantad id payat di Yohuda, 3 om noponu' ku no iyau do kuasa' ku. Noonuan ku no iyau do pomusorou dit atarom, om toilaan, om komiloo' do momonsoi do nunu nopo o buburuon --- 4 do momolukis do maan do poiyaan, i mokimoilo kopio do momonsoi, om wonsoyon nogindo i linukis diri do tamas, om pirok om tambaga' o wonsoyon; 5 om momolunau do watu dit agayo o gatang do maan podokoto'; om mongikir do kayu; om nunu nopo o buburuon di mokimoilo kopio do momonsoi. 6 Om nopili' ku nogi' i Oholiab i tanak di Ahisamak, i mantad id payat di Dan, do monguhup dau do kumaraja'. Om noonuan ku nogi' do toilaan dit aralom o koinsanai di tulun do suwai di monunukang, om koilo i' iyolo' do momonsoi do koinsanai di ponuhuan ku do momonsoi: 7 i Kiim ku, om i Kaban do Tumpongo om i sompon di Kaban, om koinsanai di pakakas do hiri'd Kiim, 8 om i mija' om koinsanai di pakakas do hiri, om i potitimpakan do lampung di tamas dot osompipi' o wonsoyon om i piro-piro o pakakas di lampung, om i mija' do podtutudan do kominyan, 9 om i pananaraban do porsombahan di sorobon om koinsanai di pakakas do hiri, om i mimpun om i pinoimpahan di mimpun, 10 om i pakayan di dong imam dit ongolumis, i pakayon di Harun om i tangaanak dau do tontok dot osiliu iyolo' do imam di momonsoi do karaja' ku, 11 om i tumau do ponununtug, om i kominyan dit osonong o kosingudan, i hirion id Bilik dit Olidang. Om soira' nopod momonsoi iyolo'dti, om poiyoon no kopio di pinonuhuan ku diya',” ka dau.
Sabat, i Tadau do Koundarangan
12 Om suhuo' nod Tuhan i Musa do 13 popoboros dot id tulun dot Israil do boros do poingkaa, “Poinggoyoon no o tadau'd Sabat, i tadau do natantu' ku do tadau do koundarangan. Tu' iri no o tanda' di tumpongo dot id pialatan ku om iyokoyu do gisom do poingompus, do popointalang dot iyoho' no i Tuhan, o minoniliu dokoyu do tulun ku. 14-15 Pusohon no kopio dokoyu o tadau do koundarangan diti tu' tadau dot olidang. Noonuan kou no dot onom o tadau do kakarajaan, nga' iri nopo tadau do koturu' om tadau dot agayo di pinotobilang do maan do doho'. Om isai nopo it a' momusou do tadau'ddi, om i kumaraja' do tontok do tadau'ddi, om hukuman no do kapatayon. 16 Mositi' no do poinggoyoon do tulun dot Israil o tadau'ddi do maan do tanda' di tumpongo toko'. 17 Tadau nopoddi om tanda' dit ogirot dot id pialatan ku om i tulun dot Israil, tu' iyoho' i Tuhan, nga' onom no tadau do minomonsoi do tawan om pomogunan. Om tontok di tadau do koturu' om tingkod oku no do kumaraja' om undorong oku no,” ka dau. 18 Om soira' di nokopongo o Kinorohingan do moro-boros dot id di Musa do hiri'd Nuluhon do Sinai, om patahako' no do Kinorohingan dot id di Musa i duwo o kaping do watu di pinotulisan do Kinorohingan do koinsanai di toturan diri.
I Sapi' do Tamas
1 Om tontok di nopurimanan di tulun dot Israil dot alaid noddi kopio om a' po i Musa nokoruhuk do mantad hiri'd nuluhon, om timungai no diyolo' i Harun, om boro-boros no iyolo' dot id dau do poingkaa, “A' toko' no oilaan ondung nunu o nosiliu dot id di Musa, i minomoyo' dati' do suminoliwan do mantad hilo'd Masir; nga' kainou, momonsoi toko' nogi' dot iso' o ponokokinorohingan di milo do momoyo' dati',” ka diyolo'. 2 Om boros kaddi di Harun dot id diyolo', “Iduwo' ngai' dokoyu o tanting do tamas di songimpakai do sawo om tangaanak dokoyu'd kusai om tondu', om ngoyon i' patahako' doho',” ka dau. 3 Om iduwo' ngai' nopoddi di tulun o tanting-anting diyolo', om ngoyo' no patahako' di Harun. 4 Om romito' ngai' nod Harun i tanting-anting diri, om lanako' no dau. Om potunguho' nogiddi dau dot id pomorunan, om kowonsoi noddi i tamas diri do miagal-agal do sapi'. Om boros kaddi di tulun dot ogumu', “Oi Israil, iti no i kinorohingan toko', i pinoposoliwan dati' do mantad hilo'd Masir!” ka diyolo'. 5 Om pomonsoi noddi i Harun dot iso' o pananaraban do porsombahan do hiri'd dotoguangan di sapi' do tamas diri, om poboroso' no dau dot id tulun dot ogumu' o poingkaa, “Suab nopondo om haro o poginakanan do maan do pomusou do Tuhan,” ka dau. 6 Om osuab poddi di tadau kawagu, om paatod no iyolo' do piro-piro o tayam-tayam do maan do porsombahan di sorobon om iri no suwai om akanon do maan do porsombahan do piombolutan. Om poginakan noddi i tulun dot ogumu', om minoginum iyolo' do gisom do nangaawuk om minogiampahu' iyolo'. 7 Om boros kad Tuhan dot id di Musa, “Ruhuk nogi' kopio do dinondo, tu' iri nopo tulun nu, i winoyo' nu do suminoliwan do mantad hilo'd Masir, om nokopomonsoi nod dusa om minagada' doho'. 8 Notongkiadan no diyolo' i ralan di pinotuduk ku do susuyon diyolo'; om nokopomonsoi no iyolo'd sapi' do tamas do linanak do minomonsoi. Om nokotuku' no iyolo' om nakapatahak do porsombahan dot id winonsoi diyolo'ddi. Om somboro-boros no iyolo' dot iri no i kinorohingan di pinoposoliwan diyolo' do mantad hilo'd Masir. 9 Oilaan ku no kopio o kokodoho' do ginawo do tulun diti. 10 Baino' nopo, om kada' oku no diya' oduhai. Tu' otogod oku no kopio diyolo', om patayon ku no iyolo'. Om silihon ku nogindo iya' om i sinakagon nu do bansa' dit agayo,” ka dau. 11 Nga' lugu-lugutai noddi di Musa o Tuhan, i Kinorohingan dau. Boros ka dau, “Oi Tuhan, nokuro tu' otogod kopio ko diti tulun nu, i pinoidu' nu do mantad hilo'd Masir dot i kokoriso' om i kuasa' nu o pinopoidu' nu diyolo'? 12 Tu' ondung patayon ngai' nu iyolo', om mimboros nondo i tulun do Masir do kinopononudan nu nopo diti tulun dot ogumu' do suminoliwan do mantad hilo'd Masir nga' ngoyon no patayo' do hiti'd konuluhanan, om opunso i' kopio iyolo'. Kada' kotogod, oi Tuhan. Posimbano' no o pomusorou nu om kada' kopio porikatai do kosusaan iti tulun nu. 13 Soroho' no i susuhuon nu, i Abraham, om i Isak om i Yakub. Om soroho' no do nakapamatos ko no dot id diyolo' do mikuwo'd sumpa' dot onuan nu iyolo' do sinakagon do miagal di rombituon do hilo'd tawan kogumu', om patahakon nu dot id sinakagon diyolo' o koinsanai di tana' di pinabatos nu do sumiliu do diyolo'd songonuon do gisom dot alaid,” ka dau. 14 Om posimbano' iddi do Tuhan o pomusorou dau, om a' iddi dau pinorikot i kosusaan di nokoboros dau'ddi dot id tulun dau. 15 Om ruhuk noddi i Musa di nuluhon, do kiinigit di duwo o kaping do watu, i pinotulisan do koinsanai dit oturan do Kinorohingan o hiri'd miampaping. 16 Om Kinorohingan i' o minomonsoi di watu'ddi om iyau nogi' o pinopokikir dit oturan do hiri'd watu. 17 Om tontok di rumuhuk no iyo Musa di Yosua, om korongou no di Yosua i tulun dot Israil do songgiak-giak, om boro-boros no iyau di Musa, “Haro ot orongou ku do miagal do giniakan do maso'd sumangod do hilo'd kokiiman,” ka dau. 18 Om boros ka di Musa, “A' i' miagal do pinongkisan do nakamanang o karangahan dilo' om a' miagal do giniakan di naala'; ilo' nopo om tulun i' do modsinding,” ka dau. 19 Om tontok dit osomok noddi i Musa di kokiiman om kokito no dau i sapi' do tamas om i tulun do sontari-tari'. Om kotogod tomod noddi iyau. Om podumpaho' no dau i watu di poingigit dau do hiri'd guas di nuluhon om kababak no i watu'ddi. 20 Om ngoyo' noddi dau i sapi' di winonsoi di tulun dot Israil, om lanako' no dau. Om tutuo' nogiddi do gisom do naapu, om tunguho' no dau do waig. Om suhuo' nogiddi dau i tulun dot Israil do monginum diri. 21 Om boro-boros no iyau di Harun, “Nunu kopio o winonsoi diti tulun dot id diya' tu' pinologos nu iyolo' do minomonsoi do dusa dot iyo kopio'dti kagayo?” ka dau. 22 Om boros ka di Harun do suminimbar, “Kada' kotogod doho'; tu' iya' nga' koilo i' dot iso-iso' no kopio o ginawo diti tulun do momonsoi'd araat. 23 Boros ka diyolo' dot id doho', ‘A' toko' no oilaan ondung nunu o nosiliu dot id di Musa, i minomoyo' dati' do suminoliwan do mantad hilo'd Masir; nga' kainou, momonsoi toko' nogi' do ponokokinorohingan di milo do momoyo' dati’ ka diyolo'. 24 Om suhuo' ku noddi iyolo' do papatahak ngai' dot id doho' di tamas diyolo', om isai nopoddi i haro o tamas om oluso' ngai' nopo diyolo' om patahako' no doho', om posuboo' ngai' ku no i tamas diri do hiri'd tapui, om kosiliu nopod miagal do sapi'!” ka dau. 25 Om kopurimanai noddi di Musa do pinologos di Harun i tulun dot Israil do miagal di kuda' do nokoidu' do mantad id kandang tu' a' no opusus-pusus, om gisom do nosiliu poddi iyolo'd koirakan di pisangod diyolo'. 26 Om ongoi noddi i Musa ingkakat do hiri'd dotimbabaan di wawayaan di kokiiman om pomoros no dot opuhod do poingkaa, “Isai nopo i tumanud do Tuhan, om kumaa nod hiti!” ka. Om ongoi ngai' nopo timung i payat do Liwi do hiri'd posorili' di Musa. 27 Om boros ka di Musa dot id diyolo', “Suhuon ngai' kou nopod Tuhan, i Kinorohingan dot Israil, do mangabil do gayang om mongoi tongkop diti kokiiman do mantad id wawayaan diti om gisom do hilo'd wawayaan di suwai, om patayon ngai' no i tobpinai dokoyu om i kongoombolutan om i songkoduwo dokoyu,” ka dau. 28 Om wonsoyo' noddi di payat do Liwi i pinonuhuan diri. Om tontok nopod tadau'ddi om haro i' o tolu noribu o tulun do pinatai. 29 Om boros ka di Musa dot id tulun di mantad id payat do Liwi, “Tadau nod baino' do tuminobilang kou do sumiliu do imam di momonsoi do karaja' do don Tuhan tu' napatai no dokoyu i tangaanak om i tobpinai dokoyu. Om barakatan kou indo do Tuhan,” ka dau. 30 Tadau noddi kawagu om boro-boros no i Musa dot id tulun dot Israil do poingkaa, “Nokowonsoi kou nod dusa dit agayo kopio. Nga' baino' nopo om tumakad oku po kawagu dilo nuluhon do mongoi solowot do Tuhan; om maha' daa om kaanu oku do koompunan do dusa dokoyu,” ka dau. 31 Om guli' noddi i Musa do minongoi solowot do Tuhan, om boro-boros no iyau do poingkaa, “Agayo no kopio o dusa do nowonsoi di tulun dot Israil. Tu' minomonsoi iyolo' do ponokokinorohingan do tamas o winonsoi, om tuminuku' iyolo' dot id ponokokinorohingan diri. 32 Pokionuon ku no kopio dot ompunan nu i dusa diyolo'; nga' ondung amu', om tonuson nopo o ngaran ku di nokotulis nu do hiri'd buuk di pinotulisan nu do ngaran do tulun nu,” ka dau. 33 Om boros kad Tuhan, “Iri no ngaran do tulun di nokowonsoi'd dusa dot id doho' o tonuson ku o ngaran dot id buuk ku. 34 Nga' pamanau nogi', om woyoon i' ilo tulun dot ogumu' do kumaa do hilo'd kinoiyonon di pinosunud ku diya'. Sorohon no do woyoon ko i' di moloikat ku, nga' rumikot no o maso do kopomohukuman ku di tulun diri dot i dusa diyolo' o kopomohukuman ku,” ka dau. 35 Om porikatai noddi do Tuhan do toruol i tulun dot ogumu', tu' minononsog i' iyolo' di Harun do minomonsoi di sapi' do tamas.
Sinuhu' do Tuhan i Tulun dot Israil do Tumongkiad di Nuluhon do Sinai
1 Om boros kaddi do Tuhan dot id di Musa, “Mositi' no do tumongkiad ko om koinsanai di tulun di winoyo' nu do mantad hilo'd Masir, do kinoiyonon diti, om mongoi kou do hilo'd pomogunan di pinabatos ku dot id di Abraham, om id di Isak om id di Yakub, om id sinakagon diyolo'. 2 Om suhuon ku indo i moloikat ku do momoyo' dokoyu. Om uyungon ku indo i tulun do Kanaan, om Amori, om Hit, om Poris, om Howi om Yobus. 3 Om kumaa kou nondo dot id iso' o pomogunan di kaya' om oluhub. Nga' a' oku i' iyoho' moyo' dokoyu, tu' obinsurilog kopio kou i' koulun, om ooris oku dot araag ku iyokoyu do hilo'd tanga'd ralan,” ka dau. 4-6 Om tontok di nokorongou i tulun dot ogumu' di boros do Tuhan diri, om timpuun no iyolo' do minihad. Om sinuhu'd Tuhan i Musa do popoboros dot id diyolo' do poingkaa, “Iyokoyu no o tulun dit obinsurilog kopio. Ondung moyo' oku daa dokoyu dot ongoruhai piya, nga' aayi' ku no doti' iyokoyu do mamatai. Nga' iduwo' ngai' nogi' dokoyu ino pongillumis dokoyu'd tinan dokoyu om momusorou oku nogindo ondung nunu o wonsoyon ku dot id dokoyu,” ka dau. Om di nopoddi di nokotongkiad i tulun dot Israil do mantad hilo'd Nuluhon do Sinai, om a' noddi iyolo' manampakai di poingillumis do tinan.
I Kiim do Tuhan
7 Soira-ira' nopo do popowonsoi i tulun dot Israil do kiim diyolo', om ngoyon no di Musa i Kiim dit Olidang, om powonsoyon no dau do hiri'd sodu-odu' di kokiiman diyolo'. Iri nopo kiim diri nga' rinoitan do Kiim do Tuhan. Om isai nopo ot orohian do mokianu do nosihat do Tuhan om mongoi nod hiri. 8 Tontok nopo di mongoi i Musa dot id Kiim diri, om mingkakat ngai' nopo i tulun do hiri'd wawayaan di kiim diyolo' om sumonsod nopo di Musa do gisom do kosuang iyau di Kiim. 9 Kosuang pondo i Musa, om sumondot no i haun di poorigi om mundorong nod hiri'd wawayaan di Kiim. Om moro-boros nondo o Tuhan do mantad hiri'd haun dot id di Musa. 10 Om okito pondo di tulun dot ogumu' i haun do poorigi do hiri'd wawayaan di Kiim, om motud ngai' no iyolo' do tumuku'. 11 Om tumimbaba' nopo o Tuhan do moro-boros di Musa, do miagal po di tulun do monokiboro-boros do tambalut dau. Om gumuli' nondo i Musa do hiri'd kokiiman. Nga' i Yosua nopo, i tanak di Nun, i tanakwagu do mongunguhup di Musa, om tumimporon i' do hiri'd Kiim.
Minamatos o Tuhan do Momoyo' di Tulun Dau
12 Insan o tadau om boro-boros no i Musa dot id Tuhan do poingkaa, “Otopot nogi' do sinuhu' oku diya' do momoyo' diti tulun do kumaa dot id pomogunan di pinabatos nu'ddi, nga' a' ko i' minomisunud ondung isai o suhuon nu do momoyo' doho'. Om nokoboros nu no do kotutun kopio ko doho' om kohubayaan oku diya'. 13 Iyo nopoddi, om sunudai oku daa di natantu' mantad nu do wonsoyon nu, om kopomonsoi oku i' di karaja' nu, om koposonong kasai' oku do ginawo nu. Om sorohon no do nopili' nu no o bansa' diti do sumiliu do diya'd songonuon,” ka dau. 14 Om boros kad Tuhan, “Woyoon ku i' iyokoyu, om onuan ku iyokoyu do kamanangan,” ka. 15 Om boros ka di Musa do suminimbar, “Ondung a' ko tumanud dahai, om kada' no iyahai pologoso' do tumongkiad do kinoiyonon diti. 16 Poingkuro daa'ndo o tulun do koilo dot ohubayaan ko diti tulun nu om ohubayaan ko doho', dot a' ko moyo-woyo' dahai? Tu' iri no i hino ko dot id pogialatan dahai o kopisuayan dahai di bansa'd suwai do hiti'd pomogunan,” ka dau. 17 Om boros kad Tuhan dot id di Musa, “Wonsoyon ku i' ino pokionuon nu tu' otutunan tiya' i' kopio om kohubayaan ku iya',” ka. 18 Om boros kaddi di Musa do minokianu, “Pokitono' oku po daa di tulinau do koropohon nu di kosorong kopio,” ka. 19 Om boros kad Tuhan do suminimbar, “Tumalib oku indo dot id toguang nu do mikuwo'd toinsanan di kagayaan ku, om poboroson ku nondo i ngaran ku dit olidang. Iyoho' no o Tuhan, om popointalang oku i' do kosianan om kolisihan dot id tulun di pilion ku. 20 A' ku indo pokitanan diya' o rabas ku, tu' aiso' no ot apasi di kokito do rabas ku. 21 Nga' haro i' iti tontolob do hiti'd toning ku dot ingkokoton nu. 22 Om soira' nopo do tumalib i tulinau ku di kosorong kopio, i tanda' do nakarapou oku, om posuangon ku nondo iya' dot id piolitan dilo tontolob om tirungon ku iya' do palad ku do gisom do katalib oku. 23 Om iduwon ku nogindo o palad ku om kokito ko indo do tinolikudon ku nga' a' ko no kokito do rabas ku,” ka dau.
Duwo o Kaping do Watu do Wagu
1 Om boros kad Tuhan dot id di Musa, “Manganu nod duwo o kaping do watu om sangkapon no do poiyoon dit id gulu, om tulisan ku i' iri di boros di pinotulis do hiri'd watu dit id gulu, i binabak nu'ddi. 2 Kosuabon nopod suab om mositi' nod kosodia' ko no, om tumakad no do hilo'd Nuluhon do Sinai do mongoi solowot doho' do hilo'd dimpak. 3 Om iso' pod tulun nga' aiso' i' o koino-ino do moyo' diya' do tumakad; om kada' nod haro o tulun do mongoi do hinonggo nopo do hiri'd nuluhon diri; om a' koino-ino do haro o dumba' ko' sapi' do mangakan-ngakan do hiri'd guas di nuluhon,” ka. 4 Om panganu noddi i Musa do duwo o kaping do watu om sangkapo' no dau. Om osuab po di tadau kawagu om igitai no dau i watu'ddi do tuminakad di Nuluhon do Sinai, do tumanud di pinonuhuan do Tuhan. 5 Om rikot no o Tuhan dot id rolot do haun, om ingkakat no do tuminalad di Musa, om poboroso' no dau i ngaran dau dit olidang, iri no i Tuhan. 6 Om talib noddi o Tuhan do hiri'd dotoguangan di Musa om boro-boros no dot opuhod do poingkaa, “Iyoho' no o Tuhan, i Kinorohingan do poimponu' do kosianan om kolisihan, it a' obintogod, om i pointalang do kosianan om kotorodoko'. 7 Bayaanon ku i' i batos ku dot id piro-piro noribu o sinakagon om mangampun oku do karaaton om dusa; nga' a' oku i' kolihu do momohukum di tangaanak om i manangaki diyolo' do gisom do korikot di sinakagon di kointolu om koingapat dot i dusa di molohing diyolo' o kopomohukuman ku,” ka dau. 8 Om olomus nopo i Musa do minotud do tuminuku'. 9 Om boros ka dau, “Oi Tuhan, ondung ohubayaan kopio ko doho' om pokionuon ku no daa iya' do momoyo' dahai. Obinsurilog no daa kopio iti tulun, nga' ompunai no o kararaat om dusa dahai, om romito' no iyahai do sumiliu'd tulun nu,” ka.
Ninwoguan i Tumpongo
10 Om boros kad Tuhan dot id di Musa, “Baino' nopodti, om momonsoi oku do tumpongo dot id tulun dot Israil. Om momonsoi oku nondo do piro-piro koimayaan dit a' po nowonsoi do honggo nopo do hiti'd pomogunan dot id pogialatan do nunu nopo o bansa' do tulun. Om oinsanan nopondo o tulun do kokito do kogoyoo' di koimayaan di wonsoyon ku, iyoho' i Tuhan, o momonsoi di koronob kopio dot id dokoyu. 11 Tonudon no it oturan do patahakon ku dokoyu do tadau'd baino'. Uyungon ku indo i tulun dot Amori, om Kanaan, om Hit, om Poris, om Howi, om tulun do Yobus, do rumikot kou do mongoi sangod diyolo'. 12 Kada' kou pomonsoi do pitoruan dot id tulun do hilo'd pomogunan di ngoyon dokoyu, tu' osiliu i' moti'ndo iri do lawa' di kapatai dokoyu. 13 Om kada' kou no kopio pomonsoi do miagal diri, suwai ko' raagon nogi' dokoyu i poiyanan diyolo' do porsombahan, om habaon ngai' i torigi di ponokotingolig diyolo' om tagadon ngai' i torigi dot Asira, i ponokokinorohingan diyolo'. 14 Kada' kou tuku' dot id kinorohingan do suwai, tu' iyoho' nopo, i Tuhan, om a' i' orohian do haro o mongoi ponokiiyo-iyo doho'. 15 Kada' kou pomonsoi do pitoruan dot id tulun do pomogunan diri. Tu' soira' nopo do mongoi iyolo' tuku' di ponokokinorohingan diyolo' om di papatahak iyolo' do porsombahan di sumbolion, om alapon kou nondo diyolo' do mongoi amung diyolo', om abayayat kou nondo do mangakan di taakanon di nokosubak diyolo' dot id tingolig diyolo'. 16 Om mangawin doti'ndo i tangaanak dokoyu'd kusai di kosumandakan do bansa'd suwai, i mamayayat diyolo' dot a' tumorodok dot id doho' om tumuku' dot id ponokokinorohingan diyolo'. 17 Kada' kou pomonsoi om kada' kou tuku' do tingolig di basi' do winonsoi. 18 Poinggoyoon no dokoyu i Tadau'd Agayo do Roti dit A' Kipangambang. Mangakan kou no do roti dit aiso' o pangambang do solinaid do turu' o tadau do tontok di tulan dot Abib, do miagal di pinonuhuan ku. Tu' tulan noddi do tuminongkiad kou do mantad hilo'd Masir. 19 Pointikid-tikid do tanak do kusai dit id gulu kosusu, om i tontoluhan do tayam-tayam dokoyu dit id gulu kosusu, om doho' ngai' no. 20 Nga' bolion i' kawagu dokoyu o pointikid-tikid di tontoluhan do kaladai dit id gulu kosusu, do pomoli nopo om tanak do dumba' do patahakon do maan do porsombahan. Ondung a' dokoyu bolion kawagu i kaladai, om tipuon no o liou'ddi. Bolion no dokoyu kawagu o koinsanai di tanak dokoyu'd kusai dit id gulu kosusu. Iso' pod tulun nga' aiso' i' o koino-ino do mongoi rapou doho' dot aiso' no o porsombahan dot igitan. 21 Noonuan kou no dot onom o tadau do kakarajaan dokoyu, om kada' kou no karaja' do tontok di tadau'd koturu', do dongmamaradu piya daa ko' dongmongomot nga' kada' kou no kopio karaja'. 22 Poinggoyoon no dokoyu i Tadau dot Agayo do Dongmongomot do tumimpuun kou do mongomot di tua' do gandum dokoyu dit id gulu koonsok. Om ramayon no dokoyu i Tadau dot Agayo do Kinuhub-Kuhub do motingkaayi' o toun, di mongupu' kou do tua-ua'. 23 Intolu do sontoun do mositi' nod rumikot ngai' i kokusayan dokoyu do mongoi sambayang dot id doho', i Tuhan, i Kinorohingan dot Israil. 24 Ouyung ngai' ku nopondo i bansa'd suwai, it id doburuan dokoyu, om koinggayo ku o pomogunan dokoyu, om aiso' nondo o mumbal do mongoi panangod do pomogunan dokoyu do tontok do mamaramai kou di tolu o poginakanan diri. 25 Kada' kou papatahak do roti di rinalatan do pangambang do tontok do papatahak kou di tayam-tayam do maan do porsombahan dot id doho'. Kada' kou no poolu' do nunu nopo o popot di tayam-tayam di sinumbali' do tontok do Tadau'd Agayo do Paska do gisom do kosuabon. 26 Paatod kou no di gandum di gulu dokoyu koomot do hilo'd Walai'd Sasambayangan dot Agayo, do pointikid do toun. Kada' kou pogonsok do dumba' ko' kambing dit okoro' po, dot i gatas di molohing dau o pongonsok,” ka. 27 Om boros kad Tuhan dot id di Musa, “Tulison no i boros diri, tu' iri no i boros diri o poimpahan ku do tumpongo di wonsoyon ku dot id diya' om id tulun dot Israil,” ka. 28 Om undorong noddi i Musa do hiri do poinsugku'd Tuhan do solinaid dot apat nohopod o tadau om apat nohopod o totuong. Om solinaid nopoddi om a' i' iyau minakan om a' mininum. Om tuliso' no dau do hiri'd watu di ponunulisan i boros di tumpongo, iri no i Hopod o Toturan do Kinorohingan.
Ruminuhuk i Musa di Nuluhon do Sinai
29 Tontok di ruminuhuk i Musa di Nuluhon do Sinai do kiinigit di Hopod o Toturan, om mogulinau nopo o rabas dau tu' nokoponokiboro-boros no iyau'd Tuhan; nga' a' i' dau oilaan do mogulinau o rabas dau. 30 Om ontong no di Musa i Harun om koinsanai di tulun, om kokito no diyolo' do mogulinau o rabas di Musa. Om ooris diri iyolo' do mongoi insomok dau. 31 Nga' lohowo' nod Musa iyolo', om ongoi noddi i Harun om i piro-piro o boyoon dot Israil insomok di Musa. Om boro-boros no i Musa diyolo'. 32 Om timung ngai' nogiddi i tulun dot Israil do posorili' di Musa. Om poboroso' ngai' no di Musa diyolo' it oturan di pinatahak do Tuhan dot id dau di hilo'd Nuluhon do Sinai. 33 Om kopongo poddi i Musa do moro-boros diyolo', om tirungo' no dau do kulu o rabas dau. 34 Om soira' nopo do sumuang i Musa di Kiim do Tuhan do mongoi boro-boros do Tuhan, om iduwon no dau i kulu do pointirung do rabas dau. Om sumoliwan nopondo iyau, om posunudon ngai' no dau i boros do Tuhan dot id tulun dot Israil, 35 om okito no diyolo' do mogulinau i rabas dau. Om potirungon no kawagu di Musa i kulu dot id rabas dau do gisom dot orikot kawagu i kaangayan dau kabara-barasai do Tuhan.
Oturan do Pasal do Tadau'd Sabat
1 Om lohowo' no di Musa o koinsanai di tulun dot Israil, om boro-boros no iyau diyolo' do poingkaa, “Iti no o ponuhuan do Tuhan do wonsoyon dokoyu! 2 Koino-ino kou i' do kumaraja' do solinaid dot onom o tadau, nga' iri nopo tadau'd koturu' om tadau dit olidang, i tadau do koundarangan, om i tadau do nokotobilang do don Tuhan. Isai nopo o kumaraja' do tontok do tadau di koturu' om hukuman no do kapatayon. 3 Magapui piya do hiri'd walai dokoyu nga' a' i' koino-ino do tontok do tadau'd Sabat,” ka dau.
Porsombahan do Pomonsoi di Kiim dot Olidang
4 Om boros kad i Musa dot id toinsanan di tulun dot Israil, “Iti no o ponuhuan do Tuhan. 5 Papatahak kou nod porsombahan dot id Tuhan. Om isai nopo it orohian do manahak do porsombahan, om patahak nod tamas, om pirok, ko' tambaga', 6 ko' kain linan dit osonong, ko' i kain do kihulu-hulu dit otomou, om aragang doitom-itom, om aragang ko' i kain do hulu do kambing o winonsoi; 7 om i kulit do dumba' do tontoluhan di sinasakan dot aragang om i kulit dot osonong om i kayu di roitan dot akasia, 8 om tumau do ponuang do lampung; om rampa do pomorolot di tumau di ponununtug om i pomorolot di kominyan dit osonong o kosingudan; 9 om i watu dot agayo o gatang di roitan do delima, om i watu'd suwai dot angagayo o gatang do podokoton do hiri'd ipod, om hiri'd lokop do kangkab di Boyoon dot Agayo dot Imam,” ka dau.
Pakakas di Kiim do Tuhan
10 Om boros ka kawagu'd Tuhan dot id di Musa, “Mositi' no do rumikot ngai' i tulun dit ongoilo do monukang dit id pogialatan dokoyu, do mongoi pomonsoi do koinsanai di pinonuhuan do Tuhan, iri no: 11 i Kiim, om i taap di Kiim om i ponokop do ponong id soibau, i piro-piro o pangait, om i papan di poturidongon, om i tukod di potibabaron, om i pongorigi di wawayaan, om i posungkadan do torigi; 12 om i Kaban do Tumpongo, om i kayu do pagantayang di Kaban, om i ponompon di Kaban, om i tabir di ponirung di Kaban; 13 om i mija', om i kayu do pagantayang di mija', om koinsanai di pakakas di mija', om i roti di patahakon do maan do porsombahan dot id Kinorohingan; 14 om i potitimpakan do lampung do maan do ponitiu om koinsanai di pakakas do hiri; om koinsanai di lampung do mitonggoi di tumau di lampung; 15 om i mija' do podtutudan do kominyan om i kayu do pagantayang di mija'; om i tumau do ponununtug; om i kominyan dit osonong o kosingudan; om i tabir di wawayaan di Kiim; 16 om i pananaraban do porsombahan di sorobon do mitonggoi di pinangabot di tambaga' do winonsoi, om i kayu do pagantayang di pananaraban do porsombahan, om koinsanai di pakakas do suwai, om i mimpun di pongougan, om i pinoimpahan di mimpun; 17 om i tabir do pomorinding di natad, om i torigi om i posungkadan di torigi, om i tabir di wawayaan do hiri'd natad; 18 om i pamagapit om i tali di Kiim om i pomorinding di natad; 19 om i pakayan dit ongolumis di piro-piro o imam, i pakayon diyolo' do tontok do momonsoi'd karaja' ku do hiri'd Bilik dit Olidang, om i pakayon di dong imam do pakayon di Harun om i tangaanak dau,” ka dau.
Pinaatod di Tulun dot Israil i Porsombahan Diyolo'
20 Om pamanau ngai' no i tulun dot Israil do tuminongkiad di niyonon diyolo' do tuminimung. 21 Om isai nopoddi i notingkau o ginawo do papatahak do porsombahan, om minongoi no paatod do porsombahan dot id Tuhan do pomonsoi di Kiim do Tuhan. Om igit ngai' nopo iyolo' do koinsanai di pakayon do sumambayang om i wonsoyon do pakayan do imam. 22 Om isai nopoddi it orohian do manahak, do tongokusai om tongoondu', nga' minigit ngai' nopo do piin di maan do pomolumis, om tanting-anting, om pondulung, om karo, om mogisuayan nopo o bansa' do tamas di maan do pomolumis, om patahako' no diyolo' iri dot id Tuhan. 23 Pointikid-tikid do tulun di haro o kain linan dit osonong, om kain di kihulu-hulu dot otomou, om aragang doitom-itom om aragang, om kain di hulu do kambing do winonsoi, om kulit do dumba' do tontoluhan di sinasakan dot aragang, ko' kulit dit osonong, nga' pinapatahak ngai' nopoddi. 24 Om koinsanai'd tulun di haro o pirok ko' tambaga' nga' minigit ngai' nopo do pinatahak dot id Tuhan. Om koinsanai'd tulun di haro o kayu di roitan dot akasia, di milo'd powonsoyon nga' pinapatahak nogi'. 25 Om oinsanan nopo i tongoondu' dit ongoilo do mangawol do minigit do banang di tiningkor diyolo' dot it opurak dit atandai om i banang dot asalau dit otomou, om aragang doitom-itom, om it aragang. 26 Om minomonsoi nogi' iyolo' do banang do hulu do kambing o winonsoi. 27 Om iri no i piro-piro o boyoon om pinapatahak do watu dit agayo o gatang di roitan do delima om piro-piro o watu dot agayo o gatang do suwai ko' iri do podokoton do hiri'd ipod om hiri'd lokop do kangkab. 28 Om minigit nogi' iyolo' do rampa om tumau do ponuang di lampung, om tumau di ponununtug, om kominyan dit osonong o kosingudan. 29 Om oinsanan nopo i tulun dot Israil dot angagaan ngai' o ginawo do pinapatahak di porsombahan diyolo' dot id Tuhan do pomonsoi di pinonuhuan do Tuhan do pinolombus di Musa.
Piro-Piro Tukang do Momonsoi di Kiim do Tuhan
30 Om boros kad Musa dot id tulun dot Israil, “Nopili' nod Tuhan i Bisaliil, i tanak di Uri, i manangaki di Hur, i mantad id payat do Yohuda. 31 Noponu' no iyau'd Kinorohingan do kuasa' dau, om noonuan dau iyau do toilaan, om komiloo' do kumaraja', om pomusorou dit obinsuhut do momonsoi'd nunu nopo o buruon, 32 om momolukis do maan do poiyaan di mokimoilo kopio do momonsoi, om powonsoyon nogindo i linukis diri dot id pirok om id tambaga'; 33 om momolunau di watu dit agayo o gatang do maan podokoto', om mongikir do kayu, om nunu nopo o buburuon di mokimoilo kopio do momonsoi. 34 Om noonuan nogi' do Tuhan i Bisaliil om i Oholiab, i tanak di Ahisamak, i mantad id payat di Dan, do toilaan do monuduk do tulun do suwai di komilaan diyolo'd momonsoi. 35 Om noonuan no iyolo'd Tuhan do toilaan do momonsoi do nunu nopo o buburuon do tulun dit oilo do manangkap do watu, om i mongingikir, om i mangangawol do kain linan dit osonong, om i kain do kihulu-hulu dit otomou, om aragang doitom-itom, om it aragang, om piro-piro o bansa'd kain do suwai. Milo ngai' nopo iyolo' do momonsoi do nunu nopo o buburuon di mogisuayan om ongoilo iyolo' do momolukis do maan do poiyaan.
1 I Bisaliil no, om i Oholiab, om koinsanai di tukang di nongoonuan do Tuhan do toilaan om pomusorou dit obinsuhut, it ongkoilo do momonsoi do koinsanai di gunaon do pomonsoi di Kiim do Tuhan. Om iyolo' no o momonsoi do koinsanai'ddi do tumanud di pinonuhuan do Tuhan,” ka.
Pinapatahak o Tulun dot Israil dot Ogumu' o Porsombahan
2 Om lohowo' no di Musa i Bisaliil, om i Oholiab, om koinsanai di tukang do suwai, i noonuan do Tuhan do komilaan om it ongorohian do muhup, om suhuo' nod Musa iyolo' do tumimpuun do kumaraja'. 3 Om karamit no diyolo' do mantad id di Musa o koinsanai di pinatahak di tulun dot Israil do pomonsoi di Kiim dot Olidang. Nga' monikid kosuabon kasai' po i tulun dot Israil do mongoi papatahak di patahakon diyolo' dot id di Musa. 4 Om ongoi ngai' no i tukang di maso do kumaraja', 5 solowot di Musa om posunudo' no diyolo' di Musa o poingkaa, “Ogumu' no ko' mantad di gunaon o nakatahak diti tulun, do pomonsoi di pinonuhuan do Tuhan do momonsoi,” ka. 6 Om poboroso' noddi di Musa dot id pointongkop di kokiiman dot a' no minog do haro o papatahak kawagu do pomonsoi di Kiim dot Olidang; om a' noddi pinapaatod do porsombahan i tulun dot Israil. 7 Iri nopo nangkaatod om talib no do kabagal do pomongo do koinsanai di wonsoyon.
Minomonsoi di Kiim do Tuhan
8 Id pogialatan nopo di tukang diri, om iri no tukang dit ongoilo kopio o minomonsoi di Kiim do Tuhan. Winonsoi nopo diyolo'd Kiim om hopod o bidang do kain linan dit osonong, i piniawol do kain di kihulu-hulu dot otomou, om it aragang doitom-itom, om it aragang. Om rinindaan iri do pinoiyo- iyo do moloikat di roitan do kerub. 9 Oirad nopo i bidang do kain: hopod om duwo mito do konoruo' om duwo mito do kalaabo'. 10 Om pogitombir-tombiro' no diyolo' i limo o bidang di kain, om iso' poddi o kinotombiran, om i limo kawagu bidang nga' niyo iddi. 11 Om wansayai no diyolo' do posuluhan do kain dit otomou o winonsoi, o hiri'd tompok di ponong id soibau di duwo o kinotombiran do kain diri. 12 Om padakatai no diyolo' do limo nohopod o posuluhan i kinotombiran do kain di koiso', 13 om limo i' nohopod o posuluhan do pinodokot di kinotombiran do kain di koduwo, mipasang diri i duwo o kinotombiran di kain. 14 Om pomonsoi nogiddi iyolo' do tokop di Kiim diri do hopod om iso' o bidang do kain di hulu do kambing o winonsoi. 15 Om oirad nopo o pinomonsoi diyolo'ddi: hopod om tolu o mito do konoruo' om duwo o mito do kalaabo'. 16 Om pogitombir-tombiro' no diyolo' i limo o bidang diri, om iri nogi' it onom o bidang do noolu' nga' pinogitombir-tombir i'. 17 Om wansayai no diyolo' do limo nohopod o posuluhan o hiri'd tompok di kinotombiran di kain di koiso', om limo nohopod o posuluhan do pinodokot do hiri'd tompok di kinotombiran di kain di koduwo. 18 Om pomonsoi no iyolo' do limo nohopod o pangait do tambaga' o winonsoi do popiromut di duwo o kinotombiran di kain diri om kopisangkayu i' do maan do tokop. 19 Om duwo po o tokop do suwai do winonsoi diyolo'. Iso' nopo om kulit do dumba' do tontoluhan di sinasakan dot aragang o winonsoi, om iri no tiso' om kulit dit osonong o winonsoi do maan do tokop di posoibahon. 20 Om wonsoyo' no diyolo' i padakatan di Kiim do papan do kayu di roitan dot akasia o winonsoi, om pinoturidong diyolo' iri do pinopowonsoi. 21 Kasawato' nopo do pointikid-tikid di papan diri om apat o mito, om kalaabo' no om onom nohopod om onom o sontimito. 22 Om kinakalan ngai' do duwo o kokol di mituma' i papan, om milo indo do piromuton i papan. Om kinakalan ngai' nopo do miagal diri o koinsanai di papan. 23 Duwo nohopod o papan do pinowonsoi diyolo' do pinoturidong dot id disan ponong id salatan di Kiim, 24 om apat nohopod o posungkadan, do pirok do winonsoi, do posungkadan di papan, om iso' nopo o papan om pinosungkad do duwo o posungkadan di misusun, om oinggiratan i' i piniromutan di kokol. 25 Om duwo nohopod o papan do pinowonsoi diyolo' do pinoturidong dot id disan ponong id utara di Kiim, 26 om apat nohopod o posungkadan, do pirok do winonsoi; om iso' nopo o torigi om pinosungkad do duwo o posungkadan di misusun. 27 Om ponong id tolikud no di Kiim diri, it id somputul ponong id kotonobon, om pinawansayan diyolo' dot onom o papan di pinoturidong, 28 om duwo o papan do pinowonsoi do pointikid di linsuk. 29 Iri nopo papan di ponong id linsuk om piniromut o hiri'd siriba' om gisom do koompus do hiri'd sawat. Om niyo goduwo nopoddi i duwo o linsuk di pinawansayan di duwo o papan. 30 Om walu'ddi o papan om hopod om onom o posungkadan do pirok do winonsoi; om iso' nopo o torigi om pinosungkad do duwo o posungkadan di misusun. 31 Om pomonsoi po iyolo' do hopod om limo o tukod di potibabar do kayu di roitan dot akasia o winonsoi, om limo o pinodokot di papan di pinoturidong do hiri'd sampaping di Kiim, 32 om limo o pinodokot di papan di pinoturidong di hiri'd dosompopingan kawagu, om limo o pinodokot di papan di hiri'd somputul ponong id kotonobon, i hiri'd dolikudan di Kiim. 33 Iri nopo tukod di potibabar di hiri'd tanga-tanga', i pinodokot do hiri'd piintangaan di papan, om poindapit nopo di papan di ponong id rombu di Kiim. 34 Om urogupai no diyolo' do tamas i papan di songinturidong om winansayan do posusukan do tamas o winonsoi, do maan do posusukan di tukod di songintibabar, i nurogupan i' do tamas. 35 Om pomonsoi no iyolo' do tabir do kain linan dit osonong, i piniawol do kain di kihulu-hulu dot otomou, om aragang doitom-itom, om it aragang do winonsoi, om rindaai no do pinoiyo-iyo do moloikat di roitan do kerub. 36 Om pomonsoi no iyolo' dot apat o torigi do kayu di roitan dot akasia o winonsoi, do potoidan di tabir. Om urogupai no diyolo' iri do tamas, om padakatai nod pangait do tamas do winonsoi. Om pomonsoi no iyolo' dot apat o posungkadan di torigi do pirok o winonsoi, do ponginggirot di torigi. 37 Om wansayai no diyolo' do tabir i wawayaan di Kiim do kain linan dit osonong o winonsoi, i piniawol do kain di kihulu-hulu dot otomou, om aragang doitom-itom, om it aragang, om rinindaan do minomolumis. 38 Om pomonsoi no iyolo' do limo o torigi di pinadakatan do pokoitan do tabir, i dinakatan do pangait om nurogupan do tamas o hiri'd dompok ponong id sawat di torigi om i pinomoloting. Om iri no limo o posungkadan di torigi om tambaga' do winonsoi.
Winonsoi i Kaban do Tumpongo
1 Om wonsoyo' no di Bisaliil i Kaban do Tumpongo do kayu di roitan dot akasia o winonsoi. Konoruo' nopo di Kaban diri om hatus om hopod o sontimito, om kalaabo' no om onom nohopod om onom o sontimito, om kasawato' no om onom nohopod om onom o sontimito. 2 Om urogupai no dau do tamas di nosompipi' ot id suang om id soibau di Kaban diri, om nisanan dau do tamas o posorili'. 3 Om minomonsoi nogi' iyau dot apat o tontolingo do tamas o winonsoi, do posusukan di pagantayang. Om podokoto' no dau iri do hiri'd apat o gakod di Kaban, do sopiduwo o tontolingo do hiri'd miampaping di Kaban. 4 Om pomonsoi no iyau do kayu do pagantayang do kayu di roitan dot akasia o winonsoi, om urogupai no dau do tamas iri. 5 Om posusuko' no dau di tontolingo di hiri'd miampaping di Kaban i pagantayang. 6 Om pomonsoi no iyau do sompon do tamas dit osompipi' o winonsoi. Konoruo' nopo di sompon om hatus om hopod o sontimito, om kalaabo' no om onom nohopod om onom o sontimito. 7 Om pomonsoi po iyau do duwo o koiyo-iyo do moloikat di roitan do kerub, do tamas di tinantan o winonsoi, 8 do piniomputul di sompon di Kaban. Om pinomonsoi nopo dau'ddi nga' pinasagalai di sompon. 9 Om mitimbaba' i duwo o koiyo-iyo do moloikat di roitan do kerub do hiri'd miomputul di sompon, om poungkalad do pointokop di sompon i talad di koiyo-iyo do moloikat di roitan do kerub.
Winonsoi i Mija' do Poiyanan di Roti do Patahakon do Kinorohingan
10 Om pomonsoi no i Bisaliil do mija' do kayu di roitan dot akasia o winonsoi. Konoruo' nopo di mija'ddi om walu' nohopod om walu' o sontimito, om kalaabo' no om apat nohopod om apat o sontimito, om kasawato' no om onom nohopod om onom o sontimito.1|75|HK76F| Mija' do pasakayan di roti do porsombahan|37.10 11 Om urogupai no dau i mija'ddi do tamas dit osompipi' om oligo' no do tamas o hiri'd mitingisan. 12 Om isanai no dau o pointutuk di mija'ddi do turu' nohopod om limo o milimito do kalaabo'. Om oligo' no dau do tamas o pointutuk di pinongisan di mija'ddi. 13 Om pomonsoi no iyau dot apat o tontolingo do tamas do maan do posusukan di pagantayang om podokoto' no do hiri'd apat o sunduk, it id sawa-sawat di gakod di mija'. 14 Om iri nopo tontolingo di posusukan di kayu do pagantayang di mija'ddi om pinodokot do hiri'd toning di pinongolig di pinongisan. 15 Om iri nopo kayu di pagantayang om kayu di roitan dot akasia o winonsoi om nurogupan iri do tamas. 16 Om winonsoi nogi' dau i pakakas di mija'ddi, do tamas dit osompipi' o winonsoi: piring, om sangkir, om kakanan, om mangkuk di pakayon do papatahak do waig dot anggur do maan do porsombahan.
Winonsoi i Potitimpakan do Lampung
17 Om wonsoyo' no di Bisaliil i potitimpakan do lampung do tamas dit osompipi' o winonsoi. Iri nopo puun om i guas di lampung diri om tamas di tinantan o winonsoi. Iri nopo bunga di pinongillumis, do pinoiyo-iyo do tusak dit a' po noungkalad om i tusak di noungkalad nga' pasagalai nopo di guas di potitimpakan di lampung. 18 Om haro ot onom o raan do hiri'd guas di potitimpakan do lampung, do sopitolu o miampaping. 19 Om pointikid-tikid dit onom o raan diri om winansayan ngai' nopo do tolu o koiyo-iyo do tusak do maan do pongillumis, do pinoiyo-iyo do tusak di kayu do roitan do badam, dot it a' po noungkalad om i noungkalad no. 20 Om iri nopo guas di potitimpakan do lampung diri om winansayan dot apat o bunga di pongillumis do pinoiyo-iyo do tusak do kayu di roitan do badam dit a' po noungkalad om i noungkalad no. 21 Om hiri nopod puun do pointikid-tikid di tolu o raan do miampaping diri om haro ot iso' o koiyo-iyo do tusak dit a' po noungkalad. 22 Iri ngai' nopo i tusak dit a' po noungkalad om i raan, om i potitimpakan do lampung diri om iso' no o watang do tamas di tinantan do winonsoi. 23 Om minomonsoi iyau do turu' o lampung do potimpakon di potitimpakan do lampung, om minomonsoi po iyau do sanggip om talam, do tamas dit osompipi' o winonsoi. 24 Om naayi' nopo dau do pinomonsoi di potitimpakan do lampung diri om koinsanai di pakakas do hiri, om tolu nohopod om limo kilogram do tamas dit osompipi'.
Winonsoi i Mija' do Podtutudan do Kominyan
25 Om pomonsoi no i Bisaliil do mija' do maan do podtutudan do kominyan, do kayu di roitan dot akasia o winonsoi. Om apasagi' o pinomonsoi di mija' do podtutudan diri; do konoruo' nopo om apat nohopod om limo o sontimito, om apat i' nohopod om limo o sontimito do kalaabo', om kasawato' no om siam nohopod o sontimito. Om pasagalai nopo di mija' i sinangau-sangau di hiri'd apat o sunduk di mija'ddi.1|75|HK78B| I pananaraban do porsombahan|37.25 26 Om urogupai no dau do tamas dit osompipi' i hiri'd sakai, om hiri'd misingobik om hiri'd misingompok, om i sinangau-sangau di mija'. Om oligo' po dau do tamas o mitingisan di mija'ddi. 27 Om pomonsoi no iyau do duwo o tontolingo do tamas, om podokoto' no do hiri'd siriba-riba' di pinongolig di mitingisan, do hiri'd miampaping di mija', do maan do posusukan di kayu do pagantayang di mija'. 28 Iri nopo kayu di pagantayang om kayu di roitan dot akasia o winonsoi, om nurogupan po dau iri do tamas.
Winonsoi i Tumau do Ponununtug om i Kominyan
29 Om minomonsoi po i Bisaliil do tumau di ponununtug om i kominyan dit osonong o kosingudan, i pinogirolo-rolot do miagal di tumau dit osonong o kosingudan.
Winonsoi i Pananaraban do Porsombahan di Sorobon
1 Om pomonsoi no i Bisaliil do pananaraban do porsombahan di sorobon do kayu di roitan dot akasia o winonsoi. Om apasagi' o pinomonsoi'ddi, do 2.2 mito do konoruo' om 2.2 mito do kalaabo', om 1.3 mito do kasawato'. 2 Om pinasagalai dau di pananaraban do porsombahan o pinomonsoi di sinangau-sangau di hiri'd apat o sunduk dit id sakai di pananaraban do porsombahan. Om nurogupan ngai' dau iri do tambaga'. 3 Om winonsoi nogi' dau o koinsanai di pakakas di pananaraban do porsombahan: piro-piro poriuk, om sikup, om piro-piro mangkuk, om piro-piro totodok, om poiiyanan do tapui. Koinsanai'dti om tambaga' ngai' nopo do winonsoi. 4 Om pomonsoi no iyau do pangabot do tambaga' o winonsoi, om pooboto' no do hiri'd kopiintangaan do kasawato' di pananaraban do porsombahan, dot id siriba' di kabang di pananaraban do porsombahan. 5 Om pomonsoi no iyau dot apat o tontolingo om podokoto' no do hiri'd apat o sunduk di pananaraban do porsombahan. 6 Om iri nopo kayu di pagantayang om kayu di roitan dot akasia o winonsoi, om nurogupan dau iri do tambaga'. 7 Om posusuko' nogiddi dau di tontolingo do hiri'd miampaping di pananaraban do porsombahan i kayu do pagantayang. Iri nopo pananaraban do porsombahan diri om papan do winonsoi, om kiguang o hiri'd tanga'.
Winonsoi i Mimpun do Tambaga'
8 Om wonsoyo' no di Bisaliil i mimpun do tambaga', om i pinoimpahan di mimpun nga' tambaga' i' do winonsoi. Iri nopo tambaga' do pinomonsoi'ddi om i pogotulan i' daa di tongoondu' di maganu-anu do hiri'd wawayaan di Kiim do Tuhan.
Rinding di Kiim do Tuhan
9 Om rindingo' no di Bisaliil o posorili' di natad di Kiim do Tuhan. Pinomorinding nopo dau om kain linan dit osonong do winonsoi'd tabir. Konoruo' nopo di tabir dit id disan ponong id salatan om apat nohopod om apat o mito, 10 do tinukod do duwo nohopod o torigi do tambaga' di poinsungkad do duwo nohopod o posungkadan di tambaga' do winonsoi, do mitonggoi di pangait om i loting di pirok do winonsoi. 11 Om iyo iddi o winonsoi do hiri'd disan ponong id utara. 12 Id bombong ponong id kotonobon no, om tinobiran do duwo nohopod om duwo mito do konoruo', om pinawansayan do hopod o papan di pinoturidong do poinsungkad do hopod o posungkadan, om mitonggoi di pangait om i loting, i pirok do winonsoi. 13 Om i hiri'd bombong ponong id koulayon, i kiwawayaan, nga' duwo i' nohopod om duwo o mito do kalaabo' di pinomorinding. 14-15 Hiri nopod miampaping di wawayaan om tinobiran do tabir dit 6.6 o mito do konoruo', om norigianan do tolu o torigi do poinsungkad do tolu o posungkadan. 16 Koinsanai di tabir di pinomorinding di natad om kain ngai' nopod linan dit osonong o winonsoi. 17 Iri nopo pinosungkadan di torigi om tambaga' do winonsoi, om iri no pangait om i loting om i ponulob di tompok di torigi om pirok ngai' nopo do winonsoi. Om pinogiromu-romut i torigi di pointutuk di natad dot i loting do pirok o pinopogiromu-romut. 18 Iri nopo tabir di wawayaan di pinomorinding di natad om kain linan dit osonong o winonsoi, i piniawol do kain di kihulu-hulu dot otomou, om it aragang doitom-itom, om it aragang; om rinindaan iri. Konoruo' nopo di tabir diri om siam o mito, om kasawato' no om duwo o mito; do pinoiyo di pinomorinding di natad. 19 Iri nopo tabir diri om tinukod dot apat o torigi do poinsungkad dot apat o posungkadan. Iri nopo pangait, om i pinonulob di torigi, om i pinomoloting om pirok ngai' nopo do winonsoi. 20 Nga' iri nopo gapit di Kiim om gapit di pinomorinding om tambaga' i' do winonsoi.
I Pakakas dit Ongokodou o Winonsoi do Pinakai do Hiri'd Kiim do Tuhan
21 Iti no o dopitar do kogumuo' di pakakas dit ongokodou o winonsoi do pinakai do hiri'd Kiim do Tuhan, i pinoiyanan di duwo o kaping do watu di pinotulisan di Hopod ot Oturan do Kinorohingan. Minonuhu' nopo do momonsoi di dopitar diri om i Musa, om minomonsoi nopoddi om i tulun do Liwi. Om woyoon nopo di tulun do Liwi do minomonsoi'ddi om i Itamar, i tanak di Harun. 22 Om wonsoyo' ngai' nopo di Bisaliil, (i tanak di Uri, i manangaki di Hur, i mantad id payat di Yohuda), o koinsanai di pinonuhuan do Tuhan. 23 I Oholiab nopo, i monguhup di Bisaliil, i tanak di Ahisamak, i mantad id payat di Dan, om mongingikir, om momolukis do maan do poiyaan, om mangangawol do kain linan dit osonong, om kain di kihulu-hulu dot otomou om aragang doitom-itom om it aragang. 24 Koinsanai nopo di tamas di pinatahak dot id Tuhan do pomonsoi di Kiim dot Olidang om soribu o kilogram do kawagato', do tinimbang do tumanud di poninimbang di natantu' mantad. 25 Iri nopo pirok do naanu do mantad id pinongintaban di tulun dot Israil om tolu noribu om apat nahatus om tolu nohopod o kilogram do kawagato', do tinimbang do tumanud di poninimbang di natantu' mantad. 26 Kogumuon nopo di naanu'ddi om irad di kogumuo' do pinabayar do koinsanai di tulun di nokointob dot id pinongintaban. Iso' nopo o tulun om mambayar dot irad di pambayar di natantu' mantad, om timbangon di poninimbang di natantu' mantad. Nokohompit nopo dot id pinongintaban diri om onom nahatus om tolu noribu, om limo nahatus om limo nohopod o tongokusai di duwo nohopod o toun ko' it id sawat ko' iri o tumur. 27 Iri nopo pirok diri, om tolu noribu om apat nahatus o kilogram do pinakai do pinomonsoi di hatus o posungkadan do torigi di Kiim dit Olidang om i tabir, do tolu nohopod om apat o kilogram do pinomonsoi do pointikid-tikid di posungkadan. 28 Om iri nopoddi tolu po nohopod o kilogram do pirok do noolu', om winonsoi di Bisaliil do panakong, om pangait do podokoton di torigi, om i pinosulob do hiri'd dompok di torigi. 29 Kogumuon nopo di tambaga' do pinatahak dot id Tuhan om duwo noribu om apat nahatus om duwo nohopod om limo kilogram. 30 Om iri no tambaga'ddi o pinakai do pinomonsoi di pinosungkadan do hiri'd wawayaan di Kiim do Tuhan, om i pananaraban do porsombahan om i pangabot di pananaraban diri, om koinsanai di pakakas do hiri'd pananaraban do porsombahan, 31 om i pinosungkadan di pinangansar di natad, om i wawayaan di natad, om koinsanai di gapit di Kiim om i tabir di pinomorinding do pointutuk di Kiim.
Winonsoi i Pakayan do dong Imam
1 Om wonsoyo' no diyo Bisaliil di Oholiab i pakayan do dong imam dit ongolumis, i papakayon di imam do tontok do maganu-anu iyolo' do hiri'd Bilik dit Olidang. Om wonsoyo' no diyolo' i pakayan di Harun di dong imam do tumanud di pinonuhuan do Tuhan dot id di Musa. Winonsoi nopo diyolo' do pakayan di dong imam diri om i kain do kihulu-hulu dit otomou, om aragang doitom-itom om aragang. 2 Om wonsoyo' no diyolo' it ipod do kain linan dit osonong, om i kihulu- hulu dit otomou, om it aragang doitom-itom, om it aragang, om banang do tamas, o winonsoi. 3 Om tantano' no diyolo' o piro-piro kaping do tamas om pogiridi-ridiso' no do soronipi-nipis do winonsoi do banang dit atandai. Om poowolo' nogiddi iri di kain linan dot osonong, om i kain do kihulu-hulu dit otomou, om aragang doitom-itom om it aragang. 4 Om winansayan diyolo'd duwo o togiis o hiri'd miampaping di ponong id lihawa dit ipod, do pinodokot do hiri'd ponong id disan, om milo i' do pikogoson. 5 Om iri nogi' i tagkos dit atandai o pinangawol nga' sagalai i' di kain do winonsoi dot ipod o kain do winonsoi, om podokoto' no do hiri'd ipod i tagkos om misagalai nopoddi, do miagal di pinonuhuan do Tuhan dot id di Musa. 6 Om lunaho' noddi diyolo' i watu dot agayo o gatang, i watu do roitan do delima, om podokoto' no di padadakatan di tamas do winonsoi. Om pokikiro' noddi diyolo', dot osonong kopio o pinopokikir i ngaran di hopod om duwo o tangaanak di Yakub do hiri'd piro-piro o watu dit angagayo o gatang diri. 7 Om podokoto' nogiddi i piro-piro o watu dit angagayo o gatang diri do hiri'd togiis do lihawa dit ipod do ponokowakil di hopod om duwo o payat dot Israil, do miagal di pinonuhuan do Tuhan dot id di Musa.
Winonsoi i Lokop do Kangkab
8 Om wonsoyo' no diyo Bisaliil di Oholiab i lokop do kangkab. Om kain nopo do winonsoi diyolo'ddi om sagalai i' di winonsoi dot ipod, om pinomorinda' nga' piagalo' nopo. 9 Pinomonsoi nopo di lokop do kangkab om apasagi' om pinilapis. Konoruo' nopo om duwo nohopod om duwo o sontimito, om kalaabo' nga' duwo i' nohopod om duwo o sontimito. 10 Om dakatai no diyolo' i lokop do kangkab diri dot apat o rulud do watu dit angagayo o gatang. Hiri nopod rulud do koiso' om dinakatan do watu di roitan do delima, om topas, om garnit. 11 Hiri nod rulud do koduwo om dinakatan do watu di roitan do samrud, om nilam om mutiara'. 12 Hiri nod rulud do kotolu om dinakatan do watu di roitan do lasuardi, akik, om kecubung. 13 Hiri nod rulud do kaapat om dinakatan do watu di roitan do pirus, yakut, om ratna cempaka. Om pinodokot ngai' nopori dot id padadakatan, di tamas do winonsoi. 14 Om pointikid-tikid di hopod om duwo o watu'ddi nga' kinikiran ngai' nopo do ngaran di tangaanak di Yakub --- iso' nopo o watu om iso' no o ngaran do pinokikir --- do ponokowakil di hopod om duwo o payat dot Israil. 15 Om minomonsoi pod rantai do tamas dit osompipi' o winonsoi, om pinitabid diri do miagal do tali. 16 Om pomonsoi po iyolo' do duwo o pondulung do tamas do pinodokot do hiri'd sunduk ponong id sawat di lokop do kangkab. 17 Om iri nopo duwo o tompok di rantai'ddi om pinosulung do hiri'd duwo o pondulung, 18 om iri no duwo kawagu o tompok di suwai om pinokogos di padadakatan do watu dit agayo o gatang, om poingkogos di togiis do lihawa dit ipod. 19 Om pomonsoi po kawagu iyolo' do duwo o pondulung do tamas do pinodokot do hiri'd sunduk ponong id siriba' di lokop do kangkab, do hiri'd lupi di ponong id saalom, i pointopis dit ipod. 20 Om pomonsoi po kawagu iyolo' do duwo o pondulung do tamas do pinodokot do ponong id siriba' di duwo o togiis di posoibau, i ponong id lihawa dit ipod, do hiri'd topis di lupi o pinadakatan, i hiri'd sawa-sawat di tagkos dit atandai o pinangawol. 21 Om pitokongo' noddi diyolo' i pondulung di lokop do kangkab om i pondulung dit ipod, do tali dit otomou o pinanakong, om id sawat kasai' indo di tagkos i lokop do kangkab, om a' i' iri tumatak.
Winonsoi i Pakayan do Dong Imam di Suwai
22 Om iri nopo rasuk dot anaru dit osoibahan dit ipod om kain ngai' nopo di kihulu-hulu dit otomou o winonsoi. 23 Om hiri nopod tisan di liou di rasuk om nawol do minongisan do pinomogirot, om a' no oruhai dot ohurak. 24-26 Om pointutuk nopo do tompok di rasuk om pinadakatan do pongillumis di pinoiyo-iyo do tua' do kayu di roitan do delima do kain linan dit osonong o winonsoi, om i kain do kihulu-hulu dit otomou, om aragang doitom-itom, om aragang; om piniolot-olot do giring do tamas do pinopodokot do tumanud di pinonuhuan do Tuhan do pinolombus di Musa. 27 Om pomonsoi no iyolo'd rasuk do pakayon di Harun om i tangaanak dau, 28 om minomonsoi nogi' iyolo' do sigar, om tupi', om soluar dot oniba' do kain linan o winonsoi, 29 om tagkos do kain linan dit osonong, om kain di kihulu-hulu dot otomou, om aragang doitom-itom, om it aragang o winonsoi. Om rinindaan po diyolo' iri do miagal di pinonuhuan do Tuhan dot id di Musa. 30 Om pomonsoi po iyolo' do pongillumis do tamas dit osompipi' o winonsoi, do tanda' do nokotobilang no iyolo' do sumiliu do don Tuhan do songonuon. Om kikirai no diyolo' i pongillumis diri do boros do poingkaa, “Pinotobilang do maan do don Tuhan,” ka. 31 Om pokogoso' no diyolo' iri do hiri'd sigar do hiri'd ponong id duros, do tali dit otomou o pinongogos, do miagal di pinonuhuan do Tuhan dot id di Musa.
Nopongo i Buruon
32 Om kopongo ngai' noddi i buruon do hiri'd Kiim do Tuhan. Om nowonsoi no di tulun dot Israil iri do tumanud di pinonuhuan do Tuhan dot id di Musa. 33 Om ngoyo' noddi diyolo' pootodo' dot id di Musa i Kiim om koinsanai di pakakas di Kiim; i pangait, om i tukod di potibabaron, om i papan di poturidongon, om i posungkadan di papan; 34 om i ponokop, i kulit do dumba' do tontoluhan do winonsoi, i sinasakan dot aragang, om i tokop, i kulit dit osonong do winonsoi; om i tabir do pinomorinding di Bilik dit Olidang Kopio; 35 om i Kaban do Tumpongo, i pinoiyanan di duwo o kaping do watu om i sukud do pagantayang om i sompon di Kaban, 36 om i mija' om koinsanai di pakakas do hiri, om i roti di patahakon do maan do porsombahan dot id Kinorohingan; 37 om i potitimpakan do lampung di tamas dot osompipi' do winonsoi, om i piro-piro o lampung, om koinsanai di pakakas di lampung, om i tumau do ponuang di lampung; 38 om i poiyanan do porsombahan di tamas do winonsoi, om i tumau do ponununtug, om i kominyan dit osonong o kosingudan, om i tabir di wawayaan di Kiim, 39 om i pananaraban do porsombahan do mitonggoi di pinangabot, i tambaga' do winonsoi, om i kayu do pagantayang, om koinsanai di pakakas di pananaraban do porsombahan; om i mimpun do pongougan om i poimpahan di mimpun, 40 om i tabir do pomorinding di natad, om i torigi om i posungkadan di torigi, om i tabir di wawayaan di natad om i tali, om i gapit di Kiim, om koinsanai di pakakas do pakayon do hiri'd Kiim; 41 om i pakayan do dong imam dit ongolumis, i pakayon diyolo' do hiri'd Bilik dot Olidang, om i pakayan di Harun di dong imam om i pakayan di tangaanak dau. 42 Om nowonsoi ngai' no di tulun dot Israil i buruon diri do tumanud di pinonuhuan do Tuhan dot id di Musa. 43 Om sorisido' no di Musa do minogontong o koinsanai'ddi, om kokito no dau dot iyo ngai' nopo di pinonuhuan do Tuhan o pinomonsoi diyolo'ddi. Om barakatai noddi di Musa iyolo'.
Pinopowonsoi om Sinambayangan i Kiim do Tuhan
1 Om boros kad Tuhan dot id di Musa, 2 “Powonsoyon no i Kiim ku do tontok do tadau do koiso' do tulan di koiso'. 3 Posuangon nod hiri'd Kiim i Kaban do Tumpongo, i kisuang di Hopod ot Oturan, om porindingon no i tabir do hiri'd dotimbabaan di Kaban. 4 Posuangon no i mija' om pasakayon ngai' nod hiri i pakakas do pointonggoi'ddi. Om posuangon nondo i potitimpakan do lampung om potimpakon ngai' i lampung do hiri. 5 Poiyonon no i mija' do tamas di podtutudan do kominyan do hiri'd dotimbabaan di Kaban do Tumpongo. Om porindingon no i tabir do hiri'd wawayaan di Kiim. 6 Iri nopo pananaraban do porsombahan di sorobon om hirion id dotimbabaan di Kiim. 7 Iri nopo mimpun do pongougan om hirion id piolitan di Kiim om i pananaraban do porsombahan. Om suangan nod waig i mimpun. 8 Powonsoyon no i pomorinding di natad om porindingon no i tabir do hiri'd wawayaan di natad. 9 Om patahakon no do maan do porsombahan dot id doho' o koinsanai di pakakas di Kiim. Om ralan nopo do papatahak diri om tuntugan di tumau di ponununtug, om kotobilang indo ngai' iri do maan do doho'. 10 Om patahakon no dot id doho' i pananaraban do porsombahan om koinsanai di pakakas do pointonggoi'ddi. Ralan nopo do papatahak diri om tuntugan do tumau, om kotobilang indo ngai' iri do maan do doho'. 11 Om iyo iddi o papatahak di mimpun do pongougan om i poimpahan di mimpun. 12 Om suhuon nondo i Harun om i tangaanak dau do mongoi do hiri'd wawayaan di Kiim, om suhuon iyolo' do modsu' do tumanud dit oturan do don tugama'. 13 Om rosukan nondo i Harun di pakayan do dong imam, om tuntugan no iyau do tumau. Iyo noddi o wonsoyon nu om kotobilang i' iyau do sumiliu do imam do momonsoi'd karaja' ku. 14 Angatan no i tangaanak di Harun om porosukan no diyolo' i rasuk. 15 Om tuntugan nondo iyolo' di tumau do miagal di pinonuntug nu di tapa' diyolo', om osiliu i' iyolo' do imam di momonsoi do karaja' ku. Om iri no i tinuntugan iyolo' do tumau o poposiliu diyolo' do imam do gisom dot alaid,” ka dau. 16 Om wonsoyo' ngai' nopo di Musa o miagal diri do tumanud di pinonuhuan do Tuhan. 17 Om tontok di tadau do koiso' di toun do koduwo do mantad di suminoliwan iyolo' do mantad hilo'd Masir, om powonsoyo' noddi i Kiim do Tuhan. 18 Om poiliho' no di Musa i posungkadan, om poturidongo' no i papan di poturidongon, om posusuko' no i ponukod di potibabaron. 19 Om potokopo' no dau di Kiim i ponokop di Kiim, om takapai no kawagu dau i tokop di posoibahon. 20 Om ngoyo' nogiddi dau i duwo o kaping do watu om posuango' no di Kaban do Tumpongo. Om posusuko' no dau i kayu do pagantayang do hiri'd tontolingo di Kaban, om posompono' no dau i sompon di Kaban. 21 Om posuango' noddi dau i Kaban do Tumpongo do hiri'd Kiim, om porindingo' no dau i tabir. Om iyo noddi o ralan do monirung di Kaban do Tumpongo do tumanud di pinonuhuan do Tuhan dau. 22 Om posuango' no dau i mija' do hiri'd Kiim, do hiniri'd ponong id utara, dot id soliwan di tabir. 23 Om pasakayo' no dau di mija' i roti di patahakon do maan do porsombahan dot id Tuhan. 24 Om posuango' no dau di Kiim i potitimpakan do lampung, om poiliho' no do hiri'd ponong id salatan, do pinahapak di mija'. 25 Om tutudai no dau i lampung do hiri'd kinoiyonon di Koropohon do Tuhan. 26 Om posuango' no dau do hiri'd Kiim i mija' do tamas, do pinohiri'd dotimbabaan di tabir, 27 om tutudai no dau i kominyan dit osonong o kosingudan do miagal di pinonuhuan do Tuhan dot id di Musa. 28 Om porindingo' no dau i tabir do hiri'd wawayaan di Kiim, 29 om poiliho' no dau i pananaraban do porsombahan di sorobon do hiri'd dotimbabaan di tabir. Om patahako' noddi i porsombahan do sorobon om i porsombahan do gandum do hiri'd sakai di pananaraban do porsombahan. 30 Om poiliho' no dau i mimpun do pongougan do hiri'd piolitan di Kiim om i pananaraban do porsombahan, om suangai no dau do waig i mimpun. 31 Om ougan kasai' nopo di Musa, om i Harun, om i tangaanak di Harun o palad om lapap diyolo' do hiri, 32 do soira' nopo do sumuang iyolo' di Kiim dot Olidang, ko' mongoi insomok di pananaraban do porsombahan. 33 Om hiri nopod posorili' di Kiim om i pananaraban do porsombahan om rininding dau, om tinobiran dau o hiri'd wawayaan di natad. Om kopongo ngai' noddi i buruon.
Luminikup i Haun di Kiim do Tuhan
34 Om sondot noddi o haun do minomolikup di Kiim dot Olidang om koponu' nopo i Kiim do tulinau di kosorong tomod, i tanda' do nakarapou o Tuhan. 35 Om gowoi poddi om a' i Musa milo do sumuang di Kiim. 36 Om soira' nopod minsawat i haun di hiri'd Kiim dot Olidang, om hiyason no di tulun dot Israil i kokiiman diyolo', om kumaa nondo iyolo' dot id kinoiyonon do suwai. 37 Ondung hiri kasai'd sawa-sawat di Kiim dot Olidang i haun diri om hiri kasai' po iyolo'd pinomukiiman diyolo'. 38 Om solinaid nopo di tulun dot Israil do mombo-hombo, om okito kasai' nopo i tanda' do nakarapou o Tuhan do hiri'd sawa-sawat di Kiim diri, do kokitanan nopo do dangadau om miagal do haun, om kokitanan no do dongotuong om miagal do tapui di molob-ngolob.
Porsombahan di Sorobon
1 Om lohowo' nod Tuhan i Musa do suminuang di Kiim do Tuhan om onuwai no dau i Musa do piro-piro ot oturan 2 di mositi' nod tonudon di tulun dot Israil do tontok do papatahak iyolo' do porsombahan di sumbolion. Tontok nopo do papatahak o tulun do tayam-tayam do maan do porsombahan di sorobon, om koino-ino i' iyau do patahak do sapi', ko' dumba', ko' kambing dau. 3 Ondung sapi' o patahakon dau do maan do porsombahan, om mositi' no dot i sapi' do tontoluhan, om it aiso' o bohiton do tinan. Om mositi' no do hiri'd wawayaan di Kiim do Tuhan o paatadan dau'ddi, om kohubayaan i' iyau do Tuhan. 4 Om mositi' no do pakabayon di tulun o longon dau do hiri'd sakai di tulu di tayam-tayam diri, om romiton indo do Tuhan i porsombahan diri do maan do porsombahan do pangampun do dusa do tulun diri. 5 Om mositi' no do sumbolion di tulun i sapi'ddi do hiri'd dotimbabaan di wawayaan di Kiim dot Olidang. Om iri nopondo raha' di sapi' om patahakon dit imam di suminolusuk di Harun, dot id Tuhan, om potiyason nogindo do hiri'd misingobik om hiri'd misingompok di pananaraban do porsombahan, do hiri'd toning di wawayaan di Kiim dot Olidang. 6 Om mositi' no dot iduwon di tulun o kulit di tayam-tayam diri om popoton. 7 Om mositi' no do pouludon dit imam i siduwon do hiri'd sakai di pananaraban do porsombahan om opuyan nogindo diyolo'.1|60|HK78A| Imam|1.7 8 Om mositi' no do posuboon diyolo' do hiri'd tapui i popot di tayam-tayam di sinumbali'ddi, om potonggoyon nogi' i tulu om i lunok di tayam-tayam. 9 Om mositi' no dot ougan di sanganu i suang do tian om i gakod di tayam-tayam diri, om sorobon nogindo dit imam di maso do maganu-anu o koinsanai di porsombahan di sinumbali'ddi do hiri'd pananaraban do porsombahan. Om iri no tawau di porsombahan do taakanon diri o kasanangan do Tuhan. 10 Ondung dumba' ko' kambing o patahakon do maan do porsombahan, om mositi' nod tontoluhan, om it aiso' o bohiton do tinan. 11 Om mositi' nod sumbolion di sanganu i tayam-tayam diri do hiri'd toning di tisan di pananaraban do porsombahan do ponong id utara. Om poiyason nogindo dit imam i raha' di tayam-tayam diri do hiri'd misingobik om hiri'd misingompok di pananaraban do porsombahan. 12 Om aayi' nopondo di tulun do momopot i tayam-tayam diri, om posuboon ngai' nondo dit imam di maganu-anu i popot diri, do mogitonggoi-tonggoi di tulu om i lunok, do hiri'd tapui. 13 Om mositi' no dot ougan di sanganu i suang do tian om i gakod di tayam-tayam diri, om patahakon nogindo dit imam iri dot id Tuhan, om sorobon ngai' nopondo do hiri'd sakai di pananaraban do porsombahan. Om iri no tawau di porsombahan do taakanon diri o kasanangan do Tuhan. 14 Ondung tombolog o patahakon di tulun do maan do porsombahan di sorobon, om mositi' no do sikukur ko' punai. 15 Om mositi' no dot igitan dit imam i tombolog diri do hiri'd pananaraban do porsombahan, om uritoson nondo o liou di tombolog, om sorobon nogindo i tulu do hiri'd pananaraban do porsombahan. Om mositi' no do poiyason dau i raha' di tombolog diri do hiri'd misingobik om hiri'd misingompok di pananaraban do porsombahan. 16 Om mositi' no dot iduwon dau i ludukan om i suang di ludukan di tombolog diri, om pataamon nogindo do hiri'd tisan di pananaraban do porsombahan do ponong id koulayon, i hiri'd patataaman do tauu. 17 Om mositi' no dot igitan dau o hiri'd guas di palapa' di tombolog diri do momohukata' di tinan, nga' kada' pondo do kotobilang i palapa'. Om mositi' no do songkoyuon i tombolog do monorob do hiri'd pananaraban do porsombahan. Om iri no tawau di porsombahan do taakanon diri o kasanangan do Tuhan.
Porsombahan do Gandum
1 Ondung haro o tulun do papatahak do gandum do maan do porsombahan dot id Tuhan, om mositi' no do tutuon po dau i gandum diri do gisom dot aapung. Om tunguhon nogindo do tumau'd saitun i tapung om sakayan do kominyan o hiri'd soibau. 2 Om igitan nondo iri do hiri'd imam di suminolusuk di Harun. Om manu nondo it imam do maso do maganu-anu do songonggom di tapung do mitonggoi di tumau do saitun om insanan nopo i kominyan, om sorobon nondo iri do hiri'd sakai di pananaraban do porsombahan. Om iri no o tanda' do nakatahak ngai' no i porsombahan diri dot id Tuhan. Om iri no tawau di porsombahan do taakanon diri o kasanangan do Tuhan. 3 Iri nopondo i noolu' di porsombahan do gandum diri om iri no it imam o kaanu. Iri nopo gandum diri om olidang no kopio, tu' nanu i' do mantad id taakanon di nakatahak dot id Tuhan. 4 Ondung roti di nonsok dot id pagagansakan o maan do porsombahan, om mositi' no dot i roti dit a' naralatan do pangambang. Om songkoino id akapal piya o pomomonsoi di roti, dot i tapung di rinalatan do tumau do saitun o wonsoyon; om songkoino nogi' dot onipis piya o pomomonsoi di roti, i gihilan nod tumau'd saitun. 5 Ondung roti di linugu do hiri'd pomoluguan o maan do porsombahan, om mositi' no dot i tapung di rinalatan do tumau do saitun o wonsoyon, it a' rinalatan do pangambang. 6 Om tontok nopo do patahakon i roti'ddi do maan do porsombahan om mositi' no do mumukon po om tuntugan nogindo do tumau'd saitun. 7 Ondung i roti do nonsok dot id poriuk o maan do porsombahan, om mositi' no do tapung om tumau do saitun o wonsoyon do roti'ddi. 8 Om igitan no i roti'ddi do maan do porsombahan dot id Tuhan, om patahakon no dit imam. Om iri nondo it imam o mongigit di roti'ddi do hiri'd pananaraban do porsombahan. 9 Om onuon nondo dit imam o wookon di roti'ddi do maan do tanda' do nakatahak ngai' iri dot id Tuhan. Om sorobon nondo dau i roti'ddi do hiri'd pananaraban do porsombahan. Om iri no tawau di porsombahan do taakanon diri o kasanangan do Tuhan. 10 Om iri nopondo i noolu' di porsombahan diri om iri no it imam o kaanu. Iri nopo roti'ddi om olidang no kopio, tu' nanu i' do mantad id taakanon di nakatahak do maan do porsombahan dot id Tuhan. 11 Kada' no kopio ralatai do pangambang ko' paha' o nunu nopo i taakanon do patahakon dokoyu dot id Tuhan. 12 Om mositi' no do manu kou do wookon di gandum dit id gulu koomot do pointikid do toun, om igitan nori do maan do porsombahan dot id Tuhan. Nga' iri nopo gandum om a' i' sorobon do hiri'd pananaraban do porsombahan. 13 Pointikid-tikid di porsombahan do gandum om mositi' no do ralatan dokoyu do silaon, tu' iri no silaon o tanda' di tumpongo dot id pialatan dokoyu om Kinorohingan. (Mositi' no do ralatan dokoyu do silaon o koinsanai di porsombahan dokoyu.) 14 Soira' nopo do papatahak kou do porsombahan dot id Tuhan dot i gandum dit id gulu koomot o patahakon, om igitan no i gandum di nolugu no ko' i nowonsoi nod tapung. 15 Om mositi' nod tuntugan do tumau do saitun i gandum om sakayan do kominyan o hiri'd soibau. 16 Om sorobon nondo dit imam o wookon di gandum om i tumau'ddi, om insanan nopo i kominyan, do sumiliu do tanda' do nakatahak ngai' iri dot id Tuhan do maan do porsombahan do taakanon.
Porsombahan do Piombolutan
1 Tontok nopo do papatahak do sapi' ot isai nopo o tulun, do maan dau do porsombahan do piombolutan, do tontoluhan ko' tondu' i sapi'ddi om mositi' no dot it aiso' o bohiton do tinan. 2 Om mositi' no do pakabayon di sanganu o longon dau do hiri'd sakai di tulu di sapi'ddi. Om sumbolion nogindo dau i sapi'ddi do hiri'd wawayaan di Kiim do Tuhan. Om potiyason nondo dit imam di suminolusuk di Harun i raha' di sapi' do hiri'd misingobik om hiri'd misingompok di pananaraban do porsombahan. 3 Om mositi' no do patahakon dot id Tuhan iti piro-piro o bohogian di sapi'ddi do maan do porsombahan do taakanon: i linuap di songinsokot di suang do tian, 4 om i lusou-lusou do pitonggoyon di linuap, om i bohogian di tundu-undu' dit osonong kopio. 5 Om tutudan ngai' nopondo dit imam iri do hiri'd pananaraban do porsombahan do mitonggoi di porsombahan do sorobon di suwai. Om iri no tawau di porsombahan do taakanon diri o kasanangan do Tuhan. 6 Ondung dumba' ko' kambing o maan do porsombahan do piombolutan, om koino-ino i' do tontoluhan ko' tondu' i tayam-tayam diri, nga' mositi' no dot aiso' o bohiton do tinan. 7 Tontok nopo do haro o tulun do papatahak do dumba' do maan do porsombahan, 8 om mositi' no do pakabayon dau o longon dau do hiri'd sakai'd tulu di dumba', om sumbolion nogindo iri do hiri'd dotimbabaan di Kiim dot Olidang. Om poiyason nondo dit imam i raha' di dumba'ddi do hiri'd misingobik om hiri'd misingompok di pananaraban do porsombahan. 9 Om mositi' no do patahakon dit imam dot id Tuhan iti piro-piro o bohogian di dumba' do maan do porsombahan do taakanon: i lunok di dumba', om oinsanan i tikiu di kilunok, do pamatod nopo di tikiu om porotopon nopo, om i linuap di songinsokot di suang do tian, 10 om i lusou-lusou om pitonggoyon di linuap, om i bohogian di tundu-undu' dit osonong kopio. 11 Om mositi' no do sorobon dit imam di maso do maganu-anu o koinsanai'ddi do hiri'd sakai di pananaraban do porsombahan, do maan do porsombahan do taakanon dot id Tuhan. 12 Ondung kambing o patahakon do maan do porsombahan, 13 om mositi' no do pakabayon di sanganu o longon dau do hiri'd sakai'd tulu di kambing. Om sumbolion nondo dau i kambing diri do hiri'd dotimbabaan di Kiim do Tuhan. Om mositi' no do poiyason dit imam i raha' di kambing do hiri'd misingobik om hiri'd misingompok di pananaraban do porsombahan. 14 Om iti ngai' no o bohogian do tinan di kambing do patahakon dit imam do maan do porsombahan do taakanon dot id Tuhan: oinsanan i linuap di songinsokot di suang do tian, 15 om i lusou-lusou do mitonggoi di linuap, om i bohogian di tundu-undu' dit osonong kopio. 16 Om sorobon ngai' nopondo dit imam iri dot id sakai di pananaraban do porsombahan, do maan do porsombahan do taakanon di kasanangan do Tuhan. Iri ngai' nopo lunok di kambing diri om don Tuhan ngai' no. 17 A' i' koino-ino do haro ot ongoiso' piya do tulun dot Israil do mangakan do lunok ko' raha'. Om iti nopo toturan diti om iyo no kasai'dti do gisom dot alaid om mositi' no do tonudon do koinsanai'd tulun dot Israil do hinonggo nopo iyolo' do poingiyon.
Porsombahan do Pangampun do Dusa dit A' Tinomod
1 Om suhuo' nod Tuhan i Musa 2 do popoilo di tulun dot Israil, dot isai nopo i kowonsoi do dusa om i kotolibamban do nunu nopo di pinonuhuan do Tuhan, dot a' dau tomodon, om mositi' no do tumanud dot oturan diti: 3 Ondung i Boyoon dot Agayo dot Imam o kowonsoi do dusa, om kohompit nondo i tulun dot Israil do pasalaon, om mositi' no do papatahak iyau do songinan o sapi' do tontoluhan dit aiso' o bohiton do tinan om it okoro' po, do maan do porsombahan di sumbolion dot id Tuhan, om oompunan id Tuhan i dusa dau. 4 Om mositi' no dot igitan dau i sapi'ddi do hiri'd wawayaan di Kiim do Tuhan. Om pakabayon nondo di Boyoon dot Agayo dot Imam o longon dau dot id sakai'd tulu di sapi', om sumbolion nondo iri do hiri'd Kiim dit Olidang. 5 Om mositi' nod igitan dau o wookon di raha' do sumuang di Kiim. 6 Om mositi' nod potobungon dau o tunturu' dau do hiri'd raha' di sapi' om powowoson dot inturu' do hiri'd tabir dit id dotimbabaan di Kaban do Tumpongo. 7 Om pogihilon dau o tongokooro' di raha' do hiri'd sinangau-sangau dit id pointikid-tikid di sunduk di mija' do podtutudan do kominyan dit osonong o kosingudan; i hiri'd suang di Kiim dot Olidang. Iri nopondo i topod di raha', om poiyason do hiri'd poimpahan di pananaraban do porsombahan di hiri'd soliwan, i hiri'd dotimbabaan di wawayaan di Kiim. 8 Om mositi' no dot onuon ngai' dau i lunok di sapi' do tontoluhan diri, om i linuap di songinsokot di suang do tian, 9 om i lusou-lusou do mitonggoi di linuap, om i bohogian di tundu-undu' dit osonong kopio. 10 Om mositi' no do sorobon ngai' dit imam i lunok diri do hiri'd sakai di pananaraban do porsombahan di sorobon, do miagal di wonsoyon dau do tontok do papatahak do porsombahan do pogiombolutan. 11 Nga' mositi' no dot onuon ngai' dau i kulit, om i tonsi, om i tulu, om i gakod, om it id suang do tian, om kotonggoi ngai' no i tinaii'. 12 Om mositi' no dot igitan ngai' dau iri do sumoliwan di kokiiman, om sorobon do hiri'd sakai di siduwon do hiri'd patataaman do tauu, i hiri'd kinoiyonon di nolidangan no do tumanud dot oturan do don tugama'. 13 Ondung koinsanai di tulun dot Israil do kowonsoi'd dusa, om kasala' iyolo' tu' nokotolibamban dot iso' di ponuhuan do Tuhan, nga' a' i' diyolo' tinomod, 14 om oilaan nopondo i dusa'ddi, om mositi' no do lomusan di tulun dot ogumu' do mongoi paatod do sapi' do tontoluhan dit okoro' po do hiri'd Kiim do Tuhan. Om mositi' no do patahakon i sapi'ddi do maan do porsombahan do pangampun do dusa. 15 Om mositi' no do pakabayon di tongoboyoon di bansa' o longon diyolo' do hiri'd sakai di tulu di sapi', om sumbolion nogindo i sapi'ddi dot id kinoiyonon diri. 16 Om mositi' no do manu i Boyoon dot Agayo dot Imam dot ongokooro' di raha' di sapi'ddi dot igitan do sumuang di Kiim dot Olidang. 17 Om mositi' no do potobungon dau di raha' o tunturu' dau om powowoson dot inturu' do hiri'd tabir dit id dotimbabaan di Kaban do Tumpongo. 18 Om mositi' no do pogihilon dau o tongokooro' di raha' do hiri'd sinangau-sangau dot id pointikid-tikid di sunduk di mija' do podtutudan do kominyan, i hiri'd suang di Kiim. Om iri nopondo noolu' om poiyason do hiri'd poimpahan di pananaraban do porsombahan di sorobon, it id soliwan di Kiim, do potimbaba' di wawayaan di Kiim. 19 Om mositi' no dot iduwon ngai' i lunok di sapi' om sorobon nogindo do hiri'd sakai di pananaraban do porsombahan. 20 Om poingkuro nopo i wonsoyon dau dot id sapi' do tontoluhan di maan do porsombahan do pangampun do dusa om iyo noddi o wonsoyon dau dot id sapi'ddi. Om iyo noddi i Boyoon dot Agayo dot Imam do papatahak do porsombahan do pangampun do dusa di tulun dot Israil, om ompunan indo do Tuhan i dusa diyolo'. 21 Om igitan nogindo dit imam i sapi'ddi do sumoliwan, om sorobon nondo dau iri do hiri'd soliwan di kokiiman, do miagal di pononorob dau di sapi' do tontoluhan di maan do porsombahan do pangampun do dusa dau. Om iyo noddi o papatahak di porsombahan do pangampun do dusa di tulun dot ogumu'. 22 Ondung songulun o pomorinta' do kowonsoi'd dusa, om kasala' iyau tu' nokotolibamban dot iso' di pinonuhuan do Tuhan, nga' a' i' dau tinomod, 23-24 om osunudan pondo iyau do pasal di dusa dau'ddi, om mositi' no do manganu iyau do songinan o kambing do tontoluhan dit aiso' o bohiton do tinan, do maan dau do porsombahan do pangampun do dusa dau'ddi. Om mositi' no do pakabayon dau o longon dau do hiri'd sakai di tulu di kambing om sumbolion do hiri'd tisan ponong id utara di pananaraban do porsombahan, i hiri'd ponunumbolian do tayam-tayam di maan do porsombahan di sorobon. 25 Om potobungon nondo dit imam o tunturu' dau do hiri'd raha' di kambing om pogihilon do hiri'd sinangau-sangau do pointikid-tikid di sunduk di pananaraban do porsombahan. Om iri nopo noolu' di raha' om poiyason do hiri'd poimpahan di pananaraban do porsombahan. 26 Om mositi' no do sorobon ngai' dau i lunok di kambing do hiri'd sakai di pananaraban do porsombahan, do miagal di pononorob dau do lunok do tayam-tayam di sumbolion do maan do porsombahan do pogiombolutan. Om iyo noddi o papatahak dit imam di porsombahan do pangampun do dusa di songulun o pomorinta'ddi, om oompunan indo do Tuhan i pomorinta'. 27 Ondung id pogialatan di tulun toomod o kopomonsoi'd dusa, om kasala' no iyau tu' kotolibamban no di ponuhuan do Tuhan, nga' a' i' dau tinomod, 28 om osunudan po iyau do pasal di dusa dau'ddi, om mositi' no do lumomus iyau do mongoi panganu do songinan o kambing do tondu' dit aiso' o bohiton do tinan do maan do porsombahan di sumbolion. 29 Om mositi' no do pakabayon dau o longon dau do hiri'd sakai di tulu di kambing diri om sumbolion nogindo i kambing do hiri'd tisan ponong id utara di pananaraban do porsombahan, i ponunumbolian do tayam-tayam di maan do porsombahan di sorobon. 30 Om mositi' no do potobungon dit imam o tunturu' dau do hiri'd raha' di kambing, om pogihilon nogindo di sinangau-sangau dot id pointikid-tikid di sunduk di pananaraban do porsombahan. Om iri nopondo noolu' om mositi' no do poiyason do hiri'd poimpahan di pananaraban do porsombahan. 31 Om mositi' no dot iduwon ngai' dau i lunok do miagal di lunok di tayam-tayam di sinumbali' do maan do porsombahan do pogiombolutan tu' iduwon ngai'. Om mositi' no do sorobon dau iri do hiri'd pananaraban do porsombahan, om kasanangan indo do Tuhan i tawau di sinorob dau'ddi. Om iyo noddi o papatahak dit imam di porsombahan do pangampun do dusa di tulun, om oompunan indo do Tuhan i tulun diri. 32 Ondung dumba' ot igitan do tulun do maan do porsombahan do pangampun do dusa, om mositi' nod tondu' i dumba' om aiso' o bohiton do tinan. 33 Om mositi' no do pakabayon di sanganu o longon dau do hiri'd tulu di dumba', om sumbolion i dumba'ddi do hiri'd tisan ponong id utara di pananaraban do porsombahan, i ponunumbolian di tayam-tayam do maan do porsombahan di sorobon. 34 Om mositi' no do potobungon dit imam o tunturu' dau do hiri'd raha' di dumba' om pogihilon di sinangau-sangau dot id pointikid-tikid di sunduk di pananaraban do porsombahan. Om iri nopondo noolu' di raha' om potuntugon do hiri'd poimpahan di pananaraban do porsombahan. 35 Om mositi' no dot iduwon ngai' dau i lunok do miagal di pongingidu' dau do lunok di dumba' do sumbolion do maan do porsombahan do pogiombolutan. Om sorobon nogindo dau iri do hiri'd sakai di pananaraban do porsombahan do mitonggoi di porsombahan do taakanon di patahakon dot id Tuhan. Om iyo noddi o papatahak dit imam di porsombahan do pangampun do dusa di tulun, om oompunan indo do Tuhan i tulun diri.
Hal dit Apatut dot Ontokon do Porsombahan do Pangampun do Dusa
1 Tulun nopo di pasalaon om mositi' no do mamabo do kootuson di winonsoi dau: Ondung haro o tulun di lohowon do sumiliu do sasi' dot id kut, nga' a' indo dau poboroson i nokito om i norongou dau. 2 Ondung haro o tulun do kakama' do nunu nopo i sosomu' dot id pagantangan do tugama', nga' a' i' dau tomodon, do kakama' do tinan do nintorusan di napatai, om opurimanan nopondo dau i nowonsoi dau'ddi om diri no do sosomu' iyau dot id pagantangan do tugama' om kasala' iyau. 3 Ondung haro o tulun do kakama' do nunu nopo i sosomu' do mantad id tulun, dot a' tomodon, om opurimanan nopondo dau i nowonsoi dau'ddi, om diri no do kasala' iyau. 4 Ondung haro o tulun do sumumpa' dot a' puro-puroon o pomomoros do sumumpa' do pasal do nunu nopo, om opurimanan nopondo dau i nowonsoi dau'ddi om diri no do kasala' iyau. 5 Soira' nopo do kasala' o tulun do miagal diri o kasalaan, om mositi' no dot okunon dau i kasalaan dau'ddi. 6 Om pomohukum nopo di dusa dau'ddi om songinan o dumba' do tondu' ko' kambing do tondu' do patahakon dau dot id Tuhan do maan do porsombahan. Om mositi' no do patahakon dit imam i porsombahan diri, om oompunan indo i dusa di tulun diri. 7 Ondung aiso' o dumba' ko' kambing do patahakon di tulun do nakasala'ddi do maan do porsombahan do pangampun di dusa dau, om mositi' no do papatahak iyau dot id Tuhan do duwo o tinan do sikukur ko' duwo o tinan do punai do maan do porsombahan di sumbolion do pangampun do dusa dau. Iri nopo songinan di tombolog om maan do porsombahan do pangampun do dusa, om iri no tiso' om maan do porsombahan di sorobon. 8 Om mositi' no do ngoyon dau patahako' dit imam i duwo o tombolog diri. Om poguluonon pondo dit imam do papatahak i tombolog do maan do pangampun do dusa. Om mositi' no dot uritoson dau i liou di tombolog diri, nga' a' i' iduwon i tulu. 9 Om poturuon o wookon di raha' di tombolog diri do hiri'd misingobik di pananaraban do porsombahan. Om iri nopondo raha' di noolu' om potuntugon do hiri'd poimpahan di pananaraban do porsombahan. Iri no o porsombahan do patahakon om kaanu i' do koompunan do dusa. 10 Om patahakon nogindo dit imam i tombolog di koduwo do maan do porsombahan di sorobon, do tumanud dit oturan. Om iyo noddi o papatahak dit imam di porsombahan do pangampun do dusa di tulun, om oompunan i' do Tuhan i tulun diri. 11 Ondung aiso' o pongonuan di tulun di nakasala'ddi do duwo o tinan do sikukur ko' duwo o tinan do punai, om mositi' no do papatahak iyau do songkilogram o tapung do maan do porsombahan do pangampun do dusa. Nga' a' i' koino-ino do ralatan i tapung do tumau do saitun ko' kominyan, tu' iri nopo om porsombahan do pangampun do dusa, om okon i' ko' porsombahan do gandum. 12 Om mositi' no do ngoyon dau patahako' dit imam i tapung diri. Om manu nondo it imam do songonggom di tapung, do maan do tanda' do nakatahak ngai' no i tapung diri dot id Tuhan. Om mositi' no do sorobon i tapung di songonggom diri do hiri'd sakai di pananaraban do porsombahan do maan do porsombahan do taakanon. Om iri no o porsombahan do maan do pangampun do dusa. 13 Om iyo noddi o papatahak dit imam di porsombahan do pangampun do dusa di tulun, om oompunan i' do Tuhan i tulun diri. Om i nopondo noolu' di tapung om iri no it imam o kaanu do miagal dit oolu' di porsombahan do gandum tu' iri no imam o kaanu.
Porsombahan do Poningolon
14 Om patahako' nod Tuhan dot id di Musa iti piro-piro ot oturan. 15 Ondung haro o tulun dit a' tumomod do kolihu do papatahak di porsombahan di nokotobilang dau do patahakon dot id Tuhan, om mositi' no do papatahak iyau do porsombahan do poningolon. Patahakon nopo om mositi' no do songinan o dumba' do tontoluhan ko' songinan o kambing do tontoluhan, nga' mositi' no dot aiso' o bohiton do tinan. Om tontuon nondo o pomohorogo'ddi do tumanud di pomohorogo di natantu' mantad. 16 Mositi' no do tingalanan dau it a' dau nakatahak om ruhangan po dot induwo i sompihopod. Om mositi' no do patahakon dau i tayam-tayam diri dot id imam. Om patahakon nondo dit imam i tayam-tayam diri do maan do porsombahan do pangampun do dusa di tulun, om oompunan indo do Tuhan i tulun diri. 17 Ondung haro o tulun do kowonsoi'd dusa, om kasala' no tu' kotolibamban dot iso' di pinonuhuan do Tuhan, nga' a' i' daa dau tinomod, om kasala' no iyau'ddi, om mositi' no do bayaran dau i nokoontok dau. 18 Mositi' no do paatod iyau dot id imam do songinan o dumba' do tontoluhan ko' songinan o kambing do tontoluhan dit aiso' o bohiton do tinan. Om iri no o maan do porsombahan do poningolon. Om tontuon nondo o horogo'ddi do tumanud di pomohorogo di natantu' mantad. Om patahakon nondo dit imam i porsombahan diri do pangampun do dusa di tulun, om oompunan indo do Tuhan i tulun diri. 19 Om iri no o porsombahan do poningolon do pangampun di dusa dau dot id Tuhan.
1 Om patahako' nod Tuhan dot id di Musa iti piro-piro ot oturan. 2-3 Ondung a' no iyau poguli' do konunu-nunuan di pinokiopian dot id dau di sompi' ko' tulun dot Israil, ko' manakau no iyau di konunu-nunuan do tulun diri, ko' akalan no dau i tulun diri, ko' a' no iyau mangakun do nokokito di konunu-nunuan di natagak, do gisom do sumumpa' iyau dot a' nokokito'ddi, om kowonsoi no iyau do dusa dot id Tuhan. Om ondung kowonsoi iyau do miagal diri om mositi' no do papatahak iyau do porsombahan do poningolon. 4-5 Om mositi' no do tingalanan dau o nunu nopo i naanu dau dit a' otulid o ralan dau do minanganu. Om soira' nopo dot oilaan iyau do nakasala', om tontok noddi do bayaran ngai' dau i sanganu di nangaanu dau'ddi, om ruhangan po dot induwo i sompihopod. 6 Om mositi' no do paatod iyau dot id imam do songinan o dumba' do tontoluhan ko' songinan o kambing do tontoluhan dit aiso' o bohiton do tinan, do maan do porsombahan do poningolon dot id Tuhan. Om tontuon nondo o horogo'ddi do tumanud di pomohorogo di natantu' mantad. 7 Om mositi' no do patahakon dit imam i porsombahan diri do pangampun do dusa di tulun, om oompunan indo do Tuhan i tulun diri.
Porsombahan dit Insanan do Monorob
8 Om suhuo' nod Tuhan i Musa do 9 papatahak dot id di Harun om id tangaanak di Harun diti piro-piro ot oturan do pasal do porsombahan di sorobon. Porsombahan nopo di sorobon om potimporonon nopo do hiri'd pananaraban do porsombahan do gisom dot osuaban, om mositi' no dot osikit kasai' i tapui. 10 Om iri nondo it imam di kirasuk do kain linan om kisoluar do kain linan dit oniiba', o mongidu' di tauu di kilunok, i noolu' do hiri'd pananaraban do porsombahan, om hirion nondo dau id toning di pananaraban do porsombahan i tauu'ddi. 11 Om mositi' no do tingalanan dau o pakayan dau om igitan nondo dau i tauu do sumoliwan di kokiiman, om hirion nondo dau id kinoiyonon dit olidang dot id pagantangan do tugama' i tauu'ddi. 12 Om mositi' no do piantangan kasai' i tapui do hiri'd pananaraban do porsombahan om kitapui kasai' i'; kada' no kopio pologoso' dot opisok i tapui'ddi. Pointikid-tikid do kosuabon om mositi' no dot udungan dit imam i tapui di hiri'd pananaraban do porsombahan, om pouludon i maan do porsombahan do sorobon do hiri'd sakai di pananaraban do porsombahan. Om sorobon i lunok do hiri do maan do porsombahan do pogiombolutan. 13 Om mositi' no do kisinikit kasai' i tapui do hiri'd pananaraban do porsombahan, om kada' no pologoso' dot opisok.
Porsombahan do Gandum
14 Iti ngai' no ot oturan do pasal di porsombahan do gandum. Mositi' no do ngoyon dit imam di suminolusuk di Harun patahako' o porsombahan do gandum dot id Tuhan do hiri'd dotimbabaan di pananaraban do porsombahan. 15 Om manu nondo iyau do songonggom di tapung om manu di tumau, om insanan nopo do manganu i kominyan di pinosoibau di tapung. Om sorobon nondo dau iri do hiri'd pananaraban do porsombahan do maan do tanda' do nakatahak ngai' nori dot id Tuhan. Om iri no tawau di porsombahan diri o kasanangan do Tuhan. 16-17 Om wonsoyon nondo i tapung di noolu'ddi do roti dit a' ralatan do pangambang, om akanon nondo dit imam iri dot id kinoiyonon dit olidang, i hiri'd natad di Kiim do Tuhan. Iri no o pinatahak do Tuhan dot id imam do maan do diyolo'd gontok di porsombahan do taakanon. Iri nopo taakanon diri om olidang kopio, do miagal di porsombahan do pangampun do dusa om i porsombahan di poningolon. 18 Om pointikid-tikid di tangaanak di Harun do kusai nga' koino-ino nod mangakan do roti'ddi do gisom dot alaid; iri no kasai' o diyolo'd gontok dit aanu diyolo' do mantad id taakanon di nakatahak dot id Tuhan. Nga' tulun nopod suwai di kakama' di taakanon di nakatahak diri, om orualan no dot oontok do kuasa' do kolidango' di porsombahan diri. 19 Om patahako' nod Tuhan dot id di Musa o piro-piro ot oturan diti, 20 do pasal do pomimili' dot imam di sumolusuk di Harun. Tontok nopod tadau do pilion it imam diri, om mositi' no do papatahak iyau dot id Tuhan do songkilogram o tapung do gandum. (Irad do kogumuon di porsombahan do gandum do patahakon do monikid tadau.) Iri nopo songintanga' di tapung diri om patahakon di dongkosuabon, om iri no songintanga' kawagu om patahakon do dongsosodopon. 21 Om mositi' no do ralatan do tumau i tapung diri, om luguon nogindo do hiri'd pomoluguan. Om mumukon nondo iri om patahakon do maan do porsombahan do gandum. Om iri no tawau di porsombahan diri o kasanangan do Tuhan. 22 Papatahak nopo do porsombahan diri do gisom dot alaid om i sinakagon di Harun di nosiliu do Boyoon dot Agayo dot Imam. Om sorobon ngai' nopori do maan do porsombahan dot id Tuhan. 23 Iri nopo porsombahan do gandum di patahakon dit imam diri om mositi' no dot insanan do monorob; om kada' nod haro o tongokooro' piya dot akanon.
Porsombahan do Pangampun do Dusa
24 Om suhuo' nod Tuhan i Musa do 25 papatahak dot id di Harun om id tangaanak di Harun diti piro-piro ot oturan do pasal do porsombahan do pangampun do dusa. Iri nopo tayam-tayam do maan do porsombahan do pangampun do dusa om mositi' no do sumbolion do hiri'd tisan ponong id utara di pananaraban do porsombahan, i ponunumbolian di tayam-tayam do maan do porsombahan di sorobon. Porsombahan nopodti om olidang no kopio. 26 Iri nopo imam di papatahak di tayam-tayam diri om mositi' no do hiri'd kinoiyonon dit olidang do mangakan di porsombahan diri, i hiri'd natad di Kiim do Tuhan. 27 Isai nopo ko' nunu nopo o kakama' di tonsi do tayam-tayam di nakatahak diri om orualan no dot oontok di kuasa' do kolidango'ddi. Ondung haro o kain dot otiasan do raha' di tayam-tayam diri, om mositi' no do pupuan i kain diri dot id kinoiyonon dit olidang. 28 Iri nopo kuron di pinomolosuan di tonsi di tayam-tayam do numaan do porsombahan diri om mositi' no do babakon. Om ondung poriuk do basi' o pinagansakan, om mositi' no do kisasan i poriuk om lihungan do waig. 29 Isai nopo o tongokusai do mantad id sompiiyon dot imam om koino-ino nod mangakan do porsombahan diri, it olidang kopio'ddi. 30 Nga' ondung haro o naanu di raha' di tayam-tayam diri do tinanggayan do sumuang di Kiim do pinakai do tontok di mokianu'd koompunan do dusa do tumanud dit oturan do tugama', om a' no koino-ino'd kanon i tayam-tayam diri, om mositi' no dot insanan iri do monorob.
Porsombahan do Poningolon
1 Iti no ngai' ot oturan do pasal di porsombahan do poningolon, i porsombahan dit olidang kopio. 2 Iri nopo tayam-tayam do maan do porsombahan diti om mositi' nod sumbolion do hiri'd tisan ponong id utara di pananaraban do porsombahan, i ponunumbolian di tayam-tayam do maan do porsombahan di sorobon. Om iri nopondo raha' om mositi' no do poiyason do hiri'd misingobik om hiri'd misingompok di pananaraban do porsombahan. 3 Mositi' nod iduwon ngai' i lunok di tayam-tayam om patahakon ngai' do maan do porsombahan do hiri'd sakai di pananaraban do porsombahan: i tikiu di kilunok, om i linuap do songinsokot do hiri'd suang do tian, 4 i lusou-lusou om pitonggoyon di linuap, om i bohogian di tundu-undu' dit osonong kopio. 5 Om mositi' nod sorobon ngai' dit imam i lunok diri do hiri'd pananaraban do porsombahan do maan do porsombahan do taakanon dot id Tuhan. Iri nopo om porsombahan do poningolon. 6 Isai nopo tongokusai do mantad id sompiiyon dot imam om koino-ino no do mangakan diri, nga' mositi' no dot akanon dot id kinoiyonon dit olidang tu' iri nopo porsombahan diri om olidang kopio. 7 Haro o tiso' o toturan do pasal di porsombahan do pangampun do dusa, om i porsombahan do poningolon do kopiagal: iri no tu' iri nopo tonsi di tayam-tayam di pinatahak do maan do porsombahan om iri no imam di pinapatahak diri o kaanu. 8 Iri nopo kulit di tayam-tayam di pinatahak do maan do porsombahan di sorobon om iri no imam di pinapatahak diri o kaanu. 9 Om koinsanai di porsombahan do gandum di nuhub do minogonsok do hiri'd ponguhuban, ko' i nonsok dot id poriuk, ko' i linugu, om iri no imam di pinapatahak diri dot id Kinorohingan o kaanu'ddi. 10 Nga' koinsanai di porsombahan do gandum dit a' nonsok, dot iri tuu rinalatan do tumau, ko' iri po it a' rinalatan om kasanganu ngai' no it imam di suminolusuk di Harun, om mositi' no dot iradon o pamahagi'ddi dot id pogialatan diyolo'.
Porsombahan do Piombolutan
11 Iti no o piro-piro toturan do pasal di porsombahan do piombolutan di patahakon do maan do porsombahan dot id Tuhan. 12 Soira' nopo do papatahak do porsombahan diti do maan do pongunsikou do Kinorohingan, om tanggayan no i tayam-tayam di pinatahak diri do roti dit a' rinalatan do pangambang. Iri nopo roti di potonggoyon om koino-ino i' dot akapal o pomomonsoi, dot i tapung di rinalatan do tumau do saitun o wonsoyon. Om songkoino nogi' do roti dit onipis do rinalatan do tumau do saitun. 13 Om patahak po do roti di nonsok dot a' rinalatan do pangambang do maan do pomoruhang diri. 14 Om mositi' no do patahakon o wookon do pointikid-tikid do bansa' di roti'ddi do maan do porsombahan di potobilangon do maan do don Tuhan; om kaanu nopoddi om iri no it imam di minanganu di raha' di tayam-tayam om i pinopoiyas diri do hiri'd pananaraban do porsombahan. 15 Om iri nopo tonsi di tayam-tayam diri om mositi' no do kanon do tontok do tadau di kinapatahakan diri; kada' nod haro o toolu'ddi dot ongokooro' piya do gisom do kosuabon kawagu. 16 Ondung paatod o tulun do porsombahan do piombolutan do pamayaan di nakabatos dau, ko' maan dau do porsombahan do kagaanan do ginawo dau, om a' i' minog dot oiyon iri do mangakan do tontok do tadau di pinatahak iri. Nunu nopo it oolu' om koino-ino i' do kanon do tadau kawagu. 17 Nga' haro nopo o topod di tonsi'ddi do kotolu'd tadau om mositi' no do tutudan. 18 Ondung kanon i topod di tonsi'ddi di kotolu'd tadau, om a' nod Kinorohingan romiton i porsombahan. Tu' a' no osiliu do barakat di tulun di pinapatahak i porsombahan diri, nga' osiliu nogi' do porsombahan di sosomu'. Om isai nopo o mangakan di porsombahan di nososomu'ddi om mositi' no do mamabo do kootuson diri. 19 Ondung kotopis i tonsi'ddi do nunu nopo i sosomu' dot id pagantangan do tugama', om a' nori koino-ino dot akanon, suwai ko' mositi' nod sorobon. Isai nopo it olidang dot id pagantangan do tugama' om koino-ino no do mangakan di tonsi di porsombahan di piombolutan diri, 20 nga' ondung haro o tulun dit a' olidang dot id pagantangan do tugama' do mangakan diri, om a' no kohompit di tulun do songonuon do Kinorohingan. 21 Om ondung haro o tulun do mangakan di tonsi di nakatahak diri do numaan do porsombahan, nga' nokoigit i' iyau di sosomu' dot id pagantangan do tugama', do mantad tuu dot id tulun ko' mantad po dot id nintorusan, om a' no iyau kohompit do tulun di songonuon do Kinorohingan. 22 Om patahako' nod Tuhan dot id di Musa iti piro-piro ot oturan 23 do patahakon dot id tulun dot Israil. Lunok nopod sapi', om dumba', om kambing om a' no koino-ino dot akanon. 24 Iri nopo lunok do nintorusan di napatai toomod ko' i pinatai do nintorusan dot orongit om a' no koino-ino do kanon, nga' koino-ino i' do maan do nunu nopo o kogunaan do suwai. 25 Isai nopo i mangakan do lunok do nintorusan di milo daa do patahakon do maan do porsombahan do taakanon dot id Tuhan, om a' no kohompit do tulun di songonuon do Kinorohingan. 26 Hinonggo nopo o koiyonon do tulun dot Israil, nga' a' no kopio iyolo' koino-ino do mangakan do raha' do tombolog ko' raha' do nintorusan. 27 Isai nopo o tumolibamban dot oturan diti om a' no kohompit do tulun di songonuon do Kinorohingan. 28 Om patahako' nod Tuhan dot id di Musa iti piro-piro ot oturan 29 do patahakon dot id tulun dot Israil. Isai nopo o papatahak do porsombahan do piombolutan, om mositi' nod potobilang do wookon diri do maan do porsombahan di potobilangon do maan do don Tuhan, 30 dot iyau kopio o papatahak diri do maan do porsombahan do taakanon. Om mositi' nod igitan dau i lunok om i kangkab di tayam-tayam diri do maan do porsombahan di potobilangon do maan do don Tuhan. 31 Om mositi' nod sorobon dit imam i lunok diri do hiri'd pananaraban do porsombahan nga' iri nopo kangkab diri om aanu i' dit imam. 32 Om iri nopo gakod do wanan di tayam-tayam diri om mositi' nod potobilangon do patahakon 33 dit imam di papatahak di raha' om i lunok di porsombahan do piombolutan. 34 Iri nopo kangkab om i gakod do wanan di tayam-tayam diri om porsombahan no di pinotobilang, it onuon do Tuhan do mantad id tulun dot Israil do patahakon diyolo' dot id imam do gisom dot alaid. 35 Iri no i bohogian do mantad id porsombahan do taakanon di pinatahak do Tuhan dot id di Harun om id tangaanak dau do tontok do tadau di pinili' iyolo' do sumiliu'd imam. 36 Tontok no do tadau'ddi do sinuhu'd Tuhan i bansa' dot Israil do papatahak do bohogian diti do mantad id porsombahan dit igitan diyolo' dot id imam. Om mositi' no do tonudon kasai' di tulun dot Israil ot oturan diti do gisom dot alaid. 37 Om iri no o piro-piro ot oturan do pasal do porsombahan di sorobon, om porsombahan do gandum, om porsombahan do pangampun do dusa, om porsombahan do poningolon, om porsombahan do piombolutan. 38 Om tontok no di hilo'd Nuluhon do Sinai, i hilo'd tana' do kowotuan, do pinatahak do Tuhan dot id di Musa o piro-piro o ponuhuan diri, do tontok di minonuhu' iyau do tulun dot Israil do papatahak do porsombahan diyolo'.
Pinili' i Harun om i Tangaanak dau do Sumiliu'd Imam
1 Om boros kad Tuhan dot id di Musa, 2 “Angatan no i Harun om i tangaanak dau do mongoi do hilo'd wawayaan di Kiim ku, om igitan no i pakayan do dong imam, om i tumau do ponununtug, om i sapi' do tontoluhan dit okoro' po do maan do porsombahan do pangampun do dusa, om duwo o dumba' do tontoluhan om sambalatak o roti dit a' rinalatan do pangambang. 3 Om lohowon ngai' nogindo i tulun dot Israil do tumimung do hiti,” ka dau. 4 Om wonsoyo' no di Musa o miagal di pinonuhuan do Tuhan. Om kotimung ngai' poddi i tulun dot ogumu', 5 om boro-boros no i Musa diyolo' do poingkaa, “Iti nopo wonsoyon ku do dinondo'dti om pinonuhuan i' do Tuhan,” ka dau. 6 Om angatai no di Musa i Harun om i tangaanak di Harun do mongoi do hiri'd gulu om suhuo' no dau iyolo' do modsu' do tumanud dit oturan do tugama'. 7 Om porosukai no dau di Harun i rasuk om i rasuk dit anaru, om poogkoso' dau di Harun i tagkos. Om papakayai no dau it ipod om paagkasai dau di Harun i tagkos dit atandai o pinangawol. 8 Om papakayai nod Musa di Harun i lokop do kangkab om posuango' no dau it Urim om Tumim do hiri'd lokop do kangkab. 9 Om posigarai no dau i sigar, om podokoto' dau i tamas do pongillumis do hiri'd ponong id turos di sigar, i tanda' do nosiliu i Harun do songonuon do Kinorohingan. Om wonsoyo' ngai' nopo di Musa iri do tumanud di pinonuhuan do Tuhan dot id dau. 10 Om ngoyo' nod i Musa i tumau do ponununtug om gihilai no dau di tumau'ddi i Kiim do Tuhan, om koinsanai di konunu-nunuan do hiri'd suang di Kiim. Om iyo noddi o ralan dau do pinapatahak ngai'ddi dot id Tuhan. 11 Om anu noddi i Musa dot okooro' di tumau di ponununtug diri om wawasai no dau dot inturu' o hiri'd sakai di pananaraban do porsombahan om koinsanai di pakakas do hiri, om hiri'd mimpun om hiri'd poimpahan di mimpun. Om iyo noddi o ralan dau do pinapatahak ngai'ddi dot id Tuhan. 12 Om pilio' noddi dau i Harun; om ralan nopo di Musa do minomili' di Harun om tinuntugan dau o tulu di Harun dot okooro' di tumau di ponununtug. 13 Om angatai nod i Musa i tangaanak di Harun do mongoi do hiri'd gulu, om porosukai no dau diyolo' i rasuk, om paagkasai dau diyolo' i tagkos, om potupiyai no dau diyolo' i tupi' do dong imam do tumanud di pinonuhuan do Tuhan dot id dau. 14 Om ngoyo' noddi di Musa i songinan o sapi' do tontoluhan dit okoro' po do maan do porsombahan do pangampun do dusa, om pakabayo' no di Harun om i tangaanak dau o longon diyolo' do hiri'd sakai'd tulu di sapi'ddi. 15 Om sumbolio' nod i Musa i sapi'ddi om onuo' no dau o wookon di raha'. Om potobungo' no dau o tunturu' dau do hiri'd raha' om pogihilo' no i raha' do hiri'd sinangau-sangau dot id pointikid-tikid di sunduk di pananaraban do porsombahan. Om poiyaso' nogiddi dau i topod di raha' do hiri'd poimpahan di pananaraban do porsombahan. Om iyo noddi o ralan dau do minomolidang di pananaraban do porsombahan do tumanud dot oturan do tugama', om iyo noddi o ralan do pinapatahak diri dot id Tuhan. 16 Om onuo' ngai' noddi di Musa i linuap di songinsokot di suang do tian di sapi' di sinumbali'ddi. Om nanu nogi' dau i bohogian di tundu-undu' om i lusou-lusou do mitonggoi di lunok di sapi'. Om sorobo' ngai' no dau iri do hiri'd pananaraban do porsombahan. 17 Om ngoyo' no dau i noolu-olu' di tonsi, om i kulit, om i tinaii' di sapi'. Om sorobo' ngai' no dau do hiri'd soliwan di kokiiman do miagal di pinonuhuan do Tuhan. 18 Om ngoyo' nogiddi di Musa i dumba' do tontoluhan do maan do porsombahan do sorobon. Om pakabayo' no di Harun om i tangaanak dau o longon diyolo' do hiri'd sakai di tulu di dumba'ddi. 19 Om sumbolio' no di Musa i dumba' om poiyaso' no dau i raha' do hiri'd misingobik om hiri'd misingompok di pananaraban do porsombahan. 20-21 Om popoto' noddi di Musa i dumba' do tontoluhan diri, om ougai no dau do waig i suang do tian om i gakod di dumba'ddi. Om iri nopo i tulu, om i lunok, om i noolu-olu' do tinan di dumba' do tontoluhan diri, om tinutudan dau do hiri'd sakai di pananaraban do porsombahan do tumanud di pinonuhuan do Tuhan. Iti no o porsombahan do taakanon, om iri no tawau do porsombahan diri o kasanangan do Tuhan. 22 Om ngoyo' nod i Musa i dumba' do tontoluhan di koduwo do maan do kopomilian dot imam. Om pakabayo' nod i Harun om i tangaanak dau o longon diyolo' do hiri'd sakai do tulu di dumba', 23 om sumbolio' nod i Musa i dumba'ddi. Om onuo' noddi di Musa o wookon di raha' di dumba'ddi om pogihilo' no dau do hiri'd tolingo'd wanan di Harun, om hiri'd posolon do longon dau'd wanan, om hiri'd posolon do lapap dau'd wanan. 24 Om suhuo' nod Musa i tangaanak di Harun do minsomok-somok dau, om gihilai nogiddi dau do raha' dot okooro' o hiri'd tolingo diyolo'd wanan, om hiri'd posolon do lapap diyolo'd wanan. Om iri nopo noolu' di raha' om pinoiyas di Musa do hiri'd misingobik om hiri'd misingompok di pananaraban do porsombahan. 25 Om onuo' nod i Musa i lunok di dumba'ddi, om i tikiu di kilunok, om koinsanai di linuap do songinsokot di suang do tian, om i bohogian di tundu-undu' dit osonong kopio, om i lusou-lusou do mitonggoi di linuap, om i gakod do wanan di dumba'ddi. 26 Om anu nogiddi i Musa di roti dit a' rinalatan do pangambang do mantad hiri'd balatak. Om patahako' no dau dot id Tuhan: iso' o roti dit akapal, i rinalatan do tumau do minomonsoi, om iso' o roti dit oniipis. Om pasakayo' no dau i roti'ddi do hiri'd lunok om hiri'd gakod do wanan di dumba'. 27 Om pakahangai ngai' no dau di Harun om i tangaanak di Harun i taakanon diri om patahako' no diyolo' iri dot id Tuhan do maan do porsombahan di pinotobilang do maan do don Tuhan. 28 Om ngoyo' noddi di Musa i taakanon do poingkahang diyolo', om sorobo' no dau do hiri'd pananaraban do porsombahan. Iri nopo om pinosoibau dau di porsombahan di sorobon, do maan do porsombahan do kopomilian. Iri no o porsombahan do taakanon, om iri no tawau'ddi o kasanangan do Tuhan. 29 Om ngoyo' nod i Musa i kangkab di dumba'ddi om patahako' no dot id Tuhan do numaan do porsombahan di pinotobilang do maan do don Tuhan. Om iri no o di Musa do gontok, do mantad id dumba' do tontoluhan di sinumbali'ddi do numaan do porsombahan do kinopomilian dot imam. Om wonsoyo' ngai' nopod i Musa iri do tumanud di pinonuhuan do Tuhan dot id dau. 30 Om anu no i Musa dot okooro' di tumau do ponununtug om minanu iyau dot okooro' di raha' do hiri'd pananaraban do porsombahan, om powowoso' no dau dot id di Harun om id pakayan diyolo'. Om iyo noddi o ralan dau do pinapatahak diyolo' om i pakayan diyolo' dot id Tuhan. 31 Om boros kad i Musa dot id di Harun om id tangaanak di Harun, “Igitai dokoyu ilo tonsi di sinumbali'ddi do hilo'd wawayaan diti Kiim do Tuhan, om losuon id hilo'. Om kanon nogindo do mikuwo'd di roti di hiri'd balatak di sinuangan do porsombahan do kopomilian, do miagal di pinonuhuan do Tuhan. 32 Mositi' nod sorobon ngai' o tonsi ko' roti dit oolu'. 33 Kada' kou no kopio tongkiad do mantad hilo'd wawayaan di Kiim do Tuhan do solinaid do turu' o tadau, dot a' po owonsoi ngai' it apatut do wonsoyon do kopomilian dokoyu. 34 Tuhan i' o minonuhu' dati' do momonsoi diti winonsoi toko' baino', om oompunan indo o dusa dokoyu. 35 Om mositi' nod mundorong kou do hilo'd toning di wawayaan di Kiim do Tuhan do solinaid do turu' o tadau om turu' o totuong, om atanud i' i pinonuhuan do Tuhan. Ondung a' dokoyu wonsoyon o miagal diri, om apatai kou no moti'. Tu' iri no o pinonuhuan do Tuhan dot id doho',” ka dau. 36 Om wonsoyo' ngai' nopoddi di Harun om i tangaanak dau i pinonuhuan do Tuhan do pinolombus di Musa.
Pinapatahak i Harun do Porsombahan
1 Tadau poddi kawagu di nopongo i pagadatan do kopomilian, om lohowo' nod i Musa i Harun, om i tangaanak di Harun, om i boyoon dot Israil. 2 Om boros ka dau dot id di Harun, “Ongoi panganu'd songinan o sapi' do tontoluhan dit omulok po, om songinan o dumba' do tontoluhan dit aiso' o bohiton do tinan. Om patahakon nori do maan do porsombahan dot id Tuhan. Iri nopo sapi' om maan do porsombahan do pangampun do dusa om iri no dumba' om maan do porsombahan do sorobon. 3 Om sunudan nondo i tulun dot Israil do manganu do kambing do tontoluhan do maan do porsombahan do pangampun do dusa, om songinan o sapi' di sontoun nogi' o tumur, om songinan o tanak do dumba' di sontoun o tumur, om it aiso' o bohiton do tinan do maan do porsombahan do sorobon. 4 Om suhuon no iyolo' do mongigit do songinan o sapi' do tontoluhan om songinan o kambing do tontoluhan do maan do porsombahan do piombolutan. Om mositi' nod patahakon diyolo' dot id Tuhan i tayam-tayam diri do mitonggoi di porsombahan do gandum di rinalatan do tumau. Om mositi' nod wonsoyon diyolo' o miagal diri tu' tadau nod baino' do mintalang o Tuhan dot id diyolo',” ka. 5 Om igitai ngai' nopo diyolo' do hiri'd dotimbabaan di Kiim i pinonuhuan di Musa diri. Om timung ngai' no i tulun dot Israil do hiri do suminambayang dot id Tuhan. 6 Om boros ka di Musa, “Sinuhu' kou'd Tuhan do momonsoi do miagal diti om kokito kou indo di tulinau di kosorong kopio do tanda' do koropohon do Tuhan,” ka dau. 7 Om boros ka di Musa dot id di Harun, “Ongoi do hilo'd pananaraban do porsombahan, om papatahak nod porsombahan do pangampun do dusa om porsombahan di sorobon do hilo', om oompunan i' do Tuhan o dusa nu om dusa do koinsanai'd tulun do diti. Om wonsoyon no o miagal diri, do tumanud di pinonuhuan do Tuhan,” ka dau. 8 Om ongoi no i Harun do hiri'd pananaraban do porsombahan om sumbolio' no dau i sapi'd tontoluhan dit okoro' po do numaan do porsombahan di sinumbali' do pangampun di dusa dau. 9 Om ngoyo' noddi di tangaanak di Harun i raha' di sapi'ddi om patahako' no diyolo' dot id di Harun. Om potobungo' nod Harun o tunturu' dau do hiri'd raha' om pogihilo' no do hiri'd sinangau-sangau dot id pointikid-tikid di sunduk di pananaraban do porsombahan. Om iri nopoddi i noolu' di raha' om poiyaso' no dau do hiri'd poimpahan di pananaraban do porsombahan. 10 Om iri nopo lunok, om i lusou-lusou, om i bohogian di tundu-undu' di sapi' dit osonong kopio, om sinorob dau do hiri'd pananaraban do porsombahan do miagal di pinonuhuan do Tuhan dot id di Musa. 11 Nga' iri nopo tonsi om i kulit di sapi'ddi om hiri'd soliwan di kokiiman o pinanaraban dau. 12 Om ngoyo' noddi di Harun i tayam-tayam di maan dau do porsombahan di sorobon do maan do dau, om sumbolio' no dau. Om ngoyo' noddi di tangaanak di Harun i raha' om patahako' no dot id di Harun. Om poiyaso' no di Harun i raha'ddi do hiri'd misingobik om hiri'd misingompok di pananaraban do porsombahan. 13 Om patahako' nogiddi diyolo' di Harun i tulu om i popot do suwai di tayam-tayam diri, om sorobo' no di Harun iri do hiri'd pananaraban do porsombahan. 14 Om ougai no dau i suang do tian om i gakod di tayam-tayam. Om sorobo' no dau do hiri'd pananaraban do porsombahan, do pinotimpak di noolu-olu' di porsombahan di sorobon. 15 Om kopongo poddi ngai' iri, om patahako' nogi' di Harun i porsombahan do nigitan di tulun dot ogumu'. Om ngoyo' no dau i kambing di patahakon do maan do porsombahan do pangampun do dusa di tulun dot ogumu'. Om sumbolio' no dau i kambing diri om patahako' no dau do miagal di pinapatahak dau di porsombahan do maan do pangampun do dusa dau. 16 Om ngoyo' nogiddi dau i tayam-tayam di natantu' mantad do maan do porsombahan di sorobon, om patahako' no dau do tumanud dit oturan. 17 Om pinatahak nogi' dau i porsombahan do gandum. Om anu no iyau do songonggom di tapung om sorobo' no dau do hiri'd pananaraban do porsombahan. (Iti nopo nga' pomoruhang di porsombahan di sorobon do monikid tadau.) 18 Om sumbolio' no dau i sapi' do tontoluhan om i dumba' do tontoluhan do maan do porsombahan do piombolutan do maan di tulun dot Israil. Om ngoyo' no di tangaanak di Harun i raha' om patahako' no diyolo' dot id di Harun, om poiyaso' no di Harun i raha'ddi do hiri'd misingobik om hiri'd misingompok di pananaraban do porsombahan. 19 Om iri nopo popot di sapi' om i dumba' dit ongkilunok, 20 om pinasakai dau di kangkab di duwo o tayam-tayam diri, om igitai nogiddi dau do minongoi do hiri'd pananaraban do porsombahan. Om sorobo' no dau i lunok diri do hiri'd pananaraban do porsombahan, 21 om patahako' no dau i kangkab om i gakod di tayam-tayam diri do maan do porsombahan di pinotobilang do maan do don Tuhan, i bohogian dit onuon dit imam do miagal di pinonuhuan di Musa. 22 Om kopongo ngai' poddi di Harun do papatahak i porsombahan diri, om poinsawato' no dau o longon dau do kasahau di tulun dot ogumu', om barakatai no dau iyolo'. Om lintuhun nogiddi iyau. 23 Om suang no i Musa om i Harun do hiri'd Kiim do Tuhan, om kosoliwan poddi iyolo' om barakatai no diyolo' i tulun dot ogumu'. Om intalang no i tulinau di kosorong kopio do tanda' do nakarapou o Tuhan, dot id tulun dit ogumu' om kokito no diyolo' iri. 24 Om sigog iddi do porikoto' do Tuhan o tapui, do minonorob di pananaraban do porsombahan. Om soira' di nokito di tulun dot ogumu' o miagal diri, om pomogiak ngai' nopo iyolo' om otud no do tuminuku'.
Dusa di Nadab om i Abihu
1 Insan tadau om ngoyo' no di Nadab om i Abihu i talam di poiiyanan diyolo'd tapui. Iyolo' nopoddi om tangaanak di Harun. Om suangai no diyolo'd popou i talam diri, om ruhangai no diyolo'd kominyan; om patahako' nogiddi diyolo' dot id Tuhan. Nga' iri nopo tapui'ddi om a' i' olidang, tu' a' i' iyolo'd Tuhan sinuhu' do papatahak diri. 2 Om sigog nopoddi do polintuhuno' nod Tuhan o tapui do minonorob diyolo', gisom do napatai iyolo' do hiri'd Kiim do Tuhan. 3 Om boros kaddi di Musa dot id di Harun, “Iti no o komoyon do Tuhan di boros dau do poingkaa, ‘Koinsanai di tulun di momonsoi'd karaja' ku om mositi' no do momusou doho', tu' iyoho' noo o Kinorohingan, om pointalangon ku indo o kagayaan ku dot id tulun ku,’ ka,” ka dau. Nga' aiso' id komi di Harun. 4 Om lohowo' no di Musa i Misail om i Ilsapan. Iyolo' nopo om tangaanak di Usiol, i tamanon di Harun. Om boros ka di Musa dot id diyolo', “Kainou'd hiti, om ngoyon ngai' i' dokoyu antayango' ilo rata' di kamanakon dokoyu do sumoliwan diti Kiim dot Olidang; om posoliwanon i' diti kokiiman,” ka dau. 5 Om rikot noddi iyolo' om antayango' no diyolo' i rata, nga' hiri nod pakayan o nigitan diyolo' do tontok di minangantayang di rata'. Om posoliwano' no diyolo' di kokiiman i rata'ddi, do miagal di pinonuhuan di Musa. 6 Om boro-boros noddi i Musa dot id di Harun om id di Iliasar om id di Itamar, i tangaanak di Harun. Boros ka dau, “Kada' dokoyu pologoso' dot a' sudayon ino tobuk dokoyu, om kada' dokoyu hurako' ino pakayan dokoyu do pointalang do mogihad kou. Tu' ondung wonsoyon dokoyu o miagal diri om apatai kou no moti'. Om otogod nondo o Tuhan do koinsanai'd tulun dot Israil. Nga' koino-ino i' o koinsanai di tulun dot Israil di suwai do mogihad do kinapatayon di duwo o tulun diri, i pinatai di tapui do mantad id Tuhan. 7 Kada' kou soliwan diti wawayaan do Kiim, om a' kou i' apatai. Tu' nokotobilang kou no do momonsoi do karaja di don Tuhan, do tontok di tinuntugan kou di tumau,” ka dau. Om wonsoyo' no diyolo' o miagal di pinoboros di Musa.
Oturan do Tonudon dot Imam
8 Om boros ka do Tuhan dot id di Harun, 9 “A' kou no koino-ino do sumuang di Kiim dot Olidang, iya' om i tangaanak nu, ondung koponginum kou nod waig dot anggur ko' tiinumon di kaawuk. Om ondung sumuang kou, om apatai kou no moti'. Om iti no ot oturan dot apatut do tonudon do koinsanai'd sinakagon nu. 10 Pisuwai-suwayon no kopio dokoyu i dong Kinorohingan om i dong kogumuan, om it a' sosomu' om i sosomu' dot id pagantangan do tugama'. 11 Potudukon no kopio dot id tulun dot Israil o koinsanai dit oturan do nakatahak ku diya', di pinolombus di Musa,” ka. 12 Om boros kad Musa dot id di Harun, om id di Iliasar om id di Itamar, i tangaanak di Harun, “Ngoyo' dokoyu onuo' i porsombahan do gandum, i noolu' di porsombahan do taakanon di pinatahak dot id Tuhan. Om wonsoyon nori do roti dit a' ralatan do pangambang, om akanon i' do hilo'd toning di pananaraban do porsombahan, tu' iri nopo porsombahan diri om olidang no kopio. 13 Kanon no dokoyu i roti'ddi dot id kinoiyonon dit olidang; tu' iri no o dokoyu'd gontok, diya' om don tangaanak nu di tongokusai, do mantad id taakanon di pinatahak dot id Tuhan. Iri no o pinonuhuan do Tuhan doho'. 14 Nga' koino-ino kou i' om i tangaanak dokoyu'd kusai om tondu' do mangakan di kangkab om i gakod di tayam-tayam di numaan do porsombahan om i porsombahan do pinotobilang do maan do don Tuhan, it aanu dit imam. Honggo nopo o kinoiyonon dit olidang dot id pagantangan do tugama' om koino-ino no dokoyu'd iyonon do mangakan diri. 15 Om igitan nondo diyolo' i gakod om i kangkab di tayam-tayam diri do tontok di patahakon i lunok do maan do porsombahan do taakanon dot id Tuhan. Iri nopo popot do tayam-tayam diri om gontok no dokoyu om gontok di tangaanak dokoyu do gisom dot alaid, do miagal di pinonuhuan do Tuhan,” ka dau. 16 Om uhoto' no di Musa ondung hinonggo i kambing do maan do porsombahan do pangampun do dusa. Om koilaai no dau do nosorob no i kambing diri. Om kotogod noddi iyau di Iliasar om i Itamar. Om boros ka dau, 17 “Nokuro tu' okon ko' id kinoiyonon dit olidang o pinangakanan dokoyu di porsombahan do pangampun do dusa'ddi? Olidang tomod moti' iri, om pinatahak pogi' do Tuhan iri dot id dokoyu nga' maan do pangampun do dusa diti tulun dot ogumu'. 18 Om mositi' no daa do hilo'd Kiim dot Olidang o pinangakanan dokoyu di porsombahan diri do miagal di pinonuhuan ku dokoyu, tu' a' i' noigitan i raha' di kambing diri do hilo'd Kiim dot Olidang,” ka dau. 19 Om boros ka di Harun do suminimbar, “Poingkuro no daa do nakan ku i porsombahan do pangampun do dusa'ddi di tadau baino'? Nokoinsonong i' tuu daa do ginawo'd Tuhan iri? Nakatahak no di tulun dot ogumu' i porsombahan do pangampun do dusa om i porsombahan di sorobon dot id Tuhan di tadau baino', nga' nosiliu kasai' i' iti kosusaan dot id doho',” ka dau. 20 Om natapatan iddi i Musa do nokorongou di pinosimbar di Harun do miagal diri.
Nintorusan di Koino-ino do Kanon om it A' Koino-ino do Kanon
1 Om patahako' nod Tuhan dot id di Musa om id di Harun iti piro-piro ot oturan, 2-3 do patahakon dot id tulun dot Israil. Nunu nopo o nintorusan di poingiyon do hiti'd tindal, i manapa' di kanon dau, om i nopilapak o sondulu om koino-ino no dokoyu'd kanon. 4-6 Nga' iri nopo unta, om i palanuk, om i tikus balanda' om a' i' koino-ino do kanon. Mositi' nod pokososomuon ngai' o nintorusan diri tu' mulong piya do sapaon diyolo' i kanon diyolo', nga' a' i' nopilapak o sondulu diyolo'. 7 Wogok nga' a' i' koino-ino do kanon. Om mositi' nod pokososomuon i wogok tu' nopilapak piya daa o sondulu nga' a' i' i wogok manapa' di kanon dau. 8 Kada' kou no kopio pangakan do nintorusan diri om kada' kou ongoi igit do nintorusan diri di nangapatai piya, tu' nintorusan nopoddi om sosomu' i'. 9 Koino-ino kou i' do mangakan do nunu nopo kasada' di kisorod om kisisi'. 10 Nga' nunu nopo o nintorusan di poingiyon do hilo'd waig dit aiso' o sorod om aiso' o sisi', om amu' no koino-ino'd kanon. 11 Nintorusan nopo do miagal diri om pokososomuon no. Amu' nori koino-ino do kanon, om amu' koino-ino do mongoi kama'.2|60|HK7C|Wogok, unta, tikus talun, tikus belanda|11.11 12 Kada' kou no kopio pangakan do nunu nopo i poingiyon dot id suang do waig dit aiso' o sorod om aiso' o sisi'. 13-19 Kada' kou no kopio pangakan dot ongoiso' piya do tombolog diti: kondiu, puok, simpupulu, kondiu baras, bangkahak, tombolog di roitan do burung unta, putik rahat, luungon, montis, luing, tubou, om gair. 20 Om koinsanai di sontulud-tulud dit ongokooro' om i sangkamang-kamang, nga' pokososomuon ngai' no; 21 suwai nondo ko' i mimpod-simpod do mamanau. 22 Om koino-ino kou i' do mangakan do katat, om ngatit, om godu. 23 Nga' koinsanai dit ongkitalad dit ongokooro' om i sangkamang-kamang om mositi' no do pokososomuon. 24-28 Om isai nopo o koigit do tinan do nintorusan di nangarait diti di nangapatai om sosomu' no do gisom do sosodopon: koinsanai di nintorusan di kisondulu (suwai nondo ko' i nopilapak o sondulu om i manapa' di kanon dau) om i kigakod dot apat dit atarom o sondulu. Isai nopo o koigit do tinan do nintorusan diri di nangapatai om mositi' nod pupuan i pakayan dau, nga' sosomu' po ma kasai' iyau do gisom do sosodopon. 29-30 Iri nopo tikus do gouton, om i tikus dot angagayo om i tikus dot ongokoro', om tugarang, om pokososomuon ngai' nopo. 31 Om isai nopo o koigit di nintorusan diri di nangapatai om sosomu' no iyau do gisom do sosodopon. 32 Om ondung aratu' i tinan do nintorusan diri di napatai no dot id nunu nopo o koburu-buruon, dot iri tuu kayu, ko' kain, ko' kulit, ko' karung do winonsoi, om ososomu' nori, om mositi' no do poobugon dot id waig. Nga' poingkuro piya nga' sosomu' kasai' nori do gisom do sosodopon. 33 Om ondung aratu' i tinan di nintorusan diri di napatai no dot id kuron, om kotonggoi ngai' no i poinsuang di kuron dot ososomu', om iri kuron nga' mositi' no do babakon. 34 Iri nopo taakanon di koubasanan i' daa do mangakan, om ososomu' ngai' no dot ondung notungu nori do waig do mantad id kuron di nososomu'. Om iri i milo i' daa dot inumon dot id suang do kuron di nososomu' nga' kotonggoi no dot ososomu'. 35 Nunu nopo o korotuon di tinan di nintorusan diri di napatai no om ososomu' no; ondung i ropuhan do tana' ko' i pagagansakan di tana' do winonsoi o korotuon diri om mositi' no do babakon. 36 Nunu nopo ot otopisan di tinan di nintorusan di napatai'ddi om sosomu' no; nga' iri nopondo tudan do waig om i torobong om a' i' ososomu', tu' iti nopo om a' i' ososomu'. 37 Ondung haro ot ongoiso' do nintorusan di napatai dot aratu' dot id sakai di linsou di maan do tonomon, om a' i' ososomu' i linsou. 38 Nga' ondung poirandam do waig i linsou, om orotuan nondo di tinan di nintorusan di napatai'ddi, om ososomu' no i linsou. 39 Ondung haro o tulun do koigit do nintorusan di napatai, i koino-ino piya daa do kanon, om sosomu' no o tulun diri do gisom do sosodopon. 40 Om ondung haro o tulun do kapangakan do tonsi di nintorusan di napatai'ddi --- i naanu do mantad id honggo nopo o bohogian do tinan di nintorusan diri --- om mositi' no do pupuan dau o pakayan dau, nga' sosomu' kasai' po mando iyau do gisom do sosodopon. Om isai nopo o mongigit do nintorusan di napatai'ddi om mositi' no do pupuan dau o pakayan dau, nga' sosomu' kasai' po mando iyau do gisom do sosodopon. 41 Kada' kou nogi' kopio pangakan do nunu nopo o bansa' do nintorusan dit ongokooro' do sampanau-panau do hilo'd tana', 42 dot iri tuu i kumamang ko' iri po i kigakod dot apat, ko' it ogumu' o gakod, tu' sosomu' ngai' nori. 43 Kada' dokoyu sosomuo' o tinan dokoyu do mangakan do nintorusan diri o ponosomu'. 44 Iyoho' no o Tuhan, i Kinorohingan dokoyu, iyo nopoddi om antaan-taan no dokoyu om olidang kasai' kou i' tu' olidang oku i' iyoho'. 45 Iyoho' no i Tuhan, i pinoposoliwan dokoyu do mantad hilo'd Masir, om osiliu oku indo do Kinorohingan dokoyu. Kumolidang kou no, tu' olidang oku i'. 46 Om iri no ot oturan do pasal do koinsanai do nintorusan om tombolog, om pasal do koinsanai di poingiyon dot id suang do waig, om koinsanai di nintorusan di mimpanau do hiti'd tana'. 47 Om ilaan no kopio dokoyu i kopisuayan dit a' sosomu' om i sosomu', om i nintorusan di koino-ino do kanon om it a' koino-ino do kanon do tumanud dot oturan do tugama'.
Pomolidang do Tongoondu' dit Osusu
1 Om patahako' nod Tuhan dot id di Musa iti piro-piro ot oturan 2 do patahakon dot id tulun dot Israil. Soira' nopod haro o tondu' dot osusu, om kusai no o tanak dau, om sosomu' no i tondu'ddi dot id pagantangan do tugama' do solinaid do turu' o tadau; do miagal nopo di kososomuo' dau do tontok di haro o pomulanan dau. 3 Om orikot nopondo o tadau'd kawalu' om mositi' no do sunatan i tanak di kosususu'ddi. 4 Om katalib nopo i turu' o tadau, om tolu po nohopod om tolu o tadau di tondu' do pokososomuon, tu' ogumu' i' o raha' do nokosoliwan. Om katalib pondo iri om a' nogi' iyau sosomu'. Om tontok nopo dit a' po katalib i maso do kopomolidangan om a' po iyau koino-ino'd kumama' do nunu nopo it olidang ko' mongoi po suang di Kiim dot Olidang. 5 Soira' nopod haro o tondu' dot osusu, om tondu' no o tanak dau, om sosomu' no i tondu'ddi do solinaid do hopod om apat o tadau, do miagal do kososomuo' dau do tontok di haro o pomulanan dau. Om mantad nopoddi om onom po nohopod om onom o tadau di tondu' do pokososomuon tu' ogumu' i' o raha' do nokosoliwan. 6 Om atalib nopondo i maso'd kopomolidangan, do kusai tuu i tanak di pinogkosusu ko' tondu' po, om mositi' nod mongoi i tondu'ddi papatahak do porsombahan dot id imam do hiri'd wawayaan di Kiim do Tuhan. Porsombahan nopo do patahakon om songinan o tanak do dumba' di sontoun nogi' o tumur, do maan do porsombahan di sorobon, om songinan o punai ko' songinan o sikukur do maan do porsombahan do pangampun do dusa. 7 Om mositi' nod patahakon dit imam i porsombahan diri dot id Tuhan om wonsoyon i natantu' mantad do wonsoyon do pongidu' do kososomuo' di tondu', om olidang indo i tondu' dot id pagantangan do tugama'. Iri no ot apatut do wonsoyon di tondu', om oidu' indo i kososomuo' dau. 8 Ondung aiso' o panganu di tondu'ddi do tanak do dumba', om mositi' no do papatahak iyau do duwo o tinan do punai ko' duwo o tinan do sikukur. Iri nopo songinan om maan do porsombahan di sorobon om iri no tiso' om maan do porsombahan do pangampun do dusa. Om mositi' no do wonsoyon dit imam i natantu' mantad do wonsoyon do pongidu' di kososomuo' di tondu', om olidang indo i tondu'ddi dot id pagantangan do tugama'.
Oturan do Pasal do Toruol do Kulit
1 Om patahako' nod Tuhan dot id di Musa om id di Harun iti piro-piro ot oturan: 2 Ondung haro o tulun di kitoruol o kulit, it oguruk ko' i kikupos ko' i haro o miagal di tinudu-tudu' dot ongopurak, i koiyo-iyo do sumiliu'd toruol dit araat do hiri'd kulit dau, om mositi' nod ngoyon i tulun diri posolowoto' dit imam di suminolusuk di Harun. 3 Om porisaon nondo dit imam o kulit di tulun di kitoruol diri. Ondung opurak i hulu do hiri'd kulit di kitoruol, om poillosod no i kulit, om iri no kopio toruol do kulit dot araat o nokoontok di tulun diri. Om poboroson nondo dit imam di suminolusuk di Harun do sosomu' i tulun diri. 4 Nga' ondung opurak no toomod i kulit, om a' poillosod i kulit, om a' opurak i hulu, om posuwai-suwayon nopondo dit imam i tulun diri do solinaid do turu' o tadau. 5 Om ngoyon nondo kawagu dit imam porisao' i tulun diri di koturu' do tadau, om ondung a' nokosimban om a' nakaralad i toruol dot okito dau, om posuwai-suwayon po dau i tulun diri do solinaid do turu' kawagu o tadau. 6 Om ngoyon nondo kawagu dit imam porisao' i tulun diri di koturu' do tadau. Om ondung natanus i toruol, om a' no nakaralad, om poboroson nondo dit imam dot olidang i tulun diri, om okon ko' toruol dot araat i toruol dau. Om pupuan nondo di tulun i pakayan dau om olidang i' iyau dot id pagantangan do tugama'. 7 Nga' ondung rumalad i toruol dot id tohuri ko' i nokoboros dit imam dot olidang i tulun diri, om mositi' no do mongoi kawagu i tulun diri solowot dit imam. 8 Om porisaon nondo kawagu dit imam i toruol di tulun diri, om ondung nakaralad, om poboroson no dit imam do sosomu' i tulun, tu' iri nopo om toruol nod kulit dit araat. 9 Iri nopo tulun di kitoruol do kulit dit araat, om mositi' nod ngoyon posolowoto' dit imam. 10 Om porisaon nondo dit imam o tulun diri. Ondung opurak i kulit di kitoruol, om i hulu nga' opurak om haro po o gandas, 11 om kitoruol no kopio dot araat i kulit di tulun diri. Om mositi' nod poboroson dit imam do sosomu' i tulun diri. Okon no ko' posuwai-suwayon po toomod, tu' atalang no do sosomu' i tulun diri. 12 Ondung rumalad i miagal di tinudu-tudu' dit opurak, gisom dot otongkop o tinan di tulun do mantad id gakod om gisom dot id tulu dau, 13 om mositi' nod ngoyon kawagu iyau porisao' dit imam. Ondung okito dit imam do nokotongkop nod tinan di tulun i miagal di tinudu-tudu' dot opurak diri, om i kulit di tulun nga' opurak ngai' noddi, om mositi' nod poboroson dit imam dot olidang i tulun diri. 14-15 Nga' ondung gumandas, om mositi' nod ngoyon kawagu iyau porisao' dit imam. Om ondung gandas kopio iri, om mositi' nod poboroson do sosomu' i tulun diri. Tu' iri no i gandas o tanda' do toruol do kulit dit araat i toruol dau. 16 Nga' ondung lumingos i gandas, om mumang kawagu purak, om mositi' nod mongoi i tulun solowot dit imam, 17 om oporisa' i' iyau kawagu. Om ondung nokopurak i guminandas, om poboroson no dit imam dot olidang i tulun diri. 18 Ondung haro o tulun do kuposon, om olingos no i kupos dau 19 nga' alaid-laid no om haro po o lumonit dot opurak ko' opurak daragang- ragang o kokitanan do hiri'd kinolingasan di kupos, om mositi' nod mongoi i tulun diri solowot dit imam 20 om oporisa' i' iyau. Om ondung nokolosod i kulit di minumang purak, om nokopurak i hulu do hiri, om mositi' nod poboroson dit imam do sosomu' i tulun diri. Iri nopo kupos om koimpuunon nod toruol do kusta. 21 Nga' ondung a' opurak i hulu do hiri'd kinolingasan di kupos, om a' poillosod i kulit, suwai ko' opurak nogi' ko' i kulit do suwai, om mositi' nod posuwai-suwayon dit imam i tulun diri do solinaid do turu' o tadau. 22 Ondung rumalad it opurak diri, om mositi' nod poboroson dit imam do sosomu' i tulun diri tu' toruol nod kulit dit araat o nokoontok dau. 23 Nga' ondung a' nokosimban om a' ruminalad it opurak, om iri i kinolingasan di kupos iri, om poboroson no dot olidang i tulun diri. 24 Ondung haro o tulun dot olonuk do tapui, om mumang nondo purak ko' opurak daragang-ragang i kulit do hiri'd nolonuk, 25 om mositi' nod porisaon po dit imam i tulun diri. Ondung mumang purak i hulu do hiri'd nolonuk diri, om poillosod no i kulit om norolihan nod toruol do kulit dit araat i nolonuk do tapui'ddi. Om mositi' nod poboroson dit imam do sosomu' i tulun diri. 26 Nga' ondung a' mumang purak i hulu do hiri'd nolonuk, om a' nokolosod i kulit, suwai ko' opurak nogi' o kokitanan, om mositi' nod posuwai-suwayon dit imam o tulun diri do solinaid do turu' o tadau. 27 Om ngoyon nondo kawagu dit imam porisao' i toruol di tulun diri do koturu'd tadau. Om ondung nakaralad i toruol, om iri no o tanda' dot i toruol do kusta o nokoontok di tulun diri. Om mositi' nod poboroson do sosomu' i tulun diri. 28 Nga' ondung a' sumimban om a' rumalad it opurak diri, suwai ko' opurak nogi' o kokitanan, om okon i' ko' toruol do kusta iri. Om mositi' nod poboroson dit imam dot olidang i tulun diri, tu' iri nopo om kinolingasan i' di nolonuk do tapui. 29 Ondung haro o kusai ko' tondu' di kitoruol o kulit do tulu, ko' kitoruol o hiri'd roo, 30 om mositi' nod ngoyon kopio dit imam porisao' iri. Ondung poillosod i kulit, om osilou om otigas i tobuk do hiri, om iri no o tanda' do toruol do kusta o nokoontok do tulun diri. Om mositi' nod poboroson do sosomu' i tulun diri. 31 Ondung a' poillosod i kulit di kitoruol, nga' aiso' no ma o tobuk dit osonong do hiri, do tontok di porisao' i' dit imam, om mositi' nod posuwai-suwayon i tulun diri do solinaid do turu' o tadau. 32 Om koturu' pondod tadau, om mositi' nod porisaon kawagu dit imam i kulit di kitoruol. Om ondung a' nakaralad i toruol diri om aiso' o tobuk dit ongosilou, om a' poillosod o kokitanan di kulit, 33 om mositi' nod bugaran di tulun o posorili' di kulit di kitoruol. Om posuwai-suwayon po kawagu dit imam i tulun diri do solinaid do turu' o tadau. 34 Om koturu' pondod tadau, om ngoyon no kawagu dit imam porisao' i toruol di tulun diri. Om ondung a' nakaralad i toruol, om a' poillosod i kulit, om poboroson nod olidang i tulun diri; om mositi' nod pupuan di tulun o pakayan dau. 35 Nga' ondung rumalad i toruol dot id tohuri ko' i pinoboros dot olidang i tulun diri, 36 om mositi' nod ngoyon dit imam porisao' kawagu i toruol di tulun diri. Ondung nakaralad kopio i toruol, om a' no minog dot antangan dit imam ondung haro ot osilou di tobuk, tu' atalang no do sosomu' i tulun diri. 37 Nga' ondung okito dit imam dot a' rumalad i toruol, om nokosuni no o tobuk dit ongosonong do hiri, om nolingos no i toruol diri. Om mositi' nod poboroson dit imam do nolingos i toruol om olidang i tulun diri. 38 Ondung haro o kusai ko' tondu' di haro o miagal do tinudu-tudu' dot opurak do hiri'd kulit, 39 om mositi' nod porisaon kopio dit imam o tulun diri. Ondung a' opurak no i kulit, om gurap i' toomod iri do nokoroliu do hiri'd kulit di tulun, om a' i' sosomu' i tulun diri. 40-41 Ondung alagasan o ponong id tipus ko' ponong id turos do tulu do tongokusai, om a' i' sosomu' i tulun diri, ondung nalagasan no toomod. 42 Nga' ondung haro o mimbulai dot opurak daragang-ragang do hiri'd nalagasan, om toruol nod kulit dit araat o nokoontok di tulun diri. 43 Om mositi' nod ngoyon kopio dit imam porisao' o tulun diri. Om ondung haro kopio it ongopurak daragang-ragang do hiri'd nalagasan, 44 om mositi' nod poboroson dit imam do sosomu' i tulun diri tu' noontok no do toruol do kusta o hiri'd tulu di tulun diri. 45 Om tulun nopo di noontok do toruol do kulit dit araat, om mositi' nod manampakai iyau do pakayan di nongohurak-hurak no, om a' sudayon o tobuk. Om mositi' nod tirungon dau o ponong id siriba' do rabas dau, om minggiak nogindo do poingkaa, “Sosomu'! Sosomu'!” ka. 46 Solinaid nopo di tulun do kitoruol do miagal diri, om sosomu' no iyau. Om mositi' no do hiri'd soliwan di kokiiman o tiyonon dau, it id sodu' do tulun do suwai.
Oturan do Pasal do Gorum
47 Soira' nopod haro o gorum dot id kain ko' id pakayan di kihulu-hulu ko' i kain linan 48 ko' id kulit ko' id nunu nopo i kulit do winonsoi, 49 om ondung otomou-tomou ko' aragang-ragang o kokitanan diri, om iri no kopio i gorum di rumalad iri, om mositi' nod ngoyon pokitanai dit imam iri. 50 Om antangan nondo dit imam i gorumon diri om posuwai-suwayon no i gorumon do solinaid do turu' o tadau. 51 Om ngoyon no dau kawagu antangai iri di koturu'd tadau. Om nakaralad nopo i gorum, om sosomu' no i ginorumon diri. 52 Om mositi' nod tutudan dit imam i gorumon, tu' iri nopo om gorum di rumalad; om mositi' no do tapui o pamaraag diri. 53 Nga' ondung a' nakaralad i gorum do hiri'd nokodokoton di gorum dot okito dit imam, 54 om monuhu' nondo iyau'd tulun do momupu' di ginorumon diri om posuwai-suwayon o poiyanan diri do solinaid do turu' o tadau. 55 Om ngoyon nondo kawagu dit imam antangai i gorumon diri, om ondung iyo kasai'ddi o kokitanan di gorum, dot a' piya daa nakaralad, om sosomu' no i ginorumon diri; om mositi' nod tutudan, do hiri tuu'd soibau ko' hiri pod saalom i gorumon. 56 Nga' ondung natanus i gorum di ngoyon kawagu dit imam antangai i ginorumon, om hurakon nondo dau i ginorumon do mantad hiri'd kain ko' mantad hiri'd kulit. 57 Nga' ondung mimbulai kawagu i gorum, om rumalad no kawagu, om mositi' nod tutudan di sanganu i ginorumon diri. 58 Ondung pupuan dau i ginorumon om a' nondo mimbulai kawagu i gorum, om mositi' nod pupuan kawagu dau iri, om olidang i' iri dot id pagantangan do tugama'. 59 Om iri no o toturan do pasal do gorum dot id pakayan, dot iri tuu i kain do kihulu-hulu ko' iri po kain linan, ko' nunu nopo i kulit do winonsoi.
Pomolidang do Tulun di Kolilingasai do Toruol do Kusta
1 Om patahako' nod Tuhan dot id di Musa 2 iti piro-piro ot oturan do pasal do kowoyo-woyoo' do momolidang do tulun di nolingasan do mantad id toruol do kusta. Tontok nopo di tadau do poboroson dot olidang i tulun diri, om mositi' no do ngoyon iyau posolowoto' dit imam. 3 Om angatan nondo iyau dit imam do sumoliwan di kokiiman om porisaon nogindo iyau. Ondung nolingos no kopio i toruol dau, 4 om suhuon nondo dit imam i tulun diri do papatahak do duwo o tombolog dit a' sosomu', om sallangod o kayu sedar do Libanon, om sampatod o tali dit aragang, om sompuun o sakot di roitan do hisop. 5 Om iri nopondo tiso' di tombolog om mositi' no do kokoron om sahawon di kuron di kisuang do waig do mantad id tudan do waig. 6 Om iri no tombolog di tiso', om i kayu sedar, om i tali dot aragang om i sakot di roitan do hisop, om potobungon di raha' di tombolog di kinokor. 7 Om powowoson nondo dit imam dot inturu' i raha' di tombolog diri do hiri'd tulun di nolingasan. Om poboroson nogindo dit imam dot olidang i tulun diri. Om iri nopondo i tombolog di poimiyau om mositi' no do poiduwon do hilo'd talun. 8 Om pupuan nondo di tulun o pakayan dau, om bugaron ngai' o tobuk dau, om mongoi podsu'; om olidang nogindo iyau dot id pagantangan do tugama'. Om koino-ino nondo iyau do sumuang do hiri'd kokiiman nga' hiri po mando kasai' iyau'd soliwan di kiim dau do solinaid do turu' o tadau. 9 Om koturu' nopondod tadau, om bugaron po kawagu dau o tulu dau, om bugaron o ganggut, om bugaron ngai' o hulu do tinan dau; om pupuan nogindo dau o pakayan dau om mongoi podsu', om olidang nogindo iyau dot id pagantangan do tugama'. 10 Kawalu' nopondod tadau om mositi' nod paatod iyau do duwo o tanak do dumba' di tontoluhan, om songinan o dumba' do tondu' di sontoun nogi' o tumur om it aiso' o bohiton do tinan, om tolu kilogram do tapung di rinalatan do tumau do saitun, om sompitolu di songlito o tumau do saitun. 11 Om mositi' no dot angatan dit imam i tulun diri om igitan ngai' i porsombahan dau'ddi do hiri'd wawayaan di Kiim do Tuhan. 12 Om ngoyon nondo dit imam o tiso' di tanak do dumba' do tontoluhan diri om i tumau do saitun di sompitolu di sonlito. Om patahakon nondo dau iri do maan do porsombahan di poningolon. Om iri nopo nga' porsombahan di pinotobilang do maan do don Tuhan, om iri no it imam o kaanu'ddi. 13 Om mositi' no do sumbolion dau i tanak do dumba'ddi dot id kinoiyonon dit olidang, i hiri'd ponunumbolian do tayam-tayam di maan do porsombahan do pangampun do dusa om i porsombahan di sorobon. Om mositi' no do hiri o ponumbolian di dumba'ddi tu' iri nopo porsombahan do poningolon, om iyo i' di porsombahan do pangampun do dusa tu' olidang kopio om iri no imam o kaanu. 14 Om manu nondo it imam dot ongokooro' di raha' di tanak do dumba'ddi om pogihilon no do hiri'd tolingo'd wanan, om hiri'd posolon do longon do wanan om hiri'd posolon do lapap do wanan di tulun di poboroson dot olidang dot id pagantangan do tugama'. 15 Om manu it imam dot ongokooro' di tumau do saitun om poihibon no do hiri'd palad dau'd gibang. 16 Om potuduwon nogindo dit imam o tiso' di tunturu' do longon dau'd wanan di tumau do saitun diri, om powowoson dot inturu' ot ongokooro'ddi do hiri'd Kiim do Tuhan. 17 Om manu nogindo iyau dot ongokooro' di tumau di hiri'd palad dau, om ongokooro' di raha' di dumba', om pogihilon nogindo do hiri'd tolingo'd wanan, om hiri'd posolon do longon do wanan, om hiri'd posolon do lapap do wanan di tulun di poboroson dot olidang dot id pagantangan do tugama'. 18 Om iri nopondo tumau di noolu' do hiri'd palad dau, om poumahon do tulu di tulun diri. Om iyo noddi o wonsoyon do maan do pomolidang do tumanud dit oturan do tugama'. 19 Om patahakon nogindo dit imam i porsombahan do pangampun do dusa om wonsoyon ngai' i maan do pomolidang do tumanud dot oturan do tugama'. Om owonsoi ngai' po dau iri om sumbolion nogindo dau i tayam-tayam do maan do porsombahan di sorobon. 20 Om patahakon nondo dau iri do mitonggoi di porsombahan do gandum do hiri'd pananaraban do porsombahan. Om iyo noddi o wonsoyon dit imam do maan do pomolidang do tinan do tumanud dot oturan do tugama'. Om olidang nondo i tulun diri dot id pagantangan do tugama'. 21 Ondung mosikin i tulun diri, om aiso' no o panganu dau di tolu o tayam-tayam di natantu' mantad do maan do porsombahan, om migit nopo iyau do songinan o dumba' do tontoluhan di tanak po do maan do porsombahan do poningolon, om maan do porsombahan di potobilangon do maan do don Tuhan, it aanu dit imam. Om songkilogram nopo o tapung di rinalatan do tumau do saitun o patahakon dau do maan do porsombahan do gandum om sompitolu di songlito o tumau do saitun. 22 Om papatahak nogi' iyau do duwo o tinan do punai ko' duwo o tinan do sikukur. Songinan o maan do porsombahan do pangampun do dusa om songinan o maan do porsombahan di sorobon. 23 Om kawalu' nopondod tadau di kopomolidangan do tinan dau, om mositi' nod ngoyon ngai' dau patahako' dot id imam i porsombahan diri do hiri'd wawayaan di Kiim dot Olidang. 24 Om ngoyon nondo dit imam i dumba' om i tumau do saitun diri om patahakon no do maan do porsombahan di potobilangon do maan do don Tuhan, om iri nopo om aanu no dit imam. 25 Om sumbolion nondo dit imam i dumba'ddi om manu dot ongokooro' di raha' om pogihilon nogindo do hiri'd tolingo'd wanan, om hiri'd posolon do longon do wanan, om hiri'd posolon do lapap do wanan di tulun di poboroson dot olidang. 26 Om poihibon nondo dit imam ot ongokooro' di tumau do hiri'd palad dau'd gibang. 27 Om potuduwon o tiso' di tunturu' do longon dau'd wanan om powowoson nogindo dau dot inturu' do hiri'd Kiim do Tuhan. 28 Om gihilan nondo dau di tumau o hiri'd ginihilan dau di raha': hiri'd tolingo'd wanan, om hiri'd posolon do longon do wanan, om hiri'd posolon do lapap do wanan di tulun di poboroson dot olidang. 29 Om iri nopondo noolu' di tumau om poumahon do hiri'd tulu di tulun diri. Om iyo noddi o kowoyo-woyoo' do momolidang do tinan do tumanud dot oturan do tugama'. 30 Om patahakon nogindo dau o tiso' di punai ko' sikukur 31 do maan do porsombahan do pangampun do dusa, om iri no tiso' om maan do porsombahan di sorobon do mitonggoi di porsombahan do gandum. Om iyo noddi o wonsoyon dit imam do momolidang do tinan do tulun do tumanud dot oturan do tugama'. 32 Iri no ot oturan do tonudon do tulun di kitoruol do kusta nga' it aiso' o panganu di natantu' mantad do maan do porsombahan do pomolidang do tinan dau.
Gorum dot id Walai
33 Om patahako' nod Tuhan dot id di Musa om id di Harun 34 iti piro-piro o toturan do pasal di walai dot adakatan do gorum di rumalad. (Iti nopo toturan diti om tonudon nopo om kosuang i tulun dot Israil di pomogunan do Kanaan, i patahakon do Tuhan dot id diyolo' do maan do diyolo'd songonuon.) 35 Isai nopo o kokito do gorum do hiri'd walai dau, om mositi' no do mongoi pomisunud dit imam do pasal diri. 36 Om monuhu' nondo it imam do posoliwan do koinsanai di poinsuang di walai do tintod dau do mongoi pogontong kopio di gorum; tu' a' nopo posoliwanon nga' oinsanan nopo i poinsuang di walai'ddi do pokososomuon. Om mongoi nogindo it imam do hiri'd walai'ddi 37 do mongoi pogontong di gorumon. Ondung haro ot otomou-tomou ko' aragang- ragang do potomborok do pasarabak di limput, 38 om tongkiadan no dau i walai om ontiilan do solinaid do turu' o tadau. 39 Om koturu' pondod tadau om gumuli' no kawagu iyau do mongoi pogontong di gorum. Ondung nakaralad i gorum, 40-41 om monuhu' no iyau do tulun do mongidu' di watu di nadakatan do gorum, om iduwon ngai' i limput di ponong id suang. Om iri nopondo pinonorokot om i watu di nidu'ddi om pataamon do hiri'd kinoiyonon di sosomu' do hiri'd soliwan di bandar. 42 Om tingalanan nogindo do watu do wagu i watu di nidu'ddi. Om lopisan do ponorokot do wagu i limput di walai. 43 Ondung mimbulai kawagu i gorum do hiri'd walai dot id tohuri ko' i noidu' i watu di nadakatan do gorum, om nokisasan om nolopisan di ponorokot i walai, 44 om mositi' nod ngoyon kawagu dit imam antangai i walai'ddi. Ondung nakaralad i gorum om sosomu' ngai' no i walai'ddi. 45 Om mositi' nod huyason i walai, om iri nopondo watu om i kayu, om i pinonorokot do pinomonsoi di walai om mositi' nod posoliwanon di bandar om pataamon do hiri'd kinoiyonon di sosomu'. 46 Isai nopo o sumuang di walai di maso pod poontiil, om sosomu' no do gisom do sosodopon. 47 Isai nopo o kolii ko' kaakan do hiri'd walai'ddi om mositi' no do pupuan i pakayan dau. 48 Ondung a' mimbulai i gorum do hiri'd walai di nolopisan di pinonorokot do wagu di ngoyon dit imam antangai, om poboroson no dot olidang i walai, tu' aiso' noddi o gorum do hiri. 49 Om manganu nondo it imam do duwo o tombolog, om piro-piro o langod do kayu sedar, om sampatod o tali dit aragang, om sompuun o sakot di roitan do hisop. 50 Om mositi' nod kokoron dau i tiso' di tombolog diri do sahawon do kuron di kisuang do waig di kaanu do mantad id tudan do waig. 51 Om mositi' nod ngoyon dau poobugo' di raha' di tombolog di kinokor i kayu sedar, om i hisop, om i tali dot aragang diri, om i tombolog di miyau. Om poobugon ngai' dau iri do hiri'd waig di kaanu'ddi. Om wawasan nogindo dau di raha' i walai'ddi dot inturu' kowowos. 52-53 Om iri nopo tombolog di poimiyau om mositi' nod poiduwon dit imam do hiri'd talun, i hiri'd soliwan di bandar. Om iyo noddi o wonsoyon dit imam do pomolidang di walai do tumanud dot oturan do tugama', om olidang indo i walai'ddi dot id pagantangan do tugama'. 54 Om iyo noddi ot oturan do pasal do toruol do kusta, 55-56 om pasal dit oguruk, om i kupos, om i miagal di tinudu-tudu' dot ongopurak ko' iri po lumonit, om pasal do gorum dot id pakayan ko' id walai. 57 Om iti nopo piro-piro o toturan diti nga' pongilo ondung sosomu' tuu ko' amu' o nunu nopo dot id pagantangan do tugama'.
I Sosomu' do Mantad id Tulun
1 Om patahako' nod Tuhan dot id di Musa om id di Harun iti piro-piro o toturan 2 do patahakon dot id tulun dot Israil. Iri nopo miagal-agal do waig di sumoliwan do mantad id wayaan do sobu do tongokusai om sosomu' i'; 3 dot iri tuu i kotobpus kopio ko' iri po it opusus, om a' indo kotobpus. 4 Om iri toodopon dot oirikahanan ko' oodop do kusai'ddi nga' kotonggoi nod sosomu'. 5-8 Om isai nopo o tulun di kakama' do tulun di nokopoulai di miagal-agal do waig diri, ko' kakabai di toodopon dau, ko' koirikau do hiri'd nirikohonon dau, ko' it odulaan do tulun diri, om mositi' nod pupuan dau i pakayan dau om modsu'; nga' sosomu' no i tulun diri do gisom do sosodopon. 9 Iri nopo pakol ko' timpohon dot oirikahanan do tulun di nokopoulai di miagal-agal do waig diri, om sosomu' no. 10-11 Isai nopo i kakama' ko' kagantai do nunu nopo i noirikahanan ko' i noigitan do tulun do miagal diri, dot a' po iyau kopongoug do palad dot id gulu, om sosomu' no o tulun diri do gisom do sosodopon. 12 Iri nopo kuron dot igitan do tulun do miagal diri om mositi' nod babakon, om lihungan i tompurung di kayu do winonsoi, dit oigitan dau. 13 Olingasan nopondo o tulun di haro o miagal-agal do waig do sumoliwan do mantad id wayaan do sobu dau, iri no i toruol dau'ddi, om mositi' nod mandad iyau do solinaid do turu' o tadau. Om katalib pondo iri om pupuan nogi' dau i pakayan dau om mongoi podsu' dot id tudan do waig, om olidang nogindo iyau dot id pagantangan do tugama'. 14 Om kawalu' pondod tadau om mositi' nod paatod iyau do duwo o tinan do punai ko' sikukur do hiri'd wawayaan di Kiim do Tuhan do ngoyon patahako' dit imam. 15 Om patahakon nondo dit imam o tiso' di tombolog diri do maan do porsombahan do pangampun do dusa om iri no tiso' om maan do porsombahan di sorobon. Om iyo noddi o wonsoyon dit imam do pomolidang do tulun diri do tumanud dit oturan do tugama'. 16 Soira' nopo do kasabput do kusai o narot dau, om mositi' nod modsu' iyau, nga' sosomu' po ma kasai' iyau do gisom do sosodopon. 17 Nunu nopo i kain ko' kulit do winonsoi dot osobputan di narot om mositi' nod pupuan, om sosomu' nori do gisom do sosodopon. 18 Kopidudun nopo o kusai om tondu', om mositi' nod modsu' goduwo iyolo', om sosomu' no iyolo' do gisom do sosodopon. 19 Tontok nopod pomulanan do tondu', om sosomu' no i tondu'ddi do solinaid do turu' o tadau. Om isai nopo i koigit dau om sosomu' no do gisom do sosodopon. 20 Nunu nopo it oirikahanan dau ko' it oliiyan dau do maso'd haro o pomulanan dau om sosomu' no. 21-23 Isai nopo o koigit do toodopon ko' koigit di noirikahanan di tondu'ddi nga' mositi' nod pupuan di tulun i pakayan dau om modsu'. Om sosomu' no i tulun diri do gisom do sosodopon. 24 Ondung haro o kusai do mongoi dudun do tondu' di maso'd haro o pomulanan, om orolihan no i kusai di kososomuo' di tondu'ddi om sosomu' no iyau do solinaid do turu' o tadau. Om honggo nopo o toodopon dot oodop dau nga' sosomu' no. 25 Ondung haro o tondu' do haro kasai' o raha' do sumoliwan do solinaid do piro-piro o tadau do suwai ko' i pomulanan dau ko' ondung alaid ko' mantad di koubasanan do tumingkod o pomulanan dau, om sosomu' no iyau do solinaid pod haro o raha' do sumoliwan, do miagal di kososomuo' dau di maso'd haro o pomulanan dau. 26 Om honggo nopo o toodopon di koliiyon dau ko' nunu nopo it oirikahanan dau do tontok do miagal iyau'ddi, om sosomu' no. 27 Isai nopo i koigit diri om kotonggoi nod sosomu'; om mositi' nod pupuan dau i kain dau om modsu'; om sosomu' kasai' no iyau do gisom do sosodopon. 28 Otingkod nopondo i raha' do sumoliwan, om mositi' nod mandad i tondu'ddi do solinaid do turu' o tadau, om olidang nogindo iyau dot id pagantangan do tugama'. 29 Om kawalu' pondod tadau om migit nondo iyau do duwo o tinan do punai ko' duwo o tinan do sikukur do ngoyon patahako' dit imam do hiri'd wawayaan di Kiim do Tuhan. 30 Om patahakon nondo dit imam o tiso' di tombolog diri do maan do porsombahan do pangampun do dusa om iri no tiso' om maan do porsombahan do sorobon. Om iyo noddi o wonsoyon dit imam do momolidang do tondu'ddi do tumanud dot oturan do tugama'. 31 Om sinuhu' do Tuhan i Musa do poposorou di tulun dot Israil do mongilo kopio ondung soira' iyolo'd ososomu' om soira' dot a' sosomu', om a' i' diyolo' ososomu' i Kiim do Tuhan, i hiri'd tanga' di kokiiman diyolo'. Tu' ondung koponosomu' iyolo' di Kiim dot Olidang, om patayon no iyolo'. 32 Om iri ngai' no ot oturan do tonudon di tongokusai di haro o miagal-agal do waig do sumoliwan do mantad id wayaan do sobu ko' i kopoulai do narot, 33 om i tonudon do tongoondu' do haro o pomulanan, om tonudon di tongokusai di kodudun di tongoondu' di haro o pomulanan.
I Tadau do Kopongompunan do Dusa
1 Om boro-boros no o Tuhan dot id di Musa di napatai i duwo o tanak do kusai di Harun, dot i pinapatahak do tapui dit okon ko' korohian do Tuhan o nakapatayan. 2 Boros ka dau, “Sunudan no i Harun, i tobpinai nu, do tontok no di maso'd natantu' mantad do koino-ino iyau do mongoi do hiri'd dotirung di tabir, do sumuang di Bilik dit Olidang Kopio. Tu' hilo' oku nod mintalang do poirolot do haun, do hiri'd sawa-sawat di sompon di Kaban do Tumpongo. Ondung tumolibamban i Harun dot oturan diri, om apatai no iyau. 3 Kapatahak po iyau'd sapi' do tontoluhan dit okoro' po do maan do porsombahan do pangampun do dusa om kapatahak do songinan o dumba' do tontoluhan do maan do porsombahan di sorobon, om koino-ino nogi' iyau do sumuang di Bilik dit Olidang Kopio,” ka dau. 4 Om patahako' noddi do Tuhan iti piro-piro ot oturan. Tintod nopo di Harun do mongoi do hiri'd Bilik dit Olidang Kopio, om mositi' nod modsu' iyau om manampakai di pakayan do dong imam, i rasuk, om i soluar dot oniiba', om i tagkos, om i sigar di kain linan ngai' nopo do winonsoi. 5 Om mositi' nod onuan di tulun dot Israil i Harun do duwo o kambing do tontoluhan do maan do porsombahan do pangampun do dusa om songinan o dumba' do tontoluhan do maan do porsombahan di sorobon. 6 Om mositi' nod papatahak i Harun do songinan o sapi' do tontoluhan do maan do porsombahan do pananus do dusa dau om i dusa di sompiiyon dau. 7 Om igitan nogindo dau i duwo o kambing diri do hiri'd wawayaan di Kiim do Tuhan. 8 Hiri nopondo om undion nondo dau, do mamakai do duwo o watu do maan do pongilo. Iri nopo tiso' di watu om natandaan do “don Tuhan,” ka, om iri no tiso' om natandaan dot “di Asasil,” ka. 9 Om patahakon nondo di Harun i kambing di nopili' do don Tuhan do maan do porsombahan do pangampun do dusa. 10 Om iri no i kambing di nopili' do patahakon di Asasil, om miyahon nopo do papatahak dot id Tuhan om uyungon nogindo do kumaa do hiri'd tana' do kowotuan do pokoyoon dot id di Asasil, om oidu' i' i dusa di tulun dot Israil. 11 Soira' nopo do papatahak i Harun di sapi' do tontoluhan do maan do porsombahan do pangampun do dusa dau om i sompiiyon dau, 12 om mositi' no do mongoi iyau do talam di poiiyanan kasai' do tapui, om ponuon iri do popou di kisinikit po do mantad hiri'd pananaraban do porsombahan, om manu do duwo tonggom do kominyan dit atandai, om igitan nogindo iri do hiri'd suang di Bilik dit Olidang Kopio. 13 Om mositi' nod posuboon dau i kominyan diri do hiri'd tapui, i hiri'd dotoguangan do Tuhan. Om otirung indo di lisun i sompon di Kaban do Tumpongo, om a' i' dau okito i sompon, om a' indo iyau apatai. 14 Om mositi' nod manu iyau dot ongokooro' di raha' di sapi' om potuduwon nondo dau'd hiri o tunturu' dau, om powowoson do hiri'd dotimbabaan di Kaban do Tumpongo dot inturu' powowoso'. 15 Om owonsoi pondo o miagal diri, om sumbolion nogindo di Harun i kambing do maan do pangampun do dusa di tulun dot ogumu', om igitan i raha' di kambing diri do hiri'd Bilik dit Olidang Kopio. Om powowoson nogindo dau i raha'ddi do hiri'd sompon om hiri'd dotimbabaan di Kaban do Tumpongo, do miagal di pinopowowos iyau di raha' di sapi'. 16 Om iyo noddi o wonsoyon dau do pomolidang di Bilik dit Olidang Kopio do mantad id kososomuo' di tulun dot Israil om mantad id koinsanai'd dusa diyolo'. Om mositi' nod wonsoyon dau o miagal diri do pomolidang di Kiim dit Olidang, tu' hiri id tanga' di kokiiman o pinawansayan di Kiim dit Olidang, om iri nopo kokiiman nga' sosomu' i' dot id pagantangan do tugama'. 17 Mantad nopo di sumuang i' i Harun di Bilik dit Olidang Kopio do mongoi pomonsoi di natantu' mantad do wonsoyon do maan do pomolidang, om gisom do kosoliwan iyau, om kada' nod haro o tongoiso' piya'd tulun do poundorong do hiri'd suang di Kiim diri. Om owonsoi pondo di Harun iri do bagi'd tinan dau, om i sompiiyon dau, om bagi'd koinsanai di tulun, 18 om mositi' nod sumoliwan iyau do mongoi'd hiri'd pananaraban do porsombahan diri. Om mositi' nod manu iyau dot ongokooro' di raha' di sapi' om raha' di kambing om pogihilon nondo do hiri'd sinangau-sangau dot id pointikid di sunduk di pananaraban do porsombahan. 19 Om potobungon nondo dau o tunturu' dau do hiri'd raha' om powowoson nogindo dau o tongokooro' di raha'ddi do hiri'd pananaraban do porsombahan dot inturu' wawasai. Om iyo noddi o kowoyo-woyoo' do momolidang di pananaraban do porsombahan do mantad id dusa di tulun dot Israil, om olidang indo i pananaraban do porsombahan diri.
I Kambing dot Oitom
20 Om boros ka kawagu'd Tuhan dot id di Musa, “Opongo pondo di Harun do momonsoi i natantu' mantad do wonsoyon do momolidang di Bilik dit Olidang Kopio, om i kinoiyonon do suwai di hiri'd Kiim do Tuhan, om i pananaraban do porsombahan do tumanud dit oturan do tugama', om mositi' no do patahakon dau dot id Tuhan i kambing di miyau po di nopili' do di Asasil. 21 Om mositi' nod pakabayon goduwo di Harun o longon dau do hiri'd sakai do tulu di kambing diri, om mikuwo'd mangakun do koinsanai di karaaton, om dusa, om kososongkiwal di tulun dot Israil, om kakaa i' dot id tulu di kambing o koinsanai di karaaton di tulun dot Israil. Om uyungon nondo i kambing diri do pokoyoon do hiri'd tana' do kowotuan. Moguyung nopoddi om songulun i nopili' do momonsoi do karaja'ddi. 22 Om tanggayan nondo di kambing diri o koinsanai di dusa do tulun dot Israil do hiri'd tana' do kowotuan dit aiso' o tulun do momogun. 23 Om sumuang nondo i Harun di Kiim dot Olidang, om iduwon dau i pakayan do dong imam; i rinasuk dau di tintod do suminuang di Bilik dit Olidang Kopio. Om poilihon nondo dau i pakayan diri do hiri'd Kiim dit Olidang. 24 Om mositi' nod modsu' iyau dot id bilik dit olidang om manampakai nogindo di dau'd pakayan. Om sumoliwan nogindo iyau do mongoi papatahak do porsombahan di sorobon do pananus di dusa dau om i dusa di tulun dot Israil. 25 Om sorobon nondo dau do hiri'd pananaraban do porsombahan i lunok di tayam-tayam di maan do porsombahan do pangampun do dusa. 26 Om iri nopo tulun di minongoi ponguyung di kambing do tontoluhan do hiri'd tana' do kowotuan do pokoyoon dot id di Asasil, om suhuon kopio do momupu' di pakayan dau om modsu' do tintod do gumuli' do hiri'd kokiiman. 27 Om iri nopondo i sapi' do tontoluhan om i dumba' do tontoluhan di numaan do porsombahan do pangampun do dusa, i songraha' di nigitan do hiri'd Bilik dit Olidang Kopio do maan do pananus do dusa, om mositi' no do posoliwanon di kokiiman, om sorobon nogindo. Om mositi' no do sorobon ngai' nopo i kulit, om i tonsi', om i suang do tian di duwo o tayam-tayam diri. 28 Om iri nopo tulun di modtutud ngai'ddi om mositi' nod momupu' di pakayan dau om modsu' do tintod do gumuli' do hiri'd kokiiman,” ka dau.
Kowoyo-woyoo' do Popoinggayo di Tadau do Kopongiduan do Dusa
29-31 Om boros ka kawagu'd Tuhan dot id di Musa, “Iti no ngai' ot oturan dit apatut do tonudon do gisom dot alaid. Tontok nopod tadau'd kohopod do tulan do koturu', om mositi' nod puasa om a' koino-ino'd momonsoi'd karaja' do nunu nopo, o koinsanai'd tulun dot Israil, om i bansa'd suwai di poirolot diyolo'. Tu' tadau nopoddi om tadau dit olidang kopio. Mositi' nod wonsoyon i natantu' mantad do wonsoyon do momolidang do bansa'd Israil do mantad id koinsanai di dusa diyolo' do tontok do tadau'ddi. Om olidang indo iyolo' do tumanud dit oturan do tugama'. 32 Om iri no i Boyoon dot Agayo dot Imam o nopili' kopio, om i nokotobilang do Kinorohingan do sumowoli di tapa' di Boyoon dot Agayo dot Imam diri o momonsoi di wonsoyon di natantu' mantad do wonsoyon do maan do pomolidang. Om mositi' nod manampakai iyau di pakayan do dong imam, 33 om wonsoyon nogindo i natantu' mantad do wonsoyon do pomolidang di Bilik dit Olidang Kopio, om i kinoiyonon do suwai do hiri'd Kiim do Tuhan, om i pananaraban do porsombahan, om it imam, om koinsanai di tulun dot Israil. 34 Om mositi' nod tonudon kasai iti toturan diti do gisom dot alaid. Om wonsoyon kasai' dot insan do sontoun i wonsoyon di natantu' mantad do wonsoyon do pomolidang di tulun dot Israil do mantad id koinsanai di dusa diyolo',” ka dau. Om wonsoyo' nod i Musa iri do tumanud di pinonuhuan do Tuhan dot id dau.
Kolidango' do Raha'
1 Om suhuo' nod Tuhan i Musa 2 do papatahak dot id di Harun om id tangaanak di Harun, om id koinsanai di tulun dot Israil diti piro-piro ot oturan do poingkaa, 3-4 “Soira' nopo do koponumbali' o tulun dot Israil do sapi' ko' dumba' ko' kambing do maan do porsombahan dot id Tuhan dot id kinoiyonon do suwai ko' mantad do hiri'd wawayaan di Kiim do Tuhan, om kotolibamban no dit oturan, tu' nakapaawas nod raha'. Om a' no o tulun diri kohompit di tulun do songonuon do Kinorohingan. 5 Komoyon nopo dot oturan diti nga' baino' nopondo om ngoyon ngai' nopo di tulun dot Israil pootodo' do hiri'd Kiim do Tuhan i tayam-tayam di koubasan daa diyolo' do monumbali' do hilo'd talun. Baino' nopondo om mositi' no do ngoyon diyolo' pootodo' iri dot id imam do hilo'd wawayaan di Kiim do Tuhan, om sumbolion nogindo do hiri do maan do porsombahan do piombolutan. 6 Om mositi' nod powowoson dit imam i raha' di sinumbali'ddi do hiri'd misingobik om hiri'd misingompok di pananaraban do porsombahan, i hiri'd wawayaan di Kiim dit Olidang. Om sorobon dau i lunok om kasanangan indo do Tuhan i tawau di porsombahan diri. 7 Om mositi' no do tumorodok i tulun dot Israil dot id Tuhan om a' kopio koino-ino do monumbali' do tayam-tayam diyolo' do hilo'd talun do maan do porsombahan dot id rusod dit araat, di monongkoiyo-iyo'd kambing. Om mositi' nod tonudon kasai' iti toturan diti do gisom dot alaid. 8 Soira' nopod haro o tulun dot Israil ko' bansa'd suwai di poingiyon dot id rolot diyolo' do papatahak do porsombahan di sorobon ko' nunu nopo o porsombahan 9 do maan do porsombahan dot id Tuhan, dot id kinoiyonon do suwai ko' mantad do hilo'd wawayaan di Kiim dot Olidang, om a' no kohompit do tulun di songonuon do Kinorohingan. 10 Ondung haro o tulun dot Israil ko' bansa'd suwai di poirolot diyolo' do mangakan do tonsi do tayam-tayam dit a' nakaawas o raha', om saapon nod Tuhan o tulun diri, om a' no iyau kohompit do tulun di songonuon do Tuhan. 11 Tu' ginawo nopo do koinsanai di songimpasi om hiri nod raha'. Om iri no o nokoponuhuan do Tuhan do popotuntug do koinsanai di raha' do hiri'd pananaraban do porsombahan, om oidu' indo o dusa'd tulun. Iri no i raha', tu' ginawo, o koidu' do dusa. 12 Om iri no o nokopogoduhan do Tuhan di tulun dot Israil om i bansa'd suwai di poirolot diyolo' do mangakan do tonsi dit a' nakaawas o raha'. 13 Soira' nopod haro o tulun dot Israil ko' bansa'd suwai di poirolot diyolo' do mongoi pongintorus do nintorusan ko' tombolog di koino-ino'd kanon, om mositi' nod paawason dau i raha' do hiri'd tana' om olitan nogindo do tana' i raha'ddi. 14 Tu' ginawo nopod koinsanai di songimpasi om hiri nod raha'. Om iri no o nokopogoduhan do Tuhan di tulun dot Israil do mangakan do tonsi dit a' nakaawas o raha'. Om isai nopo o mangakan di pogoduhan om a' no kohompit do tulun di songonuon do Kinorohingan. 15 Pointikid-tikid do tulun dot Israil ko' bansa'd suwai di poirolot diyolo', do kapangakan do tonsi do nintorusan di napatai toomod ko' i pinatai do nintorusan dit orongit, om mositi' nod pupuan i pakayan dau, om modsu', om mandad do gisom do sosodopon, om olidang nogindo iyau dot id pagantangan do tugama'. 16 Ondung a' dau wonsoyon o miagal diri om mositi' nod boboon dau o kootuson diri,” ka dau.
Pidudunan di Pogoduhan
1 Om suhuo' nod Tuhan i Musa 2 do popoboros dot id tulun dot Israil diti boros do poingkaa, “Iyoho' no o Tuhan, i Kinorohingan dokoyu. 3 Kada' kou omit di kowoyo-woyoon di tulun do Masir, i hilo'd pinomogunan dokoyu di gulu po, om kada' kou omit do kowoyo-woyoon di tulun do hilo'd pomogunan do Kanaan, i paatadan ku dokoyu. 4 Mumboyo' kou nod oturan ku om tonudon no dokoyu i ponuhuan ku. Tu' iyoho' no o Tuhan, i Kinorohingan dokoyu. 5 Tonudon ngai' no dokoyu it oturan om i ponuhuan ku di pinatahak ku dot id dokoyu. Tu' ondung owonsoi dokoyu o miagal diri om apasi kou no. Iyoho' no o Tuhan, i Kinorohingan dokoyu,” ka dau. 6 Om iti ngai' no ot oturan do pinatahak do Tuhan, “Kada' kou ongoi dudun dot isai nopo di koobpinayan dokoyu. 7 Kada' dokoyu ngoyo' duduno' o tina' dokoyu, om a' i' ointingayam o tapa' om tina' dokoyu. 8 Kada' dokoyu intingayamo' o tapa' dokoyu, dot i mongoi kou dudun di sawo dau'd suwai o pongintingayam. 9 Kada' dokoyu duduno' i tobpinai dokoyu'd tondu' di toput dokoyu'd pusod ko' iri po tobpinai dokoyu'd tondu' di tanak mantad di tapa' dokoyu ko' i tanak mantad di tina' dokoyu, dot i poinsugku' dokoyu'd guminayo ko' it amu'. 10 Kada' dokoyu duduno' i manangaki dokoyu; tu' iri no moti' o mongintingayam dokoyu. 11 Kada' dokoyu duduno' i tobpinai dokoyu'd tondu' di tanak mantad di tapa' dokoyu ko' tanak mantad di tina' dokoyu; tu' iyau nga' tobpinai i' dokoyu. 12-13 Kada' dokoyu duduno' i tinanon dokoyu, do tobpinai tuu iyau di tapa' dokoyu, ko' tobpinai po di tina' dokoyu. 14 Kada' dokoyu duduno' o sawo di tamanon dokoyu; tu' iyau nga' tinanon i' dokoyu. 15 Kada' dokoyu duduno' i tondu' do monongiwan dokoyu 16 ko' iri po sawo di tobpinai dokoyu. 17 Kada' dokoyu duduno' i tanak ko' i monongodu' di tondu' di noumbalan dokoyu'd momodudun do gulu; tu' a' i' oila-ilaan nga' iso-iso' po doti' o raha' dokoyu, om kotolibamban i' dot oturan o miagal diri. 18 Kada' dokoyu kowino' i tobpinai di sawo dokoyu, do poimpasi po i sawo dokoyu. 19 Kada' kou ongoi dudun do tondu' di maso'd haro o pomulanan, tu' tondu' nopoddi om sosomu' i' dot id pagantangan do tugama'. 20 Kada' kou ongoi dudun do sawo'd tulun do suwai; tu' iri no o kososomu' dokoyu. 21 Kada' kou papatahak dot ongoiso' piya do tanak dokoyu do maan pakayo' do tumuku' dot id Molok, i ponokokinorohingan diri. Tu' iri nopo wonsoyon do miagal diri om mongindaraat i' do ngaran do Kinorohingan, i Tuhan. 22 A' no kopio koino-ino do miampahu' o kusai om kusai; tu' iri nopo om katagadan i' do Kinorohingan. 23 A' no kopio koino-ino do mongoi pagampahu' do nintorusan ot isai nopo o kusai ko' tondu'; tu' iri nopo wonsoyon do miagal diri om araat i' om sosomu' kopio. 24 Kada' dokoyu sosomuo' o tinan dokoyu do wowonsoyon do miagal diri, tu' iyo noddi i tulun do kapir do minonosomu' do tinan diyolo', i tulun do kapir di poingiyon mantad no do hilo'd pomogunan do Kanaan dot id gulu ko' iyokoyu, om iri noddi o koponguyungan do Tuhan diyolo', om koiyon kou i' iyokoyu'd hilo'. 25-27 Om iri no i kowoyo-woyoon diyolo' dit araat kopio o minonosomu' di tana'ddi. Om hukumai noddi iyolo'd Tuhan, om a' noddi iyolo' pologoson do mundorong do hilo'. Nga' iyokoyu nopo, om kada' kou nogi' kopio pomonsoi do wowonsoyon do miagal diri. Iyokoyu ngai' nopo om koinsanai di bansa'd suwai di poirolot dokoyu, om mositi' nod mumboyo' dit oturan om i ponuhuan do Tuhan. 28 Om a' kou indo ohukuman do Tuhan om a' ouyung do mantad id tana'ddi do miagal di nosiliu dot id tulun do kapir di poingiyon do hilo' dit id gulu ko' iyokoyu. 29 Om koilo ngai' kou i' dot isai nopo i momonsoi'd kowoyo-woyoon do miagal diri karaat om a' no kohompit do tulun di songonuon do Kinorohingan,” ka dau. 30 Om boros kad Tuhan, “Tonudon no dokoyu i boros ku om kada' kou tanud di kowoyo-woyoon di tulun di poingiyon do hilo'd pomogunan do Kanaan dit id gulu ko' iyokoyu. Kada' dokoyu sosomuo' o tinan dokoyu do mingwonsoi'd miagal diri o ponosomu'. Tu' iyoho' no o Tuhan, i Kinorohingan dokoyu,” ka dau.
Oturan do Pasal do Kolidango' om Kotulido'
1 Om suhuo' nod Tuhan i Musa 2 do popoboros dot id tulun dot Israil do boros do poingkaa, “Kolidang kou no, tu' iyoho' nopo, i Tuhan, i Kinorohingan dokoyu, om olidang i'. 3 Mositi' nod momusou do tina' om tapa' o pointikid-tikid do tulun, om momusou di tadau'd Sabat, do miagal di pinonuhuan ku. Tu' iyoho' no o Tuhan, i Kinorohingan dokoyu. 4 Kada' kou tongkiad doho', om kada' kou tuku' dot id tingolig; kada' kou pomonsoi do ponokokinorohingan dot i miagal do basi' o wonsoyon, do maan dokoyu'd tukuon. Tu' iyoho' no o Tuhan, i Kinorohingan dokoyu. 5 Soira' nopo do monumbali' kou do tayam-tayam do maan do porsombahan di piombolutan, om mositi' nod tonudon dokoyu it oturan do nakatahak ku dokoyu, om romiton ku i' i porsombahan dokoyu. 6 Om mositi' nod kanon i tonsi do tontok do tadau di sinumbali' i tayam-tayam diri ko' di tadau kawagu. Haro nopo ot oolu' di tonsi'ddi di kotolu'd tadau, om mositi' nod sorobon, 7 tu' sosomu' nori dot id pagantangan do tugama'. Om isai nopo i mangakan diri nga' a' ku no romiton i porsombahan dau. 8 Om isai nopo i mangakan diri nga' kasala' no tu' poiyoon i' dau di koubasanan no kasai' i nokotobilang do maan do doho'. Om a' no iyau kohompit di tulun do songonuon ku. 9 Soira' nopod mongomot kou, om kada' dokoyu omoto' i hiri'd tisan di tumo, om i nongotoliban do mongomot nga' a' no minog do ngoyon gulio' do mongomot. 10 Kada' kou guli' do hiri'd kabun dot anggur dokoyu do mongoi pongupu' di tua' di noolu' ko' mongoi po pomuhu di tua' di nongoloho. Pologoson nopori do maan di tulun do mosikin om i tulun do bansa'd suwai. Tu' iyoho' no o Tuhan, i Kinorohingan dokoyu. 11 Kada' kou panakau, om kada' kou ponipu', om kada' kou pongudut. 12 Kada' kou pamatos dot id suang do ngaran ku ondung a' no dokoyu bayaanon kopio iri; tu' mongindaraat nori do ngaran ku. Tu' iyoho' no o Tuhan, i Kinorohingan dokoyu. 13 Kada' kou pakaanak-anak dot isai nopo o tulun om kada' kou pagahau do konunu-nunuan do tulun diri. Kada' dokoyu poloido' do papatahak do sontuong- tuong piya i gadsi' do tulun di pakaraja' dot id dokoyu. 14 Kada' kou pomopol do tulun di bosukon, om kada' kou ongoi poiliu do nunu nopo dot id doburuan do tulun di bolou do maan dokoyu'd kosoduwon dau. Koronok kou no doho'; tu' iyoho' no o Tuhan, i Kinorohingan dokoyu. 15 Mositi' no dot otopot om otulid o wonsoyon dokoyu do tontok do momutus kou dot id kut, kada' kou panampaping di tulun do mosikin om kada' kou kooris di tulun do kaya'. 16 Kada' kou popimboros do boboroson dit a' otopot do pasal dot isai nopo o tulun. Ondung manantu' do kosunsudon di tulun i kopomisaraan dau, do posion tuu ko' patayon po iyau, om mungkomi kou no, ondung kotulung no dau i dokoyu'd poboroson. Tu' iyoho' no o Tuhan. 17 Kada' kou poopi' do katagadan dokoyu dot id isai nopo o tulun. Salasayon nogi' dokoyu di tulun diri i katagadan dokoyu'ddi, om a' kou i' kowonsoi'd dusa dot i tulun diri o kobungou. 18 Kada' kou suli' dot isai nopo o tulun, om kada' kou popoopi' do karaatan dokoyu dot id tulun diri, suwai ko' kosianai kou nod tulun do suwai do miagal dot osianan kou do dokoyu'd tinan. Tu' iyoho' no o Tuhan. 19 Tonudon ngai' no dokoyu i ponuhuan ku. Kada' dokoyu pisobuho' o nintorusan di misuwai o bansa'. Kada' kou pananom do duwo o bansa' do totonomon dot iso-iso' o tumo do pananaman. Kada' kou panampakai do pakayan di nawol, do duwo o bansa'd banang do piniawol. 20 Ondung haro o kusai do nakabatos do papadagang di turipon dau'd tondu' dot id kusai'd suwai do maan do ponokosawo di kusai'ddi, nga' a' po di kusai di momoli nabayaran i tondu'ddi, om a' i' hukuman do kapatayon i kusai do sanganu di tondu' dot aampahu' piya dau i tondu'ddi, nga' hukuman goduwo nopo iyolo'. Tu' turipon kasai' po dau i tondu'ddi. 21 Om mositi' nod paatod i kusai, i sanganu di tondu'ddi, do dumba' do tontoluhan do hiri'd wawayaan di Kiim do Tuhan do maan dau'd porsombahan do poningolon. 22 Om patahakon nondo dit imam i dumba' do maan do pomolidang, om oidu' i' o dusa di tulun diri, om oompunan indo iyau'd Kinorohingan. 23 Korikot kou nopondo do hilo'd pomogunan do Kanaan, om tontok nopo do momutanom kou do nunu nopo o bansa'd tua-ua', om pokososomuon no dokoyu i tua' di tua-ua' dokoyu'ddi do tolu-tolu po toun. Kada' dokoyu akano' o tua' di tinanom dokoyu do solinaid poddi. 24 Om kaapat nopondod toun om mositi' nod patahakon ngai' dokoyu i tua'ddi dot id doho' do maan do porsombahan do popointalang do kounsikahan dokoyu dot id doho', i Tuhan. 25 Nga' kolimo nopondod toun om koino-ino no dokoyu'd kanon i tua' di tinanom dokoyu'ddi. Ondung wonsoyon dokoyu o miagal diri, om sumapou no o tua' di tua-ua' dokoyu. Tu' iyoho' no o Tuhan, i Kinorohingan dokoyu. 26 Kada' kou pangakan do tonsi dit a' nakaawas o raha'. Kada' kou pinsingilo do nunu nopo o kowoyoon do toilaan di don rogon. 27 Kada' dokoyu pampadai o tobuk dot id poriling do tulu dokoyu om kada' kou pomugar do ganggut, 28 om kada' kou pamapak do tinan dokoyu, om kada' kou pinsuhat do tinan dokoyu do tontok do mogihad di tulun do napatai. Tu' iyoho' no o Tuhan. 29 Kada' dokoyu intingayamo' i tangaanak dokoyu'd tondu', dot i silihon do sundal dot id walai do tingolig o pongintingayam; tu' ondung momonsoi kou do miagal diri om tumuku' kou nod tingolig om oponu' pondod wowonsoyon dit a' osonong i pomogunan diri. 30 Poinggoyoon no dokoyu o tadau'd Sabat om pusohon no dokoyu i tiyonon do sumambayang dot id doho'. Tu' iyoho' no o Tuhan. 31 Kada' kou ongoi pokinosihat do tulun di momolohou do rusod do tulun di napatai. Tu' ondung mongoi kou, om atantu' nod ososomu' kou. Tu' iyoho' no o Tuhan, i Kinorohingan dokoyu. 32 Podulon no dokoyu om pusohon no i tongomolohing no. Koronok kou no doho'; om pusohon oku no dokoyu, tu' iyoho' no o Tuhan. 33 Kada' dokoyu raraato' o tulun do bansa'd suwai di poingiyon dot id pomogunan dokoyu. 34 Poiyoon nopo dokoyu iyolo' di sompi' ko' tulun dot Israil om kosianai kou no diyolo' do miagal dot osianan kou do dokoyu'd tinan. Hondomo' no dokoyu dot iyokoyu nga' nokoumbal i' do nokosugku' do bansa'd suwai do momogun-mogun di hilo' kou pod pomogunan do Masir. Tu' iyoho' no o Tuhan, i Kinorohingan dokoyu. 35 Kada' kou pamakai do ponipong dit a' koontok do ponipu' do tulun do suwai, dot iri tuu i ponipong do konoruo', ko' iri po ponimbang do kawagato' ko' iri po i pagagadang. 36 Mositi' no do koontok i poninimbang, om i poninipong om i pagagadang dokoyu. Tu' iyoho' no o Tuhan, i Kinorohingan dokoyu, om iyoho' i pinoposoliwan dokoyu do mantad hilo'd Masir. 37 Tonudon ngai' no dokoyu it oturan om i boros ku. Tu' iyoho' no o Tuhan,” ka dau.
Hukuman do Tulun dit A' Mumboyo'
1 Om suhuo' nod Tuhan i Musa 2 do popoboros dot id tulun dot Israil do boros do poingkaa, “Isai nopo dokoyu ko' isai nopo di bansa'd suwai di poingiyon dot id rolot dokoyu, o papatahak do tanak do maan pakayo' do tumuku' di tingolig do Molok om mositi' nod dumpahon do watu, dot oinsanan nopo i tulun do momodumpau, do gisom i' dot apatai i tulun diri. 3 Ondung haro o tulun do papatahak di tanak dau dot id di Molok om i monosomu' di Kiim ku dit Olidang, om i mongindaraat do ngaran ku dit olidang, om saapon ku no o tulun diri, om a' ku pohompiton di tulun do songonuon ku. 4 Nga' ondung pologoson tomod di tulun dot ogumu' i nowonsoi di tulun diri, om a' diyolo' iyau hukuman do kapatayon, 5 om iyoho' nondo o sumaap di tulun diri, om koinsanai di sompiiyon dau om koinsanai di tulun di minoyo' dau do tuminongkiad do mantad id doho', om tuminuku' nogiddi di tingolig do Molok. Om a' ku no iyau pohompiton do tulun di songonuon ku. 6 Ondung haro o tulun do mongoi pokinosihat do tulun di momolohou do rusod di tulun do napatai, om saapon ku no o tulun diri, om a' ku pohompiton do tulun di songonuon ku. 7 Kumolidang kou no, tu' iyoho' no o Tuhan, i Kinorohingan dokoyu. 8 Tonudon no dokoyu it oturan ku, tu' iyoho' no o Tuhan, om iyoho' i popotobilang dokoyu do silihon ku do doho'd songonuon,” ka dau. 9 Om patahako' nod Tuhan iti piro-piro ot oturan do poingkaa, “Isai nopo i momopol do tina' ko' tapa' dau, om mositi' nod hukuman do kapatayon. Iri nopo kinapatayon dau om iri i kasalaan dau o nokobungou. 10 Ondung haro o kusai do bansa'd Israil do magampahu' do sawo do tulun di bansa' dau, om hukuman goduwo nopod kapatayon i kusai om i tondu' di nampahu' dau'ddi. 11 Iri nopo kusai di mongoi dudun dot iso' di sawo di tapa' dau, om mongintingayam no di tapa' dau. Om mositi' nod hukuman goduwo nopod kapatayon i kusai om i tondu'ddi. Iri nopo kinapatayon diyolo'ddi om iri i kasalaan diyolo' o nokobungou. 12 Ondung haro o kusai do mongoi dudun di tondu' di monongiwan dau, om mositi' nod hukuman goduwo nopo iyolo'd kapatayon. Tu' nokotolibamban no iyolo' dit oturan. Om iri nopo kinapatayon diyolo'ddi om iri i kasalaan diyolo' o nokobungou. 13 Soira' nopod miampahu' o kusai om kusai, om kowonsoi goduwo no iyolo' dit araat kopio, om mositi' nod hukuman goduwo nopo iyolo'd kapatayon. Om iri nopo kinapatayon diyolo'ddi om iri i kasalaan diyolo' o nokobungou. 14 Ondung kowinon do songulun o kusai ot iso' o tondu' om kowinon po kawagu dau i tina' di tondu'ddi, om mositi' nod tutudan ngai' nopo iyolo'd tolu do gisom dot apatai, tu' minomonsoi i' iyolo' dit araat kopio. Kada' no kopio do haro ot osiliu do miagal diri dot id pogialatan dokoyu. 15 Ondung haro o kusai do monokiampahu' do nintorusan, om mositi' nod hukuman do kapatayon i kusai'ddi om i nintorusan. 16 Ondung haro o tondu' do monokiampahu' do nintorusan om mositi' nod hukuman do kapatayon i tondu'ddi om i nintorusan. Om iri nopo kinapatayon diyolo'ddi om iri i kasalaan diyolo' o nokobungou. 17 Ondung haro o kusai do mangawin di tobpinai dau'd tondu' di toput do pusod dau ko' i tobpinai dau'd tondu' di tanak mantad di tapa' ko' tanak mantad di tina' dau, om mositi' nod intingayamon iyolo' dot id toguang do tulun dot ogumu', om uyungon nogindo do mantad id kinoiyonon di tulun dot ogumu'. Tu' minagampahu' i' i kusai'ddi di tobpinai dau'd tondu', om mositi' nod boboon dau i kootuson diri. 18 Ondung dumudun o kusai do tondu' di maso'd haro o pomulanan, om mositi' nod uyungon iyolo' do mantad id kinoiyonon do tulun dot ogumu', tu' notolibambanan no diyolo' it oturan do pasal do kolidangan do tumanud dot oturan do tugama'. 19 Ondung haro o kusai do magampahu' di tinanon dau, om mositi' nod tonggungon diyolo' o kootuson di winonsoi diyolo' dit a' tuminanud dot oturan. 20 Ondung dudunon do songulun o kusai i sawo di tamanon dau, om mongintingayam no iyau di tamanon dau. Om mositi' nod boboon di kusai om i tondu' o pomohukum di winonsoi diyolo'ddi: tu' pomohukum nopo om a' goduwo nopondo iyolo' maganak. 21 Ondung haro o kusai do mangawin di sawo do tobpinai dau, om a' no iyolo' maganak do gisom dot ikapatai diyolo'. Tu' sosomu' no kopio om araat i winonsoi dau, om minongintingayam iyau di tobpinai dau,” ka dau. 22 Om boros kad Tuhan, “Tonudon ngai' no dokoyu it oturan om i ponuhuan ku. Om a' kou i' ouyung do mantad id pomogunan do Kanaan, i kinoiyonon do paatadan ku dokoyu. 23 Kada' kou omit do kowoyo-woyoon om i kaadat-adato' di tulun mantad do hilo'. Pinaparaat no kopio i tulun do kapir do ginawo ku, tu' angaraat i' kopio o kowoyo-woyoon diyolo'. Om iri no o koponguyungan ku diyolo' do baino'dti, om kosuang kou i' di pomogunan diri. 24 Nakapamatos oku no dot iyokoyu o kasanganu di pomogunan di kaya' om it oluhub diri, om patahakon ku i' kopio iri dot id dokoyu. Iyoho' no i Tuhan, i Kinorohingan dokoyu. Om nokosuwai-suwai ku no iyokoyu do mantad id bansa'd suwai. 25 Iyo nopoddi om mositi' nod milo kou do mongintutun di nintorusan om i tombolog di sosomu', om it a' sosomu'. Kada' kou pangakan do nintorusan ko' tombolog di sosomu'. Tu' nokoboros ku no do sosomu' o nintorusan diri, om ondung kanon pondo dokoyu iri, om ososomu' kou no. 26 Nokosuwai-suwai ku no iyokoyu do mantad id bansa'd suwai, om osiliu kou i' do tulun dit iyoho' noo o sanganu. Om mositi' no dot olidang kou tu' iyoho' no o Tuhan, om olidang oku. 27 Pointikid-tikid do tongokusai om tongoondu' di mongoi pomolohou do rusod do tulun do napatai om mositi' nod dumpahon do watu do gisom dot apatai; om iri nopo kinapatayon do tulun di momonsoi do miagal diri om iri i kasalaan dau o nokobungou,” ka dau.
Kolidango' dot Imam
1 Om suhuo' nod Tuhan i Musa do poposunud diti piro-piro ot oturan dot id tongoimam di sinakagon di Harun, “Iso' po dit imam nga' a' no koino-ino do monosomu' do tinan dau dot i mongoi tanud do momolobong do tanak do tobpinai dau o kososomu', 2 nga' suwai indo dot iri no i tina' dau ot apatai ko' iri tapa' dau, ko' tanak dau'd kusai ko' tanak dau'd tondu', ko' tobpinai dau'd kusai, 3 ko' tobpinai dau'd tondu' dit a' po nakakawin, it iso-iso' po o walai diyolo'. 4 Om a' i' iyau koino-ino do popologos dot ososomu' o tinan dau do kososomu' nopo om i kapatayon do tulun di kawaris dau tu' nokopogitotokin no. 5 Imam nopo om a' i' koino-ino do momugar do tobuk do ponong honggo nopo do tulu dau, ko' momompod pod ganggut dau ko' minsuhat do tinan, do popointalang do mogihad iyau di tulun do napatai. 6 Tu' iri nopo imam om nokotobilang no do sumiliu'd songonuon ku, om iri no ot a' diyolo' koina-inaan do mongindaraat do ngaran ku. Tu' iyolo' no i papatahak dot id doho' di porsombahan do taakanon, om mositi' no dot olidang iyolo'. 7 Imam nopo om a' i' koino-ino do mangawin do tondu' di nokoumbal do sumiliu'd sundal ko' i tondu' di nodudun do kusai'd gulu, ko' i tondu' di nakaada' do sawo, tu' imam nopo om nokotobilang no do sumiliu'd songonuon ku. 8 Om mositi' nod okunon do koinsanai'd tulun dot iri nopo imam om nokotobilang no do sumiliu'd songonuon ku, tu' iri no it imam o papatahak dot id doho' di porsombahan do taakanon. Iyoho' no o Tuhan, om olidang oku, om lidangan ku o tulun ku. 9 Ondung sumiliu'd sundal o tanak do tondu' dit imam, om mositi' nod tutudan i tondu'ddi do gisom dot apatai, tu' minongintingayam i' iyau di tapa' dau. 10 Iri nopo Boyoon dot Agayo dot Imam, om nokotobilang no do sumiliu'd songonuon do Kinorohingan do momonsoi do karaja' di dong imam. Om pinopogirot nopo di pinomilian dau'ddi om iri no i tinuntugan di tumau dot olidang o hiri'd tulu dau, om pinakayan iyau do pakayan di dong imam. Om iri no ot a' dau koina-inaan do popologos di tobuk dau dot a' osudai, ko' momohurak pod pakayan dau do popointalang do mogihad iyau do tulun di napatai. 11-12 Nakatahak no iyau dot id doho' do pinotobilang do sumiliu'd songonuon ku, om iri no ot a' dau koina-inaan do monosomu' do tinan dau. Om a' nogi' iyau koino-ino do monosomu' di Kiim ku dit Olidang do ponosomu' nopo om i mongoi salakoi'd walai di haro o rata', do mulong piya do rata' iri di tapa' ko' tina' dau. 13-14 Tondu' nopo di koino-ino dau'd kowinon om iri no i mantad id payat di tadon dau iyau. Om a' no iyau koino-ino do mangawin do tondu' di nopuadan ko' tondu' po di naadaan do sawo, ko' tondu' di nokoumbal do suminiliu'd sundal. 15 Ondung wonsoyon dau i pogoduhan diri, om iri nopondo i tangaanak dau, it apatut daa dot olidang, om sosomu' no. Tu' iyoho' no o Tuhan, om nokotobilang ku no iyau do sumiliu do Boyoon dot Agayo dot Imam,” ka dau. 16 Om suhuo' nod Tuhan i Musa 17 do popoboros diti dot id di Harun, “Tulun nopo di haro o bohiton do tinan dot id pogialatan di sinakagon nu, om a' no iyau koino-ino do papatahak do porsombahan do taakanon dot id doho'. Om iyo noddi ot oturan do gisom dot alaid. 18 Iri nopo tulun di papatahak do porsombahan, om a' no koino-ino do tulun di haro o bohiton do tinan: a' koino-ino'd tulun di bolou, ko' i kimpo', ko' it a' iyo'd dombokon o rabas, ko' it a' iyo'd dombokon o tinan; 19 om a' koino-ino i tulun di notipu' o longon, ko' i notipu' o gakod; 20 om a' koino-ino i tulun di notongkud ko' i miningkarakata' o kinosuni-sunio'; om a' koino-ino i tulun di noinggolian. 21 Iri nopo tulun di haro o bohiton do tinan dot id pogialatan di sinakagon di Harun om a' no koino-ino do papatahak do porsombahan do taakanon dot id doho'. 22 Nga' koino-ino i' iyau do mangakan di taakanon do nakatahak dot id doho', i porsombahan do taakanon dit olidang om i porsombahan do taakanon dit olidang kopio. 23 Nga' a' no o tulun diri koino-ino do mongoi insomok di tabir dot olidang om i pananaraban do porsombahan tu' haro i' o bohiton do tinan dau. Om a' no kopio iyau koino-ino do monosomu' di konunu-nunuan di nokotobilang do maan do doho', tu' iyoho' no o Tuhan, om iyoho' i pinopotobilang di konunu-nunuan diri,” ka dau. 24 Om iri ngai' no i pinoboros di Musa dot id di Harun, om id tangaanak di Harun, om id koinsanai di tulun dot Israil.
Kolidango' di Porsombahan dot id Tuhan
1 Om suhuo' nod Tuhan i Musa 2 do popolombus do boros diti dot id di Harun om id tangaanak di Harun, “Kada' dokoyu indaraato' o ngaran ku dit olidang. Iyo nopoddi om mositi' nod pusohon kopio i piro-piro porsombahan di pinotobilang di tulun dot Israil do patahakon doho'. Tu' iyoho' no o Tuhan. 3 Ondung haro o tiso' di sinakagon nu di maso do sosomu' do mongoi insomok di porsombahan di pinatahak di tulun dot Israil dot id doho', om a' no kopio iyau pologoson kawagu do maganu-anu do hiri'd pananaraban do porsombahan. Om iti no ot oturan do gisom dot alaid. Tu' iyoho' no o Tuhan. 4 Kada' nod haro o tongoiso' di sinakagon di Harun di kitoruol o kulit dit araat kopio, ko' i maso'd haro o sumoliwan do miagal-agal do waig do mantad id wayaan do sobu, do mongoi pangakan di porsombahan dot olidang, dot a' po iyau nolidangan do tumanud dit oturan do tugama'. Ondung koigit it imam do nunu nopo i sosomu' do notopisan do rata' om sosomu' no iyau; om sosomu' no iyau ondung koposoliwan iyau'd narot, 5 ko' koigit iyau'd nintorusan ko' tulun di sosomu'. 6 Isai nopo ot imam dit ososomu' om sosomu' kasai' no iyau'ddi do gisom do sosodopon. Om atalib piya o sosodopon nga' sosomu' kasai' po iyau om a' po koino-ino do mangakan di porsombahan dot olidang dot a' po iyau kopodsu'. 7 Otonob po o tadau, om olidang nogi' iyau, om koino-ino nogindo iyau do mangakan di porsombahan dot olidang, tu' iri no o ponokotaakanon dau. 8 Imam nopo om a' i' koino-ino do mangakan do tonsi do nintorusan di napatai toomod ko' iri po i pinatai do nintorusan dot orongit. Ondung mangakan iyau'ddi, om ososomu' no iyau. Tu' iyoho' no o Tuhan. 9 Om mositi' nod tumanud o koinsanai dit imam di piro-piro ot oturan di pinatahak ku. Tu' ondung amu', om kasala' no iyolo', om apatai, tu' tuminolibamban i' iyolo' di piro-piro ot oturan dit olidang diri. Tu' iyoho' no o Tuhan, om iyoho' no i pinopotobilang diyolo' do sumiliu'd songonuon ku. 10 Iri nopo porsombahan di pinotobilang do maan do doho', om iri no i tulun dit id sompiiyon dit imam o koino-ino do mangakan, tulun nopod suwai om a' i' koino-ino do mangakan diri do mulong piya dot i tulun di poinsugku'd walai dit imam, ko' i tulun di pakaraja' dot id imam. 11 Nga' iri nopo turipon dit imam, i binoli dit imam do tusin dau, ko' i turipon di nosusu do hiri'd walai dit imam, om koino-ino id mangakan di taakanon dot aanu dit imam. 12 Iri nopo tanak do tondu' dit imam dit akawin do kusai dit okon ko' imam, om a' no koino-ino do mangakan di porsombahan di pinotobilang do maan do doho'. 13 Nga' iri nopo tanak do tondu' dit imam di nopuadan ko' i naadaan do sawo om aiso' po o tanak, i guminuli' do hiri'd walai di tapa' dau, om iri poddi molohing dau o kosondi-sondihon, om koino-ino i' do mangakan dit aramit di tapa' dau, i nosiliu dot imam. Iri no sompiiyon kopio dit imam o koino-ino do mangakan do porsombahan diri. 14 Ondung haro o tulun dit okon ko' sompiiyon dit imam do kapangakan di porsombahan dit olidang diri, nga' a' i' daa dau tinomod, om mositi' nod bayaran kawagu dau it imam do gatang do koinsanai di porsombahan diri, om ruhangan po dot induwo i sompihopod. 15 A' no kopio koino-ino it imam do monosomu' di porsombahan do pinotobilang do maan do doho', 16 dot i popologos do tulun dit a' koino-ino'd mangakan, do mangakan di porsombahan, o ponosomu'. Tu' iyoho' no o Tuhan, om iyoho' no i momolidang do porsombahan diri,” ka dau. 17 Om suhuo' nod Tuhan i Musa, 18-19 do papatahak dot id di Harun om id tangaanak di Harun, om id koinsanai di tulun dot Israil, diti piro-piro ot oturan do poingkaa, “Soira' nopod papatahak o tulun dot Israil ko' i bansa'd suwai do poingiyon do hilo'd Israil, do porsombahan di sorobon, do pamayaan tuu dau iri di nakabatos dau ko' porsombahan po dau do tumanud do kagaanan do ginawo dau, om mositi' nod aiso' o bohiton do tinan di tayam-tayam diri. Om mositi' nod tontoluhan i tayam-tayam, om it aiso' o bohiton do tinan, om aramit indo iri. 20 Ondung papatahak kou do tayam-tayam di haro o bohiton do tinan do maan do porsombahan, om a' nod Tuhan romiton iri. 21 Soira' nopod haro o tulun do papatahak dot id Tuhan do porsombahan di piombolutan, do pamayaan tuu dau iri do batos dau ko' porsombahan po dau do tumanud do kagaanan do ginawo dau, om mositi' nod it aiso' o bohiton do tinan di tayam-tayam diri, om aramit indo iri. 22 Kada' kou papatahak dot id Tuhan do tayam-tayam di bolou, ko' i kimpo' ko' i notipuan ko' i notogu', ko' i kikupos di kinanaon, ko' i kitoruol o kulit, ko' i kigandas. Kada' papatahak do tayam-tayam do miagal diri do hiri'd pananaraban do porsombahan do maan do porsombahan do taakanon. 23 Koino-ino i' do papatahak do tayam-tayam dit a' iyo di koubasanan o kinosuni-sunio' ko' it a' osonong o kinoinan-inano' do maan do porsombahan di tumanud do kagaanan do ginawo, nga' tayam-tayam nopo do miagal diri om a' i' romiton do maan do pamayaan di pinabatos. 24 Kada' kou papatahak dot id Tuhan do tayam-tayam di nababak o tontolu, ko' i nosinsib o tontolu, ko' i nosuhat ko' i noidu' o tontolu. A' no kopio koino-ino do haro ot osiliu do miagal diri do hiti'd pomogunan dokoyu. 25 Kada' kou papatahak do nunu nopo o tayam-tayam di naanu dokoyu do mantad id tulun di bansa'd suwai do maan do porsombahan do taakanon. Tu' tayam-tayam nopod miagal diri om miagal nopo di tayam-tayam di haro o bohiton do tinan, om a' i' romiton do maan do porsombahan. 26-27 Soira' nopod haro o tanak do sapi' dot osusu, ko' tanak pod dumba', ko' tanak do kambing, om kada' no kopio potongkiado' iri do mantad id molohing dau do turu-turu' po tadau do mantad di kinosusuon. Nga' katalib pondo iri om romiton nori do maan do porsombahan do taakanon. 28 Kada' dokoyu piandado' do papatahak do maan do porsombahan i sapi' om i tanak di sapi', ko' i dumba' om i tanak di dumba', ko' i kambing om i tanak di kambing dot insan-insan kopio o tadau do patahakon. 29 Soira' nopod papatahak kou do porsombahan do kounsikahan dot id Tuhan, om mositi' nod tonudon it oturan om aramit i' i porsombahan dokoyu, 30 om akanon ngai' nopori do tontok do tadau'ddi om kada' kou no poolu' dot ongokooro' piya do maan do tadau kawagu,” ka dau. 31 Om boros kad Tuhan, “Tonudon ngai' no dokoyu i ponuhuan diri; tu' iyoho' no o Tuhan. 32 Kada' dokoyu indaraato' o ngaran ku dit olidang; om mositi' nod ongotumbayaan ngai' i tulun dot Israil dot olidang oku. Tu' iyoho' no o Tuhan, om iyoho' i popolidang dokoyu. 33 Om iri no o kinoposoliwanan ku dokoyu do mantad hilo'd Masir, tu' sumiliu oku nondo do Kinorohingan dokoyu. Tu' iyoho' no o Tuhan,” ka dau.
Tadau dot Agayo dot Ugama'
1 Om patahako' nod Tuhan dot id di Musa 2 iti piro-piro ot oturan do pasal do tadau dot agayo do tugama', “Tontok nopo di piro-piro o tadau'ddi om mositi' nod tumimung i bansa' dot Israil do sumambayang. 3 Om mositi' nod potobilangon dokoyu o tadau'd Sabat do maan do don Tuhan do hinonggo kou nopod poingiyon. Onom o tadau dokoyu do koino-ino do kumaraja', nga' sorohon no dokoyu, do koturu' nopod tadau, i tadau'd Sabat, om tadau nod koundarangan. Kada' kou no karaja' do tadau'ddi, suwai ko' tumimung kou no do sumambayang. 4 Om posunudon noti piro-piro o tadau dot agayo diti do tontok di maso do natantu' mantad,” kad Tuhan.
Tadau'd Agayo do Paska om Tadau'd Agayo do Roti dit A' Kipangambang
5 Om boros ka kawagu'd Tuhan, “Iri nopo Tadau'd Agayo do Paska, i ramayon do maan do pomusou'd Tuhan, om tumimpuun do tontok dit otonob o tadau do koontok di tadau'd kohopod om apat do tulan do koiso'. 6 Om tadau nondo kawagu, di tadau'd kohopod om limo, om tumimpuun no i Tadau'd Agayo do Roti dit A' Kipangambang. Om kada' kou no pangakan do roti di rinalatan do pangambang do solinaid do turu' o tadau. 7-8 Solinaid nopo di turu' o tadau'ddi om mositi' nod papatahak kou do porsombahan do taakanon dot id Tuhan. Om tontok nopo di tadau'd koiso' om tadau'd koturu' do karamayan diri, om mositi' nod tumimung kou do sumambayang om a' kou koino-ino do kumaraja' do nunu nopo. 9-10 Korikot kou nopondo do hilo'd pomogunan di patahakon do Tuhan dot id dokoyu, om tontok nopondo di mongomot kou'd barli do hilo', om iri nopo barli dit id gulu kopio dokoyu omoto', om mositi' nod ngoyon dokoyu patahako' dit imam. 11 Tontok nopo di sinuabon di tadau'd Sabat om mositi' nod patahakon dit imam i porsombahan do barli diri do maan do porsombahan di pinotobilang do maan do don Tuhan, om asanangan indo o Tuhan dokoyu. 12 Om tontok nopod papatahak kou do porsombahan do barli diri, om mositi' nod papatahak kou po do songinan o tanak do dumba' di sontoun nogi' o tumur, om it aiso' o bohiton do tinan do maan do porsombahan di sorobon. 13 Om potonggoyon nopo dokoyu'ddi do maan do porsombahan do taakanon, om duwo o kilogram do tapung di rinalatan do tumau'd saitun. Om iri no i tawau di porsombahan diri o kasanangan do Tuhan. Om papatahak kou nogi' do songlito o waig dot anggur do potonggoyon diri. 14 Ondung a' po dokoyu katahak o porsombahan diri dot id Tuhan, om kada' kou no kopio pangakan dot ongokuuri' piya di barli di koomot diri, dot iri tuu it a' po noonsok, ko' iri po i nalasu' no, ko' i nogoyiu no. Om mositi' nod tonudon do koinsanai di sinakagon nu iti toturan diti do gisom dot alaid,” ka dau.
Tadau dot Agayo do Dongmongomot
15 Om boros ka kawagu'd Tuhan, “Mantad nopo di sinuabon di tadau'd Sabat, do tontok di papatahak kou dot id Tuhan do tua' do barli dit id gulu omoto', om intobon no dokoyu o turu' kopio o minggu'. 16 Om tadau nopondod kolimo nohopod, dit atalib o tadau'd Sabat di kointuru', om mositi' nod papatahak kou kawagu do porsombahan do gandum dot id Tuhan. 17 Pointikid-tikid do sompiiyon om mositi' nod papatahak do duwo o binuluguan do roti om patahakon nondo do maan do porsombahan di potobilangon do maan do don Tuhan. Om sombulugu' nopo di roti, nga' duwo o kilogram do tapung di rinalatan do pangambang o wonsoyon. Om mositi' nod patahakon iri dot id Tuhan do maan do porsombahan do gandum dit id gulu omoto'. 18 Om mositi' nod papatahak i tulun dot Israil do turu' o dumba' di sontoun nogi' o tumur, om songinan o sapi' do tontoluhan, om duwo tinan do kambing, dit aiso' ngai' o bohiton do tinan do potonggoyon di roti'ddi. Om patahakon ngai' nondo iri do maan do porsombahan di sorobon dot id Tuhan, do mitonggoi di porsombahan do gandum om porsombahan do waig dot anggur. Om iri no tawau do porsombahan diri o kasanangan do Tuhan. 19 Om papatahak nogi' iyolo' do songinan o kambing do tontoluhan do maan do porsombahan do pangampun do dusa, om duwo o tanak do dumba' do tontoluhan di sontoun nogi' o tumur, do maan do porsombahan do piombolutan. 20 Om mositi' nod patahakon dit imam i roti om i duwo o tanak do dumba'ddi do maan do porsombahan di potobilangon do maan do don Tuhan, om iri no it aanu dit imam. Om iri ngai' nopo porsombahan diri om ongolidang ngai' nopo. 21 Tontok nopod tadau'ddi om a' kou no koino-ino do kumaraja' do nunu nopo, om mositi' nod tumimung kou do sumambayang. Om mositi nod wonsoyon di sinakagon nu o miagal diti do gisom dot alaid, do honggo nopo iyolo'd poingiyon. 22 Soira' nopod mongomot kou, om kada' dokoyu omoto' i gandum do hiri'd tisan di tumo, om kada' dokoyu ngoyo' gulio' do mongomot i gandum di nongotoliban. Pologoson nopori do maan di tulun do mosikin om i tulun do bansa'd suwai. Tu' Tuhan no o Kinorohingan dokoyu,” ka dau.
Tadau dot Agayo do Toun do Wagu
23-24 Om boros ka kawagu'd Tuhan, “Tadau nopod koiso' do tulan do koturu' om mositi' nod ramayon tu' nokotobilang nori do tadau'd koundarangan. Tontok nopod tadau'ddi, dit orongou i tuni do torumpit, om mositi' nod tumimung kou do sumambayang. 25 Om papatahak kou nod porsombahan do taakanon dot id Tuhan, om kada' kou karaja' do nunu nopo,” ka dau.
Tadau do Kopongompunan do Dusa
26-27 Om boros ka kawagu'd Tuhan, “Tontok nopo di tadau do kohopod do tulan do koturu' om Tadau di Kopongompunan do Dusa do tulun dot ogumu' do pointikid-tikid do toun. Tontok nopod tadau'ddi om mositi' nod puasa kou om tumimung kou do sumambayang, om papatahak kou dot id Tuhan do porsombahan di taakanon. 28 Kada' kou no karaja' do tontok do tadau'ddi, tu' tadau noddi do kapamansayan di wonsoyon di natantu' mantad do maan do pangampun do dusa. 29 Isai nopo i mangakan do nunu nopo do tontok do tadau'ddi, om a' no kohompit do tulun di songonuon do Kinorohingan. 30 Om isai nopo i kumaraja' do tontok do tadau'ddi, om Tuhan no o momohukum do tulun diri do kapatayon o pomohukum. 31 Om iyo no kasai'dti ot oturan do tonudon do koinsanai di manangaki diya' om i sinakagon diyolo', do honggo nopo iyolo'd poingiyon. 32 Iri nopo maso dot id piolitan di motingkotonob no o tadau do tadau'd kosiam do tulan diri om gisom dit otonob o tadau di tadau'd kohopod, om mositi' nod pusohon kopio dokoyu, tu' iri no o tadau'd koundarangan di nokotobilang. Om osongodou nopo do tadau'ddi do puasa kou, om a' no koino-ino do mangakan do nunu nopo, do sokoro-koro' piya,” ka dau.
Tadau dot Agayo do Kinuhub-Kuhub
33-34 Om boros ka kawagu'd Tuhan, “Iri nopo Tadau dot Agayo do Kinuhub-Kuhub, om tumimpuun do tontok di tadau'd kohopod om limo do tulan di koturu', om koloido' nopoddi om turu' o tadau. 35-36 Om solinaid nopo di turu' o tadau, om mositi' nod papatahak kou do porsombahan do taakanon do pointikid do tadau. Om tadau nopondod kawalu' do karamayan diri om mositi' no do tumimung kou do sumambayang, om papatahak do porsombahan do taakanon om a' kou koino-ino do kumaraja'. 37 (Om iri no ngai' i tadau dot agayo do tugama' dit apatut do ramayon dokoyu. Tontok nopod tadau dot agayo'ddi, om mositi' nod tumimung kou do sumambayang om papatahak do porsombahan do taakanon, om porsombahan di sorobon, om porsombahan do gandum, om porsombahan do tayam-tayam, om porsombahan do waig dot anggur, do miontok di gunaon do pointikid do tadau. 38 Iti nopo karamayan diti om pomoruhang di tadau'd Sabat di koubasanan, om i piro-piro porsombahan nga' pomoruhang nogi' di porsombahan dokoyu di koubasanan, om pomoruhang di porsombahan dokoyu di pamayaan di pinabatos, om pomoruhang di porsombahan di tumanud do kagaanan do ginawo, do patahakon dot id Tuhan.) 39 Om koomot kou nopondo, om mositi' nod papaharo kou do karamayan do solinaid do turu' o tadau, do tumimpuun di tadau'd kohopod om limo do tulan do koturu'. Om iri nopo tadau'd koiso' om tadau'd potobilangon do maan do koundarangan. 40 Om tontok nopod tadau'ddi, om mongoi kou no pongupu' do piro-piro o tua-ua' dit ongosonong do mantad id kouwaan dokoyu. Om manganu nogi' do roun di guas do roitan do palma, om i raan do kayu dit ongokohob o tuntu. Om tumimpuun nogindo do mamaramai di karamayan do tugama' do pomusou'd Tuhan, i Kinorohingan dokoyu. 41 Om ramayon no dokoyu o karamayan diri do solinaid do turu' o tadau. Om mositi' nod tonudon di sinakagon dokoyu ot oturan diti do gisom dot alaid. 42 Om mositi' nod miyon ngai' i tulun dot Israil dot id kinuhub-kuhub do solinaid di turu' o tadau'ddi, 43 om koilo indo i sinakagon dokoyu do sinuhu' do Tuhan i bansa' dot Israil do miyon dot id kinuhub-kuhub dit angara-raat do tontok di pinosoliwan dau iyolo' do mantad hilo'd Masir. Tu' iyau no i Tuhan, i Kinorohingan dokoyu,” ka dau. 44 Om iyo noddi i Musa do pinopoboros dot id tulun dot Israil do koinsanai dit oturan diri do papaharo do karamayan do tugama' do pomusou'd Tuhan.
Kowoyo-woyoo' do Momogompi' di Lampung
1 Om suhuo' nod Tuhan i Musa 2 do papatahak dot id tulun dot Israil diti piro-piro ot oturan do poingkaa, “Paatod kou no do tumau do saitun dit osompipi' om it osonong kopio do ponuang di lampung di hiri'd Kiim dot Olidang, om otutudan indo kasai' i lampung. 3 Om mositi' nod ngoyon di Harun tutudai i lampung diri do pointikid do sosodopon, om pologoson nopod kitapui do gisom do kosuabon o hiri'd kinoiyonon di koropohon do Tuhan, i hiri'd soliwan di tabir, it id dotimbabaan di Kaban do Tumpongo, i hiri'd Bilik dit Olidang Kopio. Om mositi' nod tonudon kasai' iti toturan diti do gisom dot alaid. 4 Om mositi' nod gompion kasai' di Harun i lampung di hiri'd potitimpakan do lampung di tamas dit osompipi' o winonsoi. Om mositi' nod ngoyon dau piantangai iri, om otutudan kasai' i' iri do tontok di kopodtutudan kasai' do hiri'd Kiim do Tuhan,” ka dau.
I Roti di Patahakon dot id Kinorohingan
5 Om boros ka kawagu'd Tuhan, “Manu no do hopod om duwo kilogram do tapung om wonsoyon nori do hopod om duwo o binuluguan do roti. 6 Om poiiliu nopo di roti'ddi om ruludon do duwo o rulud, do sopionom o sonrulud, do hiri'd mija' di nurogupan do tamas dit osompipi', i hiri'd suang di Kiim do Tuhan. 7 Om timpakan nod kominyan dit osompipi' o hiri'd duwo o rulud di roti'ddi. Tu' iri nopo kominyan diri om poningolon di roti do maan do tanda' do nakatahak nori dot id Tuhan do maan do porsombahan do taakanon. 8 Pointikid-tikid do tadau'd Sabat, om mositi' nod haro o roti do hiri'd suang di Kiim do Tuhan, do gisom do mompus-ompus. Tu' iti no it apatut do wonsoyon do tulun dot Israil do gisom dot alaid. 9 Iri nopo roti'ddi om maan di Harun om i sinakagon dau. Om mositi' nod id kinoiyonon dit olidang o pangakanan diyolo'ddi, tu' iri nopo roti'ddi om nanu do mantad id taakanon dit olidang kopio di nakatahak dot id Tuhan, om iri no it aanu dit imam,” ka dau.
I Momopol do Kinorohingan om it Oturan do Ponuli'
10-11 Hiri nopod kokiiman di tulun dot Israil om haro o songulun o kusai. Tapa' nopo dau om tulun do Masir om tina' no dau om tulun dot Israil, dot i Silomit o ngaran i tanak di Dibri do mantad id payat di Dan. Insan tadau om ponokisongkiwal no i kusai'ddi dot iso' o tulun dot Israil. Om tontok di misongkiwal iyolo', om pomopol no i kusai'ddi do Kinorohingan. Om ngoyo' noddi iyau di tulun dot Israil posolowoto' di Musa. 12 Om tamangai nopoddi diyolo' i tulun diri do daamot do magandad do boros do Tuhan, ondung poingkuro o wonsoyon diyolo' dot id tulun diri. 13 Om boros kad Tuhan dot id di Musa, 14 “Ngoyo' posoliwano' diti kokiiman i tulun diri. Om pointikid-tikid do tulun di nokorongou do tulun diri do minomopol, om mositi' nod pakabai do longon diyolo' dot id tulu do tulun diri do popointalang do nakasala' i tulun. Om oinsanan nopondo i tulun do momodumpau di tulun diri do watu do gisom dot apatai. 15 Om poboroson nogindo dot id toinsanan o tulun dot Israil dot isai nopo i momopol do Kinorohingan om mositi' nod mamabo do kootuson diri, 16 om hukuman nogindod kapatayon i tulun diri. Isai nopo o tulun, do tulun tuu dot Israil ko' bansa'd suwai di poingiyon do hilo'd Israil, do kopomopol do Tuhan om mositi' nod dumpahon do watu, do koinsanai di tulun o momodumpau do gisom dot apatai i tulun diri. 17 Isai nopo i mamatai'd tulun do suwai om hukuman nod kapatayon. 18 Isai nopo o tulun di mamatai'd tayam-tayam do tulun do suwai om mositi' nod tingalanan dau iri. Oturan nopo om ‘ginawo o pomolokop do ginawo’. 19 Ondung haro o tulun do pokoruol do tulun do suwai, om poingkuro nopo i winonsoi dau do pinopokoruol, om mositi' nod wonsoyon o miagal diri dot id dau. 20 Ondung koponipu' iyau'd tulang, om mositi' nod tipuon o dau'd tulang. Ondung kopomolou iyau dot iso' do mato do tulun do suwai, om i tiso' di dau'd mato nga' bolohon no. Ondung kopomobog iyau'd tulun do suwai, gisom dot otipu' o nipon di tulun diri, om mositi' nod tipuon o dau'd nipon. Nunu nopo i winonsoi dau dot id tulun do suwai, gisom dot a' diri osonong o tinan do tulun do suwai, om mositi' nod wonsoyon o miagal diri dot id dau'd tinan do ponuli' di winonsoi dau. 21 Isai nopo o kapamatai do tayam-tayam, om mositi' nod tingalanan dau iri. Nga' isai nopo o kapamatai do tulun, om mositi' nod patayon. 22 Om mositi' nod tonudon ngai' dokoyu i toturan diri om tonudon nogi' di tulun do bansa'd suwai di poingiyon dot id rolot dokoyu, tu' iyoho' no i Tuhan, i Kinorohingan dokoyu,” ka dau. 23 Om koboros poddi di Musa iri dot id tulun dot Israil, om posoliwano' no diyolo' di kokiiman i tulun di minomopol do Kinorohingan, om dumpaho' no diyolo' iyau'd watu do gisom do napatai. Om iri no o nokoodsuur di tulun dot Israil do momonsoi di pinonuhuan do Tuhan dot id di Musa.
I Toun do Koturu'
1 Om hilo' nod Nuluhon do Sinai o Tuhan do minoro-boros di Musa, om minonuhu' dau 2 do patahak diti piro-piro ot oturan dot id bansa'd Israil: Soira' nopondod korikot kou do hilo'd pomogunan di patahakon do Tuhan dot id dokoyu om a' kou no koino-ino'd mananom-tanom di tana' do pointikid-tikid di toun do koturu'. Om opusou i' dokoyu o Tuhan. 3 Mositi' nod tanaman dokoyu i tumo dokoyu om tutuan i guas dot anggur, om onuon i tua' di tanom-tanom dokoyu do solinaid dot onom o toun. 4 Nga' iri nopo koturu'd toun om potobilangon no dokoyu do maan do don Tuhan. Om solinaid nopod toun diri om pologoson nopo i tana' dot a' buatan om a' tanaman. A' no tanaman i tumo dokoyu om a' tutuan i guas dot anggur. 5 Iri piya gandum di suminuni toomod, it a' tinanom, nga' kada' no dokoyu ngoyo' omoto'. Tu' toun nopoddi om maso do koundarangan di tana' do buatan. 6 Om iyo piya'ddi nga' haro kasai' i' o suang di tana' do maan dokoyu'd takanon om akanon di turipon dokoyu, om i songingkaraja' dot id dokoyu, om i bansa'd suwai di poinsugku' dokoyu; 7 om akanon nogi' di tayam-tayam dokoyu, om i nintorusan di songhombo-hombo do hilo'd koomulakan dokoyu. Nunu nopo i sumuni do hilo'd tana' om aakan ngai' i'.
Toun di Kopogulian
8 Intobon no o toun dot inturu' i turu', om kogumuo' nopoddi om apat nohopod om siam o toun. 9 Om tontok nopondo do tadau'd kohopod do tulan di koturu', i Tadau do Kopongompunan do Dusa om monuhu' nod tulun do mongoi pouni do torumpit do pointongkop di pomogunan. 10 Om iyo kou noddi do potobilang di toun do kolimo nohopod diri, om poposunud do haro o kosimbayanan do kumaa dot id toinsanan o tulun di hiri'd pomogunan. Solinaid nopod toun diri om koinsanai di dapu' di nakadagang om mositi' nod pogulion kawagu dot id sanganu mantad di dapu' ko' id sinakagon di sanganu mantad di dapu'ddi. Om isai nopo i nadagang do siniliu do turipon om mositi' nod pogulion do hiri'd sompiiyon dau. 11 Kada' dokoyu tanamai o tumo dokoyu, om kada' dokoyu omoto' i gandum di suminuni toomod, om kada' dokoyu ngoyo' upuo' i tua' dot anggur dokoyu dit a' notutuan. 12 Toun nopoddi om toun dit olidang dot id dokoyu. Iri nopo i koino-ino dokoyu'd kanon om iri po i tua' di suminuni toomod do hiri'd tumo dokoyu. 13 Id suang nopod toun diri om koinsanai di dapu' di nakadagang om mositi' nod pogulion dot id sanganu mantad di dapu'ddi. 14 Om soira' nopondo do papadagang kou'd tana' dot id tulun di bansa' dokoyu, ko' momoli kou'd tana' do mantad id tulun diri, om kada' no kopio dot a' otulid o ralan do papadagang diri ko' momoli'ddi. 15 Iri nopo gatang di tana' om mositi' no do tontuon mantad do tumanud do kogumuon di toun di haro ot aanu do mantad id tana'ddi om gisom dot orikot i Toun do Kopogulian dit id dosunsudan. 16 Ondung ogumu' po o nintaban do toun dot a' po orikot iri, om amahal no o gatang di tana'. Nga' ondung okuri' no o nintaban do toun dot a' po orikot iri, om mositi' nod omura-mura no o gatang, tu' iri nopo dagangon om iri no i kogumuon do tua' do tanom do hiri'd tana'. 17 Kada' kou ponipu' dot iyokoyu ngai' it iso-iso' o bansa'. Suwai ko' koronok kou nod Tuhan, i Kinorohingan dokoyu.
Tuhoton do Pasal di Toun do Koturu'
18 Tonudon ngai' no it oturan om i ponuhuan do Tuhan, om osimbayan kou id mongiyon-ngiyon dot id pomogunan diri. 19 Om kouwa' indo i tinanom dokoyu do hiri'd tana' om kabagal kasai' dokoyu o taakanon om osimbayan kou do mongiyon-ngiyon do hilo'. 20 Nga' haro dotindo o muhot ondung nunu no ot akanon do tontok di koturu'd toun, tu' a' i' tanaman i tana' om a' ongoyon onuo' i tua' di songintanom. 21 Tontok nopo di toun do koonom om barakatan indo do Tuhan i tana' gisom dot iri nopo tua' dot aanu do toun diri om kabagal i' do duwo o toun. 22 Om mananom kou nopondo di tumo dokoyu di kawalu'd toun, om haro kasai' po i tomot dokoyu di toun do koonom dot akanon dokoyu. Om haro kasai' po ot akanon dokoyu do gisom dot oomot i tua' di tinanom dokoyu di toun do kawalu'ddi.
Kopogulian do Tana' om Walai
23 Kada' kopio dokoyu dagango' do gisom dot otilombus i tana' dokoyu, tu' okon i' ko' iyokoyu o sanganu'ddi. Sanganu nopo kopio di tana'ddi om Kinorohingan i', om iyokoyu nopo nga' miagal nod sompogunan di pinologos do mananom-tanom di tana'. 24 Ondung haro o songkoiyonon do tana' do padagangon, om mositi' nod tumboyoon i sanganu mantad di tana', do tontok dot onuon kawagu dau i tana'ddi. Tu' iyau no it apatut do kasanganu'ddi. 25 Ondung haro o tulun dot Israil di rumutum kopio, gisom dot a' no milo dot a' dau padagangon i tana' dau, om mositi' nod bolion kawagu di tobpinai dau dit id somok po, i tana'ddi. 26 Om tulun nopo dit aiso' o tobpinai do momoli kawagu di tana' dau, om kakaya' i' doti' iyau do koimbagu om kabagal indo o tusin dau do pomoli kawagu di tana'ddi. 27 Om ondung iyo'ddi nga' mositi' nod bayaran dau do tusin i tulun di minomoli di tana'ddi dot irad di gatang do suang di tana' do solinaid di piro-piro o toun dot a' po orikot i Toun do Kopogulian dit id dosunsudan. Tu' orikot nopo o toun diri, om poingkuro piya nga' koguli' kasai' no i tana' dot id dau tu' sanganu mantad di tana'ddi. 28 Nga' ondung a' kabagal o tusin dau do pomoli kawagu di tana' dau'ddi, om iri kasai' po i minomoli o kikuasa' di tana'ddi do gisom dot orikot i Toun do Kopogulian. Nga' orikot nopondo i toun diri om pogulion no i tana' dot id sanganu mantad di tana'. 29 Soira' nopod papadagang o tulun do walai dit id suang do bandar di kitolig o posorili', om kikuasa' no iyau do momoli kawagu di walai'ddi dot osontounan do mantad di tadau'd kinapadagangan. 30 Nga' ondung a' dau bolion kawagu i walai'ddi dot osontounan, om asanganu no kasai' di minomoli i walai, om otungkusan di sinakagon dau; om a' no koguli' kawagu i walai'ddi do tontok piya di Toun do Kopogulian. 31 Nga' walai nopod hiri'd kawalayan dit aiso' o tolig do posorili', om paagalon nopod tumo; tu' haro i' o kuasa' di sanganu mantad do momoli'ddi, om mositi' do pogulion kawagu iri do tontok di Toun do Kopogulian. 32 Nga' iri nopo tulun do Liwi om kikuasa' i' do momoli kawagu di dapu' diyolo' do hiri'd bandar di natantu' mantad do diyolo' do soira-ira' nopo. 33 Ondung haro o tulun do Liwi do padagang do walai dit id suang dot ongoiso' di kabandaran di natantu' do diyolo'ddi, om ondung a' dau oboli kawagu iri, om mositi' nod pogulion kawagu dot id dau i walai'ddi dot orikot i Toun do Kopogulian, tu' iri nopo walai di tulun do Liwi do hiri'd bandar diyolo', om iyolo' kasai' no o kasanganu do gisom dot alaid dot id pogialatan di tulun dot Israil. 34 Nga' iri nopo kobuturan do hiri'd posorili' di kabandaran do tulun do Liwi, om a' no kopio koino-ino do padagangon; tu' iyolo' kasai' no o kasanganu'ddi do gisom dot alaid.
I Paalasan dot id Tulun do Mosikin
35 Ondung haro o tulun dot Israil di poingiyon dot id somok dokoyu di rumutum kopio, om gisom dot aiso' no o kanon dau om mositi' nod onuan dokoyu iyau dot irad di patahakon dokoyu dot id tulun di gumadsi'. Om poingiyon kasai' indo iyau do hiri'd somok dokoyu. 36-37 Kada' dokoyu pokionuwai'd bunga i tusin di pinaalasan dokoyu dot id tulun diri. Suwai ko' koronok kou nod Kinorohingan, om pologoson no o tulun diri do poingiyon do hiri'd somok dokoyu. Om kada' kou panganu'd tuntung do mantad id taakanon di padagangon dokoyu dot id dau. 38 Iri no o ponuhuan do Tuhan, i Kinorohingan dokoyu, i pinoposoliwan dokoyu do mantad hilo'd Masir, do papatahak dokoyu diti tana' do Kanaan; om osiliu indo iyau do Kinorohingan dokoyu.
Kopolobusan do Turipon
39 Ondung haro o sompi' ko' tulun dot Israil di poingiyon dot id somok dokoyu do rumutum kopio, om gisom do dumagang nopo iyau dot id dokoyu do sumiliu'd turipon, om kada' dokoyu iyau suhuo' do momonsoi'd karaja' di dong turipon. 40 Mositi' nod miyon nopo iyau do hiri'd dokoyu do miagal do tulun di gumadsi'; om kumaraja' dot id dokoyu do gisom dot orikot i Toun do Kopogulian. 41 Tontok nopoddi om mositi' nod tumongkiad iyau om i tangaanak dau di walai dokoyu, om gumuli' do hiri'd sompiiyon dau om hiri'd tana' di komolohingan dau. 42 Iri nopo tulun dot Israil om turipon i' do Tuhan, tu' iyau i' o pinoposoliwan diyolo' do mantad hilo'd Masir; om a' no iyolo' koino-ino do padagangon do maan do turipon. 43 Kada' dokoyu iyolo' raraato', nga' koronok kou nod Kinorohingan dokoyu. 44 Ondung orohian kou do haro o turipon, om mongoi kou nopo boli do mantad id bansa'd suwai di hiri'd posorili' dokoyu. 45 Om koino-ino kou i' do momoli di tangaanak do tulun do bansa'd suwai di poingiyon dot id rolot dokoyu. Iri nopo tangaanak do bansa'd suwai dit osusu dot id pomogunan dokoyu, om koino-ino i' do silihon do dokoyu'd songonuon. 46 Om koino-ino i' iyolo' do potungkusan dokoyu di tangaanak dokoyu do maan diyolo'd turipon do solinaid po diyolo'd poimpasi. Nga' kada' nogi' kopio dokoyu raraato' o sompi' ko' tulun dot Israil. 47 Ondung haro o bansa'd suwai di poingiyon dot id rolot dokoyu do kumaya', om rumutum nogindo i sompi' ko' tulun dot Israil, om dumagang nondo iyau do sumiliu'd turipon di bansa'd suwai'ddi, ko' id sompiiyon di bansa'd suwai. 48 Om kadagang nopondo iyau, om koino-ino kasai' i' i tulun dot Israil diri do bolion kawagu do tongoiso' di tobpinai dau'd kusai, 49 ko' i tamanon dau, ko' i tikid dau'd molohing, ko' i koobpinayan dau'd suwai dit id somok po o koobpinayan; ko' iyau piya, di kaanu iyau'd tusin do kabagal do pambayar, nga' milo i' do momoli do kopolobusan do tinan dau. 50 Om mositi' nod monokirunding iyau di tulun di minomoli dau. Om intobon diyolo' i toun do mantad di duminagang i tulun diri do sumiliu'd turipon om gisom dot orikot i Toun do Kopogulian dit id dosunsudan. Om tontuon nogindo diyolo' o gatang di kopolobusan dau. Om iri nopo pamagatang om poiyoon di pamagadsi' do tulun di gumadsi'. 51-52 Om mositi' nod pogulion kawagu di turipon o wookon di gatang do pinomoli do tumanud do kogumuon do toun di noolu', 53 do miagal-agal ko' tulun iyau di guminadsi' do monikid toun nod godsian. Om a' no kopio koino-ino do raraaton iyau di tuan dau. 54 Ondung a' iyau kalabus do tumanud di duwo o ralan do kolobusan diri, om mositi' nod polobuson iyau om i tangaanak dau do tontok do Toun di Kopogulian dit id dosunsudan. 55 Tulun nopo dot Israil om a' i' koino-ino do sumiliu'd turipon do gisom dot ikapatai, tu' tulun nopod Israil om turipon nod Tuhan. Iyau i' o pinoposoliwan diyolo' do mantad hilo'd Masir. Om iyau no o Tuhan, i Kinorohingan diyolo'.
Barakat dot id Tulun dit Obingumboyo'
1 Om boros kad Tuhan, “Kada' kou pomonsoi'd tingolig, om kada' kou popoingkakat do tininganak om torigi'd watu di kinikiran do maan do tukuon. Tu' iyoho' no o Tuhan, i Kinorohingan dokoyu. 2 Ramayon no dokoyu i piro-piro o tadau dot agayo do tugama', om pusohon no i tiyonon do sumambayang dot id doho'. Tu' iyoho' no o Tuhan. 3 Ondung miontok dit oturan o kowoyo-woyoon dokoyu om mumboyo' kou di ponuhuan ku, 4 om porikoton ku indo kasai' o rasam di dongkararasaman kasai', om kosuni i' i songintanom do hiri'd tana', om mongua' i kouwaan dokoyu. 5 Om a' indo aayi-ayi' o tua' di tanom-tanom di hiri'd tana' dokoyu, gisom dot orikot nopo i kopongupuan dokoyu'd tua' dot anggur, om maso po dokoyu do mongomot do gandum. Om tontok nopo dit orikot no o kapananaman do gandum, om maso po dokoyu do mongupu' do tua' dot anggur. Om kabagal kasai' indo dokoyu o taakanon dokoyu, om osimbayan kou do mongiyon-ngiyon dot id pomogunan dokoyu. 6 Om onuan ku indo iyokoyu do kosimbayanan do hilo'd pomogunan dokoyu, gisom dot osimbayan kou nopod modop, tu' aiso' no o poddosi dokoyu. Punsoon ngai' ku nopondo i nintorusan dit ongorongit do hilo'd pomogunan dokoyu, om pisangadan do hilo' nga' aiso' nondo. 7 Angaala' indo dokoyu i pisangod dokoyu, 8 om limo nopo dokoyu nga' kaala' no do hatus o tulun, om hatus no om kaala' i' do hopod noribu o tulun. 9 Barakatan ngai' ku indo iyokoyu, om onuan ku iyokoyu do tanak dot ogumu'. Om nunu nopo i nakabatos ku dot id dokoyu nga' bayaanon ngai' ku i'. 10 Om ogumu' tomod nondo o tomot dokoyu gisom do koromut do sontoun. Om gisom do taamon pondo dokoyu i noolu' di nomot dit id gulu om haro i' o poiyanan di wagu koomot. 11 Om mundorong oku indo dot id pogialatan dokoyu do hiri'd Kiim ku dit Olidang, om a' ku indo kopio iyokoyu tongkiadan. 12 Moyo-woyo' oku indo kasai' dokoyu; om osiliu oku do Kinorohingan dokoyu, om iyokoyu nga' osiliu nondo do tulun ku. 13 Iyoho' no i Tuhan, i Kinorohingan dokoyu, o pinoposoliwan dokoyu do mantad hilo'd Masir om a' kou noddi osiliu'd turipon. Noidu' ku no i kuasa' di monginggorit dokoyu om nosiliu ku no iyokoyu'd tulun dit a' porintaon do bansa'd suwai,” ka dau.
Hukuman dot id Tulun dit A' Obingumboyo'
14 Om boros kad Tuhan, “Ondung a' kou tumanud do ponuhuan ku, om ohukuman kou no. 15 Ondung a' kou tumanud dit oturan ku om i boros ku, om mamaraag kou no di tumpongo di winonsoi ku dot id dokoyu, 16 om hukuman ku no iyokoyu. Porikatan ku nondo iyokoyu do kosusaan --- toruol om sogiton dit a' milo'd lingoson, gisom dot obolou o mato dokoyu, om oinggorit o koposi-posion dokoyu. Momutanom kou piya nga' a' kou i' kaakan di tua' di tinanom dokoyu, tu' rumikot nondo i pisangod do mongoi pangala' dokoyu om mangayi' di natanom-tanom dokoyu. 17 Om saapon ku nondo iyokoyu gisom dot aala' kou. Om iri nondo tulun dit araatan dokoyu o momorinta' dokoyu. Om adalaan kou nondo kopio'd moddosi gisom do manangkus kou'd mogidu' dot aiso' piya o momogusa' dokoyu. 18 Ondung a' kou mumboyo' doho' do kopuriman kou piya ngai'ddi, om ruhangan ku pondo o hukuman dokoyu dot inturu' kopiluap ko' i gulu. 19 Adalaan no daa kopio kasawat o ginawo dokoyu, nga' poinsiribaon ku indo iyokoyu. Aiso' nondo o rasam do sumondot, om tumuu pondo om kumodou do miagal do watu o tana' dokoyu. 20 Aiso' nopondo o kootuk-otukon do huyan dokoyu, tu' a' i' haro o sumuni do hiri'd tana' dokoyu, om a' mongua' o kouwaan dokoyu. 21 Ondung sumurilog kasai' kou om a' kou mumboyo' doho', om ruhangan ku pondo o hukuman dokoyu do gisom dot inturu' kopiluap ko' i gulu. 22 Porikoton ku nondo i nintorusan dit ongorongit dot id pogialatan dokoyu. Om iri nondo nintorusan diri o mimpatai di tangaanak dokoyu, om i tayam-tayam dokoyu, om mangayi' dokoyu gisom dot okuri' kou nondo, om ongoingou pondo i karalan-ralanan dot id pomogunan dokoyu. 23 Ondung a' kasai' kou mumboyo' doho', do kopuriman kou piya ngai' di pomohukum diri, suwai ko' sumaap kou nogi', 24 om saapon ku no iyokoyu om hukuman ku dot inturu' kopiluap o kawagato' ko' mantad dit id gulu. 25 Om porikot oku nondod pisangadan dot id dokoyu do pomohukum ku dokoyu tu' nokotolibamban kou no di tumpongo toko'. Om tontok nopondo di tumimung kou dot id bandar dokoyu do mongoi daa intirung, om porikatan ku po iyokoyu'd toruol dit a' milo'd lingoson, gisom dot a' nondo milo dot a' kou tumahak dot id pisangod dokoyu. 26 Om ooiyan kou nondo do taakanon gisom dot iso' poo o pagansakan do roti do pakayon do hopod o tongoondu', tu' iri po o haro dot id diyolo'. Om toini-inion nondo i taakanon. Om aayi' piya dokoyu i taakanon nga' louson kasai' kou po. 27 Ondung sumaap kasai' kou om a' kou mumboyo' doho' do kopuriman kou piya do koinsanai'ddi, 28 om tumogod oku nondo kopio om saapon ku iyokoyu. Om hukuman ku iyokoyu dot inturu' kopiluap o kawagato' ko' mantad dit id gulu. 29 Om adalaan kou nondo kopio'd louson gisom dot iri piya tangaanak dokoyu nga' kanon i' dokoyu. 30 Om raagon ku nondo i tiyonon dokoyu'd modsubak di hilo'd timpak do konulu-nuluan, om habaon ngai' ku i mija' do podtutudan dokoyu'd kominyan, om pataamon ku nondo o rata' dokoyu dot id tingolig dokoyu di nangahaba'ddi. Om araatan oku nondo kopio, 31 gisom do silihon ku'd pogun i kabandaran dokoyu, om raagon ku i tiyonon dokoyu'd modsubak, om a' ku romiton i porsombahan dokoyu. 32 Om raagon ku nopondo kopio i pomogunan dokoyu, gisom dot ongkotigowo i pisangod di sumowoli'd miyon do hiri do kokito di kinaraagan. 33 Porikatan ku nondod pisangadan o hiri'd pomogunan dokoyu, om potompiason ku iyokoyu dot id piro-piro o pomogunan do bansa'd suwai. Om kologos tomod nopondo i tumo dokoyu, om ongosiliu'd pogun i kabandaran dokoyu. 34-35 Om tontok nondoddi do koundorong kopio i tana' dokoyu dit a' daa dokoyu uhang do poundorong-dorongon do buaton. Om daamot nopondo dokoyu do hilo'd dombokon, i hilo'd pomogunan do pisangod dokoyu, om poillogos tomod nopondo i tana' dokoyu. Om tontok nondo'ddi do koundorong do buaton i tana' dokoyu. 36 Om padalaan ku nondo iyokoyu do momorolosi, iyokoyu it atanggayan dot id pomogunan do bansa'd suwai, gisom dot iri piya kohus do roun dit awayaan do ribut nga' papatangkus i' dokoyu do mogidu'. Om manangkus kou nondod mogidu' do miagal pod gusa-gusaon kou dot id suang do pisangadan. Om ohunduk kou indo do tontok piya dit aiso' o pisangod dot id sorili' dokoyu. 37 Om kopogitatahub kou nopondo dot ouru'd manangkus do mogidu', dot aiso' piya o momogusa'. Om a' kou no kogoos do sumaap dot isai nopo o pisangod. 38 Om apatai kou nondo do hilo'd pomogunan di pinananggayan di pisangod dokoyu, om aakan kou di tana' di pisangod dokoyu. 39 Om iri nopondo it okuri' no dokoyu, i noolu-olu' do poingiyon do hilo'd pomogunan do pisangod dokoyu, om monorimo-rimo pod tumongob dot i dusa dokoyu om i dusa di komolohingan dokoyu o kobungou. 40 Nga' okunon indo di sinakagon dokoyu i dusa diyolo' om i dusa di komolohingan diyolo', i nokowonsoi'd dusa tu' suminaap i' doho'. Suminurilog iyolo' doho', 41 gisom dot a' oku noddi milo dot a' sumaap diyolo' om moguyung diyolo', om gowoi poddi om natanggayan iyolo' di pisangod diyolo' do hilo'd pomogunan di pisangod diyolo'. Om id tohuri nopondo, di koinsiriba' om kopuriman do hukuman di dusa om i kosurilogo' diyolo' i sinakagon diyolo', 42 om sorohon ku indo i tumpongo ku dot id di Yakub, om id di Isak, om id di Abraham. Om inwoguan ku indo i batos ku do papatahak di tana'ddi dot id tulun ku. 43 Nga' id gulu po kopio om mositi' nod ongkopoggidu' ngai' po i tulun do mantad id pomogunan diri, om koundorong i' kopio'd buaton i tana'. Om mositi' nod opurimanan ngai' di tulun ku o koinsanai di hukuman do porikoton ku dot id diyolo', tu' a' i' iyolo' tuminanud dit oturan om i ponuhuan ku. 44 Nga' tontok nopo di poundorong iyolo' do hilo'd pomogunan do pisangod diyolo', om a' ku i' iyolo' tongkiadan kopio, om a' ku iyolo' punsoon. Tu' ondung punsoon ku iyolo' nga' iyoho' no o kapamaraag di tumpongo ku dit ogirot dot id diyolo', om Tuhan oku i' om Kinorohingan oku diyolo'. 45 Om inwoguan ku nondo i tumpongo ku dot id komolohingan diyolo' do tontok di pinopointalang oku do kuasa' ku dot id koinsanai'd bansa' dot i pinoposoliwan oku di tulun ku do mantad hilo'd Masir o kinopointalangan ku; om osiliu oku indo, iyoho' i Tuhan, do Kinorohingan diyolo',” ka dau. 46 Om iri no ngai' ot oturan om ponuhuan di pinatahak do Tuhan dot id di Musa, di hilo'd Nuluhon do Sinai, do patahakon dot id tulun dot Israil.
Oturan do Pasal do Porsombahan dot id Tuhan
1 Om patahako' nod Tuhan dot id di Musa 2 iti piro-piro ot oturan do patahakon dot id tulun dot Israil, “Soira' nopod katahak dot id Tuhan ot iso' o tulun do maan do pamayaan do batos, om milo i' do polobuson o tulun diri ondung mambayar nod tusin dot irad diti, 3-7 do tumanud di gatang di natantu' mantad: --- Kusai nopo dit id piolitan do duwo nohopod o toun om onom nohopod o toun, om limo nohopod o tusin do pirok do pambayar. --- tondu' nopo di nosukod no om tolu nohopod o tusin do pirok do pambayar. --- tanak nopod kusai dit id piolitan do limo o toun om duwo nohopod o toun, om duwo nohopod o tusin do pirok o pambayar. --- tanak nopod tondu' om hopod o tusin do pirok do pambayar. --- tanak nopod kusai dit id siriba' do limo o toun do tumur om limo o tusin do pirok do pambayar. --- tanak nopod tondu' dit okoro' po om tolu o tusin do pirok do pambayar. --- kusai nopo dit id sawat ko' onom nohopod o toun do tumur om hopod om limo o tusin do pambayar. --- tondu' nopo dit id sawat ko' onom nohopod o toun do tumur om hopod o tusin do pirok do pambayar. 8 Ondung adalaan kopio komosikin i tulun di minamatos diri gisom dot a' iyau kabayar di gatang di natantu' mantad, om mositi' nod ngoyon dau pootodo' i tulun di pinatahak dot id Tuhan diri dot id imam. Om tontuon nondo dit imam o gatang dit omura, do tumanud dit asaapan do tulun diri. 9-10 Ondung pasal do nintorusan dit a' sosomu', i koino-ino'd maan do porsombahan dot id Tuhan i pinabatos, om a' no di tulun di minamatos koino-ino do tingalanan iri do nintorusan do suwai. Tu' koinsanai di porsombahan do patahakon dot id Tuhan om olidang no. Nga' ondung tingalanan daa dau iri, om don Tuhan goduwo no di nintorusan diri. 11 Nga' ondung pasal do nintorusan di sosomu' i pinabatos, i nintorusan dit a' milo'd romiton do maan do porsombahan dot id Tuhan, om mositi' nod pootodon di tulun di minamatos o nintorusan diri dot id imam. 12 Om tontuon nondo dit imam o gatang di nintorusan diri do tumanud do koinan-inano' di nintorusan. Om a' no koino-ino do pingkurangan i gatang di pinatantu'. 13 Ondung bolion kawagu di tulun i nintorusan diri, om mositi' nod bayaran dau i gatang om ruhangan pod induwo i sompihopod. 14 Ondung haro o tulun do papatahak do walai dau dot id Tuhan, om tontuon nondo dit imam o gatang di walai do tumanud do kosonong-sonongo' di walai. Om a' no milo do pingkurangan i gatang di pinatantu'. 15 Ondung bolion kawagu di tulun di pinapatahak di walai, i walai'ddi, om mositi' nod bayaran dau i gatang om ruhangan po dot induwo i sompihopod. 16 Ondung haro o tulun do papatahak do songkoiyonon di tana' dau dot id Tuhan, om mositi' nod tontuon i gatang do tumanud do kogumuon do tonomon di pananom do tana'ddi. Om gatang nopod pointikid-tikid do 20 kilogram do barli do tonomon om hopod o tusin do pirok. 17 Ondung patahakon dau i tana' do dongkolimponusan do Toun di Kopogulian, om mositi' nod bayaran ngai' i gatang. 18 Ondung patahakon i tana' do piro-piro toun dot id tohuri ko' iri, om mositi' nod tontuon dit imam o gatang diri do tumanud do kogumuo'd toun di noolu' do gisom dot orikot i Toun do Kopogulian dit id dosunsudan, om tontuon nondo dau o gatang di poimura-mura. 19 Ondung bolion kawagu di tulun di pinapatahak di tumo, i tumo'ddi, om mositi' nod bayaran dau i gatang om ruhangan pod induwo i sompihopod. 20 Om ondung pobolion dau i tumo'ddi dot a' po dau abayaran dot id Tuhan, om a' no iyau koino-ino do momoli kawagu di tana'ddi. 21 Om Toun nopondod Kopogulian dit id dabantalan, om asanganu kasai' nondod Tuhan i tumo'ddi do gisom dot alaid, om patahakon nondo iri dot id tongoimam. 22 Ondung haro o tulun do papatahak dot id Tuhan do songkoiyonon o tumo di binoli dau, 23 om tontuon nondo dit imam o gatang diri do tumanud do kogumuo'd toun di noolu' do gisom dot orikot i Toun do Kopogulian dit id dosunsudan. Om mositi' nod bayaran di tulun o gatang di natantu'ddi do tontok do tadau'ddi. Om Tuhan no o kasanganu di tusin diri. 24 Om tontok nopondo di Toun do Kopogulian om mositi' nod pogulion i tumo'ddi dot id tulun di sanganu mantad ko' id sinakagon po dau. 25 Om mositi' nod tontuon i gatang do tumanud di pamagatang di natantu' mantad. 26 Iri nopo tayam-tayam dit id gulu kosusu om don Tuhan no, om iso' pod tulun nga' aiso' no o koino-ino do papatahak diri dot id Tuhan do maan do porsombahan do tumanud do kagaanan do ginawo. Iri nopo tanak do sapi', om i tanak do dumba', ko' i tanak do kambing dit id gulu kosusu om don Tuhan ngai' no. 27 Om iri nopo nintorusan do sosomu' dit id gulu kosusu om milo i' do bolion kawagu do tumanud di pamagatang di natantu' mantad, nga' ruhangan po dot induwo i sompihopod. Ondung a' bolion kawagu, om koino-ino i' do pobolion dot id tulun do suwai do tumanud di gatang di natantu' mantad. 28 Iso' pod tulun nga' aiso' i' o koino-ino do padagang ko' momoli kawagu do nunu nopo i pinatahak dau dot id Tuhan dit aiso' o pinaantakan, do tulun tuu iri ko' nintorusan ko' tana'. Tu' Tuhan no o sanganu'ddi do gisom dot alaid. 29 Tulun piya di pinatahak dot id Tuhan do maan patayo' nga' a' no koino-ino do bolion kawagu, suwai ko' mositi' nod patayon. 30 Sompihopod nopod nunu nopo o tua' do totonomon, do gandum tuu ko' tua-ua', nga' don Tuhan ngai' no. 31 Ondung haro o tulun dot orohian do momoli kawagu'd wookon diri, om mositi' nod bayaran dau i gatang di natantu' mantad, om ruhangan pod induwo i sompihopod. 32 Iso' nopod mantad do hopod o tayam-tayam om don Tuhan no. Ondung intobon i tayam-tayam, om pointikid-tikid di kohopod, om mositi' nod don Tuhan noddi. 33 Nga' a' i' koino-ino do maan di sanganu sompipio' i tayam-tayam gisom dot iri ngai' pondo it angara-raat no ot opili'. Om a' nogi' koino-ino do poolonon dau i tayam-tayam di nopili'ddi. Ondung poolonon dau i tayam-tayam diri do tayam-tayam do suwai om mositi' nod patahakon goduwo nopo i tayam-tayam diri dot id Tuhan, om a' no koino-ino'd bolion kawagu,” ka dau. 34 Om iri no ngai' o boros do Tuhan do pinoboros dau dot id di Musa di hilo'd Nuluhon do Sinai do polombuson dot id tulun dot Israil.
Pinongintaban do Tulun dot Israil di Koinsan Nogi'
1 Tontok di tadau do koiso' di tulan do koduwo di toun do koduwo do mantad di kinosoliwanan di tulun dot Israil do mantad id pomogunan do Masir, om boro-boros no o Tuhan dot id di Musa do tontok di hiri iyau id suang di Kiim do Tuhan di hilo'd tana' do kowotuan do Sinai. Om boros ka dau, 2 “Mositi' no do papaharo kou di Harun do pongintaban dilo tulun dot Israil, om pogisuwai-suwayon iyolo' do mongintob do tumanud do pinuruan do sompiiyon diyolo'. Om tulison ngai' no o ngaran di tongokusai 3 di duwo nohopod o toun do tumur ko' it otuo ko' iri, it ongokoris po do sumiliu'd soudor. 4 Om suhuon no o tiso' di boyoon do pinuruan do sompiiyon do mantad id pointikid-tikid di payat do monulung dokoyu,” ka dau. 5-16 Om iti ngai' no i tongokusai, i boyoon do mantad id pointikid-tikid do payat do nongopili' do momonsoi do karaja'ddi. - Payat - Boyoon do Pinuruan do Sompiiyon - Rubin - I Ilisur, i tanak di Sidour - Simion - I Solumiol, i tanak di Surisiadai - Yohuda - I Nahason, i tanak di Aminadab - Isakar - I Nitaniil, i tanak di Suar - Sibulon - I Iliab, i tanak di Hilon - Ipraim - I Ilisama, i tanak di Amihud - Manasi - I Gamaliol, i tanak di Pidasur - Binyamin - I Abidan, i tanak di Gidioni - Dan - I Ahiosor, i tanak di Amisadai - Asor - I Pagiol, i tanak di Okran - Gad - I Iliasap, i tanak di Rohuil - Naptali - I Ahira, i tanak di Inan 17 Om iri ngai' no i hopod om duwo o tongokusai'ddi o minonguhup di Musa om i Harun 18 do minonimung ngai' di tulun do tontok di tadau do koiso' di tulan do koduwo. Om tuliso' ngai' no diyolo' o ngaran di tulun do pinogisosompipi' do tumanud di pinuruan do sompiiyon diyolo'. Om ngaran nopo do koinsanai di tongokusai di nokorikot do duwo nohopod o toun do tumur ko' it otuo ko' iri om tinulis ngai' nopo om pinointob 19 do tumanud di pinonuhuan do Tuhan. Om tuliso' ngai' no di Musa o ngaran di tongokusai'ddi di hilo' iyolo'd tana' do kowotuan do Sinai. 20-46 Om iri nopo tongokusai di nokorikot do duwo nohopod o toun do tumur ko' it id dotuo ko' iri, it ongokoris po do sumiliu'd soudor, om tinulis ngai' nopo o ngaran do sinompipi' do tumanud di pinuruan do sompiiyon om sompiiyon diyolo'. Nimpuun nopo do monulis om i payat di Rubin, i tanak di Yakub dot id dotuo. Om poingkaa no o kogumuon diyolo': - Payat - Kogumuon - Rubin - 46,500 - Simion - 59,300 - Gad - 45,650 - Yohuda - 74,600 - Isakar - 54,400 - Sibulon - 57,400 - Ipraim - 40,500 - Manasi - 32,200 - Binyamin - 35,400 - Dan - 62,700 - Asor - 41,500 - Naptali - 53,400 - Kogumuon do toinsanan: - 603,550 47 Iri nopo tulun do Liwi om a' i' tinulis o ngaran do pinosugku' do ngaran di payat do suwai, 48 tu' nosunudan nod Tuhan i Musa do 49 poingkaa, “Papaharo ko nopod pongintaban do tulun dit ongokoris po do sumiliu'd soudor, om kada' pohompito' i payat di Liwi. 50 Nga' suhuon nogi' i tulun do Liwi do momogompi' di Kiim ku om koinsanai di pakakas do hiri. Om karaja' nopo diyolo' om: sumaan di Kiim ku do mitonggoi ngai' di pakakas do hiri'd Kiim, om popowonsoi do kiim diyolo' do posorili' di Kiim ku. 51 Om soira' nopod mundaliu kou, om iri no i tulun do Liwi o momohuyas di Kiim ku, om popowonsoi kawagu'ddi dot id pomukiiman kawagu dokoyu. Om isai nopo o tulun do suwai ko' i tulun do Liwi, do mongoi insomok di Kiim om mositi' nod hukuman do kapatayon. 52 Om iri no tulun dot Israil di suwai om mositi' nod popowonsoi do kiim diyolo' do tumanud di sinompuruan diyolo', om sorompori-pori do tumanud di bondira' diyolo'. 53 Nga' iri nopo tulun do Liwi om mositi' nod popowonsoi di kiim diyolo' do posorili' di Kiim ku. Om mositi' nod tamangan diyolo' i Kiim diri om aiso' indo o tulun do koinsomok dot i kopotogod doho', gisom do hukuman ku nondo o tulun dot Israil,” ka dau. 54 Om wonsoyo' ngai' no di tulun dot Israil o koinsanai di pinonuhuan do Tuhan dot id di Musa.
Koiyonon do Pointikid-tikid di Payat do Hiri'd Kokiiman
1 Om patahako' nod Tuhan dot id di Musa om id di Harun iti piro-piro o toturan. 2 Soira' nopod powonsoi i tulun dot Israil do Kiim diyolo', om mositi' nod powonsoyon do pointikid-tikid do tulun o kiim diyolo' dot id sahau do bondira' di sinompuruan diyolo', mikuwo'd dakatan do tanda' di pinuruan do sompiiyon diyolo' i kiim diyolo'. Om mositi' nod posorili' di Kiim ku o pawansayan ngai' di kiim diri. 2|30|HK8|Kokiiman dot ongkibondira' do tumanud di sinompuruan|2.2 3-9 Ponong id koulayon nopo, om i tulun dit id sahau do bondira' do sinompuruan di Yohuda o popowonsoi di kiim diyolo' do tumanud di pinuruan diyolo', om sorompori-pori do moyo' di boyoon diyolo' do miagal diti: - Payat - Boyoon - Kogumuon - Yohuda - I Nahason i tanak di Aminadab - 74,600 - Isakar - I Nitaniil i tanak di Suar - 54,400 - Sibulon - I Iliab i tanak di Hilon - 57,400 - Kogumuon do toinsanan: - 186,400 Om mositi' no dot i sinompuruan di Yohuda o mogulu do mamanau. 10-16 Ponong id salatan nopo om i tulun dit id sahau do bondira' di sinompuruan di Rubin o popowonsoi do kiim diyolo' do tumanud di pinuruan diyolo', om sorompori-pori do tumanud di boyoon diyolo', do miagal diti: - Payat - Boyoon - Kogumuon - Rubin - I Ilisur i tanak di Sidour - 46,500 - Simion - I Solumiol i tanak di Surisiadai - 59,300 - Gad - I Iliasap i tanak di Rohuil - 45,650 - Kogumuon do toinsanan: - 151,450 Om mositi' no dot i sinompuruan di Rubin o mamanau do sumusuhut di sinompuruan di Yohuda. 17 Om kapamanau po i duwo o sinompuruan diri om mamanau nogindo i payat di Liwi, it ongkisinaan di Kiim do Tuhan. Om mositi' nod mamanau o pointikid-tikid di sinompuruan diri do tumanud dit oturan do mamanau do miagal di maso'd powonsoi di kiim, tu' sorompori-pori nopod mundorong do hiri'd kinoiyonon diyolo', dot id sahau di bondira' do sinompuruan diyolo'. 18-24 Ponong id kotonobon nopo om i tulun dit id sahau do bondira' di sinompuruan di Ipraim o popowonsoi do kiim do tumanud di pinuruan diyolo', om sorompori-pori do tumanud di boyoon diyolo' do miagal diti: - Payat - Boyoon - Kogumuon - Ipraim - I Ilisama i tanak di Amihud - 40,500 - Manasi - I Gamaliol i tanak di Pidasur - 32,200 - Binyamin - I Abidan i tanak di Gidioni - 35,400 - Kogumuon do toinsanan: - 108,100 Om iti no sinompuruan di Ipraim om mositi' nod mamanau do sumusuhut di payat di Liwi. 25-31 Ponong id utara nopo om i tulun dit id sahau do bondira' di sinompuruan di Dan o popowonsoi'd kiim diyolo' do tumanud di pinuruan diyolo', om sorompori-pori do tumanud di boyoon diyolo' do miagal diti: - Payat - Boyoon - Kogumuon - Dan - I Ahiosor i tanak di Amisadai - 62,700 - Asor - I Pagiol i tanak di Okran - 41,500 - Naptali - I Ahira i tanak di Inan - 53,400 - Kogumuon do toinsanan: - 157,600 Om iti nopo sinompuruan do payat di Dan om mamanau do hiri'd ponong id tohuri kopio. 32 Om kogumuon nopo di tulun dot Israil di nongkotulis o ngaran om 603,550 o tulun. 33 Om iri nopo payat di Liwi om a' i' pinotulis o ngaran do poinghompit di tulun dot Israil do suwai, tu' iyo noddi o pinonuhuan do Tuhan dot id di Musa. 34 Om wonsoyo' ngai' nopo di tulun dot Israil i pinonuhuan do Tuhan dot id di Musa. Sompori-pori nopo iyolo'd pinopowonsoi do kiim diyolo' dot id sahau do bondira' diyolo', om minamanau do mogiwoyo-woyo' di pinuruan do sompiiiyon diyolo'.
I Tangaanak di Harun do Tongokusai
1 Om iti no o sompiiyon di Harun om i Musa do tontok di minoro-boros o Tuhan dot id di Musa di hilo'd timpak di Nuluhon do Sinai. 2 I Harun nopo om kianak dot apat o kusai: i Nadab it id dotuo, om i Abihu, om i Iliasar, om i Itamar. 3 Om pinili' ngai' nopo iyolo' do sumiliu dot imam dot i tinuntugan do tumau o tulu o ralan do minomili'. 4 Nga' i Nadab nopo di Abihu om napatai iddi do tontok di pinapatahak iyolo'd tapui dit okon ko' korohian do Tuhan di maso diyolo' do hilo'd tana' do kowotuan do Sinai. Om aiso' i' goduwo o tanak diyolo', om iyo Iliasar poddi di Itamar o maganu-anu di toonuon dot imam di poimpasi po i Harun.
Pinili' i Tulun do Liwi do Maganu-Anu do Muhup dit Imam
5 Om boros kad Tuhan dot id di Musa, 6 “Suhuon no i payat do Liwi do mongoi'd hiti'd gulu, om pilion i' iyolo' do sumiliu'd susuhuon di Harun, it Imam diri. 7 Om mositi' nod momonsoi iyolo' di karaja' dit apatut diyolo'd wonsoyon do hiri'd Kiim ku om mogobi-obi' dit imam om i tulun dot ogumu'. 8 Om mositi' nod iyolo' o mongilo-ilo do koinsanai di pakakas di Kiim om mogobi-obi' di tulun dot Israil do suwai. 9 Iso' noo o tonggungan di tulun do Liwi, iri no tu' sumiliu'd susuhuon di Harun om i tangaanak dau. 10 Om mositi' nod pilion nu i Harun om i tangaanak dau do momonsoi'd karaja' di dong imam; om isai nopo o tulun do suwai di mumbal daa do momonsoi'd karaja'ddi nga' mositi' nod hukuman do kapatayon,” ka dau. 11 Om boros kad Tuhan dot id di Musa, 12-13 “Baino' nopondo om iyoho' no o sanganu di tulun do Liwi. Tontok di pinatai ku o koinsanai di tanak do kusai do tulun do Masir dit id gulu kosusu, om diri nod pinotobilang ku do maan ku'd doho' i tangaanak do kusai dit id gulu kosusu, dot id suang do pointikid-tikid do sompiiyon do tulun dot Israil, om iri nogi' i tanak do tontoluhan do tayam-tayam diyolo' dit id gulu kosusu. Om poningolon nopo di tangaanak do kusai do tulun dot Israil dit id gulu kosusu om iri no i tulun do Liwi, om iyolo' no ot osiliu do songonuon ku. Tu' iyoho' no o Tuhan,” ka dau.
Pinongintaban di Tulun do Liwi
14 Om tontok no di hilo'd tana' do kowotuan do Sinai do sinuhu'd Tuhan i Musa 15 do monulis do ngaran do koinsanai di tulun do Liwi do tumanud di pinuruan do sompiiyon om sompiiyon diyolo'; om tinulis ngai' nopo o ngaran do pointikid-tikid do tanak do kusai di sombulan nogi' ko' otuo ko' iri o tumur. 16 Om wonsoyo' nod Musa i pinonuhuan do Tuhan diri. 17-20 I Liwi nopo om kianak do tolu o kusai: i Girson, i Kohat om i Morari. Om iyolo' no o komolohingan di piro-piro pinuruan do sompiiyon di pinungaranan do ngaran diyolo'. I Girson no om kianak do duwo o kusai: i Libni om i Simoi. I Kohat no om kianak dot apat o kusai: I Amram, i Yisar, i Hibron om i Usiol. Om i Morari no om kianak do duwo o kusai: i Mali om i Musi. Om iyolo' no o komolohingan di piro-piro o sompiiyon di pinungaranan do ngaran diyolo'. 21 Poinsuang nopo di pinuruan do sompiiyon di Girson om i sompiiyon di Libni om i sompiiyon di Simoi. 22 Kogumuon nopod tongokusai di sombulan nogi' ko' otuo ko' iri o tumur di nokointob om 7,500 o tulun. 23-24 Boyoon nopod pinuruan do sompiiyon diti om i Iliasap i tanak di Lail. Om pawansayan nopod pinuruan do sompiiyon diti do kiim diyolo' om mositi' no do hiri'd ponong id kotonobon, it id dotolikudan di Kiim do Tuhan. 25 Om iyolo' no o mongilo-ilo di Kiim, om i tokop di Kiim do ponong id suang, om i tokop di Kiim do ponong id soibau, om i tabir di wawayaan, 26 om i tabir di pomorinding di natad do posorili' di Kiim om i pananaraban do porsombahan, om i tabir di wawayaan di natad. Om iyolo' no o mongilo-ilo do nunu nopo o buruon di kagait do pakakas diri. 27 Om poinsuang nopo di pinuruan do sompiiyon di Kohat om i sompiiyon di Amram, om i Isar, om i Hibron, om i Usiol. 28 Om kogumuon nopod tongokusai di sombulan nogi' ko' otuo ko' iri o tumur di nokotulis o ngaran om 8,600 o tulun. 29 Om pawansayan nopod pinuruan do sompiiyon diti do kiim diyolo' om mositi' nod hiri'd ponong id salatan di Kiim do Tuhan. 30 Om boyoon nopo di pinuruan do sompiiyon diyolo' om i Ilisapan i tanak di Usiol. 31 Om iyolo' no o mongilo-ilo di Kaban do Tumpongo, om i mija', om i potitimpakan do lampung, om i pananaraban do porsombahan, om i mija' do podtutudan do kominyan, om i piro-piro pakakas do pakayon dit imam do hiri'd Bilik dit Olidang, om i tabir do wawayaan di Bilik dit Olidang Kopio. Om iyolo' no o mongilo-ilo do koinsanai di buruon do kagait do pakakas diri. 32 Boyoon nopo do toinsanan di tulun do Liwi om i Iliasar i tanak di Harun. Om iyau no o mongilo-ilo do koinsanai'd tulun di maganu-anu do hiri'd Bilik dit Olidang. 33 Poinsuang nopo di pinuruan do sompiiyon di Morari, om i sompiiyon di Mali om i Musi. 34 Kogumuon nopod tangaanak do tongokusai di sombulan nogi' ko' otuo ko' iri o tumur di nokotulis o ngaran om 6,200 o tulun. 35 Om pawansayan nopod pinuruan do sompiiyon diti do kiim diyolo' om mositi' nod hiri'd ponong id utara di Kiim do Tuhan. Om boyoon nopod pinuruan do sompiiyon diti om i Suriol i tanak di Abihail. 36 Iyolo' nopo om sinuhu' do mongilo-ilo di papan di Kiim di poturidongon, om i ponukod di potibabaron, om iri ngai' i torigi, om i posungkadan di torigi om koinsanai di pakakas do hiri. Om iyolo' no o mongilo-ilo do nunu nopo o buruon do kagait do pakakas diri. 37 Om iyolo' nogi' o mongilo-ilo ngai' di torigi, om i posungkadan om i tali di pakayon do momorinding di natad. 38 Om i Musa nopod i Harun om koinsanai di tangaanak di Harun, om mositi' nod popowonsoi do kiim diyolo' do hiri'd dotimbabaan di Kiim do Tuhan, i ponong id koulayon. Om iyolo' no i momonsoi di wonsoyon di natantu' mantad do tontok do sumambayang, do bagi' di tulun dot Israil do hiri'd Bilik dit Olidang. Om isai nopo o tulun do suwai di mumbal do momonsoi'd miagal diri om mositi' nod hukuman do kapatayon. 39 Om kogumuon nopo do koinsanai di tangaanak do kusai di payat di Liwi di sombulan nogi' ko' otuo ko' iri o tumur di tinulis di Musa o ngaran, do sinompipi' do tumanud di pinuruan do sompiiyon diyolo', do tumanud di pinonuhuan do Tuhan om 22,000 o tulun.
I Tulun do Liwi o Pinoningolon di Tangaanak do Kusai dit id Gulu Kosusu
40-41 Om boros kad Tuhan dot id di Musa, “Koinsanai di tangaanak do kusai di tulun dot Israil dit id gulu kosusu om doho' ngai' no. Om tulison no o ngaran do pointikid-tikid do tangaanak do kusai di tulun dot Israil dit id gulu kosusu, di sombulan no ko' otuo ko' iri o tumur. Nga' maan nopod poningolon diyolo' om oinsanan nopo i tulun do Liwi do silihon ku do doho'd songonuon. Tu' iyoho' no o Tuhan! Om iri tayam-tayam di tulun do Liwi nga' onuon ku no do poningolon do koinsanai di tayam-tayam di tulun dot Israil dit id gulu kosusu,” ka. 42 Om wonsoyo' nod Musa o koinsanai di pinonuhuan do Tuhan; tinulis ngai' nopo dau o ngaran do koinsanai di tangaanak do kusai dit id gulu kosusu 43 di sombulan no ko' it otuo ko' iri o tumur. Om kogumuon nopod toinsanan diyolo' om 22,273 o tulun. 44 Om boro-boros no o Tuhan dot id di Musa do poingkaa, 45 “Dinondo nopodti om patahakon no dot id doho' i tulun do Liwi do sumiliu do doho'd songonuon do maan do poningolon do koinsanai di tangaanak do kusai di tulun dot Israil dit id gulu kosusu, om patahakon ngai' i tayam-tayam di tulun do Liwi do maan do poningolon di tayam-tayam di tulun dot Israil dit id gulu kosusu. 46 Om iri nopo tangaanak do kusai do tulun dot Israil dit id gulu kosusu om 273 o tulun do poinggumu' mantad ko' i tulun do Liwi, om mositi' nod lopusan dokoyu i nokolobi'ddi. 47 Iso' nopo di tanak diri om mositi' nod lopusan dokoyu do limo o tusin do pirok do tumanud di pamagatang di natantu' mantad; 48 om patahakon no i tusin diri dot id di Harun om id tangaanak di Harun,” ka dau. 49 Om wonsoyo' nod i Musa i pinonuhuan do Tuhan diri. Om ngoyo' no dau 50 i tusin do pirok do 1,365 o kogumuo'. 51 Om patahako' no dau i tusin diri dot id di Harun om id tangaanak di Harun.
Karaja' di Tulun do Liwi, I Mantad id Pinuruan do Sompiiyon di Kohat
1 Om suhuo' nod Tuhan i Musa 2 do mongintob di tulun do Liwi, i mantad id pinuruan do sompiiyon di Kohat do pogisompipi-pipion do tumanud di pinuruan do sompiiyon di sorokuri-kuri' om tumanud di sompiiyon diyolo'. 3 Om sinuhu' nogi' iyau do monulis do ngaran do koinsanai di tongokusai di kiumur dot id piolitan do tolu nohopod om limo nohopod o toun, it ongosorupai do maganu-anu do hiri'd Kiim do Tuhan. 4 Om karaja' nopo diyolo' nga' momogompi' di piro-piro pakakas dit ongolidang kopio. 5 Om patahako' nod Tuhan dot id di Musa iti piro-piro o ponuhuan do poingkaa: Orikot nopo o maso'd kopomohuyasan di kokiiman, om mositi' nod mongoi i Harun om i tangaanak dau do hilo'd suang di Kiim ku. Om iduwon nondo diyolo' i tabir dit id dotimbabaan di Kaban do Tumpongo, om potokopon di Kaban i tabir diri. 6 Om mositi' nod takapan kawagu diyolo' i Kaban diri do kulit dit osonong, om soibahan kawagu'd monokop do kain dit otomou. Om posusukon nogindo i kayu do pangantayang di Kaban. 7 Om mositi' nod takapan kawagu diyolo'd kain dot otomou i mija' di poiyanan do roti do patahakon dot id Tuhan. Om pasakayon nogindo di mija' i piring om i mangkuk di poiyanan do kominyan, om i mangkuk di poiyanan do porsombahan, om i kakanan di poiyanan do porsombahan do waig dot anggur. Om mositi' nod haro kasai' o roti do hiri'd sakai di mija'ddi. 8 Om mositi' nod takapan ngai' diyolo' iri do kain dot aragang. Om takapan no kawagu'd kulit dot osonong. Om posusukon nogindo diyolo' i kayu do pangantayang di mija'. 9 Om mositi' nod mongoi iyolo' anu do kain dot otomou, do ponokop di potitimpakan do lampung, om i lampung, om i sanggip om i talam, om koinsanai di poiyanan do tumau do saitun. 10 Iri nopo potitimpakan do lampung om koinsanai di pakakas di lampung nga' mositi' nod lopoton diyolo' do kulit dit osonong om pasakayon nogindo do hiri'd pangantayang. 11 Om owonsoi pondo o miagal diri, om mositi' nod takapan diyolo' do kain dit otomou i mija' do podtutudan do kominyan di tamas do winonsoi. Om takapan nogi' kawagu iri do kulit dit osonong. Om posusukon nogindo i kayu do pangantayang di mija' di podtutudan do kominyan diri. 12 Om mositi' nod ngoyon ngai' diyolo' i pakakas di pakayon do hiri'd Bilik dit Olidang, om mositi' nod lopoton iri do kain dit otomou. Om mositi' nod takapan diyolo' kawagu iri do kulit dit osonong. Om pasakayon nogindo do hiri'd pangantayangan. 13 Om mositi' nod iduan diyolo'd tauu di kilunok i pananaraban do porsombahan om takapan nogindo do kain dit aragang doitom-itom. 14 Om mositi' nod pasakayon diyolo' do hiri'd pananaraban do porsombahan o koinsanai di pakakas di pakayon do sumambayang: i poiyanan do tapui, om i totodok, om i pononduk, om i mimpun. Om mositi' nod takapan diyolo' iri do kulit dit osonong om posusukon nogindod hiri i kayu do pangantayang. 15 Om soira' nopo dot orikot o maso do kopomohuyasan di kokiiman, om mositi' nod rumikot i tulun di mantad id pinuruan do sompiiyon di Kohat do mongoi panaan di piro-piro pakakas dot ongolidang diri; nga' ngoyon nopo om it atakapan ngai' di Harun om i tangaanak dau i pakakas diri. A' i' koino-ino do koigit di pakakas dot ongolidang i tulun do mantad id pinuruan do sompiiyon di Kohat tu' ondung mongoi iyolo' igit diri om apatai no moti' iyolo'. Om iyo noddi o karaja' di tulun do mantad id pinuruan do sompiiyon di Kohat do tontok do powolihon i Kiim diri. 16 I Iliasar no, i tanak di Harun diri, om mongilo-ilo do koinsanai di hiri'd Kiim om i tumau di lampung, om i kominyan, om i porsombahan do gandum, om i tumau di ponununtug, om koinsanai dit id suang di Kiim di nokotobilang do maan do don Tuhan. 17 Om boros kad Tuhan dot id di Musa om id di Harun, 18-19 “Iti nopo piro-piro pakakas diti om nokotobilang no do maan do doho'. Om antaan-taan no kopio dokoyu, om a' i' koinsomok dilo pakakas i tulun do Kohat. Tu' apatai no moti' iyolo' do kowonsoi no iyolo'd miagal diri. Om mositi' nod sumuang di Kiim i Harun om i tangaanak dau, om tudukan nogindo diyolo' i tulun dit id payat di Kohat di karaja' diyolo' om it apatut diyolo'd igitan, om aiso' indo ot osiliu do miagal diri. 20 Nga' ondung sumuang i tulun do Kohat di Kiim diri om kokito nondo dit imam do momodoropi' di piro-piro pakakas dit ongolidang do tintod do powolihon, om apatai no i tulun do Kohat,” ka dau.
Karaja' di Tulun do Liwi, i Mantad id Pinuruan do Sompiiyon di Girson
21 Om suhuo' nod Tuhan i Musa 22 do mongintob di tulun do Liwi, i mantad id pinuruan do sompiiyon di Girson do tumanud di pinuruan do sompiiyon di sorokuri-kuri' om i sompiiyon diyolo'. 23 Om mositi' nod tulison di Musa o koinsanai'd ngaran do tongokusai dit id piolitan do tolu nohopod om limo nohopod o toun, it osorupai do maganu-anu do hiri'd Kiim do Tuhan. 24 Om nonuan iyolo'd karaja' do mongigit diti piro-piro o pakakas: 25 I Kiim om i piro-piro o pakakas do suwai: i tokop di Kiim do ponong id suang, om i tokop dit id soibau, i tokop di posoibahon kawagu, i kulit dit osonong do winonsoi, om i tabir do hiri'd wawayaan di Kiim, 26 om i tabir om i tali di pakayon do momorinding do natad di Kiim, om i pananaraban do porsombahan, om i tabir di hiri'd wawayaan di natad, om koinsanai di pakakas do pakayon do popowonsoi ngai'ddi. Om iyolo' no o mongilo-ilo do nunu nopo o buruon di kagait do pakakas diri. 27 Om mositi' nod ngoyon di Musa om i Harun piantangai iyolo' om ongowonsoi ngai' i' i karaja' di pinatahak di Harun om i tangaanak dau dot id tulun do Girson, om ongoigitan ngai' i' i pakakas dit apatut dot igitan. 28 Om iri no o karaja' di tulun do Girson do hiri'd suang di Kiim. Om mositi' nod wonsoyon diyolo' i karaja'ddi do moyo' dit ituduk di Itamar i tanak di Harun.
Karaja' di Tulun do Liwi, i Mantad id Pinuruan do Sompiiyon di Morari
29 Om suhuo' nod Tuhan i Musa do mongintob di tulun do Liwi, i mantad id pinuruan do sompiiyon di Morari do sompipion do tumanud do pinuruan do sompiiyon di sorokuri-kuri', om i sompiiyon diyolo'. 30 Om mositi' nod tulison di Musa o ngaran do koinsanai'd tongokusai di kiumur dot id piolitan do tolu nohopod om limo nohopod o toun, it ongosorupai do maganu-anu do hiri'd Kiim do Tuhan. 31 Om nonuan iyolo'd karaja' do manaan ngai' di papan di poturidongon do powonsoyon di Kiim, om iri ngai' i ponukod di potibabaron, om i torigi, om i posungkadan di torigi. 32 Om iri nogi' i torigi di pongorigi di pomorinding di natad do pointutuk di Kiim, om i piro-piro posungkadan di torigi, om i gapit, om i tali, om koinsanai di pakakas di gunaon do maan do popowonsoi di Kiim. Om tinantu' ngai' nopo o pakakas dit igitan do pointikid-tikid do tulun. 33 Om iyo noddi o karaja' dot apatut do wonsoyon di tulun di mantad id pinuruan do sompiiyon di Morari do hiri'd suang di Kiim, om mositi' nod wonsoyon o karaja'ddi do tumanud dit ituduk di Itamar i tanak di Harun.
Pinongintaban di Tulun do Liwi
34-48 Om papaharo no i Musa om i Harun om i piro-piro boyoon di tulun dot Israil do pongintaban di tolu o pinuruan do sompiiyon di Liwi: i pinuruan do sompiiyon di Kohat, om i Girson, om i Morari. Tu' iyo noddi o pinonuhuan do Tuhan. Om sinompipi' diyolo' do mongintob do tumanud di pinuruan do sompiiyon di sorokuri-kuri', om tumanud do pointikid-tikid di sompiiyon. Om tuliso' ngai' nopo diyolo' o ngaran di tongokusai dit id piolitan do tolu nohopod o toun om limo nohopod o toun do tumur, it ongosorupai do maganu-anu do hiri'd Kiim do Tuhan. Om poingkaa o kogumuon di nointob diyolo': - Pinuruan do Sompiiyon - Kogumuon - Kohat - 2,750 - Girson - 2,630 - Morari - 3,200 - Kogumuon do toinsanan: - 8,580 49 Om tinulis ngai' nopo o ngaran di tulun diri, om nonuan ngai' iyolo' do karaja' dit apatut diyolo'd wonsoyon om notudukan iyolo' dit apatut do saanon diyolo', do tuminanud di pinonuhuan do Tuhan do pinolombus di Musa.
Oturan do Pasal do Tulun do Sosomu'
1 Om boros kad Tuhan dot id di Musa, 2 “Patahakon no iti piro-piro o ponuhuan dot id tulun dot Israil: Iri nopo tulun di kitoruol do kusta, om i tulun di haro o miagal-agal do waig dit a' osonong do sumoliwan do mantad id tinan, om i tulun di nokoigit do rata', om mositi' nod posoliwanon di kokiiman di tulun dot Israil. 3 Om mositi' nod suhuon iyolo'd tumongkiad, om a' i' diyolo' ososomu' i kokiiman, i tiyonon ku do poinsugku' di tulun ku,” ka dau. 4 Om wonsoyo' no di tulun dot Israil i pinonuhuan diri. Om posoliwano' ngai' nopo diyolo' do mantad hiri'd kokiiman diyolo' o tulun di miagal diri.
Pamalapus do Pogontok do Kasalaan
5 Om patahako' nod Tuhan dot id di Musa 6 iti piro-piro o toturan do patahakon dot id tulun dot Israil: Soira' nopod haro o tulun dit a' otorodok dot id Tuhan om i kowonsoi do sala' dot id tulun do suwai, 7 om mositi' nod okunon di tulun o dusa dau om lopusan ngai' dau i nokoontok di kasalaan dau'ddi, om ruhangan po dot induwo i sompihopod om patahakon dau iri di tulun di napamansayan dau'd sala'. 8 Nga' ondung napatai no i tulun di napamansayan dau'd sala', om aiso' o tobpinai dau dit osomok o kopiobpinayan, om mositi' nod patahakon dau dot id Tuhan i pamalapus dau'ddi, om iri nondo it imam o kaanu'ddi. Iti nopo pamalapus om poruhangon di dumba' do tontoluhan di maan do patahakon do tontok do momonsoi dit apatut do wonsoyon do maan do pongidu'd dusa do tulun di kisala'ddi. 9 Om pointikid-tikid di popuhawangon di pinotobilang, i patahakon do tulun dot Israil dot id Tuhan nga' asanganu ngai' no dit imam di karamit do porsombahan diri. 10 Iri nopo porsombahan di patahakon dot id songulun ot imam, om mositi' nod onuon dit imam iri do maan do dau.
Pasal do Kusai di Kipomusarahan dot Araat dot id Sawo Dau
11 Om suhuo' nod Tuhan i Musa 12-14 do papatahak diti piro-piro o toturan dot id tulun dot Israil. Haro i' doti' o tongokusai do koumbal do kopuriman dot a' otorodok i sawo dau tu' minongoi doti' ponokidudun do kusai'd suwai. Nga' a' i' doti' di kusai oilaan kopio tu' minomolisok-lisok i' i sawo dau do minomonsoi do miagal diri. Om sasi' nga' aiso', om a' i' nokosupan i sawo dau do minomonsoi do miagal diri; ko' haro i' doti' o kusai di kipomusarahan dot araat dot id sawo dau, nga' a' i' kopio nokowonsoi dot araat i sawo dau. 15 Om haro nopo ot osiliu do miagal di duwo o hal diri om mositi' nod angatan di kusai i sawo dau do mongoi solowot dit imam. Om mositi' nod migit iyau do porsombahan dit apatut do patahakon; iri no tu' songkilogram o tapung do barli. A' i' koino-ino'd tunguhon do tumau do saitun i tapung om a' kuwaan do kominyan tu' iri nopo om porsombahan do mantad id kusai di kisangka' dot araat; om iri no o pongilo ondung otopot ko' amu' i sangka' dau'ddi. 16 Om angatan nondo dit imam i tondu'ddi do mongoi'd hiri'd gulu, om suhuon do mingkakat do hiri'd dotimbabaan di pananaraban do porsombahan. 17 Om manu nogindo it imam dot iso' o mangkuk di tana' do winonsoi, om suangan iri do waig dit olidang dot ongokooro'. Om manu nogindo iyau'd tana' dot ongokooro' do mantad hiri'd sirang di Kiim do Tuhan, om posuangon iri do hiri'd mangkuk di kiwaig, om osiliu indo i waig diri do waig di poporikot do kousungan. 18 Om poroboyon nondo o tobuk di tondu', om pakahangan dau i tapung di maan do porsombahan. Om mositi' nod it imam o mongigit di mangkuk di kisuang do waig dit opoit di poporikot do kousungan. 19 Om suhuon nogindo dit imam i tondu' do tumumboyo' diti sumpa' do poboroson dit imam do poingkaa, “Ondung a' ko nakapagampahu' om a' ko i' oontok do kousungan do porikoton diti waig. 20 Nga' ondung nakapagampahu' ko, 21 om Tuhan no o posiliu'd ngaran nu do ngaran di pongungusung dot id pogialatan do bansa' nu. Om iyau no o popokukus di pawayaan nu'd sobu om papagayo do tian nu. 22 Kosuang nopondo iti waig dot id tian nu, om iti no o papagayo'd tian nu om popokukus di pawayaan nu'd sobu,” ka. Om mositi' nod sumimbar i tondu'ddi do poingkaa, “Kotumboyo' oku i'; wonsoyon nopod Tuhan o miagal diri,” ka. 23 Om tulison nondo dit imam i boros do pomopol, om pisokon no kawagu i tulis dot i waig dit opoit di hiri'd mangkuk o pomisok. 24 Iri nopo waig diri om pokoruol di tondu' do gisom dot orualan no kopio. Nga' tontok dit a' po dit imam osuhu' i tondu' do monginum di waig diri, 25 om mositi' nod ngoyon po dit imam i porsombahan do tapung, om poinsawaton dau o longon dau do papatahak di tapung diri dot id Tuhan. Om pasakayon nogindo dau i tapung do hiri'd pananaraban do porsombahan. 26 Om mongoi nondo it imam anu do songonggom di tapung do maan do tanda' do nakatahak no i tapung diri. Om sorobon nogindo iri do hiri'd pananaraban do porsombahan. Om kolimpupuson nopondo om poinuman nondo di tondu' i waig diri. 27 Om ondung nakapagampahu' kopio i tondu'ddi, nga' kopuriman no iyau do toruol dot adalaan kopio dot obungou di waig diri; gumayo nondo o tian dau om kumukus o pawayaan dau'd sobu. Om osiliu nondo do ngaran di pongungusung o ngaran dau dot id pogialatan do bansa' dau. 28 Nga' ondung aiso' o sala' dau, om a' i' iyau oontok di pinongusung diri. Om maganak i' iyau. 29-30 Om iyo noddi o toturan do pasal do kusai di momiogu om i kipomusarahan do nakapagampahu' i sawo dau. Om mositi' nod suhuon i tondu' do mingkakat do hiri'd dotimbabaan di pananaraban do porsombahan, om wonsoyon dit imam i natantu' mantad do wonsoyon. 31 Iri nopo kusai om a' i' kohompit di kasalaan, nga' iri nopo sawo dau om mositi' nod mamabo do kootuson di winonsoi dau do nakasala' no kopio iyau.
Oturan do Pasal do Tulun di Sumiliu'd Nasir
1 Om suhuo' nod Tuhan i Musa 2 do papatahak diti piro-piro o toturan do kumaa dot id tulun dot Israil. Pointikid-tikid do kusai ko' tondu' di mamatos do sumiliu'd tulun do nasir om i tumobilang do sumiliu'd songonuon do Tuhan, 3 om mositi' nod a' monginum do waig dot anggur om tiinumon di kaawuk. Om a' no iyau koino-ino do monginum do nunu nopo i winonsoi do mantad id tua' dot anggur, om a' koino-ino do mangakan do tua' dot anggur di kouupu' ko' i tua' dot anggur di kinoring. 4 Om solinaid nopo dau do sumiliu'd tulun do nasir, om a' no iyau koino-ino do mangakan do nunu nopo i mantad id guas dot anggur; dot iri tuu i linsou ko' iri po kulit dit anggur. 5 Solinaid nopo do poinggirot i batos dau do sumiliu'd tulun do nasir, om a' no iyau koino-ino do momompod do tobuk dau ko' momugar po do ganggut. Tu' akagasan no iyau di batos dau do gisom pod aayi' i maso do tuminobilang iyau do suminiliu'd tulun di songonuon kopio'd Tuhan. Om solinaid nopo do maso'ddi om mositi' nod pologoson dau o tobuk om ganggut dau do numaru. 6-7 Om iri no i tobuk dau o sumiliu'd tanda' do tuminobilang iyau do sumiliu'd songonuon kopio do Kinorohingan. Om iri no ot a' dau koina-inaan do monosomu' do tinan dau: a' no iyau koino-ino do minsomok do rata' do mulong piya do rata' di tapa' ko' tina' dau, ko' rata' po di tobpinai dau. 8 Om solinaid nopo dau do tulun do nasir om potobilang no iyau do sumiliu'd tulun di songonuon kopio'd Tuhan. 9 Ondung ososomu' o tobuk do tulun do nasir, i tobuk di nokotobilang dau'ddi, tu' pointoning iyau do tulun di monigowo do matai, om mositi' nod andadon dau do solinaid do turu' o tadau; om katalib pondo iri om bugaron nogindo dau o tobuk om ganggut dau, om olidang nogindo iyau. 10 Om tontok nopondo di kawalu'd tadau, om mositi' nod mongoi iyau papatahak do duwo tinan do punai ko' duwo tinan do sikukur dot id imam do hiri'd wawayaan di Kiim do Tuhan. 11 Om iri nopo tiso' di tombolog om mositi' nod maan do porsombahan do pangampun do dusa, om iri no tiso' om maan do porsombahan di sorobon do pongidu' do kososomuo' di tulun di nokoigit do rata'ddi. Om tontok i' do tadau'ddi do mositi' no do posongonuan kawagu di tulun diri i tobuk dau 12 om inwoguan kawagu i kinapatahakan dau do tinan dau do sumiliu'd tulun do nasir do solinaid di maso do natantu' mantad. Om iri nopo maso di notoliban om a' no pointobon tu' nososomu' no i tobuk dau di pinosongonuan dau'ddi. Om mositi' nod papatahak iyau do tanak do dumba' do sontoun nogi' o tumur do maan do porsombahan do poningolon. 13 Opupusan nopondo i maso di pinabatos di tulun do sumiliu iyau'd nasir, om mositi' nod momonsoi iyau dot iso' o wonsoyon di natantu' mantad. Mositi' nod mongoi iyau do hiri'd wawayaan di Kiim do Tuhan 14 do mongoi papatahak dot id Tuhan do tolu o tinan do tayam-tayam dit aiso' o bohiton do tinan: songinan o tanak do dumba' do tontoluhan di sontoun nogi' o tumur do maan do porsombahan di sorobon, om songinan o tanak do dumba' do tondu' di sontoun nogi' o tumur do maan do porsombahan do pangampun do dusa, om songinan o dumba' do tontoluhan do maan do porsombahan do piombolutan. 15 Om mositi' nogi' do papatahak iyau do sambalatak o roti dit a' rinalatan do pangambang: i roti dit obulugu', i tapung di rinalatan do tumau do saitun o winonsoi, om i roti dit onipis, i ginihilan do tumau do saitun. Om suwai no ko' iri om mositi' nod papatahak po iyau do gandum om waig dot anggur. 16 Om mositi' nod patahakon ngai' dit imam iri dot id Tuhan; om mositi' nod patahakon dau i porsombahan do pangampun do dusa om i porsombahan di sorobon. 17 Om potonggoyon nopo di roti do sambalatak diri om songinan o dumba' do tontoluhan do patahakon dot id Tuhan do maan do porsombahan do piombolutan, om iri nogi' i gandum om i waig dot anggur nga' mositi' nod patahakon dot id Tuhan. 18 Om mositi' nod bugaron di tulun do nasir o tobuk dau do hiri'd wawayaan di Kiim do Tuhan. Om posuboon nogindo i tobuk dau do hiri'd tapui di maso do panaraban di porsombahan do piombolutan diri. 19 Om owonsoi pondo o miagal diri, dit oonsok i toliip di dumba' do tontoluhan, om mositi' nod ngoyon dit imam i toliip diri do pitonggoyon dot iso' di roti dit obulugu' om iso' di roti dit onipis, om pakahangan nogindo di tulun do nasir. 20 Om mositi' nod patahakon dit imam i porsombahan do taakanon diri do maan do porsombahan di potobilangon do patahakon dot id Tuhan; om iti no i porsombahan dit olidang dot aanu dit imam, do maan do pomoruhang di kangkab om gakod di dumba' do tontoluhan, i natantu' mantad no dot aanu dit imam. Om owonsoi pondo o miagal diri om koino-ino nogindo i tulun di nasir diri do monginum do waig dot anggur. 21 Om iri no o toturan do tonudon di tulun di sumiliu'd nasir; nga' ondung nokopoboros o songulun di suminiliu'd nasir do papatahak do porsombahan di lobi ko' i miontok-ontok di batos dau, om mositi' nod wonsoyon dau o miontok di pinoboros dau.
Poboroson dit Imam do Tontok do Mamarakat
22 Om suhuo' nod Tuhan i Musa 23 do popoboros dot id di Harun om id tangaanak di Harun do mositi' nod miagal diti o boros do poboroson diyolo' do soira' nopo do mamarakat iyolo'd tulun dot Israil: 24 Maha' daa om barakatan om gompion kou'd Tuhan. 25 Maha' daa om osonong om opuhawang o Tuhan dot id dokoyu. 26 Maha' daa om osianan o Tuhan dokoyu om manahak dokoyu do kosimbayanan. 27 Om boros kad Tuhan, “Ondung roiton diyolo' o ngaran ku do maan do pamarakat di tulun dot Israil, om barakatan ku no kopio iyolo',” ka dau.
Porsombahan di Piro-piro Boyoon
1 Tontok di tadau di nopongo di Musa do pinopowonsoi i Kiim do Tuhan, om patahako' no dau dot id Tuhan i Kiim om koinsanai di pakakas do hiri, do tinuntugan do tumau o ralan do pinapatahak. Om niyo nogiddi dau i pananaraban do porsombahan om koinsanai di pakakas do hiri. 2 Om ngoyo' noddi di piro-piro boyoon do pinuruan do sompiiyon patahako' i porsombahan diyolo' dot id Tuhan. Iyolo' nopodti om i boyoon do payat dot Israil, om i nonuan do karaja' do mongintob di maso'd pongintaban do tulun. 3 Om patahak no iyolo' dot onom o guyudan om hopod om duwo tinan do sapi': iso' o guyudan do pinatahak do duwo o tulun do boyoon, om soronginanan do sapi' o pointikid-tikid di boyoon. Om katahak poddi diyolo' iri, 4 om boro-boros no o Tuhan dot id di Musa do poingkaa, 5 “Romiton ngai' no i pinatahak diri do pakayon do momonsoi'd karaja' dit apatut do wonsoyon do maan di Kiim ku; patahakon ngai' nopori dot id tulun do Liwi do tumanud di karaja' do wonsoyon diyolo',” ka dau. 6 Om patahako' ngai' no di Musa i guyudan om i sapi'ddi dot id tulun do Liwi. 7 Tinahak nopo dau di tulun do Girson om duwo o guyudan om apat o tinan do sapi', 8 om apat o guyudan om walu' o tinan do sapi' do tinahak dau di tulun do Morari. Om mositi' nod wonsoyon diyolo' o koinsanai di karaja' diyolo' do tumanud dit ituduk di Itamar, i tanak di Harun. 9 Nga' iri nopo tulun do Kohat om a' i' nakaanu di guyudan ko' i sapi' di mantad id di Musa tu' iri nopo pakakas dit ongolidang di diyolo'd gompion om a' i' milo dot a' saanon. 10 Om minongigit po i piro-piro boyoon do porsombahan do maan do pamaramai do kapatahakan di pananaraban do porsombahan. Om tontok di nokosodia' iyolo' do papatahak di porsombahan diyolo'ddi do hiri'd pananaraban do porsombahan, 11 om boro-boros no o Tuhan dot id di Musa do poingkaa, “Sunudan no iyolo' dot insan nopo o tadau om iso' no di boyoon o rumikot do mongoi papatahak di dau'd patahakon do maan do pamaramai di kapatahakan di pananaraban do porsombahan. Om iyo kasai' nopoddi do solinaid do hopod om duwo o tadau,” ka dau. 12-83 Om ngoyo' no diyolo' patahako' i porsombahan diyolo' do minogisuhu-suhut do miagal diti: - Tadau - Payat - Boyoon - Ko-1 - Yohuda - I Nahason i tanak di Aminadab - Ko-2 - Isakar - I Nitaniil i tanak di Suar - Ko-3 - Sibulon - I Iliab i tanak di Hilon - Ko-4 - Rubin - I Ilisur i tanak di Sidour - Ko-5 - Simion - I Solumiol i tanak di Surisiadai - Ko-6 - Gad - I Iliasap i tanak di Rohuil - Ko-7 - Ipraim - I Ilisama i tanak di Amihud - Ko-8 - Manasi - I Gamaliol i tanak di Pidasur - Ko-9 - Binyamin - I Abidan i tanak di Gidioni - Ko-10 - Dan - I Ahiosor i tanak di Amisadai - Ko-11 - Asor - I Pagiol i tanak di Okran - Ko-12 - Naptali - I Ahira i tanak di Inan. Oiyo nopo i porsombahan do nigitan diyolo': iso' o piring do pirok, do 1.5 kilogram do kawagato', om iso' o mimpun do pirok do 800 gram do kawagato', do tumanud di poninimbang di natantu' mantad. Om sinuangan goduwo nopo i piring om i mimpun diri do tapung di rinalatan do tumau do maan do porsombahan do gandum. Om iri no suwai om iso' o piring do tamas do 110 o gram do kawagato', do noponu' do kominyan; om songinan o sapi' do tontoluhan, om songinan o dumba' do tontoluhan, om songinan o tanak do dumba' do sontoun nogi' o tumur, do maan do porsombahan di sorobon; iso' o kambing do maan do porsombahan do pangampun do dusa; om duwo o sapi' do tontoluhan, om limo o dumba' do tontoluhan, om limo o kambing, om limo o tanak do dumba' di sontoun nogi' o tumur do maan do porsombahan do piombolutan. 84-88 Om kogumuon nopo di porsombahan do nigitan di hopod om duwo o boyoon diri dot oinsanan, do maan do tontok di kapatahakan di pananaraban do porsombahan om: --- hopod om duwo o piring do pirok om hopod om duwo o mimpun do pirok do 27.6 kilogram o kawagato' do toinsanan. --- hopod om duwo o piring do tamas do 1.32 kilogram o kawagato' do poimponu' do kominyan. --- hopod om duwo tinan do sapi' do tontoluhan, om hopod om duwo o dumba' do tontoluhan, om hopod om duwo o tanak do dumba' di sontoun nogi' o tumur, do pitonggoyon di porsombahan do gandum do maan do pomoruhang di porsombahan di sorobon. --- hopod om duwo o kambing do maan do porsombahan do pangampun do dusa. --- duwo nohopod om apat o sapi' do tontoluhan, om onom nohopod o dumba' do tontoluhan, om onom nohopod o kambing, om onom nohopod o tanak do dumba' di sontoun nogi' o tumur, do maan do porsombahan do piombolutan. 89 Tontok di suminuang i Musa do hiri'd Kiim dot Olidang do mongoi boro-boros do Tuhan, om korongou no dau o Tuhan do minoro-boros dau do mantad hiri'd sawa-sawat di sompon do Kaban do Tumpongo, i hiri'd piolitan di duwo o pinoiyo-iyo'd moloikat di roitan do kerub.
Kowoyo-Woyoo' do Popotimpak di Lampung
1 Om boros kad Tuhan dot id di Musa, 2 “Sunudan no i Harun do tontok nopod popotimpak iyau di turu' o lampung do hiri'd potitimpakan di lampung, om mositi' nod poundaron kopio dau o potitimpak, om kotitiu i' do ponong id gulu i tinitiu di lampung,” ka dau. 3 Om wonsoyo' no di Harun o miagal di pinonuhuan do Tuhan. Om potimpako' no dau i lampung do hiri'd potitimpakan di lampung do pinotoguang ponong id gulu. 4 Om iri nopo potitimpakan do lampung diri nga' tamas ngai' nopod tinantan o winonsoi do mantad hiri'd siriba' om gisom do hiri'd sawat, do tumanud di poiyaan do pinokitanan do Tuhan dot id di Musa.
Linidangan om Sinambayangan i Tulun do Liwi
5 Om boros kad Tuhan dot id di Musa, 6 “Potongkiadon no i tulun do Liwi do mantad id tulun dot Israil do suwai, om wonsoyon no i wonsoyon di natantu' mantad do pomolidang diyolo' 7 do poingkaa o kowoyo-woyoo' do momolidang: Wawasan no iyolo' do waig di pinotobilang do maan do pomolidang, om suhuon iyolo' do momugar do tobuk om hulu do pointongkop do tinan diyolo', om suhuon iyolo' do momupu' do pakayan diyolo'. Om olidang indo iyolo' dot id pagantangan do tugama'. 8 Om suhuon nondo iyolo' do manganu do songinan o sapi' do tontoluhan dit okoro' po om porsombahan do gandum di gunaon, iri no i tapung di rinalatan do tumau do saitun. Om iya', oi Musa, nga' mositi' nod mongoi panganu dot iso' kawagu o sapi' do tontoluhan do maan do porsombahan do pangampun do dusa. 9 Om timungon ngai' nogindo i tulun dot Israil om suhuon i tulun do Liwi do mingkakat do hiri'd dotimbabaan di Kiim ku. 10 Om pakabayon nondo di tulun dot Israil o longon diyolo' do hiri'd sakai'd tulu di tulun do Liwi. 11 Om patahakon nogindo di Harun i tulun do Liwi diri do maan do porsombahan di pinotobilang do mantad id tulun dot Israil do patahakon dot id doho', om milo i' iyolo'd momonsoi do karaja' ku. 12 Om pakabayon nogindo di tulun do Liwi o longon diyolo' do hiri'd sakai do tulu di duwo o sapi' do tontoluhan diri; om iri nopondo i songinan om maan do porsombahan di sorobon. Om owonsoi nopo o miagal diri om koidu' no i tulun do Liwi do mantad id dusa diyolo'. 13 Patahakon no i tulun do Liwi do maan do ponokoporsombahan di pinotobilang do patahakon dot id doho', om suhuon no i Harun om i tangaanak dau do sumiliu'd boyoon diyolo'. 14 Om mositi' nod posuwai-suwayon dokoyu i tulun do Liwi do mantad id tulun dot Israil di suwai, dot iyo'ddi o kowoyo-woyoo' do posuwai-suwai; om osiliu i' iyolo' do doho'd songonuon. 15 Om owonsoi nopondo dokoyu i wonsoyon di natantu' mantad do kapatahakan di tulun do Liwi, om haro no o kosorupayan diyolo' do momonsoi'd karaja' do hiri'd Kiim ku. 16 Nosiliu ku no iyolo' do sumowoli di tangaanak do tongokusai dit id gulu kosusu do mantad id pointikid-tikid do sompiiyon do tulun dot Israil; om iyolo' nopoddi om nokotobilang no do maan ku'd doho'. 17 Tontok di pinatai ku o toinsanan di tangaanak do kusai dit id gulu kosusu do hilo'd Masir, om maso noddi do nosiliu'd songonuon ku di pinotobilang i tangaanak do tongokusai dit id gulu kosusu do mantad id pointikid-tikid do sompiiyon dot Israil, om pointikid-tikid di tayam-tayam dit id gulu kosusu nga' nosiliu nogi' do doho'd songonuon. 18 Om dinondo nodti, om ilo' no tulun do Liwi ot onuon ku do poningolon do koinsanai di tangaanak do kusai dit id gulu kosusu do tulun dot Israil, 19 do miagal ko' porsombahan do mantad id tulun dot Israil. Om patahakon ngai' ku iti dot id tulun do Liwi om id di Harun om id tangaanak dau, om kapaganu-anu i' i tulun do Liwi di toonuon do dong imam do hiri'd suang di Kiim ku. Om iri nondo i tulun do Liwi o mokianu'd koompunan do mantad id doho' do bagi' di tulun dot Israil, om a' i' iyolo' oontok do kosusaan do mulong piya do koinsomok kopio iyolo' di Bilik dot Olidang diri,” ka dau. 20 Om iri noddi o kinapatahakan di Musa om i Harun om koinsanai di tulun dot Israil di tulun do Liwi dot id Tuhan, do tumanud di pinonuhuan do Tuhan. 21 Om lidangai noddi di tulun do Liwi o tinan diyolo' do tumanud dit oturan do tugama', om pinupuan diyolo' o pakayan diyolo'. Om patahako' noddi di Harun iyolo' do maan do porsombahan di pinotobilang do maan do don Tuhan. Om winonsoi nogi' dau i wonsoyon di natantu' mantad do pongidu'd dusa diyolo'. 22 Om wonsoyo' ngai' nopoddi di tulun dot Israil i pinonuhuan do Tuhan dot id di Musa do wonsoyon dot id tulun do Liwi. Om haro noddi o kosorupayan di tulun do Liwi do kumaraja' do hiri'd Kiim do Tuhan do tumanud dot ituduk di Harun om i tangaanak dau. 23 Om boros kad Tuhan dot id di Musa, 24 “Mositi' nod tumimpuun o pointikid-tikid do tulun do Liwi do momonsoi do karaja' dau do hiri'd Kiim ku, dot orikot o duwo nohopod om limo o toun do tumur dau. 25 Om kotingkod nopondo iyau do momonsoi di karaja' dau'ddi om orikot o limo nohopod o toun do tumur dau. 26 Om katalib nopondo iri, om koino-ino i' iyau do monguhup di tulun do Liwi do suwai di kumaraja' do hiri'd suang di Kiim ku. Nga' a' no iyau koino-ino dot iso-iso' kopio do momonsoi do nunu nopo o karaja'. Om iyo noddi o kowoyo-woyoo' nu do mangatur do karaja' di tulun do Liwi,” ka dau.
Tadau'd Agayo do Paska di Koinduwo
1 Tontok di tulan do koiso', di toun do koduwo, do mantad di kinosoliwanan do tulun dot Israil do mantad hilo'd Masir, om boro-boros no o Tuhan dot id di Musa do hilo'd tana' do kowotuan do Sinai. Om boros kad Tuhan, 2-3 “Tontok nopod tadau'd kohopod om apat do tulan diti, do tumimpuun do mantad dit otonob o tadau, om mositi' nod ramayon do tulun dot Israil o Tadau'd Agayo do Paska do tumanud dit oturan do natantu' mantad,” ka dau. 4 Om suhuo' no di Musa i tulun dot Israil do mamaramai do Paska. 5 Om ramayo' noddi diyolo' iri di sosodopon do tadau'd kohopod om apat do tulan diri, do hilo'd tana' do kowotuan do Sinai. Om wonsoyo' ngai' nopo diyolo' o miagal di pinonuhuan do Tuhan dot id di Musa. 6 Nga' haro o piro-piro o tulun do sosomu' dot id pagantangan do tugama', tu' nokoigit iyolo'd rata'. Om a' noddi iyolo' milo do mamaramai do Paska do tontok do tadau'ddi. Om ongoi no iyolo' solowot di Musa om i Harun, 7 om boro-boros no iyolo'd poingkaa, “Iyahai nopodti om sosomu', tu' nokoigit iyahai'd rata'. Nga' nokuro'ddi tu' posuwai-suwayon iyahai do gisom dot a' iyahai kapatahak do porsombahan dot id Tuhan do poingandad dilo tongotobpinai dahai dit oiyo o bansa'?” ka diyolo'. 8 Om boros kad i Musa do suminimbar, “Andadon po do gisom pod otudukan oku'd Tuhan,” ka dau. 9 Om suhuo' nod Tuhan i Musa 10 do popoboros dot id tulun dot Israil do poingkaa, “Ondung haro ot id pogialatan dokoyu ko' id pogialatan di sinakagon dokoyu do sosomu' tu' nokoigit do rata', ko' haro o tulun dot id tindalanon do kumaa dot id kinoiyonon dit osodu', om it orohian i' daa do mamaramai do Paska. 11 Om koino-ino i' iyolo' do mamaramai'ddi. Nga' iri nopondo i karamayan diri om pohoroon nopo diyolo' om sombulan do gisom diri, i totuong di kohopod om apat do tulan di koduwo. Om ramayon nondo diyolo' o tadau'ddi do mikuwo'd mangakan do roti dit a' rinalatan do pangambang om rinapa' dit opoit. 12 Kada' nod haro o pooluon do taakanon diri do gisom do kosuabon kawagu, om a' nogi' koino-ino do haro o tongoiso' pod tulang dot otipu' di tayam-tayam do patahakon dot id Tuhan. Om mositi' nod ramayon o tadau'd Paska do tumanud do koinsanai dit oturan. 13 Nga' iri nopo tulun dit olidang i' daa dot id pagantangan do tugama' om okon ko' id tindalanon, nga' a' indo mamaramai di Paska, om a' no kohompit do tulun di songonuon ku o tulun diri, tu' a' i' iyau pinapatahak do porsombahan dot id doho' do tontok di maso di natantu' mantad. Om mositi' nod boboon di tulun diri o kootuson di dusa dau. 14 Ondung haro o tulun do bansa'd suwai dot id rolot dokoyu dit orohian do mamaramai do Paska, om mositi' nod tumanud iyau do koinsanai dit oturan om kowoyo-woyoo' do mamaramai'ddi. Iso-iso' i' o toturan do tonudon do koinsanai'd tulun, dot iri tuu tulun dot Israil ko' iri po tulun do bansa'd suwai,” ka dau.
Haun di Kitapui
15-16 Om tontok di tadau di pinowonsoi i Kiim do Tuhan, om tontok noddi do ruminikot o haun do luminikup di Kiim. Om dongotuong nopo nga' miagal do tapui o kokitanan di haun diri. 17 Om soira' nopod minsawat i haun, om huyason no di tulun dot Israil i kokiiman diyolo', om mamanau nondo. Om honggo nopo o sondoton di haun om hiri no o pawansayan kawagu diyolo' do kiim diyolo'. 18 Monuhu' po o Tuhan di tulun dot Israil do momohuyas di kiim diyolo', om huyason nogi' diyolo', om monuhu' po o Tuhan do popowonsoi kawagu'ddi om powonsoyon nogi' diyolo'. Om solinaid nopo di haun do hiri'd sawa-sawat di Kiim do Tuhan, om hiri kasai' no iyolo'd kinoiyonon diri. 19 Ondung alaid i haun do hiri'd sawa-sawat di Kiim, om a' no iyolo' mamanau tu' mumboyo' i' iyolo'd Tuhan. 20 Nga' nokoumbal i' do piro-piro no tadau di haun do hiri'd sawa-sawat di Kiim. Nga' poingkuro piya nga' Tuhan i' o popoilo ondung hiri kasai' iyolo'd kinoiyonon diri do mundorong ko' mundaliu iyolo'. 21 Om koumbal i' do mundorong i haun do hiri do mantad nod sosodopon om gisom do kosuabon kawagu, om minsawat nopo i haun nga' mamanau no iyolo'. Om soira-ira' nopod minsawat i haun om mundaliu no iyolo'. 22 Om duwo tuu o tadau ko' sombulan, ko' sontoun, ko' alaid ko' iri nga' solinaid nopo di haun do hiri'd sawa-sawat di Kiim do Tuhan, om a' no iyolo' mundaliu. Nga' ondung minsawat i haun, om mundaliu no iyolo'. 23 Om boros kasai' nopod Tuhan o tonudon di tulun dot Israil do tontok do mundorong iyolo' dot id iso' o kinoiyonon om tontok do mundaliu iyolo' dot id kinoiyonon do suwai, do tumanud di poboroson do Tuhan dot id di Musa.
Torumpit do Pirok
1 Om boros kad Tuhan dot id di Musa, 2 “Momonsoi nod duwo o torumpit do pirok di tinantan o wonsoyon. Om iri no o pounion do pomolohou di tulun dot ogumu' do tumimung om iri nogi' o pounion do pomisunud diyolo' do mamanau. 3 Ondung pounion goduwo i torumpit dot oloyong o pouuni, om komoyon nopoddi nga' mositi' nod tumimung ngai' i tulun dot ogumu' do hiri'd posorili' diya' do hilo'd wawayaan di Kiim ku. 4 Nga' ondung iso' noo o torumpit do pounion, om iri no i boyoon do payat o tumimung do hiri'd posorili' diya'. 5 Ondung mutut-putut o pouuni, om komoyon nopoddi nga' mositi' nod mamanau ngai' i payat di hiri'd ponong id koulayon o pinomukiiman. 6 Ondung pounion do koinduwo i torumpit diri do mutut-putut o pouuni, om komoyon nopoddi nga' mositi' nod mamanau ngai' i payat di hiri'd ponong id salatan. Ondung mutut-putut o pouuni om ponuhu' nori di tulun do mamanau. 7 Nga' momolohou nopo di tulun dot ogumu' do tumimung, om oloyong o pouuni. 8 Om pouni nopo di torumpit diri nga' mositi' nod it imam, i tangaanak di Harun. Om mositi' nod tonudon iti piro-piro o toturan diti do gisom dot alaid. 9 Soira' nopod sumangod kou dot id pomogunan dokoyu, do sumaap di pisangod do mongoi panangod dokoyu, om pounion no i torumpit do tanda' do sumangod kou. Om ngoyon ku indo iyokoyu uhupai, iyoho' i Tuhan i Kinorohingan dokoyu, om posion ku iyokoyu do mantad id koinsanai di pisangod dokoyu. 10 Om tontok di tadau do rumamai kou, di Tadau dot Agayo do Tulan do Wagu om i karamayan di suwai do don tugama', om pounion no i torumpit diri do tontok di papatahak kou dot id doho' do porsombahan di sorobon om porsombahan do piombolutan. Om uhupan ku indo iyokoyu. Tu' iyoho' no o Tuhan i Kinorohingan dokoyu,” ka dau.
Minamanau i Tulun dot Israil
11 Om tontok di koduwo nod toun do mantad di tuminongkiad i tulun dot Israil do pomogunan do Masir, do koontok di tadau'd koduwo do tulan do koduwo, om insawat no i haun do mantad hiri'd sawa-sawat di Kiim do Tuhan. 12 Om timpuun no i tulun dot Israil do mamanau do tuminongkiad di tana' do kowotuan do Sinai. Om tontok di nokorikot iyolo' do hilo'd tana' do kowotuan do Paran, om undorong no i haun. 13 Om timpuun no i tulun dot Israil do minamanau do tumanud di ponuhuan do Tuhan do pinolombus di Musa. 14 Om soira-ira' nopod mamanau iyolo' nga' iyo kasai' nopoddi o toturan do mamanau do tonudon diyolo'. Om iri no tulun dit id sahau do bondira' di sinompuruan di winoyo' di payat di Yohuda o minogulu'd mamanau, do mogisuhu-suhut nopo i sinompuruan. Om boyoon nopo diyolo' nga' i Nahason i tanak di Aminadab. 15 Om minomoyo' nopo di payat di Isakar om i Nitaniil i tanak di Suar. 16 Om i Iliab i tanak di Hilon o minomoyo' di payat di Sibulon. 17 Om huyaso' noddi i Kiim do Tuhan, om timpuun nod minamanau i pinuruan do sompiiyon di Girson om i Morari dot ongkisinaan di Kiim. 18 Om hiri nopod tohuri-huri diyolo' nga' i tulun dit id sahau do bondira' di sinompuruan di winoyo' di payat di Rubin, do mogisuhu-suhut nopo i sinompuruan. Om boyoon nopo diyolo' nga' i Ilisur i tanak di Sidour. 19 Minomoyo' nopo di payat di Simion, om i Solumiol i tanak di Surisiadai, 20 om minomoyo' no di payat di Gad om i Iliasap i tanak di Rohuil. 21 Om pamanau nogiddi i tulun do Liwi, i mantad id pinuruan do sompiiyon di Kohat dot ongkiinigit di piro-piro pakakas dit ongolidang. Om tontok di nokorikot iyolo' do hiri'd pawansayan do kiim dit id dosunsudan, om nokowonsoi no kawagu i Kiim do Tuhan. 22 Om pamanau no i tulun dit id sahau do bondira' di sinompuruan di winoyo' di payat dot Ipraim do mogisuhu-suhut nopo i sinompuruan. Om boyoon nopo diyolo' nga' i Ilisama i tanak di Amihud. 23 Om boyoon nopo di payat di Manasi om i Gamaliol i tanak di Pidasur. 24 Om boyoon no di payat di Binyamin om i Abidan i tanak di Gidioni. 25 Om id tohuri noddi om pamanau no i tulun dit id sahau do bondira' di sinompuruan di winoyo' di payat do Dan. Om iyolo' no i madtatamong do ponong id tohuri do koinsanai di sinompuruan. Om mogisuhu-suhut nopo i sinompuruan do minamanau. Om boyoon nopo diyolo' nga' i Ahiosor i tanak di Amisadai. 26 Boyoon nopo di payat di Asor om i Pagiol i tanak di Okran, 27 om boyoon no di payat di Naptali om i Ahira i tanak di Inan. 28 Om iyo noddi o toturan di tulun dot Israil do mamanau do mogisuhu-suhut i sinompuruan do soira-ira' nopo iyolo'd mamanau do kumaa dot id kinoiyonon do suwai. 29 Om boro-boros no i Musa dot id di Hobab i tanak di Rohuil, i tulun do Midian diri, i tipagon di Musa. Boros ka dau, “Mamanau noddi iyahai do kumaa do hilo'd kinoiyonon di nokoboros do Tuhan do patahakon dau dot id dahai. Om nakabatos no o Tuhan do posiliu'd tulun dot Israil do bansa' di kaya'. Om tanud pogi' dahai om bohogian i' dahai iya' do kakayaan dahai,” ka dau. 30 Nga' boros ka di Hobab, “Pounsikou nopo, nga' gumuli' oku i' do hilo'd pomogunan di kinosusuon ku,” ka dau. 31 Om boros kad Musa, “A, kada' iyahai tongkiadai. Iya' nopo om milo i' do popotunud dahai'd ralan, tu' kotunud ko i' ondung honggo o tuundorongon do pawansayan toko'd kiim do hilo'd tana' do kowotuan. 32 Tumanud ko nopo daa dahai om bohogian indo dahai iya' do koinsanai di barakat do patahakon do Tuhan dot id dahai,” ka dau.
Minamanau i Tulun dot Israil
33 Om tontok di nokotongkiad i bansa' dot Israil do mantad hilo'd Sinai, i nuluhon dot olidang diri, om pamanau no iyolo' do solinaid do tolu o tadau. Om iri kasai' nopo i Kaban do Tumpongo'd Tuhan o hiri'd gulu diyolo', do mogihum do kinoiyonon di pawansayan diyolo'd kiim. 34 Om solinaid nopo diyolo' do mingundaliu do mantad id pointikid-tikid do kinoiyonon di pinawansayan diyolo'd kiim, om hiri kasai' nopod sawa-sawat diyolo' i haun do Tuhan do tontok do dangadau. 35 Om soira-ira' nopo dot igitan i Kaban do Tumpongo om moro-boros no i Musa do poingkaa, “Ingkakat no, oi Tuhan, om pogitotongkiado' no i pisangod nu do gisom do manangkus ngai' do mogidu' i tulun dit araatan diya',” ka dau. 36 Om soira-ira' nopod poundorongon i Kaban do Tumpongo om moro-boros no i Musa do poingkaa, “Guli' no, oi Tuhan, dot id piro-piro noribu do sompiiyon dot Israil,” ka dau.
Kinoiyonon di Roitan do Tabira
1 Om timpuun no i tulun do sontogod-togod do Tuhan dot ouudipanan di kosusaan diyolo'. Om soira' di norongou'd Tuhan i boros diyolo' do sontogod-togod, om kotogod no iyau, om porikatai no dau iyolo'd tapui. Om tapui poddi o poirolot diyolo' gisom do nosorob o somputul di kokiiman. 2 Om pinggiak no i tulun do mokitulung di Musa. Om sambayang noddi i Musa dot id Tuhan, om kopisok no i tapui. 3 Om iri noddi o kinopomungaranan do kinoiyonon diri do Tabira tu' hilo' no do suminikit i tapui do Tuhan dot id pogialatan diyolo'.
Minomili' i Musa do Turu' Nohopod o Boyoon
4 Om haro i' o piro-piro o tulun do bansa'd suwai do manud-tanud di tulun dot Israil do mamanau. Om iyolo' nopodti nga' siakan no tomod do tikanas, om iri poddi i tulun dot Israil nga' tuminimpuun diri do sontogod-togod. Boros ka diyolo', “Haro po bo daa giya o tikanas toko'dti! 5 Di nopo di hilo' toko' pod Masir om kaakan toko' id sada' do gisom dot abangat toko', om a' i' minog do momoli. Osorou no daa'ddi i sangop, om i sadur, om i losun, om i bawang dit aragang, om i bawang dit opurak, i koubasan toko' do mangakan di hilo' po. 6 Nga' baino' noddi om ongolomok toko' no. Aiso' no nunu-nunu dot akanon --- aiso' no suwai, ilo' po manna do pointikid-tikid do tadau,” ka no diyolo'. 7 (Iri nopo manna om miagal do linsou dit ongokooro' dot ongopurak dosilou- silou. 8-9 Iri nopo manna'ddi om kotonggoi di bolobou do rumatu' do hiri'd kokiiman di dongotuong. Om kosuabon nopondo om minsorili' poo i tulun do mongoi ponimung di manna. Om kisaron nondo diyolo' iri ko' tutuon do gisom dot aapung. Om onsokon nondo diyolo' do maan do roti dit ourug dit alampis. Om kaakanan nopo nga' miagal do roti di nonsok do tumau do saitun.) 10 Om korongou nod i Musa i tulun dot Israil do sontogod-togod, dot ongotimung-timung do songingkakat do hiri'd wawayaan di kiim diyolo'. Om kotogod noddi o Tuhan gisom do tuminongob i Musa. 11 Om boros kaddi di Musa dot id Tuhan, “Nokuro tu' raraaton kopio oku iyoho' diya'? Nokuro tu' a' ko orohian doho'? Nokuro tu' onuan oku diya'd tonggungan do mongilo-ilo ngai'dti tulun? 12 Okon toi ko' okon i' ko' iyoho' o minomonsoi diyolo' om okon ko' iyoho' o minaganak diyolo'? Om nokuro tu' suhuon oku diya' do sumiliu'd miagal do mitatamong do mamabo'd tanak, gisom dot iyoho' noo o momogompi' kasai' diyolo' do solinaid do hiti'd tindalanon do kumaa do hilo'd pomogunan di pinabatos nu dot id komolohingan diyolo'? 13 Antangai pogi' nga' a' nopo moti' iyolo' otingkod-tingkod do mokianu do tikanas. Om honggo daa o ngayan ku do tikanas do kabagal do tulun dot irad diti kogumu'? 14 A' oku no kooyit dot iso-iso' kopio oku do mongilo-ilo ngai'dti tulun; adalaan no kopio kawagat iti dot id doho'! 15 Ondung iyoon kasai' oku diya'dti oi Tuhan, om kosianai no doho', om patayon oku no om a' oku i' kopuriman do koinggoritan diti pinorikot nu dot id doho',” ka dau. 16 Om boros kad Tuhan dot id di Musa, “Monimung nod turu' nohopod o tulun di pusohon om i nongookunan do sumiliu'd boyoon do tulun. Om pootodon no iyolo' dot id doho' do hilo'd suang do Kiim ku, om suhuon no iyolo' do mingkakat do hilo' dot id talad nu. 17 Om lumintuhun oku nondo om moro-boros oku diya' do hiri'd kinoiyonon diri. Om onuon ku nondo o tongokooro' di rusod di nakatahak ku diya' om patahakon ku nondo iri dot id diyolo'. Om milo indo iyolo'd monguhup diya' do mongilo-ilo do koinsanai'd tulun diti, om a' ko nondo iso-iso' do mongilo-ilo diyolo'. 18 Om poboroson no dot id tulun diti do dinondo o poingkaa, ‘Lidangan no dokoyu o tinan dokoyu do bagi'd tadau'd suab; om kaakan kou indo do tikanas. Norongou nod Tuhan i tihad om todoi dokoyu dot osisiakanan do tikanas, om i boros dokoyu do pakamaha-maha' dokoyu di hilo' kou pod Masir. Baino' nopo om onuan kou nod Tuhan do tikanas, om mositi' nod kanon dokoyu iri. 19 Om mositi' nod kanon dokoyu iri dot okon nopo ko' sangadau no ko' duwo o tadau, ko' limo ko' hopod o tadau ko' duwo nohopod o tadau, 20 suwai ko' mositi' nod kanon dokoyu iri do solinaid do sombulan, do gisom id sumakit kou om mingilob dot ouru do mingakan di tikanas. Om osiliu nondo o miagal diri tu' niada' i' dokoyu o Tuhan dot id pogialatan dokoyu. Om minimboros kou do sontogod-togod dau dot osonong nogi' daa dot a' kou minumbal do tumongkiad do mantad hilo'd Masir,’ ka,” kad Tuhan. 21 Om boros ka di Musa dot id Tuhan, “Diya oku'd momoyo' dot onom nahatus noribu o tulun, om poboroson nu i' do manahak ko do tikanas do kabagal diyolo' ngai' do solinaid do sombulan? 22 Kabagal i' tuu o sapi' om dumba' do sumbolion do pamangat diyolo'? Kabagal i' tuu diyolo' dot oinsanan piya i sada' do hilo'd rahat?” ka dau. 23 Om boros kad Tuhan do suminimbar, “Haro toi o kogisomon do sinundu ku? A' ko no alaid do kokito ondung abayaan kopio tuu ko' amu' i pinoboros ku'ddi,” ka dau. 24 Om soliwan no i Musa, om polombuso' no dau dot id tulun dot ogumu' i pinoboros do Tuhan. Om ponimung no i Musa do turu' nohopod o boyoon om suhuo' no dau iyolo' do mingkakat do hiri'd posorili' di Kiim do Tuhan. 25 Om lintuhun noddi o Tuhan do hiri'd haun om boro-boros no iyau di Musa. Om ngoyo' no dau ot okooro' di Rusod di pinatahak dau di Musa om patahako' no dau dot id turu' nohopod o boyoon diri. Om soira' di luminintuhun i Rusod dot id diyolo', om timpuun no iyolo' do mimboros dot opuhod do miagal do nabi, nga' a' i' alaid no dot iyo iyolo'ddi. 26 Nga' iri nopo duwo boyoon do mantad id pogialatan di turu' nohopod o boyoon diri, i Ildad om i Midad, nga' minundorong do hiri'd kokiiman om a' i' minongoi tanud di suwai do minongoi do hiri'd Kiim do Tuhan. Om hiri noddid kokiiman i Rusod do luminintuhun dot id diyolo'. Om timpuun no iyolo' goduwo do mimboros dot opuhod do miagal do nabi. 27 Om panangkus noddi do suminoliwan o songulun o tanakwagu do minongoi pomisunud di Musa di nosiliu dot id di Ildad om id di Midad. 28 Om boro-boros noddi i Yosua i tanak di Nun, i mongunguhup di Musa do mantad dit omulok po iyau. Boros ka dau dot id di Musa, “Ngoyo' iyolo' oduhai oi Tuan!” ka dau. 29 Om boros kad i Musa do suminimbar, “Nokuro tu' mogobi' ko doho'd osolon? Orohian oku nogi' daa kopio do patahakon do Tuhan o Rusod dau dot id toinsanan diti tulun dau, om gisom do mimboros ngai' iyolo' dot opuhod do miagal do nabi!” ka dau. 30 Om guli' noddi i Musa om i turu' nohopod o boyoon do hiri'd kokiiman.
Pinorikot do Tuhan i Burung Puyuh
31 Om sigog id potonguso' do Tuhan i tongus do mantad id rahat do pinoporikot do burung puyuh dit ogumu' kopio, dot ongosiriba' no o ponunulud. Om kotongkop nopo di tombolog i kokiiman gisom do piro-piro o kilomito do kosoduwo' do posorili' di kokiiman do sinondot di tombolog, om honggo nopo nga' sokoon no di tombolog diri. 32 Om nosongodou nopoddi do tadau'ddi, om nosuaban do totuong diri, om nosongodou di tadau kawagu, do minggamit i tulun di burung puyuh. 33 Om tontok dit osima' po iyolo'd tikanas, om kotogod no o Tuhan di tulun om porikatai no dau iyolo'd toruol di mogkoroliu. 34 Om pungaranai noddi o kinoiyonon diri do “Lobong di Godoot” tu' hilo' no o pinamalabangan diyolo' di tulun dit ongodoot do tikanas. 35 Om undaliu no i tulun do mantad hiri om pakayaai no do hilo'd bandar do Hasirot; om powonsoyo' no diyolo' o kiim diyolo'd hilo'.
Hinukuman i Miriam
1 I Musa nopo nga' minanansawo do tondu' do bansa'd Kus, om iri noddi o kopongindaraatan di Miriam om i Harun di Musa. 2 Boros ka diyolo', “I Musa no tuu o pawayaan do Tuhan do boros dau? Okon toi ko' iyato nga' pawayaan i' dau'd boros dau?” ka diyolo'. Om norongou id Tuhan i boros diyolo'. 3 (I Musa nopo nga' tulun dit osiriba' kopio o ginawo it osiriba' no kopio o ginawo ko' mantad dot isai nopo o tulun di poimpasi do hiti'd pomogunan.) 4 Om sigog nopoddi do boro-boros o Tuhan dot id di Harun om id di Miriam do poingkaa, “Pokionuon ku iyokoyu'd tolu do mongoi do hilo'd Kiim ku,” ka dau. Om ongoi no iyolo', 5 om lintuhun no o Tuhan dot id rolot do haun di poinaru do miagal do torigi. Om ingkakat noddi o Tuhan do hiri'd wawayaan di Kiim, om pomolohou nod, “Harun! Miriam!” ka. Om laang goduwo no iyolo' do minamanau. 6 Om boros kad Tuhan, “Pokinongou kou no diti poboroson ku! Soira' nopod haro o nabi dot id pogialatan dokoyu om mintalang oku dot id diyolo' dot id suang do pinointalang om moro-boros oku diyolo' dot id suang do nipi. 7 Nga' a' i' iyo'ddi do tontok do moro-boros oku di Musa, i susuhuon ku, tu' noonuan ku no iyau'd karaja' do momoyo' do koinsanai diti tulun dot Israil, i tulun ku. 8 Om timbabaon ku nopo iyau do tontok do moro-boros oku, om poinsondot o pomomoros ku, om okon no ko' posiriban-ribanon ku. Tinan ku piya nga' nokokito i' iyau! Om nokuro tu' katama' kou po daa kopio do sumaap dau?” ka dau. 9 Om kotogod no o Tuhan diyolo' goduwo; om tontok di tuminongkiad o Tuhan, 10 om di minidu' i haun do mantad hiri'd Kiim do Tuhan, om sigog id koontok i Miriam do toruol do kusta. Om miagal poddi do gapas kopurak o kulit dau. Om soira' di kuminoili i Harun di Miriam om kokito dau do noontok i Miriam do toruol do miagal diri. 11 Om boro-boros no iyau di Musa, “Tulungo' iyahai oi Tuan, kada' iyahai pologoso' dot oinggorit dot obungou di dusa do nowonsoi dahai do gama' di kababasug dahai. 12 Kada' i Miriam pologoso' do miagal di tanak do napatai mantad do nosusu, om i nopiintanga' nod napasa' o tonsi,” ka dau. 13 Om pomolohou no i Musa do Tuhan, “Oi Kinorohingan, lingasai no iyau!” ka. 14 Om boros kad Tuhan do suminimbar, “Ondung dinulaan daa iyau di tapa' dau, om turu' no tadau do boboon dau o kointingayaman dau. Iyo nopoddi om poinsoduwon no iyau diti kokiiman do solinaid do turu' o tadau, om atalib pondo iri om koino-ino nogi' iyau do sumuang kawagu,” ka dau. 15 Om posoliwano' noddi i Miriam di kokiiman do solinaid do turu' o tadau. Om solinaid nopo dit a' po iyau nokoguli', om a' po minundaliu i bansa'ddi do mantad id kinoiyonon diri. 16 Om tongkiad nogiddi iyolo' do mantad hilo'd Hasirot om powonsoyo' no diyolo' o kiim diyolo' do hilo'd tana' do kowotuan do Paran.
I Hopod om Duwo o Gomponoluku'
1 Om boros kad Tuhan dot id di Musa, 2 “Momili' nod songulun dot id pialatan di piro-piro boyoon do pointikid-tikid di hopod om duwo o payat do bansa'dti; do songulun o mantad id pointikid-tikid do payat. Om suhuon no iyolo' do sumiliu'd gomponoluku' do mongoi ponorisid do mogontong di pomogunan do Kanaan, i patahakon ku dot id tulun dot Israil,” ka dau. 3-15 Om wonsoyo' nod Musa i pinonuhuan do Kinorohingan diri. Om suhuo' no dau do minamanau do mantad hilo'd tana' do kowotuan do Paran iti piro-piro o boyoon diti: - Payat - Boyoon - Rubin - I Siamua i tanak di Sakur - Simion - I Sapat i tanak di Hori - Yohuda - I Kalib i tanak di Yopuni - Isakar - I Yigal i tanak di Yusup - Ipraim - I Hosia i tanak di Nun - Binyamin - I Palti i tanak di Rapu - Sibulon - I Gadiol i tanak di Sodi - Manasi - I Gadi i tanak di Susi - Dan - I Amiol i tanak di Gomali - Asor - I Situr i tanak di Mikail - Naptali - I Nabi i tanak di Wopsi - Gad - I Guil i tanak di Maki 16 Om iri ngai' no o gomponoluku' di sinuhu' di Musa do mongoi ponoluku' do pomogunan diri. I Hosia nopo i tanak di Nun diri, om pinawaliu di Musa o ngaran; om i Yosua diri o pinomungaran. 17 Om tontok di sinuhu' di Musa iyolo' do mamanau, om bilinai no dau iyolo' do poingkaa, “Mamanau kou no do pakayaan ponong id utara do mantad hiti, do kumaa ponong hilo'd salatan do pomogunan do Kanaan, om lumombus nogindo do hiri'd konulu-nuluan. 18 Ilaan no kopio dokoyu ondung okuro-kuro o pomogunan diri, om ondung piro kogumuo'd tulun do hilo', om ondung songkuro o kinoris diyolo'. 19 Om antangan no kopio dokoyu ondung osonong ko' amu' i pomogunan diri, om ondung id kawalayan dit aiso' o tolig do posorili' o tiyonon di tulun do hilo' ko' id bandar po dit ongkitolig o posorili' o tiyonon diyolo'. 20 Om antangan no ondung oluhub i tana', om ondung ogumu' o kayu do hilo'. Om kada' kou no kopio kolihu do mongigit dot ongokuuri' di tua' do totonomon do hilo' do gumuli' kou,” ka dau. (Om tontok nopoddi nga' tumimpuun nogi' do monsok i tua' dot anggur.) 21 Om pamanau no i tulun diri do kuminaa ponong id utara om sorisido' no diyolo' do mingontong o pomogunan diri do tuminimpuun do mantad hiri'd tana' do kowotuan do Sin, i ponong id salatan, om luminombus do hiri'd bandar do Ribo, it id toning do Ralan do Hamat di ponong id utara. 22 Om id gulu nopo kopio om kuminaa iyolo' do ponong id salatan do pomogunan diri om ruminikot do hilo'd bandar do Hibron, i kinoiyonon do tulun dot Ahiman, om Sisai om Talmai. Iyolo' nopo nga' sinakagon dot iso' o bansa'd tulun dit angagayo koulun, i roitan do tulun dot Inak. (Iri nopo bandar do Hibron om turu' no toun do poingwonsoi dot id gulu ko' i bandar do Soan di hilo'd Masir.) 23 Om korikot no iyolo' do hilo'd Rantai dot Iskol. Om hilo' no o pinanatasan diyolo' do raan dot anggur do mitonggoi do sompuru o tua' dot anggur. Nga' awagat tomod iri gisom dot a' no milo dot a' pasansangon do kayu do pangantayang, om piniantayangan diri do duwo o tulun. Om minigit nogi' iyolo' do piro-piro o tua' do kayu di roitan do delima om tua' dot ara do patahakon do maan do ponuwau-suwau. 24 Om pungaranai noddi o kinoiyonon diri do Rantai dot Iskol tu' hilo' no o pinongonuan di tulun dot Israil di sompuru o tua' dot anggur. 25 Om kosorisid poddi di piro-piro gomponoluku' o pomogunan diri do solinaid dot apat nohopod o tadau, om poguliai nogi' diyolo' 26 dot id di Musa, om id di Harun, om id toinsanan di tulun dot Israil, i maso do pointimung do hilo'd Kadis, it id tana' do kowotuan do Paran. Om susuyo' ngai' no diyolo' i nongokito diyolo'. Om pokitanai diyolo' di tulun dot Israil i tua-ua' di nigitan diyolo'. 27 Om boros ka diyolo' dot id di Musa, “Nosorisid no dahai do mogontong i pomogunan diri om nokito dahai do kaya' i pomogunan om oluhub i tana'd hilo'; om diya iti tua-ua' dot okuri' do mantad hilo'. 28 Nga' iri nopo tulun do hilo' om ongokoris koulun, om bandar diyolo' nga' angagayo om ongogirot po o tolig do posorili'. Om haro po ot araat tu' hilo' nogi' o nokokitanan dahai di sinakagon do tulun dit angagayo koulun. 29 Momogun-mogun nopod hiri'd ponong id salatan do pomogunan diri om i tulun dot Amalik; om hiri nod konulu-nuluan om i tulun do Hit, om Yobus, om Amori o mongiyon-ngiyon; om hiri nod potoropis di Rahat do Tanga' om hiri'd poinsusui di Bawang do Yordan om i tulun do Kanaan o momogun-mogun,” ka. 30 Nga' tingkodo' nod Kalib i tulun do somboro-boros do tumogod di Musa, boros ka dau, “Ngoyon toko' nogi' songodo' i pomogunan diri om aahau toko' i' o pomogunan diri do dinondo, tu' okoris toko' i' do mangala'ddi,” ka. 31 Nga' boros ka di tulun di songwoyo' di Kalib do guminuli', “A' toko' i' moti' okoris do sumaap diyolo'. Tu' iri nopo tulun do hilo' om ongokoris i' ko' iyati',” ka diyolo'. 32 Om popimboroso' noddi diyolo' o boros dit a' otopot dot id tulun dot Israil do pasal di pomogunan di nongoi diyolo' antangai. Boros ka diyolo', “A' i' kabagal di tulun di hilo' mantad id pomogunan o hasil di tana'd hilo', tu' okuri' i' kopio o hasil. Om iri nopo tulun do hilo' do nongokito dahai om angaranggou kopio koulun. 33 Om nokokito po iyahai do tulun dit angagayo kopio koulun, i sinakagon do tulun dot Inak. Om miagal pod godu-godu kokoro' o kopurimanan dahai do tinan dahai, om iyo no doti'ddi kopio o kokitanan diyolo' dahai,” ka.
Sontogod-togod i Tulun dot Israil
1 Om monuaban nopoddi i tulun dot Israil do mihad dot atatangkabaan. 2 Om sontogod-togod diri iyolo' di Musa om i Harun. Boros ka no diyolo', “Osonong-sonong nogi' daa do napatai toko' di hilo'd Masir ko' hiti pod tana' do kowotuan! 3 Nunu kopio o kapangangatan do Tuhan dati' do hilo'd pomogunan do Kanaan? Tu' apatai toko' nopo dot id pisangadan om angatanggayan do pisangod iti sawo om iti tangaanak toko'. Osonong nogi' do gumuli' toko' do hilo'd Masir!” ka. 4 Om pogiboro-boros noddi iyolo' do poingkaa, “Osonong nogi' do momili' toko'd boyoon om gumuli' toko' i' kawagu do hilo'd Masir,” ka. 5 Om otud no i Musa om i Harun do hiri'd dotimbabaan do koinsanai di tulun. 6 Om hurako' nopo di Yosua i tanak di Nun, om i Kalib i tanak di Yopuni, o pakayan diyolo' do popointalang do tumongob iyolo'. Iyolo' goduwo nopoddi nga' mantad id pialatan di piro-piro o tulun di minongoi ponoluku'. 7 Om boros ka diyolo' dot id toinsanan di tulun, “Iri nopo pomogunan di nongoi dahai antangai om aiso' no o koiyo do kosonongo'. 8 Ondung ohubayaan o Tuhan dati', om pootodon toko' i' dau do hilo', om patahakon dau dati' i pomogunan di kaya' om it oluhub o tana'. 9 Kada' kou saap do Tuhan om kada' kou kooris di tulun do poingiyon do hilo'. Osoonong toko' do mangala' diyolo'. Tu' moyo-woyo' i' o Tuhan dati' om naala' no dau i ponokokinorohingan di mongintirung do tulun do hilo', om kada' kou no kooris,” ka. 10 Om songima-ima' ngai' no daa'ddi i tulun do momodumpau ngai' diyolo'd apat do watu do gisom dot apatai iyolo'. Nga' sigog id kokito di tulun i tulinau di kosorong kopio do mantad id koropohon do Tuhan, do minimbulai do hiri'd sawa-sawat di Kiim do Tuhan.
Sinambayangan di Musa i Tulun dot Ogumu'
11 Om boros kad Tuhan dot id di Musa, “Gisom tuu do songgira' iti tulun do sumaap kasai' doho'? Songkuro po o koloido' diyolo'd mada' do mogondos doho', dot irad piya'ddi kogumu' o koimayaan do nowonsoi ku dot id pogialatan diyolo'? 12 Punsoon ku nondo iyolo', do toruol di mogkoroliu o pomunso ku. Om iya' nondo o silihon ku do molohing dot iso' o bansa' dit agayo om it okoris ko' mantad diyolo',” ka. 13 Nga' boros kad Musa dot id Tuhan, “Nga' Tuhan, nokoilo no i tulun do Masir dot i sinundu nu o pinoposoliwan nu dahai do mantad hilo'd Masir. 14 Om nosusui no diyolo' iri dot id tulun di poingiyon dot id pomogunan diti. Om nongkoilo no o tulun do moyo-woyo' ko dahai. Om nongkorongou nogi' iyolo' dot okito ko i' kopio do tontok do mundorong i haun nu dot id sawa-sawat dahai; om mogulu-gulu ko dahai dot id rolot do haun di poorigi do dangadau om id rolot ko do tapui di poorigi do dongotuong. 15 Om ondung patayon ngai' nu iti tulun nu, om mimboros ngai' nondo i bansa' di nongkorongou do pasal do kobontugo' nu, do 16 pinatai nu i tulun nu do hiti'd tana' do kowotuan tu' a' ko no kogoos do papaatod diyolo' do hilo'd pomogunan di pinabatos nu. 17 Om iri no o kokuwaan oi Tuhan, do pokionuon ku do pointalangon nu i kuasa' nu dot id dahai om wonsoyon nu i pinabatos nu. Tu' nokoboros ko i' do poingkaa, 18 ‘Iyoho' nopo i Tuhan, om a' i' obintogod, om pointalangon ku i' o kosianan ku, om kotorodoko' ku dit a' opupus-pupusan. Om ompunan ku i' i tulun di kidusa om i sumaap doho'. Nga' iyo piya'ddi nga' posulion ku i' dot id tangaanak om id manangaki o kasalaan di komolohingan do gisom id korikot di sinakagon do kointolu om koingapat,’ ka nu. 19 Om dinondo nopodti oi Tuhan, om pokionuon ku no kopio dot ompunan nu o dusa diti tulun do miagal di minangampun ko diyolo' do mantad di tuminongkiad i' iyolo' do pomogunan do Masir, tu' agayo i' kopio o kosianan nu,” ka dau. 20 Om boros kaddi do Tuhan do suminimbar, “Ompunan ku i' iyolo', do miagal di pinokianu nu. 21 Nga' mamatos oku no dot id suang do ngaran ku om id suang do kuasa' ku di koponu' diti pomogunan, 22 dot id pogialatan nopodti tulun om iso' po nga' aiso' no ot otogui do gisom do kosuang do pomogunan di pinabatos ku dot id komolohingan diyolo'. Tu' a' i' iyolo' mumboyo' doho', om managalai-galai nogi' iyolo' do mogumbal doho'. Om nongkokito i' daa iyolo' di tulinau do tanda' do karapahan ku di kosorong tomod, om nokokito iyolo' di piro-piro o koimayaan do winonsoi ku do hilo'd Masir om hiti'd tana' do kowotuan. 23 A' no, a' no kopio iyolo' kosuang do pomogunan diri. Id pogialatan nopo diyolo' di minagada' doho', om iso' po nga' aiso' no o koulok do pomogunan diri. 24-25 Nga' i Kalib nopo, i susuhuon ku om a' i' iyo'ddi. Tu' iyau nopo om tuminorodok i' dot id doho'. Om iri no o kapaatadan ku dau do hilo'd tana' di nohombo dau. Om iri nopondo i tana' dit arantai, i pomogun-mogunan do tulun dot Amalik om tulun do Kanaan do dinondo, om aanu indo di sinakagon di Kalib, i susuhuon ku'ddi. Om suab nopondo, oi Musa, om gumuli' no om kumaa no do hilo'd tana' do kowotuan, i ponong id Suok dot Akaba,” ka dau.
Hinukuman do Tuhan i Tulun dot Israil di Sontogod-togod
26 Om boros kad Tuhan dot id di Musa om id di Harun, 27 “Gisom po tuu do songgira' do sontogod-togod kasai' do sumaap doho' iti tulun dot angaraat? Apaasan oku nod korongou do boros diyolo' do sontogod-togod! 28 Simbaron no dokoyu iyolo' do poingkaa: Boros kad Tuhan om, ‘Sumumpa' oku no dot id suang do ngaran ku do wonsoyon ku nondo dot id dokoyu o miagal di pinokianu dokoyu. Iyoho' no, i Tuhan o minomoros diti. 29-30 Apatai kou nondo om mogiuriasan nopondo do hiti'd tana' do kowotuan o rata' dokoyu. Tu' sontogod-togod ngai' kou i' do sumaap doho'. Om iri no o kokuwaan do suwai nopo ko' iyo Kalib di Yosua, om aiso' no o tiso' piya dokoyu dit id sawat ko' duwo nohopod o toun do tumur do kosuang di pomogunan di pinabatos ku dokoyu. 31 Boros ka dokoyu om tanggayan nondo do pisangod i tangaanak dokoyu! Nga' pootodon ku indo iyolo' dot id pomogunan di niada' dokoyu, om iri nondo o pomogunan dot osiliu do pomogunan kopio diyolo'. 32 Nga' iyokoyu nopo om hiti nod tana' do kowotuan o kapatayon. 33 Om minghombo nopondo i tangaanak dokoyu do hiti'd tana' do kowotuan do solinaid dot apat nohopod o toun. Om oinggorit nondo i tangaanak dokoyu, do gisom po dot apatai ngai' i tulun di rampam dokoyu, tu' a' kou i' tuminorodok. 34 Om boboon no dokoyu i kootuson di dusa dokoyu do solinaid dot apat nohopod o toun; sontoun o pomogontok do sangadau do mantad dit apat nohopod o tadau dokoyu do minongoi hombo dot id pomogunan diri. Om oilaan nogindo dokoyu ondung okuro-kuro no o kopurimanan do saapon kopio ku iyokoyu! 35 Om sumumpa' oku no do wonsoyon ku iti dot id dokoyu, iyokoyu i tulun dot angaraat om i mogisosokodung nopo do sumaap doho'. Om hiti nod tana' do kowotuan diti o kapatayon ngai' dokoyu. Iyoho' no i Tuhan o minomoros diti,’ ka dau,” kanto dokoyu. 36-37 Iri no piro-piro o tulun di sinuhu' di Musa do minongoi pogontong di pomogunan diri om it a' otopot o pinosunud di guminuli' iyolo' o nokobungou di tulun dot Israil do sontogod-togod do sumaap do Tuhan. Om iri no o nokopomohukuman do Tuhan diyolo' do toruol, do gisom do nangapatai iyolo'. 38 Id pialatan nopo di hopod om duwo o gomponoluku' om iyo Yosua po di Kalib o poimpasi.
Di Koinsan I' Umbal do Manangod di Pomogunan
39 Om soira' di sinunudan di Musa i tulun dot Israil di pinoboros do Tuhan diri, om songihad-ihad poddi iyolo' dot atatangaban. 40 Om tadau noddi kawagu, dit osuab po, om sodia' no iyolo' do mongoi panangod do hiri'd konulu-nuluan do pomogunan diri. Om boros ka diyolo', “Okunon i' dahai do nokowonsoi iyahai'd dusa. Nga' baino' nopo om ngoyon no dahai songodo' do magahau i pomogunan di pinoboros do Tuhan dot id dahai,” ka diyolo'. 41 Nga' boros kad Musa, “Nokuro'ddi tu' sumurilog kou pod Tuhan do dinondo? Aiso' i' bo ot aanu-anu dokoyu! 42 Kada' kou nogi' ongoi. Tu' a' i' moyo-woyo' dokoyu o Tuhan, om aala' kou indo di pisangod dokoyu. 43 Kotimbaba' kou nopondo di tulun dot Amalik om i tulun do Kanaan, om angapatai kou indo dot id pisangadan. Om a' no o Tuhan momoyo' dokoyu tu' a' kou i' minumboyo' dau,” ka dau. 44 Nga' nokobulun kasai' po i tulun dot Israil do minongoi do hiri'd konulu-nuluan do mulong piya dot a' i Musa om i Kaban do Tumpongo tuminongkiad di kokiiman. 45 Om songodo' no di tulun dot Amalik om i tulun do Kanaan di poingiyon do hilo' i tulun dot Israil. Om kaala' no diyolo' i tulun dot Israil om gusao' no do gisom do nokorikot do hilo'd Horma.
Oturan do Pasal do Porsombahan di Sumbolion
1 Om patahako' nod Tuhan dot id di Musa 2 iti piro-piro o toturan dit apatut do tonudon di tulun dot Israil do hilo'd pomogunan di patahakon do Tuhan dot id diyolo'. 3 Maan nopod porsombahan di sorobon, om porsombahan do pamayaan do batos ko' porsombahan di patahakon do tumanud do kagaanan do ginawo ko' porsombahan do patahakon do tontok do nunu nopo o karamayan do don tugama' di koubasanan, om honggo nopod tayam-tayam diti nga' koino-ino id patahakon dot id Tuhan: songinan o sapi' do tontoluhan, ko' songinan o dumba' do tontoluhan, ko' songinan o dumba' ko' songinan o kambing. Om iri no o tawau do porsombahan do taakanon diti o kasanangan do Tuhan. 4-5 Isai nopo o papatahak dot id Tuhan do dumba' ko' kambing do maan do porsombahan di sorobon, om mositi' nod tanggayan o pointikid-tikid do tayam-tayam diri do songkilogram o tapung di rinalatan do songlito o tumau do saitun do maan do porsombahan do gandum, om songlito o waig dot anggur. 6 Ondung songinan o dumba' do tontoluhan do patahakon, om mositi' nod papatahak po do duwo kilogram do tapung, do ralatan do tumau'd saitun do songlito om satanga' do maan do porsombahan do gandum, 7 om mitonggoi do songlito om satanga' o waig dot anggur. Om iri no tawau do piro-piro o porsombahan diti o kasanangan do Tuhan. 8 Ondung songinan o sapi' do tontoluhan o maan do porsombahan di sorobon ko' porsombahan do pamayaan do batos ko' porsombahan do piombolutan, 9 om mositi' nod papatahak po do tolu kilogram do tapung di rinalatan do duwo lito do tumau'd saitun do maan do porsombahan do gandum, 10 om duwo po o lito do waig dot anggur. Om iri no tawau do porsombahan diti o kasanangan do Tuhan. 11 Om iri no it apatut do patahakon do maan do porsombahan do potonggoyon do pointikid-tikid do sapi' do tontoluhan, ko' dumba' do tontoluhan, ko' dumba' ko' kambing. 12 Ondung lobi ko' iso' o tayam-tayam do patahakon do maan do porsombahan, om iri nogi' i porsombahan do tapung, om tumau, om waig dot anggur nga' ruhangan no do tumanud di kogumuo' di tayam-tayam. 13 Om mositi' nod wonsoyon do pointikid-tikid do tulun dot Israil o miagal diri do soira-ira' nopo iyolo' do papatahak do porsombahan do taakanon. Om iri no tawau do porsombahan diti o kasanangan do Tuhan. 14 Om i tulun do bansa'd suwai di poirolot dokoyu do daamot noo ko' i tumimporon nga' mositi' nod tumanud do koinsanai dot oturan diri do soira' nopo iyolo' do papatahak do porsombahan do taakanon dot id Tuhan, dot i kasanangan do Tuhan o tawau. 15-16 Om oiyo nopo o toturan om kowoyo-woyoo' dot apatut do tonudon dokoyu om i tulun do bansa'd suwai di poirolot dokoyu, tu' iyokoyu nopo diyolo' om oiyo i' dot id pagantangan do Tuhan. Om iyo no kasai'ddi o tonudon do gisom dot alaid. 17 Om patahako' nod Tuhan dot id di Musa 18 iti piro-piro o toturan do tonudon di tulun dot Israil do korikot iyolo' do hilo'd pomogunan di patahakon do Tuhan dot id diyolo'. 19 Om soira' nopo do mangakan kou do nunu nopo o tua' do totonomon do hiri'd pomogunan diri, om mositi' nod potobilang kou do wookon do maan do porsombahan di potobilangon do maan do don Tuhan. 20 Om soira' nopo do mogonsok kou do roti dot i gandum di gulu koomot o wonsoyon, om mositi' nod patahakon dot id Tuhan i roti dit id gulu koonsok, do maan do porsombahan di potobilangon do maan do don Tuhan do karalan-ralano' nopo do papatahak om iyo iddi papatahak dokoyu di gandum dit id gulu dokoyu kotutu. 21 Om mositi' nod patahakon dokoyu i roti dit id gulu koonsok do maan do porsombahan di potobilangon do maan do don Tuhan do gisom do mompus-ompus. 22 Om haro i' dotindo o tulun dit a' tumomod do momolihu do momonsoi do piro-piro dit oturan di pinatahak do Tuhan dot id di Musa. 23 Om koumbal i' doti' do koimbagu do kolihu iti tulun do momonsoi do koinsanai di pinonuhuan do Tuhan do pinolombus di Musa. 24 Ondung owonsoi di tulun o kasalaan do miagal diri tu' a' i' iyolo' nokoilo dot oturan, om mositi' no do papatahak iyolo' do songinan o sapi' do tontoluhan do maan do porsombahan di sorobon, i porsombahan di kasanangan do Tuhan o tawau. Om mositi' nod papatahak po iyolo' do porsombahan do gandum om porsombahan do waig dot anggur do miagal dit apatut, do potonggoyon di porsombahan do sorobon diri. Om suwai no ko' iri, om mositi' no do papatahak po iyolo' do songinan o kambing do tontoluhan do maan do porsombahan do pangampun do dusa. 25 Om wonsoyon nogindo dit imam i natantu' mantad do wonsoyon do pongidu' do dusa di tulun dot ogumu'. Om ompunan indo iyolo'd Kinorohingan tu' a' i' diyolo' tinomod do momonsoi i kasalaan diyolo', om kawagu po nga' nakapatahak no iyolo' do porsombahan do pangampun do dusa do maan do porsombahan do taakanon do maan do don Tuhan. 26 Om oinsanan nopondo i tulun dot Israil om i tulun do bansa'd suwai di poirolot diyolo' dot oompunan, tu' oinsanan i' iyolo' do nokohompit do kasalaan diri. 27 Ondung haro o tulun do kowonsoi'd dusa dot a' dau tomodon, om mositi' nod papatahak iyau do songinan o kambing do tondu' di sontoun nogi' o tumur do maan do porsombahan do pangampun do dusa. 28 Om mositi' nod wonsoyon dit imam i natantu' mantad do wonsoyon do pongidu' di dusa, do hiri'd pananaraban do porsombahan om oidu' i' i dusa di tulun, om oompunan indo do Tuhan o tulun diri. 29 Om iyo nogiddi o toturan do tonudon dot isai nopo o kowonsoi'd dusa dit a' tomodon, do tulun tuu iri dot Israil ko' tulun po do bansa'd suwai di poingiyon do hilo'. 30 Nga' ondung haro o tulun dot Israil ko' tulun do bansa'd suwai di tumomod do momonsoi'd dusa, om pakaiso-aiso' no kopio iyau'd Tuhan. Om mositi' nod hukuman iyau do kapatayon 31 tu' suminaap i' iyau'd Tuhan om tuminomod do tuminolibamban di pinonuhuan do Tuhan. Om iri i sala' di tulun o nokobungou di kinapatayon dau.
Tulun dit A' Momusou do Tadau'd Sabat
32 Insan o maso, do tontok di hilo' pod tana' do kowotuan i tulun dot Israil, om haro o kusai do nabantalan do maso do mintimung do siduwon do tontok do tadau'd Sabat. 33 Om ngoyo' no i tulun diri potimbabao' di Musa, om i Harun om koinsanai di tulun, 34 om pinoundorong poddi iyau tu' a' po oilaan ondung kukuroyon iyau. 35 Om boros kad Tuhan dot id di Musa, “Mositi' nod hukuman do kapatayon iti tulun diti; om mositi' nod posoliwanon iyau diti kokiiman. Om oinsanan nopondo iti tulun do momodumpau dau'd watu do gisom dot apatai do hilo'd soliwan diti kokiiman,” ka dau. 36 Om oinsanan nopoddi i tulun do pinoposoliwan di tulun diri do mantad hiri'd kokiiman, om dumpaho' no diyolo' iyau'd watu do gisom do napatai, do tumanud di pinonuhuan do Tuhan.
Oturan do Pasal do Rinaboi-Raboi
37 Om suhuo' nod Tuhan i Musa 38 do poposunud diti ponuhuan dot id tulun dot Israil do poingkaa, “Wansayan nod rinaboi-raboi o hiri'd tompok do pakayan dokoyu om kagasan nod tali dot otomou o pointikid-tikid di rinaboi-raboi. Om mositi' nod wonsoyon kasai' dokoyu o miagal diti do gisom dot alaid. 39 Om guna' nopo di rinaboi-raboi'ddi nga' maan do kopomuhandaman. Om soira-ira' nopondo dot okito dokoyu i rinaboi-raboi'ddi, om osorou ngai' no dokoyu i ponuhuan ku om umboyoon indo dokoyu iri. Om iri nondo o kaantob dokoyu do monolikud doho' do tumanud di dokoyu'd korohian om i dokoyu dot osorou. 40 Om iri no i rinaboi-raboi o poposorou dokoyu do mumboyo' do koinsanai di ponuhuan ku, gisom dot asangkayu kou nondo kopio dot asanganu ku. 41 Iyoho' no i Tuhan i Kinorohingan dokoyu; om iyoho' no i pinoposoliwan dokoyu do mantad hilo'd Masir, om osiliu oku i' do Kinorohingan dokoyu. Iyoho' no o Tuhan,” ka.
Suminaap i Kora, om i Datan, om i Abiram
1-2 I Kora nopo, i tanak di Yisar, i mantad id pinuruan do sompiiyon di Kohat, i payat di Liwi, om nakasaap kopio do suminurilog di Musa. Om sinokodung nogi' iyau do tolu o tulun do mantad id payat di Rubin --- i Datan om i Abiram i tangaanak di Iliab, om i On i tanak di Pilit --- om haro po 250 o tulun dot Israil do suwai dot iri ngai' i boyoon dit angabantug do nopili' di rayat do suminokodung dau. 3 Om ongoi ngai' nopo iyolo' solowot di Musa om i Harun, om boro-boros nod poingkaa, “Pokinongou pogi' oi Musa! Pointikid-tikid do tulun dot Israil om nokotobilang ngai' i' do sumiliu'd songonuon do Tuhan. Om hiti id pogialatan toko' o Tuhan. Nga' nokuro tu' momusorou ko iya' do poinsawa-sawat ko ko' mantad diti tulun do suwai di songonuon do Tuhan? Adalaan no kopio ko' i natantu' mantad iti wonsoyon nu!” ka diyolo'. 4 Om soira' di norongou di Musa iri, om tungub nopo iyau do hiri'd tana' om sambayang no dot id Tuhan. 5 Om boros kaddi dau dot id di Kora om id toinsanan di tulun do tuminanud di Kora, “Kosuabon nopod suab om potudukon indo do Tuhan dot id dati' ondung isai noo i tulun di nokotobilang do sumiliu'd songonuon do Tuhan. Om Tuhan indo o momili' di tulun di nokotobilang do sumiliu'd songonuon dau, om pologoson do Tuhan o tulun diri do minsomok dau do hiri'd pananaraban do porsombahan. 6-7 Kosuabon nopondod suab om migit kou no, iya' om koinsanai di tuminanud diya' do talam di poiyanan do tapui, om suangan nod popou, om kuwaan do kominyan, om igitan nogindo iri do hiri'd pananaraban do porsombahan. Om okito toko' nogindo ondung isai i nopili' do Tuhan dot id pogialatan toko'. Iyokoyu nogi', i tulun do Liwi o nokowonsoi dit adalaan kopio ko' i natantu' mantad,” ka dau. 8 Om boros ka kawagu di Musa dot id di Kora, “Pokinongou kou pogi', oi tulun do Liwi! 9 Ondos daa dokoyu om agaan-gaan iti kinopomilian do Kinorohingan dot Israil dokoyu do mantad id pogialatan di tulun dot Israil do suwai, om gisom do koino-ino kou do minsomok dau, om kapaganu-anu do hiri'd Kiim dau, om kakaraja' om kopogobi-obi' di tulun dot Israil? 10 Pinusou ko nogi' kopio'd Tuhan diti oi Kora, om koinsanai di tulun do Liwi di suwai --- om pokionuon po daa'ddi dokoyu dot osiliu kou dot imam! 11 Soira' nopod mogod-togod kou do sumaap di Harun, om otopot nopo kopio, oi Kora, om Tuhan i' o saapon nu, om saapon di tulun di tuminanud diya',” ka. 12 Om ponuhu' no i Musa do mongoi pomolohou di Datan om i Abiram, nga' boros ka diyolo', “A' i' iyahai mongoi! 13 A' po tuu ula' do pinosoliwan nu iyahai do mantad hilo'd tana' do Masir dit oluhub, do ngoyon no patayo' do hiti'd tana' do kowotuan? Om baino' nodti om pakaanak-anakon nu po daa iyahai? 14 Atalang no kopio dot a' ko i' pinoporikot dahai dot id tana' dit oluhub, om aiso' o tumo om kabun dot anggur dot asanganu dahai, om akalan nu po daa'ddi iyahai do baino'. A' i' iyahai mongoi!” ka diyolo'. 15 Om kotogod noddi kopio i Musa, om boros ka dau dot id Tuhan, “Oi Tuhan, kada' romito' i porsombahan dot igitan do tulun diti. A' oku i' nokowonsoi'd sala' dot id tongoiso' piya diyolo'; songinan-nginan piya o kaladai nga' aiso' i' o naanu ku do mantad id diyolo',” ka. 16 Om boros kaddi di Musa dot id di Kora, “Rumikot nod suab do hilo'd Kiim do Tuhan do miwoyo' di 250 o tulun do sumokodung diya'. Om i Harun nga' hilo' nogi'. 17 Om mositi' nod sorompori-pori kou'd migit do talam di poiyanan do tapui, om suangan nod kominyan om patahakon nogindo iri do hiri'd sakai di pananaraban do porsombahan,” ka dau. 18 Om sompori-pori nopoddi i tulun do minongoi panganu di talam di poiyanan do tapui, om suangai no diyolo'd popou, om kinuwaan do kominyan. Om ingkakat noddi iyolo' do hiri'd wawayaan di Kiim dot id talad di Musa om i Harun. 19 Om timungo' ngai' no di Kora o koinsanai di tulun, om ingkakat no iyolo' do potimbaba' di Musa om i Harun do hiri'd wawayaan di Kiim do Tuhan. Om sigog iddi do kokito di tulun i tulinau do koropohon do Tuhan di kosorong tomod. 20 Om boros kaddi do Tuhan dot id di Musa om id di Harun, 21 “Insodu' kou do mantad diti tulun, tu' dinondo nod raagon ku iyolo',” ka dau. 22 Nga' otud no iyo Musa di Harun do tuminuku' om boro-boros nod poingkaa, “Oi Kinorohingan, iya' no i manahak do koposion do koinsanai di songimpasi. Ondung kowonsoi'd dusa o tiso' o tulun, om otogod ko no tuu'ndo dot oinsanan o tulun?” ka diyolo'. 23 Om boros kad Tuhan dot id di Musa, 24 “Suhuo' ilo tulun dot ogumu' do minsodu' dilo kiim di Kora, om i Datan om i Abiram,” ka. 25 Om ongoi noddi i Musa do mogiwoyo-woyo' di piro-piro boyoon dot Israil do hiri'd kinoiyonon di Datan om i Abiram. 26 Om boros kad Musa dot id tulun dot Israil, “Insodu' kou no do mantad id kiim diti tulun dot angaraat, om kada' kou ongoi kama' do nunu nopo i diyolo'd songonuon. Om ondung a' kou mumboyo', om apatai kou no do kotonggoi diyolo', dot obungou di dusa diyolo',” ka. 27 Om insodu' no i tulun dot Israil di kiim di Kora, om i Datan om i Abiram. Om nokosoliwan no i Datan om i Abiram di kiim diyolo' om poingkakat no iyolo', dot iyolo' ngai' di sawo om i tangaanak diyolo' do hiri'd wawayaan di kiim diyolo'. 28 Om boros kaddi di Musa dot id tulun dit ogumu', “Iti no o koilaan dokoyu do Tuhan o minonuhu' doho' do momonsoi'd koinsanai'ddi, om okon i' ko' mantad id doho'd korohian. 29 Ondung kapatai-patayo' toomod diti tulun, om aiso' no o nunu-nunu do hukuman do mantad id Kinorohingan, om a' oku nod Tuhan sinuhu'. 30 Nga' ondung wonsoyon do Tuhan it a' po dokoyu norongou-rongou do mantad di gulu, om opitas no iti tana' do monolon diyolo' om koinsanai di diyolo'd songonuon, om gisom do miyau iyolo' do kolintuhun do hilo'd kinoiyonon do tulun di napatai, om oilaan no dokoyu do suminaap do Tuhan o tulun diti,” ka dau. 31 Om maha' di nopupusan no kopio di Musa i boros dau, om pigirang no i tana' do hiri'd ningkokoton diyo Datan di Abiram, do gisom do nopipitas, 32 om korudsu' nopoddi iyolo' do mogitonggoi-tonggoi di sompiiyon diyolo' om koinsanai di tulun di suminokodung di Kora om iri ngai' i dapu' diyolo'. 33 Om karatu' noddi iyolo' di poimiyau po iyolo' do hiri'd kinoiyonon do tulun do napatai do mitonggoi do koinsanai di dapu' diyolo'. Om pilontop no kawagu i tana' om a' noddi iyolo' hino. 34 Om oinsanan nopo i tulun dot Israil di hino'd hiri do minogidu' do tontok di norongou diyolo' i giniakan di tulun diri. Om songgiak-giak po i tulun dot Israil do poingkaa, “Panangkus toko'd mogidu'! Tu' nunu koilo-ilo nga' tolonon toko' nopo iyati' diti tana'!” ka. 35 Om porikoto' pod Tuhan o tapui do molob-ngolob do minonorob di 250 o tulun di minongoi papatahak di kominyan.
Talam do Poiyanan do Tapui
36 Om boros kaddi do Tuhan dot id di Musa, 37 “Suhuon no i Iliasar i tanak di Harun diri, do posuwai-suwai di talam do tambaga' di poiyanan do tapui, do mantad id kinasaraban di tulun diri. Om potiason no i tohun di mantad id talam do poiyanan do tapui'ddi dot id kinoiyonon do suwai, tu' iri nopo pinoiyanan do tapui'ddi om olidang. 38 Tu' nongolidangan no iri do tontok di nongoi patahako' do hiri'd sakai di pananaraban do porsombahan di don Tuhan. Om ngoyon no i talam do poiyanan do tapui'ddi do mantad id tulun di nohukuman do nobungou di dusa diyolo'. Om tantanon no dokoyu iri do gisom id onipis, om wonsoyon indo do ponompon di pananaraban do porsombahan. Om iri no ot osiliu do popoinsan di tulun dot Israil,” ka dau. 39 Om ngoyo' ngai' no di Iliasar i talam do poiyanan do tapui'ddi om ponuhu' no iyau'd tulun do manantan diri do gisom dot ongonipis no, om wonsoyon nogindo do ponompon di pananaraban do porsombahan. 40 Om iri nondo o popoinsan di tulun dot Israil, do suwai nopo ko' i sinakagon di Harun, om iso' pod tulun nga' aiso' no o koino-ino do mongoi podtutud do kominyan dot id Tuhan, do hiri'd pananaraban do porsombahan. Om isai nopo o tulun do tumolibamban dot oturan diri om apatai no do miagal di Kora om i tulun di suminokodung dau. Om wonsoyo' ngai' nopoddi o miagal diri do tumanud di pinonuhuan do Tuhan dot id di Iliasar do pinolombus di Musa.
Pinasi di Harun i Tulun dot Israil
41 Om tadau noddi kawagu om oinsanan nopo i tulun dot otogod diyo Musa di Harun. Boros ka diyolo', “Pinatai dokoyu o piro-piro o tulun di songonuon do Tuhan,” ka. 42 Om maha' di nokotimung ngai' no iyolo' do sumaap daa di Musa om i Harun, om koili no iyolo' do hiri'd Kiim do Tuhan. Om kokito no diyolo' o haun do luminikup di Kiim, om imbulai no i tulinau do mantad hiri'd Kiim do Koropohon do Tuhan di kosorong tomod. 43 Om ongoi no iyo Musa di Harun ingkakat do hiri'd dotimbabaan di Kiim, 44 om boro-boros no o Tuhan dot id di Musa do poingkaa, 45 “Insodu' kou do mantad id tulun diti. Tu' hilo' nod kinoiyonon diyolo' o pamatayan ku diyolo'!” ka dau. Om otud goduwo nopo iyolo' do tuminuku'. 46 Om boros kaddi di Musa dot id di Harun, “Ngoyo' kopio i talam do poiyanan nu'd tapui, om suangan nod popou do mantad hilo'd pananaraban do porsombahan, om kuwaan nod kominyan dot ongokooro' o hiri'd sakai di popou. Om lomusan nod mongigit iri do mongoi'd hilo'd tulun dot ogumu' om wonsoyon no i natantu' mantad do wonsoyon do pongidu' di dusa diyolo'. Lomusan no! Tu' nokourabus no o kototogod do Tuhan om nokotimpuun nod mogkoroliu o toruol di rumoliu,” ka dau. 47 Om wonsoyo' nod i Harun o miagal di pinoboros di Musa. Ngoyo' no dau i talam do poiyanan dau'd tapui, om panangkus no do minongoi'd hiri'd tanga' di tulun dot ogumu' di pointimung. Om soira' di nokito dau do nokotimpuun no i kosusaan, om pasakayo' no dau di popou'd tapui i kominyan, om wonsoyo' no dau i natantu' mantad do wonsoyon do pongidu' do dusa di tulun dot ogumu'. 48 Om kotingkod noddi i kosusaan diri, gisom do poingkakat diri i Harun do hiri'd tanga' di tulun di poimpasi om i tulun di nangapatai. 49 Om iri nopo napatai do maso'ddi om 14,700 o tulun, om a' po kohompit i tulun di napatai do tontok di suminaap i Kora. 50 Om kotingkod poddi i kosusaan diri, om guli' nogi' i Harun do hiri'd di Musa do hiri'd wawayaan di Kiim do Tuhan.
I Sukud di Harun
1 Om boros kad Tuhan dot id di Musa, 2 “Suhuon no i tulun dot Israil do papatahak dot id diya' do hopod om duwo o sukud; dot iso' o sukud do mantad id pointikid-tikid di boyoon do payat. Om tulison no o ngaran di piro-piro boyoon do hiri'd sukud diyolo'. 3 Om tulison nogindo o ngaran di Harun do hiri'd sukud di mamawakil do payat di Liwi. Om mositi' nod iso' o sukud do mantad id pointikid-tikid di boyoon do payat. 4 Om igitan ngai' no i sukud diri do hiri'd Kiim ku om poilihon no do hiri'd dotimbabaan di Kaban do Tumpongo. Om hiri no o koiyonon ku do sumolowot diya'. 5 Om iri nopondo i sukud do tulun di pilion ku om momutolid. Om iti no o ralan ku do moningkod di boros do tulun dot a' otingkod-tingkod do sontogod-togod do sumaap diya',” ka dau. 6 Om poboroso' no di Musa iri dot id tulun dot Israil. Om sompori-pori nopoddi i boyoon diyolo' do pinapatahak dot iso' o sukud dot id di Musa; dot iso' o sukud do mantad id pointikid-tikid do payat. Om oinsanan nopo nga' hopod om duwo o sukud, om poirolot noddi i di Harun do sukud. 7 Om igitai ngai' nod Musa i sukud diri do suminuang di Kiim do Tuhan, om poiliho' no dau do hiri'd dotimbabaan di Kaban do Tumpongo. 8 Om tadau noddi kawagu, di suminuang i Musa di Kiim, om kokito no dau do nokopomutolid no i sukud di Harun, i mamawakil do payat do Liwi. Om nokopongusak no i sukud om noungkaya' i tusak, om kitua' do tua' do kayu ketapang di noonsok no! 9 Om ngoyo' ngai' no di Musa i sukud om pokitanai no dau di tulun dot Israil. Om kokito ngai' no iyolo' di nosiliu'ddi, om ngoyo' noddi di piro-piro boyoon i sukud diyolo'. 10 Om boro-boros noddi o Tuhan dot id di Musa do poingkaa, “Ngoyo' kawagu poiliho' ino sukud di Harun do hilo'd dotimbabaan di Kaban do Tumpongo. Om poopion nopo i sukud diri do maan do popoinsan di tulun dot Israil dit obinsaap, om ondung a' iyolo' tumingkod do sontogod-togod om apatai no moti' iyolo',” ka dau. 11 Om wonsoyo' nod Musa i pinonuhuan do Tuhan diri. 12 Om boros ka di tulun dot Israil dot id di Musa, “Iyo nopoddi om obungou no iyahai! 13 Ondung a' milo dot a' apatai o tulun di koinsomok dilo Kiim do Tuhan, om komoyon nopoddi nga' aiso' no o pokukurayan dahai!” ka diyolo'.
Karaja' dit Imam om i Tulun do Liwi
1 Om boros kad Tuhan dot id di Harun, “Iya' nopo oi Harun, om i tangaanak nu, om i tulun do Liwi, om mositi' nod mamabo do kootuson di kasalaan do nunu nopo o paganu-anu do hilo'd Kiim ku, nga' iya' noo om i tangaanak nu o mamabo do kootuson do kasalaan di karaja' di dong imam. 2 Ngoyo' no angatai'd hiti i koobpinayan nu, i payat ngai' do Liwi, do kumoruhang diya'd kumaraja' om monguhup diya' do daamot nu om i tangaanak nu do kumaraja' do hiri'd Kiim ku. 3 Om mositi' nod wonsoyon di payat do Liwi it apatut diyolo'd wonsoyon dot id dokoyu om wonsoyon diyolo' i karaja' diyolo' do hiri'd Kiim, nga' a' i' iyolo' koino-ino do mongoi igit di konunu-nunuan dit ongolidang do hiri'd Bilik dit Olidang ko' iri po hiri'd pananaraban do porsombahan. Tu' soira' nopo do koigit iyolo'ddi, om apatai no iyolo' om iya' nga' kotonggoi nod apatai. 4 Om mositi' nod kumoruhang iyolo' diya' do kumaraja' om momonsoi di karaja' diyolo' do maganu-anu do hiri'd Kiim ku, nga' isai nopo it a' noonuan do kosorupayan do momonsoi do karaja'ddi om a' no koino-ino do kumoruhang diya' do kumaraja'. 5 Iya' noo, oi Harun, om i tangaanak nu, ot apatut do momonsoi di karaja' do hiri'd Bilik dit Olidang om hiri'd pananaraban do porsombahan, om a' oku indo otogod di tulun dot Israil. 6 Iyoho' no i minomili' di tulun do Liwi, i koobpinayan nu'ddi do mantad id pogialatan do tulun dot Israil do maan ku do pomuhawang diya'. Om nokotobilang no iyolo' do sumiliu'd songonuon ku, om milo no iyolo' do momonsoi'd karaja' diyolo' do hiti'd suang do Kiim ku. 7 Nga' iya' noo om i tangaanak nu o koino-ino do momonsoi do karaja' di dong imam, do nunu nopo i kagait di pananaraban do porsombahan om i hiri'd Bilik dit Olidang Kopio. Om iri no ot apatut nu do wonsoyon, tu' nopuhawangan ku no iyokoyu do karaja' do dong imam. Om pointikid-tikid do tulun dit aiso' o kosorupayan do miagal diri do koinsomok di konunu-nunuan dit olidang diri om hukuman nod kapatayon,” ka dau.
It Aanu dot Imam
8 Om boros kad Tuhan dot id di Harun, “Soro-sorohon no, do koinsanai di porsombahan di pinotobilang do maan do doho', om it a' sorobon do maan do porsombahan, om iya' no o kaanu. Om iri no o diya'd aanu kasai' do gisom dot alaid. Om iri no o patahakon ku diya' om i sinakagon nu. 9 Om mantad nopo di piro-piro porsombahan dit olidang kopio dit a' sorobon do hiri'd pananaraban do porsombahan, om iti ngai' no o diya' dot aanu: i porsombahan do gandum, om i porsombahan do pangampun do dusa, om i porsombahan do poningolon. Om nunu nopo i pinatahak dot id doho' do maan do porsombahan dit olidang, om iya' no om i tangaanak nu o kaanu. 10 Om pokolidangon no iri, om akanon no dot id kinoiyonon dit olidang. Om tongokusai noo o koino-ino do mangakan diri. 11 Om suwai no ko' iri, om koinsanai di porsombahan do suwai di pinotobilang, i porsombahan do tulun dot Israil dot id doho', om iya' no o kaanu'ddi. Om iri no o patahakon ku diya' om i tangaanak nu'd tongokusai om i tangaanak nu'd tongoondu'. Om iyo noddi o toturan do gisom dot alaid. Om isai nopo it id suang do sompiiyon nu dit olidang dot id pagantangan do tugama' om koino-ino nod mangakan diri. 12 Om iya' no ot onuan ngai' ku di hasil do tana' dit id gulu dit ongosonong kopio, i ngoyon di tulun dot Israil patahako' dot id doho' do monikid toun: i tumau do saitun, om i waig dot anggur, om i gandum. 13 Koinsanai'ddi om diya' ngai' no. Om isai nopo it id suang do sompiiyon nu dit olidang dot id pagantangan do tugama' om koino-ino nod mangakan diri. 14 Om nunu nopo i hilo'd tana' dot Israil di pinotobilang do maan do doho' dot aiso' o pinaantakan, om iyokoyu no o kaanu. 15 Om pointikid-tikid do tanak ko' tayam-tayam dit id gulu kosusu, do patahakon di tulun dot Israil dot id doho', om iyokoyu no o kaanu. Nga' mositi' nod romiton dokoyu o tusin di pamalapus do pointikid-tikid do tanak dit id gulu kosusu om i pamalapus do pointikid-tikid do tayam-tayam di sosomu' dit id gulu kosusu. 16 Om tangaanak nopo nga' mositi' nod lopusan do tontok di sombulan nogi' o tumur diyolo'. Om gatang nopo di natantu' do maan do pamalapus om limo o tusin do pirok, do tumanud di gatang do natantu' mantad. 17 Nga' sapi' nopo ko' dumba' ko' kambing dit id gulu kosusu om a' no koino-ino do lopusan. Iri nopo tayam-tayam diri om doho' no kopio om mositi' nod patahakon. Poiyason no i raha' di tayam-tayam diri do hiri'd pananaraban do porsombahan om sorobon no i lunok do maan do porsombahan do taakanon. Om iri no tawau di porsombahan diri o kasanangan ku. 18 Iyokoyu no o kaanu do tonsi di tayam-tayam do miagal di porsombahan di pinotobilang do maan do doho' tu' iyokoyu o kaanu di kangkab om i gakod do wanan di tayam-tayam diri. 19 Om iya' no om i tangaanak nu'd tongokusai om tongoondu' ot onuan ku do koinsanai di porsombahan di pinotobilang, i patahakon di tulun dot Israil dot id doho', do gisom dot alaid. Om iti no o tiso' o popogirot do batos, om it a' no milo do pututon dot id pialatan to om i sinakagon nu,” ka dau. 20 Om boros ka kawagu'd Tuhan dot id di Harun, “Iyokoyu nopo om a' no kaanu do nunu-nunu do maan do tungkusan. Om aiso' i' o tongosongkoiyonon piya do tana' do hilo'd pomogunan di pinabatos ku'ddi dot asanganu dokoyu. Tu' iyoho' no, i Tuhan, ot osiliu do tungkusan dokoyu,” ka dau.
It Aanu di Tulun do Liwi
21 Om boros kad Tuhan dot id di Harun, “Koinsanai di sompihopod do patahakon do tulun dot Israil dot id doho' om patahakon ngai' ku no dot id tulun do Liwi. Om iti no o ponokogadsi' diyolo' do maganu-anu do hiri'd Kiim ku. 22 Om iri nopo tulun dot Israil di suwai om a' no koino-ino do mongoi insomok di Kiim, om a' i' iyolo' koporikot do hukuman do kapatayon dot id tinan diyolo'. 23 Mantad nopod baino' om iri no tulun do Liwi o koino-ino do maganu-anu do hilo'd Kiim ku om i mongilo-ilo do karaja'd hilo'. Om iti nogi' o toturan do tonudon di sinakagon nu do gisom dot alaid. Om aiso' no ot aanu di tulun do Liwi do maan do tungkusan do hilo'd Israil, 24 tu' iri nopo sumiliu do tungkusan diyolo' om koinsanai di sompihopod di patahakon do tulun dot Israil dot id doho' do maan do porsombahan di pinotobilang do maan do doho'. Om iri no o kapabarasan ku dot id tulun do Liwi, dot iyolo' nopo om a' i' kaanu do maan do tungkusan do hilo'd Israil,” ka dau.
Porsombahan di Sompihopod do Mantad id Tulun do Liwi
25 Om suhuo' nod Tuhan i Musa 26 do popolombus diti ponuhuan dot id tulun do Liwi do poingkaa, “Soira' nopo do karamit kou di porsombahan do sompihopod do patahakon di tulun dot Israil dot id dokoyu, tu' iri no i patahakon do Tuhan dot id dokoyu do dokoyu'd songonuon, om mositi' nod patahakon kawagu dokoyu dot id Tuhan o sompihopod do mantad diri do maan do porsombahan di potobilangon. 27 Om iti nopo porsombahan di potobilangon diti nga' paagalon nopo di porsombahan do gandum do wagu, om i porsombahan do waig dot anggur do wagu do mantad id songulun o gompongumo. 28 Om iyo nodti o ralan dokoyu do papatahak do porsombahan di potobilangon do maan do don Tuhan, do mantad id toinsanan di porsombahan do sompihopod dit aramit dokoyu do mantad id tulun dot Israil. Om iti nopo porsombahan do pinotobilang diti do maan do dong Kinorohingan nga' mositi' nod patahakon dokoyu di Harun. 29 Patahakon no it osonong kopio do mantad id koinsanai dit aramit dokoyu. 30 Om katahak pondo dokoyu it osonong kopio'ddi, om koino-ino kou nogindo do manganu di noolu', do miagal di gompongumo tu' iri it oolu' di patahakon dau ot onuon dau. 31 Om iri nopo i noolu', om koino-ino i' dokoyu om i sompiiyon dokoyu dot akanon do hinonggo nopo o pangakanan. Tu' iri no o ponokogadsi' dokoyu do maganu-anu do hiri'd Kiim ku. 32 A' kou i' kasala' do mangakan piya'ddi, ondung nakatahak dokoyu it osonong kopio dot id Tuhan. Nga' kada' nogi' kopio dokoyu sosomuo' i porsombahan do tulun dot Israil dit ongolidang diri do ponosomu' nopo om i sangkaakan-akan nopo do mantad id porsombahan diri om a' po nakatahak dot id doho' it osonong kopio. Ondung tolibambanan dokoyu o toturan diti, om hukuman kou nod kapatayon,” ka dau.
Tauu do Mantad id Kinasaraban di Sapi' dot Aragang
1 Om suhuo' nod Tuhan i Musa om i Harun 2 do papatahak diti piro-piro o toturan dot id tulun dot Israil: Manganu nod songinan o sapi' dot aragang dit aiso' o bohiton do tinan om it a' po noumbalan do nasakayan do ginandar. 3 Patahakon no o sapi'ddi dot id di Iliasar, it Imam diri. Om mositi' nod posoliwanon di kokiiman i sapi' om sumbolion nogindo dot id toguang di Iliasar. 4 Om mositi' nod manu i Iliasar dot ongokooro' do raha' di sapi' om powowoson nogindo dot inturu' do potimbaba' ponong id Kiim ku. 5 Om mositi' nod insanan do monorob i sapi'ddi, do potonggoyon i kulit, om i tonsi, om i raha', om i suang do tian, do hiri'd toguang dit imam. 6 Om mongoi nogindo panganu it imam dot ongokooro' di kayu sedar, om songguas o sakot do roitan do hisop, om sampatod o tali dot aragang, om posuboon ngai' nogindo iri do hiri'd tapui. 7 Om owonsoi ngai' pondo iri om pupuan nogi' dit imam o pakayan dau om tuntugan do waig o tinan dau. Om koino-ino nogindo iyau do sumuang di kokiiman; nga' gisom nopod sosodopon om poinghompit po iyau do tulun di sosomu'. 8 Om i tulun di minonorob di sapi' nga' mositi' no do pupuan dau i pakayan dau om tuntugan do waig o tinan dau; om iyau nga' sosomu' po kasai' do gisom do sosodopon. 9 Om ngoyon nogindo do songulun dit olidang dot id pagantangan do tugama' timungo' i tauu di sapi'ddi om poilihon dot id kinoiyonon dit olidang dot id pagantangan do tugama' do hiri'd soliwan di kokiiman. Om hiri no o poilihan di tauu om oongoi i' di tulun dot Israil do tontok do posodia'd waig do maan do pomolidang. Om iri nopo wonsoyon di natantu' mantad diri nga' maan do pongidu'd dusa. 10 Om iri nopo tulun di minonimung do tauu di sapi'ddi nga' mositi' nod pupuan dau o pakayan dau, nga' tulun po kasai' iyau'd sosomu' do gisom dot orikot o sosodopon. Om iyo no kasai'ddi o toturan do gisom dot alaid, do tonudon di tulun dot Israil om i tulun do bansa'd suwai di poingiyon dot id rolot diyolo'.
I Koigit do Rata'
11 Isai nopo o koigit do rata' om sosomu' no do solinaid do turu' o tadau. 12 Om tontok nopo di tadau'd kotolu om tadau'd koturu' om mositi' nod papaharo o tulun diri do kopomolidangan do tinan dot i waig do pomolidang kasai' o pakayon; om olidang nogindo iyau dot id pagatangan do tugama'. Nga' ondung a' iyau momolidang do tinan dau di tadau'd kotolu om tadau'd koturu', om ososomu' kasai' po iyau. 13 Isai nopo o koigit do rata' om a' no momolidang do tinan, om tulun no iyau do sosomu', tu' a' po iyau notuntugan di waig do pomolidang. Om koponosomu' iyau di Kiim do Tuhan, om iri no ot a' dau kohompit- hompit di tulun do songonuon do Kinorohingan. 14 Ondung haro o tulun dot apatai dot id suang do kiim, om isai nopo o tulun dot id suang di kiim do tontok di minatai i tulun diri, ko' i kosuang di kiim diri, om ososomu' no do solinaid do turu' o tadau. 15 Om koinsanai di kakanan om poriuk dit aiso' o sompon do hiri'd suang di kiim diri nga' kohompit nod sosomu'. 16 Ondung haro o tulun do koigit do rata'd tulun di pinatai'd tulun ko' i kinapatai-patayo' toomod do hilo'd dumo, ko' ondung haro o tulun do koigit do lobong ko' tulang do tulun do napatai, om sosomu' no o tulun diri do solinaid do turu' o tadau. 17 Om pomolidang nopod tinan do mantad id kososomu'ddi om mositi' nod mongoi panganu dot ongokuuri' di tauu di sapi' dot aragang di sinorob do maan do pangampun do dusa om posuangon nogindo i tauu'ddi dot id iso' o poriuk, om tunguhon nogindo iri do waig di wagu kaanu. 18 Pasal nopo di hal do koiso'ddi, iri no tu' tontok nopo do haro o tulun dot apatai dot id suang do kiim, om mositi' nod mongoi panganu o songulun dit olidang dot id pagantangan do tugama' do songguas o sakot di roitan do hisop, om poobugon iri do hiri'd waig, om wawasan nogindo i kiim om koinsanai dit id suang di kiim, om iri nogi' i tulun di hiri'd kiim. Om pasal no di hal do koduwo, iri no tu' soira' nopo do haro o tulun do koigit do rata', ko' lobong ko' tulang do tulun do napatai, om mositi' nod i tulun dit olidang dot id pagantangan do tugama' o momowowos di tulun di sosomu'ddi. 19 Om tontok nopondo do tadau'd kotolu om tadau'd koturu', om mositi' nod wawasan do tulun dit olidang dot id pagantangan do tugama' i tulun di maso pod sosomu'ddi. Om koturu' pondod tadau om opongo nogi' o kopomolidangan do tulun diri. Om pupuan nogindo di tulun o pakayan dau om modsu', om olidang nondo iyau dot otonob o tadau. 20 Isai nopo it ososomu' nga' a' indo papaharo do kopomolidangan do tinan, om sosomu' kasai' no iyau tu' a' po notuntugan di waig do pomolidang. Om koponosomu' po iyau di Kiim do Tuhan, om a' no iyau kohompit do tulun di songonuon do Kinorohingan. 21 Om mositi' nod tonudon kasai' dokoyu o toturan diti do gisom dot alaid. Om iri tulun di popowowos di waig do pomolidang diri nga' mositi' nod pupuan dau o pakayan dau. Om isai nopo o koigit do waig diri om sosomu' no do gisom do sosodopon. 22 Om nunu nopo o konunu-nunuan dot oigitan do tulun di sosomu' om kotonggoi nod sosomu', om i tulun do suwai di kakabai di tulun diri nga' sosomu' no do gisom do sosodopon.
I Nongosiliu do Hilo'd Kadis
1 Tontok di tulan do koiso' om korikot ngai' no i tulun dot Israil do hilo'd tana' do Sin om powonsoyo' no diyolo' o kiim diyolo' do hilo'd Kadis. Om hilo' no o kinapatayon di Miriam om hilo' o pinamalabangan dau.2|60|HK59C| Tana' do kowotuan|20.1 2 Om hiri nopod kinoiyonon di pinawansayan diyolo'd kiim nga' aiso' o waig. Om rikot ngai' no i tulun do minongoi gurumung diyo Musa di Harun do 3 mikuwo'd sontogod-togod om mimboros do poingkaa, “Songkuro daa o kosonongo' do napatai iyahai do hilo'd dotimbabaan dilo Kiim do Tuhan do nokotonggoi di tobpinai dahai dit iso-iso' o bansa'. 4 Nokuro tu' nangatan nu iyahai do minongoi'd hiti'd tana' do kowotuan? Mongoi no daa patai do hiti do mogitonggoi-tonggoi diti tayam-tayam dahai. 5 Nunu kopio o kinoposoliwanan nu dahai do mantad hilo'd Masir dot id kinoiyonon dot oinggorit o pinangangatan, om it a' i' milo do tanaman do nunu- nunu? Aiso' i' o gandum do hiti, om aiso' o tua' dot ara toi ko' tua' dot anggur, om tua' do delima. Om waig piya dot inumon nga' aiso' i'!” ka diyolo'. 6 Om insodu' noddi i Musa om i Harun do mantad id tulun dot ogumu'ddi om ongoi no iyolo' ingkakat do hiri'd wawayaan di Kiim do Tuhan. Om tuku' no iyolo' do gisom do nokotungub do hiri'd tana' o rabas diyolo', om intalang noddi i tulinau do koropohon do Tuhan di kosorong tomod dot id diyolo'. 7 Om boros kad Tuhan dot id di Musa, 8 “Ngoyo' i sukud di hilo'd dotimbabaan di Kaban do Tumpongo om timungon nogindo dokoyu di Harun i tulun dot ogumu'. Om hiri nondod dotoguangan ngai' diyolo' do moro-boros ko dot id tontolob dilo hoodi', om sumoliwan nondo o waig do mantad id tontolob dilo' do tinumon di tulun dot ogumu' om tinumon di tayam-tayam diyolo',” ka. 9 Om ngoyo' no di Musa i sukud diri, do tuminanud di pinonuhuan do Tuhan. 10 Om timungo' no diyo Musa di Harun o koinsanai di tulun do hiri'd dotimbabaan di tontolob. Om boros kad Musa, “Pokinongou ngai' kou no, iyokoyu it obinsaap! Minog no tuu kopio do posoliwan iyahai'd waig do mantad id tontolob diti do maan dokoyu?” ka. 11 Om pobilido' nod i Musa i sukud om pobobogo' no dau di tontolob dot induwo pobobogo'. Om luyung nopo o waig dot agayo tomod om ologod do mantad hiri'd tontolob, gisom do nongkoinum ngai' i tulun om i tayam-tayam diyolo'. 12 Nga' togodo' nod Tuhan i Musa om i Harun. Om boros kad Tuhan, “A' kou minonongkuyaan kopio doho' do popoimbulai do sinundu ku dit olidang dot id toguang diti tulun dot Israil, om iri no ot a' dokoyu koina-inaan do momoyo' diyolo' do sumuang di pomogunan di pinabatos ku dot id diyolo',” ka dau. 13 Om iyo noddi o nosiliu do hilo'd Moriba. Tu' hilo' no i tulun dot Israil do minimboros do tumogod do Tuhan, om hilo' no o Tuhan do pinopointalang do kolidango' dau dot id bansa'ddi.
A' Pinatalib di Raja' dot Idom i Tulun dot Israil
14 Om ponuhu' no i Musa do piro-piro o tulun do minongoi solowot di raja' dot Idom do tontok di hilo' iyolo'd Kadis. Om boros ka diyolo', “Iti no o habar do mantad id payat dot Israil, i kowori-worisan nu. Om nokoilo ko i' di kosusaan do nokoontok dahai. 15 Iri nopo komolohingan dahai om minongoi do hilo'd Masir om hilo-hilo' noddi iyolo' do minomogun-mogun do solinaid do piro-piro o toun. Nga' ninggorit di tulun do Masir i komolohingan dahai om iyahai nogi' nga' ninggorit i' diyolo', 16 om pomolohou noddi iyahai'd Tuhan do mokitulung dau. Om norongou i' dau i lolohou dahai om porikot noddi iyau dot iso' o moloikat. Om iri no i moloikat diri o minomoyo' dahai do suminoliwan do mantad hilo'd pomogunan do Masir. Om dinondo nopodti om hilo' no iyahai'd Kadis, it iso' o kampung do hilo'd wolit diti pomogunan nu. 17 Om pokionuon daa dahai do pawayaon nu iyahai diti pomogunan nu. Om a' i' iyahai di tayam-tayam dahai sumala' do ralan ko' mongoi pod hiri'd koumaan ko' hiri'd kokobunan dot anggur nu. Om a' iyahai mongoi inum do hiri'd torobong nu. Mamanau nopo iyahai do sumusui di ralan magayo do gisom id kosoliwan iyahai diti pomogunan nu,” ka diyolo'. 18 Nga' boros ka di tulun dot Idom do suminimbar, “A' i' dahai uhang do maya' kou diti pomogunan dahai. Om ondung osonsog kou, om sumoliwan no iyahai do mongoi panangod dokoyu,” ka diyolo'. 19 Om boros ka di tulun dot Israil, “A' i' iyahai tumongkiad di ralan magayo. Om ondung mongoi iyahai inum do waig dokoyu, ko' mongoi inum i tayam-tayam dahai, om bayaran i' dahai. Maya' no toomod iyahai do hiti,” ka diyolo'. 20 Om boros ka kawagu di tulun dot Idom, “A' i' dahai uhang!” ka diyolo'. Om soliwan noddi iyolo' do miwoyo' do soudor dit ongokoris do mongoi panangod di tulun dot Israil. 21 Om poguliai noddi di tulun dot Israil do mongoi pogihum do ralan do suwai tu' mada' i' i tulun dot Idom do pawaya' di tulun dot Israil di pomogunan diyolo'.
Napatai i Harun
22 Om oinsanan nopoddi i tulun dot Israil do tuminongkiad do mantad hilo'd Kadis om korikot no iyolo' do hilo'd Nuluhon do Hor, 23 it id wolit dot Idom. Om hilo' no do minoro-boros o Tuhan dot id di Musa om id di Harun do poingkaa, 24 “A' i' kosuang i Harun di pomogunan di pinabatos ku dot id tulun dot Israil; matai no iyau tu' tuminolibamban kou i' di pinonuhuan ku di hilo'd Moriba. 25 Angatan no i Harun om i Iliasar, i tanak dau do tumakad di Nuluhon do Hor. 26 Om hilo' nopondo om iduwon no i pakayan do dong imam di poimpakai di Harun, om papakayan no iri di Iliasar. Om hilo' no o kapatayon di Harun,” ka dau. 27 Om wonsoyo' nod Musa i pinonuhuan do Tuhan diri. Om takad no i Musa om i Harun om i Iliasar di Nuluhon do Hor dot antang-antangan do koinsanai di tulun. 28 Om iduwo' noddi di Musa i pakayan di Harun di dong imam om papakayai no dau di Iliasar. Om kapatai noddi i Harun do hiri'd timpak di nuluhon diri, om ruhuk no kawagu iyo Musa di Iliasar. 29 Om korongou ngai' noddi i tulun do napatai no i Harun, om pogihadai no diyolo' i Harun do solinaid do tolu nohopod o tadau.
Kamanangan do Suminaap di Tulun do Kanaan
1 Arad nopo nga' ngaran dot iso' o bandar di ponong id salatan do pomogunan do Kanaan. Om soira' di norongou di raja' do bandar diri do maya' i tulun dot Israil di ralan do kawaya' do hilo'd Atarim, om ngoyo' no dau iyolo' songodo' om natanggayan dau'ddi o piro-piro di tulun dot Israil. 2 Om pamatos noddi i tulun dot Israil do mikuwo'd suminumpa'; om boros ka diyolo' dot id Tuhan, “Ondung onuan nu iyahai do kamanangan do sumaap dilo tulun, om patahakon no dahai iyolo' dot id diya' dot aiso' o paantakan do kapatahakan, om potonggoyon ngai' nogi' dahai do patahak ilo bandar diyolo', om patayon nopo kopio dahai iyolo',” ka diyolo'. 3 Om pokinongoho' id Tuhan i pinokianu di tulun dot Israil diri, om tinulung iddi dau iyolo' do mangala' di tulun do Kanaan. Om patayo' no di tulun dot Israil i tulun do Kanaan om raago' ngai' diyolo' i kabandaran diyolo'. Om pungaranai no diyolo' o kinoiyonon diri do Horma.
I Tulanut di Tambaga' do Winonsoi
4 Om tongkiad noddi i tulun dot Israil di Nuluhon do Hor, om susui no iyolo' di ralan do poingkaa do hilo'd Suok dot Akaba, om kaalai i' iyolo' di pomogunan dot Idom. Nga' di nopo di hiri no iyolo'd tanga'd ralan om a' no di tulun dot ogumu' milo'd pususon o ginawo diyolo' do tumogod, 5 gisom do sontogod-togod po iyolo' do Kinorohingan om i Musa. Boros ka diyolo', “Nokuro tu' pinosoliwan nu iyahai do mantad hilo'd Masir do ngoyon no patayo' do hiti'd tana' do kowotuan; hiti nopo om aiso' o takano' om aiso' o waig. Apaasan noddi iyahai diti taakanon dot aiso' o maro-maro!” ka. 6 Om porikatai noddi do Tuhan do tulanut di kapatai o tindukon i tulun dot ogumu'. Om ogumu' tomod diri o tulun dot Israil do notinduk di tulanut. 7 Om ongoi noddi i tulun dot Israil solowot di Musa om boro-boros nod poingkaa, “Nokowonsoi no iyahai'd dusa tu' mogod-togod iyahai'd Tuhan om mogod-togod iyahai diya'. Nga' pokionuo' no kopio'd Tuhan do dinondo do popoggidu' diti tulanut do mantad id dahai,” ka diyolo'. Om sambayangai noddi di Musa i tulun dot ogumu'ddi. 8 Om suhuo' noddi do Tuhan i Musa do momonsoi dot iso' o tulanut do tambaga' o wonsoyon, om poriliton i' iri dot id iso' o kayu di poodsukon. Om pointikid-tikid do tulun dit otinduk do tulanut om montong nopondo di tulanut do tambaga'ddi om olingasan i'! 9 Om pomonsoi no i Musa do tulanut, do tambaga' o winonsoi, om podokoto' no dot id iso' o kayu di pinoodsuk. Om isai nopo o tulun dit otinduk do tulanut om olingasan no do kokito di tulanut do tambaga'ddi.
Mantad Hilo'd Nuluhon do Hor om Gisom do Hilo'd Rantai do Muab
10 Om tilombus nopo i tulun dot Israil do minamanau om powonsoyo' noddi diyolo' o kiim diyolo' do hilo'd bandar dot Obot. 11 Om di nopoddi nokotongkiad iyolo' do kinoiyonon diri, om powonsoyo' no diyolo' o kiim diyolo' do hilo'd kinaraagan dot Abarim, i hilo'd tana' do kowotuan, i ponong id koulayon do mantad id pomogunan do Muab. 12 Om powonsoyo' no diyolo' o kiim diyolo' do hilo'd Rantai do Sirid. 13 Om undaliu po kawagu iyolo' do mantad hilo' om powonsoyo' no diyolo' o kiim diyolo' do ponong id utara di Bawang dot Arnon, i tana' do kowotuan do kogoyoo' nopo om korikot do hilo'd pomogunan do tulun dot Amori. (Iri nopo Bawang dot Arnon om ponokowolit di pomogunan do tulun do Muab om pomogunan di tulun dot Amori.) 14 Om iri no o kinoponulisan do hiri'd “Buuk do Pisangadan di don Tuhan” do poingkaa, “...Kampung Wahib, it id watas do Supa, om i rantai do hilo', om i Bawang dot Arnon, 15 om i songintidong-tidong do hiri'd rantai, i korikot do hilo'd kampung Ar o kogoyoo', om poingkaa do hilo'd wolit di pomogunan do tulun do Muab,” ka. 16 Om mantad nod hilo' om pakayaai po diyolo' do hilo'd Biir, i kinoiyonon di roitan dot Ogumu' o Torobong. Om hilo' no o Tuhan do minoro-boros di Musa do poingkaa, “Suhuo' ilo tulun do tumimung, om onuan ku i' iyolo'd waig,” ka. 17 Om tontok noddi do minodsinding i tulun dot Israil do sinding diti, “Oi torobong dot ogumu', posimpulako' no o waig nu, om romiton i' dahai do mikuwo'd sinding --- 18 I torobong do nukad di tangaanak do raja' om i piro-piro boyoon do bansa', nukad di sukud do pomorinta' om nukad di sukud diyolo',” ka. Om mantad nod hilo'd tana' do kowotuan om pakayaai po diyolo' do hilo'd Matana, 19 om pakayaai po kawagu diyolo' do hilo'd Nahaliol, om pakayaai nogiddi diyolo' do hilo'd Bamot; 20 om pakayaai noddi diyolo' do hilo'd rantai di pomogunan do tulun do Muab, it id dosibaan di Nuluhon do Pisga, i potimbaba' ponong id tana' do kowotuan.
Kamanangan do Suminaap di Raja' Sihon om i Raja' Og
21 Om ponuhu' no i tulun dot Israil do piro-piro o tulun do minongoi solowot di Sihon i raja' do tulun dot Amori, do mongoi popoboros do poingkaa, 22 “Pokionuon daa dahai do pologoson nu iyahai do maya' do pomogunan nu. Om a' i' iyahai di tayam-tayam dahai sumala' di ralan do mongoi do hiri'd koumaan ko' hiri'd kokobunan dot anggur nu, om a' i' iyahai minum do hiri'd torobong nu. Sumusui nopo iyahai di ralan magayo do gisom do kosoliwan iyahai di pomogunan nu,” ka diyolo'. 23 Nga' a' i' di Sihon uhang do maya' i tulun dot Israil di pomogunan dau. Om timungo' no dau i soudor dau om ongoi no do hilo'd Yahas, i hilo'd tana' do kowotuan, om songodo' no diyolo' i tulun dot Israil do hilo'. 24 Nga' id suang nopod pinisangadan diri om ogumu' tomod o soudor dot Amori do napatai di tulun dot Israil. Om kaanu noddi di tulun dot Israil i pomogunan do pisangod, do mintonod di Bawang dot Arnon om gisom do korikot do hilo'd Bawang do Yabok, i ponong id utara, it id wolit do pomogunan do tulun dot Amon, tu' iri nopo pomogunan dot Amon om intirungan i' do tulun dit ongokoris kopio. 25 Om iyo noddi o kinowoyo-woyoo' di tulun dot Israil do minagahau do koinsanai di bandar do tulun dot Amori, om kohompit no o Hisbon om koinsanai di bandar dot ongokooro' di hiri'd posorili', om undorong noddi iyolo' do hilo'. 26 Hisbon nopo nga' bandar dot agayo di Raja' Sihon. Om nokoumbal i' iyau do suminangod di raja' do Muab di gulu po om naahau dau i pomogunan di raja' do Muab do gisom do hilo'd Bawang dot Arnon. 27 Om iri no o kopodsindingan di tulun dit ongoilo do modsinding do poingkaa, “Rikot no do hilo'd Hisbon, i bandar di Raja' Sihon! Siontong iyahai do bandar diri dot owonsoi om otonduli' kawagu. 28 Di nopo di gulu po om haro o nosiliu dot id bandar do Hisbon dot iyo pod tapui i soudor di Sihon do minamanau; om rinaag diyolo' i bandar dot Ar di hilo'd Muab om tinolon diyolo' i konulu-nuluan do poingompus dit Arnon do ponong id sarayo. 29 Oi tulun do Muab, obungou kou no! Iyokoyu i tumuku' dot id tingolig do Kamos, angapatai kou no! Pinologos kou di ponokokinorohingan dokoyu dot osiliu'd tulun dit ouyung do pisangod, nangatanggayan di raja' dot Amori i kongoonduan dokoyu. 30 Nga' baino' nopoddi om nangapatai no i sinakagon diyolo', do poinsusui nopo di ralan do mantad hilo'd Hisbon om korikot do hilo'd Dibon, do mantad pod hilo'd Nasim om gisom do hilo'd Nopa, it id somok do Modiba,” ka. 31 Om undorong no i tulun dot Israil do hiri'd pomogunan di tulun dot Amori. 32 Om ponuhu' nogiddi i Musa do piro-piro tulun do mongoi pogihum do ralan dit osonong do mongoi panangod di bandar do Yasir. Om kaahau no di tulun dot Israil o bandar diri om iri nogi' i kabandaran dit ongokooro' do hiri'd posorili', om uyungo' no diyolo' i tulun dot Amori di poingiyon do hilo'. 33 Om pahamadai nogiddi di tulun dot Israil, om susui no iyolo' di ralan do poingkaa do hilo'd Basan. Om pamanau no i Raja' Og do mantad hilo'd Basan do miwoyo' di soudor dau do mongoi panangod di tulun dot Israil do hilo'd bandar dot Idroi. 34 Om boros kad Tuhan dot id di Musa, “Kada' kooris dau. Tu' onuan ku i' iya' do kamanangan. Om aala' nu i' iyau, om koinsanai di rayat dau om i pomogunan dau. Om wonsoyon no dot id dau o miagal di winonsoi nu dot id di Raja' Sihon, i minomorinta' do hilo'd Hisbon,” ka dau. 35 Om patayo' no di tulun dot Israil i Og, om i tangaanak dau om koinsanai di rayat dau; om aiso' no o pinoolu-olu' diyolo'. Om iyono' noddi diyolo' o pomogunan diri.
Minokitulung i Biliam di Raja' do Muab
1 Om mombus-lombus po kasai' i tulun dot Israil do mamanau om powonsoyo' no diyolo' o kiim diyolo' do hiri'd rantai do Muab, i ponong id koulayon do mantad di Bawang do Yordan, it id hapak do bandar do Yorikou. 2 Om tontok di nokorongou i raja' do Muab, i roitan dot i Balak i tanak di Sipor, do winonsoi di tulun dot Israil dot id tulun dot Amori, om i kogumuo' di tulun dot Israil, 3 om ooris tomod diri iyau om ongooris ngai' i rayat dau. 4 Om boro-boros noddi i tulun do Muab dot id piro-piro boyoon do tulun do Midian do poingkaa, “A' no alaid om araag ngai' nodti tulun dot ogumu' o nunu nopo i hiti'd posorili' toko'; do miagal no di sapi' do mangaii' di butur,” ka. Om ponuhu' noddi i Raja' Balak 5 do tulun do mongoi pomolohou di Biliam i tanak di Bior, i poingiyon do hilo'd bandar do Pitor, it id toning di Bawang dot Iprat, it id watas dot Amau. Om poingkaa o boros di pinobilin di Balak do poboroson di tulun di sinuhu' dau dot id di Biliam, “Nokoilo ko no, do haro moti' o tiso' o bansa'd tulun do nokorikot do mantad hilo'd Masir, om iri nopo tulun diri do baino' nga' nokotongkop no do pomogunan dahai om motiponolod no do pomogunan dahai. 6 Iyolo' nopo om ogumu' i' ko' iyahai. Iyo nopoddi, om uhupan no iyahai do momopol diyolo', om ulan toi' daa om aala' dahai iyolo', om ouyung indo iyolo' do mantad id pomogunan dahai. Tu' oilaan ku i' dot isai nopo o tulun do barakatan nu nga' kaanu no kopio'd barakat. Om iyo nogiddi tu' isai nopo i papalan nu nga' apapalan no kopio o tulun diri,” ka. 7 Om pamanau no i piro-piro boyoon do tulun do Muab om i boyoon do tulun do Midian om minigit iyolo' do pamagadsi' di Biliam om momopol indo iyau di tulun dot Israil. Om pinoboros nogi' diyolo' dot id di Biliam i pinobilin di Raja' Balak. 8 Nga' boros ka di Biliam do suminimbar, “Modop kou po dot insan o tuong do hiti. Suab pondo om poboroson ku nogi' dot id dokoyu ondung nunu ka do poboroson do Tuhan dot id doho',” ka dau. Om undorong ngai' noddi i boyoon do tulun do Muab diri do hiri'd di Biliam. 9 Om rikot noddi o Kinorohingan dot id di Biliam om ponguhot no dau do poingkaa, “Isai ngai' iti tulun do minundorong do hiti'd diya' oi Biliam?” ka. 10 Om boros ka di Biliam do suminimbar, “Iti ngai' nopo tulun diti om mantad hilo'd pomogunan do Muab. Om sinuhu' iyolo' di Raja' Balak do mongoi popoilo doho' 11 do haro o tiso' o bansa'd tulun do nokorikot do mantad hilo'd Masir, om bansa' nopoddi nga' nokotongkop no do pomogunan diyolo'. Om suhuon oku'ddi di Raja' Balak do momopol do bansa'ddi do mogobi' dau. Om aala' indo dau om ouyung dau iyolo' do mantad id pomogunan dau,” ka dau. 12 Nga' boros kad Kinorohingan dot id di Biliam, “Kada' nogi' kopio ongoi tanud dilo tulun, om kada' papalai i tulun dot Israil, tu' iyolo' nopo moti' om nabarakatan ku no,” ka dau. 13 Om kosuabon noddi, om ongoi no boro-boros i Biliam di tulun di sinuhu' di Raja' Balak, boros ka dau, “Uli' kou nogi', tu' mada' i' o Tuhan do mongoi oku tanud dokoyu,” ka dau. 14 Om guli' noddi iyolo' dot id di Balak om posunudo' no diyolo' dot id dau dot a' i' nakasaga' i Biliam do tuminanud diyolo'. 15 Om ponuhu' po kawagu i Balak do piro-piro o boyoon dot ogumu-gumu' om angasawa-sawat o pangkat ko' it id gulu. 16 Om ongoi noddi iyolo' do hiri'd di Biliam do pinoposunud diti boros di Balak do poingkaa, “Pokionuon ku no daa kopio do mongoi ko do hiti'd doho'! 17 Gumuon ku i' o pamagadsi' ku diya', om nunu nopo o ponuhuan nu doho' nga' wonsoyon ku i'. Rumikot no kopio om papalan i' doho' i bansa'd tulun diri,” ka. 18 Nga' boros kad i Biliam do suminimbar, “Mulong piya do patahakon di Balak doho' o koinsanai do pirok om tamas di hilo'd walai dau, nga' a' oku i' milo do tumolibamban do boros do Tuhan i Kinorohingan di tukuon ku, do mulong piya do hal dit ongokooro'. 19 Nga' odop kou pod hiti do miagal di winonsoi di tulun di sinuhu' dit id gulu, om oilaan ku i' ondung haro o suwai do poboroson do Tuhan dot id doho',” ka dau. 20 Om rikot noddi o Kinorohingan dot id di Biliam do totuong diri, om boro-boros nod poingkaa, “Ondung mongoi pangangat diya' o nokorikatan diti tulun do hiti, om mogopi-opi' nogi' om tumanud i' diyolo'. Nga' iri po tu' nunu nopo i ponuhuan ku diya' om iri no o wonsoyon nu,” ka dau. 21 Om kosuabon noddi om pakalai nod i Biliam i kaladai dau, om ongoi no iyau tanud di boyoon do tulun do Muab.
I Biliam om i Kaladai Dau
22 Om otogod diri o Tuhan tu' minongoi i' i Biliam tanud diyolo'. Om tontok di poinsakai no i Biliam di kaladai dau, do minitanud di duwo o susuhuon dau, om ongoi no ingkakat o moloikat do Tuhan do hiri'd tanga' di ralan do mangantob di Biliam. 23 Om kokito nopo di kaladai i moloikat do poingkakat do hiri do kiinigit do gayang, om lisang no i kaladai om pakayaai no do hiri'd koumaan. Om bobogo' no di Biliam i kaladai dau, om gayato' no kawagu dau do tumorunung di ralan. 24 Nga' ongoi no kawagu i moloikat do Tuhan ingkakat do hiri'd ralan dit okikip, i hiri'd piolitan do duwo o kabun dot anggur, i nolig do watu o miampaping. 25 Om kokito nopo di kaladai i moloikat do Tuhan, nga' impit nopo i kaladai do hiri'd tolig do watu, om kokisas noddi di watu o gakod di Biliam. Om bobogo' noddi kawagu di Biliam i kaladai dau. 26 Om sogulu po kawagu i moloikat do Tuhan, om ongoi no ingkakat do hiri'd ralan dit okikip no kopio, it aiso' noo o wayaan do magalai dot id wanan ko' id gibang. 27 Tontok nopoddi, om kokito nopo di kaladai i moloikat do Tuhan, nga' gupu' nopo i kaladai. Nga' a' noddi di Biliam nopusus o ginawo dau dot otogod tu' bobogo' nopo dau di sukud dau i kaladai dau. 28 Om pomiloo' noddi do Tuhan do moro-boros i kaladai, om boros kaddi di kaladai dot id di Biliam, “Nunu toi kopio o nowonsoi ku dot id diya'? Tu' intolu ko noddi pomobog doho'?” ka. 29 Om boros kad i Biliam do suminimbar, “Kababagan ku nopo diya' nga' i ponguntotogod nu doho'! Ondung kidangol oku daa om napatai ku no daa iya',” ka dau. 30 Nga' boros ka di kaladai do suminimbar, “Okon toi ko' iyoho' kasai' i' i sasakayon nu do mantad di gulu po? Om nokoumbal oku no toi do minongiyo diya'dti di gulu, oi Tuan?” ka. Om boros kad i Biliam, “Amu',” ka dau. 31 Om pokitono' noddi do Tuhan i Biliam di moloikat do poingkakat do hiri, i kiinigit do gayang, om tungub nopoddi i Biliam do hiri'd tana' do tuminuku'! 32 Om boro-boros noddi i moloikat do poingkaa, “Nokuro tu' intolu nu nopo bobogo' ilo kaladai nu? Kinorikatan ku nopo om mongoi pangantob diya' tu' a' i' daa apatut do mongoi ko. 33 Nga' osonong po tu' nokokito doho' ilo kaladai nu, om intolu nopoddi lisang ilo kaladai nu. Ondung a' daa nokolisang ilo kaladai, om napatai ku no daa iya', om ilo' pondo daa kaladai nu o posion ku,” ka dau. 34 Om boros kaddi di Biliam, “Nokowonsoi oku nod dusa. A' ku i' oilaan do poingkakat ko do hilo'd tanga'd ralan do mangantob doho'. Nga' baino' nopo, om ondung kasala' oku do mongoi dot osorou nu, om muli' oku no,” ka dau. 35 Nga' boros ka di moloikat do Tuhan, “Ongoi nopo katuu tanud dilo tulun, nga' iri no i ponuhuan ku diya' do poboros ot apatut nu'd poboroson,” ka dau. Om tilombus nogiddi i Biliam do mamanau do tuminanud di tulun di Balak.
Rinuba' di Raja' Balak i Biliam
36 Om korongou nopoddi di Balak do rumikot i Biliam, nga' ongoi no iyau ruba' dau do hilo'd Ar, i bandar do hilo'd tisan do Bawang dot Arnon, i hilo'd wolit do pomogunan do Muab. 37 Om boro-boros noddi i Balak dot id di Biliam do poingkaa, “Nokuro tu' a' ko ruminikot dit insan tiya' i' lohowo'? Ondos nu daa om a' oku kasaap do mamagadsi' diya'?” ka dau. 38 Om boros kad i Biliam do suminimbar, “Nga' nokorikot oku i' maddi koii? Nga' baino' nopo, om aiso' no o kuasa' ku do popoboros do nunu nopo, tu' iri no i ponuhuan do Kinorohingan doho' o milo ku'd poboroson,” ka dau. 39 Om tanud noddi di Balak i Biliam do minongoi do hilo'd bandar do Husot. 40 Om hilo' no o pinonumbolian di Balak do sapi' om dumba' dau. Om patahako' nod i Balak o wookon di tonsi di sinumbali'ddi dot id di Biliam om id piro-piro boyoon di manud-tanud dau.
I Koinsan i'do Pinoboros di Biliam it Osiliu dot id Dabantalan
41 Tadau noddi kawagu om angatai no di Balak i Biliam do minongoi do hiri'd nulu-nulu do Bamot Baal. Om hiri nopoddi nga' okito no di Biliam o wookon di tulun dot Israil.
1 Om boros kad i Biliam dot id di Balak, “Pamansayai oku do turu' o pananaraban do porsombahan do hiti, om onuan oku do turu' o sapi' do tontoluhan om turu' o dumba' do tontoluhan,” ka dau. 2 Om wonsoyo' no di Balak i pinoboros di Biliam diri. Om tanud noddi iyolo' do pinapatahak do maan do porsombahan dot iso' o sapi' om iso' o dumba' do tontoluhan goduwo, do hiri'd pointikid-tikid di pananaraban do porsombahan. 3 Om boro-boros noddi i Biliam dot id di Balak do poingkaa, “Ingkakat nondo do hiti'd toning diti porsombahan nu di sinorob. Om daamot nopodti om mongoi oku pogontong ondung sumolowot doho' o Tuhan ko' amu' po. Om sunudan ku indo iya' do koinsanai di poboroson dau doho',” ka dau. Om iso-iso'ddi i Biliam do tuminakad dot iso' o nulu-nulu. 4 Om ongoi noddi o Tuhan solowot di Biliam. Om boro-boros no i Biliam do Tuhan, “Oi Tuhan, nokopomonsoi oku nod turu' o pananaraban do porsombahan, om nakapatahak oku nod maan do porsombahan do songinan o sapi' om songinan o dumba' do tontoluhan goduwo dot id pointikid-tikid di pananaraban do porsombahan,” ka dau. 5 Om sunudai nod Tuhan i Biliam ondung nunu o poboroson dau, om sinuhu' dau iyau do mongoi poboros dot id di Balak di boros dau'ddi. 6 Om guli' noddi i Biliam, nga' hiri po kasai' i Balak om i piro-piro boyoon do tulun do Muab do songingkakat do hiri'd toning di porsombahan di sinorob. 7 Om poboroso' noddi di Biliam it ongosiliu dot id dabantalan do poingkaa, “Nangatan oku di Balak i raja' do Muab do mantad hilo'd Aram, i hilo'd konuluhanan do ponong id koulayon. Boros ka dau, ‘Rikot no, om tulungon oku i' do moro-boros, patayon no doho' ilo tulun dot Israil!’ ka. 8 Poingkuro oku daa do momopol dit a' papalan do Kinorohingan? Ko' mimboros do momohukum dit a' hukuman do Tuhan? 9 Okito ku iyolo' do mantad hiti'd timpak do nuluhon dit angakawas; piantangan ku iyolo' do mantad hiti'd timpak do konulu-nuluan. Iyolo' no o bansa' di poimpori-pori do momogun-mogun; oilaan i' diyolo' do nabarakatan iyolo' do lobi ko' i bansa'd suwai. 10 Sinakagon nopo dot Israil om miagal pod pupuk kogumu', a' no ointob o kogumuo'. Maha' daa om aayi' o surupu ku do miagal dilo tulun di songonuon do Kinorohingan. It otorodok dot id Kinorohingan dot id suang do nunu nopo; matai oku nondo dot id suang do kosimbayanan,” ka dau. 11 Om boros kaddi di Balak dot id di Biliam, “Nunu iti winonsoi nu dot id doho'? Kinapangangatan ku nopo diya'd hiti om mongoi pomopol dilo pisangod ku. Nga' minamarakat ko nogi' diyolo',” ka. 12 Om boros ka di Biliam do suminimbar, “Iri no ponuhuan do Tuhan doho' o milo ku'd poboroson,” ka dau.
Koinduwo do Pinoboros di Biliam it Osiliu dot id Dabantalan
13 Om boro-boros noddi i Balak di Biliam do poingkaa, “Kaino mitanud do mongoi'd hilo'd kinoiyonon do suwai; om hilo' nopondo om iri no wookon di tulun dot Israil ot okito nu. Om papalan nondo iyolo'd hilo',” ka dau. 14 Om angatai no di Balak i Biliam do minongoi do hilo'd kobuturan do Sopim om ongoi no do hiri'd timpak di Nuluhon do Pisga. Om hilo' nga' minomonsoi i' iyau do turu' o pananaraban do porsombahan om pinapatahak do maan do porsombahan do songinan o sapi' do tontoluhan om songinan o dumba' do tontoluhan do hiri'd pointikid-tikid di pananaraban do porsombahan. 15 Om boros ka di Biliam dot id di Balak, “Undorong pod hiti, dot id toning diti porsombahan nu di sinorob, do daamot ku do mongoi solowot do Tuhan do hilo',” ka dau. 16 Om ongoi no o Tuhan solowot di Biliam om sunudai no dau iyau ondung nunu it apatut do poboroson dau. Om suhuo' nogiddi do Tuhan iyau do gumuli' dot id di Balak do mongoi polombus di pinoboros dau. 17 Om poguliai no di Biliam, om kabantalai no dau do poingkakat kasai' i' i Balak do hiri'd toning di porsombahan dau di sinorob, om hiri ngai' i' i boyoon do tulun do Muab. Om uhot no i Balak ondung nunu i pinoboros do Tuhan. 18 Om poboroso' noddi di Biliam iti tongosiliu dot id dabantalan do poingkaa, “Oi Balak i tanak di Sipor, kaino no, tu' haro o poboroson ku, om pokinongohon no. 19 Kinorohingan nopo om a' i' miagal do tulun tu' mongudut, om it oruuhai om kosimban no o ginawo. Nunu nopo o pobotoson dau, om wonsoyon no dau; moro-boros nopo iyau, om atantu' nod owonsoi iri. 20 Nosuhu' oku nod mamarakat, om soira' nopod mamarakat o Kinorohingan, om a' ku no milo do pakaisoon iri. 21 Aiso' ot araat dot okito ku dot id di Yakub; aiso' ot osusa' dot okito ku dot id Israil. Moyo-woyo' i' diyolo' o Tuhan i Kinorohingan diyolo'; popimboroson no diyolo' dot iyau o raja' diyolo'. 22 Pinosoliwan iyolo'd Kinorohingan do mantad hilo'd Masir; miagal po iyau'd sapi' di lalang do mogobi' diyolo'd sumaap. 23 Aiso' no o limu', om aiso' o toilaan do dong rogon, do milo'd pakayon do sumaap di tulun dot Israil. Om popimboroson nopondod tulun do pasal di tulun dot Israil om poingkaa, ‘Antangai pogi' ilo winonsoi'd Kinorohingan dot Israil di koimayaan kopio!’ ka. 24 Iri nopo tulun dot Israil om miagal do singa dit okoris: A' po iyau mundorong dot a' po atabpaan om a' po oinum o raha' di pisangod dau,” ka dau. 25 Om boros kaddi di Balak dot id di Biliam, “Ula' no. Ondung a' ko momopol dilo tulun dot Israil, om kada' po daa'ndo kopio iyolo' barakatai!” ka dau. 26 Nga' boros ka di Biliam do suminimbar, “A' ku toi diya' nokoboros no do mositi' nod wonsoyon ku i ponuhuan do Tuhan doho'?” ka dau.
Kointolu do Pinoboros di Biliam it Osiliu dot id Dabantalan
27 Om boros ka di Balak, “Kaino mongoi'd hilo'd kinoiyonon do suwai. Tu' nunu koilo-ilo nga' pologoson ko nopod Kinorohingan do momopol di tulun dot Israil do mogobi' doho' do hilo',” ka dau. 28 Om angatai no dau i Biliam do minongoi do hiri'd timpak di Nuluhon do Pior, i koimpa' di tana' do kowotuan. 29 Om boros ka di Biliam dot id di Balak, “Momonsoi nod turu' o pananaraban do porsombahan do hiti, om mongigit nod turu' o tinan do sapi' do tontoluhan om turu' o tinan do dumba' do tontoluhan,” ka dau. 30 Om wonsoyo' nod i Balak i pinonuhuan di Biliam. Om papatahak no iyau do songinan o sapi' do tontoluhan om songinan o dumba' do tontoluhan dot id pointikid-tikid di pananaraban do porsombahan.
1 Om oilaan noddi di Biliam do monuhu' o Kinorohingan dau do mamarakat di tulun dot Israil. Om a' noddi iyau minongoi pogontong do maan do pogintutunan do miagal di winonsoi dau dit id gulu ko' iri. Om ontong no i Biliam do ponong hiri'd tana' do kowotuan 2 om kokito no dau i tulun dot Israil do mogitumpuk-tumpuk o pinopowonsoi diyolo' di kiim diyolo' do sorompori-pori do tumanud di payat diyolo'. Om porintao' noddi do Rusod do Kinorohingan i Biliam, 3 om poboroso' no dau it ongosiliu dot id dabantalan do poingkaa, “Iti no o bilin di Biliam i tanak di Bior, moro-boros o tulun di kokito kopio 4 I korongou do poboroson do Kinorohingan, poinsonsod oku do montong dit okito ku dot id soroyoon i pinointalang do mantad id Kinorohingan dit Agayo o Sinundu. 5 Olumis i kokiiman nu oi Yakub, om i kinoiyonon nu oi Israil! 6 Miagal do rulud di koguasan do kayu kurma miagal do kabun dit id toning do bawang, miagal do kayu gaharu di tinanom do Tuhan, miagal do kayu sedar dit id toning do waig. 7 Osima' indo iyolo'd rasam om a' ooiyan do waig o tumo di pananaman diyolo'd totonomon. Abantug indo ko' i Agag i raja' diyolo', om karalad o pomorintaan dau do hilo'd sodu'. 8 Pinosoliwan iyolo'd Kinorohingan do mantad hilo'd Masir, miagal po iyau'd sapi' di lalang do sumaap do mogobi' diyolo'. Tolon-tolonon nopo diyolo' i pisangod diyolo', om mumukon o tulang, om pintipuon i pana'. 9 Miagal pod singa dit okoris o bansa'ddi; isai po daa o kobulun do mamagangau dau do tontok di koodop iyau? Isai nopo o mamarakat dot Israil om abarakatan no, isai nopo o momopol dot Israil om ousung no,” ka dau. 10 Om otogod tomod diri i Balak mikuwo'd pinoonggom dau o tonggom dau. Om boro-boros no iyau dot id di Biliam do poingkaa, “Linohou ku iya' do mongoi pomopol do pisangod ku nga' binarakatan nu nogi' iyolo' dot ongointotolu. 11 Nga' pamanau nogi' kopio'd muli' do dinondo! Nakabatos oku no daa do mamagadsi' diya', nga' mada' i' o Tuhan do rumamit ko di gadsi',” ka dau. 12 Om boros kad Biliam do suminimbar, “A' oku toi nokoboros no di tulun di sinuhu' nu do minongoi solowot doho' 13 do patahakon nu piya daa doho' o koinsanai'd pirok om tamas di hilo'd walai nu, nga' a' oku i' milo do tumolibamban di ponuhuan do Tuhan doho', om a' oku milo do mingwonsoi do nunu nopo i doho'd korohian? Iri no ponuhuan do Tuhan doho'd poboros o milo ku'd poboroson,” ka dau.
I Tohuri nod Pinoboros di Biliam dot Osiliu dot id Dabantalan
14 Om boros kad Biliam dot id di Balak, “Muli' oku no do hilo'd bansa' ku do dinondo. Nga' a' oku po kapamanau om poinsanon mantad tiya' po ondung nunu o wonsoyon di tulun dot Israil dot id bansa' nu do koimbagu,” ka dau. 15 Om poboroso' no di Biliam it ongosiliu dot id dabantalan do poingkaa, “Iti no o bilin di Biliam i tanak di Bior; iti no o boros do tulun di kokito kopio. 16 I korongou do boros do Kinorohingan om kaanu do toilaan do mantad id dau it Asawat Kopio. Poinsonsod oku do montong dot id soroyoon i pinointalang do mantad id Kinorohingan dit Agayo o Sinundu. 17 Okito ku ot id dabantalan, it id dosunsudan do bansa'd Israil. Haro o raja' do miagal do rombituon dit agayo, it atalang o tulinau, do mimbulai do mantad id bansa'ddi. Miagal po iyau do rombituon dit agayo o tulinau do mantad id Israil. Bobogon nondo dau i boyoon do Muab om alaon ngai' dau i tulun do Sit. 18 Alaon ngai' nondo dau i pisangod dau do hilo'd Idom om asanganu dau i tana' diyolo', om kamanang i' kasai' ot Israil. 19 Ulakan di tulun dot Israil i pisangod diyolo' om iso' po nga' aiso' no ot oolu',” ka dau. 20 Om kokito no di Biliam i tulun dot Amalik dot id suang di pinointalang diri, om poboroso' no dau it ongosiliu dot id dabantalan do poingkaa, “Id pialatan nopo do koinsanai'd bansa' om Amalik no it okoris kopio do hiti'd pomogunan. Nga' haro i' o kopupuson diti bansa', om poimpunso no do gisom dot alaid,” ka. 21 Om kokito po dau i sinakagon di Kain dot id suang di pinointalang diri. Om poboroso' no dau it ongosiliu dot id dabantalan do poingkaa, “Osimbayan no kopio ino kinoiyonon dokoyu, miagal pod rumun di hiri'd sakai do pampang dit asawat. 22 Nga' iyokoyu nopo, i tulun do Kini om apatai indo do tanggayan kou di tulun dot Asur,” ka. 23 Om poboroso' pod i Biliam it ongosiliu dot id dabantalan do poingkaa, “Isai ilo tulun do tumimung do hilo'd utara? 24 Rumikot i mononolod do mantad hilo'd Siprus; alaon nondo diyolo' ot Asur om Ibir, nga' iyolo' piya'ndo nga' apatai i',” ka dau. 25 Om pogopi-opi' noddi i Biliam om pamanau nod minuli' do hiri'd walai dau, om i Balak nogi' nga' minamanau no.
Hilo'd Nuluhon do Pior i Tulun dot Israil
1 Om tontok di hilo'd Rantai do Sitim i tulun dot Israil do pinopowonsoi do kiim diyolo', om timpuun no i kokusayan diyolo' do minongoi pagampahu' di tongoondu' do Muab di hilo'. 2 Om angatai no iyolo' di tongoondu' do Muab di mongoi rapou di poginakanan do papatahak do porsombahan, do pomusou di tingolig do Muab. Om pangakan no i tulun dot Israil do taakanon diri om tuku' no iyolo' dot id Baal, i tingolig 3 do hilo'd Nuluhon do Pior. Om kotogod no o Tuhan diyolo', 4 om boro-boros no iyau dot id di Musa do poingkaa, “Timungon ngai' no o koinsanai di boyoon do tulun dot Israil om patayon no iyolo' di dongadau om owonsoi i' iti ponuhuan ku, om a' oku indo tumogod diti tulun,” ka dau. 5 Om boros kaddi di Musa dot id koinsanai di boyoon do tulun dot Israil, “Mositi' nod sompori-pori kou nopod mamatai do koinsanai'd tulun dit id payat dokoyu di tumuku' dot id Baal di hilo'd Pior,” ka dau. 6 Om tontok di maso di Musa om i tulun dot Israil do mihad do hiri'd wawayaan di Kiim do Tuhan, om kokito no diyolo' o songulun o bansa'd Israil do minangangat do tondu' do Midian do suminuang di kiim dau. 7 Om soira' di nokito di Pinihas iri om ingkakat no iyau do tuminongkiad do mantad hiri'd pitimungan diri. I Pinihas nopoddi nga' tanak di Iliasar, i manangaki di Harun. Om ongoi no iyau dot iso' o tandus, 8 om susuhut no iyau di kusai om i tondu'ddi do suminuang di kiim. Om potokono' no dau i tandus do gisom do nolopuson goduwo i tulun diri. Om kotingkod noddi i toruol do mogkoroliu do hilo'd Israil. 9 Nga' daamot nopoddi om napatai no o 24,000 o tulun. 10 Om boros kaddi do Tuhan dot id di Musa, 11 “I Pinihas nopo i tanak di Iliasar, i manangaki di Harun it Imam, om a' no nokotoron do kokito'd tulun do tumuku' do kinorohingan do suwai ko' iyoho'. Om a' oku nondo tumogod diti tulun dot Israil, om tumingkod oku no do mamatai diyolo'. 12 Om sunudan no i Pinihas do momonsoi oku dot iso' o pibatasan dot id dau, i poinggirot do gisom dot alaid. 13 Potontuon no iyau om i sinakagon dau do sumiliu dot imam do gisom dot alaid tu' iyau nopo om a' no nokotoron do kokito do tulun do tumuku' dot id kinorohingan di suwai ko' iyoho'. Om iri no o kopongompunan ku do dusa do tulun dot Israil!” ka dau. 14 Ngaran nopo di tulun dot Israil di pinatai do mitonggoi di tondu' do Midian diri nga' i Simri i tanak di Salu, i boyoon dot iso' o sompiiyon dot id suang do payat di Simion. 15 Ngaran no di tondu' om i Kosbi i tanak di Sur; om i Sur nopo, i tapa' dau'ddi nga' boyoon dot iso' o pinuruan do sompiiyon do tulun do Midian. 16 Om poboroso' nod Tuhan iti ponuhuan dot id di Musa do poingkaa, 17 “Ngoyon no songodo' i tulun do Midian, 18 tu' kapamatayan nopo om i kararaat diyolo' di minagakal dokoyu do tontok di hilo' kou id Pior, om i Kosbi, i tanak do songulun o boyoon dot iso' o sompiiyon do tulun do Midian, i pinatai do tontok di haro o toruol di mogkoroliu di hilo'd Pior o kapamatayan dau,” ka dau.
Pinongintaban di Koinduwo
1 Om katalib poddi i toruol do mogkoroliu, om boro-boros no o Tuhan dot id di Musa om id di Iliasar, i tanak di Harun it Imam do poingkaa, 2 “Papaharo kou nod pongintaban do koinsanai'dti tulun dot Israil do tumanud di sompiiyon diyolo'. Om mositi' nod tulison ngai' o ngaran di tongokusai di kiumur do duwo nohopod o toun ko' it id sawat ko' iri, i tongokusai di milo nod sumiliu do soudor,” ka. 3-4 Om wonsoyo' no diyo Musa di Iliasar i pinonuhuan diri. Om lohowo' ngai' no diyolo' o koinsanai di tongokusai di kiumur dot irad diri, om timungo' no do hilo'd rantai do Muab, it id soborong di Bawang do Yordan, it id somok do bandar do Yorikou. Om iti no ngai' o tulun dot Israil di suminoliwan do mantad hilo'd Masir: 5 Id suang nopo do payat di Rubin (I Rubin nopo om tanak di Yakub dit id dotuo) om: i pinuruan do sompiiyon di Hinok, om i Palu, 6 om i Hisron, om i Karmi. 7 Kogumuon nopo do tongokusai dot id suang do piro-piro o pinuruan do sompiiyon diti om 43,730 o tulun. 8 Sinakagon no di Palu, om i Iliab, 9 om tangaanak no di Iliab om i Nomuil, i Datan om i Abiram. Om iyo Datan no di Abiram i pinili' di tulun dot ogumu'. Om iyolo' no i suminaap di Musa om i Harun, om i suminokodung di tulun di tuminanud di Kora do suminaap do Tuhan. 10 Om pipitas no i tana' do gisom dot agayo o nopipitas om kotolon noddi iyolo' di tana' om kapatai no do mogitonggoi-tonggoi di Kora om i tulun di tuminanud dau do daamot di tapui do minimpatai do 250 o tongokusai. Om iri no o nosiliu do popoinsan di tulun dot Israil. 11 Nga' a' i' nokotonggoi do napatai i tangaanak di Kora. 12 Id suang nod payat di Simion om: i pinuruan do sompiiyon di Nomuil, om i Yamin, om i Yakin, 13 om i Sira om i Saul. 14 Kogumuon nopod tongokusai dot id suang do piro-piro o pinuruan do sompiiyon diti om 22,200 o tulun. 15 Id suang nod payat di Gad om: i pinuruan do sompiiyon di Sipon, om i Hagi, om i Suni, 16 om i Osni, om i Iri, 17 om i Arod, om i Arili. 18 Kogumuon nopod tongokusai dot id suang do piro-piro o pinuruan do sompiiyon diti om 40,500 o tulun. 19-21 Id suang nod payat di Yohuda om: i pinuruan do sompiiyon di Sila, om i Piris, om i Sira, om i Hisron om i Hamul. (Iri nopo duwo di tanak di Yohuda do kusai, iyo Or di Onan, om hilo' pod Kanaan o kinapatayon.) 22 Kogumuon nopod tongokusai dot id piro-piro o pinuruan do sompiiyon diti om 76,500 o tulun. 23 Id suang nod payat di Isakar om: i pinuruan do sompiiyon di Tola, om i Pua, 24 om i Yasub om i Simron. 25 Kogumuon nopod tongokusai dot id suang do piro-piro o pinuruan do sompiiyon diti om 64,300 o tulun. 26 Id suang nopod payat di Sibulon om: i pinuruan do sompiiyon di Sirid, om i Ilon om i Yaliil. 27 Kogumuon nopod tongokusai dot id piro-piro o pinuruan do sompiiyon diti om 60,500 o tulun. 28 Mantad no dot id di Yusup, i tapa' do duwo o kusai om: i payat di Manasi om i payat di Ipraim. 29 Id suang nopod payat di Manasi om: i Makir i tanak di Manasi. Iyau no i tapa' di Giliad; om iti ngai' no i pinuruan do sompiiyon do suminolusuk di Giliad: 30 i pinuruan do sompiiyon di Isir, om i Hilik, 31 om i Asriol, om i Sikim, 32 om i Somida om i Hipir. 33 I Silapihad nopo i tanak di Hipir om aiso' i' o tanak do kusai; tongoondu' ngai' nopo o tanak dau. Ngaran nopo diyolo' om i Mala, i Noa, i Hogla, i Milka om i Tirsa. 34 Kogumuon nopod tongokusai dot id suang do piro-piro o pinuruan do sompiiyon diti om 52,700 o tulun. 35 Id suang nod payat di Ipraim om: i pinuruan do sompiiyon di Sutila, om i Bikir om i Tahan. 36 Iri nopo pinuruan do sompiiyon di Iran om sinakagon i' di Sutila. 37 Kogumuon nopod tongokusai dot id suang do piro-piro o pinuruan do sompiiyon diti om 32,500 o tulun. Om iri ngai' no i pinuruan do sompiiyon di sinakagon di Yusup. 38 Om id suang nopod payat di Binyamin om: i pinuruan do sompiiyon di Bila, om i Asbil, om i Ahiram, 39 om i Sopupam om i Hupam. 40 Iri nopo pinuruan do sompiiyon di Arod om i Naaman om sinakagon i' di Bila. 41 Kogumuon nopod tongokusai dot id suang do piro-piro o pinuruan do sompiiyon diti om 45,600 o tulun. 42 Om id suang nod payat di Dan om: i pinuruan do sompiiyon di Suham. 43 Kogumuon nopod tongokusai dot id suang do pinuruan do sompiiyon diti om 64,400 o tulun. 44 Id suang nopod payat di Asor om: i pinuruan do sompiiyon di Yimna, om i Yiswi om i Boria. 45 Iri nopo pinuruan do sompiiyon di Hibir om i Malkiol om sinakagon i' di Boria. 46 I Asor nopo om kianak dot iso' o tondu' dot i Sira o ngaran. 47 Kogumuon nopod tongokusai dot id suang do piro-piro o pinuruan do sompiiyon diti om 53,400 o tulun. 48 Id suang nopod payat di Naptali om: i pinuruan do sompiiyon di Yasiil, om i Guni, 49 om i Yisir om i Silom. 50 Kogumuon nopod tongokusai dot id suang do piro-piro o pinuruan do sompiiyon diti om 45,400 o tulun. 51 Kogumuon nopod tongokusai do tulun dot Israil dot oinsanan om 601,730 o tulun. 52 Om boros kad Tuhan dot id di Musa, 53 “Pogiongkib-ongkibon no i tana' dot id pogialatan di payat dot Israil do tumanud do kogumuo' do pointikid-tikid di payat. 54-56 Ralan nopod mangangkib di tana' om maan undio'. Iri nopo payat dot ogumu' om agayo no o pangangkib, om iri no payat dot okuri' om okoro' no o pangangkib,” ka dau. 57 Iri nopo payat di Liwi nga' kosuang ngai' no i pinuruan do sompiiyon di Girson, om i Kohat om i Morari. 58 Om id suang nopod sinakagon diyolo' nga' kohompit ngai' no i pinuruan do sompiiyon dit ongokooro', iri no i pinuruan do sompiiyon di Libni, om i Hibron, om i Mali, om i Musi om i Kora. I Kohat nopo nga' tapa' di Amram, 59 i minanansawo do tanak do tondu' do songulun i mantad id payat di Liwi. Ngaran nopo di tanak do tondu'ddi nga' i Yokibid; om nokosusuon nopo dau nga' hilo'd Masir. Om paganak no iyolo' di Amram do duwo o tanak do kusai, iyo Harun di Musa, om iso' o tanak diyolo'd tondu', dot i Miriam o ngaran. 60 I Harun nopo om kianak dot apat o kusai: i Nadab, om i Abihu, om i Iliasar om i Itamar. 61 Iyo Nadab nopo di Abihu om napatai do tontok di pinapatahak iyolo' do tapui dit okon ko' korohian do Kinorohingan. 62 Kogumuon nopo do tongokusai dot id suang do payat di Liwi di sombulan nogi' ko' asawat ko' iri o tumur om 23,000 o tulun. Iyolo' nopo om pinosuwai-suwai o pinotulisan do ngaran do mantad di tulun dot Israil do suwai; tu' a' i' iyolo' nongkiban do tana' di maan diyolo'd songonuon do hilo'd Israil. 63 Om iyo noddi o pinopotulis do ngaran di piro-piro o pinuruan do sompiiyon dot Israil do tinulis diyo Musa di Iliasar di pinapaharo iyolo' do pinongintaban do tulun do hilo'd rantai do Muab, it id soborong di Bawang do Yordan, it id somok no do bandar do Yorikou. 64 Om id pialatan nopo di tulun do tinulis diyo Musa di Harun o ngaran di hilo'd tana' do kowotuan do Sinai om iso' po nga' aiso' no o poimpasi. 65 Nokoboros mantad nod Tuhan dot angapatai ngai' iyolo' do hilo'd tana' do kowotuan. Om nangapatai ngai' no kopio iyolo'; nga' i Kalib poo i tanak di Yopuni, om i Yosua i tanak di Nun ot a' napatai.
I Tangaanak di Silapihad do Tongoondu'
1 I Silapihad nopo om kianak do limo o tondu', i Mala, i Noa, i Hogla, i Milka, om i Tirsa. I Silapihad nopo om tanak di Hipir, om i Hipir no om tanak di Giliad, om i Giliad no om tanak di Makir, om i Makir no om tanak di Manasi, om i Manasi no om tanak di Yusup. 2 Om ongoi no i limo tanak di Silapihad do tondu'ddi solowot di Musa om i Iliasar, it Imam diri, om i piro-piro boyoon om koinsanai di tulun do pointimung do hiri'd toning di Kiim do Tuhan. Om boro-boros no iyolo' do poingkaa, 3 “Napatai no i tapa' dahai do hilo'd tana' do kowotuan om aiso' i' o tanak dau'd kusai. Iyau nopo om okon i' ko' id pialatan di tulun di suminokodung di Kora, tu' suminaap do Tuhan; iri i dau'd dusa o nakapatai-patai dau. 4 Nga' nokuro tuu tu' iri no it aiso' o tanak dau'd kusai o katanus-tanus do ngaran do tapa' dahai do mantad hiti'd bansa' dot Israil? Onuwai no iyahai do tana' do tungkusan dot id pogialatan di koobpinayan do tapa' dahai,” ka. 5 Om posunudo' nod Musa i boros diyolo'ddi dot id Tuhan, 6 om boros kad Tuhan dot id di Musa, 7 “Koontok i' ilo pokionuon di tangaanak di Silapihad do tongoondu'; onuan nopo iyolo'd tana' do tungkusan dot id pogialatan dilo koobpinayan di tapa' diyolo'. Om pologoson nopo dot otungkusan diyolo' it apatut dot aanu di tapa' diyolo'. 8 Om sunudan no ilo tulun dot Israil dot ondung haro o kusai dot apatai om aiso' i' o tanak dau'd kusai om iri no i tanak dau'd tondu' o tumungkus do nunu nopo i dau'd songonuon. 9 Ondung aiso' o tanak dau'd tondu', om iri no i koobpinayan dau'd tongokusai o kotungkus diri. 10 Ondung aiso' o tobpinai dau'd kusai om iri no tobpinai di tapa' dau do kusai o kotungkus diri. 11 Ondung aiso' o tobpinai dau'd kusai om aiso' o tamanon dau, om iri no i waris dau dit id somok po o kopiobpinayan o kotungkus diri om kaanu'ddi dot osiliu do dau'd songonuon. Om mositi' nod tonudon di tulun dot Israil iti do silihon dot oturan dit ogirot, do miagal di pinonuhuan ku, iyoho' i Tuhan, dot id diya',” ka dau.
Nopili' i Yosua do Sumowoli di Musa
12 Om boros kad Tuhan dot id di Musa, “Ongoi takad dilo Nuluhon dot Abarim om mimpa' i' di tana' do patahakon ku dot id tulun dot Israil. 13 Om kokito ko pondo'ddi, om matai ko no do miagal di Harun, i tobpinai nu, 14 tu' suminurilog goduwo kou i' di pinonuhuan ku di hilo' kou id tana' do kowotuan do Sin. Tontok di sontogod-togod ngai' doho' i tulun di hilo'd Moriba, om minada' ko i' do pinopointalang di sinundu ku dit olidang dot id diyolo',” ka dau. (Moriba nopo nga' ngaran di tudan do waig do hilo'd Kadis, i hilo'd tana' do kowotuan do Sin.) 15 Om sambayang no i Musa do poingkaa, 16 “Oi Tuhan i Kinorohingan, i tadon do koposion do koinsanai di songimpasi, pokionuon ku no kopio do momili' ko'd tulun di milo do momoyo' diti tulun dot ogumu', 17 om i milo do momoyo' diyolo' do mongoi sangod, om a' i' iyolo' osiliu'd tulun do miagal di baanan do dumba' dit aiso' o gompomogompi',” ka. 18 Om boros kaddi do Tuhan dot id di Musa, “Lohowon no i Yosua i tanak di Nun, i tulun dit oilo kopio'ddi, om pakabayon no o longon nu dot id tulu dau. 19 Poingkokoton no iyau dot id toguang di Iliasar it Imam diri om id toguang do toinsanan di tulun dot Israil, om poboroson nondo dot id toguang ngai' diyolo' dot iyau no i sumowoli diya'. 20 Onuan no iyau do wookon di kuasa' nu om mumboyo' ngai' i' dau i tulun dot Israil. 21 Om mokituduk indo iyau di Iliasar it Imam diri, tu' koilo do korohian ku do mamakai dit Urim om i Tumim. Om iyo noddi o ralan di Iliasar do monuduk di Yosua om koinsanai di tulun dot Israil dit apatut diyolo'd wonsoyon,” ka dau. 22 Om wonsoyo' nod Musa o miagal di pinonuhuan do Tuhan dot id dau. Om poingkakato' no dau i Yosua do hiri'd toguang di Iliasar, it Imam diri, om id toguang do koinsanai di tulun. 23 Om pakabayo' nod Musa o longon dau dot id tulu di Yosua, om poboroso' no dau dot id tulun dot ogumu' dot i Yosua no o sumowoli dau; tu' iyo noddi o pinonuhuan do Tuhan.
I Porsombahan di Natantu' do Patahakon Kasai'
1 Om suhuo' nod Tuhan i Musa 2 do monuhu' di tulun dot Israil do papatahak dot id Kinorohingan do tontok di maso di natantu' mantad diti piro-piro o porsombahan do taakanon di kasanangan do Tuhan. 3 Om iti ngai' no i porsombahan do taakanon do patahakon dot id Tuhan: Patahakon nopod maan do porsombahan di sorobon do pointikid do tadau, om duwo o tanak do dumba' do tontoluhan di sopisontoun nogi' o tumur, om it aiso' o bohiton do tinan. 4 Iri nopo tiso' di tanak do dumba'ddi om patahakon do dongkosuabon, om iri no tiso' om patahakon do dongsosodopon. 5 Om tanggayan goduwo nopo i tanak do dumba'ddi do porsombahan do gandum do songkilogram o tapung, om ralatan do songlito o tumau do saitun dit osonong kopio. 6 Om iri no i porsombahan do patahakon do pointikid do tadau dit insanan do monorob, om it id gulu i' kopio do pinatahak do hilo'd Nuluhon do Sinai do maan do porsombahan do taakanon. Om iri no i tawau do porsombahan diri o kasanangan do Tuhan. 7 Om iri nopo porsombahan do waig dot anggur do potonggoyon di tanak do dumba' di koiso'ddi, om mositi' nod potuntugon do hiri'd pananaraban do porsombahan o songlito di waig dot anggur diri. 8 Om dongsosodopon nondo om patahakon no i tanak do dumba' di koduwo'ddi dot iyo iddi porsombahan do dongkosuabon o papatahak. Om potonggoyon i porsombahan do waig dot anggur. Om iri nga' porsombahan i' do taakanon, om iri no tawau do porsombahan diri o kasanangan do Tuhan.
I Porsombahan do Tadau'd Sabat
9 Tontok nopod tadau'd Sabat om mositi' nod papatahak do duwo o tanak do dumba' do tontoluhan di sopisontoun nogi' o tumur, it aiso' goduwo nopo o bohiton do tinan, om papatahak do duwo kilogram do tapung di rinalatan do tumau do saitun do maan do porsombahan do gandum, om porsombahan do waig dot anggur. 10 Om mositi' nod patahakon iti porsombahan di sorobon do pointikid do tadau'd Sabat, do poruhangon di porsombahan do monikid tadau om i porsombahan do waig dot anggur di potonggoyon kasai' di porsombahan.
Porsombahan do Tadau'd Koiso' do Pointikid do Tulan
11 Papatahak no dot id Tuhan do porsombahan di sorobon do pointikid do koimpuunon do tulan: patahakon nopo om duwo o tinan do sapi' do tontoluhan dit okoro' po, om songinan o dumba' do tontoluhan, om turu' o tanak do dumba' do tontoluhan di sorontoun-toun ngai' nogi' o tumur, om it aiso' ngai' nopo o bohiton do tinan. 12 Om maan nopo do porsombahan do gandum om i tapung di rinalatan do tumau do saitun: Potonggoyon nopod pointikid-tikid do songinan o sapi' om tolu o kilogram do tapung; 13 om potonggoyon nod pointikid-tikid do songinan o tanak do dumba' om songkilogram o tapung. Iti nopo porsombahan do sinorob diti om porsombahan do taakanon dot id Tuhan. Om iri no tawau diti porsombahan o kasanangan do Tuhan. 14 Iri nopo porsombahan do waig dot anggur dit apatut do patahakon do potonggoyon di porsombahan do sinorob, om duwo o lito do waig dot anggur do potonggoyon di dumba' do tontoluhan, om songlito o potonggoyon do pointikid-tikid do songinan o tanak do dumba'. Om iri no o toturan do maan do porsombahan di sorobon do tontok do tadau'd koiso' do pointikid-tikid do koimpuunon do tulan do poingompus do toun. 15 Om poruhangon nopo di porsombahan do sorobon do pointikid do tadau do mitonggoi di porsombahan do waig dot anggur, om songinan o kambing do tontoluhan do maan do porsombahan do pangampun do dusa.
Porsombahan do Tadau'd Agayo do Roti dit A' Kipangambang
16 Iri nopo Tadau'd Agayo do Paska om mositi' nod ramayon do tontok di tadau do kohopod om apat do tulan di koiso' do maan do pomusou'd Tuhan. 17 Om tadau nopondod kohopod om limo om tumimpuun no o karamayan do don tugama' di ramayon do solinaid do turu' o tadau. Om solinaid nopoddi om roti no dit a' rinalatan do pangambang o koino-ino do kanon. 18 Tontok nopo di tadau do koiso' do karamayan diri, om tumimung kou nod sumambayang, om kada' kou no karaja' do nunu nopo. 19 Om papatahak kou no dot id Tuhan do porsombahan di sorobon do maan do porsombahan do taakanon. Patahakon nopo om duwo o sapi' do tontoluhan dit okoro' po, om songinan o dumba' do tontoluhan, om turu' o tanak do dumba' do tontoluhan di sorontoun-toun ngai' nogi' o tumur, om it aiso' ngai' nopo o bohiton do tinan. 20 Papatahak nod porsombahan do gandum di natantu' mantad om i ralatan do tumau'd saitun. Patahakon nopo om tolu o kilogram do tapung do potonggoyon do pointikid-tikid do songinan o sapi', om duwo kilogram do potonggoyon di dumba' do tontoluhan, 21 om songkilogram o potonggoyon do pointikid-tikid dot iso' di tanak do dumba'. 22 Om patahak nogi' do songinan o kambing do tontoluhan do maan do porsombahan do pangampun do dusa, om owonsoi i' i wonsoyon di natantu' mantad do pongidu' do dusa di tulun dot ogumu'. 23 Om patahakon ngai' no iri do poruhangon di porsombahan do sorobon di natantu' mantad do patahakon do monikid kosuabon. 24 Om iyo nogiddi o papatahak do porsombahan do taakanon dot id Tuhan do solinaid do turu' o tadau. Om iri no tawau di porsombahan diri o kasanangan do Tuhan. Om patahakon ngai' no iri do poruhangon di porsombahan di sorobon om i porsombahan do waig dot anggur di patahakon do pointikid do tadau. 25 Tumimung kou nod sumambayang di tadau'd koturu' om kada' kou no karaja' do nunu nopo.
Porsombahan do Tadau'd Agayo do Dongmongomot
26 Tontok nopo di tadau do koiso' di Tadau dot Agayo do Dongmongomot, tontok di papatahak kou dot id Tuhan do wookon di gandum dit id gulu koomot, om mositi' nod tumimung kou do sumambayang, om kada' kou no karaja' do nunu nopo. 27 Papatahak kou nod porsombahan di sorobon tu' iri no tawau do porsombahan diri o kasanangan do Tuhan. Patahakon nopo om duwo o tinan do sapi' do tontoluhan dit okoro' po, om songinan o dumba' do tontoluhan, om turu' o tanak do dumba' do tontoluhan di sorontoun-toun nogi' o tumur, om it aiso' ngai' nopo o bohiton do tinan. 28 Om papatahak nod porsombahan do gandum di natantu' mantad, i tapung di rinalatan do tumau do saitun. Patahakon nopo om tolu o kilogram do tapung do potonggoyon do pointikid-tikid do songinan o sapi' do tontoluhan, om duwo kilogram do tapung do potonggoyon di dumba' do tontoluhan. 29 Om songkilogram o tapung do potonggoyon do pointikid-tikid do songinan o tanak do dumba'. 30 Om papatahak nogi' do songinan o kambing do tontoluhan do maan do porsombahan do pangampun do dusa, om owonsoi i' i wonsoyon di natantu' mantad do pongidu'd dusa di tulun dot ogumu'. 31 Patahakon ngai' no iri, om patahakon nogi' i porsombahan do waig dot anggur do poruhangon di porsombahan do sorobon om i porsombahan do gandum di patahakon do pointikid do tadau.
Porsombahan do Tontok do Toun do Wagu
1 Tontok nopo di tadau do koiso' di tulan do koturu', om tumimung kou nod sumambayang, om kada' kou karaja' do nunu nopo. Om mositi' nod pounion ngai' i torumpit do tontok do tadau'ddi. 2 Om papatahak kou no dot id Tuhan do porsombahan di sorobon, tu' iri no tawau do porsombahan diri o kasanangan do Tuhan. Patahakon nopo om songinan o sapi' do tontoluhan dit okoro' po, om turu' o tinan do tanak do dumba' di tontoluhan do sorontoun-toun nogi' o tumur, om it aiso' ngai' nopo o bohiton do tinan. 3 Om patahak kou nod porsombahan do gandum di natantu' mantad, i rinalatan do tumau do saitun. Patahakon nopo om tolu o kilogram do tapung do potonggoyon di sapi', om duwo o kilogram do tapung do potonggoyon di dumba' do tontoluhan, 4 om songkilogram o tapung do potonggoyon do pointikid-tikid do songinan o dumba'. 5 Om patahak nogi' do songinan o kambing do tontoluhan do maan do pangampun do dusa, om owonsoi i' i natantu' mantad do wonsoyon do pongidu'd dusa di tulun dot ogumu'. 6 Om patahakon ngai' no iri do poruhangon di porsombahan do sorobon di natantu' mantad do patahakon do monikid tadau do tontok di tadau'd koiso' do pointikid do koimpuunon do tulan, do mitonggoi di porsombahan do gandum, om i porsombahan do waig dot anggur. Om iri no tawau do porsombahan do taakanon diri o kasanangan do Tuhan.
Porsombahan do Tadau do Kopongompunan do Dusa
7 Tumimung kou nod sumambayang do tontok di tadau'd kohopod do tontok di tulan do koturu'. Om tontok nopo do tadau'ddi, om mositi' nod puasa kou om a' koino-ino do kumaraja' do nunu nopo o karaja'. 8 Om patahak kou no dot id Tuhan do porsombahan di sorobon. Patahakon nopo om songinan o sapi' do tontoluhan dit okoro' po, om songinan o dumba' do tontoluhan, om turu' o tinan do tanak do dumba' di tontoluhan di sorontoun-toun nogi' o tumur, om it aiso' ngai' nopo o bohiton do tinan. Om iri no tawau do porsombahan diri o kasanangan do Tuhan. 9 Patahak nod porsombahan do gandum di natantu' mantad, i tapung di rinalatan do tumau do saitun: Patahakon nopo om tolu o kilogram do tapung do potonggoyon di sapi', om duwo o kilogram do tapung do potonggoyon di dumba' do tontoluhan, 10 om songkilogram o tapung do potonggoyon do pointikid-tikid do songinan o tanak do dumba'. 11 Om patahak nogi' do songinan o kambing do tontoluhan do maan do porsombahan do pangampun do dusa. Iti nopo nga' poruhangon di kambing do patahakon do tontok di momonsoi di natantu' mantad do wonsoyon do maan do pangampun do dusa di tulun dot ogumu', om poruhangon di porsombahan di sorobon do pointikid do tadau do mitonggoi di porsombahan do gandum om i porsombahan do waig dot anggur.
Porsombahan do Tadau dot Agayo do Kinuhub-Kuhub
12 Tumimung kou nod sumambayang do tontok do tadau do kohopod om limo di tulan do koturu'. Om ramayon no dokoyu o tadau dot agayo diti do maan do pomusou'd Tuhan, do solinaid do turu' o tadau. Om kada' kou no karaja' do nunu nopo do solinaid diri. 13 Om tontok nopo di tadau'd koiso', om papatahak kou no dot id Tuhan do porsombahan do taakanon. Patahak nod hopod om tolu o sapi' do tontoluhan dit ongokoro' po, om duwo o tinan do dumba' do tontoluhan, om hopod om apat o tanak do dumba' do tontoluhan di sorontoun-toun nogi' o tumur, om it aiso' ngai' nopo o bohiton do tinan. Om iri no tawau do porsombahan diri o kasanangan do Tuhan. 14 Om patahakon no i porsombahan do gandum di natantu' mantad, i tapung di rinalatan do tumau'd saitun. Potonggoyon nopo do pointikid-tikid do songinan o sapi' om tolu o kilogram do tapung, om duwo o kilogram do tapung do potonggoyon do pointikid-tikid do songinan o dumba' do tontoluhan, 15 om songkilogram o tapung do potonggoyon do pointikid-tikid do songinan o tanak do dumba'. Om potonggoyon nopo kawagu di porsombahan do gandum, om i porsombahan do waig dot anggur di natantu' mantad. 16 Om suwai no ko' iri, om patahak kou nod songinan o kambing do tontoluhan do maan do porsombahan do pangampun do dusa. Om porsombahan nopodti nga' poruhangon di porsombahan do sorobon do pointikid do tadau, om i porsombahan do gandum i porsombahan do waig dot anggur di potonggoyon kasai'. 17 Om tontok nopo di tadau'd koduwo om patahak kou nod hopod om duwo o sapi' do tontoluhan dit ongokoro' po, om duwo o tinan do dumba' do tontoluhan, om hopod om apat o tanak do dumba' do tontoluhan di sorontoun-toun nogi' o tumur, om it aiso' ngai' nopo o bohiton do tinan. 18-19 Om patahakon nod pointonggoi do porsombahan diri o koinsanai di porsombahan do suwai di pinatahak do tontok di tadau'd koiso'. 20 Om tontok nopo di tadau'd kotolu om patahak kou nod hopod om iso' o sapi' do tontoluhan dit ongokoro' po, om duwo o tinan do dumba' do tontoluhan, om hopod om apat o tanak do dumba' di tontoluhan di sorontoun-toun nogi' o tumur, om it aiso' ngai' nopo o bohiton do tinan. 21-22 Om patahakon nod pointonggoi do porsombahan diri o koinsanai di porsombahan do suwai di pinatahak do tontok di tadau do koiso'. 23 Om tontok nopo di tadau'd kaapat om patahak kou nod hopod o tinan do sapi' do tontoluhan dit ongokoro' po, om duwo o tinan do dumba' do tontoluhan, om hopod om apat o tanak do dumba' di tontoluhan di sorontoun-toun nogi' o tumur, om it aiso' ngai' nopo o bohiton do tinan. 24-25 Om patahakon nogi' do pointonggoi'ddi o koinsanai di porsombahan do suwai di pinatahak do tontok di tadau do koiso'. 26 Om tontok nopo di tadau do kolimo om patahak kou nod siam o sapi' do tontoluhan dit ongokoro' po, om duwo o tinan do dumba' do tontoluhan, om hopod om apat o tanak do dumba' di tontoluhan di sorontoun-toun nogi' o tumur om it aiso' ngai' nopo o bohiton do tinan. 27-28 Om patahakon nogi' do pointonggoi'ddi o koinsanai di porsombahan do suwai di pinatahak do tontok di tadau do koiso'. 29 Om tontok nopo di tadau do koonom om patahak kou nod walu' o tinan do sapi' do tontoluhan dit ongokoro' po, om duwo o tinan do dumba' di tontoluhan, om hopod om apat o tanak do dumba' do tontoluhan di sorontoun-toun nogi' o tumur, om it aiso' ngai' nopo o bohiton do tinan. 30-31 Om patahakon nogi' do pointonggoi di porsombahan diri o koinsanai di porsombahan do sorobon di suwai do miagal di pinatahak do tontok di tadau'd koiso'. 32 Om tontok nopo di tadau do koturu', om patahak kou nod turu' o sapi' do tontoluhan dit ongokoro' po, om duwo o tinan do dumba' do tontoluhan, om hopod om apat o tanak do dumba' do tontoluhan di sorontoun-toun nogi' o tumur, om it aiso' ngai' nopo o bohiton do tinan. 33-34 Om patahakon nogi' do pointonggoi'ddi o koinsanai di porsombahan do suwai di pinatahak do tontok di tadau'd koiso'. 35 Om tontok nopo di tadau do kawalu' om tumimung kou no do sumambayang om kada' kou no karaja' do nunu nopo. 36 Om patahak kou nod porsombahan di sorobon dot id Tuhan do maan do porsombahan do taakanon. Patahakon nopo om songinan o sapi' do tontoluhan dit okoro' po, om songinan o dumba' do tontoluhan, om turu' o tinan do tanak do dumba' di tontoluhan di sorontoun-toun nogi' o tumur, om it aiso' ngai' nopo o bohiton do tinan. Om iri no tawau do porsombahan diri o kasanangan do Tuhan. 37-38 Om patahakon nogi' do pointonggoi'ddi o koinsanai di porsombahan di pinatahak do tontok di tadau do koiso'. 39 Om iyo noddi o toturan do pasal di porsombahan di sorobon, om porsombahan do gandum, om porsombahan do waig dot anggur, om i porsombahan do piombolutan dit apatut dokoyu'd patahakon dot id Tuhan do tontok do mamaramai di piro-piro o tadau dot agayo di natantu' mantad. Om iri ngai' nopo porsombahan diri om poruhangon di porsombahan di patahakon dokoyu do pamayaan do batos di mikuwo'd sumpa' ko' i porsombahan do tumanud do kagaanan do ginawo. 40 Om polombuso' ngai' nod i Musa dot id tulun dot Israil o koinsanai di pinonuhuan do Tuhan dot id dau.
Oturan do Pasal do Batos di Mikuwo'd Sumpa'
1 Om patahako' nod Musa iti piro-piro o toturan dot id koinsanai di boyoon do payat dot Israil, do poingkaa: 2 Soira' nopod haro o kusai do mamatos do mikuwo'd sumpa' do papatahak do nunu nopo dot id Tuhan, ko' mamatos do mikuwo'd sumpa' do mamantang do nunu nopo om mositi' nod wonsoyon ngai' di tulun i pinabatos dau'ddi, om a' no iyau koino-ino dot a' mamayaan di batos dau di mikuwo'd sumpa' diri. 3-4 Soira' nopod haro o sumandak di poingiyon po do hiri'd walai do tapa' dau do mamatos do mikuwo'd sumpa' do papatahak do nunu nopo dot id Tuhan, ko' mamatos do mikuwo'd sumpa' do mamantang do nunu nopo, om mositi' nod wonsoyon dau o koinsanai di batos dau di mikuwo'd sumpa' ko' batos dau'ddi, ondung a' no awagat o ginawo di tapa' dau do koilo do pasal diri. 5 Nga' ondung awagat o ginawo di tapa' dau do bayaanon di tanak dau i pinabatos diri, om a' i' akagasan di batos i sumandak diri. Om oompunan i' iyau'd Tuhan tu' iri i tapa' dau o mogodu dau do mamayaan di batos dau di mikuwo'd sumpa'. 6-7 Ondung haro o tondu' dit a' po nakasawo do momonsoi'd batos do mikuwo'd sumpa', do minomusorou kopio tuu iyau do tintod do minomonsoi di batos diri ko' amu' po, ko' ondung minamatos iyau do mikuwo'd sumpa' do mamantang do nunu nopo, om akagasan no iyau di batos dau di mikuwo'd sumpa' ko' i batos dau'ddi. Om soira' nopod kakawin iyau, om akagasan kasai' po iyau di batos dau'ddi, ondung a' no awagat o ginawo di sawo dau do korongou do pasal diri. 8 Nga' ondung mogodu i sawo dau do bayaanon dau i batos dau di mikuwo'd sumpa'ddi do korongou i sawo dau, om a' no iyau akagasan di batos diri. Om ompunan i' iyau'd Tuhan. 9 Tondu' nopo di nopuadan ko' i nadaan do sawo om mositi' nod mamayaan do koinsanai di batos dau di mikuwo'd sumpa' ko' i batos dau do mamantang do nunu nopo. 10 Ondung haro o tondu' di nakakawin no do mamatos do mikuwo'd sumpa' ko' mamatos do mamantang do nunu nopo, 11 om mositi' nod wonsoyon dau o koinsanai di nokoboros dau'ddi, ondung a' no awagat o ginawo di sawo dau do korongou do pasal diri. 12 Nga' ondung mogodu i sawo dau do bayaanon dau i batos dau'ddi do korongou i sawo dau do pasal diri, om a' no i tondu' akagasan di batos dau. Om ompunan i' iyau'd Tuhan tu' iri i sawo dau o minogodu dau do mamayaan di batos dau do mikuwo'd sumpa'. 13 Haro i' o kuasa' do kusai do popogirot ko' papaiso' do nunu nopo o batos do mikuwo'd sumpa' ko' batos di pinoboros di sawo dau. 14 Nga' ondung a' awagat o ginawo di kusai do tontok di tadau do korongou iyau do pasal di batos di sawo dau di mikuwo'd sumpa', om mositi' nod wonsoyon ngai' di tondu' i batos dau di mikuwo'd sumpa' ko' i batos dau. Nokogirot no di sawo dau i batos dau'ddi tu' a' i' pinopoboros dot awagat o ginawo dau do tontok di tadau do nokorongou iyau do pasal di batos diri. 15 Nga' ondung pakaisoon di kusai i batos di sawo dau di mikuwo'd sumpa' do tadau'd suwai, om iri no i kusai o mamabo do kootuson di winonsoi dau do pinapakaiso'ddi. 16 Om iri no o piro-piro o toturan do pinatahak do Tuhan dot id di Musa do pasal do batos di mikuwo'd sumpa' do wonsoyon do sumandak di poinsugku' po do tapa' dau, om i tondu' di nakasawo no.
Pisangadan do Sumuli' do Tulun do Midian
1 Boros kad Tuhan dot id di Musa, 2 “Hukuman ngai' no o tulun do Midian do ponuli' di kangaraaton diyolo' dot id tulun dot Israil. Om katalib pondo iri om apatai ko nondo, oi Musa,” ka. 3 Om boro-boros noddi i Musa dot id tulun dot Israil, “Sumodia' kou no do mongoi sangod. Om ongoyon no dokoyu songodo' i tulun do Midian om hukuman no iyolo' do ponuli' di kangaraato' diyolo' dot id toguang do Tuhan. 4 Om momili' kou nod sororibu-ribu o soudor do mantad id pointikid-tikid do payat dot Israil, do mongoi sangod,” ka dau. 5 Om pilio' noddi o sororibu-ribu o tulun do mantad id pointikid-tikid do payat dot Israil. Om ginumu' nopo diyolo'ddi nga' hopod om duwo noribu o tulun di nokosodia' no do mongoi sangod. 6 Om suhuo' noddi di Musa iyolo' do mongoi sangod. Om i Pinihas i tanak di Iliasar it Imam, o boyoon diyolo'. Om i Pinihas no i mongilo-ilo do koinsanai di pakakas dit ongolidang, om i torumpit di pouunion do maan do popoilo. 7 Om ngoyo' noddi di tulun dot Israil songodo' i tulun do Midian, om patayo' ngai' nopo diyolo' i tongokusai'd hiri do tumanud di pinonuhuan do Tuhan dot id di Musa. 8 Om kohompit nogi' i limo o raja' do tulun do Midian. Iri ngai' nopo raja'ddi nga': i Iwi om i Rikim, om i Sur, om i Hur, om i Riba. Om pinatai po diyolo' i Biliam i tanak di Bior. 9 Om tanggayai no di tulun dot Israil i tongoondu' om i tangaanak di tulun do Midian, om onuo' ngai' diyolo' i sapi' om i tayam-tayam diyolo'd suwai om i dapu' diyolo'. 10 Om tutudai no di tulun dot Israil i kabandaran om i kokiiman di tulun do Midian. 11 Om timungo' ngai' nogiddi di tulun dot Israil i nangaanu diyolo' do mantad id pisangod, dot i tulun om i tayam-tayam di natangggayan diyolo'ddi, 12 om igitai ngai' no diyolo' do hiri'd di Musa om hiri'd di Iliasar om hiri'd toinsanan di tulun dot Israil. Tontok nopoddi om hilo' iyolo'd rantai do Muab do minomukiim, i hilo'd somok do Bawang do Yordan, it id hapak do bandar do Yorikou.
Minuli' i Soudor dot Israil
13 Om soliwan ngai' noddi i Musa om i Iliasar, om i piro-piro boyoon do suwai, om i tulun dot Israil do minongoi ruba' di soudor dot Israil. 14 Om kotogod noddi i Musa di soudor om i boyoon di soudor om i sinompuruan do soudor di koguguli' do mantad id pisangadan. 15 Om ponguhot no i Musa diyolo', “Nokuro tu' pinologos dokoyu'd poimpasi iti tongoondu'? 16 Okon toi ko' ilo' no tongoondu' i tuminanud di nosihat di Biliam, i nokobungou ngai'd tulun dot Israil dot a' tuminorodok dot id Tuhan di hilo'd Pior! Om iri noddi o pinoporikot do kousungan dot id tulun di songonuon do Tuhan. 17 Baino' nopo om patayon ngai' no dokoyu o tangaanak do tongokusai om i tongoondu' di nodudun do kusai. 18 Nga' iri nopo i tongoondu' di minsusukod nogi' om i tongoondu' dit a' po nodudun do kusai, om koino-ino i' dokoyu dot onuon. 19 Om dinondo nodti, om koinsanai dokoyu i nakapamatai'd tulun, ko' i nakakama' do rata'd tulun om mositi' nod mundorong do hilo'd soliwan dilo kokiiman do solinaid do turu' o tadau. Om tontok nopo di kotolu om di koturu'd tadau, om mositi' nod wonsoyon dokoyu om i tongoondu' di tinanggayan dokoyu, i wonsoyon di natantu' mantad do pomolidang do tinan do tumanud do toturan do tugama'. 20 Koinsanai di pakayan om nunu nopo i kulit do winonsoi, ko' hulu'd kambing ko' kayu do winonsoi, om mositi' nod lidangan do tumanud dit oturan do tugama',” ka dau. 21 Om boro-boros noddi i Iliasar di tulun dot ogumu' di koguguli' do mantad id pisangadan, “Iti ngai' no o toturan di pinatahak do Tuhan dot id di Musa. 22-23 Koinsanai dit a' sumorob, do miagal do tamas, om pirok, om tambaga', om basi', om gundol dit opurak om gundol dit oitom, om mositi' nod posuboon ngai' iri dot id tapui do pomolidang diri. Om nunu nopo i konunu-nunuan dit osorob do tapui om ougan no di waig di pongongoug do tontok do momolidang. 24 Om koturu' nopod tadau om mositi' nod pupuan dokoyu o pakayan dokoyu, om olidang kou indo dot id pagantangan do tugama', om koino-ino kou nondo do sumuang do hiri'd kokiiman,” ka dau.
Binahagi' i Konunu-Nunuan di Naanu Mantad id Pisangod
25 Om boro-boros noddi o Tuhan dot id di Musa, 26 “Iya' no om i Iliasar, om koinsanai di boyoon do suwai di tulun dot Israil, ot apatut do mongintob di konunu-nunuan di naahau do mantad id pisangod, om kohompit ngai' nogi' i tulun om i tayam-tayam di nangatanggayan. 27 Om iri nopo i konunu-nunuan diri nga' piduwoon om piintangaon nopo. Songintanga' nopo om patahakon di soudor, om songintanga' no om patahakon di tulun dot Israil di suwai. 28 Mantad nopo di tintanga' di naanu di soudor om mositi' nod manganu dot iso' do mantad id pointikid-tikid do limo nahatus --- do mantad id pogialatan do tulun di natanggayan om mantad nogi' dot id pogialatan do sapi' om kaladai, om dumba' om kambing, do maan do sukai do patahakon dot id Tuhan. 29 Om patahakon nondo iri dot id di Iliasar it Imam, do maan do porsombahan di potobilangon do maan do don Tuhan. 30 Om mantad no di tintanga' di tulun dot Israil do suwai, om mositi' nod manganu dot iso' do mantad id pointikid-tikid do limo nohopod dot id pogialatan di tulun di natanggayan om mantad id pogialatan do sapi' om kaladai, om dumba' om kambing. Om patahakon ngai' nondo iri di tulun do Liwi, i mongilo-ilo do hiri'd Kiim di Koropohon do Tuhan,” ka dau. 31 Om wonsoyo' ngai' nopo di Musa om i Iliasar iri do tumanud di pinonuhuan do Tuhan. 32-35 Iti ngai' no i nangaanu di soudor do tinanggayan diyolo' do mantad id pisangod, do suwai mantad ko' i nangaanu diyolo' do maan diyolo'. Kogumuon nopo om 675,000 o dumba' om kambing, om 72,000 o sapi', om 61,000 o kaladai, om 32,000 o tongoondu' dit a' po nodudun do kusai. 36-40 Om kogumuon nopo di nakatahak dot id soudor diri om 337,500 o dumba' om kambing. Om 675 o tinan do mantad diri do numaan do sukai do pinatahak dot id Tuhan; om 36,000 o tinan do sapi', om 72 o tinan do mantad diri do numaan do sukai do pinatahak dot id Tuhan; om 30,500 o kaladai, om 61 o tinan do mantad diri do numaan do sukai do pinatahak dot id Tuhan; om 16,000 o tongoondu' di minsusukod nogi', om 32 o tulun do mantad diri do numaan do sukai do pinatahak dot id Tuhan. 41 Om patahako' ngai' nod Musa i numaan do sukai'ddi dot id di Iliasar do numaan do porsombahan do potobilangon do maan do don Tuhan, do tumanud di pinonuhuan do Tuhan. 42-46 Om iri no i tintanga' di pinatahak dot id tulun dot Israil di suwai, i songintanga' di pinatahak di soudor, om 337,500 o dumba' om kambing. Om 36,000 o sapi', om 30,500 o kaladai, om 16,000 o tongoondu' dit a' po nodudun do kusai. 47 Om mantad nodti om minanganu i Musa dot iso' do mantad id pointikid-tikid do limo nohopod o tulun di tinanggayan di soudor dot Israil, om mantad id pogialatan di tayam-tayam. Om patahako' nogiddi di Musa iri dot id tulun do Liwi, i maganu-anu dot id Kiim do Tuhan, do tumanud di pinonuhuan do Tuhan dot id dau. 48 Om rikot noddi dot id di Musa i boyoon do soudor, i minomoyo' di soudor dot Israil, 49 do minongoi popoilo di Musa do poingkaa, “Tuan, nointob ngai' no dahai i soudor dit id siriba' do kuasa' dahai, om aiso' i' o natagak. Hino ngai' i' iyolo'. 50 Om baino' nopodti om paatod no iyahai diti nangaanu dahai: Iti tamas, om saring, om lungkaki', om pondulung, om simbong, om karo, do patahakon ngai' dahai dot id Tuhan do pambayar dahai do ginawo dahai, om intirungan indo kasai' iyahai'd Tuhan,” ka diyolo'. 51 Om romito' ngai' noddi di Musa om i Iliasar i tamas diri, i nowonsoi mantad no do maan do pongillumis. 52 Om iri nopo pinatahak di piro-piro boyoon do soudor diri nga' osomok nod duwo nahatus o kilogram do kawagato'. 53 Om onuo' noddi di soudor dit okon ko' boyoon i nangaanu do mantad id pisangod do maan do diyolo'. 54 Om igitai ngai' noddi di Musa om i Iliasar i tamas diri do hiri'd Kiim do Tuhan. Om ointirungan i' do Tuhan i bansa' dot Israil.
Payat di Hiri'd Ponong Id Koulayon do Mantad id Bawang do Yordan
1 Iri nopo payat di Rubin om i Gad nga' sorogumuan tomod do tayam-tayam. Om kokito nopoddi diyolo' dot osonong kopio i tana' do hilo'd Yaisor om i tana' do hilo'd Giliad do pomogompian do tayam-tayam, 2 om ongoi noddi iyolo' solowot di Musa, om i Iliasar, om i piro-piro boyoon do suwai dit id pogiolitan do tulun dot Israil, om boro-boros no iyolo' do poingkaa, 3-4 “Iri nopo tana' do hilo'd bandar dot Atarot, om Dibon, om Yaisor, om Nimra, om Hisbon, om Iliali, om Sibam, om Nibo, om Bion, i naanu no do tulun dot Israil, do tinulung do Tuhan do minanganu, nga' ongoluhub kopio om osonong do pomogompian do tayam-tayam. Iyahai nopo om sorogumuan tomod do tayam-tayam, 5 om pokionuon no dahai do patahakon nu dahai o tana'dti do dahai'd songonuon. Om kada' iyahai suhuo' do mundaliu do kumaa do hilo'd soborong dilo Bawang do Yordan,” ka diyolo'. 6 Om boros kad Musa do suminimbar, “Nunu hoi? Mundorong kou no daa'ddi iyokoyu do hiti om inda' ka di tongotobpinai dokoyu dot oiyo ko' bansa' dot Israil tu' maso pod mongoi sangod. 7 Nokuro tu' kasaap kopio kou do monompurolosi do tulun dot Israil do sumoborong dilo Bawang do Yordan do kumaa do hilo'd pomogunan di pinatahak mantad do Tuhan dot id diyolo'? 8 Om iyo no motindo i winonsoi di komolohingan dokoyu di gulu po, do tontok di sinuhu' ku iyolo' do mongoi hombo di pomogunan diri do mantad hilo'd Kadis Barnia. 9 Om pamanau no iyolo' do gisom do nokorikot do hilo'd Rantai dot Iskol, om nokokito no iyolo' di pomogunan diri. Nga' tontok di guminuli' iyolo' om tompurolosio' no diyolo' i tulun dot Israil, gisom dot a' noddi iyolo' minongoi do hiri'd pomogunan di pinatahak mantad do Tuhan dot id diyolo'. 10-11 Om tontok nod tadau'ddi do notogod tomod o Tuhan, boros ka dau, ‘Iti nopo tulun diti om a' noddi tumorodok dot id doho'. Om sumumpa' oku no dot isai nopo o tulun dot Israil di nokorikot nod duwo nohopod o toun do tumur ko' it otuo mantad ko' iri do mantad di kinosoliwanan diyolo' do mantad hilo'd Masir, om aiso' no o kosuang do hilo'd pomogunan di nakabatos ku di Abraham om i Isak om i Yakub,’ ka dau. 12 Om koontok ngai' nopo i tulun dot Israil di sumpa' diri, om i Kalib po i tanak di Yopuni, i tulun do Kinas diri, om i Yosua i tanak di Nun ot a' noontok. Tu' iyolo' poo it otorodok dot id Tuhan. 13 Om otogod diri o Tuhan dot id tulun dot Israil, gisom do pinologos do Tuhan iyolo' do mombo-hombo do hilo'd tana' do kowotuan do solinaid dot apat nohopod o toun, om gisom do nangapatai ngai' i tulun di suminaap do Tuhan. 14 Baino' nodti om momonsoi kou po iyokoyu do miagal di winonsoi di komolohingan dokoyu. Kidusa kou no kopio, iyokoyu i sukodwagu. Tu' ondung momonsoi kou do miagal diri om poporikot kou no kopio do kototogod do Tuhan dit a' ogina-gina' dot id tulun dot Israil! 15 Ondung a' kou mumboyo' do tisuhu' do Tuhan do dinondo, om tongkiadan pondo do Tuhan dot alaid-laid o koinsanai do bansa'dti do hiti'd tana' do kowotuan. Om iyokoyu no o kobungou do kapatayon diyolo',” ka dau. 16 Om ongoi noddi i payat do Rubin om i payat do Gad solowot di Musa, om boro-boros nod poingkaa, “Potumboyoo' po iyahai do momonsoi'd kandang di kitolig do poiyanan dahai di dumba' dahai, om momonsoi do bandar dit ongkitolig o posorili' do poiyanan dahai dilo tangaanak om sawo dahai. 17 Om opongo pondo dahai iri, om mongoi nogindo iyahai uhup di koobpinayan dahai dit iso-iso' o bansa' do sumaap di pisangod do gisom dot aanu diyolo' i pomogunan diri om osiliu do diyolo'd songonuon. Om daamot nopondoddi om miyon nondo do hiri'd bandar do kitolig i tangaanak om sawo dahai do daamot dahai do mongoi sangod. Om ointirungan nondo iyolo' do mantad id tulun di poingiyon mantad do hiti'd pomogunan diti di mongoi sangod. 18 Om a' po iyahai gumuli' do hiri'd walai dahai dot a' po aanu di tulun dot Israil i pomogunan di nakatahak mantad do maan do diyolo'd songonuon. 19 Om a' no iyahai manganu dot ongokooro' piya do tana' di hilo'd soborong do Bawang do Yordan, tu' nakaanu no iyahai do dahai'd gontok do tana' do hiti'd ponong id koulayon do mantad id Bawang do Yordan,” ka diyolo'. 20 Om boros kad i Musa do suminimbar, “Ondung otopot no kopio ino pinoboros dokoyu, om hiti nod kinoiyonon do Koropohon do Tuhan do sumodia' kou do mongoi sangod. 21 Om koinsanai dilo soudor dokoyu om mositi' nod sumoborong dilo Bawang do Yordan do mongoi sangod dilo pisangod toko'. Om woyoon kou id Tuhan do gisom dot aala' do Tuhan iyolo', 22 om gisom dot osolod dokoyu i pomogunan diri. Om koino-ino kou nogindo do muli', tu' nowonsoi no dokoyu it apatut dokoyu'd wonsoyon dot id Tuhan, om id tongotobpinai dokoyu dit oiyo ko' bansa' dot Israil. Om kotumboyo' nogindo o Tuhan do iyokoyu o kasanganu di tana' di ponong id koulayon. 23 Nga' a' nopo dokoyu owonsoi o miagal di nakabatos dokoyu, om sorohon no dokoyu do kowonsoi kou nod dusa dot id toguang do Tuhan. Nga' kada' kou no kopio pomonsoi'd dusa tu' iri no moti' dusa o kopomohukuman dokoyu. 24 Om ongoi kou no popoingkakat do bandar om kandang do poiyanan di dumba' dokoyu. Nga' wonsoyon no kopio dokoyu i nangkabatos dokoyu!” ka dau. 25 Om boro-boros noddi i payat do Gad om i payat do Rubin do poingkaa, “Oi Tuan, tonudon ngai' i' dahai o nunu nopo i ponuhuan do Tuan. 26 Poundorongon ngai' dahai o tangaanak om sawo om i dumba' dahai do hiti'd bandar do Giliad. 27 Nga' iyahai nopo om sumodia' i' do mongoi sangod, om Tuhan i' o momoyo' dahai. Om sumoborong nondo iyahai di Bawang do Yordan do mongoi sangod do tumanud di pinoboros do Tuan,” ka diyolo'. 28 Om poboroso' noddi di Musa iti ponuhuan dot id di Iliasar om id di Yosua, om id koinsanai di boyoon dot Israil, 29 “Ondung tumanud no kopio do ponuhuan i payat do Gad om i payat do Rubin do sumoborong do Bawang do Yordan, do mongoi uhup dokoyu do mongoi sangod, om kamanang kou no, om patahakon nopo diyolo' i tana' do Giliad do maan do diyolo'd songonuon. 30 Nga' a' nopo iyolo' moyo' dokoyu do sumoborong do Bawang do Yordan do mongoi sangod, om mositi' nod iri no i tana' di diyolo'd bahagi' ot aanu diyolo' do miagal dokoyu tu' kaanu do bahagi'd tana' do hilo'd pomogunan do Kanaan,” ka. 31 Om boros ka di payat do Gad om i payat do Rubin do suminimbar, “Oi Tuan, wonsoyon ngai' i' dahai o nunu nopo i pinonuhuan do Tuhan dot id dahai. 32 Om sumoborong i' iyahai do kumaa do hilo'd pomogunan do Kanaan do mongoi sangod do moyo' do Tuhan i boyoon dahai. Om aanu i' dahai iti tana' do dahai'd songonuon do hiti'd ponong id koulayon do mantad id Bawang do Yordan,” ka diyolo'. 33 Om patahako' nod Musa dot id payat do Gad om id payat do Rubin om id songintanga' do payat do Manasi o koinsanai di watas di Sihon i raja' do tulun dot Amori, om i watas di Raja' Og, i mantad id pomogunan do Basan, om kohompit nogi' i kabandaran om i tana' do hiri'd posorili'. 34 Om wonsoyo' no kawagu di payat di Gad i bandar do Dibon, Atarot, Aroir, 35 Atarot Sapan, Yaisir, Yogbiha, 36 Bait-Nimra, om Bait-Haran do winonsoi'd kabandaran di kitolig om pamansayan do kandang do dumba'. 37 Om winonsoi kawagu di payat di Rubin i kabandaran do Hisbon, Iliali, Kiriataim, 38 Nibo, Baal-Mion (ngaran nopo do bandar diti om nakawaliu no) om Sibam. Iri nopo bandar di winonsoi kawagu diyolo'ddi nga' pinungaranan ngai' diyolo' do ngaran do wagu. 39 Om ngoyo' no di pinuruan do sompiiyon di Makir i tanak di Manasi, solodo' i tana' do Giliad, om iyon noddi iyolo' do hiri. Om uyungo' no diyolo' i tulun dot Amori, i poingiyon do hiri'd bandar diri. 40 Om patahako' noddi di Musa dot id pinuruan do sompiiyon di Makir i tana' do Giliad, om hiri noddi iyolo' do minomogun-mogun. 41 Om i Yair no i mantad id payat do Manasi, om minanangod om minonolod do piro-piro o kampung, om pungaranai noddi dau i kokompungan diri do “Kokompungan do Yair”. 42 Om i Noba no, om minongoi panangod om minonolod di bandar do Kinat om koinsanai di kokompungan do hiri. Om pungaranai noddi dau iri do Noba do pinasangai di ngaran dau.
Pinamanahan do Mantad Hilo'd Masir om Gisom do Hilo'd Muab
1 Tontok di nokotongkiad i tulun dot Israil do mantad hilo'd Masir, do minulud do minamanau do tumanud di payat diyolo', do winoyo' di Musa om i Harun, om minumbaya' iyolo' dot id piro-piro o kinoiyonon. 2 Om tinulis ngai' di Musa o ngaran do pointikid-tikid di kinoiyonon di pinomukiiman diyolo', do tumanud di pinonuhuan do Tuhan. 3 Om di nopo suminoliwan o tulun dot Israil do mantad id Masir, do winoyo' do Tuhan, om tontok di tadau'd kohopod om limo do tulan di koiso', i sangadau nogi' o kinotoliban do mantad di tadau do Paska di koinsan nogi'. Om tongkiad no iyolo' di bandar do Ramisis, dot antang-antangan di tulun do Masir, 4 di maso do momolobong di tangaanak diyolo' dit id gulu kosusu, i pinatai do Tuhan. Om iri no i kinapatayan di tangaanak diyolo'ddi do pinointalang do Tuhan dot iyau no ot okoris ko' mantad di tongotingolig di tulun do Masir. 5 Om pamanau noddi i tulun dot Israil do mantad hilo'd Ramisis om pomukiim no iyolo' do hilo'd Sukot. 6 Om mantad nod hilo'd Sukot om pomukiim no iyolo' do hilo'd Itam, i hiri'd tisan do tana' do kowotuan. 7 Om mantad nod hilo', om poguliai no diyolo' do hilo'd Pi-Hahirot, i ponong id koulayon do mantad id Baal Sipon, om pomukiim noddi iyolo' do hilo'd somok do Migdol. 8 Om tongkiad noddi iyolo' do mantad hilo'd Pi-Hahirot om soborong no iyolo' di Rahat dot Aragang, om pamanau no do kuminaa do hiri'd tana' do kowotuan dot Itam; om maha' di tolu noddi o tadau diyolo' do manau-panau om pomukiim no iyolo' do hilo'd Mara. 9 Om mantad nod hilo' om lombus no iyolo' do hilo'd Ilim, om pomukiim no iyolo'd hilo'. Hilo' nopod Ilim om haro o hopod om duwo o tudan do waig, om turu' nohopod o guas do kurma. 10 Om pamanau no iyolo' do tuminongkiad dot Ilim om pomukiim no iyolo' do hiri'd somok do Suok do Suis. 11 Om pomukiim no kawagu iyolo' do hilo'd tana' do kowotuan do Sin. 12 Om koimbagu noddi om pomukiim no iyolo' do hilo'd somok do Dopka, 13 om pakayaai no diyolo' do hilo'd Alus. 14 Om pomukiim noddi iyolo' do hilo'd Rapidim, nga' aiso' i' o waig dot inumon do hiri. 15-37 Om mantad no do hilo'd Rapidim om lombus no iyolo' do kuminaa do hilo'd Nuluhon do Hor. Om iti no ngai' o nokoiyonon diyolo' do minomukiim: Hilo'd tana' do kowotuan do Sinai, hilo'd Kibrot Taawa, ko' “Kalabangan di Godoot”, hilo'd Hasirot, hilo'd Ritma, hilo'd Rimon Piris, hilo'd Libna, hilo'd Risa, hilo'd Kihilata, hilo'd Nuluhon do Siapir, hilo'd Harada, hilo'd Makilot, hilo'd Tahat, hilo'd Tara, hilo'd Mitka, hilo'd Hasmona, hilo'd Mosirot, hilo'd Bini Yaakan, hilo'd Hor Gidgad, hilo'd Yodbata, hilo'd Abrona, hilo'd Ision-Gibir, hilo'd tana' do kowotuan do Sin (i hilo'd Kadis) om hilo'd Nuluhon do Hor, it id wolit do tana' dot Idom. 38-39 Om takad no i Harun, it Imam diri, do hilo'd Nuluhon do Hor, do tumanud di pinonuhuan do Tuhan. Om kapatai noddi i Harun do hilo' do tontok di tadau do koiso' do tulan di kolimo, di kaapat nohopod do toun do mantad di kinosoliwanan do tulun dot Israil do mantad hilo'd Masir. Tumur nopo di Harun do tontok di napatai iyau om hatus om duwo nohopod om tolu o toun. 40 Om korongou noddi di raja' do pomogunan dot Arad, i hilo'd tana' do Nigib, i ponong id salatan do Kanaan, do mamanau no do kumaa'd hiri'd pomogunan diri i tulun dot Israil. 41-49 Iti no ngai' i kinoiyonon do pinawansayan di tulun dot Israil do kiim diyolo' di mantad iyolo' do hilo'd Nuluhon do Hor om gisom do nokorikot iyolo' do hilo'd rantai do pomogunan do Muab, i hilo'd Salmuna, hilo'd Punon, hilo'd Obot, hilo'd kinaraagan dot Abarim, hilo'd watas do Muab, hilo'd Dibon Gad, hilo'd Almon Diblataim, hilo'd Nuluhon do Abarim, it id somok do Nuluhon do Nibo, om hilo'd rantai do Muab, it id somok di Bawang do Yordan, id hapak di bandar do Yorikou, it id pialatan do Bait-Yosimot, om Rantai dot Akasia.
Ponuhuan do Tintod do Sumoborong di Bawang do Yordan
50 Hilo' nod rantai do Muab, i hiri'd somok do Bawang do Yordan, it id hapak do bandar do Yorikou do nonuan do Tuhan i Musa do 51 piro-piro o ponuhuan diti do patahakon dot id tulun dot Israil, “Kosoborong kou nopondo di Bawang do Yordan do kumaa'd hilo'd pomogunan do Kanaan, 52 om mositi' nod uyungon ngai' dokoyu i tulun mantad do hilo'd pomogunan diri. Om raagon ngai' no dokoyu o koinsanai di tingolig diyolo' di watu ko' tambaga' do winonsoi, i tiiyonon diyolo' do sumambayang. 53 Om mositi' no do solodon dokoyu i tana'ddi om miyon kou nod hiri, tu' iri no o patahakon ku dokoyu. 54 Om mositi' nod pogiongkib-ongkibon dokoyu i tana'ddi dot id pogialatan do pointikid-tikid di payat om i pinuruan do sompiiyon do tulun dot Israil, dot undion o ralan do mangangkib. Iri nopo i pinuruan do sompiiyon dit asapou om agayo no o tana' do poongkibon, om iri no i pinuruan do sompiiyon dit okuri' om okoro' no o tana' do poongkibon dot id diyolo' do maan do diyolo'd songonuon. 55 Nga' ondung a' dokoyu uyungon i tulun mantad do hiri'd pomogunan diri, om iyolo' no motindo i poundorong do hilo' o monusa' dokoyu, do miagal pod togis di nokoliwata' dokoyu ko' miagal do rugi di nokosulu do lapap dokoyu. Om saapon kou motindo diyolo'. 56 Om ondung a' dokoyu uyungon iyolo', om iyokoyu motindo o raagon ku do pamaraag ku nopo om i natantu' mantad ku do pamaraag ku diyolo',” kad Tuhan.
Wolit di Tana'
1 Om poboroso' noddi do Tuhan dot id di Musa 2 i ponuhuan do kumaa dot id tulun dot Israil do poingkaa, “Korikot kou nopondo do hilo'd Kanaan om wansayan no dokoyu'd wolit i tana'ddi do poingkaa: 3 Wolit nopo do ponong id salatan, om potilombus nopo do mantad hiri'd tana' do kowotuan do Sin do poinsusui di wolit do pomogunan dot Idom. Wolit nod ponong id koulayon om poimpuunon do hilo'd tompok ponong id salatan di Rahat do Napatai. 4 Om pahamadon nondo do ponong id salatan do kumaa id Ralan dot Akrabim, om potilombus nopo do hilo'd Sin gisom do korikot do hilo'd Kadis Barnia, i ponong id salatan. Om mantad nondod hilo' om pahamadon po do kumaa do ponong id kotonobon, do gisom do korikot do hilo'd Hasar-Adar, om potilombuson do hilo'd Asmon. 5 Om hilo' no do pahamadon i wolit do kumaa'd hilo'd rantai do piwolitan do pomogunan do Masir, om koompok nondo do hilo'd Rahat do Tanga'. 6 Iri no i Rahat do Tanga' o wolit di pomogunan dokoyu do ponong id kotonobon. 7 Wolit no do ponong id utara om poimpuunon di Rahat do Tanga' do pokoyoon do hilo'd Nuluhon do Hor 8 om mantad nod hilo' om pokoyoon do hilo'd ralan di roitan do Ralan do Hamat, om potilombuson do hilo'd Sidad 9 om hilo'd Sipron om koompok do hilo'd Hasar-Inan. 10 Wolit no do ponong id koulayon, om poimpuunon do hilo'd Hasar-Inan om gisom do korikot do hilo'd Sipam. 11 Om mantad nod hilo' om poruhukon do hilo'd Ribla, i ponong id koulayon do mantad id Ain, om potilombuson do hilo'd konulu-nuluan, it id tisan di Tasik Galilia do ponong id koulayon, 12 om pokoyoon do ponong id salatan do posusuyon di Bawang do Yordan, om gisom do korikot do hilo'd Rahat do Napatai. Om iyo noddi it apat o wolit di pomogunan dokoyu,” ka dau. 13 Om boro-boros noddi i Musa di tulun dot Israil do poingkaa, “Iti no ngai' o tana' dot aanu dokoyu, dot undion o ralan dokoyu'd manganu, i tana' dot ongkibon dot id pogialatan di siam om satanga' o payat dot Israil, do tumanud di pinonuhuan do Tuhan. 14-15 Iri nopo payat do Rubin om Gad om i songintanga' do payat do Manasi nga' nakaanu no do diyolo'd gontok, om iri nopo tana' diyolo'ddi om naangkib no dot id pogialatan di piro-piro o sompiiyon diyolo'. Tana' nopo di naanu diyolo' nga' ponong id koulayon do mantad di Bawang do Yordan, it id hapak do Bandar do Yorikou i ponong id soborong,” ka dau.
Piro-piro Boyoon do Nopili' do Mangangkib di Tana'
16 Om boros kad Tuhan dot id di Musa, 17 “Iri nopo it apatut do mangangkib di tana' om i Iliasar it Imam, om i Yosua, i tanak di Nun. 18 Om momili' no do songulun o boyoon do mantad id pointikid-tikid do payat do monguhup diyo Iliasar om i Yosua do mangangkib di tana',” ka dau. 19-28 Om iti ngai' no o ngaran di tulun di nopili' do Tuhan. - Payat - Boyoon - Yohuda - I Kalib, i tanak di Yopuni - Simion - I Samuil, i tanak di Amihud - Binyamin - I Ilidad, i tanak di Kislon - Dan - I Buki, i tanak di Yogli - Manasi - I Haniol, i tanak di Ipod - Ipraim - I Komuil, i tanak di Siptan - Sibulon - I Ilisapan, i tanak di Parna - Isakar - I Paltiol, i tanak di Asan - Asor - I Ahihud, i tanak di Silomi - Naptali - I Pidail, i tanak di Amihud 29 Iri ngai' no o tulun di sinuhu'd Tuhan do mangangkib di tana' di hilo'd Kanaan do patahakon dot id tulun dot Israil.
Piro-Piro Bandar do Patahakon dot id Payat do Liwi
1 Tontok di hilo'd rantai do Muab, i hilo'd somok do Bawang do Yordan, it id hapak do bandar do Yorikou, om boro-boros no o Tuhan dot id di Musa do poingkaa, 2 “Sunudan ngai' no o tulun dot Israil do mantad nopo di tana' do naanu diyolo'ddi om mositi' no do patahakon diyolo' dot id tulun do Liwi om kopomogun-mogun i' do hilo' i tulun do Liwi. 3 Om asanganu nondo diyolo' i kabandaran diri do pomogun-mogunan diyolo'. Om iri no i tana' di kobuturan do hiri'd posorili' di kabandaran om poiyanan di sapi' om i tayam-tayam diyolo'd suwai. 4 Kogoyoo' nopo di kobuturan diri om apat nahatus om limo nohopod o mito do sukaton do mantad id tolig di bandar do pabasagi'. 5 Iri nopondo tana' do kinoiyonon di tulun do Liwi om apasagi'. Sopisiam nahatus o mito do konoruo' om kalaabo'. Om iri nopondo i bandar om hiri'd tanga' di kinoiyonon diyolo'. 6 Om onuan nogi' dokoyu i tulun do Liwi dot onom o bandar di maan do pogintirungan do tulun di kapamatai do tulun do suwai dit a' tomodon do mamatai, om hiri nondo o tongoyon diyolo' intirungo'. Om suwai no ko' iri om onuan po dokoyu iyolo' dot apat nohopod om duwo o bandar 7 do mitonggoi di kobuturan. Om oinsanan nopondo om apat nohopod om walu' o bandar dot aanu di tulun do Liwi. 8 Kogumuo' nopo do bandar do tulun do Liwi dot id suang do watas do pointikid-tikid dot iso' o payat dot Israil om mositi' nod tontuon do tumanud do kogoyo-goyoo' di watas,” ka dau.
Bandar do Pogintirungan
9 Om suhuo' nod Tuhan i Musa 10 do popolombus dot id tulun dot Israil diti boros do poingkaa, “Kosoborong kou nopondo di Bawang do Yordan do kumaa do hilo'd pomogunan do Kanaan, 11 om momili' kou nod piro-piro o bandar do maan do pogintirungan dot isai nopo o tulun di kapamatai do tulun dot a' tomodon do mamatai, om hiri nondo o ngoyon di tulun diri. 12 Om hiri nod bandar diri dot aiso' o ligogon di tulun diri do mantad id koobpinayan di tulun di napatai dau'ddi, i kosorou daa do momolokop. Tu' isai nopo it atandasan do mamatai'd tulun, om a' i' milo do hukuman do kapatayon dot a' po oilaan kopio dot id bisara'. 13 Om momili' kou no dot onom o bandar: 14 tolu o hilo'd ponong id koulayon do mantad id Bawang do Yordan om tolu o hilo'd tana' do Kanaan. 15 Om iri nopo piro-piro o bandar diri om silihon do bandar do pogintirungan do tulun dot Israil, om i tulun do bansa'd suwai di poirolot dokoyu di koumbaya' no toomod ko' i poingiyon do hiri. Om isai nopo o tulun do kapamatai do tulun dit okon ko' tomodon do mamatai, om hiri nod bandar diri o poggiduon. 16-18 Nga' ondung haro o tulun do kapamatai do sompi' ko' tulun do basi' ko' watu ko' kayu o pinakai dau do minamatai di tulun, om kasala' no iyau. Om mositi' no do hukuman do kapatayon. 19 Om mositi' no dot i koobpinayan dit osomok po di tulun di napatai o mamatai do tulun diri. Ondung osolowot dau i tulun diri om mositi' no do patayon dau. 20 Ondung haro o tulun dot otogod do tulun do suwai, om patayon nondo dau iyau do maan potungubo' ko' dumpahon po dau, 21 ko' tumbukan po dau i tulun, om kasala' no i tulun di minamatai'ddi. Om mositi' no do hukuman do kapatayon. Om mositi' no dot i koobpinayan dit osomok po di tulun di napatai o mamatai di tulun di minamatai'ddi. Ondung osolowot dau i tulun diri om mositi' no do patayon dau. 22 Nga' iri nopo tulun di kapamatai do tulun dit aiso' i' o katagad-tagadan dau, do nokotungub tuu ko' nodumpau po dau do watu o nakapatai di tulun diri, nga' a' i' daa dau tinomod do mamatai. 23 Ko' ondung haro o songulun do pinaparatu' do watu om haro'ddi o tulun do nootungan di watu om napatai'ddi, nga' okon i' ko' haro ot osorou dau do mamatai ko' okon ko' pisangod dau i tulun diri. 24 Hal nopo do miagal diri, om mositi' nod obian di tulun dot ogumu' i tulun di nakapatai'ddi, om okon i' ko' i tobpinai di tulun di napatai ot obian. 25-28 Mositi' nod intirungan di tulun dot ogumu' i tulun di nakapamatai'ddi do mantad id kototogod di koobpinayan di tulun di napatai. Om angatan nondo iyau do gumuli' do hiri'd bandar di pogintirungan, i pinogiduwon dau di gulu. Om mundorong nopo iyau do hiri do gisom dot apatai i Boyoon dot Agayo dot Imam do maso'ddi. Om katalib pondo iri om koino-ino nogindo iyau do muli'. Ondung tumongkiad iyau do mantad hiri'd bandar di pogintirungan, i pinogiduwon dau'ddi, om osolowot nondo iyau di koobpinayan di tulun di napatai om patayon nondo iyau, om iyo nopoddi om a' i' komoyon do minamatai. 29 Iti nopo toturan diti om mositi' nod tonudon dokoyu om i sinakagon dokoyu do hinonggo kou nopo do poingiyon. 30 Ondung haro o tulun do tondoson do minamatai do tulun do suwai, om milo nopo kopio do poboroson do nakasala' ko' hukuman do kapatayon do kointalang kopio i winonsoi dau do poboroson do duwo ko' lobi ko' iri o tulun do sasi'. Nga' iso-iso' nopo o tulun do sasi' om a' i' ogirot do popotopot di pinonondos diri. 31 Tulun nopo di minamatai do tulun om mositi' nod hukuman do kapatayon. Om a' i' dau milo do bayaran do tusin i hukuman do nokoontok dau'ddi. 32 Ondung haro o tulun do mogidu' do kumaa dot id honggo nopo di bandar do pogintirungan, om kada' no dokoyu potumboyoo' i tulun diri do mambayar do tusin do koulian dau dot id walai dau dot a' po apatai i Boyoon dot Agayo dot Imam. 33 Ondung poulion dokoyu iyau om ososomu' no dokoyu i pomogunan dit iyonon dokoyu. Om aiso' no o ralan do suwai do momolidang di pomogunan diri, suwai nondo ko' patayon i tulun di minamatai. 34 Kada' no kopio dokoyu sosomuo' o pomogunan di koiyonon dokoyu tu' iyoho' no o Tuhan, om poundorong oku do hiti'd pogiolitan do tulun dot Israil,” kad Tuhan.
Tungkusan di Tongoondu' di Nakasawo
1 Om ongoi no solowot di Musa om i piro-piro boyoon do suwai i komolohingan do sompiiyon dit id suang do pinuruan do sompiiyon di Giliad. I Giliad nopo om tanak di Makir, i manangaki di Manasi. I Manasi nopo om tanak di Yusup. 2 Om boros ka diyolo', “Sinuhu' kou'd Tuhan do mangangkib di tana' dot id pogiolitan diti tulun dot Israil dot undion o ralan do mangangkib. Om sinuhu' kou nogi' dau do manahak do tana' do potungkusan di Silapihad i tobpinai dahai'ddi, dot id tangaanak dau di tongoondu'. 3 Nga' apatut id sorohon dot ondung akawin iyolo' do tongokusai di mantad id payat do suwai, om i tana' nga' aanu no di tulun do mantad id payat do suwai'ddi. Om oingkarayan nondo i tana' di pinaangkib do maan do dahai. 4 Om tontok piya di Toun do Kopogulian, i maso do kopogulian ngai' do nunu nopo o dapu' di nadagang dot id sanganu mantad di dapu', nga' iri nopo tana' di tangaanak di Silapihad do tongoondu', om asanganu kasai' no di payat do sawo diyolo', om okon nondo ko' payat dahai o kasanganu di tana',” ka diyolo'. 5 Om poboroso' nod Musa dot id tulun dot Israil iti boros do mantad id Tuhan do poingkaa, “Otopot i' i pinoboros di tulun do mantad id payat di Yusup, 6 om iri no o kapabarasan do Tuhan dot aiso' i' o kokogos di tangaanak di Silapihad do tongoondu' do mokikawin dot isai nopo i korohian diyolo', nga' mositi' no ma do tulun dit id suang do payat diyolo'. 7 Iri nopo tana' dot otungkusan do pointikid-tikid do tulun dot Israil om asanganu kasai' no di payat dau do gisom dot alaid. 8 Om pointikid-tikid do tongoondu' di kaanu do tungkusan do tana' dot id pogiolitan do payat do hiti'd Israil, om mositi' nod mokikawin do tulun dit id suang do payat dau. Om kotungkus indo o koinsanai di tulun dot Israil di tana' do komolohingan diyolo', 9 om a' i' kopingwaliu dot id payat do suwai o sanganu di tana'. Om pointikid-tikid do payat nga' kasanganu kasai' no di tana' do notungkusan diyolo' do gisom dot alaid,” ka dau. 10-11 Om pokikawin ngai' noddi i limo o tanak di Silapihad do tondu': i Mala, i Tirsa, i Hogla, i Milka, om i Noa di koobpinayan diyolo' di pinsan koinsan nogi', do tumanud di pinonuhuan do Tuhan dot id di Musa. 12 Minokikawin iyolo' di tulun do mantad id pinuruan do sompiiyon dit id suang do payat di Manasi i tanak di Yusup diri. Om asanganu kasai' iddi di payat do tapa' diyolo' i tana' do notungkusan diyolo'. 13 Om iri no ngai' o pongoturan om ponuhuan do pinatahak do Tuhan dot id bansa' dot Israil do pinolombus di Musa, do tontok di hilo'd rantai do Muab i tulun dot Israil, i hilo'd toning do Bawang do Yordan, it id hapak do bandar do Yorikou.
Koimpuunon
1 Id suang nod buuk diti o pinotulisan do koinsanai di pinosunud di Musa dot id bansa' dot Israil di hilo' iyolo' id tana' do kowotuan, i ponong id koulayon do mantad di Bawang do Yordan. Tontok nopoddi om hilo' iyolo' id Rantai do Yordan it id somok do bandar do Sup, it id piolitan do bandar do Paran, i bandar di ponong id sampaping di nundorong diyolo', om i bandar do Topil, om bandar do Laban, om bandar do Hasirot om bandar do Disahab, o ponong id sampaping diyolo'. 2 (Hopod om iso' o tadau do koloidon do mamanau do mantad hilo'd Nuluhon do Sinai do kumaa do hilo'd Kadis Barnia do maya' di konuluhanan do pomogunan dot Idom.) 3 Tontok di tadau do koiso' di tulan do kohopod om iso' do toun di kaapat nohopod do mantad di kinosoliwanan di tulun dot Israil do mantad id pomogunan do Masir, om posunudo' no di Musa dot id diyolo' o koinsanai di pinonuhuan do Kinorohingan di Musa do poposunud dot id tulun dot Israil. 4 Tontok nopoddi om naala' nod Tuhan i Raja' Sihon, i bansa' dot Amori, i minomorinta' do bandar do Hisbon, om naala' nogi' dau i Raja' Og, i mantad hilo'd Basan, i minomorinta' do bandar dot Astarot, om Idroi. 5 Om timpuun no i Musa do poposuhut do komoyon dit oturan om i ponuhuan do Tuhan di hilo' po i tulun dot Israil id ponong id koulayon do mantad id Yordan, it id watas do Muab. Boros ka di Musa, 6 “Tontok di hilo' toko' pod Nuluhon do Sinai, om minomisunud o Tuhan i Kinorohingan toko' do poingkaa, ‘Laid kou noddi do poundorong do hiti'd nuluhon diti. 7 Om iduwon ngai' no dokoyu i kiim dokoyu om lumombus kou do mamanau do kumaa do hilo'd konulu-nuluan do pomogunan do tulun dot Amori, om hilo'd kinoiyonon dit id posorili' do kinoiyonon diri, i hilo'd Rantai do Yordan, om hilo'd konulu-nuluan, om hilo'd rantai, om hilo'd kinoiyonon di ponong id salatan, om hilo'd tisan di Rahat do Tanga'. Ongoi kou no iyon do hilo'd tana' do Kanaan do gisom do katalib di konuluhanan do Libanon om gisom do korikot di bawang dot agayo, i bawang dot Iprat. 8 Iri ngai' no i pomogunan di nakabatos ku do patahakon ku, iyoho' i Tuhan o papatahak, dot id komolohingan dokoyu: i Abraham, i Isak, om i Yakub, om potungkusan ku di sinakagon diyolo'. Ongoi kou no pomogun do hilo'd pomogunan diri,’ ka dau,” ka di Musa.
Minomili' i Musa do Piro-piro Tulun do Gompomutus
9 Boros kaddi di Musa dot id tulun dot ogumu'ddi, “Tontok di hilo' toko' pod Nuluhon do Sinai, om minoro-boros oku dokoyu do poingkaa, ‘Awagat kopio o tonggungan ku do momoyo' dokoyu dot opurimanan ku. Om a' oku no kooyit dot iso-iso' kopio oku. 10 Tu' siniliu kou do Tuhan, i Kinorohingan dokoyu do miagal dilo rombituon do hilo'd tawan kogumu'. 11 Om maha' daa om poinggumuon kou do Kinorohingan di komolohingan dokoyu, do kopiluap do piro-piro kawagu noribu o kogumuon dokoyu, om posimbayanon kou do miagal di pinabatos dau! 12 Nga' poingkukuro oku po do kooyit do tonggungan dot iyo kopio'ddi kawagat do manalasai di pogisosongkiwalan dokoyu? 13 Nga' osonong do momili' kou do piro-piro o tongokusai di kitoilaan om it obinsuhut, om it ogumu' o nopinsingilaan, do mantad id pointikid-tikid do payat, om silihon ku nogindo iyolo' do boyoon dokoyu,’ kangku. 14 Om nokotumboyo' kou i' dot osonong do wonsoyon o miagal diri. 15 Om siliho' ku noddi i tongokusai dit ongkitoilan om it ogumu' no o nopinsingilaan diri, i nongopili' dokoyu do mantad id pointikid-tikid do payat do sumiliu'd boyoon dokoyu. Om haro o boyoon do soribu o tulun, om haro o boyoon do hatus o tulun, om haro o boyoon do limo nohopod o tulun, om haro o boyoon do hopod o tulun. Om minomili' oku po do piro-piro o tulun do siniliu ku do boyoon do mongilo-ilo dot id pointikid-tikid di payat. 16 Tontok nopoddi om sinunudan ku iyolo' do poingkaa, ‘Pokinongohon no kopio dokoyu i pogisosongkiwalan dot id pogiolitan do tulun dokoyu. Om salasayon no do tumanud di pomumutus dot otulid o pointikid-tikid di haro o pogisosongkiwalan dot id pogialatan tuu dokoyu ngai' ko' id pogialatan po di bansa'd suwai di poundorong dot id rolot dokoyu. 17 Nga' kada' kou no kopio panampaping do momutus; iyoon no kopio dokoyu o pomumutus dot isai nopo o tulun. Kada' kou poddosi dot isai nopo o tulun, tu' nunu nopo it ibutus dokoyu om mantad nori dot id Kinorohingan. Ondung haro ot apangkal kopio do manalasai, om porikoton nopo dokoyu iri dot id doho', om iyoho' indo o manalasai,’ kangku. 18 Om sinunudan ku nogi' iyokoyu do koinsanai dit apatut do wonsoyon dokoyu,” ka di Musa.
Sinuhu' i Piro-Piro Gomponoluku' do Minamanau do Hilo'd Kadis-Barnia
19 Om boros ka kawagu di Musa, “Nowonsoi toko' no i pinonuhuan do Tuhan toko'. Tuminongkiad toko' di Nuluhon do Sinai om minaya' toko' di tana' do kowotuan dit agayo om i korolosi kopio di pinakayaan toko' do hilo'd konuluhanan do pomogunan do tulun dot Amori. Om soira' di nokorikot toko' do hilo'd Kadis Barnia, 20-21 om boros kangku, ‘Baino' noddi, om nokorikot kou no do hiti'd konuluhanan do pomogunan dot Amori, i patahakon do Tuhan, i Kinorohingan di komolohingan toko' dot id dati'. Ontong kou pogi' nga' hoodi' no moti', okito no dokoyu. Ongoi kou no pomogun do hilo' do tumanud di pinonuhuan do Tuhan. Kada' kou no poddosi ko' mikoduwo po o ginawo,’ kangku. 22 Nga' rikot kou po dot id doho' om boro-boros kou no do poingkaa, ‘Osonong do monuhu' toko' po do piro-piro o tulun do mongoi ponoluku' dilo pomogunan, om milo i' iyolo' do momisunud dati' ondung honggo o ralan dot osonong do wayaan toko' do kumaa'd hilo' om koilo toko' do kowoyo-woyoo' di kabandaran do hilo',’ ka dokoyu. 23 Om osonong i' do wonsoyon o miagal diri dot osorou ku iyoho', om pomili' oku noddi do hopod om duwo o tulun, do songulun o mantad id pointikid-tikid do payat. 24 Om ongoi no iyolo' do hilo'd konuluhanan do gisom do nokorikot do hilo'd Rantai dot Iskol do mongoi ponoluku' di pomogunan diri. 25 Om igit no iyolo' do tua-ua' di nanu diyolo' do mantad hilo' do pinatahak diyolo' dati' di guminuli' iyolo', om posunudo' no diyolo' dot iri nopo pomogunan do patahakon do Tuhan, i Kinorohingan toko' om oluhub kopio o tana'. 26 Nga' suminaap kou i' di pinonuhuan do Tuhan, i Kinorohingan dokoyu om minada' kou do mongoi do hiri'd pomogunan diri. 27 Om sontogod-togod kou tu' boros ka dokoyu om ‘Otogod o Tuhan dati'. Kinopolobusan nopo dau dati' do mantad id pomogunan do Masir, om maan no do tahakon dot id tulun dot Amori, om apatai toko' indo diyolo'. 28 Nokuro daa tu' mongoi toko'd hilo'? Moddosi i' iyahai, tu' iri nopo i gomponoluku' di sinuhu' dahai om minomisunud do tulun nopod hilo' om okoris om osiou ko' iyahai. Om poingiyon iyolo' dot id bandar di kitolig do korikot do hilo'd tawan kasawato'. Om haro o nokito diyolo' do tulun do hilo' dit angagayo kopio koulun,’ ka no dokoyu. 29 Nga' boros kangku do minomisunud dokoyu, ‘Kada' kou poddosi di tulun do hilo'. 30 Tu' woyoon kou i' do Tuhan i Kinorohingan dokoyu. Muhup i' iyau dokoyu do sumaap do miagal di nokito dokoyu di hilo'd Masir, 31 om di hilo'd tana' do kowotuan. Nokopuriman kou no do kinowoyo-woyoo' do Kinorohingan do minomoyo' dokoyu do kuminaa'd hiti, om ginompi' kou dau do hilo' do miagal pod songulun o tapa' do mamabo di tanak dau,’ kangku. 32 Nga' mulong pod nokoboros ku no o miagal diri dot id dokoyu nga' a' kou i' otumbayaan do Tuhan, 33 mulong piya do minogulu kasai' iyau dokoyu do mogihum do tiyonon dokoyu do momukiim. Om minogulu iyau dokoyu do potunud do ralan dokoyu, do miagal do tapui di poorigi do dongotuong, om miagal do haun di poorigi do dangadau,” ka dau.
Hinukuman do Tuhan o Tulun dot Israil
34 Om boros ka kawagu di Musa, “Norongou i' do Tuhan i boros dokoyu do sontogod-togod om kotogod noddi iyau. Om boros kaddi dau, 35 ‘Aiso' no o songulun piya dot id pogialatan dokoyu do mantad id sinakagon diti tangaraat do maso'd baino' do kosuang do hilo'd pomogunan dot oluhub o tana', i nakabatos mantad ku di taki-aki dokoyu. 36 I Kalib noo i tanak di Yopuni o koongoi do hilo'. Iyau nopo om otorodok i' dot id doho' om patahakon ku indo dot id dau om id sinakagon dau i tana' di nongoi dau homboo',’ ka dau. 37 Om otogod iddi o Tuhan dot id doho' dot iyokoyu o nokobungou, om boros ka dau, ‘Iya' piya oi Musa, nga' a' i' kosuang do hilo'd pomogunan diri. 38 Nga' pogiroton no o ginawo di Yosua i tanak di Nun, i mongunguhup diya'ddi. Tu' iyau no o boyoon do tulun dot Israil do mongoi ponolod do pomogunan diri,’ ka dau. 39 Om boros kaddi do Tuhan dot id koinsanai dati', ‘Ilo' nopo tangaanak dokoyu dit ongokoro' po, it a' po koilo dit otopot om it araat om kosuang i' do hilo'd pomogunan diri, i tangaanak di komoyon dokoyu dot angatanggayan do pisangod dokoyu. Iyolo' no ot onuan ku do pomogunan diri, om iyolo' no o kopomogun do hilo'. 40 Nga' iyokoyu nopo, om poguliai no dokoyu kawagu do hilo'd tana' do kowotuan do maya' di ralan do kumaa do hilo'd Suok dot Akaba,’ ka dau. 41 Om boros ka dokoyu do suminimbar do tontok diri, ‘Oi Musa, nokowonsoi no iyahai do dusa dot id toguang do Tuhan. Nga' baino' nopo om mongoi no iyahai sangod do tumanud di pinonuhuan do Tuhan, i Kinorohingan dot id dahai,’ ka dokoyu. Om sorompori-pori kou nopoddi do suminodia' do mongoi sangod, om minomusorou kou dot a' i' osusa' do mongoi panangod do pomogunan dit id konuluhanan. 42 Nga' boros kad Tuhan dot id doho', ‘Oduhan no iyolo' do mongoi sangod, tu' a' oku no momoyo' diyolo', om aala' indo iyolo' do pisangod,’ ka dau. 43 Om nosunudan ku i' iyokoyu di boros do Tuhan, nga' a' kou i' minamadul diri. Suminaap kou i' dau. Om oondos tomod kou do tuminakad do hilo'd konuluhanan. 44 Om soliwan noddi i tulun dot Amori di poundorong do hilo'd konuluhanan diri, do miagal pod sangkawad o moningot do ruminuba' dokoyu. Om gusao' kou nopo diyolo' do gisom do nokorikot do hilo'd Horma, om kaala' kou no do hilo'd konuluhanan do tana' dot Idom. 45 Om songihad-ihad kou poddi do mokiuhup daa do Tuhan, nga' a' no iyau minokinongou om a' minamadul dokoyu,” ka.
Piro-Piro Toun do Hilo'd Tana' do Kowotuan
46 “Om gowoi poddi om a' no milo dot a' toko' minundorong do hilo'd
1 Om boro-boros po kawagu i Musa, “Alaid noddi om guli' toko' no om ongoi toko' no do hilo'd tana' do kowotuan, it id doindalanan do kumaa do hilo'd Suok dot Akaba, do tumanud di pinonuhuan do Tuhan. Om alaid toko' i' do minghombo do hilo'd konuluhanan do pomogunan dot Idom. 2 Om sunudai oku noddi do Tuhan do 3 laid toko' no kopio'ddi do minghombo dot id konuluhanan diri om mongoi toko' nondo do ponong id utara. 4 Om sinuhu' oku dau do momisunud dokoyu diti tituduk do poingkaa, ‘Oruhai kou no do kawaya' diti konuluhanan di pinomogunan do tulun dot Idom, i kinoiyonon di kowori-worisan dokoyu, i sinakagon di Isau. Om moddosi indo iyolo' dokoyu, 5 nga' kada' kou nogi' sangod diyolo', tu' a' oku i' manahak dokoyu do bahagi' dot ongosarangau piya di tana' diyolo'. Tu' nakatahak ku no o pomogunan dot Idom dot id sinakagon di Isau. 6 Nga' taakanon nopo om waig om koino-ino i' do bolion dokoyu do mantad id diyolo',’ ka dau. 7 Soroho' no dokoyu ondung poingkuro o Tuhan i Kinorohingan dokoyu do minamarakat dot id suang do nunu nopo i winonsoi dokoyu. Ginompi' kou i' do solinaid dokoyu do mimpanau do hilo'd tana' do kowotuan dit agayo. Om nintirungan kou dau do solinaid dit apat nohopod o toun, om nangaanu ngai' i' dokoyu o nunu nopo it apatut dokoyu'd aanu. 8 Om pamanau toko' noddi do luminombus om tongkiad toko' no di ralan di mantad id kabandaran dot Ilat om Ision-Gibir, i poingkaa do hilo'd Rahat do Napatai, om pahamadai toko' noddi do ponong id koulayon do pongid utara, do kuminaa do hilo'd tana' do kowotuan do Muab. 9 Om boros ka do Tuhan dot id doho', ‘Kada' kou pamagangau di tulun do Muab, i sinakagon di Lut, om kada' kou sangod diyolo'. Tu' nakatahak ku no diyolo' iti bandar dot Ar, om a' oku no mamahagi' dokoyu dot ongokooro' piya diti tana' diyolo',’ ka dau,” ka di Musa. 10 (Di nopo di gulu po om bansa' do tulun dit angagayo koulun, i roitan dot Imim o minomogun do hilo'd Ar. Iyolo' nopo om angaranggou, dot iyo po di tulun dot Inakim, it iso' kawagu o bansa' do tulun dit angagayo koulun. 11 Tulun nopo dot Inak om tulun dot Imim om roitan do Ropaim, nga' pomungaran nopo do tulun do Muab diyolo' om Imim. 12 Iri daa i tulun do Hori nga' hilo' nogid Idom do minomogun di gulu po, nga' nuyung iyolo' di sinakagon di Isau om pinunso diyolo' o bansa'ddi. Om sowolio' noddi di sinakagon di Isau do minomogun i pinomogunan diyolo' do miagal di tulun dot Israil di koimbagu tu' minonguyung di piro-piro pisangod diyolo' do mantad hiri'd pomogunan di pinatahak do Tuhan dot id diyolo'.) 13 Om boros ka kawagu di Musa, “Om soborong toko' noddi di Bawang do Sirid do tuminanud di pinonuhuan do Tuhan dot id dati'. 14 Tontok nopoddi om tolu no nohopod om walu' o toun do mantad di tongkiad toko' i' do hilo'd Kadis Barnia. Om oinsanan nopo i soudor do mantad id sinakagon diri do nangapatai do miontok di nokoboros mantad do Tuhan. 15 Om saapo' kasai' nopod Tuhan iyolo' do gisom do nangapatai ngai' dau iyolo'. 16 Soira' poddi di nangapatai ngai' iyolo', 17 om boro-boros no o Tuhan dot id dati' do poingkaa, 18 ‘Tadau nod baino' do mamanau kou do tumalib di watas do Muab do maya' do hilo'd bandar dot Ar. 19 Om koinsomok kou nondo do hilo'd tana' dot Amon, i pinomogunan di sinakagon di Lut. Kada' dokoyu iyolo' gangaho' om kada' kou sangod diyolo', tu' a' ku no iyokoyu bohogian dot ongokooro' piya di tana' do pinatahak ku dot id diyolo',’ ka dau,” ka di Musa. 20 (Iri nopo watas diri om nabantug nogi' do pinomogunan di tulun do Ropaim, i ngaran do bansa' di poingiyon do hilo' di gulu po. Nga' pomungaran nopod tulun dot Amon do bansa'ddi om Samsumim. 21 Iyolo' nopo om angaranggou koulun do miagal di tulun dot Inak, om ongokoris om asapou daa. Nga' patayo' no iyolo'd Tuhan om sowoli noddi i bansa' dot Amon do minomogun do hiri'd pomogunan diyolo'. 22 Om iyo nogiddi o winonsoi'd Tuhan dot id tulun dot Idom, i sinakagon di Isau, i minomogun do hilo'd konuluhanan dot Idom. Tu' pinatai'd Tuhan i tulun do Hori, om kopomogun-mogun indo i tulun dot Idom do hiri'd pomogunan diri do gisom do baino'. 23 Di nopo di gulu po om iri nopo tana' do poingompus do tisan di Rahat do Tanga' om nongoi iyono' di tulun do mantad hilo'd pulou do Krita. Om pinatai diyolo' i tulun dot Awi, i tulun mantad do hilo', om iyono' noddi diyolo' i pomogunan diri do gisom do korikot do hilo'd bandar do Gasa, i ponong id salatan.) 24 “Om boros kaddi do Tuhan di notoliban toko' o watas do Muab, ‘Baino' nopo om pamanau kou no om sumoborong i' di Bawang dot Arnon. Om paalaan ku nondo dokoyu i Sihon i raja' dot Amori, i momorinta' do hilo'd Hisbon, om potonggoyon ku i pomogunan dau. Songodon no dokoyu iyau, om iyonon no dokoyu i pomogunan dau. 25 Om mantad pod tadau baino' om popoddosion ku no ngai' dokoyu o tulun do hinonggo-honggo nopo. Gagaran ngai' nopondo do moddosi o koinsanai'd tulun do hinonggo nopo do soira' nopo do korongou iyolo' dot oroitan o ngaran dokoyu,’ ka dau,” ka di Musa.
Naala' dot Israil i Raja' Sihon
26 Om boros ka kawagu di Musa, “Om ponuhu' oku noddi do piro-piro di tulun ku do mantad hilo'd tana' do kowotuan do Kidimot do kuminaa do hilo'd di Sihon, i raja' do Hisbon, do poporomut do boros do monokiulud do poingkaa, 27 ‘Potumboyoo' no iyahai do maya' diti pomogunan nu oi Tuan. Om tumilombus nopo iyahai do mamanau om a' i' iyahai sumala' di ralan. 28 Om bolion i' dahai o nunu nopo i taakanon dot aakan dahai, om i waig dot oinum dahai. Maya' no toomod iyahai diti pomogunan nu, 29 do gisom do kosoborong iyahai di Bawang do Yordan do pakayaan do hilo'd pomogunan di patahakon do Tuhan i Kinorohingan dahai dot id dahai. Tu' iri nopo sinakagon di Isau di momogun do hilo'd Idom, om i tulun do Muab i poingiyon do hilo'd Ar om pinopotumboyo' i' dahai do minaya' di watas diyolo',’ ka. 30 Nga' a' i' pinopotumboyo' dati' i Raja' Sihon do maya' di pomogunan dau, tu' pinokodou do Tuhan i Kinorohingan dokoyu, o ginawo di Raja' Sihon, om pinologos dau i raja' do suminaap dati', gisom do naala' toko' iyau om nosolod toko' iddi i pinomogunan dau om iyon-iyonon toko' po do gisom do baino'. 31 Om boros kaddi do Tuhan dot id doho', ‘Intong pogi' nga' nakatahak ku no diya' i Raja' Sihon om i tana' do pinomogunan dau. Solodo' no ilo tana' do pinomogunan dau om momogun nod hilo'!’ ka dau. 32 Om pamanau no daa'ddi i Raja' Sihon do miwoyo' di soudor dau do minongoi sangod dati' do hilo'd somok do bandar do Yahas. 33 Nga' diri noddi do pinatahak do Tuhan i Kinorohingan toko' i raja'ddi dot id dati'. Om patayo' toko' noddi iyau, om i tangaanak dau om koinsanai di soudor dau. 34 Tontok nogiddi do sinolod om rinaag toko' o pointikid-tikid di bandar, om pinatai toko' nogi' o pointikid-tikid do tulun --- do kusai om tongoondu' do mitonggoi di tangaanak. Aiso' no o songulun piya do pinasi toko'. 35 Tayam-tayam diyolo' nga' nanu ngai' toko', om i hiri'd bandar diyolo' nga' pininganu ngai' toko' i konunu-nunuan do hiri. 36 Tuhan no, i Kinorohingan toko' o pinopokoris dati' do gisom do naanu ngai' toko' i bandar do mantad pod hilo'd Aroir, it id dompok do Rantai dot Arnon, om i bandar dit id tanga' di rantai do gisom do nokorikot do hilo'd Giliad. Om aiso' no tiso' di bandar dit ongkitolig dot a' toko' nosolod. 37 Nga' a' toko' i' minongoi insomok di watas do tulun dot Amon, ko' hiri'd tisan do Bawang do Yabok ko' hiri'd kabandaran di hilo'd konuluhanan, om i kinoiyonon do suwai di pinogoduhan do Tuhan i Kinorohingan toko' do mongoi,” ka di Musa.
Naala' dot Israil i Raja' Og
1 Om boros ka kawagu di Musa, “Katalib nori om pamanau toko' no do kuminaa ponong id utara do poingkaa ponong id watas do Basan, om rikot no i Raja' Og i raja' do miwoyo' do koinsanai di soudor dau do minongoi panangod dati' do hilo'd somok di bandar dot Idroi. 2 Nga' boros kad Tuhan dot id doho', ‘Kada' poddosi dau, oi Musa, tu' patahakon ku i' iyau om i soudor dau, om koinsanai di tana' di pinomogunan dau dot id diya'. Wonsoyo' no dot id dau o miagal di winonsoi nu dot id di Sihon i raja' dot Amori, i minomorinta' do hilo'd Hisbon,’ ka dau. 3 Om iyo noddi o Tuhan do pinapatahak di Raja' Og om koinsanai di tulun dau dot id dati', gisom do nangapatai ngai' toko' iyolo'. 4 Om tontok iddi do nosolod ngai' toko' i kabandaran dau dot onom nohopod o bandar do koinsanai dot id watas dot Argob, i porintaon daa di Raja' Og. Aiso' no tiso' piya di bandar diri dot a' toko' nosolod. 5 Oinsanan nopo i kabandaran diri do kitolig dot akawas, om ongkiwawayaan om kisalampad do basi' do pongontiil di totobon. Nga' hiri nopod kokompungan om ogumu' i' it aiso' o tolig. 6 Insanai toko' nopo i kabandaran do minamaraag om koinsanai nopo o tongokusai om tongoondu' om tangaanak diyolo' do pinatai toko' do miagal di winonsoi toko' dot id kabandaran di porintaon daa di Raja' Sihon, i hilo'd Hisbon. 7 Om onuo' ngai' toko' nopo i tayam-tayam diyolo', om pininganu toko' i konunu-nunuan di hiri'd kabandaran diyolo'. 8 Tontok noddi do sinolod toko' i pomogunan do porintaon daa di duwo o raja' do tulun dot Amori, i hilo'd ponong id koulayon do mantad id Bawang do Yordan, do mantad hilo'd Bawang dot Arnon om gisom do korikot do hilo'd Nuluhon do Hormon. 9 (Pomungaran nopo di tulun do Sidon di Nuluhon do Hormon om Sirion, om pomungaran nod tulun dot Amori di nuluhon diri om Sonir.) 10 Om solodo' toko' no o koinsanai di tana' do pinomogunan di Og, i raja' do Basan; i kabandaran do hiri'd tana' dit apatau, om pointongkop di watas do Giliad om Basan, om gisom do nokorikot do hilo'd kabandaran do Salka om Idroi, i ponong id koulayon,” ka di Musa. 11 (I Raja' Og nopo om tulun do Ropaim dit id tohuri no kopio. Iri nopo lungun dau om watu do winonsoi, om kalaabon nopo om oruhai nod duwo o mito, om konoruo' no om apat o mito do tumanud do poninipong di koubasanan. Okito po iti do gisom piya'd baino' do hilo'd bandar do Raba, it id pinomogunan do tulun dot Amon.)
Piro-Piro Payat do Minomogun do Ponong id Koulayon do Mantad id Bawang do Yordan
12 Om boros ka kawagu di Musa, “Tontok di nasanganu toko' i pomogunan diri, om patahako' ku no di payat do Rubin om payat do Gad i watas do ponong id utara do bandar dot Aroir, it id somok do Bawang dot Arnon, om pinatahak ku diyolo' o sombohogian di konuluhanan do Giliad, om kohompit nogi' i kabandaran do hilo'. 13 Om iri no i tana' do Giliad di noolu', om koinsanai do watas do Basan, i nokoiyonon di Raja' Og do momorinta' di gulu po, om koinsanai do watas dot Argob, om patahakon ku dot id songintanga' di payat di Manasi,” ka dau. (Basan nopo om rinoitan do pomogunan do tulun do Ropaim. 14 I Yair no, i songulun do mantad id payat do Manasi o nakasanganu do koinsanai dit id watas dot Argob, i hilo'd Basan, do gisom do korikot dot id piwolitan do Gosur om Maaka. Om pungaranai no dau i kokompungan diri do pinasangai do ngaran dau, om gisom piya do baino' nga' roitan kasai' po iri do kokompungan do Yair.) 15 “Om iri nopo watas do Giliad om pinatahak ku di sinompuruan do sompiiyon di Makir, i mantad id payat do Manasi. 16 Om iri no watas do mantad hilo'd Giliad om gisom do korikot do hilo'd Bawang dot Arnon, om pinatahak ku dot id payat do Rubin om payat do Gad. Piwolitan nopo diyolo' do ponong id salatan om i piintangaan di Bawang dot Arnon, om wolit no diyolo' do ponong id utara om i Bawang do Yabok, i wolit do watas do tana' do tulun dot Amon o somputul. 17 Om ponong id kotonobon noo, om poiralad po i tana' diyolo' do gisom do korikot do hilo'd Bawang do Yordan. Iri nopo Bawang do Yordan om poingudan di Tasik Galilia do ponong id utara om lumuyung do poingkaa do hilo'd Rahat do Napatai di ponong id salatan, om poingkaa dot id guas do Nuluhon do Pisga o ponong id koulayon. 18 Tontok nogiddi do minomisunud oku diyolo' diti ponuhuan do poingkaa, ‘Nakatahak nod Tuhan i Kinorohingan toko', iti tana' do ponong id koulayon do mantad id Bawang do Yordan do maan dokoyu do pomogun-mogunan. Baino' nondo om onuwai no dokoyu do rapo-rapo do sumangod ilo soudor dokoyu, om suhuon nogindo iyolo' do sumoborong dilo Bawang do Yordan, do mogulu-gulu dilo piro-piro payat do suwai, do mongoi ponguhup diyolo' do monolod di pomogunan do maan do diyolo'd pomogun-mogunan. 19 Ilo' nopo sawo, om tangaanak om tayam-tayam dokoyu dit ogumu' om poundorongon nopo dot id kabandaran di pinatahak ku dot id dokoyu. 20 Uhupan no dokoyu i bansa' dot oiyo ko' tulun dot Israil do gisom do koundorong iyolo' do hilo'd tana' di patahakon do Tuhan dot id diyolo', i ponong id kotonobon do mantad id Bawang do Yordan, om gisom dot oonuan iyolo'd Tuhan do kosimbayanan do poingiyon do hilo' do miagal di winonsoi dau dot id dokoyu do hiti. Ongowonsoi ngai' pondo iri om sorompori-pori kou nogindo do gumuli' do hilo'd tana' di pinatahak ku dot id dokoyu,’ kangku. 21 Om boros kangku'ddi dot id di Yosua, ‘Nongokito ngai' nu no i winonsoi do Tuhan i Kinorohingan nu dot id di Sihon om id di Og, i duwo o raja'ddi. Om iyo iddi o wonsoyon do Tuhan dot id piro-piro o raja' do suwai di singolodon dokoyu o pomogunan. 22 Kada' poddosi diyolo' tu' Tuhan i' i Kinorohingan nu o mogobi' diya' do sumangod,’ kangku,” ka.
A' i Musa Porikoton do Hilo'd Kanaan
23 Om boros ka kawagu di Musa, “Tontok nopoddi om nokototos oku no kopio do suminambayang dot id Tuhan 24 do poingkaa, ‘Oi Tuhan it Agayo Kuasa', oilaan ku dot iri nopo pinokitanan nu doho' om timpuunon nogi' di wonsoyon nu dot angagayo kopio om i kongopusahan kopio. Aiso' no o ponokokinorohingan do hilo'd tawan om hiti'd tana' do milo do momonsoi do koinsanai di kopusahan di winonsoi nu. 25 Om potumboyoo' oku no do sumoborong dilo Bawang do Yordan, oi Tuhan, do mongoi intong di tana' dot oluhub do hilo'd soborong, i watas do konulu-nuluan dit olumis kopio om i Konuluhanan do Libanon,’ kangku. 26 Nga' iyokoyu i' o nokobungou gisom do kinatagadan oku'ddi do Tuhan, om a' iddi iyau suminimbar di pinokianu ku. Tu' boros kad Tuhan, ‘Ula' no! Kada' no pingroitai ino, oi Musa. 27 Ongoi nogi' do hilo'd timpak do Nuluhon do Pisga om mintong i' do ponong id utara, om ponong id salatan, om ponong id koulayon, om ponong id kotonobon. Om sonsodon no kopio it ongokito nu'd hilo', tu' a' ko no koongoi do hilo'd soborong do Yordan. 28 Tudukai no i Yosua, om pogiroton no o ginawo dau tu' iyau no o sumiliu do boyoon dilo bansa' do sumoborong dilo bawang do mongoi ponolod dilo pomogunan dit okito nu,’ ka dau. 29 Om iri noddi o kinoundarangan toko' do hiti'd rantai dit id hapak do bandar do Bait-Pior,” ka di Musa.
Nodsuur di Musa i Tulun dot Israil do Mumboyo'
1 Boros kaddi di Musa dot id tulun dot Israil, “Tonudon ngai' no dokoyu iti toturan do potudukon ku, om angapasi kou i' om kopomogun kou do hilo'd pomogunan di patahakon do Tuhan i Kinorohingan di komolohingan dokoyu, dot id dokoyu. 2 Om kada' dokoyu ruhangai do nunu nopo iti ponuhuan ku'dti, om kada' dokoyu poingkurio' iti. Tonudon ngai' no dokoyu i ponuhuan do Tuhan i Kinorohingan, di pinatahak ku dot id dokoyu. 3 Nokokito kou i' iyokoyu di winonsoi'd Tuhan di hilo'd Nuluhon do Pior. Pinatai ngai' dau o koinsanai di tulun di tuminuku' dot id tingolig do Baal do hilo'. 4 Nga' iyokoyu nopo it otorodok dot id Tuhan i Kinorohingan dokoyu om poimpasi po kasai' do gisom do baino'. 5 Nokotuduk ku no ngai' dokoyu it oturan do miagal di pinonuhuan do Tuhan i Kinorohingan ku do wonsoyon ku. Om tonudon ngai' no dokoyu iri do hilo' kou id pomogunan di ngoyon dokoyu solodo'. 6 Tumorodok kou no kopio do tumanud diri. Om iri nondo o popointalang dot id bansa'd suwai dot ongoilo kou, om momoros nondo iyolo' do poingkaa, ‘Aralom no kopio o toilaan om ogumu' ot osuhutan do bansa' dot agayo diti,’ ka nondo diyolo'. 7 Aiso' no tiso'd bansa', do mulong piya do bansa' dot angagayo di haro o ponokokinorohingan dit id somok kopio do lohowon do tontok do mokiuhup iyolo' do koiyo do Tuhan i Kinorohingan toko'. Tu' iyau nopo om sumimbar i' dati' do tontok do mokiuhup toko' dau. 8 Aiso' no o tiso' do bansa', do mulong piya do bansa' dit agayo, do haro ot oturan do miagal diti toturan di nokotuduk ku dokoyu baino' tu' otulid. 9 Insan-insanon no om soro-sorohon no, do solinaid nopo dokoyu do poimpasi om kada' no kopio dokoyu lihuwai i nongokito dokoyu. Susuyan no dokoyu i tangaanak om i tongomanangaki dokoyu do pasal 10 di tadau do nokotimbaba' kou do Tuhan i Kinorohingan dokoyu di hilo' kou id Nuluhon do Sinai, do tontok di minoro-boros o Tuhan dot id doho' do poingkaa, ‘Timungo' ngai' no iti tulun. Tu' orohian oku do korongou iyolo' diti poboroson ku om kopinsingilo i' iyolo' do mumboyo' doho' do solinaid diyolo' do poimpasi, om tudukan indo diyolo' i tangaanak diyolo' do tumorodok do mumboyo' doho',’ ka dau. 11 Om susuyon no dot id diyolo' ondung poingkuro-kuro kou do minongoi ingkakat do hiri'd guas do nuluhon di nokulumutan do lisun dit oitom do miagal do haun dot akapal, om tontok di molob-ngolob o tapui do gisom do korikot do hilo'd tawan. 12 Om sunudan no iyolo' ondung poingkuro o Tuhan do minoro-boros dokoyu do mantad hiri'd tapui, om ondung poingkuro kou do nokorongou di boros dau do mulong piya dot a' dokoyu nokito kopio o tinan dau. 13 Sinunudan kou do Tuhan ondung nunu o wonsoyon dokoyu do pomogompi' di tumpongo do Tuhan dot id dokoyu'ddi --- iri no tu' sinuhu' dau do tumanud di Hopod ot Oturan di tinulis dau dot id duwo o kaping do watu. 14 Sinuhu' oku do Tuhan do popotuduk dot id dokoyu do koinsanai dit oturan dit apatut dokoyu do tonudon do hilo' kou id pomogunan di ngoyon dokoyu solodo' do maan dokoyu do pomogun-mogunan,” ka di Musa.
Mogodu do Tumuku' dot id Tingolig
15 Om boros ka kawagu di Musa, “Sorohon no dokoyu, do tontok di minoro-boros o Tuhan dot id dokoyu do mantad hiri'd tapui di hilo'd Nuluhon do Sinai, om aiso' i' o nokito dokoyu ondung okuro-kuro o koinan-inano' dau. 16 Iyo nopoddi, om antaan-taan no kopio do kopomonsoi kou do dusa dot i momonsoi'd tininganak do tukuon dokoyu do poingkuro nopo o kokitanan, do kusai tuu ko' tondu' po o poiyaan. 17 Ko' miagal pod nintorusan ko' tombolog, 18 ko' miagal pod nintorusan di monungkamang ko' sada' po. 19 Kada' kou kabayayat do tumuku' om modsubak dit ongokito dokoyu do hilo'd tawan, dot ilo tuu tadau ko' ilo tulan om i rombituon. Tu' momonsoi kou nopo do miagal diri om kowonsoi kou nod dusa. Tu' iri nopo om pinatahak ngai' do Tuhan i Kinorohingan dokoyu do maan do pagandasan om tukuon do bansa'd suwai. 20 Nga' iyokoyu nopo om bansa' i' di pinosoliwan do Tuhan do mantad hilo'd Masir, i kinoiyonon do noinggorit kopio kou. Tuhan no o pinoposoliwan dokoyu do mantad id pomogunan diri do silihon kou dau do tulun di songonuon dau do miagal diti baino'. 21 Om kotogod noddi doho' i Tuhan i Kinorohingan dokoyu, do nobungou dokoyu, om gisom do suminumpa' iyau dot id doho' dot a' oku no posoborongon di Bawang do Yordan do kumaa do hilo'd tana' dot oluhub, i tana' do patahakon dau dot id dokoyu. 22 Hiti nod pomogunan diti o kapatayon ku om a' oku no kosoborong dilo bawang. Nga' iyokoyu nopo om oruhai nod sumoborong do mongoi pomogun do hilo'd tana' dit oluhub. 23 Nga' antaan-taan no kopio dokoyu dot olihuan i tumpongo, om podulon no i pinogoduhan dau dokoyu, dot a' momonsoi do tingolig do poingkuro nopo o koinan-inano'. 24 Tu' Tuhan nopo, i Kinorohingan dokoyu om miagal pod tapui do monorob, om a' i' iyau orohian do haro o mongoi iyo-iyo dau. 25 Tontok piya dit alaid kou no do poundorong dot id pomogunan diri, gisom dot ongkiangaanak kou no om haro o manangaki dokoyu nga' kada' kou no kopio pomonsoi'd dusa do momonsoi'd tingolig do poingkuro nopo o koinan-inano'. Araat no kopio o miagal diri dot okito'd Tuhan, tu' iri no o popotogod kopio dau. 26 Ondung sumongkiwal kou doho', om lohowon ku no o tawan om tana' do baino' do sumiliu'd sasi' do papasala' dokoyu, om a' indo alaid om a' kou no hino dot id pomogunan diri. Om a' kou indo alaid do poingiyon dot id pomogunan dit id soborong do Bawang do Yordan. Tu' patayon ngai' kou nopondo. 27 Potompiason kou motindo do Tuhan dot id pomogunan do suwai. Om okuri' nondo ot id pogialatan dokoyu dot apasi. 28 Modsubak kou motindo do tingolig di winonsoi'd tulun, i kayu om watu do winonsoi, i tingolig dit a' kokito om a' korongou, om a' milo'd makan om a' kosingud. 29 Hilo' no motindo do mogihum kou do Tuhan i Kinorohingan dokoyu, om ondung mogihum kou dau dot aayi-ayi' kopio o ginawo dokoyu om okito i' dokoyu iyau. 30 Soira' nopo dot agangau kou, om ongosiliu ngai' i kosusaan diri dot id dokoyu om diri nondo do gumuli' kou dot id Tuhan om mumboyo' kou dau. 31 Iyau nopo om Kinorohingan dit obinsianan kopio. Om a' kou i' dau tongkiadan om a' kou patayon. Om a' i' dau olihuan i tumpongo di winonsoi dau dot id taki-aki dokoyu. 32 Ponguho-nguhot kou no do pasal di gulu-gulu po, tontok dit a' kou po nopogkosusu, di winonsoi nogi' do Kinorohingan o tulun do hiti'd pomogunan. Sorisido' no o pointongkop diti pomogunan. Haro toi o nosiliu do miagal diti kagayo do mantad di gulu po? Haro toi o nokorongou do miagal diti do mantad di gulu po? 33 Haro toi o bansa'd tulun do napasi do tontok do nokorongou do boros do Kinorohingan do moro-boros do mantad id tapui do miagal di noumbalan dokoyu? 34 Haro toi o ponokokinorohingan do nakasaap do mangangat do bansa'd tulun do lumabus do mantad id pomogunan do suwai, do siniliu'ddi dau do tulun di songonuon dau do miagal di winonsoi do Tuhan i Kinorohingan dokoyu, dot id dokoyu di hilo' kou id Masir? Nokito no kopio do mato dokoyu do pinopoimbulai iyau do sinundu om kinoris dau dit agayo kopio; om pinorikot dau o toruol om pisangadan, om minomonsoi po iyau do kongopusahan om i kongoimayaan kopio, om minomonsoi di korolosi kopio. 35 Kinapamansayan nopo do Kinorohingan do miagal diri om popointalang kopio dot iyau no o Kinorohingan om aiso' no o suwai ko' iyau. 36 Pinologos kou i' do Kinorohingan do korongou do boros dau do mantad hilo'd tawan, om milo indo iyau do monuduk dokoyu; om hiti nod pomogunan diti do pinologos kou dau do kokito di tapui dau dit olidang om minoro-boros iyau dokoyu do mantad hiri'd tapui'ddi. 37 Tu' osianan i' kopio iyau di komolohingan dokoyu, om pilio' kou noddi dau. Om iri kuasa' dau dit agayo o pinoposoliwan dau dokoyu do mantad hilo'd Masir. 38 Om tontok di minongoi kou sangod, om iyau i' o minonguyung di piro-piro bansa' dot angagayo om ongokoris ko' iyokoyu, om kaatod kou indo dau do hiri'd pomogunan diyolo', i patahakon dau dot id dokoyu. Om gisom piya'd baino' nga' iyokoyu kasai' po o sanganu do pomogunan diri. 39 Iyo nopoddi, om soro-soroho' no dokoyu, om kada' no kopio dokoyu lihuwai: Do Tuhan noo o Kinorohingan do hilo'd tawan om hiti'd pomogunan, om aiso' no o suwai. 40 Tonudon ngai' no dokoyu o koinsanai dit oturan dau di nokotuduk ku dokoyu baino', om ongosonong-sonong kou indo om ongosonong-sonong i sinakagon dokoyu. Om kotilombus kou i' do momogun-mogun do hilo'd tana' di patahakon do Tuhan dot id dokoyu, do maan do potungkusan dokoyu do gisom dot alaid,” ka di Musa.
Kabandaran do Pogintirungan do Hilo'd Ponong id Koulayon do Mantad di Bawang do Yordan
41 Om potobilango' no di Musa o tolu o bandar do hiri'd ponong id koulayon do mantad di Bawang do Yordan, 42 i pogintirungan do tulun di nakapamatai do tulun do suwai dot a' dau tinomod do minamatai, it okon ko' pisangod dau. Milo indo i tulun diri do mongoi dot id iso' di bandar diri om a' indo iyau apatai. 43 Poobion nopo di payat do Rubin om i bandar do Bisir i hilo'd kapatahan do tana' do kowotuan. Om poobion no di payat do Gad om i bandar do Ramot it id watas do Giliad, om poobion no di payat do Manasi om i bandar do Golan it id watas do Basan.
Nonuan i Tulun dot Israil dot Oturan do Kinorohingan
44 Om patahako' noddi di Musa dot id tulun dot Israil it oturan om ponudukan do Kinorohingan. 45-46 Pinatahak nopo dau diyolo' o toturan diti om di nokosoliwan no i tulun dot Israil do mantad hilo'd Masir, di hilo' no iyolo'd rantai dit id hapak do bandar do Bait-Pior; i ponong id koulayon do mantad di Bawang do Yordan. Iri nopo om id suang do watas di songonuon daa di Raja' Sihon, i bansa' dot Amori di minomorinta' do hilo'd bandar do Hisbon di gulu po. Om naala' di Musa om i tulun dot Israil i raja'ddi di nokosoliwan iyolo' do mantad hilo'd Masir. 47 Om solodo' no diyolo' i pinomogunan di Raja' Sihon om i pinomogunan di Raja' Og, i mantad hilo'd Basan, i tiso' di raja' dot Amori do poingiyon do hiri'd ponong id koulayon do mantad di Bawang do Yordan. 48 Kogoyoo' nopo do tana'ddi om mantad di bandar dot Aroir, it id disan di Bawang dot Arnon, om poingkaa ponong id utara do gisom do korikot do hilo'd Nuluhon do Sirion, i roitan do Nuluhon do Hormon. 49 Nokosuang nogi' o koinsanai do watas di ponong id koulayon do mantad di Bawang do Yordan do gisom do korikot do hilo'd Rahat do Napatai do ponong id salatan om korikot di guas do Nuluhon do Pisga.
I Hopod o Toturan
1 Om timungo' ngai' nod Musa i tulun dot Israil om boro-boros no iyau diyolo' do poingkaa, “Oi tulun dot Israil, pokinongou ngai' kou no diti toturan do patahakon ku dokoyu do tadau'd baino'. Pinsingilaan ngai' no dokoyu iti om torodokon no kopio dokoyu do tumanud. 2 Minomonsoi o Tuhan i Kinorohingan toko' do tumpongo do hilo'd Nuluhon do Sinai, 3 dot okon nopo ko' id komolohingan toko' noo di gulu po, suwai ko' id dati' nogi' i songimpasi do dinondo. 4 Mantad nod hiri'd tapui di hilo'd timpak di nuluhon do minoro-boros o Tuhan dot id dokoyu do potimbaba' kopio. 5 Tontok nopoddi om iyoho' no o poingkakat dot id piolitan dokoyu om Tuhan, do popolombus dot id dokoyu di boros dau. Tu' minodosi kou i' di tapui gisom dot a' kou kasaap do tumakad do hiri'd timpak di nuluhon. Boros kad Tuhan, 6 ‘Iyoho' no o Tuhan i Kinorohingan dokoyu, i pinoposoliwan dokoyu do mantad hilo'd Masir, i pomogunan di kinosilihan dokoyu'd turipon di gulu po. 7 Kada' kou tuku' dot id ponokokinorohingan do suwai, suwai ko' iyoho' noo o tukuon. 8 Kada' kou pomonsoi do nunu nopo o tininganak do poiyo-iyoon di hilo'd tawan ko' i hiti'd tana', ko' i hilo'd saalom do waig dit id saalom do tana'. 9 Kada' kou podsubak do nunu nopo i rait ko' tingolig, om kada' kou tuku' dot id tingolig diri tu' iyoho' no o Tuhan i Kinorohingan dokoyu, om a' oku i' orohian do haro o mongoi iyo-iyo doho'. Tulun nopo dit araatan doho' om hukuman ku no, om hukuman ku i manangaki dau do gisom dot intolu om ingapat kopilombus o sinakagon dau. 10 Nga' pointalangon ku indo o kosianan ku dot id tulun dit osianan doho' om it otorodok do tumanud ngai' di ponuhuan ku, do gisom dot impiro-piro noribu pilombus o sinakagon dau. 11 Kada' kou pamarait do ngaran ku dot araat o kopomoroitan, tu' iyoho' nopo, i Tuhan i Kinorohingan dokoyu, om momohukum i' dot isai nopo i mamarait do ngaran ku dot araat o kopomoroitan. 12 Poinggoyoon no om pusohon no i tadau'd Sabat, om silihon nori do tadau dit olidang do tumanud di pinonuhuan do Tuhan i Kinorohingan dokoyu, dot id dokoyu. 13 Onuan ku iyokoyu dot onom o tadau do kakarajaan. 14 Nga' iri nopondo tadau di koturu' om tadau no do koundarangan di nokotobilang do maan do doho'. Tontok nopo do tadau'ddi om aiso' no o songulun piya do koino-ino do kumaraja' --- dot iyokoyu tuu ko' i tangaanak dokoyu ko' i turipon dokoyu, ko' i tayam-tayam dokoyu, ko' i bansa'd suwai di momogun-mogun dot id pomogunan dokoyu. Turipon piya dokoyu nga' poundorongon i' do miagal dokoyu. 15 Hondomo' no dokoyu do nosiliu kou i' do turipon do hilo'd pomogunan do Masir di gulu po, om iyoho' no i Tuhan i Kinorohingan dokoyu o pinoposoliwan dokoyu dot i kuasa' om i kokorisan ku dit agayo kopio o pinoposoliwan ku dokoyu. Om iri no o koponuhuan ku dokoyu do momusou kopio di tadau'd Sabat. 16 Pusohon no dokoyu i tapa' om tina' dokoyu, do tumanud di ponuhuan ku dokoyu, om osonong-sonong kou indo om alaid kou do poingiyon dot id pomogunan di patahakon ku dot id dokoyu. 17 Kada' kou pamatai. 18 Kada' kou pagampahu'. 19 Kada' kou panakau. 20 Kada' kou pasala' do tulun do suwai dot a' otopot o kapasalaan. 21 Kada' kou korohiai di sawo do kusai'd suwai. Om kada' kou korohiai di walai dau, ko' i tana' dau, ko' i turipon dau, ko' i sapi' dau ko' i kaladai dau, ko' nunu nopo i dau'd songonuon,’ kad Tuhan. 22 Iri ngai' no o toturan do Tuhan do pinatahak dau dot id dokoyu do tontok di songintimung kou do hiri'd nuluhon. Iti ngai' no o toturan do pinatahak dau, om aiso' no o suwai do tontok di minoro-boros iyau dot opuhod do mantad hiri'd tapui di mantad id haun dit akapal. Om pokikiro' nogiddi dau it oturan diri dot id duwo o kaping do watu om patahako' noddi dot id doho',” ka di Musa.
Minodosi i Tulun dot Israil
23 Om boros ka kawagu di Musa, “Tontok di notongkop do tapui i nuluhon om di nokorongou kou do boros do mantad hiri'd dotuong, om rikot ngai' no dot id doho' i molohing-lohingon om i boyoon do payat dokoyu. 24 Om boro-boros no iyolo' do poingkaa, ‘Pinopointalang dot id dahai i Tuhan i Kinorohingan do kuasa' om kagayaan dau do tontok di norongou dahai iyau do minoro-boros do mantad hiri'd tapui! Om koilo noddi iyahai do baino' do mulong piya do koponokiboro-boros o Kinorohingan do tulun nga' a' i' o tulun apatai. 25 Nga' nokuro tu' minsomok po kawagu iyahai do kapatayon? Apatai indo doti' iyahai di tapui di korolosi kopio'ddi. Om atantu' no dot angapatai toko' no do korongou toko' kawagu'd Tuhan i Kinorohingan toko' do moro-boros. 26 Haro toi o tulun do nokoumbal dot a' napatai do korongou do Kinorohingan di poimpasi do moro-boros do mantad id tapui? 27 Poguliai no kawagu, oi Musa, om pokinongohon ngai' no i poboroson do Tuhan i Kinorohingan toko'. Om pogulian nogindo do hiti'd dahai, om sunudan no iyahai do nunu nopo i pinoboros dau dot id diya', om mokinongou i' iyahai om tonudon dahai iri,’ ka diyolo'. 28 Tontok di norongou do Tuhan iri om boro-boros no iyau dot id doho' do poingkaa, ‘Nongorongou ku no i pinoboros diti tulun. Om otopot i' iri. 29 Oondos oku no do kopuriman kasai' daa iyolo' do miagal diri! Om oondos oku do momusou kasai' daa iyolo' doho' om otorodok do mumboyo' do koinsanai di pinonuhuan ku, om osonong-sonong ngai' i' daa'ndo iyolo' om i sinakagon diyolo' do gisom dot alaid. 30 Pamanau no, om suhuon no iyolo' do muli' do hilo'd kokiiman diyolo'. 31 Nga' iya' nopo, oi Musa, om mundorong nopo do hiti'd sugku' ku. Om patahakon ngai' ku indo diya' it oturan om i ponuhuan ku. Om potudukon nori dot id diyolo' om tumorodok i' iyolo' do tumanud diri do hilo' iyolo'd pomogunan di patahakon ku dot id diyolo',’ kad Tuhan. 32 Oi tulun dot Israil, tonudon no kopio dokoyu o koinsanai di pinonuhuan do Tuhan i Kinorohingan dokoyu, dot id dokoyu. Kada' dokoyu songkiwalo' o tongoiso' piya dit oturan dau. 33 Tonudon ngai' no dokoyu iri om osonong-sonong kou i' om kopomogun kasai' kou do hilo'd pomogunan di ngoyon dokoyu pomogun-mogunai,” ka di Musa.
Ponuhuan dit Agayo Kopio
1 Om boros ka kawagu di Musa, “Iti ngai' no o toturan do pinonuhuan do Tuhan i Kinorohingan dokoyu do potudukon ku dot id dokoyu. Tumorodok kou no do tumanud do koinsanai'dti do hilo' kou id pomogunan dit oruhai no dokoyu'd aanu do maan dokoyu do pomogun-mogunan. 2 Solinaid nopo dokoyu do poimpasi om mositi' no do momusou kou'd Tuhan i Kinorohingan dokoyu, om tumorodok do tumanud do koinsanai dit oturan dau di pinotuduk ku dokoyu, om alaid kou i' do poingiyon do hilo'd pomogunan diri. Om i sinakagon dokoyu nga' apatut nogi' do momonsoi do miagal diri. 3 Soro-sorohon ngai' no kopio dokoyu i ponudukan diri om tumorodok kou no do tumanud diri! Om ongosonong-sonong kou i', om osiliu kou dot iso' o bansa' dit okoris, om kopomogun kou indo do hilo'd pomogunan di kaya' om it oluhub o tana', do miagal di pinabatos do Tuhan i Kinorohingan di komolohingan toko'. 4 Soro-sorohon no dokoyu, oi tulun dot Israil! Tuhan no, om Tuhan noo, o Kinorohingan toko'! 5 Kosianai kou nod Tuhan i Kinorohingan dokoyu do mikuwo'd aayi-ayi' o ginawo om pointalangon no dokoyu iri dot id suang do kowoyo-woyoon dokoyu, om pointalangon dot id suang do wonsoyon dokoyu. 6 Kada' no kopio dokoyu kolihuwai iti ponuhuan di pinatahak ku dot id dokoyu di tadau baino'. 7 Potudukon noti dot id tangaanak dokoyu. Piguli-gulian noti do popotuduk dot id diyolo' do hilo' kou id walai, ko' hilo'd kinoiyonon do suwai, ko' di poundorong kou, ko' di maso dokoyu do kumaraja'. 8 Poogkoson no it oturan diri dot id longon dokoyu, om poogkoson do ponong id turos dokoyu do maan do poposorou dokoyu. |HK079D.pcx|col||| I Oturan do Tuhan do pinaagkos dot id turos|6.8 9 Potulison no it oturan diri do hiri'd torigi do wawayaan do walai dokoyu om id torigi di wawayaan do tansar di walai dokoyu,” ka dau.
Mogodu do Sumongkiwal
10 Om boros ka kawagu di Musa, “Poingkuro nopo o Tuhan i Kinorohingan dokoyu do minamatos dot id komolohingan dokoyu, dot id di Abraham, om id di Isak, om id di Yakub, om bayaanon no dau do papatahak dot id dokoyu i pomogunan di kibandar dot angagayo om ongosonong diri, it okon ko' iyokoyu o minomonsoi. 11 Iri piya'ndo i kawalayan do hiri nga' nongoponu' pod dapu' dit ongosonong nga' okon i' ko' iyokoyu o pinoposuang do hiri. Om ogumu' o torobong dit okon ko' iyokoyu o minongukad om ongkitanom dot anggur om saitun dit okon ko' iyokoyu o minananom. Om soira' nopondo do kaatod kou'd Tuhan do hilo'd pomogunan diri, om haro ngai' nopondo dot id dokoyu o nunu nopo i korohian dokoyu'd mangakan. 12 Om soro-sorohon no kopio dokoyu om a' i' dokoyu olihuan o Tuhan, i pinoposoliwan dokoyu do mantad hilo'd Masir, i pomogunan di minonguripon dokoyu di gulu po. 13 Koronok kou nod Tuhan i Kinorohingan dokoyu, om sumambayang kou no dot id dau, om id dau noo, om soira' nopod mamatos kou do mikuwo'd sumpa', om mamatos kou no dot id suang nod ngaran dau. 14 Kada' kou tuku' dot id ponokokinorohingan di tukuon do tulun di hiti'd posorili' dokoyu. 15 Ondung tumuku' kou dot id ponokokinorohingan do suwai om rumikot no o kototogod do Tuhan dot id dokoyu do miagal do tapui di monorob ngai' dokoyu, tu' Tuhan nopo i Kinorohingan dokoyu om a' i' orohian do haro o mongoi iyo-iyo dau. 16 Kada' dokoyu pogumbalai o Tuhan i Kinorohingan dokoyu, do miagal di winonsoi dokoyu di hilo'd Masa. 17 Soro-sorohon no kopio dokoyu do tumorodok do tumanud do koinsanai di toturan do pinatahak do Tuhan dot id dokoyu. 18 Wonsoyo' ngai' no dokoyu i pinoboros do Tuhan dit ongotulid om ongosonong, om ongosonong-sonong kou i'. Om iyokoyu indo o kasanganu di tana' dot oluhub di pinabatos do Tuhan dot id komolohingan dokoyu. 19 Om ouyung ngai' indo dokoyu i pisangod dokoyu do miagal di pinabatos mantad do Tuhan. 20 Koimbagu nopondo, om muhot nondo i tangaanak dokoyu do poingkaa, ‘Nokuro o Tuhan i Kinorohingan toko' tu' monuhu' dati' do tumorodok do tumanud ngai' diti toturan?’ ka. 21 Om simbaron no dokoyu iyolo' do poingkaa, ‘Iyahai nopo di gulu po om nosiliu do turipon di raja' do Masir, nga' pinosoliwan i' iyahai do Tuhan do mantad hilo' dot i sinundu dau dit agayo kopio o pinoposoliwan. 22 Iyahai no kopio o nokokito do Tuhan do minomonsoi do kopusahan om i kotompurolosi kopio dot id tulun do Masir, om id raja' diyolo' om id koinsanai di pagawai di raja'. 23 Om posoliwano' no iyahai do Tuhan do mantad hilo'd Masir om angatai no iyahai dau do kuminaa'd hiti om patahako' no dau dot id dahai iti tana' do miagal di nakabatos mantad dau dot id taki-aki toko'. 24 Om suhuo' noddi iyahai do Tuhan i Kinorohingan toko' do tumorodok kopio do tumanud ngai' diti toturan dau, om momusou dau, om ondung wonsoyon toko' o miagal diri om gompion indo kasai' dau iti bansa' toko' om osimbayan toko' do momogun-mogun. 25 Om asanangan nondo dati' o Tuhan i Kinorohingan ondung otorodok toko' no do tumanud do koinsanai di pinonuhuan dau,’ kanto dokoyu,” ka di Musa.
Tulun di Songonuon do Tuhan
1 Om boros ka kawagu di Musa, “Tuhan indo i Kinorohingan dokoyu o momoyo' dokoyu do sumuang di pomogunan dot ongoyon dokoyu pomogun-mogunai, om iyau nogi' o monguyung di piro-piro o bansa' di momogun mantad do hilo'. Om soira' nopo do mongoi kou sangod, om uyungon indo dau o turu' o bansa' dit angagayo om ongokoris do mantad ko' iyokoyu dot antang-antangan dokoyu; iri no i tulun do Hit, om Girgasi, om Amori, om Kanaan, om Poris, om Howi, om Yobus. 2 Om soira' nopondo do patahakon do Tuhan i Kinorohingan dokoyu, dot id dokoyu i piro-piro o bansa'ddi om aala' ngai' dokoyu iyolo', om oiyon no kopio dokoyu iyolo'd mamatai. Kada' kou no kopio ponokitaru' diyolo' om kada' dokoyu insianai iyolo'. 3 Om kada' kou kawin diyolo', om kada' dokoyu pologoso' o tangaanak dokoyu do mangawin dot isai nopo dot id pogiolitan diyolo'. 4 Tu' iyolo' no moti' o kabayayat do tangaanak dokoyu do tumuku' dot id ponokokinorohingan do suwai, om tumongkiad do mantad id Tuhan. Om tumogod nondo o Tuhan dot id dokoyu, om ondung wonsoyon dokoyu o miagal diri om diiri indo om diiri do patayon kou dau. 5 Iyo nopoddi, om raagon no dokoyu o koinsanai di pananaraban diyolo' do podsubak do tingolig, om mumukon nopo i torigi do watu di pokolidangon diyolo', om tagadon i tanda' di tingolig dot Asira, om tutudan ngai' i tingolig di tukuon diyolo'. 6 Wonsoyon ngai' no dokoyu o miagal diri, tu' iyokoyu nopo om Tuhan no i Kinorohingan o sanganu. Id pialatan nopo do koinsanai'd bansa'd tulun do hiti'd pomogunan, om iyokoyu no o pinili'd Tuhan do sumiliu'd tulun dau di dau kopio do songonuon. 7 Okon i' ko' kosopoho' dokoyu ko' mantad do bansa'd suwai o kinosianan om kinopomilian do Tuhan dokoyu, tu' iyokoyu no it okuri' kopio do hiti'd pomogunan. 8 Nga' nosianan i' o Tuhan dokoyu om pilio' kou noddi dau tu' orohian iyau do mamayaan di batos dau dot id taki-aki dokoyu. Om iri no o kinopomosian dau dokoyu dot i sinundu dau dit agayo kopio o pinamasi, om pinoidu' kou nogi' dau do mantad id turiponon di raja' do Masir. 9 Soro-sorohon no dokoyu, do Tuhan nopo i Kinorohingan dokoyu om iso' noo, om iyau noo o Kinorohingan, om otorodok kopio iyau. Om sulungon i' kopio dau i batos dau om pointalang iyau do kosianan dau dit aiso' o kopupuson dot id rinibuan o sinakagon do tulun dit osianan dau om it otorodok do tumanud ngai' di ponuhuan dau. 10 Nga' a' no iyau opogong do momohukum do tulun dit araatan dau. 11 Iyo nopoddi, om tonudo' no kopio dokoyu o nunu nopo i nokotuduk dot id dokoyu, om torodok kou no kopio do tumanud do koinsanai dit oturan om i ponudukan di nakatahak ku dokoyu di tadau baino',” ka di Musa.
Barakat dot id Tulun di Mumboyo'
12 Om boros ka kawagu di Musa, “Ondung mokinongou kopio kou diti ponuhuan om otorodok kou do tumanud do koinsanai'dti, om Tuhan i Kinorohingan dokoyu nga' otorodok no do mongigit di tumpongo do winonsoi dau dot id dokoyu, om pointalangan kou dau do kosianan dau do miagal di pinabatos ku dot id taki-aki dokoyu. 13 Osianan indo iyau dokoyu om barakatan kou dau, om sumapou kou indo om ogumu' o tangaanak dokoyu. Om barakatan indo dau o tumo dokoyu om kaanu kou i' do gandum om anggur, om tumau do saitun. Om barakatan kou dau gisom dot onuan kou dau do sapi' om dumba' dot ogumu'. Om patahakon ngai' nopondo dau dokoyu o koinsanai'dti barakat do hilo' kou'd pomogunan di pinabatos do Tuhan di komolohingan dokoyu do patahakon dot id dokoyu. 14 Aiso' no o bansa'd tulun do suwai do hiti'd pomogunan dot onuan dau do barakat dot ogumu' dot iyo di patahakon dau dot id dokoyu. Aiso' i' o songulun piya dot id pogialatan dokoyu ko' id pogialatan po di tayam-tayam dokoyu dot a' maganak. 15 Intirungan kou i' dau do mantad id toruol dot araat om mantad id koinsanai'd kosusaan do miagal di noumbalan dokoyu di hilo'd Masir. Nga' iri nopo pisangod dokoyu om pologoson i' dau dot oontok do koinsanai di kosusaan diri. 16 Patayon ngai' no dokoyu i bansa' di patahakon do Tuhan i Kinorohingan dokoyu dot id longon dokoyu, om kada' dokoyu iyolo' insianai. Om kada' kou tuku' dot id ponokokinorohingan diyolo' tu' iri no moti' o kapatai dokoyu. 17 Kada' dokoyu soroho' dot ogumu' o nintaban diyolo' do mantad ko' iyokoyu, om a' kou kotori' do monguyung diyolo'. 18 Kada' kou poddosi diyolo'. Sorohon nopo i winonsoi'd Tuhan i Kinorohingan dokoyu dot id raja' do Masir diri om id koinsanai di tulun dau. 19 Sorohon ngai' nopo i kosusaan dit angawagat kopio di nokito dokoyu, om i kongopusahan om i kongoimayaan di winonsoi'd Tuhan i Kinorohingan dokoyu do mikuwo'd sinundu om kokorisan dau dit agayo kopio do pinoposoliwan dokoyu. Om iyo nogiddi o wonsoyon dau dot id koinsanai di bansa' di poddosi dokoyu do baino' tu' patayon ngai' indo dau iyolo' do miagal di tulun do Masir. 20 Om gangahon nondo dau iyolo' gisom dot iri piya tulun di mogidu' do mongoi lisok nga' patayon i' do Tuhan i Kinorohingan dokoyu. 21 Kada' kou poddosi di piro-piro o bansa'ddi. Tu' Tuhan i' i Kinorohingan dokoyu o mongintirung dokoyu; iyau no o Kinorohingan dit agayo, om it apatut dokoyu'd poddosi. 22 Borinuton indo do Tuhan do monguyung i piro-piro o bansa'ddi do tontok do mongoi kou sangod. Tu' a' kou i' kopunso diyolo' dot insan-insan kopio o maso, tu' ondung iyo'dion daa om gumumu' nondo o nintorusan dot angaraat, om iri indo o sumiliu do koligagaanan dokoyu. 23 Posuangon indo do Tuhan dot id longon dokoyu i piro-piro pisangod dokoyu om tompurolosion dau iyolo' do gisom dot angapatai iyolo'. 24 Om iri ngai' i raja' diyolo' nga' patahakon i' do Tuhan dot id dokoyu. Om patayon nondo dokoyu iyolo' om olihuan nondo o ngaran diyolo'. Om aiso' no o songulun piya do kasaap dokoyu tu' patayon ngai' nopondo dokoyu o pointikid-tikid do tulun. 25 Sorobon ngai' no dokoyu i tingolig di tukuon diyolo'. Om kada' kou korohiai di tamas om i pirok di poinsokot di tingolig, om kada' dokoyu onuo' iri, tu' ondung onuon dokoyu om iri no o kapatai dokoyu, do Tuhan nopo om araatan i' kopio do tingolig. 26 Om kada' kou pongigit dot ongoiso' piya di tingolig do hiri'd walai dokoyu. Ondung mongigit kou om poingkuro nopo i nokousung diyolo' om iri no o kousung dokoyu. Karaatai kou no di tingolig diri om pakaraaton no dokoyu, tu' iri nopo om napapalan nod Tuhan,” ka di Musa.
Tana' dot Osonong do Pomogun-Mogunan
1 Boros ka kawagu di Musa, “Tumorodok kou no do tumanud do koinsanai dit oturan do pinatahak ku dokoyu di tadau baino', om apasi kou i', om muhang- ruhang o kosopoho' dokoyu, om kopomogun kou indo do hilo'd tana' di pinabatos mantad do Tuhan dot id komolohingan dokoyu. 2 Sorohon no i kinowoyo-woyoo' do Tuhan, i Kinorohingan dokoyu do minomoyo' dokoyu dot id tindalanon dit osodu' do minaya' di tana' do kowotuan do solinaid dot apat nohopod o toun di nakatalib; om i kinowoyo-woyoo' dau do pinoporikot do kosusaan do pogumbal dau dokoyu, om oilaan i' ot id suang do ginawo dokoyu ondung tumorodok kopio kou do tumanud di ponuhuan dau. 3 Pinologos kou dau do louson, om onuwai kou nogiddi dau do manna do maan dot akanon, it a' po dokoyu om i komolohingan dokoyu noumbalan do mangakan do gulu. Kinapamansayan nopod Tuhan do miagal diri om monuduk dokoyu dot okon i' ko' taakanon noo o kapasi do tulun, suwai ko' koinsanai di boros do poboroson do Tuhan. 4 Solinaid nopo dit apat nohopod o toun om a' i' nohurak o pakayan dokoyu, om a' luminonit o lapap dokoyu. 5 Soro-sorohon no dokoyu, do Tuhan i Kinorohingan dokoyu nga' mamalapos i' do monuduk dokoyu do miagal di songulun o tapa' do mamalapos do monuduk di tangaanak dau. 6 Iyo nopoddi, om wonsoyon no dokoyu o nunu nopo i pinonuhuan do Tuhan. Tonudon ngai' no dokoyu it oturan dau, om koronok kou no dau om pusohon no dokoyu iyau. 7 Maso no do Tuhan, i Kinorohingan dokoyu do momoyo' dokoyu do kumaa do hilo'd tana' dit oluhub, i tana' dot ogumu' o bawang om palu, om tudan do waig do mantad hilo'd saalom do tana' di lumuyung do hiri'd rantai om hiri'd konulu-nuluan. 8 Om iri no o tana' di sunian do gandum om barli om anggur, om haro o tua' dot ara om tua' do delima, om guas do saitun, om ogumu' po o paha'. 9 Hilo' nopo om a' kou no koumbal do louson ko' ooyian pod nunu nopo. Watu nopod hilo' om kirolot do basi', om haro o tambaga' dot aanu dokoyu do mantad hiri'd konuluhanan. 10 Nunu nopo i kosiakanan dokoyu om haro ngai' nopo. Om mongunsikou kou nondo do Tuhan, i Kinorohingan dokoyu di tana' dit oluhub do pinatahak dau dot id dokoyu,” ka di Musa.
Mogodu do Kolihu do Tuhan
11 Boros ka kawagu di Musa, “Antaan-taan no kopio dokoyu, om a' kou i' kolihu do Tuhan, i Kinorohingan dokoyu. Kada' nod haro o tiso' dit oturan dau dot a' dokoyu tonudon, it oturan di pinatahak ku dokoyu di tadau baino'. 12 Om soira' nopondo dot angaanu ngai' dokoyu i korohian dokoyu do mangakan, om ongkoingkakat dokoyu o walai dokoyu dit olumis dot iyonon dokoyu, 13 om di koinggumu' o sapi', om dumba' dokoyu, om tamas om pirok dokoyu, om koinsanai do dapu' dokoyu'd suwai, 14 om soro-sorohon no kopio dokoyu om a' kou i' osiliu do tulun dit oondos, gisom dot olihuan dokoyu o Tuhan, i Kinorohingan dokoyu, i pinoposoliwan dokoyu do mantad hilo'd pomogunan do Masir, i pomogunan di minonguripon dokoyu di gulu po. 15 Tuhan no o minangahak dokoyu do tuminalib do hilo'd tana' do kowotuan dot agayo, i kinoiyonon do kotompurolosi kopio tu' ogumu' o tulanut di kapatai o tindukon, om ogumu' o tompoluluhu. Tontok di hilo' kou id tana' dit otuu om it aiso' o waig, om pinoimbulai i' do Tuhan o waig do mantad hiri'd tontolob do pinoinuman dokoyu do gisom do nongourudtuu kou. 16 Om tontok di hilo' kou id tana' do kowotuan om nonuan kou i' dau do manna, i taakanon dit a' insan koumbalai di taki-aki dokoyu do mangakan. Hilo' no do pinorikot dau o kosusaan dot id dokoyu do pogumbal dokoyu, om popoinsiriba' do ginawo dokoyu, om owonsoi indo dau it osonong dot id dokoyu dot atalib iri. 17 Iyo nopoddi om kada' no kopio dokoyu soroho' dot iri nopo kakayaan dokoyu om mantad i' do koporuo' om kokoriso' dokoyu. 18 Sorohon no do Tuhan i', i Kinorohingan dokoyu o minanahak dokoyu di kakayaan diri. Winonsoi pogi' dau o miagal diri nga' otorodok kasai' i' iyau dot id tumpongo di winonsoi dau dot id taki-aki dokoyu do gisom piya do baino'. 19 Kada' no kopio dokoyu kolihuwai o Tuhan, i Kinorohingan dokoyu, om kada' kou guli' do tumuku' om modsubak do ponokokinorohingan do suwai. Ondung momonsoi kou do miagal diri, om poinsanon mantad ku no iyokoyu do tadau do baino' dot atantu' no do patayon kou do Tuhan. 20 Tu' ondung a' kou otorodok do tumanud do boros do Tuhan, om patayon kou no dau do miagal di piro-piro o bansa' di pinatai dau dot antang-antangan dokoyu,” ka di Musa.
A' Minumboyo' i Tulun dot Israil
1 Om boros ka kawagu di Musa, “Pokinongou kou no, oi tulun dot Israil! Baino' nopodti om oruhai kou no do sumoborong dilo Bawang do Yordan do mongoi pomogun do hilo'd tana' di piro-piro o bansa'd suwai dit angasapou om ongokoris ko' iyokoyu. Om bandar diyolo' nga' angagayo om kitolig di korikot do hilo'd tawan o kasawato'. 2 Om iri piya i tongoulun do hilo' nga' angaranggou om ongokoris; iyolo' nopo om angagayo koulun, om nokorongou kou nogi' dot aiso' no o songulun piya do kasaap diyolo'. 3 Nga' oilaan indo dokoyu do baino', do mogulu dokoyu o Tuhan, i Kinorohingan dokoyu, do miagal po di tapui do monorob. Alaon indo do Tuhan iyolo' dot antang-antangan dokoyu, om ouyung indo dokoyu iyolo' om oruhai dokoyu iyolo' dot apatai do miagal di nakabatos do Tuhan. 4-5 Om ouyung nopondo iyolo' do Tuhan, i Kinorohingan dokoyu, do mantad id dokoyu, om kada' kou pomusorou do kinapaatadan nopod Tuhan dokoyu do hilo' do mongoi panganu di tana'ddi om i kosonongo' dokoyu om i kosorupayan dokoyu do kaanu'ddi. Tu' a' i' kopio iyo'ddi, nga' nuyung pogi' do Tuhan i tongobansa'ddi do mogobi' dokoyu nga' i karaato' diyolo' o kinoponguyungan. Kapalagasan nopod Tuhan dokoyu do mongoi panganu di tana' do pinomogunan diyolo' nga' mamayaan o Tuhan di pinabatos dau dot id taki-aki dokoyu, i Abraham, om i Isak om i Yakub. 6 Kotumbayaai kou no kopio do kapatahakan nopod Tuhan dot id dokoyu di tana' dot oluhub diri om okon i' ko' i kosorupayan dokoyu do kaanu'ddi. Tu' iyokoyu nopo om bansa' i' dit ongokodou o ginawo. 7 Kada' dokoyu kolihuwai i winonsoi dokoyu di pinopotogod do Tuhan, i Kinorohingan dokoyu, di hilo'd tana' do kowotuan. Tu' mantad nopo di tadau do suminoliwan kou do mantad hilo'd Masir om gisom do nokorikot do tadau di kinorikatan dokoyu'd hiti, om a' kou no impiro-piro saap do Tuhan. 8 Tontok piya di hilo'd Nuluhon do Sinai nga' minomonsoi kou i' di katagadan do Tuhan, gisom do patayon kou daa'ddi do Tuhan. 9 Tontok nopoddi om tuminakad oku do hiri'd timpak do nuluhon diri do minongoi ramit di duwo o kaping do watu do pinotulisan di tumpongo do Tuhan dot id dokoyu. Om minundorong oku do hiri do solinaid dot apat nohopod o tadau om apat nohopod o totuong dot a' minakan om a' mininum. 10 Om patahako' noddi do Tuhan dot id doho' i duwo o kaping do watu, i tinulisan do longon kopio dau o minonulis, do koinsanai di pinoboros dau dot id dokoyu do mantad hiri'd tapui do tontok di songintimung kou do hiri'd guas di nuluhon. 11 Om katalib poddi ot apat nohopod o tadau om apat nohopod o totuong om patahako' nogiddi do Tuhan dot id doho' i duwo o kaping do watu, i pinotulisan dau di tumpongo'ddi. 12 Katalib poddi iri om boro-boros no o Tuhan dot id doho' do poingkaa, ‘Ruhuk nogi' kopio do hilo'd siba', tu' ilo nopo tulun dot ogumu' di winoyo' nu do suminoliwan do mantad hilo'd Masir om nokowonsoi no dot araat. Nakasansala' no iyolo' do mantad di pinonuhuan ku diyolo', om pomonsoi nogiddi iyolo' do tingolig do tukuon diyolo',’ ka dau. 13 Om minoro-boros po o Tuhan dot id doho' do poingkaa, ‘Oilaan ku no o kokodoho' do ginawo do tongoulun diti. 14 Om kada' no umbal do mogodu doho'. Tu' nokopomusorou oku no do mamatai diyolo', om aiso' nondo o tongosongulun piya do kohondom diyolo'. Om iya' nondo o silihon ku do tapa' dot iso' o bansa' dit agayo om ongokoris ko' mantad diyolo',’ ka dau. 15 Om ruhuk oku noddi di nuluhon do poingigit ku i duwo o kaping do watu do pinotulisan di tumpongo. Om molob-ngolob poo o tapui do hiri'd nuluhon. 16 Om kokito ku no do notolibambanan no dokoyu i ponuhuan di pinatahak do Tuhan, i Kinorohingan dokoyu, dot id dokoyu om nokowonsoi kou'd dusa dot id Tuhan, tu' minomonsoi kou i' do tingolig di tamas do winonsoi di pinoiyo-iyo do sapi'. 17 Om tontok noddi do pinodumpau ku i duwo o kaping do watu'ddi dot id toguang dokoyu do gisom do nomumuk. 18 Om ongoi oku poddi kawagu otud dot id toguang do Tuhan do hiri'd timpak di nuluhon diri dot apat nohopod o tadau om apat nohopod o totuong do koloido' dot a' minakan om a' mininum. Winonsoi ku pogi' o miagal diri nga' minomonsoi kou i' do dusa dot id toguang do Tuhan om pinopotogod kou dau. 19 Moddosi oku no kopio di kototogod do Tuhan dit a' ogina-gina' tu' gisom do patayon kou daa'ddi dau. Nga' pinokinongou oku po kawagu do Tuhan. 20 A' no daa ogina-gina' o kotogodo' do Tuhan di Harun do gisom do patayon no daa do Tuhan i Harun. Om iri no o kinasambayangan ku do bagi' di Harun do tontok diri. 21 Om ngoyo' ku no i winonsoi dokoyu di miagal-agal do sapi'ddi, i tamas do winonsoi, om pataamo' ku no iri do hiri'd tapui. Om mumuko' ku noddi om tutuo' ku no do gisom do noutok dot iyo po di pupuk, om pataamo' ku nogiddi do hiri'd palu di lumuyung do mantad hiri'd nuluhon. 22 Tontok di hilo' kou id Tabira, om hilo'd Masa om hilo'd Kibrot Taawa, om pinotogod i' dokoyu o Tuhan, i Kinorohingan dokoyu. 23 Om tontok di sinuhu' kou dau do mamanau do mantad hilo'd Kadis Barnia do mongoi panganu di tana' do patahakon dau dot id dokoyu, om diri nga' suminongkiwal kou i' di pinonuhuan dau. A' kou minogondos dau om a' kou minumboyo' di pinoboros dau. 24 Mantad poddi nokotutun oku i' dokoyu om a' kou no impiro-piro saap do Tuhan. 25 Om otud oku noddi dot id toguang do Tuhan do solinaid dot apat nohopod o tadau om apat nohopod o totuong, tu' oilaan ku no kopio dot iso-iso' no o ginawo dau do mamatai daa dokoyu. 26 Om sambayang oku noddi dot id dau do poingkaa, ‘Oi Tuhan it Asawat Kopio, kada' patayo' iti tulun nu, i tulun nu di pinasi nu om i pinosoliwan nu do mantad hilo'd Masir, dot i kinoris om i sinundu nu dot agayo o pinoposoliwan. 27 Hondomo' no i susuhuon nu, i Abraham, om i Isak, om i Yakub, om kada' ontong dilo kokodoho' do ginawo, om kangaraato' om dusa do tulun diti. 28 Tu' ondung patayon nu iti tongoulun diti om haro nondo o pounayan di tulun do Masir do mimboros dot a' ko nokogoos do pinoporikot dilo tulun nu do hilo'd tana' di pinabatos nu dot id diyolo'. Momoros nondo iyolo' do kinoposoliwanan nu nopo di tulun nu om pokoyoon nu do hilo'd tana' do kowotuan, om apatai nu indo iyolo' tu' araatan ko i' diyolo'. 29 Nga' soroho' no, dot okon toi ko' iti nogi' i tulun di pinili' nu do silihon nu do tulun nu om i pinosoliwan nu do mantad hilo'd Masir, dot i sinundu nu om i kinoris nu dot agayo o pinoposoliwan?’ kangku,” ka di Musa.
Rinamit Kawagu di Musa i Hopod ot Oturan
1 Om boros ka kawagu di Musa, “Om boros kaddi do Tuhan dot id doho', ‘Ongoi no pomonsoi do duwo o kaping do watu do sangkapon do manganu om wonsoyon i' do miagal dit id gulu, om momonsoi nod kaban do poiyanan diri. Om mongoi nogindo rapou doho' do hilo'd timpak dilo nuluhon. 2 Om tulisan ku nogindo o hiri'd duwo o kaping do watu'ddi do miagal di pinotulis ku dot id watu di binabak nu. Om otulisan pondo om mositi' no do poopion dot id suang di kaban,’ ka dau. 3 Om pomonsoi oku noddi dot iso' o kaban, do kayu di roitan dot akasia o winonsoi ku, om pomonsoi oku do duwo o kaping do watu do miagal dit id gulu, om igitai ku nori do hiri'd timpak di nuluhon. 4 Om tulisai noddi do Tuhan i duwo o kaping do watu'ddi do miagal di boros do pinotulis dau di tinsan i', iri no i Hopod ot Oturan di pinatahak dau dot id dokoyu do tontok di norongou dokoyu iyau do minoro-boros do mantad hiri'd tapui do tontok di songintimung kou do hiri'd guas di nuluhon. Om patahako' no do Tuhan dot id doho' i watu'ddi. 5 Om ruhuk oku noddi di nuluhon. Om iri no duwo o kaping do watu om pinoopi' ku do hiri'd suang di kaban di winonsoi ku do miagal di pinonuhuan do Tuhan dot id doho', om hiri noddi kasai' i watu'ddi do gisom do baino',” ka di Musa. 6 (Om pamanau no i tulun dot Israil do mantad hiri'd torobong do tulun do Yaakan om pakayaai no diyolo' do hilo'd Mosira. Om hilo' nod Mosira o kinapatayon om pinamalabangan di Harun. Om iri noddi i tanak dau, i Iliasar, o suminowoli dau do suminiliu dot imam. 7 Om mantad nod hilo' om pakayaai no diyolo' do hilo'd Gudgod om hilo'd Yotbata, i tana' dot osima' do waig. 8 Om hiri nod timpak di nuluhon diri do pinotobilang do Tuhan o piro-piro o tongokusai do mantad id payat do Liwi do momogompi' di Kaban do Tumpongo, om sumiliu dot imam do momonsoi'd karaja dau, om popoboros do barakat dot id suang do ngaran do Tuhan. Gisom piya do baino' nga' iri kasai' po o karaja' di tulun do Liwi. 9 Iri no ot a' kinoonuan di payat do Liwi do bahagi' do tana' do maan do tungkusan do miagal di payat do suwai, tu' naanu nopo diyolo' do ponokotungkusan om i kinosilihan diyolo' dot imam do mogobi-obi'd Tuhan, i kaanu do bahagi' di porsombahan do patahakon dot id Tuhan, do miagal di pinabatos do Tuhan, i Kinorohingan dokoyu.) 10 “Minundorong oku do hiri'd timpak di nuluhon do solinaid dot apat nohopod o tadau om apat nohopod o totuong do miagal di winonsoi ku di koinsan i'. Om pinokinongou oku i' kawagu do Tuhan om nakaakun iyau dot a' mamatai dokoyu. 11 Om suhuo' oku noddi dau do mongoi pomoyo' dokoyu, om aanu i' dokoyu i pomogunan do nakabatos dau do patahakon dot id komolohingan dokoyu,” ka di Musa.
I Pokionuon do Kinorohingan
12 Om boros ka kawagu di Musa, “Om dinondo no, oi tulun dot Israil, om pokinongou kou no diti pokionuon do Tuhan, i Kinorohingan dokoyu, do mantad id dokoyu: Sambayang kou no dot id Tuhan, i Kinorohingan dokoyu, om wonsoyon ngai' no dokoyu i ponuhuan dau. Kosianai kou no dau, om sumambayang kou no dot id dau do mikuwo'd aayi-ayi' o ginawo om pomusorou dokoyu. 13 Om tumorodok kou no do tumanud do koinsanai di ponuhuan dau. Om patahakon ku dokoyu iti do tadau baino' do maan do koinsanangan dokoyu. 14 Ilo' piya tawan dit asawat kopio nga' Tuhan i' o sanganu. Om iti tana', om koinsanai di hiti nga' iyau nogi' o sanganu. 15 Nga' agayo i' kopio o kosianan do Tuhan di komolohingan dokoyu gisom do pinili' kou dau do mantad id pogialatan do koinsanai'd bansa'. Om iyokoyu kasai' po o tulun di nopili' dau. 16 Iyo nopoddi, om mantad do baino', om mositi' no do tumorodok kou dot id Tuhan, om kada' kou nondo kokodou o ginawo. 17 Tu' Tuhan nopo, i Kinorohingan dokoyu om id sawat i' ko' mantad do toinsanan o ponokokinorohingan om agayo o kuasa' dau ko' mantad do koinsanai'd kuasa'd suwai. Iyau nopo om Kinorohingan dit agayo om okoris, om apatut no do mumboyo' ngai' dau. Iyau nopo om a' i' manampaping om a' rumamit do ponisip. 18 Om antaan-taan i' kopio dau, om otulid indo o wonsoyon dot id tangaanak dit aiso' o molohing om id tongoondu' di nopuadan. Om osianan i' iyau di tulun do bansa'd suwai di poinsugku' do tulun toko' do momogun-mogun, tu' onuan i' dau iyolo' do taakanon om pakayan. 19 Iyo nopoddi om pointalango' no dokoyu o kosianan dokoyu dot id tulun do sompogunan diri tu' iyokoyu nga' sompogunan i' do hilo'd Masir di gulu po. 20 Umboyo' kou nod boros do Tuhan, i Kinorohingan dokoyu, om sumambayang kou no dot id dau, om id dau noo. Kotorodok kou no dot id dau. Om mamatos kou nopo do mikuwo'd sumpa' om mositi' no dot id suang no do ngaran dau. 21 Royohon no iyau, tu' iyau noo o Kinorohingan dokoyu, om nokito no dokoyu o koinsanai di nongowonsoi dau dot id dokoyu di kongopusahan kopio. 22 Tontok di minongoi do hilo'd Masir i taki-aki dokoyu di gulu po om turu' no iyolo' nohopod o tulun do koinsanai. Nga' baino' noddi om pinoinggumu' kou do Tuhan, i Kinorohingan dokoyu do miagal dilo rombituon do hilo'd tawan kogumu',” ka di Musa.
Kogoyoo' do Tuhan
1 Om boros ka kawagu di Musa, “Kosianai kou nod Tuhan, i Kinorohingan dokoyu, om tumorodok kasai' kou no do tumanud do koinsanai dit oturan dau. 2 Sorohon no dokoyu do tadau'd baino' i nongoilaan dokoyu do pasal do Tuhan do mantad id nongopurimanan dokoyu. Tu' iyokoyu no kopio i nokopuriman diri om okon i' ko' i tangaanak dokoyu. Nokito no dokoyu i kogoyoo' do Tuhan om i kokoriso' dau om i sinundu dau, 3 om i kongopusahan do winonsoi dau. Om nokito dokoyu i winonsoi dau dot id raja' do Masir om id pointongkop do pomogunan do raja'ddi. 4 Nokito nogi' dokoyu ondung poingkuro o Tuhan do minomunso di soudor do Masir do mogitonggoi-tonggoi di kuda' om i korita'-kuda' diyolo', tu' linondod dau iyolo' do hilo'd Rahat dot Aragang do tontok di minomogusa' daa iyolo' dokoyu. 5 Om noilaan dokoyu i winonsoi do Tuhan dot id dokoyu di hilo' kou pod tana' do kowotuan, dit a' kou po nokorikot do hiti. 6 Om ahandaman i' dokoyu i winonsoi do Tuhan dot id di Datan om id di Abiram, i tangaanak di Iliab, i mantad id payat do Rubin. Tu' iyolo' nopo sanganak-anak om tinolon do tana' di minipitas, do mogitonggoi-tonggoi di kiim diyolo' om i susuhuon diyolo' om i tayam-tayam diyolo'. 7 Iyokoyu no kopio o nokokito do koinsanai di nongosiliu di koimayaan kopio do winonsoi'd Tuhan,” ka di Musa.
Barakat do Tulun di Mumboyo' om Kousungan do Tulun dit Amu' Mumboyo'
8 Om boros ka kawagu di Musa, “Tumorodok kou no do mumboyo' do koinsanai di ponuhuan di pinoboros ku dokoyu di tadau baino'. Om kosoborong kou indo di bawang om kosuang kou di pomogunan dit oruhai no dokoyu'd oiyon. 9 Om alaid kou indo do momogun-mogun do hilo'd pomogunan di kaya' om it oluhub o tana', i pinabatos mantad do Tuhan do patahakon dot id komolohingan dokoyu om id sinakagon diyolo'. 10 Ilo' nopo tana' di rikoton dokoyu do maan dokoyu'd pomogun-mogunan om a' i' miagal di pomogunan do Masir, i hilo'd kinoundorongon dokoyu di gulu po. Hilo' nopod Masir om soira' nopo do mananom kou do gandum om ohuyan kou po do momuwaig di tana'. 11 Nga' ilo' nopo tana' dot ongoyon dokoyu pomogun-mogunai om tana' do konuluhanan om rantai, i tana' dit opiyopos kasai' do rasam. 12 Tuhan i', i Kinorohingan dokoyu o migompi' do tana'ddi do tikoompus do toun. 13 Iyo nopoddi, om tumorodok kou no do tumanud di ponuhuan di pinoboros ku dokoyu di tadau baino'. Kosianai kou no do Tuhan, i Kinorohingan dokoyu om sumambayang kou no dot id dau do mikuwo'd aayi-ayi' o ginawo om pomusorou dokoyu. 14 Ondung momonsoi kou do miagal diri om pasandatan indo do Tuhan do rasam i tana' dokoyu do tontok di kararasaman, do tontok di dongkaamatan dokoyu, om tontok di tumimpuun kou'd mananom. Om haro indo o gandum, om waig dot anggur, om tumau do saitun dokoyu. 15 Om haro o sakot do kanon di tayam-tayam dokoyu. Om haro ngai' nopo dot id dokoyu i taakanon di korohian dokoyu. 16 Kada' kou nogi' kapalid do gisom do tumolikud kou'd Tuhan, om tumuku' kou nondo om modsubak kou do ponokokinorohingan do suwai. 17 Ondung momonsoi kou do miagal diri om otogod nondo o Tuhan dokoyu. Om a' nondo dau parasamon, om tana' nopondo dokoyu om adalaan no kotuu gisom dot a' no sumuni o totonomon. Om a' pondo alaid om angapatai kou nod hilo' do mulong piya daa do tana' iri dot osonong, i tana' do patahakon do Tuhan dot id dokoyu. 18 Soro-sorohon no kasai' dokoyu iti ponuhuan diti, om podulon no kopio dokoyu. Om pokogoson noti dot id longon dokoyu om pokogoson do ponong id turos dokoyu om ahandaman indo dokoyu. 19 Om potudukon noti ponuhuan diti dot id tangaanak dokoyu. Piguli-gulian no dokoyu do monusui o ponuhuan diti do tontok do poundorong kou do hilo'd walai, om di maso dokoyu dot id kinoiyonon do suwai, om di maso dokoyu do poundorong om di maso dokoyu do kumaraja'. 20 Potulison noti ponuhuan diti do hiri'd torigi di wawayaan do walai om id torigi di wawayaan do tansar do walai dokoyu. 21 Om alaid kou indo di tangaanak dokoyu do momogun-mogun do hilo'd tana' di pinabatos do Tuhan, i Kinorohingan dokoyu dot id komolohingan dokoyu. Om hilo' kou nondo do momogun-mogun do solinaid po do hino ilo tawan dot id sawat diti tana'. 22 Tumorodok kou no do tumanud do koinsanai dit oturan di pinatahak ku dokoyu: Kosianai no do Tuhan, i Kinorohingan dokoyu, om wonsoyon ngai' no dokoyu i pinonuhuan dau, om tumorodok kou no dot id dau. 23 Om uyungon indo dau o koinsanai di bansa'd suwai do tontok do ngoyon dokoyu iyolo' songodo', om kopomogun kou i' do hilo'd tana' di piro-piro o bansa'd tulun dit angagayo om ongokoris ko' iyokoyu. 24 Om oinsanan nopondo i tana' dit oulakan dokoyu dot asanganu dokoyu. Kogisomon nopondo do tana' dot aanu dokoyu om mantad hilo'd tana' do kowotuan di ponong id salatan om gisom do korikot do hilo'd Konuluhanan do Libanon do ponong id utara, om mantad hilo'd Bawang dot Iprat do ponong id koulayon om gisom do korikot do hilo'd Rahat do Tanga' do ponong id kotonobon. 25 Aiso' nondo o songulun piya do kasaap dokoyu. Tu' hinonggo nopo o ngoyon dokoyu dot id pomogunan diri, om Tuhan no, i Kinorohingan dokoyu o momorolosi ngai' di tulun do gisom do moddosi iyolo' dokoyu do miagal di pinabatos mantad do Tuhan. 26 Tadau nopod baino' om pologoson ku nopo iyokoyu do momili' ondung barakat o pilion dokoyu ko' iri po i kousungan --- 27 barakat nopo o pilion dokoyu om tumorodok kou no do tumanud di ponuhuan do Tuhan, i Kinorohingan dokoyu, i pinoboros ku dokoyu di tadau baino'. 28 Nga' kousungan no ot aanu dokoyu ondung a' kou no otorodok do tumanud di ponuhuan diri, om sumansala' kou no di ponuhuan, om tumolikud kou nogindo doho' do mongoi sambayang dot id ponokokinorohingan do suwai dit a' dokoyu insan tukuo' do sumambayang. 29 Soira' nopondo do porikoton kou do Tuhan do hilo'd pomogunan di ngoyon dokoyu pomogun-mogunai, om poboroson no i barakat do mantad hiri'd timpak di Nuluhon do Gorisim om iri no i kousungan om poboroson do mantad hiri'd timpak di Nuluhon dot Ibal. 30 (Iti nopo duwo o nuluhon diti om hilo' goduwo id sampaping ponong id kotonobon do mantad id Bawang do Yordan, i hilo'd watas do tulun do Kanaan di poingiyon do hilo'd Rantai do Yordan. Niyonon nopo diyolo' om ponong id kotonobon om a' i' osodu' no do mantad di koguasan do kayu di tiiyonon do sumambayang do hilo'd Mori, it id somok di bandar do Gilgal.) 31 Oruhai kou no do sumoborong di Bawang do Yordan do mongoi pomogun-mogun do hilo'd tana' di patahakon do Tuhan, i Kinorohingan dokoyu, dot id dokoyu. Om soira' nopondo dot osolod dokoyu i tana'ddi om di kopomogun kou'd hilo', 32 om tonudon no kopio dokoyu o koinsanai dit oturan di pinatahak ku dokoyu di tadau baino',” ka di Musa.
Iso' Noo o Tiyonon do Sumambayang
1 Om boros ka kawagu di Musa, “Pokinongoho' ngai' no dokoyu o koinsanai diti toturan dit apatut dokoyu do tonudon do solinaid dokoyu do momogun-mogun do hilo'd tana' di patahakon do Tuhan, i Kinorohingan di tukuon di komolohingan dokoyu, dot id dokoyu. 2 Korikot kou nopondo do hilo'd pomogunan diri om raagon ngai' no dokoyu i tiyonon do tulun do modsubak di ponokokinorohingan diyolo' di hilo'd konuluhanan dot akawas, om hiri'd konulu-nuluan, om it id sahau do koguasan do kayu dit ongokohob o tuntu. 3 Huyason ngai' no dokoyu i pananaraban do podsubak do tingolig diyolo', om babakon no i torigi'd watu di pokolidangon diyolo' di pinoodsuk diyolo'. Om sorobon ngai' no dokoyu i ponokokinorohingan diyolo', i roitan dot Asira, om mumukon ngai' no i tininganak diyolo', om a' indo osubak kawagu i ponokokinorohingan diri dot id kinoiyonon diri. 4 Kada' kou sambayang dot id Tuhan, i Kinorohingan dokoyu do miagal do kowoyo-woyoo' do tulun diri do sumambayang dot id ponokokinorohingan diyolo'. 5 Mantad nopo do koinsanai di watas do pomogunan di payat dot Israil om pilion indo do Tuhan o tiso' o koiyonon do tulun toko' do sumambayang dot id Tuhan. 6 Om hilo' kou nondo do papatahak do porsombahan di sorobon om i porsombahan do suwai di sumbolion, om i porsombahan dokoyu di sompihopod, om i porsombahan dokoyu do suwai om i porsombahan dokoyu do pamayaan di batos dokoyu do mikuwo'd sumpa' dot id Tuhan, om i porsombahan do patahakon do tumanud do kagaanan do ginawo, om i tanak do sapi' om dumba' om kambing dokoyu dit id gulu kosusu. 7 Hilo' nod toguang do Tuhan, i Kinorohingan dokoyu do kanon dokoyu om i sompiiyon dokoyu o koinsanai di hasil do karaja' dokoyu do mikuwo'd otood o ginawo tu' binarakatan i' iri do Tuhan. 8 Om soira' nopondo dot orikot o maso'ddi om kada' kou no pomonsoi do miagal diti wonsoyon dokoyu do dinondo. Tu' gisom piya do baino' nga' maso po dokoyu do sumambayang do tumanud do kowoyo-woyoo' di korohian dokoyu. 9 Tu' a' kou po nokorikot do hilo'd tana' di patahakon do Tuhan, i Kinorohingan dokoyu, dot id dokoyu, i kinoiyonon dot aiso' o koligagaanan do momogun-mogun. 10 Om soira' nopondo do kosoborong kou di Bawang do Yordan, om pologoson kou indo do Tuhan do kasanganu om kopomogun-mogun do hiri'd pomogunan diri. Om iyau no o mongintirung dokoyu do mantad id koinsanai do pisangod dokoyu om osimbayan kou indo do momogun-mogun do hiri om aiso' o koligagaanan dokoyu. 11 Momili' indo o Tuhan do tiso' o tiyonon do sumambayang dot id dau. Om mositi' no do pootodon dokoyu do hilo' o koinsanai di pinonuhuan ku dokoyu: i porsombahan dokoyu di sorobon, om i porsombahan do suwai di sumbolion, om porsombahan dokoyu do sompihopod om i porsombahan dokoyu'd suwai, om i porsombahan di pinotobilang dokoyu, i nakabatos dokoyu do patahakon dot id Tuhan. 12 Kumotood kou no dot id toguang dau do hiri'd kinoiyonon diri do mogiwoyo-woyo' di tangaanak dokoyu, om i susuhuon dokoyu, om i tulun do Liwi di poingiyon dot id kabandaran dokoyu; hondomon no dokoyu dot iri nopo tulun do Liwi om aiso' i' o tana' do diyolo' kopio'd songonuon. 13 Kada' dokoyu patahako' i porsombahan dokoyu do hinonggo nopo o kinoiyonon di pilion dokoyu. 14 Mositi' no do patahakon dokoyu iri dot id kinoiyonon di tontuon do Tuhan, dot id watas do tiso' di payat dokoyu. Hilo' noo o patahakan dokoyu di porsombahan di sorobon om hilo' o tiyonon dokoyu do momonsoi do koinsanai di pinonuhuan ku dokoyu. 15 Nga' koino-ino kou i' do monumbali' om mangakan di tayam-tayam dokoyu do hinonggo nopo o kinoiyonon dokoyu. Om mangakan kou nopo do songkuro nopo o kogumuon do tumanud di patahakon do Tuhan dot id dokoyu. Oinsanan kou nopo, dot it olidang ko' it a' olidang dot id pagantangan do tugama' do koino-ino do mangakan diri do miagal nod mangakan kou do tonsi do paus om tambang. 16 Nga' kada' no kopio dokoyu kano' i raha' di tayam-tayam diri. Paawason no dokoyu iri do hiri'd tana' do miagal do waig. 17 Kada' dokoyu kano' o nunu nopo di patahakon dokoyu dot id Tuhan, dot id kinoiyonon dokoyu: dot iri po tuu i porsombahan do sompihopod di gandum dokoyu ko' i waig dot anggur, ko' i tumau do saitun, ko' iri po tanak do sapi' om dumba' dokoyu dit id gulu kosusu, ko' i porsombahan do pamayaan di nakabatos dokoyu do mikuwo'd sumpa' dot id Tuhan, ko' i porsombahan dokoyu do tumanud do kagaanan do ginawo --- om nunu nopo o porsombahan do suwai. 18 Pangakanan nopo dokoyu'ddi om hiri nod kinoiyonon do sumambayang di tontuon do Tuhan, i Kinorohingan dokoyu. Mangakan nopoddi om iyokoyu om i tangaanak dokoyu, om i susuhuon dokoyu om i tulun do Liwi di poingiyon dot id kabandaran dokoyu. Om kumotood ngai' kou no do hiri kou id kinoiyonon diri dot i nongowonsoi dokoyu o kataadan. 19 Om soro-sorohon dokoyu dot a' mangada-ada' di tulun do Liwi do solinaid dokoyu do poingiyon dot id pomogunan diri. 20 Soira' nopondo do poinggoyoon do Tuhan, i Kinorohingan dokoyu i watas dokoyu, do miagal di nakabatos mantad dau om koino-ino kou no do mangakan do daging do soira-ira' nopo do tumanud do korohian dokoyu. 21 Ondung adalaan kosodu' i kinoiyonon di tinantu' do tiyonon do sumambayang, om koino-ino kou i' do monumbali' do sapi' om dumba' ko' kambing di nakatahak do Tuhan dot id dokoyu do honggo nopo o kinoiyonon do soira-ira' nopo dot orohian kou. Om koino-ino kou i' do mangakan di daging diri dot id walai dokoyu do miagal di nokosunud ku dokoyu. 22 Isai nopo o tulun, dot olidang tuu ko' amu' dot id pagantangan do tugama' nga' koino-ino i' do mangakan do daging diri do miagal di mangakan iyau do daging do paus om tambang. 23 Nga' kada' kou po pangakan do tonsi dit a' nakaawas o raha' tu' tiyonon nopod ginawo om hiri'd raha', om a' kou i' koino-ino do mangakan do ginawo do mitonggoi di tonsi. 24 Kada' dokoyu kano' i raha'; suwai ko' paawason no dokoyu iri do hilo'd tana' do miagal di waig. 25 Ondung tonudon dokoyu o ponuhuan diti, om asanangan indo o Tuhan om ongosonong-sonong ngai' kou om osimbayan kou om i sinakagon dokoyu. 26 Igitan ngai' no dokoyu do hiri'd kinoiyonon di tinantu' dot iyonon do sumambayang i porsombahan dokoyu om i porsombahan di nakabatos dokoyu do patahakon dot id Tuhan. 27 Iri nopo porsombahan di sorobon om i porsombahan di kanon o tonsi om mositi' no do patahakon do maan do porsombahan do hiri'd sakai di pananaraban do porsombahan dot id Tuhan, om potuntugon i raha' di maan do porsombahan diri do hiri'd sakai di pananaraban do porsombahan. 28 Umboyoon no kopio dokoyu o koinsanai di pinonuhuan ku dokoyu om kopomonsoi kou i' dit osonong om i korohian do Tuhan i Kinorohingan dokoyu, om osonong-sonong kou indo di sinakagon dokoyu, om osimbayan kou do gisom do poingompus,” ka di Musa.
Mogodu do Tumuku' dot id Tingolig
29 Om boros ka kawagu di Musa, “Rumikot kou nopondo dot id pomogunan diri, om patayon indo do Tuhan i Kinorohingan dokoyu i piro-piro o bansa'd tulun di poingiyon do hilo', gisom dot osolod nondo dokoyu om opomogun-mogunan dokoyu i pomogunan diri. 30 Om angapatai ngai' nopondo i bansa' do tulun diri, om antaan-taan no kopio dokoyu. Kada' kou nogi' kopio omit diyolo' do tumuku' dot id ponokokinorohingan do suwai tu' iri nopo wonsoyon do miagal diri om porikot nod kosusaan. 31 Kada' kou sambayang dot id Tuhan, i Kinorohingan dokoyu, dot iyo di kowoyo-woyoo' diyolo' do tumuku' dot id ponokokinorohingan diyolo' o kowoyo-woyoo'. Tu' tontok nopo di tumuku' iyolo' dot id ponokokinorohingan diyolo' om mingwonsoi iyolo' dit angaraat kopio, i karaatan do Tuhan. Om iri piya tangaanak diyolo' nga' sorobon i' diyolo' do hiri'd pananaraban do porsombahan diyolo' do maan do porsombahan di sinumbali' dot id ponokokinorohingan diyolo'. 32 Wonsoyon ngai' no dokoyu i pinonuhuan ku dokoyu; om kada' dokoyu ruhangai i pinonuhuan diri, om kada' dokoyu ingkuriai,” ka di Musa.
1 Om boros ka kawagu di Musa, “Haro i' doti'ndo o nabi ko' i tulun di popoilo do komoyon do nipi do mamatos do haro o kopusahan om koimayaan 2 do maan do pamalid dokoyu, gisom do tumuku' kou nondo om modsubak kou do ponokokinorohingan dit a' dokoyu notutunan do mantad di gulu. Om mulong piya dot abayaan i pinabatos di tulun diri, 3 nga' kada' kou pokinongou dau. Tu' pakayon i' do Tuhan, i Kinorohingan dokoyu i tulun diri do pogumbal dokoyu, do pongilo ondung osianan kou'd Tuhan do mikuwo'd aayi-ayi' kopio o ginawo dokoyu ko' amu'. 4-5 Patayon no dokoyu o tulun di poposunud do komoyon do nipi om i nabi di monuhu' dokoyu do sumaap do Tuhan, i pinoposoliwan dokoyu do mantad hilo'd Masir, i pomogunan di minonguripon dokoyu di gulu po. Tulun nopo do miagal diri om araat no kopio tu' mumbal do potongkiad dokoyu do mantad id kowoyo-woyoo' di pinonuhuan do Tuhan dokoyu do tumanud. Om mositi' no do patayon o tulun diri, om oidu' i' do mantad id dokoyu o karaaton diri. Nga' iyokoyu nopo om tumanud kou nod Tuhan om pusohon no dokoyu iyau; umboyo' kou no do boros dau om tonudon no i ponuhuan dau; sumambayang kou no dot id dau om tumorodok dot id dau. 6-7 Om iri piya doti' i tobpinai dokoyu'd kusai ko' i tanak dokoyu'd kusai ko' i tanak dokoyu'd tondu' ko' i sawo dokoyu di kosianan dokoyu ko' i tambalut kopio dokoyu nga' momolisok-lisok i' do mongodsuur dokoyu do tumuku' dot id ponokokinorohingan do suwai, it a' dokoyu om a' di taki-aki dokoyu notutunan do mantad di gulu po, om i ponokokinorohingan do tulun di poingiyon dot id somok dokoyu ko' iri po i ponokokinorohingan do tulun di poingiyon do hilo'd sodu'. 8 Nga' kada' iyau pologoso' do mononsog dokoyu; kada' kou pokinongou dau. Kada' dokoyu iyau insianai om kada' kou kolisiu dau, om kada' dokoyu intirungai iyau. 9 Patayon nopo kopio dokoyu iyau! Om mogulu kou no do momodumpau dau'd watu om pologoson nogindo ngai' o tulun do suwai do momodumpau dau'd watu do gisom dot apatai iyau. 10 Dumpahon no iyau do watu do gisom dot apatai! Tu' mumbal daa iyau do popotongkiad dokoyu do mantad id Tuhan, i Kinorohingan dokoyu, i pinoposoliwan dokoyu do mantad hilo'd Masir, i pomogunan di minonguripon dokoyu di gulu po. 11 Om korongou ngai' indo o tulun dot Israil di nosiliu do miagal diri; om moddosi nondo iyolo' om aiso' nondo o tiso'd tulun do momonsoi dot iyo kopio'ddi karaat. 12 Soira' nopondo do poingiyon kou dot id kabandaran di patahakon do Tuhan, i Kinorohingan dokoyu, dot id dokoyu, om korongou kou dotindo 13 do haro o piro-piro o tulun dot araat do mantad id bansa' dokoyu do minamalid di tulun do hiri'd bandar diyolo' gisom do tumuku' diri iyolo' dot id kinorohingan dit a' dokoyu notutunan do gulu. 14 Ondung korongou kou do habar do miagal diri, om sorisidon no kopio dokoyu do mongilo iri; om ondung otopot do nosiliu o miagal kopio'ddi karaat 15 om patayon ngai' nopo dokoyu i tulun dot id bandar diri, om patayon ngai' nogi' i tayam-tayam diyolo'. Om raagon nopo kopio i bandar. 16 Timungon ngai' nopo i dapu' di tulun di poingiyon do hiri om potimungon do hiri'd padang dit id suang di bandar do maan do porsombahan dot id Tuhan, i Kinorohingan dokoyu. Om pologoson nopo do poingraag i bandar diri do gisom dot alaid om a' no koino-ino do wonsoyon kawagu. 17 Kada' kou panganu do nunu nopo i natantu' do raagon, om a' indo o Tuhan otogod dokoyu om insianan kou dau. Insianan kou indo dau om silihon kou do tulun dit asapou do miagal di pinabatos dau dot id taki-aki dokoyu, 18 ondung tonudon ngai' no dokoyu i ponuhuan dau di pinosunud ku dot id dokoyu di tadau baino', om wonsoyon ngai' no dokoyu i ponuhuan dau'ddi,” ka di Musa.
Pogihad dit Okon ko' Korohian do Tuhan
1 Om boros ka kawagu di Musa, “Iyokoyu no o tulun di songonuon do Tuhan, i Kinorohingan dokoyu. Om soira' nopo do mogihad kou di tulun do napatai, om kada' dokoyu pinsuhato' o tinan dokoyu om kada' dokoyu bugaro' o tobuk dit id bangku' do tulu dokoyu, do miagal di wonsoyon do tulun di bansa'd suwai. 2 Iyokoyu nopo om songonuon do Tuhan, i Kinorohingan dokoyu, om nopili' kou no dau do silihon do tulun dau dot id pogialatan do koinsanai'd bansa' do hiti'd pomogunan,” ka dau.
Nintorusan di Sosomu' om it Amu' Sosomu'
3 Om boros ka kawagu di Musa, “Kada' kou pangakan do nunu nopo o nintorusan di nokoboros do Tuhan do sosomu'. 4 Koino-ino kou i' do mangakan do nintorusan diti: sapi', dumba', kambing, 5 paus, dumba' di hilo'd gouton, kambing di hilo'd gouton, om tambang --- 6 nunu nopo o nintorusan di nopilapak o sondulu om manapa' di kanon dau. 7 Nga' kada' kou pangakan do nunu nopo o nintorusan dit a' nopilapak o sondulu om it a' manapa' di kanon dau. Kada' kou pangakan dot unta, om i tikus balanda' om i landak. Iti nopo om nintorusan di sosomu'; tu' manapa' piya daa iri di kanon diyolo' nga' a' i' nopilapak o sondulu. 8 Kada' kou pangakan do wogok. Tu' iti nopo om nintorusan di sosomu'; tu' nopilapak i' daa o sondulu nga' a' i' manapa' dit akanon dau. Kada' kou pangakan do tonsi do wogok om kada' kou ongoi kama' do wogok di napatai. 9 Koino-ino kou i' do mangakan do nunu nopo o sada' di kisorod om kisisi', 10 nga' nunu nopo i poingiyon do hilo'd waig dit aiso' o sorod om aiso' o sisi' om a' no koino-ino do kanon. Tu' iri nopo om mositi' no do pokososomuon. 11 Koino-ino kou i' do mangakan do nunu nopo o tombolog dot a' sosomu'. 12-18 Nga' iti no ngai' o bansa' do tombolog dot a' dokoyu koino-ino do kanon: kondiu, puok, simpupulu, kondiu baras om i suwai-suwai kokondiu, bangkahak, i tombolog di roitan do tombolog dot unta, putik rahat, luungon, montis om i tongotombolog do suwai di miagal do montis, tombolog di roitan dot undan om kasa, om gair. 19 Om koinsanai di sontulud-tulud dit ongokooro'; om sosomu' ngai' no, kada' dokoyu kano' iri. 20 Nga' koino-ino kou i' do mangakan do nunu nopo i sontulud-tulud dit ongokooro' dit a' sosomu'. 21 Kada' kou pangakan do nunu nopo o nintorusan dit apatai toomod dot aiso' o minumang. Pologoson nopo i sompogunan di poirolot dokoyu do mangakan diri, ko' pobolion dokoyu iri dot id sompogunan. Nga' iyokoyu nopo om Tuhan i' i Kinorohingan dokoyu o manansanganu; iyokoyu no o tulun di songonuon dau. Kada' dokoyu onsoko' o tanak do dumba' ko' tanak do sapi' dot i gatas di molohing do tayam-tayam diri o pogonsok,” ka dau.
Oturan di Porsombahan do Sompihopod
22 Om boros ka kawagu di Musa, “Potobilang kou no do porsombahan do sompihopod do mantad id toinsanan do hasil di tumo dokoyu do pointikid do toun. 23 Om mongoi kou nogindo do hiri'd tiyonon do sumambayang di tinantu' do Tuhan, i Kinorohingan dokoyu, do tiyonon do sumambayang dot id dau. Om hilo' nondo, dot id toguang do Tuhan, do kanon dokoyu i porsombahan do sompihopod do mantad id gandum om waig dot anggur, om tumau do saitun, om i tanak do sapi' om tanak do dumba' dokoyu dit id gulu kosusu. Om wonsoyon no dokoyu o miagal diri om kopinsingilo kou i' do momusou kasai' do Tuhan, i Kinorohingan dokoyu. 24 Ondung adalaan kosodu' i tiyonon do sumambayang diri do mantad id walai dokoyu do paatadan dokoyu di sompihopod do mantad id hasil di pinabarakat do Tuhan dot id dokoyu, om wonsoyon no dokoyu o miagal diti. 25 Pobolion no i hasil di naanu dokoyu'ddi om igitan no i tusin do hiri'd tiyonon do sumambayang di tinantu'ddi. 26 Om pakayon nopo i tusin diri do pomoli do nunu nopo o korohian dokoyu --- do tonsi tuu do sapi', ko' tanak do dumba', ko' waig dot anggur ko' tiinumon di kaawuk --- om hilo' nondod kinoiyonon diri dot id toguang do Tuhan, i Kinorohingan dokoyu, o pangakanan dokoyu om i sompiiyon dokoyu do taakanon diri. Om rumamai kou nogindo do hiri. 27 Kada' dokoyu kada-kadaai i tulun do Liwi di poingiyon do hiri'd bandar dokoyu; tu' aiso' i' o tana' diyolo' di diyolo' kopio. 28 Pointikid-tikid do kooyion do kotolu'd toun om mositi' nod igitan ngai' dokoyu i sompihopod do mantad id koinsanai di tua' di totonomon dokoyu om poopion no do hiri'd kabandaran dokoyu. 29 Iti nopo taakanon diti om patahakon dot id tulun do Liwi tu' aiso' i' o tana' diyolo', om patahakon di sompogunan om i tangaanak dot aiso' o molohing om i tongoondu' do nopuadan di poingiyon dot id bandar dokoyu. Om koino-ino i' iyolo' do mongoi anu'ddi do gisom do kabagal diyolo'. Wonsoyon no dokoyu o miagal diti om barakatan kou indo do Tuhan, i Kinorohingan dokoyu do nunu nopo o wonsoyon dokoyu,” ka dau.
I Toun do Koturu'
1 Om boros ka kawagu di Musa, “Pointikid-tikid do kooyion do toun do koturu', om mositi' nod tonuson dokoyu i tutang do tulun di kiutang dot id dokoyu. 2 Poingkaa o kowoyo-woyoo' do mananus diri. Pointikid-tikid do tulun dot Israil di nokopoolos do tusin dot id sompi' ko' bansa' dau om mositi' no do tonuson nopo dau i tutang diri, om a' no iyau koino-ino do mongoi pokibayar di tusin; tu' tumanud nopo di nokoboros do Tuhan om natanus no i tutang diri. 3 Nga' koino-ino kou i' do mokibayar di tutang do tulun di bansa'd suwai dot id dokoyu, nga' kada' kou no kopio pokibayar do nunu nopo di noutang do bansa' dokoyu dot id dokoyu. 4 Om barakatan kou indo do Tuhan, i Kinorohingan dokoyu do hilo'd pomogunan di patahakon dau dot id dokoyu. Aiso' indo o tiso'd tulun di bansa' dokoyu do mosikin 5 ondung wonsoyon ngai' no dokoyu i pinonuhuan do Tuhan di pinoboros ku dokoyu di tadau baino'. 6 Om barakatan kou indo do Tuhan do miagal di nakabatos dau. Om kopoolos kou indo do tusin dot id ogumu' o bansa'd tulun nga' a' kou indo iyokoyu minog do molos do mantad id isai nopo; om iyokoyu nondo o momorinta' dot ogumu' o bansa'd tulun, nga' aiso' indo o bansa'd tulun do momorinta' dokoyu. 7 Ondung haro o tulun di sompi' ko' bansa' dot Israil di haro o kosusaan do poingiyon do hinonggo nopo o bandar dot id pomogunan di patahakon do Tuhan, i Kinorohingan dokoyu, dot id dokoyu, om kada' kou katamaha' om kada' kou kopogong do monulung dau. 8 Suwai ko' kumopuhawang kou no om pooloson no iyau do gisom di kabagal dau. 9 Kada' kou nogi' dot a' poolos dau do nunu nopo, do muhai-ruhai piya i toun do kopononusan do tutang. Kada' pologoso' do kosuang dot id pomusarahan dokoyu o pomusorou dot iyo kopio'ddi karaat. Ondung a' kou poolos om momolohou indo do Tuhan o tulun diri do papasala' dokoyu, om iyokoyu indo o pasalaon. 10 Momuhawang no do tulun diri do mikuwo'd osonong om osinggawa' o ginawo, om barakatan kou i' do Tuhan do nunu nopo o wonsoyon dokoyu. 11 Haro kasai' i' o piro-piro o tulun dot Israil do mosikin om i haro o kokurangan, om iri no o koponuhuan ku dokoyu do kumopuhawang dot id diyolo',” ka dau.
I Wonsoyon dot id Turipon
12 Om boros ka kawagu di Musa, “Ondung haro o tulun do sompi' ko' bansa' dot Israil, do kusai tuu ko' tondu', di papadagang do tinan dau dot id dokoyu do sumiliu do turipon dokoyu, om mositi' no do poiduwon dokoyu iyau do kakaraja' iyau dot id dokoyu do solinaid dot onom o toun. Om orikot nopondo i toun do koturu', om poiduwon no kopio dokoyu iyau. 13 Soira' nopo do poiduwon dokoyu i turipon diri, om kada' nogi' dokoyu suhuo' do mamanau dot aiso' kopio o tonggoi. 14 Kumopuhawang kou no do manahak dau do mantad id nunu nopo i nakabarakat do Tuhan dot id dokoyu, dot i dumba' om i gandum om i waig dot anggur. 15 Sorohon no dokoyu dot iyokoyu nga' turipon i' do hilo'd Masir di gulu po om Tuhan i', i Kinorohingan dokoyu o pinoposoliwan dokoyu; om iri no o kopomisunudan ku dokoyu diti ponuhuan diti. 16 Nga' a' i' dotindo sitongkiad i turipon dokoyu'ddi, tu' osianan i' doti' iyau dokoyu om i sompiiyon dokoyu, om orohian do mundorong do poinsugku' dokoyu. 17 Iyo nopoddi om angatan no iyau do mongoi do hiri'd wawayaan do walai dokoyu om luangan no o tolingo dau. Om osiliu nondo iyau do turipon dokoyu do solinaid dau do poimpasi. Om iri turipon dokoyu do tondu' nga' iyoon iddi. 18 Kada' kou kotogod do tontok do papalabus kou do turipon dokoyu, tu' onom no o toun dau do pakaraja' dot id dokoyu om songintanga' noo do gadsi' do susuhuon o pinamagadsi' dokoyu dau. Wonsoyon no o miagal diri om barakatan kou i' do Tuhan, i Kinorohingan dokoyu do nunu nopo o wonsoyon dokoyu,” ka dau.
Tanak do Sapi' om Tanak do Dumba' dit id Gulu Kosusu
19 Om boros ka kawagu di Musa, “Potobilangon no do maan do don Tuhan, i Kinorohingan dokoyu, o koinsanai'd tanak do sapi' do tontoluhan om tanak do dumba' do tontoluhan dit id gulu kosusu; kada' dokoyu porobuato' o sapi' om kada' dokoyu bugarai o dumba'ddi. 20 Pointikid-tikid do toun om mositi' no do kanon dokoyu om i sompiiyon dokoyu i tayam-tayam diri dot id toguang do Tuhan do hilo'd tiyonon do sumambayang di natantu' mantad. 21 Nga' ondung haro o bohiton do tinan di tayam-tayam diri, do kimpo' tuu ko' bolou ko' haro o bohiton do suwai dit araat kopio, om kada' no dokoyu patahako' iri dot id Tuhan, i Kinorohingan dokoyu. 22 Koino-ino kou i' do mangakan do tayam-tayam diri dot id walai dokoyu. Om koino-ino ngai' o tulun dit olidang om i sosomu' dot id pagantangan do tugama' do mangakan do tayam-tayam diri, do miagal do mangakan kou do paus om tambang. 23 Nga' kada' dokoyu kano' i raha' di tayam-tayam diri, suwai ko' paawason no dokoyu i raha' do hilo'd tana' do miagal do waig,” ka dau.
Tadau'd Agayo do Paska
1 Om boros ka kawagu di Musa, “Pusohon no dokoyu o Tuhan, i Kinorohingan dokoyu, do ralan nopod momusou dau om mamaramai di tadau dot agayo do Paska do tontok di tulan dot Abib tu' tontok nod tulan diri di dongotuong do pinosoliwan kou dau do mantad hilo'd Masir. 2 Mongoi kou no do hiri'd natantu' mantad do tiyonon do sumambayang om sumbolion nod hiri ot ongoiso' di dumba' ko' i sapi' dokoyu do maan do porsombahan do Paska do pomusou'd Tuhan, i Kinorohingan dokoyu. 3 Mangakan kou nopod porsombahan do Paska diri om kada' kou pangakan do roti di naralatan do pangambang. Turu' o tadau dokoyu do mangakan do roti dit a' rinalatan do pangambang do miagal di nakan dokoyu do tontok di naarau-arau kou do tuminongkiad do pomogunan do Masir. Om mangakan kou no do roti do miagal diri --- i roitan do roti do koinggoritan --- om osorou kasai' indo dokoyu i tadau di kinosoliwanan dokoyu do mantad hilo'd Masir, i kinoiyonon dokoyu do noinggorit do solinaid dokoyu'd poimpasi. 4 Om turu' nondo o tadau dot a' koino-ino do haro o tulun do kipangambang do roti do hiri'd walai dau; om iri nopondo tonsi di tayam-tayam di sinumbali' do tontok do sosodopon di tadau do koiso' om mositi' no dot oiyon do mangakan do totuong diri. 5-6 Ngoyon no dokoyu sumbolio' i tayam-tayam di maan do tontok do Tadau'd Agayo do Paska do hiri'd tiyonon do sumambayang di natantu' mantad --- om a' no koino-ino do sumbolion iri dot id kinoiyonon do suwai dot id pomogunan di nakatahak do Tuhan, i Kinorohingan dot id dokoyu. Sumbolion no dokoyu iri do tontok di tumonob o tadau do miagal di maso di tuminongkiad kou i' do pomogunan do Masir. 7 Losuon no dokoyu i tonsi do tayam-tayam diri om kanon no dokoyu do hiri'd tiyonon do sumambayang di natantu' mantad, om kosuabon pondo om muli' kou no dot id walai dokoyu. 8 Om a' kou no koino-ino do mangakan do roti di rinalatan do pangambang do solinaid dot onom o tadau. Om koturu' nopondod tadau om tumimung kou no do sumambayang dot id Tuhan, i Kinorohingan dokoyu, om kada' kou karaja' do nunu nopo do tontok do tadau'ddi,” ka dau.
Tadau dot Agayo do Dongmongomot
9 Om boros ka kawagu di Musa, “Intobon no o turu' o minggu' do mantad di timpuun kou do mongomot do gandum, 10 om ramayon nogindo dokoyu i Tadau dot Agayo do Dongmongomot, do maan do pomusou'd Tuhan. Om papatahak kou no do porsombahan do tumanud do kagaanan do ginawo dokoyu do tontok do tadau'd agayo diri, do miontok di barakat do nakatahak do Tuhan dot id dokoyu. 11 Kotood kou no dot id toguang do Tuhan, dot iyokoyu ngai' di tangaanak dokoyu, om i susuhuon dokoyu, om i tulun do Liwi, om i tulun do bansa'd suwai, om i tangaanak dot aiso' o molohing, om i tongoondu' do nopuadan di songingiyon do hiri'd kabandaran dokoyu. Om wonsoyon no dokoyu o miagal diri do hilo'd tiyonon do sumambayang di natantu'ddi. 12 Tumorodok kou no kopio do tumanud do koinsanai di ponuhuan diri; om kada' dokoyu kolihuwai do turipon kou i' iyokoyu do hilo'd Masir di gulu po,” ka dau.
Tadau dot Agayo do Kinuhub-Kuhub
13 Om boros ka kawagu di Musa, “Ogomos ngai' nopondo dokoyu i gandum dokoyu om apaga' ngai' i tua' dot anggur, om ramayon no kopio dokoyu i Tadau dot Agayo do Kinuhub-Kuhub do solinaid do turu' o tadau. 14 Ramayon no dokoyu iri dot iyokoyu ngai' di tangaanak dokoyu, om i susuhuon dokoyu, om i tulun do Liwi, om i tulun do bansa'd suwai, om i tangaanak dot aiso' o molohing, om i tongoondu' do nopuadan di poingiyon dot id kabandaran dokoyu. 15 Pusohon no dokoyu o Tuhan, i Kinorohingan dokoyu; do ralan nopod momusou om mamaramai do tadau dot agayo diti do solinaid do turu' o tadau do hilo'd tiyonon do sumambayang di natantu' mantad. Om kotood kou no tu' nabarakatan nod Tuhan i tinanom dokoyu om i karaja' dokoyu. 16 Oinsanan nopo i tongokusai do bansa' dokoyu dot apatut do mongoi sambayang dot id Tuhan dot intolu do sontoun do hilo'd tiyonon do sumambayang di natantu' mantad do tontok di Tadau'd Agayo do Paska, om di Tadau dot Agayo do Dongmongomot, om di Tadau dot Agayo do Kinuhub-Kuhub. Om mositi' no do migit ngai' do porsombahan o pointikid-tikid di tongokusai, 17 do songkuro nopo i milo dau do patahakon do miontok di barakat do nakatahak do Tuhan, i Kinorohingan dokoyu dot id dau,” ka dau.
Ralan do Momonsoi dit Otulid
18 Om boros ka kawagu di Musa, “Momili' kou no do gompomutus om piro-piro o pagawai'd suwai dot id pointikid-tikid do bandar di patahakon do Tuhan, i Kinorohingan dokoyu, dot id dokoyu. Iti nopo tulun diti om manalasai do hal di rayat dot otulid o pananalasai. 19 A' i' iyolo' koino-ino dot a' otulid o pomumutus ko' manampaping po do tontok do momutus; a' i' iyolo' koino-ino do rumamit do tusin di ponisip. Tu' tulun piya daa dit oilo om it otulid o ginawo, nga' osompon indo di ponisip o mato diyolo' gisom dot a' nondo otulid o pomumutus diyolo'. 20 Mositi' no dot otulid kasai' o pomumutus dokoyu om a' manampaping, om kopomogun-mogun kou indo do hilo'd pomogunan di patahakon do Tuhan, i Kinorohingan dokoyu, dot id dokoyu, om hilo' kasai' kou nondo do momogun-mogun dot id suang do kosimbayanan. 21 Soira' nopo do momonsoi kou do pananaraban do porsombahan dot id Tuhan, i Kinorohingan dokoyu, om kada' dokoyu patalado'ddi i kayu do panakatanda' di Asira, i ponokokinorohingan diri. 22 Om kada' kou poudong do nunu nopo o torigi do watu do pakayon do tontok do tumuku' dot id ponokokinorohingan do suwai. Tu' iri nopo om karaatan kopio do Tuhan.
1 Kada' kou papatahak dot id Tuhan, i Kinorohingan dokoyu do sapi' ko' dumba' di haro o bohiton do tinan; tu' iri nopo om karaatan kopio'd Tuhan. 2 Ondung korongou kou do haro o piro-piro o tongokusai ko' tongoondu' di poingiyon dot id tongoiso' di bandar dokoyu do nokowonsoi'd dusa dot id Tuhan, om tuminolibamban di tumpongo do Tuhan, 3 tu' tuminuku' iyau om minodsubak do ponokokinorohingan do suwai ko' tuminuku' do tadau ko' tulan ko' rombituon, it a' miontok di pinonuhuan do Tuhan. 4 Ondung korongou kou do habar do miagal diri, om sorisidon no kopio dokoyu do mongilo iri. Om ondung otopot kopio do nosiliu o miagal diri karaat do hiti'd Israil, 5 om ngoyon nopo i tulun diri om posoliwanon no di bandar, om dumpahon nondo do watu do gisom dot apatai. 6 Nga' haro po o duwo o tulun do sasi' do papasala' di tulun diri om patayon nogi' i tulun diri; iso-iso' nopo o tulun do sasi' do papasala' di tulun diri om a' i' iyau koino-ino do patayon. 7 Om iri no tulun di sasi'ddi o mogulu do momodumpau dau do watu, om momodumpau ngai' nogindo di tulun diri i tulun do suwai. Om iti no o ralan dokoyu do mongidu' do karaaton diri. 8 Haro i' dotindo o piro-piro hal dit apagon do manalasai dot i gompomutus toomod o manalasai. Miagal ko' i pigulatan do sanganu do tana' ko' i kopokoruol do tulun do suwai, ko' i hal do popisuwai di monomod do mamatai om it a' tomodon do mamatai. Haro nopo ot osiliu do miagal diri, om mositi' nod mongoi kou do hiri'd tiyonon do sumambayang di natantu' mantad do Tuhan, i Kinorohingan dokoyu. 9 Om poboroson no i hal diri dot id tongoimam di mantad id payat do Liwi om id tulun di nopili' do siniliu'd gompomutus do tontok do maso'ddi, om pologoson no iyolo' do manalasai do hal diri. 10 Om iyolo' nondo o momutus diri, om mositi' no do wonsoyon dokoyu o miontok di pinomutus diyolo'. 11 Romiton nopo i pomutus diyolo' om tonudon ngai' no i ponudukan diyolo' do sorisidon kopio'd tumanud. 12 Isai nopo o tulun di katama' daa do sumongkiwal di gompomutus ko' it imam di maso do pakaraja' do tontok diri om mositi' no do hukuman do kapatayon; om iti no o ralan do mongidu' do karaaton diri do mantad id Israil. 13 Om korongou ngai' nondo o tulun do pasal diri om ongooris nondo iyolo', om aiso' nondo o tulun do katama' do momonsoi do miagal diri,” ka dau.
Pongoturan do Pasal do Raja'
14 Om boros ka kawagu di Musa, “Aanu nopondo dokoyu i pomogunan di patahakon do Tuhan, i Kinorohingan dokoyu dot id dokoyu, om kopomogun-mogun kou'd hilo' om orohian kou dotindo do haro o raja' dokoyu do miagal di tulun do bansa'd suwai dit id posorili' dokoyu. 15 Om ilaan no kopio dokoyu do mositi' no dot i pilion do Tuhan i tulun di pilion dokoyu do sumiliu'd raja'. Om mositi' no do bansa' dokoyu o tulun diri; om kada' kou pomili' do bansa'd suwai do silihon do raja' dokoyu. 16 A' i' koino-ino dot ogumu' o kuda' di raja' do patahakon dot id tongosoudor dau, om a' iyau koino-ino do monuhu' do tulun do mongoi boli do kuda' do hilo'd Masir, tu' nokoboros nod Tuhan dot a' no kopio koino-ino do gumuli' kawagu i tulun dau do hilo'd Masir. 17 Om a' i' koino-ino dot ogumu' o sawo di raja' tu' iri no motindo o popotongkiad dau do mantad id Tuhan, om a' iyau koino-ino do momogumu' do pirok om tamas do maan do papakaya' dau. 18 Osiliu nopondo do raja' o tulun diri, om mositi' no do haro o solinan dau di buuk do pinotulisan dit oturan do Kinorohingan om i ponudukan do Kinorohingan, i sinalin do mantad id pinotulisan mantad, i pinoopi' di tongoimam do mantad id payat do Liwi. 19 Om mositi' no dot id toning kasai' dau i buuk diri om mambasa' iyau do buuk diri do solinaid dau do poimpasi. Om koilo indo iyau do momusou do Tuhan, om tumorodok do tumanud do koinsanai di pinonuhuan di pinotulis do hiri. 20 Ondung tumorodok iyau do mambasa'ddi, om a' indo iyau momusorou do poimogo-mogot iyau ko' i sompi' ko' tulun dot Israil do suwai om a' iyau sumurilog di ponuhuan do Tuhan do pasal do nunu nopo. Om momorinta' indo iyau dot Israil, i bansa' dau, do piro-piro o toun do koloido', om kopomorinta' nogi' dot Israil i sinakagon dau do solinaid do piro-piro o sinakagon do mogilombu-lombus,” ka dau.
It Aanu dit Imam
1 Om boros ka kawagu di Musa, “Iri nopo payat do Liwi, i nongosiliu ngai' dot imam diri, om a' i' kaanu do bahagi' di tana' do hilo'd Israil; tu' kaakan-akanan nopo diyolo' om mantad no di porsombahan om i piro-piro o porsombahan di sumbolion di patahakon dot id Tuhan. 2 A' i' iyolo' kaanu do bahagi' do tana' do miagal di naanu di payat do suwai; bahagi' nopo dot aanu diyolo' om iri no i kinosilihan diyolo' dot imam do mogobi-obi'd Tuhan, i kaanu do bahagi' di porsombahan do patahakon dot id Tuhan, do miagal di nakabatos mantad do Tuhan. 3 Soira' nopo do papatahak kou do sapi' ko' dumba', om mositi' no do patahakon dot id tongoimam i toliip, om i roo, om i tian di tayam-tayam diri. 4 Om mositi' no do patahakon dot id diyolo' i gandum dit id gulu koomot, om i waig dot anggur om i tumau do saitun, om i hulu do dumba' dit id gulu kaanu. 5 Mantad nopo dot id pogialatan di payat dokoyu om iri no payat do Liwi o pinili' do Tuhan do sumiliu'd imam di mogobi-obi' dau do gisom dot alaid. 6 Isai nopo o tulun do Liwi do mantad id honggo nopo o bandar dot Israil, it orohian do mongoi do hiri'd tiyonon do sumambayang di natantu' mantad do Tuhan om koino-ino no 7 do maganu-anu do hiri do sumiliu'd imam di mogobi-obi' do Tuhan, i Kinorohingan dau, do miagal di tulun do Liwi do suwai di maganu-anu'd hiri. 8 Om mositi' no do kaanu iyau do taakanon dot irad dit aanu di tongoimam do suwai, om koino-ino i' iyau do popoopi' do nunu nopo i pootodon di sompiiyon dau dot id dau,” ka dau.
I Pogoduhan do Momonsoi
9 Om boros ka kawagu di Musa, “Kopomogun-mogun kou nopondo do hilo'd pomogunan di patahakon do Tuhan, i Kinorohingan dokoyu, dot id dokoyu, om kada' kou omit di pingwonsoyon di piro-piro o bansa'd tulun di poingiyon do hilo' dit angaraat kopio. 10 Kada' dokoyu patahako' i tangaanak dokoyu do maan do porsombahan di sorobon do hiri'd pananaraban do porsombahan; om kada' dokoyu pologoso' o tongoiso' piya di tulun dokoyu do minsingilo do toilaan di tulun do mogogontong ko' mogihum po do pogintutunan ko' mamakai po do toilaan di dong bobolian, 11 ko' mamakai do gimat, om kada' iyolo' pologoso' do momolohou di rusod do tulun do napatai. 12 Araatan i' o Tuhan, i Kinorohingan dokoyu, do wowonsoyon dit araat kopio do miagal diri. Om iri no o koponguyungan dau di piro-piro o bansa'ddi do mantad id pomogunan diri do tontok do rumikot kou do mongoi panangod diyolo'. 13 Tumorodok kou no kopio do tumanud do Tuhan, i Kinorohingan dokoyu do mikuwo'd aayi-ayi' o ginawo dokoyu,” ka dau.
Batos do Kinorohingan do Poporikot dot Iso' o Nabi
14 Om boros ka kawagu di Musa, “Hilo' nopod pomogunan di potiongoyon no dokoyu pomogun-mogunai, om iri nopo tulun do hilo' nga' tumanud do nosihat do tongobobolian om mogihum iyolo' do pogintutunan, nga' mada' i' o Tuhan, i Kinorohingan dokoyu do momonsoi kou iyokoyu do miagal diri. 15 Suwai ko' porikot nondo iyau do songulun o nabi do miagal doho' do mantad id pogialatan do bansa' dokoyu, om mositi' no do mumboyo' kou do boros dau. 16 Tontok di tadau di pointimung kou do hilo'd Nuluhon do Sinai, om pinokianu kopio dokoyu dot a' kou korongou kawagu do Tuhan do moro-boros om a' kou kokito di tapui do tanda' do nakarapou iyau, tu' ooris kou dot apatai kou. 17 Om boros kaddi do Tuhan dot id doho', ‘Kopunong no kopio i pinokianu diyolo'ddi. 18 Porikatan ku indo iyolo' do songulun o nabi di miagal diya' do mantad id pogialatan do bansa' diyolo', om sunudan ku indo iyau dit apatut do poboroson dau dot id diyolo', om sunudan dau iyolo' do koinsanai di ponuhuan ku. 19 Om moro-boros indo iyau dot id suang do ngaran ku, om hukuman ku ot isai nopo o tulun dit a' mumboyo' do boros dau. 20 Nga' ondung haro o nabi di katama' do mimboros dot id suang do ngaran ku om a' oku i' nokoponuhu' dau, om mositi' no do hukuman iyau do kapatayon, om iyoon nogiddi ot isai nopo o nabi di mimboros dot id suang do ngaran do ponokokinorohingan do suwai. 21 Muhot kou doti' ondung poingkuro kou do mongilo ondung mantad kopio dot id Tuhan i poboroson do songulun o nabi ko' okon,’ ka. 22 Ondung haro o nabi do moro-boros dot id suang do ngaran do Tuhan om a' indo abayaan i pinoboros dau, om okon no ko' mantad id Tuhan i boros dau'ddi. Tu' mantad i' do toilaan di nabi diri i boros di pinoboros dau, om a' kou i' minog do moddosi dau,” ka dau.
I Kabandaran do Pogintirungan
1 Om boros ka kawagu di Musa, “Angapatai pondo do Tuhan, i Kinorohingan dokoyu i piro-piro o bansa'd tulun di sanganu daa di pomogunan do patahakon do Tuhan dot id dokoyu, om osolod nopondo dokoyu i kabandaran diyolo' om i kawalayan diyolo', om koundorong kou nopondo kopio do hilo', 2-3 om bohogion no dokoyu o pomogunan diri do tolu o bohogian, om otikid nopo dot iso' o bandar do pogintirungan dit id somok. 4 Om haro nopondo o tulun di kapamatai do tulun do suwai dot a' tinomod do minamatai, it okon ko' pisangod dau, om milo i' i tulun diri do mogidu' om mongoi dot id iso' di bandar do pogintirungan diri do mongoi intirung do hiri. 5-6 Miagal ko', haro nopo o duwo o tulun do mongoi panagad do kayu do hilo'd gouton, om maha' di managad nod kayu o tiso' diyolo', om sigog pondo dot otongos o tulu di kapak dau om oontok nondo i tiso' dau, gisom dot apatai i tulun diri, om milo i' i tulun di nakapamatai nga' it a' i' tinomod do mamatai do mongoi dot id iso' di tolu o bandar diri tu' aiso' i' o sala' dau, om aiso' indo o koligagaanan dau. Ondung iso-iso' o bandar do pogintirungan, om adalaan i' dotindo kosodu' iri, om okosupan nondo i tulun diri di koobpinayan di tulun do napatai, i koobpinayan dit apatut do momolokop do kinapatayan di tobpinai dau, om kapamatai nondo o tulun diri do tulun dit aiso' o sala' dot atatagadan iyau. 7 Om iri no o koponuhuan ku dokoyu do potobilang do tolu o bandar. 8 Soira' nopondo do poinggoyoon do Tuhan, i Kinorohingan dokoyu o pomogunan dokoyu, do miagal di nakabatos dau dot id komolohingan dokoyu do wonsoyon dau, om katahak ngai' dau dot id dokoyu i tana' do nakabatos dau, 9 om momili-mili' kou po do tolu kawagu o bandar. (Om patahakon i' dau i tana'ddi ondung wonsoyon ngai' no dokoyu i ponuhuan ku dokoyu di tadau baino', om ondung osianan kou no do Tuhan i Kinorohingan dokoyu, om miontok no di ponudukan dau o kowoyo-woyoon dokoyu.) 10 Wonsoyon no dokoyu o miagal diri om a' i' apatai o tulun dit aiso' o sala'. Om a' kou indo iyokoyu kasala' do kapamatai diyolo' dot id pomogunan di patahakon do Tuhan dot id dokoyu. 11 Nga' ondung haro o tulun do tumomod do mamatai di pisangod dau di karaatan dau om mogidu' no daa'ndo dot id tiso' di bandar do pogintirungan diri do mongoi pokiintirung, 12 om mositi' no dot i tongoboyoon do hiri'd bandar dau o monuhu' do poposoliwan dau om patahakon indo dot id koobpinayan di tulun di pinatai it apatut do momolokop do kinapatayan di tobpinai diyolo', om apatai indo diyolo' i tulun do minamatai'ddi. 13 Kada' no kopio dokoyu insianai o tulun do miagal diri. Poiduwon no kopio ot Israil do mantad id pinamatayan diri om osimbayan kou indo,” ka dau.
Wolit do Tana' do Mantad di Gulu po.14 Om boros ka kawagu di Musa, “Kada' dokoyu poundoliho' i wolit do tana' di songkoduwo dokoyu, i wolit di natantu' mantad di gulu po do hilo'd pomogunan di patahakon do Tuhan, i Kinorohingan dokoyu, dot id dokoyu,” ka dau.
Pongoturan do Pasal do Sasi'
15 Om boros ka kawagu di Musa, “A' i' kabagal o songulun-ngulun do monondos dot iso' o tulun do nakasala' o tulun diri; mositi' no do duwo o tulun do sasi' do popointalang kopio do kasala' o tulun diri. 16 Ondung haro o songulun do mumbal do pokoruol do ginawo do tulun do suwai tu' tondoson dau i tulun diri do nakasala' nga' a' i' ma otopot kopio i ponondos dau'ddi, 17 om mositi' no do mongoi goduwo i tulun diri do hiri'd tiyonon do sumambayang di natantu' mantad do Tuhan, om butusan nogindo iyolo' dit imam om i gompomutus di pakaraja' do maso'ddi. 18 Mositi' no do sorisidon kopio dit imam do mongilo o hal diri; om ondung haro o tulun do minongudut do pinapasala' di songulun di sompi' ko' tulun dot Israil, 19 om mositi' no do porotuan iyau do hukuman di porotuon mantad daa dot id tulun di pinasala'. Om iyo noddi o ralan do mongidu' do karaaton diri. 20 Om korongou ngai' indo o tulun do suwai di nosiliu do miagal diri; om ooris nondo iyolo', om aiso' nondo o tongosongulun piya do kasaap do momonsoi do miagal kopio'ddi karaat. 21 Kada' kou no kopio ponginsian do tulun do miagal diri; tu' pomohukum nopo om ginawo o pomolokop do ginawo, om mato o pomolokop do mato, om nipon o pomolokop do nipon, om longon o pomolokop do longon, om gakod o pomolokop do gakod,” ka dau.
Pongoturan do Pasal do Pisangadan
1 Om boros ka kawagu di Musa, “Soira' nopo do mamanau kou do mongoi sangod do pisangod dokoyu om kokito kou do korita'-kuda', om kuda', om soudor dit ogumu' ko' i dokoyu, om kada' kou poddosi'ddi. Tu' moyo-woyo' i' dokoyu o Tuhan, i Kinorohingan dokoyu, om monguhup iyau dokoyu, iyau i pinoposoliwan dokoyu do mantad hilo'd Masir. 2 Tontok dit a' kou po koongoi kasangod, om mositi' no do haro ot imam do mongoi pomoros dot id tongosoudor do poingkaa, 3 ‘Oi tulun dot Israil, pokinongou kou no. Tadau nod baino' do mongoi kou sangod. Om kada' kou kooris di pisangod dokoyu, om kada' dokoyu poluhoyo' o ginawo, om kada' kou kagangau. 4 Tu' woyoon kou i' do Tuhan, i Kinorohingan dokoyu, om monguhup iyau dokoyu, om onuan kou i' dau do kamanangan,’ ka. 5 Om sunudan nondo di pagawai i soudor do poingkaa, ‘Haro o tulun do hiti di wagu po kowonsoi'd walai, om a' po dau noiyon i walai dau'ddi? Ondung haro, om mositi' no do muli' o tulun diri. Tu' ondung amu', om apatai nopondo iyau dot id pisangadan om tulun nod suwai o koiyon di walai dau. 6 Haro o tulun do hiti di wagu po kapananom do kabun dot anggur, om a' poddi nokoumbal do mongupu' do tua' dit anggur dau? Ondung haro, om mositi' nod muli' o tulun diri. Tu' a' nopo, om apatai nopondo iyau dot id pisangadan, om tulun nod suwai o mimbangat di waig dot anggur dau. 7 Haro o tulun do hiti di nokotunang nogi'? Ondung haro om mositi' no do muli' iyau. Tu' a' nopo, om apatai nopondo iyau dot id pisangadan, om tulun nod suwai o mangawin di tondu' di notunangan dau,’ ka. 8 Om mositi' no do poboroson po di pagawai dot id soudor diri o boros do poingkaa, ‘Haro o tulun do hiti dit oluhoi no o ginawo om i moddosi? Ondung haro, om mositi' no do muli' o tulun diri. Tu' a' nopo, om kotonggoi nondo dau do moddosi i tulun do suwai,’ ka. 9 Kopongo pondo i pagawai do moro-boros dot id soudor diri, om momili' nogindo do boyoon do pointikid-tikid do posukan. 10 Soira' nopo do mongoi kou panangod dot iso' o bandar, om umbalan po do monuhu' i tulun do hiri do tumahak dot id dokoyu. 11 Ondung iwangan diyolo' i wawayaan di bandar om tumahak no iyolo' dot id dokoyu, om osiliu ngai' nopondo iyolo' do turipon dokoyu om sansagan do kumaraja' dot id dokoyu. 12 Nga' ondung a' tumahak dot id dokoyu i tulun do hiri'd bandar diri, tu' uhang nogi' diyolo' do sumaap, om turungkuon no dokoyu do soudor dokoyu o bandar diri. 13 Om katahak nopondo do Tuhan i Kinorohingan dokoyu i bandar diri dot id dokoyu, om mositi' nod patayon ngai' dokoyu i tongokusai do hiri'd bandar diri. 14 Nga' koino-ino kou i' do mononggoi di tongoondu', om i tangaanak, om i tayam-tayam, om nunu nopo it id suang do bandar diri. Om pakayon nopo o nunu nopo o dapu' di pisangod dokoyu. 15 Om iyoon no dokoyu'ddi i kabandaran dit id sodu' di pomogunan do koundorongon dokoyu. 16 Nga' ondung koponolod kou do bandar do hiri'd pomogunan di patahakon do Tuhan, i Kinorohingan dokoyu, dot id dokoyu, om mositi' nod patayon ngai' nopo o tulun do hiri. 17 Punsoon nopo do mamatai o koinsanai di bansa'd tulun do hiri: i tulun do Hit, Amori, Kanaan, Poris, Howi, om Yobus, do miagal di pinonuhuan do Tuhan dot id dokoyu. 18 Patayon no dokoyu iyolo', om a' i' iyolo' kopominsuhu' dokoyu do momonsoi'd dusa dot id Tuhan, tu' monuduk moti'ndo iyolo' dokoyu do momonsoi do koinsanai di sosomu', i wonsoyon diyolo' do tontok do tumuku' dot id ponokokinorohingan diyolo'. 19 Soira' nopo do mumbal kou do monolod do bandar, om kada' dokoyu tagado' i tongotua-ua' do hiri, do mulong piya dot alaid kou do monurungku' do bandar diri. Kanon nopo dokoyu i tua' nga' kada' dokoyu umpadano' i guas; tu' okon i' ko' i guas do kouwaan o pisangod dokoyu. 20 Nga' koino-ino kou i' do managad di kayu do suwai om pakayon nopo do maan do ponurungku' di bandar do gisom dot osolod dokoyu o bandar diri,” ka dau.
Hal do Tulun di Nakapamatai'd Tulun dit A' Milo'd Salasayon
1 Om boros ka kawagu di Musa, “Ondung haro o tulun dot abantalan do pinatai dot id tumo do hilo'd pomogunan di patahakon do Tuhan, i Kinorohingan dokoyu, dot id dokoyu, om a' i' dokoyu oilaan ondung isai o minamatai do tulun diri, 2 om mositi' no do ngoyon di boyoon om i gompomutus tipongo' o kosoduwo' do mantad hiri'd kinoilihon di tinan di tulun diri om gisom do korikot dot id pointikid-tikid di bandar dit id somok. 3 Om momili' nondo i boyoon di hiri'd bandar dit id somok kopio di kinoilihon di tinan do tulun diri do songinan o sapi' dit okoro' po, it a' po insan porobuato'. 4 Om gayaton nondo diyolo' iri dot id iso' o kinoiyonon dit id toning do bawang dit a' insan karasak, om it a' insan karadu om a' insan kopomutanamai i tana'd hiri. Om hiri nondo do tipuon diyolo' o liou di sapi'ddi. 5 Om mositi' no do mongoi ngai'd hiri it imam do mantad id payat do Liwi, tu' iyolo' no o momutus do nunu nopo o hal di kagait do kororongit. Om iyolo' o nopili'd Tuhan, i Kinorohingan dokoyu do momonsoi'd karaja' do Tuhan om popoboros do barakat dot id suang do ngaran do Tuhan. 6 Om oinsanan nopondo i boyoon do mantad hiri'd bandar dit id somok kopio di kinoiyonon do kinabantalan di tulun do pinatai, do mongoug do palad diyolo' do pasahawon di sapi'ddi, 7 om momoros do poingkaa, ‘A' i' iyahai minamatai dilo tulun om a' iyahai koilo ondung isai kopio o tulun do minamatai. 8 Oi Tuhan, ompunai no i tulun dot Israil i tulun nu, i pinosoliwan nu do mantad hilo'd Masir. Ompunai no iyahai om kada' iyahai poboboo' diti pinamatayan do tulun dit aiso' o sala',’ ka. 9 Om owonsoi pondo i ponuhuan do Tuhan diri, om a' kou nogindo apababaan di pinamatayan do tulun diri,” ka dau.
Pongoturan do Tongoondu' di Natanggayan do Mantad id Pisangadan
10 Om boros ka kawagu di Musa, “Soira' nopo dot onuan kou do Tuhan, i Kinorohingan dokoyu do kamanangan dot id pisangadan om mononggoi kou nondo do tulun do mantad id pisangadan diri. 11 Om haro i' dotindo o tokito dokoyu do tondu' dit olumis dot id pogialatan diyolo' om i korohian dokoyu do mangawin. 12 Om angatan nopo i tondu'ddi do hiri'd walai dokoyu. Om pampadan nondo dau o tobuk dau om pampadan o sondulu, 13 om tingalanan dau o pakayan dau. Om mundorong nondo iyau do hiri'd walai dokoyu om mogihad iyau di molohing dau do solinaid do sombulan; om atalib pondo iri om kowinon nogindo dokoyu i tondu'ddi. 14 Koimbagu nopondo, om ondung a' kou orohian di tondu'ddi, om pologoson nopo iyau do tumongkiad. A' kou i' koino-ino do moniliu dau do turipon ko' papadagang po dau tu' sinansagan i' dokoyu i tondu'ddi do dumudun dokoyu,” ka dau.
Pongoturan do Tungkusan di Tanak do Kusai dit id Gulu Kosusu
15 Om boros ka kawagu di Musa, “Ondung haro o kusai do duwo o sawo om kianak goduwo nopod kusai i sawo dau'ddi nga' okon i' ko' i sawo di kosianan kopio dau o sanganak di tanak do kusai dot id gulu kosusu. 16 Om soira' nopondo do momusorou i tapa' do ralan dau do mamahagi' di dapu' dau dot id tangaanak dau, om a' i' iyau koino-ino do mogobi' di tanak do kusai di sawo di kosianan dau, gisom do patahakon dau dot id tanak do kusai di sawo do kosianan dau i tungkusan dit apatut daa dot aanu di tanak do kusai dit id gulu kosusu. 17 Mositi' no do patahakon dau o duwo tintanga' di dapu' dau dot id tanak do kusai dit id gulu kosusu, do mulong piya dot okon iyau ko' tanak di sawo di kosianan dau. Mositi' no do pusohon di tapa' i tanak dau'd kusai dit id gulu kosusu, om patahakon dot id dau i tungkusan dit apatut dot aanu do tanak diri,” ka dau.
Pongoturan do Tanak dit Amu' Mumboyo'
18 Om boros ka kawagu di Musa, “Ondung haro o molohing di kianak do kusai dit obinsongkiwal om it a' milo'd sunudan, i tanak dit a' nopo tumanud do boros di molohing dau, do pikoton piya daa diyolo' iyau do monuduk. 19 Om mositi' no do pootodon di molohing i tanak diri dot id tongoboyoon di bandar di kinoiyonon diyolo' om bisaraon nogindo. 20 Om poboroson nondo di molohing dot id tongoboyoon diri o boros do poingkaa, ‘A' nopo milo'd sunudan iti tanak dahai, om obinsongkiwal om a' tumanud do boros dahai; momirubat no ilo' do tusin om mogiginum,’ ka. 21 Om iri nondo i tongoboyoon do bandar diri o momodumpau di tanak diri do watu o pomodumpau, do gisom dot apatai i tanak, om oidu' indo dokoyu o karaaton diri. Om korongou ngai' nopondo i hilo'd Israil di nosiliu do miagal diri, om ooris nondo iyolo',” ka dau.
Piro-Piro ot Oturan
22 Om boros ka kawagu di Musa, “Ondung haro o tulun do hinukuman do kapatayon tu' nokowonsoi i' iyau'd sala', om pinogiis i tinan dau dot id kayu di pinoodsuk, 23 om kada' nogi' dokoyu pologoso' do poingiyo'ddi i tinan diri do gisom dot osuaban. Mositi' no do lobongon iri do tontok do tadau'ddi, tu' rata' nopod tulun do poinggiis dot id kayu om poporikot do popol do Kinorohingan dot id pomogunan diri. Ngoyon no dokoyu lobongo' i rata', om a' i' dokoyu ososomu' i tana' di pinatahak do Tuhan, i Kinorohingan dokoyu, dot id dokoyu.
1 Ondung kokito kou do sapi' ko' dumba' do tulun di sompi' ko' bansa'd Israil do nokoidu', om kada' dokoyu pologoso' tomod iri; ngoyon no dokoyu iri pogulio' dot id sanganu. 2 Nga' ondung osodu' o walai di sanganu ko' ondung a' kou koilo do sanganu'ddi, om igitan nopori do muli'. Om korikot nopondo i sanganu do mongoi pogihum diri, om patahakon no dokoyu iri dot id dau. 3 Om iyo nogiddi o wonsoyon dokoyu ondung kobontol kou no do kaladai, ko' kain, ko' nunu nopo i natagak do sompi' ko' bansa' dot Israil. 4 Ondung haro o kaladai ko' sapi' di sompi' ko' bansa' dot Israil do kogupu' do hilo'd ralan, om kada' dokoyu pologoso' tomod iri, suwai ko' uhupan no dokoyu i sanganu do potungag kawagu'ddi. 5 Tongoondu' nopo om a' i' koino-ino do manampakai do pakayan do tongokusai, om tongokusai nga' a' i' koino-ino do manampakai do pakayan do tongoondu'; tu' araatan i' o Tuhan, i Kinorohingan dokoyu, do tulun di momonsoi do miagal diri. 6 Ondung kobontol kou do rumun do tombolog dot id kayu ko' hilo'd tana' do maso di molohing di tombolog do momut, ko' poinsugku' i molohing di tombolog di tangaanak dau, om kada' dokoyu ngoyo' i molohing di tombolog. 7 Koino-ino kou i' do manganu di tanak do tombolog, nga' poiduwon no dokoyu i molohing, om otogui kou i' om osimbayan kou do momogun-mogun. 8 Soira' nopo do momonsoi kou do walai'd wagu, om wansayan no kopio dokoyu do tolig o pointutuk di tisan di taap. Om a' kou indo pasalaon do haro piya o tulun dot aratu' do mantad hiri om gisom dot apatai. 9 Kada' kou pananom do totonomon do suwai do poirolot di pinatanaman dokoyu dot anggur; ondung wonsoyon dokoyu o miagal diri, om a' kou no koino-ino do manganu do tua' dit anggur om i tua' di totonomon do suwai di tinanom dokoyu'd hiri. 10 Kada' dokoyu pokuwai dot iso-iso' o poku' do sapi' om kaladai do maan do pamaradu. 11 Kada' kou panampakai do kain di piniawol do hulu'd dumba' om banang do linan. 12 Tombiran no dokoyu do raboi-raboi o hiri'd apat o sunduk do pakayan dokoyu,” ka dau.
Oturan do Kolidango' do Pisasawaan
13 Om boros ka kawagu di Musa, “Ondung haro o kusai di mangawin dot iso' o tondu', om alaid nondo om a' indo i kusai orohian di tondu', 14 om mongudut nondo i kusai do papasala' di tondu', tu' tondoson dau do nodudun do kusai dot id gulu i tondu' dit a' po iyolo' nokopikawin. 15 Ondung haro ot osiliu do miagal diri, om mositi' no do ngoyon di molohing di tondu' i lapik do toodopon di noturuan do raha' di tadau do kinopikowinan, do popointalang dot a' i tondu' nodudun do kusai dot id gulu. Om mositi' no do pointalangon diyolo' i kain diri dot id tongoboyoon di bandar do hiri'd bisara'. 16 Om poboroson nondo di tapa' di tondu' dot id diyolo' o poingkaa, ‘Pinatahak ku i' iti tanak ku'd tondu' do kowinon diti kusai nga' baino' noddi om niada' i' dau iti tondu'. 17 Om minongudut iyau do papasala' diti tondu', tu' minomoros iyau do nodudun do kusai iti tondu' dit a' po iyolo' nokopikawin. Nga' diya iti kointalangan kopio dot a' ilo tanak ku nodudun do kusai dot id gulu; ontong kou pogi' dilo noturuan do raha' do hiti'd lapik do toodopon do tontok di minikawin iyolo'!’ ka nondo dau. 18 Om ngoyon nondo di tongoboyoon do bandar i kusai om bobogon nondo diyolo' iyau. 19 Om rugion nondo i kusai'ddi do hatus o tusin do pirok om patahakon iri dot id tapa' di tondu', tu' nintingayam i' di kusai o songulun o tondu' dot Israil. Om sawo indo kasai' di kusai i tondu'ddi, om a' i' koino-ino dot adaan di kusai do solinaid di kusai do poimpasi. 20 Nga' ondung otopot i boros do pinonondos om aiso' o kointalangan kopio dot a' nodudun do kusai i tondu' dot id gulu, 21 om mositi' no dot angatan diyolo' i tondu' do hiri'd wawayaan do walai di tapa' dau, om dumpahon nondo di tongokusai do hiri'd bandar i tondu'ddi, do watu o pomodumpau, do gisom dot apatai i tondu'. Minomonsoi i tondu'ddi di kointingayam kopio dot id pogialatan do bansa' toko' tu' nodudun no iyau'd kusai dit a' po iyau nakakawin, om di maso po dau do poingiyon dot id walai di tapa' dau. Om iyo nodti o ralan do mongidu' do karaaton diri. 22 Ondung haro o kusai dot okosupan do maso do poindudun do sawo do kusai'd suwai, om mositi' no do hukuman goduwo nopo iyolo' do kapatayon. Om iyo nodti o ralan do mongidu' do karaaton diri. 23 Ondung haro o kusai dot okosupan do poindudun do tondu' di notunangan nod tulun do suwai dot id iso' o bandar, 24 om posoliwanon nopo dokoyu iyolo' goduwo om dumpahon nod watu do gisom dot apatai. Om patayon no i tondu' tu' a' i' iyau mininggiak do minokitulung om hiri i' daa iyau id bandar, om norongou i' daa iyau do tulun do suwai. Om iri kusai nga' patayon no tu' minongoi i' dudun do tondu' di kitunang no. Om iyo nodti o ralan do mongidu' do karaaton diri. 25 Ondung haro o kusai do mongoi pangasou do tondu' do hilo'd talun, dot i tondu' di notunangan no do kusai'd suwai, om iri no i kusai o patayon. 26 Om a' indo kuroi-kuroyon i tondu' tu' a' i' iyau nokowonsoi do dusa dit apatut do hukuman do kapatayon. Iti nopo om miagal nopo di ngoyon do songulun o kusai saapo' o tiso' o kusai om patayon nondo dau i kusai'ddi. 27 Tu' hiri id talun o pinangasahan di kusai di tondu'ddi, om mininggiak piya daa i tondu' do mokitulung nga' aiso' i' o tulun do milo do mongoi ponulung dau. 28 Ondung haro o kusai dot okosupan do poindudun do tondu' dit aiso' o tunang, 29 om mositi' no do bayaran di kusai i tapa' di tondu'ddi do limo nohopod o tusin do pirok, it irad di topungon kasai'. Om mositi' no do kowinon kopio di kusai i tondu'ddi tu' sinansagan i' dau do dumudun dau. Om a' no i kusai koino-ino do magada' di tondu'ddi do solinaid dau do poimpasi. 30 A' i' kopio koino-ino ot isai nopo o kusai do mongindaraat di tapa' dau do mongoi dudun dot isai nopo di sawo di tapa' dau, o pongindaraat,” ka dau.
Tulun dit Amu' Kohompit do Tulun di Songonuon do Tuhan
1 Om boros ka kawagu di Musa, “Kusai nopo di noidu' o tontolu ko' napampadan o wayaan do sobu, om a' no pohompiton do tulun di songonuon do Tuhan. 2 Tulun nopo di nosusu dot a' po nokopikawin i molohing dau, om a' no pohompiton do tulun di songonuon do Tuhan. Om iri piya sinakagon dau do gisom do korikot di linombusan do sinakagon di koinghopod nga' a' i' pohompiton. 3 Tulun nopo dot Amon om Muab om i sinakagon diyolo', dot iri piya i linombusan do sinakagon di koinghopod nga' a' i' pohompiton do tulun di songonuon do Tuhan. 4 Tu' a' i' iyolo' minanahak dokoyu do taakanon om waig do tontok di hilo' kou id tindalanon di kososoliwan dokoyu do mantad hilo'd Masir. Om minamagadsi' po iyolo' di Biliam i tanak di Bior, i mantad hilo'd bandar do Pitor, i hilo'd Misopotamia, do momopol dokoyu. 5 Nga' a' i' do Tuhan, i Kinorohingan dokoyu pinokinongou i Biliam, suwai ko' siniliu nogi' dau do barakat i popol, tu' osianan i' iyau dokoyu. 6 Kada' kou nogi' kopio pomonsoi do nunu nopo do ponguhup om poposimbayan do bansa'ddi do solinaid diyolo' do poimpasi. 7 Kada' dokoyu poinsiriba-ribao' i tulun dot Idom tu' waris i' dokoyu iyolo'. Om kada' dokoyu poinsiriba-ribao' i tulun do Masir, tu' nokoumbal kou i' do nokoiyon do hilo'd pomogunan diyolo' di gulu po. 8 Om pohompiton nopo do tulun di songonuon do Tuhan o sinakagon diyolo' do mantad di linombusan do sinakagon di kointolu om gisom dot impiro-piro kawagu pilombus o sinakagon diyolo',” ka dau.
Momolidang di Kokiiman do Soudor
9 Om boros ka kawagu di Musa, “Soira' nopo dot id suang kou do kiim do tontok do haro o pisangadan, om ilagon no kopio dokoyu o nunu nopo i monosomu' dokoyu dot id pagantangan do tugama'. 10 Ondung haro o songulun o kusai dot id pogialatan dokoyu dot ososomu' dot id pagantangan do tugama' tu' nokoposoliwan iyau do narot di dongotuong, om mositi' no do sumoliwan iyau di kiim om mundorong nondo do hiri'd soliwan. 11 Osodop pondo om mositi' nod modsu' iyau, om otonob pondo o tadau om koino-ino nogi' iyau do gumuli' do hiri'd kokiiman. 12 Mositi' no do haro ot iso' o kinoiyonon do ngoyon dokoyu pagawasai do hiri'd soliwan di kokiiman. 13 Migit kou no do kayu-kayu do ponokopakakas dokoyu, om mongoi kou nopondo taii' om milo i' dokoyu do maan do pongukad do luang i kayu-kayu'ddi, om olitan nogindo kawagu i luang. 14 Gompion no i kokiiman dokoyu om olidang i' dot id pagantangan do tugama', tu' moyo-woyo' i' dokoyu o Tuhan, i Kinorohingan dokoyu, do hiri'd kokiiman do mongintirung dokoyu om manahak dokoyu do kamanangan do sumaap ngai' di pisangod dokoyu. Kada' kou pomonsoi do nunu nopo it a' osonong, dot i popotongkiad do Tuhan do mantad id dokoyu,” ka dau.
Piro-Piro ot Oturan do Suwai
15 Om boros ka kawagu di Musa, “Ondung haro o turipon do mogidu' do mantad id tuan dau om rumikot nondo dot id dokoyu do mongoi pokiintirung, om kada' dokoyu iyau pogulio' dot id tuan dau. 16 Om koino-ino i' iyau do miyon do hinonggo nopo o bandar di korohian dau, om kada' kou korongit dot id dau. 17 A' no kopio koino-ino do haro o tulun dot Israil do kusai ko' tondu' po do sumiliu'd sundal dot id walai do tingolig. 18 Om a' kou koino-ino do papatahak do tusin dot i suminiliu'd sundal o ralan do kinoonuan di tusin, do hiri'd Walai'd Sasambayangan do Tuhan, i Kinorohingan dokoyu, do maan do pamayaan do batos di mikuwo'd sumpa'. Tu' araatan i' kopio o Tuhan do sundal dot id walai'd tingolig. 19 Soira' nopo do popoolos kou do tusin ko' taakanon ko' nunu nopo dot id sompi' ko' tulun dot Israil, om kada' dokoyu iyau suhuo' do mambayar do bunga di nolos dau. 20 Koino-ino kou i' do mokibunga di paalasan dokoyu dot id tulun do bansa'd suwai, nga' a' kou i' koino-ino do mokibunga di paalasan dokoyu dot id sompi' ko' tulun dot Israil. Tonudo' no dokoyu ot oturan diti, om barakatan indo do Tuhan, i Kinorohingan dokoyu, o nunu nopo o wonsoyon dokoyu do hilo' kou id pomogunan di ngoyon dokoyu pomogun-mogunai. 21 Soira' nopo do mamatos kou dot id Tuhan, i Kinorohingan dokoyu, om kada' dokoyu popiloid-loido' do momonsoi i nakabatos dokoyu; tu' uhoton kou indo do Tuhan di batos dokoyu, om dusa no dokoyu ondung a' no dokoyu bayaanon i batos dokoyu'ddi. 22 Okon i' ko' dusa dot a' kou piya mamatos dot id Tuhan. 23 Nga' mamatos kou nopo do mantad id kosinggawaan do ginawo dokoyu, om bayaanon no kopio dokoyu iri. 24 Soira' nopo do sumusui kou do ralan di kawaya' do kabun dot anggur do tulun do suwai, om koino-ino kou i' do mangakan di tua' dot anggur do gisom dot ayahan kou nga' kada' kou posuang di tua' dot anggur dot id balatak dokoyu dot igitan do mamanau. 25 Soira' nopo do sumusui kou do ralan di kawaya' do tumo do tinanaman do gandum do tulun do suwai, om koino-ino kou i' do mangakan di gandum di kotuon dokoyu nga' kada' kou po panganu di gandum do goribon do manganu,” ka dau.
Oturan di Miada' om i Kumawin Kawagu
1 Om boros ka kawagu di Musa, “Ondung haro o kusai di mangawin dot iso' o tondu', om alaid nondo om mada' indo iyau di tondu'ddi tu' haro no ot a' dau korohian, om monulis nondo iyau do surat do kopiadaan om patahakon no dot id tondu'ddi, om uyungon nondo dau i tondu' do mantad id walai dau. 2 Om ondung akawin kawagu do kusai'd suwai i tondu' do nadaan diri, 3 om iri piyando i kusai'ddi nga' a' i' orohian di tondu' dot alaid-laid. Om monulis nondo i kusai do surat do kopiadaan om patahakon no dot id tondu'ddi, om uyungon nondo dau i tondu' do mantad id walai dau. Ko' amu' no iyo'ddi, om apatai doti' i sawo di tondu' di koduwo. 4 Nga' poingkuro nopo ot osiliu, nga' a' no koino-ino i sawo di tondu' dot id gulu do mangawin kawagu di tondu'ddi; tu' mositi' no do sorohon di kusai do nososomu' i tondu'ddi. Ondung kowinon kawagu di sawo di tondu' dot id gulu i tondu'ddi, om iti no o karaatan kopio do Tuhan. Kada' kou nogi' kopio pomonsoi do dusa dot iyo kopio'ddi karaat do hilo'd pomogunan di patahakon do Tuhan, i Kinorohingan dokoyu, dot id dokoyu,” ka dau.
Piro-Piro ot Oturan do Suwai
5 Om boros ka kawagu di Musa, “Kusai nopo di wagu po kakawin, om a' i' koino-ino dot onuon do sumiliu'd soudor ko' posuangon do nunu nopo o karaja' di pogiuhupan do kumaraja'; a' i' iyau koino-ino do lohowon do momonsoi do karaja'ddi do solinaid do sontoun, om koundorong i' iyau do hiri'd walai dau om milo indo do popotood di sawo dau. 6 Soira' nopo do popoolos kou do nunu nopo dot id isai nopo o tulun, om kada' dokoyu ngoyo' i watu di pongisar dau di gandum dau do maan do pasandaon. Tu' aahawan nondo i sompiiyon dau di koburu-buruon diyolo' do poposodia' do taakanon, i koposi-posion diyolo'. 7 Isai nopo o mongoi panangkap do sompi' ko' tulun dot Israil do silihon do turipon dau ko' padagangon po dau dot id ponguripanan om mositi' no do hukuman do kapatayon o tulun diri. Om iyo nodti o ralan do mongidu' do karaaton diri. 8 Soira' nopo do haro o toruol dit araat kopio dot id kulit dokoyu, om wonsoyon no kopio o miontok di ponuhuan di tongoimam do mantad id payat do Liwi; wonsoyon no dokoyu it apatut do wonsoyon do miontok di pinosunud ku dot id diyolo'. 9 Soroho' no dokoyu i winonsoi do Tuhan, i Kinorohingan dokoyu, dot id di Miriam do tontok di nokosoliwan kou no do mantad hilo'd Masir. 10 Soira' nopo do poolos kou do nunu nopo dot id iso' o tulun, om kada' kou ongoi suang di walai dau do mongoi panganu di rasuk dau di pasandaon mantad dau; 11 mandad kou nopo do hiri'd soliwan om pologoson nopo i tulun diri do mongoi papatahak di rasuk dau dot id dokoyu. 12 Ondung tulun iyau do mosikin, om kada' dokoyu poopio' i rasuk dau'ddi do gisom dot osuaban; 13 popiguli-gulion no dokoyu i rasuk diri do monikid sosodopon, om haro i' o rasuk dau do modop. Om ounsikou indo iyau om asanangan o Tuhan, i Kinorohingan dokoyu, dokoyu. 14 Kada' kou ponipu' do susuhuon di mosikin om it aiso' o pokukurayan, do tulun tuu dot Israil ko' bansa'd suwai di poingiyon dot id bandar dokoyu. 15 Godsian kasai' no dokoyu iyau do monikid tadau do gontok di karaja' dau do tadau'ddi, dot a' po otonob o tadau; tu' momoguna' i' kopio iyau di tusin, om piimanan no dau dot aanu dau iri. Ondung a' dokoyu iyau godsian, om momolohou nondo iyau do Tuhan do papasala' dokoyu, om iyokoyu nondo o pasalaon tu' nokowonsoi kou i' do dusa. 16 A' i' koino-ino do hukuman do kapatayon i molohing dot i kasalaan do nowonsoi di tangaanak dau o kapamatayan; om tangaanak nga' a' i' koino-ino do hukuman do kapatayon dot i kasalaan di molohing diyolo' o kapamatayan; pointikid-tikid do tulun om milo nopod hukuman do kapatayon om iri dau'd kasalaan o kopomohukuman. 17 Kada' dokoyu ahawai dit apatut dot aanu diyolo' i tulun do bansa'd suwai om i tangaanak dot aiso' o molohing; kada' dokoyu onuo' i rasuk do tondu' do nopuadan do maan do pasandaon do nokoutang piya iyau dot id dokoyu. 18 Hondomo' no dokoyu dot iyokoyu nga' turipon i' do hilo'd Masir di gulu po om Tuhan i', i Kinorohingan dokoyu o pinoposoliwan dokoyu do mantad hilo'; om iri no o kinapatahakan ku dokoyu dot oturan diti. 19 Tontok nopo do timungon dokoyu i tomot dokoyu, om haro nondo o wookon di gandum di naanu dokoyu dot a' dokoyu oigitan, om kada' no dokoyu ngoyo' gulio' iri. Pologoson nopori do maan di tulun di bansa'd suwai, om i tangaanak dot aiso' o molohing, om i tongoondu' do nopuadan, om barakatan kou indo do Tuhan, i Kinorohingan dokoyu, do nunu nopo o wonsoyon dokoyu. 20 Noongoi nopo dokoyu koupu' i tua' do saitun, om kada' kou no guli' do mongoi pongupu' di nongoolu'; tu' iri nopo om maan po di tulun do bansa'd suwai, om i tangaanak dot aiso' o molohing, om i tongoondu' do nopuadan. 21 Noongoi nopo dokoyu koupu' i tua' dot anggur dokoyu, om kada' kou no guli' kawagu do mongoi pogontong do tua' do hiri'd guas dit anggur, tu' iri nopo tua' dot anggur di noolu' om maan po di tulun do bansa'd suwai om i tangaanak dot aiso' o molohing, om i tongoondu' di nopuadan. 22 Kada' kopio dokoyu kolihuwai do turipon kou do hilo'd Masir di gulu po; om iri no o kinapatahakan ku dot oturan diti dot id dokoyu.
1 Ondung haro o duwo o tulun dot Israil do mongoi dot id kut do mongoi pisalasai do hal, om oilaan nondo dot iri nopo tiso' om aiso' o sala' om iri no tiso' om kisala'. 2 Ondung loposon o pomohukum di tulun di kisala', om mositi' no do suhuon di gompomutus i tulun diri do tuminggoub om loposon nogindo. Om songkuro nopo o kawagato' do kasalaan do nowonsoi dau, om irad noddi o kosoruo' do pamalapos. 3 Nga' a' i' koino-ino dot lobi' ko' ingapat nohopod loposo'. Tu' asaru' nopo ko' iri, om iyo pod intingayamon kopio o tulun diri dot id toguang do tulun dot ogumu'. 4 Kada' dokoyu kakangai o kabang do sapi' di maso do mongulok do gandum do potobilang di tua' do mantad id rawo,” ka dau.
Tonggungan dot id Tobpinai di Napatai
5 Om boros ka kawagu di Musa, “Ondung haro o duwo o kusai do miobpinai do poingiyon dot id iso' o kinoiyonon, om apatai nondo ot iso' diyolo'. Om aiso' po o tanak dau'd kusai, om iri nopondo sawo dau om a' i' koino-ino do kowinon do tulun dit okon ko' id suang do sompiiyon di sawo mantad dau. Apatut nopo do mangawin di tondu'ddi om i tobpinai di sawo di tondu'. 6 Om iri nopondo tanak diyolo' do kusai dit id gulu kosusu om sorohon i' do tanak di tulun di napatai, om haro i' o sinakagon do tulun diri dot id pogialatan do tulun dot Israil. 7 Nga' ondung a' i' tulun diri mangawin di sawo daa di tobpinai dau di napatai, om mositi' no do mongoi i tondu' solowot di tongoboyoon do bandar om moro-boros nondo do poingkaa, ‘A' i tobpinai di sawo ku momonsoi di tonggungan dau do manahak do sinakagon di tobpinai dau dot id pogialatan do tulun dot Israil,’ ka. 8 Om mositi' nod lohowon di tongoboyoon do bandar i kusai'ddi om moro-boros iyolo' dot id dau. Ondung mada' kasai' i kusai'ddi do momonsoi di tonggungan dau, 9 om mositi' no do ngoyon di sawo di tobpinai dau insamakai i kusai'ddi dot id toguang di tongoboyoon di bandar, om ngoyon dau iduwo' o kasut di kusai, om dulaan nogindo o rabas di kusai, om moro-boros do poingkaa, ‘Iyo nodti o wonsoyon dot id tulun dit a' manahak do sinakagon dot id tobpinai dau,’ ka. 10 Om sompiiyon nopondo di kusai'ddi om roitan do ‘sompiiyon do tulun di nongoi iduwo' o kasut' do hilo'd Israil,” ka dau.
Piro-piro o Toturan do Suwai
11 Om boros ka kawagu di Musa, “Ondung haro o duwo kusai do miumang, om mumbal nondo i sawo di tiso' do kusai'ddi do mongoi ponguhup di sawo dau tu' ngoyon dau songgolo' o wayaan do sobu di ponokiumang di sawo dau, 12 om potodon nopo o longon di tondu'ddi, om kada' no iyau insianai. 13-14 Kada' ponipu', do mamakai do ponimbang om pagadang dit a' koontok o ralan do monipu'. 15 Mamakai no di ponimbang om pagadang di koontok om otogui kou i' do poingiyon do hiri'd pomogunan di patahakon do Tuhan i Kinorohingan dokoyu dot id dokoyu. 16 Araatan i' kopio o Tuhan i Kinorohingan dokoyu, do tulun di monipu',” ka dau.
Monuhu' do Mamatai di Tulun dot Amalik
17 Om boros ka kawagu di Musa, “Sorohon no dokoyu i winonsoi do tulun dot Amalik do tontok di hilo' kou id tanga'd ralan di kososoliwan dokoyu do mantad hilo'd Masir. 18 A' i' iyolo' oronok do Kinorohingan, om hiri iyolo'd tohuri do minongoi panangod dokoyu do tontok dit ohuyan kou no om a' kou no kogoos. Om patayo' ngai' noddi diyolo' i tulun dokoyu di hiri'd tohuri, i tulun dit a' no angkapanau. 19 Iyo nopoddi, om katahak nopondo do Tuhan, i Kinorohingan dokoyu, o pomogunan diri dot id dokoyu, om aiso' o ligogon dokoyu do mantad id pisangod di poingiyon dot id posorili' dokoyu, om mositi' no do patayon ngai' dokoyu i tulun dot Amalik om gisom dot a' nondo iyolo' ahandaman. Soro-sorohon no kopio dokoyu iti!” ka dau.
Porsombahan do Mantad id Tomot
1 Om boros ka kawagu di Musa, “Soira' nopondo do korikot kou do hilo'd pomogunan di patahakon do Tuhan, i Kinorohingan dokoyu, dot id dokoyu, om kopomogun-mogun kou'd hilo', 2 om mositi' no do sompori-pori kou nopo do posuang dot id balatak do bahagi' di koiso' do mantad id pointikid-tikid do tua' di totonomon di nomot dokoyu, om pootodon nondo dot id tiyonon do sumambayang di natantu' mantad. 3 Mongoi kou no solowot dit imam di maso do maganu-anu do tontok diri om poboroson no dot id dau o poingkaa, ‘Dinondo no do pointalangon ku dot id Tuhan, i Kinorohingan ku do nokosuang oku no di pomogunan di pinabatos dau dot id komolohingan toko' do patahakon dot id dati',’ ka. 4 Om romiton nondo dit imam i balatak di poingigit dokoyu om poilihon nondo dau do hiri'd dotimbabaan di pananaraban do porsombahan dot id Tuhan, i Kinorohingan dokoyu. 5 Om poboroson nondo dokoyu o boros do miagal diti dot id toguang do Tuhan, ‘Oi Tuhan, taki ku nopo om bansa' dot Aram di mombo-hombo. Om angatai no dau i sompiiyon dau do mongoi do hilo'd Masir do mongoi iyon-iyon do hilo'. Tontok di minongoi i' iyolo'd hilo', om okuuri' iyolo', nga' kosiliu noddi iyolo' do bansa' dit agayo om okoris. 6 Om orongit tomod i tulun do Masir dot id dahai om sinansagan iyahai diyolo' do kumaraja' do miagal do turipon. 7 Om pillohou noddi iyahai do mokitulung diya', oi Tuhan, i Kinorohingan di taki-aki dahai. Om norongou nu i' i lolohou dahai om nokito nu i koinggoritan, om kosusaan, om koudipono' dahai. 8 Om pinosoliwan nu i' iyahai do mantad hilo'd Masir dot i sinundu om kokorisan nu dit agayo kopio o pinoposoliwan nu dahai. Om minomonsoi ko do piro-piro o koimayaan om kosuayan, om minomonsoi ko do piro-piro i minomorolosi kopio do pisangod. 9 Om pootodo' nu noddi iyahai do hiti, om patahako' nu no dahai iti pomogunan di kaya' om it oluhub o tana'. 10 Om iri noddi o kapatahakan ku diti bahagi' do koiso' do mantad id tomot di pinatahak nu dot id doho', oi Tuhan,’ ka. Om iyo noddi o papatahak dokoyu di balatak diri dot id Tuhan. Om owonsoi pondo dokoyu o miagal diri om sumambayang kou nogindo dot id dau do hiri. 11 Om mongunsikou kou no do koinsanai dit ongosonong do nakatahak do Tuhan, i Kinorohingan dokoyu, dot id dokoyu om id sompiiyon dokoyu. Om angatan no i tulun do Liwi om i tulun di bansa'd suwai di poingiyon dot id pogialatan dokoyu do mamung dokoyu dot id karamayan diri. 12 Pointikid-tikid do kotolu'd toun, om mositi' no do patahakon dokoyu i porsombahan dokoyu di sompihopod, iri no i sompihopod di tomot dokoyu. Onuan nopo dokoyu'ddi om it imam di mantad id payat do Liwi, om i tulun di bansa'd suwai, om i tangaanak dit aiso' o molohing om i tongoondu' di nopuadan, om haro indo o taakanon dot aanu diyolo' do mantad id pointikid-tikid do bandar. Om owonsoi nopondo dokoyu o miagal diri, 13 om moro-boros kou no dot id Tuhan do poingkaa, ‘Aiso' no ot ongokuri' piya di sompihopod do tua' do totonomon do nokoolu' do hilo'd walai ku, it apatut do patahakon dot id diya', oi Tuhan; nakatahak ngai' ku nori dot id tulun do Liwi, om id tulun di bansa'd suwai, om id tangaanak dit aiso' o molohing om id tongoondu' di nopuadan, do miagal di pinonuhuan do Tuhan dot id doho'. Om iso' po di ponuhuan do Tuhan do pasal di porsombahan di sompihopod nga' aiso' i' o notolibambanan ku. 14 Om aiso' i' ot ongokooro' piya di porsombahan do sompihopod diri do nakan ku do tontok di mogihad oku do tulun do napatai; ko' pinosoliwan ku po di walai ku do tontok di maso ku do sosomu' dot id pagantangan do tugama', ko' numaan ku do podsurung di tulun do napatai. Otorodok oku i' do minumboyo' diya', oi Tuhan, tu' nowonsoi ngai' ku i' i pinonuhuan nu do pasal do porsombahan di sompihopod. 15 Om ontong no om barakatan no ot Israil, i tulun nu, do mantad hino'd kinoiyonon nu dit olidang, do hino'd surga; om barakatai noti pomogunan di kaya' om it oluhub di pinatahak nu dot id dahai, do tumanud di batos nu dot id taki-aki dahai,’ kantondo dau,” kad i Musa.
Tulun di Pinili' do Tuhan
16 Om boros ka kawagu di Musa, “Tadau nod baino' do suhuon kou'd Tuhan, i Kinorohingan dokoyu do mumboyo' do koinsanai dit oturan dau; om tumorodok kou no do tumanud diri do mikuwo'd aayi-ayi' o ginawo dokoyu. 17 Tadau nod baino' do nakun dokoyu o Tuhan do sumiliu'd Kinorohingan dokoyu. Om minamatos kou do mumboyo' do boros dau om momonsoi do koinsanai dit oturan om ponuhuan dau. 18 Om tadau nod baino' do rinamit kou do Tuhan do sumiliu'd tulun dau do miagal di pinabatos dau dot id dokoyu, om sinuhu' kou dau do tumanud do koinsanai dit oturan dau. 19 Om silihon kou nondo dau do bansa' dit agayo ko' mantad do bansa' do suwai di winonsoi dau, om royohon kou nondo om pusohon Om osiliu kou nondo do tulun do songonuon do Tuhan, do miagal di nakabatos dau,” ka dau.
Pinotulis dot id Watu it Oturan do Kinorohingan
1 Om polombuso' noddi di Musa om i piro-piro o boyoon dot Israil dot id bansa'ddi o boros do poingkaa, “Tonudon no dokoyu o koinsanai diti ponuhuan di pinoboros ku di tadau baino'. 2 Tontok nopondo do tadau di sumoborong kou di Bawang do Yordan do rumikot do hilo'd pomogunan di patahakon do Tuhan, i Kinorohingan dokoyu, dot id dokoyu, om poudong kou no do piro-piro o watu dit angagayo om saaton nori dot opurak. 3 Om potulison no dot id watu'ddi o pointikid-tikid di boros dot oturan diri. Om korikot kou nopondo do hilo'd pomogunan di kaya' om it oluhub o tana', i pinabatos do Tuhan, i Kinorohingan di tukuon di taki-aki dokoyu, 4 om di kosoborong kou di Bawang do Yordan, om mositi' nod mongoi kou do hiri'd Nuluhon dot Ibal. Om id timpak nod nuluhon diri o poudangan dokoyu di watu, om panaatan di watu'ddi do miagal di pinonuhuan ku dokoyu di tadau baino'. 5 Om hiri nod kinoiyonon diri o pamansayan dokoyu dot iso' o pananaraban do porsombahan, do wonsoyon nopo om i watu dit a' i' noumbalan do mamabak do pakakas do basi' o pinamabak. 6 Tu' pointikid-tikid do pananaraban do porsombahan di wonsoyon do maan do don Tuhan, i Kinorohingan dokoyu, om mositi' nod watu dit a' binabak o maan do wonsoyon. Om id sakai no di pananaraban do porsombahan diri o patahakan dokoyu di porsombahan do sorobon. 7 Om patahakon nogi' i porsombahan do piuludan om makan kou no dot id kinoiyonon diri om kumotood kou no dot id toguang do Tuhan, i Kinorohingan dokoyu. 8 Om tarangon no dokoyu o ponunulis do pointikid-tikid di boros dot oturan do Kinorohingan do hiri'd piro-piro o watu di sinaat dot opurak diri,” kad i Musa. 9 Om boros kaddi di Musa om i piro-piro ot imam do mantad id payat do Liwi dot id koinsanai di tulun dot Israil, “Kada' kou kohiyo, oi tulun dot Israil, pokinongou kou no kopio! Tadau nod baino' do nosiliu kou do tulun do songonuon do Tuhan, i Kinorohingan dokoyu. 10 Iyo nopoddi om umboyo' kou nod boros do Tuhan om tonudon no o koinsanai dit oturan dau, i pinoboros ku dot id dokoyu di tadau baino',” ka diyolo'.
Kousungan do Tulun dit Amu' Mumboyo'
11 Om boros kaddi di Musa dot id bansa' dot Israil, 12 “Kosoborong kou nopondo di Bawang do Yordan, om mositi' no do mingkakat ot id timpak di Nuluhon do Gorisim i payat di Simion, om Liwi, om Yohuda, om Isakar, Yusup, om Binyamin, do tontok do poboroson i boros do pamarakat do bansa' diti. 13 Om tontok nopondo do poboroson i boros do pomopol om mositi' no do mingkakat do hilo'd timpak do Nuluhon dot Ibal i payat do Rubin, om Gad, om Asor, om Sibulon, om Naptali. 14 Om poboroson nondo di tulun do Liwi dot opuhod o boros diti, om sumimbar nondo i tulun dot Israil dot, ‘Amin,’ ka. 15 Poboroson nopo di tulun do Liwi om poingkaa, ‘Ousung po i tulun di momonsoi do tininganak do watu, om kayu ko' basi o wonsoyon, om i momolisok-lisok do tumuku' dot id tininganak diri; tu' araatan i' kopio o Tuhan do tulun di tumuku' dot id tingolig!’ ka. Om posimbaron nopo do koinsanai di tulun om, ‘Amin!’ ka. 16 ‘Ousung po i tulun dit a' momusou do molohing dau om i popologos tomod diyolo'!’ ka. ‘Amin!’ ka. 17 ‘Ousung po i tulun di popoundaliu do wolit di tana' do songkoduwo dau!’ ka. ‘Amin!’ ka. 18 ‘Ousung po i tulun di mamalid do tulun do bolou,’ ka. ‘Amin!’ ka. 19 ‘Ousung po i tulun di magahau dit apatut dot aanu do tulun di bansa'd suwai, om i tangaanak dit aiso' o molohing om i tongoondu' di nopuadan,’ ka. ‘Amin!’ ka. 20 ‘Ousung po i tulun di mongindaraat do tapa' dau tu' mongoi iyau dudun dot iso' di sawo di tapa dau,’ ka. ‘Amin!’ ka. 21 ‘Ousung po i tulun di monokisabu do nintorusan,’ ka. ‘Amin!’ ka. 22 ‘Ousung po i tulun di mongoi dudun di tobpinai dau'd tondu' di toput dau'd pusod, ko' iri tobpinai dau'd tondu' dit iso-iso' no tapa' ko' iso-iso' o tina',’ ka. ‘Amin!’ ka. 23 ‘Ousung po i tulun di mongoi dudun di tiwanon dau'd tondu',’ ka. ‘Amin!’ ka. 24 ‘Ousung po i tulun di momolisok-lisok do mamatai'd tulun,’ ka. ‘Amin!’ ka. 25 ‘Ousung po i tulun di rumamit do tusin do ponisip do pamatai do tulun dit aiso' o sala',’ ka. ‘Amin!’ ka. 26 ‘Ousung po i tulun dit a' mumboyo' ngai' dit oturan om ponudukan do Kinorohingan,’ ka. ‘Amin!’ ka,” ka dau.
Barakat dot id Tulun di Mumboyo'
1 Om boros ka kawagu di Musa, “Ondung mumboyo' kou'd Tuhan, i Kinorohingan dokoyu, om otorodok kou do momonsoi do koinsanai di ponuhuan dau di pinoboros ku dot id dokoyu di tadau baino', om silihon kou nod Tuhan do bansa' dit abantug kopio do hiti'd pomogunan. 2 Umboyo' kou nod Tuhan, i Kinorohingan dokoyu, om katahak ngai' indo dot id dokoyu o barakat diti: 3 Barakatan indod Tuhan i kabandaran om i koumaan dokoyu. 4 Barakatan indod Tuhan, gisom dot ogumu' o tangaanak dokoyu, om ogumu' o tomot dokoyu, om gumumu' o sapi' om dumba' dokoyu. 5 Barakatan indod Tuhan i tua' do gandum dokoyu om i taakanon di wonsoyon dokoyu do mantad id gandum. 6 Barakatan indod Tuhan o koinsanai do karaja' dokoyu. 7 Om alaon indod Tuhan i piro-piro o pisangod dokoyu do tontok do ngoyon kou diyolo' songodo'. Poundaron tomod daa diyolo' o ralan diyolo' do manangod, nga' a' nopondo oila-ilaan o kotongkus-tongkuso' diyolo' do mogidu'. 8 Barakatan indod Tuhan, i Kinorohingan dokoyu, i karaja' dokoyu om suangan dau do gandum i sulap dokoyu. Om barakatan kou indo dau do hilo'd pomogunan di patahakon dau dot id dokoyu. 9 Ondung mumboyo' kou'd Tuhan, i Kinorohingan dokoyu, om wonsoyon dokoyu o koinsanai di ponuhuan dau, om silihon kou nondo dau do tulun di songonuon dau do miagal di nakabatos dau. 10 Om kokito ngai' indo o bansa' do hiti'd pomogunan dot iyokoyu no o bansa' di nopili' do Tuhan, om poddosi kou nondo diyolo'. 11 Om puhawangan kou nondod Tuhan do tanak dot ogumu'. Om ogumu' nondo o tayam-tayam dokoyu om ogumu' o tomot dokoyu do hilo'd pomogunan di pinabatos do Tuhan dot id taki-aki dokoyu, do patahakon dot id dokoyu. 12 Om porikot indo o Tuhan do rasam do tontok di dong kararasaman, i rasam do mantad id pinoiyanan do rasam dit osima' do hilo'd tawan. Om barakatan indo dau o koinsanai di karaja' dokoyu, gisom do milo kou do popoolos dot id ogumu' o bansa', nga' iyokoyu nopo om a' i' minog do molos do mantad id isai nopo. 13 Om silihon kou nondod Tuhan, i Kinorohingan dokoyu, do boyoon dot id pogialatan do bansa', om okon kou i' ko' tumatanud no toomod. Ondung otorodok kou do tumanud do koinsanai di ponuhuan do Tuhan di pinoboros ku dot id dokoyu di tadau baino', om muhang-ruhang nopondo o kosimbayano' dokoyu, om a' kou koumbal do lumuhoi. 14 Kada' no kopio dokoyu surilogo' i ponuhuan diri do poingkuro nopo o kowoyoon do sumurilog. Om kada' kou nogi' kopio tuku' om kada' kou podsubak do ponokokinorohingan do suwai,” kad i Musa.
Kootuson dit A' Mumboyo'
15 Om boros ka kawagu di Musa, “Nga' ondung a' kou mumboyo' do Tuhan, i Kinorohingan dokoyu, om a' kou otorodok do momonsoi do koinsanai di ponuhuan om it oturan dau di pinoboros ku dot id dokoyu di tadau baino', om oontok kou no do koinsanai do popol diti: 16 Ousung ngai' po i bandar om i koumaan dokoyu. 17 Ousung po i tua' di gandum dokoyu om i taakanon di wonsoyon dokoyu do mantad id gandum. 18 Ousung kou po, gisom dot okuuri'ndo o tangaanak dokoyu, om okuri' o tomot om sapi' om dumba' dokoyu. 19 Ousung po o koinsanai di karaja' dokoyu. 20 Ondung momonsoi kou dot araat om magada' kou'd Tuhan, om porikot indo iyau do karaagon dit agayo kopio, om kagangahan, om kosusaan dot id suang do nunu nopo o wonsoyon dokoyu om oruhai pondo om punsoon kou no. 21 Om mogisuhut-suhut nopondo o toruol do koontok dokoyu, gisom dot aiso' nondo o songulun piya dokoyu dot oolu' do momogun-mogun do hilo'd pomogunan di potiongoyon no dokoyu pomogun-mogunai. 22 Om hukuman kou nondod Tuhan do toruol-ruol di mogkoroliu, om i lumonit om sogiton. Om pagadahon dau om poporikot iyau do tongus dit alasu', gisom dot angaraag o tomoton dokoyu. Om managalai nopondo o karaagan diti do rumikot dot id dokoyu, do gisom i' dot angapatai kou. 23 Om aiso' nondo o rasam, om iyo pondod watu kokodou ilo tana' dokoyu. 24 Om okon nogindo ko' rasam o porikoton do Tuhan suwai ko' tongus do mitonggoi do soliohuk om togis do gisom i' dot angapatai ngai' kou. 25 Ondung a' kou mumboyo' do Tuhan, i Kinorohingan dokoyu, om pologoson kou'ndo dau dot aala' di piro-piro o pisangod dokoyu. Om poingundar piya o karalan-ralano' dokoyu do mongoi sangod, nga' a' nopondo oila-ilaan o kotongkus-tongkuso' dokoyu do mogidu'. Om ongooris ngai' nopondo o bansa' do hiti'd pomogunan do kokito di kosusaan dokoyu. 26 Om apatai kou nopondo om osiliu po do taakanon do tombolog om nintorusan dit orongit o rata' dokoyu, om aiso' i' o tongosongulun piya do monguyung di nintorusan diri. 27 Om hukuman kou nondod Tuhan do kupos do miagal do gandas om gurap dit akatol o tinan dokoyu om aiso' no o koubat diri. 28 Om ulahon kou nondod Tuhan, om bolohon kou om borulongon kou. 29 Om pitangaadau piya'ndo nga' mikarahawor kou i' do miagal di tulun do bolou, nga' a' kou i' kobontol do ralan. Om aiso' nopondo o koundar do wonsoyon dokoyu. Om managalai-galai kou nopondo dot ulak-ulakan om panakahan, om aiso' no o tiso' piya'd tulun do monguhup dokoyu. 30 Ondung a' kou mumboyo' do Tuhan, i Kinorohingan dokoyu, om iti ngai' no o koontok dot id dokoyu. Kotunang kou no daa dot id iso' o tondu' nga' tulun id suwai o kakawin di tunang dokoyu. Momonsoi kou no daa do walai nga' a' kou i' koiyon do hiri. Om mananom kou no daa dot anggur nga' a' kou i' kaakan do tua' dit anggur. 31 Om montong-ontong kou i' do sumbolion i sapi' dokoyu nga' a' kou indo kaakan do tonsi di sapi'ddi. Om montong-ontong kou do ngoyon tanggayai do mogidu' i kaladai dokoyu, om a' nori koguli' kawagu. Om patahakon nondo dot id piro-piro o pisangod dokoyu i dumba' dokoyu, om aiso' i' o monulung dokoyu. 32 Om montong-ontong kou do patahakon dot id sompogunan i tangaanak dokoyu do silihon do turipon. Om opodi' poo o mato dokoyu do mogihum di tangaanak dokoyu do monikid do tadau, nga' aiso' no ot okito dokoyu tu' a' no iyolo' koguli' kawagu. 33 Om sompogunan indo o kaanu do koinsanai di tua' do totonomon dokoyu, i pininghuyanan dokoyu do minomogompi', nga' iyokoyu nopondo om aiso' i' ot aanu-anu suwai ko' pongulok-ulok noo om kororongit o managalai-galai dot aanu dokoyu. 34 Om oulau kou nondo di koinggoritan dit opurimanan dokoyu do miagal diri. 35 Om tongkopon nopondod Tuhan o gakod dokoyu do gandas dit oruol om it a' milo do lingoson; om otongkop nopondod kupos o mantad id gakod om gisom do korikot dot id tulu dokoyu. 36 Ondung a' kou mumboyo' do Tuhan, i Kinorohingan dokoyu, om pokoyoon kou nondod Tuhan, om i raja' dokoyu dot id pomogunan do suwai, dit a' dokoyu noongoi'd gulu, om it a' di taki-aki dokoyu noongoi. Om hilo' kou nondo do modsubak do ponokokinorohingan di kayu om watu do winonsoi. 37 Om hilo' nopondod piro-piro o pomogunan di potompiasan do Tuhan dokoyu, om kotigowo nondo o tulun do kokito dokoyu; om hingi-hingion kou nondo om irak-irakan kou diyolo'. 38 Ogumu' i' daa o linsou do potonomon dokoyu nga' okuri' indo o hasil dot aanu dokoyu tu' aayi' i' dot aakan do katat i totonomon dokoyu'ddi. 39 Mananom kou no daa'ndo dot anggur om pigompian dokoyu iri, nga' a' kou i' kopongupu' do tua' dit anggur om a' kou koinum di waig dot anggur, tu' aayi' indo dot aakan do giuk i guas dit anggur. 40 Om sinunian ngai' nopo daa do saitun ot id pointongkop di pomogunan dokoyu, nga' lumopuk ngai' indo i tua' di saitun gisom dot a' kou i' kaanu do tumau do mantad id tua' di saitun. 41 Kianak kou daa'ndo do tongokusai om tongoondu' nga' atangkap indo iyolo' do pisangod do tontok do pisangadan, om aiso' indo o tangaanak dokoyu. 42 Om aayi' nopondo dot aakan do mangakan-ngakan i tua-ua' om i totonomon dokoyu. 43 Om muhang-ruhang nopondo o kuasa' di tulun do bansa'd suwai, i poundorong dot id pomogunan dokoyu, nga' muhoi-luhoi nopondo o dokoyu'd kuasa'. 44 Iyolo' nopo om kiusin i' do paalasan dot id dokoyu, nga' iyokoyu nopo om aiso' i' o nunu-nunu do paalasan dot id diyolo'. Om alaid nondo om iyolo' no o momorinta' dokoyu. 45 Om korikot ngai' nopondo i kosusaan diri dot id dokoyu, om managalai nopondo iri do mamagangau dokoyu do gisom dot apatai kou, tu' a' kou i' minumboyo' do Tuhan, i Kinorohingan dokoyu, om a' kou tuminanud dit oturan di pinatahak dau dot id dokoyu. 46 Om iri ngai' no kosusaan diri o kointalangan kopio do hukuman do Tuhan dot id dokoyu om id sinakagon dokoyu do gisom dot alaid. 47 Nabarakatan kou nod Tuhan dot id suang do koinsanai'd nunu nopo, nga' a' kou i' orohian do sumambayang dot id dau do mikuwo'd ginawo dit otood om iso- iso' kopio o ginawo. 48 Iyo nopoddi om mositi' no do sumiliu kou do susuhuon di piro-piro o pisangod di porikoton do Tuhan do mongoi panangod dokoyu. Om louson kou nondo om tuuhan, om poillabas om aiso' ngai' o nunu nopo. Om awagat tomod nondo o ponginggorit do Tuhan dokoyu do gisom dot angapatai kou. 49 Om haro nondo o tiso' o bansa' dit a' dokoyu osuhutan o boros do porikoton do Tuhan do mantad id tisan diti pomogunan do mongoi panangod dokoyu. Om iyo pondo iyolo'd kondiu do mongoi ponimbit dokoyu. 50 Iyolo' nopo om ongorongit kopio om a' monginsian dot isai nopo, dot iri tuu i molohing no ko' iri po it omulok po. 51 Om oiyon nopondo diyolo' i tayam-tayam om i tomot dokoyu. Aiso' no ot ongokuri' piya do pooluon diyolo' di gandum, om waig dot anggur, om tumau do saitun, om sapi', om kambing om dumba' dokoyu; gisom dot angapatai kou nondo dot olikapan. 52 Om songodon nondo diyolo' o pointikid-tikid do bandar do hilo'd pomogunan di patahakon do Tuhan, i Kinorohingan dokoyu, dot id dokoyu. Om angahaba' ngai' nopondo i tolig di bandar dit angakawas om i ninggiratan om i sondihon daa dokoyu. 53 Om daamot nopondo di piro-piro o pisangod dokoyu do monurungku' di kabandaran dokoyu, om aiso' nondo o pokukurayan dokoyu dot ololousanan kou gisom dot iri piya'ndo i tangaanak dokoyu nga' kanon i' dokoyu, i tangaanak di pinopuhawang do Tuhan, i Kinorohingan dokoyu, dot id dokoyu. 54-55 Om iri piya i sinakagon do raja' dit otulid kopio daa o ginawo nga' aiso' nondo o pokukurayan do solinaid do turungkuon do pisangod, gisom do kanon nopo dau o piro-piro di tangaanak dau tu' aiso' no o takanon do suwai. Om aiso' i' ot ongokoro' piya dot akanon dau'ddi do patahakon dau dot id tobpinai dau ko' id sawo dau di kosianan kopio dau ko' id tangaanak dau di maso do poimpasi. 56-57 Om iri piya tondu' do sinakagon do raja' dit otulid kopio daa o ginawo om i kaya' tomod gisom dot a' i' daa nokoumbal do mamanau'd gakod do mongoi'd honggo nopo nga' momonsoi i' do miagal diri. Tontok nopondo do turungkuon do pisangod i bandar om aiso' nondo o pokukurayan do tondu'ddi dot ololousanan, gisom do lumisok-lisok nopo iyau do mangakan di tanak dau di kosususu do mitonggoi do pusod di tanak. Om aiso' i' ot ongokoro' piya dit akanon dau'ddi do patahakon dau dot id sawo dau di kosianan dau ko' patahakon po dot id tangaanak dau. 58 Ondung a' kou otorodok do tumanud do koinsanai dit oturan do Tuhan, i Kinorohingan dokoyu, i nongkotulis dot id buuk diri, om a' kou momusou do Tuhan, i Kinorohingan dokoyu dit abantug om i koimayaan kopio, 59 om porikatan kou nod Tuhan om i sinakagon dokoyu do toruol-ruol dit a' milo do lingoson om i toruol do mogkoroliu dit a' milo do tingkodon. 60 Om oontok kou nondo di toruol-ruol dit araat kopio, i nongokito dokoyu di hilo' kou pod Masir om a' kou nondo olingasan. 61 Om poporikot po o Tuhan do piro-piro o bansa'd toruol om toruol di mogkoroliu, it a' noroitan dot id suang do buuk diti, i buuk dot Oturan do Tuhan, om patayon kou nogindo dau. 62 Om mulong piya dot ogumu' kou no daa do miagal po di rombituon do hilo'd tawan kogumu', nga' okuri' nondo ot oolu' dokoyu do poimpasi tu' a' kou i' minumboyo' do Tuhan, i Kinorohingan dokoyu. 63 Om poingkuro nopo o Tuhan dot orohian do manahak do kosimbayanan dot id dokoyu om popoinggumu' dokoyu, om iyo nogiddi o korohiano' dau do mamatai om momunso dokoyu. Om ouyung kou nondo do mantad id pomogunan di potirikoton no dokoyu. 64 Om potompiason kou nondod Tuhan dot id pogialatan do bansa' do hiti'd pointongkop do pomogunan. Om hilo' kou nondo do tumuku' dot id piro-piro o ponokokinorohingan di kayu om watu do winonsoi, i ponokokinorohingan dit a' dokoyu om a' di taki-aki dokoyu notutunan do mantad di gulu. 65 Aiso' i' o kosimbayanan dokoyu do hinonggo-honggo kou piya, om aiso' o kinoiyonon do milo dokoyu do komoyon do dokoyu'd songonuon, tu' potongkoboon kou nondod Tuhan gisom dot aiso' o pokukurayan dokoyu tu' aiso' no o pagandasan. 66 Om haro kasai' nopondo o ligogon dokoyu dot id suang do koposi-posion dokoyu. Om monikid tadau nopondo om monikid totuong dot ooris kou om moddosi kou dot apatai. 67 Om motod-kotod pondo o kangkab dokoyu dot opopoddosian do kokito do nunu nopo. Dongkosuabon nopo om orohian kou nopo daa dot oruhai'd tumuong, om dongotuong nondo om orohian kou nopo daa dot oruhai do numawau. 68 Om poongoyon kou nondo kawagu do Tuhan do hilo'd Masir do kapal do rahat o pasakayan; mulong piya daa do nokoboros no dau dot a' popoguli' kawagu dokoyu dot id pomogunan diri, om hilo' no daa'ndo do tumotos kou do padagang do tinan dokoyu do sumiliu'd turipon dot id pisangod dokoyu, nga' aiso' i' o songulun piya do sipomoli dokoyu,” kad i Musa.
Pinibatasan do Tuhan om i Tulun dot Israil
1 Iri ngai' no i boros dot id suang di tumpongo do pinonuhuan do Tuhan di Musa do popoboros dot id tulun dot Israil do tontok di hilo' iyolo' id pomogunan do Muab. Om iri nopo tumpongo'ddi om poruhangon di tumpongo do winonsoi'd Tuhan dot id diyolo' di hilo'd Nuluhon do Sinai. 2 Om suhuo' noddi di Musa o koinsanai di tulun dot Israil do tumimung, om boro-boros no iyau dot id diyolo' do poingkaa, “Iyokoyu i' kopio o nokokito di winonsoi'd Tuhan dot id raja' do Masir om id piro-piro o pagawai dau, om id pomogunan dau. 3 Om nokokito kou nogi' di kosusaan di korolosi kopio om i kongoimayaan, om i kongopusahan di winonsoi'd Tuhan. 4 Nga' gisom piya do tadau'd baino' nga' a' kou i' dau pinosuhut ngai' do komoyon di nongoumbalan dokoyu'ddi. 5 Apat nopo nohopod o toun do koloido'd Tuhan do minomoyo' dokoyu do minaya' di tana' do kowotuan, nga' a' i' noromuk o pakayan om kasut dokoyu. 6 Aiso' i' daa o roti dot akanon dokoyu om aiso' o waig dot anggur ko' tiinumon do kaawuk dot inumon dokoyu, nga' pinatahak ngai' i' do Tuhan dot id dokoyu o koinsanai di pokionuon dokoyu om koilo kou i' dot iyau no o Kinorohingan dokoyu. 7 Om tontok di nokorikot toko' do hiti'd kinoiyonon diti, om ngoyo' toko' no daa songodo' di Raja' Sihon, i mantad hilo'd Hisbon, om i Raja' Og, i mantad hilo'd Basan, nga' naala' toko' i' iyolo'. 8 Om kosolod toko' noddi i tana' diyolo' om pobohogio' toko' no dot id payat do Rubin om payat do Gad, om id songintanga' do payat do Manasi. 9 Om tumorodok kou no do tumanud do koinsanai di tumpongo'ddi, om koundar kou i' do nunu nopo o wonsoyon dokoyu. 10 Om tadau nod baino' do songingkakat ngai' kou dot id toguang do Tuhan, i Kinorohingan dokoyu, iyokoyu ngai' i boyoon om i pagawai, om koinsanai do tongokusai, 11 om tongoondu', om tangaanak om koinsanai'd tulun di bansa'd suwai di poingiyon dot id rolot dokoyu, i monguhup dokoyu do mongoi pokisiduwon om mongoi sago'. 12 Om dinondo no do momonsoi o Tuhan do tumpongo dot id dokoyu, om hiti ngai' kou no do songingkakat do popogirot di tumpongo'ddi om mangakun kou do momonsoi di ponuhuan di tumpongo. 13 Om tadau nod baino' do silihon kopio kou'd Tuhan do bansa' di songonuon dau, dot i tumpongo'ddi o poposiliu, om iyau no ot osiliu do Kinorohingan dokoyu do miagal di nakabatos dau dot id dokoyu om id taki-aki dokoyu, i Abraham, i Isak om i Yakub. 14 Om iri nopo tumpongo'ddi om i ponuhuan di tumpongo, om okon nopo ko' winonsoi do Tuhan dot id dokoyu noo, 15 suwai ko' winonsoi nogi' dau dot id pointikid-tikid do tulun di songingkakat do hiti'd toguang dau do tadau baino', om id piro-piro o sinakagon toko' do koimbagu,” ka dau.
Kootuson dit Amu' Mumboyo' do Tuhan
16 Om boros ka kawagu di Musa, “Ahandaman po dokoyu i kinowoyo-woyoo' toko' di hilo'd Masir om okuro-kuro o nopurimanan toko' do nokopingwaya' do pomogunan di piro-piro o bansa'd suwai. 17 Om nokokito kou di piro-piro o tingolig di kososomu' kopio do tukuon diyolo'; i tingolig di kayu om watu, om pirok om tamas do winonsoi. 18 Iyo nopoddi, om antaan-taan no kopio dokoyu om aiso' i' o tongosongulun piya dot id pogialatan dokoyu, do kusai tuu ko' tondu', om sompiiyon tuu ko' payat, di songingkakat do hiti, do tumongkiad do Tuhan, i Kinorohingan toko', om tumuku' nogindo dot id ponokokinorohingan do bansa'd suwai. Tu' iri nopo wonsoyon do miagal diri om iyo di gamut di sumuni do sumiliu'd tanom dit opoit om kawanit. 19 Om id pogialatan nopo dokoyu di songingkakat do hiti, i nongkorongou di ponuhuan dit awagat kopio'ddi, om kada' no kopio do haro o momusorou dot osonong kasai' o koposi-posion dau, do momonsoi kasai' piya iyau di dau'd korohian. Tu' iri no moti' o kapatai ngai' dokoyu, iyokoyu i tulun dot araat om i tulun dit osonong. 20 Tulun nopo do miagal diri om a' nod Tuhan ompunan. Tu' oontok no iyau do kototogod do Tuhan dit a' ogina-gina', om orotuan iyau do koinsanai di kosusaan dit awagat kopio di nongkotulis dot id suang do buuk diti, do gisom do patayon iyau'd Tuhan. 21 Om iyau nondo o silihon do Tuhan do poiyaan dot id koinsanai'd payat dot Israil, om hukuman iyau'd Tuhan di popol di nongoroitan dot id suang do tumpongo di nokotulis dot id suang do buuk diti, i buuk dot Oturan do Tuhan. 22 Koimbagu nopondo, om kokito nondo i sinakagon dokoyu om i piro-piro o bansa'd suwai do mantad id piro-piro o pomogunan di hilo'd sodu' di kosusaan om koinggoritan do porikoton do Tuhan dot id pomogunan dokoyu. 23 Om osiliu nondo do tana' dit a' sunian i tana' dokoyu om otongkop do tana' do kitapui om silaon, om a' nondo milo do tanaman i tana' dokoyu, om sakot piya nga' a' no sumuni do hiri. Om iri nopo pomogunan dokoyu om iyo pondo di bandar do Sodom om Gomura, om Adma om Siboim, i rinaag do Tuhan do tontok dit a' no ogina-gina' o kototogod dau. 24 Om muhot ngai' nopondo o pointongkop diti pomogunan do poingkaa, ‘Nokuro tu' iyo'ddi o winonsoi'd Tuhan dot id pomogunan diyolo'? Nokuro tu' iyo kopio'ddi o kototogod dau?’ ka. 25 Om isimbar nopondo om poingkaa, ‘Iyo pogi'ddi o winonsoi'd Tuhan nga' sinurilog diyolo' i tumpongo do Tuhan, i Kinorohingan di taki-aki diyolo', i winonsoi dau dot id diyolo' do tontok di pinosoliwan dau iyolo' do mantad hilo'd Masir. 26 Minodsubak nogi' iyolo' do ponokokinorohingan dit a' diyolo' notutun-tutunan do gulu, om oduhan nogi' daa iyolo'd Tuhan do tumuku' dot id ponokokinorohingan diri. 27 Om iri no o kinatagadan do Tuhan di tulun dau, om kinoporikatan dau do koinsanai di kosusaan dit awagat kopio di nongkotulis dot id suang do buuk diti. 28 Om kotogod noddi kopio o Tuhan, om uyungo' nopoddi do Tuhan i tulun dot Israil do mantad id pomogunan diyolo' tu' atatagadan no kopio iyau, om pataamo' noddi dau iyolo' do hilo'd pomogunan do suwai. Om gowoi poddi om hilo' iyolo' do dinondo,’ ka. 29 Haro i' o piro-piro hal do lisokon do Tuhan, i Kinorohingan toko'; nga' iri nopo Tourat dau om nokointalang no dau dot id dati', om mositi' no do tumorodok toko' om i piro-piro o sinakagon toko' do tumanud diri do gisom dot alaid,” ka dau.
Barakat do Tuhan do Tulun di Rumologo
1 Om boros ka kawagu di Musa, “Pilio' no dokoyu i korohian dokoyu do dinondo; do barakat tuu ko' popol po o pilion dokoyu, do miagal di pinoboros ku dot id dokoyu. Om opurimanan ngai' pondo dokoyu i koinggoritan diri om koiyon kou dot id pogialatan di piro-piro o bansa'd suwai, i potompiasan do Tuhan dokoyu, om ahandaman nogindo dokoyu iti pilion di poboroson ku dot id dokoyu. 2 Ondung orohian kou om orohian i piro-piro o sinakagon dokoyu do gumuli' dot id Tuhan, om iso-iso' no kopio o ginawo dokoyu do mumboyo' ngai' di ponuhuan dau di pinoboros ku dot id dokoyu di tadau baino', 3 om insianan kou indo do Tuhan, i Kinorohingan dokoyu. Om poulion kou indo dau do mantad id piro-piro o bansa'd tulun di pinotompiasan dau dokoyu, om posimbayanon kawagu kou dau. 4 Om mulong piya do kopogitongkiad-kiad kou do pointongkop diti pomogunan nga' timungon kou indo do Tuhan, i Kinorohingan dokoyu om pogulion kawagu kou dau. 5 Om aanu indo dokoyu kawagu i tana' di pinomogunan di taki-aki dokoyu di gulu po. Om poingurut pondo o kosimbayano' dokoyu om asapou kou ko' mantad di komolohingan dokoyu. 6 Om onuan kou nondo do Tuhan, i Kinorohingan dokoyu do ginawo dit obintanud, om i sinakagon dokoyu nga' onuan nogi' dau do ginawo dit obintanud, gisom dot osianan kou nondo dau do mikuwo'd aayi-ayi' o ginawo dokoyu, om kopomogun kasai' kou dot id pomogunan diri. 7 Om oinsanan nopondo i popol diri do porotuon dot id piro-piro o pisangod dokoyu dit araatan om i mongulok-ulok dokoyu. 8 Om tumorodok kou indo kawagu dot id Tuhan om wonsoyon ngai' dokoyu i ponuhuan dau di pinoboros ku dot id dokoyu di tadau baino'. 9 Om poundaron ngai' indo do Tuhan o nunu nopo o wonsoyon dokoyu; om ogumu' indo o tangaanak dokoyu om ogumu' o tayam-tayam; om a' indo aayi-ayi' o tua' di totonomon dot id koumaan dokoyu. Om asanangan indo o Tuhan do poposimbayan dokoyu do miagal di gulu tu' nasanangan iyau do pinoposimbayan di komolohingan dokoyu. 10 Nga' mositi' no do mumboyo' kou dau om tumanud do koinsanai dit oturan di pinotulis dot id buuk diti, i buuk dot Oturan do Tuhan. Om mositi' no do gumuli' kou dot id dau do mikuwo'd aayi-ayi' o ginawo dokoyu. 11 Iti nopo ponuhuan di poboroson ku dot id dokoyu om a' i' adalaan kawagat om okon i' ko' ponuhuan dit a' milo'd wonsoyon. 12 Okon i' ko' hilo'd tawan o pinoiyanan di ponuhuan diri. Om a' kou i' minog do muhot do poingkaa, ‘Isai no ma o minsawat do mongoi'd hilo' om oongoi i' iri, om katahak indo dot id dati', om korongou toko' indo'ddi om atanud toko'?’ ka. 13 Om okon i' ko' hilo'd soborong do rahat o pinoiyanan di ponuhuan diri. Om a' kou i' minog do muhot do poingkaa, ‘Isai no ma o sumoborong dilo rahat om oongoi i' iri, om korongou toko' indo om katanud toko'ddi?’ ka. 14 Kada' kou ponguhot do miagal diri tu' hiti nod dokoyu i ponuhuan diri. Naapal no dokoyu i ponuhuan diri om milo kou no do poboros dot a' piya mintong di pointulis, om iso' ko' wonsoyon po daa dokoyu. 15 Om tadau nod baino' do momili' kou di pilion dokoyu, dot iri tuu it osonong ko' iri po it araat, om koposion tuu ko' kapatayon po. 16 Ondung osianan kou'd Tuhan, i Kinorohingan dokoyu, om mumboyo' kou no dau, om tumanud do koinsanai dit oturan om ponuhuan dau di pinoboros ku dot id dokoyu di tadau baino', om osimbayan kou no om osiliu kou do bansa' dit agayo. Om barakatan kou indo do Tuhan, i Kinorohingan dokoyu do hilo' kou id pomogunan di potiongoyon no dokoyu. 17 Nga' ondung a' kou mumboyo' om a' kou mokinongou, om mokilogos kou dot apalid do gisom do tumuku' kou nondo dot id ponokokinorohingan do suwai, 18 om atantu' no do patayon ku iyokoyu. Soro-sorohon no dokoyu! Nokoboros ku no ngai' iri dot id dokoyu di tadau baino' do popoinsan dokoyu. Om a' indo anaru o tumur dokoyu do hilo'd pomogunan dit id soborong diti Bawang do Yordan, i potisolodon no dokoyu. 19 Om pilio' nopo dokoyu i pilion dokoyu do dinondo; do koposion tuu ko' kapatayon o pilion dokoyu; barakat tuu do Tuhan ko' popol po dau. Om lohowon ku no o tawan om pomogunan do sumiliu'd sasi' ondung nunu i pilion dokoyu. Pilio' no dokoyu o koposion. 20 Kosianai kou nod Tuhan, i Kinorohingan dokoyu, om umboyo' kou no dau, om tumorodok kou no dot id dau. Om alaid kou indo om alaid i piro-piro o sinakagon dokoyu do poingiyon do hilo'd pomogunan di pinabatos do Tuhan dot id taki-aki dokoyu, i Abraham, i Isak om i Yakub,” ka dau.
Suminowoli i Yosua di Musa
1 Om boro-boros po kawagu i Musa dot id tulun dot Israil. 2 Boros ka dau, “Dinondo nopodti om hatus no om duwo nohopod o toun ku om a' oku noddi kogoos do momoyo' dokoyu. Om suwai no ko' iri, om nokoboros nod Tuhan dot a' oku no koino-ino do sumoborong di Bawang do Yordan. 3 Om Tuhan indo, i Kinorohingan dokoyu o mogulu dokoyu do mamanau om iyau o mamatai do koinsanai di bansa'd tulun di poingiyon do hilo', gisom dot osingolod dokoyu i tana' diyolo'. Om i Yosua no o silihon do boyoon dokoyu do miagal di nokoboros do Tuhan. 4 Om oiyon nopondo do Tuhan do mamatai i piro-piro o bansa'ddi do miagal di minangala' iyau di Sihon om i Og, i duwo raja' dot Amori, om di rinaag dau i pomogunan diyolo'. 5 Om onuan kou indo do Tuhan do kamanangan do sumaap diyolo', om mositi' no do wonsoyon dokoyu dot id diyolo' o miagal di poboroson ku dot id dokoyu. 6 Pogiroton no dokoyu o ginawo dokoyu, om kumosiou kou no! Kada' kou kooris diyolo'! Tu' uhupan kou i' do Tuhan, i Kinorohingan dokoyu. Om a' kou i' dau iman-imanon om a' kou dau tongkiadan!” ka dau. 7 Om lohowo' noddi di Musa i Yosua; om boro-boros no i Musa dot id di Yosua dot id toguang do koinsanai di tulun dot Israil. Boros ka dau, “Pogiroto' no o ginawo nu, oi Yosua, om kumosiou no! Iya' no o momoyo' diti tulun do mongoi ponolod di pomogunan di pinabatos do Tuhan dot id taki-aki diyolo'. 8 Tuhan i' o momoyo' om monguhup diya'. Om a' i' iyau mongiman-iman diya' om a' monongkiad diya'. Iyo nopoddi, om kada' no kopio kooris om kada' koluhoi o ginawo,” ka dau.
Ponuhuan do Mambasa' di Tourat do Tuhan dot Insan do Turu' o Toun
9 Om tuliso' noddi di Musa i Tourat do Tuhan, i Kinorohingan, om patahako' no dau dot id piro-piro o imam do mantad id payat do Liwi, i nonuan do karaja' do mongilo-ilo di Kaban do Tumpongo, om id piro-piro o boyoon dot Israil. 10 Om boros ka di Musa do minonuhu' diyolo', “Pointikid-tikid do kooyion do toun di koturu', do tontok di toun do kopononusan do tutang, i tontok di Tadau dot Agayo do Kinuhub-Kuhub, 11 om mositi' no do basaon dokoyu o koinsanai diti Tourat dot opuhod o pambasa' dot id tulun dot Israil di rumikot do mongoi sambayang dot id Tuhan, i Kinorohingan dokoyu do hilo'd tiyonon do sumambayang di natantu' mantad. 12 Om suhuon ngai' no o tulun --- dot i tongokusai om i tongoondu' om i tangaanak, om i bansa'd suwai di poingiyon dot id kabandaran dokoyu do mongoi pokinongou di Tourat do basaon diri, om kopinsingilo i' iyolo' do momusou'd Tuhan, i Kinorohingan dokoyu, om tumorodok nondo do tumanud ngai' di ponuhuan dau. 13 Om owonsoi nopo o miagal diri om iri piya'ndo tangaanak dokoyu dit a' po nokorongou di Tourat do Tuhan, i Kinorohingan dokoyu, nga' korongou indo om kopinsingilo do momusou'd Tuhan do solinaid diyolo' do poimpasi dot id pomogunan di potisolodon no dokoyu; i tana' di hilo'd soborong do Bawang do Yordan,” ka dau.
Ponuhuan dit id Tohuri no do Pinatahak do Tuhan di Musa
14 Om boro-boros noddi o Tuhan dot id di Musa do poingkaa, “Oniba' no o tumur nu. Om lohowo' nogi' kopio i Yosua, om angatan i' do mongoi'd hilo'd Kiim ku om otudukan ku i' iyau,” ka dau. Om ongoi noddi iyo Musa di Yosua do hiri'd Kiim. 15 Om intalang no o Tuhan dot id diyolo' dot id rolot do haun di poorigi do hiri'd somok do wawayaan di Kiim. 16 Om boros kad Tuhan dot id di Musa, “Oruhai ko noddi do matai. Om apatai ko nopondo om a' nondo o tulun dot Israil otorodok dot id doho', om tolibambanan diyolo' i tumpongo di winonsoi ku dot id diyolo'. Om tumongkiad nondo iyolo' doho', om tumuku' nogindo dot id ponokokinorohingan di tukuon di tulun do poingiyon do hilo'd pomogunan di potisolodon no diyolo'. 17 Ondung osiliu o miagal diri, om a' nondo ogina-gina' o kotogodo' ku diyolo'. Om tongkiadan ku nondo iyolo' om patayon ku, om ogumu' nopondo o kosusaan dit angawagat kopio do koontok diyolo', om opurimanan nogindo diyolo' do nongosiliu ngai' pogi' iri dot id diyolo' nga' a' oku noddi moyo-woyo' diyolo'. 18 Om tontok nopondo do maso'ddi om a' oku no monguhup diyolo', tu' tumuku' i' iyolo' dot id ponokokinorohingan do suwai om mingwonsoi iyolo' dot araat. 19 Om tuliso' no iti sinding do dinondo. Om potudukon noti dot id bansa' dot Israil do maan do ponokosasi' dot id diyolo'. 20 Om pokoyoon ku nondo iyolo' do hilo'd pomogunan di kaya' om it oluhub o tana', do miagal di pinabatos ku di taki-aki diyolo'. Om haro ngai' dot id diyolo' o nunu nopo o taakanon di korohian diyolo'. Nga' alaid nondo om sumansala' po iyolo' kawagu om tumuku' dot id ponokokinorohingan. Om iyadaan oku nondo diyolo' om tolibambanan diyolo' i tumpongo ku. 21 Om ogumu' nopondo o kosusaan dit angawagat do koontok diyolo'. Nga' maso kasai' indo do sindingon iti sinding om maan do ponokosasi' dot id diyolo'. Om dinondo piya, tu' a' ku po iyolo' nakakaa do hilo'd pomogunan di pinabatos ku nga' oilaan ku no o pomusarahan diyolo',” kad Tuhan. 22 Om tontok i' do tadau'ddi do tinulis di Musa i sinding diri, om potuduko' no dau dot id tulun dot Israil. 23 Om boro-boros noddi o Tuhan dot id di Yosua, i tanak di Nun. Boros ka dau, “Pogiroto' no o ginawo nu, oi Yosua, om kumosiou no! Iya' no o momoyo' diti tulun dot Israil do sumuang di pomogunan di pinabatos ku dot id diyolo', om uhupan ku indo iya',” ka. 24 Om tuliso' noddi di Musa i Tourat do Kinorohingan dot id iso' o buuk. Om sinorisid tomod dau o pinonulis do mantad di timpuunon om gisom do nopupusan. 25 Om kopongo poddi di Musa do minonulis iri, om boro-boros no iyau dot id piro-piro o imam di mantad id payat do Liwi, i nonuan do karaja' do mongilo-ilo di Kaban do Tumpongo. Boros ka dau, 26 “Ngoyo' no dokoyu iti buuk do Tourat do Kinorohingan, om poilihon no dot id sampaping di Kaban do Tumpongo do Tuhan, i Kinorohingan dokoyu. Om hilo' kasai' indo do maan do ponokosasi' do bansa' diti. 27 Om oilaan ku i' dot ongosurilog kopio iyolo' om obinsaap. Tu' iti piya poimpasi oku po nga' suminaap i' iyolo' do Tuhan; om okuro-kuro nogi' tuu'ndo dot apatai oku! 28 Suhuo' ngai' no i boyoon do bansa' om i pagawai do soudor do tumimung dot id toguang ku do dinondo, om kolombus ku i' dot id diyolo' iti piro-piro hal. Om lohowon ku no o tawan om pomogunan do sumiliu'd sasi' diyolo'. 29 Oilaan ku no dot apatai oku nopondo, om rumaat ngai' nondo o tulun diti om iyadaan diyolo' i nokotuduk ku dot id diyolo'. Om oontok nondo iyolo' do kosusaan dit awagat kopio, tu' momonsoi i' iyolo' di pogoduhan do Tuhan, om i popotogod do Tuhan,” ka.
Sinding di Musa
30 Om basao' noddi di Musa iti sinding do gisom do nopupusan, om mokinongou ngai' nopo i bansa' dot Israil. Poingkaa i sinding diri.
1 “Oi tawan, pokinongou no, tu' moro-boros oku, oi pomogunan pokinongou no kopio. 2 Maha' daa om iyo di rasam do sumondot iti ponudukan ku, om iyo di tinuru' do bolobou iti boros ku, om iyo di rasam dot asapou dot id kobuturan, om iyo di tinuru' do rasam dot id totonomon. 3 Royohon ku indo o ngaran do Tuhan. Popinsusuyo' no o kogoyoo' do Kinorohingan toko'! 4 Tuhan no, it okoris kopio o mogobi' dokoyu, otulid ngai' i' om otopot i karalan-ralano' dau. Otorodok i' om otopot i Kinorohingan dokoyu, om momonsoi iyau dit osonong om it apatut. 5 Nga' iyokoyu nopo om tulun dit a' otorodok, om bansa' di noponu' do kouudut om dusa, om a' no osorupai do roitan do tulun dau. 6 Iyo toi'ddi o ponomuli' dokoyu di kosonongo' do Tuhan, oi tulun di basug om aiso' o toila-ilaan? Okon toi ko' iyau no o Tapa' dokoyu, om i Minamasi dokoyu, om i minoniliu dokoyu dot iso' o bansa'? 7 Soroho' no dokoyu i maso di nakatalib, di gulu po, suhuo' no dokoyu i tapa' dokoyu do momisunud dokoyu do koinsanai di nongosiliu, suhuo' no dokoyu i kongomolohingan do momisunud dokoyu di nongosiliu di gulu po, om sunudan kou i' diyolo'. 8 Tontok di binahagi' dit Asawat Kopio i tana' do maan do potungkusan, om tinantu' mantad i' o wolit do tana' do pointikid-tikid do bansa'. Om iso' no o Kinorohingan do momorinta' ngai'ddi. 9 Nga' iti nopo sinakagon di Yakub diti om pinili' do Tuhan do sumiliu'd dau'd songonuon. 10 Nabantalan dau iyolo' do minghombo, do hilo'd kinoiyonon dit oingou do hilo'd tana' do kowotuan. Iyolo' no o koupusan kopio dau, om intirungan dau iyolo' om gompion dau. 11 Poingkuro nopo i kondiu do monuduk di tanak dau do tumulud, om sumahau di tanak dau dot i talad dau do poungkalad o panahau. 12 Om iyo noddi o Tuhan do momoyo' di tulun dau, om a' i' iyau minog dot uhupan di piro-piro o ponokokinorohingan do suwai. 13 Kopomorinta' i' i tulun dau do hilo'd konuluhanan, om sumuni o kayu saitun do hiri'd tana' di kiwatu, kaakan i' iyolo' do tua' do totonomon do hiri'd koumaan, om koinum do paha' do mantad id pogialat-alatan di watu. 14 Ogumu' i' o daging om susu dot aanu diyolo' do mantad id tayam-tayam diyolo'; om it osonong kopio i gandum om i waig dot anggur dot aanu diyolo'. 15 Kuminaya' i tulun do songonuon do Tuhan, nga' obinsongkiwal i', ongolombon po iyolo' do nangayahan do takanon. Om tongkiadai noddi diyolo' o Kinorohingan, i minomonsoi diyolo'. om niada' diyolo' i Gampamasi diyolo' dit okoris kopio. 16 Tumuku' iyolo' dot id tingolig, om gowoi poddi om minoguhang o Tuhan, om kotogod noddi iyau do gama' di karaaton diyolo'ddi. 17 Pinapatahak iyolo'd porsombahan dot id ponokokinorohingan dit a' otopot, it a' notutunan om it a' tinuku' di taki-aki diyolo' di gulu po. 18 Tuminongkiad iyolo' do Kinorohingan di mamasi; om nokolihu iyolo' do Tuhan, i manahak do koposion. 19 Kokito poddi do Tuhan i kowoyo-woyoon di tangaanak dau om kotogod no o Tuhan, om iyadaai no dau iyolo'. 20 Boros ka dau, ‘Uhang ngai' ku no; antangan nopo ondung poingkuro nondo ot osiliu. Tu' osurilog i' i bansa'ddi, om a' iyolo' otorodok. 21 Pinopotogod doho' i tininganak di tukuon diyolo', om osolon oku di roitan diyolo' do ponokokinorohingan. Om potogodon ku nondo i bansa' do songonuon ku di bansa' dit okon i' ko' bansa' kopio, om poosolon ku iyolo' di tulun do basug. 22 Om iyo pondo do tapui do molob-ngolob o kototogod ku, i monorob do koinsanai'd nunu nopo do hiti'd pomogunan, i tapui di rumalad do gisom do korikot do hilo'd saalom do tana', om monorob do konuluhanan do gisom do korikot do hiri'd gamut di nuluhon. 23 A' oku nopo tumingkod do poporikot do kosusaan dit awagat kopio, om saapon ku nondo iyolo' di pana' ku. 24 Apatai nondo iyolo' do toruol do sogiton om mononglous, om apatai do toruol dit araat kopio. Rumikot nondo o nintorusan dit orongit do mongoi panabpo diyolo', om minggiak pondo iyolo' dot otinduk do tulanut di kapatai. 25 Poporikot o pisangadan do kapatayon do hiri'd karalan-ralanan, om iri piya i poundorong do hiri'd duwalai nga' ongooris i'. Angapatai nondo i tangaanakwagu om i kosumandakan, om iri piya i ragang po om i molohing no nga' angapatai ngai' i'. 26 Punsoon ku no daa kopio iyolo', om olihuan indo iyolo'. 27 Nga' a' i' apatut o pisangod dot Israil dot oondos, dot iyo po daa'ndo do naala' diyolo' i bansa' do songonuon ku; tu' iyoho' noo, om iyoho' no kopio, o minomonsoi ngai'ddi,’ ka. 28 Israil no o bansa' dit aiso' o toila-ilaan; om aiso' o pongitungan diyolo'. 29 A' i' iyolo' kosuhut ondung nokuro tu' naala' iyolo'; a' i' iyolo' kosuhut ondung nunu i nosiliu. 30 Poingkukuro po daa o songulun-ngulun do momogusa' do soribu o tulun, om momogusa' o duwo tulun do hopod noribu o tulun. Nadagang no iyolo' do Tuhan, i Kinorohingan diyolo', notongkiadan no iyolo' do Kinorohingan dit okoris. 31 Oilaan i' di pisangod dot Israil dot a' okoris i mongintirung diyolo', om a' i' koiyo di Kinorohingan dot Israil dit okoris. 32 Iri nopo pisangod dot Israil om iyo pod Sodom om Gomura karaat, iyo po di guas dot anggur dit opoit om i kawanit o tua'. 33 Waig nopod anggur diyolo' om iyo pod paliu do tulanut di kapatai. 34 Sorohon i' do Tuhan i winonsoi di pisangod diyolo', om hukuman indo dau iyolo' dot orikot i maso do kopomohukuman. 35 Sulian indo iyolo' do Tuhan om hukuman dau iyolo', om aratu' nondo iyolo', tu' oruhai no o tadau do kapatayon diyolo'. 36 Posion indod Tuhan i tulun dau, om insianan ngai' dau i susuhuon dau, dot okito dau iyolo' dot aiso' o pokukurayan om a' kogoos. 37 Uhoton nondod Tuhan i tulun do songonuon dau, ‘Hinonggo ngai' no i ponokokinorohingan di mongintirung dokoyu? 38 Paakanon dokoyu iyolo' do porsombahan di kilunok, om agayo waig dot anggur do poinuman dokoyu. Pologoson nopo iyolo' do monguhup dokoyu; sunudai nopo dokoyu iyolo' do rumikot do mongoi pamasi dokoyu do dinondo,’ ka dau. 39 ‘Ontong pogi', iyoho' no o Kinorohingan dit Iso-Iso', aiso' no o suwai ko' iyoho'. Mamatai oku om mamasi, monuhat oku om momolingos. Soira' nopo do haro o wonsoyon ku, om aiso' no o tongosongulun piya do kasaap doho'. 40 Otopot no kopio dot iyoho' i poimpasi, iyoho' i Kinorohingan, om poinsawaton ku o longon ku do sumumpa' do poingkaa: 41 Aasa' ku pondo i gayang ku dit okilat, om wonsoyon ku nondo it otulid. Sulian ngai' ku nondo i pisangod; om hukuman ku it araatan doho'. 42 Notounan pod raha' diyolo' i gayang ku, raha' di tulun do natangkap om i tulun di nongosuhat. Patayon ngai' nopo di gayang ku o koinsanai'd tulun di sumaap, a' ku no posion i pisangod dit anganaru o tobuk,’ ka. 43 Pimpangkis kou no, oi bansa', dot i tulun do songonuon do Tuhan o kopomongkisan. Sulian dau i pisangod dau nga' ompunan i' dau o dusa di bansa' do songonuon dau,” ka. 44 Binasa' di Musa om i Yosua i tanak di Nun o sinding diri, gisom do nokorongou ngai' nopoddi i bansa' dot Israil di sinding diri.
Pinopoboros i Musa do Ponudukan dit id Tohuri No
45 Om koboros ngai' poddi di Musa i ponudukan do Tuhan dot id bansa' dot Israil, 46 om boro-boros no iyau do poingkaa, “Antaan-taan no kopio dokoyu, om atanud ngai' i' dokoyu i ponuhuan di pinoboros ku dot id dokoyu di tadau baino'. Potudukon ngai' no dokoyu iri dot id tangaanak dokoyu, om otorodok indo iyolo' do numboyo' do koinsanai dit oturan do Tuhan. 47 Okon i' ko' boros toomod i ponudukan diri, suwai ko' iri nopo om koposion dokoyu. Tonudon ngai' no dokoyu i ponuhuan diri, om otogui kou i' do hilo'd pomogunan dit oruhai no dokoyu dot aanu, i hilo'd soborong diti Bawang do Yordan,” kad i Musa. 48 Om tontok i' do tadau'ddi do minoro-boros o Tuhan dot id di Musa do poingkaa, 49 “Ongoi no do hilo'd Konuluhanan dot Abarim, i hilo'd pomogunan do Muab, it id hapak do bandar do Yorikou. Om tumakad no di Nuluhon do Nibo, om mimpa' no di tana' do Kanaan, it a' no alaid om patahakon ku no di bansa' dot Israil. 50 Om hilo' nondod timpak do nuluhon diri o kapatayon nu, oi Musa, do miagal di Harun, i tobpinai nu, do minatai do hilo'd Nuluhon do Hor. 51 A' goduwo kou nopo tuminorodok dot id doho' om a' kou minomusou doho' dot id toguang di bansa' dot Israil do tontok di hilo' kou id tudan do waig do Moriba, i hilo'd somok do bandar do Kadis, it id tana' do kowotuan do Sin. 52 Om iri no ot a' nu koina-inaan do sumuang di pomogunan do patahakon ku dot id bansa' dot Israil; koimpa' ko no di pomogunan do mantad hiti'd sodu',” kad Tuhan.
Binarakatan di Musa i Piro-Piro o Payat dot Israil
1 Om barakatai nod i Musa, i susuhuon do Kinorohingan diri, i bansa' dot Israil dit a' po iyau napatai. Boros ka dau, 2 “Rumikot o Tuhan do mantad hilo'd Nuluhon do Sinai; minulai iyau do hilo'd Idom do miagal do tadau. Minimbulai iyau do mantad hilo'd Nuluhon do Paran do mulinau dot id tulun dau. Winoyo' iyau do hopod noribu o moloikat. Om iyo pod kodumaat o tapui do molob-ngolob do hiri'd ponong id wanan dau. 3 Osianan i' o Tuhan di tulun dau, intirungan i' dau i songonuon dau. Kainou motud do tumuku' dot id toguang dau om mumboyo' toko' di ponuhuan dau. 4 Tonudon toko' i' i Tourat do pinatahak di Musa, i ponokodapu' do bansa' diti dit agayo kopio o gatang. 5 Tontok di tuminimung ot Israil do miwoyo' di boyoon diyolo', om Tuhan no o nosiliu do raja' di tulun do songonuon dau,” kad i Musa. 6 Om boros ka di Musa do pasal di payat do Rubin, “Maha' daa om a' koumbal dot opunso i payat do Rubin, dot okuri' piya i tulun dau,” ka dau. 7 Om boros ka di Musa do pasal di payat do Yohuda, “Oi Tuhan, pokinongoho' no iyolo' do tontok do lumohou iyolo' do mokitulung, om kopiiso' i' iyolo' di payat do suwai. Uhupai no iyolo' do sumangod do pisangod dot id pisangadan,” ka dau. 8 Om boros ka di Musa do pasal di payat do Liwi, “Pointalangon nu, oi Tuhan, o korohian nu dot it Urim om id Tumim o popointalang, do pawayaon di tulun do Liwi, i susuhuon nu dit otorodok. Pinogumbalan nu iyolo' di hilo'd Masa, om nilaan kopio nu iyolo' ondung otorodok, di hilo'd torobong do Moriba. 9 Otorodok i' kopio iyolo' dot id diya' om poinggayo po o kotorodoko' diyolo' dot id diya' ko' id nunu nopo o suwai, om poinggayo po ko' kotorodoko' dot id molohing om id tobpinai. Tinanud i' diyolo' i ponuhuan nu, om otorodok i' iyolo' dot id tumpongo nu. 10 Tudukan indo diyolo' i tulun nu do mumboyo' di Tourat nu, om pinapatahak iyolo' do porsombahan di sorobon do hiri'd pananaraban do porsombahan nu. 11 Oi Tuhan, uhupai no o payat diti om okoris i' iyolo', om asanangan ko indo di wonsoyon diyolo. Patayo' ngai' no i pisangod diyolo'; punsoo' no kopio do gisom dot alaid,” kad i Musa. 12 Om boros ka di Musa do pasal di payat do Binyamin, “Iti no o payat di kosianan do Tuhan. Intirungan i' dau iyolo' do tadau om totuong; om poingiyon iyau dot id pogialatan diyolo',” ka. 13 Om boros ka di Musa do pasal di payat do Yusup, “Maha' daa om barakatan do Tuhan i tana' diyolo', do waig do mantad id saalom do tana' om rasam o pamarakat. 14 Maha' daa om osima' do tua-ua' dit ongosonong kopio om nongoonsok i kouwaan. 15 Maha' daa om otongkop do tua-ua' di nopili-pili' no kosonongo' i konulu-nuluan do hilo', i hino mantad no do mantad di gulu po. 16 Maha' daa om barakatan do Tuhan i tana' diyolo' do gisom do mabai-labai o barakat, i Tuhan di moro-boros do mantad id bulungkut do kitapui di molob-ngolob o mamarakat. Iti no o barakat dot id di Yusup om id sinakagon dau, i Yusup no o boyoon dot id pogialatan di tobpinai dau. 17 I Yusup nopo om iyo pod sapi' do gonsukod kokoris, sungu nopo dau om i piro-piro noribu o sinakagon di Manasi om Ipraim. Sunguon ngai' dau i bansa' do gisom do korikot do hilo'd tisan do pomogunan dot oimpit dau,” kad i Musa. 18 Om boros ka di Musa do pasal di payat do Sibulon om i payat dot Isakar, “Maha' daa om kumaya' i Sibulon do mantad id pogidagang-dagangan do hilo'd rahat, om rumuhang o kakayaan dot Isakar do hilo'd kinoiyonon diyolo'. 19 Alapon diyolo' i bansa'd suwai do hilo'd nuluhon diyolo'; om patahakon diyolo'd hilo' i porsombahan do sorobon dit apatut. Kaanu iyolo'd dapu' do mantad hiri'd togis do poingompus di tisan do rahat,” kad i Musa. 20 Om boros ka di Musa do pasal di payat do Gad, “Royohon no o Kinorohingan, i minanahak di Gad do tana' dit agayo dot undorongon diyolo'. Poingandad no o Gad dot iyo di singa do momogii do longon om manganit do kulit do tulu. 21 Naanu no diyolo' i tana' dit osonong kopio, om iyolo' no o nonuan di bahagi' do dong boyoon. Numboyo' i' diyolo' i ponuhuan om it oturan do Tuhan, do tontok di tuminimung ngai' i boyoon dot Israil do mogiboro-boros,” kad i Musa. 22 Om boros ka di Musa do pasal di payat do Dan, “Dan nopo om iyo pod singa dit okoro' po. Om sumimbul nopo iyau do sumoliwan do mantad hilo'd Basan,” ka. 23 Om boros ka di Musa do pasal di payat do Naptali, “Ogumu' no kopio o barakat dot id di Naptali, tu' osianan i' o Tuhan dau; watas nopo dau om mantad po di Tasik dot Agayo do Galilia om gisom do korikot do hilo'd salatan,” ka. 24 Om boros ka di Musa do pasal di payat dot Asor, “Id pogialatan ngai' nopo di payat dot Israil om payat nod Asor ot ogumu' kopio o barakat dot aanu. Kolisihan kopio iyolo' di piro-piro o tobpinai diyolo', om osonong o sunion do saitun do hiri'd tana' diyolo'. 25 Nintirungan ngai' do totobon do basi' i bandar diyolo' om osimbayan kasai' i' o koposi-posion diyolo',” kad i Musa. 26 Om boros ka kawagu di Musa, “Oi tulun dot Israil, ilaai no dokoyu, Kinorohingan nopo om agayo i' ko' koinsanai di ponokokinorohingan do suwai. Kadarapas i' iyau dilo tawan dot id suang do kagayaan om kolopuson dilo haun do mongoi ponguhup dokoyu. 27 Minogobi' kasai' i' dokoyu o Kinorohingan; om iri longon dau i hino kasai' o minangahang dokoyu. Nuyung dau o pisangod do mantad id dabantalan dokoyu, om sinuhu' kou do mamatai do koinsanai di pisangod. 28 Osimbayan indo do momogun-mogun i sinakagon di Yakub, om aiso' o koligagaanan do hilo'd pomogunan dit osimbayan, om osima' do gandum om waig dot anggur om oyopos i tana' do bolobou di mantad hilo'd tawan. 29 Oi Israil, osimbayan ko no kopio, aiso' i' o bansa'd suwai do pinasi dot iyo di bansa' nu. Tuhan nopo om iyo pod kolid om gayang dot id diya', tu' mogobi' iyau dokoyu om manahak do kamanangan. Rumikot ngai' nondo i pisangod dokoyu do mokiinsian, nga' pingulakan pondo dokoyu iyolo',” kad i Musa.
Napatai i Musa
1 Om tongkiad noddi i Musa di rantai do Muab om takad no iyau di Nuluhon do Nibo, do gisom do nokorikot do hiri'd timpak do Nuluhon do Pisga, i ponong id koulayon do mantad id Yorikou. Om hilo' no do pinotuduk do Tuhan dot id dau o koinsanai di pomogunan diri: i watas do Giliad do gisom do korikot do hilo'd bandar do Dan do ponong id utara, 2 om koinsanai di watas do Naptali; om i watas dot Ipraim do gisom do korikot di Rahat do Tanga'; 3 om i ponong id salatan do watas do Yohuda om i rantai do mantad hilo'd Soar om gisom do korikot do hilo'd Yorikou, i bandar di notongkop pod kayu di roitan do kurma. 4 Om boros kaddi do Tuhan dot id di Musa, “Ilo' no i pomogunan di pinabatos ku dot id di Abraham, om id di Isak om id di Yakub, do potungkusan di sinakagon diyolo'. Pokitonon ku iya' dilo', oi Musa, nga' a' ku i' iya' poongoyon do hilo',” ka dau. 5 Om kapatai noddi i Musa, i susuhuon do Tuhan diri, do hilo'd tana' do Muab, do miagal di nokoboros do Tuhan di gulu po. 6 Om lobongo' no iyau'd Tuhan dot id iso' o kubong do hilo'd Muab, it id hapak di bandar do Bait-Pior, nga' gisom piya do tadau'd baino' nga' aiso' i' o tongosongulun piya do koilo kopio ondung hinonggo i lobong dau. 7 Di nopo di napatai i Musa om hatus no om duwo nohopod o toun do tumur dau. Om a' i' nokosimban o kokoriso' do tinan dau, om pogogontong dau nga' atarang po kasai'. 8 Om pogihad noddi i tulun dot Israil do solinaid do tolu nohopod o tadau do hilo'd rantai do Muab, tu' napatai no i Musa. 9 Om ponuo' no do Tuhan do toilaan i Yosua, i tanak di Nun, tu' iyau no o pinili' di Musa do sumowoli dau. Om minumboyo' i' i tulun dot Israil do boros di Yosua om winonsoi diyolo' i ponuhuan do Tuhan di pinolombus di Musa. 10 Om aiso' no o nabi do hilo'd Israil do miagal kopio di Musa tu' nokotimbaba' kopio do Tuhan do monokiboro-boros. 11 Om aiso' no o nabi do nokopomonsoi di piro-piro o koimayaan om kosuayan do miagal di winonsoi di Musa dot id pomogunan do Masir, om id raja' do hilo' om id tongopagawai di raja' do miagal di pinonuhuan do Tuhan. 12 Om aiso' no o nabi do nokopomonsoi di koronob kopio om i korolosi kopio do miagal di winonsoi di Musa dot id toguang do koinsanai di bansa' dot Israil.
Sinuhu'd Kinorohingan i Yosua do Mongoi Pangala' do Kanaan
1 Di nopoddi napatai i Musa, i susuhuon do Tuhan diri, om boro-boros no o Tuhan dot id di Yosua, i tanak di Nun. I Yosua nopo nga' i mongunguhup di Musa di gulu po. 2 Om boros kad Tuhan, “Napatai noddi i Musa, i susuhuon ku. Iyo nopoddi, om sodia' kou no, iya' om koinsanai do tulun dot Israil do sumoborong do Bawang do Yordan; om mongoi kou i' do hilo'd pomogunan di patahakon ku diyolo'. 3 Honggo nopo o kinoiyonon dot oongoi dokoyu om patahakon ku nori dot id diya', oi Yosua, om id toinsanan o tulun ku. Tu' iyo noddi o nokoboros mantad ku dot id di Musa. 4 Tana' nopo dot aanu dokoyu om mantad pod hilo'd tana' do kowotuan di ponong id salatan om korikot di Konuluhanan do Libanon, i ponong id utara; om mantad di Bawang dot Iprat dit agayo, i ponong id koulayon, om oinsanan o pomogunan do tulun do Hit, om gisom do korikot dot id Rahat do Tanga', i ponong id kotonobon. 5 Iso' pod tulun nga' aiso' i' o kasaap diya', oi Yosua, do solinaid nu do poimpasi. Tu' manud-tanud oku i' kasai' diya', do miagal di minananud oku di Musa. Om woyoon kasai' tiya' i' om a' ku iya' tongkiadan. 6 Pogiroto' no om pasangalo' no o ginawo nu tu' iya' no o sumiliu do boyoon diti bansa' do mongoi ponolod di pomogunan di nakabatos mantad ku dot id taki- aki dokoyu. 7 Pogiroto' no om pasangalo' no kopio o ginawo nu. Om tonudon no kopio o koinsanai di Tourat di pinatahak di Musa, i susuhuon ku'ddi, dot id diya'. Om kada' no kopio sansala' dot ongoiso' piya do mantad id Tourat diri om koundar ko indo do honggo nopo o tongoyon nu. 8 Kada' no kopio kolihuwai do mambasa' i buuk do Tourat do pointikid-tikid do maso do sumambayang. Om soro-sorohon no om pinsingilaan no kopio iri do tadau om totuong. Om tonudon no o nunu nopo i nokotulis do hiri'd buuk diri. Tu' ondung owonsoi nu o miagal diti om osimbayan indo om koundar o koposi-posion nu. 9 Soroho' pogi' nga' nosuhu' ku no moti' iya' do popogirot om papasangal kopio do ginawo. Om kada' no kooris om kada' poluhoyo' o ginawo tu' iyoho' no i Tuhan, i Kinorohingan nu, o manud-tanud kasai' diya' do hinonggo nopo o pakayaan nu,” ka.
Sinunudan di Yosua i Tulun dot Ogumu'
10 Om suhuo' noddi di Yosua i piro-piro o boyoon di tulun dot Israil 11 do tumongkop di kokiiman do poposunud do boros do poingkaa, “Posodia' toko' no do kokoriu, tu' tolu po moti' o tadau om sumoborong toko' no di Bawang do Yordan do pakayaan do hilo'd pomogunan di patahakon do Tuhan, i Kinorohingan toko' dot id dokoyu,” ka. 12 Om boro-boros no i Yosua dot id payat do Rubin, om id payat do Gad, om id songintanga' di payat do Manasi do poingkaa, 13 “Soroho' no dokoyu i pinoboros di Musa, i susuhuon do Tuhan, dot id dokoyu, iri no tu' iri nopo tana' dot id soborong do Yordan, i ponong id koulayon om patahakon do Tuhan, i Kinorohingan dokoyu, dot id dokoyu, do pomogun-mogunan dokoyu. 14 Poundorongon nopo do hiti'd tana' di pinatahak di Musa dokoyu o koinsanai'd sawo om tangaanak, om tayam-tayam dokoyu. Nga' ilo' ngai' nopo soudor dokoyu om mositi' no dot ongkirapo-rapo om sumodia' do mongoi sangod. Tu' iyolo' no o mogulu do tulun dot Israil do sumoborong do Bawang do Yordan, om iyolo' o monguhup diyolo', 15 gisom dot aanu diyolo' i pomogunan di patahakon do Tuhan, i Kinorohingan dokoyu, dot id diyolo', iri no i tana' do hiri'd sampaping ponong id kotonobon do mantad id Bawang do Yordan. Om oonuan pondo do Tuhan do kosimbayanan o koinsanai di payat dot Israil om pogulian nogindo dokoyu do hiti'd tana' di nakatahak di Musa, i susuhuon do Tuhan dot id dokoyu; i hiti'd soborong do Bawang do Yordan, do ponong id koulayon,” ka dau. 16 Om boros ka di payat do Rubin om i payat do Gad, om i songintanga' di payat do Manasi dot id di Yosua, “Nunu nopo o ponuhuan nu dahai om wonsoyon ngai' i' dahai, om hinonggo nopo o ponuhuan nu dahai do mongoi om ngoyon ngai' i' dahai. 17 Poingkuro nopo iyahai do minumboyo' di boros di Musa om iyo noddi o pongungumboyo' dahai do boros nu. Om Tuhan no i Kinorohingan nu o manud-tanud diya' do miagal di minananud iyau di Musa. 18 Isai nopo o tulun do sumaap diya' om it a' tumanud do boros nu om hukuman no do kapatayon. Pogiroton no om pasangalon no o ginawo nu,” ka diyolo'.
Minonuhu' i Yosua do Mongoi Ponoluku' di Bandar do Yorikou
1 Om ponuhu' noddi i Yosua do duwo o tulun do gomponoluku' do mantad hilo'd kokiiman do Sitim do lumisok-lisok i' do mongoi ponorisid do mogontong di pomogunan do Kanaan om okon-okon po om i bandar do Yorikou. Om ongoi no i duwo o tulun diri do hiri'd bandar diri, om rikot no iyolo' do hiri'd walai do songulun o tondu' do sundal, om odop no iyolo' do hiri. Ngaran nopo di tondu'ddi nga' i Rahab. 2 Om haro'ddi o tulun do minongoi pomisunud di raja' do Yorikou do haro o piro-piro tulun dot Israil do nokorikot do totuong diri do mongoi ponoluku' do pomogunan diri. 3 Om ponuhu' no i raja' do tulun dau do mongoi pomisunud di Rahab do poingkaa, “Iri nopo tulun di minumbaya' do hino'd walai nu om mongoi i' ponoluku' do pointongkop diti pomogunan. Posoliwano' nogi' kopio iyolo'!” ka. 4-6 Om boros ka di Rahab do suminimbar, “Otopot nogi' do haro o piro-piro o tulun do nokorikot do hiti'd walai ku, nga' a' oku i' koilo ondung hinonggo o tadon diyolo'. Om maha' di totuong no, dit a' po natabanan i wawayaan do bandar, om pamanau no iyolo'. Om a' oku i' minonguhot ondung honggo o pakayaan diyolo'. Nga' ondung ngoyon dokoyu iyolo' gusao' om okosupan po dokoyu iyolo',” kad i Rahab. (Nga' nokolisok no ma di Rahab i duwo o tulun do gomponoluku'ddi do hiri'd sakai do taap di walai dau. Om tinakapan dau iyolo' di bundusan di poinsidang do hiri.) 7 Om soliwan noddi di bandar i piro-piro o susuhuon di raja' do mongoi pogihum di gomponoluku'. Om tabanai noddi i wawayaan di bandar. Om pingihumai noddi diyolo' i gomponoluku'ddi do gisom do nokorikot iyolo' do hiri'd sosoborongon do Bawang do Yordan. 8 Nga' maha' dit a' po nokoodop i duwo o tulun do gomponoluku'ddi, om ongoi no i Rahab do hiri'd sakai di taap do walai dau. 9 Om boro-boros no iyau di duwo o tulun diri do poingkaa, “Oilaan ku no do nakatahak nod Tuhan dot id dokoyu o pomogunan diti. Om oinsanan nopo o tulun do hiti do moddosi dokoyu. Om pananggagaran ngai' poo o tulun do hiti dot opopoddosian do tumimbaba' dokoyu. 10 Tu' nokorongou no iyahai do kinowoyo-woyoo' do Tuhan do minamarasak di Rahat dot Aragang dot id toguang dokoyu, do tontok di minogidu' kou do mantad id pomogunan do Masir. Om nokorongou ngai' nogi' iyahai do kinowoyo-woyoo' dokoyu do minamatai di Sihon om i Og, i duwo o raja' dot Amori, do hilo'd ponong id koulayon do mantad di Bawang do Yordan. 11 Nongooris tomod diri iyahai do tontok di nokorongou iyahai'ddi. Om koluhoi ngai' nopo o ginawo dahai do nokoilo do pasal dokoyu. Tu' iri nopo Tuhan, i Kinorohingan dokoyu om Kinorohingan do hilo'd tawan om hiti'd pomogunan. 12 Om sumpa' kou no do dinondo dot id suang do ngaran do Tuhan do wonsoyon dokoyu dot id sompiiyon ku o miagal di winonsoi ku dot id dokoyu. Om onuwai oku no do tanda' do pongilaan ku, om otumbayaan oku indo dokoyu. 13 Om pamatos kou no do posion dokoyu o tapa' om tina' ku, om tobpinai ku'd kusai om tondu', om koinsanai do sompiiyon diyolo'. Om kada' no kopio iyahai dokoyu pologoso' dot apatai,” ka dau. 14 Om boros ka di duwo o gomponoluku' do suminimbar di Rahab, “Uhang i' dahai dot iyahai ot apatai ko' mantad dot apatai ko iya', ondung a' nu no poboroson dot id tulun do suwai iti winonsoi dahai. Om atantu' no dot osonong o wonsoyon dahai dot id diya' do tontok do patahakon do Tuhan iti pomogunan diti dot id dahai,” ka diyolo'. 15 Iri nopo walai di Rahab nga' pinawaal do hiri'd tolig di bandar. Om osonong iddi iyau do pinopoulu di duwo o tulun diri, do tali o pinakai dau do pinopoulu, do pinawaya' di liligaon do ponong id soliwan di tolig di bandar. 16 Om boros ka di Rahab, “Pakayaai no dokoyu do hilo'd konulu-nuluan om a' kou i' osolowot di piro-piro o susuhuon di raja'. Om lumisok kou nod hilo' do solinaid do tolu o tadau, do gisom id ongkoguli' ngai' i susuhuon di raja'ddi, om mamanau kou nogindo kawagu,” ka. 17 Om boros ka di duwo tulun diri dot id di Rahab, “Oo, om sinuhu' nu iyahai'ddi do mamatos; om bayaanon i' bo dahai i batos diri. 18 Om soira' nopondo do ngoyon dahai songodo' iti pomogunan dokoyu, om pokogoson no iti tali dot aragang do hiti'd liligaon do pouluhan nu dahai. Om angatan no i tapa' om tina' nu, om i tongotobpinai nu om koinsanai di koworisan do tapa' nu do hiti'd walai nu. 19 Ondung haro o sumoliwan diyolo' do mantad hiti'd walai nu, om apatai noo, om okon no ko' iyahai o sosolon, tu' diyolo' nod sala'. Nga' ondung haro ot orualan di hiti'd suang do walai, om iyahai no o monongkoilo. 20 Nga' ondung popinsunudon nu do tulun do suwai iti winonsoi dahai om a' no iyahai akagasan di nakabatos dahai dot id diya',” ka diyolo'. 21 Om kookunai nod i Rahab i pinibatasan diyolo'ddi om suhuo' noddi dau iyolo' do mamanau. Om kapamanau poddi iyolo' om pokogoso' no dau i tali dot aragang do hiri'd liligaon. 22 Om ongoi noddi lisok do hiri'd konulu-nuluan i duwo o tulun do gomponoluku'ddi. Om pingihumai no iyolo' di piro-piro o susuhuon di raja' do hiri'd pointongkop di watas do solinaid do tolu o tadau, nga' a' i' diyolo' nokito i gomponoluku'ddi. Om poguliai ngai' noddi di susuhuon di raja' do hilo'd Yorikou. 23 Om ruhuk nogiddi i duwo o gomponoluku'ddi do mantad hiri'd konulu-nuluan. Om soborong no iyolo' di bawang do pinogulian do hiri'd di Yosua. Om sunudai no diyolo' i Yosua do koinsanai di nosiliu dot id diyolo'. 24 Om boros kaddi diyolo', “Oilaan no kopio dahai do tahakon do Tuhan dati' o koinsanai di pomogunan diri. Tu' oinsanan nopo i tulun do hilo' do moddosi dati',” ka.
Suminoborong i Tulun dot Israil di Bawang do Yordan
1 Om osuab poddi di kosuabon kawagu om tongkiadai no di Yosua om koinsanai di tulun dot Israil i kokiiman do hilo'd Sitim om ongoi no iyolo' do hiri'd tisan di Bawang do Yordan. Om powonsoyo' no diyolo' o kiim diyolo'd hiri. Om hiri-hiri noddi iyolo' do minomukiim do gisom do norikot o maso do kasabarangan diyolo' di bawang. 2 Om katalib poddi o tolu tadau, om pamanau ngai' no i boyoon diyolo' do tuminongkop di kokiiman diyolo'. 3 Om boros ka di tongoboyoon diri dot id tulun dot Israil, “Soira' nopo dot okito dokoyu i piro-piro ot imam do manaan di Kaban do Tumpongo'd Tuhan, i Kinorohingan toko', om mamanau ngai' kou no do mantad id kinoiyonon dokoyu om tumanud nondo diyolo'. 4 Tu' a' kou po insan koongoi do hiti om iyolo' no o momoyo' dokoyu dot id tindalanon. Nga' kada' kou insomok kopio di Kaban do Tumpongo, nga' mositi' no do songkilomito o kosoduwo' dokoyu do mantad diri do hiri'd tohuri,” ka diyolo'. 5 Om boro-boros no i Yosua dot id koinsanai di tulun dot Israil do poingkaa, “Lidangan no dokoyu o tinan dokoyu tu' suab nopondo om momonsoi o Tuhan do koimayaan dot id pogialatan dokoyu,” ka. 6 Om suhuo' noddi di Yosua i piro-piro ot imam do sumaan di Kaban do Tumpongo om mamanau dot id gulu di tulun dot ogumu'. Om wonsoyo' no diyolo' o miagal diri. 7 Om boros kad Tuhan dot id di Yosua, “Mantad nod baino' do silihon ku iya' do tulun dit abantug, gisom dot oinsanan nopondo o tulun dot Israil do momusou diya'. Om oilaan diyolo' do moyo-woyo' oku diya' do miagal di minomoyo' oku di Musa. 8 Soira' nopod korikot do hiri'd bawang i piro-piro ot imam di kisinaan di Kaban do Tumpongo, om suhuon no iyolo' do tumabung di waig om mingkakat nopondod hiri'd tisan di bawang,” ka. 9 Om boros ka di Yosua dot id tulun dit ogumu'ddi, “Kainou'd hiti, om mokinongou i' do poboroson do Tuhan, i Kinorohingan toko'. 10 Om soira' nopo do mongoi kou sangod om atantu' no dot uyungon dau i tulun do Kanaan, om Hit, om Howi, om Poris, om Girgasi, om Amori om Yobus. Om oilaan indo dokoyu do hiti'd pogialatan dokoyu o Kinorohingan di poimpasi do kokito kou do koimayaan do wonsoyon dau, 11 do posoborongon i Kaban do Tumpongo do Tuhan di Bawang do Yordan do mogulu dokoyu. 12 Om pomili' kou no do hopod om duwo o tulun --- songulun o mantad id pointikid-tikid do payat dot Israil. 13 Soira' nopondo do katabung do hiri'd waig o gakod di piro-piro ot imam di kisinaan di Kaban do Tumpongo'd Tuhan, i Tuhan do koinsanai'dti pomogunan, om owokok nondo i bawang. Om tumimung nondo i waig dot id iso' o koiyonon,” ka dau. 14-15 Tontok nopoddi nga' dongmongomot, om koubasanan no do lumuyud kasai' i Bawang do Yordan. Om tontok noddi do tuminongkiad i tulun dot Israil do kinoiyonon di pinomukiiman diyolo'; tu' sumoborong noddi iyolo' di Bawang do Yordan. Om iri no i piro-piro ot imam di kisinaan di Kaban do Tumpongo o minogulu di tulun dot ogumu' do minamanau. Om maha' di nakatabung o gakod di piro-piro ot imam do hiri'd waig, 16-17 om kowokok no i bawang. Iri nopo waig nga' notimung do ponong hiri'd sarayo do hilo'd Adam; it iso' o bandar dot id sampaping do bandar do Sartan. Nga' iri nopo bawang di hiri'd sawa', i koluyung do hiri'd Rahat do Napatai om narasak no kopio. Om nokosoborong iddi i tulun dot Israil do hiri'd hapak do Yorikou. Om solinaid nopo diyolo' do manau-panau do hiri'd kinarasakan di waig om songingkakat ngai' po it imam di kisinaan di Kaban do Tumpongo do hiri'd tanga-tanga' di bawang do narasak gisom do nokosoborong ngai' i tulun dot Israil.
Hopod om Duwo Watu do Kopomuhandaman do Pinoudong
1 Kosoborong ngai' poddi di Bawang do Yordan o koinsanai di tulun dot Israil om boro-boros nogi' o Tuhan dot id di Yosua do poingkaa, 2 “Pomili' no do hopod om duwo o tulun do mantad id bansa' diti; do soroiso-iso' o tulun do mantad id pointikid-tikid do payat. 3 Om suhuon nondo iyolo' do manganu do hopod om duwo o watu do mantad hilo'd tanga' do Bawang do Yordan, i hiri'd ningkokoton di piro-piro ot imam. Om suhuon no iyolo' do manaan di watu om popoiliu'ddi do hiri'd pomukiiman dokoyu do totuong do baino',” ka. 4 Om lohowo' noddi di Yosua i hopod om duwo o tulun do nopili' dau. 5 Boros ka di Yosua dot id diyolo', “Ongoi kou no do hilo'd bawang. Om mogulu nopo di Kaban do Tumpongo'd Tuhan, i Kinorohingan toko'. Om tumikid kou no do sumaan do watu do soroisaan do watu o pointikid-tikid di payat. 6 Iri nopo watu'ddi nga' poposorou do tulun dot Israil di winonsoi do Tuhan. Om koimbagu nopondo, di muhot o tangaanak dokoyu do komoyon di watu, 7 om sunudan no dokoyu iyolo' dot a' luminuyung i Bawang do Yordan do tontok di sinaan do suminoborong i Kaban do Tumpongo'd Tuhan. Om iri no watu o sumiliu do poposorou do tulun dot Israil di nosiliu'd hiti,” ka. 8 Om wonsoyo' noddi di tongoulun diri i pinonuhuan di Yosua do tumanud di pinonuhuan do Tuhan dot id dau. Om panganu no iyolo' do hopod om duwo o watu do mantad hiri'd tanga' di Bawang do Yordan. Om soroisaan do watu o pointikid-tikid di payat dot Israil. Om igitai no diyolo' i watu do hiri'd pinomukiiman diyolo' om poiliho' noddi diyolo' do hiri. 9 Om pogitimpak-timpako' noddi di Yosua o hopod om duwo o watu do hiri'd ningkokoton di piro-piro ot imam di kisinaan di Kaban do Tumpongo do hiri'd tanga' di Bawang do Yordan. (Om hino po kasai' i watu di pinogitimpak-timpak diri do gisom do baino'.) 10 Om songingkakat poddi kasai' i piro-piro ot imam do hiri'd tanga' di Bawang do Yordan do gisom do nongowonsoi ngai' di tulun dot Israil i pinonuhuan do Tuhan dot id di Yosua. Om koinsanai'dti nga' miontok ngai' i' di pinonuhuan di Musa dot id di Yosua. Om angarau-arau ngai' nopoddi i tulun dot Israil do suminoborong di bawang. 11-13 Om iri no payat do Rubin, om payat do Gad om i songintanga' di payat do Manasi, i nongkosodia' no do mongoi sangod, o minogulu di payat dot Israil do suwai do suminoborong di bawang, tu' iyo noddi o pinonuhuan di Musa. Om woyoo' nod Tuhan it apat nohopod noribu o tulun di nokosodia' no do sumangod diri do suminoborong om minongoi'd hiri'd tana' dot apatau do hilo'd somok do Yorikou. Om kosoborong ngai' poddi i tulun dot Israil om pogulu no diyolo' do mamanau i piro-piro ot imam di kisinaan di Kaban do Tumpongo'd Tuhan. 14 Iri nopo winonsoi'd Tuhan do tadau'ddi nga' minongodsuur di tulun dot Israil do momusou kopio di Yosua do miagal do pomusou do tulun dot abantug. Om pusohon kasai' iddi do tulun dot Israil i Yosua do solinaid dau do poimpasi, do miagal di pinomusou diyolo' di Musa. 15 Om suhuo' nod Tuhan i Yosua 16 do momisunud di piro-piro ot imam di kisinaan di Kaban do Tumpongo do tumindal do mantad hiri'd Bawang do Yordan. 17 Om wonsoyo' no di Yosua o miagal di pinonuhuan do Tuhan dot id dau. 18 Om kotindal ngai' poddi it imam di suminaan di Kaban do Tumpongo'd Tuhan om luyung no kawagu i bawang om luminuyud kawagu do miagal di timpuun i'. 19 Tontok di tadau'd kohopod do tulan do koiso' om soborong no i tulun dot Israil di Bawang do Yordan. Om pomukiim no iyolo' do hilo'd kinoiyonon di roitan do Gilgal, i ponong id koulayon do mantad id Yorikou. 20 Om hilo' no i Yosua do pinopogitimpak-timpak di hopod om duwo o watu di nanu do mantad hiri'd Bawang do Yordan. 21 Om boros ka di Yosua dot id tulun dot Israil, “Muhot nopondo i tangaanak dokoyu do sumonu' do komoyon diti watu, 22 om sunudan no iyolo' do minokok i Bawang do Yordan do tontok di suminoborong o tulun dot Israil di bawang, om otuu nopo i tana' do winayaan diyolo'. 23 Om sunudan no iyolo' do rinasak do Tuhan, i Kinorohingan toko', i Bawang do Yordan gisom do nokosoborong toko' iddi; do miagal di minamarasak o Tuhan di Rahat dot Aragang om nokosoborong iddi iyahai. 24 Om iri nondo i nongowonsoi'd Tuhan diri o koilo-ilo ngai' do bansa'd tulun do hiti'd pomogunan do kogoyoo' do sinundu'd Tuhan. Om momusou indo kasai' iyolo' do Tuhan, i Kinorohingan toko' do gisom dot alaid,” ka dau.
1 Koinsanai di raja' do tulun dot Amori, i ponong id kotonobon do mantad di Bawang do Yordan, om koinsanai di raja' do Kanaan do poingompus di Rahat do Tanga', nga' nongkorongou ngai' no do winokok do Tuhan i Bawang do Yordan do gisom do nokosoborong ngai' i tulun dot Israil. Om kongooris tomod noddi di tulun dot Israil i tongoraja'ddi.
Minonunat do Hilo'd Gilgal
2 Om boro-boros noddi o Tuhan dot id di Yosua do poingkaa, “Manarom no do watu do maan do panakapais om sunatan no o tulun dot Israil,” ka. 3 Om wonsoyo' no di Yosua i pinonuhuan do Tuhan dot id dau, om sunatai no dau i tulun dot Israil do hilo'd kinoiyonon di pinungaranan do Nunu-Nulu do Ponunatan. 4-6 Winonsoi pogi' di Yosua o miagal diri nga' tontok nopo di suminoliwan i' i tulun dot Israil do mantad hilo'd Masir om nongosunatan ngai' no i tongokusai diyolo'. Nga' daamot nopo di minghombo iyolo' do hilo'd tana' do kowotuan do solinaid dot apat nohopod o toun, om aiso' no o tangaanak diyolo' do tongokusai do nosunatan. Om koinsanai di tongokusai di nosukup o tumur dot onuon do soudor di soliwan i' iyolo' do mantad hilo'd Masir nga' nangapatai no di motingkaayi' ot apat nohopod o toun, tu' a' iyolo' tuminanud do boros do Tuhan. Om kawagu po nga' nokosumpa' mantad no o Tuhan dot a' popokito diyolo' di pomogunan dot osimbayan om it oluhub o tana', i nakabatos mantad dau dot id taki-aki diyolo'. 7 Iri nopo tangaanak do tongokusai di tulun di nangapatai noddi om aiso' i' o nongosunatan di solinaid diyolo' do minghombo do hiri'd tana' do kowotuan. Om iyolo' no, i sukodwagu o sinunatan di Yosua. 8 Kosunatai ngai' poddi iyolo', om undorong no iyolo' do hiri'd kokiiman do gisom do nolingos i sinunatan. 9 Om boro-boros no o Tuhan dot id di Yosua, “Tadau nod baino' do tinanus ku i tingayam dokoyu do nosiliu do turipon do hilo'd Masir,” ka dau. Iri no o kinopomungaranan do kinoiyonon diri do Gilgal do gisom do baino'. 10 Tontok nopo di poundorong iyolo' do hilo'd Gilgal, i tana' dot apatau dot id somok do Yorikou, om minamaramai iyolo' do Paska di sosodopon do tadau'd kohopod om apat do tulan diri. 11 Tadau noddi kawagu om pangakan no iyolo' di taakanon do hilo'd Kanaan, iri no i gandum do ginowi om roti dit a' rinalatan do pangambang. Om diri nogindo do minangakan iyolo' do tua' do totonomon do hiri'd pomogunan diri. 12 Om tingkod noddi do rumikot o manna do mantad hilo'd tawan, om a' noddi mangakan o tulun dot Israil di manna. Om mantad nod tadau'ddi dot i tua-ua' di tanom-tanom do hiri'd pomogunan do Kanaan ot akanon diyolo'.
I Yosua om i Tulun di Kigayang
13 Tontok dit osomok no i Yosua do hilo'd Yorikou om sigog id kokito dau o songulun o kusai do poingkakat do hiri'd toguang do kiinigit do gayang. Om insomok no i Yosua do mikuwo'd minuhot do poingkaa, “Soudor ko dahai ko' pisangod ko?” ka dau. 14 Om boros ka di tulun do suminimbar, “Okon oku i' ko' soudor dokoyu om okon oku ko' pisangod. Iyoho' nopodti om boyoon do soudor do Tuhan,” ka dau. Om otud noddi i Yosua do tuminuku' dot id tulun diri. Om boro-boros no i Yosua do poingkaa, “Iyoho' no o susuhuon nu, oi Tuan. Nunu o ponuhuan nu doho', oi Tuan?” ka dau. 15 Om boros ka di boyoon do soudor do Tuhan dot id di Yosua, “Iduwo' ino kasut nu tu' iti nopo kinoingkokoton nu om tana' dit olidang,” ka dau. Om iduwo' noddi di Yosua i kasut dau.
Naala' o Bandar do Yorikou
1 Iri nopo wawayaan do sumuang di bandar do Yorikou nga' ogirot tomod o pinonobon om haro po o madtamong do hiri tu' mada' do haro o kosuang do tulun dot Israil. Om aiso' no o songulun piya do kosuang ko' kosoliwan po di bandar diri. 2 Om boros kad Tuhan dot id di Yosua, “Patahakon ngai' ku dot id diya' o bandar do Yorikou om i raja' do hilo', om koinsanai di soudor diyolo' di gunsiou. 3 Om mamanau kou no do tumutuk di bandar, dot iyokoyu ngai' di soudor nu dot insan do sangadau, do solinaid dot onom o tadau. 4 Om mamanau nopo dot id gulu-gulu di Kaban do Tumpongo om turu' ot imam dit otikid do torumpit. Om tadau nopod koturu' om tumutuk kou no di bandar do miwoyo' di piro-piro o soudor nu dot inturu' kotutuk, om iri ngai' no it imam om popinguni di torumpit do maso'ddi. 5 Om owonsoi nopondo o miagal diri om pounion nondo dit imam i torumpit dot oloyong o popouni. Om orongou po dokoyu o tuni'ddi om mamangkis ngai' nogindo dot opuhod i tongokusai. Om humaba' nondo i tolig do bandar diri. Om maso noddi do sumuang ngai' di bandar i soudor nu,” ka dau. 6 Om lohowo' ngai' noddi di Yosua it imam om boro-boros no iyau diyolo' do poingkaa, “Ongoyo' dokoyu i Kaban do Tumpongo om mamanau i' o turu' dokoyu do hiri'd gulu-gulu di Kaban do Tumpongo do mikuwo'd popouni di torumpit,” ka. 7 Om boros kaddi di Yosua dot id tongosoudor dau, “Pamanau kou do mongoi tutuk dilo bandar. Om iri nopo i tongosoudor dit ongkirapo-rapo om mamanau dot id gulu-gulu di Kaban do Tumpongo do Tuhan,” ka. 8-9 Om pamanau ngai' no i soudor di madtamong do hiri'd gulu dot id gulu- gulu di piro-piro ot imam di popouni di torumpit; om susuhut ngai' nogiddi diyolo' it imam di kisinaan di Kaban do Tumpongo, om susuhut no i tongosoudor di madtamong dot id tohuri. 10 Om sunudai ngai' noddi di Yosua i soudor dau dot a' mamangkis om a' momoros dot ongoiso' piya o boros dot a' po dau iyolo' suhuon do mamangkis. 11 Om suhuo' noddi di Yosua i piro-piro o tulun diri do tumutuk di bandar diri dot insan kotutuk do mikuwo'd saanon i Kaban do Tumpongo, om pogulian nondo diyolo' do hiri'd kokiiman. Om hiri id kokiiman o todopon diyolo' do dongotuong. 12-13 Tadau noddi kawagu, om suab no i Yosua do tuminungag. Om ongoi ngai' no i soudor om it imam tutuk di bandar diri do koinduwo no do miagal dit id gulu o koulud-uludo' do mamanau: Id gulu nopo kopio om i tongosoudor di madtamong dot id gulu; om iri nogindo i turu' ot imam di popinguni di torumpit; om sumusuhut nogindo i tongoimam di kisinaan di Kaban do Tumpongo, om hiri nopondod tohuri om i tongosoudor di madtamong dot id tohuri. Om solinaid nopo diyolo' do manau-panau om popingunion nopo i torumpit. 14 Om tontok no di tadau'd koduwo'ddi do minongoi iyolo' tutuk di bandar diri dot insan kotutuk om poguliai no diyolo' do hiri'd kokiiman. Om iyo noddi o winonsoi diyolo' do pointikid-tikid do tadau do solinaid dot onom o tadau. 15 Om korikot noddi i koturu'd tadau om tungag no iyolo' dit osuab po, di mulai nogi' o tadau. Om ongoi no iyolo' tutuk di bandar do Yorikou. Om miagal kasai' iddi o kowoyo-woyoo' diyolo' do tuminutuk, nga' tadau nopoddi om inturu' iyolo' tutuk di bandar. 16 Om tontok nopo di kointuru' diyolo' do tuminutuk, di nokouni di piro-piro ot imam i torumpit, om boro-boros noddi i Yosua di soudor dau do poingkaa, “Pamangkis kou no! Tu' nakatahak nod Tuhan iti bandar dot id dati'! 17 Raagon ngai' nopo dokoyu o suang diti bandar. Om iti bandar nga' raagon nogi' do maan do porsombahan dot id Tuhan. I Rahab poo, i tondu' do sundal diri, o posion dokoyu om koinsanai di sompiiyon dau, tu' minongintirung i' iyau di gomponoluku' toko'. 18 Kada' kou panganu do nunu nopo it apatut do raagon. Tu' ondung manganu kou'ddi om poporikot kou no do kosusaan dot id kokiiman do tulun dot Israil. 19 Nga' iri nopo i winonsoi do mantad id pirok, om tamas, om tambaga' om basi' om mositi' no do posuwai-suwayon ngai' om potobilangon do maan do don Tuhan. Om mositi' nod posuangon ngai' iri dot id poiiyanan do dapu' di don Tuhan,” ka dau. 20 Om pounio' noddi di piro-piro ot imam i torumpit. Om korongou poddi di tulun dot Israil iri om pamangkis no iyolo' dot opuhod tomod, om kahaba' noddi i tolig di bandar do Yorikou. Om takad ngai' noddi di nulu-nulu i soudor dot Israil om suang ngai' no iyolo' di bandar do Yorikou, om kosolod noddi diyolo' i bandar diri. 21 Om patayo' ngai' noddi diyolo' o koinsanai di hiri'd suang di bandar, dot i tongokusai om i tongoondu', om i tongomulok po om i tongomolohing no, do gayang o pinamatai diyolo'. Om pinatai ngai' nogi' diyolo' i sapi', om i dumba', om i kaladai. 22 Om boros kaddi di Yosua dot id duwo o gomponoluku' di gulu poddi, “Ongoi kou no do hilo'd walai di tondu' do sundal diri om angatan no iyau om i sompiiyon dau do sumoliwan do miagal di nakabatos mantad dokoyu dot id dau,” ka. 23 Om ongoi noddi iyolo' do hiri om angatai no diyolo' i Rahab do sumoliwan do miwoyo' di tina', om tapa', om tongotobpinai dau, om koinsanai di sompiiyon dau. Om angatai ngai' no diyolo' o koinsanai di sompiiyon di Rahab om iri ngai' nogi' i susuhuon dau do hiri'd kinoiyonon dit aiso' o ligogon, it id somok do kokiiman do tulun dot Israil. 24 Om tutudai no di piro-piro o soudor dot Israil i bandar diri do gisom do nouu. Iri po i tamas, om pirok, om tambaga' om basi', ot a' diyolo' rinaag. Om pinosuang diyolo' iri do hiri'd poiiyanan di dapu' do don Tuhan. 25 Nga' pinasi i' di Yosua i Rahab, i tondu' do sundal diri, om koinsanai di sompiiyon dau tu' minongintirung i' iyau di duwo o gomponoluku', i sinuhu' di Yosua do minongoi ponoluku' di bandar do Yorikou. (Om iri nopo i sinakagon di Rahab nga' hilo' kasai' pod Israil do gisom do baino'.) 26 Om tontok noddi do minomopol i Yosua do poingkaa, “Isai nopo o mumbal do momonsoi kawagu do bandar do Yorikou om usungon no iyau do Tuhan. Isai nopo o popoiliu do watu do poimpahan di bandar diri om atagakan no do tanak dau dit id dotuo; isai nopo o momonsoi di wawayaan dot agayo di bandar diri om atagakan no do tanak dau dit id domulok,” ka. 27 Om winoyo' kasai' id Tuhan i Yosua om abantug diri i Yosua dot id pointongkop do pomogunan diri.
Dusa di Akan
1 Nga' a' i' o tulun dot Israil tuminanud di boros do Tuhan di minogodu do manganu do nunu nopo it apatut do raagon. Haro o songulun o kusai dot i Akan o ngaran dot a' tuminanud do boros diri, gisom do tuminogod diri o Tuhan dot id tulun dot Israil. (Ngaran nopo do tapa' di Akan om i Karmi, om taki no dau om i Sabdi, i mantad id pinuruan do sompiiyon di Sira, it id suang do payat di Yohuda.) 2 Om suhuo' no di Yosua o piro-piro o tulun do mantad hilo'd Yorikou do mongoi do hilo'd bandar dot Ai. Ai nopo om iso' o bandar di ponong id koulayon do mantad id Baitol, it id somok do Bait-Awon. Om sinuhu' dau iyolo' do mongoi pogontong do pomogunan diri. Om kowonsoi poddi diyolo' i pinonuhuan diri, 3 om uli' no iyolo' do minongoi solowot di Yosua, om boros ka diyolo', “A' i' minog do mongoi ngai' toko' panangod di bandar diri. Duwo nopo ko' tolu noribu o tulun nga' ula' no. A' i' minog do mongoi ngai' sangod o soudor tu' bandar nopod Ai om okooro',” ka diyolo'. 4 Om tolu noddi noribu o tulun dot Israil do minongoi panangod di bandar diri. Nga' naala' iddi iyolo'. 5 Om gusao' noddi di tulun dot Ai i tulun dot Israil do mantad hiri'd wawayaan di bandar dot Ai, gisom do hiri nod sodu' kopio. Om haro i' doti' o tolu nohopod om onom o soudor do tulun dot Israil do pinatai do tulun dot Ai do hiri'd guas di nulu-nulu. Om moddosi diri om ongooris i tulun dot Israil. 6 Om hurako' noddi di Yosua o rasuk dau do natatangaban. Om otud no iyau dot id toguang di Kaban do Tumpongo'd Tuhan. Om iri ngai' nogi' i boyoon do tulun dot Israil nga' minotud i' do hiri do gisom do nasadapan. Om naraban diyolo' do pupuk o tulu diyolo' do popointalang dot adalaan tomod iyolo' do tumongob. 7 Om boros kaddi di Yosua dot id Tuhan, “Oi Kinorohingan, i Tuhan ku! Nokuro tu' winoyo' nu iyahai do gisom do nokosoborong di Bawang do Yordan? Patahakon nu tuu iyahai dot id longon do tulun dot Amori do gisom nondo dot angapatai iyahai? Nokuro tu' a' nu iyahai pinologos do momogun-mogun do hilo'd soborong do Bawang do Yordan? 8 Nunu poddi o milo ku'd poboroson do baino' tu' naala' nod pisangod o tulun dot Israil, oi Tuhan? 9 Kongorongou nondo o tulun do Kanaan om koinsanai di tulun do hiti'd pomogunan di nosiliu'ddi om ngoyon nondo iyahai diyolo' songodo' om patayon ngai' nondo iyahai diyolo'! Nunu pondo o wonsoyon nu om suahon kasai' ko i'?” ka dau. 10 Om boros kad Tuhan dot id di Yosua, “Ingkakat no! Kada' otud do hino'd tana' dot iyo kopio'ndo! 11 Nokowonsoi nod dusa o tulun dot Israil! Tu' a' iyolo' tuminorodok dot id batos dahai diyolo'. Tu' minanganu iyolo' do wookon di dapu' dit apatut daa do raagon. Om minanakau iyolo' di dapu' om minongudut po. Pinolisok diyolo' iri dot id rolot di dapu' diyolo'. 12 Om iri no ot a' nakasaap-saap di tulun dot Israil do pisangod diyolo'. Tu' iyolo' nga' nohukuman no do kapatayon. Om a' oku noddi mananud dokoyu ondung a' no dokoyu raagon i dapu' dit a' daa apatut dot onuon diri. 13 Ingkakat no, oi Yosua! Om lidangan no o koinsanai dilo tulun dot Israil. Om suhuon no iyolo' do tumimbaba' doho' do suab tu' moro-boros oku, iyoho' i Tuhan, i Kinorohingan dot Israil, dot id diyolo' do poingkaa, ‘Oi tulun dot Israil, haro dot id dokoyu o wookon di dapu' dit apatut do raagon do tumanud di pinonuhuan ku! Om a' kou i' moti' kaala' do pisangod dokoyu ondung a' po dokoyu kataam i dapu'ddi,’ kangku nondo. 14 Iyo nopoddi, om sunudan no iyolo' do kosuabon nopod suab om sorisidon ku'd mongilo o pointikid-tikid do payat dot Israil. Ondung otuduk ku ot iso' o payat om mositi' no do tumimbaba' doho' o koinsanai di pinuruan do sompiiyon dot id suang do payat diri. Ondung otuduk ku ot iso' o pinuruan do sompiiyon, om mositi' no do tumimbaba' doho' o koinsanai di sompiiyon dot id suang do pinuruan diri. Ondung otuduk ku ot iso' o sompiiyon om mositi' no do tumimbaba' doho' o pointikid-tikid do tulun dot id suang do sompiiyon diri. 15 Om iri nopo tulun dit otuduk om oilaan no do pinopoopi' di dapu' di pogoduhan diri om mositi' nod tutudan nopo do miyau do miwoyo' di sompiiyon dau om koinsanai di dau'd songonuon tu' iyau no o minongintingayam kopio do tulun dot Israil om tuminolibamban iyau di batos,” ka dau. 16 Om osuab poddi di kosuabon kawagu om ngoyo' no di Yosua potimbabao' do Kinorohingan i tulun dot Israil. Om potimbabao' no dau o pointikid-tikid di payat dot Israil om koontok no o payat do Yohuda. 17 Om potimbabao' no di Yosua o pointikid-tikid di pinuruan do sompiiyon di payat do Yohuda. Om koontok no o pinuruan do sompiiyon di Sira. Om potimbabao' no dau o pointikid-tikid do sompiiyon dit id suang do pinuruan do sompiiyon di Sira om koontok no i sompiiyon di Sabdi. 18 Om ngoyo' noddi di Yosua potimbabao' o pointikid-tikid do tulun dit id suang do sompiiyon di Sabdi, om koontok no i Akan. Iyau nopo nga' tanak di Karmi, om manangaki di Sabdi. 19 Om boros ka di Yosua dot id di Akan, “Oi tanak ku, posunudo' ngai' no do dinondo i nongowonsoi nu dot id toguang do Tuhan, i Kinorohingan dot Israil. Om kada' no popolisok do nunu nopo dot id doho',” ka dau. 20 Om boros ka di Akan do suminimbar, “Otopot no do nokowonsoi oku do dusa dot id Tuhan, i Kinorohingan dot Israil. Iti no o winonsoi ku: 21 Nokokito oku dot iso' o rasuk dit olumis kopio, i winonsoi do hilo'd Babilonia, do poirolot di dapu' di nangaanu toko'. Om nokokito oku do pirok di duwo i' doti' o kilogram do kawagato' om songwatang o tamas dit awagat i' ko' satanga' kilogram. Om norohian tomod oku'ddi di dapu'ddi om onuo' ku no. Om polobongo' ngai' ku nopori do hiri'd tana' di pinomukiiman ku. Om iri nopo pirok om hiri'd saalom kopio,” ka dau. 22 Om arau-arau nopoddi i Yosua do minonuhu' do piro-piro o tulun do minongoi do hiri'd kiim di Akan. Om kokito no diyolo' do hiri kopio i' o pinamalabangan di dapu' di pinogoduhan do manganu'ddi om i pirok nga' hiri kopio nogid saalom. 23 Om igitai no diyolo' i dapu' do suminoliwan do mantad hiri'd kiim di Akan om patahako' no diyolo' dot id di Yosua om id koinsanai di tulun dot Israil. Om poiliho' no diyolo' iri dot id toguang do Tuhan. 24 Om pootodo' noddi di Yosua om koinsanai di tulun dot Israil do hiri'd rantai di roitan do Rantai do Kosusaan i Akan, om i pirok, om i rasuk om i tamas, om koinsanai di tangaanak dau do tondu' om kusai, om koinsanai di sapi', om i kaladai, om i dumba' dau, om i kiim om koinsanai di dau'd songonuon. 25 Om boros ka di Yosua dot id di Akan, “Nokuro tu' pinoporikot ko do kosusaan dot id dati'! Om baino' nodti om porikatan ko no iya'd Tuhan do kosusaan,” ka dau. Om oinsanan nopoddi i tulun dot Israil do minomodumpau di Akan do watu do gisom do napatai iyau. Om dinumpau diyolo'd watu om sinorob diyolo' i sompiiyon dau om koinsanai di dau'd songonuon. 26 Om pogitimpak-timpako' noddi diyolo' i watu dot ogumu' do hiri'd kinoiyonon diri. Iri nopo watu di pinotimung diri nga' hino kasai' po do gisom do baino'. Iri no o kinopomungaranan do kinoiyonon diri do Rantai do Kosusaan. Om a' noddi otogod o Tuhan.
Rinaag om Sinolod o Bandar dot Ai
1 Om boro-boros no o Tuhan dot id di Yosua do poingkaa, “Potonudo' ngai' no diya' ilo soudor nu om ngoyon no dokoyu songodo' o bandar dot Ai. Om kada' poluhoyo' o ginawo om kada' kooris. Tu' pamanangon ku i' iya' do sumangod di raja' dot Ai; om iri nondo i tulun dau, om i bandar dau, om i pomogunan dau nga' aanu nu i'. 2 Poingkuro nopo o winonsoi nu dot id bandar do Yorikou om i raja' do hilo', om miagal noddi o wonsoyon nu dot id bandar om id raja' dot Ai. Nga' baino' nopo om koino-ino kou i' do manganu do konunu-nunuan om tayam-tayam diyolo'. Om sumodia' kou no do manangod do bandar diri om potigowoon no o pananangod do mantad id dotolikudan di bandar,” ka dau. 3 Om sodia' noddi i Yosua do mongoi do hiri'd bandar dot Ai do miwoyo' di soudor dau. Om pilio' no dau o tolu nohopod noribu o soudor dit ongosiou om suhuo' no dau iyolo' do mamanau do dongotuong. 4 Om boros ka dau dot id diyolo', “Lumisok kou no do hiri'd dotolikudan di bandar, nga' kada' kou insodu' kopio, om mositi' no do posodia' kasai' kou do sumangod. 5 Nga' iyoho' nopo om koinsanai diti tulun ku om minsomok i' di bandar. Om soira' nopondo do gusaon iyahai di tulun dot Ai om pogulian nondo dahai do mogidu' do mantad hiri'd bandar, do miagal di winonsoi toko' dit insan toko' i' ongoi sangod. 6 Om gusaon nondo iyahai diyolo' do gisom do kosoliwan iyolo' di bandar. Nga' osorou nopo daa'ndo diyolo' om a' i' iyahai kasaap do miagal dit id gulu. 7 Om diri nondo do sumoliwan kou do mantad hiri'd linisok dokoyu do mongoi ponolod di bandar diri. Om patahakon indo do Tuhan i Kinorohingan dokoyu, i bandar diri dot id dokoyu. 8 Aala' pondo dokoyu i bandar diri om tutudan no do miagal di pinonuhuan do Tuhan. Iri no ot isuhu' ku dokoyu,” ka dau. 9 Om suhuo' noddi di Yosua iyolo' do mamanau om mandad do hiri'd lisokon diyolo', i ponong id kotonobon do mantad id bandar dot Ai, it id piolitan dot Ai om Baitol. Nga' i Yosua nopo om minodop i' do hiri'd kokiiman do tulun dot Israil. 10 Om osuab poddi di kosuabon, om ngoyo' no di Yosua timungo' i soudor dau. Om woyoo' noddi dau iyolo' om i piro-piro o boyoon dot Israil nga' minomoyo' nogi' di piro-piro o soudor do minongoi do hilo'd Ai. 11 Iri nopo soudor di minoyo' di Yosua nga' kuminaa ponong id wawayaan dot agayo di bandar dot Ai. Om pomukiim no iyolo' do ponong id utara. Om iso' po o kubong dot id piolitan diyolo' di bandar dot Ai. 12 Om suhuo' no dau o limo doti' noribu o soudor do mongoi lisok do ponong id kotonobon do mantad id bandar diri, i hiri'd piolitan dot Ai om Baitol. 13 Om pogitongkiad-kiado' no dau i soudor diri: iri nopo soudor dit ogumu' nga' ponong id utara di bandar, om iri no suwai om ponong id kotonobon. Om i Yosua nopo om minodop i' do hiri'd Rantai do Yordan. 14 Om soira'ddi do nokito di raja' dot Ai i soudor di Yosua, om tilombus nopo iyau do suminodia'. Om ongoi no iyau om i piro-piro o soudor dau do hiri'd Rantai do Yordan, i niyon diyolo' do suminangod do tulun dot Israil dit insan i'. Nga' a' i' dau oilaan do songodon iyau do mantad id tohuri. 15 Om poggidu' noddi i Yosua om i soudor dau do miningala-ala' om pakayaai no do ponong id tana' dit aiso' o sumuni. 16 Om notimung ngai' noddi i tongokusai do hiri'd bandar dot Ai do mongoi pomogusa' di Yosua om i soudor dau. Om musa-gusa' iyolo' di Yosua nga' modu-sodu' iyolo' di bandar. 17 Om koinsanai nopo i tongokusai di hiri'd bandar dot Ai do suminoliwan di bandar do minongoi pomogusa' di tulun dot Israil do gisom do poingiwang tomod nopoddi i bandar om aiso' no o tumamong. 18 Om boros kad Tuhan dot id di Yosua, “Potuduko' ino tandus nu do hilo'd Ai tu' patahakon ku no diya' ilo bandar,” ka. Om wonsoyo' nod i Yosua o miagal diri. 19 Om koinsawat poddi di Yosua o longon dau, om ingkakat ngai' no i soudor dau di songillisok do minongoi panangod om minonolod do bandar diri, om tutudai nogiddi diyolo' i bandar. 20-21 Om soira'ddi kuminoili i tulun dot Ai om kokito no diyolo' o lisun dot oitom tomod do mininsawat do hilo'd tawan. Om i Yosua om i soudor dau nga' nokokito nogi' di lisun diri om koilaai noddi diyolo' do nosolod no di posukan do soudor do suwai i bandar dot Ai, om poguliai noddi diyolo' om timpuunai no diyolo' do minimpatai i tulun dot Ai. Om aiso' noddi o ralan di tulun dot Ai do mogidu'. 22 Om i tulun dot Israil di hiri'd bandar dot Ai nga' minongoi'ddi uhup do momogusa' di tulun dot Ai, gisom do notutukan diyolo' i tulun dot Ai om koinsanai nopoddi i tulun dot Ai do napatai. Om aiso' no o tongoiso' piya'd tulun do nokopoggidu' om aiso' o napasi, 23 suwai ko' iri po i raja' dot Ai. Om tangkapo' no diyolo' i raja' dot Ai om pootodo' no do hiri'd di Yosua. 24 Om patayo' ngai' nopo di tulun dot Israil i pisangod diyolo' do hiri'd tana' dit aiso' o sumuni; i pinomogusaan diyolo' di pisangod. Om poguliai no diyolo' do hiri'd bandar dot Ai om patayo' no diyolo' o koinsanai di tulun do poingiyon do hiri'd bandar diri. 25-26 Om kapatai ngai' nopo o tulun dot Ai do tadau'ddi --- do hopod om duwo noribu o tongokusai om tongoondu'. Om pointuduk kasai' nopoddi di Yosua i tandus dau do hilo'd Ai om a' po dau pinoinsiriba' o longon dau dit a' po naayi' do mamatai o tulun do hiri. 27 Om igitai no di tulun dot Israil i tayam-tayam om i konunu-nunuan di naanu diyolo' do mantad hiri'd bandar diri. Tu' miagal noddi o pinonuhuan do Tuhan dot id di Yosua. 28 Om tutudai no di Yosua i bandar dot Ai om pologoso' nopoddi do poingraag kasai'. Om poingraag kasai' po i bandar diri do gisom do baino'. 29 Om pogiiso' no dau i rata' di raja' dot Ai dot id iso' o guas do kayu do gisom do nasadapan. Nga' maha' di notonob o tadau om ponuhu' nogi' i Yosua do popolintuhun di rata' om papataam diri do hiri'd ralan di wayaan do sumuang di wawayaan dot agayo do bandar diri. Om rubpuwai nogiddi diyolo'd watu dot ogumu' i rata'ddi. Om hino kasai' pori do gisom do baino'.
Binasa' i Tourat do Hiri'd Nuluhon dot Ibal
30 Om pomonsoi no i Yosua do pananaraban do porsombahan di don Tuhan, i Kinorohingan dot Israil, do hilo'd Nuluhon dot Ibal. 31 Om wonsoyo' no di Yosua i pananaraban do porsombahan diri do tumanud di Tourat di Musa, i susuhuon do Tuhan, dot id tulun dot Israil, do miagal di nokotulis dot id Tourat di Musa do poingkaa, “Iri nopo pananaraban do porsombahan om watu dit a' binabak do pakakas do basi' o wonsoyon,” ka. Om papatahak noddi i tulun dot Israil dot id Tuhan do porsombahan di sorobon om porsombahan do piombolutan do hiri'd pananaraban do porsombahan diri. 32 Om hilo' no i Yosua dot antang-antangan di tulun dot Israil do minanalin di Tourat di pinotulis dot id Buuk di Musa dot id piro-piro o watu diri. 33 Om oinsanan nopoddi i tulun dot Israil om i boyoon diyolo', om i gunsiou om i gompomutus, om iri nogi' i tulun do bansa'd suwai di poingiyon dot id rolot diyolo' do miningkakat do miampaping di Kaban do Tumpongo'd Tuhan om potoguang iyolo' di tongoimam do mantad id payat do Liwi, i mananaan di Kaban do Tumpongo. Om songintanga' nopo di tulun diri om potoguang di Nuluhon do Gorisim, om iri no songintanga' kawagu om potoguang di Nuluhon dot Ibal. Tu' iyo noddi o pinonuhuan di Musa, i susuhuon do Tuhan diri do wonsoyon diyolo' dot orikot i maso do rumamit iyolo' do barakat di pinabatos do Tuhan. 34 Om basao' noddi di Yosua dot opuhod o koinsanai di Tourat diri, do miagal di nongkotulis do hiri'd Buuk do Tourat, om kohompit ngai' no i pamarakat om i pomopol. 35 Om basao' ngai' nopo di Yosua o koinsanai di pinonuhuan di Musa di nongkotulis do hiri'd buuk dot oturan dot id toguang do koinsanai di tulun di songintimung do hiri do kohompit ngai' i tongoondu', om i tangaanak om koinsanai di tulun do bansa'd suwai di poingiyon dot id rolot diyolo'.
Nakalan di Tulun do Gibion i Yosua
1 Iri nopo kinamanangan dot Israil om nongorongou ngai' no do koinsanai di raja' do pointongkop di pomogunan dot id ponong id kotonobon do mantad id Bawang do Yordan, om i hiri'd konuluhanan, om i hiri'd guas do nuluhon, om hiri'd poingompus do tisan do Rahat do Tanga', om gisom do hilo'd Nuluhon do Libanon, i ponong id utara. Om iyolo' nopoddi nga' i raja' do Hit, om Amori, om Kanaan, om Poris, om Howi, om Yobus. 2 Om oinsanan nopoddi i raja'ddi do minogiupakat do mogisosokodung do sumaap di Yosua om i tulun dot Israil. 3 Nga' iri nopo tulun do hilo'd Gibion om i tulun do Howi, om nokorongou no di winonsoi di Yosua do hilo'd bandar do Yorikou om Ai. 4 Om pogipapakat no iyolo' do magakal di Yosua. Om posodia' no iyolo' do kokoriu om posuango' no dot id karung dit angaraat no, om kantung do kulit dit araat no o pinoiyanan do waig dot anggur om pagandaro' noddi diyolo' iri di kaladai. 5 Om pakayan do pinakai diyolo' nga' gansing no. Om kasut diyolo' nga' angaraat no om nompin-ompinan poo. Om iri roti do nigitan diyolo' nga' nokodou no om gorumon poo. 6 Om ongoi no iyolo' solowot di Yosua do hiri'd kokiiman do hilo'd Gilgal. Om boros ka diyolo' dot id di Yosua om id tulun dot Israil, “Iyahai nopodti om mantad id pomogunan dit osodu'. Om orohian iyahai do momonsoi'd pitoruan dot id dokoyu,” ka diyolo'. 7 Nga' boros ka di tulun dot Israil, “Mantad kou i' doti' do hiti'd kasamakan. Om poingkuro'ddi iyahai do monokitaru' dokoyu?” ka diyolo'. 8 Om boros ka diyolo' dot id di Yosua, “Posodia' i' iyahai do momonsoi'd nunu nopo i korohian nu,” ka. Om uhoto' no iyolo' di Yosua, “Isai kopio kou'ndo, om honggo tadon dokoyu?” ka dau. 9 Om boros ka diyolo' do suminimbar, “Iyahai nopodti om mantad id iso' o pomogunan di hilo'd sodu', nga' nokorongou iyahai do pasal do Tuhan, i Kinorohingan, i tukuon dokoyu. Om norongou ngai' no dahai i winonsoi dau do hilo'd Masir, 10 om i winonsoi dau dot id duwo o raja' dot Amori, i hilo'd ponong id koulayon do mantad id Bawang do Yordan: i Sihon, i raja' do Hisbon, om i Og, i raja' do Basan, i poingiyon do hilo'd Astarot. 11 Om suhuo' noddi iyahai di tongoboyoon dahai om koinsanai di tulun do hilo'd pomogunan dahai do mongokoriu do mongoi solowot dokoyu. Sinuhu' iyahai diyolo' do momonsoi'd nunu nopo i korohian dokoyu om momonsoi'd pitoruan dot id dokoyu. 12 Antangai pogi' iti roti do kinokoriu dahai. Tu' tontok nopo di minamanau i' iyahai do mantad hilo'd walai dahai do mongoi solowot dokoyu om alasu' po iti roti. Nga' antangai pogi'ddi do baino'! Nga' okodou po tomod om gorumon no. 13 Om iti kantung do poiyanan dahai'd waig dot anggur, nga' wagu po kopio di sinuangan i' dahai. Nga' intangai pogi'! Nga' nohurak no moti'ddi. Om iti pakayan om iti kasut dahai nga' nagansing no, tu' osodu' kopio i' o pinamanau dahai,” ka diyolo'. 14 Om romito' no di tulun dot Israil i taakanon di tinahak di tulun do Gibion nga' a' i' iyolo' minuhot do Tuhan. 15 Om pomonsoi noddi i Yosua do pitoruan do mogiuulud dot id tulun do Gibion diri om pamatos no iyau dot a' mamatai diyolo'. Om oinsanan nopoddi i boyoon do tulun dot Israil do suminumpa' do tumanud di pinitoruan diri. 16 Om katalib poddi o tolu tadau do mantad di nokopitoruan diyolo', om koilaai nogiddi di tulun dot Israil dot a' i' osodu' o tadon di tongoulun diri. 17 Om pamanau no iyolo' do solinaid do tolu o tadau om korikot no iyolo' do hiri'd bandar di tadon di tulun diri. Tadon nopo di tulun diri nga' hilo'd bandar do Gibion, om Kopira, om Biirot, om Kiriat Yiarim. 18 Nga' a' noddi milo i tulun dot Israil do mamatai diyolo' tu' nokosumpa' ngai' no i boyoon diyolo' dot id tulun diri dot id suang do ngaran do Tuhan, i Kinorohingan dot Israil, dot a' iyolo' mamatai diyolo'. Om sosolon tomod daa'ddi di tulun dot Israil i tongoboyoon diyolo'. 19 Nga' boros ka di tongoboyoon do suminimbar, “Kukuroyon poo. Tu' nokosumpa' no iyahai dot id diyolo' dot id suang do ngaran do Tuhan, i Kinorohingan dot Israil. Om a' toko' noddi milo do momonsoi dot araat dot id diyolo'. 20 Om pologoson toko' nopo iyolo' do poimpasi tu' nokosumpa' no iyahai. Tu' a' nopo nga' hukuman toko' nod Kinorohingan. 21 Pologoson nopo iyolo' do poimpasi, nga' sumiliu no ma iyolo' do monginsiduwon om mananago' dati',” ka diyolo'. Om miagal noddi o nopogibara-barasan di tongoboyoon. 22 Om lohowo' no di Yosua i tulun do Gibion do mongoi solowot dau. Om uhoto' no dau iyolo' do poingkaa, “Nokuro tu' minagakal kou dahai? Hilo'd sodu' o tadon dahai, ka dokoyu om mantad kou i' do hiti'd somok. 23 Iyo nopoddi, tu' minongudut kou, om hukuman kou no moti' do Kinorohingan. A' kou no om i bansa' dokoyu milo dot a' sumiliu do turipon, om monginsiduwon kou nondo om mananago' do hiri'd Walai'd Kinorohingan ku,” ka dau. 24 Om boros ka diyolo' do suminimbar, “Oi Tuan, minomonsoi pogi' iyahai do miagal diri nga' nokorongou no iyahai do nosunudan no kopio'd Tuhan, i Kinorohingan nu i Musa, i susuhuon dau'ddi, do patahakon do Tuhan o pomogunan diti dot id dokoyu, om patayon dau o koinsanai'd tulun do hiti do tontok do rumikot kou. Om kooris noddi kopio iyahai dokoyu; om moddosi iyahai. Om iri no o kinapamansayan dahai do miagal diri. 25 Nga' baino' nopo om id suang no iyahai do kuasa' nu. Om wonsoyo' nopo dot id dahai it apatut dot osorou nu,” ka diyolo'. 26 Om nintirungan iddi di Yosua iyolo' om a' dau pinologos i tulun dot Israil do mamatai diyolo'. 27 Nga' siniliu no maddi dau iyolo' do turipon, do monginsiduwon om mananago' di tulun dot Israil om paatod do waig do pakayon do hiri'd pananaraban do porsombahan di don Tuhan. Om gisom do baino' nga' iri kasai' po o buruon diyolo' do hiri'd tiyonon do sumambayang di natantu' mantad do Tuhan.
Naala' o Tulun dot Amori
1 Om korongou noddi i Adonisidik, i raja' do Yorusalim, do naala' no om naraag ngai' di Yosua i suang di bandar dot Ai, om pinatai i raja' dot Ai do miagal di winonsoi di Yosua dot id raja' om id bandar do Yorikou. Om norongou nogi' dau dot iri nopo tulun do Gibion nga' nokopomonsoi no do pitoruan do monokiulud di tulun dot Israil, om poirolot no iyolo' di tulun dot Israil do momogun-mogun. 2 Om ooris tomod diri i tulun do hiri'd Yorusalim tu' iri nopo bandar do Gibion om irad i' di bandar do suwai dit ongkiraja'. Om agayo i' ko' i bandar dot Ai om i tulun do hiri nga' gunsiou ngai' i'. 3 Om ponuhu' noddi i Adonisidik do tulun do mongoi pomisunud di Huham, i raja' do Hibron, om i Piriam, i raja' do Yarmut, om i Yapia, i raja' do Lakis, om i Dobir, i raja' do Iglon, do boros do poingkaa, 4 “Rikot kou no, do mongoi uhup doho' do manangod do Gibion tu' nokopomonsoi no i tulun do hilo' do pitoruan do monokiulud di Yosua om i tulun dot Israil,” ka. 5 Om pogisosokodung noddi i limo o raja' do tulun dot Amori do minongoi sangod om tutukai no diyolo' o Gibion. Iri ngai' nopo i raja'ddi om mantad do hilo'd Yorusalim om Hibron, om Yarmut, om Lakis, om Iglon. 6 Om ngoyo' noddi di tulun do Gibion sunudai i Yosua do hilo'd kokiiman do Gilgal. Boros ka diyolo', “Kada' kopio iyahai tongkiadai! Rikot no do mongoi ponguhup dahai! Posion no iyahai! Tu' koinsanai di raja' do tulun dot Amori, i mantad hilo'd konulu-nuluan om nokopogisosokodung no do manangod dahai!” ka. 7 Om pamanau no i Yosua om koinsanai di soudor dit ongkirapo-rapo do mogiwoyo-woyo' di piro-piro o gunsiou do mantad hilo'd Gilgal do mongoi sangod. 8 Om boro-boros no o Tuhan dot id di Yosua do poingkaa, “Kada' kooris diyolo'. Tu' noonuan ku no iya' do kamanangan. Om aiso' i' o tiso' diyolo' do kasaap diya',” ka. 9 Om kosuabai nopo i Yosua do minamanau do mantad hilo'd Gilgal do kuminaa do hilo'd Gibion. Om a' i' nokoinsan-insan i tulun dot Amori do tontok di sinangod iyolo' di Yosua. 10 Om noris diri do Tuhan o koinsanai di tulun dot Amori do tontok di nokokito iyolo' di soudor dot Israil. Om ogumu' tomod diri o tulun dot Amori do nangapatai do hilo'd Gibion, om iri nopoddi it a' napatai om ginusa' diyolo' do gisom do nokorikot do hiri'd ralan do rumuhuk di nuluhon do hilo'd Bait-Horon om gisom do hilo'd Asika om Makida, i ponong id salatan. 11 Om soira' di minogidu' i tulun dot Amori do mantad id soudor dot Israil do hilo'd Bait-Horon om minaya' iyolo' do hiri'd rantai, it id piolitan do Bait-Horon om Asika. Om otungai no iyolo'd Tuhan do karambatu dit angagayo do mantad hilo'd tawan di solinaid diyolo' do manau-panau do gisom do nokorikot iyolo' do hilo'd Asika. Om ogumu' nogiddi o napatai do nootungan di karambatu ko' mantad di pinatai di tulun dot Israil. 12 Om tontok nod tadau'ddi do nonuan do Tuhan i tulun dot Israil do kamanangan do suminangod di tulun dot Amori, om boro-boros noddi i Yosua dot id Tuhan. Om boros ka di Yosua dot id toguang di tulun dot Israil, “Oi tadau, undorong no dot id hapak do Gibion; Oi tulan, kada' no undaliu dot id hapak do Rantai dot Ayalon,” ka. 13 Om undorong no i tadau, om i tulan nga' a' noddi minundaliu do gisom do naala' do tulun dot Israil i pisangod diyolo'. Iti nopo nga' notulis i' dot id Buuk do Yasar. Om iyo no kopio'ddi o nosiliu tu' minundorong i tadau do hilo'd piintangaan do tawan, om a' tuminonob i tadau do nasangadahan piya. 14 Om a' po insan do haro o miagal diri di gulu, om a' nogi' osiliu kawagu do koimbagu i nosiliu do tontok do tadau'ddi tu' pinohubayaan kopio do Tuhan o pinokianu do tulun. Om minuhup o Tuhan dot Israil do suminangod! 15 Om katalib poddi i pinisangadan diri, om poguliai nogiddi di Yosua om i soudor dau do hilo'd kokiiman do Gilgal.
Tinangkap di Yosua i Limo Raja' dot Amori
16 Nga' iri nopo i limo o raja' dot Amori om nokopoggidu' i' om luminisok dot id iso' o luang do hiri'd nulu-nulu do hilo'd Makida. 17 Om soira' di nabantalan iyolo' do tulun om ngoyo' noddi di tulun sunudai i Yosua di kinoiyonon do linisok diyolo'. 18 Om boros ka di Yosua, “Antaban no do watu dot agayo i kabang do luang diri, om suhuon no o piro-piro o soudor do tumamong do hiri. 19 Nga' iyokoyu nopo om kada' kou no undorong do hiri. Suwai ko' gusaon no dokoyu i pisangod om songodon no iyolo' do mantad hiri'd dohuri diyolo'. Kada' dokoyu pologoso' iyolo' do sumuang di kabandaran diyolo'! Tu' noonuan kou nod Tuhan, i Kinorohingan dokoyu do kamanangan do sumangod diyolo',” ka dau. 20 Om insanai nopoddi di Yosua om i tulun dot Israil i tulun dot Amori do mamatai, nga' haro po o piro-piro tulun di nokosuang do hiri'd bandar om a' iddi napatai. 21 Om poguliai ngai' no di tulun dot Israil do hiri'd di Yosua do hilo'd kokiiman do Makida. Om ongosonong-sonong ngai' i' iyolo'. Om aiso' no tiso' do tulun do hiri'd pomogunan diri do mumbal do momoros do sumaap di tulun dot Israil. 22 Om boros kaddi di Yosua, “Ngoyo' nondo ukabai i luang om pokoyoon do hiti i limo o raja' diti,” ka dau. 23 Om ukabai noddi i luang, om posoliwano' no i raja' do Yorusalim, om Hibron, om Yarmut, om Lakis, om Iglon. 24 Om kaatod ngai' poddi diyolo' i raja' dot id di Yosua, om lohowo' nogiddi di Yosua o koinsanai di tulun dot Israil do mongoi rapou dau. Om suhuo' no dau i boyoon do gunsiou di minoyo' dau do minongoi sangod, do mongulok do liou do koinsanai di raja'ddi. 25 Om boros ka di Yosua dot id boyoon do soudor dau, “Kada' kou no kooris om kada' dokoyu poluhoyo' o ginawo. Pogiroton no dokoyu o ginawo om kumosiou kou no, tu' miagal nodti o wonsoyon do Tuhan dot id koinsanai di pisangod dokoyu,” ka dau. 26 Om patayo' no di Yosua i limo o raja' diri om pogiiso' no o rata' diyolo' dot id limo o guas do kayu do gisom do nasadapan. 27 Nga' di nopoddi tumonob o tadau om ponuhu' no i Yosua do popolintuhun di rata' om pataamon indo do hiri'd luang di linisok di piro-piro o raja'ddi. Om antabai noddi do watu dit agayo o hiri'd kabang di luang diri om hilo' po kasai' i watu'ddi do gisom do baino'.
Minangala' Kawagu i Yosua do Piro-Piro o Watas do Tulun dot Amori
28 Om songodo' no di Yosua o Makida do tadau iddi do gisom do naala' dau. Om pinatai nogi' dau i raja' om koinsanai di tulun do hiri'd bandar diri. Aiso' no o tongoiso' piya di tulun do napasi. Tu' poingkuro nopo i winonsoi dau dot id raja' do bandar do Yorikou om miagal noddi o winonsoi dau dot id raja' do Makida. 29 Om ongoi noddi i Yosua om i soudor dau do hilo'd Libna do mantad hilo'd Makida, om songodo' no diyolo' i bandar do Libna. 30 Om nonuan i' iyolo'd Tuhan do kamanangan do suminangod di bandar diri om i raja' do hiri. A' i' diyolo' pinologos do haro o tongoiso' piya do tulun do nokopoggidu'. Om pinatai nogi' diyolo' o koinsanai di tulun do hiri. Om miagal i' di winonsoi diyolo' dot id raja' do Yorikou o winonsoi diyolo' dot id raja' do hiri. 31 Om mantad no do hilo'd Libna, om pakayaai no di Yosua om i soudor dau do hilo'd Lakis. Om tutukai no diyolo' i bandar diri do minanangod. 32 Tontok di koduwo nod tadau do misangod iyolo' om onuwai no iyolo'd Tuhan do kamanangan do suminangod di hiri'd bandar do Lakis. Om iyo iddi winonsoi diyolo' di hilo'd bandar do Libna o winonsoi diyolo' do hilo'd Lakis tu' a' i' diyolo' pinologos do haro o tongoiso' piya o tulun do kopoggidu'. Om patayo' ngai' nopo diyolo' o koinsanai di tulun do hiri. 33 Om rikot no i Horam, i raja' do Gisir, do hilo'd bandar do Lakis do mongoi daa uhup do sumangod, nga' naala' i' di Yosua iyau om i soudor di Horam. Songulun po nga' aiso' no o nokopoggidu' tu' patayo' ngai' nopo diyolo' i tulun do hiri. 34 Om mantad nod hilo'd Lakis, om pakayaai no di Yosua om i soudor dau do hilo'd Iglon. Om tutukai no diyolo' i bandar diri do minanangod. 35 Om tontok id tadau'ddi do naala' om nosolod diyolo' i bandar diri. Om patayo' ngai' nopo diyolo' o tulun do hiri do miagal di winonsoi diyolo' di hilo'd bandar do Lakis. 36 Om mantad nod hilo'd Iglon, om takad no i Yosua om i soudor dau di konuluhanan do kuminaa do hilo'd bandar do Hibron do minongoi sangod, 37 om nosolod iddi diyolo' i bandar diri. Om patayo' no diyolo' i raja' om koinsanai di tulun do hiri'd bandar diri, om id kabandaran do suwai di hiri'd posorili'. Om raago' nopo kopio dau i bandar diri do miagal di winonsoi dau di hilo'd bandar dot Iglon. Om songulun po nga' aiso' no o napasi. 38 Om poguliai noddi di Yosua om i soudor dau do minongoi panangod di bandar do Dobir. 39 Om songodo' no di Yosua do gisom do naala' dau i raja' om i bandar diri om koinsanai di kabandaran di hiri'd posorili'. Om pinatai nogi' diyolo' o koinsanai di tulun do hiri do miagal di winonsoi di Yosua di hilo'd bandar do Hibron om Libna, om id koinsanai di raja' do hilo', om id bandar do Dobir om i raja' do hiri'd bandar diri. 40 Om iyo noddi i Yosua do minangala' do koinsanai di watas diri, om kohompit nogi' o koinsanai di raja' dot id watas do konulu-nuluan, om i hiri'd tidong di konulu-nuluan di ponong id koulayon, om it id guas do konulu-nuluan di ponong id kotonobon, om iri nogi' i hiri'd tana' dit aiso' o sumuni di ponong id salatan. Iso' pod tulun nga' aiso' no o pinologos dau do minogidu' tu' patayo' ngai' nopo dau, tu' iyo noddi o pinonuhuan do Tuhan, i Kinorohingan dot Israil. 41 Om iri nopo pinisangadan do nongoi di Yosua, dot it iyau o boyoon, om mantad pod hilo'd Kadis Barnia do ponong id salatan om gisom do hilo'd Gasa, it id somok do tisan do rahat, om kohompit no ngai' o koinsanai'd watas do Gusin om gisom do hilo'd Gibion, i ponong id utara. 42 Om kaala' no di Yosua o koinsanai di raja' om pomogunan di porintaon diyolo' dot insan noo ongoi sangod tu' nuhupan i' do Tuhan, i Kinorohingan dot Israil, o tulun dot Israil do suminangod. 43 Om katalib poddi iri, om poguliai no di Yosua om koinsanai di soudor dau do hilo'd kokiiman diyolo' di hilo'd Gilgal.
Naala' di Yosua i Yabin om i Piro-Piro o Raja' do Suminokodung di Yabin
1 Om soira' di nokorongou i Yabin, i raja' do Hasor, di kinamanangan do tulun dot Israil, om ponuhu' no iyau do tulun do minongoi pomisunud di Raja' Yobab, i mantad id bandar do Madon, om koinsanai di raja' do bandar do Simron om Aksap, 2 om koinsanai di raja' do mantad id bandar do ponong id konulu-nuluan di ponong id utara, om it id Rantai do Yordan, i ponong id salatan do mantad id Galilia, om i watas do hiri'd guas do konulu-nuluan, om i watas do hiri'd tisan do rahat dit id somok do Dor. 3 Om minonuhu' nogi' iyau do tulun do mongoi pomisunud di tulun do Kanaan di hilo'd ponong id koulayon om i hilo'd ponong id kotonobon do mantad di Bawang do Yordan; om i tulun dot Amori, om Hit, om Poris; om i tulun do Yobus, i hilo'd watas do konulu-nuluan, om i tulun do Howi, i tulun do hilo'd guas do Nuluhon do Hormon, it id watas do Mispa. 4 Om rikot ngai' no i raja'ddi do miwoyo' do toinsanan di soudor diyolo'. Om miagal pod togis do hilo'd tisan do rahat o kogumuo' diyolo'; om kuda' om korita'-kuda' diyolo' nga' ogumu' nogi' tomod. 5 Om pogiuuhup ngai' nopo i raja'ddi do suminangod do tulun dot Israil. Om timung no iyolo' dot id somok do palu di roitan do Mirom. 6 Om boro-boros no o Tuhan dot id di Yosua do poingkaa, “Kada' kooris diyolo'. Tu' dongiyo'dti nopondod suab, om patayon ngai' ku no iyolo' do mongobi' di tulun dot Israil. Om maso noddi do tipuan ngai' dokoyu i kuda', om tutudan ngai' i korita'-kuda' diyolo',” ka dau. 7 Om rikot no i Yosua om koinsanai di soudor dau do minonigowo do minanangod diyolo' do hilo'd palu do Mirom. 8 Om onuwai nod Tuhan i tulun dot Israil do kamanangan. Om gusao' no diyolo' i pisangod diri do gisom do nokorikot do hilo'd Misripot Maim, i ponong id utara, om hilo'd Sidon, om gisom do nokorikot do hilo'd Rantai do Mispa, i ponong id koulayon. Om songodo' no di tulun dot Israil i pisangod diyolo', do gisom do nangapatai i pisangod. 9 Om tinipuan ngai' di Yosua i kuda' om tinutudan ngai' dau i korita'-kuda' diyolo', do tumanud di pinonuhuan do Tuhan do wonsoyon dau dot id diyolo'. 10-11 Om poguliai noddi di Yosua, om ngoyo' no dau solodo' o bandar do Hasor, om patayo' no dau i raja' do hiri. Maso nopoddi om Hasor no it okoris kopio dot id pogialatan di pomorintaan do hilo'. Om pinatai diyolo' o koinsanai di tulun dot id bandar diri om aiso' no o songulun piya do pinasi. Om i bandar nga' tinutudan i' diyolo'. 12 Om kosolod ngai' no di Yosua i kabandaran, om katangkap dau o koinsanai di raja', om patayo' nogiddi dau do tumanud di pinonuhuan di Musa, i susuhuon do Tuhan diri. 13 Nga' aiso' i' o tinutudan di tulun dot Israil di bandar dit id timpak di poinulu-nulu. Tinutudan nopo di Yosua om Hasor noo. 14 Om nanu ngai' di tulun dot Israil o koinsanai di dapu' om i tayam-tayam do hiri, nga' pinatai ngai' i' diyolo' i tulun do hiri'd bandar diri. Om aiso' no o tongoiso' piya di tulun do pinasi. 15 Koinsanai di pinonuhuan do Tuhan dot id di Musa, i susuhuon dau, nga' pinoboros ngai' nopo di Musa dot id di Yosua. Om wonsoyo' ngai' nopo di Yosua i pinonuhuan diri, om iso' po nga' aiso' no ot a' dau winonsoi.
I Watas do Sinolod di Yosua
16 Nosolod ngai' noddi di Yosua i pomogunan --- i watas do hiri'd konulu-nuluan, om i hiri'd guas do nulu-nulu, i ponong id utara om ponong id salatan, om koinsanai di watas do Gusin om tana' dit aiso' o sumuni di ponong id salatan, om kohompit po i Rantai do Yordan. 17-18 Kogoyoo' nopo di watas diri nga' mantad po di Nuluhon dit Aiso' o Sumuni di ponong id salatan, it id somok dot Idom, om gisom do hilo'd Baal-Gad do ponong id utara, it id Rantai do Libanon, i ponong id salatan do mantad id Nuluhon do Hormon. Om alaid i' kopio i Yosua do minanangod do koinsanai di raja' dot id watas diri do gisom do naala' om nangapatai ngai' dau iyolo'. 19 Iso' po di bandar diri nga' aiso' no o minomonsoi'd pitoruan do monokiulud di tulun dot Israil, suwai ko' iri po i bandar do Gibion, i bandar do tulun do Howi. Iri nopo suwai om naala' ngai' nopo dot id pisangadan. 20 Om pinologos iyolo'd Tuhan do sisaap di tulun dot Israil om angapatai ngai' indo iyolo' om a' iyolo' insianan. Tu' miagal noddi o pinonuhuan do Tuhan dot id di Musa. 21 Om maso nogiddi do pinunso di Yosua i tulun dot Inak, it angagayo koulun, i songingiyon do hilo'd watas do konulu-nuluan --- do hilo'd Hibron, om Dobir, om Anab, om id koinsanai do watas do konulu-nuluan do Yohuda om Israil. Om patayo' ngai' nopo di Yosua iyolo' om rinaag ngai' dau i bandar diyolo'. 22 Om aiso' noddi ot ongoiso' piya do tulun dot Inak do poimpasi do hilo'd pomogunan dot Israil. Nga' haro po o piro-piro diyolo' do hilo'd Gasa, om hilo'd Gat, om hilo'd Asdod. 23 Om naanu ngai' di Yosua o koinsanai di tana', tu' iyo noddi o pinonuhuan do Tuhan dot id di Musa. Om ongkibo' no di Yosua i tana'ddi. Om tikidai no dau do tana' o pointikid-tikid di payat do bansa'd Israil, do maan do diyolo'd tungkusan. Om tingkod noddi iyolo' do sumangod.
Piro-Piro o Raja' do Naala' di Musa
1 Nosolod noddi om nopomogun-mogunan di tulun dot Israil i tana' di ponong id koulayon do mantad id Yordan; do mantad id Rantai dot Arnon om pointakad do hilo'd Rantai do Yordan om gisom do hilo'd Nuluhon do Hormon, i ponong id utara. Om naala' nogi' diyolo' o duwo o raja': 2 iri nopo tiso' om i Sihon, i raja' do tulun dot Amori, i momorinta' do hilo'd Hisbon. Kinoiyonon nopo do pinorinta' dau om songintanga' do watas do Giliad do mantad hilo'd Aroir (it id dompok do Rantai dot Arnon) om i bandar do hiri'd tanga-tanga' di rantai, om gisom do hilo'd Bawang do Yabok, it id piwolitan do watas do tulun dot Amon; 3 om kosuang nogi' o watas di ponong id koulayon do mantad id Yordan do mantad hilo'd Tasik Galilia do poingkaa ponong id salatan om gisom do korikot do hilo'd Bait-Yosimot, i ponong id koulayon do mantad id Rahat do Napatai, gisom do korikot do hilo'd guas do Nuluhon do Pisga. 4 Iri nopo tiso' di raja' di naala' do tulun dot Israil, om i Og, i raja' do pomogunan do Basan. Iyau po o noolu-olu' dot id pogialatan di tulun do Ropaim. Iyau nopo om momorinta' do hilo'd Astarot om hilo'd Idroi. 5 Kosuang nopod pomorintaan dau om Nuluhon do Hormon, om Salka, om oinsanan o Basan, do gisom do korikot do hilo'd watas do Gosur om Maaka, om kohompit nogi' o songintanga' di watas do Giliad, do gisom do hilo'd watas di porintaon di Raja' Sihon, i mantad id bandar do Hisbon. 6 Iti nopo duwo o raja' diti nga' naala' di Musa om i tulun dot Israil di gulu po. Om pinatahak di Musa, i susuhuon do Tuhan, i tana' di piro-piro o raja'ddi dot id payat do Rubin, om Gad, om songintanga' do payat do Manasi, do maan do diyolo'd songonuon.
Piro-Piro o Raja' do Naala' di Yosua
7 Om naala' di Yosua om i tulun dot Israil o koinsanai do raja' di ponong id kotonobon do mantad id Bawang do Yordan; do mantad hilo'd Baal-Gad, it id Rantai do Libanon, om gisom do korikot do hilo'd Nuluhon dit Aiso' o Sumuni, di ponong id salatan, it id somok dot Idom. Om bohogio' no di Yosua i tana'ddi do pinoikid di payat dot Israil, do maan do diyolo'd songonuon. 8 Iri nopo tana' do binahagi' nga' kohompit no i watas do konulu-nuluan om i watas do kotidangan do ponong id kotonobon, om i Rantai do Yordan, om i kotidangan di konulu-nuluan do hiri, om i kotidangan do ponong id koulayon, om i watas do tana' do kowotuan di ponong id salatan. Iri ngai' nopo watas diri om pinomogunan daa di tulun do Hit, om Amori, om Kanaan, om Poris, om Howi om Yobus. 9-24 Kogumuon nopo do koinsanai di raja' do naala' om tolu nohopod om iso' o tulun, i mantad id piro-piro o bandar diti: bandar do Yorikou, om Ai (it id toning do Baitol), Yorusalim, Hibron, Yarmut, Lakis, Iglon, Gisir, Dobir, Gidir, Horma, Arad, Libna, Adulam, Makida, Baitol, Tapua, Hipir, Apik, Lasaron, Madon, Hasor, Simron Miron, Aksap, Taanak, Mogido, Kidis, Yokniam (it id toning do Nuluhon do Karmol), Dor (it id tisan do rahat) Goyim (i hilo'd Galilia), om Tirsa.
Piro-Piro Watas dit A' po Nosolod
1 Molohing noddi kopio i Yosua. Om boro-boros no o Tuhan dot id dau do poingkaa, “Molohing ko noddi nga' ogumu' po o watas di mositi' do ngoyon solodo'. 2 Koinsanai di watas do Pilistin om Gosur, 3 om oinsanan nogi' i watas dot Awi, i poingkaa ponong id salatan. (Iri nopo tana' do mantad id Bawang do Sihor, it id piwolitan do Masir om gisom dot id piwolitan dot Ikron do ponong id utara --- om oinsanan nopo do poinsuang do pomogunan do tulun do Kanaan. Om momorinta' nopodti nga' i raja' do Pilistin di hilo'd Gasa, om Asdod, om Askilon, om Gat om Ikron.) 4 Haro po it apatut do ngoyon solodo': koinsanai do pomogunan do Kanaan om Miara (i pomogunan do tulun do Sidon) gisom do hilo'd Apik, it id piwolitan do watas do tulun dot Amori; 5 om iri nogi' i watas do tulun do Gibal, om koinsanai do watas do Libanon om poingkaa ponong id koulayon do mantad hilo'd Baal-Gad, i ponong id salatan do Nuluhon do Hormon om gisom do korikot do hilo'd ralan di kumaa do hilo'd Hamat. 6 Om kosuang nogi' o koinsanai di watas do tulun do Sidon, i momogun-mogun do hilo'd watas do konuluhanan, it id piolitan do konuluhanan do Libanon om bandar do Misripot Maim. Om uyungon ngai' ku i' iyolo' do ngoyon iyolo' songodo' di tulun dot Israil. Om ongkibon no o tana'ddi om patahakon no di tulun dot Israil do maan do diyolo'd songonuon do miagal di pinonuhuan mantad ku diya'. 7 Om baino' nodti om ongkibon no ilo tana' do patahakon dot id siam o payat dot Israil di suwai, om id songintanga' do payat do Manasi. Om patahakon no dot id diyolo' do maan do diyolo'd songonuon,” ka dau.
Nangkib i Tana' di Ponong id Koulayon do Mantad id Bawang do Yordan
8 Iri nopo payat do Rubin, om Gad om songintanga' do payat do Manasi om nakaanu no do tana' dit id ponong id koulayon, it id soborong do Bawang do Yordan, do pinatahak di Musa, i susuhuon do Tuhan dot id diyolo'. 9 Tana' nopo do naanu diyolo' nga' oinsanan o hilo'd Aroir (it id dompok do Rantai dot Arnon), om i bandar di hiri'd tanga-tanga' di rantai'ddi, om kosuang nogi' i tana' dot apatau do mantad hilo'd Modiba om korikot do hilo'd Dibon. 10 Om poirikot nogi' dot id wolit do pomogunan dot Amon, om kosuang ngai' i piro-piro o bandar dit id suang do pomorintaan di Sihon, i raja' do tulun dot Amori, i nokoumbal do momorinta' do hilo'd Hisbon di gulu po. 11 Om kohompit po i watas do Giliad, om i tana' di posorili' do Gosur om Maaka, om koinsanai di Nuluhon do Hormon, om oinsanan nogi' o watas do Basan do gisom do korikot do hilo'd Salka. 12 Om kosuang po do watas diyolo' i kinoiyonon di pinorinta' daa di Og, i tulun do Ropaim di kopupuson no do minomorinta' do hilo'd Astarot om hilo'd Idroi. Naala' ngai' no di Musa i piro-piro o bansa'ddi om nouyung dau iyolo' do mantad id watas diyolo'. 13 Nga' iri po tulun do hilo'd bandar do Gosur om Maaka ot a' di tulun dot Israil nouyung; om poundorong kasai' poddi iyolo' do hilo'd Israil. 14 Nga' iri nopo payat do Liwi om a' no di Musa nonuan do tana' tu' kaanu i' iyolo' do bohogian di maan do diyolo'd songonuon do mantad id porsombahan di sorobon, do hiri'd pananaraban do porsombahan di don Tuhan, i Kinorohingan dot Israil. Tu' iyo noddi o pinonuhuan do Tuhan dot id di Musa.
Piro-Piro o Watas do Pinatahak dot id Payat do Rubin
15 Nakatahak nod i Musa o wookon di tana' di pinabatos do Tuhan dot id tulun dot Israil, dot id pinuruan do sompiiyon dit id suang do payat do Rubin, do maan do diyolo'd songonuon. 16 Iri nopo watas do naanu diyolo'ddi om kosuang no ot Aroir (it id dompok do Rantai dot Arnon) om i bandar do hiri'd tanga-tanga' di rantai'ddi, om kosuang ngai' nogi' i tana' dot apatau di posorili' do Modiba. 17 Om kohompit nogi' o Hisbon om koinsanai di bandar di hiri'd poimpatau: iri nopo kabandaran diri om Dibon, Bamot-Baal, Bait-Baal-Mion, 18 Yahas, Kidimot, Mopaat, 19 Kiriataim, Sibma, Sirit-Hasahar, it id timpak di nulu-nulu do hiri'd rantai, 20 Bait-Pior, om i kotidangan do Nuluhon do Pisga, om Bait-Yosimot. 21 Om kosuang nogi' i kabandaran dit id tana' dot apatau, om koinsanai di watas di pinorinta' di Sihon, i raja' do tulun dot Amori, i nokoumbal do momorinta' do hilo'd Hisbon. Nga' naala' i' di Musa iyau om i pomorinta' do tulun do Midian. Iyolo' nopo nga': i Owi, i Rikim, i Sur, i Hur, om i Riba. Om nokoumbal ngai' o tulun diti do minomorinta' do pomogunan diri dot id suang do kuasa' di Raja' Sihon. 22 Id pialatan nopo di tulun di pinatai do tulun dot Israil om i Biliam i tanak di Bior, i mogogontong diri. 23 Wolit nopo do watas di payat do Rubin do ponong id kotonobon om i Bawang do Yordan. Om iri ngai' no o bandar om kokompungan do pinatahak dot id koinsanai di pinuruan do sompiiyon do payat do Rubin do sumiliu do diyolo'd songonuon.
Piro-Piro o Watas do Pinatahak dot id Payat do Gad
24 Om pinatahak di Musa o wookon di tana' di pinabatos do Tuhan dot id tulun dot Israil dot id koinsanai di pinuruan do sompiiyon do payat do Gad do maan do diyolo'd songonuon. 25 Iri nopo watas do naanu diyolo'ddi om kosuang no o Yaisir, om koinsanai di bandar do hilo'd Giliad, om songintanga' di watas do tulun dot Amon om gisom do korikot do hilo'd Aroir, i ponong id koulayon do mantad id Raba. 26 Om kosuang nogi' o Hisbon, om Ramat Mispa om Bitonim, om mantad do hilo'd Mahanaim om gisom do korikot do hilo'd wolit do Lodibar. Om kosuang ngai' nopori do watas do payat do Gad. 27 Om kosuang nopo do watas do Gad do ponong hiri'd Rantai do Yordan om Bait-Haram, om Bait-Nimra, om Sukot, om Sapon, i noolu-olu' do watas di pinorinta' di Raja' Sihon, i mantad hilo'd Hisbon. Om wolit nopo do ponong id kotonobon di watas do Gad om i Bawang do Yordan om poinsulok do gisom do korikot di Tasik Galilia, do ponong id utara. 28 Om iri ngai' no o bandar om kampung do pinatahak dot id toinsanan di pinuruan do sompiiyon di payat do Gad, do maan do diyolo'd songonuon.
Watas do Pinatahak dot id Payat do Manasi di Ponong id Koulayon
29 Om pinatahak di Musa o wookon di tana' di pinabatos do Tuhan dot id tulun dot Israil dot id pointikid-tikid do pinuruan do sompiiyon do songintanga' di payat do Manasi do maan do diyolo'd songonuon. 30 Iri nopo watas do naanu diyolo'ddi nga' poirikot do hilo'd Mahanaim om kosuang ngai' no o watas do Basan --- koinsanai di watas di pinorinta' daa di Og, i raja' do Basan. Om kosuang nogi' it onom nohopod o kampung do hilo'd Yair, it id watas do Basan. 31 Om kosuang nogi' o songintanga' do watas do Giliad, om Astarot, om Idroi, i duwo o bandar dot agayo dot id suang do pomorintaan di Raja' Og dot id watas do Basan di gulu po. Koinsanai nopo o watas diri do pinatahak dot id songintanga' di pinuruan do sompiiyon di sinakagon di Makir, i tanak di Manasi. 32 Om iyo noddi o pinangangkib di Musa di tana' di ponong id koulayon do mantad id Yorikou om Bawang do Yordan di hilo' po iyau id Rantai do Muab. 33 Nga' aiso' i' o tana' do pinatahak dau dot id sinakagon do Liwi, tu' sinunudan dau iyolo' do bohogian nopo dot aanu diyolo' om i bahagi' di porsombahan dot id Tuhan, i Kinorohingan do tulun dot Israil. Om iri no o sumiliu do diyolo'd songonuon.
Binahagi' i Tana' do Ponong Id Kotonobon do Mantad id Bawang do Yordan
1 Om poingkaa no o kinowoyo-woyoo' do pinangangkib di tana' do Kanaan di ponong id kotonobon do mantad di Bawang do Yordan dot id tulun dot Israil. Minangangkib nopo di tana' nga' i Iliasar it Imam, om i Yosua i tanak di Nun, om i boyoon do mantad id pointikid-tikid do pinuruan do sompiiyon do payat dot Israil. 2 Iri nopo tana' di ponong id kotonobon do mantad di Bawang do Yordan om nundi' do minamahagi' dot id siam om satanga' di payat do tulun dot Israil, tu' iyo noddi o pinonuhuan do Tuhan dot id di Musa. 3-4 Iri nopo duwo om satanga' di payat dot Israil do suwai om noonuan no di Musa do tana' do ponong id koulayon do mantad id Bawang do Yordan. (Iri nopo sinakagon di Yusup om nabahagi' do duwo o payat: i payat do Manasi om payat dot Ipraim.) Om iri no payat do Liwi, om a' no di Musa nonuan do bahagi di tana'. Nga' nonuan no iyolo' do piro-piro o bandar do maan do diyolo'd tiyonon om nonuan do kobuturan do paakan-akanan om poiyanan di baanan do sapi' om dumba' diyolo'. 5 Om iyo noddi o pinamahagi' di tulun dot Israil di tana'ddi do tuminanud di pinonuhuan do Tuhan dot id di Musa.
Pinatahak o Hibron dot id di Kalib
6 Insan tadau om rikot no o piro-piro tulun do mantad id payat do Yohuda dot id di Yosua do hilo'd Gilgal. Iso' nopo diyolo' nga' i Kalib, i tanak di Yopuni, i mantad id pinuruan do sompiiyon do Kinis. Om boros kad i Kalib dot id di Yosua, “Oilaan nu i' i boros do Tuhan dot id di Musa, i susuhuon do Tuhan diri, di hilo' pod Kadis Barnia dot iyato goduwo o komoyon. 7 Tontok di suhuo' oku i' di Musa, i susuhuon do Tuhan diri, do mongoi ponoluku' do pomogunan diti do mantad hilo'd Kadis Barnia, om apat nogi' nohopod o toun ku. Om pinoposunud oku i' dit otopot di nokoguli' oku. 8 Nga' iri nopo koruhang ku'd suwai do minongoi ponoluku' om minonompurolosi i' iyolo' di tulun dot Israil. Nga' iyoho' nopo om otorodok oku i' do minumboyo' do Tuhan, i Kinorohingan ku. 9 Om iri noddi o kinapabatasan di Musa dot id doho' do honggo nopo i noulakan do lapap ku om iri no ot aanu ku om aanu di sinakagon ku. 10 Nga' baino' nopoddi om apat noddi nohopod o toun do mantad di poboroso' id Tuhan iri dot id di Musa. Maso nopoddi om hilo' pod tana' do kowotuan o tulun dot Israil do minghombo, nga' mantad nopoddi om ginompi' oku id Tuhan do miagal di nakabatos dau. Om poimpasi oku poddi do gisom do baino'. Ontong pogi'! Nga' walu' noddi nohopod om limo o toun ku, 11 nga' okoris oku po do miagal di suhuo' oku i' di Musa. Okoris oku po do mongoi sangod om momonsoi do nunu nopo. 12 Iyo nopoddi, om patahako' no dot id doho' i watas do hiri'd konulu-nuluan di nakabatos mantad do Tuhan dot id doho' do tontok di tadau di pinoporongou oku om i koruhang ku'd suwai do habar di nongoi dahai. Tontok nopoddi om sinunudan dahai iya' do momogun-mogun do hilo' i bansa' dot Inak, it angagayo koulun. Om bandar diyolo' nga' angagayo om ongkitolig. Nga' woyoon oku i' doti' do Tuhan om ouyung ku indo iyolo'. Tu' iyo noddi o nokoboros do Tuhan,” ka dau. 13 Om barakatai nod i Yosua i Kalib, i tanak di Yopuni. Om patahako' no dau i bandar do Hibron dot id di Kalib, do maan do dau'd songonuon. 14 Om gisom piya'd baino' nga' iri kasai' po i sinakagon di Kalib, i tanak di Yopuni, i tulun do Kinis diri, o sanganu do Hibron tu' notumbayaan i' iyau do Tuhan, i Kinorohingan do tulun dot Israil. 15 Nga' di nopoddi gulu po om roitan do bandar dot Arba o Hibron. (I Arba nopo om osiou kopio dot id pogialatan do tulun do bansa' dot Inak.) Om osimbayan noddi o pomogunan diri tu' aiso' no o pisangadan.
Piro-Piro Watas do Pinatahak dot id Payat do Yohuda
1 Iri ngai' i pinuruan do sompiiyon di payat do Yohuda nga' nakaanu nogi' do bahagi' di tana'. Om poingkaa o pinogisaman di watas do naanu diyolo': Pinogisaman nopo di tana' do ponong id salatan om it id dompok no kopio do ponong id salatan di tana' do kowotuan do Sin, i hilo' nod piwolitan dot Idom; 2 do pinoimpuun dot id dompok ponong id salatan di Rahat do Napatai, 3 om kawaya' di kangkab do nuluhon do hilo'd Akrabim, om gisom do korikot do hilo'd Sin. Om kawaya' do ponong id salatan do Kadis Barnia, om kawaya' do hilo'd Hisron, om katakad do hilo'd Adar, om kahamad nogindo do poingkaa do hilo'd Karka. 4 Mantad nod hilo' om poillombus po i wolit do hilo'd Asmon, om poinsusui di palu dit id piwolitan do Masir, om koompok do hilo'd Rahat do Tanga'. Om iyo noddi o wolit di watas do Yohuda do ponong id salatan. Om iri no wolit diri o wolit do koinsanai di pomogunan dot Israil do ponong id salatan. 5 Om kogisomon no do watas diri do ponong id koulayon om i Rahat do Napatai, om poillombus i wolit do poingkaa ponong id utara do gisom do korikot do hiri'd tolungan di Bawang do Yordan. Om wolit no do ponong id utara om mimpuun do hiri'd tolungan do Bawang do Yordan, 6 om patakadan do hilo'd Bait-Hogla, om poillombus do gisom do hiri'd tisan di Rantai do Yordan. Mantad nod hilo' om poillombus po kawagu i wolit do ponong id utara do gisom do korikot do hilo'd Watu do Bohan (i Bohan nopo nga' tanak di Rubin), 7 om poillombus po i wolit do hilo'd rantai di roitan do Rantai do Kosusaan om gisom do korikot do hilo'd Dobir, om kahamad po kawagu do ponong id utara do poingkaa do hilo'd Gilgal, it id kinoiyonon di potimbaba' di kangkab do nuluhon dot Adumim di ponong id salatan do mantad id rantai'ddi. Om mantad nod hilo' om poillombus po i wolit do gisom do korikot di tudan do waig di roitan dot In Simis, om poillombus po kawagu do hilo'd In Rogil, 8 om patakadan nogindo do kawaya' di Rantai do Hinom do kumaa ponong id salatan di nulu-nulu, om i kinoiyonon do Yorusalim, i bandar do tulun do Yobus. Om mantad nod hilo' om pointakad i wolit do poingkaa do hiri'd timpak di nulu-nulu'ddi, i ponong id kotonobon do mantad id Rantai do Hinom, it id dompok ponong id utara di Rantai do Ropaim, 9 om poillombus po kawagu do hilo'd tudan do waig di roitan do Mi-Niptua, om gisom do korikot do hiri'd kabandaran dit id toning di Nuluhon dot Ipron. Om mantad nod hilo' om humamad no i wolit do poingkaa do hilo'd Baala (i roitan do Kiriat Yiarim), 10 om pointutuk do ponong id kotonobon do mantad id Baala, i ponong hiri'd Konuluhanan dot Idom, om poillombus po do hilo'd ponong id utara di Nuluhon do Yiarim (i roitan do Nuluhon do Kisalon), om poruhukan nondo do hilo'd Bait-Simis, om gisom do korikot do hilo'd Timna. 11 Om mantad nod hilo'd Timna, om poillombus po i wolit do hilo'd ponong id utara dot Ikron, om humamad nogindo do kumaa ponong hilo'd Sikron do kawaya' di Nuluhon do Baala, om poillombus do hilo'd Yabniil, om koompok do hilo'd Rahat do Tanga'. 12 Om iyo noddi o pinogisaman di watas do Yohuda do ponong id kotonobon. Poiyonon nopo do hiri'd watas diri nga' i pinuruan do sompiiyon di payat do Yohuda.
Sinolod di Kalib o Hibron om Dobir
13 Iri nopo sombohogian di watas do Yohuda om pinatahak dot id di Kalib, i tanak di Yopuni, i mantad id payat do Yohuda, do tumanud di pinonuhuan do Tuhan dot id di Yosua. Om pinatahak po dot id di Kalib i bandar do Hibron, i bandar di Arba di gulu po. I Arba nopo om tapa' di Inak. 14 Sinakagon nopo di Inak om tulun do: Sosai, Ahiman, om Talmai. Om nouyung ngai' nod i Kalib iyolo'ddi do mantad hilo'd Hibron. 15 Om mantad nod hilo' om tilombus po kawagu i Kalib do minongoi panangod di tulun di poingiyon do hilo'd Dobir. (Bandar nopodti di gulu po om roitan do Kiriat Sipir.) 16 Om boros ka di Kalib, “Isai nopo o kusai di kosolod do Kiriat Sipir om pokowinon ku no di Aksa, i tanak ku'd tondu',” ka dau. 17 Om kosolod noddi di Otniol, i tanak di Kinas, i bandar diri. I Otniol nopo nga' tanak di Kinas, i tobpinai di Kalib. Om pokowinai noddi di Kalib di Otniol, i Aksa, i tanak dau'd tondu'. 18 Tontok nopo di tadau do kinopikowinan diyolo' om sansagai no di Otniol i Aksa do mokianu di tapa' dau do songkoiyonon o tana'. Om lintuhun no i Aksa do mantad hiri'd kaladai dau. Om uhoto' no iyau di tapa' dau, “Nokuro'ri?” ka dau. 19 Om boros ka di Aksa do suminimbar, “Haro no daa i tana' di nakatahak nu doho' nga' hilo' id kinoiyonon dit aiso' o waig. Om onuan oku po daa do piro-piro o tudan do waig,” ka dau. Om patahako' no di Kalib di Aksa i tudan do waig di hiri'd sokid om i hiri'd siba'.
I Kabandaran do Yohuda
20 Iti no ngai' o bandar do naanu di pinuruan do sompiiyon do payat do Yohuda do maan do diyolo'd songonuon. 21-32 Iri nopo kabandaran dit id sodu' kopio do ponong id salatan di naanu do payat do Yohuda, it id piwolitan dot Idom om duwo nohopod om siam o bandar do kohompit ngai' i kokompungan di hiri'd posorili'. Iri nopo kabandaran diri om: Kabsiil, Idir, Yagur, Kina, Dimona, Adada, Kidis, Hasor, Itnan, Sip, Tilim, Bialot, Hasor-Hadata, Kiriot-Hisron (ko' Hasor), Amam, Sima, Molada, Hasar-Gada, Hismon, Bait-Pilit, Hasar-Sual, Borsiba, Baala, Iyim, Isim, Iltolad, Kosil, Horma, Siklag, Madmana, Sansana, Libaot, Silhim, Ain, om Rimon. 33-36 Iri nopo kabandaran dit id guas di nulu-nulu do kosuang ngai' i kokompungan do hiri'd posorili', om hopod om apat o bandar dot oinsanan. Iri nopo kabandaran diri om: Istaol, Sora, Asna, Sanoa, In Ganim, Tapua, Onam, Yarmut, Adulam, Soko, Asika, Saaraim, Aditaim, Godira, om Godirotaim. 37-41 Haro po kawagu o hopod om onom o bandar do naanu di payat do Yohuda, do kosuang ngai' i kokompungan do hiri'd posorili'. Iri nopo kabandaran diri om: Sinan, Hadasa, Migdal-Gad, Dilian, Mispa, Yoktiil, Lakis, Boskat, Iglon, Kabon, Lamas, Kitlis, Gidirot, Bait-Dagon, Naama, om Makida. 42-44 Om haro po kawagu o siam o bandar do poinsuang di watas do Yohuda, do kosuang ngai' i kokompungan do hiri'd posorili'. Iri nopo kabandaran diri om: Libna, Itir, Asan, Yipta, Asna, Nosib, Kohila, Aksib om Marisa. 45 Suwai no ko' iri om kosuang po ot Ikron om i kokompungan om kawalayan do hiri'd posorili', 46 om koinsanai di bandar om i kampung di hiri'd somok dot Asdod, do mantad hilo'd Ikron om korikot do hilo'd Rahat do Tanga'. 47 Om kosuang nogi' i bandar dot Asdod om Gasa om i kokompungan om kawalayan di pointongkop nopo do gisom do hiri'd somok di palu dit id piwolitan do Masir om i tisan do Rahat do Tanga'. 48-51 Ponong hiri nod watas do konulu-nuluan om naanu di payat do Yohuda o hopod om iso' o bandar do kosuang ngai' i kokompungan do hiri'd posorili'. Iri ngai' nopo bandar diri om: Samir, Yatir, Soko, Dana, Kiriat Sana (ko' Dobir), Anab, Istimoa, Anim, Gusin, Holon, om Gilon. 52-54 Haro po o siam kawagu o bandar do naanu do payat do Yohuda, do kosuang ngai' i kokompungan do hiri'd posorili'. Iri ngai' nopo bandar diri om: Arab, Duma, Isan, Yanum, Bait-Tapua, Apika, Humta, Kiriat-Arba (ko' Hibron), om Sior. 55-57 Om haro po kawagu o hopod o bandar do naanu diyolo' do kosuang ngai' i kokompungan di hiri'd posorili'. Iri ngai' nopo bandar diri om: Maon, Karmol, Sip, Yuta, Yisriil, Yokdiam, Sanoa, Kain, Gibia, om Timna. 58-59 Om haro po ot onom o bandar do naanu diyolo' do kosuang ngai' i kokompungan di hiri'd posorili'. Iri ngai' nopo bandar diri om: Halhul, Bait-Sur, Gidor, Maarat, Bait-Anot, om Iltikon. 60 Om iti nogi' duwo o bandar nga' naanu i' diyolo' do kosuang ngai' i kokompungan di hiri'd posorili': i bandar do Kiriat Baal (ko' Kiriat Yiarim) om bandar do Raba. 61-62 Ponong hiri nod tana' do kowotuan om naanu di payat do Yohuda ot onom o bandar do kohompit ngai' i kokompungan di hiri'd posorili'. Iri ngai' nopo bandar diri om: Bait-Araba, Midin, Sokaka, Nibsan, Bandar do Silaon, om In-Gidi. 63 Nga' iri nopo tulun do Yobus, i poingiyon do hilo'd Yorusalim om a' i' di sinakagon di Yohuda nuyung. Om poinsugku' poddi kasai' iyolo' do payat do Yohuda do hilo'd Yorusalim do gisom do baino'.
Watas do Pinatahak dot id Payat dot Ipraim om Payat do Manasi di Ponong Id Kotonobon
1 Pinogisaman nopo di tana' di pinatahak dot id payat do Yusup om mantad hilo'd Bawang do Yordan, i hiri'd somok do Yorikou, i ponong id koulayon do mantad di piro-piro tudan do waig do hilo'd Yorikou om korikot do hilo'd tana' do kowotuan. Mantad nod hilo'd Yorikou om pinatakad i wolit do gisom do korikot do hilo'd Baitol, i hiri'd watas do konulu-nuluan. 2 Om mantad nod hilo'd Baitol om poillombus i wolit do hilo'd Lus om kawaya' dot Atarot, i pomogun-mogunan do tulun dot Arki. 3 Om mantad nod hilo' om pinakaa i wolit do ponong id kotonobon, i hilo'd watas do tulun do Yaplit, om poirikot do hilo'd Bait-Horon-dit-id-Sawa'. Om mantad nod hilo' om poillombus po i wolit do hilo'd Gisir, om koompok do hilo'd Rahat do Tanga'. 4 Iri no o watas do pinatahak dot id payat do Manasi om Ipraim, i maan do sinakagon di Yusup do diyolo'd songonuon.
Ipraim
5 Iti no o kogisomon do tana' di pinatahak dot id koinsanai di pinuruan do sompiiyon dot id suang do payat dot Ipraim. Wolit nopo do ponong id koulayon om mimpuun do hilo'd Atarot Adar om gisom do korikot do hilo'd Bait-Horon-dit-id-Sarayo. 6 Om mantad nod hilo' om poingkaa i wolit do hilo'd Rahat do Tanga'. Om ponong id utara nopo om Mikmitat. Om ponong id koulayon no om poinghamad i wolit do poingkaa do hilo'd Taanat Silo. Om kawaya' di bandar diri i wolit do ponong id koulayon do kumaa do hilo'd Yanua. 7 Om mantad nod hilo' om pinoruhuk i wolit do hilo'd Atarot om hilo'd Naharat, gisom do korikot do hilo'd Yorikou om koompok nogindo do hilo'd Bawang do Yordan. 8 Om pinogisaman no di watas do ponong id kotonobon om mimpuun do hilo'd Tapua om gisom do korikot di palu do Kana om koompok do hilo'd Rahat do Tanga'. Iri no o tana' do pinatahak dot id koinsanai do pinuruan do sompiiyon di payat dot Ipraim do sumiliu do diyolo'd songonuon. 9 Om kosuang ngai' nogi' i kokompungan dot agayo om okoro' dit id watas do payat do Manasi. 10 Nga' a' i' di payat dot Ipraim nouyung i tulun do Kanaan, i poingiyon do hilo'd Gisir. Om iri nopo tulun do Kanaan diri nga' poirolot kasai' i' diti payat dot Ipraim, nga' sinansagan no maddi iyolo' do kumaraja' dot id tulun dot Ipraim.
Manasi i Ponong id Kotonobon do Mantad di Bawang do Yordan
1 Iri nopo songintanga' di tana' di ponong id kotonobon do mantad id Bawang do Yordan om pinatahak dot id songintanga' di pinuruan do sompiiyon di sinakagon di Manasi, i tanak di Yusup do kotuahan. Tanak nopo di Manasi dot id dotuo om i Makir. I Makir nopo om tapa' di Giliad. Om i Makir nopo nga' sumasangod dit osiou kopio. Om iri noddi o kinapatahakan dot id di Makir do watas do Giliad om Basan, i ponong id koulayon do mantad id Bawang do Yordan. 2 Iri nopo tana' di ponong id kotonobon do mantad id Bawang do Yordan om pinatahak dot id pinuruan do sompiiyon di Abiosor, om i Hilik, om i Asriol, om i Sikim, om i Hipir om i Somida. Iyolo' ngai' nopo nga' sinakagon di tangaanak do tongokusai di Manasi, i tanak di Yusup. Om iyolo' no o nongosiliu do boyoon do pinuruan do sompiiyon. 3 I Hipir nopo om tanak di Giliad, om tapa' nod i Giliad om i Makir, i tanak di Manasi. Tanak nopo di Hipir om i Silapihad; om tongoondu' ngai' nopo o tanak dau, om aiso' i' o tanak dau'd kusai. Ngaran nopo diyolo' om: i Mala, i Noa, i Hogla, i Milka, om i Tirsa. 4 Om ongoi no i tangaanak di Silapihad do tongoondu' solowot di Iliasar, it Imam, om i Yosua i tanak di Nun, om koinsanai di boyoon do tulun dot Israil. Om boros ka diyolo', “Nosuhu' id Tuhan i Musa do manahak dahai do tana' do sumiliu do dahai'd songonuon do miagal do koobpinayan dahai di tongokusai tu' onuan i' do tana' do sumiliu do diyolo'd songonuon,” ka. Om nonuan iddi iyolo' do tana' do miagal di koobpinayan diyolo' di tongokusai do tumanud di ponuhuan do Tuhan. 5 Om iri noddi o nakaanu-anu di Manasi do hopod o bohogian do tana' do suwai ko' i hilo'd Giliad om i hilo'd Basan, i ponong id koulayon do mantad id Bawang do Yordan, 6 tu' i tangaanak dau do tongokusai om tongoondu' nga' nakaanu ngai' i' do tana'. Nga' iri nopo tana' do hilo'd Giliad om pinatahak dot id sinakagon di Manasi do suwai. 7 Pinogisaman nopo do watas do payat do Manasi om mimpuun do hilo'd Asor gisom do korikot do hilo'd Mikmitat, i ponong id koulayon do mantad id Sikim. Om mantad nod hilo' om pinoruhuk i wolit do kumaa ponong id salatan do gisom do korikot do hilo'd watas do tulun dot In Tapua. 8 Watas nopo do Tapua om di Manasi i', nga' iri nopo bandar do Tapua, it id wolit do pomogunan diri, om nasanganu no di sinakagon di Ipraim. 9 Om mantad nod hilo' om poruhuko' po kawagu i wolit do watas do payat do Manasi gisom do korikot do hiri'd palu do Kana. Iri ngai' nopo i bandar di ponong id salatan di palu'ddi om di Ipraim i', do mulong piya do hiri ngai'd watas di payat do Manasi i bandar diri. Om poillombus po i wolit do watas do Manasi do poinsusui di palu do poingkaa ponong id utara, om koompok do hilo'd Rahat do Tanga'. 10 Naanu nopo di payat dot Ipraim om ponong id salatan, om naanu no di payat do Manasi om ponong id utara. Om i Rahat do Tanga' o wolit diyolo' do ponong id kotonobon. Poinronit nopo do watas do Manasi dot id utara ponong id kotonobon om i watas dot Asor, om poinronit no dot id utara di ponong id koulayon om i watas dot Isakar. 11 Id suang nopo do watas dot Isakar om watas dot Asor om haro po o piro-piro o kinoiyonon do tana' do payat do Manasi o sanganu, iri no i hilo'd Bait-Sian om Yibliam om kohompit ngai' i kokompungan dot id posorili' di kinoiyonon diri. Om kosuang nogi' o Dor (bandar dot id toning do tisan do rahat) om Indor, Taanak, Mogido, om koinsanai di kampung do hiri'd posorili'. 12 Nga' a' i' nokouyung di tulun mantad do hiri'd kabandaran diri i payat do Manasi. Om hilo' poddi kasai' i tulun do Kanaan. 13 Om mulong piya dot okoris daa'ddi i tulun dot Israil nga' a' kasai' i' diyolo' nouyung i tulun do Kanaan nga' nasansagan i' ma diyolo' i tulun do Kanaan do kumaraja' dot id diyolo'.
Minokianu Kawagu do Tana' i Payat dot Ipraim om i Payat do Manasi di Ponong id Kotonobon
14 Om boros kaddi di sinakagon di Yusup, dot id di Yosua, “Nokuro tu' songkoiyonon no o tana' do patahakon nu dahai? Ogumu' tomod iyahai'dti tu' binarakatan i' iyahai'd Tuhan,” ka diyolo'. 15 Om boros ka di Yosua do suminimbar, “Ondung ogumu' kopio kou gisom dot a' orumpos do hilo'd konulu-nuluan dot Ipraim, om ongoi kou no do hilo'd gouton dot id watas do tulun do Poris om Ropaim. Om ngoyon no dokoyu riliko' i hilo'd kopuruan do watas diyolo',” ka dau. 16 Om boros ka diyolo' do suminimbar, “A' i' dahai kabagal i hilo'd konulu-nuluan, nga' iri nopo tulun do Kanaan di momogun-mogun do hilo'd rantai om ongkikorita' do basi', om miagal nogiddi i tulun do Kanaan do hilo'd Bait-Sian om i hilo'd piro-piro o kampung di posorili', om i nogi' i tulun do momogun-mogun do hilo'd Rantai do Yisriil,” ka. 17 Om boros ka di Yosua dot id payat dot Ipraim om id payat do Manasi di ponong id kotonobon, “Otopot nogi' dot asapou kou om ongokoris kou koulun. Om kaanu kou i' do lobi ko' iso' o koiyonon do tana'. 18 Ngoyon nopo dokoyu onuo' i hilo'd watas do konulu-nuluan. Om mulong piya do pogouton po daa tomod ilo', nga' alanggaan indo dokoyu om asanganu ngai' dokoyu. Om ouyung i' dokoyu i tulun do Kanaan do mulong piya dot ongkikorita' iyolo' do basi' om ongokoris koulun,” ka dau.
Binahagi' i Tana' di Noolu'
1 Tontok di nosolod do tulun dot Israil i pomogunan di pinabatos do Tuhan, om timung no o koinsanai di tulun dot Israil do hilo'd Silo. Om powonsoyo' no diyolo' do hilo' i Kiim do Tuhan. 2 Nga' haro po o turu' o payat do bansa' dot Israil dot a' po nobohogian do tana'. 3 Om boros kaddi di Yosua dot id tulun dot Israil, “Songkuro po koloido' om ngoyon nogi' dokoyu pomogun-mogunai i tana' do pinatahak do Tuhan, i Kinorohingan do taki-aki dokoyu, dot id dokoyu? 4 Pomili' kou no do tolu o tulun do mantad id pointikid-tikid do payat. Om suhuon ku'ndo iyolo' do mongoi hombo diti pomogunan do mikuwo'd monukat do pogisaman do watas di korohian diyolo' do manganu. Om pogulian nogindo diyolo' dot id doho'. 5 Iri nopo tana'ddi om bohogion do turu' o bohogian do patahakon diyolo'. Di Yohuda nopo om iri kasai' no i watas dau di ponong id salatan, om di Yusup nga' iri kasai' no i watas dau di ponong id utara. 6 Om tulison no dokoyu i pogisaman di turu' o bohogian di tana'ddi om patahakon no dot id doho'. Om undion ku nogindo do mongilo do korohian do Tuhan, i Kinorohingan, do bagi dokoyu. 7 Iri nopo payat do Liwi om a' i' kaanu do tana' do miagal dokoyu, tu' bohogian nopo diyolo' om sumiliu dot imam di momonsoi'd karaja' do Tuhan. Iri no i payat do Gad, om payat do Rubin, om payat do Manasi di ponong id koulayon, om nakaanu no do bohogian do tana' do ponong id koulayon do mantad id Bawang do Yordan; i tana' do pinatahak di Musa, i susuhuon do Tuhan dot id diyolo',” ka dau. 8 Om bilinai noddi di Yosua i tulun do poingkaa, “Tumongkop kou nodti pomogunan om sukaton no i tana', om pogulian nogindo dokoyu dot id doho'. Om undion ku nogindo do hiti'd Silo do mongilo do korohian do Tuhan do bagi dokoyu,” ka. Om pamanau noddi iyolo' do minongoi hombo di pomogunan do mongoi ponukat di tana' di nobilinan iyolo' di Yosua. 9 Om ongoi no tongkop di pomogunan i piro-piro o tulun diri. Om tuliso' no diyolo' i pinogisaman di turu' o bohogian di tana' om tinulis ngai' nogi' i piro-piro o bandar di nokosuang di tana'. Om poguliai noddi diyolo' do hiri'd di Yosua do hilo'd Silo. 10 Om undio' noddi di Yosua do mongilo do korohian do Tuhan do bagi diyolo'. Om patahako' no di Yosua i tana' dot id pointikid-tikid do payat dot Israil dit a' po nakaanu do bohogian do tana'.
Tana' do Pinatahak dot id Payat do Binyamin
11 Id gulu nopo do nakaanu do bohogian do tana' om iri ngai' i sompiiyon dot id suang do payat do Binyamin. Tana' nopo diyolo' nga' id piolitan do tana' di payat do Yohuda om i tana' do payat di sinakagon di Yusup. 12 Pinogisaman nopo do tana' diyolo' do ponong id utara om pinoimpuun do hiri'd Bawang do Yordan. Om pointakad di tidong di ponong id utara do Yorikou, om iri no wolit di tana' di poingkaa ponong id kotonobon om kawaya' di watas do konulu-nuluan do gisom do korikot do hilo'd tana' do kowotuan do Bait-Awon. 13 Om poillombus po kawagu i wolit diri do hiri'd tidong di ponong id salatan do Lus (i roitan nogi' do Baitol), om poiruhuk i wolit do hilo'd Atarot Adar, i hilo'd nuluhon di ponong id salatan do Bait-Horon-dit-id-Sawa'. 14 Mantad no do ponong id kotonobon do nuluhon diri, om pahamadon i wolit di tana' do ponong id salatan do poingkaa do hilo'd Kiriat Baal (ko' Kiriat Yiarim.) Kiriat Baal nopo nga' payat do Yohuda o sanganu. Iri no o wolit di tana' do ponong id kotonobon. 15 Wolit no di tana' do ponong id salatan om tumimpuun do mantad hiri'd dompok do Kiriat Yiarim om gisom do hiri'd piro-piro o tudan do waig do Mi-Niptua. 16 Om poruhukon nondo i wolit do hiri'd guas do nuluhon di potimbaba' di Rantai do Hinom, it id dompok ponong id utara di Rantai do Ripaim. Om pokoyoon no do ponong id salatan om pawayaon di Rantai do Hinom, i ponong id salatan di kangkab do konulu-nuluan do hilo'd pomogunan do Yobus, om poingkaa po do hilo'd In Rogil. 17 Mantad nod hilo' om pahamadon i wolit do hilo'd ponong id utara do poingkaa do hilo'd Insimis, om poillombus do hilo'd Golilot, it id soborong do Takadon dot Adumim. Om poruhukon nogindo i wolit do hilo'd Watu do Bohan (i Bohan nopo nga' tanak di Rubin), 18 om pawayaon i wolit do ponong id utara di guas do nuluhon di potimbaba' do Rantai do Yordan. Om poruhukon i wolit do hiri'd rantai. 19 Om pawayaon i wolit do ponong id utara di guas do Nuluhon do Hogla, om koompok nondo do ponong id utara do piolungan do Rahat do Napatai om Bawang do Yordan. 20 Wolit nopo do ponong id koulayon om i Bawang do Yordan. Om iri no o wolit do tana' do naanu ngai' di sompiiyon do payat do Binyamin do sumiliu do diyolo'd songonuon. 21 Iri nopo bandar do naanu ngai' di sompiiyon dot id suang do payat do Binyamin, om Yorikou, Bait-Hogla, Imik-Kosis, 22 Bait-Araba, Somaraim, Baitol, 23 Haawim, Para, Opra, 24 Kipar-Haamonai, Opni om Giba. Hopod om duwo o bandar do toinsanan om kosuang po i kokompungan do hiri'd posorili'. 25 Om kosuang po o bandar do Gibion, Rama, Biirot, 26 Mispa, Kopira, Mosa, 27 Rikim, Yirpiil, Tarala, 28 Sila, Ilip om Yobus (ko' Yorusalim), Gibia om Kiriat Yiarim. Hopod om apat o bandar dot oinsanan om kosuang po i kokompungan do hiri'd posorili'. Om iri no o pomogunan do naanu ngai' di sompiiyon dot id suang do payat do Binyamin do maan do diyolo'd songonuon.
Tana' do Pinatahak dot id Payat do Simion
1 Iri nopo koduwo do nakaanu do bahagi' di tana' om iri ngai' i sompiiyon dot id suang do payat do Simion. Iti nopo tana' diyolo' om poiralad do hiri'd suang di watas do payat do Yohuda. 2 Om bandar nopo do pinatahak dot id diyolo' om Borsiba, Siba, Molada, 3 Hasar-Sual, Bala, Isim, 4 Iltolad, Bitul, Horma, 5 Siklag, Bait-Hamarkabot, Hasar-Susa, 6 Bait-Libaot, om Saruhon. Hopod om tolu o bandar dot oinsanan om kosuang po i kokompungan di hiri'd posorili'. 7 Om kosuang po o bandar dot Ain, Rimon, Itir, om Asan. Apat o bandar do toinsanan om kosuang po o kokompungan do hiri'd posorili'. 8 Om kosuang ngai' nopo i kokompungan do hiri'd posorili' di piro-piro o bandar diri, do gisom do korikot do hilo'd Baalat-Biir (ko' Rama) i ponong id salatan. Iri no i tana' do pinatahak dot id sompiiyon dit id suang do payat do Simion do maan do diyolo'd songonuon. 9 Iri nopo sombohogian di tana' do payat do Simion diti nga' nanu do mantad id tana' do Yohuda. Tu' nadalaan kopio kagayo o tana' do naanu do Yohuda. Om iri noddi o kinapatahakan do sombohogian di tana' do Yohuda dot id payat do Simion.
Tana' do Pinatahak dot id Payat do Sibulon
10 Iri no kotolu do nakaanu do tana' om iri ngai' i sompiiyon dot id suang do payat do Sibulon. Iri nopo tana' do naanu diyolo' om poirikot do hilo'd Sarid. 11 Wolit nopo do ponong id kotonobon om poingkaa do hilo'd Marala, om koronit do Dabisit om i palu do ponong id koulayon do mantad id Yokniam. 12 Wolit no do ponong id koulayon om mantad hilo'd Sarid om poingkaa do hilo'd wolit do Kislot Tabor, om poillombus po i wolit do hilo'd Dobrat om pointakad do hilo'd Yapia. 13 Om mantad nod hilo' om poillombus po i wolit do ponong id koulayon do gisom do korikot do hilo'd Gat-Hipir om Itkasin, om poinghamad do poingkaa ponong id Nia, do poirikot do hilo'd Rimon. 14 Wolit no do ponong id utara om poinghamad do hilo'd Hanaton, om koompok do hilo'd Rantai do Yiptail. 15 Om kosuang nopo di tana' om bandar do: Katat, Nahalal, Simron, Yidala, om Baitlahim. Hopod om duwo o bandar do toinsanan om kosuang po i kokompungan do hiri'd posorili'. 16 Iri nopo kabandaran om i kokompungan diri om id suang di watas di pinatahak dot id sompiiyon dit id suang do payat do Sibulon.
Tana' do Pinatahak dot id Payat dot Isakar
17 Iri no kaapat do nonuan do tana' om iri ngai' i sompiiyon dot id suang do payat dot Isakar. 18 Kosuang nopo di tana' diyolo' om bandar do: Yisriil, Kosulot, Sunim, 19 Hoparaim, Sion, Anaharat, 20 Rabit, Kision, Ibis, 21 Rimit, In-Ganim, In-Hada, om Bait-Pasis. 22 Wolit nopo di tana' diyolo' om koronit do bandar do Tabor, Sahasima, om Bait-Simis, om koompok nondo do hilo'd Bawang do Yordan. Nokosuang nopo do watas diyolo' om hopod om onom o bandar do toinsanan om kosuang po i kokompungan do hiri'd posorili'. 23 Iri nopo kabandaran om i kokompungan diri om poinsuang do hiri'd watas di pinatahak dot id sompiiyon dit id suang do payat dot Isakar do maan do diyolo'd songonuon.
Tana' do Pinatahak dot id Payat dot Asor
24 Iri no kolimo do nonuan do tana' om iri ngai' i sompiiyon dot id suang do payat dot Asor. 25 Kosuang nopo do tana' diyolo' om bandar do: Hilkat, Hali, Bitin, Aksap, 26 Alamilik, Amad, om Misal. Wolit nopo do ponong id kotonobon om poinronit do Karmol om Bawang do Libnat. 27 Mantad nod hilo' om poinghamad i wolit do ponong id koulayon, do poingkaa do hilo'd Bait-Dagon, i poinronit do watas do Sibulon om Rantai do Yiptail, om poingkaa ponong id utara do poirikot do hilo'd Bait-Imik om Nohiol. Om potilombus po i wolit do ponong id utara do poingkaa do hilo'd Kabul, 28 Ibron, Rihob, Hamon, om Kana do gisom do korikot do hilo'd Sidon. 29 Mantad nod hilo' om poinghamad po i wolit do poingkaa do hilo'd Rama, om poillombus do hilo'd bandar do Tirus, i bandar di kitolig; om poinghamad po kawagu i wolit do poingkaa do hilo'd Hosa, om koompok do hilo'd Rahat do Tanga'. Bandar nopo dot id suang do tana'ddi om Mahalab, Aksib, 30 Uma, Apik, om Rihob. Kosuang nopo do watas diyolo' nga' duwo nohopod om duwo o bandar om kosuang ngai' po i kokompungan di hiri'd posorili'. 31 Iri no ngai' i kabandaran om i kokompungan di nokosuang di watas di pinatahak dot id toinsanan di sompiiyon dit id suang do payat dot Asor do maan do diyolo'd songonuon.
Tana' di Pinatahak dot id Payat do Naptali
32 Iri no koonom do nonuan do bahagi' di tana' om iri ngai' i sompiiyon dot id suang do payat do Naptali. 33 Pinoimpuunan nopo do wolit di tana' diyolo' om hilo'd Ilip, do mantad di koguasan do kayu do hilo'd Saanaim, om poillombus i wolit do hilo'd Adami Nikib, om hilo'd Yabniil, om gisom do hilo'd Lakum, om koompok do hilo'd Bawang do Yordan. 34 Mantad nod hilo' om poinghamad i wolit do ponong id kotonobon do hilo'd Asnot Tabor; om mantad nod hilo' om poingkaa i wolit do hilo'd Hukok, i poinronit do watas do Sibulon do ponong id salatan om poinronit dot Asor do ponong id kotonobon, om wolit no do ponong id kotonobon, om i Bawang do Yordan. 35 Iri nopo bandar dot ongkitolig om Sidim, Sor, Hamat, Rakat, Kinirit, 36 Adama, Rama, Hasor, 37 Kidis, Idroi, In-Hasor, 38 Yiron, Migdalil, Horim, Bait-Anat, om Bait-Simis. Hopod om siam o bandar do toinsanan om kosuang ngai' po i kokompungan di hiri'd posorili'. 39 Iri no ngai' i kabandaran om i kokompungan di nokosuang do watas di pinatahak dot id sompiiyon dot id suang di payat do Naptali, do maan do diyolo'd songonuon.
Tana' do Pinatahak dot id Payat do Dan
40 Iri nopo koturu' do nonuan do bahagi' di tana' om iri ngai' i sompiiyon dit id suang do payat do Dan. 41 Kosuang nopo di watas diyolo' om bandar do Sora, Istaol, Irsimis, 42 Saalabin, Ayalon, Yitla, 43 Ilon, Timna, Ikron, 44 Iltiki, Gibiton, Baalat, 45 Yohud, Binibirak, Gat-Rimon, 46 Miyarkon, Rakon, om kosuang nogi' i tana' do hiri'd somok do Yopi. 47 Iri nopo payat di Dan om a' iddi nokopomogun-mogun do hiri'd sombohogian di watas diyolo'. Om ongoi no iyolo' do hilo'd Lisim do minongoi panangod di bandar diri. Om nosolod iddi diyolo' i bandar diri om napatai diyolo' i tulun do poingiyon do hiri om pomogun-mogunai noddi diyolo' i bandar. Om powoliho' no diyolo' o ngaran di bandar do Lisim om pungaranai no do Dan, do pinasangai di Dan, i taki-aki diyolo'. 48 Om iri ngai' no i bandar om kokompungan do nokosuang di watas do pinatahak dot id koinsanai di sompiiyon dit id suang do payat do Dan do maan do diyolo'd songonuon.
Tana' do Pinatahak dot id di Yosua
49 Kopongo poddi i tulun dot Israil do mogibahagi-hagi' di tana' om onuwai no diyolo' i Yosua, i tanak di Nun, do sombohogian di tana' do maan do dau'd songonuon. 50 Om patahako' no diyolo' di Yosua i bandar do pinokianu dau, iri no i bandar do Timnat Sira, i hilo'd konulu-nuluan dot Ipraim, tu' iyo' noddi o pinonuhuan do Tuhan. Om wonsoyo' no kawagu di Yosua i bandar diri om iyon no iyau do hiri. 51 Om iyo noddi o pinamahagi' di Iliasar, it Imam diri, om i Yosua i tanak di Nun, om i piro-piro o boyoon do sompiiyon do payat dot Israil, di tana' do hiri'd pomogunan diri. Om nundi' diyolo' do minamahagi' i tana'ddi do hilo'd Silo, do hiri'd wawayaan di Kiim do Tuhan, do mongilo do korohian do Tuhan do bagi' diyolo'. Om kopongo noddi do mamahagi' i tana'ddi.
Piro-Piro o Bandar do Pogintirungan
1 Om suhuo' nod Tuhan i Yosua do momisunud do tulun dot Israil do poingkaa, 2 “Nosuhu' ku no i Musa do momisunud dokoyu do pasal di bandar do pogintirungan. Iti nopo nga' bandar di ngoyon do tulun di mogidu', om ointirungan i' iyolo'. Om pilio' no dokoyu i piro-piro bandar do silihon do bandar do pogintirungan. 3 Iri nopo tulun do nakapamatai do tulun do suwai dot a' dau tinomod, om milo i' do mongoi dot id bandar diri om a' i' apatai di tulun di sumuli' daa dau. 4 Milo i' iyau do mongoi do hiri'd bandar do pogintirungan om mongoi do hiri'd kinoiyonon do momutus, i hiri'd wawayaan di bandar. Om susuyon nondo dau dot id piro-piro o boyoon ondung poingkukuro o kinowoyo-woyoo' di nowonsoi dau. Om pologoson indo iyau di piro-piro o boyoon do sumuang di bandar om onuan iyau do tiyonon dot undorongon dau. 5 Ondung mongoi i tulun di sumuli' daa dau do hiri'd bandar diri om a' indo di tulun do hiri'd bandar patahakon i tulun do nakapamatai'ddi dot id tulun di sumuli'. Om mositi' no dot intirungan diyolo' i tulun diri tu' nakapamatai daa iyau do sompi' ko' tulun dot Israil nga' a' i' dau tinomod, om okon i' ko' araatan iyau di tulun. 6 Pologoson nopo iyau do poundorong do hiri do gisom dot obutusan iyau dot id toguang do tulun dot ogumu' om gisom dot apatai i tulun do nosiliu dot imam dot agayo do maso'ddi. Om pologoson nogindo iyau do muli' do hiri'd kampung dau mantad, i tadon dau do minogidu',” ka dau. 7 Om pilio' noddi diyolo' o piro-piro bandar do maan do bandar do pogintirungan. Om iti no ngai' o nopili' diyolo': i bandar do Kidis, i hilo'd konulu-nuluan do Naptali, di hilo'd Galilia; om bandar do Sikim, i hilo'd konulu-nuluan dot Ipraim, om Hibron i hilo'd konuluhanan do Yohuda. 8 Ponong hilo' nod koulayon do mantad id Bawang do Yordan, i hilo'd tana' do kowotuan, i hiri'd poimpatau dot id konulu-nuluan, i ponong id koulayon do mantad id Yorikou, om pinili' diyolo' o bandar do Bisir, it id watas do Rubin, om bandar do Ramot, i hilo'd Giliad, it id watas do Gad; om bandar do Golan, i hilo'd Basan, it id watas do Manasi. 9 Iri no ngai' o bandar do pogintirungan do nopili' do maan do koinsanai di tulun dot Israil om koinsanai'd tulun di bansa'd suwai di poirolot diyolo'. Pointikid-tikid do tulun di kapamatai do tulun dot a' tomodon, om ointirungan no do hiri'd piro-piro o bandar diri, do mantad id tulun di momogusa' dau do mongoi suli'. Om a' i' iyau koino-ino do patayon dot a' po obutusan dot id toguang do tulun dot ogumu'.
Bandar do Naanu di Payat do Liwi
1-2 Insan o tadau om ongoi no i piro-piro o boyoon do sompiiyon do payat do Liwi do hilo'd Silo, i hilo'd pomogunan do Kanaan, do minongoi solowot di Iliasar it Imam, om i Yosua i tanak di Nun, om i piro-piro o boyoon do sompiiyon do koinsanai di payat dot Israil. Boros ka diyolo', “Nokoponuhu' no o Tuhan, do pinolombus di Musa, dot onuan iyahai do piro-piro o bandar do tiyonon dahai, om onuan iyahai do tana' do kobuturan do hiri'd posorili' di bandar do poiyanan di tayam-tayam dahai,” ka. 3 Om onuwai no di tulun dot Israil i payat do Liwi do piro-piro o bandar di kibutur o posorili', do mantad di tana' di nangaanu diyolo', tu' miagal noddi o pinonuhuan do Tuhan. 4 Id gulu nopo do nakaanu do piro-piro o bandar om i pinuruan do sompiiyon di Kohat. Iri nopo piro-piro sompiiyon di suminolusuk di Harun it Imam, om nakaanu do hopod om tolu o bandar do mantad id payat do Yohuda, om Simion om Binyamin. 5 Iri no piro-piro sompiiyon do suwai do mantad id pinuruan do sompiiyon di Kohat om nakaanu do hopod o bandar do mantad id payat dot Ipraim, om Dan, om Manasi di ponong id kotonobon do mantad di Bawang do Yordan. 6 Iri no pinuruan do sompiiyon di Girson om nakaanu do hopod om tolu o bandar do mantad id payat dot Isakar, Asor, Naptali, om Manasi di ponong id koulayon do mantad di Bawang do Yordan. 7 Iri no piro-piro sompiiyon do mantad id pinuruan do sompiiyon di Morari om nakaanu do hopod om duwo o bandar do mantad id payat do Rubin, om Gad om Sibulon. 8 Om undio' no do minamahagi' i piro-piro o bandar diri om i kobuturan di posorili' di bandar do pinatahak dot id payat do Liwi. Tu' iyo noddi o pinonuhuan do Tuhan do pinolombus di Musa.
I Piro-Piro Bandar do Pinatahak dot id Pinuruan do Sompiiyon di Kohat
9-19 Id suang nopo di pinuruan do sompiiyon di Kohat, om iri ngai' no it imam di suminolusuk di Harun ot id gulu kopio koonuwai do piro-piro o bandar; om nonuan iyolo' do hopod om tolu o bandar do mitonggoi di tana' do kobuturan do hiri'd posorili'. Naanu nopo diyolo' do mantad id watas do payat do Yohuda om Simion om siam o bandar dot oinsanan: Libna, Yatir, Istimoa, Holon, Dobir, Ain, Yuta, om Bait-Simis, om Arba. Arba nopo om pinungaranan do pinasangai di tapa' di Inak. Om iri nopo bandar diri, i pinungaranan diri do Hibron do baino', om bandar do pogintirungan do hilo'd konuluhanan do Yohuda. Om iri nopo koumaan om i kokompungan do bandar diri om nakatahak no dot id di Kalib i tanak di Yopuni, do maan do dau'd songonuon. Om mantad no dot id watas do payat do Binyamin om nonuan iyolo' dot apat o bandar: Gibion, Giba, Anatot om Almon. 20-26 Iri nopo piro-piro sompiiyon do suwai dot id suang di pinuruan do sompiiyon di Kohat om nonuan do hopod o bandar do mitonggoi di tana' do kobuturan do hiri'd posorili'. Om mantad no dot id payat dot Ipraim om nonuan iyolo' dot apat o bandar: Bait-Horon, Kibsaim, Gosir om Sikim. Sikim nopo om bandar do pogintirungan do hilo'd konulu-nuluan dot Ipraim. Mantad no dot id payat do Dan om nonuan iyolo' dot apat o bandar: Iltiki, Gibiton, Ayalon, om Gat Rimon. Om mantad no dot id payat do Manasi di ponong id kotonobon om nonuan iyolo' do duwo o bandar: Taanak om Gat Rimon.
I Piro-Piro do Pinatahak dot id Pinuruan do Sompiiyon di Girson om i Morari
27-33 Iri no tiso' kawagu do pinuruan do sompiiyon dot id suang do payat do Liwi, i pinuruan do sompiiyon di Girson, om nonuan do hopod om tolu o bandar do mitonggoi di tana' do kobuturan do hiri'd posorili'. Om mantad no dot id payat do Manasi di ponong id koulayon om nonuan iyolo'd duwo o bandar: Biistra om Golan. Golan nopo om bandar do pogintirungan do hilo'd Basan. Om mantad nod id payat dot Isakar om nonuan iyolo' dot apat o bandar: Kision, Dobrat, Yarmut om In Ganim. Om mantad nod id payat dot Asor om nonuan iyolo' dot apat o bandar: Misal, Abdon, Hilkat, om Rihob. Om mantad nod id payat do Naptali om nonuan iyolo' do tolu o bandar: Hamatdor, Kartan om Kidis. Kidis nopo om bandar do pogintirungan do hilo'd Galilia. 34-40 Iri no sinakagon di Liwi do suwai, i pinuruan do sompiiyon di Morari om nonuan do hopod om duwo o bandar do mitonggoi di tana' do kobuturan do hiri'd posorili'. Mantad nopod id payat do Sibulon om nonuan iyolo' dot apat o bandar: Yokniam, Karta, Dimna, om Nahalal. Om mantad nod id payat do Rubin om nonuan iyolo' dot apat o bandar: Bisir, Yahas, Kidimot, om Mipaat. Om mantad nod id payat do Gad om nonuan iyolo' dot apat o bandar: Mahanaim, Hisbon, Yaisor om Ramot. Ramot nopo om bandar do pogintirungan do hilo'd Giliad. 41-42 Id suang nopo di tana' do naanu do tulun dot Israil om apat nohopod om walu' o bandar do kosuang ngai' i kobuturan di hiri'd posorili' do pointikid-tikid di bandar do pinatahak dot id payat do Liwi.
Nosolod di Tulun dot Israil o Tana' do Kanaan
43 Om patahako' noddi do Tuhan dot id tulun dot Israil o koinsanai di tana' di nakabatos mantad dau do mikuwo'd sumpa' do patahakon dot id taki-aki diyolo'. Om kosolod poddi diyolo' i tana'ddi om pomogun-mogun noddi iyolo'd hiri. 44 Om onuwai nod Tuhan iyolo' do kosimbayanan do pointongkop do pomogunan diri tu' nintirungan dau iyolo' do miagal di nakabatos mantad dau dot id taki- aki diyolo'. Aiso' no tiso' di pisangod do tulun dot Israil do nakaala' diyolo' tu' nonuan i' iyolo'd Tuhan do kamanangan do suminangod do koinsanai di pisangod diyolo'. 45 Nabayaan ngai' id Tuhan do minomonsoi o koinsanai di nakabatos dau dot id tulun dot Israil, om aiso' no o tiso' dot a' nowonsoi.
Sinuhu' di Yosua i Piro-Piro Payat do Ponong id Koulayon do Muli' do Hiri'd Diyolo'd Watas
1 Om timungo' no di Yosua i tulun do mantad id payat do Rubin, Gad om Manasi di ponong id koulayon do mantad id Bawang do Yordan. 2 Om boros ka dau dot id diyolo', “Nowonsoi ngai' no dokoyu o koinsanai di pinonuhuan di Musa, i susuhuon do Tuhan diri. Om minumboyo' kou nogi' di pinonuhuan ku. 3 Om solinaid diti om a' kou i' insan koumbal do monongkiad do tulun dot Israil do suwai, om otorodok kou i' do tuminanud do boros do Tuhan, i Kinorohingan dokoyu. 4 Om baino' nodti, om noonuan nod Tuhan, i Kinorohingan dokoyu, do kosimbayanan o koobpinayan dokoyu di sompi' ko' tulun dot Israil do miagal di nakabatos mantad do Tuhan. Om songkoino kou noddi do gumuli' do hilo'd watas dokoyu, i hilo'd ponong id koulayon do mantad id Bawang do Yordan; i tana' do pinatahak mantad di Musa dot id dokoyu. 5 Om soro-sorohon no kopio dokoyu do tumanud dit Oturan di pinoboros di Musa do poingkaa: Kosianai nod Tuhan, i Kinorohingan dokoyu, om wonsoyon no o korohian dau, om tonudon no i ponuhuan dau, om tumorodok no dot id dau om sumambayang no kasai' dot id dau do mikuwo'd aayi-ayi' o ginawo om pomusarahan dokoyu,” ka dau. 6-9 Om suhuo' no di Yosua i payat do Rubin, Gad om Manasi di ponong id koulayon do muli' om barakatai no dau iyolo' do mikuwo'd binilinan do poingkaa, “Uli' kou no do mitonggoi do dapu' om kakayaan om tayam-tayam dot ogumu', om pirok om tamas, om tambaga' om basi', om pakayan dot ogumu'. Om bohogian no dokoyu i tongotobpinai dokoyu di sompi' ko' tulun dot Israil di dapu' do naanu dokoyu do mantad id pisangod,” ka dau. Om uli' noddi iyolo'. Om uli' noddi i payat do Rubin, om i payat do Gad om i songintanga' do payat do Manasi di ponong id koulayon do mantad id Bawang do Yordan. Om tongkiad no iyolo' di tulun dot Israil do suwai do hilo'd Silo, i hilo'd pomogunan do Kanaan. Om ongoi no iyolo' do hilo'd Giliad, i tana' do nasanganu diyolo', i naanu diyolo' do tumanud di boros do Tuhan do pinolombus di Musa. (Noonuan no di Musa do tana' o songintanga' do payat do Manasi do hilo'd Basan, om i Yosua nga' minanahak po kawagu di songintanga' do payat do Manasi do tana' di ponong id kotonobon do mantad di Bawang do Yordan, do pasagalai di tana' do payat dot Israil do suwai.)
I Pananaraban do Porsombahan do Hilo'd Somok do Bawang do Yordan
10 Om tontok di nokorikot i payat do Rubin, om Gad om Manasi di ponong id koulayon do mantad id Bawang do Yordan do hilo'd Golilot --- it id ponong id kotonobon do mantad id Bawang do Yordan --- om pomonsoi no iyolo' dot iso' o pananaraban do porsombahan dit agayo om olumis do hiri'd somok di bawang.1|60|HK63A| Momonsoi do pananaraban do porsombahan|22.10 11 Om kosunudai noddi i tulun dot Israil do suwai di winonsoi diyolo', “Minomonsoi i payat do Rubin, Gad om Manasi di ponong id koulayon do mantad id Bawang do Yordan dot iso' o pananaraban do porsombahan do hilo'd Golilot, i ponong id kotonobon do mantad id Bawang do Yordan!” ka. 12 Om soira' di nokorongou iyolo' do miagal diri om timung no o koinsanai di tulun dot Israil do hilo'd Silo. Om sumaap daa'ddi iyolo' di payat dot Israil di ponong id koulayon do mantad id Bawang do Yordan. 13 Om suhuo' no diyolo' i Pinihas i tanak di Iliasar, it Imam diri, do mongoi solowot di payat do Rubin, Gad om Manasi do ponong id koulayon di Bawang do Yordan, do hilo'd Giliad. 14 Om woyo' no di Pinihas o hopod o boyoon di tulun dot Israil, --- do songulun o mantad id pointikid-tikid do payat di hiri'd ponong id kotonobon do mantad id Bawang do Yordan; om boyoon ngai' nopo iyolo' do sompiiyon dot id suang do payat diyolo'. 15 Om ongoi ngai' no i tulun di sinuhu'ddi do hilo'd watas do Giliad do minongoi solowot di payat do Rubin, Gad om Manasi di ponong id koulayon. 16 Om boro-boros no iyolo' dot id tulun di mantad id payat do Rubin, Gad om Manasi, dot id suang do ngaran do koinsanai di tulun do songonuon do Tuhan do poingkaa, “Nokuro tu' araat o winonsoi dokoyu dot id toguang do Kinorohingan dot Israil? Sumaap kou'd Tuhan tu' minomonsoi kou i' diti pananaraban do porsombahan. A' kou noddi tumanud di ponuhuan dau! 17 A' toi dokoyu osorou di nokowonsoi toko' do dusa do hilo'd Pior do pinorikatan toko'd Tuhan do toruol dit araat kopio'ddi? Om oinggorit toko' poddi kasai' do gama' di dusa'ddi. Om a' po tuu kabagal iri? 18 Tumongkiad kou po daa kawagu do Tuhan? Ondung sumaap kou'd Tuhan do baino' om suab nopondo om tumogod no iyau do koinsanai'd tulun dot Israil. 19 Ondung sosomu' om a' osorupai dot iyonon do sumambayang o hilo'd pomogunan dokoyu om mongoi kou nopo do hiti'd pomogunan di don Tuhan, i kinoiyonon di Kiim do Tuhan. Mokianu kou nopo dahai do tana', nga' kada' kou po kopio saap do Tuhan om kada' kou pominsuhu' dahai do sumaap dot i momonsoi'd pananaraban do porsombahan do suwai o kasaap-saap do Tuhan. Tu' haro no o pananaraban do porsombahan dot id Tuhan, i Kinorohingan toko'. 20 Soroho' pogi' i Akan i tanak di Sira tu' a' tuminanud di boros do Tuhan, do pasal di konunu-nunuan dit apatut daa do raagon. Om kinootuson nopo nga' kohompit ngai' nopoddi o tulun dot Israil do nohukuman. I Akan no daa o kidusa, nga' okon iddi ko' i Akan noo o napatai,” ka diyolo'. 21 Om boro-boros no i payat do Rubin, Gad, om Manasi di ponong id koulayon dot id piro-piro o boyoon do sompiiyon do payat dot Israil di ponong id kotonobon do mantad id Bawang do Yordan do poingkaa, 22 “Kinorohingan no ot Agayo Kuasa'! Om iyau no o Tuhan! Kinorohingan no ot Agayo Kuasa'! Om iyau no o Tuhan! Oilaan i' dau o nakapamansayan dahai'dti om orohian nogi' iyahai do koilo kou iyokoyu! Ondung sumaap iyahai'd Tuhan om a' otumbayaan dau, om patayo' nopo iyahai do dinondo! 23 Ondung a' iyahai tumorodok dot id Tuhan om gisom do minomonsoi iyahai diti pananaraban do porsombahan dahai, do maan do panaraban do porsombahan di sorobon ko' poiyanan po do porsombahan do gandum, ko' porsombahan do piombolutan, om Tuhan nopo o momohukum dahai! 24 Nga' okon i' ko' iyo'ddi! Winonsoi pogi' dahai iti pananaraban do porsombahan diti nga' ooris iyahai do koimbagu nopondo om momoros dotindo o sinakagon dokoyu dot id sinakagon dahai do poingkaa, ‘A' kou i' kouhup-uhup do Tuhan, i Kinorohingan dot Israil! 25 Om winonsoi do Tuhan iti Bawang do Yordan do popotongkiad dahai do mantad id dokoyu, i payat do Rubin om Gad. A' kou i' iyokoyu kouhup-uhup do Tuhan!’ ka dotindo diyolo'. Om pakaus nondo do ginawo di sinakagon dahai i sinakagon dokoyu, gisom dot a' nondo iyolo' sumambayang dot id Tuhan. 26 Om iri no o kinapamansayan dahai'dti pananaraban do porsombahan, tu' okon i' ko' pananaraban do porsombahan di sumbolion, ko' poiyanan po di piro-piro o porsombahan dahai. 27 Nga' sumiliu no dot iso' o tanda' dot id dati' ngai' om id sinakagon toko' do koimbagu dot otopot i' kopio do sumambayang ngai' toko' dot id Tuhan do hiri'd Kiim do Tuhan om papatahak do porsombahan di sorobon om i piro-piro o porsombahan do suwai om i porsombahan do piombolutan. Om a' nondo milo i sinakagon dokoyu do momoros dot id sinakagon dahai dot a' iyolo' kouhup do Tuhan. 28 Komoyon nopo dahai nga' ondung osiliu o miagal diri om milo indo i sinakagon dahai do momoros do poingkaa, ‘Intangai pogi' i taki-aki dahai nga' nokopomonsoi i' do pananaraban do porsombahan do miagal di pananaraban do porsombahan di don Tuhan. Okon i' ko' pananaraban do porsombahan di sorobon iti ko' poiyanan po do porsombahan, suwai ko' tanda' noo dot id piolitan toko',’ ka nondo diyolo'. 29 A' i' kopio iyahai sumaap do Tuhan, ko' tumingkod po do sumambayang dot id dau o kinapamansayan dahai diti pananaraban do porsombahan do sorobon, ko' porsombahan do gandum ko' i piro-piro o porsombahan do suwai. A' i' kopio iyahai momonsoi do pananaraban do porsombahan do suwai ko' i pananaraban do porsombahan do don Tuhan, i Kinorohingan toko' di hilo'd dotimbabaan di Kiim do Tuhan,” ka diyolo'. 30 Om korongou po i Pinihas, om i piro-piro o boyoon do tulun dot Israil di tuminanud dau, om i piro-piro o boyoon do sompiiyon dot Israil di pinoboros di payat do Rubin, Gad om Manasi di Ponong id Koulayon diri, om osonong nogiddi o ginawo diyolo'. 31 Om boros ka di Pinihas, i tanak di Iliasar it Imam diri, dot id payat do Rubin, Gad om Manasi di Ponong id Koulayon, “Baino' nopoddi om oilaan no dahai do moyo-woyo' o Tuhan dati', tu' a' kou i' sumaap dau. Om nokoidu' i' dokoyu o tulun dot Israil do mantad id hukuman do Tuhan,” ka dau. 32 Om tongkiadai no di Pinihas om i piro-piro o boyoon dot Israil i payat do Rubin om Gad do hilo'd Giliad. Om uli' no iyolo' do hilo'd Kanaan om posunudo' no diyolo' iri dot id tulun dot Israil. 33 Om osonong ngai' nogiddi o ginawo di tulun dot Israil. Om pamarayou no iyolo'd Tuhan! Om a' noddi iyolo' kosorou do manangod di payat do Rubin om Gad ko' mamaraag po do pomogunan diyolo'. 34 Om boros ka di payat do Rubin om Gad, “Iti nopo pananaraban do porsombahan diti om maan toko' do sasi' dot id dati' ngai' do Tuhan no o Kinorohingan,” ka diyolo'. Om pungaranai no diyolo' i pananaraban do porsombahan diri do “Sasi'”.
Boros di Yosua do Pinongintod dau di Tulun dot Israil
1 Om onuwai nod Tuhan do kosimbayanan i tulun dot Israil, gisom dot a' noddi iyolo' rolosion do pisangod. Om alaid noddi do mantad diri om molohing noddi kopio i Yosua. 2 Om timungo' noddi dau o koinsanai di tulun dot Israil, om i boyoon, om i woyo-woyoon, om i gompomutus, om i pagawai diyolo'. Om boros ka dau dot id diyolo', “Molohing oku noddi kopio. 3 Om nongkokito kou no di nongowonsoi'd Tuhan, i Kinorohingan dokoyu dot id toinsanan di bansa'd tulun do hiti do bagi' dokoyu. Om Tuhan, i Kinorohingan dokoyu o suminangod do minongobi' dokoyu. 4 Om nabahagi' ku no iti tana' dot id koinsanai'd payat dokoyu do maan do dokoyu'd songonuon. I tana' do bansa' di nangaala' do mimpuun do mantad id soborong ponong id koulayon do mantad id Bawang do Yordan om gisom do korikot do hilo'd Rahat do Tanga', do ponong id kotonobon. 5 Saapon i' om uyungon do Tuhan, i Kinorohingan dokoyu i piro-piro o bansa'ddi do mongoi kou sangod diyolo'. Om asanganu i' dokoyu i tana' diyolo' do miagal di nakabatos mantad do Tuhan, i Kinorohingan dokoyu, dot id dokoyu. 6 Iyo nopoddi, om tumorodok kou no kopio do tumanud di nongkotulis do hiri'd buuk do Tourat di Musa. Om kada' nod haro o tongoiso' piya dit oturan diri do toliban. 7 Kada' kou no ponokiambalut di tulun di bansa'd suwai di poingiyon dot id rolot dokoyu, ko' mamarait po do ngaran di tingolig diyolo', ko' rumait po do ngaran di tingolig diri do tontok do sumumpa' kou. Kada' kou no kopio tuku' dot id tingolig diyolo' ko' motud po dot id toguang diyolo'. 8 Suwai ko' tumorodok kou no do mumboyo' do Tuhan do miagal di kotorodoko' dokoyu dot id dau do gisom do baino'. 9 Nouyung nod Tuhan i bansa' dit angagayo om it okoris do minogobi' dokoyu. Om aiso' i' o tongoiso' piya dot id pogialatan diyolo' do kasaap dokoyu. 10 Iso' nopo dokoyu om kaala' i' do soribu o pisangod tu' tulungon kou i' do Tuhan, i Kinorohingan dokoyu do sumangod diyolo' do miagal di nakabatos mantad dau. 11 Iyo nopoddi, om soro-sorohon no kopio dokoyu dot osianan do Tuhan, i Kinorohingan dokoyu. 12 Ondung a' kou tumorodok om tumanud kou nogindo dilo bansa' do tulun di momogun-mogun do poirolot dokoyu om mangawin kou do tulun diyolo', 13 om atantu' no dot a' i' o Tuhan, i Kinorohingan dokoyu mogobi' dokoyu do monguyung di bansa'ddi. Om iri nopo bansa'ddi nga' sumiliu do koligagaanan dot id dokoyu, om osiliu nondo iyolo' do lawa' ko' i kosulungon dokoyu. Om oinggorit kou nondo kopio dot iyolo' o koinggorit do miagal po do bobogon o likud ko' miagal do tinsukon do rugi o mato. Om oinggorit kou nondo kopio do gisom dot iso' pod tulun nga' aiso' no o momogun-mogun do hiri'd pomogunan dot osonong di pinatahak do Tuhan, i Kinorohingan dokoyu, dot id dokoyu. 14 Baino' nopoddi om oruhai noddi o kapatayan ku. Om opurimanan ngai' i' dokoyu do nakatahak ngai' nod Tuhan, i Kinorohingan dokoyu o koinsanai dit osonong dot id dokoyu do miagal di nakabatos dau dot id dokoyu. Om koinsanai di nakabatos dau nga' nangabayaan i'. 15 Nga' poingkuro nopo o Tuhan do minamayaan di pinabatos dau dot id dokoyu, om atantu' no dot iyo noddi iyau do poporikot do koinggoritan dot id dokoyu. 16 Ondung tumolibamban kou di tumpongo di pinonuhuan do Tuhan dokoyu'd tumanud, om mongoi kou no podsubak om mongoi kou tuku' dot id tingolig om otogod nondo o Tuhan om hukuman kou nondo dau, gisom dot aiso' no o tiso' dokoyu'd momogun-mogun do hiti'd pomogunan dit osonong, i pinatahak do Tuhan dot id dokoyu,” ka dau.
Minoro-boros i Yosua dot id Tulun dot Israil do Hilo'd Sikim
1 Om timungo' noddi di Yosua o koinsanai di payat dot Israil do hilo'd Sikim. Om lohowo' no dau o koinsanai di boyoon, om i woyo-woyoon, om i gompomutus, om i pagawai dot Israil, om timung noddi iyolo' do minongoi timbaba' do Kinorohingan. 2 Om boro-boros noddi i Yosua dot id koinsanai di tulun dot Israil do poingkaa, “Pokinongou kou no do boros do poboroson do Tuhan, i Kinorohingan dot Israil, dot id dokoyu. Om poingkaa o boros do Kinorohingan, ‘Di nopo di gulu po om poingiyon i taki-aki dokoyu do hilo'd soborong do Bawang dot Iprat. Om tumuku' iyolo' dot id ponokokinorohingan do suwai. Iso' nopo diyolo' om i Tira, i tapa' di Abraham om i Nahor. 3 Om ngoyo' ku no popinghomboo' i Abraham, i taki-aki dokoyu, i poingiyon daa do hilo'd soborong do Bawang dot Iprat, do pinotongkop ku iyau do pomogunan do Kanaan. Om onuwai ku no iyau do sinakagon dot ogumu'. Om i Isak no o pinatahak ku dau, dit id gulu kopio. 4 Om onuwai ku no i Isak do duwo o tanak, do ngaran nopo om i Yakub om i Isau. Om onuwai ku no i Isau do tana' di hilo'd konulu-nuluan dot Idom do maan do dau'd songonuon. Nga' i Yakub noo, i taki-aki dokoyu om minongoi do hilo'd Masir do miwoyo' di tangaanak dau. 5 Om lohowo' ku no i Musa om i Harun, do pinoporikot do kosusaan dot agayo do hilo'd Masir. Nga' iyokoyu nopo om pinosoliwan ku i' do mantad do hilo'. 6 Om pinosoliwan ku do mantad hilo'd Masir i taki-aki dokoyu. Om gusao' no iyolo' di soudor do Masir dit ongkikorita'-kuda' do dong sumasangod om it ongkikuda'. Nga' soira' di nokorikot i taki-aki dokoyu do hilo'd Rahat dot Aragang 7 om pokiuhup noddi iyolo' doho', om potuongo' ku noddi ot id piolitan diyolo' om i tulun do Masir. Om londodo' ku no i soudor do Masir do hiri'd rahat gisom do nongolondod ngai' iyolo'. Om nongoilaan ngai' i' dokoyu o koinsanai di winonsoi ku'ddi di hilo'd Masir. Om alaid kou po kopio do poundorong do hilo'd tana' do kowotuan. 8 Om poongoyo' ku no iyokoyu do hilo'd pomogunan do tulun dot Amori, i ponong id koulayon do mantad id Bawang do Yordan. Om suminaap i' daa iyolo' dokoyu nga' pinamanang ku i' iyokoyu do suminaap diyolo'. Om kosolod noddi dokoyu i pomogunan diyolo' om patayo' ku no iyolo' di maso dokoyu do sumangod. 9 Om ongoi no saap do tulun dot Israil i raja' do Muab, i roitan dot i Balak, i tanak di Sipor. Om minonuhu' iyau do tulun do mongoi solowot di Biliam i tanak di Bior, do monuhu' di Biliam do momopol dokoyu. 10 Nga' a' ku i' winonsoi i pinokianu di Biliam, gisom do minamarakat nogiddi iyau dokoyu om nokoidu' ku iddi iyokoyu do mantad id longon di Balak. 11 Om kosoborong kou noddi di Bawang do Yordan om korikot kou no do hilo'd Yorikou. Om i tulun do Yorikou nga' suminaap i' daa dokoyu. Om i tulun dot Amori, om Poris, om Kanaan, om Hit, om Girgasi, om Howi, om Yobus nga' suminaap nogi' daa. Nga' naala' ngai' ku i' iyolo' tu' nobian ku i' iyokoyu. 12 Ginangau ku iyolo' om rinolosi ku do tontok di sinangod dokoyu iyolo'. Gisom do minogidu' goduwo i raja' dot Amori do mantad id dokoyu. Om okon i' ko' i gayang ko' i po pana' o kinamanangan dokoyu. 13 Nakatahak ku no dot id dokoyu o tana' dit okon ko' iyokoyu o minorobuat, om piro-piro o bandar dit okon ko' iyokoyu o minomonsoi. Om baino' noddi om poingiyon kou no do hiti'd pomogunan diti, om mangakan kou di tua' dot anggur om tua' do saitun dit okon ko' iyokoyu o minananom!’ ka,” ka dau. 14 Om boros kaddi kawagu di Yosua, “Iyo nopoddi om pusoho' no dokoyu o Tuhan, om tumorodok kou no do sumambayang dot id dau do mikuwo dot aayi-ayi' kopio o ginawo. Om pataamon no dokoyu i tingolig do tukuon di taki-aki dokoyu di gulu po di hilo'd Misopotamia om di hilo'd Masir. Sumambayang kou no dot id Tuhan om id dau noo. 15 Ondung mikoduwo o ginawo dokoyu do sumambayang dot id Tuhan, om ilaai no kopio dokoyu do dinondo ondung id disai o sambayangan dokoyu: i ponokokinorohingan di taki-aki dokoyu di hilo'd Misopotamia, ko' iri po i ponokokinorohingan do tulun dot Amori do hiti'd pomogunan di pomogun-mogunan dokoyu do dinondo. Nga' iyoho' nopo om i sompiiyon ku, om sumambayang i' dot id Tuhan, om id Tuhan noo,” ka dau. 16 Om boros ka di tulun dot Israil do suminimbar, “Aiso' i' kopio o ginawo dahai do tumongkiad do Tuhan om tumuku' dot id ponokokinorohingan do suwai! 17 Tu' Tuhan no, i Kinorohingan toko', o pinoposoliwan di taki-aki toko' do mantad id koudipanan do nosiliu do turipon do hilo'd Masir, om nongkokito toko' nogi' di piro-piro o koimayaan do winonsoi'd Tuhan. Om Tuhan nogi' o minongintirung dati' di hiri'd tindalanon toko' do minaya' do piro-piro o pomogunan do bansa'd suwai. 18 Om tontok di suminuang toko' diti pomogunan om nuyung ngai' i' do Tuhan o koinsanai di tulun dot Amori, i momogun-mogun mantad do hiti. Iyo nopoddi, om iyahai nga' orohian i' do sumambayang dot id Tuhan. Tu' iyau no o Kinorohingan toko',” ka. 19-20 Om boros ka di Yosua dot id tulun dot Israil, “A' kou i' milo do tumuku' dot id Tuhan. Tu' Tuhan nopo om Kinorohingan dit Olidang Kopio om a' i' iyau orohian do haro i mongoi iyo-iyo dau. Om a' iyau mangampun do dusa om kasalaan dokoyu. Ondung tumongkiad kou dau om tumuku' kou nondo dot id tingolig, om a' no iyau mangampun do dusa dokoyu. Om hukuman kou nondo dau. Om raagon kou po dau do mulong piya daa dot osonong iyau dot id dokoyu di gulu po,” ka. 21 Om boros ka di tulun dot Israil do suminimbar, “Amu'! A' no iyahai sumambayang dot id ponokokinorohingan do suwai. Sumambayang no iyahai kasai' dot id Tuhan, om id dau noo,” ka diyolo'. 22 Om boros kaddi di Yosua dot id diyolo', “Iyokoyu no o sumiliu do sasi' dokoyu. Tu' nopili' no dokoyu do sumambayang kou dot id Tuhan,” ka. Om boros ka diyolo' do suminimbar, “Oo, iyahai no o sumiliu do sasi' dahai,” ka. 23 Om boro-boros po kawagu i Yosua do poingkaa, “Ondung miagal diri, om taamai ngai' no dokoyu i ponokokinorohingan do bansa'd suwai di poingigit dokoyu. Om pamatos kou no do tumorodok kasai' kou dot id Tuhan, i Kinorohingan dot Israil,” ka. 24 Om boros ka di tulun dot Israil dot id di Yosua, “Sumambayang i' iyahai dot id Tuhan, i Kinorohingan toko'. Om mumboyo' i' iyahai do ponuhuan dau,” ka. 25 Om pomonsoi noddi i Yosua do tumpongo do maan di tulun dot Israil do hilo'd Sikim do tontok do tadau'ddi. Om onuwai no dau iyolo' do piro-piro ot oturan om ponuhuan dit apatut diyolo'd tonudon. 26 Om tuliso' ngai' no di Yosua iri dot id Buuk do Tourat do Kinorohingan. Om anu no iyau dot iso' o watu dit agayo, om poudongo' no do hiri'd sahau di kayu dot agayo, i hiri'd kinoiyonon di nokotobilang do maan do don Tuhan. 27 Om boro-boros nogiddi i Yosua di tulun dot Israil do poingkaa, “Iti nopo watu diti om sasi' toko', do koinsanai di boros do Tuhan di pinoboros dot id dati' om nokoboros no do hiti'd toguang diti watu. Om iti no watu ot osiliu do sasi' dokoyu ondung sumaap kou no do Kinorohingan dokoyu do koimbagu,” ka. 28 Om kowonsoi poddi ngai' iri om suhuo' ngai' no di Yosua i tulun diri do muli'. Om uli' no iyolo' do hiri'd watas diyolo'.
Napatai i Yosua om i Iliasar
29 Om kapatai noddi i Yosua, i tanak di Nun, i susuhuon do Tuhan, di hatus om hopod o toun do tumur dau. 30 Om lobongo' no diyolo' i Yosua do hiri'd tana' dau, i hilo'd Timnat Sira, it id konulu-nuluan dot Ipraim, i ponong id utara di Nuluhon do Gaas. 31 Solinaid nopo di poimpasi po i Yosua om sumambayang kasai' i' dot id Tuhan i tulun dot Israil. Om diri piya di napatai no i Yosua nga' sumambayang kasai' po dot id Tuhan i tulun dot Israil, do solinaid po do songimpasi i piro-piro o boyoon di nongkokito di winonsoi'd Tuhan dot id tulun dot Israil. 32 Iri nopo rata' di Yusup, i nigitan do tulun dot Israil do mantad hilo'd Masir om linobong diyolo' do hilo'd Sikim. Iti nopo nga' tana' do binoli di Yakub di gulu po, do mantad id tangaanak di Hamor, i tapa' di Sikim, do hatus o tusin do pirok do pinomoli. Iri nopo tana'ddi om i sinakagon di Yusup o nokotungkus. 33 Om i Iliasar, i tanak di Harun nga' napatai nogi'. Om linobong iyau do hilo'd Gibia, i bandar do pinatahak dot id di Pinihas i tanak di Iliasar, i hilo'd watas do konulu-nuluan dot Ipraim.
Tinangkap di Payat do Yohuda om i Payat do Simion i Adonibisik
1 Tontok di napatai i Yosua, om uhot no i tulun dot Israil do Tuhan do poingkaa, “Oi Tuhan, disai tuu'd payat dot id pogialatan dahai ot apatut do mogulu do mongoi panangod di tulun do Kanaan?” ka. 2 Om boros kad Tuhan do suminimbar, “I payat do Yohuda o mogulu. Tu' noonuan ku no iyolo' do kuasa' do mangala' do pomogunan diri,” ka. 3 Om boros kaddi di tulun do Yohuda dot id tulun do Simion, “Tanud kou pogi' dahai do mongoi panangod di tulun do Kanaan om mongoi ponolod di tana' do natantu' mantad do Tuhan do patahakon dot id dahai. Om iyahai nga' mongoi indo tanud dokoyu do mongoi kou ponolod di tana' do natantu' mantad do Tuhan do patahakon dot id dokoyu,” ka. Om ongoi noddi i payat do Simion 4 om i payat do Yohuda sangod; om piwoyo' nopo iyolo'. Om onuwai no iyolo'd Tuhan do kamanangan do suminangod di tulun do Kanaan om i tulun do Poris. Om kapatai no o hopod noribu o tulun do pisangod do hilo'd Bisik. 5 Om ngoyo' no di duwo o payat diri songodo' i raja' do pomogunan diri, i roitan dot i Adonibisik. 6 Om poggidu' no daa iyau, nga' gusao' no diyolo' iyau om kokosupai iddi diyolo'. Om potodo' noddi diyolo' o posolon do lapap om posolon do palad dau. 7 Om boros kad i Adonibisik, “Di nopoddi gulu po, om nakapamatod oku do posolon do lapap om posolon do palad do turu' nohopod o raja'. Om pinologos ku nogi' iyolo' do mangakan di mumu' do taakanon dit aratu' do mantad id mija' ku. Om baino' noddi, om wonsoyon noddid Kinorohingan dot id doho' o miagal di winonsoi ku dot id diyolo',” ka dau. Om tanggayai noddi diyolo' i Adonibisik do hilo'd Yorusalim, om hilo' no o nakapatayon dau.
Naala' di Payat do Yohuda o Yorusalim om Hibron
8 Om ngoyo' no di tulun do Yohuda songodo' o Yorusalim, om kosolod no diyolo' i bandar diri. Om tutudai noddi diyolo' i bandar om patayo' i tulun do poingiyon do hiri. 9 Om ongoi poddi kawagu iyolo' panangod di tulun do Kanaan di momogun-mogun do hiri'd watas do konulu-nuluan, om i hiri'd guas do nulu-nulu; om i nogi' i momogun-mogun do hilo'd kinoiyonon dit otuu di ponong id salatan, 10 om i hilo'd bandar do Hibron, i bandar do pinungaranan do Kiriat Arba di gulu po. Om hilo' no do naala' di tulun do Yohuda i pinuruan do sompiiyon di Sisai, om i Ahiman om i Talmai.
Naala' di Otniol i Bandar do Dobir
11 Om mantad nod hilo'd Hibron, om ngoyo' no di tulun do Yohuda songodo' i bandar do Dobir, i roitan do Kiriat Sipir do tontok diri. 12 Om boros kad songulun do mantad id payat do Yohuda, i roitan dot i Kalib, “Isai nopo o kaala' do Kiriat Sipir, om kakawin no di tanak ku'd tondu', i roitan dot i Aksa,” ka. 13 Om kosolod no di Otniol i bandar diri. I Otniol nopo om tanak di tadi' di Kalib, i roitan dot i Kinas. Om pokowinai noddi di Kalib di Otniol i Aksa. 14 Om tontok di tadau do minikawin iyolo' om sansagai nod i Otniol i Aksa do mokianu di tapa' dau do songkoiyonon o tumo. Om lintuhun noddi i Aksa do mantad hiri'd kaladai dau, om uhoto' no iyau di Kalib ondung nunu o pokionuon dau. 15 Om boros kad i Aksa do suminimbar, “Mokianu oku daa do piro-piro o tudan do waig, tu' iri nopo tana' di pinatahak nu doho' om hilo'd kinoiyonon dit otuu,” ka dau. Om iri noddi o kinapatahakan di Kalib di tudan do waig di hiri'd sokid om i tudan do waig di hiri'd siba' dot id di Aksa.
Kinamanangan di Payat do Yohuda om Payat do Binyamin
16 Iri nopo sinakagon di tiwanon di Musa, i tulun do Kini diri, om tuminanud di tulun do Yohuda do suminoliwan do mantad id Yorikou, i bandar dit ogumu' o guas do kurma, om pakayaai no diyolo' dot id kinoiyonon dit aiso' o sumuni, i ponong id salatan dot Arad, i hilo'd Yohuda. Om hilo' no o pinomogun-mogunan diyolo' dot id rolot di tulun dot Amalik. 17 Om piwoyo' noddi i payat do Simion om i payat do Yohuda do minongoi panangod om minongoi pangala' di tulun do Kanaan di poundorong do hilo'd bandar do Sipat. Om papalai noddi diyolo' o bandar diri, om raago' nogiddi diyolo'. Om pungaranai no do Horma i bandar diri. 18-19 Om nuhupan i' do Tuhan i tulun do Yohuda gisom do nosolod diyolo' i hiri'd watas do konulu-nuluan. Nga' a' no iyolo' nokosolod do Gasa, om Askilon om Ikron, om i piro-piro o watas do hiri'd posorili'. Tu' iri nopo tulun di poingiyon do hiri'd poingompus di tisan do rahat nga' ongkikorita'- kuda' di don sumasangod di basi' do winonsoi. Om iri no ot a' di tulun do Yohuda nakasaapan do monguyung diyolo'. 20 Om Hibron nopo nga' pinatahak dot id di Kalib, do tumanud di pinonuhuan di Musa. Tu' nopo di gulu po, om nuyung di Kalib o tolu pinuruan do sompiiyon di sinakagon di Inak do mantad id bandar diri. 21 Om a' i' i payat do Binyamin nokouyung di tulun do Yobus do mantad id bandar do Yorusalim. Om gowoi poddi om poinsugku' kasai' po i tulun do Yobus di tulun do Binyamin do momogun-mogun do hilo'.
Naala' o Baitol di Duwo o Payat do Sinakagon di Yusup
22-23 Om ngoyo' no di payat dot Ipraim om i payat do Manasi --- i sinakagon di Yusup diri --- songodo' i bandar do Baitol, i roitan do Lus do maso'ddi. Om nuhupan i' iyolo'd Tuhan. Om tontok di pakayaan no di piro-piro o gomponoluku' di sinuhu'ddi do hiri'd bandar, 24 om kosolowot no iyolo'd songulun o kusai di tumongkiad no di bandar. Om boros ka diyolo' dot id dau, “Ondung tudukan nu iyahai'd ralan do sumuang diti bandar, om a' i' iyahai momonsoi'd araat dot id diya',” ka. 25 Om tudukai noddi di tulun iyolo' do ralan do sumuang di bandar. Om suang noddi di bandar i tulun dot Ipraim om Manasi, om patayo' ngai' nopo diyolo' i tulun do hiri. Nga' a' i' diyolo' pinatai i tulun di nosolowot diyolo'ddi om i sompiiyon dau. 26 Om undaliu noddi i tulun diri do hilo'd pomogunan do tulun do Hit. Om pomonsoi no iyau dot iso' o bandar do hilo', om pungaranai no dau do Lus. Om iri kasai' po o ngaran di bandar diri.
Piro-Piro o Bansa'd Tulun dot A' di Tulun dot Israil Nouyung
27 Om a' i' di payat do Manasi nouyung i tulun mantad do hilo'd bandar do Bait-Sian, om Taanak, om Dor, om Yibliam, om Mogido, om i hiri'd kokompungan dit id somok. Om hilo' kasai' poddi i tulun do Kanaan do poingiyon. 28 Nga' di nopoddi nokokoris ko' mantad di timpuun i' i tulun dot Israil, om sansagai noddi diyolo' i tulun do Kanaan do kumaraja' dot id diyolo'. Nga' a' i' diyolo' ninsanan kopio do monguyung i tulun do Kanaan do mantad hilo'. 29 Om a' i' di payat dot Ipraim nouyung do posoliwan i tulun do Kanaan, i tulun mantad do hiri, do mantad id bandar do Gisir. Om hilo' kasai' poddi i tulun do Kanaan do poingiyon, do poinsugku' diyolo'. 30 Om i tulun mantad do bandar do Kitron om Nahalol nga' a' i' di payat do Sibulon nouyung do sumoliwan. Om gowoi poddi do momogun-mogun kasai' po i bansa'd Kanaan do hilo' do poinsugku' diyolo'. Nga' sinansagan i' maddi diyolo' i tulun do Kanaan do kumaraja' dot id diyolo'. 31 Om i tulun mantad do hilo'd bandar dot Ako, Sidon, Ahlab, Aksib, Hilba, Apik om Rihob, nga' a' i' di payat dot Asor nuyung do sumoliwan. 32 Om gowoi poddi om poingiyon kasai' po i tulun do Kanaan dot id piro-piro o bandar diri do poinsugku' di tulun dot Asor. 33 Om i tulun mantad do hilo'd bandar do Bait-Simis om Bait-Anat nga' a' i' di payat do Naptali nouyung do sumoliwan. Om poingiyon kasai' po i tulun do Kanaan do hiri'd kabandaran diri do poinsugku' di tulun do Naptali, nga' sinansagan no ma diyolo' i tulun diri do kumaraja' dot id diyolo'. 34-35 Iri tulun dot Amori nga' poingiyon kasai' po do hilo'd Ayalon, om hilo'd Saalbim, om hilo'd Nuluhon do Hiris. Tu' sinansagan diyolo' i payat do Dan do kumaa do hiri'd watas do konulu-nuluan, om a' i' diyolo' pinologos do rumuhuk do hiri'd rantai di hiri'd siba'. Nga' poinsuang i' ma do pomorintaan do payat dot Ipraim om payat do Manasi i tulun dot Amori, om sinansagan do kumaraja' dot id duwo o payat diri. 36 Hiri nopod ponong id utara do Sila, om wolit nopo di pomogunan dot Idom om kawaya' di Takadon dot Akrabim.
I Moloikat do Tuhan do hilo'd Bokim
1 Om tongkiad no i moloikat do Tuhan do mantad hilo'd Gilgal om pakayaai no do hilo'd Bokim. Om boro-boros no iyau dot id tulun dot Israil do poingkaa, “Nokosoliwan ku no iyokoyu do mantad hilo'd Masir, om nakaatod ku no iyokoyu do hiti'd pomogunan di pinabatos ku dot id taki-aki dokoyu. Om nokoboros ku nogi' o poingkaa, ‘A' ku i' raagon i tumpongo ku dot id dokoyu. 2 Om iri no ot a' dokoyu koina-inaan do momonsoi do nunu nopo o pitoruan dot id tulun mantad do pomogunan diti. Om mositi' nod raagon ngai' dokoyu i pananaraban diyolo' do porsombahan,’ kangku. Nga' a' i' dokoyu winonsoi i pinonuhuan ku'ddi. Suwai ko' pasansala' nogi' o winonsoi dokoyu! 3 Pokinongou kou nod dinondo! A' ku nondo uyungon do sumoliwan iti tulun mantad do pomogunan diti do tontok do mongoi kou sangod diyolo'. Osiliu nondo iyolo' do pisangod dokoyu om aakalan kou nondo gisom dot iyokoyu nga' tumuku' nondo di ponokokinorohingan diyolo',” ka dau. 4 Om koboros poddi di moloikat i boros do miagal diri, om ihad ngai' nopo i tulun dot Israil. 5 Om iri no o kinopomungaranan do kinoiyonon diri do Bokim. Om hilo' no i tulun dot Israil do pinapatahak dot id Tuhan do porsombahan di sinumbali'.
Kinapatayon di Yosua
6 Om kosuhu' poddi di Yosua i tulun dot Israil do mamanau, om pamanau ngai' noddi iyolo' do minongoi pomogun-mogun do hiri'd tana' di pinaangkib dot id diyolo'. 7 Om solinaid nopo di poimpasi po i Yosua, om sumambayang kasai' i' dot id Tuhan i tulun dot Israil. Om di napatai no i Yosua nga' sumambayang kasai' po iyolo' dot id Tuhan do solinaid po dot i tulun di nongkokito kopio di koimayaan do winonsoi'd Tuhan dot id tulun dot Israil, o boyoon diyolo'. 8 Om kapatai no i Yosua i tanak di Nun, i susuhuon do Tuhan diri, di hatus om hopod o toun dau. 9 Om lobongo' noddi iyau do hiri'd tana' dau di hilo'd Timnat Sira, it id konulu-nuluan dot Ipraim, i ponong id utara do Nuluhon do Gaas. 10 Om kapatai ngai' noddi i komolohingan, om i nopoddi i sukod wagu om a' no kotutun do Tuhan, tu' a' i' iyolo' nokopuriman di winonsoi'd Tuhan dot id tulun dot Israil.
Tuminingkod do Tumuku' dot id Tuhan i Tulun dot Israil
11-14 Om pomonsoi nod dusa dot id Tuhan i tulun dot Israil. Om a' noddi iyolo' sumambayang dot id Tuhan, i Kinorohingan di taki-aki diyolo', i Kinorohingan di pinoposoliwan diyolo' do mantad hilo'd Masir. Om timpuun no iyolo' do tumuku' dot id Baal om id Astorit, om id piro-piro o ponokokinorohingan di tulun di hiri'd posorili' diyolo'. Om kotogod noddi o Tuhan di tulun dot Israil om pologoso' nopoddi dau o piro-piro sinompuruan do tulun do mongoi panangod diyolo' om mongoi panakau do konunu-nunuan diyolo', gisom dot a' no iyolo' kogoos do sumangod di pisangod di hiri'd posorili' diyolo'. 15 Om pointikid-tikid do mongoi iyolo' sangod om saapon kasai' nopo iyolo'd Tuhan, do miagal di nokoinsan mantad do Tuhan dot id diyolo'. Om oinggorit tomod diri iyolo'. 16 Om onuwai noddi iyolo'd Tuhan do boyoon di popoidu' diyolo' do mantad id sinompuruan do tulun do manakau. 17 Nga' a' i' di tulun dot Israil pinusou i piro-piro o boyoon diri. Om a' i' iyolo' tumorodok dot id Tuhan, suwai ko' tumuku' nogi' iyolo' do tingolig. Om a' iyolo' minusui di kowoyo-woyoon di taki-aki diyolo' dit obingumboyo' do ponuhuan do Tuhan. 18 Om soira' nopod patahak o Tuhan do boyoon dot id tulun dot Israil, om uhupan kasai' nopo do Tuhan i boyoon diri. Om solinaid nopo do poimpasi i boyoon diri, om poiduwon no do Tuhan i tulun dot Israil do mantad id pisangod diyolo', tu' osianan i' iyau diyolo' do tontok dit orongou dau iyolo' do songodoi-odoi poo dot ouru dot inggoriton om udiponon. 19 Nga' apatai nopondo i boyoon diri, om rumaat no o kowoyo-woyoon di tulun dot Israil ko' mantad di komolohingan diyolo'. Modsubak iyolo' om tumuku' dot id tingolig. Om guminuli' iyolo' di kongoubasanan dit angaraat om a' no diyolo' tongkiadan iri. 20 Om iri no o kinatagadan kopio do Tuhan di tulun dot Israil. Om boro-boros no iyau do poingkaa, “Nosuhu' ku no i taki-aki do bansa'dti do mongigit kasai' di tumpongo ku dot id diyolo'. Nga' naraag noddi diti bansa' i tumpongo'ddi, tu' tuminolibamban i' iyolo' do boros ku. 21 Om baino' nopondo om a' ku no uyungon o nunu nopo o bansa'd tulun di noolu' dot id pomogunan diti do mantad di napatai i Yosua. 22 Om iri nondo bansa'ddi o maan ku'd pogumbal di bansa'd Israil, om oilaan ku indo ondung orohian i tulun dot Israil do tumanud di ponuhuan ku do miagal di taki-aki diyolo', ko' amu' po,” ka. 23 Om iri no ot a' do Tuhan kinapanahakan do kamanangan dot id di Yosua do suminangod di piro-piro o bansa'ddi. Suwai ko' pinologos nogi' do Tuhan i piro-piro o bansa'ddi do momogun-mogun dot id pomogunan diri, om a' i' dau iyolo' narau-arau do minonguyung.
I Piro-Piro Bansa'd Tulun do Poingiyon Kasai' do Hilo'd Pomogunan do Kanaan
1 Om pologoso' noddi do Tuhan o piro-piro o bansa'd tulun do miyon dot id pomogunan diri, do maan do pogumbal di tulun dot Israil dit a' nokoumbal do pisangadan do hilo'd Kanaan. 2 Om winonsoi pogi' do Tuhan o miagal diri nga' maan dau do ponuduk do pointikid-tikid di sukodwagu dot Israil do minsingilo do pisangadan, om okon- okon po om i tulun dit a' insan koumbal do mongoi sangod. 3 Om iri nopo bansa'd tulun di poingiyon po kasai' dot id pomogunan diri om: i tulun di poingiyon do hiri'd limo o bandar do Pilistin, om koinsanai di tulun do Kanaan, om Sidon, om i tulun do Howi di poingiyon do hilo'd konuluhanan do Libanon, do mantad pod hilo'd Nuluhon do Baal Hormon om gisom do korikot do hilo'd ralan di poingkaa do hilo'd Hamat. 4 Hilo' pogi' iyolo' nga' iyolo' no o sumiliu'd pogumbal di tulun dot Israil. Om iyo noddi o koilo-ilo ondung tumanud i tulun dot Israil do koinsanai di ponuhuan, i pinoboros do Tuhan dot id taki-aki diyolo' do pinolombus di Musa ko' amu'. 5 Om iri no o kokuwaan do poundorong kasai' po i tulun do Kanaan, om Hit, om Amori, om Poris, om Howi, om Yobus dot id pomogunan diri, do poinsugku' di tulun dot Israil. 6 Om pogikakawin noddi i tulun dot Israil om i piro-piro o bansa'ddi. Om ponokitanud noddi i tulun dot Israil do tumuku' di tingolig diyolo'.
I Otniol
7 Om pomonsoi po kawagu'd dusa i tulun dot Israil dot id Tuhan, i Kinorohingan diyolo'. Om nokolihu noddi kopio iyolo' dau, gisom do tuminuku' iyolo' dot id tingolig do Baal om Asira. 8 Om kotogod no o Tuhan di tulun dot Israil, om pologoso' nopoddi dau iyolo' dot aala' om oporinta' di Raja' Kusan Risataim, i mantad hilo'd Misopotamia, do solinaid do walu' o toun. 9 Om pomolohou noddi do Tuhan i tulun dot Israil do mokitulung dau. Om patahako' noddi do Tuhan dot id diyolo' i Otniol do popoidu' diyolo'. (I Otniol nopo om tanak di Kinas, i tadi' di Kalib). 10 Om porintao' noddi i Otniol do Rusod do Tuhan, om kosiliu noddi iyau do boyoon di tulun dot Israil. Om ongoi no iyau sangod, om onuwai no iyau'd Tuhan do kamanangan do suminangod di raja' do Misopotamia. 11 Om osimbayan noddi o pomogunan diri do solinaid dot apat nohopod o toun. Om kapatai noddi i Otniol.
I Ihud
12 Om pomonsoi po kawagu'd dusa dot id Tuhan i tulun dot Israil. Om pokoriso' noddi do Tuhan i Iglon, i raja' do Muab, gisom dot okoris iyau ko' mantad di tulun dot Israil. 13 Om sokodung no i Iglon di tulun dot Amon om Amalik, om kaala' noddi i tulun dot Israil. Om kosolod no dau o Yorikou, i bandar dot ogumu' o guas do kurma. 14 Om hopod om walu' o toun di tulun dot Israil do porintaon di Iglon. 15 Nga' tontok di luminohou o tulun dot Israil do Tuhan do minokiuhup dau, om porikoto' no dau dot id diyolo' i Ihud do popoidu' diyolo'. I Ihud nopoddi nga' golibang; om iyau nopo om tanak di Gira, i mantad id payat do Binyamin. Om i Ihud no o popiatod di patahakon do tulun dot Israil dot id di Raja' Iglon. 16 Insan o tadau om pomonsoi no i Ihud dot iso' o gayang. Om iri nopo gayang diri nga' miampaping nopo o tarom, om oruhai nod satanga mito o konoruo': Om obilo' no di Ihud i gayang diri do ponong id wanan, do pinasaalom di pakayan dau. 17 Om ngoyo' nogiddi dau patahako' dot id di Iglon i patahakon do mantad id tulun dot Israil. I Iglon nopoddi nga' olombon kopio. 18 Om katahak poddi di Ihud iri, om suhuo' ngai' no dau i tulun di minanaan di tamas diri do minuli'. 19-20 Nga' soira'ddi nokorikot iyolo' do hilo'd kowotuan di kinikiran, it id somok do Gilgal, om undorong no iyau. Om poguliai no dau dot id di Iglon, i hiri'd bilik dot osogit do maso'ddi, it id sawat kopio di walai dau di don raja'. Om boros ka di Ihud dot id di Iglon, “Oi Tuan Raja'! Haro o poboroson ku diya' dit a' koino-ino'd haro o wokon do korongou!” ka dau. Om suhuo' ngai' no di raja' i susuhuon dau do sumoliwan. Om iri poddi raja' om i Ihud o hiri. Om insomok no i Ihud di raja' di poirikau, om boro-boros no iyau do poingkaa, “Haro o boros do Kinorohingan do bagi diya'!” ka dau. Om korongou poddi di raja' ot iyo'ddi, om ingkakat no iyau. 21-22 Om olomus nopo i Ihud do minongodong di gayang dau, i poingabil dau do ponong id wanan, dot i longon dau'd gibang o pinongodong. Om potoboko' no dau i gayang do gisom do nakaralom tomod do hiri'd tian di raja'. Om katanom nopo i gayang, tu' iri piya tulu nga' nakatanom i' do hiri'd lunok do tian di raja', om gisom do nokolopuson do hiri'd likud. Om pologoso' nopo di Ihud i gayang do poingiyo'ddi, 23 om soliwan nogiddi iyau. Om tabanai noddi dau om ontiilai dau i bilik diri. 24 Om pamanau noddi iyau. Om tontok di minongoi'd hiri i susuhuon di raja', om nokito diyolo' do poontiil ngai' i wawayaan di bilik, om ondos daa diyolo' om hiri kasai' po i raja', nga' gisom i' om minongoi pagawas. 25 Nga' alaid nopoddi kopio iyolo' do poingandad om a' iddi di raja' niwangan i wawayaan, om ngoyo' no diyolo' i kunsi' om iwangai no i wawayaan. Om poingiliu no do hiri'd siliu i raja' diyolo' do napatai. 26 Om di nopo daamot diyolo' do poingandad om nokopoggidu' no i Ihud do hilo'd Soira, do minaya' di kowotuan do kinikiran. 27 Om korikot poddi iyau do hilo'd konulu-nuluan dot Ipraim, om pounio' no dau i torumpit do pomolohou di tulun dot Israil do mongoi sangod. Om rikot ngai' no iyolo'. Om iyau no o boyoon diyolo' do ruminuhuk do mantad hiri'd konulu-nuluan. 28 Om boros ka dau dot id diyolo', “Tanud kou doho', tu' naala' nod Tuhan i tulun do Muab, i pisangod dokoyu'ddi tu' minongobi' iyau dokoyu,” ka. Om ruhuk ngai' noddi i tulun dot Israil di konulu-nuluan. Om kosolod no diyolo' i sosoborongon di tulun do Muab do hilo'd Bawang do Yordan. Om iso' po di pisangod nga' aiso' no o pinologos do suminoborong. 29 Om id suang nopod pinisangadan diri om haro i' o hopod noribu soudor do Muab dit ongosiou kopio do pinatai diyolo'; om iso' po nga' aiso' no o napasi. 30 Om tontok nod tadau'ddi do naala' dot Israil o Muab. Om osimbayan noddi o pomogunan diri do solinaid do walu' nohopod o toun.
I Samgar
31 Om iri no boyoon do suminusuhut om i Samgar i tanak di Anat. Om iyau nga' pinopoidu' nogi' do tulun dot Israil. Iri no i kayu do pomimikot do sapi' o pinamatai dau dot onom nahatus o tulun do Pilistin.
I Dibora om i Barak
1 Om tontok di napatai i Ihud, om pomonsoi po kawagu'd dusa dot id Tuhan i tulun dot Israil. 2 Om pologoso' nopoddi do Tuhan iyolo' do naala' di Yabin, i raja' do Kanaan di poingiyon do hilo'd bandar do Hasor. Om boyoon nopo di soudor dau nga' i Sisora, i poingiyon do hilo'd Harosit Hagoyim. 3 I Yabin nopoddi nga' kikorita'-kuda' di don sumasangod, do basi' do winonsoi, do siam nahatus o kogumuo'. Om duwo nohopod o toun dau do momorinta' di tulun dot Israil dot araat tomod o pomomorinta'. Om pomolohou noddi do Tuhan i tulun dot Israil do mokitulung dau. 4 Boyoon nopod tulun dot Israil do tontok diri om songulun o nabi do roitan dot i Dibora, i sawo di Lapidot. 5 Om koubasan nod i Dibora do mirikau dot id sahau di guas do kurma, it id piolitan do Rama om Baitol, i hilo'd watas do konulu-nuluan dot Ipraim. Om hiri no o rikoton di tulun dot Israil do mongoi pokinosihat dau. 6 Insan tadau, om ponuhu' no iyau'd tulun do minongoi pomolohou di Barak, i tanak di Abinoam, do mantad hilo'd bandar do Kidis, it id watas do Naptali. Om boros kaddi dau dot id di Barak, “Iti no o ponuhuan do Tuhan, i Kinorohingan dot Israil dot id diya', ‘Monimung nod hopod noribu o tongokusai do mantad id payat do Naptali om Sibulon, om woyoon no iyolo' do mongoi'd hilo'd Nuluhon do Tabor. 7 Om suhuon ku nogindo i Sisora, i boyoon do soudor di Yabin, do mongoi sangod dokoyu do hilo'd Bawang do Kison, do miwoyo' di soudor om korita'-kuda' dau di don sumasangod. Nga' onuan ku i' iyokoyu do kamanangan dot id pisangadan diti,’ ka,” ka dau. 8 Om boros kad i Barak dot id di Dibora, “Ondung moyo' ko iya', om mongoi oku i'. Nga' ondung amu', om iyoho' nga' a' i' mongoi,” ka dau. 9 Om boros ka di Dibora do suminimbar, “Moyo' oku i'! Nga' sorohon no, dot okon indo ko' iya' o kaanu'd kobontugan. Tu' tondu' i' o pakayon do Tuhan do mangala' di Sisora,” ka dau. Om pamanau no i Dibora do miniwoyo' di Barak do minongoi'd hilo'd Kidis. 10 Om lohowo' nod i Barak i payat do Sibulon om i payat do Naptali do minongoi'd hilo'd Kidis. Om kogumuon nopod tulun do tuminanud di Barak om i Dibora do tontok diri om hopod noribu o tulun. 11 Om tontok nopoddi nga' tuminongkiad i Hibir, i tulun do Kini, do mantad id bansa' dau. (Iri nopo bansa'd Kini om sinakagon di Hobab, i tipagon di Musa.) I Hibir nopodti nga' minongoi pomukiim do hiri'd somok di koguasan do kayu di roitan do tarbantin do hilo'd Saanaim, it a' i' osodu' no do mantad hilo'd Kidis. 12 Om korongou nopoddi i Sisora do nokoongoi no i Barak do hiri'd Nuluhon do Tabor, 13 om timungo' no dau i siam nahatus o korita'-kuda' dau do don sumasangod, i basi' do winonsoi, om tinimung dau o koinsanai di soudor dau. Om suhuo' no dau iyolo' do mamanau do mantad hilo'd Harosit Hagoyim do kumaa do hilo'd Bawang do Kison. 14 Om boros kaddi di Dibora dot id di Barak, “Kono, mamanau! Tuhan i' o momoyo' diya'. Om tadau nod baino' dot onuan ko dau do kamanangan do sumangod di Sisora,” ka. Om ruhuk noddi i Barak di Nuluhon do Tabor do miwoyo' di hopod noribu o tulun dau, 15 om ngoyo' no diyolo' songodo' i Sisora. Om gangaho' noddi do Tuhan o koinsanai di soudor di Sisora om i korita'-kuda' dau do don sumasangod, gisom do lintuhun nopo i Sisora do mantad hiri'd korita'-kuda' dau, om pamanaho' nopoddi dau do minogidu'. 16 Om gusao' nod i Barak i korita'-kuda' di don sumasangod om i soudor do pisangod diri, do gisom do nokorikot do hilo'd Harosit Hagoyim. Om patayo' ngai' nopoddi dau i soudor di Sisora; om iso' po nga' aiso' no o pinologos do poimpasi. 17 Om daamot nopoddi nga' nokoongoi no i Sisora do hiri'd kiim di Yail, i sawo di Hibir, i tulun do Kini, tu' i Raja' Yabin nopo, i mantad hilo'd Hasor diri om tambalut di sompiiyon di Hibir. 18 Om soira' di ruminikot i Sisora, om ngoyo' no iyau di Yail ropoho', om boro-boros no iyau do poingkaa, “Kono oi Tuan, suang nopo diti kiim ku; kada' poddosi,” ka dau. Om suang noddi i Sisora di kiim, om lisoko' no iyau di Yail do hiri'd dotirung di tabir. 19 Om boros ka di Sisora dot id di Yail, “Onuwai oku daa diya' do waig dot ongokooro' dot inumon ku, tu' tuuhan oku,” ka dau. Om ukabai nod i Yail i kantung do kulit, i poiiyanan do susu. Om koonuwai poddi dau i Sisora do tinumon om polisoko' no kawagu dau i Sisora do hiri'd dotirung di tabir. 20 Om boros kad i Sisora dot id di Yail, “Ongoi ingkakat do hilo'd wawayaan diti kiim. Om haro nopo o tulun do rumikot do monguhot diya' ondung haro o tulun do hiti, om poboroson no dot aiso',” ka dau. 21 Om nohuyan no kopio i Sisora om siodop tomod diri iyau. Om koodop noddi iyau gisom do nokoolong tomod. Om ongoi no i Yail panganu do dunsul do basi' om iso' o papak do kiim. Om pomirulan-rulan noddi iyau do minongoi insomok di Sisora, om papapako' nogiddi dau i papak do hiri'd poriling di Sisora, do gisom do nokolopuson do hiri'd tana'. Om iyo noddi o pinamatai di Yail di Sisora. 22 Om soira'ddi ruminikot i Barak do minongoi pogihum di Sisora, om ngoyo' no iyau di Yail ropoho' om boro-boros no iyau, “Kaino pogi', om potudukon ku i' diya' i tulun dit ihumon nu,” ka dau. Om suang noddi i Barak do minoyo' di Yail, om kokito no dau do napatai no i Sisora, do poingiliu'd hiri'd tana', om poimpapak i papak do kiim do hiri'd poriling dau. 23 Om tontok nod tadau'ddi do nonuan do Tuhan do kamanangan i tulun dot Israil do suminangod di Yabin, i raja' do Kanaan. 24 Om maid-laid nga' moris-koris i tulun dot Israil do sumaap di raja', gisom dot alaid nopoddi om kapatai no diyolo' i raja'.
Sinding di Dibora om i Barak
1 Om tontok nod tadau'ddi do minodsinding i Dibora om i Barak, i tanak di Abinoam, diti sinding do poingkaa: 2 Royohon no o Tuhan! Iso-iso' no kopio o ginawo di tulun dot Israil do sumaap; agaan nopo o ginawo di tulun do minongoi sangod. 3 Pokinongou kou no, oi koinsanai'd raja'! Pokinongou kou no, oi koinsanai'd pomorinta'! Modsinding oku, om pouni oku'd tuunion dot id Kinorohingan dot Israil, i Tuhan. 4 Oi Tuhan, tontok di tuminongkiad ko di konuluhanan do Soir, om tontok di suminoliwan ko do pomogunan dot Idom, om gogor nopo iti tana', om sondot no o rasam do mantad hilo'd tawan. Om kasaug nopo o waig do mantad hilo'd haun. 5 Guminogor ngai' o nuluhon dot id toguang do Tuhan do Sinai, id toguang do Tuhan, i Kinorohingan dot Israil. 6 Tontok di poimpasi po i Samgar, i tanak di Anat, om di poimpasi po i Yail om aiso' no o tulun do monompogunan do maya' di pomogunan, om aiso' o tulun do mimpanau do hiri'd ralan magayo. 7 Nopogiiduan i kabandaran dot Israil, oi Dibora. Ongoingou nopo, dit a' ko po nokorikot do suminiliu'd tina' do tulun dot Israil. 8 Haro'ddi o pisangadan do hiri'd pomogunan do tontok di tuminuku' i tulun dot Israil do ponokokinorohingan do suwai. Iso' po nga' aiso' no o kikolid ko' kitandus, dot id pogialatan dit apat nohopod noribu o tulun do hilo'd Israil. 9 Id boyoon pod soudor dot Israil o ginawo ku, id tulun dit angagaan o ginawo do minongoi sangod. Royohon no o Tuhan! 10 Iyokoyu i poinsakai'd kaladai dot opurak, iyokoyu i poirikau dot id tirikohonon dit osonong, om iyokoyu ngai' nogi' i mamanau'd gakod do hinonggo nopo o pakayaan. Popimboroso' no dokoyu o kinamanangan diri. 11 Pokinongou pogi'! Ohiyo i tulun dot ogumu' do posorili' di torobong do popinsusui'd kinamanangan di pinatahak do Tuhan dot id tulun dot Israil! Om pamanau ngai' noddi do ruminuhuk i tulun do songonuon do Tuhan do mantad id kabandaran diyolo' do kuminaa do hiri'd wawayaan do bandar. 12 Ingkakat no, oi Dibora, ingkakat no! Pamanau nod momoyo', om modsinding no, ingkakat no, oi Barak i tanak di Abinoam, gayato' no o tulun di naala' nu! 13 Om rikot noddi i tulun dit ongotorodok dot id boyoon diyolo', ruminikot i tulun di songonuon do Tuhan dot id dau do posodia' nod mongoi sangod. 14 Hilo'd Ipraim o tadon diyolo' do ruminuhuk do hiri'd rantai, do muhut-suhut di payat do Binyamin. Ruminuhuk ngai' i boyoon do soudor do mantad hilo'd Makir, om ruminuhuk ngai' i woyo-woyoon do soudor do mantad hilo'd Sibulon. 15 Ruminikot ngai' i boyoon dot Isakar do tuminanud di Dibora, ruminikot i Isakar, om i Barak nga' ruminikot nogi', om tuminanud iyolo' dau do gisom do nokorikot do hiri'd rantai. Nga' mogisuwai-suwai ot osorou di payat do Rubin; a' iyolo' milo do poboros ondung mongoi tuu ko' amu'. 16 Nokuro tu' minundorong iyolo' dot id pogialatan di dumba'? Orohian no tuu iyolo' do mokinongou di gompomogompi'd dumba' do momolohou di dumba' diyolo'? Otopot no kopio do mogisuwai-suwai ot osorou di payat do Rubin, a' iyolo' milo'd poboros ondung mongoi tuu ko' amu' po. 17 Iri nopo payat do Gad om minundorong do hilo'd ponong id koulayon do mantad id Yordan, om minundorong i payat do Dan do hiri'd somok di kapal do rahat dot ogumu'. Om minundorong i payat dot Asor do hiri'd tisan do rahat; minundorong iyolo' do hiri'd tisan di suok do rahat. 18 Nga' iri nopo payat do Sibulon om i payat do Naptali om a' no minomusorou do koposion do tinan diyolo' do monokisangod dot id pisangadan. 19 Hilo' nod Taanak, it id somok di bawang do Mogido, do minogisasangod i raja'; suminangod i raja' do Kanaan, nga' a' i' iyolo' minononggoi'd pirok. 20 Iri rombituon do hilo'd tawan nga' suminaap i'; sinangod diyolo' i Sisora, do tontok di duminarapas iyolo'd tawan. 21 Norulun iyolo' do luyud di bawang do Kison --- i bawang do Kison dit ologod. Mamanau oku po, om tumilombus oku pod mamanau do mikuwo'd kokorisan! 22 Om rikot no i kuda' dot ongosiau tomod olotung poo o tana' dot oulakan di sondulu di kuda'. 23 “Usungon no i Miros,” ka di moloikat do Tuhan, “Usungon no i tulun di poingiyon do hilo'. Tu' a' iyolo' minongoi uhup do Tuhan, do miagal do gunsiou,” ka dau. 24 Olumaag ko no, oi Yail, i sawo di Hibir, i tulun do Kini, olumaag ko no dot id pogialatan do koinsanai'd tongoondu' di poingiyon dot id kokiiman. 25 Minokianu i Sisora do waig, nga' nonuan nogi' dau iyau do susu; nonuan dau iyau do susu di kilunok dot id suang do sangkir dit olumis. 26 Om iso' nopod longon dau nga' kiinigit do papak; om iri no longon dau'd tiso' om kiinigit do dunsul do basi'; dinunsul di Yail o tulu di Sisora do gisom do nababak; linopuson dau do mamapak o tulu di Sisora. 27 Nohunduk iyau, om aiso' no o ginawo dot id toning do gakod di Yail. Poingiliu po iyau do hiri'd tana' tu' napatai no! 28 Luminiga' i tina' di Sisora do hiri'd liligaon; poingontong po iyau do mantad hiri'd tinimpusod. “Nokuro tu' alaid kopio do korikot i korita'-kuda' --- Nokuro tu' ongogonoi kopio o kuda' dau?” ka dau do minuhot. 29 Om simbar no dau i susuhuon dau'd tongoondu' dit angapandai, nga' piguli-guli' po dau do mimboros dot id suang do ginawo dau o poingkaa, 30 “Maso po diyolo'd mogihum do konunu-nunuan dit onuon om pogiduwo-duwoon, iso' ko' duwo o sumandak dot aanu do pointikid-tikid do soudor, om kain dit agayo o gatang do patahakon di Sisora, om kulabai di rinindaan do mogisuayan o patahakon di sawo do raja',” ka. 31 Angapatai po daa o koinsanai di pisangod nu do miagal di Sisora, oi Tuhan, nga' iri nopo tambalut nu om mulinau i' do miagal di tadau! Om osimbayan noddi o hiri'd pomogunan diri do solinaid dot apat nohopod o toun.
I Gideon
1 Om pomonsoi po kawagu'd dusa dot id Tuhan o tulun dot Israil. Om pologoso' nopoddi do Kinorohingan o tulun do Midian do momorinta' diyolo' do solinaid do turu' o toun. 2 Om iri nopo tulun do Midian nga' ongokoris po ko' mantad di tulun dot Israil, gisom do mongoi po i tulun dot Israil lisok do hiri'd koluang-luangan do pampang om hiri'd kinoiyonon do suwai dit aiso' o ligogon do hiri'd konulu-nuluan. 3 Om soira' nopod mananom-tanom o tulun dot Israil, om rumikot no i tulun do Midian do miwoyo' di tulun dot Amalik om i tulun di mantad hiri'd kowotuan do mongoi panangod diyolo'. 4 Om momukiim no i tulun diri do hiri'd pomogunan dot Israil om pingraagon no diyolo' i tanom-tanom do hiri, om gisom do korikot do hiri'd watas di posorili' do Gasa, i ponong id salatan. Om tanggayan ngai' nopo diyolo' i tayam-tayam do tulun dot Israil, dot i dumba', om i sapi', om i kaladai diyolo'. Om aiso' no o tongosonginan piya do pooluon gisom dot aiso' no o kaakan-akanan di tulun dot Israil. 5 Soira' nopod rumikot iyolo' om mogitonggoi-tonggoi nopo iyolo' dit unta om kiim diyolo' dit ogumu' tomod, om a' no ointob o kogumuo'. Om rumikot iyolo' do mongoi pamaraag di pomogunan diri. 6 Om aiso' no o pokukurayan di tulun dot Israil do sumaap diyolo'. 7 Om pomolohou noddi do Tuhan i tulun dot Israil, do mokitulung dau do sumaap di tulun do Midian. 8 Om ponuhu' no o Tuhan do songulun o nabi do ruminikot dot id diyolo'. Om boros ka di nabi, “Poingkaa o boros do Tuhan, i Kinorohingan dot Israil, ‘Pinoidu' ku iyokoyu do mantad id ponguripanan do hilo'd Masir. 9 Om pinasi ku iyokoyu do mantad id tulun do Masir om mantad id tulun di minanangod dokoyu di poingiyon do hiti'd pomogunan diti. Om nuyung ku nogi' iyolo' do mantad id pomogunan diti di minongoi kou sangod diyolo', om patahako' ku noddi dokoyu iti pomogunan diyolo'. 10 Om nokoboros ku no dot id dokoyu dot iyoho' no o Tuhan, i Kinorohingan dokoyu, om a' kou koino-ino do tumuku' dot id ponokokinorohingan do tulun dot Amori, i sanganu daa diti pomogunan do tiyonon dokoyu'd baino'. Nga' a' kou i' minumboyo' di boros ku,’ ka,” ka dau. 11 Insan tadau om rikot no o moloikat do Tuhan do hilo'd kawalayan dot Opra, om irikau no do hiri'd sahau do guas do kayu di roitan do tarbantin. Sanganu nopo di kayu do tarbantin diri om i Yoas, i mantad id pinuruan do sompiiyon di Abiosor. Iri nopo tanak di Yoas, i roitan dot i Gidion, om maso do momogomos do gandum do hiri'd pamagaan dot anggur. Om poillisok-lisok iyau do momogomos tu' ooris dot okito di tulun do Midian. 12 Om rikot no i moloikat do Tuhan dot id di Gidion om boro-boros nod poingkaa, “Oi tanakwagu dit osiou om okoris! Moyo-woyo' i' o Tuhan diya'!” ka. 13 Om boros kad i Gidion, “Oi Tuan, koino-ino oku id muhot? Ondung otopot do moyo-woyo' o Tuhan dahai, om nokuro'ddi tu' oontok iyahai do miagal diti? Honggo ngai' noddi i koimayaan di noumbalan do Tuhan do minomonsoi di gulu po, i pininsusui di taki-aki dahai do pasal do karalan-ralano'd Tuhan do pinoposoliwan diyolo' do mantad hilo'd Masir? Nga' baino' nopoddi om notongkiadan no iyahai'd Tuhan om pologoson tomod nopoddi iyahai do porintaon dilo tulun do Midian,” ka dau. 14 Om suhuo' noddi do Tuhan i Gidion, boros ka dau, “Oi-oiyon no o kinoris nu om ngoyon i' poiduwo' iti tulun dot Israil do mantad id pomorintaan do tulun do Midian. Tu' iyoho' i' o monuhu' diya',” ka. 15 Om boros kad i Gidion do suminimbar, “Nokuro tu' iyoho', oi Tuhan? Poingkuro oku daa'd poidu' do tulun dot Israil do mantad id pomorintaan do tulun do Midian? Tu' id suang nopod payat do Manasi om pinuruan nod sompiiyon ku ot oluhoi kopio. Om id suang nopod sompiiyon ku om iyoho' no kopio it aiso' o ngaran-ngaran,” ka dau. 16 Om boros kad Tuhan do suminimbar, “Atantu' no do milo ko i' do poidu'! Tu' iyoho' i' o monguhup diya'. A' ko i' osusa' do mangala' di tulun do Midian tu' iyo nod sumaap ko dot iso' o tulun,” ka. 17 Om boros kad i Gidion do suminimbar, “Ondung kohubayaan kopio oku diya', om onuwai oku daa do tanda' do pongilaan ku ondung Tuhan kopio o minoro-boros dot id doho'. 18 Om kada' po daa tongkiad dot a' ku po iya' osurungan do porsombahan do taakanon,” ka dau. Om boros kad Tuhan do suminimbar, “Hiti oku i' do gisom pod koguli' ko,” ka. 19 Om uli' no i Gidion om pogonsok no iyau do songinan o kambing dit okoro' po, om ongoi iyau panganu do tapung do hopod o kilogram, om pomonsoi nogiddi iyau do roti dit a' rinalatan do pangambang. Om posuango' noddi dau i tikanas dot id balatak, om posuango' dau dot id lansang i waig di tikanas. Om igitai ngai' nopo dau iri om posurungo' no dot id moloikat do Tuhan di poingandad do hiri'd sahau di kayu do roitan do tarbantin. 20 Om boros ka di moloikat do Tuhan, “Poiliho' ino tikanas om ino roti do hiti'd sakai diti watu, om potunguhon nod hiti ino waig di tikanas,” ka. Om wonsoyo' nod Gidion i pinonuhuan diri. 21 Om poroloyo' nod Tuhan o longon dau, om potuduwo' no dau di tikanas om i roti i tompok di kayu di poingigit dau. Om sikitai nopoddi i watu. Om kosorob nopoddi i tikanas om i roti. Om a' noddi nokitanan i moloikat. 22 Om kopurimanai noddi di Gidion do moloikat kopio id Tuhan i ruminikot dot id dau. Om ooris tomod diri i Gidion, om boros ka dau, “Obungou oku no, oi Tuhan it Asawat Kopio! Tu' nokotimbaba' kopio oku i' di moloikat nu!” ka. 23 Nga' boros kad Tuhan dot id dau, “Kada' katangkabo! Kada' poddosi. Tu' a' ko i' apatai,” ka. 24 Om pomonsoi noddi i Gidion dot iso' o pananaraban do porsombahan do hiri om pungaranai no dau iri do “Tuhan o Tadon do Kosimbayanan”. Om hino kasai' po i pananaraban do porsombahan diri do hilo'd Opra, i hiri'd kawalayan do pinuruan do sompiiyon di Abiosor do gisom do baino'. 25 Om boro-boros no o Tuhan dot id di Gidion do tontok do totuong diri, do poingkaa, “Ongoi di sapi' do tontoluhan di tapa' nu, i sapi' di turu' no o toun do tumur. Om raagon no i pananaraban do porsombahan di winonsoi di tapa' nu dot id Baal, om habaon ngai' i torigi di panakatanda' di Asira, i ponokokinorohingan diri, it id sampaping di pananaraban do porsombahan. 26 Om wansayan nod pananaraban do porsombahan dit osonong o pomomonsoi, o hiri'd kinotimungon di rinaag. Om sorobon nondo i sapi' do tontoluhan diri, do songkoyuon nopod monorob, om a' i' popoton, do maan do porsombahan dot id Tuhan. Om maan nopod pogudung om i torigi di panakatanda' dot Asira, i ponokokinorohingan diri di hinaba' nu,” ka dau. 27 Om angatai nod i Gidion o hopod di susuhuon dau om ngoyo' no dau wonsoyo' i pinonuhuan do Tuhan dot id dau. Nga' a' i' iyau nakasaap do momonsoi'ddi do dangadau tu' ooris iyau di sompiiyon dau om i tulun do hiri'd kawalayan. Om dongotuong diri do winonsoi dau. 28 Om soira'ddi nongkotungag i tulun do hiri'd kawalayan di kosuabon, om kokito no diyolo' do nangahaba' no i pananaraban do porsombahan dot id Baal om i torigi do panakatanda' dot Asira, i ponokokinorohingan diyolo'. Om nokito nogi' diyolo' do nawansayan nod pananaraban do porsombahan o hiri'd kinoiyonon diri, om napanaraban nod songinan o sapi' do tontoluhan, do numaan do porsombahan di sinumbali'. 29 Om pogiuhot-uhot noddi iyolo' do poingkaa, “Isai kopio o minomonsoi'dti?” ka no diyolo'. Om kopinguhot poddi, om koilaai nogi' diyolo' dot i Gidion, i tanak di Yoas o minomonsoi'ddi. 30 Om boros kaddi diyolo' dot id di Yoas, “Rinaag di tanak nu i pananaraban do porsombahan dot id Baal om hinaba' i torigi do panakatanda' dot Asira, i ponokokinorohingan, it id sampaping di pananaraban do porsombahan diri. Posoliwano' pogi' i tanak nu'd hiti, om apatai i' dahai iyau!” ka. 31 Nga' boros kad i Yoas do suminimbar di tulun di sumaap dau, “Sumokodung kou'd Baal? Obian dokoyu o Baal? Isai nopo i sumokodung do Baal, om patayon nod baino'! Ondung kinorohingan kopio i Baal, om pologoson nopo iyau do mongintirung do tinan dau, tu' dau i' di pananaraban do porsombahan di rinaag,” ka dau. 32 Tu' boros kad i Yoas, “Pologoson nopo dot i Baal o mimpori-pori do sumaap di Gidion, tu' naraag nod Gidion i pananaraban do porsombahan dot id Baal,” ka dau. Om mantad poddi om i Yorubaal no o pinomungaran do tulun di Gidion. 33 Om tontok nopoddi nga' nokotimung ngai' no i tulun do Midian om Amalik, om i piro-piro o payat do tulun do mantad hilo'd tana' do kowotuan di ponong id koulayon do mantad id Yordan. Om soborong no iyolo' di Bawang do Yordan, om pomukiim no do hiri'd Rantai do Yisriil. 34 Nga' porintao' no i Gidion do Rusod do Tuhan, gisom do pinopouni iyau do torumpit do pomolohou di tulun dot id suang do pinuruan do sompiiyon di Abiosor do rumikot do mongoi sokodung dau. 35 Om minonuhu' nogi' iyau'd tulun do minongoi'd hiri'd payat dot Asor, om payat do Sibulon om payat do Naptali om hilo'd watas do Manasi di ponong id koulayon do mantad id Bawang do Yordan. Om iyolo' nga' ruminikot ngai' do minongoi tanud dau. 36 Om boros kaddi di Gidion dot id Kinorohingan, “Oi Tuhan, nokoboros nu no dot iyoho' o pakayon nu do popoidu' do tulun dot Israil. 37 Om nokoiliu ku no o hulu'd dumba' do hiti'd tana', it iyonon kasai' dahai do momogomos do gandum. Om ondung iri no hulu'd dumba' ot oyopos do bolobou do kosuabon do suab, om iri no o kointalangan kopio do pakayon oku diya' do popoidu' do tulun dot Israil,” ka dau. 38 Om kosiliu noddi o miagal diri. Di nopoddi nokotungag i Gidion di kosuabon, om pagao' no dau i hulu'd dumba', om samangkuk nopo o waig do napaga' do mantad hiri. 39 Om boros kaddi dau dot id Kinorohingan, “Oi Tuhan, kada' kotogod do moro-boros oku piya kawagu. Potumboyoo' oku nod mongilo kawagu dot iti hulu'd dumba' o pongilaan ku. Nga' baino' nopo om iti nopo hulu'd dumba' ot otuu, nga' oyopos indo i tana',” ka. 40 Om wonsoyo' nod Kinorohingan i pinokianu di Gidion do tontok do totuong diri. Om kosuabon noddi om otuu kopio i' i hulu'd dumba', nga' iri nopo tana' om noyopos i' do bolobou.
Naala' di Gidion i Tulun do Midian
1 Insan tadau dit osuab po om tungag no i Gidion om koinsanai di tulun di tumatanud dau, om ongoi no iyolo' pomukiim do hiri'd toning di tudan do waig do Harod. Iri nopo pinomukiiman di tulun do Midian nga' ponong id utara diyolo', hiri'd rantai dit id somok do Nulu-Nulu do Mori. 2 Om boros kad Tuhan dot id di Gidion, “Adalaan kopio kogumu' ino tulun do manud-tanud diya'. Om a' oku i' milo'd manahak diyolo'd kamanangan do sumangod di tulun do Midian, tu' momusorou dotindo iyolo' do nakamanang-manangan nopo diyolo' om mantad i' do kokoriso' diyolo', om a' indo iyolo' mamarayou doho'. 3 Om poboroson no o poingkaa dot id tulun di manud-tanud diya', ‘Isai nopo i moddosi, om mositi' nod tumongkiad diti Nuluhon do Giliad, om gumuli' nopo do hilo'd walai dau,’ kanto,” ka dau. Om uli' no o duwo nohopod om duwo noribu di tulun; om hopod poddi noribu o tulun do noolu'. 4 Om boro-boros po kawagu o Tuhan dot id di Gidion do poingkaa, “Adalaan po kasai' kogumu' ilo tulun do manud-tanud diya'. Om angatan no iyolo' do hilo'd kinoiyonon di kiwaig. Om sompipion ku nogindo diya' iyolo'. Ondung otuduk ku o tiso' o tulun do tumanud diya', om mositi' nod tumanud iyau. Nga' ondung otuduk ku o tiso' tulun dot a' koino-ino do tumanud diya', om a' no iyau koino-ino do tumanud,” ka. 5 Om angatai ngai' nod Gidion i tulun do minongoi'd hiri'd kinoiyonon di kiwaig. Om boro-boros noddi o Tuhan dot id di Gidion do poingkaa, “Iri nopo tulun di poingkakat do minum dot iyo di ponginginum do tasu tu' silaan, om posuwai-suwayon no do mantad id tulun di motud do minum,” ka dau. 6 Om iri nopo tulun di miningkakat do mininum, do tinimbauk do palad i waig om sinilaan do minonginum, om tolu nahatus o tulun; om iri ngai' nopo i suwai om songingotud do mininum. 7 Om boros kaddi do Tuhan dot id di Gidion, “Iri no tolu nahatus o tulun, i poingkakat do mininum, o pakayon ku do popoidu' dokoyu om pakayon ku do manahak do kamanangan dot id diya' do sumangod di tulun do Midian. Suhuon ngai' nopo i tulun do suwai do muli',” ka dau. 8 Om suhuo' ngai' noddi di Gidion i tulun dot Israil di suwai do minuli'; noolu' nopo om iri po i tolu nahatus o tulun. Nga' pinoiliu ngai' i' diyolo' i kokoriu om i torumpit diyolo'. Om iri nopo kokiiman di tulun do Midian nga' hiri'd rantai dit id dosibaan diyolo'. 9 Om boro-boros no o Tuhan dot id di Gidion do tontok do totuong diri do poingkaa, “Tungag oi Gidion! Ngoyo' no songodo' ilo kokiiman do tulun do Midian. Om onuan ku i' iya' do kamanangan do sumangod diyolo'. 10 Nga' ondung ooris ko, om angatan no i Pura, i susuhuon nu'ddi, do tumanud diya' do mongoi'd hilo'd kokiiman dilo pisangod. 11 Om korongou ko indo di pogibara-barasan di pisangod, om iri nondo o poposiou diya' do mongoi sangod,” ka. Om ongoi no iyo Gidion di Pura, do hiri'd tisan di kokiiman di pisangod diyolo'. 12 Om iri nopo tulun do Midian, om tulun dot Amalik, om i tulun mantad do hiri'd tana' do kowotuan om pointongkop nopo di rantai. Om iyo pod katat dit ogumu' do tuminokop, o kokiiman diyolo'. Om it unta diyolo' nga' iyo pod togis do hilo'd tisan do rahat kogumu'. 13 Om soira'ddi nokorikot i Gidion do hiri, om korongou no dau o songulun o kusai do maso'd monusui do nipi dau dot id tambalut dau. Om poingkaa o pinoboros di tulun diri, “Nokoipi oku do haro nogi' o sombulugu' o roti barli do miid-liid om kosuang no diti kokiiman toko' om koontok no o tiso' di kiim. Om kahaba' nopo nogi' i kiim om kalapik nopo do hiti'd tana',” ka dau. 14 Om boros ka di tambalut dau do suminimbar, “Atuukoi, om iri no moti' kopio gayang di Gidion ino, i tanak di Yoas, i bansa' dot Israil. Om komoyon nopondo nga' noonuan no iyau'd Kinorohingan do kamanangan do sumangod do tulun do Midian om sumangod do koinsanai'dti tulun toko' di mongoi sangod!” ka dau. 15 Om korongou poddi di Gidion i nipi di tulun diri, om i komoyon di nipi'ddi, om otud no iyau do suminambayang dot id Kinorohingan. Om guli' nogiddi iyau do hiri'd kokiiman di tulun dot Israil om boro-boros no iyau'd poingkaa, “Sodia' kou no! Tu' noonuan kou nod Tuhan do kamanangan do sumangod di soudor do Midian,” ka dau. 16 Om bohogio' nod i Gidion i tulun dau di tolu nahatus diri do tolu o posukan. Om nonuan ngai' nopo o pointikid-tikid di tulun do torumpit om iso' o kakanan do kisuang do tata' di kiapui. 17 Om boros kad i Gidion dot id diyolo', “Korikot oku nopondo do hilo'd tisan dilo kokiiman do tulun do Midian, om antangan oku no kopio dokoyu, om wonsoyon no dokoyu o miagal di wonsoyon ku. 18 Soira' nopod pounion ku o torumpit do mogiaandad di tulun dot id posukan ku, om mositi' nod pounion dokoyu i dokoyu'd torumpit, om pagarangon dokoyu do hiri'd posorili' di kokiiman o boros do poingkaa, ‘Don Tuhan om di Gidion!’ ka,” ka dau. 19 Om maha' di pitangatuong noddi, om korikot no i Gidion om i tulun dau do hiri'd tisan di kokiiman di pisangod. Tontok nopoddi nga' wagu po kosowoliai i tulun di madtatamong. Om pounio' no di Gidion om i tulun dit id posukan dau o torumpit diyolo', om babako' no diyolo' i kakanan diyolo'. 20 Om iri i duwo posukan do suwai nga' iyo nogiddi o winonsoi. Om poinsawato' ngai' no diyolo' i tata' do poingigit do longon diyolo'd gibang, om pounio' diyolo' i torumpit di poingigit do longon diyolo'd wanan. Om pamagarang nogiddi iyolo' do poingkaa, “Gayang do Tuhan om gayang di Gidion!” ka. 21 Om sompori-pori nopo iyolo'd miningkakat do hiri'd kinoiyonon diyolo' do pointutuk di kokiiman. Om oinsanan nopoddi i soudor do pisangod do minanangkus do minogidu' do mikuwo'd songgiak-giak poo. 22 Om tontok di popinguni i Gidion om i tulun dau di torumpit diyolo', om binsuhuo' ngai' noddi do Tuhan i soudor do pisangod do mogititibas do gayang dot iyolo' i' om iyolo'. Om panangkus no iyolo' do mogidu' do kuminaa ponong id Sirira om gisom do nokorikot do hilo'd Bait-Sita om hilo'd bandar dot Abil Mihola, i hilo'd somok do Tabat. 23 Om lohowo' ngai' noddi i payat do Naptali, om Asor, om Manasi di ponong id koulayon om Manasi di ponong id kotonobon do mantad id Bawang do Yordan. Om gusao' ngai' no diyolo' i soudor do Midian. 24 Om pinopinsunud nogi' di Gidion dot id pointongkop di watas do konulu-nuluan dot Ipraim i boros do momolohou do poingkaa, “Kainou rumuhuk do mongoi sangod di tulun do Midian. Tamangan no i Bawang do Yordan om koinsanai di luyu' do bawang do gisom do korikot do hilo'd Bait-Bara. Kada' nogi' kopio dokoyu pologoso' do sumoborong do hilo' i tulun do Midian,” ka dau. Om iri'ddi tulun dot Ipraim nga' tinimung ngai' nogi'. Om tamangai no diyolo' i Bawang do Yordan om koinsanai di luyu' do bawang do gisom do korikot do hilo'd Bait-Bara. 25 Om katangkap no diyolo' i duwo o boyoon do tulun do Midian, i Orib om i Siib. Om patayo' noddi i Orib do hilo'd Watu dot Orib, om i Siib no om pinatai do hilo'd pamagaan dot anggur do Siib. Om tilombus po i tulun dot Ipraim do minomogusa' di tulun do Midian. Om pootodo' noddi diyolo' i tulu di Orib om i Siib dot id di Gidion do hilo'd soborong do Yordan di ponong id koulayon.
Naala' i Tulun do Midian
1 Om boros ka di tulun dot Ipraim dot id di Gidion, “Nokuro tu' a' nu iyahai nangatan di minamanau ko i' do minongoi sangod di tulun do Midian? Nokuro tu' niyo nu iyahai'ddi?” ka. Om iyo noddi iyolo' do mimboros dot otogod di Gidion. 2 Nga' boros kad i Gidion do suminimbar, “Iri nopo doho'd winonsoi om okooro' do katalad di dokoyu'd winonsoi. Okooro' doti' daa i dokoyu'd winonsoi nga' iri nopo it okooro'ddi om agayo i' ko' mantad di winonsoi do koinsanai di soudor do mantad id pinuruan do sompiiyon ku. 3 Iyokoyu nogi' i nakaanu do kuasa' do mantad id Kinorohingan, gisom do nakapatai kou di Orib om i Siib, i duwo o boyoon do tulun do Midian diri! Om pataladon nopoddi, om nunu noo o doho'd nowonsoi?” ka dau. Om koboros poddi di Gidion o miagal diri om a' noddi iyolo' otogod. 4 Om tontok nopoddi nga' nokorikot no i Gidion om i tolu nahatus o tulun dau do hiri'd soborong di Bawang do Yordan. Om ohuyan no daa tomod iyolo' nga' momogusa' kasai' po iyolo' di pisangod. 5 Om korikot noddi iyolo' do hilo'd Sukot. Om boros kad i Gidion dot id tulun di poingiyon do hiri'd bandar diri, “Onuwai daa doho' ilo tulun ku'd taakanon dot ongokuuri'. Tu' nohuyan no tomod iyolo', om inda' ka do maso po dahai'd momogusa' di Siba om i Salmuna, i duwo o raja' do Midian,” ka dau. 6 Nga' boros ka di boyoon di hilo'd Sukot do suminimbar “A, a' po giya dokoyu natangkap iyo Siba di Salmuna dino, om mokianu kou no daa'd taakanon! Nunu daa'ddi o kapanahakan do taakanon dot id tulun nu?” ka diyolo'. 7 Om boros kad i Gidion, “Ookuro i' katuu! Oonuan oku pod Tuhan do kamanangan do sumangod di Siba om i Salmuna, om bobogon ku nogindo iyolo'd rugi om i kohorob do mantad hilo'd tana' do kowotuan!” ka. 8 Om tilombus noddi i Gidion do minamanau om korikot no do hilo'd Ponuil. Om hilo' nga' minokianu i' daa iyau'd taakanon do patahakon dau di tulun dau. Nga' iyo i' di pinonimbar di tulun do hilo'd Sukot o pinosimbar di tulun do hilo'd Ponuil. 9 Om iri no o kinapabarasan di Gidion dot id diyolo' do poingkaa, “Osonong-sonong oku i' moti'dti do gumuli'. Om diri nopondo om habaon ku no iti walai'd akawas dot id bandar diti!” ka. 10 Om tontok nopoddi nga' hilo'd Karkor i Siba om i Salmuna do mogiwoyo-woyo' do koinsanai di soudor diyolo'. Om id pogialatan nopo di tulun do mantad hilo'd tana' do kowotuan om haro po doti' o hopod om limo noribu o tulun do noolu'; tu' napatai no o hatus om duwo nohopod noribu di soudor diyolo'. 11 Om susui nopo i Gidion di tisan do tana' do kowotuan, i ponong id koulayon do mantad id Noba om Yogbiha, om potigowoo' no dau do minanangod i pisangod. 12 Om poggidu' no daa i Siba om i Salmuna, i duwo o raja' do Midian diri, nga' gusao' id Gidion iyolo' om katangkap iddi dau iyolo'. Om a' noddi oila-ilaan o kokoyo-koyoon di soudor do Midian tu' angadalaan nod moddosi. 13 Om tontok di minuli' iyolo' do mantad id pisangadan, om susui no i Gidion di ralan do kawaya' di Takadon do Hiris. 14 Om hilo' no o pinanangkapan dau do songulun o tanakwagu do mantad hilo'd Sukot, om uhoto' no dau ondung isai ngai' o ngaran di boyoon do hilo'd Sukot. Om tuliso' ngai' no di tanakwagu i ngaran di boyoon do pinatahak dau di Gidion. Oinsanan nopo nga' turu' nohopod om turu' o tulun. 15 Om ongoi noddi i Gidion solowot di boyoon diri do hiri'd bandar om boro-boros no iyau'd poingkaa, “Ontong kou pogi', nga' diya no i Siba om i Salmuna. Om atantu' nod osorou kasai' po dokoyu dit a' kou minonulung dahai, tu' a' ku po giya naanu iyolo', koii? A' kou i' minanahak do taakanon dot id tulun ku do tontok do maso'ddi, om ohuyan no daa tomod iyolo',” ka dau. 16 Om ngoyo' noddi di Gidion i rugi om i kohorob do mantad hilo'd tana' do kowotuan, om bobogo' ngai' no dau i boyoon do bandar do Sukot dot i rugi om i kohorob diri o pinomobog. 17 Om hilo'd Poniol nga' hinaba' no kopio dau i walai'd akawas om pinatai ngai' dau i tongokusai dot id bandar diri. 18 Om uhoto' noddi di Gidion i Siba om i Salmuna, do poingkaa, “Ongokuro-kuro ngai' i tulun di pinatai dokoyu'd hilo'd Tabor?” ka. Om boros ka diyolo' do suminimbar, “Koiyo-iyo ngai' iyolo' diya' --- iyo ngai' nopo iyolo'd tanak do raja',” ka. 19 Om boros kad i Gidion, “Iyolo' no i tobpinai ku, i tangaanak di tina' ku. Ondung a' daa dokoyu pinatai iyolo'ddi, om a' ku i' daa iyokoyu patayon,” ka dau. 20 Om boros kaddi di Gidion dot id di Yitir, i tanak dau dot id dotuo, “Ngoyo' iyolo' patayo'!” ka. Nga' i Yitir nopoddi om omulok po. Om ooris po iyau, om a' iddi dau kinodong i gayang dau do maan do pamatai. 21 Om boros kad i Siba om i Salmuna dot id di Gidion, “Iya' nopo pogi' o mamatai dahai. Pointalango' pogi' do kusai kopio ko!” ka diyolo'. Om patayo' noddi di Gidion iyolo' om onuo' ngai' no dau i pongillumis dit id liou dit unta diyolo'. 22 Om boros kaddi di tulun dot Israil dot id di Gidion, “Nokoidu' nu noddi iyahai do mantad id pomorintaan do tulun do Midian. Om siliu no do boyoon dahai --- iya' om sinakagon nu,” ka. 23 Nga' boros ka di Gidion do suminimbar, “A' oku i'. A' oku i' sumiliu'd boyoon dokoyu; om iti tanak ku nga' a' i'. Tuhan o sumiliu'd boyoon dokoyu,” ka dau. 24 Nga' boros ka kawagu di Gidion, “Iso' noo o pokionuon ku; iri ngai' nopo tanting di naanu dokoyu do mantad id pisangod om mositi' nod patahakon ngai' dokoyu dot id doho',” ka. (Iri nopo tulun do Midian om ongoubas do mananganting do tamas; do miagal di tulun do suwai di momogun-mogun do hilo'd tana' do kowotuan.) 25 Om boros ka diyolo' do suminimbar, “Oo. Osonong i' o ginawo dahai do patahak diri dot id diya',” ka. Om pawalado' no diyolo' ot iso' o kain, om oinsanan nopoddi i tulun do minongoi poiliu do tanting di naanu diyolo' do mantad id pisangod. 26 Om oinsanan nopo i tanting do tamas di pinatahak dot id di Gidion om osomok nod duwo nohopod o kilogram do kawagato', om a' po kohompit i pongillumis do suwai, om i karo, om i kain dot aragang doitom-itom, i pinakai di raja' do Midian, om i karo di poinsulung di liou dit unta diyolo'. 27 Om wonsoyo' noddi di Gidion do tingolig i tamas diri, om poiyono' no dau do hilo'd Opra, i kampung dau. Om oinsanan nopoddi i tulun dot Israil do minongoi'd hilo' do minongoi tuku' di tingolig diri gisom dot a' noddi diyolo' osorou o Kinorohingan. Om iri no o nosiliu'd lawa' dot id di Gidion om id sompiiyon dau. 28 Om a' noddi korolosi i tulun do Midian; tu' naala' no iyolo' di tulun dot Israil. Om osimbayan noddi o pomogunan diri do solinaid dot apat nohopod o toun, di daamot pod poimpasi i Gidion.
Kinapatayon di Gidion
29 Om katalib poddi i pinisangadan, om uli' no i Gidion do hiri'd kampung dau, om undorong no iyau'd hiri. 30 Om kogumuo' nopod tanak dau'd kusai om turu' nohopod o tulun tu' ogumu' i' o sawo dau. 31 Om haro po o panakasawo dau do hilo'd Sikim, om kianak diri iyolo' do songulun o kusai di pinungaranan dau dot i Abimilik. 32 Om kolohing poddi kopio i Gidion, i tanak di Yoas diri, om kapatai nogi' iyau. Om lobongo' no iyau do hilo'd pinamalabangan di Yoas, i tapa' dau. Iri nopo kalabangan diri om hilo'd Opra, i kawalayan di pinuruan do sompiiyon di Abiosor. 33 Om di nopoddi napatai i Gidion, om a' noddi i tulun dot Israil otorodok dot id Kinorohingan. Om tumuku' diri iyolo' dot id tingolig di Baal om siniliu diyolo'd ponokokinorohingan o Baal-Borit. 34 Om a' noddi iyolo' sumambayang dot id Tuhan, i Kinorohingan diyolo', i pinopoidu' diyolo' do mantad id koinsanai'd pomorintaan do pisangod diyolo' di hiri'd posorili' diyolo'. 35 Om a' iyolo' ounsikahan di sompiiyon di Gidion dot i nongowonsoi'd Gidion dot ongosonong kopio dot id tulun dot Israil o kopongunsikahan.
I Abimilik
1 Insan tadau om ongoi no i Abimilik, i tanak di Gidion diri, do hilo'd bandar do Sikim, i tadon di koobpinayan di tina' dau. Om hilo' nod minoro-boros iyau diyolo' do poingkaa, 2 “Ngoyo' daa dokoyu uhoto' ngai' iti tulun do hiti'd Sikim, ondung honggo'ddi ot osonong: Porintaon di turu' nohopod o tanak di Gidion ko' porintaon po do songulun noo? Om posorohon no iyolo' dot iyoho' nga' koobpinayan kasai' po diyolo',” ka dau. 3 Om ongoi no i koobpinayan di tina' di Abimilik solowot di tulun do hilo'd Sikim om polombuso' no diyolo' i boros di Abimilik dot id tulun do hilo'. Om pokouhango' noddi di tulun do Sikim do tumanud di Abimilik tu' tobpinai i' diyolo' iyau. 4 Om onuwai noddi diyolo' i Abimilik do turu' nohopod o tusin do pirok, i nanu do mantad id walai di tingolig do Baal-Borit. Om iri no i tusin do pinamagadsi' di Abimilik dot iso' o sinompuruan do tulun dot angaraat do sumokodung dau, 5 om ongoi nogiddi i Abimilik do hilo'd Opra, i kampung mantad di tapa' dau. Om hilo' no, dot id sakai dot iso' noo o watu do pinatai dau o turu' nohopod di tobpinai dau. Nga' i Yotam nopo, i tanak di Gidion do komulakan, om a' i' napatai tu' minongoi iyau lisok. 6 Om timung ngai' noddi i tulun do Sikim om i tulun do Bait-Milo, om ongoi no iyolo' do hiri'd guas do kayu do tarbantin di pokolidangon di hilo'd Sikim. Om hilo' no o pinonilihan diyolo'd i Abimilik do raja'. 7 Om soira' di nokorongou i Yotam do hal diri, om ongoi no iyau ingkakat do hiri'd timpak di Nuluhon do Gorisim. Om garangai no dau i tongoulun diri do poingkaa, “Pokinongou kou no doho', oi tulun do Sikim, om orongou kou indo do Kinorohingan! 8 Insan o maso om timung ngai' no i kokoyuan do momili' do raja' diyolo'. Om boros ka diyolo' dot id guas do saitun, ‘Siliu do raja' dahai,’ ka. 9 Om boros ka di guas do saitun do suminimbar, ‘A, a' oku i'. Tu' ondung sumiliu oku'd raja' dokoyu, om a' no milo'd a' oku tumingkod do popoimbulai do tumau'd saitun, i pakayon do ponuwau do tingolig om tulun!’ ka.1|80|HK68C| Raan do kayu do saitun|9.9 10 Om boros ka di kokoyuan dot id kayu ara, ‘Iya' no o sumiliu'd raja' dahai,’ ka. 11 Nga' boros ka di guas dot ara, ‘A' oku i', tu' osiliu oku nopod raja' dokoyu nga' kotingkod oku nondo do mongua' di tua' dot ara dit ongoomis,’ ka. 12 Om boro-boros noddi i kokoyuan dot id guas dot anggur, ‘Iya' nopo o sumiliu'd raja' dahai,’ ka. 13 Nga' boros ka di guas dot anggur do suminimbar, ‘Tumingkod oku tuu daa toomod do mongua' dot anggur di poposonong do ginawo'd tingolig om tulun, do sumiliu nod raja' dokoyu o kotingkadan,’ ka. 14 Om iri noddi o kinapabarasan do koinsanai di kayu dot id guas do rugi do poingkaa, ‘Iya' nopo o sumiliu'd raja' dahai!’ ka. 15 Om boros ka di guas do rugi, ‘Ondung iso-iso' kopio o ginawo dokoyu do poposiliu doho'd raja', om ongoi kou no lungung doho'. Nga' ondung amu', om haro'ndo o tapui do mimbulai do mantad id raan ku dit ongkirugi do monorob do koinsanai di koguasan dot aras do hilo'd Libanon,’ ka,” ka dau. 16 Om boros ka kawagu di Yotam, “Iso-iso' no kopio o ginawo om otulid no kopio o ginawo dokoyu do momili' di Abimilik do raja'? Nowonsoi no dokoyu it apatut do wonsoyon dot id di Gidion, i tapa' ku'ddi, om id sompiiyon dau? Nosomulian no dokoyu i winonsoi di tapa' ku dit ongosonong diri, 17 i minongoi iyau sangod do minogobi' dokoyu? Sorohon no dokoyu, dot a' no dau sinorou o dau'd tinan do pinopoidu' dokoyu do mantad id pomorintaan do tulun do Midian. 18 Nga' baino' noddi om sumaap kou nogi' di sompiiyon do tapa' ku. Patayo' ngai' nopo dokoyu i tangaanak dau --- koinsanai nopo o turu' nohopod o tulun dot id sakai dot iso' noo o watu. I Abimilik nopo om tanak no di tapa' ku di susuhuon dau'd tondu'. Nga' siniliu i' dokoyu iyau do raja' do Sikim, tu' tobpinai po giya'ndo dokoyu iyau. 19 Ondung otulid om iso-iso' kopio o ginawo dokoyu do minomonsoi'd miagal diti dot id tapa' ku di tadau baino', om kumosonong kou nopo dot id di Abimilik, om pologoson iyau do kumosonong dot id dokoyu. 20 Nga' ondung a' iyo'ddi, om koimbulai po daa o tapui do mantad id di Abimilik do monorob do koinsanai'dti tulun do hiti'd Sikim om i tulun do Bait-Milo. Om koulai po daa o tapui do mantad id tulun do Sikim om Bait-Milo do monguu do monorob di Abimilik,” ka dau. 21 Om poggidu' noddi i Yotam, om ongoi no iyau undorong do hilo'd Biir, tu' minodosi iyau di Abimilik, i tobpinai dau'ddi. 22 Om i Abimilik no o minomorinta' dot Israil do solinaid do tolu o toun. 23 Om poimbulayo' noddi do Tuhan o pitagadan dot id piolitan di Abimilik om i tulun do Sikim, gisom do suminaap iyolo' di Abimilik. 24 Om nosiliu pogi' o miagal diri nga' ponuli' di karaaton di Abimilik om i tulun do Sikim di minominsuhu' dau do mamatai di turu' nohopod o tangaanak di Gidion. 25 Om ponuhu' no i tulun do Sikim do tulun do magawang do hiri'd timpak di konuluhanan do manangkap di Abimilik. Om isai nopo o tulun do kawaya'd hiri nga' panakahan no di tulun di songingawang. Om posunudo' noddi iri dot id di Abimilik. 26 Tontok nopoddi nga' nokorikot no i Gaal, i tanak di Ibid, do mogitanud-tanud di tongotobpinai dau do minongoi iyon do hilo'd Sikim; om iyau noddi o pagandas-gandasan di tulun do Sikim. 27 Om ongoi ngai' nopo iyolo' do hiri'd kokobunan diyolo'd anggur, do mongoi pamaga' do waig dot anggur do maan dot inumon, om papaharo do poginakanan. Om moginakan nondo iyolo' om moginum do hiri'd tiyonon do tumuku' di tingolig diyolo', om mikuwo'd mimpopol di Abimilik. 28 Om boros ka nod i Gaal, “Isai kopio daa i Abimilik diri, om isai toko' iyati' i tulun do Sikim? Okon toi ko' tanak iyau di Gidion? A' toi daa apatut nopo om osiliu daa'd susuhuon di Hamor, i tapa' di Sikim, i Gidion om i wakil dau di roitan dot i Sibul! Om nokuro'ddi tu' mokiporinta' toko' dau? 29 Ondung iyoho' daa o boyoon di tulun do Sikim, om atantu' no do nopupusan ku no o surupu di Abimilik! Om poboroson ku nondo dot id dau o poingkaa, ‘Kaino pogi'! Timungo' ngai' o soudor nu om mongoi to i' pisaap!’ kangku nondo,” ka dau. 30 Om kotogod no i Sibul, i momorinta' di bandar do Sikim diri, do tontok di nokorongou iyau di popimboroson di Gaal. 31 Om ponuhu' no iyau'd tulun do minongoi do hiri'd di Abimilik, i hilo'd Aruma do tontok diri, do mongoi popoboros do poingkaa, “Nokorikot no i Gaal, i tanak di Ibid, do mogitanud-tanud di tongotobpinai dau do hiti'd Sikim, om mominsuhu' diri iyau do tulun do hiti do sumaap diya'. 32 Iyo nopoddi, om mongoi kou no di tulun nu lisok do hilo'd dumo do totuong. 33 Om kosuabon pondod suab, di koulai o tadau, om tigowoon nod mongoi panangod i bandar. Om ondung sumoliwan i Gaal om i tulun dau do mongoi saap diya', om iri no o maso nu do manangod dau!” ka dau. 34 Om pamanau noddi i Abimilik om koinsanai di tulun dau do tontok di dongotuong. Om pogibahagi-hagi' no iyolo' dot apat o posukan om ongoi no lisok do hiri'd soliwan di bandar do Sikim. 35 Om kokito poddi di Abimilik om i tulun dau i Gaal do sumoliwan om miningkakat do hiri'd wawayaan di bandar, om soliwan ngai' no iyolo' do mantad hiri'd linisok diyolo'. 36 Om kokito nod i Gaal iyolo', om boro-boros no iyau di Sibul, “Ontong pogi'! Nga' haro moti' o tulun do rumuhuk do hiti do mantad hilo'd timpak do nuluhon!” ka dau. Nga' boros ka di Sibul, “Okon i' ko' tulun ilo'. Sangai-sangai no toomod ilo' do hilo'd nuluhon,” ka dau. 37 Om boros ka kawagu di Gaal, “Ontong pogi'! Rumuhuk nolo tulun do hilo'd guas dilo nulu-nulu, om haro po kawagu o sinompuruan do tulun do suwai do rumikot do hiti do mantad hilo'd guas do tarbantin di tulun di mogogontong do nasip!” ka dau. 38 Om boros kaddi di Sibul dot id dau, “Honggo noddi i koburuako' nu'ddi? Tu' boros ka nu di guulu om ‘Nokuro tu' mokiporinta' toko' di Abimilik?’ ka nu. Ilo' no ngai' i tulun dit untotorion nu'ddi. Ngoyo' pogi' iyolo' songodo' do dinondo!” ka dau. 39 Om angatai noddi di Gaal i tulun do Sikim do suminoliwan, om ngoyo' no diyolo' songodo' i Abimilik. 40 Nga' saapo' no di Abimilik i Gaal do gisom do minogidu' iyau. Om songingiliu poddi i nangapatai do hiri'd dotimbabaan di wawayaan di bandar. 41 Om poguliai noddi di Abimilik do hilo'd Aruma, om uyungo' no di Sibul i Gaal om i tongotobpinai di Gaal do suminoliwan do hilo'd Sikim. Om a' noddi iyolo' koino-ino do miyon do hilo'. 42 Om tadau noddi kawagu om timpuun no i tulun do Sikim do tumongkiad di bandar do mongoi do hiri'd koumaan. Om posunudo' no o hal diri dot id di Abimilik. 43 Om timungo' nod i Abimilik i tulun dau, om bohogio' no do tolu o bohogian. Om ongoi no iyolo' lisok do hiri'd koumaan do madtamong. Om tontok di nokito dau do pakayaan no di tulun do bandar diri do hiri'd koumaan, om soliwan no iyau do mantad hiri'd linisok dau, om ngoyo' no dau iyolo' patayo'. 44 Om daamot nopod i Abimilik om i tulun dau do minarau-arau do minongoi padtamong di wawayaan do bandar, om iri nopo duwo o bohogian do tulun dau om minggusa' om mimpatai di tulun di minogidu' do hiri'd koumaan. 45 Om ponongodou nopo i Abimilik do suminangod do tadau'ddi, om kosolod noddi dau i bandar diri; om patayo' no dau i tulun do hiri, om raago' dau i bandar om sasadai nogiddi dau do silaon. 46 Om soira' di nokorongou i tulun di hiri'd suang di kuta' do bandar do Sikim do pasal diri, om ongoi no iyolo' intirung do hiri'd luang dot id siriba' di walai'd tingolig dot Ilbirit. 47 Om haro'ddi o tulun do minomisunud di Abimilik do nokotimung no i tulun do Sikim do hiri. 48 Om ongoi noddi i Abimilik om i tulun dau do hilo'd Nuluhon do Salmon. Om hilo' nod minintutu' iyau do raan do kayu, do kapak o pinonutu'. Om saano' nogiddi dau iri. Om suhuo' no dau i tulun dau do lumomus do momonsoi'd miagal di winonsoi dau. 49 Om oinsanan nopoddi i tulun do minintutu' di raan do kayu, om tanud no di Abimilik. Om potimungo' nopo diyolo' i raan do kayu'ddi do hiri'd kabang di luang dit id siriba' di walai'd tingolig. Om tutudai noddi diyolo' di maso di tulun do Sikim do hiri'd suang di luang. Om kapatai ngai' noddi i tulun do Sikim do haro i' doti' o soribu o tongokusai om tongoondu'. 50 Om ongoi noddi i Abimilik do hilo'd Tibis. Om tutukai no dau i bandar om kosolod no dau. 51 Hiri nopod tanga' di bandar om haro o walai'd watu dit akawas; om ongoi ngai' nopoddi i tulun do bandar diri do hiri'd walai'd akawas. Om suang no iyolo'd hiri, om ontiilai no, om ongoi no iyolo' do hiri'd sakai di taap. 52 Om rikot noddi i Abimilik do hiri do mongoi panangod di walai'd akawas. Nga' tontok di nokorikot iyau do hiri'd wawayaan di walai'd akawas do mongoi daa podtutud diri, 53 om paratu' no o songulun o tondu' do watu di maan do pongisar, do pinootung di tulu di Abimilik, gisom do kababak nopo i korulung do tulu dau. 54 Om olomus nopo i Abimilik do minomolohou di tanakwagu di sumaan di rapo-rapo dau, boros ka dau, “Kodongo' kopio ino gayang nu om patayon oku i'; tu' mada' oku i' do boro-boroson do tondu' o minamatai doho',” ka dau. Om toboko' noddi iyau di tanakwagu do gisom do napatai i Abimilik, om uli' ngai' noddi iyolo'. 55 Om soira' di nokito di tulun dot Israil do napatai i Abimilik, om uli' ngai' noddi iyolo'. 56 Om iyo noddi o pinonuli' do Kinorohingan di Abimilik di karaaton do nowonsoi dau dot id tapa' dau, do tontok di minamatai iyau di turu' nohopod o tobpinai dau. 57 Om hinukuman nogid Tuhan i tulun do Sikim dot i karaato' diyolo' o kinopomohukuman. Om miontok nopoddi di pinoboros di Yotam, i tanak di Gidion diri, i nosiliu dot id diyolo' do tontok di pinapalan dau iyolo'.
I Tola
1 Om di nopoddi napatai i Abimilik, om kosiliu no i Tola, i tanak di Pua, do boyoon do pinopoidu' di tulun dot Israil do mantad id pisangod. I Tola nopoddi nga' manangaki di Dodo, i mantad id payat dot Isakar. Om poingiyon iyau do hilo'd Samir, it id watas do konulu-nuluan dot Ipraim. 2 Koloido' nopo dau do boyoon do tulun dot Israil om duwo nohopod om tolu o toun. Om kapatai noddi iyau om lobongo' no do hilo'd Samir.
I Yair
3 Om suminusuhut nopod i Tola do suminiliu'd boyoon do tulun dot Israil, om i Yair, do solinaid do duwo nohopod om duwo o toun. I Yair nopo om mantad hilo'd Giliad. 4 Tangaanak nopo dau'd kusai om tolu nohopod o tulun. Om kogumuon nopod kaladai do sasakayon diyolo' om tolu nohopod o tinan om tolu nohopod o kampung diyolo' do hilo'd watas do Giliad. Om roitan kasai' pod kokompungan do Yair o kokompungan diri. 5 Om kapatai no i Yair, om lobongo' no do hilo'd Kamon.
I Yipta
6 Om pomonsoi no kawagu'd dusa dot id Tuhan i tulun dot Israil. Om a' no diyolo' pusohon o Tuhan om nokotingkod no iyolo' do sumambayang dot id dau. Sambayangan nopo diyolo' om i tingolig di Baal om Astorit, om i tingolig do tulun do Siria, om Sidon, om Muab, om Amon, om Pilistin. 7 Om iri no o kinatagadan do Tuhan di tulun dot Israil gisom do pologoso' nopo dau i tulun do Pilistin om tulun dot Amon do momorinta' diyolo'. 8 Om hopod nopo om walu' o toun di duwo o bansa'ddi do mongulok-ulok di tulun dot Israil di momogun-mogun do hilo'd Giliad, i watas di tulun dot Amori do ponong id koulayon do mantad id Bawang do Yordan. Om ninggorit tomod diyolo' i tulun dot Israil. 9 Om soborong po i tulun dot Amon di Bawang do Yordan do minongoi panangod di payat do Yohuda, om Binyamin om Ipraim, do gisom do noinggorit tomod diri i tulun dot Israil. 10 Om pomolohou noddi do Tuhan i tulun dot Israil. Boros ka diyolo', “Nokowonsoi no iyahai'd dusa dot id diya', tu' a' iyahai minomusou diya', i Kinorohingan dahai, om tuminuku' nogi' iyahai di tingolig do Baal,” ka. 11-12 Om boros kad Tuhan do suminimbar, “Di nopoddi gulu po, om pinorinta' kou di tulun do Masir, om Amori, om Amon, om Pilistin, om Sidon, om Amalik om i tulun do Maon. Om pomolohou kou noddi doho' do mokitulung, koii? Om a' ku toi iyokoyu tinulung do minidu' do mantad id pomorintaan diyolo'? 13 Nga' iyo piya'ddi nga' tuminolikud kou po doho', om minongoi kou nogi' tuku' di tingolig. Om a' oku noddi poidu' dokoyu'd baino'. 14 Ongoi kou nopo pomolohou di tingolig di pinili' dokoyu. Pologoson nopo i tingolig diri do monulung dokoyu do tontok dot id suang kou'd kosusaan,” ka dau. 15 Nga' boros ka di tulun dot Israil dot id Tuhan, “Nokowonsoi no iyahai'd dusa, oi Tuhan. Om wonsoyo' nopo i korohian nu do tulungon nu po daa iyahai'd baino',” ka diyolo'. 16 Om pataamo' ngai' noddi diyolo' i tingolig, om sambayang no iyolo' dot id Kinorohingan. Om a' iddi kotoron o Kinorohingan do kokito di tulun dot Israil dot id suang do kosusaan. 17 Om tontok nopoddi nga' sumodia' ngai' no i soudor dot Amon do mongoi sangod, om maso no diyolo' do powonsoi'd kiim do hilo'd Giliad. Om i tulun dot Israil nga' nokotimung no, om maso no do powonsoi'd kiim do hilo'd Giliad. 18 Om hilo' noddi do minogiboro-boros i tongoulun om i boyoon do payat dot Israil do poingkaa, “Isai nopo o kasaap do sumiliu'd boyoon do momoyo' diti tulun do mongoi sangod di tulun dot Amon, om silihon no do boyoon do koinsanai diti tulun do hiti'd Giliad,” ka.
1 I Yipta nopo om soudor dit osiou kopio do poingiyon do hilo'd Giliad. Tapa' nopo dau om i Giliad nga' tina' no dau om tondu'd sundal. 2 Om haro i' o tangaanak di tapa' dau do tongokusai do tina' nopo om i sawo kopio di tapa' dau. Om tontok di nongosukod i tangaanak, om sansagai no diyolo' i Yipta do tumongkiad di walai diyolo'. Boros ka diyolo', “A' ko i' kaanu do nunu-nunu'd tungkusan do mantad id tapa' dahai, tu' iya' nopo om tondu' id suwai o sanganak!” ka. 3 Om iri noddi o kinopoggiduan di Yipta do mantad id tongotobpinai dau om ongoi no iyau iyon do hilo'd watas do Tob. Om hilo' no do haro ot iso' o sinompuruan do tulun dot angaraat do minongoi sugku' dau, om ongoi noddi iyolo' pimpanakau. 4 Om alaid-laid noddi om ngoyo' no di tulun dot Amon songodo' i tulun dot Israil. 5 Om tontok di nosiliu o miagal diri, om ngoyo' no di boyoon do tulun dot Israil, di hilo'd Giliad, angatai i Yipta do muli' do mantad hilo'd watas do Tob. 6 Om boros ka diyolo', “Woyoo' iyahai do mongoi sangod di tulun dot Amon,” ka. 7 Nga' boros kad i Yipta do suminimbar, “Araatan kou i' kopio doho'ddi, om sinansagan oku dokoyu do tuminongkiad di walai di tapa' ku. Om nokuro noddi do baino' tu' rumikot kou i' dot id doho' dot id suang kou'd kosusaan?” ka dau. 8 Om boros ka diyolo' do suminimbar, “Ruminikot pogi' iyahai nga' orohian iyahai'd moyo' ko dahai do mongoi sangod di tulun dot Amon, om iya' o boyoon do koinsanai di tulun do Giliad,” ka. 9 Om boros kad i Yipta do suminimbar, “Ondung pogulion oku dokoyu do hilo'd Giliad do mongoi sangod di tulun dot Amon, om onuan toko' nopod Tuhan do kamanangan, om iyoho' no ot osiliu'd pomorinta' dokoyu,” ka dau. 10 Om boros ka diyolo' do suminimbar, “Kaakun i' iyahai. Om Tuhan no o sumiliu'd sasi' dahai,” ka. 11 Om pamanau no i Yipta do mogiwoyo-woyo' di boyoon do Giliad. Om siliho' no iyau di tulun do Giliad do pomorinta' om boyoon. Om poboroso' ngai' no di Yipta i pokionuon dau di tulun do Giliad do hilo'd Mispa dot id toguang do Tuhan. 12 Om ponuhu' nogiddi i Yipta do tulun do minongoi solowot di raja' dot Amon do mongoi poboros do poingkaa, “Nunu o sala' dahai tu' mongoi ko panangod do pomogunan dahai?” ka. 13 Om boros ka di raja' dot Amon do suminimbar di tulun diri om, “Tontok di ruminikot i' i tulun dot Israil do mantad hilo'd Masir, om nongoi diyolo' solodo' i tana' dahai, do mantad pod hilo'd Bawang dot Amon om gisom do korikot do hilo'd Bawang do Yabok om Bawang do Yordan. Pogulio' no dokoyu iri kosonong-sonong,” ka diyolo'. 14 Om ponuhu' po kawagu i Yipta do tulun do minongoi solowot di raja' dot Amon 15 do mongoi poboros dot isimbar do poingkaa, “A' i' i tulun dot Israil minonolod di tana' do tulun do Muab ko' iri po tana' do tulun dot Amon. 16 Tontok di tuminongkiad do mantad hilo'd Masir o tulun dot Israil, om pakayaai no diyolo' do hilo'd Suok dot Akaba, do minaya' di tana' do kowotuan om korikot noddi iyolo' do hilo'd Kadis. 17 Om ponuhu' noddi iyolo'd tulun do minongoi solowot di raja' dot Idom do mokibanar daa do maya' di pomogunan dau. Nga' a' i' dau iyolo' pinabanar. Om pokionuo' po diyolo' o miagal diri dot id raja' do Muab, nga' a' i' iyau pinapabanar diyolo' do maya' di pomogunan dau. Om iri noddi o kinoundarangan di tulun dot Israil do hilo'd Kadis. 18 Om tilombus nogiddi iyolo'd minamanau do minaya' di tana' do kowotuan, nga' a' no nakawaya' do pomogunan dot Idom om Muab, suwai ko' suminusui iyolo' di ralan di kosorili' do gisom do nokorikot do hilo'd ponong id koulayon do mantad id Muab, it id soborong do Bawang dot Arnon. Om pomukiim no iyolo'd hilo', nga' a' i' suminoborong di bawang tu' kosuang nod pomogunan do Muab o hiri. 19 Om ponuhu' noddi i tulun dot Israil do tulun do minongoi solowot di Sihon, i raja' do tulun dot Amori do hilo'd Hisbon, do mokibanar daa do maya' di pomogunan dot Amori, tu' mongoi iyolo' do hiri'd diyolo'd watas. 20 Nga' a' i' di Sihon pinabanar iyolo' tu' lohowo' ngai' nogi' dau i soudor dau om pomukiim no iyolo' do hilo'd Yahas om ngoyo' nogiddi diyolo' songodo' i tulun dot Israil. 21 Nga' nonuan i' do Tuhan, i Kinorohingan do tulun dot Israil, do kamanangan i tulun dot Israil do suminangod di Sihon om i soudor dau. Om iyo noddi o nakaanu-anu di tulun dot Israil do koinsanai di tana' do tulun dot Amori di poingiyon dot id pomogunan diri. 22 Om iri nopo tana' do tulun dot Amori di naanu om noiyon diyolo' nga' mantad pod hilo'd Arnon do ponong id salatan, om gisom do hilo'd ponong id utara di Bawang do Yabok, om mantad di tana' do kowotuan do ponong id koulayon do mantad id Yordan om gisom do hilo'd ponong id kotonobon do mantad id Bawang do Yordan. 23 Om Tuhan i', i Kinorohingan do tulun dot Israil, o minonguyung di tulun dot Amori do maan do koinsanangan di tulun do songonuon do Tuhan. 24 Om umbalan nu po daa'ddi do mongoi panganu kawagu iri? Iri nopo tana' di pinatahak di Kamos, i tingolig dokoyu'ddi, dot id dokoyu, om koino-ino i' dot onuon kasai' dokoyu. Nga' iri nopo pinatahak do Tuhan, i Kinorohingan dahai, dot id dahai, om onuon kasai' no dahai. 25 Ondos nu daa om osonong-sonong ko iya' ko' mantad di Balak, i tanak di Sipor, i raja' do Muab diri? I Balak nopo om a' i' nokoumbal do suminaap ko' minanangod dahai. 26 Tolu no nahatus o toun dot Israil do momogun-mogun do hilo'd Hisbon om hilo'd Aroir, om hiri'd kawalayan dit id posorili', om hiri'd kabandaran do poinsusui di Bawang dot Arnon. Om nokuro tu' a' nu nongoi kawagu iri do solinaid diri? 27 A' i' iyahai nakasala' dot id diya'. Iya' nogi' i nakasala' tu' minongoi panangod dahai. Om Tuhan no o gompomutus. Om iyau no o momutus diti hal dot id pialatan do tulun dot Israil om tulun dot Amon do tadau'd baino',” ka. 28 Nga' a' i' di raja' dot Amon pinusou i boros di Yipta diri. 29 Om porintao' noddi di Rusod do Tuhan i Yipta. Om pamanau no i Yipta do minongoi ompuya' do hiri'd watas do Giliad om Manasi, om poguliai nogiddi dau do hilo'd Mispa, i hilo'd Giliad. Om mantad nod hilo' om lombus po iyau do minamanau do kuminaa do hilo'd pomogunan do tulun dot Amon. 30 Om pomonsoi no i Yipta do batos dot id Tuhan do poingkaa, “Ondung potumboyoon oku'd Tuhan do mangala' di tulun dot Amon, 31 om kamanang oku no om isai nopo it id gulu soliwan di walai ku do mongoi rapou doho' di koguli' oku om patahakon ku no dot id Tuhan do maan do porsombahan do sorobon,” ka. 32 Om soborong noddi i Yipta di Bawang do Yordan do minongoi sangod di tulun dot Amon. Om onuwai no iyau'd Tuhan do kamanangan. 33 Om insanai nopo iyolo'd i Yipta do minamatai do mantad pod hilo'd Aroir om gisom do korikot do hilo'd watas di posorili' do Minit --- oinsanan nopo nga' duwo nohopod o bandar --- om gisom do nokorikot do hilo'd Abil-Kiramim. Om ogumu' tomod o tulun dot Amon do napatai, om naala' iyolo' di tulun dot Israil.
I Tanak di Yipta do Sumandak
34 Om tontok di minuli' i Yipta do hilo'd Mispa, om ongoi no i tanak dau'd sumandak ruba' dau do mikuwo'd mari-tari' om popouni do rebana. Om iso' nori o tanak dau. 35 Om kokito nopoddi di Yipta i tanak dau om tuminongob tomod diri iyau gisom do pininghurak dau o pakayan dau. Om boro-boros no iyau do poingkaa, “Atuukoi, oi tanak ku, oruol no kopio o ginawo ku! Nokuro tu' iya' no kopio o popotongob do ginawo ku? Tu' nokosumpa' oku no dot id Tuhan om a' ku no milo dot a' bayaanon iri!” ka dau. 36 Om boros kaddi di sumandak dot id di Yipta, “Nokosumpa' ko no dot id Tuhan oi Apa', om Tuhan nga' pinopotumboyo' i' diya' do minonuli' di karaaton do tulun dot Amon, i pisangod nu'ddi om nunu nopo i pinabatos nu om wonsoyon nopo,” ka. 37 Nga' boros ka kawagu di sumandak, “Nga' iso' poo o pokionuon ku: Onuwai oku po daa diya'd maso do duwo o tulan do mongoi pimpanau do hilo'd konulu-nuluan do mogiwoyo-woyo' di tambalut ku. Om hilo' nondo do mogihad oku diti nasip ku, tu' sumandak oku po daa, om matai oku no,” ka dau. 38 Om potumboyoo' iddi iyau di tapa' dau, om pologoso' nod minamanau. Om ongoi noddi i sumandak om i tambalut dau do hiri'd konulu-nuluan do mongoi pogihad do hilo', tu' a' po iyau kasawo om aiso' po tanak om matai no. 39 Om katalib poddi o duwo o tulan om guli' no iyau dot id tapa' dau, om wonsoyo' noddi di tapa' dau i pinabatos dau dot id Tuhan. Om kapatai noddi i tondu' di sumandak po daa iyau. Om iri no o kinoimpuunon dot id pogialatan do tulun dot Israil, do koubasanan nod 40 tumongkiad i kosumandakan do walai diyolo' do solinaid dot apat o tadau do pointikid do toun do mikuwo'd tumongob do momusorou di tanak di Yipta di hilo'd Giliad.
I Yipta om i Payat dot Ipraim
1 Om tontok noddi do suminodia' i payat dot Ipraim do mongoi sangod. Om soborong noddi iyolo' di Bawang do Yordan do pakayaan do hilo'd Sapon. Om boros ka diyolo' dot id di Yipta, “Nokuro tu' ongoi ko nopo sangod di tulun dot Amon om a' nu i' iyahai nangatan? Tutudan no dahai iya' om koinsanai dit id suang do walai nu'd baino',” ka diyolo'. 2 Om boros kad i Yipta, “Haro o pitagadan dot id pialatan dahai, i tulun do Giliad om i tulun dot Amon. Om nolohou ku i' iyokoyu do rumikot do mongoi ponguhup dahai do midu' do mantad id pomorintaan di tulun dot Amon diri, nga' a' kou i' ruminikot. 3 Om soira' nopoddi do noilaan ku dot a' kou rumikot do mongoi ponguhup dahai, om ongoi oku nopoddi sangod di tulun dot Amon, om a' ku no pinadul o tinan ku dot apatai piya. Om onuwai oku noddi do Tuhan do kamanangan do suminangod diyolo'. Om nokuro'ddi tu' rumikot kou do mongoi saap doho'?” ka dau. 4 Om timungo' ngai' noddi di Yipta i tulun do Giliad om songodo' no diyolo' i tulun dot Ipraim, om kaala' no diyolo'. (Iri nopo tulun do Giliad di poundorong do hilo'd watas dot Ipraim om Manasi nga' tondoson di tulun dot Ipraim do tuminongkiad do mantad id Ipraim, i payat mantad diyolo'.) 5 Om tamangai no di tulun do Giliad di maso do sumangod i hiri'd sosoborongon di Bawang do Yordan, om atalaban i' diyolo' i tulun dot Ipraim di mogidu' daa. Om pointikid-tikid do haro o tulun dot Ipraim di mogidu' do muhot daa ondung koino-ino do sumoborong, om uhoton ngai' nopo di tulun do Giliad do poingkaa, “Tulun ko dot Ipraim?” ka. Ondung “Okon,” ka do posimbaron di tulun, 6 om suhuon no diyolo' i tulun do momoros di boros dot “Syibolit,” ka. Om pomomoros nopo di tulun nga' “Sibolit,” ka tu a' i' kadawot no kopio di boros diri. Om tangkapon nondo diyolo' i tulun om patayon no dot id iso' o kinoiyonon do hiri'd sosoborongon. Om kapatai no ot apat nohopod om duwo noribu o tulun dot Ipraim do tontok diri. 7 Om koloido' nopo di Yipta do nosiliu'd boyoon di tulun dot Israil om onom o toun. Om kapatai noddi iyau om lobongo' no do hilo'd kampung dau do hilo'd bandar do Mispa, di hilo'd Giliad.
I Ibsan, i Ilon om i Abdon
8 Om suminusuhut nopo di Yipta do nosiliu'd boyoon do tulun dot Israil om i Ibsan, i mantad hilo'd Baitlahim. 9 I Ibsan nopodti nga' kianak do tolu nohopod o tongokusai om tolu nohopod o tongoondu'. Om iri nopo tangaanak dau'd tongoondu' nga' pinasawaan dau do tulun do mantad id payat do suwai. Om panganu no iyau'd tolu nohopod o sumandak do mantad id payat do suwai do pinokowinan di tangaanak dau'd tongokusai. Om koloido' nopo di Ibsan do nosiliu'd boyoon di tulun dot Israil om turu' o toun. 10 Om kapatai noddi iyau om lobongo' no do hilo'd Baitlahim. 11 Om suminusuhut no di Ibsan do nosiliu'd boyoon do tulun dot Israil om i Ilon, i mantad id payat do Sibulon. Om hopod o toun dau do boyoon di tulun dot Israil. 12 Om kapatai noddi iyau om lobongo' no do hilo'd Ayalon, it id watas do Sibulon. 13 Om suminusuhut nod i Ilon do nosiliu'd boyoon do tulun dot Israil om i Abdon, i tanak di Hilil, i mantad hilo'd Piraton. 14 Om kogumuon nopod tanak dau'd tongokusai om apat nohopod o tulun, om iri no manangaki dau do tongokusai om tolu nohopod o tulun. Om otikid nopo iyolo'd kaladai do sakayon. Om walu' o toun di Abdon do boyoon di tulun dot Israil. 15 Om kapatai noddi iyau om lobongo' no do hilo'd Piraton, i hilo'd watas dot Ipraim, it id watas do konulu-nuluan do tulun dot Amalik.
Kinosusuon di Simson
1 Om pomonsoi po kawagu'd dusa dot id Tuhan i tulun dot Israil. Om pologoso' noddi do Tuhan i tulun do Pilistin do momorinta' diyolo' do solinaid dot apat nohopod o toun. 2 Om tontok nopoddi nga' haro o songulun o kusai do hilo'd kampung Sora. Ngaran nopo dau om i Manua, i mantad id payat do Dan. Iri nopo sawo dau om a' maganak. 3 Nga' insan o tadau om rikot no o moloikat do Tuhan dot id sawo dau om boro-boros nod poingkaa, “Solinaid nopodti om aiso' i' o tanak nu, nga' a' no alaid om monontian ko no. Om osusu ko nondo do tanak do kusai. 4 Nga' antaan-taan no kopio, kada' no kopio ponginum do waig dot anggur ko' i tiinumon do kaawuk, ko' mangakan po do nunu nopo i sosomu'; 5 tu' natantu' mantad no i tanak di ponontianon nu do sumiliu'd tulun do Nasir. Iyo nopoddi, om osusu nopondo i tanak nu om kada' no kopio pampadai o tobuk dau. Tu' iyau no o popoidu' do tulun dot Israil do mantad id pomorintaan do tulun do Pilistin,” ka. 6 Om ongoi noddi i sawo di Manua solowot di Manua, om boros ka dau, “Haro moti' o susuhuon do Kinorohingan do ruminikot dot id doho'. Om rabas nopo dau nga' miagal do moloikat do Kinorohingan, om nooris tomod oku. Om a' ku i' nuhot ondung honggo o tadon dau, om a' iyau pinoposunud do ngaran dau dot id doho'. 7 Nga' boros ka dau om monontian oku kakando om osusu do tanak do kusai. Om boros ka kawagu dau, om a' oku koino-ino do monginum do waig dot anggur ko' iri po tiinumon do kaawuk ko' mangakan po do nunu nopo i sosomu', tu' iri nopo tanak diri nga' mositi' nod patahakon dot id Kinorohingan do sumiliu'd tulun do nasir do solinaid dau do poimpasi,” ka. 8 Om korongou poddi di Manua iri, om sambayang no iyau dot id Tuhan do poingkaa, “Oi Tuhan, porikot-rikoto' po daa i susuhuon nu'ddi dot id dahai do mongoi pomisunud dahai ondung nunu ot apatut do wonsoyon dahai dot id tanak diri dot osusu,” ka. 9 Om pinokinongou i' do Kinorohingan i pinokianu di Manua. Om rikot po kawagu i moloikat do Tuhan do tontok di poirikau i sawo di Manua do hiri'd dumo. Om tontok nopoddi nga' okon ko' hiri i sawo dau, 10 om panangkus noddi iyau do minongoi posunud di sawo dau do pasal diri. Boros ka dau, “Kaino pogi' mongoi ontong, tu' nokorikot no kawagu i tulun di minongoi solowot doho' di guulu!” ka dau. 11 Om olomus nopoddi i Manua do minongoi tanud di sawo dau. Om ongoi no iyau insomok di tulun diri om ponguhot no do poingkaa, “Iya' nogi' i minoro-boros di sawo ku?” ka dau. “Oo,” ka dau do suminimbar. 12 Om uhot noddi i Manua do poingkaa, “Osiliu nopondo i pinoboros nu'ddi, om nunu nondo o wonsoyon di tanak? Poingkuro-kuro nondo o koposi-posion dau?” ka. 13 Om boros ka di moloikat do Tuhan do suminimbar, “Mositi' nod soro-sorohon kopio di sawo nu do tumanud do koinsanai di pinoboros ku dot id dau. 14 A' iyau koino-ino do monginum do waig dot anggur ko' iri po tiinumon do kaawuk, om a' nogi' koino-ino do mangakan do nunu nopo i mantad id guas dot anggur, om a' koino-ino do mangakan do nunu nopo i sosomu'. Om mositi' nod tonudon ngai' dau i pinoboros ku'ddi,” ka. 15 Om boros kaddi di Manua dot id dau, “Andad-andad po daa dot ongoruhai. Pagansakan po dahai iya' do kambing dit okoro' po,” ka. 16-17 Nga' boros ka di moloikat do Tuhan, “Mandad oku piya'd hiti nga' a' oku i' mangakan di taakanon do posurungon nu. Nga' ondung orohian ko do posurung, om posodiawon nopo do maan do porsombahan di sorobon, om patahakon nori dot id Tuhan,” ka dau. Om a' pod i Manua oilaan do moloikat do Tuhan i moro-boros dau'ddi. Om boro-boros noddi i Manua do poingkaa, “Sunudai daa giya iyahai'd ngaran nu, oi Tuan, om kapatahak i' iyahai do maan do pongunsikou diya' dot osiliu i pinoboros nu'ddi,” ka. 18 Om uhot noddi i moloikat do Tuhan do poingkaa, “Nokuro tu' orohian ko'd koilo do ngaran ku? Ngaran ku nopo om ngaran di koimayaan,” ka. 19 Om ongoi noddi i Manua panganu do songinan o kambing dit okoro' po do mitonggoi'd gandum dot okuuri', om pasakayo' no dau di watu om patahako' no dot id Tuhan, i Tuhan di momonsoi do koimayaan. 20-21 Om tontok di minsawat no i lisun di porsombahan do mantad id pananaraban do porsombahan diri, om kokito no di Manua om i sawo dau i moloikat do Tuhan do mininsawat do poirolot di sinikit do tapui, do pakayaan do hilo'd tawan. Om koilaai nogiddi di Manua do moloikat do Tuhan iri, om otud noddi iyau om i sawo dau do tuminuku'. Om a' noddi hino i moloikat om a' no iyolo' nokokito kawagu di moloikat diri. 22 Om boros kaddi di Manua dot id sawo dau, “Atantu' no dot apatai to tu' nokokito to i' di Kinorohingan!” ka. 23 Om boros ka di sawo dau do suminimbar, “Ondung patayon to daa'd Tuhan, om atantu' nod a' dau romiton i porsombahan di pinatahak to'ddi dot id dau; om a' daa dau pinotuduk ngai' iri dot id dato om a' pinoposunud di piro-piro o hal di pinoboros dau dot id dato'ddi,” ka dau. 24 Om alaid noddi om kosusu no i sawo di Manua dot iso' o tanak do kusai, om pungaranai no dau dot i Simson. Om mayo-gayo nopoddi i tanak om binarakatan do Tuhan; 25 om tontok di hilo' iyau'd kokiiman di payat do Dan, it id pialatan do Sora om Istaol, om timpuun no o Rusod do Tuhan do minanahak dau do kokorisan.
I Simson om i Sumandak do Mantad Hilo'd Timna
1 Insan tadau om ongoi no i Simson do hilo'd Timna. Om hilo' no o kinokitanan dau do songulun o sumandak do Pilistin. 2 Om uli' noddi iyau om boro-boros no iyau di tapa' om i tina' dau. Boros ka dau, “Haro o sumandak do Pilistin do korohian kopio ku do hilo'd Timna. Om ngoyon no daa dokoyu doho' iyau atadai'd tunang,” ka. 3 Nga' boros ka di tapa' om i tina' dau, “Nokuro tu' minog do mogongoi do tondu'd Pilistin do maan do sawo, tu' a' i' miagal o tugama' toko'? Aiso' no kopio o tondu' do korohian nu dot id suang do pinuruan do sompiiyon toko' om id suang diti bansa' toko'?” ka. Om boros kad i Simson dot id tapa' dau, “Nga' iri no sumandak do Pilistin o korohian ku. Om ngoyon no doho' iyau paatadai'd tunang, oi apa',” ka. 4 Nga' a' i' di molohing di Simson oilaan do Tuhan i' o mominsuhu' di Simson do momonsoi'd miagal diri. Tu' mogihum no o Tuhan do ralan do sumangod di tulun do Pilistin. Tontok nopoddi om i tulun do Pilistin o momorinta' di tulun dot Israil. 5 Om ongoi no i Simson do hilo'd Timna do miwoyo' di tapa' om tina' dau. Om tontok di nakawaya' iyolo' dot iso' o kabun dot anggur, om korongou no i Simson do garom do songinan o singa dit okoro' po. 6 Om sigog iddi dot okoris i Simson do pinokoris di kuasa'd Tuhan, gisom do longono' nopo dau do pinopogitobilang-bilang i singa, do miagal nod kambing i singa. Om a' i' dau pinosusui iri di tapa' om i tina' dau. 7 Om ongoi no i Simson solowot di sumandak, om pogkorumo no dau, tu' orohian no kopio i Simson di sumandak diri. 8 Om alaid noddi do mantad diri, om ongoi no kawagu i Simson do hiri do minongoi pangawin di sumandak. Om tontok di hiri iyolo'd tindalanon, om sala' no iyau di ralan, do minongoi pogontong di kinapasaan di singa di pinatai dau. Nga' soira'ddi nokorikot iyau'd hiri om kokito no dau dot ogumu' tomod o potiukan do hiri'd kinapasaan di tinan di singa, om haro o paha' di potiukan do hiri. 9 Om ngoyo' no dau kokogo' i paha', om kahangai nopo dau do minongigit om tilombus nogiddi do minamanau do makan-akan di paha'. Om guli' noddi iyau do hiri'd tapa' om tina' dau, om patahako' no dau diyolo' o wookon di paha'. Om kano' no diyolo' iri nga' a' i' di Simson sinunudan iyolo' do mantad id kinapasaan do tinan do singa o nangayan dau'ddi. 10 Om kaatadai poddi di tapa' dau do tunang i sumandak diri do hiri'd walai di sumandak om papaharo noddi i Simson do poginakanan do hiri do tumanud do koubasanan di tangaanakwagu. 11 Om soira'ddi nokito iyau di tulun do Pilistin, om ponuhu' no iyolo'd tolu nohopod o tangaanakwagu do mongoi do hiri'd dau. 12 Om boros kaddi di Simson dot id diyolo', “Haro o sundoiton ku. Om ondung arait dokoyu iri, om tikidan ku nopondo iyokoyu'd kain linan dit aalus om sapasang o pakayan dit osonong. Om onuan ku iyokoyu'd maso do turu' o tadau do momusorou'd kosondoton diri, do solinaid diti poginakanan do nokopikowinan. 13 Nga' ondung a' dokoyu arait iri om manahak ngai' kou doho' do kain linan dit aalus om pakayan dit osonong,” ka dau. Om boros kaddi di tolu nohopod o tanakwagu do Pilistin diri, “Ba! Poboroso' daa ino sundoiton nu,” ka. 14 Om boros kad Simson, “Mantad nopo di mangakan, om minimbulai i taakanon; mantad no dit okoris, om minimbulai ot oomis,” ka. Om natalib noddi o tolu tadau nga' a' po diyolo' narait i sundait diri. 15 Om kaapat noddi do tadau om ongoi no iyolo' boro-boros di sawo di Simson, boros ka diyolo', “Lugu-lugutan no kama i sawo nu om posunud i' iyau do kosondoton di sundait. A' nopo moti' om tutudan no dahai iya' om koinsanai dit id suang do walai'd tapa' nu. Tu' oilaan i' dahai do linohou nu pogi' iyahai nga' mokimaanu-anu ko i' do kountungan do mantad id dahai!” ka diyolo'. 16 Om ongoi noddi i sawo di Simson solowot di Simson do mikuwo'd mihad-ihad poo, om boro-boros nod poingkaa, “Oilaan ku i' dot a' ko osianan doho'. Nokuro tu' minonundait ko dot id tambalut ku om a' ko i' poilo doho' do kosondoton diri? Antangai pogi' nga' araatan kopio ko i' doho'!” ka dau. Om boros kad Simson, “Pokinongou pogi! Iri piya tapa' om tina' ku nga' a' ku i' sinunudan. Om nokuro daa'ndo tu' sunudan ku iya'?” ka dau. 17 Om mihad-ihad nopoddi kasai' i sawo di Simson do solinaid di turu' o tadau do moginakan. Om mugut-lugut i' kasai'ddi i sawo di Simson om posunudo' noddi di Simson o kosondoton di sundait di koturu'd tadau. Om posunudo' no di sawo di Simson iri dot id tulun do Pilistin diri. 18 Om tontok di koturu'd tadau, dit a' po i Simson nokoongoi do hiri'd bilik do toodopon dau, om boros ka di tulun do bandar diri dot id dau, “Nunu po ot oomis ko' paha'? Om nunu po ot okoris ko' singa?” ka. Om boros kad i Simson do suminimbar, “Ondung a' daa dokoyu tinompurolosi i sawo ku om a' i' daa dokoyu noilaan o kosondoton di sundait!” ka dau. 19 Om sigog nopoddi dot okoris i Simson dot i kuasa'd Tuhan o pinopokoris dau, om ongoi no iyau do hilo'd Askilon. Om hilo' no o pinamatayan dau do tolu nohopod o tongokusai dit ongkipakayan dot ongosonong, om onuo' no dau i pakayan om patahako' no di tolu nohopod o tangaanakwagu di nakarait di sundait. Om uli' noddi iyau do hiri'd walai dau do mikuwo'd monosol tomod iyau. 20 Om patahako' noddi di tiwanon di Simson do kusai i sawo di Simson dot id tulun di minomoyo' di Simson do tontok di kuminawin.
1 Piro-piro noddi o koloido' do mantad diri, di dongmongomot nod gandum, om ongoi no i Simson ompuya' di sawo dau do mikuwo'd minigit do songinan o kambing dot okoro' po do patahakon di sawo dau. Om boros kad i Simson dot id tiwanon dau'd kusai, “Mongoi oku'd hilo'd bilik di sawo ku,” ka. Nga' a' i' iyau di tiwanon dau'd kusai pinotumboyo'. 2 Tu' boros ka dau dot id di Simson, “Ondos ku daa om araatan ko no kopio dau, om nakatahak ku noddi iyau dot id tambalut nu. Nga' ngoyon nopo i tadi' dau. Olumis-lumis nogi' iri,” ka dau. 3 Om boros kaddi di Simson, “Iti nopo wonsoyon ku dot id tulun do Pilistin do baino' om okon no ko' doho'd sala'!” ka dau. 4 Om ongoi noddi iyau pamagamit do tolu nahatus o toni. Om pikogoso' no dau o tikiu di toni, do sinoroduwo-duwo; om posusukai no dau'd tata' o hiri'd pinikagasan di tikiu. 5 Om tutudai nogiddi' dau i tata' om poiduwo' ngai' no dau i toni do hiri'd koumaan di tulun do Pilistin. Om kosorob ngai' nopo i gandum di nongoomot no daa do hiri'd dumo; om okon nopo ko' iri noo nga' iri piya i gandum di songinsuni om i kokobunan dot anggur nga' nangaalab ngai' nogi'. 6 Om ongoi noddi i tulun do Pilistin pinguhot ondung isai o minomonsoi'ddi. Om haro'ddi o tulun do minomisunud diyolo' dot i Simson o minonimpuun diri tu' pinatahak i' di tiwanon dau'd kusai i sawo di Simson dot id tambalut di Simson. Om iri noddi o nakaangayan di tulun do Pilistin kopodtutudai di tondu' di sawo daa di Simson om koinsanai dit id suang do walai di tapa' dau do gisom do nangapatai ngai' iyolo'. 7 Om boros kaddi di Simson dot id tulun do Pilistin diri, “Dot iyo pama'dti o winonsoi dokoyu? Sumumpa' oku no dot a' oku po mundorong dot a' ku po iyokoyu osulian diti!” ka dau. 8 Om ngoyo' noddi dau iyolo' saapo' om ogumu' tomod diri o pinatai dau tu' orongit tomod diri iyau. Om pamanau nogiddi iyau do minongoi undorong dot id iso' o luang do pampang do hiri'd nulu-nulu do hilo'd Itam.
Naala' di Simson i Tulun do Pilistin
9 Om rikot no i tulun do Pilistin do hiri'd watas do Yohuda om pomukiim no iyolo' do hilo'. Om ngoyo' nogiddi diyolo' songodo' i kampung do Lihi. 10 Om uhoto' no di tulun do Yohuda i tulun do Pilistin, “Nokuro tu' mongoi kou panangod dahai?” ka. Om boros ka diyolo' do suminimbar, “Kinorikatan nopo dahai om mongoi panangkap di Simson om owonsoi i' dahai dot id dau o miagal di winonsoi dau dot id dahai,” ka. 11 Om korongou poddi diyolo' o miagal diri, om ongoi no o tolu noribu di tulun do Yohuda do hiri'd luang do pampang di hilo'd Itam. Om hilo' poddi om boro-boros no iyolo' dot id di Simson do poingkaa, “Kinukuro nu iyahai? A' ko po koilo do tulun do Pilistin o momorinta' dati'?” ka diyolo'. Om boros kad i Simson do suminimbar, “Suminuli' oku noddi winonsoi diyolo' dot id doho',” ka. 12 Om boros ka diyolo', “Kinorikatan nopo dahai'd hiti om mongoi pongogos diya' om katahak indo dahai iya' dot id tulun do Pilistin,” ka. Om boros kad Simson, “Pamatos kou po dot a' kou iyokoyu mamatai doho',” ka. 13 Om boros ka diyolo', “Ba, mongoi no bo iyahai'dti pongogos diya', om katahak i' dahai iya' dot id tulun do Pilistin. A' i' iyahai mamatai diya',” ka. Om kagasai noddi diyolo' i Simson do tali di wagu po, om angatai nod tuminongkiad di luang do pampang. 14 Om soira'ddi nokorikot i Simson do hilo'd Lihi, om santangkus-tangkus poddi i tulun do Pilistin do minongoi ruba' dau do mikuwo'd pininggarangan diyolo' i Simson. Om sigog nopoddi dot okoris i Simson dot i kuasa'd Tuhan o pinopokoris. Om pimpututo' nopoddi dau i tali di pinongogos di longon dau dot iyo poddi nosorob i tali. 15 Om kokito noddi iyau do tulang do roo do kaladai di wagu-wagu po kapatai. Om ngoyo' no dau i tulang om iri no o pinamatai dau do soribu o tulun. 16 Om podsinding noddi i Simson do poingkaa, “Roo nod kaladai o pinamatai ku'd soribu o tulun; roo nod kaladai o pinopountun ku di rata' diyolo',” ka. 17 Om kopodsinding poddi iyau, om taamo' no dau i tulang do roo'ddi. Om iri no o kinopomungaranan do kinoiyonon diri do Ramat Lihi. 18 Om kopuriman noddi i Simson do tuuhan tomod, gisom do luminohou iyau do Tuhan. Boros ka dau, “Oi Tuhan, katatahak nu dot id doho' iti kamanangan dot agayo om dinondo nodti om matai oku no tuu'ndo dot otutuuhanan, om atangkap nondo dilo tulun do Pilistin dit a' kotutun do Tuhan!” ka dau. 19 Om ukabai nod Kinorohingan ot iso' o luang do hiri'd tana' om soliwan no o waig do mantad hiri'd luang diri. Om inum no i Simson, om osonong-sonong nogiddi ot opurimanan dau. Om iri noddi o kinopomungaranan do tudan do waig diri do tudan do Waig do Hakor. Om hino kasai' po i tudan do waig diri do hilo'd Lihi. 20 Om i Simson no o boyoon di tulun dot Israil do solinaid do duwo nohopod o toun do tontok di porintaon iyolo' di tulun do Pilistin.
Hilo'd Gasa i Simson
1 Insan o tadau om ongoi no i Simson do hilo'd Gasa. Om hilo' no o kinasalawatan dau do songulun o tondu'd sundal. Om ongoi no iyau sugku' di tondu'ddi do minodop. 2 Om kongoilo noddi i tulun do hilo'd Gasa do hiri i Simson. Om tutukai noddi diyolo' i kinoiyonon diri om awangai no diyolo' i Simson do hiri'd wawayaan di bandar do gisom do nosuaban. Om tontok nopoddi do totuong diri om aiso' no o winonsoi diyolo' tu' koihi pod momusorou do poingkaa, “Mulai nopo o tadau om patayon toko' no iyau,” ka no. 3 Nga' a' i' i Simson nosuaban do minodop do hiri. Tu' pitangatuong poddi om tungag no iyau om ongoi no do hiri'd wawayaan di bandar. Om sakato' no dau i totobon di tolig di bandar --- dot i totobon, om i torigi, om i salampad do pogitonggoi-tonggoyo' ngai' nopo dau iri do minanakat. Om saano' noddi dau iri do minongoi do hiri'd timpak di nulu-nulu di koimpa' do Hibron.
I Simson om i Dolila
4 Alaid-laid noddi om haro o tondu' do mantad do hilo'd Rantai do Sorik do kinouhangan di Simson. Ngaran nopo di tondu'ddi om i Dolila. 5 Om rikot no o limo o raja' do Pilistin do minongoi solowot di tondu'ddi, om boro-boros nod, “Lugu-lugutan no i Simson om koilo ko i' do tadon di kokorisan dau, om ralan do popoluhoi dau. Om rumikot nogindo iyahai do mongoi pongogos om mongoi pangala' dau. Om patahak ngai' nopondo iyahai do sororibuan om hatus o tusin do pirok dot id diya',” ka diyolo'. 6 Om boros kaddi di Dolila dot id di Simson, “Simson, nokuro tu' okoris kopio ko? Nunu kopio o popokoris diya', posunudo' daa! Nunu poo o pongogos diya' om oluhoi ko indo?” ka dau. 7 Om boros kad i Simson do suminimbar, “Ondung kagasan oku'd turu' o tali di sagalai di pomoloting do pana' di wagu po, it a' po notuu kopio om oluhoi oku no, om iyo oku pondo do tulun ngai',” ka dau. 8-9 Om onuwai noddi di piro-piro o raja' do Pilistin i Dolila do turu' o tali di sagalai'd pomoloting do pana' di wagu po, it a' po notuu kopio. Om daamot nopoddi di tulun do Pilistin do poingandad dot id bilik do suwai, om kagasai nod i Dolila i Simson di tali'ddi. Om polohowo' nogiddi dau o poingkaa, “Simson! Hodi tulun do Pilistin do rumikot!” ka dau. Nga' pututo' nopod i Simson i tali di sagalai'd pomoloting do pana'ddi. Om kongoputut nopo i tali dot iyo pod banang dit oputut dot osorob do tapui. Om a' poddi kasai' noimbulayan i tadon do kokorisan di Simson. 10 Om boros kaddi di Dolila dot id di Simson, “A! Goudut ko! Monguntotogod ko no doho'! Sunudai oku daa giya kopio ondung nunu noo o kokogos diya'!” ka dau. 11 Om boros kad i Simson do suminimbar, “Ondung kagasan oku'd tali di wagu po, it a' po insan kapakai, om oluhoi oku no, om iyo oku pondo do tulun ngai',” ka dau. 12 Om daamot nopo di tulun do Pilistin do poingandad dot id bilik do suwai, om ongoi no i Dolila do piro-piro o tali di wagu po, om kagasai no dau i Simson. Om polohowo' nogiddi dau o poingkaa, “Simson! Hodi tulun do Pilistin do rumikot!” ka dau. Nga' pututo' nopod i Simson i tali'ddi do poingkogos do longon dau dot iyo nod momutut do banang. 13 Om boros kaddi di Dolila dot id di Simson, “A, antangai pogi' nga' nuntotogod oku po moti' diya' kawagu. Goudut ko. Sunudai oku pogi' ondung nunu poo o kokogos diya'!” ka dau. Om boros kad i Simson do suminimbar, “Ondung pogisolopid-lopidon iti turu' o kinawangkasan do tobuk ku, om pokogoson nogindo do papak om oluhoi oku no, om iyo oku pondo do tulun ngai',” ka dau. 14 Om poodopo' noddi di Dolila i Simson om solopido' no dau i turu' o kinawangkasan di tobuk dau; gisom dot iso' poddi o kinosolopidan. Om pokogoso' nogiddi dau do papak om polohowo' no dau o poingkaa, “Simson! Hodi tulun do Pilistin do rumikot!” ka dau. Om tungag no i Simson om kagayat no dau i tobuk dau gisom do noidu' do mantad hiri'd papak. 15 Om boros kaddi di Dolila dot id dau, “Antangai pogi', nga' muhang oku diya', ka nu, om a' ko i' muhang kopio! Intolu ko noddi ponguntotogod doho', om gisom piya'd baino' nga' a' oku po diya' nosunudan do tadon dino kokorisan nu,” ka dau. 16 Om monikid tadau nopoddi i Dolila do mugut-lugut do mononsog, gisom dot apaasan noddi i Simson do korongou dau. 17 Om alaid noddi om posunudo' nod i Simson i tadon do kokorisan dau. Boros ka dau, “Iti nopo tobuk ku om a' i' insan kopompod. Om nakatahak oku no dot id Kinorohingan do pinotobilang do sumiliu'd dau'd songonuon. Om mantad poddi pogkosusuo' oku i', om nosiliu oku no do tulun do Nasir. Ondung pompodon iti tobuk ku om atagak no o kokorisan ku om oluhoi oku nondo, om iyo oku pondo do tulun ngai',” ka dau. 18 Om koilaai noddi di Dolila do nokosunud no di Simson it otopot. Om poporomut noddi iyau'd boros dot id piro-piro o raja' do Pilistin do poingkaa, “Riko-rikot kou po do baino' poo. Tu' nokosunud nod i Simson it otopot,” ka dau. Om rikot noddi iyolo' do mikuwo'd minongigit do tusin do patahakon dot id di Dolila. 19 Om puayai noddi di Dolila i Simson do gisom i' do nokoodop do hiri'd poo dau. Om pomolohou noddi iyau'd tulun om suhuo' no dau do minomompod di turu' o kinawangkasan do tobuk di Simson. Om katagakai noddi i Simson di kokorisan dau. Om untotogodo' noddi di Dolila i Simson, 20 boros ka dau, “Simson! Hodi tulun do Pilistin do rumikot,” ka. Om tungag no i Simson om ondos daa dau om koidu' i' iyau do miagal di gulu. Tu' a' i' dau noilaan do nokotongkiad no o Tuhan do mantad id dau. 21 Om tangkapo' noddi iyau di tulun do Pilistin om irulo' no diyolo' o linso' do mato dau. Om pokoyoo' no diyolo' iyau do hilo'd Gasa om kagasai no do rantai'd tambaga'. Om posuango' nogiddi iyau dot id giil. Om hiri noddi do sinuhu' iyau do mongisar. 22 Nga' daamot nopoddi om sumuni no kawagu i tobuk dau.
Kinapatayon di Simson
23 Insan o tadau om timung ngai' no i raja' do Pilistin do mongoi poginakan om mongoi papatahak do porsombahan dit ogumu' kopio dot id Dagon, i tingolig diyolo'. Om podsinding no iyolo' do poingkaa, “Noonuan toko' no diti tingolig toko' do kamanangan do suminaap di Simson, i pisangod toko'!” ka diyolo'. 24-25 Om adalaan noddi kopio o kotoodo' diyolo' gisom do minomoros iyolo' do poingkaa, “Angatan daa i Simson do hiti, om ountotogod toko' i' iyau!” ka. Om ngoyo' no diyolo' i Simson do mantad hiri'd giil, om suhuo' no diyolo' iyau do mingkakat dot id piolitan do duwo o torigi dit agayo, om untotogodo' nogiddi diyolo' iyau. Om soira'ddi di nokito di tulun dot ogumu' i Simson, om royoho' no diyolo' i Dagon, om podsinding no iyolo' do poingkaa, “Noonuan toko' no di tingolig toko' do kamanangan do suminaap di pisangod di minamaraag diti pomogunan toko' om i minamatai di tulun toko' dot ogumu' tomod,” ka. 26 Om boros kad i Simson dot id tanak do kusai di mangahak dau, “Ngoyo' oku daa diya' poigito' di torigi do pinomogirot diti walai, om kosondiu oku i' do hiri,” ka dau. 27 Iri nopo walai'd agayo'ddi nga' nosolot po tomod do tulun. Om iri nogi' i limo o raja'd Pilistin nga' hiri i'. Om hiri nopod tingkat dit id sawat di walai om haro i' doti' o tolu noribu o tulun. Om songingontong ngai' nopo iyolo' di Simson om minguntotori' iyolo' dau. 28 Tontok noddi do suminambayang i Simson, boros ka dau, “Oi Tuhan, it Asawat Kopio, soroho' oku no diya'. Onuwai oku no do kokorisan do baino' poo, oi Kinorohingan, om osulian ku i' i tulun do Pilistin di minongirul di duwo o linso'd mato ku,” ka dau. 29 Om kabayai goduwo noddi di Simson i duwo o torigi di pinomogirot di walai dot agayo'ddi. Om sudsuro' noddi dau di longon dau'd gibang i tiso' di torigi om iri longon dau'd wanan o pinonudsur dau di torigi'd koduwo. 30 Om poboroso' noddi dau dot opuhod o poingkaa, “Baya' nopod kotonggoi oku diti tulun do Pilistin do matai!” ka. Om ponotos tomod noddi iyau do minonudsur di duwo o torigi'ddi do gisom do nahaba'. Om kahabaai nopoddi i limo o raja' do tulun do Pilistin do mitonggoi'd toinsanan di tulun do hiri. Om i Simson nga' nokotonggoi nogi' do napatai. Nga' tontok nopoddi kinapatayo' dau, om ogumu' nogi' o napatai dau do tontok diri ko' mantad di napatai dau di poimpasi po iyau. 31 Om rikot ngai' noddi i tobpinai dau om koinsanai di koobpinayan dau do suwai do minongoi di rata' dau. Om poulio' noddi diyolo' i rata' dau, om lobongo' no do hiri'd pinamalabangan di Manua, i tapa' dau. Iri nopo kalabangan diri nga' hiri'd piolitan do Sora om Istaol. Om i Simson no o nosiliu'd boyoon di tulun dot Israil do solinaid do duwo nohopod o toun.
I Tingolig do Tinuku' di Mika
1 Di nopo di gulu po, om haro o songulun o kusai do roitan dot i Mika. Om poingiyon iyau do hilo'd watas do konulu-nuluan dot Ipraim. 2-4 Insan tadau om boro-boros no iyau di tina' dau, “Ina', tontok di natagakan ko do soribu om hatus o tusin do pirok, om norongou ku do pinapalan nu i minanakau'ddi. Diya i tusin diri, oi ina'! Iyoho' i' i minanakau'ddi,” ka dau. Om pogulio' noddi di Mika i tusin diri dot id tina' dau. Om boros ka di tina' dau do suminimbar, “Maha' daa om barakatan ko'd Tuhan, oi tanak ku!” ka dau. Om onuo' noddi di tina' di Mika o duwo nahatus di tusin do pirok diri, om patahako' no do songulun o tukang pirok. Om pomonsoi noddi i tukang pirok dot iso' o tininganak do kayu o winonsoi, om urogupai nogiddi dau di pirok. Om patahako' noddi di tina' di Mika i tininganak diri dot id di Mika, om boro-boros nod, “Napakai ku no i tusin diri do pinomonsoi diti tininganak. Tu' nakabatos oku no do papatahak di tusin diri dot id Tuhan, om koidu' ko indo do mantad id popol di pinoboros ku'ddi, oi tanak ku,” ka dau. Om poopio' noddi di Mika i tininganak diri do hiri'd walai dau. 5 Om i Mika nga' haro i' o tiyonon do sumambayang, om nokopomonsoi iyau do piro-piro o tininganak do tingolig om nokopomonsoi dot iso' ot ipod. Om siniliu dau'd imam o tiso' di tanak dau'd kusai. 6 Om tontok nopoddi nga' aiso' po o raja' do tulun dot Israil, om sompori-pori nopo i tulun do tumanud di diyolo'd korohian dot id suang do koposi-posion diyolo'. 7 Om tontok nopoddi nga' haro o songulun o tanakwagu do mantad id payat do Liwi, i mantad hilo'd kampung do Baitlahim, it id watas do Yohuda. 8 Om tuminongkiad iyau do mantad hilo'd Baitlahim om maso noddi do mimpanau do mogihum do kinoiyonon do suwai do pomogun-mogunan dau. Om hiri noddid tindalanon, om korikot no iyau do hiri'd walai di Mika, i hilo'd watas do konulu-nuluan dot Ipraim. 9 Om uhoto' no iyau di Mika, “Tulun ko'd nunu, oi tobpinai?” ka dau. Om boros ka di tulun do suminimbar, “Iyoho' nopo om tulun do Liwi, do mantad hilo'd Baitlahim, i hilo'd watas do Yohuda. Om maso ku'dti do mogihum do tiyonon do momogun-mogun,” ka dau. 10 Om boros kad i Mika, “Miyon nopod hiti om osiliu ko i' do ponosihat om imam dahai. Om onuan ku indo iya' do pakayan om takanon nu, om hopod o tusin do pirok do pointikid do toun,” ka dau. 11-12 Om kookunai i' di tanakwagu do Liwi iri. Om siliho' noddi iyau dot imam di mogobi-obi' di Mika, om iyon no iyau do hiri'd walai di Mika, om iyo poddi iyau do tanak kopio di Mika. 13 Om boros kaddi di Mika, “Oilaan ku noddi kopio dot osonong o Tuhan dot id doho' tu' haro noddi o tulun do Liwi do nosiliu'd imam di mogobi-obi' doho',” ka dau.
I Mika om i Payat do Dan
1 Om maso nopoddi om aiso' po o raja' do tulun dot Israil. Om maso nogiddi o payat do Dan do mogihum do tana' do pomogun-mogunan diyolo'. Tu' aiso' po o tana' diyolo' dot id pogialatan di payat dot Israil. 2 Om iri nopo sinompuruan do sompiiyon di poundorong do hilo'd Sora om Istaol om minomili' iyolo' do limo o tulun dit ongokoris om gunsiou do sinuhu' do mongoi pogontong di pomogunan diri, om mongoi ponoluku' di tulun do hiri. Om pamanau noddi i tulun di pinili'ddi. Om korikot no iyolo' do hilo'd watas do konulu-nuluan di tana' dot Ipraim, om ongoi no iyolo' odop do hiri'd walai di Mika. 3 Tontok di hiri iyolo'd walai di Mika, om korongou no diyolo' i tanakwagu do Liwi do moro-boros om kotutunai no diyolo' i boros dau. Om ponguhot no iyolo' dau, “Nokuro tu' hiti ko? Nunu o maan nu'd hiti? Isai o minangangat diya' do hiti?” ka. 4 Om boros ka di tanakwagu do suminimbar, “Iti no o korohian di Mika. Om godsian oku dau do sumiliu'd imam,” ka. 5 Om boros ka diyolo', “Iyo nopoddi om tulungo' daa iyahai do monguhot do Kinorohingan ondung osonong o kotutukon diti tongoyon dahai ko' amu',” ka. 6 Om boros ka dit imam do suminimbar, “Kada' kou katangkabo tu' korohian i' do Tuhan iti tongoyon dokoyu,” ka dau. 7 Om pamanau noddi i limo o tulun diri do minongoi'd hilo'd Lais. Om hilo' no iyolo' do minonorisid do koposi-posion di tulun do hiri. Om kokito no diyolo' o koposi-posion di tulun do Lais do miagal di koposi-posion do tulun do Sidon, do mulong piya dot osodu' iyolo' do mantad id tulun do Sidon, om poimpori-pori do mantad id bansa'd suwai, nga' ongosimbayan i' o koposi-posion diyolo' tu' aiso' i' o pisangod diyolo' om haro ngai' diyolo'. 8 Om koguli' poddi i limo o tulun diri do hiri'd payat diyolo' di hilo'd Sora om Istaol, om suhuo' noddi iyolo' di payat do Dan do poposunud di nokito diyolo'. 9-10 Om boros ka diyolo', “Iri nopo pomogunan di nokito dahai om osonong, om agayo, om osimbayan, om haro ngai' nopo. Kainou mongoi nogi' do hilo'd Lais, om kada' toko' undorong tomod. Om ngoyon toko' nogi' kopio songodo' iri dot oruhai om oiyon toko' i' i pomogunan diri, tu' patahakon id Kinorohingan iri dot id dokoyu. Om soira' nopo do korikot kou'd hilo' om a' i' diyolo' osorou do mongoi kou panangod diyolo',” ka. 11 Om pamanau noddi ot onom nahatus o tulun do mantad id payat do Dan do mantad hilo'd Sora om Istaol dot ongkirapo-rapo ngai' do don sumasangod. 12 Om ongoi no iyolo' do hilo'd ponong id kotonobon do mantad id Kiriat Yiarim, it id watas do Yohuda, om pomukiim no iyolo' do hilo'. Om iri no o kokuwaan do roitan kasai' po do “Kokiiman do Dan” o kinoiyonon diri. 13 Om lombus po iyolo' do minamanau do mantad hilo' do kuminaa do hilo'd watas do konulu-nuluan dot Ipraim om korikot no iyolo' do hiri'd walai di Mika. 14 Om boro-boros no i limo o tulun, i gomponoluku' di sinuhu' di gulu poddi dot id tambalut dau, “Koilo kou i' do haro ot iso' o walai dot id pogiolitan diti walai'dti do haro o tininganak do nurogupan do pirok? Om haro po o tininganak do suwai om haro ot ipod. Nunu ot osorou dokoyu dot apatut toko'd wonsoyon?” ka diyolo'. 15 Om ongoi noddi iyolo' do hiri'd walai di Mika, i niyon di tanakwagu do Liwi, do mikuwo'd suminuwau iyolo' dau. 16 Nga' iri nopo it onom nahatus di soudor do payat do Dan dit ongkirapo-rapo'ddi om songingkakat no do hiri'd wawayaan di bandar. 17 Nga' iri nopo i limo o gomponoluku' om suminuang do hiri'd walai di Mika do minongoi panganu di tininganak di kayu do winonsoi do nurogupan do pirok, om i tininganak do suwai om it ipod. Nga' maso nopoddi om iri nopo i tanakwagu do Liwi om hiri'd rolot dit onom nahatus o soudor di hiri'd wawayaan do bandar. 18 Om soira' do nokosuang i limo o tulun do hiri'd walai di Mika do minongoi panganu dit ipod om i tininganak do tingolig om ponguhot no i tanakwagu do Liwi, “Nunu ot onuon dokoyu'd hiti?” ka. 19 Om boros ka diyolo', “Kada' pimboros. Kada' no ponguhot. Woyo' nopo dahai, om iya' no o sumiliu'd imam om ponosihat dahai. Tu' osonong nogid sumiliu'd imam dot iso' o payat, ko' sumiliu'd imam dot iso' no o sompiiyon,” ka. 20 Om asanangan iddi i tanakwagu di pinoboros diyolo'ddi. Om onuo' no dau it ipod om i tininganak do tingolig om woyo' no iyau diyolo'. 21 Om lombus no iyolo'd minamanau, om pinogulu diyolo' i tangaanak om i tayam-tayam, om i konunu-nunuan diyolo'. 22 Om koinsodu' poddi iyolo' om pangangat no i Mika di tulun di hiri'd somo-somok dau do mongoi pomogusa' di tulun do Dan. Om tontok di nokosupan diyolo' i payat do Dan, 23 om pinggiak no i Mika om i tongoulun dau. Om koili no i tulun do payat do Dan, om uhoto' no diyolo' i Mika, “Nunu'ri? Nokuro tu' iyo kopio'llo o kogumuon dilo tulun?” ka. 24 Om boros kad i Mika do suminimbar, “Kada' kou nod a' mingilo-ilo. Tu' nanu ngai' dokoyu i tininganak di winonsoi ku, om it imam ku nga' natanggayan no dokoyu do mogidu'. Om aiso' noddi o nunu-nunu ku!” ka dau. 25 Om boros ka di tulun do Dan, “Kada' nogi' ungkomi. Tu' mungkomi ko nopo moti', om tumogod moti' ilo tulun om sumaap nondo iyolo' om patayon ko nopo om koinsanai di sompiiyon nu!” ka. 26 Om lombus noddi i tulun do Dan do minamanau. Om kokito noddi di Mika dot osodu' noddi iyolo', om ongokoris ko' iyau, om uli' noddi i Mika. 27-28 Om kaanu poddi di tulun do Dan it imam diri om i konunu-nunuan di maan do sumambayang di winonsoi di Mika, om ngoyo' nogiddi diyolo' songodo' o Lais, i kampung dit osimbayan om aiso' o ligogon do tulun di poingiyon do hiri. (Iri nopo kampung diri nga' hiri'd rantai do kinoiyonon do kampung do Bait-Rihob.) Om songodo' noddi di tulun do Dan i tulun do Lais. Om tutudai nogiddi diyolo' i kampung diri. Om aiso' no o minongoi uhup di tulun do Lais tu' poimpori-pori i' iyolo' om osodu' do mantad id Sidon. Om wonsoyo' noddi kawagu di tulun do Dan i kampung diri om pomogun-mogun no iyolo' do hiri. 29 Om powoliho' noddi diyolo' o ngaran di kampung diri, om pungaranai no do Dan, do pinasangai di ngaran di taki diyolo' di roitan dot i Dan, i tanak di Yakub. 30 Om poingkakato' noddi diyolo'd hiri i tininganak do tingolig di nanu diyolo'ddi do maan diyolo'd tukuon. Om pilio' no diyolo' i Yonatan, i tanak di Girsom, i manangaki di Musa, do sumiliu'd imam diyolo'. Om iri no i sinakagon di Girsom o nosiliu'd imam do payat do Dan do gisom do norikot o nakapananggayan do pisangod di tulun dot Israil do pinakaa dot id pomogunan do suwai. 31 Om iri nopo i tininganak do tingolig di winonsoi di Mika diri nga' hilo' kasai' id Lais do solinaid do hilo'd Silo i Kiim do tiyonon do sumambayang dot id Kinorohingan.
I Tulun do Liwi om i Panakasawo Dau
1 Tontok dit aiso' po o raja' do tulun dot Israil, om haro o songulun o Liwi do poingiyon do hiri'd sokid, it id watas do konulu-nuluan dot Ipraim. Om pogongoi no iyau'd tondu' do numaan dau do panakasawo, do mantad hilo'd Baitlahim, it id suang do watas do Yohuda. 2 Nga' kotogod noddi i tondu' dot id dau, om uli' no i tondu'ddi do hiri'd walai di tapa' dau do hilo'd Baitlahim. Om maha' dit apat noddi o tulan di tondu' do poundorong do hiri, 3 om ongoi no i sawo dau pangangat do songulun di susuhuon dau om igitai dau o duwo o tinan di kaladai do minongoi suhut di sawo dau do mongoi popouli' dau. Om tontok di nokorikot iyolo' do hilo' om ngoyo' no di tondu' posolowoto' i sawo dau di tapa' dau. Om tontok di nokito di tapa' di tondu' i sawo di tanak dau, om otood tomod diri iyau do suminuwau dau, 4 om sansagai no iyau di tapa' di tondu' do mundorong do hiri'd walai dau. Om undorong no iyau do hiri do solinaid do tolu o tadau. Om poinsugku' noddi iyau di tondu' di panakasawo dau do makan, om misugku' iyolo'd modop. 5 Om maha' dit osuab po di kaapat nod tadau om sodia' no iyolo'd mamanau. Nga' boro-boros nogi' i tapa' di tondu'ddi di tulun do Liwi, “Makan kou po om a' kou i' louson, om mamanau kou nogindo,” ka. 6-7 Om irikau noddi iyolo', om pogiilang no iyolo' do makan om minum. Nga' maha' di mamanau no daa iyolo', om lugu-lugutai po di tapa' di tondu' i tulun do Liwi dot a' mamanau. Boros ka dau, “A' i' bondo marau-arau, modop pod hiti'd baino',” ka. Om undorong poddi do hiri i tulun do Liwi do totuong diri. 8 Om maha' dit osuab po di kolimo nod tadau, om sumodia' no iyolo' do mamanau, om boro-boros po kawagu i tapa' di tondu' dot id tulun do Liwi, “Kainou, makan po; om mamanau kou id tiinu',” ka. Om akan noddi iyolo' om ponorimo-rimo po gisom do tumonob noddi o tadau. 9 Om tontok di mamanau no daa'ddi i tulun do Liwi om i panakasawo dau om i susuhuon dau, om boro-boros po kawagu i tapa' di tondu', “Osodop noti. Om a' no alaid do tumuong. Osonong nogid modop kou pod hiti om a' nogi' arau-arau. Om sumuab kou i' do mamanau'd suab do muli' do hilo'd walai nu,” ka. 10-11 Nga' a' noddi minundorong i tulun do Liwi. Om pamanau noddi iyau do miniwoyo' di panakasawo dau om i susuhuon dau om i duwo o kaladai dau di pinakalan goduwo. Om tumuong noddi di nokorikot iyolo' do hilo'd somok do bandar do Yobus (iri no i bandar do Yorusalim.) Om boro-boros no i susuhuon diri dot id tuan dau, “Tuan, kainou mundorong om modop toko' nopo do hiti'd bandar do tulun do Yobus,” ka. 12-13 Nga' boros ka di tuan dau, “Amu'! A' toko' i' milo do mundorong do hiti tu' okon i' ko' pomogunan do tulun dot Israil. Kainou lombus toko' nopod mamanau, om modop toko' i' do hilo'd Gibia ko' hilo'd Rama!” ka dau. 14 Om lombus poddi iyolo' do minamanau, om a' no minundorong do hilo'd Yobus. Om notonob noddi o tadau om korikot nogi' iyolo' do hilo'd Gibia, it id watas do payat do Binyamin. 15 Om umbaya' no daa'ddi iyolo' do mongoi odop do hiri. Om suang noddi iyolo' do hiri'd bandar diri. Nga' aiso' i' o tongosongulun piya do pinapasalakoi diyolo'. Om ongoi noddi iyolo' undorong do hiri'd talun-alun. 16 Om daamot di songirikau iyolo'd hiri, om rikot no o songulun o molohing no do koguguli' do mantad id dumo. Tadon nopo kopio dau om hilo'd watas do konulu-nuluan dot Ipraim. Nga' baino' nopoddi om poingiyon no iyau do hiri'd Gibia. (Iri nopo tulun do suwai di poingiyon do hilo' om mantad id payat do Binyamin.) 17 Om kokito noddi di tulun di molohing no i tulun do Liwi do hiri'd talun- alun, om uhoto' no dau iyau, “Hinonggo tadon dokoyu, om hinonggo o pakayaan dokoyu?” ka dau. 18 Om boros ka di tulun do Liwi do suminimbar, “Koririkot dahai'dti do mantad hilo'd Baitlahim, i hilo'd watas do Yohuda, om poulian no dahai'dti do hilo'd sokid, i hilo'd konulu-nuluan dot Ipraim. Nga' aiso' i' o tongosongulun piya do tulun do hiti'd bandar diti do popoodop dahai dot id walai diyolo'. 19 A' i' daa iyahai mokianu do nunu nopo; tu' kabagal i' dahai o kokoriu dahai. Haro i' o sakot do nokoring om haro po taakanon do suwai do paakanan dahai dilo kaladai dahai. Om haro o roti om anggur dot akanon dahai dilo sawo ku om ilo susuhuon ku,” ka dau. 20 Om boros kaddi di tulun di molohing noddi, “Kada' katangkabo, tu' tulungon ku i' iyokoyu, om kada' kou odop do hiti'd talun-alun,” ka dau. 21 Om angatai noddi dau iyolo' do mongoi do hiri'd walai dau. Om sumado' no dau i kaladai di tulun do Liwi. Om pongoug noddid lapap i tulun di molohing no, om i tulun di nangatan dau'd hiri, om akan nogiddi iyolo'. 22 Om daamot di mogirumo-rumo iyolo' om sigog nopo om ngoyo' di tongokusai'd sundal do mantad id bandar diri, tutukai i walai. Om sombobog-bobog nopoddi iyolo' di totobon di walai, mikuwo'd minoro-boros di tulun di molohing no, do poingkaa, “Patahako' dahai ino tongokusai di pinasalakoi nu do hino'd walai nu do maan dahai ompohuo',” ka. 23 Om soliwan no i tulun di molohing noddi, om boro-boros no diyolo', “Kada' kou no kopio, oi tobpinai-tobpinai. Pokionuon ku no, dot a' kou momonsoi dit araat om it a' kopio apatut. Tu' iyolo' nopo om nokoumbaya' no toomod do hiti'd doho'. 24 Patahakon ku nogi' dot id dokoyu ilo tondu' do panakasawo dau om i tanak ku'd sumandak. Om wonsoyon nopo o nunu nopo o korohian dokoyu dot id diyolo', nga' kada' kou po pomonsoi dot araat dot id tongokusai diti nokoumbaya' do hiti'd doho',” ka dau. 25 Nga' ongosonsog kopio i tongokusai'd sundal diri; om posoliwano' no di tulun do Liwi i tondu' di panakasawo dau'ddi do pinatahak dot id diyolo'. Om ompohuo' noddi diyolo' i tondu'ddi do gisom do nosuaban. 26 Om maha' dit osuab po di kosuabon om guli' no i tondu'ddi do hiri'd walai di tulun di molohing no, i niyonon di sawo dau. Om kahaba' nopo iyau do hiri'd toning di wawayaan di walai. Om tontok di nokoulai no o tadau om hiri kasai' po iyau. 27 Om tontok di kosuabon diri, di nokotungag i sawo dau, om iwangai no di sawo dau i totobon di walai tu' mamanau no daa iyau nga' kokito nogi' dau i tondu' di panakasawo dau do poinglii do hiri'd toning di wawayaan om poingkabai o longon di totobon di walai. 28 Om boros ka dau dot id tondu'ddi, “Tungag, kaino mamanau,” ka. Nga' a' no nokosimbar i tondu', tu' napatai no. Om kakato' no dau i tondu'ddi om pasakayo' no di kaladai, om pamanau noddi iyolo' do minuli' do hiri'd walai dau. 29 Om korikot noddi iyau do hiri'd walai om panganu no iyau'd dangol om popoto' no dau i rata' di tondu'ddi do hopod om duwo o popot. Om popingotodo' nogiddi i popot diri do hiri'd hopod om duwo o payat dot Israil, do soroisaan di popot. 30 Om oinsanan nopo i tulun do nokokito'ddi do momoros do poingkaa, “A' toko' po nokokito do nosiliu do miagal diti do mantad di suminoliwan i' o tulun dot Israil do mantad hilo'd Masir do gisom do baino'. A' toko' no milo'd mundorong toomod nopo. Mositi' nod mogiboro-boros toko' ondung nunu ot apatut do wonsoyon toko'!” ka diyolo'.
Mogisasangod i Tulun dot Israil
1 Om rikot ngai' no i tulun dot Israil, i mantad hilo'd Dan, i ponong id utara om gisom di hilo'd Borsiba, i ponong id salatan, om i mantad id Giliad, i ponong id koulayon do minumboyo' di lolohou'ddi. Om timung ngai' no iyolo' do hilo'd Mispa dot id toguang do Tuhan. 2 Kogumuon nopo diyolo'ddi om apat nahatus noribu o soudor di mamanau'd gakod. Om iri boyoon do pointikid-tikid do payat dot Israil nga' hino ngai' nogi' do hiri. 3-4 Om daamot nopoddi om nokorongou no o tulun do Binyamin do nongkotimung ngai' no i tulun dot Israil di suwai do hilo'd Mispa. Om uhot no i tulun dot Israil di tulun do Liwi di napatayan do panakasawo, “Susuyai daa iyahai ondung poingkuro kopio do nosiliu o kararaat do miagal diri!” ka diyolo'. Om boros ka di tulun do Liwi do suminimbar, “Minumbaya' oku om i panakasawo ku do modop do hilo'd Gibia, it id watas do Binyamin. 5 Om maha' di totuong no om rikot no i tulun do Gibia do mongoi pogihum doho'. Om tutukai nopo diyolo' i walai di niyonon ku do mongoi daa pamatai doho'. Nga' ngoyo' noddi diyolo' ompohuo' i panakasawo ku do gisom do napatai iyau. 6 Om maai ku noddi popoto' i rata' dau om potikido' ku no di hopod om duwo o payat dot Israil, do soroisaan nopo iyolo' do popot. Om winonsoi ku pogi' o miagal diri nga' minomonsoi i' i tulun do Gibia dot araat kopio, i mongintingayam do tulun dot Israil. 7 Om koinsanai dokoyu i hino'd hiti nga' tulun ngai' i' dot Israil. Om mangangat oku'ddi dokoyu do momusorou ondung nunu it apatut toko'd wonsoyon!” ka dau. 8 Om insan-insan nopo i tulun di songintimung do hiri do miningkakat om minomoros do poingkaa, “Iso' pod tulun dot id pogialatan dahai nga' aiso' no muli' do hilo'd kiim ko' hilo'd walai dahai. 9 Iti no o wonsoyon toko'. Momili' toko' nondo do tulun, dot undion o ralan do momili', do mongoi sangod do tulun do Gibia. 10 Sompihopod nopodti tulun dot Israil om poposodia' do taakanon di mongoi sangod. Om iri no suwai om mongoi panangod di tulun do Gibia do pomohukum di winonsoi diyolo' dit araat kopio dot id pogialatan do tulun dot Israil,” ka diyolo'. 11 Om iyo noddi o tulun dot Israil do minogisosokodung do manangod do bandar do Gibia. 12 Om ponuhu' noddi i tulun dot Israil do piro-piro o tulun do mongoi do hilo'd watas do payat do Binyamin do poporongou do habar diti, “Nunu kopio o winonsoi dokoyu'd araat? 13 Patahako' no dahai i tongokusai'd sundal do mantad hino'd Gibia, om patayon i' dahai do mananus di karaaton diri dot id pogialatan do tulun dot Israil,” ka diyolo'. Nga' a' i' pinusou di tulun do Binyamin i pinoboros di tulun dot Israil do suwai'ddi. 14 Nga' ongoi ngai' nogi' i tulun do Binyamin di mantad id koinsanai'd bandar dot id watas do Binyamin do hilo'd Gibia do mongoi sangod di tulun dot Israil do suwai. 15-16 Om tadau nogiddi do minonimung iyolo' do duwo nohopod om onom noribu o soudor do mantad id kabandaran diyolo'. Om suwai no ko' iri, om minonimung po o tulun do Gibia do turu' nahatus o tulun di pinili-pili' no kopio, om i golibang ngai' nopo. Om oinsanan nopo iyolo'ddi dot ongotiru' do popolositik do watu. Ondung momolositik iyolo' om a' i' koumbal dot a' koonong. 17 Om iri no tulun dot Israil di suwai om minonimung dot apat nahatus noribu o soudor di nokopinsingilo do sumangod.
Sinangod i Tulun do Binyamin
18 Om ongoi noddi i tulun dot Israil do hilo'd tiiyonon do sumambayang do hilo'd Baitol, om ponguhot no iyolo' do Kinorohingan, “Payat disai dot id pogialatan dahai ot apatut do mogulu do mongoi sangod do tulun do Binyamin?” ka diyolo'. Om boros kad Tuhan do suminimbar, “Payat di Yohuda,” ka. 19 Om kosuabon noddi kawagu om pamanau no i tulun dot Israil om pomukiim no iyolo' do hilo'd somok di bandar do Gibia. 20 Om potimbabao' noddi diyolo' di bandar i soudor diyolo', om ngoyo' no diyolo' songodo' i soudor do Binyamin. 21 Om soliwan noddi i soudor do Binyamin do minongoi panangod om kapatai nopo diyolo' o duwo nohopod om duwo noribu di soudor do tulun dot Israil do tadau'ddi. 22-23 Om ongoi po kawagu i tulun dot Israil do hiri'd tiiyonon do sumambayang, om ihad no iyolo' dot id toguang do Tuhan do gisom do nasadapan, tu' naala' i' iyolo'. Om uhoto' po kawagu diyolo' o Tuhan, “Mongoi po tuu iyahai sangod di koobpinayan dahai, i tulun do Binyamin?” ka diyolo'. Om boros kad Tuhan do suminimbar, “Oo, mongoi po,” ka. Om kokoris noddi kawagu o ginawo di soudor dot Israil. Om uludo' no kawagu diyolo' i soudor diyolo' do sumodia' do sumangod do miagal di pinongulud diyolo' di tadau di nakatalib. 24 Om koinduwo no diyolo'ddi do mongoi sangod di soudor do Binyamin. 25 Om iri tulun do Binyamin nga' koinduwo no do suminoliwan do mongoi sangod. Om patayo' no diyolo' o hopod om walu' noribu o soudor dot Israil di nokopinsingilo do sumangod. 26 Om ongoi po kawagu i tulun dot Israil do hilo'd Baitol do miningihad dot id toguang do Tuhan. Om hilo' no iyolo' do puasa do gisom do totuong. Om pinapatahak nogi' iyolo' dot id Tuhan di porsombahan do piombolutan om i porsombahan do sorobon. 27-28 Om maso nopoddi om hilo'd Baitol i Kaban do Tumpongo do Kinorohingan, om i Pinihas, i tanak di Iliasar, i manangaki di Harun, ot imam do hiri. Om uhoto' no di piro-piro tulun diri o Tuhan, “Oi Tuhan, mongoi po tuu iyahai sangod di koobpinayan dahai, i tulun do Binyamin ko' potingkodon dahai iti pisangadan diti?” ka diyolo'. Om boros kad Tuhan do suminimbar, “Ngoyon nopo dokoyu iyolo' songodo', tu' suab nopo om onuan ku no iyokoyu do kamanangan,” ka dau. 29 Om korongou noddi diyolo' i pinosimbar do Tuhan, om ngoyo' no diyolo' poundorongo' i soudor do hiri'd kinoiyonon di songillisok-lisok do hiri'd posorili' di bandar do Gibia. 30 Om tontok di kotolu'd tadau om ongoi noddi iyolo' sangod di soudor do Binyamin, do pinopoulud nopo diyolo' di soudor om miagal i' di pinopoulud diyolo' di piro-piro tadau do nakatalib, tu' pinotimbaba' di bandar do Gibia. 31 Om sangod no i tulun do Binyamin, gisom do noupanan iyolo' do suminoliwan do mantad hiri'd bandar. Om timpuun noddi iyolo' do minimpatai di tulun dot Israil di hiri'd soliwan di bandar do hiri'd ralan do kumaa do hilo'd Baitol om hiri'd ralan do kumaa do hilo'd Gibia, do miagal di winonsoi diyolo' dit id gulu. Om tolu'ddi nohopod o tulun dot Israil do napatai. 32 Om iri no o kinapamarasan do tulun do Binyamin do poingkaa, “Naala' toko' no iyolo' do miagal di gulu,” ka. Nga' tuminomod i' i soudor do tulun dot Israil do minogidu' tu' mongupan iyolo' di soudor do Binyamin do mongoi'd hiri'd talun-alun dit id sodu' di bandar. 33 Om kotongkiad poddi i soudor do tulun dot Israil dit ogumu', om timung no kawagu iyolo' do hilo'd Baal Tamar. Om olomus nopoddi do suminoliwan i soudor diyolo' di songillisok do hiri'd posorili' di bandar. 34 Om iyolo' nopoddi nga' iri tulun di nongopili-pili' no do mantad id koinsanai do tulun dot Israil; kogumuon nopo diyolo' om hopod noribu o tulun. Om kotimpuun noddi o pisangadan dot adalaan kopio do tontok di minongoi sangod do tulun do Gibia i hopod noribu o soudor do tulun dot Israil. Om a' i' di tulun do Binyamin soro-sorohon dot oruhai no iyolo' dot aala'. 35 Nga' nonuan i' do Tuhan do kamanangan i tulun dot Israil do suminangod di soudor do Binyamin, gisom do nakapamatai i tulun dot Israil do 25,100 o soudor do Binyamin. 36 Om kopurimanai nogiddi di tulun do Binyamin do naala' iyolo'.
Nakamanang-manang di Tulun dot Israil
Om tuminomod i' i soudor dot Israil dit ogumu' do minogidu' do mantad id tulun do Binyamin, tu' mogondos no iyolo' di soudor diyolo' di songillisok do hiri'd posorili' di bandar do Gibia. 37 Om olomus nopo i soudor di songillisok diri do suminuang do minongoi panangod di bandar do Gibia, om tongkop nopo iyolo' di bandar diri, om patayo' ngai' no diyolo' i tulun do hiri'd bandar. 38 Nga' nokopogiupakat mantad no iyolo' dot ondung haro ot okito do lisun dot akapal do minsawat do mantad hiri'd tanga' di bandar, 39 om mositi' nod pogulian kawagu di soudor dot Israil dit ogumu' do mongoi saap di pisangod. Om maso nopoddi om nakapamatai no o tulun do Binyamin do tolu nohopod o soudor dot Israil. Om boros ka di tulun do Binyamin, “Naala' toko' no iyolo' do miagal di gulu,” ka. 40 Nga' sigog id haro o lisun do mininsawat do mantad hiri'd tanga' di bandar do Gibia. Om kotigowo nopo i tulun do Binyamin di kuminoili iyolo' om nokito do notutudan no i bandar diyolo'. 41 Om maso noddi do guminuli' kawagu i soudor dot Israil dit ogumu' do minongoi panangod, om a' noddi oila-ilaan o kokoyo-koyoon di soudor do Binyamin, tu' opurimanan no diyolo' dot oruhai no iyolo'd aala'. 42 Om poggidu' no iyolo' do mantad id tulun dot Israil do kuminaa do hiri'd koomulakan, it id soliwan do bandar, nga' a' no iyolo' milo do minogidu'. Tu' nosorilian po iyolo' di soudor dot Israil dit ogumu' om i soudor di suminoliwan do mantad hiri'd bandar. Om agayo noddi kopio o kinaalaan di tulun do Binyamin. 43 Om tutukai nopoddi di tulun dot Israil iyolo' do minomogusa' do gisom do nokorikot dot id iso' o kinoiyonon di ponong id koulayon do mantad id Gibia. Om tontok di momogusa' iyolo' om kapatai no diyolo' 44 o hopod om walu' noribu di soudor di nokopinsingilo do sumangod dit id pogialatan do soudor do Binyamin. 45 Nga' iri nopo i wookon di soudor do Binyamin om minanangkus do guminuli' do minaya' do hiri'd koomulakan do kumaa do hilo'd nuluhon di kapampangan do hilo'd Rimon. Nga' iri nopo limo noribu do mantad id pogialatan diyolo' om pinatai do hiri'd tanga'd ralan. Om iri no i noolu-olu' om ginusa' do gisom do nokorikot do hilo'd Gidiom. Om id pogialatan nopoddi om duwo noribu o tulun do pinatai. 46 Iri nopo soudor do Binyamin di napatai do tadau'ddi om 25,000 o tulun --- iri ngai' nopo i soudor dit ongokoris om gunsiou. 47 Nga' iri nopo soudor diyolo' di minogidu' do minaya' di koomulakan om i pinakayaan do hilo'd nuluhon do kapampangan do Rimon, om onom po nahatus o tulun do napasi. Om undorong no iyolo' do hilo'd Rimon do solinaid dot apat o tulan. 48 Om ngoyo' po kawagu iyolo' di soudor dot Israil songodo' om pinatai diyolo' o koinsanai di tulun do Binyamin di noolu-olu' --- i tongokusai om tongoondu', om tangaanak om i tayam-tayam diyolo'. Om tutudai ngai' nopoddi diyolo' i bandar dot id watas diri.
I Tongoondu' do Maan do Sawo di Tulun do Binyamin
1 Om tontok di tuminimung i tulun dot Israil do hilo'd Mispa, om pamatos no iyolo' dot id Tuhan do mada' do haro o tongoiso' piya di tanak diyolo'd tondu' do pokowinon do tulun do Binyamin. 2 Om ongoi noddi i tulun dot Israil do hilo'd Baitol om irikau no iyolo' do hilo' do mikuwo'd tumongob kopio dot id toguang do Tuhan do gisom do nasadapan. Om pingihad no iyolo' om boro-boros nod opuuhod do poingkaa, 3 “Oi Tuhan, i Kinorohingan dot Israil, nokuro tu' nosiliu o miagal diti? Tu' payat nopod Binyamin om mantad id payat dahai, nga' oruhai noddi iyolo' dot opunso!” ka diyolo'. 4 Om kosuabon noddi kawagu dit osuab po om pomonsoi no i tulun dot Israil do pananaraban do porsombahan do hiri, om papatahak no iyolo' dot id Tuhan do porsombahan di sorobon om porsombahan di piombolutan. 5 Om pinguhatai noddi diyolo' ot id pogialatan di payat dot Israil, ondung haro o tulun dot a' minongoi toguang do Tuhan do hilo'd Mispa. (Tontok nopoddi om suminumpa' o tulun dot Israil dot isai nopo ot a' mongoi tinong di lolohou do mongoi do hilo'd Mispa om mositi' no do hukuman do kapatayon.) 6 Om ongosianan iddi i tulun dot Israil di tongotobpinai diyolo', i tulun do Binyamin. Om boros ka diyolo', “Baino' nopoddi om natagakan toko' nod iso' o payat. 7 Nunu po o wonsoyon toko' dot id tulun do Binyamin di nongoolu-olu' om kasawo i' iyolo', tu' nokosumpa' toko' no dot id Tuhan dot a' toko' pologoson o tangaanak toko' di tongoondu' do kowinon di tulun do Binyamin,” ka. 8 Om ihumo' noddi diyolo' ondung haro po o pinuruan do tulun do mantad id payat dot Israil dot a' nokoongoi kotimung do hilo'd Mispa. Om koilaai noddi diyolo' dot iri nopo tulun do hilo'd Yabis, i hilo'd Giliad, om aiso' i' o tongoiso' piya do minongoi do hilo'd Mispa. 9 Om antangai no i pinonulisan do ngaran di nongkorikot, om koilaai nod aiso' i' o tongoiso' piya do tulun di mantad hilo'd Yabis do nokoongoi. 10 Om ponuhu' noddi iyolo'd hopod om duwo noribu o tulun dot id pogialatan diyolo' di pointimung do hilo'd Baitol, om i piro-piro o gunsiou do mongoi pamatai do koinsanai di tulun do Yabis, om kohompit ngai' nogi' i tongoondu' om i tangaanak. 11 Om sinuhu' nogi' iyolo' do mamatai do koinsanai di tongokusai om i tongoondu' di nongodudun do kusai. 12 Om id pogialatan nopo di tulun do Yabis om haro po ot apat nahatus o tongoondu' dit a' po nodudun do kusai. Om tanggayai no diyolo' i tongoondu'ddi do hilo'd kokiiman do Silo, i hilo'd pomogunan do Kanaan. 13 Om ponuhu' ngai' noddi i tulun dot Israil do tulun diyolo' do mongoi solowot di tulun do Binyamin di hilo'd nuluhon di kapampangan do hilo'd Rimon, do mongoi poporomut do boros dot orohian do monokiulud. 14 Om iri noddi o kinoulian di tulun do Binyamin. Om patahako' noddi di tulun dot Israil i kosumandakan di mantad id Yabis, it a' diyolo' pinatai'ddi, do sumiliu'd sawo di tulun do Binyamin. Nga' a' i' nokotikid di tulun do Binyamin i kosumandakan diri. 15 Om osianan iddi i tulun dot Israil di tulun do Binyamin tu' naraag nod Tuhan o piuludan do payat dot Israil. 16-18 Om boro-boros noddi i piro-piro boyoon do suminangod di hilo'd Baitol do poingkaa, “Id suang nopo di payat do Binyamin om aiso' no o tongoondu'. Nga' kuroyon po tu' a' toko' no milo do papakawin do tangaanak toko' do tondu' do tulun do Binyamin, tu' nokosumpa' toko' no do momopol dot isai nopo ot id pogialatan toko' do papakawin do tangaanak dau'd tondu' dot id tulun do Binyamin! Om nunu poddi o wonsoyon toko' dot id tulun do Binyamin om kakawin i' iyolo'? Om a' toko' i' atagakan dot iso' o payat do mantad di hopod om duwo o payat. Om mositi' nod mogihum toko'd ralan ondung poingkuro iyolo' do kaanu do sinakagon,” ka diyolo'. 19 Om boros ka diyolo', “Haro o tiso' o ralan do tontok di tadau'd agayo do don Tuhan di ramayon do pointikid do toun do hilo'd Silo,” ka. (Ponong id salatan nopod Silo om i bandar do Baitol, om ponong id kotonobon nopo om haro o talun-alun di mantad hilo'd Baitol do poingkaa do hilo'd Sikim, om iri no i ponong id utara om bandar do Libona.) 20 Om boro-boros ngai' no i boyoon di hiri'd pinitimungan do hilo'd Baitol dot id tulun do Binyamin di nongoolu-olu'ddi, “Mongoi ngai' kou no lisok do hilo'd kokobunan dot anggur di hilo'd Silo, 21 om tumamong kou nopod hiri. Om soira' nopondo do sumoliwan i kosumandakan do Silo do mongoi panari' do hiri'd karamayan do don Tuhan do monikid toun, om sumoliwan kou no do mantad hiri'd kabun dot anggur. Om sorompori-pori kou nopod mononggoi dot iso' o sumandak. Om tanggayan no dokoyu iyolo' do mongoi do hilo'd watas do Binyamin do maan dokoyu'd sawo. 22 Ondung rumikot i tapa' ko' i tobpinai di sumandak do mongoi pangangat di tondu' om poboroson no dokoyu dot id diyolo' o poingkaa, ‘Pologoson nopo iyolo' do hiti'd dahai. Tu' a' i' dahai iyolo' tinanggayan do mantad id pisangadan. Om a' kou i' kasala' dot id sumpa' dokoyu, tu' okon i' ko' iyokoyu o pinapatahak diyolo' dot id dahai,’ kanto dokoyu,” ka diyolo'. 23 Om wonsoyo' noddi di tulun do Binyamin i pinoboros diyolo'ddi. Om sorompori-pori nopoddi iyolo' do minononggoi dot iso' o sumandak dit id pogialatan di kosumandakan di manari' di hilo'd Silo. Om tanggayai no diyolo' do guminuli' do hilo'd watas diyolo'. Om wonsoyo' no kawagu diyolo' i kabandaran diri om hilo' no iyolo' do minomogun-mogun. 24 Om iri nogi' i tulun dot Israil do suwai nga' minogionguli' noddi dot id tana' di diyolo'd songonuon do hiri'd watas diyolo' do tumanud di sinompuruan do sompiiyon, om i payat diyolo'. 25 Om maso nopoddi om aiso' po o raja' do hilo'd Israil om sorompori-pori nopo o tulun do momonsoi di dau'd korohian.
Minongoi i Alimilik om i Sompiiyon Dau do Hilo'd Muab
1-2 Tontok di gulu po, di maso po dot aiso' o raja' do tulun dot Israil, om minononglous o hilo'd pomogunan do Kanaan. Tontok nopoddi om haro o songulun o kusai do roitan dot i Alimilik. Iyau nopo om mantad id pinuruan do sompiiyon di Iprata, i poingiyon do hilo'd Baitlahim, it id watas do Yohuda. Ngaran nopo di sawo dau om i Noumi, om ngaran no di tanak dau do duwo noo, om i Malon om i Kilion. Om ongoi noddi i Alimilik, om i sawo dau om i duwo o tanak dau do hilo'd pomogunan do Muab do mongoi pomogun-mogun do hilo' do daamot tu' minononglous i' o hilo'd pomogunan diyolo'. Nga' tontok di hilo' po iyolo', 3 om kapatai no i Alimilik. Om i Noumi poddi om i duwo o tanak dau o noolu'. 4 Om panansawo noddi goduwo i tanak dau do tongoondu' do Muab. Kinawin nopo diyolo' nga' i Orpa om i Rut. Om hopod noddi o toun do mantad diri, 5 om kapatai no i Malon om i Kilion. Om iso' poddi i Noumi.
Guminuli' i Noumi om i Rut do Hilo'd Baitlahim
6 A' no alaid do mantad diri om korongou no i Noumi do habar do binarakatan do Tuhan o tumo di tulun dau gisom dot ongosonong diri o tua' di tinanom diyolo'. Om pogopi-opi' noddi i Noumi om i duwo o monongiwan dau do tumongkiad do pomogunan do Muab, om gumuli' do hilo'd pomogunan mantad di Noumi. 7 Om pamanau ngai' no iyolo' do gumuli' do hilo'd Yohuda. Nga' maha' di hilo' no iyolo'd tanga'd ralan, 8 om boro-boros no i Noumi di duwo o monongiwan dau. Boros ka dau, “Muli' kou nogi' do hilo'd walai di tina' dokoyu. Om maha' daa om osonong o Tuhan dot id dokoyu, do miagal dokoyu tu' osonong dot id doho' om id diyolo' i nangapatai no. 9 Om maha' daa om onuan kou pod Tuhan do sawo om sompiiyon,” ka dau. Om koboros poddi di Noumi o miagal diri, om tungubai no dau iyolo' do minongintod. Nga' ihad goduwo no i Orpa om i Rut. 10 Om boro-boros no iyolo' di Noumi, “A! Tumanud i' iyahai diya' do mongoi do hilo'd bansa' nu, oi ina',” ka diyolo'. 11 Nga' boros kad i Noumi do suminimbar, “Muli' kou piya, oi oyo'. Kada' kou no tanud doho'. Tu' a' oku no milo do maganak do maan dokoyu'd sawo! 12 Uli' kou nogi'. Tu' molohing oku noddi kopio, om a' oku no kasawo koimbagu. Om sokiro piya daa do haro o mogongoi doho', om totuong id baino' do kowinon oku, om kianak oku nondo do kusai, 13 nga' kaandad kou po tuu daa do gisom do kagayo iyolo'? A' kou tuu daa mokikawin do tulun do suwai? Oilaan i' dokoyu dot a' no kopio milo do miagal diri, oi oyo'. Tu' notogod o Tuhan doho', om osianan oku no kopio dokoyu,” ka dau. 14 Om polompudai poddi kawagu diyolo' do minihad. Om tungubai noddi di Orpa i tiwanon dau do minongintod; om uli' no iyau do hilo'd walai dau. Nga' i Rut nopo om a' no kopio sitongkiad di tiwanon dau. 15 Om boros ka di Noumi dot id dau, “Antangai pogi' oi Rut, nga' nokouli' no moti' ilo biras nu do hilo'd bansa' dau om hilo'd tingolig dau. Ongoi nogi' pogi' iya' woyo' dau do muli',” ka dau. 16 Nga' boros kad i Rut do suminimbar, “Kada' oku no sansagai do pouli', om monongkiad diya', oi ina'. Moyo' oku no diya'. Tu' honggo nopo ngoyon nu iya', om hiri no o doho'd ngoyon. Om hinonggo nopo o tiyonon nu, oi ina', om hiri no o doho'd tiyonon. Bansa' nu nga' bansa' ku no, om Kinorohingan nu nga' Kinorohingan ku no. 17 Honggo nopo o kapatayon nu, oi ina', om hiri no o doho'd kapatayon, om hiri no o pamalabangan doho'. Hukuman oku nopod Tuhan ondung pologoson ku no do haro o popitongkiad dato, oi ina', do suwai ko' kapatayon,” ka dau. 18 Om tontok di noilaan di Noumi dot iso-iso' no kopio o ginawo di Rut do tumanud dau, om kada' noddi iyau ungkomi. 19 Om pamanau no iyolo' do gisom do nokorikot do hilo'd Baitlahim. Om kotigowo ngai' nopoddi i tulun do hiri'd bandar diri do norikatan diyolo'. Boros ka no di tongoondu' do hiri, “I Noumi kopio toi iri?” ka no diyolo'. 20 Om boros kad i Noumi, “Kada' oku no dokoyu roitai dot i Noumi. Roitan oku nopo dot i Mara, tu' pinologos do Kinorohingan, it Agayo Kuasa', do poimponu' do koinggoritan o koposi-posion ku. 21 Tontok di tuminongkiad oku i' do kinoiyonon diti om haro ngai' ku i', nga' baino' noddi om pinouli' oku'd Tuhan dot aiso' no o nunu-nunu ku. Iyo nopoddi, om kada' oku no dokoyu roitai dot i Noumi, tu' nohukuman oku nod Tuhan, it Agayo Kuasa', do koinggoritan dit a' ogina-gina',” ka dau. 22 Om iyo noddi o kinowoyo-woyoo' di Noumi do minuli' do mantad hilo'd Muab do miniwoyo' di Rut, i tondu' do Muab, i monongiwan dau. Om wagu po kotimpuun do mongomot do barli o hilo'd Baitlahim di nokorikot iyolo'd hilo'.
Minongomot i Rut do Hiri'd Tumo di Buas
1 I Noumi nopoddi nga' haro o koworisan do pongid di Alimilik, i sawo dau. Ngaran nopo di waris dau'ddi om i Buas, i tulun do kaya' om i pusohon kopio do tulun. 2 Insan tadau om boro-boros no i Rut dot id di Noumi, “Ina', mongoi oku daa pomuhu di barli do nangaratu' di tulun do mongomot do hilo'd koumaan, dot uhang nu no. Om oilaan ku do kosolowot oku id tulun di popologos doho' do momuhu di barli do nangaratu' di tongoulun do mongomot,” ka dau. Om boros kad i Noumi do suminimbar, “Ongoi nopo, oi oyo',” ka dau. 3 Om ongoi no i Rut do hiri'd koumaan. Om pimpuhu no iyau di barili di nangaratu' di tongoulun do mongomot. Om koontok no kopio do hiri iyau'd tumo di Buas.1|100|HK67E| Winangkasan do barli|2.3 4 Om a' po alaid om kohino no i Buas do mantad hilo'd Baitlahim. Om boro-boros no iyau do suminuwau di tongoulun di mongomot do hiri. “Tuhan no o moyo-woyo' dokoyu,” ka dau. “Tuhan no o mamarakat diya',” ka diyolo' do suminimbar. 5 Om ponguhot no i Buas di mandur di tulun, “Isai ilo tondu' do hoodi'?” ka dau. 6 Om boros ka di mandur do suminimbar, “Ilo' no i tondu' di bansa'd suwai'ddi di minoyo' di Noumi do mantad hilo'd Muab. 7 Minokibanar iyau doho' do sumusuhut dilo tulun do mongomot do momuhu di barli do nangaratu'. Om mantad poddi kosuabon iyau do mimpuhu, om noondo nogi' iyau ongoi intulungung do mundorong-dorong,” ka dau. 8 Om boros ka di Buas dot id di Rut, “Pokinongou pogi'. Kada' no ongoi pomuhu do barli dot id tumo do suwai ko' hiti. Momuhu nopo do muhut-suhut dilo tongoondu' do hiti; 9 om antangan nopo ot ongoyon diyolo' omoto', om sumusuhut nopo diyolo'. Nosunudan ku no ilo tongokusai dot a' mamagangau diya'. Om ondung tuuhan ko, om mongoi nopo anu di waig do hiri'd luping di nongosuangan diyolo'd waig,” ka dau. 10 Om otud no i Rut do hiri'd toguang di Buas. Om boro-boros no iyau di Buas, “Nokuro tu' opuhawang kopio ko dot id doho'? Tu' iyoho' nopo om sompogunan i', nga' osonong kopio ko i' dot id doho' om pusohon kopio oku diya'?” ka dau. 11 Om boros kad i Buas do suminimbar, “Norongou ngai' ku no i winonsoi nu dot id tiwanon nu do mantad di kapatai i sawo nu. Om nokoilo oku no do tinongkiadan nu o molohing nu om pomogunan nu, om minongoi ko'ddi sugku' di tulun do hiti, it a' mantad nu notutunan. 12 Tuhan no o monomuli' do koinsanai di kosonongo' nu. Om maha' daa om kaanu ko do kointirungan do mantad id Tuhan, i Kinorohingan dot Israil, tu' nokorikot ko no do mongoi pokiintirung dau,” ka dau. 13 Om boros kad i Rut, “Osonong ko no kopio dot id doho', oi Tuan. Noinsasamadan tomod o ginawo ku tu' osonong ko i' do minoro-boros doho' do mulong piya dot a' oku i' koiyo dot ongoiso' dilo susuhuon nu,” ka dau. 14 Om tontok di minakan do tangaadau, om boro-boros no i Buas di Rut. Boros ka dau, “Kaino mangakan do roti, om potobungon nopo do hilo'd waig dot oonsom ino roti nu,” ka dau. Om irikau no i Rut dot id rolot di minongomot do hiri om surungai no iyau di Buas do barli di ginowi. Om akan no i Rut do gisom do nayahan iyau nga' haro po o topod dau. 15 Om tontok di nakapamanau i Rut do guminuli' kawagu do minongoi pimpuhu di barli do nangaratu' om sunudai no di Buas i tongoulun do mongomot, boros ka dau, “Pologoson nopo iyau do mimpuhu di barli do hiri'd pogiolitan di nongowongkos do koongoi no iyau'd hiri. Kada' dokoyu iyau oduhai. 16 Om tomodon nopo do mongodong o piro-piro o guas di barli di songingwongkos om poilihon nopo om oongoi i' dau kotimung,” ka dau. 17 Om pintimung nopoddi i Rut di barli di nangaratu' do hiri'd tumo'ddi do gisom do nasadapan. Om potopuo' noddi dau i barli do manganu di tupu'. Om kaanu noddi dau i tupu' om oruhai no do hopod o kilogram do kogumuo'. 18 Om igitai no dau i barli di nopuhu-puhu dau do minuli' do hiri'd bandar. Om pokitono' no dau i tiwanon dau do kogumuo' di barli do notimung dau. Om pinatahak nogi' dau i noolu' di nakan dau di dangadau. 19 Om uhoto' no di Noumi iyau, “Hinonggo kopio o pinongonuan nu'dti? Disai'd tumo do nongoi nu? Maha' daa om barakatan do Kinorohingan i tulun di nosianan diya',” ka dau. Om poboroso' no di Rut do hiri'd tumo do songulun i roitan dot i Buas o pinomuhuan dau di barli. 20 Om boros ka di Noumi, “Oddo, om koobpinayan toko' i' moti' dit id somok po i Buas. Om iyau no ot id pogialatan di koobpinayan toko' dot id somok po dit apatut do monongkoilo dato,” ka dau. Om boros ka kawagu dau, “Atantu' no do barakatan do Tuhan i Buas. Tu' bayaanon kasai' id Tuhan o batos dau dot id tulun di poimpasi om id tulun piya di nangapatai no,” ka dau. 21 Om boros ka kawagu di Rut, “Kawagu no om sinuhu' oku po dau do momuhu di barli do moyo-woyo' di mongomot do hilo' do gisom dot aayi' o tomoton,” ka dau. 22 Om boros ka di Noumi do suminimbar di Rut, “Iyo nogiddi, oi oyo'. Osonong nogi' kopio do moyo' ko di tongoondu' di mongomot do hilo'd di Buas. Tu' ondung mongoi ko pongomot dot id tumo do tulun do suwai om gangahon ko i' dotindo di tongoulun do hiri,” ka dau. 23 Om ongoi noddi i Rut pomuhu di barli do hiri'd tumo di Buas. Om hiri kasai' nopo iyau do gisom do noomot ngai' i barli om i gandum. Om poinsugku' po i Rut di tiwanon dau.
Nakasawo i Rut
1 A' poddi alaid no do mantad diri om boro-boros no i Noumi dot id di Rut, “Oyo', a' tuu daa osonong do pogihuman ku iya' do koruhang om kisompiiyon ko indo do diya' kopio. 2 Sorohon no dot i Buas nopoddi, i nongoi dokoyu di tongoondu' pangamatai, om koobpinayan toko' i'. Pokinongou pogi'! Sosodopon nopod baino' om momogomos iyau di barli. 3 Om mongoi no podsu', om mamakai no do tumau dit owongi' kopio, om mananrasuk di rasuk nu dit olumis kopio. Om mongoi nogindo do hilo'd pamagamasan dau do barli, nga' kada' no intalang dot id dau dot a' po iyau kopongo do makan om minum. 4 Antangan no kopio o tiyonon dau do modop. Om koodop pondo iyau om ngoyon nogi' siibo' i kumut dau, om modop nondo do ponong id gakod dau. Om sunudan ko indo dau ondung nunu ot apatut nu'd wonsoyon,” ka dau. 5 Om boros kad i Rut, “Oo, tonudon ngai' ku i' ino boros nu, oi ina',” ka dau. 6 Om ongoi noddi i Rut do hiri'd pamagamasan do barli. Om wonsoyo' no dau o miagal di pinonuhuan di tiwanon dau. 7 Kopongo poddi i Buas do minakan om mininum, om osonong tomod diri o kopurimanan dau. Om ongoi no iyau odop do hiri'd pinotimungan di barli. Om pomirulan-rulan no i Rut do minongoi'd hiri. Om ngoyo' no dau siibo' i kumut di Buas om odop no iyau do hiri'd ponong id gakod di Buas. 8 Pitangatuong noddi om sigog iddi do koposik i Buas. Togiging no daa iyau nga' kotigowo nopo iyau do nokokito di tondu' do poillii do ponong hiri'd gakod dau. 9 “Isai ko?” kad Buas do minuhot. “I Rut oku, oi Tuan,” ka dau do suminimbar. “Iya' nopo om koobpinayan i' dahai dit id somok po, om iya' no ot apatut do monongkoilo doho'. Om kowinon oku nogi',” ka dau. 10 Om boros kad Buas do suminimbar, “Tuhan no o mamarakat diya', oi Rut. Iti nopo winonsoi nu'dti om popointalang no kopio do kolisihan dit agayo dot id sompiiyon tu' poillobi po kagayo ko' mantad di nowonsoi nu dot id tiwanon nu. Otopot nopo kopio om milo ko i' daa do mogihum do tangaanakwagu'd suwai, dot id pialatan di kaya' om i mosikin, nga' a' i' iyo'ddi o winonsoi nu. 11 Kada' katangkabo, oi Rut, tu' wonsoyon ngai' ku i' o koinsanai di pinokianu nu; tu' koilo ngai' no o tulun do hiti'd bandar dot osonong ko koondu'. 12 Otopot nogi' do tobpinai oku dokoyu dit id somok po, om it apatut do monongkoilo do koposi-posion nu, nga' haro po o tobpinai dokoyu dit id somok ko' iyoho'. 13 Nga' odop nopo do totuong diti. Om kosuabon pondo om ilaan nogi' ondung monongkoilo do koposi-posion nu i tulun diri ko' amu'. A' nopo, om sumumpa' oku no dot id Kinorohingan di poimpasi dot iyoho' no o monongkoilo do koposi-posion nu. Nga' odop nopo do hiti do gisom do kosuabon,” ka kawagu di Buas. 14 Om odop noddi i Rut do ponong hiri'd gakod di Buas. Nga' minsusuab noddi om tungag no iyau dit otuong-tuong po, om a' i' iyau okito'd tulun tu' mada' i' i Buas do haro o tongoiso' piya do tulun do koilo do minongoi i Rut do hiri'd kinoiyonon diri. 15 Om boros ka di Buas dot id di Rut, “Iduwo' ino kulabai nu om pawalado' do hiiti,” ka dau. Om iduwo' nod Rut i kulabai dau om pawalado' no. Om suangai nod Buas do barli i kulabai do haro i' doti' o duwo nohopod kilogram do kogumuo'. Om kakato' nod Buas i barli diri om pasaanai nod i Rut. Om ongoi noddi i Buas do hiri'd bandar. 16 Om soira'ddi nokorikot iyau do hiri'd walai om uhoto' no iyau di tiwanon dau, “Poingkukuro no, oi oyo'?” ka dau. Om susuyo' ngai' nopo di Rut i winonsoi di Buas dot id dau. 17 Om boros ka kawagu di Rut, “Boros ka di Buas om a' i' osonong do gumuli' ondung aiso' kopio ot igit-igitan. Om onuwai oku poddi dau diti barli,” ka dau. 18 Om boros kad i Noumi dot id di Rut, “Andadon nopo, oi Rut, do gisom dot okito nu o kootuson diti. A' i' bo i Buas mundorong dot a' po asalasai o hal diti do baino',” ka dau.
Kinawin di Buas i Rut
1 Om ongoi no i Buas irikau do hiri'd tiiyonon do mogiboro-boros, i hiri'd wawayaan dot agayo di bandar. Om talib no i tulun di noboros dau dot osomok po kopio o koobpinayan dot id di Alimilik. Om lohowo' no di Buas iyau. “Kaino pod hiti, oi tobpinai, mirikau-rikau po,” kad i Buas. Om ongoi no i tulun diri irikau'd hiri. 2 Om minomolohou nogi' i Buas do hopod o tulun do boyoon do tulun do hiri'd bandar diri do minongoi irikau'd hiri. Om koirikau poddi iyolo', 3 om boro-boros no i Buas dot id waris dau, “Nokoguli' no i Noumi do mantad hilo'd Muab om pobolion kaka'ddi dau i tana' di Alimilik, i koobpinayan to. 4 Osorou ku'ddi dot apatut id poiloon ko, tu' iyato goduwo no it apatut do monongkoilo do pasal diri. Om ondung bolion nu i tana'ddi om poboroson nopo do bolion nu do hiti'd toguang diti tongoulun do songirikau. Nga' ondung a' nu bolion, om poboroson nogi' kopio tu' iya' no ot id gulu dot apatut do pouhatan diri, om a' nu nopondo bolion om oila-ilaan ku nogi' iyoho',” ka dau. Om boros ka di tulun diri do suminimbar, “Bolion ku i',” ka dau. 5 Om boros ka kawagu di Buas, “Osonong no. Nga' ondung bolion nu i tana'ddi do mantad id di Noumi, om i Rut, i tondu' do nopuadan do mantad hilo'd Muab nga' aanu nu no. Om asanganu indo kasai' di sinakagon di napatai i tana'ddi,” ka. 6 Om boros kaddi di tulun diri, “Iyo nopoddi om a' oku no momoli di tana', maan nopo iya' bolio', tu' bolion ku piya iri nga' okon i' ko' i tangaanak ku o kotungkus. Maan nopo iya' bolio', a' oku no momoli'ddi,” ka dau. 7 Tontok nopo do maso'ddi, om koubasan nopo do popogirot do kapadagangan do dapu' ko' kopialanan do dapu' om oluson di padagang o tiso' do kasut dau om patahakon di tulun di momoli. Om miagal noddi o popogirot kopio do kapadagangan do dapu' do tumanud do koubasanan do tulun dot Israil. 8 Om kaa pogi'ddi do tontok di minomoros i tulun dot id di Buas dot, “Iya' no o momoli di tana'ddi,” ka, om iduwo' no dau o tiso' di kasut dau om patahako' no dot id di Buas. 9 Om boros ka di Buas dot id tongoboyoon om id koinsanai di tulun do hiri, “Iyokoyu ngai' no o sasi' ku do tadau'd baino' do noboli ku no do mantad id di Noumi o koinsanai di dapu' om tungkusan daa di Alimilik, om i Kilion om i Malon, i tangaanak di Alimilik. 10 Om i Rut nogi', i tondu' do Muab diri, i sawo daa di Malon, nga' nosiliu noddi do sawo ku. Om miagal nodti dot asanganu kasai' di sompiiyon di tulun do napatai i dapu' diyolo', om a' indo atanus o ngaran do sompiiyon dau dot id pogialatan di koobpinayan dau om i tulun do hiti'd bandar di tadon dau. Om iyokoyu no o sasi' diti do tadau'd baino',” ka dau. 11 Om boros ka ngai' di boyoon om i tulun do hiri, “Iyo noddi. Iyahai no o sumiliu'd sasi'. Om maha' daa do pousuyon do Tuhan di Rasil om i Lia i sawo nu, tu' minaganak dot ogumu' do bagi' di Yakub. Om maha' daa dot osiliu ko do tulun do kaya' dot id pogialatan di pinuruan do sompiiyon di Iprata, om abantug do hiti'd Baitlahim. 12 Maha' daa dot osiliu o sompiiyon nu do miagal di sompiiyon di Piris, i tanak diyo Yohuda di Tamar, dot i tangaanak do patahakon do Tuhan dot id diya' do mantad id tondu'dti o poposiliu do miagal diri,” ka diyolo'.
I Buas om i Sinakagon Dau
13 Om potonudo' noddi di Buas i Rut do minuli' tu' nosiliu noddi iyau do sawo dau. Om barakatai nod Tuhan i Rut, om ponontian no iyau. Om kosusu no iyau do tanak do kusai. 14 Om boros kaddi di tongoondu' dot id di Noumi, “Royohon no o Tuhan! Tu' noonuan ko noddi dau do tanak do kusai, do monongodu' diya' do tadau'd baino', do momogompi' diya'. Maha' daa om abantug iti tanak diti do hiti'd Israil! 15 Osianan i' kopio diya' i monongiwan diya', tu' agayo nogi' kopio o dau do winonsoi dot id diya' ko' mantad di wonsoyon do turu' o tanak do kusai. Tu' noonuan ko no dau do tanak do kusai do monongodu' diya', i popotood do ginawo nu om i momogompi' diya' do molohing ko,” ka. 16 Om kibito' no di Noumi i tanak diri, om pitamangai no dau do mikuwo'd osianan kopio iyau do miagal po do dau kopio'd tanak. 17 Om pungaranai no di tongoondu' do hiri'd songkoduwo i tanak diri dot i Obid. “Kianak noddi do kusai i Noumi,” ka diyolo'. I Obid nopo om tapa' di Isai, om i Isai no om tapa' di Daud. 18-22 Iti no o sinakagon di Piris do gisom do nokorikot dot id di Daud: i Piris, i Hisron, i Ram, i Aminadab, i Nahason, i Salmon, i Buas, i Obid, i Isai om i Daud.
Hilo'd Silo i Ilkana om i Sompiiyon Dau
1 Di nopo di gulu po, om haro o songulun o kusai do mantad id payat dot Ipraim, do poingiyon do hilo'd bandar do Rama, i hilo'd watas do konulu-nuluan dot Ipraim. Ngaran nopo di kusai om i Ilkana. I Ilkana nopoddi om tanak di Yoruham, om manangaki di Ilihu. Iyau nopo om poinghompit di sompiiyon di Tohu, i sompiiyon do mantad id pinuruan do sompiiyon di Sup. 2 I Ilkana nopoddi nga' duwo o sawo, i Hana om i Ponina. I Ponina nopo om kitanak i', nga' i Hana noo om aiso' o tanak. 3 Pointikid-tikid do toun om tumongkiad kasai' nopo i Ilkana do hilo'd Rama do mongoi sambayang do hilo'd Silo, om mongoi papatahak do porsombahan di sumbolion dot id Tuhan, it Agayo Kuasa'. Imam nopo do mogobi-obi'd Tuhan do hilo'd Silo om i Hopni om i Pinihas, i tangaanak di Ili. 4 Pointikid-tikid do mongoi i Ilkana patahak do porsombahan di sumbolion, om onuan kasai' nopo dau do bahagi' di daging di sinumbali' i Ponina, om tikidan ngai' nogi' dau di daging do sinumbali' i tangaanak dau. 5 Nga' mulong piya do kosianan kopio daa dau i Hana, nga' sambahagi' noo o patahakon dau tu' i Hana nopo om a' i' do Tuhan nonuan do tanak. 6 Om asaru' nopoddi i Ponina i tapid di Hana diri, do pokoruol do ginawo om monori-tori' di Hana, tu' i Hana nopo om a' i' do Tuhan nonuan do tanak. 7 Om iyo kasai' nopoddi do monikid toun. Pointikid-tikid do mongoi iyolo' do hiri'd Walai'd Tuhan om pokoruol kasai' nopo i Ponina do ginawo di Hana, gisom do mihad nopoddi i Hana, om a' makan. 8 Om uhoton kasai' nopondo di Ilkana i Hana, i sawo dau'ddi do poingkaa, “Hana, nokuro tu' mihad ko? Nokuro tu' a' ko makan? Nokuro tu' tumongob ko nopo? Okon toi ko' oupus ko no doho' ko' mantad do hopod o tanak do kusai?” ka dau.
I Hana om i Ili
9-10 Insan tadau, di nakaakan no iyolo' do hiri'd walai'd Tuhan do hilo'd Silo, om ingkakat no i Hana. Om tontok nopoddi nga' poirikau i Ili, it Imam diri, do hiri'd tirikohonon dau dit id toning di wawayaan. Om maso nopoddi nga' tumongob tomod i Hana, om sumambayang iyau dot id Tuhan do mikuwo'd mihad-ihad tomod. 11 Om poboroso' noddi di Hana o batos dau do poingkaa, “Oi Tuhan, it Agayo Kuasa', ontong no doho', i susuhuon nu. Antangai no iti koinggoritan ku. Soroho' oku no, om kada' oku kopio lihuwai. Ondung onuan oku daa diya' dot iso' o tanak do kusai om mamatos oku no do papatahak dau dot id diya' do solinaid dau'd poimpasi. Om tobuk piya dau nga' a' ku i' pampadan,” ka dau. 12 Om alaid tomod i Hana do sumambayang dot id Tuhan, om poinsonsod diri i Ili do munung di Hana. 13 Nga' id suang nod ginawo di Hana o sumambayang, om munung no dau o mopi-kopi, om a' i' orongou o boros dau. Om ondos daa'ddi di Ili do naawuk i Hana. 14 Om boros kad i Ili dot id di Hana, “Kada' pagawuk do hiti! Kada' nondo ongoi kawagu ponginum do waig dot anggur!” ka dau. 15 Nga' boros ka di Hana do suminimbar, “A' oku i' aawuk, oi Tuan. A' oku i' minoginum do tinumon do kaawuk. Nga' tumongob tomod oku'dti, om maso ku do sumambayang do popoboros ngai' do kosusaan ku dot id Tuhan. 16 Kada' oku tondoso' do tondu' dit a' osonong. Tu' iyo oku pogidti do sumambayang nga' tumongob tomod oku,” ka dau. 17 Om boros kaddi di Ili, “Ondung iyo'ddi, om kumosonong-sonong no! Maha' daa om pohubayaan do Kinorohingan dot Israil i pinokianu nu,” ka dau. 18 Om boros kaddi di Hana, “Maha' daa om kohubayaan oku diya', oi Tuan,” ka dau. Om poguliai noddi dau, om ongoi no akan, om a' noddi iyau tumongob.
Nosusu i Somuil om Pinatahak Iyau dot id Tuhan
19 Kosuabon noddi om suab no i Ilkana om i sompiiyon dau do tuminungag. Om kasambayang poddi iyolo' dot id Tuhan om uli' no iyolo' do hilo'd Rama. Om ongoi no i Ilkana dudun di Hana, i sawo dau'ddi, om simbaro' nod Tuhan i sambayang di Hana. 20 Om ponontian no i Hana om kosusu no iyau'd tanak do kusai. Om pungaranai no dau dot i Somuil tu' boros ka dau, “Pinokianu ku iyau do mantad id Tuhan,” ka. 21 Om korikot noddi kawagu i maso do kaangayan di Ilkana om i sompiiyon dau do hilo'd Silo, do mongoi papatahak do porsombahan di sumbolion, i patahakon dot id Tuhan do monikid toun. Om suwai no ko' iri om nakapamatos no i Ilkana do papatahak do porsombahan di pinotobilang. 22 Nga' tontok nopoddi om a' i' i Hana minoyo'. Tu' boros ka di Hana dot id sawo dau, “Kotingkod pod sumusu i Somuil om pootodon ku nogindo iyau do hilo'd Walai'd Tuhan, om hilo' nondo iyau'd poingiyon do solinaid dau do poimpasi,” ka dau. 23 Om boros ka di Ilkana do suminimbar, “Oo, poingkuro nopo ot osonong dot osorou nu om wonsoyon nopo. Hiti ko nopod walai do gisom pod kotingkod do sumusu ilo tanak to. Om maha' daa om pohubayaan do Tuhan i pinabatos nu,” ka dau. Om pitamangai noddi di Hana i tanak do hiri'd walai do gisom do nokotingkod i tanak do sumusu. 24 Om kotingkod poddi do sumusu i Somuil om pootodo' noddi iyau di Hana do hilo'd Walai'd Tuhan di hilo'd Silo do mulong piya dot okoro' po daa i Somuil. Om minigit po i Hana dot iso' o sapi' do tontoluhan, di tolu nogi' o toun do tumur, om minigit iyau do gandum do hopod o kilogram, om sangkantung do kulit o waig dot anggur. 25 Om kosumbali' poddi diyolo' i sapi' om pootodo' nogiddi diyolo' i Somuil dot id di Ili. 26 Om boros kaddi di Hana dot id di Ili, “Haro daa o poboroson ku diya', oi Tuan. Osorou oku i' diya'? Iyoho' no i tondu' di nokito nu do poingkakat do hiti do sumambayang dot id Tuhan di gulu poddi. 27 Iti no i tanak do pinokianu ku dot id Tuhan, om nosimbar kopio i' do Tuhan i pinokianu ku. 28 Om iri no o kapatahakan ku diti tanak dot id Tuhan, do sumiliu'd don Tuhan do songonuon do solinaid dau do poimpasi,” ka dau. Om ongoi nogiddi iyolo' sambayang dot id Tuhan.
Sambayang di Hana
1 Om sambayang no i Hana do poingkaa, “Pinonu' do Tuhan do kataadan o ginawo ku, popotood do ginawo ku i winonsoi dau, irak-irakan ku i pisangod ku, ooropod oku no kopio tu' nuhupan oku i' do Kinorohingan. 2 Aiso' no o miagal do Tuhan kolidang, om aiso' no o koiyo dau, aiso' no o pogintirungan do koiyo do Kinorohingan toko'. 3 Tingkod kou do mimboros do minggayo-gayo, pupusai ino boros nu do mokirayou-rayou, tu' Tuhan nopo om Kinorohingan i' di koilo, om butusan i' dau o koinsanai'd wonsoyon do tulun. 4 Notipu' no i pana' do soudor do gunsiou, nga' kumoris no i tulun dit oluhoi. 5 Iri nopo tulun di nangayahan di gulu po, om gumadsi' noddi do mogihum do kaakan-akanan, nga' iri no tulun di louson di gulu po om a' noddi louson. Iri nopo sawo dit a' maganak om kianak noddi do turu', nga' iri no tina' dit ogumu' o tanak om notongkiadan noddi. 6 Tuhan no i mamatai om i mamasi, pokoyoon dau o tulun do hilo'd kinoiyonon di tulun do napatai, om posoliwanon no kawagu dau iyolo' do mantad hilo'. 7 Haro i' o tulun do porutumon dau, om haro nogi' i pakayaon dau. Haro i' o tulun do poinsiribaon dau, om haro nogi' i poinsawaton dau. 8 Kakaton dau i tulun do mosikin do mantad id pupuk, poiduwon dau i tulun do kikokurangan do mantad id koinggoritan. Poomboluton dau iyolo' di tangaanak do raja', om onuan dau iyolo' do karaja' dit asawat. Tuhan no o sanganu do pinoimpahan diti tana', om hiri no o pinawansayan dau diti pomogunan. 9 Intirungan dau o tulun dau dit ongotorodok, nga' atagak i' dot id totuong i tulun dot araat. A' i' milo'd manahak do kamanangan o kinoris do tulun. 10 Angapatai nondo o pisangod do Tuhan, ongorod nopondo iyau do sumaap diyolo' do mantad hilo'd tawan. Butusan nondod Tuhan o pointongkop diti pomogunan, onuan nondo dau do kuasa' i raja' di nopili' dau, pamanangon nondo dau i raja' di nopili' dau,” ka dau. 11 Om uli' noddi i Ilkana om i sompiiyon dau do hilo'd walai dau do hilo'd Rama, nga' i Somuil nopo, i tanak dau'ddi, om minundorong no do hilo'd Silo do momonsoi do karaja'd Tuhan do moyo-woyo' di Ili it Imam, i monuduk dau.
I Tangaanak di Ili
12 Iri nopo tangaanak di Ili do tongokusai nga' angaraat kopio. Om a' iyolo' mamadul do Tuhan. 13 Om a' iyolo' tumanud dit oturan do momonsoi do karaja' di don imam, dot id tulun dot Israil. Tu' soira' nopod haro o tulun do papatahak do porsombahan di sumbolion, om rumikot no i susuhuon dit imam do kiinigit do totodok do tolu sarapang. Om tontok dit onsokon nogi' i daging, 14 om mongoi no iyau pintodsok do hiri'd kuali' di pagansakan di daging, om nunu nopo it otodok dau om onuon no dau do maan do don imam. Om iyo ngai' nopoddi o wonsoyon diyolo' dot id koinsanai'd tulun dot Israil di mongoi patahak do porsombahan di sumbolion do hilo'd Silo. 15 Om kawagu po kanogi' nga' koumbal i' do tontok dit a' po kotobilang i lunok di sinumbali' do maan sorobo', om moro-boros no i susuhuon dit imam dot id tulun di papatahak di porsombahan di sumbolion do poingkaa, “Onuwai oku daa dino daging dit a' po nalasu', do maan dit imam do luguon. Tu' mada' no iyau di daging di nalasu',” ka. 16 Ondung sumimbar daa i tulun dot, “Osonong nogid tonudon to it oturan, om sorobon po lo lunok, om koino-ino ko nogi' do manganu do nunu nopo o korohian nu,” ka, om moro-boros no i susuhuon dit imam dot, “Amu', onuwai oku nod dinondo. Tu' a' nopo moti', om ahawan ku nopo iya'!” ka. 17 Iri nopo dusa di duwo o tanak di Ili diri nga' awagat no kopio dot id pagantangan do Tuhan tu' a' iyolo' minamadul di porsombahan di sumbolion do patahakon dot id Tuhan.
Hilo'd Silo i Somuil
18 Om daamot nopoddi nga' maso no di Somuil, i tanak di Hana diri, do momonsoi'd karaja' do Tuhan. Om kirasuk iyau do kain linan do miagal di papakayon dot imam do tontok do sumambayang. 19 Pointikid-tikid do toun om wansayan kasai' nopo di tina' di Somuil i Somuil do rasuk dit okooro'. Om ngoyon nondo dau pootodo' dot id di Somuil i rasuk diri do tontok di moyo' iyau di sawo dau do mongoi papatahak di porsombahan di sumbolion do patahakon do monikid toun. 20 Om barakatan nondo di Ili i Ilkana om i sawo di Ilkana, om boros kando dau dot id di Ilkana, “Maha' daa om onuan ko kawagu'd Tuhan do tangaanak do mantad id sawo nu'dti do poningolon di tanak di pinatahak nu dot id Tuhan,” ka. Om muli' nondo iyolo' do hilo'd Rama. 21 Om binarakatan i' kopio do Tuhan i Hana gisom do kianak po kawagu iyau do tolu o kusai om duwo o tondu'. Om mayo-gayo nopoddi i Somuil, om maso i' kasai' dau do momonsoi do karaja'd Tuhan.
I Ili om i Tangaanak Dau
22 Om molohing noddi kopio i Ili. Om mongou-rongou kasai' nopo iyau do kowoyo-woyoon di tangaanak dau dot id tulun dot Israil. Om oilaan i' di Ili do mongoi iyolo' dudun di tongoondu' di pakaraja' do hiri'd wawayaan di Kiim do Tuhan. 23 Om boros kaddi di Ili dot id tangaanak dau, “Nokuro tu' momonsoi kou do miagal diri? Momisunud ngai' nopo o tulun doho' di kowoyo-woyoon dokoyu dot araat. 24 Kada' kou no ubas-ubas do miagal diri, oi tangaanak ku! Tu' araat no kopio i popimboroson do tulun di songonuon do Tuhan do pasal dokoyu! 25 Ondung kopomonsoi'd dusa o tulun dot id sompi' ko' tulun, om milo i' o Kinorohingan do mogobi' dau. Nga' ondung kopomonsoi'd dusa o tulun dot id Tuhan om isai poo o milo do monulung dau?” ka dau. Nga' a' i' iyolo' minamadul di boros di Ili, i tapa' diyolo'ddi, tu' natantu' mantad nod Tuhan do patayon dau iyolo'. 26 Nga' i Somuil nopo, i tanak diri, om mayo-gayo nopoddi, om kasanangan iyau'd Tuhan om kasanangan do koinsanai'd tulun.
I Pinoboros dot Osiliu dot id Sompiiyon di Ili dot id Dabantalan
27 Insan tadau, om rikot no o nabi do boros do Tuhan dot id di Ili do pinopoboros do boros do Tuhan dot id dau, do poingkaa, “Di nopo maso pod i Harun, i taki-aki nu'ddi om i sompiiyon dau do turipon di raja' do Masir, om intalang oku no dot id di Harun. 28 Om id pogialatan nopo do toinsanan di payat dot Israil om sompiiyon no di Harun o pinili' ku do sumiliu'd imam di mogobi-obi' doho', do maganu-anu do hiri'd pananaraban do porsombahan, om modtutud do kominyan, om manampakai dit ipod do tontok do moro-boros doho'. Om nonuan ku iyolo' do kuasa' do manganu do sombahagian do mantad id porsombahan di sorobon do hiri'd pananaraban do porsombahan. 29 Nga' nokuro tu' tamaha' ko do kokito di porsombahan di sumbolion om i porsombahan di patahakon di tulun ku dot id doho'? Nokuro tu' pusohon nu nogi' kopio i tangaanak nu mantad ko' iyoho'? Nokuro tu pinologos nu iyolo' do polombon do tinan diyolo' dot i bohogian dit osonong kopio do mantad id porsombahan di tulun ku dot id doho' o maan do pomolombon? 30 Iyoho' no i Tuhan, i Kinorohingan dot Israil, o minamatos dot id diyolo' di gulu po do sompiiyon nu no om pinuruan do sompiiyon nu o sumiliu'd imam do momonsoi'd karaja' ku do gisom dot alaid. Nga' baino' nopoddi om a' ku no wonsoyon o miagal diri! Tu' iri nopo momusou doho' om pusohon ku i', nga' iri no i mongintingayam doho' om intingayamon ku no. 31 Pokinongou no, tu' rumikot moti'ndo o maso do patayon ku o koinsanai di tangaanakwagu dot id suang do sompiiyon nu om id suang do pinuruan do sompiiyon nu, gisom dot aiso' no o kolohing do tongokusai dot id suang do sompiiyon nu. 32 Tumongob ko nondo om osolon di tulun dot Israil do suwai tu' kokito ko do koinsanai di barakat do patahakon ku diyolo'; nga' id suang nopod sompiiyon nu iya' om aiso' i' ot anaru-naru o tumur. 33 Nga' posion ku indo o songulun do mantad id sinakagon nu, om iyau nondo o sumiliu'd imam di mogobi-obi' doho'. Nga' obolou i' mando o mato dau om kakaus o ginawo dau. Nga' apatai ngai' no i sinakagon nu'd suwai. 34 Soira' pod opiandad dot apatai i duwo tanak nu, i Hopni om i Pinihas, om opurimanan nu nogindo dot abayaan kopio i pinoboros ku'ddi. 35 Om momili' oku nondo dot imam dit otorodok dot id doho', om i momonsoi do koinsanai di ponuhuan ku. Om onuan ku iyau do sinakagon di momonsoi kasai' do karaja' di dong imam dot id toguang di piro-piro o raja' do pilion ku. 36 Om isai nopondo o sinakagon nu di poimpasi, om mongoi pondo solowot dit imam diri do mokianu'd tusin om taakanon, om momilugu-lugut do mokibanar do muhup dit imam do suwai do maganu-anu. Tu' miagal poddi o koonu-onuan diyolo'd kaakan-akanan,” ka dau.
Minintalang o Tuhan dot id di Somuil
1 Tontok nopoddi om maso po di Somuil, i tanak poddi, do momonsoi do karaja'd Tuhan do tumanud dit ituduk di Ili. Om maso nopoddi nga' ingkuri' no do haro o boros do Tuhan om i pointalangon do mantad id Tuhan. 2 Insan tuong, om koodop i Ili do hiri'd bilik dau, om oruhai nod obolou o mato dau tu' molohing no kopio. 3 Om i Somuil no om koodop do hiri'd Kiim dot Olidang. Om maha' dit a' po numawau, di poingapui po i lampung, 4 om lohowo' nod Tuhan i Somuil dot, “Somuil! Somuil!” ka. Om simbar no i Somuil, “Hoi, nunu'ri oi Aki,” ka dau. 5 Om panangkus no iyau do minongoi'd hiri'd di Ili. Om boro-boros nod, “Linohou oku diya', oi Aki? Hati oku no,” ka dau. Nga' boros ka di Ili, “Amu', a' oku i' minomolohou diya'. Ongoi odop,” ka dau. Om ongoi no kawagu i Somuil odop. 6-7 Om lohowo' po kawagu'd Tuhan i Somuil. Nga' a' i' di Somuil oilaan do Tuhan o minomolohou dau, tu' a' po o Tuhan insan koboro-boros dau. Om tungag po kawagu iyau om ongoi nod hiri'd di Ili, om boro-boros nod, “Linohou oku diya', oi Aki? Hati oku no,” ka dau. Nga' boros kad i Ili, “Amu', a' oku i' minomolohou diya', oi ondu'. Ongoi kawagu odop,” ka dau. 8 Om lohowo' po kawagu'd Tuhan i Somuil do kointolu. Om tungag no i Somuil om ongoi nod hiri'd di Ili. Om boro-boros nod, “Linohou oku diya', oi Aki? Hati oku no,” ka dau. Om koilaai nogiddi di Ili do Tuhan i' o minomolohou di tanak. 9 Om iri noddi o kinapamarasan dau dot id di Somuil dot, “Ongoi kawagu odop. Om ondung lohowon ko kawagu om sumimbar nod, ‘Boro-boros nopo, oi Tuhan. Tu' mokinongou i' iti susuhuon nu,’ kanto,” ka dau. Om ongoi no kawagu i Somuil odop. 10 Om rikot no o Tuhan, om ongoi no ingkakat do hiri'd kinoiyonon diri, om pomolohou no kawagu, “Somuil! Somuil!” ka. Om boros kad i Somuil do suminimbar, “Boro-boros nopo, oi Tuhan. Tu' mokinongou i' iti susuhuon nu,” ka. 11 Om boros kaddi do Tuhan dot id dau, “Haro o wonsoyon ku di koronob kopio dot id tulun dot Israil do koimbagu, gisom dot oborulong ngai' nopo o tulun di korongou. 12 Om tontok noddi do porikoton ngai' ku dot id di Ili i kosusaan di nokoboros ku do rumikot dot id sompiiyon dau, do mantad do koimpuunon om gisom do kopupuson. 13 Nosunudan ku no iyau do hukuman ku i sompiiyon dau do gisom dot alaid tu' minongindaraat i' doho' i tangaanak dau. Om oilaan i' di Ili i wonsoyon diyolo' nga' a' i' dau iyolo' noduhan. 14 Om iri no o nokosumpaan ku dot id sompiiyon di Ili dot aiso' no o porsombahan di sumbolion ko' porsombahan do nunu nopo do koidu' diti dusa dot awagat kopio,” ka dau. 15 Om odop no kawagu i Somuil do hiri'd toodopon dau do gisom do kosuabon. Om tungag no iyau di kosuabon om ngoyo' ngai' no dau iwangai i wawayaan di Walai'd Tuhan. Om ooris daa'ddi iyau do momisunud di Ili di nokointalang dot id dau, 16 nga' lohowo' no iyau di Ili, “Oi Somuil, i tanak ku,” ka. “Nunu, oi Aki?” kad Somuil. 17 Om uhoto' no iyau di Ili, “Nunu kad boros do Tuhan dot id diya'? Kada' nod haro lisok-lisokon do posunud doho', posunudon ngai' nopo. Tu' hukuman ko moti'd Tuhan dot a' nu no posunudon ngai' doho' i pinoboros dau,” ka di Ili. 18 Om susuyo' ngai' nopoddi di Somuil iri dot id di Ili. Iso' po nga' aiso' no o linisok-lisok dau. Om boros kaddi di Ili, “Iyau no o Tuhan, om wonsoyon nopo dau it osonong dot osorou dau,” ka dau. 19 Om mayo-gayo nopoddi i Somuil. Om woyoon kasai' nopo iyau do Tuhan om binayaan ngai' dau i pinoboros di Somuil. 20 Om koilo ngai' nopoddi o tulun do pointongkop dot Israil do nabi kopio do Tuhan i Somuil. 21 Om minintalang po kawagu o Tuhan do hilo'd Silo, i kinoiyonon dit intalang i' iyau dot id di Somuil dit insan i', om minoro-boros iyau dau. Om soira' nopod moro-boros i Somuil, om mokinongou ngai' nopo i tulun dot Israil.
Naahau do Tulun do Pilistin i Kaban do Tumpongo
1 Tontok nopoddi om timungo' ngai' no di tulun do Pilistin i soudor diyolo' do mongoi panangod do tulun dot Israil. Om iri no o kinapamanahan di soudor dot Israil do mongoi sangod; om pomukiim no iyolo' do hilo'd somok dot Ibin Haisor, om iri no soudor do Pilistin om minomukiim do hilo'd Apik. 2 Om songodo' no di soudor do Pilistin i soudor dot Israil, om maha' di notingkod i pinisangadan dit adalaan kopio om naala'ddi i soudor dot Israil. Om haro i' doti' ot apat noribu o soudor dot Israil do napatai do hiri'd pinisangadan diyolo'. 3 Om soira'ddi nokoguli' do hiri'd kokiiman i soudor dit a' napatai, om boros ka di boyoon do tulun dot Israil, “Nokuro tu' pinologos toko'd Tuhan do naala' di tulun do Pilistin do baino'? Ngoyo' toko' nogi' igitai'd hiti i Kaban do Tumpongo'd Tuhan di hilo'd Silo, om woyoon toko' indo do Tuhan om poiduwon toko' dau do mantad id pisangod toko',” ka diyolo'. 4 Om ponuhu' noddi iyolo'd piro-piro o tulun do minongoi'd hilo'd Silo do mongongoi di Kaban do Tumpongo'd Tuhan, iyau it Agayo o Kuasa', i poirikau do hiri'd sakai di moloikat di roitan do kerub. Om tonudo' noddi di Hopni om i Pinihas i tangaanak di Ili diri, i Kaban do Tumpongo. 5 Om soira'ddi nokorikot i Kaban do Tumpongo do hiri'd kokiiman om insan-insan nopo do minamangkis i tulun dot Israil dot opuhod kopio do gisom do nokogogor i tana'. 6 Om soira'ddi norongou di tulun do Pilistin i pinongkisan di tulun dot Israil diri, om boros ka diyolo', “Nokuro tu' sampangkis-pangkis ilo tulun dot Ibrani?” ka. Nga' soira'ddi noilaan diyolo' do nokorikot i Kaban do Tumpongo'd Tuhan do hiri'd kokiiman dot Ibrani, 7 om kongooris noddi iyolo'. Boros ka no diyolo', “Haro moti' o kinorohingan do nokorikot do hilo'd kokiiman diyolo'! Obungou toko' nodti! A' toko' po insan koumbal do miagal diti. 8 Obungou toko' no! Isai po daa o milo'd mamasi dati' do mantad id kinorohingan dit ongokoris diri? Okon toi ko' iri nogi' i kinorohingan diri o minamatai di tulun do Masir do hilo'd tana' do kowotuan di gulu po? 9 Nga' pokorison no o ginawo, oi tulun do Pilistin! Sumangod kou no do miagal do kusai. Tu' ondung amu' nga' osiliu toko' no do turipon dilo tulun dot Ibrani, do miagal di nosiliu iyolo'd turipon toko' di gulu. Nga' sumangod kou no do miagal do kusai!” ka. 10 Om ponotos noddi do suminangod i soudor do Pilistin om kaala' no diyolo' i soudor dot Israil. Om sompori-pori nopoddi i soudor dot Israil do minuli' do hiri'd kiim diyolo'. Om nadalaan no kopio iyolo' do naala', tu' tolu nopo nohopod noribu o soudor dot Israil do napatai. 11 Om iri i Kaban do Tumpongo do Kinorohingan nga' natanggayan no di pisangod. Om iri nogi' i duwo o tanak di Ili, iyo Hopni om i Pinihas, nga' napatai nogi'.
Kinapatayon di Ili
12 Om panangkus nod minongoi do hilo'd Silo o songulun do mantad hiri'd pinisangadan. Iyau nopo nga' mantad id payat do Binyamin. Om tadau iddi do nokorikot iyau do hilo'd Silo. Om pinghurako' no dau o rasuk dau om arabai no dau'd tana' o tulu dau do popointalang do tumongob iyau. 13 Om i Ili nopo nga' poirikau do hiri'd tirikohonon dau do hiri'd tisan do ralan, om aiso' i' o komi dau tu' mondom-hondom po iyau di Kaban do Tumpongo'd Tuhan. Om potongkopo' noddi di tulun diri do hiri'd bandar o habar do naala' ot Israil. Om oinsanan nopoddi i tulun do hiri do minihad tu' ongooris no kopio iyolo'. 14 Om korongou no di Ili i tihad. Om ponguhot noddi iyau, “Nunu kopio ilo kagangahan dilo'?” ka. Om osiau nopo i tulun diri do minongoi solowot di Ili do mongoi posunud di habar dot araat. 15 Tontok nopoddi nga' siam no nohopod om walu' o tumur di Ili om mato dau nga' oruhai no dot a' kokito. 16 Om boros ka di tulun diri dot id di Ili, “Minogidu' oku do mantad hilo'd pisangadan baino', om koririkot ku'dti,” ka dau. Om uhoto' noddi di Ili iyau, “Poingkuro no habar, oi ondu'?” ka dau. 17 Om boros ka di tulun di pinoporomut di habar do suminimbar, “Minogidu' i tulun dot Israil do mantad id tulun do Pilistin; om ogumu' tomod o napatai! Om i duwo o tanak nu'ddi, i Hopni om i Pinihas nga' napatai nogi'. Om iri Kaban do Tumpongo'd Kinorohingan nga' natanggayan nod pisangod!” ka dau. 18 Om soira'ddi noroitan di tulun i Kaban do Tumpongo, om koliad no i Ili do mantad hiri'd timpohon dau do hiri'd toning di wawayaan dot agayo. Om kotipu' no o liou dau di noliad iyau, tu' molohing no iyau om olombon po. Om diri noddi do napatai i Ili. Om i Ili no i nosiliu'd boyoon di tulun dot Israil do solinaid dot apat nohopod o toun.
Kinapatayon di Sawo di Pinihas
19 Iri nopo monongiwan di Ili do tondu', i sawo di Pinihas, om borosusuon no. Om soira'ddi nokorongou iyau do naahau i Kaban do Tumpongo'd Kinorohingan, om napatai i tiwanon om i sawo dau, om sigog nopoddi do korualai iyau'd tian, om a' no alaid om kosusu no iyau. 20 Om tontok dit oruhai no iyau dot apatai om boros ka di tongoondu' di migagu dau, “Kada' kooris! Tu' kusai o tanak nu,” ka. Nga' a' no dau pinusou i boros diyolo' om a' iyau suminimbar. 21 Om pungaranai no dau i tanak diri dot i Ikabod, tu' boros ka dau om, “Nokotongkiad nod mantad id Israil o kagayaan do Kinorohingan,” ka. Minomoros pogi' iyau do miagal diri nga' naahau no i Kaban do Tumpongo om napatai i tiwanon dau'd kusai om i sawo dau. 22 Om boros ka kawagu dau, “Nokotongkiad nod mantad id Israil i kagayaan do Kinorohingan tu' natanggayan nod pisangod i Kaban do Tumpongo'd Kinorohingan,” ka dau.
Hiri'd Pogialatan do Tulun do Pilistin i Kaban do Tumpongo
1 Soira'ddi naahau di tulun do Pilistin i Kaban do Tumpongo'd Kinorohingan, om igitai no diyolo' iri do mantad hilo'd Ibin Haisor do kuminaa do hilo'd bandar dot Asdod, i bandar diyolo'. 2 Om posuango' no diyolo' i Kaban diri do hiri'd walai di Dagon, i tingolig diyolo'. Om poiliho' no diyolo' iri do hiri'd toning di tingolig diyolo'. 3 Nga' kosuabon noddi om kokito no di tulun do hiri'd bandar dot Asdod do pointungub do hiri'd tana' i Dagon, i tingolig diyolo', dot id toguang di Kaban do Tumpongo'd Tuhan. Om tungago' no diyolo' i tingolig om potondulio' no do hiri'd pinoiyanan mantad. 4 Nga' kosuabon noddi kawagu om kokito no diyolo' i Dagon, i tingolig diri, do naratu' kawagu do hiri'd toguang di Kaban do Tumpongo. Nga' tontok nopoddi om nopungol i tulu om i duwo longon di tingolig om hiri'd doulakan kopio di wawayaan o kinoilihon. Om iri po tinan di tingolig o noolu'. 5 (Iri no ot a' dit imam di mogobi-obi' do Dagon om koinsanai di tulun do sumuang di walai di Dagon koina-inaan do mulok do hiri'd doulakan kopio di wawayaan di walai'd Dagon do gisom do baino'; laangan kasai' nopo diyolo' o hiri.) 6 Om awagat tomod diri o pinomohukum do Tuhan di tulun do hiri'd Asdod om i tulun do hiri'd posorili'. Pinomohukum nopo dau diyolo' nga' gandas dot id tinan diyolo'. 7 Soira' di nokito diyolo' do miagal diri o nosiliu, om boros ka diyolo', “Hinukuman toko' di Kinorohingan dot Israil, om i Dagon, i tingolig toko' nga' hinukuman nogi' dau. A' toko' no milo'd poloidon do hiti i Kaban do Tumpongo,” ka. 8 Om suhuo' no diyolo' o piro-piro tulun do minongoi pomolohou di limo o raja' do Pilistin. Om lohowo' ngai' no diyolo' i raja', “Kukuroyon toko' no ma ilo Kaban do Tumpongo'd Kinorohingan do tulun dot Israil,” ka. Om boros ka di raja' do suminimbar, “Pokoyoon do hilo'd bandar do Gat,” ka diyolo'. Om powoliho' no diyolo' i Kaban do Tumpongo'd Kinorohingan dot Israil do hilo'd Gat, i bandar do Pilistin do suwai. 9 Nga' maha' di nokorikot i Kaban do hilo' om hukumai nod Tuhan i bandar diri, gisom dot agangau poddi ngai' i tulun do hiri. Tu' hinukuman do Tuhan do gandas i tulun dot id bandar diri, dot i tongomulok po om iri nogi' i molohing no. 10 Om iri no o kinapaatadan diyolo' di Kaban do Tumpongo'ddi do hilo'd Ikron, it iso' kawagu o bandar do Pilistin. Nga' tontok di nokorikot i Kaban diri do hilo' om pinggiak ngai' no i tulun do hilo' dot, “Nigitan diyolo'd hiti ilo Kaban do Tumpongo'd Kinorohingan do tulun dot Israil do maan do pamatai dati'!” ka diyolo'. 11 Om lohowo' noddi diyolo' do tumimung o koinsanai di raja' do tulun do Pilistin, om boro-boros no iyolo'd, “Pogulion nogi' ilo Kaban do Tumpongo'd Kinorohingan do tulun dot Israil do hilo'd tadon mantad dilo' om a' i' kapamatai dati' om iti sompiiyon toko',” ka. Om agangau ngai' poddi i tulun do hiri'd bandar diri tu' awagat no kopio o pinomohukum do Kinorohingan dot id diyolo'. 12 Om iri piya tulun dit a' napatai nga' nongorolihan no di gandas. Om millohou poddi iyolo' do mokitulung di ponokokinorohingan diyolo'.
Pinoguli' i Kaban do Tumpongo
1 Om tontok di turu' noddi o tulan di Kaban do Tumpongo'd Tuhan do hiri'd pomogunan do tulun do Pilistin, 2 om pomolohou no i tulun do Pilistin dit imam om i bobolian. Om uhot no iyolo', “Kukuroyon toko' no ma i Kaban do Tumpongo'd Tuhan diri? Ondung pogulion toko' iri do hilo'd tadon mantad diri, om nunu no ma o potonggoyon toko'?” ka. 3 Om boros ka diyolo' do suminimbar, “Ondung pogulion dokoyu i Kaban do Tumpongo'd Kinorohingan do tulun dot Israil, om a' no milo dot a' kou potonggoi do maan do popuhawangon do ponogit di dusa dokoyu. Tu' iyo noddi o ralan do momolingos dokoyu, om oilaan nogindo dokoyu ondung nokuro tu' a' kou'd Kinorohingan dot Israil tingkad-tingkadan do momohukum,” ka. 4 Om uhot po kawagu i tulun do Pilistin, “Nunu o potonggoyon dahai?” ka. Om boros ka dit imam do suminimbar, “Potonggoyon no dokoyu o limo bulugu' do tamas di koiyo-iyo'd gandas o pomomonsoi, om limo o tinan do tikus, do tamas do winonsoi, do pongikid do toinsanan di raja' do Pilistin. Tu' iri no i gandas om i tikus o nokoinggorit dokoyu om i limo o raja' do Pilistin. 5 Momonsoi kou nod koiyo-iyo do gandas om tikus do tamas o wonsoyon, tu' iri no i mamaraag diti pomogunan dokoyu do maso'dti. Om opusou indo dokoyu o Kinorohingan do tulun dot Israil. Om maha' daa om a' nondo iyau momohukum dokoyu, om a' momohukum di tingolig, om tana' dokoyu. 6 Nokuro tu' pokodohon dokoyu o ginawo do miagal di raja' om i tulun do Masir di gulu po? Kada' dokoyu lihuwai i pinonguntotogod do Kinorohingan diyolo', gisom do minonosol iyolo', om pinologos iddi diyolo' i tulun dot Israil do tuminongkiad do mantad hilo'd Masir. 7 Iyo nopoddi, om posodia' kou no do guyudan di wagu po om manu do duwo o tinan do sapi' di susuan pod tanak om it a' po insan pagayato' do guyudan. Om pagayatan no di duwo o sapi' i guyudan diri nga' iri nopo tangaanak di sapi' om pogulion no do hiri'd kandang. 8 Om ngoyon nondo i Kaban do Tumpongo'd Tuhan, om pasakayon no di guyudan. Om posuangon no dot id kaban i tamas do potonggoyon dokoyu, om poilihon nogindo do hiri'd toning di Kaban do Tumpongo'd Tuhan, tu' iri no o popuhawangon dokoyu dot id dau do maan do ponogit di dusa dokoyu. Om pologoson nopo i guyudan diri do gayaton do honggo nopo o pakayaan. 9 Nga' antaan no dokoyu ondung honggo o pakayaan di guyudan. Ondung pakayaan di guyudan do ponong hilo'd bandar do Bait-Simis, i hilo'd pomogunan dau, om iri no kopio Kinorohingan do tulun dot Israil o pinoporikot di kinoinggoritan toko' dit awagat kopio. Nga' ondung amu', om okon i' ko' iyau o pinoporikot, suwai ko' kinoontok-ontoko' no toomod,” ka diyolo'. 10 Om wonsoyo' noddi diyolo' o miagal diri. Ongoi no iyolo' panganu do duwo o tinan do sapi' di posusu pod tanak, om pagayato' no diyolo' di guyudan i sapi'ddi. Nga' pinoundorong i' diyolo' i tangaanak di sapi' do hiri'd kandang. 11 Om pasakayo' no diyolo' i Kaban do Tumpongo do hiri'd guyudan om potoningo' diyolo' i kaban do pinosuangan di winonsoi do kaagal-agal do tikus om gandas do tamas do winonsoi. 12 Om pamanau no i sapi' di pinamagayat di guyudan do kumaa'd hilo'd Bait-Simis, om tilombus nopod mamanau om a' i' suminala' di ralan. Om mua-ngua' nopo i sapi' do maso'd manau-panau. Om susuhut no i limo o raja'd Pilistin di sapi'ddi do gisom do nokorikot do hilo'd piwolitan do Bait-Simis. 13 Om tontok nopoddi nga' maso di tulun di hiri'd bandar do Bait-Simis do mongomot do gandum do hiri'd rantai. Nga' soira' di huminangog iyolo', om sigog id kokito diyolo' i Kaban do Tumpongo. Om ongotood tomod diri iyolo' do nokokito'ddi! 14 Om undorong no i guyudan dot id somok do tontolob dot agayo do hiri'd tumo di Yosua, i tulun do poingiyon do hilo'd Bait-Simis. Om longodo' no di tulun i papan di pinowonsoi di guyudan om sumbolio' diyolo' i duwo o sapi' do numaan do porsombahan di sorobon dot id Tuhan. 15 Om polintuhuno' no di tulun do Liwi i Kaban do Tumpongo'd Tuhan om i kaban di kisuang do tamas, om poiliho' no diyolo' do hiri'd sakai di tontolob. Om papatahak nogiddi i tulun do Bait-Simis do porsombahan di sorobon om porsombahan do sumbolion dot id Tuhan. 16 Om soira' di nokito di limo o raja'd Pilistin i winonsoi diyolo'ddi om poguliai no diyolo' do hilo'd Ikron do tontok do tadau'ddi. 17 Pinopokirim i tulun do Pilistin dot id Tuhan do limo o bulugu' do tamas di koiyo-iyo'd gandas do maan do popuhawangon do ponogit di dusa diyolo'; om soroisaan nopo i bandar diyolo': i bandar dot Asdod, Gasa, Askilon, Gat om Ikron. 18 Om pinopokirim nogi' iyolo'd koiyo-iyo'd tikus do tamas o winonsoi. Om soroisaan nopo i limo o bandar di porintaon di limo o raja' do Pilistin, do kohompit ngai' i bandar dit ongkitolig om iri nogi' i kokompungan dit aiso' o tolig. Om hilo' kasai' po do gisom do baino' i tontolob dot agayo'ddi, i hiri'd tumo di Yosua, i tulun do Bait-Simis, i tontolob do pinoilihan diyolo' di Kaban do Tumpongo'd Tuhan. Om iri no i sumiliu'd kointalangan kopio do haro o nosiliu do miagal diri. 19 Om patayo' nod Tuhan o turu' nohopod o tulun do Bait-Simis tu' minongoi i' iyolo' ontong do hiri'd suang di Kaban do Tumpongo'd Tuhan. Om pogihad ngai' noddi i tulun do hiri'd bandar diri tu' pinorikatan iyolo'd Tuhan do hukuman dot awagat kopio.
Hilo'd Kiriat Yiarim i Kaban do Tumpongo
20 Om boros kaddi di tulun do hilo'd Bait-Simis, “Isai po o kasaap do tumimbaba'd Tuhan, i Kinorohingan dot Olidang Kopio? Id disai poo o paatadan toko' di Kaban om koinsodu' i' iri dati'?” ka diyolo'. 21 Om ponuhu' no iyolo'd piro-piro o tulun do mongoi pomisunud di tulun do hilo'd Kiriat Yiarim, do poingkaa, “Nokoguli' no di tulun do Pilistin i Kaban do Tumpongo'd Tuhan. Om rikot kou no do mongoi di Kaban diri, do hinoon id dokoyu,” ka diyolo'.
1 Om ngoyo' noddi di tulun do hilo'd Kiriat Yiarim i Kaban do Tumpongo'd Tuhan diri om posuango' no do hiri'd walai di Abinadab. Walai nopo di Abinadab om hiri'd timpak do nulu-nulu. Om pilio' no diyolo' i Iliasar, i tanak di Abinadab do podtomongon di Kaban do Tumpongo.
I Somuil o Momorinta' dot Israil
2 Om alaid i' i Kaban do Tumpongo'd Tuhan do poundorong do hilo'd Kiriat Yiarim; tu' haro i' doti' o duwo nohopod o toun do koloido'ddi do poundorong do hilo'. Om maso nopoddi nga' oinsanan nopo o tulun dot Israil do lumohou'd Tuhan do mokitulung dau. 3 Om boro-boros noddi i Somuil dot id toinsanan di tulun dot Israil, “Ondung aayi-ayi' o ginawo dokoyu'd gumuli' dot id Tuhan, om taamon ngai' no dokoyu i ponokokinorohingan do suwai om i tininganak dot Astorit. Om oyi-oyion no dokoyu do papatahak dot id Tuhan o koposi-posion dokoyu, om id dau noo o sambayangan, om poiduwon kou indo dau do mantad id pomorintaan do tulun do Pilistin,” ka dau. 4 Om pataamo' ngai' noddi di tulun dot Israil i tingolig do Baal om i tininganak dot Astorit, om id Tuhan poddi o sambayangan diyolo'. 5 Om boros kaddi di Somuil, “Timungon ngai' no i tulun dot Israil do hilo'd Mispa om sumambayang oku nogindo dot id Tuhan do bagi dokoyu,” ka. 6 Om timung ngai' no iyolo' do hilo'd Mispa. Om ongoi no iyolo' timbauk do waig om potuntugo' nod hiri do maan do porsombahan dot id Tuhan, om puasa no iyolo' do nosongodou do tadau'ddi. Boros ka diyolo', “Nokowonsoi no iyahai'd dusa dot id Tuhan,” ka. (Om hilo' nod Mispa i Somuil do tuminimpuun do minanalasai di pigulatan di tulun dot Israil.) 7 Om soira' di nokorongou i tulun do Pilistin do tuminimung i tulun dot Israil do hilo'd Mispa, om pamanau no i limo o raja' do Pilistin do miwoyo' di soudor diyolo' do mongoi panangod di tulun dot Israil. Om ongooris tomod diri i tulun dot Israil do nokorongou'ddi. 8 Om boros ka diyolo' dot id di Somuil, “Kada' no kopio tingkod do sumambayang dot id Tuhan, i Kinorohingan toko', om koidu' toko' i' do mantad id tulun do Pilistin,” ka. 9 Om ponumbali' noddi i Somuil do songinan o tanak do dumba' om songkoyuo' nopo do minonorob do maan do porsombahan dot id Tuhan. Om sambayang nogiddi iyau om otulung i' do Tuhan i tulun dot Israil. Om sinimbar iddi do Tuhan i sambayang dau. 10 Om tontok di maso pod i Somuil do papatahak di porsombahan di sorobon, om insomok no i tulun do Pilistin do mongoi panangod diyolo'. Nga' maso iddi do nokongorod o Tuhan do hilo'd tawan do hiri'd sawa-sawat diyolo' gisom dot oborulong nopoddi i tulun do Pilistin om a' no oila-ilaan o kotongkus-tongkuso' diyolo' do mogidu'. 11 Om soliwan no i soudor dot Israil do mantad hilo'd Mispa om gusao' no diyolo' i tulun do Pilistin do gisom dot osomok nod hilo'd Bait-Kar. Om pinimpatai nogi' diyolo' i tulun do Pilistin do hiri'd tanga'd ralan. 12 Om panganu noddi i Somuil dot iso' o watu om poudongo' nod hiri'd piolitan do Mispa om Son. Boros ka dau, “Nuhupan toko' id Tuhan do solinaid toko' do manau-panau,” ka dau. Om pungaranai no dau i watu'ddi do “Watu do Minonguhup”. 13 Om iyo noddi o nakaala-ala' di tulun do Pilistin, om a' no iyolo'd Tuhan pinologos do sumuang di pomogunan do tulun dot Israil. Om solinaid nopo di Somuil do poimpasi, om a' no insan kamanang i tulun do Pilistin do sumangod di tulun dot Israil. 14 Om koinsanai di bandar dit id pialatan dot Ikron om Gat, i naanu daa di tulun do Pilistin, nga' nokoguli' ngai' nopoddi dot id tulun dot Israil. Om naanu kawagu dot Israil o koinsanai di tana' mantad diyolo'. Om miulud noddi i tulun dot Israil om i tulun mantad do hilo'd Kanaan. 15 Om solinaid nopo di Somuil do poimpasi om pomorinta' kasai' no iyau do tulun dot Israil. 16 Pointikid-tikid do toun om mamanau kasai' nopo iyau'd tumutuk do Baitol, om hilo'd Gilgal, om hilo'd Mispa do mongoi panalasai di pigulatan dot id bandar diri. 17 Om muli' kasai' nopo iyau do hilo'd Rama. Om hilo' nga' manalasai i' iyau di tulun dot Israil. Om minomonsoi nogi' iyau dot iso' o pananaraban do porsombahan dot id Tuhan do hilo'd Rama.
Mokianu'd Raja' i Tulun dot Israil
1 Tontok di molohing no i Somuil, om siliho' no dau i tangaanak dau'd kusai do gompomutus do hilo'd Israil. 2 Iri nopo kotuahan do tanak dau om i Yoil o ngaran, om iri no koduwo om i Abia. Gompomutus goduwo nopo iyolo' do hilo'd Borsiba. 3 Nga' a' i' iyolo' tuminanud di kowoyo-woyoon dot osonong di tapa' diyolo'. Tu' mongingusin no o sorohon diyolo'. Om rumamit iyolo'd tusin di ponisip do tulun dot id diyolo', om a' otulid o pomumutus diyolo'. 4 Om iri noddi o nokotimungan do koinsanai di boyoon do tulun dot Israil, om ongoi ngai' no iyolo' solowot di Somuil do hilo'd Rama. 5 Om boros ka diyolo' dot id dau, “Antangai pogi' nga' molohing ko noddi, om ilo tangaanak nu nga' a' i' tumanud do kowoyo-woyoon nu. Om osonong nogi' do pomilian nu iyahai'd raja', om haro i' o dahai'd raja' do miagal dilo bansa'd suwai,” ka. 6 Nga' a' i' i Somuil ohubayaan di pinokianu diyolo'ddi. Om sambayang noddi iyau dot id Tuhan. 7 Om boros kaddi do Tuhan dot id dau, “Pohubayaan ngai' nopo i pinokianu diyolo'. Tu' okon i' ko' iya' ot iyadaan diyolo', suwai ko' iyoho'. A' noddi iyolo' orohian dot iyoho' o raja' diyolo'. 8 Mantad poddi pinosoliwan ku i' iyolo' do mantad hilo'd Masir om tuminongkiad no iyolo' doho', om tuminuku' nogiddi dot id ponokokinorohingan do suwai. Om iti nopo wonsoyon diyolo' dot id diya' do baino'dti om miagal noddi o wonsoyon kasai' diyolo' dot id doho'. 9 Iyo nopoddi om pohubayaan nopo i pinokianu diyolo' nga' poinsanon mantad po iyolo' om poiloon kopio ondung poingkukuro o wonsoyon di raja' dot id diyolo' do sumonu',” ka dau. 10 Om posunudo' ngai' nod i Somuil i nokoboros do Tuhan diri dot id tulun di mokianu'd raja'. 11 Om boros kad Somuil, “Iti no ngai' o wonsoyon di raja' dot id dokoyu. Sansagan nondo dau i tangaanak dokoyu'd kusai do sumiliu'd soudor. Haro o silihon dau'd pongigiton di korita'-kuda' dau, om haro o silihon do soudor di songinsakai'd kuda', om haro o silihon do soudor di mamanau'd gakod. 12 Om haro o silihon dau'd boyoon do sinompuruan do soribu o soudor, om haro nogi' o boyoon do limo nohopod o soudor. Om i tangaanak dokoyu'd kusai nga' sansagan indo di raja' do mamaradu do tumo dau, om mongomot, om momonsoi'd rapo-rapo do sumangod, om pakakas do korita'-kuda' dau. 13 Iri no tangaanak dokoyu'd tongoondu' om onuon dau do popomonsoyon do tumau dit osonong o kosingudan, om mogogonsok, om momomonsoi'd roti dau. 14 Om onuon dau i tumo dokoyu dit ongoluhub, om i kabun dot anggur dokoyu, om i kabun do saitun dokoyu dit ongosonong kopio do maan patahako' di pagawai dau. 15 Om ontokon nondo do sukai i tumo om kabun dot anggur dokoyu, dot i sompihopod do tua' di gandum om anggur dokoyu o maan do sukai. Om patahakon nogindo di raja' iri di boyoon do soudor dau om i pagawai dau. 16 Om onuon ngai' dau i susuhuon dokoyu, om i tayam-tayam om i kaladai dokoyu dit ongosonong kopio, om suhuon ngai' nogindo dau iri do kumaraja' dot id dau. 17 Om onuon dau o sompihopod do mantad id koinsanai di dumba' om i kambing dokoyu. Om iyokoyu'ndo nga' osiliu do turipon dau. 18 Om tontok nopondoddi om sontogod-togod kou nondo di raja' do pinili' dokoyu. Nga' a' nod Tuhan pokinongohon i boros dokoyu do tumogod,” ka dau. 19 Nga' a' no mokinongou di boros di Somuil i tulun dot Israil. Boros ka diyolo', “Poingkuro piya nga' manu kasai' no iyahai'd raja', 20 om koiyo i' iyahai dilo bansa'd suwai. Tu' iri'ndo raja' dahai o momorinta' dahai om momoyo' dahai do mongoi sangod,” ka. 21 Om pokinongoho' ngai' nopod Somuil i boros diyolo'ddi om posunudo' noddi dau dot id Tuhan. 22 Om boros kad Tuhan do suminimbar, “Wonsoyo' nopo o miagal di pinokianu diyolo'. Pomilian nopo iyolo'd raja',” ka dau. Om suhuo' noddi di Somuil i tulun dot Israil do muli' do hiri'd walai diyolo'.
Nokosolowot i Saul di Somuil
1 Haro o songulun do kaya' om it abantug do mantad id payat do Binyamin. Ngaran nopo dau om i Kis. Iyau nopo om tanak di Abiol om manangaki di Siror. Om iyau nopo nga' id suang do sompiiyon di Bikurat, i sompiiyon do mantad id pinuruan do sompiiyon di Apia. 2 I Kis nopodti nga' kianak do kusai. Om ngaran nopo di tanak dau om i Saul, i tanakwagu dot oligkang om okoris. I Saul nopoddi om aranggou om oligkang ko' mantad do koinsanai di tulun dot Israil do suwai. Tu' iri nopo tulun dot Israil do suwai om gisom ngai' no dau id lihawa. 3 Insan tadau om katagakai no i Kis do piro-piro tinan do kaladai. Om boros kaddi dau dot id di Saul, “Ongoi pangangat dot ongoiso' di susuhuon do moyo' diya' om ongoyon i' dokoyu ihumo' i kaladai,” ka. 4 Om homboo' no diyolo' o hilo'd watas do konulu-nuluan dot Ipraim om hilo'd tana' do Salisa, nga' a' i' diyolo' nokito i kaladai'ddi. Om tilombus poddi iyolo' do hilo'd Sahalim, nga' a' i' hino'd hilo' i kaladai. Om ongoi po iyolo' do hilo'd watas do Binyamin, nga' a' i' diyolo' nokito i kaladai'ddi. 5 Om soira' di nokorikot iyolo' do hilo'd tana' do Sup, om boro-boros no i Saul dot id susuhuon dau, “Kaino muli', tu' iyato moti'ndo o hondom-hondomon di tapa' ku, om okon no ko' i kaladai,” ka dau. 6 Om boros ka di susuhuon dau do suminimbar, “Kada' po! Tu' haro o susuhuon do Kinorohingan do hiti'd bandar diti di suahon kopio'd tulun, tu' nunu nopo i poboroson dau om angabayaan no kopio. Kaino po mongoi solowot dau. Tu' milo i' doti' iyau do momisunud dato ondung honggo i kaladai'ddi,” ka dau. 7 Om boros kad Saul, “Ondung mongoi to do hilo'd dau, om nunu nondo patahak-tahakon to dau? Tu' naayi' no i kokoriu di nigitan to. Om aiso' no nunu-nunu do milo to do patahakon di susuhuon do Kinorohingan diri,” ka. 8 Om boros ka di susuhuon dau, “Haro i' o doho'd iso' poo tusin do pirok. Om patahakon ku i' dau i tusin diri om momisunud indo iyau dato ondung hinonggo i kaladai'ddi,” ka dau. 9-11 Om boros kad Saul, “Ba, osonong. Kaino mongoi'd hilo'!” ka. Om ongoi no iyolo'd hiri'd bandar di nokoiyonon di susuhuon do Kinorohingan diri. Om tontok di tumakad nogi' iyolo' di nulu-nulu do kumaa'd hiri'd bandar, om kosolowot nogi' iyolo' do piro-piro tongoondu' di mongoi sago' do hiri'd torobong. Om uhoto' no diyolo' i tongoondu', “Hiti bo i mogogontong diri?” ka diyolo'. (Tontok nopoddi nga' roitan do mogogontong o nabi. Om soira' nopo do haro o tulun dot orohian do muhot do nunu nopo dot id Kinorohingan, om momoros no iyolo' dot, “Kaino mongoi'd hilo'd mogogontong,” ka.) 12-13 Om boros ka di tongoondu' do suminimbar, “Hiti i'. Id gulu-gulu no iyau ko' iyokoyu. Ondung osiau kou om okosupan po doti' dokoyu iyau. Osolowot i' dokoyu iyau do hilo'd bandar. Tu' nokorikot pogi' iyau baino' nga' papatahak do porsombahan di sumbolion, i tulun do hiti'd bandar do hiri'd pananaraban do porsombahan do hilo'd timpak do nulu-nulu. Om a' po milo'd makan i tulun do nongolohou dot a' po iyau korikot tu' mositi' no do barakatan po dau'd gulu i porsombahan diri,” ka. 14 Om ongoi noddi do hiri'd bandar i Saul om i susuhuon dau. Om tontok di sumuang nogi' daa iyolo' di bandar om kokito no diyolo' i Somuil do pakayaan pong id diyolo', do mongoi'd hiri'd tiyonon do sumambayang. 15 Tontok nopoddi konihabon po, om nosunudan nod Tuhan i Somuil do poingkaa, 16 “Suab nopondo, do dongiyo'dti, om monuhu' oku nondo do songulun do mantad id payat do Binyamin do mongoi solowot diya'. Om pilion no iyau do sumiliu'd raja' do tulun dot Israil, i tulun do songonuon ku; do tuntugan do tumau o ralan do momili'. Om iyau no o popoidu' diyolo' do mantad id tulun do Pilistin. Tu' nokito ku no o koinggoritan do tulun ku, om norongou ku o tihad diyolo' do mokitulung,” ka. 17 Om soira' di nokito'd Somuil i Saul om boro-boros no o Tuhan dot id di Somuil, “Iti no i tulun di komoyon ku diya'ddi. Iyau no o momorinta' do tulun ku,” ka dau. 18 Om tontok nopoddi nga' rumapou no i Saul di Somuil do hiri'd somok di wawayaan dot agayo di bandar. Om boros kad Saul, “Sunudai oku daa ondung hinonggo walai di mogogontong oi Aman,” ka. 19 Om boros kad i Somuil do suminimbar, “Iyoho' nogi' i mogogontong diri. Pogulu-gulu doho'd mamanau do mongoi'd hilo'd tiyonon do sumambayang, tu' tumorungak goduwo kou doho'd makan do baino'. Suab pondo om simbaron ku nogi' ngai' i tuhoton nu, om muli' kou nogindo. 20 Om iri nopo i kaladai di natagak di tolu no tadau'd nakatalib diri om nokito no. Kada' kou no katangkabo. Om kawagu po nga' iri nopo it agayo kopio o gatang do hiti'd pointongkop dot Israil om patahakon nondo dot id diya' om id sompiiyon do tapa' nu,” ka dau. 21 Om boros ka di Saul do suminimbar, “Iyoho' nopodti om mantad id payat do Binyamin, i payat dit okuuri' kopio do hiti'd Israil. Om sompiiyon ku no it aiso' kopio o ngaran-ngaran dot id suang do payat diri. Om nokuro'ddi tu' miagal diri o boros nu dot id doho'?” ka dau. 22 Om angatai nod i Somuil i Saul om i susuhuon di Saul do suminuang dot iso' o bilik dit agayo, om onuwai no dau iyolo'd tirikohonon dit osonong kopio dot id dotoguangan do haro i' doti' o tolu nohopod o tulun di linohou do mongoi akan. 23 Om boros kad i Somuil dot id tulun di mogogonsok, “Ngoyo' posurungo' i tikanas di pinonuhuan ku diya'd poopi' di tiinu'ddi,” ka. 24 Om ngoyo' no di mogogonsok i tonsi'd poo di pinili-pili' noo, om posurungo' no dot id di Saul. Om boros kad Somuil, “Iti no i pinoopi' ku do buntuk diya', om aakan nu i' do potorungak diti tulun do nalap ku. Akan no,” ka dau. Om akan no i Saul, om tontok nod tadau'ddi do tuminorungak i Saul di Somuil do minakan. 25 Om kaakan poddi iyolo', om poruhukai no diyolo' do mantad hiri'd niyon do sumambayang om ongoi no iyolo' do hiri'd bandar. Om onuwai no i Saul do tiyonon do modop do hiri'd sakai'd taap di walai, 26 om odop noddi i Saul do hiri.
Siniliu di Somuil do Raja' i Saul
Om soira' di minnanawau no om ngoyo' nod i Somuil lohowo' i Saul do hiri'd sakai di taap. Boros ka dau, “Tungag, om ngoyon ku i' iya' pootodo',” ka. Om tungag no i Saul om piwoyo' no iyolo'd i Somuil do minamanau. 27 Om soira' di nokorikot iyolo' do hiri'd tisan di bandar om boro-boros no i Somuil di Saul, “Suhuo' ilo susuhuon nu do mogulu-gulu dato do mamanau,” ka dau. Om pogulu-gulu nod mamanau i susuhuon di Saul. Om boro-boros po kawagu i Somuil dot id di Saul, “Undorong pod hiti dot oruhai. Tu' haro o boros do Kinorohingan do polombuson ku dot id diya',” ka dau.
1 Om ngoyo' noddi di Somuil i kakanan di kisuang do tumau'd saitun, om potuntugo' nod hiri'd tulu di Saul. Om tungubai no dau i Saul om boro-boros nod, “Pinili' ko'd Tuhan do sumiliu'd raja' do tulun dau, i bansa'd Israil. Om iya' no o momorinta' di tulun dau om mongintirung diyolo' do mantad id koinsanai'd pisangod diyolo'. Om iti no o tanda' dot id diya' do pinili' kopio ko'd Tuhan do sumiliu'd raja' do tulun dau: 2 Kotongkiad ko nopondo doho' do baino', om kosolowot ko nondo do duwo o kusai do hilo'd somok di lobong di Rahil, i hilo'd Silsa, it id watas do Binyamin. Om sunudan ko'ndo diyolo' do nokito no i kaladai di nongoi nu daa ihumo'ddi om katangkabaan nopoddi di tapa' nu nga' okon no ko' i kaladai, suwai ko' iya'. Tu' minguhot poddi iyau'd poingkaa, ‘Kukuroyon ku no ma i tanak ku'ddi?’ ka. 3 Om mantad nondod hilo' om tumilombus nopod mamanau do gisom do korikot ko di guas do kayu, i tiiyonon do sumambayang do hilo'd Tabor. Om hilo' nod ngoyon ko solowoto' do tolu o tongokusai do pakayaan do hilo'd Baitol do mongoi papatahak do porsombahan di sumbolion dot id Kinorohingan. Om iso' nopo diyolo' nga' kiginayat do tolu o tinan do tanak do kambing; om iso' diyolo' o kiinigit do tolu liob do roti, om iso' kawagu o kiinigit do kantung do kulit do kisuang do waig dot anggur. 4 Om sumuwau nondo iyolo' diya' om onuan ko nondo do duwo liob do roti, om romiton no i roti'ddi. 5 Om katalib pondo'ri om mositi' nod mongoi ko do hilo'd Gibia, i nulu-nulu do Kinorohingan diri, om i pinomukiiman di tulun do Pilistin. Om kosolowot ko'ndod piro-piro nabi do mogiwoyo-woyo', do hiri'd nulu-nulu di haro o pananaraban do porsombahan. Om popouni iyolo'd gambus, om rebana, om suling om kecapi do mikuwo'd sampangkis-pangkis om santari-tari'. 6 Om sigog indo do porintaon ko do Rusod do Tuhan om moyo' ko nondo diyolo' do mintari' om mimpangkis, om oonuan ko nondo do kowoyo-woyoon do wagu, gisom do suwai nondo ko' i gulu o kowoyo-woyoon nu. 7 Osiliu ngai' nopondo o miagal diri om wonsoyon nopo it osonong dot osorou nu, tu' woyoon ko i' do Kinorohingan. 8 Om mogulu no doho' do mongoi'd hilo'd Gilgal. Om solowoton ku indo iya'd hilo', di mongoi oku papatahak do porsombahan di sorobon om porsombahan di piombolutan. Mandad nopod hilo' do solinaid do turu' o tadau, do gisom do korikot oku do mongoi pomisunud diya' dit apatut nu'd wonsoyon,” ka dau. 9 Om soira' di nokotolikud nogi' i Saul do tumongkiad di Somuil, om onuwai nod Kinorohingan i Saul do kowoyo-woyoon do wagu. Om koinsanai di pinosunud di Somuil dot id dau nga' nongosiliu ngai' nopo do tadau'ddi. 10 Om soira' di nokorikot i Saul om i susuhuon dau do hilo'd Gibia om ngoyo' no iyolo' solowoto' do piro-piro o nabi di mogiwoyo-woyo'. Om sigog id porintao' i Saul do Rusod do Kinorohingan, om tanud no iyau di piro-piro o nabi do mintari' om mimpangkis. 11 Om oinsanan nopoddi i tulun di kotutun mantad di Saul dot osuayan do nokokito dau do miagal diri o kowoyo-woyoon. Om mogiuhot-uhot poddi iyolo', “Nunu'ddi kopio o nosiliu dot id tanak di Kis dilo'? Do nosiliu i' i Saul iyau'd nabi,” ka no diyolo'. 12 Om ponguhot noddi o songulun di poingiyon do hiri, “Poingkuro ngai' no ilo nabi di suwai? Isai tuu o diyolo'd tapa' dot osorou dokoyu?” ka dau. Iri noddi o kinointonodon di boboroson do poingkaa, “Do nosiliu i' i Saul iyau'd nabi?” ka. 13 Om kotingkod poddi i Saul do mintari' om mimpangkis om ongoi no iyau'd hiri'd pananaraban do porsombahan do hiri'd timpak do nulu-nulu. 14 Om kokito no di tamanon di Saul i Saul om i susuhuon di Saul, om ponguhot nod, “Honggo tadon dokoyu?” ka. Om boros kad Saul, “Minongoi iyahai pogihum do kaladai di natagak, nga' di nopoddi dit a' dahai nokito iri, om ongoi no iyahai solowot di Somuil,” ka dau. 15 “Nunu kad Somuil?” ka di tamanon dau'd minuhot. 16 Om boros kad Saul do suminimbar, “Sinunudan iyahai dau do nokito no kaka i kaladai,” ka. Nga' a' i' di Saul sinunudan i tamanon dau di boros di Somuil dot osiliu iyau'd raja'.
Nosiliu i Saul do Raja'
17 Om lohowo' nod Somuil i tulun dot Israil do tumimung do hilo'd Mispa, 18 om boros ka dau dot id diyolo', “Poingkaa no o boros do Tuhan, i Kinorohingan dot Israil, ‘Pinosoliwan ku iyokoyu do mantad hilo'd Masir om pinoidu' ku iyokoyu do mantad id pomorintaan do tulun do Masir om mantad id pomorintaan do piro-piro o bansa'd suwai di minonginggorit dokoyu. 19 Iyoho' no i pinopoidu' dokoyu do mantad id koinsanai di koinggoritan om kosusaan. Nga' baino' noddi om iyada' oku i' dokoyu, i Kinorohingan dokoyu, tu' minokipili' kou i' doho' do songulun do sumiliu'd raja' dokoyu. Om ondung iyo'ddi, om tumimung kou no dot id toguang ku, i Tuhan dokoyu, do sumompipi' do tumanud do payat om pinuruan do sompiiyon dokoyu,’ ka,” ka dau. 20 Om suhuo' nod Somuil o pointikid-tikid di payat do mongoi'd hiri'd gulu om pilio' nod Tuhan o payat do Binyamin. 21 Om suhuo' nod i Somuil i sompiiyon dot id suang do payat do Binyamin do mongoi'd hiri'd gulu om kopili' no i sompiiyon di Matri. Om soira' di minongoi'd hiri'd gulu o pointikid-tikid do kusai dit id suang do sompiiyon di Matri, om kopili' no i Saul, i tanak di Kis. Om ihumo' noddi diyolo' i Saul nga' a' i' iyau hino'd hiri. 22 Om uhot noddi do Tuhan i tulun, “Oi Tuhan, minongoi i' tuu'd hiti i tulun diri?” ka. Om boros kad Tuhan do suminimbar, “Minongoi i Saul lisok do hilo'd tolikud dilo konunu-nunuan,” ka. 23 Om panangkus nopoddi iyolo' do minongoi poundaliu di Saul do mantad hiri, om angatai nod hiri'd pogialatan di tulun dot ogumu'. Om kokito no diyolo' dot i Saul nopo nga' aranggou no ko' mantad do tulun do suwai; tu' iri nopo tulun do suwai om gisom ngai' no dau dot id lihawa di poingkakat iyau. 24 Om boros kaddi di Somuil dot id tulun dot Israil, “Iti no i tulun do nopili'd Tuhan. Aiso' i' o songulun dot id pogialatan dati' do koiyo dau,” ka dau. Om pagarango' no di tulun dot Israil o poingkaa, “Otogui po iti raja'!” ka. 25 Om poboroso' nogiddi di Somuil dot id koinsanai di tulun o kuasa' om tonggungan do raja'. Om potuliso' ngai' no dau iri dot id iso' o buuk. Om poopio' no dau i buuk diri dot id kinoiyonon dit olidang. Om suhuo' ngai' nogiddi dau i tulun do minuli' dot id walai diyolo'. 26 Om i Saul nga' minuli' nogi' do hilo'd walai dau do hilo'd Gibia. Om minoyo' dau o piro-piro tulun di gunsiou om i bininsuhu'd Kinorohingan do moyo' di Saul. 27 Nga' haro i' o piro-piro tulun dot angaraat di minimboros do poingkaa, “Haro kopio tuu o guna' do tulun diti dot id dati'?” ka. Om hingi-hingion diri diyolo' i Saul om a' minanahak do nipuhawang dot id dau. Nga' a' i' miningkoilo-ilo i Saul.
Naala' di Saul i Tulun dot Amon
1 Oruhai pod mantad diri, om angatai nod i Nahas i raja' dot Amon diri, i soudor dau do minongoi ponurungku' di bandar do Yabis, it id suang do watas do Giliad. Om boros ka daa di tulun do hilo'd Yabis dot id di Nahas, “Mitaru' toko' nogi' om mokiporinta' i' iyahai diya',” ka. 2 Om boros ka di Nahas, “Monokitaru' oku i' dokoyu nga' wonsoyon ku po o miagal diti: maan ku po irulo' o pointikid-tikid do mato dokoyu'd wanan om ointingayam i' o koinsanai'd tulun dot Israil,” ka dau. 3 Om boros ka di piro-piro o boyoon do hiri'd bandar do Yabis, “Onuwai po iyahai'd maso do turu' o tadau do popoilo diti habar dot id pointongkop do pomogunan dot Israil. Ondung aiso' o mongoi dahai ponulung, om tumahak no iyahai dot id diya',” ka diyolo'. 4 Om korikot no i piro-piro o susuhuon diri do hilo'd Gibia, i kinoiyonon di Saul. Om tontok di pinoboros diyolo' i habar diri om timpuun nod minihad i tulun do hiri tu' aiso' no o pokukurayan diyolo'. 5 Maso nopoddi nga' koguguli' di Saul do mantad id dumo do kiginayat di sapi' dau. Om ponguhot no iyau, “Nokuro ti? Nokuro tu' mihad ngai' o tulun?” ka dau. Om posunudo' no diyolo' dot id dau i habar do pinosunud di tulun do mantad hilo'd Yabis. 6 Om soira'ddi nokorongou i Saul diri, om porintao' no iyau di Rusod do Kinorohingan, om kotogod no tomod iyau. 7 Om ongoi no iyau do duwo o tinan do sapi' om pimpopoto' no dau. Om ponuhu' no iyau'd tulun do minongigit di popot di sapi'ddi do potongkopon di pomogunan dot Israil, do mikuwo'd popoboros do boros do poingkaa, “Isai nopo it a' tumanud di Saul om i Somuil do mongoi sangod, om popoton no do miagal diti sapi' diyolo'!” ka. Om ongooris diri i tulun dot Israil do haro doti'ndo o wonsoyon do Tuhan. Om rikot ngai' nopoddi iyolo', om aiso' no o minolu'. 8 Om timungo' nod Saul iyolo' do hilo'd Bisik om intobo' dau iyolo': 300,000 o tulun do mantad hilo'd Israil, om 30,000 o tulun do mantad hilo'd Yohuda. 9 Om boros kaddi diyolo' dot id tulun di mantad hilo'd Yabis diri, “Sunudan no i tulun dokoyu dot a' po orikot o tangaadau'd suab om otulung no iyolo',” ka. Om soira'ddi nokorongou i tulun do Yabis diri om ongotood tomod diri iyolo'. 10 Om boros ka diyolo' dot id di Nahas, “Suab nopondo om mangakun no iyahai'd aala', om wonsoyon nopo i korohian nu do wonsoyon dot id dahai!” ka. 11 Om kosuabon poddi om bohogio' nod Saul i tulun dau do tolu o bohogian. Om tontok di numawau nogi', om ongoi no iyolo' do hiri'd kokiiman di tulun dot Amon do minongoi panangod diyolo'. Om a' poddi norikot o tangaadau om nangapatai nod Saul i pisangod. Om iri nopoddi i tulun dot Amon dit a' nangapatai om kopogitongkiad-kiad nopo, om aiso' no o soroduwo-duwo tulun do miwoyo-woyo' do manangkus. 12 Om boros kaddi di tulun dot Israil dot id di Somuil, “Honggo no i tulun di kasaap kopio dot a' poposorupai di Saul do sumiliu'd raja'? Patahako' daa iyolo' dot id dahai, om maan i' dahai iyolo' patayo',” ka diyolo'. 13 Nga' boros kad i Saul, “Iso' pod tulun nga' a' i' koino-ino'd patayon do tadau'd baino', tu' tadau nod baino' do pinasi'd Tuhan ot Israil,” ka. 14 Om boros kaddi di Somuil dot id diyolo', “Kainou mongoi ngai' do hilo'd Gilgal, om maan toko' indo kawagu pogiroto' dot i Saul o nosiliu'd raja' toko',” ka dau. 15 Om ongoi ngai' no iyolo' do hilo'd Gilgal om hilo' no, do hiri'd tiiyonon do sumambayang diri, do pinogirot kawagu diyolo' dot i Saul o raja' diyolo'. Om papatahak no iyolo' do porsombahan do piombolutan. Om ramayo' no di Saul om koinsanai'd tulun dot Israil i winonsoi do tontok diri.
Boros di Somuil do Pinongintod
1 Om boro-boros noddi i Somuil dot id tulun dot Israil, “Nowonsoi ngai' ku no i pinokianu dokoyu. Om nopomilian ku no iyokoyu'd raja'. 2 Om mantad do baino', om iyau no o sumiliu'd boyoon dokoyu, tu' iyoho' nopo om molohing no om nokopurak no o tobuk ku. Laid oku noddi kopio do nosiliu'd boyoon dokoyu, do mantad po dit omulok oku po om gisom do baino'. Tu' nangkagayo no o tangaanak ku. 3 Om baino' nopodti om poingkakat oku dot id toguang dokoyu! Om ondung nakasala' oku dot id suang do nunu nopo, om tondoso' oku nopod dinondo dot id toguang do Tuhan om id toguang diti raja' di nopili' dau. Nokoumbal oku toi do minanakau do sapi' ko' kaladai do tulun do suwai? Nokoumbal oku toi do minagakal ko' minonginggorit pod isai nopo o tulun? Nokoumbal oku toi do ruminamit do tusin di ponisip? Poboroson nopo, om koguli' ku i' o nunu nopo i naanu ku,” ka dau. 4 Om boros ka di tulun dot Israil, “Amu', a' ko i' insan pagakal om a' ko insan ponginggorit dahai. Om a' ko insan panakau do nunu nopo do mantad id tulun do suwai,” ka diyolo'. 5 Om boros kaddi di Somuil, “Tuhan no om ilo raja' di nopili' dau o sumiliu'd sasi' do tadau'd baino', dot aiso' o sala' ku dot ongokooro' piya,” ka dau. Om boros ka diyolo' do suminimbar, “Iyo noddi, Tuhan no o sumiliu'd sasi' toko',” ka. 6 Om boros ka kawagu di Somuil, “Tuhan i' o minomili' di Musa om i Harun. Om iyau no o pinoposoliwan di taki-aki dokoyu do mantad hilo'd Masir. 7 Om dinondo nodti, om kada' kou po pamanau. Tu' pasalaon ku iyokoyu dot id toguang do Tuhan. Sorohon no dokoyu i kosianan do Tuhan di pinointalang dau dot id dokoyu om id taki-aki dokoyu. 8 Tontok di minongoi i Yakub om i sompiiyon dau do hilo'd Masir, om di nopo di ninggorit iyolo' di tulun do Masir, om pomolohou nod Tuhan i taki-aki dokoyu do mokitulung dau. Om suhuo' nod Tuhan i Musa om i Harun do momoyo' diyolo' do sumoliwan do mantad hilo'd Masir do mongoi pomogun-mogun do hiti'd pomogunan diti. 9 Nga' linihuan iddi diyolo' o Tuhan, i Kinorohingan diyolo'. Om pologoso' noddi do Tuhan i tulun do Pilistin, om i raja' do Muab, om i Sisora, i boyoon do soudor di hilo'd Hasor, do minongoi panangod di taki-aki dokoyu do gisom do naala' iyolo'. 10 Om sambayang noddi iyolo' dot id Tuhan do minangakun di dusa diyolo'. Boros ka diyolo', ‘Nokowonsoi no iyahai'd dusa dot id diya', oi Tuhan, tu' tuminongkiad iyahai diya' om tuminuku' nogiddi iyahai di tingolig do Baal om Astorit. Nga' poiduwo' no iyahai do mantad id pisangod dahai, oi Tuhan, om sumambayang indo iyahai dot id diya'!’ ka. 11 Om pilio' noddi do Tuhan i Gidion, om i Barak nogiddi, om i Yipta no, om id tohuri noddi om iyoho' o pinili' dau. Nokopoidu' ngai' iyahai dokoyu do mantad id pisangod dokoyu, gisom dot osimbayan kou'ddi do momogun-mogun. 12 Nga' soira'ddi noilaan dokoyu do mongoi panangod dokoyu i Nahas, i raja' do tulun dot Amon diri, om iyadaai no dokoyu o Tuhan do sumiliu'd raja' dokoyu. Tu' boros ka dokoyu dot id doho', ‘Orohian iyahai do porintaon do raja',’ ka dokoyu. 13 Om baino' nodti om haro no o raja' do nopili' dokoyu. Pinokianu dokoyu iyau, om patahako' noddi do Tuhan iyau dot id dokoyu. 14 Solinaid nopo dokoyu do momusou'd Tuhan, i Kinorohingan dokoyu, om sumambayang dot id dau, om mokinongou do boros dau, om mumboyo' do ponuhuan dau, om solinaid nopo dokoyu om ilo raja' dokoyu do tumanud dau om osimbayan kou no. 15 Nga' ondung a' kou momusou'd boros do Tuhan, om a' mumboyo'd ponuhuan dau, om atantu' nod saapon kou dau, om saapon dau i raja' dokoyu. 16 Om dinondo nodti om kada' kou po pamanau! Mintong kou po kopio di wonsoyon do Tuhan do koimayaan kopio. 17 Dongmagadau'd dinondo koii? Nga' sumambayang oku indo dot id Tuhan om poporikot indo iyau do tinggoron om rasam do ponimbar di sambayang ku. Om osiliu nopondo o miagal diri om kopuriman kou nogindo do nokowonsoi kou'd dusa dit agayo kopio dot id Tuhan tu' minokianu kou i' do raja',” ka dau. 18 Om sambayang noddi i Somuil, om tadau iddi do pinoporikot o Tuhan do tinggoron om rasam. Om oinsanan nopoddi i tulun dot Israil dot ooris do Tuhan om ooris di Somuil. 19 Om boros kaddi diyolo' dot id di Somuil, “Tulungo' no iyahai, oi Tuan, sambayang nod id Tuhan, i Kinorohingan nu, do bagi' dahai, om a' i' iyahai apatai. Opurimanan noddi dahai do suwai nopo ko' i dusa dahai, om nokowonsoi po kawagu iyahai'd dusa tu' minokianu i' iyahai'd raja',” ka. 20 Om boros kaddi di Somuil, “Kada' kou kooris! Tu' mulong piya do nokopomonsoi kou'd karaaton diri, nga' kada' kou i' tongkiad do Tuhan. Suwai ko' sumambayang kou no kasai' dot id dau do mikuwo'd aayi-ayi' o ginawo dokoyu. 21 Kada' kou tanud di piro-piro o ponokokinorohingan, tu' a' i' iyolo' milo'd monulung ko' mamasi po dokoyu, tu' a' i' iyolo' poimpasi. 22 Nakabatos no kopio o Tuhan do mikuwo'd sumpa' dot a' iyau tumongkiad dokoyu. Tu' natantu' no dau dot iyokoyu o silihon dau do tulun di songonuon dau. 23 Om iyoho' noo om mada' oku no kopio do kowonsoi'd dusa dot id Tuhan dot i tumingkod do sumambayang do bagi' dokoyu o kowonsoi-wonsoi ku'd dusa. Om monuduk kasai' oku i' dokoyu do pasal dit ongosonong om it apatut dokoyu'd wonsoyon. 24 Umboyo' kou nod Tuhan om wonsoyon no dokoyu i korohian dau do mikuwo'd otorodok om iso-iso' kopio o ginawo. Soroho' no dokoyu i kongoimayaan do winonsoi dau do bagi' dokoyu. 25 Nga' ondung tumilombus kou'd momonsoi'd dusa om apatai kou no om ilo raja' dokoyu nga' kotonggoi nod apatai,” ka dau.
Pisangadan do Sumaap do Tulun do Pilistin
1 Insan tadau, do tontok di nosiliu nod raja' i Saul, 2 om pomili' no iyau do tolu noribu tulun. Om poundorongo' no dau dot id sugku' dau do hilo'd Mikmas, i hilo'd konulu-nuluan do Baitol, o duwo noribu di tulun. Om suhuo' no dau o soribu di tulun do tumanud di Yonatan, i tanak dau, do kumaa do hilo'd Gibia, it id watas do payat do Binyamin. Om iri no tulun do suwai ko' iri om sinuhu' dau do muli'. 3 Om kaala' nod Yonatan i sonsinompuruan do soudor do Pilistin do hilo'd Giba; om kongorongou no i bansa'd Pilistin do pasal diri. Om ponuhu' no i Saul do piro-piro o tulun do mongoi popouni'd torumpit do pointongkop di pomogunan, do pomolohou di tulun dot Ibrani do mongoi sangod. 4 Om sinunudan ngai' nogi' i tulun dot Israil do napatai nod Saul i boyoon do soudor do Pilistin om araatan diri diyolo' i tulun do Pilistin. Om iri no o kinotonudan di tulun dot Israil di lolohou do mongoi tanud di Saul do hilo'd Gilgal. 5 Om daamot nopoddi nga' nokotimung no i tulun do Pilistin do mongoi sangod di tulun dot Israil. Tolu nohopod noribu o korita'-kuda', om onom noribu o soudor di kikuda', om miagal po di pasir do hilo'd tisan do rahat o kogumuo' di soudor diyolo'. Om pomukiim no iyolo' do hilo'd Mikmas, i ponong id koulayon do Bait-Awon. 6 Om hilo' no o tadon diyolo' do minanangod di tulun dot Israil, gisom dot aiso' no o pokukurayan di tulun dot Israil. Om haro'ddi o piro-piro di tulun dot Israil do minongoi lisok do hiri'd luang do pampang, om hiri'd luang do nuluhon, om hiri'd pogialat-alatan do tontolob, om hiri'd luang do tana' om hiri'd torobong. 7 Iri no wookon om suminoborong di Bawang do Yordan om pinakayaan do hilo'd watas do Gad om Giliad. I Saul nopo nga' hilo' kasai' pod Gilgal, om pananggagaran ngai' poddi i tulun do manud-tanud dau dot opopoddosian. 8 Turu' no tadau'd i Saul do magandad do korikatan di Somuil, do hilo'd Gilgal, tu' iyo noddi o pinonuhuan di Somuil, nga' gisom piya do maso'ddi nga' a' po hino i Somuil. Om tumimpuun noddi i tulun do tumongkiad di Saul. 9 Om boros kaddi dau dot id diyolo', “Hiitio' doho' i porsombahan do sorobon om i porsombahan do piombolutan,” ka dau. 10 Om maha' dit oruhai no dau'd opupusan o kapatahakan di porsombahan diri om korikot nogi' i Somuil. Om ongoi no i Saul ruba' dau mikuwo'd suminuwau. 11 Nga' uhoto' no di Somuil iyau, “Nunu o winonsoi nu?” ka dau. Om boros kad Saul do suminimbar, “Pogiiduan oku nodti tulun, om iya' po nga' a' koriko-rikot do miagal di nakabatos nu. Kawagu po nga' nokotimung no i tulun do Pilistin do hilo'd Mikmas. 12 Osorou ku nopo nga' ngoyon oku doti'ndo di soudor do Pilistin songodo' do hiti'd Gilgal om a' oku po nokopokianu do kosianan do mantad id Tuhan. Om patahako' ku nopoddi i porsombahan,” ka dau. 13 Nga' boros kad i Somuil dot id di Saul, “Iri nopo winonsoi nu'ddi om dongkababasug tomod i'. Tu' a' ko tuminanud do tisuhu' do Tuhan, i Kinorohingan nu. Ondung tuminanud ko daa, om atantu' no do pologoson ko i' daa'd Tuhan om i sinakagon nu do momorinta' dot Israil do gisom dot alaid. 14 Nga' iyo nopondo tu' a' ko tuminanud om a' no tumilombus o pomorintaan nu. Om mogihum indo o Tuhan do tulun di korohian dau do silihon do raja' do tulun dau,” ka dau. 15 Om tongkiad no i Somuil do mantad hilo'd Gilgal om pakayaai no dau do hilo'd Gibia, it id watas do Binyamin. Om daamot nopoddi om nintob di Saul i soudor dau om haro po ot onom nahatus o tulun. 16 Om pomukiim no i Saul om i Yonatan, i tanak dau, om i piro-piro o soudor diyolo' do hilo'd Giba, it id watas do Binyamin. Om iri no tulun do Pilistin om minomukiim do hilo'd Mikmas. 17 Tontok nopoddi nga' minamanau do mantad hiri'd kokiiman o tolu bohogian do tulun do Pilistin do mongoi panangod, iri nopo bohogian do koiso' om pinakayaan ponong id Opra, it id watas do Sual, 18 om iri no bohogian do koduwo om pinakayaan do hilo'd Bait-Horon. Om iri no bohogian di tiso' om kuminaa do hilo'd wolit di poingimpa' do Rantai do Siboyim om i tana' do kowotuan. 19 Tontok nopoddi nga' aiso' i' o modsusupu' do basi' do hilo'd Israil tu' mada' i tulun do Pilistin do momonsoi i tulun dot Ibrani do gayang om tandus. 20 Om a' no milo'd a' mongoi i tulun dot Israil do hiri'd tulun do Pilistin do mongoi pokiasa' do radu, om sangkul, om kapak om gogorib diyolo'. 21 Pamagadsi' nopo do mangasa' do kapak om momonsoi di kakang do sapi', om sopisousin, om pamagadsi' nod mangasa' do radu om sangkul, om sopiduwo o tusin. 22 Gowoi poddi om iyo Saul nod i Yonatan, i tanak dau'ddi, o kigayang om kitandus di maso do mogisasangod do hilo'd Mikmas, om iso' po di tulun dot Israil do suwai nga' aiso' i' o kigayang ko' kitandus. 23 Om suhuo' no di tulun do Pilistin o sombohogian di soudor diyolo' do madtalob di ralan do hiri'd pitas do nuluhon do hilo'd Mikmas.
Kosioho' di Yonatan
1 Insan tadau, om boro-boros no i Yonatan dot id tanakwagu di mongingigit di rapo-rapo dau, “Kaino mongoi'd hilo'd kiim do tulun do Pilistin,” ka. Nga' a' i' di Yonatan sinunudan i Saul, i tapa' dau. 2 Maso nopoddi om poundorong i Saul do hiri'd dolungungan do guas do delima do hilo'd Migron, it id somok no do Gibia. Om haro i' doti' ot onom nahatus o tulun do moyo-woyo' di Saul do maso'ddi. 3 (Iri nopo it imam di kiinigit dit ipod do maso'ddi om i Ahia, i tanak di Ahitub; i Ahitub nopo om tobpinai di Ikabod. I Ikabod no om tanak di Pinihas, om i Pinihas no om tanak di Ili, it Imam do mogobi-obi' do Tuhan do hili'd Silo). Om iri ngai' nogi' i tulun do hiri nga' a' i' nokoilo do nakapamanau i Yonatan. 4 Iri nopo ralan do hilo'd Mikmas diri, i hiri'd pitas do nuluhon, i kawayaon kopio di Yonatan do mongoi'd hiri'd kiim do Pilistin, om nopiompopingan do pampang dit atarom. Iri nopo tiso' di pampang om roitan do Bosis om iri no tiso' om roitan do Sini. 5 Iri nopo pampang di ponong id utara om potimbaba' do Mikmas, om iri no ponong id salatan om potimbaba' do Giba. 6 Boros kad Yonatan dot id tanakwagu'ddi, “Kaino mongoi'd hilo'd kiim dilo tulun do Pilistin, ilo tulun do kapir. Tu' uhupan to i' doti' do Tuhan; tu' milo i' o Tuhan do manahak do kamanangan dot id tulun dit ogumu' om id tulun dit okuri',” ka dau. 7 Om boros ka di tanakwagu do suminimbar, “Nunu nopo o wonsoyon nu om tumanud oku no,” ka dau. 8 Om boros ka di Yonatan, “Osonong no. Sumampaping to nopo om okito to i' di tulun do Pilistin. 9 Ondung suhuon to diyolo'd mandad do gisom do korikatan diyolo', om mandad to nopo, om a' to no sumampaping. 10 Nga' ondung suhuon to diyolo' do mongoi'd hilo'd diyolo', om mongoi to nopo; tu' iri no o koilaan to dot onuan to'd Tuhan do kamanangan do sumaap diyolo',” ka dau. 11 Om pokilogos nopo iyolo' goduwo dot okito di tulun do Pilistin. Om boros kaddi di tulun do Pilistin, “Intong pogi'! Nga' haro moti' o tulun dot Ibrani do suminoliwan do mantad hilo'd luang di linisok diyolo'!” ka. 12 Om polohowo' noddi diyolo' o boros dot id di Yonatan om id tanakwagu'ddi, “Takad kou'd hiti! Tu' haro o pokitanan dahai dokoyu!” ka. Om boros kaddi di Yonatan dot id tanakwagu'ddi, “Tanud doho'. Tu' noonuan nod Tuhan do kamanangan o tulun do Israil do sumangod do tulun do Pilistin,” ka dau. 13 Om ponungkamang no i Yonatan do tuminakad, om i tanakwagu nga' muhut- suhut i' dau. Om honggo nopo o kobulaton di Yonatan om hiri no iyau do momobog di tulun do Pilistin om hiri no dot ohunduk iyolo', om muhut-suhut dau i tanakwagu do mimpatai di tulun do Pilistin diri. 14 Om id suang nopod pinisangadan dit insan i' om haro i' doti' o duwo nohopod o tulun do napatai di Yonatan om i tanakwagu'ddi dot id kinoiyonon di sompiapat do hiktar o kogoyoo'. 15 Om pananggagaran poddi dot opopoddosian i tulun do Pilistin do hiri'd kokiiman om i hiri'd talun do nokorongou di habar diri. Om ongooris ngai' poddi i tulun do Pilistin om i soudor di madtamong, om i piro-piro sinompuruan do mananakau; om iri piya tana' nga' guminuyu', om ongoborulong ngai' poddi iyolo'.
Naala' o Tulun do Pilistin
16 Om kokito'ddi di tulun di Saul i tulun do Pilistin dot a' no oila-ilaan o kotongkus-tongkuso' tu' ongoborulong poo, do tontok di pointamong iyolo' do hilo'd Gibia, it id watas do Binyamin. 17 Om boros kad Saul dot id tulun dau, “Intobo' ilo soudor toko' om ilaan no ondung isai ot a' hino'd hiti,” ka dau. Om soira' di nointob diyolo', nga' koilaai no dot a' hino i Yonatan om i tanakwagu di mongingigit di rapo-rapo dau. 18 Om boro-boros no i Saul dot id di Ahia, it Imam, “Igitai it ipod do hiti,” ka dau. (Tadau nopoddi nga' nigitan di Ahia it ipod dot id toguang di tulun dot Israil.) 19 Om maso pod i Saul do moro-boros dit imam nga' muhang-ruhang nopo o kagangaho' do hiri'd kokiiman di tulun do Pilistin. Om boros kaddi di Saul dot id imam diri, “Aiso' no o maso toko' do muhot do Tuhan,” ka dau. 20 Om pamanau noddi i Saul om i piro-piro o soudor dau do minongoi'd hiri'd pogisasangadan. Om kokito no diyolo' dot angagangau nopo i tulun do Pilistin tu' mogisasaap nopo iyolo' om mogipapatai dot iyolo' i' om iyolo'. 21 Om iri nopoddi i tulun dot Ibrani di poingiyon do hiri'd watas di tulun do Pilistin, om i minongoi daa sugku' di soudor do Pilistin nga' tuminongkiad diri diyolo' om minongoi nogiddi sokodung di Saul om i Yonatan. 22 Om iri nogi' i tulun do suwai, i minongoi daa lisok do hiri'd konulu-nuluan dot Ipraim nga' minongoi iddi uhup do suminangod di tulun do Pilistin, di nokorongou iyolo' do minogidu' i tulun do Pilistin. 23 Om sangod nopo iyolo' do minompus di ralan, om gisom do nakatalib iyolo' do hilo'd Bait-Awon. Om tadau noddi do pinasi do Tuhan ot Israil.
I Nongosiliu di Notingkod o Pisangadan
24 Tontok nopod tadau'ddi nga' louson no om ongolomok poo i tulun dot Israil tu' nokopomopol no i Saul do poingkaa, “Isai nopo o tulun do mangakan do nunu nopo do tadau'd baino' dot a' oku po kosuli' di pisangod ku om ousung no,” ka. Om gowoi poddi om iso' pod tulun nga' aiso' no o minangakan do nunu- nunu do nosongodou do tadau'ddi. 25 Om korikot no iyolo' dot id iso' o puru' om kokito no iyolo' ngai' do paha' dot ogumu' tomod. 26 Nga' aiso' i' tiso' diyolo'd minangakan tu' ooris iyolo'd oontok di popol di Saul. 27 Nga' i Yonatan nopo, om a' i' nokorongou di popol di tapa' dau, i koorisan ngai' di tulun. Om poroloyo' no dau i sukud do poingigit dau om ongoi no iyau tiuk di paha' dot okooro' do mantad hiri'd pinuwalai om kano' no dau. Om okoris nopoddi o nopurimanan dau. 28 Nga' boros kad songulun di soudor, “Ongolomok no daa ngai' iyahai'd ololousanan nga' minongoris i tapa' nu tu' minomopol iyau do poingkaa, ‘Isai nopo o tulun do mangakan do nunu nopo do tadau'd baino' om ousung no,’ ka,” ka dau. 29 Om boros kad Yonatan do suminimbar, “Adalaan noddi kopio o winonsoi di tapa' ku dot id tulun toko' do miagal diri! Antangai pogi' nga' okoris-koris no moti' o topurimanan ku iyoho' tu' minangakan oku i' di paha'. 30 Okon toi ko' osonong nogi' daa'd nakan di tulun i taakanon di naahau do mantad id pisangod? Tu' ondung minangakan, nga' atantu' no dot ogumu-gumu' i' daa o tulun do Pilistin dot apatai toko',” ka dau. 31 Om naala' iddi di tulun dot Israil i tulun do Pilistin do mantad pod hilo'd Mikmas om gisom do korikot do hilo'd Ayalon do tontok do tadau'ddi. Nga' louson noddi kopio iyolo', 32 om gowoi poddi om pogiahawo' nopo diyolo' i nangaanu diyolo' do mantad id pisangod. Om onuo' no diyolo' i sapi' om i dumba', om sumbolio' nod hiri. Om kano' noddi diyolo' i daging dit a' po nakalawas ngai' o raha'. 33 Om kosunudai noddi i Saul do pasal diri, “Intong pogi', nga' momonsoi moti'd dusa o tulun toko' dot id Tuhan tu' mangakan iyolo'd daging di kiraha',” ka. Om boros kad Saul do minamagarang, “Magakal kou! Poliid kou'd watu dit agayo do hiti!” ka dau. 34 Om boros ka kawagu dau dot id tulun di minomisunud diri, “Ongoi kou do hilo'd tulun diri om suhuon no iyolo'd mongigit di sapi' om dumba' diyolo' do hiti. Om osumbali' i' diyolo' iri dot id sakai diti watu om aakan i' do hiti. Nga' kada' po do momonsoi'd dusa dot id Tuhan tu' mangakan do daging di kiraha',” ka dau. Om igitai no di tulun i tayam-tayam di naanu diyolo' do mantad id pisangod do kuminaa'd hiri do totuong iddi. Om sumbolio' noddi diyolo' do hiri. 35 Om pomonsoi no i Saul dot iso' o pananaraban do porsombahan dot id Tuhan. Om iri no o pananaraban do porsombahan di winonsoi di Saul dit id gulu i' kopio. 36 Om boros kad Saul dot id tulun dau, “Ngoyo' toko' gusao' i tulun do Pilistin do dongotuong do baino', om asangod toko' i' iyolo' om panakahan toko' nogindo do gisom dot anawau, om patayon ngai' toko' nopondo iyolo',” ka dau. Om boros ka di tulun do suminimbar, “Wonsoyo' nopo it osonong dot osorou nu,” ka diyolo'. Nga' boros ka dit imam diyolo', “Osonong do muhot toko' pod Kinorohingan,” ka dau. 37 Om uhot no i Saul do Kinorohingan, “Mongoi oku tuu sangod di tulun do Pilistin? Pamanangon oku i' tuu diya'?” ka dau. Nga' a' i' suminimbar o Kinorohingan do tadau'ddi. 38 Om boros kaddi di Saul dot id piro-piro o boyoon di tulun, “Kainou'd hiti om ilaan toko' i' ondung nunu i dusa do nowonsoi'd tadau baino'! 39 Mamatos oku no dot id Tuhan di poimpasi, i minanahak do kamanangan dot id tulun dot Israil, dot iri nopo tulun di nakasala' om hukuman nod kapatayon, do mulong piya dot i Yonatan, i tanak ku,” ka dau. Nga' aiso' i' o songulun piya do nakatama' do suminimbar. 40 Om boros kaddi di Saul dot id toinsanan di tulun dot Israil, “Ingkakat kou iyokoyu do ponong hilo', om mingkakat iyahai di Yonatan do ponong hiti,” ka dau. Om boros ka di tulun do suminimbar, “Wonsoyo' nopo it osonong dot osorou nu,” ka. 41 Om sambayang no i Saul dot id Tuhan, i Kinorohingan dot Israil, “Nokuro tu' a' ko sumimbar doho'd baino', oi Tuhan, i Kinorohingan dot Israil? Simbaro' oku no do pawayaon diti watu dot olidang. Ondung iyoho' ko' i Yonatan o nakasala', om simbaro' no di watu dot Urim, nga' ondung Israil, i tulun nu o nakasala', om simbaro' no do watu'd Tumim,” ka dau. Om iri nopoddi nisimbar do Tuhan om iyo Yonatan di Saul o notuduk, om nokointalang noddi dot a' nakasala' i rayat. 42 Om boros kad Saul, “Baino' nodti om pointalango' no ondung i Yonatan ko' iyoho' o nakasala',” ka dau. Om i Yonatan no o nokointalang do nakasala'. 43 Om uhoto' noddi di Saul i Yonatan, “Nunu o winonsoi nu?” ka dau. Om boros ka di Yonatan do suminimbar, “Nakapangakan oku'd paha' dot okooro' do tiniuk ku di sukud ku. Nga' posodia' oku id patayon,” ka dau. 44 Om boros kad i Saul, “Hukuman oku nopod Kinorohingan dot a' ku no iya' hukuman do kapatayon, oi Yonatan!” ka dau. 45 Nga' boros ka di tulun dot ogumu' dot id di Saul, “Nokuro tu' patayon nogi' i Yonatan, tu' okon toi ko' iyau o nakaanu'd kinamanangan dit agayo do hiti'd Israil? Amu', a' i' iyahai kaakun! Mamatos iyahai dot id Tuhan, i poimpasi, dot iso' pod tobuk di Yonatan nga' a' i' koino-ino dot ouul. Tu' iri i' i nuhupan iyau'd Tuhan, o nakamanang-manang dau baino',” ka diyolo'. Om napasi iddi di tulun dot ogumu' i Yonatan do mantad id hukuman do kapatayon. 46 Om tingkod no i Saul do momogusa' di tulun do Pilistin. Om uli' noddi i tulun do Pilistin do hiri'd pomogunan diyolo'.
Pomorintaan di Saul om Sompiiyon Dau
47 Tontok di nosiliu i Saul do raja' dot Israil, om ngoyo' ngai' nopo dau songodo' i pisangod do tulun dot Israil do hinongo-honggo nopo iyolo'. Iri tulun do Muab, om Amon, om Idom; om i piro-piro o raja' do Soba, om i tulun do Pilistin. Om kamanang kasai' nopo iyau dot id pisangadan. 48 Osiou tomod iyau do suminangod gisom dot i tulun dot Amalik nga' naala' i' dau. Om nokoidu'ddi dau o tulun dot Israil do mantad id pisangod di mongoi panakau do konunu-nunuan diyolo'. 49 Tangaanak nopod i Saul do tongokusai om i Yonatan, i Yiswi, om i Malkisua. Iri no tanak dau'd tondu' dot id gulu om i Mirab, om iri no koduwo om i Mikal. 50 Sawo nod i Saul om i Ahinuam, i tanak di Ahimaas; om iri no boyoon do soudor dau om i Abnor, i pinsan dau; i Abnor nopo om tanak di Nor; i tamanon di Saul. 51 I Kis nopo, i tapa' di Saul, om i Nor, i tapa' di Abnor, om tangaanak di Abiol. 52 Solinaid nopo di Saul do poimpasi om a' no milo'd a' iyau tumotos do sumaap di tulun do Pilistin. Om iri no o kokuwaan do soira' nopod kosolowot iyau'd tulun dit okoris om osiou om silihon no dau do soudor dau.
Suminangod di Tulun dot Amalik
1 Insan tadau, om boro-boros no i Somuil di Saul, “TUHAN no i minonuhu' doho' do momili' diya' do sumiliu'd raja' do tulun dau, i bansa'd Israil. Iyo nopoddi, om pokinongoho' no iti boros do Tuhan, it Agayo Kuasa'. 2 Hukuman no dau o tulun dot Amalik tu' suminaap i' di tulun dot Israil i taki-aki diyolo' do tontok di kososoliwan di tulun dot Israil do mantad hilo'd Masir. 3 Iyo nopoddi om ngoyo' no songodo' i tulun dot Amalik om raagon ngai' nopo i diyolo'd songonuon. Kada' nod haro o poolu-oluon; patayon ngai' no i tongokusai, om tongoondu', om tangaanak om i tangaanak di ragang po om i sapi', om i dumba', om it unta om i kaladai,” ka. 4 Om timungo' ngai' nod i Saul i soudor dau om intobo' no dau do hilo'd Tilaim. Om oinsanan nopo nga' 200,000 o soudor do mantad hilo'd Israil om 10,000 o soudor do mantad hilo'd Yohuda. 5 Om ongoi no i Saul om i soudor dau do hilo'd bandar do tulun dot Amalik om awang no iyolo' do hiri'd kinarasakan do bawang. 6 Om porikot no i Saul do boros do poinsan di tulun do Kini, it iso' bansa'd tulun, i taki-aki nopo diyolo' om osonong dot id tulun dot Israil, di kososoliwan di tulun dot Israil do mantad hilo'd Masir di gulu po. Poingkaa o boros di Saul, “Poggidu' kou no om tumongkiad nod mantad id tulun dot Amalik om a' kou i' kotonggoi'd apatai,” ka dau. Om tongkiad no i tulun do Kini do mantad hiri. 7 Om ngoyo' noddi di Saul songodo' i tulun dot Amalik, om kaala' no dau iyolo'. Om monokisaap nopo iyau do mantad pod hilo'd Hawila om gisom do nokorikot do hilo'd Sur, i ponong id koulayon do mantad hilo'd Masir. 8 Om tangkapo' no dau i Agag, i raja' do tulun dot Amalik, om patayo' ngai' no dau i tulun dot Amalik do suwai. 9 Nga' pinologos i' di Saul om i soudor dau do poimpasi i Agag. Om a' i' diyolo' pinatai i dumba' om i sapi' dit ongosonong, om i tangaanak do sapi' om kambing dit ongolomu' om nunu nopo it agayo o gatang. Iri no tayam-tayam dit angara-raat om it aiso' o guna' o pinatai diyolo'.
Nidu' do Raja' i Saul
10 Om boro-boros no o Tuhan dot id di Somuil, 11 “Monosol oku i' do siniliu ku'd raja' i Saul. Tu' nokotongkiad no iyau doho' om a' noddi mumboyo' dot isuhu' ku,” ka dau. Om kotogod no i Somuil. Om lugu-lugutai no dau o Tuhan do gisom do nosuaban. 12 Osuab poddi di kosuabon kawagu om ngoyo' no dau ihumo' i Saul do mongoi daa solowot dau. Om kosunudai no iyau do minongoi i Saul do hilo'd Karmol do minongoi popoingkakat do watu do maan do kopomusarahan do ngaran dau, om lombus po i Saul do hilo'd Gilgal. 13 Om ngoyo' nod Somuil solowoto' i Saul. Om boros kad Saul dot id dau, “Maha' daa om barakatan ko'd Tuhan, oi Somuil! Nowonsoi ku no i pinonuhuan do Tuhan,” ka dau. 14 Nga' boros kad Somuil do minuhot dau, “Ondung otopot do miagal dino, om nokuro tu' korongou oku'd tunga' do sapi' om tuni do dumba'?” ka. 15 Om boros kad Saul do suminimbar, “Ilo' nopo om nanu di tulun ku do mantad id tulun dot Amalik. Nanu diyolo' i dumba' om sapi' dot ongosonong kopio do maan do porsombahan di sorobon dot id Tuhan, i Kinorohingan nu. Nga' iri nopo suwai om pinatai ngai' no,” ka dau. 16 Nga' boros kad Somuil, “Tingkod pod moro-boros. Pokinongoho' poti boros do Tuhan di pinoboros dau dot id doho' kosodop,” ka dau. “Poboroso',” kad Saul. 17 Om boros kad Somuil, “Mulong pod aiso' i' daa o ngaran-ngaran nu dot opurimanan nu, nga' nosiliu ko i' do boyoon do koinsanai'd payat dot Israil. Pinili' ko i' do Tuhan do suminiliu'd raja' do tulun dot Israil, 18 om sinuhu' ko dau do mamatai ngai' di tulun dot Amalik dit angaraat diri. Om sinuhu' ko dau do sumaap diyolo' do gisom dot apatai ngai' nu iyolo'. 19 Nga' nokuro tu' a' ko minumboyo' di nisuhu'd Tuhan? Nokuro tu' minanganu ngai' kou nopo di dapu' diyolo' om gowoi poddi om nokowonsoi kou di karaatan do Tuhan?” ka dau. 20 Nga' boros kad Saul do suminimbar, “Nga' a' oku toi minumboyo'd boros do Tuhan? Tuminanud oku i' di nisuhu' dau. Natanggayan ku i' do minuli' i Raja' Agag, om napatai ngai' ku i' i tulun dot Amalik di suwai. 21 Nga' a' i' di tulun ku pinatai i dumba' om i sapi' dit ongosonong kopio di nangaanu do mantad id pisangod. Suwai ko' nigitan ngai' i' diyolo' iri do hiti'd Gilgal do maan do porsombahan di sumbolion dot id Tuhan, i Kinorohingan nu!” ka dau. 22 Nga' boros kad Somuil, “Honggo ma i korohian kopio'd Tuhan: i mumboyo' ko' i porsombahan om i porsombahan do sumbolion? Osonong nogi' do mumboyo' ko'd Tuhan ko' mantad do papatahak ko'd porsombahan di sumbolion, om osonong nogi' i mumboyo' ko' i lunok do dumba'. 23 Tu' sumaap nopod Tuhan om miagal poddi momurinait karaat; om it asawat o ginawo nga' iyo poddi tumuku' do tingolig karaat. Iyo nopoddi tu' niada' nu i boros do Tuhan om Tuhan nga' mada' no dot iya' o raja',” ka dau. 24 Om pagaku noddi i Saul dot id di Somuil do nokorongou'd miagal diri, boros ka dau, “Otopot nod nokowonsoi oku'd dusa. Tu' tuminolibamban oku di pinonuhuan do Tuhan om a' oku minamadul di boros nu. Minodosi oku di tulun ku, om gowoi poddi om tonudo' ku nopo i pinokianu diyolo'. 25 Nga' baino' nopo, om mokiampun oku no di dusa ku, om ompunai oku no, om tonudo' oku no do gumuli' do hilo'd Gilgal, om kasambayang oku i' dot id Tuhan,” ka dau. 26 Nga' boros kad Somuil, “A' oku no gumuli' do tumanud diya'. Tu' niada' nu i' i boros do Tuhan, om Tuhan nga' mada' no diya' do sumiliu'd raja' dot Israil,” ka dau. 27 Om tolikud noddi i Somuil do tumongkiad do kinoiyonon diri, nga' toidai nod Saul i rasuk di Somuil do gisom do nohurak. 28 Om boros kaddi di Somuil dot id di Saul, “Tadau nod baino' do hurakon do Tuhan o pomorintaan dot Israil do mantad id diya' om patahakon nondo dau dot id tulun do suwai dit osonong mantad ko' iya'. 29 Kinorohingan nopod Israil di kikagayaan om a' i' mongudut om a' posimban dot osorou dau, tu' iyau nopo om okon i' ko' tulun,” ka dau. 30 Om boros kad Saul, “Nokowonsoi oku nod dusa. Nga' pointalango' po daa o kosuahan nu doho' do hiti'd toguang diti boyoon do tulun ku om id toinsanan diti tulun dot Israil. Tanud no doho' do muli do hilo'd Gilgal om kasambayang oku i' dot id Tuhan, i Kinorohingan nu,” ka dau. 31 Om tanud no i Somuil di Saul do minuli' do hilo'd Gilgal, om sambayang no i Saul dot id Tuhan. 32 Om boros kaddi di Somuil, “Ngoyo' i Raja' Agag hitio'd doho',” ka. Om rikot no i Raja' Agag dot id dau, mikuwo'd osonong-sonong no daa o ginawo dau tu' kosorou daa iyau dot, ‘Nakatalib noddi o kapatayon!’ ka. 33 Nga' boros kad Somuil, “Poingkuro nopo i gayang nu do minanagak do tanak do piro-piro o molohing do tondu' om iyo noddi i tina' nu iya' dot atagakan do tanak dau,” ka dau. Om pintotoko' noddi di Somuil i Agag dot id dotimbabaan di pananaraban do porsombahan do hilo'd Gilgal. 34 Om uli' noddi i Somuil do hilo'd Rama, om i Saul nga' minuli' nogi' do hilo'd walai dau do hilo'd Gibia. 35 Om mantad poddi, do solinaid di Somuil do poimpasi, om a' no iyau insan ongoi solowot di raja'. Nga' tumongob diri i Somuil tu' monosol i' o Tuhan do minomili' di Saul do raja' dot Israil.
Pinili' i Daud do Sumiliu'd Raja'
1 Om alaid-laid noddi, om boros kad Tuhan dot id di Somuil, “Songkuro nopondo koloido' nu'ndo do tumongob dot i Saul o katangaban? A' ku toi iyau nadaan no do sumiliu'd raja' do tulun dot Israil? Nga' ongoi nogid hilo'd Baitlahim do dinondo, om migit no do tumau'd saitun, om mongoi i' dot id tiso' o tulun di roitan dot i Isai tu' nopili' ku no o tiso' di tangaanak dau do sumiliu'd raja',” ka. 2 Nga' boros kad Somuil, “Poingkuro oku'd momonsoi'd miagal diri? Tu' ondung korongou i Saul diti nga' atantu' no do ngoyon oku dau patayo',” ka. Om boros kad Tuhan, “Migit no do songinan o sapi' dit okoro' po om poboroson nondo dot id tulun dot ogumu' do mongoi ko pogi'd hilo' nga' mongoi ko papatahak dot id Tuhan do porsombahan di sumbolion. 3 Om alapon no i Isai dot id kapatahakan di porsombahan di sumbolion diri. Om sunudan tiya' indo ondung nunu it apatut nu'd wonsoyon. Pilion no do silihon do raja', i tulun do potudukon ku diya',” ka. 4 Om wonsoyo' nod Somuil i pinonuhuan do Tuhan dot id dau. Ongoi no iyau'd hilo'd Baitlahim om kotigowo ngai' nopo i boyoon di tulun do hiri'd bandar diri do minongoi solowot dau. Om ponguhot no iyolo', “Osonong-sonong i' o kaangai-angayan nu'd hiti?” ka diyolo'. 5 Om boros kad Somuil do suminimbar, “Oo, osonong i'. Nokorikot oku'd mongoi papatahak dot id Tuhan do porsombahan di sumbolion. Om lidangan no dokoyu o tinan dokoyu om katanud kou i' dot id kapatahakan di porsombahan do sumbolion diri,” ka dau. Om sinuhu' i' dau i Isai om i tangaanak di Isai do momolidang do tinan diyolo', om nalap dau iyolo' do hiri'd kapatahakan di porsombahan diri. 6 Om soira'ddi nokotimung iyolo' om kokito nod i Somuil i tanak di Isai dot i Iliab o ngaran. Om poingkaa daa ot osorou dau, “Iti nopo tulun di poingkakat dot id toguang do Tuhan diti nga' atantu' nod i pilion do Tuhan,” ka. 7 Nga' boros kad Tuhan dot id di Somuil, “Kada' ontong dilo rinanggou om ilo linigkang dau. Okon i' ko' ilo' o korohian ku tu' a' i' iyo'd don tulun o pogogontong ku. Tu' antangan nopod tulun om iri no i korupa-rupao' dot id soliwan, nga' antangan ku nopo iyoho' om i ginawo,” ka dau. 8 Om lohowo' no di Isai i tanak dau dot i Abinadab o ngaran, do mongoi timbaba' di Somuil. Nga' boros kad Somuil, “Ilo' nga' a' i' do Tuhan pilion,” ka dau. 9 Om suhuo' no di Isai i Sama do mongoi timbaba', nga' boros kad Somuil, “Ilo' nogi' nga' a' i' do Tuhan pilion,” ka dau. 10 Om iyo ngai' nopoddi o kinowoyo-woyoo' di Isai do minonuhu' di turu' o tanak dau do minongoi timbaba' di Somuil. Nga' boros kad Somuil dot id di Isai, “Aiso' i' o nopili'd Tuhan dot id pogialatan diyolo',” ka dau. 11 Om uhoto' nod i Somuil i Isai, “Haro po o suwai do tangaanak nu'd kusai?” ka dau. Om boros kad i Isai, “Haro po i komulakan, nga' maso dau do momogompi'd dumba',” ka dau. Om boros kad Somuil, “Ngoyo' iyau sunudai do mongoi'd hiti. Tu' a' toko' po papatahak do porsombahan di sumbolion dot a' po iyau korikot,” ka dau. 12 Om ponuhu' noddi i Isai do tulun do mongoi pomolohou di tanak dau. Iri nopo tanak dau'ddi nga' tanakwagu dit oligkang om osihat, om olumis o mato dau. Om boro-boros noddi o Tuhan dot id di Somuil, “Iti no. Pilio' iyau!” ka. 13 Om olomus nopo i Somuil do minongoi di tumau'd saitun, om tuntugai no dau i Daud do tanda' do pilion dau iyau, dot id toguang di tobpinai di Daud do suwai. Om maso iddi do pinorinta' do Rusod do Tuhan i Daud. Om mantad pod tadau'ddi om moyo-woyo' kasai' no dau o Rusod do Tuhan. Om uli' noddi i Somuil do hilo'd Rama.
Hiri'd Walai di Saul i Daud
14 Om tongkiad noddi di Saul i Rusod do Tuhan. Om inggoriton diri iyau'd rusod dot araat di sinuhu'd Tuhan do mongoi ponginggorit dau. 15 Om boros kaddi di piro-piro o susuhuon di Saul, dot id di Saul, “Oilaan i' dahai dot inggoriton ko'd rusod dot araat di sinuhu'd Tuhan do mongoi ponginggorit diya'. 16 Nga' ondung kaakun ko, om posodia' i' iyahai do mogihum do tulun di milo do mongombit do kecapi. Om soira' nopondo dot inggoriton ko di rusod dot araat, om kombiton nondo di tulun i kecapi dau, om olingasan ko indo,” ka diyolo'. 17 Om boros kaddi di Saul, “Pogihuman oku nod tulun dit oilo do pouni do tuunion, om angatan nod hiti'd doho',” ka dau. 18 Om boros ka di tiso' di susuhuon dau, “Haro o tanak di Isai, i tulun do Baitlahim diri, dot oilo do popouni do tuunion. Om kawagu po nga' oligkang iyau koulun, om osiou, om soudor dit osonong, om oilo do mimboros. Om woyoon po iyau'd Tuhan,” ka dau. 19 Om ponuhu' no i Saul do tulun do minongoi'd hiri'd di Isai do mongoi poboros do poingkaa, “Suhuon no i tanak nu, i Daud, i gompomogompi' di dumba' nu do mongoi solowot doho',” ka. 20 Om suhuo' no di Isai i Daud do mongoi solowot di Saul, mikuwo'd pinoigitan do songinan o tanak do kambing, om songinan o kaladai di ginandaran do roti om kantung do kulit di noponu'd waig dot anggur. 21 Om iyo noddi i Daud do minongoi'd hiri'd di Saul om kosiliu no iyau do susuhuon di Saul. Om orohian tomod diri i Saul di Daud, gisom do pinili' dau iyau do mongingigit do rapo-rapo dau'd sumangod. 22 Om posunudai nod Saul i Isai do poingkaa, “Orohian kopio oku'd Daud. Pologoson nopo iyau do mundorong do hiti do sumiliu'd susuhuon ku,” ka. 23 Om mantad poddi om pounion kasai' nopo di Daud i kecapi dau do soira-ira' nopod rikoton i Saul di rusod dot araat di sinuhu'd Tuhan. Om mogidu' nondo i rusod dot araat om osonong-sonong nondo i Saul.
Suminaap i Guliat di Tulun dot Israil
1 Insan o maso, om timungo' no di tulun do Pilistin i soudor diyolo' do hilo'd Soko. Pinotimungan nopo diyolo' om hilo'd Soko, it iso' o bandar do hilo'd watas do Yohuda. Om pomukiim no iyolo' do hilo'd piolitan do Soko om Asika, it id somok dot Ipis Damim. 2 Om i Saul om i tulun dot Israil nga' tuminimung nogi', om pomukiim no iyolo' do hilo'd Rantai dot Ila, om sodia' no iyolo' do mongoi sangod di tulun do Pilistin. 3 Iri nopo tulun do Pilistin om songingkakat dot id timpak dot iso' o nulu- nulu om iri no tulun dot Israil om id timpak dot iso' o nulu-nulu'd suwai. Piolitan nopo diyolo' om iso' po o kubong. 4 Om haro'ddi o kusai do roitan dot i Guliat, i mantad id bandar do Gat, do suminoliwan do mantad hiri'd kokiiman do tulun do Pilistin do minongoi pimboros do sumaap di tulun dot Israil. Koronggoho' nopo dau om haro i' doti' o tolu o mito. 5 Om kirasuk iyau do tambaga' di dong sumasangod do kawagato' nopo om haro i' doti' o limo nohopod om turu' o kilogram, om kitupi' iyau do tambaga'. 6 I gakod dau nga' kilapis do tambaga', om poinsaan po dau o tandus do tambaga'. 7 Iri nopo randagan do tandus dau om irad i' di salampad do pangawalan, om iri no dila' di tandus dau om haro i' doti' o turu' o kilogram do kawagato'. Om haro o soudor do hiri'd gulu-gulu dau do kiinigit di kolid dau. 8 Om ingkakat no i Guliat om pinggarangai no dau i soudor dot Israil, “Nunu maan dokoyu'd hino, tu' poimbaris do mongoi sangod? Okon toi ko' tulun oku'd Pilistin, oi dokoyu i turipon di Saul? Pomili' kou pogi' dot iso' o tulun dot id pogialatan dokoyu di gunsiou do mongoi saap doho'. 9 Ondung kamanang iyau, om kapatai no doho', om sumiliu no iyahai'd turipon dokoyu. Nga' ondung kamanang oku, om apatai ku no iyau, om osiliu kou nod turipon dahai. 10 Umbalan ku no kopio iyokoyu'd baino', oi soudor dot Israil. Pomili' kou pogi' dot iso' o tulun do mongoi saap doho'!” ka dau. 11 Om soira' di nokorongou i Saul om i tulun dau di boros do miagal diri om aiso' no o pokukurayan diyolo' tu' moddosi ngai' poo.
Hiri'd Kokiiman di Saul i Daud
12 I Daud nopo om tanak di Isai, i tulun dot Iprata, do mantad hilo'd Baitlahim, it id watas do Yohuda. I Isai nopoddi nga' kianak do walu' o kusai, om tontok nopoddi nosiliu i Saul do raja' om molohing no kopio i Isai. 13 Minongoi ngai' nopo tanud di Saul do sumangod i tolu tangaanak dau'd angagayo. Ngaran nopo dit id dotuo om i Iliab, om iri no koduwo om i Abinadab, om iri no kotolu om i Sama. 14 I Daud nopo om tanak dau do komulakan. Om tontok di moyo-woyo' nod Saul do sumangod i tolu tobpinai dau dot id dotuo, 15 om misomonu-monu' do tongkiadan di Daud i Saul, tu' muli' iyau do hilo'd Baitlahim do mongoi padtamong di baanan do dumba' di tapa' dau. 16 Om monikid kosuabon nopo om monikid sosodopon do minsomok i Guliat di tulun dot Israil om mimboros do sumaap diyolo' do solinaid dot apat nohopod o tadau. 17 Insan tadau, om boro-boros no i Isai dot id di Daud, “Ongoi anu dot ongohopod o kilogram di gandum do ginowi om hopod o liob do roti, om ngoyon no pootodo' dot id tobpinai nu do hilo'd kokiiman do soudor. 18 Om igitai iti hopod o bulugu' do montiga' do patahakon di boyoon do soudor. Uhoton no kopio ondung poingkuro-kuro no i tobpinai nu om migit nod maan ku'd pogintutunan do nokosolowot kopio ko diyolo' om ongosonong-sonong iyolo'. 19 I Raja' Saul nopo om i tobpinai nu, om koinsanai di tulun dot Israil om hilo'd Rantai dot Ila do sumangod di tulun do Pilistin,” ka dau. 20 Om osuab poddi di kosuabon kawagu, om tungag no i Daud om ponuhu' no iyau do tulun do suwai do mongoi padtamong di dumba'. Om igitai ngai' no dau i taakanon om pamanau no do tumanud di pinonuhuan di tapa' dau. Om korikot no iyau do hiri'd kokiiman do tontok di mamanau no i tulun dot Israil do mongoi sangod om mikuwo'd sampangkis-pangkis do pangkis do sumangod. 21 Om mitimbaba' nopo i soudor dot Israil om i soudor do Pilistin do posodia' nod misangod. 22 Om poiliho' nopoddi di Daud i taakanon di nigitan dau dot id tulun di madtatamong di taakanon do soudor om tangkus nod minongoi'd hiri'd tiyonon do misangod. Om ongoi no iyau solowot di tobpinai dau om ponguhot no ondung poingkuro-kuro no iyolo'. 23 Nga' maso dau do moro-boros diyolo' om pamanau no i Guliat do minongoi'd hiri'd gulu do minimboros do sumaap dot Israil do miagal di pimboroson kasai' dau. Om i Daud nga' nokorongou nogi' di pinoboros dau'ddi. 24 Om kokito poddi di tulun dot Israil i Guliat om panangkus no iyolo' do minogidu' tu' moddosi no kopio iyolo'. 25 “Antangai pogi' iyau!” ka diyolo' do mogiboro-boros. “Om pokinongoho' pogi' ilo boros dau do sumaap. Nakabatos no i Saul, i raja' toko' do manahak dot isomuli' dit agayo dot id tulun di kapatai di Guliat. Om pokowinan po di raja' i tanak dau'd tondu' dot id tulun diri, om sompiiyon dau nga' a' no minog do mambayar do sukai,” ka diyolo'. 26 Om uhoto' no di Daud i soudor di hiri'd toning dau, “Nunu ot isomuli' di tulun di kapatai dilo tulun do Pilistin, om i kopoidu' do tulun dot Israil do mantad id kointingayaman diti? Nga' isai kopio toi ilo tulun do Pilistin do kapir dilo', tu' kasaap kopio'd mimboros do sumaap do soudor do Kinorohingan di poimpasi?” ka dau. 27 Om sunudai no diyolo' iyau dit isomuli' do patahakon dot id tulun di kapatai di Guliat. 28 Om korongou nod i Iliab, i tobpinai di Daud dot id dotuo, i boros di Daud dot id soudor diri, om kotogod no iyau di Daud. Boros ka dau, “Nunu maan nu'd hiti? Isai no o sinuhu' nu'd madtamong di dumba' nu do hilo'd tana' do kowotuan? Oilaan ku i' ino kowoyo-woyoon nu'd minggunsiou-siou; mongoi ko no ontong do mogisasangod do hiti koii?” ka dau. 29 Om boros kad Daud do suminimbar, “Nunu o sala' ku? Minuhot oku no toomod diri!” ka dau. 30 Om ongoi noddi iyau solowot di soudor do suwai om iri kasai' nopo o tuhoton dau, om pointikid-tikid do muhot iyau nga' iyo kasai' nopoddi ot isimbar. 31 Nga' haro o piro-piro tulun do nokorongou di boros di Daud. Om poboroso' no diyolo' iri dot id di Saul. Om lohowo' noddi di Saul i Daud do mongoi solowot dau. 32 Om boros kad Daud dot id di Saul, “Oi Tuan Raja', a' toko' i' minog do moddosi di tulun do Pilistin diri! Tu' ngoyon ku i' iyau saapo',” ka dau. 33 “Kada'!” kad i Saul do suminimbar. “Poingkuro ko'd sumaap dau? Tu' iya' nopo om omulok po, nga' iyau nopo om noubas nod sumangod do mantad po dit okoro' po iyau,” ka dau. 34 Nga' boros kad Daud dot id di Saul, “Iyoho' nopo om oubas i' do madtamong di dumba' do tapa' ku. Om soira' nopod rumikot o singa ko' bohuang do mongoi daa panabpo di dumba' om 35 gusaon ku nopo om patayon ku no om apasi indo i dumba'. Om ondung takaman oku di singa ko' i bohuang, om maan ku nopo kotolo' o liou om bobogon ku no do gisom dot apatai. 36 Nakapamatai oku nod singa om bohuang, om iti tulun do Pilistin do kapir diti nga' oiyo iddi, tu' kasaap kopio i' do mimboros do sumaap diti soudor do Kinorohingan di poimpasi. 37 Pinoidu' oku id Tuhan do mantad id singa om bohuang om poiduwon oku i' dau do mantad id tulun do Pilistin diti,” ka dau. Om boros kaddi di Saul, “Ongoi no, om maha' daa om woyoon ko'd Tuhan,” ka. 38 Om patahako' nod Saul di Daud i pakayan do don sumasangod om i rasuk do basi' om pakayo' noddi di Daud iri. Om potupiyai nogiddi di Saul di Daud i tupi' do tambaga'. 39 Om pokogoso' no di Daud i gayang di Saul do hiri'd rasuk do basi', om umbal noddi iyau do mamanau. Nga' a' no iyau milo'd mamanau tu' a' i' iyau noubas do manampakai'd pakayan do don sumasangod. “A' oku i' milo'd manampakai'dti,” ka dau. Om iduwo' ngai' nopoddi dau i pakayan do don sumasangod. 40 Om igitai no dau i sukud do dong madtatamong do dumba', om anu iyau'd limo o watu dit ongolunau do mantad hiri'd bawang, om posuango' no dau do hiri'd kantung dau. Om poingigit dau o tullogong, om ongoi nogiddi iyau timbaba' di Guliat.
Naala' di Daud i Guliat
41 Om pamanau noddi i tulun do Pilistin do mongoi insomok di Daud, om hiri'd gulu-gulu dau i mongingigit di kolid dau. 42 Nga' soira' di nokito kopio di Guliat i Daud, om koirak poddi tomod i Guliat do monguntotori' dau tu' omulok po i Daud om oligkang kinoulunan. 43 Om boros kad i Guliat dot id di Daud, “Nunu maan nu'ndo sukud? Tasu oku daa dot osorou nu?” ka dau. Om pimpapalai no dau i Daud dot id suang do ngaran di ponokokinorohingan dau. 44 Om boros ka kawagu dau, “Kaino pogi'd hiiti. Om paakanan ku i' o rata' nu di tombolog om i nintorusan,” ka dau. 45 Om boros kad Daud, “Iya' nopo om rumikot do sumaap doho' do mikuwo'd gayang, om tandus, om totokon. Nga' iyoho' nopo om rumikot do sumaap diya' do mikuwo'd ngaran do Tuhan it Agayo Kuasa', i Kinorohingan do soudor dot Israil, it indaraaton nu'ddi. 46 Tadau nod baino' do patahakon ko'd Tuhan dot id doho'. Tu' aala' ku i' iya' om oidu' ku o tulu nu. Om paakanan ku'd tombolog om nintorusan o rata' nu om i rata do soudor do Pilistin. Om koilo indo o pointongkop do pomogunan do haro o Kinorohingan do tukuon dahai, i tulun dot Israil, 47 om kokito ngai' indo o koinsanai'd tulun do hiti dot a' i' minog do haro o gayang ko' tandus do Tuhan do mamasi do tulun dau. Iyau no i kamanang dot id suang do pisangadan diti, om patahakon kou i' dau dot id suang do longon dahai,” ka dau. 48 Om soira' di mininsomok kawagu i Guliat di Daud, om osiau nopoddi i Daud do minanangkus do kuminaa ponong id borisan di soudor do Pilistin do mongoi saap dau. 49 Om kokog no i Daud di kantung dau om anu nod iso' o watu, om polositiko' no dau dot id di Guliat. Om koonong nopo di watu o turos di Guliat om gisom do nakatanom di korulung do tulu dau. Om kahaba' nopoddi i Guliat om kotungub no do hiri'd tana'. 50-51 Om panangkus no i Daud do minongoi'd hiri'd kinoilihon di Guliat om ingkakat no iyau do hiri'd toning dau. Om kodongo' no dau i gayang di Guliat do mantad hiri'd tangkap om iduwo' no dau o tulu di Guliat, om kapatai noddi i Guliat. Om miagal noddi i Daud do minangala' om minamatai di Guliat, tu' aiso' i' o gayang dau, suwai ko' tullogong noo om iso' o watu do pinamatai dau! Soira' di nokito di tulun do Pilistin do napatai no i gunsiou diyolo' om panangkus no iyolo'd minogidu'. 52 Om pamangkis no i soudor dot Israil om i soudor do Yohuda om gusao' no diyolo' i soudor do Pilistin do mantad hilo'd Saaraim om gisom do nokorikot do hilo'd Gat om hilo'd wawayaan dot agayo dot Ikron. Iri nopoddi tulun do Pilistin di nongosuhat nga' songingiliu pod hiri'd ralan! 53 Om soira' di guminuli' i soudor dot Israil do minongoi pomogusa' di soudor do Pilistin, om ngoyo' no diyolo' pingonuo' it id suang do kiim di soudor do Pilistin. 54 Om ngoyo' nod Daud i tulu di Guliat om igitai nod hilo'd Yorusalim, nga' iri nopo rapo-rapo di Guliat om pinoopi' i' dau do hiri'd kiim dau.
Pinosolowot i Daud di Saul
55 Soira'ddi nokito di Saul i Daud do mongoi saap di Guliat, om uhoto' no dau i Abnor, i boyoon do soudor dau, “Abnor, isai o sanganak dilo tanakwagu dilo'?” ka dau. “Oi Tuan Raja', a' oku i' koilo,” kad Abnor do suminimbar. 56 Om boros kad Saul do minonuhu', “Ongoi poguho-guhot ondung isai sanganak dilo',” ka. 57 Om soira'ddi guminuli' i Daud do hiri'd kokiiman, di napatai dau i Guliat, om angatai no iyau di Abnor do minongoi solowot di Saul. Om poingigit po di Daud i tulu di Guliat. 58 Om uhoto' no di Saul iyau, “Isai o sanganak diya', oi anakwagu?” ka. Om boros kad Daud do suminimbar, “Iyoho' nopo om tanak di Isai, i mantad hilo'd Baitlahim,” ka dau.
1-2 Om kopongo po i Saul do monokiboro-boros di Daud, om oduhai no dau i Daud do minuli' do hiri'd walai di tapa' dau. Om korongou nod i Yonatan, i tanak di Saul, i pinibara-barasan diyolo'ddi. Om i Yonatan diri nga' osianan nogi' kopio di Daud do miagal pod osianan do dau'd tinan. 3 Om sumpa' noddi i Yonatan do mambalut kasai' di Daud do gisom dot alaid, tu' osianan kopio i' iyau di Daud. 4 Om iduwo' no dau i rasuk di poinrasuk dau om patahako' no dau di Daud, om iri nogi' i pakayan dau do don sumasangod, om i gayang, om i pana', om i tagkos dau nga' pinatahak i' dau. 5 Om owonsoi kasai' nopod Daud kosonong-sonong o koinsanai di ponuhuan di Saul dau do momonsoi. Om siliho' noddi iyau di Saul do boyoon di soudor dau. Om asanangan ngai' nopod i Daud i soudor om i susuhuon di Saul.
Mosol i Saul di Daud
6 Tontok di minuli' i Daud, di napatai dau i Guliat, i tulun do Pilistin diri, om tontok di baris no i soudor do suwai do sumuang di bandar, om ongoi ngai' no solowot di Saul i tongoondu' do mantad id pointikid-tikid do bandar dot Israil. Om minsinding po iyolo' dot atataadan, om mintari' om popinguni do rebana om kecapi. 7 Om ongotood tomod diri iyolo' om modsinding do poingkaa, “Boribu-ribu o pisangod do napatai di Saul, nga' hinapadan noribu o napatai di Daud,” ka. 8 Om kotogod tomod noddi i Saul tu' a' iyau norohian do nokorongou'ddi. Boros ka dau, “Hinapadan noribu o poboroson diyolo'd napatai di Daud, nga' doho' nopo om boribu-ribu noo. A' no alaid om silihon no diyolo'd raja' i Daud!” ka dau. 9 Om mantad poddi om mosol no om monoinu' i Saul di Daud. 10 Tadau noddi kawagu, om sigog id rikoto' i Saul di rusod dot araat di sinuhu'd Kinorohingan. Om miagal poddi iyau'd tulun do mulau-ulau do muhod do hiri'd walai dau. Maso nopoddi nga' mongombit i Daud di kecapi do miagal di koubasanan dau om i Saul no om kiinigit do tandus. 11 Om poingkaa'ddi ot osorou di Saul, “Maan ku lo' palantako' do hilo'd limput,” ka. Om potokono' no dau dot induwo i tandus dot id di Daud, nga' noilag goduwo id Daud iri. 12 Om ooris diri i Saul di Daud tu' woyoon i' iyau'd Tuhan, nga' i Saul nopo om notongkiadan nod Tuhan. 13 Om iri noddi o kinopoinsoduan di Saul di Daud do mantad id dau, om siliho' no dau i Daud do boyoon do soribu o soudor. Om i Daud no o minogulu di soudor dau dot id pointikid-tikid do pisangadan. 14 Om koundar kasai' nopo o wonsoyon di Daud tu' woyoon i' iyau'd Tuhan. 15 Om soira' di nokito'd Saul do koundar kasai' i Daud, om okon nogiddi dot ooris kopio iyau di Daud. 16 Nga' osianan ngai' nopod i Daud i tulun dot Israil om Yohuda tu' iyau no o boyoon dit ogumu' kopio o nowonsoi dot osonong.
Kinawin di Daud i Tanak di Saul do Tondu'
17 Om boros kaddi di Saul dot id di Daud, “Diya i Mirab, i tanak ku'd tondu' dit id dotuo. Om pokowinan ku no diya' ilo' do kopointalang ko nod kosioho' nu do sumangod dot id suang do pisangadan do don Tuhan,” ka dau. (Tu' osorou nopo daa di Saul nga' iyo nodti o ralan dot apatai i Daud di tulun do Pilistin om okon indo ko' iyau kopio o kapamatai.) 18 Om boros kad Daud do suminimbar, “Isai oku'dti om nunu kopio o sompiiyon ku do hiti'd Israil tu' silihon oku do monongiwan do Raja'?” ka dau. 19 Nga' soira' di norikot i maso do kapatahakan di Mirab dot id di Daud, om pokowinai nogiddi i Mirab di Adriol, i tulun do mantad hilo'd bandar do Mihola. 20 Nga' minuhang iddi di Daud i tanak di Saul do tondu' di tiso', i roitan dot i Mikal. Om asanangan nopo i Saul do nokoilo'ddi. 21 Osorou nopo dau nga', “Patahakon ku nopo di Daud i Mikal om silihon ku indo iyau do lawa' dot id di Daud, om apatai indo iyau di tulun do Pilistin,” ka. Om koinduwo noddi di Saul do momoros dot id di Daud do poingkaa, “Monongiwan ko no doho',” ka. 22 Om suhuo' nod Saul i pagawai dau do momolisok-lisok do mongoi pomisunud di Daud dot orohian iyau di Daud om posunudon dot oinsanan nopo i pagawai dau dot osianan di Daud. Om posunud nogi' do tontok noddi o maso dot osonong do kowinon di Daud i tanak dau'd tondu'. 23 Om posunudo' no diyolo' iri dot id di Daud. Nga' boros kad i Daud do suminimbar, “Ondos daa dokoyu om osoonong do sumiliu'd monongiwan do raja'? Iyoho' nopo om tulun i' do mosikin om aiso' o ngaran-ngaran,” ka dau. 24 Om sunudai no di pagawai i Saul di pinoboros di Daud. 25 Om suhuo' no kawagu iyolo' di Saul do momisunud di Daud do poingkaa, “Pokionuon nopo di raja' do pongopung di tondu' om hatus o kulit di sisinsibon do monunat do mantad id tulun do Pilistin om osulian i' i pisangod dau,” ka. (Iti no o ralan dit osorou di Saul dot apatai i Daud di tulun do Pilistin.) 26 Soira' di nokosunud di pagawai i boros diri dot id di Daud om pangakun no i Daud do sumiliu'd monongiwan di raja'. Om tontok dit a' po norikot o tadau do pikowinan, 27 om ongoi no i Daud om i tulun dau pamatai do duwo nahatus o tulun do Pilistin do hiri'd watas do Pilistin. Om igitai no dau dot id di Saul i kulit do sisinsibon do tontok do monunat dot irad di pinokianu dau. Om pokowinai noddi di Saul di Daud i Mikal. 28 Om koilaai noddi kopio di Saul do moyo-woyo' o Tuhan di Daud om osianan kopio di Daud i Mikal, i tanak dau'd tondu'. 29 Om okon nogiddi dot ooris kopio i Saul di Daud. Om araatan kasai' nopoddi i Saul di Daud do solinaid dau do poimpasi. 30 Om pointikid-tikid do mongoi saap diyolo' i soudor do Pilistin om poillobi-lobi no kasai' o kamanangan di Daud dot id pisangadan ko' i soudor di Saul do suwai. Om iri noddi o pinapabantug kopio di Daud.
Ginusa' di Saul i Daud
1 Om sunudai nod i Saul i tanak dau, i Yonatan, om koinsanai di pagawai dau do pokipapatayan dau i Daud. Nga' i Yonatan nopo om osianan i' kopio di Daud. 2 Om iri noddi o kinopomisunudan dau di Daud, boros ka dau, “Pokipapatayan ko moti' di tapa' ku. Om antaan-taan no. Kosuabon nopod suab, om mongoi no lisok dot id iso' o kinoiyonon dit a' oilaan do wokon om mundorong nopod hiri. 3 Om moyo' oku'ndo di tapa' ku do mongoi'd hiri'd somok di kinoiyonon di linisok nu om monokiboro-boros oku'ndo dau do pasal diya', om sunudan ku indo iya' do kootuson di pibara-barasan dahai,” ka dau. 4 Om poboroso' noddi di Yonatan o kosonongo' di Daud dot id di Saul. Boros ka dau, “Apa', kada' kopio pokorualai i Daud, i susuhuon nu. Tu' a' i' iyau insan pomonsoi'd kasalaan dot id diya'; tu' osonong ngai' i' o koinsanai di winonsoi dau dot id diya'. 5 Tontok di minongoi iyau pamatai di Guliat om a' no dau sinorou o dau'd tinan, om onuwai nod Tuhan do kamanangan dit agayo kopio o tulun dot Israil. Iya', oi apa', nga' nokokito nogi', om notood tomod ko do tontok diri. Nga' nokuro'ddi tu' momonsoi ko dot araat dot id tulun dit aiso' sala', om pokipapatayan nu i Daud do baino' dot aiso' o paantakan?” ka dau. 6 Om kotumbayaai iddi i Saul do nokorongou di boros di Yonatan, om sumpa' no iyau dot id suang do ngaran do Tuhan dot a' iyau mamatai di Daud. 7 Om lohowo' noddi di Yonatan i Daud om sunudai no dau di pinibara-barasan diyolo'. Om angatai noddi dau i Daud do minongoi'd hiri'd di Saul om karaja' no kawagu i Daud dot id di Saul do miagal di gulu. 8 Om ongoi po kawagu i tulun do Pilistin panangod diyolo'. Om ngoyo' nod Daud saapo' iyolo', gisom do naala' dau i tulun do Pilistin om poggidu' ngai' noddi i tulun do Pilistin. 9 Insan tadau om sigog id rikoto' i Saul di rusod dot araat di sinuhu'd Tuhan. Tontok nopoddi nga' poirikau i Saul do hiri'd walai dau om kiinigit iyau di tandus dau. Om i Daud nga' hiri nogi' do popouni di kecapi dau. 10 Om mumbal daa'ddi i Saul do papalantak di Daud do hiri'd limput. Nga' noilag i' di Daud, om iri nogiddi i tandus o nakalantak do hiri'd limput. Om poggidu' no i Daud do mantad hiri. 11 Om totuong iddi do minonuhu' i Saul do piro-piro o tulun do mongoi padtamong di walai di Daud. Om sinuhu' daa dau iyolo' do mamatai di Daud di kosuabon. Nga' sunudai nod i Mikal, i sawo di Daud, i Daud. Boros ka dau, “A' ko nopo moti' mogidu' do totuong do baino' om apatai ko nod suab,” ka dau. 12 Om polintuhuno' no di Mikal i Daud do pinawaya' di liligaon, om poggidu' no i Daud do mantad hiri. 13 Om ngoyo' noddi di Mikal i tininganak, i tingolig do sompiiyon dau, om poliiyo' nod hiri'd toodopon di Daud. Om nongoi dau i bantal di hulu'd kambing do winonsoi om pabantalo' no di tulu di tininganak. Om kumutai nogiddi dau. 14 Soira' di nokorikot i tulun do sinuhu' di Saul do mongoi daa panangkap di Daud om sunudai noddi di Mikal iyolo' do sumakit i Daud. 15 Nga' suhuo' po kawagu di Saul i tulun dau do mongoi pogontong di Daud, do mato kopio o kokito. Boros ka dau, “Antayangon nopo iyau do mongoi'd hiti do hiri'd toodopon dau, om apatai ku i' iyau,” ka dau. 16 Om suang no i piro-piro o tulun diri do hiri'd bilik om kokito'ddi diyolo' dot iri i' i tininganak do tingolig i hiri'd toodopon om i bantal do hulu'd kambing do winonsoi o pinoulunanan. 17 Om uhoto' no di Saul i Mikal, “Nokuro tu' nakalan oku diya' om pinologos nu'd mogidu' i pisangod ku?” ka dau. Om boros kad Mikal do suminimbar, “Boros ka dau om patayon oku no dau dot a' ku no iyau tulungon do mogidu',” ka. 18 Om poggidu' no i Daud om ongoi no do hilo'd di Somuil do hilo'd Rama. Om susuyo' ngai' nopod Daud dot id di Somuil o koinsanai di winonsoi di Saul dot id dau. Om pakayaai no diyo Daud di Somuil do hilo'd Nayot om undorong no iyolo'd hilo'. 19 Nga' kosunudai i' i Saul do hilo'd Nayot i Daud, i hilo'd somok do Rama. 20 Om ponuhu' no i Saul do piro-piro o tulun do mongoi panangkap di Daud. Nga' tontok di nokokito i piro-piro tulun diri do piro-piro o nabi di mogiwoyo-woyo' do mintari' om minggiak do moyo-woyo' di Somuil, i boyoon diyolo', om iyolo' nogiddi nga' porintao' nod Rusod do Kinorohingan, om timpuun no iyolo' iyau do mintari' om minggiak. 21 Soira' di nokorongou i Saul do habar diri om ponuhu' po kawagu iyau'd tulun do mongoi'd hiri, nga' i tulun diri nga' minintari' i' om mininggiak. Om ponuhu' po i Saul do tulun, do kointolu no dau'd minonuhu', nga' miagal iddi o nosiliu dot id diyolo'. 22 Om ongoi noddi i Saul iyau do hilo'd Rama. Om tontok di nokorikot iyau do hiri'd torobong dot agayo do hilo'd Soku, om ponguhot no iyau ondung honggo iyo Somuil di Daud. Om kosunudai no iyau do hilo' iyolo'd Nayot, i hilo'd somok do Rama. 23 Om pakayaai nod i Saul do hilo'd Nayot, nga' tontok di manau-panau po iyau om porintao' no iyau kadauu do Rusod do Kinorohingan, gisom dot iyau nogi' nga' minintari' iddi om mininggiak do gisom do nokorikot iyau do hilo'd Nayot. 24 Om iduwo' nod Saul o pakayan dau, om pintari' noddi om pinggiak no dot id toguang di Somuil. Om kahaba' nogiddi iyau do hiri'd tana', om poillabas nopoddi do nosongodou om gisom do nosuaban. (Om iri no o kinoimpuunon di boboroson do poingkaa, “Do nosiliu id nabi i Saul iyau?” ka.)
Tinulung di Yonatan i Daud
1 Om poggidu' noddi i Daud do mantad hilo'd Nayot, i hilo'd somok do Rama, om ongoi no iyau solowot di Yonatan. Om uhoto' no dau i Yonatan, “Nunu o kasalaan ku? Nunu ot araat do nowonsoi ku? Nunu o nowonsoi ku dot araat om nunu o dusa ku dot id tapa' nu tu' gisom do pokipapatayan oku di tapa' nu?” ka dau. 2 Om boros ka di Yonatan do suminimbar, “Kada' pomoros dot iyo'ndo, tu' sumumpa' oku no dot id Tuhan dot a' ko i' kopio patayon. Tu' sunudan kasai' oku i' di tapa' ku do nunu nopo o wonsoyon dau, do hal tuu dit agayo ko' okoro' po. Om a' i' iyau insan do mogolim dot id doho' do nunu nopo. Om a' i' otopot ino pinoboros nu,” ka dau. 3 Nga' boros ka di Daud do suminimbar, “Noilaan no di tapa' nu dot osianan ko doho'. Om atantu' nod a' iyau popoilo diya' di maan dau wonsoyo'ddi tu' mada' iyau do tumongob ko. Nga' otopot no kopio iti poboroson ku dot id suang do ngaran do Tuhan di poimpasi do sallaang po o kosoduwo' ku do mantad id kapatayon,” ka dau. 4 Om boros kad Yonatan, “Wonsoyon ku i' o nunu nopo o pokionuon nu,” ka dau. 5 Om boros kad i Daud, “Suab nopo om Tadau dot Agayo do mamaramai do Tulan do Wagu. Otopot nopo daa kopio om tumorungak oku daa di raja' do makan. Nga' ondung kaakun ko om mongoi oku lisok do hilo'd talun do gisom do sosodopon do suab diino. 6 Ondung monguhot i tapa' nu ondung nokuro tu' a' oku nakarapou, om poboroson nopo do pinologos oku diya' do minuli' do hilo'd Baitlahim do mongoi papatahak do porsombahan di patahakon dot insan do sontoun do miwoyo' do toinsanan di sompiiyon ku. 7 Ondung a' iyau otogod, om aiso' no o ligogon ku. Nga' ondung otogod iyau om oilaan nu indo do nokopomusorou mantad no iyau do pokoruol daa doho'. 8 Om mokitulung oku no diya' do wonsoyon nu'ti pokionuon ku, tu' nokogirot to no i pinibatasan to goduwo dot id toguang do Tuhan. Ondung kisala' oku om iya' nogi' o mamatai doho'! A' no minog dot i tapa' nu o mamatai doho',” ka dau. 9 Om boros ka di Yonatan do suminimbar, “Kada' katangkabo, tu' ondung oilaan kopio ku do nokopomusorou i tapa' ku do pokoruol diya' om atantu' nod sunudan tiya' i',” ka dau. 10 Om uhoto' nod i Daud i Yonatan, “Isai nondo o momisunud doho' dot apantog no o ponimbar di tapa' nu diya',” ka. 11 Om boros kad Yonatan, “Kaino mongoi'd hilo'd talun,” ka dau. Om ongoi no goduwo iyolo'd hiri'd talun. 12 Om boros kad Yonatan dot id di Daud, “Tuhan no, i Kinorohingan dot Israil o sumiliu'd sasi' to. Tu' dongiyo'dti nopod suab ko' suab diino om uhoton ku nondo i tapa' ku. Ondung osonong iyau dot id diya' om monuhu' oku id tulun do mongoi pomisunud diya'. 13 Nga' ondung nokopomusorou iyau do pokoruol diya' om pologoson nopo o Tuhan do mamatai doho' ondung a' ku no iya' sunudan om a' tiya' no pologoson do mogidu' om a' ko i' apatai. Maha' daa om woyoon ko'd Tuhan do miagal di minomoyo' iyau di tapa' ku di gulu po. 14 Om ondung a' oku apatai om igitan no i batos to dot id toguang do Tuhan do tumorodok ko dot id doho'. Om ondung apatai oku, 15 om pointalangon no o kotorodoko' nu dot id sinakagon ku do gisom do poingompus. Om soira' nopondod apatai ngai'd Tuhan o pisangod nu, 16 om poinggirot i' kasai' iti pibatasan to. Ondung a' nu igitan i pinibatasan diri om hukuman ko nod Tuhan,” ka dau. 17 Om koinduwo nodti do minonuhu' i Yonatan di Daud do mamatos dot osianan dau, tu' osianan kopio i' i Yonatan di Daud do miagal dot osianan iyau do dau'd tinan. 18 Om boro-boros po kawagu i Yonatan di Daud, “Suab nopo tu' Tadau dot Agayo do Tulan do Wagu, om atantu' nod oilaan do tulun dot a' ko hino tu' a' ko i' hino do potorungak do makan. 19 Om ondung a' ko hino do suab diino om atantu' nod ngoyon ko ihumo'. Iyo nopoddi, om mongoi nogi' do hilo'd linisok nu di gulu om lumisok nod hiri'd tirung di nokotimbunon do watu. 20 Om mamana' oku nondo dot intolu do ponong hiri'd tinimbunan do watu do miagal-agal do haro o pokiaanangan ku. 21 Om suhuon ku nogindo i susuhuon ku do mogihum di pana'ddi. Om ondung momoros oku dot id susuhuon ku dot, ‘Antangai i pana' do hiiti'd somok, ngoyo' no!’ ka dot id dau, om komoyon nopoddi om aiso' i' o koligagaanan nu om milo ko nod sumoliwan do mantad hiri. Om sumumpa' oku dot id suang do ngaran do Tuhan di poimpasi dot aiso' i' o nunu-nunu'd koligagaanan nu. 22 Nga' ondung momoros oku dot id dau dot, ‘Hiino'd sodu' i pana',’ ka, om mogidu' no tu' komoyon nopoddi nga' suhuon ko'd Tuhan do mogidu'. 23 Nga' iri nopo batos di nowonsoi to dot id pialatan to goduwo om Tuhan no o mongilo-ilo om oigitan kasai' to indo iri do gisom dot alaid,” ka dau. 24 Om ongoi no i Daud lisok do hiri'd talun. Om tontok di Tadau dot Agayo do Tulan do Wagu, om ongoi no i Saul rapou di poginakanan. 25 Om irikau no i Saul do hiri'd tiirikohonon dau dit id toning di limput. Om i Abnor nopo nga' poirikau do hiri'd toning di Saul, om i Yonatan no om poirikau do hiri'd dotoguangan di Saul. Nga' aiso' i' o poirikau di tiirikohonon di Daud. 26 Nga' tadau nopoddi om aiso' i' o boros di Saul, tu' poingkaa ot osorou dau, “Haro doti' o nosiliu dot id di Daud di minonosomu' dau dot id pagantangan do tugama',” ka. 27 Om tadau noddi kawagu, di koduwo nod tadau do mamaramai do Tulan do Wagu, om aiso' po kasai' o poirikau di tiirikohonon di Daud. Om uhoto' noddi di Saul i Yonatan, “Nokuro tu' a' hino i Daud di konihab om baino' nga' a' i' hino do hiti'd poginakanan?” ka dau. 28 Om boros kad Yonatan do suminimbar, “Minokibanar iyau doho' do mongoi'd hilo'd Baitlahim. 29 Tu' poingkaa o boros dau, ‘Pologoso' oku nod mamanau, tu' mongoi oku papatahak do porsombahan do miwoyo' di sompiiyon ku do hilo'd Baitlahim, om sinuhu' oku di tobpinai ku dot id dotuo do mongoi'd hilo'. Ondung kaakun ko, om pologoso' oku nod mongoi solowot di sompiiyon ku,’ ka dau. Om iri noddi ot a' dau nakarapahan do hiti'd poginakanan nu, oi Apa',” ka dau. 30 Om kotogod tomod noddi i Saul di Yonatan do nokorongou iyau'ddi, om gisom do minomoros iyau do poingkaa, “Iya' no o tanak dit araat kopio! Baino' nopoddi om oilaan ku no do mogobi' ko di Daud. Om mongintingayam ko do tinan nu om i tina' nu. 31 A' ko toi koilo dot ondung poimpasi po i Daud om a' ko no osiliu'd raja' do pomogunan diti? Ngoyo' iyau angatai'd hiti! Tu' mositi' nod patayon iyau!” ka dau. 32 Nga' boros kad Yonatan do suminimbar, “Nokuro tu' patayon iyau? Nunu o dusa dau?” ka. 33 Om korongou poddi di Saul i boros di Yonatan om diri nod pinotokon di Saul i tandus dau dot id di Yonatan do pamatai daa dau. Om koilaai nogiddi kopio di Yonatan do pokipapatayan no kopio di tapa' dau i Daud. 34 Om ingkakat no i Yonatan do mantad hiri'd tirikohonon dau om soliwan no di kinoiyonon diri do mikuwo'd otogod tomod. Om a' no iyau minangakan do nunu- nunu do tadau'ddi, i tadau do koduwo do karamayan do Tulan do Wagu, tu' tumongob no kopio iyau do kosorou di Daud do nindaraat di Saul, i tapa' dau. 35 Kosuabon noddi kawagu om ongoi no i Yonatan do hiri'd talun do mongoi solowot di Daud, do miagal di pinibatasan mantad diyolo'. Om pangangat no iyau dot iso' o kusai dit okoro' po. 36 Om boros ka dau dot id tanak do kusai'ddi, “Manangkus no om ngoyon i' ihumo' i pana' do papanaon ku,” ka dau. Om panangkus no i tanak om papanao' nod Yonatan i pana' do pinosogulu di tanak diri. 37 Om tontok di nokorikot i tanak do hiri'd kinorotuon di pana'ddi om garangai no di Yonatan iyau, “Osodu' pod mantad hino i pana'. 38 Siahai no! Kada' andog tomod do hino!” ka dau. Om ngoyo' no di tanak i pana' om guli' nod hiri'd tuan dau. 39 Nga' a' i' iyau koilo ondung nunu kopio o komoyon di boros di Yonatan diri. Iyo Yonatan nod i Daud o koilo. 40 Om patahako' noddi di Yonatan i pakakas dau'd mamana' dot id tanak diri om suhuo' no dau'd migit do gumuli' do hiri'd bandar. 41 Om kapamanau poddi i tanak om soliwan nogiddi i Daud do mantad id dotirung di tinimbunan do watu. Om otud no iyau dot intolu. Om sopiihad-ihad nopoddi goduwo iyo Daud di Yonatan, om minigapus tomod iyolo'. Nga' katangaban nopo di Daud om agayo po ko' i katangaban di Yonatan. 42 Om boro-boros noddi i Yonatan dot id di Daud, “Kinorohingan i' o momoyo' diya'. Om Tuhan no o momogompi' dato om i sinakagon to, om iyau o milo do mongigit di pinibatasan to dot id toguang do Kinorohingan,” ka. Om pamanau noddi i Daud, om poguliai no di Yonatan do hiri'd bandar.
Minogidu' i Daud do Mantad id di Saul
1 Om ongoi noddi i Daud do hilo'd di Ahimilik, it Imam do hilo'd Nob. Om soliwan no i Ahimilik do minongoi solowot dau do mikuwo'd nokotigowo tomod. Om ponguhot no iyau, “Nokuro tu' iso-iso' ko do minongoi'd hiti?” ka dau. 2 Om boros kad Daud, “Sinuhu' oku di raja' do minongoi'd hiti. Om a' oku i' dau pinologos do momisunud dot isai nopo o tulun diti karaja' ku'dti. Om suhuo' ku noddi i tulun do mongoi solowot doho' dot id iso' o kinoiyonon. 3 Nunu po kaakan-akanan do haro dot id diya'? Onuwai oku daa dot ongolimo o liob do roti, ko' nunu nopo i haro do hiti!” ka dau. 4 Om boros ka dit imam do suminimbar, “Aiso' no o roti ku di roti do koubasanan, suwai ko' iri po roti di maan do porsombahan o haro. Nga' koino-ino ko i' do manganu dilo', dot a' no i tulun nu nokodudun do tongoondu' di tadau di nakatalib,” ka dau. 5 Om boros ka di Daud do suminimbar, “Atantu' nod amu'! Olidang kasai' i' i tulun ku dot id pagantangan do tugama' do mulong piya dot i koubasanan o karaja'; om okon-okon nogindod baino' tu' agayo kopio o komoyon diti karaja' dahai,” ka dau. 6 Om patahako' noddi dit imam i roti'ddi dot id di Daud tu' iri po roti di nakatahak dot id Kinorohingan o haro dot id dau, om i nanu do mantad id pananaraban do porsombahan om tiningalanan dau'ddi do roti do wagu. 7 (Nga' tontok nopod tadau'ddi om kaantakai nod hiri i Doig i mantad hilo'd Idom, i boyoon do madtatamong do dumba' di Saul. Hiri pogi' iyau nga' momonsoi iyau dit apatut do wonsoyon dau do tumanud dot oturan do tugama'.) 8 Om uhoto' no di Daud i Ahimilik, “Haro o tandus ko' gayang di nokoopi' nu do milo ku'd pakayon? Tu' aarau-arau tomod oku do minamanau do sinuhu' di raja', gowoi poddi om a' oku nokoigit di gayang ku ko' nunu-nunu nopo i rapo-rapo'd suwai,” ka dau. 9 Om boros kaddi di Ahimilik do suminimbar, “Hati i' i gayang di Guliat, i tulun do Pilistin di pinatai nu di hilo'd Rantai dot Ila. Hilo'd dotirung dit ipod i gayang do linopot do kain. Ondung onuon nu iri om ngoyo' nopo. Tu' iri po o rapo-rapo do hiti,” ka dau. Om boros ka di Daud, “Onuo' nopo doho' iri, tu' aiso' no o gayang dot osonong ko' iri dot id pointongkop diti pomogunan,” ka dau. 10 Om tadau iddi do minogidu' i Daud do mantad id di Saul. Om ongoi no iyau do hilo'd di Akis, i raja' do bandar do Gat. 11 Boros ka di pagawai di Raja' Akis dot id di Akis, “Okon toi ko' i Daud iti, i raja' do hilo'd pomogunan dau? Okon toi ko' iyau no i pinodsindingan di tongoondu' do mikuwo'd santari-tari' do modsinding do poingkaa, ‘Boribu-ribu o napatai'd i Saul, nga' hinapadan noribu o napatai'd i Daud!’ ka,” ka diyolo'. 12 Om di nopoddi norongou di Daud i boros diyolo', om agangau'ddi o ginawo dau om ooris tomod diri iyau di Akis i raja' do Gat. 13 Om iri noddi o kinopingula-ulahan di Daud dot id toguang di tulun dot ogumu'. Om okon-okon poddi dit umbalan daa diyolo'd momusus iyau nga' mingkalahit po iyau di wawayaan dot agayo di bandar gisom do mogolinuyung po o roloi dau do hiri'd ganggut dau. 14 Boros ka di Akis dot id pagawai dau, “A' toi dokoyu okito ilo tulun dilo' do mulau? Nokuro tu' nangatan dokoyu ilo' do hiti? 15 A' po toi ula' o tulun do mulau do hiti'd posorili' dokoyu tu' nangatan dokoyu ilo tulun do mulau do hiti'd walai ku?” ka dau.
Pinatai Ngai' it Imam
1 Om poggidu' no i Daud do mantad hiri'd bandar do Gat om ongoi no lisok dot id iso' o luang do nuluhon do hilo'd somok do bandar dot Adulam. Om soira' di nokorongou ngai' i tobpinai dau om i sompiiyon dau do hiri iyau om ongoi no iyolo' do hiri'd dau. 2 Om iri tulun dit osusa', om i kiutang, om it otogod nga' minongoi ngai' sugku' di Daud. Om haro i' doti' ot apat nahatus o tulun diyolo'd toinsanan, om i Daud no nosiliu'd boyoon diyolo'. 3 Om mantad do hilo' om pakayaai nod Daud do hilo'd Mispa i tid pomogunan do Muab. Boros ka dau dot id raja' do Muab, “Tulungo' oku daa'd popoiyon diti tapa' om tina' ku do hino'd diya' do gisom dot oilaan ku ondung nunu wonsoyon do Kinorohingan dot id doho',” ka dau. 4 Om poundorongo' nod Daud i tapa' om i tina' dau do hiri'd sugku' di raja' do Muab, om hiri-hiri no iyolo' do solinaid di Daud do poillisok do hiri'd luang di nuluhon. 5 Nga' rikot noddi i Nabi Gad, om boros ka dau dot id di Daud, “Kada' undorong do hiti. Pamanau nogi' do gumuli' do hilo'd Yohuda,” ka. Om pamanau no i Daud om ongoi no do hiri'd puru' do Kirit. 6 Insan tadau, om korongou no di Saul do nosolowot no i Daud om i tulun dau. Tontok nopoddi om hilo'd Gibia i Saul do poirikau do hiri'd lungung di guas do tamariska i tid timpak do nulu-nulu, om poingigit dau i tandus dau, om songingkakat ngai' i boyoon do soudor dau do hiri'd posorili' dau. 7 Om boro-boros noddi iyau di soudor dau, “Pokinongou kou no, oi tulun do Binyamin! Ondos daa dokoyu om manahak dokoyu'd tumo om kabun dot anggur i Daud, om poposiliu dokoyu do boyoon do soudor dau? 8 Iri toi daa kopogiupakatan dokoyu do sumaap doho'? Om aiso' i dokoyu o momisunud doho' dot iri piya tanak ku nga' sumokodung i' di Daud. Om aiso' dokoyu o tumangkabo do kosorou doho' ko' momisunud po doho' do maso nopodti nga' mogihum i Daud, i susuhuon ku, do ralan do mamatai doho', om i Yonatan i tanak ku nga' mongodsuur i' di Daud!” ka dau. 9 I Doig nogi', i tulun dot Idom diri nga' poingkakat i' do poingamung di soudor do suwai. Om boros ka di Doig, “Nokito ku i' i Daud do minongoi solowot di Ahimilik i tanak di Ahitub, do hilo'd Nob. 10 Om uhot no i Ahimilik do Tuhan ondung nunu o wonsoyon di Daud. Om onuwai noddi dau i Daud do kokoriu om patahako' dau i gayang di Guliat, i tulun do Pilistin diri,” ka dau. 11 Om ponuhu' no i Saul do tulun do mongoi pomolohou di Ahimilik it imam diri, om koinsanai di sompiiyon dau di nongosiliu dot imam do hilo'd Nob. Om ongoi noddi iyolo' solowot di Saul. 12 Om boros kad Saul dot id di Ahimilik, “Pokinongou no, oi Ahimilik!” “Oo, oi Tuan Raja',” ka dau'd suminimbar. 13 Om uhoto' no di Saul iyau, “Nokuro tu' miupakat kou di Daud do sumaap doho'? Nokuro tu' minuhot ko'd Kinorohingan do bagi' dau om pinatahak nu po dau i gayang, om kinokorihan nu iyau do roti? Om baino' nopodti nga' sumaap iyau doho' om mogihum do ralan do mamatai doho'!” ka dau. 14 Om simbar ka di Ahimilik, “Okon toi ko' i Daud nopo om boyoon di soudor nu dit otorodok kopio? Om monongiwan po iyau diya', om boyoon do madtatamong nu, om suahon iyau do koinsanai'd tulun do hiri'd walai nu! 15 Otopot nogid minuhot oku'd Kinorohingan do bagi' dau nga' okon i' ko' tontok nogiddi do minomonsoi oku'd miagal diri. Nga' a' oku i' koilo di pakat do sumaap diya'! Om kada' oku nogi' kopio tondoso' om kada' tondoso' ot isai nopo o tid suang do sompiiyon ku, oi Tuan Raja'. Tu' a' oku i' koilo-ilo'd hal dino!” ka dau. 16 Nga' boros ka di raja', “Oi Ahimilik, patayon kou no, iya' om koinsanai di sompiiyon nu,” ka. 17 Om boros kad Saul dot id soudor di madtatamong dau di songingkakat do hiri'd toning dau, “Ngoyo' dokoyu patayo' ilo imam do Tuhan! Tu' suminuang iyolo'd pakat di Daud, om a' i' minomisunud doho' do minogidu' i Daud, do mulong piya do koilo iyolo'ddi,” ka. Nga' mada' i' i tongosoudor di madtatamong do mamatai dit imam do Tuhan. 18 Om boros ka di Saul dot id di Doig, “Ngoyo' iya' patayo' iyolo!” ka. Om ngoyo' nod Doig patayo' ngai' it imam. Walu' nohopod om limo ot imam di milo ngai' do mongigit dit ipod do pinatai dau do tadau'ddi. 19 Om ponuhu' po i Saul do mongoi pamatai do toinsanan i poingiyon do hilo'd Nob, i bandar dot imam diri: i tongokusai, i tongoondu', i tangaanak, om i ragang po, om i sapi', om i kaladai, om i dumba'. 20 Nga' i Abiatar nopo i tanak di Ahimilik, om nokopoggidu' i'. Om ongoi no iyau do hilo'd sugku' di Daud. 21 Om sunudai no dau i Daud do nangapatai ngai' nod i Saul it imam di mongobi-obi' do Tuhan. 22 Om boros kad Daud dot id dau, “Soira' di nokito ku i Doig do tadau'ddi om oilaan ku no do haro posunudon dau di Saul. Om iyoho' no nokobungou do kinapatayon do koinsanai di tobpinai nu. 23 Sugku' nopo doho', om kada' kooris. Pokipapatayan to no daa goduwo'd Saul diti nga' aiso' i' o koligagaanan nu'd poinsugku' doho',” ka dau.
Nintirungan di Daud o Bandar do Kohila
1 Insan o tadau om kosunudai no i Daud do maso nod tulun do Pilistin do manangod do bandar do Kohila, om ngoyon diyolo' panakaho' i gandum di wagu po koomot. 2 Om uhot noddi i Daud do Tuhan, “Ngoyon ku tuu saapo' i tulun do Pilistin diri?” ka. “Ngoyon,” kad Tuhan do suminimbar. “Ngoyon nopo iyolo' saapo' om intirungan no o bandar do Kohila,” ka dau. 3 Nga' boros ka di tulun di Daud dot id dau, “Hiti piya'd Yohuda nga' ongooris tomod toko' no, om okuro-kuro nogindo do mongoi toko'd hilo'd Pilistin!” ka diyolo'. 4 Om uhot poddi kawagu i Daud do Tuhan. Om boros kad Tuhan dot id dau, “Kada' katangkabo, ngoyon nopo songodo' i bandar do Kohila, tu' patahakon ngai' ku i' dot id diya' i soudor do Pilistin,” ka. 5 Om ongoi noddi i Daud om i tulun ngai' dau do hilo'd Kohila om songodo' no diyolo' i tulun do Pilistin. Om ogumu'ddi o tulun do Pilistin do napatai diyolo' om nanu diyolo' i tayam-tayam diyolo'. Om iyo noddi i Daud do minamasi ngai' di tulun do hiri'd bandar diri. 6 Tontok di minogidu' i Abiatar, i tanak di Ahimilik do minongoi sugku' di Daud om di minongoi iyau woyo' di Daud do hilo'd Kohila om nigitan i' dau it ipod. 7 Om tontok di sinunudan i Saul do minongoi i Daud do hilo'd Kohila, om poingkaa ot osorou di Saul, “Nakatahak no kopio'd Kinorohingan iyau dot id longon ku'd baino'. Tu' minongoi nopo i Daud do hilo' tu' bandar di kitolig om kitotobon om nokosuang no iyau'd lawa',” ka.2|75|HK80E|Bandar di kitolig om kiwawayaan dot agayo|23.7 8 Om lohowo' noddi di Saul i soudor dau do mongoi sangod, om mongoi ponurungku' do Kohila om oturungku' i' i Daud om koinsanai di tulun dau. 9 Om soira' di norongou di Daud do mongoi saap dau i Saul, om boro-boros no iyau di Abiatar, it Imam diri, “Igitai'd hiti it ipod,” ka dau. 10 Om sambayang noddi i Daud, “Oi Tuhan, i Kinorohingan dot Israil, nokorongou oku do rumikot i Saul do mongoi pamaraag diti bandar do Kohila dot iyoho' i susuhuon nu o kapamaraagan. 11 Patahakon oku tuu do tulun do Kohila dot id di Saul? Om otopot tuu do rumikot i Saul do miagal di norongou ku? Oi Tuhan, i Kinorohingan dot Israil, simbaro' oku no!” ka dau. Om boros kad Tuhan do suminimbar, “Rumikot no moti' i Saul,” ka. 12 Om uhot po kawagu i Daud, “Patahakon oku tuu om i tulun ku di tulun do Kohila dot id di Saul?” ka. Om boros kad Tuhan do suminimbar, “Patahakon kou i' moti',” ka. 13 Om tongkiad noddi do mantad hilo'd Kohila i Daud om koinsanai di tulun dau. Om kogumuo' nopo diyolo' om haro i' doti' ot onom nahatus o tulun, om tilombus no iyolo' do minghombo dot id piro-piro o kinoiyonon do suwai. Om soira' di nokorongou i Saul do nokopoggidu' no i Daud do mantad hilo'd Kohila om kada' noddi iyau ongoi sangod.
Hilo'd Konulu-nuluan i Daud
14 Om ongoi noddi lisok i Daud do hiri'd luang do konulu-nuluan do hilo'd tana' do kowotuan do Sip. Om pigusa-gusa' kasai' i daa di Saul i Daud, nga' a' id Tuhan pinatahak i Daud dot id di Saul. 15 Nga' mulong pod miagal diri, nga' ooris kasai' i' i Daud, tu' pokipapatayan kasai' i' di Saul iyau. Tontok di hilo'd Horis i Daud, i hilo'd tana' do kowotuan do Sip, 16 om ongoi no i Yonatan solowot di Daud do hilo', do mongoi popogirot do kotumbayaan di Daud dot intirungan kasai' i iyau do Kinorohingan. 17 Boros kad Yonatan dot id di Daud, “Kada' kooris. Tu' a' ko i' di tapa' ku milo do pokorualan. Oilaan no kopio dau dot iya' no o sumiliu'd raja' do tulun dot Israil, om iyoho' o kaanu'd pangkat dot id siriba-riba' diya',” ka dau. 18 Om pogiroto' no diyo Daud di Yonatan o batos do piombolutan diyolo' dot id toguang do Tuhan. Om undorong noddi i Daud do hilo'd Horis om poguliai no di Yonatan do hiri'd walai dau. 19 Om ongoi no solowot di Saul do hilo'd Gibia o piro-piro o tulun do mantad hilo'd Sip, om boros ka diyolo', “Poillisok i Daud do hilo'd watas dahai do hiri'd luang do nulu-nulu dit id somok do Horis, i hilo'd timpak do Nulu-Nulu do Hakila i ponong id salatan do tana'd kowotuan do Yohuda. 20 Oilaan i' dahai do pokitatangkapan nu iyau, oi Raja'. Om ongoi no kopio do hilo'd dahai. Om oilaan no kopio dahai dot atangkap nu iyau,” ka diyolo'. 21 Om boros kad Saul, “Tuhan no o mamarakat ngai' dokoyu tu' osonong kou i' dot id doho'! 22 Pamanau kou no om ngoyon po kawagu dokoyu ilaai kopio! Ilaan no kopio ondung hinonggo iyau om isai o nokokito dau. Tu' opintar kopio daa iyau dot orongou ku. 23 Om ilaan no ondung honggo'ddi o luang do nulu-nulu do lilisokon dau om ngoyon oku no sunudai dot oruhai! Om moyo' oku nogindo dokoyu. Ondung hilo' po kasai' iyau id kinoiyonon diri om ihumon ku no kopio iyau do mulong piya do tumongkop oku do Yohuda do mogihum,” ka dau. 24 Om pogulu no di Saul i piro-piro o tulun diri do minuli' do hilo'd Sip. Om iyo Daud nopo di piro-piro o tulun dau nga' hilo'd tana' do kowotuan do Maon, it id rantai dot oingou i ponong id salatan do tana'd kowotuan do Yohuda. 25 Om timpuun no i Saul om i piro-piro o soudor dau do mogihum di Daud. Nga' nongoi id tulun sunudai i Daud do pasal diyolo', om ongoi noddi i Daud do hiri'd nuluhon di kapampangan di hilo'd tana'd kowotuan do Maon, om undorong no iyau'd hiri. Om soira'ddi do nokorongou i Saul do pasal diri om gusao' no dau i Daud. 26 I Saul nopo di soudor dau nga' hiri'd sampaping ponong hiti di nuluhon diri, nga' i Daud nopo om i tulun dau om hiri'd sampaping ponong hilo'. Marau-arau tomod iyolo' do minogidu' tu' oruhai no daa iyolo' dot otutukan om atangkap di Saul. 27 Nga' tontok nogiddi do nokorikot ot iso' o susuhuon do minongoi pomisunud di Saul do poingkaa, “Uli' kopio! Tu' maso nod tulun do Pilistin do manangod do pomogunan toko!” ka. 28 Om tingkod noddi i Saul do momogusa' di Daud om ongoi no iyau sangod do tulun do Pilistin. Iri noddi o kinopomungaranan di nuluhon diri do Nuluhon do Pinitongkiadan. 29 Om tongkiad noddi i Daud do mantad hiri om pakayaai no dau do hilo'd In-Godi om lisok nod hiri'd luang do konulu-nuluan do hilo'.
A' di Daud Pinatai i Saul
1 Tontok di koguguli' di Saul do minongoi sangod do tulun do Pilistin om korongou no dau do hilo'd tana' do kowotuan di hiri'd somok dot In-Godi i Daud. 2 Om olomus nopoddi i Saul do minomili' do tolu noribu o soudor dau dit ongosiou kopio do pointongkop dot Israil om ongoi no pogihum di Daud om i tulun dau do ponong id koulayon do mantad id Nuluhon do Kapampangan di roitan do Kambing do Gouton. 3 Om korikot no i Saul do hiri'd iso' o luang do nulu-nulu, it id somok do kandang do dumba' do hiri'd toning do ralan. Om suang no iyau do hiri'd luang di nulu-nulu'ddi do minongoi pagawas. Nga' koontok no kopio do hiri o linisok diyo Daud om i tulun dau, nga' iyolo' nopo om ponong hiri'd gogok kopio. 4 Boros ka diyolo' dot id di Daud, “Iti no o maso nu'd osonong! Dot okon toi ko' nokoboros nod Tuhan dot id diya' o poingkaa, ‘Patahakon ku indo diya' o pisangod nu om wonsoyon no o nunu nopo o korohian nu dot id dau,’ ka,” ka dau. Om pomirulan-rulan no i Daud do minongoi do hiri'd kinoiyonon di Saul om ngoyo' noddi dau sinsibo' ot okooro' di rasuk di Saul, nga' a' i' di Saul noilaan iri. 5 Om kopurimanai noddi di Daud do nakasala' iyau do minomonsoi do miagal diri. 6 Om boro-boros no i Daud dot id tulun dau, “Pokionuon ku no dot antaban oku'd Tuhan do momonsoi dot araat dot id raja' ku di nopili' do Tuhan do sumiliu'd raja'. Om a' oku i' koino-ino do pokoruol dau tu' iyau no o raja' do pinili'd Tuhan!” ka dau. 7 Om iyo noddi i Daud do minonginsasamod di tulun dau, om a' dau iyolo' pinologos do sumaap di Saul. Om soliwan noddi i Saul do mantad id luang do nulu-nulu'ddi, om lombus noddi iyau do minamanau. 8 Om i Daud nga' suminoliwan nogi' do mantad id luang do nulu-nulu'ddi om pomolohou no iyau do hiri'd tohuri-huri di Saul, “Oi Raja'!” ka dau. 9 Om koili noddi i Saul. Om otud no i Daud dot id toguang dau om boro-boros nod, “Nokuro tu' mokinongou ko do boros do tulun di momoros do mumbal oku'd pokoruol diya'? 10 Antangai pogi' nga' di nopo di tiinu' di hilo'd luang do nulu-nulu om nakatahak ko no daa'd Tuhan dot id doho', om i tulun ku nga' monuhu' no daa doho' do mamatai diya', oi Tuan Raja', nga' a' oku i'. Boros kangku, ‘A' oku i' pokoruol di raja' ku di nopili'd Tuhan’. 11 Antangai pogi' iti kain do sininsib ku do mantad id rasuk do tiwanon ku. Ondung mamatai oku daa diya', oi Tuan Raja', om napatai ku no daa iya'. Nga' ngoyo' ku nopo sinsibo' ot okooro' di rasuk nu. Om iti no o kointalangan dot a' oku i' momusorou do sumaap do Tuan Raja', ko' pokoruol pod Tuan Raja'. Nga' gusaon oku i' diya' om pokipapatayan oku do mulong piya dot aiso' o sala' ku dot id toguang nu! 12 Tuhan no o momutus dato ondung isai to o nakasala'! Om Tuhan no o monuli' di kararaat nu dot id doho' tu iyoho' nopo om a' i' kopio pokoruol diya'. 13 Tu' poingkaa o boros di komolohing-lohingan, ‘Tulun nod araat o momonsoi dot araat,’ ka. Iyo nopoddi, om a' oku i' pokoruol do Tuan Raja'. 14 Antangai oku pogi' i pokipapatayan do raja' dot Israil! Antangai oku pogi' i pigusa-gusa' dau! Iyoho' nopo om iyo nod songinan o tasu di napatai no! Om iyo oku nod kutu-kutu! 15 Butusan to i' do Tuhan om tontuon dau ondung isai o kasala'. Maan i' dau antangai kopio iti hal to. Nga' maan oku i' dau obiai om posion oku i' dau do mantad id diya'!” ka dau. 16 Om kopongo poddi i Daud do minimboros, om boro-boros nogiddi i Saul, “Iya' kopio toi iti, oi Daud, i monongiwan doho'?” ka dau. Om pingihad no iyau. 17 Om boros kaddi dau dot id di Daud, “Iya' no ot otopot om iyoho' no o nakasala'. 18 Tu' iri nopo karaaton ku dot id diya' om sinulian nu nogi' dot osonong. Om nokointalang nu no kopio o kosonongo' nu dot id doho' do tadau baino'. Tu' a' ko i' minamatai doho' do mulong piya do nakatahak oku no daa'd Tuhan dot id diya'. 19 Ingkuri' i' kopio o tulun do popoidu' do pisangod dau ondung natangkap dau i pisangod dau'ddi. Tuhan no o mamarakat diya' diti kosonongo' nu dot id doho' di tadau baino'! 20 Oilaan ku noddi kopio do baino' dot iya' no o sumiliu'd raja' dot Israil, om koingkakat indo kopio o pomorintaan dot Israil dot iya' o momorinta'. 21 Nga' sumpa' no dot id doho' dot id suang do ngaran do Tuhan dot a' nu patayon o sinakagon ku om a' indo atanus o ngaran ku do mantad id sompiiyon ku,” ka dau. 22 Om kookunai nod i Daud iri. Om uli' noddi i Saul do hiri'd walai dau, om i Daud no om iri ngai' tulun dau om pinogulian do hiri'd lilisokon diyolo'.
Kinapatayon di Somuil
1 Om a' no alaid do mantad diri om kapatai no i Somuil. Om oinsanan nopoddi o tulun dot Israil do tuminimung do minogihad dau. Om lobongo' no diyolo' iyau do hiri'd walai dau di hilo'd Rama.
I Daud om i Abigail
Katalib poddi iri, om ongoi no i Daud do hiri'd tana' do kowotuan do Paran. 2-3 Om haro o songulun do mantad id sinakagon di Kalib do hilo', dot i Nabal o ngaran. Tadon nopo dau nga' hilo'd Maon, nga' kitana' iyau do hilo'd somok do bandar do Karmol. Om iyau nopoddi nga' tulun di kaya' kopio om kidumba' iyau do tolu noribu o tinan om kikambing do soribu o tinan. I Abigail nopo, i sawo dau, om olumis kopio koondu' om oilo do mimboros. Nga' i Nabal nopo om obintogod om araat o kowoyo-woyoon dau. Om korongou no i Daud do maso di Nabal do momogunting di hulu do dumba' dau do hilo'd Karmol, 4 om tontok nopoddi nga' hilo'd tana' do kowotuan i Daud, 5 om ponuhu' no iyau do hopod o tangaanakwagu do mongoi solowot di Nabal do hilo'd Karmol, om mongoi poporikot do tabi' dau. 6 Om sinuhu' dau iyolo' do poboros dot id di Nabal do poingkaa, “Poporikot i Daud do tabi' dot id diya', om maha' daa om osonong-sonong ko om i sompiiyon nu, om koinsanai di songonuon nu. 7 Nokorongou iyau do maso nu do momogunting do hulu'd dumba' nu. Om orohian iyau do koilo ko do solinaid nopodti om poinsugku' ngai' dahai i gompomogompi' do dumba' nu, om a' i' dahai iyolo' insan gangaho'. Om solinaid diyolo'd hilo'd Karmol om aiso' i' o tiso' po di diyolo'd songonuon do napanakau. 8 Uhoto' nopo iyolo'. Om atantu' nod sunudan ko i' diyolo'. Ruminikot iyahai do tontok diti tadau'd moginakan, om pokionuon di Daud do romiton nu iyahai kosonong-sonong. Om onuwai no iyahai, i susuhuon nu om i tambalut nu, do nunu nopo do tumanud do kagaanan do ginawo nu,” kad i Daud. 9 Om poboroso' no di tulun di Daud i boros di Daud diri dot id di Nabal, om andad no iyolo'd hiri. 10 Nga' boros kad Nabal do suminimbar, “Isai i Daud? A' oku i' kotutun dau! Noponu' po bod turipon di minogidu' do mantad id tuan diyolo' iti pomogunan do baino'! 11 A' oku i' moti' kopio mongoi panganu di roti om i waig om i tayam-tayam do sinumbali' ku di maan ku di gompomogunting do hulu di dumba' ku, do patahakon do tulun dit a' ku oilaan o tadon!” ka dau. 12 Om guli' no dot id di Daud i tulun di Daud, om posunudo' no diyolo' i boros di Nabal. 13 Om boros kad Daud do minonuhu' diyolo', “Obilo' dokoyu o gayang dokoyu!” ka. Om wonsoyo' no di tulun di Daud o miagal diri. Om obilo' nod i Daud i dau'd gayang. Om angatai nogiddi dau o haro i' doti' ot apat nahatus o tulun do moyo' dau om duwo nahatus o pinoundorong do madtamong di konunu-nunuan diyolo'. 14 Om daamot nopoddi, om ongoi no boro-boros o tiso' di susuhuon di Nabal dot id di Abigail, i sawo di Nabal. Boros ka dau, “Nokorongou ko noddi? Minonuhu' i Daud do piro-piro o tulun do mantad hilo'd tana' do kowotuan do mongoi poporikot do tabi' dot id tuan toko'. Nga' indaraato' nogi' dau iyolo'. 15 Iri nopo tulun diri nga' osonong kopio dot id dahai. A' i' iyolo' insan pamagangau dahai. Om tontok di poinsugku' iyolo' dahai do hilo'd talun om a' i' iyahai napanakahan do nunu nopo. 16 Monikid tadau nopo om monikid tuong iyolo' do mongintirung dahai di solinaid dahai do madtamong di kambing om dumba' do hiri'd somok diyolo'. 17 Pomusorou no kopio ondung nunu ot apatut do wonsoyon nu! Tu' poporikot moti' iti do koligagaanan dot id tuan toko' om id koinsanai'd sompiiyon dau. Okodou no kopio o ginawo dau, tu' a' no mokinongou'd boros dot isai nopo!” ka dau. 18 Om olomus nopo i Abigail do minonimung do duwo nahatus o liob do roti, om duwo o kantung do kulit do noponu'd waig dot anggur, om limo tinan do dumba' di nolugu, om hopod om turu' o kilogram do gandum do noonsok, om hatus o puru do tua' dot anggur di kinoring, om duwo nahatus o tua' dot ara di winonsoi'd roti, om pagandaro' ngai' nogiddi iri do piro-piro o tinan do kaladai. 19 Boros ka dau dot id susuhuon dau, “Poguulu kou do mamanau. Om sumuhut oku i',” ka dau. Nga' a' i' dau sinunudan i sawo dau. 20 Tontok di nokorikot i Abigail do hiri'd ralan di poingkilong di hiri'd nulu-nulu om kokito no dau i Daud om i tulun di Daud do pakayaan do ponong id dau. 21 Om maso nopoddi nga' momusorou no i Daud do poingkaa, “Aiso' i' tomod o komoyon di nintirungan ku i songonuon di tulun diri do hilo'd tana' do kowotuan. Iso' po di konunu-nunuan dau nga' aiso' i' o napanakau'd tulun. Nga' baino' nopoddi om somulian i' dau do karaaton i kosonongo' ku. 22 Patayon oku nopod Kinorohingan dot a' ku no apatai o koinsanai do kusai do hilo'd walai dau dot a' po koulai o tadau do suab!” ka. 23 Tontok di nokito di Abigail i Daud, om osiau nopo iyau do luminintuhun do mantad hiri'd kaladai dau, om otud no iyau 24 do hiri'd toning do gakod di Daud. Boros ka dau, “Tulungo' oku no, oi Tuan, om pokinongoho' po iti boros ku! Pababaan nopo doho' o kasalaan diri! 25 Kada' podulo' i Nabal, tu' tulun dot aiso' o guna'! Iyau no tulun do basug tu' okon toi ko' basug nogi' o komoyon di ngaran dau? A' oku i' nokokito di tulun di sinuhu' nu do tontok di nokorikot iyolo'. 26 Kinorohingan i' o minogodu diya' do sumuli' om mamatai di pisangod nu. Om baino'dti om sumumpa' no dot id Tuhan di poimpasi dot ohukuman do miagal di Nabal o koinsanai di pisangod nu om i tulun di momonsoi'd araat dot id diya'. 27 Ompunai oku no, oi Tuan, om romito' no iti popuhawangon ku do nigitan ku. Om patahakon noti dot id tulun nu. 28 Ompunai oku no do koinsanai di kasalaan do nowonsoi ku. Silihon ko i' do Tuhan do raja', om poingkaa nogi' i sinakagon nu, tu' sumangod ko i' do bagi'd Tuhan. Om a' ko i' kowonsoi'd araat do solinaid nu'd poimpasi. 29 Ondung haro daa o mumbal do mongoi saap om mongoi pamatai diya' om gompion ko i' do Tuhan, i Kinorohingan nu, om posion ko i' dau do miagal di pomogompi' do tulun do dapu' di koupusan kopio dau. Nga' iri nopo pisangod nu om pataamon id Tuhan do miagal do watu di polositikon. 30 Om soira' nopondo dot owonsoi ngai'd Tuhan o koinsanai dit ongosonong do nakabatos dau dot id diya', om osiliu ko dau'd raja' dot Israil, 31 om osorou nu nondo dot a' ko suminuli' om a' minamatai dot aiso' o pinaantakan; om a' ko indo monosol om a' ko tumongob. Om soira' nopondod abarakatan ko'd Tuhan om kada' oku no kopio lihuwai,” ka dau. 32 Om boros kad Daud dot id dau, “Royohon no o Tuhan, i Kinorohingan dot Israil tu' minonuhu' diya' do mongoi solowot doho' do tadau'd baino'! 33 Mongunsikou oku no dot id Kinorohingan dino komiloo' nu'd momusorou. Tu' iri nopo winonsoi nu baino' nga' nokoodu doho' do mimpori-pori'd sumuli'. 34 Nantaban oku i' do Tuhan do pokoruol diya'. Nga' ondung okon daa ko' minarau-arau ko do minongoi solowot doho' om sumumpa' oku no dot id Kinorohingan dot Israil di poimpasi, dot apatai ngai' no daa o tulun di Nabal dot orikot o kosuabon do suab!” ka dau. 35 Om romito' nod Daud i pinatahak di Abigail, mikuwo'd minomoros do poingkaa, “Uli' no do hilo'd walai nu, om kada' no katangkabo. Tu' wonsoyon ku i' i pinokianu nu,” ka dau. 36 Om uli' noddi i Abigail do hiri'd di Nabal. Maso nopoddi nga' moginakan i Nabal do miagal pod don raja' o pogiginakan. Om magauk tomod iyau do mikuwo'd osonong tomod ot opurimanan dau. Om aiso' iddi o pinosunud di Abigail dot id dau do gisom do kosuabon kawagu. 37 Om soira' di notibanasan i Nabal om susuyo' ngai' nogiddi di Abigail i nongosiliu'ddi. Nga' sigog id noontok i Nabal do toruol do tundu-undu' gisom do luminomok o tinan dau om a' noddi iyau kogura'. 38 Om hopod no tadau'd mantad diri om koontok po kawagu iyau do toruol do tundu-undu' do pinorikot do Tuhan do gisom do napatai'ddi iyau. 39 Om soira' di nokorongou i Daud do napatai no i Nabal om boros ka dau, “Royohon no o Tuhan! Tu' nosulian no dau i Nabal do minonguntotori' doho'. Nga' noduhan oku i' do Tuhan, iyoho' i susuhuon dau, do momonsoi'd araat dot id di Nabal. Tuhan iddi o minomohukum di Nabal dot i karaato' dau o kinopomohukuman,” ka dau. Om ponuhu' noddi i Daud do piro-piro o tulun do minongoi ponunang di Abigail. 40 Om korikot noddi i piro-piro o tulun di Daud do hilo'd Karmol, om posunudo' no diyolo' dot id di Abigail o poingkaa, “Sinuhu' iyahai di Daud do mongoi diya' paatod do hilo'd dau do sumiliu'd sawo dau,” ka. 41 Om otud noddi i Abigail om pomoros nod, “Iyoho' no o susuhuon di Daud. Om posodia' oku i' do mongoug do lapap di susuhuon dau,” ka dau. 42 Om olomus nopoddi iyau do minongopi-opi' om sakai no di kaladai dau. Om tanud no dau o limo o susuhuon dau'd tongoondu'. Om pamanau noddi iyau do tuminanud di tulun di Daud om kosiliu no iyau do sawo di Daud. 43 Di nopo dit id gulu po ko' iri, om nakawin no di Daud i Ahinuam, i mantad hilo'd Yisriil. Om kosiliu noddi i Abigail iyau do sawo dau. 44 Om daamot nopoddi, om patahako' nod Saul i Mikal, i tanak dau'd tondu', i sawo daa di Daud diri dot id di Palti, i tanak di Lais, i mantad hilo'd bandar do Galim.
A' Po Kawagu di Daud Pinatai i Saul
1 Insan o tadau om rikot no kawagu o piro-piro o tulun do mantad hilo'd Sip do minongoi solowot di Saul do hilo'd Gibia, do minomisunud dau do poillisok i Daud do hilo'd Nuluhon do Hakila, it id tisan do tana' do kowotuan do Yohuda. 2 Om tilombus nopo i Saul do minongoi do hilo'd tana' do kowotuan do Sip do miwoyo' do tolu noribu o soudor dau di gunsiou do mongoi pogihum di Daud. 3 Om powonsoyo' no diyolo' o kiim diyolo' do hiri'd tisan di ralan do hilo'd Nuluhon do Hakila. Tontok nopoddi nga' hiri pod tana' do kowotuan i Daud, 4 om ponuhu' no i Daud do tulun do mongoi ponoluku'. Om koilaai no dau do hiri kopio i' i Saul. 5 Om potilombusai nopo di Daud do minongoi do hilo'd pinomukiiman di Saul om kokito no dau i kiim di Saul om i Abnor, i tanak di Nor. I Abnor nopo nga' boyoon do soudor di Saul. Om kiim nopo di Saul om hiri'd tanga-tanga' om iri no kiim di soudor di Saul om songinsorili' di kiim dau. 6 Om uhoto' no di Daud i Ahimilik, i tulun do Hit diri, om i Abisai, i tobpinai di Yoab, (tina' nopo diyolo' nga' i Soruya), boros ka dau, “Isai ot id pialatan dokoyu do kasaap do moyo' doho' do mongoi do hilo'd pinomukiiman di Saul?” ka dau. “Iyoho',” ka di Abisai. 7 Om totuong iddi do minongoi i Daud om i Abisai suang di pinomukiiman di Saul. Om kokito no diyolo' do koodop i Saul do hiri'd tanga-tanga' di kokiiman om poingodsuk do hiri'd tana' i tandus dau do hiri'd toning do tulu dau. Om i Abnor noo om i soudor dau om koodop do posorili' di Saul. 8 Om boros ka di Abisai dot id di Daud, “Totuong nodti do patahakon do Kinorohingan o pisangod nu dot id diya'. Pologoso' oku nod monobok dau do gisom do kohondot dilo tana'. Ilo' i tandus dau o ponobok ku dot insan ku nopo potoboko'. Om a' ku no iyau induaan do monobok!” ka dau. 9 Nga' boros kad Daud, “Kada' kopio iyau patayo'! Tu' atantu' nod hukuman do Tuhan i tulun di mamatai'd raja' do nopili' dau,” ka dau. 10 Om boros kad Daud, “Id suang nod ngaran do Tuhan do poimpasi, dot oilaan ku do Tuhan i' o mamatai di Saul, do kapatai-patayo' po tuu dau o kapatai dau ko' maso po dau'd sumangod. 11 Nga' mada' oku i' do mumbal do mamatai do tulun di nopili'd Tuhan. Kaino onuo' to nopo ilo poiyanan dau'd waig om ilo tandus dau, om sumoliwan to nondod hiti,” ka dau. 12 Om ngoyo' noddi di Daud i tandus om i poiyanan di Saul do waig, i poingiliu'd hiri'd toning do tulu dau, om tongkiad noddi iyau om i Abisai do mantad hiri. Aiso' i' tiso' piya'd tulun do nokokito ko' nokoilo po di nosiliu'ddi, om aiso' o noposik. Koodop ngai' nopo iyolo' tu' pinoolong tomod iyolo'd Tuhan. 13 Om pakayaai noddi di Daud do ponong hiri'd sampaping di rantai. Om ongoi no iyau'd hiri'd timpak di nulu-nulu dit osodu' no do mantad id pinomukiiman di Saul. 14 Om garangai no dau i Abnor om i soudor di Saul, “Abnor! Simbaro' oku! Korongou ko i' doho!” ka dau. Om ponguhot no i Abnor, “Isai kopio ilo minggarang?” ka. 15 Om boros kad Daud do suminimbar, “Abnor, okon toi ko' iya' o tulun dit osiou kopio do pointongkop do hiti'd Israil? Nga' nokuro tu' a' nu nintirungan i raja', i tuan nu? Waagu kosuang do hino'd kokiiman o tulun do mongoi daa pamatai di tuan nu, 16 nga' a' nu i' winonsoi o karaja' nu. Sumumpa' oku no dot id Tuhan di poimpasi, oi Abnor, dot oinsanan kou nopo dot a' daa osorupai do posion. Tu' a' i' dokoyu nintirungan i tuan dokoyu, i pinili'd Tuhan do sumiliu'd raja'. Antangai pogi! Honggo no i tandus di raja'? Om honggo no i poiyanan do waig di hiri'd toning do tulu dau'ddi?” ka dau. 17 Om kotutunai noddi di Saul i boros di Daud. Om ponguhot no iyau, “Iya' ino, oi Daud, i tanak ku?” ka. “Oo, oi Tuan Raja',” kad i Daud do suminimbar. 18 Om boros ka kawagu di Daud, “Nokuro tu' maso po o Tuan Raja' do momogusa' diti susuhuon nu? Nunu o kasalaan do nowonsoi ku? 19 Pokinongoho' no o boros ku. Ondung Tuhan o mominsuhu' diya' do sumaap doho', om maha' daa dot oinsasamadan do porsombahan o ginawo dau dit otogod. Nga' ondung don tulun do wonsoyon diti, om ousung ngai' no iyolo'! Tu' nuyung oku diyolo' do mantad id pomogunan di pinabatos mantad do Tuhan gisom do hiti oku'ddid pomogunan di mononsog doho' do tumuku' dot id ponokokinorohingan do suwai. 20 Kada' oku pologoso' dot apatai dot id pomogunan do suwai, it osodu' do mantad id toguang do Tuhan. Nokuro tu' orohian o raja' dot Israil do mamatai doho' tu' iyoho' nopo om miagal nod kutu? Nokuro tu' maan oku diya' osuo' do miagal pod magasu do manuk talun?” ka dau. 21 Om boros kad Saul do suminimbar, “Otopot nod nokowonsoi oku'd dusa. Guli' no, oi Daud, i tanak ku! A' oku nondo momonsoi'd araat dot id diya'. Tu' pinologos oku i' diya' do poimpasi kosodop. Otopot no kopio do basug oku! Om iti wonsoyon ku nga' araat no kopio!” ka dau. 22 Nga' boros ka di Daud do suminimbar, “Na, diya iti tandus nu. Ponuhu' do songulun di madtatamong nu do mongoi'dti. 23 Osonong kasai' i' ot isomuli' do Tuhan dot id tulun dit otorodok om otulid o ginawo. Nakatahak ko no daa dau dot id doho' di tadau baino', nga' a' oku i' minomonsoi'd araat dot id diya', oi raja' di nopili'd Tuhan. 24 Poingkuro nopod pinologos ku iya' do poimpasi di tadau baino', om poingkaa nogi' o Tuhan do mongintirung doho' om popoidu' doho' do mantad id koinsanai'd koligagaanan!” ka dau. 25 Om boros kad Saul dot id di Daud, “Barakatan ko id Tuhan, oi tanak ku! Owonsoi ngai' nu i' o koinsanai di korohian nu'd momonsoi!” ka dau. Om tilombus no i Daud do minimpanau nga' i Saul nopo om minuli' no do hiri'd walai dau.
Hiri i Daud id Pogialatan do Tulun do Pilistin
1 Om momusorou'ddi i Daud do poingkaa, “Poingkuro piya nga' rumikot i' o tadau do ngoyon oku di Saul patayo'. Om osonong nogid mogidu' oku'd hilo'd pomogunan do tulun do Pilistin. Om a' nondo i Saul mogihum doho' do hiti'd Israil, om iyoho' nogi' nga' osimbayan nondo,” ka. 2 Om pamanau noddi i Daud do miwoyo' dit onom nahatus o tulun dau om arau-arau nopo iyolo' do minongoi solowot di Akis, i tanak di Mua, i raja' do bandar do Gat. 3 Om undorong noddi i Daud om koinsanai di tulun dau do hilo'd Gat, do mogiwoyo-woyo' di sompiiyon diyolo'. Om moyo-woyo' nogid Daud i duwo o sawo dau; i Ahinuam, i tondu' do mantad hilo'd bandar do Yisriil, om i Abigail, i sawo daa di Nabal, i mantad hilo'd Karmol. 4 Om tontok di norongou di Saul do nokopoggidu' i Daud do hilo'd bandar do Gat om tingkod noddi iyau do mogihum dau. 5 Om boros kad Daud dot id di Akis, “Ondung tambalut ku iya', om onuwai oku no dot iso' o bandar dot okooro' do maan ku'd tiyonon, om a' indo iyahai poinsugku' diya' do hiti'd bandar dot agayo do pomogunan nu,” ka. 6 Om patahako' noddi di Akis dot id di Daud o bandar do Siklag. Om mantad poddi om iri ngai' no i raja' do Yohuda o sanganu do Siklag. 7 Om koloido' nopo di Daud do poingiyon do hiri'd pomogunan do tulun do Pilistin om sontoun om apat o tulan. 8 Tontok nopoddi nga' asaru' i Daud om i tulun ngai' dau do mongoi panangod di tulun do Gosur, om i tulun do Girsi, om i tulun dot Amalik, i poundorong do hiri'd watas diri. Om ngoyo' noddi di Daud solodo' i tana' diyolo' do gisom do korikot do hilo'd Sur, om poinsusui di ralan do kumaa do hilo'd Masir. 9 Om patayo' ngai' nopo dau i tongokusai om i tongoondu', om tanggayai ngai' dau i dumba', om i sapi', om i kaladai', om it unta, om i pakayan diyolo'. Om guli' noddi i Daud do minongoi popoilo di Akis. 10 Om muhot nopo i Akis dau do poingkaa, “Hinonggo o nongoi dokoyu songodo' baino'?” ka. Om poboroson nod Daud dot id di Akis do minongoi iyau do hilo'd ponong id salatan do Yohuda, ko' hilo'd kinoiyonon do tulun do Yiramiil, ko' hilo'd kinoiyonon do tulun do Kini. 11 Om patayo' ngai' nopo di Daud i tulun do hiri'd bandar di nongoi dau songodo' om aiso' no o songulun piya do nokoguli' do hilo'd Gat do minongoi pomisunud di winonsoi diyolo'. Om miagal noddi o wonsoyon di Daud do solinaid dau do hilo'd pomogunan do tulun do Pilistin. 12 Om otumbayaan tomod i Akis di Daud. Om poingkaa ot osorou dau, “Karaatan no kopio i Daud di bansa' dau gisom dot a' no milo dot a' iyau sumiliu'd susuhuon ku do solinaid dau do poimpasi,” ka.
1 Om a' no alaid do mantad diri om timungo' no di tulun do Pilistin o soudor diyolo' do mongoi sangod dot Israil. Om boros ka di Akis dot id di Daud, “Atantu' nod oilaan ku do muhup ko no doho' om i tulun nu nga' muhup no do mongoi sangod,” ka. 2 Om boros ka di Daud do suminimbar, “Oo. Iyoho' nopo om susuhuon nu. Om okito nu nogindo kopio ondung nunu noo o milo ku'd wonsoyon,” ka dau. Om boros kad i Akis, “Silihon ku no iya'd madtatamong doho' do gisom dot alaid,” ka.
Minongoi i Saul Solowot do Bobolian di Momolohou do Rusod do Tulun do Napatai
3 Maso nopoddi nga' napatai no i Somuil om nopogihadan no iyau do koinsanai'd tulun dot Israil. Om linobong diyolo' iyau do hilo'd Rama, i bandar do tadon dau. Om tontok nopoddi nga' nouyung ngai' nod Saul do mantad hilo'd Israil i mogogontong om i bobolian di momolohou'd rusod do tulun di napatai. 4 Iri nopo soudor do tulun do Pilistin om tuminimung om pinopowonsoi'd kiim do hilo'd somok do bandar do Sunim. Om i Saul nga' minonimung i' di tulun dot Israil om pomukiim no iyolo' do hilo'd Nuluhon do Gilbua. 5 Om soira' di nokito di Saul i soudor do Pilistin om minodosi tomod diri iyau. 6 Om uhot no daa iyau'd Tuhan ondung nunu ot apatut dau'd wonsoyon nga' a' i' suminimbar o Tuhan dot id nipi, ko' id Urim om Tumim, ko' pinawaya' pod songulun o nabi. 7 Om boros kaddi di Saul dot id pagawai dau, “Pogihumai oku'd songulun o tondu' di milo do momolohou'd rusod do tulun do napatai, tu' mokiilo oku dau,” ka dau. “Haro i' o bobolian do hilo'd Indor,” ka diyolo'. 8 Om pingunali-nali noddi i Saul, om a' nod tulun otutunan. Om otuong poddi om ongoi no iyau solowot di tondu'ddi do miwoyo' do duwo o pagawai dau. Boros kad Saul dot id tondu'ddi, “Lohowo' doho' i rusod di tulun di roiton ku o ngaran om suhuon no do popoboros ondung nunu ot osiliu dot id dosunsudan,” ka dau. 9 Om boros ka di tondu', “Atantu' nod oilaan nu ondung nunu i winonsoi di Raja' Saul, tu' nuyung dau do mantad id Israil o koinsanai di mogogontong om i bobolian di momolohou'd rusod do tulun do napatai. Nokuro tu' posuangon oku daa diya'd lawa' do mamatai doho'?” ka dau. 10 Om sumpa' no i Saul do poingkaa, “Sumumpa' oku no dot id suang do ngaran do Tuhan di poimpasi dot a' ko i' ohukuman do wonsoyon nu piya iti,” ka. 11 Om ponguhot no i tondu', “Isai o pokilahawan nu doho'?” ka. “I Somuil,” kad Saul do suminimbar. 12 Soira' di nokito di tondu' i Somuil om pomogiak no iyau om boro-boros no di Saul, “Nokuro tu' magakal ko doho'? Tu' i Raja' Saul ko i'!” ka dau. 13 Nga' boros kad Saul dot id dau, “Kada' kooris! Posunudo' nopo ino tokito nu,” ka. Om boros ka di tondu', “Okito ku o rusod do songulun do mimbulai do mantad hilo'd tana',” ka dau. 14 Om uhot po kawagu i Saul, “Okuro-kuro o rabas dau?” ka. Om boros ka di tondu' do suminimbar, “Iyau nopo om songulun o kusai di molohing no. Om kirasuk iyau dot anaru,” ka. Om koilaai noddi di Saul dot i rusod di Somuil iri. Om otud no iyau do suminuwau di nabi diri. 15 Om boros kad Somuil dot id di Saul, “Nokuro tu' mamagangau ko doho' om momolohou doho' do gumuli' kawagu?” ka. Om boros kad Saul do suminimbar, “Agayo kopio o kosusaan ku. Tu' mongoi sangod doho' o tulun do Pilistin om Kinorohingan kanogi' nga' nokotongkiad no doho'. A' nopo iyau sumimbar doho' do pawayaon do nabi om a' sumimbar dot id nipi. Iri noddi o kinapamalahawan ku diya' om osunudan oku i' diya' ondung nunu ot apatut ku'd wonsoyon,” ka dau. 16 Om boros kad Somuil, “Nunu po o kapamalahawan nu doho' do notongkiadan ko'd Tuhan om nosiliu iyau'd pisangod nu? 17 Nabayaan nod Tuhan i boros dau do pinawaya' dau dot id doho' di gulu po; naanu no dau iti pomorintaan dot Israil do mantad id diya' om patahakon diri dau dot id di Daud. 18 A' ko tuminanud di pinonuhuan do Tuhan. Tu' a' nu pinatai ngai' i tulun dot Amalik om a' nu rinaag ngai' i konunu-nunuan diyolo'. Om iri noddi o kinapamansayan do Tuhan do miagal diti dot id diya' do baino'. 19 Patahakon ko nondo dau om i tulun dot Israil dot id tulun do Pilistin. Suab nopondo om kowoyo' ko no doho' om i nogi' tangaanak nu'd kusai, om patahakon pod Tuhan o soudor dot Israil dot id tulun do Pilistin,” ka. 20 Om diiri iddi om diiri do nahaba' i Saul do hiri'd tana' dot iyo poddi sinisian do nopoddosian kopio do nokorongou di pinoboros di Somuil. Om kawagu po nga' olomok tomod iyau tu' a' po iyau nakaakan do nunu-nunu do nosongodou om gisom di mitingkosuab no. 21 Om insomok no di Saul i tondu' om koilaai no dau do moddosi i Saul, om boros ka di tondu', “Oi Tuan, matai po tamu' doho' do minomonsoi di pinokianu nu. 22 Om baino' nodti om wonsoyo' no iti pokionuon ku. Makan pod ongokooro' di taakanon di maan ku posodiawo' om okoris ko i' kawagu do lumombus do mamanau,” ka. 23 Nga' minada' i' i Saul tu' boros ka dau om a' i' iyau makan. Nga' mononsog tomod i pagawai dau. Om alaid noddi om tumboyo' no iyau. Tungag noddi iyau do mantad hiri'd tana' om irikau no do hiri'd toodopon. 24 Om olomus nopo i tondu' do minonumbali' do songinan o tanak do sapi' dit olomu' kopio om anu iyau'd tapung. Om onsoko' no dau iri do winonsoi'd roti dit a' rinalatan do pangambang. 25 Om posurungo' no dau i taakanon diri dot id di Saul om id pagawai dau. Om akan noddi iyolo'. Om pamanau noddi iyolo' do totuong iddi.
Niada i Daud di Tulun do Pilistin
1 Om timungo' no di tulun do Pilistin o koinsanai di soudor diyolo' do hilo'd Apik, om powonsoyo' no di tulun dot Israil o diyolo'd kiim do hiri'd somok di tudan do waig do hilo'd Rantai do Yisriil. 2 Om pamanau no i limo o raja' do Pilistin do kisoudor do hatus o tulun dot iso' o sinompuruan om soribu o tulun dot iso' o sinompuruan. I Daud no om i tulun dau om moyo-woyo' do hiri'd tohuri-huri di Raja' Akis. 3 Om soira' di nokito di boyoon do soudor do Pilistin i Daud om i tulun dau om ponguhot no iyolo', “Nunu maan diti tulun dot Ibrani do hiti?” ka. Om boros ka di Akis do suminimbar, “Ilo' nopo om i Daud, i pagawai daa di Raja' Saul, i raja' dot Israil. Nga' alaid no iyau'd poinsugku' doho'. Om mantad poddi tadau'd kinorikatan dau om gisom do baino' om aiso' i' o sala' dau do nokito ku,” ka dau. 4 Nga' kotogod nogiddi di Akis i boyoon do soudor do Pilistin. Boros ka diyolo' dot id dau, “Suhuo' nogi' iyau'd muli' do hilo'd bandar di pinatahak nu dau. Nga' kada' nogi' iyau pologoso'd moyo' dati' do mongoi sangod. Tu' a' i' oila-ilaan do maso nopo doti'd sumangod om tumongkiad nondo iyau dati' om iyati' indo o saapon dau. Tu' okon toi ko' iri no daa o ralan dau do momolumbok do ginawo di tuan dau dot i kapamatai do tulun toko' o ralan dau do momolumbok? 5 Okon toi ko' i Daud iyau, i sindingon di tongoondu' do tontok di minintari' iyolo' di gulu po do poingkaa, ‘Boribu-ribu o pisangod do napatai di Saul, nga' hinapadan noribu o napatai di Daud,’ ka,” ka diyolo'. 6 Om lohowo' noddi di Akis i Daud om boro-boros no iyau, “Okunon ku i' dot id toguang do Kinorohingan di poimpasi dot otorodok ko dot id doho', om orohian oku i' daa do moyo' ko doho' do hiti'd pisangadan. Tu' mantad poddi nokorikot ko i' do hiti'd doho' om a' ko i' insan kasala' dot id doho'. Nga' a' ngai' asanangan diya' ilo raja'd suwai. 7 Iyo nopoddi, om sumonong-sonong nopod muli' om kada' pomonsoi do nunu nopo i katagadan ngai' dilo raja' do Pilistin,” ka dau. 8 Om boros ka di Daud do suminimbar, “Nunu o kasalaan do winonsoi ku? Tu' boros kanu om a' oku i' insan kasala' dot id diya' do mantad di korikot oku i'. Om ondung miagal diri, om nokuro tu' a' oku diya' pologoson do tumanud diya' do mongoi saap do pisangod nu?” ka dau. 9 Om boros ka di Akis, “Oilaan ku i' dot otorodok ko do miagal po di moloikat do Kinorohingan, nga' ilo raja'd suwai ot a' kaakun do moyo' ko dahai do mongoi sangod. 10 Iyo nopoddi, om muli' nod suab, oi Daud, om koinsanai di tuminongkiad di Saul di minongoi do hiti'd doho', om sumuab kou nod suab do mamanau dit a' po koulai o tadau,” ka dau. 11 Om pamanau noddi i Daud om i tulun dau dit osuab po di sinuabon, om uli' nod hilo'd pomogunan do tulun do Pilistin; om iri no tulun do Pilistin om tuminilombus do minamanau do minongoi do hilo'd Yisriil.
Pisangadan do Sumaap do Tulun dot Amalik
1 Duwo no tadau om korikot no i Daud om i tulun dau do hilo'd Siklag. Nga' di nopo dit a' po iyolo' nokorikot, om noongoi no di tulun dot Amalik kasangod i ponong id salatan do Yohuda om nongoi diyolo' songodo' o Siklag. Tinutudan diyolo' i bandar do Siklag, 2 om tinanggayan ngai' diyolo' i tongoondu'. Aiso' i' o pinatai diyolo' nga' tinanggayan ngai' no ma diyolo' i tulun do hiri di tuminongkiad iyolo' di bandar. 3 Tontok di nokorikot i Daud om i tulun ngai' dau do hilo'd Siklag, om kokito no diyolo' do notutudan no i bandar om nangatanggayan i sawo om i tangaanak diyolo'. 4 Om pingihad tomod noddi i Daud om i tulun dau do gisom dot aiso' no o posunsudan diyolo'd mihad. 5 Om iri duwo sawo di Daud, iyo Ahinuam di Abigail nga' natanggayan nogi' di pisangod. 6 Om tumongob tomod diri i Daud, tu' ongotogod ngai' dau i tulun dau, tu' nangatagakan no iyolo' do tangaanak om sawo diyolo'. Om potidumpahon i' daa'ddi diyolo' i Daud do watu do pamatai dau. Nga' pinogirot id Tuhan, i Kinorohingan di Daud, o ginawo dau. 7 Om boros kad Daud dot id di Abiatar, it Imam diri, i tanak di Ahimilik, “Onuo'd hiiti it ipod,” ka. Om ngoyo' nod Abiatar iri. 8 Om uhot no i Daud do Tuhan, “Ngoyon ku tuu gusao' i gampanakau'ddi? Okosupan ku i' tuu iyolo'?” ka dau. Om boros kad Tuhan do suminimbar, “Ngoyo' nopo iyolo' gusao'. Okosupan nu i' iyolo' om koidu' nu i' i tulun di nangatanggayan diri,” ka. 9-10 Om pamanau noddi i Daud do miwoyo' dit onom nahatus o tulun dau. Om soira' di nokorikot iyolo' do hiri'd Bawang do Bisor, om lombus no i Daud do minamanau do miwoyo' dit apat nahatus o tulun. Nga' iri nopo duwo nahatus o tulun om minundorong nod hiri, tu' a' no iyolo' kosoborong di Bawang do Bisor tu' angadalaan no kopio iyolo'd ohuyan. 11 Om kosolowot no i tulun di moyo-woyo' di Daud dot iso' o tanak do kusai do bansa' do Masir do hiri'd talun. Om ngoyo' no diyolo' pootodo' iyau do hiri'd di Daud. Om tolu no tadau di tanak dot a' nakaakan om a' nokoinum om paakano' noddi diyolo' i tanak diri om poinumo', 12 om onuwai diyolo' do roti di tua' dot ara do winonsoi om duwo o puru do tua'd anggur di kinoring. Om kaakan poddi iyau om okoris nogiddi kawagu iyau, tu' tolu no tadau dau dot a' nakaakan om a' nokoinum. 13 Om ponguhot noddi i Daud dau, “Isai o tuan nu? Om honggo o tadon nu?” ka dau. Om boros ka di tanak do suminimbar, “Iyoho' nopo om tulun do Masir, om turipon oku do tulun dot Amalik. Niduan oku di tuan ku di tolu no tadau do mantad baino' tu' suminakit oku. 14 Nongoi dahai songodo' i kinoiyonon di tulun do Kiriti di ponong hilo'd salatan do Yohuda om i kinoiyonon do sinompuruan do sompiiyon di Kalib, om tinutudan nogi' dahai i bandar do Siklag do gisom do nouu,” ka dau. 15 Om ponguhot no i Daud, “Mongoi ko i' daa potunud dahai do ralan do kumaa dot id kinoiyonon di gampanakau'ddi?” ka dau. Om boros ka di tanak do suminimbar, “Mongoi oku i', nga' mositi' no do sumumpa' ko dot id Kinorohingan dot a' ko mamatai doho' ko' popoguli' po doho' dot id tuan ku,” ka. 16 Om potunudo' no dau i Daud dot id kinoiyonon di tulun diri. Om tadau nopoddi nga' songinsasad nopo i gampanakau do hiri'd kinoiyonon diri. Om maso diyolo'd makan om minum om rumamai dot aarapadan dot ogumu' o dapu' do napanakau diyolo' do mantad id pomogunan do Pilistin om Yohuda. 17 Tadau noddi kawagu di minnanawau nogi' om ngoyo' no di Daud iyolo' songodo', om misangod nopoddi iyolo' do gisom do notuangan. Apat po nahatus o tangaanakwagu di songinsakai'd unta o nokopoggidu'; nga' iri nopo suwai om nangapatai ngai' no diyolo'. 18 Om nokoidu' ngai' i' di Daud o pointikid-tikid do tulun om dapu' di tinanggayan daa di tulun dot Amalik, om iri nogi' i duwo sawo dau. 19 Om aiso' i o tiso' do natagak. Naanu kawagu i' di Daud o koinsanai di sawo om tangaanak do tongokusai om tongoondu' om koinsanai di dapu' di tinanggayan di tulun dot Amalik. 20 Om naanu kawagu i' di Daud o koinsanai di dumba' om i tayam-tayam diyolo'. Om gayato' no di tulun di Daud i tayam-tayam diri do hiri'd gulu-gulu di konunu-nunuan di nangaahau diyolo', mikuwo'd minomoros iyolo' do poingkaa, “Iti nopo om di Daud nod bahagi'!” ka. 21 Om poguliai noddi di Daud do hiri'd duwo nahatus o tulun di minundorong do hiri'd toning di Bawang do Bisor, tu' nadalaan iyolo' do nohuyan. Om rubao' noddi di duwo nahatus o tulun i Daud om i tulun ngai' dau di santanud-tanud dau. Om solowot no i Daud diyolo' do mikuwo'd osonong tomod o podsusuwau dau. 22 Nga' haro ot id pogialatan di tulun di Daud di tuminanud dau do minongoi sangod dot angaraat om mosol, tu' boros ka diyolo', “A' i' tuminanud dati' do minongoi sangod iti tulun diti, om a' toko' no bohogian iyolo'dti naanu-anu toko'. Ngoyon nopo diyolo' ilo sawo om tangaanak diyolo' om poulian no,” ka. 23 Nga' boros kad Daud do suminimbar, “Oi tobpinai-tobpinai ku, kada' toko' kopio iyo'ddio' i nakatahak do Tuhan dot id dati'. Tu' ginompi' toko' i' dau om nonuan toko' dau do kamanangan do suminangod di gampanakau! 24 Aiso' i' o tiso' pod sumokodung dino tosorou dokoyu. Iyoon nopo o pamahagi': i minundorong do minadtamong di konunu-nunuan do nigitan om i minongoi sangod, nga' mositi' no dot oirad nopo o bahagi' dot aanu,” ka dau. 25 Om miagal noddi o pinanalasai di Daud do hal diri. Om mantad poddi om tonudon kasai' no ot oturan diri do hilo'd Israil do gisom do baino'. 26 Soira' di nokoguli' i Daud do hilo'd Siklag om pootodo' no dau o sombohogian di konunu-nunuan do naanu diyolo' do mantad id pisangod dot id boyoon do tulun do Yohuda, i hilo'd bandar di pininghambaan di tulun dau. Om patanggayai no dau'd boros do poingkaa, “Romito' no dokoyu iti konunu-nunuan do naanu dahai do mantad id pisangod do Tuhan do maan dahai'd popuhawangon dokoyu,” ka. 27-31 Iri nopo bandar do nonuan diyolo'ddi nga' hilo'd: Baitol, Rama i ponong id salatan do Yohuda, Yatir, Aroir, Sipmot, Istimoa, Rakal, om i ngai' bandar do tulun do Yiramiil, om i bandar do tulun do Kini, Horma, Borasan, Atak, Hibron, om koinsanai di bandar di nopinghambaan di Daud om i tulun dau nga' nonuan ngai' nopo diyolo' do nipuhawang.
Kinapatayon di Saul om i Tangaanak Dau
1 Daamot nopoddi, om suminangod o tulun do Pilistin do tulun dot Israil do hilo'd Nuluhon do Gilbua. Om ogumu' tomod diri o tulun dot Israil do napatai. Om iri no noolu-olu' diyolo' do kohompit i Raja' Saul om i tangaanak dau, om minogidu' ngai'. 2 Nga' ginusa' i' iyolo' di tulun do Pilistin om patayo' no diyolo' i tolu tanak di Saul do tongokusai; i Yonatan, i Abinadab om i Malkisua. 3 Om mitotos tomod do misangod o hiri'd posorili' di Saul gisom dot iyau nga' ogumu' tomod diri o notogu' om napana' di pisangod, om nouruan tomod iyau do nosuhat. 4 Om boros ka dau dot id tanakwagu di mongingigit di rapo-rapo dau, “Kodongo' ino gayang nu om patayo' oku, om okon pondo ko' iti tulun do Pilistin di kapir o kapamatai doho' om kopinghingi-hingi doho',” ka dau. Nga' a' i' kasaap i mongingigit do rapo-rapo dau do momonsoi di pinonuhuan dau'ddi. Om kodongo' nopoddi di Saul i gayang dau om tobok no iyau. 5 Om soira' di nokito di mongingigit do rapo-rapo di Saul do napatai no i Saul om tobok no iyau kadauu om kapatai noddi do nakaandad di Saul. 6 Om miagal noddi o kinapatai-patayo' di Saul, om i tolu o tanak dau do tongokusai om i mongingigit do rapo-rapo dau, om koinsanai di tulun di moyo-woyo' kasai' di Saul do tontok do tadau'ddi. 7 Om tontok di nokorongou i tulun dot Israil di hiri'd sampaping di Rantai do Yisriil om i ponong id koulayon do mantad id Bawang do Yordan do nokopoggidu' i soudor dot Israil, om napatai i Saul om i tangaanak dau'd tongokusai, om iyolo' nogiddi nga' tuminongkiad di bandar diyolo' om minogidu'. Om ngoyo' noddi di tulun do Pilistin solodo' i piro-piro o bandar diri. 8 Tadau noddi kawagu, di natalib i pinisangadan om ngoyo' no di tulun do Pilistin pingonuo' i konunu-nunuan di songintonggoi di soudor dot Israil di nangapatai. Om kabantalai no diyolo' i rata' di Saul om i tolu tanak dau do hilo'd Nuluhon do Gilbua. 9 Om iduwo' no diyolo' i tulu di Saul om oluso' no ngai' i rapo-rapo dau, om ponuhu' nogiddi do tulun do popotongkop do habar dot osonong diri dot id tingolig om id koinsanai'd tulun diyolo' om id pointongkop do pomogunan do Pilistin. 10 Om poiliho' no diyolo' i rapo-rapo'd Saul do hiri'd walai di tingolig dot Astorit, om palantako' no diyolo' do hiri'd tolig di bandar do Bait-San i rata' di Saul. 11 Om soira' di nokorongou i tulun do hilo'd Yabis, i hilo'd Giliad, di winonsoi do tulun do Pilistin dot id di Saul, 12 om tuongo' nopo di gunsiou diyolo' do minamanau do minongoi'd hilo'd Bait-San. Om polintuhuno' no diyolo' i rata' di Saul om i rata' di tangaanak dau do mantad id tolig diri om igitai no kawagu diyolo' do hilo'd Yabis. 13 Om tutudai no diyolo' i rata' do hilo' om lobongo' no i tulang do hiri'd sahau di kayu do tamariska do hiri'd bandar diri. Om puasa noddi iyolo' do solinaid do turu' o tadau.
Nokorongou i Daud do Napatai i Saul
1 Tontok di napatai no i Saul, om koguli' nogi' i Daud do mantad id pinisangadan di minangala' iyau di tulun dot Amalik. Om undorong noddi iyau do hilo'd Siklag do solinaid do duwo o tadau. 2 Tadau noddi kawagu om korikot no o tiso' o tanakwagu do mantad id kokiiman di Saul. Om hinurak dau o pakayan dau om naraban dau do pupuk o tulu dau do popointalang do tumongob iyau. Om ongoi no iyau solowot di Daud om otud no do hiri'd toguang dau. 3 Om uhoto' no iyau di Daud, “Honggo o tadon nu?” ka dau. Om boros ka di tanakwagu do suminimbar, “Minogidu' oku do mantad hilo'd kokiiman do tulun dot Israil,” ka dau. 4 Om boros ka di Daud, “Sunudai oku daa ondung poingkuro kopio o nosiliu,” ka dau. Om boros ka di tanakwagu do suminimbar, “Minogidu' ngai' i soudor toko' do mantad id pinisangadan. Om okon nopo ko' ogumu' o soudor do napatai nga' iyo Saul di Yonatan, i tanak dau nga' napatai nogi',” ka dau. 5 Om boros kad i Daud do minonguhot dau, “Poingkuro ko do nokoilo do napatai i Saul om i Yonatan?” ka. 6 Om boros ka di tanakwagu do suminimbar, “Tontok nopoddi, om koontok no kopio do hilo' oku'd Nuluhon do Gilbua om kokito ku noddi i Saul do tumobok di tandus dau. Om kawagu po kanogi' nga' gusa-gusaon no iyau di korita'-kuda' om i soudor do pisangod di songinsakai'd kuda' do mongoi ponutuk dau. 7 Om koili no i Saul om kokito oku no dau, om lohowo' oku no dau, ‘Nunu'ri, oi Tuan ku,’ kangku do suminimbar. 8 Om ponguhot no iyau doho' ondung isai oku. Om posunudo' ku no do tulun oku dot Amalik. 9 Om boros kaddi dau dot id doho', ‘Kaino do hiiti, maai oku diya' patayo'! Tu' nadalaan oku nod nosuhat om a' no alaid om apatai oku no,’ ka. 10 Om insomok oku noddi dau om maai ku no iyau patayo'. Tu' oilaan ku no dot ahaba' po iyau om apatai no. Om iduwo' ku noddi i tupi' dau do dong raja' om i golong do poinsulung do longon dau, om igitai ku no do hiti'd diya', oi Tuan,” ka dau. 11 Om korongou poddi di Daud iri, om hurako' no dau i pakayan dau tu' tumongob no kopio iyau. Om miagal ngai' nopoddi o winonsoi di tulun dau. 12 Tumongob tomod diri iyolo' om pogihad noddi iyolo' do gisom do nosongodou, om a' iyolo' minakan om a' mininum do maan do kopomuhandaman di Saul, om i Yonatan, om koinsanai di tulun dot Israil, i tulun do songonuon do Tuhan, tu' ogumu' tomod o nangapatai do hiri'd pinisangadan. 13 Om uhoto' noddi di Daud i tanakwagu di pinoporomut di habar diri, “Honggo o tadon nu?” ka dau. Om boros ka di tanakwagu do suminimbar, “Iyoho' nopo om tulun dot Amalik nga' poingiyon oku do hiti'd pomogunan nu, oi Tuan,” ka dau. 14 Om boros ka di Daud, “Nokuro tu' kasaap kopio ko do mamatai di raja' do nopili'd Tuhan?” ka dau. 15 Om ponuhu' no i Daud do songulun di soudor dau do mamatai di tanakwagu'ddi. Om bobogo' no di soudor i tanakwagu om patayo' no dau. 16 Om boros ka di Daud dot id tulun dot Amalik diri, “Iya' i' o pinaparatu' do hukuman do kapatayon dot id tinan nu tu' minangakun ko i' dot iya' o minamatai di raja' do nopili'd Tuhan,” ka dau.
Sinding di Daud do Minogihad di Saul om i Yonatan
17 Om pogihadai no di Daud i Saul om i Yonatan, i tanak di Saul do mikuwo'd minodsinding diti sinding do mogihad. 18 Om minonuhu' nogi' iyau do popotuduk diti sinding do mogihad dot id koinsanai do tulun do payat do Yohuda. (Nokotulis i' iti sinding diti dot id Buuk do Yasar.) 19 “Nangapatai no i boyoon toko' do hilo'd konulu-nuluan dot Israil! Nangapatai no i gunsiou toko'! Naraag ngai' no i kaandasan do tulun dot ogumu'. 20 Kada' posusuyo' iti habar diti do hilo'd Gat om kada' posunudo' iti do hilo'd karalan-ralanan dot Askilon. Kada' potoodo' i tongoondu' do Pilistin; kada' posonongo' o ginawo di tangaanak do tondu' di tulun do kapir. 21 Kada' po daa kasandatai do rasam ko' bolobou o hilo'd konulu-nuluan do Gilbua; aiso' kasai' po daa o sumuni do hiri'd koumaan do hilo'! Tu' hilo' no o nokoilihon di kolid do gunsiou toko' dot id suang do kointingayaman, a' noddi opulangan do tumau i kolid di Saul. 22 Kipaliu i pana' di Yonatan, om aiso' ot olu-oluon di gayang di Saul, do monibas di soudor dot ongokoris, om mamatai di pisangod. 23 Kosianan om koupusan kopio i Saul om i Yonatan, misugku' i' di poimpasi po, om misugku' i' do minatai; okoris po iyolo' ko' singa, om osiau ko' kondiu. 24 Oi tongoondu' dot Israil, pogihadai no dokoyu i Saul! Rinosukan kou dau do pakayan dit angaragang om agayo gatang, linumis kou dau do tamas om watu dit olumis, it agayo o gatang. 25 Nangapatai no i soudor do gunsiou, napatai iyolo' dot id pinisangadan. Napatai i Yonatan do hilo'd konulu-nuluan. 26 Tumongob oku do kosorou diya', oi Yonatan, i tobpinai ku; osonong tomod ko dot id doho'! Agayo tomod o kosianan nu doho', agayo po ko' kosianan do tondu'. 27 Nangapatai no o gunsiou toko'! Notongkiadan no om aiso' noddi o kootuk-otukon di rapo-rapo diyolo'!” ka.
Siniliu i Daud do Raja' do Yohuda
1 Om uhot noddi i Daud do Tuhan, “Mongoi oku tuu undorong dot id ongoiso' di bandar do hilo'd Yohuda?” ka dau. “Oo,” kad Tuhan do suminimbar. “Bandar do honggo'ddi?” ka kawagu di Daud do minuhot. “I bandar do Hibron,” kad Tuhan. 2 Om ongoi noddi i Daud do hilo'd Hibron om powoyoo' goduwo no dau i sawo dau: i Ahinuam, i mantad hilo'd Yisriil, om i Abigail, i sawo daa di Nabal, i tulun do Karmol. 3 Om nangatan nogi' dau o koinsanai di tulun dau, om iri ngai' i sompiiyon diyolo' om undorong no iyolo' do hiri'd kabandaran di posorili' do Hibron. 4 Om ongoi noddi i tulun do Yohuda do hilo'd Hibron, om siliho' no diyolo' i Daud do raja' do Yohuda. Soira'ddi do nokorongou i Daud do nolobong no di tulun do Yabis di hilo'd Giliad i Saul, 5 om ponuhu' no iyau do piro-piro o tulun do minongoi'd hilo' om popoboros do poingkaa, “Maha' daa om barakatan kou do Tuhan tu' pinopointalang kou i' do kotorodoko' dokoyu dot id raja' dokoyu dot i minomolobong kou dau o pinopointalang. 6 Om maha' daa om pointalangon do Tuhan o kotorodoko' om kosianan dau dot id dokoyu. Om iyoho' nga' osonong indo o wonsoyon dot id dokoyu tu' i winonsoi dokoyu'ddi o kapamansayan ku'd osonong. 7 Sumiliu kou no do tulun dit okoris om osiou! Napatai no i Saul, i raja' dokoyu, om nopili' oku no di tulun do Yohuda do sumiliu do raja' diyolo',” ka.
Siniliu do Raja' dot Israil i Isbosit
8 I Abnor nopo, i tanak di Nor, om minogidu' do miniwoyo' di Isbosit, i tanak di Saul, do hilo'd Mahanaim, it id soborong do Yordan. I Abnor nopoddi nga' boyoon do soudor di Saul. 9 Om hilo' no do siniliu di Abnor i Isbosit do raja' do watas do Giliad, om Asur om Yisriil, om Ipraim, om Binyamin, om pointongkop dot Israil. 10 Apat no nohopod o toun do tumur di Isbosit di nosiliu iyau do raja' dot Israil, om duwo o toun do koloido' dau do minomorinta'. Nga' iri nopo payat do Yohuda om otorodok kasai' i' dot id di Daud. 11 Om turu' o toun om satanga' di Daud do momorinta' do watas do Yohuda do hilo'd Hibron.
Minisangod ot Israil om Yohuda
12 Om pamanau no i Abnor om piro-piro o pagawai di Isbosit do mantad hilo'd Mahanaim om pakayaai no diyolo' do hilo'd bandar do Gibion. 13 Om ngoyo' no di Yoab, (tina' nopo dau nga' i Soruya), om i pagawai di Daud do suwai solowoto' iyolo' do hiri'd somok di kulam do hilo'd Gibion. Om minitimbaba' iyolo' do minirikau do hiri'd tisan di kulam; tu' hiri'd soborong ponong hiti o nirikau di Abnor om i tongoulun dau, om id soborong ponong hilo' o nirikau di Yoab om i tongoulun dau. 14 Om boros ka di Abnor dot id di Yoab, “Suhuo' to ilo tulun to do misaap do miala-ala'!” ka dau. “Ba,” ka di Yoab do suminimbar. 15 Om pamanau noddi o hopod om duwo o tulun do mantad id payat do Binyamin do ponokowakil di Isbosit, om pamanau o hopod om duwo tulun do mantad id pogialatan di tulun di Daud. 16 Om sompori-pori nopoddi iyolo' do mamabut do tobuk di ponokisaap dau om sopitobok-tobok do gayang do hiri'd tobik di tiso', gisom do koinsanai nopoddi do napatai i duwo nohopod om apat o tulun. Om iri no o kinopomungaranan di kinoiyonon do hilo'd Gibion diri do “Tumo do Gayang”. 17 Om kinootuson nopoddi nga' pinisangadan dit adalaan kopio. Om kaala' no di soudor di Daud i Abnor om i soudor dot Israil. 18 Om hiri ngai' nopo i tolu o tanak di Soruya, i Yoab, i Abisai, om i Asail. I Asail nopo nga' iyo pod tambang o kosiaho' do manangkus, 19 om a' noddi dau tingkadan do momogusa' i Abnor. 20 Om koili no i Abnor om ponguhot no iyau, “Iya' ino, oi Asail?” ka dau. “Oo,” ka di Asail do suminimbar. 21 Om boros kad i Abnor, “Kada' oku iyoho' gusao'. Ngoyo' nogi' gusao' ot ongoiso' dilo soudor do suwai, om onuon nopo i rapo-rapo dau,” ka dau. Nga' gusaon kasai' i' iyau di Asail. 22 Om boro-boros po kawagu i Abnor di Asail, “Kada' oku no gusao'! Kada' oku sansagai do mamatai diya'! Tu' poingkuro oku nondo do tumimbaba' di Yoab, i tobpinai nu?” ka dau. 23 Nga' gusaon kasai' i' di Asail iyau. Om potokono' noddi di Abnor i tandus dau do ponong id tohuri om koonong nopo o tian di Asail gisom do nokolopuson i tandus do hiri'd likud dau. Om kahaba' nopoddi i Asail do hiri'd tana' om kapatai no. Om undorong ngai' nopoddi i tulun do hiri'd kinoilihon dau, di nokorikot iyolo'd hiri. 24 Nga' maso i' di Yoab om i Abisai do momogusa' di Abnor. Om tontok di notonob no o tadau om korikot no iyolo' do hilo'd nulu-nulu dot Ama, i ponong id koulayon do mantad id Gia, it id ralan do kumaa do hilo'd tana' do kowotuan do Gibion. 25 Om ongoi po kawagu i tulun do Binyamin uhup di Abnor, om tamong no iyolo' do hiri'd timpak dot iso' o nulu-nulu. 26 Om hiri no o tadon di Abnor do pinopolohou dot id di Yoab do poingkaa, “Misangod toko' nopo tuu'dti do gisom dot alaid? A' nu toi oilaan do karaaton noo o kootuson diti pisangadan? Okon toi ko' iyahai nga' bansa' i' dokoyu? Songkuro po o koloido' om oduhan nu nogi' ilo tulun nu do momogusa' dahai?” ka dau. 27 Om boros ka di Yoab do suminimbar, “Sumumpa' oku no dot id suang do ngaran do Kinorohingan di poimpasi, dot ondung a' ko daa minomoros do miagal diri om atantu' no do gusaon kasai' kou i' dilo tulun ku do gisom do kosuabon do suab,” ka dau. 28 Om pounio' noddi di Yoab i torumpit dau do monuhu' di tulun dau do tumingkod do momogusa' di soudor dot Israil. Om kotingkod noddi i pisangadan. 29 Om ponuabai nopo i Abnor om koinsanai di tulun dau do minamanau do minaya' di Rantai do Yordan. Om soborong nogiddi iyolo' di Bawang do Yordan, om nosongodou po iyolo' do minamanau di tadau kawagu om korikot nogi' do hilo'd Mahanaim. 30 Om soira' di nokotingkod i Yoab do momogusa' di soudor dot Israil om timungo' ngai' no dau i tulun dau. Om koilaai nogiddi dau dot a' hino o hopod om siam o tulun do suwai ko' i Asail. 31 Tolu nahatus om onom nohopod o tulun di Abnor do mantad id payat do Binyamin do pinatai di tulun di Daud. 32 Om ngoyo' noddi di Yoab om i tulun dau i rata' di Asail om lobongo' no do hilo'd kalabangan do sompiiyon dau di hilo'd Baitlahim. Om ponuabai nopoddi iyolo' do minamanau om korikot nogi' iyolo' do hilo'd Hibron di kosuabon.
1 Om haro kasai' po o pisangadan di soudor di sumokodung di sompiiyon di Saul om i soudor di sumokodung di Daud. Om muhang-ruhang nopoddi o kokoriso' di Daud, nga' muhoi-luhoi noddi i pisangod dau.
I Tangaanak di Daud
2 Iti no ngai' it onom o tanak di Daud do nosusu do hilo'd Hibron, do nirus do mantad id kotuahan om gisom dot id komulakan: i Amnon, tina' nopo dau om i Ahinuam, i mantad hilo'd Yisriil; 3 i Kiliab, tina' nopo dau om i Abigail, i sawo daa di Nabal, i tulun do Karmol; i Absalom, tina' nopo dau om i Maaka, i tanak di Talmai, i raja' do Gosur; 4 i Adonia, tina' nopo dau om i Hagit; i Sipasa, tina' nopo dau om i Abital; 5 i Yitram, tina' nopo dau om i Igla. Hilo' ngai' nopod Hibron o kinosusuon do tangaanak diti.
Suminokodung i Abnor di Daud
6 Om daamot nopo di misaap i soudor di Daud om i soudor dit ongotorodok dot id sompiiyon di Saul, om tumotos nopoddi i Abnor do papabantug do ngaran dau dot id pogialatan di tumatanud di Saul. 7 Insan tadau om tondoso' no di Isbosit, i tanak di Saul, i Abnor do minongoi dudun di Rispa, it iso' di panakasawo di Saul. I Rispa nopo om tanak di Aya do tondu'. 8 Om kotogod tomod noddi i Abnor tu' tinondos i' iyau do miagal diri. Om boros ka dau, “Ondos nu daa om monompuraraat oku di Saul? Ondos nu daa om sumokodung oku do Yohuda? Mantad po di gulu po om otorodok oku i' dot id di Saul, i tapa' nu, om id tobpinai dau, om id tambalut dau. Om nuhupan ku iya' gisom dot a' ko i' naala' di Daud, om pasalaon oku poddi diya' do pasal nod tondu'! 9-10 Osonong nogi' do monguhup oku di Daud, om kawagu po nga' nakabatos mantad nod Tuhan do patahakon dau iti pomorintaan di Saul om i sinakagon dau dot id di Daud, om silihon nondo i Daud do raja' do pointongkop dot Israil om Yohuda. Om hukuman oku nopod Kinorohingan dot a' oku no tumotos do mamayaan di nakabatos do Kinorohingan dot id di Daud diri!” ka dau. 11 Om moddosi tomod diri i Isbosit di Abnor, gisom dot a' no iyau nokosimbar dot ongoiso' piya o boros. 12 Om ponuhu' no i Abnor do susuhuon dau do mongoi do hilo'd di Daud, i hilo'd Hibron do tontok diri, do mikuwo'd popoboros do poingkaa, “Isai po o momorinta' do pomogunan diti? Momonsoi nod batos dot id doho' om uhupan ku indo iya' do posokodung ngai' diya' di tulun dot Israil,” ka. 13 Om boros kad Daud do suminimbar, “Ba, osonong! Poromuton noti boros diti dot id di Abnor: Momonsoi oku id pibatasan dot id diya', nga' haro ot iso' o pokionuon ku do wonsoyon nu: Mositi' nod powoyoon nu i Mikal, i tanak di Saul do tondu'ddi, do mongoi ko solowot doho',” ka. 14 Om minonuhu' po i Daud do piro-piro susuhuon dot id di Isbosit, do popoboros do poingkaa, “Pogulio' no doho' i Mikal, i sawo ku. Tu' noboli ku no iyau do hatus o kulit di sisinsibon do monunat do tulun do Pilistin,” ka. 15 Om suhuo' noddi di Isbosit i tulun di sinuhu' di Daud do mongongoi di Mikal do mantad id di Paltiol, i tanak di Lais, i sawo daa di Mikal. 16 Nga' ongoi i' tanud di Mikal i Paltiol, do mikuwo'd mihad-ihad tomod do hiri'd ralan do gisom do nokorikot do hilo'd bandar do Bahurim. Om boros kaddi di Abnor dot id di Paltiol, “Ula' no, uli' nogi'!” ka dau. Om uli' nogiddi i Paltiol. 17 Om ongoi noddi i Abnor ponokirunding di boyoon do tulun dot Israil, om boros ka dau dot id diyolo', “Alaid kou no dot orohian dot i Daud o raja' dokoyu. 18 Om iti no o maso dokoyu'd osonong. Sorohon no dokoyu do nakabatos mantad nod Tuhan dot id di Daud o poingkaa, ‘I Daud o pakayon ku do mamasi do tulun dot Israil, i tulun ku, do mantad id tulun do Pilistin om mantad id pisangod diyolo'd suwai!’ ka. 19 Om ruminunding nogi' i Abnor di payat do Binyamin, om ongoi nogiddi iyau do hilo'd Hibron do minongoi pomisunud di Daud di nopogiokun-okunan di tulun dot Israil om i payat do Binyamin,” ka. 20 Tontok di minongoi i Abnor solowot di Daud do hilo'd Hibron do miwoyo' di duwo nohopod o tulun dau, om papaharo no i Daud do poginakanan do maan diyolo'. 21 Om boros kaddi di Abnor dot id di Daud, “Mamanau oku nodti do mongoi ponuhu' do koinsanai di tulun dot Israil do sumokodung diya'. Om romiton ko indo diyolo' do sumiliu'd raja' diyolo', om oporinta' nu indo o pointongkop diti pomogunan do miontok di korohian do ginawo nu,” ka dau. Om jomino' no di Daud dot aiso' o koligagaanan di Abnor, om pologoso' nogiddi dau i Abnor do minamanau.
Pinatai di Yoab i Abnor
22 A' po alaid do mantad diri om koguli' no i Yoab om i tulun di Daud do mantad id pinisangadan, om ogumu' tomod o dapu' do naahau diyolo' do mantad id pisangod. 23 Om kosunudai noddi i Yoab do minongoi solowot di Raja' Daud i Abnor om nokouli' noddi do mikuwo'd jinamin dot aiso' o koligagaanan dau. 24 Om ongoi noddi i Yoab solowot di raja', om boro-boros nod, “Nokuro tu' iyo'ddi o winonsoi nu? Ruminikot i Abnor dot id diya', om nokuro'ddi tu' pologoso' nu nopo iyau do minamanau? 25 Kinaangayan nopo dau do hiti nga' minongoi no pagakal, om minongoi pongilo-ilo ngai' di wonsoyon nu om i kowoyo-woyoo' nu. A' ko i' koilo dot iiyo'ddi?” ka dau. 26 Om kotongkiad poddi i Yoab di Daud om ponuhu' no iyau do tulun do mongoi pomolohou di Abnor. Om kokosupai no diyolo' i Abnor do hilo'd somok di torobong do Sira, om pogulio' no diyolo' iyau. Nga' a' i' nokoilo i Daud do pasal diri. 27 Om korikot poddi i Abnor do hilo'd Hibron, om angatai no iyau di Yoab do hiri'd toning di wawayaan dot agayo, do miagal-agal do posunud dit a' koino-ino do korongou o tulun do suwai. Nga' hiri nogiddi do tinobok di Yoab o tian di Abnor do gisom do napatai iyau. Om miagal noddi o kinapatai-patayo' di Abnor, tu' minamatai i' iyau di Asail, i tadi' di Yoab. 28 Soira'ddi nokorongou i Daud do pasal diri om boros ka dau, “Oilaan id Tuhan dot okon i' ko' iyoho' om okon ko' iti rayat ku o nakasala' dot id suang di kinapatayon di Abnor. 29 I Yoab nopo om i sompiiyon dau o hukuman! Haro po daa kasai' o sinakagon di Yoab di kitoruol di haro kasai' o raha' do sumoliwan, ko' i kitoruol do kulit dit araat kopio, ko' tongokusai di don tongoondu' do kowoyo-woyoo', ko' it apatai dot id pisangadan, ko' it aiso' o takanon!” ka dau. 30 Om iyo noddi i Yoab di Abisai, i tadi' dau'ddi, do suminuli' di Abnor tu' minamatai i' i Abnor di Asail, i tadi' diyolo' di hilo'd pinisangadan do hilo'd Gibion.
Linobong i Abnor
31 Om suhuo' noddi di Daud i Yoab om koinsanai di tulun dau do momohurak do pakayan diyolo', om manampakai di pakayan do mogihad, tu' sinuhu' iyolo' do mogihad di Abnor. Om tontok di linobong i Abnor om i Daud o minamanau do hiri'd tohuri-huri di lungun. 32 Pinamalabangan nopo di Abnor om hilo'd Hibron, om miningihad tomod diri i raja' om koinsanai di rayat dau do hiri'd lobong di Abnor. 33 Om pogihadai noddi di Daud i Abnor, boros ka dau, 34 “Nokuro tu' minatai i Abnor do miagal do tulun di basug? A' i' nakagasan o longon dau, om gakod dau nga' a' i' nakagasan do rantai. Minatai iyau do pinatai do tulun dit araat om orongit!” ka. Om pogihadai po kawagu di tulun dot ogumu' i Abnor. 35 Om nosongodou nopo do lugu-lugutan di tulun i Daud do makan nga' sumpa' nogi' iyau do poingkaa, “Patayon oku nopod Kinorohingan do makan oku no dot a' po otonob ilo tadau!” ka dau. 36 Om osonong tomod diri o ginawo di rayat do nokorongou'ddi. Tu' nunu nopo o wonsoyon di Raja' Daud nga' poposonong ngai' nopod ginawo diyolo'. 37 Om tontok nod tadau'ddi do nokoilo i rayat di Daud om koinsanai di tulun dot Israil dot a' i' nokohompit-hompit i Daud do minamatai di Abnor. 38 Boros ka di raja' dot id pagawai ngai' dau, “A' toi dokoyu oilaan do minatai baino' o songulun o boyoon dot agayo do hiti'd Israil? 39 Mulong po dot iyoho' daa i raja' do nopili'd Kinorohingan nga' oluhoi no ot opurimanan ku do tadau'd baino'. Adalaan no kopio korongit i tangaanak di Soruya. A' oku no kosoibau diyolo'. Hukuman po daa do Tuhan i tulun dot araat diri do miontok di winonsoi diyolo'!” ka dau.
Pinatai i Isbosit
1-4 Iri nopo sinakagon di Saul do suwai om i Mopibosit, i tanak di Yonatan. Nga' nokimpaan iyau di limo nogi' o toun do tumur dau do tontok di napatai i Saul om i Yonatan. Tu' tontok di nokorongou i mitamong di Mopibosit do habar do kinapatayon diyolo' do mantad hilo'd Bandar do Yisriil, om poggidu' no iyau do poingkibit i tanak. Nga' arau-arau tomod iyau om gowoi poddi om karatu', om kokimpaai noddi. Om soira'ddi nokorongou i Isbosit, i tanak di Saul diri, do napatai i Abnor do hilo'd Hibron, om moddosi tomod diri iyau. Om ongooris ngai' i tulun dot Israil. I Isbosit nopoddi om haro o duwo pagawai dau di siniliu do boyoon do tulun di mongoi sangod. Iyolo' nopoddi nga' i Rikab om i Baana. Iyolo' nopo om tangaanak di Rimon, i mantad hilo'd Biirot, it id suang do payat do Binyamin. (Biirot nopo om id suang i' do watas do Binyamin. Iri nopo tulun mantad do hiri nga' minogidu' do kuminaa do hilo'd Gitaim, om hilo-hilo' noddi iyolo' do poingiyon.) 5 Om ongoi no i Rikab om i Baana do hiri'd walai di Isbosit. Om pitangaadau no do nokorikot iyolo'd hiri, om maso no di Isbosit do koodop do dangadau. 6 Om sumubu po nga' nokoodop no i tondu' di madtatamong di walai tu' nalamayan do monompipi' di gandum. Om salakoi nopoddi i Rikab om i Baana. 7 Kosuang poddi iyolo' do hiri'd walai om tilombus nopo iyolo' do hiri'd bilik di Isbosit. I Isbosit nopo do maso'ddi nga' nokoolong tomod do koodop, om toboko' no diyolo' iyau do gisom do napatai. Om maai noddi diyolo iduwo' o tulu di Isbosit om igitai no diyolo' do minamanau. Om kosuabai nopo iyolo' do minamanau do duminarapas di Rantai do Yordan. 8 Om ngoyo' noddi diyolo' patahako' i tulu di Isbosit dot id di Daud do hilo'd Hibron. Om boros ka diyolo', “Iti no o tulu di Isbosit, i tanak di Saul, i pisangod nu di tumotos daa do mamatai diya'. Tadau nod baino' do sinulian do Tuhan i winonsoi di Saul om i sinakagon dau dot id diya',” ka diyolo'. 9 Nga' boros ka di Daud do suminimbar, “Sumumpa' oku no dot id Tuhan di poimpasi, i minamasi doho' do mantad id koinsanai do koligagaanan, dot iyau o koilo dot otopot iti poboroson ku. 10 Tu' iri nopo tulun di minongoi poporongou doho' do habar do napatai i Saul di hilo'd Siklag, om minomusorou daa dot iri nopo habar di napatai i Saul diri nga' habar dot osonong. Nga' tinangkap ku nogiddi iyau om hinukuman ku do kapatayon! 11 Om okon-okon pondo kawagat o pomohukum ku dot id tulun dit araat, tu' minamatai do tulun dit aiso' o sala', i maso id koodop do hiri'd walai dau! Dinondo no do sulian ku ino kararaat dokoyu. Tonuson ku no iyokoyu do mantad hiti'd pomogunan!” ka dau. 12 Om ponuhu' no i Daud di soudor dau do minamatai di Rikab om i Baana. Om di nopoddi napatai, om potodo' no diyolo' o longon om gakod di duwo o tulun diri, om pogiiso' nogiddi do hiri'd toning di kulam do hilo'd Hibron. Nga' iri nopo tulu di Isbosit om nongoi i' diyolo' lobongo' do hiri'd lobong di Abnor do hilo'd Hibron.
Nosiliu i Daud do Raja' dot Israil om Yohuda
1 Om ongoi ngai' noddi i boyoon do payat dot Israil solowot di Daud do hilo'd Hibron. Om boros ka diyolo' dot id dau, “Iyahai nga' koworisan nu i'! 2 Di nopo di gulu po, dit i Saul po o raja' dahai, om iya' i' o minomoyo' do tulun dot Israil do mongoi sangod. Om kawagu po nga' nakabatos nod Tuhan dot id diya' dot iya' no o woyoon do tulun dau om iya' o sumiliu do raja' diyolo',” ka diyolo'. 3 Om ongoi ngai' nopoddi i boyoon dot Israil solowot di Daud do hilo'd Hibron. Om pomonsoi no i Daud do batos dot id diyolo' om siliho' no diyolo' i Daud do raja' dot Israil. 4 Tontok nopo di nosiliu i Daud do raja' om tolu no nohopod o toun do tumur dau. Om koloido' nopo dau do momorinta' om apat nohopod o toun. 5 Turu' o toun om onom o tulan dau do momorinta' do hilo'd Hibron om tolu nohopod om tolu toun dau do momorinta' do koinsanai dot Israil om Yohuda do hilo'd Yorusalim. 6 Insan tadau om pamanau no i Daud om i tulun dau do minongoi panangod do Yorusalim. Om ondos daa di tulun do Yobus i tulun mantad do hiri, om a' kaala' i Daud do bandar do Yorusalim. Om boros ka diyolo' dot id dau, “A' ko i' kosuang do hiti. Tu' ilo' piya tulun do bolou om kimpo' nga' katalob i' diya',” ka diyolo'. 7 (Nga' naanu kopio id Daud o Sion, i kuta' daa diyolo'. Om pungaranai noddi do, “Bandar di Daud” o kinoiyonon diri.) 8 Tontok di tadau'ddi om boro-boros no i Daud dot id tulun dau, “Haro i' o tulun do hiti dit araatan do tulun do Yobus, do miagal doho' tu' araatan diyolo', om sipamatai diyolo'? Haro nopo om mongoi kou no waya' di liang do waig om ngoyon i' songodo' i tulun do bolou om kimpo', i karaatan ku'ddi,” ka dau. (Iri noddi o kinabara-barasan diyolo' do poingkaa, “Iri nopo tulun do bolou om kimpo' om a' no koino-ino do sumuang do Walai do Tuhan,” ka.) 9 Kaanu poddi di Daud i kuta' do Sion om iyon no iyau do hiri, om pungaranai no dau iri do, “Bandar di Daud”. Om wonsoyo' no dau i bandar do posorili' di kuta'ddi, do pinoimpuun do hiri'd ponong id koulayon do mantad id nulu-nulu di tinimbunan do tana'. 10 Om maid-laid nga' muhang-ruhang o kokoriso' di Daud tu' woyoon i' iyau'd Tuhan, i Kinorohingan dit Agayo Kuasa'. 11 Om porikot no i Hiram, i raja' do pomogunan do Tirus, dot id di Daud do tulun di mongilo-ilo do pogidagang-dagangan. Om nonuan nogi' dau i Daud do kayu sedar do Libanon, om piro-piro o tukang kayu om tukang watu do momonsoi do walai do raja'. 12 Om koilaai nogiddi kopio di Daud do natantu' mantad no iyau'd Tuhan do sumiliu do raja' dot Israil om pinosimbayan do Tuhan o pomorintaan dau do maan do koinsanangan di tulun do songonuon do Tuhan. 13 Di nopo di nokoundaliu i Daud do mantad hilo'd Hibron, di hilo' iyau id Yorusalim om minanansawo po iyau do piro-piro o tongoondu', om minanganu do tongoondu' do numaan dau do panakasawo. Om ogumu' poddi o tanak dau do tongokusai om tongoondu'. 14 Iti ngai' no i tangaanak dau do tongokusai di nosusu do hilo'd Yorusalim: i Samua, i Sobab, i Natan, i Suliman, 15 i Yibhar, i Ilisua, i Nipig, i Yapia, 16 i Ilisama, i Ilyada, om i Ilipilit.
Kinamanangan do Sumangod do Tulun do Pilistin
17 Soira' di nokoilo i tulun do Pilistin do nopili' do raja' dot Israil i Daud, om pamanau no daa i piro-piro o soudor diyolo' do mongoi daa panangkap di Daud. Nga' nokorongou i' i Daud do pasal diri, om ongoi no iyau dot id iso' o kinoiyonon di kitolig o posorili'. 18 Om korikot no i tulun do Pilistin do hilo'd Rantai do Ropaim, om kaanu no diyolo' o kinoiyonon diri. 19 Om uhot no i Daud do Tuhan, “Ngoyon ku tuu songodo' i tulun do Pilistin diri? Onuan oku i' tuu diya' do kamanangan?” ka dau. Boros kad Tuhan, “Ngoyon nopo songodo'. Tu' onuan ku i' iya' do kamanangan!” ka. 20 Om ongoi noddi i Daud do hilo'd Baal Porasim om hilo' no do naala' dau i soudor do Pilistin. Om boros kaddi dau, “Naraag nod Tuhan i pogintirungan di pisangod ku, do miagal pod luyud do minonigowo do minomorudsu' ngai'ddi,” ka dau. Om iri noddi o kinopomungaranan do kinoiyonon diri do Baal Porasim. 21 Om poggidu' no i soudor do Pilistin om tongkiadai nopoddi diyolo' i tingolig diyolo' do hiri, tu' narau-arau tomod iyolo', om puhuo' no di Daud om i tulun dau i tingolig diri. 22 A' i' alaid do mantad diri om rikot no kawagu i tulun do Pilistin do minongoi iyon do hiri'd Rantai do Ropaim. 23 Om uhot po kawagu i Daud do Tuhan. Om boros kad Tuhan do suminimbar, “Kada' iyolo' songodo' do mantad hiti. Nga' sorili' nogi' om songodon i' iyolo' do mantad ponong id tohuri do hilo'd toning dilo koguasan do kayu di roitan do murbei. 24 Om orongou nu nopo o miagal-agal do tulun do mamanau do hiri'd tuntu di kayu, om mamanau no do mongoi sangod, tu' mogulu oku i' diya' do mongoi pangala' di soudor do Pilistin,” ka dau. 25 Om wonsoyo' no di Daud o miagal di pinonuhuan do Tuhan dot id dau. Om kaala' no dau i tulun do Pilistin do mantad po do hilo'd Giba om gisom do hilo'd Gisir.
Nigitan do Hilo'd Yorusalim i Kaban do Tumpongo
1 Om timungo' noddi di Daud o koinsanai di soudor dot Israil di gunsiou, om kogumuon nopo nga' tolu nohopod noribu o tulun. 2 Om pamanau no i Daud do momoyo' diyolo' do kuminaa do hilo'd Baala Yohuda, do mongoi poundaliu di Kaban do Tumpongo, i roitan do ngaran do Tuhan it Agayo o Kuasa, i poirikau do hiri'd sakai di miagal do moloikat di roitan do kerub. 3 Om ngoyo' no diyolo' i Kaban do Tumpongo do mantad id walai di Abinadab di hiri'd timpak do nulu-nulu. Om pasakayo' no diyolo' i Kaban do Tumpongo'ddi dot id guyudan di wagu po. Om iyo Usa di Ahio, i tangaanak di Abinadab o minomoyo' di guyudan, 4 om i Ahio no om hiri id gulu-gulu. 5 I Daud no om koinsanai di tulun dot Israil om tumotos do mintari' om minsinding do pomusou do Tuhan do hiri'd gulu-gulu di Kaban diri. Om popouni nogi' iyolo' do kecapi, om gandang, om rebana, om lunsing om tamburin. 6 Tontok di nokorikot iyolo' do hiri'd pamagamasan do gandum do hilo'd Nakon, om kasadu i sapi' di mamagayat di guyudan diri, om poroloyo' no di Usa o longon dau do minongoi daa pomusus di Kaban do Tumpongo. 7 Om tontok iddi do notogod di Usa o Tuhan, i Kinorohingan. Om patayo' nod Kinorohingan i Usa do hiri'd kinoiyonon diri tu' a' kopio i' iyau opuro-puro. Om kapatai no i Usa do hiri'd toning di Kaban do Tumpongo. 8 Om roitai noddi i kinoiyonon diri do Piris-Usa Iri kasai' no o ngaran do kinoiyonon diri do gisom do baino'. Om kotogod no i Daud tu' awagat kopio o pinomohukum do Tuhan di Usa. 9 Nga' ooris i' i Daud do Tuhan. Om boros ka dau, “Poingkuro oku poddi do mongigit dilo Kaban do Tumpongo?” ka dau. 10 Om a' iddi di Daud pinakaa i Kaban diri do hilo'd Yorusalim, suwai ko' ngoyo' nopoddi dau poopio' do hiri'd walai di Obid Idom, i tulun mantad do bandar do Gat. 11 Tolu o tulan do koloido' di Kaban do Tumpongo do poundorong do hiri'd walai di Obid Idom. Om binarakatan diri do Tuhan i Obid Idom om i sompiiyon dau. 12 Om ngoyo' noddi i Daud sunudai do poingkaa, “Binarakatan do Tuhan i sompiiyon di Obid Idom om koinsanai di songonuon dau, dot i Kaban do Tumpongo o kinapamarakatan,” ka. Om ngoyo' noddi di Daud i Kaban diri do mantad hiri'd walai di Obid Idom. Om igitai no dau do hilo'd Yorusalim do mikuwo do pinapaharo do karamayan. 13 Tontok dit ingonom nogi' kalaang i tulun di suminaan di Kaban do Tumpongo, om suhuo' no di Daud iyolo' do mundorong. Om papatahak noddi iyau dot id Tuhan do porsombahan di sumbolion, do pinatahak nopo om songinan o sapi' do tontoluhan om songinan o tanak do sapi' dit olomu' kopio. 14 Om pintari' no i Daud do mikuwo dot aayi-ayi' no o kinoris dau do pomusou dau do Tuhan. Tontok nopoddi nga' kigonob-gonob po iyau do kain linan dit oniiba' di poinsiwot do hiri'd tawak dau. 15 Om iyo noddi i Daud om koinsanai di tulun dot Israil do pinopoundaliu di Kaban do Tumpongo do pinakaa do hilo'd Yorusalim, mikuwo'd sampangkis-pangkis dot atataadan om popinguni do torumpit do minomoyo'ddi. 16 Om tontok di posuangon noddi do hiri'd bandar i Kaban om liga' no do hiri'd liligaon i Mikal, i tanak di Saul do tondu'. Om kokito no dau i Raja' Daud do mimbul-simbul om mari-tari' do momusou do Tuhan. Om araatan diri i Mikal do kokito di Daud. 17 Om posuango' noddi i Kaban do Tumpongo do hiri'd kiim di pinowonsoi di Daud do maan do poiyanan di Kaban diri, om poiliho' no do hiri'd poiiyanan. Om papatahak noddi i Daud dot id Tuhan do porsombahan di sorobon om porsombahan do piombolutan. 18 Om kopongo ngai' poddi iri, om barakatai ngai' no dau i tulun dot Israil dot id suang do ngaran do Tuhan dit Agayo Kuasa', 19 om tikidai nogiddi dau iyolo' do taakanon. Om onuwai noddi dau do sombulugu' o roti, om sonsinsib o tonsi di kinoring om piro-piro o roti dot anggur do kinoring o winonsoi, o pointikid-tikid di tulun dot Israil do hiri, do pinotikid di tongokusai om tongoondu'. Om uli' ngai' nogiddi iyolo' do hiri'd walai diyolo'. 20 Tontok di minuli' i Daud do hiri'd walai dau do minongoi suwau di sompiiyon dau, om soliwan no i Mikal do minongoi solowot dau. Om boro-boros nod, “Pinopoinggayo no kopio'd ngaran i raja' dot Israil baino! Tu' luminabas iyau do miagal di tulun do basug dot id toguang di tongoondu' di susuhuon di piro-piro o pagawai dau!” ka dau. 21 Nga' boros ka di Daud do suminimbar di Mikal, “Minanari' oku do pomusou ku do Tuhan, i minomili' doho' do suminiliu do boyoon di tulun dot Israil, i tulun dau, om i minagada' di tapa' nu om i sompiiyon dau. A' oku i' tumingkod do manari' do pomusou ku'd Tuhan, 22 om uhang ku id ointingayam oku piya ko' mantad di tiinu'. Poinsiriba-ribaon tomod oku doti' daa diya' nga' suahon oku i' di tongoondu' di komoyon nu'ddi!” ka dau. 23 Om aiso' i' o tanak di Mikal, i tanak di Saul diri, do gisom do kinapatayo' dau.
Boros di Natan dot id di Daud
1 Om nintirungan i' do Tuhan i Daud do mantad id koinsanai di pisangod dau, om gisom do milo'ddi iyau do mundorong do hiri'd walai dau. 2 Om boros kaddi di Raja' Daud dot id di Natan i Nabi diri, “Antangai pogi' nga' iyoho' nopo om poingiyon no dot id walai di kayu sedar do Libanon do winonsoi nga' iri nopo Kaban do Tumpongo do Kinorohingan om id kiim noo o pinoopian,” ka dau. 3 Om boros ka di Natan dot id di Daud, “Nunu nopo it osorou nu om wonsoyon nopo, tu' woyoon ko id Tuhan, oi Tuan Raja',” ka dau. 4 Nga' boro-boros no o Tuhan dot id di Natan do totuong diri do poingkaa, 5 “Pamanau no om ngoyon i' sunudai i Daud, i susuhuon ku do boros do poingkaa, ‘Okon i' ko' iya' o momonsoi do walai do maan ku dot iyonon. 6 A' oku i' nokoiyon dot id suang do walai do mantad di pinosoliwan ku i' i tulun dot Israil do mantad hilo'd Masir om gisom do baino'. Suwai ko' mombo-hombo kasai' oku i' om poingiyon kasai' oku dot id kiim. 7 Solinaid ku nopo do minghombo do moyo-woyo' do koinsanai di tulun dot Israil, om nokoumbal oku toi do minomoros dot id ongoiso' piya di boyoon do tulun dot Israil, i pinili' ku'ddi dot, nokuro tu' a' oku wansayan do walai di kayu sedar do Libanon o wonsoyon?’ ka. 8 Iyo nopoddi om poboroson no o miagal diti dot id di Daud, i susuhuon ku oi Natan, ‘Poingkaa no o boros do Tuhan it Agayo o Kuasa'. Iyoho' no i minongongoi diya' do mantad id karaja' nu do madtatamong do dumba' do hilo'd kobuturan; om siniliu ku'ddi iya' do raja' do tulun dot Israil, i tulun do songonuon ku. 9 Honggo nopo o nongoi nu nga' winoyo' ku i' iya'. Om nala' ku diya' o koinsanai di pisangod nu do tontok di suminangod ko. Om pobontugon ku'ndo o ngaran nu do miagal di piro-piro o boyoon dot angabantug kopio do hiti'd pomogunan. 10-11 Om kawagu po nga' nokosodia' ku no o tiyonon dot Israil, i tulun do songonuon ku, om nosuhu' ku no iyolo' do momogun-mogun do hilo', om osimbayan indo iyolo' om a' nondo iyolo' oinggorit kawagu. Mantad poddi nokorikot i' iyolo' do hiti'd pomogunan diti di gulu po, om tontok di minomili' oku do piro-piro o boyoon diyolo', om songod-songodon no iyolo' do tulun dit ongorohian do pokoruol, nga' a' nondo osiliu o miagal diri. Om mamatos oku dot osimbayan ko nondo do mantad id toinsanan do pisangod, om onuan ku po iya' do sinakagon. 12-13 Apatai ko nopondo, om olobong ko do poinsugku' di taki-aki nu, om silihon ku'ndo do raja' ot iso' di tanak nu'd kusai. Om iyau nondo o popoingkakat do walai ku, om pogiroton ku'ndo o pomorintaan dau do gisom dot alaid. 14 Om osiliu oku'ndo do tapa' dau om osiliu iyau do tanak ku. Soira' nopo do kowonsoi iyau do sala' om bobogon ku indo iyau do monuduk do miagal do songulun o tapa' di momobog do monuduk di tanak dau. 15 Nga' a' oku i' tumingkod dot osianan dau do miagal di tuminingkod oku do nosianan di Saul. Iyo pogiddi o winonsoi ku dot id di Saul nga' iya' no o silihon ku do raja'. 16 Haro kasai' nopondo o sinakagon nu, om potilombuson ku i' o pomorintaan nu do gisom dot alaid. Om a' indo opupusan o pomorintaan nu do gisom dot alaid,’ ka,” ka dau. 17 Om posunudo' ngai' nopo di Natan dot id di Daud o koinsanai di pinointalang do Kinorohingan dot id dau.
Sambayang di Daud do Mongunsikou
18 Om suang noddi i Raja' Daud do hiri'd Kiim do Tuhan. Om irikau no iyau om sambayang no do poingkaa, “Oi Tuhan it Asawat Kopio, a' oku i' om i sompiiyon ku osorupai do rumamit do koinsanai di barakat do patahakon nu. 19 Om agayo po ko' iri o winonsoi nu, oi Tuhan, it Asawat Kopio; tu' pinopoboros ko po do batos do pasal do sinakagon ku dot id dosunsudan. Om pinokito oku po diya'ddi do mulong po do tulun toomod oku, oi Tuhan it Asawat Kopio! 20 Nunu poo o milo ku do poboroson dot id diya'? Tu' noilaan nu no o kowoyo-woyoo' ku, i susuhuon nu. 21 Winonsoi ngai' nu iti dot id doho' do tumanud di batos nu om korohian nu, om pinokito oku po diya', iyoho' i susuhuon nu do koinsanai di hal dot angagayo'ddi. 22 Agayo ko no kopio, oi Tuhan, i Kinorohingan! Aiso' no o koiyo diya', om mantad po di gulu po om nokoilo no iyahai dot iya' noo o Kinorohingan. 23 Om aiso' no o bansa' do hiti'd pomogunan do koiyo dot Israil. Tu' Israil no o bansa' di pinoidu' nu do mantad id ponguripanan om siniliu nu'ddi iyolo' do tulun di songonuon nu. Nokotongkop no o ngaran nu dot osonong do hiti'd pomogunan tu' i winonsoi nu dot id diyolo' dit angagayo om i kongoimayaan. Nuyung ngai' nu i bansa'd suwai do miwoyo' di tingolig diyolo' do tontok di ruminikot i' i tulun nu do mongoi sangod. 24 Nosiliu nu no do tulun di songonuon nu o bansa' dot Israil do gisom dot alaid, om iya' oi Tuhan nga' nosiliu do Kinorohingan diyolo'. 25 Om baino' nodti, oi Tuhan i Kinorohingan, om pogiroto' no o batos di pinoboros nu do pasal doho' om i sinakagon ku do gisom dot alaid, om wonsoyo' no i nakabatos nu do wonsoyon nu. 26 Om abantug i' o ngaran nu. Om mompus-ompus indo o tulun do momoros do, ‘Tuhan it Agayo Kuasa' o Kinorohingan dot Israil,’ ka. Om potilombuson nu indo kasai' o sinakagon ku do sumiliu do raja' do momorinta' do bansa' diti. 27 Oi Tuhan, it Agayo Kuasa', i Kinorohingan dot Israil! Kasaap oku pogi' do sumambayang do miagal diti dot id diya' nga' nokointalang nu no ngai' iti dot id doho', i susuhuon nu, om nokopomisunud ko nogi' doho' do gompion nu o sinakagon ku om a' indo opupusan. 28 Oi Tuhan, it Asawat Kopio, iya' noo o Kinorohingan; bayaanon ngai' nu i' o batos nu, om pinabatos nu dot id doho' i batos dit osonong kopio. 29 Om pokionuon ku no daa do barakatan kasai' nu o sinakagon ku om kopuriman kasai' i' iyolo' do kosianan nu do gisom dot alaid. Nakabatos nu nori, oi Tuhan it Asawat Kopio, om barakatan kasai' nu indo o sinakagon ku do gisom dot alaid,” ka dau.
Piro-Piro o Kinamanangan di Daud dot id Pinisangadan
1 Om alaid-laid noddi do mantad diri, om ongoi no kawagu i Daud sangod do tulun do Pilistin. Om naala' i' dau iyolo' om nosolod dau i tana' diyolo'. 2 Om naala' nogi' di Daud i tulun do Muab. Om suhuo' no dau iyolo' do lumii do hiri'd tana'. Om patayo' noddi dau o duwo tulun do mantad id pointikid-tikid do tolu o tulun. Om kosiliu noddi i tulun do Muab do turipon di Daud om mambayar diri iyolo' do sukai dot id dau. 3 Om naala' nogi' di Daud i raja' do momorinta' do pomogunan do Soba, i roitan dot i Hadadisir, i tanak di Rihob; pomogunan nopoddi nga' id somok do Damsik. Tontok nopoddi nga' hiri nod tanga'd ralan i Hadadisir do mongoi daa pomorinta' kawagu di watas do ponong id sarayo di Bawang dot Iprat. 4 Om katangkap no di Daud o 1,700 o soudor di Hadadisir di poinsakai do kuda', om 20,000 o soudor di mamanau'd gakod. Om panganu no i Daud do kuda' do kabagal do pamagayat do hatus o korita'-kuda' om iri nopoddi i suwai om tinipuan ngai' dau o gakod. 5 Soira' di ruminikot i soudor do tulun do Siria do mantad hilo'd Damsik do mongoi daa uhup di Raja' Hadadisir, om ngoyo' no iyolo' di Daud songodo', om kaala' iddi iyolo'. Om 22,000 o tulun do napatai. 6 Om pomukiim noddi i Daud do pinoundarangan dau di soudor dau do hiri'd watas di tulun do Siria, om id siriba' noddi iyolo' do pomorintaan di Daud, om mambayar iyolo' do sukai dot id dau. Om hinonggo-honggo nopo i Daud do monokisangod, nga' onuan kasai' nopo iyau'd Tuhan do kamanangan. 7 Om onuo' no di Daud i kolid di tamas do winonsoi, i songingigit daa di piro-piro o pagawai di Hadadisir, om igitai no dau do hilo'd Yorusalim. 8 Om suwai no ko' iri, om ogumu' po tomod o tambaga' do nanu di Daud do mantad hilo'd Bota om hilo'd Borutai, i kabandaran do porintaon daa di Hadadisir di gulu po. 9 Om korongou noddi i Raja' Tou, i mantad hilo'd Hamat, do naala' ngai' di Daud i soudor di Hadadisir. 10 Om suhuo' noddi dau i Yoram, i tanak dau, do mongoi poporikot do tabi' dot id di Raja' Daud, om pokoundar dau tu' nakamanang i' iyau do suminangod di Hadadisir, tu' alaid no i Tou do monokisangod di Hadadisir. Om igit no i Yoram do pomuhawang do tamas, om pirok, om tambaga' do winonsoi do patahakon dau di Daud. 11-12 Om patahako' no di Daud i pinomuhawang diri dot id Tuhan do pakayon do tontok do sumambayang, om iri nogi' i pirok om tamas di naanu dau do mantad id piro-piro bansa' do tulun di naala' dau --- i tulun dot Idom, Muab, Amon, Pilistin, om Amalik --- om iri nogi' wookon di nangaanu dau do mantad id di Hadadisir. 13 Om koruhangai poddi o kababantug di Daud di napatai dau o hopod om walu' noribu o tulun dot Idom do hilo'd rantai di roitan do Rantai do Silaon. 14 Om pomukiim no i Daud do pinoundarangan dau do soudor dau dot id pointongkop do pomogunan dot Idom, om id siriba' noddi do pomorintaan dau i tulun dot Idom. Om onuan kasai' nopoddi do Tuhan do kamanangan i Daud do honggo nopo iyau do sumangod. 15 Om i Daud noddi o momorinta' do pointongkop dot Israil. Om antaan-taan kasai' dau, om otulid indo om osonong ot owonsoi dot id rayat dau. 16-17 Iti no ngai' i pagawai dot angasawat o pangkat do pinili' di Daud: Boyoon do soudor: I Yoab, i tanak di Soruya; Gomponulis do hiri'd walai'd raja': I Yosapat, i tanak di Ahilud; Imam: I Sadok, i tanak di Ahitub, om i Ahimilik, i tanak di Abiatar. Gomponulis do pomorinta': i Soraya. 18 Boyoon di madtatamong do raja': I Bonaya, i tanak di Yoyada; Imam do hiri'd walai'd raja': I tangaanak di Daud do tongokusai.
I Daud om i Mopibosit
1 Insan tadau om ponguhot no i Daud, “Haro po o tulun do noolu' dot id suang do sompiiyon di Saul? Ondung haro daa om orohian oku do popointalang do kosianan ku dot id dau do bagi' di Yonatan,” ka. 2 Iri nopo sompiiyon di Saul nga' haro o susuhuon dot i Siba o ngaran. Om sinunudan diri iyau do mongoi solowot di Daud. “I Siba ko?” ka di Daud do minuhot. “Oo, oi Tuan Raja',” ka dau. 3 Om uhoto' no di raja' iyau, “Haro po o tulun do noolu' dot id suang do sompiiyon di Saul? Tu' orohian oku do popointalang do kosianan ku dot id dau do miagal di nakabatos ku dot id Kinorohingan,” ka dau. Om boros kad i Siba do suminimbar, “Iso' poo o tanak di Yonatan do kusai, nga' kimpo' iyau,” ka dau. 4 “Hinonggo iyau?” ka di raja' do minuhot. “Hilo'd walai di Makir, i tanak di Amiol, do hilo'd Lodibar,” kad i Siba do suminimbar. 5 Om ponuhu' noddi i Daud do tulun do mongongoi di tanak di Yonatan. 6 Ngaran nopo di tanak di Yonatan diri nga' i Mopibosit. Om soira'ddi nokorikot iyau om otud no iyau dot id toguang di Daud do suminuwau dau. Om boros kad i Daud, “Mopibosit!” ka. Om boros ka di Mopibosit, “Hati oku no, oi Tuan Raja',” ka. 7 Om boros kad i Daud dot id dau, “Kada' kooris, tu' osonong oku i' dot id diya' tu' osorou ku i' i Yonatan, i tapa' nu. Pogulion ku i' diya' o koinsanai di tana' di taki nu, i Saul. Om milang kasai' ko doho' do makan do hiti'd walai ku,” ka dau. 8 Om otud po kawagu i Mopibosit, om boro-boros no iyau, “Iyoho' nopodti om miagal pod tasu do napatai! Nga' nokuro tu' podulon oku po kopio diya', oi Tuan?” ka dau. 9 Om lohowo' noddi di raja' i Siba, i susuhuon di Saul, om boro-boros no do, “Patahakon ngai' ku nopo di Mopibosit, i manangaki di tuan nu, o koinsanai di dapu' di Saul om i sompiiyon dau. 10 Umoon no dokoyu di tangaanak nu om i susuhuon nu i tana'ddi do bagi' di sompiiyon di Saul, i tuan nu, om patahakon no i hasil di tana' dot id manangaki di tuan nu do maan diyolo'd kanon. Nga' i Mopibosit nopo om hilo' kasai' id walai ku ot akanan,” ka dau. (Kogumuon nopo di tangaanak di Siba do tongokusai om hopod om limo om susuhuon no dau om duwo nohopod o tulun.) 11 Om boros kad i Siba do suminimbar, “Wonsoyon ngai' ku i' ino ponuhuan nu, oi Raja',” ka dau. Om hiri kasai' noddid walai di raja' i Mopibosit do makan do miagal poddi tanak kopio di Raja' Daud. 12 I Mopibosit nopoddi nga' kianak do kusai dot i Mika o ngaran. Om oinsanan nopoddi i sompiiyon di Siba do nosiliu do susuhuon di Mopibosit. 13 Om hilo' noddid Yorusalim do poingiyon i Mopibosit, i kimpo' goduwo o gakod diri, om hiri kasai'd walai di raja' ot akanan dau.
Naala' di Daud i Tulun dot Amon om i Tulun do Siria
1 Om alaid-laid noddi om kapatai no i Nahas, i raja' dot Amon, om i Hanun diri, i tanak dau'd kusai, o nosiliu do raja'. 2 Om boros kaddi di Daud, “Orohian oku i' do mambalut di Hanun, i tanak di Nahas, tu' minambalut i' doho' i tapa' dau,” ka. Om ponuhu' noddi i Daud do piro-piro tulun do mongoi poporikot do boros dot id diyolo' dot i Daud nga' tumonggoi i' di Hanun do tumongob. 3 Nga' tontok di nokorikot i susuhuon di Daud do hiri'd pomogunan dot Amon, om boros ka ngai' di boyoon do tulun dot Amon dot id di Hanun, “Ondos nu daa om mongoi posunud do tumonggoi iyolo' do tumongob o kinoporikatan di Daud diti tulun dau do hiti. A' i' moti'! Suwai ko' sinuhu' pogi' dau iyolo' do mongoi'd hiti nga' mongoi pogontong om mongoi ponoluku' diti bandar om aala' toko' indo diyolo'!” ka. 4 Om tangkapo' ngai' noddi di Hanun i susuhuon di Daud. Om bugaro' no o sampaping di ganggut diyolo' om pompodo' i pakayan diyolo' do gisom pod hiri'd puun do poo, om suhuo' nogiddi diyolo' i susuhuon diri do mamanau. 5 Nga' ointingayaman diri iyolo' do muli' do hiri'd pomogunan diyolo'. Om soira'ddi nosunudan i Daud do pasal diri om ponuhu' no iyau do tulun do mongoi solowot di susuhuon di nintingayam diri do mongoi poromut do boros di Daud do poingkaa, “Undorong kou nopo do hilo'd Yorikou do gisom pod kanaru kawagu ino ganggut dokoyu,” ka. 6 Om kopurimanai nogiddi di tulun dot Amon do nosiliu'ddi diyolo' do pisangod i Daud. Om pamagadsi' no iyolo' do duwo nohopod noribu o soudor do Siria, i poingiyon do hilo'd Bait-Rihob om hilo'd Soba, om hopod po om duwo noribu o soudor do mantad hilo'd Tob, om mantad nod hilo'd Maaka om soribu o soudor do miniwoyo' di raja' diyolo'. 7 Om soira'ddi nokorongou i Daud diri om suhuo' no dau i Yoab om koinsanai di soudor dau do mongoi sangod di pisangod. 8 Om pamanau no i tulun dot Amon do mongoi sangod om talob no do hiri'd wawayaan do sumuang do hiri'd bandar do Raba, i bandar diyolo' dit agayo. Iri no suwai, i tulun do Siria om i tulun do mantad hilo'd Tob om Maaka, om tuminamong do hiri'd talun dit id soliwan di bandar. 9 Om kokito no di Yoab do notutukan iyolo' do soudor di pisangod; om pilio' noddi dau i soudor dot Israil dit ongosiou kopio do tumimbaba' di tulun do Siria. 10 Om iri no soudor do suwai om i Abisai, i tobpinai dau, o minomoyo'. Om pinotimbaba' dau iyolo' di soudor dot Amon. 11 Om boros ka di Yoab dot id di Abisai, “Ondung okito nu dot aala' oku di tulun do Siria, om ngoyon oku no uhupai; om ondung a' ko kasaap di soudor dot Amon, om ngoyon ku i' iya' uhupai. 12 Kumosiou no! Tumotos toko' no do sumangod do bagi' do bansa' toko' om bagi' di bandar do Kinorohingan toko'. Om maha' daa om wonsoyon do Tuhan i korohian dau,” ka. 13 Om pamanau no i Yoab om i soudor dau do mongoi sangod om poggidu' no i tulun do Siria. 14 Om soira' di nokito di tulun dot Amon i tulun do Siria do minogidu' om poggidu' no iyolo' do mantad id di Abisai, om suang no iyolo' do hiri'd bandar diyolo'. Om kasangod poddi di Yoab i tulun dot Amon om poguliai nogiddi dau do hilo'd Yorusalim. 15 Om kopurimanai noddi di tulun do Siria do naala' iyolo' di tulun dot Israil. Om lohowo' ngai' noddi diyolo' i soudor diyolo' do tumimung kawagu. 16 Om ponuhu' no i Raja' Hadadisir do momolohou di tulun do Siria, i mantad ponong id koulayon do mantad di Bawang dot Iprat. Om rikot no iyolo' do hilo'd Hilam, om i Sobak o boyoon diyolo', i boyoon do soudor di Raja' Hadadisir do mantad hilo'd Soba. 17 Om soira' di nokorongou i Daud do pasal diri, om timungo' ngai' no dau i soudor dot Israil om soborong no iyolo' di Bawang do Yordan do pakayaan do hilo'd Hilam do mongoi sangod. Om hilo' no o pinotimungan di tulun do Siria di soudor om ongoi nogiddi iyolo' sangod di soudor di Daud. 18 Nga' naala' i' di soudor dot Israil i soudor do Siria. Napatai nopo di Daud om i soudor dau nga' 700 o mongingigit do korita'-kuda' di don sumasangod, om 40,000 i songinsakai do kuda'. Om suwai no ko' iri, om norualan po tomod diyolo' i Sobak, i boyoon di soudor do pisangod om kapatai noddi iyau do hiri'd kinoiyonon do minisangod. 19 Om soira' di nopurimanan di raja' dit id siriba' di Raja' Hadadisir do naala' iyolo' dot Israil, om ponokiulud noddi iyolo' dot Israil om insiriba' no iyolo' dot id diyolo'. Om mantad poddi om ooris no i tulun do Siria do mongoi uhup di tulun dot Amon.
I Daud om i Batsiba
1 Koubasanan no do raja' do mongoi sangod do tontok di momuroun kawagu o kayu. Om tontok di maso do kopomurounan do kayu do toun diri, om suhuo' no di Daud i Yoab om koinsanai di soudor dau do mongoi sangod; om kaala' no diyolo' i tulun dot Amon om turungkuo' no diyolo' i bandar do Raba. Nga' i Daud nopo om minundorong i' do hilo'd Yorusalim. 2 Insan tadau, di sumodop no, om tungag no i Daud di noposik iyau om ongoi no do hiri'd sakai di taap do walai dau dit arantai. Om tontok di mimpanau iyau do hiri om kokito no iyau dot iso' o tondu' do modsu'. Om iri nopo tondu'ddi nga' olumis kopio. 3 Om ponuhu' noddi iyau do tulun do mongoi ponguhot ondung isai i tondu'ddi. Om kosunudai no iyau dot i Batsiba i tondu'ddi, i tanak di Iliam, om sawo nopo dau nga' i Uria, i tulun do Hit. 4 Om ponuhu' no i Daud do tulun do mongoi pangangat di tondu' do hiri'd walai dau, om korikot poddi i tondu' do hiri, om duduno' no di Daud i tondu'ddi. (Iri nopo tondu'ddi nga' wagu po kopongo do momolidang do tinan dau do tumanud dot oturan do tugama' tu' wagu po kotingkod o pomulanan dau.) Om uli' noddi i tondu' do hiri'd walai dau. 5 Om alaid-laid noddi om ponontian no i tondu'ddi om ponuhu' no iyau do tulun do mongoi pomisunud di Daud do monontian iyau. 6 Om ponuhu' noddi i Daud do tulun do mongoi pomisunud di Yoab do poingkaa, “Suhuon no i Uria, i tulun do Hit diri, do mongoi do hiti'd doho',” ka. Om suhuo' no di Yoab i Uria do mongoi solowot di Daud. 7 Om soira' di nokorikot i Uria do hiri'd di Daud, om uhoto' no di Daud i Uria ondung osonong-sonong i Yoab om koinsanai di soudor, om ondung poingkuro- kuro no i pisangadan. 8 Om boros kaddi di Daud dot id di Uria, “Uli' no do hilo'd walai nu om koundorong-dorong ko i',” ka. Om tongkiad no i Uria di walai di raja'. Om paatadai noddi di Daud dot ipuhawang o hiri'd walai di Uria. 9 Nga' a' i' minuli' i Uria; suwai ko' minodop nogi' iyau do hiri'd toning di wawayaan do walai di raja', do poinsugku' di madtatamong do raja'. 10 Soira' di nosunudan i Daud dot a' minuli' i Uria, om uhoto' no dau iyau, “Koguguli' nu om alaid ko no do potongkiad. Nga nokuro'ddi tu' a' ko minuli' do hilo'd walai nu?” ka dau. 11 Om boros ka di Uria do suminimbar, “Iri nopo soudor dot Israil om Yohuda om maso i' do sumangod, om i Kaban do Tumpongo do Tuhan nga' moyo-woyo' i' diyolo'; om hilo'd kobuturan o pinomukiiman di Yoab, i boyoon dahai, om i soudor dau. Om nokuro tu' muli' oku i' daa'ndo iyoho' do hilo'd walai ku, do mongoi akan om mongoi inum, om mongoi dudun di sawo ku? Sumumpa' oku no kopio dot a' momonsoi do miagal diri!” ka dau. 12 Om boros kaddi di Daud, “Om undorong katuu do hiti do baino', om suab pondo om pologoson ku nogi' iya' do mamanau,” ka. Om undorong no i Uria do hilo'd Yorusalim do tadau'ddi. Om tadau noddi kawagu, 13 om lohowo' no iyau di Daud do tuminorungak dau do makan, om owuko' no di Daud i Uria. Nga' a' i' minuli' i Uria do hiri'd walai dau do totuong diri, suwai ko' odop nopo iyau do minamalapik-lapik di kumut dau do hiri'd bilik di madtatamong do walai di raja'. 14 Tadau noddi kawagu om ponulis no i Daud do patahakon dau di Yoab. Om poigitai no dau iri di Uria. 15 Tinulis nopo dau nga' poingkaa, “Pohirion nod borisan dit id gulu kopio i Uria, i hiri'd adalaan kopio do mogisasangod, om sumunsuri kou nogindo om apatai i' i Uria,” ka. 16 Om daamot diyo Yoab do monurungku' di bandar om suhuo' no dau i Uria do mongoi do hiri'd kinoiyonon dit oilaan dau dot ongokoris i pisangod do madtamong. 17 Om soira' di suminoliwan di bandar i soudor di pisangod do minongoi sangod di soudor di Yoab, om kapatai noddi o piro-piro di soudor di Daud om i Uria nga' nokotonggoi nogi' do napatai. 18 Om porikatai noddi di Yoab i Daud do habar do kinowoyo-woyoo' di pinisangadan. 19 Om bilinai no di Yoab i tulun di minongoi poromut di habar do poingkaa, “Kosunud ngai' nu nopondo di raja' o kinowoyo-woyoo' di pinisangadan, 20 om tumogod dotindo iyau om muhot nondo diya' do poingkaa, ‘Nokuro tu' mininsomok kopio kou di bandar do suminangod diyolo'? A' toi dokoyu oilaan do mamana' o pisangod do mantad hiri'd tolig do bandar diyolo'? 21 A' toi dokoyu osorou i kinapatai-patayo' di Abimilik, i tanak di Gidion diri do hilo'd Tibis? Tu' numaan no iyau do tondu' poliidai di watu do ponutuan do mantad hiri'd tolig di bandar, om iri no o nakapatai dau. Nokuro poddi tu' mininsomok kopio kou di tolig?’ ka dotindo dau. Om ondung uhoton ko di raja' do miagal diri om sunudan no iyau do poingkaa, ‘I Uria, i soudor nu'ddi nga' napatai nogi'!’ kanto,” ka dau. 22 Om ongoi no i susuhuon diri solowot di Daud om posunudo' ngai' no dau i pinonuhuan di Yoab do poposunud. 23 Boros ka di tulun do minongoi poromut di habar dot id di Daud, “Okoris i' ko' iyahai i pisangod, om soliwan noddi iyolo' do mantad hiri'd bandar do minongoi panangod dahai do hiri'd talun; nga' nouyung i' kawagu dahai iyolo' do hiri'd wawayaan di bandar. 24 Om pamana' noddi iyolo' dahai do mantad hiri'd timpak di tolig do bandar diyolo', om nangapatai'ddi o piro-piro o soudor do Tuan Raja', om i Uria, i soudor nu'ddi nga' napatai nogi',” ka dau. 25 Om sunudai no di Daud i susuhuon diri, boros ka dau, “Pogiroton no o ginawo di Yoab, om sunudan no iyau dot a' minog do tumongob tu' a' i' oilaan ondung isai ot apatai dot id pisangadan. Sunudan no iyau do tumotos kopio do sumaap om osolod i' i bandar,” ka. 26 Om soira' di nokoilo i Batsiba do napatai i sawo dau, om pogihadai no dau iyau. 27 Om katalib poddi i maso do kopogihadan om lohowo' no di Daud i tondu'ddi do hiri'd walai dau. Om kosiliu noddi iyau do sawo di Daud. Om alaid-laid noddi om kosusu no iyau do tanak do kusai. Nga' a' i' o Tuhan orohian di winonsoi di Daud.
Boros di Natan om Kinaralagaanan di Daud
1 Om suhuo' noddi do Tuhan i Nabi Natan do mongoi solowot di Daud. Om ongoi no i Natan do hiri, om boros ka dau, “Haro o duwo tulun do poingiyon dot id iso' o bandar; iso' nopo diyolo' om kaya', nga' iri no tiso' om mosikin. 2 Iri nopo tulun do kaya' nga' ogumu' o dumba' dau, 3 nga' iso' no o tanak do dumba' di tulun do mosikin, om binoli-boli i' dau iri. Om gompio' no dau i tanak do dumba' do gisom do nakagayo do hiri'd walai dau do poinsugku' di tangaanak dau. Iri nopo tanak do dumba' dau'ddi nga' poingilang dau do makan, om minum do hiri'd sangkir dau, om poingkibit dau do modop; do miagal po di tanak dau'd tondu'. 4 Insan tadau om rikot no o sompogunan dot id walai di tulun do kaya'. Om a' diri siponumbali' i tulun do kaya' di dau'd dumba' ko' sapi' do maan do paakan di sompogunan diri. Om ngoyo' noddi dau i tanak do dumba' di tulun do mosikin om onsoko' no do maan do paakan di sompogunan diri,” ka dau. 5-6 Om otogod diri i Daud di tulun do kaya' om boros ka dau, “Sumumpa' oku no dot id Tuhan di poimpasi do mositi' no do hukuman do kapatayon i tulun do minomonsoi do miagal kopio'ddi! Tu' orongit no kopio iyau! Om mositi' no do tingalanan dau i tanak do dumba'ddi dot ingapat kogumu' ko' mantad di naanu dau,” ka dau. 7 Om boros kaddi di Natan dot id di Daud, “Iya' nogi' moti' i tulun diri oi Tuan Raja'. Om poingkaa o boros do Tuhan, i Kinorohingan dot Israil, ‘Siniliu ku iya' do raja' dot Israil om pinasi ku iya' do mantad id di Saul. 8 Tinahak ku diya' i pomorintaan di Saul om iri ngai' nogi' i sawo dau; om siniliu ku iya' do raja' dot Israil om Yohuda. Om ondung a' daa kabagal iri nga' ruhangan ku po daa. 9 Nga' nokuro'ddi tu' a' nu pinadul o boros ku? Nokuro tu' minomonsoi ko dit araat? Pinokipatayan nu i Uria dot id pisangadan; pinologos nu i tulun dot Amon do minamatai dau, om ngoyo' nu poddi i sawo dau! 10 Gowoi pondo om id suang nopo do sinakagon nu, om haro kasai' nopondo ot apatai do patayon tu' a' ko i' minumboyo' doho', tu' nongoi nu kowino' i sawo di Uria. 11 Sumumpa' oku no do porikatan ku nondo iya' do kosusaan, nga' mantad i' dot id sompiiyon nu o poporikot di kosusaan diri dot id diya'. Ngoyon ngai' ku nopondo i sawo nu do montong-ontong ko, om patahakon ku dot id tulun do suwai; om dumudun nondo iyau diyolo' do hiri'd dokito kopio do dangadau. 12 Poillisok-lisok ko i' daa do minomonsoi do dusa nga' pologoson ku'ndo dot osiliu i pinoboros ku'ddi dot id dokito kopio, om ongkokito ngai' o tulun dot Israil!’ ka dau,” kad i Natan. 13 Om boros kaddi di Daud dot id di Natan, “Nokowonsoi oku nod dusa dot id Tuhan,” ka. Om boros ka di Natan do suminimbar, “Ompunan ko id Tuhan, oi Tuan Raja', om a' ko i' apatai. 14 Nga' nokopongindaraat kopio ko'd Tuhan, tu' i winonsoi nu do miagal diri o pinongindaraat nu, om matai no i tanak nu di wagu po kosusu,” ka dau. 15 Om uli' noddi i Natan do hiri'd walai dau.
Minatai i Tanak di Daud do Kusai
Om porikatai nod Tuhan do toruol i tanak di Daud, i pinogkosusu di Batsiba, i sawo daa di Uria, gisom do nadalaan tomod diri do sumakit. 16 Om sambayang noddi i Daud dot id Tuhan do mokilingos daa di tanak. Om a' no iyau mangakan do nunu nopo. Pointikid-tikid do totuong om mongoi kasai' nopo iyau do hiri'd bilik dau, om lumii do hiri'd siliu do gisom dot osuaban. 17 Om ongoi no solowot di Daud i pagawai dau do hiri'd walai dau om lugu-lugutai no daa diyolo' iyau do tumungag, nga' a' i' iyau tumungag om a' minongoi torungak diyolo'd makan. 18 Om sominggu' noddi do mantad diri om kapatai no i tanak. Om ongooris diri i susuhuon di Daud do mongoi pomisunud di Daud do napatai i tanak. Boros ka diyolo', “Di nopo poimpasi po i tanak om a' i' i raja' sumimbar dati' do tontok di moro-boros toko' dau. Om okuro-kuro nogi' tuu'ndo do baino' tu' napatai i tanak dau? Tu' nunu koilo-ilo do pokoruol dotindo iyau do tinan dau!” ka diyolo'. 19 Soira' di nokito di Daud do mogikonos-konos i susuhuon dau, om koilaai no dau do napatai no i tanak. Om uhoto' noddi dau iyolo', “Napatai'ddi i tanak?” ka. “Oo,” ka diyolo' do suminimbar. 20 Om tungag noddi i Daud do mantad hiri'd siliu om ongoi no podsu', om ponudai, om poningolon iyau do pakayan. Om ongoi noddi iyau sambayang do hiri'd walai'd Tuhan. Om soira' di nokoguli' iyau do hiri'd walai dau, om pokianu no iyau do taakanon om akan no iyau. 21 Om boros ka di pagawai dot id di Daud, “A' no kopio iyahai kosuhut do miagal diti. Tu' tontok di poimpasi po i tanak om nihadan nu i' iyau om a' ko minakan, nga' maha' nogiddi do napatai i tanak om tumungag ko om makan!” ka. 22 Om boros kad i Daud do suminimbar, “A' oku i' minakan om minihad oku di poimpasi po i tanak. Tu' osorou ku nopo nga' osianan i' doti' o Tuhan doho' om a' indo pologoson i tanak do matai. 23 Nga' baino' nopoddi tu' napatai no i tanak, om nokuro tu' minog oku po kasai' do puasa? Milo oku po daa do mamasi kawagu di tanak? Insan tadau om iyoho' nga' koongoi indo do hiri'd kinoiyonon dau, nga' a' no iyau milo do gumuli' dot id doho',” ka dau.
Nosusu i Suliman
24 Om insasamadai noddi di Daud i Batsiba, i sawo dau. Om ongoi no iyau dudun dau do minodop. Om paganak no i Batsiba dot iso' tanak do kusai. Om pungaranai nod i Daud i tanak diri dot i Suliman. Om kosianan i' do Tuhan i tanak diri. 25 Om suhuo' noddi do Tuhan i Nabi Natan do mongoi pomungaran di tanak diri dot i Yodiya, tu' kosianan id Tuhan i tanak diri.
Nosolod di Daud o Bandar do Raba
26 Om tontok nopoddi nga' maso di Yoab do sumaap do Raba, i bandar dot agayo do pomogunan dot Amon. Om oruhai no daa dau dot osolod i bandar diri. 27 Om ponuhu' noddi i Yoab do tulun do mongoi pomisunud di Daud do poingkaa, “Nasangod ku no o Raba, om nosolod ku no i tudan do waig diyolo'. 28 Ngoyo' no timungo' i soudor toko' di noolu-olu' om iya' indo o boyoon do mongoi kopio panganu di bandar. Om aiso' indo o tulun do momoros dot iyoho' o nokosolod di bandar,” ka. 29 Om timungo' ngai' no di Daud i soudor dau om ongoi no do hilo'd Raba. Om songodo' no di Daud i tulun di poingiyon do hiri'd bandar diri om kosolod noddi dau i bandar. 30 Om onuo' no dau i tupi' di raja' diyolo', om tupio' no dau. Om kawagato' nopo di tupi' nga' haro i' doti' o tolu nohopod om limo kilogram om dinakatan iri do watu dit agayo gatang dit ongolumis kopio. Om ogumu' po o konunu-nunuan do naanu dau do mantad id bandar diri. 31 Om tanggayai ngai' no dau i tulun di hiri'd bandar om sansagai no dau iyolo' do kumaraja' do mamagaragadi', om manangkul om mangapak; om pinakaraja' nogi' dau iyolo' do hiri'd pamansayan do bata' di watu o wonsoyon. Om iyo nogiddi o winonsoi dau dot id kabandaran dot Amon di suwai. Om guli' nogiddi i Daud om koinsanai di soudor dau do hilo'd Yorusalim.
I Amnon om i Tamar
1 I Absalom nopo, i tanak di Daud do kusai, om kitobpinai do tondu' dot olumis kopio. Ngaran nopo dau om i Tamar. Om muhang diri i Amnon di Tamar, i tanak di Daud di sawo dau do suwai. 2 Om haro daa'ddi ot osorou di Amnon do wonsoyon dau dot id di Tamar. Nga' a' i' milo tu' a' po nodudun do kusai i Tamar, om a' po iyau koino-ino do mongoi rolot do tongokusai. Om osorou kasai' nopoddi di Amnon iri gisom do suminakit iyau. 3 Nga' i Amnon nopoddi, om kitambalut dit oilo kopio do momusorou, dot i Yonadab o ngaran, i tanak di Simia, i tobpinai di Daud. 4 Om boros ka di Yonadab dot id di Amnon, “Oi tanak do raja', nokuro tu' miagal kopio ko'ndo do tumongob do pointikid do tadau? Nokuro kopio?” ka dau. Om boros ka di Amnon do suminimbar, “Muhang oku daa di Tamar, i tadi' di Absalom do tondu', i tobpinai ku'ddi,” ka dau. 5 Om boros kaddi di Yonadab dot id dau, “Ongoi lii do hilo'd toodopon nu, om minsaki-sakit i'. Om soira' nopondo do mongoi ontong diya' i tapa' nu, om sunudan no iyau do poingkaa, ‘Apa', pologoson daa i Tamar, i tadi' ku do mongoi paakan doho'. Om montong-ontong oku nopo dau do mogonsok di taakanon do hiti, om makan oku indo,’ kanto,” ka dau. 6 Om ongoi no i Amnon lii do hiri'd toodopon, om pinsaki-sakit no iyau. Om soira' di ruminikot i Raja' Daud do mongoi ontong dau, om boro-boros no i Amnon di raja', “Apa', pologoson daa doho' i Tamar, i tadi' ku, do mongoi pomonsoi do roti'd hiti tu' okito ku iyau. Om makan oku indo,” ka dau. 7 Om ponuhu' no i Daud do tulun do mongoi pomisunud di Tamar do hiri'd walai dau do poingkaa, “Ongoi do hilo'd walai di Amnon, i tobpinai nu, om pagansakan no iyau do takanon,” ka dau. 8 Om ongoi noddi i Tamar do hiri'd walai di Amnon, i tobpinai dau. Om poinglii i Amnon do norikatan dau. Om anu no iyau do tapung dot okooro' di nakambang no om onsoko' no dau do linugu do mogonsok do hiri'd dokito di Amnon. 9 Om ngoyo' noddi dau i roti do mantad hiri'd pinagansakan, om posurungo' no dau dot id di Amnon. Nga' a' i' i Amnon minangakan diri. Om boros ka di Amnon, “Soliwan ngai' kou do mantad hiti,” ka. Om soliwan ngai' noddi i tulun. 10 Om boros kaddi di Amnon dot id di Tamar, “Igitai ino taakanon do hiti'd toodopon ku, om suhuon oku i' diya',” ka dau. Om wonsoyo' nod i Tamar o miagal diri. 11 Nga' soira' di potunuyon nogi' di Tamar i roti dot id di Amnon, om pususo' no iyau di Amnon, mikuwo'd minomoros do poingkaa, “Dudun doho' do modop,” ka. 12 Nga' boros ka di tondu', “A, a' oku i'. Kada' oku sansagai do momonsoi do miagal kopio'dti karaat! Tu' a' i' kopio momonsoi'd miagal diti o tulun do hiti'd Israil. 13 Tu' ondung owonsoi o miagal diri, om honggo pondo pakayaan ku? Om iya'ndo nga' ointingayam no do hiti'd Israil. Nga' osonong nogi' do mongoi ko boro-boros di raja', tu' osorou ku do kaakun i' iyau do silihon oku diya'd sawo nu,” ka dau. 14 Nga' a' i' i Amnon minokinongou di boros dau. Om kosoho' no di Amnon i Tamar, tu' okoris i' iyau ko' i Tamar. 15 Om kotogod tomod noddi i Amnon di Tamar. Om agayo poddi ko' i muhang o kototogod di Amnon. Om boros kaddi di Amnon dot id tadi' dau'ddi, “Soliwan!” ka. 16 Om boros kad i Tamar do suminimbar, “Kada' pongiyondo! Kada' oku uyungo' do sumoliwan. Tu' monguyung nopo moti' om araat po ko' mantad di winonsoi nu dot id doho' di tiinu',” ka dau. Nga' a' i' mokinongou dau i Amnon. 17 Om lohowo' noddi dau i susuhuon dau di manud-tanud kasai' dau, om sunudai nod, “Posoliwano' iti tondu', om ontiilan no ilo totobon,” ka. 18 Om wonsoyo' no di susuhuon i pinonuhuan diri. I Tamar nopo daa'ddi nga' kirasuk dit anaru o longon. Tu' miagal noddi o pakayan do tangaanak do raja' di tongoondu' dit a' po nokodudun do kusai do tontok do maso'ddi. 19 Om arabai no di Tamar do pupuk o tulu dau om hurako' no dau i rasuk dau dot anaru di poimpakai dau, om sompono' no dau do palad o rabas dau, om pamanau nogiddi do mikuwo'd mompud-lompud do mihad. 20 Om uhoto' noddi iyau di Absalom, “Kinasou ko di Amnon di tiinu' koii? Ula' no, oi adi'. Tu' tobpinai nu i' i Amnon, om a' i' minog do pinsarahan tomod ino. Om kada' sunudai o wokon,” ka dau. Om undorong noddi i Tamar do hiri'd walai di Absalom. Om oingou tomod diri iyau om tumongob. 21 Om soira' di nokorongou i Raja' Daud do hal diri om kotogod no tomod iyau. 22 Om sisuli' tomod diri i Absalom di Amnon om a' noddi iyau siboro-boros di Amnon tu' minangasou i' i Amnon di Tamar, i tobpinai dau.
Suminuli' i Absalom
23 Duwo noddi toun do mantad diri om lohowo' ngai' no di Absalom i tangaanak do kusai di raja' do hilo'd Baal Hasor, it id somok do bandar dot Ipraim, tu' pinapaharo iyau do poginakanan do kopomoguntingan do hulu do dumba' dau'd hilo'. 24 Om ongoi no iyau solowot di Raja' Daud, om boros ka dau, “Apa', papaharo oku do poginakanan do kopomoguntingan do hulu di dumba' ku. Om mongoi kou no daa di pagawai nu rapou di poginakanan diri,” ka dau. 25 Nga' boros ka di raja', “A' piya minog, oi ondu'. Tu' mongoi ngai' nopo iyahai, om osusa' kopio ko'ndo,” ka dau. Om osonsog i' daa i Absalom nga' a' no i raja' mongoi. Om barakatai poddi dau i Absalom. 26 Om boros kaddi di Absalom, “Iyo nopoddi, om pologoso' po katuu doho' i Amnon, i tobpinai ku, do mongoi ruhang dahai,” ka dau. Om boros ka di raja' do suminimbar, “A' i' minog do mongoi iyau,” ka. 27 Nga' soira' dit osonsog kopio i Absalom om pologoso' noddi di raja' i Amnon om koinsanai di tangaanak dau'd suwai do mongoi tanud di Absalom. Om posurungo' noddi di Absalom o taakanon dit ogumu' om it angawasiu kopio. 28 Om sunudai ngai' no di Absalom i susuhuon dau do poingkaa, “Antangan no kopio dokoyu! Tu' soira' nopondo dot aawuk i Amnon dot adalaan do monginum di waig dot anggur, om tontok di monuhu' oku, om ngoyon no dokoyu iyau patayo'. Kada' kou kooris. Tu' iyoho' i' o monongkoilo do hal diti. Kumosiou kou no om kada' kou pikoduwo o ginawo!” ka dau. 29 Om wonsoyo' no di susuhuon di Absalom i pinonuhuan di Absalom diri om patayo' no diyolo' i Amnon. Om kokito poddi di tangaanak di Raja' Daud iri, om ongoi ngai' no iyolo' sakai di bagal diyolo' om poggidu' no. 30 Om tontok di hilo' po iyolo'd tanga'd ralan di poulian no diyolo' om korikot no o habar dot id di Daud do poingkaa, “Napatai ngai' no di Absalom i tangaanak do Raja', aiso' no tiso' do noolu'!” ka. 31 Om ingkakat no i raja', om hurako' no dau i pakayan dau, om lii no do hiri'd siliu. Om iri'ddi i susuhuon dau nga' minomohurak ngai' nogi' do pakayan dau. 32 Nga' boros ka di Yonadab, i tanak di Simia, i tobpinai di Daud, “Kada' nogi' kopio pomusorou do napatai ngai' i tangaanak do Tuan Raja'. I Amnon noo o pinatai, tu' oilaan mantad i' dot iri mantad no ot osorou di Absalom do mantad di kinasou i' di Amnon i Tamar, i tadi' dau'ddi. 33 Om kada' kopio ponongkuyaai di habar do napatai ngai' i tangaanak do Tuan Raja', tu' iso' no i Amnon o napatai,” ka dau. 34 Om poggidu' no i Absalom. Om kokito di soudor do madtatamong do walai'd raja' o tulun dot ogumu' do mogiwoyo-woyo' do ponong hiri'd Horonaim do rumuhuk di nulu-nulu. 35 Om boros kaddi di Yonadab dot id di Daud, “Antangai pogi', nga' halo' no i tangaanak do Raja'. Miontok nopo di nokoboros ku,” ka dau. 36 Om koboros poddi dau ot iyo'ddi, om korikot no i tangaanak di raja'. Om songlompud-lompud nopoddi iyolo' do mihad, om iri raja' om i pagawai dau nga' miningihad tomod nogi'. 37-38 I Absalom nopoddi nga' nokopoggidu' no, om minongoi'ddi iyau do hilo'd walai di Talmai, i tanak di Amihur, i raja' do pomogunan do Gosur. Om hilo- hilo' noddi iyau do solinaid do tolu o toun. Om alaid i' i Daud do minogihad di Amnon, 39 nga' nopoddi nakatanus-tanus o ginawo dau do tumongob, om langadon noddi iyau di Absalom.
Natur di Yoab o Kogulian di Absalom
1 Om soira' di noilaan di Yoab do langadon i Raja' Daud di Absalom, 2 om ponuhu' no iyau do tulun do mongoi do hilo'd Tokua do mongoi pangangat do songulun o tondu' dit opintar kopio do mantad hilo'. Om boros kaddi dau dot id tondu'ddi, “Minsorupai-rupai no do mogihad om manampakai no di pakayan do mogihad. Kada' pongumau do tumau dit osonong o kosingudan. Om mingiyo-iyo no do tondu' di laid no do mogihad do tulun di napatai di kosianan kopio dau. 3 Om mongoi nondo solowot di raja', om poboroson no iti poboroson ku,” ka dau. Om sunudai noddi di Yoab i tondu' do boros dit apatut dau'd poboroson. 4 Om ongoi no i tondu' solowot di raja', om otud no iyau do tuminuku', om boros ka dau, “Oi Tuan Raja', tulungo' oku no!” ka. 5 Om ponguhot no i raja' dau, “Nokuro?” ka dau. Om boros ka di tondu' do suminimbar, “Iyoho' nopodti om napatayan do sawo, om mosikin oku po. 6 Haro o duwo tanak ku'd kusai, oi Tuan, om insan tadau om piumang no iyolo' do hiri'd dumo. Om patayo' noddi di tiso' i tiso' dau tu' aiso' i' o tulun do pinopitongkiad diyolo'. 7 Om baino' noddi om oinsanan nopo i koobpinayan ku do sumaap doho'. Boros ka diyolo', ‘Patahako' daa dahai i tulun do minamatai di tobpinai dau om maan i' dahai iyau patayo',’ ka. Ondung owonsoi diyolo' o miagal diri, om iso' oku pondo, om aiso' no o tanak ku. Maan no kopio diyolo' raago' it iso' poo do kosondi-sondihon ku, om a' no poolu' do tongosongulun piya o tanak do bagi' di sawo ku do potilombus do sinakagon dau,” ka dau. 8 Om boros kaddi di raja' dot id tondu'ddi, “Uli' no do hilo'd walai nu, om salasayon ku i' diya' iti hal diti,” ka dau. 9 Om boros ka di tondu', “Oi Tuan Raja', nunu nopo o wonsoyon nu, om tonggungon ku i' om tonggungon di sompiiyon ku i kasalaan diri; nga' Raja' nopo om i sompiiyon do Raja' om aiso' i' o sala',” ka dau. 10 Om boros ka di raja', “Ondung haro kawagu o tulun do mimboros do monompurolosi diya', om pootodon nopo do hiti'd doho' i tulun diri om a' nondo iri mamagangau diya',” ka dau. 11 Om boros ka di tondu', “Oi Tuan Raja', sambayang no dot id Tuhan, i Kinorohingan nu, om a' i' i tulun di momolokop di kinapatayan di tanak ku'ddi momonsoi do karaaton di lobi kagayo do mamatai di tanak ku di tiso',” ka dau. Om boros ka di Raja' Daud, “Sumumpa' oku no dot id suang do ngaran do Tuhan di poimpasi, dot a' i' okuro-kuro i tanak nu'ddi,” ka. 12 Om boros kaddi di tondu', “Oi Tuan Raja', pologoso' oku po daa kawagu do moro-boros dot oniba',” ka. Om boros ka di raja', “Boro-boros nopo,” ka. 13 Om boros ka di tondu', “Nokuro tu' miagal diri o kasalaan do wonsoyon nu dot id tulun do songonuon do Kinorohingan? A' nu pologoson do gumuli' i tanak nu di minogidu'ddi, om gowoi poddi om iya' i kasala' do miagal di nokoboros nu di tiinu'ddi. 14 Matai ngai' toko' nodti tu' miagal toko' po di waig di nokotuntug do hilo'd tana', tu' a' no milo do timungon kawagu. Om Kinorohingan nga' a' no mamasi kawagu do tulun di napatai. Om osonong nogi' do mogihum ko'd ralan do popouli' kawagu di tulun di pinotongkiad diri. 15 Nokorikatan ku nopo do mongoi boro-boros diya'dti oi Tuan Raja', nga' tompurolosion oku do tulun. Om pomusorou oku noddi dot osonong nogi' do mongoi oku nopo boro-boros diya' om mogondos nopo do pohubayaan nu i pokionuon ku. 16 Om minomusorou oku do mokinongou ko i' doho' om popoidu' doho' do mantad id tulun di mumbal daa do mamatai doho' om mamatai di tanak ku. Tu' osorou daa diyolo' do potongkiad dahai do mantad id tana' di pinatahak do Kinorohingan dot id tulun dau. 17 Om oilaan ku nogi' do mongintirung doho' i batos do Tuan, tu' Raja' nopo om miagal po do moloikat do Kinorohingan, tu' milo do mongintutun dit osonong om it araat. Om Tuhan no i Kinorohingan nu, o moyo-woyo' do Tuan Raja',” ka dau. 18 Om boros ka di raja' do suminimbar, “Haro o tuhoton ku diya', om poboroson no dot id doho' it otopot,” ka. “Uhoto' oku nopo do nunu nopo,” ka di tondu' do suminimbar. 19 Om ponguhot noddi i raja', “I Yoab o minonuhu' diya'?” ka dau. Om boros ka di tondu', “Sumumpa' oku no dot id suang do ngaran do Raja', do sumimbar oku i' dino tuhoton nu. Otopot nogi' kopio dot i Yoab o minomisunud doho' ondung nunu ot apatut ku'd wonsoyon om it apatut ku'd poboroson. 20 Nga' winonsoi pogi' dau o miagal diri nga' panalasai kosonong-sonong do hal diri. Nga' Raja' nopo om oilo i' do miagal do moloikat do Kinorohingan tu' koilo i' do koinsanai dit osiliu,” ka dau. 21 Om lohowo' noddi di raja' i Yoab, om boro-boros no dot id dau, “Wonsoyon ku i' i pinokianu nu. Ngoyo' no angatai i Absalom, om pootodon no do hiti,” ka. 22 Om otud no i Yoab dot id toguang di Daud. Om boro-boros no dot id dau, “Kinorohingan no o mamarakat diya', oi Tuan Raja'. Oilaan ku noddi kopio do baino' dot asanangan o Tuan doho', tu' winonsoi nu i' i pinokianu ku,” ka dau. 23 Om pamanau noddi i Yoab do minongoi do hilo'd Gosur om angatai no dau i Absalom do gumuli' do hilo'd Yorusalim. 24 Nga' mada' i' i raja' do mundorong i Absalom do hiri'd walai di raja'. Boros ka di raja', “A' oku i' siontong dau,” ka. Om tilombus nopoddi i Absalom do minuli' do hiri'd walai dau om a' no minongoi solowot di raja'.
Nokopiulud iyo Absalom di Daud
25 I Absalom no o narayou o koligkango' do pointongkop dot Israil om aiso' no o tulun do suwai dit oligkang ko' iyau. Mantad nopo dot id lapap dau om gisom dot id tulu dau om aiso' i o poinraraat. 26 Om tobuk dau nga' akapal tomod, om monikid toun nopoddi do pampadan dau i tobuk dau tu' adalaan no kopio kanaru om awagat dot opurimanan dau. Iri nopo tobuk dit opompod dau nga' lobi i' do duwo kilogram o kawagato' do tumanud di poninimbang do don raja'. 27 I Absalom nopoddi nga' kianak do tolu o kusai om iso' o tondu', dit olumis kopio, dot i Tamar o ngaran. 28 Om duwo noddi o toun di Absalom do poingiyon do hilo'd Yorusalim om a' po iyau nokosolowot di raja'. 29 Insan tadau, om lohowo' no dau i Yoab, do suhuon daa dau do mongoi solowot di raja', nga' a' i' i Yoab ruminikot. Om lohowo' po kawagu di Absalom i Yoab do koinduwo nga' a' i' iyau ruminikot. 30 Om boros kaddi di Absalom dot id susuhuon dau, “Antangai pogi' nga' poinrani' i' di tumo ku di kitanom do barli o tumo di Yoab. Ngoyo' dokoyu tutudai i tumo dau'ddi,” ka dau. Om ngoyo' no diyolo' tutudai i tumo'ddi. 31 Om ongoi no i Yoab do hiri'd walai di Absalom om ponguhot no, “Nokuro tu' tinutudan di susuhuon nu i tumo ku?” ka. 32 Om boros ka di Absalom do suminimbar, “A' ko i' giya'ddi ruminikot di lohowo' ku i' iya'. Suhuon ku daa iya'ddi do mongoi solowot di raja' do poporomut diti tuhoton ku do poingkaa, ‘Nunu guna' ku do tuminongkiad do hilo'd Gosur om minongoi do hiti? Osonong nogi' daa'ddi do poundorong kasai' oku do hilo',’ ka. Nga' pogihum no daa kopio do ralan, om kosolowot oku i' di raja'. Om ondung kisala' kasai' oku po, om posodia' oku id hukuman do kapatayon,” ka dau. 33 Om ongoi noddi i Yoab solowot di Raja' Daud om sunudai no dau di pokionuon di Absalom. Om lohowo' noddi di Raja' Daud i Absalom, om rikot no iyau om otud no do hiri'd toguang di raja'. Om tungubai no iyau di raja'.
Minongupakat i Absalom do Sumaap
1 Om katalib poddi iri, om posodia' no i Absalom dot iso' o korita'-kuda' om piro-piro o kuda', om limo nohopod o tulun do moyo' dau. 2 Om pointikid-tikid do tadau dit osuab po om mongoi no i Absalom ingkakat do hiri'd tisan di ralan, i hiri'd toning di wawayaan dot agayo di walai di raja'. Om pointikid-tikid do tulun di sumuang do mongoi solowot di raja' do mongoi pokibutus do hal om lohowon no di Absalom om uhoton dau do poingkaa, “Mantad ko dot id payat disai?” ka. Om ondung sumimbar i tulun dot, ‘Mantad oku id payat diti ko' payat dilo',’ ka, 3 om barasan nondo di Absalom iyau do poingkaa, “Tumanud nopo dot oturan om otopot ino hal nu, nga' araat kopio tu' aiso' i' o wakil do raja' do mokinongou dino hal nu,” ka dau. 4 Om boros ka kawagu di Absalom, “Umbalai pogi' daa dot iyoho' o gompomutus! Tu' isai nopo daa'ndo o haro o hal ko' uhoton om mongoi nopo daa'ndo solowot doho' om otulid indo o pomutus ku,” ka dau. 5 Om soira' nopo do haro o tulun do minsomok di Absalom do motud dot id dau om poroloyon nopo dau o longon dau om ngoyon no igitai i tulun om tunguban no dau. 6 Om miagal kasai' nopodti o wonsoyon di Absalom dot id pointikid-tikid do tulun dot Israil di mongoi pokibutus di raja'. Om iyo noddi o kowoyo-woyoo' di Absalom do minomolumbok do ginawo di tulun dot Israil. 7 Om katalib diri ot apat o toun om boro-boros no i Absalom di Raja' Daud, boros ka dau, “Apa', pologoso' oku no daa do mongoi do hilo'd Hibron do mongoi pamayaan di batos ku dot id Tuhan. 8 Tu' di nopo di hilo' oku pod Gosur, i hilo'd Siria, om nakapamatos oku no dot id Tuhan dot ondung pogulion oku daa dau do hiti'd Yorusalim, om mongoi oku'ndo sambayang dot id dau do hilo'd Hibron,” ka dau. 9 Boros ka di raja', “Ongoi nopo om sumonong-sonong,” ka. Om pamanau noddi i Absalom om ongoi no do hilo'd Hibron. 10 Nga' nokoponuhu' mantad no ma iyau do tulun do mongoi pomisunud dot oinsanan o payat dot Israil do poingkaa, “Korongou kou nopo do tuni di torumpit om pogiakon no dot, ‘Nosiliu no do raja' i Absalom do hilo'd Hibron,’ kanto dokoyu,” ka dau. 11 Om haro o duwo nahatus o tulun do mantad hilo'd Yorusalim do tuminanud di Absalom do minongoi do hilo'd Hibron, nga' aiso' i' o noila-ilaan diyolo' do pasal do pakat diri om aiso' i' daa o kooris-orisan diyolo' do tuminanud dau. 12 Om soira' di maso di Absalom do papatahak do porsombahan di sumbolion om ponuhu' no iyau do tulun do mongoi pangangat di Ahitopol, i tulun do Gilo, it iso' di ponosihat di Daud. Om muhang-ruhang nopoddi o kogiroto' di pakat dau do sumaap di raja' om mumu-gumu' o tulun do sumokodung di Absalom.
Minogidu' i Daud do Mantad Hilo'd Yorusalim
13 Om rikot noddi o tulun do minongoi pomisunud di Daud do poingkaa, “Sumokodung ngai' no di Absalom o tulun dot Israil,” ka. 14 Om boros kaddi di Daud dot id koinsanai di pagawai dau di poinsugku' dau do hilo'd Yorusalim, “Kainou pamanau kopio toko'. Om kopoggidu' toko' i' do mantad id di Absalom. Tu' a' no moti' alaid om korikot no iyau. Siahai toko' no om a' toko' i' okosupan, om a' toko' indo aala' om a' angapatai iti tulun do hiti'd bandar!” ka dau. 15 Om boros ka ngai' di pagawai di raja' do suminimbar, “Posodia' ngai' i' iyahai do momonsoi do nunu nopo o poboroson do Tuan,” ka. 16 Om pamanau noddi i raja' do miwoyo' do koinsanai di sompiiyon dau om i pagawai dau. Nga' pinoundorong i' dau o hopod di tongoondu' di panakasawo dau do tumamong di walai di raja'. 17 Om soira' di tumongkiad no i raja' om koinsanai di tulun dau di bandar diri om undorong no iyolo' do hiri'd somok di walai di kolimpupuson no. 18 Om pamanau no do tuminalib di raja' o koinsanai di soudor di madtatamong dau, om iri no i pagawai dau om songingkakat do hiri'd toning di raja'. Om oinsanan it onom nahatus o soudor do tuminanud dau do mantad hilo'd Gat do poimbaris dot id dotimbabaan dau. 19 Om boros kaddi di raja' dot id di Itai, i tulun do Gat, i boyoon dit onom nahatus o soudor diri, “Nokuro tu' moyo' ko dahai? Poguliai no om mundorong nopo do sumugku' di raja' do wagu. Tu' iya' nopo om sompogunan id hiti tu' tuminongkiad ko i' do pomogunan nu. 20 Wagu ko pod hiti om nokuro daa'ndo tu' maan ku no iya' popinghomboo' do tumanud doho'? Tu' iyoho' piya nga' a' i' koilo ondung hinonggo o pakayaan ku. Poguliai nogi' om angatan ngai' i' ilo tambalut nu dit iso-iso' o bansa'. Om maha' daa om osianan o Tuhan diya' om otorodok dot id diya',” ka di raja'. 21 Nga' boros ka di Itai do suminimbar, “Oi Tuan Raja', sumumpa' oku no dot id suang do ngaran do Tuhan di poimpasi om id suang do ngaran do Raja' do moyo' oku i' kasai' diya' do honggo nopo o tongoyon nu mulong po do haro o koligagaanan do kapatayon,” ka dau. 22 Om boros kaddi di Daud dot id di Itai, “Osonong no. Kainou mamanau,” ka. Om pamanau noddi i Itai do miwoyo' do koinsanai di soudor dau om i sompiiyon diyolo'. 23 Om lompud no do minihad o koinsanai di tulun do hiri do tontok di tuminalib i Daud om i tulun do minoyo' dau do tuminongkiad di bandar diri. Om soborong noddi i raja' di luyu' do Kidron om susuhut no ngai' i tulun dau. Om pakayaai ngai' noddi diyolo' do hilo'd tana' do kowotuan. 24 Om i Sadok it Imam diri om i Abiatar it Imam nga' hiri nogi'. Om koinsanai di tulun do Liwi di kisinaan di Kaban do Tumpongo do Tuhan nga' hino ngai' nogid hiri. Om poiliho' no diyolo' i Kaban do Tumpongo, om a' po diyolo' sinaan kawagu dot a' po nokosoliwan ngai' i tulun do mantad hiri'd bandar diri. 25 Om boros kaddi di raja' dot id di Sadok, “Ongoyo' kawagu ilo Kaban do Tumpongo om pogulion do hilo'd bandar. Ondung osianan o Tuhan doho' om pologoson oku i' dau do koguli' om kokito kawagu dilo Kaban do Tumpongo om i pinoiyanan dilo'. 26 Nga' ondung a' o Tuhan asanangan doho', om poingkuro nopondo o korohian dau dot id doho',” ka dau. 27 Om boros ka kawagu di raja' dot id di Sadok, “Angatan nogi' i Ahimaas, i tanak nu, om i Yonatan, i tanak di Abiatar, om gumuli' kou no do hilo'd bandar do mikuwo'd osimbayan o ginawo. 28 Om mandad oku indo do hilo'd somok di sosoborongon di bawang do hilo'd tana' do kowotuan do gisom do kaanu oku'd habar do mantad id dokoyu,” ka dau. 29 Om pogulio' noddi diyo' Sadok di Abiatar i Kaban do Tumpongo do hilo'd Yorusalim om undorong no iyolo'd hilo'. 30 Om iduwo' noddi di Daud i kasut dau. Om patakadai no dau om koinsanai di tulun di minoyo' dau, do hiri'd Nulu-Nulu do Saitun, do mikuwo'd songihad-ihad om kinuluputan o tulu do popointalang do tumongob iyolo'. 31 Om soira' di nosunudan i Daud do minongoi sokodung i Ahitopol di pakat di Absalom do sumaap, om sambayang noddi iyau do poingkaa, “Oi Tuhan, pologoso' no dot a' atanud i nosihat di Ahitopol,” ka. 32 Om soira' di nokosigampot i Daud do hiri'd timpak di nulu-nulu, i tiiyonon do tulun do sumambayang dot id Tuhan, om ngoyo' no iyau solowoto' di Husai, i tambalut dau dit otorodok kopio, i tulun dot Arki. Om rasuk nopo di Husai nga' nopinghurak po om tulu dau nga' kipupuk. 33 Om boros kad i Daud dot id dau, “Ondung moyo' ko doho' om a' ko i' koponguhup doho'. 34 Nga' kouhup ko nogi' doho' do gumuli' ko do hilo'd bandar om ngoyon sunudai i Absalom do sumiliu ko do susuhuon dau dit otorodok do miagal di kotorodoko' nu di suminiliu do susuhuon di tapa' dau. Om tumotos nondo dot a' sumokodung do nunu nopo o nosihat di poboroson di Ahitopol. 35 Om iyo Sadok di Abiatar, i duwo ot imam diri nga' hilo' nogi', om sunudan no iyolo' do nunu nopo ot orongou nu dot id suang do walai di raja'. 36 Hilo' nogid poinsugku' diyolo', i Ahimaas om i Yonatan, i tangaanak diyolo'ddi. Om suhuon no i tangaanak diyolo'ddi do mongoi do hiti'd doho' do mongoi posunud do nunu nopo it orongou nu,” ka dau. 37 Om poguliai noddi di Husai, i tambalut di Daud diri, do hilo'd Yorusalim. Om korikot noddi iyau do hilo'd Yorusalim, om i Absalom nga' koririkot do hiri.
I Daud om i Siba
1 Om soira' dit osomok po o nakapamanahon di Daud do mantad hiri'd timpak di nulu-nulu, om sigog id solowoto' iyau di Siba, i susuhuon di Mopibosit do kiginayat do duwo o kaladai do ginandaran do duwo nahatus o liob do roti, om hatus o puru do tua' dot anggur di nokoring, om hatus o puru do tua' dot ara di kouupu', om sangkantung do kulit o waig dot anggur. 2 Om ponguhot no i Raja' Daud dau, “Nunu ngai' o maan nu'dti?” ka. Om boros ka di Siba do suminimbar, “Ilo' nopo kaladai om maan do sakayon do sompiiyon do Raja', om ilo' no roti om tua-ua' om maan di susuhuon dot akanon, om ilo' no waig dot anggur om maan dot inumon di tuuhan do hiti'd tana' do kowotuan,” ka dau. 3 Om ponguhot no i raja', “Hinonggo i Mopibosit, i manangaki di Saul, i tuan nu,” ka. Om boros kad i Siba dot id dau, “Hilo'd Yorusalim tu' otumbayaan no iyau do maan di tulun dot Israil pogulio' dot id dau i pomorintaan di taki dau, i Saul,” ka dau. 4 Om boros ka di raja' dot id di Siba, “Koinsanai di songonuon di Mopibosit om asanganu ngai' nu no,” ka. Om boros kad i Siba do suminimbar, “Wonsoyon ngai' ku i' i pinonuhuan do Raja'. Maha' daa om osonong kasai' o Raja' dot id doho'!” ka dau.
I Daud om i Simoi
5 Om soira' di nokorikot i Daud do hilo'd Bahurim, om ongoi no ruba' dau i Simoi, i tanak di Gira, i koworisan di Saul. Om mimpopol tomod iyau di Daud. 6 Om pindumpahai no dau do watu i Daud om i pagawai dau do mulong piya do notutukan i' daa i Daud di tulun om i soudor di madtatamong dau. 7 Om pimboros no i Simoi do mimpopol dau do poingkaa, “Poggidu' kopio! poggidu' kopio! Iya' i tulun do gampamatai om tulun dot araat! 8 Nahau nu i pomorintaan di Saul, om baino' nopoddi om hukuman ko nod Tuhan tu' ogumu' kopio i' o tulun dot id sompiiyon di Saul do pinatai nu. Nakatahak noddi do Tuhan iti pomorintaan dot id di Absalom i tanak nu, om aiso' noddi o kotutuk-tutukon nu tu' gampamatai ko i'!” ka dau. 9 Om boros ka di Abisai, i tadi' di Yoab, i tanak di Soruya, dot id raja', “Oi Raja', nokuro tu' pologoson nu'ti tasu do mimpopol diya'? Pologoso' oku pogi' do mongoi'd hilo' om ngoyon ku i' puloso' ilo tulu dau,” ka dau. 10 Nga' boros ka di raja' dot id di Abisai om id di Yoab, i tobpinai di Abisai, “Nunu kokuro-kuro nu doho'? Pologoson nopolo' do mimpopol doho'. Tu' ondung Tuhan o minonuhu' dau om isai poddi o milo do muhot ondung nokuro tu' miagal dilo' o wonsoyon dau?” ka dau. 11 Om boros ka di Daud dot id di Abisai, om id koinsanai di susuhuon dau, “Iri piya tanak ku kopio nga' mumbal id mamatai doho'. Om nokuro tu' osuayan kou'd kokito do winonsoi'dti tulun do Binyamin diti? Pologoson nopo iyau do mimpopol doho' tu' Tuhan i' o minonuhu' dau. 12 Om a' i' oila-ilaan nga' okito i' doti' do Tuhan iti koinggoritan ku om tingalanan indo dau do barakat i popol diri,” ka dau. 13 Om tilombus po i Daud om koinsanai di tulun dau do minamanau do suminusui di ralan om i Simoi nga' mapak-hapak i' diyolo' do hiri'd guas di nulu-nulu do mindumpau di Daud do watu om mintias do tana'. 14 Om korikot noddi i raja' om koinsanai di tulun dau do hiri'd Bawang do Yordan. Om nongohuyan no tomod iyolo'. Om undorong-dorong no iyolo' do hiri.
Hiri'd Yorusalim i Absalom
15 Om korikot noddi do hilo'd Yorusalim i Absalom om koinsanai di tulun dot Israil di manud-tanud dau. Om i Ahitopol nga' moyo-woyo' nogi' diyolo'. 16 Om soira' di nosolowot di Absalom i Husai, i tulun dot Arki, i tambalut di Daud dit otorodok diri om pomoros no i Husai dot opuhod, “Otogui po o raja'! Otogui po o raja',” ka. 17 Om ponguhot no i Absalom di Husai, “Honggo noddi i kotorodoko' nu dot id di Daud, i tambalut nu? Nokuro tu' a' ko minoyo' dau?” ka dau. 18 Om boros ka di Husai do suminimbar, “Poingkuro oku po daa do moyo'? Tu' sumokodung oku i' di tulun di nopili' do Tuhan, om i nopili' do koinsanai'dti tulun, om i nopili' do koinsanai'd tulun dot Israil. Iri no tulun diri o woyoon ku. 19 Om isai po daa o pogobi-obian ku ondung okon ko' i tanak do tuan ku? Poingkuro oku nopo do minogobi-obi' di tapa' nu om miagal noddi o pogobi-obi' ku diya',” ka dau. 20 Om boros kaddi di Absalom dot id di Ahitopol, “Poboroso' no ondung nunu ot apatut do wonsoyon toko'?” ka dau. 21 Om boros ka di Ahitopol, “Ongoi dudun dilo tongoondu' di panakasawo di tapa' nu di pinoundorong dau do madtamong di walai do raja'. Om koilo ngai' indo o tulun do hiti'd Israil do nosiliu ko di tapa' nu do pisangod om ongoodsuur indo ilo tulun do tumanud diya',” ka dau. 22 Om wansayai no diyolo' i Absalom do kiim do hiri'd sakai di taap do walai di raja', dit arantai. Om ongoi no iyau dudun di tongoondu' di panakasawo di tapa' dau. Om songingontong ngai' nopo i tulun di wonsoyon di Absalom diri. 23 Tontok nopo di maso'ddi om iyo po do mantad kopio id Kinorohingan o nosihat di Ahitopol, om kaa pogi'ddi dot umboyoon nopo di Daud om i Absalom o nosihat di Ahitopol.
Nakalan di Husai i Absalom
1 A' po alaid do mantad diri om boro-boros no i Ahitopol dot id di Absalom, “Pologoso' oku daa do momili' do hopod om duwo noribu o tongokusai om ngoyon ku indo gusao' i Daud do totuong do baino'. 2 Ngoyon ku iyau saapo' do tontok dit ohuyan om oluhoi iyau. Om tigowoon ku'ndo iyau gisom do moddosi om mogidu' ngai' nopondo i tulun dau. Om i Daud nopo o patayon ku. 3 Om tanggayan ngai' ku nogindo i tulun dau om pootodon ku nondo dot id diya' do miagal di tondu' do gumuli' dot id sawo dau. Tu' iso' no tulun do pokipapatayan nu koii? Nga' iri nopondo i tulun do suwai om a' i' pokorua-rualan,” ka dau. 4 Om osonong i' i nosihat diri do norongou di Absalom om koinsanai di boyoon do tulun dot Israil. 5 Nga' boros ka di Absalom, “Lohowo' po i Husai, om pokinongohon toko' po o dau dot osorou,” ka. 6 Om tontok di nokorikot i Husai, om boros ka di Absalom, “Poingkaa o nosihat di Ahitopol; tonudon toko' tuu iri? A' nopo, om poboroson no o diya' dot osorou,” ka dau. 7 Om boros ka di Husai do suminimbar, “Iri nopo nosihat di Ahitopol dot id dokoyu baino' om a' osonong. 8 Oilaan nu i' dot i Daud nopo om i tulun dau, om soudor dit ongokoris om osiou; om miagal po do bohuang di natagakan do tanak korongit. Om soudor nogi' iyau di noubas no tomod do sumangod om a' i' iyau insan do sumugku' di soudor dau do dongotuong. 9 Dinondo piya doti'dti nga' poillisok no iyau dot id luang do nulu-nulu ko' id kinoiyonon po do suwai. Om soira' nopondo do saapon di Daud i tulun nu, om haro no o tapatai, om pointikid-tikid do tulun di korongou'ddi om momoros nondo do naala' no i tulun nu oi Absalom. 10 Om iri piya'ndo tulun dit osiou kopio, i miagal pod singa tu' a' moddosi nga' moddosi indo tu' koilo ngai' i' o tulun do hiti'd Israil dot iri nopo tapa' nu om gunsiou kopio om iri nogi' i tulun dau nga' sumasangod dit ongokoris om gunsiou. 11 Nosihat ku nopo iyoho' om poingkaa: Timungon ngai' no o tulun dot Israil do mantad id pointongkop diti pomogunan dot Israil do gisom do miagal po di togis do hilo'd tisan do rahat kogumu'. Om iya' nondo o boyoon diyolo' do mongoi sangod. 12 Om soira' nopondo dot okito toko' i Daud do honggo nopo iyau, om songodon toko' no iyau do tontok dit a' po dau oilaan ondung nunu o nosiliu. Om aiso' no ot olu-oluon toko' diyolo' do poimpasi, dot iyau tuu ko' i po tulun dau. 13 Om ondung mongoi daa iyau suang do bandar om mongoi ngai' nopo o tulun dot Israil do tali do pokogoson di bandar om gayaton toko' nogindo iri do gisom do kosuang do kubong dit id somok. Om iso' pod watu nga' aiso' no ot oolu' do hiri'd timpak di nulu-nulu'ddi,” ka dau. 14 Om boros kaddi di Absalom om koinsanai di tulun dot Israil, “Osonong nogi' i nosihat di Husai ko' i di Ahitopol,” ka. Tu' natantu' mantad nod Tuhan dot a' atanud i nosihat di Ahitopol dit osonong om porikatan i' do Tuhan do kosusaan i Absalom.
Minogidu' i Daud
15 Om sunudai noddi di Husai i Sadok it Imam om i Abiatar it Imam di nosihat di Ahitopol om i dau do nosihat dot id di Absalom om id boyoon do tulun dot Israil. 16 Om boros kad i Husai, “Lomusai no do mongoi popoilo di Daud, om a' i' iyau modop do hilo'd sosoborongon di bawang do hilo'd tana' do kowotuan suwai ko' sumoborong nogi' kopio di Bawang do Yordan. Tu' ondung amu', om apatai no iyau om koinsanai di tulun dau,” ka dau. 17 Daamot nopoddi om poingandad no i Yonatan, i tanak di Abiatar, om i Ahimaas, i tanak di Sadok, do hiri'd somok di tudan do waig dot Inrogil, it id tisan do bandar do Yorusalim. A' no iyolo' kasaap do sumuang di bandar tu' ooris nopo dot okito do tulun. Om koubasanan no do ngoyon iyolo' sunudai dot iso' o susuhuon do tondu' do habar dit apatut do ngoyon posunudo' dot id di Daud. 18 Nga' haro iddi kopio ot iso' o tanak do kusai do nokokito diyolo', om ngoyo' no dau sunudai i Absalom. Om arau-arau nopoddi iyolo' do minongoi lisok do hiri'd walai dot iso' tulun do hilo'd Bahurim. Haro o torobong di tulun diri do hiri'd toning di walai dau om ongoi no iyolo' suang do hiri. 19 Om ongoi no i sawo di kusai anu do ponokop om potokopo' no do hiri'd kabang di torobong, om sasadai nogiddi do gandum o hiri'd sakai, gisom dot a' no okito i torobong. 20 Om korikot no i pagawai di Absalom om uhoto' no i tondu'. Boros ka diyolo', “Honggo no i Yonatan om i Ahimaas?” ka. Om boros ka dau, “Nokosoborong no dilo bawang,” ka. Om pingihumai po daa di tongoulun iyolo' nga' a' no nokito, om poguliai noddi diyolo' do hilo'd Yorusalim. 21 Om kapamanau poddi iyolo' om soliwan nogiddi i Ahimaas om i Yonatan do mantad hiri'd torobong. Om osiau nopoddi iyolo' do minongoi pomisunud di Daud di habar diri. Boros ka diyolo', “I Ahitopol nopo om minonosihat do sumaap diya'. Om pamanau nogi' kopio do sumoborong dilo bawang,” ka. 22 Om soborong noddi i Daud om koinsanai di tulun dau di Bawang do Yordan, om numawau noddi di nokosoborong ngai' iyolo'. 23 Om soira' di noilaan di Ahitopol dot a' tinanud i nosihat dau om pakalai noddi dau i kaladai dau om uli' no do hiri'd bandar dau. Om koulud ngai' po dau o hiri'd walai dau om ongoi nogiddi iyau giis. Om linobong diri iyau do hiri'd kalabangan do sompiiyon dau. 24 Om nokorikot no i Daud do hiri'd bandar do Mahanaim do tontok di sumoborong nogi' di Bawang do Yordan i Absalom om koinsanai di tulun dot Israil do minoyo' dau. 25 (Om i Amasa o pinili' di Absalom do sumowoli di Yoab do boyoon do soudor. I Amasa nopo om tanak di Yitora, i tulun dot Ismail. Om tina' nopo dau om i Abigail, i tanak di Nahas do tondu', i tobpinai di Soruya i tina' di Yoab.) 26 Om pomukiim noddi i Absalom om koinsanai di tulun dau do hilo'd tana' do Giliad. 27 Om soira' di nokorikot i Daud do hilo'd Mahanaim om ongoi no solowot dau i Sobi, i tanak di Nahas, i mantad hilo'd bandar do Raba, i hilo'd Amon, om rikot po i Makir, i tanak di Amiol, i mantad hilo'd Lodibar, om rikot i Barsilai do mantad hilo'd Rogolim, i hilo'd Giliad. 28-29 Om minigit iyolo' do mangkuk, om kuron, om galam, om gandum, om barli, om tapung om gandum di ginowi, om kasang dit aragang, om kasang dit oniba' om paha' om montiga', om susu di kilunok, om piro-piro o tinan do dumba'. Tu' oilaan no diyolo' do louson om tuuhan, om ohuyan i Daud om i tulun dau tu' minamanau do hilo'd tana' do kowotuan.
Naala' om Napatai i Absalom
1 Om timungo' ngai' noddi di Daud i tulun dau om bohogio' no do mogiposuk-posukan do sororibu-ribu om sarahatus-hatus o tulun om haro ngai' o boyoon do pointikid-tikid di posukan. 2 Om suhuo' ngai' no dau iyolo' do sumoliwan do mongoi sangod; om pitoluo' no dau i posukan diri, do winoyo' di Yoab, om i Abisai, i tobpinai di Yoab, om i Itai, i mantad hilo'd Gat, om soroisaan nopo iyolo' do posukan. Om boros ka di raja', “Iyoho' nga' mongoi i' woyo' dokoyu,” ka. 3 Om boros ka di tongoulun, “Kada' no iya' ongoi, oi Tuan Raja'. Tu' ondung mogidu' iyahai, ko' apatai po o songintanga' dahai nga' aiso' i' o nunu-nunu'ddi dot id pisangod, tu' iya' noo ot ihumon diyolo'. Iso' ko nopo nga' irad i' do hopod noribu o tulun dahai. Om osonong nogi' do sumodia' ko do monulung dahai do mantad hiti'd bandar,” ka diyolo'. 4 Om boros ka di raja' do suminimbar, “Nunu nopo it osonong dot osorou dokoyu, om iri no o wonsoyon ku,” ka dau. Om ingkakat noddi iyau do hiri'd toning di wawayaan dot agayo om pamanau ngai' no i soudor dau do mogiposuk-posukan do sororibu-ribu om sarahatus-hatus o tulun dot iso' o posukan. 5 Om sunudai no kopio dau i Yoab, om i Abisai, om i Itai do poingkaa, “Kada' no kopio dokoyu doho' pokorual-rualai i Absalom, i tanakwagu'ddi,” ka. Om korongou ngai' i' i soudor di boros di Daud diri. 6 Om pamanau noddi i soudor di Daud do minongoi saap di soudor dot Israil do hiri'd puru' dot Ipraim. 7 Om kaala' no di tulun di Daud i soudor dot Israil; om agayo no kopio o kinaalaan tu' kapatai nopo o 20,000 o tulun do tadau'ddi. 8 Om kotongkop noddi do hiri'd watas diri i mogisasangod, nga' ogumu' nogiddi o napatai di hiri'd gouton ko' mantad di napatai do hiri'd pisangadan. 9 Tontok di poinsakai i Absalom di bagal dau om sigog id kosolowot i Absalom do piro-piro o tulun di Daud. Om soira' di suminusut i bagal di guas do kayu dot agayo om kasangat no di raan o tulu di Absalom. Nga' panangkus nopo i bagal, om miis-giis poddi i Absalom. 10 Om kokito noddi di songulun o tulun di Daud i Absalom om ngoyo' no posunudo' di Yoab. Boros ka dau, “Oi Tuan, nokito ku i Absalom do miis-giis do hilo'd guas do kayu dot agayo,” ka dau. 11 Om boros ka di Yoab, “Ondung nokito nu iyau, om nokuro tu' a' nu iyau pinatai'd diiri? Onuan ku daa iya'ddi do hopod o tusin do pirok om iso' o tagkos,” ka dau. 12 Nga' boros ka di tulun do suminimbar, “Mulong piya daa dot onuan oku diya' do soribu o tusin do pirok, nga' a' oku i' mumbal do paakang do longon ku dot id tanak di raja'. Nokorongou ngai' toko' i' di Raja' do minomisunud kopio diya', om i Abisai, om i Itai do poingkaa, ‘Kada' no kopio dokoyu doho' pokorual-rualai i Absalom, i tanakwagu'ddi,’ ka. 13 Nga' ondung pinatai ku i Absalom di tiinu', om atantu' no dot oilaan i' di raja' --- tu' orongou ngai' i' dau o nunu nopo --- om atantu' no dot a' ko indo mogobi' doho',” ka dau. 14 Om boros ka di Yoab, “Ula' po no boros dit aiso' o komoyon,” ka dau. Om anu no iyau do tolu o tandus om potokono' no do hiri'd kangkab di Absalom di miyau po iyau do poinggiis do hiri'd guas do kayu dit agayo. 15 Om pogiuhupai noddi di hopod o soudor di Yoab do mamatai i Absalom. 16 Om pounio' no di Yoab i torumpit dau om tingkod noddi i soudor dau do momogusa' di tulun dot Israil. 17 Om ngoyo' no diyolo' i rata' di Absalom om pataamo' no do hiri'd torobong di hiri'd puru', om rubpuwai nogiddi do watu do gisom dot asawat o kinorubpuon di watu. Om poggidu' ngai' nopo i tulun dot Israil, om sorompori-pori nopo iyolo' do minuli' do hiri'd walai diyolo'. 18 Om tontok di poimpasi po i Absalom om pinopoingkakat iyau dot iso' o torigi do watu do hiri'd Rantai do Raja' do kopomuhandaman do ngaran dau tu' aiso' i' o tanak dau do kusai di potilombus do sinakagon dau. Om pinungaranan diri dau iri do pinasangai do ngaran dau. Om gisom piya'd baino' nga' roitan kasai' i' iri do, “Torigi do Watu di Absalom”.
Sinunudan i Daud do Kinapatayon di Absalom
19 Om boros kaddi di Ahimaas, i tanak di Sadok dot id di Yoab, “Pologoso' oku do manangkus do mongoi pomisunud di raja' do habar dot osonong tu' pinoidu' i' iyau do Tuhan do mantad id pisangod dau,” ka. 20 Boros ka di Yoab, “Kada'! Mongoi id koimbagu. Tu' tadau nopod baino' om a' ko i' koino-ino do popolombus do habar dot id raja' tu' minatai i tanak dau,” ka dau. 21 Om boros kaddi dau dot id turipon dau di tulun dot Etiopia, “Ngoyo' sunudai i raja' di nokito nu,” ka. Om otud no i turipon diri om panangkus nod minongoi. 22 Nga' osonsog i' i Ahimaas, “Poingkuro piya ot osiliu nga' pologoso' oku no do mongoi polombus di habar diri,” ka dau. Boros ka di Yoab do minonguhot, “Nokuro kopio tu' sumonsog ko do mongoi, oi tanak ku? Aiso' i' ot isomuli' dot aanu nu,” ka dau. 23 Boros ka kawagu di Ahimaas, “Poingkuro piya nga' mongoi kasai' oku i',” ka dau. “Om iyo nopoddi om ongoi nopo katuu,” kaddi di Yoab. Om panangkus no i Ahimaas do pinoruhukan do suminusui di ralan do kawaya' di Rantai do Yordan, om a' i' alaid om kosoguluanai no dau i turipon, i bansa'd Etiopia diri. 24 Poirikau i Daud do hiri'd langga' dit id piolitan di wawayaan ponong id suang om wawayaan ponong id soliwan di bandar. Om ongoi no i madtatamong do hiri'd sakai di tolig om ingkakat no do hiri'd sakai di taap di wawayaan diri. Om soira' di huminangog iyau om kokito no dau o songulun do manangkus do pakayaan do hiri. 25 Om polohowo' no di madtatamong dot id raja' do hiri'd siriba' do pinoposunud diri. Om boros ka di raja', “Ondung iso-iso' iyau om habar nod osonong o polombuson dau,” ka dau. Om maha' dit oruhai no do korikot i tulun diri, 26 om kokito po kawagu di tulun do madtatamong ot iso' kawagu o tulun do manangkus do pakayaan i' do hiri. Om polohowo' po kawagu dau o poingkaa, “Antangai pogi'! Nga' haro po kawagu o tulun do manangkus tomod do pakayaan do hiti!” ka. Om boros ka di raja' do suminimbar, “Iti nga' poporomut id habar dot osonong,” ka. 27 Om boros ka di tulun di madtatamong, “Miagal-agal di pananangkus di Ahimaas ilo pananangkus dilo tulun dot id gulu. Om i Ahimaas nolo',” ka dau. Om boros ka di raja', “Iyau nopo om osonong i' koulun om atantu' no dot osonong i' o habar do poromuton dau,” ka dau. 28 Om polohowo' no di Ahimaas o pinonuwau dau di raja', om ongoi no iyau otud do tuminuku' dot id toguang di raja', om boros ka dau, “Royohon no o Tuhan i Kinorohingan do Tuan Raja', i pinapatahak dot id Tuan Raja' do kamanangan dot id sawat do koinsanai di tulun di sumaap daa do Raja',” ka dau. 29 Om ponguhot no i raja', “Osonong-sonong i' i Absalom, i tanakwagu'ddi?” ka dau. Om boros ka di Ahimaas do suminimbar, “Oi Tuan Raja', soira' di linohou oku di Yoab, i susuhuon do Raja', om nokokito oku dot agangau nopo o hiri, nga' a' oku i' koilo ondung nunu o nosiliu do hiri,” ka dau. 30 Om boros ka di raja', “Ongoi ingkakat do hilo',” ka dau. Om ongoi noddi iyau ingkakat do hiri. 31 Om korikot noddi i turipon di Yoab, i tulun dot Etiopia om boro-boros no iyau di raja', “Poporongou oku do habar dot osonong dot id Raja'! Baino' nopo om nonuan ko nod Tuhan do kamanangan do suminaap do koinsanai do tulun di sumaap diya',” ka dau. 32 Om ponguhot no i raja', “Poimpasi po i Absalom, i tanakwagu'ddi?” ka dau. Om boros ka di turipon do suminimbar, “Pologoson nopo daa do miagal ngai' di tanakwagu'ddi ot owonsoi dot id koinsanai di tulun di mumbal do sumaap om pokoruol do Tuan Raja',” ka dau. 33 Om korongou poddi di raja' iri, om tuminongob tomod diri iyau. Om salakoi no iyau do hiri'd bilik di hiri'd sawat di wawayaan dot agayo om pogihad no iyau. Om moro-boros iyau do poingkaa, “Oi tanak ku! Tanak ku Absalom! Absalom! i tanak ku! Osonong nogi' daa dot iyoho' o minatai'ddi do sumowoli diya', oi tanak ku! Absalom, i tanak ku!” ka.
Pinoboros di Yoab o Kasalaan di Daud
1 Om sinunudan diri i Yoab do mihad i Raja' Daud do mogihad di Absalom. 2 Om iri nopo kinamanangan di tadau'ddi nga' nosiliu nogiddi do katangaban dot id toinsanan di soudor di Daud, tu' norongou diyolo' do mogihad i raja' di tanak dau. 3 Om aiso' nod komi di soudor do guminuli' do hiri'd bandar do tadau'ddi; om miagal po iyolo' di soudor do nointingayaman do minogidu' do mantad id pisangadan. 4 Om sompono' no di raja' o rabas dau mikuwo'd mininglompud do minihad om mimboros dot, “Oi tanak ku Absalom, Absalom, i tanak ku, oi tanak ku!” ka. 5 Om suang no i Yoab do hiri'd walai di raja' do minongoi solowot di raja'. Om boros ka dau, “Baino' no do minongintingayam ko do koinsanai di tulun nu, i tulun di minamasi diya' om koinsanai di tangaanak nu do kusai om tondu', om i sawo nu om i tongoondu' di panakasawo nu. 6 A' ko nogi' osianan di tulun dot osianan diya' nga' osianan ko nogi' di tulun dit araatan diya'! Nokointalang nu no kopio dot aiso' i' o komoi-komoyon di boyoon di soudor nu, om i soudor nu dot id diya'! Oilaan ku no kopio dot asanangan ko nogi' daa do poimpasi i Absalom om nangapatai ngai' iyahai do tadau baino'. 7 Ingkakat nogi' kopio om sumoliwan i' do mongoi ponginsasamod do ginawo di tulun nu. Tu' ondung a' ko sumoliwan do mongoi solowot diyolo' om sumumpa' oku no dot id Tuhan dot iso' po moti' di tulun diri nga' aiso' no o mundorong do moyo' diya' do totuong diti; om komoyon nopodti nga' iti no o kosusaan nu dit adalaan kopio kawagat dot opurimanan nu do solinaid nu do poimpasi,” ka dau. 8 Om ingkakat noddi i raja' om soliwan no om irikau no do hiri'd toning di wawayaan dot agayo di bandar. Om korongou ngai' poddi i tulun dau do hiri iyau, om ongoi ngai' no iyolo' solowot di raja'.
Pinogulian di Daud do Hilo'd Yorusalim
Daamot nopoddi om nokopoggidu' ngai' no i tulun dot Israil; om sorompori-pori nopo iyolo' do minuli' do hiri'd walai diyolo'. 9 Om mogisosongkiwal poddi ngai' i payat do tulun dot Israil do pointongkop di pomogunan. Boros ka diyolo', “I Raja' Daud i' o pinopoidu' dati' do mantad id pisangod toko', om iyau i' o minamasi dati' do mantad id longon do tulun do Pilistin, nga' baino' noddi om nokopoggidu' no iyau do mantad id di Absalom, om nokotongkiad nodti pomogunan. 10 Pilio' toko' no daa i Absalom do sumiliu do raja' toko' nga' napatai iddi iyau dot id pisangadan. Om nokuro'ddi tu' mundorong tomod kou om aiso' i' ot ongoiso' piya do mongoi pangangat di Raja' Daud do gumuli'?” ka. 11 Om iri nopo i boros di tulun dot Israil diri nga' nokorikot no dot id di Raja' Daud. Om suhuo' noddi di Daud i duwo ot imam, i Sadok om i Abiatar do mongoi ponguhot ngai' di boyoon do tulun do Yohuda do poingkaa, “Nokuro tu' kotohuri kou nogi' iyokoyu do mongoi pangangat om momoyo' di raja' do gumuli' do hilo'd walai dau? 12 Iyokoyu nopo om koobpinayan ngai' ku i' om id suang do sompiiyon ku; nga' nokuro tu' iyokoyu nogi' o kotohuri kopio do mongoi popouli' doho'?” ka. 13 Om sinuhu' nogi' di Daud iyolo' do popoboros dot id di Amasa do poingkaa, “Tobpinai ku i' iya'. Om mantad po do baino' om iya'ndo o silihon ku do sumiliu do boyoon do koinsanai do soudor do sumowoli di Yoab. Pologoson nopo o Kinorohingan do mamatai doho' dot a' ku no wonsoyon o miagal diri,” ka. 14 Om kohubayaai ngai' nopoddi i tulun do Yohuda di boros di Daud om ponuhu' noddi iyolo' do mongoi posunud do boros diti dot id raja', “Guli' no oi Tuan Raja', do miwoyo' do koinsanai di pagawai nu,” ka. 15 Om pamanau noddi i raja' do guminuli'. Om soira' di nokorikot iyau do hilo'd Bawang do Yordan, om i tulun do Yohuda nga' nokorikot no do hilo'd Gilgal do mongoi pangangat om mongoi pomoyo' di raja' do sumoborong di bawang. 16 Om i Simoi nogi', i tanak di Gira, i tulun do Binyamin diri, nga' arau-arau tomod do minongoi amung di tulun do Yohuda do mongoi solowot di Raja' Daud. 17 Om moyo-woyo' di Simoi o soribu o tulun do mantad id payat do Binyamin. Om i Siba nogi', i susuhuon di sompiiyon di Saul do miwoyo' di hopod om limo o tanak dau do kusai om duwo nohopod o susuhuon dau nga' suminoborong nogi' di Bawang do Yordan dit a' po nokorikot i raja'. 18 Om soborong noddi iyolo' do hiri'd sosoborongon do mongoi posoborong di sompiiyon di raja' om momonsoi do nunu nopo i pokionuon di raja'.
Ninsianan di Daud i Simoi
Om tontok di motisoborong no i raja' di Bawang do Yordan om ongoi no i Simoi otud dot id toguang di raja', 19 om boro-boros nod, “Oi Tuan Raja', pokionuon ku no daa kopio do lihuan nu i kasalaan di nowonsoi ku di tontok di tadau do tuminongkiad ko do Yorusalim. Kada' no soroho' i sala' ku'ddi. 20 Tu' oilaan ku no kopio do nokowonsoi oku'd dusa; om antangai pogi' nga' iyoho' no kopio o nokopogulu do mantad do koinsanai di payat di poundorong do hilo'd ponong id utara do minongoi rapou do Raja' do tadau baino',” ka dau. 21 Om korongou noddi di Abisai, i tanak di Soruya iri om boro-boros nod, “A' toi apatut do patayon i Simoi tu' minomopol di raja' do nopili' do Tuhan,” ka. 22 Nga' boros ka di Daud dot id di Abisai om id di Yoab, i tobpinai dau dit id dotuo, “Kada' kou ongoi kuro-kuro doho'! Monusa' kou nopo doho'! Tadau nod baino' do nosiliu kawagu oku do raja' dot Israil, om iso' pod tulun dot Israil nga' aiso' i' o koino-ino do patayon do tadau'd baino',” ka dau. 23 Om boros ka di Daud dot id di Simoi, “Jominon ku i' dot a' ko i' hukuman do kapatayon,” ka dau.
Ninsianan di Daud i Mopibosit
24 Om i Mopibosit, i manangaki di Saul nga' minongoi nogi' solowot di raja'. Om a' i' dau nisuan o gakod dau, om a' pinampadan o ganggut, om a' pinupuan o pakayan dau do mantad po di tuminongkiad i' i raja' do hilo'd Yorusalim gisom do tadau di nokoguli' i raja' di nakamanang iyau. 25 Om soira' di nokorikot i Mopibosit do mantad hilo'd Yorusalim do minongoi solowot di raja' om boro-boros no i raja' dot id dau, “Nokuro tu' a' ko minoyo' doho' do tontok diri oi Mopibosit?” ka. 26 Om boros ka di Mopibosit do suminimbar, “Oilaan nu i' oi Tuan Raja' do kimpo' oku. Om sunudai ku no daa i susuhuon ku do mamakol di kaladai om kasakai oku i' om katanud oku i' daa'ndo diya' nga' minagakal nogi' iyau doho'. 27 Om minongudut iyau doho' dot id Tuan Raja'; nga' iya' nopo om miagal id moloikat do Kinorohingan, om wonsoyo' nopo dot id doho' it osonong dot osorou nu. 28 Koinsanai di sompiiyon do tapa' ku nga' osorupai ngai' no daa do patayon do Tuan Raja', nga' pinologos oku i' diya' do makan do potorungak diya'. Om aiso' no o kosorupayan ku do mokianu do nunu nopo do mantad id diya', oi Tuan Raja',” ka dau. 29 Om boros ka di raja' do suminimbar, “Ula' pori'd boros. Natantu' ku no do maan dokoyu di Siba pibohogio' o koinsanai di dapu' di Saul,” ka dau. 30 Nga' boros ka di Mopibosit, “Okuro i' dot i Siba o kaanu ngai'ddi. Tu' osonong no o ginawo ku dot osonong po o Tuan Raja' do nokoguli',” ka dau.
Ninsianan di Daud i Barsilai
31 I Barsilai nogi', i tulun do Giliad nga' ruminuhuk i' do mantad hilo'd Rogolim do minoyo' di raja' do gisom do nokosoborong di Bawang do Yordan. 32 I Barsilai nopodti nga' molohing no kopio, tu' walu' no nohopod o toun dau. Nga' kaya' tomod iyau om iyau noddi o minanahak do taakanon di raja' di daamot di raja' do hilo'd Mahanaim. 33 Om boros ka di raja' dot id dau, “Kaino, tumanud doho'. Om onuan ku i' iya' do nunu nopo o kosukup-sukupan nu do hilo'd Yorusalim,” ka dau. 34 Nga' boros ka di Barsilai do suminimbar, “A' oku no alaid diti do poimpasi. Om nokuro po nanu' tu' mongoi oku po tanud do Tuan Raja' do hilo'd Yorusalim? 35 Walu' no nohopod o toun ku, om aiso' no o milo do manahak doho' do koinsanangan. Om a' oku no kopuriman ondung okuro-kuro i taakanon om it inumon ku. Om a' oku no korongou di sinding di modsisinding. Kagangau-gangau oku nopo do Tuan Raja'. 36 Om a' oku i' osorupai do kaanu dot isomuli' do raja' dot irad diri kagayo. Kowoyo' oku po katuu diya' dot oruhai do hilo'd ralan dit id soborong do Bawang do Yordan. 37 Nga' pologoson oku no iyoho' do muli' do hilo'd walai ku, om hilo' id somok di lobong di molohing ku o kapatayon ku. Nga' diiya i Kimham, i tanak ku. Pologoso' nopo iyau do tumanud do Tuan Raja'; om wonsoyon nopo dot id dau it osonong dot osorou do Tuan Raja',” ka dau. 38 Om boros ka di raja' do suminimbar, “Powoyoon ku i' i Kimham, om nunu nopo o korohian nu om wonsoyon ku i' dot id dau. Om wonsoyon ku dot id diya' o nunu nopo o pokionuon nu,” ka dau. 39 Om soborong noddi i Daud om koinsanai di tulun dau di Bawang do Yordan. Om tungubai no di Daud i Barsilai om barakatai no dau. Om poguliai noddi di Barsilai do hiri'd walai dau.
Minisongkiwal ot Israil om Yohuda do Pasal di Raja'
40 Om ongoi noddi i raja' do hilo'd Gilgal. Om i Kimham nga' minoyo' nogi' dau. Om minoyo' nogi' o koinsanai di tulun do Yohuda om songintanga' do tulun dot Israil. 41 Om ongoi ngai' no solowot di raja' o koinsanai di tulun dot Israil om pomoros no iyolo' do poingkaa, “Oi Tuan Raja', nokuro tu' osorou di tobpinai dahai, i tulun do Yohuda, dot iyolo' noo o haro o kosorupayan do mongongoi diya' om momoyo' diya', om sompiiyon nu, om koinsanai di tulun do sumoborong di Bawang do Yordan?” ka. 42 Om boros ka di tulun do Yohuda, “Atantu' no, tu' iyau nopo om osomok po kopio o koobpinayan dot id dahai. Nga' nokuro tu' otogod kou? Haro toi o naanu dahai do taakanon do pinatahak di raja', ko' nakaanu toi iyahai do nipuhawang?” ka diyolo'. 43 Om boros ka di tulun dot Israil do suminimbar, “Kosorupayan nopo dahai do mananganu di raja' om inghopod i' ko' mantad di kosorupayan dokoyu; mulong po tuu daa do tobpinai kopio dokoyu iyau. Nokuro tu' poinsiriba-ribaon daa iyahai dokoyu? Kada' nogi' dokoyu kolihuwai dot iyahai i' o nokopogulu do minomoros do mongoi popouli' di raja',” ka diyolo'. Nga' opodos po kopio i boros di tulun do Yohuda ko' mantad di boros di tulun dot Israil om mada' i' iyolo' dot aala'.
Suminaap i Siba
1 Om koontok no do haro o tulun dit araat o kowoyo-woyoon do hilo'd Gilgal do maso'ddi. Ngaran nopo dau om i Siba, i tanak di Bikri, i mantad id payat do Binyamin. Om tontok di nokorikot i minomoyo' di Daud, om pounio' nod Siba i torumpit om polohowo' no o boros do poingkaa, “A' toko' i' kokuro-kuro di Daud. Nunu o kawayaan toko' dau, oi tulun dot Israil? Kainou, muli' do hilo'd walai toko'!” ka. 2 Om tongkiad ngai' noddi di Daud i tulun dot Israil om woyo' no iyolo' di Siba. Nga' iri nopo tulun do Yohuda om suminokodung kasai' i' di Daud om minomoyo' dau do mantad hiri'd Bawang do Yordan om gisom do nokorikot do hilo'd Yorusalim. 3 Om soira' di nokorikot i Daud do hiri'd walai dau di hilo'd Yorusalim om ngoyo' no dau i hopod o tongoondu' di panakasawo dau, i pinoundorong dau do madtamong di walai. Om poiyono' no dau iyolo' do hiri'd tiso' o walai di tamangan di madtatamong. Om onuwai i' dau iyolo' do kosukup-sukupan nga' a' no ma iyau insan ongoi dudun diyolo'. Om poinsuwai-suwai noddi iyolo' do miagal di tongoondu' di nopuadan do gisom do kinapatayo' diyolo'. 4 Om boros ka di raja' dot id di Amasa, “Ngoyo' ngai' sunudai i tulun do Yohuda do tumimung om gumuli' nod hiti do miwoyo' diyolo' do tolu tadau'd mantad baino',” ka dau. 5 Om pamanau noddi i Amasa do minongoi pomisunud di tulun do Yohuda nga' a' i' iyau guminuli' do tontok di maso di natantu' mantad di raja'. 6 Om boros kaddi di raja' dot id di Abisai, “Monusa' nogi' moti' kopio dati' i Siba, i tanak di Bikri diri ko' mantad di Absalom. Angatai nogi' kopio iti tulun ku om ongoyon i' dokoyu iyau gusao', dot a' po iyolo' korikot do hilo'd bandar di kitolig om kopoggidu' nondo do mantad id dati',” ka dau. 7 Om pamanau noddi do tuminongkiad do Yorusalim i tulun di Yoab, om i soudor do madtatamong di raja', om koinsanai di soudor do suwai, do minoyo' di Abisai do mongoi pomogusa' di Siba. 8 Om soira' di nokorikot iyolo' di tontolob dot agayo do hilo'd Gibion om nokopogulu no do nokorikot do hilo' i Amasa. Om i Yoab nopo nga' kirasuk no do dongsumasangod om kiniabil do gayang di pinokogos do tagkos dau o tangkap. Soira' di luminaang iyau om karatu' no i tangkap di gayang om kosomitai poddi di longon dau'd gibang. 9 Om boros ka di Yoab dot id di Amasa, “Osonong-sonong ko i', oi tobpinai ku?” ka. Nga' iri nopo longon do wanan di Yoab nga' pointaid no di ganggut di Amasa do miagal-agal do maan dau tungubai i Amasa. 10 Nga' a' i' di Amasa insan-insanon do kiinigit do gayang i tiso'd longon di Yoab. Om toboko' no di Yoab o tian di Amasa om koulayak nopo o tinaii' dau gisom do naratu' do hiri'd tana'. Om diri i' om diri do napatai iyau; om a' no di Yoab noinduwaan do minonobok i Amasa. Om lombus po kawagu i Yoab om i tobpinai dau, i Abisai, do minongoi pomogusa' di Siba. 11 Om ingkakat no o songulun do mantad di tulun di Yoab do hiri'd toning di rata' di Amasa om pomoros no dot opuhod do poingkaa, “Isai nopo it orohian di Yoab, om i sumokodung di Daud, om osonong do tumanud di Yoab!” ka. 12 Om maso nopoddi nga' poingiliu i rata' di Amasa do notounan do raha' do hiri'd tanga' di ralan. Om kokito no di soudor di Yoab do koinsanai di tulun do kawaya' om mundorong ngai' nopod hiri do montong, om gayato' noddi dau i rata' do mantad hiri'd ralan om poiliho' no do hiri'd kasakat-sakatan, om takapai no dau do kain. 13 Om soira' di noidu' i rata' do mantad hiri'd ralan om oinsanan nopoddi i tulun do tuminanud di Yoab do mongoi pomogusa' di Siba. 14 Om nawayaan ngai' di Siba o koinsanai di watas do payat dot Israil di pinakayaan dau do hilo'd bandar do Abil-Bait-Maaka. Om songwoyo-woyo' nogi' dau o koinsanai do sinompuruan do sompiiyon di Bikri. 15 Om korongou noddi di tulun di Yoab do hiri i Siba, om ngoyo' no diyolo' awangai i bandar. Om timbunai no diyolo'd tana' o posorili' di bandar dot id soliwan di tolig di bandar om nungkudan nogi' diyolo' i tolig mantad di bandar do mamahaba'ddi. 16 Om haro'ddi o songulun o tondu' dot opintar kopio do hiri'd bandar do minomolohou do mantad hiri'd tolig di bandar do poingkaa, “Pokinongou pogi'! Pokinongou pogi'! Sunudai i Yoab do mongoi'd hiti tu' haro o poboroson ku dau,” ka dau. 17 Om ongoi noddi i Yoab, om ponguhot no i tondu', “I Yoab ko?” ka dau. “Oo,” ka di Yoab do suminimbar. Om boros ka di tondu', “Oi Tuan, pokinongoho' no iti boros ku,” ka dau. “Ba, mokinongou oku i',” ka di Yoab. 18 Om boros ka di tondu', “Di nopo di gulu po, om koubasanan no do momoros dot ‘Mokituduk ko nopo om mongoi no do hilo'd bandar dot Abil,’ ka, om iri no o winonsoi diyolo'. 19 Pinatantu' mantad di tulun dot ongotorodok do hiti'd Israil dot iti nopo bandar dahai'dti nga' bandar dit agayo om iso' o bandar dot id pialatan di bandar dot osimbayan kopio om otorodok do hiti'd Israil. Nokuro tu' umbalan nu daa do mamaraag iti? Orohian ko daa do mamaraag do tana' di don Tuhan?” ka dau. 20 Om boros ka di Yoab, “Amu'! Aiso' i' kopio o pomusarahan ku do mamaraag ko' mananus po diti bandar dokoyu! 21 Okon i' ko' miagal diri ot osorou dahai. Nga' haro o songulun do roitan dot i Siba, i tanak di Bikri do mantad hilo'd watas do konulu-nuluan dot Ipraim do mumbal do sumaap di Raja' Daud. Patahako' dahai i tulun diri om mogidu' oku i' do mantad hiti'd bandar,” ka dau. Om boros ka di tondu', “Pobigodon i' dahai i tulu dau do mantad id sampaping diti tolig,” ka. 22 Om suang no i tondu' di bandar om poboroso' no dau iri dot id toinsanan di tulun do hiri. Om ngoyo' noddi diyolo' iduwo' o tulu di Siba, i tanak di Bikri, om pobigodo' no do hiri'd di Yoab. Om pounio' no di Yoab i torumpit do popoilo do koinsanai di tulun dau do tumongkiad di bandar diri. Om uli' noddi iyolo' dot id walai diyolo'. Om poguliai noddi di Yoab do hilo'd Yorusalim do minongoi solowot di raja'.
Piro-piro o Pagawai di Daud
23 Iti ngai' no i tulun di pinili' di Daud: Boyoon do koinsanai di soudor dot Israil: i Yoab. Boyoon di soudor do moyo-woyo' kasai' di Daud: i Bonaya, i tanak di Yoyada. 24 Boyoon di tulun di sinuhu' do kumaraja': i Adoram. Poopi' do tusin do pomorinta': i Yosapat, i tanak di Ahilud. 25 Gomponulis do pomorinta': i Siya. Imam: i Sadok om i Abiatar. 26 Imam do hiri'd walai di raja': i Ira, i mantad hilo'd bandar do Yair.
Pinatai i Sinakagon di Saul
1 Tontok dit i Daud o momorinta' om minononglous dot adalaan tomod do solinaid do tolu o toun. Om ongoi noddi i Daud uhot do Tuhan do pasal diri, om boros kad Tuhan, “Mononglous pogi' nga' kisala' i Saul om i sompiiyon dau tu' minamatai iyau di tulun do Gibion,” ka. 2 (Iri nopo tulun do Gibion nga' okon i' ko' tulun dot Israil nga' i bansa' dot Amori dit okuri' no. Om mulong piya do nokosumpa' i tulun dot Israil do mongintirung diyolo' nga' numbalan i' di Saul do momunso iyolo' tu' osorou dau dot osiliu iri do koinsanangan di tulun dot Israil om tulun do Yohuda.) Om lohowo' noddi di Daud i tulun do Gibion, 3 om uhoto' no dau iyolo', “Nunu o maan ku wonsoyo' dot id dokoyu? Orohian oku do monogit di kasalaan di nowonsoi dot id dokoyu, om barakatan i' dokoyu o tulun di songonuon do Tuhan,” ka. 4 Om boros ka diyolo' do suminimbar, “A' i' milo do salasayon do pirok ko' tamas i pioduhan dahai di Saul om i sompiiyon dau, nga' a' nogi' iyahai orohian do mamatai dot ongosongulun piya do tulun dot Israil,” ka. Om boros ka di Daud do minonguhot, “Om nunu'ndo ot osorou dokoyu do maan ku wonsoyo' dot id dokoyu?” ka dau. 5 Om boros ka diyolo' dot id raja', “Orohian daa i Saul, i raja' di pinili' do Tuhan do mamatai dahai om momunso dahai gisom dot aiso' no o tiso' dahai do poimpasi do hinonggo nopo o kinoiyonon do hiti'd Israil. 6 Iyo nopoddi om patahako' no dot id dahai o turu' di sinakagon dau do kusai om maan i' dahai iyolo' pogiiso' dot id toguang do Tuhan do hilo'd Gibia, i bandar di Raja' Saul,” ka diyolo'. Om boros ka di raja', “patahakon ku i' iyolo',” ka. 7 Om a' i' di Daud pinatahak i Mopibosit, i tanak di Yonatan, tu' nokopitaru' no i Yonatan om i Daud. 8 Om ngoyo' noddi di raja' i Armoni om i Mopibosit, i tanak di Saul do kusai do pinaganak di Rispa: I Rispa nopo nga' tanak di Aya do tondu'. Om nongoi nogi' dau i limo o tanak do kusai diyo' Mirab di Adriol. I Mirab nopo nga' tanak di Saul do tondu'. Om i Adriol no om tanak di Barsilai, i mantad hilo'd Mihola. 9 Om patahako' noddi di raja' iyolo' dot id tulun do Gibion. Om pogiiso' no iyolo' di tulun do Gibion do hiri'd nulu-nulu dot id toguang do Tuhan. Om kapatai ngai' nopo i turu' tulun diri. Om pinatai ngai' iyolo' do tontok di kooiyon no do maso do kopomurounan do kayu om tontok di tumimpuun no do mongomot do barli. 10 Om anu no i Rispa, i panakasawo di Saul do kain di pakayon do mogihad om pataap-taapo' no dau do hiri'd sakai di tontolob, i hiri'd kinoilihon di rata'. Om hiri-hiri no iyau do mantad di tuminimpuun do mogiongomot om gisom do norikot i maso do rumasam do tontok di lumahanggang o roun do kayu. Om a' i' dau pinologos i tombolog do mongoi sako di rata' do dongadau om ugadan dau i nintorusan do mongoi insomok di rata' do dongotuong. 11 Om soira' di nosunudan i Daud di winonsoi di Rispa, 12 om ngoyo' no di Daud onuo' i tulang di Saul om i tulang di Yonatan, i tanak dau, do mantad id tulun di poingiyon do hilo'd Yabis, i hilo'd Giliad. (Iyolo' no i minanakau di tulang diri do mantad hiri'd talun-alun do hilo'd bandar do Bait-San, i pinogiisan di tulun do Pilistin di rata' diyolo' do tontok di naala' i Saul do hilo'd nulu-nulu do Gilbua.) 13 Om nigitan dau do mantad hilo' i tulang di Saul om i tulang di Yonatan, om tinimung nogi' dau i tulang di turu' o tulun di pinogiis diri. 14 Om lobongo' noddi dau i tulang di Saul om i tulang di Yonatan, om i tulang di turu' o tulun diri, do hiri'd lobong di Kis, i tapa' di Saul. Kinoiyonon nopodti nga' hilo'd Sila, i hilo'd watas do Binyamin. Om kowonsoi ngai' poddi iri do tumanud di pinonuhuan di raja', om simbaro' nogi' do Kinorohingan o sambayang diyolo' do bagi' di pomogunan diri.
Kinamanangan do Suminangod do Tulun do Pilistin dit Angagayo Koulun
15 Tontok di haro kawagu o pinisangadan dot id piolitan di tulun do Pilistin om i tulun dot Israil, om pamanau no i Daud do miwoyo' do koinsanai di tulun dau do minongoi sangod di tulun do Pilistin. Nga' tontok di misangod iyolo' om kohuyan no tomod i Daud. 16 Om osorou nopo daa di Yisbibinob nga' apatai no dau i Daud. I Yisbibinob nopodti nga' sinakagon do tulun dit angagayo koulun. Om kitandus iyau do tambaga' do haro i' doti' o tolu om satanga' kilogram do kawagato'. Om kiniabil iyau do gayang di wagu po. 17 Nga' rikot noddi i Abisai, i tanak di Soruya, do minongoi ponguhup di Daud. Om saapo' no dau om patayo' dau i tulun do Pilistin dit agayo koulun diri. Om suhuo' noddi di tulun di Daud do mamatos i Daud dot a' nondo moyo' diyolo' do mongoi sangod. Tu' boros ka diyolo', “Iya' no o sondihon do tulun dot Israil, om mada' i' iyahai dot atagakan diya',” ka. 18 Om katalib nori, om haro po o pinisangadan do sumangod di tulun do Pilistin dit angagayo koulun do hilo'd Gob. Om tontok noddi do pinatai di Sibkai, i tulun do Husa, i Sap, i tulun dot agayo koulun. 19 Om haro po kawagu o pinisangadan do sumangod di tulun do Pilistin do hilo'd Gob. Om pinatai di Ilhanan, i tanak di Yair, i tulun do Baitlahim diri, i Guliat, i tulun do Gat. Iri nopo tulu di tandus di Guliat om irad po di salampad di pangawalan. 20 Om haro po kawagu o pinisangadan do hilo'd Gat. Om haro o songulun dit agayo kopio o kinoulunan do hilo'. Om sopionom o tunturu' do palad dau, om sopionom o tunturu' do lapap dau. Om iri nopo tulun diri nga' orohian kopio do monokisangod. 21 Om momohingi-hingi diri iyau di tulun dot Israil nga' napatai i' iyau di Yonatan, i tanak di Simia, i tobpinai di Daud. 22 Iri nopo it apat o tulun dit angagayo koulun diri, i pinatai di Daud om i tulun dau, om sinakagon ngai' nopo do tulun dit angagayo koulun do hilo'd Gat.
Sinding do Kinamanangan di Daud
1 Iti no o sinding di sininding di Daud dot id Tuhan do tontok di pinoidu' iyau do Tuhan do mantad id di Saul om mantad id koinsanai di pisangod dau: 2 Tuhan no o manahak doho' do kointirungan; iyau no o kuta' ku dit ogirot. 3 Kinorohingan no ot intirungon ku, om aiso' no o koligagaanan ku do pointirung dau. Iyo po iyau do kolid do mongintirung doho', mogobi' iyau doho' om momogompi' doho'. Iyau no o gampamasi ku; gompion oku dau om poiduwon oku do mantad id kororongit. 4 Lumohou oku do Tuhan om poiduwon oku i' dau do mantad id pisangod ku. Royohon no o Tuhan! 5 Notutukan oku do ruab do kapatayon; minalit doho' o ruab do karaagon. 6 Pointutuk doho' o koligagaanan do kapatayon, om nokowonsoi no di lobong i pamalawa' dau doho'. 7 Luminohou oku do Tuhan dit id suang oku do kosusaan; luminohou oku do mokiuhup di Kinorohingan ku. Norongou dau o boros ku di hiri iyau id Walai dau; minokinongou iyau di tihad ku do mokiuhup. 8 Om gogor noddi om guyu' iti pomogunan; guminogor om guminuyu' o pinoimpahan do tawan, tu' otogod no kopio o Kinorohingan! 9 Suminoliwan o lisun do mantad id luang do todung dau, mindak-sindak o tapui om angalasu' tomod o popou do sumoliwan do mantad id kabang dau. 10 Pinitas dau o tawan om lintuhun noddi iyau, om oitom nopo o haun dot id siriba' di lapap dau. 11 Osiau nopo iyau do tuminulud dot id sakai di moloikat di roitan do kerub; om mininghombo iyau dot id sakai di talad do ribut. 12 Luminopot iyau do totuong; haun dit oitom, om poimponu' do waig o posorili' dau. 13 Mikit-sikit o popou dit angalasu' do mantad id kodumaat dit id gulu-gulu dau. 14 Om ngorod noddi o Tuhan do mantad hilo'd tawan, norongou'ddi o boros do Kinorohingan dit Agayo Kuasa'. 15 Pinapana' dau i pana' dau om pogiurias nopo i pisangod; kalab do kodumaat o pinopoggidu' dau diyolo'. 16 Nokointalang o nanad do rahat, om nokoulai o pinoimpahan do pomogunan, tontok di tinogod do Tuhan o pisangod dau, om minamagarang iyolo' dot atatagadan. 17 Hilo'd sawat o tadon do Tuhan do minongoi pomusus doho'; ginayat oku dau do mantad id waig dit aralom. 18 Pinoidu' oku dau do mantad id pisangod ku dit ongokoris, om mantad id koinsanai'd tulun dit araatan doho' --- om adalaan no iyolo' kokoris ko' iyoho'. 19 Suminaap iyolo' doho' do tontok dit osusa' oku, nga' nintirungan oku i' do Tuhan. 20 Nuhupan oku i' dau do minidu' do mantad id koligagaanan; pinasi oku i' dau tu' osianan i' iyau doho'. 21 Somulian oku id Tuhan tu' koontok i' o wonsoyon ku; barakatan oku i' dau tu' aiso' i' o kasalaan ku. 22 Noumboyo' ku i' i Tourat do Tuhan; a' oku i' tuminolikud do mantad id Kinorohingan ku. 23 Natanud ngai' ku i' it oturan dau; om a' oku i' tuminolibamban di ponuhuan dau. 24 Oilaan i' dau dot aiso' o dusa ku, om mininsodu' oku do mantad id wowonsoyon dit araat. 25 Om somulian oku i' dau tu' oilaan i' dau do koontok o wonsoyon ku, om oilaan dau dot aiso' o sala' ku. 26 Oi Tuhan, otorodok ko i' dot id tulun dit otorodok dot id diya', om osonong kopio ko dot id tulun dit aiso' o kasalaan. 27 Olidang ko i' dot id tulun dit olidang, nga' pisangod nu i' i tulun dit araat. 28 Uhupan id Tuhan o tulun di minsiriba', nga' poinsiribaon i' dau i tulun dit asawat o ginawo. 29 Oi Tuhan, iya' no o tanawau ku, om tonuson nu o totuong ku. 30 Onuan oku diya' do kokorisan do sumaap do pisangod ku, om onuan oku diya' do kuasa' do mangala' di pongintirungan diyolo'. 31 Kinorohingan nopo om osonong ngai' i' o wonsoyon, om boros dau nga' milo i' do ponongkuyaanan! Tuhan nopo om miagal do kolid dot id toinsanan di mogihum do kointirungan dot id dau. 32 Tuhan noo o Kinorohingan; Kinorohingan no o mongintirung dati'. 33 Kinorohingan no o pogintirungan ku dit ogirot; poposimbayan iyau do tindalanon ku. 34 Silihon oku dau do miagal di tambang tu' kotunud o pongulok-ulok; om gompion oku dau do hilo'd konuluhanan. 35 Tudukan oku dau do karalan-ralano' do sumangod, om milo oku i' do manganat di poundaan do pana' dit opuhod kopio. 36 Oi Tuhan, manahak ko doho' do kointirungan, om mamasi ko doho'; nuhupan oku diya' gisom do nosiliu oku'ddi do tulun dit abantug. 37 A' oku i' diya' pinologos dot atanggayan do pisangod, om a' oku insan kaala'. 38 Ginusa' ku i pisangod ku om naala' ku i' iyolo'; a' oku i' tumingkod dot a' ku po iyolo' apatai. 39 Binobog ku iyolo' gisom dot a' no iyolo' kotungag; om poingiliu po iyolo' do naala' dot id toguang ku. 40 Nonuan oku diya' do kokorisan do sumangod, om kamanangan do sumangod di pisangod ku. 41 Pinopoggidu' nu i pisangod ku do mantad id doho'; om patayon ku i tulun dit araatan doho'. 42 Mininglohou iyolo' do mokitulung, nga' aiso' i' o minonulung diyolo'; luminohou iyolo' do Tuhan nga' a' i' iyau suminimbar. 43 Binobog ku iyolo' do gisom do miagal po iyolo' di pupuk; piningulakan ku iyolo' do miagal po di burutak do hilo'd ralan. 44 Pinoidu' oku diya' do mantad id tulun ku dit obinsaap, om pinotilombus oku diya' do momorinta' do piro-piro o bansa'. Iri piya tulun dit a' ku notutunan mantad nga' nosiliu noddi do rayat ku. 45 Tumuku' dot id doho' o tulun di bansa'd suwai, om mumboyo' iyolo' do tontok do korongou do boros ku. 46 Atagakan iyolo' do kinoris om pananggagaran nopo do sumoliwan do mantad id kuta' diyolo'. 47 Poimpasi o Tuhan! Royohon no i mogobi' doho'! Popinsusuyo' no o kogoyoo' do Kinorohingan dit okoris, iyau i minamasi doho'! 48 Nonuan oku dau do kamanangan do suminangod do pisangod ku; om pinoinsiriba' ngai' dau doho' i bansa'd tulun, 49 om pinoidu' oku do mantad id tulun di sumaap doho'. Oi Tuhan, nonuan oku diya' do kamanangan do suminaap do pisangod ku, om intirungan oku diya' do mantad id tulun dit ongorongit. 50 Om royohon ku'ddi iya' dot id pogiolitan do koinsanai'd bansa', modsinding oku do mamarayou diya'. 51 Manahak o Kinorohingan do kamanangan dot agayo dot id raja' dau; om popointalang iyau do kosianan dit aiso' o kotingkadan dot id tulun di nopili' dau; dot id di Daud om id sinakagon dau do gisom dot alaid.
Boros di Daud dit id Tohuri No
1 I Daud nopo, i tanak di Isai, om pinili' do sumiliu do raja' om pinabantug iyau do Kinorohingan di Yakub. Om iyau no i minintulis do sinding do sindingon dot Israil. Iti no ngai' o boros di Daud dit id tohuri no: 2 Moro-boros o Rusod do Tuhan do pawayaon doho'; id tompok nod dila' ku o boros dau. 3 Nokoboros no o Kinorohingan di Yakub; boros ka di pogintirungan dot Israil dot id doho', “Iri nopo raja' dit otulid o pomomorinta', i momorinta' do mikuwo'd mumboyo' do Kinorohingan, 4 om miagal di tadau do mulinau do tontok di kosuabon po dit aiso' po o haun, i tadau do popotomou di sakot di dongkotingkadan do rasam,” ka dau. 5 Om miagal noddi o Kinorohingan do mamarakat do sinakagon ku; tu' nokopomonsoi no iyau do tumpongo dit aiso' o kopupuson dot id doho', pinitoruan dit a' milo do pakaisoon, batos dit a' milo do simbanan. Iri noo o pokionuon kopio ku; iri no i kamanangan ku, om atantu' no do bayaanon do Tuhan iri. 6 Nga' tulun nopo dit a' mumboyo' do Kinorohingan om miagal noddi rugi do pataamon. A' no oigitan do palad toomod do tulun; 7 mositi' no do mamakai ko do pakakas do basi' ko' tandus; om tutudan nondo do gisom dot ouu.
Soudor di Daud dit Angabantug
8 Iti ngai' no o ngaran do soudor di Daud dit angabantug: Koiso' nopo nga' i Isbaal, i mantad hilo'd Hakmoni, i boyoon di “Tolu o Soudor”. Nokoumbal i' iyau do suminaap do walu' nahatus o tulun dot id iso' o pinisangadan, om kapatai ngai' nopo dau iyolo' dot iri no tandus dau o pinamatai. 9 Iri no koduwo dot id pialatan di Tolu o Soudor diri om i Iliasar, i tanak di Dodo, i mantad id sinakagon di Ahohi. Minoyo' iyau di Daud do tontok di minongoi iyau sangod di tulun do Pilistin di nokotimung no do mongoi sangod. Om tontok di minsodu' no daa i tulun dot Israil, 10 om sangod i' iyau di tulun do Pilistin do gisom i' do nadalaan kohuyan o longon dau, om a' noddi kalangkab o palad dau do mantad id gayang dau. Om tadau noddi do nonuan do Tuhan iyolo' do kamanangan dit agayo. Om poguliai ngai' no di soudor di mininsodu' daa'ddi do hiri'd kinoiyonon di Iliasar do suminangod. Om pingiduwo' no diyolo' i pakayan do don sumasangod di songimpakai di soudor do nangapatai. 11 Iri no kotolu dot id piolitan di Tolu o Soudor diri om i Sama, i tanak di Agi, i mantad hilo'd Harari. Nokoumbal i' do tontok di tinimung i tulun do Pilistin do hilo'd Lihi, dot id iso' o tumo di tinanaman do kasang dot aragang. Om poggidu' no i soudor dot Israil do mantad id tulun do Pilistin. 12 Nga' i Sama nopo om suminangod po, om pinimpatai dau do gisom do naala' i tulun do Pilistin, om a' iddi nosolod i tumo. Om iyo noddi o Tuhan do minanahak do kamanangan dot agayo do tontok do tadau'ddi. 13 Tontok dit oruhai no do tumimpuun do mongomot om rikot no o tolu tulun do mantad di “Tolu Nohopod o Soudor” do minongoi solowot di Daud do hilo'd luang do Nulu-Nulu dot Adulam. Om tontok nopoddi nga' poundorong no do hilo'd Rantai do Ropaim ot iso' o sinompuruan do tulun do Pilistin. 14 Tontok nopoddi nga' hiri i Daud id kuta' dit id nulu-nulu, om nosuang no do piro-piro o tulun do Pilistin o hilo'd Baitlahim. 15 Om langadon noddi i Daud di kampung dau, om boros ka dau, “Haro daa giya o tulun do mongoi poinum doho' di waig do torobong do hilo'd Baitlahim, i hiri'd toning di wawayaan dot agayo!” ka dau. 16 Om salagai nopoddi di Tolu o Soudor dit angabantug diri i kokiiman do tulun do Pilistin. Om ongoi no iyolo' timbauk di waig do mantad hiri'd torobong om igitai no do guminuli' do hiri'd di Daud. Nga' a' i' di Daud ninum iri, suwai ko' pinotuntug nogi' dau do maan do porsombahan dot id Tuhan. 17 Boros ka dau, “Oi Tuhan, poingkuro piya nga' a' ku i' inumon iti waig! Tu' ondung inumon ku iti nga' miagal nod monginum do raha' do tongokusai dit a' no minomusorou do tinan diyolo' do minongoi'dti,” ka dau. Om a' iddi i Daud minonginum di waig diri. Om iri ngai' no o winonsoi di Tolu o Soudor dit angabantug diri. 18 I Abisai no, i tadi' di Yoab (tina' nopo diyolo' nga' i Soruya) o boyoon di “Tolu Nohopod o Soudor dit Angabantug”. Nokoumbal i' iyau do suminaap do tolu nahatus o tulun dot iri no tandus dau o pinanangod, om kapatai ngai' nopo dau iyolo'. Om iyau noddi ot abantug kopio dot id piolitan di, “Tolu Nohopod o Soudor”. 19 Om iyau no ot abantug kopio dot id pogialatan di “Tolu Nohopod o Soudor”, om iyau no o nosiliu do boyoon diyolo'. Nga' a' i' ma iyau koiyo do kobontugo' di “Tolu o Soudor”. 20 I Bonaya, i tanak di Yoyada, nga' soudor nogi' dit abantug. Iyau nopo om mantad hilo'd Kabsiil, om osiou kopio iyau. Nakapamatai i' iyau do duwo soudor do gunsiou do mantad hilo'd Muab. Om nokoumbal nogi' iyau do suminuang do luang do hiri'd tana' do tontok di monongais om pamatai noddi iyau do songinan o singa do hiri. 21 Om nakapamatai nogi' iyau do songulun o tulun do Masir dit agayo o tinan om aranggou, om i kiinigit do tandus. Om bobobog no o pinomobog di Bonaya di tulun diri. Om ahawo' noddi di Bonaya i tandus di poingigit di tulun do Masir, om patayo' no dau i tulun diri dot i tandus di tulun o pinamatai dau. 22 Om iri no o winonsoi di Bonaya dit osiou kopio; iyau nopoddi om mantad id pogialatan di “Tolu Nohopod”. 23 I Bonaya no it abantug dot id pogialatan di “Tolu Nohopod o Soudor”, nga' a' i' iyau koiyo di “Tolu o Soudor”. Om siliho' noddi iyau di Daud do boyoon di soudor di madtatamong di Daud. 24-39 Iri nopo i soudor do suwai dot id suang di “Tolu Nohopod o Soudor” nga' i: Asail, i tadi' di Yoab; i Ilhanan, i tanak di Dodo, i mantad hilo'd Baitlahim; i Sama, om i Ilika, i tulun do Harod; i Hilis, i tulun do Palti; i Ira, i tanak di Ikis, i tulun do Tokua; i Abiosor, i tulun dot Anatot; i Mobunai, i tulun do Husa; i Salmon, i tulun dot Ahohi; i Maharai, i tulun do Nitopa; i Hilib, i tanak di Baana, i tulun do Nitopa; i Itai i tanak di Ribai, i mantad do hilo'd Gibia, om mantad id payat do Binyamin; i Bonaya, i tulun do Piraton; i Hidai, i mantad do hilo'd Rantai do Gaas; i Abialbon, i tulun dot Araba; i Asmawit, i tulun do Bahurim; i Iliaba, i tulun do Saalbon; i tangaanak di Yasin; i Yonatan; i Sama, i tulun do Harari; i Ahiam, i tanak di Sarar, i tulun do Harari; i Ilipilit, i tanak di Ahasbai, i tulun do Maaka; i Iliam, i tanak di Ahitopol, i tulun do Gilo; i Hisrai, i tulun do Karmol; i Pairai, i tulun dot Arbi; i Yigal, i tanak di Natan, i mantad do hilo'd Soba; i Bani, i tulun do Gad; i Silik, i tulun dot Amon; i Naharai, i tulun do Biirot, i mongingigit do rapo-rapo di Yoab, i Ira, om i Garob, i tulun do Yitri; i Uria, i tulun do Hit. Oinsanan nopo nga' tolu nohopod om turu' o soudor dit angabantug.
Pinapaharo i Daud do Pongintaban do Tulun
1 Om kotogod po kawagu o Tuhan do tulun dot Israil, om suhuo' no dau i Daud do poporikot do kosusaan dot id diyolo'. Boros ka do Tuhan dot id dau, “Papaharo no do pongintaban do tulun do hilo'd Israil om hilo'd Yohuda,” ka. 2 Om boro-boros no i Daud di Yoab, i boyoon do soudor dau, “Ngoyon no dokoyu di pagawai ku solowoto' o koinsanai do payat dot Israil do pointongkop diti pomogunan, om intobon ngai' no i tulun. Orohian oku do koilo do ginumu' diyolo',” ka dau. 3 Nga' boros ka di Yoab do suminimbar di raja', “Oi Tuan Raja', maha' daa om poinggumuon pod Tuhan i Kinorohingan nu dot inhatus kogumu' ko' mantad do ginumu' diyolo' do dinondo ilo tulun dot Israil. Om maha' daa om kokito ko po do wonsoyon dau o miagal diri. Nga' nokuro tu' orohian o Tuan Raja' do papaharo do pongintaban do tulun?” ka dau. 4 Nga' a' i' di raja' sinimbanan i pinonuhuan dau. Om a' noddi milo dot a' tinanud di Yoab om i pagawai do suwai i pinonuhuan di raja'ddi. Om pamanau no i Yoab om i koinsanai di pagawai do minongoi pongintob di tulun dot Israil. 5 Om soborong no iyolo' di Bawang do Yordan, om pomukiim no iyolo' do hilo'd ponong id salatan dot Aroir, i bandar dit id tanga-tanga' di rantai, it id watas do Gad. Om pakayaai no diyolo' do ponong id utara, do kuminaa do hilo'd Yaisir, 6 om lombus no iyolo' do hilo'd Giliad, om hilo'd Kadis, it id watas do tulun do Hit. Om korikot noddi iyolo' do hilo'd Dan, om mantad no do hilo'd Dan om pahamadai no diyolo' do ponong id kotonobon do kuminaa do hilo'd Sidon. 7 Om korikot noddi iyolo' do hiri'd kinoiyonon di kikuta', i hilo'd Tirus. Om pakayaai no diyolo' dot id koinsanai do bandar do tulun do Howi om tulun do Kanaan; om id tohuri noddi kopio om kuminaa iyolo' do hilo'd Borsiba, i ponong id salatan do Yohuda. 8 Om katalib poddi o siam o tulan om duwo nohopod o tadau, om poguliai nogi' diyolo' do hilo'd Yorusalim tu' notongkop ngai' no diyolo' i pomogunan. 9 Om posunudo' no diyolo' dot id raja' i pinongintaban diyolo' di rayat. Kogumuon nopo do tongokusai di milo do sumuang do soudor do hilo'd Israil om, 800,000 o tulun, om 500,000 o tulun do hilo'd Yohuda. 10 Nga' maha' di nopongo no o kinopongintaban di rayat om kopuriman diri i Daud do nakasala' iyau, om boros ka dau dot id Tuhan, “Nokowonsoi oku nod dusa! Om ompunai oku no oi Tuhan, tu' dongkababasug i' di winonsoi ku,” ka. 11-12 Om boro-boros no o Tuhan dot id di Nabi Gad, i popiromut di boros do Tuhan dot id di Daud, “Pamanau no, om poboroson no dot id di Daud dot onuan ku iyau do tolu o pinsimpilian. Om honggo nopo o pilion dau om iri no o wonsoyon ku,” ka. Om tadau noddi kawagu, di noposik i Daud, 13 om ongoi no i Gad do hiri'd di Daud om posunudo' no dau i pinoboros do Tuhan, om boros ka dau, “Hinonggo'ddi o pilion do Tuan Raja'? Tolu toun do mononglous o hiti'd pomogunan nu, ko' tolu tulan do gusa-gusaon ko do pisangod nu, ko' tolu tadau do madsakit o hiti'd pomogunan nu? Soroho' noti om timbangon no kopio, om sunudan oku nogindo di posunudon ku dot id Tuhan,” ka dau. 14 Om boros ka di Daud do suminimbar, “A' oku nopodti milo do momusorou! Nga' pologoson nopo do hukuman toko' do Tuhan, tu' obinsianan i' iyau. Nga' mada' oku i' do hukuman do tulun,” ka dau. 15 Om porikatai noddi do Tuhan i tulun dot Israil do toruol do tuminimpuun do kosuabon diri gisom do norikot i maso di natantu' mantad. Om kapatai no o turu' nohopod noribu o tongokusai do pointongkop di pomogunan. 16 Om soira' di potiraagon no daa di moloikat do Tuhan o Yorusalim, om posimbano' nod Tuhan o pomusarahan dau do momohukum di tulun, om boro-boros noddi iyau dot id moloikat di mimpatai diyolo' do poingkaa, “Tingkod! Ula' no” ka. Om tontok nopoddi nga' hiri i moloikat id toning di pamagamasan do gandum di Arauna, i tulun do Yobus diri. 17 Om kokito no di Daud i moloikat di mimpatai di tulun, om boros kaddi dau dot id Tuhan, “Iyoho' no i kidusa, om iyoho' i minomonsoi do kasalaan diti. Nunu o kasalaan do nowonsoi diti rayat? Hukuman oku nopo iyoho' om i sompiiyon ku,” ka dau. 18 Om tadau iddi do ruminikot i Gad dot id di Daud, om boro-boros nod, “Pamanau no om mongoi i' pomonsoi do pananaraban do porsombahan dot id Tuhan do hilo'd pamagamasan do gandum di Arauna, i tulun do Yobus diri,” ka dau. 19 Om umboyoo' nod i Daud i pinonuhuan do Tuhan om pamanau no do tuminanud di pinosunud di Gad dot id dau. 20 I Arauna nopoddi nga' poingimpa', om kokito no dau i raja' om i pagawai dau do tumakad do mongoi do hiri'd dau. Om otud no i Arauna dot id toguang di Raja' Daud, 21 om ponguhot no i Arauna, “Nokuro tu' ruminikot do hiti o Tuan Raja'?” ka. Om boros ka di Daud do suminimbar, “Mongoi oku pomoli diti tiyonon nu do momogomos do gandum do maan do pawansayan do pananaraban do porsombahan dot id Tuhan, om otingkod indo iti toruol do nokoontok di rayat,” ka dau. 22 Om boros ka di Arauna, “Onuo' nopoti, oi Tuan Raja', om patahakon nopo do maan do porsombahan o nunu nopo it osonong dot okito nu, hati ngai' i' iti sapi' do maan do porsombahan di sorobon. Om hati iti poku' om papan di pamagamasan do maan do pogudung,” ka. 23 Om patahako' ngai' nopoddi di Arauna iri dot id raja'. Om boro-boros po kawagu i Arauna, “Om maha' daa om romiton do Tuhan i Kinorohingan nu, iti porsombahan nu oi Tuan Raja',” ka. 24 Nga' boros ka di raja' do suminimbar, “Bayaran ku i'. Tu' mada' oku id papatahak do porsombahan dot id Tuhan i Kinorohingan ku, dot a' kapambayar do gatang. Bolion ngai' ku i' iti dot id diya',” ka dau. Om bolio' nod Daud i kinoiyonon do pamagamasan do gandum om iri ngai' i sapi', do gatang nopod toinsanan om limo nohopod o tusin do pirok. 25 Om powonsoyo' no dau do hiri i pananaraban do porsombahan dot id Tuhan, om papatahak no iyau do porsombahan di sorobon om porsombahan do piombolutan. Om simbaro' no do Tuhan i sambayang di Daud, om kotingkod noddi i toruol do nokoontok di tulun dot Israil. 1|30|HK1D| Pananaraban do porsombahan di don Tuhan|24.25
Tontok di Molohing no i Raja' Daud
1 Om molohing noddi kopio i Raja' Daud. Om mulong po do kumutan iyau do kumut dit angakapal nga' osogitan kasai' i' iyau. 2 Om boros kaddi di pagawai dau, “Oi Tuan Raja', osonong nogi' do mogihum iyahai dot iso' o sumandak do sumugku' diya' om momogompi' diya'. Om modop indo iyau do hino'd toning nu om alasu' i' ot opurimanan do Tuan Raja',” ka diyolo'. 3-4 Om tongkopo' noddi o pomogunan dot Israil do mogihum do sumandak dit olumis. Om kokito noddi diyolo' o sumandak dit olumis kopio do hilo'd Sunim dot i Abisag o ngaran. Om pootodo' no diyolo' i sumandak diri do hiri'd raja'. Om iyau noddi o madtamong om momogompi' di raja'. Nga' a' i' i raja' minomonsoi do miagal di wonsoyon do tulun di misasawo dot id sumandak diri.
Mokisisiliu do Raja' i Adonia
5-6 Om i Adonia noddi o tanak di Daud dit id dotuo tu' napatai no i Absalom. Tina' nopo di Adonia om i Hagit. Om i Adonia nopodti nga' oligkang kopio koulun. Om a' i' iyau di tapa' dau insan togodo' do kowonsoi piya iyau do sala'. Om orohian no kopio i Adonia do sumiliu'd raja' om posodia' noddi iyau do korita'-kuda' di don sumasangod, om soudor di kikuda', om limo nohopod o tulun di moyo-woyo' kasai' dau. 7 Om ongoi noddi iyau boro-boros di Yoab om i Abiatar it Imam. (Ngaran nopo do tina' di Yoab om i Soruya.) Om kaakun goduwo nopo iyo Yoab di Abiatar do sumokodung di korohian di Adonia. 8 Nga' i Sadok nopo it imam, om i Bonaya i tanak di Yoyada, om i Natan i Nabi, om i Simoi, om i Roi, om i madtatamong kasai' di Raja' Daud om a' i' suminokodung di Adonia. 9 Insan tadau om papatahak no i Adonia do porsombahan di sumbolion do hilo'd kinoiyonon di roitan do Tontolob do Tulanut, it id toning di tudan do waig do roitan dot Inrogil. Porsombahan nopo do pinatahak di Adonia om dumba', om sapi' do tontoluhan om sapi' dit ongokoro' po dit ongolomu'. Nalap ngai' di Adonia i tangaanak di Raja' Daud do suwai om i pagawai di raja' di mantad hilo'd Yohuda do mongoi rapou di poginakanan do kapatahakan do porsombahan do sinumbali'ddi. 10 Nga' a' i' di Adonia nalap i Suliman i tadi' dau, om i Natan i Nabi, om i Bonaya om i madtatamong kasai' di Raja' Daud.
Siniliu do Raja' i Suliman
11 Om ongoi noddi i Natan solowot di Batsiba, i tina' di Suliman. Om boro-boros no do poingkaa, “Nokorongou ko no do minimpori-pori i Adonia, i tanak di Hagit do suminiliu'd raja'? Om inda' ka dot i Raja' Daud nopo om a' i' nokoilo do pasal diri. 12 Ondung orohian ko dot apasi i Suliman om apasi ko iya', om osonong nogi' do 13 lomusan nu do mongoi solowot di Raja' Daud. Om poboroson no dot id dau o poingkaa, ‘Okon toi ko' nokosumpa' ko no dot id doho' dot i Suliman, i tanak ku'd kusai o sumiliu do raja' do sumowoli diya'? Nokuro tu' baino' nopoddi om i Adonia i' o suminiliu do raja'?’ kanto,” ka dau. 14 Om boros ka kawagu di Natan, “Maso nu nopondo do moro-boros di Raja' Daud om sumuang oku nondo iyoho' do mongoi popogirot di boros nu,” ka dau. 15 Om ongoi noddi i Batsiba solowot di raja' do hiri'd bilik dau. Om tontok nopoddi nga' molohing no kopio i raja', om momogompi' nopo dau nga' i Abisag, i sumandak do mantad hilo'd Sunim. 16 Om kotuku' poddi i Batsiba dot id toguang di raja' do suminuwau dau, om uhoto' no iyau di raja', “Haro o pokionuon nu?” ka dau. 17 Om boros ka di Batsiba do suminimbar, “Oi Tuan Raja', suminumpa' ko dot id doho' dot id suang do ngaran do Tuhan, i Kinorohingan nu dot i Suliman, i tanak ku'd kusai o sumiliu do raja' do sumowoli diya'. 18 Nga' nosiliu no i Adonia do raja' om a' ko i' nokoilo do pasal diri. 19 Nakapatahak no i Adonia do porsombahan do dumba' dot ogumu', om sapi' do tontoluhan om tangaanak do sapi' dit ongolomu'. Om nangaalap no dau dot id poginakanan diri i tangaanak do Raja' om i Abiatar it Imam, om i Yoab i boyoon do soudor do Raja'. Nga' a' i' dau nalap i Suliman. 20 Oi Tuan Raja', songingandad ngai' no o tulun dot Israil do boros do mantad id Raja' ondung isai kopio o sumowoli diya' do sumiliu'd raja'. 21 Ondung a' nu poboroson, om atantu' no dot apatai ko pondo, om iyoon oku pondo om i tanak ku do tulun dit araat,” ka dau. 22 Om tontok di maso po di Batsiba do moro-boros, om korikot no i Natan do hiri'd walai di raja'. 23 Om sunudai no i raja' do nokorikot i Natan, om suang noddi i Natan, om ongoi no iyau otud do hiri'd toguang di raja'. 24 Om boros ka di Natan, “Oi Tuan Raja', nokoboros nu toi dot i Adonia o sumowoli diya' do sumiliu'd raja'? 25 Tu' baino' no do pinapatahak iyau do dumba' dot ogumu', om sapi' do tontoluhan om tangaanak do sapi' dit ongolomu' do maan do porsombahan. Om nalap ngai' nopo dau i tangaanak di Raja', om i Yoab i boyoon do soudor do Raja' om i Abiatar it Imam nga' nalap nogi' dau. Om wagu po iyolo' kotimpuun do mangakan-ngakan do potorungak di Abiatar om mimboros dot opuhod dot, ‘Otogui po i Raja' Adonia!’ ka no. 26 Nga' a' oku i' iyoho' nalap di Adonia. Om i Sadok it Imam, om i Bonaya, om i Suliman nga' a' i' dau nalap. 27 Tuan Raja' toi o minonuhu' do momonsoi do miagal diri, om a' i' o Tuan Raja' pinopoilo di pagawai nu ondung isai kopio o sumowoli do Tuan Raja',” ka dau. 28 Om boros ka di Raja' Daud, “Lohowo' i Batsiba,” ka. Om rikot no i Batsiba do minongoi timbaba' di raja'. 29-30 Om boros kaddi di raja' dot id dau, “Otopot nopo kopio om nakabatos ku no diya' dot id suang do ngaran do Tuhan, i Kinorohingan dot Israil, dot i Suliman, i tanak nu'd kusai o sumowoli doho' do sumiliu'd raja'. Om baino' no do mamatos oku dot id diya' dot id suang do ngaran do Tuhan di poimpasi, i pinopoidu' doho' do mantad id koinsanai do kosusaan ku, om tadau nod baino' do bayaanon ku i batos ku dot id diya'ddi,” ka dau. 31 Om otud noddi i Batsiba mikuwo'd minomoros do, “Poimpasi po o Raja' do gisom dot alaid!” ka. 32 Om ponuhu' noddi i Raja' do momolohou di Sadok, om i Natan om i Bonaya. Om korikot poddi iyolo' om, 33 boro-boros no i raja' dot id diyolo', “Ngoyo' ngai' dokoyu lohowo' i pagawai ku om moyo' kou no diyolo' do mongoi pasakai di Suliman, i tanak ku, di kaladai ku om pootodon no iyau do hilo'd tudan do waig di hilo'd Gihon. 34 Om hilo' no iyau do silihon diyo Sadok di Natan do raja' dot Israil. Om pounion nogindo dokoyu o torumpit om poboroson dot opuhod o poingkaa, ‘Otogui po i Raja' Suliman,’ ka. 35 Om woyoon nogindo iyau do gumuli' do hiti do mongoi irikau di tirikohonon ku di don raja', tu' iyau no o pilion ku do raja' do sumowoli doho' do momorinta' dot Israil om Yohuda,” ka dau. 36 Om boros ka di Bonaya, “Owonsoi i' o miagal diri, oi Tuan Raja'. Maha' daa om pogiroton do Tuhan, i Kinorohingan nu, i boros nu'ddi. 37 Om poingkuro nopo o Tuhan do minomoyo' diya', om iyo no iyau'ddi do momoyo' di Suliman. Om maha' daa om pomogoton do Tuhan o pomorintaan di Suliman do mantad ko' i pomorintaan nu,” ka dau. 38 Om pasakayo' noddi di Sadok, om i Natan, om i Bonaya, om i madtatamong di raja', i Suliman dot id kaladai di raja'. Om woyoo' no diyolo' iyau do kuminaa do hilo'd tudan do waig di hilo'd Gihon. 39 Om ngoyo' noddi di Sadok i pinoiyanan di tumau do saitun di nigitan dau do mantad hiri'd Kiim do Tuhan. Om potuntugo' noddi dau dot id di Suliman do tanda' do momili' dau. Om pounio' noddi i torumpit om oinsanan nopo i tulun do hiri do minomoros dot opuhod do poingkaa, “Otogui po i Raja' Suliman,” ka. 40 Om woyo' ngai' nopo iyolo' do guminuli', do mikuwo'd sampangkis-pangkis om popinguni do suling, gisom do miagal po dot oguyu' o tana' do gama' do kohiyoo'. 41 Om kotitingkod di Adonia om i tulun do nalap dau do mangakan-ngakan, do tontok di norongou diyolo' it ohiyo'ddi. Tontok di norongou di Yoab i tuni do torumpit, om ponguhot no iyau. “Nokuro kopio'lo' tu' ohiyo kopio o hilo'd bandar?” ka dau. 42 Om a' po di Yoab nopupusan o boros dau om korikot no i Yonatan, i tanak di Abiatar it Imam. Om boros ka di Adonia, “Suang, atantu' no do poromut ko do habar dot osonong tu' osonong ko i' koulun,” ka dau. 43 “Mokiampun oku no, tu' a' i' miagal diri,” ka di Yonatan do suminimbar. “Nopili' no di Raja' Daud i Suliman do sumiliu'd raja'. 44 Nosuhu' no i Sadok, om i Natan om i Bonaya om i madtatamong kasai' di raja' do momoyo' di Suliman; om nakasakai no diyolo' iyau di kaladai di raja'. 45 Om nopili' no diyo Sadok di Natan iyau di hilo'd tudan do waig do Gihon. Om suang noddi iyolo' di bandar mikuwo'd sampangkis-pangkis dot atataadan. Ohiyo po tomod i tulun do hilo'd bandar. Om iri no it ohiyo di norongou dokoyu di tiinu'ddi. 46 Nosiliu noddi i Suliman do raja'. 47 Om iri ngai' piya pagawai do pomorinta' nga' nongkoongoi no kosolowot di Raja' Daud. Boros ka diyolo', ‘Maha' daa om pobontugon do Kinorohingan nu i Suliman, do mantad ko' i kobontugo' nu; om maha' daa om poimogot o pomorintaan di Suliman ko' i pomorintaan nu,’ ka no. Om otud noddi i Raja' Daud do tuminuku' dot id Kinorohingan do hiri'd toodopon dau, 48 mikuwo'd suminambayang do poingkaa, ‘Royohon no o Tuhan, i Kinorohingan di tukuon do tulun dot Israil. Tu' tadau nod baino' do nopili' nu o songulun di sinakagon ku do sumiliu'd raja' do sumowoli doho'. Om pinologos oku po diya' do poimpasi gisom do nokokito oku dau!’ ka dau,” ka di Yonatan. 49 Om ongooris tomod diri i tulun di nalap di Adonia. Om ingkakat ngai' nopo iyolo' om pamanau no; om sompori-pori nopoddi iyolo' do minamanau do minuli'. 50 Om moddosi tomod diri i Adonia di Suliman gisom do minongoi iyau kabai di sinangau-sangau di pananaraban do porsombahan do hiri'd Kiim do Tuhan. 51 Om haro'ddi o tulun do minongoi pomisunud di Raja' Suliman do moddosi tomod i Adonia dau gisom do minongoi iyau kabai di sinangau-sangau di pananaraban do porsombahan. Om minomoros iyau do, “Pokionuon ku do sumumpa' po i Raja' Suliman dot id doho', dot a' oku dau patayon,” ka. 52 Om boros kad i Suliman, “Ondung osonong o kowoyo-woyoon dau om a' i' kopio iyau ohukuman, nga' ondung araat o wonsoyon dau om atantu' no dot apatai iyau,” ka dau. 53 Om ponuhu' noddi i Raja' Suliman do tulun do mongoi polintuhun di Adonia do mantad hiri'd pananaraban do porsombahan. Om ongoi noddi i Adonia solowot di raja' mikuwo'd minotud do hiri'd toguang dau. Om boros kaddi di raja', “Koino-ino ko nod muli'!” ka.
Bilin di Daud dot id di Suliman dit id Tohuri No
1 Tontok dit oruhai no do matai i Daud om lohowo' no dau i Suliman, i tanak dau. Om sunudai no dau iyau di pobilinon dau dit id tohuri no kopio. Boros kad Daud, 2 “Norikot noddi o kopupuson do topud-opud ku. Nga' pogiroton no o ginawo nu om kumosiou no. 3 Wonsoyon no o ponuhuan do Tuhan, i Kinorohingan nu dot id diya'. Om umboyoon ngai' no it oturan om ponuhuan dau di songintulis do hiri'd Tourat di Musa, om koundar ko i' do honggo nopo o ngoyon nu om nunu nopo o wonsoyon nu. 4 Mumboyo' ko nopod Tuhan, om bayaanon indo dau i batos dau do sinakagon ku o momorinta' dot Israil, ondung tumorodok no iyolo' do mumboyo' ngai' di ponuhuan dau do mikuwo'd aayi-ayi' o ginawo om pomusarahan diyolo'. 5 Iso' po kawagu! Atantu' no dot osorou nu i' i winonsoi di Yoab dot id doho' tu' pinatai dau i duwo o boyoon do soudor dot Israil, i Abnor i tanak di Nor, om i Amasa i tanak di Yitir. Pinatai dau iyolo' do tontok dit a' misangod do ponuli' dau diyolo' di minamatai iyolo' do tontok do mogisasangod. Iyau i' o minamatai di tulun dit aiso' o sala', nga' iyoho' iddi o noulian do monongkoilo di winonsoi dau, om gisom do noinggorit oku. 6 Om oilaan nu i' it apatut nu'd wonsoyon, oi tanak ku: kada' no kopio iyau pologoso' dot osonong o kapatai-patayo'. 7 Nga' kumosonong no dot id tangaanak di Barsilai di tongokusai, i mantad hilo'd Giliad. Om tulungon no iyolo' tu' osonong i' iyolo' dot id doho' do tontok di minogidu' oku do mantad id di Absalom, i tobpinai nu. 8 I Simoi no i tanak di Gira, i mantad hilo'd bandar do Bahurim it id watas do Binyamin, om hati po o pobilinon ku diya'. Tontok di pakayaan ku do hilo'd Mahanaim, om minomolupu' tomod i Simoi doho'. Nga' tontok di nosolowot ku iyau do hilo'd Bawang do Yordan, om sumpa' oku no dot id dau dot id suang do ngaran do Tuhan, dot a' ku iyau patayon. 9 Nga' iti no o pobilinon ku diya': kada' iyau pologoso' do koidu' do mantad id hukuman. Oilaan ku id koilo ko do momusorou; om ihumon no kopio o ralan do momohukum dau do kapatayon,” ka dau.
Napatai i Daud
10 Om kapatai noddi i Daud om lobongo' no iyau do hilo'd Bandar di Daud. 11 Nosiliu iyau do raja' dot Israil do solinaid dot apat nohopod o toun: turu' o toun dau do poundorong do hilo'd Hibron om tolu nohopod om tolu o toun dau do hilo'd Yorusalim. 12 Om kosiliu noddi i Suliman do raja' do suminowoli di Daud, i tapa' dau. Om ogirot tomod diri i pomorintaan di Raja' Suliman.
Napatai i Adonia
13 Insan tadau om ongoi no i Adonia do hiri'd di Batsiba. Om uhoto' no di Batsiba i Adonia, “Osonong i' o kaangai-angayan nu'd hiti?” ka dau. “Osonong i'” ka dau do suminimbar. 14 Om boros ka dau kawagu, “Haro daa o pokionuon ku diya', oi inan,” ka. “Nunu?” ka di Batsiba do minonguhot. 15 Boros ka di Adonia do suminimbar, “Oilaan nu i' dot iyoho' daa it apatut do sumiliu'd raja', om soro-sorohon ngai' no daa di tulun dot Israil o miagal diri. Nga' iri iddi tadi' ku o nosiliu'd raja'; tu' iyo noddi o kinorohian do Tuhan. 16 Nga' iso' po daa o pokionuon ku; om maha' daa om potumboyoon oku diya',” ka dau. 17 “Nunu daa o pokionuon nu?” ka di Batsiba do minonguhot. Om boros ka di Adonia, “Ngoyon daa doho' pokionuo' di Raja' Suliman om pabanaron oku i' dau do mangawin di Abisag, i sumandak do mantad hilo'd Sunim diri; oilaan ku i' do patahakon id Suliman o pokionuon nu,” ka dau. 18 “Oo, mongoi oku i' boro-boros di raja' do poporomut di boros nu,” ka dau. 19 Om ongoi noddi i Batsiba solowot di raja' do mongoi poporomut di boros di Adonia. Om ingkakat no i raja' do suminuwau di tina' dau om tuku' no do minomusou dau, om ongoi nogi' irikau kawagu do hiri'd tirikohonon di don raja'. Om ponuhu' nogi' iyau do tulun do pinoposodia' do tirikohonon do hiri'd dawananan dau do poirikahanan di tina' dau. 20 Om boro-boros noddi i Batsiba. “Haro daa ot okooro' do pokionuon ku diya'; om maha' daa om patahakon nu,” ka dau. “Nunu'ri, oi ina'? Patahakon ku i',” ka dau. 21 Om boros ka di Batsiba, “Pabanaron no daa i Adonia, i tobpinai nu do mangawin di Abisag,” ka dau. 22 “Nokuro tu' iri o pokionuon nu doho', oi ina'? Miagal nopo do pokionuon i Abisag om patahakon ku dau iti tirikohonon ku do momorinta'. Okon toi ko' id dotuo iyau ko' iyoho'. Om kawagu po nga' sumokodung dau i Abiatar it Imam om i Yoab!” ka dau. 23 Om koboros po di Suliman o miagal diri om sumpa' no iyau dot id suang do ngaran do Tuhan. Boros ka dau, “Patayon oku nopod Kinorohingan ondung a' ku no hukuman do kapatayon i Adonia dot i pinokianu dau do miagal diri o kapamatayan. 24 Nokogirot nod Tuhan o koiyonon ku do momorinta' do hiti'd tirikohonon di Daud i tapa' ku. Om nabayaan nod Tuhan i batos dau, tu' nakatahak no dau iti pomorintaan dot id doho' om id sinakagon ku. Om sumumpa' oku no dot id suang do ngaran do Tuhan i poimpasi, do tadau nod baino' do matai i Adonia!” ka dau. 25 Om suhuo' noddi di Raja' Suliman i Bonaya, om ngoyo' no dau patayo' i Adonia.
Nidu' do Pakaraja' i Abiatar om Pinatai i Yoab
26 Om boros kaddi di Raja' Suliman dot id di Abiatar it Imam, “Ongoi no do hilo'd Anatot, i kampung nu. Otopot nopo kopio om patayon ko i' daa, nga' a' ku i' iya' patayon do baino', tu' tontok di moyo-woyo' ko po di tapa' ku om tuminonggoi ko i' dau dot id koinsanai di koinggoritan dau. Om iya' nogi' i minomogompi' di Kaban do Tumpongo'd Tuhan,” ka dau. 27 Om potingkodo' noddi di Suliman i Abiatar di karaja' dau dot imam. Om iri no i winonsoi di Suliman o minamayaan di nokoboros do Tuhan di hilo' pod Silo do pasal di Ili it Imam om i sinakagon dau. 28 Om korongou ngai' no di Yoab i nongosiliu'ddi. Om moddosi tomod diri iyau tu' suminokodung i' iyau di Adonia, mulong po dot a' i' daa iyau suminokodung di Absalom di gulu po. Om poggidu' no iyau do kuminaa do hiri'd Kiim do Tuhan om ongoi no iyau kabai di sinangau-sangau di pananaraban do porsombahan. 29 Om kosunud noddi i habar dot id di Raja' Suliman, do nokoongoi no i Yoab do hiri'd Kiim do Tuhan om hiri no iyau'd pananaraban do porsombahan. Om ponuhu' no i Raja' Suliman do tulun do mongoi poromut do boros dot id di Yoab, do monguhot dau ondung nokuro tu' minongoi iyau do hiri'd pananaraban do porsombahan. Om simbar no i Yoab do minogidu' iyau om ruminikot iyau dot id Tuhan, tu' moddosi iyau di Suliman. Om suhuo' noddi di Raja' Suliman i Bonaya do mongoi pamatai di Yoab. 30 Om ongoi noddi i Bonaya do hiri'd Kiim do Tuhan om boro-boros no di Yoab, “Suhuon ko di raja' do sumoliwan do mantad hino!” ka dau. “A, hiti oku nod matai,” ka dau. Om guli' no i Bonaya do minongoi posunud diri dot id raja'. 31 Om soira' di norongou di raja' o miagal diri om pomoros no iyau do, “Ngoyo' nopo wonsoyo' o miagal di nokoboros dau. Patayon nopo iyau om lobongon no, om a' oku i' om a' ngai' i sinakagon do tapa' ku kokuro-kuro di pinamatayan di Yoab do tulun dit aiso' o sala'. 32 Om hukuman nondo iyau do Tuhan tu' minamatai i' iyau, om a' i' nokoilo-ilo i tapa' ku. Pinatai di Yoab o duwo tulun dit aiso' o sala', i Abnor i boyoon do soudor dot Israil om i Amasa i boyoon do soudor do Yohuda, om osonong nogi' daa iyolo' ko' i Yoab, nga' pinatai i' di Yoab iyolo'. 33 Om i Yoab nondo om i sinakagon dau o mamabo di hukuman do kinapatayan di duwo o boyoon do soudor diri, do gisom dot alaid. Nga' oinsanan nopondo o sinakagon di tapa' ku dit osiliu do raja' dot abarakatan kasai'd Tuhan --- om koundar kasai' iyolo',” ka di Raja' Suliman. 34 Om ongoi noddi i Bonaya do hiri'd Kiim do Tuhan, om patayo' no dau i Yoab do hiri. Om lobongo' noddi i Yoab do hiri'd walai dau di hiri'd soliwan di bandar. 35 Om siliho' noddi di raja' i Bonaya do boyoon di soudor dot ongkirapo-rapo do suminowoli di Yoab, om i Sadok diri o siniliu dot imam do suminowoli di Abiatar.
Napatai i Simoi
36 Om lohowo' noddi di raja' i Simoi om boro-boros no dau, “Momonsoi nod walai nu do hiti'd Yorusalim. Om mundorong nod hiri om kada' no soliwan diti bandar. 37 Nga' ondung sumoliwan ko om katalib ko no di luyu' do Bawang do Kidron, om patayon ko no; om iya' no o nakasala',” ka dau. 38 “Oo, oi Tuan Raja'. Tonudon ku i' o boros nu, oi Raja',” ka dau. Om hilo-hilo' noddid Yorusalim i Simoi do poundorong 39 do solinaid do tolu o toun. Nga' poggidu' noddi o duwo di turipon di Simoi do hilo'd Gat, do minongoi do hilo'd di Raja' Akis, i tanak di Maaka. Om soira' di noilaan di Simoi o hal diri, 40 om pakalai no dau i kaladai dau om ongoi no do hilo'd di Raja' Akis, i hilo'd Gat do mongoi pogihum di turipon dau. Om kosolowot noddi dau iyolo', om angatai no dau iyolo' do minuli'. 41 Nga' soira' di norongou di Suliman i nowonsoi di Simoi, 42 om ponuhu' no iyau do mongoi pomolohou dau, om boro-boros no do poingkaa, “Nosuhu' ku no iya' do mamatos dot id suang do ngaran do Tuhan dot a' ko tumongkiad do Yorusalim. Om nokoinsan mantad ku no iya' do soira' nopo do sumoliwan ko do mantad id Yorusalim, om matai ko no. Om iya' nga' nakapamatos nogi' om nakaakun do tumanud di boros ku, ko i? 43 Nga' nokuro'ddi tu' a' nu nigitan i batos nu om tinolibambanan nu i boros ku? 44 Oilaan ngai' nu i' i kararaat nu dot id tapa' ku. Om gowoi poddi om hukuman ko'd Tuhan, 45 nga' iyoho' nopo om barakatan i' om pomorintaan do tapa' ku nga' kogirot i' do gisom dot alaid,” ka dau. 46 Om koboros po dau o miagal diri om suhuo' no di raja' i Bonaya, om ngoyo' no di Bonaya patayo' i Simoi. Om i Suliman noddi o kikuasa' dot id koinsanai di nunu nopo do hiri'd pomorintaan dau.
Suminambayang i Suliman do Minokianu do Toilaan
1 Om ponokiambalut noddi i Suliman di raja' do Masir. Ralan nopo dau do minonokiambalut nga' kinawin dau i tanak do tondu' do raja'ddi. Om angatai no dau i tondu' do minongoi iyon do hiri'd Bandar di Daud do daamot po do mamaal di walai'd raja' om i Walai'd Sasambayangan dot Agayo, om i tolig di pointutuk do Yorusalim. 2 Aiso' po o Walai'd Sasambayangan dot Agayo do don Tuhan, om maso poddi di tulun do papatahak do porsombahan di sumbolion dot id piro-piro o pananaraban do porsombahan. 3 Osianan i' i Suliman do Tuhan om mumboyo' iyau di pinotuduk di tapa' dau. Nga' iyau nga' maso po do monumbali' om papatahak di tayam-tayam dot id piro-piro o pananaraban do porsombahan. 4 Pananaraban nopo do porsombahan dit abantug kopio nga' i hilo'd Gibion. Om asaru' i' i Suliman do mongoi papatahak do porsombahan do sumbolion do hilo'. Insan tadau, om ongoi no kawagu iyau do hilo' do miagal di koubasanan. 5 Om totuong noddi om intalang no o Tuhan dot id dau dot id suang do nipi dau, om minonguhot do poingkaa, “Nunu o korohian nu do patahakon ku diya'?” ka dau. 6 Om boros ka di Suliman do suminimbar, “Oi Tuhan, nokointalang nu no dot osianan kopio ko di Daud, i tapa' ku, i susuhuon nu'ddi. Tu' iyau nopo om osonong om otulid o ginawo om otorodok dot id diya'. Om pinointalangan nu iyau do kosianan nu dot id dau. Om atalang no kopio iri tu' nonuan nu iyau do tanak do kusai i momorinta' noddi do baino' do suminowoli dau. 7 Oi Tuhan, i Kinorohingan ku, iya' no i minomili' doho' do sumiliu do raja' do suminowoli di tapa' ku, mulong po dot omulok oku po, om a' oku koilo do kowoyo-woyoon do momorinta'. 8 Om id tanga-tanga' oku do bansa' di nopili' nu do sumiliu do tulun nu. Iyolo' nopo om bansa' dit asapou kopio, tu' a' no ointob-intob o kogumuo'. 9 Iyo nopoddi, oi Tuhan, om onuwai oku no do toilaan do momorinta' do tulun nu'dti do mikuwo'd otulid o pomorinta' om koilo oku id mongintutun dit osonong om it araat. Tu' ondung amu', nga' poingkuro oku po do momorinta' diti tulun nu do miagal diti kogumu'?” ka dau. 10 Om orohian tomod diri o Tuhan di pinokianu di Suliman do miagal diri. 11 Om boro-boros noddi o Tuhan dot id dau, “Iyo nopoddi tu' minokianu ko do toilaan do momorinta' dot otulid o pomomorinta', om okon ko' tumur dot anaru ko' kakayaan do maan nu'd diya', ko' kapatayon po di pisangod nu o pinokianu nu, 12 om simbaron ku i' i pinokianu nu. Om silihon ku nondo iya' do tulun dit opintar kopio om kitoilaan kopio ko' mantad do koinsanai'd tulun di nokoumbal do poimpasi om i tulun di sumusuhut do miyon do hiti'd pomogunan diti. 13 Om iri piya it a' nu pinokianu nga' patahakon ku i' diya': solinaid nu nopo do poimpasi om kaya' ko nondo om suahon kopio ko ko' mantad do koinsanai'd raja' do hinonggo-honggo nopo. 14 Om ondung iyo ko di Daud i tapa' nu'ddi, tu' minumboyo' om tuminanud dit oturan ku, om onuan ku indo iya' do tumur dot anaru,” ka. 15 Om koposik poddi i Suliman, om koilaai no dau do minoro-boros o Kinorohingan dot id dau dot id suang do nipi. Om ongoi noddi iyau do hilo'd Yorusalim om ingkakat no do hiri'd dotimbabaan di Kaban do Tumpongo'd Tuhan om papatahak no iyau do porsombahan di sorobon om porsombahan di piombolutan. Om papaharo nogiddi iyau do poginakanan do pagalapan do koinsanai di pagawai dau.
Minomutus i Suliman do Hal dit Apagon do Momutus
16 Insan tadau om ongoi no solowot di Raja' Suliman o duwo o tondu' do sundal. 17-18 Om boros ka di tiso' diyolo', “Oi Tuan Raja', iyahai nopodti om iso- iso' o walai, om aiso' i' o tulun do suwai do poinsugku' dahai, om kosusu oku no dot iso' o tanak do kusai di guulu. Om duwo no tadau do mantad diri om kosusu no iti tondu' diti; om kusai i' o tanak dau. 19 Insan totuong, tontok di maso dahai do koodop om koonsitai nodti tondu' i tanak dau, om kapatai no i tanak; nga' a' i' daa dau tinomod. 20 Om pitangatuong noddi di maso ku iyoho' do koodop om koposik no iti tondu'dti om ngoyo' no dau i tanak ku do hiri'd poirumak ku. Om ngoyo' no dau hirio'd toodopon dau i tanak ku. Om iri no tanak di napatai om nongoi dau hirio'd toodopon ku. 21 Om kosuabon noddi, di noposik oku om poposusu oku daa'ddi di tanak ku, om kokito ku no do napatai no i tanak. Nga' kosonsod ku noddi kopio om okon i' ko' i doho' di tanak diri,” ka. 22 Nga' boros ka di tondu' di tiso', “Goudut! Iri nopo tanak di poimpasi'ddi om doho' i', om iri no napatai o diya',” ka. Om boros ka di tondu' di koiso' do suminimbar, “Okon! Iri nopo tanak di napatai om diya' i', om i poimpasi o doho'!” ka dau. Om iyo noddi iyolo' do minisongkiwal do hiri'd toguang di raja'. 23 Om boros kaddi di Raja' Suliman, “Sopiakun-akun kou nopo dot i poimpasi o tanak dokoyu, om okon ko' i napatai,” ka dau. 24 Om koboros po i raja' do miagal diri om ponuhu' no iyau do tulun do minongoi'd gayang. 25 Om boros kaddi kawagu di raja', “Pipapason nogi' i tanak di poimpasi'ddi om onuan i' ilo tongoondu' do sopisampapasan,” ka dau. 26 Om korongou noddi di tondu', i tina' kopio di tanak i boros do miagal diri, om boro-boros no iyau, “Oi Tuan Raja', kada' nogi' kopio patayo' i tanak diri. Patahakon nopo iri dot id dilo',” ka. Minomoros iyau do miagal diri tu' osianan no kopio iyau di tanak dau. Nga' boros kaddi di tondu' di tiso', “A, pipapason nopo. Baya' nopo dot aiso' o kaanu dahai'ddi,” ka. 27 Om boros kaddi di Suliman, “A' piya patayon i tanak. Patahakon dilo tondu' di koiso' i tanak --- ilo' no o tina' kopio dau,” ka. 28 Om soira' di norongou di tulun dot Israil i pinomutus di Suliman do hal diri om oinsanan nopo iyolo' dot oimayaan mikuwo'd opusou kopio di Suliman. Tu' atalang no kopio do nonuan iyau'd Kinorohingan do toilaan do manalasai do hal dot otulid o pomumutus.
I Piro-Piro o Pagawai di Suliman
1 Om nosiliu noddi i Suliman do raja' do pointongkop dot Israil. 2-6 Om iti ngai' no i pagawai dit angasawat o pangkat do pinili' di Suliman: Imam: i Sadok; i Asaria i tanak di Sadok; om i Abiatar Gomponulis do hiri'd walai'd raja': i Ilihorip om i Ahia, i tangaanak di Sisia Gomponulis do pomorinta': i Yosapat, i tanak di Ahilud Boyoon do Soudor: i Bonaya i tanak di Yoyada Boyoon do koinsanai di gobunor do watas: i Asaria i tanak di Natan Ponosihat do Raja': i Sabud it Imam, i tanak di Natan Boyoon do koinsanai di susuhuon do hiri'd walai di raja': i Ahisar Boyoon do tulun di sinansagan do kumaraja': i Adoniram i tanak di Abda 7 Minomili' i Suliman do hopod om duwo o gobunor do pointongkop do pomogunan dot Israil. Karaja' nopo diyolo' om monimung do kaakan-akanan do mantad hiri'd watas diyolo' do patahakon di raja' om koinsanai di poingiyon do hiri'd walai di raja'. Om mogisowoli-woli nopo i piro-piro o gobunor dot onuan do karaja'ddi do solinaid do sombulan do pointikid-tikid do toun. 8-19 Om iri nopo hopod om duwo o gobunor diri nga' haro i' o boyoon. Iti ngai' no o ngaran di gobunor om i ngaran do watas diyolo': I Bonhur: watas do konulu-nuluan dot Ipraim I Bin-Dikir: bandar do Makas, Saalbim, Bait-Simis, Ilon, om Bait-Hanan I Bin-Hisid: bandar dot Arubot, Soko, om koinsanai di watas do Hipir I Bin-Abinadab, i sawo di Tapat, i tanak di Suliman do tondu': koinsanai do watas do Dor I Baana i tanak di Ahilud: bandar do Taanak, Mogido, om koinsanai di kinoiyonon dot id somok do Bait-Sian, om id toning do bandar do Sartan i ponong id salatan do bandar do Yisriil gisom do hilo'd bandar do Abil-Mihola, om Yokmiam I Bin-Gibir: bandar do Ramot di hilo'd Giliad, om kawalayan do hilo'd Giliad, i nasanganu di sompiiyon di Yair, i sinakagon di Manasi, om i watas dot Argob do hilo'd Basan, i kibandar dot angagayo dot onom nohopod o kogumuo', om ongkitolig om ongkisalampad do tambaga' i wawayaan dot agayo I Ahinadab i tanak di Ido: watas do Mahanaim I Ahimaas, i sawo di Basmat, i tanak di Suliman do tondu': watas do Naptali I Baana i tanak di Husai: watas dot Asir, om bandar dot Alot I Yosapat i tanak di Parua: watas dot Isakar I Simoi i tanak di Ila: watas do Binyamin I Gibir i tanak di Uri: watas do Giliad, i porintaon di Sihon i raja' dot Amori om i Og i raja' do Basan di gulu po.
Kogoyoo' do Pomorintaan di Suliman
20 Kogumuo' nopod tulun do Yohuda om Israil nga' miagal po di pasir do hilo'd tisan do rahat. Osimbayan tomod o koposi-posion diyolo' om osima' do takanon om tinumon. 21 Oinsanan nopo i bansa'd tulun do mantad pod hiri'd Bawang dot Iprat om korikot do hilo'd Pilistin om i piwolitan do Masir dot id suang ngai' do pomorintaan di Suliman. Id suang ngai' nopo do pomorintaan di Suliman om mambayar kasai' id sukai i piro-piro o bansa'ddi do solinaid di Suliman do poimpasi. 22 Kaakan-akanan nopo dot onuon di Suliman do monikid tadau nga' limo noribu lito do tapung do torigu dit angatandai, om hopod noribu lito do tapung do torigu dit angasalau, 23 om hopod o tinan do sapi' di poingkandang, om duwo nohopod o sapi' di songidu-idu', om hatus o tinan do dumba'. Om suwai no ko' iri om mokianu po iyau do tambang, om paus, om tambang do tontoluhan, om tombolog. 24 Koinsanai di tana' do ponong id kotonobon do mantad id Bawang dot Iprat, do mantad hilo'd Tipsa, i hilo'd Iprat om gisom do ponong hilo'd kotonobon, i hilo'd bandar do Gasa, nga' id suang ngai' i' do pomorintaan di Suliman. Oinsanan nopo i raja' di ponong id kotonobon do mantad id Iprat dot id suang do pomorintaan dau, om oinsanan i pomogunan do hiri'd posorili' do mulud dau. 25 Solinaid di poimpasi i Suliman om ongosimbayan ngai' nopo i tulun do pointongkop do Yohuda om Israil, aiso' no o koligagaanan diyolo', om haro ngai' nopo o kabun dot anggur om kabun dot ara do pointikid-tikid do sompiiyon. 26 Kisoudor i Suliman dit ongkikuda' do hopod om duwo noribu, om apat nohopod noribu o kogumuon do kandang do kuda' do pakandangan do kuda' di pamagayat do korita'-kuda' dau. 27 Om mogisowoli-woli nopo i gobunor, do sorombulan-bulan do papatahak do kaakan-akanan di Raja' Suliman om koinsanai di tulun di makan do hiri'd walai di raja', gisom do haro ngai' nopo diyolo'. 28 Om patahak ngai' nopo i gobunor di diyolo' dot apatut do patahakon, do barli om sakot do paakan do koinsanai di kuda' di Suliman, i kuda' di sakayon om i kuda' di pamagayat do korita'. Om popiotodon i taakanon di tayam-tayam do hiri'd kandang do kuda' do songkuro nopo i pokionuon. 29 Nonuan do Kinorohingan i Suliman do kopintaran, om toilaan dit aralom kopio ko' i toilaan do tulun do suwai, om pomusorou dit atarom kopio. 30 Hilo' nopod pomogunan do ponong id koulayon om hilo'd pomogunan do Masir om aiso' no o koiyo dau kapandai. 31 Iyau no ot apandai kopio ko' mantad do koinsanai'd tulun! Apandai po ko' i Itan i tulun dot Israhi, om apandai ko' i Himan om i Kalkol om i Darda, i tangaanak di Mahol. Abantug tomod o ngaran di Suliman do honggo nopo om pointongkop di pomogunan di hiri'd posorili' di pomorintaan dau. 32 Haro i' o tolu noribu o boros dit angaralom o komoyon, om lobi id soribu' o sinding do tinulis dau. 33 Milo i' iyau do mimboros do pasal do kokoyuan om i tanom-tanom --- mantad di kayu sedar do hilo'd Libanon om iri piya i rongilut do hisop di songinsuni do hiri'd tolig di watu do winonsoi --- om mimboros nogi' iyau do pasal do nintorusan di sontulud-tulud om i sangkamang-kamang om sada'. 34 Oinsanan nopo o raja' do pointongkop do pomogunan do nokorongou do kapandayo' di Suliman gisom do minonuhu' iyolo' do tulun do mongoi pokinongou dau.
Suminodia' i Suliman do Mamaal di Walai do Sasambayangan dot Agayo
1 I Hiram nopo, i raja' do Tirus, om tambalut i' di Raja' Daud. Om soira'ddi nokorongou i Hiram dot i Suliman o nosiliu do raja' do suminowoli di Daud, i tapa' dau, om ponuhu' no iyau do tulun do minongoi do hiri'd di Suliman. 2 Om porikatai noddi di Suliman i Hiram do boros do poingkaa, 3 “Oi Raja' Hiram. Atantu' no do koilo ko i' dot i Daud nopo, i tapa' ku, om mongoi nopo sangod do sumaap di pisangod dot id pomogunan di posorili' dau. Om iri noddi ot a' di tapa' ku kinomilaan do minomonsoi di walai dot iyonon do sumambayang dot id Tuhan, i Kinorohingan dau, do solinaid dit a' po iyau'd Tuhan noonuan do kamanangan do sumangod do koinsanai di pisangod dau. 4 Nga' baino' nopoddi om noonuan noddi do Tuhan, i Kinorohingan ku, do kosimbayanan o pointongkop diti pomorintaan ku. Om aiso' no o sumangod doho' om aiso' o ligogon do ngoyon songodo' do pisangod. 5 Nakabatos no o Tuhan dot id di Daud, i tapa' ku do poingkaa, ‘Iri nopondo tanak nu do silihon ku'd raja' do sumowoli diya' om mamaal nondo do walai dot iyonon do sumambayang dot id doho',’ ka. Iyo nopoddi, oi Raja' Hiram, om nokopomusorou oku no kopio dot iyoho' no, i Suliman, o mamaal di Walai'd Sasambayangan diri. 6 Om oilaan nu i' dot aiso' i' o tulun ku dit ongoilo do managad do kayu do miagal di tulun nu tu' ongoilo. Iyo nopoddi, om pokionuon ku daa do monuhu' ko di tulun nu do mongoi panagad do kayu sedar do hilo'd Libanon do patahakon doho'. Om suhuon ku indo i tulun ku do mongoi uhup diyolo', om piro nopo o gadsi' do pokionuon nu do pamagadsi' di tulun nu nga' bayaran ku i',” ka dau. 2|55|HK65D|Kayu sedar do Libanon do pamaal di Walai'd Sasambayangan dot Agayo|5.6 7 Om asanangan tomod diri i Hiram do nokorongou do habar diri. Boros ka dau, “Royohon no Tuhan do baino' tu' nonuan dau i Daud do tanak dit opintar kopio do suminiliu do raja' do bansa' dit agayo'ddi,” ka dau. 8 Om pobilino' noddi di Hiram iti tisimbar dau di Suliman do poingkaa, “Nokoromut no dot id doho' i boros nu'ddi om i pokionuon nu, om ookunan ku i' iri. Om posodiawon ku indo i kayu sedar do Libanon om i kayu sedar di koubasanan do tumanud di pinokianu nu. 9 Om poruhukon indo di tulun ku i kayu'ddi do mantad hilo'd Libanon om pokoyoon do hilo'd rahat. Om hilo' nopondo om kagasan nondo diyolo' i kayu do wonsoyon do miagal do gakit om milo id rulunon do sumusui di tisan do rahat do kumaa do hiri'd kinoiyonon di tontuon nu. Om korikot pondo iri do hiri om uriason nogindo i kayu om patahakon nogindo di tulun nu. Om iri nondo i tulun nu o monongkoilo'ddi. Om pokionuon ku no iyoho', om poposodia' ko do kaakan- akanan di tulun ku'ddi,” ka dau. 10 Om onuwai noddi di Hiram i Suliman do koinsanai di kayu sedar do Libanon om kayu sedar di koubasanan do tumanud di kogumuo' di pinokianu dau. 11 Om paakan ngai' no di tulun di Hiram diri, om patahak kasai' nopo i Suliman dot id di Hiram do duwo juta kilogram do gandum om apat nahatus noribu o lito do tumau'd saitun dit aiso' o rolot do pointikid do toun. 12 Om binayaan id Tuhan i batos dau tu' nonuan i' dau do toilaan i Suliman. Om i Hiram nopo di Suliman diri nga' miulud tomod om minomonsoi iyolo' do taru'. 13 Om sinuhu' di Raja' Suliman o 30,000 o tongokusai do mantad id pointongkop dot Israil do momonsoi di karaja' di posonsogon, 14 om pinili' dau i Adoniram do boyoon diyolo'. Om binahagi' di Suliman iyolo' do tolu o bohogian, do sorohopod-hopod noribu tulun dot iso' o bohogian. Om mogisowoli-woli nopo i tolu bohogian diri do mundorong do sombulan o koloido' do hilo'd Libanon om duwo nondo tulan do hiri'd walai diyolo'. 15 Om minonuhu' nogi' i Suliman do 80,000 o tulun do mamabak di watu di hiri'd nuluhon om 70,000 o tulun do mongoi pamabo di watu, 16 om 3,300 o tulun do pinili' dau do sumiliu'd mandur do mongilo-ilo do karaja'ddi. 17 Om sinuhu' iyolo' di Raja' Suliman do manganu di watu dot angagayo om it ongosonong do maan do poimpahan di Walai'd Sasambayangan dot Agayo. 18 Om iyo noddi i tulun do kuminaraja' dot id di Suliman, om i tulun di Hiram om i tulun do mantad hilo'd bandar do Gibal do pinoposodia' di watu om kayu do pamaal di Walai'd Sasambayangan dot Agayo.
Winaal di Suliman i Walai'd Sasambayangan dot Agayo
1 Tontok di tulan do Sib, i tulan do koduwo, di kaapat do toun di Suliman do momorinta', om dit apat no nahatus om walu' nohopod o toun do mantad di kinosoliwanan di tulun dot Israil do mantad hilo'd Masir, om timpuun no i Suliman do minamaal di Walai'd Sasambayangan dot Agayo. 2 Om kogoyoo' nopo di ponong hiri'd suang om: 27 o mito do konoruo', om 9 o mito do kalaabo', om 13.5 o mito do kasawato'. 3 Iri nopo kakilima' di Walai'd Sasambayangan dot Agayo'ddi om 4.5 o mito do konoruo' om kalaabo' no om 9 o mito dot irad do kalaabo' di walai. 4 Om ongkililigaon i limput di walai; do poingkoro' o pinomolobu di liligaon do ponong id soliwan om poinggayo o pinomolobu do ponong id suang. 5 Om hiri nod topis di limput di hiri'd tolikud om hiri'd bombong do ponong id soliwan om winansayan po kawagu do bilik do tolu o tingkat. Om oiyo nopo o kasawato'ddi do 2.2 o mito. 6 Kalaabo' nopo di bilik dit id tingkat do koiso' om 2.2 o mito, om iri no it id tingkat do koduwo om 2.7 o mito, om iri no it id tingkat do kotolu om 3.1 o mito. Iri nopo limput dit id tingkat dot id siriba' om akapal po ko' i limput dit id sawa-sawat, do gisom do milo do powonsoyon i palampag di bilik di pinatambing dot a' piya poluangon di limput di Walai'd Sasambayangan dot Agayo. 7 Iri nopo watu di pinakai do pamaal di walai om nosodia' mantad no do hiri'd pinongonuan di watu. Om solinaid di wonsoi-wonsoyon i walai om aiso' no ot orongou dot ohiyo do monukul, ko' mangapak ko' i mamakai do papakas do basi'. 8 Iri nopo wawayaan do sumuang do hiri'd kobilik-bilikan di pinatambing di hiri'd tingkat dot id siriba' kopio, om i hiri'd ponong id salatan di Walai'd Sasambayangan dot Agayo, om haro o tukad do wayaan do mongoi do hiri'd tingkat do koduwo om hiri'd tingkat do kotolu. 9 Om kolimpupuson noddi om pinowonsoi i siling do papan do pinodokot di kayu sedar do Libanon. Om iyo noddi i Suliman do minomongo di Walai'd Sasambayangan dot Agayo. 10 Om nopongo nogi' do minomonsoi i bilik di pinatambing, i tolu o tingkat diri; i pinooput di limput di ponong id soliwan di walai do pinopiromut nopo om i kayu sedar do Libanon. 11 Om boro-boros noddi o Tuhan dot id di Suliman, 12 “Ondung umboyoon nu o koinsanai dit oturan om ponuhuan ku, om wonsoyon ku indo dot id diya' i nakabatos ku dot id di Daud, i tapa' nu. 13 Mundorong oku nondo do hiti'd walai diti wonsoyon nu om hiti kasai' oku id pogialatan diti tulun dot Israil, i tulun do songonuon ku. Om a' ku i' iyolo' tongkiadan,” ka dau.
Pinomonsoi dit id Suang di Walai'd Sasambayangan dot Agayo
14 Om iyo noddi i Suliman do minomongo di Walai'd Sasambayangan dot Agayo:1|45|HK80D| Walai'd Sasambayangan dit Agayo do winonsoi di Raja' Suliman|6.14 15 Iri nopo limput do ponong id suang om linopisan ngai' nopo do kayu sedar do Libanon, do mantad pod hiri'd siliu om gisom do korikot do hiri'd siling. Nga' iri nopo siliu om iri i kayu sedar di koubasanan o winonsoi. 16 Hiri nopod suang di walai om sinapad do kayu sedar o hiri'd ponong id gogok kopio; do poinsondot do hiri'd siliu i sapad om poirikot do hiri'd siling. Om iri nopo bilik diri nga' rinoitan do Bilik dit Olidang Kopio. Konoruo' nopoddi om 9 o mito. 17 Om iri no bilik dit awayaan do mongoi'd hiri'd Bilik dit Olidang Kopio om 18 o mito do konoruo'. 18 Om iri nopo limput di ponong id suang di walai'ddi om linopisan ngai' nopo do kayu sedar do Libanon, om gisom dot a' noddi okito i watu di pinomolimput. Om kinikiran po i lapis diri do pinoiyo-iyo do tua' do tawadak om tusak do bunga. 19 Iri nopo Bilik dit Olidang Kopio'ddi, it id gogok kopio di Walai'd Sasambayangan dot Agayo om maan do poiyanan di Kaban do Tumpongo'd Tuhan. 20-22 Konoruo' nopo om kalaabo' om kasawato' di bilik diri om 9 ngai' nopo o mito. Om iri nopo pananaraban do porsombahan om kayu sedar do Libanon do winonsoi. Om iri nopo wawayaan di suangon do mongoi'd hiri'd bilik dit id gogok kopio'ddi om pinolotingan do rantai do tamas. Om oinsanan nopo i ponong id suang di Walai'd Sasambayangan dot Agayo'ddi do nurogupan do tamas; om iri nogi' i Bilik dot Olidang Kopio om i pananaraban do porsombahan nga' nurogupan i' do tamas. 23 Om pinoiyanan nogi' do duwo i pinoiyo-iyo do moloikat di roitan do kerub o hiri'd Bilik dit Olidang Kopio'ddi. Iri nopo kerub diri nga' kayu saitun do winonsoi. Om miagal nopo o kasawato' di winonsoi'ddi dot 4.4 o mito, 24-26 om kogoyoo', om pinomonsoi nga' miagal nopo. Duwo goduwo nopo o talad di winonsoi'ddi, do 2.2 o mito do konoruo' dot iso' o talad. Om konoruo' nopo do mantad id tompok di talad di koiso' om korikot do hiri'd tompok do talad di koduwo om 4.4 o mito. 27 Om iri nopo duwo o winonsoi'ddi nga' pinitalad do hiri'd suang di Bilik dit Olidang Kopio, om iri nopo talad do sampaping di duwo o winonsoi'ddi om kotopis di limput, om iri no talad do tiso' om kopitopis do hiri'd tanga' di bilik. 28 Om nurogupan goduwo nopo do tamas i duwo o winonsoi di koiyo-iyo do moloikat di roitan do kerub diri. 29 Om tongkopo' nopo do minongikir i limput di ponong id suang di Walai'd Sasambayangan dot Agayo. Iri nopo pinokikir om pinoiyo-iyo do moloikat di roitan do kerub om pinoiyo-iyo do guas do kurma om tusak do bunga do maan do pongillumis. 30 Om iri piya siliu nga' nurogupan i' do tamas. 31 Om iri nopo wawayaan do sumuang do hiri'd Bilik dot Olidang Kopio om pinadakatan do duwo o totobon di kayu saitun do winonsoi. Iri nopo pinongisan di wawayaan di ponong id sawat om pinalahis o pinomonsoi do hiri'd tanga- tanga'. 32 Om kinikiran goduwo nopo i totobon do pinoiyo-iyo do moloikat di roitan do kerub, om guas do kurma om tusak do bunga. Om nurogupan ngai' nopo do tamas i totobon di wawayaan om i winonsoi di pinoiyo-iyo do moloikat di roitan do kerub, om i pinokikir do koiyo-iyo do guas do kurma. 33 Hiri nod wawayaan do sumuang do hiri'd bilik dit id gulu kabantalai, i bilik dit agayo'ddi, om nisanan do boruti do kayu saitun dit apasagi'. 34 Om winansayan i wawayaan do duwo o totobon do kayu sedar di koubasanan o winonsoi, om milo goduwo nopo do polopion i totobon diri. 35 Om kinikiran goduwo nopo i totobon diri do pinoiyo-iyo do moloikat di roitan do kerub, om guas do kurma om tusak do bunga do maan do pongillumis. Om nurogupan ngai' nopo iri do tamas. 36 Hiri nopod dotimbabaan di Walai'd Sasambayangan dot Agayo'ddi om winansayan do natad. Om iri nopo natad diri om nolig o posorili'. Kowoyo- woyoo' nopo do pinomonsoi di tolig diri om tolu nopo lapis do watu om salapis no o boruti do kayu sedar do Libanon do polopison. 37 Iri nopo pinoimpahan di walai'ddi om pinowonsoi do tontok di tulan do Sib, i tulan do koduwo, di kaapat do toun di Suliman do momorinta'. 38 Om tontok di tulan do Bul, i tulan do kawalu' di kohopod om iso' do toun di Suliman do momorinta', om kopongo noddi i Walai'd Sasambayangan dot Agayo, do miagal di pomomonsoi di natantu' mantad. Koloido' nopo di Suliman do minomonsoi'ddi om turu' o toun.
Walai di Raja' Suliman
1 Om minomonsoi nogi' i Suliman do walai dau. Koloido' nopo dau do minomonsoi'ddi om hopod om tolu o toun. 2-3 Id suang nopo di walai dau'ddi om winansayan dau do langga' di rinoitan do “Langga' do Puru' do Libanon”. Kogoyo-goyoo' nopo di langga' diri om: 44 o mito do konoruo', om 22 o mito do kalaabo', om 13.5 o mito do kasawato'. Om haro o tolu rulud do torigi do kayu sedar do Libanon do hiri'd langga'ddi; sonrulud nopo nga' hopod om limo o torigi om hiri nopod sawat om pinadakatan do kasau do kayu sedar do Libanon. Om i siling do pinonirung di kasau nga' kayu sedar i' do Libanon. 4-5 Hiri nopod limput do ponong id gibang om ponong id wanan di bilik diri om kililigaon: tolu o liligaon do hiri'd limput do hiri'd sampaping om tolu kawagu o liligaon do hiri'd limput do tiso' do poingontok di tolu o liligaon do hiri'd sampaping. Iri nopo pinongisan di wawayaan om i liligaon diri om boruti dit apasagi'. 6 Om minomonsoi i Suliman do langga' do roitan do “Langga' do Torigi”. Konoruo' nopo do langga'ddi om 22 o mito, om kalaabo' no om 13.5 o mito. Id dotimbabaan nopo di langga' diri om haro o kakilima' di kitaap om kitorigi. 7 Iri no langga' do suwai om roitan do “Langga' do Tirikohonon” om roitan nogi' do “Langga' do Pomisaraan”. Iti nopo langga'dti om linopisan ngai' nopo do kayu sedar do Libanon do mantad pod hiri'd siliu om gisom do korikot do hiri'd kasau. Om hiri nod langga'ddi o tiyonon di Suliman do momisara'. 8 Om i tiyon-iyonon di Suliman nga' iyo nogi' di langga' di suwai o pinomonsoi. Om pinawansayan nopoddi om hiri'd dotolikudan di Langga' do Pomisaraan. Om winansayan pod i Suliman do walai i sawo dau, i tanak di raja' do Masir, do miagal iddi o pinomonsoi. 9 Oinsanan nopo i walai do kohompit i natad dit agayo, do watu dit ongosonong o winonsoi, do mantad pod hiri'd pinoimpahan om gisom do korikot do hiri'd kapanaapan. Om iri nopo watu'ddi om sinodia' mantad do hiri pod pinongonuan di watu om binabak do tumanud di sukatan; om kinikisan do garagadi' o miampaping di watu do ponong id suang om ponong id soliwan. 10 Iri nopo pinoimpahan di walai'ddi om watu dot angagayo di nosodia' mantad no do hiri pod pinongonuan di watu. Iri nopo watu'ddi om haro tolu om satanga' o mito do konoruo' om haro ot apat o mito do konoruo'. 11 Om id sakai nopoddi om pinotimpakan po do watu'd suwai di binabak do tumanud di sukatan. Om lopisai nogiddi do kayu sedar do Libanon. 12 Iri nopo winonsoi do tolig di natad di walai di raja' om i natad di ponong id suang di Walai'd Sasambayangan dot Agayo om i kakilima' do hiri, om watu do tolu o lapis om lopisai nogiddi do sallapis o kayu sedar do Libanon.
Karaja' di Huram do Minomongo Kopio di Walai'd Sasambayangan dot Agayo
13 Om ponuhu' noddi i Raja' Suliman do tulun do minongoi pomolohou do songulun o kusai, i roitan dot i Huram, do mantad hilo'd bandar do Tirus. Iri nopo tulun diri nga' oilo kopio do mongikir do tambaga'. 14 Iri nogi' i tapa' dau, i mantad hilo'd Tirus, nga' mongingikir nogi' do tambaga' di poimpasi po iyau. Iri nopo tina' dau nga' mantad id payat do Naptali. I Huram nopodti om tukang no kopio dot id suang do karaja'ddi om noubas no tomod do mongikir do tambaga'. Om suhuo' no iyau di Raja' Suliman do sumiliu'd boyoon do koinsanai di wonsoyon di haro o tambaga'; om kookunai i' di Huram iri.
Duwo o Torigi do Tambaga'
15-20 Om pomonsoi no i Huram do duwo o torigi do tambaga', do kakawaso' nopo di torigi'ddi om walu' o mito, om kogoyoo' no om 5.3 o mito. Om minomonsoi po iyau do duwo o tulu do pinoulu di duwo o torigi do tambaga'ddi do miirad nopo o kakawaso' do 2.2 o mito. Hiri nopod dompok ponong id sawat di pinongulu diri om winansayan dau di koiyo-iyo do tusak do bunga bakung do 1.8 o mito do kakawaso'. Om hiri nopod siriba-riba' di koiyo-iyo do tusak do bunga bakung, i hiri'd kinoimpohon diri, om winansayan dau do pinoiyo-iyo di rantai do rinambo-rambot om winansayan do duwo o rulud di pinoiyo-iyo do tua' do delima. Om sopiduwo nopo nahatus i winonsoi do pinoiyo-iyo do tua' do delima do hiri'd duwo o tulu do torigi'ddi. Om oinsanan nopo i pinongillumis diri do tambaga' do winonsoi. 21-22 Iri nopo pinongulu di torigi'ddi di pinoiyo-iyo do tusak do bunga bakung om pinotimpak dau di duwo o torigi. Om poudongo' noddi di Huram i duwo o torigi do tambaga'ddi do hiri'd dotimbabaan di wawayaan di Walai'd Sasambayangan dot Agayo. Iri nopo torigi di ponong hiri'd salatan om pinungaranan dau do Yakin, om iri no torigi di ponong id utara om pinungaranan dau do Buas. Om kopongo noddi i karaja'ddi.
I Tangki' do Tambaga'
23 Om pomonsoi po i Huram do tangki' do tambaga' dit ourug. Korolomo' nopoddi om 2.2 o mito, om sukatan no do padarapas di kabang om 4.4 o mito, om kogoyoo' no do pointutuk om 13.2 o mito. 24 Om pointutuk nopo di tangki' do ponong id soliwan om kinikiran do duwo o rulud di pinoiyo-iyo do tua' do tawadak, do pinasandad mantad do mongikir di wonsoyo' i' i tangki' do tambaga'. 25 Om pinoimpahan nopo di tangki' om hiri'd likud do hopod om duwo o sapi' do tambaga' do winonsoi do potoguang ponong id soliwan. Om sorotolu-tolu nopo i sapi'ddi do potoguang dot id iso' o kohunungon. 26 Kakapalo' nopo di tangki' om turu' nohopod om limo o milimito. Iri nopo kabang di tangki' om miagal di kabang do sangkir, om posuringa' do miagal di tusak do bunga bakung di noungkalad no. Orumpos nopo di tangki' om apat nohopod noribu lito do waig.
I Korita'-Kuda' do Tambaga'
27 Om minomonsoi nogi' i Huram do hopod o korita'-kuda' do tambaga' do winonsoi; do 1.8 mito do konoruo', om 1.8 mito do kalaabo', om 1.3 mito o kasawato'. 28 Iri nopo korita'-kuda'ddi om papan dit abasagi' o winonsoi do pinodokot dot id boruti di nowonsoi no do maan do padakatan. 29 Iri nopo papan diri om kinikiran do pinoiyo-iyo do singa, om sapi', om pinoiyo-iyo do moloikat di roitan do kerub; om hiri nod boruti di pinadakatan di papan, do hiri'd sawat om hiri'd siriba' di kinikiran di pinoiyo-iyo do singa om sapi', om pinadakatan di winonsoi do pinoiyo-iyo do tusak do bunga di sinulu. 30 Om iri nopo piro-piro korita'-kuda' om saraapatan do ruda' do tambaga' do winonsoi, om i pinawansayan di ruda' nga' tambaga' i'. Hiri nopod apat o linsuk di korita'-kuda' om winansayan do ponukod di tambaga' do winonsoi, do ponukod di poiyanan do luping, om i ponukod nga' pinadakatan i' di winonsoi do pinoiyo-iyo do tusak do bunga di sinulu do maan do pongillumis. 31 Hiri nopod sakai di ponukod diri om haro o winonsoi do poingurug do porusadan do luping. Iri nopo ponukod diri om 44 sontimito do posoibau di papan di korita'-kuda' om 22 sontimito do poirusod di korita'-kuda'. Om kinikiran o pointutuk di porusadan diri. 32 Kasawato' nopo di ruda' om onom nohopod om onom o sontimito. Iri nopo ruda'ddi om pinowonsoi do hiri'd siriba-riba' di papan di pinodokot. Iri nopo pinawansayan di ruda' om pasagalai i' di korita'-kuda'. 33 Iri nopo ruda' di korita'-kuda'ddi om miagal nopo do ruda' di korita'- kuda' do don sumasangod; iri pinawansayan di ruda', om i riim, om i sipuk om i buulbiring nga' tambaga' ngai' i' do winonsoi. 34 Om hiri nopod siriba' dit apat o linsuk do pointikid-tikid di korita'- kuda' om haro ot apat o ponukod di pasagalai di korita'-kuda' o pinomonsoi. 35 Om pointutuk nopo di ponong id sawat di korita'-kuda' om nisanan do duwo nohopod om duwo sontimito o kalaabo'. Iri nopo pinonukod diri om i papan di pinodokot di korita'-kuda' om pasagalai i' di korita'-kuda'. 36 Iri nopo pinonukod om i papan di pinodokot om kinikiran ngai' nopo do pinoiyo-iyo do moloikat di roitan do kerub, om pinoiyo-iyo do singa om guas do kurma, do hinonggo nopo i haro o pokikiran. Om notutuk ngai' nopo iti di winonsoi do pinoiyo-iyo do tusak do bunga di sinulu. 37 Om iyo noddi o pinomonsoi dau di korita'-kuda', tu' oiyo nopo o pinomonsoi om oiyo o kogoyo-goyoo'. 38 Om minomonsoi nogi' i Huram do hopod o luping dot angagayo do soroisaan nopo i korita'-kuda'ddi. Om oiyo nopo kogoyoo' do sukatan do padarapas di kabang di luping do 1.8 o mito, om walu' nahatus o lito do waig do korumpos. 39 Om poiliho' no di Huram o limo di korita'-kuda'ddi do ponong id salatan di Walai'd Sasambayangan dot Agayo, om limo o ponong id utara. Om iri no tangki' do tambaga' om pinoiliu do hiri'd linsuk ponong id salatan do ponong id koulayon.
Dopitar di Piro-Piro o Pakakas do Hiri'd Walai'd Sasambayangan dot Agayo
40-45 Om minomonsoi nogi' i Huram do piro-piro o kuali', om pononduk, om mangkuk. Om kopongo ngai' noddi dau i karaja' dau dot id di Raja' Suliman do hirion id Walai'd Sasambayangan dot Agayo. Iti ngai' no i winonsoi dau: Duwo o torigi dit agayo Duwo o tulu do pongulu di duwo o torigi I koiyo-iyo do rantai di rinambo-rambot do hiri'd tulu di pinoulu di torigi Apat nahatus o koiyo-iyo do tua' do delima do tambaga' do winonsoi do pinorulud do duwo o rulud, do sarahatus-hatus o koiyo-iyo do tua' do delima do pinodokot do pointutuk di koiyo-iyo do rantai di rinambo-rambot do hiri'd duwo o tulu di pinoulu di torigi Hopod o korita'-kuda' Hopod o luping dot agayo Tangki' do tambaga' Hopod om duwo sapi' do tontoluhan di tambaga' do winonsoi do poimpahan di tangki' Piro-piro o kuali', om pononduk om mangkuk Koinsanai di pakakas do tambaga' di hirion id Walai'd Sasambayangan dot Agayo'ddi om kinisasan ngai' nopo di Huram do gisom dot ongokolong o kokitanan do tumanud di pinonuhuan di Raja' Suliman. 46 Om pinonuhuan nopo di raja' dot iyonon do momonsoi di pakakas diri om hiri'd podsusupuan dit id piolitan do Sukot om Saritan, i hilo'd Rantai do Yordan. 47 Om a' i' di Suliman insan kotimbang i pakakas do tambaga'ddi tu' adalaan no kopio kogumu'. Om gowoi poddi om a' no noilaan o winagat diri. 48-50 Om minonuhu' nogi' i Suliman do momonsoi di pakakas do tamas o wonsoyon do hirion id Walai'd Sasambayangan dot Agayo. Om iti no ngai' iri: Pananaraban do porsombahan Mija' do poiyanan do roti di patahakon dot id Kinorohingan Hopod o potimpakan do lampung dit id dotimbabaan di Bilik dit Olidang Kopio, do limo o mija' do ponong id salatan om limo o ponong id utara Bunga Lampung Sanggip Sangkir I Pomimisok do lampung Mangkuk Piring do poiyanan do kominyan Talam do poiyanan do popou Tontolingo di totobon di Bilik dot Olidang Kopio om i totobon di ponong id soliwan di Walai'd Sasambayangan dot Agayo. 51 Om kopongo ngai' poddi di Raja' Suliman i karaja' do hiri'd Walai'd Sasambayangan dot Agayo om poopio' nogi' dau do hiri'd Bilik di poopian do konunu-nunuan di Walai'd Sasambayangan dot Agayo i pirok, om tamas, om i konunu-nunuan do suwai di pinatahak di Daud, i tapa' dau, dot id Tuhan.
Pinoopi' do Hiri'd Walai'd Sasambayangan dot Agayo i Kaban do Tumpongo'd Tuhan
1 Om lohowo' ngai' noddi di Raja' Suliman i boyoon do payat om pinuruan do sompiiyon dot Israil do mongoi solowot dau do hilo'd Yorusalim, om oongoi indo diyolo' i Kaban do Tumpongo'd Tuhan do mantad hilo'd Sion, i Bandar di Daud, om pokoyoon nondo do hiri'd Walai'd Sasambayangan dot Agayo. 2 Om timung ngai' nopo iyolo' do tontok di Tadau'd Agayo do Kinuhub-Kuhub, do koontok di tulan dot Itanim. 3 Om kotimung ngai' poddi i boyoon om kakato' nogiddi di piro-piro ot imam i Kaban do Tumpongo 4 om saano' no do pinakaa do hiri'd Walai'd Sasambayangan dot Agayo. Om pinawaliu nogi' di tulun do Liwi i Kiim do Tuhan om koinsanai di pakakas do hiri, do pinosuang do hiri'd Walai'd Sasambayangan dot Agayo. 5 Om timung noddi i Raja' Suliman om koinsanai di tulun dot Israil do hiri'd dotimbabaan di Kaban do Tumpongo om papatahak no iyolo' do dumba' om sapi' dot ogumu' kopio gisom dot a' no ointob-intob o kogumuo'. 6 Om posuango' nogiddi di piro-piro ot imam i Kaban do Tumpongo do hiri'd Walai'd Sasambayangan dot Agayo om poiliho' no do hiri'd Bilik dit Olidang Kopio do hiri'd sahau di winonsoi di koiyo-iyo do moloikat di roitan do kerub. 7 Om notirung diri di talad di winonsoi di koiyo-iyo do moloikat do roitan do kerub i Kaban diri om i kayu di pinangantayang, tu' poungkalad i talad di winonsoi'ddi. 8 Iri nopo kayu di pinangantayang diri om anaru kopio gisom dot iri no i tulun do poingkakat dot id hapak kopio di Bilik dot Olidang Kopio o kokito di tompok di kayu do pinangantayang. (Hilo' kasai' po i kayu do pinangantayang diri do gisom do baino'.) 9 Om suang nopo di Kaban do Tumpongo om aiso' i' o suwai ko' i duwo o kaping do watu di pinosuang di Musa do hiri di hilo' pod Nuluhon do Sinai, do tontok di minomonsoi o Tuhan do tumpongo dot id tulun dot Israil di hilo' iyolo'd tindalanon do mantad id Masir. 10 Om maha' di sumoliwan nogi' i piro-piro ot imam do mantad hiri'd Walai'd Sasambayangan dot Agayo om sigog id koponu' do haun i Walai'd Sasambayangan dot Agayo 11 di mogulinau tomod om kosorong kopio, tu' iri no o kagayaan do Tuhan. Om a' noddi i piro-piro ot imam diri kosuang kawagu do mongoi paganu-anu di buruon diyolo'. 12 Om sambayang noddi i Suliman, “Iya' i', oi Tuhan, i pinopoiyon dilo tadau do hilo'd tawan, nga' pinokouhang nu i' do miyon do hilo'd pituongon do haun. 13 Nokopomonsoi oku noddi do Walai'd Sasambayangan dot Agayo, dit olumis kopio do tiyonon nu do gisom dot alaid,” ka.
Boros di Suliman dot id tulun dot Ogumu'
14 Om daamot di tulun do songingkakat do hiri, om toguang no i Raja' Suliman do tuminimbaba' diyolo', om pokionuwai no dau iyolo'd Kinorohingan do barakat. 15 Boros ka dau, “Royohon no o Tuhan, i Kinorohingan dot Israil! Tu' nabayaan no dau i batos dau dot id di Daud, i tapa' ku, do poingkaa, 16 ‘Mantad po di pinosoliwan ku i' o tulun ku do mantad hilo'd Masir, om aiso' i' o bandar do hiti'd pomogunan dot Israil do pinili' ku do pamansayan do Walai'd Sasambayangan dot Agayo dot iyonon do sumambayang dot id doho'. Nga' pinili' ku i' iya', oi Daud, do momorinta' do tulun ku,’ ka,” ka dau. 17 Om boros ka kawagu di Suliman, “Nokopomusorou no daa i Daud, i tapa' ku do momonsoi do Walai'd Sasambayangan dot Agayo dot iyonon do sumambayang dot id Tuhan, i Kinorohingan dot Israil. 18 Nga' boros kad Tuhan dot id dau, ‘Osonong nogi' kopio o korohian nu'ddi do momonsoi do Walai'd Sasambayangan dot Agayo do tiyonon ku, 19 nga' okon i' ko' iya' o momonsoi di walai'ddi, suwai ko' i tanak nu,’ ka dau. 20 Om nabayaan noddi do Tuhan i batos dau. Nosiliu oku noddi do raja' dot Israil do suminowoli di tapa' ku, om nowonsoi ku no i Walai'd Sasambayangan dot Agayo, i tiyonon do sumambayang dot id Tuhan, i Kinorohingan dot Israil. 21 Om haro nogi' o tiyonon do nokosodia' ku do hiri'd Walai'd Sasambayangan dot Agayo do poiyanan di Kaban do Tumpongo, i pinosuangan di duwo kaping do watu, i pinotulisan di Tumpongo'd Tuhan dot id taki-aki toko' do tontok di pinosoliwan dau iyolo' do mantad hilo'd Masir,” ka dau.
Sambayang di Suliman
22 Om ongoi noddi i Suliman ingkakat do hiri'd dotimbabaan di pananaraban do porsombahan dot antang-antangan do koinsanai di tulun dot Israil. Om poinsawato' goduwo no dau o longon dau, 23 om sambayang no do poingkaa, “Oi Tuhan, i Kinorohingan dot Israil! Aiso' no o Kinorohingan do koiyo diya' do hilo'd sawat ko' hiti pod pomogunan! Binayaan nu i' i tumpongo nu dot id tulun nu om pointalangan nu iyolo' di kosianan nu do tontok dit iso-iso' kopio o ginawo diyolo' do mumboyo' diya'. 24 Binayaan nu i' i batos nu dot id di Daud, i tapa' ku; om baino' nopoddi, om nowonsoi ngai' nu no o koinsanai di nokoboros nu. 25 Om baino' nodti, oi Tuhan, i Kinorohingan dot Israil, om pokionuon ku do bayaanon ngai' nu i batos nu di koduwo dot id tapa' ku. 26 Iyo nopoddi, oi Tuhan, i Kinorohingan dot Israil, om wonsoyo' ngai' no o koinsanai di nakabatos nu di tapa' ku, i Daud, i susuhuon nu'ddi. 27 Nga' milo ko i' tuu do mundorong do hiti'd pomogunan? Tu' oinsanan piya ilo tawan nga' a' nu i' kabagal! Om okuro-kuro nogindo ilo Walai'd Sasambayangan dot Agayo di winonsoi ku! 28 Nga' pokinongoho' no daa o sambayang ku, oi Tuhan, i Kinorohingan ku. Om patahako' no iti pokionuon ku do tadau'd baino'. 29 Intirungai no iti Walai'd Sasambayangan dot Agayo do tadau om totuong, i pinili' nu dot iyonon nu do tontok di sumambayang oku om i tulun nu do potimbaba' diti walai'dti. 30 Om pokinongohon no o sambayang ku om sambayang dilo tulun nu do soira' nopo do sumambayang iyolo' do potimbaba' diti walai. Om maha' daa om pokinongohon nu iyahai om ompunan nu iyahai do mantad hino'd kinoiyonon nu do hino'd surga. 31 Om soira' nopo do haro o tulun do tondoson do nokowonsoi do sala' dot id tulun do suwai, om it angatan do hiti'd dotimbabaan do pananaraban do porsombahan nu do hiti'd Walai'd Sasambayangan dot Agayo diti, do mongoi sumpa' dot aiso' o sala' dau, 32 om pokinongohon no i tulun diri, oi Tuhan, do mantad hino'd surga, om butusan no i susuhuon nu. Om hukuman no i tulun di kisala' om poiduwon no i tulun dit aiso' o sala'. 33 Om soira' nopo dot aala' o tulun dot Israil do pisangod diyolo', tu' obungou di dusa diyolo', om mokitulung nopondo iyolo' diya' om rumikot do hiti'd Walai'd Sasambayangan dot Agayo diti do mongoi sambayang dot id diya' do mikuwo'd osiriba' o ginawo do mokiampun diya', 34 om maha' daa om pokinongohon nu'ri do hino'd surga. Om ompunan no o dusa di tulun nu, om pogulion no iyolo' kawagu do hilo'd pomogunan di nakatahak nu di taki-aki diyolo'. 35 Om soira' nopo dot a' nu parasamon tu' i nokopomonsoi'd dusa dot id diya' i tulun nu ot a' nu kaparasaman, om kumorologo nopondo iyolo' di dusa diyolo' om tumimbaba' diti Walai'd Sasambayangan dot Agayo om sumambayang do mikuwo'd osiriba' o ginawo, 36 om pokinongohon nori do hino'd surga. Ompunan no o dusa di tulun dot Israil om i dusa di raja' diyolo'. Tudukan no iyolo' do momonsoi dit otopot. Om parasamon nogindo o hiti'd pomogunan nu'dti, oi Tuhan, i pomogunan do pinatahak nu dot id tulun nu do sumiliu do diyolo'd songonuon do gisom dot alaid. 37 Om soira' nopo do mononglous ko' madsakit, ko' angaraag o tanom-tanom dot oontok di tongus dot alasu', ko' akanon do godu, ko' di songodon do pisangod o tulun nu, ko' oontok do toruo-ruol, 38 om pokinongohon no o sambayang diyolo'. Om ondung haro ot id pogiolitan do tulun dot Israil di tumongob om sumambayang nondo dot id diya' do mikuwo'd poinsawat do longon do potimbaba' diti Walai'd Sasambayangan dot Agayo diti 39 om pokinongohon no o pokionuon diyolo' do mantad hino'd tiyonon nu do hino'd surga. Om ompunan no iyolo' om uhupan no iyolo'. Tu' iya' no o koilo dit id suang do ginawo'd tulun. Om wonsoyo' no dot id pointikid-tikid do tulun it apatut do wonsoyon dot id diyolo', 40 om oronok i' om otorodok i tulun nu do mumboyo' diya' do solinaid diyolo' do poundorong do hiti'd pomogunan di nakatahak nu di taki-aki dahai. 41-42 Om soira' nopo do haro o bansa'd suwai di hilo'd sodu' do korongou do kagayaan nu om koimayaan di nowonsoi nu, om rumikot nondo do hiti'd pomogunan diti do mongoi tuku' dot id diya' om sumambayang do potimbaba' diti Walai'd Sasambayangan dot Agayo 43 om pokinongohon no iyau do mantad hino'd tiyonon nu do hino'd surga om patahakon no i pokionuon dau. Om oinsanan indo o tulun do hiti'd pomogunan do kotutun diya' om otorodok do mumboyo' diya' do miagal do tulun nu, i bansa' dot Israil. Om koilo indo iyolo' dot iti nopo walai di winonsoi ku om tiyonon do sumambayang dot id diya'. 44 Om soira' nopo do suhuon nu o tulun nu do mongoi sangod do pisangod diyolo', om hinonggo nopondo iyolo', nga' tumimbaba' i' iyolo' diti bandar do nopili' nu om sumambayang do potimbaba' diti walai do winonsoi ku do tiyonon nu, 45 om pokinongohon no o sambayang diyolo' do hino'd surga om onuan no iyolo' do kamanangan. 46 Om soira' nopo do momonsoi'd dusa o tulun nu, gisom do songulun po nga' aiso' no ot aiso' o dusa, om pologoson nu nondo iyolo' dot aala' do pisangod tu' adalaan ko no kopio'd otogod, om atanggayan nondo iyolo' do pisangod do kumaa id pomogunan do suwai, di hilo'd sodu' ko' it id somok, 47 om pokinongohon no o sambayang diyolo'. Ondung rumologo iyolo' om sumambayang iyolo' dot id diya', om magaku iyolo' di dusa om i kararaat diyolo' do potimbaba' do pomogunan diti om pokinongohon no i sambayang diyolo', oi Tuhan. 48 Ondung iso-iso' kopio o ginawo diyolo' do rumologo do daamot diyolo' do hiri'd pomogunan diri om sumambayang dot id diya' do potimbaba' diti pomogunan di pinatahak nu di taki-aki dahai, om potimbaba' diti bandar di nopili' nu, om potimbaba' diti walai do tiyonon do sumambayang di winonsoi ku diya', 49 om pokinongohon no o sambayang diyolo', do mantad hino'd tiyonon nu do hino'd surga, om kosianai no diyolo'. 50 Ompunai ngai' no o dusa om karaaton diyolo' dot id diya', om pologoso' no dot osonong i pisangod diyolo' dot id diyolo'. 51 Iyolo' nopo om tulun di songonuon nu, i pinosoliwan nu do mantad id pomogunan do Masir, i kinoiyonon do miagal do tapui do naraka. 52 Oi Tuhan, i Kinorohingan, piantangan no kasai' o tulun dot Israil, i tulun nu, om i raja' diyolo'. Om korohiai no do mokinongou do sambayang diyolo' do pointikid-tikid do lumohou iyolo' do mokitulung diya'. 53 Iya' no o minomili' diyolo' dot id pogialatan do koinsanai do bansa' do silihon do diya'd tulun, do miagal di nokoboros nu dot id di Musa, i susuhuon nu, do tontok di pinosoliwan nu i' iyolo' do mantad hilo'd Masir,” ka dau.
Sambayang do Kopupuson
54 Om iyo noddi i Suliman do suminambayang do mikuwo'd minotud dot id dotimbabaan di pananaraban do porsombahan, om poinsawat o longon dau. Om ingkakat noddi iyau, 55 om boro-boros no dot opuhod do mokianu'd Kinorohingan do barakat do patahakon do toinsanan di tulun di pointimung do hiri. Boros ka dau, 56 “Royohon no o Tuhan i minanahak do tulun dau do kosimbayanan do miagal di nakabatos mantad dau do pinolombus di Musa, i susuhuon dau. Tu' oinsanan nopo i batos diri dot osonong om nangabayaan ngai' dau. 57 Om maha' daa om woyoon toko' do Tuhan, i Kinorohingan toko', do miagal di minomoyo' iyau di taki-aki toko', maha' daa om a' toko' dau tongkiadan. 58 Om maha' daa om silihon toko' dau do tulun dit ongotorodok dot id dau, om i momonsoi kasai' di korohian dau, om tumanud do koinsanai dit oturan om ponuhuan di pinoboros dau di taki-aki toko'. 59 Om maha' daa om osorou do Tuhan, i Kinorohingan toko', o koinsanai di sambayang om i pinokianu ku dot id dau. Om maha' daa om barakatan kasai' dau o tulun dot Israil om i raja' diyolo' do miontok di pokionuon diyolo' do monikid tadau. 60 Om koilo indo o koinsanai di bansa' do hiti'd pomogunan do Tuhan noo o Kinorohingan, om aiso' no o suwai. 61 Om tumorodok kou no dot id Tuhan, i Kinorohingan toko', iyokoyu i tulun di songonuon do Tuhan, om tumanud do koinsanai dit oturan om ponuhuan dau do miagal diti wonsoyon dokoyu do baino',” ka dau.
Pinatahak dot id Kinorohingan i Walai'd Sasambayangan dot Agayo
62 Om patahak noddi i Suliman om koinsanai di tulun do pointimung do hiri do porsombahan di sinumbali' dot id Tuhan. 63 Pinapatahak i Suliman do 22,000 o tinan do sapi' om 120,000 o tinan do dumba' do maan do porsombahan do piombolutan. Om iyo noddi i raja' om koinsanai di rayat do pinapatahak di Walai'd Sasambayangan dot id Kinorohingan. 64 Om tontok nogi' do tadau'ddi do sinambayangan dau i kakilima', i hiri'd gulu kobontol di Walai'd Sasambayangan dot Agayo'ddi. Om hiri no iyau id kakilima' do pinapatahak do porsombahan do sorobon, om porsombahan do gandum, om lunok do tayam-tayam do maan do porsombahan do piombolutan. Hiri ngai' nopo o pinatahakan dau'ddi tu' okoro' i' kopio i pananaraban do porsombahan di tambaga' do winonsoi, do poiyanan do koinsanai di porsombahan diri. 65 Om hiri nogi'd Walai do Sasambayangan dot Agayo'ddi i Suliman om koinsanai di tulun dot Israil do pinapaharo do Tadau dot Agayo do Kinuhub-Kuhub, do solinaid do turu' o tadau. Om ogumu' no kopio o tulun do ruminikot; mantad pod hilo'd Ralan do Hamat di ponong id utara, om gisom do hilo'd piwolitan do Masir di hilo'd salatan. 66 Om kawalu' poddi do tadau, om suhuo' ngai' nogi' di Suliman i tulun do muli'. Om ongotood tomod diri iyolo' do minuli', om minamarayou iyolo' di raja' do koinsanai di barakat di pinatahak do Tuhan dot id di Daud, i susuhuon dau om id koinsanai di tulun dau, i bansa' dot Israil o kinapamarayahan.
Minintalang Kawagu o Kinorohingan dot id di Suliman
1 Om kongopongo poddi di Suliman do mamaal i Walai'd Sasambayangan dot Agayo om i walai dau di don raja' om koinsanai di nosorou mantad dau do wonsoyon, 2 om intalang no kawagu o Tuhan dot id di Suliman do miagal di nosiliu di hilo'd Gibion. 3 Om boros kad Tuhan dot id di Suliman, “Norongou ku no i sambayang nu. Om korohian ku i' ilo walai di winonsoi nu do tiyonon do sumambayang dot id doho' do gisom dot alaid. Piantangan ku indo om piintirungan ku o kinoiyonon diti. 4 Ondung sumambayang ko dot id doho' do mikuwo'd otulid om iso-iso' kopio o ginawo do miagal di Daud, i tapa' nu om tumanud ko dit oturan ku om i ponuhuan ku diya', 5 om bayaanon ngai' ku indo i nakabatos ku dot id di Daud, i tapa' nu, do haro kasai' nopondo o sinakagon dau dot osiliu'd raja' do momorinta' dot Israil. 6 Nga' ondung tolikudan oku dokoyu, om i sinakagon nu nga' tumolikud doho', om a' kou mumboyo' dit oturan ku om i ponuhuan ku, om tumuku' kou nogindo dot id ponokokinorohingan do suwai, 7 om uyungon ku nondo o tulun dot Israil do mantad hiti'd pomogunan di nakatahak ku diyolo'. Om tongkiadan ku iti walai di tinantu' ku do tiyonon do sumambayang dot id doho'. Om intingayamon nondo om irak-irakan o tulun dot Israil do hinonggo nopo iyolo'. 8 Om pogun pondo iti Walai'd Sasambayangan dot Agayo gisom dot isai nopo o tulun do katalib do hiti nga' kotigowo ngai' nopo om osuayan. Om muhot nondo iyolo' do poingkaa, ‘Nokuro tu' iyo'dti o winonsoi do Tuhan dot id pomogunan diti om id Walai'd Sasambayangan diti?’ kando diyolo'. 9 Om haro nondo o tulun do sumimbar do poingkaa, ‘Kinokuwaan nopoddi om tuminongkiad giya iyolo'd Tuhan, i Kinorohingan diyolo', i minomoyo' di taki- aki diyolo' do suminoliwan do mantad hilo'd Masir. Om tuminuku' iyolo' dot id ponokokinorohingan do suwai, gowoi poddi om pinorikot do Tuhan iti kosusaan dot id diyolo’ kando diyolo',” kad Kinorohingan.
Pinitoruan di Suliman om i Raja' Hiram
10 Om koloido' nopo di Suliman do minomongo di Walai'd Sasambayangan dot Agayo om i walai do raja' nga' duwo nohopod o toun. 11 Om nonuan di Hiram i raja' do Tirus, i Suliman do kayu sedar do Libanon om kayu sedar di koubasanan, om tamas do pinomonsoi ngai' di walai. Om kopongo ngai' poddi iri, om onuwai noddi di Suliman i Hiram do duwo nohopod o bandar do hilo'd watas do Galilia. 12 Om ngoyo' no daa di Hiram antangai iri nga' a iddi iyau orohian di pinatahak diri. 13 Om boros ka dau dot id di Suliman, “Oi tobpinai ku, iyo pama'dti o bandar do patahakon nu doho'?” ka. Om gisom do baino' nga' pungaranan kasai' po o watas diri do Kabul. 14 Koinsanai nopo do tamas do nakatahak di Hiram dot id di Suliman nga' lobi id apat noribu o kilogram do kawagato'.
Piro-Piro o Winonsoi di Suliman do Suwai
15 Sinansagan ngai' di Raja' Suliman i tulun do minomonsoi di Walai'd Sasambayangan dot Agayo om i walai do raja', om i tolig di bandar om minonimbun do tana' do ponong hiri'd salatan di bandar. Om iyo iddi o ralan dau do pinopoingkakat do bandar do Hasor, Mogido om Gisir. 16 (Bandar nopo do Gisir om i nongoi di raja' do Masir songodo' di gulu po gisom do naala' dau iri, om patayo' ngai' nopo dau i tulun do hiri om tinutudan dau i bandar. Om popuhawango' noddi dau i bandar diri di tanak dau'd tondu' do tontok di minikawin iyolo' di Suliman. 17 Om wonsoyo' no kawagu di Suliman i bandar diri.) Om minononsog i' i Suliman do tulun do minomonsoi kawagu do Bait-Horon di ponong id sawa', 18 om Baalat, om Tamar, i hilo'd tana' do kowotuan do Yohuda, 19 om i piro-piro o bandar do poiyanan do kaakan-akanan dau, om i piro-piro o bandar do poopian dau do kuda' om korita'-kuda' do don sumasangod di dong raja', om koinsanai di ponuhuan dau'd momonsoi do hilo'd Yorusalim, om hilo'd Libanon, om hinonggo nopo do hiri'd pomorintaan dau do miagal di nosorou mantad dau do wonsoyon dau. 20-21 Iri nopo i sinansagan dau do kumaraja' nga' i tulun do Kanaan dit a' di tulun dot Israil pinatai dit ongoyo' i' diyolo' iyono' o pomogunan diri. Iyolo' nopo nga' tulun dot Amori, Hit, Poris, Howi om Yobus, i notilombus do nosiliu do turipon o sinakagon diyolo' do gisom do baino'. 22 Ongosongulun piya di tulun dot Israil nga' aiso' i' o siniliu di Suliman do turipon. Iyolo' nopo nga' siniliu dau do soudor, om pagawai, om boyoon do soudor, om popongigiton di korita'-kuda', om soudor dit ongkikuda'. 23 Om limo nahatus om limo nohopod o tulun do sinuhu' dau do miontong di turipon di sansagan do kumaraja' do momonsoi ngai' di walai do wonsoyon di Suliman. 24 Iri nopo tana' di ponong id koulayon do mantad hiri'd bandar nga' tinimbunan di Suliman di nokoundaliu i sawo dau, i tanak di raja' do Masir do mantad hilo'd Bandar di Daud do minongoi do hiri'd walai do raja' di winonsoi di Suliman dot iyonon dau. 25 Om intolu do sontoun do papatahak i Suliman do porsombahan di sorobon om porsombahan do piombolutan do hiri'd pananaraban do porsombahan di winonsoi dau do maan do don Tuhan. Om modtutud nogi' iyau do kominyan do maan do don Tuhan. Iyo noddi i Suliman do minomongo di Walai'd Sasambayangan dot Agayo. 26 Om pomonsoi no i Suliman do kapal do rahat do maan di soudor dau do hilo'd rahat, i hilo'd Ision-Gibir, i hilo'd somok dot Ilat, it id tisan do Suok dot Akaba, it id watas dot Idom. 27 Om minonuhu' nogi' i Hiram do piro-piro o tulun dau dit ongoilo do papamanau do kapal do rahat do moyo' di tulun di Suliman do papamanau di kapal do rahat. 28 Om pakayaai no diyolo' do hilo'd Opir, om hilo' no o nangayan diyolo' do hopod om apat noribu o kilogram do kawagato' do tamas do pinatahak diyolo' di Suliman.
Minongoi Solowot di Suliman i Raja' do Tondu' do Siba
1 Hilo' nopod Siba om tondu' o raja' diyolo'. Om nokorongou no i raja'ddi do kobontugo' di Suliman. Om pakayaai no dau do hilo'd Yorusalim do mongoi pogumbal di Suliman do piro-piro o tuhoton dit angaralom. 2 Om pinapatanud nogi' iyau do tulun dot ogumu', om unta di ginandaran do rampa om watu dot olumis dit agayo o gatang, om tamas dit ogumu' kopio. Om kosolowot poddi iyau di Suliman om uhoto' no dau iyau do koinsanai di tuhoton dit osorou-sorou dau. 3 Om nosimbar ngai' nopo di Suliman i tuhoton diri, om aiso' i' o tiso' dot adalaan karalom dot id di Suliman. 4 Om koilo nogiddi kopio i raja' do tondu' do Siba do toilaan di Suliman. Om nokito nogi' ngai' dau it id suang di walai di Suliman, 5 om kowoyo-woyoo' di pagawai do kumaraja' do hiri'd walai do raja', om kowoyo-woyoo' di susuhuon do modsurung, om i pakayan diyolo' dot oiyo nopo, om i taakanon do posurungon diyolo', om iri ngai' i bilik dit iyonon diyolo'. Om nokokito nogi' iyau di porsombahan di sumbolion di patahakon di Suliman do hiri'd Walai'd Sasambayangan dot Agayo. Om oimayaan tomod diri om olumisan tomod i raja' do Siba do nokokito ngai'ddi. 6 Om boros ka dau dot id di Suliman, “Otopot no kopio i norongou ku do hilo'd pomogunan ku do pasal diya' om pasal do toilaan nu, oi Tuan! 7 Nga' korikot oku poddi do minongoi kopio intong, om kotumbayaai oku nogi' kopio. Om iri no i norongou ku om a' po kopintanga' diti nokito ku. Ogumu' po ko' i norongou ku o kakayao' nu om opintar ko ko' i norongou ku, oi Tuan. 8 Nongkoundar no kopio o koinsanai di sawo nu! Om ongolumaag no ngai' i pagawai nu dit id doros nu tu' korongou kasai' di ponudukan nu dit angaralom! 9 Royohon no o Tuhan, i Kinorohingan nu. Pinointalang dau dot asanangan iyau diya' tu' siniliu ko i' dau do raja' dot Israil. Tu' mompus-ompus i' o kosianan dau dot id tulun dot Israil, om iri no o kinopomilian dau diya' do raja' diyolo' om milo ko i' do popogirot dot oturan om it otulid,” ka dau. 10 Om patahako' no di raja' do tondu' do mantad hilo'd Siba dot id di Suliman o koinsanai di pomuhawang do nigitan dau do mantad hilo'd pomogunan dau. Iri nopo nga' apat noribu kilogram do tamas, om ogumu' po o rampa om watu dit olumis dit agayo o gatang. Iri nopo i rampa di pinatahak di raja'd Siba diri nga' ogumu' no kopio ko' i naanu di Suliman di maso do nakatalib, om a' noddi iyau nokoumbal do nakaanu do rampa do miagal diri kogumu' do mantad diri. 11 (Om iri ngai' i kapal do rahat di Hiram nga' pinapaatod nogi' do tamas do mantad hilo'd Opir do patahakon di Suliman, om minigit po iyolo' do kayu cendana. 12 Om iri nopo kayu'ddi nga' numaan di Suliman do tolig di kakilima' di Walai'd Sasambayangan dot Agayo om i kakilima' di walai'd raja', om winonsoi nogi' do tuunion, do kecapi om gambus, do maan di popouni do tuunion. Iri nopo nga' kayu cendana dit osonong no kopio di noumbalan do pinaatod do hilo'd Israil. Mantad poddi om a' no nokoumbal o tulun do nokokito do kayu do miagal diri kosonong.) 13 Om iri no i raja' do tondu' do Siba diri, om nonuan di Suliman do koinsanai di pinokianu dau, do suwai mantad ko' i koubasanan dau do popuhawang. Om uli' noddi i raja' do tondu'ddi do hilo'd pomogunan do Siba do mogiwoyo-woyo' di tulun dau di tuminanud dau.
Kakayao' di Raja' Suliman
14-15 Om suwai nopo ko' i sukai di bayaran di mongingindapu' om i kountungan do mantad id pongindopuan, om i bayaran di piro-piro o raja' dot Arab om i gobunor do koinsanai di watas dot Israil, om kaanu po i Raja' Suliman dot osomok no do duwo nohopod om tolu noribu kilogram do tamas do pointikid-tikid do toun. 16 Minomonsoi nogi' i Suliman do duwo nahatus o kolid dit agayo, i nurogupan ngai' do tamas do haro i' doti' o turu' o kilogram do tamas do pinonguragup dot iso' di kolid. 17 Om minomonsoi po iyau do tolu nahatus o kolid dit ongokooro' do nurogupan do tamas, do haro i' doti' o duwo kilogram do tamas do pinonguragup do tiso' di kolid. Om poopio' ngai' no dau i kolid diri do hiri'd langga' do roitan do Langga' do Puru' do Libanon. 18 Om minomonsoi nogi' iyau dot iso' o tirikohonon dot agayo di don raja'. Om iri nopo nga' nurogupan do lamai om tamas dit osonong kopio. 19-20 Iri nopo tirikohonon di don raja'ddi om winansayan dot onom o taang do tukad. Om misingompok nopo do pointikid-tikid di taang do ponong id wanan om ponong id gibang om winansayan do patung do pinoiyo-iyo do singa, do hopod om duwo do toinsanan. Om hiri nopod ponong id tolikud di tirikohonon diri om pinadakatan di pinoiyo-iyo do tulu'd sapi'! Om hiri nod kakabayon di tirikohonon diri om dinakatan di pinoiyo-iyo'd singa. Om a' po nokoumbal do haro o tirikohonon do raja' do miagal diri do hinonggo-honggo nopo o pomorintaan. 21 Om iri nopo sangkir di ponginuman di Suliman nga' tamas ngai' nopo do winonsoi, om koinsanai do nunu nopo do hiri'd langga' di roitan do Langga' do Puru' do Libanon nga' tamas nogi' di nosompipi' o winonsoi. Om aiso' i' o winonsoi do mantad id pirok, tu' aiso' i' o gatang do pirok do tontok poddi. 22 Om ogumu' o kapal do rahat di Suliman dit agayo do mogiwoyo-woyo' di kapal do rahat di Hiram. Om muli' i piro-piro o kapal do rahat diri do pointikid-tikid do toun do papaatod do tamas, pirok, lamai om kara' dit angagayo om kara' dit ongokoro'. 23 Om i Raja' Suliman no o kaya' kopio om it opintar kopio dot id pogialatan do koinsanai'd raja'. 24 Om pointongkop nopod pomogunan o tulun dot orohian do mongoi pokinongou di ponudukan di Suliman dit angaralom kopio, i pinatahak do Kinorohingan dot id dau. 25 Om pointikid-tikid do tulun di mongoi solowot di Suliman nga' papatahak ngai' nopo dot id dau dot ipuhawang do pirok, tamas, pakayan, rapo-rapo do sumangod, rampa, kuda' om bagal. Om iyo kasai' nopoddi do pointikid do toun. 26 Om minanganu nogi' i Suliman do soudor do soribu om apat nahatus i kikorita' do don sumasangod, om hopod om duwo noribu o kuda' di sakayon do mongoi sangod. Songintanga' nopoddi nga' pinoundorong do hilo'd Yorusalim, om iri no wookon om pinopintikid di bandar do suwai. 27 Tontok di pomorintaan di Suliman om gatang nopod pirok om miagal nod gatang do watu do hilo'd Yorusalim. Om kayu sedar do Libanon nga' miagal pod kayu ara o kogumuo'. 28 Om iri ngai' no i wakil di raja' o momoli do kuda' do mantad hilo'd Masir om hilo'd Kilikia, 29 om momoli do korita'-kuda' do mantad hilo'd Masir. Om padagangon nondo diyolo' iri dot id raja' do Hit om id raja' do Siria. Om gatang nopo do songinan o kuda' nga' hatus om limo nohopod o tusin do pirok, om gatang no dot iso' o korita'-kuda' di don sumasangod om onom nahatus o tusin do pirok.
Tuminongkiad i Suliman do Kinorohingan
1 Om minuhang po i Suliman dot ogumu' o tongoondu' do bansa'd suwai. Suwai nopo ko' i tanak do tondu' do raja'd Masir, om minangawin po iyau do tondu' do bansa'd Hit, Muab, Amon, Idom om Sidon. 2 Kinawin i' dau iyolo' do mulong piya dot oduhan daa'd Tuhan o tulun dot Israil do mangawin do bansa'ddi, tu' iri nondo o mamayayat diyolo' do tumanud do ponokokinorohingan do suwai. 3 Minangawin i Suliman do turu' nahatus o tanak do raja' om tolu nahatus o tondu' di siniliu dau do panakasawo dau. Om iri ngai' no sawo di Suliman diri o minamayayat dau do tuminongkiad do Kinorohingan. 4 Om tontok di molohing i Suliman om naangatan iddi diyolo' iyau do tumuku' dot id ponokokinorohingan do suwai. Om a' noddi iyau otorodok dot id Tuhan, i Kinorohingan dau, do miagal di Daud, i tapa' dau. 5 Tumuku' diri i Suliman dot id Astorit, i tingolig do tulun do Sidon, om tumuku' dot id Molok, i tingolig di kososomu' kopio di tukuon do tulun dot Amon. 6 Om iyo noddi i Suliman do minomonsoi'd dusa dot id toguang do Tuhan. I Daud nopo, i tapa' di Suliman om iso-iso' i' o ginawo do tuminanud do Tuhan, nga' i Suliman nopo om a' i' iyo'ddi. 7 Hiri'd timpak do nulu-nulu di ponong id koulayon do mantad id Yorusalim o pinamansayan dau do tiyonon do tumuku' dot id Kamos, i tingolig do tulun do Muab, om id Molok i tingolig do tulun dot Amon --- i duwo tingolig di kososomu' kopio. 8 Om minomonsoi nogi' i Suliman do tiyonon do koinsanai di sawo dau di bansa'd suwai do modtutud do kominyan om papatahak do porsombahan dot id piro-piro tingolig di tukuon diyolo'. 9-10 Mulong piya dot induwo o Tuhan, i Kinorohingan dot Israil, do minintalang dot id di Suliman do minogodu dau do tumuku' dot id tingolig, nga' a' i' di Suliman numboyo' i boros do Tuhan diri, tu' tuminongkiad nogiddi iyau do Tuhan. Om kotogod noddi o Tuhan di Suliman. 11 Boros kad Tuhan, “Iyo nopondo tu' tuminomod ko do tuminolibamban di batos nu dot id doho', om a' ko tuminanud di boros ku, om ahawon ku nondo iti pomorintaan nu do mantad id diya' om patahakon ku dot id songulun di pagawai nu. 12 Nga' a' ku i' wonsoyon iti do maso nu po do poimpasi tu' osorou ku i' i Daud, i tapa' nu. Iri pondo tanak nu o momorinta' om wonsoyon ku nogi' iti. 13 Nga' a' ku i' ahawon ngai' iti pomorintaan do mantad id dau; pooluon ku i' ot iso' o payat dot id tanak nu tu' osorou ku i' i Daud om Yorusalim, i bandar do nopili' ku do sumiliu do bandar di songonuon ku,” ka dau.
I Pisangod di Suliman
14 Om binsuhuo' nod Tuhan i Hadad, i mantad id sompiiyon do raja' dot Idom do sumaap di Suliman. 15-16 Tontok di gulu po, di naala' di Daud ot Idom om minongoi i Yoab, i boyoon do soudor di Daud do hilo' do mongoi pomolobong di soudor do nangapatai. Om poundorong i Yoab do hilo'd Idom do mogiwoyo-woyo' di soudor dau do solinaid dot onom o tulan. Om maso nopoddi om pinimpatayan diyolo' o koinsanai di kokusayan do hilo'd Idom. 17 Nga' nokopoggidu' i' i Hadad om piro-piro o tulun dot Idom, i susuhuon di tapa' dau do hilo'd Masir. Tontok nopoddi om tanak po i Hadad. 18 Om poggidu' no iyolo' do mantad hilo'd Midian om pakayaai no do hilo'd Paran. Hilo' nopod Paran om haro o piro-piro o tulun do suminompuru diyolo', om pakayaai no diyolo' do hilo'd Masir do minongoi solowot di raja' do Masir. Om onuwai no di raja' do Masir i Hadad do sompila' o tana' om iso' o walai, om nonuan nogi' iyau do taakanon. 19 Om kosiliu no i Hadad do tambalut kopio di raja', om patahako' noddi di raja' i longuon dau, i tadi' di Tapinis, i raja' do tondu'ddi, do sumiliu'd sawo di Hadad. 20 Om paganak no i sawo di Hadad dot iso' o tanak do kusai. Om pungaranai no i tanak diri dot i Gonubat. Om i Raja' Tapinis i' o pinapagayo di Gonubat do hiri'd walai di raja' do miagal di tangaanak do kusai di raja'. 21 Om korongou poddi di Hadad do napatai no i Daud, om i Yoab i boyoon do soudor dau nga' napatai no, om boro-boros no iyau dot id raja', “Pologoso' oku daa do muli' do hilo'd pomogunan ku,” ka dau. 22 “Nokuro?” ka di raja' do minonguhot. “A' ko osukup do hiti tu' gumuli' ko do hilo'd pomogunan nu?” ka dau. “Osukup i', nga' pologoso' oku nopo daa do muli',” ka di Hadad do suminimbar. Om uli' noddi iyau do hilo'd pomogunan dau. 23 Om pologoso' po kawagu'd Kinorohingan i Rison, i tanak di Ilada, do sumaap di Suliman. I Rison nopo nga' i turipon do minogidu' do mantad id tuan dau, i Hadadisir, i raja' do Soba. 24 Om nosiliu diri iyau do boyoon dot iso' o sinompuruan do tulun dit angaraat. (Nosiliu iti di naala' di Daud i Hadadisir, om pinatai ngai' dau i tambalut di Hadadisir do mantad hilo'd Siria.) Om ongoi no i Rison om koinsanai di tulun dau do hilo'd Damsik om iyon no iyolo'd hilo'. Om siliho' no iyau di tulun dau do raja' do Siria. 25 Iri nogi' i Raja' do Siria diri nga' nosiliu i' do pisangod dot Israil do miagal di Hadad, do solinaid di Suliman do poimpasi, om mamagangau iyau do pomogunan diri.
Batos do Kinorohingan dot id di Yirobiam
26 Haro po kawagu o songulun do suminaap di Suliman om iyau nopo nga' pagawai i' di Suliman, do ngaran nopo om i Yirobiam. Iyau nopo om tanak di Nibat, i mantad hilo'd Sirida, i hilo'd Ipraim. Tina' nopo dau om i Sorua, i nopuadan no. 27 Poingkaa o kinowoyo-woyoo' di Yirobiam do suminaap di Suliman. Tontok di maso di Suliman do monimbun di tana' do ponong id koulayon do mantad hilo'd Yorusalim, om di maso do mononong di tolig di bandar, 28 om i Yirobiam nga' pakaraja nogid hiri. Om soira' di nokito di Suliman dot okoris om aparu' iyau, om suhuo' no dau i Yirobiam do sumiliu do boyoon do koinsanai di tulun di sinuhu' do kumaraja' do hilo'd watas do payat do Manasi om Ipraim. 29 Om insan diri o tadau, di manau-panau i Yirobiam do sumoliwan do mantad hilo'd Yorusalim om ngoyo' no iyau solowoto' di Ahia i Nabi, i mantad hilo'd Silo, do hiri'd tanga'd ralan do hiri'd talun. Om duwo-duwo iyolo'd hiri. 30 Om iduwo' no di Ahia i rasuk dau di siningkoyo' di wagu po, om pogikinis-kiniso' no dau do hopod om duwo o nokokinisan. 31 Om boros kaddi dau dot id di Yirobiam, “Onuo' iya' o hopod o kinis. Tu' poingkaa o boros do Tuhan, i Kinorohingan dot Israil, dot id diya', ‘Ahawon ku iti pomorintaan do mantad id di Suliman om patahakon ku diya' o hopod o payat. 32 Nga' id di Suliman kasai' i' ot iso' o payat tu' osorou ku i' i Daud, i susuhuon ku, om osorou ku o Yorusalim, i bandar di nopili' ku do sumiliu do doho'd bandar, dot id pointongkop do pomogunan dot Israil. 33 Wonsoyon ku pogi' o miagal diti nga' tuminongkiad i' i Suliman doho' om tuminuku' diri iyau dot id tingolig: id Astorit, i tingolig do tulun do Sidon; om id Kamos, i tingolig do tulun do Muab; om id Molok, i tingolig do tulun dot Amon. Minomonsoi'd dusa i Suliman, om suminongkiwal iyau di pinonuhuan ku. I Daud nopo, i tapa' dau om tuminanud i' dit oturan om i pinonuhuan ku, nga' i Suliman nopo om a' i'. 34 Nga' a' ku i' onuon ngai' iti pomorintaan do mantad id dau. Pologoson ku i' iyau do momorinta' do solinaid dau do poimpasi. Om wonsoyon ku pogi' o miagal diri nga' osorou ku i' i Daud, i susuhuon ku di nopili' ku, om it otorodok do tuminanud dit oturan om i pinonuhuan ku. 35 Ahawon ku nondo iti pomorintaan do mantad id di Suliman, om patahakon ku o hopod o payat dot id diya'. 36 Nga' pologoson ku i' o tanak di Suliman do momorinta' dot iso' o payat, om haro indo kasai' o songulun di sinakagon di Daud, i susuhuon ku'ddi, do momorinta' do Yorusalim, i bandar di nopili' ku do tiyonon do sumambayang dot id doho'. 37 Om iya' no, oi Yirobiam, o silihon ku do raja' dot Israil. Om pologoson tiya' do momorinta' do koinsanai do watas di korohian nu. 38 Ondung otorodok ko dot id doho' om tumanud ko dit oturan ku, om poposonong ko do ginawo ku, tu' wonsoyon ngai' nu i ponuhuan ku diya' do miagal di Daud, i susuhuon ku, om woyoon ku indo kasai' iya' do gisom dot alaid. Om silihon ku'ndo o sinakagon nu do raja' dot Israil do sumowoli diya', do miagal di nowonsoi ku dot id di Daud. 39 Om hukuman ku'ndo i sinakagon di Daud, tu' minomonsoi id dusa i Suliman, nga' okon indo ko' gisom do poingompus do hukuman ku,’ ka,” ka dau. 40 Om umbalai no daa di Suliman do mamatai i Yirobiam di nokorongou iyau do habar diri, nga' poggidu' no i Yirobiam do hilo'd di Sisak, i raja' do Masir; om poingiyon noddi iyau'd hilo' do gisom do napatai i Suliman.
Napatai i Suliman
41 Koinsanai di nowonsoi di Suliman di suwai, om i toilaan dau om nokotulis ngai' no do hiri'd suang do Buuk di Monusui do Kinowoyo-woyoo' do Koposi-posion di Suliman. 42 Om hilo'd Yorusalim o niyonon dau di nosiliu iyau'd raja' do momorinta' do pointongkop dot Israil do solinaid dot apat nohopod o toun. 43 Kapatai noddi iyau om lobongo' no do hilo'd Bandar di Daud. Om i Rihabiam diri, i tanak dau, o suminowoli dau do suminiliu'd raja'.
Suminaap i Piro-Piro Payat di Ponong id Utara
1 Om ongoi no i Rihabiam do hilo'd Sikim, tu' nokotimung ngai' no i tulun dot Israil di mantad ponong id utara do poposiliu dau do raja'. 2 I Yirobiam nopo nga' hilo' pod Masir tu' minogidu' iyau do mantad id di Raja' Suliman. Om korongou poddi dau o habar do pasal di Rihabiam om poguliai no dau do mantad hilo'd Masir. 3 Om lohowo' no di tulun do ponong id utara i Yirobiam om pogitatanud no iyolo' do minongoi solowot di Rihabiam, om boro-boros no iyolo' dot id di Rihabiam do poingkaa, 4 “Oi Tuan Raja'! I Suliman nopo, i tapa' nu om pinopokoruol dahai. Pinawagat kopio dau o tonggungan dahai. Om baino' nopo, om ondung inggaanan nu o tonggungan dahai om sonong-sonongon nu iyahai om minsiriba' i' iyahai diya',” ka diyolo'. 5 Om boros kad Rihabiam, “Gumuli' kou nod hiti do tolu o tadau do mantad baino', om sunudan ku nogindo iyokoyu dot isimbar ku,” ka dau. Om pamanau no ngai' iyolo'. 6 Om ongoi no i Rihabiam ponokiboro-boros di komolohingan di gomponosihat di Suliman, i tapa' dau'ddi, boros ka dau, “Nunu kangku'ndo do sumimbar diyolo'? Poingkuro o nosihat dokoyu?” ka dau. 7 Om boros ka di komolohingan, “Ondung orohian kopio ko do popoinsonong do rayat, om pohubayaan nopo o pokionuon diyolo', om minsiriba' indo kasai' iyolo' dot id diya',” ka diyolo'. 8 Nga' a' i' di Rihabiam pinadul i nosihat di komolohingan. Tu' minongoi nogi' iyau ponguhot di tulun dit ongomulok po, i rampam-rampam dau, om i nosiliu do gomponosihat dau. 9 “Nunu o nosihat dokoyu doho'? Nunu tuu o poboroson ku di tulun di mokiinggaan di tonggungan diyolo'?” ka dau do minonguhot. 10 Om boros ka diyolo', “Poboroson no diyolo' o poingkaa, ‘Oluhoi oku piya daa nga' okoris oku i' ko' i tapa' ku! 11 Awagat no daa o pinotonggungan di tapa' ku dot id dokoyu; nga' awaga-wagat o doho' do potonggungan dokoyu. Tuwai noo o pinomikot dau dokoyu, nga' doho' nopod pomikot dokoyu om i pipikot do kuda' di kirugi,’ kanto,” ka diyolo'. 12 Om katalib poddi o tolu o tadau, om rikot no i Yirobiam om koinsanai di tulun do minongoi solowot di Raja' Rihabiam do miagal di pinonuhuan di raja'. 13 Nga' a' i' di Rihabiam pinadul i boros di komolohingan. Om apantog tomod o boros dau do minoro-boros di rayat, 14 tu' tuminanud iyau di nosihat di tulun dit ongomulok po. Boros ka dau, “Awagat no daa o tonggungan di pinotonggungan di tapa' ku dokoyu, nga' pawagaton ku pondo ko' iri o tonggungan dokoyu. Om tuwai noo o pinomikot dau dokoyu, nga' doho' nopod pomikot om pipikot do kuda' di kirugi,” ka dau. 15 Om a' i' di raja' pinadul i pinokianu di rayat. Nga' iri no o korohian do Tuhan, om abayaan i' i pinoboros mantad di Ahia, i Nabi, i mantad hilo'd Silo, do pasal di Yirobiam i tanak di Nibat. 16 Om kopurimanai poddi di rayat dot a' di raja' pokinongohon i pokionuon diyolo', om pagarango' no diyolo' o poingkaa, “Kada' toko' podulo' i Daud om i sinakagon dau! A' i' iyolo' nokoumbal do minomonsoi do nunu-nunu it osonong dot id dati'. Kainou, tulun dot Israil, muli'! Pologoson nopo i Rihabiam do mongilo-ilo do tinan dau!” ka diyolo'. Om saap no i tulun dot Israil di Rihabiam. 17 Om pologoso' no diyolo' i Rihabiam do momorinta' do tulun di hiri pod watas do Yohuda. 18 Om suhuo' no di Rihabiam i Adoniram, i boyoon do tulun di sinansagan do kumaraja' do mongoi ponginsasamod di rayat. Nga' dumpaho' nogiddi diyolo' iyau'd watu do gisom do napatai iyau. Om kokito poddi di Rihabiam iri om kaarau-arau no iyau do suminakai di korita'-kuda' dau om ongoi no do hilo'd Yorusalim. 19 Om mantad poddi om sumaap kasai' no i tulun dot Israil di poingiyon do ponong id utara di sinakagon di Daud. 20 Om korongou poddi di tulun dot Israil do nokouli' i Yirobiam do mantad hilo'd Masir, om lohowo' no diyolo' iyau do mongoi rapou dot id iso' o pitimungan do rayat, om siliho' no diyolo' iyau do raja' dot Israil. Om iri po i payat do Yohuda ot otorodok kasai' dot id sinakagon di Daud.
I Pinoboros di Somaya do Pasal dit Osiliu dot id Dosunsudan
21 Om korikot poddi i Rihabiam do hilo'd Yorusalim, om timungo' no dau o 180,000 o soudor dau dit ongosiou do mantad id payat do Yohuda om Binyamin. Tu' osorou nopo daa dau nga' mongoi sangod do popoguli' kawagu di kuasa' dau do momorinta' di piro-piro payat dot Israil di ponong id utara. 22 Nga' suhuo' nod Kinorohingan i Somaya i Nabi, do mongoi poboros do boros dau 23 dot id di Rihabiam om id payat do Yohuda om Binyamin do poingkaa, 24 “Kada' ongoi sangod do tulun dot Israil tu' iyolo' nga' tobpinai nu i'! Uli' ngai' kou nogi'. Tu' iti nopo nosiliu baino' om korohian ku i',” ka dau. Om umboyo' ngai' no iyolo' di boros do Tuhan om uli' no iyolo' do hiri'd walai diyolo'.
Tuminongkiad do Tuhan i Yirobiam
25 Om kosiliu poddi i Yirobiam do raja' dot Israil, om inggiratai no dau i bandar do Sikim, i hiri'd watas do konulu-nuluan dot Ipraim, om iyon no iyau'd hiri do daamot. Om undaliu no iyau om ngoyo' no dau inggiratai i bandar do Ponuil. 26-27 Om pomusorou no i Yirobiam do poingkaa, “Ondung mongoi ilo rayat ku do hilo'd Yorusalim do mongoi papatahak do porsombahan do hilo'd Walai'd Sasambayangan dot Agayo, do miagal dilo wonsoyon diyolo'd dinondo, om orohian indo iyolo' kawagu di Rihabiam, i raja' do tulun do Yohuda, om patayon oku nondo diyolo',” ka. 28 Om kopingguliai poddi dau do momusorou iri, om pomonsoi no iyau do duwo o patung di pinoiyo-iyo'd sapi' do tamas do winonsoi, om boro-boros no iyau di rayat dau, “Oi tulun dot Israil! Alaid kou no do miongoi sambayang do hilo'd Yorusalim. Nga' baino' nopo, oi tulun dot Israil, om diya iti patung di minomoyo' dokoyu do suminoliwan do mantad hilo'd Masir,” ka dau. 29 Om poiliho' no dau o tiso' di patung di pinoiyo-iyo do sapi'ddi do hilo'd Baitol om iri no tiso' om hilo'd Dan o pinoiyanan. 30 Om kowonsoi noddi i rayat do dusa tu' minongoi i' iyolo' do hilo'd Baitol om hilo'd Dan do mongoi sambayang do hilo'. 31 Om minomonsoi po i Yirobiam do tiyonon do sumambayang do hiri'd timpak do konulu-nuluan om pomili' no iyau do piro-piro ot imam do mantad id sompiiyon dit okon ko' mantad id payat do Liwi.
Pinapalan do Tuhan i Tiyonon do Sumambayang do Hilo'd Baitol
32 Om pinotimpuun nogi' di Yirobiam ot iso' o tadau'd agayo do tugama', i koontok do kohopod om limo do tulan do kawalu', do miagal di tadau dot agayo do hilo'd Yohuda. Om papatahak iyau do porsombahan do hiri'd pananaraban do porsombahan dot id sapi' di tamas do winonsoi, do hilo'd Baitol. Om poiyono' no dau i piro-piro ot imam diri do hilo'd Baitol do maganu-anu do hiri'd tiyonon do sumambayang di winonsoi dau. 33 Om tontok di kohopod om limo do tulan do kawalu', i tadau di tinantu' dau, om ongoi no iyau do hilo'd Baitol do mongoi papatahak do porsombahan do hiri'd pananaraban do porsombahan do mamaramai di tadau dot agayo do tugama' di tinantu' dau'ddi do ramayon di tulun dot Israil.
1 Tontok nopoddi om haro o songulun o nabi do mantad hilo'd Yohuda do sinuhu'd Tuhan do mongoi do hilo'd Baitol. Om di nopo nokorikot iyau'd hilo' om poingkakat no i Yirobiam do hiri'd dotimbabaan di pananaraban do porsombahan do papatahak do porsombahan di sinumbali'. 2 Om suhuo' nod Tuhan i nabi diri do moro-boros do papasala' di pananaraban do porsombahan. Boros ka dau, “Oi pananaraban do porsombahan! Poingkaa o boros do Tuhan, ‘Haro nondo o songulun o tanak di pungaranan dot i Yosia dot osusu dot id sompiiyon di Daud. Om id timpak nu no o pamatayan ngai' dau dit imam di maganu-anu do hiti'd pananaraban do porsombahan dot id tingolig om i papatahak do porsombahan di sumbolion do hiti'd sakai nu. Om hiti nod sakai nu o podtutudan dau di tulang diyolo',’ ka,” ka dau. 3 Om boros ka kawagu di nabi diri, “Ohuyas nondo iti pananaraban do porsombahan, om ilo tauu do hilo'd sakai nu nga' kotuntug nondo. Om koilo ko nogindo kopio do sinuhu' oku'd Tuhan,” ka dau. 4 Om korongou poddi di Yirobiam i boros do miagal diri, om boro-boros no iyau dot opuhod do mikuwo'd tinuduk dau i nabi diri, “Tangkapo' dokoyu ilo'!” ka. Nga' diiri i' do kuminodou i longon di Yirobiam gisom dot a' no milo do pokodongon kawagu. 5 Om sigog id kopilapak i pananaraban do porsombahan om i tauu nga' kotuntug nopo do hiri'd tana' do miagal di nokoboros mantad di nabi do tuminanud di pinonuhuan do Tuhan. 6 Om boro-boros no i Yirobiam di nabi diri, “Tulungo' oku no, sambayang no dot id Tuhan, i Kinorohingan nu. Pokilingasai no dau doho' iti longon ku!” ka dau. Om sambayang no i nabi diri, om kolingos no i longon di raja'. 7 Om boro-boros no i raja' di nabi diri, “Kaino mongoi akan do hilo'd walai ku. Om onuan tiya' i' dot isomuli' di nowonsoi nu,” ka dau. 8 Om boros ka di nabi diri do suminimbar, “Mulong piya do patahakon nu doho' o songintanga' diti kakayaan nu nga' a' oku i' tumanud diya', ko' mongoi po akan om mongoi inum do potorungak diya'. 9 Tu' nosunudan oku nod Tuhan dot a' makan om a' minum, om a' muli' do sumusui di ralan di winayaan ku do minongoi'd hiti,” ka dau. 10 Om a' noddi i nabi diri minaya' di ralan di winayaan dau di ruminikot i' iyau tu' minaya'ddi iyau do ralan do suwai.
I Nabi di Molohing no do Hilo'd Baitol
11 Tontok nopo do maso'ddi om haro o songulun o nabi di molohing no do poingiyon do hilo'd Baitol. Om rikot no i tangaanak dau do minongoi pomisunud dau di winonsoi di nabi do mantad hilo'd Yohuda, do hilo'd Baitol do tadau'ddi, om i pinoboros di nabi diri dot id di Raja' Yirobiam. 12 Om boros ka di nabi di molohing no do minonguhot diyolo', “Honggo ralan do nayaan dau di minuli' iyau?” ka. Om potuduko' no diyolo' i ralan, 13 om suhuo' no dau iyolo' do popowonsoi di pakol di kaladai dau. Om pakalai no diyolo'. Om sakai noddi iyau, om pamanau no 14 do suminusui di ralan diri do gumusa' di nabi do mantad hilo'd Yohuda. Om kabantalai no dau iyau do poirikau do hiri'd sahau di guas do kayu dot agayo. Om boros ka di nabi di molohing no do minonguhot, “Iya' nogi' i nabi do mantad hilo'd Yohuda?” ka. “Oo, iyoho' nogi',” ka dau. 15 Om boros ka di nabi di molohing no, “Kaino, tanud doho'd muli' om tumorungak i' doho'd makan,” ka. 16 Nga' boros ka di nabi do mantad hilo'd Yohuda, “A, a' oku no milo do moyo' diya' do muli' ko' sumalakoi po di walai nu. Om a' oku i' tumorungak diya' do makan ko' minum po do nunu nopod hiti, 17 tu' nobilinan oku nod Tuhan dot a' makan om a' minum, om a' gumuli' do sumusui di ralan di winayaan ku di pinaangayan ku id hiti,” ka dau. 18 Nga' boros ka di nabi di molohing noddi, i mantad hilo'd Baitol, do minongudut dau, “Iyoho' nga' nabi nogi' do miagal diya'. Om sinuhu'd Tuhan o moloikat do mongoi pomisunud doho' do mongoi pangangat diya' om papaakan diya' do hilo'd walai ku,” ka dau. 19 Om tanud noddi dau i nabi di mantad hilo'd Yohuda om torungak no dau do minakan. 20 Om tontok di makan iyolo', om boro-boros no o Tuhan dot id nabi di molohing no, 21 gisom do sinunudan diri dau i nabi di mantad hilo'd Yohuda do poingkaa, “Boros kad Tuhan om a' ko minumboyo' dau; om a' nu winonsoi i pinonuhuan dau diya'. 22 Tu' guminuli' ko nogi' om minongoi ko akan do hiri'd pogoduhan dau do mongoi akan, om iri no o kapamatayan diya', om tinan nu nga' a' no olobong do hiri'd kalabangan di sompiiyon nu,” ka dau. 23 Om kaakan poddi iyolo', om pakalai noddi di nabi di molohing no i kaladai di nabi di mantad hilo'd Yohuda. 24 Om pamanau no i nabi di mantad hilo'd Yohuda. Om maha' di hiri no iyau id tanga'd ralan om bontolo' no iyau do singa om patayo' no iyau di singa'ddi. Om poingiliu'ddi i tinan dau do hiri'd ralan, om poingkakat i kaladai om i singa do hiri'd toning di rata'. 25 Om haro'ddi o piro-piro tulun do nakatalib om nokobontol di rata' do hiri'd ralan, om poingkakat i singa do hiri'd toning di rata'. Om potilombusai no diyolo'd minongoi do hilo'd Baitol om posunudo' no diyolo' i nokito diyolo'. 26 Om soira' di nokorongou i nabi di molohing no do pasal diri, om boros kaddi dau, “Iri no i nabi dit a' minumboyo' do boros do Tuhan! Om gowoi poddi om pinorikot do Tuhan o singa do minongoi panabpo om minamatai dau, do miagal di nokoboros mantad do Tuhan,” ka dau. 27 Om boros kaddi dau dot id tangaanak dau, “Pakalai doho' i kaladai,” ka. Om pakalai no diyolo', 28 om pamanau no iyau. Om kabantalai no dau i rata' di nabi di mantad hilo'd Yohuda'ddi do poingiliu do hiri'd ralan. Om poingkakat kasai' i' do hiri'd toning di rata' i singa om i kaladai. A' i' di singa nakan i rata' om a' pinatai i kaladai. 29 Om ngoyo' noddi di nabi di molohing no i rata'ddi om pasakayo' no dau di kaladai. Om pogulio' no dau do hilo'd Baitol om pogihadai no dau om lobongo' noddi dau do hilo'. 30 Om lobongo' no dau iri do hiri'd kalabangan di sompiiyon dau om pogihadai no dau, om i tangaanak dau nga' minogihad nogi', mikuwo'd mimboros dot, “Adai giya'dti tobpinai ku, i tobpinai ku!” ka no. 31 Om kolobong poddi i rata' om boros ka di nabi di molohing no dot id tangaanak dau, “Apatai oku nopondo om lobongon oku no dot id lobong diti om potoningon nodti tinan dau o tinan ku. 32 Iri nopo boros di pinolombus dau om tumanud i' do pinonuhuan do Tuhan do papasala' di pananaraban do porsombahan do hilo'd Baitol, om koinsanai di tiyonon do sumambayang do hilo'd kabandaran do Samaria, om abayaan i' kopio iri,” ka dau.
Minomonsoi'd Dusa i Yirobiam
33 Om a' po i Yirobiam, i raja' dot Israil, tuminingkod do mantad id kowoyo-woyoon dau dot araat. Tu' maso po dau do momili' dot imam do maganu-anu do hiri'd pananaraban do porsombahan do mantad id disai nopod sompiiyon --- a' no dau tutunon. Silihon ngai' nopo dau dot imam ot isai nopo o tulun dit orohian do sumiliu'd imam. 34 Om iti no kopio o dusa dau di pinoporikot do kosusaan dot id sinakagon dau gisom do nopunso'ddi iyolo'.
Kinapatayon di Tanak di Yirobiam
1 Om tontok noddi do suminakit i Abia, i tanak di Raja' Yirobiam do kusai. 2 Om boros ka di Yirobiam dot id sawo dau, “Ongoi do hilo'd Silo, nga' mingunali-nali no do tulun toomod, om aiso' i' o kotutun diya'. Om mongoi id hilo'd tiyonon di Ahia i Nabi, i pinopoboros di gulu po dot osiliu oku do raja' dot Israil. 3 Om onuan no iyau do hopod o tinan do roti, om piro-piro o liob do roti om paha' do sangkakanan dot okooro'. Uhoton no iyau ondung poingkukuro o kosunsudon di tanak to, om sunudan ko indo dau,” ka dau. 4 Om ongoi no i sawo di Yirobiam do hiri'd walai di Ahia do hilo'd Silo. Om a' no kokito i Ahia tu' molohing no kopio iyau. 5 Nga' nosunudan no iyau'd Tuhan do rumikot i sawo di Yirobiam do mongoi ponguhot dau do pasal di tanak diyolo' di sumakit. Om nosunudan nod Tuhan i Ahia do boros dot apatut do polombuson dau. Om soira' di nokorikot i sawo di Yirobiam, om pingunali-nali no daa iyau do tulun do suwai. 6 Nga' soira' di norongou nogi' di Ahia i sawo di Yirobiam do hiri'd wawayaan, om boro-boros no i Ahia, “Salakoi. Oilaan ku i' do sawo ko di Yirobiam. Nokuro tu' mingunali-nali ko do tulun do suwai? Araat tomod o habar do posunudon ku diya'. 7 Ngoyo' nogi' sunudai i Yirobiam diti boros do Tuhan, i Kinorohingan dot Israil, dot id dau. Boros kad Tuhan, ‘Pinili' ku iya' do pomorinta' dot Israil, i tulun ku. 8 Nahau ku i pomorintaan do mantad id sinakagon di Daud om pinatahak ku daa'ddi diya'. Nga' a' ko i' miagal di Daud, i susuhuon ku, tu' otorodok dot id doho', om minumboyo' di pinonuhuan ku, om iri no i korohian ku o winonsoi dau. 9 Agayo-gayo po i diya'd dusa ko' i dusa di pomorinta' dit id gulu ko' iya'. Niadaan oku diya' om tiningkau nu o kototogod ku tu' minomonsoi ko do tingolig om patung do tambaga' do tukuon nu. 10 Om iti no o koporikatan ku do kosusaan dot id sinakagon nu om patayon ngai' ku i sinakagon nu do tongokusai, dot it ongomulok po om i komolohingan no. Punsoon ku nopo kopio o sompiiyon nu; oimuhau tomod nopondo iyolo' do miagal pod taii'. 11 Iri nopo it id suang do sompiiyon nu dit apatai dot id suang do bandar om ngoyon nondod tasu kano', om iri no it apatai do hilo'd soliwan do bandar om akanon do tombolog. Sorohon no, dot iyoho' i', i Tuhan, o minomoros diti!’ ka,” ka dau. 12 Om tuntunai po di Ahia i boros dau dot id sawo di Yirobiam, boros ka dau, “Uli' no. Om kosuang ko poddi bandar om apatai no i tanak nu. 13 Om oinsanan nopondo i tulun dot Israil do mogihad dau om ngoyon nondo diyolo' lobongo' iyau. Om iyau pondo it id suang do sompiiyon di Yirobiam dot osonong o pomolobong. Tu' iyau poo o kasanangan do Tuhan, i Kinorohingan dot Israil. 14 Haro nondo o raja' do silihon do Tuhan do pomorinta' dot Israil, om i momupus do pomorintaan di Yirobiam. 15 Hukuman nondod Tuhan ot Israil, om milayuk-layuk pondo ot Israil do miagal di sakot do hiri'd bawang. Om utuson nondo dau iyolo' do mantad hiti'd tana' dit osonong di pinatahak dau di taki-aki diyolo'. Om potompiason nondo dau iyolo' do hilo'd soborong di Bawang dot Iprat, tu' minomonsoi i' iyolo' do tingolig dot Asira, i ponokokinorohingan diyolo', om notingkau'ddi o kototogod do Tuhan. 16 Om tongkiadan nondod Tuhan ot Israil tu' minomonsoi i' iyolo'd dusa,” ka dau. 17 Om poguliai noddi di sawo di Yirobiam do hilo'd Tirsa. Om maha' di sumalakoi nogi' iyau di walai dau om kapatai no i tanak dau. 18 Om pogihadai noddi di tulun dot Israil i tanak diri om ngoyo' no diyolo' lobongo' do miagal di nokoboros mantad do Tuhan do pinolombus di Ahia i Nabi, i susuhuon do Tuhan.
Napatai i Yirobiam
19 Koinsanai di nongowonsoi di Raja' Yirobiam, om i pisangadan do noongoi dau om i karalan-ralano' dau do momorinta' nga' nongkotulis ngai' no do hiri'd suang do Buuk di Monusui do Pasal Ngai' di Raja' dot Israil. 20 Duwo nohopod om duwo toun di Yirobiam do nosiliu do raja' di momorinta'. Om kapatai noddi iyau om lobongo' no. Om i Nadab diri, i tanak dau, o suminiliu do raja' do suminowoli dau.
I Rihabiam, i Raja' do Yohuda
21 I Rihabiam nopo, i tanak di Suliman diri, om apat no nohopod om iso' o toun dau di nosiliu iyau do raja' do Yohuda. Om hopod om turu' o toun dau do minomorinta' do hilo'd Yorusalim, i bandar do pinili' do Tuhan dot id pialatan do koinsanai'd watas dot Israil, do tiyonon do sumambayang dot id dau. Tina' nopo di Rihabiam om i Naama, i tulun dot Amon. 22 Om pomonsoi nod dusa i tulun do Yohuda dot id toguang do Tuhan. Om ogumu-gumu' po i diyolo' do nowonsoi do minoningkau di kototogod do Tuhan ko' i nowonsoi di taki-aki diyolo'. 23 Minomonsoi iyolo' do piro-piro tiyonon do tumuku' dot id tingolig om pinopoingkakat iyolo' do torigi do watu om tanda' do tingolig dot Asira do maan do tukuon do hiri'd konulu-nuluan om hiri'd sahau do kayu dit angagayo. 24 Nga' araat nopo kopio, om i piro-piro o tongokusai om tongoondu' do suminiliu'd sundal do hiri'd tiyonon do tumuku' dot id tingolig. Om omitanai ngai' nopo di tulun do Yohuda i kowoyo-woyoon di tulun di nuyung do Tuhan do mantad id pomogunan diri, di ruminikot i' i tulun dot Israil do hiri; i kowoyo-woyoon di kointingayam tomod. 25 Tontok di kolimo do toun di Raja' Rihabiam do momorinta' om ngoyo' no di Sisak, i raja' do Masir, songodo' o Yorusalim. 26 Om onuo' ngai' nopo dau i dapu' do hiri'd Walai'd Sasambayangan dot Agayo om i hiri'd walai'd raja', om nokotonggoi ngai' nogi' i kolid do tamas di winonsoi di Suliman. 27 Om pomonsoi noddi i Raja' Rihabiam do kolid, do tambaga' o winonsoi do pinoningolon diri. Om paharapai no dau di piro-piro pagawai do madtatamong di wawayaan do walai'd raja' i kolid diri. 28 Om pointikid-tikid do mongoi i raja' do hiri'd Walai'd Sasambayangan dot Agayo, om igitan no di madtatamong i kolid diri, om pogulion nondo kawagu do hiri'd tiiyonon di madtatamong. 29 Om koinsanai di nongowonsoi di Raja' Rihabiam, om nongkotulis ngai' no do hiri'd suang do Buuk di Monusui do Pasal Ngai' di Raja' do Yohuda. 30 Om solinaid nopo do pomorintaan di Rihabiam om misaap kasai' nopo i Rihabiam di Yirobiam. 31 Om kapatai noddi i Rihabiam om lobongo' no do hiri'd kalabangan do raja' do hiri'd Bandar di Daud. Om suminiliu nopod raja' do suminowoli dau om i Abia, i tanak dau'd kusai.
I Abia, o Raja' do Yohuda
1 Tontok di kohopod om walu' do toun di Raja' Yirobiam do momorinta' dot Israil, om kosiliu no i Abia do raja' do Yohuda. 2 Om tolu o toun dau do minomorinta' do hilo'd Yorusalim. Tina' nopo dau om i Maaka, i tanak di Absalom do tondu'. 3 Om iyau nga' minomonsoi id dusa do miagal di winonsoi di tapa' dau. A' i' iyau tuminorodok kopio dot id Tuhan, i Kinorohingan dau, do miagal di kotorodoko' di Daud, i taki-aki dau. 4 Nga' nonuan iddi do Tuhan, i Kinorohingan di tukuon di Daud, i Abia dot iso' o tanak do kusai, do sumowoli dau do momorinta' do hilo'd Yorusalim om mongintirung do Yorusalim, tu' osorou i' do Tuhan i Daud. 5 Winonsoi'd Tuhan o miagal diri tu' nowonsoi ngai' i' di Daud i korohian do Tuhan om a' iyau nokoumbal do suminaap di pinonuhuan do Tuhan, suwai nondo ko' i winonsoi dau dot id di Uria, i tulun do Hit diri. 6 Om solinaid nopo di Abia do momorinta' om haro kasai' nopo o pisangadan dot id piolitan diyolo' di Yirobiam. 7 Om koinsanai di nongowonsoi di Abia do suwai nga' nongkotulis ngai' i' do hiri'd suang do Buuk di Monusui do Pasal Ngai' di Raja' do Yohuda. 8 Om kapatai noddi i Abia om lobongo' no do hiri'd Bandar di Daud. Om suminowoli nopoddi dau do raja' om i Asa, i tanak dau'd kusai.
I Asa, o Raja' do Yohuda
9 Tontok di koduwo nohopod do toun di Yirobiam do raja' dot Israil, om kosiliu no i Asa do raja' do Yohuda. 10 Om apat nohopod om iso' o toun dau do momorinta' do hilo'd Yorusalim. Todu' nopo dau om i Maaka, i tanak di Absalom do tondu'. 11 Om i Asa nopo om minomonsoi i' do korohian do Tuhan, do miagal di winonsoi di Daud, i taki-aki dau. 12 Om uyungo' ngai' nopo dau do mantad id pomogunan diri i tongokusai om i tongoondu' do sundal di maganu-anu do hiri'd tiiyonon do tumuku' dot id tingolig, om nidu' ngai' dau i tingolig di piningwonsoi di piro-piro o raja' dit id gulu ko' iyau. 13 Om i Maaka, i toduon daa dau, nga' nidu' i' dau o pangkat do miagal do ponokotina' di raja', tu' minomonsoi i' iyau do tingolig dit araat kopio, iri no i tingolig dot Asira, i tingolig do kororombung. Om habao' no di Asa i tingolig diri om ngoyo' no dau tutudai do hiri'd Rantai do Kidron. 14 Mulong po dot a' di Asa naraag ngai' i tiiyonon do tumuku' dot id tingolig nga' otorodok kasai' i' iyau dot id Tuhan do solinaid dau do poimpasi. 15 Om poopio' ngai' nopo dau do hiri'd Walai'd Sasambayangan dot Agayo i konunu-nunuan do pinatahak di tapa' dau dot id Tuhan, om iri nogi' i dau do konunu-nunuan, i tamas om pirok do winonsoi di pinatahak dau dot id Tuhan. 16 Om solinaid nopo di Asa i raja' do Yohuda, om i Baisa i raja' dot Israil do momorinta' om misangod kasai' nopo iyolo'. 17 Om ngoyo' no di Baisa songodo' o Yohuda om timpuun nod pinopogirot kopio di bandar do Rama om atalaban i' dau o koinsanai di modtinalib do mantad hilo'd Yohuda om i mongoi do hilo'd Yohuda. 18 Om ngoyo' ngai' noddi di Raja' Asa i pirok om i tamas di noolu-olu' do hiri'd Walai'd Sasambayangan dot Agayo om i hiri'd walai di raja'. Om suhuo' no dau o piro-piro di pagawai dau do minongoi paatod diri do hilo'd Damsik, do patahakon di Binhadad i raja' do Siria, i tanak di Tabrimon, i manangaki di Hision. Om pinatanggayan nogi' dau do boros do poingkaa, 19 “Kaino misokodung do miagal di tapa' to tu' minisokodung. Iti nopo pirok om tamas om itahak ku i' toomod diya'. Pututon no kopio o piombolutan dokoyu di Baisa, i raja' dot Israil, om poggiduon i' dau i soudor dau do mantad id watas ku,” ka. 20 Om kookunai noddi di Raja' Binhadad i pinoboros di Asa. Om suhuo' no dau i boyoon do soudor dau do miwoyo' di soudor diyolo' do mongoi panangod di bandar dot Israil. Om naala' iddi diyolo' o bandar dot Iyon, Dan, Abil-Bait-Maaka om koinsanai do Kinirot om pointongkop do watas do Naptali. 21 Om soira' di norongou di Raja' Baisa i nosiliu do miagal diri, om tingkod no iyau do popogirot do Rama om uli' no iyau do hilo'd Tirsa. 22 Om ponuhu' noddi i Raja' Asa do toinsanan di tulun do pointongkop do Yohuda, do mongoi ngai' nopo uhup do papawaliu di watu om kayu do mantad hilo'd Rama; i pinakai daa di Baisa do pomogirot di bandar. Om pakayo' ngai' noddi di Asa iri do pinomogirot di bandar do Mispa om Giba, i hiri'd watas do Binyamin. 23 Om koinsanai di winonsoi di Raja' Asa do suwai, i kosioho' dau, om i kabandaran do ninggiratan dau, nga' nokotulis ngai' i' do hiri'd suang do Buuk di Monusui do Pasal Ngai' di Raja' do Yohuda. Nga' di nopoddi molohing i Asa om noontok goduwo nopod toruol o gakod dau. 24 Om kapatai noddi i Asa om lobongo' no iyau do hiri'd kalabangan do raja' do hiri'd Bandar di Daud. Om i Yosapat diri, i tanak dau, o suminowoli dau do raja'.
I Nadab, i Raja' dot Israil
25 Tontok di koduwo do toun do pomorintaan di Asa, i raja' do Yohuda, om kosiliu nod raja' dot Israil i Nadab, i tanak di Yirobiam. Om duwo o toun dau do minomorinta'. 26 Nga' iyo i' iyau di tapa' dau tu' minomonsoi i' do dusa dot id Tuhan, om minamayayat di tulun dot Israil do momonsoi'd dusa. 27 Om pongupakat no i Baisa i tanak di Ahia, i mantad id payat di Isakar do sumaap di Nadab. Om ngoyo' no dau patayo' i Nadab di maso di Nadab om i soudor dau do monurungku' di bandar do Gibiton, i hilo'd watas do Pilistin. 28 Nosiliu o miagal diri di kotolu do toun di Raja' Asa do momorinta' do Yohuda. Om i Baisa noddi o nokosowoli di Nadab do raja' dot Israil. 29 Om tilombusai nopo dau do minimpatai ngai' i tulun dot id sompiiyon di Yirobiam. Om piontok nopo iri di boros do Tuhan di pinolombus di Nabi Ahia, i susuhuon dau do mantad hilo'd Silo; kapatai ngai' nopo i sompiiyon di Yirobiam, om iso' pod tulun nga' aiso' no o noolu'. 30 Nosiliu pogi' o miagal diri nga' pinopotogod i Yirobiam do Tuhan, i Kinorohingan dot Israil, tu' miningwonsoi iyau do dusa om minamayayat iyau do tulun dot Israil do momonsoi'd dusa. 31 Koinsanai di nongowonsoi di Nadab do suwai nga' nongkotulis ngai' i' do hiri'd suang do Buuk di Monusui do Pasal Ngai' di Raja' dot Israil. 32 Om solinaid nopo di Raja' Baisa do momorinta' dot Israil, om haro kasai' nopo o pisangadan diyolo' di Asa, i raja' do Yohuda.
I Baisa, o raja' dot Israil
33 Tontok di kotolu'd toun di Raja' Asa do momorinta' do Yohuda, om kosiliu no i Baisa i tanak di Ahia, do raja' do pointongkop dot Israil. Om koloido' nopo dau do momorinta' do hilo'd Tirsa om duwo nohopod om apat o toun. 34 Om iyau nga' miagal i' di Raja' Yirobiam di gulu po tu' minomonsoi id dusa dot id Tuhan om minamayayat di tulun dot Israil do minomonsoi'd dusa.
1 Om boro-boros noddi o Tuhan dot id di Yohu i Nabi, i tanak di Hanani. Boros ka dau, “Poboroson no o miagal diti dot id di Baisa, 2 ‘Di nopo di gulu po om aiso' i' tomod o ngaran-ngaran nu, nga' pinili' ku i' iya' do sumiliu do boyoon dot Israil, i tulun ku. Nga' baino' noddi om momonsoi ko i' do dusa do miagal di Yirobiam tu' minamayayat di tulun ku do momonsoi'd dusa, om gisom diri do nokotogod oku. 3 Om gowoi pondo om patayon ku iya' om i sompiiyon nu do gisom dot opunso kou, do miagal di winonsoi ku dot id di Yirobiam. 4 Iri nopondo i tiyon-iyon nu dot apatai do hiri'd bandar om ngoyon nondod tasu akano', om iri no it apatai do hiri'd soliwan do bandar om akanon di tombolog do mangangakan do rata',’ kanto,” ka dau. 5-7 Om iri nopo boros do Tuhan dot id di Baisa om id sompiiyon dau'ddi om pinolombus di Yohu, i nabi, tu' nokowonsoi nod dusa i Baisa dot id Tuhan. Okon nopo ko' i karaato' di piningwonsoi di Baisa o nokotogod do Tuhan, nga' nosubuanan nogi' di minimpatai iyau do koinsanai di tulun dit id suang do sompiiyon di Yirobiam. Koinsanai di nongowonsoi di Baisa di suwai, om i kosioho' dau, nga' nokotulis ngai' do hiri'd suang do Buuk di Monusui do Pasal Ngai' di Raja' dot Israil. Om kapatai noddi i Baisa om lobongo' no do hilo'd Tirsa. Om i Ila noddi, i tanak dau do kusai, o suminowoli dau do suminiliu do raja'.
I Ila, i Raja' dot Israil
8 Tontok di koduwo nohopod om onom do toun di Raja' Asa do momorinta' do Yohuda, om kosiliu nod raja' dot Israil i Ila, i tanak di Baisa. Om duwo toun dau do minomorinta' do hilo'd Tirsa. 9 Om ponokipakat no i Simri do sumaap di Ila. Iyau nopo nga' gunsiou, om boyoon do soudor di kikorita'-kuda'. Insan tadau di hilo'd Tirsa, om poginum no i Ila do hiri'd walai di Arsa, i mongilo-ilo do hiri'd walai di raja', om naawuk tomod diri i Ila. 10 Om salakoi noddi i Simri om patayo' no dau i Ila om siliu no iyau do raja' do suminowoli di Ila. Nosiliu iti di koduwo nohopod om turu' o toun di Raja' Asa do momorinta' do Yohuda. 11 Om kosiliu poddi i Simri do raja' om ngoyo' ngai' no dau patayo' i tiyon-iyon di Baisa, om iri ngai' piya i tobpinai om i tambalut di sompiiyon di Baisa nga' aiso' no o nokopoggidu'. 12 Om kapatai ngai' nopoddi it id suang do sompiiyon di Baisa do miagal di nokoboros do Tuhan do pinolombus di Nabi Yohu, dot id di Baisa. 13 Iyo Baisa nopo di Ila, i tanak dau om tumuku' dot id tingolig om minamayayat di tulun dot Israil do momonsoi'd dusa. Om gowoi poddi om pinopotogod iyolo'd Tuhan, i Kinorohingan do tukuon do tulun dot Israil. 14 Iri nopo susuyon do suwai do pasal di Ila om nongkotulis no do hiri'd suang do Buuk di Monusui do Pasal Ngai' di Raja' dot Israil.
I Simri, o Raja' dot Israil
15 Tontok di koduwo nohopod om turu' do toun di Raja' Asa do momorinta' do Yohuda, om kosiliu no i Simri do raja' dot Israil. Om hilo'ddi iyau id Tirsa do momorinta' do solinaid do turu' no tadau. Tontok nopoddi nga' maso di soudor dot Israil do monurungku' do Gibiton, i bandar do tulun do Pilistin. 16 Om soira'ddi norongou diyolo' do mongupakat i Simri do sumaap di raja' om pinatai dau i raja', om hiri nod kinoiyonon diri dot oinsanan nopo iyolo' do minomili' di Omri, i boyoon do soudor diyolo', do siniliu do raja' dot Israil. 17 Om tongkiadai noddi diyo Omri om i soudor dau o Gibiton, om ngoyo' no diyolo' turungkuo' o Tirsa. 18 Om tontok di nokito di Simri do nosolod no i bandar diri, om suang noddi iyau do hiri'd walai do raja' om tutudai no dau om rundun no iyau di walai, om kapatai noddi iyau. 19 Nosiliu pogi' o miagal diri nga' nokowonsoi id dusa i Simri dot id Tuhan, do miagal di Raja' Yirobiam, om iyau nga' minamayayat nogi' di tulun dot Israil do momonsoi'd dusa. 20 Om iri nopo susuyon do suwai do pasal di Simri, om kohompit ngai' i pakat dot araat di winonsoi dau, om nokotulis ngai' i' do hiri'd suang do Buuk di Monusui do Pasal Ngai' di Raja' dot Israil.
I Omri, o Raja' dot Israil
21 Om a' di oulud i tulun dot Israil tu' haro ot orohian dot i Tibni, i tanak di Ginat o silihon do raja', om haro ot orohian dot i Omri o raja'. 22 Nga' kinootuson nopoddi om i sumokodung di Omri o nakamanang, om napatai'ddi i Tibni, om i Omri noddi o nosiliu'd raja'. 23 Nosiliu iti do tontok di kotolu nohopod om iso' do toun di Raja' Asa do momorinta' do Yohuda. Koloido' nopo di Omri do momorinta' dot Israil om hopod om duwo toun. Om onom o toun dau do minomorinta' do Tirsa do mantad di timpuun i' iyau do momorinta'. 24 Nga' alaid noddi om pomoli no iyau dot iso' o nuluhon dot onom noribu o tusin do pirok do gatang, do mantad id songulun di roitan dot i Somor. Om pomonsoi no i Omri do bandar do hiri'd sakai di nuluhon diri, om pungaranai no dau do Samaria, do pinasangai-sangai di ngaran di Somor, i sanganu mantad di nuluhon. 25 Nga' agayo-gayo po o dusa do nowonsoi di Omri ko' i piro-piro o raja' di nokopomorinta' dit id gulu ko' iyau. 26 I Omri nga' miagal nopo di Yirobiam tu' minomonsoi'd dusa om minamayayat di tulun dot Israil do momonsoi'd dusa om tumuku' dot id tingolig. Om gowoi poddi om kotogod no o Tuhan, i Kinorohingan di tukuon do tulun dot Israil. 27 Iri nopo susuyon do suwai do pasal di Omri om koinsanai di nongowonsoi dau nga' nokotulis ngai' i' do hiri'd suang do Buuk di Monusui do Pasal Ngai' di Raja' dot Israil. 28 Om di nopoddi napatai om nolobong i Omri do hilo'd Samaria, om i Ahab diri, i tanak dau, o nosiliu do raja' do suminowoli dau.
I Ahab, o Raja' dot Israil
29 Tontok di toun do kotolu nohopod om walu' di Raja' Asa do momorinta' do hilo'd Yohuda, om kosiliu no i Ahab, i tanak di Omri do raja' dot Israil. Om duwo nohopod om duwo toun dau do momorinta' do hilo'd Samaria. 30 Om agayo-gayo po o dusa do nowonsoi dau dot id Tuhan ko' i piro-piro o raja' dit id gulu ko' iyau. 31 A' po dau koula' dot iyo-iyo poddi dusa di winonsoi di Raja' Yirobiam o dusa do winonsoi dau tu' kinawin po dau i Isibil, i tanak di Raja' Itbaal, i mantad hilo'd Sidon, om tuminuku' iyau dot id Baal. 32 Minomonsoi iyau do walai'd iyonon do tumuku' dot id Baal, i ponokokinorohingan do hilo'd Samaria. Om minomonsoi iyau do pananaraban do porsombahan dot id tingolig diri do hiri'd suang di walai'd tingolig. 33 Om minomonsoi po iyau do patung dot Asira, i ponokokinorohingan diri. Agayo po kopio o dusa di winonsoi di Ahab ko' i nowonsoi do koinsanai di raja' dot Israil di minomorinta' dot id gulu ko' iyau. Om gowoi poddi om pinopotogod iyau do Tuhan, i Kinorohingan di tukuon do tulun dot Israil. 34 Tontok di maso di Ahab do momorinta' om nongoi di Hiol, i tulun do Baitol, wonsoyo' kawagu i bandar do Yorikou. Nga' kapatayai nopo i Hiol do duwo o tanak dau do miagal di nokoboros mantad do Tuhan do pinolombus di Yosua, i tanak di Nun. Tu' napatai i Abiram, it id dotuo do tontok di pinopowonsoi i Hiol di pinoimpahan di bandar, om napatai i Sogub, i tanak dau dot id domulok do tontok di pinowonsoi di Hiol i totobon di wawayaan dot agayo di bandar diri.
I Ilia om i Minagadau dot Anaru
1 Insan tadau om ongoi no solowot di Raja' Ahab o songulun o nabi di roitan dot i Ilia. Iyau nopo om mantad do hilo'd Tisbi, i hilo'd Giliad. Om boros ka dau, “Id suang do ngaran do Tuhan, i Kinorohingan do poimpasi, i tukuon do tulun dot Israil, om i pogobi-obian ku, om momisunud oku diya', oi Tuan, dot id suang nopodti duwo ko' tolu toun dot id dabantalan om aiso' nondo o bolobou om aiso' o rasam dot ongotigas piya dot a' ku po poboroson do haro o rasam,” ka dau. 2 Om boro-boros noddi o Tuhan dot id di Ilia, 3 “Tongkiad no do kinoiyonon diti, om pakayaan no do ponong hilo'd koulayon, i hilo'd soborong do Bawang do Yordan. Om lumisok nod hilo' do hiri'd toning di luyu' do Bawang do Kirit. 4 Om koinum ko indo do hiri'd luyu' om kaakan ko do taakanon di pootodon do tombolog di roitan do bangkahak, i tombolog do suhuon ku'd paatod,” ka dau. 5 Om tonudo' no di Ilia i pinonuhuan do Tuhan diri om ongoi no iyau do hiri'd luyu' do Bawang do Kirit om undorong no iyau'd hiri. 6 Inuman nopo dau om hiri'd luyu', om kaakan iyau do roti om daging di pootodon di tombolog do roitan do bangkahak, do monikid kosuabon om monikid sosodopon. 7 Alaid noddi do mantad diri om karasak no i luyu' tu' a' i' nakarasam.
I Ilia om i Tondu' do Nopuadan do Hilo'd Sarpat
8 Om boro-boros noddi o Tuhan dot id di Ilia. 9 Boros ka dau, “Baino' nopodti om mongoi no do hilo'd bandar do Sarpat, i hilo'd somok do Sidon, om mundorong nod hilo'. Nosuhu' ku no o songulun o tondu' do nopuadan do paakan diya' do hilo',” ka dau. 10 Om ongoi noddi i Ilia do hilo'd Sarpat. Om soira' di nokorikot iyau do hiri'd wawayaan di bandar om kokito no dau o songulun o tondu' do monimung do siduwon. Om boros kaddi di Ilia dot id tondu'ddi, “Inan, ngoyo' oku daa onuwai do waig dot ongokooro',” ka dau. 11 Tontok di manau-panau no i tondu' do mongoi anu di waig, om pomolohou po kawagu i Ilia, “Igitan oku no daa diya' do roti dot ongokooro',” ka dau. 12 Om boros ka di tondu' do suminimbar, “Id suang do ngaran do Tuhan di poimpasi, i Kinorohingan di tukuon nu, om sumumpa' oku no dot aiso' no kopio o roti ku. Songonggom po kopio o tapung do torigu do hiri'd mangkuk om okoro' no o tumau do saitun do hiri'd kakanan dot okooro'. Om maso ku nogi' daa do monimung do siduwon do pogonsok dit okuri' noddi, do maan dahai di tanak ku dot akanon. Iri poo o takanon dahai, om aayi' pori om mandad pondo iyahai do matai,” ka dau. 13 Nga' boros ka di Ilia dot id dau, “Kada' katangkabo, oi inan. Wonsoyon po doho'd ongoiso' o roti dit okooro' i tapung om i tumau'ddi, om igitan nondo do hiti. Om mogonsok nogindo kawagu do maan do dokoyu di tanak nu. 14 Tu' nokoboros nod Tuhan, i Kinorohingan do tukuon do tulun dot Israil do kisuang kasai' nopondod tapung i mangkuk, om i kakanan nga' kisuang kasai' id tumau do gisom do porikatan kawagu'd Tuhan do rasam iti pomogunan,” ka dau. 15 Om pamanau noddi i tondu' do minongoi pomonsoi do miagal di nokoboros di Ilia dot id dau. Om haro kasai' nopo o kabagal do takano' diyolo'd tolu do solinaid do piro-piro o tadau. 16 Om iri nopo mangkuk diri nga' kisuang kasai' nopod tapung om i kakanan nga' kisuang kasai' nopod tumau do miagal di nokoboros do Tuhan do pinolombus di Ilia. 17 Om piro-piro noddi o koloido' do mantad diri, om sakit no i tanak di tondu' di nopuadan. Om maid-laid nga' murut-surut i toruol dau gisom do napatai iyau. 18 Om boros kaddi di tondu' dot id di Ilia, “Oi susuhuon do Kinorohingan, nokuro tu' minongoi ko'd hiti, om gowoi poddi om nosorou kawagu'd Kinorohingan i dusa ku om napatai nogiddi iti tanak ku?” ka dau. 19 Om boros ka di Ilia do suminimbar, “Patahako' daa doho' i tanak,” ka dau. Om ngoyo' noddi di Ilia kibito' i tanak do kusai di tondu'ddi, i poingkibit di tondu', om igitai no di Ilia do hiri'd sawat, do hiri'd bilik di niyon di Ilia. Om poliiyo' no di Ilia do hiri'd toodopon, 20 om sambayang no iyau dot opuhod do poingkaa, “Oi Tuhan, i Kinorohingan ku, nokuro tu' pinorikot nu o kosusaan diti dot id tondu' di nopuadan diti? Osonong tomod i' iyau dot id doho' om nokuro tu' pinatai nu nogiddi i tanak dau!” ka di Ilia. 21 Om loubai nogiddi di Ilia dot intolu i tinan di tanak, mikuwo'd suminambayang do poingkaa, “Oi Tuhan, i Kinorohingan ku, posio' no iti tanak diti,” ka dau. 22 Om pinokinongou id Tuhan i sambayang di Ilia; om koposiai no i tanak om osonong noddi. 23 Om ngoyo' noddi di Ilia patahako' i tanak diri do hiri'd tina' di tanak om boro-boros nod, “Inan! Antangai pogi' nga' napasi no kawagu iti tanak nu!” ka dau. 24 Om boros ka di tondu' di nopuadan do suminimbar, “Oilaan ku nogiddi kopio do susuhuon ko do Kinorohingan om pawayaan kopio ko'd Tuhan do boros dau!” ka dau.
I Ilia om i Obadia
1 Alaid-laid noddi do mantad diri, om di kotolu do toun do magadau, om boro-boros no o Tuhan dot id di Ilia. Boros ka dau, “Ongoi solowot di Raja' Ahab om porikoton ku indo o rasam,” ka. 2 Om pamanau no i Ilia. Tontok nopoddi om nakadala' no kopio o pagagadau do hilo'd Samaria. 3 Om lohowo' noddi di Ahab i Obadia, i mongilo-ilo di walai do raja'. (I Obadia nopo om tulun dit otorodok kopio do sumambayang dot id Tuhan, 4 om ngoyo' no di Obadia o hatus di nabi om polisoko' no dau dot id luang do nuluhon. Om binahagi' dau iyolo' do duwo o bohogian do sopilimo nohopod o tulun. Om piatadan dau iyolo' do taakanon om waig.) 5 Om boros ka di Ahab dot id di Obadia, “Kaino tumongkop diti pomogunan do mongoi pogontong do tudan do waig om bawang; tu' a' i' oila-ilaan do kobontol to nopo do sakot do paakan di kuda' om i bagal toko', om a' indo minog do haro o patayon dot ongoiso' piya di tayam-tayam toko',” ka dau. 6 Om kopibahagi' po diyolo' i watas do ngoyon diyolo' antangai, om pamanau nogiddi iyolo'. Pinakayaan di Ahab dot id iso' o kinoiyonon om i Obadia no om pinakayaan dot id kinoiyonon do suwai. 7 Om maha' di hiri nod tanga'd ralan i Obadia, om kosolowot no dau i Ilia. Om kotutunai no dau i Ilia, om otud no i Obadia do suminuwau dau. Om ponguhot no i Obadia, “I Ilia kopio ko toi, oi Aman?” ka dau. 8 “Oo, i Ilia oku nogi',” ka di Ilia do suminimbar. “Ngoyo' nogi' kopio sunudai i raja', i tuan nu'ddi do hiti oku,” ka dau. 9 Om boros ka di Obadia, “Nunu kopio'ddi o sala' ku tu' posuangon oku diya' dot id koligagaanan do patayon di Ahab? 10 Id suang do ngaran do Tuhan di poimpasi, i Kinorohingan nu, om sumumpa' oku do nokoponuhu' no i raja' do mogihum diya' dot id pointikid-tikid do kinoiyonon do pointongkop diti pomogunan. Om ondung momoros i boyoon dot iso' o kinoiyonon dot a' ko hino do hiri, om pinokianu di Ahab do sumumpa' i boyoon do kinoiyonon diri dot a' ko nosolowo-lowot do hiri. 11 Om baino' noddi om suhuon oku nogi' diya' do mongoi pomisunud dau do hiti ko? 12 Om kapamanau oku nopo dotindo do mantad hiti om atantu' no do ngoyon ko angatai di Rusod do Tuhan do kumaa dot id kinoiyonon dit a' ku oilaan! Om ondung sunudan ku i Ahab do hiti ko, om a' ko indo dau osolowot om atantu' no do patayon oku dau, do mulong piya dot otorodok kopio oku do sumambayang dot id Tuhan do mantad dit okoro' oku po. 13 A' ko po toi nokorongou di pinopolisok oku do hatus o nabi do Tuhan do hilo'd luang do nuluhon di maso di Isibil do minimpatai do nabi do Tuhan? Binahagi' ku iyolo' do sopilimo nohopod o tulun dot id iso' o luang, om piatadan ku iyolo' do takanon om tinumon? 14 Om poingkuro ko'ddi do monuhu' doho' do mongoi pomisunud di raja' do hiti ko? Atantu' no do patayon oku dau!” ka dau. 15 Om boros ka di Ilia, “Mamatos oku dot id suang do ngaran do Tuhan dit Agayo Kuasa', i pogobi-obian ku, do mongoi oku no kopio solowot di raja' do tadau'd baino',” ka dau.
I Ilia om i Piro-Piro Nabi di Modsubak do Baal
16 Om ngoyo' no di Obadia sunudai i raja', om pamanau no i Ahab do minongoi solowot di Ilia. 17 Soira' di nokito nogi' di Ahab i Ilia om pomoros no i Ahab dot opuhod do poingkaa, “No, nga' hiti ko i', i mamagangau do hiti'd Israil!” ka. 18 Nga' boros ka di Ilia, “Okon i' ko' iyoho' i mamagangau, nga' iya' om i sompiiyon nu. Tu' suminurilog ko di pinonuhuan do Tuhan, om tuminuku' ko di piro-piro o tingolig do Baal. 19 Nga' baino' nopo, om suhuon ngai' no i tulun dot Israil do mongoi solowot doho' do hilo'd Nuluhon do Karmol. Om suhuon nogi' it apat nahatus om limo nohopod o nabi di modsubak do Baal om it apat nahatus o nabi di modsubak dot Asira, i godsian di Isibil, i sawo do raja'ddi!” ka dau. 20 Om suhuo' ngai' no di Ahab o koinsanai di tulun om i piro-piro o nabi di modsubak do Baal do mongoi do hilo'd Nuluhon do Karmol. 21 Om insomok noddi i Ilia di tulun dot ogumu' om boro-boros no iyau, “Songkuro nopo koloido' dokoyu dot orohian do mikoduwo o ginawo? Ondung Kinorohingan kopio o Tuhan, om tumuku' kou no dot id Tuhan; nga' ondung Baal o Kinorohingan, om tumuku' kou nopo dot id Baal!” ka dau. Om aiso' id komi di tulun di songintimung do hiri. 22 Om boros kaddi di Ilia, “Id pogialatan nopo di nabi do Tuhan om iyoho' poo o noolu', om apat indo nahatus om limo nohopod o nabi do modsubak do Baal do hiti. 23 Nga' pootodo' pogi' do hiti o duwo tinan do sapi' do tontoluhan, om suhuon i' ilo piro-piro nabi di modsubak do Baal do manganu di songinan om sumbolion i'. Om popoton nogindo om pasakayon di siduwon, nga' kada' kopio pagapui do hiri. Om iri tiso' di sapi' nga' iyoon ku i' iyoho'ddi. 24 Om pologoson nopo i piro-piro nabi di modsubak do Baal diri do sumambayang dot id kinorohingan diyolo', om iyoho' nga' sumambayang indo dot id Tuhan. Om isai nopo i sumimbar do mikuwo'd polintuhun do tapui om iri no o Kinorohingan kopio,” ka dau. Om oinsanan nopo i tulun do suminimbar dot opuhod do poingkaa, “Kaakun i' iyahai!” ka. 25 Om boros kaddi di Ilia dot id piro-piro o nabi di modsubak do Baal, “Iyokoyu no o gulu do momili' do sapi' om poposodia'ddi tu' ogumu' kou i' iyokoyu. Om sumambayang kou no dot id kinorohingan dokoyu, nga' kada' no kopio dokoyu opuyai i kayu,” ka dau. 26 Om pilio' noddi diyolo' o songinan di sapi' om posodiawo' no diyolo'. Om sambayang nogiddi iyolo' dot id Baal do gisom do norikot o pitangaadau, do mikuwo'd minggarang. “Simbaro' iyahai, oi Baal!” ka no diyolo'. Om mingiyo nopoddi iyolo' do mikuwo'd mintari' do minsorili' di pananaraban do porsombahan di winonsoi diyolo'. Nga' aiso' i' o nunu-nunu dot isimbar. 27 Om sosodopon noddi om timpuun no i Ilia do momohingi-hingi diyolo'. Boros ka dau, “Sambayang-bayang kou po dot opuuhod! A' i' oila-ilaan do nokotongkiad nopo iyau! Ko' maso po dau do koodop, om mositi' no do posikan dokoyu iyau!” ka no di Ilia. 28 Om sambayang po kawagu dot opuuhod i piro-piro nabi diri. Om pingsuhatan po diyolo'd pisau om pais o tinan diyolo', do miagal di koubasan diyolo'd momonsoi, om gisom do songluyung-luyung po o raha'. 29 Om mingiyo nopoddi iyolo' do gisom dot aadau no, do miagal pod tulun di noulau-ulau; nga' aiso' i' o sumimbar, om aiso' o minamadul. 30 Om boros kaddi di Ilia dot id tulun dit ogumu', “Insomok-somok kou,” ka dau. Om timung ngai' no iyolo' do hiri'd posorili' dau. Om timpuun no i Ilia do mononong di pananaraban do porsombahan dot id Tuhan, di nahaba' no. 31 Om anu no iyau do hopod om duwo o watu. Iso' nopo o watu nga' ponokowakil do tiso' di hopod om duwo o sinakagon di tangaanak di Yakub, i pinungaranan do Tuhan dot i Israil. 32 Om iri no ngai' i watu'ddi o pinononong kawagu di Ilia di pananaraban do porsombahan, i tiyonon do sumambayang dot id Tuhan. Om pinoritan dau dot agayo o posorili' di pananaraban do porsombahan, do korumpos i' o hopod om apat o lito do waig. 33 Om pouludo' no dau i siduwon do hiri'd sakai di pananaraban do porsombahan. Om popoto' noddi dau i sapi' di tiso' om pasakayo' no i popot diri do hiri'd siduwon. Om boros kaddi dau, “Ngoyo' dokoyu suangai do waig ot apat o luping do gisom dot oponu', om potuntugon i' i waig do hilo'd porsombahan do sorobon om hilo'd siduwon,” ka dau. Om kowonsoi poddi diyolo' o miagal diri, 34 om boro-boros po kawagu iyau, “Tuntug-tuntugan po dokoyu,” ka dau. Om ngoyo' no diyolo' tuntugai. “Tuntug-tuntugai po dot ongoinsan,” ka kawagu di Ilia, om ngoyo' no diyolo' kawagu tuntugai. 35 Om lumuyung nopoddi i waig do posorili' di pananaraban do porsombahan do gisom do noponu' do waig i parit. 36 Om korikot poddi i maso do kapatahakan do porsombahan do sorobon di dongsosodopon, om insomok no i Nabi Ilia, di pananaraban do porsombahan, om sambayang no iyau. Boros ka dau, “Oi Tuhan, i Kinorohingan di tukuon di Abraham, om i Isak, om i Yakub. Pointalango' nod baino' dot iya' o Kinorohingan dot Israil, om iyoho' o susuhuon nu; om pointalangon do pinonuhuan ngai' nu doho' iti winonsoi ku. 37 Simbaro' oku no, oi Tuhan! Simbaro' oku no om koilo i' iti tulun dot ogumu' dot iya' no o Kinorohingan, oi Tuhan, om iya' o popoguli' kawagu diyolo' dot id diya',” ka dau. 38 Om polintuhun noddi o Tuhan do tapui do mantad hilo'd tawan do minonorob do koinsanai di porsombahan om i siduwon, om koinsanai di watu om i tana', om minonuu di waig di hiri'd parit. 39 Om kokito poddi di tulun dot ogumu' iri om tungub nopo iyolo' do hiri'd tana' do mikuwo'd minomoros do poingkaa, “TUHAN no o Kinorohingan; Tuhan no kopio o Kinorohingan!” ka diyolo'. 40 Om boros kaddi di Ilia, “Ngoyo' dokoyu tangkapo' ngai' ilo nabi di modsubak do Baal; kada' nod haro o tongoiso' piya do kopoggidu'!” ka dau. Om olomus nopoddi i tulun do minongoi panangkap do koinsanai di nabi di modsubak do Baal. Om pokoyoo' ngai' no di Ilia iyolo' do hilo'd Bawang do Kison, om hilo' noddi o pinamatayan ngai' dau diyolo'.
Notingkod do Magadau
41 Om boro-boros noddi i Ilia dot id di Raja' Ahab, “Ongoi nogi' akan do dinondo, oi Tuan Raja', tu' oruhai nod rumasam; orongou no o kahas do rasam,” ka dau. 42 Om ongoi no i Ahab akan, om i Ilia no om tuminakad di Nuluhon do Karmol. Om hilo' no iyau do pointungub do hiri'd tana', om tulu nopo dau om id piolitan do totud dau. 43 Om boros ka dau dot id susuhuon dau, “Takad daa do hilo'd timpak om antangan i' o ponong hilo'd rahat,” ka dau. Om takad no i susuhuon dau om guli' no kawagu om boros ka dau, “Aiso' i' o nunu-nunu do nokito ku,” ka. Inturu' di Ilia suhuo' i susuhuon dau do tuminakad do minongoi pogontong. 44 Om di nopo di kointuru' di susuhuon diri do guminuli', om boros ka dau, “Haro nokito ku'd haun dot irad nod palad do mantad ponong hilo'd rahat,” ka. Om boros ka di Ilia dot id susuhuon dau'ddi, “Ongoi kopio do hilo'd di Raja' Ahab, om suhuon i' iyau do sumakai di korita'-kuda' dau om kouli' i' iyau dot a' po aandon do rasam,” ka dau. 45 Om a' po alaid om luhung no i tadau, om minumang puhod o tongus om ruminasam dot asapou. Om sakai no i Ahab di korita'-kuda' dau om uli' no do hilo'd Yisriil. 46 Om tontok iddi do nakaanu i Ilia do kokorisan do mantad id Tuhan. Om lopio' no dau i rasuk dau dot anaru om poogkoso' no dau. Om panangkus no iyau do suminogulu di Ahab do gisom do nokorikot do hiri'd wawayaan do bandar do Yisriil.
Hilo'd Nuluhon do Sinai i Ilia
1 Om susuyo' ngai' no di Ahab i winonsoi di Ilia dot id di Isibil, i sawo dau. Om sinusui nogi' dau do pinatai ngai' di Ilia i nabi di modsubak do Baal. 2 Om porikoto' nod i Isibil o boros dot id di Ilia do poingkaa, “Hukuman oku nopo om patayon oku nopo di tingolig ku ondung a' ku no owonsoi dot id diya' o miagal di winonsoi nu dot id nabi diri do dongiyo'dtid suab,” ka dau. 3 Om kooris tomod noddi i Ilia gisom do minogidu' iyau do moddosi'd patayon. Om pitanud no iyolo' di susuhuon dau do minongoi do hilo'd Borsiba, i hilo'd watas do Yohuda. Om tongkiadai no di Ilia i susuhuon dau'd hilo'. 4 Nga' i Ilia nopo om pamanau nopod gakod do nosongodou do ruminikot do hiri'd tana' do kowotuan. Om undorong no iyau dot id sahau di kayu dit okohob o tuntu. Om irikau no iyau do hiri om uhang po daa'ddi dau do matai. Boros ka di Ilia dot id Tuhan, “A' oku noddi kogoos, oi Tuhan. Ngoyo' nopo o ginawo ku, osonong nogi' dot apatai oku,” ka dau. 5 Om lii noddi iyau do hiri'd sahau di kayu om koodop no iyau. Om rikot no ot iso' o moloikat do minongoi kama' dau do mikuwo'd minoro-boros do poingkaa, “Ilia, tungag, om makan i'!” ka. 6 Om pikorowo-rowo no i Ilia om kokito no dau o sonliob o roti do hiri'd toning do tulu dau om haro o kakanan dot okooro' do kisuang do waig. Om akan noddi iyau om inum, om lii no iyau kawagu. 7 Om rikot po kawagu i moloikat do Tuhan do koinduwo no do minongoi kama' dau. Om boro-boros nod, “Ilia, tungag, om makan i', om kogoos ko i' do mamanau dot osodu',” ka. 8 Om tungag no i Ilia, om akan noddi om inum iyau, gisom dot okoris iyau. Om nokogoos iddi iyau do minamanau do solinaid dot apat nohopod o tadau do kuminaa do hilo'd Sinai, i nuluhon do tiyonon do Tuhan. 9 Om odop noddi iyau do hiri'd suang dot iso' o luang do nuluhon. Om boro-boros noddi o Tuhan dot id dau, “Ilia, nunu maan nu'd hiti?” ka. 10 Om boros kaddi di Ilia do suminimbar, “Oi Tuhan, i Kinorohingan dot Agayo Kuasa'. Iyoho' nopo om iya' noo o pinogobi-obian ku. Nga' iri nopo tulun dot Israil om tuminolibamban i' di batos diyolo' dot id diya'. Tu' hinuyas diyolo' i pananaraban do porsombahan dot id diya' om pinatai diyolo' i piro-piro nabi nu. Om iyoho' poo o noolu', om baino' noddi om pokipapatayan oku po daa diyolo'!” ka dau. 11 Om boros kad Tuhan dot id dau, “Soliwan do mantad hino'd luang, om mingkakat i' do tumimbaba' doho' do hilo'd timpak diti nuluhon,” ka dau. Om talib noddi o Tuhan do hiri om porikoto' no dau o tongus dit opuhod kopio, gisom do nongopitas o nulu-nulu om nangagaang o nuluhon di kapampangan, nga' a' i' o Tuhan minintalang dot id tongus diri. Om kotingkod poddi i tongus, om guyu' no o tana', nga' a' i' o Tuhan minintalang do tontok di guminuyu' o tana'. 12 Om rikot nogiddi o tapui nga' a' i' hino o Tuhan do hiri. Om katalib poddi iri om korongou no dau o kohus do ribut dit opiiyan. 13 Om korongou poddi di Ilia i kohus di ribut dot opiiyan diri, om sompono' no dau do rasuk dau o rabas dau, om soliwan no iyau om ingkakat no do hiri'd kabang di luang. Om haro'ddi o boros do minoro-boros dau do poingkaa, “Ilia, nunu maan nu'd hiti?” ka. 14 Om boros ka di Ilia do suminimbar, “Oi Tuhan, i Kinorohingan dot Agayo Kuasa'. Iyoho' nopo, om iya' noo o pogobi-obian. Nga' iri nopo tulun dot Israil om tuminolibamban i' di batos diyolo' dot id diya'. Tu' hinuyas diyolo' i pananaraban do porsombahan dot id diya' om pinatai diyolo' i piro-piro nabi nu. Iyoho' poo o noolu', om baino' noddi om pokipapatayan oku po daa diyolo'!” ka dau. 15 Om boros kad Tuhan, “Guli' nogi' do hilo'd tana' do kowotuan, i hilo'd somok do Damsik, om tuntugan nod tumau o tulu di Hasail, do tanda' do silihon do raja' do Siria. 16 Om iyoon nogiddi i Yohu, i tanak di Nimsi, om osiliu i' iyau do raja' dot Israil, om i Ilisa i tanak di Sapat, i mantad hilo'd Abil Mihola om osiliu i' iyau do nabi do sumowoli diya'. 17 Isai nopo it a' di Hasail apatai, om apatai indo di Yohu. Om iri no i kopoggidu' do mantad id di Yohu om apatai indo di Ilisa. 18 Nga' posion ku i' o turu' noribu tulun dot Israil, iri no i tulun dit otorodok kasai' dot id doho' om it a' insan tuku' dot id tingolig do Baal om a' insan ongoi tungub di tingolig,” ka.
Pinili' do Tuhan i Ilisa
19 Om pamanau no i Ilia om kabantalai no dau i Ilisa do maso do mamaradu do hiri'd tumo dau om hopod om duwo o pasang do sapi' do maso do pamaradu. I Ilisa nopo om i sapi' dit id tohuri no o pamaradu dau. Om soira' di tuminalib i Ilia di Ilisa, om iduwo' no di Ilia i rasuk dau dit anaru om pasapayo' no do hiri'd lihawa di Ilisa. 20 Om tongkiadai nopoddi di Ilisa i sapi' dau om panangkus no do guminusa' di Ilia. Om kokosupai poddi dau, om boro-boros no i Ilisa, “Pabanaro' oku po daa do mongoi intod di molohing ku om tumanud oku nogindo diya',” ka dau. Om boros ka di Ilisa, “Ongoi nopo. A' ku i' iya' sansagan do moyo',” ka dau. 21 Om guli' noddi i Ilisa do hiri'd tumo dau om sumbolio' no dau i sapi' dau. Om iri nopo tinggayan di radu om numaan dau do pogudung do pinogonsok di daging di sapi'. Om bohogio' nogiddi dau i daging dot id tulun di pakaraja' do hiri, om akano' no diyolo'. Om ongoi noddi i Ilisa tanud di Ilia do suminiliu do mongunguhup dau.
Suminangod do Siria
1 Insan tadau om timungo' ngai' no di Binhadad, i raja' do Siria, i soudor dau, om ngoyo' no dau turungkuo' o bandar do Samaria do miwoyo' do tolu nohopod om duwo o raja' do suwai di kikuda' om kikorita'-kuda' di don sumasangod. Om songodo' no diyolo' i bandar diri. 2 Om ponuhu' no iyau do tulun do mongoi solowot di Ahab, i raja' dot Israil, do hiri'd bandar diri, do mikuwo'd poboros do poingkaa, 3 “Pokionuon di Raja' Binhadad do maan nu patahako' dot id dau i tamas, om pirok om iri ngai' i sawo om tangaanak nu dit ongokoris,” ka. 4 Om boros ka di Ahab, “Sunudan no i Tuan Raja' do kaakun oku i' di pokionuon dau. Onuon oku nopo dau om koinsanai di doho'd songonuon,” ka dau. 5 Om guli' no kawagu i piro-piro susuhuon di Binhadad diri dot id di Ahab do pinopoboros di pokionuon di Binhadad di suwai ko' iri. Poingkaa i boros di piro-piro susuhuon diri, “Di nopo di guulu om pinokianu di raja' dahai do maan nu patahako' dau i tamas, om pirok om iri ngai' i sawo om tangaanak nu. 6 Nga' baino' noo, om porikoton dau i gunsiou dau do mongoi ponoruang di walai nu om i kawalayan di pagawai nu, do mongoi panganu do nunu nopo i kigatang dot okito diyolo'. Rumikot no iyolo'd hiti do dongiyo'dtid suab,” ka diyolo'. 7 Om lohowo' ngai' noddi di Raja' Ahab i boyoon dot Israil om boro-boros no iyau diyolo', “Iyokoyu nga' kokito i' dot orohian daa iti tulun diti do momungou dati'. Tu' pokionuon dau do patahakon ngai' ku i sawo om i tangaanak ku, om i tamas om pirok ku. Om nookunan ku nori,” ka dau. 8 Om boros kaddi di piro-piro o boyoon dot Israil, “Kada' podulo' i tulun diri, oi Raja'! Kada' pokiala',” ka diyolo'. 9 Om boros kaddi di Ahab do suminimbar di susuhuon di Binhadad, “Sunudan no i Tuan Raja' Binhadad dot ookunan ku i' daa i pinokianu dau di koiso' i', nga' iri nopo koduwo om a' ku no ookunan,” ka dau. Om pamanau noddi i piro-piro susuhuon diri. Om ongoi po kawagu iyolo' solowot di Ahab, om boro-boros nod poingkaa, 10 “Porikot nondo i raja' dahai do soudor dot ogumu' kopio do mongoi pamaraag diti bandar nu, om iri nopondo tauu di kinaraagan do bandar nu om oonggom-onggom i' diyolo'. Nokosumpa' no iyau dot id tingolig dau do momohukum dau, ko' mamatai dau dot a' no dau owonsoi o miagal diri!” ka diyolo'. 11 Om boros ka di Raja' Ahab do suminimbar, “Poboroson no o miagal diti dot id di Raja' Binhadad: Iri nopo gunsiou dot otopot om oondos nopo om kopongo do sumangod, okon i' ko' dit a' po kasangod,” ka dau. 12 Iri nopo pinonimbar di Ahab diri nga' pinoboros dot id di Binhadad di maso dau do poinsugku' di piro-piro o raja' do suwai di sokodung dau, do monginum-nginum do hiri'd kokiiman diyolo'. Om korongou poddi di Binhadad iri, om suhuo' no dau i tulun dau do mongoi panangod di bandar do Samaria. Om pamanau noddi iyolo'. 13 Om daamot nopoddi, om haro o songulun o nabi do minongoi boro-boros di Raja' Ahab. Boros ka dau, “Minomoros o Tuhan dot id diya' do poingkaa, ‘Kada' poddosi di soudor dot ogumu'ddi! Onuan ku i' iya' do kamanangan do sumangod diyolo' do tadau'd baino', om oilaan nu indo dot iyoho' no o Tuhan!’ ka,” ka dau. 14 “Isai tuu o mogulu do mongoi sangod?” ka di Ahab do minuhot. Om boros ka di nabi diri, “I soudor dit ongomulok po, i woyoon di piro-piro boyoon do watas. Iyo noddi o boros do Tuhan,” ka dau. “Om isai o momoyo' do mongoi sangod?” ka kawagu di raja' do minuhot. “Iya', oi Raja',” ka di nabi. 15 Om timungo' ngai' noddi di raja' i soudor dit ongomulok po, i woyoon di piro-piro boyoon do watas, om intobo' no dau iyolo'. Oinsanan nopo nga' duwo nahatus om tolu nohopod om duwo o soudor. Om niyo i' dau'ddi i soudor dot Israil dit ongkirapo-rapo. Oinsanan nopo om turu' noribu o tulun. 16 Om tuminimpuun iyolo' do minongoi sangod di dangadau no, di maso di Binhadad om i tolu nohopod om duwo raja' do sokodung dau do moginum-ginum do gisom do nangaawuk do hiri'd kokiiman diyolo'. 17 Iri nopo minogulu om i soudor dit ongomulok po. Om ngoyo' noddi di tulun di sinuhu' di Binhadad do mongoi ponoluku' di pisangod, sunudai i Binhadad do haro o sinompuruan do soudor do kumaa ponong id diyolo' do mantad ponong hilo'd Samaria. 18 Om ponuhu' no i Binhadad do mongoi panangkap di soudor diri. Boros ka dau, “Miahon nopod manangkap. A' no podulon do mongoi tuu daa iyolo' sangod ko' mongoi po ponokiulud,” ka. 19 Om timpuun no i soudor dit ongomulok poddi do suminangod, om sinusuhut iyolo' di soudor dot Israil dit ongkirapo-rapo. 20 Om sompori-pori nopo iyolo' do minamatai di pisangod dot abantalan diyolo' gisom diri do minogidu' i tulun do Siria do gusa-gusaon di tulun dot Israil. Nga' i Binhadad nopo om a' i' nokosupan tu' suminakai iyau do kuda' do minogidu' do miwoyo' do piro-piro di soudor dau dit ongkikuda'. 21 Om i Raja' Ahab nga' minongoi nogi' sangod. Om piningraag dau i korita'- kuda' di don sumasangod om pinimpatai dau i kuda'. Om agayo no kopio o kinaalaan di tulun do Siria do tadau'ddi. 22 Om ongoi no kawagu i nabi solowot di Ahab om boro-boros no, “Baino' nodti, oi Tuan, om osonong nogi' do muli' ko om pokorison no ginawo nu om momusorou no kopio. Tu' rumikot po moti' kawagu i raja' do Siria do mongoi panangod dot orikot i maso do momiroun kawagu o kayu,” ka dau.
Minongoi Kawagu Panangod i Soudor do Siria
23 Om boro-boros no i soudor di Raja' Binhadad dot id di Binhadad, “Iri nopo kinorohingan di tukuon do tulun dot Israil om ongokoris kopio do hilo'd konuluhanan om iri no kinaala-laan toko' do nala' di bansa' dot Israil. Nga' atantu' no dot aala' toko' i' iyolo' do hilo'd rantai. 24 Om osonong nogi' do sowolian nu di boyoon do soudor i tolu nohopod om duwo o raja'ddi. 25 Om woyoon nu nogindo o posukan do soudor dot irad di soudor nu di naala' di gulu, om miwoyo' do kuda' om korita'-kuda' do don sumasangod do miagal di gulu kogumu'. Om ngoyon toko' nondo songodo' i tulun dot Israil do hilo'd rantai, om atantu' no do kamanang toko' i' do baino',” ka diyolo'. Om kookunai nod i Raja' Binhadad iri, om tonudo' no dau i nosihat di soudor dau. 26 Om korikot poddi i maso do momiroun kawagu o kayu om woyoo' no dau i soudor dau do minongoi do hilo'd bandar dot Apik do mongoi panangod di tulun dot Israil. 27 Om i tulun dot Israil nga' minonimung nogi' do soudor diyolo' om pamanau no do minongoi sangod. Om minipiduwo i soudor diyolo' om pomukiim no iyolo' do hiri'd hapak di tulun do Siria. Pataladon nopo di soudor do Siria dit agayo tomod o kinotongkopon do minomonu' di watas diri, om iyo nod duwo baanan do dumba' i soudor dot Israil. 28 Om rikot no o songulun o nabi dot id di Ahab om boro-boros no, “Poingkaa o boros do Tuhan, ‘Iyo nopoddi tu' osorou daa di tulun do Siria do hilo' nod konuluhanan do kikuasa' oku, om a' no kikuasa' do hiti'd rantai, om onuan ku i' iya' do kamanangan dot iyo piya kopio'ddi o kogumuo' do soudor diyolo'. Om koilo ko indo om i tulun nu do Tuhan oku,’ ka,” ka dau. 29 Om turu' o tadau di soudor do Siria om i soudor dot Israil do poundorong do hiri'd pinomukiiman diyolo'. Om tadau poddi di koturu' om timpuun nogi' iyolo' do minisangod. Om id suang nopo do pinisangadan diri nga' napatai di tulun dot Israil o hatus noribu o tulun do Siria. 30 Iri nopo i nokopoggidu' om minogidu' daa do kuminaa do hiri'd bandar dot Apik, nga' kahaba' noddi i tolig di bandar om kootungai no o duwo nohopod om turu' noribu diyolo'. Om i Binhadad nga' minogidu' nogi' do minongoi do hiri'd suang di bandar om lisok no dot id iso' o bilik dit id gogok no kopio. 31 Om ongoi noddi o piro-piro boyoon do soudor di Binhadad solowot dau. Om boros ka diyolo', “Boros kad tulun, om ongobinsianan i' kaka o raja' dot Israil. Om pabanaro' daa iyahai do mongoi solowot di raja' dot Israil do mikuwo'd manampakai do karung do tanda' do monosol, om manangkaro do tali do tanda' do mokiporinta'; om ulan toi' daa om a' ko dau patayon,” ka diyolo'. 32 Om panampakai noddi iyolo' do karung om panangkaro do tali, om ongoi no solowot di Ahab, om boro-boros nod poingkaa, “Nosiliu nod susuhuon nu i Binhadad, oi Tuan Raja'. Om pokionuon no daa kopio dau dot a' nu iyau patayon,” ka diyolo'. Om boros ka di Ahab, “Poimpasi po toi i tobpinai ku'ddi?” ka dau. 33 Om magandad no i boyoon do soudor di Binhadad do tanda' do sumonong i Ahab. Om koboros poddi di Ahab dot, “Tobpinai” ka, om tilombus nopo iyolo' do minomoros dot, “Oo, otopot nogi' kopio do tobpinai nu i Binhadad,” ka diyolo'. Om boros ka di Ahab, “Ngoyo' iyau hitio'!” ka dau. Om korikot noddi i Binhadad, om angatai no di Ahab do sumakai di korita'-kuda'. 34 Om boros ka di Binhadad dot id dau, “Pogulion ku i' dot id Tuan i piro-piro bandar di nosolod di tapa' ku do mantad id tapa' nu. Om songkoino ko i' do popoingkakat do tiyonon nu do mongindapu' do hilo'd bandar do Damsik do miagal di winonsoi di tapa' ku do hiti'd Samaria,” ka dau. Om boros ka di Ahab, “Iti no boros om batos nu o kopoiduan ku diya',” ka dau. Om pomonsoi noddi i Ahab do pitoruan dot id di Binhadad, om poiduwo' no di Ahab i Binhadad.
Pinasala' di Nabi i Ahab
35 Om suhuo' nod songulun o nabi o tiso' o nabi do suwai do mongoi pomobog dau, tu' iyo noddi o pinonuhuan do Tuhan, nga' mada' i' i tambalut dau do momonsoi do miagal diri. 36 Om boros kaddi di nabi diri, “Kapamanau ko po do mantad hiti om ngoyon ko nod singa tabpaai tu' a' ko i' mumboyo' do boros do Tuhan,” ka dau. Om notopot i' kopio tu' kapamanau po iyau do mantad hiri om tabpaai no iyau do singa. 37 Om ongoi no i nabi diri dot id tulun do suwai om boros ka dau, “Bobogo' oku!” ka. Om bobogo' noddi iyau di tulun do gisom do nosuhat iyau. 38 Om rilitai noddi di nabi i suhat dau, do kain o pinomorilit, gisom dot a' no iyau'd tulun otutunan. Om ongoi nogi' iyau ingkakat do hiri'd tisan do ralan do magandad di raja' dot Israil do tumalib. 39 Om soira' di tuminalib i raja', om pomolohou no i nabi diri dot i raja' o linohou, “Oi Tuan Raja', tontok di monokisaap oku do hilo'd pisangadan, om ngoyo' oku no dot iso' o soudor paatadai dot iso' o pisangod di natangkap. Boros ka dau, 'Gompion no kosonong-sonong iti tulun diti; ondung kopoggidu' iyau, om iya' no o patayon do sumowoli dau ko' kapambayar ko do tolu noribu tusin do pirok,’ ka. 40 Nga' tontok dit agangau kopio oku, om poggidu' no i tulun,” ka dau. Om boros ka di raja', “Iya' i' o pinoporikot do hukuman dot id tinan nu, om iya' no o tumanggung dino,” ka. 41 Om iduwo' noddi di nabi diri i rilit di suhat dau, om kotutunai no di raja' do tulun iyau di nabi. 42 Om boros ka di nabi diri dot id raja', “Poingkaa o boros do Tuhan, ‘Iri nogi' i tulun di pinonuhuan ku diya' do mamatai om pinologos nu do minogidu'. Om gowoi poddi om iya' no o matai do sumowoli dau; om iri pondo i soudor nga' angapatai no tu' pinologos nu i' i soudor dau do minogidu',’ ka,” ka dau. 43 Om otogod tomod diri om tumongob i raja' do minuli' do hilo'd Samaria.
Kabun dot Anggur di Nabot
1 Hiri nopod toning di walai di Raja' Ahab do hilo'd Yisriil om haro o kabun dot anggur dot i Nabot o sanganu. 2 Insan tadau om boro-boros no i Ahab di Nabot, “Sianu oku daa'dti kabun dot anggur nu, tu' iti nopo kabun om osomok kopio diti walai ku. Om tanaman ku daa do rarapaon. Onuan ku i' daa iya' do kabun dot anggur dit osonong ko' iti do maan do poningolon diti. Ko' ondung orohian ko om bolion ku nogi' do tumanud di pamagatang dit apatut,” ka dau. 3 Om boros kaddi di Nabot, “Iti nopo kabun dot anggur diti om tinungkusan ku po do mantad id taki-aki ku. Sumumpa' oku no dot id suang do ngaran do Kinorohingan dot a' ku no kopio patahakon iti dot id diya'!” ka dau. 4 Om tumongob diri om otogod o ginawo di Ahab do nokorongou di pinoboros di Nabot dot id dau. Om kouli' poddi i Ahab om lii no iyau do hiri'd toodopon dau do potoguang ponong hiri'd limput, om a' nopoddi iyau makan. 5 Om ongoi no i Isibil, i sawo di Ahab do hiri'd dau, om uhoto' no dau i Ahab, “Nokuro tu' tumongob ko? Nokuro tu' a' ko makan?” ka dau. 6 Om boros ka di Ahab, “Gama' no di Nabot, a' oku asanangan dau. Tu' bolion ku daa i kabun dau ko' ondung orohian daa iyau om poolonon ku daa do kabun dot anggur do suwai, nga' mada' i' iyau!” ka dau. 7 Om boros ka di Isibil, “Okon toi ko' raja' ko dot Israil! Tungag, om makan i'! Posimbayanon nopo o ginawo tu' katahak ku i' diya' i kabun dot anggur di Nabot diri!” ka dau. 8 Om ponulis noddi i Isibil do surat, om tulisai nod ngaran di Ahab om sinaapan di saap di Ahab. Om pokirimo' no dau i surat diri dot id boyoon om id tulun dit ongkipangkat do hilo'd Yisriil. 9 Suang nopo di surat diri om poingkaa, “Suhuon no i tulun dot ogumu' do puasa, om lohowon no iyolo' do tumimung; om onuan no i Nabot do tirikohonon dit osonong kopio dot id pitimungan diri. 10 Suhuon no o duwo tulun dot araat do mirikau do hiri'd toguang di Nabot do monondos do minomopol i Nabot do Kinorohingan om minomopol do raja'. Om posoliwanon nogindo iyau di bandar, om dumpahon do watu do gisom dot apatai!” ka. 11 Om wonsoyo' no di boyoon om i tulun dit ongkipangkat do hiri'd Yisriil i pinonuhuan di Isibil diri. 12 Om posunudo' no diyolo' dot apatut do puasa ngai' o tulun. Om lohowo' no diyolo' i tulun dot ogumu' do tumimung. Om nonuan diyolo' i Nabot do tirikohonon dit osonong kopio. 13 Om poirikohono' nogiddi o duwo tulun dot araat do hiri'd toguang di Nabot. Om tondoso' no diyolo' i Nabot do minomopol do Kinorohingan om minomopol di raja', dot id toguang di tulun dot ogumu'. Om gowoi poddi om posoliwano' no i Nabot di bandar om pindumpahai nod watu do gisom do napatai iyau. 14 Om ngoyo' noddi diyolo' posunudo' dot id di Isibil i karalan-ralano' do minamatai di Nabot. 15 Om soira' di norongou di Isibil i habar do napatai i Nabot om boro-boros no iyau di Ahab, “Napatai no i Nabot. Ngoyo' nondo onuo' i kabun dot anggur dit a' daa dau uhang do bolion nu,” ka dau. 16 Om olomus nopo i Ahab do minongoi panansanganu di kabun diri. 17 Om boro-boros noddi o Tuhan dot id di Ilia, i nabi do mantad hilo'd Tisbi. 18 Boros ka, “Baino' nopo om hilo' nod kabun dot anggur di Nabot i Ahab, i raja' do Samaria, do mongoi panansanganu di kabun diri. Ongoi nogi' kopio'd hilo', 19 om posunudon no dau do moro-boros oku, iyoho' i Tuhan do poingkaa, ‘Kapamatai nogi', om manakau po! Gowoi pondo om silaan nondod tasu o raha' nu do hiri'd pinonilaan do tasu di raha' di Nabot,’ kanto,” ka dau. 20 Om soira' di nokito di Ahab i Ilia, om boro-boros no iyau, “Oi pisangod, suminusuhut ko i' pama doho'?” ka dau. “Oo,” ka di Ilia. “Tu' araat no kopio o winonsoi nu dot id toguang do Tuhan, 21 om poingkaa'ddi o pinoboros do Tuhan dot id doho' do pasal diya', ‘Porikoton ku nondo o kosusaan dot id diya'. Potongkiadon tiya' nondo, om pointikid-tikid di tongokusai dot id sompiiyon nu, dot it omulok po ko' i molohing no, nga' punsoon ngai' ku nopondo. 22 Om osiliu nondo o sompiiyon nu do miagal di sompiiyon di Raja' Yirobiam, i tanak di Nibat, om miagal di sompiiyon di Raja' Baisa, i tanak di Ahia, tu' minamayayat ko do tulun dot Israil do minomonsoi'd dusa om gowoi poddi om notogod oku,’ ka. 23 Om i Isibil noo, om nokoboros nod Tuhan dot aakan nondod tasu i tinan dau do hiti'd suang do bandar do Yisriil. 24 Isai nopo i tiyon-iyon nu dot apatai do hiti'd suang do bandar om aakan nod tasu, om iri no it apatai do hilo'd soliwan do bandar om aakan do tombolog di mangangakan do rata',” ka dau. 25 A' po insan do haro o tulun do miagal kopio di Ahab tu' araat no kopio o nowonsoi dot id pagantangan do Tuhan. I Isibil no, i sawo dau o nokobinsuhu' dau do miningwonsoi do koinsanai di karaaton diri. 26 Kointingayam no kopio i dusa do winonsoi di Ahab, tu' tuminuku' iyau do tingolig do miagal di winonsoi di tulun dot Amori, iri no i tulun di nuyung do Tuhan do mantad id pomogunan do Kanaan di suminuang i' o tulun dot Israil do pomogunan diri. 27 Om kotingkod poddi i Ilia do mimboros, om hurako' no di Ahab o pakayan dau om panampakai nod karung do pointalang do monosol iyau. Om puasa nogiddi iyau, om modop piya nga' kipinakai i' iyau do karung. Om mimpanau piya nga' tumongob kasai' nopo o kokitanan dau. 28 Om boros kad Tuhan dot id di Ilia, 29 “A' nu toi nokito i Ahab do minsiriba' tomod dot id toguang ku? Om iri noddi ot a' ku koporikatan do kosusaan do solinaid po dau do poimpasi. Nga' maso nopondo di tanak dau do momorinta' om porikoton ku nondo i kosusaan,” ka dau.
Pinoinsan di Mika i Ahab
1 Solinaid di duwo toun om lobi om aiso' i' o pisangadan dot id pialatan dot Israil om Siria. 2 Nga' kotolu nopoddid toun, om ongoi no i Yosapat, i raja' do Yohuda, do hiri'd di Ahab, i raja' dot Israil. 3 Nga' tontok dit a' po norikot o maso'ddi, om nokoboros mantad no di Ahab dot id pagawai dau o poingkaa, “Iri nopo bandar do Ramot di hilo'd Giliad om dati' i'. Nokuro tu' a' toko' ngoyon solodo' iri do mantad id raja' do Siria?” ka dau. 4 Om tontok di nokorikot i Yosapat, om ponguhot no i Ahab dau, “Tumanud ko i' doho' do mongoi panangod do bandar do Ramot?” ka dau. Om boros ka di Yosapat, “Ondung miwoyo' to, om posodia' oku i'. Om iyo nogiddi i soudor ku om i soudor ku dit ongkikuda'. 5 Nga' osonong nopo kopio om uhoton toko' po o Tuhan,” ka dau. 6 Om timungo' noddi di Ahab o haro i' doti' ot apat nahatus o nabi. Om uhoto' no dau iyolo', “Mongoi oku tuu'dti panangod do Ramot ko' amu'?” ka dau. “Mongoi nopo!” ka diyolo' do suminimbar. “Tuhan i' o manahak diya' do kamanangan,” ka diyolo'. 7 Nga' ponguhot po kawagu i Yosapat, “Haro po o nabi do suwai di milo do momiolitan dato do muhot do korohian do Tuhan?” ka dau. 8 Om boros ka di Ahab, “Iso' poo, i Mika poo, i tanak di Yimla. Nga' araatan oku dau tu' a' nopo insan do momoros dot osonong ot id dosunsudan ku; araat kasai' nopo o poboroson dau,” ka dau. “A, kada' pomoros dot iyondo,” ka di Yosapat. 9 Om pomolohou noddi i Ahab do songulun o pagawai do hiri'd walai do raja' om suhuo' no dau do mongoi pangangat di Mika. 10 Tontok nopoddi nga' kipinakai i Yosapat om i Ahab do pakayan diyolo' di dong raja', om poirikau iyolo' do hiri'd tirikohonon do dong raja' do hiri'd pamagamasan do gandum, i hiri'd dotimbabaan di wawayaan do bandar do Samaria. Om hiri ngai' nopod dotoguangan diyolo' i piro-piro o nabi do posunud dit oilaan diyolo' do pasal dit id dosunsudan. 11 Om haro'ddi o songulun di nabi dot i Sodokia o ngaran, i tanak di Kinaana, do minomonsoi do sinangau-sangau, do basi' o winonsoi. Om boro-boros no iyau di Ahab, “Poingkaa o pinoboros do Tuhan, ‘Iti no sinangau-sangau o panangod nu do Siria, om gisom dot aala' nu iyolo',’ ka,” ka dau. 12 Om oinsanan nopo i nabi do suwai do nokosokodung diri. Boros ka ngai' diyolo', “Ngoyo' nopo songodo' o bandar do Ramot, tu' kamanang ko i', oi Tuan Raja'. Onuan ko id Tuhan do kamanangan,” ka. 13 Om daamot nopoddi om boro-boros no i pagawai di minongoi pomolohou di Mika, dot id di Mika do poingkaa, “Nongkoboros ngai' no i nabi do suwai do kamanang i raja'. Iyo nopoddi, om osonong nogi' do posunud ko dit a' araat,” ka dau. 14 Nga' boros ka di Mika, “Mamatos oku no dot id suang do ngaran do Tuhan di poimpasi do nunu nopo i pinoboros do Tuhan dot id doho', om iri no o poboroson ku!” ka dau. 15 Om soira' di nokotimbaba' i Mika di Raja' Ahab, om uhoto' no iyau di raja', “Mika, mongoi tuu iyahai di Raja' Yosapat panangod do Ramot ko' amu'?” ka dau. “Mongoi nopo!” kad i Mika. “Tu' atantu' no do kamanang ko i'. Onuan ko i' do Tuhan do kamanangan,” ka dau. 16 Om boros ka di Ahab, “Ondung moro-boros ko doho' dot id suang do ngaran do Tuhan, om poboroso' no it otopot. Impiro ku noddi iya' poinsano' do pasal diti?” ka dau. 17 Om boros ka di Mika, “Okito ku o soudor dot Israil do nokopogitongkiad-kiad do hilo'd konuluhanan. Miagal po iyolo' do dumba' dit aiso' o gompomogompi'. Iyo nopoddi, om poingkaa o boros do Tuhan do pasal diyolo', ‘Aiso' i' o boyoon do tulun diti; om pologoson nopo dot osimbayan iyolo' do muli',’ ka,” ka dau. 18 Om boros kaddi di Ahab dot id di Yosapat, “Koii, nga' otopot i' i pinoboros ku diya'! A' nopo insan dot osonong-sonong o poboroson dau dot id doho'! Araat kasai' nopo!” ka dau. 19 Om boros ka kawagu di Mika, “Pokinongou nodti poboroson do Tuhan do baino'! Nokito ku o Tuhan do poirikau do hiri'd tirikohonon dau do momorinta' do hilo'd surga, om songingkakat ngai' i moloikat dau do hiri'd toning dau. 20 Om ponguhot no o Tuhan diyolo', ‘Isai dokoyu o mongoi pominsuhu' di Ahab do mongoi sangod om apatai i' iyau do hilo'd Ramot?’ ka. Om mogisuayan nopoddi o pinoboros di moloikat. 21 Nga' haro'ddi o rusod do minongoi timbaba' kopio do Tuhan, om boro-boros nod ‘Ngoyon ku i' iyau binsuhuo',’ ka. 22 ‘Poingkuro ko do mominsuhu'?’ kad Tuhan. Om boros ka di rusod, ‘Ngoyon ku binsuhuo' i piro-piro nabi di tuuhoton di Ahab, om poboros i' iyolo' dit a' otopot,’ ka,” ka dau. 23 Om boros ka di Mika do minongolimpupus, “Iyo noddi o nosiliu. Pinologos do Tuhan iti piro-piro nabi di tuuhoton nu do mongudut diya'. Nga' nokoboros no dau do kosusaan ot abantalan nu!” ka dau. 24 Om ngoyo' no di Sodokia, i nabi diri, ropoho' i Mika, om tapapo' no dau o rabas di Mika. Om ponguhot no i Sodokia, “Songgira' kopio toi tongkiad doho' i Rusod do Tuhan om minongoi iddi boro-boros diya'?” ka dau. 25 Om boros kad i Mika, “Oilaan nu nopo om koongoi ko kolisok dot id bilik di hiri'd gogok kopio,” ka dau. 26 Om suhuo' no di Raja' Ahab o tiso' di pagawai dau, “Ngoyo' tangkapo' i Mika! Om pootodon i' do hilo'd di Amon, i gobunor do bandar, om hilo'd di Yoas, i tanak do raja'. 27 Om sunudan no iyolo' do pogiil dau, om onuan nopo iyau do taakanon om waig dot ongokooro' do gisom do koguli' oku dot aiso' o nunu-nunu do kosusaan,” ka dau. 28 Om boros kad Mika, “Osonong-sonong ko nopod koguli', om okon i' ko Tuhan o minomoros dot id doho'!” ka dau. Om boros ka kawagu dau, “Norongou ngai' nod tulun i pinoboros ku'ddi!” ka dau.
Napatai i Ahab
29 Om ngoyo' no di Ahab i raja' dot Israil, om i Yosapat i raja' do Yohuda, songodo' o bandar do Ramot, i hilo'd Giliad. 30 Om boros ka di Ahab dot id di Yosapat, “Mongoi to nopo sangod om a' oku piya iyoho' manampakai do pakayan do raja', nga' iya' nopo om manampakai no di pakayan nu do dong raja',” ka dau. Om ongoi noddi i raja' dot Israil do hiri'd pisangadan, nga' a' i' iyau minanampakai do pakayan do dong raja'. 31 Om tontok nopoddi nga' nokoponuhu' no i raja' do Siria di tolu nohopod om duwo o boyoon di soudor di kikorita'-kuda' dot a' mamatai do tulun do suwai tu' iri no raja' dot Israil o patayon. 32 Om tontok di nokito diyolo' i Raja' Yosapat, om ondos daa ngai' diyolo' om iyau no i raja' dot Israil. Om pamanau no daa iyolo' do mongoi saap dau. Nga' soira' di minomogiak i Yosapat 33 om koilaai nogi' diyolo' dot okon i' ko' iyau i raja' dot Israil. Om tingkod noddi iyolo' do sumaap. 34 Nga' koontok no kopio do songulun di soudor do Siria do minamana' i Ahab, tu' nokoontok di pinioputan di rasuk di Ahab di don sumasangod i napana'. Om kotogu' noddi iyau. “Nosuhat oku!” ka di Ahab dot id tulun di potunud di korita'-kuda' dau. “Poguliai nogi' om posoliwanon oku do mantad hiti'd pisangadan!” ka kawagu dau.1|70|HK75A| Soudor do mamana'|22.34 35 Om daamot nopo do mogisasangod om poingkakat kasai' po i Ahab do poinsondiu di korita'-kuda' dau, do potimbaba' di soudor do Siria. Om muyung-luyung i raha' do mantad hiri'd suhat dau do gisom do notounan do raha' o hiri'd sakai di korita'-kuda'. Om totuong poddi om kapatai no iyau. 36 Om maha' di tumonob o tadau, om oinsanan nopo i soudor dot Israil do sinuhu'd muli' dot id bandar om id watas diyolo', 37 tu' napatai noddi i raja'. Om uli' noddi iyolo' om lobongo' no diyolo' i rata' di Ahab do hilo'd Samaria. 38 Om tontok di linihungan i korita'-kuda' dau do hilo'd kulam do Samaria, om maso di tongoondu' do sundal do modsu'. Om sila-silaan do tasu i raha' do hiri'd korita'-kuda'. Om kabayaai nopoddi kopio o miagal di nokoboros mantad do Tuhan. 39 Om iri nopo susuyon do suwai do pasal di Raja' Ahab, om pasal di walai dau di lamai do winonsoi, om pasal di piro-piro bandar di winonsoi dau, om nongkotulis ngai' no do hiri'd suang do Buuk di Monusui do Pasal Ngai' di Raja' dot Israil. 40 Om di nopoddi napatai i Ahab, om i Ahasia diri, i tanak dau, o nosiliu do raja' do suminowoli dau.
I Yosapat o Raja' do Yohuda
41 Tontok di kaapat do toun di Ahab do momorinta' dot Israil, om kosiliu no i Yosapat, i tanak di Asa do raja' do Yohuda. 42 Tontok nopoddi om tolu no nohopod om limo toun dau. Om duwo nohopod om limo toun dau do momorinta' do hilo'd Yorusalim. Tina' nopo dau om i Asuba, i tanak di Silhi. 43 Om i Yosapat nga' iyo i' di Asa, i tapa' dau di minomorinta' dit id gulu ko' iyau, tu' minomonsoi i' dit osonong dot id pagantangan do Tuhan. 44 Nga' a' i' dau nangaraag i tiyonon do tumuku' dot id tingolig, om maso poddi di tulun dau do papatahak do porsombahan di sorobon om modtutud do kominyan do hiri. 45 Om iri nopo susuyon do suwai do pasal di Yosapat, om pasal di kosioho' dau, om i pinisangadan dau, om nongkotulis no do hiri'd suang do Buuk di Monusui do Pasal Ngai' di Raja' do Yohuda. 46 Om pinatai ngai' dau i sundal do tongokusai om tongoondu' di maganu-anu do hiri'd piro-piro pananaraban do porsombahan dot id tingolig, i nongoolu-olu' di maso po di Asa, i tapa' dau, do momorinta'. 47 Tontok nopoddi om aiso' o raja' do hilo'd Idom. Om momorinta' nopoddi do hilo' nga' iri po i boyoon do watas di pinili' di raja' do Yohuda. 48 Om minomonsoi i Yosapat do kapal do rahat dit angagayo do pasakayan daa do tamas do mantad hilo'd Opir, nga' a' iddi nakabaya' i kapal do mamanau tu' hilo' nogid Ision-Gibir om karaag no. 49 Pinokianu daa di Ahasia i raja' dot Israil, do moyo' i tulun dau di tulun di Yosapat do sumakai di kapal, nga' a' i' nakaakun i Yosapat. 50 Om kapatai noddi i Yosapat om lobongo' no do hiri'd kalabangan do raja' do hilo'd Bandar di Daud. Om i Yoram diri, i tanak dau, o nosiliu do raja' do suminowoli dau.
I Ahasia o Raja' dot Israil
51 Tontok di koturu'd toun do pomorintaan di Raja' Yosapat do hilo'd Yohuda, om kosiliu no i Ahasia i tanak di Ahab, do raja' dot Israil do solinaid do duwo o toun. 52 Om minomonsoi i' iyau'd dusa dot id Tuhan, tu' tuminanud iyau do kowoyo-woyoon dot araat di Ahab, i tapa' dau, om i kowoyo-woyoon di Isibil, i tina' dau, om i kowoyo-woyoon di Raja' Yirobiam di minamayayat do tulun dot Israil do minomonsoi'd dusa. 53 Tuminuku' iyau om minodsubak do Baal. Om iyo i' iyau di tapa' dau di minomorinta' dot id gulu ko' iyau tu' pinopotogod do Tuhan, i Kinorohingan do tukuon do tulun dot Israil.
I Ilia om i Raja' Ahasia
1 Om kapatai no i Ahab i raja' dot Israil, om saap no do pomorintaan dot Israil o pomogunan do Muab. 2 Insan tadau om karatu' no i Ahasia, i raja' dot Israil do mantad hiri'd liligaon di hiri'd tingkat dit id sawat kopio di walai do raja' do hilo'd Samaria, gisom do nadalaan iyau'd nosuhat. Om ponuhu' no iyau'd tulun do minongoi ponguhot di Baal-Sibub, i tingolig do tulun dot Ikron di hilo'd Pilistin ondung olingasan po iyau ko' amu'. 3 Nga' suhuo' nogi' di moloikat do Tuhan i Ilia, i Nabi diri, i mantad hilo'd Tisbi, do mongoi solowot di susuhuon di Raja' Ahasia do mongoi popoboros do poingkaa, “Aiso' no kopio o Kinorohingan dot Israil tu' gisom do mongoi kou ponguhot di Baal-Sibub, i tingolig do tulun dot Ikron? 4 Posunudon no di raja' do poingkaa o boros do Tuhan, ‘A' ko no olingasan, apatai ko no,’ kanto,” ka di moloikat. Om tonudo' no di Ilia i pinonuhuan do Tuhan. 5 Om poguliai ngai' noddi di susuhuon diri dot id di Raja' Ahasia. Om uhoto' no iyolo' di raja', “Nokuro tu' pinogulian dokoyu?” ka. 6 Om boros ka diyolo' do suminimbar, “Haro o songulun o kusai do minongoi solowot dahai om suhuo' no iyahai dau do gumuli' do mongoi popoilo do Tuan Raja' do poingkaa o boros do Tuhan dot id diya', ‘Aiso' no tuu o Kinorohingan dot Israil, tu' gisom do mongoi kou ponguhot do Baal-Sibub, i tingolig do tulun dot Ikron? A' ko no olingasan, apatai ko no!’ ka,” ka diyolo'. 7 “Okuro-kuro i tulun diri?” ka di raja' do minonguhot. 8 Om boros ka diyolo' do suminimbar, “Kirasuk iyau dot anaru om kitagkos do kulit do nintorusan,” ka. “O, i Ilia ino!” ka di raja' do pinopoboros dot opuhod. 9 Om ponuhu' noddi i raja' do songulun o soudor do miniwoyo' do limo nohopod o tulun do mongoi panangkap di Ilia. Om pamanau noddi i soudor diri, om kabantalai no dau i Ilia do poirikau do hiri'd timpak di nulu-nulu. Om boro-boros no i soudor, “Oi susuhuon do Kinorohingan, suhuon ko di raja' do rumuhuk,” ka. 10 Om boros ka di Ilia, “Ondung susuhuon kopio oku do Kinorohingan om lumintuhun po daa o tapui do mantad hilo'd tawan do monorob diya' om ilo tulun nu!” ka dau. Om diiri i' om diiri om sondot noddi o tapui do minonorob di soudor om i limo nohopod o tulun dau. 11 Om ponuhu' po i raja' do songulun kawagu o soudor do miwoyo' do limo kawagu nohopod o tulun. Om pamanau no iyolo' do tuminakad do minongoi boro-boros di Ilia, “Oi susuhuon do Kinorohingan, suhuon ko di raja' do rumuhuk do dinondo!” ka diyolo'. 12 Om boros ka kawagu di Ilia, “Ondung susuhuon kopio oku do Kinorohingan om lumintuhun po daa o tapui do mantad hilo'd sawat do monorob diya' om ilo limo nohopod o tulun nu!” ka dau. Om diiri i' om diiri, om sondot no o tapui do Kinorohingan do minonorob di soudor om i limo nohopod o tulun dau. 13 Om insan po kawagu do minonuhu' i raja' do songulun o soudor do miniwoyo' do limo nohopod o tulun. Om takad no i soudor do hiri'd timpak di nulu-nulu om korikot no iyolo' do hiri'd di Ilia, om otud no iyolo' dot id toguang di Ilia om boro-boros nod, “Ompunai no iyahai, oi susuhuon do Kinorohingan! Om kosianai no doho' om iti tulun ku; kada' iyahai patayo'! 14 Duwo no o soudor do mogitonggoi-tonggoi di tulun diyolo' do napatai do nosorob di tapui do mantad hilo'd tawan; nga' pokionuon ku no daa dot osianan ko doho',” ka dau. 15 Om maso iddi do minoro-boros o moloikat do Tuhan dot id di Ilia do poingkaa, “Kada' kooris! Tanud nopo dau do rumuhuk diti nulu-nulu!” ka. Om pamanau noddi i Ilia do tuminanud di soudor do minongoi do hiri'd raja'. 16 Om boros ka di Ilia dot id raja', “Minoro-boros o Tuhan do poingkaa, ‘Minongoi ko ponguhot di Baal-Sibub, i tingolig do tulun dot Ikron --- do miagal pod aiso' o Kinorohingan dot Israil dot uhoton. Om a' ko no olingasan, apatai ko no!’ ka,” ka dau. 17 Om kapatai noddi i Ahasia do miagal di nokoboros do Tuhan di pinolombus di Ilia. I Ahasia nopoddi om aiso' i' o tanak dau'd kusai, om i Yoram diri, i tadi' dau o suminowoli dau do suminiliu'd raja'. Iri nopo om nosiliu do tontok di koduwo'd toun do pomorintaan di Raja' Yihoram, i tanak di Yosapat, i raja' do Yohuda. 18 Om koinsanai di nongowonsoi di Raja' Ahasia do suwai nga' nongkotulis ngai' i' do hiri'd Buuk do Monusui do Pasal Ngai' di Raja' dot Israil.
Pinoinsawat i Ilia do Hilo'd Surga
1 Om korikot noddi o maso do Tuhan do popoinsawat di Ilia do hilo'd surga do powoyoon di ribut di monomporiu-riu. Om maso nopoddi nga' manau-panau i Ilia om i Ilisa do mantad hilo'd Gilgal, 2 om maha' di hiri no iyolo'd tanga'd ralan om boro-boros no i Ilia di Ilisa, “Undorong pod hiti, tu' suhuon oku'd Tuhan do mongoi'd hilo'd Baitol,” ka. Nga' boros ka di Ilisa do suminimbar, “Sumumpa' oku no dot id suang do ngaran do Tuhan di poimpasi om id diya' dot a' oku tumongkiad diya',” ka dau. Om piwoyo' noddi iyolo' do minamanau do kuminaa do hilo'd Baitol. 3 Om ongoi no solowot di Ilisa ot iso' o sinompuruan do nabi di poundorong do hilo' om ponguhot no iyolo' dau, “Nokoilo ko no do tadau nopod baino' om ongoyon do Tuhan i tuan nu om tumongkiad nondo diya'?” ka. “Oo, nokoilo oku no,” ka di Ilisa do suminimbar. “Ula' pori, a' no minog do pimbarasan toko' iri,” ka dau. 4 Om boro-boros po kawagu i Ilia di Ilisa, “Undorong pod hiti, tu' suhuon oku'd Tuhan do mongoi'd hilo'd Yorikou,” ka dau. Nga' boros ka di Ilisa, “Sumumpa' oku no dot id suang do ngaran do Tuhan di poimpasi om id diya' dot a' oku tumongkiad diya',” ka. Om piwoyo' noddi iyolo' do minongoi do hilo'd Yorikou. 5 Om ngoyo' po kawagu solowoto' i Ilisa dot iso' o sinompuruan do nabi di poundorong do hilo'd Yorikou do mikuwo'd minonguhot dau, “Nokoilo ko no do tadau nopod baino' om ongoyon do Tuhan i tuan nu om tumongkiad nondo diya'?” ka. “Oo, nokoilo oku i',” ka di Ilisa do suminimbar. “Nga' ula' pori, kada' toko' no pimbarasai iri,” ka dau. 6 Om boro-boros po kawagu i Ilia di Ilisa, “Undorong pod hiti, tu' suhuon oku'd Tuhan do mongoi'd hilo'd Bawang do Yordan,” ka dau. Nga' boros ka di Ilisa, “Sumumpa' oku no dot id suang do ngaran do Tuhan di poimpasi om id diya' dot a' oku i' tumongkiad diya',” ka dau. Om pamanau noddi iyolo' 7 do minongoi do hilo'd Bawang do Yordan, om limo nohopod o nabi do minoyo' diyolo'. Om undorong noddi i Ilia om i Ilisa do hiri'd tisan di bawang diri, om songingkakat diri i limo nohopod o nabi do hiri'd sodu-odu' diyolo'. 8 Om iduwo' no di Ilia i rasuk dau dit id soibau om lopio' no dau om pobobogo' nogiddi dau do hiri'd waig di bawang. Om kopigirang nopo i waig di bawang, om pamanau noddi i Ilia om i Ilisa do hiri'd nanad di nopigirangan di waig. 9 Om korikot noddi iyolo' do hiri'd soborong om uhoto' no di Ilia i Ilisa, “Nunu o korohian nu do wonsoyon ku dot id diya' dot a' oku po oongoi'd Tuhan do tumongkiad diya'?” ka dau. Om boros ka di Ilisa, “Potungkusai doho' ino sinundu nu om milo oku indo do sumowoli diya',” ka dau. 10 “Atuuk koi, apagon no moti' kopio ino,” ka di Ilia do suminimbar. “Nga' ondung kokito ko doho' do tontok dit ongoyon oku'd Tuhan, om aanu nu no i pokionuon nu. Nga' a' ko nopo kokito doho', om a' nu no aanu i pokionuon nu,” ka dau. 11 Om miboro-boros diri iyolo' di manau-panau iyolo'. Om sigog id korikot o korita' di haro o tapui do ginayat do kuda' di kitapui do minongoi popitongkiad diyolo', om poinsawato' noddi i Ilia do hilo'd surga do nokowoyo' di ribut di monomporiu-riu. 12 Om poingontong i' i Ilisa di Ilia do mininsawat om polohowo' noddi di Ilisa o poingkaa, “Ilia, i tapa' ku! I tapa' ku! I gunsiou dot Israil dit okoris kopio! A' ko noddi hino!” ka. Om a' noddi di Ilisa nokito i Ilia. Om tumongob tomod diri i Ilisa om kiniso' no dau i rasuk dau dit id soibau om kopiduwo nopo. 13 Om ngoyo' noddi di Ilisa i rasuk di Ilia dit id soibau di naratu' om poguliai no dau om ongoi no iyau ingkakat do hiri'd tisan di Bawang do Yordan. 14 Om pobobogo' no di Ilisa i rasuk di Ilia'ddi do hiri'd waig di bawang om boro-boros nod, “Hinonggo no i Tuhan, i Kinorohingan di Ilia?” ka. Om kobobog poddi dau i waig diri, om kopigirang nopo i waig, om pamanau noddi iyau do minongoi'd hiri'd soborong. 15 Om kokito no di limo nohopod o nabi di mantad hilo'd Yorikou i Ilisa, om boros ka diyolo', “Iri nopo sinundu di Ilia nga' nakawaliu no do hiri'd di Ilisa!” ka. Om ongoi noddi iyolo' solowot di Ilisa om otud no iyolo' dot id toguang dau. 16 Om boros ka diyolo', “Iyahai nopodti om limo nohopod o tulun dit ongokoris ngai'. Kaino ngoyo' toko' ihumo' i Ilia, i tuan nu. A' i' oila-ilaan do tinanggayan nopo iyau do Rusod do Tuhan do hilo'd nuluhon ko' hilo'd rantai, om poiliho' no doti'ddi do hilo',” ka. “A' i' minog!” kad i Ilisa do suminimbar. 17 Nga' sumonsog i' iyolo' om kookunai iddi di Ilisa. Om ngoyo' noddi di limo nohopod o nabi ihumo' i Ilia do tolu o tadau do koloido', nga' a' i' diyolo' nokito i Ilia. 18 Om poguliai noddi diyolo' dot id di Ilisa. Om poingandad iyau do hilo'd Yorikou. Om boros ka di Ilisa dot id diyolo', “A' ku toi nokoboros no dokoyu dot a' minog do ngoyon ihumo'!” ka dau.
Piro-Piro o Koimayaan do Winonsoi di Ilisa
19 Om haro'ddi o piro-piro o tulun do mantad hilo'd Yorikou do minongoi solowot di Ilisa, om boros ka diyolo', “Okito nu i', oi aman, dot osonong i' daa iti bandar nga' ilo' nopo waig do hiti om a' osonong, gowoi poddi om ogumu' o tongoondu' do monontian dot ongoiduan,” ka. 20 Om boros ka di Ilisa, “Ongoi kou do mangkuk di wagu po om suangan nod silaon,” ka. Om pootodo' noddi diyolo' dot id di Ilisa i pinokianu dau'ddi. 21 Om ongoi noddi i Ilisa do hiri'd tudan di waig om potuntugo' no dau i silaon diri do hiri'd waig, om boros ka dau, “Poingkaa no o boros do Tuhan, ‘Lidangan ku'ti waig diti om a' nondo kapatai om a' koidu' di ragang di ponontianon,’ ka,” ka dau. 22 Om mantad poddi om osonong noddi i waig do miagal di nokoboros di Ilisa. 23 Mantad no do hilo'd Yorikou om pakayaai no di Ilisa do hilo'd Baitol. Om maha' di hiri no iyau id tanga'd ralan om haro o piro-piro o tangaanak do mogiwoyo-woyo' do suminoliwan do mantad hiri'd bandar do momohingi-hingi dau. “Lagas, lagas, poggidu' no do mantad hiti!” ka diyolo' do minggiak. 24 Om koili no i Ilisa do minontong diyolo' om papalai no dau iyolo' dot id suang do ngaran do Tuhan. Om diiri i' om diiri om rikot no o duwo tinan do bohuang do tondu' do mantad hiri'd gouton do minongoi panabpo dot apat nohopod om duwo o tangaanak dot id pialatan di tangaanak diri, gisom do nopogitobilang-bilang poo tinan diyolo'. 25 Om lombus noddi i Ilisa do kuminaa do hilo'd Nuluhon do Karmol, om poguliai noddi dau do hilo'd Samaria.
Pisangadan dot id Pialatan dot Israil om Muab
1 Tontok di kohopod om walu' do toun di Raja' Yosapat do momorinta' do Yohuda, om kosiliu no i Yoram, i tanak di Ahab do raja' dot Israil. Om hopod om duwo toun do koloido' dau do momorinta' do Samaria. 2 Om iyau nga' nokowonsoi id dusa dot id toguang do Tuhan, nga' a' no koiyo di kararaat di Ahab om i Isibil, i molohing dau. Om piningraag ngai' dau i tingolig di winonsoi di tapa' dau di tukuon do sumambayang dot id Baal. 3 Nga' miagal i' iyau di Yorobiam, i tanak di Nobat, i nokopomorinta' dit id gulu ko' iyau, tu' minamayayat do tulun dot Israil do momonsoi'd dusa. Om a' no iyau ruminologo. 4 I Misa nopo, i raja' do Muab, om haro o baanan do dumba'. Om pointikid-tikid do toun om manahak iyau do 100,000 o tanak do dumba' do maan dau do sukai do patahakon di raja' dot Israil, om papatahak do hulu do 100,000 di dumba' do tontoluhan. 5 Nga' di nopoddi napatai i Raja' Ahab, om saap noddi i Misa do pomorintaan dot Israil. 6 Om tongkiadai nopoddi di Yoram o Samaria, om ongoi no ponimung di soudor dot ongkirapo-rapo. 7 Om poporikot no iyau do boros dot id di Yosapat, i raja' do Yohuda do poingkaa, “Sumaap i raja' do Muab doho'; tu' midu' daa iyau do mantad id pomorintaan ku, om orohian ko i' daa do sumokodung doho' do mongoi sangod dau?” ka. “Orohian oku i',” ka di Raja' Yosapat do suminimbar. “Om tumanud oku i', om i tulun ku, om i soudor ku di kikuda' nga' tumanud i'. 8 Hinonggo nondo o wayaan toko' do mongoi sangod?” ka dau. “Sumusui toko' di ralan di kawaya' do hilo'd tana' do kowotuan dot Idom,” ka di Yoram do suminimbar. 9 Om pamanau noddi i Raja' Yoram do mogiwoyo-woyo' di raja' do Yohuda om i raja' dot Idom. Om maha' di koturu' noddi do tadau diyolo' do manau-panau, om kooyiai no iyolo' do waig, om oinsanan nopo i tulun di minongigit di konunu-nunuan om i tayam-tayam diyolo' di ginandaran di konunu-nunuan diyolo' dot a' ngai' nongkoinum. 10 Om boros kaddi di Raja' Yoram, “Obungou toko' nodti. Tu' iyati' nopod tolu diti om nakatahak nod Tuhan dot id raja' do Muab!” ka dau. 11 Om ponguhot noddi i Raja' Yosapat, “Haro i' tuu o nabi do hiti'dti di milo do momialatan dati' do monguhot do Tuhan?” ka dau. Om boros ka dit iso' di pagawai do soudor di Raja' Yoram, “Hiti i' i Ilisa, i tanak di Sapat. Iyau no i mongunguhup di Ilia di gulu po,” ka dau. 12 Om boros ka di Raja' Yosapat, “Moro-boros i' moti' kopio o Tuhan dot id dau,” ka. Om ongoi noddi i tolu o raja'ddi solowot di Ilisa. 13 Om boros ka di Ilisa dot id raja' dot Israil, “A' oku i' monulung diya'! Ongoi nopo do hilo'd nabi di tuuhoton di molohing nu,” ka dau. Nga' boros ka di Yoram do suminimbar, “A, a' oku i'! Tu' nakatahak no iyahai do Tuhan dot id raja' do Muab,” ka dau. 14 Om boros ka di Ilisa, “Id suang nod ngaran do Tuhan di poimpasi, i pogobi-obian ku, dot otopot do poboroson ku dot okon nopo daa ko' momusou oku di Raja' Yosapat, om a' oku no monongkoilo diya'. 15 Ngoyo' oku paatadai do songulun di mongongombit do kecapi,” ka dau. Om daamot po di tulun diri do mongombit di kecapi, om porintao' no i Ilisa do Rusod do Tuhan. 16 Om pimboros no iyau, “Poingkaa o boros do Tuhan, ‘Momonsoi no do liang do hiti'd kinarasakan do bawang. 17 Tu' mulong piya dot a' rumasam ko' aiso' o ribut nga' lumabai nopondo o waig do hiti'd kinarasakan do bawang. Om haro indo o waig do kabagal do tinumon dokoyu om ilo tayam-tayam di ginandaran di konunu-nunuan dokoyu,’ ka,” ka dau. 18 Om boro-boros po kawagu i Ilisa, “Nga' iti nopo om okooro' dot id Tuhan. Om onuan kou po dau do kamanangan do sumangod do tulun do Muab. 19 Om araag ngai' dokoyu i bandar diyolo' dit ongkitolig om it ongosonong om atagad ngai' dokoyu i kouwaan diyolo', om osompon ngai' dokoyu i tudan do waig. Om asasadan ngai' dokoyu do watu i koumaan diyolo' dit ongoruak gisom dot angaraag nondo iri,” ka dau. 20 Kosuabon noddi kawagu, do tontok di papatahak do porsombahan di dongkosuabon, om luyung no o waig do mantad hilo'd Idom do minomonu' di kinarasakan do bawang diri. 21 Om soira' di norongou di tulun do Muab do nokorikot i tolu o raja' diri do mongoi panangod diyolo', om koinsanai nopoddi i tulun --- dot i molohing no om it ongomulok po --- di milo po do mongigit di rapo-rapo do sinuhu' ngai' dau do minongoi do hiri'd piwolitan do pomogunan. 22 Om tontok di kosuabon kawagu, di nokotungag iyolo' om kotitihai nod tadau i waig gisom do miagal poddi do raha' o kokitanan di waig. 23 Om pomogiak no iyolo', “Hodi raha'! Iri no soudor do tolu o sinompuruan do pisangod diri o minogiumang, gisom do minogipapatai'ddi iyolo'. Kainou mongoi panakau do hilo'd kokiiman diyolo'!” ka. 24 Nga' soira' di nokorikot i tulun do Muab do hiri'd pinomukiiman diri, om songodo' no iyolo' di tulun dot Israil. Om gusao' nopo iyolo' di tulun dot Israil do gisom do nangapatai iyolo'. 25 Om raago' ngai' no diyolo' i bandar do tulun do Muab. Om koinsanai di tumo dit ongoruak nga' pininsasadan ngai' diyolo' do watu, gisom do nongoolitan do watu i tumo. Om sinonsong ngai' nogi' di tulun dot Israil i tudan do waig om pinintagadan ngai' diyolo' i kouwaan di tulun do Muab. Om iri po i bandar do Kir-Harisit, i bandar dot agayo do Muab o noolu'. Nga' alaid noddi om noturungku' i' i bandar diri om pinindumpahan diyolo' do watu. 26 Om soira' di nopurimanan di raja' do Muab dot aala' iyolo' om pangangat noddi i raja' do Muab do turu' nahatus di soudor dit ongoilo do mongigit do gayang, om umbal no daa iyolo' do tumalib di soudor di raja' dot Idom, nga' a' i' iyolo' nakatalib. 27 Om gayato' no dau i tanak dau'd kusai di sumowoli daa dau do raja', om patahako' no dau do hiri'd timpak di tolig di bandar do numaan dau do porsombahan di sumbolion do podsubak di tingolig do Muab. Om kooris noddi i tulun dot Israil om iduwai no diyolo' i bandar diri, om uli' no do hilo'd pomogunan diyolo'.
Minonulung i Ilisa do Songulun o Tondu' do Nopuadan om Mosikin po
1 Insan tadau om rikot no dot id di Ilisa o songulun o tondu' di nopuadan, i sawo daa do nabi, om boro-boros nod, “Aman, napatai no i sawo ku! Om oilaan nu i' dot iyau nopo om otorodok i' dot id Kinorohingan. Nga' haro o tutang dau dot id iso' o tulun. Om baino' noddi om nokorikot no i tulun diri do mongoi panganu di duwo tanak ku do silihon dau do turipon do maan do pambayar di tutang di sawo ku,” ka dau. 2 Boros ka di Ilisa, “Poingkuro oku po do monulung diya' oi inan? Nunu po o haro dot id suang do walai nu?” ka dau. Boros ka di tondu' do suminimbar, “Aiso' no o nunu-nunu, suwai ko' iri po tumau do saitun do sangkakanan po dot okooro',” ka dau. 3 Boros ka di Ilisa, “Ongoi pokiolos do piro-piro nopo o kakanan dit aiso' o suang do hilo'd songkoduwo nu. 4 Om sumuang nogindo do miwoyo' di tangaanak nu do hiri'd walai dokoyu om tabanan no i wawayaan. Om dolinan ngai' nogindo di tumau do mantad id kakanan dit okooro' i kakanan diri om posuwai-suwayon no i nongoponu',” ka dau. 5 Om uli' noddi i tondu'ddi do hiri'd walai dau. Om kosuang poddi iyau om i tangaanak dau do hiri'd walai om tabanai no dau i wawayaan. Om dolinai ngai' no dau di tumau do saitun do mantad id kakanan dit okooro' i kakanan di pinatahak di tangaanak dau dot id dau, 6 om kongoponu' ngai' nopo i kakanan diri. Om pokianu po kawagu iyau dot iso' o kakanan. “Naayi' no,” ka di tiso' di tanak dau do suminimbar. Om a' noddi lumuyung i tumau. 7 Om poguliai no kawagu di tondu' dot id di Ilisa, om boro-boros noddi i Ilisa di tondu'ddi, “Padagangon no i tumau'ddi do maan nu do pambayar do koinsanai di tutang nu, om iri nopondo it oolu-olu' om kabagal po do maan dokoyu di tangaanak nu do kaakan-akanan,” ka dau.
I Ilisa om i Tondu' do Kaya' do Hilo'd Sunim
8 Insan tadau om ongoi no i Ilisa do hilo'd Sunim. Hilo' nopod Sunim nga' haro o songulun o tondu' do kaya'. Om lohowo' noddi di tondu' i Ilisa do makan. Mantad nopoddi om pointikid-tikid do mongoi i Ilisa do hilo'd Sunim om mongoi kasai' nopo iyau akan do hiri'd walai di tondu'ddi. 9 Om boro-boros noddi i tondu' di sawo dau, “Otumbayaan kopio oku dot iri nopo i tulun dit asaru' do koumbaya'd hiti, om susuhuon i' kopio do Kinorohingan. 10 Osonong do wansayan toko' iyau dot iso' o bilik dot okooro' do hilo'd tingkat dit id sawat diti walai toko' om sodiaan toko' do toodopon om mija' om tirikohonon, om lampung o hiri'd bilik, om haro i' o tiyonon dau do pointikid-tikid do mongoi iyau do hiti'd dati',” ka dau. 11 Insan o tadau, om ongoi no kawagu i Ilisa do hilo'd Sunim. Om suang no iyau do hiri'd bilik dau do mongoi potingkod-tingkod do huyan. 12 Om suhuo' no dau i Gohasi, i susuhuon dau, do mongoi pomolohou di tondu'ddi. Om korikot poddi i tondu'ddi, 13 om boro-boros no i Ilisa di Gohasi, “Uhoto' daa iyau ondung poingkuro oku po do sumomuli' diti hingos dau do mogobi-obi' dato. Orohian doti' iyau do mongoi oku solowot di raja' ko' i boyoon do soudor do poboros do nunu i korohian dau,” ka dau. Om boros ka di tondu' do suminimbar, “Poingiyon oku i' dot id pogialatan do koobpinayan ku om haro ngai' ku i',” ka dau. 14 Om uhoto' no di Ilisa i Gohasi, “Iyo nopoddi, om nunu pondo o milo ku'd wonsoyon dot id dau?” ka dau. Om boros ka di Gohasi do suminimbar, “Aiso' o tanak dau om molohing no i sawo dau,” ka. 15 Om boros kaddi kawagu di Ilisa, “Lohowo' po i tondu'ddi,” ka. Om rikot no i tondu' om ingkakat no iyau do hiri'd dotimbabaan di wawayaan. 16 Om boro-boros no i Ilisa di tondu'ddi, “Dongiyo'dti nopod toun do tabantalan om kokibit ko no do tanak do kusai,” ka. Boros ka di tondu', “Kada' pongudut, oi aman, tu' iya' nopo om susuhuon id Kinorohingan,” ka. 17 Nga' otopot kopio iddi i pinoboros di Ilisa, tu' tontok di dongiyo- iyo'ddi di toun kawagu, om kosusu no i tondu'ddi do tanak do kusai. 18 Tontok dit agayo noddi i tanak, om insan o kosuabon di dongmongomot, om ongoi no i tanak suhut di tapa' dau di maso do mongomot do gandum do hiri'd dumo do mogiwoyo-woyo' di tulun do suwai. 19 Om sigog id pomogiak i tanak do minoro-boros di tapa' dau, “Adu! Oruol o tulu ku!” ka. “Pootodo' ilo tanak do hilo'd tina' dau,” ka di tapa' dau do minonuhu' do songulun di susuhuon dau. 20 Om pootodo' noddi di susuhuon dau i tanak diri do hiri'd tina' di tanak, om kibito' no di tina' di tanak, i tanak. Om tontok di sosodopon do tadau'ddi om kapatai no i tanak diri. 21 Om ngoyo' no di tina' di tanak i rata' di tanak om ngoyo' no dau posuango' di bilik di Ilisa di hiri'd sawat, om poliiyo' no dau do hiri'd sakai di toodopon di Ilisa. Om soliwan no iyau om tabanai no dau i wawayaan, 22 om ngoyo' no dau lohowo' i sawo dau. Om boros ka dau, “Ponuhu' dot ongoiso' dino susuhuon do mamagayat do songinan o kaladai do pootodon do hiti. Tu' arau-arau oku do mongoi solowot di Ilisa, i Nabi. Om oruhai oku i' do koguli',” ka dau. 23 Boros ka di sawo dau, “Nokuro tu' baino' nod mongoi ko, tu' baino' nopo om okon i' ko' tadau do Sabat, om okon ko' Tadau dot Agayo do Tulan do Wagu,” ka dau. “A' i' kokukuro,” ka dau do suminimbar. 24 Om kapakalai poddi i kaladai, om boro-boros no iyau di susuhuon dau, “Pikoton no iti kaladai om osiau i' do manangkus; kada' pogonoyo' o papamanau dot a' oku po monuhu' do popogonoi,” ka dau. 25 Om pamanau no i tondu'ddi do minongoi do hilo'd Nuluhon do Karmol do hilo'd kinoiyonon di Ilisa. Om osodu' po i tondu'ddi om kokito no di Ilisa. Om boro-boros no i Ilisa di Gohasi, “Antangai pogi' ilo tondu' do mantad hilo'd Sunim do mongoi'd hiti! 26 Ongoyo' kopio iyau rubao' om uhoton no iyau ondung poingkuro-kuro i sawo om i tanak dau,” ka dau. Om poboroso' no di tondu' dot id di Gohasi dot osonong ngai' i' iyolo'. 27 Nga' soira' di nokorikot iyau dot id toguang di Ilisa, om otud no iyau om gapus no di gakod di Ilisa. Om poundolihon daa di Gohasi i tondu'ddi nga' boros ka di Ilisa, “Pologoso' nopo! Tu' kokitanan nopo dau om tumongob kopio. Nga' aiso' i' o nunu-nunu do pinosunud do Tuhan dot id doho'!” ka dau. 28 Om boro-boros no i tondu', “Aman, a' oku i' nokopokianu diya' do tanak. Om nokoboros oku no dot id diya' dot a' ko mongiman-iman doho'!” ka dau. 29 Om koili no i Ilisa di Gohasi om boro-boros nod, “Ongoyo' kopio i sukud ku! Om tumilombus nopo do mongoi'd hilo'd walai dilo tondu'. Kada' no undorong do sumuwau dot isai nopo o tulun dot orubaan nu do hilo'd ralan. Om ondung haro o tulun do sumuwau diya' om kada' no iya' ponokisuwau. Om korikot ko nopondo om pasakayon no ino sukud ku do hiri'd tinan di tanak,” ka dau. 30 Om boros ka di tondu', “Ilisa! Sumumpa' oku dot id suang do ngaran do Tuhan di poimpasi, om id diya' nogi' dot a' oku i' tumongkiad diya'!” ka dau. Om piwoyo' noddi i Ilisa om i tondu'ddi do mongoi'd hiri'd walai di tondu'. 31 Nga' nokopogulu no i Gohasi diyolo' do minongoi pasakai di sukud di Ilisa do hiri'd tinan di tanak, nga' aiso' i' o tuni ko' tanda' do suwai dot oposian i tanak. Om ongoi noddi solowot i Gohasi di Ilisa om boro-boros nod, “A' po nokotungag i tanak,” ka. 32 Soira' di nokorikot i Ilisa om suang no iyau do hiri'd bilik om kokito no dau i rata' di tanak diri do poingiliu do hiri'd sakai di toodopon. 33 Om tabanai no di Ilisa i wawayaan di bilik diri om sambayang no iyau dot id Tuhan. 34 Om loubai noddi dau i tanak, om potungubo' no dau di kabang di tanak o kabang dau om potopiso' dau o mato dau dot id mato di tanak om polokopo' dau o palad dau do hiri'd palad di tanak, om daamot di poinloub iyau di tanak om timpuun nod luminasu' i tinan di tanak. 35 Om tungag noddi i Ilisa om mikorobibi' iyau do mimpanau do hiri'd suang di bilik, om loubai po kawagu dau i tinan di tanak. Om alaid noddi om koontiho' no i tanak dot inturu' om ungkalat no iyau. 36 Om suhuo' noddi di Ilisa i Gohasi do mongoi pomolohou di tina' di tanak. Om kosuang poddi i tina' di tanak do hiri'd bilik om boro-boros nogi' i Ilisa dot id dau, “Diya iti tanak nu,” ka dau. 37 Om otud noddi i tina' di tanak dot id toguang di Ilisa om igitai nogiddi dau i tanak do suminoliwan.
Duwo po Kawagu o Koimayaan
38 Tontok dot insan o tadau di maso do mononglous o hiri'd pointongkop di pomogunan. Om maso nogiddi do minuli' i Ilisa do hilo'd Gilgal. Om maso diri dau do monuduk dot iso' o sinompuruan do nabi, om suhuo' no dau i susuhuon dau do mogonsok do takanon diyolo' do hiri'd balanga' dot agayo. 39 Om ongoi no i songulun diyolo' pokirarapaon do hiri'd dumo, om kokito no dau o tua' do koiyo-iyo do tua' do tawadak om panganu no iyau di tua'ddi dot ogumu', om kuyutai no dau do minuli'. Om oribo' no dau i tua'ddi om posuango' no do hiri'd balanga'. Nga' a' i' dau otutunan om nunu kopio o songua'ddi. 40 Om koonsok noddi iri om potikido' no dau dot id nabi. Nga' maha' di noumbalan nogi' diyolo' do mangakan iri om boro-boros no iyolo' di Ilisa, “Kawanit i' moti' iti!” ka. Om a' noddi diyolo' nakan iri. 41 Om ponuhu' no i Ilisa do manganu do tapung dot okuuri' om posuango' no dau do hiri'd balanga'. Om boro-boros no iyau, “Potikido' kawagu dokoyu ilo',” ka. Om a' noddi kawanit i nonsok diri. 42 Om koimbagu no, om korikot no songulun o kusai do mantad hilo'd Baal-Salisa di minongigit do duwo nohopod o roti do winonsoi mantad id barli di gulu omoto' do toun diri, om haro nogi' o gandum di wagu po omoto' do patahakon dau di Ilisa. Om suhuo' no di Ilisa i susuhuon dau do potikid diri dot id nabi. 43 Nga' boros ka di susuhuon dau, “A' i' koumbagal iti do maan do hatus o tulun,” ka. Om boros ka di Ilisa do suminimbar, “Potikido' nopo om kaakan i' iyolo'. Tu' nokoboros nod Tuhan do kaakan nopo iyolo' om haro po ot oolu',” ka dau. 44 Om potikido' noddi di susuhuon i taakanon diri dot id diyolo'. Om akan ngai' noddi iyolo'. Om kaakan ngai' noddi iyolo' nga' haro po o noolu' do miagal di nokoboros mantad do Tuhan.
Nolingasan i Naaman
1 I Naaman nopoddi nga' boyoon do soudor dit ongkirapo-rapo do hilo'd Siria. Om iyau nopo nga' kosianan om koupusan kopio di raja' do Siria. Tu' iyau no o pinakai do Tuhan do pinapamanang di soudor do Siria. Nga' i Naaman nopo, i soudor do gunsiou diri om kitoruol do kusta. 2 Insan o tadau, di minongoi i tulun do Siria panangod do tulun dot Israil om haro o songulun o tondu' dot Israil dit okoro' po do tinangkap diyolo', om tanggayai no diyolo' iyau. Om kosiliu noddi i tondu'ddi do susuhuon di sawo di Naaman. 3 Insan o tadau om boro-boros no i susuhuon diri dot id sawo di tuan dau do poingkaa, “Mongoi nopo daa solowot ilo tuan di nabi do hilo'd Samaria, om atantu' no do lingasan i' iyau di nabi diri,” ka dau. 4 Om korongou noddi i Naaman di boros diri, om ongoi no iyau do hiri'd raja' om susuyo' no dau i pinoboros di tondu' dit okoro' poddi. 5 Om boros ka di raja', “Ongoi nopo do hilo'd raja' dot Israil. Om monulis oku i' do surat do patahakon dau,” ka dau. Om pamanau noddi i Naaman om pongigit no iyau do tolu nohopod noribu o tusin do pirok, om onom noribu o tusin do tamas om hopod o pasang di pakayan dit ongosonong. 6 Suang nopo di surat di nigitan dau'ddi nga' poingkaa, “Id suang diti surat diti om popointutun oku diya' di Naaman, i boyoon do soudor ku, om pokionuon ku iya' do momolingos do toruol dau,” ka. 7 Soira' di nabasa' di raja' dot Israil i surat diri, om hurako' nopo dau i pakayan dau tu' aiso' no o pokukurayan dau, om boros ka dau, “Araatan oku no kopio, nokuro i raja' do Siria tu' monuhu' doho' do momolingos do tulun diti? Dot okon oku i' ko' Kinorohingan di kisinundu do mamasi ko' mamatai do tulun! Mogihum no kopio i raja' do Siria diti do ralan do paantakan do monokisongkiwal doho',” ka dau. 8 Om korongou noddi di Ilisa o hal diri, om poporikot no iyau do boros dot id raja'ddi do poingkaa, “Nokuro tu' agangau ko? Suhuo' ino tulun do mongoi'd hiti'd doho' om koilo i' iyau do haro o nabi do hiti'd Israil,” ka dau. 9 Om pamanau noddi i Naaman do suminakai do korita'-kuda' dau do gayaton di kuda' dau. Om korikot noddi iyau do hiri'd walai di Ilisa, om undorong no iyau do hiri'd dotimbabaan di wawayaan di walai. 10 Om ponuhu' no i Ilisa di susuhuon dau do minongoi popoboros dot id di Naaman do poingkaa, “Tuan, ongoi podsu' dot inturu' do hilo'd Bawang do Yordan, om olingasan ko i',” ka dau. 11 Om korongou poddi di Naaman iri, om pamanau no iyau do mikuwo'd otogod tomod. Om boro-boros nod, “Andasan ku nopo daa om mongoi iyau solowot doho', om sumambayang nondo iyau dot id Tuhan, i Kinorohingan dau, om pasahawon nondo daa dau i longon dau do hiti'd toruol ku do momolingos. 12 Okon toi ko' i nopo Bawang dot Albana om Bawang do Parpar di hilo'd Damsik om osonong i' ko' mantad di bawang do hinonggo nopo do hiti'd Israil! Om milo oku i' do mongoi podsu' do hilo' om olingasan oku i'!” ka dau. 13 Nga' ongoi no insomok i susuhuon dau om boro-boros nod, “Tuan, ondung suhuon ko daa di nabi do momonsoi dit apagon do momonsoi om atantu' nod wonsoyon nu i'. Om nokuro nogindo tu' a' tonudon i ponuhuan do mongoi no podsu' om olingasan ko i'!” ka dau. 14 Om ongoi noddi i Naaman do hiri'd Bawang do Yordan, om tolop no iyau dot inturu' do hiri'd bawang diri do miagal di pinonuhuan di Ilisa. Om kolingasai noddi i Naaman; om osonong noddi o tinan dau do miagal di tanakwagu po iyau. 15 Om poguliai noddi di Naaman om i tulun di minananud dau dot id di Ilisa, om boro-boros no dot, “Baino' nopoddi om noilaan ku no kopio dot iso' noo o Kinorohingan do pointongkop diti pomogunan, iri no i Kinorohingan di tukuon do tulun dot Israil; om iyo nopoddi om romito' no iti popuhawangon ku diya' oi Tuan,” ka dau. 16 Om boros ka di Ilisa do suminimbar, “Id suang do ngaran do Tuhan di poimpasi i pogobi-obian ku om sumumpa' oku no dot a' oku i' rumamit do nunu nopo o popuhawangon nu,” ka dau. Om posonsogon i' di Naaman do papatahak di Ilisa i popuhawangon dau, nga' mada' i' i Ilisa. 17 Om boro-boros noddi i Naaman, “Ondung mada' kopio ko do rumamit di popuhawangon ku, om pologoso' oku no do manganu diti tana' dot igitan ku do muli' do songkuro nopo ot ooyit dilo sapasang o bagal. Tu' mimpuun nod baino' do papatahak oku do porsombahan dot id Tuhan om a' oku nondo papatahak do porsombahan dot id ponokokinorohingan do suwai. 18 Om mogondos oku nod Tuhan do mangampun doho' do tontok do momoyo' oku di raja' ku do mongoi sambayang do hilo'd walai do tingolig do Rimon, i ponokokinorohingan do Siria,” ka dau. 19 Om boros ka di Ilisa, “Pamanau nopo om sumonong-sonong,” ka. A' po alaid do mantad di kinapamanahan di Naaman, 20 om pomusorou no i Gohasi, i susuhuon di Ilisa do poingkaa, “Nokuro tu' poulio' tomod nopo di tuan i tulun diri dot a' minokibayar? Apatut i' daa do rinamit dau i pinopuhawang di tulun do Siria diri! Id suang nod ngaran do Tuhan di poimpasi, do ngoyon ku i' iyau gusao' do mokianu do nunu nopo i haro dot id dau!” ka dau. 21 Om ngoyo' noddi di Gohasi gusao' i Naaman. Om soira' di nokito di Naaman do haro o tulun do gumusa' dau, om lintuhun no iyau do mantad hiri'd korita'- kuda' dau om ponguhot nod, “Nunu'ri?” ka dau. 22 Om boros ka di Gohasi do suminimbar, “Mokiampun oku, oi Tuan. Tu' sinuhu' oku do minongoi pomisunud do Tuan, do haro o duwo o nabi di koririkot di tiinu' do mantad hilo'd konulu-nuluan dot Ipraim, om suhuo' oku noddi di tuan ku do mongoi pokianu diya' do tolu noribu o tusin do pirok om duwo pasang do kain dit osonong do patahakon di duwo o nabi diri,” ka dau. 23 “Iyo nogiddi,” kad i Naaman do suminimbar, om sansagai noddi dau i Gohasi do mongigit dit onom noribu o tusin do pirok om lopoto' no di Naaman i tusin diri om posuango' no di duwo o kantung, om anu iyau di duwo o pasang do pakayan dit osonong kopio. Om poigitai ngai' no di Naaman iri di duwo o susuhuon dau di pinopogulu dau di Gohasi. 24 Om soira' di nokorikot iyolo' do hilo'd nulu-nulu di kinoiyonon di Ilisa, om onuo' no di Gohasi i tusin om i pakayan diri om ngoyo' no poopio' do hiri'd walai, om suhuo' no dau do muli' i susuhuon di Naaman. 25 Om soira' di suminuang iyau kawagu do hiri'd walai, om uhoto' no iyau di Ilisa, “Hinonggo tadon nu?” ka dau. “A' oku i' nokotongkiad, oi Tuan,” ka dau do suminimbar. 26 Nga' boros kad i Ilisa, “Hilo' oku i' moti'ddi dot id suang do rusod do tontok di luminintuhun i Naaman do mantad hiri'd korita'-kuda' dau do minongoi solowot diya'. Dinondo nopo om okon i' ko' maso do rumamit do tusin om momoli do kabun do saitun, om kabun dot anggur, om dumba' om sapi' om turipon! 27 Iyo nopoddi tu' ruminamit ko di pinomuhawang diri, om aramit nu pondo i toruol di Naaman. Om iri sinakagon nu nga' oontok ngai' nopondo do toruol do miagal diri do gisom dot alaid,” ka dau. Om kosoliwan poddi i Gohasi do mantad hiri, om koontok no iyau do toruol diri. Om sigog iddi do minumang purak i kulit dau, tu' noontok noddi iyau do toruol do kusta.
Naanu Kawagu i Kapak
1 Insan tadau om boro-boros no i nabi di tudukan di Ilisa dot id di Ilisa, “Ogiol-giol kopio'ddi iti tiyon-iyonon toko'! 2 Om pologoso' daa iyahai do mongoi panagad do kayu do hilo'd toning di Bawang do Yordan, om momonsoi nogindo iyahai do tiyonon dahai'd hilo',” ka. “Oo, osonong,” ka di Ilisa do suminimbar. 3 Om sansagai iddi do songulun dot id pialatan diyolo' i Ilisa do tumanud diyolo'. Om kotumboyo' iddi i Ilisa. 4 Om pogitanud-tanud no iyolo' do minamanau. Om soira'ddi nokorikot iyolo' do hiri'd tisan di Bawang do Yordan, om timpuun no iyolo' do managad do kayu. 5 Om maso daa do songulun diyolo' do managad om sigog i' do kotongos i kapak dau om karatu' no do hiri'd waig. “Kukuroyon ku ma lo'?” ka dau dot id di Ilisa. “Tu' nolos-olos ku i' daa ilo kapak!” ka dau. 6 Om boros ka di Ilisa, “Hinonggo o kinorotuon diri?” ka dau. Om potuduko' no di tulun i kinorotuon di kapak. Om langod noddi i Ilisa do kayu om pataamo' no dau do hiri'd waig. Om hampung noddi i kapak. 7 “Ngoyo' ilo',” ka di Ilisa. Om poroloyo' no di tulun o longon dau do minongoi panganu di kapak.
Naala' o Soudor do Siria
8 Insan o maso om ongoi no o Siria sangod dot Israil. Om koponokirunding poddi i raja' do Siria di piro-piro o boyoon do soudor dau om tontuo' nogi' dau o kinoiyonon do pomukiiman diyolo'. 9 Nga' posunudai no di Ilisa i raja' dot Israil do popoinsan dau dot a' mongoi dot id kinoiyonon diri tu' hiri no i tulun do Siria. 10 Om i tulun di songingiyon do hiri nga' sinunudan nogi' di raja' dot Israil do mumbangan-bangan kopio. Om asaru' i' i Ilisa do pinopoinsan di raja'. 11 Om araatan noddi kopio i raja' do Siria, om lohowo' ngai' no dau i boyoon do soudor dau om uhoto' no dau iyolo', “Isai ot id pialatan dokoyu do muhup do raja' dot Israil. Isai? Posunudo' dokoyu!” ka dau. 12 Om boros ka do songulun dot id pialatan diyolo', “Aiso' i', oi Tuan Raja'. I Nabi Ilisa i' o poposunud di boros nu dot id raja' dot Israil, dot iri piya i boros do Tuan Raja' di poboroson do hilo'd bilik do toodopon do Tuan Raja',” ka dau. 13 Om boros ka di raja', “Ihumon no iyau, om tangkapon ku i' iyau,” ka dau. Om kosunudai no i raja' do Siria do hilo'd Dotan i Ilisa. 14 Om ponuhu' noddi iyau do soudor dot ogumu' do kuminaa'd hilo' dot ongkikuda' om ongkikorita'-kuda' do don sumasangod. Om korikot ngai' no i soudor do hiri'd bandar di totuong. Om turungkuo' no diyolo' i bandar diri. 15 Kosuabon noddi om tungag no i susuhuon di Ilisa, om soliwan no do mantad hiri'd walai, om kokito dau i soudor do tulun do Siria dot ongkikuda' om ongkikorita'-kuda' do don sumasangod do posorili' di bandar diri do monurungku'ddi. Om poguliai no dau do hiri'd di Ilisa om boro-boros nod, “Obungou toko' no, oi Tuan! Poingkukuro toko' podti?” ka dau. 16 “Kada' kooris,” ka di Ilisa do suminimbar. “Iri nopo i momogompi' dati' om ogumu' po ko' iyolo',” ka dau. 17 Om sambayang noddi i Ilisa, “Oi Tuhan, poungkalato' no o mato dilo susuhuon ku om kokito i' iyau!” ka dau. Om pohubayaai nod Tuhan i sambayang di Ilisa om kokito no di susuhuon dau di minintong iyau, do notongkop nopo i nulu-nulu do kuda' om korita'-kuda' di kitapui do posorili' di Ilisa. 18 Om soira' di mongoi daa sangod i tulun do Siria, om sambayang no i Ilisa, “Oi Tuhan, boloho' ngai' no o mato do tulun diti!” ka dau. Om pohubayaai nod Tuhan i sambayang di Ilisa, om kongobolou ngai' nopo i tulun diri. 19 Om boros kaddi di Ilisa dot id diyolo', “Napalid kou! Okon i' ko' iti i bandar dit ihumon dokoyu. Tanud kou doho', om pootodon ku i' iyokoyu dot id tulun dit ihumon dokoyu,” ka dau. Om angatai noddi dau iyolo' do mongoi'd hilo'd Samaria. 20 Om korikot poddi iyolo' do hiri'd bandar diri, om sambayang no i Ilisa, “Poungkalato' no o mato diyolo', oi Tuhan. Pologoso' no iyolo' do kokito,” ka dau. Om pohubayaai nod Tuhan i sambayang di Ilisa, om poungkalato' no dau o mato di tulun diri. Om kopurimanai noddi diyolo' do hilo' no iyolo'd Samaria. 21 Om soira' di nokito di raja' dot Israil i soudor do Siria, om uhoto' no dau i Ilisa, “Patayon ku tuu iti tulun diti, oi Ilisa?” ka dau. 22 “Amu',” ka di Ilisa do suminimbar. “Tu' iri ngai' piya i soudor di natangkap om natanggayan nu do mantad id pisangadan nga' a' nu i' pinatai; om patayon nu nogindo daa iyolo'. Paakanon nogi' om poinumon iyolo', om pologoson nopo iyolo' do muli' dot id raja' diyolo',” ka dau. 23 Om papaharo noddi i raja' dot Israil do poginakanan dot agayo do maan diyolo'. Kangaakan poddi om kongoinum iyolo' om suhuo' nogiddi iyolo' di raja' dot Israil do muli' dot id raja' do Siria, i raja' diyolo'. Om mantad poddi om tingkod no i tulun do Siria do manangod di pomogunan dot Israil.
Tinurungku' o Samaria
24 A' po songkuro o koloidon do mantad diri om angatai no di Binhadad, i raja' do Siria, o koinsanai di soudor dau do minongoi panangod dot Israil. Om turungkuo' no diyolo' o bandar do Samaria. 25 Om nokootuson nopoddi nga' minononglous o hiri'd bandar, gisom dot iso' nopo o tulu do kaladai om walu' nohopod o tusin do pirok do gatang, om duwo no auns do taii' do punai om limo tusin do pirok do gatang. 26 Insan o maso, di manau-panau i raja' dot Israil do hiri'd timpak do tolig di bandar, om pomolohou no dau o songulun o tondu', “Tulungo' oku, oi Tuan Raja'!” ka. 27 Om boros ka di raja' do suminimbar, “Ondung a' ko'd Tuhan tulungon, om poingkuro oku po daa iyoho' do monulung diya'? Aiso' i' o gandum om aiso' o waig dot anggur ku! 28 Nga' nunu toi' o kosusaan nu?” ka dau. Om boros ka di tondu', “Di nopo di guulu, om minangangat iti tambalut ku do mangakan di doho'd tanak om kanon nogindo i dau'd tanak di tadau kawagu. 29 Om onsoko' noddi dahai i doho'd tanak, om akano' noddi dahai. Om kosuabon noddi om sunudai ku no iyau do mogonsok di dau'd tanak, nga' polisoko' nogi' dau i tanak dau!” ka dau. 30 Om soira' di norongou di raja' o hal diri, om hurako' nopo dau o pakayan dau tu' tumongob no kopio iyau. Om kokito ngai' i' i tulun di poingiyon dot id somok di tolig di bandar do kipinakai iyau do pakayan do mogihad do tanda' do tumongob iyau. 31 Om boros ka di raja' dot opuhod, “Patayon oku nopod Tuhan dot a' ku no apatai i Ilisa do baino',” ka dau. 32 Om ponuhu' noddi i raja' do tulun do mogulu dau do mongoi'd hiri'd walai di Ilisa. Tontok nopoddi om hiri i Ilisa id walai do mogirumo-rumo di piro-piro o boyoon. Om tontok dit a' po nokorikot i sinuhu' di raja' do mongoi'd hiri om boros ka di Ilisa dot id boyoon di hiri, “Antaan-taan no dokoyu! Tu' monuhu' moti' i gampamatai do tulun do mongoi pamatai doho'! Soira' nopo do korikot i tulun di sinuhu' dau do hiti, om ontiilan no ilo totobon, om kada' dokoyu iyau posolokoyo'. Om muhut-suhut i' dau i raja',” ka dau. 33 Om a' po di Ilisa nopupusan o boros dau om korikot no i raja' do hiri, om boros ka dau, “Tuhan i' o pinoporikot do kosusaan diti dot id dati'! Om nunu poddi o kapagandasan toko' dot itulung do mantad id dau?” ka dau.
1 Om boros ka di Ilisa do suminimbar, “Pokinongoho' no iti boros do Tuhan! Suab nopondo, do dongiyo'dti, om koboli no tulun do 3 kilogram do gandum dit osonong no kopio, ko' 6 kilogram do barli do horogo nopo om iso' no tusin do pirok,” ka dau. 2 Nga' boros ka di madtatamong kasai' di raja' dot id di Ilisa, “A' no kopio milo dot osiliu ot iyo'ddi! Sokiro piya daa do porikoton do Tuhan o rasam do dinondo, nga' a' no kopio milo dot owonsoi o miagal diri,” ka dau. Om boros ka di Ilisa do suminimbar, “Kokito ko indo dot osiliu o miagal diri. Nga' a' ko no ma kotudu' di taakanon diri,” ka dau.
Minogidu' i Soudor do Siria
3 Tontok nopo do tadau'ddi om haro ot apat o tulun do kitoruol o kulit dit araat kopio do hiri'd soliwan di wawayaan do bandar do Samaria. Om pogiboro-boros no iyolo', “Nunu noo ot aanu-anu toko' do mundorong do hiti do mandad do gisom dot apatai? 4 Ondung sumuang toko' dilo bandar om apatai toko' id olikapan om mundorong toko'd hiti nga' matai toko' i'. Osonong nogi' do mongoi toko'd hilo'd kokiiman do tulun do Siria. Patayon toko' no diyolo'. Nga' nunu koilo-ilo, a' toko' i' doti' diyolo' kuroi-kuroyon,” ka diyolo'. 5 Om maha' di sumodop no o tadau, om ongoi no iyolo' do hiri'd kokiiman di tulun do Siria. Nga' aiso' i' o nokito diyolo' dot ongoiso' piya o tulun do hiri. 6 Tu' pinorongou do Tuhan i tulun do Siria do tuni do miagal-agal do haro o soudor dot ogumu' dit ongkikuda' om ongkikorita'-kuda' do montol-bontol do mongoi panangod diyolo'. Om andasan daa'ddi diyolo' om ginodsian di raja' dot Israil o raja' do tulun do Hit om raja' do tulun do Masir do mogiwoyo-woyo' di soudor diyolo' do mongoi panangod diyolo'. 7 Gowoi poddi om sosodopon iddi do minogidu' iyolo' do minokipapasi. Om iduwai ngai' nopo diyolo' i kiim, om i kuda', om kaladai diyolo' do hiri'd kokiiman. 8 Om soira' di nokorikot it apat o tulun di kitoruol o kulit diri do hiri'd tisan di kokiiman, om suango' no diyolo' o tiso' di kiim. Om akan noddi iyolo' om inum om mininganu iyolo' do nunu nopo i hiri. Om minanganu nogi' iyolo' do tamas om pirok om pakayan di nokito diyolo'. Om polisoko' noddi diyolo' i nangaanu diyolo'ddi. Om suang po kawagu iyolo' di kiim do suwai. Om pinganu po kawagu iyolo' di konunu-nunuan, om niyo i' diyolo' dit id gulu. 9 Om pogiboro-boros noddi iyolo', “A' i' osonong iti wonsoyon toko'! Iti nopo om habar dot osonong! Om apatut do ngoyon toko' posunudo' iti! Ondung andadon toko' do gisom do suab, om pointantu' no do hukuman toko'. Kainou, ngoyo' toko' posunudo' iti dot id piro-piro o boyoon do soudor do pomorinta',” ka diyolo'. 10 Om tongkiadai noddi diyolo' i kokiiman do tulun do Siria om uli' no do hilo'd Samaria. Om pamagarang no iyolo' do momolohou di madtatamong do wawayaan di bandar. Boros ka diyolo', “Nokoongoi no iyahai do hilo'd kokiiman do tulun do Siria, om aiso' no o songulun do nokito om norongou dahai do hilo'. Songinlukug ngai' po i kuda' om kaladai, om tongkiadai tomod nopo diyolo' i kokiiman,” ka diyolo'. 11 Om popinsunudo' noddi di piro-piro o madtatamong o habar diri gisom do nokorikot dot id raja'. 12 Om tontok nopoddi om otuong po daa nga' tungag nopo i raja', om boros ka dau dot id koinsanai di boyoon do soudor dau, “Pokinongou kou pogi'! Om posuhuton ku i' iyokoyu ondung nunu o kosondoton dilo winonsoi di tulun do Siria! Tu' oilaan toko' i' diyolo' do louson, om iduwai noddi diyolo' i kokiiman diyolo' om ongoi no lisok do hilo'd gouton. Tu' osorou nopo diyolo' nga' sumoliwan toko' nondo do mongoi pogihum do taakanon, om ngoyon toko' nopondo diyolo' songodo' om osolod nondo diyolo' iti bandar toko',” ka dau. 13 Om boros ka do songulun di pagawai di raja', “Poingkuro piya nga' angapatai i' o tulun dot id bandar diti do miagal ngai' di tulun di nangapatai no. Osonong nogi' do monuhu' toko' do piro-piro o tulun do mongoi pogontong di nosiliu'd hilo' om sakayon nopo ilo kuda' do limo po o tinan do noolu-olu', om oilaan toko' indo ondung nunu kopio i nosiliu'ddi,” ka dau. 14 Om pomili' no iyolo' do piro-piro o tulun, om suhuo' no di raja' do sumakai do duwo o korita'-kuda' di don sumasangod. Sinuhu' iyolo' do mongilo-ilo ondung nunu kopio o nosiliu dot id soudor do Siria. 15 Om pamanau no iyolo' do gisom do nokorikot do hilo'd Bawang do Yordan. Om poingompus nopo di ralan dot okito diyolo' do moninggarayat o pakayan om i koburu-buruon do nakangataam di tulun do Siria do tontok di poggidu' iyolo'. Om poguliai no di tulun diri om ngoyo' no diyolo' posunudo' di raja'. 16 Om soliwan ngai' noddi di bandar i tulun do Samaria do mongoi pinganu di konunu-nunuan di hiri'd kokiiman do tulun do Siria. Om poingkukuro nopo i nokoboros do Tuhan om nangabayaan ngai' no tu' tolu nopo o kilogram do gandum dit osonong no kopio, ko' onom o kilogram do barli om songusin poo o pirok do gatang. 17 Nga' koontok no kopio do maso'ddi dot i madtatamong kasai' di raja' o nosuhu' do madtamong di wawayaan di bandar diri. Om kapatai no iyau'd hiri do nopingulakan di tulun dot ogumu'. Om piontok nopo di nokoboros di Ilisa do tontok di solowot i' i raja' dau. 18 Om nokoboros no di Ilisa do dongiyo nopoddi di tadau kawagu, om tolu nopo o kilogram do gandum dit osonong ko' onom o kilogram do barli om dagangon nondo do hilo'd Samaria do sousin poo o pirok do gatang. 19 Om tontok noddi do minoro-boros i madtatamong kasai' di raja' do poingkaa, “A' no kopio milo dot osiliu ot iyo'ddi. Sokiro piya daa do sigog id porikoton do Tuhan o rasam do dinondo; nga' a' no kopio milo dot owonsoi o miagal diri,” ka dau. Om boros ka di Ilisa, “Kokito ko indo kopio dot osiliu iti, nga' a' ko noddi ma kotudu' di taakanon,” ka dau. 20 Iri noddi o nosiliu dot id tulun diri, tu' napatai do nopingulakan di tulun dot ogumu' do hiri'd wawayaan di bandar diri.
Guminuli' Kawagu do Hilo'd Israil i Tondu' do Mantad Hilo'd Sunim
1 Insan o maso om porikatai nod Tuhan do mononglous o hilo'd pomogunan dot Israil do solinaid do turu' o toun. Om sinunudan mantad di Ilisa i tondu' do Sunim, i noumbalan dau do minamasi kawagu i tanak do kusai di tondu'ddi di napatai daa. Om suhuo' no di Ilisa i tondu'ddi do mongoi iyon dot id pomogunan do suwai do sumangkat nopo di sompiiyon dau. 2 Om tinanud i' di tondu' i nituduk di Ilisa, om ongoi noddi iyau do miwoyo' di sompiiyon dau do hilo'd pomogunan do Pilistin do minongoi iyon do hilo'. 3 Katalib poddi i turu' o toun diri, om poguliai no dau kawagu do hilo'd pomogunan dot Israil. Om ongoi no iyau solowot di raja' do miwoyo' di tanak dau tu' pokigulian kawagu dau i walai om i tana' dau. 4 Tontok nopoddi nga' sinuhu' di raja' i Gohasi, i susuhuon di Ilisa, do monusui di kongoimayaan di nongowonsoi di Ilisa. 5 Om maso di Gohasi do monusui do kowoyo-woyoo' di Ilisa do minamasi di tanak di napatai, nga' poboroso' no di tondu' do mantad hilo'd Sunim i pokionuon dau dot id raja'. Om boros ka di Gohasi dot id raja', “Tuan Raja', iti no i tondu'ddi, om hoodi i tanak di pinasi kawagu di Ilisa,” ka dau. 6 Om ponguhot noddi i raja' om suhuo' no dau i tondu' do monusui do pasal di tanak. Om lohowo' noddi di raja' o songulun di pagawai dau om suhuo' no dau do popoguli' kawagu do koinsanai di dapu' di tondu', om kohompit no i gatang do tua-ua' di tanom-tanom do hiri'd dumo di tondu' do solinaid di turu' o toun di tondu' dot id pomogunan do suwai.
I Ilisa om i Binhadad i Raja' do Pomogunan do Siria
7 Insan o maso om ongoi no i Ilisa do hilo'd Damsik. Tontok nopoddi nga' sumakit i Raja' Binhadad. Om soira'ddi di nosunudan i raja' do hino i Ilisa do hiri'd Damsik, 8 om boros ka dau dot id di Hasail, i songulun di pagawai dau, “Igit dot ipuhawang do patahakon di nabi, om suhuon indo iyau do monguhot do Tuhan ondung olingasan oku po tuu diti ko' amu',” ka dau. 9 Om igit no i Hasail do mogisuwai-suayan nopo o bansa' do konunu-nunuan dit ongosonong kopio do mantad hilo'd Damsik, om pagandaro' no dau dot apat nohopod o tinan dot unta. Om ongoi nogiddi iyau solowot di Ilisa. Om soira' di nokorikot i Hasail do hiri'd di Ilisa, om boro-boros no iyau, “Sinuhu' oku di Raja' Binhadad, i susuhuon nu, do monguhot diya' ondung olingasan po tuu iyau ko' amu',” ka dau. 10 Om boros ka di Ilisa do suminimbar, “Nokointalang nod Tuhan dot id doho' do matai no iyau. Nga' poboroson no dot id dau dot olingasan i' iyau,” ka dau. 11 Om sonsodo' noddi di Ilisa i Hasail gisom do suwai-suwai'ddi ot opurimanan di Hasail. Om sigog iddi dot ihad i Ilisa. 12 Om ponguhot no i Hasail dau, “Nokuro tu' mihad ko, oi Tuan,” ka dau. Om boros ka di Ilisa, “Mihad oku pogi' nga' oilaan ku no o karaaton do wonsoyon nu dot id tulun dot Israil. Tutudan nu nondo i kabandaran diyolo' di kitolig, om patayon nu o tangaanak diyolo' dit ongomulok po om it ongoligkang om kotolon nu i tangaanak di ragang po, om ulayakon nu o tian di tongoondu' do monontian,” ka dau. 13 Om boros ka di Hasail, “Isai kopio oku daa'dti? Hinonggo kopio daa o ngayan ku do kuasa' do miagal kopio'ddi?” ka dau. Nga' boros ka di Ilisa, “Nosunudan oku nod Tuhan dot osiliu ko nondo do raja' do pomogunan do Siria,” ka dau. 14 Om pouliai noddi di Hasail dot id di Raja' Binhadad. Om uhoto' no di Binhadad iyau, “Nunu kad i Ilisa?” ka dau. Om boros ka di Hasail, “Sinunudan oku dau dot olingasan ko i',” ka dau. 15 Nga' tadau poddi kawagu om anu no i Hasail do kumut, om yoposo' no dau do waig om pokuluputo' nogiddi dau dot id rabas di Raja' Binhadad do gisom do napatai i raja' do nopusakan. Om kosiliu noddi i Hasail do raja' do Siria do suminowoli di Binhadad.
I Yihoram o Raja' do Yohuda
16 Tontok di kolimo nod toun di Raja' Yoram, i tanak di Ahab do momorinta' dot Israil, om kosiliu no i Yihoram, i tanak di Yosapat do raja' do Yohuda. 17 Tontok nopoddi om tolu no nohopod om duwo o toun dau do momorinta' do hilo'd Yorusalim. 18 Om kowino' no dau i tanak di Ahab. Om pomonsoi noddi iyau do dusa dot id Tuhan do miagal di wonsoyon di sompiiyon di Ahab, tu' minusui ngai' di winonsoi di piro-piro o raja' dot Israil dit angaraat. 19 Nga' a' i' do Tuhan rinaag o pomogunan do Yohuda, tu' nakabatos mantad no o Tuhan dot id di Daud, i susuhuon dau, do sinakagon nopo dau om osiliu kasai' do raja' om momorinta' kasai' nopondo do gisom dot alaid. 20 Tontok nopo di pomorintaan di Yihoram, om suminaap o pomogunan dot Idom do pomorintaan do Yohuda, om mimpori-pori diri ot Idom do momorinta'. 21 Om pamanau noddi i Raja' Yihoram do miwoyo' do toinsanan di korita'- kuda' dau do kuminaa do hilo'd bandar do Sair. Om turungkuo' no iyolo' di soudor dot Idom do hilo'. Nga' nokoidu' i' iyau om koinsanai di boyoon do soudor dau do tuminalib di borisan di soudor do pisangod di dongotuong. Om iri no i soudor diyolo' om pogitongkiad-kiad nopo om sorompori-pori do minuli'. 22 Mantad poddi om okon noddi ko' id suang do pomorintaan do Yohuda o pomogunan dot Idom. Om maso nogiddi do suminaap o Libna do pomorintaan do Yohuda. 23 Om koinsanai di nongowonsoi di Raja' Yihoram om nongkotulis ngai' i' dot id suang do Buuk di Monusui do pasal do Raja' do Yohuda. 24 Om kapatai noddi i Raja' Yihoram om lobongo' no do hiri'd kalabangan do raja' do hiri'd Bandar di Daud. Om kosiliu noddi do raja' i Ahasia, i tanak dau do suminowoli dau.
I Ahasia o Raja' do Yohuda
25 Tontok di kohopod om duwo do toun di Yoram, i tanak di Ahab do momorinta' do pomogunan dot Israil, om kosiliu nod raja' do Yohuda i Ahasia, i tanak di Yihoram. 26 Tontok nopoddi om duwo no nohopod om duwo o toun di Ahasia, om sontoun no o koloido' dau do momorinta' do hilo'd Yorusalim. Tina' nopo dau om i Atalia, i tanak di Raja' Ahab, om manangaki iyau di Omri, i raja' dot Israil. 27 Om koobpinai diri i Ahasia do sompiiyon di Raja' Ahab tu' nakakawin no iyau dot id sompiiyon diri. Om iyau nga' minomonsoi id dusa dot id Tuhan do miagal di winonsoi di sompiiyon di Ahab. 28 Om miniuhup i Raja' Ahasia om i Raja' Yoram, i raja' dot Israil, do suminangod di Hasail, i raja' do pomogunan do Siria. Pinisangadan nopo diyolo' om hilo'd Ramot, i hilo'd watas do Giliad. Om nosuhat diri i Raja' Yoram do hiri'd pinisangadan diri. 29 Om uli' noddi i Yoram do hilo'd bandar do Yisriil do minongoi pokiubat di nongosuhat. Om ongoi no i Raja' Ahasia kakap di Yoram do hilo'.
Siniliu i Yohu do Raja' dot Israil
1 Tontok nopoddi om lohowo' no di Nabi Ilisa, o songulun di nabi dit omulok po, om boros ka dau, “Sodia' no, om mongoi i' do hilo'd Ramot, i hilo'd Giliad. Om igitan no iti kakanan dot okooro' di kisuang do tumau do saitun. 2 Om korikot ko nopondod hilo', om ihumon no i Yohu i tanak di Yosapat, i manangaki di Nimsi. Om angatan nondo iyau do sumuang do bilik do duwo-duwo kou. 3 Om tuntugan nondo diti tumau do saitun o tulu dau, om poboroson nondo o poingkaa, ‘Pinopoilo o Tuhan do silihon ko dau do raja' do tulun dot Israil,’ kanto. Om owonsoi nu pondo iri om siahan no do tumongkiad do kinoiyonon diri,” ka di Ilisa. 4 Om pamanau noddi i nabi dit omulok poddi do minongoi do hilo'd Ramot. 5 Om tontok di nokorikot iyau'd hilo', om kokunamaai no dau do maso ngai' di boyoon do soudor om i Yohu do mogirumo-rumo. Om boros ka di nabi, “Oi Tuan, haro o habar do poboroson ku diya',” ka dau. Om ponguhot no i Yohu, “Isai o posunudan nu do habar dino?” ka. “Iya', oi Tuan,” ka di nabi diri. 6 Om pitanud noddi iyolo' do suminuang do hiri'd walai, om tuntugai no di nabi o tulu di Yohu di tumau do saitun, om boro-boros nod poingkaa, “Boros kad Tuhan, i Kinorohingan dot Israil, ‘Silihon ku iya' do raja' do tulun ku, i bansa' dot Israil. 7 Patayon ngai' no i sompiiyon do tuan nu, i Raja' Ahab. Om ohukuman ku indo i Isibil tu' minamatai ngai' di nabi ku om i susuhuon ku di suwai. 8 Patayon ngai' nopo o koinsanai dit id sompiiyon om i sinakagon di Ahab; tu' patayon ngai' ku no o koinsanai do kokusayan dit id suang do sompiiyon dau dit ongomulok po, om i molohing no. 9 Om wonsoyon ku nondo dot id sompiiyon di Ahab, o miagal di winonsoi ku dot id sompiiyon di Yirobiam om id sompiiyon di Baisa, i duwo o raja' dot Israil. 10 I Isibil nopo om a' i' olobong, tu' akanon nondo do tasu o rata' dau do hilo'd watas do Yisriil,’ ka,” ka dau. Om koboros poddi di nabi dit omulok poddi o miagal diri, om soliwan no iyau do mantad hiri'd walai om panangkus no do minuli'. 11 Om guli' no i Yohu do hiri'd tambalut dau do suwai, om uhoto' no diyolo' iyau, “Nunu ka do habar? Minogkuro diya' i mulau'ddi?” ka diyolo'. “A' kou toi koilo?” ka di Yohu do suminimbar. 12 “Amu', a' i' iyahai koilo!” ka diyolo'. “Sunudai daa iyahai!” ka kawagu diyolo'. Om boros ka di Yohu, “Sinunudan oku dau do boros do Tuhan, do silihon oku'd Tuhan do raja' dot Israil!” ka dau. 13 Om diiri i' om diiri, om pawalado' ngai' no di tambalut di Yohu i rasuk diyolo' dit id soibau do hiri'd tukad di kawayaon di Yohu. Om pounio' no diyolo' i torumpit om pagarango' no diyolo' o poingkaa, “I Yohu no o raja' toko'!” ka.
Pinatai di Yohu i Yoram, i Raja' dot Israil
14-15 Om pongupakat noddi i Yohu do sumaap di Raja' Yoram. Tontok nopoddi om hilo' po i Yoram id Yisriil do minongoi pokiubat di nongosuhat di hilo'd pisangadan do hilo'd Ramot, di suminangod iyau di Hasail, i raja' do Siria. Om boros ka di Yohu dot id boyoon do soudor, i tambalut dau'ddi, “Ondung kaakun kou do sumiliu oku do raja', om kada' no pologoso' do haro o tongosongulun piya do kosoliwan do mantad hilo'd Ramot do mongoi popoinsan di tulun do hilo'd Yisriil,” ka. 16 Om sakai noddi iyau di korita'-kuda' dau di don sumasangod om pakayaai no do hilo'd Yisriil. Tontok nopoddi om minongoi kakap i Ahasia, i raja' do Yohuda, di raja' Yoram tu' a' po nolingos i nosuhat dau. 17 Om kokito'ddi di madtatamong di walai dot akawas i Yohu do mogiwoyo-woyo' di tulun dau do miririkot no. Om polohowo' no dau o boros do poingkaa, “Haro ot iso' o sinompuruan do tulun do mogitanud-tanud do kumaa'd hiti,” ka dau. Om boros ka di Yoram, “Suhuo' o songulun di soudor do kikuda' do mongoi pongilo ondung tambalut tuu iyolo' ko' pisangod po,” ka dau. 18 Om ongoi noddi i tulun di sinuhu'ddi solowot di Yohu, om boros ka dau, “Mokiilo i raja' ondung mambalut o korikatan nu'd hiti,” ka dau. Om boros ka di Yohu, “Nunu ma o diya'd koilo-ilo! Sugku' nogi' doho',” ka dau. Om posunudo' no di madtatamong do walai dot akawas dot id di Raja' Yoram do nokorikot no i tulun di sinuhu'ddi do hiri'd sinompuruan do tulun diri, nga' a' noddi iyau gumuli'. 19 Om suhuo' po kawagu dau o songulun do minongoi solowot di Yohu. Om i pinonguhatan dau, om i di Yohu do pinonimbar nga' iyo iddi gulu tu', “Nunu ma o diya'd koilo-ilo. Sugku' nogi' doho'!” ka. 20 Om posunudo' po kawagu di madtatamong di walai dot akawas do nokorikot no do hiri'd sinompuruan do tulun i sinuhu'ddi, nga' a' noddi iyau guminuli'. Om boros kaddi dau, “Atantu' no dot i Yohu o boyoon dilo tulun, tu' poinsakai iyau di korita'-kuda' dau di don sumasangod om iyo po iyau do tulun di mulau,” ka dau. 21 Om boros kaddi di Raja' Yoram, “Posodiawo' i korita'-kuda' ku!” ka dau. Kosodia' poddi, om pamanau no i Yoram om i Raja' Ahasia do sopipori-pori do suminakai di korita'-kuda' diyolo'. Om koruba' no iyolo' di Yohu do hiri'd tumo daa di Nabot di gulu po. 22 Om uhoto' noddi di Yoram i Yohu, “Mambalut i' o kinorikatan nu'd hiti?” ka dau. Om boros ka di Yohu, “Poingkuro'ddi do mongoi ambalut do solinaid pod haro o bobolian do hiti om i sumambayang dot id tingolig di tinimpuunan di Isibil, i tina' nu?” ka dau. 23 “Takal moti' iti, oi Ahasia!” ka di Yoram dot id di Ahasia. Om pogulio' no dau i korita'-kuda' dau, om poggidu' no do mantad hiri. 24 Nga' kodongo' no di Yohu i pana' dau, om papanao' no dau dot id di Yoram gisom do nokototos iyau do minamalanat di pawakasan do pana' dau. Om ilihai nogiddi dau, om pionong nopo o likud di Raja' Yoram, om gisom do nokorikot do hiri'd tundu-undu' dau. Om kahaba' noddi iyau om kapatai no do hiri'd suang di korita'-kuda' dau. 25 Om boros kaddi di Yohu dot id di Bidkar, i madtatamong kasai' dau, “Osorou nu po do tontok di poinsakai kito di kuda' om muhut-suhut to di Raja' Ahab, i tapa' di Raja' Yoram do minoro-boros o Tuhan dot id di Ahab do poingkaa, 26 ‘Oilaan ku i' i minamatai di Nabot om i tangaanak dau di konihab. Om mamatos oku no do baino' do hukuman ku'ndo iya' do hiti'd kabun diti,’ ka,” ka dau. Om boros kaddi kawagu di Yohu dot id tulun di madtatamong kasai' dau, “Ngoyo' pataamo' ilo rata' di Yoram do hilo'd kabun di Nabot om abayaan i' i hukuman do Kinorohingan dot id dau,” ka dau.
Pinatai i Ahasia, i Raja' do Yohuda
27 Om montong-ontong i' i Ahasia do koinsanai di nongowonsoi'ddi. Om poggidu' noddi iyau do poinsakai di korita'-kuda' dau do kuminaa ponong hilo'd bandar do Bait-Hagan. Om gusao' no di Yohu i Ahasia, om garangai no dau i tulun dau, “Ilo' nga' patayon i'!” ka dau. Om panao' no diyolo' i Ahasia om kosuhat no iyau do hiri'd ralan di kumaa do hilo'd Gur, it id somok do bandar do Yibliam. Nga' nokopoggidu' kasai' po iyau do gisom do nokorikot do hilo'd Mogido, om kapatai noddi iyau'd hilo'. 28 Om ngoyo' no di pagawai di Ahasia i rata' di Ahasia do pinoguli' do hilo'd Yorusalim, do mitonggoi di korita'-kuda' dau. Om lobongo' no i Ahasia do hiri'd kalabangan do raja' do hilo'd Bandar di Daud. 29 Nosiliu i Ahasia do raja' do Yohuda do tontok di kohopod om iso' do toun di Raja' Yoram, i tanak di Ahab, do raja' dot Israil.
Pinatai i Isibil, i Raja' do Tondu'
30 Om korikot noddi i Yohu do hilo'd Yisriil. Om tontok di nongorongou ngai' di Isibil i nongowonsoi'ddi, om pamadak no iyau om ponudai no, om liga' nogiddi do hiri'd liligaon di walai do raja' do luminuung do hiri'd siriba'. 31 Om tontok di suminuang i Yohu do hiri'd wawayaan dot agayo, om pomogiak no i Isibil, “Oi Simri! I gampamatai! Nunu ngoyon nu'd hiti?” ka dau. 32 Om tingaha' no i Yohu do hiri'd liligaon, om boro-boros nod, “Isai no o sumokodung doho'?” ka. Om haro'ddi o duwo ko' tolu po o pagawai do luminuung do mantad hiri'd liligaon. 33 Om boros ka di Yohu dot id diyolo', “Pataamo' dokoyu i tondu' do hiti'd siriba'!” ka dau. Om pataamo' no diyolo' i tondu'ddi do hiri'd siriba', gisom do koromos nopo o raha' dau do hiri'd tolig om hiri'd kuda'. Om poulakai nogiddi di Yohu di korita'-kuda' dau i rata' di Isibil. 34 Om suang noddi i Yohu do hiri'd walai do raja', om boro-boros nod, “Ngoyo' dokoyu lobongo' i rata' di tondu' di nousung diri, tu' iyau nopo om tanak i' do raja',” ka. 35 Nga' tontok di nongoi daa di piro-piro o tulun i rata' di Isibil, om nabantalan nopo diyolo' om iri po i korulung do tulu, om i tulang do gakod om longon dau. 36 Om soira' di pinoboros diyolo' iri dot id di Yohu, om boros ka di Yohu, “Iti no o minamayaan di nokoboros do Tuhan do pinolombus di Ilia, i susuhuon dau do poingkaa, ‘Akanon nondo do tasu o rata' di Isibil do hilo'd watas do Yisriil. 37 Om iri nopondo toolu-olu' di rata' dau om songurias poo do miagal do taii' do nintorusan, gisom dot a' nod tulun otutunan,’ ka,” ka dau.
Pinatai i Sinakagon di Ahab
1 Haro o turu' nohopod o tulun do manangaki di Raja' Ahab do poingiyon do hilo'd bandar do Samaria. Om ponulis noddi i Yohu do surat do pinotikid ngai' di boyoon di hiri'd bandar do Samaria, om i tulun dit ongkipangkat, om i tulun di mongilo-ilo di sinakagon di Ahab. Poingkaa o suang di surat diri, 2 “Iyokoyu ngai' no i monongkoilo do koinsanai di sinakagon di Raja' Ahab, om haro ngai' nogi' o korita'-kuda', om rapo-rapo dokoyu do sumangod om haro o bandar dokoyu dit ongkitolig. Om aramit nopondo dokoyu iti surat, 3 om pilion no dokoyu o songulun di sinakagon di Raja' Ahab dit osonong kopio, om silihon no dokoyu do raja' dokoyu, om tumotos kou no do mongintirung dau,” ka. 4 Om soira' di noilaan diyolo' o suang di surat, om kongooris noddi kopio iyolo'. Boros ka diyolo', “Nunu'ddi o kasaap-saap toko' di Yohu, tu' antangai pogi' nga' i Raja' Yoram piya om i Raja' Ahasia nga' a' i' nakasaap dau,” ka. 5 Om oinsanan nopoddi i boyoon di hiri'd bandar diri om it ongkipangkat di tulun do hiri, om i mongilo-ilo di walai do raja', om i tulun di mongilo-ilo di sinakagon di Raja' Ahab, do pinoporomut do boros diti dot id di Yohu. Boros ka diyolo', “Minsiriba' ngai' nopo iyahai dot id diya' om posodia' ngai' i' iyahai do tumanud do nunu nopo o tisuhu' nu. Nga' a' i' iyahai momili' dot isai nopo do silihon do raja'! Wonsoyo' nopo it osonong dot osorou nu,” ka. 6 Om ponulis po kawagu i Yohu do surat dot id diyolo' do poingkaa, “Ondung sumokodung kou doho', om posodia' do tumanud dot isuhu' ku, om patayon ngai' no dokoyu i manangaki di Ahab om igitan no dokoyu o tulu diyolo' do hiti'd doho' do dongiyo'dtid suab do hilo'd Yisriil,” ka. Iri nopo i turu' nohopod o manangaki di Raja' Ahab diri om poinsugku' di tulun dit ongkipangkat do hiri'd bandar do Samaria. Om iyolo' no o minonuduk ngai' di manangaki di Raja' Ahab diri. 7 Om soira' di naramit diyolo' i surat di Yohu, om patayo' no di tulun dit ongkipangkat di hiri'd bandar do Samaria o koinsanai di turu' nohopod o manangaki di Raja' Ahab. Om puloso' no diyolo' o tulu do koinsanai di manangaki di Ahab om posuango' no dot id balatak, om pootodo' nogiddi dot id di Yohu do hilo'd Yisriil. 8 Om kosunudai poddi i Yohu do nakaatod ngai' no i tulu di manangaki di Raja' Ahab, om suhuo' noddi dau iyolo' do poulud di tulu do pogitimpak-timpakon do duwo o kotumpukon do hiri'd wawayaan di bandar om pologoson nopondo do hiri do gisom do kosuabon kawagu. 9 Kosuabai poddi om ongoi no i Yohu do hiri'd wawayaan dot agayo, om boros ka dau dot id koinsanai di tulun di nokotimung do hiri, “Iyoho' no i minogupakat do suminaap di Raja' Yoram om iyoho' i minamatai dau; om a' kou i' iyokoyu kohompit do kasalaan diri. Nga' oilaan i' dokoyu i minamatai ngai' do tulun diti. 10 Nokointalang noddi kopio do baino' dot abayaan kopio o koinsanai di nokoboros do Tuhan do pasal di sinakagon di Ahab. Nabayaan nod Tuhan i pinoboros dau do pinolombus di Ilia, i susuhuon dau,” ka dau. 11 Om patayo' ngai' poddi di Yohu i koworisan di Raja' Ahab do suwai, i songingiyon do hilo'd Yisriil, om koinsanai di pagawai om i koombolutan di Raja' Ahab, om i piro-piro ot imam di mogobi-obi' di Raja' Ahab; iso' po nga' aiso' no o pinologos dau do poimpasi.
Pinatai o Koworisan di Raja' Ahasia
12 Om tongkiad no i Yohu do mantad hilo'd Yisriil om pakayaai no dau do hilo'd Samaria. Om hilo' noddid tanga'd ralan, dot id iso' o kinoiyonon do roitan do “Kampung do Madtatamong do Dumba'”, 13 om kosolowot dau o piro-piro o tulun di koworisan di Ahasia, i raja' do Yohuda. Om uhoto' no di Yohu iyolo', “Isai kou'ndo?” ka dau. Om boros ka diyolo', “Iyahai nopodti om koworisan di Ahasia. Mongoi iyahai'd hilo'd Yisriil do mongoi pogolimbuha' do koinsanai di sompiiyon do raja', om i monongodu' di Raja' Isibil,” ka. 14 Om boros ka di Yohu dot id tulun dau, “Tangkapo' dokoyu iyolo'!” ka dau. Om tangkapo' ngai' noddi diyolo' i tulun diri, om patayo' no do hiri'd toning dot iso' o torobong di narasakan no. Koinsanai nopo di pinatai om apat nohopod om duwo o tulun. Om iso' po nga' aiso' no o pinologos dau do poimpasi.
Pinatai Ngai' i Koworisan di Raja' Ahab
15 Om lombus po kawagu i Yohu do minamanau. Om kosolowot diri iyau di Yonadab, i tanak di Rikab, di hiri'd tanga'd ralan. Om suwau no i Yohu dau, om boros ka dau, “A' toi miagal i' o dato dot osorou? Orohian ko i' daa do sumokodung doho'?” ka dau. “Oo, orohian oku i',” ka di Yonadab do suminimbar. Om boros kaddi di Yohu, “Ondung iyo'ddi, om kaino mitabi',” ka. Om pitabi' noddi iyolo' om pasakayo' no di Yohu i Yonadab di korita'-kuda' dau. 16 Om boros ka di Yohu dot id di Yonadab, “Tanud pogi', om kokito ko i' do kotorodoko' ku dot id Tuhan,” ka dau. Om pitanud noddi iyolo' do kuminaa do hilo'd Samaria do poinsakai di korita'-kuda' diyolo'. 17 Om korikot poddi iyolo' do hilo', om patayo' noddi di Yohu o koinsanai di wari-waris di Raja' Ahab. Aiso' no o songulun piya do pinasi dau. Om kowonsoi ngai' nopo iri do miontok di boros do Tuhan do pinolombus di Ilia.
Pinatai Ngai' i Tumuku' dot id Tingolig do Baal
18 Om suhuo' no di Yohu o koinsanai di tulun do Samaria do tumimung, om boros ka dau, “I Raja' Ahab nopo om a' i' kosongkuro no o podsusubak do tingolig do Baal; nga' iyoho' nopo om a' ku no paalang-alangon. 19 Om timungon ngai' no o koinsanai di nabi di mogobi-obi' di tingolig do Baal, om koinsanai di tulun do tumuku' dot id tingolig diri om koinsanai dit imam do mogobi-obi' di tingolig diri. Kada' nod haro o songulun po dot a' rumikot. Tu' papatahak oku dot ogumu' o porsombahan dot id Baal. Om isai-isai'ndo ot a' tuminong om hukuman no do kapatayon,” ka dau. Nga' iti no o pagakal di Yohu om apatai indo o koinsanai di tulun di tumuku' dot id Baal. 20 Om boros kaddi di Yohu, “Papatantu' no dot iso' o tadau'd agayo do kopodsubakan do Baal,” ka. Om wonsoyo' no di tulun o miagal diri, 21 om i Yohu nga' popinsunud nogi' do habar diri do pointongkop do pomogunan dot Israil. Om tontok nopo di norikot i tadau'ddi om rikot ngai' nopo i modsusubak do Baal, om aiso' no ot iso' dot a' ruminikot. Om suang ngai' nopo iyolo' do hiri'd walai do podsubakan do Baal do gisom do nososok tomod. 22 Om suhuo' no di Yohu it imam di migompi' di pakayan do modsubak do papatahak ngai' di pakayan diri dot id koinsanai'd tulun di mongoi podsubak do Baal. Om wonsoyo' noddi diyolo' o miagal diri, 23 om suang noddi i Yohu om i Yonadab, i tanak di Rikab, do hiri'd walai di tingolig do Baal. Om boros kaddi dau dot id toinsanan di tulun do hiri, “Antangan no kopio dokoyu ondung osompipi' i tulun di modsubak do Baal i nokongorikot do hiti, kada' nod haro o songulun pod sumambayang dot id Tuhan do hiti,” ka dau. 24 Om patahak noddi i Yohu om i Yonadab do podsubak diyolo' do Baal. Nga' nokosodia' mantad no di Yohu i walu' nohopod o tulun di madtatamong om i gunsiou do hiri'd soliwan di walai do tingolig, om nosunudan mantad no dau iyolo' do poingkaa, “Patayon ngai' no dokoyu i tulun; isai nopo i popologos dot ongoiso' diyolo' do mogidu', om hukuman nod kapatayon!” ka. 25 Om kopongo poddi i Yohu om i Yonadab do pinapatahak do porsombahan, om soliwan no i Yohu om boro-boros no iyau do koinsanai di madtatamong om i gunsiou, “Suang kou no om patayon ngai' no dokoyu iyolo'! Kada' no dokoyu pologoso' do haro o tongosongulun piya do kopoggidu'!” ka dau. Om suang ngai' noddi iyolo' do songingkodong no o gayang, om pimpatayai ngai' no diyolo' i tulun, om gayato' ngai' no diyolo' i rata' do suminoliwan. Om suang nogiddi iyolo' do hiri'd koiyonon dit id gogok kopio di walai do tingolig, 26 do pinoposoliwan di patung do tingolig do Baal, om tutudai noddi diyolo' iri. 27 Om habao' ngai' nopo diyolo' i tingolig do Baal om i walai di tingolig. Om siliho' no diyolo' i walai di tingolig diri do totoiyan do gisom do baino'. 28 Om iyo noddi o kinowoyo-woyoo' di Yohu do minomunso do tulun di tumuku' dot id Baal do hilo'd Israil. 29 Nga' minusui iddi i Yohu di dusa di Yirobiam, i minamayayat do tulun dot Israil do minomonsoi'd dusa, tu' tuminuku' i' iyau di sapi' do tamas di winonsoi dau do hilo'd Baitol om hilo'd Dan. 30 Om boros kaddi do Tuhan dot id di Yohu, “Nowonsoi nu no dot id sinakagon di Raja' Ahab o koinsanai di pinonuhuan ku diya'. Om iri no o kapamatasan ku dot id diya' do sinakagon nu nopo om ongosiliu nondo do raja' dot Israil do gisom di koingapat do manangaki diya',” ka. 31 Nga' a' i' i Yohu minumboyo' dit oturan do Tuhan, i Kinorohingan dot Israil, dot iso-iso' kopio o ginawo. Nga' minomit nogi' iyau di Yirobiam, tu' minamayayat do tulun dot Israil do minomonsoi'd dusa.
Napatai i Yohu
32 Om maso noddi do tinimpuunan do Tuhan do mongingkoro' o watas do pomogunan dot Israil. Nosolod no di Hasail, i raja' do pomogunan do Siria, o koinsanai di watas dot Israil 33 di ponong id koulayon do mantad id Bawang do Yordan om gisom do hiri'd bandar dot Aroir, i ponong id salatan, it id somok di Bawang dot Arnon, om kohompit nogi' i watas do Giliad om Basan, i kinoiyonon di watas do Gad, Rubin, om Manasi ponong id koulayon. 34 Koinsanai di nongowonsoi di Yohu, do kohompit ngai' i kosioho' dau, om nongkotulis ngai' i' dot id suang do Buuk di Monusui do pasal do Koinsanai di Raja' dot Israil. 35-36 Om duwo nohopod om walu' o toun do koloido' di Yohu do momorinta' dot Israil do hilo'd Samaria. Om kapatai no iyau om lobongo' no do hilo'd Samaria. Om kosiliu no do raja' i Yihoahas, i tanak dau, do suminowoli dau.
I Atalia i Raja'd Tondu' do Yohuda
1 Korongou noddi di Atalia, i tina' di Ahasia, do napatai i Raja' Ahasia, i tanak dau, om ponuhu' no iyau do mamatai ngai' dit id sompiiyon di Ahasia. 2 I Yoas poo, i tanak di Ahasia, o napasi. Tontok nopo dit oruhai no daa iyau do patayon do mogitonggoi-tonggoi di tangaanak do kusai di raja' om tanggayai no iyau di Yosiba. I Yosiba nopo om tanak do tondu' di Raja' Yihoram, om tobpinai i' iyau di Ahasia, nga' misuwai po o tina' diyolo'. Tinanggayan di Yosiba i Yoas do miwoyo' di mitatamong di Yoas dot id iso' o bilik do toodopon do hiri'd Walai'd Sasambayangan dot Agayo. Om lisoko' no dau iyolo'd hiri, tu' mada' dot okito di Atalia. Om a' iddi i Yoas napatai. 3 Onom diri o toun do koloido' di Yosiba do momogompi' di tanak diri do hiri'd Walai'd Sasambayangan dot Agayo di maso di Raja' Atalia do momorinta'. 4 Nga' tontok di koturu'd toun, om lohowo' ngai' no di Yoyada it Imam, i boyoon do soudor, i madtatamong kasai' di raja' do tondu', om i migompi' di walai'd raja' do mongoi solowot dau do hiri'd Walai'd Sasambayangan dot Agayo. Om kongorikot ngai' poddi iyolo', om suhuo' no di Yoyada iyolo' do sumumpa' do tumanud dot isuhu' dau. Om pokitono' nogiddi di Yoyada iyolo', di Yoas i tanak di Ahasia, 5 om boro-boros no iyau do poingkaa, “Soira' nopo do kumaraja' kou do tadau'd Sabat, om sompitolu nopondo dokoyu, om tumamong di walai do raja', 6 om sompitolu no kawagu om tumamong di wawayaan di roitan do Wawayaan do Sur, om sompitolu nondo kawagu om tumamong do hiri'd dotolikudan di tulun di madtatamong do hilo'd wawayaan dot agayo. 7 Iri nopo i duwo o sinompuruan do soudor dit a' kumaraja' do tadau'd Sabat, om tumamong nondo do hilo'd Walai'd Sasambayangan dot Agayo do mongintirung di Raja' Yoas. 8 Intirungan no kopio dokoyu i Raja' Yoas do mikuwo'd songingkodong o gayang dokoyu, om pitonud-tonudan no dokoyu iyau do hinonggo nopo ot ongoyon dau. Isai nopo i minsomok-somok dokoyu om patayon nopo,” ka dau. 9 Om minumboyo' ngai' i' i boyoon do soudor di boros di Yoyada, om minangangat nogi' iyolo' di soudor diyolo' dit a' kumaraja' do tadau'd Sabat om i soudor di kumaraja' do tadau'd Sabat do minongoi solowot di Yoyada. 10 Om tikidai ngai' noddi di Yoyada i boyoon do soudor diri do piro-piro tandus, om kolid, i di Raja' Daud daa di songingopi' do hiri'd suang di Walai'd Sasambayangan dot Agayo. 11 Om sinuhu' di Yoyada o piro-piro tulun do tumamong do hiri'd posorili' di hiri'd ponong id wawayaan di Walai'd Sasambayangan dot Agayo, om songingkodong no diyolo' o gayang tu' mongintirung iyolo' di raja'. 12 Om angatai noddi di Yoyada i Yoas do sumoliwan, om potupio' no dau i tupi' do raja' dot id tulu di Yoas, om onuwai no dau iyau do buuk dot oturan. Om siliho' noddi i Yoas do raja' om popimboroso' nori dot id rayat. Om panapap noddid palad i rayat do mikuwo'd minomoros dot opuhod do poingkaa, “Otogui po o raja'!” ka. 13 Om korongou'ddi di Raja' Atalia i gara' di madtatamong om gara' di tulun dot ogumu'. Om osiau nopo iyau do minongoi'd hiri'd Walai'd Sasambayangan dot Agayo, i kinotimungon di tulun dot ogumu'. 14 Om kokito no di Atalia i raja' do wagu do poingkakat do hiri'd toning di torigi dot id dotimbabaan di wawayaan di Walai'd Sasambayangan dot Agayo tu' tumanud do tadat do tontok do momili' do raja'. Om nosorilian i Yoas do boyoon do soudor om i popouni do torumpit. Om oinsanan nopo i rayat do sampangkis-pangkis dot atataadan om popinguni do torumpit. Om hurako' nopo di Atalia o pakayan dau dot atatagadan om pamagarang nod, “Takal dot araat! Takal dot araat!” ka. 15 Om mada' i' i Nabi Yoyada do patayon i Raja' Atalia do hiri'd toning di Walai'd Sasambayangan dot Agayo. Om boros kaddi dau dot id koinsanai di boyoon do soudor, “Gayato' dokoyu iyau do hilo'd soliwan do pawayaon dilo duwo o borisan do madtatamong. Om patayon ngai' nopo ot isai nopo i mumbal daa do mamasi dau,” ka dau. 16 Om tangkapo' no diyolo' i Atalia, om gayato' no do kuminaa do hiri'd walai do raja'. Om patayo' nogiddi diyolo' iyau do hiri, do hiri'd dotimbabaan di wawayaan dot agayo di roitan do Wawayaan do Kuda'.
Ninwoguan di Yoyada it Imam, i Tumpongo
17 Om suhuo' no di Yoyada it Imam diri, i Raja' Yoas om i rayat do mamatos dot id Tuhan do sumiliu iyolo' do tulun di don Tuhan; om sinuhu' nogi' dau i raja' do mamatos dot id rayat. 18 Om soruango' noddi di tulun dot ogumu' i walai do tingolig do Baal, om raago' no diyolo' i walai; om minumuk diyolo' i pananaraban do porsombahan, om i tingolig. Om patayo' no diyolo' i Matan, it imam do mogobi-obi' do Baal do hiri'd dotimbabaan di pananaraban do porsombahan. Om suhuo' no di Yoyada i piro-piro madtatamong do madtamong di Walai'd Sasambayangan dot Agayo. 19 Om tonudo' no di Yoyada it Imam diri, om i piro-piro o boyoon do soudor, om i madtatamong di raja', om i madtatamong do hiri'd walai'd raja', i Yoas do mantad hiri'd Walai'd Sasambayangan dot Agayo om gisom do nokorikot do hiri'd walai do raja'; om ohuyud nopo i tulun dot ogumu' do manud-tanud do hiri'd tohuri-huri diyolo'. Om suang noddi i Raja' Yoas di walai do raja', do minaya' di wawayaan di roitan do Wawayaan do Madtatamong, om irikau no do hiri'd tirikohonon do raja'. 20 Om oinsanan nopoddi i rayat dot ongotood. Om osimbayan diri o hiri'd bandar diyolo' di napatai i Atalia do hiri'd walai di raja'. 21 Om turu' nogi' o toun di Yoas di nosiliu iyau do raja' do Yohuda.
I Yoas o Raja' do Yohuda
1 Tontok di koturu' nod toun di Raja' Yohu do momorinta' dot Israil, om kosiliu no i Yoas do raja' do Yohuda. Om apat nohopod o toun do koloido' di Raja' Yoas do momorinta' do hilo'd Yorusalim. Tina' nopo dau om i Sibia, i tulun do mantad id bandar do Borsiba. 2 Om solinaid nopo di Yoas do poimpasi om momonsoi kasai' i' iyau do korohian do Tuhan, tu' notudukan i' iyau di Yoyada it Imam diri. 3 Nga' iyo piya'ddi nga' a' i' dau rinaag i tiyonon do modsubak do tingolig. Om maso poddi di rayat do papatahak do porsombahan om modtutud iyolo' do kominyan do hiri. 4 Insan tadau, om lohowo' no di Raja' Yoas i piro-piro ot imam, om suhuo' no dau iyolo' do poopi' di tusin dit aramit diyolo' do mantad id porsombahan do hiri'd Walai'd Sasambayangan dot Agayo, i tusin di pambayar do kapatahakan do porsombahan om i tusin di patahakon do tumanud do kagaanan do ginawo. 5 Pointikid-tikid dit imam om mongilo-ilo ngai' nopo di tusin dit angaramit diyolo' do mantad id tulun di pogobi-obian diyolo'. Om iri no tusin diri o pakayon do pomonsoi di nangaraag-raag do hiri'd Walai'd Sasambayangan dot Agayo. 6 Nga' gisom piya di koduwo no nohopod om tolu do toun di Raja' Yoas do momorinta' nga' a' po dit imam nowonsoi i nangaraag-raag di hiri'd Walai'd Sasambayangan dot Agayo. 7 Gowoi poddi om lohowo' no di Yoas i Yoyada it Imam diri, om it imam do suwai, om uhoto' no dau iyolo', “Nokuro tu' a' po dokoyu nosonong i Walai'd Sasambayangan dot Agayo? Mantad pondo do baino', om a' kou no koino-ino do poopi' di tusin dit aramit dokoyu. Patahakon ngai' nopondo dokoyu iri do maan do pononong di Walai'd Sasambayangan dot Agayo,” ka dau. 8 Om kotumboyo' ngai' nopoddi it imam dot a' monimung do tusin do mantad id rayat, om a' mononong di Walai'd Sasambayangan dot Agayo. 9 Om panganu noddi i Yoyada dot iso' o pati', om luangai no dau o hiri'd sompon, om poiliho' no do hiri'd toning di pananaraban do porsombahan do ponong id wanan di wawayaan di wayaan do sumuang di Walai'd Sasambayangan dot Agayo. Om popisuang-suangon nopo dit imam di pointamong do hiri'd wawayaan di Walai'd Sasambayangan dot Agayo i tusin dit aramit diyolo' do mantad id tulun dot ogumu' do hiri'd pati'ddi. 10 Soira' dit ogumu' o tusin do hiri'd pati' om ngoyon no di gomponulis do raja', om i Boyoon dot Agayo dot Imam intobo' i tusin diri, om lopoton nogindo diyolo'. 11 Om otulis pondo diyolo' o kogumuon di tusin om patahakon nogindo diyolo' di piro-piro o mandur di momohuruan di karaja' do mononong di Walai'd Sasambayangan dot Agayo. Om iri nondo i mandur diri o mamagadsi' di tukang kayu, om i tukang do mamaal di walai, 12 om i tukang watu, om i mamabak do watu. Om iyolo' nogi' o momoli do kayu, om watu, om mongilo-ilo di tusin do posoliwanon do maan do pononong di Walai'd Sasambayangan dot Agayo. 13 Nga' a' i' pinakai i tusin diri do pomonsoi do sangkir do pirok, ko' mimpun, ko' torumpit, ko' pakakas po do lampung, ko' nunu nopo o pakakas do suwai di tamas ko' pirok do wonsoyon. 14 Iri nopo tusin diri om pogodsion ngai' nopo di tukang, om pomoli do pakakas di pakayon. 15 Iri ngai' nopo i mandur diri nga' ongotulid kopio o ginawo. Om a' iddi minog do haro o kopoilaan ondung poingkuro o kinapamakayan di tusin. 16 Nga' iri nopo tusin dit aramit di maan do porsombahan do poningolon om i porsombahan do pangampun do dusa, om a' i' posuangon do hiri'd pati'ddi. Tu' tusin nopoddi om iri no it imam o kaanu. 17 Tontok nopoddi om sinangod om sinolod di Hasail, i raja' do Siria diri, o bandar do Gat. Om ngoyon po daa dau songodo' o Yorusalim. 18 Om paatadai no di Yoas i Raja' Hasail dot ipuhawang. Iri nopo pinopuhawang diri nga' nanu do mantad id koinsanai do porsombahan di nakatahak dot id Tuhan, do mantad po dit i Yosapat, om i Yoram, om i Ahasia, o raja' di momorinta' dit id gulu ko' i Yoas. Om minanu nogi' do mantad id porsombahan di Yoas, om koinsanai di tamas di hiri'd poiiyanan do hiri'd Walai'd Sasambayangan dot Agayo, om i hiri'd walai do raja'. Om a' noddi nabayaan i Hasail do minongoi panangod do Yorusalim. 19-21 Om pogipapakat ngai' noddi i pagawai do pomorinta' do Yohuda do sumaap di Raja' Yoas. Om haro'ddi o duwo o tulun dot id pialatan diyolo', do ngaran nopo diyolo' om i Yosakar, i tanak di Simiat, om i Yosabad, i tanak di Somir, do minongoi pamatai di Yoas do hiri'd walai dau dit id timpak do tana' di pinotimbun, i hiri'd ponong id koulayon do mantad id Yorusalim, it id ralan do kumaa do hilo'd bandar do Sila. Om lobongo' noddi i Raja' Yoas do hiri'd kalabangan do raja' do hiri'd Bandar di Daud. Om kosiliu noddi do raja' i Amasia, i tanak di Yoas, do suminowoli dau. Koinsanai di nongowonsoi di Raja' Yoas om nongkotulis ngai' i' dot id suang do Buuk di Monusui do Pasal Ngai' di Raja' do Yohuda.
I Yihoahas o Raja' dot Israil
1 Tontok di koduwo no nohopod om tolu do toun do pomorintaan di Yoas, i tanak di Ahasia, do hilo'd Yohuda, om kosiliu no i Yihoahas, i tanak di Yohu, do raja' dot Israil. Om hopod om turu' o toun di Yoahas do momorinta' do hilo'd Samaria. 2 Om i Yihoahas nga' miagal i' di Raja' Yirobiam, i minomorinta' dit id gulu ko' iyau tu' minomonsoi'd dusa dot id toguang do Tuhan, om minamayayat do tulun dot Israil do minomonsoi'd dusa. A' i' iyau insan koumbal do rumologo do mantad id karaaton dau'ddi. 3 Om iri noddi o kinatagadan do Tuhan dot Israil, om pinologos diri do Tuhan i Raja' Hasail, i raja' do Siria, om i Binhadad, i tanak dau, do managalai-galai do mangala' dot Israil dot id pisangadan. 4 Om sambayang noddi i Yihoahas dot id Tuhan, om korongou i' do Tuhan i sambayang dau, tu' okito id Tuhan o korongito' di raja' do Siria do mongulok-ulok di tulun dot Israil. 5 Om onuwai iddi do Tuhan o tulun dot Israil do songulun o boyoon di pinopoidu' diyolo' do mantad id pongulok-ulok do tulun do Siria. Om osimbayan noddi iyolo' do miagal di gulu po. 6 Nga' iyo piya'ddi nga' a' i' i tulun dot Israil tuminingkod do momonsoi'd dusa di tinimpuunan di Raja' Yirobiam. Om pinologos i' diyolo' i patung do tingolig dot Asira do hilo'd Samaria. 7 Om aiso' noddi o soudor di Yihoahas, suwai ko' iri po limo nohopod o soudor dit ongkikuda', om hopod o korita'-kuda', om hopod noribu o soudor. Tu' nangapatai ngai' no di raja' do Siria i soudor di Raja' Yihoahas. 8 Om koinsanai di nongowonsoi di Raja' Yihoahas do suwai om i kosioho' dau nga' nongkotulis ngai' i' dot id suang do Buuk di Monusui do Pasal Ngai' di Raja' dot Israil. 9 Om kapatai noddi i Raja' Yihoahas om lobongo' no do hilo'd Samaria. Om kosiliu no do raja' i Yihoas, i tanak dau, do suminowoli dau.
I Yihoas o Raja' dot Israil
10 Tontok di kotolu nohopod om turu' do toun do pomorintaan di Yoas do hilo'd Yohuda, om kosiliu no do raja' dot Israil i Yihoas, i tanak di Yihoahas. Om hopod diri om onom o toun dau do momorinta' do hilo'd Samaria. 11 Iyau nga' minomonsoi nogi' do dusa dot id Tuhan tu' minusui di karaato' di Raja' Yirobiam do minamayayat do tulun dot Israil do minomonsoi'd dusa. 12 Koinsanai di nongowonsoi di Raja' Yihoas om i kosioho' dau do suminangod di Amasia, i raja' do Yohuda, nga' nongkotulis ngai' i' dot id suang do Buuk di Monusui do Pasal Ngai' di Raja' dot Israil. 13 Om kapatai noddi i Raja' Yihoas om lobongo' no do hiri'd kalabangan do raja' do hilo'd Samaria. Om kosiliu no do raja' i Yirobiam di koduwo, i tanak dau, do suminowoli dau.
Napatai i Nabi Ilisa
14 Insan o maso om kadalaai no do suminakit i Nabi Ilisa, om ongoi no i Raja' Yihoas kakap dau. Om soira' di nokito di Raja' Yihoas dot oruhai nod matai i Ilisa, om ihad no iyau do mikuwo'd minoro-boros dot, “Apa', Apa', iya' no it okoris kopio do minongintirung dot Israil!” ka dau. 15 Om boros ka di Ilisa dot id raja', “Ngoyo' ilo powakasan do pana', om manu no do pana',” ka dau. Om ngoyo' no di Raja' Yihoas iri, 16 om suhuo' no iyau di Ilisa do sumodia' do mamana'. Om sodia' noddi i Raja' Yihoas do mamana', nga' pakamao' no di Ilisa o palad dau do hiri'd palad di Yoas. 17 Om ukabai no di Raja' Yihoas i liligaon di potimbaba' ponong id pomogunan do Siria do tuminanud di pinonuhuan di Ilisa. Om boros ka di Ilisa, “Papanao' ino pana' nu!” ka. Om papanao' no di raja', om boros ka di Ilisa, “Iya' no o pana' do Tuhan. Ino no o pana' do pangala' do Tuhan do Siria. Sumangod ko nondo do tulun do Siria do hilo'd Apik om aala' nu indo iyolo',” ka dau. 18 Om suhuo' no di Ilisa i Raja' Yoas do manganu di pana' di noolu', om popimbobogon indo do hiri'd tana'. Om popimbobogo' no di raja' iri do hiri'd tana' dot intolu, om tingkod noddi iyau. 19 Om kotogod noddi i Ilisa. Boros ka dau dot id raja', “Nokuro i' tu' a' nu pinopimbobog dot ongoilimo toi ko' ongoingonom po, om aala' nu i' daa'ndo kopio i tulun do Siria? Nga' iyo nopoddi om intolu ko no do kamanang do sumangod di tulun do Siria,” ka dau. 20 A' no alaid do mantad diri om kapatai no i Ilisa, om lobongo' noddi. Koubasanan nopo do tontok diri nga' monikid toun nopo do haro o piro-piro o sinompuruan do tulun do Muab di mananakau do mongoi panangod di pomogunan dot Israil. 21 Om haro'ddi dot insan o tadau, do maso di tulun dot Israil do momolobong do tulun do napatai, om sigog id kokito diyolo' o sonsinompuruan do tulun do Muab do rumikot, om poddosi-dosi nopo iyolo' nga' pataamo' nopo diyolo' i rata' di tulun do hiri'd suang di lobong di Ilisa, om poggidu' no iyolo'. Nga' kotopis nopoddi i rata'ddi di tulang di Ilisa, nga' koposiai no kawagu om ingkakat noddi.
Pinisangadan dot id Pialatan dot Israil om Tulun do Siria
22 Solinaid nopo do pomorintaan di Raja' Yihoahas, om songodon kasai' nopo di Hasail, i raja' do Siria, o tulun dot Israil. 23 Nga' a' id Tuhan insan kolihuwai o tulun dau. Osianan i' iyau diyolo' om osonong iyau dot id diyolo'. Om a' i' dau pinologos dot opunso kopio iyolo' suwai ko' tinulung i' dau iyolo' tu' osorou i' dau i tumpongo dau dot id di Abraham om id di Isak om id di Yakub. 24 Om kapatai noddi i Hasail, i raja' do pomogunan do Siria, om kosiliu no do raja' i Binhadad, i tanak dau. 25 Tontok dit i Yihoas o raja' dot Israil, om kaala' no dau i Binhadad dot intolu. Om kaanu no kawagu dau i bandar di nongosolod di Raja' Binhadad di maso po do pomorintaan di Raja' Yihoahas, i tapa' di Yihoas.
I Amasia o Raja' do Yohuda
1 Tontok di koduwo nod toun do pomorintaan di Raja' Yihoas, i tanak di Raja' Yihoahas do hilo'd Israil, om kosiliu no i Amasia, i tanak di Yoas do raja' do Yohuda. 2 Tontok nopoddi om duwo no nohopod om limo o toun do tumur dau, om duwo nohopod om siam o toun dau do momorinta' do hilo'd Yorusalim. Tina' nopo dau om i Yoadan, i mantad hilo'd Yorusalim. 3 Om minomonsoi i' i Amasia di korohian do Tuhan. Nga' a' i' ma iyau nokoiyo di Daud, i taki-aki dau, suwai ko' minusui no iyau di tapa' dau, 4 tu' a' i' dau rinaag i tiyonon do tulun do modsubak do tingolig, om gowoi poddi om patahak kasai' po i rayat do porsombahan om modtutud do kominyan do hiri. 5 Om soira' di nokogirot o kinosilihan di Amasia do raja', om ponuhu' noddi iyau'd tulun do mongoi pamatai ngai' di pagawai di minamatai di tapa' dau. 6 Nga' a' i' dau pinatai i tangaanak di pagawai'ddi, tu' boros nopod Tuhan dot id suang di Tourat di Musa om poingkaa, “Kada' hukumai do kapatayon o molohing dot i kasalaan do tanak dau o kopomohukuman. Om kada' hukumai do kapatayon o tangaanak dot i kasalaan do tapa' diyolo' o kopomohukuman. Iri no i tulun di minomonsoi di kasala' o hukuman do kapatayon,” ka. 7 Haro ot insan dot id pinisangadan do minamatai i Raja' Amasia do hopod noribu o soudor dot Idom do hilo'd rantai di roitan do Rantai do Silaon, om nosolod nogi' dau o bandar do Sila, om pungaranai noddi dau o bandar diri do Yoktiil. Om Yoktiil kasai' po o ngaran do bandar diri do gisom do baino'. 8 Om ponuhu' noddi i Raja' Amasia do piro-piro o tulun dau do minongoi popoilo di Yihoas, i raja' dot Israil, do mangangat iyau di Yoas do misangod. 9 Nga' ponuhu' no i Raja' Yihoas do tulun do mongoi posunud dot isimbar dau do poingkaa, “Insan o maso om poromut no do boros i korugian do hilo'd konulu-nuluan do Libanon dot id kokoyuan dot aras do poingkaa, ‘Pokowinai di tanak ku i tanak nu'd tondu', oi guas dot aras,’ ka. Nga' talib no o songinan di nintorusan do hiri om pingulakai no i korugian diri. 10 Minggayo-gayo ko daa'ddi, oi Amasia, tu' naala' nu i' i tulun dot Idom. Nga' osonong nogi' do poulaon nu i kinamanangan nu'ddi om mundorong nopo do hino'd walai nu. Nokuro tu' mogihum ko po do kosusaan nu di poporikot nod koinggoritan dot id diya' om id rayat nu?” ka. 11 Nga' a' i' di Amasia pinusou i boros di Yihoas. Om pamanau i' i Raja' Yihoas om i tulun ngai' dau do minongoi sangod di Raja' Amasia do hilo'd Bait-Simis, i hilo'd Yohuda. 12 Om kaala' ngai' iddi i soudor di Amasia om koinsanai nopo iyolo' do minogidu', om sompori-pori do minuli' dot id walai diyolo'. 13 Om tangkapo' no di Yihoas i Amasia. Om soruango' no dau o Yorusalim om raago' no dau i tolig di bandar do konoruo' nopo om haro i' doti' o duwo nahatus o mito; do mantad pod hiri'd Wawayaan dot Agayo di roitan dot Ipraim om gisom do hiri'd wawayaan di roitan do Wawayaan do Linsuk. 14 Om tanggayai ngai' nopo di Raja' Yihoas i tamas om i pirok di nokito dau om koinsanai di konunu-nunuan dit id suang di Walai'd Sasambayangan dot Agayo om koinsanai di dapu' do hiri'd walai do raja', do guminuli' do hilo'd Samaria. Om tinanggayan nogi' dau o piro-piro tulun di kipangkat do hilo'd Samaria. 15 Koinsanai di nongowonsoi di Raja' Yihoas, do kohompit ngai' i kosioho' dau dot id pisangadan diyolo' di Amasia, i raja' do Yohuda, nga' nongkotulis ngai' i' dot id suang do Buuk di Monusui do Pasal Ngai' di Raja' dot Israil. 16 Om kapatai noddi i Raja' Yihoas om lobongo' no do hiri'd kalabangan do raja' di hilo'd Samaria. Om kosiliu no do raja' i Yirobiam di koduwo, i tanak di Yoas, do suminowoli dau.
Napatai i Amasia, i Raja' do Yohuda
17 Om hopod po om limo o toun di Amasia do poimpasi do mantad di napatai i Yihoas, i raja' dot Israil. 18-21 Nga' pogipapakat noddi i tulun do hilo'd Yorusalim do mamatai di Amasia. Gowoi poddi om poggidu' no iyau do kuminaa do hilo'd bandar do Lakis. Nga' gusao' i' iyau di pisangod dau, om patayo' no diyolo' iyau di hilo'. Om pasakayo' no diyolo' do kuda' i rata' dau, do pinakaa do hilo'd Yorusalim, om lobongo' no do hiri'd kalabangan do raja' do hilo'd Bandar di Daud. Om siliho' no di tulun do Yohuda do raja' i Usia, i tanak di Amasia do kusai, di hopod nogi' om onom o toun dau. Om iri nopo suwai do nongowonsoi di Raja' Amasia om nongkotulis ngai' i' do hiri'd suang do Buuk di Monusui do Pasal Ngai' di Raja' do Yohuda. 22 Om di nopoddi napatai i Amasia, i tapa' di Usia, om ngoyo' no di Usia solodo' kawagu o bandar dot Ilat, om wonsoyo' no dau kawagu.
I Yirobiam di Koduwo o Raja' dot Israil
23 Tontok di kohopod no om limo do toun do pomorintaan di Raja' Amasia, i tanak di Yihoas do hilo'd Yohuda, om kosiliu no do raja' dot Israil i Yirobiam di koduwo. Om apat nohopod om iso' o toun dau do momorinta' do hilo'd Samaria. 24 Om minomonsoi i' iyau do dusa dot id toguang do Tuhan tu' minusui iyau di karaaton di Raja' Yirobiam di koiso', i minamayayat do tulun dot Israil do momonsoi'd dusa. 25 Om i Raja' Yirobiam di koduwo o minonolod kawagu do koinsanai di watas mantad dot Israil do mantad hiri'd ralan do kumaa do hilo'd Hamat, it id utara, om gisom do hilo'd Rahat do Napatai di hilo'd salatan. Om kopiontok nopori di batos do Tuhan, i Kinorohingan dot Israil, i pinolombus di Nabi Yunus, i tanak di Amitai, i susuhuon dau do mantad hilo'd Gat-Hipir. 26 Om kokito nod Tuhan o koinggoritan do tulun dot Israil dit a' ogina-gina' om aiso' no o songulun piya do monguhup diyolo'. 27 Om a' i' o Tuhan orohian do momunso kopio dot Israil do gisom dot alaid. Om tulungo' iddi dau iyolo' dot i Yirobiam di koduwo o pinawayaan dau di ponulung dau. 28 Om koinsanai di nongowonsoi di Raja' Yirobiam di koduwo, do kohompit ngai' i kosioho' dau dot id pisangadan, om i kinowoyo-woyoo' dau do minanganu kawagu do Damsik om Hamat do patahakon do tulun dot Israil, nga' nongkotulis ngai' i' dot id suang do Buuk di Monusui do Pasal Ngai' di Raja' dot Israil. 29 Om kapatai noddi i Yirobiam di koduwo om lobongo' no do hiri'd kalabangan do raja'. Om kosiliu nod raja' i Sakaria, i tanak dau, do suminowoli dau.
I Usia o Raja' do Yohuda
1 Tontok di koduwo no nohopod om turu' do toun do pomorintaan di Yirobiam di koduwo do hilo'd Israil, om kosiliu no i Usia, i tanak di Amasia, do raja' do Yohuda. 2 Tontok nopoddi om hopod no om onom o toun dau. Om limo nohopod om duwo o toun dau do minomorinta' do hilo'd Yorusalim.Ngaran nopo do tina' dau om i Yikolia, i mantad hilo'd Yorusalim. 3 Om i Usia nga' minusui i' di tapa' dau tu' minomonsoi di korohian do Tuhan. 4 Nga' a' i' dau rinaag i tiyonon do tumuku' dot id tingolig om gowoi poddi om kakal po di rayat do papatahak do porsombahan om modtutud do kominyan do hiri. 5 Om porikatai nod Tuhan iyau do toruol do kusta. Om a' nopo lumingos i toruol diri gisom do pinosuwai-suwai iyau dot id iso' o walai om pinotingkod di karaja' dau do gisom do nikapatai dau. Om i Yotam diri, i tanak dau, o wakil dau do momorinta' di rayat. 6 Om koinsanai di nongowonsoi di Usia om nongkotulis ngai' i' do hiri'd suang do Buuk di Monusui do Pasal Ngai' di Raja' do Yohuda. 7 Om kapatai noddi i Usia om lobongo' no do hiri'd kalabangan do raja' do hilo'd Bandar di Daud. Om kosiliu nod raja' i Yotam, i tanak dau'd kusai, do suminowoli dau.
I Sakaria o Raja' dot Israil
8 Tontok di kotolu no nohopod om walu' do toun do pomorintaan di Raja' Usia do hilo'd Yohuda, om kosiliu no i Sakaria, i tanak di Yirobiam di koduwo, do raja' dot Israil. Om minomorinta' iyau do hilo'd Samaria do solinaid dot onom o tulan. 9 Om iyau nga' miagal i' ngai' di raja' dit id gulu ko' iyau tu' minomonsoi i' iyau'd dusa dot id Tuhan. Om minusui iyau do kararaat di Raja' Yirobiam di koiso', tu' minamayayat do tulun dot Israil do minomonsoi'd dusa. 10 Om pongupakat no i Salum, i tanak di Yabis, do sumaap di Raja' Sakaria. Om patayo' no dau i Sakaria do hilo'd Yibliam, om sowoli no iyau do suminiliu'd raja'. 11-12 Om kabayaai no i pinabatos do Tuhan dot id di Raja' Yohu do korikot no di sinakagon dau di koingapat ot osiliu do raja' dot Israil. Om iri nopo nongowonsoi di Raja' Sakaria do suwai om nongkotulis ngai' i' do hiri'd suang do Buuk di Monusui do Pasal Ngai' di Raja' dot Israil.
I Salum o Raja' dot Israil
13 Tontok di kotolu no nohopod om siam do toun do pomorintaan di Raja' Usia do hilo'd Yohuda om kosiliu no i Salum, i tanak di Yabis, do raja' dot Israil. Om sombulan no o koloido' dau do momorinta' do hilo'd Samaria, 14 tu' minongoi i Monahim, i tanak di Gadi, do hilo'd Samaria di mantad iyau do hilo'd Tirsa. Om patayo' noddi dau i Salum, om sowoli no iyau do suminiliu'd raja'. 15-16 Tontok di hiri'd tindalanon i Monahim do mantad hilo'd Tirsa, om nakawaya' iyau do hilo'd bandar do Tapua, om suminuang daa iyau do hiri'd bandar diri nga' a' i' iyau di tulun do hiri niwangan. Gowoi poddi om raago' no dau i bandar diri gisom do naraag no kopio, om pinatai ngai' dau i tulun do hiri, om iri nogi' i hiri'd kinoiyonon dit id posorili'. Om nulayak nogi' dau o tian do tongoondu' di monontian.Koinsanai di nongowonsoi di Raja' Salum, do kohompit ngai' i pakat dau, om nongkotulis ngai' i' do hiri'd suang do Buuk di Monusui do Pasal Ngai' di Raja' dot Israil.
I Monahim o Raja' dot Israil
17 Tontok di kotolu nohopod om siam do toun do pomorintaan di Raja' Usia do hilo'd Yohuda, om kosiliu no i Monahim, i tanak di Gadi, do raja' dot Israil. Om hopod o toun do koloido' dau do momorinta' do hilo'd Samaria. 18 Om solinaid nopo dau do poimpasi om momonsoi kasai' nopo iyau'd dusa dot id Tuhan, tu' minusui iyau di karaato' di Raja' Yirobiam di koiso', i minamayayat do tulun dot Israil do minomonsoi'd dusa. 19 Om soira' di minongoi panangod dot Israil, i Pul, i raja' dot Asur, om onuwai no iyau di Raja' Monahim do 34,000 o kilogram do pirok, tu' mokimamaha' iyau dot uhupan do popogirot do pomorintaan dau do hilo'd Israil. 20 Nokoonuan nopo di Monahim do tusin diri, om mantad id tulun dot Israil di kaya'. Sinansagan dau iyolo' do papatahak do sorolimaan nohopod do tusin do pirok. Kaanu poddi di Pul i tusin diri om uli' no iyau do hilo'd pomogunan dau. 21 Koinsanai di nongowonsoi di Raja' Monahim om nongkotulis ngai' i' do hiri'd suang do Buuk di Monusui do Pasal Ngai' di Raja' dot Israil. 22 Om kapatai noddi i Monahim om lobongo' no, om kosiliu nod raja' i Pikaya, i tanak dau'd kusai, do suminowoli dau.
I Pikaya o Raja' dot Israil
23 Tontok di kolimo no nohopod do toun do pomorintaan di Raja' Usia do hilo'd Yohuda, om kosiliu no i Pikaya, i tanak di Monahim, do raja' dot Israil. Om duwo o toun dau do momorinta' do hilo'd Samaria. 24 Om minomonsoi iyau do dusa dot id Tuhan tu' minusui iyau do karaato' di Raja' Yirobiam di koiso', tu' minamayayat do tulun dot Israil do minomonsoi'd dusa. 25 Om pongupakat no do limo nohopod o tulun do mantad hilo'd Giliad o tiso' di boyoon do soudor dau, di roitan dot i Pika, i tanak di Rimalia. Om patayo' noddi diyolo' i Pikaya dot id suang dot iso' o kuta' do hiri'd walai'd raja' do hilo'd Samaria. Om kosiliu noddi i Pika do raja' do suminowoli di Pikaya. 26 Koinsanai di nongowonsoi di Raja' Pikaya, om nongkotulis ngai' i' do hiri'd suang do Buuk di Monusui do Pasal Ngai' di Raja' dot Israil.
I Pika o Raja' dot Israil
27 Tontok di kolimo no nohopod om duwo do toun do pomorintaan di Raja' Usia do hilo'd Yohuda, om kosiliu nod raja' i Pika, i tanak di Rimalia do hilo'd Israil. Om duwo nohopod o toun dau do momorinta' do hilo'd Samaria. 28 Om minomonsoi iyau do dusa dot id Tuhan, tu' minusui iyau di Raja' Yirobiam di koiso' do minamayayat do tulun dot Israil do minomonsoi'd dusa. 29 Tontok di maso do pomorintaan di Raja' Pika, om nosolod di Tiglat-Pilisir, i raja' dot Asur, o bandar dot Iyon, om Abil-Bait-Maaka, Yanua, Kidis, Hasor om watas do Giliad, Galilia, om Naptali. Om tinanggayan nogi' dau do hilo'd Asur o koinsanai di tulun do mantad id pomogunan di nangaala' dau. 30 Tontok di koduwo nohopod do toun do pomorintaan di Raja' Yotam i tanak di Usia, do hilo'd Yohuda, om pongupakat no i Hosia, i tanak di Ila do sumaap di Raja' Pika. Om patayo' noddi di Hosia i Raja' Pika om sowoli no iyau do suminiliu'd raja'. 31 Koinsanai di nongowonsoi di Raja' Pika om nongkotulis ngai' i' do hiri'd suang do Buuk di Monusui do Pasal Ngai' di Raja' dot Israil.
I Yotam o Raja' do Yohuda
32 Tontok di koduwo do toun do pomorintaan di Raja' Pika, i tanak di Rimalia do hilo'd Israil, om kosiliu nod raja' do hilo'd Yohuda i Yotam, i tanak di Usia. 33 Tontok nopoddi om duwo no nohopod om limo o toun do tumur dau, om hopod om onom o toun do koloido' dau do momorinta' do hilo'd Yorusalim. Tina' nopo dau om i Yorusa, i tanak di Sadok. 34 Om minusui i' i Yotam do kowoyo-woyoon di Usia, i tapa' dau, tu' minomonsoi i' iyau di kohubayaan do Tuhan. 35 Nga' a' i' dau rinaag i tiyonon do modsubak dot id tingolig om gowoi poddi om papatahak kasai' po i tulun do porsombahan om modtutud do kominyan do hiri. I Raja' Yotam no o minomonsoi di wawayaan di roitan do Wawayaan dot Utara do hiri'd Walai'd Sasambayangan dot Agayo. 36-37 Tontok no di pomorintaan di Raja' Yotam, do tuminimpuun o Tuhan do minonuhu' di Rosin, i raja' do pomogunan do Siria om i Pika, i raja' dot Israil do mongoi panangod do Yohuda. Koinsanai di nongowonsoi di Raja' Yotam, om nongkotulis ngai' i' do hiri'd suang do Buuk di Monusui do Pasal Ngai' di Raja' do Yohuda. 38 Kapatai noddi i Yotam om lobongo' no do hiri'd kalabangan do raja' do hilo'd Bandar di Daud. Om kosiliu nod raja' i Ahas, i tanak dau do suminowoli dau.
I Ahas o Raja' do Yohuda
1 Tontok di kohopod om turu' do toun do pomorintaan di Raja' Pika i tanak di Rimalia, do hilo'd Israil, om kosiliu no i Ahas, i tanak di Yotam do raja' do Yohuda. 2 Tontok nopoddi om duwo no nohopod o toun do tumur dau. Om hopod om onom o toun dau do momorinta' do hilo'd Yorusalim. Nga' a' i' iyau minusui di kowoyo-woyoon dot osonong di Raja' Daud, i taki-aki dau. Nga' pomonsoi nogi' iyau dit a' kohubayaan do Tuhan, i Kinorohingan dau. 3 Minusui nogi' iyau di kowoyo-woyoon di piro-piro o raja' dot Israil, gisom do pinatahak dau i tanak dau'd kusai do numaan do porsombahan di sumbolion do patahakon dot id tingolig do tumanud di koubasanan dit araat di tulun di nuyung do Tuhan do mantad id pomogunan do Kanaan di suang i' o tulun dot Israil do pomogunan diri. 4 Om pinapatahak nogi' i Ahas do porsombahan di sumbolion om minodtutud iyau do kominyan do hiri'd tiyonon do tumuku' do tingolig do hiri'd timpak do konulu-nuluan om hiri'd sahau do kayu dit ongokohob o tuntu. 5 Om tontok nogiddi do sinangod om tinurungku' di Risin, i raja' do Siria om i Pika i raja' dot Israil o Yorusalim. Nga' a' i' iyolo' nakaala' di Raja' Ahas. 6 Om tontok nogiddi do naanu kawagu di raja' dot Idom i bandar dot Ilat. Om nuyung dau i tulun do Yohuda di songingiyon do hiri. Om iyono' no di tulun dot Idom o bandar diri. Om hilo' kasai' no iyolo' do gisom do baino'. 7 Om ponuhu' no i Ahas do piro-piro o tulun dau do minongoi poromut do boros dot id di Tiglat-Pilisir, i raja' dot Asur do poingkaa, “Iyoho' nopodti om susuhuon nu dit otorodok. Om rikot no do mongoi poidu' doho' do mantad id raja' do Siria om Israil, i maso do manangod doho',” ka. 8 Om ngoyo' no di Raja' Ahas i tamas om i pirok do mantad hiri'd Walai'd Sasambayangan dot Agayo om i dapu' do hiri'd walai di raja', om popuhawango' no dau di raja' dot Asur. 9 Om pohubayaai noddi di Tiglat-Pilisir i pinokianu di Ahas, om ngoyo' noddi dau songodo' do gisom do nosolod dau i bandar do Damsik. Om pinatai dau i Raja' Risin, om tinanggayan ngai' dau i tulun do hiri do kuminaa do hilo'd Kir. 10 Tontok di minongoi i Raja' Ahas do hilo'd Damsik, do mongoi solowot di Raja' Tiglat-Pilisir, om kokito no dau o pananaraban do porsombahan dot id bandar diri. Om pokirimo' noddi dau dot id di Uria it Imam diri, i hilo'd Yorusalim, o poiyaan di pananaraban do porsombahan diri, do mikuwo'd sukatan di koontok kopio. 11 Om pomonsoi noddi i Uria dot iso' o pananaraban do porsombahan do pinoiyo kopio di poiyaan om sukatan di naanu dau. Om kopongo no dau iri dit a' po nokoguli' i Raja' Ahas. 12 Om soira' di nokoguli' i Ahas do mantad hilo'd Damsik, om kokito no dau i pananaraban do porsombahan do nopongo no. 13 Om papatahak noddi iyau do porsombahan di sumbolion do tayam-tayam o pinatahak do hiri'd pananaraban do porsombahan om pinapatahak nogi' iyau do porsombahan do gandum, om pinopotuntug iyau do porsombahan do waig dot anggur om pinopotuntug iyau do raha' do mantad id porsombahan do piuludan. 14 Om kokito noddi di Ahas dot iri nopo i pananaraban do porsombahan di tambaga' do winonsoi, i pinotobilang do maan do don Tuhan, do hiri'd piolitan di pananaraban do porsombahan di wagu om i Walai'd Sasambayangan dot Agayo, om poundoliho' noddi di Ahas i pananaraban do porsombahan di tambaga' do winonsoi, i hiri daa id dotimbabaan di Walai'd Sasambayangan dot Agayo, do pinowolihan nopo om hiri'd ponong id utara di pananaraban do porsombahan di wagu. 15 Om sunudai noddi di Raja' Ahas i Uria it Imam diri, “Pakayon noti doho' do pananaraban do porsombahan dot agayo, do panaraban do porsombahan do dong kosuabon om porsombahan do dong sosodopon, koinsanai di porsombahan di pinatahak di raja' om i rayat. Om potuntugon nod hilo' i porsombahan do waig dot anggur di mantad id rayat. Om potuntugon no do hiti'd pananaraban do porsombahan i raha' do koinsanai di tayam-tayam di patahakon do maan do porsombahan. Nga' ilo' nopo pananaraban do porsombahan di tambaga' do winonsoi om iyoho' no o mamakai,” ka dau. 16 Om tonudo' ngai' nopo di Uria i pinonuhuan di raja'. 17 Om raago' ngai' noddi di Ahas i korita' di tambaga' do winonsoi, i papakayon do hiri'd Walai'd Sasambayangan dot Agayo. Om poundoliho' ngai' no dau i kakanan di songinsuang do hiri'd korita' do tambaga'ddi. Om nanu nogi' dau i mimpun do tambaga', i pointimpak di hopod om duwo o sapi' di tambaga' do winonsoi, om poimpoho' no dau iri do hiri'd watu. 18 Om orohian i Ahas do poposonong do ginawo di raja' dot Asur, gisom do rinaag dau i poiiyanan do tirikohonon do raja' do hiri'd Walai'd Sasambayangan dot Agayo. Om tinabanan nogi' dau i wawayaan, di wawayaan kasai' do raja'. 19 Koinsanai di nongowonsoi di Raja' Ahas om nongkotulis ngai' i' do hiri'd suang do Buuk di Monusui do Pasal Ngai' di Raja' do Yohuda. 20 Om kapatai noddi i Ahas om lobongo' no do hiri'd kalabangan do raja' di hilo'd Bandar di Daud. Om kosiliu nod raja' i Hiskia, i tanak dau, do suminowoli dau.
I Hosia o Raja' dot Israil
1 Tontok di kohopod om duwo do toun do pomorintaan di Raja' Ahas do hilo'd Yohuda, om kosiliu no i Hosia, i tanak di Ila do raja' dot Israil. Om siam o toun dau do momorinta' do hilo'd Samaria. 2 Om iyau nga' minomonsoi id dusa dot id Tuhan, nga' a' indo koiyo kopio do dusa di piro-piro o raja' dot Israil dit id gulu ko' iyau. 3 Om nongoi iyau songodo' di Salmanisir, i raja' dot Asur. Om gowoi poddi om nokosuang iyau do pomorintaan di raja' Salmanisir, i raja' dot Asur. Om mambayar kasai'ddi i Raja' Hosia do sukai dot id dau, do pointikid-tikid do toun. 4 Nga' insan o maso om ponuhu' no i Hosia di susuhuon dau do minongoi solowot di So, i raja' do Masir tu' mokiuhup daa iyau di So. Om tingkod noddi i Raja' Hosia do mambayar do sukai di monikid toun dot id pomogunan dot Asur. Nga' soira' di noilaan di Salmanisir o takal dot araat diri, om ngoyo' no dau tangkapo' i Hosia om pogiilo' no dau.
Naala' o Samaria
5 Om ngoyo' noddi di Salmanisir i raja' dot Asur, songodo' ot Israil om tinurungku' dau o Samaria. Om tontok di kotolu nod toun dau do monurungku' do Samaria, 6 i kosiam nod toun do pomorintaan di Raja' Hosia, om kosolod no di Salmanisir o Samaria. Om tanggayai no dau i tulun dot Israil do pinakaa do hilo'd Asur. Pinoiyanan nopo di Raja' dot Asur do wookon diyolo' om hilo'd bandar do Hala, om iri no wookon diyolo' om pinoiyon dau do hilo'd toning do Bawang do Habor, it id watas do Gosan, om iri no wookon om pinoiyon dot id kabandaran do hilo'd pomogunan do Madai. 7 Naala' pogi' o Samaria nga' minomonsoi do dusa o tulun dot Israil dot id Tuhan, i Kinorohingan diyolo' di pinopoidu' diyolo' do mantad id raja' do Masir, om i pinoposoliwan diyolo' do mantad id pomogunan do Masir. Tuminuku' iyolo' dot id tingolig, 8 om tuminanud do koubasanan do bansa' di nuyung do Tuhan, di rikot i' o bansa' dot Israil do minanangod di piro-piro o bansa'ddi. Om tuminanud iyolo' di kaadat-adato' di tinantu' di piro-piro o raja' dot Israil do tonudon. 9 Om momonsoi nogi' iyolo' di pogoduhan do Tuhan, i Kinorohingan diyolo'. Minomonsoi iyolo' do tiyonon do tumuku' do tingolig dot id pointikid-tikid di bandar diyolo', do hiri'd kampung dit ongokooro' om hiri'd bandar dit angagayo. 10 Id timpak nopo do pointikid-tikid do nulu-nulu om id sahau di guas do kayu dit ongokohob o tuntu, om noudangan no diyolo' do torigi do watu di don tingolig om tininganak di tingolig dot Asira. 11-12 Om minodtutud nogi' iyolo' do kominyan dot id timpak do pointikid-tikid di pananaraban do porsombahan do don tingolig, do tuminanud di kongoubasanan di piro-piro o bansa' di nuyung do Tuhan do mantad id pomogunan do Kanaan. Tuminuku' nogi' iyolo' do tingolig, do mulong piya do noduhan daa iyolo'd Tuhan. Om nokopotogod diri do Tuhan i wonsoyon diyolo' dit araat. 13 Om ponuhu' no o Tuhan di susuhuon om i nabi dau, do mongoi pomisunud di tulun dot Israil om Yohuda do boros do Tuhan do poingkaa, “Tingkod kou no do momonsoi dot araat, om tonudon ngai' no ot isuhu' om i Tourat ku di nakatahak ku dot id taki-aki dokoyu, om i nakatahak ku dokoyu do pinolombus di piro-piro o nabi, om i susuhuon ku'ddi,” ka. 14 Nga' a' i' minokinongou ot Israil om Yohuda; pinokodou i' diyolo' o ginawo diyolo' do miagal di taki-aki diyolo' dit a' otumbayaan do Tuhan, i Kinorohingan diyolo'. 15 Minada' i' i tulun dot Israil om i tulun do Yohuda do tumanud dit isuhu' do Tuhan, om a' iyolo' tuminorodok dot id tumpongo do Tuhan dot id taki-aki diyolo'. Om a' iyolo' minamadul di boros do Tuhan do mogodu diyolo', tu' tuminuku' nogi' iyolo' dot id tingolig dit aiso' o kootuk-otukon, gisom dot iyolo'ddi nga' aiso' no o kootuk-otukon. Tuminanud nogi' iyolo' do kowoyo-woyoon di piro-piro o bansa' di hiri'd posorili' diyolo' do noduhan piya daa iyolo'd Tuhan do tumanud diri. 16 Om tinolibambanan ngai' diyolo' o koinsanai dit oturan do Tuhan, i Kinorohingan diyolo', om minomonsoi iyolo' do duwo o patung do sapi' do tambaga' do winonsoi, do maan do tukuon. Minomonsoi nogi' iyolo' dot iso' o patung di tingolig dot Asira, om tumuku' iyolo' dot id rombituon, om sumambayang iyolo' dot id tingolig do Baal. 17 Pinopintahak nogi' diyolo' o tangaanak diyolo' do maan do porsombahan di sorobon dot id piro-piro o tingolig. Om mamakai iyolo' do toilaan do dong rogon, om mokituduk iyolo' di bobolian, di lumohou do rusod-rusod. Om tumotos tomod nogi' iyolo' do mingwonsoi dit a' korohian do Tuhan gisom do notogod tomod o Tuhan diyolo'. 18 Om a' noddi o Tuhan mamadul diyolo' om pataamo' nod Tuhan iyolo' do mantad id tana' di pinatahak do Tuhan dot id diyolo'. Noolu' nopoddi om iri po pomorintaan do hiri'd Yohuda. 19 Nga' iri piya i tulun do Yohuda nga' a' i' otorodok do tumanud dot oturan do Tuhan, i Kinorohingan diyolo'. Minusui nogi' iyolo' di wowonsoyon di nosiliu do koubasanan do tulun dot Israil. 20 Om iyadaai ngai' nopod Tuhan o koinsanai di tulun dot Israil. Om hinukuman dau iyolo' om pinatahak dau iyolo' dot id pisangod diyolo' dit ongorongit, gisom dot a' no iyau mamadul diyolo'. Uyungo' nopo dau iyolo' do mantad id tana' di pinatahak dau dot id diyolo'. 21 Tontok di nokotongkiad do Tuhan ot Israil do mantad id Yohuda, om pilio' no di tulun dot Israil i Yirobiam, i tanak di Nibat, do sumiliu'd raja' diyolo'. Om bayayato' no di Yirobiam iyolo' do tumongkiad do Tuhan om gisom diri do miningwonsoi iyolo' do dusa dit angagayo kopio. 22 Om minusui iyolo' di kowoyo-woyoon di Yirobiam om minomonsoi do koinsanai'd dusa di winonsoi dau. 23 Id tohuri noddi om a' nod Tuhan podulon iyolo', tu' uyungo' nopo dau iyolo' do mantad id tana' di pinatahak dau dot id diyolo'. Om kopiontok nopo iri di pinolombus di piro-piro o nabi, om i piro-piro o susuhuon dau'ddi. Om iyo noddi o tulun dot Israil do nakataam do hilo'd pomogunan dot Asur, i nokoiyonon diyolo' do gisom do baino'.
Sinowoli do Tulun dot Asur do Miyon i Pomogunan dot Israil
24 Om ponuhu' no i raja' dot Asur di tulun do mantad id bandar do Babil, Kuta, Awa, Hamat om mantad id Siparwaim do mongoi iyon do hilo'd Samaria, do sumowoli di tulun dot Israil, i nangatanggayan dot id pomogunan do pisangod. Iri ngai' no i tulun do suminowoli do miyon do hiri'd piro-piro o bandar diri. 25 Tontok di wagu po iyolo'd poingiyon do hilo', om a' i' iyolo' momusou do Tuhan. Om iri no o kinoponuhuan do Tuhan do singa do rumikot do minongoi pamatai do wookon diyolo'. 26 Om kosunudai noddi i raja' dot Asur, dot iri nopo tulun di nokongorikot do hilo'd kabandaran do Samaria, nga' a' koilo dot oturan do tingolig do pomogunan diri; gowoi poddi om suhuo' no di tingolig do hiri o singa do mongoi pamatai diyolo'. 27 Om boros kaddi di raja' dot Asur, “Suhuo' dokoyu do muli' o songulun dit imam di natanggayan toko', om poundorongon nopod hilo' do poponudukon ngai' di tulun dot oturan do tingolig do pomogunan diri,” ka. 28 Om uli' noddi o songulun dit imam dot Israil, i natanggayan daa do hilo'd Asur do mantad hilo'd Samaria. Om undorong no iyau do hilo'd Baitol. Om hilo' no iyau do minonuduk ngai' di tulun do ralan do sumambayang dot id Tuhan. 29 Nga' iri nopo i tulun di songingiyon do hilo'd Samaria om mingwonsoi kasai' do tingolig diyolo', om popingiyono' no diyolo' iri do hiri'd walai di poningoligan di nongowonsoi mantad di tulun dot Israil. Om sorompori-pori nopo do momonsoi do diyolo'd tingolig i piro-piro o sinompuruan do tulun do hiri'd bandar di niyon diyolo'. 30 Iri nopo tulun do Babil om minomonsoi di patung do tingolig do Sukot Binot, om iri no tulun do Kuta om minomonsoi do patung do tingolig do Norgal; om iri no tulun do Hamat om minomonsoi do patung do tingolig dot Asima, 31 om iri no tulun dot Awa om minomonsoi do patung do tingolig do Nibhas om Tartak; om iri no tulun do Siparwaim om pinapatahak do tangaanak diyolo' do maan do porsombahan do sorobon dot id tingolig dot Adramilik om Anamilik. 32 Iri ngai' nopo tulun diri, om tumuku' dot id piro-piro tingolig diri, om tumuku' dot id Tuhan. Om minomili' iyolo' do piro-piro o tulun do sumiliu dot imam do papatahak di porsombahan di sumbolion do hiri'd walai do tingolig. 33 Om iyo noddi iyolo', tu' tumuku' dot id Tuhan, om tumuku' dot id tingolig diyolo', do tumanud di kaadat-adato' do hiri'd pomogunan di tadon diyolo'. 34 Om gisom piya'd baino' nga' maso po diyolo' do tumanud di tadat diyolo'. A' i' iyolo' sumambayang dot id Tuhan om a' tumanud dot oturan om i ponuhuan di nakatahak do Tuhan dot id sinakagon di Yakub, i pinungaranan dau dot Israil. 35 Nokopongumpongo no o Tuhan dot id tulun dot Israil do poingkaa, “Kada' kou tuku' dot id tingolig; kada' kou otud do tumuku' dot id toguang diyolo', ko' modsubak po diyolo' ko' papatahak po do porsombahan di sumbolion dot id diyolo'. 36 Pusohon oku no dokoyu, iyoho' i Tuhan di pinopoidu' dokoyu do mantad id pomogunan do Masir, dot i kuasa' ku dit agayo o pinopoidu' ku dokoyu; tuku' kou no dot id doho', om papatahak kou no do porsombahan di sumbolion dot id doho'. 37 Tumorodok kou no kasai' do tumanud dit oturan ku om i ponuhuan di tinulis ku do pinatahak ku dokoyu. Kada' kou tuku' dot id tingolig, 38 om kada' dokoyu lihuwai i tumpongo di winonsoi ku dot id dokoyu. 39 Mumboyo' kou no doho' i Tuhan, i Kinorohingan dokoyu, om poiduwon ku indo iyokoyu do mantad id piro-piro o pisangod dokoyu,” ka. 40 Nga' a' i' mokinongou i tulun di poingiyon do hilo'd Samaria; tumanud kasai' i' iyolo' di tadat mantad diyolo'. 41 Om iyo no iyolo'ddi, tu' tumuku' dot id Tuhan om tumuku' dot id tingolig diyolo'. Om gisom piya'd baino' nga' iyo kasai' iddi o wonsoyon di sinakagon diyolo'.
I Hiskia o Raja' do Yohuda
1 Tontok di kotolu nod toun do pomorintaan di Raja' Hosia, i tanak di Ila, do hilo'd Israil, om kosiliu no i Hiskia, i tanak di Ahas do raja' do Yohuda. 2 Tontok nopoddi om duwo no nohopod om limo o toun dau, om duwo nohopod om siam o toun dau do momorinta' do hilo'd Yorusalim. Tina' nopo dau om i Abi, i tanak di Sakaria. 3 Koinsanai di winonsoi di Hiskia nga' kongohubayaan i' do Tuhan, tu' tuminanud i' iyau do kowoyo-woyoon di Raja' Daud, i taki-aki dau. 4 Koinsanai di tiyonon do tumuku' dot id tingolig om rinaag ngai' nopo dau om hinaba' ngai' dau i torigi do watu di don tingolig, om rinaag dau i patung do tingolig dot Asira. Om minumuk nogi' di Hiskia i tulanut do tambaga' di winonsoi di Musa di gulu po, i rinoitan do Nohustan. Tu' gisom piya do maso'ddi nga' modtutud kasai' i' i tulun dot Israil do kominyan do pomusou di tulanut do tambaga'ddi. 5 I Hiskia nopo om otumbayaan kopio do Tuhan, i Kinorohingan do tulun dot Israil. Om id pogialatan ngai' nopo di raja' do Yohuda, di nokopogulu ko' i suminusuhut dau do momorinta' om aiso' no o nokoiyo di Raja' Hiskia. 6 I Hiskia nopoddi nga' otorodok kopio dot id Tuhan, om a' i' iyau nokoumbal do sumaap dau. Om tonudon ngai' i' di Hiskia o koinsanai di ponuhuan do Tuhan di nakatahak dau dot id di Musa. 7 Om iri no o nokoponguhupan kasai' do Tuhan dau, om nunu nopo o wonsoyon dau nga' koundar kasai' nopo. Om suminoliwan iyau do mantad id pomorintaan do Raja' Asur om mada' iyau do porintaon di raja' dot Asur. 8 Om nangaala' nogi' dau i tulun do Pilistin, om sinolod dau i pomogunan diyolo' dot i kokompungan dit ongokooro', om i bandar dit agayo kopio, om kohompit nogi' o Gasa om i kinoiyonon do hiri'd posorili' do nosolod dau. 9 Tontok di kaapat nod toun do pomorintaan di Raja' Hiskia, i koturu' nod toun do pomorintaan di Raja' Hosia, i tanak di Ila, do hilo'd Israil, om rikot no i Salmanisir, i raja' dot Asur, do minongoi panangod do tulun dot Israil om turungkuo' no dau o Samaria. 10 Tolu poddi o toun do turungkuon i bandar do Samaria, om kaala' nogi' i bandar diri; nosiliu iri di koonom do toun do pomorintaan di Hiskia, om kosiam do toun do pomorintaan di Hosia. 11 Om tanggayai no di raja' dot Asur o tulun dot Israil di nangatangkap dau do kuminaa do hilo'd pomogunan dot Asur; om iri nopoddi wookon diyolo' om pinakaa do hilo'd bandar do Hala, om iri no suwai om pinakaa do hilo'd somok di Bawang do Habor, it id watas do Gosan, om iri no wookon diyolo' om pinakaa do hilo'd kabandaran dit id pomogunan do Madai. 12 Nakaalala' nopo do Samaria om i kowoyo-woyoon do tulun dot Israil dit a' otorodok dot id Tuhan, i Kinorohingan diyolo'. A' diyolo' tinanud i tumpongo do Tuhan dot id diyolo', om tinolibambanan ngai' diyolo' i ponuhuan di pinatahak di Musa, i susuhuon do Tuhan. A' iyolo' minokinongou om a' tuminanud diri.
Tinompurolosi dot Asur o Yorusalim
13 Tontok di kohopod om apat do toun do pomorintaan di Raja' Hiskia, om rikot no i Sanhorib, i raja' dot Asur, do mongoi panangod do kabandaran do Yohuda dit ongkitolig o posorili' do gisom do naala' ngai' dau iri. 14 Om poromut no i Hiskia do habar dot id di Sanhorib, i raja' dot Asur di hilo'd Lakis. Boros ka dau, “Mangakun oku no do nakasala', om pokionuon ku no do tumingkod ko do manangod dahai, tu' patahakon ku i' o nunu nopo o pokionuon nu,” ka. Om suhuo' no di raja' dot Asur i Raja' Hiskia do paatod do hiri'd dau do hopod noribu o kilogram do pirok, om soribu o kilogram do tamas. 15 Gowoi poddi om koinsanai nopo i pirok di hiri'd Walai'd Sasambayangan dot Agayo om i hiri'd poopian do hiri'd walai'd raja' do pinokirim di Hiskia dot id di Sanhorib. 16 Iri piya i tamas di pinodokot do pointikid-tikid di wawayaan di Walai'd Sasambayangan dot Agayo, i pinodokot daa di Hiskia, nga' ngoyo' ngai' nopo dau om pokirimo' no dot id di Sanhorib. 17 Nga' papaatod nogiddi i raja' dot Asur do soudor dot ogumu' do mantad hilo'd Lakis, i winoyo' do tolu o boyoon do soudor dit asawat o pangkat do mongoi panangod do Yorusalim. Iri ngai' nopo soudor diri om winoyo' do tolu o boyoon dit asawat o pangkat; iso' o boyoon do soudor, iso' i monininggarung do tinumon do raja', om iso' o boyoon di madtatamong do raja'. Korikot poddi iyolo' do hilo'd Yorusalim om solodo' no diyolo' i ralan do hiri'd kinoiyonon di roitan do Tumo do Mangangawol, it id toning di liang di poluyungan do waig do mantad hiri'd kulam di hiri'd sokid. 18 Om ponuhu' noddi iyolo'd tulun do mongoi pomolohou di Raja' Hiskia. Om ongoi no solowot diyolo' o tolu pagawai di Hiskia: i Ilyakim, i tanak di Hilkia, i mongilo-ilo do hiri'd walai'd raja'; i Sibna, i gomponulis do pomorinta', om i Yoa, i tanak di Asap, i popoopi' do tusin do pomorinta'. 19 Om boros ka di tiso' di boyoon do soudor dot Asur dot id diyolo', “Poboroson no o boros do Raja' dot Asur dot id di Hiskia do poingkaa, ‘Nokuro tu' osorou nu dot okoris ko? 20 Osorou nu daa do boros nopo nga' kaala' no do toilaan om kokorisan do soudor? Isai daa ot osorou nu do milo'd monguhup diya' tu' sumaap ko dot Asur? 21 Sumondiu ko daa do Masir do monguhup diya'. Nga' iri nopo om miagal do songulun di mononsukud do sumbiling, tu' otipu' nori om kotodok no dot id palad dau. Iyo noddi o kowoyo-woyoon do raja' do Masir dot id tulun di sumondiu dau,’ ka,” ka. 22 Om boros ka kawagu di boyoon do soudor dot Asur, “Ko' momoros kou daa do mogondos kou do Tuhan, i Kinorohingan dokoyu? Nga' okon toi ko' i Hiskia i' o minomohuyas di pananaraban do porsombahan dot id Tuhan om i tiyonon di tumuku' dot id Tuhan, do tontok di minonuhu' iyau do tulun di songingiyon do hilo'd Yohuda om hilo'd Yorusalim do tumuku' dot id dotimbabaan di pananaraban do porsombahan di hilo'd Yorusalim? 23 Monokitupa' oku dokoyu dot id suang do ngaran do raja' dot Asur, dot onuan kou piya daa do duwo noribu o kuda' nga' aiso' no o tulun dokoyu do sumakai do koinsanai'ddi! 24 A' kou no kotori' do sumaap di soudor dahai dit oluhoi piya kopio. Nga' mogondos kou po daa do tulun do Masir do papaatod dokoyu do korita'-kuda' om soudor dot ongkikuda'. 25 Osorou daa dokoyu do songodon tomod ku nopo om raagon ku o pomogunan diti dot a' oku'd Tuhan uhupan? Tuhan i' o minonuhu' dahai do mongoi panangod om mongoi pamaraag do pomogunan diti,” ka dau. 26 Om boros kaddi di Ilyakim, om i Sibna, om i Yoa dot id boyoon do soudor diri, “Tuan, boro-boros dahai do boros dot Aram, tu' kosuhut i' iyahai. Kada' pimboros do boros dot Ibrani, tu' kongorongou ngai' nondo ilo tulun do hilo'd timpak do tolig do bandar,” ka diyolo'. 27 Nga' boros ka di boyoon do soudor diri, “Osorou nu daa do sinuhu' oku di Raja' Asur do popoilo'ddi dot id dokoyu noo om id raja'? Amu', parangahan ku nogi' iti do koinsanai'd tulun di songirikau do hilo'd timpak do tolig do bandar, dot iyolo' nga' kapangakan indo do taii' om koponginum do sobu diyolo' do miagal dokoyu,” ka dau. 28 Om ingkakat noddi i boyoon do soudor do mikuwo'd minoro-boros dot opuhod kopio do boros dot Ibrani do poingkaa, “Pokinongoho' no iti boros do raja' do pomogunan dot Asur dot id dokoyu do poingkaa: 29 ‘Kada' kou kaakalai di Hiskia; tu' a' i' iyau milo do mamasi dokoyu. 30 Kada' kou kotumbayaai di pomilugut di Hiskia dokoyu do mogondos do Tuhan. Kada' dokoyu soroho' do poiduwon kou'd Tuhan ko' antaban po dau o soudor dot Asur do mongoi ponolod do bandar dokoyu. 31 Kada' kou pokinongou di Hiskia. Suhuon ku iyokoyu, iyoho' i raja' dot Asur, o monuhu' dokoyu do sumoliwan do mantad id bandar dokoyu om tumahak kou nogindo dot id doho'. Om kaakan kou indo do tua' dot anggur do mantad id guas dot anggur dokoyu, om kaakan kou do tua' dot ara do mantad id guas dot ara dokoyu; om koinum kou do waig do mantad id torobong dokoyu, 32 gisom dot orikot o maso do poundolihon kou dot id pomogunan di miagal-agal do pomogunan dokoyu. Hilo' nopo om haro i' o kabun dot anggur di kitua' dot aanu dokoyu, om haro o tumo di kitanom do gandum, i gandum dit aanu dokoyu o tua', om i maan dokoyu topungo' do maan do kaakan-akanan dokoyu. Om ogumu' nogi' o guas do saitun om tumau do saitun om paha'. Ondung tumanud kou diti ponuhuan ku, om osonong-sonong kou i', om a' kou indo apatai. Kada' kou pokinongou do boros di Hiskia. Magakal no iyau dokoyu om momusorou kou no daa'ndo do poiduwon kou'd Tuhan. 33 Haro toi o tingolig do bansa'd suwai do nokointirung do pomogunan diyolo' do mantad id raja' do pomogunan dot Asur? 34 Hinonggo ngai' no i tingolig do pomogunan do Hamat om Arpad do baino'? Om hinonggo ngai' no i tingolig do Siparwaim, om Hina om Iwa? Haro toi o ruminikot do minongoi popoidu' do Samaria? 35 Haro toi o tingolig do nokoumbal do pinopoidu' do pomogunan dau do mantad id pomorintaan ku? Om kada' kou no pomusorou do milo o Tuhan do poidu' do Yorusalim,’ ka,” ka dau. 36 Om oinsanan nopo i tulun di porintaon di Raja' Hiskia do hilo'd Yorusalim dot a' minungkomi tu' noduhan iyolo' di Raja' Hiskia do moro-boros. 37 Om hurako' nopo di Ilyakim, om i Sibna, om i Yoa o pakayan diyolo' tu' tumongob no kopio iyolo'. Om uli' noddi iyolo' do minongoi posunud do koinsanai di pinoboros di boyoon do soudor dot Asur diri, dot id di Raja' Hiskia.
Minokinosihat i Raja' di Yosaya
1 Korongou nopoddi di Raja' Hiskia i sinusui di tolu o tulun diri, om hurako' no dau o pakayan dau tu' tumongob no kopio iyau. Om pamakai noddi iyau do pakayan do mogihad om pakayaai no dau do hiri'd Walai'd Sasambayangan dot Agayo. 2 Om suhuo' no dau i Ilyakim, i mongilo-ilo do hiri'd walai'd raja', om i Sibna, i gomponulis do pomorinta', om i piro-piro ot imam di komolohingan no do minongoi solowot di Yosaya i Nabi, i tanak di Amos. Om iyolo' nga' minamakai nogi' do pakayan do mogihad. 3 Om iti no o boros do pinonuhuan di Hiskia diyolo' do popoboros dot id di Yosaya, “Tadau nopod baino' om tadau do katangaban; hinukuman toko' om nintingayam toko'. Miagal-agal toko' do tondu' di norikot no o maso do kopogkosusuan nga' oluhoi no o tinan dau. 4 Sinuhu' di raja' dot Asur i boyoon do soudor dau dit angasawat kopio o pangkat do mongindaraat do Kinorohingan di poimpasi. Nunu koilo-ilo nga' norongou nopod Tuhan, i Kinorohingan nu i pinongindaraat diri om hukuman nondo dau i tulun di minomoros do miagal diri. Iyo nopoddi om sumambayang no dot id Kinorohingan do bagi' di tulun toko' di maso do poimpasi,” ka. 5 Soira'ddi nokoromut dot id di Yosaya o boros di mantad id di Raja' Hiskia diri, 6 om simbaro' no di Yosaya do poingkaa, “Boros kad Tuhan om a' ko piya minog dot ooris do tulun dot Asur, i mimboros dot a' o Tuhan milo do popoidu' dati'. 7 Tu' porongohon indo do Tuhan i raja' dot Asur do habar gisom do gumuli' nondo iyau do hilo'd pomogunan dau. Om patayon nondo iyau do korikot iyau'd hilo',” ka.
Minonompurolosi Kawagu i Tulun dot Asur
8 Om korongou noddi i boyoon do soudor dot Asur, do nakapamanau no i raja' do mantad hilo'd Lakis om maso no do sumangod do hilo'd Libna, it iso' o bandar dot id somok. Om ongoi no i boyoon do soudor diri do hiri do minongoi solowot di raja'. 9 Om tontok iddi do nokorongou i tulun dot Asur do rumikot no i soudor do mantad id Masir, do woyoon di Tirhaka, i raja' dot Etiopia, do mongoi panangod diyolo'. Om korongou nopoddi di raja' dot Asur o habar diri, om ponulis no iyau kawagu do surat do pinakaa dot id di Hiskia, i raja' do Yohuda. 10 Poingkaa o boros di tinulis dau, “Sinunudan ko daa'd Tuhan, i pagandasan nu'ddi dot a' ko i' aala' do raja' dot Asur. Nga' kada' nogi' kotumbayaai'ddi. 11 Nokorongou ko no di nongowonsoi di piro-piro o raja' do pomogunan dot Asur dot id pomogunan do hinonggo nopo di ngoyon diyolo' songodo'. Om koidu' kopio ko daa'ddi iya', dot osorou nu? 12 Tontok di rinaag di taki-aki ku o bandar do Gosan, Haran, om Risip, om di pinatai ngai' dau i tulun dot Idon di songingiyon do hilo'd Tilasar, om aiso' i' o tiso' di tingolig diyolo' do milo do pinopoidu' diyolo'. 13 Hinonggo ngai' no i raja' do Hamat om Arpad, om Siparwaim, om Hana, om Iwa, do baino'?” ka. 14 Om basao' no di Raja' Hiskia i surat diri di naramit dau do pinaatod di piro-piro o susuhuon di raja' dot Asur. Om pakayaai noddi dau do hiri'd Walai'd Sasambayangan dot Agayo. Om ungkalado' no dau i surat diri dot id toguang do Tuhan, 15 mikuwo'd suminambayang do poingkaa, “Oi Tuhan, i Kinorohingan dot Israil, i poirikau do hiri'd sakai di moloikat di roitan do kerub. Iya' noo o Kinorohingan di momorinta' do koinsanai do pomorintaan dot id suang do pomogunan diti. Iya' no i minomonsoi do tawan om tana'. 16 Nga' baino' nodti om antangai no ondung nunu iti nosiliu dot id dahai. Pokinongoho' no o koinsanai di pongindaraat di Sanhorib diya', i Kinorohingan do poimpasi! 17 Koilo ngai' i' iyahai oi Tuhan, dot ogumu' no o bansa' om pomogunan do nangaala' om nangaraag di raja' dot Asur. 18 Om tinutudan ngai' nogi' i tingolig diyolo' tu' aiso' i' o kuasa' di tingolig diri. Iri nopo om patung no toomod do winonsoi do tulun, do kayu om watu do winonsoi. 19 Oi Tuhan, i Kinorohingan dahai, poiduwo' no iyahai do mantad id tulun dot Asur, om oilaan indo do koinsanai'd bansa' do hiti'd pomogunan dot iya' noo o Kinorohingan, oi Tuhan,” ka dau.
Boros di Yosaya dot id Raja'
20 Om porikot noddi i Yosaya do boros dot id di Raja' Hiskia, dot isimbar nopod Tuhan di sambayang dau 21 om poingkaa, “Hingi-hingion ko om irak-irakan ko'd tulun do Yorusalim, oi Sanhorib. 22 Isai toi it indaraaton nu dot osorou nu? Iyoho' i', i Kinorohingan dot Israil, i Kinorohingan dot olidang, it indaraaton nu'ddi. Minggayo-gayo kopio ko daa dot id toguang ku. 23 Pinapaatod ko do susuhuon nu do popoinggayo-gayo do ngaran nu dot iri no i korita'-kuda' nu o nakaanu-anu nu do nuluhon dit angasawat kopio do hilo'd Libanon. Om minggayo-gayo ko do nangatagad nu o koinsanai di guas dot aras dit angakawas om it ongolumis om salagan ngai' nu nopo i puru' di himbaan. 24 Om minggayo-gayo ko nogi' do nokopongukad ko do torobong om nokoponginum ko'd waig dot id piro-piro o pomogunan do suwai. Om piningulakan di soudor nu i Bawang do Nil do gisom do narasak. 25 A' ko po nokoilo dot iyoho' i' o minomusorou ngai'ddi do mantad di gulu po? Om wonsoyon ku'ddi iri do baino'. Iyoho' i' o minanahak diya' do kuasa' do momohuyas do piro-piro o bandar di kitolig o posorili' do gisom do nosiliu'ddi do pogun. 26 Om gisom dot iri nopo tulun di poingiyon do hilo' om aiso' no o pokukurayan. Moddosi ngai' nopo iyolo'. Nosiliu po iyolo' do miagal do sakot do hilo'd kobuturan om miagal di sakot do sumuni dot id taap do walai tu' awayaan nopo di tongus dot alasu' do mantad id koulayon, om rumiou nopo 27 Nga' oilaan ngai' ku i' o nunu nopo do pasal diya'. Oilaan ku i' o wonsoyon nu om oilaan ku o pakayaan nu. Om oilaan ku dot otogod kopio ko doho'. 28 Nongorongou ngai' ku no i pokikirayou nu. Baino' nondo om godingan ku o todung nu, om kakangan ku o kabang nu, om gayaton tiya' nondo do gumuli' do hilo'd ralan di tadon nu,” ka. 29 Om poromuto' no di Yosaya di Raja' Hiskia o boros do poingkaa, “Iti no o tanda' do koilaan nu dit osiliu dot id dabantalan. Toun nopod baino' om toun do tabantalan, om iri pondo i turisang di gandum o takanon dokoyu. Nga' katalib nopondo iri om milo kou no do mananom do gandum om anggur, om aanu dokoyu o tua'ddi. 30 Iri nopondo i tulun do Yohuda dit oolu-olu' om osimbayan nondo do miagal di tanom dit aralom o gamut om i mongua'. 31 Hilo' nopod Yorusalim om hilo'd Nulu-Nulu do Sion om haro i' o tulun dot apasi, tu' natantu' mantad nod Tuhan dot osiliu o miagal diri. 32 Poingkaa o boros do Tuhan do pasal di raja' dot Asur, ‘A' i' iyau kosuang do bandar diri, om iso' po di pana' dau nga' a' i' kapana' do hilo'. Om iso' po di soudor dau di kikolid nga' a' i' koinsomok do bandar diri, om a' i' iyolo' kopotimung do tana' do maan do ponokotolig do ponurungku' di bandar. 33 Muli' nopondo o raja' dot Asur do sumusui di ralan di winayaan dau di rikot i' iyau, om a' i' iyau kosuang do bandar diri. Iyoho' no, i Tuhan o minomoros diti. 34 Obian ku indo om intirungan ku o bandar do Yorusalim tu' osorou ku i' o doho' do kosuahan om i tumpongo ku dot id di Daud, i susuhuon ku,’ ka,” ka dau. 35 Om totuong iddi om rikot no o Moloikat do Tuhan do hiri'd kokiiman do tulun dot Asur om patayo' no dau o 185,000 o soudor, om kosuabon noddi om songingiliu poo i rata' diyolo'! 36 Om poggidu' noddi i Sanhorib, i raja' dot Asur, do mantad hiri om pouliai no dau do hilo'd Niniwi. 37 Insan diri o tadau, di maso dau do sumambayang do hiri'd walai di tingolig do Nisro, om rikot no i Adramilik om i Sarisir, i tangaanak dau'd kusai do minongoi pamatai dau do gayang o pinamatai. Om poggidu' nogiddi iyolo', om ongoi no do hilo'd pomogunan dot Ararat. Om kosiliu noddi do raja' i Isarhadon, i tanak di Sanhorib do suwai.
Nolingos i Toruol di Hiskia
1 Om tontok no do maso'ddi do suminakit i Raja' Hiskia dot adalaan kopio gisom dot oruhai no daa iyau dot apatai. Om rikot noddi i Yosaya, i tanak di Amos, do minongoi solowot dau om boro-boros nod, “Minomilin o Tuhan do monuhu' diya' do momongo do koinsanai'd karaja' nu tu' a' ko no olingasan. A' no alaid om apatai ko no,” ka dau. 2 Om togiging no i Raja' Hiskia do tuminimbaba' ponong id limput, om sambayang no iyau do poingkaa, 3 “Oi Tuhan, soroho' no o kotorodoko' ku dot id diya' do mikuwo dot iso- iso' kopio o ginawo ku, om tuminotos oku do tumanud do korohian nu,” ka dau. Om pingihad noddi iyau. 4 Om tongkiadai no di Yosaya i Raja' Hiskia, nga' a' po i Yosaya nakatalib di natad di hiri'd tanga' di walai'd raja', 5 om suhuo' no iyau'd Tuhan do gumuli' kawagu dot id di Hiskia, i raja' di tulun di songonuon do Tuhan, do mikuwo'd popoboros do poingkaa, “Iyoho' no i Tuhan, i Kinorohingan do tukuon di Daud, i taki-aki nu. Norongou ku no o sambayang nu, om nokito ku o romou nu. Om lingasan ku i' iya'; om koongoi ko no do hilo'd Walai'd Sasambayangan dot Agayo do suabdiino. 6 Oputan ku'ndo o tumur nu do hopod om limo o toun do koloido'. Om poiduwon ku iya' om iti bandar do Yorusalim do mantad id raja' dot Asur. Om intirungan ku indo o bandar diti tu' osorou ku i' o kosuahan ku om i tumpongo ku dot id di Daud, i susuhuon ku,” ka. 7 Om ponuhu' noddi i Yosaya do tulun do popogihil do tua' dot ara di hinotok do hiri'd kupos di Raja' Hiskia, om olingasan i' iyau. 8 Om ponguhot noddi i Hiskia, “Nunu o koilaan ku dot olingasan oku'd Tuhan, om koongoi oku do hilo'd Walai'd Sasambayangan dot Agayo do kotolu'd tadau?” ka dau. 9 Om boros ka di Yosaya, “Onuan ko id Tuhan dot iso' o tanda' do koilaan nu'd bayaanon do Tuhan o batos dau. Om poboroso' daa ondung honggo o korohian nu: sumindur do hopod o garis o sangai di longon do jam do tadau, i winonsoi di Raja' Ahas ko' gumuli' do hopod o garis?” ka dau. 10 Om boros ka di Hiskia, “Osonong id posindur ilo sangai do gisom do hopod o garis. Nga' pogulio' daa do hopod o garis,” ka. 11 Om sambayang noddi i Yosaya dot id Tuhan, om pogulio' nod Tuhan i sangai do hopod o garis do hiri'd jam do tadau.
Piro-Piro o Susuhuon do Mantad Hilo'd Babil
12 Om tontok noddi do nokorongou i raja' do Babil, i Mirodak Baladan i tanak di Baladan, do kolilingasai di Raja' Hiskia do sumakit. Om ponuhu' noddi iyau'd tulun do mongoi paatod do surat om ipuhawang dot id di Hiskia. 13 Om osonong tomod o pinonuwau di Hiskia do tulun di sinuhu'ddi, om angatai noddi dau iyolo' do minongoi ontong do koinsanai do kakayaan dau, i tamas om pirok, i rampa om tumau dit owongi', om koinsanai di rapo-rapo di soudor dau. Iso' po nga' aiso' no ot a' dau pinokitanan diyolo' do hiri'd walai'd raja', om pointongkop di pomorintaan dau. 14 Om rikot noddi i Yosaya do minongoi'd hiri'd di Hiskia, om ponguhot nod, “Hinonggo ngai' o tadon do tulun diri, om nunu ka diyolo'?” ka. Om boros ka di Hiskia, “Iyolo' nopo om mantad hilo'd Babil, i pomogunan di hilo'd sodu',” ka dau. 15 “Nunu ngai' o nongokito diyolo' do hiti'd walai'd raja'?” ka kawagu di Yosaya do minuhot. “Nongokito ngai' no diyolo'. Aiso' no ot a' ku pinokitanan diyolo' do hiti'd suang diti poopian do hiti'd walai ku,” ka di Hiskia do suminimbar. 16 Om boros kaddi di Yosaya dot id di Raja' Hiskia, “Boros kad Tuhan 17 om orikot nondo o maso do nunu nopo i kakayaan dot id suang diti walai nu, i nongotimung di taki-aki nu di gulu po om gisom do baino', om rangkaton ngai' nopondo do kumaa do hilo'd Babil. Om aiso' nondo ot oolu'. 18 Om haro nondo o sinakagon nu do tanggayan om silihon do pagawai do hiri'd walai'd raja' do mogobi-obi' di raja' do Babil,” ka. 19 Om boros ka di Hiskia do suminimbar, “Osonong no kopio ino boros do Tuhan di pinoboros nu doho',” ka. Minomoros pogi' iyau do miagal diri nga' osorou nopo di Hiskia om maso nopo dau do poimpasi om osimbayan i' om aiso' o kagangahan do pomorintaan dau.
Nokopupuson do Pomorintaan di Hiskia
20 Koinsanai di nongowonsoi di Raja' Hiskia, om i kosioho' dau, om i karalan-ralano' dau do minomonsoi di kulam om i poluyungan do waig do poirikot do hiri'd bandar om nongkotulis ngai' no do hiri'd Buuk di Monusui do Pasal Ngai' di Raja' do Yohuda. 21 Kapatai poddi i Hiskia, om kosiliu nod raja' i tanak dau do suminowoli dau.
I Manasi o Raja' do Yohuda
1 Hopod nogi' om duwo o toun di Manasi di nosiliu iyau'd raja' do Yohuda. Om minomorinta' iyau do hilo'd Yorusalim do solinaid do limo nohopod om limo o toun. Ngaran nopo do tina' dau nga' i Hopsiba. 2 Om minomonsoi i Manasi do dusa dot id Tuhan, tu' minusui iyau di kowoyo-woyoon dot araat di piro-piro o bansa'd tulun di nuyung do Tuhan do sumoliwan do mantad id Kanaan di suang i' o tulun dot Israil do pomogunan diri. 3 Om pinoingkakat kawagu dau i tiiyonon do tumuku' dot id tingolig, i rinaag daa di Hiskia, i tapa' dau, di gulu po. Om minomonsoi iyau do piro-piro o pananaraban do porsombahan dot id tingolig do Baal. Om minomonsoi iyau do piro-piro o patung do tingolig dot Asira, do miagal di winonsoi di Raja' Ahab, i raja' dot Israil di gulu po. Om tuminuku' nogi' i Manasi dot id rombituon. 4 Nokoboros nod Tuhan dot i Walai'd Sasambayangan dot Agayo o tiyonon do sumambayang dot id dau nga' hiri nogi' o winansayan di Manasi do pananaraban do porsombahan do don tingolig. 5 Om winansayan goduwo nopo dau do pananaraban do porsombahan di pakayon do tontok do sumambayang dot id rombituon o hiri'd duwo o natad di Walai'd Sasambayangan dot Agayo. 6 Om pinatahak nogi' dau i tanak dau do maan do porsombahan di sorobon dot id tingolig. Om minomonsoi nogi' iyau di wowonsoyon do bobolian, om i mogogontong, om i kitoilaan do dong rogon, om minokituduk iyau do rusod-rusod. Om agayo no kopio o dusa dau dot id Tuhan gisom do nokotogod tomod o Tuhan. 7 Om pinosuang nogi' dau i tanda' do tingolig dot Asira do hiri'd Walai'd Sasambayangan dot Agayo. Om iri nogi' daa o kinoiyonon di komoyon do Tuhan di pinoboros dau dot id di Daud om id di Suliman, i tanak di Daud do poingkaa, “Hiti nod Walai ku do hiti'd Yorusalim o nopili' ku dot id pialatan di hopod om duwo o watas do payat dot Israil dot iyonon do tulun ku do sumambayang dot id doho'. 8 Ondung otorodok o tulun dot Israil do tumanud do koinsanai dit isuhu' ku om mumboyo' do koinsanai di Tourat di nakatahak di Musa, i susuhuon ku dot id diyolo', om a' ku no iyolo' pologoson dot ouyung do mantad id pomogunan di nakatahak ku dot id taki-aki diyolo',” ka. 9 Nga' a' i' otorodok dot id Tuhan i tulun do Yohuda tu' naangatan nogiddi iyolo' di Manasi do momonsoi'd dusa dit araat po ko' mantad di dusa di nowonsoi di piro-piro o bansa'd tulun di nuyung do Tuhan do tontok di suang i' o tulun di songonuon do Tuhan do pomogunan diri di gulu po. 10 Om polombuso' noddi di piro-piro o nabi, iyolo' i susuhuon do Tuhan, o boros do Tuhan do poingkaa, 11 “Araat no kopio i Raja' Manasi, araat po ko' mantad di winonsoi do tulun do Kanaan, i winonsoi dau. Om iri no i tingolig dau o minamayayat di tulun do Yohuda do minomonsoi'd dusa. 12 Gowoi pondo om porikatan ku'ndo iyoho', i Tuhan i Kinorohingan di tukuon do tulun dot Israil, do kosusaan dot agayo o Yorusalim om Yohuda, gisom dot aranaban ngai' nopondo o tulun do korongou'ddi. 13 Hukuman ku nondo o Yorusalim do miagal di pinomohukum ku do Samaria om i Ahab, i raja' dot Israil, om koinsanai di sinakagon dau. Imuhawon ku nopondo o Yorusalim, do miagal po do piring di linihungan o miampaping do gisom dot opulang kopio. 14 Om pologoson ku nopondo i tulun di poundorong do hilo' dot inggoriton di pisangod diyolo', gisom dot aala' iyolo' om angaanu ngai' di pisangod i hiri'd pomogunan diyolo'. 15 Wonsoyon ku'ti dot id tulun ku tu' minomonsoi i' iyolo'd dusa dot id doho' gisom do notingkau o kototogod ku do mantad poddi soliwan i' i taki-aki diyolo' do mantad hilo'd Masir om gisom do baino',” ka. 16 Om ogumu' tomod o tulun dit aiso' o sala' do pinatai di Manasi gisom do lumuyung po o raha' do pointongkop do hilo'd Yorusalim. Iri no o dusa di winonsoi dau do suwai mantad ko' i dusa dau di minamayayat do tulun do Yohuda do minomonsoi'd dusa dot id Tuhan, iri no tu' tuminuku' dot id tingolig. 17 Koinsanai di nongowonsoi di Raja' Manasi, do kohompit ngai' no i dusa di nongowonsoi dau, nga' nongkotulis ngai' no do hiri'd Buuk di Monusui do Pasal Ngai' di Raja' do Yohuda. 18 Om kapatai noddi i Manasi, om lobongo' no do hiri'd kabun do walai'd raja', i kabun di Usa. Om i Amon diri i tanak dau, o nosiliu'd raja' do suminowoli dau.
I Amon o Raja' do Yohuda
19 Duwo nogi' nohopod om duwo o toun di Amon di nosiliu iyau'd raja' do Yohuda. Om minomorinta' iyau do hilo'd Yorusalim do duwo o toun do koloido'. Ngaran nopo do tina' dau nga' i Misulimit, i tanak di Harus, i mantad id bandar do Yotba. 20 I Amon nga' miagal nogi' di tapa' dau tu' minomonsoi i' do dusa dot id Tuhan. 21 Iyau nga' minusui i' di winonsoi di tapa' dau, om tuminuku' iyau di piro-piro o tingolig di tinuku' di tapa' dau. 22 Tuminongkiad iyau do Tuhan, i Kinorohingan di tinuku' di taki-aki dau. Om a' iyau otorodok do tuminanud dit isuhu'd Tuhan. 23 Om pogipapakat ngai' noddi i pagawai di Raja' Amon do sumaap dau om patayo' no diyolo' iyau do hiri'd walai di raja'. 24 Nga' napatai i' di tulun do Yohuda i minamatai di Raja' Amon, do hiri'd walai di raja'. Om siliho' no diyolo' do raja' i Yosia, i tanak di Raja' Amon. 25 Koinsanai di nongowonsoi di Amon nga' nongkotulis ngai' i' do hiri'd Buuk di Monusui do Pasal Ngai' di Raja' do Yohuda. 26 Om lobongo' noddi i Amon do hiri'd kalabangan do hiri'd kabun di Usa. Om i Yosia diri i tanak dau, o nosiliu'd raja' do suminowoli dau.
I Yosia o Raja' do Yohuda
1 Walu' nogi' o toun di Yosia do tontok di nosiliu iyau'd raja' do Yohuda. Om minomorinta' iyau do Yorusalim do solinaid do tolu nohopod o toun. Ngaran nopo do tina' dau nga' i Yodida, i tanak di Adaya, i mantad id bandar do Boskat. 2 I Yosia nopoddi nga' minomonsoi i' do kohubayaan do Tuhan, om tuminanud iyau do kowoyo-woyoon di Raja' Daud, i taki dau, om otorodok iyau do tuminanud do koinsanai dit oturan do Kinorohingan.
Nokito kawagu i Buuk do Tourat
3 Tontok di kohopod no om walu' do toun do pomorintaan di Raja' Yosia, om ponuhu' no iyau di gomponulis do pomorinta' do mongoi'd hiri'd Walai'd Sasambayangan dot Agayo. Ngaran nopo di gomponulis diri nga' i Sapan, i tanak di Asalia, i manangaki di Mosulam. Boros ka di Raja' Yosia, 4 “Ongoi solowot di Hilkia, i Boyoon dot Agayo dot Imam, om pokionuon i' o kopoilaan do kogumuon do tusin do notimung di piro-piro ot imam di maganu-anu do hiri'd wawayaan do Walai'd Sasambayangan dot Agayo. 5 Om suhuon no iyau do papatahak di tusin diri dot id piro-piro o mandur di mongilo-ilo di karaja' do mononong di Walai'd Sasambayangan dot Agayo. 6 Om iyolo' indo o mamagadsi' di tukang kayu, om i tukang mamaal, om i tukang watu dot i tusin diri o pamagadsi'. Om iyolo' o momoli do kayu om watu dit apatut do bolion. 7 Iri ngai' nopo tulun di mongilo-ilo do pakarajaan diri, om otulid i' kopio o ginawo, om a' i' minog do pokionuon o kopoilaan do kinapamakayan di tusin do mantad id diyolo',” ka. 8 Om posunudo' no di Sapan i boros di Raja' Yosia, dot id di Hilkia. Om sunudai no di Hilkia i Sapan do nokobontol iyau do buuk do Tourat do Tuhan do hiri'd Walai'd Sasambayangan dot Agayo. Om patahako' no di Hilkia dot id di Sapan i buuk diri, om basao' noddi dau.1|70|HK71A| I buuk do Tourat|22.8 9 Om ngoyo' noddi di Sapan poboroso' dot id raja', do naanu no dau i tusin do hiri'd Walai'd Sasambayangan dot Agayo om nakatahak no dau di piro-piro o mandur do maan do pononong di Walai'd Sasambayangan dot Agayo. 10 Om boros ka kawagu di Sapan, “Intangai pogi' iti buuk di pinatahak di Hilkia doho',” ka dau. Om basao' no dau iri do hiri'd toguang di raja'. 11 Om korongou nopoddi di raja' o boros di pointulis do hiri'd buuk diri, nga' hurako' nopo dau o pakayan dau tu' tumongob no kopio iyau. 12 Om boro-boros noddi i raja' dot id di Hilkia, i Boyoon dot Agayo dot Imam diri, om i Ahikam i tanak di Sapan, om id di Akbor i tanak di Mika, om i Sapan i gomponulis do pomorinta', om id di Asaya, i pagawai di raja' do poingkaa, 13 “Ongoyo' dokoyu doho' uhoto' o Tuhan do bagi' doho' om bagi' do toinsanan diti rayat do pasal do ponudukan do buuk diti. Otogod no o Tuhan dati' tu' a' i' di taki-aki toko' tinanud i ponuhuan di songintulis dot id buuk diti,” ka dau. 14 Om ongoi ngai' no i tulun diri pokituduk do songulun o tondu' di roitan dot i Hulda. Iyau nopo nga' nabi, i poingiyon do hiri'd kawalayan do wagu do hilo'd Yorusalim. Sawo nopo dau nga' i Salum, i tanak di Tikwa, i manangaki di Harhas; om iyau no o momogompi' di pakayan do sumambayang do hiri'd Walai'd Sasambayangan dot Agayo. Om korongou poddi i Hulda di pinoboros diyolo'ddi, 15 om suhuo' no dau iyolo' do gumuli' do popoboros dot id raja' 16 do poingkaa, “Poingkaa o boros do Tuhan, ‘Hukuman ku no o Yorusalim do mitonggoi do koinsanai di songingiyon do hilo' do miontok di nokotulis dot id suang do buuk di wagu po di raja' kabasa'. 17 Tu' tuminongkiad iyolo' doho', om pinapatahak iyolo' do porsombahan dot id piro-piro o tingolig. Om minoningkau no kopio do kototogod ku i winonsoi diyolo'. Om otogod oku no kopio do Yorusalim. Om a' no milo do tingkodon o kototogod ku. 18 Nga' poingkaa o boros ku dot id Raja' Yosia, iyoho', i Tuhan i Kinorohingan dot Israil, nokorongou ko no di songintulis dot id suang do buuk diri. 19 Om minonosol ko iddi om mininsiriba' ko dot id toguang ku do nakabasa'ddi. Om hinurak nu o pakayan nu do mikuwo'd minihad ko dot atatangaban do soira' di norongou nu do hukuman ku o Yorusalim om i tulun di poingiyon do hilo'. Hukuman nondo o Yorusalim dot adalaan kopio, om koronob kopio dot okito, gisom do ngaran nondo do Yorusalim o roiton do pomopol. Nga' norongou ku iddi o sambayang nu. 20 Om a' ku indo porotuon i hukuman dot id Yorusalim do solinaid nu po do poimpasi. Om pologoson ku i' iya' dot osonong o kapatai-patayo',’ ka,” ka dau. Om uli' ngai' noddi i tulun di sinuhu'ddi do minongoi popoboros diri dot id di Raja' Yosia.
Pinunso di Yosia i Tumuku' dot id Tingolig
1 Om lohowo' ngai' noddi di Raja' Yosia i boyoon do Yohuda om Yorusalim, 2 om ongoi nogiddi iyolo' do hiri'd Walai'd Sasambayangan dot Agayo do minogiwoyo-woyo' di piro-piro ot imam, om i nabi om koinsanai di tulun di songingiyon do hiri'd pomogunan diri, i mosikin om i kaya'. Om basao' nogiddi di raja' dot opuhod o boros o koinsanai di pointulis do hiri'd buuk di nokito do hiri'd Walai'd Sasambayangan dot Agayo, i pinotulisan do koinsanai di tumpongo. Binasa' di raja' iri do potimbaba' diyolo' do hiri'd toning di torigi dot agayo. 3 Om pamatos noddi i raja' dot id Tuhan do tumorodok dot id dau, om tumanud do koinsanai di ponuhuan om it oturan do Tuhan do mikuwo dot aayi-ayi' o ginawo om aayi-ayi' o pomusorou dau, om tumanud ngai' di ponuhuan dit id suang do tumpongo'd Tuhan dot id tulun dau, i nongkotulis do hiri'd buuk diri. Om oinsanan nopo i tulun do minamatos do tumorodok do tumanud di tumpongo'ddi. 4 Om ponuhu' noddi i Raja' Yosia di Hilkia, i Boyoon dot Agayo dot Imam diri om i piro-piro o mongunguhup dot imam, om i madtatamong di wawayaan di Walai'd Sasambayangan dot Agayo do posoliwan do mantad hiri'd Walai'd Sasambayangan dot Agayo do koinsanai di konunu-nunuan di pakayon do tumuku' dot id tingolig do Baal, om Asira, om id rombituon. Om tutudai noddi di raja' o koinsanai di konunu-nunuan do hiri'd soliwan di bandar diri, i hiri'd somok di Rantai do Kidron, om kuyutai no dau i tauu diri do hilo'd Baitol. 5 Om posoliwano' ngai' noddi di raja' it imam di nongopili' di piro-piro o raja' do Yohuda do maganu-anu do hiri'd pananaraban do porsombahan di don tingolig do hiri'd piro-piro o bandar do Yohuda, om i hiri'd posorili' do Yorusalim om i piro-piro ot imam di papatahak do porsombahan do sumbolion dot id Baal, om id tadau, om id tulan om id pomogunan do hilo'd mawo-dawo, om id rombituon. 6 Om pinosoliwan nogi' di Yosia do mantad id Walai'd Sasambayangan dot Agayo i tingolig dot Asira, om tanggayai no do sumoliwan di bandar do minongoi do hilo'd Rantai do Kidron. Om hilo' ngai' no o pinonutudan di tingolig diri. Om tutuo' nogi' i tohun diri do gisom do naawu, om popinsasado' noddi dau i tauu diri do hiri'd kalabangan do tulun dot ogumu'. 7 Iri nogi' i piro-piro o bilik do hiri'd Walai'd Sasambayangan dot Agayo di tiiyonon di sundal do tingolig, i tiyonon diyolo' do mogiampahu' do ralan do tumuku' dot id tingolig nga' rinaag nogi'. (Hiri nod bilik diri o tiiyonon do tongoondu' do mangawol do kain do papakayon diyolo' do tumuku' dot id tingolig dot Asira.) 8-9 Om i piro-piro ot imam di hilo'd Yohuda nga' nangatan ngai' do mongoi'd hilo'd Yorusalim om sinosomu' ngai' nogi' diyolo' i pananaraban do porsombahan di don tingolig do pointongkop do pananaraban dit imam do porsombahan di sumbolion do pointongkop di pomogunan. Om noduhan nogi' i piro-piro ot imam diri do maganu-anu do hiri'd Walai'd Sasambayangan dot Agayo, nga' pinologos i' iyolo' do mangakan di roti dit a' rinalatan do pangambang, i taakanon di patahakon dot id piro-piro o tambalut diyolo'. Iri nogi' i pananaraban do porsombahan do don tingolig di roitan do Tingolig do Kambing, it id somok do wawayaan di winonsoi di Yosua, i gobunor do bandar do pomogunan diri nga' hinias nogi'. Iri nopo i wawayaan diri nga' ogibangan do tontok do sumuang o tulun do bandar diri do maya' di wawayaan dot agayo. 10 Om sinosomu' nogi' di Yosia i Topit, i tiiyonon do tumuku' dot id tingolig di hilo'd Rantai do Hinom. Om aiso' noddi o tulun do milo do papatahak do tanak dau do maan do porsombahan do sorobon do patahakon dot id tingolig do Molok. 11 Om koinsanai di kuda' di pinotobilang di piro-piro o raja' do Yohuda, i patahakon do tontok do tumuku' dot id tadau nga' pinataam nogi', om i korita'- kuda' di pakayon do tontok do tumuku' dot id tingolig nga' tinutudan ngai' nogi'. (Iri ngai' nopo i korita'-kuda'ddi nga' hiri'd natad di Walai'd Sasambayangan dot Agayo --- it id toning di wawayaan dot agayo --- a' i' osodu' do mantad id bilik di tiiyonon di Natan Milik, i pagawai dit asawat o pangkat.) 12 Hinias nogi' i pananaraban do porsombahan, i winonsoi di piro-piro o raja' do Yohuda di hiri'd sakai di taap di bilik di Raja' Ahas. Om i pananaraban do porsombahan di winonsoi di Raja' Manasi, i pinoiyon do hiri'd duwo o natad di Walai'd Sasambayangan dot Agayo, nga' rinaag nogi' om pinataam do hilo'd Rantai do Kidron. 13 Om sinosomu' nogi' di Yosia i pananaraban do porsombahan di winonsoi di Raja' Suliman, i hiri'd ponong id koulayon do mantad id Yorusalim, do ponong id salatan do Nulu-Nulu do Saitun i podsusubakan do tingolig di kososomu', i roitan dot Astorit, i tingolig do tulun do Sidon, om i tingolig do Kamos, i tingolig do tulun do Muab, om i tingolig do Milkom, i tingolig do tulun dot Amon. 14 Om hinaba' nogi' di Yosia i torigi do watu di don tingolig om i patung do tingolig dot Asira. Om iri nopo i tana' di pinoudangan di torigi do watu'ddi om pinoilihan di patung diri nga' pinorubpuan di Yosia do tulang do tulun. 15 Om tinutudan nogi' di Yosia i tingolig dot Asira om i tiiyonon do modsubak do tingolig do hilo'd Baitol nga' rinaag nogi', iri nopo tiyonon do modsubak diri nga' winonsoi di Raja' Yirobiam, i tanak di Nibat --- i raja' do minamayayat do tulun dot Israil do momonsoi'd dusa. 16 Om koili no i Yosia, nga' kokito no dau i kalabangan do hiri'd timpak di nuluhon, om ponuhu' no iyau'd tulun do mongoi pongukad di lobong diri om tutudan ngai' nondo diyolo' i tulang do hiri'd sakai di pananaraban do porsombahan do hilo'd Baitol; om babako' ngai' no diyolo' i pananaraban do porsombahan diri. Om i watu nga' minumuk ngai' nogi' diyolo'. Om miagal nodti i Yosia do minonosomu' di pananaraban do porsombahan diri. Om nangabayaan ngai' nopo i nongkoboros di nabi do Tuhan di gulu po, di tontok di poingkakat i Raja' Yirobiam do hiri'd toning di pananaraban di porsombahan diri, di tontok do Tadau dot Agayo. Om kokito po di Yosia it iso' o lobong. 17 Om ponguhot no i Yosia, “Disai'dti lobong diti?” ka. Om boros ka di tulun do hilo'd Baitol, “Ilo' nopo om lobong di songulun o nabi do boros do Tuhan. Om nokoongoi iyau do hiti do mantad iyau do hilo'd Yohuda, om pinoboros dau i winonsoi nu dot id pananaraban do porsombahan do hiti'd Baitol,” ka. 18 Boros ka di raja', “Kada' no ongoyo' kuroi-kuroyo' ilo lobong. Pologoson nopo i tulang dau do hiti, om a' no powolihon!” ka. Om iri nopo i tulang di nabi di mantad hilo'd Yohuda om a' i' diyolo' kinuro-kuro; om iri nogi' i tulang di nabi di mantad hilo'd Samaria di linobong do hiri nga' a' i' kinuro-kuro. 19 Raago' ngai' nopo di Yosia i tiiyonon do tumuku' do tingolig di winonsoi di piro-piro o raja' dot Israil, dot id pointikid-tikid di bandar dot Israil, i minoningkau do kototogod do Tuhan. Poingkuro nopo o winonsoi di Raja' Yosia di hilo'd Baitol om iyo noddi o winonsoi dau dot id pananaraban do porsombahan dot id pointongkop dot Israil. 20 Pinatai ngai' di Yosia it imam dit a' tumuku' dot id Kinorohingan, do hiri'd sakai di pananaraban do porsombahan o pinamatayan dau diyolo'. Om tinutudan nogi' di Yosia i tulang do tulun do hiri'd sakai do pointikid-tikid di pananaraban do porsombahan do hilo'. Om uli' nogiddi i Yosia do hilo'd Yorusalim.
Rinamai di Yosia i Tadau dot Agayo do Paska
21 Om ponuhu' noddi i Raja' Yosia di rayat dau do mamaramai di tadau dot agayo do Paska do pomusou'd Tuhan, i Kinorohingan diyolo', do miagal di nokotulis do hiri'd buuk do tumpongo. 22 A' po nokoumbal do naramai o tadau dot agayo do Paska do miagal diti do solinaid di raja' dot Israil, toi' ko' i maso di gompomutus do momorinta' dot Israil. 23 Tontok nogiddi kohopod om walu' do toun di Yosia do momorinta' do naramai kawagu iti tadau dot agayo do Paska do hilo'd Yorusalim.
Piro-Piro i Pinoinwagu di Yosia
24 Om uyungo' ngai' no di Yosia i tulun do hilo'd Yorusalim om i hilo'd Yohuda, i momolohou do rusod di nangapatai, om i mogogontong, om pinataam o koinsanai di tingolig do sompiiyon di hiri'd walai, om i patung do tingolig, om i konunu-nunuan di pakayon do tumuku' dot id tingolig, do tumanud di songintulis do hiri'd buuk di tumpongo di nokito di Hilkia, i Boyoon dot Agayo dot imam, do hiri'd Walai'd Sasambayangan dot Agayo. 25 Aiso' po o raja' do miagal di Raja' Yosia tu' otorodok kopio do sumambayang dot id Tuhan, om pointalangon dau i kotorodoko' dau dot id kowoyo-woyoon dau om id wonsoyon dau do tumanud di Tourat di songintulis dot id suang do Tourat di Musa. Om suwai nopoddi ko' i Yosia om aiso' noddi o raja' do miagal dau. 26 Nga' i nopo winonsoi di Raja' Manasi om minoningkau do kototogod do Tuhan dot id tulun do Yohuda; gisom piya do baino' nga' otogod kasai' po o Tuhan. 27 Om boros kad Tuhan, “Poingkuro nopo i winonsoi ku dot id tulun dot Israil om miagal noddi o wonsoyon ku dot id tulun do Yohuda. Om uyungon ku iyolo' do mantad id pomogunan di pinatahak ku daa diyolo'. Om iyadaan ku i bandar do Yorusalim, i pinili' ku. Om i Walai'd Sasambayangan dot Agayo di tiiyonon diyolo' do sumambayang do tumanud di nokoboros ku nga' iyadaan ku i',” ka dau.
Kinopupuson do Pomorintaan di Yosia
28-30 Om kapatai noddi i Raja' Yosia do hilo'd Mogido dot id pinisangadan do hilo' do tontok di minongoi iyau sangod di Niko, i raja' do Masir, i minomoyo' di piro-piro o soudor dau do minongoi panangod di Raja' dot Asur do hilo'd tisan do Bawang dot Iprat. Om oito' noddi di piro-piro o pagawai di Yosia i rata' di Yosia om pasakayo' no diyolo' do korita'-kuda' do minuli' do hilo'd Yorusalim. Om lobongo' no diyolo' do hilo'd kalabangan do raja'. Om pomili' noddi i tulun do Yohuda do tulun do sumiliu'd raja', om pilio' no diyolo' i Yoahas, i tanak di Yosia do kusai, do sumowoli di Yosia do raja'. Koinsanai di nongowonsoi di Raja' Yosia om nongkotulis ngai' i' do hiri'd suang do Buuk di Monusui do Pasal Ngai' di Raja' do Yohuda.
I Yoahas o Raja' do Yohuda
31 Duwo no nohopod om tolu o toun di Yoahas do tontok di nosiliu iyau'd raja' do Yohuda, om tolu no tulan do koloido' dau do minomorinta' do hilo'd Yorusalim. Tina' nopo dau om i Hamutal, i tanak di Yoromia, i mantad id bandar do Libna. 32 I Yoahas nogi' nga' nokowonsoi id dusa dot id Tuhan do miagal di taki- aki dau. 33 Om naala' i Yoahas di Niko, i raja' do Masir di hilo' iyau'd Ribla, it id watas do Hamat, om sinansagan o Yohuda do mambayar do sukai dot id di Niko do 3,400 kilogram do pirok om tolu nohopod om apat o kilogram do tamas. Om iri no o kinopupuson do pomorintaan di Yoahas. 34 Om siliho' no di Raja' Niko i Ilyakim, i tanak di Yosia do kusai, do raja' do Yohuda. Om powoliho' nod i Niko o ngaran dau dot i Yoyakim. Om angatai no dau i Yoahas do mongoi'd hilo'd Masir, om hilo' no o kinapatayon di Yoahas.
I Yoyakim o Raja' do Yohuda
35 Om ponimung noddi i Yoyakim do sukai do tumanud di kahara-haraan di tulun dau do pambayar di sukai di pinokianu di raja' do Masir. 36 Duwo no nohopod om limo o toun di Yoyakim do tontok di nosiliu iyau'd raja' do Yohuda. Om hopod om iso' o toun do koloido' dau do momorinta' do hilo'd Yorusalim. Tina' nopo dau om i Sobuda, i tanak di Pidaya, i mantad hilo'd bandar do Ruma. 37 Om i Yoyakim nga' minomonsoi id dusa dot id Tuhan do miagal di taki-aki dau.
1 Tontok dit i Raja' Yoyakim o momorinta' om rikot no i Nobukadnisar, i raja' do Babil do minongoi panangod do gisom do naala' o Yohuda. Om tolu di o toun do koloido' di Yoyakim dot id suang do pomorintaan di Nobukadnisar. Nga' saapo' noddi di Yoyakim i Nobukadnisar dit alaid. 2 Om ponuhu' noddi o Tuhan do piro-piro o soudor dit ongkirapo-rapo do mantad hilo'd Babil, om Siria, om Muab om Amon do mongoi panangod di Yoyakim om mongoi pamaraag do Yohuda, do miagal di nokoboros mantad do Tuhan do pinolombus di piro-piro o nabi, i susuhuon do Tuhan. 3 Nowonsoi pogi' o miagal diri nga' nokoboros mantad nod Tuhan dot uyungon dau i tulun do Yohuda do mantad id pomogunan di pinatahak do Tuhan dot id diyolo'. Koponguyungan nopo dau diyolo' nga' i dusa di winonsoi di Raja' Manasi, 4 nga' agayo nopo kopio do koponguyungan om i minamatai i Manasi do tulun dit aiso' o sala'. Om a' no o Tuhan milo'd mangampun di Manasi di nowonsoi dau do miagal diri. 5-7 A' noddi insan ongoi sangod i raja' do Masir, tu' maso nopoddi om koinsanai di hiri'd posorili' do Masir, do mantad pod hilo'd Bawang dot Iprat, om gisom do korikot do hiri'd piwolitan do Masir do ponong id utara, i porintaon daa di Raja' do Masir di gulu po, om iri ngai' noddi i raja' do Babil o momorinta'. Om tontok nopo di napatai i Yoyakim, om iri no i tanak dau'd kusai, i roitan dot i Yoyakin o nosiliu'd raja' do suminowoli dau. Iri nopo i susuyon do suwai do pasal di Raja' Yoyakim om nongkotulis ngai' no dot id suang do Buuk di Monusui do Pasal Ngai' di Raja' do Yohuda.
I Yoyakin o Raja' do Yohuda
8 Hopod nogi' om walu' o toun di Yoyakin do tontok di nosiliu iyau'd raja' do hilo'd Yohuda. Om tolu no tulan do koloido' dau do momorinta' do hilo'd Yorusalim. Tina' nopo dau om i Nohusta, i tanak di Ilnatan, i mantad hilo'd Yorusalim. 9 I Yoyakin nga' minomonsoi id dusa dot id Tuhan do miagal di tapa' dau. 10 Tontok di pomorintaan di Yoyakin, om minongoi i piro-piro o soudor do Babil panangod do Yorusalim do winoyo' di piro-piro o boyoon do soudor di Nobukadnisar, om turungkuo' no diyolo' i bandar diri. 11 Om daamot di piro-piro o soudor diri do songintutuk do monurungku' di bandar do Yorusalim om ongoi no i Nobukadnisar do hilo'd Yorusalim. 12 Om pangakun nopoddi do naala' di Nobukadnisar i Raja' Yoyakin om i tina' om i tangaanak dau, om i piro-piro o boyoon do soudor om i pagawai dau di hiri'd walai dau. Om katangkap noddi i Yoyakin. Iti nopo nga' nosiliu do tontok di kawalu' do toun do pomorintaan di Nobukadnisar. 13 Om raago' ngai' nopo di Nobukadnisar i konunu-nunuan di tamas do winonsoi, i winonsoi di Raja' Suliman do pakayon do hiri'd Walai'd Sasambayangan dot Agayo. Om koinsanai di konunu-nunuan di hiri'd Walai'd Sasambayangan dot Agayo om i hiri'd walai do raja' dit angagayo o gatang nga' tinanggayan ngai' nopo di Nobukadnisar do hilo'd Babil. Om koinsanai di nongowonsoi'ddi nga' miontok ngai' nopo di nokoboros mantad do Tuhan. 14-16 Om tangkapo' noddi di Nobukadnisar i Raja' Yoyakin om i piro-piro o sawo dau, om i tina' dau om i piro-piro o pagawai do hiri'd walai dau, om tanggayai nogiddi di Nobukadnisar do hilo'd Babil. Om turu' noribu o tulun dit angabantug, om soribu o tulun do tukang om kohompit ngai' no it ongoilo do monupu' do basi' om koinsanai di tulun di milo do sumangod. Om koinsanai nopo iyolo' do tinanggayan do hilo'd pomogunan do pisangod. Om kohompit ngai' nogi' i sinakagon do raja' om i tulun dit ongkipangkat. Kogumuo' nopo dot oinsanan nga' haro i' doti' o hopod noribu o tulun. Oruhai no do noinsanan i tulun do hilo'd Yorusalim do natanggayan do hilo'd pomogunan do pisangod. Iri po i tulun do mosikin kopio o noolu'. 17 Om pilio' no di Nobukadnisar i Matania, i tamanon di Yoyakin, do sumiliu'd raja' do Yohuda. Om powoliho' no di Nobukadnisar o ngaran di Matania dot i Sodokia.
I Sodokia o Raja' do Yohuda
18 Duwo no nohopod om iso' o toun do tumur di Sodokia do tontok di nosiliu iyau'd raja' do Yohuda. Om hopod om iso' o toun do koloido' dau do momorinta' do Yorusalim. Tina' nopo dau om i Hamutal, i tanak di Yoromia, i mantad id bandar do Libna. 19 Om i Raja' Sodokia nga' minomonsoi id dusa dot id Tuhan do miagal di Raja' Yoyakin. 20 Om otogod noddi kopio o Tuhan di tulun do hilo'd Yorusalim om i tulun do Yohuda gisom dot a' no iyolo'd Tuhan podulon.
Naala' o Yorusalim
1 Om idu' noddi i Sodokia do mantad id pomorintaan di Nobukadnisar, i raja' do Babil. Om gowoi poddi om ngoyo' noddi di Nobukadnisar om i piro-piro o soudor dau dit ongkirapo-rapo songodo' o Yorusalim di tadau'd kohopod do tulan do kohopod do tontok di kosiam do toun do pomorintaan di Sodokia. Om pomukiim noddi iyolo'd hiri'd soliwan di bandar do Yorusalim. Om pomonsoi no iyolo'd tolig do posorili' di bandar diri do ponurungku' di bandar. 2 Om turungkuo' nopo diyolo' i bandar diri gisom do nokorikot do kohopod om iso' do toun do pomorintaan di Sodokia. 3 Tontok di tadau'd kosiam do tulan do kaapat do toun diri, om pononglous no o hiri'd bandar diri, gisom dot aiso' no o taakanon di tulun do hiri. 4 Om babako' noddi di pisangod i tolig di bandar diri. Nga' mulong piya do notutukan di soudor do Babil i bandar diri nga' nokosoliwan i' i raja' do Yohuda om koinsanai di soudor do Yohuda do totuong diri, om ongoi no iyolo' do hilo'd Rantai do Yordan. Tu' suminusui iyolo' di ralan di kawaya' di kabun do hiri'd toning di walai do raja', om soliwan nogiddi iyolo' do minaya' di wawayaan dot agayo di kopiromutan di duwo o tolig dot id kinoiyonon diri. 5 Nga' gusao' no di piro-piro o soudor do Babil i Raja' Sodokia om tangkapo' no diyolo' iyau do hilo'd Rantai do Yorikou. Om iduwai nopo iyau di tulun dau. 6 Om tanggayai no diyolo' i Raja' Sodokia do hiri'd di Raja' Nobukadnisar do hilo'd bandar do Ribla, om hukumai noddi iyau. 7 Om pimpatayo' no diyolo' i tangaanak di Sodokia dot antang-antangan di Sodokia. Om tiuko' no diyolo' o mato di Sodokia, om kagasai nogiddi iyau om tanggayai no do kuminaa do hilo'd Babil.
Rinaag i Walai'd Sasambayangan dot Agayo
8 Tontok di tadau'd koturu' do tulan di kolimo di kohopod om siam do toun do pomorintaan di Nobukadnisar, i raja' do Babil, om rikot no do hilo'd Yorusalim o songulun do roitan dot i Nobusaradan. Iyau nopo om ponosihat om boyoon do soudor di Nobukadnisar. 9 Om tutudai no di Nobusaradan i Walai'd Sasambayangan dot Agayo, om i walai do raja' om koinsanai di walai di tulun dit ongkipangkat do hilo'd Yorusalim. 10 Om babako' no di tulun dau i tolig di bandar diri. 11 Om tanggayai ngai' noddi di Nobusaradan do hilo'd Babil i tulun, dot i tukang di nongoolu-olu' do hilo'd Yorusalim, om i tulun di minogidu' do minongoi sugku' di tulun do Babil. 12 Nga' iri nopo wookon di tulun di mosikin kopio om pinoundorong i' diyolo' do hilo'd Yorusalim. Om sinuhu' diyolo' do morobuat do hiri'd kabun dot anggur om hiri'd koumaan. 13 Om iri ngai' nopo i torigi do tambaga' om i korita'-kuda' di hiri'd Walai'd Sasambayangan dot Agayo om i mimpun do tambaga' om binabak ngai' nopo di tulun do Babil, om igitai ngai' noddi diyolo' i tambaga'ddi do kuminaa do hilo'd pomogunan diyolo'. 14-15 Om nigitan ngai' nogi' diyolo' o konunu-nunuan diti: i piro-piro o pononduk, om i poiiyanan do tauu do mantad id pananaraban do porsombahan, om i pakakas di lampung, om i piro-piro o mangkuk di poiyanan do raha' di tayam-tayam di sumbolion do maan do porsombahan, om i mangkuk di poiyanan do kominyan om i piro-piro o pakakas do tambaga' di pakayon do sumambayang, om i pakakas do tamas om pirok om kohompit ngai' no i mangkuk om i talam, 16 om i pakakas do tambaga' di winonsoi di Raja' Suliman di pakayon do hiri'd Walai'd Sasambayangan dot Agayo, iri no i duwo o torigi do tambaga', om i piro-piro o korita'-kuda' om i mimpun dit agayo, dit awagat kopio gisom dot a' no milo do tinimbang. 17 Iri nopo duwo o torigi do tambaga'ddi nga' miirad nopo do sopiwalu' o mito do kasawato', om haro goduwo o tambaga' do pinongulu di torigi'ddi do 1.3 mito do kasawato'. Pointutuk nopo di tambaga' di pinongulu di torigi'ddi nga' winansayan do pinoiyo-iyo do rantai do rinambo-rambot om dinakatan di winonsoi do pinoiyo-iyo do tua' do delima.
Tinanggayan do pisangod o Tulun do Yohuda do Kuminaa do Hilo'd Babil
18-19 Suwai no ko' iri, om tangkapo' no di Nobusaradan i Soraya, i Boyoon dot Agayo dot Imam, om i Sipania, i mongunguhup di Boyoon dot Agayo dot Imam, om i tolu o madtatamong di wawayaan di Walai'd Sasambayangan dot Agayo, om i limo o ponosihat di raja' di poundorong do hiri'd bandar, om i boyoon do soudor, om i wakil do boyoon do soudor di mongilo-ilo do karaja' di soudor, om it onom nohopod o tulun do suwai dit ongkipangkat. 20 Om oinsanan nopo i tulun diri do pinaatod dot id di Raja' Nobukadnisar do hilo'd bandar do Ribla, 21 i hilo'd watas do Hamat. Om pimbabagai noddi iyolo' om patayo' no. Om iyo noddi i tulun do Yohuda do pinosoliwan do mantad id pomogunan diyolo' do tinanggayan do pisangod do kumaa dot id pomogunan do pisangod.
I Godalia o Gobunor do Yohuda
22 Om pilio' noddi di Raja' Nobukadnisar i Godalia, i tanak di Ahikam, i manangaki di Sapan, do sumiliu'd gobunor do hilo'd Yohuda do momorinta' di tulun di noolu-olu' do hilo'. 23 Om soira' di norongou di piro-piro o boyoon do soudor om i soudor do Yohuda dit a' nakaakun do porintaon do Babil, i pinananggayan do pisangod di tulun do hilo', om ongoi ngai' no iyolo' solowot di Godalia do hilo'd Mispa. Iri nopo i boyoon do soudor diri om: i Ismail, i tanak di Nitania; i Yohanan, i tanak di Karia; i Soraya, i tanak di Tanhumit, i mantad hilo'd bandar do Nitopa; om i Yasania, i mantad hilo'd bandar do Maaka. 24 Om boro-boros noddi i Godalia dot id diyolo', “Kada' kou poddosi di piro-piro o pagawai do pomorinta' do hilo'd Babil. Mundorong kou nopod hiti'd pomogunan toko' om minsiriba' nopo dot id raja' do Babil. Om jominon ku i' dot angapasi kou i',” ka dau.1|160|HK14E| Wawayaan dot agayo di bandar do Babil|25.24 25 Nga' tontok di tulan do koturu' do toun diri om ongoi nod hilo'd Mispa i Ismail, i tanak di Nitania, i manangaki di Ilisama, i sinakagon do raja', do miniwoyo' do hopod o tulun. Om ngoyo' no diyolo' songodo' i Godalia om patayo' no diyolo' iyau, om i tulun do Yohuda om i tulun do Babil di poinsugku' di Godalia. 26 Om oinsanan nopo i tulun do Yohuda, dot i kaya' om i mosikin do mogiwoyo-woyo' di soudor do kuminaa do hilo'd Masir tu' moddosi iyolo' di tulun do Babil.
Pinalabus i Yoyakin do Mantad Hiri'd Giil
27 Tontok di tadau'd koduwo nohopod om turu' do tulan di kohopod om duwo do toun di kotolu nohopod om turu' do mantad di natanggayan i Yoyakin do hilo'd pomogunan do pisangod, om kosiliu nod raja' do hilo'd Babil i Iwil Mirodak, om polobuso' noddi dau i Yoyakin do mantad hiri'd giil, tu' osianan iyau di Yoyakin. 28 Om osonong i' i Iwil Mirodak dot id di Yoyakin. Om nonuan nogi' di Iwil Mirodak i Yoyakin do pangkat dit asawat ko' mantad di piro-piro o raja' di natanggayan do hilo'd Babil. 29-30 Om a' noddi i Yoyakin manampakai di pakayan do hiri'd giil. Om hiri kasai' noddid walai do raja' o taakanan dau om onuan nogi' iyau do tusin do maan do kosukup-sukupan dau.
Mantad dot id di Adam om Korikot dot id di Abraham
1 I Adam nopo om tapa' di Sit, om i Sit no om tapa' di Inos, om i Inos no om tapa' di Kinan, 2 om i Kinan no om tapa' di Mahalaliil, om i Mahalaliil no om tapa' di Yarid, 3 om i Yarid no om tapa' di Hinok, om i Hinok no om tapa' di Motusala, om i Motusala no om tapa' di Lamik, 4 om i Lamik no om tapa' di Nuu.
Nosiliu do Piro-Piro o Bansa' i Sinakagon di Nuu
Kianak i Nuu do tolu o kusai: i Sim, i Ham, om i Yapit. 5 Tangaanak nopo di Yapit do tongokusai om i Gomor, i Magog, i Madai, i Yawan, i Tubal, i Misik, om i Tiras. Om iyolo' no i taki-aki do bansa' di pinungaranan do ngaran diyolo'. 6 Sinakagon nopo di Gomor om i tulun di poingiyon do hilo'd Askinas, om hilo'd Ripat, om hilo'd Togarma. 7 Sinakagon nopo di Yawan om i tulun do poingiyon do hilo'd Ilisa, om hilo'd Sepanyol, om hilo'd Siprus, om hilo'd Rodis. 8 Tangaanak nopo di Ham do tongokusai om i Kus, i Masir, i Libia, om i Kanaan. Om iyolo' no o taki-aki di bansa' di pinungaranan do ngaran diyolo'. 9 Sinakagon nopo di Kus om i tulun do poingiyon do hilo'd Siba, om hilo'd Hawila, om hilo'd Sabta, om hilo'd Raima, om hilo'd Sabtika. Sinakagon nopo di Raima om i tulun di poingiyon do hilo'd Shiba om hilo'd Didan. 10 (Kianak i Kus do kusai dot i Nimrod o ngaran. Om i Nimrod no it id gulu kopio do nosiliu do sumasangod dit abantug kopio do hiti'd pomogunan.) 11 Sinakagon nopo di Masir om i tulun di poingiyon do hilo'd Lidia, om hilo'd Anamim, om hilo'd Lihabim, om hilo'd Naptuhim, 12 om hilo'd Patrusim, om hilo'd Kasluhim, om hilo'd Krita. (Om iyolo' no o sinolusukan di tulun do Pilistin.) 13 Tangaanak nopo di Kanaan do tongokusai om i Sidon, it id dotuo, om i Hit. Om iyolo' no i taki-aki di bansa' di pinungaranan do ngaran diyolo'. 14 Om i Kanaan nogi' i taki-aki di tulun do Yobusi, om Amori, om Girgasi, 15 om Howi, om Arki, om Sini, 16 om Arwadi, om Simari, om Hamati. 17 Tangaanak nopo di Sim do tongokusai om i Ilam, i Asur, i Arpaksad, i Lud, i Aram, i Us, i Hul, i Gitir, om i Misik. Om iyolo' no o taki-aki di bansa' do pinungaranan do ngaran diyolo'. 18 I Arpaksad nopo om tapa' di Sila, om i Sila no om tapa' di Ibir. 19 I Ibir nopo om kianak do duwo o kusai; iri nopo i tanak dau dit id dotuo om pinungaranan dot i Pilig tu' maso nopoddi om nokopogitongkiad-kiad no o tulun do hiti'd pomogunan. Om iri no koduwo om pinungaranan dot i Yoktan. 20 Sinakagon nopo di Yoktan om i tulun di poingiyon do hilo'd Almodad, om hilo'd Silip, om hilo'd Hasarmawit, om hilo'd Yira, 21 om hilo'd Hadoram, om hilo'd Usal, om hilo'd Dikla, 22 om hilo'd Ibal, om hilo'd Abimail, om hilo'd Shiba, 23 om hilo'd Opir, om hilo'd Hawila, om hilo'd Yobab.
Mantad dot id di Sim om Korikot dot id di Abraham
24-27 Poingkaa no o dopitar do ngaran do sinakagon di Sim do poimpuunon dot id dau om korikot dot id di Abraham: I Sim, i Arpaksad, i Sila, i Ibir, i Pilig, i Rohu, i Sorug, i Nahor, i Tira, i Abram (i rinoitan diri dot i Abraham.)
Sinakagon di Ismail
28 I Abraham nopo om kianak do duwo o kusai: i Isak om i Ismail. 29-31 Iri nopo tangaanak di Ismail om: i Nibayot, i tanak dau dot id dotuo, i Kidar, i Adbiil, i Mibsam, i Misma, i Duma, i Masa, i Hadad, i Tima, i Yotur, i Napis, om i Kidma. Om iyolo' no o nosiliu do taki-aki do hopod om duwo o payat. 32 Haro o tondu' do panakasawo di Abraham dot i Kotura o ngaran. Om onom o tanak diyolo' do kusai: i Simran, i Yoksan, i Midan, i Midian, i Isbak, om i Sua. I Yoksan nopo om kianak do duwo o kusai: i Shiba om i Didan. 33 Om limo o tanak di Midian do kusai: i Ipa, i Ipir, i Hanok, i Abida, om i Ildaa.
Sinakagon di Isau
34 I Isak nopo, i tanak di Abraham, om kianak do duwo o kusai: i Isau om i Yakub. 35 Tangaanak nopo di Isau do kusai om i Ilipas, i Rohuil, i Yius, i Yailam, om i Kora. 36 Om i Ilipas no o nosiliu do taki-aki do payat diti: Timan, Omar, Sipi, Gaitam, Kinas, Timna, om Amalik. 37 Om i Rohuil o nosiliu do taki-aki do payat do Nahat, Sira, Syama, om Misa.
I Tulun Mantad do Hilo'd Idom
38-42 Iri nopo tulun mantad do hilo'd pomogunan dot Idom om i sinakagon do tangaanak di Soir: i Lotan, i Syobal, i Sibion, i Ana, i Dision, i Isir, om i Disian. I Lotan nopo om taki-aki do sinompuruan do tulun do Hori om Homam. (Om haro o tobpinai di Lotan do tondu' dot i Timna o ngaran.) I Syobal nopo om taki-aki do sinompuruan do tulun dot Alyan, Manahat, Ibal, Sipi, om Onam. I Sibion nopo om kianak do duwo o kusai: i Aya om i Ana; i Ana nopo om tapa' di Dision. Om i Dision no o taki-aki do sinompuruan do tulun do Hamran, Isban, Yitran, om Kiran. I Isir nopo om taki-aki do sinompuruan do tulun do Bilhan, Saawan, om Yaakan. Om i Dision nopo om taki-aki do sinompuruan do tulun dot Us om Aran.
I Piro-Piro o Raja' dot Idom
43-50 Iti ngai' nopo raja' diti om minogisuhu-suhut do minomorinta' dot Idom dit aiso' po o raja' dot Israil: I Bila, i tanak di Bior, i mantad hilo'd Dinhaba I Yobab, i tanak di Sira, i mantad hilo'd Bosra I Husam, i mantad id watas do Timan I Hadad, i tanak di Bidad, i mantad hilo'd Awit, (iyau no i minangala' do tulun do Midian dot id iso' o pinisangadan do hilo'd watas do Muab.) I Samla, i mantad hilo'd Masrika I Saul, i mantad hilo'd Rihobot, it id tisan do bawang I Baal-Hanan, i tanak di Akbor I Hadad, i mantad hilo'd Pahu (sawo nopo dau om i Mihitabiil, i tanak di Matrid, i manangaki di Misahab). 51 Iri nopo tulun dot Idom om nopogibahagi-hagi' do piro-piro payat. Iri no i payat do Timna, Alya, Yitit, 52 Oholibama, Ila, Pinon, 53 Kinas, Timan, Mibsar, 54 Magdiol, om Iram.
Sinakagon di Yohuda
1 I Yakub nopo om kianak do hopod om duwo o tongokusai: I Rubin, i Simion, i Liwi, i Yohuda, i Isakar, i Sibulon, 2 i Dan, i Yusup, i Binyamin, i Naptali, i Gad, om i Asor. 3 I Yohuda nopo om kianak do limo o tongokusai. Tanak nopo dau di Batsua, i sawo dau, i tondu' do Kanaan diri, om tolu o kusai: i Or, i Onan, om i Sila. I Or nopo, i tanak dau dit id dotuo nga' ruminaat tomod o kowoyo-woyoon gisom do pinatai'ddi iyau'd Tuhan. 4 Om duwo po kawagu o tanak do kusai di Yohuda do pinaganak di Tamar, i sawo dau, i monongiwan daa dau: i Piris om i Sira. 5 I Piris nopo om kianak do duwo o kusai: i Hisron om i Hamul. 6 Om i Sira no, i tadi' dau, om kianak do limo o kusai: i Simri, i Itan, i Himan, i Kalkol, om i Dara. 7 I Akar nopo, i tanak di Karmi, om sinakagon i' di Sira, nga' pinoporikot iyau do kosusaan dot id tulun dot Israil tu' pinopoopi' iyau di dapu' di nanu do mantad id pisangadan di pinotobilang do patahakon dot id Kinorohingan. 8 I Itan nopo om iso' noo o tanak do kusai; do ngaran nopo om i Asaria.
Dopitar do Ngaran do Sinakagon di Raja' Daud
9 I Hisron nopo om kianak do tolu o kusai: i Yiramiil, i Ram, om i Kalib. 10 Iti ngai' no o dopitar do sinakagon do mantad id di Ram om gisom do korikot dot id di Isai: i Ram, i Aminadab, i Nahason (iyau no o songulun dit abantug dot id payat do Yohuda), 11 i Salmon, i Buas, 12 i Obid, om i Isai. 13 I Isai nopo om kianak do turu' o kusai. Om oirus nopo o tumur diyolo' do tumanud do ngaran diyolo'dti: I Iliab, i Abinadab, i Simia, 14 i Nitaniil, i Radai, 15 i Osim, om i Daud. 16 Om haro po o duwo tanak di Isai do tondu': i Soruya om i Abigail. I Soruya nopoddi, i tanak di Isai do tondu' om kianak do tolu o kusai: i Abisai, i Yoab, om i Asail. 17 Om iri no tanak di Isai do tondu' di tiso', i roitan dot i Abigail, om kinawin di Yitir, i sinakagon di Ismail. Om kianak diri iyolo' dot iso' o kusai dot i Amasa o ngaran.
Sinakagon di Hisron
18 I Kalib noo, i tanak di Hisron, om minangawin di Asuba. Om kianak iyolo' dot iso' o tondu' dot i Yiriot o ngaran. I Yiriot nopo om kianak do tolu o kusai: i Yisir, i Sobab, om i Ardon. 19 Om di nopoddi napatai i Asuba, om panansawo po kawagu i Kalib di Iprata. Om kianak po iyolo' dot iso' o kusai dot i Hur o ngaran. 20 Om tanak nopo di Hur om i Uri, om iri no i manangaki dau om i Bisaliil. 21 Tontok dit onom no nohopod o toun di Hisron, om kowino' no dau i tanak do tondu' di Makir, i tobpinai di Giliad do tondu'. Om kianak iyolo' dot iso' o kusai dot i Sogub o ngaran. 22 Om i Sogub no om kianak dot iso' o kusai dot i Yair o ngaran. Om minomorinta' i Yair do duwo nohopod om tolu o bandar do hilo'd watas do Giliad. 23 Nga' naala' di pomorinta' do Gosur om pomorinta' dot Aram ot onom nohopod o bandar do hilo', do kosuang no i kokompungan do Yair om Kinat om kohompit ngai' i kawalayan do hiri'd posorili'. Sinakagon nopo di Makir, i tapa' di Giliad, om i tulun di poingiyon dot id watas diri. 24 Om di nopoddi napatai i Hisron, om kowino' no di Kalib, i tanak di Hisron, i Iprata, i sawo daa di tapa' dau. Om kianak iyolo' dot iso' o kusai dot i Asur o ngaran. Om i Asur no o minomonsoi do bandar do Tokua.
Sinakagon di Yiramiil
25 I Yiramiil nopo, i tanak di Hisron dot id gulu, om kianak do limo o kusai: i Ram it id dotuo, i Buna, i Orin, i Osim, om i Ahia. 26-27 I Ram nopo om kianak do tolu o kusai: i Maas, i Yamin, om i Ikir. Om haro po kawagu o sawo di Yiramiil dot i Atara o ngaran. Om kianak iyolo' dot iso' o kusai dot i Onam o ngaran. 28 I Onam nopo om kianak do duwo o kusai: i Samai om i Yada. Om i Samai nopo om kianak do duwo o kusai: i Nadab om i Abisur. 29 Om kowino' no di Abisur ot iso' o tondu' dot i Abihail o ngaran. Om paganak no iyolo' do duwo o kusai: i Aban om i Molid. 30 I Nadab no, i tobpinai di Abisur, om kianak do duwo o kusai: i Silid om i Apaim; nga' i Silid nopo om aiso' i' o tanak do kusai do gisom do kinapatayo' dau. 31 I Apaim no om tapa' di Yisoi, om i Yisoi no om tapa' di Sisan, om i Sisan no om tapa' di Alai. 32 I Yada no, i tobpinai di Samai, om kianak do duwo o kusai: i Yitir om i Yonatan. Nga' i Yitir nopo om aiso' i' o tanak do kusai do gisom do kinapatayo' dau. 33 I Yonatan no om kianak do duwo o kusai: i Pilit om i Sasa. Om iri ngai' no o sinakagon di Yiramiil. 34 I Sisan nopo om aiso' i' o tanak do kusai; tongoondu' ngai' nopo o tanak dau. Nga' haro o turipon dau do tulun do Masir dot i Yarha o ngaran. 35 Om pokowinai no dau o tiso' di tanak dau'd tondu' di turipon dau'ddi. Om kianak diri iyolo' dot iso' o kusai dot i Atai o ngaran. 36 Iti no o dopitar do ngaran do sinakagon do mantad id di Atai om gisom do korikot dot id di Ilisama: i Atai, i Natan, i Sabad, 37 i Iplal, i Obid, 38 i Yohu, i Asaria, 39 i Hilis, i Ilasa, 40 i Sismai, i Salum, 41 i Yikamia, om i Ilisama.
Sinakagon di Kalib do Suwai
42 Iri nopo tanak di Kalib dot id dotuo, om i Misa o ngaran. I Kalib nopoddi om tobpinai di Yiramiil. I Misa nopo om tapa' di Sip. Om i Sip no om tapa' di Marisa. Om i Marisa no om tapa' di Hibron. 43 I Hibron nopo om kianak dot apat o kusai: i Kora, i Tapua, i Rikim, om i Sima. 44 I Sima nopo om tapa' di Raham, om taki di Yorkiam. I Rikam nopo, i tobpinai di Sima, om tapa' di Samai. 45 I Samai nopo om tapa' di Maon, om i Maon no om tapa' di Bait-Sur. 46 Om haro po o tondu' do panakasawo di Kalib dot i Ipa o ngaran. Om tolu o tanak do kusai diyo' Ipa di Kalib: i Haran, i Mosa, om i Gasis. Om i Haran nga' kianak i' dot iso' o kusai dot i Gasis o ngaran. 47 (Om haro o kusai dot i Yodai o ngaran do kianak dot onom o kusai: i Rigim, i Yotam, i Gisan, i Pilit, i Ipa, om i Saap.) 48 Om haro po kawagu o tondu' do panakasawo di Kalib dot i Maaka o ngaran. Om kianak iyolo' do duwo o kusai: i Sibir om i Tirhana. 49 Om paganak po kawagu i Maaka do duwo o kusai: i Saap, om i Siwa. I Saap nopo om minomonsoi do bandar do Madmana, om i Siwa, no om minomonsoi do bandar do Makbina om Gibia. Om haro po o tanak di Kalib do tondu' dot i Aksa o ngaran. 50 Iti po kawagu o sinakagon di Kalib: I Hur nopo om tanak di Kalib do kotuahan, do tanak diyolo' di Iprata, i sawo dau. Om i Syobal, i tanak di Hur do kusai, o minomonsoi di bandar do Kiriat Yiarim. 51 Om i Salma no, i tanak di Kalib do koduwo, om minomonsoi do bandar do Baitlahim, om i Harip no, i tanak di Kalib do kotolu, om minomonsoi do bandar do Bait-Gador. 52 I Syobal nopo, i minomonsoi do bandar do Kiriat-Yiarim, om taki-aki di tulun do Haroi, om i wookon do tulun do hilo'd Monuhot, 53 om iti piro-piro o sinompuruan do tulun di poingiyon do hilo'd Kiriat Yiarim: i sinompuruan do tulun do Yitri, Puti, Sumati, om Misrai. (Iyolo' no o sinolusukan di tulun do poingiyon do hilo'd bandar do Sora om hilo'd bandar dot Istaol.) 54 I Salma nopo, i minomonsoi do bandar do Baitlahim, om taki-aki di tulun do hilo'd Nitopa, om i hilo'd Atarot-Bait-Yoab, om i tulun do Sori, it iso' di duwo sinompuruan do tulun do poingiyon do hilo'd Manati. 55 (Iti ngai' no i sinompuruan do tulun di poingiyon do hilo'd bandar do Yabis. Om iyolo' no it ongoilo do monulis om manalin do surat di kiguna' kopio: i tulun do Tirati, om Simati, om Sukati. Om iyolo' no i tulun do Kini, i minangawin do tulun do Rikab.)
I Tangaanak di Raja' Daud
1-3 Iti ngai' no o ngaran do tangaanak di Daud do kusai do poingirus do tumur diyolo'. Om pinogkosusu iyolo' di maso di Daud do hilo'd Hibron. I Amnon, tina' nopo dau om i Ahinuam, i mantad hilo'd Yisriil I Daniol, tina' nopo dau om i Abigail, i mantad hilo'd Karmol I Absalom, tina' nopo dau om i Maaka, i tanak di Talmai, i raja' do Gosur I Adonia, tina' nopo dau om i Hagit I Sipasa, tina' nopo dau om i Abital I Yitriam, tina' nopo dau om i Igla. 4 Om hilo' ngai' nopod Hibron o kinosusuon dit onom o tanak diri; i hilo'd niyon di Daud do momorinta' do solinaid do turu' o toun om satanga'. Om hilo' nod Yorusalim om tolu nohopod om tolu o toun di Daud do minomorinta', tu' iyau no o raja' do hilo'. 5 Tontok di hilo' iyau om ogumu' po o tanak dau'd kusai. Om i Batsiba nopo, i tanak di Amiol, i sawo di Daud diri, om kianak dot apat o kusai: i Simia, i Sobab, i Natan, om i Suliman. 6 Om siam po kawagu o tanak di Daud do kusai: i Yibhar, i Ilisua, i Ilpilit, 7 i Noga, i Nipig, i Yapia, 8 i Ilisama, i Ilyada, om i Ilipilit. 9 Om suwai no ko' mantad diri om haro po o tangaanak di Daud do pinogkosusu di tongoondu' di panakasawo dau. Om haro nogi' o tanak dau'd tondu' dot i Tamar o ngaran.
Sinakagon di Raja' Suliman
10-14 Iti no o dopitar do ngaran do sinakagon di Raja' Suliman do korikot dot id di Yosia: i Suliman, i Rihabiam, i Abia, i Asa, i Yosapat, i Yihoram, i Ahasia, i Yoas, i Amasia, i Usia, i Yotam, i Ahas, i Hiskia, i Manasi, i Amon, i Yosia. 15 I Yosia nopo om kianak dot apat o kusai: i Yohanan, i Yoyakim, i Sodokia, om i Yoahas. 16 I Yoyakim nopo om kianak do duwo o kusai: i Yoyakin om i Sodokia.
Sinakagon di Raja' Yoyakin
17 Iti ngai' no i sinakagon di Raja' Yoyakin di natanggayan do tulun do Babil. I Yoyakin nopo om kianak do turu' o kusai: i Sialtiol, 18 i Malkiram, i Podaya, i Sinasar, i Yikamia, i Hosama, om i Nidabia. 19 I Podaya nopo om kianak do duwo o kusai: i Sorubabil om i Simoi. I Sorubabil nopo om kianak do duwo o kusai: i Mosulam om i Hanania; om iso' o tanak dau'd tondu' dot i Silomit o ngaran. 20 Om haro po kawagu o limo o tanak dau do kusai: i Hasuba, i Ohil, i Birikia, i Hasaya, om i Yusab-Hisid. 21 Om i Hanania nopo om kianak do duwo o kusai: i Pilasa om i Yosaya. I Yosaya nopo om tapa' di Ripaya, om i Ripaya no om tapa' di Arnan, om i Arnan no om tapa' di Abaya, om i Abaya no om tapa' di Sikania. 22 I Sikania nopo om kianak dot iso' o kusai dot i Somaya o ngaran. Om i Somaya no om kianak do limo o kusai: i Hatus, i Yigal, i Baria, i Niaria, om i Sapat. 23 I Niaria nopo om kianak do tolu o kusai: i Ilyoinai, i Hiskia, om i Asrikam. 24 I Ilyoinai nopo om kianak do turu' o kusai: i Hodawia, i Iliasib, i Polaya, i Akub, i Yohanan, i Dolaya, om i Anani.
Sinakagon di Yohuda
1 Iti no o wookon do sinakagon di Yohuda: i Piris, i Hisron, i Karmi, i Hur, om i Syobal. 2 I Syobal nopo om tapa' di Riaya, om i Riaya no om tapa' di Yahat, om i Yahat no om tapa' di Ahumai om i Lahad; om iyolo' no o taki-aki di tulun do poingiyon do hilo'd bandar do Sora. 3-4 I Hur no o tanak do totuo diyo' Iprata di Kalib. Om iri no i sinakagon di Hur o minomonsoi do bandar do Baitlahim. Om kianak i Hur do tolu o kusai: i Itam, i Ponuil, om i Isir. Om i Itam no om kianak do tolu o kusai: i Yisriil, i Isma, om i Idbas; om iso' o tanak dau do tondu' dot i Hasililponi o ngaran. I Ponuil no o minomonsoi do bandar do Gidor, om i Isir o minomonsoi do bandar do Husa. 5 I Asur nopo om duwo o sawo: i Hila om i Naara. Om i Asur no o minomonsoi do bandar do Tokua. 6 Om apat o tanak do kusai diyo' Asur di Naara: i Ahusam, i Hipir, i Timini, om i Ahastari. 7 Nga' tolu no o tanak do kusai diyo' Asur di Hila: i Sirit, i Yisohar, om i Itnan. 8 I Kos nopo om tapa' di Anub om i Hasobiba. Om i Kos no o taki-aki di sinakagon di Aharhil, i tanak di Harum. 9 Om haro o songulun do roitan dot i Yabis. Om iyau no i pusohon kopio dot id sompiiyon dau. I Yabis pogi' o pinomungaran di tina' di Yabis dau nga' noinggorit tomod i tina' di Yabis do minogkosusu dau. 10 Om sambayang no i Yabis dot id Kinorohingan dot Israil do poingkaa, “Oi Kinorohingan, barakatai oku no om onuwai oku no do tana' dit agayo. Woyoo' oku no om poinsoduwo' oku no do mantad id nunu nopo o kosusaan di monginggorit doho',” ka. Om sinimbar id Kinorohingan i sambayang dau.
Piro-Piro Kawagu o Dopitar do Ngaran do Sompiiyon
11 I Kalub nopo, i tobpinai di Suha, om kianak dot iso' o kusai, dot i Mohir o ngaran. Om i Mohir nopo om tapa' di Iston. 12 I Iston nopo om kianak do tolu o kusai: i Bait-Rapa, i Pasia om i Tohina. Om i Tohina no i minomonsoi do bandar do Nahas. Om sinakagon nopo do tulun diti om minomogun do hilo'd bandar do Rika. 13 I Kinas nopo om kianak do duwo o kusai: i Otniol om i Soraya. Om i Otniol nga' kianak nogi' do duwo o kusai: i Hatat om i Mionatai. 14 I Mionatai nopo om tapa' di Opra. I Soraya no om tapa' di Yoab, i minomonsoi di roitan do Rantai do Tukang. Tu' tukang ngai' nopo i tulun do poingiyon do hiri'd rantai'ddi. 15 I Kalib nopo, i tanak di Yopuni om kianak do tolu o kusai: i Iru, i Ila, om i Naam. Om tanak nopo di Ila om i Kinas. 16 I Yihaliliil nopo om kianak dot apat o kusai: i Sip, i Sipa, i Tiria, om i Asariil. 17-18 I Isra nopo om kianak dot apat o kusai: i Yitir, i Mirid, i Ipir om i Yalon. Om kowino' nod i Mirid i Bisa, i tanak do tondu' di raja' do Masir. Om kianak diri iyolo' dot iso' o tondu' dot i Miriam o ngaran, om duwo o tanak diyolo' do kusai: i Samai om i Yisba. Om i Yisba no i minomonsoi di bandar dot Istimoa. Om minangawin nogi' kawagu i Mirid dot iso' o tondu' do mantad id payat do Yohuda. Om kianak iyolo' do tolu o kusai: i Irid, i minomonsoi do bandar do Gidor, om i Hibir, i minomonsoi do bandar do Soko, om i Yokutiol, i minomonsoi do bandar do Sanua. 19 Om kowino' no di Hodia i tobpinai di Naham do tondu'. Om sinakagon nopo diyolo' nga' i sinompuruan do tulun do Garmi, i poingiyon do hilo'd bandar do Kohila, om i sinompuruan do tulun do Maaka, i poingiyon do hilo'd bandar do Istimoa. 20 I Simon nopo om kianak dot apat o kusai: i Amnon, i Rina, i Binhanan, om i Tilon. I Yisoi nopo om kianak do duwo o kusai: i Sohit om i Binsohit.
Sinakagon di Sila
21 I Sila nopo om tanak di Yohuda do kusai. Om iti ngai' no o sinakagon di Sila: i Or, i minomonsoi do bandar do Lika; om i Lada, i minomonsoi di bandar do Marisa; om i sinompuruan do tulun di mangangawol do kain linan, i songingiyon do hilo'd bandar do Bait-Asbia; 22 om Yokim, om i tulun do poingiyon do hilo'd bandar do Kosiba; om i Yoas om i Sarap, i kuminawin do tongoondu' do Muab, om i minundorong diri do hilo'd Baitlahim. (Iti nopo dopitar do ngaran diti om sinalin do mantad id buuk di gulu po kopio.) 23 Om iyolo' no i momorun do kuron om luping do don raja', om poingiyon iyolo' do hilo'd bandar do Nitaim om hilo'd Godora.
Sinakagon di Simion
24 I Simion nopo om kianak do limo o kusai: i Nomuil, i Yamin, i Yarib, i Sira, om i Saul. 25 I Saul nopo om tanak di Salum; om tanak no di Salum om i Mibsam om tanak no di Mibsam om i Misma. 26 Tanak nopo di Misma, om i Hamuil om tanak no di Hamuil, om i Sakur, om tanak no di Sakur om i Simoi. 27 I Simoi nopo om kianak do hopod om onom o tongokusai, om onom o tongoondu', nga' a' i' ogumu' o tanak di piro-piro o tobpinai dau. Om a' iddi koirad do sinakagon di Yohuda o sinakagon di Simion. 28 Pinomogunan nopo di sinakagon di Simion do gisom di pomorintaan di Raja' Daud, om id kabandaran diti: bandar do Borsiba, Molada, Hasar-Sual, 29 Bilha, Isim, Tolad, 30 Botuil, Horma, Siklag, 31 Bait-Markabot, Hasar-Susim, Bait-Biri, om Saaraim. 32 Om minomogun nogi' iyolo' dot id limo o bandar do suwai: bandar dot Itam, Ain, Rimon, Tokin, Asan, 33 om id kawalayan di posorili' do koiyonon diri om gisom do korikot do ponong id salatan do ponong id kotonobon do mantad id bandar do Baal. Om iti no i notulis do pasal do sinakagon di Simion om i kinoiyonon diyolo'. 34-38 Iti ngai' no i boyoon do sinompuruan do tulun dot id suang do payat di Simion: i Misobab, i Yamlik, i Yosa i tanak di Amasia, i Yoil, i Yohu, (i tanak di Yosibia, i Yosibia no om tanak di Soraya, i manangaki di Asiol), i Ilyoinai, i Yaakoba, i Yisohaya, i Asaya, i Adiol, i Yosimiol, i Bonaya, i Sisa, i tanak di Sipoi, (i Sipoi nopo om suminolusuk di Alon, om i Yodaya, i Simri, om i Somaya.) Om a' nopo tumingkod do guminumu' o sompiiyon diyolo', 39 om tongkop noddi iyolo' do ponong id kotonobon do gisom do hilo'd somok do bandar do Gidor. Om pomogompian nopo diyolo' do tayam-tayam diyolo' om id sampaping ponong id koulayon do mantad id rantai'ddi, i hiri'd kinoiyonon di bandar diyolo'. 40 Om kokito no iyolo' do sakot di torombung kopio dot id rantai dit agayo'ddi. Om osimbayan tomod o kinoiyon-iyono' do hiri om aiso' o koligagaanan. Om tulun mantad nopo di poingiyon do hiri om i tulun do Ham. 41 Om tontok dit i Raja' Hiskia o momorinta' do hilo'd Yohuda, om ongoi no i sinakagon di Simion do hilo'd Gidor om ngoyo' ngai' no diyolo' raago' i kiim om i sulap di tulun do hiri. Om uyungo' no diyolo' i tulun mantad do hiri om tungoliho' no diyolo'd miyon i pomogunan diri tu' agayo tomod i butur do hiri do paakan-akanan di tayam-tayam diyolo'. 42 Om limo po kawagu nahatus o tulun do mantad id payat do Simion do minongoi do hilo'd Idom, i ponong id koulayon. Minomoyo' nopo diyolo' om i tangaanak di Yisoi do kusai: i Polasa, i Niaria, i Ripaya, om i Usiol. 43 Om patayo' no diyolo' i tulun dot Amalik, di noolu-olu' do hiri. Om mantad poddi om hiri no iyolo' do momogun-mogun do gisom do baino'.
Sinakagon di Rubin
1 Iti no o sinakagon di Rubin, i tanak di Yakub dot id dotuo. (Om a' i Rubin nakaanu di tungkusan do gontok do tanak dit id dotuo, tu' minongoi i' iyau dudun di panakasawo di tapa' dau. Om i Yusup diri o noonuan di tungkusan diri. 2 Nga' sinakagon nopo dit okoris kopio dot id pogialatan do sinakagon di Yakub om i payat di Yohuda, om iri no payat diri o tadon do piro-piro o raja' dot Israil.) 3 I Rubin nopo, i tanak di Yakub dot id dotuo om kianak dot apat o kusai: i Hinok, i Palu, i Hisron, om i Karmi. 4-6 Iti no i sinakagon di Yoil, do mogisolusuk-lusuk: i Simaya, i Gog, i Simoi, i Mika, i Riaya, i Baal, om i Biira. Om i Biira nopo, i boyoon do payat do Rubin, om tinangkap di Tiglat-Pilisir i raja' dot Asur om tinanggayan diri dau iyau dot id pomogunan do pisangod. 7 Om tumanud nopo do dopitar do ngaran do sinakagon om iti ngai' no i piro-piro o boyoon do pinuruan do sompiiyon dit id suang do payat do Rubin: i Yoyol, i Sakaria, 8 i Bila i tanak di Asas, i manangaki di Sima, i mantad id pinuruan do sompiiyon di Yoil. Om pinomogunan nopo do pinuruan do sompiiyon diti om hilo'd Aroir, om i watas do mimpuun do hilo'd Aroir om poingkaa do ponong id utara do korikot do hilo'd Nibo om hilo'd Baal Mion. 9 Ogumu' kopio o tayam-tayam diyolo' do hilo'd watas do Giliad. Om gowoi poddi om iyono' no diyolo' o watas do poingrikot do hilo'd tana' do kowotuan, gisom do korikot do hilo'd Bawang dot Iprat do ponong id koulayon. 10 Tontok di pomorintaan di Raja' Saul, om ngoyo' no di payat di Rubin songodo' i pomogunan do Hagri, om patayo' ngai' no diyolo' o tulun do hiri di maso do misangod. Om solodo' noddi diyolo' i pomogunan do Giliad.
Sinakagon di Gad
11 Iri nopo sinakagon di Gad om minomogun do ponong hiri'd utara do watas do payat do Rubin, i hilo'd Basan om gisom do hilo'd Salka, i ponong id koulayon. 12 Boyoon nopo do pinuruan do sompiiyon dit abantug kopio om i Yoil, om koduwo no dot abantug om i Sapam. Om iri no boyoon do pinuruan do sompiiyon do suwai do hilo'd Basan om i Yainai om i Sapat. 13 Om iri no tulun do suwai do payat di Gad om poinsuang diti turu' o pinuruan do sompiiyon diti: pinuruan do sompiiyon di Mikail, di Mosulam, di Syoba, di Yorai, di Yakan, di Sia, om di Ibir. 14 Iyolo' ngai' nopodti om sinakagon di Abihail i tanak di Huri. Om suminolusuk iyolo' di: Abihail, i Huri, i Yaroa, i Giliad, i Mikail, i Yosisai, i Yado, om i Bus. 15 I Ahi no i tanak di Abdiol, i manangaki di Guni, o boyoon di piro-piro o pinuruan do sompiiyon diri. 16 Pinomogunan nopo diyolo' om hiri'd watas do Basan om Giliad, do hiri'd kabandaran dot id watas diri om pointongkop di kobuturan do hilo'd kinoiyonon do roitan do Saron. 17 Iti nopo dopitar do ngaran diti om tinulis do tontok di pomorintaan di Yotam, i raja' do Yohuda, om i Yirobiam i raja' dot Israil.
Soudor di Piro-Piro o Payat di Ponong id Koulayon
18 Mantad nopo id payat do Rubin, om Gad, om Manasi di ponong id koulayon, om apat nohopod om apat noribu om turu' nahatus om onom nohopod o soudor di nokopinsingilo do mamakai do kolid, om gayang, om pana'. 19 Om sinangod diyolo' i payat do Yotur, om Napis, om Nodab; iti nopo tolu o payat diti om id suang ngai' do bansa' do Hagri. 20 Om kaala' iddi di piro-piro o soudor diri i tulun diri tu' minogondos iyolo'd Kinorohingan om suminambayang do mokiuhup dau, om sinimbar iddi do Kinorohingan i sambayang diyolo' om pinamanang dau iyolo' do suminangod do tulun do Hagri om i suminokodung daa di tulun do Hagri. 21 Om naanu nopo diyolo' do mantad id pisangod om limo nohopod noribu ot unta, om duwo nahatus om limo nohopod noribu o dumba', om duwo noribu o kaladai, om hatus noribu o tulun do tinangkap do mantad id pisangadan. 22 Om ogumu'ddi o pisangod do napatai diyolo' tu' korohian id Kinorohingan i pinisangadan diri. Om hiri kasai' nod watas diri o pinomogun-mogunan diyolo' do gisom do norikot i maso do nangatanggayan do pisangod i tulun dot Israil.
I Payat do Manasi do Ponong id Koulayon
23 Pinomogun-mogunan nopo di payat do Manasi di ponong id koulayon om hiri'd watas do Basan gisom do ponong hilo'd Baal Hormon, Sonir om Nuluhon do Hormon i ponong id utara. Om oruuhai iyolo' do guminumu'. 24 Om iti ngai' no i boyoon do pinuruan do sompiiyon diyolo': i Hipir, i Yisoi, i Iliol, i Asriol, i Yoromia, i Hodawia om i Yadiol. Om iyolo' ngai' no i soudor do gunsiou om ongokoris.
Natanggayan do Pisangod i Piro-Piro o Payat di Ponong id Koulayon
25 Nga' a' i' tuminorodok i tulun dot Israil dot id Kinorohingan di tukuon di taki-aki diyolo'. Tuminongkiad iyolo' do Kinorohingan om tuminuku' diri dot id tingolig di piro-piro o bansa'd tulun di nuyung do Kinorohingan do mantad id pomogunan do Kanaan. 26 Om gowoi poddi om bininsuhu'ddi do Kinorohingan i Pul, i raja' dot Asur (it abantug do roitan dot i Tiglat-Pilisir) do minongoi panangod do pomogunan diyolo'. Om notimporon no do natanggayan do pisangod i payat do Rubin, om Gad om Manasi di ponong id koulayon om pinoiyon diri iyolo' do hilo'd Hala, om hilo'd Habor, om hilo'd Hara, om hilo'd kinoiyonon dit id somok do Bawang do Gosan. Om hilo' noddi iyolo' do minomogun-mogun do gisom do baino'.
Ngaran do Sinakagon di Liwi do Boyoon dot Agayo dot Imam
1 I Liwi nopo om kianak do tolu o kusai: i Girson, i Kohat, om i Morari. 2 I Kohat nopo om kianak dot apat o kusai: i Amram, i Yisar, i Hibron, om i Usiol. 3 I Amram nopo om kianak do duwo o kusai: i Harun om i Musa, om kianak iyau dot iso' o tondu' dot i Miriam o ngaran. I Harun nopo om kianak dot apat o kusai: i Nadab, i Abihu, i Iliasar om i Itamar. 4 Sinakagon nopo di Iliasar do mogisolusuk-lusuk om: i Pinihas, i Abisua, 5 i Buki, i Usi, 6 i Sorahia, i Mirayot, 7 i Amaria, i Ahitub, 8 i Sadok, i Ahimaas, 9 i Asaria, i Yohanan, 10 i Asaria (iyau no i minaganu-anu do hiri'd Walai'd Sasambayangan dot Agayo di winonsoi di Raja' Suliman do hilo'd Yorusalim), 11 i Amaria, i Ahitub, 12 i Sadok, i Salum, 13 i Hilkia, i Asaria, 14 i Soraya, om i Yosadak. 15 Om i Yosadak nga' nokotonggoi nogi' do tinanggayan di Raja' Nobukadnisar do miwoyo' di tulun do Yohuda om i tulun do poingiyon do hilo'd Yorusalim, tu' iyo noddi o korohian do Tuhan.
Sinakagon di Liwi do Suwai
16 I Liwi nopo om kianak do tolu o kusai: i Girson, i Kohat, om i Morari. 17 Om iyolo' nga' ongkiangaanak nogi' do tongokusai. I Girson nopo om tapa' di Libni om i Simoi. 18 I Kohat no om tapa' di Amram, i Yisar, i Hibron, om i Usiol; 19 om i Morari no om tapa' di Mali om i Musi. 20 Iti ngai' no o sinakagon di Girson do mogisolusuk-lusuk: i Libni, i Yahat, i Sima, 21 i Yoa, i Ido, i Sira, om i Yiatirai. 22 Iti ngai' no o sinakagon di Kohat do mogisolusuk-lusuk: i Aminadab, i Kora, i Asir, 23 i Ilkana, i Ibiasap, i Asir, 24 i Tahat, i Uriol, i Usia, om i Saul. 25 I Ilkana nopo om kianak do duwo o kusai: i Amasai om i Ahimot. 26 Om sinakagon nopo di Ahimot do mogisolusuk-lusuk om: i Ilkana, i Sopai, i Nahat, 27 i Iliab, i Yiroham, om i Ilkana. 28 I Somuil nopo om kianak do duwo o kusai: i Yoil ot id dotuo om i Abia it id domulok. 29 Iti no o sinakagon di Morari do mogisolusuk-lusuk: i Mali, i Libni, i Simoi, i Usa, 30 i Simia, i Hagia, om i Asaya.
I Pouuni do Tuunion dot id Walai'd Sasambayangan dot Agayo
31 Iti ngai' no i tulun di nonuan di Raja' Daud do karaja' do pouuni do tuunion do hiri'd Walai'd Sasambayangan dot Agayo do hilo'd Yorusalim, do mantad poddi nakawaliu do hiri i Kaban do Tumpongo. 32 Om tontok dit a' po di Raja' Suliman nowonsoi i Walai'd Sasambayangan dot Agayo om mogisowoli-woli nopo iyolo' do maganu-anu do hiri'd Kiim do Tuhan. 33 Om iti no o dopitar do ngaran do tulun di mogisolusuk-lusuk di nonuan do karaja': Mantad nopo dot id pinuruan do sompiiyon di Kohat om: i Himan, i tanak di Yoil, i momoyo' di tinimungan do modsisinding do koiso'. Om iti no i sinolusukan di Himan do pinoguli' dot id di Yakub: i Himan, i Yoil, i Somuil, 34 i Ilkana, i Yiroham, i Iliol, i Toa, 35 i Sup, i Ilkana, i Mahat, i Amasai, 36 i Ilkana, i Yoil, i Asaria, i Sipania, 37 i Tahat, i Asir, i Ibiasap, i Kora, 38 i Yisar, i Kohat, i Liwi, om i Yakub. 39 I Asap nopo om momoyo' di tinimungan do modsisinding do koduwo. Om iti no o sinolusukan di Asap do pinoguli' dot id di Liwi: i Asap, i Borokia, i Simia, 40 i Mikail, i Baasiya, i Malkia, 41 i Itai, i Sira, i Adaya, 42 i Itan, i Sima, i Simoi, 43 i Yahat, i Girson, om i Liwi. 44 I Itan no, i mantad id pinuruan do sompiiyon di Morari o momoyo' di tinimungan do modsisinding do kotolu. Om iti no i sinolusukan di Itan do pinoguli' dot id di Liwi: i Itan, i Kisi, i Abdi, i Maluk, 45 i Hasabia, i Amasia, i Hilkia, 46 i Amsi, i Bani, i Simir, 47 i Mali, i Musi, i Morari, om i Liwi. 48 Om iri no sinakagon di Liwi do suwai om nonuan do karaja' do suwai do hiri'd Walai'd Sasambayangan dot Agayo.
Sinakagon di Harun
49 I Harun nopo om i sinakagon dau om modtututud do kominyan om papatahak di porsombahan do sorobon do hiri'd pananaraban do porsombahan. Iyolo' no i mongilo-ilo do koinsanai'd wonsoyon do tontok do sumambayang do hiri'd kinoiyonon dit Olidang Kopio om papatahak do porsombahan do pangampun do dusa do tulun dot Israil. Om wonsoyo' ngai' nopo diyolo' iti do tumanud di pinonuhuan di Musa, i susuhuon do Kinorohingan. 50 Iti no o dopitar do ngaran do sinakagon di Harun: i Iliasar, i Pinihas, i Abisua, 51 i Buki, i Usi, i Soraya, 52 i Mirayot, i Amaria, i Ahitub, 53 i Sadok om i Ahimaas.
Tiyonon di Tulun do Liwi
54 Kinoiyonon nopo di pinatahak dot id sompiiyon di Kohat, i sinakagon di Harun om i bahagi' di koiso' do mantad id watas do pinatahak dot id tulun do Liwi. 55 Kosuang nopod watas diti om bandar do Hibron, it id watas do Yohuda om i kobuturan do hiri'd posorili'. 56 Nga' iri nopo koumaan om i kokompungan do hiri'd posorili' di bandar diri om pinatahak i' dot id di Kalib, i tanak di Yopuni. 57-59 Iti ngai' no o bandar do pinatahak dot id sinakagon di Harun: Hibron, i bandar do pogintirungan diri, om Yatir, om i kabandaran do Libna, Istimoa, Hilon, om Dobir, Asan, om Bait-Simis om mitonggoi di kobuturan do hilo'. 60 Om hilo' nod watas do Binyamin om iti ngai' no o bandar do pinatahak dot id diyolo' do mitonggoi di kobuturan do hiri: Giba, Alimit, om Anatot. Oinsanan nopo om hopod om tolu o bandar do tiyonon do koinsanai di sompiiyon diyolo'. 61 Om hiri nod watas do Manasi do ponong id kotonobon om hopod o bandar do pinatahak dot id pinuruan do sompiiyon di Kohat do pinotikid di sompiiyon dit a' po nobohogian do tana'. Om nundi' iti do pinatahak dot id diyolo'. 62 Om iri no i piro-piro o sompiiyon dit id suang do pinuruan do sompiiyon di Girson, om pinotikid di sompiiyon o hopod om tolu o bandar dot ongokooro' do hiri'd watas dot Isakar, Asor, Naptali, om Manasi ponong id koulayon do hilo'd Basan. 63 Om iri nogi' i hopod om duwo o bandar do hilo'd watas do Rubin, Gad, om Sibulon nga' pinatahak i' dot id pinuruan do sompiiyon di Morari, om pinotikid di piro-piro o sompiiyon dot id pinuruan diri. 64 Om iyo noddi o pinamahagi' di tulun dot Israil di bandar do tiyonon di tulun do Liwi, do mitonggoi di kobuturan do hiri'd posorili' di bandar. 65 (Om iri nogi' i kabandaran do hiri'd watas do Yohuda, om Simion, om Binyamin di nangarait di tiinu' nga' nundi' i' do pinapatahak.) 66 Om haro nogi' o piro-piro o sompiiyon do mantad id pinuruan do sompiiyon di Kohat do nonuan do bandar om kobuturan do hilo'd watas dot Ipraim: 67 i bandar do Sikim, i bandar do pogintirungan dot id watas do konulu-nuluan dot Ipraim, om Gisir, 68 Yokmiam, Bait-Horon, 69 Ayalon, om Gat-Rimon. 70 Om hilo' nod watas do Manasi di ponong id kotonobon om pinatahak dot id diyolo' i bandar dot Anor om Biliam do mitonggoi di kobuturan do hiri'd posorili'. 71 Om iri no sompiiyon dit id suang do pinuruan do sompiiyon di Girson om nonuan do piro-piro o bandar diti do mitonggoi do kobuturan do hiri'd posorili': Hilo' nopod watas do Manasi di ponong id koulayon om: Golan, i hilo'd Basan, om Astarot. 72 Hilo'd watas dot Isakar: Kidis, Dabirat, 73 Ramot, om Anim. 74 Hilo'd watas dot Asor: Masal, Abdon, 75 Hukok om Rihob. 76 Hilo'd watas do Naptali: Kidis, i hilo'd Galilia, om Hamon, om Kiriataim. 77 Om iri no sinakagon di Morari dit a' po nakaanu do tana', om nonuan do piro-piro bandar diti do mitonggoi di kobuturan do hiri'd posorili': Hilo'd watas do Sibulon: Rimono om Tabor. 78 Hilo'd watas do Rubin, i ponong id koulayon do mantad id Bawang do Yordan i hilo'd somok do Yorikou: Bisir, i tana' dot apatau dot id konulu-nuluan, om Yahas, 79 Kidimot om Mipaat. 80 Hilo'd watas do Gad: Ramot, i hilo'd Giliad, om Mahanaim, 81 Hisbon, om Yaisir.
Sinakagon di Isakar
1 I Isakar nopo om kianak dot apat o kusai: i Tola, i Pua, i Yasub, om i Simron. 2 I Tola nopo om kianak dot onom o kusai: i Usi, i Ripaya, i Yoriol, i Yamai, i Yibsam, om i Somuil. Om iyolo' ngai' no o boyoon do sompiiyon di pinuruan do sompiiyon di Tola om soudor nogi' iyolo' dit angabantug do gunsiou. Tontok di pomorintaan di Daud om kogumuo' nopo do sinakagon diyolo' om 22,600 o tulun. 3 I Usi no om kianak dot iso' o kusai dot i Yisraya o ngaran. I Yisraya no om it apat o tanak dau'd kusai o boyoon di pinuruan do sompiiyon. Ngaran nopo dit apat o tanak di Yisraya diri om i Mikail, i Obaya, i Yoil, om i Yisia. 4 Ogumu' tomod o sawo om tangaanak diyolo' gisom do milo i' iyolo' do potobilang do tolu nohopod om onom noribu o tongokusai do sumiliu'd soudor. 5 Om tumanud nopo di dopitar do ngaran di tinulis do pomorinta' om oinsanan nopo i sinakagon di Isakar om 87,000 o tongokusai di milo do sumiliu'd soudor.
Sinakagon di Binyamin om i Dan
6 I Binyamin nopo om kianak do tolu o kusai: i Bila, i Bikir, om i Yidiaol. 7 I Bila no om kianak do limo o kusai: i Isbon, i Usi, i Usiol, i Yirimot, om i Iri. Iyolo' no i boyoon do sompiiyon dot id suang do pinuruan do sompiiyon diyolo' dot abantug do soudor do gunsiou. Id suang nopo do sinakagon diyolo' om haro i' o 22,034 o tongokusai di milo do sumiliu'd soudor. 8 I Bikir nopo om kianak do siam o kusai: i Somira, i Yoas, i Iliasor, i Ilyoinai, i Omri, i Yirimot, i Abia, i Anatot, om i Alimit. 9 Tumanud nopo di dopitar do ngaran di tinulis do pomorinta' om oinsanan nopo i sompiiyon dit id suang do sinakagon diyolo' om haro i' o 20,200 o tongokusai di milo do sumiliu'd soudor. 10 I Yidiaol nopo om kianak dot iso' o kusai dot i Bilhan o ngaran. Om i Bilhan no om kianak do turu' o kusai: i Yousi, i Binyamin, i Ihud, i Kinaana, i Sitan, i Tarsis, om i Ahisahar. 11 Om iyolo' no i boyoon do sompiiyon dot id suang do pinuruan do sompiiyon diyolo' dit angabantug do soudor di gunsiou. Kogumuo' nopo do tongokusai diyolo' di milo do sumiliu'd soudor om 17,200 o tulun. 12 I Supim nopo di Hupim om sinakagon di Ir. I Husim no om sinakagon di Dan.
Sinakagon di Naptali
13 I Naptali nopo om kianak dot apat o kusai: i Yasiol, i Guni, i Yisir, om i Salum. Iyolo' nopo om sinakagon di Bilha.
Sinakagon di Manasi
14 Om kianak iyo' Manasi di tondu' dot Aram di panakasawo dau, do duwo o kusai: i Asriol om i Makir. I Makir nopo om tapa' di Giliad. 15 Om pogihumai no di Makir do sawo i Hupim om i Supim. Ngaran nopo di sawo di Makir om i Maaka. Om ngaran nopo di tanak di Makir do koduwo om i Silapihad. Tongoondu' ngai' nopo o tangaanak di Silapihad, om aiso' i' o tongokusai. 16 Om paganak no i Maaka, i sawo di Makir, do duwo o kusai. Om pungaranai no i duwo o tanak diri dot i Piris om i Siris. I Piris no om kianak do duwo o kusai: i Ulam om i Rikim. 17 I Ulam no om kianak dot iso' o kusai dot i Bidan o ngaran. Om sinakagon ngai' nopo iyolo' di Giliad, i tanak di Makir, i manangaki di Manasi. 18 I Molikit no, i tobpinai di Giliad do tondu' om kianak do tolu o kusai; i Isihod, i Abiosor, om i Mahla. 19 I Somida no om kianak dot apat o kusai: i Ahian, i Sikim, i Liki, om i Aniam.
Sinakagon di Ipraim
20 I Ipraim nopo om kianak do tolu o kusai: i Sutila, i Isir om i Ilad. Iti ngai' no o sinakagon di Ipraim do minogisolusuk-lusuk: i Sutila, i Birid, i Tahat, i Ilada, i Tahat, 21 i Sabad om i Sutila. Om haro po o duwo o tanak di Ipraim do kusai: i Isir om i Ilad. Nga' pinatai iyolo' tu' minongoi iyolo' panakau di tayam-tayam do tulun di poingiyon mantad do hilo'd bandar do Gat. 22 Om mogihad nopoddi i tapa' diyolo' do piro-piro o tadau do koloido', om ninsasamadan po iyau di piro-piro o tobpinai dau. 23 Om ongoi noddi kawagu i Ipraim dudun di sawo dau om ponontian no i sawo dau, om kosusu no do tanak do kusai. Om pungaranai no diyolo' i tanak diri dot i Boria tu' haro i' o kosusaan do nokoontok di sompiiyon diyolo'. 24 I Ipraim nopo om kianak dot iso' o tondu' dot i Siira o ngaran. Om i Siira no o minomonsoi di bandar do Bait-Horon do ponong id sokid om i Bait-Horon do ponong id siba', om i bandar dot Usa om Siira. 25 Om kianak po i Ipraim dot iso' o kusai dot i Ripa o ngaran. Om iti no o sinakagon di Ripa: i Risip, i Tila, i Tahan, 26 i Ladan, i Amihud, i Ilisama, 27 i Nun, om i Yosua. 28 Om iri nopo watas do naanu diyolo' om i noiyon diyolo' om kosuang no o Baitol, om i kokompungan do hiri'd posorili' om poingkaa po do hilo'd Naaran, i ponong id koulayon, om hilo'd Gisir, i ponong id kotonobon. Om kohompit nogi' o bandar do Sikim om Aya, om i kokompungan do hiri'd posorili'. 29 Om iri no sinakagon di Manasi o minomohuruan do mongilo-ilo do Bait-Sian, Taanak, Mogido, Dor om i kokompungan do hiri'd posorili'. Om iri ngai' no i kinoiyonon do pinomogun-mogunan di sinakagon di Yusup, i tanak di Yakub.
Sinakagon di Asor
30 Iti ngai' no o sinakagon di Asor. Kianak i Asor dot apat o kusai: i Yimna, i Yiswa, i Yiswi, om i Biria, om iso' o tanak do tondu' dot i Sira o ngaran. 31 I Biria nopo om kianak do duwo o kusai: I Hibir om i Malkiol. Om i Malkiol no o minomonsoi do bandar do Birsait. 32 I Hibir no om kianak do tolu o kusai: i Yaplit, i Somir, i Hotam, om iso' o tondu' dot i Sua o ngaran. 33 Om i Yaplit nga' kianak i' do tolu o kusai: i Pasak, i Bimhab om i Aswat. 34 Om i Simir, i tobpinai dau do kusai nga' kianak i' dot apat o kusai: i Ahi, i Roga, i Yohuba om i Aram. 35 I Hotam no, i tobpinai di Yaplit do kusai om kianak dot apat o kusai: i Sopa, i Imna, i Silis om i Amal. 36 Sinakagon nopo di Sopa om i Sua, i Harnipir, i Syual, i Bori, i Imra, 37 i Bisir, i Hod, i Sama, i Silsa, i Yitran om i Biira. 38 Sinakagon nopo di Yitir om i Yopuni, i Pispa om i Ara. 39 Om sinakagon no di Ula om i Ara, i Haniol om i Risia. 40 Iri ngai' no o sinakagon di Asor. Om iyolo' no i boyoon do sompiiyon om soudor dit angabantug do gunsiou om boyoon dit angabantug o ngaran. Iri nopo sinakagon di Asor om haro i' o 26,000 o tongokusai di milo do sumiliu'd soudor.
Sinakagon di Binyamin
1 I Binyamin nopo om kianak do limo o kusai. Om iti no o ngaran diyolo' do poingirus do tumur diyolo': i Bila, i Asibil, i Ara, 2 i Noha om i Rapa. 3 Sinakagon nopo di Bila om i Adar, i Gira, i Abihud, 4 i Abisua, i Naaman, i Ahoa, 5 i Gira, i Sopupan om i Horam. 6-7 Sinakagon nopo di Ihud om i Naaman, i Ahia om i Gira. Iyolo' ngai' no i boyoon do sompiiyon di poingiyon daa do hilo'd Giba di gulu po. Nga' nouyung iddi iyolo' om ongoi no iyolo' undorong do hilo'd Manahat. Minomoyo' nopo diyolo' om i Gira, i tapa' di Usa om i Ahihud. 8-9 Om adaai no di Saharaim o duwo di sawo dau, i Husim om i Baara. Om panansawo poddi kawagu iyau di hilo' iyau'd watas do Muab. Om kinawin nopo dau nga' i Hodis. Om paganak no iyolo' do turu' o kusai: i Yobab, i Sibia, i Misa, i Malkam, 10 i Yius, i Sokia om i Mirma. Om nosiliu ngai' nopo do boyoon do sompiiyon i tangaanak dau'ddi. 11 Om kianak po iyo' Saharaim di Husim, i sawo dau'ddi, do duwo o kusai: i Ahitub om i Ilpaal. 12 Om i Ilpaal nopo om kianak do tolu o kusai: i Ibir, i Misam om i Simid. Om i Simid no o minomonsoi di bandar dot Ono om Lod om i kokompungan do hiri'd posorili'.
Sinakagon di Binyamin do Hilo'd Gat om Hilo'd Ayalon
13 I Biria no om i Sima o boyoon do sompiiyon di poingiyon do hilo'd bandar dot Ayalon. Om nuyung diyolo' i tulun di poingiyon do hilo'd Gat. 14-16 Sinakagon nopo di Biria om i Ahio, i Sasak, i Yirimot, i Sobaya, i Arad, i Idir, i Mikail, i Yispa om i Yoha.
Sinakagon di Binyamin do Hilo'd Yorusalim
17 Sinakagon nopo di Ilpaal om i Sobaya, i Mosulam, Hiski, Hibor, 18 i Yismorai, i Yislia om i Yobab. 19 Sinakagon nopo di Simoi om i Yakim, i Sikri, i Sabdi, 20 i Ilyoinai, i Silotai, i Iliol, 21 i Adaya, i Boraya om i Simrat. 22 Sinakagon no di Sasak om i Yispan, i Ibir, i Iliol, 23 i Abdon, i Sikri, i Hanan, 24 i Hanania, i Ilam, i Antotia, 25 i Yipdiya om i Ponuil. 26 Sinakagon nopo di Yiroham om i Samsorai, i Soharia, i Atalia, 27 i Yaarisia, i Ilia om i Sikri. 28 Om iyolo' no i taki-aki di tulun di nosiliu'd boyoon do sompiiyon, om nokotulis dot id pinotulisan do ngaran di suminolusuk diyolo'. Om hilo' nod Yorusalim do poingiyon i suminolusuk diyolo'.
Sinakagon di Binyamin do Hilo'd Gibion om Hilo'd Yorusalim
29 I Yoyol no o minomonsoi do bandar do Gibion om undorong noddi iyau do hilo'. Sawo nopo dau om i Maaka, 30 om tanak no dau do kusai dit id dotuo om i Abdon. Tangaanak nopo dau'd kusai do suwai om i Sur, i Kis, i Baal, i Nor, i Nadab, 31 i Gidor, i Ahio, i Sakaria, 32 om i Miklot, i tapa' di Simia. Om niyon nopo di sinakagon diyolo' do suwai om hilo'd Yorusalim, do poinsugku' di piro-piro o sompiiyon do suwai di mantad id pinuruan do sompiiyon diyolo'.
Sompiiyon di Raja' Saul
33 I Nor nopo om tapa' di Kis, om i Kis no om tapa' di Raja' Saul. I Saul nopo om kianak dot apat o kusai: i Yonatan, i Malkisua, i Abinadab om i Isbaal. 34 I Yonatan nopo om tapa' di Moribaal, om i Moribaal no om tapa' di Mika. 35 I Mika nopo om kianak dot apat o kusai: i Piton, i Milik, i Taria om i Ahas. 36 I Ahas nopo om tapa' di Yoada. Om i Yoada no om kianak do tolu o kusai: i Alimit, i Asmawit om i Simri. I Simri nopo om tapa' di Mosa, 37 om i Mosa no om tapa' di Bina, om i Bina no om tapa' di Rapa, om i Rapa no om tapa' di Ilasa, om i Ilasa no om tapa' di Asil. 38 I Asil no om kianak dot onom o kusai: i Asrikam, i Bokru, i Ismail, i Siaria, i Obaya om i Hanan. 39 I Isik no, i tobpinai di Asil do kusai, om kianak do tolu o kusai: i Ulam it id dotuo, i Yius, om i Ilipilit. 40 Iri nopo tangaanak di Ulam om soudor ngai' nopo dit ongosiou om mamamana' dit ongotiru'. Om kianak i Ulam do tongokusai do 150 o tulun do kogumuo'. Om iyolo' ngai' no o sinakagon di Binyamin.
Tulun di Nokoguli' do Mantad id Pomogunan di Pinananggayan do Pisangod Diyolo'
1 Iri nopo tulun dot Israil om pinodopitar o ngaran do tumanud di ngaran do sompiiyon diyolo', om pinotulis do hiri'd suang do Buuk do Raja' Ngai' dot Israil. Iri nopo tulun do Yohuda, om tinanggayan do hilo'd Babil, tu' iri no o pomohukum di dusa diyolo'. 2 Iri nopo tulun dit id gulu kopio guli' do hilo'd tana' diyolo' do hiri'd kabandaran om i tulun dot Israil di tulun tomood, om i piro-piro ot imam, om i tulun do Liwi, om i maganu-anu do hiri'd Walai'd Sasambayangan dot Agayo. 3 Iri nopo payat do Yohuda, om Binyamin om Ipraim, om Manasi, om miniyon do hilo'd Yorusalim. 4-6 Oinsanan nopo om 690 o sompiiyon do mantad id payat do Yohuda do miniyon do hilo'd Yorusalim. Om kohompit nogi' i sinakagon di tolu o tanak di Yohuda di roitan dot i Piris, i Sila om i Sira. Boyoon nopo di sinakagon di Piris, om i Utai, i tanak di Amihud, i manangaki di Omri. Om taki-aki nopo di Utai do suwai, om i Imri om i Bani. Boyoon nopo di sinakagon di Sila, om i Asaya. Om iyau no o nosiliu do boyoon do sompiiyon dau. Boyoon nopo di sinakagon di Sira, om i Yuil. 7-9 Om iti ngai' no i tulun do mantad id payat do Binyamin do minomogun-mogun do hilo'd Yorusalim: I Salu, i tanak di Mosulam, i manangaki di Hodawia, om manangaki di Hasinua, i tapa' di Hodawia. I Yibnia, i tanak di Yiroham I Ila i tanak di Usi, i manangaki di Mikri I Mosulam, i tanak di Sopasa, i manangaki di Rohuil, om manangaki di Yibnia, i tapa' di Rohuil. Oinsanan nopo om 956 o sompiiyon do mantad id payat diri. Iri nopo ngaran di nangarait diri om boyoon ngai' nopo do sompiiyon.
I Piro-Piro ot Imam do Poingiyon do Hilo'd Yorusalim
10-12 Iti ngai' no it imam do poingiyon do hilo'd Yorusalim: I Yoyada, i Yoyarib, i Yakin. I Asaria i tanak di Hilkia, (i Asaria nopo om boyoon do pagawai do hiri'd Walai'd Sasambayangan dot Agayo.) Komolohingan nopo dau om i Mosulam, i Sadok, i Mirayot om i Ahitub. I Adaya i tanak di Yiroham; komolohingan nopo dau om i Pasur om i Malkia. I Masai, i tanak di Adiol; komolohingan nopo dau om i Yasira, i Mosulam, i Mosilimit om i Imor. 13 Iri ngai' nopo it imam di nosiliu'd boyoon do sompiiyon om 1,760 o tulun. Om iyolo' no it ongoilo kopio do kumaraja' do hiri'd Walai'd Sasambayangan dot Agayo.
Tulun do Liwi di Poingiyon do Hilo'd Yorusalim
14-16 Iti ngai' no o tulun do Liwi do poingiyon do hilo'd Yorusalim: I Somaya i tanak di Hasub; komolohingan nopo dau om i Asrikam om i Hasabia i mantad id payat do Morari. I Bakbakar, i Hiris om i Galal. I Matania i tanak di Mika, komolohingan nopo dau om i Sikri om i Asap. I Obaya, i tanak di Somaya; komolohingan nopo dau om i Galal om i Yodutun. I Birikia i tanak di Asa, i manangaki di Ilkana, i poingiyon do hilo'd watas do bandar do Nitopa.
I Madtatamong do Walai'd Sasambayangan dot Agayo di Poundorong do Hilo'd Yorusalim
17 Iti ngai' no i madtatamong di Walai'd Sasambayangan dot Agayo di poingiyon do hilo'd Yorusalim: i Salum, i Akub, i Talmon om i Ahiman, om i piro-piro o koobpinayan diyolo'. I Salum no o boyoon diyolo'. 18 Om iri no piro-piro o tulun do mantad id pinuruan do sompiiyon diyolo' o nonuan do karaja' do madtamong di wawayaan do roitan do Wawayaan dot Agayo do Raja' di ponong hiri'd koulayon, do gisom do dinondo. Di nopo di gulu po om karaja' nopo diyolo' om madtamong do hiri'd piro-piro o wawayaan di kumaa dot id kokiiman do tulun do Liwi. 19 I Salum no, i tanak di Kori, i manangaki di Ibiasap, om i piro-piro o tulun do suwai do mantad id pinuruan do sompiiyon di Kora o nonuan do karaja' do madtamong di wawayaan di Kiim do Tuhan, do miagal di komolohingan diyolo' di gulu po tu' minaganu-anu do hiri'd kiim do Tuhan. 20 I Pinihas, i tanak di Iliasar nga' nokoumbal id nosiliu do boyoon diyolo' di gulu po. Maha' daa om woyoon kasai' iyau'd Tuhan! 21 I Sakaria nogi', i tanak di Mosilimia nga' nokoumbal id madtamong di wawayaan do Kiim do Tuhan. 22 Oinsanan nopo om 212 o tulun di nopili' do madtatamong di wawayaan dot agayo. Om tinulis o ngaran diyolo' do tumanud do ngaran di kampung do nokoiyonon diyolo'. Om iyo' Raja' Daud no di Nabi Somuil o minanahak di taki-aki diyolo' do karaja' do miagal diri. 23 Om pinotilombus i' diyolo' om i sinakagon diyolo' i karaja'ddi do madtamong do wawayaan di Walai'd Sasambayangan dot Agayo. 24 Om haro ngai' nopo o wawayaan do ponong id utara, om salatan, om koulayon om kotonobon. Om otikid nopo do boyoon do tulun do madtamong i piro-piro o wawayaan diri. 25 Om uhupan i' i piro-piro o madtatamong diri di koobpinayan diyolo' di songingiyon dot id kawalayan do hilo'. Om mogisowoli-woli nopo iyolo' do mongoi ponguhup diyolo' do soroturu-turu' o tadau dot insan. 26 Iri nopo it apat o tulun do boyoon di madtatamong diri om mantad id tulun do Liwi. Om iyolo' no i mongilo-ilo kopio di karaja'ddi. Om iyolo' nogi' i mongilo-ilo di piro-piro o bilik do hiri'd Walai'd Sasambayangan dot Agayo om koinsanai di konunu-nunuan di songingopi' do hiri. 27 Om iyonon nopo diyolo' om hiri'd toning di Walai'd Sasambayangan dot Agayo tu' iyolo' no it apatut do madtamong om mongingiwang di wawayaan do monikid kosuabon.
Tulun do Liwi di Suwai
28 Iri no tulun do Liwi do suwai om mongilo-ilo ngai' di pakakas do pakayon do sumambayang. Om piintaban diyolo' i pakakas diri do pointikid-tikid do posoliwanon om pogulion kawagu. 29 Om iri no suwai om mongilo-ilo di pakakas di pakayon do sumambayang, om i tapung, om waig dot anggur, om tumau do saitun, om kominyan, om koinsanai di rampa. 30 Nga' iri nopo popogirolo-rolot di rampa om iri i' i piro-piro ot imam. 31 Om i Matitia, i tulun do Liwi diri, i tanak di Salum dot id dotuo, i mantad id pinuruan do sompiiyon di Kora, o momomonsoi do roti di patahakon do maan do porsombahan. 32 Om iri no tulun do mantad id pinuruan do sompiiyon di Kohat om poposodia' do roti di posusurungon do hiri'd Walai'd Sasambayangan dot Agayo do pointikid do tadau'd Sabat. 33 Om haro nogi' o piro-piro di tulun do Liwi do modsisinding do hiri'd Walai'd Sasambayangan dot Agayo. Om iri ngai' nopo i boyoon di piro-piro o sompiiyon diri om miniyon do hiri'd walai di pinatambing di Walai'd Sasambayangan dot Agayo. Om a' no iyolo' nonuan do buruon do suwai tu' dangadau om dongotuong nga' lohowon kasai' i' iyolo' do momonsoi di diyolo'd wonsoyon. 34 Om iri ngai' nopo i tulun di nangarait diri om boyoon ngai' nopo di sompiiyon do Liwi do tumanud di komolohingan diyolo'. Om iyolo' no i poingiyon do hilo'd Yorusalim.
Taki-aki om Sinakagon di Raja' Saul
35 Om wonsoyo' no di Yoyol i bandar do Gibion om iyon noddi iyau'd hiri. Om ngaran nopo di sawo dau om i Maaka. 36 Ngaran noddi tanak dau dot id dotuo om i Abdon, om iri no tangaanak dau'd kusai di suwai om i Sur, i Kis, i Baal, i Nor, i Nadab, 37 i Gidor, i Ahio, i Sakaria om i Miklot, 38 i tapa' di Simia. Iri nopo sinakagon diyolo' om miniyon do hilo'd Yorusalim, do poinsugku' di piro-piro o sompiiyon do suwai do mantad id pinuruan do sompiiyon diyolo'. 39 I Nor nopo om tapa' di Kis, om i Kis no om tapa' di Saul. I Saul no om kianak dot apat o kusai: i Yonatan, i Malkisua, i Abinadab om i Isbaal. 40 I Yonatan nopo om tapa' di Moribaal, om i Moribaal no om tapa' di Mika. 41 I Mika nopo om kianak dot apat o kusai: i Piton, i Milik, i Taria om i Ahas. 42 I Ahas nopo om tapa' di Yaira, om i Yaira no om kianak do tolu o kusai: i Alimit, i Asmawit om i Simri. I Simri nopo om tapa' di Mosa, 43 om i Mosa no om tapa' di Bina, om i Bina no om tapa' di Ripaya, om i Ripaya no om tapa' di Ilasa, om i Ilasa no om tapa' di Asil. 44 I Asil nopo om kianak dot onom o kusai: i Asrikam, i Bokru, i Ismail, i Siaria, i Obaya om i Hanan.
Napatai i Raja' Saul
1 Om pisangod no i tulun do Pilistin om i tulun dot Israil do hilo'd Nuluhon do Gilbua. Om ogumu' diri o tulun dot Israil do napatai'd hiri. Om iri nopo noolu-olu', do kohompit no i Saul om i tangaanak dau, om minogidu' diri. 2 Nga' nokosupan i' iyolo' di tulun do Pilistin om napatai iddi o tolu di tanak di Saul: i Yonatan, i Abinadab om i Malkisua. 3 Om nokototos no kopio o pisangadan do posorili' di Saul gisom do nadalaan iyau do nosuhat do pinana' di pisangod. 4 Om boros kaddi dau dot id tanakwagu di mongingigit di rapo-rapo dau, “Kodongo' ino gayang nu om tobokon oku i', om a' oku i' oirak-irakan diti tulun do Pilistin tu' kapir,” ka. Nga' a' i' katama' i tanakwagu'ddi do momonsoi do miagal diri. Om gowoi poddi om kodongo' nopo di Saul i gayang dau om haba' no do tuminobok di gayang. 5 Om soira'ddi nokito di tanakwagu do napatai i Saul, om iyau'ddi nga' haba' nopo do tuminobok di gayang dau. 6 Om iyo noddi o kinapatai-patayo' di Saul om i tolu o tangaanak dau'd kusai. Om diri noddi do nopupusan i pomorintaan dau. 7 Om soira' di nokorongou i tulun dot Israil di poingiyon do hilo'd Rantai do Yisriil do minogidu' ngai' i soudor diyolo', om napatai i Saul om i tolu o tangaanak dau'd kusai, om iduwai nopo diyolo' i kabandaran diyolo' om poggidu' no. Om gowoi poddi om rikot no i tulun do Pilistin do minongoi iyon do hiri'd kabandaran diri. 8 Om tadau po kawagu di natalib i pisangadan, om ngoyo' noddi di tulun do Pilistin pingiduwai do pakayan i rata' di tulun dot Israil. Om kabantalai no diyolo' i rata' di Saul om i rata' di tolu o tanak dau'd kusai do hilo'd Nuluhon do Gilbua. 9 Om puloso' no diyolo' o tulu di Saul om onuo' ngai' i rapo-rapo dau. Om ponuhu' no iyolo'd tulun do mongigit di tulu om i pakayan di Saul do don sumasangod do tumongkop di pomogunan do tulun do Pilistin om poporikot do habar dot osonong dot id piro-piro di tingolig diyolo' om id tulun dot ogumu'. 10 Om poiliho' no diyolo' i rapo-rapo di Saul dot id iso' di walai di tingolig diyolo' om iri no tulu di Saul om pinogiis do hiri'd walai di Dagon, i ponokokinorohingan diyolo'. 11 Om soira' di nokorongou i tulun do Yabis, i hilo'd Giliad, di winonsoi di tulun do Pilistin dot id di Saul, 12 om pamanau ngai' no i gunsiou diyolo' do minongoi di rata' di Saul om i rata' di tangaanak di Saul. Om igitai no diyolo' iri do hilo'd Yabis. Om lobongo' ngai' no diyolo' i rata'ddi do hilo', dot id sahau do kayu dit agayo. Om a' diri iyolo' minakan om a' mininum do solinaid do turu' o tadau. 13 Napatai pogi' i Saul nga' a' iyau tuminorodok dot id Tuhan. Om a' iyau minumboyo' di pinonuhuan do Tuhan; tu' minumbal nogi' daa iyau do minokituduk di rusod do tulun di napatai, 14 om a' nogi' minokituduk do Tuhan. Om gowoi poddi om pinatai iyau'd Tuhan om pinatahak i pomorintaan dau dot id di Daud, i tanak di Isai.
Nosiliu i Daud do Raja' dot Israil om Yohuda
1 Om oinsanan nopoddi i tulun dot Israil do minongoi solowot di Daud do hilo'd Hibron. Om boros ka diyolo' dot id dau, “Iyahai nopodti om tobpinai nu i'. 2 Di nopo di gulu po, dit i Saul po o raja' toko', om iya' i' o minomoyo' do tulun dot Israil do minongoi sangod. Om nakabatos no o Tuhan, i Kinorohingan nu dot iya' nondo o momoyo' do tulun dau om osiliu do raja' diyolo',” ka. 3 Om rikot ngai' nopoddi i boyoon do tulun dot Israil dot id di Raja' Daud do hilo'd Hibron. Om pomonsoi noddi i Daud do tumpongo dot id diyolo' dot id suang do ngaran do Tuhan. Om pilio' no diyolo' i Daud do sumiliu'd raja' dot Israil do miagal di nakabatos mantad do Tuhan do pinolombus di Somuil. 4 Om ngoyo' noddi di Raja' Daud om koinsanai di soudor dot Israil songodo' i bandar do Yorusalim. Om tontok nopoddi om Yobus po o ngaran do bandar diri. Om iri po i tulun do Yobus, i tulun mantad do pomogunan diri o poingiyon do hilo'. 5 Om sunudai no di tulun do Yobus i Daud do poingkuro piya nga' a' i' iyau kosuang di bandar. Nga' nosolod iddi di Daud i kuta' diyolo' di roitan do Sion. Om iyon no iyau'd hiri. Om pinungaranan diri i kuta'ddi do “Bandar di Daud”. 6 Om boros kaddi di Daud, “Isai nopo o tulun dit id gulu kopio do kapamatai do tulun do Yobus om iyau no o boyoon do koinsanai do soudor,” ka. Om i Yoab diri, o minomohuruan di pinisangadan; om kosiliu no iyau'd boyoon do koinsanai di soudor. Tina' nopo di Yoab om i Soruya. 7 Rinoitan pogi' do “Bandar di Daud” i kuta'ddi nga' minongoi i' i Daud iyon do hiri'd kuta'ddi. 8 Om wonsoyo' no dau kawagu i bandar do pointutuk di kuta'ddi. Nimpuun nopo dau do minomonsoi om hiri'd kinoiyonon di tinimbunan do tana' di hiri'd ponong id koulayon do mantad id nulu-nulu. Om tuntunai no di Yoab do minomonsoi iri do gisom do nopongo. 9 Om muhang-ruhang nopoddi o kokoriso' di Daud, tu' moyo-woyo' i' dau o Tuhan, it Agayo Kuasa'.
Soudor di Daud dit Angabantug
10 Iti ngai' no o ngaran do soudor di Daud dit angabantug. Om minogisokodung iyolo' di tulun dot Israil do pinoposiliu di Daud do raja', do miagal di nakabatos mantad do Tuhan. Om pinogirot nogi' diyolo' i pomorintaan dau. 11 Iri nopo soudor di koiso' om i Yasobam, i mantad id pinuruan do sompiiyon di Hakmoni, om iyau no i boyoon di “Tolu o Soudor”. Iri no tandus o nigitan dau do suminangod om nakapatai i' iyau do tolu nahatus o tulun dot id iso' noo o pinisangadan. 12 Koduwo nopo di “Tolu o Soudor” dot abantug diri om i Iliasar, i tanak di Dodo, i mantad id pinuruan do sompiiyon di Ahohi. 13 Minuhup iyau di Daud do suminangod di tulun do Pilistin di hilo'd pisangadan do Pas Damim. Om tontok di tuminimpuun i tulun dot Israil do mogidu' om hiri iyau'd tumo di tinanaman do barli. 14 Nga' undorong nopo iyau om i tulun dau do hiri'd tanga' di tumo'ddi om sangod no iyolo' di tulun do Pilistin. Om nonuan iddi iyau do Tuhan do kinamanangan dot agayo. 15 Insan tadau om ongoi no o tolu di tolu nohopod o soudor di Daud dit angabantug dot id iso' o pampang di niyon di Daud, it id toning di luang do nulu-nulu dot Adulam. Om maso nopoddi om nokopomukiim no i soudor do Pilistin do hiri'd Rantai do Ropaim. 16 Om tontok nopoddi om hiri i Daud id nulu-nulu di kikuta' do padtamangan. Om noiyon no do piro-piro o soudor do Pilistin i bandar do Baitlahim. 17 Om linangadon diri i Daud di kampung dau, om boros ka dau, “Orohian oku no daa do haro o songulun do mongoi doho' poinum di waig di torobong dit id toning do wawayaan dot agayo do Baitlahim,” ka. 18 Om pogihum noddi do ralan i tolu o soudor dot angabantug diri do minaya' di pinomukiiman di tulun do Pilistin. Om ongoi no iyolo' timbauk di waig do mantad id torobong diri om igitai no diyolo' dot id di Daud. Nga' a' i' di Daud ninum i waig; suwai ko' potuntugo' nogi' dau do maan do porsombahan dot id Tuhan, 19 mikuwo do minomoros dot, “A' oku i' kopio monginum do waig diti! Tu' ondung monginum oku'dti om miagal pod monginum oku do raha' diti tulun dit a' no minomusorou'd tinan diyolo',” ka dau. 20 Boyoon nopo di “Tolu Nohopod o Soudor” dit abantug om i Abisai, i tobpinai di Yoab. Suminangod iyau do tolu nahatus o tulun om napatai ngai' i' dau iyolo' dot iri no tandus dau o pinamatai. Om nabantug diri iyau dot id pogialatan di “Tolu Nohopod o Soudor”. 21 Om iyau no it abantug kopio dot id pogialatan di “Tolu Nohopod o Soudor” om nosiliu diri iyau do boyoon diyolo', nga' a' i' iyau nokoiyo do kobontugo' di “Tolu o Soudor”. 22 I Bonaya nopo, i tanak di Yoyada, i mantad hilo'd Kabsiil om soudor dit abantug om osiou kopio. Om nokoumbal nogi' iyau do minamatai do duwo o gunsiou do bansa' do Muab. Om nokoumbal nogi' iyau do tuminuhun dot id luang di dong manangais om minamatai iyau dot iso' o singa do hiri. 23 Om minamatai nogi' iyau do tulun do Masir dit aranggou kopio. Om koronggoho' nopo di tulun diri om asawat i' ko' duwo o mito, om kitandus dot agayo kopio. Om saapo' no di Bonaya i tulun diri dot iri no i bobobog dau o pinongumang dau, om ngoyo' no dau ahawo' i tandus do poingigit di tulun do Masir diri, om iri no tandus di tulun diri o pinamatai dau di tulun diri. 24 Om iri no o kosioho' di Bonaya, it iso' do mantad id pogialatan di “Tolu Nohopod o Soudor”. 25 Om iyau no ot abantug kopio dot id pogialatan di “Tolu Nohopod o Soudor”, nga' a' i' iyau koiyo do kobontugo' di “Tolu o Soudor”. Om siliho' no iyau di Daud do boyoon di soudor do madtatamong dau. 26-47 Iti ngai' no i soudor do suwai dit angabantug: I Asail, i tobpinai di Yoab I Ilhanan, i tanak di Dodo, i mantad hilo'd Baitlahim I Syamot, i tulun do Harod I Hilis, i tulun do Pilit I Ira, i tanak di Ikis, i tulun do Tokua I Abiosor, i tulun dot Anatot I Sibkai, i tulun do Husa I Ilai, i tulun do Ahohi I Maharai, i tulun do Nitopa I Hilid, i tanak di Baana, i tulun do Nitopa I Itai, i tanak di Ribai, i tulun do Gibia, it id watas do Binyamin I Bonaya, i tulun do Piraton I Hurai, i mantad hilo'd rantai do Gaas I Abiol, i tulun dot Araba I Asmawit, i tulun do Bahurim I Ilyahba, i tulun do Saalbon I Hasim, i tulun do Gison I Yonatan, i tanak di Sagi, i tulun do Harari I Ahiam, i tanak di Sakar, i tulun do Harari I Ilipal, i tanak di Ur I Hipir, i tulun do Mikirati I Ahia, i tulun do Piloni I Hisro, i tulun do Karmol I Naarai, i tanak di Isbai I Yoil, i tobpinai di Natan I Mibhar, i tanak di Hagri I Silik, i tulun dot Amon I Naharai, i mongingigit do rapo-rapo di Yoab, i tulun do Biirot I Ira om i Garob, i tulun do Yitri I Uria, i tulun do Hit I Sabad, i tanak di Ahlai I Adina, i tanak di Sisa (songulun it abantug dot id payat di Rubin, om kisoudor do tolu nohopod o tulun) I Hanan, i tanak di Maaka I Yosapat, i tulun do Mitni I Usia, i tulun dot Astarot I Sama om i Yoyol, i tangaanak di Hotam, i tulun dot Aroir I Yodiail om i Yoha, i tangaanak di Simri, i tulun do Tis I Iliol, i tulun do Mahawim I Yoribai om i Yosawia, i tangaanak di Ilnaam I Yitma, i tulun do Muab I Iliol, i Obid om i Yaasiol, i tulun do Misobaya.
Tulun dit id Gulu Kopio Tanud di Daud do Mantad id Payat do Binyamin
1 Tontok di minogidu' i Daud do mantad id di Raja' Saul, om minongoi'ddi iyau iyon do hilo'd Siklag. Tontok di hilo' iyau om ogumu' o soudor di noubas nod sumangod om i milo kopio do ponongkuyaanan do minongoi sugku' dau, 2 do mantad id payat do Binyamin om payat nogiddi o tadon di Saul. Om oinsanan nopo i soudor diri dot ongotiru' do mamana' om ongotiru' do monulogong --- do longon do wanan om longon do gibang. 3-7 Boyoon nopo diyolo' om i Ahiosor om i Yoas, i tangaanak di Simaa do tongokusai, i mantad hilo'd Gibia. Iti ngai' no o ngaran do soudor diri: I Yosiol om i Pilit, i tangaanak di Asmawit do tongokusai I Biraka om i Yohu, i tulun dot Anatot I Yismaya, i tulun do Gibion, i gunsiou om iso' di boyoon di sinompuruan do “Tolu Nohopod o Soudor”. I Yoromia, i Yohasiol, i Yohanan om i Yosabad, i tulun do Gidira I Ilusai, i Yirimot, i Bialia, i Somaria, i Sopasa i tulun do Harupi I Ilkana, i Yisia, i Asariil, i Yoisir om i Yasobam i mantad id pinuruan do sompiiyon di Kora I Yoila, om i Sibaya i tangaanak do kusai di Yiroham, i tulun do Gidor.
I Tulun di Tuminanud di Daud do Mantad id Payat do Gad
8 Iti ngai' no o ngaran di soudor dit angabantug om i nongoubas do sumangod do mantad id payat do Gad di suminugku' di Daud di hiri iyau id kuta' di hilo'd tana' do kowotuan. Om ongoilo tomod iyolo' do mamakai do kolid om tandus, om orongit do miagal po di singa, om osiau do miagal do tambang. 9-13 Om iti ngai' no o ngaran diyolo' do poingirus di kasawato' do pangkat diyolo': I Isir, i Obaya, i Iliab, i Mismana, i Yoromia, i Atai, i Oliol, i Yohanan, i Ilsabad, i Yoromia om i Makbanai. 14 Haro o piro-piro tulun dot id pogialatan di payat di Gad do boyoon do soudor dit angasawat o pangkat: om boyoon nogi' iyolo' do soudor do soribu o tulun. Om iri no suwai om boyoon do soudor di koubasanan, om boyoon iyolo' do soudor do hatus o tulun. 15 Om tontok di tulan do koiso' do toun diri, om mulong pod lumuyud dot agayo i Bawang do Yordan, nga' sinoborong i' diyolo', om nouyung i' diyolo' i tulun di songingiyon do ponong hiri'd koulayon om i ponong hiri'd kotonobon do mantad di bawang diri.
Tulun di Tuminanud di Daud do Mantad id Payat do Binyamin om Yohuda
16 Insan tadau om rikot no o sonsinompuruan o tulun do mantad id payat do Binyamin om Yohuda do hiri'd kuta' do padtamangan di niyon di Daud. 17 Om ngoyo' no di Daud solowoto' iyolo' om boro-boros no dot, “Ondung mambalut om monulung doho' o kinorikatan dokoyu om kainou no, sumugku' doho'd hiti. Osonong i' o ginawo dahai do poinsugku' dokoyu. Nga' ondung magakal kou doho' om papatahak kou doho' dot id pisangod ku, mulong piya dot a' oku nokoumbal do pinopokoruol dokoyu, om oilaan i' di Kinorohingan di tukuon di taki-aki toko',” ka dau. 18 Om tontok iddi do pinorinta' do Rusod do Kinorohingan o tiso' diyolo', i roitan dot i Amasai. Om i Amasai no o nosiliu do boyoon di sinompuruan do “Tolu Nohopod o Soudor”. Om poboroso' no dau o poingkaa, “Oi Daud, i tanak di Isai, tumanud i' iyahai diya'! Iya' no o kaanu do kamanangan do miwoyo' di tulun di muhup diya'! Muhup i' dati' o Kinorohingan,” ka dau. Om romito' noddi di Daud iyolo' om siliho' no dau iyolo' do boyoon di soudor dau.
Tulun di Tuminanud di Daud do Mantad id Payat do Manasi
19 Om haro o piro-piro soudor do mantad id payat di Manasi do minongoi sugku' di soudor di Daud, do tontok di minamanau i Daud do minoyo' di tulun do Pilistin do mongoi sangod di Raja' Saul. Nga' a' iddi nokouhup i Daud di tulun do Pilistin, tu' ooris ngai' i' i raja' diyolo' dot aakalan iyolo' dau tu' mongoi dotindo iyau sugku' di Saul, i tuan dau di gulu po om kohudsu nondo iyolo'. Om gowoi poddi om suhuo' no diyolo' iyau do gumuli' do hilo'd Siklag. 20 Iti ngai' no o ngaran di soudor do mantad id payat do Manasi di minoyo' di Daud do tontok di minuli' iyau kawagu do hilo'd Siklag: I Adna, i Yosabad, i Yodiail, i Mikail, i Yosabad, i Ilihu om i Silotai. Om oinsanan nopo iyolo' do boyoon do soribu o soudor di hilo' po iyolo'd Manasi. 21 Om siliu no iyolo' do boyoon do soudor di Daud do minuhup di Daud, tu' gunsiou ngai' i' iyolo' dit ongokoris kopio. Om nosiliu'ddi iyolo' do boyoon do soudor dot Israil di koimbagu. 22 Om osomok nod monikid tadau do haro o tulun do wagu do mongoi sugku' di soudor di Daud, gisom dot ogumu' tomod diri o soudor dau.
Soudor di Daud
23-37 Tontok di hilo' i Daud id Hibron, om ogumu' o soudor di nongkopinsingilo do sumangod do minongoi sugku' di soudor dau. Om iyolo' no i minonguhup dau do suminiliu do raja' do suminowoli di Saul, do miagal di nakabatos do Tuhan. Om poingkaa o kogumuo' diyolo': Mantad id Yohuda: 6,800 o tulun, dot ongkirapo-rapo, om ongkikolid om ongkitandus; Mantad id Simion: 7,100 o tulun di nongkopinsingilo do sumangod; Mantad id Liwi: 4,600 o tulun; I Yoyada om i piro-piro o tulun di tuminanud dau, i sinakagon di Harun: 3,700 o tulun; I Sadok, i gunsiou dit omulok po om i koobpinayan dau: 22 o tulun dit angabantug; Mantad id Binyamin (i payat di tadon di Saul): 3,000 o tulun (nga' kogumuan i' di payat di Binyamin dot otorodok kasai' dot id di Saul); Mantad id Ipraim: 20,800 o tulun. Om abantug ngai' nopo iyolo' dot id pinuruan do sompiiyon diyolo'; Mantad id Manasi ponong id kotonobon: 18,000 o tulun di nongopili' do mongoi poposiliu di Daud do raja'; Mantad id Isakar: 200 o boyoon om miwoyo' di tumatanud diyolo' (koilo ngai' i' iti boyoon dit apatut do wonsoyon do tulun dot Israil om i maso dot osonong do momonsoi'ddi); Mantad id Sibulon: 50,000 o tulun dit otorodok om i milo do ponongkuyaanan, om i nongkosodia' no do mongoi sangod, om i milo do mamakai do nunu nopo o rapo-rapo do sumangod; Mantad id Naptali: 1,000 o boyoon om miwoyo' do 37,000 o soudor dit ongkikolid om ongkitandus; Mantad id Dan: 28,600 o tulun di nongkopinsingilo do sumangod; Mantad id Asor: 40,000 o tulun di nongkosodia' no do sumangod; Mantad id piro-piro o payat di ponong id koulayon do mantad id bawang do Yordan --- iri no i payat do Rubin, Gad om Manasi ponong id koulayon: 120,000 o tulun dit ongoilo do mamakai do nunu nopo o rapo-rapo do sumangod. 38 Om oinsanan nopoddi i soudor di nongkosodia' no do sumangod do minongoi do hilo'd Hibron. Om korohian nopo diyolo' do wonsoyon om poposiliu di Daud do raja' do pointongkop dot Israil. Om iso-iso' nopo o ginawo do tulun dot Israil di suwai dot orohian do momonsoi do miagal diri. 39 Om minundorong iyolo' do hiri'd sugku' di Daud do solinaid do tolu o tadau. Om minangakan iyolo' di taakanon om minonginum di tinumon di pinosodia' di tulun dot Israil. 40 Om mantad piya do hilo'd Isakar, om Sibulon, om Naptali, i piro-piro o payat do ponong id utara, nga' ruminikot ngai' i' i tulun dot ongkiginayat ngai' nopo do kaladai, om unta, om bagal, om sapi' do ginandaran do tapung, om tua' dot ara om tua' dot anggur di kinoring om waig dot anggur om tumau do saitun. Om guminayat nogi' iyolo' do sapi' om dumba' do maan do sumbolion om maan do tikanas. Om iri ngai' no o pointalang dot ongotood ngai' o tulun do pointongkop di pomogunan dot Israil.
Pinawaliu i Kaban do Tumpongo do Mantad Hilo'd Kiriat Yiarim
1 Om ponokirunding no i Daud do toinsanan di boyoon do soudor dau, i boyoon do soudor di soribu o tulun, om i boyoon do soudor do hatus o tulun. 2 Om katalib poddi iri om posunudo' no dau dot id toinsanan o tulun dot Israil o boros do poingkaa, “Ondung kaakun kou, om ondung korohian do Tuhan, i Kinorohingan toko' iti, om suhuo' ngai' toko' no o bansa' toko' om it imam om i tulun do Liwi do hilo'd kabandaran diyolo' do tumimung do mongoi sugku' dati' do hiti. 3 Om ngoyon toko' nogindo i Kaban do Tumpongo do Kinorohingan dit a' napadul do solinaid di pomorintaan di Raja' Saul,” ka. 4 Om kaakun ngai' nopo i tulun do hiri di pinoboros di Daud. 5 Om timungo' ngai' noddi di Daud i tulun dot Israil do mantad id pointongkop do pomogunan diri do mantad po do hilo'd piwolitan do pomogunan do Masir do ponong id salatan om gisom do hilo'd Ralan do kumaa do hilo'd Hamat do ponong id utara, do mongoi pawaliu di Kaban do Tumpongo do mantad hilo'd Kiriat Yiarim om pokoyoon do hilo'd Yorusalim. 6 Om ongoi no i Daud om koinsanai di tulun dot Israil do hilo'd bandar do Baala, iri no i bandar do roitan do Kiriat Yiarim, it id watas do Yohuda, do mongoi di Kaban do Tumpongo do Kinorohingan. Iri nopo Kaban diri om koilaan do Tuhan o poirikau do hiri'd sakai di moloikat do roitan do kerub. 7 Tontok di nokorikot iyolo' do hilo'd bandar do Baala, om posoliwano' no diyolo' i Kaban do Tumpongo'ddi do mantad id walai di Abinadab om pasakayo' no di guyudan di wagu po. Om popotunud nopo di sapi' di mamagayat di guyudan diri om i Usa om i Ahio. 8 Om i Daud no om koinsanai di tulun dot Israil om minogulu-gulu di Kaban om mintari' do popoinggayo do Kinorohingan. Om modsinding nogi' iyolo' dot ompoton do kecapi, gambus, gandang, rebana om torumpit. 9 Om soira' di nokorikot iyolo' do hiri'd pamagamasan do gandum di Kidon, om kasadu i sapi' di mamagayat di guyudan. Om gowoi poddi om poroloyo' no di Usa o longon dau do minongoi pomusus di Kaban do Tumpongo. 10 Om diiri i' om diiri do notogod o Tuhan di Usa om pinatai'ddi do Tuhan i Usa tu' minongoi i' iyau kama' di Kaban diri. Om kapatai no i Usa do pinatai'd Kinorohingan. 11 Om mantad poddi om roitan no do “Piris Usa” o kinoiyonon diri. Om tuminogod diri i Daud tu' hinukuman i' do Tuhan i Usa dot iyo kopio'ddi kawagat. 12 Om ooris diri i Daud do Kinorohingan. Om boros ka dau, “Poingkuro poddi o ralan ku do mongoi di Kaban do Tumpongo'ddi?” ka. 13 Om a' iddi iyau nabayaan do minongigit di Kaban diri do hilo'd Yorusalim. Om poiliho' nopoddi dau do hiri'd walai do songulun di roitan dot i Obid Idom. Iyau nopo om tulun do mantad id bandar do Gat. 14 Om hiri-hiri noddi i Kaban diri do solinaid do tolu o tulan. Om binarakatan diri do Tuhan i sompiiyon di Obid Idom om koinsanai di dau'd songonuon.
Piro-Piro o Winonsoi di Daud do Hilo'd Yorusalim
1 Om ponuhu' no i Hiram i raja' do pomogunan do Tirus, do wakil do mongingindapu' do mongoi do hiri'd di Daud. Om onuwai no dau i Daud do kayu sedar do Libanon om piro-piro o tukang watu om tukang kayu do momonsoi di walai'd raja'. 2 Om kopurimanai nogiddi kopio di Daud do Tuhan o pinopogirot do kinosilihan dau do raja' dot Israil om popoburu' di pomorintaan dau do koinsanangan di tulun di songonuon do Tuhan. 3 Om panansawo po kawagu i Daud do piro-piro o tongoondu' di hilo' iyau'd Yorusalim, om noruhangan poddi o tangaanak dau do kusai om tondu'. 4 Iti ngai' no o ngaran di tangaanak dau do tongokusai di nosusu do hilo'd Yorusalim: i Syamua, i Sobab, i Natan, i Suliman, 5 i Yibhar, i Ilisua, i Ilpilit, 6 i Noga, i Nipig, i Yapia, 7 i Ilisama, i Biilyada om i Ilipilit.
Kamanangan do Suminangod do Tulun do Pilistin
8 Om soira' di nokoilo i tulun do Pilistin do nosiliu noddi i Daud do raja' do pointongkop dot Israil, om pamanau ngai' no i soudor diyolo' do mongoi daa panangkap di Daud. Om pamanau noddi i Daud iyau do mongoi solowot diyolo'. 9 Om korikot no i soudor do Pilistin do hilo'd Rantai do Ropaim om timpuun no do manangod di tulun di hiri'd rantai'ddi. 10 Om uhot no i Daud do Kinorohingan. Boros ka dau, “Oi Tuhan, ngoyon ku tuu songodo' i tulun do Pilistin? Onuan oku i' tuu diya' do kamanangan,” ka. Om boros kad Tuhan do suminimbar, “Ngoyon nopo songodo'! Onuan ku i' iya' do kamanangan!” ka. 11 Om ngoyo' noddi di Daud songodo' i tulun do Pilistin do hilo'd Baal- Pirasim om naala' i' dau iyolo'. Om boros ka dau, “Pinakai oku id Kinorohingan do tuminolibamban di soudor do pisangod do miagal di luyud do rumudsu',” ka. Om rinoitan diri do Baal-Pirasim o kinoiyonon diri. 12 Om soira' di minogidu' i tulun do Pilistin om koiliu ngai' no diyolo' i tingolig diyolo', tu' narau-arau kopio iyolo' do minogidu'. Om ponuhu' noddi i Daud do modtutud ngai' di tingolig diri. 13 Om a' po alaid om guli' no kawagu i tulun do Pilistin do hiri'd rantai'ddi om timpuun no do sumangod. 14 Om uhot po kawagu i Daud do Kinorohingan. Om boros kad Kinorohingan do suminimbar, “Kada' iyolo' ngoyo' songodo' do mantad hiti. Nga' sorili' nogi' om sumodia' id manangod diyolo' do mantad hilo'd sampaping; do hilo'd toning do koguasan do kertau. 15 Om orongou nu po o tuni do miagal do pamamanau do soudor do hiri'd tuntu di kokoyuan, om sumangod nogi', tu' mogulu oku indo diya' do mamanau do mongoi pangala' di soudor do Pilistin,” ka dau. 16 Om wonsoyo' no di Daud o miagal di pinonuhuan do Kinorohingan. Om nouyung iddi dau i tulun do Pilistin do mantad hilo'd Gibion om gisom do nokorikot do hilo'd Gisir. 17 Om abantug tomod diri o ngaran di Daud do hinonggo-honggo nopo. Om oinsanan nopo o bansa' dot ooris di Daud tu' pinooris id Tuhan iyolo'.
Sumodia' do Pawaliu di Kaban do Tumpongo
1 Om pomonsoi no i Daud do piro-piro o walai dau do hilo'd Bandar di Daud. Om pinoposodia' nogi' iyau do poiyanan di Kaban do Tumpongo do Kinorohingan om winansayan dau do kiim i Kaban diri. 2 Om boros ka dau, “Tulun nod Liwi ot apatut do sumaan di Kaban do Tumpongo'ddi tu' iyolo' no i nopili'd Tuhan do sumaan diri om momonsoi'd karaja' dau do gisom dot alaid,” ka. 3 Om timungo' ngai' noddi di Daud i tulun dot Israil do hilo'd Yorusalim do mongoi pawaliu di Kaban do Tumpongo do hiri'd poiyanan di nosodia' dau. 4 Om lohowo' ngai' no dau i sinakagon di Harun om i tulun do Liwi. 5 Om rikot no i Uriol, i tulun do Liwi do mantad id pinuruan do sompiiyon di Kohat, i boyoon do hatus om duwo nohopod o tulun do mantad id pinuruan do sompiiyon dau. 6 Om i Asaya, i mantad id pinuruan do sompiiyon di Morari, i boyoon do duwo nahatus om duwo nohopod o tulun; 7 om i Yoil, i mantad id pinuruan do sompiiyon di Girson, i boyoon do hatus om tolu nohopod o tulun; 8 om i Somaya, i tulun do mantad id pinuruan do sompiiyon di Ilsapan, i boyoon do duwo nahatus o tulun; 9 om i Iliol, i tulun do mantad id pinuruan do sompiiyon di Hibron, i boyoon do walu' nohopod o tulun; 10 om i Aminadab, i tulun do mantad id pinuruan do sompiiyon di Usiol, i boyoon do hatus om hopod om duwo o tulun. 11 Om lohowo' noddi di Daud i Sadok it Imam om i Abiatar it Imam, om onom o tulun do Liwi: i Uriol, i Asaya, i Yoil, i Somaya, i Iliol om i Aminadab. 12 Om boros ka dau dot id diyolo', “Iyokoyu no o boyoon do piro-piro o pinuruan do sompiiyon dit id suang do payat do Liwi. Om lidangan no dokoyu o tinan dokoyu om i tulun do Liwi do suwai, om milo kou indo do mongoi papawaliu di Kaban do Tumpongo'd Tuhan, i Kinorohingan dot Israil, dot id kinoiyonon di nokosodia' ku do poiyanan diri. 13 A' kou giya hino di ngoyo' i' powoliho' i Kaban diri, gowoi poddi om hinukuman toko' do Tuhan, i Kinorohingan toko', tu' a' i' kopunong di korohian dau o ralan toko' do suminambayang dot id dau,” ka dau. 14 Om lidangai noddi dit imam om i tulun do Liwi o tinan diyolo' om milo' i' iyolo' do pawaliu di Kaban do Tumpongo'd Tuhan, i Kinorohingan dot Israil. 15 Om saano' noddi diyolo' i Kaban do nantayang di kayu do pagantayang do miagal di pinonuhuan do Tuhan do pinolombus di Musa. 16 Om suhuo' ngai' noddi di Daud i boyoon do tulun do Liwi do monuhu' do piro-piro o tulun do Liwi do modsinding om popouni do tuunion di popotood do ginawo, om popouni do kecapi om simbal. 17-21 Om mantad nopo di pinuruan do sompiiyon di modsisinding om iti ngai' no o pinili' diyolo' do popouni di simbal om tambaga': i Himan, i tanak di Yoil om i koobpinayan dau; i Asap, i tanak di Borokia; i Itan i tanak di Kusaya, i mantad id pinuruan do sompiiyon di Morari. Om minomili' po kawagu iyolo' do piro-piro o tulun do Liwi do monguhup diyolo' om mongombit di kecapi dit otolis: Pinili' nopo om i Sakaria, i Yaasiol, i Somiramot, i Yohiol, i Uni, i Iliab, i Maasiya om i Bonaya. Om mongombit no di kecapi dit olombou, om pinili' nopo diyolo' nga' i Matisa, i Ilipili, i Mikniya, i Asasia om duwo o tulun di madtatamong do Walai'd Sasambayangan dot Agayo, i Obid Idom om i Yoyol. 22 I Kinaya nopo om oilo kopio do popouni do tuunion, om iyau noddi o pinili' do sumiliu'd boyoon di tinimungan do payat do Liwi di popouni do tuunion. 23-24 Om pinili' nopo do madtamong di Kaban do Tumpongo'd Tuhan om i Borokia, i Ilkana, i Obid Idom om i Yohia. Om nopili' nopo do pouni di torumpit do hiri'd gulu-gulu di Kaban do Tumpongo om iti piro-piro ot imam diti: i Sibania, i Yosapat, i Nitaniil, i Amasai, i Sakaria, i Bonaya om i Iliosor.
Pinawaliu i Kaban do Tumpongo do Pinakaa do Hilo'd Yorusalim
25 Om ongoi noddi i Raja' Daud, om i piro-piro o boyoon dot Israil, om i boyoon do soudor, do hiri'd walai di Obid Idom do mongoi panganu di Kaban do Tumpongo. Om pinapaharo nogi' iyolo' do karamayan dit agayo. 26 Om minonumbali' iyolo' do turu' o tinan do sapi' do tontoluhan om turu' o tinan do dumba' do maan do porsombahan dot id Kinorohingan, do mokitulung do Kinorohingan do monguhup di tulun do Liwi di sumaan di Kaban do Tumpongo. 27 Om i Daud nopo om kipinakai do rasuk do linan dit aalus. Om iyo nogiddi o pakayan di piro-piro o tulun di popouni do tuunion, om i Kinia, i boyoon diri, om i tulun do Liwi di suminaan di Kaban do Tumpongo. Om kipinakai po i Daud dot ipod. 28 Om iyo noddi i tulun dot Israil do minananud di Kaban do Tumpongo gisom do nokorikot do hilo'd Yorusalim, do mikuwo'd sampangkis-pangkis dot atataadan om popinguni do torumpit, om toburi', om simbal om kecapi. 29 Om tontok di posuangon i Kaban diri do hiri'd bandar, om kokito no di Mikal, do mantad hiri'd liligaon, do mintari' tomod om minsimbul i Raja' Daud dot atataadan. Om araatan tomod diri i Mikal di Daud. I Mikal nopoddi nga' tanak di Saul do tondu'.
1 Om igitai no diyolo' i Kaban do Tumpongo'ddi do hiri'd kiim di nokosodia' di Daud. Om poiliho' no diyolo' i Kaban diri do hiri'd suang di kiim. Om papatahak noddi iyolo' do porsombahan do sorobon om porsombahan do piombolutan dot id Kinorohingan. 2 Om kopongo po i Daud do pinapatahak di porsombahan diri, om barakatai no dau i tulun dot Israil dot id suang do ngaran do Tuhan, 3 om tikidai no dau iyolo' do taakanon. Om nonuan ngai' nopo dau o pointikid-tikid do kusai om tondu' do hilo'd Israil do roti, om sompigis o sinalau, om roti di tua' dot anggur di kinoring do winonsoi. 4 Om pilio' no di Daud o piro-piro o tulun do Liwi do momoyo' do tulun do sumambayang dot id Tuhan, i Kinorohingan dot Israil, dot id toguang di Kaban do Tumpongo'ddi. Om modsinding diri iyolo' do mamarayou'd Tuhan. 5 Om i Asap o pinili' do sumiliu'd boyoon om i Sakaria o wakil dau. Om mongombit nopo do kecapi om i Yoyol, i Somiramot, i Yohiol, i Matisa, i Iliab, i Bonaya, i Obid Idom om i Yoyol. I Asap nopo om pouni do simbal, 6 om iri no duwo imam do suwai, i Bonaya om i Yahasiol om popouni kasai' do torumpit do hiri'd gulu-gulu di Kaban do Tumpongo. 7 Om diri no do koinsan i' kopio di Daud do pinapatahak do karaja' do modsisinding do mamarayou'd Tuhan dot id di Asap om id piro-piro o tulun do Liwi do suwai.
Sinding do Mamarayou
8 Pongunsikou nod Tuhan, popinsunudo' no o kogoyoo' dau; Sunudan ngai' no o bansa'd tulun di nongowonsoi dau dit ongosonong. 9 Podsinding no do pamarayou'd Tuhan; popinsunudo' no i nongowonsoi dau di kongoimayaan kopio. 10 Kotood toko' no tu' nasanganu toko' no dau; Kumooropod ngai' no o tulun di tumuku' dot id dau! 11 Rikot no dot id Tuhan do mokianu do kokorisan, om kada' tingkod do sumambayang dot id dau. 12-13 Iyokoyu i sinakagon di Yakub, i susuhuon do Kinorohingan, i sinakagon dot Israil, i tulun di pinili' dau. Soroho' no i kongoimayaan di winonsoi do Kinorohingan, om tonudon no i ponuhuan dau. 14 Tuhan no o Kinorohingan toko'; om kotongkop diti pomogunan o kuasa' dau. 15 Kada' kopio lihuwai i tumpongo do Kinorohingan, i winonsoi dau om pinogirot do gisom do poingompus; 16 i tumpongo do winonsoi dau dot id di Abraham, i batos do pinabatos dau dot id di Isak. 17 Pinogirot do Tuhan i tumpongo dot id di Yakub, i tumpongo di poingompus dot id Israil. 18 “Patahakon ku i' diya' i pomogunan do Kanaan,” ka dau, “Om iri no o tungkusan nu,” ka dau. 19 Di nopo di gulu po om okuuri' o tulun di dong Kinorohingan om sompogunan iyolo' do hilo'd pomogunan do Kanaan. 20 Minghombo nopo iyolo' do mantad id iso' o kinoiyonon om kumaa dot id kinoiyonon do suwai, mantad id iso' o bansa'd tulun om kumaa dot id bansa'd tulun do suwai. 21 Nga' mada' i' o Kinorohingan do haro o monginggorit diyolo'; pinoinsan ngai' dau i raja', tu' mongintirung i' iyau di tulun dau; 22 “Kada' pokorualai i tulun di nongopili' ku; kada' kuroi-kuroyo' i nabi ku,” ka dau. 23 Podsinding no dot id Tuhan, oi koinsanai do pomogunan! Popinsusuyo' no do pointikid do tadau i habar dot osonong do napasi iyahai dau. 24 Popinsusuyo' no i kagayaan dau dot id koinsanai'd bansa'd tulun, om i winonsoi dau do kongoimayaan kopio dot id toinsanan o tulun. 25 Tuhan nopo om agayo i' om apatut no do royohon kopio; apatut no do pusohon kopio iyau ko' mantad di ponokokinorohingan do suwai. 26 Iri nopo ponokokinorohingan do suwai om tininganak no toomod, nga' Tuhan nopo om minomonsoi i' do tawan om pomogunan om koinsanai'd nunu nopo. 27 Nosorilian iyau do kagayaan om kogoyoo' dau do miagal di dong raja', noponu' do sinundu om kaarapadan i Walai'd Sasambayangan dot Agayo. 28 Royohon no o Tuhan, oi koinsanai dokoyu i tulun do hiti'd pomogunan. Royohon no i kagayaan om i kokoriso' dau. 29 Royohon no i ngaran do Tuhan di kikagayaan; migit nod porsombahan om rumikot no do hiri'd Walai'd Sasambayangan dot Agayo. Oiyo-iyon no o ginawo nu do tontok do sumambayang dot id dau. 30 Gagarai kou no dot id toguang do Tuhan, oi koinsanai do pomogunan! Nokogirot no o pinopoiyon diti pomogunan om a' no milo do powolihon. 31 Kooropod no, oi pomogunan om tawan! Sunudai ngai' no o bansa'd tulun do Tuhan noo o raja'. 32 Ngorod no, oi rahat, om koinsanai di kipinuhobo do hino'd rahat; kooropod no, oi koumaan, om koinsanai di poinsuni'd hino! 33 Mimpangkis pondo dot atataadan i kokoyuan do hilo'd gouton dot id toguang do Tuhan, do tontok do rumikot iyau do mongoi pomorinta' diti pomogunan. 34 Pongunsikou nod Tuhan, tu' osonong i' iyau; om mompus-ompus o kosianan dau. 35 Poboroson no dot id dau o poingkaa, “Posio' no iyahai, oi Kinorohingan, i Gampamasi dahai; timungo' no iyahai kawagu; poiduwo' no iyahai do mantad id koinsanai'd bansa'd tulun di suwai, om ounsikou indo iyahai om mamarayou iyahai do ngaran nu dit olidang,” ka. 36 Royohon no o Tuhan, i Kinorohingan dot Israil. Royohon no iyau do baino' om gisom dot alaid! Om kosinding poddi di Asap om i tulun do Liwi i sinding diri om oinsanan nopoddi i tulun do minomoros dot, “Amin,” ka, om royoho' no diyolo' o Tuhan.
Suminambayang do Hilo'd Yorusalim om Hilo'd Gibion
37 Om suhuo' no di Raja' Daud i Asap om i tulun do Liwi do suwai, di koruhang di Asap do nosiliu do mongilo-ilo kasai' do nunu nopo i kagait do sumambayang do hiri'd kiim di pinoiyanan di Kaban do Tumpongo'd Tuhan. Om apatut nod wonsoyon diyolo' i karaja' diyolo'ddi do hiri do pointikid-tikid do tadau. 38 Om monguhup nopo diyolo' om i Obid Idom, i tanak di Yodutun, om onom nohopod om walu' o tulun do suwai do mantad id pinuruan do sompiiyon dau. Om madtatamong nopo di wawayaan om i Obid Idom om i Hosa. 39 Om i Sadok no, it Imam diri om it imam do suwai, om mongilo-ilo di kowoyo-woyoo' do sumambayang dot id Tuhan do hiri'd tiyonon do sumambayang do hilo'd Gibion. 40 Pointikid-tikid do kosuabon om sosodopon om mositi' no do papatahak iyolo' do porsombahan do sorobon do hiri'd pananaraban do porsombahan do miontok di nokotulis do hiri'd Tourat di pinatahak do Tuhan dot id tulun dot Israil. 41 Om monguhup nopo di Sadok it Imam diri, om i piro-piro imam do suwai, om i Himan om i Yodutun om i tulun do suwai di pinili' do sumiliu'd modsisinding dot id Tuhan do pasal di kosianan dau di mompus-ompus. 42 Om i Himan nogi' om i Yodutun o nopili' do mongilo-ilo di torumpit om i simbal om i tuunion do suwai do pounion do tontok do sindingon i sinding do pamarayou. Om iri no i tulun do mantad id pinuruan do sompiiyon di Yodutun o sinuhu' do madtamong di wawayaan. 43 Om uli' ngai' noddi i tulun. Om i Daud nga' minuli' nogi' do minongoi solowot di sompiiyon dau.
Boros di Natan dot id di Daud
1 Tontok nopoddi om poingiyon no i Raja' Daud do hiri'd walai dau di don raja'. Insan tadau, om lohowo' no dau i Nabi Natan. Om boros ka dau, “Antangai pogi', nga' poingiyon oku no iyoho' do hiti'd walai di kayu sedar do Libanon do winonsoi nga' iri nopo Kaban do Tumpongo'd Tuhan om hilo' kasai' id kiim!” ka. 2 Om boros ka di Natan, “Wonsoyo' nopo it osorou nu tu' uhupan ko id Kinorohingan,” ka. 3 Nga' totuong iddi do minoro-boros o Kinorohingan dot id di Natan. 4 Boros ka dau, “Ngoyo' sunudai i Daud, i susuhuon ku do poingkaa, ‘Okon i' ko' iya' o momonsoi do walai dot iyonon ku, 5 tu' mantad poddi posoliwano' ku i' i tulun dot Israil do mantad hilo'd Masir om gisom do baino' om a' oku i' insan koiyon dot id walai; poingiyon kasai' oku i' dot id kiim do mombo-hombo. 6 Om solinaid ku do mombo-hombo do moyo-woyo' di tulun dot Israil om a' oku i' insan ponguhot di piro-piro o boyoon di pinili' ku ondung nokuro tu' a' iyolo' minomonsoi do walai do kayu sedar do Libanon o wonsoyon do tiyonon ku,’ kanto. 7 Iyo nopoddi, oi Natan, om sunudan no i Daud, i susuhuon ku, dot iyoho' no, i Tuhan it Agayo Kuasa' o momoros dot id dau do poingkaa, ‘Nongoi ku iya' do mantad id karaja' nu do momogompi'd dumba' do hilo'd talun om siniliu ku iya' do raja' do tulun dot Israil, i tulun ku. 8 Om honggo nopo nongoi nu nga' winoyo' ku i' iya', om nala' ku o koinsanai di pisangod nu do tontok di minongoi ko sangod. Om silihon ku'ndo iya' do miagal di piro-piro o boyoon dit angagayo tu' angabantug do hiti'd pomogunan. 9-10 Om nopili' ku no ot iso' o kinoiyonon do patahakon ku dot Israil, i tulun ku do pomogun-mogunan om nokoiyon ku no iyolo' do hilo', i kinoiyonon dit aiso' o koinggorit. Om mantad poddi kosuang iyolo' do pomogunan diti om di pinomilian ku iyolo' do boyoon om songod-songodon no iyolo' do tulun dit ongorongit, nga' a' nondo osiliu kawagu o miagal diri. Mamatos oku no do mangala' do koinsanai do pisangod nu om manahak diya' do sinakagon. 11 Apatai ko nopondo om olobong ko dot id sugku' di komolohingan nu, om silihon ku'ndo do raja' o tiso' di tangaanak nu'd kusai, om pogiroton ku o pomorintaan dau. 12 Om iyau nondo i momonsoi do walai dot iyonon ku, om pogiroton ku indo o pomorintaan dau do gisom dot alaid. 13 Om iyoho' nondo o tapa' dau om iyau o tanak ku. Om a' oku indo tumingkod do sumokodung dau do miagal di winonsoi ku dot id di Saul. Om noidu' ku no i Saul do raja' om osiliu ko indo iya' do raja'. 14 Om silihon ku'ndo i tanak nu do mongilo-ilo di walai ku om i pomorintaan ku do gisom dot alaid. Om a' otingkod do momorinta' o sinakagon dau do gisom do mogisolusuk-lusuk,’ kanto,” ka dau. 15 Om posunudo' ngai' nopo di Natan dot id di Daud o koinsanai di pinosunud do Kinorohingan dot id dau.
Sambayang di Daud do Mongunsikou
16 Om ongoi noddi i Raja' Daud do hiri'd Kiim do Tuhan, om irikau no iyau, om sambayang nod poingkaa, “A' oku i' om i sompiiyon ku osorupai do kaanu di barakat di pinatahak nu dot id doho', oi Tuhan, i Kinorohingan. 17 Nga' ogumu' po ko' iri o wonsoyon nu dot id doho' do baino'; tu' nakabatos ko no do pasal di sinakagon ku dot id dosunsudan. Om paagalon oku po diya' di tulun dit asawat o pangkat, oi Tuhan i Kinorohingan. 18 Nunu po o milo ku'd poboroson dot id diya'! Tu' talib id koilo ko doho', nga' pusohon oku i' diya', i susuhuon nu. 19 Diya' id korohian om iya' o nokosorou mantad do momonsoi do miagal diti dot id doho' om popointalang dot id doho' do kobontugo' ku do koimbagu. 20 Oi Tuhan, aiso' no o koiyo diya'; om nokoilo mantad no iyahai dot iya' no o Kinorohingan. 21 Om aiso' i' o bansa'd suwai do miagal do bansa' dot Israil do hiti'd pomogunan tu' pinoidu' nu do mantad id ponguripanan om siniliu nu do tulun di songonuon nu. Om iri nopo winonsoi nu dot angagayo om i kongoimayaan kopio dot id diyolo' om pinopotongkop do kobontugo' do ngaran nu do hiti'd pomogunan. Pinosoliwan nu i tulun nu do mantad hilo'd Masir om nuyung nu i bansa'd suwai di mangantob daa di tulun nu do tontok di ruminikot i tulun nu. 22 Om siniliu nu o bansa' dot Israil do tulun nu do gisom dot alaid om iya' no, oi Tuhan, i nosiliu do Kinorohingan diyolo'. 23 Om baino' nopodti, oi Tuhan i Kinorohingan, om bayaanon no kasai' i batos nu do pasal doho' om i sinakagon ku, om wonsoyon no i pinoboros nu do wonsoyon nu. 24 Om abantug nondo o ngaran nu, om mompus-ompus nopondo o tulun do momoros do poingkaa, ‘Iri no Tuhan dit Agayo Kuasa' o Kinorohingan dot Israil,’ ka. Om iya' no o poposiliu kasai' do sinakagon ku do raja' do bansa' diti do gisom dot alaid. 25 Katama' oku id sumambayang do miagal diti, oi Kinorohingan ku, tu' nokointalang ngai' nu no iti dot id doho', i susuhuon nu, om nosunudan oku no diya' do silihon nu do raja' i sinakagon ku. 26 Iya' noo oi Tuhan, o Kinorohingan, om pinoboros nu o batos dit osonong kopio'dti dot id doho'. 27 Om pokionuon ku do barakatan nu i sinakagon ku om kopuriman kasai' i' iyolo' do kosianan nu. Iya' no, oi Tuhan, i minamarakat di tulun nu om abarakatan nondo iyolo' do gisom dot alaid,” ka dau.
Piro-Piro o Kinamanangan di Daud dot id Pisangadan
1 Om a' po alaid do mantad diri om ngoyo' no kawagu di Raja' Daud songodo' i tulun do Pilistin, om kaala' i' dau iyolo'. Om pinoidu' dau do mantad id pomorintaan diyolo' i bandar do Gat om i kokompungan do hiri'd posorili'. 2 Om naala' nogi' dau i tulun do Muab. Om mambayar diri iyolo' do sukai dot id dau. 3 Om ngoyo' po kawagu di Daud songodo' i Hadadisir, i raja' do pomogunan do Soba, it id suang do pomogunan do Siria, it id toning do watas do Hamat, tu' minumbal daa i Hadadisir do momorinta' kawagu di watas dot id somok di tudan do Bawang dot Iprat. 4 Om naahau di Daud o soribu di korita'-kuda', om turu' noribu o soudor do songinsakai'd kuda', om duwo nohopod noribu o soudor di Hadadisir di mamanau'd gakod. Om pinotobilang dau o piro-piro o kuda' do kabagal do mamagayat do hatus o korita'-kuda' dau di don sumasangod, nga' iri nopo i suwai om tinipuan ngai' dau o gakod. 5 Om soira' di pinoporikot daa i tulun do Siria do soudor do mantad hilo'd Damsik do mongoi ponguhup di Raja' Hadadisir, om ngoyo' noddi di Daud songodo' iyolo' om kapatai no dau o duwo nohopod om duwo noribu o tulun. 6 Om pomonsoi noddi i Daud do kiim dot iyonon do soudor do hiri'd watas diyolo', om id suang diri iyolo' do pomorintaan di Daud, om mambayar diri iyolo' do sukai dot id dau. Om honggo nopo i Daud do sumangod nga' pamanangon kasai' i' iyau'd Tuhan. 7 Om naahau nogi' di Daud i kolid do tamas di nigitan di piro-piro o pagawai di Hadadisir om igitai noddi dau do hilo'd Yorusalim. 8 Om ogumu' tomod nogi' o tambaga' do nanu dau do mantad hilo'd Tibhat om hilo'd Kun, i kabandaran do porintaon di Hadadisir di gulu po. (Om iri no i tambaga'ddi o pinakai di Suliman do winonsoi'd tangki', om i torigi dot angagayo, om i piro-piro o pakakas do tambaga' do hiri'd Walai'd Sasambayangan dot Agayo.) 9 Om korongou no di Tou, i raja' do pomogunan do Hamat, do naala' no di Daud o koinsanai di soudor di Hadadisir. 10 Om suhuo' noddi dau i Yoram, i tanak dau'd kusai, do mongoi poporikot do tabi' dau dot id di Raja' Daud om mongoi pongunsikou dau di kinamanangan dau do suminangod di Hadadisir. Om igit no i Yoram dot ogumu' o tamas, om pirok, om tambaga' do popuhawangon di Daud. 11 Om patahako' noddi di Raja' Daud iri dot id Tuhan do wonsoyon do konunu-nunuan di pakayon do tontok do sumambayang, om i pirok om i tamas nga' niyo iddi, i nanu dau do mantad id piro-piro o bansa'd tulun di naala' dau --- i bansa' dot Idom, Muab, Amon, Pilistin om Amalik. 12 Om kaala' no di Abisai, (tina' nopo dau om i Soruya), i tulun dot Idom do hilo'd rantai di roitan do Rantai do Silaon. Om napatai di Abisai o hopod om walu' noribu o tulun dot Idom. 13 Om pomonsoi no iyau do kokiiman do tiyonon do soudor do hilo'd pointongkop dot Idom. Om kosuang no do pomorintaan di Raja' Daud i tulun dot Idom. Om honggo nopo i Daud do sumangod nga' pamanangon kasai' nopo iyau'd Tuhan. 14 Om iyo noddi i Daud do minomorinta' do koinsanai dot Israil om antaan-taan kopio dau om owonsoi i' it otulid om it osonong dot id rayat dau. 15-17 Iti ngai' no i pagawai dit angasawat o pangkat do pinili' di Daud: Boyoon do soudor: i Yoab, i tobpinai di Abisai dot id dotuo Gomponulis do hiri'd walai do raja': i Yosapat, i tanak di Ahilud Imam: i Sadok, i tanak di Ahitub, om i Ahimilik, i tanak di Abiatar Gomponulis do Pomorinta: i Sausa Boyoon di madtatamong di raja': i Bonaya i tanak di Yoyada. Iri no tangaanak di Daud do kusai om ongkikaraja' do karaja' dit angasawat, dot id porinta.
Naala' di Daud i Tulun dot Amon om i Tulun do Siria
1 Om a' po alaid do mantad diri om kapatai no i Nahas, i raja' do tulun dot Amon. Om kosiliu nod raja' i Hanun, i tanak dau. 2 Om boros kad i Daud, “Mositi' nod pointalangon ku do mambalut oku di Hanun do miagal di winonsoi di Nahas dot id doho',” ka. Om ponuhu' no i Daud do tulun do mongoi posunud dot iyau nga' tumonggoi i' do tumongob. Om soira' di nokorikot iyolo' do hilo'd Amon om di minongoi iyolo' rapou di Raja' Hanun, 3 om boros ka di piro-piro o boyoon do tulun dot Amon dot id raja' diyolo', “Ondos nu daa om mongoi pomusou di tapa' nu o kinoponuhuan di Daud diti tulun do mongoi posunud do tumonggoi iyau'd tumongob? A' i' moti'! Kinoponuhuan nopo moti' dau diyolo'dti om mongoi ponoluku' om mongoi pogontong diti pomogunan om aanu indo dau!” ka diyolo'. 4 Om tangkapo' noddi di Hanun i tulun di sinuhu' di Daud diri om bugaro' no o ganggut diyolo', om pompodo' i rasuk diyolo' do mantad hiri'd guas do poo, om suhuo' nogiddi do minuli'. 5 Om ointingayaman tomod diri iyolo' do gumuli' do hiri'd pomogunan diyolo'. Om soira' di nokorongou i Daud di winonsoi do miagal diri, om posunudai no dau iyolo' do mundorong do hilo'd Yorikou om hilo-hilo' nopo do gisom pod kosuni kawagu i ganggut diyolo'. 6 Om kopurimanai noddi di Raja' Hanun om i tulun dot Amon do nosiliu diyolo' do pisangod i Daud. Om pambayar noddi iyolo' do tolu nohopod om apat noribu o kilogram do pirok do poniwa' do korita'-kuda' di don sumasangod om i papamanau do korita'-kuda' do mantad hilo'd Misopotamia i ponong id sokid, om mantad hilo'd Maaka om hilo'd Soba, i hilo'd pomogunan do Siria. 7 Om rikot no i tolu nohopod om duwo noribu o korita'-kuda' di don sumasangod di siniwaan diyolo' om i soudor di raja' do Maaka om pomukiim no do hilo'd somok do Modiba. Om soliwan ngai' no i tulun dot Amon do mantad id toinsanan o bandar diyolo' om sodia' nod mongoi sangod. 8 Om soira' di nokorongou i Daud di nosiliu do miagal diri om suhuo' no dau i Yoab om koinsanai di soudor dau do mongoi sangod. 9 Om pamanau no do suminoliwan i tulun dot Amon om sodia' no do sumangod do hiri'd wawayaan dot agayo do bandar do Raba, i bandar diyolo' dot agayo. Om iri ngai' no i raja' di ruminikot do minongoi uhup diyolo' om minawang do hiri'd talun. 10 Om kokito'ddi di Yoab do noturungku' iyau di soudor do pisangod. Om pilio' noddi dau i soudor dot Israil dit ongokoris kopio om boriso' no do potimbaba' di soudor do Siria. 11 Om iri nopo soudor do suwai om pinowoyo' ngai' dau di Abisai, i tobpinai dau. Om pinotimbaba' dau iyolo' di soudor dot Amon. 12 Om boros ka di Yoab dot id di Abisai, “Ondung okito nu dot aala' oku di tulun do Siria, om rumikot no do mongoi uhup doho', om ondung aala' ko di tulun dot Amon om rumikot oku i' do mongoi uhup diya'. 13 Pogiroton no o ginawo om kumosiou no! Tumotos toko' nod sumangod do bagi' di tulun toko' om i kabandaran do Kinorohingan toko'. Om pologoson nopo dot owonsoi o korohian do Tuhan,” ka dau. 14 Om pamanau no i Yoab om i tulun dau do minongoi sangod, om poggidu' no i soudor do Siria. 15 Om soira' di nokito di tulun dot Amon do mogidu' i soudor do Siria, om poggidu' noddi iyolo' do mantad id di Abisai om suang no di bandar. Om poguliai noddi di Yoab do hilo'd Yorusalim. 16 Om kopurimanai no di tulun do Siria do naala' iyolo' di tulun dot Israil. Om panganu no iyolo' do soudor do mantad hiri'd watas do ponong id koulayon do mantad id Bawang dot Iprat, do hilo'd pomogunan do Siria, om siliho' no diyolo' i Sobak do boyoon di soudor; iyau no i boyoon do soudor di Hadadisir, i raja' do Soba. 17 Om soira' di norongou di Daud iri om timungo' no dau i soudor dot Israil om soborong no iyolo' di Bawang do Yordan, om boriso' no dau iyolo' do potimbaba' di tulun do Siria. Om timpuun no iyolo' do misangod, 18 om uyungo' no di tulun dot Israil do pinopoguli' i tulun do Siria. Om napatai nopo di Daud om i tulun dau om turu' noribu o tulun do Siria di papamanau do korita'-kuda' di don sumasangod om apat nohopod noribu o soudor di mamanau'd gakod. Om napatai nogi' diyolo' i Sobak, i boyoon di soudor do Siria. 19 Om soira' di nopurimanan ngai' di soudor dit id siriba' di Hadadisir do naala' iyolo' dot Israil, om ponokiulud noddi iyolo' di Daud om pokiporinta' no iyolo' dau. Mantad poddi om a' noddi insan i tulun do Siria do mongoi uhup di tulun dot Amon.
Nosolod di Daud o Raba
1 Om tontok di dongmomiroun o kayu, i maso do koubasanan do raja' do mongoi sangod, om woyoo' no di Yoab i soudor om ngoyo' no diyolo' solodo' i pomogunan dot Amon; nga' i Raja' Daud nopo om minundorong i' do hilo'd Yorusalim. Om turungkuo' no diyolo' o bandar do Raba, om songodo' no diyolo' iri, om raago' noddi diyolo'. 2 Om ngoyo' noddi di Daud i tupi' di raja' do tulun dot Amon om tupio' no dau. Kawagato' nopo di tupi'ddi om haro i' doti' o tolu nohopod om apat o kilogram. Om haro nogi' o watu dot olumis dit agayo gatang do poinsokot di tupi'ddi. Om ogumu' nogi' o konunu-nunuan do nanu diyolo' do mantad id bandar diri. 3 Om sansagai ngai' no dau i tulun do hilo' do kumaraja' do mamagaragadi', om manangkul, om mangapak. Om niyo nogiddi dau i tulun di hiri'd kabandaran dot Amon do suwai. Om guli' noddi i Daud om koinsanai di soudor dau do hilo'd Yorusalim.
Suminangod di Tulun do Pilistin dit Angagayo Koulun
4 Om alaid-laid noddi do mantad diri, om pisangod po kawagu iyolo' di tulun do Pilistin do hilo'd Gisir. Om tontok noddi do pinatai di Sibkai, i mantad hilo'd Husa, o tulun dit agayo kopio koulun do roitan dot i Sipai. Om naala' iddi i tulun do Pilistin. 5 Om haro po kawagu o pinisangadan do suminaap di tulun do Pilistin. Om tontok noddi do pinatai di Ilhanan, i tanak di Yair, i Lahmi, i tobpinai di Guliat, i mantad hilo'd Gat. Randagan nopod tandus dau om irad di salampad di pangawalan do tulun di mangangawol. 6 Om haro po kawagu o pinisangadan do hilo'd Gat. Om haro o tulun dot agayo kopio koulun do hilo' dit onom goduwo o tunturu' do lapap om palad. Iyau nopo om sinakagon do tulun dit angagayo koulun do mantad di gulu po. 7 Om momohingi-hingi nopo iyau di tulun dot Israil. Nga' napatai i' iyau di Yonatan, i tanak di Simia, i tanak do tobpinai di Daud. 8 Iri nopo tolu tulun di pinatai di Daud om i tulun dau om sinakagon ngai' nopo do tulun dit angagayo koulun do mantad hilo'd bandar do Gat.
Nintob di Daud i Tulun dot Israil om Yohuda
1 Om orohian diri o rogon do mamagangau do tulun dot Israil om binsuhuo' noddi dau i Daud do mongintob di tulun. 2 Om sunudai no di Daud i Yoab om i piro-piro o pagawai dau do suwai, boros ka dau, “Ongoi kou tongkop dot Israil, om homboon ngai' no dokoyu o watas dot Israil om intobon ngai' no o tulun. Tu' orohian oku do koilo ondung piro o kogumuo' diyolo',” ka. 3 Om boros ka di Yoab, “Maha' daa om piluapon do Tuhan o kogumuo' do tulun dot Israil dot inghatus kogumu' ko' mantad do kogumuo' diyolo' do dinondo! Susuhuon ngai' nu i' iyolo', oi Tuan Raja'. Nga' nokuro'ddi tu' orohian ko do momonsoi do miagal diti om gisom dot oinsanan nopondo o tulun do mamabo do kootuson do kasalaan diti,” ka dau. 4 Nga' sansagai i' di raja' i Yoab do mumboyo' di ponuhuan dau. Om pamanau noddi i Yoab, om hombo no iyau do tuminongkop di pomogunan dot Israil, om aiso' no ot a' dau noongoi, om poguliai nogiddi dau do hilo'd Yorusalim. 5 Om posunudo' no dau dot id di Raja' Daud o ginumu' di tulun di milo do sumangod. Kogumuo' nopo om sojuta om hatus o tulun do hilo'd Israil om apat nahatus om turu' nohopod noribu o tulun do hilo'd Yohuda. 6 Nga' payat nopo do Liwi om Binyamin om a' i' di Yoab nongoi intobo' tu' a' i' iyau kosokodung di pinonuhuan di raja'. 7 Om Kinorohingan nga' a' nogi' orohian di winonsoi di Daud, om gowoi poddi om hinukuman dau i tulun dot Israil. 8 Om sambayang noddi i Daud dot id Kinorohingan, “Agayo no kopio o dusa ku tu' minomonsoi oku i' do miagal diti! Ompunai oku no. Tu' nabasug tomod oku,” ka dau. 9 Om boros kaddi do Tuhan dot id di Nabi Gad, i ponosihat di Daud, 10 “Ngoyo' sunudai i Daud dot onuan ku iyau do tolu o pinsimpilian. Om honggo nopo i pilion dau om iri no o wonsoyon ku,” ka. 11 Om ongoi no i Gad solowot di Daud om sunudai no dau di nokoboros do Tuhan. Om ponguhot noddi i Gad, “Honggo'dti o pilion nu, tu' mositi' no do pilion nu o tiso' diti: 12 Tolu o toun do mononglous ko' tolu o tulan do gusa-gusaon ko do soudor do pisangod nu ko' tolu o tadau do saapon ko'd Tuhan di gayang dau om poporikot iyau do toruol di mogkoroliu do hiti'd pomogunan nu, om monuhu' di moloikat dau do porikot do kapatayon dot id pointongkop dot Israil? Poboroso' no do dinondo ondung honggo'ddi o posimbaron ku'd Tuhan?” ka dau. 13 Om boros kad Daud dot id di Gad, “Oborulong oku nopodti! Nga' mada' oku id hukuman do tulun. Suwai ko' pologoson nopo o Tuhan do momohukum doho', tu' obinsianan i' iyau,” ka dau. 14 Om porikatai nod Tuhan do toruol do mogkoroliu i tulun dot Israil. Om turu' diri nohopod noribu o tulun do napatai. 15 Om ponuhu' no daa'ddi o Tuhan do moloikat do mongoi pamaraag do Yorusalim, nga' wolihai iddi dau o tosorou dau. Om boros ka dau dot id moloikat diri, “Tingkod! Ula' pori!” ka. Om tontok nopoddi om poingkakat no i moloikat do hiri'd toning di pamagamasan do gandum di Arauna, i tulun do Yobus. 16 Om kokito di Daud i moloikat do poingkakat do hilo'd mawo-dawo do kiinigit do gayang, om posodia' no daa do mamaraag do Yorusalim. Om otud noddi do hiri'd tana' i Daud om koinsanai di boyoon di tulun do kipinakai ngai' do karung do tanda' do monosol. 17 Om sambayang no i Daud do poingkaa, “Oi Kinorohingan, iyoho' no i nakasala'. Iyoho' no i minonuhu' do mongintob do tulun. Nunu noddi o kasalaan diti tulun dit aiso' no o pokukurayan diti? Oi Tuhan, i Kinorohingan ku, hukumai oku nopo om i sompiiyon ku, nga' kada' nogi' kuroi-kuroyo' iti tulun nu,” ka. 18 Om sunudai noddi di moloikat do Tuhan i Gad do monuhu' di Daud do momonsoi do pananaraban do porsombahan dot id Tuhan do hiri'd pamagamasan do gandum di Arauna. 19 Om pamanau no i Daud do minumboyo' di pinonuhuan do Tuhan do momonsoi di pinoboros di Gad dot id dau. 20 Om momogomos daa di gandum i Arauna om it apat o tanak dau'd kusai do hiri'd pamagamasan. Nga' soira' di nokito diyolo' i moloikat om panangkus nopo it apat o tangaanak di Arauna do minongoi lisok. 21 Om kokito po di Arauna i Raja' Daud do mimbobontol do hiri, om tongkiadai nopo dau i pamagamasan om otud no do hiri'd tana'. 22 Om boros ka di Daud dot id dau, “Padagango' daa dot id doho' iti pamagamasan nu'd gandum om kopoingkakat oku id pananaraban do porsombahan do don Tuhan do hiti, om ontingkod i' iti toruol do mogkoroliu. Patahakon ngai' ku i' diya' o gatang,” ka dau. 23 Boros ka di Arauna, “Onuo' nopoti, oi Tuan Raja', om wonsoyon nopo i korohian nu do momonsoi. Hati ngai' i' iti sapi' do maan do porsombahan do sorobon dot id pananaraban do porsombahan, om hati iti papan do pamagamasan do maan do pogudung, om hati iti gandum do maan do porsombahan. Insanan ku nopoti do papatahak diya', om a' i' minog do bolion,” ka dau. 24 Nga' boros ka di raja' do suminimbar, “Amu', bayaran ngai' ku i' i gatang. A' oku i' papatahak do porsombahan dot id Tuhan do nunu nopo i diya'd songonuon, om it a' ku oboli,” ka dau. 25 Om bayarai no di Daud i Arauna dot onom nahatus o tusin do tamas do pinomoli di pamagamasan do gandum diri. 26 Om pomonsoi noddi i Daud do pananaraban do porsombahan do don Tuhan do hiri, om papatahak no iyau do porsombahan do sorobon om porsombahan do piombolutan. Om sambayang noddi iyau, om simbaro' nod Tuhan i sambayang dau do mikuwo'd pinoporikot do tapui do mantad hilo'd surga do minonorob di porsombahan do hiri'd pananaraban do porsombahan diri. 27 Om suhuo' noddi do Tuhan i moloikat do paangkap di gayang dau, om umboyoo' noddi di moloikat. 28 Om soira' di nokito di Daud iri om koilaai no dau do nosimbar nod Tuhan i sambayang dau, do tontok di pinapatahak iyau di porsombahan do hiri'd pananaraban do porsombahan dit id pamagamasan do gandum di Arauna. 29 Om tontok nopoddi om hilo' pod kinoiyonon do sumambayang di hilo'd Gibion i Kiim do Tuhan, i winonsoi di Musa do hilo'd tana' do kowotuan, om iri nogi' i pananaraban do porsombahan nga' hilo' po. 30 Nga' a' i' i Daud minongoi sambayang dot id Kinorohingan do hilo' tu' ooris iyau di gayang di moloikat do Tuhan.
1 Om boros kaddi di Daud, “Hiti no o pamansayan di Walai'd Tuhan, i Kinorohingan. Om iti no o pananaraban do porsombahan diti o pananaraban di tulun dot Israil do porsombahan di sorobon do patahakon dot id Tuhan,” ka dau.
Sumodia' do Momonsoi di Walai'd Sasambayangan dot Agayo
2 Om suhuo' no di Raja' Daud do tumimung o koinsanai di tulun do bansa'd suwai i poingiyon do hiri'd pomogunan dot Israil. Om suhuo' no dau iyolo' do kumaraja'. Om wookon nopo diyolo' om pinoposodia' do watu do pomonsoi di Walai'd Sasambayangan dot Agayo. 3 Om minonimung iyau do basi' dot ogumu' kopio do wonsoyon do lantak om tontolingo di wawayaan dot agayo di walai'ddi. Om minonimung nogi' iyau do tambaga' dot ogumu' kopio gisom dot aiso' no o milo do monimbang do kawagato'. 4 Om minokianu nogi' iyau di tulun do Tirus om tulun do Sidon dot ogumu' o kayu sedar do Libanon. 5 Winonsoi pogi' dau o miagal diri nga' poingkaa ot osorou dau, “Iri nopo Walai'd Sasambayangan dot Agayo do wonsoyon di Suliman, i tanak ku, om mositi' no dot olumis kopio om abantug do pointongkop diti pomogunan. Nga' omulok po iyau om okuri' po o nopinsingilaan, om mositi' no dot iyoho' o posodia' ngai' diti pakakas,” ka. Om ogumu' no o nokosodia' di Daud do pakakas dit a' po iyau napatai. 6 Om lohowo' no dau i Suliman, i tanak dau om suhuo' no dau do momonsoi di Walai'd Sasambayangan dot Agayo do don Tuhan, i Kinorohingan di tukuon do tulun dot Israil. 7 Om boros ka di Daud dot id dau, “Ondu', orohian oku daa do momonsoi do Walai'd Sasambayangan dot Agayo do pomusou'd Tuhan i Kinorohingan ku. 8 Nga' sinunudan oku'd Tuhan dot adala' kopio o tulun do napatai ku om asaru' kopio oku do minongoi sangod. Gowoi poddi om mada' o Tuhan dot iyoho' o momonsoi di Walai'd Sasambayangan dot Agayo. 9 Nga' minamatos i' ma iyau dot id doho' do poingkaa, ‘Haro'ndo o tanak nu do momorinta' dot id suang do kosimbayanan, tu' tulungon ku'ndo iyau gisom dot aiso' nondo o pisangadan. Om ngaran nopondo dau om i Suliman tu' tontok no di pomorintaan dau dot onuan ku do kosimbayanan ot Israil om aiso' o kagangau. 10 Om iyau no i momonsoi do Walai ku. Om osiliu nondo iyau do tanak ku, om osiliu oku do tapa' dau. Om momorinta' kasai' nopondo dot Israil i sinakagon dau do gisom dot alaid,’ ka dau,” ka di Daud. 11 Om boros ka kawagu di Daud, “Om maha' daa om monguhup kasai' diya' o Tuhan, i Kinorohingan nu, oi ondu'. Om maha' daa om owonsoi kopio nu i Walai'd Sasambayangan dot Agayo do miontok di pinabatos dau. 12 Om maha' daa om onuan ko'd Tuhan, i Kinorohingan nu do pomusarahan dot atarom om toilaan om milo ko i' do momorinta' dot Israil do miontok di Tourat dau. 13 Ondung umboyoon ngai' nu it oturan do pinatahak do Tuhan dot id di Musa do bagi' dot Israil, om koundar ko no. Pokoiso-isoon no om pogiroton no o ginawo om kada' poddosi do tumimbaba' do nunu nopo. 14 Om iri no i Walai'd Sasambayangan dot Agayo om tuminotos oku no do monimung, gisom do nokotimung oku do tolu noribu om apat nahatus o tan do tamas om lobi ko' tolu nohopod om apat noribu o tan do pirok do maan do pomonsoi'ddi. Om suwai no ko' mantad diri om a' i' ointob-intob i nokosodia' ku do tambaga' om basi'. Om haro no o nokosodia' ku do kayu om watu, nga' mongoi ko po mando panganu kawagu do pomoruhang diri. 15 Ogumu' no o tulun nu do momonsoi do karaja'ddi. Haro no o tulun do kumaraja' do hiti'd pamabakan do watu, om haro o tukang do suwai di milo do 16 monukang do tamas, om pirok, om tambaga' om basi'. Om timpuunan no i karaja'ddi dot oruhai, om maha' daa om uhupan ko'd Tuhan,” ka dau. 17 Om suhuo' no di Daud o toinsanan di boyoon dot Israil do muhup di Suliman. 18 Om boros ka dau, “Nuhupan ko id Tuhan, i Kinorohingan nu, gisom do haro o kosimbayanan om aiso' o kagangau. Tu' pinologos oku dau do minangala' do koinsanai do tulun di poingiyon mantad dot id pomogunan diti, om baino' noddi om id siriba' no iyolo' do kuasa' nu om id siriba' do kuasa'd Tuhan. 19 Iyo nopoddi om sambayang no dot id Tuhan, i Kinorohingan nu do mikuwo'd aayi-ayi' o ginawo nu om aayi-ayi' o pomusorou nu. Timpuun nod mamaal di Walai'd Sasambayangan dot Agayo om kosuang nu i' do hiri i Kaban do Tumpongo'd Tuhan om koinsanai di pakakas do suwai di pakayon do sumambayang dot id dau,” ka dau.
1 Om soira' di molohing noddi kopio i Daud om siliho' no dau do raja' dot Israil i Suliman, i tanak dau.
Karaja' di Tulun do Liwi
2 Om timungo' no di Raja' Daud o koinsanai di boyoon do tulun dot Israil om koinsanai dit imam om i tulun do Liwi. 3 Om intobo' no dau o koinsanai di tongokusai do tulun do Liwi di kiumur do tolu nohopod o toun om it otuo ko' iri. Om kogumuo' nopo dot oinsanan om tolu nohopod om walu' noribu o tulun. 4 Om suhuo' no di raja' o duwo nohopod om apat noribu o tulun do mongilo-ilo di karaja' do hiri'd Walai'd Sasambayangan dot Agayo, om onom noribu o tulun di mangangatur om momimisara', 5 om apat noribu o tulun do madtatamong, om apat noribu o tulun do mamarayou'd Tuhan mikuwo'd popouni do tuunion di pinatahak di raja'. 6 Om bohogio' no di Daud i tulun do Liwi do tolu o bohogian do tumanud di pinuruan do sompiiyon diyolo': pinuruan do sompiiyon di Girson, om pinuruan do sompiiyon di Kohat om pinuruan do sompiiyon di Morari. 7 I Girson nopo om kianak do duwo o kusai: i Ladan om i Simoi. 8 I Ladan no om kianak do tolu o kusai: i Yohiol, i Sitim om i Yoil. 9 Om iyolo' no i boyoon di pinuruan do sompiiyon di suminolusuk di Ladan. (I Silomit nopo, om i Hasiol om i Haran nga' tanak di Simoi do kusai). 10-11 I Simoi nopo om kianak dot apat o kusai: i Yahat, i Sisa, i Yius om i Boria. Iti nopo ngaran diti om pinoirus do tumur diyolo'. I Yius nopo di Boria om a' i' ogumu' no o sinakagon diyolo' om iso' noddi o pinuruan do sompiiyon diyolo'. 12 I Kohat nopo om kianak dot apat o kusai: i Amram, i Yisar, i Hibron om i Usiol. 13 I Amram nopo, i tanak dau dot id dotuo, om tapa' di Harun om i Musa. (I Harun nopo om i sinakagon dau om tinantu' no mantad do mongilo-ilo di pakakas do pakayon do sumambayang do gisom dot alaid, om modtutud do kominyan dot id Tuhan, om mogobi-obi' do Tuhan, om mamarakat di tulun dot id suang do ngaran do Tuhan. 14 Nga' iri nopo tangaanak di Musa do kusai, i Musa i susuhuon do Kinorohingan diri, om pinohompit i' di payat do Liwi). 15 I Musa nopo om kianak do duwo o kusai: i Girsom om i Iliosor. 16 Iri nopo boyoon dot id pogialatan di tangaanak di Girsom om i Sibuil. 17 Iso' no i Rihabia o tanak di Iliosor do kusai, nga' i Rihabia nopo om ogumu' i' o tanak. 18 I Yisar noo, i tanak di Kohat do koduwo, om kianak do kusai dot i Silomit o ngaran. Om iyau no i boyoon di pinuruan do sompiiyon dau. 19 I Hibron noo, i tanak di Kohat do kotolu, om kianak dot apat o kusai: i Yoria, i Amaria, i Yahasiol om i Yikamiam. 20 I Usiol noo, i tanak di Kohat do kaapat om kianak do duwo o kusai: i Mika om i Yisia. Om i Mika no o nosiliu do boyoon di pinuruan do sompiiyon dau. 21 I Morari nopo om kianak do duwo o kusai: i Mali om i Musi. I Mali nga' duwo i' o tanak do kusai: i Iliasar om i Kis. 22 Nga' aiso' i' o tanak di Iliasar do kusai do gisom do kinapatayo' dau; tongoondu' ngai' nopo o tanak dau. Om kowino' no i tangaanak di Iliasar do tondu' di pinsan diyolo', iri no i tangaanak di Kis. 23 I Musi nopo, i tanak di Morari do koduwo om kianak do tolu o kusai: i Mali, i Idir om i Yirimot. 24 Om iri ngai' no o sinakagon di Liwi do tumanud do pinuruan do sompiiyon om sompiiyon diyolo', om nokotulis ngai' nopo o ngaran diyolo'. Om haro ngai' nopo o karaja' di sinakagon dau di duwo nohopod o toun do tumur ko' it otuo ko' iri do hiri'd Walai'd Sasambayangan dot Agayo. 25 Om boros ka di Daud, “Noonuan nod Tuhan, i Kinorohingan dot Israil, do kosimbayanan i tulun dau, om iyau nondo nga' poingiyon kasai' no do hiti'd Yorusalim do gisom dot alaid. 26 Om a' noddi minog do pisaan-saan di tulun do Liwi i Kiim do Tuhan om i piro-piro o pakakas do pakayon do sumambayang,” ka. 27 Om tumanud nopo di pinonuhuan di Daud dit id tohuri no om potulison ngai' nopo do mongoi karaja' i tulun do Liwi dit orikot o duwo nohopod o toun do tumur, 28 om nonuan iyolo' do karaja' diti: monguhup di piro-piro ot imam di suminolusuk di Harun do mongilo-ilo di kowoyo-woyoo' do sumambayang do hiri'd Walai'd Sasambayangan dot Agayo, om miontong do koinsanai di natad om i bilik, om popoopi' di konunu-nunuan di nokotobilang do maan do don Tuhan om a' indo iri ososomu'. 29 Om mongilo-ilo di roti do patahakon dot id Kinorohingan, om i tapung di maan do porsombahan dot id Tuhan, om i roti dit onipis dit a' rinalatan do pangambang, om i porsombahan di linugu, om i tapung di rinalatan do tumau do saitun, om monimbang om magadang di porsombahan di hiri'd Walai'd Sasambayangan dot Agayo; 30 om modsinding do mamarayou'd Tuhan do monikid kosuabon om monikid sosodopon, 31 om soira-ira' nopo do monorob do porsombahan dot id Tuhan do tontok do tadau'd Sabat, om Tadau dot Agayo do Tulan do Wagu, om tontok di tadau dot agayo do suwai. Om sinuhu' i tulun do Liwi do sumambayang dot id Tuhan do pointikid-tikid do maso. 32 Om iyolo' nogi' o sinuhu' do mongilo-ilo om momogompi' di Kiim do Tuhan om i Walai'd Sasambayangan dot Agayo, om monguhup di koobpinayan diyolo', om i piro-piro ot imam di suminolusuk di Harun, do tontok do haro o sumambayang do hiri'd Walai'd Sasambayangan dot Agayo.
Karaja' do Pinatahak dot id Piro-Piro ot Imam
1-3 I Harun nopo om kianak dot apat o kusai: i Nadab, i Abihu, i Iliasar om i Itamar. Iyo Nadab nopo di Abihu om nokopogulu di tapa' diyolo' do minatai, om aiso' i' o sinakagon diyolo'. Om i Iliasar po om i Itamar o nosiliu dot imam. Om bohogio' no di Raja' Daud i sinakagon di Harun do tumanud di karaja' diyolo'. Om nuhupan iyau di Sadok, i sinakagon di Iliasar, om i Ahimilik, i sinakagon di Itamar do mamahagi' diyolo'. Iti ngai' no o sinompuruan do tulun di kinohompiton di sinakagon di Itamar. 4 Iri nopo sinakagon di Iliasar om binahagi' do hopod om onom o sinompuruan, om iri no i sinakagon di Itamar om binahagi' do walu' o sinompuruan; niyo pogiddi nga' poinggumu-gumu' o tongokusai do nosiliu'd boyoon do sompiiyon di sinakagon di Iliasar. 5 Id pogialatan nopo di sinakagon di Iliasar om i Itamar om haro o piro-piro o pagawai do Walai'd Sasambayangan dot Agayo om boyoon do tugama', om ralan nopoddi do minamahagi' do karaja' diyolo' om numaan undio'. 6 Om minogisowoli-woli'ddi do minongundi' i sinakagon di Iliasar om i sinakagon di Itamar. Om tuliso' noddi di Somaya, i tanak di Nitaniil, o ngaran diyolo'. I Somaya nopo om tulun do Liwi om gomponulis iyau. Om suminiliu nopo do sasi' om i raja' om i piro-piro o pagawai dau, om i Sadok it Imam diri, om i Ahimilik, i tanak di Abiatar, om koinsanai di boyoon di sompiiyon dot imam om i piro-piro o boyoon do piro-piro o sompiiyon do tulun do Liwi. 7-18 Om iti ngai' no i duwo nohopod om apat o sinompuruan do tulun do tumanud di kinoirus-iruso' do minongundi': - - - - - - - - - - - - - - - - - - - - - - - - 19 Iri ngai' no i tulun di pinotulis o ngaran do tumanud di karaja' diyolo'. Om suang no iyolo' di walai'd Sasambayangan dot Agayo om wonsoyo' no diyolo' i karaja' diyolo' do tontok do sumambayang di natantu' mantad di Harun, i taki-aki diyolo' do tumanud di pinonuhuan do Tuhan, i Kinorohingan dot Israil.
Dopitar do ngaran do Tulun do Liwi
20 Iti ngai' no o boyoon di sompiiyon do sinakagon di Liwi do suwai: I Yodaya, i sinakagon di Subail, i suminolusuk di Amram; 21 I Yisia, i sinakagon di Rihabia; 22 I Yahat, i sinakagon di Silomit, i suminolusuk di Yisar; 23 I Yoria, i Amaria, i Yahasiol om i Yokamiam, i tangaanak ngai' di Hibron; do poingirus do tumur diyolo': 24 I Samir, i sinakagon di Mika, i suminolusuk di Usiol; 25 I Sakaria, i sinakagon di Yisia, i suminolusuk di Usiol, i tobpinai di Mika; 26 I Mali, i Musi om i Yaasia, i sinakagon di Morari. 27 I Yaasia, i kianak do tolu o kusai: i Soham, i Sakur om i Hibri. 28-29 I Mali nopo om kianak do duwo o kusai: i Iliasar om i Kis. I Iliasar nopo om aiso' i' o tanak do kusai nga' i Kis nopo om kianak i' dot iso' o kusai, dot i Yiramiil o ngaran. 30 I Musi nopo om kianak do tolu o kusai: i Mali, i Idir om i Yirimot. Iti ngai' no o sompiiyon dot id suang do payat di Liwi. 31 Om tuminanud iyolo' di winonsoi di piro-piro o tobpinai diyolo' di gulu po, iri no i piro-piro ot imam di suminolusuk di Harun. Tu' pongilo nopo diyolo' do karaja' diyolo' om undion di boyoon do pointikid-tikid do sompiiyon om it iso' di tadi' dau ondung nunu o diyolo'd karaja'. Om sasi' nopo nga' i Raja' Daud, i Sadok, i Ahimilik, i piro-piro o boyoon do sompiiyon dot imam, om i piro-piro o boyoon do tulun do Liwi.
I Pouuni do Tuunion do Hiri'd Walai'd Sasambayangan dot Agayo
1 Om pilio' no di Raja' Daud om i piro-piro o boyoon do tulun do Liwi o pinuruan do sompiiyon diti, do momoyo' do tontok do sumambayang: i Asap, i Himan, om i Yodutun. Om iyolo' ngai' no i popinsunud do boros do Kinorohingan do mikuwo'd ompoton do kecapi om gambus om simbal. Iti no o dopitar do ngaran do tulun di nopili' do momoyo' do tontok do sumambayang, i woyoon do pointikid-tikid do sinompuruan diyolo': 2 It apat o tanak di Asap do kusai: i Sakur, i Yusup, i Nitania om i Asarila. Om i Asap no o boyoon diyolo', tu' popolombus do boros do Kinorohingan do soira' nopo do monuhu' i raja'. 3 It onom o tanak di Yodutun do kusai: i Godalia, i Sori, i Yosaya, i Simoi, i Hasabia om i Matisa. Om pinopolombus iyolo' do boros do Kinorohingan do tumanud dit ituduk di tapa' diyolo', om mikuwo dot ompoton do kecapi, om sinding do pamarayou om pongunsikou'd Tuhan. 4 I hopod om apat o tanak di Himan do kusai: i Bukia, i Matania, i Usiol, i Sibuil, i Yirimot, i Hanania, i Hanani, i Iliata, i Gidalti, i Ramamti-Isir, i Yosbikasa, i Maloti, i Hotir om i Mahasiot. 5 I Himan nopo om nabi di raja'. Pinatahak do Kinorohingan dot id di Himan iti hopod om apat o tanak do kusai om tolu o tanak do tondu' do miagal di nakabatos do Tuhan, tu' suahon dau i Himan. 6 Popouni ngai' nopo do simbal om kecapi om gambus i tangaanak di Himan do tumanud dit ituduk di tapa' diyolo', do mongompot di sambayang do hiri'd Walai'd Sasambayangan dot Agayo. Om i Asap noo, om i Yodutun, om i Himan, om pisunudan di raja' di ponuhuan dau. 7 Iti nopo duwo nohopod om apat o tanak do tongokusai diyolo'dti om nongosompipi' no i tulun dit ongoilo, om iri no tulun do Liwi di koobpinayan diyolo' om ongoilo kopio do popouni do tuunion. Oinsanan nopo om duwo nahatus om walu' nohopod om walu' o tulun. 8 Om ralan nopo diyolo' do minongilo ondung nunu o diyolo'd buruon, om maan diyolo' undio' --- dot id pogialatan dit ongomulok po om i molohing no, om it ongoilo no om i minsingilo nogi'. 9-31 Iri nopo duwo nahatus om walu' nohopod om walu' o tulun diri om binahagi' do tumanud do sompiiyon dot id duwo nohopod om apat o sinompuruan do sorohopod-hopod om duwo o tulun dot iso' o sinompuruan, om kiboyoon nogi' o pointikid-tikid do sinompuruan. Om iti no o ngaran diyolo' do pinoirus do tumanud di kinoirus-iruso' do minongundi': - 1. i Yusup, i mantad id sompiiyon di Asap - 13. i Subail - 2. i Gadalia - 14. i Matisa - 3. i Sakur - 15. i Yirimot - 4. i Yisri - 16. i Hanania - 5. i Nitania - 17. i Yosbikasa - 6. i Bukia - 18. i Hanani - 7. i Yisarila - 19. i Maloti - 8. i Yosaya - 20. i Iliata - 9. i Matania - 21. i Hotir - 10. i Simoi - 22. i Gidalti - 11. i Asariil - 23. i Mahasiot - 12 i Hasabia - 24. i Romamti Isir
I Madtatamong di Walai'd Sasambayangan dot Agayo
1 Iti no o karaja' di tulun do Liwi di madtatamong di Walai'd Sasambayangan dot Agayo. Mantad nopo dot id sompiiyon di Kora om i Misilimia i tanak di Kori, i mantad id sompiiyon di Ibiasap. 2 I Misilimia nopo om kianak do turu' o kusai. Om iti no o ngaran diyolo' do pinoirus di tumur diyolo': i Sakaria, i Yidail, i Sobaya, i Yatniol, 3 i Ilam, i Yohanan om i Ilyoinai. 4 I Obid Idom no om pinuhawangan do Kinorohingan do walu' o tanak do kusai. Om iti no o ngaran diyolo' do pinoirus di tumur diyolo': i Somaya, i Yosabad, i Yoa, i Sakar, i Nitaniil, 5 i Amiol, i Isakar om i Piulitai. 6-7 I Somaya nopo, i tanak di Obid Idom dot id dotuo om kianak dot onom o kusai: i Otni, i Ripail, i Obid, i Ilsabad, i Ilihu om i Simakia. Om iyolo' ngai' nopodti om tulun di pusohon tu' kitoilaan ngai' nopo iyolo' dot id suang do pinuruan do sompiiyon diyolo', om okon-okon po om i Ilihu om i Simakia. 8 Id suang nopo do sompiiyon di Obid Idom om haro ot onom nohopod om duwo o tulun dit oilo kopio do nonuan do karaja' do madtatamong. 9 Om mantad no dot id sompiiyon di Misilimia om haro o hopod om walu' o tulun dit oilo kopio do nonuan do karaja'ddi. 10 Om mantad no dot id pinuruan do sompiiyon di Morari om i Hosa o nopili'. I Hosa nopo om kianak dot apat o kusai: i Simri (siniliu iyau di tapa' dau do boyoon, mulong po dot okon ko' iyau o tanak do kotuahan), 11 i Hilkia, i Tibalia om i Sakaria. Om oinsanan nopo om hopod om tolu o tulun do mantad id sompiiyon di Hosa do nosiliu do madtatamong di Walai'd Sasambayangan dot Agayo. 12 I nopo madtatamong di Walai'd Sasambayangan dot Agayo om binahagi' do piro-piro o sinompuruan do tumanud di sompiiyon diyolo'. Om pinakaraja' iyolo' do hiri'd Walai'd Sasambayangan dot Agayo do miagal di tulun do Liwi do suwai. 13 Om pointikid-tikid do sompiiyon, dit ogumu' ko' it okuri' nga' minongundi' ngai' nopo do manantu' ondung honggo i wawayaan do tamangan diyolo'. 14 Noontok nopo di Solomia om i wawayaan do ponong id koulayon, om noontok no di Sakaria, i tanak di Solomia dit osonong kasai' nopo o nosihat do poboroson, om i wawayaan ponong id utara. 15 Om noontok no di Obid Idom om i wawayaan do ponong hiri'd salatan, om iri no tangaanak dau om nakaanu do karaja' do madtamong di piro-piro o bilik do poopian do konunu-nunuan. 16 Om karaja' nopo do naanu di Supim om i Hosa om madtamong di wawayaan do ponong id kotonobon om i wawayaan do roitan do Syalikit, i hiri'd ralan do tumakad. Om mogisowoli-woli nopo iyolo' do kumaraja' do tumanud di maso do kumaraja' di natantu' mantad. 17 Iri nopo i ponong hiri'd koulayon, om soroonom-onom kasai' nopo o tulun do madtamong, om iri no ponong hiri'd utara om apat o tulun, om iri ponong id salatan nga' apat i' o tulun do madtamong do monikid tadau. Om iri bilik do poiiyanan do konunu-nunuan nga' saraapat-apat i' o tulun do madtamong do monikid tadau: iso' nopo bilik om tamangan do duwo o tulun. 18 Om iri no it id toning di tiirikohonon do tulun dot ogumu' i ponong hiri'd kotonobon, om apat o tulun do madtamong di ralan dot agayo, om duwo o tulun do madtamong di tiirikohonon do tulun dot ogumu'. 19 Om iyo noddi o karaja' di madtatamong do mantad id pinuruan do sompiiyon di Kora om i Morari.
I Karaja' do Suwai do Hiri'd Walai'd Sasambayangan dot Agayo
20 Om iri no tulun do Liwi do suwai om nonuan do karaja' do mongilo-ilo di poopian di pinatahak dot id Kinorohingan om i kousinan do Walai'd Sasambayangan dot Agayo. 21 Om i Ladan nopo, i tiso' di tangaanak di Girson do kusai, om taki-aki do piro-piro o pinuruan do sompiiyon, om kohompit no i sompiiyon di Yohiol, i tanak dau. 22 Om duwo po o tanak di Ladan do kusai, i Sitam om i Yoil, do mongilo-ilo di kousinan do Walai'd Sasambayangan dot Agayo om i poopian do konunu-nunuan. 23 Om iri nogi' i sinakagon di Amram, i Yisar, i Hibron om i Usiol nga' nonuan nogi' do karaja'. 24 Om nosiliu nopod boyoon do mongilo-ilo do kousinan do Walai'd Sasambayangan dot Agayo om i Sibuil, i mantad id pinuruan do sompiiyon di Girsom, i tanak di Musa. 25 I Sibuil nopo om tanak di Silomit do suminolusuk di Iliosor, i tobpinai di Girsom. I Iliosor nopo om tapa' di Rihabia, om i Rihabia no om tapa' di Yosaya, om i Yosaya no om tapa' di Yoram, om i Yoram no om tapa' di Sikri, om i Sikri no om tapa' di Silomit. 26 I Silomit nopo om i sompiiyon dau om mongilo-ilo di porsombahan di patahakon dot id Kinorohingan, di pinatahak di Raja' Daud, om i piro-piro o boyoon do sompiiyon, om i piro-piro o soudor. 27 Iri nopo porsombahan diri om i wookon di dapu' di nangaanu diyolo' dot id pisangadan, om pinatahak diri diyolo' do maan do koburu-buruon do hiri'd Walai'd Sasambayangan dot Agayo. 28 I Silomit no om i sompiiyon dau o mongilo-ilo do koinsanai di pinatahak do maan do koburu-buruon do hiri'd Walai'd Sasambayangan dot Agayo; om kohompit no i porsombahan di pinaatod di Somuil; om i Raja' Saul, om i Abnor, i tanak di Nor; om i Yoab, i tanak di Soruya.
Karaja' di Tulun do Liwi do Suwai
29 Id pogialatan nopo di sinakagon di Yisar, om i Kinania no om i tangaanak dau'd kusai o nonuan do karaja' do mangangatur om momimisara' dot id pogialatan di tulun dot Israil. 30 Id pogialatan nopo di sinakagon di Hibron, om i Hasabia no, om soribu om turu' nahatus o koobpinayan do sompiiyon dau o nonuan do karaja' do mongilo-ilo do pasal di don tugama' om i dong pomorinta' do hilo'd Israil do ponong hiri'd kotonobon do mantad id Bawang do Yordan. Om oinsanan nopo iyolo' do tulun dit ongoilo. 31 I Yoria nopo om boyoon di sinakagon di Hibron. Tontok di kaapat nohopod do toun do pomorintaan di Daud, om nokoumbal do minongilo kopio do sinolusukan di sinakagon di Hibron, om koilaai noddi dot iri nopo piro-piro o soudor do gunsiou do mantad id sinakagon diri om poingiyon do hilo'd Yasor, it id watas do Giliad. 32 Om pomili' noddi i Raja' Daud do duwo noribu om turu' nahatus o boyoon do sompiiyon dit ongosiou do mantad id koworisan do sompiiyon di Yoria om suhuo' no dau iyolo' do mongilo-ilo do pasal di don tugama' om dong pomorinta' do hilo'd Israil, i ponong id koulayon do mantad id Bawang do Yordan, iri no it id watas do Rubin, om Gad om Manasi di ponong id koulayon.
Pagawai dot id Pogialatan do Soudor om id Pogialatan do Rayat
1 Iti no o dopitar do ngaran di piro-piro o boyoon do sompiiyon, om i boyoon do pinuruan do sompiiyon dot Israil om i piro-piro o pagawai diyolo' do mangatur di karaja' do pomorintaan dot Israil. Pointikid-tikid do tulan do pointikid do toun, om iso' no o sinompuruan do tulun do duwo nohopod om apat noribu o tulun do kogumuo' do kumaraja', do woyoon dot iso' o boyoon do tontok do tulan diri. 2-15 Om iti ngai' no o ngaran di boyoon do kumaraja' do pointikid do tulan: Tulan do koiso': i Yasobam i tanak di Sabdiol (iyau nopo om mantad id pinuruan do sompiiyon di Piris, i sombohogian do payat do Yohuda). Tulan do koduwo: i Dodai, i sinakagon di Ahohi (wakil nopo dau om i Miklot). Tulan do kotolu: i Bonaya i tanak di Yoyada it Imam, i boyoon di “Sinompuruan do Tolu Nohopod o Soudor” (om suminowoli nopo dau do boyoon di sinompuruan diri om i Amisabad, i tanak dau). Tulan do kaapat: i Asail, i tobpinai di Yoab (i Sobaya, i tanak dau o suminowoli dau). Tulan do kolimo: i Samhut, i sinakagon di Yisra. Tulan do koonom: i Ira, i tanak di Ikos, i mantad hilo'd bandar do Tokua. Tulan do koturu': i Hilis, i sinakagon di Ipraim, i mantad hilo'd bandar do Piloni. Tulan do kawalu': i Sibkai, i mantad hilo'd bandar do Husa (iyau nopo om mantad id pinuruan do sompiiyon di Sira, i sombohogian do payat do Yohuda). Tulan do kosiam: i Abiosor, i mantad hilo'd bandar dot Anatot, it id watas do Binyamin. Tulan do kohopod: i Maharai, i sinakagon di Sira, i mantad hilo'd bandar do Nitopa. Tulan do kohopod om iso': i Bonaya, i mantad hilo'd bandar do Piraton, it id watas do payat dot Ipraim. Tulan do kohopod om duwo: i Hildai, i sinakagon di Otniol, i mantad hilo'd bandar do Nitopa.
Boyoon do Payat do Bansa' dot Israil
16-22 Iti ngai' no o dopitar do ngaran do boyoon do payat do bansa' dot Israil. - Payat - Boyoon - Rubin - i Iliosor, i tanak di Sikri - Simion - i Sopasa, i tanak di - - Maaka - Liwi - i Hasabia, i tanak di - - Komuil - Harun - i Sadok - Yohuda - i Ilihu, i tobpinai di - - Raja' Daud - Isakar - i Omri, i tanak di Mikail - Sibulon - i Yismaya, i tanak di - - Obaya - Naptali - i Yirimot, i tanak di - - Asriol - Ipraim - i Hosia, i tanak di Asasia - Manasi - i Yoil, i tanak di Podaya - Ponong id - - kotonobon - - Manasi - i Yido, i tanak di Sakaria - Ponong id - - koulayon - - Binyamin - i Yaasiol, i tanak di - - Abnor - Dan - i Asariil, i tanak di - - Yiroham. 23 Om a' i' di Raja' Daud nintob i tulun dit id siriba' ko' duwo nohopod o toun do tumur tu' nakabatos no o Tuhan do silihon dau o tulun dot Israil do miagal do rombituon do hilo'd tawan kogumu'. 24 Om nokotimpuun no daa i Yoab, (tina' nopo dau om i Soruya) do mongintob do tulun do tontok diri, nga' a' i' dau nopongo do mongintob. Tu' hinukuman do Kinorohingan o tulun dot Israil dot i pinongintaban diri o kinopomohukuman. Om a' noddi nokotulis do hiri'd suang do buuk di Raja' Daud o kogumuon diyolo'.
I Mongilo-ilo di Dapu' do Raja'
25-31 Om iti ngai' no o dopitar do ngaran do tulun di mongilo-ilo di dapu' di raja': Bilik do poopian do hiri'd walai do raja': i Asmawit, i tanak di Adiol Bilik di poopian di hiri'd soliwan di walai do raja': i Yonatan, i tanak di Usia Mororobuat do hiri'd dumo: i Isri, i tanak di Kolub Kabun dot anggur: i Simoi, i mantad hilo'd bandar do Rama Poopian dot anggur: i Sabdi, i mantad hilo'd bandar do Sipmi Kabun do saitun om kabun dot ara (di hiri'd guas do konuluhanan di ponong id kotonobon): i Baal Hanan, i mantad hilo'd bandar do Gidiri Poiiyanan do tumau do saitun: i Yoas Baanan do sapi' do hilo'd Rantai do Saron: i Sitrai, i mantad hilo'd bandar do Saron Baanan do sapi' do hilo'd tana' dot apatau: i Sapat, i tanak di Adlai Unta: i Obil, i sinakagon di Ismail Kaladai: i Yodiya, i mantad hilo'd bandar do Mironot Dumba' om kambing: i Yasis, i tulun do Hagri.
Ponosihat di Daud
32 I Yonatan nopo, i tamanon di Raja' Daud, om ponosihat dit oilo kopio om tulun dit ogumu' o toilaan. Om iyau no om i Yohiol, i tanak di Hakmoni, o nonuan do karaja' do monuduk di tangaanak di raja' do tongokusai. 33 Om i Ahitopol nga' ponosihat nogi' di raja', om i Husai noo, i tulun dot Arki om tambalut kopio di raja'. 34 Om soira' di napatai i Ahitopol, om i Abiatar diri, om i Yoyada, i tanak di Bonaya o nosiliu do ponosihat. Om i Yoab no om boyoon di soudor do don raja'.
I Pinotuduk di Daud do Pasal di Walai'd Sasambayangan dot Agayo
1 Om suhuo' ngai' no di Raja' Daud i boyoon dot Israil do tumimung do hilo'd Yorusalim. Om timung noddi do hilo'd Yorusalim o koinsanai di boyoon do payat, om i boyoon di mangatur di karaja' do dong pomorinta', i boyoon di pinuruan do sompiiyon, om i mongilo-ilo di dapu' om i tayam-tayam di raja', om i mongilo-ilo di tangaanak di raja' --- om oinsanan i pagawai di hiri'd walai di raja' om i soudor dit ongkipangkat, om koinsanai di tulun dit ongkipangkat. 2 Om ingkakat no i Daud do hiri'd toguang diyolo' om boro-boros nod poingkaa, “Pokinongou kou no doho', oi tobpinai-tobpinai ku dit iso-iso' o bansa'. Alaid oku no daa do sipomonsoi do walai'd poiyanan di Kaban do Tumpongo dit a' minog do popingwolihon, i poulakan do Tuhan, i Kinorohingan toko', do gakod dau. Om nokoposodia' oku no do maan do pamaal di Walai'd Sasambayangan dot Agayo do tiyonon do sumambayang dot id dau, 3 nga' noduhan oku i' dau do momonsoi'ddi tu' ogumu' kopio o raha' do tulun do nakalawas ku, tu' soudor oku i'. 4 Pinili' oku'd Tuhan, i Kinorohingan di tukuon dot Israil, om pinili' dau o sinakagon ku do momorinta' dot Israil do gisom dot alaid. Om pinili' dau i sinakagon do Yohuda do posodia' do boyoon, om mantad nod payat do Yohuda om pinili' dau i sompiiyon do tapa' ku. Om id pogialatan no do sompiiyon di tapa' ku, om norohian iyau do minomili' doho' om pinoposiliu doho' do raja' do pointongkop dot Israil. 5 Om nonuan oku dau dot ogumu' o tanak do kusai, om id pogialatan no diyolo' om pinili' dau i Suliman do momorinta' dot Israil, i pomorintaan do don Tuhan. 6 Om boros kad Tuhan dot id doho', ‘I Suliman no, i tanak nu, o momonsoi di Walai'd Sasambayangan dot Agayo do maan do doho'. Nopili' ku no iyau do sumiliu do tanak ku, om iyoho' o sumiliu do tapa' dau. 7 Om pologoson ku'ndo do mompus-ompus kasai' i pomorintaan dau ondung tumilombus no iyau do mumboyo' do koinsanai dit oturan om ponuhuan ku, do miagal di wonsoyon dau do dinondo,’ ka,” ka dau. 8 Om boros ka kawagu di Daud, “Oi koinsanai'd rayat ku, hiti nod toguang do Kinorohingan toko' om hiti'd toguang do toinsanan o tulun dot Israil, i tulun do don Tuhan, do suhuon kopio ku iyokoyu, do mumboyo' kopio do koinsanai di pinonuhuan do Tuhan, i Kinorohingan toko', om kotilombus kou i' do kasanganu'dti pomogunan dot osonong om kotungkus i' dokoyu iti dot id sinakagon di sumusuhut dokoyu do gisom dot alaid,” ka dau. 9 Om id di Suliman no, om poingkaa o pinoboros di Daud, “Oi tanak ku, suhuon kopio ku iya' do mintutun do Kinorohingan di tukuon di tapa' nu om momonsoi'd karaja' dau do mikuwo'd osombulu' kopio o ginawo om agaan o ginawo. Tu' oilaan ngai' i' dau o pomusarahan om korohian toko'. Om ondung rumikot ko dot id dau, om romiton ko i' dau; nga' ondung tumongkiad ko dau om tongkiadan ko nondo dau do gisom dot alaid. 10 Om mositi' no dot opurimanan nu do nopili' ko nod Tuhan do momonsoi'dti Walai'd Sasambayangan dot Agayo do maan do dau. Om wonsoyo' noti do dinondo --- om wonsoyon no do mikuwo'd ginawo dit iso-iso' kopio,” ka. 11 Om patahako' noddi di Daud di Suliman i palan om koinsanai di palan di Walai'd Sasambayangan dot Agayo, om i palan di bilik di poopian do konunu-nunuan. Om palan do koinsanai di bilik do suwai, om palan di kinoiyonon dot Olidang Kopio, it iyonon do mangampun do dusa. 12 Om pinatahak nogi' dau o koinsanai di palan di nongosorou dau do poiyaan do koinsanai di natad di ponong id suang om i bilik do songinsorili' di natad, om i palan di bilik do poiyanan di konunu-nunuan di Walai'd Sasambayangan dot Agayo, om i bilik di poiyanan di patahakon dot id Tuhan. 13 Om pinatahak nogi' di Daud di Suliman i notulis mantad do karalan-ralano' do mamahagi' di piro-piro ot imam om i tulun do Liwi dot id piro-piro o sinompuruan, om kowoyo-woyoo' do momonsoi di karaja' do hiri'd Walai'd Sasambayangan dot Agayo, om kowoyo-woyoo' do momogompi' do koinsanai di konunu-nunuan di Walai'd Sasambayangan dot Agayo. 14 Om pinotuduk nogi' dau ondung songkuro o ginumu' do pirok om tamas do pakayon do pomonsoi di piro-piro o pakakas, 15 do pomonsoi do pointikid-tikid di lampung om i potimpakan do lampung, 16 om pomonsoi di mija' do pirok, om pomonsoi di mija' do tamas di pasakayan di roti do patahakon dot id Kinorohingan. 17 Om pinotuduk nogi' dau ondung songkuro o ginumu' do tamas di nosompipi' do maan do pomonsoi di totodok, om mangkuk, om kakanan, om songkuro o kogumuo' do pirok om tamas do pomonsoi di piring, 18 om songkuro o kogumuo' do tamas do nosompipi' do pomonsoi di podtutudan do kominyan om wonsoyon do korita'-kuda' do pasakayan di winonsoi di pinoiyo- iyo do moloikat di roitan do kerub di poungkalad o talad dot id sawa-sawat di Kaban do Tumpongo'd Tuhan. 19 Om boros kad i Raja' Daud, “Poinsuang ngai' iti di palan di tinulis do miontok di pinonuhuan do Tuhan doho' do momonsoi,” ka. 20 Om boros kad i Raja' Daud dot id di Suliman, i tanak dau, “Pokoiso-isoo' no, om pogiroto' no o ginawo nu. Timpuunan no i karaja' om kada' poddosi do tumimbaba' do nunu nopo. Om muhup indo diya' o Tuhan, i Kinorohingan di tukuon ku. Om a' ko i' dau tongkiadan do gisom dot opongo ngai' nu i karaja' do momonsoi di Walai'd Sasambayangan dot Agayo. 21 Nongoonuan ngai' nod karaja' do hiri'd Walai'd Sasambayangan dot Agayo it imam om i tulun do Liwi. Om ongorohian ngai' i' do muhup diya' o piro-piro tukang di mogisuayan o toilaan. Om koinsanai di rayat om i boyoon diyolo' nga' posodia' ngai' i' do momonsoi do nunu nopo o ponuhuan nu,” ka dau.
I Pinopuhawang do Pomonsoi di Walai'd Sasambayangan dot Agayo
1 Om poboroso' no di Daud dot id koinsanai di tulun di pointimung do hiri o poingkaa, “I Suliman no, i tanak ku o nopili' do Kinorohingan dot id pogialatan di tangaanak ku'd kusai, nga' omulok po iyau om okuri' po o nopinsingilaan dau. Om iti nopo karaja' dot apatut do wonsoyon om agayo om awagat, tu' iti nopo om okon i' ko' tiyonon do tulun do miagal di walai'd raja', nga' iti nopo Walai'd Sasambayangan dot Agayo om don Tuhan i', i Kinorohingan. 2 Om nokototos oku no do poposodia' do pakakas diti Walai'd Sasambayangan dot Agayo --- do tamas, om pirok, om tambaga', om basi', om kayu, om watu dit ongolumis, om watu dot angamahal o gatang, om watu di mogisuayan o warna' do maan do pomolumis, om ogumu' o watu di linunau. 3 Om pinapatahak oku do pirok om tamas do mantad id konunu-nunuan ku, tu' osianan oku no kopio di Walai'd Kinorohingan, i tiyonon do sumambayang. 4 Ogumu' i' ko' hatus o tan do tamas di nosompipi' do nakatahak ku om osomok nod duwo nahatus om apat nohopod o tan do pirok do nosompipi' do pomolumis di limput di Walai'd Sasambayangan dot Agayo, 5 om maan do wonsoyon dit apatut do wonsoyon di piro-piro o tukang. Om isai po ot orohian do manahak do popuhawangon dot id Tuhan?” ka dau. 6 Om kongorohiai noddi do popuhawang i piro-piro o boyoon di pinuruan do sompiiyon, om i boyoon do payat, om i boyoon do soudor, om i mongilo-ilo di dapu' di don raja' 7 do koinsanai diti do pomonsoi di Walai'd Sasambayangan dot Agayo: lobi ko' hatus om turu' nohopod o tan do tamas, om lobi ko' tolu nahatus om apat nohopod o tan do pirok, om lobi ko' onom nahatus om duwo nohopod o tan do tambaga', om lobi ko' tolu noribu om apat nahatus o tan do basi'. 8 Om iri tulun dit ongkiwatu dot agayo o gatang nga' pinapatahak nogi' do posuangon di kousinan di dong Walai'd Sasambayangan dot Agayo, om mongilo-ilo nopoddi om i Yohiol, i tulun do Liwi, i mantad id pinuruan do sompiiyon di Girson. 9 Om agaan tomod nopo o ginawo di tulun do pinapatahak dot id Tuhan, om ongotood ngai' iyolo' tu' ogumu' tomod o nakatahak diyolo', om i Raja' Daud nga' otood tomod nogi'.
Minamarayou i Daud do Kinorohingan
10 Om royoho' no di Raja' Daud o Tuhan dot id toguang di tulun dot ogumu'. Om boros ka dau, “Oi Tuhan, i Kinorohingan di tukuon di Yakub, i taki-aki dahai, iya' no o royohon do gisom do poingompus! 11 Agayo ko no kopio, om kikuasa', om kikagayaan, om koimayaan kopio, om abantug. Diya' ngai' i' dot oinsanan di hilo'd tawan om hiti'd pomogunan, om iya' no o raja' dit agayo, i pomorinta' dot id sawat do koinsanai do nunu nopo. 12 Mantad ngai' i' dot id diya' o kakayaan om kohoroo'; om porintaon nu o koinsanai do nunu nopo do mikuwo'd kokoriso' om kuasa' nu; om milo ko i' do papabantug om popokoris dot isai nopo o tulun. 13 Om mongunsikou diri iyahai diya' oi Kinorohingan dahai, om mamarayou iyahai do ngaran nu di kikagayaan. 14 Nga' a' oku i' om i rayat ku milo do manahak diya' do nunu-nunu, tu' koinsanai'ddi om nipuhawang nu i', om pinopoguli' no iyahai di diya' mantad. 15 Om oilaan nu i' oi Tuhan do koposi-posion nopo dahai om miagal no di tulun di tindapou om miagal di sompogunan, do miagal di komolohingan dahai di gulu po. Tumur nopo dahai om miagal no do sangai di tumalib, om a' i' iyahai milo do mogidu' do mantad id kapatayon. 16 Oi Tuhan, i Kinorohingan dahai, tinimung ngai' dahai iti konunu-nunuan dot agayo o gatang do maan do pomonsoi do walai nu do pomusou dahai di ngaran nu dit olidang, nga' iya' ngai' i' o tadon diti om iya' ngai' o sanganu. 17 Oilaan ku i' dot umbalan ngai' nu o ginawo do pointikid-tikid do tulun om orohian ko i' do tulun dit otulid o ginawo. Om pinatahak ngai' ku diya' iti do mikuwo dot otulid om iso-iso' om agaan o ginawo ku, om nokito ku nogi' o kooropodo' di tulun nu do nokotimung do hiti do pinapatahak do nipuhawang dot id diya'. 18 Oi Tuhan, i Kinorohingan di tinuku' di komolohingan dahai, i Abraham, om i Isak, om i Yakub, piantangan no i tulun nu om osianan kasai' i' iyolo' diya', om tulungon no iyolo' om otorodok kasai' i' iyolo' dot id diya' do gisom dot alaid. 19 Om onuwai no i Suliman, i tanak ku do korohian dit osombulu' kopio do mumboyo' do koinsanai di ponuhuan nu om korohian do mamaal di Walai'd Sasambayangan dot Agayo di pinosodiaan ku do koinsanai'dti,” ka dau. 20 Om kasambayang poddi i Daud do miagal diri om suhuo' ngai' noddi di Daud i tulun do mamarayou'd Tuhan. Boros ka dau, “Royoho' no o Tuhan, i Kinorohingan dokoyu!” ka. Om oinsanan nopo i tulun do minamarayou'd Tuhan, i Kinorohingan di tinuku' di komolohingan diyolo', om otud no iyolo' do suminuwau'd Tuhan om suminuwau di raja'. 21 Om tadau po kawagu om ponumbali' no iyolo' do tayam-tayam do minaan do porsombahan di sumbolion do pinatahak dot id Tuhan, om potikido' nogiddi di tulun do maan diyolo'd kanon. Om suwai no ko' mantad diri, om pinapatahak po iyolo' do soribu o sapi' do tontoluhan, om soribu o dumba' do tontoluhan, om soribu o tanak do dumba', do minaan songkoyuo' do monorob do hiri'd pananaraban do porsombahan. Om pinapatahak nogi' iyolo' do porsombahan dot anggur. 22 Om ongotood tomod diri iyolo' do tontok do tadau'ddi do maso diyolo' do mangakan om monginum dot id toguang do Tuhan. Om koinduwaai po diyolo' do popoboros do raja' i Suliman. Om pinogirot diyolo' o kinosilihan di Suliman do raja' diyolo' dot id suang do ngaran do Tuhan, om pinogirot nogi' diyolo' o kinosilihan di Sadok dot imam. 23 Om i Suliman noddi o nokosowoli di Daud, i tapa' dau do raja' do miagal di natantu' mantad do Tuhan. Om iyau nopo om raja' di nokoundar kopio, om oinsanan nopo i bansa' dot Israil do minumboyo' dau. 24 Om oinsanan nopo i pagawai do pomorinta' om i soudor, om i tangaanak di Daud do suwai do minamatos do mumboyo' di Suliman tu' raja'. 25 Om pinoronok om pinopusou do Tuhan di Suliman o koinsanai do bansa' diri om siniliu dau iyau do raja' dit abantug ko' mantad do raja' do suwai di nokoumbal do momorinta' dot Israil.
Pinomorintaan di Daud
26 Pinorinta' di Daud, i tanak di Isai o pointongkop dot Israil 27 do solinaid dot apat nohopod o toun. Turu' o toun dau do minomorinta' do hilo'd Hibron om tolu nohopod om tolu o toun dau do momorinta' do hilo'd Yorusalim. 28 Om kapatai nopo iyau om di molohing kopio iyau, om kaya' kopio iyau om suahon do tulun. Om i Suliman diri, i tanak dau'd kusai o nosiliu'd raja' do nokosowoli dau. 29 Om susuyon nopo do pasal di Raja' Daud do mantad di timpuun i' om gisom do kopupuson om nongkotulis ngai' i' do hiri'd suang do buuk di tinulis di tolu o nabi, i Somuil, om i Natan, om i Gad. 30 Om iri nopo pinotulis diri om monusui do karalan-ralano' dau do minomorinta', om kokoriso' dau, om koinsanai di nongosiliu dot id dau, om id Israil, om id pomorintaan di raja' di hiri'd posorili'.
Suminambayang i Suliman do Mokianu'd Toilaan
1 Om nosiliu noddi i Suliman, i tanak di Raja' Daud, do raja' dit ogirot o pomorintaan do hilo'd Israil. Om binarakatan iyau do Tuhan, i Kinorohingan dau, om pinokoris kopio iyau do Tuhan. 2 Om oinsanan nopo i boyoon do soribu o soudor om boyoon do hatus o soudor, om oinsanan i pagawai do pomorinta', om oinsanan i boyoon do sompiiyon, om oinsanan i rayat dot Israil do sinuhu' di Raja' Suliman 3 do mongoi woyo' dau do hilo'd tiyonon do sumambayang di hilo'd Gibion. Om ongoi ngai' nopoddi iyolo' do hilo' tu' hilo' no i Kiim do Tuhan di winonsoi di Musa, i susuhuon do Tuhan, di hilo' pod tana' do kowotuan. 4 (Nga' iri nopo i Kaban do Tumpongo'd Tuhan om hilo' nod Yorusalim, do poinsuang di kiim do winonsoi di Raja' Daud, do tontok di pinawaliu dau i Kaban do mantad hilo'd Kiriat Yiarim.) 5 Om i pananaraban do porsombahan, i tambaga' do winonsoi, i winonsoi di Bisaliil i tanak di Uri, i manangaki di Hur, nga' hilo' id Gibion, do hiri'd dotimbabaan di Kiim do Tuhan. Om hilo' no i Raja' Suliman om koinsanai di rayat do suminambayang dot id Tuhan. 6 Om hiri nod pananaraban do porsombahan di tambaga' do winonsoi, it id dotimbabaan di Kiim, o pinanaraban di raja' do soribu o tinan do tayam-tayam do maan do porsombahan di sorobon dot id Tuhan. 7 Om totuong iddi do minintalang o Kinorohingan dot id di Suliman, om boro-boros nod, “Nunu o korohian nu do patahakon ku diya'?” ka. 8 Om boros ka di Suliman, “Tuhan, nokointalang nu no dot osianan kopio ko di Daud, i tapa' ku, om baino' noddi om nosiliu oku no diya' do raja' do suminowoli dau. 9 Om maha' daa om bayaanon nu i batos nu dot id tapa' ku do dinondo, oi Tuhan, i Kinorohingan ku. Nopili' oku no diya' do sumiliu'd raja' do bansa' dit agayo, it a' no ointob-intob o kogumuo'. 10 Om iri no o kopokionuan ku diya' do toilaan om pomusarahan dot atarom do momorinta' diyolo'. Tu' ondung amu', om poingkuro oku po daa do momorinta' diti tulun nu dot irad diti kogumu'?” ka dau. 11 Om boros kad Kinorohingan dot id di Suliman, “Osonong tomod i pinokianu nu. A' ko i' minokianu do kakayaan ko' dapu' ko' kobontugan ko' kapatayon di pisangod nu, ko' tumur po dot anaru, suwai ko' minokianu ko do toilaan om pomusarahan dit atarom do momorinta' diti tulun ku, di pinaharapan ku diya'. 12 Om iri no o kapanahakan ku diya' do toilaan om pomusarahan dot atarom. Om suwai no ko' iri, om posimbayanon tiya' po, om pakayaon ku iya', om pobontugon ku ko' mantad di piro-piro raja' dit ongosonong di maso di nakatalib, om id dabantalan,” ka dau.
Kakayaan om Pomorintaan di Raja' Suliman
13 Om tongkiad noddi i Suliman di tiyonon do sumambayang do hilo'd Gibion, i pinoiyanan di Kiim do Tuhan, om poguliai no dau do hilo'd Yorusalim. Om hilo' no iyau do momorinta' dot Israil. 14 Om pongonuwai no dau i soudor dau do soribu om apat nahatus o korita'- kuda' di don sumasangod, om hopod om duwo noribu o tinan do kuda' di don sumasangod. Songintanga' nopoddi nga' pinoiliu dau do hilo'd Yorusalim, om iri no suwai om pinakaa dau dot id bandar do suwai. 15 Tontok nopo di pomorintaan di Suliman, om pirok nopo nga' miagal no do konunu-nunuan di koubasanan kasai', tu' miagal pod watu; om kayu sedar do Libanon nga' ogumu' no kopio tu' miagal pod kayu ara di koubasanan o kogumuo'. 16 Om iri ngai' no i wakil di raja' o momoli do kuda' do mantad hilo'd Musri om hilo'd Kilikia, 17 om korita'-kuda' do don sumasangod do mantad hilo'd Masir, om padagangon no kawagu diyolo' dot id piro-piro o raja' do Hit om raja' do Siria. Om gatang nopo do padagang diyolo' nga' hatus om limo nohopod o tusin do pirok dot iso' o kuda', om onom nahatus o tusin do pirok dot iso' o korita'-kuda' do don sumasangod.
Sumodia' do Momonsoi di Walai'd Sasambayangan dot Agayo
1 Om natantu' no di Raja' Suliman do momonsoi iyau do Walai'd Sasambayangan dot Agayo do don Tuhan, om momonsoi do walai'd raja' dot iyonon dau. 2 Om ponuhu' no i Suliman do turu' nohopod noribu o tulun do mongoi pomirangkat di pakakas do pawaalon, om walu' nohopod noribu o tulun do mamabak do watu do hilo'd konuluhanan, om tolu noribu om onom nahatus o mandur do miontong do karaja'ddi. 3 Om porikoto' no di Suliman o boros diti dot id di Hiram, i raja' do Tirus do poingkaa, “Osonong do midagang-dagang to do miagal di winonsoi di Daud, i tapa' ku. Pinapadagang ko do kayu sedar do Libanon dot id dau do pamaal di walai dau do don raja'. 4 Om baino' no om orohian oku do mamaal di Walai'd Sasambayangan dot Agayo do don Tuhan, i Kinorohingan ku. Om hiri nondod walai'ddi o tiyonon ku om tiyonon di rayat ku do sumambayang om modtutud do kominyan om it ongosonong o kosingudan. Om posodia' kasai' nopondo iyahai do roti do maan do porsombahan dot id Tuhan. Om patahak nondo iyahai do porsombahan di sorobon do pointikid-tikid do kosuabon om sosodopon, om pointikid do tadau'd Sabat, om tadau dot agayo do Tulan do Wagu, om tontok di piro-piro o tadau di natantu' mantad do Tuhan, i Kinorohingan dahai, do kopomusahan dahai dau. Nokoponuhu' no iyau do tulun dot Israil do momonsoi do miagal diri do gisom dot alaid. 5 Om mositi' nod suwai-suwai ko' i walai di koubasanan i Walai'd Sasambayangan dot Agayo do wonsoyon ku tu' Kinorohingan nopo dahai om agayo i' ko' mantad do nunu nopo o ponokokinorohingan do suwai. 6 Nga' otopot nopo kopio om iso' pod tulun nga' aiso' i' o milo do momonsoi do walai'd Kinorohingan, tu' oinsanan piya ilo tawan nga' a' i' kabagal do tiyonon dau. Om iri nopondo i Walai'd Sasambayangan dot Agayo di wonsoyon ku om milo no kopio do podtutudan do kominyan dot id Kinorohingan. 7 Om iri no o kopokionuan ku diya' do paatod dot id dahai do tulun dit oilo kopio do manantan do tamas, om pirok, om tambaga' om basi', om it oilo do mangawol do kain dit otomou, om it otomou daragang-ragang om it aragang, om it oilo do monipong. Om muhup nondo iyau di piro-piro o tukang di mantad hilo'd Yohuda om hilo'd Yorusalim, i nongopili' mantad di Daud, i tapa' ku. 8 Om oilaan ku nogi' dot ongoilo kopio do managad do kayu i tulun di mananagad do kayu do hino'd pomogunan nu. Om paatadan oku no daa diya' do piro-piro o bansa' do kayu sedar om kayu cendana do mantad hilo'd Libanon. Om suhuon ku indo i tulun dahai do muhup di tulun nu, 9 do posodia' do kayu dot ogumu'. Tu' mositi' no dot agayo om olumis i Walai'd Sasambayangan dot Agayo di maan dahai waalo'. 10 Om paatadan i' dahai do taakanon i tulun nu do duwo noribu tan do gandum, om duwo noribu tan do barli, om apat nahatus noribu lito do waig dot anggur, om apat nahatus noribu lito do tumau do saitun,” ka. 11 Om simbaro' no di Raja' Hiram i surat di Raja' Suliman, do poingkaa, “Siniliu ko do Tuhan do raja', tu' osianan i' o Tuhan do bansa' nu. 12 Royohon no o Tuhan, i Kinorohingan dot Israil, i minomonsoi do tawan om pomogunan! Nonuan dau i Daud do tanak do kusai di kipomusarahan dot atarom om i kitoilaan, i momonsoi do walai'd Tuhan om walai do dong raja' dot iyonon dau. 13 Paandadon ku nodti do paatod o songulun o tukang dit oilo om atarom o pomusarahan, i roitan dot i Huram. 14 Tina' nopo dau om mantad id payat do Dan, om tapa' no dau om tulun do Tirus. Iyau nopo om oilo kopio do momonsoi do nunu nopo i tamas, om pirok, om basi', om watu om kayu do wonsoyon. Om milo nogi' iyau do mangawol do kain dot otomou, om it otomou daragang-ragang, om it aragang, om iri nogi' i kain linan. Om milo ngai' nopo iyau do mongikir do poiyoon do nunu nopo i poiyaan. Om suhuon nopo iyau do kumaraja' do poinsugku' di tukang nu iya' om i tulun di nakakaraja' dot id tapa' nu. 15 Om poingandad no iyahai do korikatan di gandum, om barli, om anggur, om i tumau do saitun di pinabatos nu'ddi. 16 Om mongoi indo iyahai panagad do kayu sedar do hilo'd konuluhanan do Libanon do songkuro nopo o kogumuo' do pokionuon nu. Om kagasan nogindo dahai do poiyoon di gakit, om porulunon dahai do hilo'd rahat do gisom do hilo'd Yopi. Om hilo' nopondo om oongoi no dokoyu kasaan do pokoyoon do hilo'd Yorusalim,” ka.
Tinimpuunan do Mamaal i Walai'd Sasambayangan dot Agayo
17 Om papaharo no i Raja' Suliman do pongintaban do koinsanai di tulun do bansa'd suwai di poingiyon do hilo'd Israil, do miagal di winonsoi di Raja' Daud, i tapa' dau. Om koilaai no do 153,600 o tulun do bansa'd suwai. 18 Om 70,000 o tulun do mantad id pogialatan diyolo' do sinuhu' do mongoi panaan di maan do waalon, om 80,000 o mamabak do watu do hilo'd konuluhanan, om 3,600 o mandur do miontong do karaja'ddi.
1 Om natantu' mantad no di Daud, i tapa' di Suliman, do waalan nopo di Walai'd Sasambayangan dot Agayo om hilo'd Yorusalim; do hiri'd Nuluhon do Moria, i tiyonon do momogomos do gandum, it i Arauna daa, i tulun do Yobus, o sanganu di gulu po. 2 Om tinimpuunan nopo di Raja' Suliman do momonsoi i Walai'd Sasambayangan dot Agayo'ddi nga' di tulan do koduwo di kaapat do toun dau do momorinta'. 3 Konoruo' nopo di walai nga' duwo nohopod om turu' o mito om kalaabo' no om siam o mito. 4 Konoruo' nopo di langga' dit id gulu kobontol om miirad do kalaabo' di walai, tu' siam o mito. Om kasawato' no om limo nohopod om apat o mito. Om hiri nopod ponong id suang di langga'ddi nga' nurogupan do tamas di nosompipi'. 5 Hiri nopod langga' dit agayo di walai'ddi nga' linimput do papan do kayu sedar do Libanon om nurogupan do tamas dit osonong, om kinikiran do pinoiyo-iyo do guas do kurma om rantai. 6 Om linumis po di raja' i walai'ddi do watu dit olumis om it agayo gatang dit ongosonong kopio om tamas di nanu do mantad hilo'd pomogunan do Parwaim. 7 Om iri nogi' i tamas diri o pinonguragup dau di limput di Walai'd Sasambayangan dot Agayo'ddi, om i boruti di pinadakatan di limput, om i pinadakatan di totobon, om iri ngai' i totobon di wawayaan. Om kinikiran ngai' nopo di pinoiyo-iyo do moloikat di roitan do kerub o hiri'd limput. 8 Konoruo' nopo di bilik di hiri'd gogok kopio, i roitan do Bilik dit Olidang Kopio, om siam o mito, om kalaabo' no om siam o mito, dot irad do kalaabo' di Walai'd Sasambayangan dot Agayo. Kogumuo' nopo do tamas do pinonguragup di limput di Bilik dot Olidang Kopio'ddi om duwo nohopod o tan, 9 om limo nahatus om turu' nohopod o gram do tamas do winonsoi do lantak. Iri nopo limput do koinsanai'd di bilik di hiri'd tingkat dot id sawat om nurogupan do tamas. 10-13 Om minonuhu' nogi' i raja' di piro-piro tukang do momonsoi do duwo i poiyo-iyoon do moloikat di roitan do kerub, do tambaga' o wonsoyon; om urogupan nogindo do tamas om pitoningon do poiliu, do potimbaba' di wawayaan do hiri'd Bilik dit Olidang Kopio. Om wansayan goduwo nopo do talad di poungkalad do 2.2 mito do konoruo', om kopitopis i' i tompok do tiso' di talad di winonsoi'ddi do hiri'd tanga' di bilik, om iri no tompok di talad do koduwo om poirikot do hiri'd limput do ponong id gibang om ponong id wanan. Konoruo' nopo di talad diri om siam o mito; miirad nopo do kalaabo' di bilik. 14 Om iri nopo Bilik dit Olidang Kopio'ddi om winansayan do tirai do kain linan om kain dit otomou, om kain dit otomou daragang-ragang om kain dit aragang. Om rinindaan i tirai'ddi do pinoiyo-iyo do moloikat di roitan do kerub.
Duwo o Torigi do Tambaga' dit Agayo
15 Om pomonsoi no i raja' do duwo o torigi do sopihopod om limo om satanga' o mito do kasawato', om poudongo' no dau do hiri'd gulu kobontol di Walai'd Sasambayangan dot Agayo. Om winansayan goduwo nopo i torigi'ddi do pinongulu do 2.2 mito o kasawato'. 16 Om linumis po i pinongulu di torigi'ddi di tambaga' do winonsoi do pinoiyo-iyo do rantai di rinambo-rambot om hatus o pinoiyo-iyo do tua' do delima. 17 Pinoudangan nopo di torigi dot agayo'ddi om hiri'd miampaping di wawayaan do sumuang di Walai'd Sasambayangan dot Agayo; om iri nopo i torigi do ponong id salatan om pinungaranan do Yakin, om iri no torigi di ponong id utara om pinungaranan do Buas.
Pakakas do Hiri'd Walai'd Sasambayangan dot Agayo
1 Om ponuhu' no i Raja' Suliman do momonsoi dot iso' o pananaraban do porsombahan do tambaga' o wonsoyon, do konoruon nopo om siam o mito, om kalaabon nga' siam i' o mito. Om kasawato' no om apat om satanga' o mito. 2 Om minomonsoi nogi' iyau do tangki' do tambaga', dot ourug o pinomonsoi. Korolomo' nopo di tangki' om 2.2 mito, om sukatan no do padarapas di kabang om 4.4 mito, om kogoyoo' no do pointutuk om 13.2 o mito. 3 Pointutuk nopo do ponong id soliwan do tisan di kabang di tangki' om kinikiran do pinoiyo-iyo do sapi' do duwo o rulud, do pinasagalai di tangki'. 4 Iri nopo tangki'ddi nga' pinasakai do likud do hopod om duwo o sapi' di tambaga' do winonsoi --- tolu o sapi' do potoguang ponong id utara, om tolu o potoguang ponong id salatan, om tolu o potoguang ponong id kotonobon, om tolu o potoguang ponong id koulayon. 5 Kakapalo' nopo di tangki' om 75 o milimito. Om iri nopo tisan do kabang di tangki' nga' koiyo-iyo di tisan do kabang do sangkir tu' posuringa' do koiyo-iyo di tusak do bunga bakung di noungkalad no. Korumpos nopo di tangki' om haro i' doti' o 60,000 o lito. 6 Om minomonsoi po i Raja' Suliman do hopod o mimpun dot angagayo. Limo o poilihon do hiri'd ponong id salatan di Walai'd Sasambayangan dot Agayo om limo o poilihon do hiri'd ponong id utara. Iri ngai' nopo mimpun dit angagayo'ddi nga' pongougan di popot do tayam-tayam di sorobon do maan do porsombahan di sumbolion. Om iri no waig di hiri'd tangki' dit agayo'ddi om maan dit imam do pomougan. 7-8 Om minomonsoi po iyau do hopod o potimpakan do lampung do tamas o winonsoi; om pinoiyo di poiyaan di natantu' mantad, om minomonsoi iyau do hopod o mija'. Pinoiyanan nopo di hopod o potimpakan do lampung om i hopod o mija' diri nga' hiri'd bilik dot agayo di Walai'd Sasambayangan dot Agayo; limo o potimpakan do lampung om limo o mija' do ponong id gibang, om sopilimo o pinoiliu do hiri'd ponong id wanan. Om minomonsoi po iyau do hatus o mangkuk do tamas do winonsoi. 9 Om minomonsoi po i Raja' Suliman dot iso' o natad do ponong id suang do maan do don imam, om iso' kawagu o natad do ponong id soliwan. Om iri nopo totobon di wawayaan dit id piolitan di duwo o natad diri om nurogupan do tambaga'. 10 Iri nopo tangki' om pinoiliu do hiri'd linsuk di ponong id salatan om potimbaba' ponong id koulayon do hiri'd Walai'd Sasambayangan dot Agayo. 11-16 Om minomonsoi po i Huram, i boyoon di tukang, do kuali', sikup, om mangkuk dot ogumu'. Om kopongo ngai' no dau do minomonsoi o koinsanai di pakakas do hirion id Walai'd Sasambayangan dot Agayo, do miagal di nakabatos dau dot id di Raja' Suliman. Iri ngai' nopo pakakas diri om: Duwo o torigi dot agayo Duwo o pongulu do torigi do pinoulu di duwo o torigi'ddi I winonsoi do pinoiyo-iyo do rantai do rinambo-rambot do hiri'd duwo o pinongulu di torigi Apat nahatus o pinoiyo-iyo do tua' do delima do tambaga' do winonsoi, i pinorulud do duwo o rulud do sopihatus dot iso' o rulud; om pinotutuk di winonsoi do pinoiyo-iyo do rantai do rinambo-rambot di hiri'd duwo o pongulu di torigi. Hopod o korita'-kuda' Hopod o mimpun dot angagayo Iso' o tangki' Hopod om duwo o sapi' di tambaga' do winonsoi do pasakayan di tangki' Piro-piro o kuali', om sikup om totodok. Om tambaga' nopo di pinomonsoi di Huram do koinsanai di pakakas diri om tambaga' di kinisasan do gisom dot okolong. Om winonsoi ngai' dau iri do maan do koburu-buruon do hiri'd Walai'd Sasambayangan dot Agayo, do miontok di pinonuhuan di Raja' Suliman. 17 Om sinuhu' iyolo' di Raja' do momonsoi'ddi do hilo'd podsusupuan dit id piolitan do Sukot om Sirida, it id Rantai do Yordan. 18 Om ogumu' no kopio i pakakas diri gisom dot iso' pod tulun nga' aiso' no o koilo ondung piro o kilogram do tambaga' do naayi' do pinomonsoi'ddi. 19-22 Om minonuhu' po i Raja' Suliman do momonsoi do piro-piro pakakas do suwai do tamas dit osompipi' o wonsoyon, do koburu-buruon do hiri'd Walai'd Sasambayangan dot Agayo. Iri ngai' nopo pakakas diri om: Pananaraban do Porsombahan Piro-piro o mija' do poiyanan di roti do maan do porsombahan dot id Kinorohingan Koinsanai di potimpakan do lampung om i lampung do tamas dit osompipi' do winonsoi; i tutudan do hiri'd dotimbabaan di Bilik dit Olidang Kopio, do miontok di natantu' mantad I pinomolumis di pinoiyo-iyo do tusak do bunga Piro-piro lampung Piro-piro o pananggip do popou Pomisok do lampung Piro-piro o mangkuk Piro-piro o piring do poiyanan do kominyan Piro-piro o talam do poiyanan do popou Koinsanai di totobon do wawayaan di koiwang ponong id soliwan di Walai'd Sasambayangan dot Agayo om i totobon di Bilik dit Olidang Kopio nga' nurogupan ngai' nopod tamas.
1 Om kopongo poddi di Raja' Suliman do momonsoi i Walai'd Sasambayangan dot Agayo, om poopio' no dau do hiri'd piro-piro bilik do poopian o koinsanai di pirok, om tamas, om i konunu-nunuan do suwai di pinatahak di Daud dot id Tuhan.
Pinosuang di Walai'd Sasambayangan dot Agayo i Kaban do Tumpongo'd Tuhan
2 Om lohowo' ngai' noddi di Raja' Suliman o koinsanai di boyoon do payat om pinuruan do sompiiyon dot Israil do rumikot do hilo'd Yorusalim do mongoi di Kaban do Tumpongo'd Tuhan do mantad hilo'd Sion, i Bandar di Daud, om posuangon do hiri'd Walai'd Sasambayangan dot Agayo. 3 Om rikot ngai' nopo iyolo' do tontok di Tadau'd Agayo do Kinuhub-Kuhub. 4 Om kongotimung ngai' poddi i boyoon om saano' no di tulun do Liwi i Kaban do Tumpongo, 5 om igitai no diyolo' do hiri'd Walai'd Sasambayangan dot Agayo. Om iri nogi' i Kiim do Tuhan om i pakakas do hiri nga' pinawaliu ngai' no dit imam om i tulun do Liwi do pinosuang do hiri'd Walai'd Sasambayangan dot Agayo. 6 Om timung nogiddi i Raja' Suliman om koinsanai di tulun dot Israil do hiri'd dotimbabaan di Kaban do Tumpongo om papatahak no iyolo' do porsombahan dot id Tuhan, do pinatahak nopo om dumba' om sapi' dot ogumu' kopio, gisom dot a' no ointob-intob. 7 Om posuango' ngai' nogiddi dit imam i Kaban do Tumpongo do hiri'd Walai'd Sasambayangan dot Agayo, om poiliho' no diyolo' do hiri'd sahau di winonsoi do pinoiyo-iyo do moloikat do roitan do kerub, do hiri'd Bilik dit Olidang Kopio. 8 Iri nopo talad di winonsoi di pinoiyo-iyo do moloikat do roitan do kerub nga' poungkalad do poinsompon di Kaban om i kayu do pinangantayang di Kaban. 9 Iri nopo kayu di pinangantayang nga' anaru kopio, gisom dot iri no tulun di poingkakat do hiri'd hapak kopio di Bilik dit Olidang Kopio o kokito di tompok di kayu di pinangantayang diri. (Hilo' kasai' po i kayu do pinangantayang diri do gisom do baino'.) 10 Poinsuang nopo di Kaban do Tumpongo om aiso' i' o suwai ko' i duwo o kaping do watu. Iri nopo duwo o kaping do watu'ddi om pinosuang di Musa do hiri'd Kaban di hilo' pod Nuluhon do Sinai; do tontok di minomonsoi i' o Tuhan do tumpongo dot id bansa' dot Israil, di kososoliwan diyolo' do mantad hilo'd Masir.
Kagayaan do Tuhan
11-14 Nokosodia' ngai' no it imam do hiri, i mantad id piro-piro o sinompuruan, do momonsoi di wonsoyon do don tugama'. Om oinsanan nopo i modsisinding om i popouni do tuunion do mantad id payat di Liwi --- i Asap, i Himan om i Yodutun om koinsanai dit id suang do pinuruan do sompiiyon diyolo', do kipinakai do pakayan do kain linan. Iri nopo i tulun do Liwi om miningkakat do ponong id koulayon do mantad id pananaraban do porsombahan om ongkiinigit do simbal om kecapi. Om poinsugku' nogi' diyolo' o hatus om duwo nohopod ot imam di popouni do torumpit. Iri nopo sinding di modsisinding diri om ompoton do torumpit om simbal om tuunion do suwai. Om iti no i boroson do sinding diyolo' dot id Tuhan, “Royohon no o Tuhan, tu' iyau nopo om osonong. Mompus-ompus kasai' i' o kosianan dau,” ka. Tontok di suminoliwan it imam do mantad hiri'd Walai'd Sasambayangan dot Agayo, om sigog i' do koponu' i walai'ddi do tulinau do tanda' do nakarapou o Tuhan, gisom dot a' no iyolo' milo do potilombus do momonsoi di natantu' mantad do wonsoyon do tontok do sumambayang.
Boros di Raja' Suliman dot id Rayat
1 Om sambayang noddi i Raja' Suliman do poingkaa, “Oi Tuhan, uhang nu nogi' do miyon dot id pituongon do haun. 2 Nga' baino' noddi, om nawansayan ku no iya' do walai do miagal do walai'd raja', do maan nu dot iyonon do gisom dot alaid,” ka dau. 3 Om kasambayang poddi i raja', om toguang no iyau dot id toinsanan do rayat di songingkakat do hiri, om pokionuwai no dau iyolo' do barakat do mantad id Kinorohingan. 4-6 Boros ka dau, “Di nopo di gulu po, om minamatos o Tuhan dot id di Daud, i tapa' ku do poingkaa, ‘Mantad di posoliwano' ku i' o tulun ku do mantad hilo'd Masir, om gisom do baino', om aiso' i' o tiso' pod bandar do hiti'd pomogunan dot Israil do pinili' ku do poingkakatan do Walai'd Sasambayangan do maan ku, om aiso' o songulun piya do pinili' ku do sumiliu do boyoon dot Israil, i bansa' do songonuon ku. Nga' baino' noddi, om pilion ku o Yorusalim dot iyonon do sumambayang dot id doho'. Om iya' no, oi Daud, o pilion ku do momorinta' di tulun ku,’ ka. Royohon no o Tuhan, i Kinorohingan dot Israil, i minamayaan do batos diri!” ka dau. 7 Om boros ka kawagu di Suliman, “Nokopomusorou no i Daud, i tapa' ku, do momonsoi do Walai'd Sasambayangan dot Agayo do maan do don Tuhan, i Kinorohingan dot Israil. 8 Nga' boros kad Tuhan dot id dau, ‘Osonong i' daa kopio ino tosorou nu. 9 Nga' okon i' ko' iya' o popoingkakat di Walai'd Sasambayangan dot Agayo, suwai ko' i tanak nu,’ ka dau. 10 Om baino' noddi om nabayaan nod Tuhan i batos dau. Om nosiliu oku nod raja' dot Israil do suminowoli di tapa' ku. Om nowonsoi ku no i Walai'd Sasambayangan dot Agayo do maan do Tuhan, i Kinorohingan dot Israil. 11 Om nokosuang ku no do hiri'd Walai'd Sasambayangan dot Agayo i Kaban do Tumpongo, i sinuangan di watu do tumpongo'd Tuhan dot id tulun dot Israil,” ka dau.
Sambayang di Suliman
12-13 Om minomonsoi po i Suliman do mimbar do tambaga' o winonsoi do hiri'd tanga' di natad di Walai'd Sasambayangan dot Agayo. Konoruo' nopo di mimbar om 2.2 o mito, om kalaabo' nga' irad iddi tu' 2.2 o mito, om kasawato' no om 1.3 o mito. Om ongoi no i Suliman ingkakat do hiri'd mimbar diri dot id dotoguangan do koinsanai di rayat di nakarapou'd hiri, om timbaba' no iyau di pananaraban do porsombahan. Om kokito ngai' i' dau i tulun do hiri. Om otud nogiddi iyau, om poinsawato' goduwo no dau o longon dau, om sambayang noddi. 14 Boros ka dau, “Oi Tuhan, i Kinorohingan dot Israil! Aiso' no o Kinorohingan do koiyo diya' do hilo'd tawan om hiti'd pomogunan! Binayaan nu i' i batos nu om pinointalang nu o kosianan nu dot id tulun nu dit otorodok dot id diya' om it obingumboyo' do mikuwo'd aayi-ayi' o ginawo. 15 Om binayaan nu i batos nu dot id di Daud, i tapa' ku; nowonsoi ngai' nu noddi do tadau'd baino' o pointikid-tikid di boros di pinoboros nu. 16-17 Om nakabatos ko nogi' dot id tapa' ku dot ondung iso-iso' kopio o ginawo di sinakagon dau do tumanud di Tourat nu do miagal di winonsoi dau, om haro kasai' nopondo o songulun do mantad id sinakagon dau dot osiliu do raja' dot Israil. Om baino' nodti, oi Tuhan, i Kinorohingan dot Israil, om pokionuon ku do bayaanon nu po o koinsanai di pinabatos nu dot id di Daud, i tapa' ku, i susuhuon nu'ddi. 18 Nga' milo ko i' tuu kopio, oi Kinorohingan, do miyon do hiti'd pomogunan dot id pogialatan do tulun? Tu' oinsanan piya ilo tawan nga' a' nu i' kabagal dot iyonon, om okuro-kuro nogindo iti Walai'd Sasambayangan dot Agayo di winonsoi ku! 19 Oi Tuhan, i Kinorohingan ku, iyoho' no o susuhuon nu! Om pokinongoho' no daa doho' iti sambayang ku, oi Tuhan, i Kinorohingan ku, om patahako' no iti pokionuon ku. 20-21 Om intirungan no do pointikid-tikid do tadau om totuong iti Walai'd Sasambayangan dot Agayo di pinili' nu do diya'. Om maha' daa om korongou ko doho' do hino'd kinoiyonon nu do hino'd surga, om mangampun doho' om mangampun di tulun nu do tontok do sumambayang iyahai dot id diya' do potimbaba' diti walai. 22 Om soira' nopo do haro o tulun do tondoson do nokowonsoi'd sala' dot id tulun do suwai, om angatan nondo do hiti'd pananaraban do porsombahan di hiti'd Walai'd Sasambayangan dot Agayo, do sumumpa' dot a' iyau nokowonsoi'd sala', 23 om pokinongohon nori do hino'd surga, om butusan no i susuhuon nu'ddi, oi Tuhan. Hukuman no i kisala' om poiduwon no it aiso' o sala'. 24 Om soira' nopo dot aala' do pisangod o bansa' dot Israil, iti tulun do songonuon nu, tu' obungou di dusa diyolo', om rumikot nondo iyolo' dot id diya' do mokitulung, om mongoi do hiti'd Walai'd Sasambayangan dot Agayo, om sumambayang do mikuwo'd osiriba' o ginawo do mokiampun diya', 25 om pokinongohon no iyolo' do hino'd surga. Om maha' daa om ompunan nu o dusa diti tulun nu om pogulion nu kawagu iyolo' do hiti'd pomogunan di nakatahak nu dot id komolohingan diyolo'. 26 Soira' nopo dot a' ko poporikot do rasam tu' nokowonsoi i' do dusa dot id diya' o tulun nu, om ondung kumorologo iyolo' di dusa diyolo' om tumimbaba' diti Walai'd Sasambayangan dot Agayo, om sumambayang do mikuwo'd osiriba' o ginawo dot id diya', 27 om pokinongohon no iyolo' do hino'd surga, oi Tuhan. Om ompunan no o dusa di susuhuon nu, i tulun dot Israil. Tudukan no iyolo' do momonsoi dit otopot. Om owonsoi pondo o miagal diri, om porikatan nod rasam o hiti'd pomogunan nu, i pomogunan di pinatahak nu dot id tulun nu do sumiliu'd songonuon diyolo' do gisom dot alaid. 28 Soira' nopo do mononglous ko' orikatan do toruol di mogkoroliu o hiti'd pomogunan diti, ko' angaraag i totonomon dot oontok do tongus dit alasu' ko' akanon do katat, om soira' nopod songodon do pisangod i tulun nu, ko' oontok do toruol, 29 om pokinongohon no o sambayang diyolo'. Om ondung haro o songulun di tulun dot Israil, i tulun do songonuon nu do tumongob, om sumambayang nondo dot id diya' do mikuwo'd popoinsawat do longon dau do pointuduk diti Walai'd Sasambayangan dot Agayo, 30 om pokinongohon no o sambayang diyolo' do hino'd tiyonon nu do hino'd surga, om ompunan no om uhupan iyolo'. Tu' iya' noo o koilo dot id suang do ginawo'd tulun. Iyo nopoddi, om wonsoyon no dot id pointikid-tikid do tulun it apatut do wonsoyon dot id diyolo', 31 om oronok indo om mihuboyo-boyo' o tulun nu dot id diya' do solinaid diyolo' do poingiyon do hiti'd pomogunan di pinatahak nu dot id taki-aki dahai. 32 Om soira' nopod haro o tulun do bansa'd suwai do mantad id pomogunan di hilo'd sodu' do korongou do kobontugo' om kokoriso' nu, om korongou do posodia' kasai' ko do monguhup, om rumikot nondo iyau dot id Walai'd Sasambayangan dot Agayo diti do mongoi sambayang dot id diya', 33 om maha' daa om pokinongohon nu o sambayang dau do hino'd tiyonon nu do hino'd surga, om patahakon nu i pokionuon dau. Om iyo nondo do tulun dot Israil, i tulun do songonuon nu, o koinsanai do bansa'd tulun do hiti'd pomogunan tu' kotutun diya' om mumboyo' do boros nu, om kongoilo dot iti no walai di winonsoi ku o tiyonon do sumambayang dot id diya'. 34 Om soira' nopod suhuon nu i tulun nu do mongoi sangod do pisangod, om hinonggo nopondo iyolo' do tumimbaba' diti bandar di nopili' nu om sumambayang do potimbaba' diti walai di winonsoi ku do maan nu, 35 om maha' daa om pokinongohon nu o sambayang diyolo' do hino'd surga, om maha' daa om onuan nu iyolo' do kamanangan. 36 Om soira' nopo do kowonsoi do dusa dot id diya' iti tulun nu --- otopot nopo kopio om aiso' i' o tulun dot aiso' o dusa --- om pologoson tomod nu nopondo iyolo' dot alaon do pisangod om atanggayan do pisangod do kumaa dot id pomogunan dit osodu' ko' osomok, tu' atatagadan ko no kopio, 37-38 om ondung otopot-topot kopio om aayi-ayi' kopio o ginawo diyolo' do tumongkiad di dusa diyolo' do daamot diyolo' do poingiyon dot id pomogunan diri, om sumambayang nondo dot id diya' do potimbaba' do pomogunan diti, i pinatahak nu dot id taki-aki dahai, om potimbaba' diti bandar do nopili' nu om iti Walai'd Sasambayangan dot Agayo di winonsoi ku do maan nu, 39 om pokinongohon no daa o sambayang diyolo' do hino'd tiyonon nu do hino'd surga, om kosianai no diyolo'; om maha' daa om ompunan nu o koinsanai di dusa do tulun nu. 40 Om antangai no iyahai do dinondo, oi Kinorohingan ku, om pokinongohon ngai' no i sambayang dahai dot id diya' do mantad id kinoiyonon diti. 41 Ingkakat nod dinondo, oi Tuhan i Kinorohingan! Om suang no diti Walai'd Sasambayangan dot Agayo do miwoyo' di Kaban do Tumpongo, i tanda' do kuasa' nu, om miyon nod hiti do gisom dot alaid. Barakatan no o koinsanai do karaja' dit imam di mogobi-obi' diya', om maha' daa om ongotood ngai' i tulun nu tu' osonong ko i' dot id diyolo'. 42 Oi Tuhan, i Kinorohingan, simbaro' no iti sambayang do raja' di nopili' nu. Sorohon no i kosianan nu dot id di Daud, i susuhuon nu,” ka dau.
Sinambayangan i Walai'd Sasambayangan dot Agayo
1 Om kasambayang poddi i Raja' Suliman, om rikot no o tapui do mantad hilo'd tawan do minonorob do koinsanai di porsombahan di sinumbali' di pinatahak dot id Tuhan. Om koponu' noddi di tulinau do tanda' do nakarapou o Tuhan, i Walai'd Sasambayangan dot Agayo, 2 gisom dot a' no kosuang it imam do hiri'd suang. 3 Om soira' di nokito di tulun dot Israil o tapui do ruminikot do mantad hilo'd tawan om noponu' di tulinau do tanda' do nakarapou o Tuhan, i Walai'd Sasambayangan dot Agayo, om otud nopo iyolo' do hiri'd siliu do tuminuku' om mikuwo'd minamarayou iyolo' do Kinorohingan, tu' Kinorohingan nopo om osonong om mompus-ompus o kosianan dau. 4 Om papatahak noddi i Raja' Suliman om koinsanai di tulun do pointimung do hiri, do porsombahan di sumbolion dot id Tuhan. 5 Om papatahak no i Suliman do 22,000 o tinan do sapi' om 120,000 o tinan do dumba' do numaan do porsombahan do piuludan. Om iyo noddi i raja' om koinsanai di rayat do pinapatahak di Walai'd Sasambayangan dot Agayo dot id Kinorohingan. 6 Om songingkakat ngai' it imam do hiri'd ningkokoton diyolo' do mitimbaba' di tulun do Liwi di mamarayou'd Tuhan do mikuwo'd popinguni di tuunion di winonsoi di Raja' Daud, om modsinding di sinding do “Mompus-Ompus O Kosianan Dau,” ka, do tumanud di pinonuhuan di Daud. Om iri ngai' no imam om popinguni do torumpit om songingkakat i tulun dot ogumu'. 7 Om potobilango' noddi di Suliman do maan do don Tuhan i hiri'd tanga' di natad, it otimbabaan di Walai'd Sasambayangan dot Agayo, om papatahak nogiddi iyau do porsombahan di sorobon om porsombahan do gandum om lunok, i nanu do mantad id porsombahan do piuludan. Iyo pogiddi o winonsoi di Suliman nga' a' no orumpos di pananaraban do porsombahan di tambaga' do winonsoi, dot oinsanan i porsombahan. 8 Om hiri nod Walai'd Sasambayangan dot Agayo do minamaramai i Suliman om koinsanai di tulun dot Israil do Tadau dot Agayo do Kinuhub-Kuhub do solinaid do turu' o tadau. Om ogumu' no kopio o tulun do nokotimung tu' nongkorikot nopo om mantad pod hilo'd Ralan do Hamat di ponong id utara om gisom do hilo'd piwolitan do Masir di ponong id salatan. 9 Turu' o tadau diyolo' do pointimung do pinapatahak di pananaraban do porsombahan dot id Tuhan, om turu' po kawagu o tadau diyolo' do minamaramai di Tadau dot Agayo do Kinuhub-Kuhub. Om tontok di tadau do kolimpupuson no, om papaharo po iyolo' do karamayan do pongolimpupus. 10 Om tadau poddi kawagu, di koduwo nohopod om tolu tadau do tulan do koturu', om suhuo' ngai' no di Suliman i tulun do minuli'. Om ongotood ngai' nopo iyolo' tu' osonong ngai' i' o winonsoi'd Tuhan dot id tulun dot Israil, i tulun do songonuon dau, om id di Daud om id di Suliman.
Minintalang Kawagu o Kinorohingan dot id di Suliman
11 Om kopongo poddi di Suliman do momonsoi i Walai'd Sasambayangan dot Agayo om i walai do don raja' do miontok di natantu' mantad do wonsoyon, 12 om intalang no kawagu o Tuhan dot id di Suliman di dongotuong, om boro-boros nod poingkaa, “Norongou ku no i sambayang nu, om romiton ku i' iti walai di winonsoi nu do maan do tiyonon do sumambayang dot id doho' do gisom dot alaid. 13 Om soira' nopo dot a' oku poporikot do rasam ko' poporikot oku do katat do mangayi' do tanom-tanom ko' poporikot oku do toruol di mogkoroliu dot id tulun ku, 14 om ondung minsiriba' iyolo', om sumambayang dot id doho' om kumorologo di dusa diyolo', mikuwo'd tumongkiad di kowoyo-woyoon diyolo' dot araat, om pokinongohon ku indo do hilo'd surga o sambayang diyolo'; om ompunan ku i' o dusa diyolo' om posimbayanon kawagu ku o pomogunan diyolo'. 15 Om piantangan ku indo iti Walai'd Sasambayangan dot Agayo om posodia' kasai' oku do mokinongou do koinsanai do sambayang diyolo' di poboroson diyolo' do hiti'd kinoiyonon diti. 16 Wonsoyon ngai' ku pogi' o miagal diri nga' nopili' ku no o kinoiyonon diti om nokotobilang ku no do maan dot iyonon do sumambayang dot id doho' do gisom dot alaid. Om piantangan ku indo om piintirungan ku do gisom dot alaid. 17 Ondung iyo ko iya' di Daud, i tapa' nu, tu' otorodok do tumanud dit oturan ku om momonsoi do toinsanan di ponuhuan ku diya', 18 om bayaanon ku indo i batos ku dot id di Daud, i tapa' nu, do haro kasai' nopondo o songulun di sinakagon dau dot osiliu do raja' dot Israil. 19 Nga' ondung sumaap ko om i rayat nu nga' sumaap dit oturan ku om i ponuhuan ku, om tumuku' kou nogindo dot id tingolig, 20 om posoliwanon ku nondo iyokoyu do mantad id pomogunan di pinatahak ku dokoyu. Om tongkiadan ku pondo iti walai di natantu' ku do tiyonon do sumambayang dot id doho', om hinonggo-honggo nopondo nga' hingi-hingion po om irak-irakan do tulun o tulun dot Israil. 21 Om iti nondo Walai'd Sasambayangan dot Agayo, i suahon kopio daa do dinondo, nga' popotigowo pondo do tulun di katalib do hiti. Om muhot nondo iyolo' do poingkaa, ‘Nokuro tu' iyo kopio'dti o winonsoi'd Tuhan dot id pomogunan diti om id Walai'd Sasambayangan dot Agayo'dti?’ ka. 22 Om poingkaa nondo o ponimbar do tulun, ‘Nokobungou nopo nga' tuminongkiad iyolo'd Tuhan, i Kinorohingan diyolo', i minomoyo' di taki-aki diyolo' do suminoliwan do mantad hilo'd Masir. Tu' tuminuku' nogi' om minamatos iyolo' do tumorodok dot id tingolig. Om iri no o nokoporikatan do Tuhan do kosusaan diti dot id diyolo',’ ka nondo diyolo',” ka dau.
Piro-Piro o Winonsoi di Suliman dit Ongosonong
1 Koloido' nopo di Suliman do minomonsoi di Walai'd Sasambayangan dot Agayo om i walai dau do don raja' om duwo nohopod o toun. 2 Om winonsoi nogi' dau kawagu i piro-piro bandar di pinatahak di Raja' Hiram dot id dau, om minonuhu' iyau do tulun dot Israil do mongoi iyon do hiri. 3 Om kosolod po dau i watas do Hamat om Soba, 4 om ninggiratan dau i bandar do Palmira, i hilo'd kinoiyonon do poiyanan do kaakan-akanan di hilo'd Hamat. 5 Om winonsoi nogi' dau kawagu o bandar do Bait-Horon dit id sokid om Bait-Horon dit id siba', om nosiliu'ddi do bandar di kitolig o posorili' di bandar diri, om kisalampad o totobon do wawayaan dot agayo. 6 Om winonsoi nogi' dau kawagu o bandar do Baalat, om koinsanai di bandar do poiyanan do kaakan-akanan, om i piro-piro bandar do pinoiyanan di korita'- kuda' om i kuda' dau. Om nowonsoi ngai' nopo dau i natantu' mantad dau do wonsoyon do hilo'd Yorusalim, om hilo'd Libanon om pointongkop di watas do porintaon dau. 7-8 Om oinsanan nopo i tulun do sinakagon di bansa' do Kanaan, it a' di tulun dot Israil pinatai di solodo' i' diyolo' o pomogunan diri, do sinuhu' di Suliman do kumaraja' do miagal do turipon. Iri nopo tulun diri nga' bansa' do Hit, Amori, Poris, Howi om Yobus. Om gisom piya do baino' nga' turipon kasai' po i sinakagon diyolo'. 9 Iri nopo tulun dot Israil om a' i' sinuhu' do kumaraja' do miagal do turipon, suwai ko' siniliu iyolo' do soudor, om boyoon do soudor, om boyoon dit ongkikorita'-kuda' do don sumasangod, om soudor di songinsakai'd kuda'. 10 Duwo nahatus om limo nohopod o pagawai do sinuhu' do monongkoilo di tulun di kumaraja' do miagal do turipon do hiri'd piro-piro o waalon. 11 Om powoliho' no di Suliman i sawo dau, i tanak do raja' do Masir, do mantad id Bandar di Daud om pinakaa do hiri'd walai di winonsoi dau do tiyonon di sawo dau. Tu' boros ka di Suliman, “A' i' koino-ino do miyon i sawo ku do hiti'd walai di Daud do don raja', i raja' dot Israil, tu' koinsanai di kinoiyonon di noumbalan do pinoilihan di Kaban do Tumpongo om olidang no,” ka dau. 12 Om papatahak no i Suliman dot id Tuhan do porsombahan di sumbolion do hiri'd sakai di pananaraban do porsombahan di winonsoi dau, dot id dotimbabaan di Walai'd Sasambayangan dot Agayo. 13 Om pinapatahak iyau do porsombahan di sorobon do pointikid do tadau dot agayo do tumanud di Tourat di Musa: tontok do tadau'd Sabat, Tadau dot Agayo do Tulan do Wagu om tontok di tolu o tadau dot agayo do pointikid-tikid do toun --- iri no i Tadau'd Agayo do Roti dit A' Kipangambang, Tadau dot Agayo do Dongmongomot, om Tadau dot Agayo do Kinuhub-Kuhub. 14 Om natur nogi' di Suliman o karaja' dit imam do pointikid do tadau, om karaja' di tulun do Liwi di monguhup dit imam do modsinding do pamarayou om momonsoi di karaja' diyolo', do tumanud di pinangatur di Daud, i tapa' dau. Om iri nogi' i madtatamong di Walai'd Sasambayangan dot Agayo nga' binahagi' i' dau do piro-piro o sinompuruan do madtamong do pointikid-tikid di wawayaan, do tumanud di nituduk di Daud, i susuhuon do Kinorohingan. 15 Om tinanud ngai' nopo, om aiso' i' o tinolib-toliban di pinotuduk di Daud dot id imam om id tulun do Liwi do pasal di piro-piro bilik di poopian do konunu-nunuan om pasal di piro-piro o hal do suwai. 16 Om kopongo noddi i waalon di natantu' mantad di Suliman do wonsoyon. Om osonong ngai' nopo o pinomonsoi'ddi, do mantad poddi pinoiliu i' i watu do pinoimpahan om gisom do nopongo i Walai'd Sasambayangan dot Agayo. 17 Om ongoi noddi i Suliman do hilo'd Ision-Gibir om hilo'd Ilat, i duwo o bandar do podompiran do kapal do rahat do hiri'd tisan di Suok dot Akaba, do hilo'd pomogunan dot Idom. 18 Om nonuan nogi' iyau di Raja' Hiram do piro-piro kapal do rahat do pinitanud di piro-piro pagawai dau om i piro-piro tulun di popotunud do kapal do rahat di nongoubas no. Om pogitanud-tanud nopo iyolo' di tulun di Suliman do kuminaa do hilo'd pomogunan dot Opir do mongoi panganu do lobi ko' hopod om limo noribu o kilogram do tamas, om pootodo' noddi diyolo' iri dot id di Suliman.
Nokorikot i Raja'd Tondu' do Siba
1 Iri nopo Raja'd Tondu' do pomogunan do Siba nga' nokorongou do kobontugo' di Suliman. Om ongoi noddi iyau do hilo'd Yorusalim do mongoi pogumbal di Suliman do piro-piro o tuhoton dit angaralom. Om ogumu' nogi' o tulun do pinowoyo' dau om ogumu' ot unta di ginandaran do rampa, om watu dot olumis dit angagayo o gatang, om tamas dot ogumu' kopio. Om kosolowot poddi i Raja'd Tondu' diri di Suliman, om poboroso' ngai' no dau o tuhoton dit osorou-sorou dau dot uhoton. 2 Om kosimbar ngai' nopod i Suliman i nuhot dau'ddi, om iso' po nga' aiso' i' ot adalaan karalom dot id di Suliman. 3 Om koilaai no di Raja'd Tondu' dot opintar kopio i Suliman om nokokito iyau di walai'd raja' dit olumis kopio do winonsoi di Suliman. 4 Om nokokito nogi' iyau di kowoyo-woyoon di pagawai do kumaraja' do hiri'd walai'd raja', om i pakayan diyolo' dit ongoiyo om i bilik dit iyonon diyolo'; om nokokito nogi' iyau di taakanon di pinosurung, om i pakayan di tulun di modsusurung do tontok do moginakan; om nokokito nogi' iyau di piro-piro porsombahan di sumbolion di patahakon di Suliman do hiri'd Walai'd Sasambayangan dot Agayo. Om oimayaan tomod diri om olumisan tomod i Raja'd Tondu' do Siba do nokokito ngai'ddi. 5 Om boros kaddi dau dot id di Suliman, “Ongotopot i' kopio i norongou ku do pasal do kopintaro' nu di hilo' oku pod pomogunan ku! 6 Nga' korikot oku poddi do minongoi kopio ontong ngai'ddi, om ponongkuyaai oku nogi' kopio. Om a' i' kointanga-tanga' diti nokito ku i nongorongou ku. Opintar ko po om kaya' ko ko' i nokosunud do tulun dot id doho' do pasal do kopintaro' om kakayao' nu. 7 Olumaag no kopio o koinsanai di pagawai dit id toning kasai' diya' tu' kopirongou di ponudukan nu dit angaralom! 8 Royohon no o Tuhan, i Kinorohingan nu! Om nokointalang no dau dot asanangan iyau diya' tu' siniliu ko i' dau do raja' dot Israil. A' i' iyau otingkod dot osianan do tulun dot Israil; om iri no o nokopomilian dau diya' do sumiliu do raja' diyolo', om kogirot nu i' ot oturan om it otulid,” ka dau. 9 Om patahako' noddi di Raja'd Tondu' do Siba dot id di Suliman i popuhawangon dau di nigitan dau --- lobi i' dot apat noribu kilogram o tamas om ogumu' o watu dot olumis dit angagayo o gatang om ogumu' o rampa. Om a' no i Suliman nokoumbal kawagu do nakaramit do rampa dot iyo'ddi pinatahak di Raja'd Tondu' do Siba tu' osonong no kopio. 10 (Om iri nogi' i tulun di Raja' Hiram om i tulun di Raja' Suliman di pinapaatod do tamas do mantad hilo'd Opir do patahakon di Suliman nga' minigit pod watu dit ongolumis, om it agayo o gatang, om minigit do kayu cendana. 11 Om iri no i kayu'ddi o winonsoi di Suliman do tukad di Walai'd Sasambayangan dot Agayo om tukad di walai dau do don raja'. Om iri nogi' o winonsoi do kecapi om gambus do maan di tulun do pouuni do tuunion. Om a' po nokoumbal do haro ot iyo'ddi do hilo'd pomogunan do Yohuda.) 12 Om patahako' ngai' nopo di Suliman dot id Raja'd Tondu' do Siba o nunu nopo i pinokianu dau, do suwai mantad ko' i popuhawangon kasai' di Suliman. Om uli' noddi i Raja'd Tondu' diri do hilo'd pomogunan dau do mogitanud-tanud di tulun di minomoyo' dau.
Kakayaan di Raja' Suliman
13 Monikid toun nopo om osomok nod duwo nohopod om tolu noribu o kilogram do tamas dot aramit di Suliman, 14 om a' po kohompit i sukai do mantad id piro-piro o tulun di mongingindapu' om i tulun di dumagang-dagang, om mantad id piro-piro raja' dot Arab om koinsanai di gobunor dot Israil. 15 Om pomonsoi no i Suliman do duwo nahatus o kolid dit angagayo do nurogupan ngai' nopod tamas di tinantan do haro i' doti' o turu' o kilogram do pinonguragup dot iso' o kolid. 16 Om minomonsoi po iyau do tolu nahatus o kolid dit ongokoro-koro', om nurogupan do tamas di tinantan do haro i' doti' o tolu o kilogram do pinonguragup dot iso' o kolid. Om posuango' ngai' nopo dau i kolid diri do hiri'd langga' di pinungaranan do Langga' do Puru' do Libanon. 17 Om minomonsoi po i Raja' dot iso' o tirikohonon do don raja' dit agayo om linopisan do lamai om nurogupan do tamas di nosompipi'. 18 Iri nopo tirikohonon diri nga' winansayan do tukad dot onom o taang. Om haro o poulakan do lapap di nurogupan do tamas do pasagalai di tirikohonon. Om haro o kakabayon di tirikohonon. Om hiri nopod miampaping di kakabayon om haro o winonsoi do pinoiyo-iyo'd singa. 19 Om hiri'd misingompok do pointikid-tikid di taang do tukad nga' haro ngai' nopo i winonsoi do pinoiyo-iyo'd singa, om oinsanan nopo i winonsoi'ddi om hopod om duwo o tinan. Om a' po nokoumbal do haro o tirikohonon do raja' dot iyo'ddi do hinonggo-honggo nopo o pomorintaan. 20 Koinsanai di ponginuman di Suliman om tamas ngai' nopod winonsoi om iri ngai' i pakakas do hiri'd langga' di roitan do Langga' do Puru' do Libanon nga' tamas i' di nosompipi' do winonsoi. Om tontok nopo di poimpasi po i Suliman om aiso' i' o gatang do pirok. 21 Om ogumu' po o kapal do rahat di Suliman dit angagayo do moyo-woyo' di piro-piro kapal do rahat di Raja' Hiram do hilo'd rahat dot agayo. Om insan kasai' dot id suang do tolu o toun do gumuli' i kapal do rahat diri do mongoi paatod do tamas, pirok, lamai, kara' om tubou. 22 I Raja' Suliman nopo nga' kaya' om opintar ko' mantad do raja' do hinonggo nopo do hiti'd pomogunan. 23 Om oinsanan nopo o tulun dot orohian do mongoi pokinongou do ponudukan dau dit angaralom di pinatahak do Kinorohingan dot id dau. 24 Om pointikid-tikid do tulun di rumikot nga' manahak kasai' nopod nipuhawang dot id dau. Papatahak iyolo' do konunu-nunuan di pirok om tamas do winonsoi, om papatahak do pakayan, rapo-rapo, rampa, kuda' om bagal. Om iyo kasai' nopoddi do pointikid do toun. 25 Om haro po ot apat noribu o kandang do poiyanan di Raja' Suliman do kuda' om korita'-kuda' dau. Om kogumuo' nopod kuda' dau do don sumasangod om hopod om duwo noribu o tinan. Om iri nopo wookon diri om pinoiliu dau do hilo'd Yorusalim, om iri no suwai om pinoiyon dot id piro-piro o bandar do suwai. 26 Om iyau no o kikuasa' dot id sawat do toinsanan di raja' do hiri'd watas do mantad pod hilo'd Bawang dot Iprat om gisom do korikot di pomogunan do Pilistin om i piwolitan do Masir. 27 Tontok nopo di pomorintaan di Suliman, om pirok nopo do hilo'd Yorusalim om miagal nod konunu-nunuan di koubasanan, tu' miagal pod watu; om kayu sedar do Libanon nga' a' no aayi-ayi', tu' miagal po di kayu ara. 28 Om momoli nogi' i Suliman do kuda' do mantad hilo'd Musri om mantad id piro-piro o pomogunan do suwai.
Susui dot Oniba' do Pasal di Pomorintaan di Suliman
29 Iri nopo susuyon do suwai do pasal di Suliman, do mantad di timpuun i' om gisom di kinopupuson, om nongkotulis no do hiri'd suang do Buuk do Susui di tinulis di Natan i Nabi, om id suang di Buuk do Boros do Pasal dit id Dabantalan di tinulis di Ahia, i tulun do Silo, om id suang do Buuk do Pinointalang di tinulis di Ido i Nabi, i pinotulisan di susui do pasal di pinomorintaan di Yirobiam, i raja' dot Israil. 30 Apat nohopod o toun do koloido' di Suliman do momorinta' do pointongkop do hilo'd Yorusalim. 31 Om kapatai noddi iyau om lobongo' nod hilo'd Bandar di Daud. Om kosiliu nod raja' i Rihabiam, i tanak dau do suminowoli dau.
Suminaap i Piro-Piro Payat do Ponong id Utara
1 Om ongoi no i Rihabiam do hilo'd Sikim tu' nokotimung nod hilo' o koinsanai di rayat dot Israil do ponong id utara, do posiliu dau do raja'. 2 Om soira' di nokorongou do hal diri i Yirobiam, i tanak di Nibat, i minongoi do hilo'd Masir tu' minogidu' iyau do mantad id di Raja' Suliman, om poguliai no dau do hilo'd Israil. 3 Om lohowo' no di rayat do ponong id utara i Yirobiam, om pogitatanud no iyolo' do minongoi solowot di Rihabiam. Boros ka diyolo', 4 “Awagat no kopio o pinotonggungan di Suliman, i tapa' nu, dot id dahai. Ondung pagaan-gaanon nu daa i tonggungan dahai om i koinggoritan dahai, om minsiriba' i' iyahai dot id diya',” ka diyolo'. 5 Om boros ka di Rihabiam do suminimbar, “Momusorou oku po, om tolu po o tadau do mantad baino' om gumuli' kou nogi' kawagu do hiti,” ka dau. Om uli' ngai' noddi i tulun diri. 6 Om pokinosihat no i Rihabiam di kongomolohingan no di nosiliu do ponosihat di Suliman, i tapa' dau. Boros ka dau, “Poingkuro ma o ponimbar ku di tulun diri? Poingkuro o nosihat dokoyu?” ka dau. 7 Om boros ka diyolo', “Ondung osonong o wonsoyon nu dot id tulun diri om poposonong ko do ginawo diyolo' tu' osonong i' o ponimbar nu, om otorodok no iyolo' dot id diya' do gisom dot alaid,” ka. 8 Nga' a' i' di Rihabiam pinadul i nosihat di kongomolohingan diri. Suwai ko' ongoi nogi' iyau dot id tulun dit ongomulok po, i rampam nogi' dau, i nongosiliu do ponosihat dau. 9 Boros ka dau, “Poingkuro ma o ponimbar ku di tulun di mokinggaan do tonggungan diyolo'? Poingkuro o nosihat dokoyu doho'?” ka di Rihabiam do minuhot diyolo'. 10 Om boros ka diyolo', “Poboroson no o poingkaa dot id diyolo', ‘Oluhoi oku piya nga' okoris-koris oku i' ko' i tapa' ku. 11 Awagat no daa i pinotonggungan di tapa' ku dot id dokoyu nga' awaga-wagat po o doho'd potonggungan dokoyu. Tuwai noo o pinomikot dau dokoyu, nga' i pipikot do kuda' o doho'd pomikot dokoyu!’ kanto,” ka diyolo'. 12 Tolu poddi o tadau do mantad diri om guli' no kawagu i Yirobiam om koinsanai di tulun diri do minongoi solowot di Raja' Rihabiam, do tumanud di pinonuhuan dau. 13 Om suminansala' i' iyau di nosihat di kongomolohingan tu' apantog nopo iyau do minoro-boros di rayat, 14 tu' tuminanud nogi' iyau di pinonosihat di tulun dit ongomulok po. Boros ka dau, “Awagat no daa i pinotonggungan di tapa' ku dot id dokoyu, nga' awagat po ko' iri o doho'd potonggungan dokoyu. Tuwai noo o dau do pinomikot dokoyu, nga' doho' nopod pomikot dokoyu om pipikot do kuda'!” ka dau. 15 Om a' i' dau pinadul i pinokianu di rayat. Nga' iri no o korohian do Tuhan, i Kinorohingan, tu' mositi' nod osiliu i nokoboros mantad di Ahia i Nabi, i mantad hilo'd Silo do pasal di Yirobiam, i tanak di Nibat. 16 Om soira'ddi nokito di rayat dot a' i' mokinongou i raja', om pagarango' noddi diyolo' o poingkaa, “Nunu kopio o kapadul-padul toko' di Daud om i sinakagon dau? Aiso' i' o nunu-nunu do winonsoi diyolo' dot osonong dot id dati'. Kainou muli', oi tulun dot Israil! Pologoson nopo i Rihabiam do mongilo-ilo do dau'd tinan!” ka diyolo'. Om suminaap diri i rayat dot Israil, 17 om i Rihabiam nopoddi nga' raja' poo do watas do Yohuda. 18 Om suhuo' no di Raja' Rihabiam i Adoniram, i mandur di turipon di songingkaraja', do monginsasamod di rayat. Nga' dumpaho' nogi' diyolo' iyau do watu do gisom do napatai iyau. Om kokito poddi di Rihabiam iri, om osiau nopo iyau do suminakai di korita'-kuda' dau om poggidu' no do kuminaa do hilo'd Yorusalim. 19 Om mantad poddi om sumaap no kasai' di raja' do sinakagon di Daud i rayat do pomorintaan do ponong id utara dot Israil.
I Pinoboros di Nabi Somaya
1 Soira' di nokorikot i Raja' Rihabiam do hilo'd Yorusalim, om ponimung no iyau do 180,000 o soudor dau dit ongosiou do mantad id payat do Binyamin om Yohuda do mongoi panangod di tulun dot Israil om koguli' i' o pomorintaan dau dot id payat di ponong id utara dot Israil. 2 Nga' suhuo' nod Tuhan i Nabi Somaya 3 do mongoi polombus do boros diti dot id di Rihabiam om id toinsanan di payat do Yohuda om Binyamin, 4 “Kada' kou ponokisangod di tulun dot Israil, i tongotobpinai dokoyu. Uli' ngai' kou nogi'. Tu' iti nopo nosiliu om korohian ku i',” ka. Om umboyo' ngai' no iyolo' di boros do Tuhan om a' iddi iyolo' nabayaan do minongoi sangod di Yirobiam.
Nolig di Rihabiam i Kabandaran
5 Om undorong no i Rihabiam do hilo'd Yorusalim om ponuhu' no iyau'd tulun do momonsoi'd tolig do pongolig do posorili' di kabandaran dit id watas do Yohuda om Binyamin. Iri nopo bandar diri om: 6 bandar do Baitlahim, Itam, Tokua, 7 Bait-Sur, Soko, Adulam, 8 Gat, Marisa, Sip, 9 Adoraim, Lakis, Asika, 10 Sora, Ayalon om Hibron. 11 Om pinogirot nogi' dau i kabandaran di kitolig diri om tinikidan dau dot iso' o boyoon do soudor o pointikid-tikid di bandar, om nonuan ngai' dau i bandar do kaakan-akanan, om tumau'd saitun, om waig dot anggur, 12 om kolid, om tandus. Om id suang kasai' iddi do pomorintaan dau o watas do Yohuda om Binyamin.
Minongoi i Piro-Piro Imam om i Tulun do Liwi do Hilo'd Yohuda
13 Om ongoi ngai' nopod hiri'd di Rihabiam it imam om i tulun do Liwi do mantad id toinsanan di watas dot Israil. 14 Tongkiadai ngai' nopo di tulun do Liwi i kobuturan do paakan-akanan do tayam-tayam om i tana' diyolo', om undaliu no iyolo' do hilo'd Yohuda om hilo'd Yorusalim, tu' a' iyolo' di Yirobiam pinabanar do kumaraja' di karaja' dot imam di mogobi-obi'd Tuhan, om i suminowoli di Yirobiam do raja' dot Israil nga' a' i' pinapabanar diyolo'. 15 Minomili' nogiddi i Yirobiam dot imam do maganu-anu do hiri'd tiyonon do modsubak do tingolig om modsubak do rusod-rusod, om i patung di pinoiyo-iyo do sapi' di winonsoi dau. 16 Om iri nopo i tulun do mantad id toinsanan di payat dot Israil dit otopot-topot kopio dot orohian do sumambayang dot id Tuhan, i Kinorohingan dot Israil, om minongoi i' do hilo'd Yorusalim, do tuminanud di tulun do Liwi, om kapatahak i' iyolo' do porsombahan di sumbolion dot id Tuhan, i Kinorohingan di tinuku' di taki-aki diyolo'. 17 Om iri noddi o kogiro-girot di pomorintaan do Yohuda. Om tolu o toun diyolo' do suminokodung kopio do pomorintaan di Rihabiam, i tanak di Suliman, om koiyon-iyono' nopo diyolo' om iyo po dit i Raja' Daud po om i Raja' Suliman o momorinta'.
Sompiiyon di Rihabiam
18 Kinawin nopo di Rihabiam om i Mahalat; tapa' nopo di Mahalat om i Yorimot, i tanak di Daud, om tina' no dau om i Abihail, i tanak di Iliab, i manangaki di Isai. 19 Kianak iyo Rihabiam di Mahalat do tolu o kusai: i Yous, i Somaria om i Saham. 20 Om kowino' po di Rihabiam i Maaka i tanak di Absalom. Om apat o tanak diyolo'd kusai: i Abia, i Atai, i Sisa om i Silomit. 21 Kogumuo' nopod sawo di Rihabiam om hopod om walu', om kogumuon nod tondu' di panakasawo dau om onom nohopod. Tangaanak nopo di Rihabiam do kusai om duwo nohopod om walu', om onom nohopod o tangaanak dau'd tondu'. Id pogialatan nopo di sawo om tongoondu' di panakasawo dau om i Maaka no o kosianan kopio dau. 22 Om i Abia noddi, i tanak diyolo' di Maaka o kasanangan kopio dau dot id pogialatan do koinsanai di tangaanak dau, om i Abia no o pinili' dau do similiu'd raja' do sumowoli dau. 23 Om oilo tomod i Rihabiam do minanahak do karaja' dot id tangaanak dau'd kusai, om pinoiyon dau iyolo' dot id kabandaran dit ongkitolig do pointongkop do watas do Yohuda om Binyamin. Om nonuan nogi' dau iyolo' do taakanon do gisom dot a' aayi-ayi', om nonuan dau iyolo'd sawo dot ogumu'.
Sinangod do Masir o Yohuda
1 Om kogirot poddi o pomorintaan di Raja' Rihabiam, om a' di dau om a' do koinsanai di rayat dau pinadul i Tourat do Tuhan, 2 om a' noddi iyolo' tuminorodok dot id Tuhan. Om hukumai noddi iyolo'd Tuhan. Om tontok di kolimo do toun do pomorintaan di Rihabiam, om ngoyo' no di Sisak i raja' do Masir, songodo' o Yorusalim, 3 do miwoyo' do soribu om duwo nahatus o korita'-kuda' di don sumasangod, om onom nohopod ribu o soudor di kikuda', om soudor dit a' no ointob-intob o kogumuo', do poinghompit ngai' i soudor do Libia, Suki om Etiopia. 4 Om sinolod dau i kabandaran di kitolig o posorili' do hilo'd Yohuda om potilombusai po dau o hilo'd Yorusalim. 5 Om tontok nopoddi nga' nokotimung nod hilo'd Yorusalim i Raja' Rihabiam om koinsanai di boyoon do tulun do Yohuda do mogidu' daa do mantad id di Sisak. Nga' rikot no dot id diyolo' i Somaya i Nabi, om boro-boros nod, “Poingkaa o boros do Tuhan, ‘Tuminongkiad kou doho', om iyoho' nga' tumongkiad no dokoyu do baino', om oporinta' kou indo di Sisak,’ ka,” ka dau. 6 Om pagakun noddi i raja' om koinsanai di boyoon do nokowonsoi iyolo'd dusa. Boros ka diyolo', “Otulid i' i wonsoyon do Tuhan diri,” ka. 7 Om soira' di nokito do Tuhan do mininsiriba' iyolo', om boro-boros po kawagu iyau dot id di Somaya do poingkaa, “A' ku i' iyolo' patayon tu' minagakun i' iyolo' di dusa diyolo'. A' no alaid om poiduwon ku no iyolo'; om a' indo araag o Yorusalim. Nga' iyo piya'ddi nga' i Sisak 8 kasai' i' o momorinta' diyolo', om koilo indo iyolo' do pisuayan do momonsoi do ponuhuan ku om momonsoi do ponuhuan do pomorinta' do hiti'd pomogunan,” ka. 9 Om rikot noddi i Raja' Sisak do minongoi panangod do bandar do Yorusalim om nongoi ngai' dau i konunu-nunuan dit angagayo o gatang di hiri'd Walai'd Sasambayangan dot Agayo om i hiri'd walai'd raja'; do kohompit ngai' no i kolid do tamas di winonsoi di Raja' Suliman. 10 Om pomonsoi noddi i Rihabiam do kolid do tambaga' o winonsoi do pinoningolon di nangaanu di pisangod, om patamangai no dau di boyoon do soudor di madtatamong di wawayaan dot agayo di walai'd raja'. 11 Om pointikid-tikid do mongoi i raja' do hiri'd Walai'd Sasambayangan dot Agayo, om ngoyon no di madtatamong i kolid diri om pogulion nogindo kawagu do hiri'd bilik di madtatamong. 12 Om kotingkod noddi i kototogod do Tuhan dot id di Rihabiam tu' mininsiriba' i' iyau dot id Tuhan, om a' iddi iyau'd Tuhan pinatai. Om osonong noddi kawagu o koiyon-iyono' do hilo'd Yohuda.
Susui dot Oniba' do Pasal do Pomorintaan di Rihabiam
13 Niyon nopo di Rihabiam do momorinta' nga' hilo'd Yorusalim om mayo-gayo nopoddi o kuasa' dau do momorinta'. Tumur nopo dau di nosiliu iyau'd raja' om apat nohopod om iso' o toun, om hopod om turu' o toun dau do momorinta' do hilo'd Yorusalim, i bandar di nopili'd Tuhan do tiyonon do sumambayang dot id dau, dot id pogialatan di kabandaran do hilo'd watas dot Israil. Tina' nopo di Rihabiam om i Naama, i mantad hilo'd pomogunan dot Amon. 14 Om araat o winonsoi di Rihabiam tu' a' i' iyau tuminotos do momonsoi do korohian do Tuhan. 15 Susuyon nopod pasal di Rihabiam do mantad di timpuun i' om gisom do kinopupuson, om i sinolusukan dau, nga' nokotulis ngai' i' dot id suang di Buuk do Susui di tinulis di Somaya i Nabi, om id suang di Buuk do Susui di tinulis di Ido i Nabi. Om misangod kasai' nopo iyo' Rihabiam di Yirobiam. 16 Om kapatai noddi i Rihabiam om lobongo' no iyau do hiri'd kalabangan do raja' di hilo'd Bandar di Daud. Om kosiliu nod raja' i Abia, i tanak dau, do suminowoli dau.
Minisangod iyo Abia di Yirobiam
1 Tontok di kohopod om walu' do toun do pomorintaan di Raja' Yirobiam do hilo'd Israil, om kosiliu no i Abia do raja' do Yohuda, 2 om tolu o toun do koloido' di Abia do momorinta' do hilo'd Yorusalim. Tina' nopo dau om i Mikaya, i tanak di Uriol, i mantad hilo'd bandar do Gibia. Om haro'ddi o pisangadan diyo Abia di Yirobiam; 3 om pomolohou no i Abia dot 400,000 o soudor om pomolohou i Yirobiam do 800,000 o soudor. 4 Om pitimbaba' no i duwo o tinimungan do soudor diri do hilo'd watas do konulu-nuluan dot Ipraim. Om takad no i Abia do hiri'd Nuluhon do Somaraim om pomoros no iyau dot opuhod dot id di Yirobiam om id tulun dot Israil do poingkaa, “Pokinongou kou! 5 Koilo kou i' do nokopomonsoi no o Tuhan, i Kinorohingan dot Israil, do batos dot id di Daud om id sinakagon dau dot iyau no om i sinakagon dau o momorinta' dot Israil do gisom dot alaid. Om a' no milo dot a' bayaanon i batos diri. 6 Nga' iyo piya'ddi nga' suminaap i' i Yirobiam i tanak di Nibat, di Suliman i raja' dau. 7 Minonimung iyau dot iso' o sinompuruan do tulun dot araat om sinansagan dau iyolo' do posonsog do korohian diyolo' dot id di Rihabiam, i tanak di Suliman. Nga' tontok nopoddi om omulok po kopio i Rihabiam, om a' po ogumu' o nopinsingilaan dau do kowoyo-woyoo' do sumaap. 8 Om baino' noddi om momusorou kou'ddi do kasaap kou di kuasa' do pinatahak do Tuhan dot id sinakagon di Daud, tu' ogumu' o soudor dokoyu om kisapi' kou di tamas do winonsoi, i siniliu di Yirobiam do ponokokinorohingan dokoyu. 9 A' toi dokoyu nouyung ngai' no it imam di mogobi-obi'd Tuhan, it imam di suminolusuk di Harun om i tulun do Liwi? Om pinosowoli nopoddi dokoyu nga' isai nopo o tulun dit orohian do sumiliu'd imam, do mongigit po iyau do songinan o sapi' ko' turu' o tinan do dumba', om silihon no dokoyu dot imam do modsubak di ponokokinorohingan dokoyu; it okon i' ko' Kinorohingan kopio. Tu' iyo noddi o kowoyo-woyoo' di piro-piro o tulun di bansa'd suwai do momili' dot imam di tuuhoton diyolo'. Nga' iyahai nopo om a' i' minomonsoi do miagal diri. 10 Sumambayang kasai' i' iyahai dot id Tuhan, i Kinorohingan dahai om a' i' iyahai tuminongkiad dau. Iri nopo imam dahai om iri kasai' i' i sinakagon di Harun, om iri kasai' i tulun do Liwi o monguhup diyolo'. 11 Pointikid-tikid do kosuabon om sosodopon om modtutud kasai' nopo iyolo' do kominyan om papatahak dot id Tuhan do porsombahan di sorobon, om posurung do roti do maan do porsombahan do hiri'd mija'. Om monikid tuong iyolo' do modtutud di lampung di hiri'd potitimpakan do lampung di tamas do winonsoi. Mumboyo' kasai' i' iyahai di ponuhuan do Tuhan. Nga' iyokoyu nopo om nokotongkiad no dau. 12 Boyoon nopo dahai om Kinorohingan i' om hiti i' it imam di mogobi-obi' dau. Om nokosodia' no iyolo' do popouni do torumpit do tanda' do sumangod iyahai dokoyu. Oi tulun dot Israil, kada' kou saap do Tuhan, i Kinorohingan do taki-aki dokoyu! Tu' poingkuro piya nga' a' kou i' kamanang!” ka dau. 13 Om daamot nopoddi nga' suhuo' no di Yirobiam o songintanga' di soudor dau do mongoi talob di soudor do Yohuda do ponong id tohuri, om iri no songintanga' om minawang do hiri'd doburuan diyolo'. 14 Om soira' di nokito di soudor do Yohuda do notutukan iyolo' do pisangod, om pinggiak no iyolo' do mokiuhup do Tuhan. Om pounio' no di piro-piro imam i torumpit, 15 om pamangkis ngai' no i soudor do Yohuda do pangkis do sumangod om pamanau no iyolo' do minongoi sangod, do winoyo' di Abia. Om alao' nod Kinorohingan i Yirobiam om i soudor dot Israil 16 gisom do minogidu' iyolo'. Om pinamanang do Kinorohingan i tulun do Yohuda do suminangod diyolo'. 17 Om agayo no kopio o kinaalaan di tulun dot Israil do nala' di Abia om i soudor dau; tu' limo nopo nahatus noribu o soudor dit ongosiou do napatai. 18 Om nakamanang iddi i tulun do Yohuda tu' suminondiu i' iyolo' do Tuhan, i Kinorohingan di taki-aki diyolo'. 19 Om soira' di ginusa' di Abia i soudor di Yirobiam, om sinolod nogi' dau o piro-piro o bandar om kawalayan di hiri'd posorili'. Iri nopo kabandaran diri om Baitol, Yosana, om Ipron. 20 Om solinaid nopo di pomorintaan di Abia, om a' no nokoguli' kawagu dot id di Yirobiam i kuasa' dau do momorinta' do hiri, om alaid noddi om patayo' no iyau'd Tuhan. 21 Nga' i Abia no om muhang-ruhang nopo o kuasa' do momorinta'. Kogumuon nopod sawo dau om hopod om apat o tulun, om tangaanak no dau do tongokusai om duwo nohopod om duwo o tulun, om tangaanak no dau do tongoondu' om hopod om onom o tulun. 22 Om iri nopo susuyon do suwai do pasal di Abia, om koinsanai di pinoboros om i winonsoi dau om nokotulis ngai' no dot id suang di Buuk do Susui di tinulis di Ido, i Nabi.
Naala' di Raja' Asa i Tulun do Etiopia
1 Om kapatai poddi i Raja' Abia om di nolobong iyau do hiri'd kalabangan do raja' do hiri'd Bandar di Daud, om kosiliu no do raja' i Asa, i tanak dau, do suminowoli dau. Om osimbayan diri o hiri'd pomogunan dot Israil do solinaid do hopod o toun, di maso do pomorintaan di Asa. 2 Om pinoposonong i' i Asa do ginawo'd Tuhan, i Kinorohingan dau, tu' minomonsoi i' iyau dit otulid om it osonong. 3 Om nidu' ngai' dau i pananaraban do porsombahan di dong bansa'd suwai, om nidu' nogi' dau i tiyonon do modsubak do tingolig. Om minumuk dau i torigi do watu di don tingolig om hinaba' ngai' dau i torigi di tingolig dot Asira. 4 Om suhuo' no dau i rayat do Yohuda do momonsoi do korohian do Tuhan, i Kinorohingan di taki-aki diyolo', om mumboyo' di ponudukan om ponuhuan do Tuhan. 5 Nidu' ngai' nopo dau i tiyonon do tumuku' dot id tingolig om tiyonon do modtutud do kominyan di hilo'd kabandaran do Yohuda. Om osimbayan noddi o pomorintaan diri di maso dau do momorinta', 6 gisom do milo iddi iyau do momonsoi di tolig do pongolig do posorili' di kabandaran do hilo'd Yohuda. Om aiso' noddi o pisangadan do solinaid do piro-piro o toun tu' nonuan i' iyau'd Tuhan do kosimbayanan. 7 Boros ka di Asa dot id rayat do Yohuda, “Osonong dot inggiratan toko' i kabandaran do ponginggirot nopo om wansayan do tolig o posorili', om wansayan do walai'd angakawas do pogimpaan, om wansayan do wawayaan dit angagayo dit ongkisalampad o totobon. Naanu toko' pogi' o pomogunan diti nga' otorodok toko' i' do tuminanud di korohian do Tuhan, i Kinorohingan toko'. Om ginompi' toko' dau om pinosimbayan dau o pointongkop diti pomogunan toko',” ka dau. Om timpuun noddi iyolo' do minomonsoi'ddi om kopongo no diyolo'. 8 Kogumuon nopo di soudor di Raja' Asa om 300,000 o tulun do Yohuda dit ongkikolid om ongkitandus, om 280,000 o tulun do Binyamin dit ongkikolid om ongkipana'; om oinsanan nopo iyolo' do soudor dit ongosiou om nongkopinsingilo do sumangod. 9 Insan o maso om rikot no o songulun do bansa'd Etiopia di roitan dot i Sira do minongoi panangod do Yohuda do miniwoyo' do sojuta o soudor om tolu nahatus o korita'-kuda' do don sumasangod. Om pamanau po iyolo' do gisom do nokorikot do hilo'd Marisa. 10 Om soliwan no i Asa do minongoi timbaba' di Sira, om sopipori-pori nopoddi iyolo' do pinopotimung di soudor diyolo' do hiri'd Rantai do Sipata, it id somok do Marisa. 11 Om sambayang noddi i Asa dot id Tuhan, i Kinorohingan dau do poingkaa, “Oi Tuhan, iya' noo i milo do monguhup dit oluhoi do tumimbaba' dit okoris. Uhupai no iyahai do dinondo, oi Tuhan i Kinorohingan dahai! Iya' noo o sondihon dahai om id suang nod ngaran nu do sumoliwan iyahai do mongoi sangod diti soudor dot ogumu' kopio'dti. Oi Tuhan, iya' no o Kinorohingan dahai. Kada' pologoso' dot aala' ko dot isai nopo o tulun,” ka dau. 12 Om songodo' no di Asa om i soudor do Yohuda i soudor do Etiopia. Om naala' i' do Tuhan i soudor dot Etiopia gisom do minogidu' iyolo'. 13 Om gusao' po iyolo' di Asa om i soudor dau do gisom do nokorikot do hilo'd Gorar. Om ogumu' tomod diri o napatai di soudor dot Etiopia gisom dot aiso' no o pokukurayan diyolo' tu' naala' no kopio iyolo'd Tuhan om i soudor do Yohuda. Om ogumu' nogi' i konunu-nunuan diyolo' do nangaanu di suminangod diyolo'. 14 Om raago' noddi di soudor do Yohuda i kabandaran di hilo'd watas do posorili' do Gorar, tu' pinooris do Tuhan i tulun do songingiyon do hiri. Om pingonuo' nopo di soudor do Yohuda i konunu-nunuan do hiri'd bandar om ogumu' tomod diri o naanu diyolo'! 15 Om nongoi po diyolo' songodo' i kokiiman di gompomogompi' do tayam-tayam, om ogumu' tomod o dumba' om unta do naanu diyolo'. Om guli' nogiddi iyolo' do hilo'd Yorusalim.
Minonginwagu i Asa do Tugama' do Hiri'd Pomogunan Dau
1 Om porintao' nod Rusod do Kinorohingan i Asaria i Nabi, i tanak di Odid, 2 gisom do minongoi iyau solowot di Raja' Asa, om boro-boros nod poingkaa, “Oi Raja' Asa, om koinsanai di tulun do poingiyon do hiti'd Yohuda om hilo'd Binyamin! Pokinongou kou no! Osomok i' o Tuhan dot id dokoyu ondung osomok kou no dot id dau. Ondung mokituduk kou'd Tuhan, om monuduk i' iyau. Nga' ondung a' kou mamadul dau, om iyau nga' a' no mamadul dokoyu. 3 Laid noddi kopio o tulun dot Israil dot a' sumambayang dot id Kinorohingan dit otopot kopio, om aiso' o ponudukan dot aanu diyolo' do mantad id imam, om a' iyolo' tumanud dit oturan. 4 Nga' id suang nopo iyolo'd kosusaan, om rumikot i' iyolo' dot id Tuhan, i Kinorohingan dot Israil. Om minokituduk i' iyolo' dau, om tinudukan iddi dau iyolo'. 5 Tontok nopoddi nga' a' nopo osimbayan o tulun do mimpanau, tu' haro ngai' nopo o kosusaan om kagangahan dot id pointikid-tikid do pomogunan. 6 Mogiinggori-gorit nopo i piro-piro o bansa'd tulun, om mogiinggori-gorit i kabandaran, tu' pinorikatan iyolo'd Kinorohingan do kosusaan om kagangahan dit awagat kopio. 7 Nga' iyokoyu nopo om mositi' nod polonuton o ginawo om kumosiou kou. Om koundar i' o nunu nopo o wonsoyon dokoyu,” ka dau. 8 Om soira' di norongou di Asa i boros di Asaria, i tanak di Odid diri, om okoris nopoddi o topurimanan dau. Om iduwo' ngai' no dau i tingolig do hilo'd pomogunan do Yohuda om Binyamin, om i hiri'd kabandaran di naala' dau dit id watas do konulu-nuluan dot Ipraim. Om wonsoyo' no kawagu dau i pananaraban do porsombahan di don Tuhan, i hiri'd natad di Walai'd Sasambayangan dot Agayo. 9 Om ogumu' nogi' o tulun dot Ipraim om Manasi, om Simion do minongoi sugku' di Asa, om miniyon diri do hiri'd watas di porintaon dau, tu' okito diyolo' dot uhupan iyau'd Tuhan. Om suhuo' ngai' no di Asa i tulun diri om i rayat do Yohuda om Binyamin 10 do tumimung do hilo'd Yorusalim. Om timung no iyolo' di tulan do kotolu do tontok di kohopod om limo do toun do pomorintaan di Asa. 11 Om tadau noddi do pinapatahak iyolo' do porsombahan dot id Tuhan do turu' nahatus o tinan do sapi' om turu' noribu o tinan do dumba', do mantad di nangaanu diyolo' dot id pisangadan, om i nigitan diyolo' do minuli'. 12 Om pamatos no iyolo' dot id Tuhan do sumambayang iyolo' dot id Tuhan, i Kinorohingan di taki-aki diyolo', do mikuwo'd aayi-ayi' o ginawo om pomusarahan diyolo'. 13 Om isai nopo, molohing tuu ko' omulok, kusai tuu ko' tondu', dot a' sumambayang dot id Tuhan, om pointantu' nod hukuman do kapatayon. 14 Om pamatos no iyolo' dot id Tuhan do mikuwo'd suminumpa' dot opuhod o boros dot igitan kasai' diyolo' i batos diri. Om pimpangkis noddi iyolo' do mikuwo'd pinopinguni do torumpit. 15 Om oinsanan nopoddi i rayat do Yohuda dot ongotood tu' nokopomonsoi no iyolo' do batos do mikuwo'd iso-iso' kopio o ginawo. Om asanangan iyolo' do sumambayang dot id Tuhan, om Tuhan nga' orohian i' do rumamit diyolo'. Om nonuan do Tuhan do kosimbayanan o hiri'd watas diyolo'. 16 Om iduwo' noddi di Raja' Asa o pangkat di Maaka i todu' dau, do Tina' do Raja' tu' minomonsoi i' i Maaka do tingolig dit araat kopio --- i tingolig dot Asira, i tingolig do kororombung. Om mumuko' nopo dau i tingolig diri om tutudai nogiddi dau do hilo'd Rantai do Kidron. 17 Mulong piya dot a' di Asa naraag ngai' i tiyonon do modsubak do tingolig dot id pomogunan diri, nga' otorodok kasai' no ma iyau dot id Tuhan do solinaid dau do poimpasi. 18 Om poopio' noddi di Asa do hiri'd Walai'd Sasambayangan dot Agayo o koinsanai di tamas om pirok om i konunu-nunuan do suwai di naanu diyolo' om i naanu di tapa' dau do mantad id pisangadan. 19 Om aiso' no o pisangadan dot id pomogunan diri do gisom di kotolu nohopod om limo do toun di Asa do momorinta'.
Suminangod dot Israil
1 Tontok di kotolu nohopod om onom do toun di Raja' Asa do momorinta' do hilo'd Yohuda, om ngoyo' no di Baisa, i raja' dot Israil songodo' o Yohuda. Om pogiroto' no dau o bandar do Rama do mangantob di ralan do sumuang om sumoliwan do Yohuda. 2 Om ngoyo' noddi di Raja' Asa i tamas om i pirok do mantad hiri'd Walai'd Sasambayangan dot Agayo om i hiri'd walai'd raja', om pootodo' no dau dot id di Binhadad, i raja' do Siria do hilo'd Damsik. Om pinoporikot nogi' iyau do boros do poingkaa, 3 “Kaino miambalut do miagal di winonsoi di molohing to. Om pinaatadan ku nogi' iya' do tamas om pirok do maan ku do popuhawangon diya', om suhuon ku iya' do momutut di piombolutan dokoyu di Baisa, i raja' dot Israil, om poinsoduwon indo dau i soudor dau do mantad id watas ku,” ka. 4 Om kookunai i' di Binhadad i pinoboros diri, om suhuo' no dau i piro-piro boyoon do soudor dau do mogiwoyo-woyo' di soudor diyolo' do mongoi panangod di kabandaran dot Israil. Om kaala' no diyolo' o bandar dot Iyon, Dan, Abil-Bait-Maaka om koinsanai di kabandaran do poopian do kaakan-akanan di hilo'd Naptali. 5 Om soira' di nokorongou i Raja' Baisa do hal diri, om tingkod no iyau do popogirot do Rama om tongkiadai no dau. 6 Om suhuo' no di Raja' Asa o koinsanai di tulun do mantad id Yohuda do mongoi panaan di watu om kayu di pinonginggirot daa di Baisa do Rama. Om iri no o pinakai di Asa do pinopogirot do bandar do Giba om Mispa.
I Nabi Hanani
7 Om tontok noddi do ruminikot i Hanani i Nabi, dot id di Raja' Asa om boro-boros nod poingkaa, “A' ko noddi kapangala' do soudor do Israil tu' suminondiu ko i' di raja' do Siria, om a' nogi' suminondiu do Tuhan, i Kinorohingan nu. 8 Okon toi ko' Etiopia om Libia nga' kisoudor i' dot ogumu' dit ongkirapo-rapo om ogumu' o korita'-kuda' om soudor dit ongkikuda'? Nga' iyo piya'ddi nga' nonuan ko id Tuhan do kamanangan do suminangod diyolo', tu' suminondiu ko i' dau. 9 Tuhan i' o miontong do pointongkop diti pomogunan om pinointalang dau o kokoriso' dau dot id tulun dit otorodok dot id dau. Dangkababasug no kopio do winonsoi nu baino', om gowoi pondo om baino' no o timpuunon nu dot aala' dot id pisangadan,” ka dau. 10 Om notogod tomod diri i Asa do nokorongou di boros di Nabi Hanani, om posuango' noddi dau i nabi diri dot id giil. Om tontok nogiddi do ninggorit di Asa o piro-piro tulun dot id pogialatan di rayat dau.
Kinopupuson do Pomorintaan di Asa
11 Iri nopo i nongosiliu do maso do pomorintaan di Asa, do mantad di timpuun i' om gisom do kinopupuson, om nongotulis ngai' no do hiri'd suang di Buuk do Susui do Pasal Ngai' di Raja' do Yohuda om Israil. 12 Om tontok di kotolu no nohopod om siam do toun dau do momorinta', om koontok goduwo nod toruol dit araat o gakod di Asa. Nga' iyo piya'ddi nga' a' i' iyau minokitulung do Tuhan, suwai ko' minokitulung nogi' iyau do bobolian. 13 Duwo poddi o toun do mantad diri om kapatai no iyau. 14 Om kopuro' nod rampa om it ongosonong o kosingudan i rata' dau, om lobongo' no do hiri'd kalabangan do raja' di hilo'd Bandar di Daud. Om podtutud no i rayat do rinubpu' do gisom dot agayo tomod o binandak do pinomusou diyolo' di Asa.
Nosiliu do Raja' i Yosapat
1 Om kosiliu noddi i Yosapat do raja' do Yohuda do suminowoli di Asa, i tapa' dau. Om pogiroto' no dau o koiyon-iyono' dau tu' sumodia' iyau do sumangod dot Israil. 2 Om poiyanai no dau do soudor o pointikid-tikid di bandar do kitolig do hilo'd Yohuda, om hiri'd kinoiyonon dit id soliwan do bandar do hilo'd Yohuda, om hiri'd kabandaran di nosolod di tapa' dau dit id watas dot Ipraim. 3 Om barakatai nod Tuhan i Yosapat tu' tuminanud i' iyau do kowoyo-woyoon di tapa' dau, dot a' tuminuku' dot id Baal, 4 tu' suminambayang i' iyau dot id Kinorohingan. Om minumboyo' iyau do ponuhuan do Kinorohingan, om a' i' iyo di kowoyo-woyoon di piro-piro raja' dot Israil o kowoyo-woyoon dau. 5 Om pinogirot do Tuhan o pomorintaan di Raja' Yosapat do hilo'd Yohuda. Om oinsanan nopo i rayat do papatahak dot ipuhawang dot id dau, om kaya' tomod diri iyau om pusohon kopio. 6 Om aayi-ayi' o ginawo dau do mumboyo' do ponuhuan do Tuhan om rinaag ngai' dau o koinsanai di tiyonon do modsubak do tingolig om i tininganak do tingolig dot Asira do hilo'd Yohuda. 7 Om tontok di kotolu nod toun do pomorintaan dau, om ponuhu' no iyau do piro-piro di pagawai dot angasawat o pangkat do mongoi potuduk dit oturan do Tuhan do hilo'd kabandaran do Yohuda. Iri nopo i tulun do sinuhu'ddi nga': i Binhail, i Obaya, i Sakaria, i Nitaniil om i Mika. 8 Om kinoruhang po iyolo' do siam o tulun do Liwi om duwo o nabi. Iri nopo tulun do Liwi diri nga' i Somaya, i Nitania, i Sobaya, i Asail, i Somiramot, i Yonatan, i Adonia, i Tobia om i Tobadonia. Iri no duwo ot imam om i Ilisama om i Yoram. 9 Om piigit-igit nopo diyolo' i Buuk do Tourat do Tuhan do mintikid do toinsanan di bandar do Yohuda do mongoi ponuduk di rayat do hilo'.
Kobontugo' di Yosapat
10 Om pooriso' nod Tuhan o koinsanai di raja' dit id sorili' do Yohuda do mongoi sangod di Raja' Yosapat. 11 Om ogumu' o pirok om i nipuhawang do suwai do naramit dau do mantad id tulun do Pilistin. Om mantad no di tulun dot Arab om nakaramit iyau do 7,700 o tinan do dumba' om 7,700 o tinan do kambing. 12 Om maid-laid diri nga' mayo-gayo o kuasa' di Yosapat. Om pointongkop nopod Yohuda o winansayan dau do kuta' do padtamangan om piro-piro bandar do poopian do kaakan-akanan. 13 Om ogumu' o kaakan-akanan do tinimung dau dot id kabandaran diri. Om hilo' nopod Yorusalim om pinoiyanan dau do piro-piro boyoon do soudor dit ongosiou, 14 do sompori-pori do haro o sinompuruan, do tumanud di pinuruan do sompiiyon diyolo'. I Adna nopo om boyoon di soudor do mantad id pinuruan do sompiiyon do payat do Yohuda. Om iyau no o boyoon do 300,000 o soudor. 15 Iri no tulun do koduwo om i Yohanan; om iyau no o boyoon do 280,000 o soudor. 16 Om iri no tulun do kotolu om i Amasia, i tanak di Sikri; om iyau no o boyoon do 200,000 o soudor. (I Amasia nopo om agaan nopo o ginawo dau do norohian do momonsoi'd karaja' do don Tuhan om a' i' iyau sinuhu' do tulun do suwai.) 17 Om iri nopo boyoon di sinompuruan do piro-piro o pinuruan do sompiiyon do Binyamin, om i Iliada i soudor do nabantug o kosioho'. Om iyau no o boyoon do 200,000 o soudor dit ongkipana' ngai' om ongkikolid. 18 Iri no wakil dau do boyoon dot id suang do sinompuruan diti, om i Yosabad; om iyau no o boyoon do 180,000 o soudor di haro ngai' o rapo-rapo di don soudor. 19 Om iyolo' no i pakaraja' do hilo'd Yorusalim. Om suwai no ko' iri, om poiyono' po di raja' o piro-piro o soudor do suwai do hiri'd piro-piro kuta' do padtamangan dit id watas do Yohuda.
Pinoinsan di Mika i Ahab
1 Om tontok di nakakaya' om di nakabantug i Yosapat, i raja' do Yohuda, om pokowino' no dau o tiso' dit id suang do sompiiyon dau dot id iso' o tulun dit id suang do sompiiyon di Ahab, i raja' dot Israil. 2 Piro-piro noddi o toun do mantad diri om ongoi no i Yosapat pogolimbuha' di Ahab do hilo'd bandar do Samaria. Om papaharo no i Ahab do poginakanan om ponuhu' no iyau do monumbali' dot ogumu' o dumba' om sapi' do ponuwau di Yosapat om i tulun di tuminanud dau. Om tontok noddi do nangatan dau i Yosapat do mongoi panangod di bandar do Ramot, i hilo'd Giliad. 3 Om boros ka dau do minuhot, “Orohian ko i' do tumanud doho' do mongoi panangod do Ramot?” ka. Om boros ka di Yosapat do suminimbar, “Oo, mongoi to nopo. Om sumugku' indo do soudor nu i soudor ku. 4 Nga' osonong do muhot kito pod Tuhan,” ka dau. 5 Om timungo' no di Ahab ot apat nahatus o nabi om uhoto' no dau iyolo' do poingkaa, “Mongoi oku tuu panangod do Ramot ko' amu'?” ka. “Mongoi!” ka diyolo' do suminimbar. “Onuan ko id Kinorohingan do kamanangan,” ka kawagu diyolo'. 6 Nga' ponguhot po kawagu i Yosapat, “Haro po o nabi do suwai ko' iyolo' di milo do momiolitan dato om i milo do monguhot ondung poingkuro o korohian do Tuhan?” ka dau. 7 Om boros ka di Ahab, “Iso' poo, i Mika i tanak di Yimla. Nga' araatan oku dau tu' a' nopo iyau insan do posunud dit osonong dot id doho'; iri kasai' nopo it a' osonong o posunudon dau,” ka dau. “A, kada' pomoros dot iyondo!” ka di Yosapat. 8 Om lohowo' no di Ahab o songulun di pagawai do hiri'd walai di raja' om suhuo' no dau do marau-arau do mongoi pangangat di Mika. 9 Tontok nopoddi om kipinakai iyo Ahab di Yosapat do pakayan di don raja', om poirikau do hiri'd tirikohonon do don raja' do hiri'd kinoiyonon do pamagamasan do gandum dit id dotimbabaan di wawayaan dot agayo do bandar do Samaria. Om rikot ngai' nopo do hiri'd dotoguangan diyolo' i nabi do minongoi polombus do boros do pasal dit id dosunsudan. 10 Om haro o songulun dot id pogialatan di piro-piro o nabi diri, i roitan dot i Sodokia, i tanak di Kinaana, do minomonsoi do sinangau-sangau do basi' do winonsoi, om boro-boros noddi iyau dot id di Ahab, “Poingkaa o boros do Tuhan, ‘Iti no sinangau-sangau o panangod nu do Siria om pangala' nu diyolo',’ ka,” ka dau. 11 Om kosokodung ngai' nopo i nabi di suwai, om boros ka diyolo', “Ngoyon nopo songodo' o Ramot, tu' kamanang ko i'. Onuan ko id Tuhan do kamanangan,” ka. 12 Om daamot nopoddi om boros ka di tulun do sinuhu' do minongoi pangangat di Mika, dot id di Mika, “Oinsanan nopo i nabi do pinopoboros do kamanang i raja'. Om maha' daa om osonong o diya' kadauu do poboroson do miagal di diyolo'd pinoboros,” ka dau. 13 Nga' boros ka di Mika, “Sumumpa' oku no dot id suang do ngaran do Tuhan di poimpasi dot iri no i pinoboros do Kinorohingan dot id doho' o poboroson ku!” ka dau. 14 Om karapou poddi i Mika di Raja' Ahab, om ponguhot no i raja', “Mongoi i' tuu iyahai di Raja' Yosapat panangod do Ramot ko' amu'?” ka dau. “Ongoi kou nopo!” ka di Mika. “Atantu' nod kamanang ko i'. Tu' onuan ko id Tuhan do kamanangan,” ka dau. 15 Om boros ka di Ahab, “Ondung moro-boros ko doho' dot id suang do ngaran do Tuhan, om poboroson no it otopot. Impiro tiya' no sunudai dot iyo'ddi?” ka dau. 16 Om boros kad i Mika, “Okito ku o soudor dot Israil do nopogitongkiad-kiad do hilo'd konuluhanan. Miagal po iyolo' do dumba' dit aiso' o gompomogompi', om poingkaa o boros do Tuhan do pasal diyolo', ‘Iti nopo tulun diti om aiso' o boyoon; om pologoson nopo iyolo' dot osimbayan do muli',’ ka,” ka dau. 17 Om boros kaddi di Ahab dot id di Yosapat, “Piontok nopo di boros ku, koii? A' nopo iyau insan poboros dit osonong dot id doho'! Iri kasai' nopo it araat o poboroson dau,” ka dau. 18 Om boros ka kawagu di Mika, “Pokinongoho' no iti poboroson do Tuhan do dinondo! Okito ku o Tuhan do poirikau dot id tirikohonon dau do momorinta' do hilo'd surga, om oinsanan nopo i moloikat dau do songingkakat do hiri'd toning dau. 19 Om ponguhot no o Tuhan do poingkaa, ‘Isai o mongoi pominsuhu' di Ahab om mongoi i' iyau sangod om apatai indo do hilo'd Ramot, i hilo'd Giliad?’ ka. Om mogisuwai-suwai nopo o pinosimbar di moloikat. 20 Alaid noddi om rikot no ot iso' o rusod. Om insomok no iyau do Tuhan om boro-boros nod, ‘Iyoho' o mongoi pominsuhu' dau,’ ka. ‘Poingkuro ko do mominsuhu'?’ kad Tuhan do minuhot. 21 Om boros ka di rusod, ‘Mamanau oku nondo om ngoyon ku i' binsuhuo' do mongudut o koinsanai di nabi, di tuuhoton di Ahab,’ ka. Om boros kad Tuhan, ‘Ba, wonsoyon nopo o miagal diri, om obinsuhu' nu indo kopio iyau,’ ka,” ka dau. 22 Om boros ka kawagu di Mika, “Nosiliu no kopio iri! Pinoudut do Tuhan i piro-piro o nabi di tuuhoton nu dot id diya' tu natantu' mantad nod Tuhan i piro-piro o nabi di tuuhoton nu'ddi do mongudut diya' tu' natantu' mantad nod Tuhan do paratu' diti kosusaan dot id diya'!” ka dau. 23 Om pamanau no i Nabi Sodokia do minongoi'd hiri'd gulu om insomok no iyau di Mika om tapapo' no dau o rabas di Mika, om boro-boros nod, “Soira' kopio'ddi tongkiad i Rusod do Tuhan do mantad id doho' om minongoi nogiddi boro-boros diya'?” ka dau. 24 Om boros ka di Mika, “Okito nu indo o katapatan diti do mongoi ko lisok!” ka. 25 Boros ka di Raja' Ahab, “Tangkapo' dokoyu ilo'! Om pootodon i' do hilo'd di Amon, i gobunor diti bandar, om hilo'd di Yoas, i tanak do raja'. 26 Suhuon no iyolo' do pogiil dau, om kada' no iyau onuwai'd suwai ko' roti noo om waig do gisom do koguli' oku do mikuwo'd osonong-sonong,” ka dau. 27 Om boros ka di Mika, “Ondung osonong-sonong ko do koguli', om okon no ko' Tuhan o somboros di pinolombus ku'ddi. Om iyokoyu ngai' no i hino'd hiti o sumiliu'd sasi',” ka dau.
Napatai i Ahab
28 Om pamanau noddi i Ahab i raja' dot Israil, om i Yosapat i raja' do Yohuda, do minongoi panangod do bandar do Ramot i hilo'd Giliad. 29 Om boros ka di Ahab dot id di Yosapat, “A' oku i' iyoho' manampakai do pakayan do raja' do mongoi sangod, nga' iya' nopo om manampakai no di pakayan do don raja',” ka dau. Om kada' noddi panampakai do pakayan do don raja' i raja' dot Israil do tontok di minongoi iyolo' sangod. 30 Om tontok nopod maso'ddi nga' nosunudan no di raja' do Siria i boyoon do soudor dau dit ongkikorita'-kuda' dot a' manangod dot isai nopo do suwai ko' i raja' dot Israil. 31 Gowoi poddi om tontok di nokito diyolo' i Raja' Yosapat, om andasan ngai' nopo daa diyolo' om iyau i raja' dot Israil. Om songodo' no daa diyolo' iyau. Nga' pomolohou no i Yosapat do Tuhan, om uhupai no iyau'd Tuhan, i Kinorohingan. Om pasalao' nod Tuhan i kawayaon di mongoi panangod. 32 Om koilaai nogiddi di piro-piro boyoon do soudor do Siria dit ongkikorita'-kuda' dot okon i' ko' i tulun diri i raja' dot Israil, om tingkod noddi iyolo' do manangod dau. 33 Nga' kaantak-antakai no kopio do minamana' o tiso' di soudor do Siria om kolopuson no di rasuk di Ahab do dong soudor, do hiri no kopio'd piniromutan o noontok. “Noontok oku!” ka di Ahab do minamagarang dot id tulun di potunud di korita'-kuda' dau. “Poguliai om posoliwanon oku i' do mantad id pisangadan diti!” ka dau. 34 Om daamot nopo di soudor do mogisasangod, om poingkakat kasai' po i Raja' Ahab do poinsondiu di korita'-kuda' dau do potimbaba' di soudor do Siria. Om kapatai noddi iyau di notonob o tadau.
Tinogod i Yosapat do Songulun o Nabi
1 Om soira' di nokoguli' i Yosapat, i raja' do Yohuda do hiri'd walai dau do hilo'd Yorusalim, dot osonong-sonong i' iyau, 2 om rikot no o songulun o nabi di roitan dot i Yohu i tanak di Hanani, do minongoi solowot di raja'. Om boros ka di nabi diri dot id dau, “Apatut i' toi do monguhup ko'd tulun dot araat om sumokodung do tulun dit araatan do Tuhan! Iri no i winonsoi nu o kotogod-togod do Tuhan diya'. 3 Nga' iyo piya'ddi nga' haro i' o kosonongo' nu. Tu' nidu' ngai' nu i tininganak do tingolig dot Asira, i tukuon di rayat om tuminotos ko do tumanud do korohian do Kinorohingan,” ka dau.
Minonginwagu i Yosapat
4 I Raja' Yosapat nopo om poingiyon do hilo'd Yorusalim. Nga' asaru' i' iyau do mongoi pinsolowot di rayat do pointongkop do pomogunan do mangangat diyolo' do gumuli' dot id Tuhan, i Kinorohingan do taki-aki diyolo'. 5 Om pointikid-tikid do bandar di kitolig do hilo'd Yohuda om pinomilian ngai' nopo dau do gompomutus, 6 om sinunudan dau do poingkaa, “Popunongon no kopio dokoyu o pomumutus, tu' a' kou i' momutus dot id suang do ngaran do tulun. Suwai ko' id suang do ngaran do Tuhan. Om piantangan kasai' kou i' dau do tontok di momutus kou do hal. 7 Rumonok kou nod Tuhan, om antaan-taan no kopio dokoyu do tontok do momonsoi kou do nunu nopo, tu' Tuhan nopo, i Kinorohingan toko', om araatan i' do tulun dit a' otulid o kowoyo-woyoon, om i manampaping do wokon, om i rumamit do ponisip,” ka dau. 8 Om hilo'd Yorusalim nga' minomili' i' i Yosapat do piro-piro o gompomutus dot id pialatan di tulun do Liwi, om it imam, om i boyoon do rayat. Om iyolo' no ot apatut do momutus do hal di sumaap do Tourat do Tuhan om piro-piro o hal do suwai.1|80|HK78E| Tulun do Liwi om Imam|19.8 9 Om iti no o pinoboros di Yosapat dot id piro-piro o gompomutus diri, “Wonsoyon no dokoyu iti karaja' dokoyu do mikuwo'd rumonok do Tuhan. Om tonudon ngai' no i ponuhuan dau do nunu nopo o wonsoyon dokoyu. 10 Om soira' nopo do korikot i tambalut dokoyu di mantad id bandar do suwai di minamatai'd tulun ko' tuminolibamban do Tourat, ko' tuminolibamban do boros do Tuhan, om tudukan no dokoyu iyolo' do kowoyo-woyoon do tontok do bisara'. Om a' indo iyolo' kowonsoi do sala' dot id Tuhan, om a' indo o Tuhan otogod dokoyu om a' otogod diyolo'. Wonsoyon no dokoyu o ponuhuan diti, om a' kou i' kowonsoi'd sala'. 11 Om i Amaria, i Boyoon dot Agayo dot Imam ot onuan ku do kuasa' dit id sawat kopio do momutus do nunu nopo o hal di kagait dot Oturan do Tuhan. Om i Sobaya, i tanak di Ismail, i gobunor do Yohuda, ot onuan ku do kuasa' dit id sawat kopio do momutus do koinsanai'd hal do suwai. Om iri nogi' i tulun do Liwi nga' kitonggungan i' do mongilo-ilo kopio dot owonsoi i nobutus dot id bisara'. Tonudon ngai' no iti pinotuduk, om pogiroton no kopio o ginawo do momonsoi'dti. Om maha' daa om woyoon do Tuhan i tulun dit otulid o wonsoyon!” ka dau.
Suminangod dot Idom
1 Om piro-piro noddi o koloido' do mantad diri om ngoyo' no di soudor do Muab om soudor dot Amon songodo' o Yohuda, om minoyo' nogi' i soudor do Mounim, i soudor do sokodung diyolo'. 2 Om korikot noddi o tulun do minongoi poromut do habar diti dot id di Raja' Yosapat, “Nokorikot no i soudor dot ogumu' do mantad hilo'd Idom, i hilo'd soborong do Rahat do Napatai! Mongoi iyolo' panangod om nosolod no diyolo' o Hasason Tamar,” ka. (I roitan dot In-Godi). 3 Om kooris noddi i Yosapat om sambayang no iyau do minokituduk do Tuhan. Om ponuhu' no iyau do koinsanai di rayat do puasa. 4 Om rikot ngai' nopo do hilo'd Yorusalim o tulun do mantad id pointikid-tikid do bandar do hilo'd Yohuda, do mongoi pokitulung do Tuhan. 5 Om iyolo' ngai' no di tulun do songingiyon do hilo'd Yorusalim o tuminimung do hiri'd natad do wagu di Walai'd Sasambayangan dot Agayo. Om ingkakat no i Raja' Yosapat do tuminimbaba' diyolo'. 6 Om sambayang no iyau dot opuhod o boros do poingkaa, “Oi Tuhan, i Kinorohingan do taki-aki dahai! Iya' no o Kinorohingan do hino'd surga om iya' o momorinta' dot id sawat do koinsanai'd bansa'd tulun do hiti'd pomogunan. Kikuasa' ko om okoris ko; iso' pod tulun nga' aiso' i' o kasaap diya'. 7 Iya' no o Kinorohingan dahai. Tontok di ruminikot i' i tulun nu, i bansa' dot Israil, do hiti'd pomogunan diti, om nuyung nu i' i tulun mantad di poingiyon do hiti do maso'ddi. Om patahako' nu noddi iti pomogunan dot id sinakagon di Abraham, i tambalut nu, do sumiliu do diyolo'd songonuon do gisom dot alaid. 8 Om nokoiyon noddi iyolo' do hiti om nokopomonsoi do Walai'd Sasambayangan dot Agayo do pomusou diya'. Om oilaan i' diyolo' 9 dot ondung ohukuman iyolo' dot i dusa diyolo' o kopomohukuman, om orikot nondo iyolo'd pisangadan, ko' oontok do toruol di mogkoroliu, ko' mononglous, om milo i' iyolo' do rumikot do mongoi ingkakat do hiti'd dotimbabaan diti Walai'd Sasambayangan dot Agayo. Om id suang nopo iyolo' do kosusaan om milo i' iyolo' do sumambayang dot id diya', om pokinongohon nu indo iyolo' om uhupan nu iyolo'! 10 Om dinondo nopodti nga' songodon iyahai do tulun dot Amon om Muab, om Idom. Tontok di nokorikot i' i taki-aki dahai do mantad hilo'd Masir, om a' nu i' iyolo' pinotumboyo' do sumuang di pomogunan diri dot a' po iyolo' suminusui di ralan di posorili' om a' iddi nangapatai i tulun dot Amon, om Muab, om Idom. 11 Om baino' noddi om iyo'dti o wonsoyon di piro-piro o bansa'ddi dot id dahai. Om nuyung iyahai diyolo' do mantad id pomogunan di pinatahak nu dot id dahai. 12 Iya' no o Kinorohingan dahai! Hukumai no iyolo', tu' aiso' no o pokukurayan dahai do tumimbaba' di soudor dot ogumu' di mongoi panangod dahai. A' no iyahai koilo ondung nunu ot apatut do wonsoyon dahai, om iri no o kinorikatan dahai dot id diya' do mongoi pokitulung,” ka dau. 13 Om daamot nopoddi nga' songingkakat ngai' i tongokusai do Yohuda do mogiwoyo-woyo' do sawo om tangaanak diyolo' do hiri'd Walai'd Sasambayangan dot Agayo. 14 Id pogialatan nopo di tulun dot ogumu'ddi om haro o songulun o tulun do Liwi di roitan dot i Yahasiol. Iyau nopo om tanak di Sakaria, i mantad id pinuruan do sompiiyon di Asap do suminolusuk di Bonaya, i Yoyol, om i Matania. Om tontok noddi do pinorinta' do Rusod do Tuhan i Yahasiol, 15 om boros kaddi dau, “Oi Tuan Raja', om iyokoyu i tobpinai ngai' ku. Boros kad Tuhan om a' kou i' apatut do momoros dot aiso' o pokukurayan ko' moddosi po do tumimbaba' di soudor dot ogumu'. Tu' iri nopo mongoi sangod om okon i' ko' iyokoyu suwai ko' Kinorohingan. 16 Suab nopondo, di tumakad iyolo' do maya' di ralan do kawaya' do hilo'd Sis, om ngoyon no dokoyu iyolo' songodo'. Om kotimbaba' kou nondo diyolo' do hiri'd tompok di rantai dit id gulu kobontol di tana' do kowotuan, i hilo'd somok do Yoruil. 17 A' kou i' minog do monokisaap dot id pisangadan diti. Mingkakat kou nopo do hilo'd tiyonon dokoyu do kumaraja', om mandad kou nopod hilo'. Om kokito kou indo dot onuan kou'd Tuhan do kamanangan. Oi tulun di poingiyon do hiti'd Yohuda om hiti'd Yorusalim, kada' kou katangkabo om kada' kou kooris. Ongoi kou nopo sangod, tu' uhupan kou id Tuhan!” ka dau. 18 Om otud noddi i Raja' Yosapat. Om woyo' ngai' nopo i rayat dau do minotud do tuminuku' dot id Tuhan. 19 Om ingkakat noddi i tulun do Liwi di mantad id pinuruan do sompiiyon di Kohat om i Kora do minodsinding do mamarayou'd Tuhan i Kinorohingan dot Israil. 20 Kosuabon noddi kawagu, dit osuab po, om soliwan no i rayat om ongoi no do hiri'd tana' do kowotuan dit id somok do Tokua. Om soira' di minamanau iyolo', om nosihatai no iyolo' di Yosapat do poingkaa, “Oi rayat do Yohuda om Yorusalim! Ponongkuyaai kou nod Tuhan, i Kinorohingan dokoyu, om ogirot i' o ginawo dokoyu. Romiton no dokoyu o nosihat do mantad id piro-piro o nabi di tuuhoton dokoyu, om koundar kou i'!” ka dau. 21 Om koponokirunding poddi i raja' di rayat dau, om suhuo' no dau i modsisinding do mamakai do pakayan dit oiyo nopo, i koubasanan diyolo' do mamakai do tontok do haro o wonsoyon di don tugama'. Om mositi' nod mulud do poimbaris do hiri'd gulu di soudor om modsinding do poingkaa, “Royohon no o Tuhan! Mompus-ompus kasai' i' o kosianan dau!” ka. 22 Om soira' di tumimpuun do modsinding i modsisinding, om gangaho' nod Tuhan o hiri'd pogialatan di soudor do pisangod di maso do mongoi panangod. 23 Om songodo' no di soudor dot Amon om Muab i soudor dot Idom do gisom do naayi' do napatai. Om poguliai nogiddi diyolo' om pogisasangod no dot iyolo' i' om iyolo'. 24 Om soira' di nokorikot do hiri'd walai'd akawas do padtamangan i soudor do Yohuda, i hiri'd tana' do kowotuan om impao' no diyolo' i kinoiyonon di pisangod, om kokito no diyolo' do songinromos no do hiri'd tana' i rata' di pisangod. Om iso' po di soudor do pisangod nga' aiso' no o poimpasi. 25 Om ngoyo' no di Yosapat om i soudor dau pingonuo' i konunu-nunuan di pisangod. Om ogumu' tomod o tayam-tayam, om rapo-rapo, om pakayan, om konunu-nunuan do suwai dit angagayo o gatang do nabantalan diyolo'. Om kotimung poddi diyolo' i konunu-nunuan diri do solinaid do tolu o tadau, om ogumu' po o konunu-nunuan do suwai, gisom dot a' noddi milo dot a' tongkiadan. 26 Om kaapat poddi do tadau om timung no iyolo' do hiri'd Rantai do Boraka om pamarayou no iyolo'd Tuhan tu' i nongowonsoi dau dot id diyolo' o kapamarayahan. Om iri no o kinopomungaranan do rantai'ddi do Rantai do “Boraka”. 27 Om woyoo' noddi di Yosapat o koinsanai di soudor do muli' do hilo'd Yorusalim do mikuwo'd ongotood tomod iyolo' tu' naala' nod Tuhan i pisangod diyolo'. 28 Om soira' di nokorikot iyolo' do hiri'd bandar, om baris no iyolo' do kuminaa do hiri'd Walai'd Sasambayangan dot Agayo dot ompot-ompoton do kecapi om torumpit. 29 Om ongooris ngai' nopoddi i pomogunan do suwai di nokorongou iyolo' do karalan-ralano'd Tuhan do minangala' di pisangod dot Israil. 30 Om iri no o nokosimbayan-bayan di Yosapat do momorinta', om nonuan iyau'd Tuhan do kosimbayanan do pointongkop di pomogunan.
Kinopupuson do Pomorintaan di Yosapat
31 Nosiliu nopo i Yosapat do raja' do Yohuda om di tolu no nohopod om limo o toun do tumur dau, om duwo nohopod om limo o toun dau do momorinta' do hilo'd Yorusalim. Tina' nopo dau om i Asuba, i tanak di Silhi. 32 Om i Yosapat nga' iyo i' di Asa, i tapa' dau, tu' osonong i' o winonsoi dau dot id toguang do Tuhan. 33 Nga' iri nopo piro-piro o tiyonon do modsubak do tingolig om a' i' dau rinaag. Om a' po aayi-ayi' no o ginawo di rayat do sumambayang dot id Kinorohingan di taki-aki diyolo'. 34 Nga' iri nopo susuyon do suwai do pasal di Yosapat, do mantad di timpuun i' om gisom do kinopupuson do pomorintaan dau, om nongkotulis no do hiri'd Susuyon do Pasal di Yohu i Tanak di Hanani, i nokotulis do hiri'd suang do Buuk do Susui do Pasal Ngai' di Raja' dot Israil. 35 Insan o maso om popiogot nod piombolutan i Yosapat, i raja' do Yohuda om i Ahasia, i raja' dot Israil, i raja' di mingwonsoi dot angaraat. 36 Om hilo' no iyolo'd Ision-Gibir, i pododompiran do kapal do rahat, do minomonsoi do piro-piro kapal do rahat do mongoi'd hilo'd Tarsis. 37 Nga' ngoyo' no di Iliosor i Nabi, i tanak di Dodawa, i mantad hilo'd bandar do Marisa poinsano' i Yosapat, boros ka dau, “Raagon nondod Tuhan i nongowonsoi nu tu' minonokiambalut ko i' di Ahasia,” ka. Om karaag ngai' nopoddi i kapal do rahat di winonsoi di Yosapat gisom dot a' noddi milo do mamanau.
1 Om kapatai noddi i Yosapat om lobongo' no do hiri'd kalabangan do raja' do hilo'd Bandar di Daud. Om i Yihoram, i tanak dau'd kusai o nosiliu'd raja' do suminowoli dau.
I Yihoram o Raja' do Yohuda
2 I Yihoram nopo, i tanak di Yosapat do kusai, i raja' do Yohuda, om kiobpinai dot onom o kusai: i Asaria, i Yohiol, i Sakaria, i Asariahu, i Mikail om i Sopasa. 3 Om ogumu' tomod o tamas om pirok, om konunu-nunuan do suwai dit angagayo o gatang do naanu diyolo' do mantad id tapa' diyolo', om tinikidan iyolo' do bandar di kitolig o posorili' do hilo'd Yohuda. Om i Yihoram no o tinantu' di Yosapat do sumiliu'd raja' tu' iyau no o tanak dau'd kusai dit id dotuo. 4 Om soira' dit opurimanan di Yihoram dot ogirot o pomorintaan dau om ponuhu' no iyau do mamatai do koinsanai di tobpinai dau, om piro-piro nogi' o pagawai dit angasawat o pangkat. 5 Nosiliu nopo i Yihoram do raja' om di tolu no nohopod om duwo o toun do tumur dau, om minomorinta' iyau do hilo'd Yorusalim do solinai'd do walu' o toun. 6 Om minomit iyau do kowoyo-woyoon di Raja' Ahab om i raja' dot Israil do suwai, tu' kinawin dau o tiso' di tanak do tondu' di Ahab. Om minomonsoi iyau do dusa dot id Tuhan, 7 nga' a' id Tuhan pinatai i raja' do mantad id sinakagon di Daud tu' nakabatos no iyau do momorinta' kasai' o sinakagon di Daud. 8 Maso nopo di pomorintaan di Yihoram, om suminaap ot Idom om minidu' do mantad id pomorintaan do Yohuda, om mimpori-pori noddi iyolo' do momorinta'. 9 Om soliwan noddi i Yihoram om iri ngai' i boyoon do soudor dau do mogiwoyo-woyo' di korita'-kuda' dau do don sumasangod do mongoi sangod dot Idom. Om turungkuo' no daa iyau di soudor dot Idom, nga' nakatalib i' iyolo' di soudor do pisangod di songinsorili' diyolo', di dongotuong. 10 Om mantad poddi om a' noddi ot Idom mokiporinta' do Yohuda. Om tontok iddi do suminaap om minidu' do mantad id pomorintaan do Yohuda o bandar do Libna. Om nongosiliu pogi' o miagal diri nga' tuminongkiad i' i Yihoram do mantad id Tuhan, i Kinorohingan di tukuon di taki-aki dau. 11 Om minomonsoi po iyau do tiyonon do modsubak do tingolig do hilo'd konulu-nuluan do Yohuda, om gowoi poddi om nokowonsoi'd dusa dot id Tuhan i rayat do Yohuda om Yorusalim. 12 Om pokirim noddi i Ilia i Nabi, do surat dot id di Yihoram. Om poingkaa o pinotulis do hiri'd surat, “TUHAN no, i Kinorohingan di tinuku' di Daud, o momohukum diya' tu' a' ko i' tuminanud di kowoyo-woyoon di tapa' om taki nu. 13 Tu' minomit ko nogi' do kowoyo-woyoon di piro-piro raja' dot Israil, om minamayayat ko do rayat do Yohuda om Yorusalim dot a' tumorodok dot id Kinorohingan. Iri nopo i winonsoi nu nga' miagal di winonsoi di Raja' Ahab om i piro-piro raja' do suminowoli dau. Om pinatai nu po i tobpinai nu, om ongosonong nogi' daa iyolo' ko' iya'. 14 Porotuan nondod Tuhan do hukuman dot awagat kopio iti rayat nu, om tangaanak om sawo nu, om angaraag ngai' nopondo o dapu' nu. 15 Om iya'ndo nga' oinggorit do toruol dot id tinaii' nu, om maid-laid nga' mayo-gayo nopondo i toruol diri!” ka. 16 Tontok nopoddi nga' haro o piro-piro tulun do Pilistin om tulun dot Arab do poingiyon do hiri'd somok di kokiiman do tulun dot Etiopia di hiri'd watas do ponong id tisan do rahat. Om binsuhuo' nod Tuhan i tulun diri do mongoi panangod di Yihoram. 17 Om ngoyo' no diyolo' songodo' o Yohuda, om ngoyo' pingonuo' i konunu-nunuan do hiri'd walai'd raja', om tanggayai ngai' nogiddi diyolo' i tangaanak om sawo di Yihoram. Noolu' nopo om i Ahasia poo, i tanak di Yihoram do kusai dit id domulok. 18 Om katalib poddi iri, om hukumai nod Tuhan i Yihoram do toruol dot id tinaii' dit a' milo'd lingoson. 19 Om osomok nod duwo o toun do murut-surut nopo o koruolo' di toruol, gisom do nadalaan noddi kopio iyau do sumakit, om kapatai noddi iyau. Om a' i' minodtutud do kayu di rinubpu' i rayat dau do maan do pomusou dau do miagal di winonsoi diyolo' dot id taki-aki dau. 20 Iso' pod tulun nga' aiso' i' o monosol do napatai iyau. Om hilo' id Bandar di Daud o pinamalabangan dau nga' okon no ma ko' hiri'd kalabangan do raja'. Tontok nopo di nosiliu i' do raja' i Yihoram om tolu nogi' nohopod om duwo o toun dau, om walu' o toun dau do minomorinta' do hilo'd Yorusalim.
I Ahasia o Raja' do Yohuda
1 Tontok di minongoi sangod it iso' o sinompuruan do tulun dot Arab, om koinsanai nopo i tangaanak di Yihoram do kusai do napatai, om i Ahasia poddi, i tanak dau dit id domulok o noolu'. Om siliho' noddi di tulun do hilo'd Yorusalim do raja' i Ahasia, do suminowoli di tapa' dau. 2-3 Om kosiliu no i Ahasia do raja' di duwo nohopod om duwo o toun do tumur dau. Om sontoun iyau do momorinta' do hilo'd Yorusalim. Om i Ahasia nga' iyo i' di sompiiyon di Raja' Ahab, tu' suhuon iyau di Atalia, i tina' dau do momonsoi dit araat. I Atalia nopo nga' tanak do tondu' di Raja' Ahab, om manangaki di Omri, i raja' dot Israil. 4 Om i Ahasia nga' minomonsoi i' do dusa dot id Tuhan do miagal di sompiiyon di Ahab, tu' iyolo' no i minonosihat dau di napatai i tapa' dau. Om iri no i tulun di monosihat dau o minomungou dau. 5 Om iri i nosihat diyolo' o nokosokodung-kodungan dau di Yoram, i raja' dot Israil do sumangod di Hasail, i raja' do Siria. Om pisangod no iyolo' do hilo'd Ramot, it id watas do Giliad. Om nosuhat diri i Yoram dot id pinisangadan diri. 6 Om guli' noddi iyau do hilo'd Yisriil do minongoi pokiubat, om ongoi no i Ahasia do hilo' do minongoi kakap di Yoram.
Pinatai di Yohu i Ahasia
7 Om natantu' mantad nod Kinorohingan dot apatai i Ahasia do tontok do mongoi iyau kakap di Yoram. Tontok nopoddi nga' sinaap i Yoram dot iso' o kusai di roitan dot i Yohu, i tanak di Nimsi. I Yohu no o nopili'd Tuhan do mamatai ngai' di sinakagon di Raja' Ahab. Om i Ahasia, i minongoi kakap di Yoram nga' nokohompit nogi' dot id pisaapan diri. 8 Om patayo' ngai' po di Yohu i piro-piro o boyoon do Yohuda om i kamanakon di Ahasia di minoyo' do minongoi kakap di Yoram. Winonsoi di Yohu iti do tontok di pinorikot dau o hukuman do Tuhan dot id sompiiyon diri. 9 I Ahasia nopo om nokopoggidu' i' do hilo'd Samaria. Om ihumo' noddi iyau om kokito no do hiri'd kinoiyonon di linisok dau. Om ngoyo' no iyau pootodo' do hiri'd di Yohu om patayo' noddi. Nga' linobong i' diyo Yohu om i tulun dau i Ahasia tu' pomusou diyolo' di Raja' Yosapat, i taki dau di minonotos do momonsoi do korohian do Tuhan do mikuwo'd aayi-ayi' kopio o ginawo dau. Om aiso' no o tulun dit id suang do sompiiyon di Ahasia do milo do sumiliu'd raja' do sumowoli dau.
I Atalia o Raja'd Tondu' do Yohuda
10 Om soira' di nokoilo i Atalia do napatai i Raja' Ahasia, i tanak dau, om ponuhu' no iyau do mamatai ngai' di sinakagon do raja' do hilo'd Yohuda. 11 I Ahasia nopo om kitobpinai do tondu' di roitan dot i Yosiba, om i nakawin do songulun ot imam di roitan dot i Yoyada. Om pomolisok-lisok no i Yosiba do minongoi do tiso' di tanak di Ahasia do kusai, i roitan dot i Yoas, do mantad id pogialatan di tangaanak do raja' do patayon di Atalia. Om polisoko' no i tanak diri do miwoyo' di mitamong dau dot id iso' di bilik do hiri'd Walai'd Sasambayangan dot Agayo. Om iyo noddi i Yosiba do minamasi di tanak diri om a' iddi di Atalia napatai. 12 Onom o toun di Yoas do poillisok do hiri'd Walai'd Sasambayangan dot Agayo di solinaid di Atalia do momorinta'; tu' i Atalia no o nosiliu do raja'd tondu'.
Sinaap i Atalia
1 Tontok di koturu' do toun, om wonsoyo' noddi di Yoyada it Imam, it osorou dau dot apatut do wonsoyon. Om pongupakat no iyau do limo o boyoon do soudor, i Asaria i tanak di Yiroham, i Ismail i tanak di Yohanan, i Asaria i tanak di Obid, i Maasiya i tanak di Adaya, om i Ilisapat i tanak di Sikri. 2 Om ongoi no iyolo' dot id pointikid-tikid di bandar do hilo'd Yohuda, om timungo' no diyolo' i tulun do Liwi om koinsanai di boyoon do pinuruan do sompiiyon, om angatai no do hilo'd Yorusalim. 3 Om timung no iyolo' do hiri'd Walai'd Sasambayangan dot Agayo, om pamatos no iyolo' dot id di Yoas, i tanak do raja'ddi. Om boros ka di Yoyada dot id diyolo', “Iti no i tanak do kusai di daudti' Raja' Ahasia! Om mositi' no dot osiliu iyau do raja' do dinondo, tu' nakabatos no o Tuhan dot iri kasai' i sinakagon di Raja' Daud o momorinta'. 4 Om iti no ot apatut do wonsoyon toko': kopongo pondo do maganu-anu it imam om i tulun do Liwi do tontok do tadau'd Sabat, om a' no minog do muli' iyolo'. Sompitolu nopo diyolo' om mositi' no do tumamong do hiri'd piro-piro wawayaan di Walai'd Sasambayangan dot Agayo, 5 om sompitolu kawagu o hilo'd walai'd raja', om iri no suwai om hilo'd wawayaan di roitan do Wawayaan dot Agayo do Pinoimpahan. Om mositi' nod tumimung ngai' o rayat do hiri'd natad di Walai'd Sasambayangan dot Agayo. 6 Om a' i' koino-ino do haro o songulun po do sumuang di Walai'd Sasambayangan dot Agayo do suwai ko' it imam om i tulun do Liwi di maso do maganu-anu. Iyolo' nopo om koino-ino i' do sumuang tu' nokotobilang no iyolo' do momonsoi'd karaja' do don Tuhan. Iri nopo tulun do suwai om mositi' nod mumboyo' dot Oturan do Tuhan, om hiti'd soliwan ot undorongon. 7 Om mositi' nod mingkakat i tulun do Liwi do posorili' di raja' do mikuwo'd songingkodong o gayang, om madtamong di raja' do honggo nopo o ngoyon dau. Om isai nopo i mumbal daa do sumuang di Walai'd Sasambayangan dot Agayo om mositi' nod patayon,” ka dau. 8 Om wonsoyo' no di tulun do Liwi om i rayat do Yohuda i pinonuhuan di Yoyada. Iri tulun di nongkopongo nod maganu-anu do tontok di tadau'd Sabat nga' a' poddi pinouli'. Om milo iddi di piro-piro boyoon do soudor do suhuon i tulun di nongkopongo no do maganu-anu om i nokorikot nogi' do mongoi paganu-anu. 9 Om tikidai no di Yoyada do tandus om kolid i piro-piro boyoon do soudor, dot i di Daud di gulu po do pinoopi' do hiri'd Walai'd Sasambayangan dot Agayo. 10 Om sinuhu' nogi' di Yoyada o piro-piro o tulun di songingkodong no o gayang do madtamong do ponong hiri'd gulu kobontol di Walai'd Sasambayangan dot Agayo do mongintirung di raja'. 11 Om kowonsoi ngai' poddi iri, om posoliwano' nogi' di Yoyada i Yoas, om tupiai no dau i Yoas do tupi' do raja', om onuwai dau do Buuk dot Oturan do Kinorohingan. Om iyo noddi i Yoas do siniliu do raja'. Om tuntugai noddi di Yoyada om i tangaanak dau i Yoas di tumau do potuntugon do tontok do momili' do raja'. Om oinsanan nopo i tulun do minomoros dot opuhod do poingkaa, “Otogui po daa o raja'!” ka. 12 Om korongou di Atalia i rayat do sampangkis-pangkis do sumuwau do raja'. Om osiau nopo iyau do minongoi do hiri'd Walai'd Sasambayangan dot Agayo, i nokotimungon di tulun dot ogumu'. 13 Om kokito no dau i raja' do wagu'ddi do poingkakat do hiri'd wawayaan do sumuang di Walai'd Sasambayangan dot Agayo, i kinoiyonon do pinili' iyau do silihon do raja'. Om nosorili' nopo iyau do boyoon do soudor om i tulun do popouni do torumpit. Om oinsanan nopo i rayat do sampangkis-pangkis dot atataadan om i torumpit nga' popingunion. Om i piro-piro o popouni do tuunion di hiri'd Walai'd Sasambayangan dot Agayo nga' popinguni di tuunion diyolo' do pamaramai do kinopomilian di raja'ddi. Om hurako' nopo di Atalia o pakayan dau dot atatagadan om pinggarang no, “Takal dot araat! Takal dot araat!” ka. 14 Om a' i' di Yoyada uhang do patayon i Atalia do hiri'd somok di Walai'd Sasambayangan dot Agayo. Om boros kaddi dau dot id piro-piro boyoon do soudor, “Posoliwano' iyau do potolibon dilo madtatamong do songimbaris om patayon ngai' nopo i mumbal daa do mongoi poidu' dau,” ka dau. 15 Om tangkapo' no diyolo' iyau, om pokoyoo' no do hiri'd walai'd raja'. Om patayo' noddi iyau do hiri'd wawayaan dot agayo di roitan do Wawayaan do Kuda'.
Minonginwagu i Yoyada
16 Om angatai no di Yoyada it Imam, i Raja' Yoas om i rayat do mamatos do sumiliu iyolo'd tulun do songonuon do Tuhan. 17 Om oinsanan nopo iyolo' do minongoi pamaraag di walai'd tingolig do Baal; om mumuko' nopo diyolo' i pananaraban do porsombahan om i tingolig do Baal. Om i Matan, it Imam do modsubak do Baal nga' pinatai nogi' dot id dotimbabaan di piro-piro pananaraban do porsombahan diri. 18 Om suhuo' noddi di Yoyada i piro-piro imam om i tulun do Liwi do mongilo-ilo di buruon do hiri'd Walai'd Sasambayangan dot Agayo do miagal di natantu' mantad di Raja' Daud. Om mositi' no do papatahak iyolo' do porsombahan di sorobon dot id Tuhan do tumanud di Tourat di Musa om mongilo-ilo di sinding do sindingon om i piro-piro o karamayan do tontok do tadau'd agayo. 19 Om minonuhu' po i Yoyada do tulun do madtamong do hiri'd piro-piro o wawayaan di Walai'd Sasambayangan dot Agayo, om a' i' kosuang o tulun dit a' olidang. 20 Om tanud ngai' nopo di Yoyada i boyoon do soudor, om i piro-piro boyoon do tulun, om i piro-piro pagawai do pomorinta', om koinsanai di rayat, do minomoyo' di Raja' Yoas do mantad hiri'd Walai'd Sasambayangan dot Agayo om gisom do nokorikot do hiri'd walai'd raja'. Om suang no iyolo' do minaya' di wawayaan dot agayo om irikau noddi i raja' do hiri'd tirikohonon do raja'. 21 Om oinsanan nopoddi i tulun do hiri'd bandar dot ongotood tomod, om hiri'd bandar nga' osimbayan tu' napatai noddi i Atalia.
I Yoas o Raja' do Yohuda
1 Turu' nogi' o toun do tumur di Yoas do tontok di nosiliu iyau do raja' do Yohuda, om minomorinta' iyau do hilo'd Yorusalim do solinaid dot apat nohopod o toun. Ngaran nopod tina' dau om i Sibia, i mantad hilo'd bandar do Borsiba. 2 Solinaid nopo di poimpasi i Yoyada it Imam, om kasanangan ngai' id Tuhan o wonsoyon di Yoas. 3 Om pomili' no i Yoyada do duwo o tondu' do maan di Yoas do sawo, om iyolo' no o nokoonuan di Yoas do tangaanak do kusai om tondu'. 4 Om alaid-laid poddi iyau do momorinta', om pomusorou noddi iyau do mononong di Walai'd Sasambayangan dot Agayo. 5 Om suhuo' no dau o piro-piro imam om i tulun do Liwi do mongoi ponimung do tusin do mantad id toinsanan di rayat di hilo'd kabandaran do Yohuda, do pointikid-tikid do toun, do pononong di Walai'd Sasambayangan dot Agayo. Om sinuhu' dau iyolo' do tuminimpuun dot oruhai do momonsoi do karaja'ddi, nga' monorimo-rimo nogi' i tulun do Liwi. 6 Om lohowo' noddi dau i Yoyada it Imam, i boyoon dit imam do suwai, om boro-boros nod, “A' toi nokoponuhu' i Musa, i susuhuon do Tuhan, diti rayat do mambayar do sukai do maan do kosukup-sukupan do hiri'd Kiim do Tuhan? Om baino' noddi, om nokuro tu' a' nu suhuon kopio ilo tulun do Liwi do monimung do sukai do mantad id rayat do Yohuda om Yorusalim?” ka dau. 7 (Iri nopo Walai'd Sasambayangan dot Agayo om rinaag di tulun di tuminanud di Atalia, i tondu' dot araat diri, om ogumu' nogi' i konunu-nunuan di pinotobilang do maan do dong Kinorohingan do nongoi diyolo' do numaan pakayo' do tumuku' dot id Baal.) 8 Om suhuo' noddi di raja' i tulun do Liwi do momonsoi dot iso' o pati' do poiyanan do tusin, om poilihon indo do hiri'd toning di wawayaan dot agayo di Walai'd Sasambayangan dot Agayo. 9 Om poboroso' noddi dot id tulun dot ogumu' do hilo'd Yorusalim om hilo'd Yohuda do mositi' nod mambayar ngai' o tulun do sukai dot id Tuhan, do miagal di pinonuhuan di Musa. 10 Om osonong ngai' nopo o ginawo di rayat om i boyoon diyolo' do nokorongou di pinoboros diri. Om pogiwoyo-woyo' nopo iyolo' do minongoi posuang do tusin do maan diyolo'd sukai do hiri'd pati' di poiyanan do tusin. 11 Om pointikid-tikid do ngoyon di tulun do Liwi pootodo' i pati' dot id pagawai do raja' di monongkoilo'ddi, om oponu' kasai' nopod tusin i pati'. Om bubuson nondo i tusin do poingontong i gomponulis do pomorinta' om i wakil di Boyoon dot Agayo dot Imam. Om aiso' pondo o suang di pati', om pogulion nogindo i pati'ddi do hiri'd poiyanan kasai'. Om iyo kasai' nopoddi o wonsoyon diyolo' do pointikid-tikid do tadau om ogumu' tomod diri o tusin dot otimung. 12 Om patahakon nondo di raja' om i Yoyada i tusin diri dot id mandur, om iyolo' no o mamagadsi' di tukang watu, om i tukang kayu, om i tukang do manantan do tambaga' om i suwai-suwai ko' iri. 13 Om tumotos ngai' nopo iyolo' do mononong di Walai'd Sasambayangan dot Agayo gisom do nokogirot om nosonong do miagal di timpuun i'. 14 Om kopongo poddi i karaja'ddi, om iri nopo tamas om pirok dit a' naayi' om pinatahak dot id raja' om id di Yoyada. Om iri no i tamas om i pirok diri o winonsoi'd mangkuk om i pakakas do suwai do maan do hiri'd Walai'd Sasambayangan dot Agayo.
A' Pinusou i Winonsoi di Yoyada dit Ongosonong
Solinaid nopo di Yoyada it Imam diri do poimpasi, om oulud tomod i' o papatahak do porsombahan di sumbolion do hiri'd Walai'd Sasambayangan dot Agayo. 15 Otogui tomod i' i Yoyada tu' di nopo di minatai iyau om hatus no om tolu nohopod o toun do tumur dau. 16 Om linobong iyau do hiri'd kalabangan do raja' do hiri'd Bandar di Daud, tu' pomusou di winonsoi dau dit osonong dot id Kinorohingan, om id Walai'd Sasambayangan dot Agayo om id tulun dot Israil. 17 Om di nopo di napatai i Yoyada om abayayat diri i Yoas di piro-piro boyoon do Yohuda gisom dot a' noddi iyau momusou di ponudukan di Yoyada. 18 Om a' noddi i rayat sumambayang do hiri'd Walai'd Sasambayangan dot Agayo, i Kinorohingan di taki-aki diyolo', tu' modsubak nogiddi iyolo' do tingolig om i piro-piro tininganak do tingolig dot Asira. Om iri no i dusa diyolo' o nokotogod-togod do Tuhan dot id tulun do Yohuda om id tulun do Yorusalim. 19 Om ponuhu' no o Tuhan do piro-piro ot imam do mongoi pomisunud diyolo', om gumuli' i' daa'ndo iyolo' dot id Tuhan, nga' a' i' i rayat mokinongou. 20 Om porintao' noddi do Rusod do Kinorohingan i Sakaria, i tanak di Yoyada it Imam diri. Om ongoi no i Sakaria toguang di tulun dot ogumu', om boro-boros no dot opuhod do poingkaa, “Poingkaa o boros do Tuhan, i Kinorohingan, ‘Nokuro tu' a' kou tumanud di ponuhuan ku om nokuro tu' momungou kou do tinan dokoyu? A' kou mamadul doho', om iyoho' nga' a' no mamadul dokoyu!’ ka,” ka dau. 21-22 Nga' pogiupakat no i rayat do sumaap di Sakaria, om i Raja' Yoas nga' suminokodung i' di pakat diri. Om a' no di Yoas osorou i kosonongo' om kotorodoko' di Yoyada, i tapa' di Sakaria. Om dumpaho' noddi do watu i Sakaria do gisom do napatai iyau do hiri'd natad di Walai'd Sasambayangan dot Agayo, tu' minonuhu' i' i raja' do momonsoi'd miagal diri. Om tontok dit oruhai nod oiduan do ginawo i Sakaria, om pomoros no iyau dot opuhod do poingkaa, “Maha' daa om okito do Tuhan i winonsoi nu om sulian ko dau!” ka dau.
Kinopupuson do Pomorintaan di Yoas
23 Om tontok i' do toun diri, di maso do lumahanggang o roun do kayu, do nongoi di soudor do Siria songodo' o Yohuda om Yorusalim. Om patayo' ngai' nopo diyolo' i boyoon do tulun om ogumu' o konunu-nunuan do tinanggayan diyolo' do hilo'd Damsik. 24 Okuri' i' daa i soudor do Siria, nga' pinologos i' iyolo'd Tuhan do mangala' di soudor do Yohuda dit ogumu' ko' iyolo', tu' a' i' di tulun do Yohuda pinadul o Tuhan, i Kinorohingan di taki-aki diyolo'. Om iri no o pinomohukum do Tuhan di Raja' Yoas. 25 Om nadalaan tomod diri do nosuhat i Raja' Yoas. Om kapamanau poddi i soudor do pisangod, om pipakat no o duwo di pagawai di Yoas. Om ngoyo' no diyolo' patayo' i Yoas do hiri'd toodopon dau do ponuli' di pinamatayan dau di tanak di Yoyada it Imam diri. Om lobongo' no i Raja' Yoas do hiri'd Bandar di Daud, nga' okon i' ko' hiri'd kalabangan do raja'. 26 (Iri nopo tulun di minipakat do sumaap dau'ddi om i Sabad i tanak di Simiat, om i Yosabad i tanak di Simrit. I Simiat nopo om tondu' do bansa'd Amon, om i Simrit no om tondu' do bansa'd Muab.) 27 Id suang nopo di Buuk do Poposuhut do Komoyon di Buuk do Raja' om haro i' i susuyon do pasal di tangaanak di Yoas, om i boros do pinoboros mantad do pasal dit id dosunsudan dau, om i karalan-ralano' dau do minononong di Walai'd Sasambayangan dot Agayo do pinotulis do hiri'd Buuk di Poposuhut do Komoyon di Buuk do Raja'. Om i Amasia diri, i tanak di Raja' Yoas o nosiliu do raja' do suminowoli di Raja' Yoas.
I Amasia o Raja' do Yohuda
1 Nosiliu nopo i Amasia do raja' nga' di duwo no nohopod om limo o toun do tumur dau, om duwo nohopod om siam o toun do koloido' dau do momorinta' do hilo'd Yorusalim. Tina' nopo dau om i Yoadan, i mantad hilo'd Yorusalim. 2 I Amasia nga' minomonsoi i' di korohian do Tuhan nga' a' i' ma aayi-ayi' kopio o ginawo dau. 3 Om kogirot poddi o pomorintaan dau om hukumai no dau do kapatayon i piro-piro pagawai di minamatai di tapa' dau. 4 Nga' a' i' dau pinatai i tangaanak di piro-piro pagawai'ddi tu' tuminanud i' iyau di boros do Tuhan dit id suang di Tourat di Musa do poingkaa, “Kada' hukumai do kapatayon o molohing dot i karaaton do winonsoi di tangaanak dau o kopomohukuman, om kada' hukumai do kapatayon o tangaanak dot i karaaton do winonsoi di molohing diyolo' o kopomohukuman. Iri no i tulun di nokowonsoi'd araat o koino-ino do hukuman do kapatayon,” ka.
Pinisangadan do Sumaap dot Idom
5 Om timungo' ngai' no di Raja' Amasia i tulun do mantad id payat do Yohuda om Binyamin, om suhuo' no dau iyolo' do mingkakat do tumanud di pinuruan do sompiiyon diyolo', do momoyo' nopo om i boyoon do soribu o soudor om i boyoon do hatus o soudor. Om pilio' nogiddi dau i tulun di duwo no nohopod o toun om it otuo ko' iri, i milo do monokisangod om milo do mamakai do tandus om kolid. Kogumuo' nopo di nopili' om 300,000 o tulun. 6 Om suwai no ko' iri om pamagadsi' po iyau do 100,000 o soudor do mantad hilo'd Israil do pinamagadsi' nopo om haro i' doti' o 3,400 o kilogram do pirok. 7 Nga' rikot no o songulun o nabi dot id raja' om boro-boros nod poingkaa, “Kada' onuo' ilo soudor dot Israil, tu' a' i' iyolo'd Tuhan uhupan. 8 Nga' ondung onuon nu iyolo' om songkuro-kuro piya o kokoriso' om kosioho' do soudor nu, nga' pologoson i' do Kinorohingan dot aala' ko do pisangod. Tu' Kinorohingan noo o kikuasa' do manahak do kamanangan ko' kaalaan,” ka dau. 9 Om boros ka di Amasia do minonguhot, “Poingkuro nondo ngai' i pirok di nakatahak ku diyolo'?” ka. Om boros ka di nabi, “Milo i' o Tuhan do poguli' dot id diya' dot lobi ko' iri!” ka. 10 Om posoliwano' noddi di Amasia i soudor di ginodsian daa dau'ddi om suhuo' no dau do muli'. Om uli' noddi iyolo', nga' ongotogod tomod maddi iyolo'. 11 Om pasangalo' nopo di Amasia o ginawo dau om woyoo' no dau i soudor dau do minongoi'd hilo'd Rantai do Silaon. Om hilo' no iyolo' do suminangod om napatai diyolo' o hopod noribu o soudor dot Idom. 12 Om hopod po noribu o soudor do suwai do natanggayan diyolo'. Om tanggayai ngai' no i soudor diri do hiri'd timpak di pampang do hilo'd bandar do Sila om popintaamo' no do hiri'd siba' do gisom do napatai. 13 Om daamot nopoddi om ngoyo' no di soudor dot Israil, i pinouli' di Amasia songodo' i kabandaran do Yohuda dit id pialatan do Samaria om Bait-Horon. Om patayo' no diyolo' o tolu noribu o tulun om ogumu' po o konunu-nunuan do pininganu diyolo'. 14 Om kaala' poddi di Amasia i soudor dot Idom om uli' no iyau do mikuwo'd minongigit di piro-piro tininganak do tingolig dot Idom. Om poiyono' no dau iri do hilo'd Yohuda. Om podtutud noddi iyau do kominyan dot id tininganak diri om tuminuku' iyau dot id tingolig diri. 15 Om pinopotogod tomod do Tuhan i winonsoi dau'ddi. Om ponuhu' noddi o Tuhan do songulun o nabi do minongoi solowot di Amasia. Om boros ka di nabi, “Nokuro tu' tumuku' ko dot id tingolig do bansa'd suwai, it a' i' nakapasi do tulun dau do mantad id kuasa' nu?” ka dau. 16 Om boros ka di Amasia, “Kada' kohiyo. A' ko nopo mumboyo' om patayon no moti' dahai iya'! A' i' iyahai nokopomili' diya' do sumiliu do ponosihat do raja'!” ka dau. Om kada' noddi pimboros i nabi diri, nga' pomoros po iyau do poingkaa, “Baino' nopoddi om oilaan ku no kopio do patayon ko do Kinorohingan tu' ino wonsoyon nu o kapamatayan, om it a' ko minamadul do nosihat ku,” ka dau.
Suminangod o Yohuda dot Israil
17 Om pogiupakat no i Amasia i raja' do Yohuda, om i piro-piro o ponosihat dau do sumaap dot Israil. Om ponuhu' no iyau do tulun do minongoi solowot di Yihoas, i raja' dot Israil, i tanak di Yihoahas, i manangaki di Yohu, do mangangat dau do misangod. 18 Nga' poromuto' nod tulun dot id di Raja' Yihoas o ponimbar do poingkaa, “Insan o maso om pokirim no i korugian do hilo'd konuluhanan do Libanon do boros diti dot id kokoyuan dot aras, ‘Oi guas dot aras, patahako' daa i tanak nu'd tondu' dot id tanak ku do maan dau'd sawo,’ ka. Nga' talib nod hiri o songinan o nintorusan om pingulakai no i korugian. 19 Naala' nu no o tulun dot Idom, oi Amasia, om minggayo-gayo ko daa'ddi. Nga' osonong nogi' do dumuwalai ko nopo. Nunu kopio o kahantalan nu do mogihum do kosusaan di momungou no diya' om ino rayat nu?” ka. 20 Nga' a' i' di Amasia pinadul i boros di Yoas. Om id suang nod korohian do Kinorohingan dot aala' i Amasia tu' tuminuku' i' iyau di tininganak do tingolig dot Idom. 21 Om ongoi noddi i Yihoas, i raja' dot Israil sangod di Amasia, i raja' do Yohuda. Om pisangod no iyolo' do hilo'd Bait-Simis, i hilo'd Yohuda. 22 Om kaala' no i soudor do Yohuda om poggidu' ngai' no iyolo' do minuli' do hiri'd walai diyolo'. 23 Om tangkapo' no di Yihoas i raja' dot Israil, i Amasia, om pootodo' no do hilo'd Yorusalim. Om habao' no di Yihoas i tolig di bandar diri do haro i' doti' o duwo nahatus o mito do konoruo' do mantad hiri'd wawayaan di roitan do Wawayaan dot Agayo dot Ipraim om gisom do hiri'd wawayaan di roitan do Wawayaan dot Agayo do Linsuk. 24 Om tanggayai ngai' no dau do hilo'd Samaria i tamas, om pirok, om i piro-piro pakakas do suwai, di pitamangan di sinakagon di Obid Idom do hiri'd Walai'd Sasambayangan dot Agayo, om i nogi' i piro-piro pakakas do walai di pitamangan di Obid Idom, om i dapu' do walai do raja' nga' tinanggayan ngai' nopo di Yihoas do hilo'd Samaria. Om minononggoi nogi' iyau do piro-piro o tulun di maan dau pokibayarai do tontok di pokigulian iyolo' di koobpinayan diyolo'. 25 Om kapatai poddi i Yihoas i raja' dot Israil, om hopod po om limo o toun di Amasia, i raja' do Yohuda do poimpasi. 26-28 Om mantad poddi tuminongkiad do Tuhan i Amasia, om mogipapakat no i tulun do sumaap dau do hilo'd Yorusalim. Om poggidu' no daa iyau do hilo'd bandar do Lakis, nga' ginusa' i' iyau di pisangod dau om patayo' noddi iyau do hilo'. Om pasakayo' nod kuda' i rata' dau do pinakaa do hilo'd Yorusalim, om lobongo' no do hiri'd kalabangan do raja' do hilo'd Bandar di Daud. Om iri nopo susuyon do suwai do pasal di Amasia do mantad di timpuun i' om gisom do kinopupuson do pomorintaan dau om nongotulis ngai' i' do hiri'd suang do Buuk di Monusui do Pasal Ngai' di Raja' do Yohuda om Israil.
I Usia o Raja' do Yohuda
1-3 Om di nopoddi napatai i Amasia, om oinsanan nopo i rayat do Yohuda do minomili' di Usia, i tanak di Amasia do kusai, do silihon do raja'. Tontok nopoddi om hopod nogi' om onom o toun do tumur dau. Tina' nopo dau om i Yikolia, i tondu' do mantad hilo'd Yorusalim. Om koloido' nopo di Usia do momorinta' do hilo'd Yorusalim om limo nohopod om duwo o toun. Om iyau no i minonolod om i minomonsoi kawagu do bandar dot Ilot. 4 Om i Usia nga' iyo i' di tapa' dau, tu' minomonsoi i' di korohian do Tuhan. 5 Om i Sakaria no o ponosihat dau do pasal do kowoyo-woyoo' do don rusod. Om solinaid nopo di Sakaria do poimpasi, om otorodok i' i Usia do sumambayang dot id Tuhan gisom do nabarakatan iyau'd Tuhan. 6 Om ongoi no i Usia sangod di tulun do Pilistin, om habao' no dau i tolig do bandar do Gat, Yobni, om Asdod. Om pomonsoi no iyau do piro-piro o bandar di kitolig do hilo'd somok dot Asdod om id kinoiyonon do suwai do hilo'd Pilistin. 7 Om nuhupan i' iyau'd Kinorohingan do mangala' di tulun do Pilistin, om i tulun dot Arab di poingiyon do hilo'd Gurbaal, om i nogi' i tulun do Mounim. 8 Om iri tulun dot Amon nga' mambayar i' do sukai dot id di Usia. Om mayo-gayo diri o kuasa' dau gisom do nokorikot do hilo'd Masir o kobontugo' do ngaran dau. 9 Om wansayai no di Usia do walai'd akawas do pogigimpaan o hiri'd wawayaan di roitan do Wawayaan dot Agayo do Linsuk om hiri'd wawayaan di roitan do Wawayaan dot Agayo do Rantai om hiri'd kokilongon di tolig. 10 Om minomonsoi po iyau do piro-piro o walai dot angakawas do maan do pogimpaan do hiri'd kobuturan, om minongukad iyau do torobong dot ogumu' tu' ogumu' i' kopio o tayam-tayam dau do hiri'd tana' dot apatau di hiri'd guas do konulu-nuluan om hiri'd rantai di ponong id kotonobon. Om suhuo' no dau i rayat dau do mananom dot anggur do hiri'd konulu-nuluan, om momutanom-tanom do hiri'd tana' dit oruak, tu' orohian iyau do momutanom-tanom. 11 I Usia nopo om kisoudor dot ogumu' di posodia' kasai' do mongoi sangod. Om mongoi sangod i soudor dau do tumanud di sinompuruan diyolo', om i Yoyol om i Maasiya, i piro-piro o gomponulis do raja', o mitulis do kogumuon diyolo'. Om boyoon nopo di gomponulis om i Hanania, it iso' di pagawai di raja'. 12-13 Oinsanan nopo i soudor dot ongkirapo-rapo om 307,500 o tulun di milo nod mongoi sangod do bagi' di raja'. Om 2,600 o boyoon do momoyo' diyolo'. 14 Om nonuan di Usia i soudor dau do kolid, om tandus, om tupi' do tambaga', om rasuk do basi', om pawakasan do pana' om pana', om watu do pomodumpau. 15 Om minomonsoi i tulun di momomonsoi do rapo-rapo do don sumasangod, i songingiyon do hilo'd Yorusalim do pakakas do papapana' di pana' om watu dot angagayo do mantad hiri'd walai dit angakawas di pogigimpaan om mantad hiri'd linsuk di tolig do bandar. Om abantug tomod i Usia do hinonggo nopo, om agayo o kuasa' dau tu' nuhupan i' iyau'd Kinorohingan.
Hinukuman i Usia di Kasasawat do Ginawo Dau
16 Om tontok di nokogirot i Raja' Usia, om mininsawat diri o ginawo dau, om iri no o nokoinsiriba-riba' do pangkat dau. Tuminolibamban iyau di boros do Tuhan, i Kinorohingan dau tu' suminuang i' iyau di Walai'd Sasambayangan dot Agayo do minongoi podtutud do kominyan do hiri'd podtutudan do kominyan. 17 Nga' suhuto' no iyau di Asaria do miwoyo' do walu' nohopod ot imam do suwai, it ongokoris om ongosiou 18 do papasala' di winonsoi dau. Boros ka diyolo', “Tuan Raja'! A' ko i' koino-ino do modtutud do kominyan dot id Tuhan. Iti nopo om buruon dit imam di suminolusuk di Harun, tu' iyolo' no o nokotobilang do momonsoi do karaja'dti. Tongkiad nogi' kopio'dti kinoiyonon dot olidang! Suminaap ko'd Tuhan, i Kinorohingan, om a' ko noddi kaanu do barakat dau,” ka diyolo'. 19 Tontok nopoddi om poingkakat no i Usia do hiri'd toning di podtutudan do kominyan di hiri'd Walai'd Sasambayangan dot Agayo, do kiinigit di podtutud do kominyan. Om kotogod no iyau dit imam, nga' sigog i' dot imbulai o toruol do kusta do hiri'd turos dau. 20 Om kotigowo tomod diri i Asaria om it imam do suwai do nokokito dau, om sansagai no diyolo' iyau do tumongkiad do mantad hiri'd Walai'd Sasambayangan dot Agayo. Om osiau nopo iyau do suminoliwan tu' nohukuman no iyau'd Tuhan. 21 Om posuwai-suwayo' noddi i Raja' Usia dot id iso' o walai tu' kitoruol i' iyau do miagal diri. Om hiri-hiri noddi iyau do gisom do kinapatayo' dau. Om a' noddi iyau koino-ino do sumuang di Walai'd Sasambayangan dot Agayo. Om i Yotam noddi, i tanak dau do kusai o momonsoi ngai' di karaja' dau do dong pomorinta'. 22 Om iri nopo susuyon do suwai do pasal di pomorintaan di Raja' Usia, om nongotulis no di Yosaya i Nabi, i tanak di Amos. 23 Om di nopoddi napatai i Usia, om linobong iyau do hiri'd somok di kalabangan do raja' nga' okon i' ko' hiri kopio'd kalabangan diri tu' kitoruol i' o kulit dau dit araat kopio. Om i Yotam noddi, i tanak dau'd kusai, o nosiliu'd raja' do suminowoli dau.
I Yotam o Raja' do Yohuda
1 Om kosiliu no i Yotam do raja' di duwo nohopod om limo o toun do tumur dau, om hopod om onom o toun dau do momorinta' do hilo'd Yorusalim. Tina' nopo dau om i Yorusa, i tanak di Sadok. 2 Om iyau nga' minomonsoi i' di korohian do Tuhan, do miagal di winonsoi di tapa' dau. Nga' iyau nopo om a' i' minongoi podtutud do kominyan do hiri'd Walai'd Sasambayangan dot Agayo, do miagal di winonsoi di tapa' dau. Nga' iyo piya'ddi, nga' maso po di rayat do momonsoi'd dusa. 3 Om wonsoyo' no di Yotam i wawayaan do roitan do Wawayaan dot Agayo dot Utara, i hiri'd Walai'd Sasambayangan dot Agayo om inggiratai no dau o tolig do hiri'd kinoiyonon di roitan dot Opil di hilo'd Yorusalim. 4 Om pomonsoi no iyau do piro-piro o bandar do hilo'd konulu-nuluan do Yohuda om minomonsoi po iyau do kuta' di padtamangan om piro-piro walai dot angakawas do pogigimpaan do hiri'd gouton. 5 Om songodo' no dau do gisom do naala' i raja' dot Amon om i soudor dau, om sansagai no dau i tulun dot Amon do mambayar do sukai dot id dau. Om monikid toun nopo do solinaid do tolu o toun do mogisuhut-suhut do mambayar iyolo' do 3,400 o kilogram do pirok, om 1,000 o tan do gandum om 1,000 o tan do barli. Om a' no milo dot a' diyolo' wonsoyon o miagal diri. 6 Om mayo-gayo diri o kuasa' di Yotam tu' otorodok i' om obintanud iyau do Tuhan, i Kinorohingan dau. 7 Om i suwai-suwai do nongosiliu do daamot di Yotam do momorinta', om i piro-piro pisangadan om i nongobutus dau, nga' nongkotulis no do hiri'd suang do Buuk do Monusui do Pasal do Raja' dot Israil om Yohuda. 8 Om duwo no nohopod om limo o toun do tumur di Yotam do tontok di nosiliu iyau do raja'. Om koloido' nopo dau do momorinta' do hilo'd Yorusalim om hopod om onom o toun. 9 Om kapatai no iyau om lobongo' no do hiri'd Bandar di Daud, om i Ahas diri, i tanak dau'd kusai o nosiliu do raja' do suminowoli dau.
I Ahas o Raja' do Yohuda
1 Om kosiliu no i Ahas do raja' di duwo nogi' nohopod o toun do tumur dau, om koloido' nopo dau do momorinta' do hilo'd Yorusalim om hopod om onom o toun. Nga' a' i' iyau tuminanud di kowoyo-woyoon dot osonong di Raja' Daud, suwai ko' minomonsoi nogi' iyau dit okon ko' korohian do Tuhan. 2 Kowoyo-woyoon nopo dau om miagal di kowoyo-woyoon di piro-piro raja' dot Israil, om i kowoyo-woyoon do tulun di momonsoi do tingolig do Baal do tambaga' o wonsoyon, 3 om modtutud iyau do kominyan do hiri'd Rantai do Hinom. Om iri piya tanak dau'd kusai nga' pinatahak i' dau do numaan do porsombahan di sumbolion dot id tingolig, do tumanud di koubasanan dot araat do tulun di nuyung do Tuhan do mantad id pomogunan do Kanaan, do tontok di suminuang i' i tulun dot Israil do pomogunan diri. 4 Om pinapatahak i Ahas do porsombahan di sumbolion om minodtutud do kominyan do hiri'd tiyonon do modsubak do tingolig do hiri'd konulu-nuluan om hiri'd sahau do kayu dit ongokohob o tuntu.
Minisangod o Siria om Israil
5-6 Om pologoso' nod Tuhan, i Kinorohingan, do naala' di raja' do Siria i Raja' Ahas; om minononggoi nogi' i raja' do Siria dot ogumu' o tulun do Yohuda do pinakaa do hilo'd Damsik, tu' minomonsoi id dusa i Raja' Ahas. Om pinologos po iyau'd Tuhan do naala' di Raja' Pika, i tanak di Rimalia, i mantad hilo'd Israil. Om insan no o tadau di Raja' Pika do minamatai do 120,000 o soudor do Yohuda dit ongosiou. Om pologoso' nopod Tuhan i Kinorohingan di taki-aki diyolo' dot ongosiliu ngai' o miagal diri tu' a' i' mamadul do Tuhan i rayat do Yohuda. 7 Om patayo' no di songulun o soudor dot Israil di roitan dot i Sikri, i Maasiya i tanak di Ahas do kusai. Om pinatai nogi' dau i Asrikam, i mongilo-ilo di walai'd raja' om i Ilkana, i pagawai do raja' dit asawat kopio o pangkat. 8 Om mulong po dot oiyo i' daa do bansa' dot Israil o tulun do Yohuda, nga' minononggoi i' i soudor dot Israil do 200,000 o tongoondu' om tangaanak do tulun do Yohuda, om tanggayai no diyolo' do hilo'd Samaria do mitonggoi do konunu-nunuan dot ogumu' kopio.
I Nabi Odid
9 Haro o songulun o nabi do Tuhan do roitan dot i Odid do poingiyon do hilo'd bandar do Samaria. Tontok di muli' no i soudor dot Israil do mogiwoyo-woyo' di tinanggayan diyolo' do mantad hilo'd Yohuda, om ngoyo' no iyolo' di Odid solowoto' do tontok di sumuang no iyolo' di bandar. Boros ka dau, “Naala' no dokoyu o tulun do Yohuda tu' otogod i' diyolo' o Tuhan i Kinorohingan di taki-aki dokoyu. Nga' norongou id Tuhan i kororongit dokoyu do minamatai di soudor do Yohuda. 10 Om baino' noddi, om silihon daa dokoyu do turipon o tulun do Yorusalim om Yohuda! A' i' dokoyu oilaan dot iyokoyu nga' momonsoi id dusa dot id Tuhan i Kinorohingan dokoyu? 11 Pokinongou kou pogi'! Iti nopo tulun do tinangkap dokoyu'dti om tobpinai i' dokoyu. Om suhuo' nogi' kopio dokoyu iyolo'd muli'. Tu' a' nopo moti' om otogod moti'ndo o Tuhan om hukuman kou nondo dau,” ka dau. 12 Om haro'ddi ot apat o tulun do woyo-woyoon do hilo'd Israil; i Asaria i tanak di Yohanan, i Borokia i tanak di Mosilimot, i Yohiskia i tanak di Salum, om i Amasa i tanak di Hadlai, dot a' suminokodung di winonsoi di soudor di minuli'ddi. 13 Boros ka diyolo', “Kada' dokoyu angatai do hiti ino tulun do tinanggayan dokoyu! Nokowonsoi toko' nod dusa dot id Tuhan, om ula' no do hukuman i dusa toko'. Om baino' no, om momonsoi kou po do miagal diti do pomoruhang di kasalaan toko',” ka diyolo'. 14 Om patahako' no di soudor i tulun di tinangkap diyolo'ddi om i konunu-nunuan di naanu diyolo', dot id rayat om id piro-piro o boyoon diyolo'. 15 Om ingkakat noddi it apat o tulun do woyo-woyoon diri do mongilo-ilo di tulun di nangatangkap. Om bohogio' no diyolo' i pakayan om i konunu-nunuan di nangaanu'ddi dot id tulun di nangatangkap. Om binahagi' nogi' diyolo' i kasut, om i taakanon om i tinumon. Om ubatai no diyolo'd tumau do saitun i suhat di tulun di nangatangkap. Om iri no it adalaan koluhoi, it a' no kapanau om pinasakai diyolo'd kaladai. Om oinsanan nopoddi i tulun di nangatangkap do pinaatod do hilo'd Yorikou, i bandar do koguasan do kurma, om kouli' i' iyolo' do hilo'd kampung diyolo' do hilo'd Yohuda. Om uli' nogiddi i tulun dot Israil do hilo'd Samaria.
Minokiuhup i Ahas do Tulun dot Asur
16-17 Om timpuun po kawagu o tulun dot Idom do manangod do Yohuda om mintangkap do tulun dot ogumu'. Om pokitulung noddi i Raja' Ahas di Tiglat-Pilisir, i raja' dot Asur, do mongoi ponguhup diyolo'. 18 Om tontok nogiddi do manangod i tulun do Pilistin di kabandaran do hiri'd guas do nuluhon di ponong id kotonobon, om i hiri'd watas di ponong id salatan do Yohuda. Om nosolod nogi' diyolo' o bandar do Bait-Simis, om Ayalon, om Gidirot, om i bandar do Soko, om Timna, om Gimso, om i kawalayan di posorili' di tolu o bandar diri. Om undorong noddi iyolo'd hilo'. 19 Om porikatai nod Tuhan do kosusaan om kagangahan o hilo'd Yohuda tu' a' i' di Ahas, i raja' do Yohuda, pinadul it apatut dot aanu di rayat, om suminaap iyau'd Tuhan. 20 Om okon i' ko' monguhup di Ahas o kinorikatan di raja' dot Asur, suwai ko' minongoi nogi' ponusa' dau. 21 Om onuwai noddi di Ahas i raja' dot Asur do tamas di mantad id Walai'd Sasambayangan dot Agayo, om i mantad id walai'd raja', om i mantad id walai di piro-piro boyoon do rayat. Nga' iri piya nga' aiso' i' o kinootuk-otukon.
Dusa di Ahas
22 Nga' iyo piya kopio'ddi o kosusao' nga' muhang-ruhang nogi' o dusa do wonsoyon di Ahas dot id Tuhan. 23 Minomungou iyau do tinan dau om i rayat dau tu' pinapatahak i' iyau do porsombahan di sinumbali' dot id tingolig do tulun do Siria di minangala' dau. Minomusorou daa iyau do poingkaa, “Nuhupan i' di tingolig do Siria i raja' do Siria, om ondung papatahak oku do porsombahan di sumbolion dot id tingolig diyolo' om uhupan oku i' dotindo iyoho',” ka. 24 Om ngoyo' ngai' noddi dau i pakakas di hiri'd Walai'd Sasambayangan dot Agayo om pingraago' no dau. Om tabanai no dau i Walai'd Sasambayangan dot Agayo, om pomonsoi no iyau do piro-piro o pananaraban do porsombahan do pointongkop do Yorusalim. 25 Hiri nopod pointikid-tikid do bandar om kawalayan do hilo'd Yohuda om winansayan ngai' nopo dau do tiyonon do modsubak do tingolig om monorob do porsombahan di sinumbali' dot id tingolig do bansa'd suwai. Om iri no o pinopotogod kopio'd Tuhan i Kinorohingan di taki-aki dau, dot id dau. 26 Om iri nopo susuyon do suwai do pasal di pomorintaan dau om koinsanai di winonsoi dau om nongkotulis no do hiri'd suang do Buuk di Monusui do Pasal Ngai' di Raja' do Yohuda om Israil. 27 Om kapatai noddi i Ahas, om lobongo' no do hiri'd kalabangan do hilo'd Yorusalim, nga' okon i' ko' hiri'd kalabangan do raja'. Om kosiliu nod raja' i Hiskia, i tanak dau'd kusai do suminowoli dau.
I Hiskia o Raja' do Yohuda
1 Om kosiliu no i Hiskia do raja' do Yohuda di duwo nohopod om limo o toun do tumur dau. Om duwo nohopod om siam o toun do koloido' dau do momorinta' do hilo'd Yorusalim. Tina' nopo dau om i Abia i tanak di Sakaria. 2 I Hiskia nopo om minomonsoi i' do korohian do Tuhan do tuminanud di kowoyo-woyoon di Raja' Daud, i taki-aki dau.
Linidangan di Hiskia i Walai'd Sasambayangan dot Agayo
3 Tontok di tulan do koiso' di toun do nosiliu i Hiskia do raja', om ukabai no di Hiskia i wawayaan di Walai'd Sasambayangan dot Agayo om ponuhu' no iyau'd tulun do mononong diri. 4 Om suhuo' no dau it imam om i tulun do Liwi do tumimung do hiri'd natad di Walai'd Sasambayangan dot Agayo, i hiri'd ponong id koulayon, 5 om boro-boros no iyau diyolo'd hiri. Boros ka dau, “Iyokoyu nopo i tulun do Liwi, om apatut nod potobilang do tinan dokoyu do mogobi-obi'd Tuhan om lidangan i' iti Walai'd Tuhan, i Kinorohingan di taki-aki dokoyu. Om mositi' nod iduwon ngai' i kososomu' diti walai. 6 A' tuminorodok dot id Tuhan i Kinorohingan toko', i komolohingan toko', tu' minomonsoi nogi' iyolo' dit okon ko' korohian dau. A' i' diyolo' pinadul iyau om a' ginompi' i tiyonon dau. 7 Tinabanan diyolo' i wawayaan di Walai'd Sasambayangan dot Agayo om pinisok diyolo' i lampung do hiri. Om aiso' no o modtutud do kominyan om aiso' o papatahak do porsombahan di sorobon do hiri'd Walai'd Sasambayangan dot Agayo. 8 Om hukumai noddi do Tuhan o tulun do Yohuda om i tulun do Yorusalim tu' atatagadan no kopio iyau. Om koilo ngai' kou i' do pinopotigowo om minongoris do koinsanai'd tulun i winonsoi'd Tuhan. 9 Nangaala' i komolohingan toko' dot id pisangadan, om nangatanggayan do pisangod i tangaanak om sawo toko'. 10 Om mamatos oku no do momonsoi'd tumpongo dot id Tuhan, i Kinorohingan dot Israil do dinondo, om a' indo iyau otogod dot id dati'. 11 Oi tangaanak ku, kada' no dokoyu popiloid-loido', tu' iyokoyu no i nopili'd Tuhan do modtutud do kominyan dot id dau, om momoyo' diti tulun dau do sumambayang dot id dau,” ka dau. 12-14 Iri nopo tulun do Liwi di nakarapou do tontok diri om: Mantad id pinuruan do sompiiyon di Kohat: i Mahat i tanak di Amasai, om i Yoil i tanak di Asaria Mantad id pinuruan do sompiiyon di Morari: i Kis i tanak di Abdi, om i Asaria i tanak di Yihaliliil Mantad id pinuruan do sompiiyon di Girson: i Yoa i tanak di Sima, om i Idon i tanak di Yoa Mantad id pinuruan do sompiiyon di Ilisapan: i Simri om i Yoyol Mantad id pinuruan do sompiiyon di Asap: i Sakaria om i Matania Mantad id pinuruan do sompiiyon di Himan: i Yohiol om i Simoi Mantad id pinuruan do sompiiyon di Yodutun: i Somaya om i Usiol 15-16 Om timungo' ngai' noddi diyolo' i tulun do Liwi di suwai, om lidangai ngai' no diyolo' o tinan diyolo'. Om suang nogiddi it imam do hiri'd Walai'd Sasambayangan dot Agayo om timpuun nod momolidang do kinoiyonon diri do tumanud di Tourat do Tuhan, om i pinonuhuan di raja'. Posoliwano' ngai' nopo diyolo' i sosomu' om hirio' no diyolo'd natad di Walai'd Sasambayangan dot Agayo. Om igitai nogiddi di tulun do Liwi do hiri'd Rantai do Kidron, it id soliwan di bandar. 17 Om tinimpuunan nopo i karaja'ddi nga' di tadau'd koiso' do tulan do koiso'. Om tadau poddi do kawalu' om kopongo no diyolo' do mamalangga' o pointongkop di natad om gisom do ponong hiri'd bilik di gulu kopio kobontol di hiri'd Walai'd Sasambayangan dot Agayo. Om walu' po kawagu o tadau diyolo' do minamalangga' do pointongkop di walai'ddi om kopongo nopo diyolo' do mamalangga' om di kohopod om onom do tadau do tulan diri.
Pinatahak Kawagu dot id Kinorohingan i Walai'd Sasambayangan dot Agayo
18 Om posunudo' noddi di tulun do Liwi dot id di Raja' Hiskia o poingkaa, “Notongkop no dahai do momolidang i Walai'd Sasambayangan dot Agayo, do kohompit ngai' i pananaraban do porsombahan di sorobon, om i mija' do poiyanan di roti do patahakon dot id Tuhan, om iri ngai' i pakakas do hiri. 19 Om nongoongoi kawagu dahai i pakakas di nidu' di Raja' Ahas do tontok dit a' iyau mamadul do Tuhan dit iyau po o momorinta'. Om nokotobilang ngai' no dahai i pakakas diri do maan do don Tuhan, om hilo' ngai' no id dotimbabaan di pananaraban do porsombahan iri do dinondo,” ka diyolo'. 20 Om a' no i Raja' Hiskia minonorimo-rimo tu' olomus nopo iyau do minonimung di woyo-woyoon do tulun, om pogiwoyo-woyo' no iyolo' do minongoi do hiri'd Walai'd Sasambayangan dot Agayo. 21 Om pinatahak nopo do porsombahan do pangampun do dusa di sompiiyon di raja' om i rayat do Yohuda, om maan do pomolidang di Walai'd Sasambayangan dot Agayo, om turu' o tinan do sapi' do tontoluhan, om turu' o dumba', om turu' o tanak do dumba', om turu' o kambing. Om suhuo nogiddi di raja' i piro-piro imam di suminolusuk di Harun do papatahak di tayam-tayam diri do hiri'd sakai di pananaraban do porsombahan do maan do porsombahan di sorobon. 22 Id gulu nopo kopio om nongoi dit imam sumbolio' i piro-piro o sapi'ddi om poiyaso' no diyolo' i raha' do hiri'd pananaraban do porsombahan. Om niyo i' diyolo'ddi i turu' o tinan do dumba' om i turu' o tinan do tanak do dumba'. 23 Om id tohuri noddi om ngoyo' no diyolo' i kambing om igitai nod hiri'd raja' om id rayat di maso do sumambayang do hiri. Om pakabayo' ngai' nopo diyolo' o longon diyolo' do hiri'd kambing diri. 24 Om sumbolio' nogiddi i kambing diri om potuntugo' no i raha' do hiri'd pananaraban do porsombahan do maan do porsombahan do pangampun do dusa do koinsanai di rayat. Om winonsoi pogi' diyolo' o miagal diri nga' nokoponuhu' no i raja' do papatahak do porsombahan di sorobon om porsombahan do pangampun do dusa do koinsanai di rayat dot Israil. 25 Om ponuhu' no i raja' di tulun do Liwi do mongoi'd hiri'd Walai'd Sasambayangan dot Agayo do popouni do kecapi om gambus, do tumanud di pinonuhuan di pinoboros do Tuhan dot id di Daud do pinolombus di Gad, i nabi di tuuhoton dau, om i Natan i Nabi. 26 Om sagalai i' di pinakai di Daud i tuunion diri. Om iri piro-piro imam dit ongkitorumpit nga' sinuhu' nogi' do minongoi'd hiri. 27 Om panahak no i Hiskia do tanda' do kotimpuunan di kapatahakan do porsombahan di sorobon. Om daamot nopo do papatahak di porsombahan di sumbolion, om modsinding i tulun dot ogumu' do sinding do pamarayou'd Tuhan, om iri no i popouni do tuunion om popinguni do torumpit om i tuunion do suwai. 28-29 Om otud no i Raja' Hiskia om koinsanai di tulun do hiri do tuminuku' dot id Tuhan om iri no modsisinding om modsinding nopo om i popouni do tuunion nga' popinguni nopo do tuunion do gisom do nongosorob ngai' i porsombahan di sinumbali'ddi. 30 Om suhuo' no di raja' om i woyo-woyoon do tulun i tulun do Liwi do modsinding dot id Tuhan di sinding di tinulis di Daud om i Asap, i nabi. Om ongooropod ngai' nopo i tulun do modsinding om mikuwo'd minotud do tumuku' dot id Kinorohingan. 31 Om boro-boros noddi i Hiskia do poingkaa, “Nongolidangan kou noddi do baino', om mositi' nod papatahak kou dot id Tuhan do porsombahan di sumbolion, do maan dokoyu do porsombahan do kounsikahan,” ka dau. Om tonudo' no diyolo' i boros di Hiskia, om agaan nopo o ginawo diyolo' do pinapaatod do tayam-tayam do maan do porsombahan. 32 Minigit iyolo' do turu' nohopod o sapi' do tontoluhan om hatus o dumba', om duwo nahatus o tanak do dumba' om patahako' nogiddi dot id Tuhan do numaan do porsombahan di sorobon. 33 Om pinapatahak po iyolo' dot onom nahatus o sapi' do tontoluhan om tolu noribu o dumba' do maan do pogiilangan do mangakan do koinsanai di tulun di nakarapou'd hiri. 34 Iri nopo imam di nokopomolidang do tinan nga' okuri' kopio om a' di iyolo' kaayi' do mongidu' ngai' do kulit di tayam-tayam. Om nuhupan diri iyolo' di tulun do Liwi, tu' otorodok nogi' kopio i tulun do Liwi ko' it imam do tumanud dit oturan do momolidang. Om minonguhup kasai' po iyolo' dit imam do gisom do kabagal do maganu-anu it imam di nokopomolidang do tinan. 35 Om suwai nopo ko' i porsombahan di sorobon, om pinapatahak po it imam do lunok di nanu do mantad id porsombahan do kounsikahan di nakan di rayat. Om pinapatahak po iyolo' do waig dot anggur di pinotungu do poingandad di porsombahan di sorobon. Om iyo noddi o pinonimpuun kawagu do sambayang do hiri'd Walai'd Sasambayangan dot Agayo. 36 Om osonong tomod diri o ginawo di Raja' Hiskia om i rayat dau tu' nuhupan i' iyolo'd Kinorohingan do momonsoi ngai'ddi, om a' i' iyolo' alaid do minomonsoi'ddi.
Sumodia' do Mamaramai do Paska
1-5 Om a' poddi di rayat naramai o Tadau'd Agayo do Paska do maso di kapamaramayan kasai' do tontok do tulan do koiso', tu' okuri' kopio ot imam do nokopomolidang do tinan, om a' po ogumu' o tulun do nokotimung do hilo'd Yorusalim. Om iso-iso' nopoddi o pakat di Raja' Hiskia om koinsanai di pagawai dau om i tulun do hilo'd Yorusalim do mamaramai di Paska do tontok do tulan do koduwo, om orohian ngai' nopo iyolo' di pakat diri. Om popokirim noddi i raja' do surat dot id koinsanai'd tulun, do pointongkop dot Israil om Yohuda, om hilo'd Ipraim om hilo'd Manasi nga' kiniriman i' diyolo'd surat. Om linohou ngai' i tulun dot Israil do mongoi do hiri'd Walai'd Sasambayangan dot Agayo do hilo'd Yorusalim, do mongoi pamaramai do Paska do maan do pomusou'd Tuhan, do miagal di natantu' mantad do hiri'd Tourat di Musa. 6 Om suhuo' no di raja' om i pagawai dau o piro-piro tulun do tumongkop do Yohuda om Israil do papaatod do surat di tinulisan do poingkaa, “Oi rayat dot Israil! Nokoidu' kou no do mantad id pomorintaan do tulun dot Asur. Om guli' kou no do dinondo dot id Tuhan, i Kinorohingan di tinuku' di Abraham, om i Isak, om i Yakub, om gumuli' i' iyau kawagu dot id dokoyu. 7 Kada' kou omit di komolohingan dokoyu om i tulun dot Israil do suwai dit a' otorodok dot id Tuhan, i Kinorohingan diyolo'. Om nokokito kou no do kawagato' do pinomohukum dau diyolo'. 8 Kada' kou kokodou o ginawo do miagal diyolo', suwai ko' umboyo' kou nod Tuhan. Rikot kou nod hilo'd Yorusalim; do hilo'd Walai'd Sasambayangan dot Agayo, i nokotobilang do Tuhan i Kinorohingan dokoyu do maan do dau do gisom dot alaid. Kainou no sumambayang dot id dau om otingkod i' o kototogod dau dot id dokoyu. 9 Ondung mamadul kou'd Tuhan, om osianan indo i pisangod di minononggoi di koobpinayan dokoyu, om pogulion indo diyolo' kawagu i tulun di tinangkap diyolo'ddi. Tuhan nopo, i Kinorohingan dokoyu, om Kinorohingan i' dit osonong om obinsianan; om podulon kou indo dau do mamadul kou no iyokoyu dau,” ka. 10 Soira' di minamanau i tulun di sinuhu'ddi do mantad id kabandaran dit id watas do payat dot Ipraim om Manasi om gisom do hilo'd utara om nokorikot do hilo'd watas do payat do Sibulon, om nirak-irakan nogi' om hiningi-hingi iyolo'. 11 Nga' haro i' o piro-piro o tulun do mantad id payat dot Asor, om Manasi om Sibulon dit orohian do mongoi do hilo'd Yorusalim. 12 Om hilo'd Yohuda nga' kuminaraja' i' o Kinorohingan om piniiso-iso' dau o ginawo di rayat do tumanud kopio di korohian do Kinorohingan om tumanud di ponuhuan do raja' om i pagawai do raja'.
Tadau'd Agayo do Paska
13 Tontok di tulan do koduwo om ogumu' tomod diri o tulun do tuminimung do hilo'd Yorusalim do mongoi pamaramai di Tadau'd Agayo do Roti dit A' Kipangambang. 14 Om ngoyo' ngai' no diyolo' i pananaraban do porsombahan di hilo'd Yorusalim di maan do pananaraban do porsombahan di sumbolion om podtutudan do kominyan dot id tingolig om pataamo' no diyolo' do hiri'd Rantai do Kidron. 15 Om sumbolio' no diyolo' i piro-piro dumba' do tontok di kohopod om apat do tulan diri, do maan do porsombahan di sumbolion do don Paska. Om nointingayam tomod diri it imam om i tulun do Liwi di maso pod sosomu'. Om lidangai noddi diyolo' o tinan diyolo', om milo indo iyolo' do papatahak do porsombahan di sorobon do hiri'd Walai'd Sasambayangan dot Agayo. 16 Om sompori-pori nopo iyolo' do minongoi do hiri'd diyolo' do tiiyonon do hiri'd Walai'd Sasambayangan dot Agayo do tumanud di natantu' mantad di nokotulis do hiri'd Tourat di Musa. Om patahako' no di tulun do Liwi i raha' di porsombahan do sinumbali'ddi dot id imam, om potunguho' noddi dit imam i raha' do hiri'd pananaraban do porsombahan. 17 Om ogumu' po ot id pogialatan di tulun do nakarapou'd hiri dot a' nokopomolidang do tinan, om a' poddi iyolo' koino-ino do monumbali' do dumba' do maan do porsombahan di sumbolion do don Paska. Om iri noddi i tulun do Liwi o minogobi' diyolo' do momonsoi'ddi om pinapatahak diri dot id Tuhan. 18 Om suwai no ko' iri, om id pogialatan nopo di tulun dot Ipraim, Manasi, Isakar, om Sibulon, om ogumu' po i ruminikot om a' i' nokopomolidang do tinan. Om a' noddi katanud no dit oturan mantad o pamaramai diyolo' do Paska. Om sambayangai noddi iyolo' di Raja' Hiskia. Poingkaa o sambayang dau, 19 “Oi Tuhan, i Kinorohingan, i tinuku' do taki-aki dahai. Maha' daa om ompunan nu i tulun di maso do sumambayang dot id diya' do mikuwo'd aayi-ayi' kopio o ginawo, dot a' piya nolidangan o tinan diyolo'; tu' iya' nopo om osonong i',” ka dau. 20 Om norongou id Tuhan i sambayang di Hiskia. Om ompunai iddi do Tuhan i tulun diri, om a' i' dau iyolo' hinukuman. 21 Turu' o tadau do koloido' di tulun do pointimung do hilo'd Yorusalim do mamaramai di Tadau'd Agayo do Roti dit A' Kipangambang. Om ongotood tomod iyolo'. Monikid tadau nopo i tulun do Liwi om it imam do mamarayou'd Tuhan do mikuwo'd aayi-ayi' kopio o ginawo. 22 Om oilo tomod i tulun do Liwi do momoyo' di tulun do sumambayang dot id Tuhan, gisom do narayou iyolo' di Hiskia.
I Karamayan do Koduwo
Om katalib poddi o turu' o tadau do papatahak do porsombahan di sinumbali' do pongunsikou'd Tuhan, i Kinorohingan di taki-aki diyolo', 23 om oinsanan nopo iyolo'd minomoros do popotilombus di karamayan diri do turu' kawagu o tadau. Om ramayo' poddi kawagu diyolo' iri do mikuwo'd ongotood o ginawo. 24 Om papatahak no i Raja' Hiskia do soribu o tinan do sapi' do tontoluhan om turu' noribu o tinan do dumba'. Om papatahak no i piro-piro pagawai di Hiskia do soribu o tinan do sapi' do tontoluhan om hopod noribu o tinan do dumba'. Om pinatahak ngai' nopo i tayam-tayam diri dot id rayat do maan do sumbolion om maan dot akanon. Om ogumu' tomod diri ot imam do minomolidang do tinan. 25 Om ongotood ngai' nopo i rayat do Yohuda, om it imam, om i tulun do Liwi, om i tulun do mantad hiri'd utara, om i tulun do bansa'd suwai di nokoiyon do hilo'd Israil om hilo'd Yohuda. 26 Om aramai tomod o hilo'd bandar do Yorusalim tu' mantad poddi pomorintaan di Raja' Suliman, i tanak di Daud do kusai, om a' po nokoumbal do nosiliu o miagal diri. 27 Om pinokionuan dit imam om i tulun do Liwi do barakat do mantad id Tuhan i rayat, om norongou iddi do Kinorohingan do hiri'd tiyonon dau do hilo'd surga i sambayang diyolo', om rinamit dau i pinokianu diyolo'.
Ninwoguan di Hiskia o Kowoyo-Woyoo' do Tugama'
1 Om kopongo poddi i karamayan, om oinsanan nopo i rayat do tuminikid di bandar do hilo'd Yohuda, om pingraago' no diyolo' i torigi do watu do don tingolig, om pininghaba' i tininganak di pinoingkakat do pinatahak dot id Tingolig dot Asira, om piningraag i pananaraban do porsombahan om i tiiyonon do modsubak do tingolig. Om iyo iddi o winonsoi diyolo' dot id kinoiyonon do suwai do hilo'd Yohuda, om hiri'd watas do Binyamin, om Ipraim, om Manasi. Om uli' nogiddi ngai' iyolo' do hiri'd kinoiyonon diyolo'. 2 Om tontuo' no kawagu di Raja' Hiskia o karaja' dit imam om i tulun do Liwi. Om iti ngai' no i karaja' diyolo'ddi: papatahak do porsombahan di sorobon om porsombahan do piuludan, om moyo' do sumambayang do hiri'd Walai'd Sasambayangan dot Agayo, om mamarayou om mongunsikou do Tuhan dot id piro-piro o kinoiyonon do hiri'd suang di Walai'd Sasambayangan dot Agayo. 3 Om pinapatahak po i raja' do tayam-tayam do maan do porsombahan di sorobon do monikid kosuabon om monikid sosodopon, om maan do porsombahan di sumbolion do patahakon do tontok do tadau'd Sabat, om tontok di Tadau dot Agayo do Tulan do Wagu, om tontok do karamayan do suwai di natantu' dot id suang do Tourat do Tuhan. 4 Om suwai no ko' iri om suhuo' po di raja' i tulun do hilo'd Yorusalim do mongigit do porsombahan di natantu' mantad do patahakon dot id imam om id tulun do Liwi, om oponu' indo diyolo' o maso diyolo' do maganu-anu do hiri'd Walai'd Sasambayangan dot Agayo, do tumanud di nokotulis do hiri'd Tourat do Tuhan. 5 Om posunudo' no i ponuhuan diri dot id tulun dot ogumu', om paatod noddi i tulun dot Israil do maan do popuhawangon do mantad id tua' dit id gulu di tanom-tanom diyolo', do patahakon dit imam: luong, anggur, tumau do saitun, paha' om i tua' do totonomon do suwai. Om pinatahak no diyolo' di tulun do Liwi om sompihopod do nunu nopo i haro dot id diyolo'. 6 Oinsanan nopo i tulun di poingiyon do hilo'd Yohuda do pinapaatod do sompihopod di baanan do sapi' om dumba' diyolo', om ogumu' po o pinopuhawang do suwai, om patahako' ngai' nogiddi diyolo' iri dot id Tuhan, i Kinorohingan diyolo'. 7 Tuminimpuun nopo do pinaatod i popuhawangon om di tulan do kotolu, om mikot-rikot kasai' nopo do gisom di tulan do koturu'. 8 Om royoho' noddi di Raja' Hiskia om i pagawai dau o Tuhan, om rinayou diyolo' i tulun dot Israil do tontok di nokokito iyolo' di pinopuhawang dot irad diri kogumu'. 9 Om soira' di minoro-boros i raja' dot id imam om id tulun do Liwi do pasal di pinopuhawang diri, 10 om boro-boros no i Asaria, i Boyoon dot Agayo dot Imam, i suminolusuk di Sadok, do poingkaa, “Mantad poddi popingatod o rayat do nipuhawang diyolo' do hilo'd Walai'd Sasambayangan dot Agayo, om a' no iyahai ooyian do taakanon; tu' a' nogi' dahai aayi-ayi' iri. Om aramit pogi' dahai ot irad diri nga' binarakatan id Tuhan o tulun dau,” ka diyolo'. 11 Om pomonsoi no iyolo' do bilik do poopian do hiri'd posorili' di Walai'd Sasambayangan dot Agayo, tu' iyo noddi o pinonuhuan di raja', 12 om poopio' ngai' no diyolo' i pinopuhawang diri om i porsombahan di sompihopod do hiri'd piro-piro bilik di poopian. Om i Konania, i tulun do Liwi, o sinuhu' do mongilo-ilo ngai'ddi om i Simoi, i tadi' dau o sinuhu' do monguhup dau. 13 Om hopod po o tulun do Liwi do suwai do sinuhu' do maganu-anu do moyo' diyolo': i Yohiol, i Asasia, i Nahat, i Asail, i Yorimot, i Yosabad, i Iliol, i Yismakia, i Mahat om i Bonaya. Om winonsoi ngai' nopo iri do tumanud di pinonuhuan di Raja' Hiskia om i Asaria, i Boyoon dot Agayo dot Imam. 14 I Kori noo, i tanak di Yimna, i tulun do Liwi di nosiliu do boyoon di madtatamong do hiri'd wawayaan di roitan do Wawayaan dot Agayo do Koulayon, i hiri'd Walai'd Sasambayangan dot Agayo, om nonuan do karaja' do rumamit om mamahagi' di popuhawangon di patahakon dot id Tuhan. 15 Om hiri nod kabandaran do suwai di nokoiyonon dot imam, om uhupan i Kori diti piro-piro o tulun do Liwi: i Idon, i Minyamin, i Yosua, i Somaya, i Amaria, om i Sakania. Om oirad nopo o pamahagi' di taakanon dot id tulun do payat do Liwi do tumanud di buruon diyolo', 16 om okon i' ko' tumanud do pinuruan do sompiiyon. Om oinsanan nopo i tongokusai di kiumur do tolu nohopod o toun om it otuo ko' iri, om i kiburuon kasai' do hiri'd Walai'd Sasambayangan dot Agayo do pointikid do tadau, do tumanud di sinompuruan diyolo' do kaanu di diyolo'd bahagi'. 17 Iri ngai' nopo it imam om tinulis o ngaran do tumanud di pinuruan do sompiiyon diyolo' om iri no tulun do Liwi di kiumur do duwo nohopod o toun ko' it otuo ko' iri om tinulis o ngaran do tumanud di buruon om i sinompuruan diyolo'. 18 Om tulison ngai' nopo o ngaran diyolo' om i ngaran do tangaanak om sawo diyolo', om i tiyon-iyon diyolo'd suwai, tu' mositi' nod posodia' kasai' iyolo' do pointikid do maso do momonsoi di karaja' diyolo' di don Tuhan, di natantu' mantad. 19 Id pogialatan nopo dit imam di songingiyon do hiri'd kabandaran di tinantu' mantad dot iyonon di sinakagon di Harun, ko' i hiri'd kobuturan di posorili' do kabandaran diri, om haro o piro-piro o tulun do pinili' do mamahagi' di taakanon dot id toinsanan di tongokusai dit id suang do sompiiyon dot imam, om id pointikid-tikid do tulun di nokotulis o ngaran dot id suang do payat do Liwi. 20 Om otulid ngai' nopo o wonsoyon di Raja' Hiskia dot id pointongkop do Yohuda, om poposonong iyau do ginawo'd Tuhan, i Kinorohingan dau. 21 Om koundar i' iyau, tu' koinsanai di wonsoyon dau do bagi' di Walai'd Sasambayangan dot Agayo ko' i wonsoyon dau do tumanud di Tourat do Tuhan, om wonsoyon i' dau do mikuwo'd aayi-ayi' kopio o ginawo dau, tu' osianan i' iyau'd Tuhan, i Kinorohingan dau.
Rinolosi do Tulun dot Asur o Tulun do Yorusalim
1 Om kowonsoi poddi di Raja' Hiskia i popointalang do kotorodoko' dau dot id Tuhan, om ngoyo' no di Sanhorib i raja' dot Asur, songodo' o Yohuda. Nongoi dau turungkuo' o kabandaran dit ongkitolig o posorili' om sinuhu' dau i soudor dau do monolod di kabandaran diri. 2 Om soira' di noilaan di Hiskia do haro o ginawo di Sanhorib do manangod do Yorusalim, 3-4 om pogiokun-okunai no di raja' om i piro-piro pagawai dau do monompon dit ongkiwaig do hiri'd soliwan di bandar om aiso' indo o waig di tulun dot Asur do tontok do koinsomok iyolo' do Yorusalim. Om ogumu' tomod o tulun do sinuhu' di piro-piro pagawai di Hiskia diri do mongoi ponompon ngai' di tudan do waig di lumuyung do ponong id soliwan di bandar. 5 Om inggiratai noddi di raja' i bandar, om sonongo' no dau i tolig di posorili' di bandar, om pomonsoi po iyau do walai dot angakawas do maan do pogimpaan do hiri'd sakai di tolig, om pomonsoi po kawagu iyau do tolig do ponong id soliwan. Om suwai no ko' iri om sinonong po dau i tolig di winonsoi do hiri'd timpak di tana' do pinotimbun do hiri'd ponong id koulayon do mantad id bohogian di laid di bandar do Yorusalim. Om minonuhu' nogi' iyau do momonsoi do tandus om kolid dot ogumu'.1|65|HK8E| Wawayaan dot agayo dot iso' o bandar di kitolig|32.5 6 Om minomili' nogi' iyau do piro-piro boyoon do soudor do momoyo' do koinsanai di tongokusai do hiri'd bandar, om monuhu' diyolo' do tumimung do hiri'd dalangga' dit id dotimbabaan di wawayaan dot agayo di bandar. Om boros kaddi dau, 7 “Pogiroton no om pokoiso-isoon no o ginawo dokoyu; kada' kou kooris di raja' dot Asur ko' iri po i soudor dau. Okoris toko' i' iyati' ko' iyau. 8 Iyau nopo om don tulun noo do kokorisan, nga' iyati' nopo om haro i' o Tuhan, i Kinorohingan toko' do monguhup om sumangod do mogobi' dati',” ka dau. Om korongou poddi di rayat i boros di raja' do miagal diri, om a' noddi iyolo' ooris. 9 Om alaid-laid noddi, di hilo' pod Lakis i Sanhorib om i soudor dau, om ponuhu' no iyau'd tulun do minongoi solowot di Hiskia om i rayat do Yohuda do hilo'd Yorusalim, do popoboros do boros do poingkaa, 10 “Muhot oku, iyoho' i Sanhorib, i raja' dot Asur, ondung nunu po kopio o kasaap-saap dokoyu do mundorong do hilo'd Yorusalim tu' noturungku' no. 11 Nokoboros daa i Hiskia do poiduwon kou i' do Tuhan, i Kinorohingan dokoyu do mantad id kuasa' dahai, koii? Nga' kada' kou ponongkuyaai, tu' magakal no iyau toomod dokoyu. Pologoson kou i' moti'ndo dau do louson om tuuhan. 12 Iyau no i minamaraag di piro-piro o tiiyonon do sumambayang om i piro-piro pananaraban do porsombahan di don Tuhan, om suhuo' noddi dau i tulun do Yohuda om i tulun do Yorusalim do sumambayang om modtutud do kominyan dot id iso' noo o pananaraban do porsombahan. 13 A' kou toi koilo di winonsoi ku om i winonsoi di komolohingan ku dot id piro-piro o bansa'd tulun do suwai? A' po nokoumbal do haro o tingolig do bansa'd suwai do nokopoidu' do tulun dau do mantad id kuasa' do raja' dot Asur! 14 Isai noo diyolo' o nokoumbal do momonsoi do miagal diri? Om poingkuro po daa do milo do poidu' dokoyu i dokoyu'd tingolig? 15 Kada' dokoyu pologoso' i raja' dokoyu do magakal om mongudut dokoyu! Kada' kou ponongkuyaai dau! Tu' a' i' nokoumbal do haro o tingolig do tulun do hinonggo-honggo nopo do minilo do pinopoidu' di tulun dau do mantad id kuasa' do raja' dot Asur. Om atantu' no dot i tingolig dokoyu nga' a' i' milo do poidu' dokoyu!” ka. 16 Om ogumu' po o boros do pinimboros di susuhuon dot Asur do pongindaraat do Tuhan, i Kinorohingan om pinongindaraat di Hiskia, i susuhuon do Tuhan diri. 17 Iri nogi' i Raja' dot Asur nga' minonulis id surat do sumaap do Tuhan, i Kinorohingan do tukuon di tulun dot Israil. Poingkaa o suang di surat diri, “Iri nopo tingolig di Hiskia om miagal no di tingolig di piro-piro o bansa'd suwai tu' a' i' milo do poidu' di tulun dau do mantad id kuasa' ku,” ka. 18 Om pagarango' ngai' nopo di susuhuon dot Asur iri dot id suang do boros dot Ibrani do pomorolosi om popoluhoi do ginawo di tulun do Yorusalim di hiri'd timpak di tolig di bandar. Om iyo no daa'ddi o pangala' di tulun dot Asur di bandar diri. 19 Om pimboroson diyolo' dot iri nopo Kinorohingan di tukuon do hilo'd Yorusalim om iyo noddi tingolig do bansa'd suwai, i tininganak di winonsoi'd tulun. 20 Om sambayang noddi i Raja' Hiskia om i Yosaya i Nabi, i tanak di Amos. Om pinglohou no iyolo' do mokiuhup do Kinorohingan. 21 Om ponuhu' noddi o Tuhan dot iso' o moloikat do minongoi pamatai di soudor om i piro-piro boyoon do soudor do tulun dot Asur. Om guli' noddi i raja' dot Asur do hilo'd pomogunan dau do mikuwo'd nointingayam tomod. Insan o tadau, di maso dau do hiri'd walai di tingolig dau, om haro'ddi o piro-piro di tangaanak dau do minongoi pamatai dau, do gayang o pinamatai. 22 Om iyo noddi o ralan do Tuhan do pinopoidu' di Raja' Hiskia om i tulun do hilo'd Yorusalim do mantad id kuasa' di Sanhorib, i raja' dot Asur, om mantad id pisangod diyolo' do suwai. Om nonuan iyolo'd Tuhan do piuludan dot id piro-piro o pomogunan do suwai. 23 Om ogumu' o tulun do minongoi do hilo'd Yorusalim dot ongkiinigit do porsombahan do patahakon dot id Tuhan om popuhawangon dot id di Hiskia. Om mantad poddi om suahon no i Hiskia do koinsanai'd bansa' do tulun.
Toruol di Hiskia om Kasasawat do Ginawo Dau
24 Om tontok noddi do suminakit i Raja' Hiskia dot adalaan kopio gisom dot oruhai no iyau dot apatai. Om sambayang no iyau, om patahak noddi o Tuhan do tanda' dot id dau dot olingasan iyau. 25 Nga' a' i' iyau minongunsikou di kolingasan do pinatahak do Tuhan dot id dau, tu' mininggayo-gayo nogi' iyau. Om iri noddi o kinatagadan do Tuhan di tulun do Yohuda om Yorusalim. 26 Nga' alaid noddi om insiriba' iddi i Hiskia om i tulun do Yorusalim, om a' iddi nakaratu' i pomohukum do solinaid po di Hiskia do poimpasi.
Kakayaan om Kobontugo' di Hiskia
27 Om nakakaya' tomod diri i Raja' Hiskia, om pusohon do koinsanai'd tulun. Om minomonsoi iyau do piro-piro o bilik do poopian di dapu' dau: tamas, pirok, watu dit olumis dit angagayo o gatang, rampa, kolid om i konunu-nunuan do suwai dit angagayo o gatang. 28 Om haro po o piro-piro o walai dau do poiyanan do tua' do tanom-tanom dau: gandum, anggur, om tumau do saitun; om kikandang po iyau do poiyanan di sapi' om dumba' dau 29 dit ogumu' kopio. Om suwai no ko' iri om minomonsoi po iyau do bandar dot ogumu'. Om ogumu' tomod o kakayaan do pinatahak do Kinorohingan dot id dau. 30 I Raja' Hiskia no i minomokok di tudan do waig do Gihon, om i pinopoluyung di waig do pinawaya' di parit do hiri'd saalom do tana' do poluyungon do hiri'd suang di bandar do Yorusalim. Om koundar ngai' nopo i winonsoi di Hiskia. 31 Om tontok di nokorikot i tulun do sinuhu' do mantad hilo'd Babil do minongoi ponguhot do pasal di kinolingasan di Hiskia di koimayaan kopio, om pologoso' nopod Tuhan i Hiskia do momonsoi do tumanud di korohian di Hiskia do pongilo kopio'd Tuhan do ginawo dau.
Kinopupuson do Pomorintaan di Hiskia
32 Om iri nopo susuyon do suwai do pasal di Raja' Hiskia, om pasal di kosianan dau'd Tuhan, om nongkotulis no do hiri'd suang do Buuk do Pinotulisan di Pinointalang do Kinorohingan dot id di Yosaya i Nabi, i Tanak di Amos, om id suang di Buuk do Susui do Pasal Ngai' di Raja' do Yohuda om Israil. 33 Om kapatai noddi i Hiskia, om lobongo' no iyau do hiri'd tana' di poinsawa-sawat do hiri'd kalabangan do raja'. Om oinsanan nopo i rayat do Yohuda om Yorusalim do pinopointalang do pomusou diyolo' dau dit a' ogina-gina' do tontok di minatai iyau. Om kosiliu noddi do raja' i Manasi i tanak dau, do suminowoli dau.
I Manasi o Raja' do Yohuda
1 Hopod nogi' om duwo o toun do tumur di Manasi di nosiliu iyau do raja' do Yohuda, om koloido' nopo dau do momorinta' do hilo'd Yorusalim om limo nohopod om limo o toun. 2 Om minomonsoi i Manasi do dusa dot id Tuhan, tu' tuminanud iyau di kongoubasanan dot araat di piro-piro o bansa'd tulun di nuyung do Tuhan do mantad hilo'd Kanaan do tontok di suang i' o tulun dot Israil do pomogunan diri. 3 Om wonsoyo' no dau kawagu i tiyonon do modsubak do tingolig di rinaag di Hiskia, i tapa' dau. Om winonsoi nogi' dau kawagu i piro-piro pananaraban do porsombahan di pakayon do modsubak do Baal, om minomonsoi iyau do piro-piro tininganak do Tingolig dot Asira, om tuminuku' iyau dot id rombituon. 4 Om nokoboros nod Tuhan, do Yorusalim no o tiyonon do sumambayang dot id dau do gisom dot alaid, nga' hiri nogid Walai'd Sasambayangan dot Agayo o pinamansayan di Manasi do piro-piro pananaraban do porsombahan dot id tingolig. 5 Om winansayan goduwo nopo dau do pananaraban do porsombahan dot id rombituon o hiri'd natad di Walai'd Sasambayangan dot Agayo. 6 Om pinatahak dau i tangaanak dau do maan do porsombahan di sorobon do hiri'd Rantai do Hinom. Om mininsingilo iyau di toilaan do bobolian om i mogogontong, om toilaan do dong rogon, om mokituduk di rusod-rusod. Om agayo no kopio o dusa dau dot id Tuhan gisom do tuminogod diri o Tuhan. 7 Om pinoiyanan dau do tininganak do tingolig o hiri'd suang di Walai'd Sasambayangan dot Agayo, om iri nogi' daa i Walai'd Sasambayangan dot Agayo o komoyon do Kinorohingan do tontok di minoro-boros iyau dot id di Daud om id di Suliman i tanak di Daud do poingkaa, “Nopili' ku no o Yorusalim dot id pogialatan di hopod om duwo o watas di payat do bansa'd Israil. Om natantu' ku no do mositi' nod sumambayang dot id doho' i tulun ku do hiri'd walai ku dot id bandar diri do gisom dot alaid. 8 Ondung tonudon ngai' di tulun dot Israil i ponuhuan ku om tonudon i Tourat di pinatahak di Musa, i susuhuon ku dot id diyolo' om a' ku no iyolo' pologoson dot ouyung do mantad id pomogunan di pinatahak ku dot id taki-aki diyolo',” ka. 9 Om i Manasi no o minamayayat di rayat do Yohuda do momonsoi'd dusa dit araat po ko' i dusa di winonsoi di piro-piro o bansa'd Kanaan di nuyung do Tuhan do tontok di suang i' i tulun di songonuon do Tuhan do pomogunan diri.
Kuminorologo i Manasi
10 Om togodo' no daa'd Tuhan i Manasi om i rayat dau nga' a' i' iyolo' minokinongou. 11 Om gowoi poddi om porikoto' nod Tuhan i piro-piro boyoon do soudor dot Asur do minongoi ponolod do Yohuda. Om koito' no i Manasi do kakait do minanangkap dau, om kagasai no iyau om tanggayai noddi iyau do hilo'd Babil. 12 Om insiriba' nogiddi iyau dot id Tuhan i Kinorohingan dau, di maso dau dot oinggorit, om sambayang no iyau do mokiuhup do Tuhan. 13 Om simbaro' id Kinorohingan i sambayang di Manasi. Om pogulio' no iyau'd Kinorohingan do hilo'd Yorusalim do momorinta' kawagu'd hilo'. Om iri noddi i nosiliu do miagal diri o pinopogirot do kotumbayaan di Manasi, do Tuhan noo o Kinorohingan. 14 Om poinsawato' no di Manasi i tolig di ponong id soliwan di Bandar di Daud, i tolig di ponong id koulayon. Om nimpuun nopo dau do momonsoi om id iso' o kinoiyonon di hiri'd rantai, it id toning do tudan do waig do Gihon om potilombus dot id utara do gisom do hiri'd wawayaan di roitan do Wawayaan dot Agayo do Sada' om i hiri'd kinoiyonon di roitan dot Opil dot id bandar diri. Om pinoiyanan ngai' nopo dau do songulun o boyoon do soudor ot id pointikid-tikid do bandar di kitolig do hilo'd Yohuda. 15 Om nidu' ngai' dau i tininganak do tingolig do bansa'd suwai om iri nogi' i tingolig di pinoiliu dau do hiri'd Walai'd Sasambayangan dot Agayo. Om nidu' ngai' nogi' dau i piro-piro pananaraban do porsombahan di don tingolig di hiri'd nulu-nulu di winaalan do Walai'd Sasambayangan dot Agayo, om id kinoiyonon do suwai do hilo'd Yorusalim. Om insanai nopo dau iri do pinoposoliwan di bandar om pataamo' ngai' noddi. 16 Om sonongo' noddi dau i pananaraban do porsombahan, i hiri'd tiyonon do tumuku' dot id Tuhan. Om hiri noddi iyau do pinapatahak do porsombahan do piuludan om porsombahan do kounsikahan. Om suhuo' ngai' no dau i tulun do Yohuda do tumuku' dot id Tuhan, i Kinorohingan dot Israil. 17 Om maso po di rayat do papatahak do porsombahan di sumbolion dot id piro-piro o kinoiyonon do suwai di tiyonon do sumambayang, nga' iri nopo i porsombahan diri om Tuhan i' ot onuan.
Kinopupuson do Pomorintaan di Manasi
18 Om iri nopo susuyon do suwai do pasal di Manasi, om i sambayang dau dot id Kinorohingan, om i boros do Kinorohingan dot id dau do pinolombus di piro-piro nabi dot id suang do ngaran do Tuhan, i Kinorohingan dot Israil, om nokotulis ngai' no do hiri'd suang do Buuk di Monusui do Pasal Ngai' di Raja' dot Israil. 19 Om nokotulis po do hiri'd suang di Buuk di Monusui do Pasal di Nabi i sambayang di Manasi om i nisimbar do Kinorohingan di sambayang diri, om i dusa di nowonsoi dau dit a' po iyau nokorologo, om i kinoiyonon do modsubak do tingolig om i tininganak do Tingolig dot Asira di winonsoi dau, om i piro-piro tingolig di tinuku' dau. 20 Om kapatai no i Manasi, om lobongo' no do hiri'd walai'd raja'. Om kosiliu nod raja' i Amon, i tanak dau'd kusai, do suminowoli dau.
I Amon o Raja' do Yohuda
21 Duwo nogi' nohopod om duwo o toun do tumur di Amon di nosiliu iyau'd raja' do Yohuda. Om koloido' nopo dau do momorinta' do hilo'd Yorusalim om duwo no o toun. 22 Om iyau nga' minomonsoi id dusa dot id Tuhan do miagal di tapa' dau, om tuminuku' iyau dot id tingolig di tinuku' di tapa' dau. 23 Nga' i Amon nopo om a' i' iyo di tapa' dau tu' a' i' iyau mininsiriba' om a' guminuli' dot id Tuhan; agayo-gayo po dau'd dusa ko' i tapa' dau. 24 Om pogipapakat no i piro-piro pagawai di Raja' Amon do sumaap di Amon om ngoyo' no diyolo' iyau patayo' do hiri'd walai'd raja'. 25 Nga' napatai i' di rayat do Yohuda i tulun di minamatai di Raja' Amon, om siliho' no diyolo' do raja' i Yosia, i tanak di Amon.
I Yosia o Raja' do Yohuda
1 Om walu' nogi' o toun do tumur di Yosia di nosiliu iyau do raja' do Yohuda, om tolu nohopod om iso' o toun do koloido' dau do momorinta' do hilo'd Yorusalim. 2 Om korohian id Tuhan i winonsoi dau; tu' tuminanud i' iyau di kowoyo-woyoon di Raja' Daud, i taki-aki dau, om naayi' dau do tumanud o koinsanai dit oturan do Kinorohingan.
Tiningkod di Yosia i Tulun do Modsubak do Tingolig
3 Om di nopoddi walu' no toun di Yosia do nosiliu'd raja', dit omulok po kopio iyau, om timpuun no iyau do sumambayang dot id Kinorohingan, i tinuku' di Raja' Daud, i taki-aki dau. Om apat no toun do mantad diri om timpuun no iyau do mingraag di tiyonon do modsubak do tingolig, om i tininganak di Tingolig dot Asira, om i piro-piro tingolig do suwai. 4 Om mumuko' nopo kopio di tulun di Yosia i tininganak om i tingolig diri om potiaso' nogiddi i kinomumukan do hiri'd lobong di tulun di pinapatahak do porsombahan di sinumbali' dot id tingolig diri. Om habao' ngai' nopo diyolo' i piro-piro pananaraban do porsombahan dot id Baal om i piro-piro podtutudan do kominyan do hilo'. 5 Om tutudai noddi di Yosia do hiri'd sakai di pananaraban do porsombahan diri i tulang dit imam di minogobi-obi di tingolig diri. Om iyo noddi o ralan dau do minomolidang kawagu do Yohuda om Yorusalim dot id pagantangan do tugama'. 6 Om iyo iddi o winonsoi dau do hiri'd kabandaran om i hiri'd piro-piro o kinoiyonon di nangaraag do hilo'd watas do Manasi, om Ipraim, om Simion, om gisom do korikot do hilo'd Naptali, i ponong id utara. 7 Om oinsanan nopo i pananaraban do porsombahan om i tininganak dot Asira do pointongkop do hiri'd Pomorintaan dot Utara do rinaag ngai' di Yosia, om mumuko' ngai' nopo dau i tininganak om i podtutudan do kominyan. Om uli' nogiddi i Yosia do hilo'd Yorusalim.
Nokito Kawagu i Buuk do Tourat do Tuhan
8 Tontok di kohopod no om walu' do toun do pomorintaan di Yosia, di notingkod dau i modsubak do tingolig do hiri'd Walai'd Sasambayangan dot Agayo om id pointongkop di pomogunan, om ponuhu' no iyau do tolu o tulun do mongoi pononong di Walai'd Tuhan, i Kinorohingan. Iri nopo tolu o tulun diri nga' i Sapan, i tanak di Asalia, i Maasiya i gobunor do Yorusalim, om i Yoa i tanak di Yoahas, i pagawai dot asawat o pangkat. 9 Om patahako' no di tulun do Liwi dot id di Hilkia, i Boyoon dot Agayo dot Imam, i tusin di notimung diyolo'. Iri nopo tulun do Liwi diri nga' i madtatamong di wawayaan do Walai'd Sasambayangan dot Agayo. Iri nopo tusin diri nga' mantad id tulun dot Ipraim om Manasi, om mantad id rayat do suwai, i mantad id pomorintaan dot id utara, om mantad id rayat do hilo'd Yohuda, om mantad hilo'd Binyamin om hilo'd Yorusalim. 10 Om patahako' noddi di Hilkia i tusin diri dot id tolu o tulun di nonuan do karaja' do mongilo-ilo di karaja' do mononong di Walai'd Sasambayangan dot Agayo. Om patahako' no diyolo' i tusin diri dot 11 id piro-piro tukang kayu om i tukang mamaal do pomoli do watu om kayu do maan do pononong di piro-piro o walai di pinologos di raja' do Yohuda do poingraag. 12 Iri nopo tulun di mononong di nangaraag diri nga' tulun dit ongotulid kopio o ginawo. Om boyoon nopo diyolo' nga' apat o tulun do Liwi: i Yahat om i Obaya, i mantad id pinuruan do sompiiyon do Morari, om i Sakaria om i Mosulam i mantad id pinuruan do sompiiyon di Kohat. Om iri no i tulun do Liwi, it ongoilo ngai' do popouni do tuunion, 13 om nonuan do karaja' do mongilo-ilo di momirangkat ngai' di pakakas, om boyoon di tulun di pakaraja' do momonsoi di mogisuayan o karaja'; om i mongilo-ilo do kowoyo-woyoon di karaja' om madtamong di wawayaan. 14 Om tontok di pinosoliwan i tusin do mantad hiri'd pinoopian, om kokito no di Hilkia i Buuk do Tourat do Tuhan, i Tourat di pinatahak do Kinorohingan dot id di Musa. 15 Om boros ka di Hilkia dot id di Sapan, “Nokito ku i Buuk do Tourat do Tuhan do hilo'd Walai'd Sasambayangan dot Agayo,” ka dau. Om patahako' no dau i buuk diri dot id di Sapan, 16 om romito' no di Sapan i buuk om ongoi no solowot di raja' om boro-boros nod, “Nowonsoi ngai' no dahai i pinonuhuan nu. 17 Noongoi no dahai i tusin di pinoopi' do hilo'd Walai'd Sasambayangan dot Agayo, om nakatahak no dahai dot id tulun di songingkaraja' om id mandur diyolo',” ka dau. 18 Om boros ka kawagu dau, “Pinatahak di Hilkia iti buuk diti dot id doho',” ka. Om basao' noddi di Sapan i buuk diri do pinarangahan di raja'. 19 Om korongou poddi di raja' i suang di buuk diri, om hurako' no dau o pakayan dau dot atatangaban. 20 Om suhuo' noddi di raja' i Hilkia om i Ahikam i tanak di Sapan, om i Abdon i tanak di Mika, om i Sapan i gomponulis do pomorinta', om i Asaya i madtatamong kasai' di raja'. Boros ka dau, 21 “Ngoyo' dokoyu doho' uhoto' o Tuhan do bagi' doho' om bagi' di tulun di nongoolu' do hilo'd Israil om hiti'd Yohuda do pasal do suang diti buuk. Otogod o Tuhan dati' tu' a' i' i taki-aki toko' tuminanud di pinonuhuan di songintulis do hiti'd buuk diti,” ka dau. 22 Om ongoi no i tulun diri uhot do songulun o tondu' di roitan dot i Hulda. Iyau nopo om nabi di poingiyon dot id kawalayan do wagu di hilo'd Yorusalim. Ngaran nopod sawo dau om i Salum i tanak di Tikwa, i manangaki di Harhas. Om i Salum no o mongilo-ilo di pakayan do tontok do sumambayang do hiri'd Walai'd Sasambayangan dot Agayo. Om korongou poddi di Hulda i pinoboros diyolo', 23 om suhuo' no dau iyolo' do gumuli' dot id raja' do popolombus do 24 boros do poingkaa, “Poingkaa o boros do Tuhan, hukuman ku nondo o Yorusalim om koinsanai di tulun do poingiyon do hilo' dot iti popol di songintulis do hiti'd buuk di binasa' dot id raja' o pomohukum. 25 Nokotongkiad no iyolo' doho' om pinapatahak iyolo' do porsombahan di sinumbali' dot id tingolig. Koinsanai di winonsoi diyolo' om pinopotogod ngai' nopo doho'. Otogod oku no kopio do Yorusalim, om a' no milo dot atanus o kototogod ku. 26 Nga' poingkaa o bilin ku dot id di Raja' Yosia, iyoho' i Tuhan, i Kinorohingan dot Israil: Nokorongou ko no di pointulis dot id suang do buuk diri, 27 om minonosol ko iddi om mininsiriba' ko dot id toguang ku. Minihad ko om hinurak nu o pakayan nu do tanda' do tumongob ko do tontok di nokorongou ko di boros ku do momohukum do Yorusalim om i tulun do poingiyon do hilo'. Nga' norongou ku no i sambayang nu. 28 Om a' ku indo porotuon dot id Yorusalim i hukuman do solinaid nu pod poimpasi. Om osonong indo o kapatai-patayo' nu,” ka. Om poguliai no di tulun di sinuhu' di raja' dot id raja' om posunudo' no diyolo' i pinobilin diri.
Minamatos i Yosia do Tumorodok Iyau dot id Tuhan
29 Om lohowo' ngai' noddi di Raja' Yosia i piro-piro boyoon do Yohuda om Yorusalim. 30-31 Om tanud noddi iyau diyolo' do minongoi do hiri'd Walai'd Sasambayangan dot Agayo, om minoyo' nogi' i piro-piro imam, om i piro-piro nabi, om koinsanai di rayat, dot i mosikin om i nogi' i kaya'. Om hiri nod toguang diyolo', dot id toning di torigi di pinotobilang do maan do don raja', o pinambasaan di raja' do toinsanan do suang di buuk do tumpongo dot opuhod o pambasa' dau, i buuk di nokito do hiri'd Walai'd Sasambayangan dot Agayo. Om pamatos noddi i raja' dot id Tuhan do tumorodok dot id dau, om aayi-ayi' o ginawo om aayi-ayi' o pomusorou do tumanud di ponuhuan om it oturan dau, om tumanud di ponuhuan do tumpongo'd Tuhan dot id tulun dau, i pointulis dot id buuk diri. 32 Om oinsanan nopo i tulun do Binyamin om i tulun do suwai di hilo'd Yorusalim do sinuhu' dau do mamatos do tumorodok dot id pinibatasan diri. Om iri no o kinotonudan di tulun do Yorusalim dit Oturan dot id suang di pinibatasan dot id pialatan diyolo' om id Kinorohingan di taki-aki diyolo'. 33 Om i tingolig di kososomu', dit id piro-piro o kinoiyonon dot id suang di watas dot Israil, nga' rinaag ngai' nogi' di Raja' Yosia. Om suhuo' no dau i rayat dau do sumambayang dot id Tuhan, i Kinorohingan di taki-aki diyolo'. Om solinaid nopo di Yosia do poimpasi om otorodok kasai' i' i rayat dot id Tuhan.
Rinamai di Yosia o Paska
1 Om ramayo' noddi di Yosia o Paska do hilo'd Yorusalim do pomusou dau do Tuhan. Om iri nopo tayam-tayam do maan do tontok do karamayan diri nga' sinumbali' do tontok di tadau do kohopod om apat di tulan do koiso'. 2 Om bohogio' no di Yosia dot id koinsanai dit imam i karaja' dit apatut do wonsoyon diyolo' do hiri'd Walai'd Sasambayangan dot Agayo, om sinuhu' dau iyolo' do sonong-sonongon kopio o pomonsoi do karaja'ddi. 3 Om sinuhu' nogi' di Yosia i tulun do Liwi di nokotobilang do momonsoi do karaja'd Tuhan, om i nosiliu do monunuduk dot Israil. Boros ka dau, “Ngoyo' dokoyu poopio' i Kaban do Tumpongo'd Tuhan dit olidang diri do hilo'd Walai'd Sasambayangan dot Agayo, i winonsoi di Raja' Suliman, i tanak di Daud do kusai. A' no dokoyu minog do popingwolihon iri. Pogobi-obian no dokoyu o Tuhan, i Kinorohingan dokoyu, om i tulun dot Israil, i tulun do songonuon do Tuhan. 4 Ongoi kou no do hilo'd Walai'd Sasambayangan dot Agayo, i tiyonon do tinantu' dot iyonon di pinuruan do sompiiyon dokoyu, om sumodia' kou no do momonsoi'd karaja' di natantu' mantad di Raja' Daud om i Raja' Suliman i tanak dau'd kusai, do wonsoyon dokoyu. 5 Om uludon no kopio dokoyu o pamahagi' di karaja' om haro indo kasai' ot id pogialatan dokoyu do milo'd monguhup do pointikid-tikid di sinompuruan do tulun dot Israil. 6 Om mositi' nod sumbolion dokoyu i dumba' om kambing do maan do tontok do Tadau'd Agayo do Paska. Om iri no o kopomolidangan dokoyu do tinan dokoyu do tumanud dot oturan do tugama', om posodia' kou di porsombahan do sumbolion om owonsoi i' di tulun dit oiyo ko' bansa' dokoyu i pinonuhuan do Tuhan di pinolombus di Musa,” ka dau. 7 Om panahak no i Raja' Yosia do tayam-tayam dau do maan di tulun di nakarapou di karamayan do Paska. Tinahak nopo dau om tolu nohopod noribu o tinan do dumba', om tanak do dumba', om kambing dit ongokoro' po, om tolu noribu o tinan do sapi' do tontoluhan. 8 Om i piro-piro pagawai di Yosia nga' minanahak nogi' do maan di piro-piro imam, om maan di tulun do Liwi om koinsanai di rayat. Om iri nopo tolu o pagawai di nonuan do karaja' do mongilo-ilo di Walai'd Sasambayangan dot Agayo, i Hilkia i Boyoon dot Agayo dot Imam, om i Sakaria, om i Yohiol, om minanahak ngai' nopo dit imam do duwo noribu om onom nahatus o tinan do tanak do dumba' om kambing dit ongokoro' po om tolu nahatus o tinan do sapi' di tontoluhan do maan do porsombahan do tontok do karamayan diri. 9 Om iri piro-piro boyoon do tulun do Liwi: i Konania, i Somaya om i Nitaniil i tobpinai dau, i Hasabia, i Yoyol, om i Yosabad, nga' minanahak i' di tulun do Liwi do limo noribu o tinan do tanak do dumba' om kambing dit ongokoro' po om limo nahatus o tinan do sapi' di tontoluhan do maan do porsombahan do tontok di karamayan diri. 10 Om kopongo ngai' poddi iri do maan di karamayan do Paska, om sompori-pori nopo it imam om i tulun do Liwi do minongoi do hiri'd tiiyonon diyolo' do kumaraja' do miagal di pinonuhuan di raja'. 11 Om sumbolio' noddi diyolo' i tayam-tayam do maan do tontok di Tadau'd Agayo do Paska; i tulun do Liwi o minongidu' di kulit di tayam-tayam om it imam o pinopowowos di raha' do hiri'd sakai di pananaraban do porsombahan. 12 Om kaanu ngai' nopod soronginanan o tayam-tayam di maan do porsombahan do sorobon o pointikid-tikid di pinuruan do sompiiyon di nakarapou'd hiri. Om milo iddi iyolo' do papatahak do porsombahan di sumbolion do tumanud dit oturan di nokotulis do hiri'd Tourat di Musa. 13 Om luguo' noddi di tulun do Liwi i porsombahan di sinumbali' di don Paska, do tumanud dit oturan, om linasu' diyolo' dot id poriuk, om id kuali', om id balanga', i porsombahan di pinotobilang. Om araa-raho' nogiddi diyolo' do pinopotikid i tonsi dot id tulun dot ogumu'. 14 Om kowonsoi po ngai' iri, om posodiawo' nogi' di tulun do Liwi i daging di diyolo'd gontok om i gontok dit imam di sinakagon di Harun. Tu' maganu-anu nopo it imam do papatahak di tayam-tayam do maan do porsombahan di sorobon, om mininsorob iyolo' di lunok di nanu do mantad id porsombahan di sinumbali' do gisom do notuangan. 15 Om i piro-piro tulun di popouni do tuunion do mantad id pinuruan do sompiiyon di Asap, it id suang do payat do Liwi nga' hiri id tiiyonon diyolo' do maganu-anu, i hiri'd natantu' mantad di Raja' Daud do tiyonon diyolo'. Iti ngai' no o ngaran diyolo': i Asap, i Himan, om i Yodutun, it imam di pakaraja' dot id raja'. Iri nopo madtatamong do wawayaan dit angagayo om a' i' minog do tumongkiad di karaja' diyolo' tu' milo i' iyolo' do mamaramai do Paska do hiri'd tiyonon diyolo' do kumaraja' tu' uhupan i' iyolo' di tulun do Liwi di suwai. 16 Om tontok no do tadau'ddi do winonsoi diyolo' o koinsanai di pinonuhuan di Raja' Yosia do momonsoi do pamaramai di Paska, do kohompit ngai' no i piro-piro porsombahan do hiri'd pananaraban do porsombahan. 17 Om oinsanan nopo i rayat dot Israil di nakarapou'd hiri do minamaramai do Paska om turu' o tadau do koloido' diyolo' do minamaramai di Tadau'd Agayo do Roti dit A' Kipangambang. 18 Om a' po nokoumbal dot iyo'ddi o pinamaramai do Paska do mantad di hino po i Nabi Somuil. Iso' po di raja' dit id gulu nga' aiso' i' o nokoumbal do minamaramai do Paska do miagal di pinamaramai 19 do tontok di kohopod om walu' do toun di Yosia do momorinta', do rinamai di Raja' Yosia om it imam, om i tulun do Liwi, om i tulun do Yohuda om tulun dot Israil, om i tulun do poingiyon do hilo'd Yorusalim.
Kinopupuson do Pomorintaan di Yosia
20 Om kowonsoi ngai' po di Raja' Yosia iri do maan do hiri'd Walai'd Sasambayangan dot Agayo, om woyoo' no di Niko i raja' do Masir, i soudor dau do mongoi sangod do hilo'd Karkomis, it id toning do Bawang dot Iprat. Om tuminotos i' daa i Yosia do minangantob dau, 21 nga' porikot no i Niko do boros diti dot id di Yosia, “Iti nopo pisangadan om a' i' kokuro-kuro diya', oi raja' do Yohuda! Okon i' ko' mongoi saap diya' o kinorikatan ku, nga' mongoi saap di pisangod ku, om Kinorohingan i' o minonuhu' doho' do momonsoi'dti dot oruhai. Uhupan oku i' do Kinorohingan, om kada' nogi' iyau antabai, tu' patayon ko moti'ndo dau,” ka. 22 Nga' suminonsog i' i Yosia do minongoi sangod. A' i' iyau minumboyo' di pinoboros do Kinorohingan do pinolombus di Raja' Niko. Om pingunali-nali no iyau do tulun dit okon ko' raja' om ongoi no do hiri'd pisangadan di hiri'd rantai do hilo'd Mogido. 23 Om hiri noddid pisangadan diri do noonong do pana' i Raja' Yosia. Om suhuo' noddi dau o piro-piro di susuhuon dau do posoliwan dau do mantad id pisangadan diri, tu' nadalaan no kopio iyau do nosuhat. 24 Om kakato' no diyolo' iyau do mantad hiri'd korita'-kuda' dau om powoliho' no diyolo' iyau dot id korita'-kuda' do suwai di hino'd hiri, om pokoyoo' nogiddi diyolo' do hilo'd Yorusalim. Om hilo' no o kinapatayon dau om lobongo' no iyau do hiri'd kalabangan do raja'. Om oinsanan nopo i rayat do Yohuda om Yorusalim do minogihad di kinapatayon dau. 25 Om ponulis no i Nabi Yoromia, dot iso' o sinding do pogihad di Raja' Yosia. Om gisom piya do dinondo nga' sindingon kasai' po i sinding diri do hilo'd Israil, do sindingon di modsisinding do tongokusai om tongoondu' do kopomuhandaman di kinopogihadan do kinapatayon di Yosia. Om iri nopo sinding nga' pinotulis do hiri'd buuk di pinotulisan ngai' di sinding do pogihad. 26 Om iri nopo susuyon do suwai do pasal di Yosia, do pasal di kosianan dau do Tuhan, om i kotorodoko' dau do tumanud di Tourat do Tuhan, 27 om i susuyon do pasal do kowoyo-woyoo' do koposi-posion dau do mantad di timpuun i' om gisom do kinopupuson, nga' nongkotulis ngai' no do hiri'd suang do Buuk di Monusui do Pasal Ngai' di Raja' dot Israil om Yohuda.
I Yoahas o Raja' do Yohuda
1 Om pilio' no di rayat do Yohuda i Yoahas, i tanak di Yosia do kusai, om siliho' no diyolo' iyau do raja' do Yorusalim do suminowoli di tapa' dau. 2 Om duwo no nohopod om tolu o toun do tumur di Yoahas di nosiliu iyau do raja' do Yohuda, om koloido' nopo dau do momorinta' do hilo'd Yorusalim om tolu o tulan. 3-4 Om tangkapo' no di Niko i raja' do Masir, i Yoahas, om tanggayai no do hilo'd Masir. Om suhuo' noddi dau o Yohuda do mambayar do 3,400 o kilogram do pirok om 34 o kilogram do tamas do tanda' do minsiriba' iyolo' dot id dau. Om siliho' nogiddi dau do raja' i Ilyakim i tobpinai di Yoahas, om powoliho' no dau o ngaran di Ilyakim dot i Yoyakim. Om tanggayai noddi dau i Yoahas do hilo'd Masir.
I Yoyakim o Raja' do Yohuda
5 Duwo no nohopod om limo o toun do tumur di Yoyakim di nosiliu iyau do raja' do Yohuda. Om hopod om iso' o toun dau do momorinta' do hilo'd Yorusalim. Om minomonsoi iyau'd dusa dot id Tuhan, i Kinorohingan dau. 6 Tontok di nongoi di Nobukadnisar i raja' do Babil, solodo' o Yohuda, om tangkapo' no dau i Yoyakim, om kinagasan diri i Yoyakim do tinanggayan do hilo'd Babil. 7 Om haro'ddi o piro-piro di konunu-nunuan dit agayo o gatang di hiri'd Walai'd Sasambayangan dot Agayo do tinanggayan di Nobukadnisar om hirio' no dau id walai di don raja' do hilo'd Babil. 8 Om iri nopo susuyon do suwai do pasal di Yoyakim, do kohompit ngai' i winonsoi dau di sosomu' om i karaato' dau, om nokotulis ngai' no do hiri'd suang do Buuk di Monusui do Pasal Ngai' di Raja' dot Israil om Yohuda. Om i Yoyakin diri, i tanak dau'd kusai o nosiliu do raja' do suminowoli dau.
I Yoyakin o Raja' do Yohuda
9 Hopod nogi' om walu' o toun do tumur di Yoyakin di nosiliu iyau do raja'd Yohuda. Om koloido' nopo dau do momorinta' do hilo'd Yorusalim om tolu o tulan om hopod o tadau. Om iyau nga' minomonsoi id dusa dot id Tuhan. 10 Tontok di maso do momuroun kawagu o kayu om tangkapo' no om tanggayai di Raja' Nobukadnisar i Yoyakin do hilo'd Babil. Om i konunu-nunuan dit angagayo gatang do hiri'd Walai'd Sasambayangan dot Agayo nga' tinanggayan nogi' dau. Om siliho' noddi di Nobukadnisar i Sodokia, i tamanon di Yoyakin, do raja' do Yohuda om Yorusalim.2|90|HK14E| Bandar do Babil --- hilo' no pinananggayan di tulun do nangatangkap|36.10
I Sodokia o Raja' do Yohuda
11 Duwo no nohopod om iso' o toun do tumur di Sodokia di nosiliu iyau'd raja' do Yohuda. Om hopod om iso' o toun dau do momorinta' do hilo'd Yorusalim. 12 Om iyau nga' minomonsoi id dusa dot id Tuhan. Om a' iyau mininsiriba' om a' minumboyo' di Yoromia, i pinopolombus do boros do Tuhan.
Naala' o Yorusalim
13 Om sansagai no di Raja' Nobukadnisar i Sodokia do sumumpa' dot id suang do ngaran do Kinorohingan do tumorodok iyau dot id dau. Nga' alaid noddi om suminaap i' i Sodokia di Nobukadnisar. Om a' i' i Sodokia rumologo di dusa dau. Om suminurilog iyau do Tuhan, i Kinorohingan dot Israil, om a' orohian do gumuli' dot id dau. 14 Om suwai no ko' iri, om iri Walai'd Sasambayangan dot Agayo, i pinotobilang do Tuhan do maan do dau nga' sinosomu' i' di piro-piro boyoon do Yohuda, om it imam, om i rayat, tu' iyolo' nga' minodsubak i' do tingolig om minomit di kowoyo-woyoon di tulun do bansa'd suwai di kidusa di hiri'd posorili' diyolo'. 15 Om asaru' no o Tuhan, i Kinorohingan di taki-aki diyolo' do monuhu' do susuhuon dau do mongoi poposorou di tulun dau, tu' olisiu i' iyau diyolo' om olisiu iyau di Walai dau. 16 Nga' nuntotogod nogi' diyolo' i susuhuon do Kinorohingan, om nirak-irakan ngai' i nabi dau, om a' pinadul i boros dau. Om alaid noddi om kotogod no kopio o Tuhan diyolo' gisom dot aiso' no o ralan diyolo' do midu' do mantad id kototogod do Tuhan. 17 Om binsuhuo' nod Tuhan i raja' do Babil do mongoi panangod diyolo'. Om pimpatayo' no di raja' i tulun do Yohuda dit ongomulok po, om iri nogi' i tulun di hiri'd suang di Walai'd Sasambayangan dot Agayo. Om iso' pod tulun nga' aiso' no o ninsianan dau, do molohing tuu ko' omulok, om kusai tuu ko' tondu' ko' iri po i kitoruol ko' it aiso' o toruol. Patahako' ngai' nopo iyolo'd Kinorohingan dot id raja' do Babil. 18 Om iri ngai' i pakakas do Walai'd Sasambayangan dot Agayo, om i konunu-nunuan dit angagayo o gatang, om i dapu' di raja' om i dapu' di pagawai dau, nga' nanu ngai' nopo di raja' do Babil om igitai no dau do hilo'd Babil. 19 Om habao' no dau i tolig do bandar do Yorusalim, om tutudai no i bandar, om nokotonggoi ngai' diri i Walai'd Sasambayangan dot Agayo om koinsanai di walai'd raja' do mogitonggoi-tonggoi di konunu-nunuan dit angagayo o gatang di hiri'd kawalayan do raja'. 20 Om iri nopo i rayat dit a' nangapatai om tinanggayan do hilo'd Babil. Om hilo' no iyolo' do nosiliu'd turipon dau om nosiliu do turipon di sinakagon dau do gisom do norikot i maso do pomorintaan do raja' do Porsia. 21 Om iyo noddi do nongosiliu i pinoboros do Tuhan di pinolombus di Yoromia, do poillogos tomod nopondo i pomogunan do solinaid do turu' nohopod o toun do maan do poningolon di piro-piro o toun do Sabat dit a' pinadul di gulu po.
Sinuhu' di Koris do Muli' i Tulun do Yohudi
22 Tontok di sontoun nogi' i Koris i raja' do Porsia do momorinta', om wonsoyo' nod Tuhan i pinoboros dau do pinolombus di Nabi Yoromia. Om binsuhuo' nod Tuhan i Koris do popoboros do boros diti di binasa' dot id pointongkop do pomorintaan dau. Poingkaa i pinoboros dau, 23 “Poingkaa no o boros di Koris, i raja' do Porsia! Tuhan no, i Kinorohingan do momorinta' do surga, o pinoposiliu doho'd raja' do pointongkop diti pomogunan, om sinuhu' oku dau do momonsoi di walai dau do hilo'd Yorusalim, i hilo'd watas do Yohuda. Om mositi' nod gumuli' ngai' kou'd hilo', iyokoyu ngai' i tulun do songonuon do Kinorohingan! Om maha' daa om woyoon kou'd Tuhan, i Kinorohingan dokoyu,” ka.
Sinuhu' di Koris i Tulun do Yohudi do Gumuli' do Hilo'd Pomogunan Diyolo'
1 Tontok di sontoun nogi' i Koris, i raja' do pomogunan do Porsia, do momorinta' om wonsoyo' nod Tuhan, i pinoboros dau di pinolombus di Nabi Yoromia. Om tingkaho' nod Tuhan o ginawo di Koris, i raja' do pomogunan do Porsia do popoboros do ponuhuan diti do basaon dot id pointongkop di pomorintaan dau. Poingkaa i ponuhuan diri: 2 “Poingkaa no o ponuhuan di Koris, i raja' do Porsia. Nakatahak ngai' nod Tuhan, i Kinorohingan do surga dot id doho' o koinsanai do pomorintaan do hiti'd pomogunan. Om sinuhu' oku dau do popoingkakat do walai dau do hilo'd Yorusalim, i hilo'd watas do Yohuda. 3 Om isai nopo dokoyu o kohompit do tulun dau, om intirungan nod Kinorohingan! Om muli' kou no kopio do hilo'd Yorusalim, om wonsoyon i' dokoyu kawagu i Walai'd Sasambayangan do don Tuhan, i Kinorohingan dot Israil, i Kinorohingan di tukuon do hilo'd Yorusalim. 4 Om ondung haro o tongosongulun di tulun dau do hiti'd pinananggayan do pisangod dot apatut do tulungon do muli', om mositi' no do tulungon di songkoduwo dau. Mositi' no dot onuan diyolo' do pirok om tamas, om kokoriu do hilo'd ralan om piro-piro o tayam-tayam do pagandaran, om onuan do piro-piro o porsombahan do maan di Walai'd Sasambayangan dot Agayo do hilo'd Yorusalim,” ka. 5 Om pogopi-opi' ngai' noddi i boyoon do pinuruan do sompiiyon do mantad id payat do Yohuda om Binyamin, om i piro-piro ot imam om i tulun do Liwi, om i pointikid-tikid di tulun di notingkau do Kinorohingan o ginawo do gumuli' do mongoi pomonsoi di Walai'd Sasambayangan dot Agayo do hilo'd Yorusalim. 6 Om oinsanan nopo i songkoduwo diyolo' do minonulung diyolo'. Om pinapatahak iyolo' do konunu-nunuan om koburu-buruon do pirok om tamas do winonsoi, om kokoriu do hiri'd tanga'd ralan, om tayam-tayam do pagandaran, om piro-piro o koburu-buruon do suwai, om porsombahan do maan do hiri'd Walai'd Sasambayangan dot Agayo. 7 Om pinoguli' ngai' nogi' di Koris i mangkuk om i sangkir di pakayon do hiri'd Walai'd Sasambayangan dot Agayo do hilo'd Yorusalim; i pinosuang di Nobukadnisar do hiri'd walai di tingolig dau. 8 Om patahako' ngai' no di Koris i koburu-buruon diri dot id di Mitridat, i boyoon do popoopi' do tusin do pomorinta'. Om tuliso' ngai' no di Mitridat o ngaran di koburu-buruon diri do tuminanud di pinonuhuan di Sisbasar, i gobunor do Yohuda. 9-10 Iti ngai' no o ngaran di koburu-buruon diri: - mangkuk do tamas di pakayon do papatahak do porsombahan - 30 - mangkuk do pirok di pakayon do papatahak do porsombahan - 1,000 - piro-piro mangkuk do suwai - 29 - mangkuk do tamas dit ongokooro' - 30 - mangkuk do pirok dit ongokooro' - 410 - i piro-piro o koburu-buruon do suwai - 1,000 11 Oinsanan nopo nga' limo noribu om apat nahatus o mangkuk do tamas om pirok om i piro-piro koburu-buruon do suwai. Om igitai ngai' nopo di Sisbasar iri do tontok di minuli' iyau om koinsanai di tulun do suwai di nangatanggayan, do tuminongkiad do Babil om kuminaa'ddi do hilo'd Yorusalim.
Dopitar do Ngaran do Tulun di Minuli' do Mantad id Pomogunan do Pinananggayan do Pisangod
1 Om ogumu' i' ot id pogialatan di tulun do natanggayan do pisangod do tuminongkiad do watas do Babil, om guminuli'ddi do hilo'd Yorusalim om hilo'd Yohuda, om sompori-pori nopo iyolo' do kuminaa do hiri'd bandar diyolo'. Iri nopo sompiiyon diyolo' di nangatanggayan do pisangod om hilo' nod Babil o pinomogun-mogunan do mantad po di natangkap om natanggayan iyolo' di Raja' Nobukadnisar do hilo'. 2 Boyoon nopo diyolo' om i Sorubabil, i Yosua, i Nohomia, i Soraya, i Riilaya, i Mordikai, i Bilsan, i Mispar, i Bigwai, i Rohum om i Baana. Iti no o dopitar do ngaran di pinuruan do sompiiyon do bansa' dot Israil, om kogumuo' do tulun do mantad id pointikid-tikid do pinuruan do sompiiyon di minuli' do mantad id pomogunan do pinananggayan do pisangod: 3-20 Paros --- 3 2,172 Sopasa --- 372 Ara --- 775 Pahat-Muab (sinakagon di Yosua om i Yoab) --- 2,812 Ilam --- 1,254 Satu --- 945 Sakai --- 760 Bani --- 642 Bobai --- 623 Asgad --- 1,222 Adonikam --- 666 Bigwai --- 2,056 Adin --- 454 Atir (i roitan dot i Hiskia) --- 98 Bosai --- 323 Yora --- 112 Hasum --- 223 Gibar --- 95 21-35 Om iri nogi' i tulun di miniyon dot id kabandaran diti o komolohingan di gulu po nga' guminuli' i' do mantad id pomogunan di pinananggayan do pisangod: Baitlahim --- 123 Nitopa --- 56 Anatot --- 128 Asmawit --- 42 Kiriat Yiarim, Kopira om Biirot --- 743 Rama om Giba --- 621 Mikmas --- 122 Baitol om Ai --- 223 Nibo --- 52 Magbis --- 156 Ilam di tiso' --- 1,254 Harim --- 320 Lod, Hadid om Ono --- 725 Yorikou --- 345 Sinaa --- 3,630 36-39 Iti no o dopitar do ngaran di piro-piro pinuruan do sompiiyon dot imam di minuli' do mantad id pomogunan di pinananggayan do pisangod: Yodaya (sinakagon di Yosua) --- 973 Imor --- 1,052 Pasur --- 1,247 Harim --- 1,017 40-42 Iri no piro-piro pinuruan do sompiiyon do Liwi di minuli' do mantad id pomogunan di pinananggayan do pisangod om: Yosua om Kadmiol (sinakagon di Hodawia) --- 74 I piro-piro modsisinding do hiri'd Walai'd Sasambayangan dot Agayo (sinakagon di Asap) --- 128 I madtatamong di wawayaan di Walai'd Sasambayangan dot Agayo(sinakagon di Salum, i Atir, i Talmon, i Akub, i Hatita om i Sobai) --- 139 43-54 Iti no o dopitar do ngaran di pinuruan do sompiiyon di piro-piro o maganu-anu do hiri'd Walai'd Sasambayangan dot Agayo, di minuli' do mantad id pomogunan di pinananggayan do pisangod: Siha, Hasupa, Tabaot, Kiros, Siaha, Padon, Libana, Hagaba, Akub, Hagab, Samlai, Hanan, Gidol, Gahar, Riaya, Risin, Nikoda, Gasam, Usa, Pasia, Bosai, Asna, Mounim, Nopusim, Bakbuk, Hakupa, Harhur, Baslit, Mohida, Harsa, Barkos, Sisora, Tima, Nosia om Hatipa. 55-57 Iti ngai' no pinuruan do sompiiyon di piro-piro o susuhuon di Suliman do minuli' do mantad id pinananggayan do pisangod. Sotai, Sopirit, Poruda, Yaala, Darkon, Gidol, Sopasa, Hatil, Pokirit-Hasibaim om Ami. 58 Koinsanai nopo do pinuruan do sompiiyon di piro-piro o tulun di maganu-anu do hiri'd Walai'd Sasambayangan dot Agayo om i susuhuon di Suliman di minuli' do mantad id pinananggayan do pisangod om 392 o tulun. 59-60 Iri ngai' nopo tulun di guminuli' do mantad hilo'd bandar do Tilmola, Tilharsa, Kerub, Adan om Imor, om 652 o tulun. Iyolo' nopoddi nga' mantad id pinuruan do sompiiyon di Dolaya, Tobia om i Nikoda. Nga' a' i' diyolo' milo do pointalangon kopio do sinakagon iyolo' do bansa' dot Israil. 61-62 Om haro nogi' o piro-piro o pinuruan do sompiiyon dot imam dot a' nokito i tinulisan do pasal di taki-aki diyolo', iri no i pinuruan do sompiiyon di Habaya, di Hakos, om di Barsilai. (Iri nopo taki-aki di pinuruan do sompiiyon di Barsilai nga' minangawin do songulun o tondu' do mantad id sinakagon di pinuruan do sompiiyon di Barsilai, i hilo'd Giliad. Om pakayo' noddi dau o ngaran do sompiiyon di tiwanon dau.) Om a' iddi iyolo' naanu do sumiliu dot imam tu' a' i' diyolo' milo do pointalangon kopio ondung isai o taki-aki diyolo'. 63 Om noduhan diri iyolo' di gobunor do watas do Yohuda do mangakan di taakanon di nakatahak dot id Kinorohingan, do daamot po dot aiso' ot imam di milo do mongilo kopio do mamakai dit Urim om Tumim. 64-67 Koinsanai nopo di tulun di mantad hilo'd pinananggayan do pisangod do minuli' do hilo'd pomogunan diyolo' om 42,360 o tulun. Om suwai no ko' iyolo' om i piro-piro o susuhuon diyolo' nga' minuli' nogi' do kogumuon nopo om 7,337 o tulun. Om kogumuon no di modsisinding om 200 o tulun. Om nigitan ngai' diyolo' i tayam-tayam diyolo' do poingkaa o kogumuo': Kuda' --- 736 Bagal --- 245 Unta --- 435 Kaladai --- 6,720 68 Om soira' di nokorikot ngai' i tulun di nangatanggayan do pisangod diri do hiri'd Walai'd Sasambayangan dot Agayo do hilo'd Yorusalim, om haro'ddi o piro-piro o boyoon do pinuruan do sompiiyon do minanahak do porsombahan do tumanud do kagaanan do ginawo diyolo' do papatahak. Om iri nopo nga' maan do pomonsoi kawagu di Walai'd Sasambayangan dot Agayo. 69 Om papatahak no iyolo' do tumanud di milo diyolo'd patahakon. Om kogumuon nopo dot oinsanan di pinatahak diyolo' om 500 o kilogram do tamas, om 2,800 o kilogram do pirok, om 100 o rasuk dit anaru do pakayon dit imam. 70 Om iyon ngai' noddi it imam om i tulun do Liwi, om i wookon di tulun diri, do hilo'd Yorusalim om hiri'd kabandaran dit id somok do Yorusalim. Om iri no i modsisinding, om i madtatamong do wawayaan dot agayo di Walai'd Sasambayangan dot Agayo, om piro-piro o tulun di maganu-anu do hiri'd Walai'd Sasambayangan dot Agayo om i tulun dot Israil do suwai om miniyon do hiri'd bandar di pinomogun-mogunan di taki-aki diyolo' di gulu po.
Tuminimpuun Kawagu do Sumambayang
1 Tontok di tulan do koturu', om nongkoundorong noddi i tulun dot Israil do hiri'd bandar diyolo'. Om timung ngai' noddi iyolo' do hilo'd Yorusalim di tadau do koiso' do tulan diri. 2 Om timpuun noddi i Yosua, i tanak di Yihosadak om i piro-piro o tambalut dau, iri no i piro-piro ot imam diri, om i Sorubabil, i tanak di Sialtiol, om mogiwoyo-woyo' di tobpinai dau do minomonsoi kawagu di pananaraban do porsombahan dot id Kinorohingan dot Israil. Om koponorob indo iyolo' do porsombahan di sumbolion dot id sakai di pananaraban do porsombahan diri, do tumanud di pinonuhuan di nokotulis dot id suang do Tourat di Musa, i susuhuon do Kinorohingan. 3 Om mulong po dot ooris daa iyolo' di tulun di poingiyon do hiri'd pomogunan diri, nga' winonsoi i' diyolo' i pananaraban do porsombahan do hiri'd kinoiyonon mantad di gulu po. Om timpuun noddi iyolo' do papatahak kawagu do porsombahan di sorobon do dongkosuabon om dongsosodopon. 4 Om rinamai nogi' diyolo' i Tadau dot Agayo do Kinuhub-Kuhub, do tumanud dit oturan; om monikid tadau iyolo' do papatahak do porsombahan di sumbolion di natantu' mantad do patahakon do tontok do tadau'ddi. 5 Om suwai no ko' iri om oulud diri o kapatahakan diyolo' do porsombahan di sorobon om i porsombahan di sumbolion do tontok do Tadau dot Agayo do Tulan do Wagu om tontok do pointikid-tikid do haro o pitimungan do suwai do sumambayang dot id Tuhan. Om papatahak nogi' iyolo' do porsombahan dot id Tuhan do tumanud do kagaanan do ginawo diyolo'. 6 Om mulong po dot a' po iyolo' nokotimpuun do mamaal kawagu di Walai'd Sasambayangan dot Agayo, nga' tuminimpuun no iyolo' do monorob do porsombahan di sumbolion dot id Tuhan, di tadau do koiso' di tulan do koturu'.
Tinimpuunan do Mamaal i Walai'd Sasambayangan dot Agayo
7 Om papatahak no i rayat do tusin do pamagadsi' di tukang watu om i tukang kayu. Om pinopokirim nogi' iyolo'd takanon, om tinumon om tumau do saitun dot id bandar do Tirus om bandar do Sidon do maan do poolonon do kayu sedar do Libanon di mantad id piro-piro o bandar diri. Om pokoyoon do hilo'd Yopi i kayu'ddi do pawayaon di rahat. Iri ngai' no o winonsoi di rayat tu' nakabanar no iyolo' di Koris, i raja' do Porsia. 8 Om tontok di tulan do koduwo'd toun do mantad di kinogulian di tulun dot Israil do hilo'd Yorusalim, om timpuun no iyolo' do momonsoi kawagu di Walai'd Sasambayangan dot Agayo. Om minaal ngai' nopo iyo Sorubabil, om i Yosua, om i piro-piro o tambalut diyolo' do suwai dit iso-iso' o bansa', om i nogi' i piro-piro ot imam, om i tulun do Liwi, om koinsanai di tulun di guminuli' do hilo'd Yorusalim do mantad id pomogunan di pinananggayan do pisangod. Om iri nopo tulun do Liwi di duwo nohopod o toun do tumur om it otuo ko' iri om siniliu ngai' nopo do momohuruan di karaja' do mamaal di Walai'd Sasambayangan dot Agayo. 9 Om siniliu nogi' do momohuruan di buruon do mamaal di Walai'd Sasambayangan dot Agayo i Yosua, i tulun do Liwi diri, om i tangaanak dau om i tobpinai dau, om i Kadmiol om i tangaanak dau, (i mantad id pinuruan do sompiiyon do Hodawia.) Om minuhup nogi' diyolo' i tulun do Liwi, i mantad id pinuruan do sompiiyon di Honadad. 10 Om daamot nopo di piro-piro o tulun di mamaal do popowonsoi di poimpahan di Walai'd Sasambayangan dot Agayo, om iri nopo i piro-piro ot imam dit ongkirasuk dot anganaru om it ongkiinigit do torumpit, om minongoi ingkakat do hiri'd kinoiyonon di natantu' mantad. Om iri tulun do Liwi, i mantad id pinuruan do sompiiyon di Asap nga' minongoi nogi' ingkakat do hiri. Om ongkiinigit iyolo' do tagung dit ongokooro'. Om pamarayou no iyolo'd Tuhan do tumanud dit oturan di natantu' mantad, dit i Daud po o raja'. 11 Om podsinding no i rayat do sinding do pamarayou'd Tuhan, om piguli-guli' diyolo' do modsinding i gulion di sinding diri, do poingkaa, “Tuhan nopo om osonong kopio! Om mompus-ompus o kosianan dau dot id Israil,” ka. Om oinsanan nopo i tulun do tuminanud do mimpangkis om mamarayou'd Tuhan tu' nokowonsoi no i poimpahan di Walai'd Sasambayangan dot Agayo. 12 Nga' ogumu' o tulun do minlompud do mihad dot id pogialatan di piro-piro ot imam, om i tulun do Liwi, om i piro-piro o boyoon do pinuruan do sompiiyon di komolohingan no, di nokokito di Walai'd Sasambayangan dot Agayo di gulu po, do tontok di miontong iyolo' do powonsoi di poimpahan di Walai'd Sasambayangan dot Agayo'ddi. Nga' iri nopo tulun do suwai di hiri, om sampangkis-pangkis poo dot atataadan, 13 om a' noddi oilaan ondung hinonggo i mihad om hinonggo i mimpangkis dot atataadan tu' opuhod tomod o giniakan diyolo', gisom do korongou ngai' i hiri'd sodu'.
Nohimpagangan i Mamaal di Walai'd Sasambayangan dot Agayo
1 Om korongou no di piro-piro o pisangod do tulun do Yohuda om Binyamin do waalon kawagu di tulun di nokoguli' do mantad id pomogunan di pinananggayan do pisangod i Walai'd Tuhan, i Kinorohingan dot Israil. 2 Om ongoi noddi iyolo' solowot di Sorubabil om i piro-piro o boyoon di sinompuruan do sompiiyon om boro-boros nod, “Muhup daa iyahai dokoyu do maal dilo Walai'd sasambayangan. Tu' iyahai nga' miagal i' dokoyu tu' tumuku i' dot id Kinorohingan dokoyu, om papatahak kasai' iyahai do porsombahan di sumbolion dot id dau do mantad poddi pinakaa iyahai di Isarhadon, i raja' dot Asur diri do hiti,” ka diyolo'. 3 Nga' boros ka di Sorubabil, om i Yosua, om i piro-piro o boyoon do sinompuruan do sompiiyon do tulun dot Israil dot id diyolo', “A' i' iyahai mokiuhup dokoyu do mamaal diti Walai'd Tuhan, i Kinorohingan dahai. Iyahai noo o mamaal diti do miagal di pinonuhuan di Koris, i raja' do pomogunan do Porsia dot id dahai,” ka. 4 Om timpuun noddi do popoluhoi do ginawo di tulun do Yohudi i tulun di laid no do poingiyon do hiri'd pomogunan diri, om monompurolosi iyolo' diyolo', om otingkadan i' daa'ndo i waalon diri. 5 Om sinisipan nogi' diyolo' i piro-piro o pagawai do pomorinta' do pomogunan do Porsia do poningkod di wonsoyon di tulun do Yohudi, do solinaid di Raja' Koris do momorinta' om gisom i' dit i Raja' Darius o raja' do pomogunan do Porsia.
Tiningkod do Momonsoi Kawagu i Bandar do Yorusalim
6 Tontok di koimpuunon do pomorintaan di Raja' Ahaswiros, om ponulis nod surat do monondos diyolo' dot araat i piro-piro o pisangod di tulun do poingiyon do hilo'd Yorusalim om Yohuda. 7 Om tontok nogi' di pomorintaan di Raja' Artasasta, i Raja' dot Agayo do hilo'd Porsia nga' haro i' o nosiliu do miagal diri. Om ponulis nod surat i Bislam, om i Mitridat, om i Tabiil om i piro-piro o tambalut diyolo'd suwai do kumaa dot id di Raja' Artasasta. Om iri nopo surat diri nga' tinulis dot id suang do boros dot Aram om posolinon diri dot id boros dit osuhutan do tontok di basaon. 8-9 Om nakaramit po i Artasasta do surat do pasal do Yorusalim. Iri nopo surat nga' pinokirim di Rohum i gobunor diri om i Simsai i gomponulis do watas om i piro-piro o tambalut diyolo', om i piro-piro o gompomutus om koinsanai di pagawai do suwai di mantad hilo'd Irik, om Babil, om Susan, i hilo'd pomogunan dot Ilam, 10 om i piro-piro o bansa'd suwai di pinoundaliu di Asnapar, it abantug diri. Iyolo' nopo nga' sinuhu' dau do momogun-mogun do hilo'd bandar do Samaria om id piro-piro o bandar do suwai dit id watas dot Iprat di ponong id Kotonobon. 11 Iti no o suang di surat diri: “Kumaa id Raja' Artasasta. Mantad id piro-piro susuhuon nu di poingiyon do hiti'd watas dot Iprat Kotonobon. Tumabi' iyahai diya'. 12 Orohian iyahai do popoilo do Tuan Raja' dot iri nopo i tulun do Yohudi di kuminaa'd hiti, do mantad id watas do suwai di porintaon nu, om poundorong do hiti'd Yorusalim om wonsoyon no kawagu diyolo' i bandar dot araat om obinsaap. Nokotimpuun no iyolo' do momonsoi kawagu di tolig om a' no diyolo' alaid dot opongo. 13 Oi Tuan Raja', ondung owonsoi kawagu i bandar diri, om opongo do momonsoi i tolig di bandar, om tumingkod nondo i tulun do hiri do mambayar do sukai, om okuri' nondo it aanu do pomorintaan do Tuan Raja'. 14 Om a' i' apatut do piantangan tomod nopo dahai o Raja' dot orugi', tu' osonong i' kopio o winonsoi nu dot id dahai. Om iri no o kapabarasan dahai do 15 sorisidon kopio do mogontong i nokotulis dot id suang do buuk di monusui do pasal do taki-aki do Tuan Raja'. Om oilaan indo do Tuan Raja' do mantad id buuk do pinotulisan diri do bandar nopo do Yorusalim nga' obinsaap do mantad di gulu po, om mamagangau di piro-piro o raja' om i pomorinta' di watas do hilo'. Om osusa' mantad no do momorinta' o tulun do hilo'. Om iri noddi o kinapamaraagan do bandar diri. 16 Om oilaan no dahai, oi Raja', dot ondung owonsoi kawagu i bandar diri om opongo i tolig di bandar om a' ko no koporinta' di watas dot Iprat di ponong id Kotonobon,” ka. 17 Om pokirimo' no di raja' ot isimbar do poingkaa, “Kumaa id di Rohum, i gobunor do watas, om id di Simsai, i gomponulis do watas, om kumaa id piro-piro o tambalut diyolo'd suwai, i poingiyon do hilo'd Samaria, om it id kabandaran do suwai om id watas dot Iprat di ponong id Kotonobon. Tumabi' ngai' oku dokoyu! 18 Iri nopo surat do pinokirim dokoyu dot id doho' om nasalin no om nabasa' dot id doho'. 19 Om nokoponuhu' oku no do monorisid kopio, om noilaan noddi dot iri nopo bandar do Yorusalim nga' obinsaap mantad no do piro-piro o raja' do mantad di gulu po, om iri tulun do songingiyon do hilo' nga' kogumuan no do sumasaap om moninimpuun do kagangahan. 20 Nokoumbal i' di gulu po do haro o piro-piro o raja' dit ongokoris do nokopomorinta' do hilo', om nokopomorinta' do koinsanai di watas dot Iprat do ponong id Kotonobon. Om minonimung iyolo' do sukai om i titimungon do dong pomorinta' do mantad id rayat. 21 Om iyo nopoddi om moro-boros oku no do mogodu ngai' di tulun do momonsoi kawagu di bandar do gisom do haro kawagu o boros ku. 22 Om wonsoyo' no kopio dokoyu'd oruhai iti ponuhuan ku'dti, om kada' dokoyu popioling-olingo', om a' i' agayo o korugian ku!” ka. 23 Om kabasa' poddi i surat do mantad id di Raja' Artasasta dot id di Rohum, om id di Simsai, om id piro-piro o tambalut diyolo' do suwai, om arau-arau ngai' no iyolo' do minongoi'd hilo'd Yorusalim. Om sansagai tomod no diyolo' i tulun do Yohudi do tumingkod do momonsoi kawagu di bandar.
Tuminimpuun Kawagu do Mamaal di Walai'd Sasambayangan dot Agayo
24 Om kotingkadai no do mamaal i Walai'd Sasambayangan dot Agayo, om a' no nosoupan kawagu do gisom di koduwo do toun do pomorintaan di Darius, i raja' do Porsia.
1 Tontok nopo do maso'ddi nga' tuminimpuun do mimboros dot id suang do ngaran do Kinorohingan dot Israil o duwo o nabi do kumaa id tulun do Yohudi di poingiyon do hilo'd Yohuda om hilo'd Yorusalim. Iyolo' nopo nga' i Hagai om i Sakaria, i tanak di Ido. 2 Om korongou poddi iyolo' do boros di duwo o nabi diri, om timpuun no i Sorubabil i tanak di Sialtiol, om i Yosua i tanak di Yosadak, do mamaal kawagu di Walai'd Sasambayangan dot Agayo di hilo'd Yorusalim. Om nuhupan nogi' iyolo' di duwo o nabi diri. 3 Nga' olomus nopo do ruminikot i Tatnai, i gobunor do watas dot Iprat di ponong id Kotonobon do miwoyo' di Sitar Bosnai om i piro-piro o tambalut diyolo' do hilo'd Yorusalim do minongoi solowot di tulun do Yohudi. Om ponguhot no iyolo', “Isai o minonuhu' dokoyu do mamaal om monukup do koburu-buruon diti Walai'd Sasambayangan diti?” ka. 4 Om boros ka kawagu diyolo', “Isai ngai' o ngaran di tulun di muhup do mamaal diti Walai'd Sasambayangan dot Agayo diti?” ka. 5 Nga' piantangan id Kinorohingan om intirungan dau o koinsanai di boyoon do Yohudi gisom dot a' iddi i piro-piro o pagawai do Porsia minomonsoi do nunu-nunu dot a' po iyolo' koponulis do surat dot id di Darius, om a' po kaanu dot isimbar dau. 6 Iti no o surat di pinokirim diyolo' dot id di Raja' Darius: 7 “Kumaa dot id di Raja' Darius. Maha' daa om osimbayan o Raja' do momorinta'! 8 Popoilo iyahai do Tuan Raja' do minongoi iyahai do hilo'd watas do Yohuda om nokito dahai do maan no kawagu waalo' i Walai'd Tuhan, i Kinorohingan dit Agayo, do watu dit angagayo o pomonsoi om linopisan do kayu i limput. Om sonongon tomod diyolo' o pomomonsoi'ddi om a' i' diyolo' opitingkad-tingkadan do momonsoi. 9 Om uhoto' ngai' no dahai i boyoon do bansa'ddi ondung isai o minonuhu' diyolo' do mamaal kawagu di Walai'd Sasambayangan diri, om monukup di koburu-buruon do hiri. 10 Om pinokianu ngai' nogi' dahai o ngaran diyolo' om osunudan i' dahai o Tuan Raja' ondung isai ngai' o boyoon do mamaal diri. 11 Om boros ka diyolo'd suminimbar, ‘Iyahai nopo om susuhuon do Kinorohingan do tawan om pomogunan om koinsanai do nunu nopo. Om waalon kawagu dahai iti Walai'd Sasambayangan dot Agayo, i pinoingkakat om sinukup do koburu-buruon dot iso' o raja' dot Israil dit abantug kopio di piro-piro nohopod o toun do nakatalib. 12 Nga' pinopotogod iddi do Kinorohingan do surga, i taki-aki dahai, om pologoso' noddi dau iyolo' do naala' di Raja' Nobukadnisar, i raja' do pomogunan do Babil, i sinakagon do Kasdim. Om raago' no di raja' iti Walai'd Sasambayangan dot Agayo om tanggayai no i bansa' dahai do hilo'd pomogunan do Babil. 13 Om kosiliu noddi i Koris do raja' do Babil om tontok di koiso' nogid toun do momorinta' iyau, om pomoros no iyau do monuhu'd mamaal kawagu diti Walai'd Sasambayangan dot Agayo. 14 Om i koburu-buruon do mantad id Walai'd Sasambayangan dot Agayo, i tamas om pirok do winonsoi, i nanu di Raja' Nobukadnisar do mantad hiti'd Yorusalim om i pinosuang dau do hiri'd walai'd tingolig do hilo'd Babil, nga' pinoguli' i' di Raja' Koris. Om patahako' no di Raja' Koris i koburu-buruon diri dot id di Sisbasar, i siniliu dau do gobunor do Yohuda. 15 Om suhuo' no iyau di raja' do mongigit ngai' di koburu-buruon diri om popoguli' do hiri'd Walai'd Sasambayangan dot Agayo di hilo'd Yorusalim, om mamaal kawagu di Walai'd Sasambayangan dot Agayo'ddi. 16 Om ongoi noddi i Sisbasar do hilo'd Yorusalim om powonsoyo' no dau i poimpahan di Walai'd Sasambayangan dot Agayo. Om mantad poddi om gisom do baino' om wonsoi-wonsoyon nori, nga' a' poddi ma nopongo,’ ka diyolo'. 17 Om iyo nopoddi om ondung kotumboyo' o Tuan Raja' om osonong do sorisidon kopio do mogontong o hiri'd potutulisan do pasal do pomorinta' do hilo'd Babil, ondung otopot ko' amu' do nokoponuhu' i Raja' Koris do mamaal kawagu di Walai'd Sasambayangan di hiti'd Yorusalim. Om poiloon nondo iyahai ondung poingkuro ot osorou do Tuan Raja' do pasal do hal diti,” ka.
Nokito i Pinonuhuan di Raja' Koris do Hiri'd Pinotulisan
1 Om ponuhu' noddi i Raja' Darius do mogihum om monorisid kopio di hiri'd potutulisan do pasal do pomorinta' di poingopi' do hilo'd Babil. 2 Nga' hilo'd bandar dot Amita, i hilo'd watas do Midia, om okon i' ko' hilo'd Babil, o kinokitanan dot iso' o surat di linopi do pinotulisan do poingkaa: 3 “Tontok di koiso' nogi' do toun di Raja' Koris do momorinta', om ponuhu' no i Raja' do mamaal kawagu di Walai'd Sasambayangan dot Agayo di hilo'd Yorusalim, i tiyonon do tulun do papatahak do porsombahan om tiyonon do monorob do porsombahan di sumbolion. Kasawato' nopo di Walai'ddi om duwo nohopod om turu' o mito om kalaabo' nga' duwo i' nohopod om turu' o mito. 4 Iri nopo pomolimput om lopisan do kayu o pointikid-tikid do tolu o lapis do watu. Om koinsanai dit apakai do pomonsoi nga' bayaran ngai' i' do mantad id kousinan do dong pomorinta'. 5 Om iri koburu-buruon do hiri'd Walai'd Sasambayangan dot Agayo, do hilo'd Yorusalim, i tamas om pirok do winonsoi, i tinanggayan di Raja' Nobukadnisar do hiti'd Babil, nga' potondulion kopio do hiri'd pinoiyanan mantad,” ka.
Minonuhu' i Darius do Monuntun Kawagu do Mamaal di Waalon
6 Om pokirimo' no di Darius ot isimbar do poingkaa, “Kumaa dot id di Tatnai, i gobunor do watas dot Iprat di ponong id Kotonobon, om id di Sitar Bosnai, om id piro-piro o pagawai do watas dot Iprat di ponong id Kotonobon. Kada' kou pamagangau di tulun do Yohudi diri, 7 om kada' kou pomohimpogong do mamaal di Walai'd Sasambayangan dot Agayo diyolo'. Pologoson nopo i gobunor do Yohuda om i piro-piro o boyoon do tulun do Yohudi do mamaal di Walai'd Sasambayangan diri do hiri'd winaalan mantad di gulu po. 8 Om suhuon ku iyokoyu do muhup diyolo' do mamaal diri. Om koinsanai dit apakai diyolo' do pomonsoi'ddi nga' mositi' no do bayaran dot oruhai do mantad id kousinan dit aanu do mantad id sukai dit otimung do hino'd watas dot Iprat di ponong id Kotonobon, om a' no opiundarang-darangan i waalon. 9 Om suwai no ko' iri, om kada' no dokoyu kolihuwai do papatahak do nunu nopo i pokionuon di piro-piro ot imam do hilo'd Yorusalim. Sapi' tuu do tontoluhan dit okoro' po ko' dumba' ko' tanak do dumba' do maan do porsombahan di sumbolion dot id Kinorohingan do surga, om gandum om silaon om waig dot anggur om tumau do saitun. 10 Wonsoyon ngai' no o miagal diri, om kapatahak i' iyolo' do porsombahan di sumbolion di korohian do Kinorohingan do surga, om opokionuan oku indo diyolo' do barakat, om i tangaanak ku'd tongokusai nga' opokionuan nogindo do barakat. 11 Om momoros oku nogi' dot ondung haro o tulun dot a' mumboyo' diti boros ku om ngoyon nopo iduwo' o tiso' di torigi do walai dau om lohisan no o somputul om posuhakon nopo do tinan di tulun diri do gisom do kolopuson. Om silihon nopo do pataaman do rinomos i walai dau. 12 Om Kinorohingan no, i minomili' do Yorusalim do tiyonon do tulun do sumambayang dot id dau, o mamatai dot isai nopo o raja' ko' bansa' di kasaap do tumolibamban diti ponuhuan om i mumbal daa do mamaraag di Walai'd Tuhan di hilo'd Yorusalim. Iyoho' no, i Darius, o monuhu' diti. Om mositi' no dot umboyoon ngai' iti!” ka.
Sinambayangan i Walai'd Sasambayangan dot Agayo
13 Om wonsoyo' ngai' nopo di Tatnai, i gobunor do watas dot Iprat di ponong id Kotonobon, om i Sitar Bosnai om i piro-piro o tambalut diyolo' i pinonuhuan di Raja' Darius diri. 14 Om potilombuso' nopo di piro-piro o boyoon do tulun do Yohudi do mamaal i Walai'd Sasambayangan dot Agayo, om a' no opiundarang-darangan. Om noodsuur nogi' iyolo' di boros di Nabi Hagai om i Nabi Sakaria. Om kopongo no diyolo' do mamaal i waalon do tumanud di pinonuhuan do Kinorohingan dot Israil, om i pinonuhuan di Koris, om i Darius, om i Artasasta, i piro-piro o raja' do pomogunan do Porsia. 15 Om kopongo noddi kopio diyolo' i Walai'd Sasambayangan dot Agayo'ddi di tadau'd kotolu do tulan dot Adar, di koonom do toun do pomorintaan di Raja' Darius. 16 Om sambayangai noddi di tulun dot Israil, om i piro-piro ot imam, om i tulun do Liwi, om koinsanai di tulun di nokoguli' do mantad id pomogunan di pinananggayan do pisangod, i Walai'd Sasambayangan dot Agayo do mikuwo'd ongooropod tomod o ginawo diyolo'. 17 Om tontok no do kinapanambayangan diri do pinapatahak iyolo' do porsombahan do hatus o tinan do sapi' di tontoluhan, om duwo nahatus o tinan do dumba' di tontoluhan, om apat nahatus o tinan do tanak do dumba'. Om hopod om duwo o kambing do maan do porsombahan do pangampun do dusa do toinsanan di tulun dot Israil, do soronginanan o pointikid-tikid di payat dot Israil. 18 Om sinompipi' nogi' diyolo' o sinompuruan di piro-piro ot imam om i tulun do Liwi do maganu-anu do hiri'd Walai'd Sasambayangan dot Agayo do tumanud dit oturan di nokotulis do hiri'd Buuk di Musa.
Tadau dot Agayo do Paska
19 Om ramayo' ngai' no di tulun di nokoguli' do mantad id pomogunan do pinananggayan do pisangod, o Tadau dot Agayo do Paska do tontok di tadau'd kohopod om apat di tulan do koiso', di toun kawagu. 20 Om oinsanan nopo it imam om i tulun do Liwi do minomolidang do tinan diyolo', om ongolidang noddi iyolo'. Om sumbolio' noddi di tulun do Liwi i piro-piro o tayam-tayam do maan do porsombahan di sumbolion do tontok do Paska do maan do koinsanai di tulun do guminuli' do mantad id pomogunan di pinananggayan do pisangod, om maan ngai' dit imam, om maan do diyolo'. 21 Iri nopo porsombahan di sumbolion diri nga' nakan do toinsanan di tulun dot Israil di nokoguli' do mantad id pomogunan do pinananggayan do pisangod, om koinsanai di tulun do poingiyon dot id pomogunan diri, i tuminongkiad do mantad id kowoyo-woyoon do momonsoi'd dusa om rumikot nondo do mongoi sambayang dot id Tuhan, i Kinorohingan do tulun dot Israil. 22 Om rinamai po diyolo' i Tadau'd Agayo do Roti dit A' Kipangambang do solinaid do turu' o tadau, do mikuwo'd ongotood kopio iyolo'. Om ongotood tomod iyolo' tu' pinolisiu id Tuhan i raja' dot Asur dot id diyolo' om minuhup iyau diyolo' do minamaal di Walai'd Tuhan i Kinorohingan do tulun dot Israil.
Nokorikot i Isra do Hilo'd Yorusalim
1 Piro-piro noddi o toun do mantad diri, do tontok dit i Artasasta o raja' do pomogunan do Porsia, om haro o songulun o kusai do roitan dot i Isra, i mantad id sinakagon di Harun, i Boyoon dot Agayo dot Imam. Om poingkaa o sinolusukan di Isra do mimpuun dot id dau om gumuli' dot id di Harun, i Boyoon dot Agayo dot Imam diri: i Isra nopo nga' tanak di Asaria, om i Asaria no om tanak di Hilkia, om i Hilkia no om 2 tanak di Salum, om i Salum no om tanak di Sadok, om i Sadok no om tanak di Ahitub, 3 om i Ahitub no om tanak di Amaria, om i Amaria no om tanak di Asaria, om i Asaria no om tanak di Morayot, 4 om i Morayot no om tanak di Soraya, om i Soraya no om tanak di Usi, om i Usi no om tanak di Buki, 5 om i Buki no om tanak di Abisua, om i Abisua no om tanak di Pinihas, om i Pinihas no om tanak di Iliasar, om i Iliasar no om tanak di Harun, i Boyoon dot Agayo dot Imam. 6-7 I Isra nopo nga' tulun dit oilo kopio, om it ogumu' ot osuhutan di Tourat, i pinatahak do Tuhan, i Kinorohingan dot Israil dot id di Musa. Om patahako' ngai' nopo di raja' o koinsanai di pinokianu di Isra tu' binarakatan id Tuhan i Isra. Tontok di koturu' nod toun do pomorintaan di Raja' Artasasta om pamanau no i Isra do mantad hilo'd Babil do kuminaa do hilo'd Yorusalim do miwoyo' do piro-piro o tulun dot Israil: i piro-piro ot imam, i tulun do Liwi, i modsisinding, i madtatamong do wawayaan di Walai'd Sasambayangan dot Agayo, om i piro-piro o tulun di maganu-anu mantad. 8-9 Om pamanau no iyolo' do mantad hilo'd Babil di tadau do koiso' do tulan di koiso', om nuhupan i' iyolo'd Kinorohingan gisom do nokorikot iyolo' do hilo'd Yorusalim di tadau'd koiso' do tulan do kolimo. 10 Om naayi-ayi' no kopio di Isra o ginawo dau do minsingilo di Tourat do Tuhan do mikuwo'd tonudon dau, om potuduk iyau do koinsanai di ponudukan om oturan diri dot id tulun dot Israil.
I Surat do Mantad id Pomorinta' do Pinatahak di Artasasta dot id di Isra
11 Iti no o surat do tinahak di Raja' Artasasta dot id di Isra, it Imam om it oilo kopio do koinsanai dit Tourat. 12 “ Mantad id di Raja' Artasasta, om kumaa dot id di Isra, it Imam om it oilo kopio do Tourat do Kinorohingan do surga. 13 Poboroson ku do potumboyo' oku i' dot isai nopo o tulun dot Israil, dit orohian do gumuli' om koinsanai dit imam, om i tulun do Liwi, do pointongkop diti pomogunan do porintaon ku do moyo' diya' do gumuli' do hilo'd Yorusalim. 14 Iyoho' no, om i turu' o gomponosihat ku o monuhu' diya' do mongoi pogontong kopio ondung poingkuro-kuro no o hilo'd Yorusalim om hilo'd Yohuda. Antangan no kopio ondung natanud i Tourat do Kinorohingan di pinaharapan diya'. 15 Om igitan nogi' iti tamas om pirok, i maan dahai di piro-piro ponosihat ku do porsombahan dot id Kinorohingan dot Israil, i Kinorohingan di poundorong do hilo'd Yorusalim. 16 Om igitan nogi' o koinsanai di pirok om tamas di notimung nu do mantad id pointongkop do watas do Babil om koinsanai di pinatahak di tulun dot Israil om i piro-piro ot imam dot id Walai'd Tuhan, i Kinorohingan diyolo' di hilo'd Yorusalim. 17 Om sonong-sonongon no o pamamakai di tusin do pomoli do sapi' do tontoluhan, om kambing do tontoluhan, om tanak do dumba', om gandum om waig dot anggur. Om patahakon ngai' nori dot id sakai di pananaraban do porsombahan di hiri'd Walai'd Sasambayangan dot Agayo do hilo'd Yorusalim. 18 Om iri no it oolu' di pirok om tamas, om pakayon nopo dokoyu do tumanud do korohian nu om korohian ngai' di tambalut nu do miontok do korohian do Kinorohingan nu. 19 Patahakon no dot id Kinorohingan o koinsanai di koburu-buruon di nakatahak dot id diya' do maan do pakayon do tontok do sumambayang do hiri'd Walai'd Sasambayangan dot Agayo. 20 Om nunu nopo o koburu-buruon do suwai dit apatut do haro do hiri'd Walai'd Sasambayangan dot Agayo, di bolion, om bayaran nopo do mantad id kousinan di dong pomorinta'. 21 Om nokoponuhu' oku no, iyoho', i Raja' Artasasta, do koinsanai di poopi' di tusin di dong pomorinta' dit id watas dot Iprat di ponong id Kotonobon dot olomus do papatahak do nunu nopo i pokionuon di Isra it Imam, it oilo kopio do Tourat do Kinorohingan do surga, 22 do gisom do 3,400 o kilogram do pirok, om 10,000 o kilogram do gandum, om 2,000 o lito do waig dot anggur, om 2,000 o lito do tumau do saitun om songkuro nopo o kogumuo' do silaon di pokionuon. 23 Om posodiawon no kopio o koinsanai di pokionuon do Kinorohingan do surga do maan di Walai'd Sasambayangan dot Agayo, om a' i' iyau otogod doho' om a' otogod di raja' di sumusuhut doho' do momorinta'. 24 Om a' ngai' koino-ino do pokionuan do sukai it imam, om i tulun do Liwi, om i modsisinding, om i madtatamong do wawayaan om i tulun di maganu-anu, om isai nopo i kapaganu-anu do hiri'd Walai'd Sasambayangan dot Agayo. 25 Om iya' no, oi Isra, o momili' do piro-piro o boyoon om gompomutus do momorinta' do koinsanai di tulun do poingiyon dot id watas dot Iprat di ponong id Kotonobon, dot i tulun di tumanud di Tourat do Kinorohingan nu, do mikuwo di toilaan do nakatahak do Kinorohingan dot id diya'. Om potudukon no i Tourat diri dot id isai nopo o tulun dit a' po nokoilo'ddi. 26 Om pointikid-tikid do tulun dit a' mumboyo' dit Oturan do Kinorohingan nu, ko' it oturan do pomorinta', om lomusan no do momohukum do kapatayon, ko' uyungon ko' ahawan do dapu' ko' giilon,” ka.
Minamarayou i Isra do Kinorohingan
27 Om boros kaddi di Isra, “Royohon no o Tuhan, i Kinorohingan di tinuku' di taki-aki toko'! Tu' tiningkau dau o ginawo di raja' gisom do minomusou kopio iyau di Walai'd Tuhan di hilo'd Yorusalim. 28 Om nasanangan iddi doho' i raja', om i piro-piro o gomponosihat dau om koinsanai di pagawai di raja' dot ongkipangkat tu' nuhupan oku id Tuhan. Om pinokoris oku'd Tuhan, i Kinorohingan ku, gisom do nakaangat oku iddi dot ogumu' o boyoon do pinuruan do tulun dot Israil do gumuli' do hilo'd Yorusalim,” ka dau.
I Tulun di Nangatanggayan do Pisangod do Minoyo' di Isra
1 Iti no dopitar do ngaran di piro-piro boyoon do pinuruan do sompiiyon di natanggayan do pisangod do hilo'd Babil, i guminuli' do hilo'd Yorusalim do minoyo' doho' do tontok dit i Raja' Artasasta o momorinta': 2-14 i Girsom, i mantad id pinuruan do sompiiyon di Pinihas, i Daniol, i mantad id pinuruan do sompiiyon di Itamar, i Hatus, i tanak di Sokania, i mantad id pinuruan do sompiiyon di Daud, i Sakaria, i mantad id pinuruan do sompiiyon di Paros, do miwoyo' do hatus om limo nohopod o tongokusai do mantad id pinuruan do sompiiyon dau (haro i' o nongkotulis do hiri'd potutulisan do pasal di sinolusukan diyolo') i Ilyuinai, i tanak di Siraya, i mantad id pinuruan do sompiiyon di Pahat Muab, om miwoyo' do duwo nahatus o tongokusai, i Sokania i tanak di Yahasiol, i mantad id pinuruan do sompiiyon di Satu, do miwoyo' do tolu nahatus o tongokusai, i Ibid i tanak di Yonatan, i mantad id pinuruan do sompiiyon di Adin, do miwoyo' do limo nohopod o tongokusai, i Yosaya i tanak di Atalia, i mantad id pinuruan do sompiiyon di Ilam, do miwoyo' do turu' nohopod o tongokusai, i Sobaya i tanak di Mikail, i mantad id pinuruan do sompiiyon di Sopasa, do miwoyo' do walu' nohopod o tongokusai, i Obaya i tanak di Yohiol, i mantad id pinuruan do sompiiyon di Yoab, do miwoyo' do duwo nahatus om hopod om walu' o tongokusai, i Silomit i tanak di Yosipia, i mantad id pinuruan do sompiiyon di Bani, do miwoyo' do hatus om onom nohopod o tongokusai i Sakaria i tanak di Bobai, i mantad id pinuruan do sompiiyon di Bobai, do miwoyo' do duwo nohopod om walu' o tongokusai i Yohanan i tanak di Hakatan, i mantad id pinuruan do sompiiyon di Asgad, do miwoyo' do hatus om hopod o tongokusai i Ilipilit, i Yohiol om i Somaya, i mantad id pinuruan do sompiiyon di Adonikam, do miwoyo' dot onom nohopod o tongokusai (iyolo' nopo om nokotohuri do nokorikot) i Utai om i Sabud, i mantad id pinuruan do sompiiyon di Bigwai, do miwoyo' do turu' nohopod o tongokusai.
Minonimung i Isra do Tulun do Liwi di Maganu-Anu do Hiri'd Walai'd Sasambayangan dot Agayo
15 Om timungo' ngai' ku no i tongoulun diri do hilo'd tisan di bawang di lumuyung do hilo'd bandar dot Ahawa. Om hilo' no iyahai do minomukiim do solinaid do tolu o tadau. Nga' soira' di pininguhot ku iyolo' om koilaai ku no do haro i' o piro-piro ot imam dot id pogialatan diyolo', nga' aiso' i' o tulun do Liwi. 16 Om lohowo' ku noddi o siam di boyoon: i Iliosor, i Ariol, i Somaya, i Ilnatan, i Yarib, i Ilnatan, i Natan, i Sakaria, i Mosulam, om duwo o tulun do monunuduk, i Yoyarib om i Ilnatan. 17 Om suhuo' ku noddi iyolo' do mongoi solowot di Ido, i boyoon do tulun do hilo'd Kasipia. Om sinuhu' ku iyolo' do momisunud di Ido om i piro-piro o tambalut dau, do porikot dot id dahai do piro-piro o tulun di maganu-anu do hiri'd Walai'd Sasambayangan dot Agayo. 18 Om porikoto' no diyolo' dot id dahai i Sorobia, i tulun do Liwi dit oilo kopio, i mantad id pinuruan do sompiiyon di Mali, tu' opuhawang i' o Kinorohingan dot id dahai. Om minoyo' nogi' di Sorobia i tangaanak dau om i piro-piro o tobpinai dau do hopod om walu' o tulun do toinsanan. 19 Om i Hasabia om i Yosaya, i mantad id pinuruan do sompiiyon di Morari, do miwoyo' do 20 di koobpinayan diyolo' nga' pinorikot nogi' diyolo' dot id dahai. 20 Om suwai no ko' iri, om 220 o tulun do maganu-anu do hiri'd Walai'd Sasambayangan dot Agayo do nokoruhang om nokotulis o ngaran. Iri nopo taki-aki diyolo' di gulu po nga' nopili' di Raja' Daud om i piro-piro o pagawai dau do monguhup di tulun do Liwi.
Nangatan di Isra i Tulun dot Israil di Guminuli' do Mantad id Pomogunan do Pinananggayan do Pisangod do Sumambayang om Puasa
21 Om pangangat oku noddi do toinsanan di tulun do puasa do hiri'd Bawang dot Ahawa, om mikuwo'd minsiriba' dot id Kinorohingan dahai. Om suminambayang iyahai do mokiwoyo'd Kinorohingan dot id tindalanon, om mokiintirung iyahai dau om pokiintirungan dahai i tangaanak dahai om i dahai'd songonuon. 22 Tu' ointingayaman oku do mokianu di raja' do soudor dit ongkikuda' do mongintirung dahai do mantad id pisangod do hiri'd tanga'd ralan, tu' nokoboros ku no dot id raja' o poingkaa, “Intirungan i' do Kinorohingan dahai o koinsanai'd tulun di mogondos dau, nga' pointikid-tikid di tulun dot a' otorodok dot id dau om karaatan no dau om hukuman po dau,” kangku. 23 Om puasa diri iyahai om sambayang no iyahai dot id Kinorohingan do mokigompi' dau, om sinimbar i' dau i sambayang dahai.
Piro-Piro o Pinatahak do Pakayon do Hiri'd Walai'd Sasambayangan dot Agayo
24 Om pomili' oku nod hopod om duwo o boyoon dot imam dot id pogialatan di piro-piro o boyoon dot imam. Iyolo' nopo om i Sorobia, om i Hasabia om hopod o tulun do suwai. 25 Om timbango' ku noddi diyolo' i pirok, om i tamas, om koinsanai di koburu-buruon do suwai di pinatahak di raja', om i piro-piro o ponosihat dau, om i piro-piro o pagawai dau, om koinsanai di tulun dot Israil do maan do pakayon do hiri'd Walai'd Sasambayangan dot Agayo. Om patahako' ngai' ku nopori dot id piro-piro ot imam diri. 26-27 Iti no i pinatahak diyolo': Pirok --- 22 tan 100 o pakakas do pirok --- 70 kilogram tamas --- 3,400 kilogram 20 o mangkuk do tamas --- 8.4 kilogram 2 mangkuk do tambaga' dit osonong kopio, it irad i' do gatang do mangkuk do tamas. 28 Om boros kangku dot id piro-piro ot imam diri, “Iyokoyu nopondo om nokotobilang no do don Tuhan, i Kinorohingan di tinuku' di taki-aki toko', om iti nogi' koburu-buruon di pirok om tamas do winonsoi di pinatahak dot id Tuhan nga' nokotobilang nogi' do maan do don Tuhan. 29 Om gompion no kopio dokoyu iti koburu-buruon diti do gisom do korikot kou do hilo'd Walai'd Sasambayangan dot Agayo. Om korikot kou nopondo'd hilo' om timbangon ngai' noti, om patahakon nogindo dot id piro-piro o boyoon dot imam om id piro-piro o boyoon do tulun do Liwi, om patahakon dot id piro-piro o boyoon do tulun dot Israil di hilo'd Yorusalim,” kangku. 30 Om romito' noddi di piro-piro ot imam om i tulun do Liwi i pirok om i tamas om i koburu-buruon diri om igitai no diyolo' do kuminaa do hilo'd Walai'd Sasambayangan dot Agayo di hilo'd Yorusalim.
Nokorikot do Hilo'd Yorusalim
31 Om pamanau noddi iyahai do mantad hilo'd Bawang dot Ahawa do kumaa do hilo'd Yorusalim do tontok di tadau'd kohopod om duwo do tulan di koiso'. Om nintirungan i' iyahai'd Kinorohingan do hiri'd tindalanon, do mantad id pisangod di manangod om mangantob. 32 Om soira' di nokorikot iyahai'd hilo'd Yorusalim om undorong poddi iyahai do solinaid do tolu o tadau. 33 Om tadau poddi do kaapat om ongoi nogi' iyahai do hiri'd Walai'd Sasambayangan dot Agayo om timbango' no dahai i pirok om i tamas, om i koburu-buruon do suwai. Om patahako' nogiddi dahai iri dot id di Mirimot it Imam, i tanak di Uria, om poingontong nogi' i Iliasar, i tanak di Pinihas, om duwo o tulun do Liwi, i Yosabad, i tanak di Yosua, om i Noadia, i tanak di Binui. 34 Om timbango' ngai' nopo i koburu-buruon diri om pinotulis ngai'. 35 Om tontok no do tadau'ddi dot oinsanan nopo i tulun di nokoguli' do mantad id pomogunan di pinananggayan do pisangod do pinapatahak do porsombahan di sorobon dot id Kinorohingan dot Israil. Om papatahak no iyolo' do hopod om duwo tinan do sapi' di tontoluhan do maan do toinsanan di tulun dot Israil, om siam nohopod om onom o tinan do kambing do tontoluhan om turu' nohopod om turu' o tanak do dumba' om suwai no ko' iri om pinapatahak po iyolo' do hopod om duwo o tinan do kambing do maan do pangampun do diyolo'd dusa. Om sorobo' ngai' nopo i tayam-tayam diri do numaan do porsombahan di sumbolion dot id Tuhan. 36 Om onuo' nogi' diyolo' i surat do mantad id porinta' di pinatahak di raja' dot id diyolo' om patahako' no diyolo' dot id piro-piro o gobunor om id piro-piro o pagawai do watas dot Iprat di ponong id Kotonobon. Om panahak ngai' nopo iyolo' do maan do ponulung di bansa'ddi om milo i' kasai' iyolo' do sumambayang dot id Walai'd Sasambayangan dot Agayo.
Nokorongou i Isra do Minanansawo i Tulun do Yohudi do Tulun dit Okon ko' Yohudi
1 Om soira' di nowonsoi ngai' iri om rikot no dot id doho' o piro-piro o boyoon do tulun dot Israil, do minongoi pomisunud doho' dot iri nopo tulun dot Israil om i piro-piro ot imam, om i tulun do Liwi nga' a' i' suminuwai-suwai do mantad id bansa' di tulun mantad di hiri'd pomogunan di posorili'. Iri no i bansa' dot Amon, Muab, Masir, Kanaan, Hit, Poris, Yobus om Amori. Wonsoyon nopo diyolo' nga' miagal nopo di wowonsoyon di piro-piro bansa'ddi tu' momonsoi di wowonsoyon dit araat kopio. Om iri nogi' i piro-piro ot imam om i tulun do Liwi nga' miningwonsoi i' do miagal diri. 2 Tu' minanansawo i tongokusai do Yohudi di tongoondu' do bansa'd suwai, gisom dot a' noddi olidang i tulun di nokotobilang do maan do songonuon do Tuhan. Tu' iri nogi' i piro-piro o boyoon om i piro-piro o pagawai dot Israil o minogulu kopio do minomonsoi do miagal diri. 3 Tontok di nokorongou oku di boros diri om hurako' ku nopo o pakayan ku, om undato' ku tobuk ku om ganggut ku dot atatagadan om irikau oku no tu' adalaan oku no kopio do tumongob. 4 Om irikau oku noddi do gisom do norikot i kapatahakan do porsombahan do sumbolion do don sosodopon. Om timungai oku nopo di tulun, tu' ongooris iyolo' do kosorou di pomohukum do Kinorohingan dot Israil, do dusa di tulun di nokoguli' do mantad id pinananggayan do pisangod diri. 5 Om soira' di norikot i maso do kapatahakan do porsombahan do sumbolion di don sosodopon, om ingkakat oku no do mikuwo'd tumongob tomod oku om nohurak o pakayan ku om otud oku no om poinsawato' ku no o longon ku dot id Tuhan, i Kinorohingan ku. 6 Om boros kangku, “Oi Kinorohingan ku, ointingayaman tomod oku no daa do potimbaba' do rabas ku dot id toguang nu. Tu' mogitimpak-timpak poo o dusa dahai do hiti'd tulu dahai gisom do kosunggu no do hilo'd tawan o kasawato'. 7 Tu' mantad po di taki-aki po dahai om gisom do baino' om nokowonsoi no iyahai, i tulun nu, do dusa dot id diya'. Om iri no o kinaala-alaan dahai om i piro-piro o raja' om i piro-piro ot imam dahai, do naala' di piro-piro o raja' do bansa'd suwai. Om pinimpatayan iyahai om pinanakahan iyahai om tinanggayan iyahai do pisangod. Om nintingayam tomod iyahai do gisom piya do tadau'd baino'. 8 Om baino' nodti om wagu po iyahai kopuriman kawagu do kosianan do Tuhan, i Kinorohingan dahai. Om pinosoliwan o piro-piro dahai do mantad id pinonguripanan do mongoi iyon do hiti'd kinoiyonon dit olidang, i kinoiyonon dit osimbayan. Mulong piya do nosiliu daa iyahai'd turipon nga' nonuan nu i' iyahai do koposion do wagu. 9 Tontok di nosiliu no iyahai do turipon nga' a' nu i' iyahai tinongkiadan. Pinologos nu i' dot asanangan dahai i piro-piro o raja' do Porsia om gisom do pinopotumboyo' iyau dahai do mongoi pomonsoi kawagu di Walai'd Sasambayangan dot Agayo, i nosiliu no daa do pogun. Om nintirungan nu nogi' iyahai do hiti'd Yohuda om hiti'd Yorusalim. 10 Nga' baino' noddi oi Tuhan, i Kinorohingan, om nunu po o milo dahai'd poboroson do nosiliu o miagal diti? Tu' a' noddi kawagu iyahai minumboyo' di boros nu, 11 di pinatahak nu dot id dahai do pinolombus di piro-piro o nabi, i susuhuon nu'ddi. Sinunudan iyahai diyolo' dot iri nopo i pomogunan do ngoyon dahai iyono' nga' pomogunan di sosomu' tu' notongkop pod tulun di poingiyon mantad do hiri do wowonsoyon dit araat om i kososomu' kopio. 12 Sinunudan nogi' iyahai di piro-piro o nabi dot a' iyahai koino-ino do manansawo do bansa'ddi om a' koino-ino do monguhup diyolo' do kumaya' om sumimbayan ondung orohian no iyahai do kaakan do hasil di tana' om orohian do potungkus diri dot id sinakagon dahai do gisom dot alaid. 13 Om mulong piya do nosiliu ngai' nori do maan do pomohukum do dusa om kasalaan dahai nga' oilaan i' dahai dot a' nu i' oi Kinorohingan, naayi-ayi' kopio do paparatu' i hukuman dit apatut daa do porotuon dot id dahai, om gisom do pinasi nu po iyahai. 14 Om poingkuro'ddi dot a' po iyahai kawagu mamadul do boros nu om mongoi po panansawo diti tulun dot angaraat? Ondung wonsoyon dahai o miagal diri, om atantu' nod otogod kopio ko gisom do maan nu'ndo iyahai punsoo' om aiso' nondo o tongosongulun piya do poimpasi. 15 Oi Tuhan, i Kinorohingan do tulun dot Israil, iya' nopo om otulid i' kopio, nga' pinologos nu i' iyahai do poimpasi. Okunon no dahai i kasalaan dahai dot id diya'; om a' no daa iyahai osorupai do tumimbaba' diya',” ka di Isra.
Mogodu do Manansawo do Tulun di Bansa'd Suwai
1 Om tontok di maso di Isra do sumambayang do mangakun do dusa, do mikuwo'd mingihad om poingotud dot id toguang di Walai'd Sasambayangan dot Agayo, om timungai no iyau do tulun dot Israil dot ogumu' kopio, dot i tongokusai om i tongoondu' om i tangaanak. Om oinsanan nopo i tulun do millompud do mihad do posorili' dau. 2 Om boro-boros no i Sikania, i tanak di Yohiol, i mantad id pinuruan do sompiiyon di Ilam, dot id di Isra do poingkaa, “Nokowonsoi no iyahai'd dusa dot id Tuhan, tu' minanansawo iyahai do tongoondu' do bansa'd suwai. Nga' mulong piya do miagal diri, nga' haro kasai' po o soro-sorohon dot Israil. 3 Kainou sumumpa' dot id Kinorohingan toko', do maan toko' uyungo' i tongoondu'ddi om i tangaanak diyolo'. Om wonsoyon ngai' i' dahai i nosihat nu om i nosihat do tulun do suwai di momusou do boros do Kinorohingan. Umboyoon i' dahai i ponuhuan do Tourat do Kinorohingan. 4 Iya' no it apatut do momonsoi dit apatut do wonsoyon. Om wonsoyon nopo kopio it apatut do wonsoyon do gisom dot owonsoi iri!” ka dau. 5 Om suhuo' noddi di Isra i piro-piro o boyoon dot imam om i tulun do Liwi, om koinsanai di tulun do suwai do sumumpa' do momonsoi do miagal di nokoboros di Sikania. 6 Om kosumpa' poddi iyolo' om pamanau nogiddi i Isra do mantad id dotimbabaan di Walai'd Sasambayangan dot Agayo, om ongoi no iyau do hiri'd bilik di Yohanan, i tanak di Iliasib. Om odop no iyau'd hiri. Om a' no iyau minakan om a' mininum tu' adalaan no iyau do tumongob do kosorou di winonsoi do koinsanai di tulun di nokoguli' do mantad id pomogunan di pinananggayan do pisangod. 7 Om potongkopo' noddi o habar do hilo'd Yohuda om hilo'd Yorusalim do tumimung do hilo'd Yorusalim o koinsanai di tulun di nokoguli' do mantad id pinananggayan do pisangod. 8 Om soinai noddi di piro-piro o boyoon om i piro-piro o woyo-woyoon di tulun, i surat do popoilo dot isai nopo it a' korikot dot id suang do tolu o tadau om ahawan nod dapu' dau om iduwon do mantad id sinompuruan di tulun. 9 Om katalib poddi o tolu o tadau di tontok di tadau'd koduwo nohopod do tulan do kosiam, om rikot no do hilo'd Yorusalim o koinsanai di tongokusai di poingiyon do hiri'd watas do Yohuda om Binyamin do minongoi timung do hiri'd natad di Walai'd Sasambayangan dot Agayo. Om tontok nopoddi om rumasam dot asapou. Om gagaran ngai' poo i tulun dot ongosogitan dot ooyuban di tongus dit osogit, om kopuriman dot agayo kopio o komoyon di pitimungan diri. 10 Om ingkakat noddi i Isra, om boro-boros no iyau dot id diyolo' do poingkaa, “Nokowonsoi kou nod dusa, tu' minanansawo kou do tongoondu' di bansa'd suwai, om gowoi poddi om noruhangan po kawagu o kasalaan do tulun dot Israil. 11 Nga' baino'dti om okuno' no dokoyu i dusa dokoyu dot id toguang do Tuhan, i Kinorohingan di tinuku' di taki-aki toko'. Om wonsoyo' no dokoyu o miontok do korohian dau. Om insodu' kou no do mantad id bansa'd suwai, i poingiyon do hiti'd pomogunan toko' om adaai no dokoyu i sawo dokoyu do bansa'd suwai!” ka dau. 12 Om oinsanan nopoddi i tulun do suminimbar dot opuhod do poingkaa, “Tonudon ngai' i' dahai i nosihat nu,” ka. 13 Om boros ka kawagu diyolo', “Adalaan kogumu' iti tulun do nakarapou'd hiti, om kawagu po nga' rumasam dot asapou. Om a' i' iyahai kogoos do poingkakat do hiti'd soliwan do miagal diti. Om a' i' milo do salasayon iti do sangadau-ngadau ko' duwo-duwo tadau tu' ogumu' i' kopio iyahai do nokowonsoi'd dusa. 14 Om pologoso' no i piro-piro o boyoon dahai do mundorong do hiti'd Yorusalim do manalasai do hal diti. Om rumikot nogindo do hiti o koinsanai'd tulun di kisawo do bansa'd suwai do tontok dot insan o maso di tontuon, do miwoyo' di piro-piro o boyoon om i gompomutus do mantad id bandar dau. Om otingkod nondo o kototogod do Kinorohingan dot id dahai do pasal do hal diti,” ka. 15 Om aiso' i' ot a' kosokodung di boros diri suwai' ko' i Yonatan poo, i tanak di Asail, om i Yasiya, i tanak di Tikwa. Om sinokodung nogi' iyolo' di Mosulam om i Sabitai, i duwo tulun do Liwi. 16 Nga' orohian kasai' i' do momonsoi di nokoboros diri i tulun di nokoguli' do mantad id pinananggayan do pisangod. Om pomili' noddi i Isra, it Imam diri, do piro-piro o tulun do mantad id piro-piro o boyoon do sinompuruan do sompiiyon. Om potuliso' no o ngaran diyolo'. Om timpuun no iyolo' do minanalasai do hal diri di tadau do koiso' do tulan do kohopod. 17 Om kasalasai noddi diyolo' o koinsanai di hal di pasal do tongokusai di minanansawo do tongoondu' do bansa'd suwai di tolu o tulan do mantad diri.
I Tongokusai di Kisawo do Tongoondu' do Bansa'd Suwai
18 Id pogialatan nopo do tongokusai di nakasawo do tongoondu' do bansa'd suwai om: Imam, tinulis o ngaran do tumanud di pinuruan do sompiiyon diyolo': Mantad id pinuruan do sompiiyon di Yosua om i tongotobpinai dau, i tangaanak di Yosadak: i Maasiya, i Iliosor, i Yarib om i Gadalia. 19 Om minangakun iyolo' do magada' di sawo diyolo'. Om papatahak noddi iyolo' do songinan o dumba' do tontoluhan do maan do porsombahan do pangampun di dusa diyolo'. 20 Mantad nopod id pinuruan do sompiiyon di Imor om: i Hanani om i Sobaya. 21 Mantad nopod id pinuruan do sompiiyon di Harim om: i Maasiya, i Ilia, i Somaya, i Yohiol om i Usia. 22 Mantad nopod id pinuruan do sompiiyon di Pasur om: i Ilyoinai, i Maasiya, i Ismail, i Nitaniil, i Yosabad om i Ilasa. 23 Mantad nopod id pogialatan di tulun do Liwi om: I Yosabad, i Simoi, i Kolaya (i roitan nogi' dot i Kolita), i Pitaya, i Yuda om i Iliosor. 24 Mantad nopod id pogialatan do modsisinding om: I Iliasib. Mantad nopod id pogialatan do madtatamong do Wawayaan dot Agayo di Walai'd Sasambayangan dot Agayo om: i Salum, i Tilim, om i Uri. 25 Mantad dot id pogialatan do tulun dot Israil do suwai: Mantad id pinuruan do sompiiyon di Paros: i Ramia, i Yosia, i Malkia, i Miyamin, i Iliasar, i Malkia om i Bonaya. 26 Mantad id pinuruan do sompiiyon di Ilam: i Matania, i Sakaria, i Yohiol, i Abdi, i Yirimot om i Ilia. 27 Mantad id pinuruan do sompiiyon di Satu: i Ilyoinai, i Iliasib, i Matania, i Yorimot, i Sabad om i Asisa. 28 Mantad id pinuruan do sompiiyon di Bobai: i Yohanan, i Hanania, i Sabai om i Atlai. 29 Mantad id pinuruan do sompiiyon di Bani: i Mosulam, i Maluk, i Adaya, i Yasub, i Sial, om i Yiramot. 30 Mantad id pinuruan do sompiiyon di Pahat Muab: i Adna, i Kilal, i Bonaya, i Maasiya, i Matania, i Bisaliil, i Binui om i Manasi. 31-32 Mantad id pinuruan do sompiiyon di Harim: i Iliosor, i Yisia, i Malkia, i Somaya, i Simion, i Binyamin, i Maluk om i Simaria. 33 Mantad id pinuruan do sompiiyon di Hasum: i Matnai, i Matata, i Sabad, i Ilipilit, i Yoromai, i Manasi om i Simoi. 34-37 Mantad id pinuruan do sompiiyon di Bani: i Maadai, i Amram, i Uil, i Bonaya, i Bidiya, i Koluhu, i Wania, i Mirimot, i Iliasib, i Matania, i Matnai om i Yaasai. 38-42 Mantad id pinuruan do sompiiyon di Binui: i Simoi, i Solomia, i Natan, i Adaya, i Maknadbai, i Sasai, i Sarai, i Asariil, i Solomia, i Simaria, i Salum, i Amaria om i Yusup. 43 Mantad id pinuruan do sompiiyon di Nibo: i Yoyol, i Matika, i Sabad, i Sobina, i Yadai, i Yoil om i Bonaya. 44 Oinsanan nopo iti tongokusai'dti do nakapanansawo do tongoondu' do bansa'd suwai. Om adaai ngai' no diyolo' om uyungo' diyolo' i sawo diyolo'ddi om i tangaanak diyolo'.
1 Iti no o sinusui di Nohomia, i tanak di Hakalia do pasal di nongowonsoi dau.
Tumongob i Nohomia do Kosorou do Yorusalim
Tontok di tulan do Kislu, i kohopod om duwo do toun do pomorintaan di Artasasta, i raja' do Porsia, om maso ku'd poundorong do hilo'd bandar do Susan, i bandar dot agayo. Iyoho' nopodti om i Nohomia. 2 Om rikot no i Hanani, i tobpinai ku do mantad hilo'd Yohuda do miwoyo' do piro-piro o tulun do suwai. Om uhoto' ku no iyolo' ondung poingkuro-kuro no o hilo'd Yorusalim om i tulun do Yohudi di nokoguli' do mantad hilo'd Babil, i pomogunan do pinananggayan do pisangod. 3 Om boros ka diyolo' do minomisunud doho', “Iri nopo i tulun di mantad id pomogunan di pinananggayan do pisangod om nokoguli' nod hilo'd pomogunan mantad, nga' oimuri tomod iyolo' tu' ulak-ulakan tomod di bansa'd suwai di songingiyon do hiri'd posorili'. Om iri tolig di bandar do Yorusalim nga' poingraag kasai' po, om i piro-piro o wawayaan nga' a' po nowonsoi do mantad po di numaan tutudai di gulu po,” ka diyolo'. 4 Om soira' di norongou ngai' ku iri om irikau oku no do mikuwo'd miningihad. Mingihad oku nopoddi do piro-piro o tadau do koloido' om puasa oku. Om sambayang oku no dot id Kinorohingan do poingkaa, 5 “Oi Tuhan, i Kinorohingan do momorinta do surga. Iya' no o Kinorohingan dit agayo om rumikot iyahai dot id toguang nu do mikuwo'd ooris. Osianan kasai' ko i' om bayaanon nu i batos nu dot id tulun dit osianan diya' om i mumboyo' di ponuhuan nu. 6 Antangai oku no, oi Tuhan, om pokinongoho' no o sambayang ku di polombuson ku dot id diya' do tadau om totuong do bagi' do tulun dot Israil, i susuhuon nu. Okunon ku no do nokopomonsoi iyahai'd dusa, iyahai i tulun dot Israil; om i taki-aki ku om iyoho' nogi' nga' nokopomonsoi id dusa. 7 Suminaap iyahai diya', om tuminolibamban iyahai di pinonuhuan nu. A' dahai natanud it oturan di pinatahak nu dahai di pinolombus di Musa, i susuhuon nu. 8 Oi Tuhan, soroho' no i boros nu di pinonuhuan nu di Musa do popoboros dot ondung a' iyahai, i tulun dot Israil, otorodok dot id diya' om pogitongkiad-kiadon nu nondo iyahai dot id pogialatan do bansa'd suwai. 9 Nga' ondung gumuli' iyahai kawagu dot id diya' om momonsoi di pinonuhuan nu om timungon nu i' kawagu iyahai do mulong piya do nokopogitongkiad-kiad no iyahai do hilo'd tisan do tana'. Om pogulion nu i' iyahai do hiri'd kinoiyonon di nopili' nu dot iyonon dahai do sumambayang dot id diya'. 10 Oi Tuhan, iyahai nopodti om susuhuon nu om tulun di diya'd songonuon. Om pinasi nu iyahai dot i kuasa' nu dit agayo om i kokoriso' nu o pinamasi nu dahai. 11 Om baino'dti om pokinongoho' no o sambayang ku om sambayang do koinsanai di susuhuon nu'd suwai dit orohian do momusou diya'. Tulungo' oku no om osianan i' doho' i raja' do baino',” kangku. Tu' maso nopoddi nga' monininggarung oku do tinumon di raja'.
Minongoi i Nohomia do hilo'd Yorusalim
1 Insan tadau dit apat no o tulan do nakatalib, do tontok di tulan do Nisan, di maso di Raja' Artasasta do makan, om ngoyo' ku no patahako' i waig dot anggur dot id dau, nga' olunggui tomod oku. Om a' oku po nokoumbal dot olunggui dot id toguang dau do miagal di tadau'ddi. 2 Om uhoto' oku no dau, “Nokuro tu' tumongob kopio ko, om a' ko i' sumakit? Nga' atantu' nod haro o katangkabaan nu,” ka dau. Om kotigowo oku, 3 om boros kangku'ddi do suminimbar, “Maha' daa om otogui o raja'! Poingkuro oku po dot a' tumongob do maso pod poingraag i bandar di pinamalabangan di taki-aki ku om i wawayaan di bandar nga' nongosorob ngai',” kangku. 4 Om ponguhot no i raja', “Nunu daa'ddi o pokionuon nu?” ka dau. Om sambayang oku no dot id Kinorohingan di momorinta' do surga dot id suang do ginawo ku, 5 om boro-boros oku nogiddi di raja' do poingkaa, “Ondung ohubayaan o raja' doho' om orohian do papatahak do pokionuon ku om pologoso' oku no do mongoi'd hilo'd pomogunan do Yohuda, i bandar do pinamalabangan di taki-aki ku om owonsoi ku i' kawagu i bandar diri,” kangku. 6 Om kookunai noddi di raja' i pinokianu ku'ddi. Iri nopo i sawo di raja' nga' poirikau dot id talad dau. Om uhoto' oku no dau ondung songkuro koloido' ku'd poundorong do hilo', om ondung soira' oku'd koguli', om sunudai ku no iyau. 7 Om pokianu oku nod surat do mantad id raja' do patahakon di piro-piro o gobunor do watas dot Iprat, di ponong id Kotonobon, do momisunud diyolo' do popologos doho' do mamanau do mongoi'd hilo'd Yohuda. 8 Om minokianu oku nogi' do surat do patahakon dot id di Asap, i madtatamong di puru' do dong porinta, do momisunud dau do manahak doho' do kayu do pomonsoi di wawayaan di tolig di kuta' di mongintirung di Walai'd Sasambayangan dot Agayo, om pomonsoi di tolig di bandar, om pamaal di walai dot iyonon ku. Om patahako' ngai' nopo di raja' i pinokianu ku tu' nuhupan oku i' do Kinorohingan. 9 Om paatadai oku po di raja' do piro-piro o boyoon do soudor om soudor di poinsakai'd kuda' do momoyo' doho'. Om pamanau oku no do kuminaa do ponong hilo'd watas dot Iprat di ponong id Kotonobon. Om hilo' no do pinatahak ku i surat di raja' dot id piro-piro o gobunor di hilo'. 10 Nga' i Sanbalat nopo, i tulun do mantad hilo'd Bait-Horon, om i Tobia, i tulun dot Amon, nga' araatan tomod do nokorongou do nokorikot oku do mongoi ponulung di bansa' dot Israil. 11 Om lombus oku no do minamanau om korikot oku no do hilo'd Yorusalim om undorong oku nod hilo' do solinaid do tolu o tadau. 12 Solinaid nopoddi om a' oku i' minomisunud dot isai nopo o tulun do pinopoilo o Kinorohingan doho' do momonsoi kawagu di bandar do Yorusalim. Om kosuabon noddi kawagu dit otuong-tuong po om tungag oku no om soliwan oku no di bandar do miwoyo' do piro-piro o tambalut ku. Om a' no iyahai minongigit do tayam-tayam do suwai do maan do sakayon do suwai ko' iri no i kaladai di sinakai ku. 13 Otuong po do tontok di suminoliwan iyahai di bandar do minaya' di wawayaan di roitan do Wawayaan do Rantai, i hiri'd ponong id kotonobon. Om pakayaai no dahai ponong id salatan, do minaya' di Tudan do Waig do Naga', do pinakayaan dahai do hiri'd wawayaan di roitan do Wawayaan do Rinomos. Om tontok di manau-panau oku om pingantangai ku no i tolig di bandar di nangaraag om i piro-piro o wawayaan di nosorob. 14 Om tontok di hiri iyahai'd bohogian di bandar di ponong id koulayon om pakayaai no dahai ponong id utara do kumaa do hiri'd wawayaan di roitan do Wawayaan do Tudan do Waig om hiri'd Torobong do Raja'. Om aiso' no o wayaan di kaladai di sinakai ku tu' ogumu' kopio i' i kinaraagan. 15 Om poruhukai no dahai do hiri'd Rantai do Kidron om lombus nopo iyahai do minamanau do totuong diri do miningontong di bandar. Om pahamadai no dahai do guminuli' kawagu do hiri'd bandar do minaya' di wawayaan di roitan do Wawayaan do Rantai. 16 Om aiso' i' o tiso' di pagawai do nokoilo do nongoi ku om aiso' o koilo ondung nunu i sorohon ku do wonsoyon ku. Tu' gisom piya'ddi nga' aiso' po nokoboros ku dot id tulun di sompi' ko' Yohudi dot id piro-piro ot imam ko' id piro-piro di boyoon ko' id piro-piro di pagawai, ko' id isai nopo di kouhup do momonsoi di bandar do Yorusalim. 17 Nga' boro-boros oku noddi dot id diyolo' do poingkaa, “Antangai pogi' o koinggoritan toko'. Tu' pogun po o Yorusalim om ilo' ngai' wawayaan diti bandar nga' nongosorob. Kainou wonsoyo' toko' kawagu iti tolig diti bandar om a' toko' i' ointingayam kawagu,” kangku. 18 Om sinunudan ku nogi' iyolo' di kinowoyo-woyoo' do Kinorohingan do minonguhup doho', om i nokoboros di raja' dot id doho'. Om boros ka diyolo', “Kainou tumimpuun do momonsoi kawagu'dti!” ka. Om sodia' ngai' noddi iyolo' do momonsoi di karaja'ddi. 19 Nga' soira' di nokorongou i Sanbalat, om i Tobia, om i Gisim, i tulun dot Arab diri, di maan dahai wonsoyo' om irak-irakai no iyahai diyolo' om nuntotori' iyahai diyolo'. Boros ka diyolo', “Nunu daa ot osorou-sorou dokoyu do wonsoyon dokoyu! Sumaap kou daa di raja'?” ka. 20 Om boros kangku do suminimbar, “Poundaron id Kinorohingan di momorinta' do surga iti wonsoyon dahai. Iyahai nopo om susuhuon i' dau, om tumimpuun no iyahai do momonsoi kawagu'dti. Nga' iyokoyu nopo om aiso' i' o kosorupayan do sumanganu do nunu nopo i hiti'd Yorusalim. Om soira' nopo do mogiboro-boros o tulun do pasal do Yorusalim om a' i' oroitan o dokoyu'd ngaran,” kangku.
Sinonong i Tolig do Yorusalim
1 Poingkaa no o kinowoyo-woyoo' do minononong di tolig do bandar do Yorusalim. Sinonong di Iliasib, i Boyoon dot Imam, om i piro-piro o tambalut dau i wawayaan di roitan do Wawayaan do Dumba', om pinodokot diyolo' i totobon. Om sinambayangan diyolo' iri do pinapatahak dot id Tuhan. Om sinonong diyolo' om sinambayangan diyolo' i tolig do gisom do hiri'd walai dot akawas di roitan do Walai'd Akawas do Hatus om i walai'd akawas di roitan do Walai'd Akawas do Hananil. 2 Minononong nopo kawagu di bohogian dit id dosunsudan diri om i tulun do Yorikou. Om i Sakur i tanak di Imri o minononong di bohogian dit id dosunsudan diri. 3 Minononong nopo kawagu di wawayaan di roitan do Wawayaan do Sada' om i pinuruan do sompiiyon di Sinaa. Om pinowonsoi diyolo' i padakatan do totobon om i tontiil om i salampad do pongontiil di totobon. 4 Minononong nopo kawagu di bohogian dot id dosunsudan diri om i Mirimot i tanak di Uria, i manangaki di Hakos. Om minomonsoi no kawagu di bohogian dot id dosunsudan diri om i Mosulam, i tanak di Birikia, i manangaki di Misisabiil. Om minomonsoi no kawagu di bohogian dot id dosunsudan diri om i Sadok i tanak di Baana. 5 Om minomonsoi no kawagu di bohogian dot id dosunsudan diri om i tulun do Tokua, nga' a' i' minangakun do momonsoi di karaja' dit angawagat di pinonuhuan di mandur i piro-piro o boyoon di bandar. 6 Minomonsoi nopo kawagu di wawayaan di roitan do Wawayaan do Yosana, om i Yoyada i tanak di Pasia, om i Mosulam i tanak di Bisoya. Om pinowonsoi diyolo' i padakatan di totobon, om pinodokot diyolo' i totobon, om pinowonsoi diyolo' i tontiil om i salampad do pongontiil di totobon. 7 Om minomonsoi nopo kawagu di bohogian dot id dosunsudan diri om i Milasa i tulun do mantad hilo'd Gibion, om i Yadon i tulun do mantad hilo'd Mironot, om i tulun do Gibion om i tulun do Mispa. Iri nopo winonsoi diyolo' om i tolig do gisom do korikot di walai di gobunor do watas dot Iprat di ponong id Kotonobon. 8 Om minomonsoi no kawagu di bohogian dit id dosunsudan diri om i Usiol, i tanak di Haraya, i tukang amas. Om minomonsoi nopo kawagu di bohogian dot id dosunsudan diri om i Hanania, i momomonsoi do tumau dot osonong o kosingudan. Winonsoi nopo dau nga' gisom do nokorikot di tolig di roitan do Tolig dot Alaab. 9 Om minomonsoi no kawagu di bohogian dot id dosunsudan diri om i Ropaya i tanak di Hur, i momorinta' do songintanga' di watas do Yorusalim. 10 Om minomonsoi nopo kawagu di bohogian dot id dosunsudan diri om i Yodaya, i tanak di Harumap. Iti nopo tolig diti nga' id toning kopio di walai dau. Om minomonsoi no kawagu di bohogian dot id dosunsudan diri om i Hatus, i tanak di Hasabnia. 11 Minomonsoi nopo kawagu di tolig do bohogian dot id dosunsudan diri, om i walai dot akawas di roitan do Walai dot Akawas do Kiapui om i Malkia, i tanak di Harim, om i Hasub, i tanak di Pahat Muab. 12 Om minomonsoi no kawagu di bohogian dot id dosunsudan diri om i Salum, i tanak di Halohis, i momorinta' do songintanga' di watas do Yorusalim, om nuhupan iyau di tangaanak dau'd tongoondu'. 13 Om minomonsoi nopo kawagu di wawayaan di roitan do Wawayaan do Kubong om i Hanun om i tulun di poingiyon do hiri'd bandar do Sanua. Om pinodokot diyolo' i totobon, om winansayan diyolo' do tontiil om salampad do pongontiil di totobon. Konoruo' nopo di tolig do winonsoi diyolo' om 440 o mito, tu' gisom do nokorikot do hiri'd wawayaan di roitan do Wawayaan do Rinomos. 14 Om minomonsoi nopo kawagu di wawayaan di roitan do Wawayaan do Rinomos om i Malkia, i tanak di Rikab, i momorinta' do watas do Bait-Kirim. Om pinodokot dau i totobon om winansayan do tontiil om salampad do pongontiil di totobon. 15 Om minomonsoi no kawagu di wawayaan di roitan do Wawayaan do Tudan do Waig om i Salum i tanak di Kolhosi, i momorinta' do watas do Mispa. Om tinaapan dau i wawayaan diri om pinodokot dau i totobon om winansayan do tontiil om salampad. Om winonsoi nogi' dau i tolig do hiri'd toning di kabun do don raja' do hilo'd torobong di roitan do Torobong do Sila do gisom do nokorikot do hiri'd ralan di tinaangan di poiruhuk do mantad hiri'd Bandar di Daud. 16 Minomonsoi nopo kawagu di bohogian dot id dosunsudan diri om i Nohomia i tanak di Asbuk, i momorinta' do songintanga' do watas do Bait-Sur. Om winonsoi dau i tolig do gisom do nokorikot di lobong do sompiiyon di Daud, om i kulam di winonsoi, om i walai do piro-piro o soudor.
I Tulun do Liwi do Nokouhup do Minononong di Tolig
17 Iti ngai' no i tulun do Liwi do minomonsoi kawagu di piro-piro o bohogian di tolig: I Rohum nopo, i tanak di Bani om minomonsoi di bohogian dot id dosunsudan diri. I Hasabia nopo, i momorinta' do songintanga' do watas do Kohila, om minomonsoi di bohogian dot id dosunsudan diri do pongobi' di watas dau. 18 I Binui nopo, i tanak di Hinadad, i momorinta' do songintanga' kawagu do watas do Kohila, om minomonsoi di bohogian dot id dosunsudan diri. 19 I Isir nopo, i tanak di Yosua, i momorinta' do Mispa, om minomonsoi di bohogian dot id dosunsudan diri. Winonsoi nopo dau om i tolig di pinoiyanan di rapo-rapo do sumasangod do gisom do nokorikot do hiri'd kokilongon di tolig. 20 I Baruk nopo, i tanak di Sabai, om minomonsoi di bohogian dot id dosunsudan diri, do gisom do nokorikot do hiri'd wawayaan di walai di Iliasib, i Boyoon dot Agayo dot Imam. 21 I Mirimot nopo, i tanak di Uria, i manangaki di Hakos, om minomonsoi di bohogian dot id dosunsudan diri, do gisom do nokorikot do hiri'd dompok di walai di Iliasib.
I Piro-piro ot Imam di Nokouhup do Minononong di Tolig
22 Iti no o piro-piro ot imam di minomonsoi kawagu di piro-piro o bohogian di tolig: Iri ngai' nopo it imam di mantad id posorili' do Yorusalim om minomonsoi kawagu di bohogian dot id dosunsudan. 23 I Binyamin om i Hasub o minomonsoi kawagu di bohogian dot id dosunsudan diri; it id dotimbabaan di walai diyolo'. I Asaria, i tanak di Maasiya, i manangaki di Anania, o minomonsoi kawagu di bohogian dot id dosunsudan diri, it id toning di walai dau. 24 Om i Binui, i tanak di Hinadad, o minomonsoi kawagu di bohogian dot id dosunsudan diri, do mantad hiri'd walai di Asaria om gisom do nokorikot di linsuk di tolig. 25-26 Om i Palal, i tanak di Usai, o minomonsoi kawagu di bohogian dot id dosunsudan diri, do mantad hiri'd linsuk di tolig om i walai dit akawas di hiri'd walai do raja' di hiri'd sokid, it id toning di natad dot iyonon do madtatamong. Om i Podaya, i tanak di Paros, o minomonsoi di bohogian dot id dosunsudan diri, do gisom do nokorikot di pinogisaman di ponong id koulayon om it id somok do wawayaan di roitan do Wawayaan do Waig, om i walai dot akawas di tiyonon do madtatamong di Walai'd Sasambayangan dot Agayo. (Iti nopo nga' id somok di bohogian di bandar di roitan dot Opil, i kinoiyonon di piro-piro o tulun di maganu-anu do hiri'd Walai'd Sasambayangan dot Agayo.)
I Tulun do Suwai di Minononong di Tolig
27 Om iri nopo tulun do Tokua om minomonsoi di bohogian di tolig dit id dosunsudan. Om iti no o koduwo'd bohogian do winonsoi diyolo'. Iti nopo winonsoi diyolo' nga' pinointonod dit id hapak di walai'd akawas dit agayo, i tiyonon do madtamong di Walai'd Sasambayangan dot Agayo, om gisom do korikot do hiri'd tolig dit id somok do kinoiyonon di roitan dot Opil. 28 Haro o piro-piro ot imam di poundorong do hiri'd somok do wawayaan di roitan do Wawayaan do Kuda' do minomonsoi kawagu di tolig do mantad id wawayaan di roitan do Wawayaan do Kuda', i hiri'd dotimbabaan di walai diyolo' om poingkaa ponong id utara. Om sorompori-pori nopo i piro-piro ot imam do minomonsoi di tolig dit id dotimbabaan di walai diyolo'. 29 I Sadok i tanak di Imor, o minomonsoi di tolig dit id dotimbabaan di walai dau. Om i Somaya i tanak di Sokania, o minomonsoi di bohogian dot id dosunsudan diri. Iyau nopo om madtatamong di wawayaan di roitan do Wawayaan do Koulayon. 30 Om i Hanania i tanak di Solomia, om i Hanun i tanak di Salap do kusai di koonom, o minomonsoi kawagu di bohogian dot id dosunsudan diri. Om iti no koduwo'd bohogian do winonsoi diyolo'. Om i Mosulam i tanak di Borokia, o minomonsoi kawagu di bohogian dot id dosunsudan diri, om it id dotimbabaan di walai dau. 31 Om i Malkia, i tukang amas, o minomonsoi di bohogian dot id dosunsudan diri. Konoruo' nopo di winonsoi dau om gisom do nokorikot di walai dot iyonon di tulun do maganu-anu do hiri'd Walai'd Sasambayangan dot Agayo om i tulun di dumadagang, it id toning di wawayaan di roitan do Wawayaan do Mipkad, it id toning di bilik di hiri'd sakai di tolig di hiri'd linsuk ponong id utara do ponong id koulayon. 32 Om i piro-piro o tukang amas om i tulun di dumadagang, o minomonsoi kawagu di bohogian di kolimpupuson no, i mantad id bilik di hiri'd sakai do tolig di hiri'd linsuk om gisom do nokorikot di wawayaan di roitan do Wawayaan do Dumba'.
Suminurilog i Nohomia di Tulun dit A' Sumokodung di Karaja'ddi
1 Om soira' di nokorongou i Sanbalat do nokotimpuun no iyahai, i tulun do Yohudi, do momonsoi kawagu di tolig di bandar om kotogod no tomod iyau om timpuun no do momohingi-hingi dahai. 2 Om boros ka dau dot id toguang di koombolutan dau, om id toguang di piro-piro o soudor do Samaria, “Nunu daa ot osorou-sorou diti tulun do Yohudi di nongorutum diti, do wonsoyon diyolo'? Osorou tuu daa diyolo' do momonsoi kawagu diti bandar? Ondos tuu daa diyolo' om opongo no diyolo' ilo karaja' do sangadau noo do momongo, do papatahak iyolo'd porsombahan di sorobon? Milo i' kaka iyolo' do manganu do watu do mantad hiri'd kinotimungon di nongosorob do maan do pomonsoi kawagu?” ka. 3 Om i Tobia nga' poingkakat i' do hiri'd toning dau. Om boros ka dau iyau, “Okuro-kuro kaka o tolig do wonsoyon diyolo'? Toni-toni nopo nga' kahaba' nobo'ddi!” ka. 4 Om sambayang oku nod poingkaa, “Oi Kinorohingan, pokinongoho' no ilo pomohingi-hingi diyolo' dahai! Om pologoso' no dot ogulian iyolo' dilo pomohingi-hingi diyolo'. Pologoso' no dot apanakahan iyolo' do koinsanai di haro dot id diyolo', om pologoson no iyolo' dot atangkap om atanggayan do pisangod dot id pomogunan do suwai. 5 Kada' no ompunai i winonsoi diyolo' dot araat om kada' kolihuwai i dusa diyolo' tu' nokopongindaraat no kopio iyolo' dahai, iyahai i momonsoi diti tolig,” kangku. 6 Om wonsoyo' nopo dahai i tolig, om a' po alaid om songintanga' no o kasawato' di tolig do mantad ko' i kasawato' mantad, tu' ongorohian kopio i' o koinsanai di tulun do momonsoi di tolig. 7 Om soira' di nokorongou i Sanbalat, om i Tobia, om i tulun dot Arab, om Amon, om Asdod dot a' dahai notingkadan do momonsoi kawagu i tolig do Yorusalim, om nosombol ngai' dahai i nongoposu, om a' noddi ogina-gina' o kototogod diyolo'. 8 Om pogipapakat noddi iyolo' do mongoi panangod om mongoi pamagangau do Yorusalim, 9 nga' sambayang no iyahai dot id Kinorohingan dahai om ponuhu' no iyahai do tongokusai do tumamong do sumaap diyolo' do tadau om totuong. 10 Om iti no o sinding do sininding di tulun do Yohudi, “Ongoluhoi no iyahai do mamabo diti binabo; ogumu' kopio o kinaraagan do maan iduwo'. A' no iyahai kogoos do momonsoi kawagu diti tolig do baino',” ka. 11 Ondos daa di pisangod dahai om a' iyahai kokito diyolo' om a' iyahai koilo di wonsoyon diyolo' dot id dabantalan dot a' po iyolo' korikot do mongoi pamatai dahai om mongoi poningkod di karaja' dahai. 12 Nga' mongoi kasai' nopo i tulun do Yohudi di poingiyon dot id rolot di pisangod do popoinsan dahai dit osorou daa di pisangod dahai do wonsoyon diyolo' dot id dahai. 13 Om onuwai ngai' ku noddi i tulun do rapo-rapo do don sumasangod. Nonuan ku iyolo' do gayang om tandus om pana'. Om potomongo' ku no iyolo' do tumanud di pinuruan do sompiiyon diyolo' do hiri'd tolikud do hinonggo nopo o tolig dit a' po nopongo. 14 Om okito ku'ddi do moddosi ngai' i tulun. Om boros kangku dot id diyolo' om id koinsanai di boyoon om i pagawai diyolo', “Kada' kou poddosi dilo pisangod toko'. Sorohon toko' no do Tuhan nopo om okoris i' om agayo o kuasa', om sangod toko' no do bagi' do bansa' toko', om bagi' do tangaanak toko', om sawo toko', om bagi' diti walai toko',” kangku. 15 Om korongou noddi di pisangod dahai do noilaan dahai it osorou daa diyolo' do wonsoyon diyolo' dot id dahai, om kopurimanai noddi diyolo' do naantaban id Kinorohingan it osorou mantad diyolo' do wonsoyon. Om oinsanan nopoddi iyahai do guminuli' do minongoi pomonsoi kawagu di tolig. 16 Om mantad poddi om songintanga' nopo di tulun ku om momonsoi di tolig om songintanga' no om madtamong do kipinakai do rasuk do basi' om ongkitandus om ongkikolid, om ongkipana'. Om iso-iso' ngai' nopo o ginawo di boyoon dahai do sumokodung do koinsanai di tulun 17 di momonsoi kawagu di tolig. Om iri i tulun dot ongkiinigit di pakakas do pomonsoi o tiso'd longon nga' kiinigit po do rapo-rapo do don sumasangod o longon do tiso'. 18 Om koinsanai di momonsoi di tolig nga' ongkiabil ngai' nopod gayang. Om iri nopo tulun di popouni do torumpit do popoinsan nga' moyo-woyo' ngai' nopo doho'. 19 Om sunudai ngai' ku no i tulun om i pagawai om i boyoon diyolo' do poingkaa, “Iti nopo karaja' diti nga' agayo kopio o kinotongkopon om mogiinsodu-odu' toko'ddi do momonsoi diti tolig. 20 Nga' soira' nopo dot orongou dokoyu i torumpit om tumimung kou no do hiti'd posorili' ku. Om sumaap indo o Kinorohingan do bagi' dati',” kangku. 21 Gowoi poddi om pointikid-tikid nopod tadau do mantad poddi numawau nogi' om gisom do koulai i rombituon do dongotuong do kumaraja' o songintanga' dahai do momonsoi di tolig om songingkakat o songintanga' dahai do madtamong dot ongkiinigit do tandus. 22 Om maso nodti do sinunudan ku i tongokusai di momohuruan om i mongunguhup diyolo' do mundorong do hilo'd Yorusalim do dongotuong om atamangan i' dahai i bandar om kakaraja' pondo do dangadau. 23 Om a' ku i' iduwon i rasuk ku do dongotuong piya, om i piro-piro o tambalut ku om i piro-piro o susuhuon ku om i piro-piro o madtatamong doho' nga' aiso' i' o mongidu'd rasuk. Om ongkiinigit kasai' nopo iyahai di rapo-rapo dahai do don sumasangod.
Tinulung di Nohomia i Tulun do Mosikin
1 Om alaid-laid noddi do mantad diri om ogumu'ddi o tulun, do Yohudi do tongokusai om tongoondu' do somboro-boros dot a' manangkasanangan di sompi' ko' tulun do Yohudi di suwai. 2 Boros ka nod wookon diyolo', “Iyoho' nopo om ogumu' o tanak. Om manu iyahai'd gandum tu' iri poo o koposion dahai,” ka. 3 Om boros ka nod wookon om, “A' no milo dot a' pasandaon o tumo, om kabun dot anggur, om walai ku tu' mokiboboli oku'd gandum, om a' i' iyahai olikapan,” ka. 4 Om suwai nod tulun om somboro-boros dot, “A' no milo dot a' iyahai molos do tusin do maan do pambayar do sukai di pokionuon do raja', do ponukai di tumo om kabun dot anggur dahai. 5 Iyahai nga' sompi' i' ko' tulun do Yohudi. Om tangaanak dahai nga' iyo i' di tangaanak do Yohudi'd suwai. Nga' dahai nopod tangaanak om a' no milo dot a' osiliu do turipon. Om haro no o piro-piro di tangaanak dahai do tongoondu' do nakadagang do silihon do turipon. Nga' aiso' no o milo dahai'd pokukurayan tu' tumo om kabun dot anggur dahai nga' nangkasanda' ngai' no dahai,” ka. 6 Om soira' di norongou ngai' ku i boros diyolo'ddi om otogod tomod oku'ddi, 7 om osorou ku'ddi dot apatut do haro o wonsoyon. Om togodo' ngai' ku no i boyoon om i boyoon do rayat. Om boros kangku dot id diyolo', “Minonginggorit kou do tobpinai dokoyu!” kangku. Om papaharo oku noddi do pitimungan do koinsanai'd tulun do manalasai do kosusaan diri. 8 Boros kangku, “Nokototos no iyahai do mimboli kawagu di piro-piro koobpinayan toko' di sompi' ko' tulun do Yohudi dit a' no kumukuro dot a' dumagang dot id tulun do bansa'd suwai. Nga' baino' noddi om iyokoyu o mamadsal do koobpinayan dokoyu do padagang do tinan diyolo' do sumiliu do turipon dokoyu, om iyolo' daa nga' sompi' i' ko' tulun do Yohudi!” kangku. Om kada' nopo ungkomi i piro-piro o boyoon tu' aiso' no o milo diyolo'd posimbaron. 9 Om boros kangku'ddi kawagu, “Iri nopo winonsoi dokoyu'ddi om a' no kopio osonong. Apatut dot oronok kou do Kinorohingan om momonsoi dit otopot. Om a' kou indo kowonsoi do paantakan di pisangod toko', i tulun dot aiso' o Kinorohingan do momohingi-hingi dati'. 10 Nokoolos ngai' ku no i tulun diri do tusin om gandum, om i piro-piro o tobpinai ku om i kongoombolutan ku nga' pinopoolos nogi'. Baino' nopo om kada' toko' no pokionuo' i pambayar daa do tutang diyolo' dot id dati'. 11 Tonuson ngai' nopo i tutang diyolo' dot id dokoyu dot iri tuu i tusin ko' i gandum, ko' i waig dot anggur ko' tumau po do saitun. Om lomusan no kopio dokoyu do popoguli' dot id diyolo' di tumo, om i kabun dot anggur, om i kabun do saitun om i walai diyolo'!” kangku. 12 Om boros kaddi di piro-piro o boyoon, “Wonsoyon i' dahai o miagal di nokoboros nu. Pogulion ngai' i' dahai iri om a' no dahai pokibayaran i tutang diyolo',” ka. Om lohowo' ngai' ku no it imam om suhuo' ku no i piro-piro o boyoon diri do sumumpa' dot id toguang ngai' dit imam do wonsoyon kopio diyolo' o miagal di nokoboros diyolo'ddi. 13 Om iduwo' ku noddi i tagkos ku di poingagkos ku om poungkarabo' ku no. Om boros kangku'ddi, “Miagal nodti o Kinorohingan do poungkarab dot isai nopo dokoyu it a' sumulung di batos di pinoboros dokoyu'ddi. Om ngoyon nondod Kinorohingan o walai dokoyu om koinsanai do dapu' dokoyu om rumutum kou nondo,” kangku. Om oinsanan nopo i tulun di songintimung do hiri do minomoros dot, “Amin!” ka. Om pamarayou noddi iyolo'd Tuhan. Om wonsoyo' noddi di piro-piro o boyoon i nakabatos diyolo'.
Kopuhawango' di Nohomia
14 Nosiliu oku'd gobunor do Yohuda do solinaid do hopod om duwo o toun, do mantad di koduwo nohopod do toun di Raja' Artasasta do momorinta' om gisom di kotolu nohopod om duwo do toun dau do momorinta'. Om solinaid nopoddi om a' oku i' om i koobpinayan ku insan panganu di taakanon di maan daa do dong gobunor. 15 Nga' pointikid-tikid di gobunor dot id gulu ko' iyoho' om nosiliu ngai' nopod tonggungan di rayat dot awagat tu' minokianu i' iyolo' dot apat nohopod o tusin do pirok do sangadau, do maan diyolo'd pomoli do taakanon om waig dot anggur. Om iri piya i susuhuon diyolo' nga' nokoponginggorit i' di rayat. Nga' iyoho' nopo om a' oku i' minomonsoi do miagal diri tu' ooris oku i' do Kinorohingan. 16 Tuminotos oku nogi' do gisom dot agaas-gaasan ku do minononong di tolig om a' oku i' mininganu do tana' dot ongokooro' piya do maan ku'd doho'. Om iri nogi' i pakaraja' dot id doho' nga' minuhup ngai' i' do minononong di tolig. 17 Om oubas oku nogi' do popoilang do makan do hiri'd walai ku do hatus om limo nohopod o tulun do Yohudi do mogiwoyo-woyo' di piro-piro o boyoon diyolo'. Om paakanon ku po o koinsanai di tulun do rumikot dot id doho' do mantad id bansa'd suwai di hiri'd posorili'. 18 Monikid tadau oku nopo do monumbali' do songinan o sapi' om onom o tinan do dumba' dit ongolomu' om ogumu' o manuk do sumbolion ku. Om pointikid-tikid do tadau'd kohopod om poposodia' oku do waig dot anggur di wagu po kowonsoi. Nga' oilaan ku i' o kawagato' do tonggungan di rayat om a' ku iddi nanu i bohogian do tahakon do maan do dong gobunor. 19 “Om pokionuon ku no, oi Kinorohingan, do sorohon ngai' nu daa i nongowonsoi ku do bagi' diti bansa'dti, om barakatai oku no,” kangku.
Pakat dot Araat do Sumaap di Nohomia
1 Om korongou noddi i Sanbalat om i Tobia, om i Gisim, om i piro-piro o pisangod dahai'd suwai do nopongo no dahai do momonsoi i tolig, om i nongoposu nga' nongosombol no, om iri po i piro-piro o totobon ot a' dahai nokodokot do hiri'd piro-piro o wawayaan di bandar. 2 Om posunudai oku no di Sanbalat om i Gisim do mangangat daa doho' do mongoi solowot diyolo' dot id iso' o kawalayan do hilo'd Rantai dot Ono. Nga' oilaan ku i' do popokoruol daa iyolo' doho'. 3 Om ponuhu' oku noddid tulun do mongoi pomisunud diyolo' dot a' oku koongoi tu' maso ku do momonsoi'd karaja' dit agayo kopio. Mada' oku i' dot otingkadan i karaja' do mongoi solowot diyolo' o kotingkad-tingkadan. 4 Om ingapat oku nopo daa diyolo' posunudai do boros do miagal diri nga' iyo kasai' nopoddi o posimbaron ku. 5 Om suhuo' no di Sanbalat o tiso' di susuhuon dau do mongoi pomisunud doho' di koinglimo no. Nga' iti nopo baino' om tinulis dot id surat di poingukab. 6 Poingkaa o suang di surat: “Minomisunud i Gisim doho' do haro o pimboroson do tulun di bansa'd suwai do hiti'd posorili' do mumbal kou daa di tulun do Yohudi do sumaap do porinta, om iri noddi o kapananangan dokoyu di tolig di bandar. Om nokoboros nogi' dot osorou-sorou nu daa do sumiliu'd raja' do Yohudi, 7 om nokopomili' ko no do piro-piro o nabi do poposiliu diya'd raja' do hilo'd Yorusalim. Om pointantu' no do korongou i' i raja' do pasal diti om osorou ku dot osonong nogi' do misolowot to om opibara-barasan no o hal diti,” ka. 8 Om pokirimai ku no iyau dot isimbar do poingkaa, “Aiso' i' ot otopot di boros nu'ddi. Winonsoi-wonsoi nu i' iri,” kangku. 9 Om mumbal daa iyolo' do monompurolosi dahai om otingkadan indo dahai i karaja'ddi. Nga' sumambayang oku po do poingkaa, “Oi Kinorohingan, pokoriso' oku no!” kangku no. 10 Om tontok nogiddi do minongoi oku songkoduwo do hiri'd di Somaya, i tanak do kusai di Dolaya, i manangaki di Mihitabiil, tu' a' iyau milo do tumongkiad di walai dau do mongoi solowot doho'. Om boros ka dau dot id doho', “Kaino kama mongoi lisok do hiri'd Bilik dot Olidang do hilo'd Walai'd Sasambayangan dot Agayo om mongontiil to i' tu' haro moti' o tulun do mongoi pamatai diya' do totuong do baino',” ka dau. 11 Om boros kangku'd suminimbar, “Okon oku i' ko' tulun dit orohian do mogidu'. Ondos nu daa om mumboyo' oku do mongoi lisok do hiri'd Walai'd Sasambayangan dot Agayo do mokimapasi? A' oku i' kopio momonsoi do miagal diri,” kangku. 12 Om soira' di minomusorou kopio oku nga' kopurimanai ku no dot okon i' ko' Kinorohingan o minomisunud di Somaya, nga' sinisipan i' daa iyau di Tobia om i Sanbalat do popoboros diri dot id doho'. 13 Sinisipan daa diyolo' iyau do monompurolosi doho' om kowonsoi oku i' daa'ndo do dusa, om araag i' o ngaran ku om boro-boroson nondo do tulun. 14 Om sambayang oku no do poingkaa, “Oi Kinorohingan, soroho' no i winonsoi di Tobia om i Sanbalat, om hukuman no iyolo'! Om soroho' no i Noaya, i nabi do tondu' diri, om koinsanai di nabi do suwai di mumbal daa do monompurolosi doho',” kangku.
Nopongo do Mononong i Tolig
15 Om katalib poddi o limo nohopod om duwo o tadau do kuminaraja' om kopongo ngai' nogi' do momonsoi i tolig do tontok di tadau do koduwo nohopod om limo do tulan dot Ilul. 16 Om soira' di nokorongou ngai' i pisangod dahai dit id pogialatan di piro-piro o bansa'd suwai di hiri'd posorili', om kopurimanai nogiddi diyolo' do nointingayam iyolo' tu' koinsanai di tulun om koilo i' do kinapanga-pangaan nopo di karaja'ddi nga' mantad id nuhupan do Kinorohingan. 17 Om solinaid nopoddi do maso'ddi om mikirim-kirim pod surat i piro-piro o boyoon do tulun do Yohudi om i Tobia. 18 Om ogumu' i' o tulun do Yohudi do mambalut di Tobia tu' monongiwan i' iyau di Sokonia i tanak di Ara. Om kawagu po nga' iri nopo tanak di Tobia di roitan dot i Yohanan nga' minanansawo di tanak do tondu' di Mosulam, i tanak di Borokia. 19 Om popimboroson nopo di tongoulun dot id toguang ku o kosonongo' di Tobia, om posunudon ngai' diyolo' dau o koinsanai di doho'd boros. Om popingkirim po daa iyau'd surat do ponompurolosi doho'.
1 Om kopongo poddi do mononong i tolig di bandar, om ponuhu' oku no do podokot di totobon di piro-piro o wawayaan. Om i tulun do madtatamong di wawayaan, om i piro-piro o modsisinding, om i tulun do Liwi nga' nosuhu' ku no do momonsoi di diyolo'd buruon. 2 Om ponuhu' oku no do duwo o kusai do momorinta' do bandar do Yorusalim: iyolo' nopo om i Hanani, i tobpinai ku om i Hanania, i boyoon di kuta' do padtamangan. I Hanania nopo om milo kopio do ponongkuyaanan om oronok do Tuhan; aiso' no o tulun do koiyo dau. 3 Om sunudai ku no iyolo' dot a' mongiwang di wawayaan do Yorusalim do dongkosuabon dot a' po asawa-sawat o tadau om mositi' no do modtobon om mongontiil di wawayaan dit a' po kotingkod do kumaraja' i madtatamong do dongsosodopon. Om sinunudan ku nogi' iyolo' do momili' do tulun dot id pogialatan di tulun do poingiyon do hilo'd Yorusalim om monuhu' do piro-piro diyolo' do momonsoi'd piro-piro o karaja' di natantu' mantad, om iri no suwai om madtamong do hiri'd posorili' di walai diyolo'.
Dopitar do Ngaran do Tulun di Nokoguli' do Mantad id Pomogunan do Pinananggayan do Pisangod
4 Yorusalim nopo nga' bandar dot agayo nga' okuri' po o tulun do poingiyon do hiri, om a' po adala' o walai do nowonsoi'd hiri. 5 Om poiloo' oku nod Kinorohingan do monimung ngai' di tulun om i boyoon diyolo' om i pagawai diyolo', om ointob ku i' iyolo' do tumanud di ngaran di sinolusukan diyolo' di nongkotulis. Om tontok noddi do nokito ku i pinotulisan do ngaran di tulun dit id gulu kopio koguli' do mantad id pomogunan do pinananggayan do pisangod. Om iti no i pointulis do hiri'd pinotulisan diri: 6 Ogumu' o tulun di natanggayan do hilo'd pomogunan di pinananggayan do pisangod do tuminongkiad di watas do Babil om guminuli' kawagu do hilo'd Yorusalim om hilo'd Yohuda, om pinakayaan do hiri'd bandar diyolo'. Iri nopo piro-piro o sompiiyon diyolo' nga' alaid no do poundorong do hiri'd pomogunan do pinananggayan do pisangod do hilo'd Babil, do mantad poddi tinangkap om tinanggayan iyolo' di Raja' Nobukadnisar. 7 Boyoon nopo diyolo' om i Sorubabil, i Yosua, i Nohomia, i Asaria, i Raamia, i Nahamani, i Mordikai, i Bilsan, i Mispirit, i Bigwai, i Nahum om i Baana. 8-25 Iti no o dopitar do ngaran di piro-piro o pinuruan do sompiiyon dot Israil, om kogumuon do tulun dot id suang do pointikid-tikid do pinuruan do sompiiyon di nokoguli' do mantad id pomogunan do pinananggayan do pisangod: - Paros - --- 2,172 - Sopasa - --- 372 - Ara --- - 652 - Pahat-Muab (i sinakagon di Yosua om i Yoab) - --- 2,818 - Ilam - --- 1,254 - Satu - --- 845 - Sakai - --- 760 - Binui - --- 648 - Bobai - --- 628 - Asgad - --- 2,322 - Adonikam - --- 667 - Bigwai - --- 2,067 - Adin - --- 655 - Atir (i roitan dot i Hiskia) - --- 98 - Hasum - --- 328 - Bosai - --- 324 - Harip - --- 112 - Gibion - --- 95 26-38 Om iri tulun di poingiyon dot id kabandaran diti o komolohingan di gulu po nga' guminuli' nogi' do mantad id pomogunan do pinananggayan do pisangod: - Baitlahim om Nitopa - --- 188 - Anatot - --- 128 - Bait-Asmawit - --- 42 - Kiriat-Yiarim, Kopira om Biirot - --- 743 - Rama om Giba - --- 621 - Mikmas - --- 122 - Baitol om Ai - --- 123 - Nibo di tiso' - --- 52 - Ilam di tiso' - --- 1,254 - Harim - --- 320 - Yorikou - --- 345 - Lod, Hadid om Ono - --- 721 - Sinaa - --- 3,930 39-42 Iti no o dopitar do ngaran di pinuruan do sompiiyon do piro-piro ot imam di guminuli' do mantad id pomogunan di pinananggayan do pisangod: - Yodaya (i sinakagon di Yosua) - --- 973 - Imor - --- 1,052 - Pasur - --- 1,247 - Harim - --- 1,017 43-45 I piro-piro o pinuruan do sompiiyon do Liwi di minuli' do mantad id pomogunan di pinananggayan do pisangod: - Yosua om i Kadmiol (i sinakagon di Hodiwia) - --- 74 - I popouni do tuunion do hiri'd Walai'd Sasambayangan dot Agayo (i sinakagon di Asap) - --- 148 - I Madtatamong do wawayaan di Walai'd Sasambayangan dot Agayo (i sinakagon di Salum, Atir, Talmon, Akub, Hatita om Sobai) - --- 138 46-56 Iti no o dopitar do ngaran di piro-piro o pinuruan do sompiiyon di maganu-anu do hiri'd Walai'd Sasambayangan dot Agayo di minuli' do mantad id pomogunan do pinananggayan do pisangod: Siha, Hasupa, Tabaot, Kiros, Sia, Padon, Libana, Hagaba, Salmai, Hanan, Gidol, Gahar, Riaya, Risin, Nikoda, Gasam, Usa, Pasia, Basai, Mounim, Nopusim, Bakbuk, Hakupa, Harhur, Baslit, Mohida, Harsa, Barkos, Sisora, Tima, Nosia om Hatipa. 57-59 I piro-piro o pinuruan do sompiiyon di piro-piro o susuhuon di Suliman di minuli' do mantad id pomogunan di pinananggayan do pisangod: Sotai, Sopirit, Porida, Yaala, Darkon, Gidol, Sopasa, Hatil, Pokirit-Hasibaim, Amon. 60 Koinsanai nopo di sinakagon do tulun di maganu-anu do hiri'd Walai'd Sasambayangan dot Agayo do mihompit di sinakagon di piro-piro o susuhuon di Suliman di minuli' do mantad id pomogunan di pinananggayan do pisangod om 392 o tulun. 61-62 Iti ngai' no i tulun do minuli' do mantad hilo'd bandar do Tilmila, Tilharsa, Korub, Adon om Imor, nga' a' i' iyolo' milo do popointalang kopio ondung sinakagon iyolo' do bansa' dot Israil. Iyolo' nopo om id suang do pinuruan do sompiiyon di Dolaya, om i Tobia om i Mikoda. Oinsanan nopo om 642 o tulun. 63-64 Om haro nogi' o piro-piro o pinuruan do sompiiyon dot imam dit a' nokito o pinotulisan do ngaran di taki-aki diyolo'. Iri nopo pinuruan do sompiiyon diri nga': i Habaya, i Hakos om i Barsilai. (Haro o songulun di taki-aki do pinuruan do sompiiyon dot imam di Barsilai do minangawin do tondu' di sinakagon do pinuruan do sompiiyon di Barsilai di hilo'd Giliad. Om pakayo' noddi dau o ngaran di sompiiyon do tiwanon dau.) Om a' iddi iyolo' naanu do sumiliu dot imam tu' a' i' diyolo' milo do pointalangon kopio ondung isai o taki-aki diyolo'. 65 Om noduhan diri iyolo' di gobunor do watas do Yohuda do mangakan di taakanon di nakatahak dot id Kinorohingan do daamot po dot aiso' ot imam di milo do mongilo kopio do mamakai dit Urim om Tumim. 66-69 Om koinsanai nopo di tulun do minuli' do hilo'd pomogunan dau do mantad id pomogunan di pinananggayan do pisangod om 42,360 o tulun. Om suwai no ko' iri om minuli' nogi' i piro-piro o susuhuon diyolo' do 7,337 o tulun, om iri no modsisinding om 245 o tulun. Om nigitan nogi' diyolo' i tayam-tayam diyolo' do poingkaa o kogumuo': Kuda' --- 736 Bagal --- 245 Unta --- 435 Kaladai --- 6,720 70-72 Om ogumu' ot id pogialatan di rayat do minanahak do nipuhawang do mongingkuri-kuri' do balansa' do pononong di Walai'd Sasambayangan dot Agayo: - Mantad id gobunor - 8 kilogram do tamas - 50 o mangkuk do pakayon do sumambayang - 530 o rasuk dot imam dit anganaru - Mantad id piro-piro pinuruan do sompiiyon - 168 kilogram do tamas - 1,250 kilogram do pirok - Mantad id tulun do suwai - 168 kilogram do tamas - 140 kilogram do pirok - 67 o rasuk dot imam dit anganaru. 73 Om oinsanan nopo i tulun dot Israil, om it imam, om i tulun do Liwi, om i madtatamong do wawayaan di Walai'd Sasambayangan dot Agayo om i modsisinding, om ogumu' o tulun toomod, om i tulun di maganu-anu do hiri'd Walai'd Sasambayangan dot Agayo, do miniyon do hiri'd kabandaran om hiri'd kokompungan do hilo'd Yohuda.
Binasa' di Isra i Tourat dot id Toinsanan di Tulun
1 Tontok di tulan do koturu' om nongkoundorong ngai' noddi i tulun dot Israil do hiri'd bandar diyolo'. Om tontok di tadau do koiso' do tulan diri om timung ngai' no iyolo' do hilo'd Yorusalim do hiri'd natad dit otimbabaan di wawayaan di roitan do Wawayaan do Waig. Om suhuo' no diyolo' i Isra, it oilo kopio do Tourat di pinatahak do Tuhan dot id tulun dot Israil, i pinolombus di Musa, do mongoi panganu di buuk do Tourat diri. 2 Om ngoyo' no di Isra iri om igitai no dau do hiri'd toguang di tulun di songintimung --- i tongokusai, om i tongoondu', om i tangaanak di milo nod mokinongou. 3 Om basao' no di Isra i Tourat diri dot id diyolo' do mantad po di kosuabon om gisom do pitangaadau. Om orohian ngai' nopo iyolo' do mokinongou'ddi. 4 I Isra nopo nga' poingkakat do hiri'd mimbar di papan do winonsoi. Om iri nopo mimbar diri nga' winonsoi do maan do maso'ddi. Om iti ngai' no o tulun di poingkakat do hiri'd dawananan dau: i Matisa, i Sima, i Anaya, i Uria, i Hilkia om i Maasiya. Om iri no i songingkakat do hiri'd dogibangan dau om i Podaya, i Misail, i Malkia, i Hasum, i Hasbadana, i Sakaria om i Mosulam. 5 Iri nopo mimbar di ningkokoton di Isra nga' asawat i' ko' mantad di tulun dot ogumu' om ongkokito ngai' nopoddi iyolo' dau. Om maha' di noukaban no dau i buuk, om ingkakat ngai' no iyolo'. 6 Om boros kaddi di Isra, “Royohon no o Tuhan, i Kinorohingan dot Agayo,” ka dau. Om oinsanan nopo i tulun do pinopoinsawat do longon diyolo' om simbar no do poingkaa, “Amin! Amin!” ka. Om otud ngai' no iyolo' do tuminuku' dot id Kinorohingan. 7 Om hangog noddi iyolo' om ingkakat no do hiri'd kinoiyonon diyolo', om potuduko' noddi di piro-piro o tulun do Liwi i Tourat dot id diyolo'. Iri nopo i tulun do Liwi diri nga': i Yosua, i Bani, i Sorobia, i Yamin, i Akub, i Sabitai, i Hodia, i Maasiya, i Kolita, i Asaria, i Yosabad, i Hanan om i Polaya. 8 Om pinasalin diyolo' o boros di Tourat do Kinorohingan om pinatarang o komoyon diri do gisom dot osuhutan kopio di tongoulun. 1|65|HK65B| Binasa' di Isra i Tourat do Kinorohingan dot id tulun dot ogumu'|8.5-8 9 Om soira' di norongou di tulun dot ogumu' do binasa' i Tourat diri, om nongosudu'ddi iyolo' om ihad no iyolo'. Om sunudai noddi di Gobunor Nohomia, om i Isra it Imam it oilo kopio di Tourat diri, om i tulun do Liwi i pinoposuhut di Tourat diri, o koinsanai di tulun do poingkaa, “Tadau nopod baino' om tadau di nokotobilang do maan do don Tuhan, i Kinorohingan toko', om kada' kou nogi' tongob om kada' kou ihad. 10 Nga' uli' kou nogi' do dinondo om moginakan i'. Om bohogian no di taakanon om waig dot anggur dokoyu i tulun dit aiso' o taakanon. Tadau nopod baino' om tadau di nokotobilang do maan do Tuhan toko', om kada' kou tongob. Tu' iri nopo i kaarapadan do patahakon do Tuhan dot id dokoyu om popokoris i' dokoyu,” ka. 11 Om ngoyo' noddi di tulun do Liwi insasamadai o koinsanai di tulun om piguli-guli' po diyolo' do popimboros o boros do poingkaa, “Kada' kou tongob do tontok do tadau'dti, i tadau di nokotobilang do maan do don Tuhan,” ka. 12 Om uli' ngai' noddi i tulun om akan no iyolo' om inum do mikuwo'd ongotood tomod. Om bohogiai no diyolo' i tulun do suwai di taakanon diyolo' tu' nosuhutan no kopio diyolo' o komoyon di binasa' di norongou diyolo'ddi.
Tadau dot Agayo do Kinuhub-Kuhub
13 Om tadau noddi kawagu om ongoi ngai' no i boyoon do pinuruan do sompiiyon, om it imam, om i tulun do Liwi do hiri'd di Isra do mongoi pinsingilo di ponudukan di Tourat. 14 Om kabantalai no diyolo' do hiri'd Tourat, i pinatahak do Tuhan di pinolombus di Musa, do sinuhu' i tulun dot Israil do miyon dot id kinuhub-kuhub dot oruuhai, do solinaid di Tadau dot Agayo do Kinuhub-Kuhub. 15 Om poboroso' noddi diyolo' dot id tulun dot ogumu' ot iso' o ponuhuan, om potongkopo' no diyolo' iri dot id pointongkop do Yorusalim om hiri'd kabandaran om hiri'd kokompungan. Poingkaa i ponuhuan diri, “Ongoi kou no do hilo'd konuluhanan om manganu do raan do kayu dot aras, om kayu do saitun, om kayu di kitumau, om guas do kurma, om raan di kayu do suwai do maan do wonsoyon do kinuhub-kuhub do tumanud di pinonuhuan di nokotulis do hiri'd buuk do Tourat,” ka. 16 Om ongoi ngai' noddi i tulun panganu do raan di kayu'ddi, om pomonsoi no iyolo' do kinuhub-kuhub do hiri'd sakai di taap do walai diyolo' dit arantai, om hiri'd natad do walai diyolo', om hiri'd natad dit id dotimbabaan di Walai'd Sasambayangan dot Agayo, om hiri'd pogititimungan do tulun dot ogumu', it id toning di wawayaan di roitan do Wawayaan do Waig, om hiri'd pogititimungan do tulun dot ogumu', it id toning di wawayaan di roitan do Wawayaan dot Ipraim. 17 Koinsanai di tulun di nongkoguli' do mantad id pomogunan di pinananggayan do pisangod nga' minomonsoi ngai' nopo do kuhub-kuhub, om iyon noddi iyolo'd hiri. Om diri nogindo do nowonsoi o miagal diri do mantad di poimpasi po i Yosua, i tanak di Nun. Om oinsanan nopo dot ongosimbayan om ongooropod i tulun. 18 Om mantad nopo di tadau do koiso' di tadau do karamayan diri om gisom do norikot i tadau do kolimpupuson om mambasa' kasai' nopo iyolo' do sobohogian di Tourat do Kinorohingan do pointikid do tadau. Om ruminamai iyolo' do solinaid do turu' o tadau, om tontok di kawalu'd tadau om haro'ddi o pinitimungan dot agayo do pongolimpupus di karamayan diri, do tumanud di pinonuhuan do hiri'd Tourat.
Nakun Ngai' di Tulun o Dusa Diyolo'
1-2 Tontok di tadau'd koduwo nohopod om apat do tulan diri om timung ngai' no i tulun dot Israil do puasa do popointalang do rumologo iyolo' di dusa diyolo'. Om nokotongkiad no iyolo' do mantad id koinsanai'd tulun di bansa'd suwai. Om panampakai no iyolo' do karung om arabai no diyolo'd pupuk o tulu diyolo' do popointalang do tumongob iyolo'. Om ingkakat noddi iyolo' om pangakun no di dusa do nongowonsoi diyolo' om i nongowonsoi di taki-aki diyolo'. 3 Om haro i' doti' o tolu o jam do binasa' dot id diyolo' i Tourat do Tuhan, i Kinorohingan diyolo', om tolu poddi kawagu o jam do minangakun iyolo' di dusa diyolo'. Om otud nogiddi iyolo' do tuminuku' dot id Tuhan, i Kinorohingan diyolo'. 4 Hiri nopo nga' haro o mimbar dot iyonon di tulun do Liwi om songingkakat nopod hiri nga': i Yosua, i Bani, i Kadmiol, i Sobania, i Buni, i Sorobia, i Bani, om i Konani. Om sambayang noddi iyolo' dot opuhod dot id Tuhan, i Kinorohingan diyolo'. 5 Minomimpin nopo do sumambayang do tadau'ddi om i tulun do Liwi: i Yosua, i Bani, i Kadmiol, i Hasabnia, i Sorobia, i Hodia, i Sobania om i Pitaya. Boros ka diyolo', “Ingkakat no om royoho' no o Tuhan, i Kinorohingan toko'! Royohon no iyau do gisom dot alaid! Royohon no o ngaran dau di kikagayaan, do mulong piya dot a' i' daa kabagal-bagal o pamarayou do tulun dau!” ka.
Sambayang do Mangakun do Dusa
6 Om sambayang ngai' noddi i tulun dot Israil do poingkaa, “Iya' noo o Tuhan, oi Tuhan; iya' no o minomonsoi do koinsanai do hilo'd tawan om koinsanai dilo rombituon do hilo'd tawan. Iya' no o manahak do koposion om iya' o momogompi' do koinsanai'd nunu nopo. Koinsanai di kisinundu do hilo'd tawan nga' motud ngai' nopo do tumuku' dot id diya'. Om minsiriba' iyolo' dot id diya'. 7 Iya' noo, o Kinorohingan, oi Tuhan. Iya' no i minomili' di Abram do mantad id pogialatan do bansa' dau. Tinongkiadan dau o Ur, i hilo'd Babil, tu' winoyo' nu i' iyau. Om pinungaranan nu iyau do ngaran do wagu, dot i Abraham. 8 Om koilaai nu no dot otorodok iyau dot id diya', om pomonsoi ko no do tumpongo dot ogirot dot id dau. Minamatos ko do papatahak dau di tana' do tulun do Kanaan, om Hit, Om Amori, om i tana' do tulun do Poris, Yobus om Girgasi. Om koinsanai nopo iri do pinatahak nu dot id dau, do sumiliu dot iyonon do koinsanai di sinakagon dau. Om binayaan nu i' i batos nu. Tu' otulid i' o wonsoyon nu, om opuhawang ko. 9 Nokito nu i' i koinggoritan di taki-aki dahai di gulu po, norongou nu i' i tihad diyolo' di hilo' iyolo'd Masir om di hilo' iyolo'd Rahat do Toborau. 10 Minomonsoi ko do koimayaan dot id toguang di raja', om id toguang ngai' di pagawai om i rayat do pomogunan diri. Tu' oilaan nu i' do pinokorualan diyolo' i tulun nu. 11 Pinigirang nu i rahat do winayaan di tulun nu. Om pinosoborong nu iyolo' do minaya' do tana' dit otuu, om nongolondod do hiri'd waig dot aralom i minomogusa' diyolo', miagal po iyolo' di watu di nakasaalom do hilo'd rahat dit opuhod om korolosi. 12 Pinotunud nu iyolo' do haun o pinopotunud diyolo' do tontok do dangadau. Om tinitiu nu o ralan diyolo' do tapui di poorigi do tontok do dongotuong. 13 Luminintuhun ko do mantad hino'd tawan do hilo'd Nuluhon do Sinai dit olidang. Om minoro-boros ko'ddi dot id tulun nu. Om nonuan nu iyolo' dot oturan dit osonong om ponudukan di kiguna'. 14 Tinudukan nu iyolo' do popoinggayo di tadau'd Sabat dit olidang, om nonuan nu iyolo' dot oturan nu do pinolombus di Musa. 15 Tontok di louson iyolo' om aiso' o takanon, nga' nonuan nu i' iyolo' do roti do mantad hilo'd tawan. Om nonuan nu iyolo' do waig do mantad id tontolob do tontok di tinuuhan iyolo'. Sinunudan nu iyolo' do momogun-mogun do hiri'd tana', di pinabatos mantad nu do mikuwo'd sumpa' do patahakon nu dot id diyolo'. 16 Nga' suminawat o ginawo om kuminodou o ginawo di taki-aki dahai, om a' iyolo' minumboyo' di pinonuhuan nu. 17 A' iyolo' minumboyo', om nolihuan ngai' diyolo' i winonsoi nu dit ongosonong, om koinsanai di koimayaan do nongowonsoi nu nga' nongolihuan ngai i' diyolo'. Minomili' iyolo' do boyoon tu' asawat i' o ginawo diyolo'. Om siguli' po kawagu iyolo' do hilo'd Masir, do sumiliu'd turipon. Nga' iya' nopo om Kinorohingan dit orohian do mangampun, alanut o ginawo, om obinsianan, om a' obintogod. Agayo kopio o kosianan nu, om a' nu i' iyolo' tinongkiadan. 18 Minomonsoi iyolo' do tingolig do pinoiyo-iyo do sapi'. Om minomoros nogi' iyolo' dot, ‘Iti no o kinorohingan dokoyu, i pinoposoliwan dokoyu do mantad hilo'd Masir, i hilo'd pinonguripanan,’ ka. Minongindaraat tomod iyolo' diya', oi Tuhan! 19 Nga' a' nu i' tinongkiadan iyolo' do hilo'd tana' do kowotuan, tu' poimponu' ko i' do kosianan, a' nu i' nidu' i haun ko' i' tapui di popotunud diyolo' do tadau om totuong. 20 Om tinudukan nu i' iyolo' dit apatut diyolo'd wonsoyon. Tu' osonong ko i'. Pinaakan nu iyolo'd manna om nonuan nu'd waig do tinumon diyolo'. 21 Solinaid dit apat nohopod o toun do koloido' diyolo' do hilo'd tana' do kowotuan, om nonuan nu i' iyolo' do koinsanai di kosionuan diyolo'. A' i' nokoumbal do noromuk o pakayan diyolo', om a' nokoumbal do nokolonit ko' nokoruol po o lapap diyolo'. 22 Nonuan nu iyolo' do kamanangan do suminangod do piro-piro o bansa' om pomorinta', om koinsanai do watas om bandar om pomogunan di poinronit di tana' diyolo'. Nosolod diyolo' o pomogunan do Hisbon, i porintaon daa di Raja' Sihon. Om i pomogunan do Basan, i porintaon daa di Raja' Og. 23 Nonuan nu iyolo' do sinakagon do miagal pod rombituon do hilo'd tawan kogumu'. Om nonuan nu iyolo' do tana' do maan diyolo'd iyonon, i tana' di pinabatos mantad nu dot id taki-aki diyolo'. 24 Naala' diyolo' i pomogunan do Kanaan, naala' ngai' nu i tulun di poingiyon do hilo'. Nonuan nu i tulun nu do kuasa' do momonsoi do nunu nopo o korohian diyolo', do kumaa id toinsanan o tulun om bansa' om raja' do Kanaan. 25 Naala' om nosolod di tulun nu o piro-piro o kuta' di pogintirungan, om tana' dot oluhub, om walai do noponu'd kakayaan. Om torobong di noukadan mantad, om kabun dot anggur, om saitun, om kouwaan do suwai. Nakan diyolo' o koinsanai di korohian diyolo' om luminombon iyolo', nopurimanan diyolo' o kosonongo' do koinsanai dit ongosonong do pinatahak nu diyolo'. 26 Nga' suminaap i tulun nu om a' minumboyo' diya', om a' diyolo' pinadul i Tourat om i ponudukan nu, pinatai ngai' diyolo' i nabi di pinopoinsan daa diyolo', i popoguli' daa kawagu diyolo' dot id diya'. Oi Tuhan, asaru' ko no diyolo' dot indaraaton. 27 Om pinatahak nu'ddi iyolo' dot id pisangod diyolo'. I minangala' om minomorinta' diyolo' dot araat o pomomorinta om minonginggorit diyolo'. Om pomolohou no iyolo' diya' do mokitulung do tontok dit id suang iyolo'd kosusaan. Om norongou nu i' iyolo' do mantad hino'd surga. Om agayo i' o kosianan nu om simbaro' nu iddi iyolo'. Om nonuan nu iyolo' do boyoon om sumasangod di gunsiou. I pinopoidu' diyolo' do mantad id pisangod. 28 Soira' dit osimbayan kawagu o hiri'd pomogunan diyolo',om pomonsoi po kawagu iyolo'd dusa. Om pologoso' nu po kawagu iyolo'd naala' do pisangod di minonginggorit diyolo'. Nga' soira' di nokopuriman iyolo', om mikuwo'd kuminorologo, om minomolohou diya' do mamasi diyolo'. Om norongou nu i' iyolo' do hino'd surga, om tinulung kasai' nu i' iyolo'. Tu' agayo i' o kosianan nu dot id diyolo'. 29 Pinoinsan nu i' iyolo' om mumboyo' indo iyolo' di ponudukan nu, nga' minada' i' iyolo' dit Oturan nu tu' asawat i' o ginawo diyolo', mulong po daa do tumanud nopo di Tourat nu om iri no o ralan do kumaa id koposion. Okodou o ginawo diyolo' om osurilog, om a' iyolo' minokinongou om a' minumboyo'. 30 Monikid toun nopo do poinsanon nu iyolo', mikuwo dot alanut o ginawo nu. Tinudukan ngai' nu i nabi di boros nu do moro-boros diyolo'. Nga' mimbosuk-bosuk ngai' nopo i tulun nu, om gowoi poddi om pinologos nu iyolo'd naala' do bansa'd suwai. 31 Nga' agayo i' o kosianan nu, om a' nu iddi niadaan om a' nu rinaag iyolo'. Iya' no o Kinorohingan dit aiso' o koiyo. It agayo o kosianan om i poimponu' do kosianan! 32 Oi Kinorohingan, i Kinorohingan dahai dit okoris! Kinorohingan dit agayo om i kisinundu! Otorodok ko i' do mongigit di tumpongo om batos nu, sinulung nu i' i batos nu om winonsoi ngai' nu. Mantad po di ninggorit iyahai di raja' dot Asur, om gisom do dinondo, nga' oinggorit tomod po iyahai! Noinggorit ngai' i raja' dahai, om it imam, om i nabi, om i boyoon, om i taki-aki dahai om koinsanai di tulun dahai. Kada' no lihuwai o koinsanai di koinggoritan diri! 33 Otopot i' i winonsoi nu do minomohukum ko dahai it ongkidusa. Otulid ko i' mulong po do nokowonsoi iyahai'd dusa. 34 A' ngai' minumboyo' di Tourat nu i taki-aki, om i raja' om i boyoon om it imam dahai. A' iyolo' minokinongou om a' minomusou di ponuhuan om i boros nu di pinopoinsan. 35 Binarakatan ngai' nu i raja' om i tulun nu do gisom dot osimbayan iyolo'. Nonuan nu iyolo' do pomogunan dot agayo om tana' dot oluhub. Nga' a' i' iyolo' tuminongkiad do mantad id kowoyo-woyoon dit araat. Om a' iyolo' tuminuku' om a' suminambayang dot id diya'. 36 Om baino' noddi om nosiliu no iyahai'd turipon do hiti'd pomogunan di pinatahak nu dahai. I tana' dot oluhub di manahak dahai do kaakan-akanan. 37 Nunu nopo i hasil diti tana' nga' patahakon ngai' nopo di raja'. I pinili' nu do momorinta' do tulun nu do pomohukum nu di dusa dahai dot id toguang nu. Mingwonsoi nopo iyolo' do korohian diyolo' dot id dahai, om id suang diri iyahai'd katangaban om koinggoritan!” ka.
Suminain i Tulun dot Ogumu' dot Iso' o Pinibatasan
38 Om pomonsoi no o koinsanai'd tulun dot Israil dot iso' o batos dot ogirot om i tinulis om saapai nogi' di piro-piro o boyoon dahai, om i tulun do Liwi, om i piro-piro ot imam dahai. Tu' nosiliu ngai' i' o miagal diri.
1 Id gulu nopo do suminain om i Gobunor Nohomia i tanak di Hakalia, om i Sodokia nogiddi. Om iti ngai' tulun diti nga' suminain nogi': 2-8 Piro-Piro ot Imam: i Soraya, i Asaria, i Yoromia, i Pasur, i Amaria, i Malkia, i Hatus, i Sobania, i Maluk, i Harim, i Mirimot, i Obaya, i Daniol, i Giniton, i Baruk, i Mosulam, i Abia, i Miyamin, i Maasiya, i Bilgai om i Somaya 9-13 I Piro-piro o Tulun do Liwi: I Yosua, i tanak di Asania, i Binui, i sinakagon do pinuruan do sompiiyon di Hinadad, i Kadmiol, i Sobania, i Hodia, i Kolita, i Polaya, i Hanan, i Mika, i Rihob, i Hasabia, i Sakur, i Sorobia, i Sobania, i Hodia, i Bani om i Boninu. 14-27 Piro-Piro o Boyoon do Bansa': i Paros, i Pahat-Muab, i Ilam, i Satu, i Bani, i Buni, i Asgad, i Bobai, i Adonia, i Bigwai, i Adin, i Atir, i Hiskia, i Asur, i Hodia, i Hasum, i Bosai, i Harip, i Anatot, i Nibai, i Magpias, i Mosulam, i Hosir, i Misisabiil, i Sadok, i Yodua, i Pilisa, i Hanan, i Anaya, i Hosia, i Hanania, i Hasub, i Halohis, i Pilha, i Sobik, i Rohum, i Hasabna, i Maasiya, i Ahia, i Hanan, i Anan, i Maluk, i Harim om i Baana.
I Pinibatasan
28 Iyahai, i tulun dot Israil om i piro-piro ot imam om i tulun do Liwi, om i tulun di madtatamong do wawayaan di Walai'd Sasambayangan dot Agayo, om koinsanai di tulun di pouni do tuunion om i maganu-anu do hiri'd Walai'd Sasambayangan dot Agayo, om iri nogi' i sawo om i tangaanak dahai di milo nod mokinongou, om i tulun di minumboyo' dot Oturan do Kinorohingan, om i nokotongkiad do mantad id tulun di poingiyon do hiti'd pomogunan dahai. 29 Oinsanan nopo iyahai di boyoon dahai do sumumpa', do tumanud dit Oturan do Kinorohingan, i pinatahak dau do pinolombus di Musa, i susuhuon dau. Om usungon nopo iyahai'd Kinorohingan dot a' no dahai sulungon iti batos dahai'dti. Suminumpa' no iyahai do tumanud do koinsanai di pinonuhuan dit oturan om i ponudukan do Tuhan, i Kinorohingan dahai. 30 Sumumpa' no iyahai dot a' manansawo do bansa'd suwai di poingiyon do hiti'd pomogunan dahai. 31 Ondung mongoi daa i tulun do bansa'd suwai padagang do gandum ko' nunu nopo o padagang-dagangon diyolo'd suwai dot id dahai do tontok do tadau'd Sabat ko' tontok do tadau dot olidang do suwai, om a' no iyahai momoli'ddi. Pointikid-tikid do koturu'd toun om a' no dahai umoon i tana' om a' iyahai mokibayar do tutang. 32 Pointikid-tikid do toun om manahak ngai' iyahai do sorolimaan o gram do pirok do ponulung do pambayar dit apakai do hiri'd Walai'd Sasambayangan dot Agayo. 33 Om manahak iyahai diti pakayon do sumambayang do hiri'd Walai'd Sasambayangan dot Agayo: i roti dit olidang, i porsombahan, i porsombahan do gandum do pointikid do tadau, i tayam-tayam do maan do porsombahan do sorobon do pointikid do tadau, i porsombahan dot olidang do suwai, om i porsombahan di pangampun do dusa'd tulun dot Israil, om nunu nopo i koburu-buruon do hilo'd Walai'd Sasambayangan dot Agayo. 34 Iyahai no i rayat om it imam, om i tulun do Liwi, o mongundi' do pointikid-tikid do toun do mongilo ondung disai do pinuruan do sompiiyon dit apatut do manahak do siduwon do maan do pogudung di porsombahan di sumbolion di patahakon dot id Tuhan, i Kinorohingan dahai do tumanud di pinonuhuan dot id Tourat. 35 Pointikid-tikid do toun om igitan dahai do hilo'd Walai'd Sasambayangan dot Agayo i gandum dit id gulu dahai koomot om i tua' dit id gulu koonsok di kouwaan dahai. 36 Iri nopo tanak dahai'd kusai dit id gulu kosusu om pootodon dahai do hiri'd piro-piro ot imam do hilo'd Walai'd Sasambayangan dot Agayo do patahakon dahai dot id Kinorohingan, do tumanud di ponuhuan dot id Tourat. Om patahakon nogi' dahai i tanak do sapi', om i tanak do dumba' om i tanak do kambing dit id gulu kosusu. 37 Om patahakon dahai dot id piro-piro ot imam di hilo'd Walai'd Sasambayangan dot Agayo i tapung do gandum dit id gulu omoto' do pointikid-tikid do toun, om igitan ngai' nogi' dahai i porsombahan dahai'd suwai, dot i waig dot anggur, om tumau do saitun om piro-piro o bansa'd tua-ua'. Om igitan dahai i porsombahan di sompihopod do mantad id hasil di tumo dahai, dot id tulun do Liwi di monimung do porsombahan do sompihopod do hiri'd piro-piro o bandar di momutanom-tanom. 38 Iri nopo i piro-piro ot imam do sinakagon di Harun om apatut no do moyo' di tulun do Liwi do tontok di monimung iyolo' di porsombahan do sompihopod, om mositi' no do poopion di tulun do Liwi do hiri'd bilik di poopian do hilo'd Walai'd Sasambayangan dot Agayo o sompihopod do koinsanai di porsombahan do sompihopod dit otimung diyolo'. 39 Om mositi' no do migit i rayat dot Israil om i tulun do Liwi do gandum, om waig dot anggur, om tumau do saitun do maan do popuhawangon di tahakon kasai', do hiri'd bilik di poopian do taakanon om i koburu-buruon do hiri'd Walai'd Sasambayangan dot Agayo. Om hiri nogi' ot iyonon di piro-piro ot imam di maso'd kumaraja', om i madtatamong di wawayaan di Walai'd Sasambayangan dot Agayo, om i modsisinding. Om a' i' dahai kada-kadaan do momogompi' i Walai'd Tuhan dahai.
I Piro-Piro o Tulun di Poingiyon do Hilo'd Yorusalim
1 Iri nopo i piro-piro o boyoon nga' miniyon do hilo'd Yorusalim, om iri no rayat om minongundi' do momili' dot iso' o sompiiyon dot id pialatan do hopod o sompiiyon do miyon do hiri'd bandar do Yorusalim, i bandar dot olidang. Om iri no tulun do suwai dit a' nopili', om koino-ino no do mongoi iyon dot id kabandaran do suwai. 2 Om rinayou ngai' di rayat i tulun dit angagaan o ginawo do miyon do hilo'd Yorusalim. 3 Om hiri nod kabandaran do suwai om i rayat dot Israil om i piro-piro ot imam, om i tulun do Liwi, om i piro-piro o tulun di maganu-anu do hiri'd Walai'd Sasambayangan dot Agayo, om i sinakagon di susuhuon di Suliman, om i minongoi iyon do hiri'd tana' di diyolo'd songonuon om i hiri'd kabandaran diyolo'. Om iri no i tulun do Yohuda om Binyamin om miniyon do hilo'd Yorusalim. 4-6 Haro o piro-piro o tulun do mantad id payat do Yohuda om Binyamin do miniyon do hilo'd Yorusalim. Iti no o dopitar do ngaran diyolo': Tulun do Mantad id Payat do Yohuda: I Ataya, i tanak di Usia, i manangaki di Sakaria. Taki-aki nopo dau do suwai nga' i Amaria, i Sopasa om i Mahalaliil, i Piris, om i Yohuda. Oinsanan nopo om 468 o tulun dit ongosiou. I Maasiya, i tanak di Baruk, i manangaki di Kolhosi. Taki-aki nopo dau'd suwai om i Hasaya, i Adaya, i Yoyarib, i Sakaria, i Sila om i Yohuda. 7-8 Tulun do Mantad id Payat do Binyamin: I Salu i tanak di Mosulam, i manangaki di Yoid. Taki-aki nopo dau'd suwai om i Podaya, i Kolaya, i Maasiya, i Itiol om i Yosaya. I Gabai om i Salai, i koobpinayan di Salu dit id somok po. Oinsanan nopo om 928 o tulun. 9 Boyoon nopo diyolo' om i Yoil, i tanak di Sikri, om wakil nopo dau om i Yohuda, i tanak di Hasinua. 10-11 Piro-Piro ot Imam: I Yoyada i tanak di Yoyarib, om i Yakin. I Soraya i tanak di Hilkia, i manangaki di Mosulam. Taki-aki nopo dau'd suwai om i Sadok, i Mirayot om i Ahitub, i Boyoon dot Imam. 12 Oinsanan nopo nga' 822 ot imam di maganu-anu do hiri'd Walai'd Sasambayangan dot Agayo. I Adaya i tanak di Yiroham, i manangaki di Pilalia. Taki-aki nopo dau'd suwai om i Amsi, i Sakaria, i Pasur om i Malkia. 13 Oinsanan nopo di boyoon dot id pinuruan do sompiiyon diri om 242 o tulun. I Amasai i tanak di Asariil, i manangaki di Asai. Taki-aki nopo dau'd suwai om i Mosilimot om i Imor. 14 Haro i' o 128 o tulun do mantad id pinuruan do sompiiyon diti do soudor dit ongosiou. Boyoon nopo diyolo' om i Sabdiol, i tanak di Gidolim. 15-18 Piro-Piro o Tulun do Liwi: I Somaya, i tanak di Hasub, i manangaki di Asrikam. Taki-aki nopo dau'd suwai om i Hasabia om i Buni. I Sabitai om i Yosabad, i tulun do Liwi di kingaran-ngaran, i momohuruan di buruon dit id soliwan di Walai'd Sasambayangan dot Agayo. I Matania i tanak di Mika, i manangaki di Sabdi, i sinakagon di Asap. Iyau no o momoyo' di modsisinding do tontok do sumambayang do mongunsikou. I Bakbukia, i wakil di Matania. I Abda, i tanak di Samua, i manangaki di Galal, i sinakagon di Yodutun. Oinsanan nopo nga' 284 o tulun. 19 Piro-Piro o Madtatamong di Wawayaan: I Akub, i Talmon om i koobpinayan diyolo'. Oinsanan nopo nga' 172 o tulun. 20 Iri nopo i tulun dot Israil do suwai, om i piro-piro ot imam om i tulun do Liwi do suwai om miniyon do hiri'd tana' diyolo' di hiri'd piro-piro o bandar do hilo'd Yohuda. 21 Iri nopo i tulun di maganu-anu do hiri'd Walai'd Sasambayangan dot Agayo om poingiyon dot id iso' o kinoiyonon do hiri'd bandar do Yorusalim di roitan dot Opil. Boyoon nopo diyolo' do kumaraja' nga' i Siha om i Gispa. 22 Momohuruan nopo di tulun do Liwi di poundorong do hilo'd Yorusalim, om i Usi i tanak di Bani, i manangaki di Hasabia. Taki-aki nopo dau'd suwai om i Matania om i Mika. Om iyau nopo nga' mantad id pinuruan do sompiiyon di Asap, i pinuruan do sompiiyon di mongilo-ilo do tuunion do tontok di sumambayang do hiri'd Walai'd Sasambayangan dot Agayo. 23 Haro ot oturan do mantad id raja' do popoilo ondung disai do pinuruan do sompiiyon di mongilo-ilo do tuunion do hiri'd Walai'd Sasambayangan dot Agayo, do mogisowoli-woli do monikid tadau. 24 I Patahia i tanak di Misisabiil, i mantad id pinuruan do sompiiyon di Sira, it id suang do payat di Yohuda, o wakil di tulun dot Israil do hilo'd walai do raja' do Porsia.
I Piro-Piro o Tulun di Poingiyon dot id Kabandaran do Suwai
25-30 Om ogumu' ot id pogialatan di rayat do poingiyon do hiri'd kabandaran dit id somok di koumaan diyolo'. Om haro o piro-piro o tulun do mantad id payat do Yohuda do poingiyon do hiri'd kinoiyonon dit id pialatan do Borsiba di ponong id salatan om i Rantai do Hinom, di ponong id utara. Om hiti no ngai' id bandar diti om hiri'd kawalayan dit id posorili' o niyon diyolo': Kiriat-Arba, Dibon, Yikabsiil Yosua, Molada, Bait-Pilit, Hasar-Sual, Borsiba, Siklag, Mikhona In-Rimon, Sora, Yarmut, Sanoa, Adulam, Asika om Lakis. 31 Om haro o piro-piro o tulun do mantad id payat do Binyamin do miniyon do hilo'd Giba, Mikmas, Ai, Baitol, om hiri'd kawalayan dit id kasamakan, 32 om hilo'd Anatot, Nob, Anania, 33 Hasor, Rama, Gitaim, 34 Hadid, Siboim, Nobalat, 35 Lod, Ono, om hilo'd rantai di roitan do Rantai do Tukang. 36 Om haro o piro-piro o sinompuruan do tulun do Liwi di nokoiyon daa do hilo'd watas do Yohuda di gulu po do sinuhu' do minongoi iyon dot id pogialatan di tulun do Binyamin.
Dopitar do Ngaran di Piro-Piro ot Imam om i Tulun do Liwi
1 Iti ngai' no i piro-piro ot imam om i tulun do Liwi di guminuli' do mantad hilo'd pomogunan di pinananggayan do pisangod do minoyo' di Sorubabil i tanak di Sialtiol, om i Yosua i Boyoon dot Agayo dot Imam: 2-7 Piro-Piro Imam: i Soraya, i Yoromia, i Isra, i Amaria, i Maluk, i Hatus, i Sokania, i Rohum, i Mirimot, i Ido, i Ginitoi, i Abia, i Miyamin, i Maaya, i Bilga, i Somaya, i Yoyarib, i Yodaya, i Salu, i Amok, i Hilkia om i Yodaya. Iyolo' no i nosiliu do boyoon dot imam do tontok di poimpasi po i Yosua. 8 2I Piro-Piro Tulun do Liwi: Iti ngai' no i tulun do Liwi di boyoon do modsisinding di sinding do mongunsikou: i Yosua, i Binui, i Kadmiol, i Sorobia, i Yohuda om i Matania. 9 Iti ngai' no o tulun di modsisinding do sinding di posimbaron: i Bakbukia, i Uni om i tulun do Liwi do suwai.
Sinakagon di Yosua, i Boyoon dot Agayo dot Imam
10 I Yosua nopo om tapa' di Yoyakim, om i Yoyakim no om tapa' di Iliasib, om i Iliasib no om tapa' di Yoyada, 11 om i Yoyada no om tapa' di Yonatan, om i Yonatan no om tapa' di Yadua.
I Piro-Piro o Boyoon dot Agayo dot Imam
12-21 Tontok dit i Yoyakim o Boyoon dot Agayo dot Imam, om iti no o dopitar do ngaran di boyoon dot imam om i pinuruan do sompiiyon diyolo': - Imam - Pinuruan do Sompiiyon - Miraya - Soraya - Hanania - Yoromia - Mosulam - Isra - Yohanan - Amaria - Yonatan - Moliku - Yusup - Sobania - Adna - Harim - Hilkai - Mirayot - Sakaria - Ido - Mosulam - Giniton - Sikri - Abia - .... - Minyamin - Piltai - Moaya - Samua - Bilga - Yonatan - Somaya - Matnai - Yoyarib - Usi - Yodaya - Kalai - Salai - Hibir - Amok - Hasabia - Hilkia - Nitaniil - Yoyada
Dopitar do Ngaran do Sompiiyon dot Imam om Tulun do Liwi
22 Haro o tinulis do dopitar do ngaran do boyoon do piro-piro sompiiyon do tulun do Liwi om i sompiiyon dot imam do maso di poimpasi iti Boyoon dot Agayo dot Imam diti: i Iliasib, i Yoyada, i Yohanan om i Yadua. Om kopongo no i tinulis diri do tontok dit i Darius o raja' do Porsia. 23 Nga' iri nopo pasal di boyoon do piro-piro sompiiyon do tulun do Liwi om gisom no di poimpasi i Yonatan, i manangaki di Iliasib do haro o notulis.
Pinotikid o Buruon do Hiri'd Walai'd Sasambayangan dot Agayo
24 Om i Hasabia no om i Sorobia, om i Yosua, om i Binui, om i Kadmiol o minamahagi' di tulun do Liwi dot id piro-piro o sinompuruan. Om duwo kasai' nopo o sinompuruan, do wonsoyon nopo om mamarayou'd Tuhan om mongunsikou dot id dau, do misimbar-simbar do tumanud dit oturan di pinatahak di Raja' Daud, i susuhuon do Kinorohingan. 25 Om iti ngai' no o tulun di madtatamong di wawayaan di Walai'd Sasambayangan dot Agayo di sinuhu' do madtamong di piro-piro o bilik di poopian di hiri'd toning di wawayaan di Walai'd Sasambayangan dot Agayo: i Matania, i Bakbukia, i Obaya, i Mosulam, i Talmon om i Akub. 26 Iri ngai' nopo tulun diri nga' poimpasi do tontok di hino po i Yoyakim, i tanak di Yosua, i manangaki di Yosadak, om tontok di hino po i gobunor Nohomia, om tontok di hino po i Isra it Imam, it oilo kopio di Tourat.
Pinatahak di Nohomia dot id Tuhan i Tolig di Bandar
27 Tontok di pinatahak dot id Tuhan i tolig di bandar do Yorusalim, om lohowo' ngai' nopo i tulun do Liwi do mantad id hinonggo nopo o nokoiyonon diyolo', om kaamung i' iyolo' do mamaramai di kapatahakan diri do mikuwo'd modsinding do sinding do pongunsikou dot ompoton do tuunion do gambus om kecapi. 28 Om timung no i modsisinding di mantad id piro-piro sompiiyon do tulun do Liwi do mantad id kinoiyonon di kinoundorongon diyolo' dit id posorili' do Yorusalim, om i mantad hilo'd kabandaran di posorili' do Nitopa, 29 om i mantad do hilo'd Bait-Gilgal, om Giba om Asmawit. 30 Om lidangai no di tulun do Liwi om it imam o tinan diyolo', om linidangan nogi' diyolo' i tulun dot ogumu' om i piro-piro o wawayaan, om i tolig di bandar. 31 Om posolokoyo' ngai' ku no i boyoon do Yohuda do hiri'd sakai di tolig om suhuo' ku no iyolo' do momoyo' do duwo o sinompuruan do tulun dot ogumu' do mamanau do tumutuk di bandar, om mikuwo'd modsinding do mongunsikou'd Kinorohingan. Iri nopo sinompuruan do koiso' om poimbaris dot id timpak di tolig, om pinakayaan ponong id wanan, do poingkaa do hiri'd wawayaan di roitan do Wawayaan do Rinomos. 32 Om pamanau no i Hosaya dot id tohuri-huri di modsisinding, om tanud no o songintanga' di boyoon do Yohuda. 33-35 Om minamanau no do suminusuhut diyolo' om iti ngai' imam diti: i Asaria, i Isra, i Mosulam, i Yohuda, i Binyamin, i Somaya om i Yoromia. Om i Sakaria nogiddi o minamanau, i tanak di Yonatan, i manangaki di Somaya. Taki- aki nopo dau'd suwai om i Matania, i Mika, om i Sakur, i mantad id pinuruan do sompiiyon di Asap. 36 Om muhut-suhut dau do mamanau i piro-piro o tulun diti di mantad id pinuruan do sompiiyon dau: i Somaya, i Asariil, i Milalai, i Gilalai, i Maai, i Nitaniil, i Yohuda om i Hanani. Om ongkiinigit ngai' nopo iyolo'd tuunion do sagalai di tuunion di Raja' Daud, i susuhuon do Kinorohingan. Om i Isra it Imam, it oilo do Tourat do Kinorohingan o minogulu di borisan do tulun diri. 37 Om tontok di hilo' no iyolo' id wawayaan di roitan do Wawayaan do Tudan do Waig, om hamad no iyolo', om indakod no di tukad di kumaa do hiri'd bandar di Daud, do minaya' di walai di Daud do don raja', om poguliai nogiddi diyolo' do hiri'd tolig di kiwawayaan di roitan do Wawayaan do Waig, i ponong id koulayon do mantad id bandar diri. 38 Om iri no tiso' di sinompuruan di tulun di modsisinding, om poimbaris do hiri'd sakai di tolig do pinakayaan ponong id gibang, om tanud oku no do miwoyo' do songintanga' di tulun dot ogumu'. Om pamanau no iyahai do poimbaris do tuminalib di walai'd akawas di roitan do Walai'd Akawas di Kiapui om gisom do hiri'd tolig di roitan do Tolig dot Alaab. 39 Om mantad no do hilo' om pamanau no iyahai do tuminalib di wawayaan di roitan do Wawayaan dot Ipraim, om Wawayaan do Yosana, om i wawayaan di roitan do Wawayaan do Sada', om i walai'd akawas di roitan do Walai'd Akawas do Hananil, om i walai dot akawas di roitan do Walai'd Akawas do Mia, om gisom do nokorikot do hiri'd wawayaan di roitan do Wawayaan do Dumba'. Om undorong noddi iyahai do mamanau dot id somok di wawayaan di roitan do Wawayaan do Padtamangan, i hiri'd toning di Walai'd Sasambayangan dot Agayo. 40 Om korikot no goduwo i sinompuruan do modsisinding diri do hiri'd somok di Walai'd Sasambayangan dot Agayo. Om suwai nopo ko' i piro-piro o boyoon di tuminanud di sinompuruan ku, 41 om tuminanud nogi' i piro-piro ot imam di popouni do torumpit. Iyolo' nopo om i Iliakim, i Maasiya, i Minyamin, i Mika, i Ilyoinai, i Sakaria om i Hanania, 42 om muhut-suhut nopo diyolo' om i Maasiya, i Somaya, i Iliasar, i Usi, i Yohanan, i Malkia, i Ilam om i Isir. Om podsinding no i modsisinding do winoyo' di Yisrahia. 43 Tontok nopo do tadau'ddi nga' ogumu' o porsombahan di sinumbali' do pinatahak dot id Tuhan. Om i tulun nga' ongooropod tomod tu' pinosimbayan i' iyolo' do Kinorohingan. Iri tongoondu' om i tangaanak nga' minamung nogi' di karamayan diri. Om orongou i' do hiri'd sodu' i gara' diyolo' dot ongotood.
I Popuhawangon Kasai' dot id Walai'd Sasambayangan dot Agayo
44 Tontok nopo do maso'ddi nga' sinuhu' o piro-piro o tongokusai do madtamong di piro-piro o bilik di poopian di pinopuhawang dot id Walai'd Sasambayangan dot Agayo. Om kohompit nogi' i porsombahan do sompihopod om i gandum om tua-ua' dit id gulu koonsok do pointikid-tikid do toun. Iri nopo i piro-piro o tulun do madtatamong diri nga' nonuan do karaja' do mongoi ponimung di popuhawangon do mantad id koumaan dit id posorili' di piro-piro o bandar. Om iri nopo i popuhawangon diri nga' patahakon dot id piro-piro ot imam om id tulun do Liwi, do tumanud di ponuhuan dot id Tourat. Om angasanangan ngai' nopo i tulun do Yohuda dit imam om i tulun do Liwi, 45 tu' iyolo' no i momonsoi dit apatut do wonsoyon do maan do pomolidang, om i piro-piro ot apatut do wonsoyon do suwai do tumanud di pinonuhuan do Kinorohingan. Om iri nogi' i piro-piro o tulun do popouni do tuunion do hiri'd Walai'd Sasambayangan dot Agayo om i madtatamong di wawayaan di Walai'd Sasambayangan dot Agayo nga' minomonsoi ngai' i' di karaja' diyolo' do miontok dit oturan do winonsoi di Raja' Daud om i Suliman i tanak dau. 46 Mantad po di poimpasi po i Raja' Daud om i Asap, i popouni do tuunion di gulu po, om modsinding no i modsisinding do sinding do pamarayou om pongunsikou'd Kinorohingan. 47 Om tontok di poimpasi po i Sorubabil om i Nohomia nga' oinsanan nopo i tulun dot Israil do manahak do porsombahan do pointikid do tadau do maan do kosukup-sukupan di modsisinding om i madtatamong do wawayaan di Walai'd Sasambayangan dot Agayo. Om minanahak ngai' nogi' i tulun do porsombahan di potobilangon di patahakon dot id tulun do Liwi, om iri tulun do Liwi nga' pinapatahak nogi' di bohogian di natantu' mantad do dong imam.
Suminuwai-suwai i Tulun dot Israil do Mantad id Bansa'd Suwai
1 Tontok di binasa' i Tourat di Musa dot id tulun dot ogumu' om kabantalai no diyolo' i bohogian di minomoros dot a' kopio koino-ino do kopiamung o tulun dot Amon om tulun do Muab do tulun di songonuon do Kinorohingan. 2 Koiya-iyaan nopodti nga' a' minanahak do taakanon om waig i tulun dot Amon om Muab dot id tulun dot Israil do tontok di hiri iyolo'd tanga'd ralan di kososoliwan diyolo' do mantad hilo'd Masir. Tu' ginodsian nogi' daa diyolo' i Biliam do momopol di tulun dot Israil nga' siniliu id Kinorohingan do barakat i popol diri. 3 Om soira' di norongou di tulun dot Israil it tourat diri do binasa' om potongkiado' no diyolo' o koinsanai di tulun do bansa'd suwai do mantad hiri'd pogialatan do tulun dot Israil.
Koinwoguan do Winonsoi di Nohomia
4 I Iliasib nopo, it Imam diri om mongilo-ilo di bilik do poopian do hiri'd Walai'd Sasambayangan dot Agayo, om laid no do monokiambalut di Tobia. 5 Om patahako' no di Iliasib dot id di Tobia ot iso' di bilik dit agayo. Iti nopo daa bilik diti om maan do poopian do porsombahan do gandum om kominyan, om i piro-piro o pakakas do pakayon do hiri'd Walai'd Sasambayangan dot Agayo, om i porsombahan do dong imam, om i porsombahan do sompihopod do gandum, om waig dot anggur, om tumau do saitun do potikidon di tulun do Liwi, om potikidon di tulun di modsisinding, om i madtatamong di wawayaan di Walai'd Sasambayangan dot Agayo. 6 Tontok nopo di nosiliu o miagal diri, om okon oku ko' hilo'd Yorusalim, tu' nopo di kotolu nohopod om duwo do toun di Raja' Artasasta do momorinta' do hilo'd Babil, om guminuli' oku do hilo'd Babil do minongoi posunud di nongowonsoi ku dot id dau. Om alaid-laid poddi om pologoso' oku nogi' dau 7 do gumuli' do hilo'd Yorusalim, om uli' oku no. Om soira' di nokorikot oku'd hilo' nga' nokotigowo tomod oku do nokoilo do nonuan di Iliasib i Tobia dot iso' o bilik do hiri'd Walai'd Sasambayangan dot Agayo. 8 Om otogod oku no kopio, om popinsoliwano' ngai' ku nopo i konunu-nunuan di Tobia. 9 Om ponuhu' oku noddi do momolidang di piro-piro o bilik di hiri'd Walai'd Sasambayangan dot Agayo, om i porsombahan do gandum, om kominyan. 10 Om koilaai ku nogi' do guminuli' ngai' do hiri'd tumo diyolo' i popouni do tuunion do hiri'd Walai'd Sasambayangan dot Agayo, om i tulun do Liwi do suwai, om tuminongkiad iyolo' do mantad hilo'd Yorusalim tu' a' iyolo' di rayat onuan do maan do diyolo'd kaakan-akanan. 11 Om togodo' ngai' ku no i pagawai tu' pinologos i' diyolo' dot a' nogompi' i Walai'd Sasambayangan dot Agayo. Om ongoyo' ku no pogulio' do hiri'd Walai'd Sasambayangan dot Agayo i tulun do Liwi om i popouni do tuunion om suhuo' ku no kawagu iyolo' do maganu-anu'd hiri. 12 Om oinsanan nopoddi i tulun dot Israil do tuminimpuun kawagu do pinapaatod do porsombahan do sompihopod do gandum, om waig dot anggur, om tumau do saitun, do hiri'd bilik di poopian do hiri'd Walai'd Sasambayangan dot Agayo. 13 Om suhuo' ku no iti tulun diti do mongilo-ilo di piro-piro o bilik di poopian diri: i Solomia it Imam, i Sadok it oilo kopio di Tourat, om i Podaya, i tulun do Liwi. I Hanan, i tanak di Sakur, i manangaki di Matania o sinuhu' ku do monguhup diyolo'. Oilaan ku i' do milo ngai' ku do ponongkuyaan i tulun diri tu' otulid i' o popotikid diyolo' di kaakan-akanan dot id kongoombolutan diyolo' di maganu-anu'd hiri. 14 Oi Kinorohingan ku, soroho' no o koinsanai di winonsoi ku do bagi' di Walai'd Sasambayangan dot Agayo om i toonuon do hiri. 15 Tontok nopo do maso'ddi om haro o nokito ku do piro-piro tulun do hilo'd Yohuda do mamaga' dot anggur do tontok do tadau'd Sabat. Om tulun nod suwai om papagandar do gandum, om anggur, om tua' dot anggur, om tua' dot ara, om konunu-nunuan do suwai dot id kaladai diyolo' dot igitan diyolo' do hilo'd Yorusalim. Om oduhai ku no iyolo'd papadagang do nunu nopo do tontok do tadau'd Sabat. 16 Om haro o piro-piro tulun do mantad hilo'd bandar do Tirus di poingiyon do hilo'd Yorusalim do mongigit do sada' om mogisuwai-suayan nopo o dagangon diyolo' do hiri'd bandar do Yorusalim do padagangon dot id tulun dot ogumu' do tontok do tadau'd Sabat. 17 Om togodo' ngai' ku no i boyoon do tulun do Yohuda. Boros kangku, “Antangai pogi' iti kararaat do wonsoyon dokoyu! Monosomu' kou do tadau'd Sabat. 18 Iti nogi' kopio o dusa do kinopomohukuman do Kinorohingan di taki-aki toko' om pinologos dau'ddi do rinaag iti bandar. Om poporikot kou po daa kawagu do kototogod do Kinorohingan dot id tulun dot Israil tu' sosomuon i' dokoyu o tadau'd Sabat?” kangku. 19 Om ponuhu' oku noddi do modtobon ngai' di wawayaan di bandar do pointikid-tikid do koimpuunon do tadau'd Sabat, di tuminimpuun nogi' do sumodop, om a' no iwangan dot a' po atalib o tadau'd Sabat, dit otonob o tadau do tontok do tadau'ddi. Om suhuo' ku no piro-piro di tulun ku do tumamong do hiri'd piro-piro o wawayaan om aiso' i' o dagang-dagangon dot oigitan do sumuang do hiri'd bandar do tontok do tadau'd Sabat. 20 Nga' haro dot insan ko' induwo do minodop daa do hiri'd soliwan di tolig di bandar do tontok di totuong do tadau'd kolimo i tulun do dumagang do mogisuwai-suayan o dagangon. 21 Om poinsano' ku no iyolo'. Boros kangku, “Aiso' i' ot aanu-anu dokoyu do mandad do hino do gisom do kosuabon. Ondung mumbal kou kawagu do momonsoi do miagal diti om awagat no moti' o wonsoyon ku dot id dokoyu,” kangku. Om mantad poddi om a' noddi iyolo' insan ongoi do hiri do tontok do tadau'd Sabat. 22 Om suhuo' ku no i tulun do Liwi do momolidang do tinan diyolo' om mongoi padtamong ngai' di wawayaan om pusohon indo do tulun o tadau'd Sabat. Om sambayang oku no do poingkaa, “Oi Kinorohingan, soroho' oku no dot iti hal diti o kopomusarahan, om kosianai no doho' do miontok di kosianan nu dit agayo kopio,” kangku. 23 Om tontok nogiddi do noilaan ku dot ogumu' o tongokusai do Yohudi do nakapanansawo do tongoondu' do bansa'd Asdod, om Amon om Muab. 24 Om songintanga' nopo di tangaanak diyolo' nga' dong Asdod nod boros ko' boros do bansa'd suwai o boros diyolo' om a' no iyolo' koilo do momoros do boros dahai. 25 Om togodo' ku no i tongokusai'ddi om papalai ku no iyolo'. Om haro nogi' o binobog ku, om nundat ku o tobuk. Om suhuo' ku no iyolo' do sumumpa' dot id suang do ngaran do Kinorohingan dot a' iyolo' om i tangaanak diyolo' mumbal kawagu do manansawo do bansa'd suwai. 26 Boros kangku, “Minamayayat nopo di Raja' Suliman do minomonsoi'd dusa om i tongoondu' do bansa'd suwai. Iyau nopo daa om songulun o raja' dit agayo po ko' mantad di piro-piro o raja' do bansa'd suwai do hiti'd pomogunan. Om kinosianan i' iyau do Kinorohingan gisom do siniliu iyau'd raja' do koinsanai dot Israil, nga' naratu' iddi iyau dot id dusa do nabayayat iyau di tongoondu' di bansa'd suwai. 27 Araat no kopio o winonsoi dokoyu! Kasaap kopio kou daa do sumaap do Kinorohingan tu' minanansawo kou i' do tongoondu' do bansa'd suwai!” kangku. 28 I Yoyada nopo nga' tanak i' di Iliasib, i Boyoon dot Agayo dot Imam, nga' haro i' o tiso' di tanak dau'd kusai do minanansawo di tanak do tondu' di Sanbalat, i mantad hilo'd bandar do Bait-Horon. Om uyungo' ku noddi i Yoyada do mantad hilo'd Yorusalim. 29 Om sambayang oku nod poingkaa, “Oi Kinorohingan ku, soroho' no o pinonosomu' diti tulun di karaja' do dong imam om i tumpongo do winonsoi nu dot id piro-piro ot imam om id tulun do Liwi!” kangku. 30 Om iyo noddi o pinomolidang ku di tulun dot Israil do mantad id koinsanai di dong bansa'd suwai. Om tontuo' ku no o buruon di piro-piro ot imam om i tulun do Liwi om koilo ngai' i' iyolo' do buruon diyolo'. 31 Om tontuo' ku no o maso do kapaatadan di siduwon do pogudung di porsombahan do sumbolion. Om tinantu' ku nogi' o maso do kapaatadan diyolo' di porsombahan diyolo' do tua' do gandum om tua-ua' do suwai dit id gulu koonsok. Om id tohuri noddi om sambayang oku nod poingkaa, “Soroho' ngai' no iti, oi Kinorohingan ku, om kosianai no doho',” kangku.
Suminurilog i Raja' Wasti di Pinonuhuan di Raja' Ahaswiros
1-2 Hilo' nod Susan, i bandar dot agayo do Porsia, o niyon di Raja' Ahaswiros do momorinta' di hatus om duwo nohopod om turu' o watas do mantad hilo'd India om gisom do hilo'd Etiopia. 3 Tontok di kotolu do toun di Raja' Ahaswiros do momorinta', om papaharo no iyau do poginakanan do pinangalapan do koinsanai di pagawai dau om i tulun dit ongkipangkat. Om nakarapou ngai' nogi' i soudor do Porsia om Modia, om i gobunor om i boyoon do watas dot id poginakanan diri. 4 Om onom kopio o tulan di raja' do popingontong di kakayaan do hiri'd walai dau di don raja' om i kagayaan om i kobontugo' di pomorintaan dau. 5 Om katalib poddi iri, om papaharo po i raja' do poginakanan do pinangalapan do koinsanai di tulun do kaya' om i tulun do mosikin do hilo'd Susan, i bandar dot agayo. Koloido' nopoddi om sominggu', om niyon nopo nga' hiri'd natad do walai di raja'. 6 Om linumis tomod i kinoiyonon diri do tabir do kain linan dit otomou om opurak, i kinagasan do tali do kain linan dit aalus dit otomou daragang- ragang, om pinokogos dot id pondulung do pirok do hiri'd torigi do marmar. Om pinosodiaan nogi' do tirikohonon dit anganaru, i tamas om pirok do winonsoi, o hiri'd natad di walai di raja'. Iri nopo natad nga' linopikan do marmar dot opurak dot opurak, om hablur dot aragang, om kulit do mutiara dit okolong, om watu do pirus dit otomou. 7 Om a' no aayi-ayi' o waig dot anggur do pinosurung di raja'. Om pinoninggorungan nopo di tinumon om sangkir do tamas di mogisuayan nopo o korupa-rupao'. 8 Om aiso' nopo o poolu-oluon di waig dot anggur di tinumon, tu' nosunudan ngai' no di raja' i susuhuon do hiri'd walai do raja' do manahak do pointikid-tikid do tulun do tinumon do gisom dot abagalan iyolo'. 9 Om tontok iddi do pinapaharo i Raja' Wasti do poginakanan do hiri'd suang di walai do raja' do pinangalapan dau di tongoondu'. 10 Om tontok di tadau'd koturu' do moginakan om osonong tomod diri o kopurimanan di raja' om minginum iyau di tinumon. Om lohowo' noddi dau i turu' o susuhuon dau di nongoinggolian, i susuhuon kasai' dau. Ngaran nopo diyolo' om: i Mohuman, i Bista, i Harbona, i Bigta, i Abagta, i Sitar om i Karkas. 11 Om suhuo' no dau iyolo' do mongoi pangangat di Raja' Wasti do mongoi solowot dau do mikuwo'd monontupi' di tupi' do don raja'. Iri nopo raja' do tondu'ddi nga' olumis kopio koondu', om orohian daa'ddi i raja' do popoontong di kolumiso' di raja'd tondu' dot id koinsanai di pagawai om i tulun di nalap dau. 12 Nga' tontok di sinunudan di susuhuon i Raja' Wasti di ponuhuan di Raja' Ahaswiros diri, om a' iddi nokotumboyo' i Raja' Wasti do mongoi solowot di Raja' Ahaswiros. Om kotogod tomod noddi i raja'. 13 Om koubasanan no di raja' do moguho-guhot ondung poingkuro ot osorou di tulun dit ongoilo do pasal dot undang-undang om oturan. Om lohowo' noddi dau i piro-piro o ponosihat dau, i tulun dit ongkoilo ondung nunu ot apatut do wonsoyon dot id suang do hal diri. 14 Om kosoruan nopo dau do mokinosihat om i Karsina, i Sitar, i Admata, i Tarsis, i Miris, i Marsina, om i Momukan, i turu' o pagawai do Porsia om Modia dit angasawat kopio o pangkat dot id pomogunan diri. 15 Om boros ka dau dot id turu' o tulun diri, “Iyoho' no, i Raja' Ahaswiros, o minonuhu' di susuhuon ku do mongoi popoilo di Raja' Wasti do mongoi solowot doho', nga' a' i' dau numboyo' iri! Tumanud nopo dot undang-undang om nunu ot apatut do wonsoyon toko' dot id dau?” ka dau. 16 Om boros ka di Momukan dot id raja' om id piro-piro pagawai di raja', “Okon nopo ko' raja' noo o nindaraat di Raja' Wasti nga' oinsanan nogi' i pagawai do raja', om oinsanan o tongokusai do hiti'd pomorintaan nu! 17 Oinsanan nopondo o tongoondu' do hiti'd pomorintaan nu dot a' momusou do sawo diyolo' do korongou iyolo' di nowonsoi di raja'd tondu'. Mimboros nondo iyolo' dot, ‘Sinuhu' di Raja' Ahaswiros i Raja' Wasti do rumikot do mongoi solowot dau nga' a' i' iyau minumboyo',’ ka nondo diyolo'. 18 Korongou ngai' nopondo i sawo do koinsanai di pagawai do raja' do Porsia om Modia do kowoyo-woyoon di raja'd tondu'ddi, om atantu' no dot olomus nopo iyolo' do momisunud di sawo diyolo' do pasal diri. Om kootuson nopondo nga' sumaap nondo i tondu' di kusai om i kusai nga' tumogod nondo di tondu'. 19 Ondung kohubayaan do Tuan Raja', om ponulis no do maan do kopoilaan dot a' nondo koino-ino do mongoi timbaba' do raja' i Wasti do mantad do tadau'd baino'. Om potulison nori dot id suang dot undang-undang do Porsia om Modia, om a' i' osimbanan do gisom dot alaid. Om patahakon nogindo ilo pangkat dau do raja'd tondu' dot id tondu' dit osonong ko' iyau. 20 Om kopinsunud nopondo i kopoilaan nu'ddi dot id pointongkop diti pomorintaan nu dot agayo kopio, om oinsanan nopondo o tongoondu' do momusou do sawo diyolo', dot i tulun di kaya' om i mosikin,” ka dau. 21 Om nosokodungan i' di raja' om i pagawai dau i boros di Momukan diri, om wonsoyo' noddi di raja' o miagal di pinoboros di Momukan. 22 Om tikidai nopoddi dau do kopoilaan i watas dot id suang do pomorintaan dau do tinulis dot id suang do boros do hiri'd watas diri om tumanud do kowoyo-woyoon do ponunulis do watas diri. Iri nopo pinotulis nga' apatut no dot i kusai o boyoon do sompiiyon dau om iyau o moro-boros kopio do manantu' dit apatut do wonsoyon.
Nosiliu do Raja'd Tondu' i Isto
1 Om alaid noddi, tontok di nakatanus-tanus no o kototogod di raja', om momusorou kasai' po iyau di nowonsoi di Wasti om i pinoboros dau do wonsoyon dot id di Wasti. 2 Om boro-boros noddi o piro-piro di ponosihat di raja', it ongoubas kopio di raja'. Boros ka diyolo', “Osonong nogi' do mogihum ko do kosumandakan dit ongolumis. 3 Om milo ko i' do momili' do piro-piro pagawai dot id pointikid-tikid do watas diti pomorintaan nu, om suhuon nondo iyolo' do papaatod do kosumandakan dit ongolumis do hiti'd poiiyanan nu do tongoondu' nu do hiti'd Susan, i bandar dot agayo. Om i Higai nondo, i susuhuon nu di noinggolian om i madtatamong di walai di tiiyonon di tongoondu' o mongilo-ilo diyolo'. Om onuan nogindo iyolo' do pongillumis do tinan. 4 Om isai nopo i tondu' do korohian kopio nu om iri no ot onuon, om potingolonon di Wasti do sumiliu do raja'd tondu',” ka diyolo'. Om kotumboyo' i' i raja' di nosihat diri om tonudo' noddi dau. 5 Om haro o songulun o bansa'd Yohudi do poingiyon do hilo'd Susan. Ngaran nopo dau om i Mordikai, i tanak di Yair. Iyau nopo om sinakagon di Kis om i Simoi, i mantad id payat do Binyamin. 6 Tontok di naala' di Raja' Nobukadnisar i raja' do Babil, o Yorusalim, om tanggayai no dau i Mordikai do mogiwoyo-woyo' di Raja' Yoyakim, i raja' do Yohuda, om ogumu' po o tulun do suwai. 7 Om haro o pinsan dau dot i Isto o ngaran. Nga' ngaran nopo di Isto do don Ibrani om i Hadasa. Iyau nopoddi om olumis kopio om osonong o koinan-inano'. Om tontok di napatai goduwo i molohing di Isto om nongoi'ddi iyau di Mordikai gompio' om siniliu dau iyau do miagal do dau kopio'd tanak. 8 Tontok di nokosoliwan di raja' i kopoilaan diri om ogumu' tomod diri o kosumandakan do pinakaa do hilo'd Susan. Om i Isto nga' hiri nogi'. Om iyau nga' pinosuang nogi' di walai'd raja', om pinatamangan di Higai, i boyoon di poiiyanan di raja' do tongoondu'. 9 Om i Isto nopoddi nga' kasanangan kopio om kosianan di Higai. Om tilombusai nopo dau i Isto do manahak di pongillumis do tinan. Om nonuan dau iyau di maan do pongillumis om nonuan do taakanon dit osonong kopio. Om nonuan nogi' dau i Isto do tiyonon dit osonong kopio do hiri'd poiiyanan di raja' do tongoondu'. Om sinuhu' dau o turu' o tongoondu' di pinili-pili' no do mantad hiri'd walai'd raja' do mogobi-obi' di Isto. 10 Om a' i' di Isto pinoboros do tulun iyau'd Yohudi, tu' iri no o bilin di Mordikai dot id dau. 11 Om monikid tadau nopo i Mordikai do mongoi pipanau-panau do hiri'd natad, di hiri'd dotimbabaan di poiiyanan di raja' do tongoondu' do mongoi pongilo ondung poingkuro-kuro no i Isto om ondung nunu ot osiliu dot id dau. 12 Om koubasanan nopo do mongillumis do tongoondu' om sontoun o koloido': onom o tulan do pinggihilan do tumau di rinalatan do kominyan om onom kawagu o tulan do luhadon do tumau di rinalatan do pomowongi' di suwai. Om katalib pondo iri om ngoyon nogindo posolowoto' di Raja' Ahaswiros o pointikid-tikid di tongoondu'. 13 Tontok nopo do tadau di ngoyon i tondu' posolowoto' di raja', om di tumongkiad iyau do mantad hiri'd poiiyanan do tongoondu' om mongoi nondo do hiri'd walai di raja', om nunu nopo i korohian dau om milo ngai' nopo dau do pakayon. 14 Om mongoi i tondu'ddi do hiri di dongsosodopon om kosuabon pondo om ngoyon nondo iyau poiyono' dot id iso' o poiiyanan do tongoondu' di tamangan di Saagas, i kusai do noinggolian, i madtatamong di tongoondu' di panakasawo di raja'. Om a' nondo i tondu' koongoi kosolowot kawagu di raja' ondung a' no iyau korohian kopio di raja', om a' no olohou o ngaran dau. 15 Om korikot noddi o maso di Isto do ngoyon posolowoto' di raja'. I Isto --- i tanak di Abihail, i pinsan di Mordikai. I Mordikai no o minomogompi' di Isto do siniliu dau do dau'd tanak; i Isto --- i kolumisan ngai' nopo do pointikid-tikid do tulun di kokito dau. Tontok di norikot i kasalawatan di Isto di raja', om pakayo' nopo dau i pinotuduk di Higai, i kusai di noinggolian i boyoon di poiiyanan do tongoondu'. 16 Om tontok di koturu'd toun do pomorintaan di Ahaswiros, di tulan do kohopod, i tulan do Tibit, om ngoyo' no i Isto posolowoto' di Raja' Ahaswiros do hiri'd walai di raja'. 17 Om iyau no o kinorohian kopio di raja' do mantad ko' i kosumandakan do suwai. Om iyau no o kinosianan kopio om kinohubayaan di raja'. Om potupiyai no dau di Isto i tupi' do raja' om siliho' no dau iyau do raja'd tondu' do suminowoli di Wasti. 18 Om papaharo noddi i raja' do poginakanan dot agayo do pomusou di Isto. Om alapo' ngai' no dau i pagawai om i tulun dau dit ongkipangkat. Om poboroso' no dau do tadau'd koundarangan o tadau'ddi dot id pointongkop di pomorintaan dau. Om popintikid no iyau dot ogumu' o nipuhawang di mogisuayan do maan do pomuhawang di tulun do pointongkop di pomorintaan dau.
Pinasi di Mordikai i Raja'
19 Om daamot nopoddi om pinili' di raja' i Mordikai do sumiliu'd pagawai do pomorinta'. 20 Om i Isto no om a' po dau nokosunud do bansa' iyau do Yohudi, tu' binilinan iyau di Mordikai dot a' momisunud dot isai nopo o tulun do bansa' dau. Om numboyo' i' dau iri do miagal di pongumboyo' dau dit okoro' po iyau, di poinsugku' po iyau di Mordikai. 21 Om tontok di pakaraja' i Mordikai do hiri'd walai di raja' om karaatai no i Bigtan om i Tiris di Raja' Ahaswiros, om pipakat no daa iyolo' do mongoi pamatai di Raja' Ahaswiros. Iyolo' nopo goduwo'dti om kusai di noinggolian, om madtamong di wawayaan do kumaa do hiri'd kobilik-bilikan di raja'. 22 Om koilaai noddi di Mordikai i pakat diri, om posunudo' no dau di Raja' Isto. Om sunudai noddi di Isto i raja' di noilaan di Mordikai. 23 Om sorisido' noddi kopio do mongilo i hal diri, om koilaai no dot otopot i' kopio i pinosunud diri. Om giiso' goduwo nopoddi i duwo o tulun diri. Om ponuhu' no i raja' do potulis diri dot id buuk di monusui do pasal di pomorintaan dau.
Minomusorou i Haman do Mamatai di Tulun do Yohudi
1 Om alaid-laid poddi do mantad diri om poinsawato' noddi di Raja' Ahaswiros o pangkat do songulun di roitan dot i Haman, do siniliu do Boyoon do Montiri'. I Haman nopo om tanak di Hamidata, i sinakagon di Agag. 2 Om sinuhu' ngai' di raja' i pagawai dau do motud om tumuku' dot id di Haman do popointalang do momusou iyolo' dau. Om oinsanan nopoddi iyolo' do tuminanud di pinonuhuan diri, nga' i Mordikai poo ot a' tuminanud. 3 Om uhoto' no di pagawai di raja' i Mordikai ondung nokuro tu' sumurilog iyau di pinonuhuan di raja'. 4 Om monikid tadau nopo daa iyolo' do mononsog di Mordikai do momonsoi do miagal diri, nga' a' nopo dau pokinongohon iyolo'. Boros ka dau, “Iyoho' nopo om tulun do Yohudi, om a' oku i' koino-ino do tumuku' dot id tulun,” ka dau. Om sunudai noddi diyolo' i Haman do pasal diri, tu' orohian iyolo' do koilo ondung nunu o wonsoyon dau dot id di Mordikai. 5 Om notogod tomod diri i Haman di nokoilo iyau dot a' i Mordikai motud om a' tumuku' dot id dau. 6 Om soira' di noilaan dau do bansa'd Yohudi i Mordikai, om pomusorou no iyau do momohukum di Mordikai, om okon nopo ko' i Mordikai noo o patayon, suwai ko' minomusorou nogi' iyau do mamatai ngai' do tulun do Yohudi do pointongkop di pomorintaan do Porsia. 7 Om tontok di kohopod om duwo do toun di Raja' Ahaswiros do momorinta', do koontok di tulan do koiso', i tulan do Nisan, om ponuhu' no i Haman do tulun do mongundi' (iri nopo tundi' om roitan do “Purim”) do mongilo ondung nunu o tadau om tulan dot osonong do popowonsoi dit osorou dau dot araat. Om nopili' nopo nga' tadau do kohopod om tolu do tulan do kohopod om duwo, i tulan dot Adar. 8 Om sunudai noddi di Haman i raja', boros ka dau, “Haro ot iso' o bansa' do tulun do hiti'd pointongkop diti pomorintaan nu om haro ngai' nopo i bansa'ddi dot id pointikid-tikid do watas. Om suwai kopio o tadat do woyoon diyolo' do mantad ko' i tadat do bansa'd suwai. Om kawagu po nga' a' iyolo' mumboyo' dot undang-undang diti pomorinta', om a' no kopio osonong do posimboyonon tomod nu iyolo' do miagal diri. 9 Om ondung kohubayaan do Tuan Raja', om monulis nod surat do monuhu' do mamatai diyolo'. Tu' ondung kaakun ko daa, om jominon ku i' do koposuang oku do lobi ko' 340,000 kilogram do pirok do hilo'd kousinan do raja' do maan do pakayon do hiti'd pomorintaan nu,” ka dau. 10 Om korongou noddi di raja' iri, om oluso' no dau i pondulung dau, i pananaap do popogirot di tinulis di maan popinsunudo', om patahako' noddi dau iri dot id di Haman, i pisangod dot agayo do bansa'd Yohudi. 11 Om boros kaddi di raja' dot id dau, “Patahakon ngai' ku no diya' i bansa'ddi om i tusin diyolo'. Wonsoyon nopo i korohian nu'd wonsoyon dot id diyolo',” ka dau. 12 Om tontok di tadau di kohopod om tolu di tulan do koiso', om lohowo' no di Haman o koinsanai di gomponulis di raja' om suhuo' no dau iyolo' do monulis di boros dau, om papasalin diri dot id pointikid-tikid do boros om kowoyo-kowoyoon do ponunulis do hiri'd pomorintaan di raja', om pokirimon nogindo dot id koinsanai do pomorinta', om gobunor, om pagawai. Iri nopo om tinulis dot id suang do ngaran di Raja' Ahaswiros om sinaapan di pondulung dau. 13 Om ngoyo' no di tulun dit ongosiau do manangkus popintikido' i surat diri dot id pointikid-tikid do watas di porintaon di raja'. Om suang nopo di surat diri nga' monuhu' do mamatai do koinsanai di tulun do Yohudi --- it ongomulok po om i komolohingan no, om i tongoondu' om i tangaanak --- dot insan i' o tadau do kapamatayan, iri no i tadau do kohopod om tolu do tulan dot Adar. Om mositi' nod patayon ngai' iyolo' om aiso' no ot insianan, om onuon ngai' nopo i dapu' diyolo'. 14 Om mositi' no do popinsunudon dot id tulun dot ogumu' i boros diri dot id pointikid-tikid do watas, om kosodia' ngai' indo o tulun dot orikot o tadau'ddi. 15 Om ponuhu' no i raja' do popinsunud di boros diri dot id tulun dot ogumu' do hilo'd Susan, i bandar dot agayo, om ngoyo' no di tulun dit ongosiau do manangkus popingotodo' iri dot id pointikid-tikid do watas. Om irikau no i raja' om i Haman om inum no iyolo' do daamot di bandar do Susan dot angagangau do nongkoilo di boros diri.
Minokitulung i Mordikai di Isto
1 Tontok di nokoilo i Mordikai do koinsanai di nongowonsoi do miagal diri, om hurako' nopo dau o rasuk dau dot atatangaban. Om panampakai no iyau'd pakayan do mogihad, om arabai no dau do pupuk o tulu dau, om pimpanau no do mintongkop di bandar do mikuwo'd mompud-lompud om marang-garang do mihad 2 gisom do nokorikot iyau do hiri'd wawayaan di walai do raja'. Om a' i' iyau suminuang tu' a' i' koino-ino o tulun do kipakayan do pakayan do mogihad do sumuang do hiri. 3 Om honggo nopo o pinabarasan di boros di raja' do pointongkop di watas, om hiri no i tulun do Yohudi do sanggarang-garang do mihad. Om puasa ngai' nopo iyolo' om minglompud do mihad, om kogumuan nogi' diyolo' do minanampakai do pakayan do mogihad om minisis dot id pupuk. 4 Om soira' di sinunudan di susuhuon di Isto do tongoondu' om tongokusai do noinggolian, i Isto do pasal di wonsoyon di Mordikai, om atangkabo tomod diri iyau. Om paatadai no daa dau do pakayan i Mordikai do maan pakayo' do poningolon di pakayan do mogihad, nga' minada' i' i Mordikai. 5 Om lohowo' noddi di Isto i Hatak, it iso' di tongokusai di noinggolian do hiri'd walai di raja', om i pinili' di raja' do sumiliu do susuhuon di Isto, om suhuo' no dau iyau do mongoi solowot di Mordikai om moguho-guhot ondung nokuro tu' iyo'ddi o wonsoyon dau. 6 Om ongoi no i Hatak solowot di Mordikai do hiri'd titimungon do tulun do hiri'd bandar, i ponong id wawayaan di walai do raja'. 7 Om posunudo' ngai' nopo di Mordikai i nosiliu dot id dau om i kogumuo' do tusin do pirok do nakabatos di Haman do posuangon do hiri'd kousinan do raja', ondung angapatai ngai' i tulun do Yohudi. 8 Om nonuan nogi' di Mordikai i Hatak do solinan di surat di raja', i tinulis do hilo'd Susan do monuhu'd mamatai do tulun do Yohudi. Om suhuo' noddi di Mordikai i Hatak do mongoi patahak diri dot id di Isto, om poposunud kopio di hal diri dot id dau, om monuhu' dau do mongoi pomolugu-lugut di raja' om pokionuon kopio dot osianan i raja' di bansa' di Isto. 9 Om ongoi noddi i Hatak do hiri'd di Isto do mongoi poposunud di boros di Mordikai dot id dau. 10 Om suhuo' no kawagu di Isto i Hatak do mongoi poposunud do boros diti dot id di Mordikai, 11 “Ondung haro o tulun, do kusai tuu ko' tondu', do mongoi solowot di raja', dot a' di raja' linohou, om hukuman nod kapatayon i tulun diri. Iri no ot undang-undang, om koinsanai di tulun do mantad po di ponosihat di raja' om i rayat dot id pointongkop do watas nga' koilo ngai' noddi. Iso' poo o ralan dot a' oontok dot undang-undang diri, tu' ondung poroloyon di raja' o longon dau do poingigit i sukud do tamas dot id tulun diri om a' no apatai i tulun. Nga' sombulan no dot a' oku di raja' nolohou,” ka. 12 Om soira' do nokoboros di Hatak i boros di Isto diri dot id di Mordikai, 13 om poinsano' no di Mordikai i Isto do poingkaa, “Kada' nogi' soroho' dot osimbayan ko ko' i tulun do Yohudi do suwai, do hino ko piya'd walai di raja'! 14 Ondung a' ko mungkomi do tontok do maso'd miagal diti, om rumikot i' ot itulung do mantad hilo'd surga do kumaa dot id tulun do Yohudi, om apasi indo iyolo', nga' apatai ko indo iya' om opupusan no o sompiiyon di tapa' nu. Nga' nunu o koilo-ilo do bagi' nogi' do maso'd miagal diti o kinoposilihan diya' do raja'd tondu'!” ka dau. 15 Om ponuhu' no i Isto do poposunud dot isimbar dau do miagal diti dot id di Mordikai, 16 “Ngoyo' ngai' timungo' i tulun do Yohudi do hiti'd Susan om sumambayang kou no do bagi' doho'. Kada' kou no akan om kada' kou inum do solinaid do tolu o tadau om tolu o totuong. Om iyoho' om iri ngai' i susuhuon ku'd tongoondu' nga' a' nogi' makan om a' minum do solinaid diri. Om atalib pondo iri om mongoi oku nogi' solowot di raja', do mulong piya do kotolibamban daa iri dot undang-undang. Ondung apatai oku do momonsoi'd miagal diri o kapatai-patayan, om pokoino i' dot apatai oku piya,” ka dau. 17 Om pamanau noddi i Mordikai om wonsoyo' no dau o koinsanai di pinonuhuan di Isto dot id dau.
Nalap di Isto i Raja' om i Haman dot id Poginakanan
1 Om tontok di kotolu'd tadau di Isto do puasa om panampakai no iyau di pakayan dau do don raja' om ongoi no iyau ingkakat do hiri'd natad do ponong id suang di walai'd raja', do potimbaba' di bilik do pinoiyanan di tirikohonon do raja'. 2 Om tontok di nokito di raja' i Raja' Isto do poingkakat do hiri'd soliwan om kosianai no iyau dau, om poroloyo' no dau i longon dau di kiinigit di sukud do tamas. Om ongoi noddi rapou i Isto om igit no iyau di tompok di sukud. 3 Om boros ka di raja' do minonguhot, “Nunu o pokionuon nu oi Raja' Isto? Sunudai oku nopo di pokionuon nu, mulong piya do songintanga' diti pomorintaan ku o pokionuon nu nga' patahakon ku i' diya',” ka dau. 4 Om boros ka di Isto, “Ondung kohubayaan do Tuan Raja', om orohian oku daa do karapou kou di Haman dot id poginakanan do maan ku dokoyu do totuong do baino',” ka dau. 5 Om suhuo' noddi di raja' i Haman do marau-arau do rumikot, om karapou i' iyolo' dot id poginakanan di pinosodia' di Isto. Om ongoi no i raja' om i Haman do hiri'd poginakanan diri. 6 Om uhoto' no di raja' i Isto di maso diyolo'd minum do waig dot anggur, boros ka dau, “Sunudai oku bo do pokionuon nu. Om patahakon ku i' o pokionuon nu do mulong piya do songintanga' diti pomorintaan ku,” ka dau. 7 Om boros ka di Isto, 8 “Ondung opuhawang kopio o Tuan Raja' do papatahak do pokionuon ku om orohian oku po daa do karapou kou di Haman dot id poginakanan do pohoroon ku do totuong do suab do maan ku dokoyu. Om tontok pondoddi om sunudan tiya' nogi' do pokionuon ku,” ka dau.
Kosorou i Haman do Mamatai di Mordikai
9 Om tontok di tuminongkiad i Haman di poginakanan diri om osonong tomod o ginawo dau. Nga' kokito no dau i Mordikai do hiri'd wawayaan di walai'd raja' dot a' miningkakat do sumuwau dau, om kotogod noddi kopio i Haman di Mordikai. 10 Nga' pinusus i' dau o ginawo dau om pouliai no dau do hiri'd walai dau. Om lohowo' ngai' noddi dau i tambalut dau do mongoi do hiri'd walai dau om nangatan nogi' dau i Siris, i sawo dau do mongoi amung diyolo'. 11 Om mokirayou-rayou tomod diri iyau dot id diyolo' tu' kaya' kopio iyau om ogumu' o tangaanak dau'd kusai, om pinoinsawat di raja' o pangkat dau, om asawat o pangkat dau ko' mantad di pagawai do suwai. 12 Boros ka di Haman, “Pinapaharo i Raja' Isto do poginakanan do maan no dahai di raja', om nolohou po kawagu iyahai do totuong do suab. 13 Nga' aiso' nopo o komoyon diti dot id doho' dot antang-antangan ku po i Mordikai, i tulun do Yohudi diri do poirikau do hilo'd wawayaan do walai'd raja',” ka dau. 14 Om boros kaddi di sawo dau om i tongotambalut dau, “Ponuhu' nopo pogi' do poingkakat do torigi do duwo nohopod om duwo mito do kasawato' do maan do pogiisan. Kosuabon pondod suab om pokionuon nogi' di raja' do pogiison i Mordikai do hiri. Om osonong indo o ginawo nu do mongoi rapou di poginakanan,” ka diyolo'. Om osonong i' kopio o miagal diri do nosorou di Haman, om ponuhu' no iyau do popoingkakat do torigi do pomogiisan.
Pinusou di Raja' i Mordikai
1 Om totuong nopoddi nga' a' tomod koodop i raja', om ponuhu' no iyau do mongoi di potutulisan do pasal di pomorintaan dau, om ponuhu' no iyau'd tulun do mambasa'ddi dot id dau. 2 Om iri nopo bohogian di binasa' diyolo' dot id dau nga' pasal di Mordikai do pinopoimbulai di pakat do mamatai di raja', i pakat di Bigtan om i Tiris, i duwo o kusai do noinggolian di madtatamong daa di kobilik-bilikan di raja'. 3 Om ponguhot no i raja', “Poingkuro no o pinomusou om pinonomuli' toko' di Mordikai?” ka dau. Om boros ka di susuhuon dau, “Aiso' i' o nowonsoi dot id dau,” ka. 4 Om boros ka di raja', “Haro o hino di pagawai ku do hiti'd walai ku'd dinondo?” ka dau. Om i Haman nopoddi nga' kosusuang do hiri'd natad di walai do raja' do mongoi daa pokibanar di raja' do popogiis di Mordikai do hiri'd pogiisan di posodia' no. 5 Om boros ka di susuhuon dau, “Hiti i' i Haman do poingandad no do mongoi solowot diya',” ka diyolo'. “Posolokoyo' iyau,” ka di raja'. 6 Om salakoi no i Haman. Om boros ka di raja' dot id dau, “Haro o songulun di korohian kopio ku'd momusou. Nunu tuu ot apatut do wonsoyon ku dot id tulun diri?” ka dau. Om poingkaa'ddi ot osorou di Haman, “Isai po tuu o pusohon kopio di raja'? Atantu' no dot iyoho',” ka. 7-8 Om boros ka dau do suminimbar di raja', “Paatadan do pakayan do don raja' o tulun diri, dot i pakayan di papakayon nu iya'. Om pakayan i kuda' nu di tanda' do don raja'. 9 Om suhuon nogindo o tiso' di pagawai nu dit asawat o pangkat do mamakai di tulun diri di pakayan nu, om mikuwo'd momoyo' dau, do poinsakai di kuda' do maya' do hilo'd titimungon do tulun dot ogumu' do hilo'd bandar. Om popimboroson nogindo di tulun dot asawat o pangkat o boros do miagal diti do maso diyolo'd manau-panau, ‘Antangai pogi' o ponomuli' di raja' do tulun di pusohon dau!’ ka,” ka dau. 10 Om boros ka di raja' dot id di Haman, “Ngoyo' kopio i pakayan diri om i kuda', om patahakon i' iti tanda' do pomusou di Mordikai, i tulun do Yohudi diri. Wonsoyon ngai' nopo dot id dau i nongkoboros nu. Osolowot nu i' iyau do poirikau do hilo'd wawayaan diti walai'd raja',” ka dau. 11 Om ngoyo' noddi di Haman i pakayan diri om i kuda', om porosukai no dau di Mordikai i pakayan. Om sakai noddi i Mordikai di kuda' om woyoo' no iyau di Haman do kuminaa do hiri'd titimungon do tulun dot ogumu' do hiri'd bandar. Om popimboros diri i Haman di maso diyolo' do manau-panau do poingkaa, “Antangai pogi' o ponomuli' di raja' do tulun di korohian dau do momusou!” ka. 12 Om poguliai noddi di Mordikai do hiri'd wawayaan di walai'd raja', om arau-arau nopo i Haman do minuli' do poinsompon po o rabas tu' ointingayaman no kopio iyau. 13 Om sunudai no dau i sawo om i tongotambalut dau di nosiliu dot id dau. Om boro-boros noddi dot id dau i sawo dau om i tongotambalut dau dit ongoilo do momusorou, “Tumimpuun no dot aala' di Mordikai i kokoriso' nu. Iyau nopo om tulun i' do Yohudi, om a' ko i' kaala' dau. Atantu' no dot aala' ko dau,” ka diyolo'.
Pinatai i Haman
14 Om masaan diyolo' do moro-boros di Haman nga' korikot no i tongokusai di noinggolian do mantad hiri'd walai di raja' do sangarau-arau tomod do minongoi pangangat di Haman do mongoi rapou di poginakanan di pinosodia' di Isto.
1 Om koinduwo no di raja' om i Haman do minongoi rapou di poginakanan di pinosodia' di Raja' Isto. 2 Om uhoto' po kawagu di raja' i Isto di masaan diyolo'd minum. “Nunu kopio o pokionuon nu, oi Raja' Isto? Posunudo' daa, om atantu' no do patahakon ku i' diya'. Songintanga' piya diti pomorintaan ku o pokionuon nu nga' patahakon ku i' diya',” ka dau. 3 Om boros ka di Raja' Isto, “Ondung kohubayaan daa do Tuan Raja' om pokionuon ku dot apasi o bansa' ku. 4 Tu' dinagang oku om i bansa' ku do maan patayo'. Ondung dagangon daa iyahai dot id ponguripanan om a' oku i' daa mungkomi, om a' oku i' daa mamagangau diya' do pasal diri, nga' oruhai no iyahai do patayon om punsoon!” ka dau. 5 Om uhoto' noddi di Raja' Ahaswiros i Raja' Isto, “Isai kopio daa o kasaap do momonsoi do miagal diri? Honggo o tulun diri?” ka dau. 6 Om boros ka di Isto, “Pisangod nopo dahai om i gomponginggorit dahai om iloi Haman, i tulun dot araat kopio!” ka dau. Om poinsonsod poddi i Haman di Raja' om i Raja' Isto dot opopoddosian. 7 Om ingkakat nopo i raja' do natatagadan, om ongoi no do hiri'd natad di walai'd raja'. Om okito noddi di Haman dot iso-iso' no kopio o ginawo di raja' do momohukum dau dot i hal diri o kopomohukuman, om gowoi poddi om undorong po iyau do momolugu-lugut daa di Isto do mamasi dau. 8 Om haba' nopo i Haman do hiri'd tirikohonon di Isto dit anaaru' do mokiinsian, nga' naampapan no do suminuang kawagu i raja' do hiri'd bilik diri do mantad hiri'd natad di walai di raja'. Om soira' di nokito di raja' i Haman do miagal diri, om pamagarang no iyau, “Ngoyon po daa'dti kusai kosoho' iti raja'd tondu' do hiti'd toguang ku, om hiti'd suang do walai ku?” ka dau. Om koboros po di raja' o miagal diri om ngoyo' no di tongokusai di nongoinggolian kuluputai o tulu di Haman. 9 Om boros kaddi di tiso' diyolo', i roitan dot i Harbona, “Nokopoingkakat no moti' daa i Haman do torigi do hilo'd walai dau do pogiisan di Mordikai, i minamasi do Tuan Raja'. Om kasawato' nopo nga' duwo nohopod om duwo o mito!” ka dau. Om boros ka di raja', “Ngoyo' i Haman pogiiso' do hiri'd torigi'ddi!” ka. 10 Om pogiiso' noddi i Haman do hiri'd torigi di winonsoi mantad daa dau do pogiisan di Mordikai. Om katanus-tanus nogiddi o kototogod di raja'.
Sinuhu' i Tulun do Yohudi do Sumaap di Pisangod Diyolo'
1 Om tontok i' do tadau'ddi do pinatahak ngai' di Raja' Ahaswiros dot id di Raja' Isto o koinsanai di dapu' di Haman, i pisangod dot agayo di tulun do Yohudi. Om sunudai noddi di Isto do tikid i' dau'd molohing i Mordikai, om mantad poddi om koino-ino no i Mordikai do mongoi solowot di raja' dot a' piya lohowon o ngaran dau. 2 Om oluso' noddi di raja' i pondulung dau, i nanu kawagu dau do mantad id di Haman, om patahako' no dau di Mordikai. Om suhuo' no di Isto i Mordikai do mongilo-ilo di dapu' di Haman. 3 Om ongoi po kawagu solowot i Isto di raja'. Om otud no iyau do mikuwo'd minihad do mokitulung di raja' do mananus di pakat dot araat di Haman, i sinakagon di Agag, do mamatai di tulun do Yohudi. 4 Om poroloyo' no di raja' i sukud dau'd tamas dot id di Isto. Om ingkakat noddi i Isto, om boros ka dau, 5 “Ondung kohubayaan do Tuan Raja', om ondung osianan kopio ko doho', om pokionuon ku no daa do monuhu' ko dot a' mamayaan di pinonuhuan do hiri'd surat di Haman do mamatai do bansa'd Yohudi do hiti'd pomogunan diti. 6 Poingkuro oku pod kotoron, ondung osiliu o kosusaan diri dot id tulun ku, om iri pondo koobpinayan ku nga' angapatai ngai'?” ka dau. 7 Om boros kaddi di Raja' Ahaswiros dot id di Raja' Isto om id di Mordikai, “Antangai pogi' nga' nokogiis ku no moti' i Haman dot i pakat dau dot araat do mamatai di tulun do Yohudi o kinopogiisan, om nakatahak ku diloi Isto i dapu' dau. 8 Nga' boros nopo di pinotongkop dot id suang do ngaran do raja' om nasaapan di saap do raja', om a' no milo'd simbanan. Nga' pabanaron ku i' iyokoyu do monulis do surat dot id tulun do Yohudi do poingkuro nopo it osonong dot osorou dokoyu. Om tulison nopo dokoyu i surat dot id suang do ngaran ku, om saapan nopo di saap di don raja',” ka dau. 9 Om tontok nogi' do tadau'ddi, di tadau'd koduwo nohopod om tolu do tulan do kotolu, i tulan do Siwan, do linohou di Mordikai i piro-piro gomponulis do raja' om suhuo' no dau iyolo' do potulis di boros dau dot id surat do pokirimon dot id tulun do Yohudi, om id koinsanai'd gobunor, om boyoon, om pagawai di 127 o watas; do mantad pod hilo'd India om poingkaa do hilo'd Etiopia. Om iri nopo surat diri om tinulis do tumanud di boros om kowoyo-woyoo' do ponunulis do pointikid-tikid di watas, om id suang do boros om kowoyo-woyoo' do ponunulis di tulun do Yohudi. 10 Om iri nopo surat diri nga' tinulis ngai' nopo dot id suang do ngaran di raja', om saapai nogiddi di saap do don raja'. Om ponuhu' nogiddi i Mordikai do tulun do mongoi popotikid di surat diri dot id pointongkop do watas do pomorintaan, do sumakai'd kuda' dit ongosiau di don raja'. 11 Om iri ngai' nopo i surat diri om pinoposunud do papabanar i raja' di tulun do Yohudi dot id pointikid-tikid do bandar do mogiuulud do mongintirung do tinan diyolo'. Ondung ngoyon iyolo' saapo' di tulun di kirapo-rapo do mantad id nunu nopo o bansa' do hinonggo nopo o watas do kinoiyonon diyolo', om pokoino i' iyolo' do sumaap om mamatai diyolo' do pitonggoyon di sawo om tangaanak diyolo', om pokoino iyolo' do mamatai ngai' do pisangod diri om manganu di dapu' diyolo'. 12 Iti nopo pinoboros diti om mositi' nod wonsoyon dot id pointongkop do pomorintaan do Porsia do tontok di tadau di natantu' mantad daa di Haman do kapamatayan di tulun do Yohudi, iri no i tadau'd kohopod om tolu do tulan di kohopod om duwo, i tulan dot Adar. 13 Om mositi' nod poboroson iri do miagal dot undang-undang om posunudon dot id koinsanai'd tulun dot id pointikid-tikid di watas, om kosodia' i' i tulun do Yohudi do sumaap di pisangod diyolo' do tontok do tadau'ddi. 14 Om pamanau ngai' noddi i tulun di sinuhu'ddi do suminakai'd kuda' di don raja'. Om pinopinsunud nogi' di tulun dot ogumu' i boros diri do hilo'd Susan, i bandar dot agayo. 15 Om soliwan noddi i Mordikai do mantad hiri'd walai do raja' do kipinakai do pakayan do don raja' dit otomou om opurak, om kirasuk iyau dot anaaru do kain linan dit otomou daragang-ragang, om kitupi' iyau do tupi' di don raja' di tamas do winonsoi dit olumis kopio. Om noponu' pod pinongkisan dot atataadan o hiri'd bandar do Susan. 16 Om iri'ddi tulun do Yohudi nga' ongosimbayan tomod tu' aiso' noddi o kagangahan diyolo'. 17 Om binasa' nogi' i boros di raja' do hiri'd bandar om hiri'd watas om hilo' no do pinapaharo i tulun do Yohudi do tadau do koundarangan, do mikuwo'd minoginakan om ongotood tomod iyolo'. Om ogumu' diri o tulun do suwai do tuminanud do tugama' do Yohudi, tu' ooris iyolo' di tulun do Yohudi.
Pinatai di Tulun do Yohudi i Pisangod Diyolo'
1 Om korikot noddi i tadau do kohopod om tolu do tulan dot Adar, i tadau do kapamansayan di boros do mantad id raja', i tadau do soro-sorohon di pisangod di tulun do Yohudi do mangala' di tulun do Yohudi. Nga' iri nogiddi i tulun do Yohudi o minangala' diyolo'. 2 Om honggo nopo o kinoiyonon di tulun do Yohudi dot id pointikid-tikid do bandar do hiri'd pomorintaan di raja', om hilo' no do minogiuulud iyolo' do tuminimung om minogisosokodung do sumaap dot isai nopo o tulun di sumaap do pokoruol diyolo'. Om ongooris ngai' nopoddi diyolo' i tulun do hinonggo nopo, om aiso' no o tongosongulun piya do katama' do sumaap diyolo'. 3 Om oinsanan nopo i pagawai do hiri'd watas om i gobunor, om i songingkaraja' dot id pomorinta' do suminokodung di tulun do Yohudi tu' ongooris ngai' iyolo' di Mordikai. 4 Om nokotongkop noddi di pomorintaan di raja' dot agayo o kuasa' di Mordikai. 5 Om gowoi poddi om nunu nopo o korohian di tulun do Yohudi do wonsoyon dot id pisangod diyolo' nga' milo no diyolo'd wonsoyon. Ongkigayang nopoddi iyolo' do minongoi saap om minamatai di pisangod diyolo'. 6 Om hilo' nopod Susan, i bandar dot agayo, om limo nahatus o tulun do pinatai di tulun do Yohudi. 7-10 Om iri nopo wookon di nangapatai'ddi nga' i hopod o tanak do kusai di Haman, i tanak di Hamidata, i pisangod dot agayo di tulun do Yohudi. Ngaran nopo di tangaanak di Haman diri om: i Parsandata, i Dalpon, i Aspata, i Porata, i Adalia, i Aridata, i Parmasta, i Arisai, i Aridai om i Waisata. Nga' a' i' i tulun do Yohudi minongoi pagahau di dapu'. 11 Om tontok i' do tadau'ddi do pinosunud dot id raja' o kogumuo' do tulun di napatai do hilo'd Susan. 12 Om boros kaddi dau dot id di Raja' Isto, “Hiti nopod Susan om limo no nahatus o tulun do napatai di tulun do Yohudi, om kohompit ngai' i hopod o tanak do kusai di Haman. Om okuro-kuro nopo tuu o winonsoi diyolo' do hilo'd piro-piro o watas do suwai! Nunu po o pokionuon nu? Sunudai oku nopo do pokionuon nu om atantu' no dot aanu nu i' iri,” ka dau. 13 Om boros ka di Isto do suminimbar, “Ondung kohubayaan do Tuan Raja', om pologo-logoso' po i tulun do Yohudi do hiti'd Susan do momonsoi do miagal di winonsoi diyolo' baino' do tadau'd suab. Om monuhu' do momogiis di rata' di hopod o tanak di Haman do tongokusai do hilo'd pomogiisan,” ka dau. 14 Om ponuhu' noddi i raja' do powonsoi do miagal di pinokianu di Isto, om popinsunudo' no i boros diri do hilo'd Susan. Om posoliwano' noddi i rata' di hopod o tanak di Haman do kusai do maan pogiiso'. 15 Tontok di tadau'd kohopod om apat do tulan dot Adar om timung po kawagu i tulun do Yohudi do hilo'd Susan om pamatai po iyolo' do tolu kawagu nahatus o tulun do hiri'd bandar diri. Nga' a' i' iyolo' minongoi pangahau di dapu'. 16 Om iri tulun do Yohudi do hiri'd watas do suwai nga' tuminimung nogi' om minogiuulud do mongintirung do tinan diyolo'. Om kaala' no om kapatai diyolo' o 75,000 o tulun dit araatan diyolo'. Nga' a' i' iyolo' minongoi pagahau di dapu'. 17 Miagal noddi o nosiliu di tadau do kohopod om tolu do tulan dot Adar. Nga' tontok nopo di tadau do kohopod om apat om aiso' no o pinatai, suwai ko' rinamai'ddi diyolo' o tadau'ddi do mikuwo'd ongotood ngai' iyolo' om minoginakan. 18 Nga' iri nopo tulun do Yohudi di hilo'd Susan, om iri tadau do kohopod om limo o tadau do rinamai diyolo' tu' minamatai po iyolo' di pisangod diyolo' di tadau do kohopod om tolu om tadau do kohopod om apat. Om tontok nogiddi di tadau do kohopod om limo do tuminingkod iyolo'. 19 Om iri nopoddi tulun do Yohudi di songingiyon dot id bandar dot ongokooro' om iri no tadau do kohopod om apat di tulan dot Adar o siniliu diyolo' do tadau'd karamayan om tadau do kataadan, om maso do moginakan om kopogitahak-tahakan do taakanon.
I Poginakanan do Purim
20 Om tuliso' no di Mordikai i nongosiliu'ddi om popingkirim no iyau'd surat dot id toinsanan di tulun do Yohudi dit id somok om id sodu' do pointongkop di pomorintaan do Porsia. 21 Suang nopo di surat diri nga' monuhu' diyolo' do mamaramai di tadau do kohopod om apat om tadau do kohopod om limo do tulan dot Adar do pointikid do toun. 22 Tu' tontok no do tadau'ddi do naala' di tulun do Yohudi i pisangod diyolo', om tontok no do tulan diri do nosowolian do kataadan om kosimbayanan o katangaban om katangkabaan. Om sinunudan iyolo' do papaharo do poginakanan om karamayan, om maso do kopogitahak-tahakan do taakanon, om manahak nogi' do nipuhawang dot id tulun do mosikin. 23 Om tonudo' no di tulun do Yohudi i boros di Mordikai, om kosiliu noddi do tadau'd karamayan o tadau'ddi do monikid toun. 24 I Haman nopo, i tanak di Hamidata, i sinakagon di Agag, i pisangod dot agayo di tulun do Yohudi, om minongundi' (i tundi' di roitan do “purim”) do mongilo do tadau do kapamatayan di tulun do Yohudi; tu' maan daa dau iyolo' punsoo'. 25 Nga' ongoi no i Isto solowot di raja' om potongkopo' noddi di raja' o ponuhuan di tinulis dot id surat om gowoi poddi om i Haman nogi' o noontok di kapatayon di wonsoyon daa dau dot id tulun do Yohudi, tu' kogiis nopo iyau om i tangaanak dau'd kusai do hiri'd torigi di pogiisan. 26 Om iri noddi o kinoroitan do tadau dot agayo'ddi do Purim. Om i surat di Mordikai, om koinsanai di nongosiliu dot id tulun do Yohudi, 27 o nokoodsuur diyolo' do momonsoi dot oturan di tonudon diyolo' om tonudon di sinakagon diyolo' om koinsanai di tulun do suwai do bansa'd Yohudi. Tumanud nopo dot oturan diri om mositi' nod ramayon diyolo' o duwo o tadau di tinantu' di Mordikai do monikid toun. 28 Om tinantu' nogi' do hondomon kasai' om ramayon o tadau do Purim diri do pointikid-tikid do sompiiyon do Yohudi do mogisolusuk-lusuk do gisom dot alaid, dot id pointikid-tikid do watas om bandar. 29 Om ponulis po i Isto, i tanak di Abihail, do pinoruhang di surat di Mordikai do popogirot di surat di Mordikai do pasal do Purim. 30 Om pinokirim i surat diri dot id pointikid-tikid do tulun do Yohudi om kiniriman nogi' do solinan i 127 o watas do hiri'd pomorintaan do Porsia. Om pinotulisan nogi' i surat diri do sambayang do mokianu'd kosimbayanan om aiso' indo o koligagaanan do tulun do Yohudi. 31 Om minonuhu' diyolo' om i sinakagon diyolo' do momusou di tadau do Purim do tontok di maso di natantu' mantad, do miagal di pomusou diyolo' dit oturan do momusou di maso do puasa om i maso do mogihad. Om iri no o pinonuhuan di Mordikai om i Raja' Isto dot id surat diri. 32 Om iri nopo pinonuhuan di Isto, i pinopogirot dit oturan do pasal do Purim, om pinotulis dot id suang do buuk.
Kobontugo' di Raja' Ahaswiros om i Mordikai
1 Om sansagai noddi di Raja' Ahaswiros do kumaraja' i tulun do poingiyon do hiri'd potoropis do rahat om i tulun di poingiyon dot id sodu' di rahat, dit id suang do pomorintaan dau. 2 Om oinsanan nopo i nongowonsoi dau dit angagayo om i kongopusahan kopio, om oinsanan i susuyon di pinopoinsawat iyau do pangkat di Mordikai, do nongkotulis do hiri'd suang do buuk di monusui do pasal ngai' di raja' do Porsia om Modia. 3 Om i Mordikai nopoddi, i tulun do Yohudi, om asawat no kopio o pangkat dau tu' iri po raja' ot id sawat ko' iyau. Om pusohon tomod om korohian iyau di sompi' ko' tulun do Yohudi. Om kuminaraja' iyau do popoinsonong di tulun dau om poposimbayan do koinsanai di sinakagon diyolo'.
Pinogumbalan i Ayub di Gampamalid
1 Haro o songulun o kusai do roitan dot i Ayub do poingiyon do hilo'd tana' do Us I Ayub nopo om sumasambayang dot id Kinorohingan om otorodok kopio iyau dot id dau, om osonong kopio iyau koulun, om a' momonsoi do nunu nopo it araat. 2 I Ayub nopo om kianak do turu' o kusai om tolu o tondu', 3 om ogumu' nogi' o turipon dau, om kidumba' iyau do turu' noribu o tinan, om kiunta do tolu noribu o tinan, om kisapi' do soribu o tinan, om kikaladai do limo nahatus o tinan. Iyau no o tulun dit akaya' kopio dot id pogialatan di tulun di poingiyon dot id watas di ponong hilo'd Koulayon. 4 Iri nopo tangaanak dau'd kusai om oubas do mogisowoli-woli do papaharo do poginakanan, om mogialap-alap iyolo', om iri nogi' i tangaanak di Ayub do tongoondu' nga' alapon i' diyolo' do mongoi amung di poginakanan. Om moginakan ngai' nopondo iyolo'. 5 Pointikid-tikid do kopongo iyolo' do moginakan, om osuab kasai' nopo i Ayub do tumungag do papatahak do porsombahan di sumbolion do pogobi' dau do pointikid-tikid di tangaanak dau. Om oompunan i' iyolo'd Kinorohingan. Kapamansayan nopo di Ayub do miagal diri nga' osorou dau do nokopomonsoi doti'd dusa di mongindaraat do Kinorohingan o tiso' dot id pogialatan di tangaanak dau, dot a' piya doti' daa diyolo' tinomod. 6 Insan tadau om rikot no i piro-piro o susuhuon do Kinorohingan do hilo'd surga, do hiri'd toguang do Tuhan, om ponokitanud no i Gampamalid. 7 Om uhoto' nod Tuhan i Gampamalid, “Hinonggo tadon nu?” ka. Om boros ka di Gampamalid do suminimbar, “Wagu oku po kopimpanau do mikaa-kaa do hilo' om hiti do mintongkop diti pomogunan,” ka dau. 8 Om uhoto' no kawagu iyau'd Tuhan, “Nokokito ko i' nangku di Ayub, i susuhuon ku? Aiso' no o tulun do hilo'd pomogunan dot otorodok om osonong kopio do miagal dau,” ka dau. 9 Nga' boros ka di Gampamalid, “Orohian i' tuu i Ayub do sumambayang dot id diya' dot aiso' daa ot aanu-anu dau? 10 Okon toi giya ko' intirungan kasai' nu i' iyau, om i sompiiyon dau om koinsanai di dau'd songonuon? Om binarakatan nu i' o koinsanai di wonsoyon dau, om nonuan nu iyau do tayam-tayam dot ogumu' do gisom do koponu' diti pomogunan. 11 Nga' ondung onuon ngai' nu daa i haro dot id dau, om atantu' no do timbabaon ko nopo dau do momopol!” ka dau. 12 Om boros kad Tuhan do suminimbar di Gampamalid, “Ba, om ngoyo' ngai' no onuo' i kakayaan di Ayub, nga' kada' po kopio iyau pokorualai,” ka dau. Om tongkiad noddi i Gampamalid do mantad id toguang do Tuhan.
Napatai Ngai' o Tangaanak di Ayub, om Nangaraag ngai' i Dapu' Dau
13 Alaid-laid noddi, om maso di tangaanak di Ayub do moginakan do hiri'd walai di tobpinai diyolo' dit id dotuo, 14 om sigog i' do mangkus-tangkus o songulun do minongoi rapou di Ayub. Boros ka dau, “Maso dahai do mamaradu do hilo'd tumo dot i sapi' o pamaradu dahai, om i kaladai nga' hiri ngai' id somok do mangakan-ngakan, 15 om sigog id rikot o tulun do Shiba do minongoi pongumang dahai, om tanggayai ngai' nopo diyolo' i tayam-tayam. Om pinatai ngai' diyolo' i susuhuon nu, om iyoho' po o nokopoggidu' do minongoi pomisunud diya', oi Tuan,” ka. 16 Om a' po dau nopupusan do monusui iri, om korikot no kawagu o songulun di susuhuon do suwai, om boro-boros nod, “Sinisian ngai' i dumba' do mitonggoi di madtatamong di dumba', om kapatai ngai' nopo iyolo'. Om songulun oku pod nokopoggidu' do minongoi pomisunud diya', oi Tuan,” ka dau. 17 Om a' po dau nopupusan do monusui iri, om korikot no kawagu o tulun do kotolu, om boro-boros nod, “Haro o tolu sinompuruan do tulun do Kasdim di mananakau do minongoi panakau dit unta nu, om pinatai ngai' nogi' diyolo' i susuhuon nu'd suwai; om iyoho' po o nokopoggidu' do minongoi pomisunud diya', oi Tuan,” ka dau. 18 Om a' po dau nopupusan do monusui iri, om korikot po kawagu o songulun di susuhuon dau, om boro-boros nod, “Maso daa di tangaanak nu'd moginakan do hiri'd walai di tanak nu dot id dotuo oi Tuan, 19 nga' sigog nopo om rikot no o tongus dot opuhod do mantad ponong hilo'd tana' do kowotuan do minamahaba' di walai, om kangapatai ngai' nopo i tangaanak nu, oi Tuan, om iyoho' po o nokopoggidu' do minongoi pomisunud diya', oi Tuan,” ka dau. 20 Om ingkakat noddi i Ayub om hurako' no dau i rasuk dau do natatangaban. Om bugaro' dau o tobuk dau om tungub no do hiri'd tana'. Om boro-boros nod, 21 “Di nopo di pinaganak oku i' om aiso' i' o nunu-nunu do tonggoi ku; om matai oku nga' iyo nogiddi tu' aiso' i' o nunu-nunu dot atanggayan ku. Tuhan i' o pinapatahak diri, om baino' noddi om noongoi no dau kawagu iri. Royohon no o ngaran dau!” ka dau. 22 Om otopot no kopio do nosiliu ngai' piya iri, nga' a' i' i Ayub minomonsoi'd dusa om a' iyau pinapasala'd Tuhan.
Pinogumbalan Kawagu i Ayub di Gampamalid
1 Soira' di norikot i tadau do korikatan kawagu di piro-piro o susuhuon do Kinorohingan di hilo'd surga dot id toguang do Tuhan, om i Gampamalid nga' nokorikot nogi' do poirolot diyolo'. 2 Om uhoto' nod Tuhan i Gampamalid, “Hinonggo o nongoi nu?” ka. Om boros ka di Gampamalid, “Minongoi oku pimpanau do ponong hilo' om ponong hiti do mintongkop diti pomogunan,” ka dau. 3 Om ponguhot no o Tuhan, “Nokito nu i' i Ayub, i susuhuon ku? Aiso' no o tulun do hiti'd pomogunan dot iyo dau kotorodok om iyo dau kosonong. Sumambayang i' iyau dot id doho', om a' kopio momonsoi dot araat. Otorodok kasai' i' iyau dot id doho' do nasansagan oku piya daa diya' do potumboyo' diya' do monusa' dau, dot aiso' o pinaantakan,” ka dau. 4 Nga' boros ka di Gampamalid, “Ginawo nopo om kosonong-sonongo'd tinan om agayo i' o gatang ko' mantad do dapu'. Om uhang id tulun do katahak ngai' dau o nunu nopo i haro dot id dau, dot apasi po iyau. 5 Nga' ondung inggoriton nu o tinan dau, om atantu' nod timbabaon ko nopo dau do momopol!” ka dau. 6 Om boros kad Tuhan dot id Gampamalid diri, “Ba, om wonsoyo' nopo o nunu nopo dot id dau, nga' kada' po iyau patayo',” ka dau. 7 Om tongkiad noddi i Gampamalid diri do mantad id toguang do Tuhan, om poimbulayai no dau do gandas o pointongkop do tinan di Ayub do mantad pod hiri'd lapap om gisom do hiri'd tulu dau. 8 Om ongoi no i Ayub irikau do hiri'd somok di patataaman do rinomos om pingkukut no di gandas dau dot i babak do kuron o pongukut. 9 Om boros ka di sawo di Ayub dot id dau, “Tumorodok kasai' ko po dot id Kinorohingan? Papalai pogi' o Kinorohingan! Om matai nopo iya'!” ka dau. 10 Om boros ka di Ayub, “Miagal po di tulun do basug o koboro-boroso' nu! Do nokuro daa tu' iri no it ongosonong o korohian toko'd rumamit do mantad id Kinorohingan, om iyadaan toko' indo it araat?” ka dau. Om mulong pod miagal diri o koinggoriton di Ayub nga' iso' pod boros dau do tumogod do Kinorohingan nga' aiso' i'.
Ruminikot i Piro-Piro o Tambalut di Ayub
11 Haro'ddi o tolu di tambalut di Ayub, i Ilipas, i mantad id bandar do Toman, i Bildad, i mantad id pomogunan do Sua, om i Sopar, i mantad id pomogunan do Naama. Tontok di nokorongou iyolo' di koinggoritan di Ayub, om pogipapakat no iyolo' do mongoi kakap om mongoi ponginsasamod di Ayub. 12 Nga' tontok dit osodu' po iyolo' om kokito no diyolo' i Ayub, om oruhai no daa iyolo' dot a' nokotutun dau. Om ronggung nopoddi iyolo' do minihad om hurako' no diyolo' i pakayan diyolo' do natatangaban, om popintias no iyolo'd pupuk do hilo'd sawat om popingarab di pupuk dot id tulu diyolo'. 13 Om irikau no iyolo' do hiri'd tana' do hiri'd toning di Ayub, do solinaid do turu' o tadau om turu' o totuong, om a' minomoros dot ongoiso' piya o boros, tu' oilaan no diyolo' dot a' no ogina-gina' o koinggoriton di Ayub. 1|55|HK63C| I Ayub om i tongotambalut dau|2.13
Boros di Ayub dot id Tuhan
1 Om id tohuri noddi ko' iri om boro-boros no i Ayub do minomopol di tadau di kinosusuon dau. 2-3 Oi Kinorohingan, papalai no i tadau di kinosusuon ku; papalai no i totuong di ponontiano' oku i'. 4 Siliho' no i tadau'ddi do totuong, oi Kinorohingan. Kada' no hondomo' kawagu i tadau'ddi, kada' no pologoso' dot oulinahan do tulinau o tadau'ddi. 5 Poluhungo' no i tadau'ddi, do gisom dot aiso' ot okito-kito; likupai nod haun i tadau om tirungo' no i tinitiu di tadau. 6 Iduwon nopo i totuong diri do mantad id tulan om toun diri; kada' no kawagu iri pohompito' do mongintob; 7 podondomo' no o totuong diri, om pologoson nopo dot aiso' o kosimbayanan, om aiso' o kataadan. 8 Suhuo' ngai' no i bobolian do momopol do tadau'ddi, iyolo' i koilo do monuhu' di Lowiatan! 9 Kada' poulinaho' i rombituon di mulai kasai' do dongminsusuab; pologoson nopo o totuong diri dot oiman-iman do magandad do korikatan do tadau'd wagu om pagandasan do wagu. 10 Papalai no i totuong diri tu' pinopologos doho' do pinogkosusu, om pinopologos doho' dot osusa' om tumongob. 11 Songkuro daa kosonongo' ondung napatai oku dit id suang oku pod tian di tina' ku, ko' tontok po di kasawa' oku i' do napatai oku. 12 Nokuro tu' ginapus oku om kinibit oku di tina' ku? Nokuro tu' pinosusu oku po dau di susu dau? 13 Ondung napatai oku daa do tontok do maso'ddi, om osimbayan oku no daa do poundorong do dinondo, 14 om koodop do miagal ngai' di raja' om i pomorinta', i minomonsoi kawagu di walai do raja' di gulu po. 15 Koodop oku no daa'ndo do miagal di tanak do raja', i minomirumpos do tamas om pirok do gisom do nokoponu' di walai diyolo', 16 ko' koodop po daa do miagal di tanak di nolombus dot aiso' o ginawo di kasawa' i'. 17 Id suang nopod lobong, om i tulun dot araat nga' kotingkod no do mingwonsoi dit araat, om i mororobuat di nongohuyan, nga' koundorong no. 18 Om iri piya i tulun do songinggiil nga' koumbal no do haro kosimbayanan, tu' kalabus no do mantad id koinggoritan do togodon om pinggarangan do monuhu'. 19 Hilo' nopo om oiyo nopo o tulun; dot i tulun dit angabantug om it aiso' o ngaran-ngaran, om i turipon nga' koidu' nondo do mantad id ponguripanan. 20 Nokuro ma o tulun dit oinggorit tu' pologoson pod poimpasi? Nokuro ma i tulun do tumongob tu' onuan pod tanawau? 21 Tu' iyolo' nopo om magandad po daa do kapatayon, nga' a' i' rumikot o kapatayon; orohian nogi' iyolo' dot apatai, ko' mantad do haro o dapu'. 22 Koumbal nopo iyolo' dot otood om dit apatai om olobong iyolo'. 23 Lisokon do Kinorohingan it id dosunsudan diyolo'. Om noturungku' no dau iyolo'. 24 A' oku no milo'd makan, tu' mihad oku po, om a' oku no milo'd tumingkod do mingodoi. 25 Korikot ngai' nopo dot id doho' i kopoddosian om katangkabaan ku. 26 Aiso' no o kosimbayanan, om aiso' o kataadan ku tu' a' nopo otingkod-tingkod o koinggoritan ku.
Pisimbar-simbaran di koinsan i'
4.1-14.22
Ilipas
1-2 Ayub, otogod ko tuu do moro-boros oku? A' oku no kotoron dot a' koungkomi. 3 Nokoponuduk ko nod tulun dot ogumu', om pinopokoris ko di tulun dit oluhoi. 4 Soira' nopod haro o tulun do katahub, om oluhoi, om ohuyan, om koingkakat indo iyolo' dot oodsuur di boros nu. 5 Baino' noddi om iya' o noontok do kosusaan, nga' adalaan ko iddi kopio do moddosi, om a' ko milo'd tumimbaba' diri. 6 Suminambayang ko i' dot id Kinorohingan, om aiso' o kabara-barasan do koposi-posion nu. Om apatut no dot ogirot o ginawo nu om haro o pagandasan nu. 7 Soroho' pogi, haro toi o tulun dit aiso' o sala' do nokoumbal do noontok do kosusaan om kagangahan? 8 Nokokito oku i' do tulun do papasasad do karaaton, om mananom do kousungan do miagal do linsou; om baino' noddi om mongomot i tulun diri do kosusaan om kagangahan. 9 Iyo pod tongus dot opuhod, o Kinorohingan do mamatai diyolo' tu' atatagadan no kopio iyau. 10 Iri nopo i tulun dot araat om minggarom po om minguni do miagal do singa, nga' tiningkod i' iyolo'd Kinorohingan do minguni, om tinipu' dau o nipon diyolo'. 11 Iyo po iyolo' di singa do minatai dot aiso' o kanon, om tangaanak diyolo' nga' nokopogitongkiad-kiad poo. 12 Nokoumbal o boros dot opiiyan do nokorikot dot id doho', om opian no kopio, tu' gisom dot oruhai ku nod a' orongou. 13 Miagal po i boros diri do nipi dit araat tu' minamagangau doho' do koodop. 14 Gagaran oku do nakapagag; songgogor-gogor poo o tinan ku dot ouru'd moddosi. 15 Haro o ribut dot opiiyan do nokosowogi' do rabas ku, om sorimbutuon oku poddi dot opopoddosian. 16 Haro nogi' ot okito ku'd poingkakat do hiri; om sonsodo' ku no nga' a' ku i' otutunan ondung nunu kopio iri. Om korongou ku noddi o boros do tontok dit aiso' i' ot ohiyo do poingkaa, 17 “Milo i' tuu o tulun dot aiso' kopio o kasalaan dot id pagantangan do Kinorohingan? Milo i' tuu iyau do lumidang dot id toguang di Minomonsoi dau? 18 A' id Kinorohingan milo do ponongkuyaanan i susuhuon dau do hilo'd surga; iri ngai' piya i moloikat dau nga' haro i' o kasalaan dot okito dau. 19 Om ondos nu daa do monongkuyaan kopio iyau dit ongkipinuhobo di tana' do winonsoi, i milo i' do pisoson do miagal do kolibobog? 20 Poimpasi po doti' o tulun do dongkosuabon poo, nga' a' i' iyau oilaan do matai dit a' po orikot o sosodopon. 21 Om katagak ngai' nopo i dau'd songonuon, om apatai no iyau, om aiso' po daa o toila-ilaan dau,” ka.
1 Pillohou no, oi Ayub, om pokinongohon no ondung haro o sumimbar. Haro po toi o moloikat do pokitulungan nu? 2 Iri no tulun do basug ot apatai dot it araatan o kapatai. 3 Nokoumbal oku'd nokosolowot do tulun do basug, di kokitanan nopo om osimbayan tomod o koposi-posion, nga' sigog i' dot usungo' ku i walai di tiyonon diyolo'. 4 Aiso' no o kointirungon di tangaanak dau, om aiso' o mogobi' diyolo' do hilo'd pomisaraan. 5 Iri indo tulun di louson o mangakan di tinanom-tanom di tulun do basug. Iri piya i gandum di sumuni do hiri'd salag di rugi, nga' aanu ngai' i' di tulun dit aiso' o suang do tian. Om sianu i tulun di tuuhan do kakayaan, di dapu' om i kakayaan dau. 6 Karaaton nopo om a' i' sumuni do hilo'd tana', kosusaan nga' a' i' mimbulai do mantad id tana'. 7 A' i' kopio! Suwai ko' tulun i' o poporikot do kosusaan dot id tinan dau, miagal di tanak ngapui tu' mantad i' do hiri'd tapui. 8 Iyoho' nopo daa ot iyo diya', om lumohou oku nod Kinorohingan, om patahakon ku o hal ku dot id dau. 9 Iyati' nopo om a' i' kosuhut di kongoimayaan do wonsoyon dau. A' no ointob om a' opupusan i kongopusahan do wonsoyon dau. 10 Pinorikatan dau'd rasam o hiti'd tana', om linuyungan ngai' dau'd waig i koumaan. 11 Iyau no i Kinorohingan di popoinsawat di tulun dot aiso' o ngaran- ngaran, om manahak do kaarapadan dot id tulun di mihad do tumongob. 12-13 Raagon dau i tosorou do tulun dit ongkipomusarahan dot araat, om lawaan dau om pohudsuon dau i tulun dit apandai, gisom dot aiso' no ot abayaan di wonsoyon diyolo', om kosulung iyolo' di takal diyolo'. 14 Tontok piya do pitangaadau nga' momihawor i' iyolo' do miagal do dongotuong. 15 Nga' posion id Kinorohingan i tulun dot orutum, do mantad id kapatayon. Om poiduwon dau i tulun dit aiso' o ngaran-ngaran do mantad id koinggoritan. 16 Onuan dau do pagandasan i tulun do mosikin, om tingkodon dau o boros di tulun dot araat. 17 Olumaag no i tulun di tudukan do Kinorohingan! Om kada' kaus do tontok do togodon ko dau. 18 Ubatan i' do Kinorohingan i suhat di sinuhat dau; om longon i' dau o pokoruol diya', om longon nogi' dau o momolingos diya'. 19 Poiduwon kasai' ko i' dau do mantad id koligagaanan; 20 tontok nopod mononglous, om posion ko i' dau, om tontok do haro o pisangadan, nga' intirungan ko i' dau do mantad id kapatayon. 21 Poiduwon ko i' dau do mantad id tudut om pongindaraat, om a' ko ooris do tumimbaba' do kosusaan om kagangahan. 22 Koirak ko i' do rumikot piya ot orongit om mononglous, om a' ko moddosi do tumimbaba' di nintorusan dit orongit. 23 Aiso' nondo o watu di tumo do roduwon nu; om a' ko nondo ngoyon tabpaai do nintorusan dit ongorongit. 24 Osimbayan ko nondo do poingiyon dot id suang di kiim nu, om soira' nopo do mongoi ko ontong di dumba' nu, nga' okito nu indo dot ongosonong-sonong ngai' i' iri. 25 A' nondo ointob-intob o sinakagon nu, miagal pondo di sakot do hilo'd kobuturan o kogumuo' diyolo'. 26 Miagal di gandum do noonsok, dit omoton do tontok do kapangamatan, om iya' nga' iyo nogiddi tu' otogui do gisom do kolohing. 27 Ayub, alaid no iyahai do minsingilo ngai' diti. Iti nopo om otopot i' kopio, iyo nopoddi, om romito' nopo.
1-2 Ondung timbangon daa dot id ponimbangan iti kosusaan om katangaban ku, om atantu' no dot awagat po ko' togis do rahat. 3 Om kada' kou kosuayai dot a' piya oila-ilaan o koboro-boroso' ku. 4 Nokotodok dot id tinan ku i pana' do Kinorohingan dit Osundu Kopio. Om i paliu di pana' nga' nokotongkop nod tinan ku. Korolosi no kopio o kosunduwo' do Kinorohingan, om sumaap iyau doho' do miagal di soudor do pisangod. 5 Abagalan i' o kaladai do kaakan do sakot, om sapi' nga' kododog i' do kaakan do sakot di nokoring. 6 Nga' isai o mangakan do takanon dot ayami, it a' noosin? Poingkuro daa do haro o maro-maro di topurak do tontolu'? 7 A' oku no siakan do taakanon do miagal diri, om nunu nopo o kanon ku nga' siilob ngai' oku nopod kaakan. 8 Nokuro o Kinorohingan tu' a' pohubayaan i pokionuon ku? Nokuro ma tu' a' iyau sumimbar do sambayang ku? 9 Orohian oku nogi' daa do patayon oku dau do dinondo! 10 Ondung oilaan ku daa do wonsoyon dau o miagal diri, nga' minsimbul oku nopo daa dot ounsikahan, do mulong piya dot oruol ot opurimanan ku. Oilaan ku i' do Kinorohingan nopo om olidang. Om a' oku i' insan do sumongkiwal dit isuhu' dau. 11 Honggo po o kokorisan ku do potilombus doho' do poimpasi? Nokuro tu' minog po do poimpasi oku, dot aiso' o pagandasan ku? 12 Winonsoi toi o tinan ku do miagal do watu kokoris? Tambaga' toi iti tinan ku? 13 Aiso' no o kokorisan ku do pamasi diti tinan ku; aiso' no o milo ku'd pokiuhupan. 14 Id suang nod katangaban do miagal diti dot orohian kopio oku daa do haro o tambalut ku dit otorodok, do nokotongkiad oku tuu do Kinorohingan ko' amu'. 15 Nga' iyokoyu nopo, oi kongoombolutan ku, om posiwot nogi' doho' do miagal di palu dit arasak do tontok dot aiso' o rasam. 16 Miagal kou nod waig do palu di nokodou, tu' noponu' do salju om ais, 17 nga' orikot nopo i maso dot alasu', om atagak nopo i salju om it ais. Om koimbulai nondo i nanad di palu, tu' aiso' no o waig om otuu tomod. 18 Apalid i' i sinompuruan do tulun di mimpanau do tontok do mogihum do waig, mimpanau iyolo' do gisom dot apatai do hilo'd tana' do kowotuan. 19 I sinompuruan do tulun do mantad hilo'd Shiba om mantad hilo'd Tima nga' ruminikot do minongoi pogihum di waig di soro-sorohon no daa diyolo'. 20 Nga' katanus tomod nopo o ginawo diyolo' do morou-sorou do hiri'd tisan di palu, di narasak o waig. 21 Iyokoyu no o miagal di palu diri, oi koombolutan ku. Suminunsuri kou om minodosi kou do nokokito do koinggoritan ku. 22 Nokuro? Nokoumbal oku toi do nokopokianu dokoyu do nunu-nunu? Ko' nokoponuhu' oku toi dokoyu do monisip do tulun do suwai do mogobi' doho'? 23 Ko' nokopokipasi oku toi dokoyu do mantad id pisangod dit orongit? 24 Nga' tudukai oku nopo, pointalango' nopo o kinasalaan ku! Mundorong oku i' om mokinongou oku do boros nu. 25 Iri nopo boros di mantad kopio dot id ginawo om koinsasamod i' do ginawo, nga' iri nopo boros dokoyu om maan i' dokoyu toomod, aiso' i' o komoyon. 26 Ondos nopo daa dokoyu om mimboros oku dot aiso' o suang! Nga' nokuro tu' simbaron po dokoyu i boros ku om aiso' no o pokukurayan ku? 27 Undion i' dokoyu ondung poingkukuro o kotutukon di tanak dit aiso' o molohing, i nosiliu nod turipon. Om maan dokoyu do papakaya' dokoyu i tambalut kopio dokoyu! 28 Antangai kopio oku pogi'. Do mongudut kopio oku tuu daa dokoyu? 29 Adalaan no i pinoboros dokoyu. Om tingkod kou no do momonsoi dit a' otulid Kada' kou pasala' doho'. Tu' aiso' i' kopio o sala' ku. 30 Nga' maso po dokoyu do momusorou do goudut oku --- tu' osorou nopo dokoyu om a' oku no koilo do pisuayan dit otopot om i kasala'.
1 Koposi-posion nopod tulun, om miagal do koposi-posion do soudor di sinansagan do kumaraja', tu' oudipon om oinggorit do miagal do koposi-posion do turipon, 2 miagal di turipon do langadon do lungungon, miagal di mororobuat di mandad-andad nod gadsi'. 3 Poingompus nopod tulan dot aiso' o guna' ku do poimpasi, om pointikid-tikid do totuong do tumongob oku. 4 Tontok nopo do mongoi oku odop, om anaru tomod o totuong dot opurimanan ku. Langadon oku nod kosuabon, tu' a' oku nopo kogintoron do poillii. 5 Tinan ku nopo om noponu' pod giuk; notongkop oku pod kogom; om nana' nga' lumuyung poo do mantad id gandas ku. 6 Osiau nopod tumalib o maso ku do tontok dit aiso' o pagandasan do kumaa id koompokon, dot osiau po ko' i porilitan do banang do mangangawol. 7 Soroho' no, oi Kinorohingan do koposion ku nopo om iyo no di pinuhobo di pohoboon; om i kosimbayanan ku nga' nopupusan no. 8 Kokito ko po doho' do dinondo poo, nga' a' ko nondo kokito kawagu doho'. Mogihum ko piya daa doho' nga' a' oku no hino'. 9-10 Miagal no di haun do tumanus om it a' nondo okito, o tulun do matai tu' a' no gumuli' kawagu; om olihuan nondo iyau do tulun di kotutun mantad dau. 11 Iri no ot a' ku komilaan dot a' mungkomi! A' ku no milo do pakangkabon o kototogod om koruolo' do ginawo ku. A' oku no milo dot a' moro-boros, do popolombus dit id suang do ginawo ku. 12 Nokuro tu' tamangan oku diya'? Osorou nu daa do naga' oku dit orongit do hilo'd rahat? 13 Lumii oku no daa do mundorong-dorong. Tu' mogihum oku do koinggaan-gaanan diti toruol ku. 14 Nga' tompurolosion oku i' diya' do nipi, pilodopon oku diya' om porikatan oku do soroyoon dit araat, 15 gisom dot orohian oku nogi' do kotolon om apatai i', ko' mantad do poimpasi dot id tinan di noponu' do koinggoritan. 16 Ohuyan oku no om apaasan oku nod poimpasi, orohian oku nogid matai! Pologoso' oku nopo, tu' aiso' no o guna' ku'd poimpasi. 17 Nokuro tu' posuulon kopio nu o tulun dot id toguang nu? Nokuro tu' imparasan kopio nu o wonsoyon dau? 18 Pisorisidan nu iyau do monikid do kosuabon, om pogumbalan nu iyau do pointikid do maso, do pongilo kopio nu dau. 19 Soira' ko do tumolikud doho', om otolon ku i' daa'ndo o tiou ku? 20 Norualan ko toi di dusa ku, oi tulun di madtamong doho' do poinggiil? Nokuro tu' iyoho' o maan nu'd pinsingilaan do manangod? 21 A' ko no kopio milo do mangampun do dusa ku? A' nu no kopio tonuson i kasalaan ku? A' oku no alaid om kolii no dot id lobong, om ihumon oku piya daa diya' nga' a' oku no hino.
I Bildad
1-2 Songkuro po o koloido' nu do mimboros dot iyondo? Miagal po do ribut dit okohus ino boros nu. 3 A' i' o Kinorohingan insan ponomputul do katapatan. A' i' iyau insan kopinduwaai do momonsoi dit otopot. 4 Nokowonsoi doti'd dusa dot id Kinorohingan i tangaanak nu om osorupai no do hukuman iyolo'd Tuhan, do miontok di nowonsoi diyolo'. 5 Nga' guli' nogi' om lumohou i' do Kinorohingan dit Osundu Kopio, do mokiinsian om mokianu do koompunan. 6 Ondung otopot kopio dot olidang om otulid o ginawo nu, om olomus indo o Kinorohingan do monguhup diya', om tondulion kawagu dau o sompiiyon nu dot isomuli' diya'. 7 Om koinsanai di dapu' nu di natagak diri nga' a' i' kopikuro-kuro do pitaladon di patahakon do Kinorohingan dot id diya' do koimbagu. 8 Soroho' pogi' dot ongoruhai i toilaan do tulun dit ongoilo di gulu- gulu po. Soroho' pogi' i nongoumbalan di komolohingan toko'. 9 Koposi-posion toko' nopo om oniiba' om aiso' i' o toila-ilaan toko'. Miagal toko' nod sangai do tumalib do hiti'd pomogunan. 10 Nga' pokinongoho' pogi' i boros di tulun dot ongoilo di gulu po. Poingkaa o potudukon diyolo' diya', 11 “Hiri nod kiwaig-waig o sunion di bundusan; a' i' insan i bundusan dot abantalan do poinsuni dot okon ko' id buyut- buyut. 12 Ondung arasak i waig om iri no i bundusan ot id gulu kopio koriou. Nga' omulok po kopio om a' po norikot i kapanatasan om a' po milo dot onuon. 13 Tulun nopo dit aiso' o Kinorohingan om miagal no di bundusan; aiso' no o kotutukon di pagandasan diyolo' dot olihuan diyolo' o Kinorohingan. 14 Mogondos nogi' iyolo' di banang dot atandai, it iyo no di tompulawa-lawa' katandai. 15 Ogirot toi i tompulawa-lawa' do sondihon? Alanut toi i banang do toidon? 16 Tulun nopo dot araat om iyo pod sakot do sumuni dit id dotimpalangan do tadau, iyo po di sakot di rumoloi do tumongkop do pomutanam-tanaman. 17 Iri nopo gamut di sakot om nongkorilit po di watu, om ogirot tomod do pointapil di kowotuan. 18 Nga' utuso' pogi' daa i sakot diri do dinondo, nga' a' i' okito o pinongutusan. 19 Pointantu' no dot iyo-iyo noddi o kaarapadan do tulun dot angaraat, baino' noddi om tulun nod suwai o sumowoli diyolo'. 20 Nga' tulun nopo dot otorodok om a' id Kinorohingan insan dot iduan, om a' iyau insan ponguhup do tulun dit araat. 21 Poirakon indo kawagu dau o kabang nu, om popimpongkison ko dot atataadan. 22 Nga' intingayamon i' om poinsiribaon dau it araatan diya'. Om walai nopod tulun dot araat om raagon do gisom dot ohuyas,” ka.
I Ayub
1-2 Oilaan ku i' dot a' kasala' ino boros nu. Nga' poingkukuro o tulun do sumurilog do kumotopot dot id Kinorohingan? 3 Poingkukuro po ma o tulun toomod do monokisongkiwal dau? Milo i' o Kinorohingan do moguhot do soribu o poguhatan, om iso' po nga' aiso' i' ot osimbar do tulun. 4 Kinorohingan nopo om oilo kopio om osundu; isai po daa o kobulun do sumaap dau? 5 A' id tulun oilaan o Kinorohingan do pawaliu do nuluhon, om raagon nopo dau iri do tontok di tumogod iyau. 6 Guyuon do Kinorohingan iti pomogunan om pogogoron dau iti tana', om iyogon dau o torigi diti pomogunan. 7 Milo i' o Kinorohingan do mogodu dilo tadau do mimbulai do dongkosuabon, om milo do mogodu dilo rombituon do mulinau do dongotuong. 8 Aiso' i' o minonguhup do Kinorohingan do minomonsoi dilo tawan, om aiso' o nokowoyo' dau do miningulok di likud di naga' do rahat. 9 Kinorohingan i' o pinopoiyon dilo rombituon do hilo'd tawan --- i roitan do soguwanggo', om Balatik, om Muru-Puru om koinsanai di rombituon di ponong id salatan. 10 Iyati' nopo om a' i' kosuhut di winonsoi dau dit angagayo, om a' toko' kointob di kongoimayaan do wonsoyon dau. 11 Tumalib no o Kinorohingan, nga' a' oku i' kokito dau. 12 Om onuon nopo dau o nunu nopo i korohian dau, om iso' pod tulun nga' aiso' i' o kasaap do muhot dau do poingkaa, “Nunu ino wonsoyon nu?” ka. 13 A' nod Kinorohingan pinusus o kototogod om kolosuo' do ginawo dau. Iri piya i minonguhup di Rahab nga' mininsiriba' i' dot id dau. 14 Om poingkukuro oku po daa do sumurilog dau? Nunu po daa o poboroson ku do ponimbar dau? 15 Mulong po dot aiso' o sala' ku, nga' kumukuro oku po daa, do suwai ko' mokiinsian do Kinorohingan, i gompomutus doho'. 16 Mulong po dot iyo'ddi, nga' ondung pologoson oku daa dau do mimboros, om a' oku i' monongkuyaan do pokinongohon oku dau. 17 Pinorikot dau o tongus dot opuhod do minomuntul om pinopokoruol doho', om aiso' i' o pinaantakan. 18 A' oku i' dau pologoson do momuhobo dot ongoruhai piya; pinonu' po dau'd koinggoritan o koposi-posion ku. 19 Monokiingkodou oku tuu dau? Nga' antangai pogi' o kokoriso' dau dit a' ogina-gina'! Angatan ku tuu iyau do mibisara'. Nga' isai daa o katama' do momolohou dau dot id pibisaraan? 20 Otorodok oku i' om a' oku nokowonsoi'd dusa, nga' karangahan nopodti boros ku om kasala' oku i', om koinsanai'd boros ku nga' iyo pod papasala' doho'. 21-22 Aiso' i' daa o sala' ku, nga' uhang ngai' ku no. Apaasan oku nod poimpasi. Aiso' no i poimaha-maha'; tu' it otopot om i nakasala', nga' miagal nopo o kootuson: tu' patayon goduwo id Kinorohingan. 23 Soira' nopo do monigowo dot apatai i tulun dot aiso' o sala', om koirak nogi' o Kinorohingan do monguntotogod dau. 24 Pinatahak do Kinorohingan iti pomogunan dot id tulun dit angaraat, om binolou ngai' dau o mato di gompomutus. Om Kinorohingan ngai' i' o minomonsoi'ddi. Tu' ondung okon ko' iyau, om isai poo? 25 Oruhai do tumalib o tadau di maso ku'd poimpasi, aiso' i' o tiso' piya di tadau'ddi dot osonong. 26 Osiau tomod do tumalib o maso ku'd poimpasi do miagal po di parau' dit osiau, iyo po di kosiaho' do kondiu do monimbit do tikus. 27-28 Ondung kokusum oku om umbalan ku daa do momolihu iti toruol ku, nga' gumuli' ngai' i' iti koinggoritan ku do momigangau doho'. Oilaan ku i' do pasalaon oku po kasai'd Kinorohingan. 29 Pasalaon oku nopod Kinorohingan, om uhang ngai' ku no. 30 Aiso' no o sabun do koisu' do dusa ku. 31 Nokososok oku nod Kinorohingan dot id saalom di sosomu', gisom dot iri piya i pakayan ku nga' sosomuan i' doho'. 32 Ondung tulun daa o Kinorohingan, om milo oku i' daa'd sumimbar dau; milo i' daa iyahai do mongoi'd hilo'd pomisaraan do manalasai ngai' di pisongkiwalan dahai. 33 Nga' aiso' no o milo do momiolitan dahai. Aiso' no o milo'd momutus dot id pialatan ku om Kinorohingan. 34 Tingkod nod momohukum doho', oi Kinorohingan! Poinsoduwo' no i kororongit nu! 35 A' oku i' moddosi. Mimboros oku i', tu' oilaan ku i' ot id suang do ginawo ku.
1 Apaasan oku nod poimpasi. Poboroson ngai' ku no it araat dot opurimanan ku. 2 Kada' oku no pasalao', oi Kinorohingan; sunudai oku no ondung nunu kopio o poguhangan nu doho'. 3 Apatut i' toi dot orongit kopio ko, om magada' di winonsoi nu? Nunu noddi ot aanu-anu do sokodungon nu ot osorou om i korohian do tulun dot araat? 4 Iyo i' toi do dahai ot okito nu? 5 Iyo i' toi do dahai koniba' o tumur nu? 6 Ondung amu', om nokuro tu' ihumon ngai' nu o dusa ku, om imbulayan ngai' nu o sala' ku? 7 Oilaan nu i' dot aiso' o sala' ku, om aiso' o milo do popoidu' doho' do mantad id diya'. 8 Longon nu i' o minomonsoi doho', om nokuro daa'ddi do baino' tu' patayon oku diya' dot i longon nu di pinomonsoi nu doho' o pamatai nu? 9 Hondomo' no dot iya' i' o minomorun doho' do mantad id tana', om mumukon oku i' nangku'ndo diya' om silihon kawagu'd pupuk do tana'? 10 Iya' i' o minanahak di tapa' ku do kokorisan do pinoposiliu doho', om iya' o pinapagayo doho' dot id suang do tian di tina' ku. 11 Iya' i' o minomonsoi do tinan ku do kinuwaan do tulang om tuhat, om linopot nu o tulang ku do tonsi om kulit. 12 Nonuan oku diya' do koposion om osianan kasai' ko i' doho'. Om gompi' nu i' o nakapasi doho'. 13 Nga' baino' nopoddi om oilaan ku nogi', do solinaid nopoddi om maso nu i' do momusorou'd ralan do pokoruol doho'. 14 Pitoinuan oku diya' ondung kowonsoi oku'd dusa, om a' oku indo diya' ompunan. 15 Kowonsoi oku nopod dusa, om pasalaon oku no diya', nga' tontok nod kowonsoi oku dot otopot om roitan kasai' oku i' do nokowonsoi'd dusa! A' oku no kasaap do humangog tu' tumongob oku om ointingayaman oku. 16 Ondung kourut-urut oku dot ongokooro' nga' osuon oku no diya' do miagal do magasu do singa; om poimbulayon nu i sinundu nu do maan do pokoruol doho'. 17 Haro kasai' nopo o sasi' nu do muhup diya' do papasala' doho', om i kototogod nu doho' nga' muhang-ruhang nogi'; om momusorou ko nopod ralan do suwai do sumaap doho'. 18 Nokuro tu' pinologos oku diya' do pinogkosusu, oi Kinorohingan? Osonong nogi' daa do napatai oku dit aiso' po tiso' do tulun do nokokito doho'. 19 Om iyo po daa'ndo dot a' oku nopogkosusu, tu' pitilombuso' nopo do minomolobong do mantad id tian. 20 A' oku toi oruhai nod matai? Pologoso' oku nopo dot iso-iso'. Om osimbayan oku i' do momurimon diti maso ku'd poimpasi dot oruhai no. 21 Oruhai oku nod mamanau om a' oku no koguli' kawagu do kumaa oku id pomogunan dit otuong om aiso' o kataadan. 22 Pomogunan dit aiso' o tulinau, i noponu' pod sangai om kagangahan, tu' iri piya tulinau nga' otuong i'.
I Sopar
1-2 A' no tuu simbaron i boros dot aiso' o komoyon diri? Milo tuu i kobolotoko' do popotopot do tulun? 3 Ayub, osorou nu daa dot a' no iyahai koilo do sumimbar diya'? Om osorou nu daa dot obobou nopo iyahai dot ouru di ponguntotori' nu? 4 Osorou nu nopo daa dot a' kasala' i boros nu. Om osorou nu dot olidang ko dot id toguang do Kinorohingan. 5 Orohian oku no daa do Kinorohingan kopio o sumimbar diya'! 6 Om poiloon ko i' daa dau do toilaan nopo om ogumu' i' o kowoyoon, om a' i' osuhutan do tulun. Om purimono' no dot a' nogi' kosongkuro no ino koinggoritan nu, do pataladon di hukuman dit apatut daa do porotuon dot id diya'. 7 Oilaan nu i' tuu o kogisomon do kogoyoo'd Kinorohingan, om kogoyoo' do sinundu'd Kinorohingan? 8 Asawat i' ko' ilo tawan o sinundu do Kinorohingan. Nga' a' ko i' korikot do hilo'. Aralom i' ko' pomogunan do tulun do napatai o sinundu dau, poingkuro piya nga' a' ko i' kosuhut. 9 Sinundu nopod Kinorohingan om osinggawa' po ko' iti pomogunan om alaab ko' ilo rahat. 10 Ondung tangkapon ko'd Kinorohingan om igitan ko nogindo dot id bisara'; om isai po daa o kasaap do mogodu dau? 11 Oilaan id Kinorohingan i tulun dot aiso' o kootuk-otukon, okito ngai' i' dau o wonsoyon diyolo' dit angaraat. 12 Tulun piya'd basug nga' opintar nondo, dot osusu no i kaladai do lalang, do kaladai dit alaya'. 13 Posinondoto' no o ginawo nu, oi Ayub. Kumorologo no! Sambayang no dot id Kinorohingan. 14 Iduwo' no o dusa do mantad id ginawo nu om poinsoduwo' no o karaaton do mantad id walai nu! 15 Om milo ko indo do tumoguang do koposi-posion do hiti'd pomogunan do mikuwo'd alanut om okoris o ginawo. Ogirot ko indo om a' minog do kumanggau. 16 Om olihuan nu indo i katangaban nu, do miagal di luyud di nononos no tu' olihuan nod tulun. 17 Om koposi-posion nu nondo nga' anawau po ko' i tinitiu'd tadau di dangadau, om iri nondo it otuong dot id koposi-posion nu nga' mulinau do miagal do dongkosuabon. 18 Om osimbayan ko indo do poimpasi, om poimponu' ko'd pagandasan, om intirungan ko indod Kinorohingan do gisom dot osimbayan ko. 19 A' ko nondo moddosi dot isai nopo o pisangod, om ogumu' nondo o tulun do mokiuhup diya'. 20 Nga' iri nopondo tulun dot angaraat om mikorowo-rowo poo tu' aiso' no o pokukurayan, om aiso' o ralan do lumabus. Om iso' poo o soro-sorohon diyolo', tu' mokimohilo-hilo' po do korikot o kapatayon.
I Ayub
1-2 Iya' no kopio o minogobi' di tulun dot ogumu' do mimboros. Om soira' nopo dot apatai ko, om toilaan nu nga' kotonggoi nod apatai. 3 Iyoho' nga' tulun i' di kitoilaan, om a' i' poingharo-haro o toilaan nu ko' mantad do doho'd toilaan, om koilo ngai' no o tulun di nongkoboros nu. 4 Iri piya kongoombolutan ku nga' mongirak-irak iddi doho' do baino', mulong piya dot otopot om aiso' o sala' ku. Nokoumbal i' di gulu po do sinimbar do Kinorohingan o sambayang ku. 5 Iya' nopo om aiso' i' o kosusaan, nga' mongumang-umang ko i' daa doho', bobogon nu nogi' o tulun di motingkaratu' no. 6 Nga' iri piya i mananakau om i tulun dit aiso' o Kinorohingan nga' osimbayan id poimpasi, mulong piya do tingolig noo o pagandasan diyolo' om iri noo i kokoris diyolo'. 7 Ilo' piya tombolog om nintorusan nga' ogumu' po o potudukon dot id dokoyu, 8 pokianu nod toilaan do mantad id ongkipinuhobo dit id tindal om i hilo'd rahat. 9 Koinsanai diyolo' om kongoilo' i' do longon do Kinorohingan o minomonsoi diyolo'. 10 Kinorohingan i' o mongilo-ilo do koposi-posion do toinsanan dit ongkipinuhobo, om koposi-posion nopo do pointikid-tikid do tulun om id suang i' do palad dau. 11 Nga' poingkuro nopo o dila' nu do kopuriman di takanon, om iyo nogiddi o tolingo nu dot orohian do mokinongou do boboroson. 12-13 Tulun nopo di molohing no om haro i' o toilaan; nga' Kinorohingan noo o kitoilaan om kisinundu. Tulun nopo di molohing no om haro i' o pomusarahan dit atarom; nga' Kinorohingan noo o haro o pomusarahan dot atarom om kisinundu do popowonsoi'ddi. 14 Soira' nopod raagon do Kinorohingan, om isai poo o koilo do momonsoi kawagu'ddi? Om isai poo o popoidu'd tulun di pinogiil do Kinorohingan? 15 Magadau no do pususon do Kinorohingan o rasam; om rumikot o tampad do pologoson dau do lumuyung o waig. 16 Kinorohingan nopo om okoris om kamanang kasai', i monipu' om i tinipu' nga' id suang goduwo i' do kuasa' dau. 17 Iyau no i mongidu' do toilaan do pomorinta', om silihon po dau do koirakan i boyoon. 18 Iduwon dau o pangkat di raja' om pogiilon dau iyolo'; 19 om poinsiribaon ngai' dau it imam om i tulun dit ongkipangkat. 20 Tingkodon dau do mimboros o tulun di milo'd sondihon, om iduwon dau o toilaan di tulun di molohing no. 21 Intingayamon dau i tulun di kikuasa', om pupusan dau o kinoris do tulun di momorinta'. 22 Porikatan dau'd tulinau ot id koiyonon di totuong do miagal pod kapatayon. 23 Pogiroton om pobontugon ngai' dau o bansa', nga' id tohuri nondo om poinsiribaon i' om raagon dau iyolo'. 24 Pobosugon ngai' dau i boyoon diyolo', om pologoson dau iyolo' do minghombo tu' noborulong om napalid iyolo'. 25 Momihawor po iyolo' dot id dotuong, om mikorobibi' do miagal do tulun di naawuk.
1 Koinsanai di pinoboros nu om nokito ngai' no di gulu po, om osuhutan ngai' ku. 2 Nunu nopo i noilaan dokoyu, om iyoho' nogi' nga' koilo i'. Kada soroho' dot aala' oku diya'. 3 Nga' monokiboro-boros oku dit Osundu Kopio. Pouhoton ku'd Kinorohingan iti hal ku. 4 Tu' somponon dokoyu do tudut ino kababasug dokoyu. Miagal kou nopo di dokutur dit a' milo do mongubat. 5 A' kou nopo daa mimboros, om sorohon kou nogi' doti' daa'd tulun dot ongoilo. 6 Pokinongoho' no iti hal ku do poboroson ku. 7 Milo kou toi do mongudut dot id Kinorohingan? Ondos daa dokoyu om ino nopo tudut dokoyu om kountungan dot id Kinorohingan? 8 Milo kou tuu do mogobi' do Kinorohingan? Ongoyon daa dokoyu salasayo' i hal dau dot id pomisaraan? 9 Ondung potorungak kopio o Kinorohingan do mogintong diya', om haro tuu ot okito dau dot osonong dot id diya'? Milo kou toi do magakal do Kinorohingan do miagal do magakal do tulun? 10 Mulong pod lumisok-lisok kou do tumongkiad, nga' porikatan kou id Kinorohingan do hukuman dit awagat. 11 Ooris ko di kogoyoo' do sinundu dau. A' toi kotompurolosi diya' i kokoriso' dau? 12 Koinsanai di nosihat nu om miagal po di liohuk do tana' dot aiso' no o kootuk-otukon. Om i boros nu di popotopot diya' nga' miagal po di tana' tu' oruhai dot omumuk. 13 Tingkod nod mimboros om pologoso' oku no iyoho' dot osimbayan do mimboros! Uhang ngai' ku i' do poingkuro nopo o kootuson! 14 Nokosodia' oku nod papatahak diti ginawo ku. 15 Natagakan oku nod pagandasan! Ondung patayon oku'd Kinorohingan, om uhang ku no. Pointalangon ngai' ku i' iti hal ku dot id dau. 16 Ulan toi' om iti katamao' ku o kapasi-pasi doho', do tulun nopod araat om a' i' katama' do monokitimbaba'd Kinorohingan. 17 Pokinongoho' no kopio iti boros ku do papatarang do dinondo. 18 Nokosodia' oku nod popointalang diti hal ku, otumbayaan oku i' dot a' oku no milo'd pasalaon! 19 Oi Kinorohingan, ondung rumikot ko do mongoi ponondos doho' do kasala' oku, om mundorong oku nopod magandad do kapatayon ku. 20 Nga' patahako' no doho' iti duwo o pokionuon ku, om kasaap oku i' do sumolowot kawagu diya: 21 tingkod nod monginggorit doho' om kada' oku no padalaai do momorolosi! 22 Oi Kinorohingan, boro-boros no, om simbaron ku i'. Ko' pologoson oku do momoros om simbaron nu nogindo! 23 Songkuro toi o kogumuon do kasalaan om dusa do nowonsoi ku? Roito' ngai' nopo i dusa ku! 24 Nokuro tu' mongilag ko om minsodu' ko doho'? Nokuro tu' sorohon oku diya' do miagal do pisangod nu? 25 Iyoho' nopo om miagal po di roun do rumatu' dot otilib do ribut, om rolosion oku po daa diya'! Iyoho' nopodti om miagal po di rahami di nolonot om nokoring. Om a' no daa apatut do gusaon oku diya'. 26 Pinologos nu o koposi-posion ku dot oinggorit, tu' sinulian ngai' nu i kasalaan ku do mantad dit omulok oku po. 27 Kinagasan nu do rantai'd basi' o gakod ku; om antangan ngai' nu o kalaang-laango' ku, sorisidon nu do mogontong o nulokon ku. 28 Om nomumuk oku no do miagal di kayu do noromuk, om miagal di kain do naakan do tanai tu' noromuk no.
1 Mantad poddi pogkosusuon i' o tulun om oluhoi mantad no om aiso' o pokukurayan, om oruhai iyau do poimpasi, om oinggorit po. 2 Sumuni o tulun do miagal di bunga om olubok do miagal di tusak do bunga, om tumagak do miagal di sangai. 3 Oi Kinorohingan, siontong ko po tuu doho', om poongoyon oku po tuu diya' do hilo'd pomisaraan nu? 4 Milo toi do momonsoi dit olidang o tulun do kidusa? 5 Natantu' mantad nu no o tumur do tulun --- ondung piro noo tulan dau do poimpasi. Natantu' nu no o koompokon do tumur dau, om a' nori milo'd simbanan. 6 Tongkiadai nopo iyau, pologoson nopo iyau do mundorong, om kopuriman i' iyau do kosimbayanan do koposi-posion dau do gisom dot opongo i wonsoyon dau. 7 Guas nopo di tinagad om haro po o soro-sorohon. Tu' tolidan po om momuraan. 8 Mulong piya do nokoring no o gamut dau do hiri'd saalom do tana', om i tuod nga' noromuk no, 9 nga' oluyungan nopod waig om sumuni i' kawagu, do miagal di tanom-tanom di wagu po katanom tu' tolidan i'. 10 Nga' soira nopo dot apatai o tulun, om iri no o koompokon dau; apatai nopo iyau, om hinonggo no ma iyau'ddi? 11 Iyo po di bawang do tumingkod do lumuyung, om iyo di torobong dot arasakan, 12 o tulun di napatai, tu' a' no iyau kotungag kawagu. A' no i tulun diri tumungag kawagu do solinaid pod haro o tawan; a' no iyau mosik. 13 Pologoso' oku nod lumisok dot id suang do pomogunan di tulun di napatai. Intirungai oku no do gisom dot otingkod o kototogod nu. Tontuon no o maso do kopomuhandaman nu doho'. 14 Ondung apatai o tulun om milo po tuu iyau do masi kawagu? Nga' iyoho' nopo om monikid tadau oku nopod magandad dot opupusan i maso ku'd oinggorit. 15 Om momolohou ko nondo doho' om sumimbar oku indo diya', om olisiu ko indo doho' i tulun di winonsoi nu. 16 Om piantangan nu nondo o laang ku, om a' nu nondo sorohon i dusa ku. 17 Om ompunan nu nondo om poinsoduwon nu i dusa ku, om tonuson nu nogindo o koinsanai do kasalaan di nongowonsoi ku di gulu po. 18 Om otuhan ngai' nondo o nuluhon, om pampang dit agayo nga' koundaliu nondo do mantad hiri'd kinoiyonon mantad di pampang. 19 Om akanon nondo di waig dot opuhod i watu, om atanggayan di rasam dit asapou i tana', om iyo ko noddi do mamaraag di soro-sorohon do tulun. 20 Iya' no o mangala' do tulun do gisom dot alaid. Om paraaton nu o rabas dau om suhuon nu iyau'd mogidu' do magandad do kapatayon dau. 21 Tangaanak nopondo dau om sumiliu do tulun dit abantug, nga' a' no iyau koilo'ddi, om a' nogi' iyau koilo ondung soira' dot intingayamon iyolo', tu' aiso' i' o pinopoilo. 22 Dau nod tinan ot opurimanan dau do kitoruol, om i katangkabaan do ginawo dau o koinggorit dau.
Pinisimbar-simbaran di koinduwo
15.1-21.34
Ilipas
1-2 A' i' koontok ino boros nu, oi Ayub. 3 Tulun nopo dit oilo om a' i' sumimbar dot a' koontok o ponimbar. Om a' popotopot do tinan dau dot i boros dit aiso' o suang o maan do popotopot. 4 Ondung tonudon ino korohian nu, om aiso' no o songulun piya dot oronok do Kinorohingan, om aiso' o sumambayang dot id Kinorohingan. 5 I koboro-boroso' nu o popointalang do kisala' ko, nga' umbalan nu i' iri do monompon di koiloo' nu'd mimboros. 6 A' no minog do pasalaon tiya', tu' iri no i boros nu o papasala' diya'. 7 Andasan nu nopo daa om iya' no o tulun dit id gulu kopio pogkosusuo'? Hino ko no tuu do tontok di winonsoi ngai'd Kinorohingan i nuluhon? 8 Nokorongou ko toi ondung nunu i nosorou mantad do Kinorohingan do wonsoyon dau? Iya' no toi o nakaanu'd toilaan do tulun? 9 Koinsanai di noilaan nu, nga' nongoilaan ngai' i' dahai. 10 Kinoonuan nopo dahai'd toilaan om mantad id tulun dit opurak no o tobuk, i tulun di hino no dit a' po nosusu i tapa' nu! 11 Nokuro tu' adaan nu i ponginsasamod do Kinorohingan diya'? Nokopomoros no iyahai dot id suang do ngaran dau do boros dit osonong om koinsasamod. 12 Nga' lumasu' nogi' o ginawo nu dot otogod dahai, om atarom nopo o mato nu'd montong dahai. 13 Tumogod ko nogid Kinorohingan, om sumurilog ko dau. 14 Milo i' tuu o tulun do lumidang kopio? Milo tuu o tulun do kumotopot kopio dot id Kinorohingan? 15 Dot iri piya i moloikat nga' a' id Kinorohingan ponongkuyaanan, om a' i' iyolo' olidang dot id pagantangan do Kinorohingan. 16 Om okon-okon pondo i tulun dot araat, tu' monolon do karaaton do miagal po di monginum do waig, araat no kopio o tulun, om aiso' o guna'. 17 Pokinongou nodti poboroson ku, oi Ayub, 18 i pinotuduk do tulun dit oilo dot id doho'. Iri nopo ponudukan diri nga' mantad id taki-aki diyolo', om pinotuduk dot id sinakagon dau. 19 Tontok nopoddi nga' aiso' po o bansa'd suwai do hiti'd pomogunan diyolo'; aiso' i' o mamalid diyolo' do mantad id Kinorohingan. 20 Tulun nopo dit araat, it orohian do monginggorit, om oinggorit nod gisom do tikapatai dau. 21 Gumarang nondo o boros di korolosi dot id tolingo dau, om saapon iyau di manakau do tontok dit osimbayan iyau dot osorou dau. 22 A' no kopio iyau milo do mogidu' do mantad id totuong, tu' poingkodong no gayang do maan do pamatai dau. 23 Om tombolog di mangangakan do rata' nga' poingandad nod kapatayon dau, do mongoi pangakan di rata' dau. Noilaan no dau dot otuong ot id dabantalan dau. 24 Miagal pod raja' dit osiou o kosusaan do posodia' nod mongoi panangod dau. 25 Iyo nodti o kootuson do tulun di sumaap do Kinorohingan, i katama' do sumaap dit Osundu Kopio. 26-27 Oondos iyau, om sumaap iyau'd Kinorohingan, om pobilidon dau o kolid dau, tu' mada' i' iyau dot aala'. 28 Miniyon iyau dot id bandar di nangaraag, om hiri'd walai di pinogiiduan do sanganu, i bandar di natantu' mantad nod raagon. 29 Kakayaan nopod tulun diri om tumagak i', koinsanai dilo dapu' dau om a' i' potilombus, 30 om a' iyau koidu' do mantad id totuong. Om miagal po iyau'd kayu di nosorob o raan, om araag nondo iyau dot oobusan do pinuhobo'd Kinorohingan. 31 Ondung otumbayaan iyau dit araat, om araat no ot aanu dau. 32 A' po orikot o maso dau, om apatai no iyau; do miagal di raan di noriou tu' a' no tumomou kawagu. 33 Miagal pondo iyau di guas dot anggur di marab o tua', om miagal di guas do saitun di lumopuk o tua'. 34 Tulun nopo dot aiso' o Kinorohingan om aiso' no o sinakagon, om tapui nondo o monorob di walai di winonsoi dau do tusin di pinonisip o pinomonsoi. 35 Iyolo' no i tulun di minsorou dit araat om i minomonsoi dot angaraat. Om ginawo nopo diyolo' om poimponu' kasai' nopod poninipu'.
I Ayub
1-2 Asaru' oku no do korongou'd boros do miagal dino, ino nopo ponginsasamod nu om koinggorit nogi' doho'. 3 Soira' dokoyu do tingkadan i koboro-boroso' dokoyu dit aiso' o suang? Nunu o mominsuhu' dokoyu do sumimbar? 4 Ondung iyokoyu daa o miagal doho', om iyoho' o miagal dokoyu, om iyoho' nga' milo id momoros do miagal diri. Milo oku i' do popimbingog do tulu ku, om olitan ku iyokoyu do boros do monogod. 5 Milo oku i' daa'ndo do mimboros do popogirot do ginawo dokoyu, om a' tumingkod-tingkod do monginsasamod dokoyu. 6 Mimboros oku, nga' aiso' i' o guna', om a' mungkomi nga' a' i' kolingos diti toruol ku. 7 Pinoluhoi nu o tinan ku, oi Kinorohingan, om pinologos nu o sompiiyon ku do nangapatai ngai'. 8 Suminaap ko doho' om tinangkap oku diya'. Mogioput-oput poo o tulang ku do gama' do kogohuyo' ku. Om iri no o kabara-barasan do tulun dot ogumu' do nokowonsoi oku'd dusa. 9 Rutao' nopod Kinorohingan o tinan ku tu' otogod i' iyau doho'; atarom po o mato dau do poingontong doho' tu' araatan no kopio iyau. 10 Hingi-hingion oku pod tulun; om urugunai oku nopo diyolo', om pinintompilingan diyolo' o rabas ku. 11 Pinatahak oku'd Kinorohingan dot id tulun dit angaraat. 12 Di nopo di gulu po om osimbayan oku i' do poimpasi, nga' minonigowo o Kinorohingan do suminaap doho', om pinataam oku dau. Siniliu dau o tinan ku do maan do pinsingilaan do mamana'. 13 Om pimpanaon oku poddi dau, gisom do noulayak o tinaii' ku. Om a' i' iyau osianan doho'. 14 Suminaap iyau doho' do miagal po di soudor, om piguli-gulian oku po dau do pokoruol. 15 Manampakai oku'd karung do tanda' do tumongob, om poirikau oku do hiti'd pupuk tu' naala' oku no. 16 Mihad-ihad oku do gisom do nakaragang o rabas ku, do nouru'd mingihad. Om nokobongkung o mato ku om nokoitom o posorili' do mato ku. 17 Nga' a' oku i' ruminongit, om iso-iso' o ginawo ku'd sumambayang dot id Kinorohingan. 18 Oi tana', kada' no lisoko' i karaaton di winonsoi dot id doho'. Om apatai oku piya nga' kada' tingkodo' o giak ku do mokianu dit otulid! 19 Oilaan ku i' dot iri nopo mogobi' doho' om hino i' do hilo'd surga, iyau no o popoilo dot aiso' i' o dusa ku. 20 Hingi-hingion oku om irak-irakan oku di kongoombolutan ku. Om mihad-ihad oku pod rumikot dot id Kinorohingan do mokitulung dau. 21 Maha' i' daa om obian oku'd Kinorohingan dot id toguang dau. Do miagal di tulun dit orohian do mogobi' di tambalut dau. 22 Oruhai no dot aayi' o tumur ku, om a' no alaid om mamanau oku no om a' oku no koguli' kawagu.
1 Oniba' no o tumur ku, om oruhai oku nod a' kopuhobo, lobong po o poingandad doho'. 2 Hingi-hingion oku pod tulun; om opurimanan ku o pongumang-umang do tulun doho'. 3 Otopot oku i', oi Kinorohingan. Ponongkuyaai nod boros ku! Isai po o milo'd sumokodung do boros ku. 4 Iya' no o pinopotuong do pomusorou diyolo' gisom dot a' iyolo' kosuhut; kada' no iyolo' pologoso' do kaala' doho' do baino'!. 5 Boros ka do tinukadan di dong gulu-gulu; om haro nopo o songulun do minonipu' di tambalut dau do sianu'd tusin o kinoponipuan, om iri no moti'ndo i tangaanak di tulun diri ot ogulian diri. 6 Baino' nopoddi om iyoho' no o posuribanan di tinukadan diri, gowoi poddi om rumikot nopo o tulun dot id doho' om momodula' nod rabas ku. 7 Oruhai nod obolou o mato ku dot adalaan do tumongob, om tinan ku nga' nakagahui no tomod. 8 Om nongkotigowo ngai' i tulun dit ongotorodok; om monondos ngai' nopo i tulun dit aiso' o sala' dot aiso' o kinorohingan ku. 9 Iri nopo i tulun di momusorou dot osonong om aiso' o sala' diyolo' om otumbayaan no kopio do korohian do Kinorohingan o kowoyo-woyoon diyolo'. 10 Nga' ondung rumikot ngai' iyolo' dot id doho', om aiso' i' o songulun piya dot oilaan ku dot oilo. 11 Nakatalib no o maso ku, om koinsanai di soro-sorohon ku nga' a' noddi nabayaan, natagak no i soro-sorohon ku. 12 Nga' iri nopo i kongoombolutan ku om moro-boros dot, “Totuong nga' anawau i', om osomok no o tanawau,” ka. Nga' iyoho' nopo om maso po dot id dotuong. 13 Soro-sorohon ku nopo om aiso' no suwai ko' i pomogunan do tulun di napatai, om hilo' oku nod poingodop dot id suang do totuong. 14 Poboroson ku nondo dot iri no lobong o tapa' ku, om i giuk di mangakan do tinan ku o tina' ku, om koobpinayan ku'd tongoondu'. 15 Nunu poo o soro-sorohon ku? Isai po o manahak doho'd kosimbayanan? 16 Aiso' noddi o soro-sorohon ku do koongoi oku do hilo'd pomogunan do tulun do napatai.
I Bildad
1-2 Ayub, soira' ko'ndo do tumingkod do mimboros? Ula' po nod boros, om iyahai no o moro-boros diya'. 3 Nokuro tu' sorohon nu do miagal iyahai'd sapi' kabasug? 4 Ino i' kototogod nu o kosubu dino toruol do tinan nu. Tongkiadan no tuu'd tulun iti pomogunan dot otogod ko? Powolihon no tuu'd Kinorohingan ilo nuluhon dot iya' noo o kopowolihan? 5 Lampung nopod tulun dot araat om atantu' nod pisokon, om tapui dau nga' a' nondo obuhang. 6 Lampung do hiri'd kiim dau nga' kumoro' nondo o tulinau; om a' nondo obuhang. 7 Pamalaang-laang nopo dau di gulu po, om apanggor i', nga' mikarasadu nondo do baino', om naratu' iyau do nobungou di pinsarahan dau do wonsoyon dau. 8 Nokosuang iyau do lawa' om nakagasan o gakod dau. 9 Nakagasan do lawa' o tatad dau, om a'ddi iyau koidu'. 10 Nakataan ngai' no o lawa' do songillisok-lisok do hilo'd tana', om songingunda' no o gama-gama' do hilo'd tindalanon dau. 11 Posorili' no di tulun dot araat o korolosi do magandad dau; om manud-tanud dau iri do pointikid-tikid do lumaang iyau. 12 Iyau nopo di gulu po om kaya' kopio, nga' baino' noddi om louson iyau; poingkakat no o kosusaan do magandad do hiri'd toning dau. 13 Notongkop poo o tinan dau do toruol dit aiso' o pomolingos, om iri no o nakapasa' di longon om gakod dau. 14 Ginayat iyau do pinoposoliwan do mantad hiri'd kiim di niyonon dau dit osimbayan, om potoguango' noddi iyau do kapatayon. 15 Baino' nopoddi om isai nopo nga' koino-ino nod miyon do hilo'd kiim dau. Do notiasan di tana' di kiapui do pananus di toruol dau. 16 Sompiiyon nopo dau om miagal po di gamut di napatai; om sinakagon no dau om miagal di raan di noriou. 17 Natanus no i kobontugo' dau do hirid walai om id kinoiyonon dit id soliwan do bandar dau; om aiso' no o tongosongulun piya do kohondom dau. 18 Uyungon nondo iyau do mantad hiri'd tana' di tulun di poimpasi, om poundolihon do mantad id tanawau om pokoyoon dot id dotuong. 19 Iyau nopo om aiso' no o tangaanak om aiso' o sinakagon; om tobpinai dau nga' aiso' no. 20 Mantad pod hilo'd koulayon om korikot do hilo'd kotonobon o tulun do nangkapagag om songgogor-gogor poddi do moddosi do nokorongou di kinowoyo-woyoo' do kinootuson do koposi-posion dau. 21 Iti no kootuson do tulun dit angaraat, om it a' momusou'd Kinorohingan.
I Ayub
1-2 Nokuro kou tu' a' tumingkod do mimboros do ponginggorit doho'? 3 Asaru' kou nod pokoruol do ginawo ku, om a' kopuriman dot ointingayaman do monginggorit doho'. 4 Ondung nokowonsoi oku daa'd sala', om a' i' korugi' dokoyu iri. 5 Andasan nopo daa dokoyu om osonong kou iyokoyu ko' mantad doho', om momusorou kou dot iti nopo koinggoritan ku nga' popointalang do kisala' oku. 6 Ilaai no dokoyu do Kinorohingan i' o monginggorit doho'; pinosulung oku dau di lawa' dau. 7 Suminaap oku di kororongit dau, nga' aiso' i' o mokinongou doho', “Hinonggo no it otulid,” kangku, nga' aiso' i' o nokorongou. 8 Nantaban do Kinorohingan o ralan ku, om a' oku'ddi milo'd tumalib, tu' pinotuong dau i wayaan ku. 9 Nahau ngai' dau i kakayaan ku, om rinaag dau o ngaran ku dit osonong. 10 Sorilion oku nopo dau'd momobog. Nutus dau i pagandasan ku, om pinologos oku'd noriou gisom do napatai. 11 Tuminogod no kopio o Kinorohingan doho'; siniliu oku po dau do pisangod dau. 12 Pinaatod dau o soudor dau do mongoi panangod doho'; mingukad iyolo' do liang do pinonurungku' di kiim ku. 13 Pinoinsodu' do Kinorohingan dot id doho' i koobpinayan ku; om miagal oku pod sompogunan dot id tulun di kotutun doho'. 14 Om sompiiyon om tambalut ku nga' mininsodu' ngai'. 15 I tulun di sumosongkoduwo dot id walai ku nga' nokolihu no doho', om i susuhuon ku di tongoondu' nga' a' noddi monongkotutun doho'; paabalon oku nopo diyolo' do tulun dit a' diyolo' otutunan. 16 Soira' do momolohou oku di susuhuon ku, om a' no iyau sumimbar, mulong piya dot insasamadan ku i' iyau. 17 I sawo ku nga' soluhan do kosingud do nutong do pinuhobo ku, om i koobpinayan ku'd kusai nga' a' no kasaap do minsomok doho'. 18 Hingi-hingion oku po di tangaanak do hilo'd ralan, om mingkakat oku nopo nga' irak-irakan oku nogi' diyolo'. 19 I tambalut kopio ku nga' sosomuan pod kokito doho'; om iri piya tambalut ku di kosianan kopio ku nga' tumolikud nopo doho' do minsodu' doho'. 20 Santaid-taid po o kulit do tinan ku; oruhai oku no dot apatai. 21 Oi kongoombolutan ku, kosianai kou no doho'! Tu' binobog oku'd Kinorohingan. 22 Nokuro tu' monginggorit kou do tinan ku do miagal di ponginggorit do Kinorohingan doho'? A' po dokoyu ula' i ponginggorit dokoyu doho'? 23 Osonong no daa kopio ondung haro o popotulis diti boros ku, om osorou kasai' i'. 24 Ko' pokikiron po daa iti pinoboros ku dot id watu, om potulison nogi' om a' i' atagak do gisom dot alaid. 25 Nga' oilaan ku i' do haro o hilo'd surga do mogobi' doho', om rumikot indo iyau do mongoi ponguhup doho'. 26 Mulong piya do notongkop do gandas o kulit ku, nga' solinaid ku nopo do haro o tinan om kokito oku i' do Kinorohingan. 27 Mato kopio ku indo o kokito dau, om okon nondo iyau ko' sompogunan. Nokoluhoi o ginawo ku tu' minomoros kou do poingkaa, 28 “Poingkukuro tuu o ralan toko' do monginggorit dau?” ka. Minogihum kou do paantakan do sumaap doho'. 29 Nga' baino' nopo om poddosi kou no dilo gayang! Tu' otogod o Kinorohingan, om momohukum iyau di tulun do kidusa, om kongoilo kou i' do haro o Kinorohingan di momutus do koinsanai'd kowoyo-woyoon do tulun.
I Sopar
1-2 Iya' no kopio o pinopotogod doho', oi Ayub. A' ku noddi opusus o ginawo ku do sisimbar. 3 Iri nopo i pinoboros nu'ddi om monguntotogod no daa kopio, nga' koilo oku i' do sumimbar diri. 4 A' nu toi noilaan dot i nopo di gulu po, di pinoiyon i' o tulun do hiti'd pomogunan, 5 om aiso' i' o songulun piya dit araat dot alaid dot osimbayan. Om okirapan noo o kataadan di tulun di sumaap. 6 Mulong piya dot a' no milo'd boroson o kogoyoo' dau, gisom do kosunggu do hilo'd tawan o tulu dau. 7 Nga' otilib indo iyau do miagal di pupuk, om atagak tomod nopo iyau do hiti'd pomogunan do gisom dot alaid. Om iri ngai' nopondo i tulun dit ongoubas dau om songuhot-uhot po dot, “Hinonggo o pinakayaan dau?” ka. 8 Tumagak nondo iyau do miagal do nipi, om miagal do soroyoon di dongotuong. 9 A' nondo iyau okito, om a' iyau hino do hiri'd tiyonon dau. 10 Om pogulion nondo di tangaanak dau'd tongokusai i pinanakau dau do mantad id tulun do mosikin. 11 Mulong piya dot omulok po daa iyau om okoris po, nga' a' no alaid om osiliu no iyau do pupuk. 12-13 Oomis nopo i karaaton dot opurimanan dau, gisom dot orubatan iyau do monolon diri. Om untomon nopo dau do hiri'd kabang dau tu' momurimon kopio iyau ondung okuro-kuro iri. 14 Nga' kosuang nopondo do tian dau i taakanon diri, om mumang nondo poit do miagal do kopoito' di kawanit tu' kapatai. 15 Iri nopo dapu' di pinanakau om nongotolon no dau, nga' ilobon indo dau, tu' posoliwanon id Kinorohingan do mantad id tian dau. 16 Om nunu nopo i notolon di tulun dit angaraat nga' miagal pod kawanit; tu' iri no o mamatai dau, do miagal di tindukon do tulanut di kapatai. 17 A' no iyau kaanu do tumau do saitun dit a' aayi-ayi' om a' kaanu di susu om paha' di poluyungon. 18 A' no milo dot a' dau patahakon o nunu nopo di naanu dau, om a' nondo iyau koumbal do momurimon di kakayaan dau. 19 Tu' adalaan kopio o pinonginggorit dau'd tulun do mosikin, om minonolod iyau do walai dit okon ko' iyau o minomonsoi. 20 Iyau nopo om tulun di tamaha' kopio, om a' insan dot oumbagalan! 21 Tontok nopod makan iyau om oiyon ngai' nopo dau do mangakan, nga' a' no iyau alaid dot osimbayan. 22 Mulong piya dot osimbayan daa iyau, nga' rumikot indo i koinggoritan om katangaban dot id dau. 23 Tontok dit agangau kopio iyau do mogihum do taakanon di korohian dau, om otogod kopio nondo o Kinorohingan om hukuman dau iyau. 24 Soira' nopo do mumbal daa iyau do mongilag di gayang do basi', nga' apana' indo iyau di pana' do tambaga'. 25 Nosuhat po o tinan dau do napana' di pana', kolopuson nopo dot id tian dau i lahis di pana' dit akalab, om poimponu' po do kopoddosian o ginawo dau. 26 Koinsanai di dapu' di nongotimung dau nga' nangaraag ngai' no, i tapui dit okon ko' tulun o pinaparakit o monorob do tinan dau om koinsanai'd sompiiyon dau. 27 Ilo tawan o popoimbulai do kasalaan di tulun diri, om iti tana' o sumaap dau. 28 Tonuson ngai' nopondo o kakayaan dau, tu' adalaan no kopio o kototogod do Kinorohingan. 29 Iyo noddi o kootuson do tulun dit araat, Kinorohingan i' o pinapatantu' mantad do kootuson diyolo'.
I Ayub
1-2 Pokinongou nodti poboroson ku; tu' iri poo o pokionuon ku di koinsasamod doho'. 3 Posowoliono' oku no iyoho' do moro-boros, om soira' pondo do kongoboros ku o poboroson ku om poingkuro nopondo o pongumang-umang nu nga' poboroson nopo. 4 Ponokisongkiwal ku nopo om okon i' ko' tulun; otopot i' kopio do haro o paantakan ku dot a' ku opusus o ginawo ku. 5 Ontong pogi' doho'. A' ko po nanu' kapagag do kokito'dti tinan ku, gisom dot a' ko no daa'ndo koungkomi? 6 Soira' nopo dot osorou ku i nosiliu dot id doho', om gagaran oku po dot aranaban. 7 Nokuro tu' pologoson do Kinorohingan dot otogui o tulun dit araat, om pologoson do muhang-ruhang o dapu' diyolo'? 8 Om otogui iyolo' do gisom do kokito po iyolo' do manangaki diyolo', om kokito iyolo' do gisom dot angkagayo i manangaki diyolo'. 9 Osimbayan tomod o sompiiyon diyolo', tu' a' i' iyolo' insan koumbal do kopuriman do koinggoritan di porikoton do Kinorohingan. 10 Om tayam-tayam diyolo' nga' osonong nopod gumumu', om ongosonong dot osusu. 11 Tangaanak diyolo' nga' santangkus-tangkus nopo dot atataadan, do miagal do tangaanak do dumba'. 12 Om songigol-igol om sonsinding-sinding iyolo' dot ompoton do rebana, om kecapi om suling. 13 Ongosimbayan nopo iyolo' do poimpasi, om a' i' oinggorit do tintod do matai. 14 Inda' ka do nokoboros no iyolo' dot id Kinorohingan do poingkaa, “Tongkiadai nopo iyahai! Tu' a' no iyahai orohian do koilo'd korohian nu dot id suang do koposi-posion dahai,” ka. 15 Tu' poingkaa ot osorou diyolo', “Aiso' i' o guna' do mogobi-obi'd Kinorohingan, om aiso' o kootuk-otukon do sumambayang dot id Kinorohingan. 16 Okon toi ko' mantad id kokorisan toko' o kinoonu-onuan toko'dti,” ka diyolo'. Nga' iri nopo pomusarahan diyolo' do miagal diri om a' oku no kopio kosokodung. 17 Nokoumbal i' toi do pinisok i lampung do tulun dit angaraat, om nokoumbal i' toi o songulun dot id pogialatan diyolo' dot oontok do kosusaan? Nokoumbal toi o Kinorohingan dot otogod diyolo', gisom do hinukuman dau iyolo'? 18 Om nokoumbal toi o Kinorohingan do pinoposiliu do tulun diri, do miagal di sakot di nokoring om pupuk di tilibon do tongus? 19 Om moro-boros kou do poingkaa, “Hukuman do Kinorohingan o tanak dot i dusa di tapa' dau o kopomohukuman,” ka. Nga' osonong nogi' dot i tulun di nokowonsoi'd dusa o hukuman do Kinorohingan, om kopuriman no iyau dot i dusa dau o kopomohukuman do Kinorohingan dau. 20 Pologoson nopo o tulun di kidusa do mamabo do hukuman di dusa dau, pologoson nopo iyolo'd kopuriman do kototogod do Kinorohingan, it Asawat Kopio. 21 Ondung aayi' o maso'd tulun do hiti'd pomogunan, om milo po tuu iyau do momusorou di tangaanak dau do mongilo ondung osonong-sonong ko' oinggorit iyolo'? 22 Milo i' tuu o tulun do monuduk do Kinorohingan, tu' Kinorohingan i' o momutus di songingiyon do hilo'd surga? 23-24 Haro i' o tulun dot osonong kasai' o tinan do gisom do tikapatai dau; tu' tinan nopo diyolo' nga' ongokoris, om a' i' iyolo' oinggorit do tintod do matai. 25 Nga' haro i' o tulun dot apatai do poimponu'd koinggoritan, om a' i' insan koumbal dot osimbayan. 26 Nga' oiyo i' iyolo' dot angapatai om lobongon ngai', om akanon ngai' iyolo'd tonggiluang om giuk. 27 Oilaan ngai' ku i' ino sorohon dokoyu om koinsanai di karaato' do pomusarahan dokoyu. 28 Monguhot kou do poingkaa, “Hinonggo no ma o walai di tulun dit abantug diri, i tulun di miningwonsoi dot angaraat?” ka. 29 A' kou po toi insan koumbal do monokiboro-boros di tulun di mononompogunan? A' kou toi otumbayaan di pinoboros diyolo'? 30 Boros ka diyolo', “Tontok di momohukum o Kinorohingan, om iri nogi' i tulun dot araat ot apasi,” ka. 31 Aiso' i' o monondos di tulun dot araat, om aiso' o sumuli' di karaaton dau. 32 Soira' nopo do pokoyoon iyau do hiri'd kalabangan, om posuangon no iyau do hiri'd lobong, om tamangan kopio i lobong dau. 33 Rinibuan i' o tulun do rumikot do hiri'd pamalabangan dau, om iri piya tana' nga' ongorulan do malit di tinan dau. 34 Iri nopo ponginsasamod nu doho' om maan i' toomod. Om koinsanai di pinosimbar nu nga' tudut ngai' i'!
Pinisimbar-simbaran di kointolu
22.1-27.23
Ilipas
1-2 Id pogialatan nopod tulun, om aiso' i' o tongosongulun piya do kiguna' dot id Kinorohingan. Mulong piya do kitoilaan kopio o tulun, nga' id dau nod tinan do kiguna' iyau. 3 Kountung i' tuu do Kinorohingan i wowonsoyon nu dot otopot, om kouhup i' tuu dau i kosonongo' nu? 4 Okon i' ko' i koronoko' nu'd Kinorohingan o kapanandasan dau diya' do nakasala' ko. 5 Suwai ko' i kogumuo' do dusa nu, om koinsanai di karaaton di nongowonsoi nu. 6 Ondung a' di tobpinai nu olopusan i tutang dau, om ngoyon nu no ahawo' o koinsanai di pakayan dau. 7 Om i tulun di nohuyan nga' a' nu i' pinoinum, om a' nu onuan do takanon i tulun di louson. 8 Pinakai nu o pangkat om kuasa' nu do minonolod do koinsanai diti pomogunan. 9 Okon nopo ko' mada' ko'd monguhup di tongoondu' do nopuadan, nga' monginggorit ko po di tangaanak dit aiso' o molohing. 10 Om iri no o kokuwaan do notutukan ko pod luang do korotuon, om sigog nopo om kopuriman ko do moddosi. 11 Maid-laid nga' muong-tuong do gisom dot a' ko noddi kokito, om olondod ko do luyud dot agayo. 12 Okon toi ko' poundorong o Kinorohingan do hilo'd tawan dit id sawat kopio, om poilluung iyau dilo rombituon di hilo'd sawat? 13 Nga' poingkaa indo o boros nu do monguhot, “Nunu o koilo-ilo do Kinorohingan? Tu' iyau nopo om hilo'd notirung dilo haun dot akapal, om a' milo do momutus dati'?” ka. 14 Ondos nu daa om ilo' nopo haun dot akapal om kotirung do mato dau, do tontok di mimpanau iyau do hilo'd piolitan do tawan om tana'. 15 Potilombuson nu po o korohian nu do sumusui do ralan do tulun dot araat? 16 Mulong piya dot a' po norikot o maso do kapatayan diyolo', nga' rinulun i' iyolo' do lumpadang. 17 Om iyolo' no i magada' do Kinorohingan, om momusorou dot a' milo o Kinorohingan do momonsoi do nunu nopo dot id diyolo'. 18 Om inda' ka do Kinorohingan i' o pinapakaya' diyolo'! A' oku no kopio kosuhut do pomusarahan do tulun dit angaraat. 19 Iri nopo tulun dot ongosonong, om kongoirak i' dot atataadan do kokito di tulun dit angaraat do hukuman. 20 Koinsanai do dapu' di tulun dit angaraat om tonuson indo, om sorobon do tapui o nunu nopo i nongoolu-olu'. 21 Baino' nodti oi Ayub, om mulud no dot id Kinorohingan, om kada' nondo pomusorou do miagal iyau'd pisangod, ondung miagal diri o wonsoyon nu, om atantu' no do barakatan ko dau. 22 Romito' no o ponudukan di potudukon dau dot id diya', poopio' no i boros dau dot id suang do ginawo nu. 23 Guli' no dot id Kinorohingan do mikuwo'd kumosiriba' o ginawo, om tingkadai ngai' no i karaaton di winonsoi dot id suang do walai nu. 24 Taamo' no i tamas nu, om potiason no do hiri'd nanad di bawang do narasakan i tamas nu dit osompipi'. 25 Pologoso' no it Osundu Kopio do sumiliu do tamas nu, om iyau o sumiliu do pirok nu dit osonong kopio. 26 Om monongkuyaan ko indo kasai' do Kinorohingan, om oilaan nu nondo dot iyau no o tadon do kataadan nu. 27 Om soira' nopod sumambayang ko, om simbaron ko i' dau, om osulung nu indo i batos nu di pinabatos nu dot id dau. 28 Om koundar ngai' indo o nunu nopo o wonsoyon nu, om tumitiu indo o tulinau do hiri'd ralan nu. 29 Poinsiribaon i' do Kinorohingan i tulun di minggayo-gayo, nga' posion i' do Kinorohingan i tulun dit osiriba' o ginawo. 30 Tulungon ko i' do Kinorohingan ondung aiso' no o sala' nu, om ondung momonsoi ko di korohian dau.
I Ayub
1-2 A' oku no milo dot a' sumaap om a' moguhang do Kinorohingan, a' oku no milo do tumingkod do mingodoi. 3 Ondung koilo oku daa do tiyonon dau, om koongoi oku i' daa kosolowot dau. 4 Oiyo-iyon ku nopo daa do monusui iti kowoyo-woyoon ku dot id toguang do Kinorohingan, om poboroson ku i kosongkiwalan ku do pongobi' ku doho'. 5 Orohian oku daa do koilo ondung poingkuro o poboroson dau doho', om poingkukuro ot isimbar dau. 6 Orohian tuu o Kinorohingan do mangayi-ayi' do kinoris dau do sumaap doho'? Amu', iyau nopo om atantu' no do mokinongou i' do poboroson ku. 7 Iyoho' nopo om otulid i', om koilo oku i' do monokisimbar-simbar do Kinorohingan, om poboroson oku indo dau dot a' nakasala', om a' no osimbanan iri. 8-9 Nokopogihum oku nod Kinorohingan do hilo'd koulayon om hilo'd kotonobon, om hilo'd salatan, om hilo'd utara, nga' a' i' hino o Kinorohingan do hilo', om a' oku i' nokosolowot dau. 10 Nga' oilaan id Kinorohingan ot ongoyon ku; ondung umbalan oku dau do miagal do tamas om oilaan i' dau dot olidang oku. 11 Otorodok oku i' do mumboyo' dau, om a' oku i' koumbal do sumala' do sumusui do ralan di pinotuduk dau. 12 Tonudon kasai' ku i' i tisuhu' do Kinorohingan doho', tumanud oku i' do korohian dau, om okon i' ko' i korohian ku o tonudon ku. 13 Kinorohingan nopo om a' i' insan do sumimban, om aiso' i' o kasaap dau. Wonsoyon nopo dau i korohian dau. 14 Wonsoyon i' kopio dau i nosorou mantad dau do wonsoyon dot id doho'; om ogumu' po o suwai ko' iri dot osorou dau do wonsoyon dau. 15 Om gagaran oku poddi do moddosi dau. 16-17 It Osundu Kopio o minananus di kosioho' ku. Kinorohingan o poddosi ku, om okon i' ko' i totuong o monompurolosi doho', mulong piya dot id suang oku'd totuong, om nobolou oku di totuong.
1 Nokuro tu' a' do Kinorohingan tontuon kopio o tadau do kopomutusan, om obutusan i' do tumanud dit otulid i tulun di kotutun dau? 2 Pinawaliu do tulun i watu do piwolitan do tana' do popoinggayo do tana' dau; om minanakau iyolo' do dumba' om pinosugku'ddi diyolo' iri di diyolo'd baanan. 3 Nongoi diyolo' tanggayai i kaladai di tangaanak dit aiso' o molohing, om hirion diyolo'd diyolo' i sapi' di tondu' do nopuadan do gisom dot aayi' di tondu' do mamalapus i tutang dau. 4 Antaban diyolo' i tulun di mosikin do manganu dit apatut diyolo'd aanu, om mononsog iyolo' di tulun dit aiso' o konunu-nunuan do mogidu' om mongoi lisok. 5 Gowoi poddi, om sampanau-panau po i tulun do mosikin do hilo'd tana' do kowotuan dit otuu do mogihum do kaakan-akanan do miagal po di kaladai do lalang dit aiso' no o pogihuman do paakan di tanak diyolo'. 6 Morobu-robuat poddi iyolo' dot id tumo'd tulun do suwai; om mongungupu' do tua' dot anggur di tulun dot angaraat. 7 Aiso' no pakayan diyolo' om aiso' o kumut diyolo' do tontok do modop iyolo' do dongotuong. 8 Nga' noruyut po iyolo'd rasam dot asapou do hiri'd nuluhon, om mongoi po iyolo' susut do hiri'd pampang do mintulungung. 9 Ngoyon di tulun dot angaraat siliho'd turipon i tangaanak dit aiso' o molohing om onuon diyolo' i tangaanak di tulun do mosikin di nokopongutang dot id diyolo'. 10 Om i tulun do mosikin nga' sansagan nopo diyolo'd sumoliwan do mulong piya dot aiso' o pakayan, om mongoi nopo iyolo' pongomot do gandum do louson piya iyolo'. 11 Mamaga' i' iyolo' do tua' do saitun do maan do tumau, om mamaga' do tua' dot anggur do maan dot inumon, nga' iyolo' nopo om tuuhan i'. 12 Hilo' nopod bandar om korongou kou do tihad do tulun dit oinggorit, om tulun do nongosuhat nga' millohou do mokiubat, nga' a' id Kinorohingan pokinongohon o sambayang diyolo'. 13 Haro i' o tulun dot a' orohian do tanawau, a' iyolo' kosuhut ondung nunu i tanawau'ddi, om a' iyolo' sumusui di ralan di tanawau. 14 Tontok di dongkosuabon po om tumungag no om sumoliwan i gampamatai do mongoi pamatai di tulun do mosikin, om di dongotuong nga' mongoi po iyau panakau. 15 Tulun nopo do gampahu' om magandad nopo do kotuangan, om kuluputan dau o rabas dau om a' no iyau otutunan do tulun do suwai. 16 Tontok nopod dongotuong om mongoi iyau panakau om mamaraag iyau'd walai, nga' dangadau nopondo om mongoi iyau lisok tu' mada' i' dot oulinahan di tanawau. 17 Ooris iyau do tulinau do dangadau, nga' dongotuong nopo om aiso' i' o poddosi dau.
Sopar
18 Tulun nopo dot araat om orulun i' do luyud, om tana' di naanu dau nga' papalan id Kinorohingan, om a' nondo iyau morobuat do hiri'd kabun dot anggur dau. 19 Poingkuro nopo i salju do lumanak dot alanak di kolosuo' di dongmagadau, om alanak dot osidangan do tadau, om iyo no moti'ddi o tulun do kidusa do tumagak do hiti'd pomogunan tu' kumaa nondo do hilo'd pomogunan do tulun do napatai. 20 Aiso' nondo o tongosongulun piya do momusorou dau, dot iri piya i tina' dau, tu' tonggiluang po o mangakan do tinan dau, om miagal po iyau di kayu di nahaba'. 21 Nongosiliu pogi' o miagal diri nga' minonginggorit iyau do tondu' di nopuadan, om a' osianan do tongoondu' dit aiso' o tanak. 22 Kinorohingan nondo tu' kisinundu o mamatai do tulun dit ongosiou, om haro nopondo o wonsoyon do Kinorohingan, om aiso' nondo o pokukurayan di tulun di kidusa. 23 Nga' pologoson po doti' do Kinorohingan i tulun diri dot osimbayan do poimpasi, nga' toinuon i' ma kasai' do Kinorohingan i tulun diri. 24 Tulun nopo dot araat om oruhai do haro o kosimbayanan, om tumagak nondo iyau do gisom dot alaid, om okoring iyau do miagal di sakot dit aiso' o guna', om miagal do rawo do parai di kotuon. 25 Milo i' tuu do tulun do poboroson dot a' otopot iti? Milo i' tuu o tulun do pointalang kopio do tudut iti pinoboros ku?
Bildad
1-2 Kinorohingan nopo om osundu i' kopio, om apatut no dot oronok ngai' dau o tulun. Iyau no o poposimbayan do pomorintaan dau do hilo'd surga. 3 Isai o kointob do moloikat di nosiliu do susuhuon dau? Haro po o kinoiyonon dot a' oulinahan di tulinau do Kinorohingan? 4 Haro i' toi o tulun do milo do tumopot om lumidang dot id pagantangan do Kinorohingan? 5 Id pagantangan nopod Kinorohingan om ilo' piya tulan nga' a' i' atalang o tulinau, om ilo rombituon nga' a' i' anawau o tulinau. 6 Iyo nopoddi om okuro-kuro nogi' o tulun tu' iyo nod tonggiluang om kamang-kamang? Songkuro no o gatang do tulun dot id pagantangan do Kinorohingan?
I Ayub
1-2 Ondos nu daa om oilo kopio ko do monguhup doho' --- i tulun dot oluhoi om it aiso' ot agaagaasan! 3 Ondos nu daa om osonong i ponudukan om i nosihat di pinoboros nu dot id doho', i tulun do basug. 4 Isai po o tosorou nu do mokinongou do koinsanai di poboroson nu? Isai o mominsuhu' diya' do mimboros do miagal dino?
Bildad
5 Gagaran ngai' po i rusod di tulun di nangapatai do hilo'd waig dit id saalom diti tana'. 6 Om i pomogunan di nangapatai nga' songingukab i' dot id toguang do Kinorohingan, om aiso' no o kotirung-tirung diri dot id pagantangan do Kinorohingan. 7 Pinawalad do Kinorohingan ilo tawan do ponong id utara, om pinogiis do Kinorohingan o pomogunan do hilo'd mawo-dawo. 8 Kinorohingan i' o monuang dilo haun do waig do gisom do mabai-labai, nga' a' i' okinis ilo haun om a' oloput. 9 Lisokon dau ilo tulan do hilo'd tirung dilo haun. 10 Nurugan dau o hilo'd waig do rahat, do potongkiad do tanawau do mantad id totuong. 11 Tagadon nopo dau i torigi dilo tawan, om gumogor ngai' nopori om gumuyu' dot opopoddosian. 12 Iri no i sinundu dau o nakaala' dilo rahat, om iri koiloo' dau o nakapatai di Rahab. 13 Pinuhobo i' dau o papanawau dilo tawan, om longon dau o minamatai di naga' dit oruhai no daa do kopoggidu'. 14 Nga' iri ngai' nopoddi om tinatak-tatak nogi' di sinundu dau, iri nopo om pinokonos nogi' dot id tolingo toko'. Isai ma o koilo kopio do kogoyoo'd Kinorohingan?
I Ayub
1-2 Sumumpa' oku no dot id Kinorohingan, it Osundu Kopio, i Kinorohingan do poimpasi, it a' manahak dit otulid dot id doho', om i popotongob kopio do ginawo ku, 3 do daamot ku po dot onuan do Kinorohingan do pinuhobo, om damot po do kiginawo o tinan ku, 4 dot a' no momoros dot araat o kabang ku, om iti dila' ku nga' a' no mongudut. 5 A' oku i' momoros dot ongotopot kou; poboroson ku i' dot a' oku nakasala' do gisom do tikapatai ku. 6 A' oku i' tumingkod do momoros dot otopot oku; tu' osonong i' ot opurimanan do ginawo ku. 7 Maha' daa om hukuman ngai' i pisangod ku do miagal di tulun di poposiwot, om obobog i tulun dot araatan doho' do miagal di tulun dit araat. 8 Haro po toi o pagandasan do tulun dit aiso' o Kinorohingan, do tontok dot onuon kawagu'd Kinorohingan o ginawo diyolo'? 9 Orikot nopondo o maso do kosusaan, om olisiu po tuu o Kinorohingan do korongou di tihad diyolo'? 10 Apatut daa do norohian iyolo' di kataadan do tahakon do Kinorohingan, om kuminaparu' daa iyolo' do suminambayang dot id Kinorohingan. 11 Pologoso' oku bo do monuduk dokoyu do kogoyoo' do sinundu'd Kinorohingan, om popoilo di nosorou mantad do Kinorohingan do wonsoyon dau, iyau it Osundu Kopio. 12 Nga' a' piya, tu' nokokito ngai' i' o mato dokoyu; om nokuro tu' mimboros kou po dit aiso' o komoyon?
Sopar
13 Poingkaa no o kowoyo-woyoo' do Kinorohingan, it Osundu Kopio do momohukum ngai' di tulun dit orongit. 14 Ogumu' i' doti' daa o tanak diyolo'd kusai, nga' angapatai ngai' nopondo dot id pisangadan; om a' nopondo insan dot osukupan do takanon i tangaanak diyolo'. 15 Om iri no i poimpasi om angapatai do toruol, om iri piya i sawo diyolo' nga' a' no mogihad do tontok dot apatai i sawo diyolo'. 16 Iri nopo i tulun dot araat om kipirok doti' dot ogumu', om a' no ointob-intob, om pakayan nga' ogumu' po doti' ko' i koubasan do tulun do mamakai. 17 Nga' iri indo i tulun dit osonong o kapanampakai di pakayan diri, om i tulun dit otulid o ginawo o kaanu di pirok dau. 18 Walai nopod tulun dot araat om iyo no di walai'd korut, ko' iyo di kinuhub-kuhub do turipon di madtatamong do tumo. 19 Insan noo iyolo'd modop do miagal do tulun do kaya', om diri-diri noo, tu' oposik pondo iyolo' om natagak ngai' no o kakayaan diyolo'. 20 Iri no i koinggoritan om monigowo nopo do rumikot do miagal di lumpadang; om otilib iyolo' di tongus do dongotuong; 21 i tongus do mantad id koulayon o monilib diyolo' do mantad id walai diyolo'. 22 Ontokon nopo kopio iyolo' do monilib, om a' no insianan, do mogihum piya daa iyolo' dot intirungon. 23 Okohus po i tongus do koontok diyolo' do tontok di manangkus iyolo', monompurolosi diyolo' i tongus diri do mikuwo'd kinoris di karaag.
Mamarayou do Toilaan
1 Haro o piro-piro nukadan dot id pongukadan do pirok; om haro o tiyonon do ponompipian do tamas. 2 Ukadon do tulun o basi' do mantad id tana' om lanakon o tambaga' di mantad id watu. 3 Nohombo nod tulun i kinoiyonon dit otuong no kopio, nosorisid no diyolo' do mogintong o hiri'd tana' dit id saalom kopio. Hiri nod dotuong o pongukadan diyolo' do mogisuayan o watu. 4 Id sodu' do mantad id kinoiyonon do tulun, it a' insan koulakai do tulun, o pongukadan do tulun do luang dot aralom. Om hilo' no iyolo'd kumaraja' dot aiso' o torongou-rongou, do tumaid pod tali do hiri'd luang. 5 Taakanon nopo om sumuni i' do mantad hiri'd tana, nga' id saalom i' do tana'ddi dot ukadon ngai' om mumukon o koinsanai do nunu nopo. 6 Iri nopo watu di hiri'd tana' om kilugu' do watu di kitulinau dot otomou, om iri no pupuk om kirolot do tamas. 7 Aiso' i' o sikokondiu do kokito di ralan do kumaa do hiri'd luang di nukadan, om aiso' o kondiu do koumbal do mintulud do kasahau di luang. 8 Aiso' i' o singa ko' nunu nopo nintorusan dit orongit do nokoumbal do sumusui di ralan dit oingou do kumaa'd hiri. 9 Nukad do tulun i watu dit ongokodou no kopio, nukad diyolo' o nuluhon do gisom do hiri'd guas di nuluhon. 10 Tontok di minsangkap iyolo' do maan do wawayaan do hiri'd pogialatan di watu, om kokito no iyolo' do watu dit agayo o gatang. 11 Miningukad iyolo' do gisom do nokorikot do hiri'd tudan do bawang om kongokito noddi diyolo' i songillisok. 12 Nga' hinonggo o pogihuman do toilaan? Hinonggo toko' do minsingilo om kosuhut toko' i'? 13 Toilaan nopo om okon i' ko' id pogialatan do tulun o kokitanan; aiso' i' o tongosongulun piya do koilo do mamagatang kopio do toilaan. 14 Ilo nanad do rahat om i rahat dot agayo nga' minomoros i' do toilaan nopo om okon i' ko' hilo'. 15 Toilaan nopo om a' i' milo do bolion do pirok ko' tamas. 16 Tamas piya di nosompipi' om watu dit agayo gatang nga' a' i' koiyo do gatang do toilaan. 17 Gatang nopo do toilaan om agayo i' ko' gatang do tamas, om agayo ko' gatang do kakanan do tamas om kasa' dit olumis kopio. 18 Gatang nopo do toilaan om agayo po ko' gatang do karang dit aragang, om watu dit agayo o gatang dit oliting o kopurako', om mutiara'. 19 Iri piya watu dit agayo gatang dit osilou o kokitanan dit aiso' o rolot, om i tamas do nosompipi', nga' a' i' koiyo-iyo do gatang do toilaan. 20 Hinonggo o tadon do toilaan? Hinonggo o pokitudukan toko' om kosuhut toko' i'? 21 Aiso' i' o tiso' dit ongkipinuhobo do kokito do toilaan, iri piya tombolog di sontulud-tulud nga' a' i' kokito. 22 Kapatayon piya om karaagon nga' minomoros i' do susui-susui noo o diyolo'd norongou. 23 Kinorohingan noo o koilo do kinoiyonon do toilaan, iyau noo o koilo'd ralan do mongoi'd hilo'. 24 Tu' Kinorohingan nopo om kokito i' do hilo'd tisan do tana', om kokito do koinsanai di hiri'd siriba' do tawan. 25 Tontok di nonuan do Kinorohingan do sinundu i ribut om di tinantu' dau o wolit di waig do rahat; 26 Tontok di tinantu' do Kinorohingan o pasandatan dau do rasam, om i ralan do susuyon di kodumaat om tinggoron, 27 Om tontok no do maso'ddi do nokito dau o toilaan om noumbalan dau ondung songkuro no o gatang di toilaan, om kohubayaai noddi iyau'ddi. 28 Boros kad Kinorohingan dot id tulun, “Ralan nopo do kaanu'd toilaan, om mositi' no do rumonok do Kinorohingan. Orohian nopod kosuhut, om mositi' no do tumongkiad do mantad id karaaton,” ka.
Boros di Ayub di Kolimpupuson no do Pasal di Hal Dau
1 Om boro-boros po kawagu i Ayub.
Ayub
2 Koguli' po daa kawagu i koiyon-iyono' do koposi-posion ku do miagal di gompion oku pod Kinorohingan! 3 Tontok nopoddi om moyo-woyo' kasai' i' doho' o Kinorohingan, om onuan oku dau'd tulinau do tontok di tumalib oku dot otuong. 4 Tontok noddi dot osimbayan oku, tu' piombolutan dahai do Kinorohingan o mongintirung do walai ku. 5 Tontok nopoddi om mitanud-tanud po doho' o Kinorohingan, it Osundu Kopio, om tangaanak ku nga' posorili' ngai' po doho'. 6 I sapi' om i kambing ku nga' ogumu' po susu dot aanu ku, om i guas do saitun ku nga' ogumu' i' o tumau do tonomon piya dot id tana' di kowotuan. 7 Om soira' nopod haro pogibara-barasan di kongomolohingan do bandar, om di mongoi oku amung diyolo', 8 om mingisan nopo i tangaanakwagu do tontok di kokito iyolo' doho', om i komolohing-lohingan nga' mingkakat ngai' nopo do sumuwau doho'. 9 Om tumingkod ngai' nopo i boyoon di tulun do mogiboro-boros; 10 om iri piya tulun dit angasawat o pangkat nga' tumingkod nopo do mimboros. 11 Om pointikid-tikid di tulun di kokito ko' i korongou di winonsoi ku dit ongosonong, om mamarayou ngai' nopo om ongoimayaan di winonsoi ku. 12 Om soira' nopo do mokitulung i tulun do mosikin; om uhupan ku i' iyolo', om i tangaanak dit aiso' o molohing, nga' tulungon ku i'. 13 Iri piya tulun dit osusa' kopio nga' rumayou i' doho', om uhupan ngai' ku i' i tongoondu' do nongopuadan do gisom do kaanu iyolo' do kosimbayanan. 14 Otulid kasai' i' o wonsoyon ku om a' oku manampaping. 15 Iyoho' no o panakamato di tulun do bolou, om panakagakod di tulun do kakung. 16 Iyoho' no o panakatapa' di tulun do mosikin, om mogobi' di tulun do bansa'd suwai do tontok dot id suang iyolo'd kosusaan. 17 Nidu' ku i kuasa' do tulun dit ongorongit, om pinasi ku i tulun di tinangkap diyolo'. 18 Osorou ku nopo daa nga' anaru o surupu ku, om osonong o kapatai-patayo' ku dot id suang do walai ku. 19 Miagal oku po di guas do kayu dit orombung o ponuni-suni, it opiwoigan o gamut, om it opiyopos do bolobou o raan. 20 Oinsanan nopo o tulun do rumayou kasai' doho', om a' oku insan dot oluhoi. 21 Om soira' nopo do monosihat oku nga' tumingkod ngai' nopo o tulun do mimboros tu' mokinongou no kopio iyolo' di poboroson ku. 22 Om kopongo oku nopondo do mimboros, om aiso' no o boros do poruhangon diyolo' di boros ku; iri nopo boros ku om sumarabak nopo do miagal di tinuru' do rasam. 23 Ongotood ngai' nopo o tulun do rumamit do boros ku, miagal po di tulun do mongungumo do rumamit do rasam do tontok di maso do mogiompongusak o kayu. 24 Irakon ku i' iyolo' do tontok dit aiso' no o pokukurayan diyolo'; om iri po kosimbayanan dot id rabas ku o koodsuur diyolo'. 25 Iyoho' no o woyoon, om i mongilo kopio ondung nunu ot apatut do wonsoyon. Woyoon ku iyolo' do miagal do raja' di momoyo' di soudor dau, om iyoho' nogi' o monginsasamod diyolo' do tontok do tumongob iyolo'.
1 Nga' baino' noddi om tulun piya dit ongomulok po ko' iyoho' nga' monguntotori' i' doho'. Di nopo di gulu po om aiso' no kopio o guna' di tapa' diyolo' dot okito ku, gisom dot a' ku i' potumboyoon do moyo' di tasu ku do mongoi padtamong di dumba'. 2 Iyolo' nopo om aiso' no o guna' dot id doho' tu' adalaan no kopio iyolo' koluhoi do kumaraja' do nunu nopo i ponuhuan ku. 3 Mosikin no kopio iyolo' om louson, gowoi poddi om manapa' po iyolo'd gamut di nokoring do hilo'd tana' di kowotuan dit otuong om oingou. 4 Mongoi po iyolo' pingutus do sakot do hilo'd tana' do kowotuan, om kanon ngai' nopo diyolo' i roun om i gamut di sakot. 5 Gumara' ngai' nopo o tulun do popoggidu' diyolo', do miagal pod mamagarang iyolo'd tulun di manakau. 6 A' noddi milo dot a' iyolo' miyon dot id luang do watu, id suang do luang di pinoluang dot id kangkab do pampang. 7 Iyo po iyolo'd nintorusan do millahung do hilo'd talun, om id kobulungkutan o titimungon diyolo'. 8 Iyolo' no o sinompuruan do tulun dit aiso' kopio o guna'! Iyolo' no i nuyung do sumoliwan do mantad id pomogunan diyolo'. 9 Nga' baino' noddi om ruminikot iyolo' do mongoi pongirak-irak doho', om osiliu oku poddi do koirakan diyolo'. 10 Araa-raat oku noddi kopio om sosomu' dot osorou diyolo', om kopurimanan nopo diyolo' do tinan diyolo' nga' osonong no kopio, om pindulaan poddi diyolo' o rabas ku. 11 Tuminotos tomod diri iyolo' do mintogod do sumaap doho', tu' pinologos oku id Kinorohingan dot oluhoi om aiso' o pokukurayan. 12 Iri nopo tulun dot angaraat diri nga' rikot nopo do hiri'd dotoguangan ku do mongoi pongumang doho'; gisom do manangkus oku po dot opopoddosian. Noihum mantad no diyolo' o ralan do mangala' doho'. 13 Om antaban diyolo' o ralan ku do mogidu' om apatai oku i'. Iso' pod tulun nga' aiso' i' o mogodu diyolo' do tontok di mongoi iyolo' pongumang; 14 iyo po iyolo'd luyud do rumudsu' di tolig do pogintirungan ku. Ogumu' tomod iyolo' santanud do mongoi pongonsit doho'; 15 poimponu' oku poddi do kopoddosian. Iyo pod kohus do ribut i ngaran ku'd osonong do tuminagak; iyo pod haun di tumalib i kakayaan ku do tuminanus. 16 Baino' nopoddi om oruhai oku nod apatai; tu' a' i' nokoinggaan-gaan iti koinggoritan ku. 17 Tontok nopod dongotuong nga' oruol ngai' nopo o tulang ku; om a' nopo otingkod-tingkod o toruol ku. 18 Ginayat do Kinorohingan o hiri'd liou di rasuk ku, gisom do nakagasan oku di pakayan ku. 19 Om pataamo' oku noddi dau do hiri'd burutak; om miagal oku poddi do rinomos! 20 Lumohou oku diya', oi Kinorohingan, nga' a' ko i' sumimbar; om soira' nopod sumambayang oku nga' a' ko i' mokinongou. 21 Orongit ko noddi kopio dot id doho'; om oiyo-iyon nu no kopio o kinoris nu do monginggorit doho'. 22 Pologoson nu nopo i tongus do monilib doho'; om pindohuluyan oku poddi do tongus dit opuhod tomod. 23 Oilaan ku no do pokoyoon oku diya' dot id kapatayon, i kotimungon do koinsanai'd tulun. 24 Nokuro tu' saapon nu o tulun di nobungou, it aiso' no o milo do pokukurayan, suwai ko' mokiinsian po daa? 25 A' oku toi minihad do tuminonggoi di tulun do tumongob? Om a' oku toi nosianan di tulun di haro o kokurangan? 26 Morou-sorou oku no daa do haro o kosimbayanan om tanawau, nga' korikatai oku nogi' diti kosusaan om totuong. 27 Noponu' oku pod katangaban om toruo-ruol; muhang-ruhang nopo o koinggoritan ku do monikid tadau. 28 Mimpanau oku po dot id dotuong, tu' aiso' no o tulinau do tadau; mingkakat oku nopo dot id pogialatan do tulun dot ogumu' do mokitulung. 29 Boros ku nga' poimponu' pod katangaban o karangahan, miagal pod lahung do toni om tuni di tombolog dot unta. 30 Oitom poo o kulit ku, om iyo pod sorobon o tinan ku dot ouru'd sogiton. 31 Di nopo di gulu po om tuunion i' do rumamai ot opirongou ku, nga' baino' nopoddi om iri po i garang om tihad do tulun di mogihad ot orongou ku.
1 Nakabatos oku no do mikuwo'd sumpa', dot a' rumohian do kokito do sumandak. 2 Nunu toi o wonsoyon do Kinorohingan, it Osundu Kopio, dot id dati'? Poingkukuro iyau do sumuli' di wonsoyon do tulun? 3 Porikatan dau do kagangahan om karaagon i tulun di mingwonsoi do karaaton. 4 Oilaan ngai' i' do Kinorohingan o wonsoyon ku, okito ngai' i' dau o kalaang-laango' ku. 5 Sumumpa' oku no dot a' oku i' insan pomonsoi dot araat, om a' oku insan koumbal do monipu' do tulun do suwai. 6 Pologoson nopo o Kinorohingan do monimbang doho' dot id timbangan di koontok, om oilaan indod Kinorohingan dot aiso' o sala' ku. 7 Ondung nokotongkiad oku di ralan dot otopot, ko' nabayayat o ginawo ku dit araat, om ondung nososomu' do dusa o longon ku, 8 om pologoson nopo dot araag ngai' i tanom-tanom ku, om pologoson o tulun do suwai do mangakan di tua' do tanom-tanom ku. 9 Ondung nokoumbal oku do rumohian di sawo do songkoduwo ku, om luminisok oku do magandad do hiri'd soliwan di wawayaan do walai dau, 10 om posimboyonon nopo i sawo ku do mogonsok do taakanon do kusai'd suwai, om modop dot id toodopon do kusai'd kusai. 11 Ondung nokowonsoi oku'd dusa do miagal diri, om apatut i' do hukuman oku. 12 Dusa nopo do miagal diri om iyo pod tapui do naraka do monorob do koinsanai di doho'd songonuon. 13 Ondung haro o songulun dot id pogialatan di susuhuon ku do haro o poboroson dot id doho', tu' haro o poguhangan dau doho' om pokinongohon ku i' iyau om wonsoyon ku it otulid dot id dau. 14 Ondung a' ku wonsoyon o miagal diri, om poingkukuro oku daa'ndo do tumoguang do Kinorohingan? Nunu daa'ndo o posimbaron ku do rumikot o Kinorohingan do mongoi pomutus doho'? 15 Kinorohingan i' o minomonsoi doho', om iyau nogi' o minomonsoi di susuhuon ku. 16 A' oku i' insan dot a' koponulung di tulun do mosikin, om a' oku insan do popologos tomod di tongoondu' do nopuadan dot aiso' o pokukurayan, 17 ko' popologos tomod po di tangaanak dot aiso' o molohing do pomolouson do maso ku iyoho' do haro taakanon. 18 Ginompi' ku i' iyolo' do mantad dit okoro' po iyolo'; om tinulung ku iyolo' do solinaid ku do poimpasi. 19 Soira' nopo do kosolowot oku'd tulun dit aiso' o konunu-nunuan, om adalaan no kopio komosikino' gisom dot a' i' koboli do pakayan, 20 om onuan ku i' iyolo' do rasuk di winonsoi do mantad id hulu do dumba' ku. Om royohon oku nondo diyolo' do mikuwo'd aayi-ayi' o ginawo diyolo'. 21 Ondung nokoumbal oku do magakal di tanak dot aiso' o molohing, tu' oilaan ku no dot iyoho' o kamanang dot id pibisaraan, 22 om pologoson nopo do tipuon o longon ku, om giiyon nopo do mantad id lihawa ku. 23 Nga' moddosi oku i' do hukuman do Kinorohingan, om a' oku i' katama' do momonsoi do miagal diri. 24 A' oku i' insan pogondos do kakayaan, 25 ko' mokirayou-rayou po di dapu' ku. 26 A' oku i' insan tuku' dilo tadau dot anawau piya daa o tinitiu dilo tadau, om a' oku insan tuku' dot id tulan dot olumis piya daa ilo tulan. 27 A' oku i' insan kabayayat do momusou'ddi, ko' minonungub pod palad ku do maan do pomusou'ddi. 28 Dusa nopo do miagal diri om apatut no do kapatayon o pomohukum; tu' iyo nopoddi om mogolim nod Kinorohingan, it Osundu Kopio. 29 A' oku i' insan kotood do tontok dit oinggorit o pisangod ku, ko' ooropod po do tontok do koumbal iyolo' dot oontok do kosusaan. 30 A' oku i' insan kowonsoi'd dusa dot i sumambayang do mokipatai diyolo' o kowonsoi-wonsoi ku'd dusa. 31 Koinsanai di tulun do mororobuat do hilo'd doho' nga' koilo i' do papasalakoi kasai' oku'd tulun dit a' ku piya otutunan. 32 Tulun dit id tanga'd tindalanon diyolo' nga' pinasalakoi ku i' do hiri'd walai ku, om a' oku i' insan do popologos tomod diyolo' do modop do hiri'd soliwan. 33 Tulun nopod suwai om mumbal daa do popolisok do dusa, nga' iyoho' nopo om a' oku i' insan do popolisok do dusa ku. 34 A' oku i' insan poddosi do pimboroson do tulun; om a' oku insan dot a' minungkomi ko' minonginduwalai po dot ooris di pongindaraat diyolo' doho'. 35 Aiso' no tuu kopio o mokinongou diti poboroson ku? Sumumpa' oku no do koinsanai diti boros ku nga' ongotopot i'. Simbaron oku po daa do Kinorohingan, it Osundu Kopio. Ondung nongotulis ngai' i ponondos doho' di pisangod ku gisom dot okito ku iri, 36 om oondos oku i' do pokulabai'ddi dot id lihawa ku om tupion ku do maan do ponokotupi' di don raja'. 37 Posunudon ngai' ku indod Kinorohingan i nongowonsoi ku, om humangog oku dot id toguang dau do mikuwo'd otood o ginawo ku. 38 Ondung sinolod ku i tana' di pinongumaan ku baino', om nanu ku nori do mantad id sanganu kopio di tana', 39 om ondung naakan ku i tua' di suminuni do hiri'd tana'ddi, om pinologos ku nogi' i mororobuat di minananom diri do louson, 40 om pologoson nopo o sakot om rugi do sumuni do hilo'd tumo, do sumowoli di gandum om barli. Iti no o pinongolimpupus di Ayub di boros dau.
Boros di Ilihu
1 Oilaan no kopio di Ayub dot aiso' o sala' dau, gisom dot a' noddi suminimbar dau i tolu o tambalut dau. 2 Nga' haro o songulun do poingkakat do hiri, dot i Ilihu o ngaran, dot a' no kopusus do ginawo dau dot atatagadan, tu' pokotopot i' i Ayub do tinan dau om papasala' nogi' do Kinorohingan. I Ilihu nopo om tanak di Barakil, om sinakagon di Bus, i mantad id pinuruan do sompiiyon di Ram. 3 Om otogod nogi' iyau di tolu o tambalut di Ayub, tu' a' i' iyolo' nokosimbar di Ayub, gowoi poddi om iyo pod Kinorohingan o nakasala'. 4 I Ilihu no ot omulok kopio do hiri, om andado' poddi dau do gisom do notingkod ngai' iyolo' do mimboros. 5 Nga' soira' di nokito dau dot a' kosimbar di Ayub i tolu o tulun diri, om kotogod no iyau, 6 om timpuun no iyau do minoro-boros do poingkaa,
Ilihu
Iyoho' nopo om omulok po, om iyokoyu no om molohing no, om iri no kopoddosian ku do popoboros dot id dokoyu di doho' dot osorou. 7 Osorou ku nopo daa om iyokoyu no ot osorupai do moro-boros, om iri daa it id dotuo ot oluda' do momiduwo do toilaan. 8 Nga' iri i Rusod do Kinorohingan, it Osundu Kopio o manahak do tulun do toilaan. 9 Okon i' ko' i kotuoho' do tumur o poposiliu'd tulun, do tulun di kitoilaan, ko' monguhup po diyolo' do mongilo dit ongotopot. 10 Iyo nopoddi, om pokinongou kou no doho', pologoso' oku no do poposunud diti doho' dot osorou. 11 Pokinongou oku nopo do tontok di minoro-boros kou, om andad oku nopo di daamot dokoyu do minogihum do boros di haro o komoyon. 12 Pinokinongou ku i' kopio, om korongou ku noddi do naala' kou; a' kou i' minilo do pinopointalang do kasalaan di boros di Ayub. 13 Poingkukuro kou do momoros do nakaanu kou'd toilaan? Kinorohingan no o sumimbar di Ayub, tu' naala' kou i'. 14 Iyokoyu daa o binarasan di Ayub, om okon i' ko' iyoho', nga' doho' nopod ponimbar om a' i' iyo di dokoyu do pinonimbar. 15 A' i' iyolo' milo'd suminimbar, oi Ayub, tu' aiso' no o milo diyolo'd poboroson. 16 Mandad oku po tuu daa do nokotingkod iyolo'd moro-boros? Poingkakat tomod po iyolo'd hilo' tu' aiso' no o milo diyolo'd poboroson. 17 Amu', poboroson ku i' iti doho' do ponimbar, om sunudan tiya' di doho' dot osorou. 18 A' oku no kaandad-andad do sipoboros, a' ku no milo do pususon iti poboroson ku. 19 Ondung a' oku iyoho' koboro-boros, om oloput oku no, do miagal di kantung do kulit di kisuang do waig dot anggur di wagu po. 20 Moro-boros oku no kopio, om osimbayan i' o ginawo ku. 21 A' oku i' momogibang-gibang dot isai nopo dot id suang diti pisimbar-simbaran, om a' oku nogi' mamarayou dot isai-isai. 22 Om a' oku nogi' koilo do mamarayou-rayou, tu' ondung mamarayou-rayou oku, om pologoson nopo o Kinorohingan do momohukum doho' dot oruhai.
1 Pokinongohon no kopio o koinsanai diti poboroson ku do dinondo, oi Ayub. 2 Posodia' oku no do popoboros dit id suang mantad do pomusarahan ku. 3 Otulid i' o ginawo ku do moro-boros, om iri it ongotopot o poboroson ku. 4 Rusod id Kinorohingan o minomonsoi doho', om i minanahak doho' do pinuhobo. 5 Simbaro' nopo iti poboroson ku, do kosimbar ko no. Uludo' mantad nopo o posimbaron nu. 6 Miagal to nopo dot okito'd Kinorohingan, oi Ayub, tu' winonsoi to i' do mantad id tana'. 7 Om a' i' minog do moddosi doho'; tu' a' oku i' mangala' diya'. 8 Poingkaa o norongou ku do pinoboros nu, 9 “Iyoho' nopo om aiso' i' o sala'. Om a' oku nokowonsoi do nunu nopo it araat. Aiso' i' o sala' ku om aiso' o dusa ku. 10 Nga' Kinorohingan nogi' o minogihum do pounayan do sumaap doho', om iyoon oku poddi dau do pisangod dau. 11 Kinagasan dau do rantai o gakod ku; om pitoinuan dau o nunu nopo o wonsoyon ku,” ka nu. 12 Nga' kasala' i' i boros nu, oi Ayub. Tu' Kinorohingan nopo om osundu i' ko' mantad do tulun. 13 Nokuro tu' monondos ko'd Kinorohingan, dot a' mamadul di boros do tulun do moguhang? 14 Mulong piya do mogisuayan nopo o ralan do Kinorohingan do moro-boros, nga' aiso' i' o tongoiso' piya'd tulun do mokinongou kopio di poboroson dau. 15 Tontok nopo dot oolong do modop o tulun do dongotuong, om moro-boros i' o Kinorohingan dot id suang do nipi om pinointalang. 16 Porongohon i' iyolo'd Kinorohingan do boros dau, om moddosi iyolo' di boros dau do popoinsan. 17 Moro-boros pogi' o Kinorohingan nga' poningkod dau diyolo' do momonsoi'd dusa, om a' i' iyolo' minggayo-gayo. 18 A' i' dau iyolo' pologoson dot araag, poiduwon i' dau iyolo' do mantad id kapatayon. 19 Pomurologo nopod Kinorohingan do tulun om toruol, om oruol indo o topurimanan do tinan diyolo'. 20 Tulun nopo di kitoruol om a' no siakan do taakanon, iri piya i taakanon dit angawasiu, nga' siilob i' iyau do kokito. 21 Gumahui tomod nondo o tinan dau; om atalang ngai' o tulang dau. 22 Om oruhai no iyau'd mongoi do hilo'd pomogunan do tulun do napatai. 23 Haro i' doti' ot ongoiso' di rinibuan do moloikat do Kinorohingan, do mongoi ponulung dau, i moloikat di popohondom do tulun do buruon diyolo'. 24 Moro-boros nondo i moloikat do mikuwo'd osianan dau, do poingkaa, “Poiduwo' iyau! A' i' iyau koongoi do hilo'd pomogunan do tulun do nangapatai. Diya o tusin do pamajamin do popoidu' dau,” ka. 25 Tinan nopondo dau om sumiliu do miagal dit omulok po om okoris nondo kawagu. 26 Om Kinorohingan nga' sumimbar indo do tontok di sumambayang iyau, tumuku' indo iyau dot id Kinorohingan do mikuwo'd otood o ginawo dau; om pogulion indod Kinorohingan o koiyon-iyono' do koposi-posion dau do miagal di gulu po. 27 Moro-boros nondo i tulun dot id toguang do tulun dot ogumu' do poingkaa, “Nokowonsoi oku nod dusa. Om nokowonsoi oku no daa'd sala', nga' pinoidu' oku iddi do Kinorohingan. 28 A' oku i' dau pinologos do nokoongoi do hilo'd pomogunan do tulun do nangapatai, om poimpasi oku poddi,” ka. 29 Piguli'-guli' nopod Kinorohingan do momonsoi o miagal diri; 30 posion id Kinorohingan o tulun, om onuan dau do kosimbayanan do poimpasi. 31 Pokinongou no diti poboroson ku do dinondo, oi Ayub, kada' no iya' pimboros om pologoso' oku nopo do moro-boros. 32 Nga' ondung haro o korohian nu'd poboros, om porongoho' oku no; om agaan i' o ginawo ku do mangakun dot otopot ko. 33 Nga' ondung amu', om kada' kohiyo om pokinongou no do boros ku, om otudukan ku i' iya' do ralan do sumiliu do tulun di kitoilaan.
1-2 Iyokoyu no it ongkitoilaan, om ongopintar, pokinongou kou no diti poboroson ku. 3 Oilaan i' do tulun i taakanon dit awasiu dot oumbalan diyolo'; om oilaan i boros do haro o komoyon do tontok dot orongou diyolo' iri. 4 Mositi' no do sorisidon toko' o hal diti, om salasayon toko' nogindo. 5 Okunon i' di Ayub dot aiso' o sala' dau, om boroson dau dot a' otulid o Kinorohingan dot id dau. 6 Minonguhot iyau do poingkaa, “Poingkukuro oku do mongudut do momoros dot aiso' o dusa ku? Nadalaan oku no do noinggorit, nga' a' oku i' nokowonsoi'd dusa,” ka dau. 7 Nokoumbal kou toi do nokokito'd tulun do miagal kopio di Ayub? Iyau no kopio ot a' insan pomusou do Kinorohingan. 8 Orohian iyau do mambalut di tulun dot angaraat, om monokirolot-rolot iyau di tulun do kidusa. 9 Mimboros iyau dot aiso' i' o koonong-onongon dau do tumanud piya iyau do korohian do Kinorohingan. 10 Pokinongou kou no doho', iyokoyu it ongkosuhut! Momonsoi tuu o Kinorohingan, it Osundu Kopio di kasala'? 11 Somulian i' dau o tulun do miontok di winonsoi diyolo', om wonsoyon dau dot id diyolo' o miontok di kowoyo-woyoon diyolo'. 12 Kinorohingan nopo it Osundu Kopio om a' i' kopio momonsoi dit araat; om a' i' kopio iyau insan do momonsoi dit a' otulid dot id disai nopo. 13 Mantad toi dot id disai o kinoonuan do Kinorohingan di sinundu dau? Haro toi o minanahak dau do karaja' do mongigit diti pomogunan? 14 Ondung onuon kawagu do Kinorohingan o pinuhobo'd tulun, 15 om oinsanan nopo i songimpasi dot angapatai om osiliu kawagu'd pupuk. 16 Pokinongou kou no doho', do kitoilaan kou no! 17 Pasalaon nu daa o Kinorohingan dit otopot? Ondos nu daa om araatan o Kinorohingan dit otulid? 18 Hukuman id Kinorohingan o raja' om pomorinta', do tontok dot araat om aiso' o koonong-onongon do wonsoyon diyolo'. 19 Kinorohingan i' o minomonsoi do pointikid-tikid do tulun; a' i' dau obian o pomorinta, ko' pusohon po i tulun do kaharaan do mantad ko' i tulun do rumutum. 20 Haro i' o tulun do sigog i' dot apatai do dongotuong. Hukuman iyolo'd Kinorohingan gisom dot apatai iyolo', a' i' iyau apagon do mamatai di gunsiou. 21 Piantangan i' dau o koposi-posion do tulun, om okito dau o koinsanai do kalaang-laango'd tulun. 22 Aiso' i' o totuong di dondom piya kopio do kotirung do tulun di kidusa dot id Kinorohingan. 23 A' i' o Kinorohingan minog do manantu' do maso, do kaangayan do tulun kopokibutusai dau. 24 A' no o Kinorohingan minog do minguhot do monorisid, do mongidu' do boyoon om moningolon diyolo'd tulun do suwai. 25 Tu' noilaan i' dau o wonsoyon diyolo', om iduwon nopondo dau iyolo' om patayon dau iyolo' do tontok do dongotuong. 26 Hukuman ngai' dau dot id toguang di tulun dot ogumu', i tulun di kidusa, 27 tu' nokotingkod no iyolo' do tumanud dau; om a' diyolo' pinadul i pinonuhuan dau. 28 Iyolo' no o nokobungou di tulun do mosikin do minglohou do Kinorohingan, om norongou i' do Kinorohingan i lolohou di tulun do mosikin diri do mokitulung dau. 29 Ondung poboroson do Kinorohingan dot aiso' o wonsoyon dau, om aiso' i' o katama' do mongindaraat dau. Ondung lisokon do Kinorohingan o rabas dau, om aiso' no o kokito dau. 30 Aiso' no o milo'd wonsoyon di piro-piro o bansa'd tulun do mangantob dit ongorongit do momorinta' diyolo'. 31 Ayub, naakun nu no dot id Kinorohingan i dusa nu, om nakabatos ko no dot a' ko momonsoi kawagu'd dusa? 32 Nopokianu nu no do Kinorohingan do popointutun diya' di kasalaan nu, om nokotumboyo' ko no dot a' ko kawagu momonsoi dot araat? 33 Patahakon tuu daa giya'd Kinorohingan i pokionuon nu dot iya' nga' a' i' orohian di wonsoyon dau? Iya' i' o poboros ondung nunu ot osorou nu, om okon i' ko' iyoho'; poboroso' nopo ot osorou nu! 34 Pointikid-tikid do tulun dit oilo om kosokodung i'; om iri tulun dit opintar do korongou di poboroson ku nga' moro-boros i' 35 do mimboros nopo i Ayub, om a' i' iyau kosuhut di poboroson dau, om aiso' i' o komoyon di boros di Ayub; 36 Sorisidon nopo kopio i pinoboros di Ayub, nga' oilaan i' moti', do koboro-boroso' nopo dau om miagal do koboro-boroso' do tulun dit araat. 37 Ruhangan po dau do kososongkiwal i dusa dau; indaraaton nopo dau o Kinorohingan dot id toguang diyolo'.
1-2 Kasala' ko id momoros do miagal dino, oi Ayub, tu' pokotopot ko do tinan nu dot id pagantangan do Kinorohingan, 3 om kasala' ko do monguhot do Kinorohingan do poingkaa, “Nunu o kohompi-hompit nu di dusa ku? Aiso' i' o kinountungan ku dot a' oku piya momonsoi'd dusa,” ka nu. 4 Iyoho' no o monimbar diya' om monimbar di tambalut ngai' nu. 5 Tingaha' pogi' dilo tawan! Antangai no ondung songkuro o kasawato' dilo haun! 6 Ondung momonsoi ko'd dusa, om a' i' pokoruol do Kinorohingan iri. Ondung ogumu' o kasalaan nu, om a' i' o Kinorohingan orolihan. 7 Ondung momonsoi ko'd osonong om kouhup ko no tuu daa do Kinorohingan? Aiso' i' o pokionuon do Kinorohingan do mantad id diya'. 8 Iyokoyu no sompi' ko' tulun ot oinggorit di dusa nu, om iyolo' nogi' ot oinsanangan di kosonongon nu. 9 Soira' nopo dot ulak-ulakan o tulun om minggiak nondo iyolo'; om minglohou iyolo' do mokitulung. 10 Nga' a' nogi' iyolo' momolohou'd Kinorohingan, tu' minomonsoi diyolo', i manahak diyolo'd pagandasan do tontok di tumongob iyolo'. 11 A' iyolo' rumikot dot id Kinorohingan, i manahak dati' do toilaan, i toilaan dit aralom ko' toilaan do nintorusan om tombolog. 12 Mihad po daa iyolo' do mokitulung, nga' a' i' o Kinorohingan sumimbar, tu' ongoondos iyolo' om angaraat. 13 Aiso' i' o guna' diyolo' do minglohou; tu' a' nod Kinorohingan dit Osundu Kopio antangan iyolo' om a' dau iyolo' pokinongohon. 14 Ayub, boros ka nu om a' ko kokito do Kinorohingan, nga' kalanut no ginawo do magandad tu' nokorikot no dot id dau i hal nu. 15 Ondos nu nopo daa om a' o Kinorohingan momohukum, om pagaan-gaanon dau o dusa. 16 Aiso' no guna' nu do mimboros dot a' otingkod-tingkod, tu' atalang no dot iya' piya nga' a' i' koilo ondung nunu o komoyon dino poboroson nu.
1-2 Andad-andado' po om mokinongou po dot ongoruhai diti poboroson ku do mantad id Kinorohingan. 3 Ogumu' i' o toilaan ku; om iri no o pakayon ku do popointalang do Kinorohingan nopo, i minomonsoi doho' om otulid i'. 4 Aiso' i' moti' kopio o tudut di nokoboros ku diya'; iri i' i tulun dit oilo kopio o potimbaba' diya'. 5 Kinorohingan nopo om okoris kopio! Om aiso' i' ot ada-daan dau; om aiso' i' ot a' dau osuhutan. 6 A' i' dau pologoson dot alaid do poimpasi i tulun do kidusa. Om otulid kasai' i' o wonsoyon dau dot id tulun dit oinggorit. 7 Intirungan i' dau i tulun dot otulid o ginawo; om pologoson dau iyolo' do momorinta' do miagal do raja', om pologoson dau iyolo' do suahon do gisom dot alaid. 8 Nga' ondung kagasan o tulun do rantai do basi', om oinggorit do nobungou di winonsoi diyolo', 9 om popoilo no o Kinorohingan di karaaton om i koondos diyolo' dot id diyolo'. 10 Sinuhu' dau iyolo' do mokinongou di boros dau di popoinsan diyolo' om mokinongou di boros dau di monuhu' do tumongkiad di karaaton diyolo'. 11 Ondung tumanud iyolo'd boros do Kinorohingan om momonsoi di korohian dau, om osimbayan no iyolo' do poimpasi om kumaya' do solinaid diyolo' do poimpasi. 12 Nga' ondung a' iyolo' mokinongou, om matai no iyolo' do tontok dit aiso' po o toila-ilaan diyolo'. 13 Tulun nopo dit aiso' o Kinorohingan om poopi' do katagadan, om ohukuman piya iyolo'd Tuhan nga' a' i' iyolo' sumambayang do mokiuhup. 14 Omulok po om apatai no iyolo', tu' poimponu' po do kointingayaman o koposi-posion diyolo'. 15 Ponuduk nopod Kinorohingan do tulun om koinggoritan, om kosusaan o popopuriman dau diyolo'. 16 Kinorohingan i' o pinapalabus diya' do mantad id kosusaan, om pinopopuriman diya' do kosimbayanan; mija' nu nga' nopudsuan do taakanon. 17 Nga' baino' noddi om hinukuman ko do miontok di karaato' nu. 18 Antaan-taan no, kada' pologoso' i tusin do ponisip do monipu' diya', om kada' pologoso' o kakayaan do mamalid diya'. 19 Aiso' i' o guna' nu do mihad do mokiuhup; oinsanan piya o kinoris nu nga' a' i' milo do monguhup diya' do baino'. 20 Kada' korohiai do rumikot o totuong, i maso' dot angapatai ngai' o bansa'. 21 Antaan-taan no, kada' toguang dot id karaaton; tu' kinoporikatan nopo diti koinggoritan dot id diya' om potongkiad diya' do mantad id karaaton. 22 Hondomo' no o kogoyoo' do sinundu do Kinorohingan; Kinorohingan no o gomponuduk dit aiso' o koiyo. 23 Aiso' i' o tongosongulun piya do milo do momisunud do Kinorohingan ondung nunu ot osonong do wonsoyon dau ko' milo po do monondos dau do minomonsoi iyau dot araat. 24 Pingroyohon kasai' i' iyau dot i winonsoi dau o kapamarayahan; om iya' nga' apatut i' do mamarayou dau. 25 Nokokito ngai' i' o tulun di winonsoi dau; nga' aiso' i' o songulun piya do kosuhut ngai'ddi. 26 A' toko' i' osuhutan ngai' o kagayaan do Kinorohingan, om a' toko' ointob ondung songkuro o ginumu' do toun do tumur dau. 27 Kinorohingan i' o manganu do waig do mantad hiti'd tana' om poposimban diri do sumiliu'd tinuru' do rasam. 28 Pologoson dau o rasam do tumuru' do mantad id haun, do parasamon dau dot id toinsanan o tulun. 29 Aiso' i' o songulun do koilo ondung poingkukuro ilo haun do mundaliu; om ondung poingkukuro i tinggoron do moningkohud do hilo'd tawan, i tiyonon do Kinorohingan. 30 Nulinahan dau do kodumaat o pointongkop dilo tawan; nga' id saalom nopod rahat om otuong i' kasai'. 31 Iti no o karalan-ralano' dau do papaakan do tulun dot ogumu' om manahak do taakanon dit a' aayi-ayi'. 32 Pususon nopo dau do longon dau i kodumaat, om suhuon nogindo do tumodsok do hiri'd natantu' mantad do todsokon. 33 Tinggoron nopo om momisunud do rumikot o tongus dot opuhod, om i sapi' nga' koilo i' do korikatan di tongus.
1 Iri tongus dot opuhod o popogogor do ginawo ku. 2 Pokinongou ngai' kou no do boros do Kinorohingan, om i tinggoron di sumoliwan do mantad id kabang dau. 3 Padarapason dau do tawan i kodumaat dau, do mantad hilo'd tisan do tana' om kumaa ponong hilo'd sampaping. 4 Om korongou noddi i garom do boros dau, om solinaid nopoddi nga' a' no tumingkod-tingkod i kodumaat do mingkalab. 5 Koboros nopo o Kinorohingan do monuhu' nga' osiliu no o kopusahan kopio, i kongoimayaan dit a' toko' osuhutan. 6 Suhuon dau i salju do sumondot do hiti'd tana', om porikot iyau do rasam dit asapou do momoyopos diti tana'. 7 Tingkodon dau o karaja'd tulun; om pointalangon dau dot id diyolo' dot iyau o kumaraja'. 8 Muli' ngai' nopo i nintorusan dot id luang diyolo'. 9 Mantad hilo'd salatan i tongus dot opuhod, om mantad hilo'd utara i ribut dit osogit kopio. 10 Oobusan nopod pinuhobo do Kinorohingan om kumodou nopo i waig, om sumiliu dot ais dit okodou. 11 Kumalab nopo o kodumaat do mantad hilo'd tawan, 12 do tontok do mundaliu do tumanud di korohian do Kinorohingan. Wonsoyon ngai' nopo diyolo' o ponuhuan do Kinorohingan do hinonggo nopo do pointongkop diti pomogunan. 13 Porikoton do Kinorohingan o rasam do pomoyopos diti tana'; om koumbal i' do porikoton dau o rasam do pomohukum do tulun, om popointalang nogi' dot id diyolo' do kogoyoo' do kosianan dau dit a' sumimban do gisom dot alaid. 14 Undorong po dot oruhai, om pokinongou po, oi Ayub; soroho' po kopio i kongoimayaan do winonsoi'd Kinorohingan. 15 Koilo ko i' ondung poingkukuro o Kinorohingan do minomisunud om minonuhu' di kodumaat do kumalab do mantad hilo'd tawan? 16 Koilo ko i' ondung poingkuro ilo haun do mamanau do hilo'd mawo-dawo, i kosuulo' do toilaan do Kinorohingan di kosuayan kopio? 17 Amu', milo ko no do mingodoi dot ololosuan, dot awayaan iti tana' di tongus do mantad id salatan. 18 Milo ko i' do muhup do Kinorohingan do papawalad dilo tawan om poposiliu dilo tawan do miagal di tambaga' do tinantan tu' okodou? 19 Tudukai no iyahai dit apatut do poboroson dot id Kinorohingan; tu' natagakan no iyahai do pomusorou; om aiso' no o poboroson dahai. 20 A' oku i' mokianu'd maso do moro-boros do Kinorohingan, nokuro daa tu' pologoson ku iyau do kipaantakan do mamaraag do tinan ku? 21 Dinondo noddi om kosorong tomod o tulinau dilo tawan, gisom dot opondou toko'; om ilo tawan nga' alangga' poo do nawayaan do ribut. 22 Haro o tulinau do miagal do tamas o kokitanan do hilo'd utara, om oimayaan toko' po di kagayaan do Kinorohingan. 23 Osundu no kopio o Kinorohingan toko' gisom dot a' toko' no milo do minsomok dau; otopot i' om otulid o wonsoyon dau dot id tulun. 24 Om apatut no do pusohon iyau dot isai nopo o tulun, nga' iri nopo tulun di mangakun do kitoilaan om a' i' dau podulon.
Sinimbar do Tuhan i boros di Ayub
1 Om boro-boros noddi o Tuhan do mantad hiri'd tongus dit opuhod do poingkaa: 2 Isai ko, tu' surilogon nu o toilaan ku dot i boros do dongkababasug om it aiso' o komoyon do ponurilog nu? 3 Ingkakat no do dinondo do miagal do songulun o kusai, om simbaron i' iti poguhatan ku diya'. 4 Hino ko no toi di tinaru' ku i' iti pomogunan? Ondung ogumu' kopio o toilaan nu, om simbaro' nori! 5 Isai o pinapatantu' do kalaabo' diti pomogunan? Isai o minonipong diti pomogunan? Koilo ko i' do ponimbar ngai'ddi? 6 Nunu o kogirot di torigi do papapanggor diti pomogunan? Isai o pinopoiliu di watu do pinoimpahan diti pomogunan? 7 Tontok nopod kosuabon do tadau'ddi om mogioompot nopo i rombituon do modsinding, om mimpangkis ngai' dot atataadan i susuhuon do Kinorohingan di hilo'd surga 8 Isai o minonompon di wawayaan do mangantob di waig do rahat do tontok di luminabus iri do mantad id saalom do tana'? 9 Iyoho' i' o minonokop dilo rahat do haun om minonguluput diri do totuong. 10 Iyoho' nogi' o minomonsoi do wolit dilo rahat om nantaban ku do totobon di kisalampad. 11 Om sinunudan ku i rahat do poingkaa, “Gisom nod hiti! Kada' no tolibai! Gisom nopod hiti o ruab do tumbak nu dit ologod,” kangku. 12 Ayub, nokoumbal ko toi do minonuhu' do kosuabon do rumikot do solinaid nu do poimpasi? 13 Nokoumbal ko toi do monuhu' di kosuabon do mongonggom diti tana' om monginggog di tulun dot angaraat do mantad hiri'd linisok diyolo'? 14 Tanawau no o popointalang do nuluhon om kubong, do gisom dot atalang no kopio dot iyo po di lupi do kain om iyo di saap dot id tana'. 15 Tulinau nopo di tanawau om anawau no kopio dot id tulun dot araat, om iri no i mangantob diyolo' do mingwonsoi dit araat. 16 Nokoongoi ko no do hilo'd tudan do rahat, do hilo'd saalom do rahat? Nokopimpanau ko no do hilo'd nanad do rahat? 17 Haro toi o tulun do nokoumbal do nokoponuduk diya' do wawayaan di madtamong do pomogunan di nangapatai? 18 Koilo ko no do kogoyoo' diti pomogunan? Simbaro' nori, do koilo ko no. 19 Koilo ko i' ondung hinonggo o tadon do tanawau, ko' tadon po do totuong? 20 Milo ko i' do monuduk ondung songkuro sinodu' do tongoyon do tanawau om totuong, ko' popoguli' po kawagu'ddi? 21 Atantu' no do milo ko i', tu' molohing ko no, om hino ko no di wonsoyo' i' iti pomogunan! 22 Nokoongoi ko no do hilo'd poopian, i pinotimungan ku do salju om karambatu? 23 Nokosodia' ku nori do maan do tontok do koinggoritan, om tontok do misaap om misangod. 24 Nokoongoi ko no do hilo'd koulayon do tadau, om hilo'd tadon di ribut do koulayon do tumongus? 25 Isai o minomoliang do luyungon di rasam dot asapou, om minamalangga' do ralan di tinggoron om kodumaat? 26 Isai o pinoposondot do rasam do hilo'd kinoiyonon dit aiso' o tulun do poingiyon? 27 Isai o minomoyopos di tana' dit otuu om okodou, om sunian indo do sakot? 28 Kitapa' toi i rasam om i bolobou? 29 Isai o tina' dit ais om i bolobou do kumodou, 30 i poposiliu do waig do miagal do watu om popokodou dilo waig do rahat? 31 Milo ko i' do popogiaamung di rombituon di roitan do Walatik, om milo ko i' do mongurias di rombituon di roitan do Muru-Puru? 32 Milo ko i' do momoyo' dilo rombituon do monikid do kowolihon do maso, om potunud di rombituon dit agayo om Rombituon dit okoro' di roitan do Soguanggo'? 33 Koilo ko i' dit oturan di mongulud do hilo'd tawan, om koilo ko i' do poontok diri do hiti'd pomogunan? 34 Milo ko i' do minggarang do moro-boros dilo haun, do monuhu' do popolintuhun do rasam do pomodsu' diya'? 35 Om ondung suhuon nu i tungkilap do kumalab, om rumikot i' tuu iri dot id diya' om moro-boros do, “Tumanud i' iyahai dot isuhu' nu,” ka? 36 Isai o momisunud di tombolog di roitan dot ibis, do lumuyud i Bawang do Nil? Isai o momisunud di tandaha' do sumondot o rasam? 37 Isai noo i kitoilaan kopio do mongintob dilo haun, om moninggoub di haun do poposondot do rasam, 38 i rasam do mamalagit do pupuk do tana' do gisom do mogisosokot? 39 Milo ko i' do mogihum do taakanon do ponumad do singa, om paakan di tanak do singa do gisom dot ayahan 40 di maso diyolo' do songillisok do hilo'd luang, ko' maso po diyolo' do songingodop do hilo'd kuang do tiiyonon diyolo'? 41 Isai o manahak do taakanon di tombolog di roitan do bangkahak do tontok do minghombo iyolo' do mogihum do kanon, om tontok di minguni i tangaanak diyolo' do mokianu'd takanon?
1 Koilo ko i' ondung soira' i kambing do gouton do pinogkosusu? Nokoumbal ko i' do miniontong do tontok do mogkosusu i tambang? 2 Koilo ko i' ondung songkuro koloido' diyolo' do monontian? Koilo ko i' do maso do kasawaan di tanak dot id suang do tian diyolo'? 3 Koilo ko i' ondung soira' iyolo'd gumupu' do mogkosusu di tangaanak diyolo' do hiti'd pomogunan? 4 Hilo' id tanga'd talun i tangaanak diyolo' do gumayo om kumoris o tinan; om mimpanau nondo iyolo' do hilo'd sodu' om a' no gumuli' kawagu. 5 Isai o pinopologos di kaladai do lalang do poingidu'? Isai o pinopoidu' di kaladai om pinopologos diri do minghombo? 6 Iyoho' no o minanahak di kaladai do tana' do kowotuan do maan diyolo'd tiyonon, om pinopologos diri do mundorong do hiri'd rantai dit oosin. 7 Minsodu' i kaladai di kabandaran do tulun dit ongohiyo, om aiso' o tongosongulun piya do koilo do mongubas di kaladai ko' monuhu' poddi do morobuat. 8 Ilo' no nuluhon o pamayan-bayaanan di kaladai do mangakan-ngakan, i hilo'd pogihuman diyolo'd sakot dit ongotomou do maan diyolo'd akanon. 9 Orohian i' tuu i sapi' do lalang do porobuaton nu? Mongoi i' tuu odop i sapi'd lalang do hiri'd suang do kandang do sapi' nu? 10 Milo ko i' tuu do mongogos do tiso' di sapi' do lalang om suhuon nogindo do mamaradu? Milo ko i' tuu do monuhu' di sapi'ddi do gumayat do ragus do pamaragus di tumo nu? 11 Milo ko i' tuu do tumalahan di kinoris di sapi' om mogondos di sapi' do momonsoi di karaja' nu dit awagat? 12 Piantangan nu daa i sapi'd lalang do monimung do tua' di gandum, om popoopi' di tupu'ddi do mantad hiri'd pinamagamasan nu? 13 Asarok no kopio o kapo do talad di tombolog dot unta, nga' aiso' i' o tombolog dot unta do milo'd tumulud do miagal do podtutulud do tombolog di roitan do kandawai. 14 Iri nopo i tombolog dot unta om papadantak do tontolu' dau do hiri'd tana' do pokiuhuban dau di kolosuo' di tana'. 15 A' i' di tombolog dot unta osorou dot iri nopo tontolu' om ababak i' dot oulakan, om ababak do nintorusan do suwai. 16 Sorohon nopo dau dot okon i' ko' iyau o sanganu di tontolu', om a' i' dau sorohon i huyan dau dot aiso' piya o kotutukon diri. 17 Iyoho' i' o pinapabasug di tombolog diri om a' ku nonuan do toilaan. 18 Nga' soira' nopo do tumangkus i tombolog om aala' i' o kuda' om i tulun do poinsakai'd kuda'. 19 Ayub, iya' toi o minanahak do kinodsir di kuda', om pinoposokot di tobuk dot olumis do hiri'd likud di kuda'? 20 Iya' toi o pinopokodsir di kuda' do sumimbul do miagal di simpod do godu om minanahak di tungkobir di kuda' di kotompurolosi do tulun? 21 Orohian tomod i kuda' do mingkahu do tana' do hiri'd rantai; om tumotos do manangkus do kumaa dot id pisangadan. 22 A' i' koilo i kuda' do kopoddosian, om aiso' i' o gayang do kotompurolosi di kuda'. 23 Rapo-rapo nopo do nigitan di sumasakai di kuda' om monging-songing nopo om akalab dot otitihan do tadau. 24 A' no i kuda' siundorong tu' sitangkus no kopio, om santangkus-tangkus ngai' no i kuda' do sontimbaba' dot id doburuan; om soira' nopod pounion i torumpit om a' no iyolo' milo do poundorongon. 25 Pointikid-tikid do pounion i torumpit om monungkobir no i kuda'; kosingud no i kuda' do tawau di pisangadan dit osodu' po, om korongou do garang di boyoon do monuhu'. 26 Id diya' toi o pinokitudukan di kondiu do kowoyo-woyoon do tumulud do tontok di papakapo i kondiu di talad dau do kumaa ponong id salatan? 27 Magandad tuu i kondiu dot isuhu' nu do mongoi pomonsoi'd rumun do hilo'd nuluhon dit angakawas kopio? 28 Minomonsoi iyau do walai dau dot id sakai do pampang dit asawat, om hiri'd dompok di watu dit atarom o ponokotintirungon dau. 29 Hiri no i kondiu do mogimpa' ngai' di hiri'd somok om i hiri'd sodu' do nunu nopo i korohian dau do mamatai do maan dau dot akanon. 30 Timungan nopo di kondiu i rata' om inumon di tanak di kondiu i raha'.
1-2 Oi Ayub, suminongkiwal ko doho', i Kinorohingan it Osundu Kopio; sumurilog ko po ko' amu'?
Ayub
3-4 Miagal oku po di tulun do basug do minoro-boros oi Tuhan. Nunu po o milo ku do posimbaron? Aiso' no o milo ku do poboroson. 5 Ogumu' no kopio i nokoboros ku. 6 Om boro-boros po kawagu o Tuhan dot id di Ayub do mantad hiri'd tongus dit opuhod.
Tuhan
7 Baino' nopo om ingkakat no do miagal do songulun o kusai, om simbaro' no iti ponguhatan ku. 8 Mogolim ko toi dot otulid oku, om popotopot ko do diya'd tinan? Om papasala' doho'? 9 Okoris kopio ko toi do miagal doho'? Milo i' toi dot iyo di doho'd boros o boros nu tu' miagal pod tinggoron kopuhod? 10 Ondung koiyo ko'ddi, om ingkakat no do mikuwo'd kagayaan om koondoso' nu; kulumutai no tinan nu do kobontugo' om karayahan. 11 Antangai ngai' no i tulun dit ongoondos; om tuntugan no iyolo' di kototogod nu om intingayamon no iyolo'. 12 Ontong no diyolo' om poinsiribao' no iyolo'; om patayon no i tulun dot araat do hinonggo nopo iyolo' do poundorong. 13 Lobongon ngai' no iyolo' dot id saalom do tana'; om kagasan no iyolo' do hilo'd pomogunan di tulun di nangapatai. 14 Om iyoho' nondo o mogulu do mamarayou diya', om poboroson ku dot i kokorisan nu o nakamanang-manang nu. 15 Ontong pogi' dilo Bihimot, i kuda' do Nil dit agayo, tu' iri nopo om winonsoi ku i' do miagal diya' tu' winonsoi ku. Sakot i' o taakanon dau, do miagal di sapi' di koubasanan. 16 Nga' antangai pogi' o kokoriso' dau, om kokodoho' do masol dau. 17 Tikiu nopo dau om poturidong do miagal po di kayu sedar. Masol nod gakod dau om okodou kopio. 18 Tulang nopo dau om iyo pod tambaga' kokodou, om gakod dau nga' miagal pod basi'. 19 Iyau no o kopusahan kopio dot id pogialatan di winonsoi ku'd suwai. Iri po i minomonsoi dau o kotori' dau. 20 Hilo'd nuluhon, i kinoiyonon di nintorusan do mogiongkoringau om i sunian do sakot di taakanon dau. 21 Gugupuon nopo dau om hiri'd sahau do bulungkut dit ongkirugi, om lilisokon no dau om hiri'd salag do bundusan do hiri'd buyut. 22 Iri po i linungung di bulungkut do korugian ot intirungon dau. Om i koguasan do kayu do hiri'd tisan di bawang o lungungon dau. 23 A' i' iyau moddosi di bawang do Yordan dit opuhod kopio, om poundorong iyau dot oolitan piya do waig o rabas dau. 24 Isai o kasaap do momolou do mato dau, om isai o kasaap do mamagading do todung dau?
1 Kagamit ko i' tuu do buayo do Lowiatan, do tapon nod sada' o pamagamit? Om mongogos di dila' dau do tali noo o pongogos? 2 Milo ko i' tuu do mamagading do todung dau, om mangait do kabang dau do basi' o pangait? 3 Milo i' toi iyau do moro-boros do mokilabus diya'? Ko' mokiinsian diya'? 4 Orohian tuu iyau do monokiupakat diya' do momonsoi'd piuludan, om monokibatos dot orohian do sumiliu'd pomuru-buruon nu? 5 Orohian ko tuu do momogompi' dau do miagal di tombolog di koupusan kopio nu, do maan nu'd ponompuyaaya' di susuhuon nu'd tongoondu'? 6 Milo i' tuu iyau do dagangon dot id tulun di monginsada' om pogiduwo-duwoon nondo di dumadagang? 7 Milo nu i' tuu do todsokon i kulit dau dot i tandus do ponginsada' o ponodsok, ko' monungkad do sarapang di tulu dau? 8 Kama' pogi' dau dot ongoinsan, om a' ko nondo mogumbal kawagu om a' nu nondo olihuan i pinisaapan diri do gisom dot alaid. 9 Isai nopo o kokito do Lowiatan, om lumomok nopo om ahaba' no dot ahadan. 10 Soira' nopo dot oposik iyau, om orongit moti' iyau; om aiso' nondo o tongosongulun piya do kasaap do rumapou dau. 11 Isai po o kotori' do monokisaap dau, om it a' orualan? Aiso' no hiti'd pomogunan do kasaap do momonsoi'd miagal diri. 12 Momisunud oku po dokoyu kawagu ondung okuro-kuro o gakod do Lowiatan, om momuara' oku dokoyu do kogoyoo' om kokoriso' dau. 13 Aiso' no o tongosongulun piya do kohurak di rasuk dau dit id soibau, ko' kolopuson di rasuk do don sumasangod di poingrasuk dau. 14 Isai poo o kasaap do monungkabang di roo dau, dit osisid pod nipon di kotompurolosi kopio. 15 Likud nopo dau om linopisan do kolid di tininopis do pinosokot, om okodou do miagal do watu. 16 Pinogiromu-romut iri dot ogirot kopio, tu' ribut piya nga' a' no kawaya' di piromutan. 17 Iri nopo kolid diri nga' pinogiromu-romut do gisom dot a' no milo'd pogitongkiad-kiadon. 18 Koontiho' nopo i Lowiatan nga' mimbulai nopo o tulinau, om mato dau nga' mogulinau poo do miagal do tinitiu'd tadau di mulai nogi'. 19 Momorongila' o tapui do mantad id kabang dau, om momuralakou o tanak ngapui do lumabus. 20 Momurulon o lisun do lumabus do mantad id todung dau, do miagal po di lisun do sakot do tutudan dot id sahau di rinakan. 21 Pinuhobo nopo dau om kosidu i' do tapui, mandak-bandak o tapui do lumabus do mantad id kabang dau. 22 Liou dau nga' okoris kopio, om korolosi dot isai nopo o kosolowot dau. 23 Aiso' no ot ongokoro' piya dot olomok do kulit dau; okodou ngai' nopo om a' ababak do miagal do basi'. Om a' no otogu' tu' miagal pod basi' kokodou. 24 Ginawo nopo dau om a' i' kopuriman do moddosi, om okodou do miagal do watu di winonsoi do tosung. 25 Soira' nopod tumungag iyau, om iri piya it aiso' no o koiyo do kokoriso' nga' moddosi i'; lumuhoi iyolo' om a' no milo'd sumaap. 26 Aiso' no karis do kotogu' do tinan dau; barambang, om pana', ko' tandus nga' a' no kotogu' dau. 27 Basi' piya nga' miagal nod sakot toomod dot opurimanan dau, tambaga' nga' miagal no di kayu do noromuk. 28 Aiso' no o pana' do milo'd popoggidu' dau; watu piya dot okodou do pomodumpau dau nga' miagal no di sakot toomod dot opurimanan dau. 29 Bobobog nga' piagalon no dau di roun do sakot, om tokonon iyau'd tulun nga' koirak nogi' iyau. 30 Sisi' nopo do tian dau om miagal di kinababakan do kuron katarom; oburutak nopo ot awayaan dau do miagal po dot aragus. 31 Gouron nopo dau ilo rahat nga' miagal pod waig di gumolok, om momiputa' do miagal do kuron di kisuang do tumau. 32 Anawau nopo ot otitiu di nulokon dau, om ilo rahat nga' silihon dau do puta' dot opurak. 33 Aiso' no koiyo dau dot id pomogunan diti; tu' iyau no i nintorusan dit aiso' o poddosi. 34 Iri piya i nintorusan dit angagayo no kopio, nga' intingayamon i' dau. Iyau no o raja' do koinsanai'd nintorusan dit ongorongit do hilo'd gouton.
1-2 Om simbar noddi i Ayub do Tuhan.
I Ayub
Noilaan ku no, oi Tuhan, dot aiso' i' ot a' angabayaan dit ongosorou nu; aiso' i' ot a' nu milo'd wonsoyon. 3 Minonguhot ko doho' ondung nokuro tu' katama' kopio oku do sumoibau do toilaan nu, tu' iyoho' nopo om basug i'. Pinoboros ku it a' ku iyoho' osuhutan, om i hal di kongopusahan ku. 4 Monuhu' ko doho' do mokinongou do tontok do moro-boros ko, om pokisimbaran nu doho' i poguhatan nu. 5 Di nopo di gulu po om iri no i pinosunud do tulun do suwai dot id doho' ot oilaan ku do pasal diya', nga' baino' nopoddi om mato ku no kopio o kokito diya'. 6 Om ointingayaman oku no kopio do kosorou di boros ku di nongkoboros ku, om poirikau oku do hiti'd pupuk om tauu do mikuwo'd kumorologo oku.
Kolimpupuson
7 Kongoboros ngai' poddi do Tuhan iti dot id di Ayub, om boro-boros no iyau dot id di Ilipas do poingkaa, “Otogod oku diya' om ilo duwo o tambalut nu, tu' a' kou i' pinopoboros dit otopot do pasal doho'. Nga' i Ayub nopo i susuhuon ku om a' i' iyo'ddi. 8 Baino' nopo om igit no do turu' o tinan do sapi' do tontoluhan om turu' o tinan do dumba' do tontoluhan do hilo'd di Ayub. Om patahakon nori do maan do porsombahan di sorobon do maan do diya'. Om sumambayang nogindo i Ayub do bagi' diya', om romiton ku indo i sambayang dau, om a' kou i' ointingayam, do mulong piya dot apatut kou no daa do hukuman. Tu' a' kou i' minomoros dit otopot do pasal doho', do miagal di pinoboros di Ayub,” kad Tuhan. 9 Om tonudo' ngai' no di Ilipas om i Bildad om i Sopar o koinsanai di pinonuhuan do Tuhan, om pohubayaai nod Tuhan i sambayang di Ayub. 10 Om kasambayangai poddi di Ayub i tolu o tambalut dau'ddi, om pogulio' no kawagu'd Tuhan i kakayaan di Ayub, om onuwai no dau iyau do dapu' dot induwo kopiluap o kogumuo' do mantad ko' i gulu. 11 Koinsanai di tobpinai di Ayub do kusai om tondu', om i tambalut mantad dau nga' ruminikot noddi do minongoi pogolimbuha' dau om minoginakan iyolo' do hiri'd walai di Ayub. Om minomoros nogi' iyolo' do tumonggoi iyolo' di Ayub do tumongob tu' pinorikatan i' iyau'd Tuhan do koinsanai di kosusaan diri, om ninsasamadan diyolo' iyau. Om sorompori-pori nopo iyolo' do minanahak di Ayub do tusin om soroisaan do pondulung do tamas. 12 Om binarakatan iddi do Tuhan o koposi-posion di Ayub dot agayo po ko' i pinamarakat dau di Ayub dit a' po iyau noontok di koinggoritan. Haro'ddi o baanan di Ayub do hopod om apat noribu o tinan do dumba', om onom noribu tinan dot unta, om duwo noribu tinan do sapi', om soribu tinan do kaladai. 13 Om kianak po i Ayub do turu' o kusai om tolu o tondu'. 14 Om pungaranai no dau it id dotuo di tanak dau'd tondu' dot i Yomima, om iri no i sumusuhut dau om i Kosia, om iri no i tomulok om i Kirinhapuk. 15 Om pointongkop nopod pomogunan diri om aiso' no o koiyo do kolumiso' di tolu o tangaanak di Ayub do tongoondu'ddi. Om nonuan nogi' iyolo' do tungkusan do mantad id tapa' diyolo' do miagal di tobpinai diyolo'd tongokusai. 16 Mantad nopoddi om hatus po om apat nohopod o toun di Ayub do poimpasi, do gisom do nokokito po iyau di manangaki dau om i tangaanak di manangaki dau. 17 Om molohing poddi kopio i Ayub om kapatai nogi' iyau.
Buuk do Koiso'
Sinding 1 --- 41
Kolumaagan dit Otopot
1 Olumaag no i tulun dit amu' tumanud do ponudukan do tulun dot araat, om amu' momit do kowoyo-woyoon do tulun do kidusa om amu' moyo' do tulun di mongindaraat do Kinorohingan. 2 Suwai ko' korohian nopo diyolo' om mumboyo' di Tourat do Tuhan, om momuhondom diri do tadau om totuong. 3 Miagal iyolo' di kayu di poinsuni dot id tisan do bawang, tu' mongua' do pointikid do maso do koponguaan, om a' rumiou o tuntu. Koundar ngai' nopo o wonsoyon diyolo'. 4 Nga' tulun nopod araat om amu' i' iyo'ddi; miagal iyolo' di tapol dot otilib do tongus. 5 Hukuman indod Kinorohingan i tulun do kidusa, om potongkiadon do mantad id tulun Dau. 6 Tulun nopo di mumboyo' Dau om potunudon i' om intirungan do Tuhan, nga' tulun nopo dit araat om pakayaan no dot id kapatayon.
Raja' di Pinili' do Kinorohingan
1 Nokuro tu' momusorou do sumaap i piro-piro bansa'? Nokuro o rayat diyolo' tu' mogupakat dit aiso' o kotutuk-tutukon? 2 Sumaap ngai' i raja' diyolo', mogipapakat ngai' i pomorinta' diyolo' do sumaap do Tuhan om sumaap di raja' di pinili' dau. 3 Boros ka no di pomorinta', “Kainou midu' do mantad id pomorintaan diyolo', om iduwon toko' i' i kuasa' diyolo' do momorinta' dati',” ka. 4 Mingirak o Kinorohingan do hiri'd tirikohonon dau do momorinta' do hilo'd surga, do mongumang-umang dit osorou diyolo'd wonsoyon diyolo'. 5 Om otogod tomod diri o Tuhan do minoro-boros diyolo' om tinompurolosi dau iyolo' di kototogod dau dot a' ogina-gina'. 6 Boros ka dau, “Nopili' ku no i raja' ku, do hilo'd Sion i nuluhon ku dit olidang,” ka. 7 Boros ka di raja', “Popinsunudon ku nondo i nokoboros do Tuhan. Tu' poingkaa o boros dau dot id doho', ‘Iya' no o tanak ku, om tadau nod baino' do nosiliu oku do Tapa' nu. 8 Pokianu no, om patahakon ku i' diya' o koinsanai'd bansa', om asanganu ngai' nu indo o koinsanai'dti pomogunan. 9 Om babakon nu nondo iyolo' dot i sukud do basi' o pamabak, om mumukon nu iyolo' do miagal do kuron,’ ka dau,” ka. 10 Iyo nopoddi, om pokinongoho' no dokoyu iti boros do popoinsan, koinsanai dokoyu i raja', pinsingilaai no dokoyu iti ponudukan, koinsanai dokoyu i momorinta' diti pomogunan. 11 Sambayang no dot id Tuhan do mikuwo'd oronok dau; 12 Otud no dot id toguang dau do mikuwo'd momusou kopio. Tu' ondung amu' nga' oruuhai moti' dot otingkau o kototogod do Tuhan, om sigog i' moti'ndo do matai kou. Olumaag ngai' no i tulun di mongoi intirung do Tuhan!
Sambayang do Dongkosuabon
1 Sinding di Daud do tontok di minogidu' iyau do mantad id di Absalom, i tanak dau. 2 Oi Tuhan, ogumu' no kopio o pisangod ku, om ogumu' tomod o sumaap doho'! 3 Om mimboros po iyolo' dot id doho' do poingkaa, “A' no iyau'd Kinorohingan uhupan,” ka no diyolo'. 4 Nga' iya' no, oi Tuhan, o ponokokolid ku do mongintirung doho' do mantad id koligagaanan, om onuan oku i' diya' do kamanangan om popokoris ko do ginawo ku. 5 Lumohou oku diya', oi Tuhan, do mokiuhup diya', om simbaron oku i' diya' do mantad hino'd nuluhon nu dit olidang. 6 Lii oku nod minodop, om nintirungan oku id Tuhan do gisom do nosuaban. 7 A' oku i' moddosi di pisangod ku do rinibuan piya o kogumuo' do tuminutuk do posorili' doho'. 8 Rikot no, oi Tuhan, posio' oku no, oi Kinorohingan ku! Hukumai no o koinsanai di pisangod ku, om a' i' iyolo' milo do pokoruol doho'. 9 Kamanangan nopo om mantad i' dot id diya', oi Tuhan, om barakatan nu i' o tulun nu.
Sambayang do Dongsosodopon
1 Maan di boyoon do modsisinding. Ompoton do kecapi. Sinding di Daud. 2 Oi Kinorohingan, i mogobi' doho', simbaron oku no do tontok do sumambayang oku. Tontok dit id suang oku'd kosusaan, om tinulung oku i' diya'. Kosianai no doho' do dinondo om pokinongoho' no o sambayang ku. 3 Songkuro po koloido' dokoyu do mongindaraat doho'? Songkuro po koloido' dokoyu dot orohian dit aiso' o kootuk-otukon, om gumusa' dit aiso' o katapatan? 4 Hondomo' no, do nokopomili' no o Tuhan do songulun di kosianan dau do maan dau do dau'd songonuon, om pokinongohon oku i' dau do tontok do lumohou oku dau. 5 Kooris kou no do mikuwo'd gagaran dot id toguang do Kinorohingan, soira' nopo dot otogod kou om kada' kou pomonsoi'd dusa. Om porolomon no o pomusorou do pasal diti, do tontok di pakadada' kou do poillii dot id toodopon dokoyu. 6 Patahak nod porsombahan dit apatut dot id Tuhan, om ponongkuyaai no dau. 7 Ogumu' o tulun do sumambayang do poingkaa, “Onuwai-nuwai po iyahai do barakat dot ogumu', oi Tuhan; om maha' daa om kohubayaan nu iyahai!” ka. 8 Nga' iri nopo kataadan do pinatahak nu doho' om agayo po ko' i kataadan do pinatahak nu diyolo' om agayo po ko' i kataadan do tulun dit ogumu' o dapu'. 9 Tontok do lumii oku om mipuwoyo' oku nopod koodop, om aiso' no o kagangau-gangau doho'; tu' iya' noo, oi Tuhan, i momogompi' om poposimbayan doho'.
Sambayang do Mokiintirung
1 Maan di boyoon do modsisinding. Ompoton do suling. Sinding di Daud. 2 Oi Tuhan, pokinongoho' no iti boros ku, om pokinongoho' no iti todoi ku. 3 Pokinongoho' no iti tihad ku do mokiuhup, oi Kinorohingan ku, i Raja' ku! 4 Oi Tuhan, sumambayang oku dot id diya', om orongou nu i' o boros ku di dongkosuabon, mulai nogi' o tadau om sumambayang oku no dot id diya' do tontok di papatahak oku do porsombahan ku, om mandad oku nondo dot isimbar nu, oi Tuhan. 5 Iya' nopo, oi Kinorohingan, om a' i' orohian di wowonsoyon dot araat, a' nu i' pologoson o tulun dot araat do sumuang di walai nu. 6 A' ko i' orohian do tulun di minggayo-gayo, om araatan ko do koinsanai'd tulun di momonsoi'd araat. 7 Patayon nu i' o koinsanai'd tulun di goudut om iyada' nu o tulun dit orongit om i monipu'. 8 Nga' kosuang oku i' di walai nu, tu' agayo i' kopio o kosianan nu, om milo oku i' do sumambayang do hiri'd walai nu dit olidang, om motud oku do tumuku' dot id diya'. 9 Ogumu' tomod o pisangod ku, oi Tuhan, tudukai oku no do momonsoi di korohian nu, pointalango' no o ralan nu do wayaan ku. 10 Nunu nopo i poboroson do pisangod ku om a' i' kopio milo do ponongkuyaanan, tu' orohian no iyolo'd momungou doho'. Oomis tomod daa om kabayayat o boros diyolo', nga' poimponu' i' dit araat o ginawo diyolo'. 11 Butusan no om hukuman no kopio iyolo', oi Kinorohingan; om pologoson no i pakat diyolo' dot araat do momungou diyolo'. Uyungon no iyolo' do mantad id toguang nu tu' i kogumuo' do dusa diyolo' om i kobinsaapo' diyolo' diya' o koponguyungan. 12 Nga' tulun nopo di mintirung diya' om ongooropod ngai' no, om milo kasai' iyolo' do modsinding dot atataadan. Intirungai ngai' no i tulun dit osianan diya', tu' iya' no o kataadan kopio diyolo'. 13 Barakatan nu i' i tulun di mumboyo' diya', oi Tuhan, om miagal pod kolid i kosianan nu do mongintirung diyolo'.
Sambayang do Mokitulung do Tontok do Haro o Kosusaan
1 Maan di boyoon do modsisinding. Ompoton do kecapi do tumanud di lagu' di kawalu'. Sinding di Daud. 2 Oi Tuhan, kada' kotogod doho', om kada' oku iyadaai, kada' oku hukumai do tontok dot otogod ko. 3 Kosianai no doho' oi Tuhan, tu' ohuyan oku no kopio; onuwai oku nod kokorisan tu' a' oku no kogoos. 4 Om poimponu' oku pod kosusaan, songkuro po o koloido' om mongoi ko nogi' ponulung doho', oi Tuhan? 5 Oi Tuhan, rikot no do mongoi pamasi doho', poiduwo' oku no do mantad id kapatayon tu' kikosianan ko i' doho'. 6 Hilo' nopod pomogunan do tulun do napatai om a' ko no ahandaman, om iso' pod tulun nga' aiso' no o milo do mamarayou diya' do hiloo'. 7 Oluhoi oku no dot adalaan do tumongob, monikid tuong nopo dot oyopos do romou ku i toodopon ku, om bantal ku nga' oruyut nopo do romou ku. 8 Oruhai oku nod a' kokito, tu' nokobongkung tomod o mato ku do nouru'd miningihad do gama' di pisangod ku. 9 Insodu' kou no doho', oi tulun dit angaraat! Tu' orongou id Tuhan iti tihad ku. 10 Pokinongohon i' dau o tihad ku do mokitulung, om simbaron i' dau o sambayang ku. 11 Om oinsanan nopondo i pisangod ku dot ointingayam, tu' sigog indo dot oborulong iyolo' om mogidu' nondo iyolo'.
Sambayang do Mokianu dit Otulid
1 Sinding di Daud do mogihad, i sinding dau dot id Tuhan, do gama' di Kus, i tulun do Binyamin diri. 2 Oi Tuhan, i Kinorohingan ku, rumikot oku dot id diya' do mokiintirung, poiduwo' oku no om posio' oku no do mantad id toinsanan do tulun di momogusa' doho'. 3 Tu' ondung amu', nga' miagal pondo iyolo'd singa do mongoi pononggoi doho', dot id kinoiyonon dit aiso' no milo do mongoi pamasi doho', om hilo' nondo do pogianaton oku diyolo'. 4-5 Oi Tuhan i Kinorohingan ku, ondung nokowonsoi oku'd sala' dot id disai nopo, ondung nokopohudsu oku do tambalut ku ko' ruminongit oku po dot id pisangod ku dot aiso' o paantakan --- ondung haro o tiso'ddi do nowonsoi ku --- 6 om pologoson nopo i pisangod ku do momogusa' om mononggoi doho', pologoson nopo iyolo' do momobog om mamatai doho' om monongkiad doho' do poimpatai do poingiliu do hiti'd tana'! 7 Oi Tuhan, ingkakat no dot atatagadan! Saapo' no i kororongit do pisangod ku. Oi Kinorohingan ku, ingkakat no om ngoyon oku no uhupai! Tu' iri no it otulid o pokionuon nu. 8 Timungo' ngai' no o tulun dot id sorili' nu, om porintaon no iyolo' do hino'd tirikohonon nu do momorinta' do hilo'd surga. 9 Iya' no i gompomutus do koinsanai'd tulun, butusai oku no do tumanud di kotulido' do ginawo ku, oi Tuhan, tu' nokoilo ko i' dot aiso' o sala' ku. 10 Iya' no o Kinorohingan dit otulid om iya' o mongilo do pomusarahan om korohian dahai. Tingkodo' no i kararaat do tulun dot angaraat, om somuliai no i tulun dit ongosonong. 11 Kinorohingan no o mongintirung doho', posion i' dau i tulun do mumboyo' dau. 12 Kinorohingan nopo om gompomutus dit otulid om hukuman kasai' i' dau i tulun dit araat. 13 Ondung a' diyolo' simbanan i kowoyo-woyoon diyolo', om asaon nod Kinorohingan i gayang dau. Anaton no dau i pawakasan do pana' om poundaon dau, 14 om ngoyon ngai' dau i rapo-rapo dau di kapatai om potudukon i pana' di kitapui. 15 Antangai pogi' ondung poingkuro i tulun dot araat do minsorou dit angaraat, ginawo nopo diyolo' om poimponu' po dit araat om poimponu' do poninipu'. 16 Mongukad no daa iyolo'd luang do maan do korotuon do wokon, nga' iyolo' nogi' ot aratu'd hiri. 17 Om iri iddi i kararaat diyolo' o minomohukum diyolo' om i kororongit diyolo' o pinopokoruol diyolo'. 18 Mongunsikou oku nod Tuhan di kotulido' dau, om modsinding oku do mamarayou'd Tuhan, it Asawat Kopio.
Kagayaan do Kinorohingan om Kosuahan do Tulun
1 Maan di boyoon do modsisinding do tumanud di lagu' do Gitit. Sinding di Daud. 2 Oi Tuhan, i Kinorohingan dahai, nokito ngai' no do pointongkop diti pomogunan o kogoyoo' nu! Kosoibau i' dilo tawan i sinding do pamarayou diya', 3 do sindingon do tangaanak om i tangaanak di ragang po. Osimbayan ko i' om aiso' o koligagaanan nu do mantad id pisangod nu, om antaban ngai' nu i' i mumbal do sumaap diya'. 4 Tontok di tuminingaha' oku do hilo'd tawan di winonsoi nu, do mintong di tulan om i rombituon di pinoiyon nu do hilo'd pinoiyanan nu, 5 om nunu'ddi kopio o tulun tu' sorohon nu iyau? tulun i' daa toomod iyau, nga' gompion nu i' iyau. 6 Nga' tontok di winonsoi nu iyau, om iya' poo oi Kinorohingan ot id sawat ko' iyau, om tinupian nu po iyau do kagayaan om kosuahan. 7 Siniliu nu iyau do pomorinta' dot id sawat do koinsanai di winonsoi nu, nonuan nu iyau do kuasa' dot id sawat do koinsanai di winonsoi nu; 8 id sawat do dumba' om sapi', om iri nogi' i nintorusan do hilo'd gouton, 9 id sawat do koinsanai'd tombolog om sada' om it ongkipinuhobo do hilo'd rahat. 10 Oi Tuhan, i Kinorohingan dahai, nokito ngai' no do pointongkop diti pomogunan o kogoyoo' do kuasa' nu!
Kounsikahan dot id Kinorohingan di Kotulido' Dau
1 Maan di boyoon do modsisinding do tumanud di lagu' do Mut-Labin. Sinding di Daud. 2 Royohon ku no iya', oi Tuhan, do mikuwo'd aayi-ayi' o ginawo ku. Popinsusuyon ku nondo o koinsanai di nongowonsoi nu di kongopusahan kopio. 3 Modsinding oku nondo dot atataadan dot iya' o kopodsindingan ku, modsinding oku nondo do mamarayou diya', oi Kinorohingan it Asawat Kopio. 4 Mogidu' ngai' nopo i pisangod ku do tontok di mintalang ko, om aratu' ngai' nopo iyolo', om angapatai. 5 A' ko i' manampaping om otulid o pomumutus nu, nobian oku i' diya' do tontok di minomutus ko. 6 Notogod ngai' nu no i bansa'd suwai, nopunso nu no i tulun dot angaraat. Natanus nu no o ngaran diyolo'; om a' noddi iyolo' ahandaman do gisom dot alaid. 7 Nopunso noddi kopio i pisangod dahai do gisom dot alaid, nangaraag nu no i kabandaran diyolo', om nolihuan noddi kopio iyolo'. 8 Nga' Tuhan nopo om raja' i' do gisom do poingompus, nokopomonsoi no iyau do tirikohonon dau do momutus diti pomogunan. 9 Porintaon dau iti pomogunan do mikuwo'd katapatan, om otulid o pomumutus dau do koinsanai'd bansa'. 10 Tuhan no o kointirungan do tulun dit ulak-ulakan, om tiyonon dit aiso' o koligagaanan do tontok do haro o kosusaan. 11 Tulun nopo di kotutun diya', om mogondos i' diya', oi Tuhan, a' nu i' tongkiadan tomod ot isai nopo tulun di rumikot dot id diya'. 12 Podsinding no do mamarayou'd Tuhan, i momorinta' do hilo'd Sion! Sunudan no o pointikid-tikid do bansa' di nongowonsoi dau. 13 Ahandaman id Kinorohingan i tulun dot oinggorit, om a' i' dau olihuan i tihad diyolo', om sulian i' dau i tulun di minonginggorit diyolo'. 14 Oi Tuhan, kosianai no doho'! Antangai no iti koinggoritan do pinorikot di pisangod ku dot id doho'! Oi Tuhan, poiduwo' oku no do mantad id kapatayon. 15 Om milo oku i' do mingkakat dot id toguang di tulun do Yorusalim, i bandar dot olidang, om ongosunudan ku i' iyolo' do koinsanai di kapamarayahan ku diya'. Otood oku nondo tu' pinasi oku i' diya'. 16 Minongukad daa'd luang i piro-piro bansa'd suwai nga' iyolo' iddi o naratu'd hiri. Nokosulungon nopo diyolo' om hiri id lawa' di pinataan diyolo'. 17 Nokointalang nod Tuhan o tinan dau dot id suang di pomumutus dau dit otulid, iri nopo tulun dot araat om kosulung i' di kowoyo-woyoon diyolo'. 18 Kapatayon no o kootuson ngai' do tulun dit araat, om i magada' do Kinorohingan. 19 A' i' kada-kadaan kasai' i tulun di mosikin, om a' tilombuson do mananus i soro-sorohon di tulun do mosikin. 20 Oi Tuhan, rikot no, kada' pologoso' o tulun do minggayo-gayo! Potimbabao' no diya' i bansa'd suwai om porotuwai no iyolo'd hukuman. 21 Tompurolosio' no iyolo', oi Tuhan, popurimono' no iyolo' dot iyolo' nopo om tulun i toomod.
Sambayang do Mokianu dit Otulld
1 Nokuro tu' osodu' tomod ko, oi Tuhan? Nokuro tu' lumisok ko nogi' do tontok do kikosusaan iyahai? 2 Ongoondos tomod i tulun dot araat om monginggorit iyolo' di tulun do mosikin; pologoso' no do kosulung iyolo' di kararaat diyolo'. 3 Oondos tomod i tulun dot araat di korohian dau dot angaraat, om iri tulun do tamaha' nga' mimpopol poo om magada' do Tuhan. 4 Tulun nopo dit araat om a' i' mamadul do Tuhan; aiso' i' o Kinorohingan dot osorou dau tu' adalaan no kopio kasawat o ginawo dau. 5 Koundar ngai' nopo o wonsoyon di tulun dot araat. A' i' iyau kosuhut dot oturan do Kinorohingan; om untotogodon dau i pisangod dau. 6 Moro-boros iyau dot id suang do ginawo dau do poingkaa, “A' oku i' bo iyoho' koumbal dot a' korikot dot id pokiririkatan ku, om a' oku koumbal dot oontok do kosusaan do gisom dot alaid,” ka. 7 Koboro-boroso' nopo dau om popol ngai' poo om tudut, om boros do popokoruol do wokon; om oburuak iyau do mimboros do pongindaraat om pangamu-amu' do wokon. 8 Mongoi iyau lisok do hiri'd kawalayan, om hilo' no iyau do magawang do mamatai'd tulun dit aiso' o sala'. Ngoyon dau solukuo' i tulun di pokipapatayan dau, i tulun dit aiso' no o pokukurayan, 9 miagal po iyau'd singa do poingandad do hiri'd linisok dau. Magawang iyau do tulun dit aiso' o pokukurayan, om posulungon dau iyolo' do hiri'd lawa' dau om gayaton nogindo do mogidu'. 10 Songillatan po tomod i tulun di nangatangkap, tu' aiso' no o pokukurayan diyolo', naala' no iyolo' di kororongit do tulun dit orongit. 11 Boros ka dot id suang do ginawo di tulun dot araat, “A' i' monguro iti dot id Kinorohingan! Tu' nokoungkodom nod Kinorohingan o mato dau om a' no kokito doho'!” ka. 12 Oi Tuhan, hukumai no kopio i tulun dot angaraat! Om hondomo' no i tulun dit oinggorit! 13 Nokuro daa kopio tu' mongindaraat do Kinorohingan i tulun dot araat, om momusorou dot a' o Kinorohingan momohukum dau? 14 Nga' kokito ko i' om okito nu o kosusaan om koinggoritan dahai om atantu' nod posodia' kasai' ko i' do monulung dahai. Tumahak po dot id diya' i tulun dit aiso' o pokukurayan, tu' monulung kasai' ko i' do tulun dit aiso' o molohing. 15 Iduwo' no o kuasa' do tulun dit angaraat om ongorongit, hukumai no iyolo' dot i kasalaan do nowonsoi diyolo' o kopomohukuman, om a' indo iyolo' momonsoi kawagu do miagal diri. 16 Tuhan no o raja' do gisom dot alaid, om tulun nopo di tumuku' dot id tingolig om atanus indo do mantad id pomogunan dau. 17 Oi Tuhan, pokinongohon nu i' i sambayang do tulun dit aiso' o ngaran- ngaran, om pogiroton nu o ginawo diyolo'. 18 Pokinongohon nu i' o tihad di tulun dit ulak-ulakan do wokon, om tihad di tangaanak dot aiso' o molohing, obian nu i' iyolo' do tontok do momutus ko, om tumingkod indo o tulun do hiti'd pomogunan do rumongit do pokoruol do tulun.
Tuhan o Pongintirungan
1 Maan di boyoon do modsisinding. Sinding di Daud. Mogondos oku id Tuhan do mongintirung doho'. Basug ko no kopio do momoros dot id doho' dot, “Tulud pogi' do miagal do tombolog do kumaa'd hilo'd konuluhanan, om apasi ko i', 2 tu' naanat noddi tulun dot angaraat i pawakasan diyolo'd pana' om nokotuduk no i pana' do papanaon dot id tulun dit osonong do hiri'd kinoiyonon dit otuong. 3 Tu' aiso' no o milo'd wonsoyon di tulun dot osonong, do tontok dot a' minsingoru o kowoyo-woyoon do tulun,” ka. 4 Nokosuang no o Tuhan do hilo'd Walai dau dit olidang, om hilo'd surga i tirikohonon dau do momorinta'. Piantangan i' dau o koinsanai di tulun do hinonggo nopo om oilaan ngai' dau o wonsoyon diyolo'. 5 Sorisidon i' dau i tulun dit osonong om it araat, om aayi-ayi' no kopio o ginawo dau dot araatan do tulun dit orohian do kororongit. 6 Porotuan dau dot arang di kitapui om tana' do kitapui o tulun dit araat, om hukuman dau iyolo'd tongus di kosorob. 7 Otulid i' o Tuhan om orohian iyau do kowoyo-woyoon dit otulid, om tulun nopo di momonsoi do miagal diri om kokito nod Tuhan om kotutun dau.
Sambayang do Mokitulung
1 Maan di boyoon do modsisinding do tumanud di lagu' do kawalu'. Sinding di Daud. 2 Oi Tuhan, tulungo' no iyahai, tu' aiso' no ot iso' piya'd tulun dot osonong do noolu', aiso' no o tiso' pod tulun dot abantalan dit otulid o ginawo. 3 Mogiudut-udut ngai' nopo iyolo', om mogitipu-tipu' do boros di kabayayat o maan do ponipu'. 4 Oi Tuhan, tingkodo' no i dila' di mimboros do boros di kabayayat. Om sompono' no i kabang dit ongoondos, i mimboros do poingkaa, 5 “Iti i boros dahai o kaanu-anu dahai di pokioonuan dahai. Om poboroson nopondo dahai i korohian dahai'd poboros, om songulun po nga' aiso' i' o milo do mogodu dahai,” ka no. 6 Boros kad Tuhan, “Rumikot oku noddi do baino', tu' ulak-ulakan tomod i tulun do mosikin om songodoi-odoi poo dot orurualan i tulun di maan inggorito'. Onuan ku nondo iyolo' do kosimbayanan di laid no diyolo'd andad-andadon,” ka. 7 Milo ngai' id ponongkuyaan i batos do Tuhan, tu' aiso' i' o longot diri, iri nopo om miagal po di pirok dot inturu' lanako' do monompipi' do hiri'd tapui. 8-9 Pointongkop nopo o tulun dot araat, om oinsanan nopo o tulun do mamarayou dit angaraat. Gompio' kasai' no iyahai, oi Tuhan, om intirungai no iyahai do mantad id kararaat do tulun diri.
Sambayang do Tulun dit Oinggorit
1 Maan di boyoon do modsisinding. Sinding di Daud. 2 Songkuro po koloido' nu do momolihu doho', oi Tuhan? Gisom tuu dot alaid? Songkuro po koloido' nu do lumisok do mantad id doho'? 3 Songkuro po tuu koloido' ku'dti dot id suang do kosusaan? Songkuro po koloido' do ponuabanan om panangadahan do poimponu' kasai' do katangaban o ginawo ku? Songkuro po koloido' dot aala' kasai' oku di pisangod ku? 4 Antangai oku no, oi Tuhan, i Kinorohingan ku, om simbaro' oku no. Pogulio' no i kinoris ku, kada' oku pologoso' dot apatai. 5 Kada' pologoso' i pisangod ku do momoros dot, “Naala' noddi dahai iyau,” ka. Kada' iyolo' pologoso' dot ongotood dot i kinaalaan ku o kataadan. 6 Suminondiu oku i' di kosianan nu dit aiso' o kotingkadan, otood oku indo tu' posion oku i' diya'. Modsinding oku nondo dot id diya', oi Tuhan, tu' osonong tomod ko i' dot id doho'.
Karaaton do Tulun
1 Maan di boyoon do modsisinding. Sinding di Daud. Poingkaa ot id suang do ginawo di tulun dot araat, “Aiso' i' bo o Kinorohingan,” ka. Araat ngai' nopo iyolo', om adalaan no kopio karaat i winonsoi diyolo', aiso' no songulun piya do momonsoi dit otopot. 2 Lumuung no o Tuhan do mantad hilo'd surga dot id tulun, do mogontong daa ondung haro po o songulun di kitoilaan om i tumuku' dau. 3 Nga' oinsanan nopo iyolo' do napalid, om oiyo nopo o kararaat diyolo'. Aiso' no ot iso' piya diyolo' do momonsoi dit otopot, iso' po nga' aiso' noo. 4 “A' i' tuu iyolo'dti koilo?” kad Tuhan do monguhot. “Oinsanan nopo tuu do basug iti tulun di mingwonsoi dot araat? Tu' kaakan-akanan nopo diyolo' om mongoi po pimpanakau di konunu-nunuan di tulun ku, om a' no iyolo' insan do sumambayang dot id doho',” ka dau. 5 Nga' moddosi indo iyolo', do kokito do moyo-woyo' o Kinorohingan do tulun di mumboyo' dau. 6 Antaban daa di tulun dot araat it osorou di tulun do mosikin do wonsoyon dau, nga' Tuhan i' o monguhup dau. 7 Tuminotos oku no kopio do sumambayang om oonuan i' do kamanangan ot Israil, do mantad hilo'd nuluhon do Sion. A' no daa'ndo ogina-gina' o kotoodo' di tulun dot Israil dot oonuan kawagu iyolo'd Tuhan do kosimbayanan!
I Tulun dit Osorupai do Rumikot dot id Kinorohingan
1 Sinding di Daud. Oi Tuhan, isai o koino-ino do sumuang di Walai'd Sasambayangan dot Agayo? Isai o milo do sumambayang do hilo'd Sion, i nuluhon nu dit olidang? 2 I tulun di mumboyo' do Kinorohingan dot id suang do nunu nopo om i momonsoi kasai' dit otopot, om it otopot om otulid o koboro-boroso', 3 om it a' mimboros do pakaraat do wokon. A' i' iyau momonsoi dot araat dot id tambalut dau om a' popimboros do boros dit aiso' o suang do ponompuraraat di songkoduwo dau. 4 Tumongkiad i' iyau do tulun di niada' do Kinorohingan, nga' pusohon i' dau i tulun di mumboyo'd Tuhan. Sulungon kasai' nopo dau i batos dau, mulong piya dot apagon daa do sumulung. 5 Popoolos i' iyau om a' i' iyau mokianu'd bunga di tusin di pinaalasan om mada' iyau do sisipan do papasala'd tulun dit aiso' o sala'. Isai nopo o tulun do momonsoi'd miagal diri om aiso' no o koligagaanan do gisom dot alaid.
Sambayang di Poimponu' do Kotumbayaan
1 Sinding di Daud. Oi Kinorohingan, gompio' oku no, tu' iya' no o pagandasan ku do mongintirung doho'. 2 Boros kangku dot id Tuhan, “Iya' no o Tuhan ku, koinsanai dit ongosonong do haro dot id doho' om mantad ngai' i' dot id diya',” kangku. 3 A' no ogina-gina' o kosonongo' di tulun dot ongotorodok di songonuon do Tuhan! Korohian ku nopo kopio om poinsugku' daa diyolo'. 4 Tulun nopo di tumuku' do tingolig om poporikot nod kosusaan dot id tinan diyolo'. A' oku i' tumanud diyolo' do papatahak do porsombahan di sumbolion dot id tingolig; om a' oku tumuku' di tingolig diyolo'. 5 Oi Tuhan, iya' poo i haro dot id doho', om iya' o manahak doho' do koinsanai di pokionuon ku! Koposi-posion ku nopo dot id dosunsudan om id suang id palad nu. 6 Osonong tomod i nipuhawang nu dot id doho', om koinsonong tomod do ginawo ku! 7 Royohon ku no o Tuhan, tu' monuduk i' iyau doho', om dongotuong piya nga' moro-boros i' o ginawo ku do popoinsan doho'. 8 Kopuriman kasai' oku i' dot id toning ku o Tuhan, om poingoros iyau doho', om aiso' noddi o koguyu' doho'. 9 Om ounsikou oku noddi om otood oku, om aiso' no o koligagaanan dot opurimanan ku, 10 tu' intirungan oku i' diya' do mantad id kuasa' do kapatayon, om a' nu i' tongkiadan do hilo'd pomogunan do tulun di napatai i tulun di kosianan nu. 11 Potudukon nu i' doho' i ralan di poingkaa dot id koposion. Tontok di hino ko dot id toning ku, om iri no o popotood kopio doho', om poposimbayan doho' do gisom dot alaid.
Sambayang do Tulun dit Aiso' o Sala'
1 Sambayang di Daud. Oi Tuhan, pokinongoho' no iti sambayang ku do mokianu dit otulid, podulo' no iti tihad ku do mokitulung! Pokinongoho' no iti sambayang ku di mantad kopio dot id ginawo ku. 2 Om obian oku indo diya' do momutus ko, tu' oilaan nu i' it otopot. 3 Oilaan nu i' o ginawo ku. Ruminikot ko i' dot id doho' di dongotuong, nosorisid oku no kopio diya' om aiso' i' o nokito nu do korohian ku dit araat. 4 A' oku i' mimboros dot araat do miagal di wokon, minumboyo' oku i' di pinonuhuan nu om a' oku i' tuminanud di kowoyo-woyoon dit ongorongit. 5 Suminusui kasai' oku i' di ralan nu om a' oku i' nokoumbal do suminansala'. 6 Sumambayang oku dot id diya', oi Kinorohingan, tu' sumimbar ko i' doho'. Iyo nopoddi om podulo' oku no om pokinongoho' no iti boros ku. 7 Pointalango' no i kosianan nu di kopusahan kopio, om apasi i' iyahai. Hiri nopod toning nu, om aiso' no o ligogon dahai dot orikot iyahai di pisangod dahai. 8 Gompio' oku no do miagal do pomogompi' nu do mato nu, lisoko' oku no dot id dokungkuban do talad nu. 9 Om a' oku i' asangod do tulun dit araat, notutukan oku nod pisangod ku di mokipamatai doho'. 10 Aiso' no o kosian-sianan diyolo' om ongoondos ngai' o koboro-boroso'. 11 Posorili' no iyolo' doho' do dinondo, om honggo nopo o pakayaan ku om hiri no iyolo' do mogihum do ralan do mamahaba' daa doho'. 12 Miagal po iyolo' di singa do magawang doho', om pokitatabpaan oku no daa diyolo' do maan pogianato'. 13 Rikot no, oi Tuhan, ngoyo' saapo' i pisangod ku om alaon no iyolo'! Poiduwo' oku no do mantad id tulun dot araat dot i gayang nu o popoidu' doho'! 14 Poiduwo' oku no do mantad id tulun di monimung do dapu' diyolo' do hiti'd pomogunan. Hukuman no iyolo' di koinggoritan di notimung nu do porotuon dot id diyolo'. Orotuan po daa di pomohukum nu i tangaanak diyolo' om i manangaki diyolo'. 15 Nga' iyoho' nopo om kokito oku indo diya', tu' aiso' i' o sala' do nowonsoi ku, om oposik oku nopondo om oponu' oku id kataadan tu' poingoros ko i' doho'.
Sinding di Daud di Nakamanang Iyau
1 Maan di boyoon do modsisinding. Sinding di Daud, i susuhuon do Tuhan. Sininding o sinding diti dot id Tuhan do tontok di nokoidu' i Daud do mantad id di Saul om id pisangod dau. 2 Osianan oku no kopio diya', oi Tuhan, iya' no o tadon do kinoris ku. 3 Tuhan no o kointirungan ku, iyau no o kuta' dit apanggor dot intirungon ku. Iri no Kinorohingan ku o kointirungon ku, om aiso' no o koligagaanan ku do poinsugku' dau. Miagal po iyau di kolid do mongintirung doho', intirungan oku om gompion oku dau. 4 Lumohou oku nod Tuhan, om poiduwon oku i' dau do mantad id pisangod ku. Royohon ku no o Tuhan! 5 Posorili' po doho' o kapatayon, om malit doho' i tumbak do mamaraag. 6 Posorili' no doho' o kapatayon, om nakataan no di lobong o pamalawa' dau doho'. 7 Luminohou oku'd Tuhan do tontok dit id suang oku'd kosusaan, luminohou oku'd Kinorohingan ku do mokitulung dau. Norongou i' dau i boros ku do hiri'd Walai dau, pinokinongou i' dau i tihad ku do mokitulung. 8 Om guyu' noddi om gogor iti pomogunan, om i pinoimpahan do nuluhon nga' guminuyu' om guminogor, tu' tuminogod no kopio o Kinorohingan. 9 Muntu-nguntu' po o lisun do lumabus do mantad id todung dau, om sinikit do tapui om popou o lumabus do mantad id kabang dau. 10 Piangkango' nopo dau ilo tawan om lintuhun no do mitonggoi'd haun dit otuong do hiri'd siriba' do lapap dau. 11 Osiau nopo iyau do tuminulud dot id sakai di moloikat di roitan do kerub, om huminombo iyau dot id sakai di talad do ribut. 12 Tinirung dau do totuong o tinan dau, om nosorili' iyau do haun dit akapal om poimponu' do waig. 13 Lumopuson nopo di haun dot otuong o karambatu om kalab do tapui do mantad id kodumaat dit id toguang dau. 14 Om ngorod noddi o Tuhan do mantad hilo'd tawan, om norongou'ddi o boros dau, iyau it Asawat Kopio. 15 Papanao' no dau i pana' dau om pogitotongkiad nopo i pisangod dau; om santangkus-tangkus poddi iyolo' do mogidu' do kalab-kalaban do kodumaat. 16 Om kointalang nopoddi i nanad do rahat, om koimbulai ngai' i pinoimpahan do katanaan, do tontok di tinogod do Tuhan i pisangod dau om di ginarangan dau iyolo' dot atatagadan. 17 Poroloyo' nod Tuhan o longon dau do mantad hilo'd sawat om gayato' oku no, om potindalo' oku no do mantad hiri'd waig dit aralom. 18 Pinoidu' oku dau do mantad id pisangod ku dit ongokoris tomod om mantad id koinsanai di tulun dit araatan doho' tu' adalaan no kopio kokoris om a' oku no kotori'. 19 Tontok dit id suang oku do kosusaan, om nongoi oku daa diyolo' songodo', nga' nintirungan oku id Tuhan. 20 Tinulung oku i' dau do suminoliwan do mantad id koligagaanan, pinasi oku i' dau tu' osianan i' iyau doho'. 21 Somulian oku id Tuhan tu' otopot i' o wonsoyon ku, om barakatan oku i' dau tu' aiso' i' o sala' ku. 22 Minumboyo' oku dit oturan do Tuhan, om a' oku i' tuminongkiad do Kinorohingan ku. 23 Napadul ngai' ku i' i Tourat dau, om a' ku i' sinongkiwal i ponuhuan dau. 24 Oilaan i' dau dot aiso' o sala' ku, om mininsodu' oku di wowonsoyon dit araat. 25 Om somulian oku i' dau tu' iri i' i korohian dau o wonsoyon ku, om oilaan i' dau dot aiso' o sala' ku. 26 Oi Tuhan, otorodok ko i' dot id tulun dit otorodok dot id diya', om osonong tomod ko dot id tulun dit aiso' o kabara-barasan. 27 Osonong ko i' dot id tulun dit osonong, nga' saapon nu i' i tulun dit araat. 28 Posion nu i' i tulun di minsiriba', nga' poinsiribaon nu i' i tulun di minggayo-gayo. 29 Iya' no o manahak doho' do tanawau, oi Tuhan i Kinorohingan ku, om iya' o mongidu' di totuong ku. 30 Onuan oku diya' do kokorisan do sumaap do pisangod ku om kuasa' do tumolibamban di tolig di pogintirungan diyolo'. 31 Aiso' i' o bohiton di wonsoyon do Kinorohingan, om milo kopio do ponongkuyaan o batos dau. Tu' miagal iyau do kolid do tamas dot id koinsanai di tulun di mintirung dau. 32 Tuhan noo o Kinorohingan, Kinorohingan noo o manahak dati' do kointirungan. 33 Iyau no i Kinorohingan di popokoris doho', om i poposimbayan do tindalanon ku. 34 Pinokoris dau o gakod ku do miagal di gakod do tambang, om ginompi' oku dau do hilo'd konuluhanan, gisom dot aiso' o kinoligagaanan ku. 35 Tinudukan oku dau do sumangod, om milo oku iddi do manganat di pana' dit ologod. 36 Oi Tuhan, nintirungan oku i' diya' om pinasi oku diya', iri no i gogompi' nu o pinapabantug doho', om i sinundu nu o minomogompi' doho'. 37 A' oku i' diya' pinologos do natangkap, om a' oku insan karatu'. 38 Gusaon ku nopo i pisangod ku do gisom dot aala' ku iyolo', om a' oku i' mundorong dot a' ku po apatai iyolo'. 39 Binobog ku iyolo' do gisom dot a' no iyolo' kotungag, poingiliu po iyolo' do nangaala' dot id toguang ku. 40 Nonuan oku diya' do kokorisan do sumangod om kamanangan do suminangod do pisangod ku. 41 Pinogidu' nu i pisangod ku do mantad id doho', patayon ku nopo it araatan doho'. 42 Mingihad po iyolo' do mokitulung nga' aiso' no o tiso'd tulun do mongoi ponulung diyolo', lumohou daa iyolo'd Tuhan nga' a' i' iyau sumimbar. 43 Minumuk ku iyolo' gisom do miagal po iyolo' di pupuk do tilibon do ribut. Pingulakan ku po iyolo' do miagal do burutak do hiri'd ralan. 44 Pinasi oku diya' do mantad id tulun dit obinsaap, om siniliu oku diya' do pomorinta' do koinsanai di bansa', om bansa' dit a' mantad ku otutunan nga' nosiliu noddi do susuhuon ku. 45 Iri piya bansa'd suwai nga' minsiriba' i' dot id doho', om orongou oku nopo diyolo'd monuhu' om mumboyo' i' iyolo'. 46 Atagakan tomod nopo iyolo' do kosioho', om pananggagaran po iyolo' do sumoliwan di kuta' do pogintirungan. 47 Poimpasi i' o Tuhan! Royohon no i mogobi' doho'! Popinsunudo' no i kogoyoo' do Kinorohingan di minamasi doho'. 48 Nonuan oku dau do kamanangan do suminangod di pisangod ku, om pinoporintaan dau doho' i piro-piro o bansa'. 49 Om pinasi oku dau do mantad id pisangod ku. Om nonuan oku dau do kamanangan do suminangod di pisangod ku, om nintirungan oku dau do mantad id tulun dit orongit. 50 Om iri no o kapamarayahan ku diya' dot id pogialatan di bansa', om modsinding oku do mamarayou diya'. 51 Onuan do Kinorohingan do kamanangan dot agayo i raja' dau, om osianan kasai' i' iyau di tulun di nopili' dau, i Daud om i sinakagon dau do gisom dot alaid.
Kagayaan do Kinorohingan do Kointalang dot id Winonsoi Dau om id Oturan Dau
1 Maan di boyoon do modsisinding. Sinding di Daud.
Kagayaan do Kinorohingan dot id Winonsoi Dau
2 Popointalang i' kopio ilo tawan do kagayaan do Kinorohingan, om popinsusui di nongowonsoi dau dit angagayo kopio. 3 Polombuson i' do tadau o habar diri dot id tadau di sumusuhut, om posusuyon di totuong iri dot id totuong dit id dabantalan. 4 Aiso' id komi om aiso' o boros diyolo', om aiso' o tuni dot orongou. 5 Nga' kotongkop id pomogunan o boros diyolo' om orongou i' do hilo'd tisan do tana'. Winansayan do Kinorohingan do tiyonon ilo tadau do hilo'd tawan, 6 om mimbulai nondo iri do dongkosuabon do miagal di tanakwagu dot otood tomod do mongoi kawin, om miagal di tulun di mananangkus do sitangkus no dot id pilumbaan. 7 Mulai nopo i tadau dot id tisan do tawan om dumarapas no do kumaa dot id tisan ponong hilo'. Om iso' po nga' aiso' no o milo do lumisok do mantad id kolosuo' di tinitiu dau.
Oturan do Tuhan
8 Oturan nopod Tuhan om aiso' no o bohiton, om manahak do kokorisan do wagu. Ponuhuan nopod Tuhan om milo id ponongkuyaanan, om manahak do toilaan dot id tulun dit aiso' o toilaan. 9 Tourat nopod Tuhan om ongotopot i', om tulun nopo di mumboyo'ddi om kaanu no do kosimbayanan. Ponuhuan nopod Tuhan om otulid i' om poposuhut do tulun. 10 Sumambayang nopo dot id Tuhan om osonong tomod i', om mositi' nod wonsoyon kasai' o miagal diri. Oturan nopod Tuhan om milo i' do ponongkuyaanan, otulid i' iri do gisom dot alaid. 11 Oturan nopod Tuhan om agayo i' o gatang ko' mantad do tamas di nosompipi', om oomis ko' mantad di paha' dit aiso' o rolot. 12 Manahak doho' iri do toilaan, iyoho' i susuhuon nu, om somulian oku tu' numboyo' ku i' iri. 13 Aiso' i' o koilo do kasalaan dau dot iyau om iyau, poiduwo' oku no do mantad id kasalaan ku di songillisok, oi Tuhan. 14 Om poinsoduwo' oku no do mantad id dusa di tomodon, kada' pologoso' iri do momorinta' doho'. Om aiso' indo o kabara-barasan doho' om koidu' oku do mantad id kararaat do dusa. 15 Maha' daa om kohubayaan nu iti boros ku om iti pomusarahan ku, oi Tuhan iya' no i pogintirungan ku, om i gampamasi doho'!
Sambayang do Mokianu'd Kamanangan
1 Maan do boyoon do modsisinding. Sinding di Daud. 2 Maha' daa om simbaron ko'd Tuhan do tontok dot id suang ko'd kosusaan! Maha' daa om intirungan ko di Kinorohingan di Yakub! 3 Maha' daa om paatadan ko dau dot itulung do mantad id Walai'd Sasambayangan dit Agayo om onuan ko di monguhup do mantad hilo'd Nuluhon do Sion. 4 Maha' daa om romiton ngai' dau i porsombahan nu om orohian iyau do koinsanai di porsombahan di sumbolion. 5 Maha' daa om patahakon dau diya' o koinsanai di korohian nu om popoundar do koinsanai dit osorou nu'd wonsoyon. 6 Om mamangkis toko' nogindo dot atataadan do nakamanang ko om ramayon dahai i kinamanangan nu do mikuwo'd mamarayou'd Kinorohingan toko'. Om maha' daa om patahakon ngai'd Tuhan i pokionuon nu. 7 Oilaan ku noddi do baino' dot onuan do Tuhan do kamanangan i raja' di nopili' dau, om simbaron dau iyau do mantad hilo'd surga, i kinoiyonon dau dit olidang, om onuan do Tuhan i raja'ddi do kamanangan dit agayo dot i kuasa' dau o papamanang. 8 Haro i' o wookon do tulun do mogondos di korita'-kuda' diyolo' do don sumasangod om tulun nod suwai om mogondos di kuda' diyolo', nga' iyati' nopo om a' i' iyo'ddi, iyati' nopo om mogondos i' di kuasa'd Tuhan, i Kinorohingan toko'. 9 Tulun nopod miagal diri om kasadu i' om aratu', nga' iyati' nopo om kotungag i' om apanggor do poingkakat. 10 Onuwai nod kamanangan i raja', oi Tuhan, simbaro' no iyahai do tontok do sumambayang iyahai.
Rumayou di Kinamanangan
1 Maan di boyoon do modsisinding. Sinding di Daud. 2 Osonong tomod o ginawo di raja', oi Tuhan, tu' nonuan nu iyau do kokorisan. Otood iyau tu' pinamanang nu i' iyau. 3 Pinatahak ngai' nu dau o koinsanai di korohian do ginawo dau, om pinohubayaan nu i pinokianu dau. 4 Rumikot ko dot id dau do mikuwo'd barakat di mabai-labai, om tinupian nu iyau do tupi' do tamas di don raja'. 5 Minokianu iyau do koposion, om nonuan nu i' iyau do tumur dot anaru, i koposion do poingompus. 6 Agayo o kagayaan dau tu' nuhupan nu i' iyau om nonuan nu iyau do kobontugan om kagayaan. 7 Moyo-woyo' kasai' i' dau i barakat nu do gisom dot alaid om otood tomod iyau tu' poingoros kasai' ko i' dau. 8 Mogondos i' i raja', do Tuhan, it Osundu Kopio, om aiso' indo o koligagaanan dau do gisom dot alaid, tu' osianan kasai' i' o Tuhan dau. 9 Atangkap ngai' indo di raja' i pisangod dau om tangkapon ngai' dau i tulun dit araatan dau. 10 Rumikot nopondo iyau do miagal do tapui di molob-ngolob om patayon ngai' nopo dau iyolo'. Patayon nondod Tuhan iyolo' dot atatagadan iyau, om sorobon nondo iyolo' di tapui. 11 Aiso' nondo o tiso' piya di sinakagon diyolo' dot apasi, tu' patayon ngai' nopo iyolo' di raja'. 12 Minsorou nopo daa iyolo' do sumaap dau, nga' a' i' iyolo' nakamanang. 13 Panaon indo dau iyolo' di pana' dau om gisom do manangkus nopo iyolo'd mogidu'. 14 Royohon no dahai iya', oi Tuhan, tu' agayo i' o kuasa' nu! Modsinding nondo iyahai do mamarayou di kokoriso' nu.
Sambayang do Tontok do Haro Kosusaan om Sinding do Mamarayou
1 Maan di boyoon do modsisinding. Tumanud di lagu' do: tambang di dongminsusuab. Sinding di Daud. 2 Oi Kinorohingan ku, oi Kinorohingan ku, nokuro tu' tinongkiadan oku diya'? Mihad-ihad oku po do mokitulung, nga' aiso' i' o nokorikot do mongoi ponulung doho'. 3 Oi Kinorohingan ku, millohou oku diya' di dangadau, nga' a' ko i' sumimbar, om sumambayang oku di dongotuong nga' aiso' i' o kosimbayanan do ginawo ku. 4 Nga' iya' i' i raja' dit olidang kopio, i pingroyohon do tulun dot Israil. 5 Minogondos i' diya' i komolohingan dahai, minogondos iyolo' diya', om pinasi nu iddi iyolo'. 6 Mininglohou iyolo' diya' om nokoidu' iddi iyolo' do mantad id koligagaanan, minogondos iyolo' diya' om a' iddi iyolo' noiman-iman. 7 Nga' iyoho' nopo om okon oku no ko' tulun, tu' miagal oku pod tonggiluang, dot indaraaton om hingi-hingion do koinsanai'd tulun. 8 Mongirak-irak ngai' nopo doho' i tulun di kokito doho', sontondila-dila' nopo iyolo' om sombingog-bingog o tulu. 9 Boros ka no diyolo', “Sumondiu ko'd Tuhan, nga' nokuro'ddi tu' a' ko i' dau ngoyon posio'? Ondung orohian daa o Tuhan diya', om nokuro'ddi tu' a' ko dau ngoyon tulungo'?” ka no. 10 Iya' i' o pinapasawa' doho' do mantad id tian do tina' ku, gisom dot osonong-sonong oku i', ginompi' oku i' diya' do tontok di ragang oku po. 11 Mantad po di pogkosusuo' oku i' om iya' no o pinagandasan ku, om iya' no kasai' o Kinorohingan ku. 12 Kada' kopio insodu' doho', oi Tuhan, tu' osomok no o kosusaan, om aiso' no o monulung doho' do suwai ko' iya'. 13 Ogumu' tomod o pisangod do songintutuk doho', miagal po iyolo' di sapi' do gonsukod, songinsorili' nopo iyolo' doho', do miagal po di sapi' do gonsukod dot ongorongit do mantad hilo'd pomogunan do Basan. 14 Sontungkabang no iyolo' do miagal di singa, om sanggarom-garom do mongoi panabpo doho'. 15 Aiso' no o kokorisan ku, miagal pod waig di nokotuntug do hilo'd tana' tu' aiso' noddi. Nopisala' ngai' nopo o langaban ku, om ginawo ku nga' oluhoi no do miagal poddi rilin do nalanak. 16 Miagal pod pupuk kotuu o tatalanan ku, om poinsokot po dot id kahad o dila' ku. Tongkiadai tomod oku nopo diya', oi Tuhan, do miagal po di tulun do napatai do hiri'd lobong. 17 Notutukan oku pod tulun dit angaraat, miagal po iyolo'd tasu dit ogumu' do tuminutuk doho', mingkokot po iyolo'd longon om gakod ku. 18 Atalang ngai' po o tulang ku, songinsonsod po i pisangod ku do montong doho'. 19 Nundi' diyolo' ondung isai o kaanu di rasuk ku dit anaru, om pogiduwo-duwoo' nogiddi diyolo' i pakayan ku. 20 Kada' nogi' kopio insodu' doho', oi Tuhan, siahai nod mongoi ponulung doho'. 21 Poiduwo' oku no do mantad id gayang diri, poiduwo' oku no do mantad id tasu di manabpo. 22 Poiduwo' oku no do mantad id singa, aiso' no o pokukurayan ku dot id toguang di baanan do sapi' di lalang. 23 Sunudan ku nondo i tulun ku di nongowonsoi nu, om royohon ku nondo o ngaran nu do hilo'd pitimungan diyolo'. 24 Boros kangku'ndo, “Royohon no dokoyu iyau, iyokoyu i susuhuon do Tuhan. Poinggoyoo' no dokoyu iyau, iyokoyu i sinakagon di Yakub. Tuku' kou no dot id dau, oi tulun dot Israil. 25 A' i' dau iyada-daan i tulun dit ulak-ulakan, om a' olihuan i koinggoritan diyolo'. Om a' i' dau iyolo' iduan, suwai ko' sumimbar i' iyau do tontok do lumohou iyolo' do mokitulung,” kangku'ndo. 26 Royohon ku nondo iya', oi Tuhan, do hiri'd pitimungan do tulun dot ogumu' dot i nongowonsoi nu o kapamarayahan ku. Patahakon ku nondo i porsombahan do sumbolion di nakabatos mantad ku do hiri'd dotoguangan do koinsanai di tulun di tumuku' dot id diya'. 27 Mingyahan nondod makan i tulun do mosikin, om mamarayou'd Tuhan i tulun di rumikot dot id Tuhan. Maha' daa om osimbayan kasai' iyolo' do gisom dot alaid. 28 Oinsanan nopondo o bansa' do kosorou'd Tuhan. Rumikot ngai' nopondo dot id dau o tulun do mantad id pointikid do linsuk diti pomogunan, oinsanan nopondo o bansa'd tulun do tumuku' dot id dau. 29 Tu' Tuhan no o raja' di kikuasa', om iyau no o momorinta' do koinsanai'd bansa'. 30 Tumuku' ngai' nopondo dau i tulun dit ongoondos, om tumuku' ngai' dot id dau o koinsanai'd tulun. 31 Momonsoi ngai' nopondod karaja' dau i sinakagon di sumusuhut, om posunudon nondod tulun o pasal do Tuhan dot id sinakagon diyolo', do gisom do mogisolusuk-lusuk. 32 Om iri piya tulun dit a' po nongosusu nga' sunudan nondo do poingkaa, “Pinasi'd Tuhan o tulun dau,” ka.
Tuhan o Gompomogompi' Doho'
1 Sinding di Daud Tuhan no o gompomogompi' doho', om haro ngai' ku no. 1|90|HK5D Gompomogompi' do dumba'|23.1 2 Pologoson oku dau do mundorong do hiri'd butur dit otomou. Potunudon oku dau do waig dit amu' opuhod. 3 Inwoguan dau o koposion ku. Ahakon oku dau do sumusui di ralan dot otopot, tu' iyo noddi o kowoyo-woyoon do ngaran dau. 4 Mulong piya' do kawaya' oku do kubong dit iyo pod kapatayon o kotuongo', nga' amu' oku i' moddosi do koligagaanan, oi Tuhan, tu' moyo-woyo' ko i' doho'. Iri no tungkat om sukud nu o koinsasamod doho'. 5 Papaharo ko do poginakanan do maan ku, do hiri'd dokito di pisangod ku. Romiton oku i' diya', do miagal do tombului di suahon kopio. Om ihiban nu i sangkir ku do gisom do kalabai. 6 Iri no kosonongo' om kosianan nu o moyo-woyo' doho', do pointikid-tikid tadau do koposion ku. Om miyon oku indo do hiri'd walai nu, oi Tuhan do gisom do poingompus.
Raja' dit Agayo Kopio
1 Sinding di Daud. Tuhan no o sanganu diti pomogunan om koinsanai di songingiyon do hiti'd pomogunan, iti tana' om koinsanai di poingiyon do hiti nga' iyau ngai' i' o sanganu. 2 Pinili' dau i pinoimpahan diti tana' do hilo'd sakai do rahat, om pinoudong dau iri do hiri'd sakai'd waig dot aralom. 3 Isai no ot osorupai do tumakad do hilo'd nulu-nulu do Tuhan? Isai no o kosuang di Walai'd Sasambayangan dot Agayo? 4 Iri no tulun dit otulid o kowoyo-woyoon om pomusarahan, om it a' tumuku' dot id tingolig om a' mamatos dit aiso' o suang. 5 Om barakatan nondo iyolo'd Tuhan om posion dau iyolo', om poboroson indo do Kinorohingan dot aiso' o sala' diyolo'. 6 Miagal noddi o tulun di rumikot dot id Kinorohingan, i mongoi tuku' dot id toguang do Kinorohingan di Yakub. 7 Iwangai ngai' no i wawayaan, iwangai ngai' no i wawayaan di winonsoi di gulu po, om sumuang i' i Raja' dot Agayo kopio. 8 Isai i Raja' dot agayo kopio'ddi? Iyau no i Tuhan, it okoris om poimponu' do sinundu; i Tuhan do nakamanang dot id pinisangadan. 9 Iwangai ngai' no i wawayaan, iwangai ngai' no i wawayaan di winonsoi di gulu po, om sumuang i' i Raja' dot agayo kopio. 10 Isai i Raja' dot agayo kopio'ddi? Iyau no i Tuhan dit Osundu Kopio. Iyau no i Raja' di kikagayaan.
Sambayang do Mokiahak om Mokiintirung
1 Sinding di Daud. Id diya' no, oi Tuhan, o porikatan ku do sambayang ku, 2 iya' no o pagandasan ku, oi Kinorohingan ku! Kada' oku pologoso' dot ointingayam dot aala', kada' pologoso' i pisangod ku do monguntotogod doho'. 3 A' i' aala' i tulun di mogondos diya', suwai ko' iri no tulun dit obinsaap diya' ot aala'. 4 Tudukai oku no do karalan-ralano' nu, oi Tuhan, pointalango' ngai' nori dot id doho'. 5 Tudukai oku no, om miontok i' di korohian nu o kowoyo-woyoon ku, tu' iya' no o Kinorohingan ku di mamasi doho'. Mogondos kasai' oku i' diya'. 6 Oi Tuhan, hondomo' no i kopuhawango' om kosianan nu dit aiso' o kotingkadan, di nokointalang nu do mantad di gulu po. 7 Ompunai no i dusa om i kasalaan ku do mantad dit okoro' oku po. Hondomo' oku no, oi Tuhan, tu' mompus-ompus i' o kosianan om kosonongo' nu. 8 Tuhan nopo om osonong i' om otulid, om potudukon i' dau i ralan dau dot id tulun di kidusa. 9 Tudukan i' do Tuhan i tulun dit osiriba' o ginawo om tumanud i' iyolo' di korohian dau. 10 Woyoon i' dau do mikuwo'd kotorodoko' om kosianan dau o koinsanai'd tulun di tumanud do boros dau om mumboyo' di ponuhuan dau. 11 Bayaano' no i batos nu oi Tuhan, om ompunai no o dusa ku, tu' ogumu' no kopio o dusa ku. 12 Tulun nopo di mumboyo'd Tuhan om otudukan no dau do ralan dit apatut do susuyon diyolo'. 13 Om osimbayan indo kasai' iyolo', om tangaanak diyolo' nga' kotungkus nondo di pomogunan diyolo'. 14 Tuhan no o tambalut do tulun di mumboyo' dau om pogiroton dau i batos dau dot id tulun diri. 15 Poingontong kasai' oku nopod Tuhan, i monguhup doho', om poiduwon oku i' dau do mantad id koligagaanan. 16 Antangai oku no oi Tuhan, om kosianai no doho', tu' iso-iso' oku no, om oluhoi oku. 17 Iduwo' no i katangkabaan ku, om poiduwo' oku no do mantad id koinsanai do kosusaan ku. 18 Antangai no iti kosusaan om koinggoritan ku, om ompunai ngai' no o dusa ku. 19 Antangai pogi' nga' ogumu' tomod moti' o pisangod ku, om a' no ogina-gina' o kototogod diyolo' doho'. 20 Gompio' oku no om kada' oku pologoso' dot aala', tu' rumikot oku i' dot id diya' do mongoi pokiintirung diya'. 21 Maha' daa om ointirungan oku di kosonongo' om kotulido' do ginawo nu, tu' mogondos oku i' diya'. 22 Oi Kinorohingan, poiduwo' no ot Israil i tulun nu, do mantad id koinsanai do kosusaan diyolo'.
Sambayang do Tulun dit Aiso' o Sala'
1 Sinding di Daud. Pokotopoto' oku no, oi Tuhan, tu' otopot i' o wonsoyon ku. Om iso-iso' no kopio o ginawo ku do mogondos diya'. 2 Antangai oku no kopio, om umbalai oku no, oi Tuhan, sorisido' no o korohian om pomusarahan ku. 3 Iri no i kosianan nu dot aiso' o kotingkadan o popotunud doho', om i kotorodoko' nu o momoyo' kasai' doho'. 4 A' oku i' orohian do sumugku' do tulun di gomponipu', om minsodu' oku'd tulun di posiwot. 5 Araatan oku i' do monokiambalut do tulun dit araat, om ilagon ku i tulun dit a' osonong. 6 Oi Tuhan, ougan ku no o palad ku do popointalang dot aiso' o sala' ku, om mamanau oku do tumutuk di pananaraban do porsombahan do tumuku' dot id diya'. 7 Om modsinding oku do sinding do mongunsikou, om popinsunudon ku o koinsanai di nongowonsoi nu di kongopusahan kopio. 8 Orohian oku no kopio di walai dit iyonon nu, oi Tuhan, i kinoiyonon nu di poimponu' do kagayaan nu. 9 Kada' oku patayo' do potonggoyon di tulun do kidusa, om kada' oku poiyoo' di kootuson di gampamatai; 10 i tulun dit araat kasai' nopo o wonsoyon, om i posodia' kasai' nopo do rumamit do tusin do ponisip. 11 Nga' iyoho' nopo om iri it otopot o wonsoyon ku, kosianai no doho' om posio' oku no, oi Tuhan. 12 Nokoinsodu' oku no do mantad id koinsanai do koligagaanan, om osimbayan oku noddi, om royohon ku nondo o Tuhan do hiri'd pitimungan do tulun dau.
Sambayang do Mamarayou
1 Sinding di Daud. Tuhan no o tanawau ku, om i gampamasi doho', om aiso' no o poddosi ku. Tuhan no o manahak doho' do kointirungan do mantad id koinsanai do koligagaanan, om a' oku no kopuriman do moddosi. 2 Soira' nopod rumikot daa i tulun dot araat, do mongoi saap doho' om mumbal daa do mamatai doho', om kasadu indo iyolo' om aratu'. 3 Mulong piya dot oinsanan nopo daa i soudor do tumutuk doho', nga' a' oku i' moddosi, om mulong piya do saapon oku'd pisangod, nga' mogondos kasai' oku id Kinorohingan. 4 Iso' noo o pokionuon ku dot id Tuhan, tu' iso' noo o korohian ku: iri no tu' mokiiyon oku do hiri'd walai'd Tuhan do solinaid ku'd poimpasi, do momurimon di kosonongo' dau, om mokituduk dau. 5 Tontok nopod haro o kosusaan om intirungan oku i' dau, om lisokon oku dau do hiri'd Walai dau, om poiyonon oku dau dot id sakai do pampang dit akawas om aiso' noddi o koligagaanan ku. 6 Om aala' ku nondo i pisangod di songintutuk doho'. Om mimpangkis oku pondo dot atataadan do papatahak do porsombahan do sumbolion do hiri'd Walai'd Sasambayangan dot Agayo, om modsinding oku nondo, om mamarayou oku'd Tuhan. 7 Oi Tuhan, pokinongoho' oku no do tontok do lumohou oku diya', kosianai no doho' om simbaro' oku no! 8 Tontok di minomoros ko do poingkaa, “Rikot no do mongoi sambayang dot id doho',” ka. Om boros kangku do suminimbar, “Rumikot oku i', oi Tuhan. 9 Kada' lisok do mantad id doho',” kangku. Kada' kotogod doho'; kada' uyungo' do posoliwan iti susuhuon nu. Tu' iya' no o gomponguhup doho', kada' kopio oku tongkiadai, om kada' oku iduwai, oi Kinorohingan, i gampamasi doho'. 10 Mulong piya do tongkiadan oku do tapa' om tina' ku, nga' gompion oku id Tuhan. 11 Oi Tuhan, tudukai oku no di korohian nu do wonsoyon ku, om posusuyo' oku no do ralan dit aiso' o koligagaanan, tu' ogumu' no kopio o pisangod ku. 12 Kada' oku no kopio patahako' dot id pisangod ku, tu' saapon oku diyolo' do tudut om ponompurolosi. 13 Oilaan ku i' do kopuriman oku po do kosonongo'd Tuhan do daamot ku'd poimpasi. 14 Pogondos nod Tuhan, ponongkuyaai no, om kada' poluhoyo' o ginawo. Pogondos nod Tuhan.
Sambayang do Mokitulung
1 Sinding di Daud. Lumohou oku diya', oi Tuhan i mogobi' doho', pokinongoho' no iti pokionuon ku! Tu' ondung a' oku diya' simbaron, om kotonggoi oku no di tulun di lumintuhun do hilo'd pomogunan do tulun di nangapatai. 2 Pokinongohon oku nod tontok di millohou oku diya' do mokitulung, om tontok di poinsawaton ku o longon ku do pointuduk do hilo'd Walai'd Sasambayangan dot Agayo. 3 Kada' oku hukumai do potonggoyon di tulun dot araat, om i tulun dot angaraat o wonsoyon. It angaambalut tomod o koboro-boroso' nga' ginawo nopo diyolo' om poimponu' id katagadan. 4 Hukuman no iyolo' dot i winonsoi diyolo' o kopomohukuman, om miontok di kangaraaton do nongowonsoi diyolo', hukuman no iyolo' do miontok di winonsoi diyolo', sulian no iyolo' do miontok di winonsoi diyolo'. 5 A' i' diyolo' pusohon i nongowonsoi'd Tuhan ko' i po i tinaru' dau, om gowoi pondo om hukuman dau iyolo', om punsoon dau do gisom dot alaid. 6 Royohon no o Tuhan, tu' pinokinongou i' dau i tihad ku do mokitulung. 7 Tuhan no o mongintirung doho' om mogobi' doho', om iyau no o pagandasan ku. Monulung i' iyau doho' om popotood do ginawo ku, royohon ku no iyau do mikuwo'd modsinding dot atataadan. 8 Intirungan id Tuhan o tulun dau, om obian i' om posion dau i raja' di nopili' dau. 9 Posio' no o tulun nu, oi Tuhan, om barakatai no i tulun di songonuon nu. Siliu no do gompomogompi' doho', om pitamangan no iyolo' do gisom dot alaid.
Boros do Tuhan dot id Suang do Tongus
1 Sinding di Daud. Pamarayou kou nod Tuhan, iyokoyu i poingiyon do hino'd surga, royoho' no i kagayaan om i kuasa' dau. 2 Royoho' no i ngaran do Tuhan do kikagayaan, tuku' no dot id toguang dau, do mikuwo'd manampakai di pakayan do sumambayang. 3 Orongou i' o boros do Tuhan do hilo'd rahat, ongorod nopo o Kinorohingan di kikagayaan, om mulinggou nopo o boros dau do pointongkop di rahat dot agayo. 4 Orongou i' o boros do Tuhan do mikuwo'd kinoris om kobontugo' dau. 5 Kotipu' id koguasan dot aras o tuni do boros do Tuhan, dot iri piya i koguasan dot aras do hilo'd Libanon. 6 Iyau no i popinsimbul di konuluhanan do Libanon, do miagal di tangaanak do sapi' om iyau o popinsimpod di Nuluhon do Hormon do miagal di tanak do sapi' dit okoro' po. 7 Momoros nopo o Tuhan nga' kumalab nopo o kodumaat. 8 Momoros nopo o Tuhan nga' kogogor nopo o tana' do kowotuan, oguyu' nopo dau o tana' do kowotuan. 9 Moro-boros nopo o Tuhan nga' ongoguyu' nopo o kokoyuan do berangan do hilo'd gouton, om atantag ngai' o roun do kayu om oinsanan do gumiak i tulun di hiri'd Walai'd Sasambayangan dot Agayo do poingkaa, “Royohon no o Kinorohingan, royohon no o Kinorohingan,” ka. 10 Tuhan no o momorinta' do waig dit angaralom, om iyau no i raja' do momorinta' do gisom dot alaid. 11 Onuan do Tuhan do kokorisan i tulun dau, om onuan dau iyolo' do kosimbayanan.
Sambayang do Mongunsikou
1 Sinding di Daud. Sindingon do tontok do manambayang di Walai'd Sasambayangan dot Agayo. 2 Royohon ku no iya' oi Tuhan, tu' pinasi oku i' diya'. Om a' nu pinologos i pisangod ku do monguntotogod doho'. 3 Mihad oku po do minglohou do mokitulung diya', oi Tuhan i Kinorohingan ku, om liningasan oku i' diya'. 4 Om a' oku i' diya' pinologos do kosuang di lobong, tu' pinoguli' nu i' o ginawo ku. 5 Podsinding no do mamarayou'd Tuhan, iyokoyu i tulun dau dit ongotorodok! Soroho' ngai' no i nongowonsoi'd Tuhan, it Olidang Kopio, om pongunsikou no dau. 6 Kototogod nopo dau om oruhai id opupusan, nga' kosonongo' nopo dau om mompus-ompus i' do solinaid do tulun do poimpasi. Illogupon po doti' daa o romou do tontok di dongotuong, nga' kosuabon nopondo om rumikot indo o kataadan. 7 Aiso' no o koligagaanan dot opurimanan ku om boros kangku'ddi dot id suang do ginawo ku, “A' oku nobondo koumbal dot aala',” kangku. 8 Tu' osonong ko i' kopio dot id doho', oi Tuhan, tu' miagal ko pod kuta' do pogintirungan do hilo'd konuluhanan do manahak doho'd kointirungan. Nga' tontok di luminisok ko do mantad id doho', om a' no ogina-gina' o kooriso' ku. 9 Mininglohou oku diya', oi Tuhan, om minokitulung kopio oku diya'. 10 Nunu kopio o kountungan nu do sokiro dot apatai oku? Nunu kopio ot aanu-anu nu dot olobong oku? Milo po toi do mamarayou diya' o tulun di nangapatai? Milo po toi iyolo' do popinsusui di kosonongo' nu dit aiso' o kotingkadan? 11 Pokinongoho' no o sambayang ku, om insianai oku no. Tulungo' oku no, oi Tuhan. 12 Notingalanan nu no do kataadan i katangaban ku, gisom do mintari' oku po dot atataadan, noidu' nu no i katangaban ku, om nosorilian oku no diya' do kataadan. 13 Om a' oku nondo mimbongung-bongung, modsinding oku nondo do mamarayou diya', oi Tuhan, iya' no o Kinorohingan ku, om mongunsikou kasai' oku nondo diya'.
Sambayang do Mogondos do Kinorohingan
1 Maan di boyoon di modsisinding. Sinding di Daud. 2 Oi Tuhan, rumikot oku dot id diya' do mokiintirung diya', om kada' oku no kopio pologoso' dot aala'. Iya' no o Kinorohingan dit otulid, posio' oku no, tu' iti no o sambayang ku! 3 Pokinongoho' no o sambayang ku, posio' oku no kopio do dinondo. Siliu no do miagal do kuta' di pogintirungan do tiyonon ku, i mongintirung om i kapasi doho'. 4 Iya' no i kointirung om i kotingolig doho', woyoo' oku no om ahako' oku no do miagal di nakabatos nu. 5 Paalayo' oku no di lawa' di nakataan no do pamalawa' doho', intirungai oku no do mantad id koligagaanan. 6 Iya' no o pokigompian ku, posion oku indo diya', oi Tuhan tu' Kinorohingan ko i' dit otorodok. 7 Araatan ko i' di tulun di tumuku' dot id tingolig, nga' iyoho' nopo om mogondos oku i' diya'. 8 Otood oku indo om osonong o ginawo ku tu' mompus-ompus i' o kosianan nu doho'. Okito nu i' o koinggoritan ku, om oilaan nu i' o kosusaan ku. 9 A' nu i' pinologos i pisangod ku do manangkap doho', om nonuan oku i' diya' do kosimbayanan do mongoi do honggo nopo o korohian ku. 10 Kosianai no doho', oi Tuhan, tu' id suang oku'd kosusaan, om opodi' po o mato ku dot adalaan do mihad, om olomok oku po tomod. 11 Oluhoi no o tinan ku dot ouru'd tumongob, om iti piya mingihad nga' mongindiba' id tumur ku. Olomok oku no do gama' diti kosusaan ku, om tulang ku piya nga' kotonggoi ngai' nopo dot olomok. 12 Oinsanan nopo i pisangod ku do mongindaraat doho', om untotogodon oku di songkoduwo ku, iri piya tulun dit ongkotutun doho' nga' moddosi i' doho', tu' okito oku nopo diyolo' do hiri'd ralan om manangkus nopo iyolo'd mogidu'. 13 Nokolihu ngai' no doho' o tulun, miagal nopoddi napatai oku no. Miagal oku poddi rinomos. 14 Ogumu' tomod o pisangod dot orongou ku do mogikonos-konos, nosorilian oku pod kopoddosian. Oinsanan nopo iyolo' do mogipapakat do sumaap doho', om sontima-tima' do mamatai doho'. 15 Nga' pagandasan ku nopo iyoho', om iya' i' oi Tuhan, tu' iya' no o Kinorohingan ku. 16 Gompion kasai' oku i' diya', poiduwo' oku no do mantad id pisangod ku, om mantad id tulun di monginggorit doho'. 17 Pohubayaai no o susuhuon nu, posio' oku no tu' mompus-ompus i' o kosianan nu. 18 Lumohou oku diya', oi Tuhan, om kada' oku pologoso' dot ointingayam. Baya' nopo dot ointingayam i tulun dot araat, om koongoi do hilo'd pomogunan di tulun di nangapatai. 19 Pologoson nopo dot ongobobou i tulun do goudut om koinsanai di tulun dit ongoondos om i minggayo-gayo, i mongindaraat do tulun dit otulid o ginawo. 20 A' no milo'd boroson o kosonongo' di nongkoopi' nu do patahakon di tulun di momusou diya'! Koilo ngai' no o tulun do kosonongo' nu, om i pomogompi' nu'd tulun di mogondos diya'. 21 Intirungan nu i' iyolo' dot id doros nu tu' hiri no o haro kosimbayanan om aiso' o koligagaanan do mantad id pakat do tulun dot araat. Intirungan nu i' iyolo' dot id kinoiyonon dit osimbayan om it a' orikot do pongindaraat do pisangod diyolo'. 22 Royohon no o Tuhan! Tu' pinointalang i' dau dot id doho' i kosianan dau dit agayo kopio, do tontok di notutukan oku om sinangod oku do pisangod. 23 Minodosi oku daa'ddi om osorou ku nopo om ouyung oku no kopio dau do mantad id doros dau. Nga' norongou i' dau o tihad ku, do tontok di luminohou oku do mokitulung dau. 24 Kosianai nod Tuhan, koinsanai dokoyu i tulun dit ongotorodok. Intirungan id Tuhan i tulun dot ongotorodok, nga' hukuman i' dau i tulun dot ongoondos, do miontok di nongowonsoi diyolo'. 25 Pokorison no om pogiroton no o ginawo, koinsanai dokoyu i mogondos do Tuhan.
Pogokuan om Koompunan
1 Sinding di Daud. Sinding do monuduk. Olumaag no i tulun di noompunan o dusa, om i noompunan o kasalaan dau. 2 Olumaag no i tulun dit a' do Tuhan pasalaon, om it a' orohian do monipu'. 3 Tontok dit a' ku po naakun o dusa ku, om oluhoi oku no dot ouru do monongodou-ngodou'd mihad. 4 Tadau om totuong nga' hukuman oku i' diya', oi Tuhan, gisom do naayi' no tomod o kokorisan ku, do miagal po di bolobou dot otuu di kolosuo' do tadau. 5 Om okuno' ku noddi o dusa ku dot id diya', om a' ku no linisok i kasalaan ku. Kinoiso-iso' ku no kopio o ginawo ku do magakun diri dot id diya', om nompunan ngai' nu iddi i dusa ku. 6 Iyo nopoddi om apatut no do sumambayang dot id diya' i tulun nu dit otorodok do tontok do haro o kosusaan, tu' soira' nopondo do tumigowo do rumikot o kosusaan do miagal di lumpadang do luyud, om a' indo iyolo' orikot diri. 7 Iya' no o pogintirungan ku, tu' iya' no i popoidu' doho' do mantad id kosusaan. Puhadan ku nondod modsinding do mamarayou diya', tu' pinasi oku i' diya'. 8 Boros kad Tuhan, “Tudukan ku indo iya' do ralan dit apatut do susuyon nu, om punangan tiya' om nosihatan ku. 9 Kada' nogi' pimbasug-basug do miagal di kuda' ko' i kaladai, tu' minog pod kakangan om pikoton om mumboyo' nogi',” ka dau. 10 Iri nopo tulun dot araat om a' no milo dot a' oinggorit, nga' tulun nopo di mogondos do Tuhan, om intirungan i' di kosianan dau dit aiso' o kopupuson. 11 Kongotood kou no om kongooropod kou no, iyokoyu i tulun dit ongotulid o ginawo, dot i nowonsoi'd Tuhan o kaarapadan. Pimpangkis kou no dot atataadan, iyokoyu i mumboyo' dau!
Sinding do Mamarayou
1 Pamangkis kou no dot atataadan di nongowonsoi'd Tuhan, koinsanai dokoyu i tulun dit otulid o ginawo. Pamarayou kou no dau, koinsanai dokoyu i mumboyo' dau. 2 Pongunsikou kou nod Tuhan do mikuwo'd mongombit do kecapi, podsindingan no dokoyu iyau do mikuwo'd mongombit di tuunion dot ongkiloting. 3 Podsinding no do sinding do wagu dot id dau, sonongon no o pouuni di kecapi, om mimpangkis no dot atataadan! 4 Milo i' do ponongkuyaanan i boros do Tuhan, otorodok i' iyau dot id suang do nunu nopo o wonsoyon dau. 5 Orohian i' o Tuhan dit ongotopot om ongotulid, koponu' idti pomogunan i kosianan dau dit aiso' o kotingkadan. 6 Koboros nopo o Tuhan do monuhu' nga' kowonsoi no ilo tawan, om koboros nopo dau nga' kowonsoi no ilo tadau, om tulan om rombituon. 7 Pinotimung dau ilo rahat dot id iso' no o kinoiyonon, om nantaban dau i rahat dot agayo om a' i' kalabai. 8 Poddosi nod Tuhan, koinsanai'd katanaan! Pusoho' no iyau, koinsanai'd bansa'd tulun do hiti'd pomogunan! 9 Tontok di minoro-boros o Tuhan, om kowonsoi no iti pomogunan, poboroso' no dau nga' kosiliu ngai' nopo. 10 Raagon id Tuhan it osorou di piro-piro bansa'd tulun, om oduhan dau iyolo' do popowonsoi dit osorou daa diyolo' do powonsoyon. 11 Nga' iri nopo i dau'd nosorou do wonsoyon dau om mompus-ompus i', om aiso' o kopupuson di pokiwawansayan dau. 12 Olumaag no i bansa' di mangakun do Tuhan o Kinorohingan diyolo', olumaag no i bansa' di nopili' dau do sumiliu'd dau'd songonuon! 13 Lumuung no o Tuhan do mantad hilo'd surga om okito ngai' nopo dau o tulun. 14 Lumuung iyau do mantad hilo'd kinoiyonon dau do momorinta' dot id koinsanai di poingiyon do hiti'd pomogunan. 15 Iyau i' o manahak do pomusarahan dot id diyolo', om koilo iyau do koinsanai di wonsoyon diyolo'. 16 Okon i' ko' i kokoriso' do soudor o kamanang-manang do raja', om okon ko' kokodoho' dau o kamanang-manang di soudor. 17 A' i' milo do manahak do kamanangan i kuda' do sasakayon do sumangod, a' i' kapasi i kokodoho' diyolo'. 18 Piantangan id Tuhan i tulun di mumboyo' dau, om i tulun di mogondos do kosianan dau dit aiso' o kotingkadan. 19 Poiduwon i' dau iyolo' do mantad id kapatayon, om posion dau iyolo' do tontok do mononglous. 20 Tuhan no o pagandasan toko', tu' iyau no i gomponguhup om i mogobi' dati'. 21 Iyau no o kataadan toko', om i ngaran dau dot olidang o pagandasan toko'. 22 Maha' daa om moyo-woyo' kasai' dahai i kosianan nu do mompus-ompus, oi Tuhan, tu' iya' no o pagandasan dahai.
Rumayou do Kosonongo'd Kinorohingan
1 Sinding di Daud do tontok di miningulau-ulau iyau dot id toguang di Abimilik gisom do nuyung diri iyau. Mongunsikou kasai' oku nopondod Tuhan, om a' oku tumingkod do mamarayou dau. 2 I nongowonsoi dau o karayahan ku dau, maha' daa om ongkorongou i tulun dot ulak-ulakan do wokon, om ongotood indo iyolo'! 3 Tanud kou no doho' do popinsusui di kogoyoo' do Tuhan, kainou no mogioompot do mamarayou do ngaran dau. 4 Sambayang oku no dot id Tuhan, om sinimbar oku i' dau, om pinoidu' oku dau do mantad id koinsanai do kopoddosian ku. 5 Ongotood nondo i tulun dit inggori-goriton do kokito iyolo' dau, om a' nondo iyolo' koumbal dot oiman-iman. 6 Lumohou no dau i tulun dit aiso' o pokukurayan, om simbaron i' dau iyolo', poiduwon i' dau iyolo' do mantad id koinsanai do kosusaan diyolo'. 7 Tamangan id moloikat do Tuhan o koinsanai do tulun di mumboyo'd Tuhan, om poiduwon dau iyolo' do mantad id koligagaanan. 8 Pimpori-pori nopo pogi' do mongilo ondung songkuro o kosonongo'd Tuhan. Olumaag no i tulun di mintirung dau. 9 Umboyo' kou nod Tuhan, koinsanai dokoyu i tulun dau, tu' tulun nopo di mumboyo' do Tuhan om a' no insan dot okurangan. 10 Iri piya singa nga' koumbal i' do louson dot ooyian do taakanon, nga' tulun nopo di mumboyo'd Tuhan om a' i' ooyian do nunu nopo it osonong. 11 Pokinongou kou no, oi tangaanak ku dit ongomulok po, om tudukan ku i' iyokoyu do momusou'd Tuhan. 12 Asanangan kou daa dot osonong om osimbayan o koposi-posion? Orohian kou daa dot anaru o tumur dokoyu om kikosimbayanan? 13 Ondung orohian kou do miagal diri, om kada' kou pimboros dot araat om kada' kou pongudut. 14 Om tumongkiad no dit angaraat om momonsoi no dot osonong, om tumotos kou no do mogiuulud. 15 Piantangan id Tuhan i tulun dot ongotopot, om pokinongohon dau o tihad diyolo'. 16 Nga' saapon i' dau i tulun di mingwonsoi dot araat, om apatai pondo iyolo' om olihuan no. 17 Pokinongohon id Tuhan i tulun dot otopot do tontok di lumohou iyolo' dau, om poiduwon dau iyolo' do mantad id koinsanai do kosusaan diyolo'. 18 Id doros i' o Tuhan do tulun di tumongob, om posion dau i tulun dit aiso' no o pokukurayan. 19 Ogumu' i' daa o kosusaan dot oumbalan di tulun dot osonong, nga' poiduwon i' iyau'd Tuhan do mantad id toinsanan diri. 20 Gompion i' kopio iyau'd Tuhan, om iso' pod tulang dau nga' aiso' i' ot otipu'. 21 Iri no i kararaat dau o kapatai'd tulun dit orongit, tu' tulun nopo dot araatan di tulun dot ongotopot om atantu' nod ohukuman. 22 Posion id Tuhan o tulun di songonuon dau, om a' ohukuman o tulun di mongoi pokiintirung dau.
Sambayang do Mokiuhup
1 Sinding di Daud. Saapon no i tulun di sumaap doho', oi Tuhan, om songodon no i tulun di manangod doho'. 2 Ngoyon no i kolid om i rasuk nu do don sumasangod om rumikot no do mongoi popoidu' doho'. 3 Paakango' no i tandus om i kapak nu dot id tulun di momogusa' doho'. Sunudai oku no do posion oku diya'. 4 Angaala' po daa om ongointingayam i tulun di mumbal do mamatai doho'. Ongouyung po daa om ongoborulong i tulun di mongupakat do sumaap doho'. 5 Miagal po daa iyolo' di tapol dot otilib do ribut do tontok do gusaon iyolo' di moloikat do Tuhan. 6 Otuong po daa om alamou i ralan do wayaan diyolo' do tontok di pimbabagan iyolo' di moloikat do Tuhan. 7 Pinapataan iyolo' do lawa' do pamalawa' doho' om aiso' i' daa o paantakan diyolo' do mamalawa' doho'; om minongukad iyolo' do luang dot aralom do maan do pohudsuan doho'. 8 Nga' a' i' diyolo' oilaan dot okosupan iyolo' do kapatayon, om kosulung nondo iyolo' di lawa' diyolo' om aratu', om iri no o kapatayon diyolo'. 9 Om otood oku nondo tu' Tuhan o kataadan ku, om osonong o ginawo ku tu' pinasi oku i' dau. 10 Om aayi-ayi' nopondo o ginawo ku do momoros dot id Tuhan do poingkaa, “Aiso' no o koiyo diya'. Tu' intirungan nu i' it ongoluhoi do mantad id tulun dit ongokoris, om intirungan nu i tulun do mosikin do mantad id tulun di mongulok-ulok,” kangku nondo. 11 Pakaraat doho' o koboro-boroso' di tulun dot angaraat om monondos iyolo' doho' do minomonsoi oku'd sala' om aiso' i' o noila-ilaan ku do pasal diri. 12 Araat nogi' o ponomuli' diyolo' do kosonongo' ku, om aiso' noddi o pokukurayan ku. 13 Inda' ka do tontok di sumakit iyolo', om tuminongob oku i' do gisom dot a' oku minakan, 14 do miagal pod panambayang ku do tambalut ko' tobpinai ku, om pointuku' oku pod mogihad diyolo' do miagal pod pogigihad ku do tina' ku. 15 Nga' tontok dit iyoho' ot id suang do kosusaan, om ongotood ngai' nogi' iyolo', om songintutuk nopo iyolo' doho' do monguntotori' doho', om iri piya sompogunan nga' momobog i' doho', om a' tumingkod do mongindaraat doho'. 16 Miagal po iyolo' do tulun di mongumang-umang do tulun di nakakung, om okilou poo o mato diyolo' do montong doho' dot ara-raatan. 17 Oi Tuhan, songkuro po o koloido' nu do poingontong no toomod doho'? Poiduwo' oku no do mantad id pananangod diyolo', om posio' oku no do mantad id singa diti! 18 Om mongunsikou oku nogindo diya' dot id pitimungan do tulun nu, om royohon ku iya' dot id toguang diyolo'. 19 Kada' pologoso' i pisangod ku, i goudut diri, do monguntotogod di kinaalaan ku. Kada' pologoso' i tulun dit araatan doho' dot aiso' o paantakan, dot angasanangan do tumongob oku. 20 A' i' aambalut o koboro-boroso' diyolo', tu' minsimpudali' nogi' iyolo' do tudut dot id tulun dit orohian dot oulud. 21 Sanggarang-garang po iyolo' do mintondos doho', “Nokito i' dahai i winonsoi nu,” ka no diyolo'. 22 Nga' nokito nu i' iri, oi Tuhan, om kada' pimbongung-bongung, oi Tuhan, om kada' kopio insodu'. 23 Urolos no, oi Tuhan, obiai oku no, tungag no, oi Kinorohingan ku, om tulungo' oku no. 24 Otulid ko i' oi Tuhan, i Kinorohingan ku, om poboroso' no dot otopot oku, kada' kopio pologoso' i pisangod ku do monguntotogod doho'. 25 Kada' iyolo' pologoso' do mimboros dot id suang do ginawo diyolo' do poingkaa, “Napatai toko' noddi iyau! Om iri no kopio o korohian toko',” ka. 26 Aala' po daa om oborulong i tulun di monguntotogod doho' di maso ku dot id suang do koinggoritan. om ointingayam po daa om oindaraat i tulun di momoros do poimaha-maha' iyolo' ko' iyoho'. 27 Maha' daa om mimpangkis nondo dot atataadan i tulun dit orohian do pokotopoton oku om minghulit do mimboros do poingkaa, “Agayo no kopio o Tuhan, om orohian iyau dot osimbayan o susuhuon dau,” ka. 28 Om popinsusuyon ku nondo o kotulido' nu, om monongodou-ngodou oku do mamarayou diya'.
Karaato' do Tulun om Kosonongo' do Kinorohingan
1 Maan di boyoon do modsisinding. Mantad id di Daud i susuhuon do Tuhan.
Karaato' do Tulun
2 Pinglugutan do dusa o lugu' do ginawo do tulun dit araat, gisom do magada' iyau do Kinorohingan, om a' momusou dau. 3 Om osorou nopo dau nga' a' nod Kinorohingan oimbulayan i dusa dau om a' ohukuman iri, tu' oondos i' kopio iyau. 4 Koboro-boroso' nopo dau om noponu' pod kararaat om tudut, a' no iyau milo do momonsoi di kopunong om it osonong. 5 Daamot nopo dau do poillii do hiri'd toodopon om minsorou no iyau dit angaraat, iso' pod wonsoyon dau nga' aiso' no ot osonong, om aiso' ot adaan dau dit araat.
Kosonongo' do Kinorohingan
6 Korikot i' do hilo'd tawan o kosianan nu dit aiso' o kotingkadan oi Tuhan, om kosunggu do tawan o kotorodoko' nu. 7 Miagal pod nuluhon dit akawas o kosonongo' nu, om miagal do korolomo' do rahat o kotulido' nu. Gompion nu i' o tulun om nintorusan. 8 Oi Kinorohingan, a' no kopio milo'd bolion o kosianan nu dit aiso' o kotingkadan. Id sahau po di talad nu o kointirungan dahai. 9 Poginakanan dahai i taakanon di pinatahak nu, om pinologos nu iyahai do minum do mantad id bawang do kosonongo' nu. 10 Iya' no o tadon do koposion do koinsanai di songimpasi om iri no i tulinau nu o kokito-kito dahai do tanawau. 11 Maha' daa om potilombuson nu o kosianan nu dot id tulun di kotutun diya', om osonong ko dot id tulun dit otulid o ginawo. 12 Kada' pologoso' i tulun dot ongoondos do mumang doho', om kada' pologoso' i tulun dot angaraat do popoggidu' doho'. 13 Antangai pogi' o nokorotuon di tulun dot angaraat, hilo' no o nokoilihon diyolo' om a' no iyolo' kotungag kawagu.
Kokoyoon di Tulun dot Araat om Kokoyoon di Tulun dot Osonong
1 Mantad id di Daud. Kada' katangkabo do mingwonsoi piya dot araat o tulun, kada' osol do tulun di mingwonsoi di kasala'. 2 Tu' a' i' alaid om atanus no iyolo' do miagal di sakot do rumiou, om matai nondo iyolo' do miagal di totonomon di nolonot. 3 Pogondos nod Tuhan om pomonsoi no dot osonong, om koundorong ko indo do hiri'd pomogunan diri om aiso' o koligagaanan nu. 4 Ihumo' no i kosimbayanan do mantad id Tuhan, om patahakon indo dau diya' i korohian kopio do ginawo nu. 5 Patahako' no o koposi-posion nu dot id Tuhan, pogondos no dau, om uhupan ko i' dau. 6 Om potitihon indo dau i kosonongo' nu, om poulinahon dau i kotulido' nu do miagal di tadau do dong pitangaadau. 7 Polonuto' no o ginawo om andadon nopo o Tuhan do popowonsoi di wonsoyon dau, kada' osol do kokito do tulun di kumaya', ko' kokito po di tulun dit osimbayan tomod do monipu' do wokon. 8 Kada' katangkabo om kada' kotogod, tu' iri nopo om papakaa no dot id kosusaan. 9 Tu' tulun nopo di mogondos do Tuhan om kasanganu i' do pomogunan, nga' tulun nopo dit araat om uyungon i'. 10 A' no alaid om atanus no i tulun dot angaraat, om ihumon po daa'ndo dokoyu iyolo', nga' a' no dokoyu iyolo' okito. 11 Om iri nondo tulun dit ongosiriba' o ginawo o kasanganu di pomogunan om kopuriman do kakayaan om kosimbayanan dit a' ogina-gina'. 12 Iri nopo tulun dot araat om momusorou do mamatai di tulun dot osonong om miit po o nipon dau dot ara-raatan. 13 Nga' irak-irakan id Tuhan i tulun dot angaraat, tu' oilaan no dau dot a' no alaid om patayon no iyolo'. 14 Songingkodong no di tulun dot angaraat o gayang diyolo', om songinganat o pawakasan do pana' do pamatai di tulun do mosikin om it aiso' o pokukurayan, om ponobok di tulun di mingwonsoi dot otopot. 15 Nga' iri indo i gayang diyolo' o kapatai diyolo', om iri pawakasan diyolo'd pana' nga' aayi' nopo dot otipu'. 16 Okuri' piya o dapu' di tulun dot osonong nga' agayo i' o gatang ko' mantad do koinsanai di kakayaan do tulun dit angaraat. 17 Tu' iduwon indo do Tuhan o kokorisan di tulun dot araat, nga' intirungan i' dau i tulun dot ongosonong. 18 Gompion id Tuhan i tulun di mumboyo' dau, om iyolo' nondo kasai' o kasanganu di pomogunan do gisom dot alaid. 19 Tontok piya'ndo do haro o kosusaan diyolo' nga' a' i' iyolo' oinggorit, om kiakanon iyolo' do maso piya do mononglous. 20 Nga' angapatai indo i tulun dot angaraat, om tumanus i pisangod do Tuhan do miagal di tusak do bunga do hilo'd gouton, om tumagak tomod iyolo' do miagal di lisun. 21 Tulun nopo dit araat om milo nod molos nga' a' i' insan do popoguli', nga' tulun nopo dit osonong om opuhawang i' om obintahak. 22 Tulun nopo di nabarakatan do Tuhan om kasanganu i' di pomogunan, nga' tulun nopo di nousung dau om ongouyung indo. 23 Potunudon id Tuhan o tulun di ralan dot apatut do susuyon dau, om intirungan dau i tulun di kohubayaan dau o kowoyo-woyoon. 24 Om mulong piya dot aratu' iyolo', nga' a' i' iyolo' otilombus do poingratu', tu' potungagon i' iyolo'd Tuhan. 25 Molohing oku noddi, om alaid-laid oku no do hiti'd pomogunan, nga' a' oku i' insan kokito do tulun dot osonong do tinongkiadan tomod do Tuhan, om a' oku nokokito di tangaanak dau do mokianu-anu pod wokon do taakanon. 26 Obimpuhawang kasai' i' iyau om popoolos kasai' do wokon, om tangaanak dau nga' osiliu ngai' do barakat dot id dau. 27 Tongkiad no dit angaraat om pomonsoi no dot osonong, om koiyon kasai' i' do hiri'd pomogunan diri i sinakagon nu do gisom dot alaid. 28 Tu' orohian i' o Tuhan dit otulid om a' iyau monongkiad tomod di tulun dau dit ongotorodok. Intirungan i' kasai' dau iyolo' do gisom dot alaid, nga' ongouyung indo i sinakagon di tulun dot araat. 29 Om kasanganu indo di pomogunan i tulun dit ongotopot om koiyon do hiri do gisom dot alaid. 30 Boros nopod tulun dit osonong om kisuang i', om otulid o koboro-boroso' dau. 31 Poopion i' dau i Tourat do Kinorohingan dot id suang do ginawo dau om a' iyau insan do sumansala'ddi. 32 Awangan daa di tulun dot araat i tulun dot osonong om umbalan daa dau do mamatai. 33 Nga' a' i' iyau'd Tuhan tongkiadan tomod dot id suang do longon di pisangod dau, om a' dau pologoson dot ohukuman do tontok do bisara'. 34 Pogondos nod Tuhan om umboyoon no o ponuhuan dau, om pusohon ko indo dau om patahakon dau diya' i pomogunan, om okito nu indo dot ouyung i tulun dit angaraat. 35 Haro o tulun dot araat tomod om i minggayo-gayo do notutunan ku di gulu po, miagal po iyau do kayu sedar di hilo'd Libanon do muung-luung do wokon. 36 Nga' tontok di tuminalib oku om a' noddi iyau hino'd hiri. Ihumo' ku po daa iyau, nga' a' ku no iyau nokito. 37 Antangai no pogi' i tulun dot osonong, om sorisidon do mongilo i tulun dit otopot, tu' kisakag i' moti' i tulun dit orohian do piuludan. 38 Nga' tulun nopod kidusa om opunso nopo, om aayi' dot apatai o sinakagon diyolo'. 39 Posion id Tuhan i tulun dit ongotopot om intirungan dau iyolo' do tontok do haro o kosusaan. 40 Uhupan i' dau iyolo' om poiduwon dau, om posion dau do mantad id tulun dit araat tu' mokiintirung i' iyolo' dau.
Sambayang do Tulun dit Oinggorit
1 Sinding di Daud. Sindingon do tontok do papatahak do porsombahan di kopomuhandaman. 2 Oi Tuhan, kada' oku diya' hukumai dot otogod ko piya, kada' oku inggorito' dot alasu' piya o ginawo nu, 3 tu' notogu' oku no diya' di pana' nu, om nobobog oku diya'. 4 Orualan tomod oku tu' tinogod oku i' diya', om notongkop nopod toruo-ruol o tinan ku do nobungou di dusa ku. 5 Lumonsod oku no tu' olumpadangan oku di dusa ku, tu' adalaan no kopio kawagat iri dot id doho'. 6 Outong po tomod om songhomoi-homoi o gandas ku do nobungou di kababasug ku. 7 Pointuku' oku po, om aiso' no o pokukurayan ku, monongodou-ngodou oku pod mihad. 8 A' no asangalan o kolosuo' do tinan ku, om osomok oku nod apatai. 9 A' oku no kogoos tu' adalaan oku no kopio dot oluhoi, agangau po o ginawo ku, om modoi-odoi oku dot orurualan. 10 Oi Tuhan, oilaan nu i' i kosionuan ku, om orongou nu o todoi ku. 11 Motod-kotod po o tundu-undu' ku do tumangkabo, om aiso' no o kokorisan ku, om mato ku nga' poinruyop poo. 12 Oinsanan nopo i tambalut ku om i songkoduwo ku dot a' mongoi insomok doho', iri piya i sompiiyon ku nga' minsodu' i' doho'. 13 Tulun nopo dit orohian do mamatai doho' om nakapataan nod lawa' do pamalawa' doho', om iri no tulun dit orohian do pokoruol doho' om mima-tima' no do momungou doho', aiso' nopo o kotingkadan diyolo' do mogipapakat do sumaap doho'. 14 Miagal oku po di tulun do bosukon tu' a' no korongou, om miagal di tulun do bobou tu' a' koboros. 15 Miagal oku po di tulun dit a' korongou tu' a' no milo do sumimbar. 16 Nga' mogondos oku i' diya', oi Tuhan, om simbaron oku i' diya', oi Tuhan i Kinorohingan ku. 17 Kada' pologoso' i pisangod ku do monguntotogod doho' do tontok dot id suang oku'd koinggoritan, kada' iyolo' pologoso' do popimboros di kinaalaan ku. 18 Tu' motiratu' oku no, om toruol ku nga' a' nopo otingkod-tingkod. 19 Okunon ngai' ku no o dusa ku, tu' momonu' no doho' iri do katangkabaan. 20 Ongokoris om ongosonong tomod o tinan di pisangod ku, om ogumu' ot araatan doho' dot aiso' o paantakan. 21 Iri nopo tulun dit araat nga' araat nogi' o ponomuli' dit osonong, om sumaap ngai' nopo doho' tu' iyoho' nopo om momonsoi i' dit otopot. 22 Kada' kopio oku diya' iduwai, oi Tuhan, om kada' insodu' doho', oi Kinorohingan ku. 23 Tulungo' oku nod dinondo, oi Tuhan i gampamasi doho'.
Pongokuan do Tulun dit Oinggorit
1 Maan di boyoon do modsisinding. Sinding di Daud. Maan di Yodutun. 2 Boros ka dot id suang do ginawo ku, “Monotos oku nod popoundar do kowoyo-woyoon ku. Om a' ku no pologoson iti dila' ku do popowonsoi doho'd dusa, a' oku no mungkomi do tontok dot id doros doho' i tulun dot araat,” kangku no. 3 Om kada' oku no ungkomi, dot iso-iso' piya o boros nga' aiso' i' o pinoboros ku, mulong piya daa dot i boboroson dit ongosonong! Nga' okon nogi' do kourut o koinggoritan ku. 4 Om noponu' pod katangkabaan o ginawo ku. Maha' nogi' do momusorou kopio oku nga' okon nogi' do tumangkabo oku, om boro-boros oku noddi do poingkaa, 5 “Songkuro po o koloido' ku do poimpasi, oi Tuhan? Songgira' oku'd apatai? Sunudai oku bo do surupu' ku om kogisomon do tumur ku,” kangku no. 6 Oniiba' kopio o pinogisaman nu do tumur ku! Id pagantangan nu nopo iya' om a' i' kosongkuro o konoruo' do tumur ku. Koinsanai'd koposi-posion do tulun om miagal nod pinuhobo do pohoboon, 7 om miagal di sangai tu' tumanus i'. Aiso' i' o kotutuk-tutukon di wonsoyon dau, tu' monimung no iyau'd dapu' nga' a' indo iyau koilo ondung isai o tumungkus diri. 8 Nunu poddi o milo ku'd pagandasan diti, oi Tuhan? Iya' poo o pagandasan ku. 9 Poiduwo' oku no do mantad id koinsanai'd dusa ku, om kada' pologoso' i tulun do basug do mongirak-irak doho'. 10 Mundorong oku nopo, om a' oku mungkomi tu' iya' i' o pinopologos doho' dot oinggorit do miagal diti. 11 Kada' oku nondo hukumai! Tu' oruhai oku nod apatai dot ouru do bobogon nu. 12 Hukuman nu di kototogod nu o dusa do tulun, om miagal ko pod tanai do mamaraag di kasanangan kopio'd tulun. Otopot no kopio do koposion nopod tulun om miagal nod pinuhobo di pohoboon. 13 Oi Tuhan, pokinongoho' no o sambayang ku, om pokinongoho' no o tihad ku. Tulungon oku no do tontok do mihad oku. Iyo oku no iyoho' di taki-aki ku tu' oruuhai do poinsugku' diya'. 14 Pologoso' oku nopo dot iso-iso' om haro i' o kosimbayanan ku dot a' oku po kapamanau, om a' oku nondo hino.
Sinding do Mamarayou om Sambayang do Mokitulung
1 Maan di boyoon do modsisinding. Sinding di Daud.
Sinding do Mamarayou
2 Andad oku nopod Tuhan do mongoi ponulung doho', om pokinongoho' oku noddi dau om korongou no dau i tihad ku. 3 Pinalabus oku dau do mantad id luang di kikoligagaanan, om mantad id buyut dit aralom. Pinoiyon oku dau dot id sakai do pampang om aiso' noddi o koligagaanan ku. 4 Tinudukan oku dau do modsinding do sinding do wagu, i sinding do pamarayou do Kinorohingan toko'. Ogumu' nondo o tulun di kokito'ddi om oronok nondo iyolo' om mogondos iyolo'd Tuhan. 5 Olumaag no i tulun di mogondos do Tuhan, it a' mogondos do tingolig, om a' mamung do tulun di tumuku' dot id tingolig. 6 Ogumu' no kopio o nowonsoi nu dot id dahai, oi Tuhan, i Kinorohingan, aiso' no o koiyo diya'! Ogumu' no i nopinsorou nu dit ongosonong kopio do wonsoyon nu dot id dahai, a' ku no aayi-ayi' do monusui ngai' iri tu' adalaan no kopio kogumu'. 7 Mada' ko i' do porsombahan di sumbolion om i porsombahan do suwai, om a' ko i' mokianu do tayam-tayam di songkoyuon do monorob do hiri'd pananaraban do porsombahan ko' iri po porsombahan do pongidu'd dusa. Suwai ko' nonuan oku nogi' diya' do tolingo do maan do pokinongou di boros nu. 8 Om simbar oku noddi, “Hati oku i', notulis ngai' no do hilo'd Buuk dot Oturan i ponudukan nu doho'. 9 Orohian tomod oku do momonsoi di korohian nu, oi Kinorohingan ku! Poopion ku i' dot id suang do ginawo ku i Tourat nu,” kangku. 10 Pinopinsunud ku i habar dot osonong do pinasi iyahai diya', do hiri'd pitimungan do koinsanai di tulun nu, oi Tuhan. Om oilaan nu i' dot a' oku tumingkod do popinsunud diri. 11 A' ku i' tinoisaan i habar do koposion, pinopinsusui ku i' i kotorodoko' om i ponunulung nu. Okon i' ko' a' ku nungkomian i kotorodoko' om i kosianan nu dit aiso' o kotingkadan dot id pitimungan do koinsanai'd tulun nu. 12 Oi Tuhan, oilaan ku i' dot a' ko tumingkod dot osianan doho', om iri no i kosianan om kotorodoko' nu o mongintirung kasai' doho'.
Sambayang do Mokitulung
13 Notutukan oku pod kosusaan --- a' no ointob-intob o kogumuo'. Nokosupan oku di dusa ku, om a' oku noddi kokito. Ogumu' pori ko' mantad diti tobuk do tulu ku, om aiso' noddi o pokukurayan ku. 14 Posio' oku no, oi Tuhan, tulungo' oku nod dinondo! 15 Aala' po daa kopio om oborulong po i tulun di mumbal do mamatai doho'! Ongkoguli' po daa om ongointingayam po i tulun dit ongkoirak diti kosusaan ku. 16 Ongointingayam po daa i tulun di minonguntotogod doho', tu' naala' iddi iyolo'. 17 Maha' daa om ongooropod om ongotood ngai' i tulun di rumikot dot id diya'. Maha' daa om momoros kasai' o koinsanai'd tulun dit ounsikahan do koposion do mantad id diya' do poingkaa, “Agayo no kopio o Tuhan,” ka. 18 Oluhoi oku no, om mosikin oku oi Tuhan, nga' a' oku i' diya' linihuan. Iya' no o gampamasi doho' om iya' o Kinorohingan ku, rikot no dot oruhai do mongoi ponulung doho'!
Sambayang do Mokilingos
1 Maan do boyoon do modsisinding. Sinding di Daud. 2 Olumaag no i tulun di mamadul do tulun do mosikin, tu' uhupan indo iyolo'd Tuhan do tontok do haro o kosusaan diyolo'. 3 Intirungan indo iyolo'd Tuhan om gompion dau o koposi-posion diyolo', om posimbayanon dau iyolo' do hiti'd pomogunan, om a' dau iyolo' patahakon dot id pisangod diyolo'. 4 Tulungon i' iyolo'd Tuhan do tontok di sumakit iyolo', om lingoson dau i toruo-ruol diyolo'. 5 Boros kangku, “Nokowonsoi oku nod dusa dot id diya', oi Tuhan, nga' kosianai no doho' om lingasai oku no,” kangku. 6 Angaraat tomod o koboro-boroso' di pisangod ku dot id doho'. Boros ka no diyolo', “Soira' ma iyau'lo' dot apatai om olihuan i'?” ka no diyolo'. 7 Iri tulun di mongoi solowot doho' nga' a' i' otulid o ginawo, mintimung no iyolo'd boboroson dit araat do pasal doho', om ngoyon nogindo diyolo' popimboroso' iri do hinonggo-honggo nopo. 8 Oinsanan nopo i tulun dit araatan doho' do mogikonos-konos dot iyoho' o komoyon, om osorou nopo diyolo' nga' araat oku no kopio. 9 Boros ka no diyolo', “Adalaan no kopio iyau'd sumakit, om a' no bo iyau koundaliu do mantad hilo'd toodopon dau do gisom- gisom,” ka no diyolo'. 10 Iri piya tambalut ku'ddi ponongkuyaan kopio ku, i tilang-ilang ku'd makan, nga' sumaap i' doho'. 11 Kosianai no doho', oi Tuhan, om lingasai oku no, om sulian ku indo ngai' i pisangod ku. 12 Om oilaan ku nondo dot ohubayaan ko doho', tu' a' nondo iyolo' kaala' doho'. 13 Uhupan oku indo diya' tu' mingwonsoi oku i' dit ongotopot, om posugkuon oku diya' do gisom dot alaid. 14 Royoho' no o Tuhan, i Kinorohingan do tulun dot Israil! Royoho' no iyau do dinondo om gisom dot alaid. Iyo noddi ot osiliu! Amin!
Buuk do Koduwo
Sinding 42-72
Sambayang do Tulun di Tinanggayan do Pisangod
1 Maan di boyoon do modsisinding. Sinding do ponudukan do sininding di pinuruan do sompiiyon di Kora. 2 Poingkuro nopo i tambang do langadon do waig do palu, om iyo oku no iyoho'ddi do langadon diya', oi Kinorohingan. 3 Langadon oku diya', i Kinorohingan do poimpasi, soira' oku poddi do koongoi kasambayang do hilo'd walai nu? 4 Mihad oku nopo do tadau om totuong, romou poo o ponokotaakanon ku. Aiso' nopo kotingkadan di pisangod ku do minguhot doho' dot, “Hinonggo o Kinorohingan nu?” ka no. 5 Siihad no o ginawo ku do kosorou di gulu po, tontok di minoyo' oku di tulun dot ogumu' do minongoi do hiri'd walai'd Tuhan, om tontok di minomoyo' oku diyolo' do mamanau, i tinimungan do tulun dot ogumu' dit ongotood ngai' do modsinding om mimpangkis do mamarayou'd Kinorohingan. 6 Nokuro tu' tumongob kopio oku? Nokuro tu' tumangkabo kopio oku? Mogondos oku indo do Kinorohingan, om royohon ku pondo kawagu iyau, i Kinorohingan ku om i Gampamasi doho'. 7-8 Siihad po o ginawo ku do hiti'd pomogunan di pinananggayan doho'd pisangod, om iri noddi o kasarahan ku'd Tuhan. Pinorikatan dau do tumbak do katangaban o ginawo ku; iyo pod luyud o kagangahan do luminumpadang doho'; iyo pori di wasai dot opuhod do kotoruk do hiri'd bawang do Yordan do mantad hilo'd Nuluhon do Hormon om Nuluhon do Misar. 9 Maha' daa om pointalangon do Tuhan i kosianan dau dit aiso' o kopupuson do tontok do dangadau, om modsinding oku indo do dongotuong, om sumambayang oku dot id Kinorohingan, i tadon do koposion ku. 10 Poingkaa o poboroson ku dot id Kinorohingan, i Mogobi' doho', “Nokuro tu' linihuan oku diya'? Nokuro tu' oinggorit kasai' oku nopo do gama' do korongito' di pisangod ku?” kangku. 11 Norualan tomod o ginawo ku di pongindaraat diyolo', tu' a' nopo iyolo' tumingkod-tingkod do minguhot doho' dot, “Hinonggo no o Kinorohingan nu?” ka no. 12 Nokuro tu' tumongob kopio oku? Nokuro tu' tumangkabo kopio oku? Mogondos oku indo do Kinorohingan, om mamarayou oku pondo kawagu dau, i Kinorohingan ku, i Gampamasi doho'.
Sambayang do Tulun di Tinanggayan do Pisangod
1 Oi Kinorohingan, poboroso' no dot otopot oku, om obiai oku no dot id toguang do tulun dit a' monongkuyaan do Kinorohingan. Poiduwo' oku no do mantad id tulun di goudut om i tulun dit araat. 2 Iya' no o kointirungon ku, nokuro tu' niduan oku diya'? Nokuro tu' oinggorit kasai' oku nopo do gama' do korongito' di pisangod ku? 3 Pointalango' no i kotorodoko' nu om i katapatan nu, om maha' daa om popotunud doho' iri om poguli' doho' do hilo'd Sion, i nulu-nulu nu dit olidang, om hilo'd Walai'd Sasambayangan dit Agayo, i walai di tiyonon nu! 4 Om koongoi oku indo do hiri'd pananaraban do porsombahan dot id diya', oi Kinorohingan, tu' iya' no o tadon do kataadan ku. Om mongombit oku nogindo di kecapi ku om modsinding oku do pamarayou ku diya', oi Kinorohingan, i Kinorohingan ku. 5 Nokuro tu' tumongob kopio oku? Nokuro tu' tumangkabo kopio oku? Mogondos oku indo do Kinorohingan, om mamarayou oku pondo kawagu dau, i Kinorohingan ku, i Gampamasi doho'.
Sambayang do Mokiintirung
1 Sinding di pinuruan do sompiiyon di Kora. Sinding do ponudukan. Maan di boyoon do modsisinding. 2 Oi Kinorohingan, dahai no kopio'd tolingo o nokorongou'ddi, sinunudan iyahai di taki-aki dahai di susui'ddi, om koinsanai di nongowonsoi nu dot agayo dot id diyolo' di gulu po. 3 I kinowoyo-woyoo' nu do minonguyung di bansa'd suwai om i kinowoyo-woyoo' nu do pinopoiyon di diya'd tulun do hilo'd pomogunan diyolo', om i kinaralan-ralano' nu do minomohukum di bansa'd suwai, om i kinaralan-ralano' nu do pinoposimbayan di diya'd tulun. 4 Okon i' ko' gayang di tulun nu o pinanganu diyolo' di pomogunan diri, om okon i' ko' kinoris diyolo' o nakamanang-manang diyolo', suwai ko' iri i sinundu om i kinoris nu, om i tulinau di tanda' do nakarapou ko, i popointalang dot osianan ko diyolo', o nakamanang-manang diyolo'. 5 Iya' no o raja' ku om Kinorohingan ku, om manahak ko do kamanangan dot id tulun nu. 6 Om i sinundu nu o pinangala' dahai di pisangod dahai, nosoibahan i' dahai i bansa' di sumaap dahai tu' kinoruhang nu i' iyahai. 7 A' oku i' mogondos do pana' ku ko' iti po gayang ku do manahak doho' do kamanangan. 8 Tu' iya' no i minamasi dahai do mantad id pisangod dahai, om iya' o minangala' dit angaraatan dahai. 9 Mamarayou kasai' indo iyahai diya', om mongunsikou iyahai diya' do gisom dot alaid. 10 Nga' baino' nopoddi om notongkiadan nu no iyahai, om pinologos nu iyahai do naala', a' ko noddi moyo' di soudor dahai do mongoi sangod. 11 Pinologos nu iyahai do mogidu' dot opopoddosian di pisangod dahai, om siningolod ngai' diyolo' i dahai'd songonuon. 12 Pinologos nu iyahai do kinorot do miagal do dumba', pinogitongkiad-kiad nu iyahai do hilo'd pomogunan do bansa'd suwai. 13 Dinagang nu i tulun nu dot omura kopio o gatang, do miagal pod aiso' o gatang diyolo' dot osorou nu. 14 Kokito ngai' i' i songkoduwo dahai di winonsoi nu dot id dahai, om monguntotori' poddi om mongirak-irak iyolo' dahai. 15 Siniliu nu iyahai do koirakan dot id pogialatan do bansa', om somporog-porog po iyolo'd mongindaraat dahai. 16 Indaraaton nopo kasai' iyahai om ointingayam po tomod iyahai 17 do kopingrongou di ponguntotogod om pongindaraat di pisangod dahai om i tulun dit araatan dahai. 18 Nosiliu ngai' nopori dot id dahai, dot a' piya daa iyahai nokolihu diya', om a' tuminolibamban di tumpongo nu dot id dahai. 19 A' i' iyahai insan dot a' tuminorodok dot id diya', om a' nogi' iyahai suminaap dit isuhu' nu. 20 Nga' niduan nu i' iyahai dot id pogialatan di nintorusan dot orongit, om aiso' no o pokukurayan dahai, om tinongkiadan nu iyahai do hiri'd odondom o kotuongo'. 21 Ondung nokotingkod daa iyahai do sumambayang dot id diya', oi Kinorohingan dahai, om tuminuku' nogiddi dot id tingolig do tulun do suwai, 22 om atantu' no do noilaan nu i' daa, tu' koilo ko i' do pomusarahan do tulun. 23 Nga' iya' i' o kinaangayan diyolo' kapamatayai dahai, om iyoon po iyahai diyolo' di dumba' di potisumbolion no. 24 Posik no, oi Tuhan! Nokuro tu' koodop ko? Ingkakat no! Kada' nogi' kopio iyahai iyadaai do gisom dot alaid. 25 Nokuro tu' lumisok ko do mantad id dahai? Kada' kolihuwai iti koinggoritan om kosusaan dahai! 26 Omumuk nopo iyahai dot aratu' do hilo'd tana', songingiliu po tomod iyahai do hilo'd pupuk do naala'. 27 Rikot no do mongoi ponulung dahai, posio' no iyahai tu' mompus-ompus i' o kosianan nu.
Sinding dot id Pikowinan do Raja'
1 Sinding di pinuruan do sompiiyon di Kora. Sinding dot osianan. Maan do boyoon do modsisinding. Tumanud do lagu' do: bunga bakung. 2 Noponu' po di boros dot olumis o pomusarahan ku do maso ku do monulis diti sinding do maan di raja'. Dila' ku nopo om miagal po do pinsil di gomponulis tu' posodia' no do popolombus do sinding. 3 Iya' no it oligkang kopio dot id pogialatan do tulun, oilo kopio ko do moro-boros, om pibarakatan kasai' ko do Kinorohingan. 4 Obilo' no ino gayang nu, oi raja' dit osiou, iya' no i kikagayaan om it abantug! 5 Pamanau no do mikuwo'd kagayaan do kumaa dot id kamanangan, do popogirot dit otopot om it otulid. Iri indo kinoris nu o manahak diya' do kamanangan dit agayo! 6 Alahis i' o pana' nu do ponobok do tundu-undu' di pisangod nu, om ahaba' ngai' nopondo o tulun dot id toning do gakod nu. 7 Iri nopondo i pomorintaan di pinopuhawang do Kinorohingan diya', om ogirot kasai' i' do gisom do poingompus. Otulid i' o pomorinta' nu di tulun nu. 8 Orohian ko i' dit otopot om otukanaan ko dit angaraat. Iri noddi o kinopomilian do Kinorohingan diya', iyau i Kinorohingan nu, om minonuntug diya' do kosimbayanan dit agayo po ko' i kosimbayanan di raja'd suwai. 9 Osingud pod tumau do mur, gaharu om cendana o pakayan nu, om ramayon ko di pouuni do tuunion do hilo'd walai'd raja' di linumis do lamai dit agayo o gatang.1|80|HK69F| I kayu-kayu do roitan do mur|45.9 10 Id pogialatan nopo di tongoondu' do hilo'd walai'd raja' om i tangaanak do tondu' do piro-piro o raja', om hiri'd ponong id wanan di tirikohonon nu do poingkakat i raja'd tondu', do kipinakai do tamas dit osompipi'. 11 Oi sawo do raja', pokinongou no diti poboroson ku, lihuwai no i tulun nu om i kowori-worisan nu. 12 Ino no kolumiso' nu o porohian di raja' diya', iyau no o boyoon nu, om a' ko noddi milo dot a' mumboyo' dau. 13 Paatadan ko nondo di tulun do Tirus dot ipuhawang, om tumotos ngai' do momolumbok do ginawo nu i tulun do kaya'. 14 Iri nopo tanak di raja' do tondu' om hilo'd walai di raja', om olumis no kopio iyau. Gaun nopo dau om banang do tamas do winonsoi. 15 Minanangrasuk iyau do gaun di mogisuayan o wotik di nongoi iyau posolowoto' di raja', do tinanud di susuhuon dau'd tongoondu', om iyolo' nogi' nga' suminolowot i' di raja'. 16 Otood tomod om aramai iyolo' do suminuang di walai di raja'. 17 Ogumu' nondo o tangaanak nu'd kusai, oi Raja' ku, do sumowoli di taki-aki nu do momorinta', om silihon nu nondo iyolo' do pomorinta' do pointongkop diti pomogunan. 18 Iti no sinding ku o monusui do kobontugo' nu do gisom dot alaid, om oinsanan nopondo o tulun do mamarayou diya' do tikoompus do maso.
Woyoon om Tulungon Toko' do Kinorohingan
1 Sinding di pinuruan do sompiiyon di Kora. Maan di boyoon do modsisinding. Tumanud di lagu' dot Alamot. 2 Kinorohingan no o kointirungon om kokorisan toko', i posodia' kasai' do monulung do tontok do haro o kosusaan. 3 Om a' toko' noddi minog do moddosi do guyuon piya daa iti tana' om lumiid o nuluhon do hilo'd rahat dot aralom, 4 om ngumorod piya om gumuyu' ilo tumbak do rahat, om ongoguyu' ngai' ilo nulu-nulu do lumapos i tumbak dot agayo. 5 Haro i' o bawang di mongoit do kataadan dot id bandar do Kinorohingan, om hilo'd walai di tiyonon do Kinorohingan dit Asawat Kopio. 6 Poundorong i' o Kinorohingan dot id bandar diri, om a' i' araag i bandar diri, osuab po om rumikot no iyau do mongoi ponulung. 7 Ongooris ngai' o bansa', om pomorinta' nga' angaala' ngai' nopo, kongorod nopo o Kinorohingan nga' otonu' no iti tana'. 8 Moyo-woyo' i' dati' o Tuhan, it Osundu Kopio, iri no i Kinorohingan di Yakub o mongintirung dati'. 9 Kainou pogi' mintong di nongowonsoi'd Tuhan; intong pogi' di nongowonsoi dau di kongopusahan kopio do hiti'd pomogunan. 10 Tiningkod dau o pisangadan do pointongkop diti pomogunan, rinaag ngai' dau i rapo-rapo do sumangod om sinorob ngai' dau iri. 11 Boros ka dau, “Tingkod kou no do mogisasangod om ilaai no dot iyoho' no o Kinorohingan, it Agayo Kopio dot id pogialatan do bansa' om abantug do pointongkop diti pomogunan,” ka. 12 Moyo-woyo' i' dati' o Tuhan, it Osundu Kopio, iri no i Kinorohingan di Yakub o mongintirung dati'.
Kinorohingan o Pomorinta' dit id Sawat Kopio
1 Sinding di pinuruan do sompiiyon di Kora. Maan di boyoon do modsisinding. 2 Pitapapo' no dokoyu o palad dot atataadan, koinsanai do bansa'! Puhadan no dokoyu do modsinding do pamarayou'd Kinorohingan! 3 Koronok nod Tuhan tu' iyau no it Asawat Kopio, iyau no o raja' dot agayo, i momorinta' do pointongkop diti pomogunan. 4 Nonuan toko' dau do kamanangan do suminangod di bansa'd suwai, siniliu toko' dau do pomorinta' do pointongkop diti pomogunan. 5 Pinomilian toko' dau do pomogunan dot iyonon toko', i kaandasan kopio di tulun di kosianan dau. 6 Mongoi nopo o Kinorohingan dot id tirikohonon dau do don raja'! Om tontok noddi dot orongou o gara' om tuni do torumpit dot opuhod kopio! 7 Podsinding no do pamarayou'd Kinorohingan, podsinding no do pamarayou'd raja' toko'. 8 Kinorohingan no o raja' do pointongkop diti pomogunan, royoho' no iyau do sinding o pamarayou. 9 Poirikau o Kinorohingan do hiri'd tirikohonon dau di don raja', iyau no o momorinta' do koinsanai'd bansa'. 10 Rumikot ngai' nopo o pomorinta' do bansa' do mongoi sugku' do Kinorohingan di Abraham. Okoris po iyau ko' mantad do koinsanai'd soudor, iyau no i pomorinta' dot id sawat kopio.
Sion i Bandar do Kinorohingan
1 Sinding do pinuruan do sompiiyon di Kora. 2 Tuhan no it Agayo Kopio, om apatut no do royohon kopio iyau, do hilo'd suang do bandar do Kinorohingan toko', dot id sakai do nulu-nulu dau dit olidang. 3 Sion nopo, i Nuluhon do Kinorohingan, om akawas i' om olumis, iri no bandar di raja' dit agayo kopio o popotood do pointongkop diti pomogunan. 4 Nokointalang nod Kinorohingan dot id sugku' no dau ot aiso' o koligagaanan, dot id suang di kuta' do pogintirungan di hiri'd bandar dau. 5 Minogititimung ngai' i raja', om ruminikot do minongoi panangod di Nuluhon do Sion. 6 Nga' tontok di nokito diyolo' iri, om kangapagag nopo iyolo'; om poddosi ngai' no iyolo' om poggidu' ngai' noddi. 7 Hilo' no iyolo'd nongooris om nongorualan, do miagal poddi tondu' dot orualan do mogkosusu; 8 om miagal do kapal do rahat dit opintanggayan do tongus dit opuhod. 9 Nokorongou toko' no di nongowonsoi do Kinorohingan, om baino' nopoddi om nokokito toko' noddi do hilo'd bandar do Kinorohingan toko', i Tuhan dit Osundu Kopio, om gompion indo dau i bandar diri do gisom do poingompus. 10 Oi Kinorohingan, hilo' nod suang do Walai'd Sasambayangan dot Agayo dot ahandaman kasai' dahai i kosianan nu dit aiso' o kopupuson. 11 Royohon ko i' do koinsanai'd tulun do hinonggo nopo, om nokotongkop do pomogunan o kobontugo' do ngaran nu. Otulid i' o pomomorinta' nu; 12 pologoso' no dot otood i tulun do hilo'd Sion! Pologoso' no dot ongotood i tulun do hilo'd kabandaran do Yohuda! Tu' hinukuman nu i' i pisangod diyolo'! 13 Oi tulun di songonuon do Kinorohingan, pamanau no do tumutuk do Sion om intobon no i walai'd akawas; 14 antangan no i tolig om sorisidon nod mogontong i kuta' do pogintirungan, om milo ko i' do momisunud di sinakagon do sumusuhut. 15 Dot iyau no o Kinorohingan toko', do gisom do poingompus; iyau kasai' no o momoyo' dati' do gisom dot alaid.
Aiso' o Kootuk-Otukon do Mogondos do Kakayaan
1 Sinding di pinuruan do sompiiyon di Kora. Maan di boyoon do modsisinding. 2 Pokinongou kou nodti, koinsanai'd bansa', pokinongou kou no, koinsanai'd tulun do hinonggo nopo do pointongkop diti pomogunan, 3 koinsanai dit angagayo om ongokoro', om oinsanan i kaya' om i mosikin. 4 Atarom nondo o pomusorou ku, om mimboros oku do boros dit aralom o komoyon. 5 Minsingilo oku nondo do boros dit aralom o komoyon, om posondoton ku o komoyon diri do tontok do mongombit oku do kecapi. 6 A' oku i' moddosi do tontok do haro o koligagaanan, om tontok do tutukan oku do pisangod, 7 om tutukan di tulun dit araat di mogondos do kahara-haraan diyolo', om it ongoondos do kakayaan diyolo' dot ogumu'. 8 Songulun po nga' aiso' i' o milo do momoli do ginawo dau, a' i' iyau milo do mambayar do gatang do koposion dau dot id Kinorohingan. 9 Tu' adalaan no kagayo o pambayar do koposion do tulun, aayi-ayi' piya o nunu nopo do maan dau'd pambayar nga' a' i' kabagal, 10 do popoilag dau do kapatayon om pamasi dau do gisom do poingompus. 11 Isai nopo nga' kokito i' do tulun piya dit oilo nga' matai i', om iyo nogiddi i tulun do basug om it aiso' o toila-ilaan, otongkiadan ngai' i' diyolo' i kakayaan diyolo' do potungkusan di sinakagon diyolo'. 12 Lobong no o koiyonon diyolo' do gisom do poingompus, hilo' no iyolo'd poundorong do gisom dot alaid, mulong piya do haro daa o tana' diyolo' di gulu po. 13 Kobontugo' nopod tulun om a' i' milo do momusus do tumur dau, apatai i' iyau do miagal di nintorusan. 14 Antangai pogi' o nongosiliu dot id tulun di mogondos do tinan dau, i kootuson do tulun di sumondiu do kakayaan dau. 15 Miagal po iyolo' di dumba' tu' a' no milo dot a' apatai, om kapatayon no o gumompi' diyolo'. Aala' nondo iyolo' di tulun dot ongotopot, om i tinan diyolo' nga' mipuwoyo' nopo dot apasa' do hilo'd pomogunan di tulun do napatai, it id sodu' no do mantad di walai diyolo'. 16 Nga' posion oku indo do Kinorohingan, om poiduwon oku i' dau do mantad id kuasa' do kapatayon. 17 Kada' karaatai do kumaya' piya o tulun, om sumurut piya o kakayao' dau. 18 A' i' dau milo do tanggayan iri do matai iyau, a' i' milo do tumanud dau i dapu' dau do hiri'd lobong. 19 Mulong piya do naanu ngai' do tulun i korohian dau dot id suang do koposi-posion dau'd dinondo, om pingroyohon iyau tu' koundar kasai' iyau, 20 nga' kokoyoon nopondo dau om hilo' id kinokoyoon di taki-aki dau, i hilo'd kinoiyonon dit otuong kasai' do gisom dot alaid. 21 Kobontugo' nopod tulun om a' i' milo do momusus do tumur dau, apatai i' iyau do miagal di nintorusan.
Sambayang dit Otopot
1 Sinding di Asap Moro-boros o Tuhan, i Kinorohingan dit Osundu Kopio, momolohou iyau dot id pointongkop diti pomogunan do mantad id koulayon om gisom id kotonobon. 2 Mulinau o Kinorohingan do mantad id Sion, i bandar dit olumis kopio. 3 Rumikot no o Kinorohingan toko', om a' no iyau milo do mundorong, molob-ngolob no o tapui dot id gulu-gulu dau, om tongus dot opuhod o pointutuk dau. 4 Lohowon dau o tawan om pomogunan do sumiliu'd sasi', do miontong dau do momutus do tulun dau. 5 Boros ka dau, “Timungo' no dot id toguang ku i tulun dit ongotorodok, iyolo' i minomonsoi'd tumpongo dot id doho', om papatahak do porsombahan di sorobon,” ka. 6 Popimboros ilo tawan dot otulid o Kinorohingan, om iyau no o gompomutus dit otulid. 7 “Pokinongou kou no, koinsanai dokoyu i tulun ku, om moro-boros oku i'. Pasalaon ku nondo iyokoyu, oi Israil, iyoho' no o Kinorohingan, i Kinorohingan dokoyu. 8 Okon i' ko' i porsombahan dokoyu o kopomohukuman ku dokoyu, ko' iri po porsombahan di sorobon di patahakon kasai' dokoyu dot id doho'. 9 A' oku i' manganu do sapi' do mantad hilo'd paun dokoyu, ko' iri po kambing di hilo'd kandang dokoyu, 10 tu' doho' i' di nintorusan do hilo'd gouton, om i tayam-tayam do rinibuan do hilo'd konuluhanan. 11 Koinsanai'd tombolog di sontulud-tulud nga' iyoho' i' o sanganu, om koinsanai dit ongkipinuhobo do hilo'd talun nga' doho' i'. 12 Ondung louson oku daa om a' oku i' minog do momisunud dokoyu, tu' iti nopo pomogunan om koinsanai di hiti'd suang diti om doho' ngai' i'. 13 Mangakan oku toi do tonsi'd sapi' do tontoluhan, om monginum oku toi do raha'd kambing? 14 Pongunsikou no doho', i Kinorohingan dit Asawat Kopio, do maan do ponokoporsombahan dot id doho', om sulungo' ngai' no dokoyu o koinsanai di pinabatos dokoyu dot id doho'. 15 Pomolohou no doho' do tontok dot orikatan kou do kosusaan om poiduwon ku i' iyokoyu, om mamarayou kou indo doho',” ka dau. 16 Nga' boros kad Kinorohingan dot id tulun dit araat, “Nokuro tu' pinghulitan nu do mimboros i ponuhuan ku? Nokuro tu' mimboros ko do pasal di tumpongo ku? 17 A' nu uhang do tudukan tiya' do tontok di kasala' ko, om mada' ko di boros ku. 18 Soira' nopo do kosolowot ko di mananakau om mambalut ko no dau, om monokiwoyo-woyo' ko di tulun do gampahu'. 19 Posodia' kasai' ko nopo do mimboros dit angaraat, a' no mikoduwo o ginawo nu do mongudut. 20 Posodia' ko no do papasala' do tobpinai nu, om mogihum do kasalaan diyolo'. 21 Nongowonsoi ngai' nu noti, om a' oku i' minungkomi, om osorou nu nopo daa'ddi nga' iyoho' nga' iyo iddi. Nga' baino' nopo om togodon ku no iya' om pointalangon ku iti dot id toguang nu. 22 Pokinongou kou nodti, iyokoyu it a' momusou doho', tu' ondung amu' nga' raagon ku no moti' iyokoyu, om songulun po nga' aiso' no o milo do mamasi dokoyu. 23 Pongunsikou no o ponokoporsombahan do pomusou doho', om atantu' no do posion ngai' ku o tulun di mumboyo' doho',” ka dau.
Sambayang do Mokiampun
1 Maan di boyoon do modsisinding. Sinding di Daud 2 do tontok di nokoongoi i Natan i Nabi, kosolowot dau, di nodudun no di Daud i Batsiba. 3 Oi Kinorohingan, kosianai no doho', tu' mompus-ompus i' o kosianan nu. Tonuso' ngai' no o dusa ku, tu' agayo i' kopio o kosianan nu. 4 Lihungo' ngai' no i karaaton ku, om lidangai oku no do mantad id dusa ku. 5 Otutunan ku no o kasalaan ku, om opurimanan kasai' ku i' o dusa ku. 6 Nokowonsoi oku nod dusa dot id toguang nu, om id diya' noo. Om aiso' i' o kasalaan nu do momutus doho', om otulid ko do momohukum doho'. 7 Mantad poddi pogkosusuo' oku nogi' om araat oku no, kasawa' oku nopo om kidusa oku no. 8 Pokionuon nu nopo om katapatan om ginawo dit osombulu' kopio, ponuo' no o pomusarahan ku di toilaan nu. 9 Poinsoduwo' no i dusa ku, om olidang oku i', lihungai oku no, om opurak oku indo ko' i gapas. 10 Pologoso' oku no do korongou dit otood om it osimbayan, om mulong piya do nomumuk oku no daa om nababak oku diya', nga' otood oku indo kawagu. 11 Poungkodomo' no o mato nu do mintong di dusa ku, om tonuso' ngai' no o karaaton ku. 12 Oi Kinorohingan, onuwai oku nod ginawo dit olidang, om onuwai oku nod ginawo di wagu om ginawo dit alanut. 13 Kada' oku poinsoduwo' do mantad id doros nu, om kada' ngoyo' i Rusod nu'd Olidang do mantad id doho'. 14 Onuwai oku no kawagu do kataadan tu' napasi oku no diya', om porohiano' oku no do mumboyo' diya'. 15 Om tudukan ngai' ku indo i tulun di kidusa do koinsanai di ponuhuan nu, om gumuli' indo iyolo' dot id diya'. 16 Poiduwo' oku no do mantad id kapatayon, oi Kinorohingan i gampamasi doho', om otood oku indo do popinsusui di katapatan nu. 17 Oi Tuhan, uhupai oku no do mimboros, om royohon ku indo iya'. 18 Mada' ko i' do porsombahan di sumbolion, tu' ondung manu ko daa, om patahak oku i'. A' ko i' orohian do porsombahan di sorobon. 19 Porsombahan ku nopo oi Tuhan, om i ginawo ku dit oromumuk, tu' a' nu i' iyada' o ginawo di minsiriba' om i kumorologo kopio. 20 Oi Kinorohingan, pointalango' no o kosonongo' nu dot id Sion, om uhupai no iyau, wonsoyo' no kawagu i tolig do Yorusalim. 21 Om orohian ko nogindo di porsombahan di natantu' mantad, om koinsanai di porsombahan dahai di sorobon, om sapi' di tontoluhan nga' patahakon indo do maan do porsombahan di sorobon do hiri'd sakai di pananaraban do porsombahan.
Hukuman dot id Tulun dot Araat
1 Maan di boyoon do modsisinding. Sinding do ponudukan di Daud, 2 do tontok di ruminikot i Doig, i tulun dot Idom, do minongoi pomisunud di Saul, do nokorikot i Daud do hilo'd walai di Abimilik. 3 Oi tulun do gunsiou, nokuro tu' pokiraya-rayahan nu ino kararaat nu? Kosianan nopod Kinorohingan om mompus-ompus i'. 4 Mongupakat ko do mamaraag do tulun do suwai, ino piya dila' nu nga' miagal pod pisau di pomumugar katarom. Momudali' ko nopod tudut. 5 Agayo nogi' o korohiano' nu dit araat ko' it osonong, om orohian ko nogi' do tudut ko' mantad dit ongotopot. 6 Orohian ko nopo do mimboros di pokoruol do ginawo'd tulun, om orohian ko nogid tudut ko' mantad dit ongotopot. 7 Om gowoi pondo om raagon ko do Kinorohingan do gisom dot otilombus, om tangkapon ko nondo dau om posoliwanon ko do mantad id walai nu om pokoyoon ko do hilo'd pomogunan do tulun di nangapatai. 8 Kokito ngai' nopondo'dti i tulun dit ongotopot, om mogiompoddosi nondo iyolo', om mongirak-irak nondo iyolo' diya', om mimboros dot, 9 “Intong pogi', iti no tulun dit a' minogondos do Kinorohingan do mamasi dau, suwai ko' minogondos nogi' iyau di dapu' dau dot ogumu', om minintirung iyau di karaato' dau,” ka. 10 Nga' iyoho' nopo om miagal i' di guas do saitun di poinsuni do hiri'd suang do walai'd Kinorohingan, om mogondos oku di kosianan dau dit aiso' o kopupuson do gisom dot alaid. 11 Oi Kinorohingan, mongunsikou oku indo kasai' diya', dot i nongowonsoi nu o kopongunsikahan ku, om hilo' nondod toguang di tulun nu do popimboroson ku o kosonongo' nu.
Karaaton do Tulun
1 Maan di boyoon do modsisinding. Tumanud di lagu' do Mahalat. Sinding do ponudukan di Daud. 2 Boros ka dot id ginawo di tulun dot araat, “Aiso' i' o Kinorohingan,” ka. Nangapalid ngai' no iyolo', adalaan no kopio karaat i winonsoi diyolo', aiso' no tongosongulun piya do momonsoi dot otopot. 3 Hilo'd surga o Kinorohingan do miontong do tulun, mogontong iyau ondung haro po o tulun dit oilo do sumambayang dot id dau. 4 Nga' napalid ngai' no iyolo', oiyo nopo o kararaat diyolo'. Iso' po nga' aiso' no o momonsoi dot osonong, aiso' no o tongosongulun piya. 5 “A' toi iyolo' koilo?” kad Kinorohingan do monguhot, “Aiso' toi kopio o toila-ilaan diti tulun dot angaraat? Tu' kaakan-akanan nopo diyolo' om mimpanakau po di don tulun ku, om a' no kopio iyolo' sumambayang dot id doho',” ka. 6 Nga' id tohuri nopondo om moddosi i' iyolo', do miagal dit a' po diyolo' insan koumbalai, tu' potiason nondod Kinorohingan i tulang di pisangod di tulun dau. Tu' nadaan no diyolo' o Kinorohingan, om aala' nondo kopio iyolo' do tulun dot Israil. 7 Oi Tuhan, pokionuon ku no daa kopio do kaanu do kamanangan ot Israil do mantad hilo'd Sion. Om soira' nopondo do posimbayanon kawagu'd Kinorohingan o tulun dau om ongooropod nondo, om ongosimbayan i tulun dot Israil.
Sambayang do Mokiintirung
1 Maan di boyoon do modsisinding. Ompoton do kecapi. Sinding do ponudukan di Daud 2 do tontok do minongoi poboros i tulun do Sipi dot id di Saul do poingkaa, “Poillisok i Daud do hilo'd watas dahai,” ka. 3 Oi Kinorohingan, posio' oku no di sinundu nu, poiduwo' oku no dot i kinoris nu o popoidu'. 4 Oi Kinorohingan, pokinongoho' no o sambayang ku, pokinongoho' no iti poboroson ku. 5 Rumikot no i tulun dot ongoondos do mongoi saap doho', mumbal daa do mamatai doho' i tulun dot ongorongit, i tulun dot a' mamadul do Kinorohingan. 6 Nga' Kinorohingan no o gomponguhup doho', Tuhan no o mongintirung doho'. 7 Hukuman po daa do Kinorohingan i pisangod ku dot i karaaton diyolo' o kopomohukuman. 8 Patahak oku nondo do porsombahan di sorobon dot id diya' oi Tuhan, do mikuwo'd mongunsikou oku diya', tu' osonong ko i' kopio. 9 Pinoidu' oku diya' do mantad id koinsanai di kosusaan ku, om nokito ku no do naala' i pisangod ku.
Sambayang do Mokiintirung do Mantad id Pisangod
1 Maan di boyoon do modsisinding. Ompoton do kecapi. Sinding do ponudukan di Daud. 2 Oi Kinorohingan, pokinongoho' no iti sambayang ku, kada' tolikudai iti pokionuon ku. 3 Pokinongoho' oku no om simbaro' oku no, oluhoi oku no dot ouru diti katangkabaan ku. 4 Ooris oku no kopio di ponompurolosi do pisangod ku, om oonsitan oku di ponginggorit doho' di tulun dot araat, Poporikot no iyolo'd kosusaan dot id doho', ongotogod iyolo' doho' om angaraatan iyolo'. 5 Ooris tomod o ginawo ku, do kosorou di kapatayon do kotompurolosi kopio. 6 Ooris tomod oku om gagaran oku po, noponu' oku no kopio do kopoddosian. 7 Poingkaa ot osorou ku, “Ondung kitalad oku daa do miagal di punai, om tumulud oku nopo do mongoi pogihum do tiyonon dit osimbayan. 8 Tumulud oku daa'ndo do kumaa do hilo'd sodu' om momonsoi oku nogindo do walai do hilo'd tana' do kowotuan. 9 Oruuhai oku daa'ndo do koihum dot intirungon ku do mantad id tongus om ribut dit opuhod,” ka. 10 Oi Tuhan, raago' no iyolo', pogisuwai-suwayo' no o boros diyolo', tu' okito ku no o kororongit om pogisosongkiwalan do hilo'd bandar. 11 Tadau pod totuong nga' mimpanau i' iyolo' do mintutuk di bandar do poingompus di tolig, aiso' no o kinoiyonon dot aiso' o kararaat om kosusaan. 12 Pointongkop nopo o kinaraagan, noompus pod ponginginggorit om poninipu' ilo karalanan. 13 Ondung pisangod daa i mongumang-umang doho', om ooyit-oyit ku i' daa, ondung i daa ponokisaap ku i minggayo-gayo dot id toguang ku, om milo oku i' daa do lumisok do mantad id dau. 14 Nga' iya' i', i kombiso' ku, i sugku-sugku' ku om i tambalut kopio ku, o mongindaraat doho'. 15 Nokoumbal kito i' dot osonong tomod do miongkorumo, om nokopiwoyo' to do sumambayang do hiri'd Walai'd Sasambayangan dot Agayo. 16 Okuro ma do monigowo piya'd matai i pisangod ku, okuro i' do miyau po om mongoi no iyau do hilo'd pomogunan do tulun di napatai. Kararaat po o hilo'd walai diyolo' om id suang do ginawo diyolo'. 17 Nga' lumohou oku i' do Tuhan, i Kinorohingan, do mokiuhup dau, om posion oku i' dau. 18 Korikot i' dot id dau o todoi om tihad ku do dongkosuabon, om dong pitangaadau, om dongotuong, om orongou i' dau i boros ku. 19 Poulion oku indo dau do mikuwo'd aiso' o koligagaanan do mantad id pinisangadan do suminangod do pisangod dot ogumu'. 20 Kinorohingan no, i minomorinta' do mantad di timpuun po, o korongou doho' om iyau o mangala' diyolo', tu' mada' no iyolo' do sumimban, om a' iyolo' oronok do Kinorohingan. 21 I nakaambalut doho' di gulu nga' monokisaap no do tambalut dau, a' dau sinulung i batos dau. 22 Koboro-boroso' nopo dau om oomis po ko' paha', nga' ginawo nopo dau om noponu' id karaaton, miagal po daa do tumau kosonong i koboro-boroso' dau, nga' kotogu' indo iri do miagal di gayang dot atarom. 23 Patahako' nod Tuhan ino katangkabaan nu, om pokorison ko indo dau, a' i' iyau insan popologos dot aala' i tulun dit osonong. 24 Nga' iya' indo, oi Kinorohingan o papataam do koinsanai di tulun do goudut dot id lobong do tontok dit a' po daa nokopintanga' o tumur diyolo'. Nga' iyoho' nopo om mogondos oku i' diya'.
Sambayang do Mogondos do Kinorohingan do Tontok do Haro o Kosusaan
1 Maan di boyoon do modsisinding. Tumanud di lagu' do: Punai do hiri'd koguasan do tarbantin di hilo'd sodu'. Sinding di Daud do tontok di natangkap iyau do tulun do Pilistin do hilo'd Gat. 2 Oi Kinorohingan, insianai oku no diya', tu' saapon oku do pisangod, om aiso' nopo o kotingkadan di pisangod do monginggorit doho'. 3 Monongodou-ngodou nopo i pisangod ku do mumang doho', ogumu' tomod o tulun dit angasawat o ginawo do sumaap doho'. 4 Tontok nopo do moddosi oku, om iya' po o pagandasan ku, oi Tuhan it Osundu Kopio. 5 Mogondos oku id Kinorohingan om a' oku no moddosi, royohon ku no o Tuhan, do koinsanai di nakabatos dau o kapamarayahan ku. Nunu po daa o milo'd wonsoyon do tulun toomod dot id doho'? 6 Monongodou-ngodou nopo i pisangod ku do mamagangau doho', aiso' nopo o kotingkadan diyolo' do mogihum do ralan do pokoruol doho'! 7 Tumimung nopo iyolo' do mongoi lisok do monoinu' do koinsanai di wonsoyon ku, om mogihum do ralan do mongoi pamatai doho'. 8 Oi Kinorohingan, suliai no i kararaat diyolo', patayo' no o tulun diri do mikuwo'd otogod. 9 Oilaan nu i' dot oinggorit kopio oku, om nantangan nu i romou ku. A' nu toi nokotulis ngai' iri do hiri'd suang do buuk nu? 10 Tontok di mininglohou oku diya', om diri no do suminunsuri ngai' i pisangod ku, tu' oilaan ku no kopio dot uhupan oku diya'. 11 Royohon ku no kopio iya', oi Kinorohingan do koinsanai di pinabatos nu o kapamarayahan ku. 12 Iya' no o pagandasan ku, om a' oku no moddosi. Nunu po daa o milo'd tulun toomod do wonsoyon dot id doho'? 13 Oi Kinorohingan, sulungon ku nondo i nakabatos ku dot id diya', om patahakon ku nondo diya' i kounsikahan ku do maan ku do ponokoporsombahan ku. 14 Tu' pinasi oku i' diya' do mantad id kapatayon, om a' oku diya' pinologos do naala'. Om milo oku indo do poimpasi do pointirung do Kinorohingan, dot id suang do tanawau di monitiu do koinsanai di tulun di songimpasi.
Sambayang do Mokitulung
1 Maan di boyoon do modsisinding. Tumanud di lagu' do: Kada' pamaraag. Sinding di Daud do tontok di minogidu' iyau do mantad id di Saul om minongoi iyau do hiri'd luang do nuluhon. 2 Kosianai no doho', oi Kinorohingan, kosianai no doho', tu' rumikot oku dot id diya' do mokiintirung. Mokiintirung oku dot id sahau do talad nu, do gisom do katalib ngai' i tongus dot opuhod. 3 Lumohou oku do Kinorohingan, it Asawat Kopio, id Kinorohingan di manahak do koinsanai dit apatut dot aanu ku. 4 Hilo' iyau'd surga do sumimbar doho' om mamasi doho', om aala' ngai' nondo dau i tulun di monginggorit doho'. Om pointalangon nogindo do Kinorohingan dot id doho' o kosianan dau dit aiso' o kopupuson, om kotorodoko' dau dot id doho'. 5 Notutukan oku pod pisangod, miagal po iyolo'd singa do mangakan do tulun. Nipon nopo diyolo' om miagal pod tandus om pana', dila' no diyolo' om miagal pod gayang katarom. 6 Oi Kinorohingan, pointalango' no o kogoyoo' nu do hilo'd tawan, om kagayaan nu do pointongkop diti pomogunan. 7 Nakataan nod pisangod ku o lawa' do pamalawa' doho', om poimponu' oku pod kopoddosian. Minongukad iyolo'd luang do hiri'd ralan di wayaan ku, nga' iyolo' iddi o naratu' do hiri. 8 Otumbayaan oku no kopio diya', om modsinding oku nondo do mamarayou diya'. 9 Posik no, oi rusod ku! Posik no, oi kecapi om gambus! Om posikan ku i' ilo tadau. 10 Mongunsikou oku dot id diya', oi Tuhan, dot id pogialatan do bansa'. Mamarayou oku diya' dot id toguang do tulun dot ogumu'. 11 Kosianan nu nopo dit aiso' o kopupuson om nokosunggu no do hilo'd tawan, om kotorodoko' nu nga' nokorikot no do hilo'd haun. 12 Oi Kinorohingan, pointalango' no o kogoyoo' nu do hilo'd tawan, om kagayaan nu do pointongkop diti pomogunan.
Sambayang do Mokihukum di Tulun dot Araat
1 Maan di boyoon do modsisinding. Tumanud di lagu' do: Kada' pamaraag. Sinding di Daud. 2 Otopot no nangku kopio dot otulid o pomisara' dokoyu, iyokoyu i gompomutus? Otopot no nangku kopio dot aiso' o gibang-gibangon dokoyu do tontok do momutus do tulun? 3 Amu', araat noo o sorohon dokoyu, om mingwonsoi do kasalaan dit agayo kopio dot id pomogunan diti. 4 Pogkosusuo' nopo i tulun dot araat om poimpalid no mantad, mongudut mantad no iyolo' di pogkosusuo' i' iyolo'. 5 Poimponu' po iyolo'd rasun do miagal do tulanut, om bosukon do miagal di tulanut do modsoding, 6 gisom dot a' no korongou do boros di momolimu' do tulanut, om i rinait di bobolian dit oilo. 7 Oi Kinorohingan, tipuo' no o nipon di singa dot orongit, om uudo' no i lasit do singa, oi Tuhan. 8 Atagak po daa iyolo' do miagal di waig di rumasak, om okoring do miagal di sakot di hiri'd ralan di piulak-ulakan. 9 Iyo po daa iyolo' di tuntul do notohok, om iyo po daa di tanak di nolombus do napatai tu' a' no nokokito do tanawau. 10 A' i' diyolo' piiman-imanan dot atantab do miagal di sakot, nokotogod no kopio o Kinorohingan gisom do tinanus dau iyolo'. 11 Ongotood nondo i tulun dot ongotopot do tontok do kokito iyolo' do tulun di kidusa do hukuman, oyopos nondo di raha' di tulun dot araat o gakod diyolo'. 12 Boros ka nondod tulun, “Otopot no pama kopio do haro o somuli' di tulun dot otopot. Om haro kopio o Kinorohingan do momutus diti pomogunan,” ka.
Sambayang do Mokiintirung
1 Maan di boyoon do modsisinding. Tumanud di lagu' do: Kada' pamaraag. Sinding di Daud do tontok di minonuhu' i Saul do tulun do madtamong di walai di Daud do mongoi daa pamatai di Daud. 2 Oi Kinorohingan ku, posio' oku no do mantad id pisangod ku, om intirungai oku no do mantad id tulun do sumaap doho'. 3 Poiduwo' oku no do mantad id tulun dot araat, intirungai oku no do mantad id tulun di gampamatai. 4 Intong pogi', nga' mandad-andad no moti' iyolo' do mamatai doho', nokotimung ngai' no o tulun dot araat do sumaap doho'. Om a' oku i' daa nokowonsoi'd dusa, ko' nokotolibamban po dit oturan nu, oi Tuhan. 5 Om aiso' piya o sala' ku, nga' sangarau-arau i' iyolo' do mongoi do hiri'd kinoiyonon diyolo'. 6 Tungag no, oi Tuhan, i Kinorohingan dit Asawat Kopio, om uhupai oku no. Oi Kinorohingan dot Israil, ontong no. Intong no om hukumai ngai' no ilo bansa'd suwai, kada' kosianai dilo tulun dot angaraat di popohudsu. 7 Gumuli' nondo iyolo' di dongsosodopon, om mingusig poo iyolo' do miagal do tasu do mintutuk do bandar. 8 Pokinongou pogi' do boros diyolo'd monompurolosi, om mongindaraat. Boros nopo diyolo' om miagal pod gayang katarom. Ondos daa diyolo' om aiso' o korongou diyolo'. 9 Nga' irak-irakan nu iyolo', oi Tuhan, om hingi-hingion nu o koinsanai di bansa'. 10 Iya' no o kokorisan ku, om iya' o podsindingan ku, tu' iya' no, oi Kinorohingan ot intirungon ku. 11 Osianan i' doho' o Kinorohingan ku, om rumikot indo iyau dot id doho', om popoontong iyau doho' di pisangod ku dot angaala'. 12 Kada' iyolo' patayo', oi Kinorohingan, om a' i' di bansa' ku olihuan iyolo'. Potompiaso' no iyolo' dot i sinundu nu o popotompias, om alao' no iyolo', oi Tuhan it intirungon dahai. 13 Tu' kowonsoi'd dusa o kabang diyolo', om dusa nopo o popimboroson diyolo'. Pologoso' no iyolo' dot alawaan di kasasawat do ginawo diyolo', tu' orohian iyolo' do momopol om mingudut. 14 Patayo' no iyolo' do mikuwo'd otogod, oi Kinorohingan, patayo' no iyolo' do gisom dot opunso. Om koilo ngai' indo o tulun do Kinorohingan o momorinta' dot Israil, om pointongkop diti pomogunan o porintaon dau. 15 Gumuli' nondo i pisangod ku di dongsosodopon, do mingusig poo do miagal do tasu do mintutuk di bandar do mogihum di milo diyolo'd patayon. 16 Iyo po iyolo' di tasu do minsukai do rinomos, om millangak pondo dot a' ayahan. 17 Nga' iyoho' nopo om modsinding i' do rumayou do kokorison nu, monikid kosuabon nopo do sindingon ku i kosianan nu dit aiso' o kopupuson. Tu' iya' no o kointirungon ku, om i mongintirung doho' do tontok do haro o kosusaan. 18 Iya' no i kokorisan ku, om iya' no o podsindingan ku, tu' iya' no, oi Kinorohingan o kointirungan ku, om osianan kasai' ko i' doho'.
Sambayang do Mokitulung
1 Maan di boyoon do modsisinding. Tumanud di lagu' do: Bunga bakung, kososian. Sinding do ponudukan di Daud, 2 do tontok di suminangod iyau di tulun dot Aram-Misopotomia om tulun dot Aram-Soba, om tontok di naala' di Yoab o hopod om duwo noribu o tulun dot Idom do hilo'd Rantai do Silaon, di minuli' i Yoab. 3 Niadaan nu daa iyahai om nala' nu iyahai, om a' ko tuminanud dahai, oi Kinorohingan. Nga' guli' no dot id dahai do dinondo. 4 Ginuyu' nu iti tana' gisom do nopitas, sonongo' no i nangababak, tu' oguyu' no iti tana'. 5 Pinadalaan nu iyahai do monginggorit, iyahai i tulun nu, om mikorobibi' po iyahai do miagal di tulun di naawuk. 6 Pinoinsan nu i' i tulun dit oronok diya', om koidu' i' iyolo' do mantad id hukuman. 7 Posio' no iyahai di sinundu nu, om simbaro' no o sambayang dahai, om angapasi i' o tulun di kosianan nu. 8 Hilo'd kinoiyonon dau dot olidang do minoro-boros o Kinorohingan do poingkaa, “Bohogion ku nondo o tana' do Sikim, om bohogion ku dot id tulun ku o Rantai do Sukot. 9 Giliad nopo om doho' i', om Manasi nga' doho' nogi', Ipraim no om tupi' ku dit okodou, om Yohuda no om sukud ku di don raja'. 10 Nga' Muab nopo om pongougan ku'd gakod ku, om Idom no om podumpahan ku'd kasut ku, do tanda' dot iyoho' o sanganu'ddi. Mimpangkis oku po tu' nakamanang oku no do suminangod di tulun do Pilistin,” ka. 11 Oi Kinorohingan, isai no o paatod doho' do hilo'd bandar di kitolig? Isai no o tonudon ku do kumaa do hilo'd Idom? 12 Otopot no nangku kopio do niada' nu iyahai? A' ko no kopio mamanau do moyo' di soudor dahai? 13 Uhupai no iyahai do sumaap di pisangod, tu' tulun nopo o muhup om aiso' i' o guna'! 14 Kamanang indo iyahai oi Kinorohingan, dot uhupan nu iyahai, iya' no o mangala' di pisangod dahai.
Sambayang do Mokiintirung
1 Maan di boyoon do modsisinding. Ompoton do kecapi. Sinding di Daud. 2 Oi Kinorohingan, pokinongoho' no o tihad ku, om pokinongoho' no o sambayang ku. 3 Aiso' no o pokukurayan ku, om nokoinsodu' oku do mantad id walai, om lumohou oku po diya'. Pokoyoo' oku no dot id kinoiyonon dit aiso' o koligagaanan, 4 tu' iya' no o mongintirung doho', om i moningolig doho' do mantad id pisangod ku. 5 Pologoso' oku no do poundorong do hiri'd kiim nu gisom do tikapatai ku, om aiso' i' o koligagaanan ku dot id sahau do talad nu. 6 Oi Kinorohingan, norongou nu no i batos ku, om noonuan oku no diya' do miagal di naanu di tulun dit oronok diya'. 7 Otogui po daa i raja', om pologoso' no iyau do poimpasi do gisom do kokito di manangaki dau. 8 Maha' daa om momorinta' kasai' iyau, i raja' do pinili' nu do gisom dot alaid. Oi Kinorohingan, intirungai no iyau di kotorodoko' nu om kosianan nu dit aiso' o kopupuson. 9 Om modsinding oku indo kasai' dot id diya', om sulungon ku i nakabatos ku dot id diya' do pointikid do tadau.
Otumbayaan do Mongintirung o Kinorohingan
1 Maan di boyoon do modsisinding. Tumanud do: Yodutun. Sinding di Daud. 2 Mandad oku nopod Kinorohingan do mamasi doho'. Iyau noo o pagandasan ku. 3 Iyau noo o mongintirung doho' om mamasi doho', iyau no o mogobi' doho', om a' oku no aala'. 4 Songkuro po o koloido' dokoyu do sumaap do tulun di miagal pod pagar do noromuk tu' humaba' poo? 5 Orohian kou nod paratu' dau do mantad id pangkat dau dit asawat, asanangan kou do mongudut; poboroson nopo dokoyu om mamarakat i', nga' id suang nopod ginawo dokoyu om momolupu' i' dau. 6 Mandad oku nopod Kinorohingan, iyau poo o pagandasan ku. 7 Iyau noo o mongintirung om mamasi doho', iyau no o mogobi', om a' oku no aala'. 8 Kinorohingan no o mongintirung doho', om mogobi' doho' dit okoris. 9 Oi bansa' ku, pogondos kasai' kou nod Kinorohingan, sunudan ngai' no iyau di kosusaan dokoyu, tu' iyau no o kointirungan toko'. 10 Tulun nopo om miagal nod pinuhobo di pohoboon, it agayo om okoro' nga' oiyo nopo dot aiso' o gatang. Timbangon nopo om agaan i' kopio, agaan po ko' pinuhobo di pohoboon. 11 Kada' pogondos do kororongit, kada' soroho' do haro ot aanu-anu nu do mantad id pinanakau, muhang-ruhang piya o kakayaan nu nga' kada' pogondos diri. 12 Asaru' oku i' do korongou do Kinorohingan do momoros dot iyau o tadon do kuasa', 13 om mompus-ompus kasai' o kosianan dau. Iya' no oi Tuhan, o monomuli' do pointikid-tikid do tulun do tumanud di wonsoyon dau.
Langadon do Kinorohingan
1 Sinding di Daud do tontok di hilo' iyau id tana' do kowotuan do Yohuda. 2 Oi Kinorohingan, iya' no o Kinorohingan ku, langadon oku no diya' om ihumon ku iya'. Iyo poddi tana' dot otuu do tuuhan do waig, o ginawo ku do tuuhan diya'. 3 Pologoso' oku no do kokito diya' do hilo'd kinoiyonon nu dit olidang, om kokito di kokorisan om kagayaan nu. 4 Kosianan nu nopo dit aiso' o kopupuson om kigatang po ko' koposion, om iri no o kapamarayahan ku diya'. 5 Mongunsikou oku indo kasai' diya' do gisom do tikapatai ku, poinsawaton ku indo o longon ku dot id diya' do maso ku'd sumambayang. 6 Royohon ku nondo iya' do sinding dot atataadan, tu' osimbayan no o ginawo ku do miagal po di nakaakan do taakanon dot awasiu. 7 Tontok di poillii oku do hiri'd toodopon ku, om ahandaman tiya' no, iya' kasai' i' o soro-sorohon ku do gisom dot osuaban, 8 tu' iya' no i minonulung doho'. Id sahau nod linungung do talad nu do modsinding oku dot atataadan. 9 Kumorom oku no kopio diya', om apasi oku i' tu' okoris i' o longon nu. 10 Tulun nopo di mamatai daa doho' om kumaa no do hilo'd pomogunan do tulun di nangapatai. 11 Angapatai nondo iyolo' dot id pisangadan, om aakan iyolo' do nintorusan dit orongit. 12 Otood nondo i raja' tu' onuan i' do Kinorohingan do kamanangan. Iri nopondo tulun di minamatos dot id suang do ngaran do Kinorohingan, om mamarayou i' dau, nga' kalantom ngai' i' o kabang di goudut.
Sambayang do Mokiintirung
1 Maan di boyoon do modsisinding. Sinding di Daud. 2 Oi Kinorohingan, pokinongoho' no o sambayang ku, do tontok do haro o kosusaan ku. Poiduwo' oku no do mantad id pisangod ku di korolosi doho'. 3 Intirungai oku no do mantad id pogupakatan di tulun dot araat, om mantad id tulun dot angaraat di mogiuhup do mumang doho'. 4 Asaon diyolo' o dila' diyolo', gisom do miagal pod gayang, om poboroson diyolo' o boros di pokoruol do miagal pod pana'. 5 Lumisok-lisok i' iyolo' do mamaraag do ngaran do tulun dit osonong, om potigowoon nopo diyolo' om a' no ointingayam do mongindaraat dau do gisom dot apatai iyau. 6 Mogiodsuur-suur nopo iyolo' do mogupakat dot araat, mogiilo-ilo i' iyolo' ondung hinonggo o pataanan diyolo' di lawa' diyolo'. Om momusorou iyolo' dot aiso' o kokito diyolo'. 7 Minsorou iyolo' do momonsoi dot araat. om ondos daa diyolo' om aiso' noo o bohiton dit osorou diyolo'd wonsoyon. Apagon no kopio do mongilo o ginawo om pomusarahan do tulun. 8 Nga' papanaon nondod Kinorohingan i pana' dau dot id diyolo', om sigog nopo om ongotogu' no iyolo'. 9 Raagon nondo dau iyolo' dot i koboro-boroso' diyolo' o kapamaraagan, oinsanan nopondo o tulun do sombingog-bingog do tulu do kokito diyolo'. 10 Mogiompoddosi ngai' nopondo iyolo', momusorou nondo iyolo' di winonsoi'd Kinorohingan, om poboroson diyolo' i nongowonsoi dau. 11 Om ongooropod ngai' nondo i tulun dit ongosonong, dot i winonsoi'd Tuhan o kaarapadan. Om mintirung pondo iyolo' dau. Om oinsanan nopondo i tulun dit ongotulid o ginawo do mamarayou dau.
Pamarayou om Pongunsikou
1 Maan di boyoon do modsisinding. Sinding di Daud. Sinding. 2 Oi Kinorohingan, apatut i' iyahai do mamarayou diya' do hino'd Sion. Om sumulung iyahai di batos dahai dot id diya', 3 tu' iya' nopo om sumimbar i' do sambayang. Oinsanan nopondo o tulun do rumikot dot id diya', 4 tu' nokowonsoi i' iyolo'd dusa. Awagat no daa kopio i dusa dahai, nga' noompunan ngai' nu i' iri. 5 Olumaag no i tulun di nopili' nu, i tulun di lohowon nu do miyon do hiri'd tiyonon nu dit olidang. Oiyahan indo iyahai do toinsanan dit ongosonong do hiri'd walai nu, i barakat di Walai'd Sasambayangan dot Agayo, dit olidang. 6 Ponimbar nu nopo dahai om kamanangan om minomonsoi ko di kongoimayaan kopio do pamasi dahai. Oinsanan nopo o tulun do pointongkop diti pomogunan, om i hilo'd soborong do rahat di hilo'd sodu' dot otumbayaan diya'. 7 Sinundu nu i' o pinopoingkakat dilo nuluhon, do popointalang dot agayo kopio o sinundu nu. 8 Kotingkod ko i' do ngorod do rahat, om kotingkod ko di tumbak dot agayo, kotingkod ko do pogigugulatan do bansa'. 9 Oinsanan nopo o tulun di poingiyon do pointongkop diti pomogunan dot ooris om opusou do kokito di nongowonsoi nu dit agayo kopio. Oinsanan nopo o tulun do pointongkop diti pomogunan do pinotood nu do gisom do sampangkis-pangkis poo. 10 Gompion nu i' i tana' tu' pirasaman nu i', om poluhubon nu gisom dot orombung o sunion di songinsuni. Ponuon nu'd waig i bawang gisom dot asapou o tua' di tanom-tanom. Pinosodiaan nu iyolo' do gandum, iyo ko noddi do pinoposodia'. 11 Porikatan nu'd rasam dot asapou o hiri'd tumo di naradu om potimparanan nu'd waig, lomokon nu'd tinuru' do rasam i tana' om posunion nu i tanom-tanom dit ongokoro' po. 12 Iri no i kosonongo' nu o kosonong-sonong do tomoton; honggo nopo o koongoyon nu, om haro ngai' no o nunu nopo do gisom dot a' aayi-ayi'. 13 Notongkop pod dumba' o hilo'd pangakan-ngakanan do dumba', om ongotood ngai' nopo i hilo'd guas do nulu-nulu. 14 Notongkop pod dumba' o hilo'd kobuturan, om noponu'd gandum o hilo'd rantai. Om oinsanan nopod sampangkis-pangkis om modsinding dot atataadan.
Sinding do Mamarayou om Mongunsikou
1 Maan di boyoon do modsisinding. Sinding. Royoho' no o Kinorohingan do mikuwo'd mamangkis dot aarapadan, oi koinsanai'd tulun. 2 Podsinding no om poinggoyoo' no o ngaran dau, royoho' no iyau do mikuwo'd sinding do pamarayou. 3 Pomoros no dot id Kinorohingan do poingkaa, “Koimayaan no kopio i nongowonsoi nu! Agayo no kopio o kuasa' nu gisom do tumuku' ngai' nopo o pisangod dot id toguang nu tu' ooris iyolo' diya'. 4 Oinsanan nopo o tulun do hiti'd pomogunan do tumuku' dot id diya', modsinding iyolo' do pamarayou diya', om modsinding iyolo' do mamarayou do ngaran nu,” ka. 5 Kainou mongoi intong di nongowonsoi'd Kinorohingan, i nongowonsoi dau do kongoimayaan kopio do hiti'd pogialatan do tulun. 6 Sinimbanan dau o rahat gisom do nosiliu do tana' dot otuu, om pamanaho' nopo di taki-aki toko' do suminoborong di bawang, om iri ngai' no i nongowonsoi dau o kaarapadan toko'. 7 Iyau no ot okoris do momorinta' do gisom dot alaid, om poingontong kasai' iyau di bansa'd suwai, om aiso' i' o tulun di sumasaap do kasaap dau. 8 Oi koinsanai'd bansa', royoho' no o Kinorohingan dahai, pologoso' no dot orongou i pamarayou dokoyu. 9 Ginompi' i' iyahai dau, om a' i' iyahai pinologos dot aratu'. 10 Oi Kinorohingan, pinogumbalan nu iyahai, do miagal di pirok do sinompipi' do tapui. 11 Pinologos nu iyahai do nokosulung do lawa', om pinababaan nu po dahai o binabo dit awagat kopio. 12 Pinologos nu i pisangod dahai do minongulok dahai, om nakawaya' iyahai do tapui om luyud. Nga' baino' noddi om nakaatod nu no iyahai dot id kinoiyonon dit aiso' o koligagaanan. 13 Mongigit oku nondod porsombahan di sorobon do hilo'd walai nu, om sulungon ku i nakabatos ku dot id diya', i batos di pinoboros ku. 14 Patahakon ku indo diya' o nunu nopo i nakabatos ku, do tontok dit id suang oku'd kosusaan. 15 Papatahak oku indo do dumba' do maan do porsombahan di sorobon do hiri'd pananaraban do porsombahan, om papatahak oku'd sapi' do tontoluhan om kambing do maan do porsombahan do sumbolion, om kohubayaan nu i' i lisun diri. 16 Kainou mokinongou, koinsanai do tulun di momusou do Kinorohingan, om sunudan ku i' iyokoyu di winonsoi dau dot id doho'. 17 Mininglohou oku dau do mokitulung, om modsinding oku do mamarayou dau. 18 Ondung dusa o pininsarahan ku, om atantu' no dot a' o Tuhan minokinongou doho'. 19 Nga' otopot nopo kopio om pinokinongou oku i' do Kinorohingan, pinokinongou i' dau i sambayang ku. 20 Royohon ku no o Kinorohingan, tu' pinadul i' dau i sambayang ku om osianan kasai' i' iyau doho'.
Sinding do Mongunsikou
1 Maan do boyoon do modsisinding. Ompoton do kecapi. Sinding. 2 Oi Kinorohingan, insianai no iyahai om barakatai no iyahai, antangai no iyahai do mikuwo'd olisiu ko dahai, 3 om kongoilo i' do korohian nu o pointongkop diti pomogunan, om oinsanan i' o bansa' do kongoilo dot iya' no o gampamasi. 4 Maha' daa om mamarayou diya' o koinsanai do bansa'd tulun, maha' daa om mongunsikou diya' o koinsanai'd tulun. 5 Maha' daa om ongotood ngai' o bansa' om modsinding dot atataadan, tu' otulid i' o pomumutus nu do toinsanan do bansa', om ahakon nu o koinsanai'd bansa' do hiti'd pomogunan. 6 Maha' daa om mamarayou ngai' diya' o bansa', oi Kinorohingan, maha' daa om mongunsikou ngai' o tulun diya'. 7 Haro no o hasil do nokoimbulai diti tana', tu' nabarakatan toko' nod Kinorohingan toko'. 8 Nabarakatan toko' nod Kinorohingan, maha' daa do momusou dau o koinsanai'd tulun do pointongkop diti pomogunan.
Sinding do Kinamanangan
1 Maan di boyoon do modsisinding. Sinding di Daud. 2 Mingkakat no o Kinorohingan do popogitongkiad-kiad di pisangod dau. Om mogidu' ngai' nopo i tulun dit araatan dau tu' naala' no iyolo'. 3 Poingkuro nopo i lisun do tumagak om miagal noddi iyolo' dot uyungon do Kinorohingan, iyo poddi rilin dot alanak do tapui, o tulun dit araat dot atanus dot id toguang do Kinorohingan. 4 Nga' tulun nopo dit ongotopot om ongosimbayan i' om ongooropod dot id toguang do Kinorohingan, ongooropod i' iyolo' om mimpangkis dot atataadan. 5 Podsinding no dot id Kinorohingan, royoho' no o ngaran dau, posodiawo' no o ralan dau, i poinsakai'd haun; ngaran nopo dau om Tuhan. Kooropod no dot id toguang dau. 6 Kinorohingan nopo, i poundorong dot id kinoiyonon dau dit olidang, om momogompi' di tangaanak dit aiso' o molohing om i tongoondu' di nopuadan. 7 Onuan dau'd tiyonon i tulun dit aiso' o walai, om papalabus iyau di tulun di nongogiil om pokoyoon dau dot id kosimbayanan, nga' tulun nopo di sumaap do Tuhan om poundorongon no dot id tana' dit oingou. 8 Oi Kinorohingan, tontok di tinanud nu i tulun nu, do duminarapas di tana' do kowotuan, 9 om gogor nopo iti tana', om ilo tawan nga' pinoposondot do rasam; om guyu' nopo o tana', tu' nokorikot i Kinorohingan do Sinai, i Kinorohingan dot Israil. 10 Pinarasam nu dot asapou, om pinoruak nu kawagu i tana' dot okorop. 11 Om undorong noddi i tulun nu'd hilo', om ginompi' nu i tulun do mosikin, tu' osonong ko i', oi Kinorohingan. 12 Poboroso' nod Tuhan, om poromuto' no di tongoondu' i habar do poingkaa, 13 “Mogidu' ngai' no i raja' om i soudor diyolo',” ka. Om pogiduwo-duwoo' no di tongoondu' di hiri'd duwalai i konunu-nunuan di nangaanu, 14 i pinoiyo-iyo'd punai do nurogupan do pirok, om talad nopo nga' mogulinau nopo do miagal pod tamas dit osonong. (Nokuro tu' minundorong o wookon dokoyu do hilo'd pogialatan di kandang do dumba' do tontok di tadau do mogisasangod?) 15 Tontok di pinogitompias-pias do Kinorohingan i piro-piro raja' do hilo'd Nuluhon do Salmon, om pasandatai no dau do salju ot id kinoiyonon diri. 16 A' no ogina-gina' o kogoyoo' do Basan tu' ogumu' o posimunduk. 17 Oi Nuluhon do Basan, nokuro tu' osolon ko do montong do mantad hilo'd timpak nu dit akawas, do montong di Nuluhon do Sion, i pinili'd Kinorohingan dot undorongon dau? Mundorong no o Kinorohingan do hilo' do gisom dot alaid. 18 Rumikot o Kinorohingan do mantad hilo'd Sinai do kumaa do hilo'd tiyonon dau dit olidang, do mogiwoyo-woyo' do rinibuan o korita'-kuda' dit ongoringang. 19 Tumakad o Tuhan dilo posimunduk dot akawas, miwoyo' dot ogumu' tulun di nangatangkap dau, om karamit iyau do porsombahan do mantad piya dot id tulun dit obinsaap. Om Tuhan no, i Kinorohingan o mundorong do hilo'. 20 Royohon no o Tuhan, i mamabo do binabo di kawagat dati' do monikid do tadau, iyau no o Kinorohingan di mamasi dati'. 21 Kinorohingan toko' nopo, om Kinorohingan di mamasi dati', iyau no o Tuhan, i Tuhan toko', i pinopoidu' dati' do mantad id kapatayon. 22 Purokon indo kopio do Kinorohingan o tulu di pisangod dau, om i tulun dit a' tumingkod do mingwonsoi'd dusa. 23 Nokoboros nod Tuhan o poingkaa, “Porikoton ku indo kawagu i pisangod dokoyu do mantad hilo'd Basan, pogulion ku indo iyolo' do mantad hilo'd rahat dit aralom, 24 om milo i' dokoyu'd pongougan do gakod i raha' diyolo', om mimbangat i tasu dokoyu do monginum diri,” ka. 25 Oi Kinorohingan, kokito ngai' nondo diya' do mamanau ko do popointalang do kinamanangan nu; tonud-tonudon do tulun dot ogumu' i Kinorohingan ku, om i Raja' ku do kumaa do hiri'd tiyonon dau dit olidang. 26 I modsisinding o hiri'd gulu, om i popouni do tuunion o hiri'd tohuri, om i kosumandakan di monuntung do tamburin o hiri'd piolitan. 27 “Royoho' no o Kinorohingan dot id pogialatan di pitimungan do tulun dau; royoho' no o Tuhan, oi koinsanai do sinakagon di Yakub,” ka. 28 Minogulu nopo kopio om Binyamin, i payat dot okuri' kopio, om suminusuhut no om i boyoon do Yohuda dit ogumu' kopio, om susuhut nogiddi i boyoon do Sibulon om Naptali. 29 Oi Kinorohingan, pointalango' no o sinundu nu, i sinundu di pinakai nu do pinogobi' nu dahai. 30 Maha' daa om mongoi paatod do patahak-tahakon i raja' dot id diya', do maan di Walai'd Sasambayangan dot Agayo do hilo'd Yorusalim, i bandar dot olidang. 31 Togodo' no o Masir, i nintorusan dot orongit do hilo'd pogialatan do bundusan, tagado' no i piro-piro bansa' dit okoris om it oluhoi. Alao' no i tulun di mogihum do kakayaan. Potompiaso' no i tulun dit orohian do monokisangod. 32 Paatod nondod tambaga' i tulun do mantad hilo'd Masir, om tulun do mantad hilo'd Etiopia nga' popoinsawat nondod longon diyolo' do sumambayang. 33 Podsinding no dot id Kinorohingan, oi toinsanan do pomorintaan, podsinding no do pamarayou'd Tuhan, 34 iyau i dumarapas dilo tawan, ilo tawan di hino no do mantad di gulu po. Pokinongou nod boros do Tuhan dit opuhod. 35 Popinsusuyo' no do momorinta' o Kinorohingan dot Israil, om kisinundu o Kinorohingan do hilo'd tawan. 36 A' no ogina-gina' o kagayaan do Kinorohingan toko' do tontok di sumoliwan iyau do mantad hilo'd kinoiyonon dau, --- i Kinorohingan dot Israil. Iyau no o manahak do kokorisan om sinundu dot id tulun dau. Royohon no o Kinorohingan!
Sambayang dot id Suang do Kosusaan
1 Maan di boyoon do modsisinding. Tumanud di lagu' do: Bunga bakung. Mantad id di Daud. 2 Posio' oku no, oi Kinorohingan, tu' nokorikot no dot id liou ku o waig. 3 Lumonsod oku no dot id burutak dot aralom, om aiso' no o tana' dot okodou, hiri oku nod daralom, om oruhai oku no dot oolitan do tumbak. 4 Ohuyan oku nod nouru do minglohou do mokitulung, oruol po o tatalanan ku, om opodi' po o mato ku do mandad dot itulung nu. 5 Iri nopo tulun dit otogod doho' dot aiso' o paantakan, om ogumu' po ko' iti tobuk ku. Popinsunud do tudut do pasal doho' i pisangod ku, om iri no i tulun dit ongokoris om sipamatai doho'. Om sansagan oku diyolo' do popoguli' di dapu' dit a' ku pinanakau. 6 Oi Kinorohingan, aiso' i' o dusa ku dot olisok do mantad id diya', noilaan nu i' i kobosugo' ku dot a' ogina-gina'. 7 Kada' oku pologoso' do mongintingayam do tulun di mogondos diya', oi Kinorohingan, i Tuhan dit Osundu Kopio. Kada' oku pologoso' do mongindaraat do tulun di tumuku' dot id diya', oi Kinorohingan dot Israil! 8 Tu' iya' i' o kinopongindaraatan doho', om iya' i' o nokobungou diti tingayam ku. 9 Miagal oku pod sompogunan dot id koobpinayan ku, om miagal do wokon dot id tiyon-iyon ku. 10 Iri no i kosianan ku di walai nu o moningkau do ginawo ku, om iyoho' no o nountunan di pongindaraat do tulun diya'. 11 Puasa oku no do popointalang do minsiriba' oku, nga' pakaraaton oku id tulun. 12 Manampakai oku no daa do pakayan di mogihad, om irak-irakan oku i' diyolo'. 13 Iyoho' po o boro-boroson diyolo' do hilo'd tanga'd ralan, om mintondig po i nangaawuk do mongumang-umang doho'. 14 Nga' iyoho' nopo om sumambayang oku i' dot id diya', oi Tuhan, i Kinorohingan, simbaro' oku no do tontok di maso di korohian nu. Simbaro' oku no tu' agayo i' kopio o kosianan nu, om bayaanon nu i' i boros nu do mamasi doho'. 15 Poiduwo' oku no do mantad id burutak di kolonsodon, poiduwo' oku no do mantad id pisangod ku, om mantad id waig dot angaralom. 16 Kada' pologoso' o luyud do mangalit doho', kada' oku pologoso' dot olondod do hiri'd daralom ko' kasaalom po do hiri'd lobong. 17 Simbaro' oku no, oi Tuhan, tu' osonong ko i' om osianan kasai' ko, koili no doho', tu' agayo i' o kosianan nu. 18 Kada' lisok do mantad id doho' i susuhuon nu, tu' id suang oku'd kosusaan dot agayo, simbaro' oku nod dinondo. 19 Rikot no do mongoi pamasi doho', poiduwo' oku no do mantad id pisangod ku. 20 Oilaan nu i' i pongumang-umang doho', om i pongikum-ikum om i pongindaraat doho', okito ngai' nu i' i pisangod ku. 21 Iri no i pongindaraat o nokoruol do ginawo ku, om aiso' no o pokukurayan ku. Mingihum oku daa'd tulun di monginsian, nga' aiso' i', om miniontong oku daa do haro o mongoi ponginsasamod, nga' aiso' i'. 22 Tontok di linouson oku, nga' nonuan oku nogi' diyolo'd kawanit, om tontok di tinuuhan oku, nga' nonuan oku nogi' diyolo'd waig dit oonsom. 23 Osiliu po daa do karaagon diyolo' i poginakanan diyolo', om poporikot do kosusaan i poginakanan diyolo' di maan daa do kosogi-sogiton. 24 Obolou po daa iyolo', om aiso' po daa o tongosongulun do poimpasi do hiri'd kiim diyolo'. 25 Porikatai no iyolo' di kototogod nu, om orotuan po daa iyolo' di kototogod dit a' ogina-gina'. 26 Opogiiduan po daa o kiim diyolo', om aiso' po daa o tongosongulun do poimpasi do hiri'd kiim diyolo'. 27 Tu' monginggorit iyolo' do tulun di hinukuman nu, om pimboroson diyolo' o koinggoritan di tulun di pinokorualan nu. 28 Pawagato' po ko' i gulu o pomohukum nu diyolo', kada' no iyolo' pologoso' do haro o tintanga' di koposion do mantad id diya'. 29 Maha' daa om atanus o ngaran diyolo' dot id suang di buuk do tulun di poimpasi, maha' daa om a' iyolo' kohompit do hiri'd dopitar do ngaran di tulun nu. 30 Nga' id suang oku do korualan om aiso' no o pokukurayan ku, tungago' oku no, oi Kinorohingan, om posio' oku no. 31 Modsinding oku nondo do mamarayou'd Kinorohingan, om popinsusuyon ku nondo o kogoyoo' dau do tontok do mongunsikou oku dau. 32 Iri no i pamarayou o kohubayaan kopio'd Tuhan do mantad ko' i sapi' di patahakon dot id dau, om mantad ko' i sapi' do tontoluhan di patahakon do maan do porsombahan do sumbolion. 33 Soira' nopod okito di tulun dit ulak-ulakan iti, om ongotogod nondo iyolo', om i tulun di sumambayang dot id Kinorohingan nga' kongogirot nondo o ginawo. 34 Pokinongohon id Tuhan o tulun di mosikin, om a' i' dau olihuan i tulun dau dit id suang do giil. 35 Pamarayou nod Kinorohingan, oi tawan om tana', rahat om koinsanai dit ongkipinuhobo do hilo'. 36 Posion i' dau o Yorusalim, om poingkakaton i' dau kawagu i kabandaran do Yohuda. Om hilo' no o tiyonon di tulun dau om asanganu diyolo' i pomogunan diri. 37 Om i sinakagon di susuhuon dau nga' kotungkus nondo di tana', om i tulun dit osianan dau nga' kopomogun nondod hilo'.
Sambayang do Mokitulung
1 Maan di boyoon do modsisinding. Sinding di Daud do tontok di papatahak iyau do porsombahan di kopomuhandaman. 2 Posio' oku no, oi Kinorohingan, oi Tuhan, tulungo' oku nod dinondo! 3 Aala' po daa om oborulong po i tulun di mumbal do mamatai doho'. Oikum-ikum po daa om ongouyung po i tulun dit ongotood do haro o kosusaan ku. 4 Ongooris po daa om ointingayam i tulun di mongumang-umang doho' dot i kinaalaan diyolo' o kointingayam. 5 Maha' daa om ongotood ngai' om ongosonong o ginawo di tulun do rumikot dot id diya'. Maha' daa om momoros kasai' i tulun dit ongounsikou di koposion di patahakon nu dot, “Agayo no o Kinorohingan,” ka. 6 Oluhoi oku no, om aiso' no o pokukurayan ku, rikot no kopio dot id doho' do dinondo, oi Kinorohingan. Iya' no o gampamasi doho' oi Tuhan, lomusai no do mongoi ponulung doho'.
Sambayang di Tulun di Molohing No
1 Oi Tuhan, ruminikot oku dot id diya' do mongoi pokiintirung, kada' oku no kopio pologoso' dot aala'. 2 Tulungo' oku no om poiduwo' oku no tu' otulid ko i', pokinongoho' oku no om posio' oku no! 3 Siliu no dot intirungon ku dit ogirot tu' miagal ko do kuta' dot ogirot do maan ku'd intirungon, tu' iya' no ot intirungon ku om iya' i moningolig doho'. 4 Oi Kinorohingan ku, poiduwo' oku no do mantad id tulun dit angaraat, om mantad id kuasa' di tulun dit araat om orongit. 5 Oi Tuhan, iya' no o pagandasan ku, mantad poddi tanak oku po om mogondos oku no diya'. 6 Iya' no o sinondiu ku do solinaid ku do poimpasi, om ginompi' oku i' diya' do mantad di pogkosusuo' oku i', royohon ku no kasai' iya'. 7 Iti nopo koposion ku om nosiliu dot usuyanan do tulun dot ogumu', tu' iya' no o mongintirung doho' dit ogirot. 8 Monongodou-ngodou oku nopo do mamarayou diya', om popinsusui oku do kagayaan nu. 9 Kada' oku iyadaai do baino' tu' molohing oku, om kada' oku iduwai tu' oluhoi oku noddi. 10 Pisangod ku nga' mamatai doho', om mogiupakat iyolo' do sumaap doho'. 11 Boros ka no diyolo', “Notongkiadan no iyau'd Kinorohingan, ngoyo' toko' iyau gusao' om tangkapon toko' i', tu' aiso' no o mongoi popoidu' dau,” ka. 12 Kada' insodu' tomod doho', oi Kinorohingan, oi Kinorohingan ku, rikot no dot oruhai do mongoi ponulung doho'. 13 Aala' po daa om apatai i tulun di sumaap doho', ointingayam po daa om oindaraat i tulun di mumbal do pokoruol doho'. 14 Mogondos oku indo kasai' diya', om ruhangan ku o pamarayou ku diya'. 15 Popinsusuyon ku indo o kosonongo' nu, om monongodou-ngodou oku do mimboros do pasal di koposion do mantad id diya'. Do mulong piya dot a' ku osuhutan ngai' iri. 16 Royohon ku nondo i sinundu nu, oi Tuhan, i Kinorohingan, om iri nondo i kosonongo' nu o popinsusuyon ku. 17 Mantad po dit okoro' oku po om tinudukan oku no diya', om gisom do baino' nga' popinsusui kasai' oku i' di nongowonsoi nu di kongopusahan kopio. 18 Baino' nopoddi tu' molohing oku no, om nokopurak no o tobuk ku, om kada' oku no kopio iduwai, oi Kinorohingan. Woyoon oku no do maso ku'd popinsusui do sinundu om kokoriso' nu do kumaa dot id toinsanan o sinakagon di sumusuhut. 19 Korikot id hilo'd tawan o kotulido' nu, oi Kinorohingan, angagayo no kopio i nongowonsoi nu, om aiso' o koiyo diya'. 20 Pinorikot nu o kosusaan om koinggoritan dot id doho', nga' pogulion nu i' kawagu o kinoris ku, om tungagon oku i' diya' do mantad id lobong. 21 Pobontugon oku pondo diya' do mantad ko' i gulu po, om insasamadan oku indo kawagu diya'. 22 Royohon ku nondo iya' do mikuwo'd popouni di kecapi ku, om royohon ku i kotorodoko' nu, oi Kinorohingan ku. Modsinding oku nondo do mamarayou diya', dot ompoton do kecapi, oi Kinorohingan dot Israil dit Olidang. 23 Mimpangkis oku nondo dot atataadan do tontok do popouni oku do tuunion, om modsinding oku nondo do mikuwo'd aayi-ayi' o ginawo ku, tu' pinasi oku i' diya'. 24 Monongodou-ngodou oku nopondo do popinsusui di kotulido' nu, tu' naala' no om nointingayam i tulun di mumbal daa do pokoruol doho'.
Sambayang do bagi' di Raja'
1 Mantad id di Suliman. Oi Kinorohingan, tudukai no i raja' dot oturan nu, onuwai no iyau di kotulido' nu. 2 Om otulid indo o pomorinta' dau di tulun nu, om otulid o pomorinta' dau di tulun dit ulak-ulakan. 3 Maha' daa om osimbayan iti pomogunan, om it otulid ot owonsoi dot id pogialatan do toinsanan o bansa'. 4 Maha' daa om obian di raja' i tulun do mosikin, do tontok do butusan dau iyolo', maha' daa om tulungon dau i tulun dit orutum, om alaon dau i tulun di mongulok-ulok diyolo'. 5 Maha' daa om sumambayang kasai' dot id diya' i tulun nu do solinaid po do kitinitiu ilo tadau, om maha' daa om mamarayou ngai' diya' i sinakagon do solinaid po do kitulinau ilo tulan. 6 Maha' daa om miagal i raja' di rasam do sumondot do hilo'd dumo, om miagal do rasam dot asapou do momoyopos do tana'. 7 Maha' daa om muhang-ruhang it otulid do daamot dau do poimpasi, om maha' daa om mompus-ompus o kosimbayanan do solinaid po do kitinitiu ilo tulan. 8 Pomorintaan nopo dau om mantad po dot id iso' o rahat om gisom do korikot do rahat do suwai, mantad pod hilo'd Bawang dot Iprat om gisom do korikot dot id tisan do tana'. 9 Tumuku' ngai' nopondo dot id dau i tulun do hilo'd tana' do kowotuan, om motud i pisangod dau do hiri'd toning di gakod dau. 10 Iri ngai' i raja' do Tarsis om i mantad hilo'd piro-piro pulou nga' paatod nondo do patahak-tahakon dot id dau, om iri ngai' i raja' do Shiba om Siba nga' paatod ngai' do popuhawangon dot id dau. 11 Oinsanan nopondo o raja' do tumuku' dot id toguang dau, om oinsanan o bansa' do sumiliu do susuhuon dau. 12 Tulungon ngai' i' dau o tulun do mosikin di minglohou dot id dau, om tulungon dau i tulun dit aiso' o pokukurayan om i tulun dit ulak-ulakan. 13 Osianan i' iyau di tulun dit oluhoi om mosikin, posion i' dau i tulun di kikokurangan. 14 Poiduwon i' dau iyolo' do mantad id tulun di mongulok-ulok om mantad id tulun dit ongorongit, tu' koupusan i' kopio dau o koposion diyolo'. 15 Potoguyo' no o raja'! Maha' daa om onuan iyau do tamas do mantad id pomogunan do Shiba, maha' daa om sambayangan kasai' iyau dot aiso' o kotingkadan, maha' daa om barakatan kasai' iyau do Kinorohingan. 16 Maha' daa om osima' do gandum o hiti'd pomogunan, maha' daa om otongkop do tanom-tanom o hilo'd konulu-nuluan, om angasapou o tua' do miagal di hilo'd Libanon. Maha' daa om ongoponu' do tulun i kabandaran, do miagal di padang do notongkop do sakot. 17 Maha' daa om a' olihuan i ngaran di raja', maha' daa om mompus-ompus kasai' i kobontugo' dau do solinaid do haro o tadau. Maha' daa om royohon iyau do koinsanai'd bansa', maha' daa om pokolumaagon iyau do koinsanai'd bansa'. 18 Royohon no o Tuhan, i Kinorohingan dot Israil, tu' iyau noo o kowonsoi do kongopusahan diti. 19 Royohon no o ngaran dau tu' kikagayaan do gisom dot alaid. Maha' daa om koponu' diti pomogunan o kagayaan dau. Owonsoi po daa o miagal diri. Amin. 20 Iti no o nokopupuson do sambayang di Daud, i tanak di Isai.
Buuk do Kotolu
Sinding 73-89
Kotulido' do Kinorohingan
1 Sinding di Asap. Osonong tomod o Kinorohingan dot id tulun dit otulid o ginawo, om id tulun dit olidang o ginawo. 2 Nga' mikoduwo no daa o ginawo ku, oruhai no daa do natanus o kotumbayaan ku. 3 Tu' minosol oku di tulun dit oondos, do tontok do nokito ku dot ongkoundar i tulun dot araat. 4 Iyolo' nopo om a' i' oinggorit do toruo-ruol, tu' okoris i' iyolo' om aiso' o toruo-ruol. 5 A' i' iyolo' oinggorit do miagal do tulun do suwai, om aiso' i' o kosusaan diyolo' do miagal di dombokon. 6 Gowoi poddi om panakakaro diyolo' o koondoso' diyolo', om panakarasuk diyolo' o kororongit. 7 Ginawo nopo diyolo' om noponu' do karaaton, minsorou kasai' iyolo' do momonsoi dot araat. 8 Mongumang-umang nopo iyolo' om mimboros dot angaraat dot id tulun do suwai, ongoondos tomod iyolo' om orohian do mongonsit-onsit do wokon. 9 Mongindaraat iyolo' do Kinorohingan, i hilo'd surga, om minggayo-gayo do minsuhu' dot oiyo ko' tulun do hiti'd pomogunan, 10 gowoi pondo om iri piya tulun di songonuon do Kinorohingan nga' tumanud i' diyolo' om monongkuyaan tomod do poboroson diyolo'. 11 Boros ka no diyolo', “A' i' bo oilaan do Kinorohingan iti, a' i' bo dit Asawat Kopio oimbulayan iti,” ka. 12 Miagal noddi o kowoyo-woyoon do tulun dit araat, osimbayan po iyolo', om muhang-ruhang po o kakayaan. 13 Aiso' i' pama o kootuk-otukon ku'dti do kumolidang piya, om aiso' o guna' dot a' piya momonsoi'd dusa. 14 Oi Kinorohingan, monongodou-ngodou oku nopo dot inggoriton nu, om monikid kosuabon nopo do hukuman oku diya'. 15 Ondung minimboros oku daa do miagal diri, om okon no ko' miagal di tulun nu o kowoyo-woyoon ku. 16 Om numbalan ku i' daa do momusorou kopio o hal diri nga' adalaan i' kopio karalom do bagi' doho'. 17 Om ongoi oku noddi suang di Walai do Sasambayangan dit Agayo, om kosuhut oku nogiddi ondung poingkuro ot osiliu dot id tulun dit araat. 18 Hirion nu nondo iyolo'd ralan dit angalamou, om pologoson nu nondo iyolo' dot aratu' do gisom dot apatai iyolo'. 19 Diiri nopo om diiri iyolo' dot apatai, araat no kopio o kootuson diyolo'. 20 Miagal no iyolo' di nipi tu' olihuan no di dongkosuabon, soira' nopo dit oposik ko oi Tuhan, om tumagak nopo iyolo'. 21 Tontok dit araat tomod o tosorou ku om dit oudipon tomod ot opurimanan ku 22 om miagal oku po do nintorusan kabasug, tu' a' oku nopo kosuhut do pasal diya'. 23 Nga' minundorong oku i' kasai' dot id toning nu, om nahak oku i' diya'. 24 Potunudon oku i' diya' do mikuwo di ponudukan nu, om kootuson nopondo om romiton oku i' diya' do mikuwo'd kosuahan. 25 Nunu po toi o songonuon ku do hilo'd surga do suwai ko' iya', oi Tuhan? Om ondung nasanganu ku iya', om aiso' no o korohian ku do hiti'd pomogunan. 26 Mulong piya dot oluhoi o tinan ku om oluhoi o pomusorou ku, nga' iya' i' oi Kinorohingan o kokorisan ku; iya' noo o pokioonuan kopio ku. 27 Tulun nopo di tumongkiad diya' om atantu' no dot apatai, om patayon nu i tulun dit a' otorodok dot id diya'. 28 Nga' iyoho' nopo om potorungak no do Kinorohingan it a' ogina-gina' o kosonongo', om kaanu oku do kointirungan do mantad id Tuhan, it Osundu Kopio, om popinsusui oku do koinsanai di nongowonsoi dau.
Sambayang do Mokilabus di Bansa' do Mantad id Kuasa' do Pisangod
1 Sinding do ponudukan di Asap. Oi Kinorohingan, nokuro tu' niduan tomod nu iyahai do miagal diti? Potilombuson nu no toi kopio o kototogod nu dot id tulun nu? 2 Soroho' no i tulun nu, i pinili' nu do mantad di gulu po, i tulun di pinoidu' nu do mantad id ponguripanan om i siniliu nu do diya'd tulun. Hondomo' no o Nuluhon do Sion, i niyon nu di gulu po. 3 Homboo' no iti kinaraagan di kinoiyonon di gulu po, naraag ngai' no di pisangod dahai o konunu-nunuan do hiri'd suang do Walai'd Sasambayangan dot Agayo. 4 Sanggara-gara' po do hilo'd Walai'd Sasambayangan dot Agayo i pisangod nu dot atataadan do nakamanang, om nokoingkakat no diyolo' i bondira' diyolo'd hilo', do tanda' do kinamanangan diyolo'. 5 Miagal po iyolo' di mananagad do kayu tu' mintagad do kayu do kapak o panagad. 6 Raago' ngai' nopo diyolo' i papan do pinomolimput dot i kapak om i tukul diyolo' o pinamaraag. 7 Rinaag diyolo' i Walai'd Sasambayangan dot Agayo, om sinosomu' diyolo' i tiyonon do sumambayang dot id diya'. 8 Panatasan no daa kopio diyolo' iyahai do mangala', sorobo' ngai' nopo diyolo' i tiyonon do sumambayang dot id pomogunan diti. 9 Aiso' noddi o nokito dahai di kongoimayaan kopio, aiso' no o nabi do noolu', om songulun po nga' aiso' i' o koilo ondung soira' dot opupusan iti. 10 Oi Kinorohingan, songkuro po koloido' do pisangod dahai do momohingi-hingi diya'? Pologoson nu nopo toi iyolo' do mongindaraat do ngaran nu do gisom dot alaid? 11 Nokuro tu' a' ko monulung dahai? Nokuro tu' a' ko monongkoilo dahai? 12 Okon toi ko' nosiliu ko'd raja' dahai do mantad di timpuun i', oi Kinorohingan, om asaru' ko do mamasi dahai. 13 Pinigirang nu i rahat dot i kinoris nu dit a' ogina-gina' o kogoyoo' do pinomogirang, om minumuk nu o tulu di naga' di hilo'd rahat. 14 Binabak nu o tulu di Lowiatan om pinaakanan nu i rata' dau di nintorusan do hilo'd tana' do kowotuan. 15 Pinoluyung nu i bawang om i tudan do waig, om rinasak nu i bawang dot angagayo. 16 Winonsoi nu o tanawau om totuong, pinoiyon nu ilo tadau om ilo tulan dot id poiyanan di natantu' mantad nu. 17 Winonsoi nu o pogiwoli-wolitan diti pomogunan, om winonsoi nu o maso do magadau om maso do rumasam. 18 Nga' soroho' no, oi Tuhan do mongirak-irak diya' i pisangod nu, om a' iyolo' kotutun diya' om mongindaraat iyolo' do ngaran nu. 19 Kada' tongkiadai tomod iti tulun nu dit aiso' o pokukurayan do pinsimbayagan di pisangod diyolo' dit ongorongit, kada' kopio lihuwai do gisom dot alaid i tulun nu di maso dot inggoriton. 20 Soroho' no i tumpongo nu do pinoumpongo nu dahai, haro ngai' nopo o tulun dot orongit dot id pointikid-tikid do kinoiyonon do hiti'd pomogunan dit otuong. 21 Kada' pologoso' i tulun dit ulak-ulakan dot ointingayam, suwai ko' pologoso' no i tulun di mosikin om it oinggorit do mamarayou diya'. 22 Oi Kinorohingan, posik no om pokotopoto' no i hal nu! Soroho' no do monongodou-ngodou nopo i tulun dit a' otumbayaan diya' do mongirak-irak diya'. 23 Kada' lihuwai i balangas di pisangod nu dit ongotogod tomod, om i kohiyoo' di tulun di sumaap diya' dot a' opupus-pupusan do mamagarang.
Kinorohingan i Gompomutus
1 Maan di boyoon do modsisinding. Tumanud do lagu' do: Kada' pamaraag. Sinding di Asap. Sinding. 2 Mongunsikou iyahai diya', oi Kinorohingan, mongunsikou iyahai diya'. Popinsusuyon dahai o kogoyoo' nu, om popinsunudon dahai i nongowonsoi nu di kongopusahan kopio. 3 Boros kad Kinorohingan, “Tontok di maso do natantu' ku do kopomutusan, om otulid i' o pomumutus ku. 4 Mulong piya do gagaran ngai' it ongkipinuhobo om gumuyu' iti tana', nga' iri nopo pinoimpahan di tana' om pogiroton ku i'. 5 Sunudan ngai' ku i' i tulun dit angaraat dot a' ongoondos, 6 om oduhan ku iyolo' do mimboros do minggayo-gayo,” ka. 7 Iti nopo pomumutus om okon i' ko' ruminikot do mantad id koulayon ko' mantad id kotonobon, ko' mantad po id utara ko' mantad id salatan; 8 tu' Kinorohingan no, i gompomutus, o momohukum do wookon do tulun, om pokotopot do wookon. 9 Poingigit nod Tuhan o sangkir, i noponu' do waig dot anggur dit osokol do tanda' dot otogod iyau. Potuntugon nondo dau i sangkir diri, om inumon nondo di tulun dot angaraat do gisom dot aayi'. 10 Nga' iyoho' nopo om a' oku i' tumingkod do popimboros do pasal di winonsoi do Kinorohingan di Yakub, om a' oku tumingkod do modsinding do mamarayou dau. 11 Poluhoyon nondo dau i tulun dit angaraat, nga' pokorison pondo dau ko' i gulu i tulun dit ongosonong.
Kinorohingan di Nakamanang
1 Maan di boyoon do modsisinding. Ambaton do kecapi. Sinding di Asap. Sinding. 2 Abantug i' o Kinorohingan do hilo'd Yohuda, suahon i' o ngaran dau do hilo'd Israil. 3 Haro i' o tiyonon dau do hilo'd Yorusalim, poundorong iyau do hilo'd Nuluhon do Sion. 4 Hilo' no iyau do monipu' do koinsanai di rapo-rapo diyolo', i pana' di pisangod dau, om i kolid, om i gayang diyolo'. 5 A' no ogina-gina' o kagayaan nu, oi Kinorohingan, olumis ko po ko' i nuluhon di hino mantad no di gulu po. 6 I soudor di gunsiou nga' nosolod ngai' nu no o konunu-nunuan, om nokoolong no kopio iyolo'd koodop, gisom dot a' no kotungag tu' napatai no iyolo'. Aiso' i' o kinotutuk-tutukon di kinoris om i toilaan diyolo'. 7 Oi Kinorohingan di Yakub, tontok di tinompurolosi nu iyolo', om kangapatai nopo i kuda' diyolo' do minitonggoi di tulun di songinsakai. 8 Nga' iya' nopo, oi Tuhan om aiso' i' o katama' do sumaap, om aiso' o katama' do mingkakat dot id toguang nu do tontok dot otogod ko. 9 Hilo' ko'd surga do pinopoilo dit ibutus nu, om kododog nopo iti pomogunan dot ouru do moddosi, 10 tontok di miningkakat ko do popoboros dit ibutus nu, do mamasi do koinsanai di tulun dit ulak-ulakan do hiti'd pomogunan. 11 Kototogod nopod tulun om sumiliu i' do pamarayou diya', om iri nopondo tulun dit a' apatai dot id pisangadan om pakayon nu i' do sumiliu do diya'd kountungan. 12 Bayaano' no i nakabatos nu dot id Tuhan, i Kinorohingan nu. Papatahak ngai' kou no do porsombahan dot id Kinorohingan, koinsanai dokoyu i bansa' do hiti'd kasamakan. Poronokon id Kinorohingan dau o tulun. 13 Poinsiribaon dau i boyoon dit angasawat o ginawo, tompurolosion ngai' dau i raja' dit angabantug do hiti'd pomogunan.
Koinsasamadan do Tontok do Haro o Kosusaan
1 Maan di boyoon do modsisinding do tumanud do Yodutun. Sinding di Asap. 2 Mininglohou oku dot opuhod dot id Kinorohingan, mininglohou oku om norongou oku i' dau. 3 Tontok di haro o kosusaan om sumambayang oku i' dot id Tuhan. Monuaban oku nopo do popoinsawat do longon do sumambayang, nga' a' oku i' oinsasamadan. 4 Tontok di momusorou oku'd Kinorohingan, om koodoi oku nogi'! Om tontok do porolomon ku o pomusorou ku, nga' okon nogi' do lumomok o topurimanan ku. 5 A' oku id Tuhan pologoson do koodop do dongotuong, adalaan oku no kopio do tumangkabo gisom dot a' oku no milo do moro-boros. 6 Ongosorou ku po i tadau di nongotoliban, om angahandaman ku i toun di nangkatalib. 7 Monuaban oku nopo do minsorou, gisom do monguhot ot id suang do ginawo ku do poingkaa, 8 “Iyada' toko' no tuu kasai' do Kinorohingan diti? A' no tuu iyau ohubayaan dati'? 9 Nokotingkod tuu'ddi iyau dot osianan dati'? A' no tuu'ddi dau bayaanon i batos dau? 10 Nolihuan no tuu'ddi do Kinorohingan i kobinsiano' dau dati'? Notingalanan tuu'ddi do kobintogodo' i kobinsiano' dau'ddi?” kangku no. 11 Om boros kangku'ddi, “Iti no kopio o kotongob do ginawo ku tu' aiso' noddi kuasa' dit Asawat Kopio,” kangku. 12 Oi Tuhan, hondomon ngai' ku indo i nongowonsoi nu dit angagayo di gulu po, pogulion ku indo o pomusorou ku dot id kongopusahan di nongowonsoi nu di gulu po. 13 Sorohon ngai' ku indo i nongowonsoi nu, om sorisidon ku do momusorou o koinsanai di nongowonsoi nu di kongopusahan kopio. 14 Oi Kinorohingan, olidang ngai' nopo o wonsoyon nu, aiso' no o kinorohingan do suwai do miagal diya' kosundu. 15 Iya' no i Kinorohingan di miningwonsoi do kongopusahan, om pinointalang nu i kuasa' nu dot id pogialatan do bansa'. 16 Pinasi nu di sinundu nu i tulun nu, iri no i sinakagon di Yakub om i Yusup. 17 Poddosi nopo i waig do nokokito diya', oi Kinorohingan, om gagarai nopo i nanad do rahat. 18 Pinopotuntug i haun do rasam, om opuhod o tinggoron do hilo'd tawan, om kodumaat nga' sangkalab-kalab poo dot id posorili'. 19 Iri po ngorod do tinggoron nu ot orongou, om i kalab do kodumaat o kanawau diti pomogunan, iti po tana' nga' kogogor nopo om noguyu'. 20 Mamanau ko nopo do sumalag di tumbak, om soborongon nu i rahat, nga' a' i' okito o nulokon nu. 21 Miagal ko pod gompomogompi' do dumba' do momoyo' di tulun nu, i winoyo' di Musa om i Harun.
Kinorohingan om i Tulun Dau
1 Sinding do ponudukan di Asap. Oi tulun ku, pokinongou kou no diti potudukon ku, om podulon no kopio iti poboroson ku. 2 Moro-boros oku dokoyu dot id suang do poinukadan, om posondoton ku o komoyon di boros dot aralom di pinoboros di gulu po dit a' osuhutan o komoyon; 3 i nongorongou om i nongoilaan toko', i pinosunud di komolohingan toko' dot id dati'. 4 A' toko' i' lisokon iri dot id tangaanak toko', suwai ko' susuyon toko' i' dot id tangaanak toko' di sumusuhut dati', i pasal di kosunduwo' do Tuhan om koinsanai di nongowonsoi dau dit angagayo om i nongowonsoi dau di kongopusahan kopio. 5 Nonuan dau dot oturan o tulun dot Israil, i tulun dau, nonuan dau do ponudukan i sinakagon di Yakub. Sinuhu' dau i taki-aki toko' do popotuduk dit oturan dot id tangaanak diyolo', 6 om kongoilo i' di ponudukan i sinakagon do sumusuhut diyolo', om iyolo' nondo nga' popotuduk id di dot id tangaanak diyolo'. 7 Miagal nodti o wonsoyon om mogondos indo iyolo' dot id Kinorohingan, om a' kolihu di nongowonsoi dau, suwai ko' tumorodok kasai' do tumanud di tisuhu' dau. 8 Om a' indo iyolo' koiyo di komolohingan diyolo', tu' tulun di sumasaap om sumosongkiwal, om it a' nokoumbal dot ogirot o kotumbayaan dot id Kinorohingan, om a' tuminorodok dot id dau. 9 Iri payat dot Ipraim dit ongkipana' do ponokorapo-rapo nga' minogidu' i' do tontok di minogisasangod. 10 A' diyolo' sinulung i tumpongo do Kinorohingan dot id diyolo', a' iyolo' minumboyo' dit oturan dau. 11 Nongolihuan no diyolo' i nongowonsoi'd Kinorohingan, i kongopusahan do nokito diyolo' do winonsoi dau. 12 Minomonsoi o Kinorohingan do kongopusahan di hilo'd rantai do Soan, i hilo'd pomogunan do Masir, do montong-ontong i taki-aki diyolo'. 13 Pinigirang dau i rahat do winayaan dau do pinoposoborong diyolo'; pinoolig dau i waig do miagal do tolig do hiri'd miampaping. 14 Dangadau nopo om haun o pinomoyo' dau diyolo', om dongotuong no om tulinau do tapui o pinomoyo'. 15 Tontok di hilo' iyolo'd tana' do kowotuan om minamalapak iyau do pampang do pinopoimbulai do waig do pinoinuman diyolo'. 16 Pinoimbulai dau o waig do luminuyung do mantad hiri'd pampang do miagal pod bawang kologod. 17 Mulong piya do miagal diri nga' a' i' iyolo' tuminingkod do mingwonsoi'd dusa dot id Kinorohingan, om suminaap iyolo' do Kinorohingan, it Osundu Kopio, di hilo' iyolo'd tana' do kowotuan. 18 Tuminomod i' iyolo' do mogumbal do Kinorohingan, tu' suminonsog do mokianu do taakanon di korohian diyolo'. 19 Boros ka no diyolo' do sumaap do Kinorohingan, “Milo i' kaka o Kinorohingan do manahak dati' do taakanon do hiti'd tana' do kowotuan? 20 Otopot nogi' kopio do minamalapak iyau do pampang, om luminuyung o waig do mantad hiri do miagal pod bawang kologod. Nga' milo po tuu iyau do manahak dati' do taakanon, om manahak do tulun dau do tikanas do hiti?” ka no diyolo'. 21 Om kotogod noddi o Kinorohingan do nokorongou di pokionuon diyolo', om saapo' nod Kinorohingan i tulun dau do tapui, om muhang-ruhang nopoddi o kototogod dau diyolo', 22 tu' a' i' iyolo' otumbayaan dau, om a' iyolo' monongkuyaan do kikuasa' iyau do mamasi diyolo'. 23 Mulong piya dot iyo'ddi nga' minonuhu' i' iyau di tawan do popoiwang do totobon. 24 Nonuan dau iyolo' do taakanon do mantad hilo'd surga, tu' pinolintuhun dau o manna do maan diyolo'd akanon. 25 Om pangakan no iyolo' di taakanon do mantad hilo'd surga, om akan no iyolo' do gisom do nongoiyahan. 26 Om suhuo' pod Kinorohingan do tumongus i ribut do mantad hilo'd koulayon, om i sinundu dau o pinopotongus di ribut do mantad id salatan. 27 Om porikatai no dau i tulun dau do tombolog do gisom dot a' no ointob o kogumuo'. 28 Pinaratu' dau i tombolog diri do hiri'd pogiolit-olitan di pinomukiiman do posorili' di kiim diyolo'. 29 Om pangakan noddi iyolo' do gisom do nongoiyahan, tu' tinahak ngai' id Kinorohingan o nunu nopo i pinokianu diyolo'. 30 Nga' a' nopo iyolo' milo dot abagal-bagalan, om maso poddi diyolo' do mingakan di taakanon diri, 31 om kotogod tomod no o Kinorohingan diyolo', om patayo' no dau i tulun dit ongokoris, i tangaanakwagu dot Israil dit ongosiou. 32 Nga' mulong piya dot iyo'ddi, nga' kakal i' diyolo' do mingwonsoi'd dusa, om a' monongkuyaan dau, do nokointalang piya ngai' i kongoimayaan. 33 Om gowoi poddi om pupusai nod Kinorohingan o tumur diyolo', do miagal no di pinuhobo di pohoboon tu' diiri i' om diiri dot atanus. 34 Nga' tontok di pinatai do Kinorohingan o piro-piro dot id pogialatan diyolo', om guli' noddi o wookon diyolo' dot id Kinorohingan, mikuwo'd minonosol do dusa, om tuminorodok diri iyolo' do sumambayang dot id Kinorohingan. 35 Nahandaman diyolo' do Kinorohingan no ot intirungon diyolo', om iyau, it Asawat Kopio o mamasi diyolo'. 36 Nga' tudut ngai' i' i boros diyolo', iso' po di pinoboros diyolo' nga' aiso' i' ot otopot. 37 A' i' iyolo' tuminorodok dot id Kinorohingan, a' diyolo' tinanud i tumpongo do Kinorohingan dot id diyolo'. 38 Nga' Kinorohingan nopo om obinsianan i' do tulun dau, nompunan i' dau o dusa diyolo' om a' i' dau iyolo' rinaag. Asaru' nod Kinorohingan do pususon o kototogod dau om a' dau pointalangon i kototogod dau. 39 Tu' ahandaman i' dau dot iyolo' nopo om matai i', miagal no di ribut tu' kalambai noo om katalib no. 40 Asaru' no iyolo' do sumaap do Kinorohingan di hilo' po iyolo'd tana' do kowotuan, a' no iyolo' impiro-piro do pinopokoruol do ginawo'd Kinorohingan. 41 Miguli-guli' nopo iyolo' do mogumbal do Kinorohingan, om pinopokoruol do ginawo'd Kinorohingan dot Israil, i Kinorohingan dot olidang. 42 Nolihuan diyolo' i sinundu dau dot agayo, om i tadau di pinasi dau iyolo' do mantad id pisangod diyolo', 43 om di pinopointalang iyau do kongopusahan om koinsanai di nongowonsoi dau do kongoimayaan di hilo'd rantai do Soan, i hilo'd pomogunan do Masir. 44 Siniliu ngai' dau do raha' o bawang, om aiso' no o tinumon do tulun do Masir. 45 Pinorikot dau o langau dot ogumu' dot id pogialatan diyolo' do maan do ponginggorit diyolo', om pinorikatan dau iyolo' do bonong do pamaraag do koinsanai di tana' diyolo'. 46 Pinorikot dau o katat do mangakan di tanom-tanom diyolo', om koinsanai di tua' di tanom-tanom diyolo'. 47 Rinaag dau do karambatu o kabun dot anggur diyolo', om i guas dot ara diyolo' nga' rinaag dau do bolobou dot ais. 48 Pinatai dau do karambatu i sapi' diyolo', om i dumba' diyolo' nga' sinisian ngai'. 49 Haro o sonsinompuruan o moloikat do pinoporikot do kosusaan dot awagat kopio dot id diyolo', Oiyo-iyo' nopo dau do papalabus i kototogod dau, do gisom dot aiso' noo o pinokukurayan diyolo'. 50 A' no dau pinusus o ginawo dau dot otogod, om pinorikatan dau iyolo' do toruol di mogkoroliu do pinamatai dau diyolo'. 51 Pinatai ngai' dau o tanak do kusai dit id gulu, dot id suang do koinsanai di sompiiyon do tulun do Masir. 52 Om woyoo' noddi dau i tulun dau do luminabus do miagal di madtatamong do dumba', om winoyo' dau iyolo' do minaya' di tana' do kowotuan. 53 Aiso' i' o kinoligagaanan diyolo' tu' winoyo' i' dau iyolo', om a' i' iyolo' moddosi, nga' iri nopo pisangod diyolo' om nongolondod ngai' i' do hiri'd rahat. 54 Pinakaa dau iyolo' do hilo'd pomogunan dau dit olidang, i hilo'd konuluhanan di nosolod dau dot id pisangadan. 55 Nuyung dau i tulun mantad do hiri do tontok di tuminongkop i tulun dau'd hiri; om pinogiduwo-duwo dau i tana' dot id payat dot Israil do gisom do nongkoiyon iyolo' dot id kokiiman di pisangod diyolo'. 56 Nga' suminaap iddi iyolo' do Kinorohingan, it Asawat Kopio, om minogumbal iyolo' dau, om a' diyolo' numboyo' i pinonuhuan dau. 57 Suminaap iyolo' do miagal di taki-aki diyolo', miagal po iyolo' di pana' do nokilong tu' a' no milo do pakayon. 58 Pinotogod diyolo' o Kinorohingan tu' haro i' o tiyonon diyolo' do sumambayang dot id tininganak om tiiyonon do tumuku' dot id tingolig di winonsoi diyolo'. 59 Otogod tomod diri o Kinorohingan do tontok di nokito dau iri, om iyadaai noddi kopio do Kinorohingan i tulun dau. 60 Om tongkiadai noddi do Kinorohingan i Kiim dau di hilo'd Silo i kinoiyonon di nundorong do Kinorohingan do poinsugku' dati'. 61 Pinologos dau i pisangod toko' do minononggoi di Kaban do Tumpongo, i tanda' do sinundu om kagayaan do Kinorohingan. 62 Otogod o Kinorohingan di tulun dau, om pologoso' noddi dau iyolo' do pinatai di pisangod diyolo'. 63 Tangaanakwagu nga' nangapatai i' dot id pisangadan, om kosumandakan poddi nga' aiso' no o mangawin. 64 Imam nga' pinatai i' dot araat tomod o pinamatai, om iri ngai' i sawo diyolo' nga' a' no milo do mogihad diyolo'. 65 Alaid poddi om koposik nogi' o Kinorohingan do miagal poddi nokoodop iyau, om miagal poddi iyau di tulun dit okoris di nobinsuhu' do waig dot anggur. 66 Om uyungo' no dau i pisangod dau do mikuwo'd tiningayam om naala' do gisom dot alaid. 67 Nga' niadaan i' dau i sinakagon di Yusup, om a' dau nanu i payat dot Ipraim. 68 Nga' nanu nogi' dau o payat di Yohuda, om pinili' dau o Nuluhon do Sion, i kosianan kopio dau. 69 Om hilo' no o pinoingkakatan dau di Walai dau dot agayo, do pinoiyo di tiyonon dau do hilo'd surga, om winonsoi dau do miagal diti tana' kogirot, tu' a' araag do gisom dot alaid. 70 Pinili' dau i Daud, i susuhuon dau, om linohou dau iyau do mantad hiri'd kobuturan. 71 I pinadtamangan di Daud di dumba' dau, om siliho' no dau i Daud do raja' do tulun dot Israil, do podtomongon di tulun di dong Kinorohingan. 72 Om pinitamangan di Daud iyolo' do mikuwo'd toilaan, om oilo tomod i Daud do minomogompi' diyolo', om otulid o ginawo dau do minomoyo' diyolo'.
Sambayang do Mokilabus di Bansa'
1 Sinding di Asap. Oi Kinorohingan, nosolod nod bansa' dit a' kotutun diya' i tana' di potungkusan nu! Nososomu' no diyolo' i Walai'd Sasambayangan dot Agayo, om pinologos do poinraag o bandar do Yorusalim. 2 Pinologos diyolo' dot akanon do tombolog i rata' di tulun nu, om i rata' di susuhuon nu nga' pinologos i' diyolo' dot akanon do nintorusan. 3 Pinalawas diyolo' o raha' di tulun nu do miagal pod popotuntug do waig, miagal pod waig o raha' do lumuyung do pointongkop do Yorusalim, om aiso' no o noolu' do momolobong di rata' diyolo'. 4 Oinsanan nopo i bansa' dit id posorili' dahai do mongindaraat dahai, mongirak-irak om mongumang-umang iyolo' dahai. 5 Oi Tuhan, potilombuson nu no kopio o ginawo nu dot otogod dahai? Potilombuson nu no kopio o kototogod nu do sumikit do miagal do tapui? 6 Kotogod no di bansa' dit a' kotutun diya', om id tulun dit a' sumambayang dot id diya'. 7 Tu' napatai no diyolo' i tulun nu, om naraag diyolo' i pomogunan nu. 8 Kada' iyahai hukumai dot i dusa di komolohingan dahai o kopomohukuman, suwai ko' kosianai no dahai do dinondo tu' aiso' no o pokukurayan dahai. 9 Oi Kinorohingan, i gampamasi dahai, uhupai no iyahai, om posio' no iyahai, om ompunai no o dusa dahai, dot i kobontugo' do ngaran nu o kopoiduan. 10 Kada' pologoso' i bansa'd suwai do monguhot do pasal dahai do poingkaa, “Hinonggo no o Kinorohingan diyolo'?” ka. Hukumai ngai' no i bansa'ddi do montong-ontong iyahai, tu' iyolo' no i pinapalawas do raha' di susuhuon nu. 11 Pokinongoho' no o todoi di tulun di songinggiil, om polobuson no i tulun di hukuman do kapatayon dot i sinundu nu dit agayo o papalabus. 12 Oi Tuhan, suliai no i bansa'd suwai dot inturu' kawagat ko' mantad di pinongindaraat diyolo' diya'. 13 Om iyahai nopondo tu' tulun nu, om i ponokodumba' di pigompian nu, om mongunsikou i' dot id diya' do gisom dot alaid, om mamarayou diya' do gisom do poingompus.
Sambayang do Mokipasi di Bansa'
1 Maan di boyoon do modsisinding. Tumanud di lagu' do: Bunga bakung. Sinding do kososian di Asap. 2 Pokinongoho' no iyahai, oi gompomogompi' do tulun dot Israil, pokinongoho' no iyahai, oi boyoon do tulun nu. Poirikau ko dot id tirikohonon nu di don raja' dit id sawat ko' i moloikat di roitan do kerub. 3 Intalang no dot id payat dot Ipraim, om Binyamin om Manasi. Pointalango' no i sinundu nu, rikot no do mongoi pamasi dahai! 4 Pogulio' no iyahai, oi Kinorohingan; pointalangai no iyahai di kosianan nu om angapasi i' iyahai. 5 Oi Tuhan, i Kinorohingan dit Osundu Kopio, songkuro po koloido' nu do tumogod do sumambayang piya i tulun nu? 6 Nonuan nu iyahai do katangaban do maan dot akanon, om sangkir dot agayo do noponu'd romou do maan dot inumon. 7 Pinologos nu i bansa' dit id posorili' dahai do mogitotogod do mogiaahau do sumolod diti pomogunan dahai, om indaraaton po iyahai di pisangod dahai. 8 Pogulio' no iyahai, oi Kinorohingan it Osundu Kopio. Pointalangai no iyahai di kosianan nu, om angapasi i' iyahai. 9 Tulun nu nopo om miagal do guas dot anggur di pinawaliu nu do mantad hilo'd Masir. Nuyung nu i bansa'd suwai om potonomo' nu nogiddi i guas dot anggur do hiri'd pomogunan diyolo'. 10 Pamalangga' ko nogiddi do kinoiyonon do pinatanaman diri, om pomugamut noddi iri do gisom do nakaralom, gisom do nokotongkop di pomogunan. 11 Iri po nulu-nulu nga' nongolungungan ngai', om nokosoibau di kayu sedar dit angakawas o raan. 12 Om ruminoloi i raan diri gisom do nokorikot do hilo'd Rahat do Tanga', om gisom do nokorikot do hilo'd Bawang dot Iprat. 13 Nokuro'ddi tu' hinaba' nu i pagar do posorili'ddi? Baino' nopoddi om isai nopo o kawaya' do hiri nga' mongoi nopo panakau di tua' dit anggur. 14 Om piulak-ulakan pod bakas i guas dit anggur, om pingakanan do nintorusan i tua'. 15 Oi Kinorohingan, it Osundu Kopio, koiliono' no iyahai, luungai no iyahai do mantad hino'd surga, rikot no do mongoi pamasi di tulun nu. 16 Rikot nod hiti do mongoi pamasi'dti guas dot anggur do tinanom nu, iti guas dot anggur dit omulok po do pinosuni nu do gisom do nokopomugamut. 17 Tinutudan om tinagad do pisangod dahai i guas dot anggur, kotogod no do mintong diyolo' om patayo' no iyolo'. 18 Intirungai no om gompio' no iti tulun do pinili' nu, i bansa' di pinokoris nu. 19 Poingkuro piya nga' a' no iyahai mogidu' kawagu do mantad id diya', pologoso' no iyahai do poimpasi om kapamarayou i' iyahai diya'. 20 Pogulio' no iyahai oi Tuhan, i Kinorohingan dit Osundu Kopio, pointalangai no iyahai do kosianan nu, om angapasi i' iyahai.
Sinding do Tontok do Tadau dot Agayo
1 Maan di boyoon do modsisinding. Tumanud di lagu' do: Gitit. Mantad id di Asap. 2 Pamangkis no dot atataadan dot id Kinorohingan i mogobi' dati', podsinding no do pamarayou'd Kinorohingan di Yakub. 3 Pounio' no o tuunion om tuntungo' no i tamburin, kombito' no o gambus om kecapi dot olumis o pongongombit. 4 Pounio' no o torumpit do tontok do tadau dot agayo, tontok di tulan do wagu om tontok di misawang o tulan. 5 Iti no o toturan do hilo'd Israil, i ponuhuan do Kinorohingan di Yakub. 6 Iti no o ponuhuan dau do tulun dot Israil, tontok di sinangod dau i pomogunan do Masir. Orongou ku o boros dit a' ku po insan korongou do poingkaa, 7 “Nidu' ku i binabo do poimbabo dokoyu, pinologos ku iyokoyu do pinopoiliu di bata' do songinsaan dokoyu. 8 Tontok dit id suang kou do kosusaan, om luminohou kou doho', om ruminikot oku i' do minongoi pamasi dokoyu. Sinimbar ku i' iyokoyu do mantad hiri'd lilisokon ku di hiri'd suang do tongus, pinogumbalan ku iyokoyu di hilo'd tudan do waig do Moriba. 9 Oi tulun ku, pokinongou no diti boros ku do popoinsan dokoyu, oi Israil, orohian oku no daa kopio do mokinongou kou doho'. 10 Kada' kou nogi' kopio tuku' do kinorohingan do suwai. Kada' nod haro o ponokokinorohingan dokoyu'd suwai. 11 Iyoho' no o Tuhan, i Kinorohingan dokoyu, i minomoyo' dokoyu do suminoliwan do mantad id pomogunan do Masir. Tontok di linouson kou om nonuan ku i' iyokoyu do taakanon. 12 Nga' a' i' minokinongou doho' i tulun ku, om a' minumboyo' doho' i tulun dot Israil. 13 Gowoi poddi om pologoso' ku nopo iyolo' do tumanud di diyolo'd korohian, om momonsoi do nunu nopo i diyolo'd korohian. 14 Orohian oku no daa kopio do mokinongou doho' o tulun ku, orohian oku no daa kopio do mumboyo' iyolo' doho'. 15 A' ku no poloidon do mangala' i pisangod diyolo', om saapon ngai' ku i sumaap diyolo'. 16 Tulun nopo dit araatan doho' om poinsiribaon ku indo, om mompus-ompus o hukuman diyolo'. 17 Nga' iyokoyu nopo i tulun ku om paakanon ku indo do gandum dit osonong kopio, om popimbangaton ku iyokoyu do paha' do mantad hilo'd gouton,” ka dau.
Kinorohingan i Raja' dot Agayo Kopio
1 Sinding di Asap. Kinorohingan no o boyoon di pitimungan dit ongosundu do hilo'd surga, id pitimungan noddi do pinoboros dau i natantu' dau, do poingkaa, 2 “Kada' pomutus do tulun dot a' otulid o pomumutus, om kada' obiai i tulun dot araat. 3 Obiai no i tulun do mosikin om i tangaanak dit aiso' o molohing, wonsoyo' no it otulid dot id tulun di mosikin om id tulun dit aiso' o pokukurayan. 4 Poiduwo' no iyolo' do mantad id kuasa' di tulun dot araat. 5 Aiso' no kopio o toila-ilaan dokoyu, basug kou no kopio, naraag no kopio o kowoyo-woyoon dokoyu, om natanus no it otulid do hiti'd pomogunan. 6 Nokosunud ku no dot iyokoyu nopo om kinorohingan, om oinsanan kou nopo do tangaanak do Kinorohingan dit Osundu Kopio. 7 Nga' apatai kou i' do miagal do tulun, om haro o kooyion do tumur dokoyu do miagal do pointikid-tikid di tulun di kipangkat,” ka. 8 Oi Kinorohingan, rikot no om porintao' no iti pomogunan, tu' koinsanai do bansa' nga' iya' ngai' i' o sanganu.
Sambayang do Mokitulung do Mangala' do Pisangod
1 Sinding di Asap: sinding. 2 Oi Kinorohingan, kada' undorong tomod dot a' mungkomi-komi, kada' undorong tomod do momigapus nopo. 3 Intong pogi', nga' sumaap no moti' diya' ilo pisangod nu, om sumaap no ngai' it angaraatan diya'. 4 Mogiupakat no iyolo' do sumaap do tulun nu, om mogiboro-boros iyolo' do sumaap di tulun dit intirungan nu. 5 Boros ka diyolo', “Kainou maai toko' punsoo' o bansa' diyolo', om olihuan i' ot Israil do gisom dot alaid,” ka. 6 Iso-iso' nopo o ginawo di bansa' do mogisokodung, om mogiuhup do sumaap diya'. 7 I bansa'd tulun dot Idom om bansa'd Ismail, om i bansa'd Muab om i bansa'd Hagar. 8 Om i bansa'd Gibal, om i bansa'd Amon om i bansa'd Amalik, om i bansa'd Pilistia om i bansa'd Tirus. 9 Om i bansa'd Asur nga' minuhup nogi' diyolo', minogisosompuru iyolo' do minuhup di sinompuruan do sinakagon di Lut. 10 Wonsoyo' no dot id diyolo' o miagal di winonsoi nu dot id tulun do Midian, om id di Sisira om id di Yabin di hilo'd Bawang do Kison. 11 Naala' nu iyolo' do hilo'd Indor, om nangapasa' o rata' diyolo' do hiri'd tana'. 12 Wonsoyo' no dot id boyoon diyolo' o miagal di winonsoi nu dot id di Orib om i Siib, alao' ngai' no i woyo-woyoon diyolo' do miagal di winonsoi nu dot id di Siba om id di Salmuna, 13 i minoro-boros do poingkaa, “Solodon nondo dahai i tana' do dong Kinorohingan,” ka. 14 Oi Kinorohingan, potiaso' no iyolo' do miagal do pupuk, om miagal di sakot do nokoring do tilibon do ribut. 15 Poingkuro nopo i tapui do monorob do gouton, om i tapui do monorob di hilo'd konulu-nuluan, 16 om gusao' no iyolo' di tongus nu dot opuhod, om tompurolosio' no iyolo' di tongus nu di koronob o kopuhodo'. 17 Tingayamo' no iyolo', oi Tuhan, om okunon i' diyolo' do kisinundu ko. 18 Aala' po daa iyolo' om orolosi po daa do gisom dot alaid, angapatai po daa iyolo' dot id suang do kointingayaman. 19 Maha' daa om oilaan diyolo' dot iya' noo o Tuhan, it Asawat Kopio, i pomorinta' dot id sawat kopio do pointongkop diti pomogunan.
Langadon di Walai'd Kinorohingan
1 Maan di boyoon do modsisinding. Tumanud do lagu' do: Gitit. Sinding di pinuruan do sompiiyon di Kora. 2 Oi Kinorohingan, it Osundu Kopio, asanangan oku no kopio di Walai nu. 3 Asanangan oku no kopio do hilo' oku; orohian oku no kopio do poinsuang di Walai nu. Aayi-ayi' no ginawo ku dot ooropod do modsinding dot id Kinorohingan di poimpasi. 4 Iri piya pirit nga' haro i' o rumun, om kolumpisau nga' haro i' o tulion diyolo'. Pinoiyon diyolo' i tangaanak diyolo' do hiri'd toning di pananaraban do porsombahan nu, oi Tuhan it Osundu Kopio, i raja' ku om Kinorohingan ku. 5 Olumaag no i tulun di poundorong dot id suang do Walai nu, i modsinding kasai' do mamarayou diya'. 6 Olumaag no i tulun di nakaanu do kokorisan do mantad id diya', om it orohian kopio do mongoi do hiri'd walai nu do hilo'd Nuluhon do Sion. 7 Tontok di tumalib iyolo' di rantai do Baka dit otuu kopio, om sumiliu nopori do kinoiyonon di kitudan do waig, om i rasam di donglumahanggang o roun do kayu o koponu' di botung-botung. Om iri no o barakat do Tuhan. 8 Om muhang-ruhang o kokoriso' diyolo' di maso diyolo' do manau-panau do kumaa do hilo'd Sion do mongoi timbaba' do Kinorohingan it id sawat do koinsanai'd ponokokinorohingan. 9 Oi Tuhan, i Kinorohingan dit Osundu Kopio, pokinongou no do sambayang ku, oi Kinorohingan di Yakub, pokinongou no. 10 Oi Kinorohingan, barakatai no i raja' dahai, i raja' di pinili' nu. 11 Angasangadau nopo do hiri'd suang do Walai nu nga' osonong no kopio ko' mantad do soribu o tadau dot id kinoiyonon do suwai. Uhang ku nod poingkakat do hiri'd wawayaan do Walai'd Kinorohingan ku, ko' mantad do poingiyon do hiri'd walai do tulun dot angaraat. 12 Tuhan no o gompomogompi' om raja' toko' di kikagayaan, i manahak dati' do kosonongo' om kosuahan. Patahakon kasai' id Tuhan it ongosonong dot id tulun di mingwonsoi do korohian dau. 13 Olumaag no i tulun di mogondos diya', oi Kinorohingan it Osundu Kopio.
Sambayang do Mokianu do Kosimbayanan do Bansa'
1 Maan di boyoon do modsisinding. Sinding di pinuruan do sompiiyon di Kora. 2 Oi Tuhan, nosianan ko i' di pomogunan nu, tu' pinakaya' nu kawagu o tulun dot Israil. 3 Nompunan nu o dusa do tulun nu, om nompunan nu o koinsanai do kasalaan diyolo'. 4 A' ko noddi otogod diyolo', om a' nu pinorikot dot id diyolo' i kototogod nu dit a' ogina-gina'. 5 Pogulio' no iyahai, oi Kinorohingan i gampamasi dahai, om tingkod no do tumogod dahai. 6 Potilombuson nu no toi kopio ino kototogod nu dahai? A' nu no nangku kopio posogi-sogiton ino ginawo nu? 7 Pokoriso' no iyahai kawagu, om mamarayou indo iyahai diya', iyahai i tulun nu. 8 Pointalango' no dot id dahai i kosianan nu dit aiso' o kotingkadan oi Tuhan, om posio' no iyahai. 9 Mokinongou oku do poboroson do Tuhan, i Kinorohingan, pinapabatos iyau do piuludan dot id dati', i tulun di kosianan dau, ondung tumongkiad toko' no di dusa toko'. 10 Atantu' no do posodia' i' iyau do mamasi di tulun di momusou dau, om mundorong indo i Kinorohingan di kikagayaan do hiti'd pomogunan toko'. 11 Kopisolowot nondo o kosianan om kotorodoko', om kopigapus o piuludan om it otulid. 12 Om korikot nondo do hilo'd sawat o kotorodoko' di tulun do mantad hiti'd pomogunan, om lumuung o kotulido' do Kinorohingan do mantad hilo'd tawan. 13 Om pakayaon toko' nondod Tuhan, ogumu' nondo om osonong o hasil do tana' toko'. 14 Mogulu nondod Tuhan it otulid, do mamarantis do wayaan dau.
Sambayang do Mokitulung
1 Sambayang di Daud. Oi Tuhan, pokinongoho' no o sambayang ku, om simbaro' oku no, tu' oluhoi oku no om aiso' no o pokukurayan ku. 2 Poiduwo' oku no do mantad id kapatayon, tu' mogondos oku i' diya'. Gompio' oku no tu' iyoho' nopo om susuhuon nu i', om osianan oku diya'. 3 Iya' no o Kinorohingan ku, om insianai oku no, monongodou-ngodou oku i' do sumambayang dot id diya'. 4 Potoodo' no o susuhuon nu oi Tuhan, tu' id diya' no o korikoton do sambayang ku. 5 Osonong ko i' dot id dahai om mangampun ko, om osianan ko i' kasai' do koinsanai di tulun di sumambayang dot id diya'. 6 Pokinongou no diti sambayang ku, oi Tuhan, pokinongoho' no iti tihad ku do mokitulung. 7 Minglohou oku diya' do tontok dot osusa' oku, tu' sumimbar ko i' do sambayang ku. 8 Aiso' no o kinorohingan do miagal diya', oi Tuhan, aiso' i' o tiso' do nokopomonsoi do miagal di nongowonsoi nu. 9 Oinsanan nopondo i bansa' do winonsoi nu do rumikot do mongoi tuku' dot id diya', om royohon nondo diyolo' o kobontugo' nu. 10 Iya' no it okoris om i mingwonsoi do kongopusahan, iya' noo o Kinorohingan. 11 Tudukai oku no do korohian nu do wonsoyon ku, oi Tuhan, om otorodok oku indo do mumboyo' diya', tudukai oku no do momonsoi do karaja' nu do mikuwo'd aayi-ayi' o ginawo ku. 12 Om aayi-ayi' indo o ginawo ku do mamarayou diya', oi Tuhan i Kinorohingan ku, om popinsusuyon ku indo i kogoyoo' nu do gisom dot alaid. 13 A' no ogina-gina' o kogoyoo' do kosianan nu dit aiso' o kopupuson dot id doho'. Tu' pinoidu' oku i' diya' do mantad hiri'd lobong. 14 Oi Kinorohingan, rumikot no i tulun dot ongoondos do mongoi saap doho', haro o sonsinompuruan do tulun dit ongorongit, do mumbal daa do mongoi pamatai doho', iri no i tulun dit a' mamadul diya'. 15 Nga' iya' no oi Tuhan, i Kinorohingan dit obingupus om obinsianan, om it alanut o ginawo om otorodok kasai' om opuhawang. 16 Koiliono' oku no om insianai oku no, pokoriso' oku no om posio' oku no, tu' momonsoi oku i' do karaja' nu do miagal di tina' ku di gulu po. 17 Pointalango' no kopio o kosianan nu dot id doho', oi Tuhan, om ointingayam indo i tulun dit araatan doho', do kokito iyolo' do noinsasamadan oku diya' om tinulung oku diya'.
Pamarayou do Yorusalim
1 Sinding do pinuruan do sompiiyon di Kora. Sinding. Winonsoi do Kinorohingan i bandar dau do hilo'd timpak do nuluhon dit olidang. 2 Kosianan no kopio dau i bandar do Yorusalim, do mantad ko' i bandar do suwai do hilo'd Israil. 3 Oi bandar do Kinorohingan, pokinongou no, do koinsanai di boros dau dot ongosonong tomod do pasal diya', 4 “Tontok nopo dot intobon ngai' ku i bansa' di mumboyo' doho', om pohompiton ku nondo diyolo' o Masir om Babil; om pohompiton ku nogi' i tulun do Yorusalim, i tulun do Pilistin, om Tirus, om Etiopia,” ka. 5 Om pasal nod Nuluhon do Sion om roitan nondo iri do kasanganu o koinsanai'd bansa', om Kinorohingan it Osundu Kopio o popogirot dau. 6 Tulison nopondod Kinorohingan o ngaran do tulun dau, om pohompiton ngai' nopondo dau i bansa'd suwai do tulun mantad do Yorusalim, i bandar dau. 7 Mintari' nondo iyolo' om modsinding do poingkaa, “Hiti nod Sion o tadon do koinsanai'd barakat toko',” ka.
Sambayang do Mokitulung
1 Sinding. Sinding di pinuruan do sompiiyon di Kora. Maan di boyoon do modsisinding. Tumanud di lagu' do Mahalat-Lianot. Sinding do ponudukan di Himan, i tulun dot Israhi. 2 Oi Tuhan, i Kinorohingan ku om i gampamasi doho', monongodou oku nopo do minglohou diya', om dongotuong no om rumikot oku dot id toguang nu. 3 Pokinongou no do sambayang ku, pokinongoho' no o lolohou ku do mokitulung. 4 Ogumu' no kopio o kosusaan do nokorikot dot id doho', gisom dot oruhai oku no dot apatai. 5 Miagal oku po di tulun di motingkapatai no, aiso' no o kokorisan ku. 6 Pinataam oku dot id pogialatan do tulun di nangapatai, do miagal poddi tulun di pinatai di songinlii dot id suang do lobong diyolo', i laid nu no kolihuwai, om it a' nu no milo do tulungon. 7 Pinataam oku diya' dot id lobong dit aralom, id suang di luang dit aralom om otuong kopio. 8 Awagat no kopio i kototogod nu doho', nomumuk oku po do norotuan di kototogod nu. 9 Pinotongkiad ngai' nu doho' o tambalut ku, gisom do karaatan oku'ddi diyolo'. Noturungku' oku no om a' oku no milo do mogidu', 10 om ohour po ot okito ku tu' oinggorit oku no kopio. Oi Tuhan, monikid tadau oku nopo do minglohou diya', do mikuwo'd poinsawat do longon ku do sumambayang dot id diya'. 11 Momonsoi ko po toi do kongopusahan dot id tulun di napatai? Tumungag po toi do mamarayou diya' i tulun di songillobong? 12 Popinsusuyon po toi do tulun di songillobong o kosianan nu, ko' popinsusuyon po toi o kotorodoko' nu do hilo'd kinoiyonon do kapatayon? 13 Okito po toi o kongopusahan nu do hilo'd nokoiyonon dot otuong, om okito po toi o kosonongo' nu do hilo'd pomogunan di nolihuan no? 14 Oi Tuhan, minglohou oku do mokitulung diya', monikid kosuabon oku nopo do sumambayang dot id diya'. 15 Nokuro tu' iyadaan oku diya', oi Tuhan? Nokuro tu' tolikudan oku diya'? 16 Mantad poddi tokoro' oku po om oinggorit oku no, om motingkapatai oku i' daa, olomok oku no dot awagatan di pomohukum nu doho'. 17 A' no ogina-gina' o kawagato' do kototogod nu do koonsit doho', iri i pomohukum nu dot adalaan kopio o kapatai doho'. 18 Monongodou-ngodou nopo iyolo' do monurungku' doho' do miagal poddi luyud, om insan-insan nopo iyolo' do tumutuk doho'. 19 Pinotongkiad nu i' doho' i tambalut kopio ku, om iri poddi totuong o tambalut ku.
Sinding do Tontok do Haro o Kosusaan do Hiri'd Pomogunan
1 Sinding do ponudukan di Itan, i tulun dot Israhi.
Kotorodoko' do Tuhan it Osundu Kopio
2 Oi Tuhan, modsinding kasai' oku nopondo do mamarayou do kosianan nu dit aiso' o kotingkadan, om popinsusuyon ku nondo i kosianan nu do gisom dot alaid. 3 Oilaan ku do kosianan nu nopo om aiso' i' o kopupuson, om kotorodoko' nu nga' miagal i' do tawan kogirot. 4 Boros ka nu, “Nokopomonsoi oku no do tumpongo dot id tulun di nopili' ku, nabatasan mantad ku no do mikuwo'd sumpa' i Daud, i susuhuon ku. 5 Boros kangku, ‘Haro nondo kasai' o songulun di sinakagon nu dot osiliu do raja', om gompion kasai' ku i' o pomorintaan nu do gisom dot alaid,’ ka,” ka. 6 Oinsanan nopo i poingiyon do hilo' do modsinding do mamarayou di nongowonsoi nu di kongoimayaan kopio, om modsinding do pasal di kotorodoko' nu, oi Tuhan. 7 Aiso' no o koiyo diya' do hilo'd surga, oi Tuhan, aiso' i' o tiso' di hino'd surga do koiyo diya'. 8 Suahon ko i' do hiri'd pogititimungan dit ongolidang, om motud ngai' nopo iyolo' dot id toguang nu do momusou diya'. 9 Oi Tuhan, i Kinorohingan dit Osundu Kopio, aiso' no o koiyo diya' kosundu, om otorodok ko dot id suang do nunu nopo, oi Tuhan. 10 Iya' no i kikuasa' dot id sawat dilo rahat dot agayo, om otingkod nu i' i tumbak dit opuhod. 11 Minumuk nu i Rahab i naga' do rahat, om pinatai nu, naala' nu di kokoriso' nu dit a' ogina-gina' i pisangod nu. 12 Sanganu nopodti pomogunan om iya' i', om ilo tawan nga' diya' i', iya' i' o minomonsoi diti pomogunan om koinsanai di hiti'd suang diti pomogunan. 13 Winonsoi nu ot utara om salatan, podsindingan ko do Nuluhon do Tabor om Nuluhon do Hormon tu' atataadan no iyolo'. 14 Agayo no kopio o kuasa' nu, om a' ogina-gina' o kokoriso' nu. 15 Pomorintaan nu nopo om poingimpou do katapatan om it otulid, kointalang kasai' nopo o kosianan om kotorodoko' dot id suang do koinsanai'd wonsoyon nu. 16 Otood no kopio o tulun di sumambayang dot id diya' do mikuwo'd modsinding, om i poimpasi dot id suang do tanawau do kosonongo' nu. 17 Iya' no o kaarapadan diyolo' do tikoompus do tadau, om royohon ko diyolo' dot i kosonongo' nu o kapamarayahan. 18 Nonuan nu iyahai do kinamanangan dit agayo kopio, pinamanang nu iyahai tu' osonong ko i'. 19 Iya' no i minomili' dot intirungon dahai, oi Tuhan, iya' no i Kinorohingan dot Israil, i Kinorohingan dit Olidang Kopio, o minanahak dahai di raja' dahai.
Batos do Kinorohingan dot id di Daud
20 Id suang nopo dot iso' o pinokitanan nu di gulu po om minoro-boros ko dot id susuhuon nu dit otorodok do poingkaa, “Nouhupan ku no o soudor dit abantug kopio, om nakatahak ku nogi' o tirikohonon do raja' dot id songulun di nopili' ku do mantad id pogialatan di tulun ku. 21 Nosiliu ku nod raja' i Daud, i susuhuon ku, tu' notuntugan ku no iyau di tumau ku. 22 Om mongintirung kasai' nondo dau i kokorison ku, om iri sinundu ku o pokoris kasai' dau. 23 A' nondo iyau otorian di pisangod dau, om a' iyau aala' di tulun dot araat. 24 Raagon ngai' ku nopondo i sumaap dau, om patayon ngai' ku o tulun dit araatan dau. 25 Osianan oku indo om otorodok kasai' oku dot id dau, om pamanangon kasai' ku iyau. 26 Paraladon ku nondo o pomorintaan dau do mantad pod hilo'd Rahat do Tanga' om gisom do korikot do hilo'd Bawang dot Iprat. 27 Momoros nondo iyau dot id doho' do poingkaa, ‘Iya' no o tapa' ku om Kinorohingan ku, iya' no o mongintirung doho' om gampamasi doho',’ ka. 28 Silihon ku nondo iyau do tanak ku'd kusai dit id gulu, om raja' dit abantug kopio. 29 Bayaanon kasai' ku nopondo i pinabatos ku dau, om i tumpongo ku dot id dau nga' poinggirot kasai' i' do gisom dot alaid. 30 Haro kasai' nondo o songulun di sinakagon dau dot osiliu'd raja', do solinaid do haro o tawan. 31 Nga' ondung a' tumanud dot oturan ku i sinakagon dau om a' no momonsoi do miontok di ponuhuan ku, 32 om a' diyolo' podulon i tisuhu' ku, om a' diyolo' tonudon i potudukon ku, 33 om hukuman ku no iyolo' dot i dusa diyolo' o kopomohukuman, om pologoson ku iyolo' dot oinggorit dot i kinasalaan diyolo' o koponginggoritan. 34 Nga' potilombuson ku i' o kosianan ku dot id di Daud, om bayaanon ku i pinabatos ku dot id dau. 35 A' ku i' pututon i tumpongo ku dot id dau, om iso' po di pinabatos ku dot id dau nga' aiso' i' ot a' ku sulungon. 36 Insan oku no pamatos do mikuwo'd sumpa', om insan-insan no do gisom do poingompus, dot id suang do ngaran ku dit olidang, poingkuro piya nga' a' oku no kopio mongudut dot id di Daud. 37 Haro kasai' nopondo o sinakagon dau dot osiliu'd raja', om gompion kasai' ku o pomorintaan dau do solinaid po do kitinitiu ilo tadau. 38 Pomorintaan nopondo dau om ogirot i' do gisom dot alaid do miagal dilo tulan, om ilo' no tulan o sasi' dot otorodok do hilo'd tawan,” ka.
Mogihad do Kinaalaan di Raja'
39 Nga' tinogod nu i raja' di nopili' nu, tinongkiadan nu iyau om niadaan nu. 40 A' nu sinulung i tumpongo nu dot id susuhuon nu, om pinataam nu i tupi' dau do don raja' do hilo'd burutak. 41 Rinaag nu i tolig do bandar dau, om pinologos nu do nohiyas i kuta' do padtamangan dau. 42 Mongoi ngai' nopo panakau di dapu' dau i tulun do kawaya', om oinsanan nopo i songkoduwo dau do mongirak-irak dau. 43 Nonuan nu do kamanangan i pisangod dau, om pinotood ngai' nu iyolo'. 44 Pinologos nu dot aiso' o noontok-ontok di rapo-rapo dau, om pinologos nu iyau do naala' dot id pisangadan. 45 Nongoi nu i kuasa' dau do don raja', om pinataam nu i tupi' dau do don raja' do hiri'd tana'. 46 Pinoruhai nu iyau do luminohing dot a' po orikot o kolohing-lohingan, om nintingayam nu kopio iyau.
Sambayang do Mokilabus
47 Oi Tuhan, songkuro po o koloido' nu do lumisok? Songkuro po o koloido' do kototogod nu do rumakit do miagal do tapui? 48 Soroho' no do tumur ku nopo om oniba' i' kopio, om soroho' no do pinomonsoi nu nopo dahai om tulun i toomod tu' haro i' o kapatayon. 49 Haro toi o tulun dot a' apatai? Poingkukuro po daa o tulun do mongilag om a' i' koguli' kawagu dot id tana'? 50 Oi Tuhan, hinonggo no i kosianan nu di gulu po, hinonggo ngai' no i tumpongo nu dot id di Daud? 51 Kada' nogi' kolihuwai, ondung poingkuro oku iyoho' i susuhuon nu do numaan indaraato', om ondung okuro-kuro oku po do minamabo do pongindaraat di bansa'd suwai. 52 Pingindaraaton do pisangod nu i raja' do pinili' nu, oi Tuhan, hinonggo nopo o ngoyon dau nga' hilo' no iyau do pingindaraatan diyolo'. 53 Royoho' toko' no o Tuhan do gisom do poingompus. Owonsoi po daa o miagal diri! Amin!
Buuk do Kaapat
Sinding 90-106
Kinorohingan no o Pogintirungan do Tulun
1 Sambayang di Musa, i susuhuon do Kinorohingan. Oi Tuhan, iya' mantad no o nosiliu dot intirungon dahai, do mantad di gulu po om gisom do mogisolusuk-lusuk. 2 Tontok dit a' nu po nowonsoi ilo nulu-nulu, om dit a' nu po nowonsoi iti pomogunan, om Kinorohingan mantad ko no di poingompus, it aiso' o nimpuun om aiso' o kopupuson. 3 Sunudan nu o tulun do gumuli' kawagu dot id tana', om sumiliu do pupuk do miagal di timpuun i'. 4 Soribu nopo o toun nga' miagal nod sangadau dot id pongintaban nu, miagal noddi konihab, tu' nakatalib no, miagal noddi madtatamong do dongotuong tu' oruhai po om sowolian no. 5 Tanggayan nu iyahai do miagal po dot atanggayan do luyud, miagal no iyahai di nipi tu' oruhai do katalib. Miagal no iyahai di sakot tu' kalambing nopo do dongkosuabon, 6 om sumuni no om mongusak nondo, nga' olubok no om oriou dot orikot o dongsosodopon. 7 Angapatai iyahai do kototogod nu, om ongooris iyahai dino korongito' nu. 8 Pinointalang nu i dusa dahai dot id toguang nu, i dusa di linisok dahai nga' kointalang ngai' nopo dot id dokito nu. 9 Koiniba' o tumur dahai do gama' di kototogod nu, miagal no di pinuhobo do kohobo o koposion dahai do tumalib. 10 Turu' no nohopod o toun dahai om apatai no iyahai, nga' ongokoris nopo iyahai, om korikot id walu' nohopod o toun dahai. Nga' opurimanan nopo dahai om kosusaan no om katangaban, oruuhai dot aayi' o tumur dahai om a' nondo iyahai hino. 11 Isai noo o nokopuriman do kawagato' do kototogod nu? Isai noo o koilo ondung okuro-kuro poo o kootuson do tumogod ko? 12 Popurimono' no iyahai do tumur nopo dahai om oniba' i', om milo i' iyahai do momusorou. 13 Songkuro po koloido' dot iyo kasai'dti o kototogod nu, oi Tuhan? Kosianai nod susuhuon nu. 14 Ponuo' no iyahai di kosianan nu it aiso' o kopupuson do pointikid do kosuabon, om milo indo iyahai do modsinding do mikuwo'd ongooropod do gisom dot ikapatai dahai. 15 Onuwai no iyahai do kosimbayanan dot irad di katangaban do tinahak nu dahai di gulu, tu' haro i' o piro-piro o toun dahai do tumongob di gulu po. 16 Pointongo' no iyahai, i susuhuon nu, di wonsoyon nu di kongoimayaan kopio, pologoso' no do kongokito o sinakagon dahai di kogoyoo' do sinundu nu. 17 Oi Kinorohingan, i Tuhan dahai, pologoso' no i barakat nu do moyo-woyo' kasai' dahai. Poundaro' no kasai' iyahai dot id suang do nunu nopo o wonsoyon dahai.
Kinorohingan no i Pogintirungan Toko'
1 Isai nopo i mokiintirung do Tuhan, it Osundu Kopio, 2 om milo no do moro-boros dot id dau do poingkaa, “Iya' no i mogobi' doho' om it intirungon ku. Iya' no o Kinorohingan ku, i pagandasan ku,” ka. 3 Intirungan ko i' dau do mantad id koligagaanan di songinlisok, om mantad id koinsanai do toruol di mogoit dot id kapatayon. 4 Likupan ko i' dau di talad dau, om aiso' indo o koligagaanan nu do pointirung dau, tu' iri no i kotorodoko' dau o moningolig om mongintirung diya'. 5 A' ko no minog do moddosi di koligagaanan do dongotuong, ko' i po monigowo do sumaap do dangadau, 6 ko' iri po toruol do mogkoroliu di rumikot do dongotuong, ko' i po toruol do mamatai do dongkosuabon. 7 Haro i' doti' o soribu o tulun dot ahaba' do hiri'd toning nu, om hopod noribu o tulun do posorili' diya', nga' iya' nopo om a' i' orualan. 8 Kokito ko nondo om osorisid kopio nu, ondung poingkukuro o pomohukum di tulun dot araat. 9 Nosiliu nu no do mogobi' diya', o Tuhan, om it Asawat Kopio o mongintirung diya'. 10 Om a' ko noddi oontok do kosusaan, om a' orikatan do kororongit o walai nu. 11 Suhuon indo do Kinorohingan i moloikat dau do madtamong diya' om momogompi' diya' do hinonggo nopo o tongoyon nu. 12 Kahangan ko indo diyolo', om a' i' otogu' di watu o lapap nu. 13 Pingulakan nu indo o singa om tulanut, om i singa dit orongit om tulanut di kapatai o tindukon. 14 Boros kad Kinorohingan, “Posion ku indo i tulun dit ongosianan doho', om intirungan ku i mangakun do Tuhan oku. 15 Soira' nopo do minglohou iyolo' doho', om simbaron ku i', om tontok dot osusa' iyolo', nga' tulungon ku i' iyolo'. Posion ku i' iyolo' om pusohon ku. 16 Somulian ku indo iyolo' do tumur dit otogui, om posion ku iyolo',” ka dau.
Sinding do Pamarayou
1 Sinding do Tontok do Tadau'd Sabat. 2 A' no ogina-gina' o kosonongo' do mongunsikou diya', oi Tuhan, do mikuwo'd modsinding do pomusou do Kinorohingan, it Asawat Kopio. 3 Om monikid kosuabon do popinsusui do kosianan nu dit a' opupusan, om monikid tuong do poposusui do kotorodoko' nu, 4 do miompot do tuni do gitar di hopod o loting, om ompoton do gambus om kecapi. 5 Poposonong do ginawo ku i nongowonsoi nu, oi Tuhan, i kongopusahan kopio. Iri no i nongowonsoi nu o kopodsindingan ku do mikuwo'd ooropod kopio. 6 Agayo no kopio i nongowonsoi nu, oi Tuhan. Pomusorou nu nga' aralom no kopio! 7 Iri no it a' oilaan do tulun do basug, om it a' osuhutan do tulun dot aiso' o toila-ilaan. 8 Sumuni i' doti' daa do miagal do sakot dit orombung i tulun dot araat, om kumaya' i' doti' daa i tulun do mingwonsoi dit angaraat, nga' oinsanan indo iyolo' dot apatai, 9 tu' iya' no, it id sawat kopio, oi Tuhan, do gisom dot alaid. 10 Oilaan i' dahai dot apatai ngai' nondo i pisangod nu, om angaala' ngai' i tulun dot araat. 11 Pinokoris oku diya' do miagal di sapi' do lalang, om binarakatan oku diya' do kataadan. 12 Nokokito oku no di pisangod ku do nangaala', om norongou ku do songihad-ihad ngai' i tulun dit angaraat. 13 Iri nopo tulun dit ongotopot om rumombung indo do miagal do guas do kurma, om osonong o sunion diyolo' do miagal di guas dot aras do hilo'd Libanon. 14 Miagal iyolo' di kayu di tinanom do hiri'd Walai'd Tuhan, tu' rumombung tomod do hiri'd Walai'd Kinorohingan toko', 15 tu' mongua' kasai' po do nakalaid piya, om otomou kasai' o roun om ogirot o guas. 16 Iti no o koilaan dot otulid i' o Tuhan, om aiso' o kasalaan dau, i mogobi' doho'.
Kinorohingan no o Raja' do Gisom do Poingompus
1 Tuhan no o raja' dit abantug om okoris. Nokogirot no kopio o pinopoiyon diti pomogunan, om a' no milo do guyuon. 2 Tirikohonon nu nopo, oi Tuhan om ogirot mantad no, do mantad di timpuun i', om hino mantad ko no, om hino kasai' do gisom do poingompus. 3 Oi Tuhan, popuhodon tomod dilo rahat dot aralom o ngorod dau, mahas-kahas po o tumbak dot ologod tomod. 4 Nga' Tuhan no i momorinta' do hilo'd surga, ot agayo o kuasa' ko' mantad di ngorod do rahat, om osundu ko' mantad di tumbak do rahat. 5 Oturan nu nopo oi Tuhan, om aiso' i' o kopupuson, om walai nu nga' olidang i' kasai' do gisom do poingompus.
Kinorohingan no o Gompomutus do Koinsanai'd Tulun
1 Oi Tuhan, iya' no o Kinorohingan di momohukum, pointalango' no o kototogod nu. 2 Iya' no o gompomutus do koinsanai'd tulun, ingkakat no om sulian i' ilo tulun dot ongoondos do miontok di nowonsoi diyolo'. 3 Songkuro po o koloido' dilo tulun dot angaraat dot ongotood? Songkuro po o koloido' do rumamai iyolo', oi Tuhan? 4 Songkuro po koloido' dilo tulun dot angaraat dot ongoondos do kangaraaton diyolo'? 5 Monginggorit iyolo' do tulun nu, oi Tuhan, om ulak-ulakan iyolo' do tulun di nasanganu nu. 6 Mamatai iyolo' do tongoondu' di nongopuadan om tangaanak dit aiso' o molohing, om patayon diyolo' i bansa'd suwai di poingiyon do hiti'd pomogunan dahai. 7 Boros ka no diyolo', “A' no iyahai'd Tuhan okito, a' i' iyahai'd Kinorohingan dot Israil antangan,” ka. 8 Oi tulun ku, nokuro tu' iyo kopio kou'ddi kabasug? Soira' kou'ndo do minsingilo'd momusorou? 9 Kinorohingan i' o minomonsoi do tolingo toko', om a' tuu daa'ndo iyau korongou? Iyau i' o minomonsoi do mato toko', om a' tuu daa'ndo iyau kokito? 10 Iyau no o monuduk do koinsanai'd bansa', om a' tuu daa'ndo iyau momohukum diyolo'? Iyau no o nosiliu'd gomponuduk do koinsanai'd tulun, om aiso' tuu daa'ndo o dau'd toilaan? 11 Ongoilaan i' do Tuhan o pomusarahan do tulun, ongoilaan i' dau dot aiso' o kotutuk-tutukon do pomusarahan diyolo'. 12 Oi Tuhan, olumaag no i tulun di tudukan nu, i tulun di tudukan nu dot oturan nu. 13 Onuan nu iyau do kosimbayanan do tontok do haro o kosusaan, do gisom id aratu' i tulun dot araat do hiri'd luang. 14 A' i' kopio'd Tuhan iyada' i tulun dau, a' i' dau tongkiadan i tulun di songonuon dau. 15 Haro indo kawagu o toturan do hilo'd pomisaraan, om sumokodung ngai' nopoddi i tulun dit ongotulid o ginawo. 16 Isai no i miningkakat do minogobi' doho', do sumaap do tulun dit angaraat? Isai no i minuhup doho' do sumaap di tulun di mingwonsoi dot araat? 17 Ondung a' oku daa do Tuhan nuhupan, om a' i' daa alaid om koongoi oku no do hilo'd pomogunan do tulun di nangapatai. 18 Boros kangku, “Rumatu' oku no,” kangku daa, nga' pinogirot oku i' di kosianan nu dit aiso' o kotingkadan, oi Tuhan. 19 Soira' nopod tumongob om tumangkabo oku, om oinsasamadan oku i' diya' om potoodon oku diya'. 20 A' ko i' kopio sumokodung di gompomutus di mokisisip, i popotopot dit a' otopot. 21 Om i monokiupakat do sumaap do tulun dit ongotulid o ginawo, om i momohukum do kapatayon do tulun dit aiso' o sala'. 22 Nga' obian oku id Tuhan, om intirungan oku'd Kinorohingan ku. 23 Hukuman indo dau iyolo' dot i kangaraaton diyolo' o kopomohukuman, om patayon dau iyolo' dot i dusa diyolo' o kapamatayan, Tuhan i' i Kinorohingan toko' o mamatai diyolo'.
Sinding do Mamarayou
1 Kainou pamarayou toko'd Tuhan, podsindingai toko' no o Kinorohingan do mikuwo'd otood, tu' iyau no i mongintirung dati'! 2 Kainou mongoi rapou dau do mikuwo'd mongunsikou, om ongotood do modsinding do sinding do pamarayou. 3 Tu' Tuhan nopo om Kinorohingan di kisinundu, iyau no o raja' dit okoris kopio dot id sawat do koinsanai di ponokokinorohingan. 4 Iyau no o momorinta' do pointongkop diti pomogunan, mantad po do hiri'd luang dit aralom no kopio om gisom do hiri'd nuluhon dit asawat kopio. 5 Iyau i' o momorinta' dilo rahat, i winonsoi dau, om iyau o momorinta' di katanaan, i winorun dau. 6 Kainou tumuku' do sumambayang dot id dau, kainou motud dot id toguang do Tuhan, i minomonsoi dati'. 7 Iyau no o Kinorohingan toko', iyati' no i tulun di kosianan dau. Om iyati' i ponokodumba' dau do pigompian dau. Pokinongou kou nod boros do dinondo, 8 “Kada' dokoyu pokodoho' o ginawo do miagal di taki-aki dokoyu di hilo' iyolo'd Moriba, om miagal di hilo' iyolo'd tana' do kowotuan do Masa. 9 Hilo' no iyolo' do minogumbal doho', mulong po do nongkokito iyolo' di nongowonsoi ku dot id diyolo'. 10 Apat nohopod o toun do koloidon ku dot araatan kopio diyolo', om boros kangku, ‘Atuk, obinsurilog no kopio iti tulun ku! Tu' a' no kopio iyolo' mamadul do tisuhu' ku,’ kangku. 11 Om kotogod oku noddi om boros kangku do minomopol diyolo', ‘A' kou no kosuang di pomogunan diri i kinoiyonon di koonuan dokoyu do kosimbayanan do poinsugku' doho',’ kangku,” ka.
Kinorohingan no o Raja' dit id Sawat Kopio
1 Podsinding nod sinding do wagu dot id Tuhan! Podsinding no dot id Tuhan, oi pointongkop do pomogunan. 2 Podsinding no dot id Tuhan, om royoho' no iyau! Popinsusuyo' no do pointikid-tikid do tadau i habar dot osonong do minamasi iyau dati'. 3 Popinsusuyo' no o kagayaan dau dot id koinsanai'd bansa', om i nongowonsoi dau di kongoimayaan nga' susuyon no dot id koinsanai'd tulun. 4 Tuhan nopo om agayo, om apatut no do royohon kopio, iyau no ot apatut do pusohon do mantad ko' koinsanai di ponokokinorohingan. 5 Ponokokinorohingan nopo do bansa'd suwai om tingolig i' toomod, nga' Tuhan nopo om minomonsoi do koinsanai do nunu nopo. 6 Iyau nopo om nolopot do kagayaan om kobontugan, om noponu' do sinundu om kolumiso' i Walai'd Sasambayangan dot Agayo. 7 Royoho' no o Tuhan, oi koinsanai'd bansa' do hiti'd pomogunan, royoho' no i kagayaan om kokoriso' dau. 8 Royoho' no o ngaran do Tuhan di kikagayaan, pongigit no do porsombahan om suang no dot id Walai dau. 9 Tuku' no dot id toguang do Tuhan, mikuwo'd manampakai do pakayan do sumambayang, rikot no dot id dau do mikuwo'd momusou kopio dau, oi pointongkop diti tana'. 10 Poboroso' no dot id koinsanai'd bansa' o poingkaa, “Tuhan no o Raja'! Nokogirot tomod o pinopowonsoi dau diti pomogunan, om a' no milo'd guyuon, om otulid nondo o pomumutus dau do koinsanai'd bansa',” kanto. 11 Kongooropod kou no, oi tana' om tawan! Ngorod no, oi rahat om koinsanai di kipinuhobo dot id suang nu. 12 Kongooropod no, oi talun om koinsanai di songinsuni do hino, pamangkis kou no dot atataadan, oi kokoyuan do hilo'd puru'. 13 Tu' rumikot no o Tuhan do mongoi pomorinta' diti pomogunan, mikuwo'd otulid o pomumutus do koinsanai'd bansa'.
Kinorohingan no o Pomorinta' dit id Sawat Kopio
1 Tuhan no o raja'! Kooropod no oi pomogunan, kongooropod kou no oi pulou do hilo'd rahat. 2 Nosorili' iyau do haun om pituongon, pomorintaan nopo dau om pinoimpou do toturan om it otulid. 3 Tapui ot id gulu dau, do monorob do koinsanai di pisangod di posorili' dau. 4 Kotitiu diti pomogunan i kodumaat dau, om gagaran po iti tana' do kokito'ddi. 5 Lumanak do miagal do rilin i konulu-nuluan dot id toguang do Tuhan, i pomorinta' do koinsanai'd pomogunan. 6 Popinsusui ilo tawan do kotulido' dau, om oinsanan nopo o bansa' do kokito do kagayaan dau. 7 Koinsanai do tulun di tumuku' dot id tingolig om ointingayam no, i tulun di mokirayou-rayou dot i tingolig diyolo' o kopokirayahan, tu' koinsanai di tingolig nga' tumuku' i' dot id toguang do Tuhan. 8 Ongotood ngai' nopo i tulun do Sion, om rumamai ngai' i bandar do hilo'd Yohuda, tontok di korongou di pomumutus nu, oi Tuhan. 9 Oi Tuhan, it Asawat Kopio, iya' no o pomorinta' do pointongkop diti tana', iya' no it agayo ko' mantad do koinsanai do ponokokinorohingan. 10 Osianan i' o Tuhan do koinsanai di tulun dit araatan do karaaton, om tingoligan dau o koinsanai'd tulun dau, om poiduwon dau iyolo' do mantad id kuasa' do tulun dit araat. 11 Poulinau kasai' i' o tinitiu dot id tulun dit ongotopot, om haro o kaarapadan do tulun dit osonong. 12 Oi tulun dit ongotulid o ginawo, kongooropod ngai' kou no, dot i nongowonsoi'd Tuhan o kaarapadan, soroho' ngai' no i nongowonsoi'd Kinorohingan, it olidang, om pongunsikou kou no dot id dau.
Kinorohingan no i Pomorinta' diti Pomogunan
1 Sinding. Podsinding no do sinding do wagu dot id Tuhan, tu' minomonsoi iyau di kongopusahan kopio. Mantad id kuasa' dau om kokoriso' dau o nakamanang-manang dau. 2 Pinosunud do Tuhan i kinamanangan dau, om pinopinsusui do Tuhan i kuasa' dau do mamasi, om pinointalang dau i kotulido' dau dot id koinsanai'd bansa'. 3 Binayaan kopio i' dau i tumpongo dau dot id tulun dot Israil, tu' osianan kasai' i' iyau om otorodok dot id diyolo'. Koinsanai'd bansa' do hinonggo nopo nga' nokokito ngai' no do kinamanangan do Kinorohingan toko'. 4 Oi koinsanai do pomogunan, podsinding kou no do mikuwo'd ooropod dot id Tuhan, royoho' no dokoyu iyau do mikuwo'd sinding om pangkis dot atataadan! 5 Podsinding no do mamarayou'd Tuhan, kombito' no dokoyu i kecapi. 6 Pounio' no dokoyu i torumpit om i toburi', om pamangkis kou no dot atataadan dot id Tuhan, i raja' toko'. 7 Ngorod no, oi rahat om koinsanai di kipinuhobo do hino, oi tana' podsinding no, om koinsanai di momogun do hino. 8 Pitapapo' no o palad dokoyu oi kabawang-bawangan, oi konulu-nuluan pogioompot kou no do modsinding do mikuwo'd otood dot id toguang do Tuhan. 9 Tu' rumikot no iyau do mongoi pomorinta' diti pomogunan, om porintaon nondo dau i tulun do hiti'd pomogunan do mikuwo'd otulid o pomomorinta'.
Kinorohingan no i Raja' dot id Sawat Kopio
1 Tuhan no o raja', poirikau iyau do hiri'd tirikohonon dau do momorinta', dit id sakai di moloikat di roitan do moloikat do kerub, om gagaran ngai' nopo o tulun dot opopoddosian, om gumuyu' iti pomogunan. 2 Tuhan no i kikuasa' do hilo'd Sion, iyau no i momorinta' dot id sawat kopio do koinsanai'd bansa'. 3 Oinsanan nopondo o tulun do mamarayou di ngaran dau dit abantug om kikagayaan. Iyau no it olidang kopio. 4 Oi raja' do gunsiou, iya' no it orohian do katapatan, iya' no i pinopogirot di katapatan do hiti'd Israil, om minongigit ko dit otulid om i toturan. 5 Royohon no o Tuhan, i Kinorohingan toko', otud no dot id toguang do tirikohonon dau do momorinta', iyau no it olidang kopio! 6 I Musa no di Harun ot imam dau, om i Somuil no i sumasambayang dot id dau. Mininglohou iyolo'd Tuhan, om sinimbar iddi dau iyolo'. 7 Minoro-boros iyau diyolo' do mantad hiri'd haun di poorigi, tinanud ngai' diyolo' i ponudukan om ponuhuan do pinoboros dau dot id diyolo'. 8 Oi Tuhan, i Kinorohingan dahai, sinimbar nu i' i tulun nu, om pinointong nu iyolo' dot iya' no o Kinorohingan dit orohian do mangampun mulong piya do hinukuman nu iyolo' dot i dusa diyolo' o kinopomohukuman nu. 9 Royohon no o Tuhan i Kinorohingan toko', om tuku' no do sumambayang do hilo'd nuluhon dau dit olidang. Olidang i' o Tuhan, i Kinorohingan toko'.
Sinding do Mamarayou
1 Sinding do maan do porsombahan do kounsikahan. Oi koinsanai do pomogunan, podsinding no dot id Tuhan! 2 Sambayang no dot id Tuhan do mikuwo'd otood, rikot no dot id toguang dau do mikuwo'd modsinding! 3 Kada' no kopio kolihuwai do Tuhan nopo om Kinorohingan, iyau no i minomonsoi dati', om iyau o sanganu dati'. Iyati' no o tulun dau, i bansa' di pigompian dau. 4 Suang no di Walai dau do mikuwo'd mongunsikou, suang no do hiri'd natad di walai do mikuwo'd mamarayou, pongunsikou no dau om royoho' no iyau. 5 Osonong no kopio o Tuhan, kosianan nopo dau om aiso' o kopupuson, om kotorodoko' dau nga' mompus-ompus i'.
Batos do Songulun o Raja'
1 Sinding di Daud. Iti nopo sinding ku om pasal do kotorodoko' om kotulido', sindingon ku o sinding diti dot id diya', oi Tuhan. 2 Aiso' indo o kabara-barasan do kowoyo-woyoon ku, soira' ko do rumikot dot id doho'? Olidang indo o koposi-posion ku do poingiyon do hiri'd walai ku, 3 om a' ku pologoson tomod o karaaton. Araatan oku i' di wowonsoyon do tulun di mogidu' do mantad id diya', a' oku i' kopio orohian do monokiupakat diyolo'. 4 Wonsoyon ku nopo iyoho' om otulid i', om minsodu' oku dit angaraat. 5 Patayon ku indo i tulun di lumisok-lisok do mongindaraat do tulun do suwai, om a' oku i' orohian di tulun dit oondos om mokirayou. 6 Orohian oku indo di tulun dit otorodok dot id Kinorohingan, om pologoson ku iyolo' do mundorong do hiti'd walai ku do don raja'. Om pologoson ku indo do kumaraja' dot id doho' i tulun dit otopot-topot kopio dot otulid o ginawo. 7 Tulun nopo di goudut om a' i' koino-ino do miyon do hiti'd walai ku do don raja', om aiso' o tulun di minsorupai-rupai no do koundorong dot id toguang ku. 8 Monikid tadau nopondo do patayon ngai' ku i tulun dit angaraat do hiti'd pomogunan toko'. Uyungon ngai' ku nopo i tulun dit angaraat do mantad hiti'd bandar do Tuhan.
Sambayang do Tontok do Haro o Kosusaan
1 Sambayang do songulun di haro o kosusaan, di popoboros ngai' do kosusaan dau dot id Tuhan. 2 Oi Tuhan, pokinongou nod sambayang ku, om podulo' no iti pokionuon ku. 3 Kada' oku tolikudai do tontok dot osusa' oku. Pokinongoho' oku no, om kolosu' nod sumimbar do tontok do minglohou oku. 4 Miagal po di lisun do tumagak o koposi-posion ku, om tinan ku nga' miagal pod sumorob dot id tapui. 5 Oluhoi oku no, miagal oku po di sakot do nokoring, om aiso' no o kosiakanan ku. 6 Opuhod tomod o todoi ku, om agahui oku no, tu' tulang ku po o mogioput-oput. 7 Miagal oku po di tombolog do hilo'd tana' do kowotuan, iyo oku poddi puok do hilo'd pogun.1|55|HK9C| Longkug|102.7 8 A' oku no siodop, miagal oku po di tombolog dot iso-iso' do hiri'd taap do walai. 9 Monongodou-ngodou nopo o pisangod ku do mongindaraat doho', om i tulun di mongumang-umang doho' nga' iri po ngaran ku o maan diyolo' do pomopol. 10 Pupuk pod tana' o panakataakanon ku, om tinumon ku, nga' mirolot pod romou ku, 11 do gama' di kototogod nu om i kolosuo' do ginawo nu. Nongoi oku diya' buntuto' om pataamo' oku nogiddi diya', oi Tuhan. 12 Koposion ku nopo om miagal po di sangai di dongsosodopon tu' oruhai nod tumagak, miagal oku poddi sakot do nokoring. 13 Nga' iya' nopo, oi Tuhan, om raja' i' do gisom dot alaid, om koinsanai do sinakagon nga' kosorou kasai' indo diya'. 14 Mingkakat ko nondo om osianan ko do Sion, norikot no o maso do monginsian dau. 15 Ongosianan ngai' i' dau i susuhuon nu, mulong po do naraag iyau. Ongolisiu ngai' i' iyolo' dau, mulong piya do nohiyas no iyau. 16 Oinsanan nopondo o bansa' do moddosi do Tuhan, om oinsanan o raja' do pomogunan do moddosi di kuasa' dau. 17 Soira' nopondo do poingkakaton koimbagu do Tuhan o bandar do Sion, om pointalangon nondo dau o kagayaan dau. 18 Pokinongohon nondo dau i sambayang di tulun di niduan dau, om simbaron dau o sambayang diyolo'. 19 Potuliso' ngai' no i nongowonsoi'd Tuhan do maan di sinakagon di sumusuhut, om mamarayou indo dau i tulun dit a' po nopogkosusu. 20 Luminuung o Tuhan do mantad hilo'd tiyonon dau dit olidang do hilo'd sawat, hilo' iyau'd surga do luminuung diti pomogunan. 21 Norongou i' dau i todoi do tulun di songinggiil, om pinalabus dau i tulun di nohukuman daa do kapatayon. 22 Om popinsusuyon nondo o ngaran dau do hilo'd Sion, om royohon iyau do hilo'd Yorusalim, 23 tontok dot otimung ngai' o bansa' om pomorintaan do mongoi sambayang dot id Tuhan. 24 Noidu' nod Tuhan o kokorisan ku om omulok oku po daa, noinibaan no dau o tumur ku. 25 Oi Kinorohingan, kada' ngoyo' o ginawo ku do baino' poo, tu' a' oku po molohing. Oi Tuhan, poimpasi ko i' do gisom do poingompus, 26 winonsoi nu iti pomogunan di gulu po, om longon nu o minomonsoi dilo tawan. 27 Tumagak ngai' i' iti nga' iya' nopo om hino kasai' i' do gisom do poingompus, koinsanai'ddi om rumomuk i' do miagal do kain, om pataamon nu indo iri do miagal do rasuk di nagansing no, om atanus nondo ngai' iri. 28 Nga' iya' nopo om a' i' sumimban, om koposion nu nga' aiso' i' o kopupuson. 29 Ongosimbayan indo o tangaanak dahai do mongiyon-ngiyon, om sinakagon diyolo' nga' ongosonong-sonong indo tu' intirungan nu i'.
Kosianan do Kinorohingan
1 Mantad dot id di Daud. Orohian no kopio o ginawo ku do mamarayou'd Tuhan, om mamarayou'd ngaran dau dit olidang o tinan om pomusarahan ku. 2 Orohian no kopio o ginawo ku do mamarayou'd Tuhan, om a' oku kolihu do koinsanai dit osonong di nongowonsoi dau. 3 Mangampun i' iyau do koinsanai'd dusa ku, om momolingos iyau do koinsanai'd toruol ku. 4 Pinoidu' oku dau do mantad id lobong, om binarakatan oku dau do kosianan om kolisihan. 5 Pinonu' dau dit ongosonong o koposi-posion ku, gisom dot omulok kasai' oku po om okoris do miagal di kondiu. 6 Obian id Tuhan do momutus i tulun dit ulak-ulakan, otulid i' o wonsoyon dau. 7 Sinunudan dau i Musa di wonsoyon dau dot id dabantalan, om pinoontong dau o tulun dot Israil do kinoris dau. 8 Tuhan nopo om obinsianan i' om obinglisiu, alanut o ginawo dau om poimponu' do kosianan di mompus-ompus. 9 A' i' iyau managalai-galai do tumogod, om a' iyau mompus-ompus dot otogod. 10 A' toko' i' dau hukuman do miontok di dusa toko', om a' toko' dau sulian do miontok di kasalaan toko'. 11 Poingkuro nopo o kasawato' dilo tawan do mantad hiti'd tana', om iyo noddi o kogoyoo' do kosianan dau dot id tulun di momusou dau. 12 Songkuro nopo o kosoduwo' do koulayon do mantad id kotonobon, om iyo noddi o kosoduwo' do pataaman do Kinorohingan do dusa toko' do mantad id dati'. 13 Poingkuro nopo o kosianan do tapa' dot id tangaanak dau, om iyo noddi o kosianan do Tuhan dot id tulun di momusou kopio dau. 14 Oilaan i' dau o tadon toko', ahandaman i' dau do tana' toko' i' toomod. 15 Koposi-posion toko' nopo om miagal nod sakot, sumuni toko' no om lumombut do miagal di bunga do hilo'd gouton, 16 nga' alambayan po di ribut iri, om a' no hino, om aiso' no o kokito kawagu'ddi. 17 Nga' kosianan nopod Tuhan do tulun di momusou dau, om mompus-ompus i', om kosonongo' dau nga' a' i' opupusan do gisom do kopogilombu-lombus o sinakagon, 18 do tulun dit otorodok dot id tumpongo dau, om it otorodok do tumanud do koinsanai di ponuhuan dau. 19 Momorinta' o Tuhan do hilo'd surga, iyau no o raja' do koinsanai do nunu nopo. 20 Pamarayou kou nod Tuhan, oi moloikat di gunsiou om i kisinundu, i mokinongou do boros dau, om otorodok do tumanud do koinsanai di ponuhuan dau. 21 Pamarayou kou nod Tuhan, oi koinsanai dokoyu it ongosundu do hilo'd surga, koinsanai dokoyu i susuhuon dau di mingwonsoi do korohian dau. 22 Pamarayou kou nod Tuhan, oi koinsanai dokoyu i winonsoi dau, do pointongkop di pomorintaan dau. Orohian oku no kopio do mamarayou'd Tuhan o ginawo ku om tinan ku om pomusorou ku.
Pamarayou di Minomonsoi
1 Orohian oku no kopio do mamarayou'd Tuhan o ginawo ku om tinan ku om pomusorou ku! Oi Tuhan i Kinorohingan ku, abantug ko no kopio! Kipinakai ko do karayahan om kagayaan, 2 om kikuluput ko do tulinau. Pinoungkalad nu ilo tawan do miagal do kiim, 3 om winaal nu o walai nu do hilo'd sakai do waig di hilo'd tawan. Ponokokorita' nu ilo haun, om mimpanau ko do poinsakai di talad do ribut. 4 Siniliu nu'd susuhuon nu ilo ribut, om i kodumaat o ponokoturipon nu. 5 Ogirot tomod o pinopoudong nu diti tana' dot id sakai di pinoimpahan, om a' no oguyu' do gisom dot alaid. 6 Kinuluputan nu'd waig iti tana', om nakaalit i waig di nuluhon. 7 Nga' soira' di binarasan nu i waig, om nonos noddi iri, soira' di nokorongou iri di boros nu dot opuhod, om kohus nopori do minogidu'. 8 Tolibai nopo di waig i nuluhon do luminuyung do hiri'd kokubangan, om kumaa do hiri'd tiyonon di nokosodia' nu diyolo'. 9 Minomonsoi ko do wolit dit a' milo dot otolibambanan, do pangantob di waig do lumabai kawagu do tumongkop diti pomogunan. 10 Pinoluyung nu o tudan do waig do hilo'd kokubangan, om pinoluyung nu o bawang do hilo'd pogiolit-olitan do konulu-nuluan. 11 Iri no o tinumon di nintorusan do hilo'd gouton, om pongurudtuu di kaladai di hilo'd gouton. 12 Om hiri nod kayu dit id kasamakan, i tombolog do songuni-uni do momirumun. 13 Pinorikot nu o rasam do mantad hilo'd tawan do hilo'd konulu-nuluan, om nonuan nu'd hasil iti tana' do gisom dot a' aayi-ayi'. 14 Posunion nu o sakot do taakanon do nintorusan, om posunion nu o totonomon do maan do tulun, om milo indo o tulun do mananom-tanom, 15 om haro i' o waig dot anggur do popotood do ginawo diyolo', om haro o tumau do saitun do popooropod diyolo', om haro o taakanon do popokoris diyolo'. 16 Iri nopo koguasan dot aras do hilo'd Libanon om asaru i' dot arasaman, iri no i kokoyuan do Tuhan, i tinanom dau. 17 Hilo' no o pomirumunan do tombolog, om pomirumunan do burung bangau o hiri'd kayu sedar. 18 Mongiyon-ngiyon do hilo'd konuluhanan dot angakawas i kambing do gouton, om iri no palanuk om songinlisok do hiri'd kapampangan. 19 Winonsoi nu o tulan do koilaan do sombulan, om ilo tadau nga' koilo id maso do katanaban. 20 Pinaharo nu o maso do totuong, om tontok noddi do sumoliwan ngai' i nintorusan. 21 Minggarom po i tangaanak do singa do tontok di mokiakanon iyolo', do mogihum do taakanon di patahakon do Kinorohingan dot id diyolo'. 22 Koulai nopondo o tadau om gumuli' ngai' no iyolo' do mongoi odop do hiri'd tiyonon diyolo' do lumisok. 23 Om sumoliwan nondo i tulun do mongoi porobuat, om morobuat nopo iyolo' do gisom do sosodopon. 24 Oi Tuhan, ogumu' no kopio o nongowonsoi nu, om oilo tomod o pinomonsoi nu do koinsanai'ddi. Noponu' po iti pomogunan di winonsoi nu. 25 Ilo rahat nga' agayo om alaab tomod, om a' no ointob-intob i songingiyon do hilo', it angagayo om it ongokoro'. 26 Hilo' no o layagon di kapal do rahat, om hilo' o pinghambaan di Lowiatan, i nintorusan do rahat dit agayo kopio do winonsoi nu. 27 Iya' ngai' nopo o sondihon diyolo', om manahak diyolo' do taakanon do tontok do louson iyolo'. 28 Patahakon nu no diyolo' i taakanon, om akanon no diyolo' iri, iya' i posodia' do taakanon di pingyahanan diyolo'. 29 Soira' nopo do tumongkiad ko, om moddosi no iyolo', om soira' nopo dot ongoyon nu o pinuhobo diyolo' om apatai no iyolo', om gumuli' no iyolo' dot id tana', i tadon mantad diyolo'. 30 Nga' soira' nopo dot onuan nu iyolo' do pinuhobo, om apasi no iyolo', om onuan nu'd koposion do wagu iti pomogunan. 31 Maha' daa om mompus-ompus o kagayaan do Tuhan, maha' daa om asanangan iyau do koinsanai di nongowonsoi dau! 32 Mintong nopo iyau do hiti'd pomogunan, nga' gagaran nopo iti pomogunan, om kumama' nopo iyau do nuluhon, nga' muntu' nopo o lisun do mantad hiri'd nuluhon. 33 Modsinding oku nondo dot id Tuhan do solinaid ku do poimpasi, om modsinding oku do mamarayou'd Kinorohingan ku do gisom do tikapatai ku. 34 Maha' daa om orohian iyau do korongou diti sinding ku, tu' iyau no o tadon diti kataadan ku. 35 Angatanus po daa do hiti'd pomogunan i tulun do kidusa, om opunso po daa i tulun dot araat. Orohian oku no kopio do mamarayou'd Tuhan o ginawo ku, om tinan ku om pomusarahan ku! Royoho' no o Tuhan!
Kinorohingan om i Tulun Dau
1 Pongunsikou nod Tuhan, popinsusuyo' no o kogoyoo' dau, susuyai ngai' no o bansa' di nongowonsoi dau. 2 Podsinding no do pamarayou'd Tuhan popinsunudo' no i nongowonsoi dau di kongoimayaan kopio. 3 Kooropod no tu' nasanganu toko' no dau, kongooropod kou no, iyokoyu i tumuku' dot id dau. 4 Rikot no do mongoi pokiuhup do Tuhan, om kada' tingkod do sumambayang dot id dau. 5-6 Iyokoyu i sinakagon di Abraham, i susuhuon do Kinorohingan, iyokoyu i sinakagon di Yakub, i tulun do pinili' dau. Soroho' ngai' no dokoyu i kongopusahan do winonsoi'd Kinorohingan om it oturan do pinatahak dau. 7 Tuhan no o Kinorohingan toko', om boros nopo dau om bagi' do koinsanai di hiti'd pomogunan. 8 Om igitan kasai' i' dau i tumpongo dau, do gisom dot insoribu pogisolusuk-lusuk o sinakagon. 9 Sorohon i' dau i tumpongo dau dot id di Abraham, om i tumpongo dau dot id di Isak. 10 Pinogirot do Tuhan i tumpongo dau dot id di Yakub, i tumpongo dot id Israil do gisom dot alaid. 11 Boros ka dau, “Patahakon ku nondo dokoyu i pomogunan do Kanaan, om iri no o sumiliu do dokoyu'd songonuon,” ka. 12 A' i' ogumu' o nintaban di tulun di songonuon do Kinorohingan, om sompogunan po iyolo' do hilo'd pomogunan do Kanaan. 13 Mininghombo iyolo' dot id piro-piro o pomogunan, om id piro-piro o bansa'. 14 Nga' aiso' i' o tiso' piya'd tulun do pinologos do Kinorohingan do monginggorit diyolo', pinoinsan ngai' i' do Kinorohingan i raja' om mongintirung indo iyolo' di tulun di nasanganu dau. 15 Boros ka dau, “Kada' dokoyu gangaho' i tulun di nongopili' ku, kada' dokoyu pokorualai i nabi ku,” ka. 16 Pinorikatan do Tuhan do mononglous i pomogunan diyolo', om nongoi ngai' dau i taakanon diyolo'. 17 Nga' pinoguli' i' dau o songulun diyolo', i Yusup, i pinadagang do sumiliu'd turipon. 18 Kinagasan do rantai o gakod dau, om sinulungan do rantai'd basi' o liou dau, 19 gisom do nabayaan i pinoboros mantad dau. Pinotopot i' iyau di boros do Tuhan. 20 Om polobuso' noddi iyau di raja' do Masir, om pinalabus iyau di raja' do piro-piro o bansa' do mantad id giil. 21 Sinuhu' iyau di raja' do mongilo-ilo di pomorintaan dau, om siniliu iyau do pomorinta' do pointongkop di pomogunan. 22 Om kikuasa' iyau dot id sawat di pagawai di raja', om kikuasa' iyau do monuhu' di montiri' di raja'. 23 Om ongoi noddi i Yakub do hilo'd Masir om undorong no dot id pomogunan diri. 24 Om onuwai nod Tuhan do tangaanak dot ogumu' i tulun dau om pinokoris dau iyolo' ko' mantad di pisangod diyolo'. 25 Om pinologos dau i tulun do Masir dot araatan di tulun dau om pingakalan di tulun do Masir i susuhuon dau. 26 Om porikoto' noddi dau i Musa i susuhuon dau, om i Harun, i pinili' dau. 27 Om miningwonsoi iyolo' do piro-piro o koimayaan do mantad id Kinorohingan om minomonsoi iyolo' do piro-piro o kopusahan do hilo'd Masir. 28 Om potuongo' nod Kinorohingan o pomogunan diri, nga' a' i' i tulun do Masir minumboyo' di boros dau. 29 Siniliu dau do raha' i bawang diyolo', om pinatai ngai' i sada'. 30 Om notongkop do bonong i pomogunan diyolo', do hiri piya'd walai di raja' nga' noponu' id bonong. 31 Om ponuhu' no o Kinorohingan, om tokop nopo di pomogunan o langau om togonok. 32 Pinorikot dau o karambatu om gonit do hilo'd pomogunan diyolo', om okon nogi' ko' rasam o pinorikot. 33 Om rinaag ngai' dau i guas dot anggur om i koguasan dot ara, om hinaba' ngai' dau i kayu. 34 Koboros nopo iyau'd minonuhu', om rikot no o katat dot a' no ointob-intob o kogumuo'. 35 Akano' ngai' nopo diyolo' i tanom-tanom do hiri'd pomogunan diri, om nakan ngai' diyolo' i tua' do tanom-tanom. 36 Pinatai ngai' dau i tanak do kusai dit id gulu, dot id pointikid-tikid do sompiiyon do tulun do Masir. 37 Om posoliwano' nogiddi dau i tulun dot Israil, om minongigit iyolo' do pirok om tamas, om ongokoris ngai' nopo iyolo', om aiso' o kitoruol tu' gompion i' iyolo'd Tuhan. 38 Om ongooris ngai' nopoddi diyolo' i tulun do Masir, om ongotood nopoddi i tulun do Masir di suminoliwan i tulun dot Israil. 39 Nintirungan do Kinorohingan do haun i tulun dau, om nonuan dau iyolo' do tapui do dongotuong do ponitiu diyolo' do tontok do mamanau. 40 Pokianu no iyolo', om porikot no iyau do tombolog, nonuan dau iyolo' do takanon do mantad hilo'd surga, dot akanon diyolo' do gisom dot ongoiyahan iyolo'. 41 Linapak dau o tontolob, om okohus nopo o waig do luminuyung, do miagal pod bawang do lumuyung do hilo'd tana' do kowotuan. 42 Tu' osorou id Tuhan i tumpongo dau dot id di Abraham i susuhuon dau. 43 Om posoliwano' no dau i tulun di nopili' dau, om minsinding po iyolo' om mimpangkis dot atataadan. 44 Pinatahak dau diyolo' i pomogunan do bansa'd suwai, om pinologos dau i tulun dau do suminingolod di koumaan diyolo'. 45 Om mumboyo' indo i tulun dau dit oturan dau om tumanud di ponuhuan dau. Royohon no o Tuhan!
Kosonongo' do Tuhan dot id Tulun Dau
1 Royohon no o Tuhan! Pongunsikou nod Tuhan, tu' osonong i' iyau; om aiso' o kotingkadan do kosianan dau. 2 Isai po o kaayi' do monusui di nongowonsoi dau dit angagayo kopio? Isai po o milo do mamarayou dau do gisom do kabagal o pamarayou dau? 3 Olumaag no i tulun di mumboyo' di ponuhuan dau, om i momonsoi kasai' dit otopot. 4 Soroho' oku no dot ongoyon nu uhupai i tulun nu, oi Tuhan, pohompito' oku no iyoho' dot ongoyon nu iyolo' posio'. 5 Pokitono' oku no do kosimbayano' do tulun nu, om kohompit oku i' di kataadan di tulun nu, om kotonggoi oku di kaandasan di tulun di pinili' nu. 6 Nokowonsoi no iyahai'd dusa do miagal di komolohingan dahai, araat no o nowonsoi dahai om nakasala' iyahai. 7 A' i' nokosuhut di kopusahan do piningwansayan do Kinorohingan i taki-aki dahai di hilo' po iyolo'd Masir, olihuan i' diyolo' do pinopointalang o Kinorohingan do kosianan dau dot id diyolo', om suminaap iyolo' dau, it Asawat Kopio di hilo' iyolo'd Rahat dot Aragang. 8 Nga' pinasi i' dau iyolo' do miagal di nakabatos dau, do popointalang di sinundu dau dot agayo. 9 Barasai nopo dau i Rahat dot Aragang om rasak no, pinawaya' dau i tulun dau dot id tana' dit otuu. 10 Pinasi dau iyolo' do mantad id tulun dit araatan diyolo', pinoidu' dau iyolo' do mantad id pisangod diyolo'. 11 Nga' nolondod i' do hiri'd waig i pisangod diyolo', om aiso' no o tiso' do napasi. 12 Om kotumbayaai nogiddi i tulun dau di batos dau, om podsinding no iyolo' do mamarayou dau. 13 Nga' a' po alaid om kolihuwai no diyolo' i nowonsoi'd Tuhan, om mimpori-pori nopoddi iyolo' do mingwonsoi do nunu nopo; om a' no mandad do nosihat do Tuhan. 14 Noporinta' po iyolo' do korohian do tinan diyolo' di hilo' iyolo'd tana' do kowotuan, om pinogumbalan diyolo' o Kinorohingan. 15 Om patahako' noddi do Kinorohingan i pinokianu diyolo', nga' pinoporikot poddi iyau do toruol dit araat kopio dot id diyolo'. 16 Tontok di hilo' iyolo'd tana' do kowotuan om minosol iyolo' di Musa, om i Harun, i susuhuon do Tuhan dit olidang. 17 Om pipitas no i tana' om kourusud no i Datan do hiri, om naratu'd hiri i Abiram om i sompiiyon dau. 18 Om sondot no o tapui dot id tulun di tuminanud diyolo' om kosorob no i tulun dit angaraat diri. 19 Minomonsoi iyolo'd sapi' do tamas do hilo'd Sinai, om tuminuku' iyolo' dot id tingolig diri. 20 Pinoolon diyolo' i kagayaan do Kinorohingan, do tininganak di pinoiyo-iyo'd nintorusan di mangakan do sakot. 21 Nolihuan diyolo' i Kinorohingan di minamasi diyolo', i miningwonsoi do kongoimayaan di hilo'd Masir. 22 Kopusahan no kopio i winonsoi dau di hilo'd pomogunan diri, kosuayan no kopio i winonsoi dau di hilo'd Rahat dot Aragang. 23 Soira' di minomoros o Kinorohingan do patayon dau i tulun dau, om miningkakat i Musa do minomiolitan do Kinorohingan om i tulun dau. Om nantaban di Musa i kototogod do Kinorohingan do mamatai diyolo'. 24 Om minada' iyolo' di pomogunan dot osonong, tu' a' iyolo' notumbayaan di batos do Kinorohingan. 25 Minundorong iyolo' do hiri'd kiim diyolo' om somboro-boros dot araatan om a' no mokinongou'd boros do Tuhan. 26 Om poinsano' nod Tuhan iyolo' do mikuwo'd suminumpa' iyau dot apatai nondo iyolo' do hiri'd tana' do kowotuan. 27 Om potompiason dau i sinakagon diyolo' dot id pogialatan do bansa'd suwai, om pologoson dau iyolo' dot apatai dot id sompogunan. 28 Om tontok no di hilo' iyolo'd Pior, om minoyo' i tulun di songonuon do Kinorohingan do tumuku' dot id Baal, om minangakan iyolo' do porsombahan di nokosubak dot id tingolig. 29 Tiningkau di kowoyo-woyoon diyolo' o kototogod do Tuhan, om noontok diri iyolo' do toruol dit araat kopio. 30 Nga' ingkakat no i Pinihas om hukumai no dau i tulun di nakasala', om kotingkod noddi i toruol diri. 31 Om sorohon noddi kasai' i winonsoi dau dit osonong kopio'ddi do mantad poddi om gisom dot alaid. 32 Om hilo' nod tudan do waig do Moriba om potogodo' po kawagu di tulun o Tuhan, om i Musa iddi o nosusa' dot iyolo' o minonusa'. 33 Pinaraat tomod diyolo' o ginawo di Musa gisom dot a' no iyau minomusorou di pimboroson dau. 34 A' i' diyolo' pinatai i tulun do bansa'd suwai, tu' a' i' iyolo' tuminanud di pinonuhuan do Tuhan. 35 Tu' minogikawin-kawin nogi' iyolo' di bansa'ddi om minomit iyolo' di kowoyo-woyoon di tulun dit a' kotutun do Kinorohingan. 36 Tuminuku' do tingolig i tulun di songonuon do Kinorohingan, om iri no o nakapatai-patai diyolo'. 37 Pinatahak diyolo' i tangaanak diyolo'd tongokusai om tongoondu' do sumiliu do porsombahan di sumbolion dot id tingolig do hilo'd Kanaan. 38 Pinatai diyolo' i tangaanak dot aiso' o sala', om nososomu' diri i pomogunan dot i pinamatayan diri o nokososomu'. 39 Sinosomu' diyolo' o tinan diyolo' dot i winonsoi diyolo'ddi o nokososomu', om a' iyolo' tuminorodok dot id Kinorohingan. 40 Om otogod diri o Tuhan dot id tulun dau, om araatan kopio iyau diyolo'. 41 Pinosuang dau iyolo' dot id kuasa' do bansa'd suwai, om i pisangod diyolo' o momorinta' diyolo'. 42 Ninggorit iyolo' di pisangod diyolo' om id siriba' iyolo' do kuasa' diyolo'. 43 Asaru' i' daa do poiduwon do Tuhan i tulun dau, nga' uhang nogi' diyolo' do sumaap do Tuhan, om marom-ralom diri o kolonsodo' diyolo' dot id dusa. 44 Nga' pinokinongou id Tuhan iyolo' do tontok di mininglohou iyolo', om nokito i' dau i kosusaan diyolo'. 45 Om sinorou i' dau i tumpongo dau dot id diyolo', om winolihan iddi dau i tosorou dau tu' agayo i' o kosianan dau. 46 Pinologos diri dau dot osianan diyolo' i pisangod diyolo'. 47 Posio' no iyahai oi Tuhan, i Kinorohingan dahai, om pogulio' no iyahai dot id pomogunan dahai do mantad id piro-piro o bansa'ddi, om ounsikou indo iyahai om mamarayou iyahai do ngaran nu dit olidang. 48 Royohon no o Tuhan i Kinorohingan dot Israil, royohon no iyau do baino' om gisom dot alaid! Pologoson no do momoros ngai' o tulun dot, “Amin!” ka. Royohon no o Tuhan!
Buuk do Kolimo
Sinding 107-150
Rumayou do Kosonongo'd Kinorohingan
1 Pongunsikou nod Tuhan, tu' iyau nopo om osonong, om mompus-ompus o kosianan dau. 2 Pinghulitan nod momoros iti boros do pamarayou'd Tuhan, koinsanai dokoyu i napasi dau. Tu' pinoidu' kou dau do mantad id pisangod dokoyu. 3 Om pinoguli' kou do mantad id pomogunan do suwai, do mantad hilo'd koulayon om kotonobon, om mantad hilo'd utara om salatan. 4 Haro i' o piro-piro do mininghombo do hilo'd tana' do kowotuan, om a' kotunud do ralan do kumaa dot id bandar do tiyonon diyolo'. 5 Louson po iyolo' om tuuhan, om aiso' no o soro-sorohon diyolo' dot id dosunsudan. 6 Om pomolohou noddi iyolo'd Tuhan dit id suang iyolo'd kosusaan, om poiduwo' no dau iyolo' do mantad id kosusaan diyolo'ddi. 7 Pinosusui dau iyolo' di ralan dit opoting do kumaa dot id bandar di tiyonon diyolo'. 8 Apatut nod mongunsikou iyolo'd Tuhan tu' mompus-ompus i' o kosianan do Tuhan dot id diyolo', om minomonsoi iyau di kongoimayaan kopio dot id diyolo'. 9 Pinoinum dau i tulun do tuuhan, om pinakayahan dau dit ongosonong i tulun di louson. 10 Haro i' o piro-piro o poingiyon dot id kosusaan om id dotuong, do songinggiil om songingkogos, 11 tu' suminaap iyolo' do boros do Kinorohingan dit Osundu Kopio, om minada' iyolo' do ponudukan dau. 12 Olomok no iyolo' do nouru do karaja' dit awagat, ahaba' nopo iyolo' om aiso' i' o potungag. 13 Om id suang poddi iyolo'd kosusaan om pomolohou nogi' iyolo'd Tuhan, om pinoidu' iddi dau iyolo' do mantad id kosusaan diyolo'ddi. 14 Pinosoliwan dau iyolo' do mantad id kosusaan om totuong, om pinutut dau i kogos diyolo'. 15 Om apatut nod mongunsikou iyolo'd Tuhan, tu' mompus-ompus i' o kosianan do Tuhan dot id diyolo', om minomonsoi iyau di kongoimayaan kopio dot id diyolo'. 16 Rinaag dau i totobon do tambaga', om tinipu' dau i salampad do basi'. 17 Haro i' o piro-piro diyolo' dot oinggorit dot i dusa om kararaat diyolo' o koinggorit. 18 A' no iyolo' orohian do kokito do taakanon tu' oruhai no iyolo' dot apatai. 19 Om id suang poddi iyolo' do kosusaan om pomolohou nogi' iyolo'd Tuhan, om pinoidu' iddi dau iyolo' do mantad id kosusaan diyolo'ddi. 20 Pomoros no o Tuhan om kolingasai no iyolo', om pinoidu' dau iyolo' do mantad id kapatayon. 21 Apatut nod mongunsikou iyolo'd Tuhan tu' mompus-ompus i' o kosianan do Tuhan dot id diyolo', om miningwonsoi iyau di kongoimayaan kopio dot id diyolo'. 22 Apatut nod ounsikou iyolo' do mikuwo'd mongigit do porsombahan do sumbolion, om popinsusuyon i nongowonsoi dau do mikuwo'd sinding dot aarapadan. 23 Haro i' o piro-piro do suminoborong do rahat do suminakai do kapal do rahat, om hilo' nod rahat o pogihuman diyolo' do kaakan-akanan. 24 Om nokito diyolo' i winonsoi'd Tuhan, i winonsoi dau di kopusahan kopio do hilo'd rahat. 25 Pomoros nopo o Tuhan, om timpuun nod tuminongus dot opuhod kopio, om opuhod tomod diri o tumbak. 26 Nokoinsawat tomod i kapal do rahat om nongkotodsok i kapal do hiri'd nanad do rahat. Om moddosi po o tulun dot id suang do koligagaanan diri. 27 Nakatahub iyolo' om minikorobibi' do miagal do tulun di naawuk, om aiso' no o tosorou-sorou diyolo'. 28 Om id suang poddi iyolo'd kosusaan om pomolohou nogi' iyolo'd Tuhan, om pinoidu' iddi dau iyolo' do mantad id kosusaan diyolo'. 29 Tiningkod dau i tongus dot opuhod, om a' noddi agayo i tumbak. 30 Om ooropod diri iyolo' tu' nakatalib noddi i tongus dot opuhod, om osimbayan nopo iyolo' do pinorikot dau do hiri'd kodompiron do kapal do rahat di rikoton diyolo'. 31 Apatut nod mongunsikou iyolo'd Tuhan tu' mompus-ompus i' o kosianan do Tuhan dot id diyolo', om miningwonsoi iyau di kongoimayaan dot id diyolo'. 32 Mositi' nod popinsusuyon diyolo' i kagayaan dau dot id pitimungan do tulun dot ogumu', om royohon iyau dot id pitimungan do tongoboyoon. 33 Rinasakan do Tuhan o kabawang-bawangan, om tiningkod i tudan do waig do poluyung do waig. 34 Siniliu dau do tana' dot oosin i tana' dot oluhub, tu' i karaato' di tulun do poingiyon do hiri o kinapamansayan do miagal diri. 35 Siniliu dau do kulam do waig i kowotuan, om siniliu dau do tudan do waig i tana' dot otuu. 36 Pinologos dau i tulun do louson do miyon do hilo', om minomonsoi iyolo' do bandar do tiyonon diyolo'. 37 Tinanaman diyolo' i tumo diyolo' om minananom iyolo' dot anggur, om ogumu'ddi o nomot diyolo'. 38 Binarakatan dau i tulun dau, om ogumu'ddi o tangaanak diyolo', om a' dau pinologos do kumuri' i tayam-tayam diyolo'. 39 Soira' di naala' i tulun di nasanganu do Kinorohingan om noudipon tomod iyolo' di koinggoritan om pongulok-ulok. 40 Om nidu' diri dau o kuasa' di minonginggorit diyolo', om pinologos dau iyolo' do minghombo dot id tana' do kowotuan dit aiso' o ralan. 41 Nga' pinoidu' i' dau i tulun do mosikin do mantad id kosusaan diyolo' om pinoinggumu' dau i sompiiyon diyolo' do miagal pod baanan do dumba'. 42 Ongotood ngai' nopo i tulun dot otopot do kokito diti, nga' aiso' nopo komi di tulun dot araat. 43 Pologoson nod momusorou do pasal diti i tulun dit ongoilo, pologoson no iyolo' do kopuriman di kosianan do Tuhan dit aiso' o kotingkadan.
Sambayang do Mokiuhup do Sumaap do Pisangod
1 Sinding. Sinding di Daud. 2 Ogirot i' o kotumbayaan ku, oi Kinorohingan, modsinding oku i' do mamarayou diya'. 3 Posikan ku o ginawo ku, posikan ku o kecapi om gambus ku, posikan ku o tadau. 4 Mongunsikou oku i' diya', oi Tuhan, dot id pogialatan do bansa'. Royohon ku i' iya' dot id pogialatan do tulun. 5 Tu' kosoibau dilo tawan o kosianan nu dit aiso' o kotingkadan, kosunggu i' dilo tawan o kotorodoko' nu. 6 Pointalango' no i kagayaan nu do hilo'd tawan, oi Kinorohingan, om i kobontugo' nu do pointongkop diti pomogunan. 7 Posio' no iyahai di sinundu nu, simbaro' no o sambayang ku, om apasi i' i tulun di kosianan nu. 8 Nakapamatos no o Kinorohingan do hiri'd kinoiyonon dau dit olidang do poingkaa, “Bohogion ku nondo o tana' do Sikim do mikuwo'd osonong o ginawo ku, om ongkibon ku i Rantai do Sukot dot id tulun ku. 9 Giliad nopo om Manasi om doho' i', Ipraim no om ponokotupi' ku, om Yohuda no om ponokotungkat ku di don raja'. 10 Nga' Muab nopo om silihon ku indo do mimpun do pongougan do gakod om Idom noo om pataaman ku'd kasut ku, om iri no o koilaan dot iyoho' o sanganu'ddi. Mamangkis oku indo do pogintutunan do nakamanang oku do suminangod do tulun do Pilistin,” ka dau. 11 Isai o papaatod doho' do hilo'd bandar do kitolig, oi Kinorohingan? Isai o potunud doho' do hilo'd Idom? 12 Niadaan nu no tuu'ddi kopio iyahai? A' ko no kopio moyo' di soudor dahai do mamanau? 13 Uhupan no iyahai do sumaap di pisangod, tu' aiso' i' o kotutuk-tutukon do tulun toomod o monguhup. 14 Ondung mobi' dahai o Kinorohingan om kamanang i' iyahai, om aala' i' dau i pisangod dahai.
Sambayang do Tulun dit id Suang do Kosusaan
1 Maan di boyoon do modsisinding. Sinding di Daud. Royohon ku no iya', oi Kinorohingan, om ungkomi no. 2 Nongoi oku saapo' di tulun dot araat om i moninipu', miningudut iyolo' do pasal doho'. 3 Om mimboros iyolo' dot araat do pasal doho', om sumaap iyolo' doho' dot aiso' o paantakan. 4 Saapon oku i' diyolo' do mulong piya dot osianan oku diyolo', om suminambayang oku piya do bagi' diyolo'. 5 Sulian nogi' diyolo' do karaaton o kosonongo' ku, om sulian diyolo' do kototogod o kosianan ku. 6 Pomili' no di gompomutus dot araat do momisara' di pisangod ku, om pologoson i pisangod dau do papasala' dau. 7 Pologoson nopo iyau do bisaraon om oilaan i' do kisala', pologoson no do tondoson do kasalaan i sambayang piya dau. 8 Pologoson no dot oruhai'd opupusan i koposion dau, pologoso' no do tulun do suwai o kosowoli di karaja' dau. 9 Pologoso' no dot aiso' o molohing di tangaanak dau, om opuadan i sawo dau. 10 Pologoso' no dot osiliu do tulun di mokianu-anu po om i mombo-hombo poo i tangaanak dau, pologoso' no dot ouyung iyolo' do mantad hiri'd pogun dit iyon- iyonon diyolo'. 11 Pologoso' no dot oongoi ngai' di tulun di pinogutangan dau i dapu' dau, om pologoso' no dot angaanu ngai' do bansa'd suwai i pininghuyanan dau do minogihum. 12 Kada' pologoso' do haro o tulun dot opuhawang dot id dau ko' haro po o momogompi' di tangaanak dau di notongkiadan dau. 13 Pologoso' no dot apatai ngai' i sinakagon dau, om olihuan i' o ngaran dau dot id sinakagon di sumusuhut. 14 Pologoso' no dot osorou kasai'd Tuhan i karaato' di komolohingan dau, om a' ompunan i dusa dau do gisom do kopupuson diti pomogunan. 15 Pologoso' no dot osorou kasai'd Tuhan i dusa diyolo', nga' iyolo' nopo om lihuan no kopio dau. 16 Tu' tulun nopoddi om a' i' minomusorou do momuhawang, tu' minonginggorit iyau om minamatai di tulun do mosikin, om it oinggorit om it aiso' o pokukurayan. 17 Orohian iyau do momopol --- om pologoso' no dot iyau ot apapalan, araatan iyau do manahak do barakat, om pologoso' no dot aiso' o mamarakat dau! 18 Noubas tomod iyau do mimpopol, do miagal po do mananrasuk o koubaso' dau, pologoso nod sumarabak i popol dau dot id tinan dau do miagal do waig, om sumarabak dot id tulang dau do miagal do tumau. 19 Pologoso' nori do pointokop dau do miagal do rasuk om poinrilit dau do miagal do tagkos. 20 Oi Tuhan, iyoon noddi o pomohukum di pisangod ku, i tulun di mimboros dot araat do pasal doho'. 21 Nga' uhupai oku no iyoho', oi Tuhan, i Kinorohingan ku, do miagal di nakabatos mantad nu, om poiduwo' oku no tu' i kosonongo' om kosianan nu o kopoiduan. 22 Mosikin oku om oinggorit oku, om norualan tomod o ginawo ku. 23 Miagal oku pod sangai di dongsosodopon no, tu' oruhai nod atagak, miagal oku po di godu do pugagon. 24 Olomok no o totud ku tu' puasa oku, santaid-taid po o kulit ku, om tulang ku po o mogioput-oput. 25 Om songirak-irak po i tulun do mintong doho', om songbingog-bingog pod tulu do monguntotogod. 26 Uhupai oku no oi Tuhan, i Kinorohingan ku, posio' oku no tu' osianan kasai' ko i' doho'. 27 Poiloo' no i pisangod ku, dot iya' no i minamasi doho'. 28 Papalan oku piya diyolo' nga' barakatan oku i' diya'. Aala' po daa i pisangod ku, nga' iyoho' nopo i susuhuon nu om otood i'. 29 Pologoso' no dot okuluputan do tingayam i pisangod ku, pologoso' no iyolo' dot olopot do kointingayamo'. 30 Puhadan ku nondo o boros ku do mongunsikou'd Tuhan, royohon ku indo iyau do hilo'd pitimungan do tulun dot ogumu'. 31 Tu' obian i' dau i tulun do mosikin om posion dau do mantad id tulun di momohukum daa dau do kapatayon.
TUHAN om i Raja' do Pinili' Dau
1 Sinding di Daud. Om boros kad Tuhan dot id tuan ku, i raja', “Irikau do hiti'd dawananan ku do gisom id opoulakan ku diya' i pisangod nu,” ka. 2 Hilo' nod Sion o poimpuunan do Tuhan do popoinggayo do pomorintaan nu. Porintaon no i pisangod nu! 3 Tontok nopo di tadau do mongoi ko sangod di pisangod nu, om orohian toomod nopondo i tulun nu do mongoi tanud do sumangod. Om miagal po di bolobou do dongkosuabon i tangaanakwagu do rumikot do hilo'd Nuluhon dit Olidang. 4 Nakabatos nod Tuhan do mikuwo'd sumpa', om a' no dau pakaisoon iri. Boros ka dau, “Imam ko nondo do gisom do poingompus do miagal di Malkisidik,” ka dau. 5 Tuhan nopo om hino id dawananan nu, om soira' nopo do tumogod iyau, om raja' piya nga' aala' i' dau. 6 Porotuan nondo dau do hukuman i piro-piro o bansa', om ponuon dau do rata' i kinoiyonon do sumangod, alaon dau i raja' do pointongkop diti pomogunan. 7 Mongoi i raja' inum do hiri'd tudan do waig do hiri'd tisan do ralan, om okoris indo iyau, om kamanang iyau.
Mamarayou do Tuhan
1 Royohon no o Tuhan! Aayi-ayi' no o ginawo ku do mongunsikou'd Tuhan dot id pitimungan do tulun dau. 2 Ongosonong tomod om koimayaan kopio i wonsoyon do Tuhan, oinsanan nopo i tulun dit asanangan diri dot orohian do kosuhut kopio'ddi. 3 Koinsanai di wonsoyon do Tuhan om osonong i' om royohon, om mompus-ompus o kotulido' dau. 4 Mada' i' o Tuhan dot olihuan toko' i winonsoi dau di kongopusahan kopio, tu' obinsianan iyau om obinlisiu. 5 Manahak i' iyau do taakanon dot id tulun di momusou dau, a' i' dau olihuan i tumpongo dau. 6 Nokointalang no dau i sinundu dau dot id tulun dau, tu' nakatahak no dau diyolo' i tana' do bansa'd suwai. 7 Otorodok i' o Tuhan om otulid dot id suang do nunu nopo o wonsoyon dau, om milo ngai' do ponongkuyaanan i boros dau. 8 Mompus-ompus kasai' i' it oturan dau, tu' pinatahak i' dau iri dot id suang do katapatan om kotulido'. 9 Pinalabus do Tuhan i tulun dau, om minomonsoi iyau do tumpongo di mompus-ompus dot id diyolo'. Iyau nopo om olidang om okoris! 10 Ralan nopod kaanu do toilaan om oronok do Tuhan; om manahak i' iyau do pomusarahan dit atarom dot id tulun di mumboyo' do boros dau. Apatut nod royohon iyau do gisom dot alaid.
Kolumaagan do Tulun dit Osonong
1 Royohon no o Tuhan! Olumaag no i tulun dit oronok do Tuhan, om it asanangan do mumboyo' do ponuhuan dau. 2 Tangaanak nopo di tulun dot osonong om angabantug i' do hiti'd pomogunan, om abarakatan o sinakagon dau. 3 Sompiiyon nopondo dau om kaya' om ogumu' o dapu', om haro kasai' o kosimbayanan do gisom dot alaid. 4 Tumitiu i' o tulinau do hiri'd totuong dot id tulun dit osonong, om it obinsianan om opuhawang om otulid. 5 Olumaag no i tulun dit orohian do popoolos, om it otulid o kowoyo-woyoon do dumagang. 6 Tulun nopo dot osonong om a' i' koumbal do koinsiriba' o ngaran, om osorou kasai' indo iyau do gisom dot alaid. 7 A' i' iyau ooris do korongou do habar dot araat, tu' ogirot i' o kotumbayaan dau, om mogondos iyau'd Tuhan. 8 A' i' iyau kumanggau om a' ooris, tu' iso-iso' no o ginawo dau dot otumbayaan do kokito iyau di pisangod dau dot aala'. 9 Opuhawang i' iyau dot id tulun di mosikin, om a' sumimban i kopuhawango' dau, asawat o pangkat dau om pusohon iyau. 10 Otogod nondo i tulun dot araat do kokito'ddi, miit po o nipon diyolo' dot atatagadan om apatai nondo iyolo', om atanus tomod nopo i soro-sorohon diyolo'.
Rumayou do Kosonongo'd Tuhan
1 Royohon no o Tuhan! Oi koinsanai'd susuhuon do Tuhan, royoho' no o ngaran dau! 2 Royohon nondo o ngaran dau, do mantad do baino' om gisom do poingompus. 3 Mantad pod hilo'd koulayon do tadau om gisom do korikot do hilo'd kotonobon do tadau do royohon o ngaran do Tuhan. 4 Porintaon do Tuhan o koinsanai do bansa', om kosoibau do tawan o kagayaan dau. 5 Aiso' no o koiyo do Tuhan i Kinorohingan toko'. Poingiyon iyau do hilo'd kinoiyonon dit id sawat kopio, 6 nga' luminuung i' iyau do mintong do tawan om pomogunan. 7 Potungagon dau i tulun do mosikin do mantad id pupuk, kakaton dau i ruminutum do mantad id koinggoritan diyolo'. 8 Om silihon dau iyolo' do tambalut do raja', i raja' do tulun dau. 9 Pusohon i' dau i tondu' dit aiso' o tanak dot id sompiiyon dau, potoodon i' dau iyau tu' onuan i' dau iyau do tangaanak. Royohon no o Tuhan!
Sinding do Paska
1 Tontok di suminoliwan i tulun dot Israil do mantad hilo'd Masir, di tuminongkiad i sinakagon di Yakub di pomogunan diri, 2 om siliho' nod Tuhan o tulun do Yohuda do tulun dau, om siniliu dau ot Israil do songonuon dau. 3 Ontong no dau i Rahat dot Aragang om panangkus no do minogidu', om tingkod nopo do luminuyung i Bawang do Yordan. 4 Mininsimbul i nuluhon do miagal do kambing do tontoluhan, om mininsimpod i nulu-nulu do miagal do tangaanak do dumba'. 5 Nokuro kopio tu' minogidu' ko, oi rahat? Nokuro tu' tuminingkod ko do lumuyung, oi Bawang do Yordan? 6 Nokuro tu' mininsimbul kou do miagal do kambing do tontoluhan, oi konulu-nuluan? Oi nulu-nulu, nokuro tu' mininsimpod kou do miagal do tangaanak do dumba'? 7 Gogor no, oi pomogunan tu' rumikot no o Tuhan, gogor no dot id toguang do Kinorohingan di Yakub. 8 Iyau no i pinoposimban di tontolob do siniliu do kulam do waig om pinoposimban do pampang do siniliu do bawang di songluyung-luyung.
Pamarayou do Kinorohingan dit Osundu Kopio
1 Iya' noo oi Tuhan, om iya' noo ot apatut do royohon, om okon i' ko' iyahai o royohon tu' otorodok ko i' om aiso' o kotingkadan do kosianan nu. 2 Nokuro daa tu' muhot dahai i bansa' do poingkaa, “Hinonggo o Kinorohingan dokoyu,” ka. 3 Kinorohingan nopo dahai om hilo'd surga, om nunu nopo o korohian dau om iri no o wonsoyon dau. 4 Ponokokinorohingan nopo diyolo' om tamas om pirok do winonsoi om winorun do palad do tulun. 5 Kikabang i' iyolo' nga' a' i' koboros om kimato nga' a' i' kokito. 6 Kitolingo i' iyolo' nga' a' i' korongou, om kitodung nga' a' i' kosingud. 7 Kilongon i' iyolo' nga' a' i' milo do kumama', om kigakod nga' a' i' kapanau, om a' iyolo' koboros. 8 Om pologoso' no i tulun di minomonsoi diyolo' do koiyo di tingolig do winonsoi diyolo'. 9 Pogondos nod Tuhan, oi tulun dot Israil, tulungon kou i' dau om intirungan kou. 10 Pogondos nod Tuhan, oi imam di mogobi-obi' do Kinorohingan, tulungon kou i' dau om intirungan kou. 11 Pogondos nod Tuhan, oi koinsanai dokoyu i tumuku' dot id dau, tulungon kou i' dau om intirungan kou. 12 Osorou toko' i' do Tuhan om barakatan toko' i' dau, barakatan i' dau i tulun dot Israil om it imam di mogobi-obi' do Kinorohingan. 13 Barakatan i' dau o koinsanai do tulun di momusou dau, iyoon nopo dau do mamarakat it angagayo om it ongokoro'. 14 Maha' daa om onuan kou'd Tuhan do tangaanak dot ogumu', iyokoyu om i sinakagon dokoyu. 15 Maha' daa om barakatan kou'd Tuhan, i minomonsoi do tawan om pomogunan! 16 Tawan nopo om Tuhan noo o sanganu, nga' pinatahak i' dau do tulun o pomogunan. 17 A' i' o Tuhan royohon di tulun di nangapatai, ko' i tulun di nongkolintuhun no dot id kinoiyonon dit oingou. 18 Nga' iyati' nopo i songimpasi om mongunsikou i' dau, do mantad do baino' om gisom do poingompus. Royohon no o Tuhan!
Mamarayou do Kinorohingan i Tulun di Nokoidu' do Mantad id Kapatayon
1 Osianan oku'd Tuhan, tu' pokinongohon oku i' dau, pokinongohon i' dau o sambayang ku. 2 Mokinongou i' iyau doho', do pointikid-tikid do lumohou oku dau. 3 Nosorilian oku po do koligagaanan do kapatayon, katangkabo no kopio om korolosi doho' o kapatayon. 4 Om pomolohou oku noddi do Tuhan do poingkaa, “Pokionuon ku no kopio iya' oi Tuhan do mamasi doho',” kangku. 5 Tuhan nopo om osonong i' om obinsianan, monginsian i' o Kinorohingan doho'. 6 Intirungan id Tuhan i tulun dot aiso' o pokukurayan, tulungon oku i' dau do tontok dot id suang oku'd koligagaanan. 7 Pogiroton ku i' o ginawo ku, tu' osonong i' o Tuhan dot id doho'. 8 Pinoidu' oku i' do Tuhan do mantad id kapatayon, ninsasamadan oku i' dau om a' oku dau pinologos do naala'. 9 Om poimpasi oku iddi do hiti'd pomogunan tu' intirungan oku id Tuhan. 10 Otumbayaan oku i' kasai' do minomoros oku piya dot, “Ulak-ulakan oku no kopio,” ka, 11 om tontok piya dit oborulong oku om minomoros oku dot, “Aiso' i' o tongoiso' piya'd tulun do milo do ponongkuyaan,” kangku. 12 Nunu po o milo ku'd patahakon dot id Tuhan do ponomuli' ku di kosonongo' dau dot id doho'? 13 Papatahak oku indo do porsombahan do waig dot anggur dot id Tuhan do pongunsikou ku dau do minonulung doho'. 14 Hilo' nod pitimungan do koinsanai'd tulun dau do bayaanon ku i pinabatos ku dot id dau. 15 Oupus tomod i' o Tuhan do tontok do haro ot apatai dot ongoiso' piya di tulun di kosianan dau. 16 Iyoho' no o susuhuon nu, oi Tuhan, momonsoi oku i' do karaja' nu do miagal di tina' ku. Pinoidu' oku i' diya' do mantad id kapatayon. 17 Papatahak oku indo do porsombahan do kounsikahan ku dot id diya', om sumambayang oku dot id diya'. 18 Bayaanon ku indo i batos ku dot id Tuhan, dot id toguang do toinsanan di tulun dau 19 di pointimung do hiri'd natad do Walai'd Sasambayangan dot Agayo do hilo'd tanga' di bandar do Yorusalim. Royohon no o Tuhan!
Pamarayou do Tuhan
1 Royoho' no o Tuhan, oi koinsanai'd bansa', royoho' no iyau, oi koinsanai'd tulun! 2 Tu' osianan i' kopio iyau dati', om mompus-ompus o kotorodoko' dau. Royohon no o Tuhan!
Sambayang do Mongunsikou'd Kinamanangan
1 Pongunsikou nod Tuhan, tu' osonong i' iyau, om mompus-ompus o kosianan dau. 2 Pologoso' no do momoros i tulun dot Israil do, “Mompus-ompus i' o kosianan dau,” ka. 3 Pologoso' no do momoros it imam di mogobi-obi' do Kinorohingan do, “Mompus-ompus i' o kosianan dau,” ka. 4 Pologoso' no do momoros ngai' i tulun di tumuku' dot id dau do, “Mompus-ompus i' o kosianan dau,” ka. 5 Luminohou oku'd Tuhan do tontok dit id suang oku'd kosusaan, om sinimbar oku i' dau om pinoidu' oku dau. 6 Moyo-woyo' i' o Tuhan doho', om a' oku i' moddosi, om aiso' no o milo'd tulun do wonsoyon dot id doho'. 7 Tuhan i' o monulung doho', om okito ku indo i pisangod ku dot aala'. 8 Osonong nogi' do mogondos do Tuhan, ko' mantad do sumondiu do tulun. 9 Osonong nogi' do mogondos do Tuhan, ko' mantad do sumondiu do raja'. 10 Ogumu' daa o pisangod do pointutuk doho', nga' naala' ku i' iyolo' di kuasa'd Tuhan. 11 Nosorilian oku nopo diyolo', nga' naala' ku i' iyolo' di kuasa'd Tuhan. 12 Miagal po iyolo' di moningot do minongurun doho', nga' kosorob tomod nopo iyolo' do miagal di rugi di sinorob do tapui tu' oruhai do nouu. Tu' pinunso ku iyolo' di sinundu'd Tuhan. 13 Pinadalaan tomod oku do minanangod om oruhai oku no daa dot aala', nga' nuhupan oku iddi do Tuhan. 14 Tuhan no o popokoris om popogirot doho', iyau no o mamasi doho'. 15 Pokinongou no do boros dit opuhod dot atataadan do nakamanang, do hilo'd kokiiman do tulun do Kinorohingan, do poingkaa, “Iri no o winonsoi'd Tuhan dit okoris kopio. 16 Pinamanang toko' di kuasa' dau, i kuasa' dau di nakamanang dot id pisangadan!” ka no. 17 A' oku i' apatai suwai ko' poimpasi oku i', om popinsusui oku di nowonsoi'd Tuhan. 18 Nadalaan oku no kopio dau do minomohukum, nga' a' oku i' dau pinologos dot apatai. 19 Iwangai doho' i totobon do Walai'd Sasambayangan dot Agayo, om sumuang oku i' do mongoi pongunsikou'd Tuhan. 20 Iti no o wawayaan di don Tuhan, om iri no tulun dot otopot o milo do maya'd hiti. 21 Royohon ku iya', oi Tuhan, tu' sinimbar nu i' o sambayang ku, om nonuan oku diya' do kamanangan. 22 Iri nopo watu di niada' di mamamaal, tu' sorohon diyolo' dot aiso' o guna', nga' iri nogiddi i watu'ddi o kiguna' kopio. 23 Iri no o winonsoi'd Tuhan, om koimayaan tomod toko' iri. 24 Iti no o tadau di kinamanangan do Tuhan, om kongotood toko' no do mamaramai'dti. 25 Posio' no iyahai oi Tuhan, om onuwai no iyahai'd kamanangan. 26 Pologoson no do barakatan do Kinorohingan, i tulun di rumikot dot id suang do ngaran do Tuhan, barakatan dahai iya' do mantad hilo'd Walai'd Sasambayangan dot Agayo. 27 Tuhan nopo om Kinorohingan i', om osonong iyau dot id dati'. Potimpuuno' no i karamayan do mikuwo'd mongigit do raan do kayu om mintutuk di pananaraban do porsombahan. 28 Iya' no o Kinorohingan ku, om unsikohon ku iya'; om popinsusuyon ku o kagayaan nu. 29 Pongunsikou nod Tuhan tu' osonong iyau, om mompus-ompus o kosianan dau.
Tourat do Tuhan
1 Olumaag no i tulun dit aiso' o kabara-barasan do koposi-posion, om i mumboyo' do Tourat do Tuhan. 2 Olumaag no i tulun di tumanud do ponuhuan dau, om it iso-iso' kopio o ginawo do mumboyo' dau. 3 Olumaag no i tulun di tumanud do korohian do Tuhan, om it a' momonsoi dot araat. 4 Oi Tuhan, nakatahak nu no dahai it oturan nu, om sinunudan nu iyahai do tumorodok do mumboyo'ddi. 5 Orohian oku no daa kopio dot otorodok oku do tumanud di ponudukan nu. 6 Ondung podulon kopio ku o koinsanai di ponuhuan nu, om a' oku no ointingayam. 7 Royohon ku nondo iya' do mikuwo'd otulid o ginawo ku, do tontok do minsingilo oku dit oturan nu dit otulid. 8 Tonudon ku i' it oturan nu, kada' oku no kopio tongkiadai.
Tumanud di Tourat do Tuhan
9 Ralan nopo do tanakwagu do popolidang kasai' do kowoyo-woyoon dau om tumanud di ponudukan nu, oi Tuhan. 10 Aayi-ayi' no o ginawo ku do momonsoi di korohian nu, om kada' oku pologoso' do sumansala' di ponuhuan nu. 11 Nokoopi' ku no dot id suang do ginawo ku it oturan nu, om a' oku indo kowonsoi'd dusa dot id diya'. 12 Royohon ku no iya', oi Tuhan, om tudukai oku no do kowoyo-woyoo' nu. 13 Opuhod indo o boros ku do popinsunud do koinsanai dit oturan di nakatahak nu. 14 Osonong nogi' kopio o ginawo ku do tumanud di ponuhuan nu ko' mantad do dapu' dot ogumu'. 15 Minsingilo oku dit oturan nu, om sorisidon ku i ponudukan nu. 16 Orohian tomod oku dit oturan nu, om a' ku lihuan i ponuhuan nu.
Kataadan dot id Suang dit Oturan do Tuhan
17 Kumosonong no dot id doho', i susuhuon nu, oi Tuhan, om apasi oku i', om mumboyo' oku indo di ponudukan nu. 18 Poungkalato' no o mato ku, om kokito oku i' do katapatan di Tourat nu. 19 Daamot nopo do hiti oku'd pomogunan, om kada' lisoko' i toturan nu do mantad id doho'. 20 Oruol po o ginawo ku do langadon, orohian oku no kopio do koilo dit oturan nu do pointikid-tikid do maso. 21 Togodon nu i' i tulun dot asawat o ginawo, papalan nu indo i tulun dit a' mumboyo' dit isuhu' nu. 22 Poiduwo' oku no do mantad id pongindaraat om ponguntotori' diyolo', tu' tinanud ku i' it oturan nu. 23 Mulong piya do mogipapakat i pomorinta' do sumaap doho', nga' momusorou kasai' oku i' dit oturan nu. 24 Poposonong do ginawo ku i ponudukan nu, om iri no o monosihat doho'.
Osombulu' o Ginawo do Tumanud do Tourat do Tuhan
25 Poillii oku po om poingisis tomod oku'd pupuk, posio' oku no kawagu do miagal di nakabatos nu. 26 Naakun ngai' ku no i nongowonsoi ku, om sinimbar oku iddi diya', tudukai oku no do tumanud dit oturan nu. 27 Uhupai oku no do tumanud dit oturan nu, om soro-sorohon ku indo kasai' i nongowonsoi nu di koimayaan kopio. 28 Mihad po o ginawo ku dot adalaan do tumongob, pokoriso' oku no do miagal di nakabatos nu. 29 Kada' oku pologoso' do sumansala' di ralan, om tudukai oku no do tourat nu tu' osonong ko i'. 30 Nopili' ku no do tumanud diya', pinokinongou ku no kopio i ponudukan nu dit otulid. 31 Natanud ku no i pinonuhuan nu, oi Tuhan, kada' oku pologoso' dot ointingayam. 32 Tonudon ku i' i ponuhuan nu, tu' ruhangan nu i' o toilaan ku.
Sambayang do Mokianu'd Toilaan
33 Oi Tuhan, tudukai oku no do komoyon di ponudukan nu, om umboyoon ku i' kasai' iri. 34 Posuhuto' oku no di Tourat nu, om umboyoon ku i' iri, om tonudon ku i' do mikuwo'd aayi-ayi' o ginawo ku. 35 Popihuboyo-boyoo' oku no di ponuhuan nu, tu' iri no o koonuan ku do kaarapadan. 36 Onuwai oku no do korohian do mumboyo' di ponudukan nu, do mantad ko' rumohian do kakayaan. 37 Kada' oku pologoso' do mogihum dit aiso' o kootuk-otukon, kumosonong no dot id doho' do miagal di nakabatos nu. 38 Sulungon no i batos nu dot id doho', i susuhuon nu, i batos do pinabatos nu dot id tulun di mumboyo' diya'. 39 Poiduwo' oku no do mantad id pongindaraat di poddosi ku, tu' osonong i' kopio it oturan nu. 40 Orohian kopio oku i' do mumboyo' di ponuhuan nu, onuwai oku no do koposion do wagu, tu' otulid ko i'.
Mogondos do Tourat do Tuhan
41 Pointalango' no o kosianan nu dot id doho', oi Tuhan, om posio' oku no do miontok di nakabatos nu. 42 Om milo oku id sumimbar di tulun do mongindaraat doho', tu' mogondos oku i' do boros nu. 43 Tulungo' oku no do popoboros kasai' dit otopot do pointikid do maso, tu' pagandasan ku nopo om iri i boros nu dit otulid. 44 Mumboyo' oku i' kasai' di Tourat nu, do gisom do poingompus. 45 Poimpasi oku indo dot id suang do kosimbayanan, tu' tumotos kopio oku i' do mumboyo' di ponudukan nu. 46 Popinsunudon ku nondo i ponuhuan nu dot id piro-piro o raja', om a' oku indo ointingayam. 47 Asanangan oku i' do mumboyo' di ponuhuan nu, tu' orohian oku i' kopio'ddi. 48 Pusohon ku i' om korohian ku i ponudukan nu, soro-sorohon ku i' i boros nu.
Otumbayaan di Tourat do Tuhan
49 Soroho' no i batos nu dot id doho', i susuhuon nu, tu' iri no o manahak doho' do pagandasan. 50 Oinggorit oku piya nga' haro i' o koinsasamod doho', tu' minanahak i' doho' do koposion i batos nu. 51 Monogod-togod nopo doho' i tulun dot asawat o ginawo, nga' a' oku i' nokotongkiad di Tourat nu. 52 Osorou ku i' i toturan nu di hino mantad no di gulu po, om koinsasamod doho' iri, oi Tuhan. 53 Soira' di kokito oku'd tulun dot araat do tumolibamban di Tourat nu, om otogod oku no kopio. 54 Tontok di maso ku'd poimpasi dot oruuhai do hiti'd pomogunan, om minonulis oku do sinding do pasal di ponuhuan nu. 55 Dongotuong nga' osorou ku i' iya', oi Tuhan, om momusorou oku di Tourat nu. 56 Koonuan ku nopo do kataadan, om mumboyo' di ponuhuan nu.
Otorodok dot id Tourat do Tuhan
57 Iya' noo o korohian kopio ku, oi Tuhan, mamatos oku no do mumboyo' do boros nu. 58 Aayi-ayi' no o ginawo ku do mokiinsian diya', do tumanud di nakabatos nu. 59 Nosorisid ku no o kowoyo-woyoon ku, om mamatos oku no do tumanud do ponudukan nu. 60 A' oku no minglaid, suwai ko' potilombusan ku no do mumboyo' di ponuhuan nu. 61 Nakataan no daa di tulun dot araat i lawa' di pamalawa' dau doho', nga' a' ku i' lihuan i Tourat nu. 62 Tumungag oku nopo do pitangatuong, do mamarayou diya' tu' otulid i' i ponuhuan nu. 63 Tambalut oku i' do koinsanai'd tulun di tumanud di ponuhuan nu. 64 Oi Tuhan, noponu' po iti pomogunan do kosianan nu dit aiso' o kotingkadan, tudukai oku no di ponuhuan nu.
Gatang do Tourat do Tuhan
65 Sinulung nu i' i batos nu, oi Tuhan, om mamadul ko doho', i susuhuon nu. 66 Onuwai oku no do toilaan om pomusorou dit atarom, tu' otumbayaan oku i' di ponuhuan nu. 67 Tontok nopo dit a' oku po diya' nohukuman, om kasala' oku nopo, nga' mumboyo' oku noddi do boros nu do baino'. 68 Osonong ko no kopio, om osonong o wonsoyon nu, tudukai oku no do ponuhuan nu. 69 Mongindaraat doho' i tulun dot asawat o ginawo, nga' aayi-ayi' i' o ginawo ku do mumboyo' di ponudukan nu. 70 Aiso' i' o tosuhut-suhutan do tulun diti, nga' poposonong i' do ginawo ku iyoho' it Tourat nu. 71 Nokoinsonong nogi' doho' i pinomohukum nu, tu' minonuduk doho' do minsingilo di ponuhuan nu. 72 Haro nogi' kopio o gatang dit oturan do pinatahak nu doho', ko' mantad do koinsanai di dapu' do hiti'd pomogunan.
Kotulido' do Tourat do Tuhan
73 Winonsoi oku diya', om ginompi' oku diya', onuwai oku no do toilaan, om koilo oku i' dit oturan nu. 74 Tulun nopo di momusou diya', om ooropod i' do kokito doho', tu' mogondos oku i' di batos nu. 75 Oilaan ku i' dot otulid i boros nu, oi Tuhan, om hinukuman oku diya' tu' otorodok ko i'. 76 Pologoso' no do koinsasamod kasai' doho' i kosianan nu dit aiso' o kotingkadan, do miagal di nakabatos nu doho', i susuhuon nu. 77 Kosianai no doho', om apasi oku i', tu' poposimbayan i' do ginawo ku i Tourat nu. 78 Pologoso' no dot ointingayam i tulun dot asawat o ginawo tu' mingudut iyolo' do papasala' doho', nga' iyoho' nopo, om momusorou i' di ponudukan nu. 79 Pologoso' no do rumikot dot id doho' i tulun do momusou diya', om koinsanai'd tulun di koilo do ponuhuan nu. 80 Pologoso' no dot osombulu' kopio o ginawo ku do tumanud di ponuhuan nu, om a' oku i' ointingayam.
Sambayang do Mokilabus
81 Olomok oku po tomod do mandad diya' do mongoi pamasi doho', oi Tuhan, iri po batos nu o pagandasan ku. 82 Opodi' po tomod o mato ku do miontong diya' do mamayaan di pinabatos nu, om minguhot oku do poingkaa, “Soira' ko nondo do monginsasamod doho'?” kangku no. 83 Aiso' no o guna-guna' ku, miagal oku pod kantung do kulit di niada', nga' a' ku i' nolihuan i ponuhuan nu. 84 Piro po koloido' ku do mandad? Songgira' nu do hukuman i tulun do monginggorit doho'? 85 Tulun nopo dit asawat o ginawo, it a' mumboyo' do Tourat nu, om nokopongukad nod luang do popohudsu doho'. 86 Milo ngai' id sondihon i toturan nu, tulungo' oku no, tu' gusaon oku om aiso' i' o paantakan. 87 Oruhai no daa iyolo' do kapamatai kopio doho', nga' a' ku i' tinongkiadan i ponuhuan nu. 88 Kumosonong no dot id doho', om mumboyo' oku i' di ponudukan nu tu' aiso' i' o kotingkadan di kosianan nu.
Kotumbayaan dot id Tourat do Tuhan
89 Mompus-ompus i boros nu, oi Tuhan, poingompus-ompus i' do hilo'd surga. 90 A' i' atanus o kotorodoko' nu do piro-piro piya koloido', nokogirot nu no iti pomogunan, om poingiyo kasai' nodti. 91 Hino kasai' po o koinsanai do nunu nopo do gisom do tadau'd baino' tu' pogiroton ngai' iri di boros nu, om susuhuon ngai' nu iyolo'. 92 Ondung okon daa ko' i Tourat nu o tadon do kataadan ku, om napatai oku no daa di koinggoritan ku. 93 A' ku i' kopio iyadaan i ponudukan nu, tu' iri no o pinamasi nu doho'. 94 Posio' oku no, tu' iya' i' o sanganu doho', om tuminotos oku i' do mumboyo' di ponuhuan nu. 95 Poingandad no o tulun dot araat do mamatai doho', nga' mamadul oku i' iyoho' di boros nu. 96 Noilaan ku no do haro ngai' i' o gisom do nunu nopo, nga' iri nopo boros nu om aiso' i' o kogisomon.
Orohian di Tourat do Tuhan
97 Orohian tomod oku di Tourat nu, om iri nopo o sorohon ku do monongodou-ngodou. 98 Soro-sorohon kasai' ku nopo i boros nu, tu' iri no o popomilo doho' do mantad ko' i pisangod ku. 99 Ogumu' nogi' o doho'd osuhutan ko' i monuduk doho', tu' minsingilo oku i' di ponuhuan nu. 100 Ogumu' nogi' o doho'd toilaan ko' i komolohingan, tu' mumboyo' oku i' do ponuhuan nu. 101 Mininsodu' oku do koinsanai do kowoyo-woyoon dot araat, tu' orohian oku i' do mumboyo' di boros nu. 102 A' ku i' niadaan i ponudukan nu, tu' orohian oku i' do mumboyo' di boros nu. 103 Oomis tomod i ponudukan nu, oomis po ko' paha'! 104 Kaanu oku do toilaan do mantad id boros nu, gisom dot araatan oku'ddi do koinsanai'd kowoyo-woyoon dot araat.
Tulinau do Mantad id Tourat do Tuhan
105 Boros nu nopo om miagal do lampung do potunud doho', om monitiu do ralan ku. 106 Bayaanon ku i' i batos ku di mikuwo'd sumpa' do mumboyo' di ponudukan nu dit otulid. 107 Ouruan oku no kopio dot oinggorit, oi Tuhan, gompio' oku no do miagal di nakabatos nu. 108 Romito' no iti sambayang ku do mongunsikou, oi Tuhan, om tudukai oku no do boros nu. 109 Posodia' kasai' oku i' do papatahak do koposion ku do gisom dot apatai, nga' a' ku i' lihuan i Tourat nu. 110 Nokowonsoi nod tulun dot araat o lawa' do pamalawa' doho', nga' a' oku i' suminansala' do boros nu. 111 Iri no i ponudukan nu o panakadapu' ku do gisom dot alaid, iri no i kataadan do ginawo ku. 112 Nokopomusorou oku no kopio do mumboyo' di boros nu, do gisom do tikapatai ku.
Manahak do Kosimbayanan i Tourat do Tuhan
113 Araatan oku di tulun dit a' iso-iso' o ginawo do tumanud diya', nga' asanangan oku i' di Tourat nu. 114 Iya' no o mogobi' om mongintirung doho', mogondos oku i' di batos nu. 115 Oi tulun di kidusa! poggidu' no do mantad id doho'! Tu' orohian oku i' do mumboyo' do ponuhuan do Kinorohingan ku. 116 Onuwai oku no do kokorisan do miagal di nakabatos nu om apasi oku i', kada' oku pologoso' dot oiman-iman di soro-sorohon ku. 117 Ahako' oku no om aiso' i' o koligagaanan ku, om mamadul kasai' oku i' di ponudukan nu. 118 Iyadaan ngai' nu i' i tulun di sumansala' do ponudukan nu, tu' aiso' i' o kootuk-otukon di pakat diyolo' di mingudut. 119 Iyoon nu pod rinomos i tulun dot araat, om asanangan oku'ddi di ponudukan nu. 120 Gagaran oku po dot ooris diya', noponu' oku pod kopoddosian di pomohukum nu.
Mumboyo' do Tourat do Tuhan
121 Nowonsoi ku no it otopot om osonong, kada' oku patahako' dot id pisangod ku. 122 Pamatos no do monguhup doho', kada' pologoso' i tulun dot asawat o ginawo do mongulok-ulok doho'. 123 Opodi' po o mato ku do miontong diya' do mongoi pamasi doho', magandad oku di maso do kopoiduan di pinabatos nu. 124 Wonsoyo' no dot id doho' o miontok di kosianan nu dit aiso' o kotingkadan, om tudukai oku no do ponudukan nu. 125 Susuhuon oku i' diya', om posuhuto' oku no, om kosuhut oku i' do ponudukan nu. 126 Oi Tuhan, norikot noddi o maso nu do momonsoi di powonsoyon nu, tu' sumaap no o tulun di Tourat nu. 127 Orohian oku i' di boros nu do mantad ko' i tamas do nosompipi'. 128 Om iri no o kotonudan ngai' ku di ponuhuan nu, om araatan oku do koinsanai di kowoyo-woyoon di kasala'.
Korohian do Mumboyo' do Toturan do Tuhan
129 Osonong tomod o ponudukan nu, om aayi-ayi' noddi o ginawo ku do mumboyo'ddi. 130 Manahak do tulinau i ponudukan nu do tontok di potudukon, om manahak do toilaan dot id tulun di basug. 131 Iyo po dit adalaan tomod do tuuhan o kalangado' ku di ponudukan nu. 132 Antangai oku no om kosianai no doho', do miagal di wonsoyon nu dot id toinsanan o tulun dit osianan diya'. 133 Poundaro' no o pamanau-panau ku do miagal di nokoboros nu, kada' oku pologoso' dot oporinta' dit araat. 134 Poiduwo' oku no do mantad id tulun di mongulok-ulok doho', om mumboyo' oku i' di ponudukan nu. 135 Ontong no doho' do mikuwo'd osianan, om tudukai oku no do boros nu. 136 Miagal pod bawang o romou ku do lumuyung, tu' a' do tulun umboyoon i tourat nu.
Otulid o Tourat do Tuhan
137 Otulid ko no kopio oi Tuhan, om oturan nu nga' otulid ngai' nopo. 138 Ponuhuan nopo di nakatahak nu, om otulid i' om otopot ngai'. 139 Miagal pod tapui o kototogod ku, tu' a' mamadul di boros nu i pisangod ku. 140 Ogirot ngai' i' o batos nu, om milo do ponongkuyaanan, om kasanangan tomod ku iri. 141 Aiso' i' o ngaran-ngaran ku om ulak-ulakan oku, nga' a' ku i' niada' i ponudukan nu. 142 Mompus-ompus i' i kotulido' nu, om otopot kasai' i Tourat nu. 143 Noponu' oku pod kosusaan om katangkabaan, nga' manahak i' doho' do kataadan i boros nu. 144 Otulid kasai' i' i ponudukan nu, posuhuto' oku no, om apasi oku i'.
Sambayang do Mokilabus
145 Aayi-ayi' no ginawo ku do lumohou diya', simbaro' oku no oi Tuhan, om mumboyo' oku i' di boros nu. 146 Lumohou oku diya', posio' oku no, om igitan ku i' o ponudukan nu. 147 Osuab po om lumohou oku no do mokiuhup diya', mogondos oku i' di batos nu. 148 Monuaban oku nopo dot a' koodop, do momusorou di ponudukan nu. 149 Tu' aiso' i' o kopupuson do kosianan nu, pokinongoho' oku no oi Tuhan. Pointalango' no o kosianan nu, om gompio' oku no. 150 Momok-somok no i tulun dot ongorongit di monginggorit doho', i tulun dit a' insan tanud do Tourat nu. 151 Nga' osomok ko i' doho', oi Tuhan, om otopot kasai' o boros nu. 152 Nokopinsingilo oku no do ponudukan nu di gulu po, natantu' nu no do mompus-ompus kasai' i' iri.
Sambayang do Mokitulung
153 Antangai no iti koinggoritan ku, om posio' oku no, tu' a' ku i' niada' i Tourat nu. 154 Obiai oku no, om poiduwo' oku no, posio' oku no do miagal di nakabatos nu. 155 Tulun nopo dot araat om a' i' posion, tu' a' iyolo' mumboyo' di ponudukan nu. 156 Nga' agayo i' o kolisihan nu, oi Tuhan, pointalango' no o kosianan nu, om posio' oku no do miontok dit oturan nu. 157 Ogumu' o pisangod om ogumu' o tulun di mongulok-ulok doho', nga' a' oku i' tumingkod do mumboyo' di boros nu. 158 Araatan oku no kopio do kokito di tulun do popohudsu, tu' a' iyolo' mumboyo' di boros nu. 159 Antangai pogi' o korohiano' ku di ponudukan nu, oi Tuhan, posio' oku no tu' a' i' insan do sumimban o kosianan nu. 160 Otopot ngai' nopo i ponudukan nu, om mompus-ompus kasai' it oturan nu dit otulid.
Mumboyo' di Tourat do Tuhan
161 Saapon oku do tulun dit ongokoris dot aiso' o paantakan, nga' momusou oku i' di Tourat nu. 162 Ooropod tomod oku dot i batos nu o kaarapadan ku, miagal pod tulun di nakaanu do dapu' o kooropodo' ku. 163 Araatan oku om mada' kopio oku do tudut, nga' asanangan oku i' di Tourat nu. 164 Mongunsikou kasai' oku nopo diya' do pointikid-tikid do tadau, dot it oturan nu dit otulid o kopongunsikahan ku. 165 Tulun nopo dit asanangan do Tourat nu, om kikosimbayanan no kopio, om aiso' no o milo do paparatu' diyolo'. 166 Mandad oku nopo diya' do mongoi pamasi doho', oi Tuhan, om wonsoyon ku i ponuhuan nu. 167 Tonudon ku i' i ponudukan nu, tu' aayi-ayi' no o ginawo ku dot orohian diri. 168 Tonudon ku i' i boros nu om i ponudukan nu, okito ngai' nu i' o wonsoyon ku.
Sambayang do Mokitulung
169 Pologoso' no do korikot dot id diya' o giniakan ku do mokitulung, oi Tuhan, onuwai oku no do ginawo dit obinsuhut do miagal di pinabatos nu. 170 Pokinongoho' no iti sambayang ku, om posio' oku no do miontok di batos nu. 171 Royohon kasai' ku indo iya', tu' tudukan oku i' diya' di boros nu. 172 Sindingon ku indo i Tourat nu, tu' otulid ngai' i' o ponudukan nu. 173 Sumodia' kasai' no do monulung doho', tu' tumanud oku i' di ponuhuan nu. 174 Langadon oku no do posion nu, oi Tuhan, nosiliu do kaarapadan ku i Tourat nu. 175 Onuwai oku no do koposion, om royohon ku i' iya', pologoso' no do kotulung doho' i ponudukan nu. 176 Minghombo oku po do miagal do dumba' di natagak, rikot no do mongoi pogihum doho', i susuhuon nu, tu' a' ku i' nadaan i boros nu.
Sambayang do Mokitulung
1 Sinding do mongoi kakap. Tontok dit id suang oku do kosusaan, om luminohou oku diya', oi Tuhan, om sinimbar oku i' diya'. 2 Poiduwo' oku no, oi Tuhan, do mantad id tulun di gomponipu' om i tulun di goudut. 3 Oi tulun do goudut, nunu no o wonsoyon do Kinorohingan dot id dokoyu? Poingkuro iyau do momohukum dokoyu? 4 Hukuman kou do pana' do soudor dit atarom, om popou dit aragang o kolosuo'! 5 Miagal pod poingiyon do hilo'd Misik o karaato' do poinsugku' dokoyu, om miagal do poinsugku' di tulun do Kidar. 6 Alaid oku noddi kopio do poinsugku' do tulun dit araatan do piuludan. 7 Soira' nopo do momoros oku do pasal do piuludan, om pisangadan nogi' o diyolo'd poboroson.
Tuhan o Mongintirung Dati'
1 Sinding do mongoi kakap. Tontok do montong oku do hilo'd konuluhanan, om oilaan ku no o tadon di monulung doho'. 2 Tuhan no o tadon di monulung doho', iyau i minomonsoi do tawan om pomogunan. 3 A' ko i' dau pologoson dot aratu', poimposik kasai' i' i mongintirung diya'. 4 Iri nopo mongintirung dot Israil, om a' i' koumbal do kotudu' ko' koodop. 5 Tamangan ko id Tuhan, hiri i' iyau id toning nu do mongintirung diya'. 6 A' i' pokoruol diya' i tadau do dangadau, om i tulan nga' a' i' pokoruol diya' do dongotuong. 7 Intirungan ko id Tuhan do mantad id koinsanai di koligagaanan, gompion ko i' dau om osimbayan ko i'. 8 Intirungan ko i' dau do tontok di rumikot ko, om tontok di mamanau ko, do baino' om gisom dot alaid.
Rumayou do Yorusalim
1 Sinding di Daud do mongoi kakap. Ooropod tomod oku do tontok di minomoros o tulun dot id doho' do poingkaa, “Kainou mongoi do hilo'd Walai'd Tuhan,” ka. 2 Om baino' noddi om hiti toko' no, do nokosuang no diti bandar do Yorusalim do minaya' di wawayaan. 3 Yorusalim nopo om bandar di winonsoi kawagu, om olumis o pinomonsoi om sinonong kopio. 4 Hiti no o ngoyon di piro-piro payat dot Israil, do mongoi pongunsikou dot id Tuhan do miontok di ponuhuan dau. 5 Hiti no i raja' dot Israil, do mirikau do momutus di rayat diyolo'. 6 Sambayang no do bagi' do kouludan do Yorusalim, “Pologoso' no do kumaya' om osimbayan i tulun di kosianan nu. 7 Pologoso' no do haro o kouludan dot id suang do watas nu, om haro o kosimbayanan dot id suang do walai'd raja',” ka. 8 Momoros oku dot id Yorusalim do pogobi' ku di koobpinayan om i tongotambalut ku do poingkaa, “Maha' daa om osonong-sonong kou!” ka. 9 Sumambayang oku om osimbayan ko i', dot i Walai'd Sasambayangan dot Agayo o kasambayangan ku.
Sambayang do Mokiinsian do Tuhan
1 Sinding do mongoi kakap. Oi Tuhan, tumingaha' oku dot id diya', do hilo'd surga i kinoiyonon nu do momorinta'. 2 Poingkuro nopo i susuhuon do sumondiu di tuan dau, om poingkuro nopo i susuhuon do tondu' do sumondiu di tondu' di sanganu di karajaon dau, om iyo noddi iyahai do sumondiu kasai' diya', oi Tuhan i Kinorohingan dahai, gisom i' dot insianan nu iyahai. 3 Kosianai no dahai, oi Tuhan, kosianai no dahai, tu' adalaan no kopio o pongindaraat diyolo' dahai. 4 Alaid noddi kopio iyahai dot untotorion di tulun do kaya', om hingi-hingion iyahai di tulun di mongulok-ulok dahai dit ongoondos tomod.
Kinorohingan no o Mongintirung di Tulun Dau
1 Sinding di Daud do mongoi kakap. Poingkuro no daa'ddi dot a' daa minogobi' dati' o Tuhan? Posimbaro' no o poingkaa, oi Israil, 2 “Ondung a' daa minogobi' dati' o Tuhan do tontok di sinangod toko' di pisangod toko', 3 om atantu' no do miaho' toko' nopo daa diyolo' do minonolon dot atatagadan dati'. 4 Om natanggayan toko' no daa di luyud, om noolitan toko' di waig. 5 Om nolondod toko' no daa do hiri'd waig di monomporiu-riu,” ka. 6 Kainou mongunsikou'd Tuhan, tu' a' pinopologos do pisangod toko' do minamatai dati'. 7 Nokoidu' toko' i' do miagal di tombolog do nakalabus do mantad id lawa' di tulun di mongintorus, noputut no i lawa' om nakalabus toko' no. 8 Tadon nopo di monunulung dati' om Tuhan i', iyau i minomonsoi do tawan om pomogunan.
Aiso' no o Koligagaanan do Tulun dit Intirungan do Tuhan
1 Sinding do mongoi kakap. Tulun nopo di mogondos do Tuhan om miagal no di Nuluhon do Sion, tu' a' no milo'd guyuon, om a' milo'd powolihon. 2 Poingkuro nopo i nuluhon do mongintirung do Yorusalim, om iyo noddi o Tuhan do mongintirung di tulun dau do baino' om gisom dot alaid. 3 Okon i' ko' poinsari-sari' i tulun dot araat do momorinta' di pomogunan do tulun dot otopot, tu' ondung iyolo' kasai' o momorinta' om kowonsoi dotindo dot araat i tulun dot otopot. 4 Oi Tuhan, wonsoyo' no it osonong dot id tulun dit osonong, om id tulun di mumboyo' do boros nu. 5 Soira' nopo do momohukum ko di tulun dot araat, om potonggoyon nod momohukum i tulun di sumansala' di ponudukan nu. Maha' daa om haro o kouludan di tulun nu!
Sambayang do Mokilabus
1 Sinding do mongoi kakap. Tontok di pinoguli' kawagu toko'd Tuhan do hilo'd Yorusalim, om miagal pori do nipi! 2 Mingirak toko' po om minsinding toko' dot aarapadan, om boros kaddi di piro-piro bansa'd suwai dot iyati' o komoyon, “Koimayaan no kopio i winonsoi'd Tuhan dot id diyolo',” ka. 3 Om otopot no kopio do kongoimayaan i winonsoi dau dot id dati'; olumaag toko' no kopio! 4 Oi Tuhan, pogulio' no iyahai do hilo'd pomogunan dahai, do miagal di rasam tu' poguli' do waig dot id kinarasakan do bawang. 5 Pologoso' no i tulun di songihad-ihad do pinapatanom do linsou, dot ongooropod do mongoi ponimung di tua'. 6 Iri nopo tulun do songihad-ihad do minongoi patanom do linsou do hilo'd dumo, om sonsinding-sinding indo dot atataadan do gumuli' iyolo' dot ongkiinigit di tua' di tinanom diyolo'.
Mamarayou do Kosonongo' do Kinorohingan
1 Sinding di Suliman. Ondung okon ko' Tuhan o mamaal do walai, om aiso' i' o kotutuk-tutukon di karaja' do tulun do mamaal. Ondung okon ko' Tuhan o madtamong do bandar, om aiso' i' o guna' di tulun do madtamong. 2 Aiso' i' o guna' do tumotos piya do mogihum do kaakan-akanan, do sumuab do mosik om lumaid do mongoi odop. Tu' patahakon ngai' id Tuhan iri dot id tulun di kosianan dau, di maso po diyolo'd koodop. 3 Tangaanak nopo om nipuhawang i' do mantad id Tuhan, iyolo' nopo om barakat i' kopio do mantad id Kinorohingan. 4 Iri nopo tanak do kusai do tanak do songulun o kusai dit omulok po iyau, om miagal pod pana' do poingigit do soudor. 5 Olumaag no i tulun di kipana' do miagal diri. Tu' a' nondo iyau koumbal dot aala' do tontok do kosolowot iyau di pisangod dau do hilo'd tiyonon do mogibisara'.
Isomuli' do Mumboyo'd Tuhan
1 Sinding do mongoi kakap. Olumaag no i tulun di mumboyo'd Tuhan, om i tumanud di ponuhuan dau. 2 Kaakan ko i' do hasil do karaja' nu, om otood ko indo om osimbayan. 3 Iri nopondo sawo nu om miagal pod guas dot anggur dit asapou o tua' dot id walai nu, om i tangaanak nu nga' miagal pod guas do saitun dit ongokoro' po, do posorili' di mija' nu. 4 Tulun nopo do mumboyo'd Tuhan om atantu' nod barakatan do Tuhan do miagal diri. 5 Maha' daa om barakatan ko'd Tuhan do mantad hilo'd Sion. Maha' daa om kokito ko do kosimbayanan do Yorusalim do solinaid nu do poimpasi! 6 Maha' daa om otogui ko om kokito ko po di manangaki diya'! Maha' daa om haro o kouludan di tulun nu!
Sambayang do Mokisuli' di Pisangod dot Israil
1 Sinding do mongoi kakap. Oi Israil, sunudai daa iyahai ondung poingkuro i pisangod nu do minonginggorit diya' do mantad dit okoro' ko po. 2 “Mantad po dit okoro' oku po, om pinadalaan mantad oku no di pisangod ku do minonginggorit, nga' a' oku i' ma diyolo' naala'. 3 Aralom tomod o sinuhat diyolo' dot id likud ku, om gisom do miagal pod tumo di rinadu o likud ku. 4 Nga' Tuhan i', it otulid, o pinopoidu' doho' do mantad id pinonguripanan,” ka. 5 Pologoso' no dot angaala' om ongouyung, o koinsanai'd tulun dit araatan do Sion. 6 Pologoso' no iyolo' do miagal di sakot di songinsuni do hilo'd sakai'd taap do walai, tu' a' po kosuni kopio om oriou no. 7 Aiso' o mongoi ponimung diri, om aiso' o mongoi pomongkos. 8 Om aiso' i' o tiso' di tulun di santalib-talib do momoros dot, “Maha' daa om barakatan ko'd Tuhan! Barakatan dahai iya' dot id suang do ngaran do Tuhan,” ka.
Sambayang do Mokitulung do Tontok do Haro o Kosusaan
1 Sinding do mongoi kakap. Lumohou oku diya', oi Tuhan, do maso ku dot id suang do kosusaan dit awagat kopio. 2 Pokinongoho' no iti lolohou ku, oi Tuhan, pokinongoho' no iti lolohou ku do mokitulung. 3 Ondung sorohon kasai' nu i dusa dahai, om isai poddi o kopoggidu' do mantad id hukuman? 4 Nga' nompunan nu i' iyahai, om oronok indo iyahai diya'. 5 Mandad-andad tomod oku dot itulung do Tuhan, om mogondos oku di batos dau. 6 Poillobi po o pagagandad ku'd Tuhan ko' mantad di pagagandad di tulun do madtatamong do magandad do kanawahan. 7 Oi Israil, pogondos nod Tuhan, tu' mompus-ompus i' o kosianan dau, om orohian kasai' iyau do mamasi. 8 Poiduwon i' dau ot Israil i tulun dau, do mantad id koinsanai'd dusa diyolo'.
Tumahak dot id Tuhan
1 Sinding di Daud do mongoi kakap. Oi Tuhan, naadaan ku no i kasasawat do ginawo ku, om nokotolikud oku no di kobinggoyo-goyoo' ku. A' oku no minsorou do hal dit angagayo ko' minsorou po di hal dot adalaan kosusa' do bagi' doho'. 2 Suwai ko' abagalan oku no om osimbayan oku. Poingkuro nopo i tanak di poingkibit di tina' dau tu' aiso' no o gura- gura' do nokosusu, om iyo noddi o ginawo ku tu' osimbayan noddi. 3 Oi Israil, pogondos nod Tuhan, do mantad do baino' om gisom dot alaid!
Mamarayou di Walai'd Sasambayangan dot Agayo
1 Sinding do mongoi kakap. Oi Tuhan, kada' lihuwai i Daud, om koinsanai di kinoinggoritan dau. 2 Oi Tuhan, soroho' no i batos do pinoboros dau dot id diya', i Kinorohingan di Yakub, dit Okoris Kopio, do poingkaa, 3 “A' oku po muli' ko' mongoi po odop; 4 a' oku po mundorong ko' modop po do hilo'd kiim ku, 5 dot a' ku po kosodia' o tiyonon do Tuhan, i walai do Kinorohingan di Yakub dit Okoris Kopio,” ka. 6 Nokorongou toko' do pasal di Kaban do Tumpongo di hilo' toko'd Baitlahim, om kokito toko' noddi iri do hilo'd koumaan do Yaar. 7 Minomoros toko' do poingkaa, “Kainou mongoi do hilo'd Walai'd Tuhan, kainou mongoi sambayang do hiri'd toguang di tirikohonon dau di don raja',” ka. 8 Ongoi no do hilo'd Walai'd Sasambayangan dot Agayo, oi Tuhan, do miwoyo' di Kaban do Tumpongo, i tanda' do sinundu nu, om mundorong no kasai'd hilo'. 9 Pologoso' no do miontok kasai' di korohian nu o wonsoyon di piro-piro imam di mogobi-obi' diya', pologoso' no do mimpangkis dot aarapadan i tulun nu. 10 Minamatos ko dot id di Daud, i susuhuon nu, kada' iyadaai i raja' do nopili' nu, oi Tuhan. 11 Minamatos ko dot id di Daud, i batos dit a' no milo dot a' sulungon. Boros ka nu, “Silihon ku'd raja' o tiso' di tangaanak nu om iyau no o sumowoli diya' do momorinta'. 12 Om ondung tumorodok kasai' iyau dot id tumpongo ku, om mumboyo' di boros ku, om iri nondo tangaanak dau nga' osiliu no do raja' do sumowoli diya' do gisom dot alaid,” ka. 13 Nopili' nod Tuhan o Sion, silihon dau iri do walai dau. 14 Boros ka nu, “Hiti no o tiyonon ku do gisom dot alaid, hiti no o tiyonon ku do momorinta'. 15 Om patahakon ku indo o koinsanai di pokionuon do Sion, om pakayahanon ku do taakanon i tulun do mosikin do hilo'. 16 Om barakatan ku indo it imam di mogobi-obi' dau do nunu nopo o wonsoyon diyolo', om modsinding nondo om mimpangkis dot aarapadan i tulun do hilo'. 17 Om hilo' no do silihon ku'd raja' dot agayo o tiso' di tangaanak di Daud, om hilo' no do pogiroton ku o pomorintaan di raja' do nopili' ku. 18 Om lopoton ku nondo do tingayam i pisangod dau, nga' pomorintaan nopo dau om haro i' o kosimbayanan,” ka.
Kosianan do Mogiobpinai
1 Sinding di Daud do mongoi kakap. Okuro-kuro nopo daa o kosonongo' om kosimbayano', do mogiuulud o tulun do Kinorohingan! 2 Miagal pori di tumau do ponununtug dit agayo gatang di pinotuntug do hiri'd tulu di Harun om koluyung do hiri'd ganggut dau, om koluyung do hiri'd liou do rasuk dau. 3 Miagal pori di bolobou do hilo'd Nuluhon do Hormon, do sumondot do hilo'd konulu-nuluan do Sion. Hilo' no o pinabatasan do Tuhan di barakat dau iri no i koposion dot aiso' o kopupuson.
Lolohou do Mamarayou'd Kinorohingan
1 Sinding do mongoi kakap. Kainou mamarayou'd Tuhan, koinsanai dokoyu i susuhuon dau, koinsanai di maganu-anu do hiri'd Walai'd Sasambayangan dot Agayo do dongotuong. 2 Poinsawato' no o longon dokoyu do sumambayang do hiri'd Walai'd Sasambayangan dot Agayo, om royohon no o Tuhan! 3 Maha' daa om barakatan kou'd Tuhan do mantad hilo'd Sion. Iyau i minomonsoi'd tawan om pomogunan!
Lolohou do Mamarayou'd Kinorohingan
1 Royohon no o Tuhan! Royohon no o ngaran dau, koinsanai dokoyu i susuhuon do Tuhan, 2 i maganu-anu do hilo'd Walai'd Tuhan, i hilo'd tiyonon do Kinorohingan toko'. 3 Royohon no o Tuhan, tu' osonong i' iyau, podsinding no do mamarayou do ngaran dau, tu' opuhawang i' iyau. 4 Pinili' dau i Yakub do maan dau do dau'd songonuon, om siniliu dau do dau'd songonuon i tulun dot Israil. 5 Oilaan ku no dot agayo o Tuhan toko', om agayo po kopio iyau ko' koinsanai'd tingolig. 6 Wonsoyon ngai' nopo dau i korohian dau, do hilo'd tawan om hiti'd pomogunan, om hilo'd rahat om hilo'd saalom do rahat dot agayo. 7 Poporikot iyau do pituongon om tongus do mantad hilo'd tisan diti tana', om wansayan dau do kodumaat i tongus, om posoliwanon dau i ribut do mantad hiri'd pinoopian dau'ddi. 8 Pinatai dau i kotuahan do tanak do tulun, om nintorusan do hilo'd Masir. 9 Minomonsoi iyau do piro-piro o kopusahan do hilo', do pomohukum di raja' om i pagawai dau. 10 Ogumu' o bansa' do rinaag dau, om pinatai dau i raja' dot ongokoris: 11 i Sihon i raja' do tulun dot Amori om i Og, i raja' do Basan, om koinsanai di raja' do hilo'd Kanaan. 12 Pinatahak dau i tana' diyolo'ddi dot id Israil, i tulun dau. 13 Oi Tuhan, popinsusuyon ko indo kasai' do Kinorohingan ko, om soro-sorohon ko kasai' do koinsanai di sinakagon di sumolusuk. 14 Obian nu i' i tulun nu, oi Tuhan, om insianan nu i susuhuon nu. 15 Tingolig nopo di piro-piro bansa' om pirok i' om tamas do winonsoi om winorun do longon do tulun. 16 Kikabang i' daa iyolo' nga' a' i' koboros, om kimato nga' a' i' kokito. 17 Kitolingo i' daa iyolo' nga' a' i' korongou, om aiso' o pinuhobo diyolo'. 18 Pologoson no dot oinsanan i minomonsoi di tingolig diri om i mogondos diri dot osiliu do miagal di tingolig di winonsoi diyolo'. 19 Royohon no o Tuhan, oi tulun dot Israil, royohon no iyau, oi nabi do Kinorohingan! 20 Royohon no o Tuhan, oi tulun do Liwi, royohon no iyau, koinsanai dokoyu i sumambayang dot id dau! 21 Royohon no o Tuhan do hilo'd Sion, do hilo'd Yorusalim, i tiyonon dau. Royohon no o Tuhan!
Sinding do Mongunsikou
1 Pongunsikou nod Tuhan tu' osonong i' iyau, om mompus-ompus o kosianan dau. 2 Pongunsikou no dot id dau, it agayo ko' mantad do koinsanai'd ponokokinorohingan do suwai, tu' mompus-ompus i' o kosianan dau. 3 Pongunsikou nod Tuhan, iyau it okoris ko' mantad do tuhan do suwai, tu' mompus-ompus i' o kosianan dau. 4 Iyau noo o momonsoi do kopusahan dit angagayo, mompus-ompus i' o kosianan dau. 5 Winonsoi dau ilo tawan dot i toilaan dau o pinomonsoi, mompus-ompus i' o kosianan dau. 6 Winonsoi dau iti pomogunan dot id sakai'd waig, mompus-ompus i' o kosianan dau. 7 Winonsoi dau ilo tadau om tulan, mompus-ompus i' o kosianan dau; 8 momorinta' ilo tadau do dangadau, mompus-ompus i' o kosianan dau; 9 momorinta' ilo tulan om rombituon do dongotuong, mompus-ompus i' o kosianan dau. 10 Pinatai dau i tanak do kusai dot id gulu di tulun do Masir, mompus-ompus i' o kosianan dau. 11 Pinosoliwan dau i tulun dot Israil do mantad hilo'd Masir, mompus-ompus i' o kosianan dau; 12 dot i longon dau dit okoris om kisinundu o pinoposoliwan, mompus-ompus i' o kosianan dau. 13 Pinigirang dau i Rahat dot Aragang, mompus-ompus i' o kosianan dau; 14 winoyo' dau i tulun dau do suminoborong di rahat, mompus-ompus i' o kosianan dau. 15 Nga' linondod dau i raja' do Masir om i soudor di raja'ddi, mompus-ompus i' o kosianan dau. 16 Winoyo' dau i tulun dau do minaya' di tana' do kowotuan, mompus-ompus i' o kosianan dau. 17 Pinatai dau i raja' dot ongokoris, mompus-ompus i' o kosianan dau; 18 pinatai dau i raja' dot angabantug, mompus-ompus i' o kosianan dau; 19 i Sihon, i raja' dot Amori, mompus-ompus i' o kosianan dau; 20 om i Og, i raja' do Basan, mompus-ompus i' o kosianan dau. 21 Pinatahak dau i tana' diyolo' dot id tulun dau, mompus-ompus i' o kosianan dau; 22 pinatahak dau iri dot id Israil, i susuhuon dau, mompus-ompus i' o kosianan dau. 23 A' toko' i' dau linihuan do tontok di naala' toko', mompus-ompus i' o kosianan dau. 24 Pinoidu' toko' dau do mantad id pisangod toko', mompus-ompus i' o kosianan dau. 25 Onuan ngai' dau do taakanon i songimpasi, mompus-ompus i' o kosianan dau. 26 Pongunsikou no dot id Kinorohingan i pomorinta' do hilo'd tawan, mompus-ompus i' o kosianan dau.
Tihad do Tulun dot Israil do Hiri'd Tisan do Kabawang-Bawangan do Babil
1 Minirikau iyahai do hiri'd tisan di kabawang-bawangan do Babil, om minihad iyahai di nosorou dahai o Sion. 2 Pinasait dahai i kecapi dahai, do hiri'd karaan-raanan di kayu do roitan do gandarusa di hiri'd toning. 3 Om suhuo' no iyahai di tulun di minononggoi dahai do modsinding, sinuhu' iyahai diyolo' do mamaramai diyolo', “Podsindingai iyahai di sinding do pasal do Sion,” ka diyolo'. 4 Poingkuro daa iyahai do modsinding dot id Tuhan do hilo'd pomogunan do wokon? 5 Baya' nopo dot a' oku milo kawagu do pouni do kecapi, ondung kolihu oku no diya', oi Yorusalim! 6 Baya' nopo dot a' oku milo kawagu do modsinding ondung a' ku no iya' osorou, ondung a' ku no sorohon dot iya' o kataadan kopio ku! 7 Soroho' no i winonsoi di tulun dot Idom, oi Tuhan do tontok di sinolod o Yorusalim. Soroho' no i boros di pinghulitan diyolo' do poingkaa, “Raagon nopo kopio do gisom id katana'!” ka no. 8 Araag ko i' moti', oi Babil, tu' orongit kopio ko i'. Olumaag no i tulun di monuli' diya' di piningwonsoi nu dot id dahai; 9 i tulun di mongoi di tangaanak nu di ragang po, om i popodumpau'ddi dot id tontolob.
Sambayang do Mongunsikou
1 Mantad id di Daud. Ounsikou oku diya', oi Tuhan, do mikuwo'd aayi-ayi' o ginawo ku. Modsinding oku do mamarayou diya' dot id toguang di piro-piro o ponokokinorohingan. 2 Tumimbaba' oku di walai nu dit olidang, i Walai'd Sasambayangan dot Agayo, tumuku' oku om mamarayou oku do ngaran nu, tu' i kosianan nu di mompus-ompus om i kotorodoko' nu o kapamarayahan ku diya', tu' nokointalang nu no dot id sawat i' ko' nunu nopo i ngaran nu om i boros nu. 3 Sinimbar oku i' diya' do tontok di luminohou oku diya', om i kokoriso' nu o pinopokoris doho'. 4 Oinsanan nopondo o raja' do hiti'd pomogunan do mamarayou diya', oi Tuhan, tu' nokorongou iyolo' di batos nu. 5 Sindingon nondo diyolo' i nongowonsoi nu, om i kogoyoo' do sinundu nu. 6 Mulong po daa do hilo' ko'd sawat, nga' momogompi' ko i' do tulun dit osiriba' o ginawo, om i tulun dot asawat o ginawo nga' a' i' milo do lumisok do mantad id diya'. 7 Tontok dit osorili' oku do kosusaan, om gompion oku i' diya'. Ngoyon nu i' saapo' i pisangod ku dit ongotogod om posion oku i' diya' di sinundu nu. 8 Wonsoyon nu i' o koinsanai di pinabatos nu, oi Tuhan, tu' mompus-ompus i' o kosianan nu, pongoo' no i notimpuunan nu do momonsoi.
Oilaan Ngai' id Kinorohingan o Nunu Nopo, om Momogompi' Iyau do Koinsanai'd Nunu Nopo
1 Maan di boyoon do modsisinding. Sinding di Daud. Oi Tuhan, nosorisid oku no diya', om otutunan oku i' diya'. 2 Oilaan ngai' nu i' o wonsoyon ku; hilo' pod sodu' om osuhutan ngai' nu no o pomusarahan ku. 3 Okito oku i' diya' do maso ku do kumaraja', om maso ku do poundorong, oilaan ngai' nu i' o wonsoyon ku. 4 Tu' tontok piya dit a' ku po kolombus o poboroson ku, nga' oilaan nu no o poboroson ku. 5 Posorili' ko nopo doho', om intirungan oku diya' di sinundu nu. 6 Aralom no kopio o toilaan nu do pasal doho', aralom po ko' it osuhutan ku. 7 Honggo po daa o pakayaan ku do mogidu' do mantad id diya'? Honggo po daa o poggiduon ku do mantad id dotoguangan nu? 8 Ondung minsawat oku daa do hilo'd tawan nga' hilo' ko i', ondung mongoi oku daa lii do hilo'd pomogunan do tulun di napatai, nga' hilo' ko i'. 9 Ondung tumulud oku daa do gisom do katalib do koulayon do tadau ko' mongoi oku po daa iyon do hilo'd kinoiyonon dit id sodu' kopio do ponong hilo'd kotonobon, 10 nga' hilo' ko i' om hilo' ko do monulung doho'. 11 Milo oku i' daa do monuhu' do totuong do momolisok doho', om monuhu' di tanawau do posorili' doho' do sumiliu'd totuong, 12 nga' iri piya totuong nga' a' i' otuong dot id diya', iri totuong nga' miagal id tadau kanawau, aiso' i' o pisuayan do totuong om tadau dot id diya'. 13 Iya' no o minomonsoi do koinsanai'd pakakas do tinan ku, pinogihunung-hunung nu o pakakas do tinan ku di hilo' pod tian do tina' ku. 14 Royohon ku no iya' tu' iya' no it apatut do poinggoyoon, suwai no kopio om kopusahan kopio o koinsanai di wonsoyon nu, oilaan ku no kopio iri. 15 Tontok di worunon nogi' o tulang ku, om di pogihunung-hunungon nogi' iri do hiri'd tian di tina' ku, om tontok di maso ku po do sumuni do hilo'd kinoiyonon di poillisok, om oilaan nu no do hilo' oku. 16 Nokito mantad oku no diya' dit a' oku po nosusu, iri nopo kogumuo'd tadau do poimpasi oku om notulis mantad nu no dot id suang do buuk nu. 17 Oi Kinorohingan, aralom no kopio o pomusarahan nu, om ogumu' kopio! A' ku no osuhutan! 18 Ondung maan ku daa intobo' iri om ogumu' po ko' pasir; soira' dit oposik oku, om momusorou kasai' oku po diya'. 19 Oi Kinorohingan, orohian oku daa do patayon nu i tulun dot araat. Orohian oku no daa dot a' oku ngoyon gangaho' di tulun dot ongorongit! 20 Angaraat tomod o pimboroson diyolo' do pasal diya', indaraaton diyolo' o ngaran nu. 21 Oi Tuhan, araatan oku no kopio di tulun dot araatan diya', a' oku orohian di tulun di sumaap diya! 22 Aayi-ayi' no kopio o ginawo ku dot araatan diyolo', nosiliu no iyolo' do pisangod ku. 23 Sorisido' oku no oi Kinorohingan, om intutunai no o ginawo ku, umbalai oku no om ilaai no o pomusarahan ku. 24 Antangan no ondung haro ot araat dot id suang ku, om potunudo' oku no di ralan dit aiso' o kopupuson.
Sambayang do Mokiintirung
1 Maan di boyoon do modsisinding. Sinding di Daud. 2 Oi Tuhan, poiduwo' oku no do mantad id tulun dot araat, intirungai oku no do mantad id tulun dot orongit. 3 Mongupakat kasai' nopo iyolo' dot araat, om monikid tadau nopo do mogihum do kopogisongkiwalan. 4 Dila' nopo diyolo' om miagal nopo di tulanut di kapatai o tindukon om boros diyolo' nga' iyo po di paliu do modsoding. 5 Intirungai oku no oi Tuhan, do mantad id kuasa' di tulun dot araat, intirungai oku no do mantad id tulun dot orongit, i mongupakat do pokoruol doho'. 6 Nokowonsoi no di tulun dot angasawat o ginawo o lawa' do pamalawa' diyolo' doho', om ompuso' nopo diyolo'd lawa' i ralan do pamalawa' daa doho'. 7 Om boros kangku dot id Tuhan, “Iya' no o Kinorohingan ku,” kangku. Pokinongoho' no iti lolohou ku do mokitulung, oi Tuhan! 8 Oi Tuhan, i Kinorohingan ku, i mogobi' doho' dit okoris, intirungan oku i' diya' dot id pisangadan. 9 Oi Tuhan, kada' patahako' di tulun dot araat i korohian diyolo', kada' pologoso' dot abayaan i pakat diyolo' dot araat. 10 Kada' pologoso' do kamanang i pisangod ku, pologoso' no do koguli' kawagu dot id diyolo' i ponompurolosi diyolo' doho'. 11 Pologoso' no dot orotuan iyolo' di popou, pologoso' no do kataam iyolo' dot id luang do gisom dot a' no iyolo' kosoliwan kawagu. 12 Pologoso' no dot aiso' ot owonsoi-wonsoi di tulun di papasala' do wokon, pologoso' no do gusaon do kosusaan i tulun dot orongit, om apatai indo iyolo'. 13 Oi Tuhan, oilaan ku i' dot obian nu i tulun do mosikin, om tulungon nu i tulun dit ulak-ulakan. 14 Om atantu' no do royohon ko di tulun dit otulid o ginawo, om koiyon indo iyolo' dot id sugku' nu.
Sambayang do Dongsosodopon
1 Sinding di Daud. Lumohou oku diya' oi Tuhan, tulungo' oku no do dinondo. Pokinongohon oku no diya' do tontok do lumohou oku diya. 2 Romito' no iti sambayang ku do ponokoporsombahan do kominyan, om iti longon ku di poinsawat o ponokoporsombahan ku di sumbolion. 3 Oi Tuhan, tamangai no o kabang ku, om piantangai no o munung ku. 4 Kada' oku pologoso' do rumohian do momonsoi di kasala', om poinsoduwo' oku no do mantad id wowonsoyon dit araat. Kada' oku pologoso' do mongoi sugku' di tulun dot angaraat do mongoi rapou di poginakanan diyolo'. 5 Ondung tulun dot osonong o monogod om momohukum doho', om osonong i' iri dot id doho'. Nga' pamarayou nopo di tulun dot araat om a' ku i' romiton, tu' sumambayang oku i' kasai' do sumaap di kowoyo-woyoon diyolo' dot araat. 6 Soira' nopo do porotuon i pomorinta' diyolo' do mantad id sakai di pampang, om okunon nogindo di tulun dot otopot i boros ku. 7 Poingkuro nopo i kayu do laason om totokon, om iyo nogiddi o tulang diyolo' do pasasadon do hiri'd tisan di lobong. 8 Nga' mogondos oku i' kasai' diya', oi Tuhan, i Kinorohingan ku. Mokiintirung oku i' diya', kada' oku pologoso' dot apatai. 9 Intirungai oku no do mantad id lawa' di nongkounda' no diyolo' do pamalawa' doho', om mantad id lawa' di tulun dit angaraat. 10 Pologoson no i tulun dot araat do kosulung di lawa' diyolo', nga' a' oku indo iyoho' kosulung.
Sambayang do Mokitulung
1 Sinding do ponudukan di Daud do tontok di hiri iyau id luang do nuluhon. 2 Lumohou oku do mokitulung do Tuhan, om mokitulung oku no kopio dau. 3 Patahakon ngai' ku nopo dau i kawagat do ginawo ku, sunudan ngai' ku nopo iyau do kosusaan ku. 4 Tontok dit oruhai nod aiso' o posunsudan ku, om oilaan i' dau it apatut ku'd wonsoyon. Ralan nopo di susuyon ku, om nangataanan no di pisangod ku do lawa' do pamalawa' doho'. 5 Soira' di minontong oku dot id posorili' doho', om aiso' i' o nokito ku do monulung doho', om aiso' o mongintirung doho'. Om aiso' o mamadul doho'. 6 Oi Tuhan, lumohou oku do mokitulung diya', iya' no i mongintirung doho', oi Tuhan, iya' no o kosionuan kopio ku dot id koposi-posion ku do hiti'd pomogunan. 7 Pokinongoho' no iti lolohou ku do mokitulung, tu' aiso' no o pokukurayan ku. Poiduwo' oku no do mantad id pisangod ku, tu' okoris no kopio iyolo' do sumaap doho'. 8 Poiduwo' oku no do mantad id kosusaan ku, om royohon ku indo iya' do hilo'd pitimungan di tulun nu, dot i kosonongo' nu dot id doho' o kapamarayahan ku.
Sambayang do Mokitulung
1 Sinding di Daud. Oi Tuhan, pokinongoho' no iti sambayang ku, pokinongoho' noti pokionuon ku tu' otulid ko i'. Simbaro' oku no tu' otorodok ko i'! 2 Kada' oku butusai, iyoho' i susuhuon nu, tu' aiso' i' ot iso' piya do tulun dot aiso' o sala' dot id toguang nu. 3 Ginusa' oku di pisangod ku, om naala' oku noddi kopio. Pinosuang oku dau dot id giil dit otuong, om miagal oku poddi di tulun di laid no kapatai. 4 Om posodia' oku noddi do tumahak nopo dot id pisangod, tu' aiso' no o pokukurayan ku. 5 Osorou ku i' i piro-piro o tadau di nakatalib, sorohon ku i' o koinsanai di nowonsoi nu, om hondomon ngai' ku i nongowonsoi nu. 6 Poinsawaton ku o longon ku dot id diya' do tontok do sumambayang oku, miagal pod tana' dot otuu di lumangad do rasam o ginawo ku do langadon diya'. 7 Simbaro' oku no do dinondo, oi Tuhan, tu' aiso' no o pagandasan ku. Kada' lisok do mantad id doho', om a' oku i' oturungku' di tulun di nokolintuhun no do hilo'd pomogunan do tulun di napatai. 8 Posoroho' oku no kasai' do monikid kosuabon di kosianan nu di mompus-ompus, tu' iya' no o pagandasan ku. Id diya' no o porikatan ku do sambayang ku, tudukai oku no di ralan dit apatut do susuyon ku. 9 Rumikot oku do mokiintirung diya', oi Tuhan, poiduwo' oku no do mantad id pisangod ku. 10 Iya' no o Kinorohingan ku, tudukai oku no do momonsoi do korohian nu. Kumosonong no dot id doho', om potunudo' oku no do ralan dit aiso' o koligagaanan. 11 Posio' oku no oi Tuhan, do miagal di nakabatos nu, poiduwo' oku no do mantad id kosusaan ku tu' osonong ko i'! 12 Patayo' no i pisangod ku, om punsoo' ngai' no i tulun di mongulok-ulok doho', tu' osianan ko i' doho' i susuhuon nu.
Minongunsikou i Raja' dot id Kinorohingan tu' Minanahak i' Iyau do Kamanangan
1 Mantad id di Daud. Royohon no o Tuhan, i mongintirung doho'! Tudukan oku dau do sumangod om popinsingiloon oku do mongoi sangod. 2 Iyau no i mongintirung om mogobi' doho', it intirungon ku om gampamasi doho'. I pagandasan ku do manahak do kointirungan, poinsiribaon dau i bansa' dot id doho'. 3 Oi Tuhan, nunu kopio o tulun tu' antangan kopio nu, isai kopio iyau tu' podulon kopio nu? 4 Tulun nopo om miagal nod ribut di mambai-lambai, om tumur dau nga' miagal nod sangai di tumalib. 5 Oi Tuhan, pigirango' pogi' ilo tawan om lumintuhun no, ngoyo' kamao' ilo nuluhon, om mogolisun i' ilo'. 6 Porikot nod kalab do kodumaat om kotias i' i pisangod nu, papanao' no i pana' nu om tumangkus i' iyolo' do mogidu'. 7 Poroloyo' no longon nu do mantad hino'd surga, potindalo' oku no do mantad id waig dit aralom om posion oku no, posio' oku no do mantad id kuasa' do bansa'd suwai, 8 it a' nopo insan do poposunud dit otopot, om sumumpa' no iyolo' nga' tudut i' iri. 9 Modsinding oku nondo do sinding do wagu dot id diya', oi Kinorohingan, om kombiton ku nondo i kecapi om modsinding oku dot id diya'. 10 Minanahak ko do kamanangan dot id raja' om pinoidu' nu i Daud, i susuhuon nu. 11 Posio' oku no do mantad id pisangod ku dit araat, poiduwo' oku no do mantad id kuasa' do bansa'd suwai, it a' insan do poposunud dit otopot, om sumumpa' no iyolo' nga' tudut i' iri. 12 Pologoso' no i tangaanak dahai do kusai di maso po diyolo' dot omulok do miyo di tanom do sumuni om gumirot. Pologoso' no i tangaanak dahai do tondu' do miagal di torigi dit olumis di momolumis do linsuk di walai'd raja'. 13 Pologoso' no dot oponu' i sulap dahai do tua' do piro-piro o bansa' do totonomon. Pologoso' no i dumba' do hilo'd tumo dahai do maganak do piro-piro nohopod noribu o kogumuo'. 14 Pologoso' no do maganak dot ogumu' i sapi' dahai, om aiso' o toiduan do ponontianon ko' atagakan pod tanak. Pologoso' nod aiso' o giniakan dot osusa' do hilo'd karalan-ralanan do bandar dahai. 15 Olumaag no i bansa' do miagal diri o kowoyo-woyoo', olumaag no i bansa' di Tuhan o Kinorohingan diyolo'!
Sinding do Mamarayou
1 Sinding do mantad id di Daud. Popinsusuyon ku i kogoyoo' nu, oi Kinorohingan om raja' ku, unsikohon ku iya' do gisom dot alaid. 2 Unsikohon ku iya' do monikid tadau, om royohon ku iya' do gisom dot alaid. 3 Tuhan nopo om abantug, om apatut do royohon kopio, a' no milo'd osuhutan o kogoyoo' nu. 4 Iri nopo winonsoi nu'ddi om royohon nondo do piro-piro o sinakagon do mogisolusuk-lusuk, om popinsusuyon nondo diyolo' i kokoriso' nu. 5 Popimboroson nondo diyolo' i kagayaan om pangkat nu do don raja', om soro-sorohon ku nondo i winonsoi nu di kongoimayaan kopio. 6 Popimboroson nondod tulun i winonsoi nu dit angagayo kopio, om popinsusuyon ku i kogoyoo' nu. 7 Om popinsunudon ngai' nondo diyolo' i kosonongo' nu, om sindingon diyolo' i kopuhawango' nu. 8 Tuhan nopo om obinsianan i' om obinglisiu, alanut i' o ginawo dau, om osianan kasai' iyau. 9 Osonong i' iyau dot id koinsanai'd tulun om kikosianan dot id koinsanai di winonsoi dau. 10 Oinsanan nopo i winonsoi nu do mamarayou diya', oi Tuhan, om oinsanan i tulun nu do mongunsikou diya'. 11 Royohon nondo diyolo' i kuasa' nu di don raja' om popinsunud di kokoriso' nu. 12 Om koilo ngai' i' o tulun di wonsoyon nu di kongopusahan kopio, om kagayaan om kobontugo' di pomorintaan nu. 13 Pomorintaan nu nopo om mompus-ompus i', om raja' ko do gisom do poingompus. Otorodok ko i' dot id batos nu, oi Tuhan, om koinsanai di wonsoyon nu nga' osonong i'. 14 Tulungon i' dau i tulun dot id suang do kosusaan, om tungagon dau i tulun do naratu'. 15 Iya' poo o pagandasan do koinsanai di songimpasi, om onuan nu iyolo' do taakanon do tontok di kaakanan diyolo'. 16 Kabagal i' diyolo' i patahakon nu diyolo', om onuan nu iyolo' do koinsanai di pokionuon diyolo'. 17 Otulid i' o koinsanai di wonsoyon do Tuhan, om kikosianan iyau do tontok do momonsoi do nunu nopo. 18 Minsomok i' iyau dot id tulun di lumohou dau, i lumohou do mikuwo'd otulid o ginawo. 19 Patahakon i' dau o koinsanai dit apatut dot aanu, do tulun dit oronok dau, orongou i' dau i tihad diyolo' om posion i' dau iyolo'. 20 Intirungan ngai' i' dau o koinsanai do tulun dit osianan dau, nga' patayon i' dau i tulun dot araat. 21 Royohon ku indo kasai' o Tuhan, pologoson ngai' no i winonsoi dau dit ongkipinuhobo do mamarayou di ngaran do Tuhan do gisom dot alaid.
Pamarayou'd Kinorohingan, i Gampamasi
1 Royohon no o Tuhan! Orohian oku no kopio do mamarayou'd Tuhan, o ginawo ku! 2 Royohon ku i' kasai' iyau do solinaid ku do poimpasi, om modsinding oku dot id Kinorohingan do gisom do kooyion do tumur ku. 3 Kada' pogondos do boyoon do tulun, tu' aiso' i' o tulun do kapasi diya'. 4 Apatai nopo iyolo', om gumuli' no do hilo'd tana', om tontok nod tadau'ddi dot opupusan ngai' o koinsanai dit osorou diyolo'd wonsoyon. 5 Olumaag no i tulun di Kinorohingan di Yakub o nosiliu do monulung dau om i mogondos dot id Tuhan, i Kinorohingan dau, 6 i minomonsoi'd tawan, om pomogunan om rahat, om koinsanai di songingiyon do hilo'. Sulungon kasai' i' dau o batos dau. 7 Om obian dau i tulun dit ulak-ulakan do tontok di butusan dau iyolo', om onuan dau do taakanon i tulun do louson. Polobuson i' do Tuhan o tulun di songinggiil, 8 om poungkalaton dau i tulun di bolou. Poingkakaton i' dau i tulun di naratu', om osianan i' iyau di tulun dau dit otulid o ginawo. 9 Intirungan i' dau i bansa'd suwai do poingiyon do hiti'd pomogunan toko', om tulungon dau i tongoondu' do nopuadan om i tangaanak dit aiso' o molohing, nga' a' i' dau pologoson dot owonsoi i tosorou di tulun dot araat. 10 Raja' i' o Tuhan do gisom dot alaid. Momorinta' i' kasai' iyau do gisom dot alaid i Kinorohingan nu, oi Sion. Royohon no o Tuhan!
Pamarayou do Kinorohingan it Osundu Kopio
1 Royohon no o Tuhan! Osonong no kopio do modsinding do mamarayou'd Kinorohingan toko', om apatut i' do royohon toko' iyau tu' iri no o popotood dati'. 2 Tondulion nod Tuhan o Yorusalim, pogulion no dau i tulun di natanggayan do pisangod. 3 Insasamadan dau i tulun dit adalaan do tumongob, om rilitan dau i suhat diyolo'. 4 Natantu' mantad no dau o ginumu' do rombituon do hilo'd tawan om tikido' nopo dau do minomungaran iri. 5 Tuhan toko' nopo om abantug no kopio om okoris, om toilaan dau nga' a' i' milo do tipongon. 6 Poingkakaton dau i tulun dot osiriba' o ginawo, nga' poisison i' dau do hilo'd tana' i tulun dot araat. 7 Podsinding no do sinding do pamarayou'd Tuhan, kombito' no i kecapi do pamarayou'd Kinorohingan toko'. 8 Pawaladon do Tuhan i haun do hilo'd tawan, om manahak iyau'd rasam do hiti'd pomogunan, om posunion dau o sakot do hilo'd nuluhon. 9 Onuan dau do taakanon i nintorusan, om sumadon dau i tangaanak do tombolog di songuni-uni poo do louson. 10 Okon i' ko' kuda' dot okoris o kasanangan do Tuhan, om okon ko' soudor dit ongosiou o korohian dau, 11 nga' kasanangan nopo dau om i tulun dit oronok dau, i tulun di mogondos kasai' di kosianan dau di mompus-ompus. 12 Royohon no o Tuhan, oi Yorusalim! Royohon no o Kinorohingan, oi Sion! 13 Pogiroton i' dau o totobon di wawayaan nu, barakatan i' dau o tulun nu. 14 Pitamangan i' dau o hilo'd watas nu om osimbayan i' kasai', om pakayahanon ko do gandum dit osonong kopio. 15 Popoboros iyau dot isuhu' dau do hiti'd pomogunan, om oruhai dot owonsoi i ponuhuan dau. 16 Miagal pod kumut o salju do pawaladon dau, om miagal do pupuk i bolobou do nokodou do potiason dau. 17 Miagal pod watu do nababak o karambatu di porikoton dau, aiso' no o kasangal dit osogit do porikoton dau. 18 Om momoros po kawagu iyau do monuhu' om lumanak nopondo it ais; porikoton no dau i tongus, om lumuyung nopo i waig. 19 Pinosunud dau i bilin dau dot id tulun dau, om i ponudukan om oturan dau dot id Israil, i tulun do pinili' dau. 20 A' i' dau winonsoi o miagal diti dot id bansa'd suwai, a' i' iyolo' koilo dot oturan dau. Royohon no o Tuhan!
Mangangat do Tawan om Pomogunan do Mamarayou'd Kinorohingan
1 Royohon no o Tuhan! Royohon no o Tuhan do hilo'd surga, iyokoyu i poingiyon do hino'd sawat. 2 Royohon no iyau, oi koinsanai do moloikat dau, oi koinsanai do soudor dau do hino'd surga. 3 Royohon no iyau, oi tadau om tulan, royohon no iyau, oi rombituon di mogulinau. 4 Royohon no iyau, oi tawan dit asawat, om royohon no iyau oi waig di hilo'd soibau do tawan. 5 Pologoson ngai' no iyolo'd mamarayou do ngaran do Tuhan! Koboros nopo dau nga' kowonsoi ngai' no iyolo', 6 om tinantu' dau o poiyanan diyolo', om iri no o tonudon diyolo' do gisom dot alaid. 7 Royohon no o Tuhan, iyokoyu i hiti'd pomogunan, om iri ngai' i naga' do hilo'd rahat, om koinsanai di rahat dot aralom; 8 i kodumaat om karambatu om i salju om i haun, om i ribut dit opuhod, i mumboyo' do boros do Tuhan. 9 Royohon no iyau, oi nulu-nulu om konuluhanan, oi kouwaan om kogoutanan; 10 koinsanai di nintorusan dit ongokohup, om i lalang, i nintorusan do sangkamang-kamang om i tombolog. 11 Royohon no iyau, oi koinsanai'd raja' om koinsanai'd pomorinta' do bansa', i tangaanak do raja' om koinsanai di pomorinta' do suwai; 12 i kosumandakan om i tangaanakwagu, i kongomolohingan om iri nogi' i tangaanak. 13 Pologoson no do mamarayou ngai' iyolo' do ngaran do Tuhan, tu' ngaran nopo dau om abantug i' ko' mantad do koinsanai'd ngaran. Om kagayaan dau nga' id sawat i' ko' pomogunan om tawan. 14 Pinokoris dau i bansa' dau, om oinsanan indo i tulun dau do mamarayou dau, i tulun dot Israil di koupusan kopio dau. Royohon no o Tuhan!
Sinding do Mamarayou
1 Royohon no o Tuhan! Podsinding no do sinding do wagu dot id Tuhan, royoho' no iyau dot id pitimungan di tulun dau dit ongotorodok! 2 Kotood no, oi Israil dot i minomonsoi diya' o kataadan, kooropod no oi tulun do Sion, dot i raja' nu o kaarapadan! 3 Royoho' no i ngaran dau do mikuwo'd manari', tuntungon no o gandang om kombiton no o kecapi do pamarayou dau. 4 Asanangan i' o Tuhan di tulun dau, om onuan dau do kamanangan i tulun dot osiriba' o ginawo. 5 Pologoso' nod rumamai i tulun do nasanganu'd Kinorohingan, dot i kinamanangan diyolo' o karamayan, om monuaban do modsinding dot atataadan. 6 Pologoso' no iyolo' do mamarayou do Kinorohingan, do mikuwo'd songingigit diyolo' i gayang diyolo' dit atarom, 7 do pangala' di bansa' om pomohukum diyolo'; 8 om pongogos di raja' diyolo', om pongogos di boyoon diyolo' do rantai do basi' o pongogos; 9 om pomohukum di bansa' do miagal di pinonuhuan do Kinorohingan. Iri no o kamanangan do tulun di nasanganu do Kinorohingan. Royohon no o Tuhan!
Royohon no o Tuhan
1 Royohon no o Tuhan! Royohon no o Kinorohingan do hilo'd Walai'd Sasambayangan dit Agayo! Royohon no i kokoriso' dau do hilo'd surga! 2 Royohon no iyau dot i nongowonsoi dau dit angagayo o kapamarayahan. Royoho' no iyau dot i kobontugo' dau o kapamarayahan. 3 Royohon no iyau do mikuwo'd popouni do torumpit, royohon no iyau do mikuwo'd mongombit do gambus om kecapi.1|50|HK62C| Torumpit|150.3 4 Royohon no iyau do mikuwo'd monuntung do tamburin om manari', royohon no iyau do mikuwo'd mongombit do kecapi om popouni do suling. 5 Royohon no iyau do mikuwo'd monuntung do simbal, royohon no iyau mikuwo'd monuntung do simbal dit opuhod o tuni.1|50|HK62F|Simbal|150.5 6 Royohon no o Tuhan, oi koinsanai di winonsoi dau dit ongkipinuhobo. Royohon no o Tuhan!
Gatang do Ponudukan
1 Iti no o piro-piro o ponudukan do pinolombus di Suliman, i tanak di Daud, i raja' dot Israil. 2 Iti no o piro-piro o ponudukan di milo do monguhup diya' do mongintutun do toilaan om nosihat dit osonong, om poposuhut do boros dit aralom o komoyon. 3 Milo i' iti do monuduk diya' do kowoyo-woyoo' do sumiliu'd tulun dit oilo, om otulid o ginawo, om otulid o kowoyo-woyoon, om otopot. 4 Milo i' iti do manahak do toilaan dot id tulun dit aiso' o noila-ilaan, om monuduk do tangaanakwagu do sumiliu'd tulun dit oilo om atarom o pomusarahan. 5 Iti nopo piro-piro ponudukan diti nga' milo nogi' do momoruhang do toilaan do tulun dit ongkitoilaan om popotunud di tulun dit ongkipalajaran, 6 om kosuhut i' iyolo' do komoyon di ponudukan dit angaralom, om it apagon dot osuhutan, om koilo nondo iyolo' do ponimbar di tuhoton do tulun dit ongkitoilaan.
Nosihat dot id Tulun dit Ongomulok Po
7 Koonu-onuan nopod toilaan om momusou kopio om rumonok do Tuhan. Nga' tulun nopod basug om a' i' mamadul do toilaan om mada' do tudukan. 8 Pokinongohon no kopio i poboroson do tapa' om tina' nu dot id diya', oi tanak ku. 9 Tu' iri nopo ponudukan diyolo'ddi nga' poposonong do kowoyo-woyoon nu, do miagal do sigar dit olumis om karo tu' mongillumis do tinan nu. 10 Tontok do bayayaton ko'd tulun do kidusa, om kada' no kopio ponokiwoyo' diyolo', oi tanak ku. 11 Ondung momoros iyolo' do poingkaa, “Kaino pogi', mongoi pogihum do tulun do maan patayo'. Kaino mongoi pongumang do tulun dit aiso' o sala', do maan do pamaramai-ramai. 12 Osimbayan piya iyolo' dit abantalan toko i' iyolo', nga' apatai indo iyolo' dot oumangan toko'. 13 Om mongoi toko nondo pimpanakau do mogisuayan nopo o dapu' dit angagayo o gatang, om ponuon toko' nondo dit aanu toko' o walai toko'. 14 Kaino, tanud dahai, om pogibohogi-hogion toko i' it apanakau toko',” ka. 15 Kada' no kopio ongoi tanud do tulun do miagal diri, oi tanak ku. Insodu' no do mantad id diyolo'! 16 A' nopo iyolo' kogintoron dot a' po kopomonsoi dot araat. Poingawang kasai' nopo iyolo' do mamatai. 17 Aiso' i' o guna' do papataan do lawa' ondung poingontong no i tombolog di pokioonuan nu, 18 tu' tulun nopod miagal diri om papataan do lawa' dit iyolo' i' om iyolo' o kosulung, i lawa' do mamatai diyolo'. 19 Tulun nopod manakau om apatai kasai' nopo di kabanakaho' dau --- iti no ot osiliu dot id tulun di kororongit o koonuan do kaakan-akanan.
Momolohou o Toilaan
20 Pokinongou pogi'! Millohou o toilaan do hilo'd karalan-ralanan om hilo'd titimungon do tulun! 21 Opuhod tomod o toilaan do minglohou do hilo'd piro-piro o wawayaan do bandar om hilo'd titimungon do tulun. 22 Boros ka di toilaan, “Oi tongoulun do basug! Songkuro po koloido' dokoyu dot orohian do basug kou? Songgira' kou do tumingkod do papagaan-gaan do toilaan om a' orohian do minsingilo? 23 Pokinongou kou no do tontok do togodon ku iyokoyu; onuan ku i' iyokoyu do nosihat dot osonong om tudukan ku iyokoyu do toilaan ku. 24 Pininglahawan ku iyokoyu, om nangatan ku iyokoyu do rumikot, nga' a' kou i' minokinongou. A' kou i' minamadul doho'. 25 Aiso' nopo o tinanud dokoyu di nosihat ku om minada' kou do sunudan ku. 26 Om gowoi pondo dot irak-irakan ku iyokoyu dot oontok kou'd kosusaan. Om untotogodon ku iyokoyu dot orikatan kou'd kopoddosian --- 27 tontok di rumikot iri dot id dokoyu do miagal do tongus, i tongus do kosusaan dit awagat kopio, om orualan kou'ndo om oinggorit kou. 28 Om momolohou kou nogindo daa do toilaan nga' a' oku no sumimbar. Oihum ngai' no daa'ndo dokoyu do mogihum doho' nga' a' kou no kokito doho'. 29 A' kou i' insan kopuriman do kiguna' o toilaan, om minada' kou do mumboyo'd Tuhan. 30 A' kou i' insan dot orohian do nosihat ku om a' kou insan do minokinongou do tudukan ku. 31 Om gowoi pondo dot opurimanan dokoyu o kootuson di winonsoi dokoyu, om iri'ndo i nongowonsoi dokoyu o poporikot do koinggoritan dot id dokoyu. 32 Matai ngai' indo o tulun dit aiso' o noila-ilaan tu' mada' i' iyolo' do toilaan. Araag indo o tulun do basug tu' a' i' asanangan do toilaan. 33 Nga' isai nopo i mokinongou doho' om kaanu nod kosimbayanan, om aiso' o poddosi,” ka.
Kogunaan do Kaanu'd Toilaan
1 Ilaai no kopio iti potudukon ku diya', oi tanak ku, om kada' no kopio lihuwai iti ponuhuan ku diya'. 2 Pokinongohon no o nunu nopo i kisuang do toilaan om tumotos nod mongilo do komoyon diri. 3 Pokianu no kopio'd toilaan; om mokianu do pomusarahan dot atarom. 4 Tumotos no do mogihum diri do miagal do pogigihum nu do tamas ko' dapu' di poillisok. 5 Ondung owonsoi nu o miagal diri, om koilo ko nondo do komoyon dot oronok do Tuhan, om haro indo o toilaan nu do pasal do Kinorohingan. 6 Tuhan no o manahak do toilaan; om iyau no o koonuan do tulun do toilaan om pomusarahan dit atarom. 7 Iyau no o monguhup om mongintirung di tulun dot otopot om otulid o ginawo. 8 Intirungan i' dau i tulun dit otulid o kowoyo-woyoon, om gompion dau i tulun dit osianan dau. 9 Ondung mokinongou ko doho', om koilo ko nondo dit otopot, om it otulid om it osonong. Koilo ko indo dit apatut nu'd wonsoyon. 10 Osiliu ko nondod tulun dit oilo, om manahak nondo diya' do kosimbayanan i toilaan nu. 11 Mongintirung nondo diya' i pomusarahan nu dot atarom om i toilaan nu, 12 om mangantob diya' do momonsoi di kasala'. Iri no o popoinsodu' diya' do mantad id tulun di poporikot do kosusaan do gama' di koboro-boroso' diyolo'. 13 Iyolo' no i tulun di minada' do tumanud do korohian do Kinorohingan, tu' tuminanud nogiddi di kowoyo-woyoo' di poimponu'd dusa. 14 Iyolo' no i tulun dit asanangan do mingwonsoi di kasala' om it orohian kopio do wowonsoyon dit araat. 15 Iyolo' no i tulun di moninipu' om it a' milo do ponongkuyaanan. 16 Om milo ko indo do tumongkiad do mantad id pamayayat do tongoondu' dit angaraat o kowoyo-woyoon, i mumbal daa do momolumbok do ginawo nu dot i koomiso' do boros dau o pomolumbok. 17 Iri nopo tondu'ddi om a' otorodok dot id sawo dau om kolihu do batos dau dot id Tuhan. 18 Ondung mongoi ko do hilo'd walai dau, om komoyon nopoddi nga' kumaa ko no dot id kapatayon. Mongoi ko nopod hilo' om miagal nopo do kumaa ko do hilo'd pomogunan di tulun di nangapatai. 19 Aiso' no tiso' di tulun di mongoi solowot dau do koguli' kawagu. A' no i tulun diri koguli' kawagu dot id ralan di kumaa dot id koposion. 20 Iyo nopoddi, oi tanak ku, om usui no do kowoyo-woyoon di piro-piro o tulun dit ongosonong, om wonsoyo' no o miontok di korohian do Kinorohingan. 21 Iri no i tulun di tumanud do korohian do Kinorohingan, it otulid o ginawo o koiyon do hiti'd pomogunan toko'. 22 Nga' uyungon id Kinorohingan do mantad hiti'd pomogunan diti i tulun dit angaraat, om it ongkidusa do miagal no di sakot dit utuson do mantad hiti'd tana'.
Nosihat dot id Tulun dit Ongomulok Po
1 Kada' no kopio lihuwai iti potudukon ku diya', oi tanak ku. Sorohon no kasai' iti ponuhuan ku diya'. 2 Iti nopo ponudukan ku'dti om popotogui diya' om poposimbayan do koposi-posion nu. 3 Kada' no kopio lihuwai o kosianan om kotorodoko' nu dot id Tuhan om id koinsanai'd tulun. Soro-sorohon no kopio iti om poopion no dot id ginawo nu. 4 Ondung wonsoyon nu o miagal diti om kasanangan ko nondod Kinorohingan om tulun. 5 Pogondos nod Kinorohingan do mikuwo'd aayi-ayi' o ginawo nu. Om kada' kopio sondiu di diya'd toilaan. 6 Sorohon no o Tuhan do tontok do momonsoi ko do nunu nopo, om tudukan ko indo dau do kowoyo-woyoo' do tumanud di korohian dau. 7 Kada' kopio pomusorou dot aralom o toilaan nu ko' mantad di noilaan kopio nu, suwai ko' umboyo' nogi'd Tuhan om momonsoi no dit osonong. 8 Ondung wonsoyon nu o miagal diri om iri no ot osiliu do ponokotubat do pomolingos di toruol nu om i nongosuhat. 9 Pusohon no o Tuhan do mikuwo'd papatahak dot id dau do hasil dit osonong kopio do mantad id tana' nu. 10 Ondung wonsoyon nu o miagal diri, om oponu' nondod gandum o koinsanai di sulap nu om adalaan kogumu' o waig dot anggur nu, gisom dot aiso' no o poiyanan nu'ddi. 11 Soira' nopo do kasala' ko, om togodon ko nondod Tuhan do ponuduk dau diya', om romiton nopo i ponogod dau'ddi, om kada' karaatai'd Tuhan. 12 Tu' togodon id Tuhan do monuduk i tulun di kosianan dau, do miagal di tapa' di monogod di tanak dau di kosianan kopio dau. 13 Olumaag no i tulun di kaanu'd toilaan, om i kaanu do pomusarahan dot atarom --- iri no i tulun dit osonong o kowoyo-woyoon. 14 Tu' kountungan nopo do kaanu'ddi om agayo po ko' i kountungan do kaanu'd pirok; om agayo o gatang ko' mantad do tamas. 15 Toilaan nopo om agayo po gatang ko' i watu dit olumis dit agayo o gatang; iri piya i korohian nu kopio nga' a' i' koiyo di toilaan. 16 Toilaan no o popotogui diya', om manahak do kakayaan om kosuahan. 17 Toilaan nopo om poposimbayan om poposonong do koposi-posion nu. 18 Olumaag no i tulun di kaanu'd toilaan; tu' iri no i toilaan o kapasi dau. 19 Iti nopo pomogunan, om iri i' i toilaan do Tuhan o pinomonsoi; om pinawalad dau ilo tawan do hilo'd pinoiyanan di natantu' mantad, dot i komiloo' dau o pinapawalad. 20 Iri i' i pomusarahan dau dit atarom o popoluyung dilo bawang om poporikot do rasam di mantad hilo'd haun do hiti'd pomogunan. 21 Iyo nopoddi om igitai no kopio ino toilaan om kotoromo' do pomusorou nu, oi tanak ku. Kada' no kopio ilihai iri. 22 Tu' iri no o mongintirung do koposi-posion nu, om aiso' indo o koligagaanan nu om osimbayan ko. 23 Om aiso' indo o koligagaanan nu do manau-panau om a' ko kasadu. 24 A' ko indo moddosi do mongoi odop, om oolong ko'd modop do gisom dot osuaban. 25 A' ko nondo minog do moddosi do kosusaan dit a' insan-insanon do rumikot, di miagal pod tongus do rumikot dot id tulun dot angaraat. 26 Gompion ko id Tuhan. Om a' ko i' dau pologoson do kosulung do lawa'. 27 Tumotos no kopio do momonsoi'd osonong dot id tulun dit apatut do pamansayan dot osonong do tontok di milo ko po do momonsoi'd miagal diri. 28 Kada' kopio sunudai ot isai nopo o tulun do magandad do gisom do suab ondung milo ko no do monulung dau do tontok do tadau'd baino'. 29 Kada' pogihum do ralan do momonsoi dot araat dot id tulun do suwai di poingiyon do hiri'd somok nu, om i monongkuyaan diya'. 30 Kada' ponokisongkiwal do tulun do suwai dot aiso' o paantakan, tu' aiso' i' o nowonsoi dau dot araat dot id diya'. 31 Kada' osol do tulun dit ongorongit ko' momusorou po do momit do kowoyo-woyoon diyolo'. 32 Tu' a' i' o Tuhan orohian do tulun di momonsoi dot araat, nga' pointalangon i' dau i nosorou mantad dau do wonsoyon dau dot id tulun di momonsoi do korohian dau. 33 Papalan i' do Tuhan o walai'd tulun dit angaraat, nga' barakatan i' dau o walai do tulun di mumboyo' dau. 34 Intingayamon i' dau i tulun dit asawat o ginawo, nga' barakatan i' dau i tulun dit osiriba' o ginawo. 35 Tulun nopo di kitoilaan om oruhangan i' o kosonongo' do ngaran dau, nga' tulun nopo di basug om oruhangan nogi' o kointingayamo' dau.
Kountungan dit Aanu do Mantad id Toilaan
1 Pokinongou nod nosihat di tapa' dokoyu dot id dokoyu, oi tangaanak ku. Podulon no kopio iri, om kaanu ko i' do pomusarahan dit atarom. 2 Iti nopo potudukon ku diya' om osonong i'. Iyo nopoddi om soro-sorohon ngai' no kopio iti. 3 Songulun oku no o tanak do kusai di molohing ku. Tontok dit okoro' oku po, 4 om tinudukan oku di tapa' ku. Boros ka dau, “Soro-sorohon no kopio iti nosihat ku, om kada' no kopio lihuwai iti. Wonsoyon no o miontok di potudukon ku diya' om apasi ko i'. 5 Siliu no do tulun di kitoilaan om it atarom o pomusorou! Kada' lihuwai om kada' iyadaai iti nosihat ku. 6 Kada' iyadaai o toilaan om intirungan ko i' di toilaan; kosianai no di toilaan om gompion ko i' dau, om aiso' indo o koligagaanan nu. 7 Ponotos no kopio do sumiliu'd tulun di kitoilaan, tu' iti no it agayo kopio o komoyon; haro piya o suwai do pokioonuan nu nga' poguluonon po kopio do manganu i pomusarahan dot atarom. 8 Kosianai no do toilaan om poinggoyoon ko i' di toilaan. Gopuso' no i toilaan, om onuan ko i' dau do kosuahan. 9 Om iyau no o papakaro do bunga dit olumis dot id diya' om manahak diya' do tupi' di dong raja' dit olumis,” ka. 10 Pokinongou no doho', oi tanak ku. Om podulo' no kopio iti nosihat ku diya' om otogui ko i'. 11 Notudukan tiya' no do toilaan om kowoyo-woyoon dit otopot. 12 Om aiso' indo o kaantob diya' do mamanau, ondung kopunong noo o kowoyo-woyoon nu; om a' ko no kasadu do tontok do manangkus ko. 13 Sorohon kasai' no i nopinsingilaan nu. Gompion no kopio iri do miagal do pomogompi' nu'd tinan nu. 14 Kada' ongoi do hiri'd toongoyon do tulun dot araat. Kada' usui do kowoyo-woyoon di tulun dot angaraat. 15 Kada' no kopio pomonsoi do miagal diri! Insodu' no do mantad dit angaraat! Iyadaai no kopio iri om kada' no sala' di ralan dot otopot. 16 Tulun nopo dot angaraat om a' i' koodop dot a' po kopomonsoi dit araat. Poimposik kasai' nopo iyolo' dot a' po iyolo' kopokoruol do tulun do suwai. 17 Kararaat nopo om kororongit nga' panakataakanon no om ponokotinumon diyolo'. 18 Nga' ralan nopod susuyon do tulun dit osonong om miagal di mulai nogi' o tadau tu' mawau-nawau nopo di mawat-sawat o tadau. 19 Nga' ralan nopo do susuyon di tulun dit angaraat om miagal po do dongotuong kotuong. Om katahub no iyolo' nga' a' i' kokito ondung nunu i nokotohubon. 20 Podulon no kopio iti boros ku, oi tanak ku. Pokinongohon no kopio iti nosihat ku. 21 Kada' kopio pologoso' iti do kotongkiad diya'. Soro-sorohon kasai' no om poopion noti dot id suang do ginawo nu. 22 Tu' iti nopo om manahak do koposion om kosonong-sonongo'd tinan dot id tulun di kosuhut diti. 23 Om antaan-taan no kopio o pomusorou nu; tu' poingkuro nopo it osorou nu om miagal noddi ot owonsoi nu. 24 Kada' kopio pomoros dit a' otopot. Om insodu' no kopio do mantad id tudut om boros di mamalid do tulun. 25 Pologoso' no dot okito do mato nu o kotulido' do ginawo nu; om a' indo tumudu' o tulu nu dot ointingayaman. 26 Momusorou no kopio dot a' nu po owonsoi o nunu nopo o wonsoyon nu, om koundar indo o koinsanai'd wonsoyon nu. 27 Insodu' no dit araat om momonsoi no dit otulid. Kada' no kopio sala' do mantad id ralan dit otopot.
Mogodu do Magampahu'
1 Pokinongou no kopio doho', oi tanak ku, podulo' no iti toilaan om nosihat ku di kopunong, 2 om koilo ko indod ralan do popotorodok do kowoyo-woyoon nu om milo ko do mimboros do miagal do tulun di kitoilaan. 3 Miagal po doti' daa do paha' koomis o munung do sawo do kusai'd suwai om kagayat do ginawo o koboro-boroso' dau. 4 Nga' katalib pondo iri, om opoit poo om toruol ot aanu nu. 5 Gayaton ko dau do lumintuhun do hiri'd pomogunan do tulun do napatai; ralan nopo di susuyon dau om ralan do kumaa dot id kapatayon. 6 A' i' iyau sumusui di ralan do kumaa dot id koposion, suwai ko' minghombo nopo iyau, om a' i' iyau kopuriman do nakasala' no iyau di ralan do kumaa dot id koposion. 7 Iyo nopoddi om pokinongou kou no doho', oi tangaanak ku, om kada' no kopio lihuwai iti boros ku. 8 Insodu' no kopio do mantad id tondu' do miagal diri! Om kada' ongoi insomok-somok di walai dau! 9 Tu' ondung mongoi ko ponokiambalut do tondu' do miagal diri om atagakan ko nondo di kosuahan nu, om omulok ko po om apatai ko no do patayon do tulun dit aiso' o kosianan. 10 Ngoyon nondod tulun do suwai o koinsanai di kakayaan nu, om i pininghuyanan nu'd minogihum nga' wokon indo o kasanganu. 11 Om poinglii ko pondo do hiri'd toodopon nu do mingodoi do magandad do kapatayan nu, om otongkop pondod toruol o tinan nu. 12 Om moro-boros ko nogindo do, “Nokuro giya'ddi tu' a' oku ruminamit di nosihat? Nokuro giya'ddi tu' minada' oku do tinudukan? 13 A' oku giya minokinongou di monunuduk doho'. A' ku giya iyolo' pinadul. 14 Om sigog iddi do nointingayam oku dot id toguang do tulun dot ogumu',” ka nu nondo. 15 Iyo nopoddi, om tumorodok no dot id sawo nu, om oiyo-iyon no o ginawo nu dot osianan dau, om iyau noo o kosianan. 16 Aiso' i' o guna' nu do mogihum do koinsanangan do mantad id tongoondu' dit okon ko' sawo nu. 17 Iri nopo i koinsanangan diri om maan no dokoyu di sawo nu, okon i' ko' maan nu dot id tondu'd suwai. 18 Iyo nopoddi om kotood no do poinsugku' di sawo nu om pogihum nod kasanangan do mantad id tondu' di kinawin nu, 19 it olumis om osonong do miagal do paus. Pologoso' no do popooropod diya' i koomiso' do kosianan dau; om pologoso' no i kosianan dau diya' do poporohian kasai' diya' dau. 20 Nokuro daa tu' ngoyon nu patahako' do tondu'd suwai o kosianan nu, oi tanak ku? Nokuro daa tu' agayat ko nogi'd koomiso' do kosianan do sawo do tongokusai'd suwai? 21 Tu' okito id Tuhan o koinsanai'd wonsoyon nu. Poingontong i' iyau diya' do hinonggo nopo o tongoyon nu. 22 Dusa nopo di tulun dot araat om miagal do lawa'. Om iyau i' om iyau ot alawaan di dusa dau. 23 Apatai iyau tu' a' i' iyau milo do momusus do korohian do tinan dau. Om iri i' i kababasug dau o poporikot dau do hiri'd lobong.
Piro-Piro Kawagu o Nosihat
1 Oi tanak ku, nokoumbal ko doti' do minamatos dot id tulun do suwai do mamajamin di tulun di mongutang. 2 Om nokosulung ko doti' di boros nu, om nalawaan ko di batos nu. 3 Ondung miagal diri o nowonsoi nu, oi tanak ku, om id suang ko nod longon di tulun diri, nga' poingkaa o ralan do sumoliwan do mantad diri: lumomus nod mongoi solowot di tulun diri, om pokionuon kopio do poiduwon ko dau do mantad id batos nu'ddi. 4 Tumotos no kopio'd midu', om kada' tingkod. 5 Lumabus nogi' kopio do mantad id lawa'ddi do miagal do tombolog ko' paus do mogidu' do mantad id tulun di magagasu. 6 Tulun nopo di gungkaul om apatut nod mongoi pinsingilo do kowoyo-woyoon di kilau, om silihon nondo dau iri do ponudukan dot id dau. 7 Iri nopo kilau, om aiso' i' o boyoon, om aiso' o mongulud, om aiso' o momorinta', 8 nga' monimung mantad i' iyolo'd takanon di dongmagadau po, do maan do kanon do dongrumasam. 9 Songkuro po koloido' di tulun do gungkaul do koodop? Soira' iyau'd tumungag? 10 Boros ka dau om, “Modop-odop oku po dot oruhai. Momigapus oku po om mundorong-dorong oku po,” ka. 11 Nga' daamot po dau'd koodop om orikatan nondo iyau do komosikinan di rumikot do miagal di tulun do manakau di kirapo-rapo. 12 Tulun nopo dit araat om it aiso' o guna' om orohian nod minghombo do popotongkop do tudut. 13 Popingkodomon diyolo' o mato diyolo' om popingguyuon o gakod, om popintudukon o tunturu' do monipu'd tulun, 14 om maso diyolo'd momusorou do momonsoi'd araat, om hinonggo nopo iyolo' nga' hiri no iyolo'd monimpuun do kopogisosongkiwalan. 15 Om oontok nondo iyolo'd kosusaan dit a' diyolo' insan-insanon, do gisom dot apatai iyolo' dot obungou di winonsoi diyolo'. 16-19 Haro o turu' o hal do karaatan kopio'd Tuhan, om it a' kopio dau milo do pologo-logoson: Kowoyo-woyoon di minggayo-gayo, kabang di goudut, longon di mamatai'd tulun dot aiso' o sala', pomusarahan di minsorou dot angaraat, gakod di marau-arau do kumaa dot id karaaton, sasi' dit a' opupus-pupusan do popimboros do tudut, om tulun di monimpuun do pitagadan dot id pogialatan di mogiambalut.
Mogodu do Magampahu'
20 Oi tanak ku, wonsoyon no i pinonuhuan do tapa' nu, om kada' kopio lihuwai i nosihat di tina' nu diya'. 21 Soro-sorohon kasai' no om poopion kasai' no i boros diyolo' dot id suang do ginawo nu. 22 Tu' iri nopo ponudukan diyolo'ddi, om momoyo' diya' do tontok do mamanau ko, om madtamong diya' do dongotuong, om popotunud diya' do dangadau. 23 Iri nopo i ponudukan di molohing nu om miagal do lampung dit atarang; om iri pomisunud diyolo' nga' milo id monuduk diya' do kowoyo-woyoon dot osonong. 24 Milo i' iri do popoinsodu' diya' do mantad id tongoondu' dit angaraat, om mantad id boros di sawo di tongokusai'd suwai di momolumbok do ginawo. 25 Kada' pologoso' dot agayat ko di kolumiso' diyolo'; om kada' kagayat di mato diyolo' di momolumbok diya'. 26 Tondu' nopod sundal om milo id bayaran dot iso' noo o roti, nga' magampahu' nopod sawo do kusai'd suwai om ginawo no o pambayar. 27 Milo toi o tulun do poposuang do tapui dot id pakit do rasuk dau dot a' osorob i rasuk dau? 28 Milo toi o tulun do mulok dot id popou do tapui dot a' olonuk o lapap dau? 29 Miagal noddi o koligagaanan do mongoi dudun do sawo do kusai'd suwai. Isai nopo o momonsoi do miagal diri om atantu' no dot ohukuman. 30 A' id tulun pakaraaton kopio no i tulun do mongoi panakau do takanon dot ololousanan iyau; 31 nga' ondung okosupan iyau, om mositi' nod bayaran dau iri dot inturu' kogumu' --- gisom do nunu nopondo i haro dot id dau om pabayaron ngai' no dau iri. 32 Nga' kusai nopo di magampahu' om basug no kopio. Mamaraag no iyau'd tinan dau. 33 Untotorion nondo iyau om inggoriton; om araag no o ngaran dau do gisom dot alaid. 34 Aiso' no o koiyo do kototogod di sawo di tondu'ddi do momiogu iyau; a' no dau opusus o ginawo dau do sisuli'. 35 A' no iyau rumamit do songkuro nopo o kogumuo'd tusin do patahakon do maan do ponginsasamod dau; piro-piro piya o kogumuo' do patahakon dot id dau nga' a' no katanus do kototogod dau.
1 Soro-sorohon noti boros ku, oi tanak ku, om kada' kopio lihuwai iti ponuhuan ku diya' do momonsoi. 2 Tonudon no iti nosihat ku, om apasi ko i'. Tonudon no om gompion no kopio iti ponudukan ku; om piagalon nopo do pomogompi' nu do mato nu. 3 Soro-sorohon kasai' noti ponudukan ku; om poopion no dot id ginawo nu. 4 Sorohon nopo do miagal do tobpinai nu o toilaan, om miagal do tambalut nu kopio o pomusarahan dit atarom. 5 Tu' iri no i toilaan o popoinsodu' diya' do mantad id sawo do kusai'd suwai, di tumotos do mamagayat diya' dot i koboro-boroso' dau dit oomis o pamagayat.
Tondu' do Sundal
6 Insan o tadau om liga' oku nod hiri'd liligaon di walai ku, 7 om kokito ku no o tangaanakwagu dot ogumu' dit aiso' po o nongoila-ilaan, nga' toinuo' ku no kopio o tiso' diyolo' di basug kopio dot id pogialatan diyolo'. 8-9 Insan o sosodopon di tumuong no om manau-panau i tanakwagu'ddi do hiri'd somok di linsuk di tiiyonon do songulun o tondu'. Om tumalib nogi' daa iyau di walai di tondu' 10 nga' ngoyo' nopo iyau solowoto' di tondu'. Iri nopo tondu'ddi nga' kipakayan do pakayan do sundal om nokopomusorou no iyau dot araat. 11 Iri nopo tondu'ddi nga' kouyu kopio om a' ointingayaman, om oubas do mimpanau do hiri'd karalan-ralanan, 12 ko' poingandad do hiri'd songinlinsuk-linsuk ko' hiri'd pogisosolowoton do ralan ko' hiri'd titimungon do tulun dot ogumu'. 13 Om gopuso' nopo di tondu' i tanakwagu'ddi om tungubai no dau, om ontong no iyau di tanakwagu'ddi om a' i' iyau ointingayaman do minomoros do poingkaa, 14 “Pinapatahak oku do porsombahan do sinumbali' di baino' om hilo' pod walai ku i daging di pinatahak ku do porsombahan diri. 15 Om soliwan oku noddi do minongoi pogihum diya'. Mongoi mantad oku nogi' daa pogihum diya', nga' hiti ko no. 16 Nolopisan ku no i toodopon ku do kain linan di mogisuayan o wotik di mantad hilo'd Masir. 17 Notuntugan ku no i toodopon ku do tumau dot osonong o kosingudan do winonsoi do mantad id mur, om gaharu', om kayu manis. 18 Kaino pogi'! Miuhang-uhang to indo do gisom dot osuaban. Osonong indo o ginawo to do tontok do migapus kito. 19 Okon i' ko' hilo'd walai i sawo ku. Nokotongkiad i' iyau do minongoi'd hilo'd sodu'. 20 Ogumu' o tusin do nigitan dau om a' po iyau koguli' dot a' po orikot o duwo minggu',” ka dau. 21 Om mogisuwai-suayan nopo o wonsoyon di tondu'ddi do pamagayat do ginawo di tanakwagu, om kagayat noddi i tanakwagu di koomiso' di boros di tondu'ddi. 22 A' no i tanakwagu'ddi minomusorou, suwai ko' tanud nopo di tondu' do miagal po di sapi' di gayaton do pokoyoon do hiri'd ponumbolian, om miagal do tambang di tumangkus do kumaa do hiri'd barambang; 23 gisom dot otobok nondod pana' o kangkab dau. Miagal po iyau di tombolog do tumulud do kumaa do hiri'd tongkurung tu' a' i' oilaan dot id suang iyau do koligagaanan. 24 Iyo nopoddi om pokinongou kou no doho', oi tangaanak ku. Podulon no kopio iti nosihat ku. 25 Kada' pologoso' do kagayat do ginawo dokoyu o tondu' do miagal diri; kada' kou ongoi gusa-gusa' dau. 26 Iri no i tondu'ddi o minamaraag do piro-piro no o kogumuo'd tongokusai. Om a' no ointob-intob o kogumuo'd tongokusai do napatai dau. 27 Ondung mongoi kou do hilo'd walai dau om komoyon nopoddi nga' pakayaan no dokoyu dot id pomogunan do tulun do napatai. Iri no o ralan do momoting do kumaa id kapatayon.
Lolohou do Toilaan
1 Pokinongou pogi'! Minglohou no o toilaan, mamagayo no o pomusarahan dot atarom. 2 Poingkakat iyau do hilo'd timpak do nulu-nulu dit id toning do karalan-ralanan, om hilo'd pogitotongkiadan do ralan. 3 Minglohou iyau do hilo'd wawayaan do bandar, hilo' no iyau do minglohou do poingkaa, 4 “Moro-boros oku dot id dokoyu, oi toinsanan o tulun, om pokinongou kou no; momolohou oku do toinsanan o tulun do hiti'd pomogunan. Om podulo' no dokoyu iti lolohou ku. 5 Ondung aiso' po o rongod dokoyu, om pinsingilo kou no om osiliu kou i' do tulun di kirongod. Ondung aiso' po toila-ilaan dokoyu, om pinsingilo kou no om osiliu kou i' do tulun di kitoilaan. 6 Pokinongou kou no do boros ku dit osonong kopio; tu' koinsanai di potudukon ku dokoyu om koontok ngai' i'. 7 Iri nopo i poboroson ku om otopot ngai' i'; om karaatan ku i' o tudut. 8 Koinsanai do poboroson ku om otopot ngai' i'; aiso' i' ot a' otopot om aiso' o kapalid. 9 Atarang ngai' i' iti dot id tulun dit atarom o pomusarahan; om osuhutan ngai' i' di tulun di kitoilaan. 10 Korohiai no diti ponudukan ku do mantad ko' pirok dit osompipi'; poinggoyoo' no o toilaan mantad ko' tamas dit osompipi'. 11 Iyoho' no i toilaan, agayo po o guna' ku ko' mantad di watu dit olumis dit agayo o gatang; iri nopo i korohian nu'd suwai om aiso' i' o koiyo doho'. 12 Iyoho' no o toilaan, om atarom o pomusarahan ku; haro o toilaan ku om oilo kopio oku do momusorou. 13 Komoyon nopo do momusou'd Tuhan om araatan dit araat; a' oku i' orohian dit asawat o ginawo om i minggayo-gayo. Om araatan oku di kowoyo-woyoon dot araat om i boros dit a' otopot. 14 Momusorou oku no di maan ku wonsoyo', om wonsoyon ku no kopio iri. Haro i' o toilaan ku om okoris oku. 15 Monguhup oku do raja' do momorinta', om monulung ngai' oku di pomorinta' do momonsoi dit otulid. 16 Koinsanai do pomorinta' do hiti'd pomogunan om uhupan ngai' ku i' do momorinta'; om iri nogi' i tulun dit ongkipangkat om i piro-piro o boyoon nga' tulungon ku i'. 17 Osianan oku i' di tulun dit osianan doho'; om iri tulun di mogihum doho' nga' kokito indo doho'. 18 Haro i' o kakayaan om kosuahan do patahakon ku; om haro o kosimbayanan om koundar. 19 Iri nopo it aanu dokoyu do mantad id doho' om osonong po ko' i tamas di nosompipi'; om agayo o gatang ko' i pirok dit osompipi'. 20 Sumusui oku i' do ralan do katapatan; om mamanau oku dot id ralan dit otulid. 21 Onuan ku i' do kakayaan i tulun dit osianan doho'; om ponuon ku do dapu' o walai dau. 22 Iyoho' no it id gulu kopio'd Tuhan wonsoyo'; iyoho' no o winonsoi dau dit id gulu kopio di timpuun i'. 23 Iyoho' nopo om winonsoi di timpuun i'; it a' po nowonsoi o pomogunan. 24 Nosusu oku no, dit a' po nowonsoi o rahat dot agayo, dit aiso' po o tudan do waig. 25 Nosusu oku no dit aiso' po o nuluhon, dit a' po nongowonsoi o nulu-nulu, 26 dit a' pod Kinorohingan nowonsoi o katanaan, om i kongoumaan do hiri, dit aiso' poo o tongosongonggom piya do tana'. 27 Hino oku i' di pinowonsoi dau ilo tawan, om tontok di winolitan dau o tawan om rahat, 28 om tontok di pinoiyon do Tuhan o haun do hilo'd tawan, om tontok di nukaban dau o tudan do waig do hilo'd rahat, 29 om tontok di sinunudan dau ilo waig do rahat dot a' tumolibamban di wolit di nokowonsoi dau. Hino oku i' do tontok di pinoiliu dau o pinoimpahan diti pomogunan. 30 Hino oku i' dot id toning dau do miagal di mongilo-ilo do wonsoyon dau, iyoho' no o popotood dau do pointikid-tikid do tadau; om ooropod kasai' oku dot id toguang dau. 31 Asanangan oku no kopio do pomogunan, om orohian oku do tulun. 32 Pokinongou kou no doho', oi tangaanakwagu! Wonsoyo' no dokoyu i pinotuduk ku om olumaag kou i'. 33 Romiton no kopio dokoyu i pinotuduk dot id dokoyu om sumiliu no do tulun dit oilo; om kada' dokoyu pagaan-gaano' iri. 34 Olumaag no i tulun di mokinongou doho', i tulun di poingandad do hiri'd wawayaan di walai ku do monikid tadau. 35 Iri nopo i tulun di kaanu doho', om kaanu nod koposion, om kasanangan no iyau'd Tuhan. 36 Nga' iri nopo tulun dit a' kaanu doho', om momorugi' nod tinan dau; tu' isai nopo it araatan doho', om orohian nod kapatayon,” ka.
Toilaan om Kababasug
1 Nokowonsoi nod toilaan o walai dau om noorigianan no dau do turu' o torigi. 2 Nokopogkorot no iyau do tayam-tayam do maan do poginakanan, om naralatan no dau do rampa i waig dot anggur, om nakarawat no dau. 3 Nosuhu' ngai' no dau i susuhuon dau'd tongoondu' do mongoi pinglohou di tulun dot alapon do hiri'd kinoiyonon dit akawas kopio do hilo'd bandar. Boros ka di susuhuon diri, 4 “Kainou sumuang, oi tulun dit aiso' po o toila-ilaan!” ka. Om boros ka di toilaan dot id tulun di basug, 5 “Kainou mangakan diti taakanon ku om monginum diti waig dot anggur di naralatan ku nod rampa. 6 Tongkiad no do mantad id tulun di basug, om apasi ko i'. Susui no di ralan do tulun di kitoilaan,” ka. 7 Ondung sunudan nu do kasalaan dau o tulun dit asawat o ginawo, om indaraaton ko nogi' dau. Ondung togodon nu o tulun dit araat om inggoriton ko nogi' dau. 8 Kada' sunudai i tulun dit asawat o ginawo do kasalaan dau, tu' karaatan ko nondo dau. Nga' ondung momisunud ko do tulun di kitoilaan do kasalaan dau, om unsikohon ko i' dau. 9 Nunu nopo o ponosihaton nu dot id tulun di kitoilaan, om koruhang nogi' iri do toilaan dau. Om nunu nopo o potudukon nu dot id tulun dit otorodok dot id Kinorohingan om koruhang nogi' iri do toilaan dau. 10 Ondung orohian ko do kitoilaan, om poguluonon po kopio do momusou om rumonok do Tuhan. Tu' ondung kotutun ko dit Olidang Kopio, om kaanu ko nod toilaan. 11 Toilaan no o popotogui diya'. 12 Ondung kitoilaan ko om ountung ko no, nga' ondung iyadaan nu i toilaan diri, om orugi' ko no. 13 Kababasug nopo om miagal di tondu' dit a' nopo otingkod do mimboros dot araatan, om it aiso' o toila-ilaan, om it a' milo dot ointingayaman. 14 Mirikau nopo iyau do hiri'd wawayaan do walai dau, ko' hiri'd tiyonon do mirikau dit id kinoiyonon dit asawat kopio do hiri'd bandar. 15 Om hiri no iyau do minglohou di tulun di santalib-talib om bayayaton dau i tulun dit ongotulid o ginawo do boros dau do poingkaa, 16 “Kainou mumbaya' po, oi tulun dit aiso' po o noila-ilaan!” ka. Om boros ka dau dot id tulun di basug, 17 “Oomis-omis po moti' i waig do pinanakau. Om osonong-sonong o kaakanan di roti do pinanakau,” ka. 18 Nga' a' i' koilo i tulun diri do koinsanai'd tulun do koongoi do hiri'd walai dau om apatai ngai' no; om iri nopo tulun di nokosuang di walai dau, om nokosuang no do hilo'd pomogunan do tulun di napatai.
Piro-Piro Nosihat di Suliman
1 Iti ngai' no o nosihat do pinoboros di Suliman. Tanak nopo di kitoilaan om poposonong do ginawo di tapa' dau; nga' tanak nod basug om popotongob di tina' dau. 2 Dapu' nopo dit aanu do mantad id poninipu' om a' i' poporikot do kountungan dot id diya'; nga' kotulido' nopo om kapasi' i' diya'. 3 A' id Tuhan pologoson do louson o tulun dit ongosonong; nga' tulun nopo dit araat om a' i' dau pologoson do kaanu di korohian dau. 4 Akaul ko nopo om rumutum ko no; nga' aparu' ko nopo om kumaya' ko i'. 5 Tulun nopo di kirongod om mongomot i' do tontok di mogiompongomot; kointingayam no kopio do koodop do dongmongomot. 6 Tulun nopo dit osonong om kaanu i' do barakat. Nga' boros nopod tulun dit araat om pangalit noo di korongito' dau. 7 Tulun nopo dit osonong om miagal i' do barakat dit osorou kasai' nopo, nga' tulun nopo dit araat om oruhai dot olihuan. 8 Tulun nopo di kirongod om rumamit id nosihat dit osonong; nga' tulun nopo di dongkababasug o koboro-boroso' om apalid i'. 9 Iri nopo tulun dit otulid o kowoyo-woyoon om osimbayan no om aiso' o koligagaanan; nga' iri nopo tulun di monipu' om oimbulayan indo. 10 Tulun nopo di momolisok do katapatan om poporikot nod kosusaan; nga' iri nopo tulun di potimbabaon nopo do popoboros it a' dau korohian, om popogiulud i'. 11 Koboro-boroso' nopod tulun dot osonong om popogirot id ginawo, nga' koboro-boroso' nopo di tulun dot araat om pangalit no toomod di kararaat dau. 12 Araatan nopo om moningkau no do kopogitatagadan; nga' kosianan noo om mangampun do koinsanai'd kasalaan. 13 Tulun nopo di koilo do momusorou om kopunong i' o koboro-boroso' dau, nga' tulun nopod basug om apatut no do pokorualan. 14 Tulun nopo di kirongod om tumotos i' do monimung do toilaan; nga' soira' nopo do moro-boros o tulun di basug, om poporikot nod kopogisosongkiwalan. 15 Kakayaan no o mongintirung di tulun do kaya', om komosikino' o momungou di tulun do mosikin. 16 Isomuli' nopo do mingwonsoi dot osonong om koposion; nga' kootuson nopo do momonsoi'd dusa om koinggumu' nondo i dusa. 17 Tulun nopo di mokinongou do sunudan om osimbayan no o koposi-posion; nga' tulun nopo dit a' mangakun do nakasala' om id suang no do koligagaanan. 18 Goudut i' i tulun di momolisok do kototogod dau. Om basug i tulun di popintongkop do boros dot a' otopot do pongindaraat do wokon. 19 Ogumu-gumu' o boros nu nga' olosu-losu' ko no do kowonsoi'd dusa; nga' ondung orohian ko dot osiliu ko'd tulun di kitoilaan om osonong nogi' dot a' nopo moro-boros. 20 Boros nopod tulun dot osonong om miagal pod pirok di nosompipi'; nga' iri nopo poboroson di tulun dot araat om aiso' i' o suang. 21 Boros nopod tulun dot osonong om kabarakat i' do tulun dot ogumu'; nga' iri nopo tulun do basug om iri no i kobosugo' dau o kapatai dau. 22 Barakat id Tuhan o papakaya' do tulun; a' i' koruhang do kakayaan do tumotos piya o tulun do kumaraja'. 23 Tulun nopo di basug om asanangan do mingwonsoi di kasala'; nga' tulun nopo di kirongod om asanangan i' do mogihum do toilaan. 24 Tulun nopo dit otulid o ginawo om kaanu i' di korohian dau; nga' tulun nopo dit araat om kaanu nogi' di poddosi kopio dau. 25 Tontok nopo do rumikot o tongus dot opuhod, om otilib nopo i tulun dot araat; nga' tulun nopo dot otulid o ginawo om aiso' i' o koligagaanan. 26 Kada' pakarajao' dot id diya' i tulun do gungkaul, tu' momoronggingot no iyau diya' do miagal di waig dot oonsom do kangaro do nipon nu ko' miagal di lisun do kopodi' do mato nu. 27 Umboyo' nod Tuhan, om alaid ko i' do poimpasi; tulun nopod araat om a' po orikot o gisom dau om apatai no iyau. 28 Iri nopo soro-sorohon do tulun dot osonong om popolumaag i' dau, nga' aiso' nopo o kotutuk-tutukon do soro-sorohon di tulun dot araat. 29 Intirungan id Tuhan o tulun dit otulid o ginawo; nga' patayon i' dau i tulun di mingwonsoi dot araat. 30 Tulun nopo dit otulid o ginawo om osimbayan i' om aiso' o koligagaanan do poimpasi; nga' tulun nopod araat om ouyung indo do mantad id pomogunan di pinotungkusan. 31 Tulun nopo dit otulid o ginawo om kopunong i' o koboro-boroso'; nga' tulun nopo dot araat om poluntomon nopo o kabang. 32 Tulun nopo dit otulid o ginawo om poposonong i' do ginawo o koboro-boroso'; nga' koboro-boroso' nopo di tulun dit araat om pokoruol nopo do ginawo.
1 Araatan i' o Tuhan do tulun di mamakai do timbangan dit a' koontok. Nga' asanangan i' iyau do tulun di mamakai di timbangan di koontok. 2 Tulun nopo di minggayo-gayo om intingayamon indo do koimbagu; nga' osonong nogi' do sumiliu do tulun dit osiriba' o ginawo. 3 Tulun nopo dit osonong, om woyoon i' di kotulido' dau; nga' tulun nopo dit oudut om apatai indo di kouduto' dau. 4 Aiso' no o guna-guna' do kakayaan dot id diya' dot orikot o kapatayon nu, nga' apasi ko i' dot otulid no o ginawo nu. 5 Oinsanangan i' di kotulido' o koposi-posion do tulun dit osonong, nga' i nopo tulun dot araat om iyau i' om iyau o kapatai do tinan dau. 6 Tulun nopo dit otulid o ginawo om apasi' i' di kotulido' do ginawo dau; nga' tulun nopo dit a' milo do ponongkuyaanan om alawaan i' di katamahao' dau. 7 Soira' nopod apatai o tulun dot araat, om iri nogi' i soro-sorohon daa dau nga' kotonggoi no dau do matai; mogondos nopo do kokorisan do tinan om aiso' i' o guna'. 8 Tulun nopo dit otopot om ointirungan i' do mantad id kosusaan; tu' pakayaan nondo di kosusaan dot id tulun dit araat. 9 Kapatai i' diya' o koboro-boroso' di tulun dot araat; nga' iri nopo toilaan do tulun dit osonong om kapasi i' diya'. 10 Soira' nopod kaanu do koinsanang-sanangan o tulun dit otulid o ginawo om ongotood no o hiri'd bandar; om mimpangkis dot atataadan i rayat do tontok dot apatai i tulun dot araat. 11 Papabantug do bandar o barakat di poboroson di tulun dot otulid o ginawo; nga' karaag id bandar o boros di tulun dot araat. 12 Basug tomod i' o mongindaraat do wokon; ondung kirongod ko, om kada' nopo ungkomi. 13 Isai nopo it obimboros om a' no milo'd posunudan do boros dit a' daa koino-ino do popinsunudon; nga' milo nu i' do posunudan dit id suang do ginawo nu i tulun di milo do ponongkuyaanan. 14 Ondung aiso' o boyoon om araag no o bansa'; ondung ogumu' o tulun do mononosihat om aiso' no o koligagaanan. 15 Ondung mamatos ko'd mambayar do tutang do tulun dit a' nu otutunan om monosol ko i' moti'ndo dot id tohuri. Osonong nogi' dot a' nopo mongoi hompi-hompit diri. 16 Tondu' nopo dit osonong o kowoyo-woyoon om suahon i', nga' tondu' nopo dit aiso' o tadat om kointingayam noo. Kusai nopo di gungkaul om a' nopo koumbal do haro o tusin; nga' kusai nopo dit opintar om kaya' i'. 17 Ountung ko no dot opuhawang ko no, nga' ondung orongit ko om orugi' ko no. 18 Aiso' i' o kountungan dot aanu di tulun dot araat; nga' ondung it otopot o wonsoyon nu om atantu' nod kaanu ko i' do barakat. 19 Isai nopo it otorodok do momonsoi dot osonong om apasi no; nga' isai nopo i sumonsog do momonsoi di kasala' om apatai no. 20 Araatan i' o Tuhan do tulun dit angaraat o pomusorou; nga' osianan i' iyau di tulun dit osonong o wonsoyon. 21 Atantu' no dot ohukuman o tulun dot araat; nga' koidu' i' i tulun dit osonong. 22 Kolumiso' nopo do tondu' dit a' osonong o kowoyo-woyoon om miagal nod pondulung do tamas do poinggading do wogok. 23 Nunu nopo i korohian do tulun dit osonong, nga' osonong no o kootuson; nga' tontok dot aanu di tulun dot araat i kosionuan dau, om oinsanan nopo o tulun dot ongotogod. 24 Haro i' o tulun dot a' puro-puroon o pamamakai do tusin nga' muhang- ruhang i' o kakayao' dau, om haro o tulun dot okikit, nga' sumurut nogi' o komosikino' dau. 25 Kopuhawang no, om opuhawangan ko i', ponulung nod wokon om otulung ko i' iya'. 26 Papalan i' do tulun o tulun di poopi' do gandum do magandad do gatang dit amahal, nga' royohon i' diyolo' i tulun di papadagang di gandum. 27 Ondung aparu' ko'd momonsoi dot osonong, om suahon ko i' do tulun, nga' ondung kopogisosongkiwalan noo ot ihumon nu, om iri nondo kopio ot aanu nu. 28 Tulun nopo di sumondiu do kakayaan dau om tumatak tomod nopondo iyau do miagal di roun di nokoring; nga' tulun nopo di mogondos do Kinorohingan om sumuni i' do miagal di tolid. 29 Tulun nopo di poporikot do kosusaan dot id sompiiyon dau, om aiso' no ot aanu-anu dot id tohuri. Tulun nopod basug om susuhuon kasai' nopo di tulun dot ongkitoilaan. 30 Iri nopo tulun di kikotumbayaan om aiso' no o koligagaanan do koposion dau; om iri nopo tulun dit oilo om muhang-ruhang i' o tulun do tumanud dau. 31 Tulun nopo dit osonong om oonuan no dot isomuli' do hiti'd pomogunan; nga' tulun nopo dit araat om i kidusa om atantu' no dot ohukuman.
1 Tulun nopo dit orohian do toilaan om orohian id sunudan do tontok di kasala' iyau; nga' tulun nopod basug om a' i' orohian do sunudan. 2 Orohian i' o Tuhan do tulun dit osonong, nga' papalan i' dau i tulun di minsorou do momonsoi dot araat. 3 A' i' manahak do kosimbayanan o karaaton; nga' tulun nopo dit otulid o ginawo om a' i' oguyu'. 4 Tondu' nopo dit osonong om sumiliu i' do kaandasan om kaarapadan di sawo dau; nga' tondu' nopo di mongintingayam do sawo dau om miagal pod toruol dot araat dot id tulang di sawo dau. 5 Otulid i' o wonsoyon do tulun dit otulid o ginawo; nga' magakal noo i tulun dit araat. 6 Boros nopod tulun dot araat om kapatai i'; nga' boros nopod tulun dit otulid o ginawo om kapasi i'. 7 Tulun nopo dot araat om aala' indo om apatai, om aiso' o sinakagon; nga' haro kasai' i' o sinakagon do tulun dit osonong. 8 Tulun nopo di kirongod om royohon i'; nga' tulun nopo di basug om hingi-hingion poo. 9 Osonong nogi' do sumiliu'd tulun dit aiso' o ngaran-ngaran, om mogihum do kaakan-akanan, mantad ko' minsorupai-rupai do tulun di kipangkat, om aiso' i' o kaakan-akanan. 10 Tulun nopo dit osonong om momogompi' i' do tayam-tayam dau; nga' tulun nopod araat om pokoruol nopo di tayam-tayam dau. 11 Tulun nopo di mongungumo dit aparu' om osima' id taakanon; nga' basug no kopio o tulun di mangayi' nod maso do mingwonsoi dit aiso' o kootuk-otukon. 12 Tulun nopo dit araat om poimponu' pod pomusarahan do momonsoi dot araat; nga' tulun nopo dit osonong om ogirot i' do miagal do tolig. 13 Tulun nopod araat om alawaan i' di koboro-boroso' dau; nga' tulun nopo dit osonong om koidu' i' do mantad id kosusaan. 14 Pongilaan nopod kowoyo-woyoon do tulun om mantad id koboro-boroso' dau om i wonsoyon dau; iri nopo it aanu dau om miontok noddi winonsoi dau. 15 Tulun nopod basug om momusorou nopo do koontok iyau; nga' tulun nopo di kitoilaan om mokinongou i' do nosihat. 16 Soira' nopo dot otogod o tulun do basug om tontok noddi do kointalang o kototogod dau; nga' tulun nopo di kirongod om popitolib-tolibon dau i pongindaraat do tulun dau. 17 Ondung poboroson it otopot, om owonsoi no it otulid; nga' mongudut nopo om iri no it a' otulid ot owonsoi. 18 Boros nopod tulun dit oburuak om kosuhat i' do ginawo do miagal di gayang; nga' boros nopod tulun di kirongod om kolingos i' do miagal do tubat. 19 Oruuhai do katalib o tudut; nga' boros nopo dit otopot om hino kasai' i' do gisom dot alaid. 20 Tulun nopo di minsorou do momonsoi dot araat om monipu' no do tinan dau; nga' tulun nopo di momonsoi dot osonong om kaanu i' do kaarapadan. 21 Tulun nopo di mumboyo'd boros do Kinorohingan om a' i' oontok do kosusaan; nga' oontok kasai' nopondod kosusaan i tulun dit araat. 22 A' i' o Tuhan orohian do tulun di goudut; nga' asanangan i' iyau do tulun di sumulung kasai' do batos dau. 23 Tulun nopo di kirongod om a' i' popimboros di toilaan dau; nga' tulun nopod basug om popinsusui noddi kababasug dau. 24 Aparu' nopod kumaraja' o tulun om osiliu no iyau'd tulun do kipangkat; nga' akaul nopo o tulun om osiliu no iyau do turipon. 25 Katangkabaan nopo om katanus i' do kaarapadan nu; nga' koinsasamod i' do ginawo nu o boros dit osonong. 26 Tulun nopo dit osonong om popotunud i' di tambalut dau; nga' tulun nopo dit araat om mamalid noo diyolo'. 27 Ondung akaul ko om a' nu no aanu i pokioonuan nu; nga' ondung aparu' ko om ountung ko no. 28 Tulun nopo di tumanud do korohian do Kinorohingan, om apasi i'; nga' tulun nopo di tumanud dit araat, om kakaa no dot id kapatayon.
1 Tanak nopo di kirongod om mokinongou i' do nosihat di tapa' dau; nga' tulun nopo dit asawat o ginawo om a' nopo mangakun do nakasala' iyau. 2 Boros nopod tulun dit osonong om manahak i' do kountungan; nga' tulun nopo di gomponipu' om orohian nod kororongit. 3 Tulun nopo dit a' olomus do poboros dit osorou dau, om aiso' i' o koligagaanan; nga' tulun nopo dit oburuak om oontok no do kosusaan. 4 Ogumu' o kosionuan di tulun do gungkaul, nga' iso' poddi kosionuan dau'ddi nga' aiso' i' ot aanu dau; nga' tulun nopo dit aparu' om aanu ngai' nopo dau i kosionuan dau. 5 Tulun nopo dit otulid o ginawo om araatan i' do tudut; nga' koboro-boroso' nopod tulun dot araat om mongintingayam noo om pakaraat. 6 Kotulido' nopo om mongintirung i' do tulun dit aiso' o kasalaan; nga' karaaton nopo om momungou i' di tulun do kidusa. 7 Haro i' o tulun do minsorupai-rupai do tulun iyau'd kaya', nga' aiso' i' o konunu-nunuan dau; om haro o tulun di minsorupai-rupai do mosikin, om kaya' nogi' kopio iyau. 8 Tulun nopod kaya' om iri no tusin dau ot onuon dau do pongintirung do koposion dau; nga' tulun nopod mosikin om aiso' i' o sipamatai dau. 9 Tulun nopo dit otopot om miagal di lampung dit atarang o tulinau; nga' tulun nopo dit araat om miagal di lampung di motikopisok no. 10 Kosusaan noo o kootuson di minggayo-gayo; nga' kitoilaan nogi' kopio do mokianu do nosihat. 11 Iri nopo i kakayaan dit oruhai do minanganu om oruhai nori dot aayi'; nga' iri nopo kakayaan di noudipon do minogihum, om oruhangan nogindo. 12 Ondung aiso' o kinotutukon di soro-sorohon nu om tumongob ko no; nga' ondung aanu nu i pokioonuan nu om otood ko no. 13 Ondung mada' ko do nosihat dit osonong, om oontok ko nod kosusaan; nga' ondung tonudon nu i nosihat om osimbayan ko no. 14 Ponudukan nopod tulun dit ongkitoilaan om miagal nod tudan do koposion; tu' milo iri do monulung diya' do tontok dot oontok ko'd koligagaanan. 15 Tulun nopo di kirongod om suahon i'; nga' tulun nopo dit a' milo do ponongkuyaanan om a' no ountung. 16 Tulun nopo di kitoilaan om momusorou i' do tintod do momonsoi'd nunu nopo; nga' tulun nopod basug om popointalang no do kababasug dau. 17 Tulun nopo di poporomut do habar dit a' milo'd ponongkuyaanan om poporikot nod kosusaan; nga' tulun nopo di poporomut do habar di milo'd ponongkuyaanan om poporikot i' do kosimbayanan. 18 Tulun nopo dit a' orohian do minsingilo om osiliu nod mosikin, om ointingayam; nga' tulun nopo di mokinongou do ponudukan om suahon nod tulun do suwai. 19 Songkuro o kosonongo' dot aanu i pokioonuan! Nga' tulun nopo di basug om mada' i' do tumongkiad do karaaton. 20 Ambalut nod tulun dit ongkitoilaan, om osiliu ko i' do tulun di kitoilaan; nga' ondung monokiambalut ko'd tulun do basug, om obungou ko no. 21 Honggo-honggo nopo nga' kosusaan kasai' nopo o moyo-woyo' do tulun di kidusa; nga' tulun nopo dot osonong om kaanu kasai' i' dit ongosonong. 22 Tulun nopo dot osonong om haro i' o kakayaan do potungkusan di manangaki dau; nga' kakayaan nopod tulun do kidusa om aanu indo di tulun dit otopot. 23 Tana' nopo dit a' noumo om ogumu' i' daa o hasil do maan do kanon di tulun do mosikin; nga' mada' i' i tulun dot araat dot umoon iri. 24 Ondung a' nu pikoton o tanak nu do tontok do kasala' iyau, om a' ko i' osianan dau; nga' ondung osianan ko dau, om pikoton nu i' iyau. 25 Tulun nopo dit otopot om haro kasai' i' o kaakan-akanan; nga' tulun nopo dit araat om louson kasai' nopo.
1 Iri no koiloo' do tondu' o kogirot do sompiiyon dau; nga' kababasug nopo om mamaraag no. 2 Tulun nopo dit otulid om oronok i' om momusou iyau'd Tuhan, i Kinorohingan; nga' iri nopo tulun dit a' otulid om mongindaraat no iyau'd Tuhan. 3 Iri no i kasawato' do ginawo'd tulun do basug o popobolotok dau; nga' boros nopod tulun di kitoilaan om kointirung i' dau. 4 Ondung aiso' o sapi' do pamagayat do radu om aiso' no o hasil do tumo; nga' ondung haro o sapi', om a' nopondo aayi-ayi' o gandum. 5 Sasi' nopo dit otulid o ginawo om otopot kasai' nopo o poboroson; nga' sasi' nopo dit a' milo'd ponongkuyaanan om tudut ngai' nopo o posunudon. 6 Tulun nopo dit asawat o ginawo om a' nopo milo do sumiliu'd tulun di kitoilaan; nga' tulun nopo dit atarom o pomusarahan om oruhai do koilo. 7 Insodu' no do mantad id tulun do basug; tu' aiso' i' o potudukon diyolo' diya'. 8 Nokuro tu' oilo kopio o tulun dit atarom o pomusorou? Oilo pogi' iyau nga' oilaan i' dau it apatut dau'd wonsoyon. Nokuro tu' aiso' kopio o toila-ilaan do tulun do basug? 9 Osorou nopod tulun do basug om a' i' monguro do kowonsoi piya iyau'd dusa; nga' tulun nopod osonong om orohian i' dot oompunan o dusa dau. 10 I kataadan, om i katangaban nga' iya' noo o kopuriman kopio'ddi; aiso' i' o tulun do suwai do kopuriman diri do miagal di diya'd opurimanan. 11 Walai nopo di tulun dot osonong om ogirot kasai' i'; nga' walai nopo di tulun dot araat om ahaba' i'. 12 Iri nopo ralan dit osorou daa'd tulun do kumaa dot id koposion; om pakayaan i' dot id kapatayon. 13 Kosompon i' doti' daa do katangaban o tirak; nga' katalib nopondo i koirakan om haro kasai' i' i katangaban. 14 Tulun nopod araat om osulian i' do miontok di karaaton dau, om tulun dot osonong nga' onuan id isomuli' do miontok di kosonongo' dau. 15 Tulun nopo di basug om ponongkuyaan ngai' nopo dau; nga' tulun nopo di kirongod om mumbangan-bangan kasai' i' do tontok do momonsoi iyau do nunu nopo. 16 Tulun nopo di kirongod om mumbangan-bangan kasai' i', om minsodu' iyau do kosusaan; nga' tulun nopo di basug om a' nopo mumbangan-bangan, om arau-arau nopo do momonsoi'd nunu nopo. 17 Tulun nopo dit obintogod om kowonsoi no di dong kababasug; nga' tulun nopo di kirongod om otorodok i' o kowoyo-woyoon. 18 Tulun nopo di basug om iri no i kootuson di kababasug dau ot aanu dau; nga' tulun nopo di kitoilaan om muhang-ruhang nopo o toilaan do posomulion dot id dau. 19 Tulun nopo dit araat om a' no milo dot a' minsiriba' dot id tulun dit otulid o ginawo, do mokiinsian. 20 Tulun nopod mosikin om aiso' i' o tiso' dot orohian, iri piya songkoduwo dau nga' a' i' orohian dau; nga' tulun nopod kaya' om ogumu' o tambalut. 21 Ondung orohian ko dot osimbayan o ginawo, om kumopuhawang no dot id tulun do mosikin; tu' dusa i' do popoinsiriba-riba' do tulun do suwai. 22 Ondung momonsoi ko dot osonong om ponongkuyaanan ko nondo om suahon ko; nga' ondung momusorou ko do momonsoi dit araat om kosusui ko no do ralan di kasala'. 23 Tumotos ko nopo do kumaraja' om osimbayan no o koposi-posion nu; nga' ondung poirikau tomod ko do mimboros noo, om osiliu ko nod tulun do mosikin. 24 Tulun nopo di kitoilaan om arayou i' tu' kitoilaan i' iyau; nga' tulun nopod basug om abantug nod basug. 25 Kapasi i' do tulun do suwai o sasi' di poposunud dit otopot; nga' ondung posunud iyau do tudut om popohudsu no iyau'd wokon. 26 Tulun nopo dit oronok do Tuhan om osimbayan no, om ointirungan iyau om i sompiiyon dau. 27 Tadon nopo do koposion om i kororonok do Tuhan; tulun nopo dit oronok do Tuhan om koinsodu' no do mantad id kapatayon. 28 Kobontugan nopod raja' om tumanud i' do ginumu' do tulun di porintaon dau; ondung aiso' o rayat dau om aiso' no o kuasa' dau. 29 Ondung alanut o ginawo nu, om kitoilaan ko no; nga' ondung buronguson ko om popointalang ko no di kababasug nu. 30 Poposonong i' do tinan o pomusarahan dit osimbayan; nga' ginawo nopo di mosol om miagal pod toruol di kapatai. 31 Ondung mongindaraat ko'd tulun do mosikin, om mongindaraat ko nod Kinorohingan di minomonsoi diyolo'; nga' ondung opuhawang ko'd tulun di mosikin om popoinggayo ko nod Kinorohingan. 32 Tulun nopo dit araat om mamatai no do tinan dau dot i wowonsoyon dot araat o kapatai; nga' tulun nopo dit osonong om apasi i' iyau di kotulido' do ginawo dau. 33 Toilaan nopo om haro ngai' i' dot id pomusarahan do tulun di kitoilaan; nga' aiso' i' o komoyon do toilaan dot id tulun do basug. 34 Bansa' nopo di mumboyo' do Kinorohingan om abantug i'; nga' bansa' nopo di nolondod dot id dusa om ointingayam i'. 35 Orohian i' o raja' do pagawai dit oilo; nga' hukuman i' dau i pagawai dit a' momonsoi di pinonuhuan dau.
1 Isimbar nopo dit alamaya' om katanus i' do kototogod; nga' isimbar nopo dit apatog om moningkau nod kototogod. 2 Moro-boros nopo o tulun di kirongod om popoinggayo i' do toilaan do gisom dot agayat o ginawo'd tulun dot orohian di toilaan; nga' tulun nopo di basug om milo nod mimboros dit aiso' o komoyon. 3 Okito ngai' id Tuhan it ongosiliu do hinonggo nopo; om poingontong iyau dati', do tontok di momonsoi toko' dot osonong ko' it araat. 4 Mongodsuur i' o boros di koinsasamod; nga' popoluhoi nod ginawo o boros di pokoruol. 5 Tulun nopo di basug om a' i' mamadul do ponudukan do tapa' dau; nga' tulun nopo di kirongod om momusou i' do nosihat do molohing dau. 6 Kakayaan nopod tulun dot osonong om mompus-ompus i'; nga' kakayaan nopo di tulun dot araat om atanus no dot oontok iyau do kosusaan. 7 Popotongkop nopod toilaan, om iri no i tulun di kitoilaan; om okon i' ko' i tulun do basug. 8 Asanangan i' o Tuhan do tontok do sumambayang i tulun dot osonong; nga' niada' i' dau i porsombahan do tulun dit araat. 9 Araatan i' o Tuhan do kowoyo-woyoon do tulun dit araat; nga' osianan i' o Tuhan di tulun do tumotos do momonsoi'd korohian do Tuhan. 10 Ondung momonsoi ko dot araat om pouruan ko nod momohukum; ondung a' ko mokinongou'd nosihat om apatai ko no. 11 Pomogunan piya do tulun di napatai nga' a' i' milo do popolisok do nunu nopo do mantad id Tuhan; om milo nogi' tuu daa'ndo do popolisok o tulun do pomusarahan dau? 12 Tulun nopo dit asawat o ginawo om a' i' orohian do sunudan do nakasala' iyau; a' i' iyau insan do rumamit do nosihat do mantad id tulun di kitoilaan. 13 Tontok nopo dot otood o tulun, om koirak i' iyau; nga' tontok nopo di tumongob iyau om olunggui no iyau. 14 Tulun nopo di kirongod om orohian i' do minsingilo; nga' tulun nopod basug om abagalan no di kababasug dau. 15 Koposi-posion nopod tulun do mosikin om agangau kasai' nopo; nga' tulun nopo dit osimbayan om otood kasai' nopo. 16 Osonong-sonong nogi' i tulun do mosikin dot oronok pod Tuhan, ko' mantad di tulun do kaya' dit agangau nopo. 17 Osonong-sonong nogi' do mangakan piya do rarapaon no toomod do potorungak di tulun do kosianan nu, ko' mantad do mangakan do tikanas dit awasiu do potorungak do tulun di karaatan nu. 18 Tulun nopo dit obintogod om moningkau no do pogisosongkiwalan; nga' tulun nopo dit alanut o ginawo om popogiuulud i'. 19 Ondung akaul ko, om hinonggo ko nopo nga' osusa' kasai' ko i'; nga' ondung otulid o kowoyo-woyoon nu om a' ko i' kobontol do kosusaan. 20 Tanak nopo di kitoilaan om poposonong i' do ginawo do tapa' dau; nga' tanak nopo di basug om a' i' momusou di tina' dau. 21 Tulun nopod basug om abagalan no di kababasug dau; nga' tulun nopo di kitoilaan om momonsoi i' dit otopot. 22 Kaanu ko nopod nosihat dot ogumu', om owonsoi ngai' nu no i pokiwawansayan nu; nga' ondung aiso' o nosihat dot aanu nu om aiso' no ot owonsoi-wonsoi nu. 23 Songkuro daa o kosonongo' ondung koboros i boros do kopunong do tontok di maso do kapabarasan diri! 24 Tulun nopod kitoilaan om tumakad i' di ralan do kumaa dot id koposion; om a' i' rumuhuk do hiri'd ralan do kumaa dot id kapatayon. 25 Raagon i' do Tuhan o walai di tulun dot asawat o ginawo; nga' intirungan i' dau o dapu' di tondu' do nopuadan. 26 Araatan i' o Tuhan di pomusarahan di tulun do kidusa; nga' asanangan i' iyau do boros dit osonong. 27 Ondung mogihum ko'd tuntung dot a' otulid o ralan do mogihum om oontok no do kosusaan o sompiiyon nu. Kada' panganu'd tusin do ponisip om otogui ko i'. 28 Tulun nopo dit osonong om momusorou po do tintod dau'd sumimbar. Nga' tulun nopo dit araat om olomus nopod sumimbar; nga' iri nopo tisimbar dau'ddi om porikot nod kosusaan. 29 Pokinongohon id Tuhan o sambayang do tulun dit osonong; nga' a' i' dau pusohon i tulun dit araat. 30 Popooropod i' do tulun o rabas dit osuwau; om poposonong do ginawo o habar dot osonong. 31 Kirongod no o tulun di mokinongou do pomisunud do tontok di kasala' iyau. 32 Ondung a' ko orohian do minsingilo, om momungou ko nod tinan nu; nga' ondung orohian ko'd sunudan do tontok di kasala' ko, om osiliu ko nod tulun di kitoilaan. 33 Tadon nopod toilaan om rumonok do Tuhan. Osiriba' nopo o ginawo nu, om suahon ko nod tulun.
1 Milo i' o tulun do minsorou di maan dau wonsoyo', nga' Kinorohingan noo o manantu' kopio'ddi. 2 Ondos nu doti' daa om koontok ngai' nopo i wonsoyon nu; nga' oilaan id Tuhan ot id suang do ginawo nu ondung nunu kopio o kapamansayan nu'ddi. 3 Pokibarakatan nod Tuhan it osorou nu'd wonsoyon nu, om owonsoi nu indo kopio iri. 4 Koinsanai di winonsoi'd Tuhan om haro ngai' i' o kootuson; om kootuson nopod tulun dot araat do natantu' mantad dau om karaagon. 5 Koinsanai'd tulun dit asawat o ginawo om karaatan no kopio'd Tuhan; a' no kopio dau iyolo' pologoson do koidu' do mantad id hukuman. 6 Tulun nopo dit otorodok dot id Kinorohingan om kaanu id koompunan. Tulun nopo dit oronok do Tuhan om koinsodu' no do mantad dit araat. 7 Ondung kohubayaan ko'd Tuhan, om pisangod nu piya nga' osiliu indo do tambalut nu. 8 Osonong nogi' dot okuri' piya ot aanu, dot otulid po o ralan do minanganu'ddi, ko' mantad dit ogumu' ot aanu do minonipu' o ralan do minanganu'ddi. 9 Milo i' o tulun do minsorou di wonsoyon dau; nga' Kinorohingan no o manantu' kopio do koposi-posion do tulun. 10 Kinorohingan i' o koonuan do pomorinta' do kuasa' dau; om iri no ot a' dau kasala-sala' do momutus. 11 Pokionuon do Tuhan do koontok i ponimbang om i ponipong dokoyu, om apatut dot otulid o kowoyo-woyoo' dokoyu do mogidagang-dagang. 12 A' i' kopio do pomorinta' milo do pologoson do haro i momonsoi dot araat; tu' kogirot nopo do pomorintaan dau om it otulid. 13 Orohian i' o pomorinta' do mokinongou dit otopot; osianan i' iyau do tulun dit otulid o koboro-boroso'. 14 Tulun nopo di kitoilaan om tumotos i' do popotood di raja'; nga' ondung tumogod i raja' om haro no doti' o hukuman do kapatayon. 15 Iri nopo kopuhawango' di raja' nga' poporikot do kosimbayanan dot id koposi-posion, dot iyo no di haun do porikot do rasam di dongmomiroun kawagu o kayu. 16 Ountung nogi' do kaanu'd pomusarahan dot atarom om toilaan, ko' mantad do kaanu do tamas om pirok. 17 Tulun nopo dit osonong om minsodu' i' dit araat; isai nopo i mumbangan-bangan dot id suang do koposi-posion dau om apasi no. 18 Kootuson nopo dot asawat o ginawo om karaagon; om kootuson no do minggayo-gayo om kapatayon. 19 Osonong nogi' dot osiriba' o ginawo om mosikin kasai' piya, ko' mantad do momit do tulun dit asawat o ginawo om kaanu di bahagi' di kakayaan diyolo'. 20 Podulon no i ponudukan do nokotuduk dot id diya', om koundar ko i'. Kotumbayaai nod Tuhan om osimbayan ko i'. 21 Tulun nopo di kitoilaan om otutunan i' dot i koiloo' dau o kotutun-tutun. Osonong-sonong o koboro-boroso' dau, nga' ogumu-gumu' no ot abayayat dau. 22 Tulun nopo di kitoilaan om apasi i' di koiloo' dau; nga' korubat nod maso do monuduk do tulun do basug. 23 Tulun nopo di milo'd momusorou om momusorou i' do tintod do moro-boros; om ogumu' pogi'ddi o monongkuyaan do boros dau. 24 Boros nopo dit alamaya' om miagal pod paha'; tu' oomis om popokoris do tinan. 25 Haro i' o ralan do sorohon daa'd tulun do kumaa dot id koposion; nga' otopot nopo kopio om kumaa i' iri dot id kapatayon. 26 Iri nopo tulun di gumadsi' om tumotos no kopio do kumaraja', tu' orohian iyau dot ayahan. 27 Tulun nopo dot araat om mogihum nopod ralan do pokoruol do tulun do suwai; boros piya dau nga' araat i', tu' iyo pod tapui di molob-ngolob. 28 Iri no tulun dot araat o popintongkop do boros do mongindaraat do tulun do suwai; iyolo' no o moningkau do kopogitatagadan om mamaraag do pogiombolutan. 29 Tulun nopo dit orongit om monipu' i' do tambalut dau, om papakaa diyolo' dot id kosusaan. 30 Antaan-taan no o tulun di mingkodom do mato dot id diya' om i mungis-ungis; tu' maso no dau do momusorou dit araat do wonsoyon dau. 31 Tulun nopo dit otulid o ginawo om opuhawangan i' do tumur dot anaru; iri nopo tobuk dau dit opurak no om iyo poddi tupi' do raja'. 32 Osonong nogi' dot alanut o ginawo, ko' mantad do kikuasa'; osonong nogi' do milo'd momusus do korohian do tinan, ko' mantad do kaala' do bandar. 33 Mongundi' o tulun do pongilo do nasip, nga' Kinorohingan noo o manantu' kopio dot isimbar diri.
1 Osonong nogi' do mangakan do taakanon di koubasanan noo do haro po o kosimbayanan, ko' mantad do moginakan do hiri'd walai di noponu' do pogisosongkiwalan. 2 Susuhuon nopo dit opintar om kaala' i' do kuasa' di tanak do tuan dau di mongintingayam; om kaanu do tungkusan dot iyo di tongotobpinai di tanak diri. 3 Tamas nopo om pirok, om tapui o maan do ponompipi'; nga' ginawo nopod tulun om Tuhan no o mongilo kopio. 4 Tulun nopo dot araat om tumanud no di ponuhuan dot angaraat, om iri goudut nga' mokinongou no do tudut. 5 Ondung mongulok-ulok kou'd tulun do mosikin, om mongindaraat kou nod Kinorohingan, i minomonsoi dau. Ondung otood kou dot osusa' o tulun do suwai, om atantu' nod ohukuman kou. 6 Kaandasan nopo di kongomolohingan om i manangaki diyolo'; om kaandasan no di tangaanak om i molohing diyolo'. 7 Tulun nopo di suahon om a' i' mongudut; nga' tulun nopo di basug om a' i' popoboros do boros di haro o komoyon. 8 Haro i' o tulun do kosorou do tusin nopo di ponisip om milo i' do momonsoi do koimayaan; om otumbayaan iyolo' do milo iri do momonsoi'd nunu nopo. 9 Ondung orohian ko do kasanangan ko'd tambalut, om ompunan no iyolo' do tontok do kasala' iyolo' dot id diya'. Tu' ondung sorohon kasai' nu i kasalaan om iri no o karaag do piombolutan. 10 Tulun nopo di kitoilaan om insan nopo iyau togodo' nga' osiliu nori do ponudukan dot id dau; nga' tulun nopo di basug om inghatus piya bobogo' nga' a' i' iyau milo'd tudukan. 11 Miagal pod tulun dit orongit di poporongou do habar, o kapatayon do rumikot dot id tulun dit araat, i tulun di moningkau nopo do kosusaan. 12 Mogo-mogot nogi' do kobontol do bohuang do maganak di natagakan do tanak dau, ko' mantad do kosolowot do tulun do basug dit agangau poo do popokito do kababasug dau. 13 Ondung somulian nu do karaaton it osonong, om a' nu nondo milo do posoliwanon o karaaton do mantad id walai nu. 14 Monimpuun nopo do pogitatagadan om miagal no do mangayas do poluyungan do waig; sombolon nogi' kopio iri dot a' po osodu' o koluyungon diri. 15 Araatan i' o Tuhan do tulun di papasala' do tulun dot aiso' o sala', om i tulun di popotopot do tulun di kisala'. 16 Aiso' i' o guna' do mangayi' do tusin do poposikul do tulun do basug; tu' aiso' i' o rongod do tulun diri. 17 Mogiinsian-sian kasai' i' i mogiambalut; om iri mogiobpinai nga' mogitulung-tulung i' do tontok do haro o kosusaan. 18 Tulun nod basug o magakun do mamajamin di tulun di mongutang. 19 Tulun nopo dit orohian do monokisongkiwal, om mogihum nod kosusaan. Ondung oburuak ko, om mogihum ko nod kopogitatagadan. 20 Tulun nopo di monipu' om a' no osimbayan; om iri tulun di goudut nga' obungou no. 21 Tanak nopo di dongkababasug o kowoyo-woyoon, om monusa' noo om popotongob do ginawo di tapa' dau. 22 Tulun nopo dit otood kasai', om osonong-sonong no o tinan. Nga' tulun nopo di tumongob nopo, om sumakit no ot osunsudan. 23 Gompomutus nopo dit a' otulid o pomumutus, om rumamit i' do tusin do ponisip; om gowoi pondo om a' owonsoi it otulid. 24 Tulun nopo di kirongod om pakayaan i' dot id toilaan; nga' tulun nopod basug om a' nopo oilaan o korikoton. 25 Tanak nopod basug om monusa' nod tapa' dau, om popotongob do tina' dau. 26 A' i' apatut do momorugi' do tulun dit aiso' o sala', om a' i' otulid do momohukum do tulun dit osonong. 27 Tulun nopo di haro o kotontuan do ginawo om a' i' ogumu' o boros. Tulun nopo di kitoilaan, om a' i' ohiyo. 28 Iri piya tulun do basug nga' aandasan id tulun do kitoilaan om kirongod, ondung a' iyau mungkomi om a' minghiyo.
1 Tulun nopo dit a' milo'd monokiambalut do wokon, om dau nod tinan o sorohon; a' nopo iyau milo do tumumboyo' dit osorou do tulun do suwai. 2 Tulun nopo di basug om mada' i' do tudukan; tu' korohian nopo dau om pointalang no di dau'd toilaan. 3 Miwoyo-woyo' nopo o dusa om tingayam; noindaraat nopo om atantu' no dot untotorion poo. 4 Boros nopod tulun om milo i' do sumiliu'd tudan do toilaan; i miagal do rahat karalom, om oliting do miagal do bawang di lumuyung dot id piro-piro o kinoiyonon. 5 A' i' osonong do mogobi' do tulun di kisala', om kasala' i' dot a' momonsoi dit otulid dot id tulun dit aiso' o sala'. 6 Tumimpuun nopo i tulun do basug do mintogod, om mokibobog no iyau. 7 Soira' nopod mimboros o tulun do basug om alawaan no iyau di boros dau; om iri no o mamaraag dau. 8 Iri nopo boros do mongindaraat do wokon om korohian do tulun do mokinongou; om kasanangan kopio'd tulun. 9 Tulun nopo dot akaul om miagal pod karaato' di tulun dit orohian do mingraag. 10 Tuhan nopo om iyo po di walai'd akawas dit ogirot kopio; om hiri no o ngoyon iyono' do tulun dit otulid o ginawo om apasi i' iyolo'. 11 Nga' tulun nopod kaya' om sumondiu i' do kakayaan dau do mongintirung dau, om sorohon dau i kakayaan dau'ddi do miagal di tolig dit akawas om ogirot di posorili' do bandar. 12 Tulun nopod asawat o ginawo om koinsiriba' indo; nga' tulun nopod osiriba' o ginawo om suahon i'. 13 Mokinongou pod gulu om sumimbar nogi'. Tu' ondung amu' nga' okon nopo ko' basug ko nga' mongindaraat ko pod wokon. 14 Haro nopo o korohiano' nu'd masi do tontok di kitoruol ko om kokoris ko no; nga' ondung aiso' o korohian nu do miagal diri om aiso' no o kosunsudon nu. 15 Tulun nopo di kirongod om sianu kasai' i' do toilaan; tulun nopo di kitoilaan om orohian kasai' i' do tudukan. 16 Ondung orohian ko'd sumolowot do tulun dit agayo o pangkat, om puhawangan po iyau'd gulu, om osonong ko indo do mongoi solowot dau. 17 Tulun nopo dit id gulu do moro-boros dot id pogibisaraan om kosoruan nod pointopot daa o karangahan, nga' oilaan nopo kopio om uhoton iyau di tulun di ponokibisara' dau. 18 Ondung haro o pitagadan dot id pialatan do duwo o tulun dit okoris goduwo, om panalasai nopoddi nga' maan undio'. 19 Ponulung no do tobpinai nu, om iyau nga' momogompi' indo diya' do miagal do tolig do bandar dit ogirot; nga' ondung tumogod ko dau, om a' no iyau monulung diya'. 20 Koinsanai di boros do poboroson nu, om opurimanan ngai' nu indo o kootuson diri. 21 Tu' iri nopo poboroson nu om milo i' do mamasi om milo nogi' do mamatai diya'. Om iya' ngai' no o mamabo do kootuson diri. 22 Ondung kaanu ko'd tondu' do maan nu'd sawo, om nakaanu ko no dit osonong kopio; iti no o popointalang dot osonong o Tuhan dot id diya'. 23 Tontok nopod mokianu o tulun do mosikin om osonong i' o boros dau do mokianu; nga' tontok nopod sumimbar o tulun do kaya' om apatog tomod iyau. 24 Haro i' o tambalut dit a' otorodok do mambalut, nga' haro i' o tambalut dit osonong po ko' i tobpinai kopio.
1 Osonong nogi' do mosikin dot otulid po o ginawo, ko' mantad do tulun do basug di goudut. 2 Aparu' piya dot aiso' o toila-ilaan nga' a' i' osonong, tulun nopo dit ohurolo om oontok indo do kosusaan. 3 Iri i' i kababasug do tulun o karaag dau, nga' Tuhan i' o pasalaon dau. 4 Tulun nopod kaya' om kaanu nopo do tambalut do wagu; nga' tulun nod mosikin om atagakan i' di tambalut piya mantad dau. 5 Ondung mongudut ko dot id pibisaraan, om atantu' no dot ohukuman ko om aiso' no o poggiduon nu. 6 Mumbal ngai' nopo o tulun do monokiambalut do tulun dit angagayo o pangkat; om monokiambalut do tulun dit obintahak. 7 Tulun nopod mosikin om a' i' poguna-gunaon do tobpinai piya dau, om okon-okon pondo i tambalut dau nga' a' kopio popoguna-guna' dau. Tumotos piya daa kopio iyau, nga' a' i' iyau kagayat diyolo'. 8 Ondung osianan ko'd tinan nu om tumotos ko i' do minsingilo; om ondung osorou nu i nopinsingilaan nu'ddi om osonong no o kotutukon nu. 9 Tulun nopo di mongudut do hiri'd pogibisaraan om a' no milo'd mogidu' do mantad id hukuman; atantu' no do patayon iyau. 10 A' i' osorupai do haro o kakayaan do tulun do basug, om turipon nga' a' i' apatut do momorinta' do tulun dit ongkipangkat. 11 Tulun nopo di kirongod om kopusus i' do kototogod dau. A' i' dau pusohon no o kasalaan do tulun dot id dau om iri no o kapamarayahan do tulun dau. 12 Kototogod nopod raja' om miagal pod garom do singa; nga' kosonongo' nopo dau om miagal po di rasam dit andad-andadon no. 13 Tanak nopod basug om kapatai i' di tapa' dau. Om tondu' no di mogod-togod nopod sawo dau om miagal po di waig dit a' tumingkod do muru-turu'. 14 Walai nopo om dapu', om otungkusan i' do mantad id molohing; nga' tondu' nopo di kirongod do maan do sawo om Tuhan noo o milo do manahak. 15 Kumaul nopo, dot orohian ko no! Om modop nopo, nga' louson ko no moti'. 16 Umboyoon no kopio o ponuhuan do Kinorohingan om apasi ko i'; tu' ondung a' nu podulon iri, om apatai ko no. 17 Nunu nopo i patahakon nu dot id tulun do mosikin om miagal no do Tuhan o pooloson nu; om bayaran ko indo kawagu'd Tuhan. 18 Tudukan no o tangaanak nu dit ongokoro' po iyolo'; tu' ondung amu' nga' iyo nod monguhup ko diyolo' do mamatai do tinan diyolo'. 19 Pologoson nopo o tulun dit obintogod do kopuriman do kootuson di kobintogodo' dau. Tu' ondung mongoi ko uhup dau, om monubuan ko no. 20 Ondung orohian ko'd rumamit do nosihat, om orohian ko'd minsingilo; om osiliu ko nod tulun di kitoilaan. 21 Tulun nopo om milo nod minsorou di wonsoyon dau, nga' iri nopondo it owonsoi kopio om iri no i korohian do Tuhan. 22 Kowoyo-woyoon nopod tulun dit antangan kopio, om iri no i kotorodoko' dau. Osonong nogi'd mosikin ko' goudut. 23 Umboyo' nod Tuhan, om osimbayan i' o koposi-posion nu; om osonong indo o ginawo nu om a' ko oontok do kosusaan. 24 Haro i' o tulun dot adalaan no kopio o kakakaul; gisom do tukono' id posuang piya'd takanon dot id kabang dau. 25 Hukuman no i tulun dit asawat o ginawo, om kaanu i' do toilaan i tulun dit aiso' o noila-ilaan. Ondung kirongod ko om kaanu ko i' do toilaan do tontok di tudukan ko. 26 Iri nopo tanak di monginggorit do tapa' dau om i monguyung do tina' dau do mantad id walai om araat no kopio om kointingayam. 27 Oi tanak ku, ondung tumingkod ko do minsingilo, om a' no alaid dot olihuan nu i nongoilaan nu dit id gulu. 28 Iri nopo tulun di sumiliu'd sasi' di mongudut, om a' no momusou dit otulid; tulun nopo dit araat om orohian no dit angaraat. 29 Tulun nopo di basug dit asawat o ginawo, om atantu' no dot obobog.
1 Popobolotok noo om paparaat do kowoyo-woyoon o tiinumon di kaawuk. Magauk ko nopo om basug ko no kopio koulun. 2 Poddosi nod raja' dit otogod do miagal do moddosi ko'd singa di marom-garom. Tulun nopo di moningkau do kototogod do raja' om momungou nod tinan dau. 3 Koilo nod monimpuun do pogitatagadan o tulun do basug; om osonong nogi' do minsodu' kou do mantad id diyolo'. 4 Gompongumo nopo di tukono' do mamaradu do tumo dau do tontok di dongkopomoroduan; om aiso' no o tomoton do tontok di mogiompongomot.1|65|HK66C| Mamaradu do tumo|20.4 5 Pomusarahan nopod tulun nga' miagal do waig dot id torobong dit aralom; nga' tulun nopo di kitoilaan om kotimbauk iddi. 6 Ogumu' i' o tulun do magakun dot otorodok iyau, nga' ingkuri' i' kopio do kosolowot di tulun dit otorodok kopio. 7 Ountung no o tangaanak di kitapa' dit otulid o kowoyo-woyoon, om i momonsoi do korohian do Kinorohingan. 8 Tontok nopod momutus i raja', om sorisidon ngai' i' dau i nongkoboros, om imbulayan ngai' dau i karaato'. 9 Isai no o milo do moro-boros dot, “Olidang o ginawo ku, om nokoidu' oku no do mantad id dusa?” ka. 10 Araatan o Tuhan do tulun dit a' koontok o poninimbang om poninipong. 11 Oilaan i' o karaato' om kosonongo' do tanak do mantad id wowonsoyon dau; oilaan i' dokoyu ondung osonong om otulid o kowoyo-woyoon dau dot i wonsoyon dau o koila-ilaan. 12 Nonuan toko'd Tuhan do mato do maan do pogontong, om nonuan toko'd tolingo do maan do pokinongou. 13 Ondung monorimo-rimo ko'd modop om rumutum ko no. Ondung aparu' ko'd kumaraja' om osima' ko no do taakanon. 14 Mimboros nopo o tulun di momoli dot angamahal o gatang do bobolion. Nga' oboli nopondo kopio diyolo' om oondos i' dot iri-iri o gatang do pinomoli dau. 15 Boros nopo di haro o komoyon, om agayo i' o gatang ko' mantad do tamas om i pongillumis. 16 Tulun nopo dit orohian do mamajamin do tulun di mongutang dot a' dau otutunan i tulun, om mositi' no dot onuon i dapu' dau do maan do pamajamin di batos dau. 17 Iri nopo dapu' do naanu do minonipu' o kinoonu-onuan om osonong i' daa dot opurimanan dokoyu di timpuun i'; nga' id tohuri nondo om miagal pondo iri di togis dot id suang do kabang dokoyu. 18 Pokianu nod nosihat dot osonong dot a' ko po kopoboros dit apatut nu'd wonsoyon; kada' ongoi sangod dot a' ko po kopomusorou kopio dit apatut nu'd wonsoyon. 19 Tulun nopo dit obimboros om a' no kopio milo'd poopi' dit a' apatut do popimboroson; kada' no kopio ongoi ponokirolot-rolot do tulun dit obimboros kopio. 20 Ondung momopol ko do molohing nu, om miagal nondo di lampung dit opisok do dongotuong o koposi-posion nu tu' opupusan no. 21 Kakayaan nopo dit oruhai kopio do minanganu, om a' i' osonong no o kootuson. 22 Kada' pimpori-pori do monuli' do karaaton. Suwai ko' pogondos nopod Tuhan do manalasai'ddi. 23 Araatan o Tuhan do tulun dit a' koontok o poninimbang om pagagadang. 24 Natantu' mantad nod Tuhan o kowoyo-woyoo' do koposi-posion do tulun do hiti'd pomogunan; gowoi poddi om a' o tulun kosuhut do kowoyo-woyoo' do koposi-posion dau. 25 Momusorou no kopio dot a' ko po kapamatos do manahak do porsombahan dot id Kinorohingan. Tu' monosol ko i' dotindo dot id tohuri. 26 Raja' nopo di kitoilaan om koilo i' ondung isai i kasala'; om hukuman dau i nakasala', om a' no dau ompunan. 27 Noonuan toko' nod Tuhan do pomusarahan om kopurimanan do ginawo, om oilaan toko' indo ot id suang do ginawo toko'. 28 Solinaid nopo dot otulid om kikosianan om otorodok i raja' do momorinta', om potilombus po o pomorintaan dau. 29 Iri nopo tulun dit omulok po om i kokoriso' dau o koimayaan, om iri no i tulun di molohing no om i tobuk dau do nongkopurak no o koponuahan. 30 Haro i' do kiguna' it ongoumbalan di koinggorit, om simbanan indo'd tulun i kowoyo-woyoon dau di kasala'.
1 Poingkuro nopo o Tuhan do popotunud do luyungon do bawang, om miagal no iyau'ddi do popotunud do pomusarahan do raja'. 2 Osorou nu doti' daa do kopunong ngai' nopo o wonsoyon nu, nga' soroho' no dot oilaan id Tuhan o korohian kopio do ginawo nu. 3 Orohian nogi' o Tuhan do wowonsoyon dit otopot om otulid, mantad ko' onuan iyau do porsombahan. 4 Tulun nopo dit araat om kidusa no tu' porintaon iyau di kasawato' do ginawo om i kobinggoyo-goyoo' dau. 5 Momusorou no kopio dit apatut nu'd wonsoyon om ogumu' i' ot aanu nu; ondung ahago-hago kopio ko om a' ko nopondo insan dot osukupan. 6 Kakayaan nopo dit a' otulid o pinanganu, om oruhai do tumagak, om papakaa iri dot id kapatayon. 7 Tulun nopo dit araat om atantu' no dot oinggorit di kororongit dau; tu' mada' i' iyau do toturan. 8 Tulun nopo di kisala' om sumusui no do ralan di poimpalid; nga' tulun nopo dit otulid o ginawo om momonsoi i' dit osonong. 9 Osonong nogi' do miyon do hiri'd sakai'd taap do walai, ko' mantad do poinsugku' i kusai di sawo dau di mintogod nopo. 10 Tulun nopo dit araat om orohian nopo do momonsoi dit araat; om aiso' o kosianan dau'd tulun do suwai. 11 Soira' do porotuan do hukuman i tulun dot asawat o ginawo om iri piya tulun do basug no kopio nga' otudukan i'. Tulun nopo di kirongod om kaanu id toilaan do mantad id ponudukan di pinotuduk dot id dau. 12 Kinorohingan nopo it otulid kopio om koilo i' dit ongosiliu dot id suang do walai di tulun dit araat; om pohudsuon i' dau iyolo' do gisom dot apatai. 13 Ondung a' ko mokinongou do tihad do tulun do mosikin do mokitulung, om diya'ndo do lolohou do mokitulung nga' a' no pokinongohon. 14 Ondung haro o tulun dot otogod diya', om puhawangan no iyau, nga' a' i' ungkomian do papatahak, om atanus-tanus indo o kototogod dau. 15 Tontok dot owonsoi it otulid om ongotood i' o tulun dit osonong; nga' ongooris indo i tulun dot araat. 16 Tulun nopo dit a' tumanud do kowoyo-woyoo' do koposi-posion di tulun dot osonong; om atantu' no do kakaa dot id pomogunan do tulun do napatai. 17 Iri nopo tulun dit orohian do minsimbayan om mosikin kasai' i'; om i tulun dit orohian nopo do moginakan nga' a' i' osiliu do tulun do kaya'. 18 Iri i' om iri tulun dot araat di mumbal daa do poporikot do koinggoritan dot id tulun dot osonong ot orikatan do koinggoritan diri. 19 Osonong nogi' do mongoi iyon do hilo'd tana' dot alasu' om it oingou, ko' mantad do sumugku' i kusai di sawo dau dit obinsongkiwal om obintogod. 20 Tulun nopo di kirongod om kaya' kasai' i' om osimbayan; nga' tulun nopo di basug om oruhai do kaayi' di tusin di kararamit dau. 21 Isai nopo o tulun di tumotos do momonsoi dit otulid om it osonong, om kaanu no do kosimbayanan, om kosuahan om tumur dit anaru. 22 Boyoon nopod soudor di kiakal om kosolod i' do bandar di tamangan do soudor dit ongosiou, om karaag iyau di tolig di ponokosondihon diyolo'. 23 Ondung mada' ko'd kohompit dot id pigulatan, om antaan-taan no o koboro-boroso' nu. 24 Tulun nopo dit oondos om asawat o ginawo, om orohian nopo do mongindaraat om momusorou dot oilo iyau. 25 Haro daa o korohian di gungkaul, nga' tukono' indo iyau do kumaraja'; iri no o kobungou dau dot adalaan dot oinggorit; 26 monongodou-ngodou nopo iyau do minsorou di korohian dau. Nga' tulun nopo di mumboyo' do Kinorohingan, om manahak i' iyau do mikuwo'd ginawo dit opuhawang. 27 Araatan i' o Tuhan do porsombahan do tulun dit araat, om okon-okon po dot araat o kapatahakan diri. 28 Iri nopo i poboroson di tulun di goudut om a' i' milo do ponongkuyaanan, nga' boros nopo di tulun di koilo kopio do hal diri, om milo i' do ponongkuyaanan. 29 Tulun nopo dit otulid o ginawo om haro i' o kotontuan dot id suang do ginawo dau, nga' tulun nopo dit araat om minog pod minsorupai-rupai. 30 Ondung saapon ko'd Tuhan, om aiso' no o milo do monulung diya'; aiso' i' o guna' di kopintaro', om kapandayo' om koiloo' nu. 31 Mulong pod haro o kuda' di don sumasangod dot id pisangadan, nga' Tuhan no o milo'd manahak do kamanangan.
1 Agayo nogi' o gatang do ngaran dot osonong, ko' mantad do kakayaan. Osonong nogi' kopio do kosianan do tulun ko' onuan do pirok om tamas. 2 Haro i' o kopiagalan do tulun do kaya' om tulun do mosikin: iri no tu' Tuhan i' o minomonsoi goduwo diyolo'. 3 Tulun nopo di kitoilaan om mongilag i' do kosusaan dit okito dau do rumikot, nga' tulun nopo dit a' milo'd momusorou om mokilogos nopo dot oontok do kosusaan, om monosol nogi' daa'ndo dot id tohuri. 4 Umboyo' nod Tuhan, om kumosiriba' no o ginawo, om kaanu ko i' do kakayaan om kosuahan om tumur dot anaru. 5 Ondung oupus ko'd ginawo nu om insodu' no do mantad id tulun dot araat; tu' iyolo' nopo om atantu' nod kosulung do lawa'. 6 Tudukan no o tanak do kowoyo-woyoo' do koposi-posion di korohian do Tuhan, om osorou indo dau kasai' iri do solinaid dau do poimpasi. 7 Tulun nopo do mosikin om porintaon di tulun do kaya'. Ondung molos ko'd tusin om osiliu ko nod turipon do tulun di nalasan nu. 8 Ondung monuduk ko dit a' otulid, om oontok ko nod kosusaan; om id tohuri nondo om atagakan ko nondod kuasa' nu. 9 Kumopuhawang no om piduwaan nod taakanon nu i tulun do mosikin, om abarakatan ko indo'd Tuhan. 10 Uyungon no o tulun dit asawat o ginawo, om aiso' i' o pogitatagadan, om pogisosongkiwalan om aiso' o mogiindara-raat. 11 Ondung otulid o ginawo nu om osonong o koboro-boroso' nu, om osiliu ko nondod tambalut do raja'. 12 Gompion i' kopio'd Tuhan o katapatan; om imbulayan i' dau i kouduto' di tulun dot araat. 13 Tulun nopo dit akaul om monginduwalai nopo do ponguwaan nopo dau om: ooris dot ongoyon iyau tabpaai do singa do hilo'd tanga'd ralan. 14 Iri nopo boros do tondu' di sundal do mamayayat om lawa' i', tu' popohudsu iri do tulun di katagadan do Tuhan. 15 Koubasanan i' do tangaanak do mingwonsoi dit a' apatut do wonsoyon, nga' pikoton nopo iyolo' do monuduk om osimbanan indo o kowoyo-woyoon diyolo'. 16 Ondung momuhawang kou'd tulun do kaya', om monginggorit nogi' do tulun do mosikin do mokikakaya' kou, om osiliu kou nogindo'd tulun do mosikin dot id tohuri.
Tolu Nohopod o Nosihat do Mantad id Tulun dit Ongkitoilaan
17 Pokinongou no, om tudukan ku i' iya' di nosihat di pinoboros di tulun dit ongkitoilaan. Pinsingilaan no i ponudukan diyolo'ddi, 18 om osonong indo o ginawo nu dot osorou nu om aapal nu'ri do pointikid do maso. 19 Orohian oku no kopio do mogondos ko'd Tuhan; om iti no o koposunudan ku diya' diti ponudukan diti do dinondo. 20 Notulis ku no o tolu nohopod o nosihat do maan ku diya' --- om koinsanai'dti nga' kotuduk ngai' nopo om osonong. 21 Om iti no o monuduk diya' dit otopot. Om soira' nopondo do suhuon ko'd monorisid kopio'dti, om koontok indo ot isimbar nu.
--- 1 ---
22 Kada' ahawai i tulun do mosikin do mulong piya daa dot aahawan nu iyau; kada' ulak-ulakai i tulun dit aiso' o pokukurayan do hilo'd pogibisaraan. 23 Tu' obian i' iyolo'd Tuhan om rolosion indo dau o tulun di momorolosi diyolo'.
--- 2 ---
24 Kada' ponokiambalut do tulun dit obintogod. 25 Tu' katanud ko dotindo do kowoyo-woyoon dau, om a' nu nondo milo'd tingkadan i kowoyo-woyoon nu'ddi.
--- 3 ---
26 Kada' pamatos do mamajamin do tulun do suwai di mongutang. 27 Tu' ondung a' ko kabayar diri nga' toodopon nu piya nga' ngoyon indo ahawo'.
--- 4 ---
28 Kada' kopio poundoliho' i wolit do tana' di tinantu' di taki-aki nu di gulu po.
--- 5 ---
29 Nokoumbal ko no do nokokito'd tulun dit osonong o pangangaraja'? Tulun nopo do miagal diri om pakarajaon indo dot id walai do raja', om okon i' ko' id walai do tulun toomod.
--- 6 ---
1 Tontok di tumorungak ko'd makan do tulun di kipangkat, om soro-sorohon no ondung isai iyau. 2 Ondung agayo daa o nakan nu om kada' pihubayaai i kogoyoo' do nakan nu. 3 Om kada' kasagau di taakanon dit angawasiu di posurungon dau, tu' mumbal i' doti' daa iyau do popohudsu diya'.
--- 7 ---
4 Kada' pingudipon tomod do mogihum do kakayaan. 5 Tu' oruhai moti' kopio do tumagak i kakayaan nu'ddi, dot iyo poddi minomualad, om tumulud do hilo'd tawan do miagal do kondiu.
--- 8 ---
6 Kada' ongoi torungak do makan do tulun dit okolit. Om kada' korohiai di taakanon dit angawasiu do posurungon dau. 7 Tu' momoros dotindo iyau do poingkaa, “Akan no, om anu-anu po,” ka, nga' a' i' iyo kopio'ddi ot id suang do ginawo dau. Tu' oomis piya o boros dau nga' suwai i' ot id suang do ginawo dau. 8 Tu' ilobon nu indo kawagu i notolon nu, om i boros nu do pinopoinggayo-gayo dau nga' aiso' i' o guna'.
--- 9 ---
9 Kada' ponosihat do tulun do basug, tu' a' i' dau pusohon i nosihat nu.
--- 10 ---
10 Kada' nogi' kopio poundaliu di wolit do tana' di natantu' mantad di gulu po, om kada' pagahau do tana' do tangaanak dit aiso' o molohing. 11 Tu' Tuhan nopo, i mogobi' diyolo', om okoris i'. Om obian indo dau iyolo' om saapon ko iya'.
--- 11 ---
12 Mokinongou no kopio do ponudukan di monunuduk diya', om tumotos nod minsingilo.
--- 12 ---
13 Kada' pikoduwo ginawo do momikot do tanak do maan do ponuduk dau. Tu' a' i' iri kapatai dau. 14 Suwai ko' kapasi nogi' di tanak iri.
--- 13 ---
15 Oi tanak ku, ondung kitoilaan ko, om osonong no kopio o ginawo ku. 16 Oondos oku no kopio diya', ondung korongou oku diya' dot oilo do mimboros.
--- 14 ---
17 Kada' osol do tulun di kidusa. Umboyo' kasai' nod Tuhan. 18 Tu' ondung iyo ko'ddi, om atantu' no dot osonong ot id dosunsudan do koposi-posion nu, om a' atagak i soro-sorohon nu.
--- 15 ---
19 Pokinongou no, oi tanak ku! Sumiliu nod tulun di kitoilaan. Porolomon no kopio o pomusorou nu'd pasal do kowoyo-woyoo' do koposi-posion nu. 20 Kada' ongoi ponokirolot-rolot do tulun di mogiginum om i tulun dit ongodoot do taakanon. 21 Tu' tulun nopo di mogiginum om i godoot om osiliu nondod mosikin. Ondung modop noo om makan o karaja' nu om a' no alaid om gansing no o posokoton nu.
--- 16 ---
22 Umboyo' nod nosihat do tapa' nu! Tu' ondung a' daa iyau hino om a' ko i' daa iya' hino do hiti'd pomogunan. Om pointalangon no do momusou kopio ko di tina' nu do molohing iyau. 23 Pomoli no dot Oturan do Tuhan, om toilaan, om ponudukan, om pomusarahan dit atarom. Om kada' nogi' kopio umbalai do papadagang iti, tu' iti nopo om agayo no kopio o gatang. 24 Otood no kopio i tapa' ondung oronok do Kinorohingan i tanak dau; om oondos iyau do kokito di tanak dau do kitoilaan. 25 Maha' daa om oondos diya' i tapa' nu; maha' daa om olumaag i tondu' di minogkosusu diya'.
--- 17 ---
26 Antaan-taan no kopio, oi tanak ku, om omit nod kowoyo-woyoon ku! 27 Tu' tongoondu' nopo di sundal om i tongoondu' dit angaraat o kowoyo-woyoon om lawa' i' di momurunsut. 28 Miagal po iyolo' di tulun do manakau do magawang diya' om ogumu' no o tongokusai do nakapagampahu' do nobungou diyolo'.
--- 18 ---
29-30 Koilo ko i' ondung nunu ot osiliu dot id tulun dit adalaan kopio do monginum do waig dot anggur, om i mumbal do monginum do tiinumon di kaawuk? Tulun nopo dot iyo'ddi om oinggorit no om osusa'. Mintogod nopondo iyau om mimboros do manangkaraatan. Aragang poo o mato dau om notongkop do suhat o tinan dau, om milo i' daa dau dot ilagon iri. 31 Kada' pologoso' i tiinumon do kaawuk do mamayayat diya', do mulong piya do kabayayat tomod o kokitanan diri do hiri'd sangkir, om osonong daa do tiuson. 32 Nga' kosuabon nopondo om iyo pod tininduk do tulanut di kipaliu ot opurimanan nu. 33 Om ohour nondo ot okito nu, om obolingot o pomusorou nu om a' oila-ilaan o koboro-boroso' nu. 34 Miagal ko pondo di tulun do hilo'd tanga'd tumbak do rahat; tu' oruol nopo o tulu nu om mikorobibi' ko. 35 Om moro-boros ko nondo do poingkaa, “Binobog oku kala' do tulun om tinompilingan oku, nga' aiso' i' o tosorou ku ondung poingkuro kopio o nosiliu. Odoi, siodop oku no kopio! Mongoi-ongoi po pama'dti poginum!” ka.
--- 19 ---
1 Kada' osol do tulun dit angaraat om kada' ponokiambalut diyolo'. 2 Tu' sorohon nopo diyolo' om kororongit noo, om iri no it araat o poboroson diyolo'.
--- 20 ---
3 Kogiro-girot nopo do pisompiiyanan om toilaan om i kopisuhut. 4 Hinonggo nopo o haro o toilaan, om haro no o bilik di noponu' do konunu-nunuan dit angagayo o gatang om olumis.
--- 21 ---
5 Koundar nogi' i tulun do kitoilaan ko' mantad di tulun dot okoris; kiguna' nogi' o toilaan ko' kinoris. 6 Tu' ondung mongoi toko' sangod om mositi' nod haro i nosorou mantad do wonsoyon. Om ogumu-gumu' o nosihat dot aanu nga' soro-sorohon nod kamanang.
--- 22 ---
7 Toilaan nopo om adalaan i' karalom do bagi' di tulun do basug. Aiso' i' o milo dau'd poboroson do tontok do mogiboro-boros do hal dit angapangkal.
--- 23 ---
8 Ondung karaaton nopo o sorohon nu do maan nu wonsoyo' om roitan ko nod tulun di mamagangau noo. 9 Nunu nopo i pinsarahan do tulun do basug om dusa noo. Tulun nopo di mongindaraat nopod tulun do suwai om a' no kasanangan dot isai nopo o tulun.
--- 24 ---
10 Ondung oluhoi ko'd tontok do haro o kagangahan, om oluhoi ko no kopio.
--- 25 ---
11 Kada' no pikoduwo ginawo do mamasi do tulun di hukuman do kapatayon dot a' otulid o kopomohukuman. 12 Boros ka nu doti' daa om, “Okon i' ko' doho' do tonggungan diti,” ka. Nga' oilaan id Kinorohingan iri om maan ko indo dau butusai do miontok di sorohon nu. Piantangan i' dau o koposi-posion nu om somulian ko indo dau do miontok di nowonsoi nu.
--- 26 ---
13 Oi tanak ku, pangakan nod paha', tu' iri nopo om osonong i'. Om poingkuro nopo o koomiso' di paha' do mantad hiri'd tulu do pinuwalai do potiukan dot akanon nu, 14 om iyo nogiddi o toilaan tu' osonong kopio do bagi' diya'. Ondung kitoilaan ko om osonong no ot id dosunsudan nu.
--- 27 ---
15 Kada' omit di tulun dot araat di mogiupakat do mongoi panakau do dapu' om mongoi ponoruang do walai di tulun dot otulid o ginawo. 16 Tu' asaru' piya dot aratu' o tulun dit otulid o ginawo nga' kotungag i' iyau kawagu. Nga' tulun nopo dit araat om apatai no di kosusaan.
--- 28 ---
17 Kada' kotood dot oontok do kosusaan o pisangod nu, om kada' koirak do tontok dot oinggorit iyau. 18 Tu' okito id Tuhan i winonsoi nu, om a' i' iyau orohian do miagal diri; om a' indo dau hukuman i pisangod nu'ddi.
--- 29 ---
19 Kada' pologoso' do katangkabo diya' i tulun dot angaraat, kada' osol diyolo'. 20 Tu' aiso' i' o pagandasan di tulun dot araat om aiso' o kosunsudon diyolo'.
--- 30 ---
21 Oi tanak ku, koronok nod Tuhan, om momusou nod raja'. Kada' ongoi ponokiambalut di tulun di sumaap diyolo'. 22 Tulun nopod miagal diri om a' i' alaid om matai no. Tu' okon i' ko' agaan-gaan o kosusaan do porikoton do Kinorohingan ko' porikoton po di raja'.
Piro-Piro Kawagu o Nosihat
23 Pinopoboros nogi' i tulun dit ongkitoilaan do nosihat do poingkaa: Ondung manampaping o gompomutus, om kasala' no iyau. 24 Ondung potopoton dau o tulun di kisala' om papalan no iyau om karaatan iyau do koinsanai'd tulun. 25 Nga' ondung momohukum i gompomutus do tulun di kisala' om abarakatan no iyau om kasanangan iyau'd tulun dot ogumu'. 26 Iri no tisimbar dit otopot o koilaan dot ogirot kopio o piombolutan. 27 Kada' po panansawo dot a' nu po kosodia' o tumo nu, om aiso' po o pogihuman nu do kaakan-akanan. 28 Kada' siliu do sasi' do papasala'd tulun do suwai ondung aiso' o poboroson nu dit otopot do kapasalaan nu dau, om kada' pongudut do pasal dau. 29 Kada' pomoros do poingkaa, “Poingkuro nopo i winonsoi dau dot id doho' om miagal noddi o wonsoyon ku dot id dau! Sumuli' oku no dau!” ka. 30 Nokoumbal oku do nakawaya' do tumo om kabun dot anggur do tulun di gungkaul om basug. 31 Nokito ku nopod hiri om rugi poo om sakot. Om iri pagar nga' naraag no. 32 Om iti no o nokotuduk doho' do mantad di nokito ku'ddi: 33 Ondung mintudu' do modop dot ongoruhai, om poirikau do momigapus do mundorong-dorong dot ongoruhai, 34 om sigog indod rumikot o komosikino' do miagal pod tulun do manakau di kirapo-rapo.
Piro-Piro o Nosihat di Suliman
1 Iti no o piro-piro kawagu o nosihat di Suliman do sinalin di piro-piro o tulun do hiri'd walai di Hiskia do don raja'; i Hiskia, i raja' do Yohuda. 2 Poinggoyoon toko' o Kinorohingan dot i pinolisok dau o kopoinggayaan; om pusohon toko' o raja' dot i patarangon dau o kopomusahan. 3 A' i' oilaan ondung nunu o sorohon do raja', tu' pomusarahan nopo dau om aralom po ko' pomusarahan toko'; iyo pod tawan kasawat om iyo do rahat karalom o pomusarahan dau. 4 Iduwo' pogi' i nokorolot di pirok, om milo indo iri do tantanon do tulun di mananantan. 5 Uyungo' ngai' pogi' i gomponosihat dit araat do mantad id walai do raja', om ogirot i' o pomorintaan, dot it otulid o kogirot. 6 Tontok do sumolowot ko'd raja' om kumosiriba' no o ginawo; om kada' pinsorupai-rupai do tulun di kipangkat dot asawat. 7 Tu' osonong nogi' do suhuon do mongoi'd hiri'd koiyonon dit ongkipangkat, ko' mantad do suhuon do patahak di niyonon nu dot id tulun di kipangkat dot asawat ko' diya'd pangkat. 8 Kada' kolomus do poporikot do hal nu do hiri'd pomisaraan; tu' ondung oilaan do kasala' ko om nunu po o milo nu'd wonsoyon? 9 Ondung haro o pigulatan dot id pialatan dokoyu di tambalut nu om salasayon nopori dot id pialatan dokoyu goduwo, nga' kada' pointalango' i lisok-lisokon do tulun do suwai. 10 Tu' koilo ngai' i' moti'ndo o tulun dot a' ko milo'd poopi' do boros dit a' apatut do popinsunudon, om araag nondo o ngaran nu do gisom dot alaid. 11 Boros nopo di poboroson do koontok o maso do kapabarasan, om iyo po di sombulugu' o tamas di poinsuang do piring do pirok. 12 Iri nopo pomisunud di poboroson do tulun di kitoilaan dot id tulun dit orohian do mokinongou, om iyo pod pondulung do tamas om iyo di pongillumis di tamas do nosompipi' do winonsoi. 13 Susuhuon nopo dit otorodok, om poposonong i' do ginawo'd tulun di minonuhu' dau, iyo po iyau di waig dot osogit dot inumon di tulun do mongomot do hilo'd dumo. 14 Batos nopo dit a' bayaanon, om iyo no di haun om ribut dit a' poposondot do rasam. 15 Iri nopo tulun dit alanut o ginawo om osonong o koboro-boroso' om kabayayat i' do tulun di kikuasa'. 16 Kada' padalaai kopio o pangakan do paha'; tu' kosumo i' moti' diya' iri, om koilob ko nondo. 17 Kada' kasaru' kopio do mongoi songkoduwo do hiri'd songkoduwo nu, tu' apaasan dotindo iyau om rumaatan nondo diya'. 18 Iri nopo boros do ponondos dit a' otopot om kapatai i', do miagal do gayang, om bobobog, om pana' dit atarom. 19 Sumondiu nopod tulun dit a' milo do ponongkuyaanan do maso'd kikosusaan, om miagal pod mongogop di muud-uud no o nipon, om miagal do mamanau di kimpo' o gakod. 20 Tulun nopo di modsinding do tulun di tumongob o podsindingan, om miagal nod mongidu' do rasuk dau do tontok dit osogit kopio, om miagal do potuntug do suka' dot id suhat dau. 21 Ondung louson i pisangod nu, om paakanon no iyau; om ondung tuuhan iyau, om poinumon no. 22 Tu' iyo noddi o pongintingayam nu dau om somulian ko indo'd Tuhan. 23 Atantu' nod poporikot do katagadan i mimboros do mongindaraat do wokon; dot iyo di tongus do mantad id utara tu' poporikot do rasam. 24 Osonong nogi' do miyon do hiri'd sakai'd taap do walai, ko' mantad do sumugku' i kusai di sawo dau dit obintogod dau. 25 Korongou nopod habar dot osonong do mantad id pomogunan dit osodu', om miagal nod monginum do waig dit osogit do tontok do tuuhan. 26 Tulun nopo dit osonong do monokiwoyo' do tulun dit araat, om miagal nod tudan do waig dit olobou ko' torobong di nososomu'. 27 A' i' osonong do padalaan o pangakan do paha', om iyo nogiddi tu' a' i' osonong dot adalaan do popimboros do pamarayou do tinan nu. 28 Ondung a' ko kopusus do korohian do tinan nu om miagal ko nod bandar di nahaba' o tolig di pogintirung.
1 A' i' apatut do royohon o tulun do basug; tu' miagal nori do rasam do dongmagadau om miagal do salju do tontok dit alasu' o tadau. 2 A' i' kokuro-kuro diya' i pomopol do wokon diya', ondung aiso' o sala' nu. Iri nopo om miagal no di tombolog di mintulud do malib-talib diya' nga' a' i' sumako diya'. 3 Apatut i' do pikoton o kuda', om apatut do kakangan o kaladai, om apatut nogi' do bobogon o tulun do basug. 4 Kada' simbar do tulun do basug, tu' sumimbar ko nopo, om koiyo ko no dau kabasug. 5 Ponimbar nopod tulun do basug om potonudon no di kababasug dau, om a' indo dau sorohon dot apandai iyau. 6 Ondung monuhu' ko'd tulun do basug do mongoi poromut do boros, om iyo nori do monipu' do gakod nu, tu' mogihum ko nod kosusaan. 7 Tulun nopod basug om a' i' milo do popoboros do boros dit aralom o komoyon, tu' iyo no iyau di tulun do nakakung o gakod tu' a' no milo do palaangon i gakod dau. 8 Mamarayou nopod tulun do basug, om miagal nod pokogos do watu dot id lositik. 9 Tulun nopod basug di mumbal daa do popoboros do boros dit aralom o komoyon, om miagal nod tulun di naawuk do mumbal do mongidu'd rugi do hiri'd tunturu' dau. 10 Tulun nopo di mananahak do karaja' di tulun do basug om i tulun do santalib-talib, om momorugi' noo do tulun dot ogumu'. 11 Tulun nopod basug di momonsoi kawagu di kababasug dau, om miagal nod tasu di mongoi pangakan kawagu di tilob dau. 12 Mogo-mogot nogi' i tulun do basug piya tomod ko' mantad di tulun do momusorou dot oilo iyau. 13 Monginduwalai nopo i gungkaul do ponguwaan nopo nga' ooris do tabpaan do singa do hilo'd tanga'd ralan. 14 Tulun nopod akaul om mitogiging-giging noo do hiri'd toodopon dau, om aiso' no toongoi-ongoi, do miagal po di totobon do kopingiwang om kopintobon. 15 Haro i' o tulun dot adalaan no kopio kakaul, gisom do posuang piya do takanon dot id kabang dau nga' tukono' i'. 16 Tulun nopod akaul om momusorou i' dot oilo iyau, ko' mantad do turu' o tulun di kitoilaan om it ongkoontok o ponimbar. 17 Mongoi nopo ponokihompi-hompit do hal do tulun do suwai om a' i' daa iyau kohompi-hompit, om miagal no di monguritos do tolingo'd tasu do hilo'd tanga'd ralan. 18-19 Tulun nopo di monipu' do tulun do suwai do maan i' daa do pogkoringau, om iyo nod tulun di mulau do mangambawa' do rapo-rapo di kapatai. 20 Ondung iso' noo o siduwon om opisok i' i tapui; om ondung aiso' o mimboros do mongindaraat do tulun do suwai om otingkod i' o pogitatagadan. 21 Poposikit do tapui o tohun om siduwon; om iyo noddi i tulun dit ogorot do monokisongkiwal do mongusa' do pogitatagadan. 22 Osonong tomod nopo o kopurimanan di mimboros do mongindaraat do tulun do suwai, om orohian o tulun do mokinongou'ddi. 23 Tulun nopo dit osonong o koboro-boroso' om araat indo ot id suang do ginawo, om miagal no di kuron do nurogupan do pirok. 24 Tulun nopo dit obingraatan om oomis piya o boros, nga' poimponu' id karaaton ot id suang do ginawo dau. 25 Om mulong piya dot osuwau iyau nga' kada' ponongkuyaai dau, tu' noponu' i' do karaaton o ginawo dau. 26 Mulong piya'd tirungon daa dau i karaato' dau, nga' oinsanan indo o tulun do kokito di karaato' dau. 27 Isai nopo i mongukad do luang do porotuan do tulun do suwai, om aratu' nod hiri. Om isai nopo i poliid do watu, om iyau no ot oliidan diri. 28 Ondung udutan nu o wokon, om araatan ko no dau. Kootuson nopod mimboros dit a' otopot om karaagon.
1 Kada' popimboroso' o wonsoyon nu do kosuabon do suab, tu' a' nu i' oilaan ondung nunu ot osiliu do tadau'd baino'. 2 Pologoson no o tulun do suwai om i sompogunan do mamarayou diya', kada' kopio royoho' o tinan nu dot iya' om iya' o mamarayou. 3 Awagat no daa o watu om pasir, nga' awaga-wagat ko' iri o kosusaan di porikoton do kababasug. 4 Pokoruol no daa do ginawo o kototogod om koronob i koburonguso', nga' awagat po moti' ko' iri i mosol. 5 Osonong nogi' do potimbabaon nopo do monogod om mikuwo'd monuduk do tulun, ko' mantad do pologoson nu iyau do momusorou dot a' ko mamadul dau. 6 Mulong piya do bobogon ko di tambalut nu nga' mikuwo i' dot osianan iyau diya', nga' ondung gopuson ko do pisangod nu om antaan-taan no. 7 Ondung ayahan ko, om paha' piya nga' niada' nu i'; nga' ondung louson ko, om iri piya it opoit nga' oomis id opurimanan nu. 8 Tulun nopo di mogidu' do mantad id walai dau, om miagal no di tombolog do tumongkiad do rumun. 9 Poposonong do ginawo i tumau dot osonong o kosingudan; nga' mamagangau i' do ginawo o kosusaan. 10 Kada' lihuwai o tambalut nu ko' i tambalut do tapa' nu. Tu' ondung id suang ko'd kosusaan om kada' no ongoi pokitulung do tobpinai nu; tu' milo nod monulung diya' i songkoduwo nu, ko' mantad di tobpinai nu di hilo'd sodu'. 11 Oi tanak ku, sumiliu nod tulun di kitoilaan, om osonong i' o ginawo ku, om haro o ponimbar ku'd tulun di papasala' doho'. 12 Tulun nopo di milo'd momusorou om kokito id kosusaan do rumikot om ilagon i' dau iri; nga' tulun nopo di basug om sumubo tomod nopo dot id kosusaan om gowoi pondo om oinggorit iyau. 13 Tulun nopo di nakabatos do mamajamin do tulun di mongutang, it a' dau otutunan, om atantu' no dot ongoyon nopondo i dapu' dau do pamajamin di batos dau. 14 Ondung osuab kopio ko do papagarang do ponunuwau nu di tambalut nu, om sorohon i' dau'ndo do momopol ko. 15 Tondu' nopo dit obintogod do sawo, om miagal no di rasam dit a' nopo tumodu' do monongodou-ngodou. 16 A' i' iyau milo do tingkodon, tu' miagal nod mogodu do tongus om miagal do mongonggom do tumau do mogodu dau. 17 Kopinsingilaan nopod tulun om mantad id tulun do suwai, do miagal di basi' tu' basi' i' o kaasa'. 18 Isai nopo i momogompi' di guas, om kaakan no do tua'ddi. Om i susuhuon di modsurung di tuan dau nga' suahon no. 19 Iri nopo it okito nu dot id waig om iri no i rabas nu; om iri it okito nu dot id ginawo nu, nga' iri no i kowoyo-woyoo' nu. 20 Korohian nopod tulun om a' nopo milo dot abagalan; do miagal di pomogunan do tulun do napatai tu' haro kasai' nopo o tiyonon. 21 Ponompipi' nopod tamas om pirok, om tapui; om pongilo nod kowoyo-woyoon do tulun om mantad di kopurimanan dau do tontok do royohon iyau. 22 Mulong piya do panatasan do momobog o tulun do basug, nga' a' i' oidu' i kababasug dau. 23 Tumotos nod momogompi' do tayam-tayam nu, 24 tu' a' i' poingompus o kakayaan. Pomorintaan piya do raja' nga' a' i' potilombus do gisom dot alaid. 25 Ngoyon no onuo' i sakot do paakan di tayam-tayam, om ngoyon onuo' i sakot do hilo'd nuluhon do daamot di sakot di katatanom do sumuni. 26 Kowonsoi ko i' do pakayan dot i hulu'd dumba' o wonsoyon om koboli ko'd tana' dot i tusin di gatang do wookon di kambing nu o pomoli. 27 Om iri no kambing nu'd suwai om pongonuan nu'd susu dot inumon nu om i sompiiyon nu, om i susuhuon nu.
1 Tulun nopod araat om mogidu' i dot aiso' piya o momogusa' diyolo', nga' tulun nopo dit otulid o ginawo om osiou i' do miagal di singa. 2 Ondung momonsoi'd dusa o bansa', om mogisowoli-woli nopondo o tulun do momorinta'; nga' ondung kitoilaan o boyoon di bansa', om ogirot i' om apanggor o pomorintaan dau. 3 Pomorinta' nopo di mongulok-ulok do tulun di mosikin, om miagal nod rasam dit asapou do mamaraag di tomoton. 4 Ondung a' ko mamadul dot oturan, om mogobi' ko no di tulun dot araat; nga' ondung tumanud ko dit oturan, om sumaap ko no di tulun dot araat. 5 Tulun nopod araat om a' i' kosuhut do komoyon dot otulid, nga' tulun nopo di sumambayang dot id Tuhan, om kosuhut i' do koinsanai'ddi. 6 Osonong nogi' do mosikin dot otulid po o ginawo, ko' mantad do kaya' om goudut i'. 7 Tanakwagu nopo di mumboyo' dot oturan om tulun no di kitoilaan. Nga' tulun nopo di monokiambalut do tulun dit aiso' o guna-guna' om mongintingayam no di tapa' dau. 8 Ondung kakaya' ko dot i bunga do tusin om poninipu' nu'd tulun do suwai o kakaya-kaya', om iri nopo kakayaan nu'ddi om aanu indo do tulun dit opuhawang dot id tulun do mosikin. 9 Ondung a' ko mumboyo' dot oturan do Kinorohingan, om sambayang nu piya'ndo nga' araat i' dot orongou dau. 10 Ondung mamayayat ko'd tulun dit otulid o ginawo do momonsoi'd araat, om iya' indo om iya' ot alawaan di lawa' nu'ddi. Nga' tulun nopo dit otulid o ginawo, om abarakatan indo do gisom dot osimbayan iyau. 11 Tulun nopod kaya' om momusorou nopo do kitoilaan iyau, nga' tulun nopod mosikin di kirongod om koilo i' ondung isai kopio iyau. 12 Soira' nopod momorinta' o tulun dot otopot, om asanangan ngai' no o tulun, nga' soira' nopod tulun dot araat o momorinta' om a' no mongoi hompi-hompit o rayat. 13 Aiso' i' ot aanu-anu nu do popolisok ko'd dusa nu. Okuno' nori do mikuwo'd tongkiadan, om ompunan ko id Kinorohingan. 14 Olumaag no i tulun di mumboyo' kasai' do Tuhan. Nga' tulun nopo di sumaap dau om obungou no. 15 Aiso' no o pokukurayan do tulun do mosikin dot id toguang do pomorinta' dit araat, tu' miagal pod potoguang iyolo'd singa di minggarom ko' bohuang di motipanabpo no diyolo'. 16 Pomorinta' nopo dit a' milo'd momusorou om osiliu nod pomorinta' dit orongit kopio, nga' tulun nopo dit araatan dit a' koontok om alaid i' do momorinta'. 17 Tulun nopo di nakapamatai om gusa-gusaon nopo ot opurimanan dau do gisom do tikapatai dau; aiso' no ot iso' do tulun do koodu dau. 18 Tulun nopo dit otulid o kowoyo-woyoon om osimbayan i' o koposi-posion. Nga' tulun nopo dit a' otulid o kowoyo-woyoon om monigowo nopo dot oontok do kosusaan. 19 Gompongumo nopo dit aparu' do morobuat om osima' nod kaakan-akanan. Nga' tulun nopo di mangayi' nod maso om mosikin kasai' nopo. 20 Tulun nopo dit otulid o ginawo om kaanu i' do barakat do mantad id Tuhan, nga' tulun nopo dit orohian dot oruhai'd kumaya' om a' no milo'd mogidu' do mantad id hukuman. 21 A' i' osonong do manampaping do wokon, nga' haro i' o gompomutus dot oonuan nopod tusin dot ongokuuri' om manampaping no. 22 Tulun nopo dit okolit om orohian nopo dot oruhai'd kumaya'; gisom dot a' i' dau oilaan dot orikatan iyau do korurutum. 23 Monogod nopod tulun do suwai do maan do ponuduk dau om korohian nogi' di tulun diri do koimbagu, ko' mantad di tulun di minamarayou dau. 24 Isai nopo i momusorou dot okon ko' dusa do manakau di dong molohing dau, om iyo no di tulun do mananakau. 25 Tulun nopo dit okolit om mongimbulai nod pogitatagadan; nga' tulun nopo dit otumbayaan do Tuhan om haro nogi' kopio ot aanu. 26 Tulun nopo di tumanud dot osorou dau om basug i'. Nga' tulun nopo di tumanud do ponudukan do tulun di kitoilaan om kaanu nod koposion. 27 Panahak nod tulun do mosikin om a' ko i' okurangan. Nga' ondung a' ko nopo monongkoilo di tulun do mosikin om ogumu' nondo o tulun do momopol diya'. 28 Lumisok ngai' nopo o rayat, do tulun dot araat o momorinta'; nga' soira' nopo dot apatai i tulun dot araat diri, om sumowoli nondo do momorinta' i tulun dot otulid o ginawo.
1 Ondung muhang-ruhang nogi' o kosongkiwalo' nu do tontok do tudukan ko, om orikot nondo o maso dot araag kopio ko om a' ko nondo milo'd tulungon. 2 Ondung otulid i pomorinta', om ongotood no i rayat. Nga' ondung araat i pomorinta', om oinggorit no i rayat. 3 Ondung orohian ko'd toilaan om oondos no diya' i tapa' nu. Ondung mongoi ko sugku' do sundal om orubat no dot aayi' o tusin nu. 4 Soira' nopod momusou i raja' dit otulid, om ogirot no o pomorintaan dau. Nga' soira' nopo do tamaha' iyau'd tusin om aratu' no o pomorintaan dau. 5 Ondung mamarayou ko di tambalut nu, om pataan ko nod lawa' do kosulungon nu. 6 Tulun nopod araat om alawaan no di dusa dau, nga' tulun nopo dit otulid o ginawo om osimbayan i' om otood. 7 Tulun nopo dit osonong om koilo i' dit apatut dot aanu di tulun dot aiso' o pokukurayan, nga' tulun nopo dit araat om a' i' kosuhut do komoyon diri. 8 Tulun nopo dit orohian do mongindaraat om kagangau i' do pointongkop do bandar. Nga' tulun nopo di kitoilaan om milo i' do poposimbayan. 9 Soira' nopod misalasai i tulun do kitoilaan om i tulun do basug, om mingirak noo om mimpopol i tulun do basug. 10 Tulun nopo di gampamatai om araatan nopod tulun dit otulid o ginawo, nga' tulun nopo dit osonong om mongintirung i' di tulun diri. 11 Tulun nopod basug om a' no kopusus-pusus do kototogod dau, nga' tulun nopo di milo'd momusorou om alanut i' o ginawo om kopusus do kototogod dau. 12 Ondung mongudut o pomorinta', om iri pagawai dau nga' mongudut ngai' no. 13 Haro i' o kopiagalan di tulun do mosikin om i mongulok-ulok dau: iri no tu' nonuan goduwo i' iyolo'd Tuhan do mato do pogontong. 14 Ondung mogobi' i raja' di tulun dit aiso' o pokukurayan, om alaid no dot oidu' o pomorintaan dau. 15 Iri nopo i ponuduk om i pomisunud nga' manahak do toilaan dot id tulun. Tanak nopo dit umboyoon kasai' o korohian, om mongintingayam indo di tina' dau. 16 Tontok di kikuasa' o tulun dot araat, om rumuhang no o kogumuo' do kasalaan. Nga' poimpasi po i tulun dot otulid o ginawo do tontok dot oidu' o kuasa' di tulun dot araat. 17 Tudukan no o tanak nu, om osiliu i' iyau do kaandasan nu om i popotood do ginawo nu. 18 Bansa' nopo dit a' tumanud do ponuhuan do Tuhan om aiso' no o kosimbayanan. Nga' olumaag i' o tulun di tumanud dot oturan do Tuhan. 19 A' ko i' milo'd monuduk do susuhuon ondung moro-boros ko no toomod dau. Tu' kosuhut i' doti' daa iyau do komoyon nu'ddi nga' a' i' dau podulon iri. 20 Mogo-mogot nogi' o tulun do basug ko' mantad di tulun dit oburuak o koboro-boroso'. 21 Ondung moyonon nu i susuhuon nu do mantad dit okoro' po iyau, om osongkiwal nondo iyau do koimbagu. 22 Tulun nopo dit obintogod, om popogisosongkiwal noo om monusa' do tulun dot ogumu'. 23 Koinsiriba' indo i tulun dit obinggayo-gayo; nga' ondung osiriba' o ginawo nu om suahon ko indo. 24 Tulun nopo di monguhup do tulun do manakau, om mogihum nod karaagon do tinan dau. Tu' ondung posunudon dau it otopot do hilo'd pogibisaraan, om ohukuman no iyau. Nga' ondung amu', om papalan no iyau'd Kinorohingan. 25 Haro i' o koligagaanan ondung ooris ko dit osorou'd tulun do suwai do pasal diya'. Nga' ondung mogondos ko'd Tuhan om osimbayan ko no. 26 Ogumu' o tulun dot orohian do kasanangan do pomorinta', nga' mantad no dot id Tuhan o koonuan kopio dit otulid. 27 Araatan i' i tulun dot osonong di tulun dot araat; om i tulun dot araat nga' araatan i' di tulun dot osonong.
Boros di Agur
1 Iti no o boros do pinoboros di Agur, i tanak di Yaki, i mantad hilo'd Masa. “A' i' hino o Kinorohingan do hiti, a' i' iyau moyo-woyo' doho', om a' oku no kosimbogui!. 2 Tu' iyoho' nopodti om iyo pod nintorusan kabasug; aiso' nopo o tosuhut-suhutan ku. 3 Om a' oku insan kopinsingilo do toilaan, om a' oku kotutun do Kinorohingan. 4 Isai ma o tulun do koilo'd kowoyo-woyoo' do hilo'd surga? Nokoumbal toi o tulun do minongonggom do ribut, om minomolopot do waig dot i rasuk dau o pinomolopot, ko' minanantu' pod kogisomon do koinsanai'd nunu nopo? Isai o ngaran dau om isai o ngaran do tanak dau? Atantu' nod koilo ko i'! 5 Sulungon ngai' id Kinorohingan o batos dau. Iyau no o ponokokolid do tulun di rumikot do mongoi pokiintirung dau. 6 Kada' ruhangai o boros dau om a' ko i' togodon om a' ko roitan do goudut,” ka dau.
Piro-Piro Kawagu o Nosihat
7 Pokionuon ku iya', oi Kinorohingan, do manahak doho' diti duwo o pokionuon ku'dti dot a' oku po apatai: 8 iri no tu' kada' oku pologoso' do mongudut, om kada' oku pologoso' do kaya' ko' mosikin. Suwai ko' onuan oku nopo di miumbagal-bagal ku. 9 Tu' ondung kaya' oku om mogolim oku dotindo diya' om momoros oku dot a' oku minog do haro o Tuhan. Nga' mosikin oku no om mongoi oku dotindo panakau om koindaraat indo'd ngaran nu. 10 Kada' papasala' di susuhuon dot id toguang di tuan dau, tu' osumpaan ko moti'ndo om asala' ko. 11 Haro i' o tulun do momopol do tapa' dau, om a' momusou'd tina' dau. 12 Haro i' o tulun do momusorou dot olidang iyau nga' maso kad sosomu' tomod nogi' iyau. 13 Haro i' o tulun do momusorou dot osonong kopio iyau, om mamarayou- rayou iyau'd tinan dau. 14 Haro i' o tulun do mogihum do kaakan-akanan, do pokoruol om mononsog di tulun do mosikin om it aiso' o pokukurayan, o ralan do mogihum. 15 Haro o duwo tanak di limbata'; ngaran nopo goduwo'ddi om i; “Patahakon doho'”! Haro ot apat o hal dit a' nopo milo dot abagalan: 16 i kinoiyonon do tulun do napatai, i tondu' dit a' maganak, i tana' di tuuhan do rasam, om i tapui di monorob do hinonggo nopo. 17 Tulun nopo di monguntotori' do tapa' dau ko' i tina' dau, om apatut nod pataamon do hilo'd soliwan om okutukan i' di tombolog di roitan do bangkahak o mato dau om aakan do kondiu o rata' dau. 18 Haro ot apat o hal dit apagon dot osuhutan: 19 i kondiu do mintulud do hilo'd tawan, i tulanut do lumuhad do hiri'd watu dit angatarom, i kapal do rahat do lumayag do hilo'd tanga'd rahat, om i kusai om tondu' do miuhang-uhang. 20 Poingkaa no o kowoyo-woyoon do tondu' dit a' otorodok dot id sawo dau; magampahu' po iyau, om mongoi nogindo akan om momihid do kabang, om moro-boros nogindo dot, “Nga' aiso' i' bo o nowonsoi ku di kasala'!” ka. 21 Haro ot apat o hal dit a' milo'd posimboyonon do hiti'd pointongkop do pomogunan: 22 i turipon do sumiliu'd raja', i tulun do basug do kaanu do koinsanai di kosionuan dau, 23 i tondu' do kasawo om a' i' daa iyau korohian do tulun, i susuhuon do tondu' do magahau do pangkat di tondu' di sanganu di karajaon dau. 24 Haro ot apat o nintorusan do hiti'd pomogunan dit ongokooro' daa nga' ongoilo kopio: 25 i kilau: ongoluhoi daa nga' monimung i' iyolo'd taakanon diyolo' do tontok do dongmagadau po. 26 I palanuk: a' i' daa okoris no nga' id pogiolit-olitan id pampang o tiyonon diyolo'. 27 I katat: aiso' i' o raja' diyolo' nga' oulud i' iyolo' do tumongkop. 28 Gontulak: atabpa-tabpaan i' daa, nga' hilo' piya'd walai'd raja' nga' iyonon i' diyolo'. 29 Haro ot apat o kosuayan kopio do tontok dit antangan kopio o pamamanau diyolo': 30 i singa, i nintorusan dot okoris om it aiso' i' o poddosi; 31 i kambing do tontoluhan, i manuk do tandaha', om i raja' dot id toguang di rayat dau. 32 Ondung nabasug ko gisom do minggayo-gayo ko'ddi om minsorou ko dot araat, om antaan-taan no! 33 Tu' ondung gouron nu o susu om osiliu nori do montiga'. Ondung momobog ko'd todung do wokon, om momburaha' nori. Ondung moningkau ko'd pitagadan om kohompit ko no dot id pitagadan diri.
Nosihat do Bagi' do Raja'
1 Iti no o nosihat di tina' di Raja' Lomuil, dot id tanak dau, 2 “Iya' no i tanak ku di kosianan kopio ku, om i nisimbar do sambayang ku. Nunu ma o posunudon ku diya'dti? 3 Kada' rubato' o kinoris nu do monokidudun do tongoondu' om kada' oiyo' o tusin nu do pambayar do tongoondu'd sundal. Tu' ogumu' no o raja' do naratu' do tondu'. 4 Pokinongou no, oi Lomuil! Raja' nopo om a' i' osorupai do monginum do waig dot anggur om a' osorupai dot adalaan koubas do tiinumon di kaawuk. 5 Tu' soira' nopod koinum iyau do tiinumon di kaawuk, om olihuan nondo dau it oturan om a' nondo dau pusohon it apatut dot aanu di tulun dot aiso' o pokukurayan. 6 Tiinumon nopod kaawuk om maan nod patahakon di tulun di motingkapatai no, om i tulun di tumongob. 7 Moginum pogi' iyolo' nga' momolihu daa di kinorutumo' diyolo' om i koinggoritan diyolo'. 8 Obiai no i tulun dit a' milo'd mongintirung do tinan dau. Intirungan ngai' no it apatut dot aanu do tulun dit aiso' o pokukurayan. 9 Uhupan no iyolo' om siliu nod gompomutus dit otulid. Patahakon no it apatut dot aanu di tulun do mosikin om i tulun dit ulak-ulakan,” ka.
Tondu' di Kisawo dit Oilo Kopio
10 Apagon nod mogihum do tondu' dit oilo kopio; iyau nopo om agayo po gatang ko' mantad di watu dot olumis dit agayo o gatang. 11 Iri sawo dau nga' otumbayaan i' dau, om a' iddi iyau insan dot okurangan do nunu nopo. 12 Solinaid nopo dau do poimpasi om monulung kasai' nopo iyau di sawo dau; om a' i' iyau insan do monusa' dau. 13 Aparu' i' iyau do mongoi ponimung di toowolon do wonsoyon do kain om i hulu'd dumba', om a' nopo iyau miundorong-dorong do mangawol diri. 14 Paatod iyau'd taakanon do hiri'd walai do mantad id kinoiyonon di hilo'd sodu', miagal po iyau di kapal do dumadagang. 15 Osuab po iyau'd tumungag do posodia' do kanon di sompiiyon dau, om momisunud di susuhuon dau do tongoondu' do buruon diyolo'. 16 Mogihum iyau'd tana' om bolion dau iri; om tanaman dau dot anggur tu' nokoponimung no iyau'd tusin do pomogompi'ddi. 17 Aparu' iyau om okoris do kumaraja'. 18 Oilaan i' dau o kootuson do nunu nopo i wonsoyon dau; om kumaraja' iyau do gisom dot alaid o kinotuangan. 19 Pimpori-porian nopo dau'd momonsoi o banang dau om mangawol iyau do kain dau. 20 Opuhawang i' iyau dot id tulun do mosikin; om monulung iyau do tulun di mokitulung. 21 Tontok piya dot orikot o maso dot osogit nga' a' i' iyau atangkabo, tu' haro ngai' i' o pakayan di sompiiyon dau dit angakapal. 22 Pimpori-porian nopo dau'd momonsoi i pamalapik do siliu dau; om manampakai iyau do kain linan dit otomou daragang-ragang, it agayo o gatang. 23 Sawo nopo dau om tulun dit abantug; om boyoon do hiri'd bandar. 24 Monombir iyau do pakayan om momonsoi'd tagkos do maan dau pobolio' dot id dumadagang. 25 Okoris i' iyau om suahon do tulun do suwai; om a' atangkabo do tumimbaba' do tadau dit id dosunsudan. 26 Alamaya' i' om poimponu' do toilaan, o koboro-boroso' dau. 27 Aparu' i' iyau do kumaraja', om antangan dau it apatut do haro dot id suang do walai dau. 28 Mongunsikou ngai' i' i tangaanak dau dot id dau om i sawo dau nga' mamarayou i' dau. 29 Boros ka di sawo dau, “Ogumu' i' o tongoondu' dot ongosonong, nga' iya' no it osonong kopio dot id pogialatan diyolo',” ka. 30 Tumanus i' i koligkango' do tinan om i kolumiso'd rabas; nga' tondu' nopo dit otumbayaan do Tuhan om apatut nod royohon. 31 Somuliai no o koinsanai di kosonongo' dau, tu' iyau no o tondu' dit apatut do pusohon do koinsanai'd tulun do hinonggo nopo!
Koposi-Posion Nopod Tulun om Aiso' i' o Kotutuk-Tutukon
1 Iti ngai' no o boros di Tulun dit Aralom o Toilaan, i tanak di Daud, i nosiliu'd raja' do hilo'd Yorusalim do suminowoli di Daud. 2 Boros ka di Tulun dit Aralom o Toilaan: Koinsanai do nunu nopo, om aiso' i' o kotutuk-tutukon! Koposi-posion nopod tulun om aiso' i' o guna', om aiso' o komoyon. 3 Kumaraja' toko' nopo do gisom do tikapatai, do gisom dot aayi-ayi' o goos toko'. Nga' nunu nondo ot aanu-anu toko' di kaandasan toko'? 4 Sinakagon nopo om mogisowoli-woli i' tu' matai no it id gulu om haro no o sinakagon do wagu, nga' iti nopo pomogunan om a' i' sumimban. 5 Ilo tadau nga' mimbulai po kasai' om tumonob. Om ohuyan poo do gumuli' do hiri'd tadon dau om mulai no kawagu. 6 Tumongus no ilo ribut do kumaa do hilo'd salatan, om tumongus nod kumaa do hilo'd utara; om sumorili' no kawagu om koguli' i' do hiri'd tadon mantad. 7 Oinsanan nopo o bawang do hilo'd rahat o koluyungon, nga' a' i' oponu-ponu' ilo rahat. Gumuli' i' kawagu i waig do hilo'd tudan do bawang, om lumuyung no kawagu. 8 Kapaasan ngai' i' iri, om a' no milo'd boroson o kapaasanon. Mato toko' nga' a' nopo ababas-babasan do mintong; om tolingo toko' nga' a' nopo ababas-babasan do mokinongou. 9 Nunu nopo i nosiliu di gulu, nga' osiliu i' kawagu. Nunu nopo i nowonsoi di gulu, om owonsoi i' kawagu. Asio' i' o tiso' di wagu kopio do hiti'd pomogunan. 10 Haro i' o tulun do momoros dot, “Intangai pogi', nga' wagu moti' iti,” ka. Nga' okon i' ko' wagu iri. Tu' hino nori dit a' toko' po nosusu. 11 A' i' do tulun osorou i nongosiliu di maso di notoliban. Om iyo nogi' moti'ddi tu' iti nopo nongosiliu'd baino' om it osiliu do koimbagu nga' a' i' osorou do tulun di sumusuhut.
I Nongoumbalan di Tulun dit Aralom o Toilaan
12 Iyoho' no, it Aralom o Toilaan, om raja' dot Israil do momorinta' do hilo'd Yorusalim. 13 Tuminorodok oku no kopio do minonorisid om mininsingilo do koinsanai dit ongosiliu do hiti'd pomogunan. Kosunsudon toko' nopo do natantu' mantad do Kinorohingan om katangkabo i' kopio. 14 Nokito ngai' ku no i nongosiliu do hiti'd pomogunan. Nga' kotumbayaai no, dot aiso' ngai' i' o kinotutuk-tutukon diri. Iyo noddi mumbal do manabpo'd ribut. 15 Iri nopo poingkilong, om a' no milo'd tulidon, om it aiso' nga' a' no milo'd pointobon. 16 Poingkaa daa o tosorou ku, “Oilo oku no kopio, om iyoho' no it oilo kopio ko' mantad do toinsanan di raja' do nokopomorinta' do hiti'd Yorusalim dit id gulu ko' iyoho'. Kosuhut oku i' do komoyon do toilaan om i boros dot angaralom,” kangku. 17 Om tumotos oku no kopio do mongilo do pisuayan do toilaan om kababasug, om pisuayan di pomusarahan dit atarom om i kowowongo. Nga' koilaai ku nogiddi dot iyo oku no di manabpo do ribut. 18 Tu' ogumu-gumu' o toilaan toko', nga' ogumu-gumu' no o katangkabaan toko'. Om ogumu-gumu' o tosuhutan toko', nga' ogumu-gumu' no o toruol toko'.
1 Om pomusorou oku noddi do sumimbayan, om kosuhut oku i' do komoyon do kosimbayanan. Nga' iri piya nga' aiso' i' o kinotutuk-tutukon. 2 Koilaai ku noddi dot iri nopo i koirakan nga' kababasug i'; om iri kosimbayanan nga' aiso' i' o guna'. 3 Om pomusorou oku nod sumimbayan om minginum do waig dot anggur om rumamai, tu' oodsuur oku di korohiano' ku do sumiliu'd tulun dit oilo. Ondos ku daa om iri no o ralan do tulun dot osonong kopio do momuriman do kosonongo'd koposi-posion dau dit oniiba' do hiti'd pomogunan. 4-5 Nongowonsoi ku no it angagayo kopio. Nokopomonsoi oku no do piro-piro o walai ku. Om nokopomukabun oku'd bunga om anggur om piro-piro o bansa'd tua-ua'. 6 Nokopongukad oku nod piro-piro o kulam do pomuwaig ku di kabun do bunga ku om i kabun do kouwaan ku. 7 Ogumu' o turipon ku dot i binoli ku om i nosusu dot id walai ku. Om tayam-tayam ku nga' ogumu' no kopio ko' mantad dot isai nopo di nokoumbal do nokoiyon do hiti'd Yorusalim. 8 Ogumu' o tamas om pirok do notimung ku do mantad id piro-piro o raja' do pomogunan di porintaon ku. Om poposonong do ginawo ku i sinding di piro-piro o modsisinding do tongokusai om tongoondu'. Om milo oku nogi' do manganu do tongoondu' do piro nopo o kogumuo' do korohian ku do maan ku'd panakasawo. 9 Otopot no kopio dot abantug oku po ko' isai nopo di nokoumbal do nokoiyon do hiti'd Yorusalim, om a' insan do mongiman-iman o koiloo' ku. 10 Tu' nunu nopo o kouhangan ku nga' aanu ku no. A' oku insan do momusus do korohian ku do mongoi pomonsoi di kasanangan ku. Oondos oku i' do koinsanai di naanu-anu ku di pininghuyanan ku, om iri no ot isomuli' doho'. 11 Nga' id tohuri noddi om sorisido' ngai' ku no o koinsanai di nongowonsoi ku, om i huyan ku'd minomongo do koinsanai'ddi, om koilaai ku nogiddi dot aiso' ngai' i' o komoyon diri. Aiso' i' o kinotutuk-tutukon di huyan ku'ddi, tu' iyo nod manabpo do ribut. 12 Poingkuro piya nga' iri no i nongowonsoi di piro-piro o raja' dit id gulu ko' iyau, o milo di raja' do wonsoyon. Om timpuun oku noddi do momusorou ondung poingkuro o kootuson dot oilo daa ko' bungou-bungou ko' basug o tulun. 13 Atantu' no dot oilaan ku i' do, “Toilaan nopo om osonong i' ko' i kababasug, do miagal do tanawau tu' osonong i' ko' i totuong. 14 Tulun nopo di kitoilaan om oilaan i' dau ondung hinonggo ot ongoyon dau, nga' tulun nopo di basug om momihawor i' do mamanau. Nga' oilaan ku i' do kotutukon ngai' nopo diyolo'ddi om oiyo i'! 15 Poingkaa o tosorou ku, ‘Iri kotutukon ku iyoho' nga' iyo i' di kotutukon di tulun di basug. Om nunu noddi o guna' do koinsanai di toilaan ku?’ Om koilaai ku noddi dot aiso' i' kopio o guna' do koinsanai'ddi. 16 Oruuhai dot olihuan i tulun do basug, nga' i tulun do kitoilaan nga' a' i' ahandaman kasai'. Tu' alaid nopondo om olihuan ngai' toko i'. A' toko' i' milo dot a' matai, dot i tulun di kitoilaan ko' iri po i tulun do basug. 17 Gowoi poddi, om aiso' no o komoyon ku do poimpasi, tu' poporikot nod kosusaan dot id doho' iti tongosiliu do hiti'd pomogunan, om aiso' i' o suwai do korikot. Aiso' ngai' nopo o kotutuk-tutukon diri, ribut noo o tinabpaan ku. 18 Koinsanai di hasil do karaja' ku om i nangaanu-anu ku nga' aiso' i' o guna' dot id doho', tu' otongkiadan ngai' ku i' iri om katahak dot id tulun di sumowoli doho'. 19 Nga' isai o koilo, ondung oilo tuu ko' basug i sumowoli doho'? Nga' poingkuro piya nga' mositi' no dot iyau o kotungkus do hasil di pininghuyanan ku om i naanu-anu ku do solinaid ku'd poimpasi do hiti'd pomogunan; i noongoi- ongoi di huyan om koiloo' ku. Om iri piya'ddi nga' aiso' i' o kinotutuk-tutukon. 20 Om baino' noddi om monosol oku i' dot iyo kopio oku'ddi do minonotos do kuminaraja'. 21 Tu' tulun nopo om tumotos do kumaraja' do tumanud do toilaan, om pomusarahan dau'd atarom, om i koiloo' dau. Om owonsoi indo dau i pokiwawansayan dau. Nga' id tohuri nondo om tongkiadan i' dau i hasil di pininghuyanan dau'ddi om patahakon iri di tulun dit a' i' nokoulai o lasu' do minogihum diri. 22 Tikapatai id tulun do tumotos do kumaraja' om oudipon tomod, nga' nunu noo o hasil di huyan dau di milo dau'd kaandasan? 23 Solinaid toko' nopod poimpasi, om koinsanai di wonsoyon toko' nga' pokoruol nod ginawo om monginggorit dati'. Pitangatuong piya nga' agangau i' o ginawo toko'. Om koinsanai'ddi nga' aiso' i' o kotutuk-tutukon. 24 Aiso' no ot osonong kopio do wonsoyon do tulun, suwai ko' makan poo om minum, om momurimon di kosonongo' di nongowonsoi dau om i hasil di karaja' dau. Oilaan ku noddi do nipuhawang ngai' id Kinorohingan iri. 25 Isai daa o kaanu'd kaakan-akanan om kosimbayanan, ondung aiso' daa o Kinorohingan? 26 Onuan id Kinorohingan do toilaan, om pomusarahan dit atarom, om kosimbayanan i tulun di poposonong do ginawo dau. Nga' tulun nopo di kidusa om suhuon dau'd kumaraja' do mogihum do kaakan-akanan om monimung do hasil di karaja' dau do patahakon di tulun di poposonong do ginawo'd Kinorohingan. Nga' koinsanai'ddi om aiso' i' o kotutuk-tutukon; miagal noddi minghuyan do manabpo do ribut,” ka.
Haro i' o Maso do Natantu' Mantad dot Osiliu o Pointikid-Tikid do Nunu Nopo
1 Koinsanai do nunu nopo do hiti'd pomogunan diti, om osiliu i' do tontok di maso di natantu' mantad do Kinorohingan. 2 Natantu' nod Kinorohingan o maso do kosusuan om maso do kapatayan, maso do kapananaman om maso do kapangamatan, 3 maso do kapamatayan om maso do kopomolingasan, maso do kopomohuyasan om maso do kapamansayan. 4 Tinantu' nogi'd Kinorohingan o maso do tumongob om maso dot otood, maso do mogihad om maso do manari', 5 om maso do miuhang-uhang om maso do momusus do korohiano' do miuhang- uhang, om maso do miburung-burung om maso dot a' mungkomi. 6 Tinantu' nogi'd Kinorohingan o maso do koonuan om maso dot atagakan, om maso do poopi' om maso do momorubat, 7 om maso do momohurak om maso do monombir, om maso dot a' mungkomi om maso do mimboros. 8 Tinantu' nogi'd Kinorohingan o maso dot osianan om maso dot araatan, om maso do misangod om maso do miulud. 9 Nunu nondo ot aanu-anu toko' do mantad di huyan toko'ddi? 10 Oilaan ku i' do pinababaan toko'd Kinorohingan do binabo dit awagat kopio. 11 Tinantu' i' dau o maso di koontok do kosilihan do koinsanai'd nunu nopo. Nonuan toko'd Kinorohingan do korohian do siilo ondung poingkukuro o maso dit id dabantalan, nga' a' toko' i' dau pologoson do kosuhut kopio do gisom dot arantaban daa o ginawo toko' do mongilo do toinsanan di wonsoyon dau. 12 Oilaan ku i' dot id dati' nopo om aiso' no it osonong ko' mantad dot otood om momurimon do koposi-posion do solinaid toko' po do poimpasi. 13 Apatut ngai' toko' i' do makan om minum om momurimon di hasil do karaja' toko'. Tu' iri nopo om nipuhawang id Kinorohingan. 14 Oilaan ku i' do hino kasai' o koinsanai di pinowonsoi'd Kinorohingan do gisom dot alaid. A' i' o tulun milo do momoruhang ko' mongingkuri' po di winonsoi'ddi, dot ongokoro' piya. Om iyo pogi'ddi o winonsoi'd Kinorohingan nga' orohian iyau do rumonok toko' dau. 15 Tu' nunu nopo i nosiliu do dinondo, nga' nosiliu nori di gulu po. Om iri haro do koimbagu nga' laid nori do hino. Om natantu' mantad nod Kinorohingan dot osiliu kawagu i nongosiliu di gulu po.
A' Otulid o Hiti'd Pomogunan
16 Haro po o nokito ku do hiti'd pomogunan do miagal diti; hinonggo nopo it apatut daa do haro it otulid om osonong, om hiri nogi' do haro o karaaton. 17 Momusorou oku, do butusan id Kinorohingan i tulun dot osonong om i tulun dot araat, tu' koinsanai do hal om wonsoyon nga' osiliu i' do tontok di maso do natantu' mantad do Kinorohingan. 18 Osorou ku nopo nga' poingkaa: pogumbalan toko'd Kinorohingan do popointalang dot aiso' i' o pisuayan do kotutukon toko' om i kotutukon do nintorusan. 19 Poingkuro piya nga' miagal i' o kotutukon do tulun om nintorusan. Tu' apatai goduwo i', om winonsoi goduwo. Om a' i' poimaha' o tulun ko' i nintorusan, tu' aiso' goduwo i' o kotutuk-tutukon do koposion diyolo'. 20 Iso-iso' i' o koiyonon do koongoyon diyolo'. Tu' iyolo' nopo om mantad i' dot id tana'; om gumuli' indo kawagu dot id tana'. 21 A' toko' toi koilo, do rusod nopod tulun om minsawat i' do hilo'd sawat nga' ginawo no di nintorusan om sumarasap do hilo'd saalom do tana'? 22 Om iri no o nokoilo-ilo ku, dot aiso' no it osonong kopio'd wonsoyon do tulun, suwai ko' momurimon do hasil di karaja' dau. Suwai nopo ko' iri om aiso' no o milo dau'd wonsoyon. A' i' iyau koilo ondung nunu ot osiliu dot apatai iyau.
1 Om piantangai ku noddi o koinsanai dit a' otulid dit osiliu do hiti'd pomogunan. Mihad ngai' poo i tulun dit ulak-ulakan, om aiso' i' ot orohian do monulung diyolo'. Iso' pod tulun nga' aiso' i' ot orohian do monguhup diyolo', tu' agayo i' o kuasa' di tulun di mongulok-ulok diyolo'. 2 Atayaan oku no di tulun di laid no kapatai tu' osimbayan nogi' iyolo' ko' mantad di tulun di maso pod poimpasi. 3 Nga' osimbayan nopo kopio om i tulun dit a' nosusu do hiti'd pomogunan, tu' a' po iyolo' nokoumbal do nokokito dit araat di wonsoyon do hiti'd pomogunan. 4 Oilaan ku nogi', do katatasan nopod tulun do kumaraja' nga' atayaan do kokito do hasil do karaja' di songkoduwo dau. Nga' aiso' ngai' i' o kotutuk- tutukon diri. Tu' iyo nod tumotos do manabpo do ribut. 5 Tu' tulun no kaka di basug o mirikau do momigapus om i popologos do tinan dau dot apatai dot olikapan. 6 Otopot i' doti' ot iyo'ddi, nga' osonong nogi' dot okuri' o dapu' dot osimbayan po o pomusarahan, ko' mantad di tulun dit aiso' nopo o kotingkadan do minghuyan do kumaraja' om aiso' indo o kotutuk-tutukon tu' iyo nod minanabpo do ribut. 7 Haro po o suwai dit aiso' o kotutuk-tutukon dot id suang do koposi-posion do tulun. 8 Haro i' o tulun dot iso-iso'; aiso' o tanak om aiso' o tobpinai. Nga' mulong po dot iyo'ddi nga' a' i' iyau tumingkod do kumaraja'. A' po iyau manangkabagalan di dapu' dau. Isai nondo o potungkusan dau dit aanu-anu dau do pomolosuan do kumaraja' om gisom do magada' ngai' di kasanang-sanangan? Iri nga' aiso' i' o kotutuk-tutukon, om oinggorit o koposi-posion dau. 9 Osonong nogi' do duwo o tulun ko' mantad do songulun-ngulun. Tu' kumaraja' nopo i duwo o tulun om osonong-sonong no iyolo'd kumaraja'. 10 Tu' ondung aratu' i tiso', nga' tulungon i' iyau di tiso' dau. Nga' aratu' nopo it iso-iso', om obungou no, tu' aiso' no o milo'd monulung dau. 11 Tontok nopo dit osogit do dongotuong, om milo i' i duwo tulun do midudun do modop om kopilasu' indo o tinan, nga' songulun-ngulun nopondo kopio om poingkukuro pondo iyau do papalasu' do tinan dau? 12 Songulun-ngulun nopo om oruhai dot aala', nga' duwo nopo o tulun do mitanud do mamanau om kaala' i' di sumaap. Tali nopod tolu santabid om alanut i' om apagon dot oputut. 13-14 Tulun piya do mosikin nga' milo i' dot osiliu do raja'; om iri i mantad id giil nga' milo i' do koongoi do hiri'd tirikohonon do raja'. Nga' molohing nopondo i raja' om a' no iyau orohian do rumamit do nosihat, om basug no kopio iyau, tu' kotutukon nopo dau om araat po ko' i kotutukon di tanak di mosikin daa nga' kitoilaan i'. 15 Om soroho' ku no o koinsanai'd tulun do hiti'd pomogunan, om oilaan ku no kopio do haro o songulun o tanakwagu dot id pialatan diyolo' do kosowoli di raja'. 16 Ginumu' nopod tulun di porintaon dau om a' i' doti' daa ointob-intob, nga' okon nopondo ko' iyau o momorinta' om aiso' no o songulun piya do milo'd mongunsikou dau di nowonsoi dau dit ongosonong. Iri nogi' nga' aiso' i' o kotutuk-tutukon, tu' miagal no di manabpo do ribut.
Kada' Kolomus do Monokibatos
1 Antaan-taan no kopio do tontok do mongoi ko do hilo'd Walai'd Sasambayangan dot Agayo. Osonong nogi' do mongoi pinsingilo o kaangayan do hilo' ko' mantad do papatahak do porsombahan di sumbolion do miagal di wonsoyon do tulun do basug. Tu' tulun nopo di basug om a' i' koilo do pisuayan dit otopot om i kasala'. 2 Momusorou po kopio dot a' ko po kopomoros. Om kada' kolomus do mamatos dot id Kinorohingan. Tu' Kinorohingan nopo moti' om hilo'd surga, nga' iya' nopo om hiti id pomogunan. Iyo nopoddi, om kada' no kopio kadala' o boros. 3 Tumangkabo ko nogi' moti', om okon nogi' do koipi ko dot araat. Ogumu- gumu' moti' o boros nu nga' ogumu-gumu' no o kosoliwan do boros di dongkababasug. 4 Iyo nopoddi, om soira' ko nopo do mamatos dot id Kinorohingan, om lomusan nod mamayaan i pinabatos nu'ddi. Tu' a' i' iyau orohian do tulun di mimbasug- basug. Sulungon no kopio i batos nu. 5 Osonong nogi' moti' dot a' mamatos ko' mantad do mamatos om a' indo bayaanon iri. 6 Kada' pologoso' i boros nu do powonsoi diya'd dusa, gisom do momoros ko nondo dot id imam di momonsoi'd karaja'd Tuhan, do noborulong ko do minamatos. Nunu noo ot aanu-anu do popotogod do Kinorohingan diya', om gowoi pondo om raagon dau i hasil do karaja' nu? 7 Poingkuro nopo dot aiso' o komoyon dot ogumu' piya o nipi, om iyo nogiddi tu' aiso' i' o guna' dot adala' o boros. Nga' koronok nod Tuhan.
Aiso' i' o Kotutuk-Tutukon do Koposi-Posion do Tulun
8 Kada' kosuayai do kokito ko piya di pomorinta' do mongulok-ulok do tulun do mosikin, om magahau di diyolo'd songonuon, om a' wonsoyon it otulid dot id diyolo'. Tu' pointikid-tikid do pagawai om intirungan i' di boyoon dit id sawat ko' iyau, om intirungan goduwo iyolo' di boyoon dit asawat po ko' diyolo'd pangkat. 9 Koposi-posion piya di raja' nga' poinsondiu i' di tomoton. 10 Iri nopo tulun dit orohian do haro o tusin dot ogumu', om a' nopondo insan do kabagal o tusin dau; om iri tulun dit adalaan dot orohian do kakayaan, nga' a' i' insan dot abagalan di kakayaan dau. Aiso' ngai' nopo o kotutuk-tutukon diti. 11 Maya-kaya' ko nga' mumu-gumu' no o tulun dit apatut nu'd paakanon. Aiso' i' o kountungan di sanganu'ddi, tu' koilo no iyau do kaya' iyau. 12 Tulun nopo di pakaraja-raja' no om misomonu-monu' i' doti' dot a' osukup do makan, nga' tontok nopod modop iyau om oolong i'. Nga' sorohon nopondo i tulun do kaya', om a' nopo iyau koodop tu' atangkabo nopo. 13 Haro o nokito ku do hiti'd pomogunan di popotongob kopio do ginawo: i tulun di monimung do dapu' do maan do tontok di haro o kokurangan. 14 Nga' atagak ngai' nopondo i dapu' dau'ddi dot id suang dot iso' noo o kinosusaan, gisom dot aiso' no o potungkusan dau di tangaanak dau. 15 Poillabas toko' i' di pinogkosusu toko' i', om iyo toko' nogindo'ddi do tumongkiad toko' diti pomogunan, tu' aiso' i' ot oigitan toko' di naanu-anu toko' di pininghuyanan toko'. 16 A' i' otulid o miagal diri! Tu' mamanau toko' nopondo om miagal no di rikot toko' i'. Mingudipon toko' no toomod do manabpo do ribut, om nunu noddi o kotutuk-tutukon diri? 17 Solinaid toko' nopod poimpasi om id suang toko' nod totuong, om kosusaan, om kakanggahan, om katagadan om korualan. 18 Osonong nopo kopio do noilaan ku'd wonsoyon toko' om makan no, om minum om momurimon do hasil di karaja' toko' do solinaid diti tumur toko' dot oniiba' di pinatahak do Kinorohingan dot id dati'; iri no o kotutukon toko'. 19 Ondung onuan do Kinorohingan do dapu' om kakayaan ot iso' o tulun, om pohubayaan no dau iyau do koumbal ngai' do kosonongo' do kakayaan diri, om mongunsikou no om purimonon no o koinsanai di hasil do karaja' nu. Iri nga' nipuhawang id Kinorohingan. 20 Ponuon id Kinorohingan do kosimbayanan o ginawo dau, om a' indo iyau atangkabo do kosorou dot oniba' o tumur dau.
1 Nokito ku nogi' it a' otulid dit araat kopio do hiti'd pomogunan. 2 Haro i' o maso do manahak o Kinorohingan do kakayaan, om karayahan om dapu' dot id iso' o tulun, do gisom dot aiso' no o kosionuan dau'd suwai. Nga' a' i' iyau'd Kinorohingan pologoson do koumbal di pinopuhawang diri. Om iri nogindo i tulun dot a' dau otutunan o kotungkus di kakayaan diri. Om iri nga' aiso' i' o kotutuk-tutukon om a' otulid. 3 Mulong pod haro daa o tulun do kitanak do hatus o tulun, om anaru o tumur dau, nga' ondung a' indo osimbayan o ginawo dau, om a' iyau olobong kosonong-sonong, nga' osorou ku nopo iyoho', om iri nopo i ragang dit osusu do nolombus om osonong nogi' o kinotutukon ko' mantad di tulun diri. 4 Iri nopo i tanak diri om a' i' monguro dot osusu tuu iyau ko' amu'; tu' kumaa nopo iyau dot id totuong, om olihuan nondo. 5 A' po iyau nokoumbal do nokokito dilo tinitiu'd tadau, om a' kosuhut do komoyon do poimpasi, om osimbayan pogi'ndo iyau do poundorong. 6 Om osonong nogi' iri ko' mantad di tulun do duwo nahatus o toun do poimpasi, nga' a' i' nokoumbal dot osimbayan. Okon toi ko' iso' i' o kinoiyonon do kokoyoon diyolo' goduwo? 7 Kakarajaan nopod tulun om mogihum nod kaakan-akanan, nga' a' i' iyau insan kopuriman dot oiyahan. 8 Om nunu noddi ot aanu-anu di tulun dit oilo do pataladon di tulun do basug? Om nunu no o guna' do milo piya i tulun do mosikin do tumimbaba' do koposi-posion dau do hiti'd pomogunan? 9 Aiso' ngai' i' o kotutukon diri, tu' iyo noddi tumotos do manabpo do ribut. Osonong nogi' dot abagalan toko' do nunu nopo i haro dot id dati', mantad ko' i haro kasai' nopo o kosionuan do pomoruhang di haro dot id dati'. 10 Koinsanai di haro do dinondo, om haro mantad no di gulu po. Om oilaan toko' i' dot a' kasaap o tulun do monokisongkiwal do tulun dit okoris ko' iyau. 11 Alaid-laid iyau do monokisongkiwal, nga' mumu-gumu' no o boros dau dit aiso' o komoyon; om aiso' i' o nunu-nunu dot aanu dau. 12 Poingkukuro o tulun do koilo ondung nunu it osonong kopio dot id dau dot id suang diti koposi-posion dit oruhai do katalib, i miagal nod sangai? Poingkukuro o tulun do koilo ondung nunu ot osiliu do hiti'd pomogunan dot apatai iyau?
Pomusarahan do Pasal do Koposi-Posion do Tulun
1 Ngaran nopo dit osonong om osonong i' ko' mantad do tumau dit amahal o gatang; om tadau di kapatayon nga' osonong nogi' ko' tadau do kinosusuon. 2 Osonong nogi' do mongoi'd hiri'd walai di haro o katangaban, ko' mongoi dot id kinoiyonon di maso do rumamai. Tu' mositi' no dot osorou kasai' toko' i' do poingandad o kapatayon do pointikid-tikid do tulun. 3 Osonong nogi' o katangaban ko' mantad do koirakan om kataadan. A' i' monguro dot olunggui piya o rabas, do muhang-ruhang po ot osuhutan. 4 Tulun nopod basug om mogihum nopod kosimbayanan. Tulun nopo di kitoilaan om kapatayon kasai' i' o sorohon. 5 Osonong nogi' do sunudan ko di tulun di kitoilaan do nakasala' ko', ko' mantad do royohon ko di tulun do basug. 6 Iri nopo i tulun do basug do koirak, om miagal no di kuropit do korugian di tutudan, tu' aiso' i' o komoyon. 7 Monipu' nopo o tulun di kitoilaan, om miagal no di tulun do basug o kowoyo-woyoon dau. Om rumamit nopo o tulun do tusin do ponisip om karaag nori do ngaran dau dit osonong. 8 Kopongoon nopod nunu nopo om osonong nogi' ko' mantad di koimpuunon nogi'. Om it alanut o ginawo nga' osonong nogi' ko' mantad dit asawat o ginawo. 9 Kada' kobintogod; om kada' pimbasug-basug do popoopi' do katagadan. 10 Kada' ponguhot do, “Nokuro i kowoyo-woyoon di gulu po tu' ongosonong nogi' ko' iti kowoyo-woyoon do dinondo?” ka. Tu' ponguhatan nopod miagal diti om iri no i tulun do basug o monguhot. 11 Apatut i' do kitoilaan o tulun do daamot dau do poimpasi, tu' gatang nopod toilaan om irad i' di dapu' do tungkusan; 12 om iyo di tusin tu' milo do moningolig do koposi-posion nu. Isai nopo o haro o pomusarahan dot atarom om toilaan, om apasi no. 13 Antangan no i wonsoyon do Kinorohingan. Haro po toi o tulun do milo'd monulid di pinokilong mantad do Kinorohingan? 14 Om kumotood no dot osonong-sonong ko po. Nga' ondung oontok ko'd kosusaan, om kada' kolihuwai do Kinorohingan i' o pinapatahak goduwo'ddi. Om a' toko' i' koilo ondung nunu ot osiliu dot id dosunsudan. 15 Aiso' i' o guna' do koposi-posion ku, nga' nokito ngai' ku i' iri do solinaid ku'd poimpasi. Haro i' do matai i tulun dit osonong do kikotumbayaan piya iyau. Nga' iri nogindo tulun dot araat om ongotogui i', dot a' piya iyolo' tumingkod do mingwonsoi'd dusa. 16 Kada' piya kadalaai kosonong, om kada' padalaai kogumu' o toilaan. Nunu noo ot aanu-anu do kumiros? 17 Kada' kadalaai karaat om kada' kadalaai kabasug. Nunu noddi o guna' do matai dot a' po orikot o kapatai-patayan? 18 Ilagon no i duwo o kowoyoon di misuwai kopio'ddi. Ondung oronok toko'd Kinorohingan, om atantu' no dot apasi toko'. 19 Toilaan nopo om haro nogi' o guna' dot id tulun di kitoilaan, ko' mantad do hopod o pomorinta' do momorinta' dot iso' o bandar. 20 Aiso' i' o songulun piya do hiti'd pomogunan dit aiso' o bohiton, om it osonong kasai' nopo o wonsoyon om a' insan kowonsoi'd dusa. 21 Kada' korohiai do mokinongou do nunu nopo o boros do tulun, tu' nunu o koilo-ilo nga' maso ko no doti' do papalan di susuhuon nu. 22 Om kopuriman ko nogindo, do wokon nga' noumbalan nu i' do momopol. 23 Iri i toilaan ku o pinongilo kopio ku do koinsanai'ddi. Nga' maha' nogi' dot ihumon ku i toilaan, om okon nogi'd minsodu' do mantad id doho'. 24 Isai noo o koilo do komoyon kopio diti koposi-posion do tulun? Adalaan no kopio karalom iri om a' no osuhutan! 25 Nga' minsingilo oku i' kasai' om mogihum oku do toilaan, om kaanu oku i' do toilaan dit aralom om isimbar do koinsanai di tuhoton. Om kosuhut oku i' do dusa nopo om kababasug i', om kobubungou o karaaton. 26 Koilaai ku noddi do tongoondu' nopo om araat po ko' kapatayon. Iri nopo pongunguhang do tondu' om miagal po di rambot om i lawa' di pointaan no do maan do pamalawa'. Iri nopo i pamagapus di tondu' nga' iyo pod kogos dit oogot. Iri nopo i tulun di momonsoi'd korohian do Kinorohingan om koilag i' di lawa'ddi, nga' iri nopo tulun do kidusa om atantu' no dot alawaan. 27 Antangai pogi', ka di Tulun dit Aralom o Toilaan: Noilaan ngai' ku iddi iri, do sinoriso-iso' ku do mogihum ot isimbar. 28 Maso ku pod mogihum dot isimbar di suwai, nga' aiso' no o noilaan ku. Id pogialatan nopod soribu o tulun, om iso' no o kusai do nabantalan ku di milo ku'd royohon. Nga' id pogialatan nopo diyolo', om iso' pod tondu' nga' aiso' i' o nokito ku di milo ku'd pusohon. 29 Iti noo o noilaan ku: Osonong i' daa om koubasanan o pinomonsoi'd Kinorohingan dati'. Nga' iyati' i' om iyati' o monusa' om momorulong do koposi-posion toko'.
1 Osonong no kopio o ginawo di tulun do kitoilaan. Tu' koilo i' iyau dot isimbar do koinsanai do nunu nopo. Iri no i toilaan o popokusum dau dot atataadan, gisom dot aiso' no i kurudot do turos dau.
Umboyo' no di Raja'
2 Wonsoyon no i ponuhuan do raja', om kada' pamatos dot id Kinorohingan dot a' ko po kopomusorou kopio. 3 Milo i' i raja' do momonsoi'd nunu nopo i korohian dau, om ondung a' iyau ohubayaan diya', om osonong nogi' do minsodu' ko dau. 4 Kikuasa' i' o raja' do momonsoi di wonsoyon dau; om aiso' no o kasaap do sumurilog dau! 5 Tulun nopo di mumboyo' dau, om osimbayan i' om aiso' o koligagaanan. Iri nopo tulun do kitoilaan om koilo i' ondung soira' om poingkuro do mumboyo' di raja'. 6 Haro i' o maso di kopunong om ralan di koontok do momonsoi do koinsanai'd nunu nopo, nga' okuuri' kopio ot osuhutan toko'! 7 Iso' pod tulun nga' aiso' i' o koilo ondung nunu o kotutukon do poingandad dau, om aiso' o milo'd poboros ondung nunu ot osiliu dot id dabantalan. 8 Iso' pod tulun nga' aiso' i' o milo'd momusus ko' papalaid pod kapatayon dau. Iti no o pisangadan dit a' milo dot ilagon, om a' milo'd mogidu' do mantad diti do monipu' piya daa ko' magakal o ralan do mogidu'.
Tulun dit Otopot om it Araat
9 Iti ngai' no o nokito ku do tontok di miontong oku do koinsanai dit ongosiliu do hiti'd pomogunan. Haro i' do pakayon do tulun o kuasa' dau do ponginggorit do sompi' ko' iyau ngai'. 10 Nokoumbal oku i' do nokokito'd tulun dit araat do napatai om linobong. Nga' di nopoddi minuli' oku do mantad hiri'd kalabangan, om korongou ku nod royohon i' iyau di tulun di hiri'd bandar di pinamansayan dau dot araat. Om iti nga' aiso' i' o kotutuk-tutukon. 11 Nokuro tu' aiso' kopio o koontob-ontobon do tulun do momonsoi dit araat? Kobungou nopoddi nga' a' olomus do hukuman i tulun di nakasala'. 12 Mulong piya do hatus no o karaaton do nowonsoi di songulun i kidusa, nga' poimpasi kasai' i' iyau om otogui. Isai nopo kaka i mumboyo'd Kinorohingan, om osonong ngai' no ot id suang do koposi-posion dau. 13 Nga' iri nopondo i tulun dot araat om ogumu' no kaka o kosusaan. Oruhai do tumalib o koposi-posion dau tu' iyo noddi sangai. Omulok po iyau om matai no tu' a' i' iyau minumboyo' do Kinorohingan dau. 14 Nga' aiso' i' o suang do boros diri. Antangai nopo pogi' iti tosiliu do hiti'd pomogunan: Haro i' o tulun dit osonong, do hukuman dot iyo po di tulun dot araat, om haro o tulun dot araat di somulian do miagal dit isomuli' do tulun dit osonong, om iti nga' aiso' i' o kotutuk-tutukon. 15 Kinopupuson nopod pomusarahan ku om mositi' nod kumotood o tulun. Tu' id suang nopod koposi-posion dau do hiti'd pomogunan om aiso' no it osonong dot id dau suwai ko' makan, om minum om rumamai. Iri noo i milo kopio'd purimonon o kosonongo' do daamot dau dot ohuyan om oudipon, dot id suang diti koposi-posion do pinatahak do Kinorohingan dot id dau. 16 Tontok di tuminotos oku'd mogihum do toilaan, om piantangai ku no o koinsanai dit osiliu do hiti'd pomogunan, om kopurimanai ku noddi do kumaraja' toko' piya do tadau om totuong dot aiso' o koundarangan, 17 nga' a' kasai' toko' i' kosuhut di wonsoyon do Kinorohingan. Poingkuro toko' piya do tumotos do minsingilo'ddi, nga' a' kasai' toko' i' kosuhut. Mangakun i tulun di kitoilaan do koilo iyau, nga' otopot nopo kopio om a' i' iyau koilo.
1 Nosorisid ngai' ku no iri do momusorou. Uludon id Kinorohingan o koposi-posion do tulun dit osonong om i kitoilaan. Om iri piya kosianan om karaatan diyolo' nga' Kinorohingan i' o monongkoilo. Aiso' i' o koilo ondung nunu ot osiliu dot id dosunsudan dau. 2 Oiyo i' o kotutukon do pointikid-tikid do tulun; tulun dit otulid om tulun dit araat, tulun dit olidang om i tulun di sosomu', i tulun di papatahak do porsombahan do sumbolion, om i tulun dit a' papatahak. A' i' poimogo-mogot i tulun dot osonong ko' mantad di tulun do kidusa, iri tulun di mamatos do mikuwo'd sumpa' nga' miagal nopo di tulun dit a' mamatos do mikuwo'd sumpa'. 3 Om oiyo i' o kotutukon diyolo'. Om a' i' otulid iri, do miagal ngai' dit ongosiliu do hiti'd pomogunan tu' a' i' otulid. Solinaid nopod tulun do poimpasi om noponu' no iyau do kouulau, om noponu' do kababasug o pomusarahan dau. Om sigog ka nopondo om apatai no iyau. 4 Nga' solinaid nopod poimpasi, om solinaid noddi do haro o soro-sorohon. A' toi koundar nogi' i tasu ko' mantad di singa, dot ondung poimpasi i tasu om poimpatai i singa? 5 Tu' iri nopo i tulun do poimpasi om koilo i' do poingandad dau o kapatayon, nga' iri nopondo i tulun do napatai om aiso' noo o toila-ilaan dau. Aiso' no ot isomuli' dau, om ngaran dau nga' nolihuan no. 6 I kopurimanan dot osianan, om araatan om i korohian do tinan dau, nga' nokotonggoi ngai' no dau'd napatai, om a' no iyau kokuro-kuro do nunu nopo it ongosiliu do hiti'd pomogunan. 7 Kainou nopo, om sumimbayan, inumo' no ino waig dot anggur nu do mikuwo dot otood o ginawo. A' i' mogodu o Kinorohingan, suwai ko' asanangan nogi' iyau. 8 Pologoso' no dot otood om osimbayan o kokitanan do rabas nu. 9 Purimonon no o kosonongo'd koposi-posion nu do poinsugku' ko di sawo nu di kosianan kopio nu do solinaid nu'd poimpasi dot id suang do koposi-posion dit aiso' o kotutuk-tutukon, i pinatahak do Kinorohingan dot id diya' do hiti'd pomogunan. Purimonon no o kosonongo' do pointikid-tikid do tadau dot aiso' piya daa o guna'. Tu' isomuli' nopo di huyan nu'ddi om i koudiponon nu om iri-iri noo. 10 Tumotos nod momonsoi do koinsanai di karaja' nu. Tu' koimbagu nopondo om aiso' no ot osorou om aiso' o karaja'. Aiso' i' o toilaan om pomusarahan dot atarom do hilo'd pomogunan di tulun di napatai. Om hilo' no o koongoyon nu. 11 Haro po ot okito ku do hiti'd pomogunan: Okon i' ko' iri kasai' no mananangkus dit osiau o kamanang dot id pilumbaan, om okon ko' iri kasai' i tulun dot okoris o kamanang dot id pisaapan. A' i' kaanu kasai' do pogihuman do kaakan-akanan i tulun dit oilo. Om a' i' kaanu kasai' do kakayaan i tulun di kitoilaan. Om iri tulun dit oilo kopio nga' a' i' kabantug kasai' no o ngaran dau. Tu' isai nopo nga' oontok i' do kosusaan dit araat kopio. 12 A' i' koilo o tulun ondung soira' dot orikot o maso dau. Poingkuro nopo i tombolog dot alawaan, om i sada' dot arambatan, om iyo noddi o tulun dot oontok do kosusaan do tontok di maso dit a' i' daa dau soro-sorohon.
Pomusarahan do Pasal do Toilaan om Kababasug
13 Hiti nopod pomogunan om haro i' o tokito ku do poiyaan dit osonong do pasal do toilaan dot osorou'd tulun: 14 Haro o tiso' o bandar dit okooro' om okuuri' o tulun do poingiyon do hiri. Insan tadau om rikot no o raja' dit abantug do minongoi panangod do bandar diri. Om turungkuo' no dau i bandar diri om sodia' nod mamaraag di tolig di bandar. 15 Id suang nopod bandar diri om haro o songulun dit oilo kopio. Om iyau poddi o nakapasi di bandar. Nga' oruuhai do nolihuan i winonsoi dau dot osonong om iso' pod tulun nga' aiso' no o kosorou dau tu' mosikin i' iyau. 16 Om otopot no i nosorou ku do kosoibau id kuasa' o toilaan. Iyo piya'ddi nga' a' i' pusohon o toilaan do tulun do mosikin. Om iso' po di boros dau nga' aiso' i' o podulon. 17 Osonong nogi' do mokinongou do boros dit opiiyan do poboroson di tulun di kitoilaan ko' mantad do mokinongou do giniakan do pomorinta' dot id tinimungan do tulun do basug. 18 Haro nogi' o guna' do toilaan ko' rapo-rapo; sontiri' nopo o nila nga' karaag nod sambalanga' o susu.
1 Iso' nopo o langau di napatai, nga' koutong i' do sombutul o tumau dit osonong o kosingudan, okooro' nopo do kababasug nga' katagak nod toilaan dit asawat. 2 Koubasanan id tulun di kitoilaan do momonsoi dot osonong, om koubasanan di tulun do basug do momonsoi dot araat. 3 Oilaan no kopio o kababasug dau dot id sompogunan piya dit osolowot dau do hilo'd tanga'd ralan om popinsunudon dau o kababasug dau dot id toinsanan o tulun. 4 Ondung togodon ko di raja', om kada' pokitingkod do kumaraja'. Tu' agayo piya o kinasalaan nu, nga' oompunan ko i' ondung alanut o ginawo nu om a' nu pimbarasan iri. 5 Haro po it araat kopio dot okito ku do hiti'd pomogunan, iri no i piro-piro o raja' om i pomorinta' dit a' otulid. 6 Onuan nogi' do pangkat i tulun do basug, om a' nogi' podulon i tulun do kaya'. 7 Nokoumbal oku i' do nokokito'd turipon do poinsakai'd kuda', om mamanau nogi'd gakod i tulun di kipangkat dot iyo poddi turipon. 8 Isai nopo i mongukad do luang, om aratu' nod hiri; isai nopo i mamabak do tolig om otinduk nod tulanut di kapatai. 9 Isai nopo o kakaraja' do hilo'd pamabakan do watu, om kaahid no di watu om osuhat. 10 A' nopo kotogu' o dangol nu om a' nu ngoyon asao', om oudipon ko nod kumaraja'. Momusorou no kopio, om sorohon mantad no o wonsoyon nu. 11 Ondung moninduk i tulanut dot a' po alaya' di pomolimu', om aiso' no o guna' di mamalaya' do tulanut. 12 Iri i boros di tulun do kitoilaan o kopomusahan do tulun dau, nga' iri nopo tulun do basug om iri i' i boros dau o karaag dau. 13 Mogkoringau noo o timpuunon dau do moro-boros, nga' alaid nopondo om iyo poddi mulau o koboro-boroso' dau. 14 Atantu' no, dot adala' o boros di tulun do basug. Poillisok i' it id dosunsudan ngai' toko'. Aiso' i' o milo'd posunud ondung nunu ot osiliu dot apatai toko'. 15 Iri no tulun do basug ot a' kotunud do ralan do kumaa do hiri'd walai dau, kumaraja' nopo iyau dot aiso' o kotingkadan. 16 Obungou no i pomogunan dit omulok po o raja', om monuaban do rumamai i piro-piro o boyoon. 17 Olumaag no i pomogunan di kikuasa' kopio i raja' do hiri, om koontok o maso do kaakanan di piro-piro o boyoon, it a' orohian dot aawuk om milo'd momusus do korohian do tinan. 18 Turuon i' o taap do walai ondung a' wonsoyon, om alaid nopondo om ahaba' indo i walai do gama' do kokoulo'. 19 Popoirak o karamayan, om popotood i waig dot anggur. Nga' mositi' nod haro o tusin do pomoli'ddi. 20 Kada' pakaraat do raja', dot id suang piya'd ginawo nu. Kada' pakaraat di tulun do kaya', do hilo' ko piya'd bilik do toodopon nu. Tu' haro i' doti' o tombolog do korongou di boros nu, om poromuton nondo dot id tulun di boro-boroson nu.
Wonsoyon do Tulun di Kitoilaan
1 Pakayo' no o tusin nu dot id pogidagang-dagangan do hilo'd pomogunan do suwai. Atantu' nod kaanu ko i' do tuntung do koimbagu. 2 Pakayo' no o tusin nu dot id piro-piro o pogidagang-dagangan; om mogihum no do ralan dot ogumu' do poinggumuan di tusin. Tu' mositi' nod mumbangan-bangan o tulun, dot a' po korikot o kosusaan. 3 Honggo nopo o kahabaon do kayu, om poingiliu kasai' nod hiri'd kinahabaon. Poimponu' nopod waig i haun, om asapou no o rasam do sumondot. 4 Isai nopo i magandad do kosonong kopio o ribut om talun, om a' no kapananom om a' kopongupu' do tua'. 5 Kinorohingan i' o minomonsoi do koinsanai'd nunu nopo, om a' i' o tulun kosuhut diri. A' i' iyau kosuhut ondung poingkuro dot osiliu o koposion do tanak do hiri'd paganakan do tondu'. 6 Mositi' nod mananom ko do dongkosuabon, om iyo iddi o wonsoyon do dongotuong. Tu' a' toko' i' oilaan ondung honggo'ddi ot osonong o sunion. Om nunu koilo-ilo nga' osonong goduwo i' doti' o sunion diri. 7 Popotood ilo tinitiu'd tadau; om a' no ogina-gina' o kosonongo' do tontok do momurimon do kosonongo'ddi. 8 Mongunsikou nod tontok do tumuo o tumur nu. Nga' sorohon no, dot alaid ko piya do poimpasi do hiti'd pomogunan, nga' alaid-laid ko do hilo'd kinoiyonon di tulun di nangapatai. Om nunu po daa'ddi o soro-sorohon? Aiso' ngai' i' o guna' om aiso' o kotutuk-tutukon.
Nosihat dot id Tulun dit Ongomulok
9 Oi tulun dit omulok po, purimono' no o kosonongo' do koposi-posion nu di maso nu pod omulok. Kumotood no do solinaid nu po dot omulok. Ngoyon ngai' no i korohian do ginawo nu, wonsoyon ngai' no i kouhangan do ginawo nu, nga' sorohon no, do Kinorohingan i' i hilo'd surga, o momutus do koinsanai di wonsoyon nu. 10 Iduwo' no o katangkabaan om kosusaan do mantad id suang do ginawo nu, tu' oruuhai do tumalib o maso nu dot omulok.
1 Sorohon no i Minomonsoi diya' dot omulok ko po, dot a' po orikot i piro-piro o toun do poimponu'd koinggoritan. Tontok nopondoddi om moro-boros ko nondo dot, “A' osimbayan o koposi-posion ku,” ka. 2 Orikot nopondo o maso'ddi om a' no atarang ot okito nu, gisom dot atalup no o tulinau do tadau, om tulan om rombituon. Om iri haun di kirasam, nga' moyo-woyo' nopo diya' do momorolosi diya'. 3 Gagaran poo o longon nu om a' no kointirung. Om gakod nu nga' oluhoi nondo, om aiso' noo o kokorisan. A' nondo hino ngai' o nipon nu do pongogop do taakanon. Om ohour ot okito nu, gisom dot a' ko no kokito kopio. 4 Oiyo-iyo nu pod orongou i karamayan do hilo'd ralan. Oruhai no dot a' orongou i tuni do tuunion om i tuni di pongisar. Iri piya tuni do tombolog nga' koposik i' diya'. 5 Ooris ko do kinoiyonon dit asawat om momirulan-rulan ko po do mamanau. Opurak no o tobuk nu om gayaton nu po o gakod nu do tontok do mamanau ko. Om aiso' no o korohian nu, om aiso' o kasanangan nu. Kumaa toko' do hilo'd kinoiyonon toko' dit id tohuri no, mogihad poo om mogkorudu' o tulun do poingompus do ralan. 6 Opogiputut-putut i rantai do pirok; om aratu' i lampung do tamas do gisom dot ababak; oputut i tali di poninimbauk om araag; om opurok i kuron do gisom do mogiuriasan. 7 Gumuli' indo o tinan toko', do sumiliu'd tana' do hiti'd pomogunan. Gumuli' indo o pinuhobo do koposion toko' dot id Kinorohingan. Iyau i' o pinapatahak diri do pinopuhawang toomod. 8 Boros kangku, om otopot i' kopio dot aiso' ngai' i' o kotutukon diri, om oinsanan dot aiso' o komoyon om aiso' o guna'.
Kolimpupuson
9 Kitoilaan i' om atarom o pomusarahan di Tulun dit Aralom o Toilaan. Om potudukon diri dau dot id koinsanai'd tulun, i toilaan dau. Ogumu' o boros dot angaralom do pinsingilaan dau om ilaan kopio dau o katapatan diri. 10 Tumotos iyau do mogihum do boros di koinsasamod, om otulid ngai' o boros di tinulis dau. 11 Boros nopod tulun dit oilo'ddi om iyo po di sukud do madtatamong do dumba' katarom, i sukud di pinongintirung dau di dumba' dau. Iti nopo pinotimungan do boros dot aralom om nosihat, om iyo poddi lantak dit ogirot o pinapalantak. Iri nga' pinopuhawang ngai' id Kinorohingan, i gompomogompi' dati' dit iso' noo. 12 Oi tanak ku, antaan-taan no kopio o pasal dot iso' o hal. Aiso' i' o kopupuson do monulis do buuk, om adalaan nopod minsingilo om kohuyan id pomusarahan om tinan. 13 Om kosorisid ngai' ku poddi iri do momusorou, om poingkaa diri o noilaan ku. Koronok nod Kinorohingan om tonudon ngai' no o ponuhuan dau, tu' iri no o kinapamansayan dau'd tulun. 14 Butusan indo'd Kinorohingan o koinsanai di wonsoyon toko'; it osonong om it araat, om i songillisok.
1 Sinding di Suliman dit olumis kopio.
Sinding do Koiso'
Tondu'
2 Tungubai oku no dino munung nu; tu' osonong po ko' waig dot anggur o kosianan nu. 3 Osonong no kopio o kosingudan do tumau nu; om iyo po di tumau dot osonong o kosingudan do ngaran nu do poposonong do ginawo. Om oinsanan nopoddi o kosumandakan do muhang diya'. 4 Powoyoo' oku, om kaino mogidu'; angatai oku no do hilo'd bilik nu, oi raja'. Om ooropod kito indo goduwo, do miinsian-sian, om miuhang-uhang. Apatut no giya do muhang ngai' i kosumandakan diya'! 5 Oi tongoondu' do Yorusalim! Oitom oku piya nga' olumis oku i', oitom oku piya do miagal di kiim do tulun do Kidar do hilo'd tana' do kowotuan, nga' olumis oku i' do miagal di tirai di walai'd Suliman do don raja'. 6 Kada' oku dokoyu indaraato', dot oitom oku piya. Tu' ilo' i tadau o nokoitom doho'. Tuminogod ngai' doho' i tobpinai ku'd kusai, om suhuo' oku noddi diyolo' do kumaraja' do hiri'd kabun dot anggur diyolo', om gowoi poddi om aiso' no o maso ku do momogompi'd tinan ku. 7 Sunudai oku no, oi kouhangan kopio ku, ondung hinonggo o pinaakan-akanan nu di dumba' nu? Hinonggo o lungungon diyolo' di pitangaadau? Nokuro tu' minog oku pod mongoi rolot di dumba' do tulun do suwai do mogihum diya'?
Kusai
8 A' ko toi kotunud di kinoiyonon diri, oi tondu' ku, dit olumis kopio? Sumusui nopo di tulok di dumba'; om ngoyo' nopo paakan-akano' i kambing nu dot id somok di kokiiman di gompomogompi'd dumba'. 9 Kabayayat ko no kopio do ginawo, oi koupusan ku, miagal ko po di kuda' di pamagayat do korita'-kuda' di Piraun. 10 Olumis tomod ino pingas nu, om kolumis do tulu nu ino tobuk nu. Om kolikup do liou nu do miagal po di watu dot olumis dit agayo o gatang. 11 Wansayan po dahai iya' do karo do tamas, dot i dinakatan do pirok do maan do pongillumis.
Tondu'
12 Tontok nopo di poillii i raja' do hiri'd toodopon dau, om osingud pod tumau o hiri. 13 Iri nopo koupusan ku om osingud pod damar, do tontok di poillii iyau do poulunan do kangkab ku. 14 Iri nopo koupusan ku om miagal pod sowongkos o tusak do bunga bakung di hilo'd kabun dot anggur dot In-Gidi.
Kusai
15 Olumis ko no kopio, oi koupusan ku, olundus ko no kopio, om popointalang do kosianan nu ino mato nu.
Tondu'
16 Oligkang ko no kopio, oi koginawaan ku, asanangan oku no kopio diya'. Hilo'd kasakat-sakatan o toodopon to. 17 Iri kayu sedar o torigi do walai to, om kayu sedar o wonsoyon do siling.
1 Iyoho' nopo, om miagal nod bunga do mantad hilo'd rantai do Saron, om miagal do bunga bakung do mantad hilo'd guas do nuluhon.
Kusai
2 Iyo po di bunga bakung dot id rolot do rugi, i koupusan ku, dot id rolot do kosumandakan do suwai.
Tondu'
3 Miagal pod guas dot ipol dot id rolot di kayu do hilo'd gouton, i koginawaan ku, do katalad di katanakwoguan do suwai. Orohian oku do mirikau do hiri'd lungung do kayu'ddi, om i tua' do kayu'ddi nga' oomis dot aakan ku. 4 Nangatan oku dau do hiri'd walai do poginakanan, om poimponu' iyau do kosianan do montong doho'. 5 Pokoriso' oku no dot i waig dot anggur dot oomis o popokoris, om posonongo' o topurimanan ku, dot i tua' dot ipol o poposonong, tu' i muhang o tosiliu do toruol ku, om olomok oku no. 6 Iri nopo longon dau'd gibang om mangahang do tulu ku, om iri no longon dau'd wanan om mimpuwai doho'. 7 Oi tongoondu' do Yorusalim, pamatos kou no, dot id paus om id tambang dit ongokilos, dot a' kou mamagangau dahai do maso dahai'd miuhang-uhang.
Sinding do Koduwo
Tondu'
8-9 Pokinongou pogi'! Hati no i koupusan ku do rumikot! Osiau tomod iyau do manangkus. Simbul-simbulan nopo dau o konuluhanan om konulu-nuluan. Poingkakat no iyau do hilo'd tirung do limput, om mikorowo-rowo do mogihum, om poingilot do hilo'd liligaon. 10 Pokinongou no, moro-boros no i koupusan ku.
Kusai
Kaino, oi koupusan ku, tanud doho'. 11 Intangai pogi' nga' nakatalib no i maso dot osogit; om nopupusan no o maddasam. 12 Mimbulai no o tusak do bunga do hilo'd talun; norikot no i maso do modsinding. Orongou no o sikukur do minguni do hiti'd kinoiyonon toko'. 13 Momulopuk no i kayu sedar; om osingud no o winongi' di tusak dot anggur. Kaino no, oi koupusan ku kaino no! 14 Nokuro tu' lumisok ko do hino'd pogiolit-olitan do watu, oi kosianan kopio ku? Pointongo' oku no di kolumiso' do rabas nu, om porongoho' oku no di boros nu dit osonong kopio, tu' olumis kopio o rabas nu, om osonong o boros nu. 15 Oi kongoombolutan, gomito' no dahai i toni dit ongokooro' dot a' po iyolo' kapamaraag dot anggur di maso do mongusak.
Tondu'
16 Iyoho' no o sanganu di koupusan ku, om iyau o sanganu doho'; poirrolot iyau di bunga bakung do momogompi'd dumba', 17 gisom do kalambai i ribut do dongkosuabon, di katalib o totuong. Guli' no, oi koupusan ku, dot iyo di paus do tontoluhan do mantad hilo'd konuluhanan do Bitir.
1 Di nopo dongotuong di hiri oku'd toodopon ku, om koipi ku no i kosianan kopio ku. Om ihumo' ku no daa iyau nga' a' ku i' iyau nokito. 2 Tungag oku no, om ongoi oku no tongkop di bandar, minimpanau oku do hiri'd karalan-ralanan om hiri'd kawalayan. Nihum ku daa i kosianan kopio ku nga' a' ku i' iyau nokito. 3 Kabantalai oku no di tulun do madtatamong do tontok di mimpanau iyau do hiri'd bandar. Om boros kangku, “Nokokito ko di kosianan kopio ku?” kangku. 4 Om tongkiadai ku no iyolo', om kokito ku noddi i koupusan kopio ku. Pususo' ku no iyau om a' ku no pinoidu' do gisom do nokorikot do hilo'd walai di tina' ku; i hiri'd bilik di tina' ku di minogkosusu doho'. 5 Oi tongoondu' do Yorusalim; pamatos kou no dot id paus om id tambang dit ongokilos, dot a' kou mamagangau dahai do maso dahai'd miuhang-uhang.
Sinding do Kotolu
Tondu'
6 Isai ilo rumikot do mantad hilo'd tana' do kowotuan, do miagal po di lisun di poorigi? Iyo po di mur om rampa o kosonongo' do kosingudan dau, i rampa di padagangon di tulun do dumadagang. 7 Ilo' nopo om i Suliman do poirikau do hilo'd tirikohonon do don raja'; om woyoon iyau dot onom nohopod o tulun do gunsiou, i tulun dot Israil di gunsiou. 8 It ongoilo kopio do migit do gayang, om nongoubas do sumangod. Ongkiabil ngai' nopo iyolo' do gayang do sumodia' do sumaap do tontok do songodon di dongotuong. 9 Nantayang i Suliman do poirikau di tirikohonon dau do don raja', i kayu dot osonong kopio do winonsoi. 10 Iri nopo torigi om pirok do winonsoi, om iri no sondihon om tamas do winonsoi. Iri nopo tirikohonon dau om linopikan do kain dit aragang, i nawol di tongoondu' do Yorusalim do mikuwo'd kosianan. 11 Oi tongoondu' do Sion, intong kou no di Raja' Suliman. Kitupi' iyau di tupi' do raja', i pinotupi' di tina' dau, do tontok di tadau do kuminawin iyau, i tadau do kataadan do ginawo dau.
Kusai
1 Olumis tomod ko, oi koupusan ku! Pointalang do kosianan o mato nu dot id tirung do tudung nu. Ino nopo tobuk nu om iyo po di kambing dit ogumu' do rumuhuk do hilo'd konulu-nuluan do Giliad. 2 Nipon nu nga' miagal po di dumba' di kobubugar om i kopopodsu'. Aiso' i' o tiso do nouud; osisid nopo om angapanggor o nipon nu. 3 Ino munung nu nga' miagal po di tuwai di rinagang, do tontok do moro-boros ko. Ino pingas nu nga' olumis tomod dot iyo po di tua' do delima dot id tirung do tudung nu. 4 Ino liou nu nga' miagal po di walai di Daud dit akawas, tu' obulugu' om anaru, karo nu nga' iyo po do soribu o kolid. 5 Ino susu nu nga' miagal pod duwo o tanak do tambang, om iyo di tanak do paus do miapid, di mangakan-ngakan dot id rolot do bunga bakung. 6 Orohian oku'd mundorong do hilo'd nuluhon do mur, i hilo'd rantai do kominyan, gisom do korikot i ribut do dongkosuabon, om katalib o totuong. 7 Olumis tomod ko, oi koupusan ku, aiso' no o bohiton do tinan nu. 8 Ruhuk no, oi tondu' di kinawin ku; do mantad hilo'd Nuluhon dot Amana, i tiyonon do rimau om singa. Kaino rumuhuk do mantad id Nuluhon do Libanon, mantad id Nuluhon do Somir om Nuluhon do Hormon. 9 Oi koginawaan ku, i tondu' di kinawin ku, nagayat o ginawo ku, di pogogontong do mato nu, om nagayat o ginawo ku dino karo do poingkaro nu. 10 Moningkau do ginawo ku o kosianan nu, oi koupusan ku, i tondu' di kinawin ku. Osonong po ko' waig dot anggur i kosianan nu. Om osonong o kosingudan nu ko' mantad do tumau dit osonong o kosingudan. 11 Iyo pod paha' koomis o munung nu, oi koupusan ku, om ino dila' nu nga' miagal pod susu om paha' dot id doho', om pakayan nu nga' osingud do wongi' do Libanon. 12 Iri nopo i koupusan ku, om miagal do kabun di poillisok, om kabun di pinagar, om tudan do waig dit iso-iso' o sanganu. 13-14 Ongorombung tomod i totonomon do hilo', iyo po di kabun do kayu delima di kitua' dot ongosonong kopio. Haro ngai' nopo o bunga pacar, om narwastu, om kayu manis, om tobu, om kunit, om kominyan, om mur om rampa di mogisuayan. 15 I tudan do waig o koyopos di kabun, i bawang do poingudan do hilo'd Libanon.
Tondu'
16 Posik no, oi tongus do salatan om tongus dot utara, tongus no do hilo'd kabun ku, ponuo' no dit osonong o kosingudan o hilo'. Lohowo' no i koginawaan ku, do mongoi pangakan di tua' dit ongosonong kopio do hilo'd kabun dau.
Kusai
1 Oi koupusan ku, nokorikot oku nod hiti'd kabun ku, mangakan oku nod paha' om i tulu di pinuwalai do potiukan. Monginum oku no do waig dot anggur om susu; om monimung oku do rampa om mur.
Tongoondu'
Akan ngai' kou no, oi tambalut dahai, inum kou no do gisom dot aawuk dot i miuhang-uhang o kaawuk.
Sinding do Kaapat
Tondu'
2 Koodop oku piya, nga' poimposik i' o ginawo ku. Nokoipi oku do mogkoritik nogi' do hilo'd totobon, i koupusan ku.
Kusai
Posuango' oku, oi koginawaan ku, oi punai ku; noyopos pod bolobou o tulu ku, om nabalabahan o tobuk ku.
Tondu'
3 Noidu' ku no o pakayan ku; om nokuro daa tu' pakayon ku po kawagu? Noowugan ku no gakod ku; om nokuro daa tu' ramasan ku po kawagu? 4 Om kabai no i koupusan ku di totobon di wawayaan, om osonong tomod diri o ginawo ku tu' id toning no iyau doho'. 5 Tungag oku no do mongoi pongiwang di totobon; om notongkop pod mur o palad ku, om sonturu-turu' o mur dot id tunturu' ku, gisom do noyopos i tontiil di totobon. 6 Iwangai ku no i wawayaan, do wayaan di koupusan ku, nga' a' i' iyau hino. Sirongou tomod oku daa di boros dau! Ihumo' ku no daa iyau, nga' a' ku i' iyau nokito, lohowo' ku no daa o ngaran dau, nga' a' i' iyau suminimbar. 7 Nokito oku'ddi di tulun do tumamong di bandar, om binobog oku diyolo' om pinokorualan oku; nahau di tulun do tumamong di bandar i kulabai ku. 8 Papalan ku iyokoyu, oi tongoondu' do Yorusalim; kosolowot kou nopondo di koupusan ku, om poboroson no dokoyu dot id dau do sumakit oku tu' ouru oku'd langadon.
Tongoondu'
9 Oi tondu' dit olumis kopio, suwai toi kopio ko' wokon i koupusan nu? Okuro-kuro kopio o koligkango' dau, tu' minog kopio dahai'd sulungon o batos dahai dot id diya'?
Tondu'
10 Oligkang i' om okoris i koupusan ku, om iso' noo iyau ot iyo'ddi dot id pialatan do hopod noribu o tulun. 11 Miagal po di tambaga' kolunau o rabas dau, om songingkilong o tobuk dau om oitom do miagal di bangkahak. 12 Mato dau nga' miagal po di punai kolumis, dit id toning di bawang di muyung-luyung, i nopodsu' do susu, om poirikau dot id toning do bawang. 13 Om pingas nopo dau om olumis do miagal po di kabun do noponu'd rampa dit ongosonong o kosingudan, munung dau nga' miagal po di tusak do bunga bakung do noyopos do waig do mur dit osompipi'. 14 Longon dau nga' olumis, om kipondulung iyau do watu dit olumis dit agayo gatang, om tinan dau nga' oligkang do miagal po di lamai di dinakatan do nilam. 15 Poo dau nga' obulugu' do miagal po di torigi do marmar dot opurak di pinosungkad do tamas; abantug iyau do miagal di Nuluhon do Libanon, om agayo do miagal di kayu sedar. 16 Oomis dot otunguban i munung dau; kagayat do ginawo ku o koinan-inano' dau. Iyo noddi i koginawaan ku, oi tongoondu' do Yorusalim.
Tongoondu'
1 Oi lundu' do tongoondu', honggo nongoi di koginawaan nu? Sunudai iyahai di ralan do sinusui dau, om kouhup indo iyahai diya' do mogihum dau.
Tondu'
2 Minongoi i koginawaan ku do hilo'd kabun dau, i tinanaman do rampa. Paakan-akan iyau di dumba' dau'd hilo' om mogkotu' di tusak do bunga bakung. 3 Iyoho' no o sanganu di koupusan ku, om iyau o sanganu doho'. paakan iyau di dumba' dau do hilo'd kobungaan do bakung.
Sinding do Kolimo
Kusai
4 Oi koupusan ku, iyo ko po di bandar do Yorusalim kolumis, om olundus ko do miagal do Tirsa! Kagayat ko do ginawo, do miagal po di tawan do notongkop do rombituon. 5 Kada' oku diya' antangai, tu' kododog oku nopo dot antangan nu. Miagal pod baanan do kambing do rumuhuk do hilo'd konulu-nuluan do Giliad ino tobuk nu. 6 Ino nipon nu nga' opurak poo do miagal do dumba' di kobubugar om i kopopodsu'. Aiso' i' tiso' dot a' hino; osisid nopo om angapanggor. 7 Ino nopo pingas nu om iyo pod tua' do delima di pinilapak, dot id dotirung do tudung nu. 8 Haro piya ot onom nohopod do sawo di raja', om walu' nohopod o tongoondu' do panakasawo dau, om haro o kosumandakan dit a' ointob o kogumuo', 9 nga' iso' no o kouhangan ku. Olundus iyau do miagal do punai. Iso' no iyau o tanak di tina' dau, om iyau no o tanak do koupusan kopio di tina' dau. Suahon ngai' iyau'd tulun om royohon do toinsanan o tongoondu', iri piya i piro-piro o sawo di raja' om i tongoondu' do panakasawo di raja' nga' mamarayou i' dau. 10-11 Minongoi oku do hilo'd kabun do kenari, om sinonsod ngai' ku i tolid do hiri'd rantai; isai poddi milo ondung nokopomiroun tuu i guas dot anggur ko' nokopongusak po i guas do delima. Isai i rumikot dot iyo po di tadau di mingungulai nogi', om iyo di tulan di misawang kolumis, om iyo di tadau di kosorong? 12 Gagaran oku po, tu' iri po i kosianan nu o kalangadan ku dot iyo poddi papanau do korita'-kuda' tu' langadon do mongoi sangod.
Tongoondu'
13 Oi tondu' do Sulam di maso do manari', pintari' no om mintong i' iyahai diya' do manari'.
Tondu'
Nokuro tu' mintong kou doho' do manari' dot id pogialatan do tulun do mananari'?
Kusai
1 Iya' no o tondu' ku dit olumis kopio, olumis tomod ino lapap nu do kikasut. Ino kinobulugu-luguo' do poo nu nga' miagal po di winonsoi-wonsoi, tu' olumis no kopio. 2 Iyo po di mangkuk dot olumis o pusod nu, i poimponu' kasai' do waig dot anggur di kirampa. Iyo pod gandum di pointimung o tian nu, i notutukan do tusak do bunga bakung. 3 Miagal pod paus di miapid o kolumiso' dino susu nu, om miagal do duwo o tambang. 4 Miagal pod walai dit akawas, di lamai do winonsoi ino liou nu, tu' anaru om olumis. Ino mato nu nga' olumis do miagal po di botung do hilo'd toning di wawayaan do Hisbon, ino todung nu nga' olumis dot iyo po di walai'd akawas do Damsik di hilo'd Libanon. 5 Ino tulu nu nga' poirrindog poo do miagal di nulu-nulu do Karmol. Om ino tobuk nu nga' kosorong do miagal di kain do sutara' dit olumis; i kagayat do ginawo do raja' o kolumiso'. 6 Olumis ko, om olundus; i koupusan kopio ku, i poposonong do ginawo ku. 7 Olundus o tinan nu, do miagal po di guas do kurma, om ino susu nu nga' miagal po di puru do tua' do kurma. 8 Orohian oku no do mindakod di guas do kurma om mongoi panganu di tua'. Ino nopo susu nu nga' miagal po di puru do tua' dot anggur, om pinuhobo nu nga' miagal po di winongi' dot ipol, 9 om otunguban dino munung nu nga' miagal po di kaakan do tua' dot anggur dit oomis.
Tondu'
Pologoson nopo do lumuyung i waig dot anggur dot id koginawaan ku, om koluyung do hiri'd munung om hiri'd nipon dau. 10 Iri no koupusan ku o sanganu doho', om iyoho' o sanganu dau. 11 Kaino, oi koupusan ku, kaino mongoi'd hilo'd talun, om modop to i' do hilo'd pogiolitan do bunga. 12 Sumuab to do mosik, om antangan to i' i guas dot anggur, ondung haro no o tolid, om ondung mungkaya' no i tusak, om ondung mongusak no i guas do delima. Om hilo' no do patahakon ku diya' i kosianan ku. 13 Osonong tomod o kosingudan di sakot di koubat, ogumu' o tua' dit awasiu do hilo'd toning di wawayaan to. Oi koupusan ku, nokosodia' ku no diya' i kasanangan di laid om i kasanangan di wagu.
1 Ondung toput ku daa iya'd pusod, om pinosusu ko di tina' ku, om tunguban tiya' nopo daa dot osolowot ku iya' do hilo'd tanga'd ralan, om aiso' i' ot osuayan. 2 Om angatan ku iya' do hilo'd walai di tina' ku, om tudukan oku nogindo diya' do kosianan. Om onuan ku iya' do waig dot anggur di kirampa, om i waig do tua' do delima o maan do tinumon. 3 Poingkahang do tulu ku o longon nu'd gibang, om muwai-puwai doho' o longon nu'd wanan. 4 Pamatos kou no dot id doho', oi tongoondu' do Yorusalim, dot a' kou momigangau do piuhang-uhangan dahai.
Sinding do Koonom
Tongoondu'
5 Isai iti rumikot do mantad id tana' do kowotuan, do miangkait di koginawaan dau?
Tondu'
Pinosikan tiya', i koupusan ku, do hiri'd sahau do guas dot ipol, i hiri'd pinogkosusuan diya'. 6 Siliho' oku nod tondu' di kosianan kopio nu, kada' pamagapus do tondu'd suwai ko' iyoho'. Kosianan nopo om miagal pod kapatayon kokoris; om miagal do pomogunan do tulun di napatai o kokodoho'. Kosianan nopo om iyo po di sinikit do tapui di molob-ngolob, om rumakit do miagal do tapui dit osikit. 7 A' i' milo do londodon do luyud o kosianan. Nga' ondung haro daa o momoli do kosianan do dapu' o pomoli, om tingayam noo o taanu dau.
Tobpinai di Tondu' do Tongokusai
8 Kitobpinai iyahai do tondu' dit omulok po, om susu dau nga' okoro' po. Kukuroyon no ma dahai iyau do haro o kusai do korikot do mongoi ponunang dau? 9 Ondung limput daa iyau'd bata', om wansayan i' daa dahai do pogimpaan o hiri'd timpak, do pirok o wonsoyon. Om ondung wawayaan iyau, om intirungan i' daa dahai do torigi do kayu sedar.
Tondu'
10 Iyo oku i' do limput, om iri no susu ku o pogimpaan. Oilaan i' di koupusan ku do kaanu iyau do kosimbayanan do mantad id doho'.
Kusai
11 Haro o kabun dot anggur di Suliman do hilo'd Baal Hamon, om posiwaai no dau iri do piro-piro o gompongumo. Om soribu o tusin do pirok do pinambayar diyolo' di hasil, om duwo nahatus ot aanu diyolo' do gontok di huyan diyolo'. 12 Baya' nopo do kaanu i Suliman do soribu o tusin, om iri no gompongumo om kaanu do duwo nahatus o tusin do tintanga' diyolo', tu' haro i' o doho'd kabun. 13 Porongoho' oku no do boros nu do mantad hilo'd kabun, oi koginawaan ku; songingandad no i kongoombolutan ku do sirongou diya' do moro-boros.
Tondu'
14 Poboroso' no om olomus oku i' do rumikot; om osiau oku do miagal di paus dit okilos do rumuhuk di nulu-nulu do Bitir.
1 Iti nopo buuk diti om pinotulisan do piro-piro o boros do pasal do Yohuda om Yorusalim, do pinointalang do Kinorohingan dot id di Yosaya, i tanak di Amos, do tontok dit i Usia, om i Yotam, om i Ahas, om i Hiskia o raja' do hilo'd Yohuda.
Tinogod do Kinorohingan i Tulun Dau
2 Boros kad Tuhan, “Oi tawan, om pomogunan, pokinongou kou no diti poboroson ku! Pinapagayo oku do tangaanak om ginompi' ku iyolo' nga' suminaap iddi iyolo' doho'. 3 Kotutun i' o sapi' di sanganu dau, nga' Israil nopo om a' i'. Om kaladai nga' kotutun i' di sanganu dau, nga' iti nopo tulun ku om aiso' i' ot osuhut- suhutan,” ka dau. 4 Obungou kou no, oi bansa' di kidusa, i tulun di nawagatan do kasalaan, om sinakagon dit angaraat kopio, om tangaanak dit angaraat o wonsoyon! Tuminongkiad kou'd Tuhan, om nindaraat dokoyu i Kinorohingan dot Israil dit Olidang Kopio, om tinolikudan dokoyu iyau, it apatut daa dokoyu'd tukuon. 5 Nokuro tu' sumongkiwal kasai' kou? Orohian kou po dot awagat ko' iri o pomohukum dokoyu? Notongkop nod suhat o tulu dokoyu om ginawo dokoyu nga' oluhoi no. 6 Aiso' no ot osonong-sonong do mantad hino'd lapap om korikot do hino'd tulu dokoyu; tu' notongkop pod linonit, om kogom om suhat. A' noudasan, om a' norilitan, om a' noubatan i suhat dokoyu. 7 Oingou po tomod o pomogunan dokoyu, om i piro-piro o bandar nga' naayi' pod nosorob. Poontong-ontongon ku nopo iyokoyu do ngoyon do bansa'd suwai onuo' i hasil do tana' dokoyu. Om aiso' no ot a' diyolo' raagon. 8 Iso' po o Yorusalim o noolu', om miagal pori do sulap-sulap do hiri'd kabun dot anggur om miagal do kuhub-kuhub do hiri'd pinomutanaman do sangop, om miagal do bandar di noturungku' do pisangod. 9 Ondung aiso' daa o tulun do pinologos do Tuhan dit Osundu Kopio, do napasi, om miagal toko' no daa do Sodom om Gomura. 10 Oi boyoon om rayat do Yorusalim, i miagal di tulun di hilo'd Sodom om Gomura! Pokinongou kou no di poboroson do Tuhan dot id dokoyu. Podulon no i potudukon do Kinorohingan dot id dokoyu. 11 Boros kad Tuhan, “Ondos daa dokoyu om orohian kopio oku di porsombahan di popintahakon dokoyu doho'? Apaasan oku no di porsombahan dokoyu do dumba' di sorobon om i lunok do tanak do sapi'. A' oku no orohian di raha' do sapi'd tontoluhan, om i raha' do dumba' om kambing dokoyu. 12 Isai daa o minonuhu' dokoyu do minongigit ngai' di porsombahan diri do tontok di mongoi kou sambayang dot id doho'? Om isai o minonuhu' dokoyu do mongoi pimpanau do hiri'd Walai'd Sasambayangan dot Agayo? 13 Aiso' i' o guna' dokoyu do migit di porsombahan diri, tu' araatan oku i' do kosingud diri. Om tontok di mamaramai kou do Tulan do Wagu om tadau'd Sabat ko' di papaharo kou do pogititimungan do don tugama', om a' oku no kososou do montong diri tu' nososomu' ngai' pori do dusa. 14 Araatan oku i' do kokito di karamayan dokoyu do Tulan do Wagu om i pogititimungan do don tugama', tu' nosiliu ngai' nori do miagal do binabo ku dit awagat, om ohuyan oku no do mamabo'ddi. 15 Tontok di poinsawaton dokoyu o longon dokoyu do sumambayang, om a' oku no montong dokoyu. Om asaru' kou piya do sumambayang nga' a' ku no pokinongohon, tu' ogumu' no o napatai do longon dokoyu. 16 Ongoi kou no pomoug, om lidangan no o tinan dokoyu, om tingkadan no i wowonsoyon dokoyu dot araat dit okito ku. Tingkod kou nod momonsoi dot araat. 17 Om minsingilo kou no do momonsoi'd osonong. Wonsoyon no dokoyu it otulid, om tulungon no i tulun dit ulak-ulakan, om obian no i tangaanak dit aiso' o molohing, om obian i tongoondu' di nongopuadan,” ka dau. 18 Boros kad Tuhan, “Kainou salasayo' toko'! Tu' mulong piya daa dot aragang po tomod o dusa dokoyu, do minonosomu' dokoyu nga' lihungan ku indo iyokoyu do gisom dot opurak kou do miagal do gapas. Mulong piya dot adalaan daa kopio kogumu' o dusa dokoyu om angawagat kopio iri, nga' ompunan ngai' ku i' iri. 19 Ondung mumboyo' kou doho' om orohian kou do mokinongou doho', om kaakan kou indo do hasil dot osonong do tana'ddi. 20 Nga' ondung sumaap kou doho', om apatai kou no dot id pisangadan. Iyoho' no i Tuhan o minomoros diti,” ka dau.
Bandar di Kidusa
21 Nokuro iti, tu' iri nopo bandar dit otorodok di gulu po om nosiliu'ddi do sundal do baino'! Ongotulid i' daa o kowoyo-woyoon do tulun di poingiyon do hiri di gulu po, nga' baino' noddi om noponu' pod tulun di gampamatai. 22 Oi Yorusalim, iyo ko i' daa do pirok di gulu po, nga' baino' noddi om aiso' no o gatang nu, iyo ko i' daa do waig dot anggur dit osonong di gulu po, nga' baino' noddi om miagal ko po di waig toomod. 23 Iri nopo i piro-piro o boyoon do tulun nu om sumasaap ngai' i' om sumokodung di gampanakau. Orohian ngai' nopo iyolo' do rumamit do tusin di ponisip om i patahak-tahakon. A' i' iyolo' insan do mogobi' do tangaanak dit aiso' o molohing dot id pogibisaraan, om a' diyolo' pokinongohon i tongoondu' do nongopuadan do tontok di posunud iyolo' do hal diyolo'. 24 Iyo nopoddi, om pokinongoho' no dokoyu iti boros do Tuhan, it Osundu Kopio, i Kinorohingan dot Israil do poingkaa, “Sulian ku nondo iyokoyu, oi pisangod ku, om a' kou indo koponusa' doho'. 25 Haro nondo o wonsoyon ku dot id dokoyu. Sompipian ku nondo iyokoyu do miagal di ponompipi' do pirok, om iduwon ngai' ku it oromos do mantad id dokoyu. 26 Om onuan ku nondo iyokoyu do pomorinta' om ponosihat do miagal di gulu po. Om roitan nondo o Yorusalim do bandar dit otulid om bandar dit otorodok,” ka. 27 Otulid i' o Tuhan, om posion indo dau o Yorusalim om koinsanai di tulun do hilo' di kumorologo. 28 Nga' tulun nopo di sumaap om i kidusa om oinsanan no do patayon; om i tulun di tumongkiad dau nga' patayon no. 29 Om monosol kou indo tu' tuminuku' kou i' di guas do kayu om pinosongonuan ngai' dokoyu do tingolig i kabun dokoyu. 30 Om osiliu kou nondo do miagal di guas do kayu di noriou, om osiliu kou do miagal do kabun dit a' opisiram. 31 Om poingkuro nopo i sakot do nokoring dot osorob do tanak ngapui, om iyo noddi i tulun do kidusa dot apatai di wowonsoyon diyolo' dot angaraat, om aiso' no o milo do moningkod di mamatai'ddi.
Kosimbayanan do Poingompus
1 Iti no o boros do pinointalang do Kinorohingan dot id di Yosaya, i tanak di Amos, do pasal do Yohuda om Yorusalim: 2 Koimbagu nopondo om iri no i nuluhon di kinoiyonon di Walai'd Sasambayangan dot Agayo ot asawat kopio dot id pogialatan di nulu-nulu'd suwai. Om ogumu' nondo o bansa'd tulun do mogiwoyo-woyo' do mongoi'd hilo', 3 om momoros ngai' nondo iyolo' do poingkaa, “Kainou tumakad do hilo'd Nuluhon do Tuhan! hilo'd walai do Kinorohingan dot Israil. Om otudukan toko' i' dau dit apatut toko'd wonsoyon. Om moyo' toko' indo di ralan di nopili' dau, tu' tadon nopod ponudukan do Tuhan om hilo' id Yorusalim, om moro-boros o Tuhan dot id tulun dau do mantad hilo'd Sion,” ka. 4 Om butusan nondo dau o hal di piro-piro o bansa'd tulun. Om supuon nondo diyolo' i gayang diyolo' do silihon do radu, om iri no tandus om silihon do pisau di panatas do tolid. Om a' nondo mogisasangod o bansa', om a' iyolo' minsingilo do sumangod. 5 Oi sinakagon di Yakub, kainou no mamanau dot id suang do tanawau'd Tuhan!
Patayon indo i Tulun dit Asawat o Ginawo.6 Oi Kinorohingan, notongkiadan nu no i tulun nu, i sinakagon di Yakub. Notongkop poo iti pomogunan do tulun di momurinait do miagal di tulun do Pilistin, om i tulun do ponong id koulayon. Momit i rayat do kaadat-adato' do bansa'd suwai. 7 Noponu' pod tamas om pirok i pomogunan diyolo' om a' no aayi-ayi' i dapu' diyolo', om a' ointob-intob i korita'-kuda' diyolo', om kuda' nga' ogumu' no kopio. 8 Noponu' pod tingolig i pomogunan diyolo', om tumuku' iyolo' di tininganak di winonsoi diyolo'. 9 Om indaraaton ngai' nopondo o tulun om intingayamon. Kada' iyolo' ompunai oi Tuhan! 10 Om mongoi nondo iyolo' lisok dot id koluang-luangan do hiri'd konulu-nuluan di kapampangan, ko' mongukad do luang do hiri'd tana' do mogidu' do mantad id kototogod do Tuhan om mantad id sinundu om kagayaan dau. 11-12 Om orikot nondo o maso do poinsiribaon i tulun dot asawat o ginawo, om raagon i kopinggaya-gayaan do tulun. Om Tuhan pondo o poinggoyoon. Om tontok nod tadau'ddi do poinsiribaon do Tuhan it Agayo o Sinundu, o koinsanai di tulun di kikuasa', om it asawat o ginawo om i minggayo-gayo. 13 Om raagon ngai' nondo i kayu sedar dit angakawas do hilo'd Libanon, om i kayu dot angagayo di hilo'd Basan. 14 Om lampayon ngai' i nuluhon om i nulu-nulu dit angakawas. 15 Om habaon ngai' i walai dot angakawas om koinsanai di tolig dot ogirot. 16 Om lonsodon ngai' i kapal dit angagayo om it ongolumis. 17-18 Om poinsiribaon nondo i tulun dit asawat o ginawo, om alaon i tulun di minggayo-gayo. Om atanus ngai' nondo o tingolig do hiti'd pomogunan. Om Tuhan pondo o poinggoyoon do tontok do tadau'ddi. 19-21 Tontok nopondo do rumikot o Tuhan do mongoi pomoguyu' diti pomogunan, om lumisok nondo o tulun dot id koluang-luangan do hilo'd konulu-nuluan di kapampangan, om mongukad do luang do hilo'd tana' do mogidu' do mantad id kototogod do Tuhan om lumisok do mantad id sinundu om kagayaan dau. Orikot nopondo o tadau'ddi om tongkiadan tomod nopo diyolo' i piro-piro o tingolig do pirok om tamas di winonsoi diyolo', om maan pondo di tikus om pungit. 22 Iyo nopoddi, om kada' no kopio pogondos do tulun tu' iyau nopo om atantu' no do matai' i', tu' aiso' i' o gatang.
Kagangahan do Hilo'd Yorusalim
1 Antangai pogi', nga' potiiduwon no moti'd Tuhan, it Osundu Kopio, do mantad hilo'd Yorusalim om hilo'd Yohuda o koinsanai di koburu-buruon diyolo', om kohompit ngai' no o taakanon om tinumon diyolo'. Om oinsanan nogi' i tulun di sondihon diyolo', 2 i gunsiou, i tulun do sumasangod, i gompomutus, i nabi, i mogogontong do nasip, i boyoon do pomorinta', 3 i boyoon do soudor, i boyoon do rayat, i tulun dot id suang do pulitik, om i tulun di koilo do momolimu' do nunu nopo it ongosiliu do hiti'd pomogunan. 4 Om silihon nondod Tuhan do boyoon diyolo' i tangaanakwagu dit a' po nongosukod. 5 Om oinsanan nopondo o tulun do manganu do kountungan do mantad id tulun do suwai. Om sumaap nondo i tongomulok po di komolohingan, om sumaap i tulun dot aiso' o ngaran-ngaran di tulun di kipangkat. 6 Om orikot nondo o maso do pilion nopod tulun o tiso' di koobpinayan dau, om moro-boros nod, “Iya' poo o kipakayan dot osonong-sonong; siliu nogi' do boyoon dahai do tontok do maso diti tosusa',” ka. 7 Nga' sumimbar nondo iyau do poingkaa, “Kada' oku pilio'! Tu' aiso' i' o takanon om aiso' o pakayan ku. Kada' oku nogi' kopio siliho' do boyoon diti tulun, tu' a' oku i' milo do monulung dokoyu,” ka. 8 Naratu' no kopio o Yorusalim! Om Yohuda nga' nahaba' no. Tu' sumaap i' do Tuhan i koboro-boroso' om i wowonsoyon diyolo', om mongindaraat iyolo'd Kinorohingan. 9 Iri kowoyo-woyoo' diyolo' dit orohian do mogipori-pori nga' popointalang no di karaaton diyolo'. Om miagal nopo iyolo' di tulun do Sodom di gulu po tu' pingroitan nopo i dusa diyolo', om a' no olim-olimon. Obungou no o tulun do miagal diri! Tu' iyolo' i' om iyolo' o pinoporikot do hukuman dot id tinan diyolo'. 10 Boros kad Tuhan, “Posunudo' no di tulun di mumboyo' doho', dot osimbayan i' om apasi iyolo' tu' kaakan i' iyolo' do hasil di huyan diyolo'. 11 Nga' obungou no i tulun dot araat! Tu' poingkuro nopo o winonsoi diyolo' dot id wokon om iyoon no iyolo' iyau'ddi do baino'. 12 Ulak-ulakan nondo do tangaanak iti tulun ku om porintaon iyolo' do tongoondu'. Om polidon nondo di piro-piro o boyoon iti tulun ku, gisom dot a' no iyolo' koilo ondung honggo o ralan do susuyon diyolo',” ka.
Butusan do Tuhan i Tulun Dau
13 Nokosodia' no o Tuhan do popoboros do poboroson dau om momutus do tulun dau. 14 Om Tuhan no o gompomutus di piro-piro o boyoon di tulun dau. Iti no o boros do Tuhan do papasala' diyolo', “Iyokoyu no i minanakau do hasil di kabun dot anggur ku, om noponu' no i walai dokoyu di dapu' do nahau dokoyu do mantad id tulun di mosikin. 15 A' kou i' apatut do mongulok-ulok di tulun ku om mongudipon di tulun do mosikin. Iyoho' no i Tuhan it Asawat Kopio, om Osundu Kopio, o minomoros diti,” ka.
Popoinsan di Tongoondu' do Yorusalim
16 Boros kad Tuhan, “Antangai pogi' o kasasawat do ginawo di tongoondu' do Yorusalim! Mamanau piya iyolo' nga' mokirayou-rayou i', om milik-silik o mato; om monginsonong iyolo'd tinan, om posonong-sonongon diyolo' o pamalaang-laang, gisom do marak-ngarak nopo i lungkaki' diyolo'. 17 Nga' tongkopon ku indod gandas i tulu diyolo' do gisom dot a' sunian do tobuk. Iri no o pomohukum ku diyolo',” ka dau. 18 Om orikot indo o maso do ngoyon ngai'd Tuhan do mantad id tongoondu' do Yorusalim, o nunu nopo i kaandasan diyolo', i pomolumis do tulu, i lungkaki', i karo, 19 i golong, i tudung, 20 i tupi', i gimat do hiri'd poingkogos do longon diyolo', 21 om i pondulung, om i tanting-anting do todung, 22 om i pakayan do dong moginakan dit ongolumis, om i gaun, om i kantung, 23 om i rasuk dit onipis, om i pakayan di kain linan do winonsoi, om i tudung dit oniiba' om i tudung diyolo' dit anaru. 24 Om osonong po daa o kosingudan diyolo' do baino' poo nga' outong nondo o kosingudan diyolo' do koimbagu. Om ponowoli no di tagkos diyolo' dit ataandai om tali dit aparad. Om iri tulu diyolo' di kitobuk dot olumis nga' alagasan nondo. Om ponowoli no di pakayan diyolo' dit ongolumis om pakayan di gansing. Olumis po daa iyolo' do dinondo; nga' ara-raat nondo iyolo' do koimbagu. 25 Om apatai nondo dot id pisangadan i tongokusai, dot iri piya i gunsiou. 26 Om mogihad ngai' pondo om tumongob o tulun do hiri'd piro-piro o wawayaan do bandar, om osiliu pondo do miagal do tondu' di poillabas tomod do poirikau do hiri'd tana' o bandar diri.
1 Om tontok nopondo do maso'ddi om pususon nopo do turu' o tondu' ot iso' o kusai om moro-boros nod, “Koihum i' iyahai do takanon om pakayan dahai, nga' pologoso' po daa iyahai do mamarait diya' do sawo dahai, om a' indo iyahai ointingayam dot a' kasawo,” ka.
Tondulion o Yorusalim
2 Orikot indo o maso do porombungon om polumison do Tuhan o koinsanai do totonomon om kayu dot id pomogunan diti. Om tadau nopondoddi om ongotood nondo i tulun dot Israil om ongoondos tu' haro no o tua' di tinanom diyolo'. 3 Om pointikid-tikid do tulun di noolu' do hilo'd Yorusalim om i nopili' do Kinorohingan do maan posio', om roitan no dot olidang. 4 Om butusan indod Tuhan om lidangan dau di sinundu dau i tulun do songonuon dau. Om lihungan dau o Yorusalim do mantad id kasalaan dau om mantad id raha' do tulun dit aiso' o sala' di pinatai dot id bandar diri. 5 Om polintuhun nondo o Tuhan do haun do dangadau, om lisun om tapui di mikit-sikit do dongotuong do hilo'd timpak do Nuluhon do Sion om poinsahau do koinsanai'd tulun di pointimung do hilo'. Om Kinorohingan no o monirung om mongintirung do pointongkop do bandar diri dot i sinundu dau o ponirung. 6 Om polungungon i' dau i bandar do tontok dit alasu' kopio di dangadau, om silihon dau do kinoiyonon dit aiso' o koligagaanan, om ointirungan do mantad id rasam om tongus dit opuhod.
Sinding do Pasal di Kabun dot Anggur
1 Pokinongoho' oku nod modsinding do pasal di kabun dot anggur di tambalut ku. Iri nopo tambalut ku om kikabun dot anggur do hilo'd guas do nulu-nulu dit oruak o tana'. 2 Songkulo' no dau i tana' om pingiduwai nod watu. Om tanamai no dau do guas dot anggur di nopili' no kosonong, om wansayai no dau do sulap dit akawas do maan do padtamangan. Om pongukad no iyau do luang dot iyonon do mamaga' di tua' dit anggur, om ongoi noddi iyau pogihum do tua' dit anggur di noonsok, nga' oonsom ngai' nopo i tua' dit anggur di nokito dau. 3 Om boro-boros noddi i tambalut ku do poingkaa, “Pokionuon ngai' ku iyokoyu i tulun do hiti'd Yorusalim om hiti'd Yohuda, do momisara' doho' om i kabun dot anggur ku. 4 Nunu po daa ot apatut do wonsoyon dot id kabun dot anggur ku'ddi dit a' nowonsoi? Nokuro tu' ongoonsom ngai' o tua' dit anggur, om okon nogi' ko' tua' dit osonong do miagal di soro-sorohon mantad ku? 5 Iyo nopoddi, om poingkaa no o wonsoyon ku dot id kabun dot anggur ku'ddi: iduwon ku nondo i pagar di pointutuk om habaon ku i tolig di mongintirung diri, om pologoson ku o nintorusan do mangakan om mingulok di kabun diri. 6 Om pologoson ku dot okurumbutan do gouton. A' ku nondo songkulon i tana' om a' ku punggulan i guas dot anggur om a' ku buatan, gisom dot osunian do rugi om sakot. Om oduhan ku o haun do poposondot do rasam do hiri,” ka. 7 Kabun nopod anggur do Tuhan it Osundu Kopio, om iri no i tulun dot Israil; om iri tulun do Yohuda i guas dot anggur di tinanom dau. Iri daa it osonong o soro-sorohon dau do wonsoyon diyolo', nga' kokito nogi' dau do mogipapatai iyolo'. Soro-sorohon daa dau do popogirot iyolo' dit otopot, nga' korongou nogi' iyau do giniakan do mokianu dit otulid.
Karaaton di Winonsoi do Tulun
8 Obungou kou no! Mimboli kou nopod walai om tumo do pomoruhang di dapu' dokoyu. Om a' no alaid om aiso' no o tiyonon do tulun do suwai om iyokoyu pondo o momogun-mogun do hiti'd pomogunan diti. 9 Orongou ku o Tuhan it Osundu Kopio, do moro-boros do poingkaa, “Oingou nopondo tu' aiso' no o songingiyon diti walai dit angagayo om ongolumis. 10 A' nondo sumonong o totonomon. Tu' iri nopo kabun dot anggur do hopod o hiktar o kogoyoo' om hopod po lito do waig dot anggur do hasil, om i hatus o lito do tonomon nga' hopod po o lito do gandum do hasil,” ka. 11 Obungou kou no! Iyokoyu i moginum nod tiinumon do kaawuk, om i magauk noo o karaja' do mantad do kosuabon om gisom do totuong. 12 Haro ngai' nopo o tuni do kecapi, om gambus, om rebana, om suling om haro o waig dot anggur dot id poginakanan dokoyu. Nga' a' i' dokoyu podulon o korohian do Tuhan om i wonsoyon dau dot id dokoyu. 13 Om gowoi pondo om gayaton kou di pisangod do tumongkiad do mantad hiti. Om lous nondo om tuuhan o kapatai ngai' di boyoon om i rayat. 14 Om potungkabangon nondo do kapatayon o kabang dau do gisom id agayo tomod o kotungkabangon do monolon di tulun dit ongkipangkat do hilo'd Yorusalim do mitonggoi di rayat dit oubas do rumamai. 15 Om ointingayam nondo o pointikid-tikid do tulun, om oinsanan i tulun dot asawat o ginawo do poinsiribaon. 16 Nga' Tuhan nopo, it Osundu Kopio om pointalang i' do kagayaan dau do tontok do momonsoi iyau dit otopot. Pointalangon nondo dau o kolidango' dau do tontok do momutus iyau di bansa' di nasanganu dau. 17 Om mangakan-ngakan nondo do hiri'd kinaraagan do bandar i tangaanak do dumba' om kambing, om a' iyolo' ooyian do kanon. 18 Obungou kou no! Iyokoyu it a' milo do tumingkod do momonsoi'd dusa. 19 Boros ka no dokoyu om, “Pologoson nopo o Tuhan i Kinorohingan dot Israil dit olidang do powonsoi kopio di natantu' mantad dau do wonsoyon, om oilaan toko' i' o komoyon dau,” ka. 20 Obungou kou no! Iyokoyu i mamarait dot osonong it araat, om anawau it otuong, om oomis it opoit. 21 Obungou kou no, tu' momusorou kou dot oilo om opintar kou. 22 Obungou kou no, iyokoyu i huruan do moginum do waig dot anggur. Osiou tomod kou daa om aiso' o poddosi do momonsoi'd tiinumon do kaawuk! 23 Nga' mokiaanu kou nopo do tusin di ponisip, om poiduwon nopo dokoyu i tulun di kisala', om antaban dokoyu i tulun dot aiso' o sala' do kaanu dot ibutus dit otulid. 24 Gowoi poddi do poingkuro nopo i paka' om i sakot do nokoring dot ouu dot osorob do tapui, om iyo noddi o gamut dokoyu do rumomuk, om lumotu' i tusak dokoyu om otilib ngai' do ribut, tu' minagada' kou i' di ponudukan do Tuhan, it Osundu Kopio, i Kinorohingan dot Israil dit olidang. 25 Gowoi poddi om otogod o Tuhan do tulun dau. Om posodia' no iyau do momohukum diyolo'. Om gumuyu' ngai' nondo o nuluhon; om songingiliu i rata' do miagal pod rinomos do hiri'd tanga'd ralan. Nga' mulong pod miagal diri o nowonsoi dau nga' a' po natanus o kototogod do Tuhan, om momohukum kasai' po iyau. 26 Om lohowon nondod Tuhan i bansa'd tulun di hilo'd sodu', om osiau nopondo iyolo' do rumikot! 27 Posodia' kasai' nopo iyolo' do sumangod om aiso' ot ohuyan dot aiso' piya o kotingkadan do sumangod. 28 Angatarom ngai' nopo o pana' diyolo', om posodia' kasai' i pawakasan diyolo'd pana', om i sondulu do kuda' diyolo' nga' miagal pod watu do pangasaan kokodou, om i ruda' do korita'-kuda' diyolo' nga' miagal po di ribut kosiau do tumolong. 29 Om minggarom ngai' poo i soudor do miagal do singa di wagu po kapanabpo do maan dau akano', om igitan nondo dau iri dot id kinoiyonon dit aiso' o koligagaanan, om a' i' oongoi kaahau. 30 Om tontok nopondo do tadau'ddi om iyo pod ngorod do rahat o pangkis do mogisasangod dot orongou do pointongkop dot Israil. Antangai pogi', nga' otuong poo o pointongkop di pomogunan om noponu' do kosusaan. Om iri piya tanawau nga' suminiliu i' do totuong.
Linohou do Kinorohingan i Yosaya do Sumiliu'd Nabi Dau
1 Tontok do toun di kinapatayon di Raja' Usia, om kokito ku no o Tuhan do poirikau do hiri'd tirikohonon dau di don raja' dit asawat om kikagayaan. Om katakapai nopo di rasuk dau dot anaru i Walai'd Sasambayangan dot Agayo. 2 Om iri nopo i piro-piro o moloikat di roitan do Serapim di sangkalab-kalab do miagal do tapui, nga' songingkakat do hiri'd posorili' dau, om saraanaman nopo iyolo'd talad. Duwo o talad do ponirung do rabas diyolo', om duwo o talad do ponirung do tinan diyolo' om duwo o talad do maan do tumulud. 3 Om mogisimbar-simbar nopo iyolo' do momoros do poingkaa, “Olidang, olidang, olidang. Olidang no o Tuhan it Osundu Kopio. Noponu' pod kagayaan dau iti pomogunan!” ka. 4 Om koguyu' nopo i pinoimpahan di Walai'd Sasambayangan dot Agayo do noguyu' di kopuhodo' do boros diyolo', om noponu' do lisun i Walai'd Sasambayangan dot Agayo. 5 Om boros kangku'ddi, “Obungou oku no! Apatai oku no! Tu' iyoho' nopo om dusa ngai' nopo o koboro-boroso', om poingiyon oku dot id rolot do tulun do miagal diri. Om okon-okon oku poddi iyoho', nga' obungou no kopio tu' nokokito oku i' di Raja', i Tuhan, it Osundu Kopio,” kangku. 6 Nga' lintuhun no do minongoi'd hiri'd doho' o tiso' di moloikat di roitan do Serapim do kiinigit do popou, i nongoi dau songgipo' do sanggip do mantad hiri'd pananaraban do porsombahan. 7 Om potopiso' no dau i popou'ddi dot id munung ku om boro-boros nod poingkaa, “Antangai pogi', nga' nokotopis nod munung nu iti popou, om noidu' noddi o kasalaan nu om noompunan do Tuhan o dusa nu,” ka. 8 Om korongou ku noddi o Tuhan do minomoros do poingkaa, “Isai ma o suhuon ku? Om isai ot orohian do sumiliu'd popinsusui di boros toko'?” ka. Om boros kangku, “Diya oku. Suhuo' oku nopo!” kangku. 9 Om boros ka dau, “Pamanau no om sunudan ngai' no i tulun do poingkaa, ‘Korongou kasai' kou i' nga' a' kou i' kosuhut di komoyon. Om poingontong kasai' kou, nga' a' kou i' koilo ondung nunu i nosiliu,’ kanto,” ka dau. 10 Om boros kaddi dau dot id doho', “Pobosugon ngai' nopo o pomusarahan do tulun diti, om bosukon nopo o tolingo diyolo' om bolohon o mato diyolo', om a' i' iyolo' korongou, om a' kosuhut, om a' kokito, om a' i' koguli' dot id doho' om a' olingasan,” ka. 11 Om uhot oku noddi, “Songkuro o koloido', do miagal diti ot osiliu oi Tuhan?” kangku. Om boros ka dau, “Gisom pod angaraag ngai' i bandar, om ongoingou, om gisom dot otongkiadan ngai' i walai, om aiso' o tanom do hiri'd tana' tu' a' no sunian. 12 Om gisom dot ouyung ngai' ku o tulun do pokoyoon do hilo'd sodu', om gisom dot otongkiadan kopio o pomogunan diti. 13 Tu' haro piya daa o tongosongulun dot id pialatan do hopod o tulun dot oolu' dot id pomogunan diti, nga' iri piya nga' patayon i'. Om iyo pondo iyau di tuod di kayu dit agayo di nokotontod o pananagad,” ka dau. (Iri nopo tuod diri nga' poiyaan do kotimpuunon do koposi-posion do wagu di tulun di nasanganu'd Kinorohingan.)
Bilin dot id di Raja' Ahas
1 Tontok di maso do pomorintaan di Raja' Ahas, i tanak di Yotam, i manangaki di Usia, i raja' do Yohuda, om kotimpuun no o pisangadan. Rikot no i Rosin, i raja' do Siria do miwoyo' di Pika i tanak di Rimalia, i raja' dot Israil, do mongoi panangod do bandar do Yorusalim, nga' a' i' iyolo' nakaala' do bandar diri. 2 Om soira' di nosunudan i raja' do Yohuda do nokorikot dot id watas dot Israil i soudor do Siria, om moddosi tomod diri iyau om koinsanai di rayat. Miagal po iyolo' di kayu do songguyu-guyu' dot oguyu' do ribut. 3 Om boros kaddi do Tuhan dot id di Yosaya, “Angatai i Siar Yasub i tanak nu, do mongoi solowot di Raja' Ahas. Osolowot nu indo iyau do hilo'd tiyonon di mangangawol do mangawol, it id dompok di liang di koluyungon do waig di mantad id kulam dit id sokid. 4 Om sunudan no i raja' do mumbangan-bangan, om a' gumangau, om a' moddosi om a' oborulong. Tu' iri nopo kototogod di Raja' Rosin om i soudor dau i tulun do Siria'ddi, om i kototogod di Raja' Pika diri om miagal nod duwo siduwon di misun-lisun noo. 5 Nokopogipapakat no o Siria om Israil om i raja' do hilo' do momonsoi dot araat dot id diya'. 6 Mongoi iyolo' panangod do Yohuda om monompurolosi do bansa'ddi om sumokodung i' daa'ndo iyolo' diyolo', om silihon nogindo diyolo' do raja' i Tabiil. 7 Nga' iyoho' no i Tuhan, o popoboros dot a' i' osiliu o miagal diri. 8 Tu' Siria nopo om a' i' okoris ko' Damsik, i bandar dot agayo do hilo', om Damsik nga' a' i' okoris ko' i Raja' Rosin. Om Israil no, om onom po nohopod om limo toun om ourias no, om okon nondo ko' iso' o bansa' di momorinta'. 9 Israil nopo om a' i' okoris ko' Samaria, i bandar dot agayo do hilo', om Samaria nga' a' i' okoris ko' i Raja' Pika. Ondung a' kou otumbayaan kopio doho', om a' kou no kopio kotori',” ka.
Tanda' dot Imanuil
10 Om sunudai po kawagu'd Tuhan do boros dau i Ahas, do poingkaa, 11 “Pokianu nod tanda' do mantad id Tuhan, i Kinorohingan nu, om onuan ko i' dau do tanda', do mantad tuu do hilo'd saalom kopio, i hilo'd kinoiyonon do tulun di napatai ko' mantad pod hilo'd surga i hilo'd sawat,” ka. 12 Nga' boros kad i Ahas do suminimbar, “A' oku i' mokianu do tanda' tu' a' oku i' mogumbal do Tuhan,” ka dau. 13 Om boros kaddi di Yosaya, “Ondung iyo'ddi, om pokinongou pogi', oi sinakagon di Raja' Daud! A' nu po ula' do mogumbal do kolonuto' do ginawo'd tulun, tu' umbalan nu po daa o kolonuto' do ginawo'd Kinorohingan? 14 Nga' Tuhan nondo o manahak diya' do tanda': Haro nondo o sumandak do monontian om osusu do tanak do kusai. Om pungaranan nondo i tanak diri dot i Imanuil. 15 Om agayo nopondo iyau om di milo iyau'd mimpori-pori do momusorou, om osimbayan nondo o hiri'd pomogunan diri. 16 Om a' po orikot o maso'ddi om aiso' no o tulun do poingiyon dot id pomogunan di duwo o raja' di poddosi nu'ddi. 17 Om porikoton nondod Tuhan dot id diya', om id rayat nu, om id sompiiyon nu o maso dit osusa' kopio, it a' po insan korikot do mantad di minitongkiad i' ot Israil om Yohuda, tu' porikoton nondo dau i raja' dot Asur. 18-19 Om tontok nopondo do tadau'ddi om lohowon nondod Tuhan i tulun do Masir om i tulun dot Asur, om rumikot nondo i duwo o bansa'ddi do miagal pod langau om moningot dit ogumu', do tumaun do hilo'd rantai di mogikubong-kubong om id pogiolit-olitan do pampang; om atakapan ngai' nopo diyolo' i korugian om hiri'd kasakat-sakatan. 20 Om pakayon nondod Tuhan o raja' dot Asur do mangala' om mongindaraat om mamaraag do bansa' dot Israil. Om iri nopondo raja' dot Asur om iyo po di tulun di momumugar di momugar ngai' do tobuk om hulu'd tinan, dot id Israil. 21 Om tontok nopondo do tadau'ddi om mulong piya dot iso' po sapi' dit okoro' po, om duwo tinan do kambing do tayam-tayam dot iso' o gompongumo, 22 nga' iri nopondo susu di tayam-tayam diri om talib i' do kabagal di gompongumo tu' okuri' no o tulun do poingiyon do hiri'd pomogunan diri. Otopot no kopio dot iri nopo tulun dit okuri' no do poingiyon do hiri'd pomogunan diri om kaakan i' do susu om paha'. 23 Tontok nopondo do tadau'ddi om iri nopo kinoiyonon di pinananaman daa do soribu o guas dot anggur om i gatang do soribu o tusin do pirok, om rugi po om sakot o sumuni'd hiri. 24 Om tulun nopo di mongoi'd hiri om a' i' kobulun dot a' migit do pana' om pawakasan do pana' tu' notongkop pod sakot om rugi o pomogunan diri. 25 Om a' nondo o tulun kobulun do mongoi'd hiri'd konulu-nuluan di pinsongkulan daa om pinintanaman di gulu po tu' notongkop pori do sakot om rugi. Om pinghambaan poo om pangakan-ngakanan do sapi' om dumba' o hiri,” ka dau.
I Tanak di Yosaya o Sumiliu'd Tanda' dot id Bansa' Diri
1 Om boro-boros no o Tuhan dot id doho' do poingkaa, “Ongoi anu do watu di ponunulisan dot agayo om potulison nod hiri o hurup dit angagayo o ponunulis do poingkaa, ‘Opusik do Magahau; Olomus do Manakau,’ ka. 2 Om momolohou nod duwo o tulun do sasi' di milo do ponongkuyaanan; i Uria it Imam om i Sakaria, i tanak di Yorobikia,” ka. 3 Om alaid-laid noddi, om ponontian no i sawo ku om kosusu nod tanak do kusai. Om boro-boros no o Tuhan dot id doho' do poingkaa, “Pungaranai iyau dot i ‘Opusik do magahau, Olomus do manakau,’ ka. 4 Tu' tontok dit a' po milo iti tanak do momolohou dot ‘Apa' om Ina’ ka, om oigitan ngai' no di Raja' Asur o kakayaan do Damsik om i dapu' do pinanakau do Samaria,” ka.
Sinangod dot Asur o Yohuda
5 Om boro-boros po kawagu o Tuhan dot id doho', 6 boros ka dau, “Minada' iti bansa' di waig do Bawang do Siloa dit oloyo' om nasanangan tomod iyolo' di Raja' Rosin om i Raja' Pika. 7 Om gowoi poddi om porikatan ku iyolo', iyoho' i Tuhan o poporikot, di raja' dot Asur om koinsanai di soudor dau do mongoi panangod do Yohuda. Om rumikot nondo iyolo' do miagal poddi waig do mangampad do mantad id Bawang dot Iprat om lumampai do gisom do kotolibamban di tisan do bawang. 8 Om rumudsu' nopo iyolo' do sumuang do Yohuda, do miagal po di luyud di mayo-gayo nopo do gisom do korikot dot id lihawa, om oolitan ngai' nopondo,” ka. Moyo-woyo' i' o Tuhan dati'! Mongintirung i' diti pomogunan i talad dau di poungkalad. 9 Timung kou no do mikuwo'd ooris, oi koinsanai'd bansa'! Pokinongou kou no, oi pomogunan dit id sodu'. Sodia' nod mongoi sangod, nga' kooris kou no! Sodia' no kopio nga' poddosi kou no! 10 Pomusorou mantad nod wonsoyon nu, nga' a' i' mando owonsoi kopio iri. Poboroso' nopo o korohian nu'd momonsoi! Nga' a' i' iri owonsoi, tu' moyo-woyo' i' dahai o Kinorohingan!
Pinoinsan do Tuhan i Yosaya
11 Om porintao' oku nod Tuhan om poinsano' oku no dau dot a' tumanud di kowoyo-woyoon do bansa'ddi. Boros ka dau, 12 “Kada' ongoi ponokiupakat diyolo' om kada' poddosi di poddosi diyolo'. 13 Sorohon no dot iyoho' nopo, i Tuhan om olidang i', om iyoho' noo ot apatut nu'd poddosi. 14 Om osiliu oku nondod watu do kosoduwon di rayat do Yohuda, om Israil om Yorusalim. Om iyo oku pondod lawa' do kosulungon diyolo' tu' olidang oku i' kopio. 15 Om ogumu' nondo ot id pogialatan diyolo' do kasadu om osuhat, om alawaan di lawa',” ka dau.
Pogoduhan do Mongoi Pomolohou do Bobolian
16 Poopion no kopio dokoyu om gompion no i boros do Kinorohingan dot id doho', oi dokoyu i tumatanud doho'. 17 Nokolisok no daa o Tuhan do mantad id tulun dau, nga' iyoho' nopo om otumbayaan i' dau om mogondos oku dau. 18 Diya oku no, do miwoyo' diti tangaanak di nakatahak do Tuhan doho'. Om iyahai no o sasi' di poimpasi do hiti'd pogialatan do tulun dot Israil do mantad id Tuhan, it Osundu Kopio, i momorinta' do hilo'd Nuluhon do Sion. 19 Nga' suhuon kou nondod tulun do mongoi pokituduk di piro-piro o bobolian di mopi-kopi noo om muol-nguol. Om moro-boros ngai' nondo o tulun diri do poingkaa, “A' toi apatut toko' i' do mokituduk do tingolig do maan do koinsanangan di tulun do poimpasi?” ka. 20 Posimbaron no o poingkaa, “Pokinongou nod ponudukan do Tuhan! Kada' pokinongoho' i piro-piro o bobolian. Tu' iri nopo poboroson diyolo' om aiso' i' o guna' dot id diya',” ka.
Maso di Poimponu' do Kosusaan
21 Om minghombo pondo do hiri'd pomogunan diri i tulun di norutum om louson. Om adalaan nondo kopio iyolo' do louson om tumogod gisom do momopol iyolo' do raja' om Kinorohingan diyolo'. Om honggo nopo ot antangan diyolo', do hilo' tuu id tawan ko', 22 hiti pod pomogunan, nga' aiso' no ot okito diyolo' do suwai ko' kosusaan, om totuong, om kopoddosian, om hiri no o paangayan diyolo'.
1 Nga' a' no alaid om koidu' no iyolo' do mantad id kosusaan diri.
Raja' di Rumikot
Iri nopo kinoiyonon di payat do Sibulon om Naptali di gulu po om roitan daa dot ara-raat kopio. Nga' koimbagu nopondo om pusohon nondo o pointongkop do watas diri, i kinoiyonon do mantad hiri'd Rahat do Tanga' om gisom do korikot di tana' do ponong id soborong do Yordan, i ponong id koulayon, om gisom do hilo'd Galilia i kinoiyonon do tulun do bansa'd suwai. 2 Iri nopo bansa' di poimpasi dot id dotuong, nga' nokokito no do tanawau dit anawau kopio. Iri nopo i poingiyon dot id sahau do kapatayon, nga' notitihan noddi do tanawau. 3 Oi Tuhan, nonuan nu iyolo' do kataadan dit agayo, om pinosimbayan kopio nu iyolo'. Iri no i kosonongo' nu o kataadan diyolo', do miagal pod kotoodo' do tulun di dongmongomot, om miagal pod kotoodo' di mogibahagi-hagi' do dapu' di naahau. 4 Noongoi nu no i binabo dot awagat, notipu' nu i bobobog di pomobog do lihawa diyolo'. Naala' nu no i bansa' di mongulok-ulok om i mongudipon do tulun nu. Do miagal di nala' nu i soudor do Midian di gulu po. 5 Tu' iri nopondo i kasut do soudor di kosuton do sumangod, om i rasuk di notounan do raha' nga' sorobon ngai' nopo om maan do pogudung di tapui do gisom dot ouu. 6 Tu' nosusu no ot iso' o tanak do bagi' dati', noonuan toko' nod iso' o tanak do kusai. Om iyau no o sumiliu do boyoon toko'. Ngaran nopo dau om: “Gomponosihat dit Oilo” om, “Kinorohingan dit Okoris” om, “Tapa' di Poingompus” om, “Raja' do Kouludan”. 7 Momorinta' iyau do hiri'd tirikohonon di Daud do don raja'; om muhang-ruhang o kuasa' dau. Osimbayan kasai' nopo o pomogunan dau: om pinoimpahan nopod kuasa' dau nga' otulid do mantad do baino' om gisom dot alaid. Om atantu' no dot owonsoi ngai' do Tuhan iti, iyau it Osundu Kopio.
Hukuman do Tuhan ot Israil
8 Norotuan nod Tuhan do hukuman o pomorintaan dot Israil. 9 Om oinsanan nopondo o bansa' dot Israil om tulun do Samaria do koilo do Tuhan o pinaparatu'ddi. Minggayo-gayo tomod daa om asawat o ginawo diyolo' do baino' poo. Boros ka no diyolo' om, 10 “Nangahaba' no i walai do bata' do winonsoi, nga' sowolian toko' i' do walai di watu o wonsoyon. Nangatagad no i guas dot ara, nga' sowolian toko' i' do kayu sedar do Libanon dit osonong kopio,” ka. 11 Nga' notingkau nod Tuhan o ginawo di pisangod do sumaap diyolo'. 12 Om Israil nopondo om songodon om alaon di bansa' do Siria, i mantad ponong hilo'd koulayon, om i tulun do Pilistin, i mantad ponong hilo'd kotonobon. Nga' mulong pod ongowonsoi ngai' o miagal diri nga' a' po atanus o kototogod do Tuhan, om momohukum kasai' po iyau. 13 Nga' a' kasai' po monosol i bansa' dot Israil, do nohukuman piya iyolo'd Tuhan it Osundu Kopio, om a' iyolo' tumanud di ponuhuan dau. 14 Gowoi pondo om insan indo tadau do kopomohukuman ngai'd Tuhan di boyoon dot Israil om i rayat diyolo'. Puloson nondo dau om taamon dau o tulu om tikiu diyolo'. 15 Iri nopo i tulu diyolo', nga' i molohing-lohingon om i tulun dit ongkipangkat, om iri no tikiu om i piro-piro o nabi di mintuduk do ponudukan di kapalid! 16 Iri nopo i piro-piro o boyoon do bansa'ddi om minamalid om minamagangau di rayat. 17 Gowoi pondo om aiso' no ot ongoiso' piya di tangaanakwagu diyolo' do poiduwon do Tuhan, om a' iyau olisiu di tangaanak dit aiso' o molohing om i tongoondu' do nongopuadan, tu' oinsanan nopo o bansa'ddi dot a' monong Kinorohingan om nokowonsoi dot araat, om angaraat ngai' o koboro-boroso'. Nga' mulong pod owonsoi ngai' iri nga' a' po atanus o kototogod do Tuhan, om momohukum kasai' po iyau. 18 Tu' iri nopo karaaton do bansa'ddi nga' sumikit nopo do miagal do tapui di monorob do sakot om rugi. Kosikito' nopo om iyo po di gouton dot osorob, tu' muntu-nguntu' po o lisun. 19 Otogod no kopio o Tuhan, it Osundu Kopio, om iri nopo pomohukum dau om iyo po di tapui di molob-ngolob, om iri no i bansa'ddi o ponokosiduwon dau do gisom dot ouu. Om aiso' no ot osianan di tobpinai dau. 20 Om pointongkop nopod pomogunan diri do mikoroihum o tulun om mingakan daa do nunu nopo i milo diyolo'd akanon, nga' a' i' iyolo' ayahan. Om kanon nopondo diyolo' o tanak piya diyolo'! 21 Misaap nondo o tulun do Manasi om Ipraim, om miuhup nogindo iyolo' do sumaap do Yohuda. Nga' mulong pod owonsoi ngai' iri nga' a' po atanus o kototogod do Tuhan om momohukum kasai' po iyau.
1 Obungou kou no! Tu' momonsoi kou dot oturan dit a' otulid, do pongulok-ulok di tulun ku. 2 Om iyo noddi o ralan dokoyu do mangantob do tulun do mosikin do kaanu dit otulid om it apatut diyolo' dot aanu, om magahau di dapu' do tongoondu' di nongopuadan om i tangaanak dot aiso' o molohing! 3 Nunu pondo o wonsoyon dokoyu do tontok do kopomohukuman do Kinorohingan dokoyu? Nunu pondo o wonsoyon dokoyu do porikoton dau o kosusaan do mantad hilo'd pomogunan dit id sodu'? Om hinonggo pondo o polisakan dokoyu di kakayaan dokoyu? 4 Aiso' no milo dokoyu'd wonsoyon tu' apatai kou po dot id pisangadan, ko' atanggayan do pisangod. Nga' mulong pod ongowonsoi ngai' iri nga' a' po atanus o kototogod do Tuhan, om momohukum kasai' po iyau.
Pakakas do Kinorohingan i Raja' dot Asur
5 Boros kad Tuhan, “Asur no o maan ku do bobobog do pomobog ku di tulun di katagadan ku. 6 Suhuon ku ot Asur do sumaap do tulun ku dit a' monong Kinorohingan, om i pinopotogod doho', suhuon ku ot Asur do mongoi panakau om mongoi pagahau, om mongoi pongulok di tulun ku do miagal di pupuk do hilo'd ralan,” ka. 7 Nga' haro mantad no nosorou di raja' dot Asur do wonsoyon dau dot araat kopio. Tu' korohian nopo dau nga' mamatai om momunso dot ogumu' o bansa'. 8 Tu' boros ka dau do mokirayou-rayou, “Okon toi ko' raja' ngai' i boyoon do soudor ku'ddi! 9 Solodon ku o bandar do Karkomis om Kalno, om Hamat om Arpad. Solodon ku po o bandar do Samaria om Damsik. 10 Alaon ku o piro-piro o pomorintaan di modsubak do tingolig dit agayo o sinundu ko' mantad di hilo'd Yorusalim om hilo'd Samaria. 11 Naraag ku no o Samaria om koinsanai di tingolig do hilo', om miagal iddi o wonsoyon ku do hilo'd Yorusalim om id koinsanai di tingolig do tukuon do hilo',” ka. 12 Nga' boros kad Tuhan, “Opongo ngai' ku nopondo do momonsoi i karaja' ku do hilo'd Nuluhon do Sion om i hilo'd Yorusalim, om hukuman ku nondo i raja' dot Asur tu' i kasawato' do ginawo dau om i kobinggoyo-goyoo' dau,” ka. 13 Tu' mimboros poo iyau do poingkaa, “Nowonsoi ngai' ku iri dot i kokoriso' ku o pinomonsoi ku. Okoris oku om oilo oku, om opintar oku. Nongoidu' ku no i wolit di momialatan do piro-piro o bansa', om napanakau ku no i pinosodia' mantad diyolo'. Om iyo oku pod gonsukod do mingulok ngai' di tulun di momorinta'. 14 Iti ngai' nopo bansa' do hiti'd pomogunan om miagal nod rumun do tombolog; om osoonong oku do mongoi panganu di dapu' diyolo', do miagal nod tulun di mongoi pongokog do tontolu' do hiri'd rumun. Aiso' i' o kapo do talad do miningkarab do minomorolosi doho', om aiso' o pinopotungkabang do tinduk do minamagarang doho'!” ka. 15 Nga' boros kad Tuhan, “Minggayo-gayo toi i kapak dot id toguang di tulun di papakapak diri, om agayo toi i garagadi' ko' i tulun di papagaragadi'? Tu' okon i' ko' i bobobog o pobilid do tulun, suwai ko' i tulun o pobilid di bobobog,” ka. 16 Om porikatan nondod Tuhan, it Osundu Kopio do toruol i piro-piro o boyoon do soudor dit ongolombon do baino', do pomohukum dau diyolo', tu' mininggayo-gayo i' o tulun dot Asur. Om lumasu' nondo o tinan diyolo' dot iyo pod tapui do molob-ngolob o kolosuo'. 17 Om sumiliu nondod miagal do sinikit do tapui i tanawau dot Israil, i Kinorohingan dit olidang kopio, do monorob do koinsanai'd nunu nopo, om monorob di korugian dot insan noo tadau. 18 Om osorob ngai' nopondo i puru' om i koumaan dit ongoruak, do miagal pod tulun dit apatai do toruol dit araat. 19 Om iri nopondo noolu-olu' di kayu do hiri'd puru' nga' ointob- intob no; tu' iri piya tanak poo nga' kointob i'.
Okuuri' o Tulun dot Apasi
20 Om korikot indo o maso dot iri nopo tulun dot Israil di noolu-olu', om a' nondo sumondiu di bansa' di momorinta' dit oruhai no daa do nakapatai diyolo'. Nga' sumondiu nondo iyolo'd Tuhan, it olidang kopio, i Kinorohingan dot Israil. 21 Om tumorodok indo kawagu dot id Kinorohingan dit okoris, i noolu-olu' do bansa'd Israil dit okuuri' no. 22 Tu' mulong pod miagal daa di pasir do hilo'd rahat o kogumuo'd tulun dot Israil, nga' a' no kopiiro i koguli' kawagu. Osomok no kopio o kosusaan, om apatut no do raagon o bansa'ddi. 23 Om atantu' no kopio do Tuhan, it Osundu Kopio, o mamaraag do pointongkop di pomogunan; tu' iri no o natantu' mantad do Tuhan, om a' no milo'd simbanan.
Hukuman do Tuhan o Pomogunan dot Asur
24 Om boros kad Tuhan it Osundu Kopio dot id tulun dau di poundorong do hilo'd Sion, “Kada' kou poddosi do tulun dot Asur dot ulak-ulakan kou piya diyolo', do miagal di winonsoi di tulun do Masir dot id dokoyu di gulu po. 25 Tu' oruhai nod opupusan o pomohukum ku dokoyu, om iyolo' nondo o katagadan ku om patayon ku. 26 Om bobogon ku nondo iyolo' diti bobobog ku, iyoho' i Tuhan, it Osundu Kopio, o momobog diyolo' do miagal di pinomobog ku di tulun do Midian di gulu po di hilo'd Nuluhon do Pampang dot Orib. Om hukuman ku nondo ot Asur do miagal di pinomohukum ku do Masir. 27 Om tontok nopondo do maso'ddi om polobuson ku nondo iyokoyu do mantad hilo'd Asur, om a' nondo iyolo' momorinta' dokoyu,” ka dau.
Suminaap i Pisangod
28 Nosolod nod soudor dot Asur o bandar dot Ayat! Notoliban no diyolo' o Migron! Nokoiliu no diyolo' o kokoriu om rapo-rapo diyolo' do hilo'd Mikmas! 29 Nakadarapas no iyolo' di darapason do hiri'd tumakad om modop iyolo' do hilo'd Giba! Gagaran ngai' po o tulun do hilo'd bandar do Rama, om mogidu' no i tulun di hilo'd Gibia, i bandar di Raja' Saul. 30 Pomogiak kou no, oi tulun do Galim! Pokinongou kou no, oi tulun do Laisa! Simbar kou no, oi tulun dot Anatot! 31 Ongosodu' o pinogidu' di tulun di hilo'd Madmina, om i hilo'd Gobim. 32 Tadau nopod baino' om hilo' nod bandar do Nob i pisangod, om sangakang-akang no iyolo' do hilo'd Nuluhon do Sion, i bandar do Yorusalim. 33 Nga' habaon indo iyolo'd Tuhan, it Osundu Kopio, do miagal di raan do tatason do mantad hiri'd guas di kayu. Tu' tagadon ngai' nopo it angakawas, om ongolumis, om intingayamon. 34 Om habaon nondo iyolo'd Tuhan do miagal di kayu dot id tanga'd puru' do tagadon do kapak. Mulong piya dot okoris daa iyolo' do miagal di kayu dit agayo do hilo'd Libanon, nga' aratu' indo iyolo'!
Pomorintaan dit Osimbayan
1 Sinakagon nopo di Raja' Daud om miagal do kayu di natagad. Nga' poingkuro nopo i tuod do tolidan kawagu, om iyo nogiddi i sinakagon di Daud tu' haro indo o raja' do mantad id sinakagon diri. 2 Om woyoon iyau di Rusod do Tuhan. Om kitoilaan indo iyau om atarom o pomusarahan, om koilo do momusorou dit apatut dau'd wonsoyon, om wonsoyon dau iri, om kotutun iyau do korohian do Kinorohingan om oronok iyau dau. 3 Iri no i mumboyo'd Tuhan o sumiliu'd kataadan kopio dau. Okon i' ko' tumanud dit okito dau o poimpahan dau do mamatos om a' iyau paparatu' do hukuman do tumanud do boros do tulun. 4 Nga' butusan ngai' i' dau i tulun do mosikin do tumanud dit otulid; om obian dau i tulun dit aiso' o pokukurayan do gisom do kamanang i tulun diri. Om monuhu' iyau do momohukum do tulun di kisala', om patayon i tulun dot araat. 5 Otulid indo om oiyo o pomorinta' dau, om a' iyau momogibang-gibang. 6 Miulud indo i dumba' om i toni, om i bohuang nga' lumii nopo dot id toning di kambing. Om i tanak do sapi' om i tanak do singa nga' mitoning nopod mangakan-ngakan do sakot, om momogompi' nopo diyolo' nga' tanak dit okoro' po. 7 Mitoning nopondo do mangakan-ngakan do sakot i sapi' om i bohuang, om mitoning do modop i tanak diyolo'. Om i singa nga' mangakan nondod sakot do nokoring do miagal di sapi'. 8 Iri piya tanak di sumusu po nga' a' i' okurai-kurayan dot id toning piya di modsoding. 9 Om hilo' nopondo id Sion, i Nuluhon dot Olidang, do Kinorohingan, om aiso' no it araat om aiso' o ligogon, tu' oponu' pondod toilaan do pasal do Kinorohingan iti pomogunan, do miagal po di waig di momonu' do rahat.
Koguli' nondo i Bansa' di Nokotongkiad
10 Om orikot nondo o maso do pusohon do koinsanai'd bansa' o songulun o raja' do mantad id sinakagon di Daud. Om tumimung ngai' nondo iyolo' do hiri'd bandar di tiyonon dau'd momorinta' do mongoi suwau dau. 11 Tontok nopondo do tadau'ddi om pakayon pondo kawagu'd Tuhan o sinundu dau om poulion dau i tulun dau di nongoolu-olu di hilo'd Asur om i hilo'd Masir, om: hilo'd piro-piro o watas do Patros, om i hilo'd Etiopia, om i hilo'd Ilam, om i hilo'd Babil, om i hilo'd Hamat om i hilo'd piro-piro o pulou di hilo'd rahat. 12 Om poinsawaton nondod Tuhan o tiso' o bondira' do popointalang dot id koinsanai'd bansa', do timungon dau kawagu i bansa' do Yohuda om Israil di nokopogitompias-pias dot id apat o linsuk diti pomogunan. 13 Om a' nondo mosol do Yohuda i pomorintaan dot Israil, om a' sumangod dot Israil o Yohuda. 14 Om miwoyo' nopondo iyolo' do mongoi sangod di tulun do Pilistin di hilo'd ponong id kotonobon, om mitanud do mongoi pagahau do dapu' di piro-piro o bansa'd tulun di ponong id koulayon, om alaon nondo diyolo' o bansa' dot Idom om Muab, om porintaon diyolo' o bansa' dot Amon. 15 Om rasakan nondod Tuhan o Suok do Suis. Om potonguson dau i tongus dot alasu' do gisom dot otuu i Bawang dot Iprat, om osiliu nondod turu' o bawang dot ongokooro', om kosoborong ngai' indo o tulun diri. 16 Om kokito nondod ralan i tulun dot Israil di noolu-olu' do sumoliwan do mantad hilo'd Asur do miagal di soliwan i' i taki-aki diyolo' do mantad hilo'd pomogunan do Masir.
Sinding do Mamarayou
1 Om orikot nondo o maso do modsinding ngai' o tulun do poingkaa, “Mongunsikou oku diya', oi Tuhan, tu' monginsasamod ko doho'. Tu' mulong pod notogod ko doho' di gulu, nga' natanus noddi o kototogod nu. 2 Gampamasi ku nopo om Kinorohingan, om iyau no o pagandasan ku. Aiso' no o korolosi doho', tu' iyau no o manahak doho' do kokorisan. Gampamasi ku nopo om Kinorohingan, iyau no o kopodsindingan ku. 3 Poingkuro nopo i waig dot osogit, do kourudtuu di tulun dot ohuyan, om iyo noddi o kototood do tulun di nasanganu do Kinorohingan, do tontok di posion dau iyolo',” ka. 4 Om orikot indo o maso do modsinding ngai' o tulun do poingkaa, “Pongunsikou nod Tuhan, om lohou nod ngaran dau do mokiuhup. Posusuyo' no i nongowonsoi dau om i kobontugo' dau, dot id koinsanai'd bansa'. 5 Podsinding no dot id Tuhan, tu' momonsoi i' iyau dot ogumu' o koimayaan. Pologoson no do korongou do koinsanai di winonsoi dau o pointongkop diti pomogunan. 6 Suhuon ngai' no i tulun di songingiyon do hilo'd Sion, do mamangkis om modsinding dot atataadan. Tu' kikagayaan i' kopio o Kinorohingan dot Israil dit olidang, om poundorong iyau dot id pogialatan di bansa' di songonuon dau,” ka.
Hukuman do Kinorohingan o Babil
1 Iti no o boros do Kinorohingan do pasal do Babil do pinointalang dau dot id di Yosaya, i tanak di Amos: 2 Poinsawato' no o bondira' do don sumasangod do hilo'd timpak do nulu-nulu dit aiso' o sumuni! Pinglohou no di piro-piro o soudor, om popingkopoiyo' no o palad nu do maan do tanda' dot apatut nod ngoyon diyolo' songodo' i bandar di minggayo-gayo om ngoyon ngai' raago i totobon di wawayaan di bandar. 3 Nosuhu' ngai' nod Tuhan i gunsiou dit ongokoris di nongopili' dau, i tulun dit a' oluhoi o ginawo, om i milo do kaandasan do mongoi sangod om sinuhu' dau iyolo' do momohukum ngai' di tulun di katagadan dau. 4 Pokinongou no dit ohiyo do hilo'd konuluhanan, i miagal do kohiyoo' do tulun dot ogumu', ohiyo tomod o piro-piro o bansa' om pomorintaan di minogititimung. Posodiawon nod Tuhan, it Osundu Kopio, i piro-piro o soudor dau do mongoi sangod. 5 Mantad ngai' iyolo' do hilo'd pomogunan dit osodu', i hilo'd tisan do pomogunan. Om raagon nod Tuhan o pointongkop do pomogunan tu' atatagadan no kopio iyau. 6 Pillompud nod mihad, tu' oruhai no o tadau do Tuhan. Om tontok nod tadau'ddi do poporikot it Osundu Kopio, do karaagon. 7 Lumuhoi ngai' nopondo o longon om ginawo do pointikid-tikid do tulun. 8 Ongooris ngai' nondo iyolo' om ongorualan tomod, do miagal pod tondu' dit orualan do mogkosusu. Om mogiontong-ontong pondo iyolo' om angaragang o rabas dot ointingayaman. 9 Atantu' nod rumikot o tadau'd Tuhan do miwoyo'd korongito' om kototogod om kolosuo' do ginawo dau dit a' ogina-gina'. Om osiliu nondo iti pomogunan do tana' dit a' sunian do nunu-nunu, om apatai ngai' o tulun di kidusa. 10 Tu' iri rombituon om i pinuruan do rombituon do hilo'd tawan nga' a' nondo poulinau do tulinau diyolo', om i tadau di mulai nogi' nga' osiliu nopo do totuong, om i tulan nga' a' nondo mogulinau. 11 Om boros kad Tuhan, “Porikatan ku nondod kosusaan iti pomogunan om hukuman ngai' ku i tulun dot araat tu' i dusa diyolo' o kopomohukuman ku. Poinsiribaon ku nondo o koinsanai'd tulun di minggayo-gayo, om hukuman ku o tulun dit asawat o ginawo om it ongorongit. 12 Om okuri' pondo ko' tamas dit osompipi' o tulun di kopoggidu'. 13 Om pogogoron ku'ndo o tawan, om guyuon ku o pomogunan do mantad id kinoiyonon diyolo', do tontok di tadau ku, i kopointalangan ku di kototogod ku iyoho' i Tuhan, it Osundu Kopio. 14 Om miagal pondo iyolo' di tambang di mogidu' dot osuon, om miagal di baanan do dumba' dit aiso' o gompomogompi', tu' sompori-pori nopondo i tulun do bansa'd suwai di poingiyon do hilo'd Babil do mongoi'd hiri'd pomogunan diyolo'. 15 Om isai nopo diyolo' it okosupan om otobok no do gisom dot apatai. 16 Poontong-ontongon nopondo iyolo' do popingloposon i tangaanak diyolo' di ragang po, om panakahon it id suang do walai diyolo', om pingkosohon o sawo diyolo',” ka. 17 Om boros kad Tuhan, “Tingkahon ku o ginawo do bansa'd Madai do sumaap do Babil. Iyolo' nopo om a' i' milo'd sisipan do pirok, ko' tamas. 18 Om iri no pana' diyolo' o pamatai diyolo' do tulun dit ongomulok po, om aiso' o kosianan diyolo' dot id tanak di ragang po, om aiso' o kolisihan diyolo' do tangaanak dot ongokoro'. 19 Om Babil piya, tu' it olumis no kopio dot id pogialatan do pomorintaan, om i kaandasan do tulun do hilo', nga' osiliu id miagal do Sodom om Gomura, tu' raagon ku i' iri, iyoho' i Tuhan. 20 Om aiso' nondo o tiso' piya'd tulun do momogun-mogun do hilo'. Om iri tulun dot Arab di mombo-hombo nga' a' no powonsoi do kiim diyolo' dot id kinoiyonon diri, om i piro-piro o gompomogompi'd dumba' nga' a' no paakan-akan di tayam-tayam diyolo'd hilo'. 21 Om mongiyon-ngiyon nopondod hilo' om iri po i nintorusan. Pomirumunan pondod longkug, om iyonon do burung unta o hilo'. Om pinghambaan di kambing talun o hiri'd kinaraagan. 22 Om iri pondo tasu di mombo-hombo o mingusig do hiri'd walai dit angakawas, om i toni o mongiyon-ngiyon do hiri'd walai'd raja' do Babil dit ongolumis tomod daa. Oruhai no o maso do karaagan do pomorintaan diri. Ointob- intob no o tadau dau,” ka.
Minuli' do Mantad id Pomogunan do Pisangod
1 Om osianan indo o Tuhan dot Israil, i bansa' di songonuon dau, om pilion kawagu dau ot Israil do sumiliu'd dau'd songonuon. Om poiyonon dau kawagu iyolo' do hilo'd pomogunan diyolo'. Om mongoi nondo sugku' diyolo' i piro-piro o bansa'd suwai om miyon do poinrolot diyolo'. 2 Om ogumu' nondo o bansa'd suwai do monulung dot Israil do gumuli' do hilo'd pomogunan di pinatahak do Tuhan dot id diyolo', om hilo' no i piro-piro o bansa'ddi do sumiliu do susuhuon dot Israil. Om tangkapon nondo dot Israil i minanangkap diyolo' om porintaon diyolo' i minongulok-ulok diyolo' di gulu po.
Hilo'd Kinoiyonon do Tulun do Napatai i Raja' do Babil
3 Om poiduwon nondod Tuhan o bansa' dot Israil do mantad id toruol om koinggoritan, om mantad id buruon dit awagat di pinosonsog dot id diyolo'. 4 Om wonsoyon nopondod Tuhan o miagal diri, om mositi' no dot untotorion diyolo' i raja' do Babil do poingkaa, “Naratu' noddi i raja' dot orongit! A' noddi iyau kopongulok-ulok. 5 Nopupusan nod Tuhan o pomorintaan di piro-piro o pomorinta' dit araat, 6 it a' otingkod-tingkod do mongulok-ulok om monginggorit di piro-piro o bansa' di naala' dau. 7 Om id tohuri nopondo, om aiso' no o kagangahan do pointongkop diti pomogunan, om modsinding ngai' dot atataadan o pointikid-tikid do tulun. 8 Om iri piya guas do kayu sanobar om kayu sedar do Libanon nga' ongotood ngai' i' tu' naratu' no i raja' dit orongit, tu' a' nopoddi iyau hino, om aiso' noddi o monuhu' do mongoi panagad diyolo'! 9 Om nokosodia' no o hilo'd pomogunan do tulun do napatai do rumuba' di raja' do Babil. Om kongoposik ngai' nopo i rusod di tulun di momorinta' di hilo' pod pomogunan; om ingkakat ngai' nopo i rusod di piro-piro o raja' do mantad id tirikohonon diyolo' di don raja'. 10 Om moro-boros ngai' nopondo iyolo' dot id dau do poingkaa, ‘Iya' nga' oluhoi noddi do miagal dahai, om aiso' no o pokukurayan! 11 Suahon ko i' daa do tuni do kecapi di gulu po, nga' baino' noddi om nokoinsiriba' ko no do hiti'd pomogunan do tulun do napatai, i kinoiyonon dit oingou; toodopon nu nopo om i giuk, om kumut nu no om i tonggiluang,’ ka. 12 Oi raja' do Babil, naratu' ko noddi do mantad hilo'd tawan, oi rombituon di mulai di dongminsusuab dit agayo o tulinau! Nakataam ko noddi do hilo'd tana', iya' i minangala' daa do piro-piro o bansa'! 13 Iya' nogi' daa i minomusorou do sumalakoi do hilo'd tawan, om popoiyon do tirikohonon nu di don raja' dot id sawat po ko' i rombituon dit asawat kopio! Om osorou nu daa do koirikau ko i' do miagal do raja' dot id timpak di nuluhon do ponong hilo'd utara, i pogititimungan do ponokokinorohingan. 14 Om minomoros ko do sumoibau ko di haun om koiyo ko indo dit Asawat Kopio. 15 Nga' haro nogiddi, tu' hilo' nogiddi id kinoiyonon do tulun do napatai dit id saalom kopio o pinolintuhunan diya'. 16 Om iri nopondo i tulun do hiri di kokito diya' om songinsonsod pondo do poingontong diya'. Boros ka'ndo diyolo' do muhot, ‘Iti bo i tulun di minomoguyu' diti pomogunan, om i pinopogogor do piro-piro o pomorintaan? 17 Iti bo i tulun di minoniliu diti pomogunan do tana' do kowotuan, om minangala' do piro-piro o bandar, om it a' pinopoidu' om a' pinopologos di tulun di nangatangkap dau do gumuli' do hiri'd pomogunan diyolo'?’ ka. 18 Songinsonong ngai' id poillii do hiri'd lobong diyolo' dit ongolumis i raja' do pomogunan di gulu po. 19 Nga' iya' nopo om aiso' i' o lobong; pataamo' tomod nopo i rata' nu, om pinologos do minutong om noolitan di rata' do piro-piro o soudor di nangapatai dot id pisangadan i rata' nu'ddi, om pinodumpau do hiri'd suang do luang do watu do nokotonggoi di rata' di piro-piro o soudor om piulak-ulakan poo. 20 A' ko i' lobongon do miagal di piro-piro o raja' do suwai, tu' minamaraag ko i' do pomogunan nu om minamatai ko do rayat nu. Om songulun po do mantad id sompiiyon nu dit araat nga' aiso' no ot apasi. 21 Oruhai nod timpuunan o kapamatayan! Angapatai ngai' nondo i tangaanak nu'd kusai dot i dusa di taki-aki nu o kapatai. Om aiso' i' o songulun piya diyolo' do kopomorinta' do hiti'd pomogunan ko' kopomonsoi pod kabandaran,” ka.
Raagon do Kinorohingan o Babil
22 Om boros kad Tuhan, it Osundu Kopio, “Ngoyon ku nondo saapo' o Babil om raagon ku. Om songulun po nga' aiso' no o posion ku, om iri piya tangaanak nga' a' ku i' pologoson do poimpasi. Iyoho' no, i Tuhan, o minomoros diti. 23 Silihon ku nondo o Babil do buyut om tiiyonon do puok. Imuhawan ku nopo kopio om tonuson ku o bandar do Babil. Iyoho' no i Tuhan, it Osundu Kopio, o minomoros diti,” ka.
Patayon do Kinorohingan o Tulun dot Asur
24 Om sumpa' no o Tuhan, it Osundu Kopio do poingkaa, “Atantu' nod osiliu o miagal di nosorou mantad ku do wonsoyon ku. 25 Patayon ku nondo i tulun dot Asur di hiti'd pomogunan ku, i hiti'd Israil, om pingulakan ku i tulun dot Asur do hilo'd nuluhon ku. Om poiduwon ku nondo i tulun ku do mantad id binabo di pinosonsog di tulun dot Asur dot id diyolo'. 26 Iri no i nosorou mantad ku do wonsoyon ku dot id koinsanai diti pomogunan, om poingakang no o longon ku do momohukum do koinsanai'd bansa',” ka. 27 Natantu' nod Tuhan, it Osundu Kopio do wonsoyon dau o miagal diri. Nakaakang no o longon dau do momohukum, om iso' pod tulun nga' aiso' no o milo'd mogodu dau.
Patayon do Kinorohingan o Tulun do Pilistin
28 Iti no o boros do pinosunud do tontok di toun di kinapatayon di Raja' Ahas. 29 Oi tulun do Pilistin, mulong piya do notipu' no daa i bobobog do pinomobog diya', nga' kada' kotood, tu' ondung haro o tulanut dot apatai, om haro po o tulanut dit araat ko' iri do sumowoli'ddi, tu' aansa' nopo i tontolu' di tulanut, om naga' di kitalad o suang. 30 Om oontok kou nondod mononglous dit adalaan kopio, om iso' pod tulun nga' aiso' no o kopoggidu'. Om Tuhan nondo ot osiliu'd gompomogompi' do tulun di mosikin dot id pogialatan di tulun do songonuon dau. Om gompion dau o koposi-posion diyolo'. Om osimbayan i' om aiso' o koligagaanan diyolo'. 31 Pingihad no, om pinggiak no, do mokitulung oi kabandaran do Pilistin! Pananggagarai ngai' kou no dot opopoddosian! Tu' nakakapal no o lisohu do mantad ponong hilo'd utara do koilaan do korikatan do soudor dit ongosiou; om aiso' i' o tiso' diyolo' do moddosi. 32 Om nunu'ddi o posimbaron toko' dot id piro-piro o susuhuon di bansa' do Pilistin? Poboroson toko' nondo diyolo' do nokogirot nod Tuhan o Sion, om hilo' no o pogintirungan di piro-piro o tulun dau dit oinggorit.
Raagon do Kinorohingan o Muab
1 Iti no o boros do Tuhan do pasal do Muab. Naraag no o bandar dot Ar om Kir, dot insan-insan nopo o tuong do naraag, om oingou poddi o pomogunan do Muab. 2 Tuminakad i tulun do Dibon do hiri'd nulu-nulu do mongoi pogihad do hiri'd podsubakan do tingolig. Minogihad i tulun do Muab do bandar do Nibo om Modiba, do mikuwo'd tumongob tomod iyolo'. Binugar diyolo' o tobuk om ganggut diyolo' do tanda' do tumongob om mogihad iyolo'. 3 Kipakayan ngai' o tulun do rasuk do mogihad do hilo'd karalan-ralanan. Mingihad po o tulun dot id sakai'd taap do walai om hiri'd soliwan. 4 Mompud-lompud pod mihad o tulun do Hisbon om Iliali, om orongou i' do hilo'd Yahas i tihad diyolo'. Om iri piya i piro-piro o soudor nga' gagaran ngai' no; tu' katagak nopo i kosioho' diyolo'. 5 Osianan oku no kopio'd Muab! Hilo'd Soar om hilo'd Iglat Solisia o pinogidu' di tulun mantad do hilo'. Om sanggarang-garang po iyolo'd mihad do tumakad do sumusui di ralan do kumaa do hilo'd Luhit, om haro o minogidu' do hilo'd Horonaim do mikuwo'd minggarang do mihad. 6 Notuu no i waig do bawang do hilo'd Nimrim, om noriou no i sakot di hiri'd tisan di bawang diri, om aiso' no o sakot dit ongorombung do hiri. 7 Om dumarapas ngai' no o tulun di Rantai do Haarabim om tumotos do mamasi do tinan diyolo' do mitonggoi do koinsanai di dapu' diyolo'. 8 Tihad poo ot orongou do poingompus di piwolitan do Muab. Om orongou i' i tihad diyolo' do hilo' piya'd Iglaim, om hilo'd Biir-Ilim. 9 Nasabak pod raha' i waig do bawang do hilo'd kampung do Dibon, om aragang poddi. Nga' haro po o porikoton do Kinorohingan dot id tulun do hilo', dot araat ko' iri. Om iri nopo i gampamatai di porikoton dau om mamatai do koinsanai di tulun do Muab di nongoolu-olu' do hilo'.
Aiso' no o Pokukurayan do Muab
1 Pinapaatod i bansa' do Muab do tanak do dumba' do mantad hilo'd bandar do Sila, i hilo'd tana' do kowotuan do pinatahak di pomorinta' do hilo'd Yorusalim. 2 Iyo poddi tombolog do nugadan do mantad id rumun i tulun do Muab do songingandad do hiri'd tisan di Bawang dot Arnon, om mimpanau poo iyolo' do posulakan no om pougusan no. 3 Om boros ka diyolo' dot id bansa' do Yohuda, “Sunudai iyahai dit apatut dahai'd wonsoyon. Intirungai no iyahai dokoyu, do miagal di kayu do momolungung do tontok dit alasu' o tadau di pitangaadau, om pologoso' no iyahai do poillungung dokoyu. Iyahai nopodti om tulun di minogidu'; om lisoko' no iyahai om a' i' iyahai okito'd tulun. 4 Pologoso' no iyahai do mundorong do hiti'd pomogunan dokoyu. Om intirungai no iyahai do mantad id tulun di mongoi pamatai dahai,” ka diyolo'. (Otingkod indo i mongulok-ulok om opupusan i karaagon; om kopoggidu' i tulun di mamaraag do pomogunan dot Israil. 5 Om osiliu nondod raja' o tiso' di sinakagon di Daud. Om porintaon nondo dau i bansa' dau do mikuwo'd otorodok om osianan. Om olomus iyau do momonsoi dit otopot, om ilaan i' kopio dau om owonsoi i' it otulid.) 6 Boros ka di tulun do Yohuda, “Nokorongou no iyahai do kasawato'd ginawo di tulun do Muab. Obingondos om obinggayo-gayo tomod daa iyolo' nga' aiso' tomod i' o suang di boros diyolo',” ka diyolo'. 7 Om mihad pondo i tulun do Muab dot i koinggoritan diyolo' o koihadan. Mihad ngai' nopondo iyolo' do tontok dit osorou diyolo' i taakanon dit angawasiu di koubasan diyolo'd mangakan do hilo'd bandar do Kir-Harisit. Om aiso' nondo o pokukurayan diyolo' om somboro-boros poo iyolo' dot ouudipanan. 8 Nangaraag no i koumaan di hilo'd somok do Hisbon om i kokobunan dot anggur do hilo'd Sibma, iri no i kabun diri o koonuan do waig dot anggur dit osonong do pangawuk ngai' di pomorinta' di piro-piro o bansa'. Di nopo di gulu po om nokoumbal id korikot do hilo'd bandar do Yaisor o kotongkopon di kabun dot anggur om kakaa do hilo'd tana' do kowotuan do ponong id koulayon, om kakaa do hiri'd soborong do Rahat do Napatai do ponong id kotonobon. 9 Om mogihad oku'ddi do kabun dot anggur do Sibma do miagal do mogihad oku'd Yaisor. Ongkoturu' po o romou ku do kosorou'd Hisbon om Iliali tu' aiso' noddi o tomoton do popotood do ginawo di bansa'. 10 Aiso' noddi o tongosongulun piya dot ongotood do hiri'd tumo dit ongoluhub. Aiso' noddi o mimpangkis ko' minsinding do hilo'd kabun dot anggur. Aiso' noddi o mamaga' do tua' dot anggur do manganu di waig dot anggur. Nopupusan ku no i pinongkisan diyolo' dot atataadan. 11 Oruol poo o ginawo ku'd kokito do hilo'd Muab om hilo'd Kir-Harisit. 12 Minghuyan noo i tulun do Muab do tumakad di nulu-nulu do hiri'd sasambayangan diyolo' do mongoi sambayang tu' aiso' i' ot aanu-anu diyolo'. 13 Iri no i boros do pinoboros do Tuhan do pasal do Muab di gulu po. 14 Nga' baino' noddi om poingkaa o boros do Tuhan dot id diyolo', “Tolu po kopio o toun om atagak no o kakayaan do Muab. Okuri' nondo o toolu' di tulun do hilo' dot ogumu' piya daa mantad, om osompipi' pondo it ongoluhoi no,” ka dau.
Hukuman do Kinorohingan o Siria om Israil
1 Boros kad Tuhan, “Okon nondo ko' bandar po o Damsik, suwai ko' kinotimungon pod kinaraagan. 2 Om i kabandaran do Siria nga' otongkiadan no kasai' do gisom dot alaid. Osiliu pondod pangakan-ngakanan do dumba' om sapi' o kinoiyonon diri; om aiso' no o tulun do moguyung di tayam-tayam diri. 3 Aiso' nondo o pokukurayan dot Israil, om Damsik nga' oporinta' nondod bansa'd suwai. Om iri nopondo noolu-olu' do tulun do Siria om ointingayam po tomod do miagal di tulun dot Israil. Iyoho' no, i Tuhan it Osundu Kopio, o minomoros diti,” ka dau. 4 Boros kad Tuhan, “Rumikot nondo o maso dot opupusan o kosimbayanan dot Israil, om kakayaan dau nga' osowolian do korurutum. 5 Israil nopondo om miagal po di tumo do hilo'd Rapaim di nongoomot ngai' o gandum. 6 Okuri' no o tulun dot apasi do hilo'd Israil, do miagal po di guas do saitun di nopua' ngai' o tua'. Tu' haro po o duwo ko' tolu o noolu' do hiri'd raan dit id sawat kopio, om piro-piro o tua' do hiri'd raan dit id siriba'. Iyoho' no, i Tuhan, i Kinorohingan dot Israil, o minomoros diti,” ka dau. 7 Orikot nopondo o tadau'ddi om gumuli' ngai' nondo o tulun do mokitulung di Minomonsoi diyolo', iri no i Kinorohingan dot Israil dit olidang. 8 A' nondo iyolo' sumondiu di pananaraban do kominyan om i patung dot Asira di winonsoi diyolo'. 9 Tontok nopondod tadau'ddi om miagal pondod pogun dit oingou i bandar diyolo' dit ongogirot, om miagal di kabandaran do tinongkiadan di tulun do Howi om Amori di minogidu' iyolo' do mantad id tulun dot Israil. 10 Oi Israil, nolihuan nu no o Kinorohingan, i minamasi diya' om i minongintirung diya' do miagal di pampang dot ogirot. Tu' minananom ko nogi'd kabun do podsubak di piro-piro o tingolig. 11 Nga' mulong piya do mitilombus nopo iri do momutolid om mongusak do tontok di tadau do tonomon nu, nga' aiso' i' kasai' o tua' do tomoton. Kosusaan no om toruol dit a' milo do lingoson ot opurimanan nu do tontok do tadau'ddi.
Aala' Nondo i Pomogunan di Pisangod
12 Ohiyo po tomod o piro-piro o bansa' dit ongokoris, do miagal pod ngorod do rahat, om miagal do kahas di tumbak dit opuhod. 13 Miagal pod ruab di tumbak dit opuhod i bansa'ddi do rumikot. Nga' pinoinsan i' iyolo'd Kinorohingan om guli' no iyolo', do miagal po di pupuk do hiri'd tidong ko' iyo di tapol dot otilib do ribut. 14 Korolosi tomod o wonsoyon diyolo' di dongsosodopon poo, nga' kosuabon nopondo om a' no iyolo' hino. Iyo noddi o kotutukon do pointikid-tikid do tulun di mongoi panakau do hiti'd pomogunan toko'.
Hukuman do Kinorohingan o Etiopia
1 Haro o pomogunan di hilo'd soborong do bawang do Etiopia dit abantug kopio tu' it orongou o kapo do talad dau o kabantug-bantug. 2 Om haro o piro-piro o wakil do pomogunan do mantad id pomogunan diri do minugus di Bawang do Nil do suminakai'd gakit di bundusan do winonsoi. Uli' kou no, oi wakil dit ongosiau! Om igitai no dokoyu o habar do gumuli' do hilo'd pomogunan dokoyu di nopipitas do bawang, om kumaa id bansa' dokoyu dit okoris om ongogirot, om kumaa id tulun dokoyu dit angaranggou om ongolunau o kulit, i tulun do koorisan do pointongkop diti pomogunan. 3 Pokinongou kou no, oi koinsanai dokoyu i poingiyon do hiti'd pomogunan! Antangan no dokoyu i bondira' do pobondiraon do hilo'd timpak do konuluhanan! Pokinongou kou no di torumpit do pounion. 4 Om boros kad Tuhan dot id doho', “A' oku indo ohiyo do lumuung do mantad hilo'd sawat, do miagal di bolobou di sumiliu nogi'd bolobou do tontok do totuong dot alasu' di dongmongomot tu' a' i' ohiyo, om osuwau oku do miagal di tulinau'd tadau do dong pitangaadau. 5 Tontok dit a' po daa aanu i tua' dot anggur, di nangatatak nogi' o bunga di nuwaan om tumimpuun nogi' daa do monsok i tua', om ngoyon nod pisangod patayo' i tulun dot Etiopia, do miagal pod dangol do patatason do raan dot anggur. 6 Om iri nopondo i rata' do piro-piro o soudor diyolo' om potimalag tomod nopo do kanon do tombolog om nintorusan. Om ngoyon nondo di tombolog iri kano' di maso dot alasu' om tontok no di maso dot osogit om i nintorusan o mongoi pangakan,” ka dau. 7 Rumikot nondo o maso dot onuan o Tuhan, it Osundu Kopio, do porsombahan do mantad id pomogunan di nopipitas do bawang, om mantad id bansa' dit okoris om osiou, i tulun dit angaranggou om ongokoris, om i tulun dit ongolunau o kulit, om i poddosi do pointongkop diti pomogunan. Om pootodon nondo diyolo' i porsombahan diri do hilo'd Nuluhon do Sion, i kinoiyonon do tumuku' do Tuhan, it Osundu Kopio.
Hukuman do Kinorohingan o Masir
1 Iti no o boros do pasal do Masir. Rumikot no o Tuhan do hilo'd Masir, do poinsakai'd haun dit osiau tomod. Om ongooris ngai' po i tingolig do Masir dot id toguang dau, om i tulun do Masir nga' aiso' no o pokukurayan dot opopoddosian. 2 Boros kad Tuhan, “Gangahon ku'ndo o hilo'd Masir gisom do haro o pogisasangadan do sompi' ko' iyolo' ngai'. Misaap nondo i miobpinai om misaap i mitimbang o walai. Mogisasangod nondo i bandar di mogitotogod, om mogiaahau do kuasa' i raja' di mogitotogod. 3 Raagon ku'ndo i nongosorou mantad daa di tulun do Masir do wonsoyon diyolo', om tonuson ku i kosioho' diyolo'. Om kouhup nondo iyolo' di tingolig diyolo' do mongoi iyolo' pokituduk di bobolian om mongoi pokianu do nosihat di rusod do tulun di napatai. 4 Om patahakon ku'ndo i tulun do Masir dot id raja' dit araat kopio, i momorinta' diyolo' dot araat kopio o pomomorinta'. Iyoho' no, i Tuhan it Osundu Kopio, o minomoros diti,” ka dau. 5 Kumoro' nondo i waig do hilo'd Bawang do Nil, om monguyat nondo do rumasak. 6 Om outong nondo i liang do waig di mantad hiri'd bawang, dot arasak i waig. Om rumiou ngai' nondo i bundusan om i sakot do hiri. 7 Om rumiou ngai' i totok di pinototok do poingompus di tisan di Bawang do Nil, om aayi' nopondo iri dot otilib do ribut. 8 Mihad ngai' pondod tumongob i monginginsada' do hiri'd Bawang do Nil, tu' aiso' no o guna' di tapon om rambot diyolo'. 9 Om aiso' nondo o pokukurayan di gompomonsoi do kain linan; 10 om i mangangawol om i piro-piro o tukang do suwai nga' tumongob ngai' nopondo om aiso' no o pokukurayan diyolo'. 11 Basug ngai' no kopio i boyoon do bandar do Soan! Om i tulun dot oilo no kopio do hilo'd Masir nga' dongkololowong i' do ponosihat. Om katama' kopio i' daa iyolo' do momoros dot id raja' do sinakagon iyolo' do tulun dit ongoilo om sinakagon di piro-piro o raja' di gulu po. 12 Oi raja' do Masir, honggo ngai' no i gomponosihat nu dit ongkitoilaan? Koilo i' doti' daa iyolo' do momisunud diya' di natantu' mantad do Tuhan, it Osundu Kopio, do wonsoyon dau do hiti'd Masir. 13 Basug ngai' nopo i boyoon do hilo'd Soan om Mimpis. A' nogi' iyolo' minomoyo' di bansa' tu' minamalid nogi' iyolo'. 14 Tinomod i' do Tuhan do pinopoboros iyolo' do nosihat di koborulong. Om gisom do kasala' ngai' nopoddi o wonsoyon do tulun do Masir, om mikorobibi' pod mamanau do miagal di tulun do naawuk di kosunsuya' di tilob dau. 15 Aiso' no o milo'd monulung do Masir dot id pialatan do boyoon ko' i rayat, om i tulun do kipangkat ko' i tulun toomod.
Tumuku' Nondo dot id Tuhan o Masir
16 Rumikot nondo o maso dot osiliu do miagal do tondu' dit obintingayaman om obingoris o bansa' do Masir. Pananggagaran pondo iyolo'd moddosi do kokito'd longon do Tuhan, it Osundu Kopio do poingakang nod momohukum diyolo'. 17 Om ooris nondo iyolo'd Yohuda do soira' nopo dot osorou diyolo' i natantu' mantad do wonsoyon do Tuhan, it Osundu Kopio, dot id diyolo'. 18 Om orikot nopondo o maso'ddi om iri nondo boros dot Ibrani o boros dot id limo o bandar do hilo'd Masir. Om sumumpa' nondo iyolo' dot id suang do ngaran do Tuhan, it Osundu Kopio. Om roitan nondo o tiso' di bandar diri do “Bandar do Tadau”. 19 Om orikot nopondo o maso'ddi om haro nondo o pananaraban do porsombahan dot id Tuhan do hilo'd pomogunan do Masir. Om haro o torigi do watu di pinotobilang dot id Tuhan do hiri'd wolit di pomogunan. 20 Om iri nondo i pananaraban do porsombahan om i torigi do watu o sumiliu'd tanda' do hino o Tuhan, it Osundu Kopio do hilo'd Masir. Om soira' nopo do minglohou ngai' i tulun do hilo' do mokitulung do Tuhan, tu' ulak-ulakan iyolo', om porikatan indo dau iyolo' do songulun do mongoi pamasi diyolo'. 21 Om mintalang nondo o Tuhan dot id bansa' do Masir, om kotutun indo iyolo' dau, om tumuku' iyolo' dot id dau, om papatahak iyolo' do porsombahan di sumbolion om porsombahan do suwai dot id dau. Om monokibatos nondo iyolo' dau do mikuwo'd sumpa'. 22 Om hukuman nondod Tuhan i bansa' do Masir, nga' id tohuri nopondo om lingasan i' dau iyolo'. Om gumuli' nondo iyolo' dot id Tuhan om pokinongohon indo dau o sambayang diyolo' om lingasan dau iyolo'. 23 Orikot nopondo o maso'ddi om haro nondo o ralan magayo dot id pialatan do Masir om Asur. Om milo nondo o tulun dot Asur do sumuang do Masir om milo o tulun do Masir do sumuang dot Asur. Om misugku' nopondo iyolo' do sumambayang. 24 Om orikot nopondo o maso'ddi om koiyo nondod Masir om Asur ot Israil, om sumiliu nondo i tolu o bansa'ddi do barakat do pointongkop diti pomogunan. 25 Om barakatan nondo iyolo'd Tuhan, it Osundu Kopio, om moro-boros iyau do poingkaa, “Barakatan ku o Masir, i tulun ku, om barakatan ku ot Asur, i winonsoi ku, om barakatan ku ot Israil, i tulun di pinili' ku,” ka.
Nabi di Poillabas o Sumiliu'd Pogintutunan
1 Om suhuo' no di Sargon, i raja' dot Asur, i boyoon do soudor dau do mongoi panangod dot Asdod, i bandar do Pilistin. 2 Tontok di tolu po toun dot id gulu ko' iti om boro-boros no o Tuhan dot id di Yosaya, i tanak di Amos, do poingkaa, “Pamanau no, om iduwon i' ino pakayan do mogihad do poimpakai nu om iduwon ino kasut nu,” ka. Om wonsoyo' no di Yosaya o miagal diri om pamanau no iyau do poillabas om aiso' o kasut. 3 Om tontok di noturungku' nod pisangod o bandar dot Asdod, om boro-boros no o Tuhan do poingkaa, “Minimpanau i Yosaya, i susuhuon ku do poillabas om aiso' o kasut do solinaid do tolu o toun. Om iti no tanda' dit osiliu do hilo'd Masir om hilo'd Etiopia. 4 Om tanggayan nopondo di Raja' dot Asur i tulun do nangatangkap dau do mantad hilo'd Masir om mantad hilo'd Etiopia. Om i tongomulok po om i komolohingan no nga' aiso' ngai' nopondo o kasut do mamanau om songillabas, om songingulai o pakou, do pongintingayam do Masir. 5 Om iri tulun di suminondiu daa do Etiopia om poondos-ondos do Masir nga' moddosi indo om oiman-iman. 6 Om orikot nopondo o maso'ddi om boros kando di tulun di momogun-mogun do hilo'd poingompus do tisan do rahat do hilo'd Pilistin, ‘Antangai pogi' i nosiliu dot id piro-piro o tulun di sinondiu toko' daa do mongintirung dati' do mantad id raja' dot Asur. Poingkuro toko' podti dot apasi?’ ka no diyolo',” ka dau.
I Pinointalang do Pasal do Karaagon do Babil
1 Iti no o boros do pasal dit osiliu dot id Babil: Miagal pod ribut do monomporiu-riu do kawaya' do tana'd kowotuan o kosusaan dit awagat kopio do rumikot do mantad id pomogunan di kotompurolosi. 2 Nokokito oku do pinointalang do pasal dit ongosiliu dit araat kopio; om pasal di magakal om mamatai. Ongoi no sangod, oi soudor dot Ilam! Ngoyo' no turungkuo' i kabandaran, oi soudor do Madai! Tu' pupusan nod Kinorohingan i koinggoritan di winonsoi'd Babil. 3 Om iri nopo nokito ku'ddi nga' nokorolosi tomod doho', om gisom dot oruol ngai' poddi o tinan ku, do miagal po di tondu' dot orualan do mogkosusu. 4 Ooris po tomod o ginawo ku, om pananggagaran oku po dot opopoddosian. Orohian oku nopo daa dot otuong nga' aiso' i' o nanu-anu ku, suwai ko' kopoddosian noo. 5 Om haro nogi' o moginakan do hiri'd pinointalang di nokito ku; nongkosodia' no o poirikahanan ngai' di tulun do nalap. Om makan no om minum iyolo'. Nga' sigog id haro o minonuhu' do poingkaa, “Oi boyoon do soudor! Sodia' kou no do mongoi sangod, om ngoyon no i kolid dokoyu!” ka. 6 Om boros kad Tuhan dot id doho', “Ponuhu' dot iso' o tulun do mongoi padtamong do hilo'd tiiyonon do madtamong om sunudan no iyau do posunud dit okito dau. 7 Ondung kokito iyau do duwo o tulun do mitanud-tanud do poinsakai goduwo'd kuda', om tulun di songinsakai'd kaladai om unta, om suhuon no iyau do mogontong kopio'ddi,” ka. 8 Om polohowo' no di tulun do minadtamong o boros do poingkaa, “Oi Tuan, poingkakat kasai' oku i' do minadtamong do hiti'd padtamangan ku do tadau om totuong,” ka. 9 Om sigog iddi do korikot iyolo'! Soroduwo-duwo nopo o tulun do mitanud do poinsakai goduwo'd kuda'. Om boros kaddi di madtatamong, “Naala' no o Babil! Om koinsanai di tingolig do tukuon diyolo' nga' nongopurok no om songinsasad poo do hilo'd tana',” ka. 10 Oi Israil, i bansa' ku! Miagal kou po daa do tua' do gandum do piningulakan, nga' baino' nopo om sunudan ku iyokoyu do habar dot osonong di norongou ku do mantad id Tuhan, it Osundu Kopio, i Kinorohingan dot Israil.
Boros do Pasal dot Idom
11 Iti no o boros do pasal dot Idom. Haro o tulun do minomolohou doho' do mantad hilo'd Idom do poingkaa, “Oi madtatamong, songkuro po o koloido' om katalib nogi' o totuong? Piro po o jam om anawau nogi'?” ka. 12 Om boros kangku do suminimbar, “Rumikot i' o kosuabon, nga' rumikot i' kawagu o totuong. Ondung orohian ko kawagu'd muhot om gumuli' no do mongoi uhot,” kangku.
Boros do Pasal dot Arab
13 Iti no o boros do pasal dot Arab. Oi tulun do Didan, pinopowonsoi ngai'd kiim i kapila nu do hilo'd tana' dot Arab dit aiso' o sumuni. 14 Panahak kou nod waig dot id tulun di tuuhan di rumikot dot id dokoyu. Om iyokoyu i tulun do Tima, nga' manahak kou nod taakanon dot id tulun di minogidu'. 15 Tu' minogidu' ngai' o tulun diri do mantad id gayang di nokodong no, om mantad id pana' di posodia' nod papanaon, om mantad id koinsanai'd koligagaanan do pisangadan. 16 Om boros kaddi do Tuhan dot id doho', “Sontoun po kopio om opupusan no o kosimbayanan do payat do Kidar. 17 Iti nopo tulun di mamamana' do hilo'd Kidar om gunsiou kopio, nga' okuri' nondo diyolo' o kopoggidu'. Iyoho' no, i Tuhan om Kinorohingan dot Israil, o minomoros diti,” ka dau.
Boros do Pasal do Yorusalim
1 Iti no o boros do pasal di rantai di roitan do Rantai do Pinointalang. Oi tulun do Yorusalim, nokuro tu' mongoi ngai' kou do hilo'd sakai'd taap do walai dokoyu? 2 A' i' apatut do moginakan om rumamai o pointongkop diti bandar. Tu' okon i' ko' suminangod o kinapatayan di piro-piro o gunsiou dokoyu. 3 Minogidu' ngai' i boyoon do soudor dokoyu om natangkap iyolo' dit a' po nakapana' ot ongoiso' piya di pana' diyolo'. 4 Pologoso' oku dot iso-iso' do mogihad di tulun ku di nangapatai. Kada' kou umbal do monginsasamod doho'. 5 Iti no o tadau di natantu' mantad do Tuhan, it Asawat Kopio, om it Osundu Kopio do tadau do kaalaan, om kagangahan, om koorisan do hiti'd rantai di roitan do Rantai do Pinointalang! Nangahaba' no i tolig do bandar toko', om mulinggou po i giniakan do mokitulung do hilo'd konulu-nuluan. 6 Rumikot ngai' no i soudor do mantad hilo'd Siria do songinsakai'd kuda' om korita'-kuda'. Om ongkiinigit i tulun dot Ilam do pana' om pawakasan do pana'. Om i piro-piro o soudor do mantad hilo'd Kir nga' nokoposodia' nod kolid. 7 Noponu' pod korita'-kuda' i rantai do Yohuda dit ongoluhub; om nogurumungan pod soudor di songinsakai'd kuda' i wawayaan dot angagayo do hilo'd Yorusalim. 8 Om naraag ngai' no o pogintirungan do Yohuda. Om tontok nopondoddi om mongoi kou nondo panganu do rapo-rapo'd sumangod do mantad hiri'd poopian do rapo-rapo. 9-10 Om kokito no dokoyu dot ogumu' no o nangababak di tolig do bandar do Yorusalim, dit apatut do sonongon. Om pingantangan ngai' no dokoyu i walai do hilo'd Yorusalim om raagon no dokoyu o wookon di walai om aanu i' i watu di walai do pomonsoi do tolig di bandar. Om ponimungan nopo dokoyu'd waig om 11 momonsoi kou'd kulam do ponimungan do waig di lumuyung do mantad hiri'd kulam di laid do hiri'd suang di bandar. Nga' a' kou i' minomusou'd Kinorohingan, i minanantu' mantad dot owonsoi o miagal diti di gulu po om i pinopologos dot owonsoi o miagal diri. 12 Tontok nopoddi nga' sinuhu' kou'd Tuhan, it Asawat Kopio, om it Osundu Kopio do mihad om millompud do mihad, om momugar do tulu dokoyu om manampakai do pakayan do mogihad. 13 Nga' minoginakan kou nogi' om ruminamai kou. Minogkorot kou nogi'd dumba' om sapi' do maan dokoyu'd kanon, om minonginum kou do waig dot anggur. Tu' boros ka dokoyu, “Kainou, moginakan om moginum! Tu' matai toko' nod suab!” ka. 14 Om boros kad Tuhan, it Osundu Kopio, om it Asawat Kopio, dot id doho' di minintalang iyau, “A' ku no ompunan iti karaaton diyolo' do gisom do tikapatai diyolo'. Iyoho' no, i Tuhan, o minomoros diti,” ka dau.
Popoinsan di Sibna
15 Om suhuo' oku nod Tuhan, it Asawat Kopio om it Osundu Kopio, do mongoi solowot di Sibna, i boyoon do walai'd raja', do momisunud dau do boros do Tuhan do poingkaa, 16 “Isai ko daa dot osorou nu? Nunu kopio o kosorupayan nu do popoluang do lobong nu do hiti'd pampang? 17-18 Antaan-taan no, tu' pataamon ku nondo iya' do hilo'd sodu'. Om anggaman ku nondo iya' om buluguon ku. Om pataamon ku nondo iya' do hilo'd pomogunan dit agayo. Om hilo' ko nondo dot apatai dot id toning di piro-piro o korita'-kuda' di kaandasan kopio nu. Minongindaraat ko nod ngaran di sompiiyon di tuan nu. 19 Om iduwon ku nondo iya' do mantad id karaja' nu om poinsiribaon ku o pangkat nu dit asawat. 20 Tontok nopondod maso'ddi, om lohowon ku'ndo i susuhuon ku, i Iliakim, i tanak di Hilkia. 21 Om porosukan ku'ndo dau ino rasuk nu do kumaraja', om paagkasan ku dau ino tagkos nu, om patahakon ngai' ku dau ino kuasa' nu. Om osiliu nondo iyau do panakatapa' do tulun do Yorusalim om Yohuda. 22 Om iyau no o kikuasa' kopio dot id siriba' di raja' di sinakagon di Daud. Om iyau no o migit di kunsi' do pomorinta'. Om nunu nopo it ukaban dau nga' aiso' no o milo'd potobon, om nunu nopo i tabanan dau nga' aiso' no o milo'd mongiwang. 23 Om onuan ku'ndo iyau do pangkat dit asawat om ogirot do miagal di posoitan dit ogirot o pinapalantak dot id limput dit ogirot. Om oinsanan nopondo o sompiiyon dau do suahon, tu' iyau o koponuahan. 24 Nga' osiliu i' do binabo dau i koobpinayan dau om i tulun di sumondiu dau. Miagal pondo iyolo'd lansang om balanga' di songinsait do hiri'd posoitan do sumondiu dau. 25 Om tontok nopondod maso'ddi om lumuwau nondo om kumodong i posoitan di pinalantak dot ogirot diri. Om iri-iri nondo o kopupuson di koobpinayan dau om i tulun di suminondiu dau. Iyoho' no i Tuhan, o minomoros diti,” ka dau.
Boros do Pasal do Tirus om Sidon
1 Iti no o boros do pasal do Tirus. Ihad kou no, iyokoyu i papapanau do kapal do Tarsis do hilo'd rahat om i lumayag do mantad hilo'd Siprus! Tu' naraag no o Tirus, i bandar do podompiran dokoyu. Naraag ngai' no o walai om i podompiran dokoyu'd kapal do rahat. 2 Ihad kou no, iyokoyu i dumadagang do hilo'd Sidon! Tu' koubasanan no dokoyu do monuhu'd tulun 3 do mongoi'd hilo'd pomogunan do suwai, i hilo'd soborong do rahat, do mongoi pomoli om mongoi padagang do gandum do mantad hilo'd Masir, om mongoi pongindapu' dot id pomogunan do piro-piro o bansa'. 4 Nointingayam no kopio o bandar do Sidon! Tu' ilo piya rahat om ilo rinalom do rahat dot agayo nga' a' no manansanganu diya'. Boros ka diyolo', “A' oku i' insan do haro o tanak. Om a' oku i' pinapagayo do tangaanak do kusai ko' tondu' po,” ka. 5 Om iri piya tulun do Masir nga' nongkotigowo i' om tumongob do nokoilo do naraag o Tirus. 6 Ihad kou no, om poggidu' kou no do kumaa do hilo'd Sepanyol, oi tulun di poingiyon do hilo'd tisan do rahat! 7 Antangai pogi' o Tirus, i bandar dokoyu di hino no do mantad di gulu po. Iti toi i bandar dit oubas do rumamai? Iti toi i bandar di minonuhu' do tulun do mongoi'd hilo'd soborong do rahat do mongoi popoingkakat do pomorintaan diyolo'd hilo'? 8 Isai o minomusorou do mamaratu' do Tirus, i bandar dot agayo o kuasa'ddi, om i tangaanak do raja' o dumadagang, i tulun do suahon kopio do hiti'd pomogunan? 9 Tuhan no, it Osundu Kopio o minomonsoi ngai'ddi. Natantu' mantad no dau do wonsoyon dau o miagal diri om opupusan i' i koondos do tulun di songingiyon do hilo', dot i nongowonsoi diyolo' o kaandasan, om poinsiribaon dau i tulun dit ongkipangkat dot id pogialatan diyolo'. 10 Ngoyo' no dokoyu umoo' i tana' dokoyu, oi tulun di poingiyon do hilo'd Sepanyol, tu' aiso' noddi o podompiran do kapal do rahat. 11 Nakaakang nod Tuhan o longon dau dot id rahat, om rinaag ngai' dau o pomorintaan; om nokoponuhu' no iyau do mamaraag di piro-piro o kuta' do pogintirungan do Ponisia. 12 Boros kad Tuhan, “Nopupusan no o kataadan nu, oi bandar do Sidon. Om ulak-ulakan nondo o tulun nu. Om mogidu' piya daa iyolo' do hilo'd Siprus nga' a' kasai' i' iyolo' koidu' do mantad id koligagaanan,” ka dau. 13 (Okon i' ko' Asur, suwai ko' Babil, o pinapatahak di bandar do Tirus dot id nintorusan dit orongit. Iri i tulun do Babil o minomonsoi ngai' di walai dit akawas do padtalob di pisangod; om iyolo' no i minamahaba' di kuta' do pogintirungan do hilo', om i pinopologos do bandar diri dot araag.) 14 Ihad kou no, oi papapanau do kapal do rahat, tu' naraag no i bandar di sondihon dokoyu. 15 Om orikot indo o maso dot olihuan o Tirus do solinaid do turu' nohopod o toun, dot irad di konoruo' do tumur do raja'. Nga' katalib pondo o turu' nohopod o toun om osiliu nondo o Tirus do miagal di tondu' do sundal, dot id suang do sinding diti: 16 Anu do kecapi, om sorili' nodti bandar, oi sundal di nolihuan! Kombiton no i kecapi, om modsinding no kawagu, om osorou ko indo kawagu. 17 Om katalib pondo o turu' nohopod o toun, om osorou nogindo kawagu'd Tuhan o Tirus, om pologoson dau o Tirus do momonsoi di karaja' mantad dau di gulu po. Om monokidagang-dagang nondo iyau dot id koinsanai'd pomorintaan do hiti'd pomogunan. 18 Nga' iri nopondo kountungan dau om it aanu-anu dau om patahakon ngai' nopo dot id Tuhan, om a' i' iri timungon ko' poopion po do gisom dot ogumu'. Suwai ko' iri nopo om patahakon dot id tulun di sumambayang dot id Tuhan, do maan do pomoli do takanon om pakayan dit apatut dot aanu diyolo'.
Hukuman do Tuhan o Pomogunan
1 Raagon nondod Tuhan iti pomogunan, gisom dot a' sunian do nunu nopo om oingou. Om porumpadon dau ot id sakai diti pomogunan om pogitotongkiadon dau i tulun do poingiyon do hiri. 2 Om oiyo nopondo o kotutukon do tulun --- i tulun toomod om it imam, om i turipon do kusai om i tuan dau, om i turipon do tondu' om i tondu' do sanganu di karajaon dau, om i momoli om i padagang, om i molos om i poolos, om i kaya' om i mosikin. 3 Om aiso' nopondo o sumuni do nunu nopo do hiti'd pomogunan. Nokoboros nod Tuhan, om atantu' no dot osiliu o miagal diri. 4 Rumiou nondo om kumoring o pomogunan, om lumuhoi ngai' nopo o pointongkop do pomogunan, om ilo tawan om iti pomogunan nga' rumomuk goduwo nopo. 5 Sosomu' no o pomogunan tu' ososomu' di tulun di songingiyon do hiri, tu' tuminolibamban iyolo' di pinonuhuan do Kinorohingan om a' suminulung di tumpongo'd Kinorohingan dot id diyolo', i tumpongo do gisom dot alaid. 6 Gowoi poddi om pinapalan do Tuhan iti pomogunan om hinukuman dau o tulun do hiri, tu' i winonsoi diyolo' o kinopomohukuman. Om sorobon nondo iyolo', om okuri' nondo diyolo' ot apasi. 7 Rumiou nondo i guas dot anggur, om apagon do kaanu'd waig dot anggur. Om i tulun dit ongotood di gulu po nga' tumongob ngai' nopondo. 8 Notingkod noddi i tuni do rebana, om notingkod i tuni do kecapi di popotood do ginawo. 9 Aiso' noddi o tulun do mondig-tondig do monginum do waig dot anggur, om aiso' o momurimon do kowosiho' di tiinumon do kaawuk. 10 Agangau nopo o pointongkop di bandar, om nongontiilan ngai' i totobon do walai tu' ongooris po ngai' i tulun do hiri. 11 Minggiak po ngai' i tulun do hilo'd karalan-ralanan tu' aiso' no o waig dot anggur. Aiso' noddi o kataadan do gisom dot alaid, om natanus no o karamayan do pointongkop diti pomogunan. 12 Naraag noddi kopio i bandar, om nohuyas i totobon do wawayaan di bandar. 13 Om miagal noddi ot osiliu dot id pointikid-tikid do bansa' do pointongkop diti pomogunan. Miagal pori do momua' di tua' do saitun di dongmongua' om miagal do mongupu' di tua' dot anggur di noolu-olu', dit id tohuri no dot upuon. 14 Om modsinding nondo dot atataadan i tulun dit a' nangapatai. Om popinsunudon nondo di tulun do ponong hilo'd kotonobon o kobontugo'd Tuhan. 15 Om royohon iyau di tulun do ponong hilo'd koulayon. Om poinggoyoon di tulun do poingiyon do hilo'd tisan do rahat, o Tuhan i Kinorohingan dot Israil. 16 Orongou nondo o sinding do mamarayou do mantad hilo'd tisan do pomogunan. I sinding do mamarayou dot Israil, i bansa' dit otulid. Nga' aiso' no o soro-sorohon ku iyoho'! Obungou oku no! Tu' maso ku po dot akalan di tulun di magakal om i mongindaraat. Om muhang-ruhang ka nogi' o kararaat diyolo'. 17 Pokinongou ngai' kou no, i tulun do hiti'd pomogunan! Poingandad no dokoyu o lawa' om luang do korotuon dokoyu; oontok kou nod kosusaan. 18 Tulun nopo di mumbal daa do mogidu' do mantad id kosusaan om aratu' no dot id luang, om iri no tulun di mogidu' do mantad id luang om kosulung nod lawa'. Miagal pondod potuntugon o rasam do mantad hilo'd tawan, om oguyu' nondo o pinoimpahan do pomogunan. 19 Om agaang nondo o tana' om opitas, om otuhan. 20 Iti po pomogunan nga' mikorobibi' pondod miagal do tulun di naawuk om maba-haba' poo do miagal di sulap dot oontok do tongus dot opuhod. Nawagatan tomod do dusa iti pomogunan, om iri no o kahaba-haba'dti. Araag nopondo kopio iti pomogunan om a' no owonsoi kawagu. 21 Om tontok nopondod tadau'ddi om hukuman ngai' nondod Tuhan i monguasa' do hilo'd sawat om i raja' do hiti'd pomogunan. 22 Om rubpuon nopondod Tuhan dot id luang o koinsanai di raja' do miagal pod tulun di songinggiil. Om tabanan nopo dau iyolo' do hiri'd giil do gisom dot orikot i maso do kopomohukuman dau diyolo'. 23 Om tumuong nondo ilo tulan om a' nondo mulinau o tadau, tu' Tuhan no it Osundu Kopio o raja' di momorinta'. Momorinta' nondo iyau do hilo'd Yorusalim do hilo'd Nuluhon do Sion, om kokito ngai' nondod sinundu dau i boyoon do bansa'.
Sinding do Mamarayou
1 Oi Tuhan, iya' no o Kinorohingan ku, pusohon ku iya' om royohon ku o ngaran nu. Nowonsoi nu no i kongopusahan kopio. Om otorodok ko i' do minomonsoi di nosorou mantad nu'd wonsoyon nu do mantad di gulu po. 2 Nangaraag ngai' nu no o bandar, om nongomumuk ngai' nu i kuta' do pogintirungan diyolo'. Natanus ngai' noddi i walai'd raja' di winonsoi do pisangod, om a' no wonsoyon kawagu do gisom dot alaid. 3 Royohon ko nondod bansa' dit ongokoris, om poddosi ko di piro-piro o bansa' dit orongit. 4 Id diya' ngai' no o pakayaan di tulun do mosikin om it aiso' o pokukurayan, om iya' no ot intirungon diyolo' do tontok do haro o kosusaan. Intirungan nu i' iyolo' do mantad id tongus dit opuhod, om lungungan nu do mantad id kolosuo'd tadau dit a' ogina-gina'. Miagal pod tongus di maso do dongrumasam i tulun dot araat do mongumang, 5 miagal po iyau di ribut dot alasu' do tumongus do hilo'd kasakat-sakatan. Nga' tiningkod nu i' i pisangod dahai do minghiyo, om tiningkod nu i pinongkisan do tulun dit angaraat, do miagal pod haun tu' momolungung do tontok di tadau dit alasu' kopio.
Poposodia' o Kinorohingan do Poginakanan
6 Posodia' nondo o Tuhan, it Osundu Kopio, do poginakanan do hilo'd Nuluhon do Sion, do maan do koinsanai'd bansa' do hiti'd pomogunan. Posurungon dau i taakanon dit awasiu no kopio om waig dot anggur dit osonong no kopio. 7 Om sigog indo dot iduwon dau i haun do katangaban di monguluput do koinsanai'd bansa' do hiri'd timpak do nuluhon diri. 8 Om tonuson nondod Tuhan it Osundu Kopio, o kapatayon do gisom do poingompus. Pihidan nondo dau o romou do pointikid-tikid do tulun om iduwon dau i tingayam do poimbabo di tulun dau do pointongkop diti pomogunan. Tu' nokoboros nod Tuhan o miagal diri, om atantu' no dot osiliu iri. 9 Om tontok nopondod maso'ddi om momoros nondo o tulun do poingkaa, “Iyau no kopio o Kinorohingan toko'. Iyau no i nandad toko' do mamasi dati'. Iyau no kopio o Tuhan, iyau no o pagandasan toko'. Otood noddi iyahai do baino' om osonong o ginawo dahai, tu' pinasi i' iyahai dau,” ka.
Hukuman do Kinorohingan o Muab
10 Intirungan indod Tuhan o Nuluhon do Sion, nga' tulun nopod Muab om pingulakan pondo do miagal di sakot do nokoring tu' pingulakan do hiri'd kinotimungon do rinomos. 11 Om poroloyon no daa'ndo di tulun do poingiyon do hilo' o longon diyolo' do miagal-agal do tulun di mumbal daa do kumaau, nga' intingayamon indo iyolo'd Tuhan om katawos nopondo o longon diyolo', tu' oluhoi no o longon diyolo'. 12 Raagon nondo dau i kuta' do pogintirungan do tulun do Muab do mitonggoi di tolig dit angakawas, om omumuk nopondo iri om osiliu'd pupuk.
Onuan do Kinorohingan do Kamanangan o Tulun Dau
1 Tontok nopondod tadau'ddi om sindingon nondo di tulun o sinding diti do hilo'd pomogunan do Yohuda, “Ogirot no kopio o bandar toko'; Kinorohingan i' o minomonsoi di tolig, om hiti toko' no dot osimbayan om aiso' o koligagaanan. 2 Iwangai ngai' no i wawayaan dot agayo di bandar, om pologoso' nod sumuang i piro-piro o bansa' dit otorodok, i bansa' do momonsoi'd korohian do Kinorohingan diyolo'. 3 Iya' no, oi Tuhan, o manahak do kosimbayanan do tulun dit ogirot o ginawo, tu' mogondos i' iyolo'd Tuhan. 4 Pogondos kasai' nod Tuhan, om gompion toko' indo kasai' dau do gisom dot alaid. 5 Poinsiribaon dau i tulun dit angasawat o ginawo, om raagon dau i bandar diyolo' dit ogirot, om nahaba' no dau i tolig di bandar do gisom do nangkataam. 6 Om ulak-ulakan nondo i bandar diri di tulun do mosikin om it ongoinggorit. 7 Oi Tuhan, iya' no o mononong do ralan do tulun dit otulid o ginawo, om otulid i' o ralan do susuyon do tulun dit otulid o ginawo. 8 Tumanud i' iyahai do korohian nu, oi Tuhan, om iya' no o pagandasan dahai om kalangadan kopio dahai. 9 Aayi-ayi' no o ginawo ku do lumangad diya' do tontok do dongotuong; om soira' nopondod butusan nu iti pomogunan, om oilaan nondo di tulun do hiti'd pomogunan o komoyon do kotulido' nu. 10 Mulong piya'd osonong ko dot id tulun dit araat, nga' a' i' iyolo' milo do minsingilo do momonsoi dit osonong. Hiti piya'd pomogunan di haro o toturan nga' momonsoi kasai' i iyolo' dot araat, a' i' iyolo' monongkuyaan do kuasa'd Tuhan. 11 A' i' koilo i piro-piro o pisangod nu, do hukuman nu iyolo'. Oi Tuhan, intingayamo' no iyolo', om pologoso' no iyolo' dot oinggorit, pologoso' no iyolo' dot orotuan do hukuman di nokosodia' mantad nu. Pointongon no iyolo' do kogoyoo'd kosianan nu dot id tulun nu. 12 Oi Tuhan, iya' no o poposimbayan dahai, tu' koinsanai dit owonsoi dahai nga' iya' i' kopio o minomonsoi'ddi do bagi' dahai. 13 Oi Tuhan, i Kinorohingan dahai, nokoumbal i' iyahai do noporinta' do piro-piro o tuan do suwai, nga' iya' noo o Tuhan dahai. 14 Nga' baino' noddi om napatai no iyolo', om a' no masi kawagu, om i rusod diyolo' nga' a' no tumungag. Tu' nohukuman nu no iyolo' om napatai nu iyolo', om natanus nu do mantad id pomusarahan nu. 15 Oi Tuhan, pinasapou nu iti bansa' dahai, om pinoinggayo nu o kinoiyonon do tana' diyolo', om iri no o kopoinggayaan diya'. 16 Hinukuman nu iyahai, oi Tuhan gisom do noinggorit iyahai, om pogihum noddi iyahai diya' om sambayang no iyahai. 17 Poingkuro nopo i tondu' do monohoruol no, tu' oruhai nod osusu om minggiak poo dot orurualan, om iyo no iyahai'ddi dot id toguang nu, oi Tuhan. 18 Monontian iyahai, om monohoruol iyahai dot id suang do koinggoritan, nga' aiso' i' o pogkosusuon dahai. A' i' iyahai kapanahak do koposion dot id pomogunan, a' i' iyahai nokopomoruhang do tulun do hiti'd pomogunan. 19 Iri nopo tulun nu di nangapatai nga' masi i' kawagu, om i rata' diyolo' nga' tumungag i' kawagu. Om i nongolobong do hiri'd lobong, nga' tumungag indo om modsinding dot atataadan. Tu' poingkuro nopo i bolobou do popoluhub diti tana', om miagal noddi o Tuhan do monungag kawagu di laid no kangapatai,” ka.
Momutus om Mononduli' o Tuhan
20 Suang kou no do hino'd walai dokoyu, oi bansa' ku, om tabanan no i totobon. Lumisok kou pod daamot, do gisom pod atanus i kototogod do Tuhan. 21 Tu' atantu' no do lumintuhun o Tuhan do mantad hilo'd kinoiyonon dau do hilo'd surga do mongoi pomohukum do tulun do hiti'd pomogunan tu' i dusa diyolo' o kopomohukuman. Om iti tana' nga' a' nondo polisok di raha' do tulun di napatai. Om pointalangon nondo i tulun di luminisok do minamatai.
1 Tontok nopondo do maso'ddi om pakayon nondod Tuhan i gayang dau dit okodou om atarom do pomohukum di Lowiatan, i tulanut di mingurilong om mingkinol. Om patayon nogi' dau i naga' do rahat. 2 Om tontok nopondo do maso'ddi om poboroson nondod Tuhan o poingkaa, “Podsinding no do pasal di kabun dot anggur ku dit osonong. 3 Iyoho' no i Tuhan, o gompomogompi'ddi; om pisiraman kasai' ku, om a' id tulun ngoyon umpadano' tu' tamangan kasai' ku i' do tadau om totuong. 4 A' oku noddi otogod. Nga' ondung haro o sakot ko' rugi dot okito ku, om ngoyon ku no kopio iyolo' songodo', om insanan ku nopod monorob. 5 Nga' ondung rumikot do mongoi pokiintirung doho' i piro-piro o pisangod do tulun ku, om pologoso' no iyolo' do monokiulud doho', pologoso' no iyolo' do monokiulud doho',” ka. 6 Koimbagu nopondo om gumamut nondo o bansa' dot Israil. Minggayo nondo om momutolid ot Israil. Om oponu' nopondo iti pomogunan do tua' diyolo'.
Hukuman do Tuhan i Bansa' do Songonuon Dau
7 A' i' koirad do winagat di pinomohukum do Tuhan di piro-piro o bansa' do suminangod do bansa'd Israil o pinomohukum dau dot Israil. Om iri nopo tulun dot Israil di napatai om a' i' koirad do kogumuo' di pisangod do napatai. 8 Pinomohukum nopod Tuhan di tulun dau nga' pinataam dau iyolo' dot id pomogunan do suwai. Nuyung dau iyolo' dot i tongus dot araat do mantad id koulayon o pinonguyung. 9 Nga' ompunan nopo o dusa dot Israil om omumuk ngai' i pananaraban do porsombahan dot id tingolig do gisom do miagal do kapur di tinutu. Om iri nogi' i pananaraban do kominyan om i tanda' dot Asira, i ponokokinorohingan diri nga' mumukon i'. 10 Pogun poddi i bandar di kitolig. Om notongkiadan do miagal do tana' dit aiso' o nunu-nunu do sumuni. Nosiliu poddi do pangakan-ngakanan do sapi', om tiyonon di sapi' i bandar diri. 11 Ongoriou nopondo om ongotipu' i raan di kayu, om timungon nondo di tongoondu' do maan do siduwon. Aiso' i' o tosuhut-suhutan do bansa'ddi om a' no iyolo'd Kinorohingan, i Minomonsoi diyolo', insianan om a' dau iyolo' kolisihan.
Tondulion do Tuhan i Bansa' do Songonuon Dau
12 Tontok nopondo do maso'ddi om soriso-isoon nondod Tuhan do monimung i tulun dau, do mantad pod hilo'd Bawang dot Iprat om korikot do hilo'd piwolitan do Masir. Om miagal po iyau'd tulun di monompipi' do gandum di poinrolot do tapol. 13 Om orikot nopondo o maso'ddi om pounion nondo o torumpit do pomolohou do popoguli' do koinsanai di tulun dot Israil di nangkataam do hilo'd Asur om hilo'd Masir. Om rumikot nondo iyolo' do mongoi sambayang dot id Tuhan do hilo'd Yorusalim do hiri'd nulu-nulu dau dit olidang.
Popoinsan di Pomorintaan dot id Utara
1 Obungou no i Pomorintaan dot Israil! Tu' iri nopo kagayaan dau nga' rumiou no do miagal di bunga do poinsigar di piro-piro o boyoon diyolo' di nangaawuk. Noumahan tomod i' daa do tumau dit osonong o kosingudan i tulu diyolo', nga' songinglii no ma iyolo' dot iyo poddi napatai do noowukan. 2 Haro i' o tulun dit okoris om ogirot do suhuon do Tuhan do mongoi panangod diyolo'. Iyo po iyau di karambatu do rumikot, om miagal do rasam dit asapou, om miagal do lumpadang di lumampai do mamaraag di tana'. 3 Pingulakan nondo i kaandasan do ginawo di piro-piro o boyoon di nangaawuk diri. 4 Om iri nopondo kobontugo' di piro-piro o boyoon dit ongoondos di motitanus noddi om tumagak nondo om iyo pondo dot a' iyolo' nokoumbal dot abantug do miagal di tua' dot ara dit id gulu tu' oonsok po om upuon no do maan dot akanon, dot iyo po dot aiso' mantad o tua' dit ara. 5 Rumikot nondo o maso'd Tuhan it Osundu Kopio om iyo pod bunga dit olumis do poinsigar di tulun dau di noolu-olu'. 6 Om onuan ngai' nondod Tuhan do ginawo do koilo dit otulid i gompomutus, om onuan dau do kosioho' i tulun di madtatamong di wawayaan do bandar do mantad id pisangod.
I Yosaya om i Piro-Piro o Nabi di Nangaawuk do mantad Hilo'd Yohuda
7 Iri piya i piro-piro o nabi om i piro-piro ot imam nga' sombibi-bibi' po dot oowukan. Om a' no oila-ilaan o kotohubon diyolo' tu' agayo kopio o waig dot anggur om tiinumon di kaawuk do noinum diyolo'. Nadalaan no do naawuk i piro-piro o nabi do gisom dot a' no iyolo' kosuhut di pointalangon do Kinorohingan dot id diyolo', om i piro-piro ot imam nga' nadalaan nod naawuk gisom dot a' no iyolo' milo'd momutus do hal di porikoton dot id diyolo'. 8 Om iri piya mija' diyolo' nga' notongkop pod tilob, om aiso' no ot opulang-pulang. 9 Om mimboros nondo iyolo' dot araatan doho'. Boros ka diyolo', “Isai daa ot osorou dau do tudukan dau. Isai ma daa o mokinongou di ponudukan dau? Iri nopo om maan nod tangaanak dit ongokoro' po! 10 Mumbal daa iyau do monuduk dati' do soriso-isoon i' o hurup, om boros, om baris do boros,” ka. 11 Ondung a' kou mokinongou doho' om iri nondo i bansa'd suwai om i suwai o boros, o suhuon do Tuhan do monuduk dokoyu. 12 Nonuan kou daa do kosimbayanan om koinsasamadan nga' mada' kou i' do mokinongou dau. 13 Om iri noddi o koponudukan do Tuhan dokoyu do soriso-isoon i' o hurup, om boros, om baris do boros. Om kasadu kasai' kou nopondo do monikid do lumaang kou. Om osuhat kou nondo om alawaan, om atanggayan kou do pisangod.
Watu do Ponginggirot do Sion
14 Pokinongou nod boros do Tuhan, oi tulun dit angasawat o ginawo, i momorinta' do rayat do hiti'd Yorusalim! 15 Oondos kou daa om mimboros do poingkaa, “Nokopiumpongo no iyahai do kapatayon, om nokopitaru' no iyahai do pomogunan do tulun di napatai. Om soira' nopod rumikot o kosusaan dit awagat om a' i' iyahai oontok, tu' sumondiu i' iyahai do tudut om takal dot araat do maan dahai do pogintirungan,” ka. 16 Gowoi poddi om poingkaa o poboroson do Tuhan, it Asawat Kopio, “Poilihan ku nondod watu dit okodou om ogirot o hilo'd Sion. I watu di ponginggirot, it agayo gatang, do maan do sasi' dot, ‘Isai nopo o monongkuyaan kopio om a' no arau-arau,’ ka. 17 Tali nopo do ponipong om it otulid, om tali nod pomoloting om i kotulido' do ginawo,” ka. Imuhawon nondod karambatu i tudut di sondihon daa dokoyu, om rulunon do luyud it intirungon dokoyu. 18 Tonuson nondo i piniumpangaan dokoyu do kapatayon, om a' bayaanon i pinitoruan dokoyu do pomogunan do tulun do napatai, om soira' nopondod korikot o kosusaan dit awagat kopio, om oontok kou no. 19 Om oontok kasai' kou nopondoddi do pointikid do tadau. Om boboon no dokoyu iri do dongkosuabon, om dong pitangaadau, om dongotuong. Om pointikid-tikid do boros di poboroson do Kinorohingan om porikot nod kopoddosian do suwai. 20 Om miagal kou nondo di tulun di mumbal do modop dot id toodopon dit oniiba' kopio, gisom dot a' i' iyau kalatan, om miagal do tulun di monongkumut do kumut dit a' i' kotokop dau. 21 Tu' sumaap nondo o Tuhan do miagal di suminaap iyau di hilo'd Nuluhon do Porasim om hilo'd Rantai do Gibion, do powonsoi di nosorou mantad dau do wonsoyon, i wonsoyon dau di kosuayan kopio'd tulun. Nga' pongoon i' dau i wonsoyon dau, i wonsoyon dau di koimayaan kopio. 22 Kada' pongirak-irak diti popoinsan do poboroson ku dokoyu! Tu' ondung mongirak-irak kou, om okon nogi' dot apagon kou do mogidu'. Tu' nokorongou oku nod boros do Tuhan, it Asawat Kopio om it Osundu Kopio, do mamaraag do koinsanai diti pomogunan.
Toilaan do Kinorohingan
23 Pokinongou nodti poboroson ku, pokinongohon no kopio iti bilin ku. 24 Aiso' i' o gompongumo do mamaradu nopo kasai' di tumo dau do maan tanamai. 25 Suwai ko' aradu po dau i tana', om tanaman no dau do linsou, dot iri tuu linsou do jintan dot oitom ko' iri linsou do jintan dit opurak. Om mananom iyau do gandum om barli; om hiri nopod ponong id disan om suwai no o tonomon dau. 26 Koilo i' iyau do morobuat tu' notudukan no iyau do Kinorohingan. 27 Tu' a' i' dau tutuon di toolu dot adalaan kawagat i linsou do jintan dot opurak ko' i linsou do jintan dit oitom. Suwai ko' i toolu dit okooro' om agaan o ponutu dau. 28 A' i' dau padalaan do momogomos i gandum do gisom dot omumuk, om koilo i' iyau do potunud di guyudan dot id sakai di gandum om a' indo omumuk i watu di gandum. 29 Om iti toilaan diti nga' mantad i' dot id Tuhan, it Osundu Kopio. Tu' kopunong ngai' i' om haro o kotutukon di natantu' mantad do Tuhan do wonsoyon dau.
I Kootuson do Yorusalim
1 Obungou no o bandar do Yorusalim, i roitan do pananaraban do porsombahan dot id Kinorohingan! Obungou no i bandar di pinomukiiman di Daud! Pologoson nopo do mogisowoli-woli o toun om mogisowoli-woli o karamayan. 2 Nga' porikatan nondo do Kinorohingan do kosusaan o bandar diri. Om haro nondo o tulun do mihad om haro o tulun do mogihad do hilo'! Om miagal pondo do pananaraban do porsombahan di notounan do raha' o pointongkop do bandar diri. 3 Om songodon nondo do Kinorohingan o bandar diri om turungkuon dau. 4 Om Yorusalim nopo om iyo pondo di tombiruo di tumotos do poporongou do boros dau do mantad hilo'd saalom do tana', i boros dit oiyo-iyo pod orongou do mantad hilo'd pupuk. 5 Nga' atagak nopondo do miagal do pupuk dit angatandai i pisangod nu dit ongorongit, om otilib do miagal di tapol do tilibon do ribut. Om sigog pondo, om a' i' daa insan-insanon 6 do poiduwon do Tuhan, it Osundu Kopio o bandar diri do mantad id pisangod, do tinggoron om guyu' do tana' dot opuhod kopio o ralan do popoidu'. Om poporikot nondo iyau do tongus do monomporiu-riu do mantad id rahat, om poporikot iyau do tapui dit osikit kopio do monorob. 7 Om oinsanan nopondo dot atanus i soudor do piro-piro o bansa' di sumaap do Yorusalim, i bandar do pananaraban do porsombahan dot id Kinorohingan, om atagak ngai' nopondo i rapo-rapo om i koburu-buruon diyolo', do miagal no di nipi do dongotuong. 8 Oinsanan nopo i bansa' di tuminimung do mongoi panangod do Yorusalim do miagal do songulun di louson do koipi do maso dau do makan, nga' oposik nopondo iyau om louson kasai' i', ko' miagal do songulun di tuuhan do koipi do maso dau do minum, nga' oposik nopondo om tuuhan kasai' po, om otuu po o tatalanan dau.
A' Pinadul i Nosihat di Nabi
9 Potilombuso' nopo ino wonsoyon dokoyu do dongkababasug; pimbolou-bolou kou nopo! Pagawuk kou nopo, nga' okon i' ko' waig dot anggur o kaawuk. Pikorobibi' kou nopo do mamanau, nga' okon i' ko' tiinumon do kaawuk o kobibi-bibian dokoyu. 10 Tu' pinosiodop om pinoolong kou do Tuhan. Om pinoungkodom dau o mato di piro-piro nabi, it apatut daa do sumiliu do panakamato di rayat, om tinirung dau o rabas do mogogontong. 11 Olisok nondo do mantad id dokoyu o komoyon do pointikid-tikid do pinointalang, do miagal no di buuk do sinaapan dit a' koino-ino dot ukaban. Om ondung patahakon dokoyu i buuk di kisaap diri dot id tulun di milo do mambasa' om suhuon nu no daa'ndo iyau do mambasa', nga' sumimbar nondo iyau do poingkaa, “A, a' oku i' tu' nasaapan giya no,” ka. 12 Om ondung patahakon nu i buuk diri dot id tulun dit a' milo do mambasa', om suhuon nu no daa'ndo iyau do mambasa', nga' sumimbar nondo iyau do poingkaa, “A, a' oku i' koilo do mambasa',” ka. 13 Om boros kad Tuhan, “Boros no toomod diti tulun do tumuku' dot id doho'. Tu' ginawo nopo diyolo' om osodu' i' doho'. Tugama' nopo diyolo' om aiso' i' o suwai ko' it oturan do tulun di naapal diyolo'. 14 Gowoi pondo om pokorualan ku iyolo' om a' ku iyolo' tingkadan do momobog, om it a' i' diyolo' insan-insanon. Om tulun nopo di kiakal om osiliu nondod tulun do basug, om aiso' o kotutuk-tutukon di toilaan diyolo',” ka dau.
I Soro-sorohon dot id Dabantalan
15 Obungou no i tulun di mumbal daa do momolisok do mantad id Tuhan dit osorou dau do wonsoyon dau! Lumisok-lisok i' iyolo' do mingwonsoi'ddi om ondos daa'ndo diyolo' om aiso' o kokito diyolo' ko' koilo ondung nunu o wonsoyon diyolo'. 16 Somputulon ngai' nopo diyolo' o nunu nopo. Nga' nunu toi i poimaha-maha', i gompomorun ko' iri po lagit? Milo toi i winorun do tulun do moro-boros dot id dau dot, “Okon i' ko' iya' o minomonsoi doho',” ka? Ko' milo toi iri do momoros dot id dau dot, “A' ko i' koilo diti wonsoyon nu,” ka? 17 Haro i' o boros do komolohingan dot, “A' no alaid om umoon no ilo gouton, om osiliu kawagu do gouton i noumo,” ka. 18 Tontok nopondod tadau'ddi om iri piya bosukon nga' korongou i' do tontok do basaon o buuk dot opuhod o pambasa', om iri bolou, it otuong o koposi-posion nga' koungkalat nondo o mato om kokito. 19 Iri piya tulun dit oudipon om i ruminutum nga' kaanu nondo kawagu do kaarapadan di patahakon do Tuhan, i Kinorohingan dot Israil dit olidang. 20 Om iri nondo o kopupuson do tumur di tulun di mongulok-ulok do wokon om i mongindaraat nopo do Kinorohingan. Patayon ngai' nopondo do Kinorohingan i tulun do kidusa, 21 om i tulun di pakaraat do wokon dot aiso' o paantakan, om i tulun di mada' do hukuman o tulun dot araat, om i tulun di popotongkop do tudut om gisom dot aantaban i tulun dit otopot do kaanu dit otulid. 22 Gowoi poddi om poingkaa no o boros do Tuhan, i Kinorohingan dot Israil, i pinopoidu' di Abraham do mantad id kosusaan, “Oi tulun ku, mantad do baino' om a' kou nondo indaraaton om a' mumang posi' o rabas dokoyu dot ointingayaman. 23 Om soira' nopondo dot okito dokoyu i tangaanak do patahakon ku dokoyu, om okunon nogindo dokoyu dot iyoho' no i Kinorohingan dot Israil dit olidang. Om pusohon oku nondo dokoyu om oronok kou doho'. 24 Om i tulun di basug nga' kosuhut nondo, om i muol-nguol nopod araatan nga' orohian nondod tudukan,” ka.
Pinitoruan do Yohuda om Masir dit Aiso' o Kinotutuk-Tutukon
1 Poingkaa no o boros do Tuhan, “Obungou ngai' no i boyoon do Yohuda, tu' sumaap i' iyolo' doho'. Tuminanud iyolo' do pomusorou dit okon ko' mantad id doho', om minomonsoi iyolo' do pinitoruan dit okon i' ko' korohian ku. Om muhang-ruhang nopoddi o dusa diyolo'. 2 Minongoi iyolo' do hilo'd Masir, om a' i' iyolo' minuhot ondung poingkuro o doho'd tosorou. Orohian iyolo' do mintirung do Masir om sumondiu dot id raja' do Masir. 3 Nga' aiso' i' o pokukurayan di raja' do Masir do monulung diyolo', om kosusaan no o kootuson di pongintirung do Masir diyolo'. 4 Mulong pod nokorikot no do hilo'd bandar do Soan om Hanis, i hilo'd Masir, i piro-piro o wakil do Yohuda, 5 nga' ointingayam indo o tulun do Yohuda tu' minogondos i' iyolo' di bansa' dit a' milo'd sondihon. Naanu nopo diyolo' om okon i' ko' i kouhup, suwai ko' pongindaraat nogi',” ka dau. 6 Iti no o boros do Tuhan do pasal di nintorusan di poingiyon do hilo'd tana' do kowotuan do ponong hilo'd salatan, “Minaya' i piro-piro o wakil do pomogunan di watas do kikoligagaanan, i tiiyonon do singa om i haro o tulanut di kapatai om naga' di kitalad. Om ginandaran diyolo' i kaladai om unta diyolo' do patahak-tahakon dit angagayo o gatang do patahakon dot id bansa' dit a' i' kopio milo do monulung diyolo'. 7 Aiso' i' guna' di ponulung do Masir. Om pungaranai ku noddi o Masir do, ‘Naga' dit a' korolosi,’ ka,” ka dau.
Bansa' dit a' Minumboyo'
8 Om suhuo' oku nod Kinorohingan do popotulis dot id iso' o buuk di karaato' di tulun dau, do maan do koilaan dit ogirot kopio, 9 tu' sumongkiwal nopo iyolo'd Kinorohingan, om mongudut, om mada' kasai' nopod mokinongou'd ponudukan do Tuhan. 10 Noduhan diyolo' i piro-piro o nabi do mimboros. Boros ka diyolo', “Kada' iyahai sunudai dit ongotopot. Nga' sunudai nogi' iyahai di korohian dahai'd mokinongou. Pologoso' nopo iyahai'd lumoyong o pomusorou. 11 Poggidu' kou, kada' kou ongoi pangantob dahai. A' i' iyahai orohian do korongou do pasal do Kinorohingan dokoyu, i Kinorohingan dot Israil dit olidang,” ka no diyolo'. 12 Nga' poingkaa o boros do Kinorohingan dot Israil dit olidang, “A' kou minamadul di boros ku om sumondiu kou nogi' do kororongit om poninipu'. 13 Boboo' nopo dokoyu o kasalaan dokoyu. Miagal kou pod tolig di nagaang do mantad pod hiri'd sawat om gisom do kosondot do hiri'd siriba'; om sigog indo dot ahaba' kou. 14 Om omumuk kou nondod miagal do kuron. Om i nadalaan no komumuk do gisom dot aiso' no o milo di kinomumukan diri do panganu do popou ko' ponimbauk do waig do mantad id luping,” ka. 15 Boros kad Tuhan, it Asawat Kopio, i Kinorohingan dot Israil dot olidang, dot id tulun dau, “Uli' kou no do mikuwo'd osinonod o ginawo, om posion ku i' iyokoyu. Ponongkuyaai kou no doho' do mikuwo'd ginawo dit osimbayan, om pokorison ku indo iyokoyu,” ka. Nga' minada' kou i' do momonsoi'd miagal diri! 16 Tu' minomusorou kou nogi' do sumakai'd kuda' dit ongosiau om mogidu' do mantad id pisangod dokoyu. Osonong no! Tu' a' no bo milo dot a' kou mogidu'! Nga' ondos daa dokoyu om osiau no i kuda' dokoyu, nga' osiau-siau moti' i momogusa' dokoyu! 17 Manangkus nopod mogidu' o tongosoribu dokoyu do kokito do songulun o soudor do pisangod. Om limo nopo soudor do pisangod nga' ula' nod popoggidu' ngai' dokoyu. Om aiso' nondo ot oolu' di soudor dokoyu suwai ko' iso' po i pinorilitan do bondira' do hiri'd timpak do nulu-nulu! 18 Nga' mulong pod miagal diri nga' poingandad i' o Tuhan do popointalang do kosianan dau dot id dokoyu. Om posodia' no iyau do monginsian dokoyu tu' osonong kasai' i o wonsoyon dau. Olumaag no i tulun di mogondos do Tuhan.
Barakatan indod Kinorohingan o Tulun Dau
19 A' kou nondo mihad, iyokoyu i songingiyon do hiti'd Yorusalim. Tu' obinsianan i' o Tuhan, om soira' nopod lumohou kou dau do mokitulung om simbaron kou i' dau. 20 Pologoson kou'd Tuhan do koumbal dit osusa' do ponuduk dau dokoyu. Nga' baino' noddi om iyau no o moyo-woyo' dokoyu om a' kou nondo minog do mogihum dau. 21 Ondung kasala' daa o ralan dokoyu nga' orongou indo dokoyu o boros dau dot id tohuri-huri dokoyu do poingkaa, “Diiya iti ralan. Susui kou do ralan diti,” ka. 22 Om ngoyon ngai' nondo dokoyu i tingolig dokoyu di nurogupan do pirok om tamas, om pataamon nondo dokoyu iri do miagal pod rinomos. Om boros kando dokoyu, “Poggidu' no do mantad id doho',” ka. 23 Om soira' nopo do patanom kou do linsou do totonomon om poporikot indo o Tuhan do rasam do poposuni'ddi. Om osonong indo o tonomon dokoyu, om ogumu' o sakot do pangakan-ngakanan do tayam-tayam dokoyu. 24 Iri nopo sapi' do tontoluhan om i kaladai do mamaradu do tumo dokoyu, om mangakan nondo di taakanon do tayam-tayam dit osonong kopio, i tinomod no do poposodia' do maan do paakanan. 25 Om tontok nopondod tadau dit oturungku' i kuta' do pogintirungan di pisangod dokoyu om angapatai nondo iyolo', om lumuyung nondo o bawang do mantad id pointikid-tikid do nuluhon om nulu-nulu. 26 Om miagal pondod tadau i tulinau di tulan, om inturu' po kanawau ko' mantad dilo kanawaho' do dinondo ilo tadau; miagal pod tinitiu do turu' o tadau do pogisusugkuon. Om osiliu ngai' nondo iti do tontok do rilitan do Tuhan om lingoson dau i suhat do tulun di pinokorualan dau.
Hukuman nondod Kinorohingan ot Asur
27 Hilo'd sodu' nga' okito i' o sinundu om kagayaan do Tuhan. Tapui om lisun o pointalang di kototogod dau. Om tontok do moro-boros iyau nga' miagal pod tapui i boros dau do monorob. 28 Om suhuon dau i tongus do mogulu dau. Om miagal pori do luyud di momorulun do koinsanai'd nunu nopo. Oinsanan nopo o bansa' dot angapatai om opupusan nondo i tongosorou diyolo' dit araat. 29 Nga' iyokoyu nopo, i tulun do songonuon do Kinorohingan, om ongooropod i' om modsinding kou nondo do miagal di koubasanan dokoyu do tontok do totuong do tadau dot agayo di karamayan do don tugama'. Om ooropod kou'ndo do miagal di tulun di manau-panau do mambat di tuni do suling do mongoi'd hiri'd Walai'd Tuhan, i mogobi' dot Israil. 30 Om porongohon ngai' nondod Tuhan o tulun di boros dau dit abantug, om popurimonon dau iyolo' di kototogod dau dit a' ogina-gina'. Om porikot nondo iyau do tapui di kosorob, om tongus dot opuhod, om karambatu om rasam dit asapou. 31 Om moddosi nondo i tulun dot Asur do korongou iyolo' di boros do Tuhan om kopuriman di kawagato' do pomohukum dau diyolo'. 32 Om daamot di piguli-guli' iyolo'd Tuhan do momobog, om iri nopondo tulun do songonuon do Tuhan om mambat-ambat di tuni di gandang om kecapi. Tu' Kinorohingan no o sumaap di tulun dot Asur. 33 Mantad poddi gulu po do nokosodia' mantad no o tapui do ponutudan do panaraban di raja' dot Asur. Agayo o kinoiyonon diri om nudungan do siduwon dot ogumu'. Om popuhoboon nondod Tuhan o pinuhobo dau do paparakit di tapui.
Intirungan Indo do Kinorohingan o Yorusalim
1 Obongou ngai' no i tulun do mongoi pokitulung do Masir! Sumondiu daa iyolo' di kokoriso' do soudor do Masir, om i kuda' dot ogumu', om korita'- kuda', om i piro-piro o soudor di songinsakai'd kuda' dit ogumu'. Nga' a' nogi' iyolo' mogondos do Tuhan, i Kinorohingan dot Israil dit olidang, om a' mokitulung dau. 2 Oilo i' o Tuhan om oilaan i' dau i wonsoyon dau! Poporikot iyau do kosusaan, om porikoton dau i nokoboros dau do wonsoyon dau dot id tulun dit angaraat do maan do pomohukum diyolo', om pomohukum di tulun di manahak diyolo'd kointirungan. 3 Iri nopo tulun do Masir om okon i' ko' Kinorohingan suwai ko' tulun i' toomod iyolo'. Om i kuda' diyolo' nga' okon i' ko' suwai ko' mantad di koubasanan, a' i' osundu. Tu' soira' nopod haro o wonsoyon do Tuhan, om iri piya bansa' dit okoris nga' aratu' i', om kotonggoi nopo dot aratu' i bansa' dot oluhoi di nuhupan daa di bansa'ddi. Apatai goduwo nopo iyolo'. 4 Boros kad Tuhan dot id doho', “Poingkuro piya daa i madtatamong do dumba' do minggiak om minggarang, nga' a' no iyolo' korolosi di singa do nakapanabpo nod dumba' dot akanon dau. Om miagal oku nogi' iyoho'ddi, i Tuhan dit Osundu Kopio, tu' a' oku no ooduhan do momogompi' do Nuluhon do Sion. 5 Tu' poingkuro nopo i tombolog do mintulud do mahau-sahau do rumun dau do madtamong di tangaanak dau, om iyo oku noddi iyoho', i Tuhan dit Osundu Kopio, do mogobi' om mongintirung do Yorusalim,” ka dau. 6 Boros kad Tuhan, “Oi bansa' dot Israil, nokowonsoi kou nod dusa dot id doho' om suminaap kou doho'. Nga' baino' nopo, om guli' kou no dot id doho'! 7 Om orikot indo o maso do pataamon ngai' dokoyu i tingolig dokoyu di pirok om tamas do winonsoi, i pinopowonsoi dokoyu'd dusa. 8 Raagon nondo ot Asur dot id pisangadan nga' okon i' ko' kinoris do tulun o karaag. Mogidu' nondo i tulun dot Asur do mantad id pisangadan om osiliu do turipon i tangaanakwagu diyolo'. 9 Om mogidu' nondo i raja' diyolo' dot opopoddosian. Om adalaan nondod moddosi i piro-piro o boyoon do soudor diyolo' gisom do tongkiadan nopo diyolo' i bondira' diyolo' do don sumasangod,” ka dau. Nokopomoros no o Tuhan, i Tuhan di tukuon do hilo'd Yorusalim om i sanganu di tapui di monorob do porsombahan do hiri'd pananaraban do porsombahan.
Raja' dit Otulid
1 Koimbagu nopondo om haro nondo o raja' dit otulid o pomomorinta', om momonsoi dit otulid o koinsanai di boyoon do bansa'. 2 Oinsanan nopo iyolo' do miagal do pogintirungan do mantad id ribut om tongus dot opuhod. Om miagal iyolo' do bawang di lumuyung dot id tana' do kowotuan, om miagal do linungung do tontolob dit agayo dot id tana' dit aiso' o sumuni. 3 Om i tulun di kokito nga' a' i' monompon do mato dau, om i korongou nga' mamadul indo. 4 Om a' nondo iyolo' ohurolo, om a' ahago-hago nga' momusorou kopio iyolo' do tontok do momonsoi do nunu nopo om otulid o ginawo do tontok do moro-boros. 5 Om aiso' nondo o momusorou dot osonong i basug, ko' momoros dot otulid i monipu'. 6 Koboro-boroso' nopod tulun do lowong om dongkababasug noo, om momusorou no dit angaraat do wonsoyon diyolo'. Koinsanai di wonsoyon om i poboroson diyolo' nga' koindaraat ngai' nopod Kinorohingan. Om a' i' iyolo' insan do papaakan di tulun do louson om a' insan poinum di tulun do tuuhan. 7 Tulun nopo di basug om araat no, om angaraat o wonsoyon dau. Om mogihum nopo iyau'd ralan do mamaraag di tulun do mosikin do tudut o pamaraag, om mangantob iyau diyolo' do manganu dit apatut diyolo'd aanu. 8 Nga' tulun nopo dit osonong om otulid i' o kowoyo-woyoon om okoris do mogobi' dit otopot.
Ibutus om Pononduli'
9 Oi tongoondu' dit ongosimbayan o koposi-posion, it aiso' o kosusaan, pokinongou kou nodti poboroson ku. 10 Osimbayan kou daa do dinondo po, nga' haro po o sontoun om aiso' nondo o pokukurayan dokoyu tu' aiso' no o tua' dot anggur dot upuon dokoyu. 11 Osimbayan tomod daa o koposi-posion dokoyu do gisom do baino', om aiso' i' o kosusaan; nga' gagarai kou no dot opopoddosian! Iduwo' no ino pakayan dokoyu om poogkoso' no i kain do papakayon do mogihad do hino'd tawak dokoyu. 12 Lompud kou nod mihad tu' naraag no o tumo dokoyu dit ongoluluhub, om i kabun dot anggur dokoyu. 13 Om rugi poddi o sumuni do hilo'd tana' do bansa' ku. Pogihadai no dokoyu i walai dit iyonon do tulun di rumamai om i bandar di poimponu'd karamayan. 14 Iri piya walai do raja' nga' tongkiadan indo om pogiiduan i bandar dot agayo. I kawalayan om i kuta' do pogintirungan di madtamong daa di bandar nga' poingraag no kasai' do gisom dot alaid. Om iri pondo kaladai di lalang o minghombo do hiri, om pangakan-ngakanan do dumba'. 15 Nga' insan po kawagu do polintuhunan toko'd Kinorohingan di Rusod dau. Om oluhub nondo i tana' dit okorop, om tumo nga' ongosonong o tua' do totonomon. 16 Om owonsoi nondo it otopot om it otulid do pointongkop di pomogunan. 17 Om momonsoi ngai' nopondo dit osonong o tulun om haro nondo o kosimbayanan om aiso' o koligagaanan do gisom dot alaid. 18 Om aiso' nondo o kosusaan do tulun di songonuon do Kinorohingan, om poingiyon iyolo' dot id kinoiyonon di haro o kosimbayanan om kouludan. 19-20 Olumaag ngai' kou no tu' kabagal i' o waig do momoyopos di totonomon dokoyu, om i tayam-tayam dokoyu nga' kapangakan-ngakan nondo do honggo nopo, om aiso' o koligagaanan. Nga' iri nopo pisangod om iyo poddi gouton dot asandatan do karambatu om araag o bandar diyolo'.
Sambayang do Mokiuhup
1 Obungou no i pisangod toko'! Tu' minanakau om minagakal iyolo', mulong piya dot a' i' daa iyolo' napanakahan ko' naakalan. Nga' opupusan indo i maso diyolo' do manakau om magakal, om iyolo' nondo ot apanakahan om aakalan. 2 Oi Tuhan, insianai no iyahai, iya' no o pagandasan dahai. Gompio' no iyahai do pointikid do tadau om poiduwon no iyahai do tontok do haro o kosusaan. 3 Soira' nopo do sumaap ko do bagi' dahai, om mogidu' ngai' nopo i bansa' do mantad id kohiyoo' do pisangadan. 4 Om iri nopondo konunu-nunuan diyolo' nga' aanu ngai' nopo om atanggayan do pisangod. 5 Abantug no kopio o Tuhan! Iyau no o momorinta' do koinsanai do nunu nopo. Om pogiroton dau it otulid om it otopot do hilo'd Yorusalim, 6 om manahak iyau do kosimbayanan di bansa'. Gompion kasai' i' dau i tulun dau, om onuan dau iyolo' do toilaan om pomusarahan dot atarom. Momusou i' iyolo'd Tuhan; om iri no o panakadapu' diyolo' dit agayo kopio. 7 Minglohou poo do mokiuhup i tulun di gunsiou. Om i piro-piro o wakil do pomorinta' di mumbal daa do papaharo do kouludan nga' mingihad po tomod. 8 Om i ralan magayo nga' noponu' pod koligagaanan gisom dot aiso' no o tulun do maya'd hiri. I pinogibatas-batasan nga' a' no sulungon om i pinitoruan nga' tolibambanan. Aiso' no o pusohon. 9 Om aiso' noddi ot ohiyo do hiri'd pomogunan tu' nopogitotongkiadan po. Nongoriou ngai' no i puru' do Libanon, om i rantai do Saron dit oluhub nga' miagal pod tana' do kowotuan. Om tumatak ngai' po o roun do kayu do hilo'd Basan om hilo'd Nuluhon do Karmol.
Pinoinsan do Tuhan i Pisangod Dau
10 Boros kad Tuhan dot id piro-piro o bansa'ddi, “Powonsoyon ku nondo do dinondo i wonsoyon ku. Om pokitonon ku iyokoyu do kogoyoo' do sinundu ku. 11 Aiso' i' o kotutukon di pinsorohon dokoyu do wonsoyon dokoyu, om aiso' o guna' do koinsanai di wonsoyon dokoyu. Om iri no i kototogod dokoyu di miagal pod tapui, o kapatai dokoyu. 12 Om aapu kou nopondo do miagal di kakahut do sorobon di wonsoyon do tapu, om miagal di rugi tu' aawu nopo dot osorob. 13 Pologoson no it id somok om it id sodu' do korongou di nowonsoi ku om otumbayaan di kuasa' ku,” ka dau. 14 Songgogor-gogor po dot opopoddosian i tulun do kidusa do hilo'd Sion. Boros ka diyolo', “Ibutus nopod Kinorohingan nga' miagal po di tapui dit aiso' o kotingkadan do molob-ngolob. Haro po tuu daa'ndo dati' ot apasi do mantad id tapui do miagal diri?” ka diyolo'. 15 Apasi kou i' ondung poboroson dokoyu it otopot om wonsoyon dokoyu it osonong. Kada' dokoyu pakayo' ino kuasa' dokoyu do pagakal do tulun di mosikin, om kada' kou ramit do tusin di ponisip do tulun dokoyu. Kada' kou ponokitanud di tulun di momusorou do mamatai'd wokon ko' i momusorou do momonsoi dot araat. 16 Om osimbayan kou indo om aiso' no o koligagaanan dokoyu, tu' miagal po do poinsuang kou'd kuta' do pogintirungan dit ogirot. Om haro indo o takanon do kanon dokoyu om haro o waig dot inumon.
Maso dot id Dabantalan dit Osimbayan Kopio
17 Orikot indo o maso do kokito kou do songulun o raja' do momorinta' do mikuwo'd kagayaan dau, dot id pomogunan dit agayo kopio. 18 Om iri nopo kopoddosian dokoyu di bansa'd suwai di monimung do sukai om tulun di mongoi ponoluku' nga' susui-susui poo di maso'd nakatalib. 19 Om a' kou nondo kokito di bansa'd suwai dit angasawat o ginawo do mimboros do boros dit a' dokoyu osuhutan. 20 Ontong pogi' do Sion, i bandar do pamaramayan toko' di tadau dot agayo do tugama' toko'. Antangai pogi' o Yorusalim! Osiliu nondo iri do tiyonon dit aiso' o koligagaanan! Osiliu nondo iri do miagal do kiim dit a' insan poundoliho', it a' i' insan kokodong i pinakagasan do tali, om a' insan koputut i tali. 21 Om pokitonon toko' nondod Tuhan do kagayaan dau. Om miyon toko' nondo dot id toning do bawang dit agayo, nga' a' i' koongoi do hiri i kapal do rahat di pisangod. 22-23 Tuhan no o raja' toko', om Tuhan no o momorinta' om mamasi dati' do mantad id pisangod. Aiso' no o guna' di koburu-buruon di hiri'd kapal do rahat diyolo'; om a' no milo dot ungkaladon i layar di kapal diyolo'. Om tontok nopondoddi om pogibohogi-hogion nondod tulun i nangaahau diyolo' do mantad id pisangod. Om iri piya i tulun do kakung nga' kaanu id bahagi, tu' ogumu' kopio i' i dapu' do nangaanu diyolo' do mantad id soudor do pisangod. 24 Om aiso' nondo o tongosongulun piya di tulun di poingiyon do hiri'd pomogunan toko' do momoros do kitoruol iyau, om koinsanai'd dusa do tulun do hiri nga' ongoompunan ngai' nondo.
Hukuman do Kinorohingan i Pisangod Dau
1 Kainou no, oi tulun do mantad id koinsanai'd bansa'! Timung ngai' kou nod hiti do mongoi pokinongou. Mongoi ngai' nod hiti o pointongkop do pomogunan om koinsanai di poingiyon do hiri do mongoi pokinongou. 2 Otogod o Tuhan do koinsanai'd bansa' om koinsanai do soudor diyolo'. Om nohukuman no dau iyolo' do kapatayon. 3 Om a' indo olobong o rata' diyolo', suwai ko' poingiliu tomod nopo do mumang pasa' om mutong. Om aragang ngai' pondo i nuluhon do notounan do raha'. 4 Om tumanus ngai' nopondo i tadau, om i tulan, om i rombituon. Om tumagak nondo ilo tawan do miagal do karatas di linopi, om ilo rombituon nga' rumatu' ngai' nondo do miagal do roun do kayu di lumoho. 5 Nokosodia' nod Tuhan i gayang dau do hilo'd surga om sumondot nondo iri dot id tulun dot Idom, i tulun di natantu' mantad nod hukuman om patayon. 6 Om otounan pondod raha' om lunok diyolo', i gayang do Tuhan do miagal pod raha' om lunok do tayam-tayam do maan do porsombahan do sumbolion. Om posodia' nondo o Tuhan do porsombahan do sumbolion do hilo'd bandar do Bosra, om iti no o ponumbolian dot agayo kopio do hilo'd tana' dot Idom. 7 Om patayon nopondo i tulun do miagal do sapi' di lalang om sapi' dit ongokoro' po. Om otongkop pondod raha' om lunok iti pomogunan. 8 Om iti no o maso'd posion do Tuhan o Sion om sulian ngai' dau i pisangod dau. 9 Om sumiliu nondod tir o kabawang-bawangan dot Idom om i tana' nga' sumiliu'd tana' do kitapui. Om miagal pondod tir o pointongkop di pomogunan do sumikit. 10 Om sumikit nondo iri do tadau om totuong, om misun-lisun nondo do gisom dot alaid. Om aiso' nondo o tanom-tanom om aiso' o sumuni do hiri'd tana' diri do solinaid do piro-piro nahatus o toun, om aiso' nondo o tulun do mumbal do maya' do hiri. 11 Puok po om bangkahak o mongiyon-ngiyon di pomogunan diri. Om silihon nondo kawagu'd Tuhan do tana' dit aiso' o sumuni o kinoiyonon diri, do miagal di wonsoyo' i' dau. 12 Om aiso' nondo o raja' do momorinta' di pomogunan diri, om i piro-piro o boyoon nga' a' ngai' no hino'd hiri. 13 Rugi pondo o sumuni do hiri'd walai do raja' om hiri'd bandar di kitolig, om puok pondo om toni o mongiyon-ngiyon do hiri. 14 Om iri po nintorusan o minghombo'd hiri, om mogilohou-lohou pondo i tomburio. Om rumikot nondod hiri i tomburio do dongotuong do mongoi pogihum dot undorongon dau'd hiri. 15 Om momonsoi nondod rumun i puok, om mogontolu', om mangadsa' di tontolu' dau. Om hilo' no o pomogompian dau di tangaanak dau. Om mogisuhut-suhut nopondo i tombolog di mangangakan do daging do tumimung do hilo'. 16 Ihumo' pogi' om basaon no i buuk do Tuhan. Aiso' i' o tiso' piya di songimpasi dot atagak ko' aiso' o koruhang. Tu' iyo noddi o pinonuhuan do Tuhan, om iyau no o monimung diyolo'. 17 Tuhan no o mamahagi' di tana' do poikidon dot id diyolo'. Tikidan nopo dau iyolo'ddi. Om hilo' nondo o tiyonon diyolo' do gisom do kopogisowoli-woli o sinakagon, om iyolo' nondo o sanganu'ddi do gisom dot alaid.
Ralan do Kumaa id Koposion
1 Ooropod nondo i tana' do kowotuan, om mungkaya' nondo o tusak do bunga do hiri'd tana' dot otuu om kowotuan. 2 Modsinding nondo, om mimpangkis dot atataadan i tana' do kowotuan, om olumis iri do miagal do Nuluhon do Libanon, om oluhub do miagal di rantai do Karmol om Saron. Om kokito ngai' nopondo o tulun di kagayaan do Tuhan om i kobontugo' dau om i sinundu dau. 3 Pokoriso' no o longon di lopuhon, om poponggoron i totud di gagaran. 4 Sunudan ngai' no i tulun dit oluhoi o ginawo do poingkaa, “Pogiroton no dokoyu o ginawo dokoyu om kada' kou poddosi, tu' rumikot i' o Kinorohingan do mongoi popoidu' dokoyu, om rumikot do mongoi pomohukum di pisangod dokoyu,” kanto. 5 Om kokito nondo i bolou, om korongou i bosukon. 6 Om minsimbul nondo i kakung do miagal po di tambang, om i tulun di bobou nga' mimpangkis dot atataadan. Om lumuyung nondo o bawang do hilo'd tana' do kowotuan. 7 Sumiliu nondod kulam di poimponu'd waig i pasir dit alasu', om otongkop do tudan do waig i tana' dot otuu. Om iri nopo kinoiyonon di pinghambaan do toni di gulu po, nga' sunian nondod sakot om bundusan. 8 Om haro'ndo o ralan magayo do hilo', do roitan do, “Ralan do kumaa id koposion”. Aiso' i' o tulun do kidusa do maya' do ralan diri, om aiso' o tulun do basug do mongoi pamalid di tulun do sumusui do ralan diri. 9 Aiso' i' o singa do hiri'd ralan diri, om nintorusan dit araat nga' aiso' i'. Om iri nopo tulun di nangapasi do Tuhan, om iri no ralan diri o wayaan do muli'. 10 Om ongotood nopondo iyolo' do korikot do hilo'd Yorusalim, om minsinding po om mimpangkis dot atataadan. Om otood nondo iyolo' do gisom do poingompus, om koidu' do mantad id katangaban om kosusaan do ginawo.
Tinompurolosi do Tulun dot Asur o Yorusalim
1 Tontok di kohopod om apat do toun do momorinta' i Raja' Hiskia do hilo'd Yohuda, om rikot no i Raja' Sanhorib do minongoi panangod om minongoi panganu di bandar dot ongkitolig do hilo'd Yohuda. I Sanhorib nopo om raja' dot Asur. 2 Om suhuo' noddi dau i monininggarung do tinumon dau, i mantad hilo'd Lakis do mongoi'd hilo'd Yorusalim do miwoyo' do soudor dot ogumu' do mongoi pononsog di Hiskia do minsiriba' dot id dau. Om awang noddi iyolo' do hilo'd ralan dit id toning do pomuru-buruan di gompomonsoi'd kain, om i haro o solunsug do waig do mantad hiri'd kulam di ponong id sokid. 3 Om ngoyo' no i monininggarung do tinumon di raja' solowoto' do tolu o pagawai di Hiskia. Iyolo' nopo nga' i Iliakim i tanak di Hilkia, i boyoon do walai'd raja', i Sibna, i gomponulis do pomorinta', om i Yoa i tanak di Asap, i popoopi' do tusin do pomorinta'. 4 Om sunudai no di monininggarung iyolo' dot orohian i raja' dot Asur do koilo ondung nokuro tu' asangal kopio i Raja' Hiskia. 5 Om boros ka kawagu dau, “Ondos daa dokoyu om kaala' do toilaan om posukan do soudor di kirapo-rapo o boros no toomod? Isai daa o tosorou dokoyu do monguhup dokoyu do sumaap dot Asur? 6 Minogondos kou daa dot itulung do mantad hilo'd Masir: nga' iyokoyu nopo om miagal nod tulun di kisukud do sumbiling. Tu' otipu' nondori om iri i longon di tulun di kisukud o tosuhak. Iyo noddi sumbiling diri i Raja' do Masir dot id koinsanai'd tulun di sumondiu dau,” ka. 7 Om boros ka kawagu di pagawai dot Asur diri, “Ko' poboroson daa dokoyu do mogondos kou'd Tuhan, i Kinorohingan dokoyu? Nga' okon toi ko' i Hiskia nogi' i miningraag di tiyonon do papatahak do porsombahan om i pananaraban do porsombahan dot id Tuhan, om i minonuhu'd tulun do Yohuda om Yorusalim do tumuku' dot id dotimbabaan dot iso' noo o pananaraban do porsombahan di hilo'd Yorusalim? 8 Monokitaru' oku diya' dot id suang do ngaran di raja' dot Asur, dot onuan ku iya' do duwo noribu o kuda' do haro no tulun nu dot irad diri kogumu' do sumakai'ddi. 9 A' kou i' kasaap di pagawai dot Asur dit osiriba' piya kopio o pangkat om mogondos kou po daa'ndo do paatod o tulun do Masir dot id dokoyu do soudor di kikuda' om it ongkikorita'-kuda'! 10 Ondos daa dokoyu om mongoi toomod oku panangod diti pomogunan dokoyu'dti dot a' o Tuhan monulung doho'? Tuhan i' o minonuhu' doho' do mongoi panangod om mongoi pamaraag diti pomogunan diti,” ka dau. 11 Om boros kaddi di Iliakim, om i Sibna, om i Yoa dot id monininggarung do tinumon diri, “Oi Tuan, boro-boros nopo dahai dot id suang do boros dot Aram tu' kosuhut i' iyahai do boros diri. Kada' pimboros do boros dot Ibrani. Tu' kosuhut ngai' nondo ilo tulun do hodi'd timpak do tolig do bandar,” ka diyolo'. 12 Om boros ka di monininggarung do tinumon do suminimbar, “Ondos daa dokoyu om sinuhu' oku di raja' dot Asur do poboros diti dot id dokoyu noo om id raja' dokoyu. Amu'. Poboroson ku nogi' iti dot id tulun dilo songirikau do hodi'd timpak do tolig tu' iyolo' nga' kotonggoi indo dokoyu do mangakan do taii' om monginum do sobu diyolo',” ka dau. 13 Om ingkakat noddi i monininggarung om pimboros no iyau do boros dot Ibrani dot opuhod kopio. Boros ka dau, “Pokinongou kou no do boros di raja' dot Asur dot id dokoyu! 14 Popoinsan iyau dokoyu om a' kou i' aakalan di Hiskia. Tu' a' i' kapasi dokoyu i Hiskia. 15 Om kada' kou tanud di boros do monuhu' do mogondos do Tuhan. Kada' dokoyu soroho' do kapasi o Tuhan dokoyu, ko' kaantob po iyau do soudor dot Asur do mongoi ponolod do bandar dokoyu. 16 Kada' kou pokinongou di Hiskia. Monuhu' dokoyu i raja' dot Asur do sumoliwan do mantad id bandar dokoyu om minsiriba' dot id dau. Tu' pologoson ngai' kou i' dau do mangakan do tua' dot anggur do mantad id guas dot anggur dokoyu om mangakan di tua' dot ara dokoyu. Om pologoson kou dau do monginum do waig do mantad id torobong dokoyu, 17 do gisom do kawaliu kou dau dot id iso' o pomogunan di miagal-agal do pomogunan dokoyu, i kikabun dot anggur om kigandum do wonsoyon do roti do kanon dokoyu. 18 Kada' kou nogi' kopio kaakalai di Hiskia om kada' kou pomusorou do mamasi dokoyu o Tuhan. Honggo o tingolig do nokoumbal do minamasi do pomogunan dau do mantad id raja' do pomogunan dot Asur? 19 Honggo ngai' noddi i tingolig do Hamat om Arpad do baino'? Om honggo ngai' no i tingolig do Soparwaim? Haro toi o minongoi pamasi do Samaria? 20 Aiso' po o tiso' di tingolig diyolo' do nakapasi do pomogunan dau do mantad id raja' dahai. Om nokuro'ddi tu' momusorou kou do kapasi o Tuhan do Yorusalim?” ka dau. 21 Om kada' nopo ungkomi i rayat tu' iyo noddi o pinonuhuan di Hiskia. Aiso' nopo o boros diyolo'. 22 Om hurako' nopo di Iliakim, om i Sibna om i Yoa o pakayan diyolo' dot atatangaban. Om uli' no iyolo' om posunudo' no diyolo' dot id raja' i pinoboros di monininggarung do tinumon di raja' dot Asur diri.
Minokinosihat i Raja' di Yosaya
1 Om tontok di norongou di Raja' Hiskia i pinoboros di tolu o tulun diri om hurako' nopo dau o pakayan dau dot atatangaban. Om panampakai no iyau di pakayan do mogihad om ongoi no do hiri'd Walai'd Sasambayangan dot Agayo. 2 Om suhuo' no dau i Iliakim, i boyoon do walai'd raja', om i Sibna, i gomponulis do pomorinta', om i piro-piro ot imam di molohing no do mongoi solowot di Nabi Yosaya, i tanak di Amos. Om iyolo' nga' minanampakai nogi' do pakayan do mogihad. 3 Om poingkaa o boros do pinonuhuan di Hiskia diyolo' do popoboros dot id di Yosaya, “Tadau nod baino' o tadau do koinggoritan; tu' hinukuman toko' om nintingayam toko'. Miagal toko' po di tondu' di mogkosusu daa nga' adalaan no kopio koluhoi. Om a' noddi milo do mogkosusu. 4 Sinuhu' di Raja' dot Asur i monininggarung do tinumon dau do mongindaraat do Kinorohingan di poimpasi. Om maha' daa do norongou'd Tuhan, i Kinorohingan nu, i pinongindaraat diyolo'ddi om hukuman dau i tulun di minimboros do miagal diri. Om sambayang no dot id Kinorohingan do bagi' diti tulun toko' di maso do poimpasi,” ka. 5 Om soira' di norongou di Yosaya i habar do mantad id di Hiskia diri, 6 om simbaro' no dau do poingkaa, “Momisunud o Tuhan diya' dot a' moddosi di tulun dot Asur do nokoboros piya iyolo' dot a' kapasi diya' o Tuhan. 7 Tu' pologoson nondod Tuhan i raja' dot Asur do korongou'd habar do gisom do gumuli' nondo iyau do hilo'd pomogunan dau. Om patayon nondo iyau'd hilo',” ka.
Minonompurolosi po Kawagu i Tulun dot Asur
8 Om koilaai noddi di monininggarung do tinumon do raja' dot Asur diri do nokotongkiad no i raja' dau do mantad hilo'd Lakis om maso no dau do sumangod do bandar do Libna, i bandar dit osomok do mantad hiri. Om ongoi noddi i monininggarung do tinumon diri solowot di raja' dau do hilo'. 9 Om maso iddi do nokorongou i tulun dot Asur do habar do maso nod mongoi panangod diyolo' i soudor do Masir, do winoyo' di Tirhaka, i raja' dot Etiopia. Om tontok di norongou di raja' dot Asur o habar diri om pokirim no iyau do surat dot id di Hiskia, 10 i raja' do Yohuda. Poingkaa o suang di surat dau, “Minomisunud daa diya' o Kinorohingan nu, i sondihon nu'ddi dot a' tiya' aala', nga' kada' nogi' kaakalai'ddi. 11 Tu' nokorongou ko no di winonsoi di raja' dot Asur dot id koinsanai'd pomogunan di korohian dau do mamaraag. Osorou nu daa do koidu' ko iya'? 12 Tu' iri taki-aki ku nga' minamaraag nogi' do bandar do Gosan, om Haran om Risip; om pinatai diyolo' i tulun do hilo'd Idon, i songingiyon do hilo'd Tolasar. Aiso' i' o tiso' di ponokokinorohingan diyolo' do nakapasi diyolo'. 13 Honggo ngai' i raja' do bandar do Hamat, om Arpad, om Soparwaim, om Hina om Iwa do baino'?” ka. 14 Om romito' no di Hiskia i surat diri do mantad id piro-piro o tulun di pinapaatod diri om basao' noddi dau, om ongoi no iyau do hiri'd Walai'd Sasambayangan dot Agayo. Om poungkalado' no dau i surat diri dot id toguang do Tuhan. 15 Om sambayang no iyau do poingkaa, 16 “Oi Tuhan it Osundu Kopio, i Kinorohingan dot Israil, i poirikau dot id sakai di moloikat di roitan do kerub! Iya' noo o Kinorohingan di momorinta' do koinsanai'd pomorintaan do hiti'd pomogunan. Om iya' o minomonsoi do tawan om pomogunan. 17 Pokinongoho' no iyahai do dinondo, oi Tuhan, om antangai noti nosiliu dot id dahai. Pokinongohon ngai' no i pinimboros di Sanhorib do mongindaraat diya', i Kinorohingan do poimpasi. 18 Koilo ngai' no iyahai, oi Tuhan, do nakapamatai do piro-piro ginumu' do bansa'd tulun i piro-piro o raja' dot Asur, om nakapamaraag do piro-piro o pomogunan, 19 om tinutudan nogi' diyolo' i ponokokinorohingan di piro-piro o bansa'ddi --- it okon i' ko' kinorohingan kopio tu' aiso' i' o kuasa', tu' iri nopo om winonsoi-wonsoi nod tulun do kayu om watu do winonsoi. 20 Iyo nopoddi, oi Tuhan, i Kinorohingan dahai, om poiduwo' no iyahai do mantad id tulun dot Asur diri, om koilo ngai' indo o bansa' do hiti'd pomogunan dot iya' noo, oi Tuhan, o Kinorohingan,” ka dau.
Boros di Yosaya dot id Raja'
21 Om ponuhu' noddi i Yosaya, do tulun do mongoi solowot di Hiskia om momisunud dau dot isimbar di sambayang di raja', 22 do pasal di Sanhorib, i raja' dot Asur. Om poingkaa o pinoboros do Tuhan, “Oi Sanhorib, irak-irakan ko nondo di bandar do Yorusalim, om hingi-hingion ko. 23 Isai daa i nindaraat om nuntotori' nu dot osorou nu, oi Sanhorib? Iyoho' no i nindaraat nu'ddi, iyoho' i Kinorohingan dot Israil, i Kinorohingan dit Olidang Kopio. 24 Sinuhu' nu i piro-piro o susuhuon nu do mongoi pokirayou-rayou dot id toguang ku do naala' nu no o konuluhanan dit angakawas do hilo'd Libanon dot i piro-piro o korita'-kuda' nu di don sumasangod o pinangala' nu. Om minokirayou-rayou ko nogi' do nakatagad ko di kayu sedar dit angakawas kopio om it ongolumis kopio, om nakawaya' ko di puru' dit akapal kopio. 25 Om oondos ko nogi' do nokopongukad ko'd torobong om nokoinum ko'd waig dot id pomogunan do suwai om narasak nu i Bawang do Nil do nopingulakan di piro-piro o soudor nu. 26 A' ko toi nokorongou do natantu' mantad ku no do mantad di gulu po do wonsoyon ku o miagal diti? Om wonsoyon ku noddi iti do baino'. Nonuan ku iya' do kuasa' do mamaraag do piro-piro o bandar dit ongkitolig do gisom dot osiliu iri do pogun. 27 Om aiso' no pokukurayan di tulun do songingiyon do hilo'; moddosi po ngai' om angagangau. Miagal po iyolo' di sakot do hilo'd kobuturan om miagal di sakot do sumuni do hiri'd sakai'd taap do walai tu' a' po kosuni kopio om okoring no do tontok dot oontok di tongus dot alasu' do mantad id koulayon. 28 Nga' oilaan ngai' ku i' o pasal diya', i wonsoyon nu om it ongoyon nu. Om oilaan ku i' dot otogod ko doho'. 29 Norongou ku no o boros do minomisunud do sumaap ko om mokirayou-rayou ko. Om gowoi pondo om godingan ku o todung nu om kakangan ku o kabang nu, om poulion tiya' nogindo do sumusui di ralan do winayaan nu di ruminikot ko i',” ka. 30 Om poingkaa'ddi o pinobilin di Yosaya dot id di Raja' Hiskia, “Iti no o pogintutunan dit osiliu dot id dabantalan. Toun nopod baino' om toun dot id dosunsudan om iri po taakanon do hilo'd gouton o kanon dokoyu, nga' toun nopo kawagu om kapananom kou no do gandum om anggur om kaakan kou do tua'ddi. 31 Om iri nopondo tulun dot olu-olu' do hilo'd Yohuda om osimbayan nondo dot iyo po di tanom di nakaralom o gamut om mongua'. 32 Om haro indo o tulun dot oolu' do hilo'd Yorusalim om hilo'd Nuluhon do Sion tu' nosorou mantad nod Tuhan, it Osundu Kopio, dot owonsoi o miagal diri. 33 Iti no o pinoboros do Tuhan do pasal di raja' dot Asur, ‘A' i' iyau kosuang diti bandar ko' kapapana' dot ongoiso' piya o pana' dot id bandar diti. Om aiso' i' o soudor di kikolid do koinsomok-somok diti bandar, om aiso' o tana' do potimbunon do maan do ponurungku'. 34 Suwai ko' gumuli' nopo iyau do sumusui di ralan di winayaan dau di minongoi i' iyau'd hiti, om a' i' iyau kosuang diti bandar. Tu' iyoho' no, i Tuhan, o minomoros diti. 35 Intirungan ku i' iti bandar om tamangan ku tu' i kosuahan ku om i batos do nokoboros ku dot id di Daud, i susuhuon ku o kopongintirungan ku,’ ka,” ka dau. 36 Om ongoi no o moloikat do Tuhan do hiri'd kiim di tulun dot Asur om patayo' no dau o 185,000 o soudor. Om kosuabon poddi, di tadau kawagu om songingiliu poo do nangapatai i soudor diri. 37 Om pamanau noddi i Raja' Sanhorib, i raja' dot Asur, om poguliai no dau do hilo'd Niniwi. 38 Insan tadau, di maso dau do sumambayang do hiri'd walai di Nisro, i ponokokinorohingan dau, om patayo' no iyau di Adramilik om i Sarisir, i tangaanak dau, do gayang o pinamatai. Om poggidu' noddi iyolo' do hilo'd pomogunan dot Ararat. Om kosiliu noddi do raja' i Isarhadon, i tanak di Sanhorib do suwai do suminowoli dau.
Toruol di Hiskia om Kinolingasan Dau
1 Om tontok noddi do suminakit i Hiskia om oruhai no daa iyau dot apatai. Om rikot no i Nabi Yosaya, i tanak di Amos do minongoi kakap dau, om boro-boros no dot id dau do poingkaa, “Suhuon ko'd Tuhan do mongintod-intod do sompiiyon nu tu' matai ko no; a' ko no olingasan,” ka dau. 2 Om togiging no i Hiskia do tuminoguang di limput om sambayang no iyau dot id Tuhan. 3 Boros ka dau, “Soroho' no, oi Tuhan, dot otorodok kasai' oku i' dot id diya' om otulid o winonsoi ku, om tuminotos oku do minomonsoi di korohian nu,” ka. Om pingihad no tomod iyau. 4 Om suhuo' no kawagu'd Tuhan i Yosaya 5 do minongoi solowot di Hiskia do posunud do boros dau do poingkaa, “Norongou ku no i sambayang nu, om nokito ku i romou nu, iyoho' i Tuhan, i Kinorohingan di tukuon di Daud, i taki-aki nu. Om pologoson ku i' iya' do poimpasi do solinaid do hopod om limo toun. 6 Om poiduwon ku i' iya' om iti bandar do Yorusalim do mantad id raja' dot Asur om intirungan kasai' ku iti bandar,” ka dau. 7 Om boros ka di Yosaya, “Iti no o pogintutunan nu do wonsoyon kopio'd Tuhan i nakabatos dau. 8 Pologoson do Tuhan do kosunsuri do hopod o garis i sangai do hilo'd pagantangan do kasawato'd tadau di winonsoi di Raja' Ahas,” ka dau. Om sunsuri noddi do hopod o garis i sangai do pogontong do kasawato'd tadau. 9 Om soira' di nolingasan i Hiskia om ponulis no iyau do sinding do pamarayou. Iti no i tinulis dau: 10 Ondos ku no daa om kumaa oku do hilo'd pomogunan do tulun do napatai di tangaumur oku nogi', om a' oku no koumbal do kolohing. 11 Ondos ku daa om a' oku no kokito'd Tuhan do maso ku po do hiti'd pomogunan do tulun do poimpasi, om a' kokito do tulun di poimpasi do hiti'd pomogunan. 12 Nongoi onuo' o pinuhobo ku, do miagal pod kiim di hinunduk do tulun; om miagal di kain di ginunting do mantad hiri'd pinorilitan di pangawalan; ondos ku daa om pupusan nod Kinorohingan o koposion ku. 13 Monuaban oku nopod mihad dot orurualan, do miagal po di tipu-tipuon do singa o tulang ku; om ondos ku daa om pupusan nod Kinorohingan o koposion ku. 14 Opian no om oluhoi no o boros ku, om modoi-odoi oku po do miagal di punai. Opodi' poddi o mato ku dot ouru'd montong do hilo'd sawat, oi Tuhan, poiduwo' oku no do mantad id koinsanai'd kosusaan diti. 15 Nunu po o poboroson ku? Tu' Tuhan i' o pinoporikot diti; om araat tomod diri o ginawo ku om a' oku no koodop. 16 Oi Tuhan, masi oku i' do bagi' diya', om lingasai oku no om ponoruo' no o tumur ku. 17 Om osiliu indo do kosimbayanan i koinggoritan ku, tu' pinoidu' oku i' diya' do mantad id koligagaanan; om nompunan ngai' nu o dusa ku. 18 Aiso' no o milo'd mamarayou diya' do hilo'd pomogunan do tulun do napatai, a' no milo'd sumondiu do kotorodoko' nu i tulun di nangapatai. 19 Iri no i tulun di poimpasi o milo do mamarayou diya', do miagal diti wonsoyon ku'd dinondo. Sunudan nondo di piro-piro o molohing i tangaanak diyolo', do kotorodoko' nu. 20 Oi Tuhan, nolingasan oku no diya', om pouni nondo iyahai do kecapi om modsinding iyahai do mamarayou diya', do hiri'd Walai'd Sasambayangan dot Agayo do solinaid dahai do poimpasi. 21 Om ponuhu' noddi i Yosaya do tulun do mongoi poluhad do tua' dot ara di hinotok do hiri'd kupos di Hiskia. 22 Om ponguhot no i Raja' Hiskia, “Nunu o koilaan kopio do lingasan oku'd Tuhan om koongoi oku indo kawagu do hilo'd Walai'd Sasambayangan dot Agayo?” ka.
Piro-Piro o Susuhuon do Mantad Hilo'd Babil
1 Om tontok no do maso'ddi do nokorongou i raja' do Babil, i Mirodak- Baladan, i tanak di Baladan, do suminakit i Hiskia nga' nolingasan iddi iyau. Om pokirimai no dau iyau do surat om ipuhawang. 2 Om posolokoyo' no di Hiskia i piro-piro o susuhuon diri om pointongo' no dau iyolo' di kakayaan dau, i pirok om i tamas dau, om i rampa om i tumau dau dit osonong o kosingudan, om koinsanai di rapo-rapo do soudor dau. Om aiso' no o hiri'd poopian dau ko' hiri pod pomogunan di porintaon dau dot a' dau pinokitanan diyolo'. 3 Om ongoi noddi i Nabi Yosaya do hiri'd di Raja' Hiskia, om ponguhot no iyau'd poingkaa, “Hinonggo o tadon di piro-piro o tulun diri om nunu ka diyolo' dot id diya'?” ka dau. Om boros ka di Hiskia, “Mantad iyolo'd hilo'd Babil, i pomogunan di hilo'd sodu' kopio,” ka dau. 4 “Nunu no o nokito diyolo'd hiti'd walai'd raja'?” ka kawagu di Yosaya do minonguhot. Om boros ka di Hiskia, “Nokito ngai' no diyolo'. Aiso' no ot a' ku pinokitanan diyolo' do hilo'd poopian,” ka dau. 5 Om sunudai noddi di Yosaya i raja', boros ka dau, “Boros kad Tuhan, it Osundu Kopio om, 6 rumikot nondo o maso dot atanggayan ngai' do hilo'd Babil o koinsanai di hiti'd walai nu, om koinsanai di nokoopi' di taki-aki nu do gisom do tadau'd baino'. Aiso' no ot oolu'ddi. 7 Om iri piya sinakagon nu nga' atanggayan i' o wookon diyolo' do hilo'd Babil om silihon do pagawai di raja' do Babil do hiri'd walai'd raja',” ka dau. 8 Om boros ka di Hiskia dot id di Yosaya, “Osonong no i boros do Tuhan do pinoboros dot id doho'ddi,” ka dau. Tu' osorou nopo dau om poingkaa, “Haro po o kosimbayanan om aiso' o koligagaanan do solinaid ku pod poimpasi,” ka.
Boros do Koinsasamod
1 Boros kad Kinorohingan toko', “Insasamadai no i tulun ku, insasamadan no iyolo'! 2 Odsuuro' no i tulun do hilo'd Yorusalim, om sunudan no iyolo' dot ula' no o koloido' diyolo' dot oinggorit. Om noompunan ku noddi i dusa diyolo', nopupusan no o pomohukum ku di dusa diyolo',” ka. 3 Haro o tulun do millohou do poingkaa, “Wansayan mantad nod ralan do wayaan do Tuhan o hilo'd tana' do kowotuan. Om potingon no o ralan do hilo'd tana' do kowotuan, do wayaan do Kinorohingan toko'. 4 Olitan ngai' no o kubong, om lampayon ngai' o nulu-nulu. Osiliu nondod rantai ilo nuluhon, om i ralan di mingkilong nga' opoting nondo. 5 Om pointalangon nondo, o kagayaan do Tuhan. Om okito ngai' nondod tulun iri, tu' nakabatos mantad nod Tuhan iti,” ka. 6 Haro o tulun do millohou do poingkaa, “Popinsunudo' no i habar,” ka. “Nunu o habar do popinsunudon ku?” kangku do minuhot. “Popinsunudo' no, tu' koinsanai'd tulun om miagal nod sakot, om a' i' iyolo' otogui ko' mantad di tusak do bunga do hilo'd gouton. 7 Rumiou i' o sakot om tusak do bunga nga' lumoho i' do tontok do potonguson do Tuhan i ribut. Tulun nga' a' i' otogui ko' mantad di sakot. 8 Rumiou i' o sakot om lumoho o tusak do bunga, nga' boros nopod Kinorohingan om hino kasai' i' do gisom do poingompus,” ka. 9 Takad no do nuluhon dit akawas om popinsunudon no i habar dot osonong dot id Yorusalim. Pinglohou no dot opuhod, om popinsunudon no i habar dot osonong dot id Sion. Sunudan no i bandar do hilo'd Yohuda do rumikot i Kinorohingan diyolo'. 10 Rumikot no o Tuhan, i Kinorohingan do mongoi pomorinta' do mikuwo'd sinundu om kokoriso' dau do miwoyo' do tulun di napasi dau. 11 Om gompion i' dau i tulun dau do miagal di gompomogompi' do dumba', om timungon ngai' dau i tangaanak do dumba'; om kibiton dau, om woyoon dau kosonong-sonong i molohing do dumba'.
Aiso' o Koiyo di Kinorohingan dot Israil
12 Haro toi o tulun do milo do magadang dilo rahat do palad o ponimbauk, ko' milo po do mamarangau dilo tawan do tunturu' o pamarangau? Haro toi o tulun do milo'd posuang do tana' diti pomogunan dot id sangkir, ko' milo pod monimbang dilo nuluhon om nulu-nulu dot id ponimbangan? 13 Haro toi o tulun do milo'd momisunud di Rusod do Tuhan dit apatut dau'd wonsoyon? Isai no o milo do monuduk dau ko' monosihat po dau? 14 Isai no o ponokiboro-boros do Kinorohingan, om koilo i' iyau do ralan dit otulid, om kosuhut iyau om kopinsingilo ondung poingkuro o pomomonsoi do nunu nopo? 15 Koinsanai do bansa'd tulun om aiso' i' toomod dot id Tuhan, tu' miagal nod sontiri' o waig; om i piro-piro o pulou di hilo'd sodu' nga' miagal nod liohuk kagaan. 16 A' i' kabagal do maan do porsombahan do sorobon, do toinsanan piya i nintorusan do hilo'd puru' do Libanon. Om oinsanan piya i kayu, nga' okuri' i' kopio do maan do siduwon do pomurakit di tapui. 17 Koinsanai'ddi bansa', nga' aiso' i' toomod dot id dau. 18 Isai poo o poiyaan do Kinorohingan, poingkuro ko'd poboros do korupa-rupao' dau? 19 A' i' iyau miagal di tininganak di wonsoyon do tulun, it urogupan do tamas om poimpohon nogindo dot id pirok. 20 Om iri no i tulun dit a' kaanu do pirok ko' tamas, om momili' do kayu dit a' obingromuk. Om mogihum nondo iyau do tukang do momonsoi di tininganak, om a' i' iri ahaba'. 21 A' kou toi koilo? A' kou toi nosunudan di gulu po? A' kou toi nokoilo, ondung poingkuro do minomonsoi diti pomogunan? 22 Minomonsoi nopodti om i poirikau do hiri'd tirikohonon dau do don raja' dit id sawat ko' iti pomogunan om id sawat ko' ilo tawan, om tulun nopo do hiti'd pomogunan om miagal nod kilau kokoro'. Om pawalado' no dau ilo tawan do miagal do kain, om miagal do kiim di tiyonon do tulun. 23 Poinsiribaon ngai' dau i pomorinta' dit angagayo o kuasa', om gisom dot aiso' nondo o kuasa' diyolo', om aiso' o pokukurayan. 24 Miagal po iyolo'd tanom-tanom dit okoro' po, i wagu po kosobul om a' po nokopomugamut. Tu' soira' nopod porikoton do Tuhan o tongus, om rumiou nopo om otilib do miagal do sakot di nokoring. 25 Isai poo o milo do poiyaan do Kinorohingan dit Olidang Kopio, haro toi o suwai do miagal dau? 26 Tingaha' pogi' do hilo'd tawan, isai o minomonsoi di rombituon dot okito dokoyu? Iri nopo i momoyo' diyolo' do miagal do soudor, om koilo i' ondung piro o kogumuo'ddi, om kotutun do ngaran do pointikid-tikid di rombituon. Ayago i' kopio o kuasa' dau, gisom dot iso' po nga' aiso' i' ot atagak diri. 27 Oi Israil, nokuro tu' muol-nguol ko nopo do moguhang dot iyo pod a' do Tuhan oilaan o kosusaan nu, om a' mamadul dot oinggorit ko, om a' manahak dit otulid? 28 A' ko toi koilo? Om a' ko toi nokorongou? Tuhan nopo om Kinorohingan i' di poingompus. Om iyau no o minomonsoi do koinsanai diti pomogunan, a' i' iyau insan dot ohuyan ko' apaasan. Om aiso' i' o tongosongulun piya do kosuhut do pomusarahan dau. 29 Onuan dau do kokorisan i tulun dot oluhoi, om i tulun dit a' kogoos. 30 Iri piya it omulok po nga' lumuhoi i', om tangaanakwagu nga' ahaba' i' dot adalaan kohuyan. 31 Nga' tulun nopo di mogondos do Tuhan, om i mokiuhup dau, om kaanu i' do kokorisan do wagu. Om minsawat nondo iyolo' do tumulud, do kitalad do miagal di dongkondiu. Om manangkus iyolo' nga' a' i' iyolo' ohuyan, om mamanau iyolo' nga' a' i' iyolo' lumuhoi.
Popogirot o Kinorohingan do Ginawo do Tulun dot Israil
1 Boros kad Kinorohingan, “Kada' kohiyo, om mokinongou no doho', oi pomogunan dit ongosodu'! Sodia' nod poboros do hal nu dot id pogibisaraan tu' onuan ko i' do maso do moro-boros. Kainou mogitimbaba-baba', om oilaan i' ondung isai ot otopot om isai i kasala'. 2 Isai o pinoporikot di pomorinta' do mantad hilo'd koulayon, om i pinapamanang dau do honggo nopo o pakayaan dau? Isai o minanahak dau do kamanangan do suminangod do raja' om piro-piro o bansa'? Tobok-tobokon nopo dau iyolo' di gayang do miagal po di pupuk toomod. Om pogitotompiason nopo dau iyolo' dot i pana' dau o popogitompias-pias, do miagal po di sakot do nokoring dot otilib do tongus. 3 Gusaon dau iyolo' om osimbayan nopo iyau do mamanau; om osiau tomod iyau, hano-hano nod a' kosondot do tana' do mamanau. 4 Isai o pinopologos dot osiliu o miagal diri; isai i minanantu' mantad dit ongosiliu do hiti'd pomogunan? Iyoho' no i Tuhan, i hino mantad di timpuun i', om iyoho' i Tuhan, o hino kasai' do gisom do kopupuson. 5 Nokokito no di nongowonsoi ku, i tongoulun do hilo'd pomogunan dit id sodu'. Om moddosi iyolo', om pananggagaran poo dot opopoddosian. Gowoi poddi om timung ngai' nopo iyolo', om rikot ngai' no iyolo'. 6 Mogiuhup-uhup poo, om mogiodsuur-suur i piro-piro o tukang. 7 Boros ka di tukang kayu, dot id tukang amas, ‘Osonong no,’ ka. Odsuuron di tulun di monguragup di tininganak i tulun di popogidoko-dokot di tininganak. Boros ka diyolo', ‘Osonong no,’ ka. Om pokuan nondo diyolo' i tininganak do popoudong om a' i' ahaba'. 8 Nga' iyokoyu nopo, oi Israil, i susuhuon ku, om tulun i' di nopili' ku, i sinakagon di Abraham, i tambalut ku. 9 Nigitan ku iyokoyu do mantad hilo'd tisan diti pomogunan, linohou ku iyokoyu do mantad hilo'd kinoiyonon dit id sodu' no kopio. Om boros kangku dot id dokoyu, ‘Iyokoyu no o susuhuon ku,’ kangku; a' ku i' iyokoyu niada' tu' pinili' ku i' iyokoyu. 10 Kada' kou poddosi, tu' moyo-woyo' oku i' dokoyu, iyoho' no o Kinorohingan dokoyu, om kada' pologoso' do haro o korolosi dokoyu. Pokorison ku i' iyokoyu, om uhupan ku iyokoyu, intirungan ku i' iyokoyu om posion ku iyokoyu. 11 Tulun nopo dit otogod dokoyu, om ointingayam indo tu' aala' i' iyolo'. Om tulun di sumaap dokoyu, nga' apatai indo. 12 Ihumon ngai' ku po daa i pisangod dokoyu, nga' a' ku no iyolo' okito. I nokoumbal do suminaap dokoyu dot id pisangadan, nga' nangapatai noddi om a' hino do hiti'd pomogunan. 13 Iyoho' no o Tuhan, i Kinorohingan dokoyu; pokorison ku i' iyokoyu om momoros oku do, ‘Kada' poddosi tu' uhupan ku i' iyokoyu,’ ka,” kangku. 14 Boros kad Tuhan, “Mulong piya dot oluhoi ko, om aiso' o pokukurayan nu, oi Israil, nga' kada' i' poddosi tu' uhupan ku i' iya'. Iyoho' no, i Kinorohingan dot Israil dit olidang o mamasi diya'. 15 Silihon ku iya' do miagal di papan do pamagamasan, di wagu po konipanai om atarom po i nipon. Gomoson ngai' nu nondo i nuluhon om raagon nu'ri, om i konulu-nuluan nga' osiliu tomod nopod tapol. 16 Om paatapon nu nondo iyolo', om otilib nondo iyolo'd ribut om kotias do tongus; om otood ko nondo, tu' iyoho' i' o Kinorohingan nu. Om royohon oku nondo diya', iyoho', i Kinorohingan dot Israil dit olidang. 17 Soira' di mogihum do waig i tulun ku, om soira' dit otuu o tatalanan diyolo' dot otutuuhanan, om simbaron ku i', iyoho', i Tuhan, i sambayang diyolo', om a' ku i', iyoho' i Kinorohingan dot Israil, tongkiadan iyolo', i tulun di songonuon ku. 18 Poluyungon ku nondo o bawang dot id pogialatan di nulu-nulu dit aiso' o sumuni, om poluyungon ku o tudan do waig do hiri'd kokubangan. Silihon ku o tana' do kowotuan do kulam do poimponu'd waig, om silihon ku i tana' dot otuu do luyu' di songluyung-luyung. 19 Posunion ku o kayu sedar do hilo'd tana' do kowotuan, om posunion ku'd hilo' i kayu akasia, om kayu murad om kayu saitun. Iri tana' dot aiso' o sumuni nga' osiliu nondod puru' do kayu sedar, om kayu sanobar om kayu berangan. 20 Om okito nondod tulun iti om koilo nondo dot iyoho', i Tuhan, o minomonsoi'ddi. Om kosuhut nondo iyolo', do Kinorohingan no dot Israil it olidang o pinapatantu' dot osiliu o miagal diri,” ka.
Sinaap Ngai'd Tuhan i Tingolig
21 Poingkaa no o boros do Tuhan, i raja' dot Israil dot id koinsanai di tingolig, “Poboroso' no o hal dokoyu, koinsanai di tingolig di piro-piro o bansa'd tulun, poboroson ngai' no i korohian dokoyu'd popoboros. 22 Kainou'd hiti om poboroson no it osiliu dot id dabantalan, om oilaan toko' indo ondung soira' iri dot osiliu. Susuyon no dot id pomisaraan i nongosiliu di gulu po, om sunudan no iyahai do komoyon diri. 23 Sunudan no iyahai ondung nunu it osiliu dot id dabantalan, om oilaan indo dahai do kinorohingan kopio kou. Pomonsoi kou daa dit osonong, porikot kou daa do kosusaan, ponuo' daa iyahai do kopoddosian om kosuayan. 24 Iyokoyu nopo om koinsanai di wonsoyon dokoyu om aiso' i' o komoyon om aiso' o suang, om i tulun do tumuku' dot id dokoyu nga' kososomu' tomod. 25 Nokopomili' oku nod tulun di poingiyon do hilo'd koulayon, om porikoton ku'ndo do mantad hilo'd utara do mongoi sangod. Pingulakan nondo dau i tulun di momorinta' do miagal pod burutak, om miagal po di momorun do kuron do mingulok di lagit. 26 Isai dokoyu o pinopoboros mantad dot osiliu o miagal diti, om milo indo iyahai do popoboros dot otopot ko? Aiso' i' tiso' dokoyu do minomoros do pasal diri, aiso' i' o nokorongou dokoyu do minungkomi kou dot ongoiso' piya o boros. 27 Iyoho' no, i Tuhan, ot id gulu kopio pomisunud do bandar do Sion do habar diri minonuhu' oku'd tulun do pinapahabar do hilo'd Yorusalim do poingkaa, ‘Rumikot no i tulun nu, muli' no iyolo'!’ ka. 28 Soira' di minontong oku do koinsanai di tingolig, om aiso' i' o tiso' diyolo' do milo do moro-boros, om aiso' ot iso' diyolo' do kosimbar, di tuhoton ku. 29 Aiso' ngai' no kopio guna-guna' diti tingolig, do ponokokinorohingan. Ongoluhoi ngai' i' iti tininganak, om aiso' o pokukurayan,” ka.
I Susuhuon do Tuhan
1 Boros kad Tuhan, “Iti no i susuhuon ku, i pinokoris ku, i nopili' ku, om i korohian ku. Noponu' ku no iyau do kuasa' ku, om poporikot nondo iyau dit otulid dot id pointikid-tikid do bansa'. 2 A' i' iyau minggiak ko' popuhod pod boros dau, ko' mimboros po dot opuhod do hiri'd tanga'd ralan. 3 A' i' iyau monipu' do poring di poinglayuk, ko' momisok pod lampung dit okoro' no o binandak. Om otorodok iyau do popointalang do katapatan. 4 A' i' otingkod o ginawo dau do mogondos om a' lumuhoi o ginawo dau; tu' popogirot i' iyau dit otopot do hiti'd pomogunan. Om sangandad-andad nopod ponudukan dau i hilo'd pomogunan dit osodu',” ka. 5 Kinorohingan no o minomonsoi om pinapawalad dilo tawan, om iyau o minomorun diti pomogunan om koinsanai di poinsuni do hiti. Nonuan dau do koposion om pinuhobo o koinsanai di tulun dau, om moro-boros diri o Tuhan, i Kinorohingan dot id susuhuon dau do poingkaa, 6 “Iyoho' no, i Tuhan, o minomolohou diya', om onuan ku iya' do kuasa' do momonsoi dit otulid. Om iya' no o pawayaan ku do monokiumpongo dot id koinsanai'd tulun, om iya' no o pawayaan ku do tulinau dot id koinsanai'd bansa' om woyoon ku iya' om gompion ku. 7 Poungkalaton nu'ndo i mato do tulun do bolou, om poiduwon nu i tulun do songinsuang dot id giil dit otuong. 8 Iyoho' no, i Tuhan i Kinorohingan nu, aiso' i' o ponokokinorohingan di milo do poinggoyoon do suwai ko' iyoho'. Om a' ngai' ku i' pologoson i tingolig do kaanu do bahagi' di pamarayou doho'. 9 Nongosiliu noddi i pinoboros ku di gulu po, om baino' nodti om sunudan ku iyokoyu do hal do wagu, mulong piya dot a' po nokotimpuun iti dot osiliu,” ka.
Sinding do Pamarayou
10 Podsinding nod sinding do wagu dot id Tuhan, royoho' no iyau, oi koinsanai'd pomogunan. Royoho' no iyau, oi dokoyu i lumayag do hilo'd rahat, royoho' no iyau, oi koinsanai di songingiyon do hilo'd rahat, podsinding kou no, oi koinsanai'd pulou di hilo'd sodu' om koinsanai di tulun di poingiyon do hino. 11 Pologoson no do mamarayou'd Kinorohingan i tana' do kowotuan om i bandar do hilo', pologoson nod mamarayou dau i tulun do hilo'd Kidar. Pologoson no do mimpangkis dot atataadan, do hilo'd timpak do nuluhon i tulun do hilo'd bandar do Sila. 12 Pologoson no do mamarayou om popoinggayo'd Tuhan, i tulun do poingiyon do hilo'd pomogunan dot osodu'. 13 Antangai pogi', nga' sumoliwan no o Tuhan do mongoi sangod, miagal po iyau do songulun o gunsiou, posodia' no iyau om agayo o ginawo dau do mongoi sangod. Mamangkis iyau do tanda' do mongoi sangod, om popointalang iyau do sinundu dau dot id pisangod.
Minamatos o Kinorohingan do Monulung do Tulun Dau
14 Poingkaa no o boros do Kinorohingan, “Alaid oku no dot a' minungkomi, om a' oku suminimbar di tulun ku. Nga' nokorikot noddi o maso ku do powonsoi di wonsoyon ku do baino', om momogiak oku do miagal do tondu' dit orualan do mogkosusu. 15 Raagon ku'ndo ilo nulu-nulu om ilo nuluhon, om riohon ku ilo sakot om kayu. Om silihon ku do kowotuan ilo bawang, om rasakan ku i kulam di poimponu'd waig. 16 Woyoon ku'ndo i tulun ku di bolou, do sumusui do ralan dit a' diyolo' insan kawayaai. Om silihon ku'ndo do tanawau i totuong dot id diyolo', om potingon ku i kawayaon diyolo' di mogikilong-kilong. Iti no o batos ku dot id diyolo', om atantu' no do sulungon ngai' ku'ti. 17 Koinsanai di mogondos do tingolig, om i mamarait do kinorohingan diyolo' i tingolig, om ountotori' no om ointingayam,” ka dau.
Mada' do Tudukan ot Israil
18 Boros kad Tuhan, “Pokinongou ngai' kou, oi tulun di bosukon, montong no pogi' kopio oi koinsanai di bolou. 19 Haro po toi o tulun di bolou po ko' mantad di susuhuon ku, om i bosukon po ko' Israil i susuhuon ku? 20 Oi Israil, ogumu' no kopio o nokito nu, nga' a' nu i' pinadul kopio iri, haro i' o tolingo dokoyu, nga' a' kou i' minokinongou kopio,” ka dau. 21 Tuhan nopo om Kinorohingan dit orohian kopio do mamasi, om orohian iyau do pusohon om poinggoyoon it oturan dau. 22 Nga' baino' noddi om napanakahan ngai' no i tulun dau, om nongkosuang no iyolo' do giil, nalawaan no iyolo' om naratu', om aiso' i' o minongoi ponulung diyolo'. 23 Isai nopo o mokinongou diti, om tumorodok no do mokinongou'dti do mantad do baino'. 24 Isai o pinapatahak dot Israil dot id tulun di minanakau dau? Tuhan i', tu' nokowonsoi toko' i' do dusa dot id dau. Om a' toko' minumboyo' di ponuhuan dau, om a' toko' tuminanud di ponudukan dau. 25 Gowoi poddi do popurimonon toko' dau do kototogod dau, om minoningkau iyau do pisangadan do ponginggorit dati'. Om miagal pod tapui i kototogod dau do monorob do pointongkop dot Israil, nga' a' toko' i' koilo ondung nunu i nosiliu'ddi om a' toko' mininsingilo do mantad di nongosiliu'ddi.
Minamatos o Kinorohingan do Popoidu' di Tulun Dau
1 Oi Israil, pokinongou nod boros do Tuhan, “Kada' poddosi, tu' posion ku i' kopio iya'. Om nolohou ku no iya' do ngaran nu o rinait ku, tu' iya' no i winonsoi ku om songonuon ku. 2 Om soira' nopod sumoborong ko do waig dot aralom om woyoon ku i' iya', om a' ko i' oolitan do kosusaan; om soira' nopo do sumalag ko'd tapui om a' ko i' osorob, a' ko i' orualan di pogumbalan dot awagat do rumikot dot id diya'. 3 Tu' iyoho' no i Tuhan, i Kinorohingan nu. I Kinorohingan dot Israil dit olidang, i mamasi diya'. Patahakon ku nopo o Masir do potingolonon diya', om patahakon ku o Etiopia om Siba do posowolion diya'. 4 Patahakon ku nopo o koinsanai'd tulun do posowolion diya', tu' kigatang kopio ko i' dot id doho', om osianan oku i' diya' om pusohon ku iya', iri no o kapatahakan ngai' ku do bansa' do posowolion diya' do matai. 5 Kada' poddosi om kada' koluhoi o ginawo, tu' moyo-woyo' oku i' diya' do mongintirung diya'. Om suhuon ku nondo do tumimung, i tulun nu do mantad hilo'd koulayon om mantad hilo'd kotonobon. 6 Suhuon ku nondo i pomogunan do hilo'd utara do popologos diyolo' do mamanau, om oduhan ku i pomogunan do hilo'd salatan do momusus diyolo'. Pologoso' nod gumuli' i tangaanak ku do mantad hilo'd pomogunan dit osodu', om mantad do hilo'd tisan do pomogunan. 7 Tu' iyolo' no o tulun ku di pinungaranan do ngaran ku, om winonsoi ku iyolo' do popoinggayo doho',” ka.
Israil no o Sasi' do Tuhan
8 Boros kad Kinorohingan, “Lohowo' no i tulun ku do mongoi do hilo'd pomisaraan; kimato i' daa iyolo' nga' a' i' kokito, kitolingo i' daa nga' a' i' iyolo' korongou. 9 Suhuon ngai' no i bansa' do tumimung, suhuon ngai' no i payat do mogititimung. Isai no diyolo' o milo do poposunud dit osiliu dot id dabantalan? Isai no diyolo' i pinoposunud mantad dit osiliu do dinondo? Pologoson no i piro-piro o sasi' do mokinongou om poboroson dot otopot iyolo'. 10 Oi tulun dot Israil, iya' no o sasi' ku, pinili' ku iya' do sumiliu'd susuhuon ku, om kotutun ko indo doho' om otumbayaan ko, om kosuhut ko dot iyoho' no o Kinorohingan om aiso' no o suwai ko' iyoho'. Iyoho' noo o Kinorohingan, aiso' i' o ponokokinorohingan do suwai ko' iyoho' di gulu om aiso' do koimbagu. 11 Iyoho' noo o Tuhan, om iyoho' noo o kapasi dokoyu. 12 Pinoboros mantad ku it osiliu dot id dabantalan, om ruminikot oku do minonulung dokoyu. Aiso' i' o kinorohingan do suwai do nokoumbal do minomonsoi'd miagal diti, iyokoyu no o sasi' ku. 13 Iyoho' no o Kinorohingan, om Kinorohingan kasai' oku no. Aiso' i' o koidu' do mantad id kuasa' ku, om aiso' o milo do monimban di natantu' mantad ku do wonsoyon ku,” ka dau.
Pinoidu' do Mantad Hilo'd Babil
14 Poingkaa no o boros do Kinorohingan dot Israil dit olidang, i Tuhan do minamasi diya', “Monuhu' oku do soudor do mongoi pamasi dokoyu do mantad id tulun do Babil, habaon ku nondo i wawayaan do bandar, om osiliu nondod tihad i pinongkisan do tulun do Babil dot atataadan. 15 Iyoho' no o Tuhan, i Kinorohingan nu dit olidang, winonsoi ku iya', oi Israil, om iyoho' no o raja' nu,” ka dau. 16 Tontok di gulu po om winansayan do Tuhan do ralan o padarapas dilo rahat, i ralan di kawaya' do waig di kitumbak dot agayo. 17 Pinatai dau o soudor dit ogumu' kopio, soudor di kikorita'-kuda' om i kikuda'. Kapatai nopo iyolo', om a' no nokotungag kawagu, miagal po iyolo' di tapui do pinisok. 18 Nga' boros kad Tuhan, “Kada' sondiu di nongosiliu di maso di notoliban, ko' minsorou po di nongosiliu di gulu po. 19 Suwai ko' piontong kou nodti wonsoyon ku dot id dabantalan, tumimpuun no dot okito dokoyu do dinondo! Momonsoi oku nondod ralan do hilo'd tana' do kowotuan, om poluyungon ku nondo o bawang do hilo'. 20 Om iri piya'ndo nintorusan nga' momusou i' doho', om i toni om i burung unta nga' mamarayou i' doho', do tontok di popoluyung oku do bawang do hilo'd tana' do kowotuan, do manahak do waig dot id tulun di nopili' ku. 21 Iyolo' no i tulun do winonsoi ku do bagi' doho', om modsinding nondo iyolo' do mamarayou doho',” ka dau.
Dusa dot Israil
22 Poingkaa no o boros do Tuhan, “Nga' apaasan kou'ddi doho', oi Israil; a' kou noddi tumuku' dot id doho'. 23 A' kou pinapatahak do dumba' dot id doho' do maan do porsombahan di sorobon, om a' kou minomusou doho' dot i porsombahan dokoyu di sumbolion o maan do pomusou. A' oku i' minononsog dokoyu do papatahak dot ogumu' o porsombahan di sumbolion, om a' oku minokianu do kominyan do pongudipon ku dokoyu. 24 A' kou i' minomoli do kominyan do patahakon dot id doho', om a' kou pinoposonong do ginawo ku dot i lunok di tayam-tayam dokoyu o maan do poposonong do ginawo ku. Suwai ko' winagatan oku nogi' dokoyu do dusa dokoyu, om nuru oku dokoyu do kasalaan dokoyu. 25 Nga' iyoho' i', i Kinorohingan o mangampun do dusa dokoyu, om mangampun oku pogi' nga' iyo noddi o kowoyo-woyoon ku. Om a' ku i' sorohon kasai', i dusa dokoyu. 26 Kainou mongoi do hilo'd pomisaraan; om poboroson ngai' no i poboroson dokoyu, poboroson no i hal dokoyu, om pointalangon no dot a' kou kasala'. 27 Nokowonsoi'd dusa i taki-aki dokoyu dit id gulu i' kopio, om nokowonsoi ngai'd dusa dot id doho' i boyoon dokoyu. 28 Om minonosomu' ngai' it imam dokoyu di kinoiyonon ku, om iri noddi o kinapalagasan ku do naraag ot Israil, om pinologos ku'ddi i tulun ku do nindaraat,” ka dau.
Tuhan no o Kinorohingan
1 Boros kad Tuhan, “Pokinongou no do dinondo, oi Israil, i susuhuon ku, om i tulun do nopili' ku, i sinakagon di Yakub. 2 Iyoho' no i Tuhan o minomonsoi diya', om mantad po di pinogkosusu ko om nuhupan ku no iya'. Kada' no poddosi, tu' iya' no o susuhuon ku, om i tulun di nopili' ku om i kosianan ku. 3 Onuan ku indod waig i tana' di tuuhan, om popoluyung oku'd bawang dot id tana' dit otuu. Om potuntugon nondo o sinundu ku dot id tangaanak nu, om potuntugon ku o barakat ku dot id sinakagon nu. 4 Om sumuni nondo iyolo' do miagal di sakot dot opiyopos, om miagal di guas do gandarusa do hiri'd tisan do bawang. 5 Om sorompori-pori nopondo i tulun do bansa'd suwai do momoros do ‘Tuhan o sanganu doho',’ ka. Om rumikot nondo iyolo' do mongoi sugku' di tulun dot Israil. Om sorompori-pori nopondo iyolo' do potulis do ngaran do Tuhan do hiri'd longon diyolo', om mangakun do tulun iyau di songonuon do Kinorohingan,” ka. 6 Poingkaa no o boros do Tuhan it Osundu Kopio, i raja', om i mongintirung dot Israil, “Iyoho' no it id gulu kopio, om iyoho' it id tohuri kopio, iyoho' noo o Kinorohingan, aiso' no o Kinorohingan do suwai ko' iyoho'. 7 Haro tu' daa o suwai do minilo do minomonsoi di nowonsoi ku? Isai tuu daa o milo do pinopoboros mantad dit osiliu dot id dosunsudan, do mantad di timpuun i', om gisom do kooyion do maso? 8 Kada' poddosi, oi tulun ku; oilaan nu i' do nokoboros mantad ku no, it osiliu dot id dabantalan do mantad poddi gulu po kopio om gisom do dinondo, om iyokoyu no o sasi' ku. Haro po toi o Kinorohingan do suwai ko' iyoho'? Haro po toi o Kinorohingan do suwai di kisinundu dit a' ku insan korongou?” ka dau.
Pogoduhan do Modsubak do Tingolig
9 Koinsanai di tulun di momonsoi do tingolig om tulun no dit aiso' o guna', om i ponokokinorohingan diyolo' dit iupus-upus kopio diyolo' nga' aiso' i' tomod o guna'. Tulun nopo di tumuku' dot id ponokokinorohingan do miagal diri om aiso' i' o toila-ilaan om bolou om ointingayam nondo iyolo' do koimbagu. 10 Aiso' i' tomod ot aanu-anu do momonsoi do tingolig do tambaga' om tumuku' nondo dot id tingolig diri do maan do ponokokinorohingan! 11 Koinsanai do tulun di tumuku' dot id tingolig diri om ointingayam nondo. Tulun nopo di momonsoi'd tingolig om tulun i' toomod, a' i' poimaha' ko' wokon. Pologoso' no iyolo' do rumikot dot id bisara' om atantu' no dot ooris iyolo' om ointingayam. 12 Manu no i tukang tambaga' do tambaga om lanakon no dot id tapui. Poingigit di longon dau dot okoris o tukul do ponukul di tambaga' om owonsoi nondo iri. Om tontok di momonsoi iyau'ddi om louson i' iyau, om tuuhan om ohuyan. 13 Tipongon no di tukang kayu i kayu, om lukisan no dau iri do poiyaan, do kapur o pomolukis. Om kikiran nondo dau iri dot i pakakas dau o pongikir om wonsoyon nori do miagal-agal do tulun dit oligkang kopio o koinan-inano', om poilihon nondo dau iri do hiri'd walai dau. 14 Haro i' do kayu sedar o ngoyon dau tagado' do maan do wonsoyon diri, om haro i' do kayu sedar, ko' kayu ok do mantad hilo'd gouton. Om haro id mananom iyau do kayu sipres om mandad i' do rasam do poposuni'ddi. 15 Somputul nopo di kayu'ddi om maan do tulun do siduwon, om somputul no om wonsoyon do tingolig. Iri nopo i somputul di kayu nga' maan do pogomutan, om maan do pogonsok do roti, om iri no somputul om maan do ponokokinorohingan do tukuon dau. 16 Somputul nopo di kayu nga' pogudung do tapui, om pogonsok dau do tikanas. Kanon nondo dau i tikanas diri om ayahan nondo ot opurimanan. Om magamut no iyau om momoros nod, “Osonong nod alasu-lasu'! Osonong noti tapui do pogomutan!” ka. 17 Nga' iri no noolu-olu' di kayu'ddi om wonsoyon dau do tingolig, om motud nondo iyau do tumuku'ddi. Om sumambayang nondo iyau dot id tingolig diri do poingkaa, “Iya' no o kinorohingan ku --- posion oku no!” ka dau. 18 Tulun nopo do miagal diri om adalaan no kopio kabasug gisom dot a' no iyolo' kosuhut di wonsoyon diyolo'. Somponon nopo diyolo' o mato om pomusarahan diyolo' do mantad id katapatan. 19 Om i gompomonsoi'd tingolig nga' a' no kopio milo'd momusorou om a' koilo do momoros do poingkaa, “Sinorob ku i' o somputul dilo kayu. Pinogonsok ku do roti om pinomoluguan ku'd daging di nakan ku. Om iri no topod di kayu'ddi om winonsoi ku do tingolig. Om diya oku noddi do tumuku' dot id kayu i' tomood!” ka. 20 Osonong nogi' do mangakan do pupuk o tulun diri ko' momonsoi do miagal diri. Napalid no kopio iyau di pomusorou dau do dongkababasug gisom dot a' no iyau milo'd tulungon. Om a' no dau okunon dot iri nopo i tingolig di poingigit dau om okon i' ko' Kinorohingan kopio.
Tuhan i Gompomonsoi om Gampamasi
21 Boros kad Tuhan, “Soroho' noti, oi Israil, soroho' no do susuhuon ku iya'. Winonsoi ku iya' do sumiliu'd susuhuon ku, om a' ku i' iya' lihu-lihuan. 22 Natanus ku no i dusa nu do miagal noddi haun, do natanggayan do tongus. Guli' no dot id doho', tu' iyoho' no i mamasi diya',” ka dau. 23 Oi tawan, pimpangkis no dot atataadan, oi kinoiyonon dot id saalom diti tana', pimpangkis kou no. Oi nuluhon, om pointikid-tikid do kayu do hilo'd puru', nokointalang nod Tuhan o kogoyoo' dau tu' pinasi dau ot Israil, i tulun dau. 24 Iyoho' no o Tuhan, i Gampamasi diya'; Iyoho' no i minomonsoi diya'. Iyoho' no o Tuhan, i minomonsoi do koinsanai'd nunu nopo. Iyoho' noo o pinapawalad dilo tawan. Om tontok di winonsoi ku iti pomogunan, om aiso' i' o minuhup doho'. 25 Pobosugon ngai' ku i mogogontong do nasip, om a' ku pologoson dot abayaan i posunudon di tulun di mogogontong dit osiliu dot id dabantalan. Songkiwalon ku i boros do tulun dit oilo, om pointalangon ku dot iri nopo toilaan diyolo' nga' kababasug i' toomod. 26 Nga' soira' nopod poposunud i susuhuon ku dit osiliu dot id dabantalan, om soira' nopo do suhuon ku i susuhuon ku do pointalang dit osorou ku do wonsoyon ku, om bayaanon ku no kopio i pinosunud diyolo'ddi dot id dabantalan. Sunudan ku o Yorusalim do miyon indo kawagu o tulun do hilo', om sunudan ngai' ku i bandar do Yohuda dot owonsoi kawagu iyolo', tumungag ngai' indo kawagu i bandar diri do mantad id kinaraagan. 27 Iso' nopo o boros do monuhu' nga' arasak no ilo rahat, om rasakan ngai' ku ilo bawang nu. 28 Boros kangku dot id di Koris, ‘Iya' no o momorinta' do bagi' doho', om wonsoyon nu i' i ponuhuan ku diya' do momonsoi. Monuhu' ko nondo do momonsoi kawagu do Yorusalim, om powonsoyon i poimpahan do walai ku,’ kangku,” ka dau.
Pinili' do Tuhan i Koris
1 Nopili' nod Tuhan i Koris do sumiliu'd raja'! Nopili' no dau iyau do mangala' do koinsanai'd bansa'. Sinuhu' dau iyau do mongidu' do kuasa' di piro-piro o raja' om iwangan id Tuhan o wawayaan do bandar do wayaan dau, gisom dot a' nondo atabanan kawagu. Boros kad Tuhan dot id di Koris, 2 “Iyoho' no o mongiwang do ralan nu, om lampayon ku o konuluhanan om konulu-nuluan. Habaon ku o totobon do tambaga', om tipuon ku o salampad do basi'. 3 Onuan ku iya', do dapu' do mantad id kinoiyonon dit otuong om poillisok, om oilaan nu nogindo do Tuhan oku, om oilaan nu do nolohou do Kinorohingan dot Israil o ngaran nu. 4 Pilion ku iya' do monguhup dot Israil, i susuhuon ku, tu' iyolo' no o tulun di nopili' ku. Noonuan ku no iya' do pangkat dot agayo, mulong piya dot a' ko kotutun doho'. 5 Iyoho' no o Tuhan, om aiso' no o kinorohingan do suwai. Onuan ku i' iya' do kokorisan dit apatut dot aanu nu, mulong piya dot a' ko kotutun do ngaran ku. 6 Wonsoyon ku o miagal diri, om koilo ngai' i' o tulun do mantad hilo'd koulayon om korikot do hilo'd kotonobon dot iyoho' no o Tuhan, om aiso' no o kinorohingan do suwai ko' iyoho'. 7 Iyoho' i' o minomonsoi do totuong om tanawau, iyoho' i' o poporikot do barakat om kousungan. Iyoho' noo, i Tuhan, o minomonsoi do koinsanai'ddi. 8 Poporikot oku nondod kamanangan do mantad hilo'd tawan do miagal do rasam, om romiton nondod pomogunan o koposion. Om kopuriman nondod kosimbayanan om it otulid o hiti'd pomogunan, iyoho' no i Tuhan, o posiliu'dti,” ka dau.
Tuhan no o Momorinta' do Koinsanai'd Nunu Nopo i Songinwonsoi, om it Ongosiliu
9 Sumaap toi i kuron di minomorun dau, i kuron di miagal no di kuron do suwai? Muhot toi i kuron dot id tulun di minomonsoi dau dot, “Nunu o wonsoyon nu'ndo?” ka. Milo toi i kuron do moguhang dot a' oilo i minomonsoi dau? 10 Katama' i' toi o tanak do muhot di tapa' dau do, “Nokuro tu' miagal diti o pinomonsoi nu doho'?” ka. 11 Poingkaa no o boros do Tuhan, i Kinorohingan dot Israil, om i Tuhan do manantu' dot id dosunsudan. “Aiso' i' o kosorupayan nu do monguhot doho' do pasal do tangaanak ku, ko' momisunud po doho' ondung nunu ot apatut ku'd wonsoyon. 12 Iyoho' no i Tuhan, o minomonsoi diti pomogunan, om iyoho' nogi' o minomonsoi do tulun, om i pinopologos diyolo' do miyon do hiti'd pomogunan. Pinawalad ku o tawan do mikuwo'd sinundu ku, om kikuasa' oku i' dot id sawat do tadau, om tulan om rombituon. 13 Iyoho' no i minonuhu' di Koris do pinopowonsoi'ddi, om popowonsoi di komoyon ku om kogirot i' it otulid. Om lampayon ngai' ku nopo o ralan dit awayaan dau. Wonsoyon nondo kawagu dau o Yorusalim, i bandar ku. Om poiduwon dau i tulun ku di nangatangkap, aiso' i' o mamagadsi' dau ko' monisip po dau, do popowonsoi do hal diti,” kad Tuhan, it Osundu Kopio. 14 Poingkaa no o boros do Tuhan dot id Israil, “Asanganu nu nondo o kakayaan do Masir om Etiopia. Om i tulun do Siba dit angara-ranggou om angagayo o kinoulunan nga' osiliu nondo do turipon nu, om moyo' nopondo iyolo' diya' di songingkogos po iyolo'. Om motud nondo iyolo' dot id toguang nu, om okunon diyolo' do moyo-woyo' o Kinorohingan diya', om okunon diyolo' do Tuhan noo o Kinorohingan. 15 Kinorohingan nopo dot Israil i minamasi do tulun dau, om Kinorohingan i' di lumisok. 16 Iri nopo i tulun di momonsoi do tingolig, nga' ointingayam nondo, intingayamon nondo om indaraaton ngai' iyolo'. 17 Nga' Israil nopo om napasi nod Tuhan, om mompus-ompus i' i kamanangan diyolo'. A' i' kopio intingayamon i tulun dau, do gisom dot alaid, ka nondo diyolo',” ka dau. 18 Tuhan no o minomonsoi do tawan, om iyau noo o Kinorohingan. Iyau o minomorun om minomonsoi diti pomogunan, om otiru' i' om ogirot o pinomonsoi dau. Winonsoi dau iti do poiyanan do tulun, om okon i' ko' iso' o kinoiyonon di poinsuwai-suwai kopio. Iyau no i minomoros dot, “Iyoho' no o Tuhan, om aiso' no o kinorohingan do suwai. 19 A' oku i' poillisok do moro-boros, om a' oku pinopolisok di natantu' mantad ku do wonsoyon ku. A' i' minog o tulun dot Israil, do mogihum doho' do hiri'd kinoiyonon di posuwai-suwai, om it oingou. Iyoho' no o Tuhan, om otopot i' o poboroson ku, om iri no it otulid o pointalangon ku,” ka dau.
Tuhan it Osundu Kopio, om i Piro-Piro o Tingolig do Babil
20 Poingkaa no o boros do Tuhan, “Kainou tumimung, oi koinsanai dokoyu i nokopoggidu' do mantad id piro-piro o bansa'; rikot ngai' kou no dot id bisara'! I piro-piro o tulun di papabaris di tininganak diyolo' di kayu do winonsoi, om i sumambayang dot id ponokokinorohingan, dit a' kapasi diyolo' --- aiso' i' o toila-ilaan do tulun do miagal diti. 21 Kainou, om poboroson no o hal dokoyu do hilo'd pomisaraan; om pologoson nopo do mogiboro-boros i mogobi' dokoyu. Isai i pinopoboros mantad dot osiliu dot id dosunsudan di gulu po? Okon toi ko' iyoho', i Tuhan dit otulid, om i Kinorohingan di mamasi do tulun ku? Aiso' no o kinorohingan do suwai ko' iyoho'. 22 Guli' kou no dot id doho', oi koinsanai'd bansa' do hiti'd pointongkop do pomogunan, om apasi kou i'. Iyoho' noo o Kinorohingan. 23 Otopot i' o batos ku, om a' minsimban, sumumpa' oku dot id tinan ku: dot oinsanan nopondo o tulun do rumikot om motud dot id toguang ku, om mamatos nondo iyolo' do tumorodok do tumanud doho'. 24 Okunon nondo diyolo', dot iyoho' noo o koonuan do kamanangan om kokorisan. Nga' koinsanai dit araatan doho', om ointingayam no. 25 Iyoho' no, i Tuhan, o mamasi do koinsanai di sinakagon di Yakub, om royohon oku indo diyolo',” ka dau.
1 Iti no o kopupuson di piro-piro o tingolig do Babil; tinuku' daa di gulu po i Bil om i Nibo, nga' baino' nopoddi om pagandaron poddi iyolo' dot id kaladai om osiliu po do ginandar do hiri'd likud do tayam-tayam dit ongohuyan no. 2 A' i' milo do mamasi diyolo' i piro-piro o tingolig diyolo', natangkap no iyolo' om natanggayan. Iti no o kopupuson di piro-piro o tingolig do Babil. 3 Pokinongou kou no doho', oi sinakagon di Yakub, koinsanai di tulun ku, di noolu-olu'. Ginompi' ku i' iyokoyu, do mantad po di ponontianon kou nogi'. 4 Iyoho' no o Kinorohingan dokoyu di momogompi' dokoyu do gisom do molohing kou om kopurak o tobuk dokoyu. Winonsoi ku i' iyokoyu om gompion kasai' ku iyokoyu, uhupan kasai' ku i' iyokoyu om posion ku iyokoyu. 5 Boros kad Tuhan, “Isai po daa o poiyaan dokoyu doho'? Haro po toi o suwai do koiyo doho'? 6 Ukaban nod tulun o poiyanan diyolo'd tusin om posoliwanon no o tamas, om timbangon no diyolo' o pirok do hiri'd timbangan. Om mamagadsi' no iyolo'd tukang amas do momonsoi'd tingolig, om motud nondo iyolo' do tumuku' dot id tingolig diri. 7 Saanon no diyolo' i tingolig, om poingkokoton no diyolo' iri do hiri'd poiiyanan om hiri nondo iri do poingkakat; om a' no milo do mundaliu do mantad id kinoiyonon diri. Om ondung haro o sumambayang dot id tingolig diri om a' i' milo do sumimbar i tingolig diri, om a' milo do popoidu' dau do mantad id kosusaan. 8 Soroho' noti, oi tulun do kidusa, sorohon no kopio i nowonsoi ku. 9 Hondomon ngai' no i nosiliu di gulu po, om okuno' no dot iyoho' noo o Kinorohingan. Om okuno' no dot aiso' no o suwai do miagal doho'. 10 Mantad po di timpuun i' om nokoboros mantad ku no i kootuson, om mantad po di gulu po om nokoboros mantad ku no it osiliu dot id dabantalan. Nokoboros ku i' dot iri nopo i natantu' mantad ku do wonsoyon ku om abayaan i' kopio, om a' no milo dot antaban. 11 Momolohou oku'd tulun do mantad hilo'd koulayon, om rumikot nondo iyau do mantad hilo'd sodu', do sumaap do miagal do tombolog dit orongit, om wonsoyon ngai' nondo dau i natantu' mantad ku do wonsoyon dau. Iyo noddi o boros ku, om atantu' no dot abayaan iri. 12 Pokinongou kou no doho', oi tulun dit angasawat o ginawo, i momusorou dot osodu' po o kamanangan. 13 Poinsomokon ku no i tadau do kamanangan om a' nori osodu', a' no oinloidan i kamanangan ku. Posion ku i' o Yorusalim, om pusohon ku ot Israil,” ka dau.
Butusan o Babil
1 Poingkaa no o boros do Tuhan, “Oi Babil, lintuhun no do mantad hino'd tirikohonon nu di don raja', om irikau no do hilo'd pupuk do tana'. Di nopo di gulu po om miagal ko pod sumandak kolumis, om pomorintaan ko dit a' aala', nga' baino' noddi om naala' ko no om nosiliu ko'd turipon. 2 Ongoi ponutu do tapung do watu o ponutu, om iduwo ino tudung nu; om oluso' ino rasuk nu dit ongolumis, kongkongo' ino gaun nu do sumoborong dilo bawang. 3 Okito ko nondo'd tulun do poillabas, om indaraaton ko nondo om intingayamon. Om sumuli' oku nondo diya', om aiso' no o tongosongulun piya do koodu doho',” ka dau. 4 Pinopoidu' nopo dati' om i Kinorohingan dot Israil dit olidang, ngaran nopo dau om Tuhan it Osundu Kopio. 5 Boros kad Tuhan dot id Babil, “Kada' kohiyo, irikau nopod hino'd totuong, a' ko nondo roitan do ‘Raja'd tondu' do piro-piro o bansa.’ 6 Tontok dit otogod oku do tulun ku, om a' ku no iyolo' nakun do tulun ku iyolo'. Pinatahak ku iyolo' dot id suang do kuasa' nu, nga' a' ko i' minonginsian diyolo', tu' iri ngai' piya i molohing no nga' ninggorit nu i'. 7 Ondos nu daa om raja' kasai' ko nopo do gisom dot alaid, a' nu i' sinorou kopio iti, om a' nu sinorou mantad o kootuson diti. 8 Pokinongou pogi'dti, oi tulun dit asanangan do sumimbayan, ondos nu daa om aiso' no o koligagaanan nu om osimbayan ko no. Sorohon nu daa dot agayo no kopio o kuasa' nu, om aiso' no koiyo diya'. Minomusorou ko daa dot a' ko i' osiliu do tondu' di nopuadan, om a' ko atagakan do sinakagon nu. 9 Nga' sansaat noo, om insan no tadau, dot osiliu goduwo o miagal diri. Mamakai ko piya daa do toilaan do bobolian om limu', nga' atagakan kasai' ko nod sawo nu om tangaanak nu. 10 Osimbayan tomod daa o topurimanan nu dot id suang do karaaton; ondos nu daa om aiso' i' o kokito di wonsoyon nu. Napalid ko di toilaan om i kopintaro' nu, om boros ka nu'ddi, ‘Iyoho' no o kinorohingan om aiso' no o miagal doho',’ ka nu. 11 Orikatan ko nondo do kosusaan dit awagat kopio, om aiso' no tiso' di toilaan nu di dong bobolian do koodu'ddi. Tumigowo nopondo o karaagan do rumikot dot id diya' --- i karaagon dit a' nu i' daa soro-sorohon! 12 Poopio' ngai' nopo i limu' nu om i gimat nu, tu' mantad po dit okoro' ko po om iri ngai' no o pinakai nu. Milo i' doti' iri do monulung diya' om nunu koilo-ilo, nga' milo ko i' dotindo do monompurolosi di pisangod nu. 13 Aiso' no o pokukurayan nu, do mulong piya do nosihatan ko. Porikoto' nopo i mogogontong, do mongoi pamasi diya'. Om porikoton i tulun di minsingilo dilo rombituon, om i mongilo do karalan-ralano' om wolit dilo tawan, om i monikid tulan nopo do momisunud diya' ondung nunu it osiliu dot id diya', dot id maso'd tabantalan. 14 Iyo pondo iyolo'd sakot do nokoring di sorobon do tapui, om a' no iyolo' kapasi do tinan diyolo'. Adalaan nondo kalasu' i sinikit do tapui dot id diyolo', om okon no ko' tapui di pogomutan. 15 Iri-iri no it osonong do milo diyolo'd wonsoyon dot id diya', i mogogontong, di pinagandasan nu do solinaid nu do poimpasi. Tumongkiad ngai' nopondo iyolo' om sompori-pori nopod mogidu', om aiso' no o tiso' diyolo' dot oolu' do monulung diya',” ka dau.
Kinorohingan no o Kikuasa' dot id Sawat di Maso dot id Dabantalan
1 Pokinongou pogi'dti, oi tulun dot Israil, om iyokoyu i sinakagon do Yohuda, sumumpa' kou dot id suang do ngaran do Tuhan, om momoros kou do tumuku' kou dot id Kinorohingan dot Israil, nga' aiso' i' o tiso' di pinoboros dokoyu'ddi do topoton kopio dokoyu. 2 Nga' oondos tomod kou indo do momoros, do tulun kou di poingiyon dot id bandar dit olidang, om mogondos kou do Kinorohingan dot Israil, i Tuhan, it Osundu Kopio. 3 Boros kad Tuhan dot id Israil, “Nokoboros mantad ku no di gulu po it osiliu dot id maso do tabantalan, om sigog iddi do wonsoyo' kopio ku iri. 4 Oilaan ku i' dot osurilog ko, om miagal po di basi' om tambaga' kokodou o ginawo nu. 5 Om gowoi poddi do pinoboros mantad ku di gulu po it id dosunsudan nu, pinosunud mantad ku i piro-piro hal dot osiliu dot id dabantalan, om aantaban ko i' do momoros dot iri i tingolig nu o pinoposiliu'ddi. 6 Koinsanai'ddi pinoboros mantad ku di gulu po om nabayaan ngai' noddi do baino'; om iyokoyu nga' mangakun no dot otopot ngai' i nokoboros mantad ku di gulu po. Om sunudan ku nondo iyokoyu do hal do wagu, i piro-piro ot osiliu dit a' ku po insan pointalango' di gulu. 7 Iti nogindo dinondo do wonsoyon ngai' ku iti; aiso' i' o nosiliu do miagal diti di maso do notoliban. Ondung haro daa om atantu' no do momoros ko do noilaan ngai' nu no o pasal diti. 8 Oilaan ku' i' dot a' ko milo do ponongkuyaanan, tu' nabantug ko no do sumasaap. Om iri noddi ot a' nu nokorongou-rongou do pasal diti, om iso' poddi o boros di habar diri nga' aiso' i' o nokorikot dot id tolingo nu. 9 Pususon ku i' o kototogod ku, om a' ku i' iyokoyu patayon, om royohon indod tulun o ngaran ku. 10 Noumbalan tiya' no dot id tapui do koinggoritan, do miagal di pirok tu' sompipion do tapui. Nga' noilaan ku noddi, dot aiso' i' kopio o guna' nu. 11 Iri nopo i winonsoi ku'ddi om iyolo' i' o kinapamansayan ku. Tu' mada' oku i' dot a' pusohon o ngaran ku, om mada' oku do haro o kabahagi' do kagayaan ku, dit apatut do doho', tu' doho' noddi,” ka dau.
I Koris, i Boyoon do Nopili'd Tuhan
12 Poingkaa no o boros do Tuhan, “Pokinongou no doho', oi Israil, i tulun di linohou ku. Iyoho' no o Kinorohingan nu, it id gulu kopio, om it id tohuri kopio, iyoho' noo o Kinorohingan. 13 Longon ku i' o minomonsoi do pinoimpahan diti pomogunan om i pinapawalad dilo tawan. Tontok do lohowon ku o pomogunan om tawan, om olomus nopo iyolo'd rumikot. 14 Timung ngai' kou, om mokinongou kou no! Aiso' i' o tiso' di tingolig do milo do poboros mantad dot iri nopo tulun di nopili' ku om mongoi panangod do Babil; om nunu nopo i ponuhuan ku dau'd momonsoi, om iri no o wonsoyon dau. 15 Iyoho' no i pinopoboros diri om i minomolohou dau; woyoon ku i' iyau, do gisom dot owonsoi dau i nosorou mantad dau do wonsoyon dau. 16 Insomok ngai' kou no doho', om mokinongou kou no diti poboroson ku; mantad poddi gulu po om poinsondot i' o pomomoros ku, om binayaan kasai' ku i' i boros ku,” ka dau.
I Natantu' Mantad do Tuhan do Wonsoyon Dau dot id Tulun Dau
Om baino' noddi om suhuon oku'd Tuhan, it Asawat Kopio, do mamanau, om nonuan oku dau di rusod dau. 17 Poingkaa o boros do Kinorohingan dot Israil dit olidang, i minamasi diya', “Iyoho' no o Tuhan, i Kinorohingan nu. Orohian oku do monuduk diya' di popoinsonong diya', om potunud oku diya' dot id ralan dit apatut nu'd susuyon. 18 Ondung otorodok ko'd mumboyo' dit oturan ku, om lumuyung nondo o barakat dot id dokoyu do miagal di bawang dot a' rumasak. Om a' ko apagon do kaanu'd kamanangan, do miagal no di tumbak do rahat di rumuab dot id tisan do rahat. 19 Om sinakagon nu nga' miagal pod togis kogumu', om piantangan kopio ku iyolo' om a' i' iyolo' apatai,” ka dau. 20 Soliwan no do mantad hilo'd Babil, poggidu' no, popinsunudo' no do mikuwo'd otood, popinghabaro' noti do hinonggo nopo: “Napasi nod Tuhan ot Israil i susuhuon dau!” kanto. 21 Tontok di pinawaya'd Tuhan i tulun dau do hilo'd tana' do kowotuan dit alasu', om a' i' iyolo' noinggorit do tuuhan. Tu' pinoluyung i' dau o waig do mantad id tontolob do tinumon diyolo', pinitas dau i tontolob, om luyung nopoddi o waig do mantad hiri. 22 “Aiso' i' o kosimbayanan do tulun di kidusa,” kad boros do Tuhan.
Israil o Tanawau do Koinsanai'd Bansa'
1 Pokinongou kou no do boros ku, oi koinsanai'd bansa' di hino'd sodu'. Iyokoyu i songingiyon do hilo'd piro-piro o pulou dit id sodu' kopio. Tontok dit a' oku po nopogkosusu om nopili' mantad oku nod Tuhan, om nolohou oku dau do sumiliu'd susuhuon dau. 2 Pinatarom dau i boros ku gisom do miagal pod gayang katarom, tinirung oku dau di longon dau. Siniliu oku dau do miagal do pana' dit alahis om i posodia' nod papanaon. 3 Boros ka dau dot id doho', “Oi Israil, iya' no o susuhuon ku, om royohon oku nondod tulun dot iya' o kapamarayahan,” ka. 4 Boros kangku, “Miningudipon tomod oku, om aiso' i' o kinotutuk-tutukon, nokototos oku no, gisom do naayi' o goos ku om aiso' i' o naanu-anu ku,” kangku. Nga' otumbayaan oku i' kopio do mogobi' o Tuhan doho', somulian oku i' dau do miontok di nongowonsoi ku. 5 Tontok dit a' oku po nopogkosusu om nopili' mantad oku nod Tuhan, siniliu oku dau do susuhuon dau do momoyo' di tulun dau'd muli'; om popogisosompuru di tulun dot Israil di nokotompias. Onuan oku id Tuhan do kosuahan, om iyau no o tadon do kinoris ku. 6 Boros kad Tuhan dot id doho', “Haro po o karaja' dit awagat ko' iri do patahakon ku diya', oi susuhuon ku. Okon nopo ko' mononduli' ko di kagayaan do tulun dot Israil di nongoolu-olu', nga' silihon ku nogi' iya' do tulinau dot id koinsanai'd bansa', om apasi ngai' ku i' iti pomogunan,” ka dau. 7 Boros kad Kinorohingan dot Israil, iyau i gampamasi, dot id tulun dit indaraaton om i karaatan do koinsanai'd bansa', i susuhuon do piro-piro o pomorinta', “Kokito ngai' nondo i raja' do wonsoyon ku, om mingkakat nondo iyolo' do sumuwau doho'. Om i piro-piro o pomorinta' nga' motud ngai' nopondo do tumuku'; tu' iyolo' nga' kokito indo'ddi,” ka dau. Osiliu pogi' o miagal diri nga' pinili' nod Tuhan i susuhuon dau dit otorodok, minomili' nopo om i Kinorohingan dot Israil dit olidang.
Wonsoyon Kawagu o Yorusalim
8 Boros kad Tuhan dot id tulun dau, “Orikot nopondo o maso ku do mamasi dokoyu, om pointalangon ku nondo o kosianan ku, om simbaron ku o sambayang dokoyu do mokitulung. Gompion ku i' om intirungan ku iyokoyu, om momonsoi oku nondod tumpongo dot id koinsanai'd bansa', dot iyokoyu o pawayaan ku. Om pologoson kawagu ku'ndo iyokoyu do momogun-mogun do hilo'd tana' dokoyu di notongkiadan tomod do dinondo. 9 Polobuson ku nondo i tulun di songinggiil, om angatan ku dot id tanawau i tulun dit id suang do totuong. Om hiri piya iyolo'd nulu-nulu dit aiso' o sumuni, nga' haro ngai' i' diyolo'. 10 Om a' indo iyolo' insan do louson ko' tuuhan po, a' i' iyolo' orualan di kolosuo'd tadau om a' orualan di kolosuo'd tana' do kowotuan. Tu' woyoon ku i' iyolo', iyoho' it osianan diyolo', woyoon ku i' iyolo' do kumaa dot id kinoiyonon dit ogumu' o tudan do waig. 11 Momonsoi oku nondod ralan do poinsusui di konuluhanan, om potingon ngai' ku o ralan. 12 Somirikot no i tulun ku do mantad hilo'd sodu' do mantad hilo'd utara, om hilo'd kotonobon, om hilo'd Sinim, i ponong hilo'd salatan,” ka dau. 13 Oi tawan, podsinding no, oi pomogunan pamangkis no dot atataadan, oi konuluhanan, podsinding no dot aarapadan. Rumikot no o Tuhan do mongoi ponginsasamod di tulun dau, om insianan i' dau i tulun dau dit oinggorit. 14 Nga' boros ka di tulun do Yorusalim, “Notongkiadan toko' nod Tuhan, om nolihuan toko' no dau,” ka. 15 Nga' boros kad Tuhan, “Kolihu toi o tina' di tanak dau, om a' toi iyau osianan di tanak do pinogkosusu dau? Mulong piya daa dot olihuan do tina' i tanak dau, nga' iyoho' nopo, i Tuhan, om a' i' kolihu dokoyu. 16 Oi Yorusalim, a' ku i' kopio iya' olihuan, tu' nokotulis ku no o ngaran nu dot id palad ku. 17 Oruhai nod korikot i mononduli' kawagu diya', oruhai no kopio, om tumongkiad no i minamaraag diya'. 18 Pikoroontong pogi' do hino'd posorili' nu, om antangan no ondung nunu o nosiliu, tumimung no i tulun om poulian no diyolo'. Om moro-boros oku dot id suang do ngaran ku, iyoho' i Kinorohingan do poimpasi, dot atantu' no dot oondos ko di tulun nu, do miagal poddi tondu' do kumawin tu' oondos di pongillumis do tinan dau. 19 Naraag daa om nopogitotongkiadan i pomogunan nu, nga' baino' noddi om adalaan iddi kokoro' i pomogunan diri do tiyonon di tulun di rumikot do mongoi pomogun-mogun do hilo'. Tu' iri nopo i tulun di minamaraag diya', om nokoinsodu' ngai' no diya'. 20 Om iri nopondo i tangaanak nu di pinogkosusu do hilo'd pomogunan di pinananggayan do pisangod, om momoros nondo dot id dokoyu do poingkaa, ‘Adalaan no kopio kokoro' iti pomogunan, manu po iyahai'd tana' dit agayo-gayo do maan dahai'd pomogun-mogunan,’ ka nondo diyolo'. 21 Om moro-boros nondo ot id suang do ginawo nu do poingkaa, ‘Honggo ngai' o tadon diti tangaanak? Isai o minogkosusu diyolo'? Isai o pinapagayo diyolo'? A' toi nangatagak ngai' do tinanggayan do pisangod i tangaanak ku, om notingkod oku noddi do maganak?’ ka,” ka. Nuyung oku do pinakaa do hilo'd pomogunan do pisangod, om iso-iso' oku no. 22 Boros kad Tuhan, it Asawat Kopio, dot id tulun dau, “Poinsawaton ku nondo o longon ku do pogintutunan do koinsanai'd bansa', om koinsanai'd bansa' di kokito do pogintutunan diri, om popoguli' nondo di tangaanak nu. 23 Miagal pondod tapa' dokoyu i piro-piro o raja', om miagal do tina' dokoyu i piro-piro o raja'd tondu'. Tumuku' nondo iyolo' do sumuwau diya', om minsiriba' dot id toguang nu. Om oilaan nu nogindo dot iyoho' no o Tuhan; om isai nopo i mogondos doho' om a' no oiman-iman,” ka dau. 24 Nga' boros ka dokoyu, “Aanu po tuu kawagu i dapu' di nangaanu di soudor do pisangod? Koidu' po tuu i tulun do natangkap do tulun dit orongit?” ka. 25 Poingkaa o tisimbar ku, iyoho' i Tuhan, “Iyo noddi ot osiliu. Koidu' i' i tulun do nangatangkap do soudor do pisangod. Om aanu i' kawagu i dapu' do nangaanu di tulun dot orongit. Saapon ngai' ku i' i pisangod nu, om poiduwon ku i tangaanak nu. 26 Binsuhuon ngai' ku nondo i pisangod dokoyu do gisom do mogipapatai iyolo' do sompi' ko' iyolo', om aawuk nondo iyolo'd raha'. Om oinsanan nopondo o tulun do koilo dot iyoho' no o Tuhan, i minamasi diya', it okoris kopio, iyoho' i Kinorohingan di Yakub om i pinopoidu' diya',” ka.
1 Poingkaa no o boros do Tuhan, “Ondos daa di tulun ku om nuyung ku iyolo' do miagal do kusai di magada'd sawo dau? Ondung iyo daa'ddi, om hinonggo o surat do nokopiadaan? Ondos daa diyolo' om pinadagang ku iyolo' dot id pisangod do miagal di tanak do padagangon do silihon do turipon? A' i' kopio miagal diri! Natanggayan pogi' iyolo' dot id ponguripanan, nga' nobungou i' di dusa om karaaton diyolo'. 2 Nokuro tu' aiso' i' o tongoiso' piya di tulun ku, do ruminikot do tontok di ruminikot oku di minongoi oku pomolohou diyolo'? Nokuro tu' a' iyolo' suminimbar do tontok di linohou ku iyolo'? Ondos daa diyolo' om adalaan oku koluhoi gisom dot a' oku no kapasi diyolo'? Milo oku i' do mamarasak dilo rahat do boros ku nod monuhu' o pamarasak ku, om milo oku do posiliu di bawang do tana' dot otuu, gisom dot apatai ngai' i sada'd hiri. 3 Milo oku i' do potuong dilo tawan, gisom dot iyo pondod mogihad do tulun di napatai,” ka dau.
Kotorodoko' di Susuhuon do Tuhan
4 Tinudukan oku'd Tuhan, it Asawat Kopio, do moro-boros, om milo oku i' do popokoris do tulun dit ongoluhoi. Om monikid kosuabon nopo iyau do papalangad doho', do mokinongou di potudukon dau doho'. 5 Nonuan oku'd Tuhan do pomusarahan dit obinsuhut, om a' oku i' suminaap dau ko' tuminolikud po dau. 6 Pataano' ku nopo o likud ku dot id tulun di momobog doho', om a' ku i' noduhan iyolo' do tontok di minongindaraat iyolo' doho', om tontok di ginayat diyolo' o ganggut ku, om dinulaan o rabas ku. 7 Nga' a' i' kopokoruol doho' i pongindaraat diyolo', tu' tulungon oku id Tuhan, i Kinorohingan. Om pogiroton ku nopo om polonuton ku o ginawo ku, tu' oilaan ku i' dot a' oku ointingayam. 8 Tu' osomok no o Kinorohingan, om pokotopoton oku i' dau. Haro toi daa i katama' kopio do papasala' doho'? Kainou mongoi pogiboro-boros do hilo'd pomisaraan, om pologoson nopo iyau do popoboros di kapasalaan dau doho'! 9 Tuhan i', i Kinorohingan dit Asawat Kopio, o mogobi' doho', om isai po daa'ndo o milo do papasala' doho'? Tumagak ngai' nopondo i papasala' doho', tumanus nopo iyolo' do miagal di kain di kanon do tanai. 10 Oi dokoyu i sumuwau do Tuhan, i Kinorohingan, om i mumboyo' do boros di susuhuon dau, mulong piya'd odondom o kotuongo' di ralan do wayaan dokoyu, nga' pogondos kou nod Tuhan, om sondiu kou no dau! 11 Koinsanai dokoyu i mogipapakat daa do mamaraag do tulun do suwai, nga' angaraag ngai' nopondo di pakat dokoyu dot araat. Tu' Tuhan indo o momonsoi'd miagal diri, om padalaan kou nondo dau do monginggorit.
Boros do Ponginsasamod do Yorusalim
1 Poingkaa no o boros do Tuhan, “Pokinongou kou no doho'. Iyokoyu i rumikot dot id doho' do mongoi pokitulung om it orohian do posion. Soroho' no i tontolob di tadon nu, om i luang do pinongonuan do watu, di tadon nu. 2 Soroho' no i taki nu, i Abraham, om i Sara; tontok di lohowo' ku i' i Abraham om aiso' i' o tanak dau. Nga' barakatai ku noddi iyau om onuwai ku no iyau'd tanak, om nonuan ku iyau do sinakagon dot ogumu'. 3 Insasamadan ku i' iya', oi Yorusalim, om koinsanai di poingiyon do hiri'd pogun nu. Mulong piya'd tana' do kowotuan o pomogunan diri, nga' silihon ku indod kabun, do miagal di tinanom ku do hilo'd Idon. Om hilo' nondo o tulun dot ongotood, om modsinding do mamarayou'd Tuhan diyolo'. 4 Pokinongou kou no doho', oi tulun ku, pokinongou kou nodti poboroson ku. Patahakon ku'ti toturan ku dot id koinsanai'd bansa', tu' poporikot i' do tanawau i ponudukan ku dot id diyolo'. 5 Oruhai oku nod rumikot do mongoi pamasi diyolo', osomok no i tadau do kamanangan ku. Om iyoho' nondo o momorinta' do koinsanai'd bansa', sangandad-andad no o pomogunan do hilo'd sodu' do korikatan ku, poingandad no iyolo' om mogondos iyolo' do ngoyon ku iyolo' posio'. 6 Tingaha' pogi' do hilo'd tawan, om luung do hiti'd pomogunan, tu' tumagak nondo ilo tawan do miagal do lisun. Om iti pomogunan nga' rumomuk do miagal do kain di nagansing, om matai ngai' i tulun do poingiyon do hilo' do miagal di langau. Nga' mompus-ompus kasai' i' i koposion do patahakon ku, om a' i' opupusan i kamanangan ku. 7 Oi tulun ku, pokinongou kou no doho', iyokoyu i koilo dit otopot. Iyokoyu i poopi' do ponudukan ku dot id suang do ginawo dokoyu, kada' kou poddosi do mulong piya do togodon kou ko' indaraaton kou'd tulun. 8 Tu' tumagak indo iyolo', do miagal di kain do kanon do tanai. Nga' mompus-ompus kasai' i' i koposion do patahakon ku, om a' i' opupusan i kamanangan ku,” ka dau.
Mokitulung do Tuhan i Bansa' dot Israil
9 Tungag no, oi Tuhan, om tulungo' no iyahai, pakayo' no i sinundu nu do pamasi dahai. Pointalango' no i sinundu nu do miagal di gulu po, tontok di tinotok nu i Rahab, i naga' do rahat diri. 10 Om iya' i' i minamarasak di rahat; om winansayan nu'd ralan o hiri'd waig, om aiso' i' o kinoligagaanan diyolo'. 11 Om iri nopondo i tulun do pinoidu' nu, oi Tuhan, om ongotood nopod muli' do hilo'd Yorusalim. Om sonsinding-sinding iyolo' om sampangkis-pangkis dot atataadan, om otood nondo iyolo' do gisom do poingompus tu' aiso' no o katangaban om aiso' o kosusaan diyolo'. 12 Boros kad Tuhan, “Iyoho' no i popokoris dokoyu. Nokuro tu' moddosi kou'd tulun tu' matai i' do miagal do sakot? 13 Iyo do nolihuan nu no o Tuhan, i Minomonsoi diya', om i pinapawalad dilo tawan, om i minomonsoi do pinoimpahan diti pomogunan? Nokuro tu' moddosi ko do ponompurolosi di tulun do mongulok-ulok diya'? Nokuro tu' moddosi ko di tulun di mamatai diya'? Tu' a' no korikot dot id diya' i kororongit diyolo' dit a' ogina-gina'. 14 Oruhai nod poiduwon i tulun do nangatangkap do pisangod, om osimbayan nondo o koposi-posion diyolo' om osima' iyolo'd taakanon. 15 Tu' iyoho' no o Kinorohingan nu; ngaran ku nopo om Tuhan, it Osundu Kopio, tingkahon ku nondo ilo rahat, gisom dot akahas po i tumbak. 16 Tudukan ku iya' diti boros ku, om intirungan ku iya' do longon ku, iyoho', i pinapawalad dilo tawan do hilo'd sawat om i pinopowonsoi di pinoimpahan diti pomogunan. Om okunon ku nondo o Sion do tulun di nasanganu ku,” ka dau.
Kopupuson do Koinggoritan do Yorusalim
17 Posik no, oi Yorusalim, urolos no om tumungag i'! Tu' noumbalan ngai' nu no i hukuman do pinaratu' do Tuhan dot id diya', tu' otogod iyau gisom diri do mikorobibi' ko po. 18 Aiso' no o tulun do popotunud diya', aiso' no o tiso' po di tulun do poingiyon do hino do mangahak diya'. 19 Duwo o kowoyoon do kosusaan do nokoontok diya'; naraag do pinisangadan o pomogunan nu, om nangapatai do nolikapan o tulun nu. Om aiso' i' ot osianan diya'. 20 Songingiliu po ngai' i tulun nu do hilo'd linsuk do ralan, tu' a' no iyolo' kogoos. Om miagal po iyolo' di paus di nokosulung do lawa', tu' nopurimanan no diyolo' i kototogod do Tuhan dit a' ogina-gina'. 21 Oi tulun do Yorusalim, awagat no kopio o koinggoritan do boboon dokoyu, gisom dot iyo kou poddi tulun do naawuk do mikorobibi'. 22 Poingkaa no o boros do Tuhan dokoyu, i Kinorohingan di mogobi' dokoyu, “Iduwon ku no i koinggoritan di pinaratu' ku dot id dokoyu do tontok dit otogod oku. Om a' kou nondo minog do monginum di waig dot anggur di popokorobibi' dokoyu. 23 Nga' patahakon ku nondo iri dot id tulun di minongulok-ulok dokoyu, i minonuhu' dokoyu do lumii dot id pupuk, om i pinopologos dokoyu do pingulakan do tulun, dot iyo kou po di rinomos do hilo'd ralan,” ka dau.
Poiduwon do Kinorohingan o Yorusalim
1 Tungag no, oi Yorusalim, tungag no! Panampakai nod pakayan dit olumis! Oi Yorusalim, i bandar dot olidang, polonuto' no o ginawo nu, tu' aiso' i' o tongosongulun piya di sosomu' do kosuang do wawayaan nu. 2 Oi Yorusalim, ingkakat no do mantad hino'd pupuk, tantago' no ino pupuk do nokosokot diya'. Oi tulun do Sion di nangatangkap do pisangod, iduwo' no ino rantai do pinongogos do liou dokoyu. 3 Tu' poingkaa no o boros do Tuhan dot id tulun dau, “Tontok di siniliu kou i' do turipon om aiso' i' o tusin do pinamagatang dokoyu, om miagal nogindoddi tu' aiso' i' o bayaran do popoidu' dokoyu. 4 Tontok di minongoi kou iyon do hilo'd Masir om iyokoyu i' o norohian do mongoi'd hilo', nga' sinansagan kou i' dot Asur do mogidu' do mantad id pomogunan dokoyu, om aiso' i' o pinamagatang diyolo' dokoyu. 5 Om baino' do hilo'd Babil nga' miagal iddi ot osiliu: tu' tinangkap kou di tulun do Babil om aiso' i' o pinamagatang diyolo' dokoyu. Om iri nopo tulun di mongulok-ulok dokoyu nga' minggayo-gayo nopo om mokirayou-rayou, om aiso' o kotingkadan do mongindaraat doho'. 6 Om rumikot indo o maso do mangakun kou do Kinorohingan oku, om kosuhut kou indo dot iyoho' i minoro-boros dot id dokoyu,” ka dau. 7 Songkuro'ddi o kosonongo' do kokito'd tulun di poporomut do habar do mamanau do sumusui di konuluhanan. Mongigit iyau do habar dot osonong, i habar do kosimbayanan, poposunud iyau do habar do kamanangan. Om popoboros dot id Sion do poingkaa, “Iri no Kinorohingan o kikuasa',” ka. 8 Mimpangkis po i tulun do madtatamong di bandar dot atataadan! Tu' iyolo' no kopio o nokokito do nokogulian do Tuhan do hilo'd Sion. 9 Pimpangkis kou nod atataadan, oi kinaraagan do hiti'd Yorusalim! Tu' poiduwon id Tuhan i bandar dau, om insasamadan dau i tulun dau. 10 Pointalangon indod Tuhan o sinundu dau dot antang-antangan do koinsanai'd bansa'. Om kokito ngai' indo o pointongkop diti pomogunan, do rumikot o Tuhan do mongoi pamasi. 11 tongkiad kou no kopio'd Babil, koinsanai dokoyu i mananaan do pakakas do Walai'd Sasambayangan dot Agayo! Om kada' kou ongoi igit di konunu-nunuan do sosomu'; lidangai no dokoyu o tinan dokoyu do tintod do mamanau. 12 Nga' tontok nopodti om a' kou no minog dot arau-arau do mamanau, om a' mumbal do mogolim-olim do mogidu'. Tu' woyoon kou id Tuhan, i Kinorohingan dokoyu, om posorili' iyau dokoyu do mongintirung dokoyu.
Susuhuon dit Oinggorit
13 Boros kad Tuhan, “Haro i' o kootuson do wonsoyon di susuhuon ku, om poinggoyoon indo iyau, om royohon. 14 Ogumu' o tulun do nokotigowo do nokokito dau di gulu po, tu' ara-raat no kopio o tinan dau gisom dot okon no ko' tulun o kokitanan. 15 Nga' baino' noddi om ogumu' o bansa' dot oimayaan dau, om iri pondo piro-piro o raja' nga' aiso' no o koungkomi, tu' oimayaan po. Om kokito nondo iyolo' om kosuhut dit a' diyolo' noilaan di gulu po,” ka dau.
1 Om boros ka di tulun do suminimbar, “Isai poddi o monongkuyaan diti posunudon dahai? Om isai o nokokito do sinundu'd Tuhan dit agayo kopio? 2 Orohian o Tuhan dot iri nopo susuhuon dau om miagal di tanom di momutolid dot id tana' dit okorop, om aiso' i' o kagayaan dau ko' koligkango' po di kobinsuhu'd tulun do momusou dau. Aiso' i' o nunu-nunu dot id dau di kabayayat do ginawo toko' do rumohian dau. 3 Nindaraat toko' iyau om niada' toko' iyau, nga' binabo i' dau i koinggoritan om i toruol. Aiso' i' o tongosongulun piya dot orohian do montong dau, om aiso' o momusou dau. 4 Nga' binabo i' dau i koinggoritan dit iyati' daa o mamabo, om tinanggung dau i toruol dit apatut daa dot iyati' o tumanggung. Nga' ondos toko' daa om hukuman do pinorikot do Kinorohingan i koinggoritan dau'ddi. 5 Nga' nosuhat pogi' iyau nga' gama' i' di dusa toko', om binobog iyau do gama' di karaaton toko'. Om hinukuman iyau, om apasi toko' i', om i suhat dau o nokolingos dati'. 6 Napalid ngai' toko' nopo do miagal di dumba', sompori-pori toko' nopo do mogihum do ralan. Nga' pinaratu' i' do Tuhan dot id dau, i hukuman dit apatut daa do porotuon dot id dati'. 7 Ninggorit tomod iyau, nga' minokilogos i' iyau, om a' i' iyau minungkomi. Miagal po iyau di tanak do dumba' di potikoroton no, om miagal do dumba' di potiguntingan no o hulu, tu' a' i' iyau minungkomi. 8 Tinangkap iyau om pinorotuan do hukuman, om nigitan do hiri'd pamatayan. Nga' aiso' i' o tongosongulun piya do momusorou do kootuson do koposion dau, napatai pogi' iyau nga' i dusa do bansa' toko' o kinapatayan. 9 Lobong nopo dau om id rolot do tulun dit araat, om linobong iyau dot id sugku' do tulun do kaya', do mulong piya dot a' iyau insan pomonsoi dot araat, om a' insan pongudut,” ka. 10 Boros kad Tuhan, “Korohian ku i' do noinggorit iyau, om apatai do sumiliu do porsombahan di sumbolion do maan do pangampun do dusa. Otogui indo iyau, om kokito di sinakagon dau, om owonsoi indo i korohian do Tuhan do pawayaon dot id dau. 11 Om katalib pondo i koinggoritan dau, om otood nondo kawagu iyau; om oilaan i' dau dot okon i' ko' aiso' toomod o komoyon di koinggoritan dau. Iri nopo susuhuon ku dit otorodok diri, om kasanangan kopio ku i', om binabo dau o hukuman do tulun dot ogumu', om ompunan ku indo iyolo' dot iyau o kopongompunan ku. 12 Norohian i' iyau do pinapatahak do koposion dau, om nokopuriman do kootuson di tulun dot araat, binabo dau o dusa do tulun dot ogumu' om suminambayang iyau do bagi' diyolo' om kaanu i' iyolo' do koompunan. Om onuan ku indo iyau do kinoiyonon dit asawat kopio, i kinoiyonon dot id pogialatan do tulun dit angabantug om i kikuasa',” ka dau.
Kosianan do Tuhan dot id Israil
1 Oi Yorusalim, miagal ko daa di tondu' dit a' maganak di gulu po. Nga' baino' nopo om milo ko nod modsinding, om mimpangkis dot atataadan! Tu' tangaanak nu nopo om ogumu' po, ko' tangaanak do tondu' dit a' insan kotongkiadai do sawo dau. 2 Poinggoyoo' no i kiim do tiyonon nu; ponoru-noruon po i tali om pogiroton no i pakagasan di tali. 3 Tu' paraladon ku nondo i tana' nu do ponong id wanan om ponong id gibang, om asanganu kawagu nu nondo i pomogunan di noiyon do bansa'd suwai. Om oponu' nondo kawagu'd tulun i piro-piro o bandar di nopogitotongkiadan. 4 Kada' kooris, tu' a' ko nondo ointingayam kawagu, om a' ko ohingi-hingi. Olihuan nu indo i kointingayamo' nu di sumandak ko po, om i koingoho' nu di nopuadan ko. 5 Tu' iyo pondod sawo nu i minomonsoi diya', ngaran nopo dau om Tuhan, it Osundu Kopio. Gampamasi nu nopo om i Kinorohingan dot Israil dit olidang, iyau no i momorinta' do pointongkop diti pomogunan. 6 Oi Israil, iya' nopo om miagal do tondu' dit omulok po di tinongkiadan do sawo dau om it adalaan tomod diri do tumongob. Nga' lohowon ko i' kawagu'd Tuhan do gumuli' dot id dau. Om mikuwo'd momoros iyau do poingkaa, 7 “Tinongkiadan ku daa iya' dot oruuhai, nga' romiton ku i' iya' kawagu do mikuwo'd osianan kopio oku diya'. 8 Tuminongkiad oku dot oruhai tu' otogod oku no kopio, nga' pointalangon kasai' ku indo dot id diya' o kosianan ku,” ka dau. Iyo noddi o boros ku, iyoho' i Kinorohingan, i Gampamasi diya'. 9 “Tontok nopo di poimpasi po i Nuu, om minamatos oku dot a' poluyud kawagu diti pomogunan. Om miagal nogiddi do baino' tu' mamatos oku dot a' tumogod kawagu diya', om a' oku nondo monogod om a' oku momohukum kawagu diya'. 10 Tu' mulong piya'd otuhan ngai' ilo nuluhon om ilo nulu-nulu, nga' a' i' otingkod o kosianan ku dot id diya', om i batos ku do monokiulud nga' igitan kasai' ku i',” ka dau. Iyo noddi o boros do Tuhan dit osianan diya'.
Yorusalim do Wagu
11 Boros kad Tuhan, “Oi Yorusalim, i bandar dot oinggorit, om it aiso' o pokukurayan, om it aiso' o monginsasamod. Wonsoyon ku indo kawagu i pinoimpahan diya', dot i watu dot olumis dit agayo o gatang o maan ku'd poimpahan. 12 Wonsoyon ku indo i walai nu dit akawas dot i watu do delima o powonsoyon ku, om wonsoyon ku i wawayaan nu dot i watu di mogulinau o powonsoyon ku, om wonsoyon ku i tolig do pointutuk diya' dot i watu dot agayo o gatang, om i watu di mogulinau do miagal do sinikit do tapui o powonsoyon ku. 13 Om iyoho' indo o monuduk di tulun nu, om onuan ku iyolo' do kosimbayanan om kouludan. 14 Iri nondo it otulid om it otopot o popogirot diya', om poinsoduwon ko do mantad id kopoddosian om i mongulok-ulok. 15 Ondung ngoyon kou'd tulun saapo', om okon i' ko' iyoho' o monuhu' diyolo', om isai nopo o sumaap diya' nga' aala' indo. 16 Iyoho' i' o minomonsoi di tulun do modsusupu', i tulun di magapui om i modsupu' di rapo-rapo do sumasangod. Nga' iyoho' nogi' o minomonsoi di soudor, i mamakai di rapo-rapo'ddi do maan do pamatai. 17 Nga' aiso' nondo o tiso' pod rapo-rapo do sumangod do kopokoruol diya'; om haro kasai' nopondo o ponimbar nu do koinsanai'd tulun di pasala' diya'. Obian ngai' ku i' i susuhuon ku om onuan ku iyolo' do kamanangan,” ka dau. Iri no o pinoboros do Tuhan.
Monginsian o Tuhan
1 Boros kad Tuhan, “Kainou, koinsanai dokoyu i tuuhan, inum kou no diti waig do nokosodia'. Kainou, koinsanai dokoyu it aiso' o tusin! Pomoli kou nod gandum om kanon nopo dokoyu iri! Nokosodia' no ot anggur om susu, dit a' pokibolian. 2 Nokuro toi tu' popimbolion dokoyu o tusin dokoyu dit a' kayahan? Om nokuro toi tu' oiyon dokoyu o gadsi' dokoyu do pomoli do taakanon dit a' kayahan? Pokinongou kou pogi' doho' om tonudon no o ponuhuan ku, om kaanu kou i' dit osonong, om koumbal kou do mangakan do taakanon dit awasiu kopio. 3 Pokinongou kou pogi', oi tulun ku, om rikot kou no dot id doho', rikot kou no dot id doho' om onuan ku i' iyokoyu do koposion dit otopot. Tu' momonsoi oku nondod tumpongo dot id dokoyu, dot i kosianan ku'd ogirot dot id di Daud i susuhuon ku, o kopongumpangaan ku. 4 Siniliu ku iyau do boyoon do soudor, om iyau no o sumiliu do sasi' dot id koinsanai'd bansa'. 5 Om momolohou kou nondo do bansa'd suwai, iyolo' nopo om a' i' daa kotutun mantad dokoyu, nga' baino' nopondo om manangkus nopo iyolo' do mongoi sugku' dokoyu. Iyoho' no, i Tuhan om Kinorohingan dokoyu, i Kinorohingan dot Israil dit olidang o posiliu do miagal diri; tu' pusohon ku i' om royohon ku iyokoyu,” ka dau. 6 Ihumo' no o Tuhan, om sambayang no dot id dau do maso pod osomok iyau. 7 Osonong nod simbanan di tulun dot araat i kowoyo-woyoon diyolo', om posimbanon diyolo' o pomusarahan diyolo'. Pologoson nod gumuli' iyolo' dot id Tuhan, i Kinorohingan, tu' monginsian i' iyau om olomus iyau do mangampun. 8 Boros kad Tuhan om, “Pomusorou ku nopo, om okon i' ko' miagal do pomusorou nu, om i kowoyo-woyoo' ku nga' suwai i' ko' mantad di kowoyo-woyoo' nu. 9 Tu' poingkuro nopo i tawan dot id sawat ko' iti pomogunan, om iyo nogiddi o pomusorou ku tu' asawat i' ko' mantad do pomusorou nu, om kowoyo-woyoo' ku nga' suwai i' kopio ko' i kowoyo-woyoo' nu. 10 Boros ku nopo om miagal di rasam, tu' sumondot do mantad hilo'd tawan do momoyopos diti pomogunan, posuni iri do totonomon om manahak do linsou' do maan do tonomon, om manahak do takanon dot akanon. 11 Om miagal nogiddi i boros do poboroson ku, tu' a' i' gumuli' dot id doho' dot aiso' o kotutuk-tutukon; tu' aiso' i' ot a' owonsoi di natantu' mantad ku'd wonsoyon, wonsoyon ngai' nopo di boros ku o koinsanai di pinonuhuan ku'd momonsoi. 12 Om tumongkiad kou nondod Babil do mikuwo'd otood kou, om posoliwanon kou di bandar dot id suang do kosimbayanan, om modsinding ngai' nondo i nuluhon om i nulu-nulu, om mimpangkis dot atataadan i kokoyuan. 13 Iri nopo korugian do dinondo om sowolian nondo do kayu sanobar, om kosowoli noddi sakot om kayu murad. Om iti nondo o tanda' di hino kasai' do poposorou dokoyu di nowonsoi ku, iyoho' i Tuhan, dot id dokoyu,” ka dau.
Kohompit Ngai' Nondo o Bansa'd Tulun di Songonuon do Kinorohingan
1 Poingkaa no o boros do Tuhan dot id tulun dau, “Wonsoyo' no dokoyu it otulid om i miontok do korohian ku, tu' oruhai oku nod mongoi pamasi dokoyu. 2 Barakatan ku i' i tulun di momusou do tadau'd Sabat om it a' kasala' o pamamakai'ddi; om tulun nopo dit a' momonsoi dot araat om osonong i' o wonsoyon ku dot id dau,” ka dau. 3 Iri nopo bansa'd suwai di nakaamung do tulun di nasanganu'd Tuhan om a' no minog do momoros dot, “Mada' i' o Tuhan do moyo' oku di tulun dau do tumuku' dot id dau,” ka. Om i kusai di noinggolian nga' a' no minog do momusorou dot a' iyau kohompit di tulun do nasanganu'd Tuhan, dot it a' iyau maganak o kopomusarahan do miagal diri. 4 Tu' boros kad Tuhan dot id kusai do miagal diri, “Ondung pusohon oku diya' dot i momusou ko do tadau'd Sabat o ralan nu'd momusou doho', om ondung wonsoyon nu i korohian ku om otorodok ko do momogompi' di tumpongo ku, 5 om osorou kasai' nondo o ngaran nu dot id suang do Walai'd Sasambayangan dot Agayo om id pogialatan do tulun ku, ko' mantad do kianak ko piya do tongokusai om tongoondu'. A' ko indo olihuan,” ka. 6 Om boros kad Tuhan dot id tulun di bansa'd suwai di minamung di tulun dau, om i tumuku' dot id dau, om i momusou do tadau'd Sabat om it otorodok kasai' dot id tumpongo dau, 7 “Angatan ku nondo iyokoyu do hilo'd Sion, i nulu-nulu dot olidang. Om onuan ku iyokoyu do kataadan do hiri'd Walai'd Sasambayangan dot Agayo. Om romiton ku indo o porsombahan di sumbolion di patahakon dokoyu dot id pananaraban do porsombahan ku. Om roitan nondo i walai ku do Walai'd Sasambayangan do koinsanai'd tulun do mantad id koinsanai'd bansa',” ka. 8 Nakabatos no o Tuhan, it Asawat Kopio, i pinopoguli' di tulun dau, i bansa'd Israil do mantad hilo'd pinananggayan do pisangod, do poporikot po kawagu iyau'd tulun do bansa'd suwai do mongoi sugku' diyolo'.
Hinukuman Ngai' i Boyoon dot Israil
9 Sinuhu'd Tuhan i piro-piro o bansa'd suwai do rumikot do miagal do nintorusan dit orongit do mongoi panabpo di tulun dau. 10 Boros kad Tuhan, “Bolou ngai' nopo i boyoon dit apatut daa do popoinsan di tulun ku! Aiso' i' o toila-ilaan diyolo'. Miagal ngai' nopo iyolo' di tasu dit a' musig. Milii-lii no iyolo' om mogunipi. Modop no o korohian diyolo'! 11 Miagal ngai' nopo iyolo' di tasu do godoot, it a' nopo milo dot ayahan. Aiso' i' o tosuhut-suhutan do boyoon diri. Sorompori-pori nopo iyolo' do momonsoi di korohian diyolo' om mogihum di diyolo'd kountungan. 12 ‘Kainou monginum do waig dot anggur,’ ka no di magagauk, ‘Om monotos toko' no do moginum! Tu' osonong-sonong po moti' o suab ko' mantad do tadau'd baino'!’ ka no diyolo',” ka dau.
Pinapalan i Modsusubak do Tingolig
1-2 Soira' nopod apatai o tulun dit osonong om koidu' no iyolo' do mantad id kosusaan om osimbayan do poundorong, do mulong piya dot aiso' o mamadul diyolo'. 3 Nga' iyokoyu nopo, i tulun di kidusa, om rikot nod hiti om butusan i'! Tu' iyokoyu nopo om miagal nopo di bobolian, om i gampahu' om i sundal, om i tulun dot araat! 4 Isai daa ot irak-irakan dokoyu? Isai daa o hingi-hingion dokoyu? Okon kou toi ko' tulun di sumasaap om i goudut? 5 Kowoyo-woyoon nopo dokoyu do modsubak di ponokokinorohingan dokoyu di kororombung om mogiampahu' kou do hiri'd lungung di kayu di pokolidangon dokoyu. Om sumbolion nogi' dokoyu i tangaanak dokoyu do maan do porsombahan do sumbolion do hiri'd koluang-luangan do pampang do hiri'd toning di tudan do bawang. 6 Om manganu kou no do watu dit olunau do mantad hiri'd kinoiyonon diri om tumuku' kou nondoddi do maan dokoyu do ponokokinorohingan. Potuntug kou do waig dot anggur do maan do porsombahan dot id watu'ddi om subakon dokoyu do porsombahan do gandum. Ondos kopio daa dokoyu om asanangan oku ngai'ddi? 7 Tumakad kou do hilo'd nuluhon dot angakawas do mongoi patahak do porsombahan do sumbolion om mongoi pogiampahu' do hiri'd timpak di nuluhon. 8 Pinoiyon dokoyu i piro-piro o tingolig dokoyu di kososomu' kopio do hiri'd wawayaan do walai dokoyu. Nokotongkiad kou no doho'; oluson nopo dokoyu o pakayan dokoyu om sumalakoi kou no do hiri'd toodopon dokoyu dit angagagayo do miwoyo' di piro-piro o tulun di kouhangan dokoyu, i godsian dokoyu do dumudun dokoyu. Om hiri nondo do tumotos kou do momonsoi do korohian do tinan dokoyu. 9 Mongumau kou om momowongi-wongi' om mongoi kou nogindo tuku' dot id di Molok, i tingolig dokoyu. Om monuhu' kou do piro-piro o susuhuon dokoyu do mongoi pogihum do tingolig do maan dokoyu do tukuon; om kopiriko-rikot iyolo' do hilo'd sodu', om hilo' piya id pomogunan do tulun do napatai nga' orikot i' diyolo'. 10 Ohuyan kou piya tomod do mongoi pogihum do ponokokinorohingan, nga' a' kou i' ababasan. Tu' osorou nopo dokoyu dot onuan kou di tingolig dokoyu do kokorisan, om a' kou i' oluhoi. 11 Boros kad Tuhan, “Isai kopio toi i ponokokinorohingan di monompurolosi dokoyu, gisom do mongudut kou nopo om olihuan oku dokoyu? Alaid oku nopo dot a' mungkomi om tumingkod kou no do tumuku' dot id doho'? 12 Ondos daa dokoyu om koontok kopio i wonsoyon dokoyu'ddi. Nga' pointalangon ku i' bondo kopio ino kowoyo-woyoon dokoyu, om iri ngai' piya'ndo tingolig dokoyu nga' a' no milo do monguhup dokoyu. 13 Soira' nopo do minglohou kou do mokitulung om pologoson ngai' nopo i tingolig dokoyu do mongoi pamasi dokoyu! Nga' alambayan nopo iri do ribut om otilib no! Nga' tulun nopo di mogondos doho' om kopomogun i' do hiri'd pomogunan diri om sumambayang dot id doho' do hiri'd Walai'd Sasambayangan dot Agayo,” ka dau.
Minamatos o Kinorohingan do Monulung om Momolingos di Tulun Dau
14 Boros kad Tuhan, “Pologoso' no i tulun ku do gumuli' dot id doho'. Iduwon ngai' no i koontobon do hiri'd ralan diyolo'! Rontisan no i ralan om sonongon no! 15 Iyoho' no o Kinorohingan dit Asawat Kopio om it Olidang, i kikuasa' do gisom do poingompus. Poingiyon oku dot id kinoiyonon dit id sawat om it olidang kopio, nga' poinsugku' oku i' do tulun dit osiriba' o ginawo om i kumorologo do dusa dau, om kogirot ku i' kawagu o kotumbayaan diyolo' om pagandasan diyolo'. 16 Okon i' ko' poompus-ompuson ku o kototogod ku om a' oku papasala' diyolo', tu' onuan ku i' iyolo' do koposion. 17 Hinukuman ku iyolo' om tinongkiadan ku tu' i dusa om i katamahao' diyolo' o kinopomohukuman ku. Nga' osurilog i' iyolo' om wonsoyon kasai' diyolo' i diyolo'd korohian. 18 Nokito ku no i kowoyo-woyoon diyolo' nga' lingasan ku i' iyolo'. Om woyoon ku indo iyolo' om tulungon ku, om insasamadan ku i tumongob. 19 Onuan ku indo do kosimbayanan o koinsanai'd tulun di hilo'd sodu' om i hiti'd somok! Lingasan ku indo o tulun ku. 20 Nga' tulun nopo dot araat om iyo po di rahat tu' a' nopo kododog, om iyo di tumbak dit a' nopo tumingkod do rumuab do mononggoi do rinomos om tana'. 21 Aiso' no o kosimbayanan do tulun di kidusa,” kad Tuhan.
Puasa dit Otopot Kopio
1 Boros kad Tuhan, “Puhadai nod minggarang! Sunudai no ot Israil, i tulun ku, di dusa diyolo'. 2 Aiso' i' o guna' diyolo' do sumambayang dot id doho' do monikid tadau, om momoros dot orohian kopio'd koilo do karalan-ralano' ku om orohian do mumboyo' do ponuhuan ku. Momoros iyolo' dot orohian dot onuan ku dot oturan dit otulid om asanangan kopio do tumuku' dot id doho',” ka dau. 3 Om ponguhot no i bansa'ddi do poingkaa, “Nokuro tu' minog toko' pod puasa ondung a' toko'd Tuhan antangan? Nokuro daa tu' minog toko' po do minsiriba' o ginawo ondung a' toko' dau pusohon?” ka diyolo'. Om boros kad Tuhan dot id diyolo', “Otopot nopo kopio om tontok di puasa kou om mogihum kou nod kountungan dokoyu om mongudipon kou di susuhuon dokoyu. 4 Poporongit no dokoyu i puasa gisom do mogisosongkiwal kou no om mogiuuhod. Ondos daa dokoyu om moningkau do ginawo ku dot orohian do mokinongou do sambayang dokoyu, i puasa' dokoyu'ddi? 5 Tontok nopo di puasa kou om inggoriton dokoyu o tinan dokoyu; om potukuon dokoyu o tulu dokoyu do gisom do miagal pod roun do sakot. Om pawalad kou do karung om papasasad kou'd pupuk do maan dokoyu'd todopon. Iri toi o komoyon dokoyu do puasa? Ondos daa dokoyu om orohian kopio oku di wonsoyon dokoyu do miagal diri? 6 Puasa nopo do korohian ku om miagal diti: Iduwon ngai' i pongulok-ulok di kokogos om it a' otulid di kawagat kopio, om poiduwon ngai' i tulun dit ulak-ulakan dokoyu. 7 Piduwaan no dokoyu do takanon i tulun di louson om posolokoyon no dot id walai dokoyu i tulun dit aiso' o walai om i mosikin. Om onuan no do pakayan i tulun dit aiso' o pakayan, om kada' pangada-kada' do monulung di koobpinayan nu di mokitulung diya'. 8 Om mulinau indo dot id dokoyu i kosianan ku do miagal di tadau di mulai nogi' do dongkosuabon, om iri suhat dokoyu nga' oruhai dot olingos. Om moyo-woyo' kasai' oku nopondo dokoyu do mamasi dokoyu; om iri no i karapahan ku o sumiliu do kointirungon dokoyu do posorili' dokoyu. 9 Tontok do sumambayang kou, om simbaron ku i' iyokoyu. Om soira' nopo do momolohou kou doho' do mokitulung om sumimbar oku i'. Tingkod kou nod mongulok-ulok do wokon, om tumingkod do rumongit, om tumingkod do mimboros dot araat. 10 Onuan nod takanon i tulun di louson, om tulungon no o tulun di haro o kosusaan. Ondung wonsoyon dokoyu o miagal diri om osiliu nopondod tanawau do miagal do tanawau di pitangaadau i totuong do posorili' dokoyu. 11 Om woyoon kasai' ku nopondo iyokoyu om pingyahanon ku iyokoyu do koinsanai dit ongosonong. Om gompion ku indo iyokoyu om osonong-sonong kasai' kou i' om okoris kou. Om miagal kou nondod kabun dit opiyopos kasai'd waig om miagal di tudan do waig dit a' insan dot arasak. 12 Om wonsoyon nondo kawagu diyolo' i bandar di laid no kosiliu'd pogun, om poimpahan nopo kawagu diyolo' i pinoimpahan di gulu po. Om abantug kou nondo do tulun di minomonsoi kawagu di tolig om walai di nangaraag,” ka dau.
Isomuli' di Tulun di Momusou do Tadau'd Sabat
13 Boros kad Tuhan, “Pusohon no o tadau'd Sabat, i tadau di pinotobilang do maan do don Tuhan. Kada' kou pomonsoi di dokoyu'd buruon do tontok do tadau'ddi. Pusohon no kopio o tadau'ddi tu' iri no o tadau do koundarangan, do ralan nopo dokoyu'd momusou om a' mimpanau do kumaa id kinoiyonon do suwai, om a' kumaraja' om a' mimboros di maan toomod. 14 Om otood kou nondo tu' sumambayang kou i' dot id doho'. Om silihon ku nondo iyokoyu do tulun di pusohon do koinsanai do hiti'd pomogunan, om osimbayan kou nondod poingiyon do hiri'd pomogunan di pinatahak ku di Yakub, i taki-aki dokoyu. Iyoho' no, i Tuhan, o minomoros diti,” ka dau.
Pinapalan di Nabi i Dusa di Bansa'ddi
1 Kada' dokoyu soroho' dot oluhoi no kopio o Tuhan do gisom dot a' milo do mamasi dokoyu ko' adalaan kopio kobosuk gisom dot a' no iyau korongou do lolohou dokoyu do mokitulung. 2 Nga' iri i dusa dokoyu o kobungou gisom dot a' iyau korongou dokoyu. Iri i dusa dokoyu i popotongkiad dokoyu do mantad id Kinorohingan do tontok di mumbal kou do sumambayang dot id dau. 3 Nakasala' kou no tu' mongudut kou i', om orongit kou, om mamatai kou. 4 Mongoi kou no do hilo'd pomisaraan, nga' a' kou i' sumokodung dit otulid. Tu' sumondiu kou i' do tudut do papamanang do hal dokoyu. Potilombuson nopo dokoyu do momonsoi i nosorou mantad dokoyu do pokoruol do tulun do suwai. 5-6 Iri nopo pakat dokoyu dot araat nga' miagal poddi tontolu' do tulanut di kapatai. Babako' pogi' i tontolu' nga' sumoliwan nopo moti' o tulanut! Nga' iri nopo i pakat dokoyu'ddi om aiso' i' kopio o guna' dot id dokoyu, iyo noddi pakayan di pinuwalai'd korut do winonsoi. 7 Momusorou kou nopod momonsoi dit araat, om a' kou no kaandad-andad do momonsoi'ddi. A' kou no otungkong do mamatai'd tulun dit aiso' o sala'. Honggo nopo o koongoyon dokoyu nga' haro kasai' nopo ot araag om oumpadan. 8 Om a' kou no kopuriman do kosimbayanan. Aiso' nopo ot otulid di wowonsoyon dokoyu. Mingkilong i ralan di susuyon dokoyu, om aiso' no moti' o songulun piya do kopuriman do kosimbayanan ondung sumusui do ralan diri.
Nakun di Bansa' o Dusa Diyolo'
9 Boros ka di tulun diri dot id Kinorohingan, “Oilaan nogiddi dahai ot a' do Kinorohingan kopoiduan dahai do mantad id tulun di monginggorit dahai. Minogondos daa iyahai do tanawau do monitiu dahai'd mamanau, nga' aiso' i', tu' otuong ngai' nopo, 10 om miagal poddi iyahai'd tulun do bolou do mikarahawor. Om pitangaadau piya nga' kasadu i' iyahai tu' iyo pori do pitangatuong, om miagal po do hiri iyahai'd pomogunan do tulun do napatai dit otuong tomod do mogihum do ralan. 11 Atangkabo po tomod iyahai om moddosi iyahai. Mandad-andad no daa iyahai diya' oi Kinorohingan do mongoi popoidu' dahai do mantad id koinggoritan nga' aiso' i' o nunu-nunu do rumikot. 12 Oi Tuhan, ogumu' no kopio o kasalaan dahai dot id diya'. Om iri iddi dusa dahai o papasala' dahai. Om opurimanan ngai' i' dahai iri. 13 Suminaap iyahai diya', om nokowonsoi iyahai'd dusa dot id diya', om minada' iyahai do tumanud diya'. Minongulok-ulok iyahai'd tulun do suwai om tuminongkiad iyahai diya'. A' ngai' nopo otopot o pomusorou dahai; om tudut ngai' o boros dahai. 14 Noidu' no it oturan dot otulid, om it otulid nga' nokoinsodu' no. A' pinadul it otulid om pinotongkiad i kotulido' do ginawo. 15 Aiso' no o tulun dot otulid o ginawo, gisom dot isai nopo i tumingkod daa do momonsoi dot araat om patayon nogi' dit angaraat,” ka diyolo'.
Sumodia' o Tuhan do Mamasi di Tulun Dau
Nokito nod Tuhan iri om a' i' iyau orohian dot aiso' o tulun dot otulid o pomumutus. 16 Kotigowo tomod iyau do kokito dot aiso' o tulun do mongoi ponulung di tulun dot ulak-ulakan. Om pakayon nondo dau i sinundu dau do pamasi diyolo' om onuan dau iyolo' do kamanangan. 17 Om pakayon nondo dau it otulid do maan do panakarasuk do basi' om tupion dau o kamanangan do ponokotupi' kolidar. Om iso-iso' no kopio o ginawo dau do poposonong do koinsanai'd nunu nopo, om momohukum om sumuli' dit a' otulid di koinggorit do tulun. 18 Om hukuman ngai' nondo dau i pisangod dau do miontok di nowonsoi diyolo', om iri ngai' piya i bansa' do hilo'd sodu' o pomogunan nga' hukuman ngai' i' dau. 19 Om mantad pondod hilo'd koulayon om korikot do hilo'd kotonobon o tulun dot ooris ngai' dau om ooris di kogoyoo' do kuasa' dau. Tu' rumikot nondo iyau do miagal do bawang dit ologod om miagal do tongus dit opuhod. 20 Om boros kad Tuhan dot id tulun dau, “Rumikot oku nondod hilo'd Yorusalim do mongoi pogobi' om mongoi pamasi ngai' dokoyu, i kumorologo do mantad id dusa. 21 Om momonsoi oku do tumpongo dot id dokoyu: Onuan ku iyokoyu do kuasa' om ponudukan ku. Soro-sorohon no om umboyoon no i ponudukan ku'ddi, om potudukon no dot id tangaanak dokoyu om id sinakagon dokoyu, om osorou indo diyolo' iri om atanud,” ka.
Kosimbayanan do Yorusalim do Koimbagu
1 Tungag no, oi Yorusalim, om ulinau no do miagal dilo tadau, nokorikot no i tanawau do koposion nu! Poulinau no dot id diya' o kagayaan do Kinorohingan. 2 Oinsanan nopo o bansa' do kuluputan do totuong, nga' iya' nopo om woyoon id Tuhan, om ulinahan di tanawau dau di kosorong. 3 Om agayat nondo o koinsanai'd bansa' dot id tanawau nu, om iri nogi' i piro-piro o raja' nga' agayat di tulinau nu di wagu. 4 Pikoroontong pogi' dot id posorili' nu om antangan no ondung nunu i nosiliu, tumimung ngai' no i rayat do minuli'. Om i tangaanak nu'd kusai nga' rumikot no do mantad hilo'd sodu', om i tangaanak nu'd tongoondu' nga' songingkibit ngai' diyolo'. 5 Om okito nopondo dokoyu iri om otood kou nondo, om kododog kou nopondo tu' adalaan no kopio kotoodo' dokoyu. Om pootodon nondo dot id dokoyu i kakayaan do koinsanai'd bansa', do lumuyung nopo dot id dokoyu do mantad hilo'd soborong do rahat. 6 Ogumu' nondo ot unta do rumikot, do mantad hilo'd Midian om hilo'd Ipa. Om haro nogi' o tulun do hilo'd Siba do mongigit do tamas om kominyan, do mikuwo'd mamarayou di nongowonsoi'd Tuhan. 7 Oinsanan nopondo i dumba' do Kidar om Nobayot do pootodon dot id dokoyu, do maan do porsombahan do sumbolion, do hiri'd sakai di pananaraban do porsombahan do patahakon dokoyu do tontok do sumambayang kou. Om orohian nondo o Tuhan diri om oruhangan o kolumiso' di walai dau. 8 Nunu ilo tumalib do miagal do haun, om i tumulud do miagal do punai do gumuli'? 9 Ilo' nopo nga' kapal do rahat do mantad hilo'd pomogunan dit id sodu', do mongigit di tulun di songonuon do Kinorohingan do gumuli'. Kiinigit nogi' iyolo' do pirok om tamas, do pamarayou'd Tuhan, i Kinorohingan; do patahakon di Kinorohingan dot Israil dit olidang, i posiliu di tulun dau do bansa' di pusohon. 10 Tulun indo do bansa'd suwai o mononduli' di tolig nu, om i piro-piro o raja' o mogobi-obi' diya'. Hinukuman ku iya' di gulu tu' atatagadan oku no, nga' baino' noddi om orohian oku do monginsian diya'. 11 Om poingiwang kasai' nopondo o wawayaan nu do tadau om totuong, om kaatod i' di piro-piro o raja' do piro-piro o bansa' i kakayaan diyolo' dot id diya'. 12 Om iri nopondo bansa' dit a' minsiriba' dot id diya', om punsoon nopondo kopio. 13 Boros kad Tuhan dot id Yorusalim, i bandar dau, “Iri nopo kayu sedar, om kayu sanobar, om kayu berangan, i kayu dot osonong kopio do hilo'd puru' do Libanon, om pootodon ngai' nondo do maan do pononduli' diya', oi bandar dit olidang, om maan do pomolumis di Walai'd Sasambayangan dot Agayo om maan do pomolumis di poulakan ku'd lapap ku. 14 Om rumikot ngai' nondo i tangaanak di minongulok-ulok diya', om motud ngai' nondo om minsiriba' dot id diya' i nongkoumbal do mongindaraat diya'. Om roitan ko nondo diyolo' do, ‘Sion’ om ‘Bandar do Kinorohingan dot Olidang’, om ‘Bandar do Tuhan’. 15 Om a' ko nondo iyadaan om a' ko karaatan, om a' ko pologoson dot oingou. Pobontugon ku nondo iya' om illumisan ku, om silihon tiya' do kinoiyonon do kataadan do gisom do poingompus. 16 Om gompion ko nondo do piro-piro o bansa' om raja' do miagal di tina' do momogompi' do tanak dau. Om oilaan nu nogindo dot iyoho' no, i Tuhan, o minamasi diya', om i Kinorohingan dot Israil dit okoris o pinopoidu' diya'. 17 Paatadan ku nondo iya' do tamas do ponowoli do tambaga', om paatod oku do pirok do ponowoli di basi'. Om paatod oku do tambaga' do ponowoli di kayu. Om paatod oku do basi' do ponowoli di watu, om osimbayan nondo om oulud, o pomogunan nu; om otulid o pomorintaan. 18 Aiso' nondo ot orongou do habar do kororongit; om pomogunan nu nga' a' nondo araag. Tu' intirungan ku indo iya' do miagal di tolig; om royohon oku indo diya' tu' napasi tiya' i'. 19 Okon nondo ko' i tadau o sumiliu do tanawau nu do dangadau, om okon ko' i tulan o tanawau nu do dongotuong. Tu' iyoho' no, i Tuhan, o sumiliu do tanawau nu do gisom do poingompus; tu' mulinau nondo dot id diya' i tanawau do kagayaan ku. 20 Opupusan nondo i katangaban nu, tu' iyoho' no, o sumiliu do tanawau nu do gisom do poingompus, i poulinau kasai' ko' mantad dilo tadau om i tulan. 21 Om momonsoi ngai' nopondo dit otulid i tulun nu, om kasanganu iyolo' di pomogunan do gisom dot alaid. Tu' winonsoi ku i' iyolo', om pinogirot ku do pointalang do kogoyoo' ku. 22 Om iri piya'ndo i sompiiyon nu dit okuri' no kopio om it aiso' o ngaran- ngaran, nga' sumiliu i' do bansa' dit agayo om kikuasa', om soira' nopondo dot orikot i maso di koontok, om powonsoyon ku nondo kopio iti. Iyoho' no o Tuhan!” ka dau.
Habar dot Osonong do Pasal do Kopolobusan
1 Noporinta' oku nod Rusod do Tuhan, it Asawat Kopio; nopili' oku no dau om nosuhu' oku do mongoi poposunud do habar dot osonong dot id tulun di mosikin om orutum, om momolingos do ginawo'd tulun dit adalaan do tumongob, om momisunud do kopolobusan dot id tulun di nangatangkap dot oruhai no iyolo'd polobuson, om momisunud di tulun di poinggiil do nakalabus no iyolo'. 2 Sinuhu' oku dau do mongoi poposunud, do norikot no o maso do kopomosian do Tuhan do tulun dau, om kapangalaan dau di pisangod diyolo'. Sinuhu' oku dau do mongoi ponginsasamod do koinsanai'd tulun di tumongob, 3 om monginsasamod do ginawo di tumongob, om popotood dit osusa'. Om modsinding nondo iyolo' do sinding do pamarayou, do ponowoli di tihad. Om miagal nondo iyolo' do kayu, di tinanom do Tuhan. Om wonsoyon ngai' diyolo' i korohian do Kinorohingan, om abantug indo o Kinorohingan. 4 Om wonsoyon nondo diyolo' kawagu, i bandar di laid nod poimpogun om oingou. 5 Oi tulun ku, gompion nondo do bansa'd suwai i tayam-tayam dokoyu, om buatan diyolo' i kabun dot anggur dokoyu. 6 Om roitan kou nondo dot imam do mogobi-obi' do Tuhan, om susuhuon do Kinorohingan toko'. Om kopuriman kou nondod kosonongo' di kakayaan do piro-piro o bansa', om oondos kou tu' nasanganu no dokoyu iri. 7 Nopupusan no o kointingayaman dokoyu, om miyon kou nondo do hilo'd pomogunan dokoyu. Om opiluap nopondo o kogumuo' do kakayaan dokoyu, om mompus-ompus o kaarapadan dokoyu. 8 Boros kad Tuhan, “Asanangan oku i' dit otulid, nga' araatan oku i' di mongulok-ulok om it araat. Om otorodok oku i' do monomuli' di tulun ku, om momonsoi oku do tumpongo di poinggirot kasai' dot id dokoyu. 9 Om abantug nondo o sinakagon diyolo', dot id pogialatan do bansa' do hinonggo-honggo nopo iyolo'. Om pointikid-tikid do tulun di kokito diyolo', nga' koilo nondo dot iyolo' nopo nga' bansa' di nabarakatan ku,” ka dau. 10 Boros kad Yorusalim, “Otood oku tu' Tuhan o kataadan ku, om Kinorohingan no o kataadan do ginawo ku. Miagal oku po do tondu' di napakayan do pakayan di dong kumawin, pinakayan oku'd Tuhan do koposion om kamanangan. 11 Tu' poingkuro nopo i linsou do potonomon, do sumuni do sumiliu'd tanom, om poingkaa no o Tuhan, it Asawat Kopio do mamasi do tulun dau, om oinsanan nopondo o bansa' do mamarayou dau,” ka.
1 Moro-boros oku i' do mongodsuur do Yorusalim, a' oku i' kumadada' dot a' po iyau apasi, om koulinau i' i kamanangan dau do miagal do lampung di mulinau do dongotuong. 2 Oi Yorusalim, okito ko nondo do koinsanai'd bansa' do nakamanang ko, om kokito ngai' nondo i raja' diyolo' do kobontugo' nu. Om pungaranan ko nondod ngaran do wagu, i ngaran do patahakon do Tuhan. 3 Miagal ko nondod tupi' do dong raja' dit olumis do pointupi' do Tuhan, i pongillumis dit agayo o gatang di dong Kinorohingan. 4 A' ko nondo roitan dot “I Tinongkiadan”, om a' roitan i pomogunan nu dot “It Oingou”. Roitan ko nondo dot “I Kolisihan do Kinorohingan”, om i pomogunan nu nga' roitan nondo dot “I Nakawin”. Tu' asanangan o Tuhan diya', om miagal pondo iyau do kusai do sawo di pomogunan nu. 5 Poingkuro nopo i tanakwagu do mangawin di sumandak, om iyo nogiddi i Minomonsoi diya' do mangawin diya'. Om poingkuro nopo i kusai di wagu po kakawin dot asanangan di sawo dau, om iyo nogiddi o Kinorohingan dot asanangan diya'. 6 Nopoiyanan ku nod tulun o hiri'd sakai di tolig nu, oi Yorusalim; om a' i' iyolo' insan do mundorong do tontok do madtamong diya' do tadau om totuong. Apatut no do posorohon diyolo' o Tuhan di batos dau, om a' i' dau olihuan iri. 7 Om mositi' no dot aiso' o kotingkadan diyolo' do mokianu, om otonduli' i' kawagu'd Tuhan o Yorusalim, om osiliu i' o bandar diri do kaandasan do pointongkop do pomogunan. 8 Nakapamatos no o Tuhan do mikuwo'd sumpa', om atantu' nod wonsoyon dau iri do mikuwo di sinundu dau: “A' nondo di pisangod nu akanon i gandum dokoyu, om a' oinum do bansa'd suwai i waig dot anggur dokoyu. 9 Nga' iyokoyu no i minananom om i minongomot di gandum, o kaakan diri om mamarayou kou nondod Tuhan. Iyokoyu no, i minomogompi' om minongupu' di tua' dot anggur, o koinum di waig dot anggur do hiri'd natad di Walai'd Sasambayangan dot Agayo,” ka. 10 Oi tulun do Yorusalim, soliwan kou no do maya' di wawayaan dot agayo, om mamalana' nod ralan do wayaan ngai' di tulun di gumuli'. Pomonsoi nod ralan magayo; om iduan no iri'd watu, om poinsawat nod bondira' om koilo i' o koinsanai'd bansa'. 11 Do poboros o Tuhan dot id pointongkop diti pomogunan do boros do poingkaa, “Sunudan ngai' no i tulun do Sion do poingkaa, ‘Rumikot no o Tuhan do mongoi pamasi dau, om powoyo' iyau di tulun di nokoidu' dau,’ kanto,” ka dau. 12 Om roitan nondo iyolo' do: “Tulun do Dong Kinorohingan”, om “I Bansa' do Pinasi do Tuhan”. Om roitan nondo o Yorusalim do “Bandar di Kalangadan”, om “I Bandar dot a' Tinongkiadan do Kinorohingan”.
Kamanangan do Tuhan do Suminangod do Koinsanai'd Bansa'
Madtatamong
1 “Isai iti rumikot do mantad hilo'd bandar do Bosra i hilo'd Idom? Isai iti kirasuk dot aragang, om it olumis kopio, om i mamanau dot okoris kopio?” ka.
Tuhan
“Iyoho' no, i Tuhan, i milo do mamasi, om poposunud oku di kinamanangan ku,” ka dau.
Madtatamong
2 “Nokuro tu' aragang kopio o pakayan nu, miagal pod pakayan do tulun di mamaga' di tua' dot anggur?” ka dau.
Tuhan
3 “Pinaga' ngai' ku i bansa' do miagal do tua' dot anggur, om aiso' i' o minongoi uhup doho'. Piningulakan ku iyolo' tu' otogod oku no kopio, om karamasai ngai' nopoddi di raha' diyolo' o pakayan ku. 4 Natantu' mantad ku no o maso do poidu' di tulun ku; om norikot no o maso do poiduwon ku iyolo'. 5 Nosuayan oku tu' tontok di kuminorowo oku om aiso' i' o monguhup doho'. Nga' pinokoris oku i' di kototogod ku, om iso-iso' oku'ddi o nakamanang. 6 Pingulakai ngai' ku nopo i bansa' tu' otogod oku no kopio, om minumuk ku iyolo'. Om potuntugo' ku nopo, i raha' diyolo' do hilo'd tana',” ka dau.
Kosonongo'd Tuhan dot id Israil
7 Popinsusuyon ku nondo i kosianan do Tuhan dit aiso' o kotingkadan. Om royohon ku iyau tu' i nongowonsoi dau dot id dati' o kapamarayahan ku. Om mabai-labai po o pinamarakat dau dati', i tulun dau, tu' poimponu' po iyau do kosianan, om aiso' o kopupuson do kosianan dau. 8 Boros kad Tuhan, “Iyolo' no kopio o tulun ku, om a' i' iyolo' magakal doho',” ka. Om poiduwo' noddi dau iyolo' 9 do mantad id koinsanai'd kosusaan diyolo'. Okon i' ko' susuhuon ko' wakil po o sinuhu'd Tuhan, suwai ko' iyau i' kopio o pinopoidu' diyolo'. Ginompi' dau iyolo' tu' osianan i' om olisiu iyau diyolo'. Om tontok piya di gulu po nga' pinigompian i' dau iyolo'. 10 Nga' suminaap i' iyolo'd Tuhan, om pinopotongob iyolo' dau. Om gowoi poddi om nosiliu iyau do pisangod diyolo', om suminaap diri iyau diyolo'. 11 Om kosorou noddi diyolo' i maso di gulu po, di poimpasi po i Musa, i susuhuon do Tuhan, om ponguhot no iyolo' do poingkaa, “Hinonggo noddi i Tuhan do minomoyo' ngai' di boyoon toko' di minaya' di rahat dot opuhod? Om honggo noddi i Tuhan di pinapatahak do sinundu dau dot id di Musa? 12-13 Honggo noddi i Tuhan di minomonsoi do piro-piro o kopusahan kopio, do mikuwo di sinundu dau do pinawaya' di Musa, i minomitas di waig do rahat om i minomoyo' do tulun dau do minaya' di waig dot aralom, om i nakaanu do kobontugan dit aiso' o kopupuson?” ka. Om miagal poddi iyolo' do kuda' kotimpas, om a' i' iyolo' insan kasadu, tu' winoyo' i' iyolo'd Tuhan. 14 Om poingkuro nopo i sapi' do woyoon do mongoi pangakan-ngakan do hiri'd kobuturan, om iyo nogiddi o Tuhan do minomoyo' di tulun dau do kuminaa dot id tana' di pinabatos dau, om bontugon id tulun o ngaran dau.
Sumambayang do Mokiinsian om Mokiuhup
15 Oi Tuhan, ontong no dahai do mantad hino'd surga, i tiyonon nu dit olidang om kikagayaan. Honggo noddi i kogoyoo' do ginawo nu do mamadul dahai? Honggo noddi i sinundu nu? Kada' kopio iyahai tolib-tolibai do momusorou. Kada' undorong tomod. 16 Tu' iya' no o tapa' dahai. A' no kotutun dahai i Abraham om i Yakub, nga' iya' nopo oi Tuhan, om tapa' i' dahai, i minamasi dahai do mantad poddi gulu po. 17 Nokuro tu' pologoson nu iyahai do sumansala' di ralan nu? Nokuro tu' pologoson nu iyahai do kumodou o ginawo gisom dot a' iyahai tumanud? Guli' no, oi Tuhan, dot i piro-piro o susuhuon nu, om i tulun di songonuon nu do mantad di gulu po, o kogulian. 18 Nokuro tu' pinologos nu do nindaraat di tulun dot araat i Walai'd Sasambayangan dot Agayo, om pinologos nu iyahai i tulun nu, do natanggayan do pisangod do piro-piro o koloido'? 19 Miagal po iyahai do tulun dit a' nu insan koporinta' do mantad di gulu po, om miagal pod okon iyahai ko' tulun nu.
1 Piangkango' ilo tawan om lumintuhun i', oi Tuhan, pogogoro' no ilo konuluhanan dot opopoddosian. 2 Om miagal pondo i konuluhanan diri di waig do gumolok do poingrakan do hiri'd tapui dit osikit. Rikot no om pointalangon no o sinundu nu dot id pisangod nu, om pogogoro' ngai' no i bansa' dot id toguang nu. 3 Haro o tinsan o maso do ruminikot ko do miningwonsoi do piro-piro o kopusahan di kotompurolosi kopio, om it a' dahai insan-insanon; om soira'ddi nokito ko di konuluhanan om gogor ngai' nopo iri dot opopoddosian. 4 Aiso' i' o tiso' do nokokito, ko' nokorongou do kinorohingan do suwai do miagal diya', i mingwonsoi do miagal diri do bagi' di tulun do mogondos diya', do mantad di gulu po. 5 Orohian ko i' di tulun dit asanangan do tumanud do korohian nu. Tinogod nu daa iyahai nga' a' i' iyahai tuminingkod do mingwonsoi'd dusa, nga' pinasi kasai' nu i' iyahai. 6 Kidusa ngai' nopo iyahai; iri piya i kowoyo-woyoon dahai dit osonong nga' nasabak i' do kososomu' om kasalaan, om miagal poddi iyahai do roun di kumoring om it otilib do ribut, tu' tumanus no iyahai do gama' di kararaat dahai. 7 Aiso' no tiso' do tulun do sumambayang dot id diya', ko' mokiuhup po diya'. Tu' luminisok ko do mantad id dahai, om pinologos nu iyahai dot araag di dusa dahai. 8 Nga' iya' no o tapa' dahai, oi Tuhan, iyahai nopo om lagit no toomod, om iya' no i minomorun dahai. Winonsoi ngai' nu i' iyahai. 9 Iyo nopoddi om kada' no kotogod doho', oi Tuhan, kada' no soroho' i dusa dahai; ontong pogi', nga' tulun nu i' iyahai. 10 Iri nopo kabandaran nu dit ongolidang om iyo pod tana' do kowotuan, Yorusalim nga' nosiliu nod tana' dit a' sunian om oingou. 11 Iri nopo Walai'd Sasambayangan dot Agayo dit olidang om abantug i niyon di taki-aki dahai do minamarayou diya', om naraag nod tapui; oinsanan nopo i kinoiyonon di korohian dahai do nangaraag. 12 Okito ngai' nu i' iri, oi Tuhan, om amu' ko nopo tuu mungkomi? Pologoson nu nopo tuu iyahai dot adalaan dot oinggorit?
Hukuman do Kinorohingan dot id Tulun di Sumaap
1 Boros kad Tuhan, “Posodia' oku no daa do sumimbar do sambayang di tulun ku nga' a' i' iyolo' suminambayang. Posodia' oku no dot ihumon diyolo' nga' a' i' iyolo' minumbal do mogihum doho'. A' i' suminambayang dot id doho' i bansa'ddi do mulong piya do posodia' kasai' oku do sumimbar do, ‘Hati oku i', tulungon ku i' iya’, kangku. 2 Posodia' kasai' oku i' daa do rumamit do tulun ku, do tumomod piya iyolo' do momonsoi dit araat om mintanud do korohian diyolo'. 3 Popotogod kasai' nopo iyolo' doho'. Tu' papatahak iyolo' do porsombahan do sumbolion dot id kabun do podsubakan di piro-piro o tingolig, om monorob iyolo' do kominyan dot id sakai di pananaraban do porsombahan do hiri. 4 Dongotuong no om mongoi iyolo' do hilo'd luang do nulu-nulu om hilo'd kalabangan do mongoi pokinosihat di rusod do tulun di nangapatai. Mangakan iyolo'd wogok om monginum do sup do daging di nakatahak dot id piro-piro o tingolig. 5 Om momoros nogindo iyolo' dot id tulun do suwai dot, ‘Insodu' kou no dahai; tu' olidang no kopio iyahai om a' no koino-ino dot oigitan dokoyu,’ ka. A' oku no iyoho' i Tuhan, milo do tumorunung kasai' do tulun do miagal diri. Miagal pod tapui dit a' milo do pisokon o kototogod ku diyolo'. 6 Natantu' ku nod sulian ku i kararaat diyolo', om notulis no i hukuman do porotuon ku dot id diyolo'. A' ku i' lihuan i nowonsoi diyolo'. Atantu' nod hukuman ku, 7 i dusa diyolo' om i dusa di taki-aki diyolo'. Tu' minodtutud iyolo' do kominyan do hiri'd podsubakan do tingolig do hilo'd timpak do nulu-nulu, om minimboros iyolo' dot araat dot id doho'. Om hukuman ku nondo iyolo' do miontok di nowonsoi diyolo' di gulu po,” ka dau. 8 Om boros kad Tuhan, “Aiso' i' o papataam do tua' dot anggur dit osonong do potonggoyon di tua' di nomomos, tu' wonsoyon i' iri do waig dot anggur. Om miagal nogiddi tu' a' ku i' raagon ngai' i tulun ku, posion ku i' i tulun di sumambayang dot id doho'. 9 Barakatan ku indo i tulun dot Israil di mantad id payat do Yohuda, om kasanganu i sinakagon diyolo' di tana' ku di hilo'd konuluhanan. Hilo' nondo do momogun-mogun i tulun di nopili' ku, om i sumambayang dot id doho'. 10 Sumambayang nondo iyolo' dot id doho' om woyoon diyolo' i dumba' om sapi' diyolo' do hiri'd pangakan-ngakanan do hilo'd Rantai do Saron di ponong id kotonobon om hilo'd rantai di roitan do Rantai do Kosusaan di ponong id koulayon. 11 Nga' suwai indo ko' iri o kootuson do tulun di magada' doho', om it a' mamadul do Sion, i nulu-nulu ku dot olidang, om i tumuku' do Gad om Moni, i tingolig do nasip om kountungan. 12 Om patayon kou nondo tu' a' kou i' suminimbar di linohou ku iyokoyu. Om a' kou minokinongou di minoro-boros oku dokoyu. Orohian kou nogi' do sumaap doho' om mingwonsoi dit araat. 13 Om atantu' no dot iri nopo tulun di tumuku' om mumboyo' doho' om osima' i' dot akanon om inumon, nga' iyokoyu nopo om louson indo om tuuhan. Osimbayan indo iyolo' nga' iyokoyu nopo om ointingayam i'. 14 Iyolo' nopo om modsinding i' dot atataadan, nga' iyokoyu nopo om mihad poo tu' aiso' no o pokukurayan. 15 Om roroiton pondo di tulun di nopili' ku o ngaran dokoyu do maan do pomopol. Tu' iyoho' no, i Tuhan, it Asawat Kopio, o mamatai dokoyu. Nga' onuan ku indod ngaran do wagu i tulun di mumboyo' doho'. 16 Om isai nopondo o hiri'd pomogunan diri di mokianu do barakat nga' mokibarakat nondo doho', iyoho' i Kinorohingan dit otorodok. Om isai nopo i sumumpa' nga' sumumpa' nondo dot id suang do ngaran ku, iyoho' i Kinorohingan dit otorodok. Om katalib nondo i kinosusaan di gulu om ongolihuan iri,” ka dau.
I Wonsoyon do Wagu
17 Boros kad Tuhan, “Momonsoi oku nondod pomogunan do wagu om tawan do wagu. Om koinsanai di nongosiliu di maso di notoliban om olihuan ngai' nopondo. 18 Kumooropod no om kumotood no dot aiso' o kopupuson dot iti wonsoyon ku o kataadan. Tu' iri nopo Yorusalim do wagu do wonsoyon ku om oponu' pondod kaarapadan, om i tulun di hiri nga' ongotood ngai' nopo o ginawo. 19 Om iyoho' piya'ndo nga' otood i' tu' Yorusalim om i tulun do hilo' o kataadan ku. Om aiso' nondo tulun do mihad om aiso' o minglohou do mokiuhup do hilo'. 20 Tangaanak nga' a' nondo matai do maso po dot okoro', tu' oinsanan nopondo i tulun dot ongotogui. Om iri piya i hatus no o toun do tumur dau nga' omulok po o kasarahan. Tu' ondung apatai o tulun dot a' po orikot o tumur do miagal diri, om sorohon nod noontok do hukuman ku. 21-22 Momonsoi nondo o tulun do walai om iyolo' no o miyon do hiri. Om a' nod tulun do suwai oiyon. Om mananom nondo iyolo' dot anggur om kopuriman iyolo' do kowosiho' di waig dot anggur; okon i' ko' wokon o koinum diri. Om otogui nondo i tulun ku do miagal di kayu do hilo'd gouton. Om kopuriman iyolo' do kootuson di karaja' diyolo'. 23 Osonong ngai' indo o kootuson di wonsoyon diyolo', om i tangaanak diyolo' om i sinakagon diyolo' do gisom dot alaid. 24 Om tontok piya dit a' po opupusan o sambayang diyolo' dot id doho' nga' osimbar ku no i sambayang diyolo'. 25 Misugku' nondo do mangakan-ngakan do sakot i toni om i dumba'; om i singa nga' mangakan nondod sakot do miagal di sapi'; om tulanut nga' a' nondo korolosi. Om aiso' nondo o nunu-nunu do pokoruol ko' momonsoi dot araat do hilo'd Sion, i nulu-nulu dit olidang,” ka dau.
Butusan do Tuhan o Koinsanai'd Bansa'
1 Boros kad Tuhan, “Tawan no o tirikohonon ku di dong raja', om pomogunan no o tuulokon ku. Om okuro-kuro daa'ndo o walai do wonsoyon nu doho', om okuro-kuro daa o kinoiyonon dot iyonon ku? 2 Tu' iyoho' i' o minomonsoi do koinsanai'd nunu nopo. Nga' orohian oku i' do tulun dit osiriba' o ginawo om i kumorologo do dusa dau, om it oronok om i mumboyo' doho'. 3 Nga' mingwonsoi nopo i bansa'ddi do korohian diyolo'. Id diyolo' nopo om aiso' i' o pisuayan do monumbali' do sapi' do tontoluhan do maan do porsombahan om monumbali' do tulun do maan do porsombahan; papatahak nopo iyolo' do tanak do dumba' do maan do porsombahan om iyo no do momutul iyolo'd liou'd tasu; om papatahak iyolo'd porsombahan do gandum nga' iyo nod papatahak do raha'd wogok, om modtutud iyolo'd kominyan nga' iyo nod tumuku' iyolo' dot id tingolig. 4 Om gowoi pondod porotuan ku iyolo' do kosusaan! I kosusaan di poddosi no kopio diyolo', tu' aiso' i' o suminimbar di minomolohou oku om aiso' o minokinongou di minoro-boros oku. Orohian nogi' iyolo' do sumaap doho' om mingwonsoi dit araat,” ka dau. 5 Pokinongou kou nod poboroson do Tuhan, iyokoyu it oronok dau om i mumboyo' dau, “Tu' otorodok kou i' dot id doho'. Om haro nondo o piro-piro o tulun do bansa' dokoyu dot araatan dokoyu om a' orohian do rumolot dokoyu, tu' otorodok kou i' dot id doho'. Hingi-hingion kou nondo diyolo' om moro-boros iyolo' do poingkaa, ‘Pointalangon daa giya kopio'd Tuhan o kobontugo' dau om posion kou dau, om kokito i' iyahai dot ooropod kou,’ ka diyolo'. 6 Pokinongou pogi'! Ilo' nopo tuni dot opuhod do hilo'd bandar om ilo tohio do hilo'd Walai'd Sasambayangan dot Agayo nga' tuni ku i' do momohukum di pisangod ku! 7 Bandar ku nopo dit olidang om miagal do tondu' di sigog id osusu om a' i' minonohoruol. 8 Haro toi o nokokito ko' nokorongou do hal do miagal diri? Haro toi o bansa'd tulun dot insan-insan o tadau do pinogkosusu? Nga' bansa' nopo dot Israil om nosusu do tontok di tumimpuun nogi' o Sion do monohoruol. 9 Kada' dokoyu soroho' do pologoson ku nod orikot o kasawaan di tulun ku do mantad id tian, om a' ku indo pologoson dot asawa' kopio,” kad Tuhan do minomoros. 10 Tonggoi nod Yorusalim dot ooropod, kotood no dot iyau o kataadan! Kumooropod no do moyo' dau do dinondo, oi koinsanai dokoyu i nokopogihad dau. 11 Kopuriman kou indod kakayaan dau, do miagal di tanak di poinsusu do tina' dau. 12 Boros kad Tuhan, “Onuan ku nondo iyokoyu do kosimbayanan dit aiso' o kopupuson. Om i kakayaan di piro-piro o bansa' nga' lumuyung nopondo dot id dokoyu do miagal do bawang dit a' rumasak. Om miagal ko nondod tanak di posusuon do tina' dau, om poingkibit, om i kolisihan kopio dau. 13 Om insasamadan ku indo iyokoyu do hilo'd Yorusalim do miagal do tina' di monginsasamod do tanak dau. 14 Om soira' nopondo dot okito dokoyu dot osiliu o miagal diti om ooropod kou nondo, om popokoris nondo om poposonong do tinan dokoyu iri. Om koilo kou nondo dot iyoho' no, i Tuhan, o monulung do tulun di mumboyo' doho', om porotuan ku do kototogod ku i pisangod ku,” ka dau. 15 Rumikot nondo o Tuhan do mitonggoi do tapui. Om sumakai nondo iyau do talad do tongus dot opuhod do mongoi pomohukum ngai' di tulun di katagadan dau. 16 Tapui nondo om gayang o pomohukum dau do koinsanai'd tulun do hiti'd pomogunan dit oilaan dau do haro o kasalaan, om ogumu' nondo o tulun do hukuman do kapatayon. 17 Boros kad Tuhan, “Oruhai no o kopomohukuman di tulun di momolidang do tinan diyolo' om i mogitanud-tanud nopo do mongoi podsubak do hiri'd kokobunan di dong tingolig. Nokosodia' no o pomohukum ku di tulun di mangakan do wogok om tikus om i taakanon do suwai di sosomu'. 18 Oilaan ku i' i pomusorou om wonsoyon diyolo'. Rumikot oku no do mongoi ponimung do tulun do mantad id koinsanai'd bansa'. Om soira' nopod tumimung iyolo', om kokito nondo iyolo' do sinundu ku, 19 om koilo iyolo' dot iyoho' no i minomohukum diyolo'. Nga' posion ku indo o wookon diyolo' om pokoyoon ku iyolo' do hilo'd bansa'd suwai om hilo'd pomogunan dot osodu' dit a' po insan korongou do pasal doho' om a' nokokito do kobontugo' om sinundu ku: iri no i hilo'd Sepanyol, om hilo'd Libia, om hilo'd Lidia, i haro o mamamana' dit ongotiru', om hilo'd Tubal, om hilo'd Yunani. Om popinsunudon nondo diyolo' o kobontugo' ku dot id piro-piro o bansa' diti. 20 Om powoyoon nondo diyolo' do gumuli' o koinsanai di koobpinayan dokoyu do mantad id koinsanai'd bansa'ddi do maan do popuhawangon dot id doho'. Om pootodon nondo diyolo' iyolo' do hilo'd nulu-nulu ku dit olidang di hilo'd Yorusalim do songinsakai'd kuda', om kaladai, om unta om korita'-kuda' om guyudan, do miagal di koubasanan do tulun dot Israil do papaatod do porsombahan do gandum do pokoyoon do hiri'd Walai'd Sasambayangan dot Agayo dot id pinoiyanan di nongolidangan. 21 Om silihon ku nondo o wookon diyolo' dot imam om tulun do Liwi. 22 Om poingkuro nopo i pomogunan do wagu om i tawan do wagu di winonsoi ku do hino kasai' tu' i sinundu ku o papaharo kasai'ddi, om miagal nogiddi i sinakagon nu om i ngaran nu do hino kasai' do gisom do poingompus. 23 Om pointikid-tikid do Tulan do Wagu, om tadau'd Sabat, om rumikot nondo o tulun do mantad id pointikid-tikid do bansa' do mongoi tuku' dot id doho' do mikuwo'd opusou kopio, do hiti'd Yorusalim. 24 Om soira' nopondo do tumongkiad iyolo', om okito nondo diyolo' i rata' do tulun di suminaap doho' do songingiliu poo. Om a' indo matai i giuk di mangakan di rata' diyolo'ddi, om i tapui di monorob di rata'ddi nga' a' i' opisok. Om oinsanan nopondo o tulun dot ooris do kokito'ddi,” ka dau.
I Yoromia
1 Iti nopo buuk diti om pinotulisan di pinoboros di Yoromia i nabi, i tanak di Hilkia, i mantad hilo'd bandar dot Anatot, it id watas do Binyamin. 2 Minoro-boros o Tuhan dot id di Yoromia do tontok di kohopod om tolu do toun di Yosia, i tanak di Amon, do raja' do Yohuda. 3 Om asaru' po o Tuhan do minoro-boros dot id dau do suwai ko' mantad diri, do mantad di minomorinta' i Yoyakim i tanak di Yosia, om gisom di kohopod om iso' do toun di Sodokia i tanak di Yosia, do momorinta'. Om tontok di tulan do kolimo do toun diri om katanggayai no i tulun do Yorusalim do kuminaa dot id pomogunan do pisangod.
Linohou i Yoromia
4 Om boro-boros no o Tuhan dot id doho' do poingkaa, 5 “Nopili' mantad ku no iya' dit a' ku po iya' nowonsoi do hiri'd tian di tina' nu, om tontok dit a' ko po nosusu; om nopili' mantad ku no iya' do silihon do nabi ku do kumaa dot id koinsanai'd bansa',” ka dau. 6 Om boros kangku, “Oi Tuhan, it Asawat Kopio, a' oku i' milo do mimboros tu' omulok oku po kopio,” kangku. 7 Nga' boros kad Tuhan dot id doho', “Kada' pomoros dot, ‘Omulok oku po,’ ka. Tu' honggo nopo o kinoiyonon do bansa'd tulun do ponuhuan ku diya'd mongoi om mositi' nod mongoi ko, om nunu nopo i ponuhuan ku diya' do poboros, om mositi' nod poboroson nu dot id diyolo'. 8 Kada' kooris diyolo' tu' manud-tanud oku i' diya' do mongintirung diya'. Iyoho' no i Tuhan, o minomoros diti!” ka dau. 9 Om poroloyo' noddi do Tuhan o longon dau, om ngoyo' no dau kamao' o munung ku, om boro-boros no dot id doho' do poingkaa, “Pokinongoho' no iti boros do poboroson ku, om popinsunudon noti. 10 Om tadau nod baino' dot onuan ku iya' do kuasa' dot id sawat do koinsanai'd bansa' om pomorintaan, do mongutus om mamahaba', om mamaraag om paparatu', om momonsoi om mananom,” ka dau.
Duwo o Pinointalang
11 Om uhoto' oku nod Tuhan, “Nunu o tokito nu, oi Yoromia?” ka. Om boros kangku, “Okito ku o raan do kayu badam, oi Tuhan,” kangku. 12 Om boros kaddi do Tuhan dot id doho', “Otopot no i pinoboros nu, om piantangan ku no kopio, om ongowonsoi ngai' i' i nokoboros ku'ddi,” ka dau. 13 Om ponguhot po kawagu o Tuhan dot id doho', “Nunu po o tokito nu?” ka. Om boros kangku, “Okito ku o balanga' do molok-golok tomod do mantad hilo'd utara, om motituntug no do ponong hiti,” kangku. 14 Om boros kad Tuhan dot id doho', “Lumabai nondo o kosusaan do mantad hilo'd utara dot id koinsanai'd tulun di poingiyon do hiti'd pomogunan diti. 15 Suhuon ngai' ku nondod rumikot o koinsanai'd bansa' do ponong hilo'd utara. Om momorinta' nondo iyolo' do Yorusalim. Om solodon diyolo' o koinsanai di wawayaan om tolig di posorili' di bandar, om koinsanai di bandar do suwai do hilo'd Yohuda. 16 Om hukuman ku nondo i tulun ku tu' minomonsoi i' iyolo'd dusa, om tuminolikud iyolo' doho'. Om pinapatahak iyolo' do porsombahan di sumbolion dot id tingolig, om minomonsoi iyolo' do tingolig do maan diyolo'd tukuon. 17 Nga' iya' nopo oi Yoromia, om sumodia' no; om ngoyon no iyolo' sunudai do koinsanai di ponuhuan ku diya'd poboros. Kada' kooris diyolo', om a' ku i' iya' pologoson dot ooris do potimbaba' ko diyolo'. 18-19 Pokinongou no, oi Yoromia! Koinsanai di hiti'd pomogunan, koinsanai di raja' do Yohuda, om i pagawai, om it imam om i rayat, nga' sumaap ngai' nopondo diya'. Nga' tadau nod baino' dot onuan ku iya' do kokorisan do tumimbaba' diyolo'; om miagal ko nondo di bandar di kitolig, om miagal di torigi do basi', om miagal di limput do tambaga'. A' indo iyolo' kaala' diya', tu' manud-tanud oku i' diya' do mongintirung diya'. Iyoho' no, i Tuhan, o minomoros diti,” ka dau.
Kosianan do Kinorohingan do Tulun dot Israil
1 Om suhuo' oku nod Tuhan do 2 mongoi posunud do boros diti dot id koinsanai'd tulun di hilo'd Yorusalim, “Oi Israil, osorou ku po i kotorodoko' nu dit omulok ko po; om i kogoyoo' do kosianan nu doho' di wagu to po kopikawin. Om tuminanud ko i' doho' do minaya' di tana' do kowotuan, i kinoiyonon dit aiso' o tanom. 3 Oi Israil, iyoho' noo o sanganu diya', om iya' no i koupusan kopio ku. Om pinorotuan ku do kosusaan o koinsanai di minonginggorit diya', Iyoho' no i Tuhan, o minomoros diti,” ka.
Dusa di Komolohingan do Bansa'd Israil
4 Pokinongou kou no do boros do Tuhan, iyokoyu i sinakagon di Yakub, iyokoyu i payat dot Israil! 5 Boros kad Tuhan, “Nunu kopio o sala' ku do nokito di komolohingan dokoyu gisom do minongindaraat iyolo' doho'? Tu' tuminuku' iyolo' di tingolig dit aiso' o guna', om iyolo'ddi nga' aiso' no o guna'. 6 Om a' oku no diyolo' pinadul; iyoho', i minomoyo' diyolo' do suminoliwan do mantad hilo'd pomogunan do Masir; om i pinopotunud diyolo' do minaya' do hilo'd tana' do kowotuan; i kinoiyonon dot aiso' o tanom, om i mogisimpurugu-rugu', i tana' dot otuu om kikoligagaanan, i tana' dot a' iyonon do tulun om a' wayaan do tulun! 7 Pinaatod ku iyolo' do kuminaa dot id tana' dit oluhub do mongoi pomurimon kopio do kosonongo' di tua-ua' do hilo', nga' maha' di nokoiyon iyolo'd hilo' om rinaag iddi diyolo' i tana' ku; om sinosomu' diyolo' i pomogunan do pinatahak ku dot id diyolo'. 8 A' no minuhot it imam ondung hinonggo oku, i Tuhan diyolo'. Tu' iri piya it imam di mogobi-obi' doho' nga' a' i' kotutun doho'. Om i boyoon nga' suminaap i' doho'; iri piya i nabi nga' minimboros ngai' i' dot id suang do ngaran di Baal om tuminuku' dot id tingolig dit aiso' o guna',” ka dau.
Kapasalaan do Tuhan di Tulun Dau
9 Boros kad Tuhan, “Om moro-boros oku po kawagu do pasala' di tulun ku, om butusan ku i sinakagon diyolo'. 10 Pakayaai pogi' dokoyu do hilo'd Siprus, i ponong hilo'd kotonobon, om ponuhu' kou'd tulun do kumaa do hilo'd pomogunan do Kidar, i ponong hilo'd koulayon. Om okito indo kopio dokoyu, dot aiso' i' o nosiliu do miagal diri do mantad po di gulu po. 11 Aiso' i' o bansa'd suwai do nokoumbal do pinopoolon di ponokokinorohingan diyolo', do mulong piya dot okon iri ko' Kinorohingan dit otopot. Nga' tulun ku nopo om minagada' i' doho', i Kinorohingan di minanahak diyolo' do karayahan, om tuminuku' nogiddi dot id tingolig dit a' milo do momonsoi'd nunu-nunu. 12 Om suhuon ku nondo ilo tawan do gumuyu', om gumogor dot osuayan 13 tu' duwo noddi o dusa do nowonsoi di tulun ku: tuminongkiad iyolo' doho', i tudan do waig di manahak do koposion dot id tulun; om minongukad iyolo'd kulam do maan diyolo' do diyolo', i kulam dit a' timparanan do waig,” ka dau.
Kinootuson do Kosurilogo' dot Israil
14 “Okon i' ko' turipon ot Israil, om okon ko' tanak do turipon. Nga' nokuro'ddi tu' gusaon iyau di pisangod dau? 15 Miagal pod singa i pisangod dau do minggarom, om siniliu diyolo' do tana'd kowotuan i tana' dau, om i kabandaran dau nga' naayi' pod nosorob, om nopogitotongkiadan. 16 Om iri no tulun do Mimpis om Tapanhis o minamalagas do tulu dot Israil. 17 Okon toi ko' iya' i' o pinoporikot diti dot id tinan nu, tu' tuminongkiad ko i' doho', i Tuhan om Kinorohingan nu, di maso ku do minomoyo' diya' do hilo'd ralan? 18 Nunu daa o nongoi nu do hilo'd Masir? Mongoi ko daa inum do waig di Bawang do Nil? Om nunu daa o nongoi nu do hilo'd Asur? Mongoi ko daa inum di waig di Bawang dot Iprat? 19 Iri i karaaton nu o momohukum diya', om i monginggorit diya' nga' iri i minagada' ko doho'. Om koilo ko nogindo ondung songkuro noo o kosusao' om karaato' do tumongkiad doho' om a' momusou doho', i Tuhan om Kinorohingan nu. Iyoho' no i Tuhan, i Kinorohingan nu, o minomoros diti; iyoho' no i Tuhan, i Kinorohingan dit Asawat Kopio om it Osundu Kopio,” ka dau.
Minada' o tulun dot Israil do Tumuku' dot id Tuhan
20 Boros kad Tuhan, “Laid ko no dot a' minsiriba' dot id doho', a' ko mumboyo' doho' om a' ko tumuku' dot id doho'. Tu' id pointikid-tikid do nulu-nulu dit akawas, om id sahau do koinsanai'd kayu dit okohob om hiri ko nod tumuku' dot id tingolig di kororombung. 21 Tinanom ku iya' do mantad id guas dot anggur di nopili' no o kosonongo'. Nga' antangai pogi' o kinosilihon nu! Nosiliu ko iddi do guas dot anggur dit a' osonong, om it aiso' o guna'. 22 Om mulong piya dot isuon nu daa o kasalaan nu do sabun di koisu' no kopio, nga' okito kasai' ku i' i kasalaan nu. 23 Om poingkuro ko'ddi do momoros dot a' nu nososomu' o tinan nu, om a' ko insan tuku' dot id Baal? Antangai ngai' pogi' i dusa nu do hilo'd rantai; soroho' no ondung nunu i winonsoi nu. Miagal ko pod unta do tondu' di lalang do mintangkus do mokiontoluhan, 24 om i tumangkus do hilo'd tana' do kowotuan dit oingou. Isai poddi o kopusus diti unta do tontok di maso kopio'ddi do mokiontoluhan? A' no minog do minsusa' do mogihum i tontoluhan di rumohian dau; tu' posodia' kasai' nopo iyau do ngoyon solowoto'. 25 Oi Israil, soroho' no, kada' pologoso' dot apalasan o lapap nu, kada' pologoso' do tumuu o tatalanan nu dot ouru do minggusa' do ponokokinorohingan. Boros ka nu, ‘A! A' oku no milo'd gumuli'. Tu' osianan oku no di ponokokinorohingan ku, om woyo' oku no diyolo',’ ka nu,” ka dau.
Apatut nod Hukuman ot Israil
26 Boros kad Tuhan, “Poingkuro nopo dot ointingayam i gampanakau dit atangkap iyau, om miagal kou nogiddi iyokoyu, oi tulun dot Israil, om kohompit nogi' i raja' dokoyu, om i pagawai dokoyu, om it imam dokoyu om i nabi di tuuhoton dokoyu! 27 Ointingayam ngai' kou nopondo, iyokoyu i momoros do kayu o tapa' dokoyu, om i watu o tina' dokoyu. Osiliu nondo o miagal diti tu' minogidu' kou i' do mantad id doho', om a' kou nogi' guminuli' dot id doho'. Nga' soira' nopo dot id suang kou'd kosusaan om minomolohou kou i' doho' do mongoi pamasi dokoyu. 28 Hinonggo ngai' no toi i tingolig di winonsoi dokoyu'ddi? Om soira' nopo dot id suang kou'd kosusaan om pologoson nopo i tingolig dokoyu'ddi do mongoi pamasi dokoyu, do milo no iyolo'! Irad pod ginumu' do bandar dokoyu o kogumuo' do tingolig dokoyu, oi tulun do Yohuda! 29 Nunu kopio o sala' ku, gisom do suminaap kou doho'? 30 Hinukuman ku daa iyokoyu nga' aiso' i' o kinoonong-onongon; tu' mada' kou i' do tudukan ku. Miagal kou po di singa di mumang, do minamatai di nabi di tuuhoton dokoyu. 31 Oi tulun dot Israil, pokinongou kou pogi' do boros ku. Nokoumbal oku toi do miagal do tana' di kowotuan dit otuong om i kikoligagaanan dot id dokoyu? Nga' nokuro tu' momoros kou dot, ‘Nakalabus no iyahai, om a' no iyahai rumikot dot id diya',’ ka. 32 Kolihu toi o sumandak di pongillumis dau, om kolihu toi o tondu' do kumawin di gaun dau do dong kumawin? Nga' tulun ku nopo om a' no ointob-intob o tadau do koloido' do nokolihu doho'. 33 Koilo kopio ko daa do mamayayat do ginawo di kouhangan nu. Om iri piya tongoondu' do sundal dit araat no kopio nga' kopinsingilo i' do mantad id dokoyu. 34 Notounan pod raha' do tulun do mosikin om tulun dit aiso' o sala' ino pakayan nu; om okon i' ko' i raha' do tulun di mananakau. Nga' mulong piya do miagal kopio'ddi, 35 nga' momoros kou i' dot, ‘Aiso' i' o sala' dahai om atantu' no dot a' i' otogod o Tuhan dahai,’ ka dokoyu. Nga' hukuman ku i' iyokoyu tu' olimon i' dokoyu do nokowonsoi kou'd dusa. 36 Pinoinsiriba' dokoyu o ngaran dokoyu tu' minokiuhup kou i' do ponokokinorohingan do bansa'd suwai. Atantu' no dot iman-imanon kou do Masir, do miagal di niman-iman kou dot Asur. 37 Om mogidu' kou indo do mantad id Masir, om pointudu' pondo o tulu dokoyu dot ointingayaman! Tu' iyoho' no, i Tuhan, o minagada' di sinondiu dokoyu; aiso' indo o taanu-anu dokoyu do mantad id diyolo',” ka dau.
A' Otorodok o Tulun dot Israil
1 Boros kad Tuhan, “Ondung magada' o kusai do sawo dau om tumongkiad nondo i tondu', om osiliu do sawo do kusai'd suwai, om a' noddi sawo dau di gulu koino-ino do ngoyon kawagu i tondu'ddi; tu' kososomu' iri diti pomogunan. Nga' iya' nopo oi Israil, om ogumu' no kopio o nongoi nu uhang-uhango', nga' gumuli' ko i' daa'ddi kawagu dot id doho'! 2 Antangai ngai' pogi' ilo timpak do konulu-nuluan. Haro po toi o kinoiyonon dot a' nu noongoi kopogompohuwai do miagal do tondu'd sundal? Miagal ko po di tulun dot Arab do poirikau do hilo'd tana' do kowotuan tu' poirikau ko po do magandad do tulun di monokiuhang diya' do hilo'd toning do ralan. Nososomu' nu no kopio dino tampahu' nu iti pomogunan. 3 Om iri noddi o kaantob-antob do rasam do mantad hilo'd tawan, om iri piya rasam di rumikot kasai' do dongkararasaman nga' a' i' korikot. Om kokitanan piya diya' nga' miagal poddi tondu' do sundal; tu' a' ko no milo dot ointingayaman. 4 Om baino' noddi om momoros ko i' dot, ‘Iya' no o tapa' ku, om nosianan ko doho' do mantad dit okoro' oku po. 5 Om a' ko i' bo otogod kasai'; om a' ko araatan doho' do gisom dot alaid,’ ka nu. Iyo noddi o boros nu, oi Israil, nga' minagayi-ayi' ko i' do miningwonsoi dit araat,” ka dau.
Mositi' no do Kumorologo o Tulun dot Israil om Yohuda
6 Tontok dit i Yosia o raja', om boro-boros no o Tuhan dot id doho' do poingkaa, “Nokito nu no i winonsoi dot Israil, i tondu' dot a' otorodok diri? Tuminongkiad iyau doho', om miagal pod wowonsoyon do tondu'd sundal o wonsoyon dau do hilo'd timpak di konulu-nuluan dot asawat om id sahau do pointikid-tikid do kayu dit okohob. 7 Ondos ku daa om gumuli' nondo iyau dot id doho' do nongowonsoi ngai' dau o miagal diri. Nga' a' i' iyau guminuli', om i Yohuda, i tobpinai dau'd tondu' dit a' otorodok, nga' nokokito nogi' ngai'ddi. 8 Om nokito nogi' do Yohuda do nadaan ku ot Israil om pinotongkiad ku tu' suminiliu i' iyau do sundal. Nga' a' nogi' ooris o Yohuda, i tobpinai dot Israil do tondu', suwai ko' suminiliu nogiddi iyau do sundal, 9 om a' i' iyau ointingayaman. Sinosomu' dau iti pomogunan om minagampahu' iyau tu' tuminuku' i' iyau do watu om kayu. 10 Om mulong piya do miagal tomod diri o nowonsoi dau, nga' minsorupai-rupai po o Yohuda, i tobpinai dot Israil do tondu', do gumuli' dot id doho'; nga' maan i' toomod dau iri om aiso' i' o katapatan. Iyoho' no, i Tuhan o minomoros diti,” ka dau. 11 Om sunudai oku noddi do Tuhan do mulong piya do nokotongkiad dau ot Israil nga' osonong-sonong po ot Israil ko' mantad do Yohuda, i tondu' dot a' otorodok diri. 12 Om suhuo' oku nod Tuhan do mongoi polombus do boros dot id Israil do poingkaa, “Oi Israil, it a' otorodok, guli' no dot id doho'. Tu' obinsianan oku i' om a' oku i' tumogod diya' do gisom dot alaid. 13 Nga' okuno' no do nakasala' ko om okuno' no do suminaap ko'd Tuhan, i Kinorohingan nu. Okuno' no do pinatahak nu dot id ponokokinorohingan do bansa'd suwai o kosianan nu di hilo' ko'd sahau do pointikid-tikid do kayu dit okohob, om okuno' no dot a' ko minumboyo' do pinonuhuan ku. Iyoho' no i Tuhan, o minomoros diti,” ka dau. 14 “Guli' kou no dot id doho', oi tulun dit a' otorodok. Tu' iyoho' i' o sanganu dokoyu. Om ongoyon ku indo o tiso' dokoyu do mantad id pointikid-tikid do bandar, om duwo o tulun do mantad id pointikid-tikid do payat. Om pogulion ku nogindo iyokoyu do hilo'd Nuluhon do Sion. 15 Om onuan ku indo iyokoyu do pomorinta' dit otorodok dot id doho'. Om momorinta' nondo iyolo' dokoyu do mikuwo'd toilaan om ginawo di kosuhut. 16 Om kogumu' kou nopondo do hiti'd pomogunan diti om a' nondo o tulun mimboros do pasal di Kaban do Tumpongo'd Tuhan. Om a' iyolo' kosorou'ddi; tu' a' no iyolo' minog do momonsoi kawagu do Kaban do Tumpongo. 17 Om orikot nopondo o maso'ddi om roitan nondo o Yorusalim do ‘Tirikohonon do Tuhan di don raja’ om oinsanan nopondo o bansa' do tumimung do hiri do tumuku' dot id doho'. Om a' nondo iyolo' momonsoi do tumanud dit osorou diyolo' dit araat om it obinsurilog. 18 Om sumugku' nondo ot Israil do Yohuda, om miandad nopondo iyolo'd muli' do mantad id pomogunan di pinananggayan do pisangod di hilo'd utara. Om gumuli' nondo iyolo' do hilo'd pomogunan di pinatahak ku di taki-aki dokoyu do maan do tungkusan,” ka dau.
Tumuku' dot id Tingolig i Tulun do Nasanganu do Kinorohingan
19 Boros kad Tuhan, “Orohian oku daa do manganu diya', oi Israil, do maan ku do tanak ku, om orohian oku do patahak dot id diya' do pomogunan dit osonong kopio, i pomogunan dit olumis no kopio do hiti'd pomogunan. Orohian oku daa do roitan oku diya' do tapa' nu, om a' ko nondo tumongkiad doho'. 20 Nga' miagal ko nopo di tondu' dot a' otorodok dot id sawo dau tu' a' ko i' tuminorodok dot id doho'. Iyoho' no i Tuhan, o minomoros diti,” ka. 21 Haro o tohio dot orongou do hilo'd timpak do konulu-nuluan; iri nopo nga' tihad do tulun dot Israil do mokitulung tu' linihuan i' diyolo' o Tuhan, i Kinorohingan diyolo'. 22 Guli' kou no, iyokoyu i tuminongkiad do Tuhan; tu' lingasan kou i' dau om potorodokon kou dau. Boros ka dokoyu, “Hati no iyahai, rumikot no iyahai dot id Tuhan, tu' iyau no o Kinorohingan dahai. 23 A' tomod i' iyahai notulung di podsusubak dahai do hilo'd timpak do konulu-nuluan. Tu' tadon nopo di monulung dot Israil om mantad no dot id Tuhan, i Kinorohingan dahai. 24 Nga' iri nopo podsubak do Baal, i tingolig di mongintingayam diri, om minanagak noo do koinsanai di piningudipanan di taki-aki dahai do minanganu do mantad poddi gulu po; i baanan do dumba' om sapi', om i tangaanak dahai do kusai om tondu'. 25 Om pologoso' nopo iyahai do mamabo do kointingayaman, om pologoso' nopo iyahai dot oindaraat. Tu' nokowonsoi no iyahai'd dusa dot id Tuhan, i Kinorohingan dahai --- iyahai om i taki-aki dahai; om a' i' iyahai insan umboyo' di ponuhuan dau,” ka diyolo'.
Lolohou do Kumorologo
1 Boros kad Tuhan, “Oi tulun dot Israil, ondung orohian kou'd gumuli', om guli' kou no dot id doho'. Om ondung pataamon dokoyu i tingolig di karaatan ku, om tumorodok kou dot id doho', 2 om milo kou no do sumumpa' dot id suang do ngaran ku. Om oinsanan nopondo o bansa' do mokibarakat doho', om mamarayou nondo iyolo' doho',” ka dau. 3 Boros kad Tuhan dot id tulun do Yohuda om id tulun do Yorusalim, “Roduwo' no dokoyu i tana' dokoyu dit a' po naradu; om kada' kopio dokoyu pasasado' i linsou dot id pogialatan do rugi. 4 Sulungon no kopio dokoyu i batos dokoyu dot id doho', i Tuhan dokoyu, om patahakon no dokoyu o tinan dokoyu dot id doho', oi koinsanai'd tulun do Yohuda om tulun do Yorusalim. Tu' ondung amu', om sumikit nondo do miagal do tapui i kototogod ku tu' araat i' i nongowonsoi dokoyu. Om sumikit nondo iri om aiso' no o milo do momisok,” ka dau.
Oruhai nod Songodon o Yohuda
5 Pounio' no i torumpit do pointongkop diti pomogunan! Pomoros no dot opuhod om it oimuayan kopio. Suhuon no i tulun do Yohuda om i tulun do Yorusalim do manangkus do mongoi'd hilo'd kabandaran di kitolig. 6 Potuduko' no i ralan do kumaa do hilo'd Sion, i nulu-nulu do Tuhan, kolomus no do mongoi'd hiri'd aiso' o koligagaanan. Kada' no pingkalaid! Tu' porikot o Tuhan do kosusaan om karaagan dit awagat kopio do mantad hilo'd utara. 7 Miagal pod singa di mimbulai do mantad hiri'd linisok dau i gampamaraag do bansa' do rumikot. Rumikot no iyau do mongoi pamaraag do Yohuda. Om osiliu pondod pogun i bandar do Yohuda om aiso' o miyon do hilo'. 8 Iyo nopoddi om panampakai kou nod pakayan do mogihad, ihad kou no, om minglompud nod mihad tu' a' po nokotongkiad do Yohuda i kototogod do Tuhan dit a' ogina-gina'. 9 Boros kad Tuhan, “Tadau nopondoddi om atagakan nopo do kosioho' i raja' om i pagawai diyolo'; om iri piya it imam nga' gagaran i' om i nabi nga' ongosuayan nopondo ngai',” ka dau. 10 Om boros kangku'ddi, “Naakalan nu no kopio iti tulun do Yohuda om tulun do Yorusalim, oi Tuhan, it Asawat Kopio. ‘Haro kosimbayanan,’ ka nu, om maso ko' potipatayon no iyahai di gayang,” kangku. 11 Om rumikot nondo o maso dot osunudan iti tulun do Yohuda om tulun do Yorusalim do rumikot i tongus dot alasu' kopio do mantad hilo'd tana' do kowotuan do pakayaan ponong id diyolo'. Om okon no ko' i ribut di koubasanan, i maan nod ponilib di tapol, 12 tu' iri nopo tongus dot opuhod do rumikot om suhuon id Tuhan. Tu' Tuhan no o paratu' do hukuman dot id tulun dau.
Noturungku' do Pisangod o Yohuda
13 Antangai pogi', nga' miagal po moti'd haun i pisangod do rumikot. Om iri nopo korita'-kuda' diyolo' do don sumasangod nga' miagal pod ribut di monomporiu-riu, om i kuda' nga' ongosiau po ko' kondiu. Obungou toko' no! Apatai toko' no! 14 Oi Yorusalim, pataamo' no it araat do mantad id ginawo nu om apasi ko i'. Songkuro po o koloido' nu do poopi' dit araat do hino'd ginawo nu? 15 Nokorikot no i tulun do poporomut do habar do mantad hilo'd bandar do Dan om i mantad hilo'd konuluhanan dot Ipraim do mongoi posunud do habar dot araat. 16 Nokorikot no iyolo' do mongoi popoinsan do koinsanai'd bansa' om momisunud do tulun do hilo'd Yorusalim do haro o pisangod do rumikot do mantad id pomogunan dot osodu'. Om mimpangkis nondo i pisangod do pangkis do monokisangod dot id bandar do Yohuda 17 om turungkuon nondo diyolo' o Yorusalim do miagal pod tulun di madtamong do tumo, tu' suminaap i' do Tuhan i bandar do Yohuda. Tuhan no o minomoros diti. 18 Oi Yohuda, iya' i' o pinoporikot diti kosusaan dot id diya'. Iri i kowoyo-woyoo' do koposi-posion nu o nokobungou do koinsanai'd koinggoritan do minonobok do ginawo nu.
Tumongob i Yoromia do Kosorou di Tulun di Dong Kinorohingan
19 Tumongob no kopio o ginawo ku om oudipon o topurimanan ku. A' oku no milo'd mundorong tomod motod-kotod poo o kangkab ku tu' orongou ku no o torumpit om i pinongkisan do mongoi sangod. 20 Mogisuhu-suhut nopo o kosusaan do rumikot, naayi' pod nangaraag o pointongkop diti pomogunan. Tu' sigog i' do nongoi raago' i kiim ku, om nopogikinis-kinis nopo i kain di kiim. 21 Songkuro po o koloido' ku'dti do montong-ontong do tulun do mogisasangod om mongou-rongou do tuni do torumpit di kobosuk o kopuhodo'? 22 Boros kad Tuhan, “Basug no kopio i tulun ku tu' a' i' iyolo' kotutun doho'. Miagal no iyolo'd tangaanak di basug, tu' aiso' i' o toila-ilaan. Ongoilo tomod daa iyolo' do mingwonsoi dit angaraat, nga' aiso' indo o toila-ilaan do momonsoi'd osonong,” ka dau.
Nokito dot id Pinointalang i Karaagon do Rumikot
23 Ontong oku nodti pomogunan, om aiso' no o suang, otuu po tomod. Tingaha' oku nod hilo'd tawan, om aiso' no o tanawau. 24 Ontong oku no di konuluhanan dit angakawas, om mingguyu' po tomod, om i konulu-nuluan nga' iyo pod kiat-kiatan do gumuyu'. 25 Aiso' no o tulun dot okito ku; om iri piya tombolog nga' nongkotulud ngai' no. 26 Nosiliu pod kowotuan i tana' dot oluhub; om i kabandaran nga' nangaraag, tu' otogod no kopio o Tuhan di tulun dau. 27 (Nokoboros nod Tuhan dot oinsanan nopondo iti pomogunan dot osiliu do tana' dit a' sunian, nga' a' i' mando dau raagon kopio.) 28 Tumongob nondo iti pomogunan; om tumuong ilo tawan. Tu' nokoboros nod Tuhan om a' no dau simbanan i natantu' mantad dau do wonsoyon dau. Natantu' no dau i wonsoyon dau om a' no kopio dau wolihan iri. 29 Om mogidu' ngai' nopondo o tulun om songhika-hika poo do korongou do tulun di songinsakai'd kuda' om i tulun do mamamana'. Haro i' diyolo' o mongoi'd hilo'd puru', om haro o mongoi indakod di kapampangan. Opogiiduan pondo i kabandaran, om aiso' no o miyon kawagu'd hiri. 30 Obungou ko no, oi Yorusalim! Nokuro tu' aragang o pakayon nu? Nokuro tu' manampakai ko'd rasuk dot aragang, om mongillumis do tinan do tamas om pirok o pongillumis, om nokuro tu' saaton nu o mato nu? Aiso' no o kootuk-otukon dino pongillumis nu! Tu' nadaan ko no di minongoi daa uhang-uhang diya', om pokipapatayan ko noddi diyolo'. 31 Nokorongou oku do giniakan do miagal di giak do tondu' do mogkosusu, i giniakan do miagal do tondu' dit omulok po do mogkosusu di tanak dau dot id gulu. Iri no o giniakan do Yorusalim do mabang-kabang poo do momuhobo, i popinghiwor pod longon do mimboros do, “Nobungou oku no! Tu' rumikot no iyolo' do mongoi pamatai doho',” ka.
Dusa do Yorusalim
1 Pingwayaai ngai' no dokoyu i ralan do hino'd bandar dokoyu, oi tulun do Yorusalim! Pikoroontong kou no dot id posorili' dokoyu! Antangai no kopio dokoyu! Haro toi o nokito dokoyu dot ongosongulun piya dit otulid o ginawo om i tumotos do tumorodok dot id Kinorohingan? Ondung haro o tokito dokoyu om ompunan i' do Tuhan o Yorusalim. 2 Mulong piya do momoros kou do tumuku' kou dot id Tuhan nga' maan i' dokoyu toomod iri. 3 Otopot nopo kopio om kotorodoko' o tihumon do Tuhan. Binobog kou dau nga' a' i' dokoyu pinusou iri; om pinokorualan kou dau nga' minada' kou i' do tudukan. Tu' pinokodou tomod nogi' dokoyu o ginawo dokoyu om a' kou kuminorologo do dusa dokoyu. 4 Om pomusorou oku noddi do poingkaa, “A, iyolo' nopodti om rayat noo, om aiso' i' o toila-ilaan. Tu' dangkababasug i' do kowoyo-woyoon diyolo'; om a' iyolo' koilo do korohian do Kinorohingan diyolo', om i ponuhuan do Tuhan diyolo'd momonsoi. 5 Mongoi oku nondo solowot di tulun dit angagayo o pangkat om moro-boros oku nondo diyolo'. Tu' atantu' no do koilo i' iyolo' ondung nunu i korohian do Kinorohingan diyolo' om i ponuhuan do Tuhan diyolo'd momonsoi,” kangku. Nga' iyolo' nogi' nga' oinsanan nopo do mada' do porintaon do Tuhan om a' iyolo' mumboyo' dau. 6 Om gowoi poddi om patayon iyolo' di singa di mantad hilo'd gouton; om ngoyon iyolo' pogianato' di toni do mantad hilo'd tana' do kowotuan do gisom dot opogitobilang-bilang iyolo'. Om iri tontokinon nga' minghombo nondo do hiri'd bandar diyolo' do mogihum do takanon. Ondung sumoliwan o tulun do mantad id walai diyolo' om opogianat no tu' adalaan no kogumu' i dusa diyolo' om asaru' iyolo' do tumongkiad do Kinorohingan. 7 Om ponguhot no o Tuhan do poingkaa, “Nokuro daa tu' ompunan ku po o dusa di tulun ku? Tu' notongkiadan oku no diyolo' om tuminuku' nogiddi iyolo' dit okon ko' Kinorohingan. Nonuan ku i' i tulun ku do taakanon do gisom do nayahan tomod iyolo', nga' minagampahu' i' iyolo', om hiri no iyolo'd walai di sundal do monorimo-rimo. 8 Miagal po iyolo' di kuda' do tontoluhan dit olomu' om it a' ogina-gina' do rumahi do mokiongoondu'; tu' orohian ngai' nopo iyolo' do sawo di tambalut diyolo'd kusai. 9 Om a' ku po tuu daa hukuman iyolo' dot iyo kopio'ddi o winonsoi diyolo' om a' oku po tuu daa sumuli' do bansa' do miagal diri? 10 Porikoton ku nondo o pisangod do mongoi pongumpadan di guas dot anggur diyolo', nga' a' indo momunso kopio. Suhuon ku nondo i pisangod do monutu' di raan dot anggur tu' okon i' ko' doho' di raan. 11 Tu' minagakal no kopio doho' i tulun dot Israil om i tulun do Yohuda. Iyoho' no i Tuhan, o minomoros diti,” ka dau.
Niadaan do Tuhan ot Israil
12 Suminaap do Tuhan i tulun do songonuon do Tuhan. Boros ka diyolo', “Aiso' i' bo ot oontok do kosusaan om aiso' o mogisasangod om mononglous,” ka. 13-14 Minomoros iyolo' dot iri nopo nabi om miagal nod ribut om pinoboros diyolo' dot aiso' o boros do Tuhan do norongou diyolo'. Om boros kaddi do Tuhan, it Osundu Kopio, dot id doho', “Oi Yoromia, silihon ku nondo do miagal do tapui o boros ku do hino'd kabang nu tu' iyo kopio iddi o pinoboros di tulun ku. Om iti nopondo bansa' om miagal po di siduwon: om sorobon nondo iyolo' di tapui do gisom dot ouu,” ka dau. 15 Oi tulun dot Israil, porikot no o Tuhan dot iso' o bansa' do mantad hilo'd sodu' do mongoi panangod dokoyu. Bansa' nopoddi om hino no do mantad poddi gulu po, om boros diyolo' nga' a' i' dokoyu osuhutan. Iyolo' nopo om ongokoris kopio koulun. 16 Om iri nopo gampamana' diyolo' nga' gunsiou ngai' nopo, om mimpatai nopo iyolo' om aiso' o kosianan. 17 Om kanon ngai' nopondo diyolo' i tua' do tanom-tanom dokoyu om i taakanon dokoyu; om patayon diyolo' i tangaanak dokoyu'd kusai om tondu'. Sumbolion ngai' nondo diyolo' i baanan do dumba' om sapi' dokoyu, om ngoyon diyolo' umpadano' i kabun dot anggur om kayu sedar dokoyu. Om iri po bandar dit ongkitolig di sondi-sondihon daa dokoyu nga' raagon ngai' nopondo diyolo'. 18 Boros kad Tuhan, “Nga' tontok piya do maso'ddi nga' a' ku i' punsoon kopio i tulun ku. 19 Nga' muhot nopo iyolo' ondung nokuro tu' winonsoi ngai' ku o miagal diri om sunudan no iyolo', oi Yoromia, do poingkuro nopo iyolo' do tuminongkiad doho' om minodsubak do ponokokinorohingan do bansa'd suwai di hilo' pod pomogunan diyolo', om miagal no iyolo'ddi dot osiliu'd turipon do bansa'd suwai dot id pomogunan dit okon ko' diyolo',” ka dau.
Pinoinsan do Kinorohingan i Tulun Dau
20 Boros kad Tuhan, “Sunudan no i sinakagon di Yakub, i poundorong do hilo'd Yohuda do poingkaa: 21 Pokinongou kou no kopio, iyokoyu i tulun do basug om lowong! Iyokoyu i kimato nga' a' i' kokito, om i kitolingo nga' a' i' korongou. 22 Iyoho' no i Tuhan; nokuro tu' a' kou oronok doho'? Nokuro tu' a' kou i' gagaran dot ooris dot id toguang ku? Okon toi ko' iyoho' o minomonsoi dilo pasir do hilo'd tisan do rahat do sumiliu do wolit dilo rahat, i wolit dot a' milo'd tolibambanan do gisom dot alaid? Mulong piya do gumayo o tumbak nga' a' i' katalib di wolit diri. 23 Nga' iyokoyu nopo om okodou i' o ginawo om obinsaap. Suminansala' kou nogi' om tuminongkiad kou doho'. 24 A' kou i' minomusorou do momusou doho' do mulong piya do porikoton ku i rasam do tontok di lumahanggang o roun do kayu, om tontok di momiroun kawagu o kayu, om onuan ku iyokoyu do maso do kapangamatan do pointikid do toun. 25 Nga' iri i dusa dokoyu o minangantob ngai' dit ongosonong do rumikot dot id dokoyu, gisom dot a' kou'ddi nokopuriman do kosonongo'ddi. 26 Oi tulun ku, haro o tulun dot araat do poinrolot dokoyu. Om poingkuro nopo i tulun do madtamong do lawa' di pamalawa' dau do tombolog, om iyo no iyolo'ddi do pataan do lawa' do pamalawa' do tulun. 27 Tu' poingkuro nopo i tulun di mamalawa' do tombolog do momonu' di kukurungan do tombolog, om iyo noddi iyolo' do momonu' di walai diyolo' do konunu-nunuan di pinanakau diyolo'. Om iyo noddi o kinosilihan diyolo'd tulun di kikuasa' om kaya'; 28 om nongkolombon diri iyolo' om osimbayan. Aiso' no o kopupuson di wowonsoyon diyolo' dot araat. A' i' iyolo' papatahak dot id tangaanak dit aiso' o molohing dit apatut daa diyolo' dot aanu om a' iyolo' mogobi' do tulun dit ulak-ulakan. 29 Nga' iyoho' nondo, i Tuhan, o momohukum diyolo' tu' iri ngai' o kopomohukuman ku, om sulian ku o bansa'dti. 30 Nosiliu no it araat kopio om i koronob kopio do hiti'd pomogunan diti; 31 tu' aiso' no o poboroson do nabi dot okon ko' tudut; om iri po imam nga' moyo' nopo di ponuhuan di nabi, om iyokoyu i tulun ku nga' orohian i' do miagal diri. Nga' nunu no ma daa'ndo o wonsoyon dokoyu dot opupusan ngai' iri,” ka dau.
Tinurungku' do Pisangod o Bandar do Yorusalim
1 Oi tulun do Binyamin, panangkus kou no do mongoi intirung! Poggidu' kou no do mantad id Yorusalim! Pounio' no o torumpit do hilo'd Tokua om polisuno' no dokoyu o tapui do maan do pogintutunan do hilo'd Bait-Kirim. Tu' motirikot no o kosusaan om i mamaraag do mantad hilo'd utara. 2 Olumis tomod daa i bandar do Sion, nga' oruhai no dot araag iri. 3 Om rikoton nondo iri do raja' do miwoyo' di soudor diyolo'. Om powonsoyon nondo diyolo' o kiim diyolo' do pointutuk di bandar, om sompori-pori nopondo do powonsoi'd kiim do hiri'd kinoiyonon do korohian diyolo'. 4 Om momoros nondo iyolo' do poingkaa, “Sodia' no do mongoi sangod do Yorusalim! Ngoyo' toko' iyolo' songodo' do pitangaadau'd baino'!” ka no diyolo'. Nga' momoros indo iyolo' do, “Nakalaid noti, tu' osiriba' no ilo tadau, om sangai nga' anaru no, tu' osodop noddi. 5 Mongoi toko' i' sangod do dongotuong; om raagon toko' i' i kuta' do pogintirungan do hiri'd bandar,” ka diyolo'. 6 Tu' nosuhu' nod Tuhan, it Osundu Kopio, i piro-piro raja' do managad do kayu om potimbun do tana' do maan do tolig om oturungku' i' o Yorusalim. Om nokoboros no o Tuhan do poingkaa, “Hukuman ku nondo iti bandar tu' ogumu' no kopio o tulun do mongulok-ulok. 7 Poingkuro nopo i tudan do waig do poluyung kasai' do waig dit oniting om iyo nogiddi o Yorusalim do posoliwan kasai' dit araat. Kororongit po om karaagon ot orongou ku dot id bandar diri; toruol po om suhat o tokito ku do hinonggo nopo. 8 Oi tulun do Yorusalim, pologoso' no do sumiliu do popoinsan diya' o koinsanai'd kosusaan diri, tu' ondung amu' nga' tongkiadan ku no moti' iyokoyu; om silihon ku do tana' dit a' sunian om aiso' o tulun do mongiyon-ngiyon diti bandar dokoyu,” ka dau.
Obinsaap o Tulun dot Israil
9 Boros kad Tuhan, it Osundu Kopio, dot id doho', “Aayi' nopondo ot Israil dot upuon do tulun, do miagal di guas dot anggur do hiri'd kabun di naayi' do mongupu' o tua'. Iyo nopoddi, om ngoyon ngai' no posio' i tulun do daamot pod haro o maso,” ka dau. 10 Om boros kangku do suminimbar, “Isai daa o mokinongou doho' do moro-boros oku piya do popoinsan diyolo', oi Tuhan? Ongokodou ngai' i' o ginawo diyolo' om mada' do mokinongou'd boros nu; pingirakan nogi' diyolo' i ponuhuan nu doho'd popoboros. 11 Iyoho' nga' a' no kogintoron tu' iyoho' piya nga' obinsuhu' i' di kototogod nu diyolo', oi Tuhan,” kangku. Om boros kaddi do Tuhan dot id doho', “Pourobuson nopo i kototogod ku dot id tangaanak di hilo'd ralan om id tangaanakwagu di mogititimung. Atanggayan ngai' nopondo i mogisawo-sawo om iri piya i komolohingan no nga' aiso' no ot oluon. 12 Tahakon nondo i walai diyolo' dot id tulun do suwai, om iyo nogiddi i koumaan om i sawo diyolo'. Om hukuman ngai' ku no i tulun do hiti'd pomogunan diti. 13 Oinsanan nopo o tulun dit angagayo om it ongokoro' po dot a' otulid o pogigihum do tusin; iri piya nabi om it imam nga' monipu' i' di tulun. 14 Miagal pod nagaru-garut no toomod i suhat do tulun ku do sorohon diyolo'; pagaan-gaanon diyolo'. ‘Osonong-sonong ngai' i' bo,’ ka no diyolo', om maso ka dot aiso' nogi' o kasanang-sanangai. 15 Apatut daa dot ointingayaman iyolo' tu' minomonsoi i' iyolo' di wowonsoyon dit araat. Nga' a' tomod i' iyolo' ointingayaman; mogot po om karagang po o rabas diyolo' dot ointingayaman. Om gowoi pondo om ahaba' iyolo' do miagal di tulun do suwai di nahaba'; om soira' nopod hukuman ku iyolo' om iri no o kopupuson do topud-opud diyolo'. Iyoho' no i Tuhan, o minomoros diti,” ka dau.
Niada' dot Israil o Ponudukan do Tuhan
16 Boros kad Tuhan dot id tulun dau, “Ingkakat kou no do hilo'd pogitotongkiadan do ralan om antangan no kopio i ralan. Uhoton no i ralan di gulu-gulu po om uhoton i ralan dit osonong kopio. Susui no do ralan diri om osimbayan i' o koposi-posion nu,” ka dau. Nga' boros ka diyolo', “A, a' i' iyahai sumusui do ralan diri,” ka. 17 Om pomili' noddi o Tuhan do tulun do sumiliu do madtatamong om popoinsan diyolo' do mokinongou do tuni di torumpit do pogintutunan. Nga' boros ka diyolo', “A' i' iyahai mokinongou,” ka. 18 Om boros kaddi do Tuhan, “Pokinongou kou pogi', oi koinsanai'd bansa'! Om ilaan no ondung nunu it osiliu dot id tulun ku. 19 Pokinongou no, oi pomogunan! Pomohukum ku nopo dit osorou diyolo' do wonsoyon diyolo', om karaagon tu' minada' i' iyolo' di ponudukan ku om a' minumboyo' di boros ku. 20 Nunu daa o kopusou-pusou ku di kominyan di mantad hilo'd Siba di patahakon diyolo' doho', om i rampa do mantad hilo'd pomogunan dit osodu'? A' oku i' rumamit di porsombahan diyolo' om a' oku orohian di porsombahan di sorobon diyolo'. 21 Om gowoi pondo om potohubon ku om porotuon ku o tulun diti. Om matai ngai' nopondo i tapa' om i tangaanak, om i tambalut om i songkoduwo diyolo',” ka dau.
I Manangod do Mantad Hilo'd Utara
22 Boros kad Tuhan, “Rumikot o tiso' o bansa' dit okoris do mantad id pomogunan do ponong hilo'd utara. Posodia' no iyolo' do mongigit di rapo-rapo do sumangod. 23 Nongoigitan no diyolo' i pana' om i gayang; orongit tomod iyolo' om aiso' o kosianan diyolo'. Miagal pod ngorod do rahat o karangahan diyolo' do songinsakai'd kuda'. Posodia' no iyolo' do mongoi panangod do Yorusalim,” ka dau. 24 “Norongou no dahai i habar diri,” ka di tulun do Yorusalim, “om olomok po tomod ot opurimanan dahai tu' aiso' no o pokukurayan dahai. Poimponu' po iyahai'd kopoddosian om toruol do miagal di tondu' do mogkosusu. 25 A' no iyahai kobulun do mongoi'd hiri'd koomulakan do mongoi pimpanau do hiri'd ralan, tu' ongkirapo-rapo ngai' nopo i pisangod do posorili' dahai om korolosi no kopio iyolo' dahai,” ka diyolo'. 26 Boros kad Tuhan dot id tulun dau, “Panampakai kou nod pakayan do mogihad om isis kou nod hilo'd pupuk. Pinglompud kou nod mihad do miagal do pogihad dokoyu do tanak do napatai dit iso' i' daa, tu' sigog i' moti' do rumikot do mongoi panangod i mongoi pamaraag dokoyu,” ka dau. 27 Om boros kaddi do Tuhan dot id di Yoromia, “Toinuo' no i tulun ku, oi Yoromia, do miagal di monompipi' ko'd basi', om ilaan no kopio ondung okuro- kuro o kowoyo-woyoon diyolo'! 28 Oinsanan nopo iyolo' do tulun di sumasaap om osurilog, om i miagal pod tambaga' om basi' kokodou o ginawo. Angaraat ngai' nopo o kowoyo-woyoon diyolo', tu' minghombo poo iyolo' do mongoi popimboros di ponompuraraat do wokon. 29 Alasu' no tomod i puputan nga' a' i' lumanak i basi' dit a' osonong om a' midu'. Aiso' i' o koonong-onongon do momolidang do tulun ku tu' a' i' poinsoduwon i tulun dit angaraat do hilo'. 30 Om roitan nondo iyolo' do rinomos, tu' iyoho' no i Tuhan, o magada' diyolo',” ka dau.
Minonusui do Boros do Tuhan i Yoromia do Hiri'd Walai'd Sasambayangan dot Agayo
1-3 Sinuhu' oku'd Tuhan do mongoi do hiri'd wawayaan di Walai'd Sasambayangan dot Agayo, i hiri'd kosolokoyon do tulun do Yohuda do mongoi sambayang. Sinuhu' oku dau do mingkakat do hiri om popolombus di poboroson do Tuhan, it Osundu Kopio, i Kinorohingan dot Israil, dot id diyolo' do poingkaa, “Simbanai no ino kowoyo-woyoon dokoyu om ino kowoyo-woyoo' do koposi-posion dokoyu, om pologoson ku i' iyokoyu do miyon kasai'd hiti. 4 Kada' ponongkuyaai di boros do tulun di magakal dokoyu do poingkaa, ‘Aiso' i' o koligagaanan toko'! Tu' iti nopo om Walai i' do Sasambayangan dot Agayo di don Tuhan. Walai i' kopio do Tuhan iti,’ ka diyolo'. 5 Posimbano' no ino kowoyo-woyoo' do koposi-posion dokoyu, om ino kowoyo-woyoon dokoyu. Wonsoyon no dokoyu it otulid dot id pogialatan dokoyu. 6 Tumingkod kou no do mongulok-ulok do bansa'd suwai, om i tangaanak dit aiso' o molohing, om i tongoondu' do nopuadan. Kada' kou pamatai do tulun dit aiso' o sala' dot id pomogunan diti. Kada' kou tuku' dot id tingolig, tu' karaag i' moti' dokoyu iri. 7 Ondung posimbanon dokoyu o kowoyo-woyoo' do koposi-posion dokoyu om ino kowoyo-woyoon dokoyu, om pologoson ku no iyokoyu do momogun-mogun do hiti'd pomogunan di pinatahak ku dot id taki-aki dokoyu do sumiliu'd diyolo'd songonuon do gisom dot alaid. 8 Antangai pogi' nga' sumondiu kou i' do boros dit a' otopot. 9 Om manakau kou, om mamatai, om magampahu', om mimboros dit a' otopot, om papatahak kou do porsombahan dot id Baal, om tumuku' kou dot id tingolig dit a' dokoyu notutunan do mantad di gulu po. 10 Mingwonsoi kou po di wowonsoyon do karaatan ku, om rumikot kou nogindo do mongoi ingkakat do hiri'd toguang ku do hilo'd walai ku om momoros kou dot, ‘Aiso' i' o koligagaanan dahai,’ ka dokoyu. 11 Ondos daa dokoyu om lilisokon do gampanakau i Walai ku? Nokito ngai' ku no i wonsoyon dokoyu. 12 Ongoi kou no do hilo'd Silo, i kinoiyonon di pinili' ku dit id gulu i' kopio do tiyonon do sumambayang dot id doho', om antangan no i winonsoi ku dot id kinoiyonon diri, tu' minomonsoi id dusa i tulun dot Israil, i tulun ku. 13 Winonsoi ngai' po dokoyu o dusa'ddi do mulong piya dot asaru' tomod oku do momoros dokoyu, nga' a' kou i' minokinongou. Om a' kou suminimbar di linohou ku iyokoyu. 14 Iyo nopoddi om nunu nopo i winonsoi ku do hilo'd Silo om iri no o wonsoyon ku dot id Walai'd Sasambayangan dot Agayo diti sondihon daa dokoyu. Hiti nod kinoiyonon di pinatahak ku daa dot id taki-aki dokoyu do wonsoyon ku o miagal di winonsoi ku do hilo'd Silo di gulu po. 15 Om uyungon ku nondo iyokoyu do mantad id doho' do miagal di minonguyung oku di tobpinai dokoyu, oi tulun dot Israil. Tu' iyoho' no i Tuhan, o minomoros diti,” ka dau.
A' Minumboyo' i Tulun dot Israil
16 Boros kad Tuhan, “Oi Yoromia, kada' no sambayangai iti tulun. Kada' no obiai iyolo' do sumambayang, om kada' pononsog doho' tu' a' oku no mokinongou diya'. 17 Tu' a' nu toi okito ilo pingwonsoyon diyolo' do hilo'd bandar do Yohuda om hilo'd karalan-ralanan do Yorusalim? 18 Mintimung pod siduwon i tangaanak, om modsidu i tongokusai, om iri no tongoondu' om minggaur do tapung do wonsoyon do roti do patahakon di ponokokinorohingan di roitan diyolo' do Raja'd Tondu' do Surga. Om popintungu nogi' iyolo' do porsombahan do waig dot anggur do patahakon dot id ponokokinorohingan do mokimohilo-hilo'd pokoruol do ginawo ku. 19 Nga' iyoho' kopio tuu daa i pokorualan diyolo'ddi? Okon, suwai ko' iyolo' i' om iyolo' o pokorualan diyolo' om it intingayamon diyolo'. 20 Om gowoi pondo dot iyoho' nondo, i Tuhan, it Asawat Kopio, o pourabus do kototogod ku dit a' ogina-gina' do hiti'd Walai'd Sasambayangan dot Agayo diti. Om pourobuson ku nogi' iri dot id tulun om id tayam-tayam, om hiri piya'd kayu om hiri'd tanom-tanom nga' pourobusan ku i' do kototogod ku. Miagal pondo do tapui di molob-ngolob om it a' milo'd pisokon o kototogod ku. 21 Oi tulun ku, haro i' daa o porsombahan dit oyion nopod monorob do hiri'd pananaraban do porsombahan, om haro i' daa i milo dokoyu'd akanon o wookon. Nga' poboroson ku nopo iyoho', i Tuhan, om mogot nogi' do kanon ngai' nopo dokoyu iri. 22 A' ku i' nonuan i taki-aki dokoyu dot oturan do pasal do porsombahan do sorobon ko' nunu nopo o kowoyoon do porsombahan do suwai di pinosoliwan ku i' iyolo' do mantad hilo'd Masir. 23 Nga' sinuhu' ku i' iyolo' do mumboyo' doho' om osiliu oku i' do Kinorohingan diyolo', om osiliu iyolo' do tulun ku. Om sinunudan ku nogi' iyolo' do tumanud di pinonuhuan ku diyolo', om osimbayan indo kasai' iyolo'. 24 Nga' a' i' iyolo' minumboyo' om a' minamadul diri. Suwai ko' miningwonsoi nogi' iyolo' do nunu nopo i korohian do ginawo diyolo' dit okodou om araat, om ruminuhang nogiddi o kararaat diyolo' om a' nogi' iyolo' suminonong. 25 Mantad poddi suminoliwan do mantad hilo'd Masir i taki-aki dokoyu om gisom do baino' om a' oku no notingkod do popingrikot do susuhuon ku, i nabi ku dot id dokoyu. 26 Nga' aiso' i' o tiso' dokoyu do minokinongou om aiso' o minamadul. Tu' ruminuhang nogi' o kokodoho' do ginawo dokoyu om pointalib nogiddi o karaato' dokoyu ko' i taki-aki dokoyu,” ka dau. 27 Om boros kaddi do Tuhan dot id di Yoromia, “Poboroson ngai' nu piya iti boros ku dot id tulun ku, oi Yoromia, nga' a' i' iyolo' mokinongou diya'; om lohowon nu no daa'ndo iyolo' nga' a' i' iyolo' sumimbar. 28 Iyo nopoddi om sunudan no iyolo' dot iyolo' no o bansa' dit a' mumboyo' doho', iyoho' i Tuhan om Kinorohingan diyolo'; om a' iyolo' minsingilo do mantad id hukuman di pinaratu' dot id diyolo'. Natagak no kopio o kotorodoko' diyolo'. Tu' a' no diyolo' insan do pinroitan iri,” ka dau.
Dusa do Hilo'd Rantai do Hinom
29 Boros kad Tuhan, “Pogihad kou no, oi tulun do Yorusalim! Pampadai no dokoyu ino tobuk dokoyu om taamon i' do hilo'd tana'. Podsinding kou no do sinding do mogihad do hilo'd timpak do nulu-nulu. Tu' pinotogod oku dokoyu, iyoho' i Tuhan, om gowoi poddi om nadaan ngai' ku o tulun ku. 30 Araat tomod o winonsoi di tulun do Yohuda. Tu' pinoiyon diyolo' i tingolig diyolo', i karaatan kopio ku do hiri'd Walai ku, om nososomu'ddi diyolo' iri. 31 Minomonsoi iyolo' do pananaraban do porsombahan di roitan do Topit do hilo'd Rantai do Hinom, do panaraban di tangaanak diyolo' do maan do porsombahan di sorobon. Nga' a' ku i' iyolo' sinuhu' do momonsoi do miagal diri, a' oku i' nokopomusorou do miagal diri. 32 Om gowoi pondo do rumikot o maso dot a' roitan do Topit om a' roitan do Rantai do Hinom o hilo', suwai ko' roitan nondo do Rantai do Pinonumbolian. Om hilo' nondo o pamalabangan diyolo' do tulun tu' aiso' no o pamalabangan do suwai. 33 Om taakanon pondod tombolog om nintorusan i rata' om aiso' i' o mongugad. 34 Osiliu nondo do tana' dit a' sunian o pomogunan diri. Om pupusan ku nondo i pangkis dot otood om it ongosonong o ginawo om i karamayan do moginakan do dong kumawin do hiri'd bandar do Yohuda om hiri'd karalan-ralanan do Yorusalim.
1 Tontok nopondo do maso'ddi om posoliwanon nondo do mantad hiri'd lobong diyolo' o tulang di raja' om i pagawai do Yohuda, om i tulang dit imam om i nabi om i tulun do suwai di poingiyon do hilo'd Yorusalim. 2 A' nogi' otimung om a' olobong i tulang diri suwai ko' poinromos nopo do hiri'd tana' do miagal pod rinomos. Songinsasad pondo iri dot id dotimpalangan do tadau, om tulan, om rombituon, i kinosianan om i sinubak di tulun diri di gulu po, om i nongoi diyolo' pokitudukai om i tinuku' diyolo'. 3 Om iri nopondo tulun di noolu-olu' do mantad id bansa' dot araat diri, i songingiyon dot id kinoiyonon di pinotompiasan ku diyolo' om orohian nogi' daa'ndo do matai ko' mantad do poimpasi. Iyoho' no i Tuhan, it Osundu Kopio, o minomoros diti,” ka dau.
Dusa om Hukuman
4 Sinuhu' oku'd Tuhan do momisunud di tulun dau do poingkaa, “Soira' nopo dot aratu' o tulun, om a' toi iyau tumungag i' kawagu? Om apalid nopod ralan o tulun om a' toi iyau gumuli' i' kawagu? 5 Nga' nokuro'ddi oi tulun ku, tu' mogidu' kou do mantad id doho' om a' no gumuli-guli'? Sumokot tomod kou nogi' di tingolig dokoyu om mada' nogi' do gumuli' dot id doho'. 6 Minokinongou tomod oku i' daa, nga' a' kou i' minomoros dit otopot. Aiso' i' o tiso' dokoyu do monosol di kararaat dokoyu, om aiso' o minuhot dot, ‘Nunu o nowonsoi ku di nakasala'?’ ka. Tu' sorompori-pori kou nopo do tumanud do korohian dokoyu, do miagal poddi kuda' do tumangkus dot id pisangadan. 7 Iri piya i tombolog do roitan do luungon nga' koilo i' do maso do koulian, i sikukur, om i kolumpisau, om i wodik, nga' koilo i' do maso do koundolihan do tiyonon. Nga' iyokoyu nopo, i tulun ku, om a' i' koilo dot oturan di ponuduk ku dokoyu. 8 Om poingkuro'ddi do momoros kou dot ongkitoilaan kou, om koilo kou dot oturan ku? Antangai pogi' nga' nosimbanan no moti' di piro-piro gomponuduk do tugama' di goudut i toturan ku. 9 Ointingayam nondo i tulun dokoyu dit ongoilo; om oborulong nopondo o pomusorou diyolo' om kosulung iyolo' do lawa'. Naadaan no diyolo' i boros ku; om nunu po kaka daa'ddi o toilaan diyolo'? 10 Om gowoi pondo om patahakon ku'd wokon i tumo diyolo' om patahakon ku dot id kusai'd suwai i sawo diyolo'. Tu' oinsanan nopo, i tulun dot angagayo om it ongokoro' po dot araat o ralan do mogihum do tusin. Iri piya nabi om it imam nga' mongudut i' di rayat. 11 Om miagal pod nagaru-garut no toomod i suhat di tulun ku dot osorou diyolo', tu' pagaan-gaanon diyolo'. ‘Osonong-sonong ngai' i' bo,’ ka no diyolo', om maso ka dot aiso' nogi' o kasanang-sanangai. 12 Oi tulun ku, nointingayaman kou i' di nongowonsoi dokoyu dit angaraat tomod? Amu'! A' tomod kou i' nointingayaman; a' i' nakaragang o rabas dokoyu dot ointingayaman. Om gowoi pondo om ahaba' kou do miagal di wokon tu' nahaba'; om soira' nopo do hukuman ku iyokoyu, om iri nondo o kopupuson do topud-opud dokoyu. Iyoho' no i Tuhan, o minomoros diti. 13 Orohian oku daa do monimung di tulun ku, do miagal do tulun di monimung di tomoton; nga' iyolo' nopo om miagal noddi guas dot anggur dit aiso' o tua', om i guas dot ara dit a' mongua'; om iri piya roun nga' nongoriou no. Om gowoi poddi om pinologos ku o bansa'd suwai do mongoi pomorinta' do pomogunan diyolo',” ka dau. 14 “Nokuro tu' poundorong tomod toko'?” ka di tulun di dong Kinorohingan do minonguhot. “Kainou pogi' manangkus do mongoi'd hilo'd bandar dit ongkitolig, om baya' nopod apatai toko' do hilo'. Tu' hukuman toko' nod Tuhan, i Kinorohingan toko', om noonuan toko' no dau di kawanit do maan dot inumon, tu' minomonsoi toko' i' do dusa dot id dau. 15 Minagandad toko' daa do kosimbayanan om kolingasan nga' aiso' tomod nopo o kinotutukon diri, tu' iri nogi' it orongit o ruminikot. 16 Hilo' nod bandar do Dan i pisangod toko'; om orongou toko' no i gongus do kuda' diyolo'. Gagaran ngai' nopo o pointongkop diti pomogunan do korongou di gongus do kuda' diyolo'. Tu' nokorikot no i pisangod toko' do mongoi pamaraag do pomogunan toko' om i bandar toko' om koinsanai di tulun do hilo',” ka diyolo'. 17 Boros kad Tuhan, “Antang-antangan no, tu' porikot oku do tulanut dot id pogialatan dokoyu, i tulanut do kapatai om it a' milo'd limuon, om tindukon kou nondoddi,” ka dau.
Tumongob i Yoromia do Kosorou di Bansa' Dau
18 A' no milo do lingoson o katangaban ku; tu' norualan no kopio o ginawo ku. 19 Pokinongou pogi'! Pointongkop nopodti pomogunan dot orongou ku i tulun ku do minggarang dot, “Okon noddi ko' hilo'd Sion o Tuhan? Okon noddi ko' hilo' i raja' do Sion?” ka no. Om boros kad Tuhan, i raja' diyolo' do suminimbar, “Nokuro giya tu' pinotogod oku dokoyu? Tu' tuminuku' kou di tingolig dokoyu om tuminuku' kou dot id ponokokinorohingan dit aiso' o guna'?” ka dau. 20 Om boros ka di tulun dot Israil, “Nakatalib no i maso do magadau, om nakatalib no i maso do mongomot, nga' a' toko' po noongoi kapasi,” ka diyolo'. 21 Tumongob po tomod o ginawo ku tu' norualan i' i bansa' ku; mogihad oku po tu' aiso' no o pokukurayan ku. 22 Aiso' toi o tubat do hilo'd Giliad? om aiso' toi o dokutur do hilo'? om nokuro'ddi tu' a' nolingasan o bansa' ku?
1 Torobong daa giya do waig iti tulu ku'dti, om tudan do romou iti mato ku, om milo oku i' do mihad do tadau om totuong do mogihad di tulun ku di nangapatai do pisangod. 2 Haro daa giya o tiyonon ku'dti do hilo'd tana' do kowotuan om kotongkiad oku i' diti bansa' ku. Tu' oinsanan nopo iyolo' dot a' otorodok, om sinompuruan do tulun di popohudsu. 3 Posodia kasai' nopo iyolo' do mongudut, tudut poo o momorinta' di pomogunan, okon no ko' katapatan. Boros kad Tuhan, “Pogisuhut-suhuton nopo do tulun ku do momonsoi it araat, om a' no iyolo' magakun do Kinorohingan oku diyolo',” ka dau. 4 A' no milo dot a' mumbangan-bangan o koinsanai do tulun di tambalut piya dau, tu' aiso' no o milo do ponongkuyaanan di tobpinai piya dau, tu' miagal ngai' nopo di Yakub koudut, om monipu' ngai' o tulun di tambalut piya kopio diyolo'. 5-6 Mamalid ngai' nopo iyolo' di tambalut piya kopio diyolo', om aiso' no tiso' piya di momoros dot otopot tu' noubas no i dila' diyolo' do minsingudut om mada' no kopio iyolo' do tumingkod do momonsoi'd dusa. Pogisuhut-suhuton nopo diyolo' do momonsoi i ponginggorit diyolo'd wokon, om a' nopo otingkod i poninipu' diyolo', om notongkiadan no kopio diyolo' o Tuhan. 7 Om gowoi poddi om minomoros o Tuhan, it Osundu Kopio do poingkaa, “Sompipion ku nondo iti tulun ku do miagal di monompipi' do basi', om umbalan ku iyolo'. Tu' nokowonsoi no dot araat o tulun ku om nunu po daa'ddi o milo ku'd wonsoyon dot id diyolo'? 8 Miagal pod pana' di kapatai o dila' diyolo', tu' tudut kasai' nopo o poboroson. Osonong tomod i' o poboroson diyolo' dot id songkoduwo diyolo', nga' otopot nopo kopio om papataan i' iyolo' do lawa' do maan do pamalawa'. 9 Om a' ku po tuu daa hukuman iyolo' diti nongowonsoi diyolo'dti? Om a' ku po tuu daa sulian o bansa' do miagal diti? Iyoho' no i Tuhan o minomoros diti,” ka dau. 10 Boros kangku, “Pogihadan ku nondo ilo tulun om pogihadan ku ilo kobuturan, tu' nongoriou po ngai' om aiso' no o tulun do maya' do hilo'. Aiso' no ot orongou do tuni do tayam-tayam om i tuni do tombolog, om i nintorusan nga' nongkopoggidu' ngai' no,” ka. 11 Boros kad Tuhan, “Silihon ku nondo o Yorusalim do kinotimungan do kinaraagan, om kinoiyonon di lilisokon do toni; om silihon ku do kinoiyonon dot oingou o kabandaran do Yohuda, om it a' iyonon do tulun,” ka dau. 12 Om ponguhot oku no, “Oi Tuhan, nokuro tu' naraag po tomod om otuu po do miagal do kowotuan iti tana', gisom dot aiso' no o maya'? Isai poddi o kitoilaan do mongilo do komoyon diti? Isai no o pinosuhut nu'dti om milo i' daa iyau do momisunud do tulun do suwai?” ka dau. 13 Om boros kad Tuhan, “Nosiliu pogi' o miagal diti nga' a' id tulun tinanud i ponudukan ku di pinatahak ku diyolo'. Om a' iyolo' minumboyo' doho' om a' diyolo' winonsoi i pinonuhuan ku. 14 Tu' pinokodou nogi' diyolo' o ginawo diyolo' om tuminuku' dot id tingolig do Baal do tumanud di ponudukan di komolohingan diyolo'. 15 Iyo nopoddi, om pokinongou no diti wonsoyon ku, iyoho' i Tuhan it Osundu Kopio, i Kinorohingan dot Israil. Onuan ku nondo i tulun ku do rarapaon dit opoit do maan diyolo'd kanon om onuan ku iyolo' do tinumon di kawanit. 16 Om potompiason ku nondo iyolo' dot id pogialatan do bansa' dit a' diyolo' otutunan om it a' notutunan di komolohingan diyolo'. Om poporikot oku nondo do soudor do mongoi panangod diyolo' do gisom dot angapatai ngai' iyolo',” ka dau.
Minokitulung i Tulun do Yorusalim
17 Boros kad Tuhan, it Osundu Kopio dot id tulun dau, “Antangai pogi' ondung nunu'ddi o nosiliu! Pomolohou kou no di mogigihad, om porikoton no i tongoondu' do modsisinding do sinding do mogihad,” ka dau. 18 Om boros kaddi di tulun do Yohuda, “Sunudan no iyolo' do marau-arau do mongoi podsinding do sinding do mogihad dahai, gisom dot oponu' do romou o mato dahai, om gisom dot oyopos o pingas dahai,” ka dau. 19 Pokinongou pogi' dilo tihad do hilo'd Sion, “Naraag no kopio iyahai! Nointingayam no kopio iyahai! Om a' no milo dot a' iyahai tumongkiad do pomogunan dahai, tu' nangaraag no o walai dahai,” ka. 20 Om boros kangku, “Pokinongou kou nod boros do Tuhan, oi dokoyu i tongoondu', om ilaan no kopio i boros dau. Tudukan no i tangaanak dokoyu'd tongoondu' do sinding do mogihad, om tudukan i tambalut dokoyu do modsinding do sinding do mogihad. 21 Tu' nokosuang no o kapatayon do minaya' di liligaon toko', om nokosuang nori di walai do raja' toko'; naayi' nod natabpaan i tangaanak do hilo'd ralan om natabpaan ngai' i tangaanakwagu do hilo'd pogititimungan do tulun. 22 Pointongkop nopo o rata' do poinsasad do hiri'd tana', do miagal pod rinomos, om miagal do winangkasan do gandum di hiri'd notoliban di mongomot om aiso' no o mongoi di gandum. Iti no o pinonuhuan do Tuhan doho' do popoboros,” ka dau. 23 Boros kad Tuhan, “A' i' apatut dot oondos i tulun dot ongoilo di toilaan diyolo', om a' apatut dot oondos i tulun dot okoris di kinoris diyolo', om a' apatut dot oondos i tulun do kaya' di kakayaan diyolo'. 24 Nga' ondung haro o tulun dot orohian dot oondos, om apatut no dot oondos iyau tu' kotutun i' iyau om kosuhut iyau di natantu' mantad ku do wonsoyon ku, tu' kosianan ku nopo om aiso' i' o kopupuson om iri wonsoyon ku nga' otulid i' om otopot. Miagal no ngai'ddi o korohian ku. Iyoho' no i Tuhan, o minomoros diti,” ka dau. 25-26 Boros kad Tuhan, “Rumikot nondo o maso do hukuman ku i tulun do Masir, om i tulun do Yohuda, om i tulun dot Idom, om i tulun dot Amon, om i tulun do Muab, om i tulun di momogun-mogun do hilo'd tana' do kowotuan, i nangapampadan o tobuk. Nosunatan ngai' i' iti tulun nga' a' i' iyolo' tuminanud di tumpongo ku, i komoyon kopio di sunat diri. Aiso' i' o tiso' di tulun diri om aiso' o mantad id tulun dot Israil do tuminanud di tumpongo ku,” ka dau.
Tuminuku' dot id Tingolig
1 Oi tulun dot Israil, pokinongou kou nodti boros do Tuhan dot id dokoyu. 2 Boros ka dau, “Kada' kou tanud di kowoyo-woyoon do bansa'd suwai; om kada' kou kagangau do kokito piya do kopusahan do hilo'd tawan, do mulong piya dot ongooris ngai' o bansa'd suwai. 3 Tu' kotumbayaan nopo do tulun diti nga' aiso' tomod i' o suang. Mongoi no tulun panagad do kayu do hilo'd gouton om patahakon no di mongingikir, om wonsoyon no dau iri do tininganak; 4 om lumison nondo iri do pirok om tamas. Om lantakon nondo do paku' om a' i' ahaba'. 5 Tingolig nopo do miagal diri om miagal noddi tinulun-tulun do pinotondu' do hiri'd tumo di tinanaman do sangop, tu' a' i' koboros; om minog i' do gantayon do tulun tu' a' i' kapanau. Kada' kou kooris diti: tu' a' i' milo do pokoruol dokoyu, om a' milo do momonsoi dit osonong dot id dokoyu,” ka dau.
Sumambayang dot id Tuhan
6 Aiso' no o koiyo diya', oi Tuhan, tu' okoris ko no kopio, om ngaran nu nga' abantug om kikuasa'. 7 Isai po daa'ddi ot a' rumonok diya', tu' raja' do koinsanai'd bansa'? Apatut no do royohon ko. Tu' aiso' no o koiyo diya' dot id pogialatan do koinsanai di tulun dot ongoilo do mantad id toinsanan o bansa', ko' id pogialatan po di raja' diyolo'. 8 Basug ngai' nopo om lowong iyolo'. Nunu no kaka daa o toilaan diyolo' do mantad id tingolig diyolo' di kayu i' toomod, tu' a' i' iri milo do monuduk di kiguna'. 9 Iri nopo tingolig diyolo' nga' nurogupan do pirok do mantad hilo'd Sepanyol, om nurogupan do tamas do mantad hilo'd bandar dot Upas, om iri nopo tingolig diri nga' wonsoi ngai' i' di tulun dit ongoilo, om pinakayan do pakayan dit oitom o karagango' om otomou daragang-ragang do nawol di mangangawol dit ongoilo. 10 Nga' iya' no oi Tuhan, i Kinorohingan dot otopot, iya' no i Kinorohingan do manahak do koposion, om i raja' dot aiso' o kopupuson. Om soira' nopo dot otogod ko nga' kogogor nopo iti pomogunan; a' i' kasangal do kototogod nu o koinsanai do bansa'. 11 (Poingkaa no ot apatut do poboroson dokoyu dot id diyolo': Iri nopo ponokokinorohingan dit a' minomonsoi diti pomogunan om tawan om atanus no do mantad hiti'd pomogunan om mantad hiti'd linungung do tawan.)
Sinding do Pamarayou do Kinorohingan
12 Winonsoi do Tuhan iti tana' dot i sinundu dau o pinomonsoi, om winonsoi dau iti pomogunan om pinawalad dau ilo tawan dot i toilaan dau o pinapawalad. 13 Soira' nopo do monuhu' iyau om kumahas nopo i waig do hilo'd soibau dilo tawan; om porikot iyau do haun do mantad hilo'd tisan diti pomogunan. Pakalabon dau i kodumaat do maso do rumasam om porikot iyau do tongus do mantad hiri'd pinoopian do tongus. 14 Basug po om aiso' o toila-ilaan do kopurimanan do tulun do kokito do miagal diri; om ointingayaman tomod nopondo i gompomonsoi do tingolig tu' iri nopo ponokokinorohingan diyolo' om a' i' otopot om aiso' o pinuhobo. 15 Aiso' ngai' i' o suang diri, om apatut no dot intingayamon om hingi-hingion, om raagon nondo ngai' iri do korikot o Tuhan do mongoi pomohukum diyolo'. 16 Nga' a' i' miagal diri i Kinorohingan di Yakub; tu' iyau no i minomonsoi do koinsanai do nunu nopo, om nopili' no dau ot Israil do sumiliu do tulun dau. Ngaran nopo dau nga' Tuhan it Osundu Kopio.
Tuminimpuun o Kopoddosian do Hiri'd Pomogunan
17 Oi tulun do Yorusalim, timungo' no dokoyu o konunu-nunuan dokoyu, tu' noturungku' kou no! 18 Pataamon kou moti'd Tuhan do mantad id pomogunan diti; om pokorualan kou dau do gisom dot aiso' nondo o tiso' dokoyu dot oolu'. Tu' Tuhan no o pinopoboros diti. 19 Om pomogiak no i tulun do hilo'd Yorusalim do poingkaa, “Nadalaan tomod iyahai do norualan! A' no lumingos iti suhat dahai. Ondos daa dahai om asangalan dahai iti, nga' a' i' dahai asangalan! 20 Nangaraag no o kiim dahai, om noputut ngai' no i tali di pinongogos diri. Nokopoggidu' ngai' no i tangaanak dahai, om aiso' no o noolu' do popowonsoi kawagu di kiim dahai; om aiso' no o noolu' do popowonsoi di tirai di kiim,” ka. 21 Om boros kangku do suminimbar, “Basug ngai' nopo i boyoon toko'; tu' a' iyolo' mokituduk do Tuhan. Iri noddi ot a' diyolo' kinoundar-undaran, om o1+asasad diri o tulun toko'. 22 Pokinongou tomod i bansa' do ponong hilo'd utara; om silihon nondo di soudor diyolo' i kabandaran do Yohuda do kowotuan dit oingou om a' iyonon do tulun; tu”toni poo o miyon do hilo',” kangku. 23 Oi Tuhan, oilaan ku i' dot aiso' i' o tongosongulun piya do kikuasa' do manantu' do kootuson do koposi-posion dau; om aiso' o tiso'd tulun do koporinta' do kowoyo-woyoo' dau. 24 Tudukai no iyahai i tulun nu, oi Tuhan; kada' indo iyahai pokorualai kopio. Om kada' iyahai hukumai di maso nu dot otogod; tu' opunso moti'ndo kopio iyahai. 25 Porikoton no ino kototogod nu dot id bansa' dit a' tumuku' dot id diya', om id tulun di magada' diya'. Tu' minamatai iyolo' do tulun nu; om pinadalaan kopio iyahai diyolo' do minamaraag gisom do nangaraag ngai' po o pomogunan dahai.
I Yoromia om i Tumpongo do Tuhan
1 Boros kad Tuhan dot id doho', 2 “Pokinongohon no o kowoyo-woyoo' diti tumpongo ku. Om sunudan no i tulun do Yohuda om i tulun do Yorusalim 3 do napapalan ku no, iyoho' i Tuhan i Kinorohingan dot Israil, o pointikid-tikid do tulun dit a' mumboyo' do kowoyo-woyoo' diti tumpongo ku'dti. 4 Iti no i tumpongo do pinoumpongo ku dot id taki-aki diyolo' do tontok di pinosoliwan ku iyolo' do mantad hilo'd Masir, i pomogunan do miagal do naraka dot id diyolo'. Sinuhu' ku iyolo' do mumboyo' doho' om tumanud do koinsanai di ponuhuan ku. Om sinunudan ku nogi' iyolo' dot ondung mumboyo' iyolo' doho' om osiliu no iyolo' do tulun ku om osiliu oku do Kinorohingan diyolo'. 5 Om bayaanon ku indo i batos ku di pinabatos ku dot id taki-aki diyolo' tu' patahakon ku indo diyolo' i pomogunan di kaya' om oruak, ondung tonudon ngai' no diyolo' i ponuhuan ku. Om nasanganu no diyolo' iri do baino',” ka dau. Boros kangku, “Iyo noddi, oi Tuhan.” 6 Om boros kaddi do Tuhan dot id doho', “Ongoi no do hilo'd kabandaran do Yohuda om hilo'd karalan-ralanan do Yorusalim. Om poboroson no i boros ku do hilo' om sunudan i tulun do mokinongou di kowoyo-woyoo' di tumpongo ku'ddi om sunudan iyolo' do mumboyo'ddi. 7 Tu' tontok di pinosoliwan ku i taki-aki diyolo' do mantad hilo'd Masir, om pinoinod tomod ku o pinomoros ku diyolo' dot apatut no do mumboyo' iyolo' doho', om kakal ku i' do popoinsan diti tulun ku do pasal diri do gisom piya do baino'. 8 Nga' a' i' iyolo' minokinongou om a' minumboyo'. Suwai ko' sompori-pori nogi' iyolo' do potilombus di kosongkiwalo' om karaato' diyolo'. Nosuhu' ku no iyolo' do mumboyo' di tumpongo ku nga' minada' i' iyolo'. Om gowoi poddi om porotuo' ngai' ku nopo dot id diyolo' i hukuman do noboros do hiri'd tumpongo'ddi,” ka dau. 9 Om boros kaddi kawagu do Tuhan dot id doho', “Mogiupakat no i tulun do Yohuda om i tulun do Yorusalim do sumaap doho'. 10 Om nokoguli' no iyolo' do momonsoi do dusa di komolohingan diyolo' tu' mada' i' iyolo' do momonsoi di ponuhuan ku; tumuku' noddi iyolo' dot id ponokokinorohingan do suwai om amu' tumanud di ponuhuan ku. Om nokotolibamban goduwo nopo ot Israil om Yohuda, di tumpongo do winonsoi ku dot id taki-aki diyolo'. 11 Om baino' noddi, om poinsanon ku no iyolo' do porikoton ku nondo, iyoho' i Tuhan o poporikot, do kosusaan dot id diyolo', om a' no iyolo' milo do mogidu' do mantad hiri. Om soira' nopo do momolohou daa iyolo' doho' do mokitulung, om a' ku no iyolo' pokinongohon. 12 Om mongoi no daa'ndo o tulun do Yohuda om tulun do Yorusalim do hiri'd tingolig di subakon diyolo' do porsombahan do sumbolion om minglohou pondo iyolo' do mokitulung. Nga' a' i' milo do monulung diyolo' i tingolig diri do rumikot i kosusaan. 13 Irad po do kogumuon do bandar do Yohuda o kogumuo' do tingolig diyolo', om i tulun do hilo'd Yorusalim nga' nokopoingkakat no do pananaraban do porsombahan do patahakon dot id Baal, i tingolig di kososomu' kopio'ddi, dot irad poddi kogumuo' do ralan do hiri'd bandar. 14 Oi Yoromia, kada' no sambayang dot id doho' om kada' oku lugu-lugutai do mogobi' diti tulun. Tu' soira' nopo dot id suang iyolo'd kosusaan om momolohou daa iyolo' doho' do mokitulung nga' a' oku no mokinongou diyolo',” ka dau. 15 Boros kad Tuhan, “Mingwonsoi dot araat i tulun di kosianan ku. Om nunu po daa'ddi o kosorupayan diyolo' do mongoi'd hiti'd walai ku? Ondos daa diyolo' om kaantob do kosusaan i mimbatos om papatahak do tayam-tayam do maan do porsombahan? Popotood tu daa diyolo' iri? 16 Rinoitan ku daa iyolo' do kayu saitun dit okohob, om i nolimbagatan do tua' dit ongosonong, nga' baino' noddi om ongorod oku pondo do moro-boros om ngoyon ku pintipuwai i raan, om ngoyon ku tutudai i roun. 17 Iyoho' no, i Tuhan it Osundu Kopio o pinopoingkakat dot Israil om Yohuda; nga' baino' noddi om nokopomusorou oku no kopio do poporikot do kosusaan dot id diyolo'. Iyolo' i' om iyolo' o pinoporikot diti dot id diyolo' tu' nokowonsoi i' iyolo' do sala'; pinotogod oku diyolo' tu' pinapatahak i' iyolo' do porsombahan dot id Baal,” ka dau.
Pakat do Mamatai di Yoromia
18 Sinunudan oku'd Tuhan di pakat dot araat di pisangod ku dot id doho'. 19 Miagal oku pod tanak do dumba' dit alaya' do maan daa patayo'. Om a' ku i' daa oilaan dot iyoho' i pogiupakatan diyolo'ddi. Mimboros po iyolo' do poingkaa, “Mangai toko' pogi' tagado' i kayu do maso poddi kayu do mongua'; maan toko' nopo iyau patayo' om olihuan id tulun o ngaran dau,” ka no diyolo'. 20 Om sambayang oku noddi do poingkaa, “Oi Tuhan, it Osundu Kopio, iya' nopo om gompomutus dit otulid; om oilaan nu i' i pomusorou om ginawo do tulun. Nakatahak ku no dot id diya' iti hal ku, pologoson oku nopondo do miontong diya' do sumuli' diti tulun,” kangku. 21 Pokipapatayan oku daa di tulun do hilo'd bandar dot Anatot om sinunudan oku diyolo' dot ondung a' oku tumingkod do popimboros do boros do Tuhan, om patayon oku no diyolo'. 22 Om boros kaddi do Tuhan, it Osundu Kopio, “Hukuman ku i' iyolo'! Apatai indo i tangaanakwagu diyolo' dot id pisangadan; om i tangaanak diyolo' nga' angapatai dot olikapan. 23 Tu' natantu' mantad ku no o maso do koporikatan ku do kosusaan dot id tulun dot Anatot, om soira' nopondo dot orikot o maso'ddi, om aiso' no o tiso' diyolo' do kopoggidu'!” ka dau.
Moguhang i Yoromia do Tuhan
1 Oi Tuhan, ondung sumongkiwal oku daa diya', om atantu' no dot iya' i' ot otopot. Nga' poingkuro piya nga' muhot kasai' oku i' diya' do pasal dit otulid. Nokuro tu' kumaya' tomod o tulun dot araat? Om nokuro tu' koundar ngai' i tulun dit a' otulid o ginawo? 2 Tonomon nu no iyolo' do miagal di totonomon, om sumuni no iyolo' om mongua' no. Boros nopo diyolo' om pokosonong diya', nga' a' i' mando iyolo' osianan kopio diya'. 3 Nga' otutunan kopio oku i' diya', oi Tuhan; okito nu i' o wonsoyon ku, om oilaan nu i' dot osianan oku diya'. Ngoyo' gayato' iti tulun dot araat diti om posoliwanon no do miagal di dumba' do ngoyon sumbolio'; om tamangan no iyolo' do gisom id orikot i maso do koponumbolian diyolo'. 4 Songkuro po koloido' dot otuu o tana' toko', om poinriou o sakot do hilo'd dumo? Matai ngai' no o tombolog om nintorusan tu' i kararaat do tulun toko', i tulun do momoros dot, “A' i' do Kinorohingan okito o kotutukon toko',” ka. 5 Om boros kad Tuhan, “Oi Yoromia, ondung ohuyan ko do monokilumbo do tulun, om poingkuro ko nogi' daa'ndo do monokilumbo do kuda'? Ondung a' ko milo do mamanau do hilo'd padang, om milo ko nogi' tuu daa'ndo do mamanau do hilo'd puru' dit id toning do Bawang do Yordan? 6 Iri piya tobpinai nu'd kusai, om i tilang-ilang nu nga' magakal ngai' i' diya'; muhup ngai' nopo iyolo' do sumaap diya'. Kada' nogi' kopio ponongkuyaai diyolo', do mulong piya daa dot aambalut o koboro-boroso' diyolo',” ka dau.
Tumongob o Tuhan do Kosorou di Tulun Dau
7 Boros kad Tuhan, “Notongkiadan ku no ot Israil, naadaan ku no i bansa' di nopili' ku. Nokosuang ku no dot id kuasa' do pisangod diyolo' i tulun di kosianan ku. 8 Sumaap diri doho' i tulun di nopili' ku; miagal po iyolo'd singa do hiri'd gouton do minggarom do sumaap doho', om gowoi poddi om araatan oku diyolo'. 9 Iri nopo tulun di nopili' ku nga' miagal pod tombolog di nokurumunan do kondiu. Lohowo' ngai' no i nintorusan do hilo'd gouton do mongoi sapul do mangakan diyolo'! 10 Ogumu' no o pomorinta' do bansa'd suwai do nakapamaraag do kabun dot anggur ku; om piningulakan diyolo' i tumo ku; om siniliu diyolo' do tana' dit a' sunian i tana' ku dit oruak. 11 Siniliu diyolo' iri do kowotuan; om poillogos tomod nopo iri dot id toguang ku. Oinsanan nopo i tana'ddi do nosiliu do kowotuan, om aiso' no o monongkoilo. 12 Nokorikot no o tulun do mongoi pamaraag do mantad ponong id sampaping di konuluhanan do tana' do kowotuan. Pinorikot ku o pisangadan do mamaraag do koinsanai diti pomogunan; om aiso' no o tongosongulun piya dot osimbayan o koposi-posion. 13 Gandum i' o tinanom di tulun ku, nga' paka' iddi o tomoton; noudipon tomod iyolo' do kuminaraja', nga' aiso' iddi o naanu-anu diyolo'. A' minotus i tanom-tanom diyolo' tu' otogod oku no kopio diyolo',” ka dau.
Batos do Tuhan dot id Bansa' dit id Posorili' dot Israil
14 Boros kad Tuhan, “Haro o poboroson ku do pasal di pomorintaan di posorili' dot Israil, i minamaraag di tana' do pinatahak ku dot Israil, i tulun ku. Poggiduon ku nondo i tulun dot araat diri do mantad id pomogunan diyolo', gisom do miagal po iyolo' di tanom di noutus, om poiduwon ku nondo o Yohuda do mantad id longon diyolo'. 15 Nga' kopoggidu' ku nopondo iyolo', om insianan ku indo kawagu iyolo'; pogulion ku indo o pointikid-tikid di bansa' dot id tana' om pomogunan diyolo'. 16 Om ondung aayi-ayi' o ginawo diyolo' do tumanud di kotumbayaan do tulun ku om orohian do sumumpa' dot id suang do ngaran ku do poingkaa, ‘Id suang do ngaran do Tuhan di poimpasi,’ ka, do miagal di minonuduk iyolo' di tulun ku do sumumpa' dot id suang do ngaran di Baal di gulu po om iyolo' nondo nga' kohompit no do tulun ku om kaanu do kosimbayanan. 17 Nga' ondung haro o tiso' do bansa' dot a' mumboyo' doho' om utuson ku nondo kopio iri do miagal di tanom dot utuson, om punsoon ku. Iyoho' no i Tuhan, o minomoros diti,” ka dau.
Gonob do Kain Linan dit Oniba'
1 Poingkaa o boros do Tuhan dot id doho', “Ongoi no boli do gonob do kain linan dit oniba', om gonobon nori, nga' kada' poobugo' do waig,” ka dau. 2 Om ongoi oku noddi boli om gonobo' ku no. 3 Om boro-boros po kawagu o Tuhan dot id doho' do poingkaa, 4 “Ongoi do hilo'd Bawang dot Iprat om polisokon i' i gonob diri do hiri'd luang dit id pogiolit-olitan do tontolob,” ka dau. 5 Om ongoi oku no om polisoko' ku nori do hiri'd toning di Bawang dot Iprat. 6 Om a' po alaid do mantad diri om suhuo' oku nod Tuhan do gumuli' do hilo'd Bawang dot Iprat do mongoi panganu di gonob. 7 Om poguliai ku no, om soira'ddi nabantalan ku i pinolisakan ku, om kokito ku noddi do noromuk no i gonob om a' no milo'd pakayon. 8 Om boro-boros noddi kawagu o Tuhan dot id doho'. Boros ka dau, 9 “Miagal nodti o pamaraag ku do koondos do Yohuda om i koondos do Yorusalim dit a' ogina-gina'. 10 A' iti tulun dot araat minumboyo' doho'. Om miagal kasai' nopoddi o kokodoho' do ginawo om kararaat diyolo', om tuminuku' po iyolo' om minodsubak do tingolig. Om gowoi pondo om miagal iyolo' diti gonob tu' aiso' no o guna'. 11 Poingkuro nopo i gonob do poinsiwot dot id tawak om iyo no daa'ddi ot osorou ku do koiyon-iyono' do koinsanai di tulun dot Israil om Yohuda tu' poinsokot no kopio doho'. Winonsoi ku pogi' o miagal diri nga' poposiliu oku daa diyolo' do tulun ku om porikot indo iyolo' do karayahan om kosuahan dot id ngaran ku; nga' a' i' iyolo' minumboyo' doho',” ka dau.
I Luping do Poiyanan do Waig dot Anggur
12 Boros kad Tuhan i Kinorohingan dot id doho', “Oi Yoromia, sunudan ngai' no i tulun dot Israil do momonu' ngai' di luping do waig dot anggur. Om sumimbar nondo iyolo' do poingkaa, ‘Dot a' kopio tuu daa iyahai koilo dot apatut do ponuon do waig dot anggur o pointikid-tikid di luping?’ ka. 13 Om sunudan nogindo iyolo' dot iyoho' nondo, i Tuhan, o momonu' do koinsanai'd tulun do hiti'd pomogunan do waig dot anggur, gisom id aawuk iyolo': kohompit no i raja', i sinakagon di Daud, om it imam, om i nabi, om koinsanai di tulun do Yorusalim. 14 Om pogiduduntukon ku nogindo iyolo' do miagal di luping, dot i tongomolohing no om i tongomulok po. Patayon ku nopo iyolo' om a' oku no olisiu om a' oku osianan diyolo'. Iyoho' no i Tuhan, o minomoros diti,” ka dau.
Pinoinsan di Yoromia i Tulun dit Asawat o Ginawo
15 Oi tulun dot Israil, nokopomoros no o Tuhan, Kumosiriba' no o ginawo om mokinongou kou no dau. 16 Pusohon no o Tuhan, i Kinorohingan dokoyu, dot a' po iyau koporikot do totuong, gisom do kasadu kou nondo do hiri'd nuluhon; dot a' po dau osiliu do totuong dit odondom kopio i tanawau di pinagandasan dokoyu. 17 Ondung a' kou mokinongou om lumisok oku nondo do mihad tu' asawat kopio i' o ginawo dokoyu; tumongob oku no kopio, om lumuyung po o romou ku tu' natangkap no om natanggayan do pisangod i tulun do nasanganu'd Tuhan. 18 Boros kad Tuhan dot id doho', “Sunudan no i raja' om i tina' dau do lumintuhun do mantad hiri'd tirikohonon diyolo' do don raja', tu' naratu' no i tupi' diyolo' do don raja' dit olumis kopio do mantad id tulu diyolo'. 19 Noturungku' nod pisangod i kabandaran do ponong hilo'd salatan do Yohuda; om aiso' no o tulun do katalib di pisangod. Koinsanai nopo i tulun do Yohuda do tinanggayan do kuminaa dot id pomogunan do pisangod,” ka dau. 20 Boros kad Tuhan dot id tulun di hilo'd Yorusalim, “Ontong pogi', oi tulun do Yorusalim! Rumuhuk no i pisangod dokoyu do mantad hilo'd utara! Honggo ngai' no i tulun di pinokiintirungan dokoyu, i tulun di kaandasan tomod dokoyu? 21 Nunu nondo o poboroson dokoyu dot aala' kou om oporinta' kou'd tulun di ponokotambalut dokoyu? Atantu' no do miagal kou pondod tondu' dit orualan tomod do mogkosusu. 22 Ondung muhot kou ondung nokuro tu' nosiliu ngai' o miagal diti dot id dokoyu, om ondung nokuro tu' nohurak o pakayan dokoyu, om nakasou kou, om nokobungou nopoddi om i dusa dokoyu dit awagat kopio. 23 Milo po toi o tulun dit oitom do monimban di koitomo' do kulit dau, om milo toi o rimau do mongidu' di buris dau? Ondung milo iyolo' om milo kou no daa iyokoyu do posimban do kowoyo-woyoon dokoyu, iyokoyu it aiso' no o wonsoyon do suwai ko' araat, om momonsoi kou nondo dit osonong. 24 Potompiason ku nondo iyokoyu do miagal di tapol dit otilib do ribut do hilo'd tana' do kowotuan. 25 Natantu' mantad ku no dot iti no o kotutukon dokoyu, tu' linihuan oku i' dokoyu om minogondos kou nogi' di tingolig. 26 Iyoho' nondo o momohurak do pakayan dokoyu om poillabas kou pondo om ointingayam kou. 27 Nokito ku no iyokoyu do mingwonsoi di karaatan ku. Nokito ku no iyokoyu do minongoi gusa' di tingolig do hiri'd nulu-nulu, om hiri'd koumaan, do miagal pod kusai di rumahi tomod di sawo do tulun do suwai, om miagal di kuda' do tontoluhan di momogusa' di kuda' do tondu'. Nobungou kou no, oi tulun do Yorusalim! Songgira' kou toindo do koidu' do mantad id karaaton?” ka dau.
Minagadau dot Adalaan Kopio
1 Poingkaa no o boros do Tuhan dot id doho' do pasal di magadau dit adalaan kopio, 2 “Mihad po o Yohuda; om i kabandaran do hilo' nga' motipatai no, songinlii po do hiri'd tana' i tulun dot atatangaban, om Yorusalim nga' minglohou poo do mokitulung. 3 Suhuon no di tulun do kaya' i susuhuon diyolo' do mongoi'd waig, om mongoi no iyolo' do hiri'd torobong, nga' aiso' i' o tokito diyolo'd waig, om gumuli' nondo iyolo' om aiso' i' o suang di luping diyolo'. Om somponon pondo diyolo' o rabas diyolo' tu' aiso' no o pokukurayan diyolo' om adalaan iyolo'd tumongob. 4 Otuu po tomod o tana' tu' aiso' i' o rasam om aiso' no o pokukurayan di gompongumo gisom do somponon po diyolo' o rabas diyolo'. 5 Hilo' nod gouton om tongkiadan nopo di paus i tanak dau di kosususu tu' aiso' no o sakot. 6 Om i kaladai di lalang nga' songingkakat pod hiri'd timpak do nulu-nulu, om sangkabang-kabang poo do momuhobo do miagal po di toni; om mato diyolo' nga' a' no kokito tu' aiso' no o kanon diyolo'. 7 Minglohou po doho' i tulun ku do poingkaa, ‘Mulong piya do pasalaon iyahai di dusa dahai, nga' tulungo' i' daa iyahai, oi Tuhan, do miagal di nakabatos nu. Asaru' no iyahai do tuminongkiad diya'; om nokowonsoi iyahai'd dusa dot id diya'. 8 Nga' iya' poo o kosondi-sondihon dot Israil; om iya' no i milo do poidu' dahai do mantad id kosusaan. Nga' nokuro tu' miagal ko'd sompogunan do hiti'd pomogunan dahai, om miagal do tulun di monompogunan tu' koumbaya' noo? 9 Nokuro tu' miagal ko'd tulun dit oborulong, om miagal do soudor dit a' milo'd monulung? Nga' atantu' no do manud-tanud ko i' dahai, oi Tuhan! Tu' iyahai nopo om tulun nu i', om kada' no kopio iyahai tongkiadai,’ ka diyolo',” ka dau. 10 Poingkaa o boros do Tuhan do pasal do tulun diti, “Asanangan nopo iyolo' do tumongkiad doho', om a' no diyolo' opusus o korohian do tinan diyolo'. Om gowoi poddi om a' oku orohian diyolo'. Om sorohon kasai' ku nondo i nongowonsoi diyolo' dot araat om hukuman ku iyolo' tu' i dusa diyolo' o kopomohukuman ku,” ka dau. 11 Boros kad Tuhan dot id doho', “Kada' oku diya' suhuo' do monulung do tulun diti. 12 Tu' mulong piya do puasa iyolo' nga' a' oku i' mokinongou do lolohou diyolo' do mokitulung; om mulong piya do papatahak iyolo' dot id doho' do porsombahan di sorobon om papatahak do porsombahan do gandum nga' a' oku i' kasai' asanangan diyolo'. Suwai ko' patayon ku i' iyolo' dot id pisangadan, om patayon ku'd lous om toruol,” ka dau. 13 Om boros kangku'ddi, “Oi Tuhan, it Asawat Kopio, oilaan nu i' do pinsunudan dilo nabi ilo tulun, dot aiso' o pisangadan om aiso' o mononglous tu' nakabatos ko i' do haro kasai' o kosimbayanan do hiti'd pomogunan dahai,” kangku. 14 Nga' boros kad Tuhan do suminimbar, “Mingudut i' nabi diri dot id suang do ngaran ku; a' oku i' nokoponuhu' diyolo', om a' oku nokoponuhu' diyolo'd mimboros om a' oku pinopoboros dot ongoiso' piya o boros dot id diyolo'. Okon i' ko' mantad id doho' i pinointalang do popimboroson diyolo'; iri nopo popimboroson diyolo'ddi dit osiliu dot id dosunsudan om pininsarahan i' toomod diyolo' om aiso' o kotutuk-tutukon. 15 Iyoho' no i Tuhan, o momisunud diya' do wonsoyon ku dot id nabi dit a' ku sinuhu'ddi, nga' i mimboros indo dot id suang do ngaran ku, om mimboros dot a' oontok do pisangadan om mononglous o pomogunan diti! Patayon ku nondo iyolo' dot id suang do pisangadan om mononglous. 16 Om iri tulun do nosunudan diyolo' do miagal diri nga' iyo nogiddi o kapatai. Pataamon nondo i rata' diyolo' do hiri'd karalan-ralanan do Yorusalim, om aiso' i' o mongoi pomolobong diyolo'. Miagal ngai' nopodti ot osiliu dot id toinsanan diyolo', do kohompit no i sawo om i tangaanak diyolo'. Popurimonon ku nondo iyolo' do kootuson di kararaat diyolo',” ka dau. 17 Sinuhu' oku'd Tuhan do momisunud di tulun dau di katangaban ku om popoboros do poingkaa, “Kiromou kasai' nopo o mato ku do tadau om totuong, om aiso' nopo o kotingkadan ku'd mihad tu' nadalaan tomod nod suhat om norualan i bansa' ku. 18 Soira' nopod mongoi oku do hilo'd koomulakan, om rata' pod tulun di napatai dot id pisangadan o tokito ku; om soira' di mongoi oku'd hilo'd bandar om tulun poddi motipatai no dot ololousanan o tokito ku. Om iri nabi om it imam nga' momonsoi nopo di karaja' diyolo' nga' a' i' iyolo' kosuhut kopio di wonsoyon diyolo'ddi,” kangku.
Minokiinsian do Tuhan i Tulun dot Israil
19 Niadaan nu no kopio o Yohuda, oi Tuhan? Araatan ko no kopio'd tulun do Sion? Nokuro tu' pinokorualan kopio nu iyahai om gisom diri dot a' no iyahai milo'd lingasan; kolingasan daa o piandad-andad dahai nga' kosusaan nogi' o rumikot. 20 Nokowonsoi no iyahai'd dusa dot id diya', oi Tuhan, om okunon no dahai o dusa dahai, om i dusa do taki-aki dahai. 21 Soroho' no i batos nu om kada' iyahai indaraato'; kada' intingayamo' o Yorusalim, i kinoiyonon do tirikohonon nu di kikagayaan. Kada' raago' i tumpongo nu dot id dahai. 22 Aiso' i' o milo di tingolig do piro-piro o bansa'ddi do porikot do rasam, om ilo tawan nga' a' i' milo do porikot do rasam do hiti'd pomogunan. Nga' iya' no o pagandasan dahai, oi Tuhan, i Kinorohingan dahai, tu' iya' no o miningwonsoi ngai'ddi.
Hukuman dot id Tulun do Yohuda
1 Om boros kaddi do Tuhan dot id doho', “Mulong piya do poingkakat daa i Musa om i Somuil do hiti do mokiinsian doho' do bansa'dti nga' a' oku no monginsian. Poggiduo' nogi' o bansa'dti tu' a' oku no siontong diyolo'. 2 Soira' nopod muhot iyolo' ondung honggo o ngoyon diyolo' om sunudan no iyolo' do nokoboros ku no o poingkaa: Haro i' o natantu' mantad dot apatai do toruol --- om iri no o kapatai diyolo'! Iri no suwai om natantu' mantad no dot apatai dot id pisangadan --- om hilo' no iyolo' dot apatai! Om haro i' o natantu' mantad dot apatai dot olikapan --- om iri no o kapatai diyolo'! Om iri no suwai om natantu' mantad no dot atanggayan do pisangod do kumaa dot id pomogunan do pisangod --- om hilo' no o koongoyon diyolo'! 3 Natantu' mantad ku no, iyoho' i Tuhan, do haro nondo ot apat i korolosi kopio do korikot dot id diyolo': apatai nondo iyolo' dot id pisangadan; om gayaton do tasu o rata' diyolo'; om kanon nondo iyolo'd tombolog om unsimoton di nintorusan i nongoolu-olu'. 4 Om pologoson ku nondo dot araatan ngai' diyolo' o koinsanai'd bansa' do hiti'd pomogunan tu' i winonsoi di Manasi, i tanak di Hiskia, di nosiliu iyau'd raja' do hilo'd Yorusalim, i hilo'd Yohuda, o kapalagasan ku,” ka dau. 5 Boros kad Tuhan, “Isai daa ot olisiu dokoyu, iyokoyu i tulun do Yorusalim? Isai po daa o mumbaya' do mongoi pongimuhot ondung osonong-sonong kou? 6 Naadaan oku no dokoyu, om notongkiadan oku dokoyu. Om paakango' ku noddi o longon ku do pokoruol dokoyu tu' apaasan oku no do momusus do kototogod ku. 7 Pinopintias ku iyokoyu do miagal di sakot do nokoring, iyokoyu i mantad id pointikid-tikid do bandar dot id pomogunan diti. Pinatai ku iyokoyu, do tulun ku piya daa iyokoyu, om pinatai ku o tangaanak dokoyu tu' a' kou i' tuminingkod do momonsoi'd araat. 8 Ogumu' nogi' o tongoondu' di nopuadan do hilo'd pomogunan dokoyu ko' mantad di togis do hilo'd tisan do rahat. Pinatai ku i tangaanakwagu dokoyu di nosukod nogi' daa kopio om ninggorit ngai' ku i tina' diyolo'. Potigowoo' ku nopo do pinoporikot do katangaban om kopoddosian dit a' ogina-gina' dot id diyolo'. 9 Nahadan i tina' di natagakan do turu' o tangaanak dau, om mobo-hobo poo iyau. Nosiliu nod totuong i tanawau dau, om nointingayam po tomod iyau om aiso' no o milo'd pokukurayan. Pologoson ku nondo i pisangod dokoyu do mamatai dokoyu, iyokoyu i maso do poimpasi. Iyoho' no i Tuhan, o minomoros diti,” ka dau.
Minoguhang do Tuhan i Yoromia
10 Aiso' no kopio o doho' iyo'd kataadan. Nokuro tu' pinogkosusu oku di tina' ku do hiti'd pomogunan? Tu' a' oku no milo dot a' monokisurilog om monokisongkiwal do koinsanai'd tulun do hiti'd pomogunan. A' oku i' insan poolos do tusin om a' oku insan olos; nga' oinsanan i' o tulun do momopol doho'. 11 Pologoson nopo dot abayaan ngai' i popol diyolo', ondung a' no osonong o winonsoi ku dot id diya', oi Tuhan, om ondung a' oku no minongobi' di pisangod ku dot id toguang nu do tontok dit id suang iyolo'd kosusaan om kagangahan. 12 (Aiso' no o kotipu'd basi', okon po om i basi' di mantad hilo'd utara tu' minirolot do tambaga'.) 13 Boros kad Tuhan dot id doho', “Porikot oku nondod pisangod do mongoi pononggoi di kakayaan om dapu' do tulun ku do pomohukum ku diyolo' tu' minomonsoi i' iyolo'd dusa do pointongkop diti pomogunan. 14 Om silihon ku nondo iyolo'd turipon di pisangod diyolo' dot id pomogunan do suwai, tu' miagal pod tapui iti kototogod ku om a' no atanus do gisom dot alaid,” ka dau. 15 Om boros kangku'ddi, “Oi Tuhan, iya' nopo om koilo i' kopio. Soroho' oku no om uhupai oku no. Suliai no doho' i tulun do mongulok-ulok doho'. Kada' no padalaai kalanut o ginawo nu dot id diyolo' do gisom nondo dot apatai oku kopio diyolo'. Soroho' no dot iya' i' o kopongindaraatan diyolo' doho'. 16 Minomoros ko dot id doho' om pinokinongou ngai' ku i' o pointikid-tikid di boros nu. Iya' no o sanganu doho', oi Tuhan, i Kinorohingan dit Osundu Kopio, om i boros nu o popotood om poposimbayan doho'. 17 A' oku i' minagayi' do maso do poinsugku' di tulun do suwai do mingirak om mogiongkoringau. Miningiso-iso' oku i' tu' tuminanud oku i' di pinonuhuan nu om otogod tomod oku. 18 Nokuro tu' mompus-ompus nopo dot oinggorit oku? Nokuro tu' a' milo'd lingoson i suhat ku? Nokuro tu' a' iri milo'd lumingos? Nokopomusorou ko no kopio do mongiman-iman doho' do miagal di bawang di rumasak do dongmagadau?” kangku. 19 Om simbar noddi o Tuhan do poingkaa, “Ondung gumuli' ko, om romiton ku i' iya' kawagu om osiliu ko indo kawagu'd susuhuon ku. Om ondung popimboros ko'd boros di kisuang om a' mimboros dit aiso' o komoyon om osiliu ko indo kawagu'd nabi ku. Om rumikot indo kawagu o tulun dot id diya', om a' ko i' minog do mongoi sungod diyolo'. 20 Om silihon ku nondo iya' do limput di nosompipi' do tambaga' dot id toguang diti bansa'. Sumaap daa'ndo iyolo' diya', nga' a' i' iyolo' kaala' diya'. Om moyo-woyo' oku indo diya' do momogompi' om mongintirung diya'. 21 Om poiduwon ku indo iya' do mantad id kuasa' di tulun dot araat om orongit. Iyoho' no i Tuhan, o minomoros diti,” ka dau.
Korohian do Tuhan dot id di Yoromia
1 Om boro-boros po kawagu o Tuhan dot id doho' do poingkaa, 2 “Kada' panansawo om kada' paganak dot id kinoiyonon do miagal diti. 3 Sunudan ku i' iya' ondung nunu ot osiliu dot id tangaanak dot osusu'd hiti om it osiliu dot id molohing diyolo'. 4 Apatai nondo iyolo' tu' oontok iyolo' do toruol dit araat kopio, om aiso' nondo o mogihad om aiso' o momolobong diyolo'. Miagal pondod rinomos i rata' diyolo' do songingiliu do hiri'd tana'. Apatai nondo iyolo' dot id pisangadan om apatai dot olikapan, om taakanon pondod tombolog om nintorusan i rata' diyolo'. 5 Kada' nogi' kopio salakoi do walai'd tulun di maso'd mogihad. Kada' pogihadai ot isai nopo. Tu' a' ku nondo barakatan o tulun ku do kosimbayanan om a' ku pointalangan do kosianan om kolisihan. 6 Matai ngai' nopondo i tulun do kaya' om i tulun do mosikin dot id pomogunan diti nga' aiso' no o mogihad om aiso' o momolobong diyolo'. Aiso' no o minsuhat do tinan om aiso' o momugar do tulu do pointalang do mogihad iyolo'. 7 Aiso' no o mongoi ruhang do makan ko' minum do monginsasamod do tulun di napatayan di kosianan kopio dau. Aiso' no o monginsian, om iri piya napatayan do tapa' om tina' dau nga' aiso' no o monginsian. 8 Kada' nogi' kopio ongoi salakoi do walai di maso'd moginakan o tulun do hiri. Kada' torungak diyolo'd makan om minum. 9 Nga' pokinongou nodti poboroson ku, iyoho' i Tuhan it Osundu Kopio, i Kinorohingan dot Israil. Tu' tingkodon ngai' ku nondo i kataadan om kaarapadan om karamayan do poginakanan do dong kumawin. Om kokito po iti tulun do hiti dot osiliu o miagal diri. 10 Soira' nopondod sunudan nu iyolo' do koinsanai'dti om muhot dotindo iyolo' ondung nokuro tu' minomusorou kopio oku do momohukum diyolo' do miagal diri kawagat. Om muhot dotindo iyolo' ondung nunu kopio o kinasalaan om dusa di nowonsoi diyolo' dot id Tuhan, i Kinorohingan diyolo'. 11 Om sunudan no iyolo' do nokoboros ku no o poingkaa, ‘Tuminongkiad doho' i komolohingan dokoyu om tuminuku' iyolo' om minodsubak do tingolig. Tinongkiadan oku diyolo' om a' iyolo' minumboyo' dit oturan ku. 12 Nga' araat po ko' iri o dokoyu'd nowonsoi. Okodou ngai' nopo o ginawo dokoyu. Om tumanud kou di korohian dokoyu'd araat. Om a' kou minumboyo' doho'. 13 Om gowoi pondo om uyungon ku iyokoyu do mantad id pomogunan diti om pokoyoon ku iyokoyu dot id pomogunan dit a' i' dokoyu om a' di komolohingan dokoyu noila-ilaan do gulu. Om hilo' nondod modsubak kou do tingolig do tadau om totuong, om a' ku i' iyokoyu insianan,’ kanto,” ka dau.
Kogulian di Tulun do Songonuon do Tuhan do Mantad id Pomogunan do Pisangod
14 Boros kad Tuhan, “Rumikot indo o maso dot a' o tulun sumumpa' dot id suang do ngaran ku, i Kinorohingan di poimpasi, i pinoposoliwan do tulun dot Israil do mantad hilo'd pomogunan do Masir. 15 Nga' sumumpa' nondo iyolo' dot id suang do ngaran ku, i Kinorohingan do poimpasi di pinoposoliwan do tulun dot Israil do mantad id pomogunan do hilo'd utara om mantad id koinsanai'd pomogunan di pinotompiasan ku diyolo'. Om pogulion ku nondo kawagu iyolo' dot id pomogunan diyolo', i pomogunan di pinatahak ku dot id komolohingan diyolo'. Iyoho' no i Tuhan, o minomoros diti,” ka dau.
Hukuman di Porikoton
16 Boros kad Tuhan, “Porikot oku nondo dot ogumu' o tulun do monginginsada' do mongoi panangkap do tulun diti. Om porikot oku nogindo do magagasu do mongoi pagasu diyolo' do miruhuk-ruhuk do konuluhanan om konulu-nuluan om hilo'd koluang-luangan do pampang. 17 Okito ngai' ku i' o wonsoyon diyolo'. Om aiso' o poillisok di dusa diyolo'ddi dot id doho'. 18 Om induwo nondo piluap o pomohukum ku di dusa om karaaton diyolo' tu' sinosomu' i' diyolo' iti tana' ku di tingolig dot ogumu', i miagal nod rata' tu' aiso' i' o pinuhobo, om pinonu' diyolo' iti tana' ku di ponokokinorohingan diyolo',” ka dau.
Sambayang di Yoromia do Popointalang do Kotumbayaan Dau dot id Tuhan
19 Oi Tuhan, iya' no i mongintirung doho' om i manahak doho' do kokorisan; om monguhup ko doho' do maso ku'd haro o kosusaan. Om rumikot nondo dot id diya' o koinsanai'd bansa' do mantad hilo'd tisan diti pomogunan om momoros iyolo' do poingkaa, “Iri nopo taki-aki dahai om iri no kinorohingan dit a' otopot om tingolig dit aiso' o guna-guna' o haro dot id diyolo', om aiso' no suwai ko' iri. 20 Milo toi o tulun do momonsoi'd kinorohingan dau? Amu', nga' ondung milo daa iyau, om okon i' ko' Kinorohingan kopio iri,” ka. 21 Boros kad Tuhan, “Iyo nopoddi om popurimonon ku nondo kopio i bansa'ddi do sinundu om kinoris ku do baino', om koilo indo kopio iyolo' dot iyoho' no o Tuhan,” ka dau.
Dusa om Hukuman dot id Yohuda
1 Boros kad Tuhan, “Oi tulun do Yohuda, notulis no i dusa dokoyu, do pinsil do basi' o pinonulis; nokokikir nori do hino'd ginawo dokoyu do lahis do mutiara' o pinongikir om nokokikir nogi' do hiri'd sunduk di pananaraban do porsombahan. 2 Tumuku' o tulun nu do hiri'd pananaraban do porsombahan om hiri'd torigi di pinoudong do pomusou di Asira, i ponokokinorohingan dokoyu, dot id toning do pointikid-tikid do guas do kayu dit okohob om id pointikid-tikid do timpak do nulu-nulu, 3 om hilo'd timpak do konuluhanan dot id soliwan do bandar. Om patahakon ku nondo di pisangod dokoyu i kakayaan om i dapu' dokoyu tu' minomonsoi kou i' do dusa do hiti'd pointongkop diti pomogunan. 4 Om a' nondo milo'd a' dokoyu patahakon i tana' do pinotungkusan ku daa dokoyu, om pologoson ku nondo iyokoyu dot osiliu'd turipon di pisangod dokoyu dot id pomogunan dit a' dokoyu noila-ilaan do gulu, tu' miagal pod tapui di mikit-sikit o kototogod ku. Om a' nori atanus do gisom dot alaid,” ka dau.
Piro-Piro o Ponudukan
5 Boros kad Tuhan, “Hukuman ku nondo i tulun di mogidu' do mantad id doho', om i sumondiu do kinoris do tulun. 6 Tulun nopo do miagal diri om miagal nod kayu-kayu di poinsuni do hilo'd tana' do kowotuan, om id tana' dit oosin, tu' a' no sunian do tanom do suwai. 7 Nga' barakatan kasai' ku indo i tulun di mogondos doho'. 8 Tu' iri nopo tulun diri om miagal po di kayu di poinsuni dot id tisan do bawang, om i poiroloi do hiri'd waig o gamut. A' i' iyau moddosi do dongmagadau piya, tu' otomou kasai' i' o roun dau, om a' iyau atangkabo dot aiso' piya o rasam tu' mongua' kasai' i' iyau. 9 Isai po o kosuhut do ginawo'd tulun? Tu' aiso' no o goudut kopio ko' mantad diti, om adalaan noti karaat. 10 Iyoho' no i Tuhan, o monorisid do ginawo om mongilo kopio do lugu' do ginawo'd tulun. Om sulian ku indo o pointikid-tikid do tulun do miontok di kowoyo-woyoon dau, om i winonsoi dau,” ka dau. 11 Tulun nopo dit a' otulid o ralan do mogihum do kakayaan om miagal nod tombolog di mongomut do tontolu' dit okon ko' iyau o minogontolu'. Tu' tangaumur nogi' om atagakan ngai' no iyau di kakayaan dau om kooyion nopondod tumur dau om kointalang nondo do tulun iyau'd basug. 12 Iri nopo Walai'd Sasambayangan toko' dit Agayo, om miagal do tirikohonon do raja' di kikagayaan dot id timpak do nuluhon dit akawas do mantad di timpuun i'. 13 Oi Tuhan, iya' no o pagandasan dot Israil; om ointingayam ngai' nopondo i tumongkiad diya'. Tumagak tomod nopondo iyolo' do miagal di ngaran do pinotulis dot id pupuk, tu' tuminongkiad i' iyolo' diya' oi Tuhan, i tudan do waig do koposion.
Minokitulung do Tuhan i Yoromia
14 Oi Tuhan, lingasai oku no om olingasan oku indo kopio, posio' oku no om apasi oku indo kopio. Tu' iya' noo o royohon ku! 15 Boros ka di tulun dot id doho', “Honggo ngai' no i pinonompurolosi do Tuhan dati'? Mangai pogi' kopio dau powonsoyo' iri do dinondo!” ka diyolo'. 16 Nga' a' oku i' insan pongodsuur diya' do porikot do kosusaan dot id diyolo' oi Tuhan. Om a' oku nogi' orohian dot oontok iyolo'd kosusaan. Oilaan nu i' oi Tuhan; oilaan nu i' i pinoboros nu. 17 Kada' siliu do kopoddosian ku; tu' iya' no o pogintirungan ku do tontok do haro o kosusaan do rumikot. 18 Intingayamo' ngai' no i minonginggorit doho', nga' kada' oku i' iyoho' intingayamo', oi Tuhan. Ponuo' no iyolo' do kopoddosian, nga' kada' oku i' iyoho' tompurolosio'. Porikatai no iyolo'd kosusaan om patayon no iyolo'.
Pusohon no o Tadau'd Sabat
19 Boros kad Tuhan dot id doho', “Oi Yoromia, pamanau no om ngoyon i' poboroso' iti boros ku do hilo'd wawayaan di roitan do Wawayaan do Rayat, i wawayaan di raja' do Yohuda do sumuang om sumoliwan di bandar, om mongoi nogindo dot id koinsanai'd wawayaan do suwai di hilo'd Yorusalim. 20 Sunudan ngai' no i raja' om koinsanai di tulun do Yohuda om koinsanai di poingiyon do hilo'd Yorusalim di sumuang do wawayaan diri do mokinongou diti poboroson ku. 21 Sunudan no iyolo' dot ondung osianan iyolo' do tinan diyolo', om a' no iyolo' koino-ino do sumaan do nunu nopo do tontok do tadau'd Sabat; om a' koino-ino do mongigit do nunu nopo do sumuang di wawayaan do Yorusalim, 22 om a' koino-ino do mongigit do nunu nopo do sumoliwan di walai diyolo' do tontok do tadau'd Sabat. Om a' iyolo' koino-ino do momonsoi'd nunu nopo o karaja' do tontok do tadau'd Sabat; tu' apatut nod pusohon diyolo' o tadau'd Sabat do silihon do tadau di potobilangon do maan do don Tuhan, do miagal di pinonuhuan ku di komolohingan diyolo'. 23 Nga' a' i' minokinongou doho' om a' minamadul doho' i komolohingan diyolo'. Suwai ko' pinokodou nogi' diyolo' o ginawo diyolo'; om a' iyolo' minumboyo' doho' om mada' iyolo'd tudukan ku. 24 Sunudan no i tulun dot apatut i' iyolo'd mumboyo' do koinsanai di ponuhuan ku. Om kada' nod haro o tiso' diyolo' do sumaan do nunu nopo do sumuang do wawayaan do bandar diti do tontok do tadau'd Sabat. Apatut nod pusohon diyolo' o tadau'd Sabat do silihon do tadau di potobilangon do maan do don Tuhan, om a' no koino-ino do momonsoi iyolo'd karaja' do nunu nopo do tontok do tadau'ddi. 25 Om sumuang nondo i raja' om i tangaanak do raja' diyolo' di wawayaan do Yorusalim om kaanu nondo iyolo'd kuasa' do don raja' do miagal di naanu di Daud. Om sumakai nondo iyolo'd korita'-kuda' om kuda' do miwoyo' di tulun do Yohuda om Yorusalim, om oponu' kasai' nopondod tulun i bandar do Yorusalim. 26 Om rumikot nondo o tulun do mantad id bandar do Yohuda om mantad id kawalayan di posorili' do Yorusalim; om haro rumikot do mantad id watas do Binyamin, om mantad hilo'd guas do nulu-nulu, om mantad hilo'd konuluhanan, om mantad hilo'd Yohuda di ponong id salatan. Om migit nondo iyolo'd porsombahan di sorobon om porsombahan do sumbolion, om porsombahan do gandum om kominyan, om iri nogi' i porsombahan do kounsikahan, do mongoi'd hiri'd Walai'd Sasambayangan dot Agayo. 27 Nga' apatut nod mumboyo' iyolo' doho' om momusou do tadau'd Sabat do silihon do tadau di nokotobilang do maan do don Tuhan. Kada' nod haro o tiso' diyolo' do sumaan do nunu nopo do sumuang di wawayaan do Yorusalim do tontok do tadau'd Sabat, tu' ondung tumolibamban iyolo' di boros ku'ddi, om tutudan ku no i wawayaan do Yorusalim. Om osorob nondo i walai do raja' do hilo'd Yorusalim, om aiso' nondo o kopisok diri,” ka dau.
Hiri'd Walai di Gompomorun do Kuron i Yoromia
1 Om boros kad Tuhan dot id doho', 2 “Ongoi do hilo'd walai di gompomorun do kuron om sunudan ku indo iya' di poboroson ku do hilo',” ka dau. 3 Om ongoi oku noddi do hiri om kokito ku no i gompomorun do maso'd momorun. 4 Om soira' nopo dot a' osonong o kawansai-wansayan di kuron di worunon dau om worunon pondo kawagu dau i lagit diri. 5 Om boros kaddi do Tuhan dot id doho', 6 “A' oku toi milo do momonsoi'd miagal di winonsoi di gompomorun do lagit diri, dot id tulun dot Israil? Iri nopo tulun ku om miagal no di lagit do poingonggom di gompomorun do poingonggom ku. 7 Soira' nopod koboros oku do mongutus ko' mamahaba', ko' mamaraag do bansa' ko' pomorintaan, 8 nga' kumorologo indo i bansa'ddi di dusa diyolo', om a' ku indo wonsoyon i nokoboros ku'ddi. 9 Om haro i' do koboros oku do poingkakaton ku om pokorison ku o bansa' ko' pomorintaan, 10 nga' ondung a' indo i bansa'ddi mumboyo' doho', tu' mingwonsoi nogi' dot araat om a' ku indo wonsoyon i nokoboros ku'ddi. 11 Iyo nopoddi om sunudan no i tulun do Yohuda om i tulun do Yorusalim do maso ku no do momusorou do sumaap diyolo' om sumodia' oku no do momohukum diyolo'. Sunudan no iyolo' do kumorologo do mingwonsoi dit araat, om sunudan iyolo' do poposonong do kowoyo-woyoon om i wonsoyon diyolo'. 12 Nga' sumimbar indo iyolo' do poingkaa, ‘Nokuro daa tu' momonsoi iyahai do miagal diri? Tu' orohian ngai' nopo iyahai do tumanud di korohian dahai dit araat,’ ka,” ka diyolo'.
Minagada' do Tuhan i Tulun dot Israil
13 Boros kad Tuhan, “Tikido' daa do monguhot o koinsanai'd bansa' ondung haro o nosiliu do miagal diri do mantad di gulu po. Araat tomod o nowonsoi di tulun dot Israil! 14 Nokoumbal toi dot aiso' o salju do hilo'd konuluhanan do Libanon? Om nokoumbal toi do narasak i luyu-luyu' dit osogit o waig do hilo'd konuluhanan? 15 Nga' iri nopo i tulun ku om nokolihu i' doho', om modtutud diri iyolo' do kominyan dot id tingolig. Nakasadu iyolo' do hiri'd ralan di gulu po, it apatut daa do susuyon diyolo', om a' noddi iyolo' sumusui'ddi suwai ko' suminansala' nogi' iyolo' om suminusui do ralan dit a' nosonong. 16 Siniliu diyolo' do kopoddosian iti pomogunan diti; om intingayamon diri do gisom dot alaid. Om kotigowo ngai' nopondo i montinalib do kokito'ddi; om mingog-bingog pondo o tulu diyolo' dot araranaban. 17 Potompiason ku nondo iti tulun ku dot id toguang do pisangod diyolo', dot iyo po di pupuk dot otilib di tongus do mantad id koulayon. Tolikudan ku nondo iyolo', om a' ku no iyolo' uhupan do rumikot i kosusaan dot id diyolo',” ka dau.
Pakat do Mamatai di Yoromia
18 Om boros kaddi di tulun, “Kainou mogipapakat do sumaap di Yoromia! Tu' haro i' bo kasai' ot imam do monuduk dati', om haro o tulun dot ongoilo do manahak dati' do nosihat, om haro o nabi do popolombus dot id dati' do boros do Kinorohingan. Dawahon toko' nopo iyau om kada' toko' pokinongou di boros dau,” ka diyolo'. 19 Om sambayang oku nod poingkaa, “Oi Tuhan, pokinongoho' noti poboroson ku om pokinongohon i pimboroson do pisangod ku dot iyoho' o komoyon. 20 Araat toi o tisomuli' dot osonong? Nga' iyolo' nopo om nokopongukad nod luang do porotuan doho'. Soroho' pogi' di minongoi oku ingkakat dot id toguang nu om di minoro-boros oku do mogobi' diyolo', om a' ko i' tumogod diyolo'. 21 Nga' baino' nopondo oi Tuhan, om pologoson nopo i tangaanak diyolo' dot apatai dot olikapan, om pologoson nopo iyolo' dot apatai dot id pisangadan. Pologoson nopo dot angatagakan i tongoondu' do sawo diyolo' om angatagakan do tangaanak diyolo'; pologoson nopo dot apatai do toruo-ruol i kokusayan diyolo' om angapatai dot id pisangadan i tangaanakwagu diyolo'. 22 Porikatan nopo iyolo'd sinompuruan do tulun di mananakau di monigowo do mongoi panakau do hiri'd walai diyolo'; om pologoson nopo iyolo' do minggiak dot opopoddosian. Tu' nokopongukad no iyolo'd luang do porotuan doho' om nakapataan iyolo'd lawa' do pamalawa' doho'. 23 Nga' oilaan ngai' nu i' i pakat diyolo' do mamatai daa doho', oi Tuhan. Om kada' no ompunai i kararaat diyolo' om kada' tonuso' i kasalaan diyolo'. Pologoson nopo iyolo' dot aratu' om aala' di maso nu dot otogod diyolo',” ka dau.
I Kuron do Nababak
1 Poingkaa no o boros do Tuhan dot id doho', “Ongoi boli do kuron, om angatan nod moyo' diya' o piro-piro di boyoon di tulun om piro-piro ot imam di molohing no, 2 om maya' kou no di wawayaan di roitan do Wawayaan do Pomorunan do kumaa'd hilo'd Rantai do Hinom. Om poboroson nondo i boros di poboroson ku diya' do korikot do hilo'. 3 Poboroson no o poingkaa, ‘Oi raja' do tulun do Yohuda, om i tulun do Yorusalim, pokinongou kou nodti poboroson ku, i Tuhan dot Osundu Kopio, i Kinorohingan dot Israil. Atantu' no do porikatan ku do karaagan o kinoiyonon diti do gisom i' dot aranaban po ngai' i tulun di korongou do pasal diri. 4 Wonsoyon ku no o miagal diti tu' tuminongkiad i' doho' i tulun om minonosomu' iyolo' do kinoiyonon diti tu' minodsubak iyolo' do ponokokinorohingan dit a' diyolo' om a' di komolohingan diyolo' om a' di raja' do Yohuda notutun-tutunan do gulu. Om sinosomu' po diyolo' do raha'd tulun dit aiso' o sala' o kinoiyonon diti, 5 om minomonsoi po iyolo' do pananaraban do porsombahan dot id Baal om katahak indo diyolo'd hiri i tangaanak diyolo' do maan do porsombahan di sorobon. Om a' oku i' nokoponuhu' diyolo' do minomonsoi'dti; om a' oku nokopomusorou do miagal diri. 6 Om gowoi pondo om rumikot o maso dot okon nondo ko' Topit o pamarait do Rantai do Hinom suwai ko' roitan nondo do Rantai do Pinamatayan. 7 Om hiti nod raagon ngai' ku i nongosorou-sorou mantad daa di tulun do Yohuda om i tulun do Yorusalim do wonsoyon diyolo'. Pologoson ku nondo i pisangod diyolo' do kamanang om mamatai diyolo' dot id pisangadan. Om paakanan ku nondod tombolog om nintorusan i rata' diyolo'. 8 Om raagon ku nondo kopio iti bandar diti gisom dot angaranaban poo om ongkotigowo i montinalib do kokito'ddi. 9 Om turungkuon nondo di pisangod i bandar om umbalan diyolo'd mamatai i tulun do hiri. Om adalaan tomod nondo kawagat o kosusaan om koinggoritan gisom dot iri piya i mogiambalut nga' mogipapatai i' do mogiakan-akan om iri piya tangaanak diyolo' nga' kanon nopo diyolo',’ ka,” ka dau. 10 Om suhuo' oku noddi do Tuhan do mamabak di kuron dot id dotoguangan di tulun di tuminanud doho', 11 om minomisunud diyolo' do nokoboros nod Tuhan, it Osundu Kopio, o poingkaa, “Mumukon ku nondo iti tulun om iti bandar, om miagal pondo diti kuron tu' a' no milo'd pogitopil-topilon kawagu. Om hilo' piya'ndod Topit nga' pamalabangan i' diyolo' di nangapatai tu' aiso' no o pamalabangan do suwai. 12 Om silihon ku nondo do miagal do Topit iti bandar diti om i songingiyon do hiti. 13 Om miagal ngai' nopondod Topit kososomu' o koinsanai di walai di hiti'd Yorusalim, om i walai do raja' do Yohuda, om iri nogi' i walai di pinodtutudan do kominyan o hiri'd sakai'd taap do walai do patahakon dot id rombituon, i ponokokinorohingan diyolo' do hilo'd tawan, om i pinotuntugan do waig dot anggur do pinodsubak do ponokokinorohingan do suwai,” ka dau. 14 Om tongkiad oku noddi do hilo'd Topit, i pinonuhuan do Tuhan doho' do popolombus di boros dau. Om ongoi oku no ingkakat do hiri'd natad di Walai'd Sasambayangan dot Agayo om sunudai ngai' ku no i tulun do nokopomoros no i Tuhan, it Osundu Kopio, om i Kinorohingan dot Israil do poingkaa, 15 “Porikatan ku nondo do hukuman di natantu' mantad ku o bandar diti om koinsanai di kawalayan do hiti'd posorili' tu' osurilog kou i' om a' kou minokinongou di pinoboros ku,” ka dau.
Suminongkiwal i Yoromia di Pasur
1 Om soira' di nokorongou i Pasur it Imam, i tanak di Imor, i boyoon di mongilo-ilo di Walai'd Sasambayangan dot Agayo, do mimboros oku do miagal diri, 2 om poboroso' no dau do bobogon oku om kagasan o gakod ku do hiri'd toning di wawayaan di roitan do wawayaan do Binyamin di ponong id sokid do mantad hiri'd Walai'd Sasambayangan dot Agayo. 3 Om kosuabon noddi kawagu, di nokoidu' oku di Pasur do poingkogos om boro-boros oku no dau do poingkaa, “Okon no ko' i Pasur o pomungaran do Tuhan diya', suwai ko' i ‘Pointongkop o Kopoddosian’. 4 Poingkaa o nokoboros do Tuhan, ‘Silihon ku nondo iya' do kopoddosian do tinan nu om i tambalut nu, om okito ngai' nu nondo iyolo' dot apatai di pisangod diyolo'. Posuangon ngai' ku nondo dot id pomorintaan do raja'd Babil o koinsanai di tulun do Yohuda; om tanggayan nondo dau o wookon diyolo' do hilo'd pomogunan dau do silihon do turipon, om iri no suwai om maan dau patayo'. 5 Om pologoson ku nogindo i pisangod diyolo' do mongoi pagahau do koinsanai di kakayaan do bandar diti om koinsanai di dapu' di raja' do Yohuda, om suhuon ku iyolo' do mongigit diri do hilo'd Babil. 6 Om iya' no, oi Pasur, om tanggayan ko nondo do miwoyo' di sompiiyon nu do hilo'd Babil. Om hilo' nondo o kapatayon nu om pamalabangan diya' do miwoyo' do koinsanai di tambalut nu di piningudutan nu,’ ka,” kangku.
Moguhang do Tuhan i Yoromia
7 Nudutan oku diya', oi Tuhan, om nakalan oku diya'. Okoris ko i' ko' iyoho', om naala' oku iddi diya'. Oinsanan nopo o tulun do mongirak-irak doho'; om monongodou-ngodou nopo iyolo' do momohingi-hingi doho'. 8 Pointikid-tikid do moro-boros oku, om a' oku no milo dot a' popogiak do, “Kororongit! Karaagon!” ka. Tu' a' oku no otingkad-tingkadan do minguntotori' om momohingi-hingi tu' popoboros oku i' do boros nu, oi Tuhan. 9 Nga' pointikid-tikid do moro-boros oku dot id suang do ginawo ku do, “Lihuan ku nopo o Tuhan, om tumingkod oku nondo do mimboros dot id suang do ngaran dau,” kangku, om miagal pod tapui i boros nu do sumikit dot id lugu' do ginawo ku. 10 Om mogikonos-konos ngai' po o tulun dot orongou ku, om boros ka no diyolo', “Pointongkop nopo o kopoddosian! Kainou ngoyo' toko' iyau posunudo' dot id pomorinta'!” ka no. Om iri piya tambalut kopio ku nga' mandad-andad i' do kaalaan ku. “Milo i' bo iyau dot akalan,” ka no diyolo' do mimboros; “om aala' toko' indo iyau, om kosuli' toko' dau,” ka no diyolo'. 11 Nga' mobi' ko i' doho', oi Tuhan, iya' i' it okoris om kisinundu, om aiso' indo ot owonsoi di monginggorit daa doho'. Om ointingayam nondo iyolo' do gisom dot alaid, tu' aiso' i' o nabayaan diyolo'd momonsoi di nosorou daa diyolo'd wonsoyon diyolo'. A' nondo milo'd olihuan i kointingayamo' diyolo'. 12 Nga' otulid i' o pongingilo nu'd tulun, oi Tuhan, it Osundu Kopio, koilo ko i' dit id suang do ginawo om it id suang do pomusarahan diyolo'. Om pologoso' oku no do kokito diya' do sumuli' di pisangod ku, tu' nakatahak ku no iti hal ku dot id diya'. 13 Podsinding no dot id Tuhan! Royoho' no o Tuhan! Tu' pinoidu' dau i tulun do mosikin do mantad id longon do tulun di momonsoi'd araat. 14 Ousung no i tadau do nokosusuon ku! Lihuan nopo i tadau di pinogkosusu oku di tina' ku! 15 Ousung no i tulun di pinopotood di tapa' ku do tontok di pinoporomut iyau di habar dot, “Kusai! Kusai o tanak nu!” ka. 16 Koiyo po daa i tulun diri dilo kabandaran di rinaag do Tuhan om a' no insian-sianan. Korongou po daa iyau do todoi dot orurualan do dongkosuabon om korongou do pangkis di mogisasangod do dong pitangaadau, 17 tu' a' oku i' dau pinatai di ponontianon oku nogi'. Tu' iri i' daa'ndo i tian do tina' ku o lobong ku. 18 Nokuro tu' pinogkosusu oku? Mokimohilo-hilo' no daa do kokito oku'd kosusaan om katangaban om gisom indo do tikapatai ku dot ointingayam oku?
Pinoboros Mantad o Kaalaan do Yorusalim
1 Om suhuo' no di Raja' Sodokia, iyau i raja' do Yohuda, i Pasur it Imam i tanak di Malkia, om i Sipania it Imam, i tanak di Maasiya do mongoi solowot doho' do poporomut do pokionuon do poingkaa, 2 “Uhoto' daa o Tuhan do bagi' dati' tu' noturungku' no di Raja' Nobukadnisar i raja' do Babil, om i soudor dau iti bandar. Om ulan toi' om wonsoyon do Tuhan o tongoiso' di kopusahan dau do bagi' dati' om tumongkiad indo i Nobukadnisar,” ka. 3 Om boro-boros noddi o Tuhan dot id doho', om sunudai ku no i tulun diri 4 do momisunud di Sodokia, di pinoboros do Tuhan, i Kinorohingan dot Israil do poingkaa, “Oi Sodokia, alaon ku nondo i soudor nu do maso do monokisangod di raja' do Babil om i soudor dau. Timungon ku nopondo i rapo-rapo di soudor nu do hilo'd tanga' diti bandar. 5 Tumotos oku nondo do sumaap dokoyu, oiyo-iyon ku no o kinoris ku om kototogod ku dit a' ogina-gina'. 6 Patayon ngai' ku nopondo i songingiyon do hiti'd bandar, do tulun tuu ko' nintorusan nga' apatai ngai' nopo do toruol dit araat. 7 Nga' iya' nopo om i pagawai nu om i tulun dit a' napatai dot id pisangadan, om i noolu-olu' di mononglous om i toruo-ruol om pologoson ngai' ku nopo iyokoyu dot atangkap di Raja' Nobukadnisar om i pisangod dokoyu, di mamatai dokoyu. Patayon kou nondo di Nobukadnisar. Aiso' no o tolu-oluon dau om aiso' ot insianan om aiso' o kolisihan dau. Iyoho' no i Tuhan, o minomoros diti,” ka dau. 8 Om sunudai oku noddi do Tuhan do momoros dot id tulun dau do poingkaa, “Pokinongou kou no! Iyoho' no o Tuhan, o popinsimpili' dokoyu do sumusui do ralan do kumaa id koposion ko' sumusui do ralan do kumaa dot id kapatayon. 9 Isai nopo i tumimporon do hiti'd bandar om apatai no dot id pisangadan ko' apatai do mononglous ko' apatai do toruo-ruol dit araat. Nga' isai nopo i sumoliwan om tumahak dot id tulun do Babil, i maso do monurungku' do bandar diti om a' no patayon om a' apatai. 10 Tu' nosorou mantad ku no dot a' mongolu' diti bandar suwai ko' maan ku nopo kopio raago'. Patahakon nondo iti bandar dot id raja' do Babil, om tutudan nondo dau iti do gisom dot ouu. Iyoho' no i Tuhan, o minomoros diti,” ka dau.
Hukuman dot id Sompiiyon di Raja' do Yohuda
11-12 Om suhuo' oku nod Tuhan do polombus dot id sompiiyon di raja' do Yohuda, iri no i sinakagon di Daud, diti boros do poingkaa, “Pokinongou nodti poboroson ku, iyoho' i Tuhan o popoboros. Tumotos no kopio om owonsoi i' it otulid do pointikid do tadau. Om poiduwon no i tulun dit ulak-ulakan do mantad id tulun di mongulok-ulok dau. Ondung a' dokoyu wonsoyon o miagal diri om monubuan no kopio iri do kototogod ku gisom do miagal pondo do tapui dit a' milo'd pisokon o kototogod ku,” ka dau. 13 Om boros kaddi do Tuhan dot id Yorusalim, “Iya' nopo, oi Yorusalim, om id sawat i' ko' iti tana' do poingrantai. Nga' saapon ku indo iya'. Tu' osorou nu nopo daa om aiso' i' o kasaap diya' om aiso' o kolopuson di tolig nu. 14 Nga' hukuman ku indo iya' tu' i nongowonsoi nu o kopomohukuman ku. Tutudan ku nondo i walai do raja' nu, om osorob ngai' nopondo o posorili'ddi. Iyoho' no i Tuhan, o minomoros diti,” ka dau.
Nosihat di Yoromia dot id Sompiiyon di Raja' do Yohuda
1-2 Om suhuo' oku nod Tuhan do mongoi do hiri'd walai di raja' do Yohuda, iri no i sinakagon di Daud. Om hilo' oku nondo do monuhu' di raja', om i pagawai dau, om i tulun do Yorusalim, do mokinongou di boros do pinoboros do Tuhan dot id diyolo'. 3 Poingkaa no i boros do Tuhan dot id diyolo', “Iyoho' no i Tuhan, o monuhu' dokoyu do momonsoi dit otulid om it otopot. Poiduwon no i tulun dit ulak-ulakan do mantad id tulun di mongulok-ulok dau. Kada' dokoyu tompuraraato' om kada' dokoyu inggorito' o tulun di bansa'd suwai, om i tangaanak dot aiso' o molohing, om i tongoondu' do nopuadan; om kada' kou pamatai do tulun dit aiso' o sala' do hiti'd kinoiyonon diti. 4 Ondung wonsoyon dokoyu o miagal di pinonuhuan ku'ddi om raja' no kasai' i sinakagon di Daud. Om maya' indo kasai' iyolo' do wawayaan diti walai do raja' do miwoyo' di pagawai om i tulun diyolo' do songinsakai do korita'-kuda' om kuda', do gisom dot alaid. 5 Nga' ondung a' kou mumboyo' do ponuhuan ku om sumumpa' oku no dot id dokoyu dot araag nondo iti walai do raja'. Iyoho' no i Tuhan, o minomoros diti. 6 Id doho' nopo daa om miagal po di tana' do Giliad om i konuluhanan do Libanon o kolumiso' diti walai do raja' do Yohuda, nga' silihon ku nondo iti do kinoiyonon dit oingou om it a' iyonon do tulun. 7 Porikot oku nondo do tulun do mongoi pamaraag diti. Igitan ngai' nopondo diyolo' i kapak diyolo' om pinglongodon no i torigi do kayu sedar om pataamon nondo iri dot id tapui. 8 Om koimbagu nopondo om mogiuhot-uhot nopo i tulun di bansa'd suwai di montinalib do hiri, ondung nokuro tu' miagal kopio'ddi o winonsoi ku, iyoho' i Tuhan, dot id bandar dot olumis diti. 9 Om sumimbar nondo o tulun do nokobungou nopo nga' tuminolibamban kou i' di tumpongo dokoyu dot id doho', i Kinorohingan dokoyu, om tuminuku' kou om minodsubak kou do tingolig,” ka.
Boros di Yoromia do Pasal di Yoahas
10 Oi tulun do Yohuda, kada' dokoyu pogihadai i Raja' Yosia; kada' kou pogihad do kinapatayan dau. Nga' pogihadai nogi' dokoyu i Yoahas, i tanak dau'd kusai, tu' tanggayan diyolo' iyau om a' no koguli' kawagu; a' no iyau koguli' kawagu do mongoi ontong do pomogunan di kinosusuon dau. 11 Boros kad Tuhan do pasal di Yoahas i tanak di Yosia, i suminiliu do raja' do Yohuda do suminowoli di tapa' dau, “Nokopoggidu' no iyau do hiti om a' no iyau koguli' kawagu. 12 Hilo' nod pomogunan di pinananggayan diyolo' dau o kapatayon dau om a' no iyau kokito kawagu do pomogunan diti,” ka dau.
Boros di Yoromia do Pasal di Yoyakim
13 Obungou no i tulun di momonsoi do walai dau dot it a' otulid o pinoimpahan om tudut o pinopoinggayo. Obungou no i tulun di monuhu' do tulun do kumaraja', om a' indo dau godsian. 14 Obungou no i tulun di momoros do, “Momonsoi oku nondod walai ku dot agayo, om it ogumu' o bilik do hiri'd sawat,” ka. Om wansayan no dau do liligaon i walai dau'ddi om limputon no dau do kayu sedar do Libanon om saaton dau dot aragang. 15 Poposonong toi diya' ko' mantad do raja'd suwai dot ondung kawaal ko do walai nu do kayu sedar do Libanon dit osonong kopio o wonsoyon, om it olumis ko' dombokon? Otogui i' i tapa' nu. Om otulid i' om a' manampaping i tapa' nu; om osonong ngai' nopo o kinootuson do nunu nopo i winonsoi dau. 16 Otulid i' o pinomutus dau di tulun do mosikin, om osonong-sonong iddi kasai' iyau. Iyo noddi o tulun di kotutun do Tuhan. 17 Nga' iya' nopo om a' i' iyo'ddi tu' iri no i diya'd korohian o tihumon nu; om mamatai ko do tulun dit aiso' o sala'. Om padalaan nu do mongulok-ulok i tulun nu. Iyoho' no i Tuhan, o minomoros diti. 18 Om gowoi poddi om poingkaa o boros do Tuhan do pasal di Yoyakim i tanak di Yosia do kusai, “Aiso' i' o mogihad do kapatayon dau. Om aiso' o momoros dot, ‘Adai, oi tambalut ku,’ ka. Om aiso' o tumongob om aiso' o momoros do, ‘Kosian-sian giya diya'ddi oi raja' ku,’ ka. 19 Miagal nod pomolobong do kaladai o pomolobong di Yoyakim, tu' gayaton nopo iyau om pataamon no do hiri'd soliwan do wawayaan do Yorusalim,” ka.
Boros do Pasal do Kootuson do Yorusalim
20 Boros kad Tuhan, “Oi tulun do Yorusalim, ongoi kou pinggiak do hilo'd Libanon, ongoi kou pingihad do hilo'd tana' do Basan; pinglohou kou no do mantad hilo'd konuluhanan do Muab tu' nangahaba' no i sumokodung dokoyu. 21 Minoro-boros oku dot id diya' di maso nu po dot osimbayan, nga' a' ko i' minokinongou. Miagal noddi o winonsoi nu do solinaid nu do poimpasi, tu' a' ko i' minumboyo' doho'. 22 Otilib nondod tongus i boyoon nu, om angatanggayan do pisangod i sumokodung diya', om ointingayam om oindaraat i bandar nu tu' araat i' i nongowonsoi nu. 23 Osimbayan tomod o kopurimanan nu dot id pogialatan di kayu sedar do hilo'd Libanon, nga' a' nondo ogina-gina' o todoi nu dot orikatan ko di toruol; i miagal po di toruol do tondu' do mogkosusu,” ka dau.
Hukuman do Kinorohingan dot id di Yoyakin
24 Boros kad Tuhan dot id di Raja' Yoyakin, i tanak di Raja' Yoyakim, i raja' do Yohuda, “Poboroson ku dot id suang do ngaran ku iyoho' i Kinorohingan do poimpasi, dot oluson ku iya' dot iyo ko piya daa di pondulung di pononoop do poinsulung di tunturu' do longon ku'd wanan, 25 om patahakon tiya' nondo dot id tulun di poddosi nu, i tulun dit orohian do mamatai diya'. Patahakon tiya' nondo dot id di Raja' Nobukadnisar, i raja' do Babil om id soudor dau. 26 Pataamon tiya' nopondo om i tina' nu dot id pomogunan dit okon ko' kinosusuon dokoyu, om hilo' nondo goduwo o kapatayon dokoyu. 27 Orohian ko i' daa'ndo tomod do kokito kawagu do pomogunan diti nga' a' kou no koguli' kawagu,” ka dau. 28 Boros kangku, “Miagal toi do kuron di nababak i Raja' Yoyakin, tu' pataamon poo om niada-ada' do tulun? Iri toi o kopoguyungan nu dau om i tangaanak dau dot id pomogunan dit a' dau noongoi-ongoi do gulu?” kangku. 29 Oi pomogunan ku, pokinongou nodti pinoboros do Tuhan, 30 “Napapalan no i tulun diri dot atatagadan do tangaanak dau, om a' kasai' iyau koundar. Aiso' nondo o sinakagon dau do momorinta' kawagu do hilo'd Yohuda, om i koirikau do hiri'd tirikohonon di Daud do momorinta'. Iyoho' no i Tuhan, o minomoros diti,” ka dau.
I Soro-Sorohon dot id Dosunsudan
1-2 Boros kad Tuhan, i Kinorohingan dot Israil, “Obungou no i boyoon di mamaraag om i popogitompias-pias di tulun ku! Iyokoyu nogi' daa it apatut do momogompi' di tulun ku. Nga' a' i' dokoyu ginompi' i tulun ku, tu' pinogitompias-pias nogi' dokoyu om nuyung dokoyu iyolo'. Om hukuman ku nondo iyokoyu tu' i kararaat dokoyu o kopomohukuman ku. 3 Timungon ngai' ku nondo i tulun ku do mantad id koinsanai di pomogunan di pinotompiasan ku diyolo', om pogulion ku nondo kawagu iyolo' do hiti'd pomogunan mantad diyolo'. Om ogumu' nondo o tangaanak diyolo' om gumumu' iyolo'. 4 Om momili' oku nondo do boyoon do momogompi' diyolo'. Om a' nondo moddosi ko' otompurolosi i tulun ku, om iso' pondo diyolo' nga' aiso' i' ot atagak. Iyoho' no i Tuhan, o minomoros diti,” ka dau. 5 Boros kad Tuhan, “Rumikot nondo o maso do momili' oku do songulun o raja' dit otulid do mantad id sinakagon di Daud. Momorinta' nondo i raja'ddi do mikuwo'd toilaan om momonsoi iyau dit otopot om it otulid do pointongkop diti pomogunan. 6 Soira' nopondo do momorinta' iyau, om aiso' nondo o koligagaanan di tulun do Yohuda, om haro o kosimbayanan do tulun dot Israil. Roitan nondo i raja'ddi dot ‘I Tuhan i Koposion Toko’. 7 Rumikot nondo o maso dot a' i tulun sumumpa' dot id suang do ngaran ku iyoho', i Kinorohingan do poimpasi, i pinoposoliwan dot Israil do mantad hilo'd pomogunan do Masir. 8 Suwai ko' sumumpa' nondo iyolo' dot id suang do ngaran ku, iyoho' i' Kinorohingan do poimpasi, i pinopoidu' do tulun dot Israil do mantad hilo'd pomogunan di ponong id utara om mantad id koinsanai do pomogunan do suwai di pinotompiasan ku diyolo'. Om momogun-mogun nondo iyolo' do hiri'd pomogunan diyolo',” ka dau.
Boros di Yoromia do Pasal di Nabi
9 Iti no o boros ku do pasal di nabi: Nokoruol tomod o ginawo ku, om gagaran oku po tomod, tu' Tuhan no om i boros dau dit olidang o pinoposiliu doho' do miagal di tulun do naawuk, i tulun di nadalaan do minonginum do waig dot anggur. 10 Noponu' pod tulun dit a' otorodok dot id Tuhan iti pomogunan toko', angaraat o kowoyo-woyoon diyolo' om kasala' o pamamakai diyolo' do kuasa' diyolo'. Om mihad poddi iti pomogunan tu' napapalan nod Tuhan, om ilo kasakatan nga' nongoriou po ngai'. 11 Boros kad Tuhan, “A' i' mumboyo' doho' ilo nabi om ilo imam di mogobi-obi' doho'; tu' nokosupan ku i' iyolo' do mingwonsoi dot araat do hilo' piya'd walai ku. 12 Alamou nondo om otuong i ralan do susuyon diyolo'; posoduwon ku nondo iyolo' om porotuon ku. Porikatan ku nondo iyolo' do kosusaan; dot orikot i maso do kopomohukuman ku diyolo'. Iyoho' no i Tuhan, o minomoros diti. 13 Nokito ku no i dusa di nabi do hilo'd Samaria; tu' minimboros iyolo' dot id suang do ngaran do Baal om minamalid iyolo' di tulun ku, 14 Nga' ara-raat i nabi di hilo'd Yorusalim do nokito ku: tu' magampahu' om mongudut iyolo'; om monguhup nogi' iyolo' di tulun do momonsoi dit araat, gisom iddi dot aiso' nopo o tiso'd tulun do tumingkod do momonsoi'd araat. Id doho' nopo om miagal nopo iyolo' di tulun do Sodom om Gomora karaat,” ka dau. 15 Om gowoi pondo om poingkaa o poboroson ku, iyoho' i Tuhan it Osundu Kopio, do pasal di nabi do hilo'd Yorusalim, “Onuan ku nondo iyolo'd totonomon dit opoit do maan dot akanon, om poinumon ku iyolo' do waig di kawanit tu' iyolo' no i minamayayat do tulun do pointongkop diti pomogunan dot a' momusou doho',” ka dau. 16 Om boros kad Tuhan, it Osundu Kopio dot id tulun do hilo'd Yorusalim, “Kada' kou pokinongou do poboroson di nabi; tu' manahak no iyolo' dokoyu do pagandasan di maan toomod. Iri i' i pininsorou toomod diyolo' o posunudon diyolo' dokoyu om okon i' ko' i nokoboros ku. 17 Pimbarasan diyolo' i tulun di mada' do mokinongou di pinoboros ku dot, ‘Osonong-sonong kou i' bo,’ ka no diyolo'. Om tikid-tikidon nopo diyolo' do momisunud i tulun dot okodou o ginawo dot, ‘A' kou i' bo oontok do kosusaan,’ ka,” ka dau. 18 Boros kangku, “Aiso' i' o tiso' diti nabi do nokoilo do pomusarahan do Tuhan. Om aiso' i' o tiso' diyolo' do nokorongou ko' nokosuhut po di natantu' mantad dau do wonsoyon dau, om aiso' o minokinongou om aiso' o minamadul di pinoboros dau. 19 Kototogod nopod Tuhan om miagal po do tongus dit opuhod kopio do kobuntul di tulun dot araat, 20 om a' i' iri tumingkod dot a' po owonsoi ngai' i natantu' mantad dau do wonsoyon dau. Om osuhutan nopondo kopio di tulun dau iti om koimbagu,” kangku. 21 Boros kad Tuhan, “A' ku i' sinuhu' do rumikot iti nabi nga' ongoi toomod nopo iyolo'. Om a' ku i' iyolo' sinunudan do poboroson nga' mimboros i' iyolo' dot id suang do ngaran ku. 22 Nga' ondung nokoilo daa iyolo' do pomusorou ku om milo i' daa iyolo' do popimboros di boros ku dot id tulun ku om milo daa do monuhu' diyolo' do kumorologo do momonsoi'd dusa, om tumingkod di wowonsoyon diyolo' dot araat. 23 Iyoho' nopo om Kinorohingan i' di hino do hinonggo-honggo nopo om okon i' ko' hino dot id iso' no o kinoiyonon. 24 Aiso' i' o milo do lumisok do gisom dot a' ku iyau okito. Tu' a' kou toi koilo do hinonggo-honggo nopo do hilo'd surga om hiti'd pomogunan nga' hino oku i'? 25 Oilaan ku i' i pinoboros di nabi di mingudut dot id suang do ngaran ku, om i momoros do sinunudan ku iyolo' do boros ku dot id suang do nipi diyolo'. 26 Songkuro po daa koloido' di piro-piro nabi do mimpalid di tulun ku, dot i boros di pininsarahan toomod diyolo' o pamalid? 27 Ondos daa diyolo' om popolihu di tulun ku doho' i nipi di pinsusuyon diyolo' do miagal di komolohingan diyolo' tu' nokolihu doho' om tuminuku' diri dot id di Baal. 28 Iri nopo nabi di haro o nipi om apatut i' do poboroson dau do nipi i' toomod iri. Nga' iri nopo i nabi di nakaramit do boros ku om apatut no do tumorodok do popinsunud do boros diri. Tu' nunu toi kopio o bundusan tu' milo daa do poiyo-iyoon do gandum? 29 Tu' okon toi ko' miagal do tapui o boros ku om miagal do dunsul di mamabak do watu? 30 Saapon ku indo i nabi di popolombus do boros do mantad id nabi do suwai, om popinsunudon nondo do boros ku kaka iri. 31 Om saapon ku nogi' i nabi di momoros do boros ku i popimboroson diyolo' om inda' ka do diyolo' tomod i' di boros. 32 Pokinongou kou no do poboroson ku, iyoho' i Tuhan! Saapon ku i nabi di minsusui do nipi diyolo' di nongoponu' do tudut. Popinsusuyon diyolo' i nipi diyolo' om gowoi pondo om apalid i tulun ku, dot i tudut om i boboroson diyolo' o kapalid. A' ku i' iyolo' sinuhu', tu' aiso' i' o guna' diyolo' dot id tulun ku. Iyoho' no i Tuhan, o minomoros diti,” ka dau.
Binabo do Tuhan
33 Boros kad Tuhan dot id doho', “Oi Yoromia, ondung haro o muhot diya' do tongoiso' di tulun ku, ko' i nabi, ko' i tulun dit imam, do poingkaa, ‘Nunu kad boros do Tuhan?’ ka, om sunudan no iyau dot, ‘Iya' no o nosiliu do binabo do Tuhan om potitaamon ko no dau,’ kanto. 34 Ondung haro o tiso' di tulun ku, ko' ongoiso' di nabi ko' it imam do momoros dot, ‘i binabo'd Tuhan,’ ka, om hukuman ku no iyau om i sompiiyon dau. 35 Suwai ko' apatut daa do monguho-nguhot iyau di tambalut dau om i songkoduwo dau do, ‘Nunu no o nisimbar do Tuhan?’ ka, ko' ‘Nunu o pinoboros do Tuhan?’ ka. 36 Om a' no iyolo' koino-ino do momoros kawagu do boros dot, ‘I binabo do Tuhan,’ ka, tu' ondung haro o momoros do miagal diri, om silihon ku nondo kopio do binabo dau i boros ku. Tu' pinasansala' di tulun dot Israil i boros do Kinorohingan diyolo', i Kinorohingan do poimpasi, om i Tuhan dit Osundu Kopio. 37 Uhoton no do poingkaa i nabi, oi Yoromia, ‘Nunu o nisimbar do Tuhan dot id dokoyu? Nunu o pinoboros do Tuhan?’ kanto. 38 Om ondung a' diyolo' tonudon i pinonuhuan ku om mimboros no dot, ‘i binabo do Tuhan,’ ka, om sunudan no iyolo' do 39 ngoyon kopio ku nondo iyolo' puhuo' om pataamon ku nondo iyolo', om i bandar di pinatahak ku diyolo' om i komolohingan diyolo' do hilo'd sodu'. 40 Om indaraaton ku nondo iyolo' om intingayamon ku iyolo' do gisom dot alaid om a' nondod tulun olihuan i kinootuson diyolo'ddi,” ka dau.
Duwo o Balatak do Tua' dot Ara
1 Om tontok di natanggayan no di Raja' Nobukadnisar do hilo'd Babil, i Raja' Yoyakin, om i piro-piro o boyoon do Yohuda, om i tulun dit ongoilo om it angabaal do monukang do mantad hilo'd Yorusalim, om pointongo' oku nod Tuhan do duwo o balatak do noponu'd tua' dot ara do hiri nogid dotimbabaan di Walai'd Sasambayangan dot Agayo, dot id suang do pinointalang. (I Raja' Nobukadnisar nopo om raja' do Babil. I Raja' Yoyakim nopo om raja' do Yohuda, om tanak iyau di Yoyakim.) 2 Iri nopo balatak do koiso' om kisuang do tua' dot ara dit ongosonong, i tua' dit id gulu koonsok; nga' iri no balatak di koduwo om kisuang do tua' dot ara di nongomomos no, om a' no milo'd kanon. 3 Om boros kaddi do Tuhan dot id doho', “Nunu o tokito nu, oi Yoromia?” ka dau. Om boros kangku do suminimbar, “Tua' dot ara, oi Tuhan. Ilo' nopo tongosonong nga' osonong no kopio, om ilo' no nongomomos om nomomos no kopio, om a' no milo'd kanon,” kangku. 4 Om boros kaddi do Tuhan dot id doho', 5 “Iyoho' no i Tuhan, om Kinorohingan dot Israil o momoros dot iri nopo tulun di natanggayan do hilo'd Babil om iyo nodti tua' dot ara dot osonong, om osonong oku indo dot id diyolo'. 6 Gompion ku i' iyolo' om pogulion kawagu ku iyolo' do hiti'd pomogunan diti. Wonsoyon ku i' iyolo' om a' ku i' iyolo' raagon; tonomon ku i' iyolo' om a' ku i' iyolo' utuson. 7 Om onuan ku indo iyolo' do ginawo dit orohian do koilo dot iyoho' no o Tuhan. Om osiliu nondo iyolo' do tulun ku om osiliu oku do Kinorohingan diyolo', tu' aayi-ayi' nondo o ginawo diyolo' do gumuli' dot id doho'. 8 Nga' i Raja' Sodokia noo, i raja' do Yohuda, om i boyoon do tulun dit id toning dau, om i tulun do Yorusalim do suwai di minundorong do hiti'd pomogunan diti ko' i minundaliu do hilo'd Masir, om iyoho' no, i Tuhan, o poposiliu ngai' diyolo' do miagal diti tua' dot ara di nomomos, om a' no milo'd kanon. 9 Porikatan ku nondo iyolo'd kosusaan dit awagat kopio gisom dot aranaban ngai' o bansa' do hiti'd pomogunan. Hingi-hingion nondo iyolo' do tulun, om maan do tiirak-irak, om untotogodon iyolo', om silihon do pomomopol i ngaran diyolo' do honggo nopo o potompiasan ku diyolo'. 10 Om porikoton ku nondo o pisangadan om mononglous, om toruol dot id diyolo' gisom dot aiso' no tiso' diyolo' dot oolu' do hiri'd pomogunan di tinahak ku diyolo' om tinahak ku di komolohingan diyolo' di gulu po,” ka dau.
I Pisangod do Mantad Hilo'd Utara
1 Tontok di kaapat do toun di Yoyakim i tanak di Yosia, do nosiliu'd raja' do Yohuda, om karamit oku nod boros do mantad id Tuhan do pasal do koinsanai'd tulun do Yohuda. Maso nopodti nga' koiso' nogid toun di Nobukadnisar do raja' do Babil. 2 Boros kangku dot id koinsanai'd tulun do Yohuda om Yorusalim, 3 “Solinaid nopo do duwo nohopod om tolu o toun do mantad di kohopod nogi' om tolu do toun di Yosia, i tanak di Amon, do raja' do Yohuda om gisom do tadau'd baino', om moro-boros kasai' no o Tuhan dot id doho', om popilombu-lombuson kasai' ku i' iri dot id dokoyu. Nga' a' kou i' minomonsoi'ddi. 4 A' kou i' minokinongou piya om a' kou minamadul do mulong piya dot aiso' o kinotingkadan do Tuhan do pinoporikot di susuhuon dau, i nabi dau dot id dokoyu. 5 Sinunudan kou diyolo' do tumongkiad di kowoyo-woyoon dokoyu dot araat om tumingkod do momonsoi'd dusa, om poingiyon kasai' kou i' daa do hiti'd pomogunan di pinatahak do Tuhan dot id dokoyu om id komolohingan dokoyu do sumiliu'd tungkusan dokoyu do gisom dot alaid. 6 Sinunudan kou di nabi dot a' tumuku' om a' modsubak do ponokokinorohingan om a' popotogod do Tuhan dot i podsusubak dokoyu do tingolig di winonsoi dokoyu o popotogod dau. Ondung minumboyo' kou daa di ponuhuan do Tuhan diri om a' kou i' daa dau hinukuman. 7 Nga' Tuhan piya nga' koboros no dot a' kou minokinongou dau. Tu' pinotogod nogi' dokoyu iyau dot ino tingolig dokoyu o pinopotogod. Om iyokoyu iddi om iyokoyu o pinoporikot do hukuman dau dot id dokoyu. 8 Om gowoi poddi om poboroson do Tuhan it Osundu Kopio o miagal diti, tu' a' kou i' minokinongou dau. Boros ka dau, 9 ‘Porikoton ngai' ku nondo i tulun do mantad hilo'd utara om porikoton ku i susuhuon ku, i Raja' Nobukadnisar, i raja' do Babil. Porikoton ku iyolo' do mongoi panangod do Yohuda om i songingiyon do hilo' om mongoi panangod do koinsanai'd bansa' di hiri'd posorili'. Raagon ku nondo i pomogunan di bansa' di hiri'd posorili' om pologoson ku nopondo iyolo' do poinraag do gisom dot alaid, om gisom do koronob om kotompurolosi o kokitanan. Iyoho' no i Tuhan, o minomoros diti. 10 Om tingkodon ngai' ku nondo i pinongkisan diyolo' dot atataadan om asasanangan, om i karamayo' do poginakanan do kumawin. Om tumau piya nondod lampung diyolo' om gandum nga' aiso' noo. 11 Poinglogos tomod nopondo do poingraag o pointongkop diti pomogunan om koronob tomod dot okito om oingou, om i bansa' do hiti'd posorili' nga' minsiriba' ngai' nopo di raja' do Babil do solinaid do turu' nohopod o toun. 12 Om katalib pondo iri om hukuman ku nogindo o bansa'd Babil om i raja' do Babil dot i dusa diyolo' o kopomohukuman ku. Raagon ku nondo i pomogunan do Babil om pologoson ku do poingraag do gisom dot alaid. 13 Porotuon ku nondo dot id Babil o koinsanai'd kosusaan di pinoboros ku do porotuon ku dot id koinsanai'd bansa' do tontok di minoro-boros oku di Yoromia --- oinsanan nopo i kosusaan di nokotulis dot id buuk diti. 14 Sulian ku nondo i tulun do Babil di piningwansayan diyolo' om ogumu' nondo o bansa' om raja' dot angagayo do moniliu diyolo' do turipon,’ ka dau,” kangku.
Pomohukum do Kinorohingan di Piro-Piro o Bansa'
15 Boros kad Tuhan, i Kinorohingan dot Israil dot id doho', “Onuo' iti sangkir di ponginuman do waig dot anggur do noponu'd kototogod ku. Igitai noti do kumaa dot id koinsanai'd bansa' di ponuhuan ku diya' do mongoi, om poinuman no diyolo' iti. 16 Om soira' nopondod koinum iyolo'dti om mikorobibi' nondo iyolo' om atagakan do pomusorou tu' porikatan ku iyolo' do pisangadan,” ka dau. 17 Om onuo' ku no i sangkir diri do mantad id longon do Tuhan om sansagai ku no do popoinum diri o koinsanai di bansa' di pinonuhuan do Tuhan doho'd mongoi. 18 Sinansagan diri o Yorusalim om koinsanai di bandar do hilo'd Yohuda, om koinsanai di raja' om boyoon do hiri do monginum diri, om osiliu i' iyolo' do tana' dit a' sunian om i koronob, om kotompurolosi kopio o kokitanan, om silihon nondod tulun do pomopol o ngaran diyolo', do miagal di wonsoyon diyolo' do gisom do baino'. 19-26 Iti ngai' no o ngaran do tulun do suwai di poinumon do mantad id sangkir diri: i raja' do Masir om i pagawai dau om i boyoon; koinsanai di tulun do Masir om koinsanai di bansa'd suwai di hilo'd Masir; koinsanai di raja' do pomogunan dot Us; koinsanai di raja' do Pilistin do hilo'd bandar dot Askilon, om bandar do Gasa, om bandar dot Ikron; om koinsanai di tulun di nongoolu-olu' do hilo'd Asdod; koinsanai di tulun dot Idom, om Muab om Amon; koinsanai di raja' do Tirus om Sidon; koinsanai di raja' do hilo'd tisan do Rahat do Tanga'; i bandar do Didan, om Tima, om Bus; koinsanai di tulun di momompod do tobuk; koinsanai di raja' dot Arab; koinsanai di raja' do payat do tulun do hilo'd tana' do kowotuan; koinsanai di raja' do Simri, Ilam om Madai; koinsanai di raja' do ponong hilo'd utara; it id somok om it id sodu', do pogisuhu-suhuton nopo. Koinum ngai' nopod suang di sangkir diri o koinsanai do bansa' do hiti'd pomogunan. Om kolimpupuson nopondo do monginum diri, om i raja' do Babil. 27 Om boros kaddi do Tuhan dot id doho', “Sunudan ngai' no i tulun dot iyoho' no i Tuhan it Osundu Kopio, i Kinorohingan dot Israil, o monuhu' diyolo' do monginum diri do gisom id aawuk om koilob iyolo', om gisom dot ahaba' om a' iyolo' kotungag kawagu, dot i pisangadan do porikoton ku dot id diyolo' o kobungou. 28 Om ondung mada' iyolo' do rumamit di sangkir diri do potunuyon nu om mada' iyolo' do monginum diri, om sunudan no iyolo' do nokoboros no o Tuhan, it Osundu Kopio, do poingkuro piya nga' a' no milo dot a' iyolo' monginum do suang di sangkir diri, tu' iyo noddi o ponuhuan do Tuhan. 29 Timpuunan ku no do mamaraag o hiti'd bandar ku. Om ondos daa diyolo' om a' iyolo' iyau ohukuman? Atantu' no dot ohukuman i' iyolo' tu' porikatan ku i' do pisangadan o koinsanai'd tulun do hiti'd pomogunan. Iyoho' no i Tuhan, it Osundu Kopio, o minomoros diti. 30 Iya' no oi Yoromia, o popoboros do koinsanai diti nokoboros ku. Sunudan ngai' no iti tulun do poingkaa, ‘Ongorod nopo o boros do Tuhan do mantad hilo'd surga. Mamagarom iyau do sumaap di tulun dau; om mamangkis iyau do miagal do tulun di mamaga' do tua' dot anggur. Korongou ngai' nopo dau o koinsanai do tulun do hiti'd pomogunan, 31 om mulinggou o boros dau do gisom do korikot do hilo'd tisan diti pomogunan. Haro o hal do kapasalaan do Tuhan do koinsanai'd bansa'. Om oinsanan nopondo o tulun do butusan om hukuman do kapatayon i tulun dot angaraat,’ ka,” ka dau. 32 Boros kad Tuhan, it Osundu Kopio, “Mogisuhu-suhut nopo i bansa' dot orikatan do kosusaan, om rumikot no o tongus dot opuhod kopio do mantad hilo'd tisan diti pomogunan,” ka dau. 33 Tontok nopo do tadau'ddi om songinsasad pondo i rata' di tulun di pinatai'd Tuhan do pointongkop diti pomogunan. Aiso' no o mogihad diyolo' om a' no oongoi kolobong i rata' diyolo'. Poingiliu tomod nopori do hiri'd tana' do miagal pod kinotimungon do rinomos. 34 Ihad kou no, iyokoyu i boyoon, i gompomogompi' do tulun di songonuon do Tuhan. Ihad kou no om isis no do hilo'd pupuk. Tu' nokorikot no o maso do kapamatayan dokoyu, om pogitompias-piason i kopoggidu'. Om iyo kou do kuron dit amahal kopio, dit aratu' om ababak. 35 Aiso' no o ralan dokoyu do mogidu'. 36-37 Mingodoi kou po om mingihad dot atatangaban tu' pinatai nod Tuhan i bansa' dokoyu, om rinaag dau o pomogunan dokoyu dit osimbayan. 38 Notongkiadan nod Tuhan i tulun dau do miagal do singa di tuminongkiad do luang dau. Tu' nosiliu'ddi do miagal do tana' do kowotuan o pomogunan diti do nobungou di pisangadan dit adalaan kopio om i kototogod do Tuhan dit a' ogina-gina'.
Binisara' i Yoromia
1 Tontok dit oruhai po do kinosilihan di Yoyakim i tanak di Yosia do kusai, do raja' do Yohuda, 2 om boro-boros no o Tuhan dot id doho' do poingkaa, “Ongoi ingkakat do hilo'd natad di Walai'd Sasambayangan dot Agayo om poboroson no o koinsanai di pinonuhuan ku diya' do popoboros dot id tulun di rumikot do mantad hilo'd kabandaran do Yohuda do mongoi sambayang do hilo'. Kada' nod haro o tiso' di boros diri dot a' polombuson. 3 Tu' ulan toi' om mokinongou daa i tulun om tumingkod di kowoyo-woyoon diyolo' dot araat. Ondung tumingkod iyolo' om wolihan ku indo o pomusorou ku di mamaraag mantad daa diyolo' tu' araat i' o pingwonsoyon diyolo',” ka dau. 4 Om sinuhu' oku'd Tuhan do popoboros dot id tulun diri do poingkaa, “Iyoho' no i Tuhan, i minomoros dot apatut kou do mumboyo' doho', om tumanud do koinsanai dit oturan di pinatahak ku dokoyu, 5 om mamadul kopio do boros di susuhuon ku, i nabi, di popingrikoton ku dot id dokoyu. Nga' a' kou i' insan umboyo' di pinoboros diyolo'ddi. 6 Ondung tumilombus kou dot a' mumboyo' om wonsoyon ku nondo dot id Walai'd Sasambayangan dot Agayo diti o miagal di winonsoi ku di hilo'd Silo, om oinsanan nopondo o bansa' do hiti'd pomogunan do mamarait do ngaran do bandar do Yorusalim do maan do pomopol,” ka dau. 7 Nokorongou ngai' nopo it imam, om i nabi om koinsanai di tulun do mimboros oku'dti do hiri'd Walai'd Sasambayangan dot Agayo. 8 Om kopupusai ngai' ku po do popoboros i pinonuhuan do Tuhan doho' do popoboros, om gayato' oku no diyolo' om pinggarang no iyolo' do poingkaa, “Apatut no do patayon ko! 9 Nokuro tu' minomoros ko dot id suang do ngaran do Tuhan dot a' no alaid om koiyo no di hilo'd Silo iti Walai'd Sasambayangan dot Agayo'dti, om pinoboros nu nogi' dot iti bandar nga' araag om aiso' nondo o miyon do hiti?” ka diyolo'. Om gurumungai oku noddi di tulun dot ogumu'. 10 Om soira' di nokorongou i boyoon do Yohuda di nosiliu do miagal diri, om arau-arau nopo iyolo' do suminoliwan do mantad hiri'd walai do raja' om ongoi no iyolo' do hiri'd Walai'd Sasambayangan dot Agayo, om ongoi no irikau do hiri'd wawayaan di roitan do Wawayaan do Wagu di Walai'd Sasambayangan dot Agayo. 11 Om boros ka dit imam om i nabi dot id boyoon, om id koinsanai di tulun, “Apatut no do hukuman do kapatayon iti tulun diti tu' pinapasala' i' iyau do bandar diti. Om iyokoyu nogi' nga' nokorongou i' dau do minomoros do miagal diri,” ka diyolo'. 12 Om boros kangku'ddi, “Sinuhu' oku'd Tuhan do mongoi popoboros do koinsanai di norongou dokoyu do pinoboros ku do papasala' diti Walai'd Sasambayangan dot Agayo om papasala' diti bandar. 13 Iyo nopoddi om simbanai nogi' kopio dokoyu ino kowoyo-woyoon dokoyu om ino pingwonsoyon dokoyu, om apatut no do mumboyo' kou'd Tuhan, i Kinorohingan dokoyu. Tu' ondung mumboyo' kou daa dau, om wolihan indo dau o pomusarahan dau di poporikot mantad daa do kapatayon dot id dokoyu. 14 Nga' iyoho' nopo, om id suang oku nod longon dokoyu. Wonsoyon nopo dokoyu dot id doho' i korohian dokoyu. 15 Nga' ilaan no kopio dokoyu iti: ondung patayon oku dokoyu om kasala' kou no om koinsanai di tulun do hiti'd bandar tu' mamatai do tulun dit aiso' o sala', tu' otopot i' kopio do Tuhan o minonuhu' doho' do mongoi popoinsan dokoyu,” kangku. 16 Om boros kaddi di boyoon om i rayat dot id imam om id nabi, “Iti nopo tulun om minomoros i' dot id suang do ngaran do Tuhan om Kinorohingan toko', om a' i' iyau apatut do hukuman do kapatayon,” ka diyolo'. 17 Om ingkakat po kawagu o piro-piro o molohing-lohingon do minoro-boros dot id tulun di nokotimung do hiri do poingkaa, 18 “Tontok dit i Hiskia po o raja' do Yohuda om sunudai no di Mika i nabi diri, i tulun do mantad hilo'd Morisit, o koinsanai di tulun do boros do Tuhan it Osundu Kopio do poingkaa, ‘Roduwon nondo o Sion do miagal do tumo, om osiliu do kinotimungon do kinaraagan o Yorusalim, om i nuluhon do kinoiyonon di Walai'd Sasambayangan dot Agayo nga' osiliu nondod puru',’ ka. 19 Om a' i' di Hiskia om i tulun do Yohuda pinatai i Mika. Suwai ko' nooris i' i Hiskia do Tuhan om minokiinsian iyau dau. Om wolihai noddi do Tuhan o pomusarahan dau di poporikot mantad daa do kosusaan do pamatai diyolo'. Nga' iyati' nodti om poporikot toko' i' daa do kosusaan dot id dati',” ka diyolo'. 20 Om boros kangku'ddi, Haro nogi' kawagu o tulun do suwai do minomoros dot id suang do ngaran do Tuhan do papasala' di bandar om i bansa' do miagal di pinoboros ku. Ngaran nopo dau nga' i Uria, i tanak di Somaya, i mantad hilo'd Kiriat Yiarim. 21 Om soira' di nokorongou i Raja' Yoyakim om i boyoon do soudor dau om i pagawai dau di pinoboros di Uria, om umbalan daa'ddi di raja' do mamatai iyau. Nga' nokoilo i' i Uria do pasal diri om poggidu' no iyau do hilo'd Masir do nopopoddosian. 22 Nga' ponuhu' po i Raja' Yoyakim di Ilnatan i tanak di Akbor om piro-piro tulun do suwai do mongoi do hilo'd Masir do mongoi pangangat di Uria. 23 Om ngoyo' no diyolo' i Uria do mantad hilo'd Masir om pootodo' no diyolo' dot id di Raja' Yoyakim. Om ponuhu' no i raja'ddi do tulun do mamatai di Uria om pataamo' noddi i rata' dau do hiri'd pamalabangan do tulun toomod. 24 Nga' iyoho' nopo, i Yoromia om sokodungon i' di Ahikam, i tanak di Sapan, om a' oku iddi pinatahak dot id tulun om a' oku pinatai.
Minonompoku' i Yoromia
1 Tontok dit oruhai po o kinosilihan di Sodokia i tanak di Yosia, do raja' do hilo'd Yohuda, om sunudai oku nod Tuhan 2 do momonsoi do poku' do kayu o wonsoyon om pongogos nopoddi om kulit di tinali om popokuon nogindo iri dot id liou ku. 3-4 Om sunudai oku noddi do Tuhan, it Osundu Kopio, i Kinorohingan dot Israil do popolombus do boros dau dot id raja' dot Idom, om Muab, om Amon, om Tirus om Sidon. Om poporomut nopo di boros diri nga' i wakil diyolo' di nokorikot do hilo'd Yorusalim do mongoi solowot di Raja' Sodokia. Om poingkaa o boros do Tuhan diri, 5 “Winonsoi ku iti pomogunan do mikuwo'd kinoris ku om sinundu ku dit agayo kopio om winonsoi ku nogi' o tulun om koinsanai do nintorusan di poimpasi do hiti'd pomogunan; om milo oku i' do papatahak diri dot id isai nopo i korohian ku'd patahakan. 6 Iyoho' no, i pinapatahak do koinsanai do bansa' diti dot id suang do kuasa' di susuhuon ku, i Nobukadnisar, i raja' do Babil, om iri piya nintorusan nga' pinatahak ku i' dot id dau. 7 Oinsanan nopo o bansa' do mininsiriba' dot id dau, om minsiriba' po kawagu iyolo' dot id dau om id manangaki dau do gisom dot orikot i maso do kaalaan di bansa' dau. Om iri nondo i bansa' do Babil o minsiriba' dot id bansa' dit ongokoris om id raja' dit angabantug dot orikot o maso'ddi. 8 Nga' ondung haro o bansa' ko' pomorintaan dot a' minsiriba' dot id pomorintaan di Nobukadnisar, om hukuman nondo i bansa'ddi do pisangadan, om mononglous, om toruol do gisom id minsiriba' nondo o bansa'ddi dot id dau. 9 Kada' kou pokinongou di nabi di tuuhoton dokoyu ko' isai nopo i magakun do milo do poposunud dit osiliu dot id dosunsudan dot id nipi ko' momolohou do rusod do tulun do napatai ko' mamakai po do toilaan do bobolian. Mogodu ngai' nopo daa iyolo' dokoyu do minsiriba' dot id raja' do Babil. 10 Mongudut i' iyolo' dokoyu om popotongkiad dokoyu do mantad id pomogunan dokoyu om koongoi kou nondo do hilo'd sodu'. Om uyungon ku iyokoyu om apatai kou nondo. 11 Nga' ondung haro o bansa' di minsiriba' om mokiporinta' di raja' do Babil om pologoson ku indo i bansa'ddi do mundorong do hiri'd pomogunan diyolo', om mongumo om momogun-mogun do hiri. Iyoho' no i Tuhan, o minomoros diti,” ka dau. 12 Om miagal nogiddi o pinoboros ku dot id di Sodokia i raja' do Yohuda, “Insiriba' no dot id raja' do Babil. Umboyo' no dau om i tulun dau om apasi ko i'! 13 Nokuro tu' uhang nu'd apatai ko om i tulun nu dot id suang do pisangadan om mononglous om toruol? Iri no o nokoboros do Tuhan dot osiliu dot id nunu nopo o bansa' di mada' do minsiriba' dot id raja' do Babil. 14 Kada' pokinongou di nabi di momisunud diya' dot a' minsiriba' dot id dau. Mongudut ngai' i' iyolo' diya'ddi. 15 Tu' Tuhan no o minomoros dot okon i' ko' iyau o pinoporikot diyolo'ddi, om pinoboros nogi' dau do mingudut no iyolo' do tontok di pinoboros diyolo' do momoros iyolo' dot id suang do ngaran do Tuhan. Gowoi pondo om potompiason om patayon ko'd Tuhan do mitonggoi di nabi di minongudut diya', oi Tuan Raja',” kangku. 16 Om sunudai ku noddi it imam om koinsanai di rayat di boros do Tuhan do poingkaa, “Kada' kou pokinongou di nabi di mimboros dot oruhai nod koguli' kawagu i pakakas di hiri'd Walai'd Sasambayangan dot Agayo do mantad hilo'd Babil. Mingudut i' iyolo' dokoyu'ddi. 17 Kada' kou pokinongou diyolo'! Insiriba' kou nogi' kopio dot id raja' do Babil diri, om apasi kou i'! Nokuro nanu' tu' uhang nu'd araag iti bandar? 18 Ondung otopot do nabi kopio iyolo' om monongkuyaan di boros ku om atantu' no do pokionuon i' daa kopio diyolo' doho', iyoho' i Tuhan it Osundu Kopio, dot a' popologos di pakakas di poingopi' do hilo'd Walai'd Sasambayangan dot Agayo om i hiri'd poiyanan dit id walai'd raja', dot atanggayan do hilo'd Babil,” ka dau. 19-20 (Tontok di tinanggayan di Raja' Nobukadnisar do hilo'd Babil i raja' do Yohuda, i Yoyakin i tanak di Yoyakim, om i boyoon do tulun do hilo'd Yohuda om hilo'd Yorusalim, om a' i' dau tinanggayan i torigi, om i tangki' do tambaga', om i korita'-kuda' om i piro-piro o pakakas di suwai di hiri'd Walai'd Sasambayangan dot Agayo.) 21 Om boros ka kawagu'd Tuhan, “Pokinongou nod poboroson ku, iyoho' i Tuhan it Osundu Kopio, om i Kinorohingan dot Israil, do pasal di pakakas di noolu' do hiri'd Walai'd Sasambayangan dot Agayo, om i hiri'd poiyanan dit id walai do raja' do Yorusalim. 22 Atanggayan ngai' nopondo iri do hilo'd Babil om hilo-hilo' nori do gisom po do podulon ku kawagu iri. Om pogulion ku nogindo kawagu iri om potondulion ku dot id kinoiyonon diti. Iyoho' no i Tuhan, o minomoros diti,” ka dau.
I Yoromia om i Nabi Hanania
1 Tontok nogi' do toun diri, di tulan do kolimo do toun do kaapat do momorinta' i Raja' Sodokia do minongoi boro-boros doho' do hiri'd Walai'd Sasambayangan dot Agayo i Hanania, i tanak di Asur, i songulun o nabi do mantad id bandar do Gibion. Om sinunudan oku dau do hiri'd toguang dit imam om i rayat 2 do minomoros o Tuhan, it Osundu Kopio, i Kinorohingan dot Israil do poingkaa, “Noidu' ku no o kuasa' di raja' do Babil. 3 Om id suang nodti duwo o toun do pogulion ku do hiti'd kinoiyonon diti o toinsanan di pakakas di mantad hilo'd Walai'd Sasambayangan dot Agayo di tinanggayan di Raja' Nobukadnisar do hilo'd Babil. 4 Om pogulion ku nogi' i raja' do Yohuda, i Yoyakin i tanak di Yoyakim, do miwoyo' do koinsanai di tulun do Yohuda di natanggayan do pisangod do hilo'd Babil. Iyoho' no i Tuhan, o minomoros diti,” ka dau. 5 Om boros kangku'ddi dot id di Hanania dot id toguang dit imam om koinsanai di rayat di songingkakat do hiri'd Walai'd Sasambayangan dot Agayo, 6 “Osonong no! Maha' daa om wonsoyon do Tuhan o miagal diri! Maha' daa om potopoton kopio dau i pinoboros nu'ddi om pogulion o koinsanai di pakakas di hiri'd Walai'd Sasambayangan dot Agayo, om koinsanai di tulun do natanggayan do hilo'd Babil. 7 Nga' pokinongou nodti poboroson ku dot id diya' om id koinsanai diti tulun. 8 Iri nopo nabi di mimboros di gulu po, it id gulu po ko' iyoho' om iya', om pinoboros mantad diyolo' do haro nondo o pisangadan, om mononglous om toruo-ruol do rumikot dot id ogumu' o bansa' om id pomorintaan dit ogirot. 9 Nga' tulun nopo di nabi di popoboros do kosimbayanan o rumikot dot id dabantalan om oilaan nopo kopio dot otopot do sinuhu' iyau'd Tuhan om angabayaan i pinopimboros di nabi diri,” kangku. 10 Om ngoyo' noddi di Hanania i poku' di poimpoku' ku om pintipuo' no dau, 11 om boro-boros no iyau dot id toguang do koinsanai di tulun di nokorikot do hiri do poingkaa, “Nokoboros nod Tuhan do miagal nodti o ponipu' dau di poku' di pinopoku' di Raja' Nobukadnisar do koinsanai di bansa'; om id suang no do duwo o toun diti do wonsoyon dau o miagal diri,” ka dau. Om koboros po dau iri om pamanau oku noddi. 12 Om a' poddi alaid do mantad diri om suhuo' oku nod Tuhan do 13 mamanau om mongoi pomisunud di Hanania do poingkaa, “Boros kad Tuhan om milo ko i' doti' daa do monipu'ddi poku' do kayu nga' sowolian po dau iri do poku' do basi'. 14 Nokoboros no o Tuhan, it Osundu Kopio, i Kinorohingan dot Israil do pokuan nondo dau do poku' do basi' o koinsanai di bansa' diti om minsiriba' i' iyolo' dot id di Nobukadnisar, i raja' do Babil. Boros kad Tuhan om iri piya nintorusan nga' poporintaan ngai' i' dau di Nobukadnisar,” ka. 15 Om posunudo' ku noddi di Hanania iri, om pomoros oku po kawagu do poingkaa, “Pokinongou pogi', oi Hanania! A' ko i' do Tuhan sinuhu', om binsuhuon nu i' daa iti tulun do monongkuyaan do tudut. 16 Om gowoi poddi om minomoros o Tuhan do mananus diya' do hiti'd pomogunan. A' po aayi' o toun diti om apatai ko no tu' sinuhu' nu i' iti tulun do sumaap do Tuhan,” kangku. 17 Om kapatai no i Hanania di tulan do koturu' do toun diri.
Surat di Yoromia do Patahakon dot id Tulun do Yohudi di Hilo'd Babil
1 Om ponulis oku nod surat do patahakon dot id koinsanai dit imam om i nabi, om i boyoon do tulun, om id koinsanai di tulun do suwai di tinanggayan di Nobukadnisar do mantad hilo'd Yorusalim do kuminaa do hilo'd Babil. 2 Tinulis ku iti surat di natanggayan nod pisangod i Raja' Yoyakin om i tina' dau, om i pagawai dau do hiri'd walai'd raja', om i boyoon do Yohuda om Yorusalim, om iri ngai' i tukang om i tulun dot angabaal. 3 Om patahako' ku no i surat diri dot id di Ilasa, i tanak di Sapan om id di Gomaria, i tanak di Hilkia, i sinuhu' di Sodokia, i raja' do Yohuda, do mongoi solowot di Nobukadnisar, i raja' do Babil. Suang nopo di surat diri om poingkaa, 4 “Boros kad Tuhan it Osundu Kopio, i Kinorohingan dot Israil, dot id koinsanai di tulun di pinologos dau do tinanggayan di Raja' Nobukadnisar do mantad hiti'd Yorusalim do kuminaa do hilo'd Babil om, 5 ‘Momogun-mogun kou nopod hiti. Maal kou nod walai dot iyonon dokoyu. Om mongumo kou no om kanon no dokoyu i tua' di tinanom dokoyu. 6 Sumawo kou no om kianak kou i'. Om posowoon no i tangaanak dokoyu om haro i' o diyolo'd tangaanak. Gumumu' kou no, om kada' kou kuri'. 7 Tumotos kou no do poposimbayan di bandar di pataaman ku dokoyu. Om sumambayang kou no dot id doho' do bagi'd koinsanangan di kabandaran diri, tu' ondung osimbayan i kabandaran diri om iyokoyu nga' osimbayan no. 8 Iyoho' no i Tuhan, it Osundu Kopio i Kinorohingan dot Israil o popoinsan dokoyu om a' kou i' oudutan di nabi di poirolot dokoyu ko' isai nopo o tulun di mangakun do milo do poposunud dit osiliu dot id dosunsudan. Kada' kou ponongkuyaai di nipi diyolo'. 9 Tu' mamakai no iyolo'd ngaran ku do popinsunud dot id dokoyu dit a' otopot. A' oku i' nokoponuhu' diyolo' do mimboros. Iyoho' no i Tuhan, o minomoros diti,’ ka dau. 10 Boros ka kawagu'd Tuhan, ‘Aayi' pondo o turu' nohopod o toun do Babil, om podulon ku nogindo kawagu iyokoyu om bayaanon ku i batos ku do popouli' dokoyu do hiti'd kinoiyonon diti. 11 Iyoho' noo, om aiso' i' o suwai, do koilo di natantu' mantad ku do wonsoyon ku dot id dokoyu, i manahak dokoyu do kosimbayanan om okon i' ko' kosusaan, om bayaanon ku nondo i soro-sorohon kopio dokoyu dot osiliu dot id dosunsudan dokoyu. 12 Om momolohou kou nondo doho' do mokitulung. Om rumikot kou nondo do sumambayang dot id doho' om simbaron ku indo o sambayang dokoyu. 13 Ihumon oku nondo dokoyu om okito oku i' dokoyu tu' aayi-ayi' i' o ginawo dokoyu do mogihum doho'. 14 Pologoson ku i' iyokoyu do kokito doho' om timungon ku nondo iyokoyu do mantad id koinsanai do pomogunan om kinoiyonon di pinotompiasan ku dokoyu, om pogulion ku nogindo iyokoyu dot id pomogunan di tadon mantad dokoyu, om tondulion ku o koiyon-iyono' dokoyu. Iyoho' no i Tuhan, o minomoros diti,’ ka dau. 15 Boros ka dokoyu om nonuan kou'd Tuhan do nabi dau do hilo'd Babil. 16 Pokinongou kou pogi' diti poboroson do Tuhan do pasal di raja' di sinakagon di Daud, om pasal di tulun do hiti'd bandar, iri no i koobpinayan dokoyu, it a' natanggayan do pisangod do nokotonggoi dokoyu. 17 Boros kad Tuhan, it Osundu Kopio, ‘Poporikot oku nondo do pisangadan, om mononglous, om toruol dot id diyolo', om silihon ku nondo iyolo' do miagal do tua' dot ara di nadalaan do nomomos gisom dot a' no milo dot akanon. 18 Pogusaon ku nondo diyolo' o pisangadan, om mononglous om toruol, om aranaban ngai' nopondo o koinsanai'd bansa' do hiti'd pomogunan do kokito di koiyon-iyono' diyolo'. Om honggo nopondo o potompiasan ku diyolo' om aranaban ngai' nopondo om ooris o tulun do kokito di nosiliu dot id diyolo'. Om hingi-hingion nondo iyolo' om maan do pomopol o ngaran diyolo'. 19 Osiliu pogi' o miagal diti dot id diyolo' nga' a' i' iyolo' minumboyo' di boros di popinsunudon ku dot id diyolo' do polombuson di nabi ku. A' i' iyolo' minokinongou'ddi. 20 Pokinongou kou no diti poboroson ku, iyoho' i Tuhan, koinsanai dokoyu i pinataam ku do hilo'd Babil,’ ka dau. 21 Nokoboros no o Tuhan, it Osundu Kopio, i Kinorohingan dot Israil, do pasal di Ahab i tanak di Kolaya do kusai om pasal di Sodokia i tanak di Maasiya, i minamakai do ngaran do Tuhan do popinsunud dot id dokoyu dit a' otopot. Nokoboros no dau do patahakon dau iyolo' dot id suang do kuasa' di Nobukadnisar, i raja' do Babil. Om iyau nondo o mamatai diyolo' dot antang-antangan dokoyu. 22 Soira' nopo do momopol do tulun do suwai i tulun do mantad hilo'd Yorusalim, i natanggayan do pisangod do hilo'd Babil, om poingkaa nondo o poboroson diyolo', ‘Wonsoyon po daa'd Tuhan dot id diya' o miagal di winonsoi dau dot id di Sodokia om id di Ahab, i miaho' nopo di raja' do Babil do minonutud!’ ka. 23 Miagal noddi o kootuson diyolo' tu' minomonsoi i' iyolo' do dusa dit angagayo kopio di hilo'd Israil, om minagampahu' iyolo' om minamakai do ngaran do Tuhan do popinsunud dit a' otopot. Okon i' ko' korohian do Tuhan o miagal diri; om oilaan i' dau i nongowonsoi diyolo' om iyau no o sasi' do papasala' diyolo'. Iyo noddi o boros do Tuhan,” ka.
Surat do Patahakon dot id di Somaya
24-25 Om sunudai oku nod Tuhan, it Osundu Kopio, i Kinorohingan dot Israil, do boros do poboroson dot id di Somaya, i tulun do Nihilam. Iyau nopo nga' pinopokirim do surat dot id suang do ngaran dau do patahakon dot id toinsanan o tulun do Yorusalim om id di Sipania it Imam, i tanak di Maasiya, om id toinsanan dit imam do suwai. Tinulis nopo di Somaya dot id surat diri, i patahakon dot id di Sipania om poingkaa, 26 “Siniliu ko'd Tuhan dot imam do suminowoli di Yoyada, om iya' noddi o boyoon dit asawat o pangkat do hino'd Walai'd Sasambayangan dot Agayo. Om karaja' nu nopo nga' miontong ondung haro o tulun do mulau di minsorupai-rupai do nabi. Om ondung haro o tulun do miagal diri, om kagasan nod rantai do basi' o liou. 27 Nokuro tu' a' nu winonsoi o miagal diti dot id di Yoromia, i tulun dot Anatot, i minimboros do miagal do nabi dot id bansa' toko'? 28 Tingkodon no iyau do mingiyo'ddi tu' sinunudan dau i tulun do hilo'd Babil dot alaid iyolo' do poundorong do hilo' om mogot nogi' do mamaal iyolo' do walai om miyon do hilo', om mongumo om mangakan di tua' di totonomon diyolo',” ka. 29 Om basao' no di Sipania it Imam, i surat diri dot id doho', 30 om suhuo' oku nod Tuhan 31-32 do popokirim do boros diti dot id toinsanan di tulun dot Israil di natanggayan do pisangod do hilo'd Babil do pasal di Somaya, “Iyoho' no i Tuhan, o momohukum di Somaya om koinsanai di sinakagon dau. Tu' okon i' ko' iyoho' o minonuhu' dau, nga' minimboros i' iyau dot id dokoyu do miagal pod nabi, om sinuhu' kou dau do monongkuyaan dit a' otopot. Aiso' nondo o sinakagon dau dot id pogialatan dokoyu. A' no iyau kokito dit ongosonong do wonsoyon ku dot id koinsanai'd tulun ku, tu' sinuhu' i' dau iyolo' do sumaap doho'. Iyoho' no i Tuhan, o minomoros diti,” ka.
Batos do Tuhan dot id Tulun Dau
1 Boros kad Tuhan, i Kinorohingan dot Israil 2 dot id doho', “Tulison ngai' no dot id buuk o koinsanai di pinosunud ku diya'. 3 Tu' rumikot nondo o maso do tondulion ku o koiyon-iyono' di tulun ku, iri no i tulun dot Israil om Yohuda. Pogulion ku nondo iyolo' kawagu dot id pomogunan di pinatahak ku dot id taki-aki diyolo', om asanganu nondo kawagu diyolo' iri. Iyoho' no i Tuhan, o minomoros diti,” ka dau. 4 Boros kad Tuhan dot id tulun dot Israil om Yohuda, 5 “Norongou ku no o giniakan do tulun di moddosi, i giniakan dot opopoddosian om okon no ko' osisimbayanan. 6 Undorong-dorong po pogi' om momusorou i'! Milo toi do mogkosusu o kusai? Nga' nokuro tu' songigit-igit ngai' nopod tian i tongokusai, do miagal po di tondu' do mogkosusu? Nokuro tu' ongoposi-posi' po ngai' o tulun? 7 Rumikot no o tadau dot araat kopio; om aiso' no o tadau'd suwai di koiyo kopio'ddi. I maso do katangkabaan kopio do tulun ku, nga' posion ku i' iyolo',” ka dau. 8 Boros kad Tuhan, it Osundu Kopio, “Orikot nopondo o tadau'ddi om tipuon ku nondo i poku' di poimpoku' diyolo' om iduwon ku i rantai di pinongogos diyolo', om okon nondo iyolo' ko' turipon do bansa'd suwai. 9 Suwai ko' mogobi-obi' nondo iyolo' doho', i Tuhan i Kinorohingan diyolo', om mogobi-obi' dot iso' o sinakagon di Daud, i silihon ku'd raja'. 10 Kada' kou kooris oi tulun ku! Kada' kou korolosi, oi tulun dot Israil! Poiduwon ku i' iyokoyu do mantad id pomogunan di hilo'd sodu' om mantad id pomogunan di pinananggayan do pisangod dokoyu. Om koguli' kou indo om osimbayan do momogun-mogun; om aiso' indo o koligagaanan dokoyu, om aiso' o monompurolosi dokoyu. 11 Rumikot oku indo do mongoi pamasi dokoyu. Om raagon ngai' ku indo i bansa' di pinotompiasan ku dokoyu. A' ku i' iyokoyu poiduwon toomod dot a' kou po ohukuman, tu' apatut kou i' do hukuman, nga' soira' nopod momohukum oku dokoyu om otulid i' o pomohukum ku. Iyoho' no i Tuhan, o minomoros diti,” ka dau. 12 Boros kad Tuhan dot id tulun dau, “A' no milo'd lingoson o suhat dokoyu, adalaan no kopio ino toruol dokoyu. 13 Aiso' no o momogompi' dokoyu, aiso' no o tubat do kolingos dino toruol dokoyu, a' kou no olingasan. 14 Nongolihuan ngai' kou no di minuhang dokoyu; a' noddi iyolo' momusorou dokoyu. Sinaap ku iyokoyu do miagal do pisangod, om awagat o pinomohukum ku dokoyu tu' ogumu' i' o dusa dokoyu om agayo kopio o kasalaan dokoyu. 15 Kada' kou no pinggiak dot orurualan dino toruol dokoyu; tu' aiso' no o pomolingos dino toruol dokoyu. Hinukuman ku iyokoyu do miagal diti tu' ogumu' i' o dusa dokoyu om agayo o kasalaan dokoyu. 16 Nga' baino' nopondo om oinsanan nopo i tulun di minonolon dokoyu dot otolon, om atanggayan ngai' i pisangod dokoyu do silihon do turipon. Om koinsanai di mongulok-ulok dokoyu nga' ulak-ulakan nondo, om koinsanai di minongoi panakau do dapu' dokoyu nga' apanakahan nondo. 17 Posonongon ku indo kawagu o tinan dokoyu; om lingoson ku i suhat dokoyu, do mulong piya do poingkaa daa o boros do pisangod dokoyu, ‘Pinataam-taam po o Sion; om aiso' no o momogompi' dau,’ ka. Iyoho' no i Tuhan o minomoros diti,” ka dau. 18 Boros kad Tuhan, “Pogulion ku i' i tulun ku dot id pomogunan diyolo' om insianan ku o pointikid-tikid do sompiiyon; owonsoi indo kawagu o Yorusalim, om owonsoi kawagu i walai'd raja'. 19 Om modsinding nondo do mamarayou doho' i tulun do hilo'; mimpangkis pondo iyolo' dot atataadan. Om gumumu' nondo iyolo' tu' barakatan ku i' iyolo'; om pusohon iyolo' tu' barakatan ku i' iyolo'. 20 Pogulion ku nondo o kuasa' di bansa'ddi do miagal di gulu po om pogiroton ku, om ogirot nondo iri do gisom dot alaid; om hukuman ku nondo o koinsanai di minongulok-ulok diyolo'. 21-22 Mantad nondo dot id bansa' diyolo' o momorinta' diyolo', mantad i' dot id tulun diyolo' i raja' diyolo'. Om rumikot iyau dot id doho' do tontok do lohowon ku iyau, tu' isai daa o katama' do rumikot ondung a' lohowon? Osiliu nondo iyolo'd tulun ku om iyoho' o Kinorohingan diyolo'. Iyoho' no i Tuhan, o minomoros diti,” ka dau. 23-24 Kototogod nopod Tuhan om miagal pod tongus, i tongus dit opuhod kopio do kobuntul di tulun dit araat. Om a' i' tumingkod iri dot a' pod Tuhan owonsoi ngai' i natantu' mantad dau do wonsoyon dau. Om osuhutan nopondo kopio di tulun dau iti om koimbagu.
Kogulian do Tulun dot Israil dot id Pomogunan Diyolo'
1 Boros kad Tuhan, “Rumikot nondo o maso dot osiliu oku'd Kinorohingan do koinsanai di payat dot Israil, om iyolo' nga' osiliu nondod tulun ku. 2 Pinopointalang oku i' do kosianan ku dot id tulun di napasi do mantad id kapatayon di hilo'd tana' do kowotuan. Om soira'ddi siundorong no i tulun dot Israil, 3 om minintalang oku i' dot id diyolo' dit osodu' oku po. Oi tulun dot Israil, a' oku i' nokotingkod dot osianan dokoyu do mantad di gulu po, om tumilombus oku do popointalang kasai' do kosianan ku dit aiso' o kotingkadan dot id dokoyu. 4 Tondulion ku i' kawagu o koiyon-iyono' dokoyu om ngoyon nondo dokoyu i tamburin om mintari' kou dot atataadan. 5 Om mananom kou nondo kawagu dot anggur do hilo'd konuluhanan do Samaria, om i minananom diri nga' kaakan indo do tua' dit anggur. 6 Rumikot nondo o maso do millohou o tulun di madtatamong do bandar do mantad hilo'd konuluhanan dot Ipraim do poingkaa, ‘Kainou tumakad do hilo'd Sion, do kumaa dot id Tuhan, i Kinorohingan toko',’ ka,” ka dau. 7 Boros kad Tuhan, “Kongotood kou no do modsinding do bagi' dot Israil, i tulun ku, i bansa' dot agayo kopio dot id pogialatan do koinsanai'd bansa'. Sindingo' no dokoyu i sinding do pamarayou do poingkaa, ‘Napasi nod Tuhan i tulun dau di noolu-olu'; om nokoidu' no dau i tulun dot Israil di nongoolu-olu',’ ka. 8 Pootodon ku nondo iyolo' do mantad hilo'd utara om timungon ku iyolo' do mantad id tisan diti pomogunan. Om tumanud indo diyolo' i tulun do bolou om it a' koundaliu, om i tongoondu' di wagu po kosusu om i borosusuon no. Gumuli' indo iyolo' do miagal do bansa' dit agayo dot id pomogunan diti. 9 Songihad-ihad pondo i tulun ku do gumuli', om insasamadan ku i' iyolo', om woyoon ku. Om pawayaon ku nondo iyolo' dot id kinoiyonon dit ogumu' o bawang, om posusuyon ku iyolo'd ralan dit alana', om a' nondo iyolo' katahub. Miagal oku pod tapa' dot Israil, Ipraim no o tanak ku'd kusai dit id dotuo,” ka dau. 10 Boros kad Tuhan, “Oi koinsanai'd bansa', pokinongou kou no doho', om popinsusuyo' no dokoyu o boros ku do hilo'd soborong do rahat. Pinotompias ku i tulun ku, nga' timungon ku indo iyolo' om gompion ku do miagal di gompomogompi'd dumba' di momogompi' di dumba' dau. 11 Nokoidu' ku no o tulun dot Israil, om nakalabus ku do mantad id longon do tulun dit okoris ko' mantad diyolo'. 12 Rumikot nondo iyolo' do mongoi podsinding dot atataadan do hilo'd Nuluhon do Sion, om otood nondo iyolo' tu' i nipuhawang ku dot id diyolo' o kataadan --- i gandum om i waig dot anggur om i tumau, om i dumba' om i sapi'. Miagal nondo iyolo' di kabun dit opiyopos do waig; tu' haro ngai' nopo dot id diyolo' i korohian diyolo'. 13 Tontok nopondo do maso'ddi om mintari' nondo om ongotood i kongosumandakan, om ongosonong o ginawo di tongokusai, om i tongomulok po om i kongomolohingan no. Tu' insasamadan ku i' iyolo' om sowolian ku do kataadan i koihadan diyolo'. Om sowolian ku do kosimbayanan i katangaban diyolo'. 14 Om pakayahanon ku it imam do taakanon dit angawasiu, om patahakon ngai' ku o koinsanai di pokionuon di tulun ku. Iyoho' no i Tuhan o minomoros diti,” ka dau.
Kosianan do Tuhan dot Israil
15 Boros kad Tuhan, “Pokinongou pogi'! Haro o tihad dot orongou do mantad hilo'd Rama tihad dit oruol kopio o pogigihad. Mogihad i Rasil di tangaanak dau; tu' a' no iyolo' hino, om a' no iyau milo dot insasamadan. 16 Tingkod nod mihad om pihidai no ino romou nu. Tu' koinsanai di winonsoi nu dot id tangaanak nu nga' somulian i', gumuli' i' iyolo' do mantad hilo'd pomogunan do pisangod. 17 Haro po o soro-sorohon dot id dosunsudan nu; tu' gumuli' i' do hiti'd kinoiyonon nu i tangaanak nu. Iyoho' no i Tuhan, o minomoros diti. 18 Orongou ku i' i tulun dot Israil do mimboros dot atatangaban do poingkaa, ‘Oi Tuhan, miagal daa iyahai di nintorusan di lalang, nga' tinudukan nu i' iyahai do mumboyo'. Pogulio' no iyahai; tu' posodia' i' iyahai do gumuli' dot id diya', oi Tuhan, i Kinorohingan dahai. 19 Tuminongkiad daa iyahai diya', nga' monosol i' iyahai di winonsoi dahai'ddi. Tu' tontok di nohukuman nu iyahai, om songintudu' po iyahai dot atatangaban. Ointingayaman tomod iyahai om noindaraat iyahai, tu' minomonsoi i' iyahai'd dusa dit omulok po iyahai,’ ka. 20 Oi Israil, iya' no o tanak di koupusan kopio ku, i tanak do kolisihan kopio ku. Tu' soira' nopo do rolosion ku iya' om osorou tiya' no do mikuwo'd langadon oku diya'. Id diya' poo o ginawo ku; om monginsian oku i' diya'. 21 Popoingkakat nod pogintutunan, om tandaan no i ralan; ihumon no kawagu i ralan di tadon nu. Guli' no, oi tulun dot Israil, guli' no do hilo'd bandar di tadon dokoyu. 22 Songkuro po o koloido' dokoyu do mikoduwo o ginawo, oi bansa' dit a' otorodok dot id doho'? Haro no o nowonsoi ku'd wagu om i suwai ko' i gulu do hiti'd pomogunan, miagal pod tondu' di mongintirung do kusai tu' suwai no kopio!” ka dau.
Kosimbayanan dot Aanu do Koimbagu di Tulun di Nasanganu do Kinorohingan
23 Boros kad Tuhan, it Osundu Kopio, i Kinorohingan dot Israil, “Soira' nopondod pogulion ku i tulun ku do hilo'd pomogunan diyolo' om momoros pondo kawagu i tulun do hilo'd pomogunan do Yohuda om id kawalayan do hilo' do poingkaa, ‘Pologoson nod barakatan do Tuhan i nulu-nulu dot olidang do hilo'd Yorusalim, i kinoiyonon di pinotobilang do maan do dau,’ ka. 24 Momogun-mogun nondo o tulun do hilo'd Yohuda om hiri'd kawalayan do hilo', om haro nondo o gompongumo, om gompomogompi' do dumba' om sapi' diyolo'. 25 Om pokorison ku nondo kawagu i tulun dit ohuyan om pakayahanon ku do taakanon o koinsanai'd tulun dit oluhoi dot ololousanan. 26 Om momoros nondo o tulun do poingkaa, ‘Koolong oku pod koodop om osonong nogi' o topurimanan ku,’ ka. 27 Iyoho' no i Tuhan o momoros do rumikot nondo o maso do ponuon ku'd tulun om nintorusan iti pomogunan dot Israil om Yohuda. 28 Om poingkuro nopo do rinulan-rulan ku do tontok di minongutus, om minamahaba' om minangala', om minamaraag, om minamatai oku diyolo', om iyo oku nogiddi do mananom om popoingkakat diyolo' tu' rulan-rulanon ku i' kopio. 29 Om orikot nopondo o maso'ddi om a' nondo o tulun momoros dot, ‘Iri i molohing o minangakan di tua' dot oonsom, nga' iri i tangaanak dau o tangaro,’ ka. 30 Suwai ko' isai nopo i mangakan do tua' dot oonsom, om iri no o tangaro; om apatai piya'ndo o tulun nga' iri i dusa dau o kapatai dau,” ka. 31 Boros kad Tuhan, “Rumikot nondo o maso do momonsoi oku'd tumpongo do wagu dot id tulun dot Israil om id tulun do Yohuda. 32 Okon nondo ko' miagal di tumpongo di gulu iti, i pinoumpongo ku dot id taki-aki diyolo' do tontok di winoyo' ku iyolo' do suminoliwan do mantad hilo'd Masir. Tu' mulong piya do miagal oku'd sawo diyolo' nga' a' i' diyolo' ginompi' i tumpongo ku dot id diyolo'. 33 Nga' poingkaa nondo i tumpongo do wagu do poumpongoon ku do tulun dot Israil: Posuangon ku nondo i toturan ku dot id lugu' do ginawo diyolo' om tulison ku iri dot id suang do ginawo diyolo'. Om osiliu oku nondo do Kinorohingan diyolo' om iyolo' nga' osiliu nondod tulun ku. 34 Om a' nondo minog do monuduk iyolo' do tulun di bansa' diyolo' do mintutun do Tuhan, tu' oinsanan nopondo iyolo' do kotutun doho', dot it ongokoro' po om it angagayo no, nga' kotutun ngai' nopondo doho'. Tu' ompunan ku nondo o dusa diyolo' om a' ku nondo sorohon i kinasalaan diyolo'. Iyoho' no, i Tuhan o minomoros diti,” ka dau. 35 “Tuhan i' o minanahak dilo tadau do sumiliu'd tanawau do dangadau, om iyau o pinapatahak dilo tulan om rombituon do mogulinau do dongotuong. Gouron dau ilo rahat om rumuab nondo i tumbak, ngaran nopo dau om Tuhan it Osundu Kopio. 36 Minamatos iyau do solinaid nopo dot a' kosimban o toturan diti pomogunan di natantu' mantad, om osiliu no kasai'd bansa' dot agayo ot Israil. 37 Ondung otipong daa ilo tawan do koimbagu, om osorisid o pinoimpahan diti pomogunan, om diri nogindo dot iyadaan ku o tulun dot Israil, tu' angaraat i' o winonsoi diyolo'. Iyoho' no i Tuhan o minomoros diti,” ka dau. 38 Boros kad Tuhan, “Rumikot nondo o maso dot owonsoi kawagu ot id pointongkop do Yorusalim do silihon do bandar ku, do mantad po di walai'd akawas di roitan do Walai'd Akawas do Hananil om gisom di wawayaan do roitan do Wawayaan do Linsuk di ponong id kotonobon. 39 Om mantad nod hilo' om poinlombus po i wolit do hilo'd nulu-nulu do Garib om kosorili' nogindo do hilo'd Goa. 40 Oinsanan nopo i rantai, i pinamalabangan di tulun di nangapatai om i pinataaman di rinomos, om koinsanai di koumaan di hilo'd tisan do bawang do Kidron om gisom do korikot do hilo'd wawayaan di roitan do Wawayaan do Kuda' di ponong id koulayon, do potobilangon do maan do doho'. A' nondo oumbalan kawagu do mamaraag ko' mamahaba' i bandar do Yorusalim,” ka dau.
Minomoli i Yoromia do Tana'
1 Om boro-boros no o Tuhan dot id doho' di kohopod do toun do pomorintaan di Sodokia, i raja' do Yohuda, om di kohopod om walu' do toun di Raja' Nobukadnisar do momorinta' do Babil. 2 Tontok nopo do maso'ddi nga' songodon no di soudor di raja'd Babil o Yorusalim, om iyoho' no om nontiilan do hiri'd natad di walai'd raja'. 3 Nontiilan oku di Raja' Sodokia do hiri, tu' tinondos oku dau do pinopimboros do boros do Tuhan do poingkaa, “Pologoson ku o raja'd Babil do mangala' do bandar diti. 4 Om i Raja' Sodokia nga' a' no milo'd mogidu'. Patahakon nondo iyau dot id raja' do Babil; om kotimbaba' nondo iyau do raja'ddi om koboro-boros iyau dau. 5 Om tanggayan nondo i Sodokia do hilo'd Babil om hilo' nondo iyau do poundorong do gisom do hukuman ku iyau. Tu' mulong piya do sumaap daa iyau di tulun do Babil nga' a' i' iyau kamanang. Iyoho' no i Tuhan o minomoros diti,” ka. 6 Sinunudan oku'd Tuhan, 7 do rumikot i Hanamiil, i tanak do kusai di Sulam, i tamanon ku, do mongoi solowot doho' do popoboli di tana' dau dot id doho'. Iri nopo tana' dau om hilo'd Anatot, it id watas do Binyamin. Iyoho' no ot osorupai do momoli di tana' dau tu' iyoho' no o waris dau dit id somok po kopio. 8 Om rikot noddi i Hanamiil do minongoi solowot doho' do hiri'd natad di walai'd raja' om suhuo' oku no dau do momoli di tana' dau; kosiliu nopo o miagal di nokoboros mantad do Tuhan. Om oilaan ku noddi kopio do minoro-boros o Tuhan doho'. 9 Om bolio' ku noddi i tana' di Hanamiil om timbango' ku no i tusin do patahakon ku dau. Om kogumuo' nopo do pinomoli ku nga' hopod om turu' o tusin do pirok. 10 Om minomolohou oku do piro-piro o tulun do sasi', om soinai ku noddi om saapai ku i surat di kinopomolian dot id toguang diyolo'. Om timbango' ku noddi i tusin do hiri'd ponimbangan. 11 Om onuo' ku noddi goduwo i solinan di surat do kinopomolian --- i tinulisan di piniokunan om i kinotontuan; i solinan di sinaapan om iri nogi' it a' sinaapan. 12 Om patahako' goduwo ku nori dot id di Baruk, i tanak di Noria, i manangaki di Maksia. Pinatahak goduwo ku i surat diri dot id dau dot id toguang di Hanamiil om i sasi' di suminain di surat do kinopomolian om id toguang di tulun do songirikau do hiri'd natad di walai'd raja'. 13 Om boros kangku dot id di Baruk, dot id toguang ngai' diyolo', 14 “Sinuhu' oku'd Tuhan, it Osundu Kopio, i Kinorohingan dot Israil, do manganu diti duwo o surat, i surat do kinopomolian di sinaapan om i solinan di surat dit a' sinaapan, om poopion noti dot id suang do luping, om a' i' araag do piro-piro o toun. 15 Nokoboros nod Tuhan, it Osundu Kopio, i Kinorohingan dot Israil, dot oboli indo kawagu o walai om tana' om kabun dot anggur do hiti'd pomogunan diti,” ka dau.
Sambayang di Yoromia
16 Tontok di nakatahak ku i surat do kinopomolian diri dot id di Baruk, om sambayang oku nod poingkaa, 17 “Oi Tuhan, it Asawat Kopio, winonsoi nu iti pomogunan om ilo tawan dot i sinundu nu om i kinoris nu dit agayo kopio o pinomonsoi; aiso' i' ot a' nu milo'd wonsoyon. 18 Pinopointalang ko do kosianan nu di mompus-ompus dot id piro-piro noribu o tulun, nga' momohukum ko i' ma do tulun dot i dusa do komolohingan diyolo' o kopomohukuman nu. Iya' no o Kinorohingan dit abantug om okoris; ngaran nu nopo om Tuhan it Osundu Kopio. 19 Kopunong ngai' i' i tontuon mantad nu do wonsoyon nu, om koimayaan ngai' i wonsoyon nu. Om okito ngai' nu i' o wonsoyon do tulun om somulian nu iyolo' do miontok di wonsoyon diyolo'. 20 Di nopo di gulu po om miningwonsoi ko do kopusahan om koimayaan do hilo'd Masir, om maso nu i' do momonsoi ngai'ddi do gisom piya'd baino' do hiti'd Israil om id pogialatan do koinsanai'd bansa'd suwai, gisom diri dot abantug ko do hinonggo-honggo nopo. 21 Pinosoliwan nu i tulun nu do mantad hilo'd Masir dot i kongopusahan om i kongoimayaan di pinonompurolosi nu di pisangod dahai, om i sinundu om kinoris nu o pinakai nu do pinoposoliwan diyolo'. 22 Pinatahak nu diyolo' iti tana' dot osonong om oluhub, do miagal di pinabatos nu dot id taki-aki diyolo'. 23 Nga' soira'ddi nokorikot iyolo' do hiti'd pomogunan diti om di nasanganu diyolo' iti, om a' iddi iyolo' minumboyo' di pinonuhuan nu om a' tuminanud di pinonudukan nu; aiso' i' o tiso' di pinonuhuan nu diyolo' do winonsoi diyolo'. Om porikoto' ngai' nu noddi iti kosusaan dot id diyolo'. 24 Nokopoingkakat no i tulun do Babil do tolig do ponurungku', om maso no diyolo'd sumaap. Kosuang nondo dot id longon diyolo' iti bandar diti tu' haro i' o pisangadan, om mononglous, om toruo-ruol. Om okito nu i' do nabayaan ngai' no i pinoboros nu. 25 Nga' iya' nogi', oi Tuhan, it Asawat Kopio, o minonuhu' doho' do momoli di tana' dot id toguang do piro-piro o sasi', do mulong piya do potionuon nod tulun do Babil iti bandar,” kangku. 26 Om boros kaddi do Tuhan dot id doho', 27 “Iyoho' no i Tuhan, i Kinorohingan do koinsanai'd tulun. Aiso' i' ot apagon dot id doho'. 28 Patahakon ku nondo iti bandar diti dot id di Raja' Nobukadnisar, i raja' do Babil, om id soudor dau; om aanu nondo diyolo' iti 29 om tutudan diyolo'. Sorobon nondo diyolo' iti do mitonggoi'ddi kawalayan di tulun di pinopotogod doho' tu' mintutud i' iyolo' do kominyan dot id Baal do hiri'd sakai'd taap do walai diyolo', om pinopotungu iyolo' do waig dot anggur do maan do podsubak do tingolig. 30 Mantad poddi nosiliu id bansa' o tulun dot Israil om tulun do Yohuda, om pinaparaat no iyolo' do ginawo ku om pinopotogod iyolo' doho' tu' araat i' o winonsoi diyolo'. 31 Mantad poddi tadau do kinapamansayan diti bandar om pinopotogod no om pinapalasu' do ginawo ku i tulun do hiti'd bandar diti. Om gowoi poddi om raagon ku iti bandar 32 tu' araat ngai' i' o winonsoi di tulun do Yohuda om i tulun do Yorusalim, om i raja' om i boyoon diyolo', om it imam om i nabi di tuhoton diyolo'. 33 Tuminolikud iyolo' doho'; om mulong piya dot a' oku tuminingkod do minonuduk diyolo' nga' a' i' iyolo' minokinongou om a' kuminorologo. 34 Om iri piya tingolig diyolo' di kososomu' kopio nga' nongoi i' poiyono' do hiri'd Walai'd Sasambayangan dot Agayo, i tiyonon do sumambayang dot id doho'; om sinosomu' diyolo' o kinoiyonon diri. 35 Pinopoingkakat nogi' iyolo' do pananaraban do porsombahan do sorobon dot id di Baal do hilo'd Rantai do Hinom, do maan do patahakan di tangaanak diyolo'd kusai om tondu' dot id di Molok, i tingolig diyolo'. A' ku i' iyolo' sinuhu' do momonsoi'd miagal diri om a' ku no daa soro-sorohon do momonsoi iyolo' do miagal kopio'ddi karaat om gisom do nakabayayat diri di tulun do Yohuda do momonsoi'd dusa,” ka dau.
Batos do Manahak do Pagandasan
36 Boros kad Tuhan, i Kinorohingan dot Israil, dot id doho', “Oi Yoromia, mimboros i bansa' dot Israil do pisangadan om mononglous om toruo-ruol o paparatu' diti bandar dot id suang do longon do raja'd Babil. Om pokinongou-nongou po pogi' diti poboroson ku do suwai ko' iri. 37 Timungon ku nondo o koinsanai di tulun do mantad id toinsanan o pomogunan di pinotompiasan ku diyolo' tu' notogod kopio oku no, om nakalasu' o ginawo ku, om pogulion ku nondo kawagu iyolo' do hiti'd kinoiyonon diti, om pologoson ku iyolo' dot osimbayan do momogun-mogun do hiti. 38 Om osiliu nondo iyolo' do tulun ku om osiliu oku do Kinorohingan diyolo'. 39 Om onuan ku nondo iyolo' do koisa-isaan do ginawo om iso-iso' o pokiririkatan dot id suang do koposi-posion diyolo'; om momusou indo kasai' iyolo' doho' do gisom dot alaid. Om iti nondo o popoinsonong diyolo' om i sinakagon diyolo'. 40 Om momonsoi oku nondo do tumpongo di mompus-ompus dot id diyolo', om a' oku monolikud diyolo', suwai ko' mingwonsoi oku nondo kasai' dit ongosonong dot id diyolo'; om onuan ku iyolo' do ginawo dit oronok om momusou doho' do mikuwo'd aayi-ayi' kopio o ginawo, om a' indo iyolo' minsodu' doho'. 41 Osonong indo o ginawo ku do mingwonsoi dot osonong dot id diyolo' om otorodok oku om aayi-ayi' kopio o ginawo ku do popoundorong diyolo' do hiti'd pomogunan diti do gisom dot alaid. 42 Tu' poingkuro nopo do pinoporikot oku do koinsanai di kosusaan dit awagat kopio dot id bansa'dti, om iyo oku noddi do poporikot do koinsanai dit ongosonong di pinabatos ku dot id diyolo'. 43 Om momoli indo kawagu o tulun do tana' do hiti'd pomogunan diti, i roitan daa dokoyu do, tana' di kowotuan; it aiso' o tulun om aiso' o nintorusan, tu' nakatahak no dot id tulun do Babil. Nga' oboli indo kawagu o tana' dot id pomogunan diti. 44 Om momoli indo o tulun do tana' do tusin do pirok o pomoli, om monulis do surat do kopomolian, om saapan diyolo' iri do saap, om momolohou do sasi' do hilo'd watas do Binyamin, om hilo'd posorili' do Yorusalim, om id koinsanai'd bandar do Yohuda, om id bandar di hilo'd watas do konuluhanan, om id bandar di hilo'd guas do nuluhon, om i hilo'd ponong id salatan do Yohuda. Tu' pogulion ku nondo iyolo' dot id pomogunan diyolo'. Iyoho' no i Tuhan o minomoros diti,” ka dau.
Iso' Kawagu o Batos di Manahak do Pagandasan
1 Om tontok di poinggiil oku po do hiri'd natad di walai'd raja', om boro-boros po kawagu o Tuhan dot id doho'. 2 Minoro-boros o Tuhan dot id doho', i minomonsoi om i pinopoiyon diti pomogunan. Boros ka dau, 3 “Pomolohou no doho' om simbaron ku i' iya'; om sunudan tiya' di kopusahan kopio om i koimayaan kopio, it a' nu po noilaan do gulu. 4 Tu' poingkaa no o boros ku, iyoho' i Tuhan, i Kinorohingan dot Israil, do pasal diti kawalayan do hiti'd bandar diti, om pasal di kawalayan do raja' do hiti'd Yohuda, i raagon nondo om habaon do tontok do songodon om turungkuon iti bandar. 5 Om aiso' no o guna' do sumaap do tulun do Babil. Tu' momonu' nori diti bandar do rata'd tulun di patayon ku tu' alasu' no kopio o ginawo ku om otogod oku diyolo'. A' oku no siontong diti bandar tu' minomonsoi i' dot araat o tulun do hiti. 6 Nga' tondulion ku nondo o bandar diti om tondulion ku o koiyon-iyono' di tulun do hiti, om onuan ku iyolo' do kokorisan om posimbayanon kopio ku iyolo' om aiso' nondo o koligagaanan diyolo'. 7 Om tondulion ku nondo kawagu o kosimbayano' dot Israil om Yohuda, om pogiroton ku kawagu iyolo' do miagal di gulu po. 8 Om lihungan ku indo iyolo' do mantad id koinsanai di dusa do nowonsoi diyolo' dot id doho', om ompunan ku iyolo' di dusa diyolo' do suminaap doho'. 9 Om osiliu nondo o bandar do Yorusalim do tadon do kataadan, om abantug, om osiliu do kaandasan ku; om oinsanan nopondo o bansa' do hiti'd pomogunan do korongou do koinsanai dit ongosonong do winonsoi ku dot id bandar diti. Om moddosi nondo iyolo' om gagaran om momusou doho' do korongou do koinsanai di kosonongo' om kosimbayano' di patahakon ku dot id bandar diti,” ka dau. 10 Boros kad Tuhan, “Momoros o tulun do kinoiyonon nopodti om nosiliu pod tana' do kowotuan; tu' aiso' no o tulun om aiso' o nintorusan do poingiyon do hiti. Om otopot i' o boros diyolo'ddi, tu' iri nopo kabandaran do Yohuda om i karalan-ralanan do hilo'd Yorusalim om oingou po tomod, tu' aiso' no o tulun om aiso' o nintorusan do poingiyon do hilo'. 11 Nga' hiti nogindod kinoiyonon diti dot orongou kawagu o pinongkisan dot aarapadan om kataadan do tontok do poginakanan do kumawin. Om orongou nondo o tulun do modsinding do tontok do papatahak iyolo'd porsombahan do kounsikahan do hilo'd Walai'd Sasambayangan dot Agayo. Om momoros nondo iyolo' do poingkaa, ‘Pongunsikou nod Tuhan, it Osundu Kopio, tu' osonong i' kopio iyau om mompus-ompus o kosianan dau,’ ka. Om tondulion ku indo o kosimbayano' do pomogunan diti do miagal di gulu po. Iyoho' no i Tuhan o minomoros diti,” ka dau. 12 Boros kad Tuhan, it Osundu Kopio, “Hiti nod pomogunan diti, i nosiliu no daa do tana' do kowotuan, om it aiso' no o tulun om aiso' o nintorusan do poingiyon, do haro nondo kawagu o sakot do paakan-akanan om poundarangan di gompomogompi'd dumba' di dumba' diyolo'. 13 Om hilo'd kabandaran di hilo'd watas do konuluhanan, om i hilo'd guas do nulu-nulu do ponong id kotonobon, om hilo'd ponong id salatan do Yohuda, om hilo'd watas do Binyamin, om hilo'd kawalayan di posorili' do Yorusalim, om hilo'd kabandaran do Yohuda, do mongintob nondo kawagu i gompomogompi'd dumba' di dumba' diyolo'. Iyoho' no i Tuhan o minomoros diti,” ka dau. 14 Boros kad Tuhan, “Rumikot nondo o maso do bayaanon ku i batos di pinoboros ku dot id tulun dot Israil om id tulun do Yohuda. 15 Tontok nopondo do maso'ddi om momili' oku nondo do songulun o raja' dit otulid do mantad id sinakagon di Daud. Om momonsoi nondo iyau dit otulid om otopot do pointongkop do pomogunan diti. 16 Om tontok nopondo do maso'ddi om koidu' nondo o Yohuda om Yorusalim do mantad id pisangod, om osimbayan om aiso' o koligagaanan diyolo'. Om iti nondo o ngaran do pomungaran do bandar do Yorusalim: ‘Tuhan i gampamasi toko’. 17 Iyoho' no i Tuhan, o mamatos do haro kasai' nopondo o sinakagon di Daud dot osiliu'd raja' dot Israil. 18 Om haro kasai' ot imam, i mantad id payat di Liwi, do mogobi-obi' doho' om papatahak do porsombahan di sorobon om papatahak do porsombahan do gandum om porsombahan di sumbolion,” ka dau. 19 Om boros kad Tuhan dot id doho', 20 “Nokopomonsoi oku nod tumpongo dot id tadau om id totuong, gisom do rumikot kasai' nopo o dangadau om dongotuong do tontok di koririkatan kasai'; om a' no milo do pakaisoon i tumpongo ku'ddi. 21 Om nokopomonsoi oku nogi' do tumpongo dot id di Daud, i susuhuon ku, do haro kasai' nopondo o sinakagon dau do sumiliu'd raja', om nokopomonsoi oku do tumpongo dot id imam, i sinakagon di Liwi, do mogobi-obi' kasai' iyolo' doho'. Om a' no milo do pakaisoon i tumpongo ku'ddi. 22 Om posopohon ku nondo o sinakagon di Daud, i susuhuon ku, om it imam do mantad id payat di Liwi di mogobi-obi' doho', do gisom do miagal pod rombituon tu' a' no ointob-intob do hilo'd tawan, om miagal di togis do hilo'd tisan do rahat tu' a' no milo'd intobon,” ka dau. 23 Om boros kad Tuhan dot id doho', 24 “A' nu toi pinokinongou i pinimboros diti tulun do poingkaa, ‘Naadaan nod Tuhan ot Israil om Yohuda, i duwo o bansa' do pinili' dau,’ ka. Om mongindaraat diri iyolo' di tulun ku, tu' sorohon no diyolo' dot okon noddi ko' bansa' dot agayo i tulun do songonuon ku. 25 Nga' iyoho' no i Tuhan, o nokopongumpongo do tadau om totuong, om iyoho' o minomonsoi dit oturan do mongulud do tawan om pomogunan. 26 Om poingkuro oku nopo do minomonsoi do miagal diri, om iyo oku nogiddi do popogirot di tumpongo ku dot id sinakagon di Yakub, om id di Daud, i susuhuon ku. Om pilion ku nondo o songulun di sinakagon di Daud do momorinta' di sinakagon di Abraham, om i Isak, om i Yakub. Om insianan ku indo iyolo', om posimbayanon kawagu ku iyolo',” ka dau.
Poboroson dot id di Sodokia
1 Om boro-boros no o Tuhan dot id doho' do tontok di sumaap no do Yorusalim om i kabandaran do hiri'd posorili' i Raja' Nobukadnisar, i raja' do Babil do miwoyo' do koinsanai di soudor dau, om koinsanai di pomorintaan om bansa' di porintaon dau. 2 Om suhuo' oku nod Tuhan, i Kinorohingan dot Israil do mongoi pomisunud di Sodokia, i raja' do Yohuda do poingkaa, “Iyoho' no i Tuhan, o papatahak diti bandar dot id raja' do Babil, om maan nondo dau tutudai iti. 3 Om iya' piya nga' a' no milo do mogidu', tu' atantu' no dot atangkap ko om katahak ko dot id dau. Om kosolowot ko nondo dau om koboro-boros kopio ko dau; om koongoi ko nondo do hilo'd Babil. 4 Nga' pokinongou pogi' diti poboroson ku do pasal diya', oi Sodokia. A' ko indo apatai dot id pisangadan, 5 tu' osonong i' o kapatai-patayo' nu. Om poingkuro nopo i rayat do minodtutud do kominyan do pomusou di komolohingan nu di minomorinta' dot id gulu ko' iya' do tontok di linobong iyolo', om iyo nogiddi iyolo' do momusou diya', tu' modtutud i' iyolo' do kominyan do pomusou diya'. Om mogihad nondo iyolo' om momoros dot, ‘Adai, napatai no i raja' toko',’ ka. Iyoho' no i Tuhan o minomoros diti,” ka dau. 6 Om poboroso' ku no i boros do Tuhan diri dot id di Raja' Sodokia, di hilo'd Yorusalim, 7 do tontok di songodon no di raja' do Babil o bandar diri. Om songodon nogi' di soudor diri o bandar do Lakis om Asika, om iri po daa o bandar di kitolig do hilo'd Yohuda.
I Winonsoi dot Araat dot id Turipon
8 Om nakapamatos no i Raja' Sodokia om i tulun do hilo'd Yorusalim do popoidu' 9 di turipon diyolo' di bansa' dot Ibrani, i tongokusai om i tongoondu'; om aiso' indo o tongosongulun piya do bansa' dot Israil do moniliu do turipon di sompi' ko' dau'd bansa'. 10 Om oinsanan nopoddi i rayat om i boyoon diyolo' do minomonsoi do tumpongo do popoidu' di turipon diyolo' om a' nondo moniliu kawagu diyolo' do turipon. Om poiduwo' ngai' no diyolo' i turipon diyolo'ddi. 11 Nga' alaid-laid noddi om wolihai po kawagu diyolo' o pomusorou diyolo', om ngoyo' no kawagu diyolo' i turipon di pinoidu' daa diyolo'ddi om sansagai po kawagu diyolo' iyolo' do sumiliu'd turipon. 12-13 Om suhuo' oku noddi do Tuhan, i Kinorohingan dot Israil do popoboros dot id tulun diri do poingkaa, “Minomonsoi oku do tumpongo dot id komolohingan dokoyu di gulu po di pinosoliwan ku i' iyolo' do mantad hilo'd Masir, om di pinoidu' ku iyolo' do mantad id pinonguripanan. Om sunudai ku no iyolo' do, 14 pointikid-tikid do koturu'd toun, om apatut nod poiduwon diyolo' o koinsanai di tulun dot Ibrani di nosiliu do turipon diyolo' do solinaid dot onom o toun. Nga' a' i' minokinongou om a' minamadul di pinoboros ku i kongomolohingan dokoyu di gulu po. 15 Om tontok di piro-piro o tadau do nakatalib om sinimbanan dokoyu o kowoyo-woyoon dokoyu om minomonsoi kou di korohian ku. Oinsanan kou nopo do nakaakun do popoidu' di tulun dot Israil di nosiliu'd turipon, om minomonsoi kou do tumpongo dot id toguang ku do hilo'd Walai'd Sasambayangan dot Agayo, i tiyonon do sumambayang dot id doho'. 16 Nga' tontok di winolihan kawagu dokoyu o pomusorou dokoyu om minongindaraat kou'ddi doho'. Tu' oinsanan kou nopo do minongoi panganu kawagu di turipon di tongoondu' om tongokusai di pinalabus daa dokoyu om pinologos do mongoi do honggo nopo o korohian diyolo'. Nga' sinansagan iddi dokoyu kawagu iyolo' do sumiliu'd turipon dokoyu. 17 Om gowoi poddi do momoros oku, iyoho' i Tuhan, dot a' kou minumboyo' do boros ku, om a' kou pinopoidu' di sompi' ko' bansa' dot Israil. Om iyo nopoddi, om poiduwon ku no kopio iyokoyu'd baino'. Om aala' kou indo dot id pisangadan, om oontok kou'd toruo-ruol om mononglous. Om poronobon ngai' ku nopondo o koinsanai'd bansa' do hiti'd pomogunan do kokito di wonsoyon ku dot id dokoyu. 18-19 Iri nopo i boyoon do Yohuda om Yorusalim om i pagawai do walai'd raja', om it imam om koinsanai'ddi boyoon, om nokopomonsoi no do tumpongo dot id doho'. Om nokogirot no diyolo' i tumpongo'ddi. Pinopogirot nopoddi om minonumbali' iyolo'd sapi', om pipapaso' no, om pamanau no iyolo' do hiri'd pialatan di duwo o papas. Nga' tinolibambanan iddi diyolo' i tumpongo'ddi om a' tinanud it oturan di tumpongo. Gowoi pondo om wonsoyon ku dot id diyolo' o miagal di winonsoi diyolo' dot id sapi'ddi. 20 Om patahakon ku nondo iyolo' dot id pisangod dit orohian do mamatai diyolo'. Om osiliu pondo do taakanon do tombolog om nintorusan o rata' diyolo'. 21 Om patahakon ku nondo i Sodokia, i raja' do Yohuda, om i pagawai dau dot id pisangod diyolo' dit orohian do mamatai diyolo'. Patahakon ku nondo iyolo' dot id soudor do raja' do Babil, i nokotongkiad no dokoyu. 22 Moro-boros oku nondod monuhu', om gumuli' nondo iyolo' do hiti'd bandar diti. Om songodon nondo diyolo' iti bandar, om solodon, om tutudan diyolo'. Om silihon ku nondod tana' dit a' sunian o hilo'd kabandaran do Yohuda om a' iyonon do tulun. Iyoho' no i Tuhan, o minomoros diti,” ka dau.
I Yoromia om i Payat do Rikab
1 Tontok di nosiliu i Yoyakim i tanak di Yosia, do raja' do Yohuda, om boro-boros no o Tuhan dot id doho' do poingkaa, 2 “Ongoi no boro-boros di tulun do Rikab, om angatan i' iyolo' do mongoi do hilo'd Walai'd Sasambayangan dot Agayo, om sumuang kou no dot id iso' o bilik, om poinumon nogindo iyolo' do waig dot anggur,” ka dau. 3 Om ngoyo' ku no angatai i Yaasania, (i tanak di Yoromia, i manangaki di Habisinia) om miwoyo' do koinsanai di tobpinai dau om i tangaanak dau do tongokusai; oinsanan nopo it id payat do Rikab do nangatan ku. 4 Om angatai ku no iyolo' do mongoi'd hiri'd Walai'd Sasambayangan dot Agayo om suang no iyahai do hiri'd bilik di tumatanud di Nabi Hanan, i tanak di Yogdalia. Iri no i bilik dit id somok di bilik do pagawai'd suwai, it id sawa-sawat di bilik di Maasiya, i tanak di Sulam. I Maasiya nopo nga' pagawai dit asawat o pangkat do hiri'd Walai'd Sasambayangan dot Agayo. 5 Om posurung oku noddi do sangkir om galas di noponu' do waig dot anggur dot id tulun do Rikab diri. Om boro-boros oku no dot id diyolo' do poingkaa, “Inum kou!” kangku. 6 Nga' boros ka diyolo', “A, a' i' iyahai monginum do waig dot anggur tu' nosunudan no iyahai di Yonadab i tanak di Rikab, i taki-aki dahai, dot a' iyahai om i sinakagon dahai koino-ino do monginum do waig dot anggur. Om a' kasai' no iyahai koino-ino do monginum diri do gisom dot alaid. 7 Om a' nogi' iyahai koino-ino do momutanom ko' mananom po ko' momoli do kabun dot anggur. Om a' iyahai koino-ino do momonsoi'd walai do solinaid dahai do poimpasi, suwai ko' miyon kasai' nopo iyahai dot id kiim, om koundorong i' iyahai do hiti'd pomogunan diti do miagal do sompogunan. 8 Om noumboyo' ngai' i' dahai i boros di Yonadab. Tu' a' i' iyahai, om i sawo dahai, om i tangaanak dahai monginum do waig dot anggur do solinaid dahai do poimpasi. 9-10 Om a' iyahai momonsoi do walai do tiyonon dahai, suwai ko' miyon nopo iyahai dot id kiim. Om aiso' o kabun dot anggur dahai ko' tumo ko' gandum po do maan do tonomon. Nangatanud ngai' nopo dahai i pinonuhuan di Yonadab i taki dahai, dot id dahai, om aiso' no o tiso' dot a' dahai natanud. 11 Nga' soira' di ruminikot i Nobukadnisar i raja' do Babil, do mongoi panangod diti pomogunan, om kopogiokunai no dahai do mogidu' do mantad id soudor do Babil om mantad id soudor do Siria, om ongoi no iyahai do hiti'd Yorusalim. Om iri no o kinoiyan-iyanan dahai do hiti,” ka diyolo'. 12-13 Om suhuo' oku noddi do Tuhan, it Osundu Kopio, i Kinorohingan dot Israil do mongoi solowot di tulun do Yohuda om Yorusalim om moro-boros dot id diyolo' do poingkaa, “Muhot oku, iyoho' i Tuhan, ondung nokuro tu' a' kou mokinongou doho' om a' tumanud do ponuhuan ku. 14 Noduhan di Yonadab i sinakagon dau do monginum do waig dot anggur, om numboyo' i' diyolo' i pinogoduhan diri. Om gisom do baino' nga' aiso' i' o tiso' diyolo' do monginum do waig dot anggur. Nga' iyokoyu nopo om a' i' minokinongou doho' mulong piya dot aiso' a kotingkadan ku do minsunud dokoyu. 15 A' oku nopo otingkod-tingkod do popingrikot di susuhuon ku, i nabi, dot id dokoyu. Om nonuan kou diyolo' do nosihat do poposonong do kowoyo-woyoon dokoyu om tumingkod do momonsoi'd araat. Om pinoinsan kou diyolo' dot a' tumuku' dot id tingolig om a' modsubak diri, om koundorong kasai' kou i' do hiti'd pomogunan di pinatahak ku dot id dokoyu om id taki-aki dokoyu. Nga' a' kou i' minamadul diri om a' kou minokinongou doho'. 16 Iri nopo sinakagon di Yonadab om minumboyo' i' kopio do boros di taki- aki diyolo', nga' iyokoyu nopo om a' i' mokinongou doho'! 17 Gowoi pondo om iyoho' no i Tuhan, it Osundu Kopio, i Kinorohingan dot Israil, o poporikot dot id dokoyu, i tulun do Yohuda om Yorusalim do koinsanai di kosusaan do porotuon ku dot id dokoyu, do miagal di nokoboros ku. Om wonsoyon ku pogi' o miagal diri nga' a' kou i' minokinongou do tontok di minoro-boros oku dokoyu om a' kou suminimbar do tontok di linohou ku iyokoyu,” ka dau. 18 Om boro-boros oku noddi dot id tulun di mantad id payat do Rikab do poingkaa o boros do Tuhan, it Osundu Kopio, i Kinorohingan dot Israil, dot id diyolo', “Minumboyo' kopio kou i' do koinsanai di boros di Yonadab, i taki- aki dokoyu, om tinanud dokoyu o koinsanai di pinonuhuan dau om winonsoi dokoyu o miontok di boros dau dot id dokoyu. 19 Om iri no o kapamatasan ku, iyoho' i Tuhan it Osundu Kopio, i Kinorohingan dot Israil, do haro kasai' nopondo o kusai do mantad id sinakagon di Yonadab i tanak di Rikab, do mogobi-obi' doho',” ka.
Binasa' di Baruk i Surat di Linopi do Hiri'd Walai'd Sasambayangan dot Agayo
1 Tontok di kaapat nod toun di Yoyakim i tanak di Yosia, do raja' do Yohuda, om boro-boros no o Tuhan dot id doho' do poingkaa, 2 “Ongoi anu dot iso' o karatas do linopi om potulison i' do hiri o koinsanai di boros di pinoboros ku diya' do pasal dot Israil, om Yohuda om koinsanai'd bansa'. Tulison ngai' no i boros ku do mantad po di minoro-boros oku i' diya' dit insan i', di maso pod i Raja' Yosia o momorinta' om gisom do baino'. 3 Tu' nunu koilo-ilo do korongou nopondo i tulun do Yohuda do koinsanai di kosusaan di porotuon ku dot id diyolo', om tumingkod i' dotindo iyolo' do momonsoi'd araat. Om ompunan ku indo i kasalaan om i dusa diyolo',” ka dau. 4 Om lohowo' ku noddi i Baruk i tanak di Noria, om tuliso' ngai' no dau i boros di pinoboros do Tuhan dot id doho', do maso ku do popoboros diri. Om potuliso' no dau do hiri'd karatas di linopi. 5 Om sunudai ku noddi i Baruk do poingkaa, “A' oku noddi pologoson do sumuang di Walai'd Sasambayangan dot Agayo. 6 Nga' tontok nopondo do puasa o tulun, om basaon no dot opuhod i pinoboros ku di tinulis nu, om koinsanai di pinoboros do Tuhan dot id doho'. Basaon nori dot id kinoiyonon di korongou ngai' o koinsanai'd tulun, om iri nogi' i tulun do Yohuda di rumikot do mantad id kawalayan diyolo'. 7 Om iri i' daa'ndo o koodsuur diyolo' do sumambayang dot id Tuhan om kumorologo do mantad id kowoyo-woyoon diyolo' dot araat. Tu' otogod no kopio o Tuhan diyolo' om orison dau iyolo',” ka dau. 8 Om wonsoyo' ngai' nopo di Baruk o miontok di pinonuhuan ku dau. Tu' basao' ngai' nopo dau i boros do Tuhan do hiri'd Walai'd Sasambayangan dot Agayo. 9 Om tontok di toun do kolimo di tulan do kosiam do pomorintaan di Yoyakim, i raja' do Yohuda, om puasa noddi o koinsanai di rayat do mokiinsian do Tuhan. Om iri tulun di poingiyon do hilo'd Yorusalim om koinsanai di rayat do mantad id kawalayan do Yohuda di ruminikot do hilo', nga' puasa ngai' nogi'. 10 Om basao' noddi di Baruk i boros ku di pinotulis do hiri'd karatas di linopi, om oinsanan nopo i tulun do minokinongou'ddi. Binasa' dau iri do hiri'd Walai'd Sasambayangan dot Agayo, do hiri'd bilik di Gamaria, i tanak di Sapan, i gomponulis do pomorinta'. Iri nopo bilik dau om hiri'd natad di ponong id sokid, it id toning di ralan do sumuang do hiri'd wawayaan di roitan do Wawayaan do Wagu di Walai'd Sasambayangan dot Agayo.
Binasa' i Surat di Linopi dot id Piro-Piro Pagawai do Pomorinta'
11 Om soira' di norongou di Mikaya i tanak di Gamaria, i manangaki di Sapan, o koinsanai di boros do Tuhan di pointulis do hiri'd karatas di linopi diri, i binasa' di Baruk, 12 om ongoi no iyau do hiri'd bilik di gomponulis do pomorinta', i hiri'd walai do raja'. Om songirikau ngai' nod hiri i piro-piro pagawai: i Ilisama i gomponulis do pomorinta', om i Dilaya i tanak di Somaya, om i Ilnatan i tanak di Akbor, om i Gomaria i tanak di Sapan, om i Sodokia i tanak di Hanania om koinsanai di pagawai do suwai. 13 Om posunudo' ngai' no di Mikaya diyolo' o koinsanai di boros do norongou dau di binasa' di Baruk do hiri'd Walai'd Sasambayangan dot Agayo. 14 Om suhuo' noddi di piro-piro pagawai i Yohudi, (i tanak di Nitania, i manangaki di Solomia, i manangaki di Kusi) do mongoi popoboros dot id di Baruk do poingkaa, “Ngoyo' i surat di linopi di binasa' nu dot id tulun dot ogumu'ddi, om mongoi nod hiti,” ka. Om ngoyo' no di Baruk i surat di linopi'ddi om ongoi no iyau do hiri'd diyolo'. 15 Om boros ka diyolo' dot id dau, “Irikau, om basaon i' dot id dahai ino surat do linopi,” ka. Om basao' no di Baruk iri. 16 Om tontok di nabasa' dau iri, om kooris no iyolo', om pogiboro-boros noddi iyolo' do poingkaa, “Apatut moti' do ngoyon toko' sunudai i raja' do koinsanai'd boros diri dot oruhai,” ka. 17 Om uhoto' no diyolo' i Baruk, “Sunudai bo iyahai ondung poingkuro ko do minonulis ngai' do boros diti? Pinoboros di Yoromia dot id diya' iti, om tuliso' nu noddi?” ka diyolo'. 18 Om boros kad i Baruk do suminimbar, “Oo, koinsanai diti boros diti om pinoboros ngai' di Yoromia om pitulis-tulis ku do hiti'd karatas do pinsil dawat o pinonulis ku,” ka dau. 19 Om boros kaddi di piro-piro pagawai dot id di Baruk, “Pamanau nogi' kopio, om mongoi kou i' di Yoromia lisok. Om kada' nod haro o songulun piya do koilo di lisokon dokoyu,” ka diyolo'.
Tinutudan di Raja' i Surat di Linopi
20 Om poopio' no di piro-piro pagawai i surat do linopi diri do hiri'd bilik di Ilisama, i gomponulis do pomorinta' om ongoi noddi iyolo' solowot di raja', om posunudo' ngai' nopo diyolo' i boros diri dot id dau. 21 Om suhuo' noddi di raja' i Yohudi do mongongoi di surat di linopi'ddi, om ngoyo' no dau do mantad id bilik di Ilisama, om basao' noddi di Yohudi dot id raja' om id toinsanan di pagawai di songingkakat do hiri'd posorili' di raja'. 22 Tontok nopoddi nga' tulan do kosiam, om poirikau i raja' do hiri'd walai do raja' di maso dot osogit. Om mikit-sikit o tapui do hiri'd ropuhan dot id dotoguangan dau. 23 Om pointikid-tikid dot aayi' di Yohudi do mambasa' o tolu ko' apat o kinoiyonon om pompodon no di raja' iri do pisau dot okooro' o pomompod, om pataamon no dau do hiri'd tapui, do gisom do nosorob ngai' i surat di linopi'ddi do hiri'd tapui. 24 Om aiso' i' o tiso' piya diyolo', i raja' ko' iri po pagawai dau do nooris do nokorongou di boros diri, om aiso' i' ot id pogialatan diyolo' do pinopointalang do monosol. 25 Nga' minogodu tomod i' daa i Ilnatan om i Dilaya om i Gamaria di raja' do monorob di surat di linopi'ddi, nga' a' i' di raja' pinokinongou iyolo'. 26 Om suhuo' no daa'ddi di raja' i Yiramiil i tanak di raja', om i Soraya, i tanak di Asriol om i Solomia i tanak di Abdiil do mongoi panangkap doho' om i Baruk, i gomponulis ku. Nga' linisok i' iyahai'd Tuhan.
Minonulis Kawagu i Yoromia do Surat di Linopi
27 Om soira' di notutudan di raja' i surat di linopi'ddi, i pinotulisan di Baruk di boros di pinoboros ku, om suhuo' oku nod Tuhan 28 do mongoi panganu kawagu do karatas do suwai di linopi om tulisan i' iri do koinsanai di pinotulis di hiri'd karatas di linopi di koinsan i'. 29 Om suhuo' oku nod Tuhan do popoboros dot id raja' do poingkaa, “Tinutudan nu i surat di linopi'ddi, om minonguhot ko di Yoromia ondung nokuro tu' pinotulis dau do hiri dot atantu' no do rumikot i raja' do Babil do mongoi pamaraag do pomogunan diti om mongoi pamatai do tulun om nintorusan do hiti. 30 Om iri noddi o kapamarasan ku, iyoho' i Tuhan, dot id diya', oi Raja' Yoyakim, dot aiso' no o tiso' do sinakagon nu do kopomorinta' do pomorintaan di Daud. Om i rata' nu nga' pataamon nopo om osidangan do tadau do dangadau om abalabahan do dongotuong. 31 Om hukuman ku nondo iya', om i sinakagon nu om i piro-piro pagawai nu, tu' nokowonsoi ngai' kou i' do dusa. Om porikatan ku nondo iyokoyu om koinsanai di tulun do poingiyon do hilo'd Yorusalim, om i tulun do Yohuda, do koinsanai di kosusaan di pinoboros ku do porikoton ku dot id dokoyu, tu' a' kou i' minamadul di pinongoris ku dokoyu,” ka. 32 Om anu oku noddi do karatas do suwai di linopi om patahako' ku no dot id di Baruk, i gomponulis ku. Om popitulis-tulison diri dau do hiri i boros do poboroson ku. Om pinotulis ngai' nogi' di Baruk do hiri o koinsanai di boros di hiri'd surat di linopi dit id gulu, om rinuhangan do piro-piro kawagu o boros do miagal diri.
Pinokianu di Sodokia dot id di Yoromia
1 Om pilio' no di Nobukadnisar i raja' do Babil, i Sodokia, i tanak di Yosia, do sumiliu do raja' do hilo'd pomogunan do Yohuda do suminowoli di Yoyakin i tanak di Yoyakim, i nidu' dau do raja'. 2 Nga' a' i' i Sodokia om i piro-piro pagawai dau, om i rayat do pomogunan diri minumboyo' di boros do Tuhan di pinosunud ku. 3 Nga' insan o maso, om ponuhu' no i Raja' Sodokia di Yukal, i tanak di Solomia, om i Sipania it Imam, i tanak di Maasiya do mongoi ponuhu' doho' do sumambayang dot id Tuhan, i Kinorohingan dahai do mogobi' di bansa'. 4 Om tontok nopo do maso'ddi om a' oku po nokogiil om osimbayan oku po do mimpanau dot id pogialatan di rayat. 5 Maso no daa di soudor do Babil do monurungku' do Yorusalim, nga' tontok di nokorongou iyolo' do nakapamanau no i soudor do Masir do mantad hilo'd Masir do mongoi sangod, om poggidu' noddi iyolo'. 6 Om suhuo' oku noddi do Tuhan, i Kinorohingan dot Israil do popoboros 7 dot id di Sodokia do poingkaa, “Hilo' nod tanga'd ralan i soudor do Masir do mongoi daa ponguhup diya', nga' gumuli' indo kawagu iyolo'. 8 Om gumuli' indo kawagu i soudor do Babil do mongoi panangod diti bandar, om aala' indo diyolo' iti, om tutudan diyolo'. 9 Iyoho' no, i Tuhan, o popoinsan dokoyu, dot a' posiwot do ginawo dokoyu, do gisom do momusorou kou dot a' gumuli' kawagu i soudor do Babil, tu' gumuli' i' moti' iyolo'. 10 Om aala' piya daa dokoyu o koinsanai di soudor do Babil, do gisom dot iri po i nongosuhat ot oolu' diyolo', om hiri ngai' po iyolo'd kiim do songillii, nga' mingkakat i' moti' iyolo'ddi do mongoi ponutud diti bandar do gisom dot ouu,” ka dau.
Natangkap om Giniil i Yoromia
11 Om poggidu' noddi do mantad hilo'd Yorusalim i soudor do Babil tu' pakayaan no di soudor do Masir dot id bandar diri. 12 Om tongkiad oku no do mantad hilo'd Yorusalim om ongoi oku no do hilo'd watas do Binyamin do mongoi panganu do tintanga' ku di tana' do potungkusan di sompiiyon ku. 13 Nga' tontok di nokorikot oku do hiri'd wawayaan di roitan do Wawayaan do Binyamin, om talabai oku no di boyoon do soudor di madtamong do hiri, om boro-boros nod, “Mogidu' ko daa om mongoi ko daa'ddi sugku' dilo tulun do Babil,” ka dau. (Iri nopo boyoon do soudor diri nga' roitan dot i Yoria; iyau nopo om tanak di Solomia om manangaki di Hanania.) 14 Om boros kangku do suminimbar, “A' i' otopot ino! Tu' a' oku i' mongoi sugku' dilo pisangod,” kangku. Nga' a' no i Yoria minokinongou. Om tangkapo' oku nopo om ngoyo' oku no dau posolowoto' di pagawai do pomorinta'. 15 Om kotogod tomod no iyolo' doho', om ponuhu' no iyau do momobog doho' om mongontiil doho' do hiri'd walai di Yonatan, i gomponulis do hiri'd walai do raja'. Iri nopo walai'ddi nga' siniliu do giil. 16 Om pinosuang oku dot id pomogiilan di pinoukad dot id saalom do tana'. Om alaid oku i' do poundorong do hiri. 17 Om ponuhu' noddi i Raja' Sodokia do tulun do mongoi doho' posolowot dau do hiri'd walai do raja'. Om pomolisok-lisok iddi i raja' do minonguhot doho' do hiri ondung haro po o boros do mantad id Tuhan. “Haro,” kangku do suminimbar. Om boros kangku kawagu, “Katahak ko nondo dot id longon do raja' do Babil!” kangku. 18 Om boros kangku'ddi do minonguhot, “Nunu kopio toi o kasalaan do nowonsoi ku dot id diya', om id pagawai nu om id rayat do gisom do pinosuang oku dot id giil? 19 Hinonggo ngai' no toi i nabi di tuuhoton nu di mimboros dot id diya' dot a' rumikot do mongoi panangod diya' om iti pomogunan diti i raja' do Babil? 20 Nga' pokinongou pogi' kopio oi Tuan ku Raja'! Pokinongoho' no iti pokionuon ku diya'. Kada' oku no kopio pogulio' do hilo'd giil di hilo'd walai di Yonatan, tu' apatai oku moti'ndo do hilo',” kangku. 21 Om ponuhu' noddi i Raja' Sodokia do popogiil doho' do hiri'd natad di walai do raja'. Om hiri oku noddi om pionuan oku do roti do mantad hiri'd pamansayan do roti do gisom do norikot o maso dit aiso' no o roti do hiri'd bandar diri.
Hiri'd Suang do Torobong di Narasakan i Yoromia
1-3 Om suhuo' oku nod Tuhan do popoboros do boros dot id rayat do poingkaa, “Patahakon ku nondo o bandar diti dot id soudor do Babil, om aala' nondo diyolo' iti. Om isai nopo o mundorong do hiti'd bandar, om apatai no dot id pisangadan, ko' apatai do louson om toruol. Nga' isai nopo o sumoliwan diti bandar om tumahak dot id tulun do Babil, om a' no apatai; om apasi indo iyau,” ka. Om norongou ngai' i' di Sopasa, i tanak di Matan, om i Godalia i tanak di Pasur, om i Yukal i tanak di Solomia, om i Pasur i tanak di Malkia i pinoboros ku'ddi. 4 Om ongoi no i pagawai solowot di raja' om poboroso' no diyolo' o poingkaa, “Apatut nod hukuman do kapatayon iti tulun diti! Tu' mimboros nopo iyau dot iyo'ddi om popoluhoi no iyau do ginawo di soudor om i tulun di maso do poundorong do hiti'd bandar. A' nogi' iyau monguhup do rayat, nga' momungou nogi' iyau diyolo',” ka. 5 Om boros ka di Raja' Sodokia do suminimbar, “Wonsoyo' nopo dokoyu i korohian dokoyu do wonsoyon dot id dau. Tu' a' oku i' milo do mogodu dokoyu,” ka dau. 6 Om ngoyo' oku noddi diyolo', om pouluho' oku no do tali o pinongulu do hiri'd torobong di Malkia, i tanak di raja'ddi. Iri nopo torobong diri nga' hiri'd natad di walai do raja'. Aiso' no o waig di torobong diri, nga' kiburutak i', om katanom oku nopo do hiri'd burutak. 7 Tontok nopoddi nga' haro o songulun o bansa' dot Etiopia do pakaraja' do hiri'd walai do raja'. Ngaran nopo dau om i Ibidmilik. Om korongou no iyau do pinosuang oku do hiri'd torobong diri. Om tontok di maso di raja' do mongigit do pogibara-barasan do hiri'd wawayaan di roitan do Wawayaan do Binyamin 8 om ongoi no i Ibidmilik do hiri, om boro-boros no iyau di raja' do poingkaa, 9 “Oi Tuan ku Raja', a' i' osonong o winonsoi do tulun diri. Tu' pinosuang diyolo' i Nabi Yoromia dot id torobong. Om apatai no moti' iyau'ddi dot ololousanan do hilo' tu' aiso' no o taakanon do hiti'd bandar,” ka dau. 10 Om suhuo' noddi di raja' i Ibidmilik, boros ka dau, “Ongoi pangangat do tolu o tulun om ngoyon i' posoliwano' i Yoromia do mantad id torobong diri dot a' po iyau apatai!” ka dau. 11 Om angatai noddi di Ibidmilik i tolu o tulun diri om ongoi no do hiri'd walai di raja', om ongoi no iyolo' panganu do kain di nangagansing no do mantad hiri, om pouluho' no dot id doho' do tali o pinongulu do hiri'd torobong. 12 Om suhuo' oku no di Ibidmilik do paampin di gansing diri dot id pokilok ku, om a' oku i' apalasan di tali. Om wonsoyo' ku no o miagal diri. 13 Om gayato' oku no diyolo' do pinopoinsawat, do sumoliwan di torobong diri. Om hiri noddid natad di walai do raja' o pinoundarangan diyolo' doho'.
Minokinosihat i Sodokia di Yoromia
14 Insan no kawagu o maso, om ponuhu' no i Raja' Sodokia do tulun do mongoi pangangat doho' do mongoi solowot dau do hiri'd wawayaan do kotolu di Walai'd Sasambayangan dot Agayo. Om boro-boros no i raja' dot id doho' do poingkaa, “Haro o tuhoton ku diya'; om posimbaron no it otopot, kada' nod haro o lisok- lisokon do mantad id doho',” ka dau. 15 Om boros kangku do suminimbar, “Ondung posunudon ku it otopot dot id diya', om atantu' no do hukuman oku diya' do kapatayon. Om ondung nosihatan ku iya', nga' a' ko i' tumanud do nosihat diri,” kangku. 16 Om pomolisok-lisok no i Raja' Sodokia do minamatos dot id doho' do poingkaa, “Sumumpa' oku dot id suang do ngaran do Kinorohingan di poimpasi, i manahak dati' do ginawo, dot a' ku iya' patayon om a' ku iya' patahakon dot id tulun di sipamatai diya',” ka dau. 17 Om sunudai ku noddi i Sodokia do boros do Tuhan, it Osundu Kopio, i Kinorohingan di tukuon do tulun dot Israil do poingkaa, “Ondung tumahak ko dot id boyoon do soudor do raja' do Babil, om a' ko i' patayon, om iti bandar nga' a' i' tutudan. Om apasi ko i' om apasi o sompiiyon nu. 18 Nga' ondung a' ko tumahak dot id diyolo', om katahak nondo iti bandar dot id longon do tulun do Babil, om tutudan nondo diyolo' iti do gisom dot ouu; om iya' nga' a' no kopoggidu' do mantad id diyolo',” ka dau. 19 Om boros kaddi di Raja' Sodokia do suminimbar, “Ooris oku di tulun toko' di minongoi sugku' di tulun do Babil. Tu' patahakon oku dotindo dot id diyolo' om inggoriton oku nondo diyolo',” ka dau. 20 Om boros kangku do suminimbar, “A' ko i' patahakon dot id diyolo'. Nga' pokionuon ku no daa kopio do mumboyo' ko do boros do Tuhan; om aiso' indo o kosusaan nu, om a' ko i' patayon. 21 Nga' ondung a' ko tumahak, om nokointalang no do Tuhan dot id doho' it osiliu. 22 Nokito ku dot id pinointalang diri do posoliwanon ngai' nopondo i tongoondu' di nongoolu-olu' do hiri'd walai do raja' do Yohuda, om ngoyon no patahako' dot id boyoon do soudor di raja' do Babil. Om mimboros nondo i tongoondu' dot id diya' do poingkaa, ‘Naakalan i raja' di tambalut kopio dau, om noporinta' iyau diyolo'. Nga' maha'ddi nakatanom dot id burutak o gakod dau, om tongkiad ngai' nopoddi iyolo',’ ka,” ka dau. 23 Om boros kangku'ddi kawagu, “Oinsanan nopondo i sawo om i tangaanak nu do posoliwanon om ngoyon patahako' di tulun do Babil. Om iya' nga' a' no kopoggidu' do mantad id diyolo', tu' atangkap ko nondo di raja' do Babil. Om iti bandar nga' otutudan nondo do gisom dot ouu,” kangku. 24 Om boros kaddi di Sodokia, “Kada' posunudo' dot id ongoiso' piya o tulun diti pinibara-barasan to, om a' ko i' apatai. 25 Om ondung koilo i pagawai do nokorumo oku diya', om rumikot nondo iyolo' dot id diya' do mongoi uhot ondung nunu o pinibara-barasan to. Om mamatos nondo iyolo' dot a' mamatai diya' ondung posusuyon ngai' nu no iri dot id diyolo'. 26 Nga' sunudan nopo iyolo' do minomolugu-lugut ko doho' dot a' popoguli' diya' do hilo'd giil do mongoi patai do hilo',” ka dau. 27 Om a' po alaid do mantad diri, om rikot kopio i' daa i piro-piro pagawai do minongoi ponguhot doho'. Nga' simbaro' ku nopo iyolo' do miagal di pinonuhuan di raja' do posimbaron. Om aiso' iddi o milo diyolo'd winonsoi tu' aiso' i' o nokoilo dot ongoiso' piya o tulun di pinibara-barasan dahai di raja'. 28 Om hiri kasai' oku pod natad di walai do raja' do gisom do norikot i tadau do nosolod do pisangod o Yorusalim.
Naala' o Yorusalim
1 Tontok di toun do kosiam di tulan do kohopod do pomorintaan di Sodokia, i raja' do Yohuda, om rikot no i Nobukadnisar i raja' do Babil do miwoyo' do koinsanai di soudor dau do minongoi panangod do Yorusalim. 2 Om tontok di tadau do kosiam, di tulan do kaapat, di kohopod om iso' do toun do pomorintaan di Raja' Sodokia, om kolopuson nod pisangod i tolig do bandar diri. 3 Om kosolod no o Yorusalim. Om rikot no i boyoon do soudor di raja' do Babil dit angasawat o pangkat, om ngoyo' no diyolo' solodo' i wawayaan di roitan do Wawayaan dit id Tanga'. Id pogialatan nopo diyolo'ddi nga' i Norgal Sarisir, i Samgar Nibo, i Sarsokim i boyoon do walai'd raja', om i Norgal Sarisir Rabmag om i piro-piro o boyoon do soudor do suwai. 4 Om soira' di nokito di Raja' Sodokia om i soudor dau i nosiliu do miagal diri, om umbal no daa iyolo' do mogidu' do kumaa do hilo'd Rantai do Yordan do totuong diri. Om waya' no iyolo' di ralan do kawaya' di kabun do raja', om soliwan no iyolo' do minaya' di wawayaan di kopiromutan di duwo o tolig dot id kinoiyonon diri. 5 Nga' gusao' no iyolo' di soudor do Babil om kokosupai no i Sodokia do hilo'd Rantai do Yorikou. Om tangkapo' no diyolo' iyau om pootodo' no dot id di Nobukadnisar i raja' do Babil, do hilo'd bandar do Ribla, it id watas do Hamat. Om hukumai noddi iyau do kapatayon. 6 Om hiri nogi'd bandar diri o pinamatayan di tangaanak dau dot antang-antangan dau. Om iri i pagawai do Yohuda nga' pinatai ngai' nogi'. 7 Om irulo' noddi o mato di Sodokia om kagasai no iyau om tanggayai no do hilo'd Babil. 8 Om tutudai noddi di tulun do Babil i walai do raja' om i kawalayan di rayat, om pingraago' diyolo' i tolig do Yorusalim. 9 Om id tohuri noddi om pokoyoo' no di Nobusaradan i boyoon do soudor do Babil, do hilo'd Babil i noolu-olu' do rayat do hiri'd bandar diri, om i tulun di minogidu' do minongoi sugku' di tulun do Babil. 10 Nga' iri nopo wookon di rayat, i tulun di mosikin kopio, it aiso' o dapu', om pinologos i' di Nobusaradan do mundorong do hilo'd pomogunan do Yohuda. Om onuwai no dau iyolo' do kabun dot anggur om tumo.
Pinalabus i Yoromia
11 Om nosuhu' no di Raja' Nobukadnisar i Nobusaradan, i boyoon do soudor dau do poingkaa, 12 “Ngoyon no ihumo' i Yoromia, om gompion no kopio iyau. Kada' iyau kuroi-kuroyo', suwai ko' wonsoyon no dot id dau o nunu nopo i pokionuon dau dot id diya',” ka dau. 13 Om ongoi noddi i Nobusaradan om i duwo o boyoon do soudor dau dit asawat o pangkat, i Nobusasban om i Norgal Sarisir, om i boyoon do soudor do Babil do suwai, 14 do hiri'd natad di walai do raja' do minongongoi doho'. Om patahako' oku noddi diyolo' dot id di Godalia, i tanak di Ahikam, i manangaki di Sapan, it apatut do mongilo-ilo doho' om aiso' i' o koligagaanan ku do muli'. Om poundorong oku noddi do hiri'd rolot di rayat.
Batos dot id di Ibidmilik
15 Tontok di maso ku pod poundorong do nontiilan do hiri'd natad di walai do raja', om suhuo' oku nod Tuhan do 16 mongoi popoboros dot id di Ibidmilik, i tulun dot Etiopia diri do boros do Tuhan, it Osundu Kopio, i Kinorohingan dot Israil do poingkaa, “Poingkuro nopo i nokoboros ku di gulu po, om poporikot oku no do kosusaan dot id bandar diti, om okon i ko' kosimbayanan. Om kokito ko indo dot osiliu o miagal diri. 17 Nga' iyoho' indo, i Tuhan o mongintirung diya' om a' ko indo patahakon dot id tulun di poddosi nu. 18 Om a' ko indo patayon tu' posion ku i' iya'. Om apasi ko i' tu' mogondos ko i' doho'. Iyoho' no i Tuhan, o minomoros diti,” ka dau.
Suminugku' i Yoromia di Godalia
1 Om boro-boros no o Tuhan dot id doho', di nakalabus oku do mantad hilo'd Rama, do pinalabus oku di Nobusaradan, i boyoon do soudor. Tinanggayan oku do hilo' do kinagasan do mogiwoyo-woyo' di tulun do suwai do nangatangkap do mantad hilo'd Yorusalim om hilo'd Yohuda, i tanggayan nod pisangod do kumaa'd hilo'd Babil. 2 Om lohowo' oku noddi di boyoon do soudor dot iso-iso' oku om boro-boros nod, “Nokoboros nod Tuhan, i Kinorohingan nu do raagon dau o pomogunan diti. 3 Om baino' noddi om nabayaan nod Tuhan iri tu' minomonsoi id dusa i bansa' nu om a' minumboyo' dau. 4 Nga' baino' nopo om poiduwon ku no iya' om iduwon ku o kogos do longon nu. Moyo' nopo doho' do kumaa do hilo'd Babil dot orohian ko no, om gompion ku i' iya'; nga' ondung a' ko mongoi, om a' i' monguro. Om osimbayan ko i' do mongoi do hinonggo nopo o ngoyon nu do pointongkop do pomogunan diti,” ka dau. 5 Nga' tontok dit a' po i Nobusaradan nakapamanau, om boro-boros no iyau do poingkaa, “Ondung orohian ko, om gumuli' nopo do hilo'd di Godalia i tanak di Ahikam, i manangaki di Sapan. Tu' iyau no o pinili' di raja' do Babil do sumiliu do gobunor do kabandaran do Yohuda. Om sumugku' nopo dau dot id pogialatan diti rayat, ko' mongoi nopo do honggo nopo o korohian nu,” ka dau. Om onuwai oku noddi dau do takanon do maan ku'd kokoriu om pinuhawangan oku dau, om pologoso' oku nogiddi dau do minamanau. 6 Om ongoi oku noddi do hiri'd di Godalia, do hilo'd Mispa, om undorong oku no do poinsugku' dau dot id pogialatan di rayat di pinologos do poundorong do hilo'd pomogunan do Yohuda.
I Godalia o Gobunor do Yohuda
7 Om nopili' no di raja' do Babil i Godalia do sumiliu'd gobunor do hilo'd Yohuda do momorinta' do koinsanai'd tulun di nongoolu' do hilo'd Yohuda, iri no i tulun di mosikin no kopio. Om korongou'ddi o wookon di boyoon do soudor om i soudor do Yohuda dit a' tuminahak dot id Babil, do nopili' no i Godalia do sumiliu'd gobunor. 8 Om ongoi no iyolo' solowot di Godalia do hilo'd Mispa. Iyolo' nopo nga' i Ismail i tanak di Nitania, om i Yohanan i tanak di Karia, om i Soraya i tanak di Tanhumit, om i tangaanak di Ipai i mantad hilo'd Nitopa, om i Yisania i mantad hilo'd Maaka, om miwoyo' di tulun diyolo'. 9 Om boro-boros no i Godalia dot id diyolo' do poingkaa, “Kada' kou kooris do tumahak dot id tulun do Babil. Undorong kou nopo do hiti'd pomogunan toko' om minsiriba' nopo dot id raja' do Babil. Om jominon ku i' dot apasi kou. 10 Om hiti oku id Mispa, om wokilon ku indo iyokoyu do rumikot i tulun do Babil do hiti. Monimung kou nopo om poopi' di tua' dot anggur om i tua-ua', om i tumau do saitun, om mundorong nopo do hilo'd kawalayan di korohian dokoyu'd mundorong,” ka dau. 11 Om daamot nopoddi nga' nongkorongou ngai' no i tulun dot Israil di hilo'd Muab, om i hilo'd Amon, om i hilo'd Idom, om i hilo'd piro-piro o pomogunan do suwai do pinopologos i raja' do Babil do wookon di tulun dot Israil do mundorong do hilo'd Yohuda, om pinili' dau i Godalia do gobunor diyolo'. 12 Om guli' ngai' noddi i tulun dot Israil do mantad id koinsanai di kinoiyonon di pinotompiasan diyolo', om guli' no iyolo' do hilo'd Yohuda. Om ongoi no iyolo' do hiri'd di Godalia do hilo'd Mispa. Om ponimung no iyolo' do tua' dot anggur om i tua-ua' dot ogumu' kopio.
Pinatai i Godalia
13 Katalib poddi iri, om rikot no i Yohanan om i piro-piro boyoon do soudor dit a' tuminahak dot id pisangod, dot id di Godalia do hilo'd Mispa. 14 Om boros ka diyolo' dot id dau, “Koilo ko i' do sinuhu' di Baalis i raja' dot Amon, i Ismail do mongoi pamatai diya'?” ka diyolo'. Nga' a' i' i Godalia monongkuyaan di boros diyolo'. 15 Om pomolisok-lisok noddi i Yohanan do minomisunud di Godalia do poingkaa, “Pologoso' oku pogi' do mongoi pamatai di Ismail, nga' aiso' i' moti' o tiso' pod tulun do koilo ondung isai o minamatai dau. Nokuro tu' pologoson iyau do mamatai diya', gisom dot opogitompias-pias pondo kawagu i tulun do Yohuda di nokotimung do hiti'd sugku' nu, om gisom dot angapatai ngai' i noolu-olu' di rayat do hiti'd Yohuda?” ka dau. 16 Nga' boros ka di Godalia do suminimbar, “Kada' nogi' kopio wonsoyo' o miagal diri. Tu' a' i' otopot i pinoboros nu'ddi do pasal di Ismail,” ka dau.
1 Om tontok di tulan do koturu' do toun diri, om rikot no i Ismail i tanak di Nitania, i manangaki di Ilisama, do miwoyo' do hopod o tulun do minongoi solowot di Godalia do hilo'd Mispa. (I Ismail nopodti nga' sinakagon do raja' om pagawai dit asawat o pangkat dot id pomorinta'.) Om tontok di mogitorungak iyolo'd makan, 2 om ingkakat no i Ismail do miwoyo' di hopod o tulun do koruhang dau om kodongo' no diyolo' o gayang diyolo' om patayo' no diyolo' i Godalia. 3 Om pinatai nogi' di Ismail o koinsanai di tulun dot Israil di poinsugku' di Godalia do hilo'd Mispa, om koinsanai di soudor do Babil di nokoontok nod hilo' do tontok diri. 4 Tadau noddi kawagu, di napatai i Godalia do tontok dit aiso' po o tulun do nokoilo'ddi, 5 om rikot no o walu' nohopod o tulun do mantad hilo'd Sikim, om hilo'd Silo om hilo'd Samaria. Om ganggut nopo diyolo' nga' nongobugar, om pakayan nga' nongohurak, om tinan diyolo' nga' piningsuhatan diyolo'. Om minigit iyolo' do porsombahan do gandum om kominyan do patahakon do hiri'd Walai'd Sasambayangan dot Agayo. 6 Om soliwan no i Ismail do mantad hilo'd Mispa, om mihad-ihad iyau do minongoi solowot diyolo'. Om soira'ddi nokobontol iyau diyolo' om boros ka dau, “Kainou mongoi ontong di Godalia,” ka. 7-8 Nga' soira'ddi nokorikot iyolo' do hiri'd tanga' di bandar, om timpuun no i Ismail om i tulun dau do minimpatai diyolo'. Nga' haro o hopod o tulun dot id pogialatan diyolo' do minomoros dot id di Ismail do poingkaa, “Kada' iyahai patayo'! Tu' haro po o gandum, om barli, om tumau do saitun om paha' do pinolisok dahai do hilo'd soliwan diti bandar,” ka diyolo'. Om kada' noddi di Ismail patayo' iyolo'. Nga' iri nopo suwai om patayo' ngai' nopo dau om pataamo' noddi dau i rata' diyolo' do hiri'd suang do torobong. 9 Iri nopo torobong di pinataaman di Ismail di rata' di tulun di pinatai dau, nga' i torobong dit agayo di winonsoi di Raja' Asa do tontok di sinangod iyau di Baisa, i raja' dot Israil. 10 Om tangkapo' ngai' noddi di Ismail o koinsanai di tulun do nongoolu-olu' do hilo'd Mispa om i tangaanak di raja' di tongoondu', i pinatahak di Nobusaradan dot id di Godalia, do pinatamangan dau. Om tangkapo' ngai' nopo di Ismail iyolo', om tanggayai ngai' no dau, om pamanau nod kuminaa dot id watas do tulun dot Amon. 11 Om korongou no i Yohanan, om koinsanai di boyoon do soudor di moyo-woyo' dau di karaaton do winonsoi di Ismail. 12 Om ngoyo' no diyolo' om i tulun diyolo' gusao' i Ismail, om kokosupai no diyolo' iyau do hilo'd kulam dot agayo di hilo'd Gibion. 13 Om soira' di nokito di rayat di nangatangkap di Ismail, i Yohanan, om i boyoon do soudor do rumikot om ongotood tomod diri iyolo'. 14 Om oinsanan nopo i tulun di nangatangkap om i tinanggayan daa di Ismail do guminuli' om tuminanud diri di Yohanan. 15 Nga' i Ismail nopo om i hopod o tulun dau om nokopoggidu' i' do mantad id di Yohanan; om pakayaai no diyolo' do hilo'd pomogunan do tulun dot Amon. 16 Om timungo' noddi di Yohanan om i piro-piro o boyoon do soudor dau o koinsanai di soudor, om i tongoondu', om i tangaanak om i pagawai do hiri'd walai do raja', i tinangkap daa di Ismail di napatai dau i Godalia. 17-18 Om moddosi ngai' nopo iyolo' do tulun do Babil tu' napatai no di Ismail i Godalia, i pinili' di raja' do Babil do sumiliu'd gobunor do pomogunan diri. Om pakayaai no diyolo' do hilo'd Masir. Hilo' noddid tanga'd ralan, om undorong no iyolo' do hilo'd Kimham, it id somok do Baitlahim.
Minokisambayang di Yoromia i Rayat
1 Om rikot ngai' noddi i tulun, dot it angagayo om it ongokoro', do minoyo' di piro-piro boyoon do soudor, do kohompit no i Yohanan i tanak di Karia, om i Asaria i tanak di Hosaya, 2 dot id doho', om boro-boros no iyolo' do poingkaa, “Aman, okito nu i' dot ogumu' i' daa iyahai di gulu po, nga' baino' noddi om okuri' no iyahai. Om pokionuon no daa kopio dahai do sumambayang ko dot id Tuhan i Kinorohingan di tukuon nu, do sumambayang do bagi dahai. Sambayangan no kopio iyahai i noolu-olu' diti, 3 om potudukon indo do Tuhan i Kinorohingan, dot id dahai ondung honggo o pakayaan dahai om it apatut dahai do wonsoyon,” ka. 4 Om boros kangku, “Oo. Wonsoyon ku i' ino pokionuon dokoyu. Sumambayang oku i' dot id Tuhan, i Kinorohingan toko', om poingkuro nopo o tisimbar dau, om posunudon ngai' ku i'. Om aiso' i' o lisokon ku dot id dokoyu dot ongoiso' piya,” kangku. 5-6 Om boros ka diyolo' dot id doho', “Pokionuon pogi' dahai iya'd sumambayang dot id Tuhan, i Kinorohingan toko', nga' orohian iyahai do mumboyo' dau, om koinsonong i' o koiyon-iyono' dahai. Om osonong piya ko' araat o boros do Tuhan nga' tonudon i' dahai. Om Tuhan no o sumiliu'd sasi' dit otulid om otorodok dot id dahai dot a' no iyahai tumanud ngai' di ponuhuan do Tuhan dot id dahai do polombuson nu, oi Aman,” ka diyolo'.
Nisimbar do Tuhan do Sambayang di Yoromia
7 Katalib poddi o hopod o tadau do mantad diri om boro-boros no o Tuhan dot id doho'. 8 Om lohowo' ku no i Yohanan, om koinsanai di boyoon do soudor di moyo-woyo' dau, om koinsanai di tulun di minoyo' dau. 9 Om boros kangku dot id diyolo', “Sinuhu' oku dokoyu do popolombus do pokionuon dokoyu dot id Tuhan, i Kinorohingan dot Israil. Om poingkaa no o boros do Tuhan, 10 ‘Ondung mundorong kou do hiti'd pomogunan diti om poingkakaton ku indo iyokoyu om a' ku i' iyokoyu porotuon; pogiroton ku i' iyokoyu tu' tumongob oku i' kopio do pinoporikot di kosusaan diri dot id dokoyu. 11 Kada' kou no kooris di raja' do Babil. Tu' moyo-woyo' oku i' dokoyu om poiduwon ku i' iyokoyu do mantad id kuasa' dau. 12 Om insianan ku indo iyokoyu, om poinsianon ku dokoyu i raja' do Babil, om pologoson kou indo dau do muli'. Iyoho' no i Tuhan, o minomoros diti,’ ka. 13-15 Nga' kada' kou saap do Tuhan i Kinorohingan dokoyu, iyokoyu i noolu-olu' do hiti'd Yohuda, om kada' kou pomoros dot, ‘A' i' iyahai mundorong dot id pomogunan diti. Mongoi i' iyahai iyon do hilo'd Masir. Tu' hilo' nopondo om a' olohou do mongoi sangod, om a' oinggorit do louson,’ ka. Om ondung pokodohon dokoyu o ginawo dokoyu om sumonsog kou do mongoi'd hilo'd Masir, do mongoi iyon do hilo', om poingkaa no o boros do Tuhan, it Osundu Kopio, i Kinorohingan dot Israil dot id dokoyu, 16 ‘Gusaon kou indo do pisangadan om mononglous di poddosi dokoyu do gisom do korikot kou do hilo'd Masir, om hilo' nondo o kapatayon dokoyu. 17 Oinsanan nopondo i tulun di sumonsog do mongoi'd hilo'd Masir do mongoi iyon do hilo', dot apatai dot id pisangadan, om apatai do lous, om apatai do toruol; om aiso' nondo o tiso' piya diyolo' dot oolu' ko' koidu' do mantad id kosusaan di porikoton ku; apatai ngai' nopondo iyolo'. 18 Poingkuro oku nopo, iyoho' i Tuhan, i Kinorohingan dot Israil do pinopourabus do kototogod ku om kolosuo' do ginawo ku dot id tulun di poingiyon do hilo'd Yorusalim, om iyo oku nogiddi do popourabus do kototogod ku dot id dokoyu, i mongoi do hilo'd Masir. Om ongooris pondo o tulun do kokito dokoyu; om tingayamon kou nondo, om silihon do pomomopol o ngaran dokoyu. Om a' kou nondo kokito kawagu diti pomogunan di kinosusuon dokoyu,’ ka dau,” kangku. 19 Om boros kangku kawagu, “Nosunudan kou nod Tuhan, iyokoyu i noolu-olu' do hiti'd Yohuda, dot a' mongoi do hilo'd Masir. Om iri no o kopoinsanan ku dokoyu do dinondo 20 do nokowonsoi kou do kasalaan dit agayo. Tu' minonuhu' kou doho'd sumambayang dot id Tuhan i Kinorohingan toko' do bagi' dokoyu, om minamatos kou do momonsoi'd toinsanan di poboroson do Tuhan. 21 Om nosunudan ku noddi iyokoyu do boros do Tuhan i Kinorohingan toko', nga' a' kou i' tumanud di boros dau. 22 Iyo nopoddi om ilaai no kopio dokoyu dot apatai kou indo do pisangadan, om lous om toruol, do hilo' kou id pomogunan di ngoyon dokoyu iyono',” kangku.
Nangatan i Yoromia do Mongoi do Hilo'd Masir
1 Om soira' di nokosunud ngai' ku di rayat i boros do Tuhan i Kinorohingan dot Israil, dit apatut ku'd polombuson dot id rayat, 2 om boro-boros no dot id doho' i Asaria, i tanak di Hosaya, om i Yohanan i tanak di Karia om koinsanai di tulun dot angasawat o ginawo. Boros ka diyolo', “Mongudut ko i'! A' i' minonuhu' diya' o Tuhan i Kinorohingan dahai, do mogodu dahai do mongoi iyon do hilo'd Masir. 3 I Baruk i' i tanak di Noria, o minominsuhu' diya' dot a' sumokodung dahai, om aala' indo iyahai di tulun do Babil, om patayon iyahai diyolo' ko' tanggayan do hilo'd Babil,” ka diyolo'. 4 Om a' minumboyo' do boros do Tuhan di monuhu' diyolo'd mundorong do hilo'd Yohuda i Yohanan, om koinsanai di boyoon do soudor, om i rayat. 5 Om timungo' ngai' noddi di Yohanan om koinsanai di boyoon do soudor i noolu-olu' do tulun do hilo'd Yohuda, om koinsanai di tulun di guminuli' daa do minongoi iyon do hilo'd Yohuda do mantad id pomogunan do suwai di kinotompiason diyolo'. 6 Iri tongokusai, om i tongoondu' om i tangaanak do raja' di tongoondu', i pinokigompian di Nobusaradan di Godalia, om iyoho' nogi' om i Baruk, nga' tinanggayan i' diyolo' do hilo'd Masir. 7 Om pakayaai noddi diyolo' do hilo'd Masir tu' a' i' iyolo' minokinongou di boros do Tuhan. Om korikot no iyolo' do hilo'd Tapanhis. 8 Om boro-boros noddi o Tuhan dot id doho' di hilo' do poingkaa, 9 “Ongoi anu do piro-piro o watu dit angagayo om lobongon i' do hiri'd tana' dit id toning di wawayaan do sumuang di walai do pomorinta' do hilo'd Tapanhis. Om mogihum no kopio'd ralan do momonsoi'ddi om kokito ngai' i' diya' i tulun do Yohuda do momonsoi ko'ddi. 10 Om poboroson no dot id diyolo' dot, iyoho' no i Tuhan it Osundu Kopio, i Kinorohingan dot Israil o poporikot di Nobukadnisar i raja' do Babil, i susuhuon ku, dot id kinoiyonon diti. Om popoingkakat nondo iyau do tirikohonon dau do momorinta' dot id sakai di piro-piro o watu di pinolobong nu do hiti'd tana', om pawaladon dau'd hiri i kiim dau do don raja'. 11 Om rumikot nondo i Nobukadnisar do mongoi pangala' do Masir. Om apatai ngai' nondo i tulun di natantu' mantad dot apatai do toruol. Om i natantu' mantad dot atanggayan do pisangod nga' atanggayan nod pisangod. Om iri no i natantu' mantad dot apatai dot id pisangadan om apatai no dot id pisangadan. 12 Om tutudan ku nondo i walai di tingolig do Masir om sorobon nondo di raja' do Babil i tingolig do hiri'd walai do tingolig diri, ko' tanggayan do hilo'd pomogunan dau. Om poingkuro nopo i gompomogompi'd dumba' do momugag do kutu do mantad id pakayan dau, om iyo nogiddi i raja' do Babil do mongimuhau do Masir do gisom dot alangga' nopondo, om mamanau nogindo iyau tu' nakamanang no iyau. 13 Om babakon nondo dau i torigi'd watu di ponokotingolig di hilo'd Hiliopolis, do hilo'd Masir, om sorobon dau i walai do tingolig do Masir,” ka dau.
Boros do Tuhan dot id Tulun dot Israil di Hilo'd Masir
1 Om boro-boros no o Tuhan dot id doho' do pasal di tulun dot Israil di poingiyon do hilo'd Masir; i hilo'd bandar do Migdol, om Tapanhis, om Mimpis, om i hilo'd watas do ponong id salatan. 2 Iti no o boros do Tuhan, it Osundu Kopio, i Kinorohingan dot Israil, dot id diyolo, “Nokokito kou i' do kosusaan di pinorikot ku dot id Yorusalim om id koinsanai'd bandar do Yohuda; om gisom piya do baino' nga' pogun po kasai' i kabandaran diri om aiso' o tulun do poingiyon do hilo'. 3 Nosiliu pogi' o miagal diri nga' araat i' o winonsoi diyolo' om pinapatahak iyolo' do porsombahan om minodsubak iyolo' do ponokokinorohingan dit a' diyolo' insan kotuku' om a' notuku' di taki-aki diyolo' do mantad di gulu po. 4 A' oku i' otingkod do popingrikot di susuhuon ku, i nabi, dot id dokoyu. Om mogodu iyolo' dokoyu do mingwonsoi di wowonsoyon dot araat, om i karaatan kopio ku. 5 Nga' a' kou i' minokinongou om a' kou minamadul diri; tu' a' kou i' tuminingkod do momonsoi dit araat, tu' papatahak kou po do porsombahan di sumbolion dot id tingolig. 6 Om gowoi poddi om pourobuso' ku no o kototogod ku om kolosuo' do ginawo ku dot id kabandaran do Yohuda om id karalan-ralanan di hilo'd Yorusalim. Om sorobo' ngai' ku nopori gisom do pogun poddi o hilo' om aiso' o sumuni, do miagal dit okito dokoyu'd baino'. 7 Om baino' noddi om monguhot oku, iyoho' i Tuhan, it Osundu Kopio, i Kinorohingan dot Israil, ondung nokuro tu' momonsoi kou dit araat kopio dot id tinan dokoyu. Orohian kou do momunso do tulun --- tongokusai, om tongoondu' om tangaanak, om i ragang po, gisom dot aiso' no ot oolu' di bansa' dokoyu? 8 Nokuro tu' momonsoi kou di popotogod doho'? Tu' ongoi kou no iyon do hiti'd Masir, om tumuku' kou noddi dot id tingolig om papatahak kou do porsombahan di sumbolion dot id tingolig do pomogunan diti! Nokuro tu' momungou kou do tinan dokoyu? Orohian kou dot indaraaton do toinsanan do bansa' do hiti'd pomogunan om silihon do pomomopol o ngaran dokoyu? 9 Nolihuan no dokoyu i kararaat do taki-aki dokoyu, om i kararaat do raja' do Yohuda om i sawo diyolo', om i kararaat dokoyu, om i sawo dokoyu di hilo' kou pod pomogunan do Yohuda om di hilo'd karalan-ralanan do hilo'd Yorusalim? 10 Nga' gisom piya'd baino' nga' a' kou i' minsiriba'. Om a' kou momusou doho', om a' tumanud dit oturan ku om i ponudukan ku di pinatahak ku dot id dokoyu om id taki-aki dokoyu. 11 Gowoi pondo om iyoho', i Tuhan it Osundu Kopio, i Kinorohingan dot Israil, o sumaap dokoyu om raagon ku o pointongkop do Yohuda. 12 Om ondung haro ot id pogialatan di tulun do Yohuda di noolu-olu' do sumonsog do mongoi'd hilo'd Masir, do mongoi iyon do hilo', om patayon ku no iyolo'. Om apatai ngai' nopondo iyolo' do hilo'd Masir, dot id pisangadan, ko' mononglous po o kapatai. Iri tulun dot ongokoro' po om it angagayo nga' apatai ngai' nopondo do miagal diri. Om ooris nondo o tulun do kokito diyolo' om indaraaton o ngaran diyolo'. 13 Om hukuman ku nondo do gisom dot apatai dot id pisangadan, om apatai do mononglous om apatai do toruol i tulun do songingiyon do hilo'd Masir, do miagal di pinomohukum ku'd Yorusalim. 14 Om aiso' nondo o tiso' po di tulun do Yohuda di noolu-olu', i minongoi iyon do hilo'd Masir do kopoggidu' ko' koguli' po do hilo'd pomogunan do Yohuda, i kalangadan tomod daa diyolo' do gulion om iyonon diyolo'. Aiso' no kopio o koguli' do suwai ko' piro-piro po o tulun di mogidu',” ka dau. 15 Om rikot noddi dot id doho' o tulun dot ogumu' kopio, iri no i tongokusai di koilo do papatahak do porsombahan di sumbolion dot id tingolig i sawo diyolo', om i tongoondu' di songingkakat do hiri, om kohompit nogi' i tulun dot Israil di poingiyon do hilo'd Masir do ponong id salatan, om boros ka diyolo' dot id doho', 16 “A' i' iyahai mokinongou di pinoboros nu'ddi dot id suang do ngaran do Tuhan. 17 Tu' tumilombus i' iyahai do momonsoi ngai' di nakabatos dahai. Papatahak kasai' i' iyahai do porsombahan di sumbolion dot id Raja'd Tondu' do Surga, om popotungu iyahai do waig dot anggur do maan do porsombahan dot id dau do miagal di winonsoi dahai, om i winonsoi di taki-aki dahai, om i raja' dahai om i tongoboyoon dahai do hilo'd kabandaran do Yohuda om hilo'd karalan-ralanan do Yorusalim. Tu' tontok nopo do maso'ddi om osima' i' iyahai do taakanon om osimbayan iyahai om aiso' o kosusaan dahai. 18 Nga' mantad poddi tuminingkod iyahai do papatahak do porsombahan di sumbolion dot id Raja'd Tondu' do Surga, om di tuminingkod iyahai do popotungu do porsombahan do waig dot anggur dot id dau, om mosikin noddi iyahai, om apatai o tulun dahai dot id pisangadan ko' oontok do mononglous,” ka diyolo'. 19 Om boros kaddi di tongoondu', “Kaakun i' i sawo dahai do momonsoi iyahai do roti do poiyo-iyoon di Raja'd Tondu' do Surga om monorob do porsombahan di sumbolion, om papatahak do waig dot anggur dot id tingolig dahai,” ka. 20 Om boros kangku'ddi dot id toinsanan di tongokusai om tongoondu' di suminimbar doho' do miagal diri, 21 “Ondos daa dokoyu om a' do Tuhan oilaan ko' nolihuan dau i porsombahan do sinumbali' di pinatahak do hilo'd kabandaran do Yohuda om hilo'd karalan-ralanan do Yorusalim di pinatahak dokoyu, om i komolohingan dokoyu, om i raja' dokoyu, om i boyoon dokoyu om i rayat do pomogunan diri? 22-23 A' no o Tuhan kotoron do montong-ontong dokoyu do papatahak do porsombahan di sumbolion dot id tingolig. Araat no kopio om kointingayam i wonsoyon dokoyu. Nokowonsoi kou nod dusa dot id Tuhan om a' kou minumboyo' di ponuhuan dau. Om gowoi poddi om naraag noddi o pomogunan dokoyu om a' no milo dot iyonon om pomomopol poddi o ngaran diri. Ooris ngai' poo o tulun do kokito'ddi,” ka dau. 24-25 Om sunudai ngai' ku noddi i tulun, om okon-okon po om i tongoondu', do boros do Tuhan it Osundu Kopio, dot id tulun do Yohuda di poingiyon do hilo'd Masir, do poingkaa, “Nokosumpa' kou no om i sawo dokoyu dot id Raja'd Tondu' do Surga do papatahak kou do porsombahan di sumbolion om papatahak kou do waig dot anggur dot id dau. Om nabayaan noddi dokoyu i batos dokoyu'ddi. Osonong no! Wonsoyon nopo dokoyu i pinabatos dokoyu! 26 Nga' pokinongoho' po dokoyu iti boros ku, iyokoyu ngai' i tulun dot Israil do poingiyon do hiti'd Masir: Sumumpa' oku, iyoho' i Tuhan, dot id suang do ngaran ku dit abantug dot a' ku nondo iyokoyu pologoson do mamarait do ngaran ku do tontok do mamatos kou. A' kou no milo'd momoros do, ‘Sumumpa' oku dot id suang do ngaran do Kinorohingan di poimpasi,’ ka. 27 Tu' tumotos oku nondo kopio do momungou dokoyu om a' kou i' osimbayan, do gisom i' dot apatai ngai' kou dot id pisangadan tuu ko' apatai po do toruol. 28 Om okuri' nondo kopio i kopoggidu' do mantad hilo'd Masir, om koguli' kawagu do hilo'd pomogunan do Yohuda. Om oilaan ngai' nogindo diyolo' ondung disai'd boros dot osiliu, iri boros ku ko' iri boros diyolo'. 29 Om porikatan ku nondo iyokoyu do kosusaan do hiti'd kinoiyonon diti do popointalang kopio dot id dokoyu, dot abayaan i' kopio i hukuman di natantu' mantad ku do porotuon ku dot id dokoyu. 30 Patahakon ku nondo i Hopra, i raja' do Masir dot id longon di pisangod dau di sipamatai dau, do miagal di pinapatahak oku di Sodokia i raja' do Yohuda dot id di Nobukadnisar, i raja' do Babil, i pisangod di sipamatai dau,” ka dau.
Batos do Kinorohingan dot id di Baruk
1 Tontok di toun do kaapat do pomorintaan di Yoyakim, i tanak di Yosia do hilo'd Yohuda, om tuliso' no di Baruk i boros di pinolombus ku dot id dau. Om polombuso' ku no dot id dau, 2 o boros do Tuhan i Kinorohingan dot Israil. Boros kad Tuhan, “Oi Baruk, 3 mimboros ko dot, ‘Obungou oku no tu' rinuhangan nogi'd Tuhan do koinggoritan o kosusaan ku dit ogumu'. Ohuyan oku po do mingodoi om aiso' no o kosimbayanan ku,’ ka nu. 4 Oi Baruk! Iyoho' no, i Tuhan, o mamahaba' di winonsoi ku om mongutus di tinanom ku do pointongkop diti pomogunan. 5 Om orohian ko po daa'ndo do posuulon ko iya'? Kada' nogi' kopio dot iyo'ddi, oi Baruk! Tu' hukuman ngai' ku i' do kosusaan o koinsanai'd tulun om iya' nga' kohompit i'. Osonong po tu' a' ko napatai. Honggo-honggo piya o ngoyon nu, nga' apasi kasai' ko i'. Iyoho' no, i Tuhan o minomoros diti,” ka dau.
Kinaalaan do Masir do Hilo'd Karkomis
1 Om boro-boros no o Tuhan dot id doho' do pasal do koinsanai'd bansa', 2 do minimpuun do Masir. Iti no o pinoboros dau do pasal di soudor di Niko i raja' do Masir, i naala' do hilo'd Karkomis, it id somok do Bawang dot Iprat; i naala' di Nobukadnisar, i raja' do Babil, di toun do kaapat do pomorintaan di Yoyakim i raja' do Yohuda, 3-4 “Mamagarang no do monuhu' do sumodia' i piro-piro boyoon do soudor do Masir! ‘Asao' no i tandus! Panampakai nod rasuk do basi' om tupi' kolidar! Ngoyo' no i kolid om mongoi i' baris! Powonsoyo' no dokoyu o pakol, iyokoyu i sumakai'd kuda'! Sakai kou no di kuda' dokoyu, om pamanau kou no do mongoi sangod!’ ka. 5 Nga' okito ku dot ooris i' iyolo' om gumuli' oi Tuhan, manangkus pod opopoddosian i soudor diyolo', om a' no kumoili tu' naala' no iyolo'. 6 Iri piya soudor dit osiau do manangkus nga' a' no kopoggidu' do mantad id pisangod. Om hilo' nod utara, it id tisan do Bawang dot Iprat, o kosoduwon om kahabaon diyolo'. 7-8 Isai iti gumayo do miagal di Bawang do Nil om miagal di bawang do lumuyud? Iri no i pomogunan do Masir. Boros kad Masir, ‘Mingkakat oku nondo do gisom id oporinta' ku iti pomogunan. Om raagon ku nondo o kabandaran om i songingiyon do hiri. 9 Panangkus kou no, oi kuda'! Kosiau kou no, oi korita'-kuda'! Pamanau no do mongoi sangod, oi gunsiou do mantad hilo'd Etiopia, om iyokoyu i mongingigit do kolid di mantad hilo'd Libia om i mamamana' do mantad hilo'd pomogunan do Lidia,’ ka,” kangku. 10 Iti no o tadau'd Kinorohingan, it Asawat Kopio; tadau nodti do sumuli' o Tuhan, it Osundu Kopio, do koinsanai di pisangod dau. Mingyahan nondo do mangakan diyolo' i gayang dau, om monginum iri do raha' diyolo' do gisom dot abangat. Tadau nod baino' it Osundu Kopio do monumbali' di sumbolion dau do hilo'd utara, it id tisan di Bawang dot Iprat. 11 Oi tulun do Masir, a' no kolingos dokoyu i tubat dokoyu. Ongoi kou nogi' do hilo'd Giliad do mongoi pogihum do tubat! 12 Nongoilaan ngai' nod bansa' o koiyon-iyono' nu di kointingayam kopio. Norongou nod hiti'd pointongkop diti pomogunan o giniakan nu. Kopogitahub- tahub po i soudor; om aandad nopondo dot ahaba' do hiri'd tana'.
Korikatan di Nobukadnisar
13 Tontok di ruminikot i Nobukadnisar, i raja' do Babil do minongoi panangod do Masir, om boro-boros no o Tuhan dot id doho'. Boros ka dau, 14 “Popinsunudo' no o habar diti do hilo'd Masir, dot id kabandaran do Mimpis om Migdol om Tapanhis, ‘Sumodia' nod mongintirung do tinan, tu' oinsanan nopondo i dapu' dokoyu dot araag dot id pisangadan. 15 Nokuro tu' minogidu' i Apis, i ponokokinorohingan nu dit okoris? Naala' no iyau do Tuhan!’ ka. 16 Ogumu' no o soudor nu di nakasadu om nahaba'. Om mogiboro-boros poo iyolo' do, ‘Kainou muli' do hilo'd bansa' toko', om kopoggidu' toko' i' do mantad id gayang do pisangod di kooris kopio,’ ka. 17 Pungaranan no i raja' do Masir do ngaran do wagu dot: ‘It Opuhod no Boros Nga' Popologos i' do Katalib o Maso do Kapamansayan Diri’. 18 Iyoho' no o Kinorohingan di Poimpasi, iyoho' no o raja' i Tuhan dit Osundu Kopio. Poingkuro nopo i Nuluhon do Tabor dot akawas ko' i konuluhanan do suwai, om asawat ko' i rahat i Nuluhon do Karmol, om iyo nogiddi o kokoriso' di mongoi sangod dokoyu. 19 Sodia' kou no, oi tulun do Masir, tu' atangkap kou no om atanggayan kou po! Tu' oingou nondo o Mimpis om osiliu'd pogun dit aiso' o tulun do poingiyon. 20 Masir nopo om miagal pod tanak do sapi' dit olomu', nga' gangahon i' iyau do langau dit agayo do mantad hilo'd utara. 21 Iri piya i soudor di ginodsian dau nga' miagal po di tangaanak do sapi' dit ongolomu' tu' a' no koundaliu; om iyolo' nga' pogulian ngai' nopondo om mogitanud-tanud do mogidu' do mokipapasi tu' a' no iyolo' kogoos. Nokorikot no i tadau do kopomohukuman diyolo'; norikot no i maso do korikatan do kosusaan dot id diyolo'. 22 Iyo po di tulanut do tumokon o Masir do mogidu' do mantad id soudor do pisangod dit osomok no. Om songodon diyolo' iyau do kapak dot iyo po di tulun do managad do kayu 23 om langgaan nopondo diyolo' o puru' di himbaan. Ogumu' no kopio i soudor do pisangod, ogumu' po ko' i katat. Iyoho' no i Tuhan o minomoros diti. 24 Intingayamon nondo i tulun do poingiyon do hilo'd Masir, tu' aala' no iyolo' di tulun do mantad hilo'd utara. Iyoho' no i Tuhan o minomoros diti,” ka. 25 Boros kad Tuhan, it Osundu Kopio, i Kinorohingan dot Israil, “Hukuman ku nondo ot Amon, i ponokokinorohingan do Tibi, om hukuman ku o pointongkop do Masir, om i ponokokinorohingan, om i raja' do Masir. Om i Raja' do Masir om i tulun di sumondiu dau 26 nga' patahakon ku nondo dot id di Nobukadnisar i raja' do Babil, om i soudor dau di sipamatai diyolo'. Nga' katalib pondo iri, om iyonon indo kawagu o pomogunan do Masir do miagal di gulu po. Iyoho' no i Tuhan o minomoros diti,” ka dau.
Posion Nondod Tuhan i Tulun Dau
27 Boros kad Tuhan, “Oi Israil, i tulun ku, kada' gagarai dot opopoddosian! Tu' poiduwon ku i' iyokoyu do mantad id pomogunan dit osodu' di pinananggayan do pisangod dokoyu. Kouli' kou indo om koiyon kou dot id pomogunan dokoyu om aiso' no o koligagaanan dokoyu. Osimbayan kou nondo do momogun-mogun om aiso' o poddosi dokoyu. 28 Kada' kou no kooris, iyokoyu i tulun di songonuon ku, tu' rumikot oku i' do mongoi pamasi dokoyu. Tu' raagon ngai' ku indo o koinsanai di bansa' di pinotompiasan ku dokoyu, nga' iyokoyu nopo om a' ku i' iyo'dion. Nga' hukuman ku i' ma iyokoyu tu' nokowonsoi kou i' do sala', nga' okon indo ko' it adalaan koruol o pomohukum ku. Iyoho' no i Tuhan o minomoros diti,” ka dau.
Boros do Tuhan do Pasal do Pomogunan do Pilistin
1 Tontok dit a' po di raja' do Masir nasangod o Gasa, om boro-boros no o Tuhan dot id doho' do pasal do pomogunan do Pilistin. 2 Boros kad Tuhan, “Antangai pogi' ilo waig do lumuyung do mantad ponong hilo'd utara, om gumayo do miagal di bawang di lumuyud do mamalampai do pointongkop do pomogunan om i songingiyon do hiri, om mamalampai di kabandaran om i tulun di poingiyon do hilo'. Om minggiak pondo o tulun do mokitulung om mogihad o koinsanai'd tulun do hiri'd pomogunan diri. 3 Korongou nondo iyolo'd kuda' do mamanau, om i ngarak do korita'-kuda', om i karatak do ruda' di korita'-kuda'. A' no kosorou di tangaanak diyolo' i komolohingan tu' olomok po tomod iyolo'. 4 Nokorikot no o maso di bansa' do Pilistin dot oiyon do mamaraag do gisom dot a' no ouhupan do Tirus om Sidon. Patayon ngai' ku nopondo o tulun do Pilistin di mantad hilo'd Krita. Iyoho' no i Tuhan, o momonsoi'ddi. 5 Noontok o tulun do Gasa do katangaban dit awagat kopio; om aiso' no o komi do tulun dot Askilon. Songkuro po o koloido' di tulun do Pilistin di noolu-olu' do tumongob? 6 Minggarang kou doti' dot, ‘Gisom toi do soira' do manangod ko, oi gayang do Tuhan? Guli' nogi' do hilo'd tangkap nu om kada' nondo pinggangau, mundorong nopod hilo',’ ka doti' dokoyu. 7 Nga' poingkuro daa'ri do mundorong ondung nosuhu' ku do manangod dot Askilon om i tulun do hilo'd tisan do rahat?” ka dau.
Pasal do Karaagan do Pomogunan do Muab
1 Iti no o pinoboros do Tuhan, it Osundu Kopio, i Kinorohingan dot Israil, do pasal do Muab, “Nobungou no o tulun di hilo'd Nibo, tu' naraag no i bandar! Nosolod no o Kiriataim, om nomumuk i tolig dit ogirot, gisom do nointingayam diri i tulun do hilo', 2 tu' natanus no i kaandasan do Muab! Nosolod nod pisangod o Hisbon, om momusorou no i pisangod do momunso do toinsanan di tulun do hilo'd Muab. Aiso' no o tulun dot orongou do mimboros do hilo'd bandar do Madmin, tu' nasangod nod soudor o bandar diri. 3 Pokinongou pogi' do giniakan do tulun do hilo'd Horonaim! ‘Kagangahan! Karaagan!’ ka. 4 Naraag no o Muab! Orongou i' do hilo'd Soar o giniakan do tulun do hilo'. 5 Pokinongoho' no i tihad do tulun do tumakad di ralan do kumaa do hilo'd Luhit, om i tihad do tulun do rumuhuk do hilo'd ralan do kumaa do hilo'd Horonaim. 6 Boros ka diyolo', ‘Siahai no, om apasi ko i'! Panangkus no do miagal di kaladai do lalang do hilo'd tana' do kowotuan,’ ka. 7 Oi Muab, suminondiu ko daa di kinoris nu om i kakayaan nu. Nga' baino' nopondo, om iya' nondo ot aala'. Om i Kamos i ponokokinorohingan nu, om it imam di mogobi-obi' dau om i sinakagon do raja' nga' atanggayan ngai' nopondo dot id pomogunan do pisangod. 8 Oinsanan nopondo o bandar dot araag, om aiso' no tiso' do bandar dot a' araag. Kubong piya om rantai nga' araag ngai' nopo. Iyoho' no i Tuhan, o minomoros diti. 9 A' no alaid om araag no o Muab. Om angaraag i kabandaran do hilo', om iso' pod tulun nga' aiso' no o koiyon do hilo',” ka dau. 10 (Ousung no i tulun dit a' iso-iso' o ginawo do momonsoi'd karaja'd Tuhan. Ousung no i tulun dit a' mongodong do gayang dau do maan do pamatai!)
Rinaag i Kabandaran do Muab
11 Boros kad Tuhan, “Mantad po di gulu po om osimbayan no kasai' o koposi-posion do tulun do Muab. Om a' i' insan katanggayai dot id pomogunan do pisangod. Osimbayan nopo iyolo' do miagal po di waig dot anggur do hiri'd pinoiyanan mantad, tu' a' i' kopintungu dot id poiyanan do waig dot anggur do suwai. Owongi' po om osonong o koinuman di waig dot anggur. 12 Nga' nokorikot noddi o maso do monuhu' oku do popotuntug do Muab do miagal di waig dit anggur, om potuntugon ngai' o suang di pinoiyanan om babakon nogindo. 13 Om oiman-iman indo o Muab di Kamos i ponokokinorohingan diyolo', do miagal di tulun dot Israil tu' noiman-iman do Baitol, i sondihon daa diyolo'. 14 Nokuro tu' moro-boros o tongokusai do Muab dot, ‘Iyahai nopo om gunsiou, i soudor do nongoubas do sumangod?’ ka. 15 Naraag no o Muab om i kabandaran do hilo', om nangapatai i tangaanakwagu, di nongopili' no o kosonongo'. Iyoho' no o minomoros diti. Iyoho' no o raja', i Tuhan dit Osundu Kopio. 16 Motirikot no o mamaraag do Muab om a' no alaid om omumuk no o Muab. 17 Pogihadai no dokoyu o Muab, koinsanai dokoyu i pomogunan do posorili' do Muab di koilo do kobontugo' dau! Poboroson no dot aiso' no o kuasa' do Muab om natanus no o kobontugo' om kokoriso' dau! 18 Oi tulun do Dibon, lintuhun no do mantad hino'd kinoiyonon nu di pusohon kopio; irikau no do hilo'd pupuk do tana'. Tu' nokorikot no i mongoi pamaraag do Muab i pomogunan nu, om i mamaraag do koinsanai di tolig nu. 19 Ingkakat no do hilo'd tisan do ralan, om antangan no kopio, oi dokoyu i poingiyon do hilo'd Aroir! Uhoto' no i tulun di minogidu' do, ‘Nunu o nosiliu,’ kanto. 20 Om sumimbar nondo iyolo' do, ‘Nointingayam no o Muab, tu' naratu' no iyau! Pogihadai no iyau. Popinsunudo' no do poingompus do Bawang dot Arnon do naraag o Muab!’ ka. 21 Norotuan nod hukuman o hilo'd kabandaran dit id watas do nuluhon dit angapatau: i hilo'd Holon, om Yahas, om Mipaat, 22 om Dibon, om Nibo, om Bait-Diblataim, 23 om Kiriataim, om Bait-Gamul, om Bait-Mion, 24 om Kiriot, om Bosra. Koinsanai di bandar do pomogunan do Muab di hilo'd sodu' om it id somok nga' nohukuman ngai' no. 25 Noidu' no i kokorisan do Muab, om naraag i pomorintaan dau. Iyoho' no, i Tuhan o minomoros diti,” ka dau.
Poinsiribaon Nondo o Muab
26 Boros kad Tuhan, “Owuko' no o Muab, tu' sumaap i' iyau doho'. Om mingluhad pondo o Muab do hiri'd tilob dau, om irak-irakan pondo iyau'd tulun. 27 Okon toi ko' Israil i piningirakan do Muab di gulu po, om it iyoon po do gampanakau di nokosupan do manakau? 28 Tongkiadai no dokoyu o kabandaran dokoyu, om mongoi i' iyon do hilo'd kapampangan, oi dokoyu i songingiyon do hilo'd Muab! Omit kou no di punai di momirumun dot id kangkab do rungas. 29 Adalaan kou no kopio do minggayo-gayo! Nokorongou oku no do kobinggoyo-goyoo' dokoyu, om kasawato' do ginawo dokoyu, om i pokirayou-rayou dokoyu, om koondoso' dokoyu! 30 Oilaan ku i' i koondos dokoyu, iyoho' i Tuhan, o koilo. Om a' i' otopot i boros dokoyu, om aiso' o kotutuk-tutukon do wonsoyon dokoyu. 31 Om mogihad oku nondo dokoyu om i tulun do hilo'd Kirhiris, i bandar dokoyu'd agayo. 32 Pogihadan ku pondo kopio o tulun do hilo'd Sibma ko' mantad di tulun do Yaisir. Iri nopo bandar do Sibma om miagal do guas dot anggur di ruminoloi o raan do gisom do nokoroloi do hilo'd soborong do Rahat do Napatai, om korikot do hilo'd Yaisir. Nga' nangaraag noddi i kouwaan di mongua' do maso'd alasu' om i tua' dot anggur dau. 33 Natanus no o kaarapadan om kataadan do ginawo do hilo'd pomogunan do Muab dit oluhub. Om notingkod ku no i waig dot anggur do lumuyung do mantad hiri'd pamagaan do tua' dot anggur; aiso' no o tulun do mamaga' do waig dot anggur om aiso' o mimpangkis dot aarapadan. 34 Mingihad po i tulun do Hisbon om Iliali; om orongou i' i tihad diyolo' do hilo'd Yahas, om orongou po di tulun do hilo'd Soar, om hilo'd Horonaim, om hilo'd Iglat-Silisia. Mihad iyolo' tu' iri piya Bawang do Nimrim nga' narasak i'. 35 Tingkodon ku nondo i tulun do hilo'd Muab do modtutud do porsombahan dot id kinoiyonon di podsubakan diyolo' om tingkodon ku do papatahak do porsombahan di sumbolion dot id tingolig diyolo'. Iyoho' no i Tuhan o minomoros diti. 36 Natanus ngai' no i kakayaan do Kirhiris om pointongkop do Muab. Tumongob oku no do kokito do koiyon-iyono' diyolo' do miagal diri; iyo oku pod tulun di monuling dot i lagu' di kosudu' kopio o sulingon ku. 37 Nongogolisan ngai' nopo diyolo' o tulu diyolo', om nongobugar o ganggut; om longon diyolo' nga' pininghorob diyolo' om kipinakai iyolo'd pakayan do mogihad do popointalang do tumongob iyolo'. 38 Hilo' nopod sakai do taap do walai om hilo'd padang om aiso' no ot orongou, suwai ko' mogihad poo. Tu' nomumuk ku no o Muab do miagal di luping di niada'. 39 Nopurok no kopio o Muab, om mihad poo iyau tu' ointingayaman no kopio iyau. Ooris poo o Muab om aiso' no o pokukurayan, om gowoi poddi om irak- irakan poo iyau do koinsanai'd bansa'. Iyoho' no, i Tuhan o minomoros diti,” ka dau.
Aiso' no o Ralan do Muab do Mogidu'
40 Boros kad Tuhan, “Iyo pondo do kondiu di poungkalad o talad, o tiso' o bansa' do rumikot do mongoi ponimbit do Muab. 41 Om ongosolod nondo i kabandaran do hilo' om i piro-piro kuta' do pogintirungan. Om ooris nondo kopio i gunsiou do Muab, gisom dot iyo po iyolo' di tondu' di mogkosusu. 42 Om araag nopondo o Muab, om okon no ko' bansa' dit agayo tu' suminaap i' iyolo' doho'. 43 Om iri pondo kopoddosian, om luang, om lawa' ot abantalan diyolo'. 44 Iri nopondo tulun di mogidu' do mantad id kopoddosian om aratu' no dot id luang, om iri no i koidu' do mantad hiri'd luang om kosulung no do lawa'; tu' natantu' ku no o maso do kapamaraagan do Muab. 45 Mokiintirung nondo do Hisbon i bandar di noporinta' di Raja' Sihon di gulu po, i tulun di minogidu' dit a' no kogoos. Nga' iri piya bandar diri nga' sumorob no. Naraag nod tapui i watas dit id piwolitan om i konuluhanan do Muab, i pomogunan do tulun dit orohian do sumangod. 46 Obungou no o Muab! Nangapatai no i tulun do hilo', i tumuku' dot id Tingolig do Kamos; nangatangkap no om natanggayan dot id pomogunan do pisangod i tangaanak diyolo'. 47 Nga' tondulion indo do Tuhan o koiyon-iyono' do pomogunan do Muab do koimbagu,” ka dau. Om iri no o pinoboros do Tuhan do pasal dit osiliu dot id Muab.
I Pomohukum do Tuhan dot id Amon
1 Poingkaa no o pinoboros do Tuhan do pasal do bansa' dot Amon, “Nokuro i tana' do payat do Gad tu' nosolod om noiyon do tulun di tumuku' dot id Tingolig do Milkom? Aiso' no kopio o tulun dot Israil do milo do mongintirung do kinoiyonon diri? 2 Nga' rumikot no o maso do porongohon ku do pinongkisan do sumangod i tulun do Raba, i bandar dot agayo do pomogunan dot Amon. Om osiliu nondo o bandar diri do pogun, om iri kawalayan do hiri'd posorili' nga' aayi' nopondo dot osorob. Om aanu nondo kawagu dot Israil i tana' dau do mantad id tulun di minonolod diri di gulu po. 3 Ihad kou no, oi tulun do Hisbon, tu' naraag no o bandar dot Ai! Oi tongoondu' do bandar do Raba, pogihad kou no om panampakai kou no do pakayan do mogihad do pointalang do tumongob kou. Pintangkus kou no tu' noborulong kou no. Atanggayan no moti' i Milkom i tingolig nu, dot id pomogunan do pisangod do miwoyo' dit imam om i tulun dau di sinakagon di raja'. 4 Nokuro tu' mokirayou kou, iyokoyu it a' otorodok? Nokuro tu' sumondiu kou do kinoris dokoyu di lumuhoi no? Poingkuro kopio kou do milo'd momoros dot aiso' i' o songulun piya do kasaap do manangod dokoyu? 5 Porikatan ku nondo iyokoyu'd kororongit do mantad id posorili' dokoyu. Mogidu' kou nondo, om sompori-pori kou nopo do mogihum do ralan do mamasi'd tinan dokoyu, om aiso' no o mongoi ponimung kawagu dokoyu. 6 Nga' koimbagu nopondo, om tondulion ku i' kawagu o koiyon-iyono' do bansa'd Amon. Iyoho' no i Tuhan o minomoros diti,” ka dau.
I Pomohukum do Tuhan dot id Idom
7 Poingkaa no o pinoboros do Tuhan it Osundu Kopio do pasal dot Idom, “Aiso' noddi toi o tulun dot Idom di milo do momusorou? A' noddi iyolo' nosihatan di tulun di mononosihat? 8 Oi tulun do Didan, guli' no om mogidu' i'! Ongoi no lisok! Raagon ku nondo o sinakagon di Isau tu' norikot no o maso ku do momohukum diyolo'. 9 Ondung haro o tulun do mongupu' do tua' dot anggur, om haro kasai' i' o pooluon diyolo', om ondung rumikot i manakau do dongotuong, om iri no i korohian dau ot onuon dau. 10 Nga' naanu ngai' ku no i songonuon di sinakagon di Isau om nokointalang ku i lilisokon diyolo'; gisom dot a' no iyolo' milo do lumisok. Nangapatai ngai' no i sinakagon dau om iso' pod tulun nga' aiso' no o nokopoggidu'. 11 Oi Idom, tongkiadai nopo dokoyu i tangaanak dokoyu dot aiso' o molohing, om gompion ku i' iyolo'; om iri tongoondu' dokoyu di nongopuadan nga' milo i' do sumondiu doho'. 12 Iri piya i tulun dit a' daa apatut do hukuman, nga' oontok i' do hukuman, om a' kou nogindo daa iyokoyu? Atantu' no dot iyokoyu nga' hukuman i'. 13 Sumumpa' oku no dot id suang do ngaran ku, dot osiliu nondo o bandar do Bosra do kinoiyonon di korolosi om i pogiiduan do tulun. Om irak-irakan nondod tulun o kinoiyonon diri om maan do pomomopol o ngaran dau. Om oinsanan nopondo i kawalayan do hiri'd posorili' dot osiliu'd pogun do gisom dot alaid. Iyoho' no i Tuhan, o minomoros diti,” ka dau. 14 Iyoho' no i Yoromia, o minomoros dot, “Oi Idom, nakaramit oku do habar do mantad id Tuhan. Om nokoporikot no iyau do susuhuon dot id bansa' do mongoi ponuhu' diyolo' do monimung do soudor om sumodia' do mongoi panangod diya'. 15 Om silihon ko nondod Tuhan do pomogunan dit oluhoi om it indaraaton do tulun. 16 Noudutan ko di kasawato' do ginawo nu. Aiso' i' o moddosi diya' do miagal dit osorou nu. Poingiyon ko dot id pogialatan do pampang, om id timpak do nuluhon. Nga' mulong piya do miagal di rumun do kondiu o kasawato' do kinoiyonon nu nga' polintuhunon ko i' do Tuhan do mantad hiri. Tuhan no o pinopoboros ngai'ddi,” ka dau. 17 Boros kad Tuhan, “Osiliu nondo do kopoddosian ot Idom, om koinsanai'd tulun do tumalib do hilo' nga' aranaban ngai' nopo om ooris tu' adalaan no kopio kawagat i kosusaan do nokoontok dot Idom. 18 Tu' poingkuro nopo o Sodom om Gomura do naraag do mitonggoi di kabandaran do hiri'd posorili', om iyo nogiddi ot Idom dot araag. Om iso' pod tulun nga' aiso' nondo o miyon do hilo'. Iyoho' no, i Tuhan o minomoros diti. 19 Sigog indo dot uyungon ku o tulun dot Idom do mantad hiri'd pomogunan diyolo', do miagal di singa do monigowo do lumabus do mantad id puru' dit id somok do Bawang do Yordan, om mongoi nondo dot id tiyonon di dumba' do mangakan-ngakan. Om momili' oku nondo do songulun o boyoon do momorinta' do pomogunan diri. Isai poo o milo do poiyoon doho'? Isai po o katama' do sumaap doho'? Haro toi o boyoon do kasaap doho'? 20 Iyo nopoddi om pokinongoho' no i natantu' mantad ku do wonsoyon ku dot id tulun dot Idom, om i wonsoyon ku dot id tulun do bandar do Timan. Iri piya i tangaanak diyolo' nga' gayaton i' do mogidu', om oinsanan nopondo o tulun do moddosi. 21 Om aratu' nopondo ot Idom, om haro nondo ot orongou dot ohiyo dit opuhod kopio gisom dot oguyu' nopo o pointongkop diti pomogunan; om orongou o giniakan di tulun do hilo'; do hilo' piya'd Rahat dot Aragang. 22 Iyo poddi kondiu di poungkalad o talad di pisangod do monimbit do Bosra. Om tontok nopondo do tadau'ddi om iyo pondo do tondu' di mogkosusu o soudor dot Idom dot opopoddosian,” ka dau.
I Pomohukum do Tuhan dot id Damsik
23 Poingkaa no o pinoboros do Tuhan do pasal do Damsik, “Atangkabo nondo om ooris o Hamat om Arpad tu' nokorongou no iyolo' do habar dot araat; songgogor-gogor po o ginawo diyolo' tu' aiso' no o pokukurayan diyolo', iyo po iyolo' di tumbak do rahat dit a' kosinonod. 24 Oluhoi no o tulun do Damsik, om nokopoggidu' no dot opopoddosian. Orualan poo iyolo' om oinggorit do miagal do tondu' di mogkosusu. 25 Nopogitotongkiadan noddi i bandar di nabantug, i bandar di haro o kaarapadan. 26-27 Tontok nopondo do tadau'ddi om angapatai nondo i katangaanakwoguan do hiri'd karalan-ralanan, om angapatai ngai' i soudor. Tutudan ku nondo i tingolig do Damsik, om uuhon ku do monorob i walai di Raja' Binhadad. Iyoho' no, i Tuhan it Osundu Kopio, o minomoros diti,” ka dau.
I Pomohukum do Payat do Kidar om Bandar do Hasor
28 Poingkaa no o pinoboros do Tuhan do pasal do payat do Kidar om i watas do porintaon di Hasor, i nosolod di Nobukadnisar, i raja' do Babil, “Oi Nobukadnisar, songodon no o payat do Kidar, om patayon no i tulun di ponong hilo'd koulayon! 29 Ahawon ngai' no i dumba' om unta, om i kiim diyolo' do mitonggoi do koinsanai di poinsuang do hiri, om pagarangon no dot id diyolo' dot, ‘Osorilian kou nondo do kopoddosian!’ kanto. 30 Oi tulun do Hasor! Iyoho' no, i Tuhan o minomoros do poingkaa: Nokopomusorou no i Nobukadnisar i raja' do Babil do mongoi panangod dokoyu. Boros ka dau, 31 ‘Kainou! Ngoyo' toko' saapo' i tulun dit osimbayan om it aiso' o koligagaanan. Aiso' i' o kointirung di bandar diyolo' tu' aiso' i' o wawayaan di kitotobon om aiso' o salampad di wawayaan,’ ka,” ka dau. 32 Boros ka kawagu'd Tuhan dot id di Nobukadnisar, “Ahawon ngai' no it unta diyolo' om i tayam-tayam diyolo'! Om potompiason ku nondo i tulun di pinampadan o tobuk. Om porikatan ku iyolo' do kosusaan do mantad id posorili' diyolo'. 33 Osiliu pondo do lilisokon do toni o Hasor, om osiliu do kinoiyonon dit aiso' o sumuni do gisom dot alaid; om iso' pod tulun nga' aiso' no mundorong do hilo'. Iyoho' no i Tuhan, o minomoros diti,” ka dau.
I Pomohukum dot id Ilam
34 Iti no o boros do Tuhan it Osundu Kopio dot id doho' do pasal do pomogunan dot Ilam do tontok di koimpuunon nogi' do pomorintaan di Sodokia i raja' do Yohuda. 35 Boros kad Tuhan, “Patayon ngai' ku nondo i gampamana' diyolo' di popokoris kopio dot Ilam. 36 Porikatan ku nondo ot Ilam do tongus do mantad id posorili' dau, om potiason ku nondo i tulun do hilo' do hinonggo-honggo nopo, gisom dot aiso' no o pomogunan dot a' orikatan do tulun di mogidu' do mantad hilo'd Ilam. 37 Om orison ku nondo o tulun dot Ilam dot id toguang di pisangod diyolo', di sipamatai diyolo'. Om patayon ku nondo iyolo', tu' otogod oku no kopio diyolo'. Om suhuon ku nondo i soudor do mongoi panangod diyolo', gisom dot opunso iyolo'. 38 Poingkakaton ku nondo do hilo'd Ilam i tirikohonon ku do momorinta', om hilo' nondo do pimpatayan ku i raja' om i boyoon diyolo'. 39 Nga' tondulion ku indo kawagu o koiyon-iyono' dot Ilam do koimbagu. Iyoho' no o Tuhan o minomoros diti,” ka dau.
Kinaalaan do Babil
1 Poingkaa no o boros do Tuhan dot id doho' do pasal do bandar do Babil, om i tulun di poingiyon do hilo', 2 “Powonsoyo' no i tanda' om popinghabaro' no dot id pogialatan do bansa', do naala' no o Babil! Nomumuk no o Mirodak, i tingolig dau, om nangababak i tininganak dau di kososomu', om i tingolig di koindaraat kopio. 3 Haro nondo o bansa' do mantad hilo'd utara do mongoi panangod do Babil, i poposiliu'd pomogunan diri do tana' dit a' sunian. Om aiso' nondo o miyon do hilo', do tulun ko' nintorusan poo, tu' oinsanan nopo do mogidu',” ka dau.
Guminuli' ot Israil
4 Boros kad Tuhan, “Tontok nopondo do maso'ddi, om rumikot nondo o tulun dot Israil om i tulun do Yohuda; om songihad-ihad pondo iyolo' do rumikot do mogihum doho', i Kinorohingan diyolo'. 5 Muhot nondo iyolo' di ralan do kumaa do hilo'd Sion, om mamanau do sumusui do ralan diri. Om momonsoi nondo iyolo' do tumpongo dot id doho' dit ogirot om poingompus, om a' diyolo' tolibambanan iri. 6 Miagal po do dumba' di natagak i tulun ku, tu' pinologos di gompomogompi' do mininghombo do hilo'd konuluhanan, om mingundaliu dot id piro-piro o nuluhon, gisom dot a' no diyolo' oilaan ondung honggo o walai diyolo'. 7 Om isai nopo i kobontol diyolo' nga' sumaap no diyolo', om momoros i pisangod diyolo' dot, ‘A' toko' i' kasala' do momonsoi do miagal diti. Tu' nokowonsoi i' iyolo' do dusa dot id Tuhan. Iri nopo taki-aki diyolo' om notumbayaan id Tuhan, om apatut daa dot iyolo' nga' otorodok i' dot id dau,’ ka diyolo'. 8 Oi tulun dot Israil, poggidu' nod sumoliwan do Babil! Pogulu kou no do tumongkiad, om sumusuhut i' i wokon. 9 Binsuhuon ku nondo o piro-piro o bansa' dit ongokoris do mantad ponong hilo'd utara do sumaap do Babil. Om posodiawon nondo diyolo' i soudor diyolo' do mongoi sangod do Babil om aala' i' diyolo' o Babil. Iyolo' nopo om mamamana' dit ongotiru' om a' insan dot a' koonong i pana' diyolo'. 10 Om apanakahan nondo o pomogunan do Babil, om ongkototos do minganu di dapu' o koinsanai di tulun do mongoi panakau'd hilo'. Iyoho' no i Tuhan o minomoros diti,” ka dau.
Kinaalaan do Babil
11 Boros kad Tuhan, “Oi tulun do Babil, pinanakau dokoyu i tulun ku. Ooropod kopio kou daa do miagal po di kuda' do minguni, om mimpanau kou nopo do miagal di sapi' di momogomos do gandum. 12 Nga' ointingayam indo om oindaraat i bandar dokoyu dit agayo. Osiliu nondo o Babil do tana' do kowotuan dit a' sunian om otuu om it aiso' no kopio o ngaran-ngaran dot id pogialatan do koinsanai'd pomogunan. 13 A' nondo oiyon kawagu o pomogunan do Babil tu' otogod oku no kopio, om osiliu pondo iri do pogun. Om aranaban ngai' nopondo om ooris o tulun di katalib do hilo'. 14 Oi dokoyu i gampamana'! Sodia' kou no do mongoi panangod do Babil, om turungkuon no dokoyu o bandar diri. Papanaon ngai' no o pana' dokoyu dot id Babil tu' nokowonsoi i' iyau do dusa dot id doho'. 15 Turungkuon no dokoyu o bandar diri om mimpangkis kou no do pangkis do sumangod, tu' nokoinsiriba' no iyau om mangakun do naala'. Nangahaba' no om nangaraag i tolig do hilo'. Tu' iri no o ponuli' ku do Babil. Wonsoyo' no dot id dau o miagal di winonsoi dau dot id tulun do suwai. 16 Kada' pologoso' o tulun do mananom do totonomon ko' mongomot po dot id pomogunan diri. Oinsanan nopondo o tulun do bansa'd suwai di poundorong do hilo' do gumuli' dot id pomogunan mantad diyolo' tu' ooris iyolo' di soudor do mongoi panangod,” ka dau.
Kogulian dot Israil
17 Boros kad Tuhan, “Tulun nopod Israil om miagal po di dumba' di nokopogitotongkiad do nouyung di singa. Tu' id gulu nopo do suminaap diyolo' nga' i raja' dot Asur om baino' noddi om i Nobukadnisar, i raja' do Babil o mongogop do tulang diyolo'. 18 Om gowoi poddi om iyoho' no, i Tuhan it Osundu Kopio, i Kinorohingan dot Israil o momohukum di Raja' Nobukadnisar om i pomogunan dau do miagal di pinomohukum ku di raja' dot Asur. 19 Nga' pogulion ku indo kawagu o tulun dot Israil do hilo'd pomogunan diyolo'. Om kaakan nondo iyolo' do hasil di tana' do hilo'd Nuluhon do Karmol om hilo'd Basan. Om ayahan indo iyolo' di hasil do tana' dit id watas dot Ipraim om Giliad. 20 Tontok nopondo do maso'ddi, om olidangan nondo ot Israil om Yohuda do mantad id dusa diyolo', tu' ompunan ku i' i tulun di pinasi ku. Iyoho' no, i Tuhan, o minomoros diti,” ka dau.
I Pomohukum do Babil
21 Boros kad Tuhan dot id bansa' di mantad hilo'd utara, “Ngoyon no songodo' i tulun do hilo'd Mirataim, om i hilo'd Pikod. Patayon no, om punsoon no kopio iyolo'. Wonsoyon ngai' no iti ponuhuan ku diya',” ka dau. 22 Orongou no do hilo'd pomogunan diri o tuni do pisangadan, om nadalaan nod nangaraag o hilo'. 23 Kotongkop nopo o pomogunan do binobog do Babil do gisom do nomumuk. Nga' baino' noddi om notipu' no i bobobog dau! Oinsanan nopo o bansa' do kotigowo do nokorongou di nosiliu dot id pomogunan diri. 24 Boros kad Tuhan, “Oi Babil, suminaap ko doho', om gowoi poddi om kosulung ko di lawa' do pamalawa' ku diya', nga' a' ko i' kopuriman. 25 Noiwangan ku no i kinoiyonon do rapo-rapo ku, om nokosoliwan ku no i rapo-rapo ku'ddi, tu' otogod oku no kopio tu' haro o wonsoyon ku, do hilo'd Babil, iyoho' i Tuhan it Asawat Kopio om it Osundu Kopio. 26 Sorilian nopo o Babil do manangod. Habaon nopo i sulap do pinoiyanan do gandum dau! Om potimbunon nopo i konunu-nunuan di panganu do mantad id pisangod do miagal do potimbun kou do gandum! Raagon nopo kopio o pomogunan diti! Kada' nod haro o poolu-oluon! 27 Patayon ngai' nopo i soudor dau. Alaon no iyolo'! Obungou no o bansa' do Babil! Tu' norikot no i maso do kopomohukuman diyolo'!” ka dau. 28 (Iri nopo i tulun di minogidu' do mantad hilo'd Babil om i kuminaa do hilo'd Yorusalim om minsusui no do kinowoyo-woyoo' do Tuhan, i Kinorohingan toko' do minonuli' di tulun do Babil di winonsoi diyolo' dot id Walai'd Sasambayangan dot Agayo.) 29 Boros kad Tuhan, “Sunudan no i gampamana' do manangod do Babil. Suhuon ngai' nopo do mamana' i milo do mamana'. Turungkuon no o bandar diri om kada' nod haro o songulun do koidu'. Sulian no o koinsanai di nongowonsoi dau, om wonsoyon nopo dot id dau o miagal di winonsoi dau dot id wokon, tu' suminawat o ginawo dau do suminaap doho', it Olidang Kopio, i Kinorohingan dot Israil. 30 Apatut no do patayon i tangaanakwagu dau do hilo'd karalan-ralanan do hilo'd bandar dau, om insanan i soudor dau do mamatai do tadau'ddi. Iyoho' no, i Tuhan o minomoros diti. 31 Oi Babil, asawat kopio o ginawo nu! Om gowoi poddi om sumaap oku diya', iyoho' i Tuhan it Asawat Kopio, i Kinorohingan dit Osundu Kopio. Tu' nokorikot no i maso do kopomohukuman ku diya'. 32 Katahub nondo om aratu' i bansa' nu di minggayo-gayo, om aiso' no o monulung diya' do monungag. Tutudan ku nondo i kabandaran nu, om araag ngai' nopondo i hiri'd posorili'ddi,” ka dau. 33 Boros kad Tuhan, it Osundu Kopio, “Noinggorit tomod i tulun dot Israil om tulun do Yohuda. Om koinsanai di minanangkap diyolo' nga' madtamong tomod diyolo' om a' no papalabu-labus diyolo'. 34 Nga' okoris oku i', iyoho' i mogobi' diyolo', ngaran ku nopo om Tuhan it Osundu Kopio. Om iyoho' nondo o manalasai di hal diyolo' om manahak do kosimbayanan do hiti'd pomogunan. Nga' kosusaan i' mando o porikoton ku dot id tulun do Babil,” ka dau. 35 Boros kad Tuhan, “Apatut nod patayon o Babil! Om i rayat om i pomorinta', om i tulun dit ongkitoilaan do hilo'. 36 Apatut nod patayon i nabi di goudut --- basug ngai' nopo iyolo'! Apatut nod patayon ngai' i soudor --- ongooris no kopio iyolo'! 37 Patayon ngai' no i kuda' om raagon i korita'-kuda' dau! Om a' no kogoos i soudor di godsian! Nangaraag ngai' no i kakayaan do Babil, om nangapanakau i dapu' dau. 38 Apatut nod rumasak ngai' i bawang do hilo', tu' noponu' po o Babil do tingolig di kotompurolosi, i mongulau di tulun do modsubak diri. 39 Gowoi pondo om osiliu do tiiyonon do rogon om rusod dot araat o hilo'd Babil om tiiyonon do tombolog di roitan do tombolog dot unta. Om a' nondo do tulun iyonon o hilo' do gisom dot alaid. 40 Om miagal nondo di nosiliu dot id Sodom om Gomura do tontok di rinaag ku o bandar diri om i kawalayan do hiri'd posorili', ot osiliu dot id Babil. Om aiso' nondo o tongoiso' piya do tulun do mongoi kawagu iyon do hilo'. Iyoho' no i Tuhan o minomoros diti. 41 Rumikot no o bansa' do mantad id pomogunan do hilo'd sodu', i ponong hilo'd utara, i bansa' dot okoris kopio. Rumikot iyolo' do miwoyo' do raja' dot ogumu'. Om posodia' no iyolo' do sumangod. 42 Kipana' iyolo' om kigayang; ongorongit tomod iyolo' om a' mangampun. Miagal poddi ngorod do rahat o tuni do kuda' diyolo', do tontok di posiahon diyolo' do mongoi panangod do Babil. 43 Korongou nopo i raja' do Babil do habar diri, nga' lomok tomod nopo iyau. Noponu' po iyau do kopoddosian, om oinggorit iyau do miagal di tondu' do mogkosusu. 44 Monigowo oku nopondo do rumikot, iyoho' i Tuhan, do miagal do singa do sumoliwan do mantad id puru' dit id somok do Bawang do Yordan om mongoi do hiri'd kobuturan di pangakan-ngakanan do dumba'. Om popoggiduon ku nondo i tulun do Babil do mantad id bandar diyolo'. Om iri nondo i boyoon di pilion ku o momorinta' do pomogunan diri. Isai po o milo do poiyoon doho'? Isai po o katama' do sumurilog doho'? Haro po toi o boyoon di kasaap doho'? 45 Iyo nopoddi om pokinongou no di natantu' mantad ku do wonsoyon ku dot id bandar do Babil, om i potiwonsoyon ku no dot id tulun do hilo'. Tu' iri piya tangaanak diyolo' nga' angagayat ngai' i' do mogidu', om oinsanan nopondo o tulun do moddosi. 46 Aala' nopondo o Babil, om haro nondo o kagangahan dit adalaan kopio, gisom dot oinsanan nopo iti pomogunan dot oguyu', om i giniakan di tulun do hilo' nga' orongou i' do bansa'd suwai,” ka dau.
I Pomohukum do Suwai dot id Babil
1 Boros kad Tuhan, “Poporikot oku nondo do tongus di mamaraag do tumongus do ponong id Babil om id tulun di poingiyon do hilo'. 2 Poporikot oku nondo do tulun di bansa'd suwai do mongoi pamaraag do Babil, do miagal di tongus do monilib do tapol do gandum. Om orikot nopondo i tadau do kapamaraagan om tumutuk nopo iyolo' do pomogunan diri do sumaap om gisom dot aiso' no ot oolu-olu' do hiri'd pomogunan diri. 3 Kada' onuwai do maso i soudor do papapana' di pana' diyolo' ko' manampakai po di rorosukon diyolo'd sumangod. Kada' dokoyu posio' i tangaanakwagu! Punsoon ngai' nopo i soudor diyolo'. 4 Ongosuhat nondo iyolo' om angapatai do hiri'd karalan-ralanan di hilo'd bandar diyolo'. 5 A' ku i' tongkiadan ot Israil om Yohuda, iyoho' i Tuhan, i Kinorohingan dit Osundu Kopio, i Kinorohingan dot Israil dit Olidang, do mulong piya do nokowonsoi iyolo'd dusa dot id doho'. 6 Poggidu' no do mantad id Babil, om apasi kou i'! Kada' kou hompit dot apatai tu' kidusa i' o Babil. Sumuli' oku noddi om hukuman ku no o Babil do miontok di nowonsoi dau. 7 Miagal daa do sangkir do tamas o Babil do poingigit ku, do mangauk do koinsanai'd pomogunan. Minonginum ngai' i bansa'd tulun do waig dot anggur do mantad id sangkir diri gisom do nongoulau ngai' iyolo'. 8 Sigog iddi do karatu' o Babil om kababak nopo! Pogihadai no iyau! Ongoi no pogihum do tubat do pongubat di suhat dau om ulan toi' om olingasan iyau. 9 Boros ka di tulun do bansa'd suwai di poundorong do hilo' do mogiboro-boros, ‘Tuminotos toko' i' daa do minonguhup do Babil, nga' alaid toko' iddi kopio do nokorikot. Nga' mogot nogi' do tumongkiad toko' do pomogunan diti om muli' do hilo'd pomogunan toko'. Tu' nohukuman nod Tuhan do hukuman dit awagat kopio, om kaayi' nopoddi do naraag!’ ka diyolo',” ka dau. 10 Om boros ka di tulun di songonuon do Tuhan, “Nokointalang nod Tuhan dot otopot toko'. Kainou ngoyo' toko' sunudai i tulun do hilo'd Yorusalim di nowonsoi'd Tuhan, i Kinorohingan toko' dot id dati',” ka diyolo'. 11 Nobinsuhu' nod Tuhan o ginawo di raja' do Modia, tu' potiraagon no dau o Babil. Om iyo noddi iyau do sumuli' do winonsoi di tulun di minamaraag di Walai'd Sasambayangan dot Agayo. Om boros ka di boyoon do soudor, “Lohisai dokoyu o pana' dokoyu! Om posodiawo' dokoyu o kolid! 12 Powonsoyo' dokoyu i tanda' do songodon o tolig do Babil. Pogiroto' no i padtamangan! Suhuo' nod mongoi tamong i tulun do madtatamong! Om ponuhu' nod tulun do mongoi awang!” ka dau. Tu' nowonsoi nod Tuhan i nokoboros dau do wonsoyon dau dot id tulun do Babil. 13 Ogumu' daa o bawang om kaya' o pomogunan diri, nga' naayi' no o maso dau do poimpasi, om norikot no o kopupuson do tumur dau. 14 Tu' nokosumpa' no o Tuhan, it Osundu Kopio, dot id suang do ngaran dau do poporikot iyau do tulun dot ogumu' do mongoi sangod do Babil; i tulun di miagal pod katat kogumu', om mimpangkis pondo iyolo' tu' nakamanang no iyolo'.
Sinding do Pamarayou'd Kinorohingan
15 Winonsoi'd Tuhan iti tana' dot i sinundu dau o pinomonsoi, om i toilaan dau o pinomonsoi dau diti pomogunan, om pinapawalad dilo tawan. 16 Om moro-boros nopo iyau do monuhu' nga' ongorod nopo i waig do hilo'd soibau dilo tawan om poporikot iyau do haun do mantad hilo'd tisan do tana'. Pakalab iyau do kodumaat di maso do rumasam, om posoliwan iyau di tongus do mantad id pinoiyanan dau. 17 Om kokito poddi o tulun do koinsanai'ddi om kopuriman nogiddi o tulun do basug iyau om aiso' o guna' dau. Om iri tulun di momonsoi do tingolig nga' oiman-iman nopo tu' iri nopo ponokokinorohingan diyolo' om okon i' ko' Kinorohingan kopio, om aiso' o pinuhobo. 18 Aiso' i' o kootuk-otukon diri om apatut no dot indaraaton om hingi-hingion, raagon indod Tuhan iyolo' do korikot iyau do mongoi pamaraag diyolo'. 19 A' i' iyo di tingolig o Kinorohingan di Yakub; tu' iyau no i minomonsoi do koinsanai'd nunu nopo, om nopili' no dau ot Israil do sumiliu'd tulun dau. Ngaran nopo dau nga' Tuhan it Osundu Kopio.
Babil Nopo om Miagal do Dunsul
20 Boros kad Tuhan, “Oi Babil, iya' no o ponokodunsul ku, i pakakas ku'd sumangod. Pinakai ku iya' do minanangod do piro-piro o bansa' om pomorintaan. 21 Om minamatai do kuda' om i tulun di songinsakai di kuda', om minamaraag do korita'-kuda' om minamatai di tulun di papamanau, 22 om minamatai do kusai om tongoondu', om i komolohingan om i tongomulok po, om i tangaanakwagu om i kosumandakan. 23 Om pinakai tiya' do pinonumbali' di gompomogompi' do dumba' om i baanan diyolo', om i gompongumo om i sapi' diyolo' di pamaradu, i pomorinta' om i pagawai dit asawat o pangkat,” ka dau.
I Pomohukum do Babil
24 Boros kad Tuhan, “Okito oku indo diya' do monuli' do Babil om i tulun do hilo', do koinsanai'ddi nongowonsoi diyolo' dot araat dot id Yorusalim. 25 Oi Babil, iya' nopo om miagal do nuluhon di mamaraag do koinsanai diti pomogunan, nga' iyoho' no, i Tuhan o pisangod nu. Gayaton ku nondo iya', om poisison ku iya' do hilo'd tana', om pologoson ku iya' dot osorob do gisom dot aawu. 26 Om aiso' nondo o tiso' di watu nu do hiri'd kinaraagan nu dot apakai kawagu do maan do pamaal. Osiliu ko nondo do miagal do tana' do kowotuan do gisom dot alaid. Iyoho' no i Tuhan, o minomoros diti. 27 Oi raja' do mantad id utara! Powonsoyo' no i tanda' do pogintutunan do mongoi sangod! Pounio' no i torumpit om korongou ngai' i' i bansa'! Posodiawo' no i bansa' do sumaap do Babil! Sunudan no i pomorinta' dot Ararat, om Mini, om Askinas do mongoi sangod. Pomili' no dot iso' o boyoon do momohuruan di pisangadan. Om ngoyo' ngai' no i kuda', i miagal pod katat kogumu'. 28 Posodiawo' no i bansa' do mongoi sangod do Babil. Porikoto' no i raja' do Modia, i boyoon diyolo' om i pagawai, om i soudor do mantad id koinsanai di pomogunan do porintaon diyolo'. 29 Gumogor po om gumuyu' iti tana' tu' bayaanon ku no i natantu' mantad ku do posiliu do Babil do tana' dit a' sunian, om it a' iyonon do tulun. 30 Nokotingkod no i soudor do Babil do monokisangod om songundorong no do hiri'd kuta' do pogintirungan diyolo'. Natagakan no iyolo' di kosioho' diyolo' om a' no iyolo' kogoos. Nangaraag no i totobon di bandar, om nongotutudan i kawalayan. 31 Mogisuhut-suhut nopo o tulun do mongoi pomisunud di raja' do Babil do notutukan nod pisangod i bandar dau. 32 Nosolod no di pisangod i sosoborongon do hilo'd bawang om nongotutudan no o kuta' di pogintirungan. Nangatagakan nopo do pomusorou i soudor do Babil. 33 Om a' no alaid dot alaon iyolo' di pisangod diyolo' om pingulakan nogindo iyolo' do miagal di gandum do hiri'd pamagamasan. Iyoho' no, i Tuhan it Osundu Kopio, i Kinorohingan dot Israil, o minomoros diti,” ka dau. 34 Minumuk di raja' do Babil o Yorusalim om akano' nogiddi dau do gisom do naayi'. Pinasaug dau o suang di bandar do miagal do papasaug do suang do luping; om miagal po iyau do naga' do minonolon do Yorusalim. Pininganu dau i korohian dau di hiri'd bandar om iri no suwai om pinintaam dau. 35 Pologoson nod momoros i tulun do Sion dot, “Babil po daa o mamabo di kararaat do winonsoi dau dot id dahai!” ka. Pologoson nod momoros i tulun do Yorusalim do, “Babil po daa o mamabo di kinoinggoritan dahai!” ka.
Uhupan i' do Tuhan ot Israil
36 Om boros kaddi do Tuhan dot id tulun do Yorusalim, “Salasayon ku i' i hal dokoyu om hukuman ku i pisangod dokoyu do gama' di winonsoi diyolo' dot id dokoyu. Rasakan ku nondo i tudan do waig do Babil om arasakan i' i kabawang-bawangan do hilo'. 37 Om osiliu nondo do kinotimungon do kinaraagan o pomogunan diri om tiiyonon pod nintorusan. Om araat tomod nondo o kokitanan diri; om aiso' no o miyon do hilo', om ongooris ngai' nopondo i kokito'ddi. 38 Om minggarom pondo i tulun do Babil do miagal do singa om minguni do miagal do tangaanak do singa. 39 Tamaha' no kopio iyolo'! Posodiaan ku indo iyolo' do poginakanan om owukon ku nondo iyolo' om posonongon ku o ginawo. Om koodop nondo iyolo' om a' nondo oposik kawagu. 40 Om ngoyon ku nondo iyolo' sumbolio' do miagal do tanak do dumba', om kambing om kambing di tontoluhan. Iyoho' no i Tuhan, o minomoros diti,” ka dau.
Kinootuson do Babil
41 Boros kad Tuhan do pasal do Babil, “Natangkap no i bandar di royohon daa do koinsanai do pomogunan! Korolosi tomod diri o kokitanan di bansa' do Babil! 42 Nalampayan do rahat o Babil om noolitan di tumbak dit opuhod tomod o pomogunan diri. 43 Korolosi tomod o kokitanan di kabandaran om miagal pod tana' do kowotuan dit otuu tomod, om it a' iyonon om a' wayaan do tulun. 44 Hukuman ku nondo o Bil, i ponokokinorohingan do Babil, om suhuon ku iyau do popoguli' di dapu' di pinanakau dau, om a' indo tumuku' dot id dau i piro-piro o bansa'd tulun. Nangaraag no i tolig do Babil. 45 Poggidu' kou no do mantad hiti, oi tulun dot Israil! Poggidu' kou no om apasi kou i' do mantad id kototogod ku dit a' ogina-gina'. 46 Kada' koluhoi o ginawo om kada' poddosi di habar dot orongou dokoyu. Tu' minsuwai o habar dot orongou do monikid toun, i habar do pasal do kororongit do hilo'd pomogunan diri om i habar do pasal di raja' do mogisasaap. 47 Kotumbayaai no do rumikot no o maso do hukuman ku o tingolig do Babil. Om ointingayam ngai' nopondo o pointongkop di pomogunan om aayi' nopondo dot apatai i tulun do hilo'. 48 Oinsanan nopondo do mimpangkis dot atataadan i hiti'd pomogunan om i hilo'd tawan dot aala' o Babil di bansa' di mongoi pamaraag diri, i mantad hilo'd utara. 49 Babil i' o nakapatai do tulun do pointongkop diti pomogunan, nga' baino' nondo om aala' no o Babil tu' iyau i' o nakapatai dot ogumu' o tulun dot Israil. Iyoho' no i Tuhan, o minomoros diti,” ka dau.
Boros do Tuhan dot id Tulun dot Israil di Hilo'd Babil
50 Boros kad Tuhan dot id tulun dot Israil di hilo'd Babil, “Nokoidu' kou no do mantad id kapatayon! Om pamanau kou no do dinondo! Kada' kou no andad! Tu' mulong po dot osodu' kou do mantad hilo'd pomogunan dokoyu nga' soroho' oku no, i Tuhan dokoyu, om soroho' no o Yorusalim. 51 Boros ka dokoyu, ‘Noindaraat om nointingayam iyahai; om aiso' no o milo dahai do pokukurayan tu' nosowoli no do bansa'd suwai i kinoiyonon dot olidang do hiri'd Walai'd Sasambayangan dot Agayo,’ ka dokoyu. 52 Iyo nopoddi om pokinongoho' no dokoyu o poboroson ku do rumikot no o maso do hukuman ku i tingolig do Babil, om mingodoi pondo i tulun di nongorualan do pointongkop di pomogunan. 53 Om mulong po do koindakod o Babil do hilo'd tawan om momonsoi do kuta' do pogintirungan do hilo', nga' poporikot kasai' oku i' do tulun do mongoi pamaraag diri. Iyoho' no i Tuhan, o minomoros diti,” ka dau.
I Pamaraag Kawagu do Babil
54 Boros kad Tuhan, “Pokinongoho' no i tihad do tulun do hilo'd Babil, om i mogihad do kinaraagan do hilo'd pomogunan diri. 55 Raagon ku no o Babil, om tingkodon ku it ohiyo do hilo'. Osiau nopo do sumuang i soudor do pisangod do miagal po di tumbak dot akahas, om ohiyo tomod iyolo' do mongoi sangod. 56 Ruminikot iyolo' do mongoi pamaraag do Babil; nangatangkap no i soudor do Babil, om nongotipu' no i rapo-rapo diyolo'. Iyoho' no o Tuhan di momohukum dit araat, om wonsoyon ku nondo dot id Babil o miontok di nowonsoi dau. 57 Owukon ku nondo i pomorinta' do Babil, i tulun di kitoilaan, om i boyoon, om i soudor, do gisom do koodop iyolo' om a' nondo iyolo' kotungag do gisom dot alaid. Iyoho' no i raja' o minomoros diti. Iyoho' no i Tuhan, it Osundu Kopio. 58 Kataam nondo do hilo'd tana' i tolig do Babil, it ogirot daa'ddi, om i wawayaan dit akawas nga' osorob nondo. Aiso' i' o kinootus-otuson di winonsoi di piro-piro o bansa'; tu' nongosorob i' i pininghuyanan diyolo'. Iyoho' no i Tuhan, it Osundu Kopio o minomoros diti,” ka dau.
Pinosunud do Hilo'd Babil i Boros di Yoromia
59 Iri nopo madtatamong kasai' di Raja' Sodokia om i Soraya, i tanak di Noria, i manangaki di Maasiya. Om tontok di kaapat do toun dot i Sodokia o raja' do Yohuda, om minoyo' i Soraya di Sodokia do minongoi do hilo'd Babil, om onuwai ku noddi i Soraya dot iso' o karaja'. 60 Tinulis ku dot id iso' o buuk o koinsanai di karaagan do rumikot dot id Babil, om kohompit nogi' i piro-piro o hal do suwai do pasal do Babil. 61 Om bilinai ku noddi i Soraya do poingkaa, “Korikot ko nopondo do hilo'd Babil, om basaon no kopio dot opuhod o boros dot id tulun do hilo' o koinsanai di nongotulis do hiti'd buuk diti. 62 Om sumambayang no dot, ‘Oi Tuhan, nokoboros nu no do raagon nu iti kinoiyonon diti, om aiso' no o songimpasi do poingiyon do hiti, aiso' o tulun om aiso' o nintorusan, om osiliu nondo do tana' do kowotuan do gisom dot alaid!’ kanto. 63 Om aayi' nu nopondo do mambasa' iti buuk, oi Soraya, om pokogoson noti dot id watu om pataamon no do hiri'd tanga' di Bawang dot Iprat, 64 om poboroson no o poingkaa, ‘Iyo nodti ot osiliu dot id Babil --- olonsod nondo iyau om a' no kahampung kawagu, tu' porikatan nod Tuhan do karaagon o bandar diti,’ kanto,” kangku. Hiti-hiti no o kooiyon do boros di Yoromia.
Kinaalaan do Yorusalim
1 Duwo nogi' nohopod om iso' o toun di Sodokia do tontok di nosiliu iyau do raja' do Yohuda. Om hopod om iso' o toun dau do minomorinta' do hilo'd Yorusalim. Ngaran nopo di tina' dau nga' i Hamutal, i tanak di Yoromia, i poingiyon do hilo'd bandar do Libna. 2 Om i Raja' Sodokia nga' minomonsoi i' do dusa dot id Tuhan do miagal di nowonsoi di Raja' Yoyakim. 3 Om notogod tomod diri o Tuhan di tulun do Yorusalim om tulun do Yohuda gisom dot a' no dau podulon iyolo'. Om saap po i Sodokia di Raja' Nobukadnisar i raja' do Babil, 4 om gowoi poddi om rikot no i Nobukadnisar do miwoyo' do koinsanai di soudor dau om ngoyo' no diyolo' songodo' o Yorusalim di tadau'd kohopod di tulan do kohopod, di kosiam do toun do pomorintaan di Sodokia. Om undorong no iyolo' do hiri'd soliwan di bandar om pomonsoi nod tolig do maan do ponurungku' di bandar, 5 om pointutuk nopoddi kasai' iyolo' di bandar do gisom di kohopod om iso' do toun di Sodokia do momorinta'. 6 Om tontok di tadau do kosiam di tulan do kaapat do toun diri, tontok dit adalaan noddi kopio do mononglous om aiso' no o takanon do tulun, 7 om kolopuson noddi do pisangod i tolig di bandar. Nga' mulong po do tinutukan di tulun do Babil i bandar diri nga' oinsanan nopo i soudor do Yohuda do minogidu' do tontok di dongotuong. Minogidu' iyolo' do minaya' di kabun do raja', om waya' no di wawayaan di popiromut di duwo o tolig, om poggidu' no iyolo' do kuminaa ponong hiri'd Rantai do Yordan. 8 Nga' ginusa' i' di soudor do Babil i Raja' Sodokia, om katangkap no diyolo' iyau di hilo'd Rantai do Yorikou, om tongkiad ngai' nopo dau i soudor dau. 9 Om pootodo' noddi i Raja' Sodokia dot id di Raja' Nobukadnisar, i hilo'd bandar do Ribla it id watas do Hamat, om hilo' no do pinorotuan iyau do hukuman do kapatayon. 10 Om hilo' nod Ribla do pinatai di Raja' Nobukadnisar i tangaanak di Raja' Sodokia, dot antang-antangan di Raja' Sodokia. Om pinatai ngai' nogi' dau i pagawai do Yohuda. 11 Om irulo' noddi dau i mato di Raja' Sodokia om kagasai no dau iyau om tanggayai no do hilo'd Babil. Om hiri noddid giil i Raja' Sodokia do hilo'd Babil do gisom do kinapatayo' dau.
Rinaag i Walai'd Sasambayangan dot Agayo
12 Tontok di tadau do kohopod di tulan do kolimo di kohopod om siam do toun di Raja' Nobukadnisar do momorinta' do Babil, om ongoi nod hilo'd Yorusalim i Nobusaradan, i ponosihat di raja' om boyoon di soudor di Nobukadnisar. 13 Om tutudai no dau i Walai'd Sasambayangan dot Agayo om i walai di raja', om i kawalayan do koinsanai di tulun dit ongkipangkat do hilo'd Yorusalim; 14 om raago' no di soudor dau i tolig di bandar. 15 Om tanggayai no di Nobusaradan do hilo'd Babil i tulun di nongoolu-olu' do hiri'd bandar, i piro-piro tukang om i tulun di minogidu' om minongoi amung do tulun do Babil. 16 Nga' pinoundorong i' dau do hilo'd Yohuda i wookon do tulun di mosikin kopio, it aiso' o dapu', om suhuo' no dau iyolo' do morobuat do hiri'd kabun dot anggur om hiri'd koumaan. 17 Om mumuko' nopo di tulun do Babil do minamabak i piro-piro torigi do tambaga' om i korita'-kuda' do hiri'd Walai'd Sasambayangan dot Agayo om i tangki' do tambaga' dit agayo, om igitai ngai' nopo diyolo' i tambaga'ddi do hilo'd Babil. 18 Om nigitan nogi' diyolo' i ponononduk do tana', om i poiiyanan do tauu di pakayon do tontok di momolinahas di pananaraban do porsombahan, om i piro-piro pakakas do lampung, om i mangkuk di panahau di raha' do mantad id porsombahan do sinumbali', om i mangkuk di podtutudan do kominyan, om koinsanai di pakakas do tambaga' do suwai di pakayon do sumambayang do hiri'd Walai'd Sasambayangan dot Agayo. 19 Om tinanggayan ngai' nogi' diyolo' o koinsanai di tamas om pirok do winonsoi: i piro-piro mangkuk dit ongokooro', om i talam di poiyanan do popou, om i mangkuk di poiyanan do raha' di porsombahan di sinumbali', om i poiyanan do tauu, om i potitimpakan do lampung, om i mangkuk do poiyanan do kominyan, om i mangkuk di ponimbauk do popotungu di porsombahan do waig dot anggur. 20 Om iri nopo winonsoi di Raja' Suliman do tambaga' do winonsoi do maan do hiri'd Walai'd Sasambayangan dot Agayo, i duwo o torigi, i korita'-kuda', i tangki' dot agayo, om i hopod om duwo o sapi' di pinoimpahan di tangki' nga' adalaan no kopio kawagat iri gisom dot a' no milo'd timbangon. 21-22 Iri nopo duwo o torigi'ddi nga' miirad nopo: sopiwalu' o mito do kasawato' om 5.3 o mito do kogoyoo'. Om haro o luang do hiri'd tanga' di torigi'ddi, om kakapalo' nopo di tambaga' nga' 75 o milimito. Om iri nopo pinongulu di duwo o torigi'ddi nga' 2.2 o mito o kasawato' om pointutuk nopo di pinongulu'ddi om winansayan do rinambo-rambot om linumis do pinoiyo-iyo do tua' do delima, di tambaga' ngai' do winonsoi. 23 Om sopihatus o pinoiyo-iyo do tua' do delima do hiri'd rinambo-rambot di hiri'd pinongulu di duwo o torigi'ddi. Nga' siam no nohopod om onom do mantad diti tua' do delima diti ot okito do mantad hiri'd siriba'.
Tinanggayan do Pisangod i Tulun do Yohuda do Hilo'd Babil
24 Suwai no ko' iri, om tinangkap po di Nobusaradan i Soraya i Boyoon dot Agayo dot Imam, om i Sipania i wakil di Soraya, om tolu o tulun di madtatamong di wawayaan di Walai'd Sasambayangan dot Agayo, 25 om i turu' o gomponosihat di raja' di hiri'd bandar, om i boyoon di soudor, om i wakil di boyoon do soudor i mongilo-ilo di soudor, om onom nohopod o tulun do suwai dit angasawat o pangkat. 26 Om tanggayai ngai' nopo dau i tulun diri om pootodo' no dot id di Raja' Nobukadnisar do hilo'd bandar do Ribla, 27 i hilo'd watas do Hamat. Om hilo' no do ninggorit iyolo', om patayo' nogiddi. Om iyo noddi o kinowoyo-woyoo' di tulun do Yohuda do tinanggayan do pisangod, do mantad hilo'd pomogunan diyolo'; 28-30 oinsanan nopo nga' 4,600 o tulun. Om pogisuhut-suhuto' nopo di Nobukadnisar do minononggoi iyolo': 3,023 o tulun do tinanggayan do tontok di toun do koturu' do pomorintaan dau, om 832 o tulun do mantad hilo'd Yorusalim do tinanggayan dau do tontok di toun do kohopod om walu' do pomorintaan dau, om 745 o tulun do tinanggayan di Nobusaradan do tontok di koduwo nohopod om tolu do toun do pomorintaan di Nobukadnisar. 31 Om tontok di toun do nosiliu'd raja' do Babil i Iwil-Mirodak, om ninsianan diri dau i Raja' Yoyakin i raja' do Yohuda, tu' pinalabus dau iyau do mantad id giil. Winonsoi dau iti di tadau'd koduwo nohopod om limo do tulan di kohopod om duwo di kotolu nohopod om turu' do toun do mantad di natanggayan i Yoyakin dot id pomogunan do pisangod. 32 Om osonong i' o winonsoi di Mirodak dot id dau om nonuan dau iyau do pangkat dit asawat ko' mantad di raja'd suwai di nangatanggayan do pisangod do hilo'd Babil. 33-34 Om a' noddi iyau mamakai di pakayan di songinggiil, om makan kasai' iyau do hiri'd walai di raja', om onuan iyau do tusin do maan dau'd kosukup-sukupan do solinai'd dau'd poimpasi.
Koinggoritan do Yorusalim
1 Oingou noddi o Yorusalim do baino', i bandar di noponu' daa'd tulun di gulu po. Abantug tomod daa iyau dot id pogialatan do bansa', nga' miagal poddi iyau do tondu' di nopuadan do baino'. I bandar do poinggoyoon daa di gulu po, nga' porintaon noddi do bansa'd suwai do baino'. 2 Monuaban nopo iyau do mihad; lumuyung po o romou dau dot id pingas dau. Aiso' no o tiso' di tambalut kopio dau di gulu po do monginsasamod dau. Naakalan iyau di tongotambalut dau, om oinsanan nopoddi iyolo' do sumaap dau do baino'. 3 Oinggorit tomod diri i tulun do Yohuda; sinansagan iyolo' do tumongkiad do pomogunan diyolo', om nosiliu diri iyolo'd turipon. Hilo'd pomogunan do suwai o tiyonon diyolo', om aiso' no o kinoiyonon di milo diyolo'd roitan do tiyonon kopio diyolo'. Om notutukan po iyolo'd pisangod, om aiso' no o pokukurayan diyolo'. 4 Aiso' noddi o mongoi do hilo'd Walai'd Sasambayangan dot Agayo do tontok do tadau dot agayo. Oinggorit po ngai' i tongoondu' di modsisinding do hilo', om mingodoi ngai' po i tulun dit imam. Aiso' no o tulun do sampanau-panau do hilo'd wawayaan do bandar, om tumongob po tomod o Bandar do Sion. 5 Nakamanang i pisangod dau; tu' nokosuang no iyau dot id kuasa' diyolo'. Ninggorit iyau'd Tuhan tu' ogumu' no kopio i dusa dau. Nangatangkap i tulun do hilo', om nangatanggayan do pisangod. 6 Susui-susui poo i kobontugo' do bandar do Yorusalim. Om miagal pod paus di mogidu' do mantad id magagasu, i piro-piro o boyoon diyolo' di louson no om it a' no kogoos. 7 Osorou do Yorusalim i maso di notoliban, tontok dit ogumu' po o dapu' dau nga' karaag noddi iyau om oinggorit diri. Tontok di naratu' iyau dot id longon do pisangod, om aiso' i' o tongoiso piya'd tulun do minongoi ponulung dau; om mingirak po i pisangod do kokito do naraag iyau. 8 Sinosomu' do Yorusalim o tinan dau, tu' minomonsoi i' iyau do dusa dit araat kopio. Om poillabas poddi iyau do baino' om intingayamon; nangatanus ngai' no o kagayaan dau. Mingodoi po iyau, tu' ointingayaman no kopio iyau. 9 Atalang tomod i kososomuo' dau, nga' a' i' iyau momusorou di kootuson dau. Om araat tomod diri i kinaraagan dau, nga' iso' pod tulun nga' aiso' i' o monginsasamod dau. Nakamanang i pisangod dau, om mihad poddi iyau do mokiinsian do Tuhan. 10 Nahawan iyau di pisangod dau do koinsanai di dapu' dau; om nokito dau iyolo' do suminuang di Walai'd Sasambayangan dot Agayo; mulong piya daa do pogoduhan do Tuhan o tulun dot okon ko' tulun do songonuon do Tuhan do sumuang do hiri. 11 Mingodoi po i tulun dau do mogihum do kaakan-akanan; om poolonon nopo diyolo' i dapu' diyolo' do taakanon, om a' i' iyolo' apatai. Mihad poo o Yorusalim do moro-boros do poingkaa, “Oi Tuhan, antangai ngai' no iti koinggoritan ku. 12 Oi tongoulun di tumalib do hilo'd ralan, ontong no om antangan no kopio. Aiso' po nokoumbal do kitoruol do miagal diti doho', i toruol di pinorikot do Tuhan dot id doho' do maso dit otogod iyau. 13 Pinoporikot iyau do tapui do mantad hilo'd tawan, i minonorob do tulang ku do gisom dot oruol no kopio. Pinapataan iyau do lawa' dot id dabantalan ku i pinaparatu' doho'. Om tongkiadai oku noddi dau do hiri dot a' otingkod-tingkod dot oinggorit. 14 Nanu dau o koinsanai di dusa ku, om pogiwongkos-wongkoso' noddi dau dot iso' o kinawangkasan, om pokoroo' no dau iri dot id liou ku, om olomok oku noddi dot awagatan. Pinatahak oku'd Tuhan dot id pisangod ku, om aiso' no o milo ku'd pokukurayan do sumaap diyolo'. 15 Pinoinsiriba' do Tuhan o koinsanai di gunsiou ku dit ongokoris. Pinoporikot iyau do soudor do mamatai di tangaanakwagu ku. Nulakan dau i tulun ku do gisom do nomumuk, do miagal di tua' dot anggur do pagaon di tulun di mamamaga'. 16 Iri noddi o nokobungou do romou ku do moninuru', aiso' no o koinsasamod doho', om aiso' o mongodsuur doho'. Naala' oku no di pisangod ku, om aiso' no o nunu-nunu do noolu' dot id tulun ku. 17 Poinsawato' ku no o longon ku do mokiuhup, nga' aiso' i' o monginsasamod doho'. Nolohou nod Tuhan o pisangod do sumaap doho' do mantad id posorili' ku; om iyoon oku pod rinomos, om i noutong no dot id pogialatan diyolo'. 18 Nga' otopot i' o Tuhan, tu' a' ku i' numboyo' i ponuhuan dau. Pokinongou no doho', oi koinsanai'd bansa'! Ontong kou no doho' dot id koinggoritan. Nangatangkap no om nangatanggayan do pisangod i tangaanakwagu ku om i kosumandakan ku. 19 Minomolohou oku di kongoombolutan ku nga' minada' i' iyolo' do monulung doho'. Minatai ngai' do hilo'd karalan-ralanan do bandar i tulun dit imam om i boyoon do bansa' do daamot diyolo' do mingihum do takanon do pongoput daa do pinuhobo diyolo'. 20 Antangai oku no, oi Tuhan, mihad oku po om tumongob oku, om norualan o ginawo ku do gama' di dusa ku. Mogipapatai poo o hilo'd karalan-ralanan, om id suang piya do walai nga' haro i' o kapatayon. 21 Pokinongoho' no iti todoi ku, oi Tuhan, aiso' no o koinsasamod doho'. Otood tomod i piro-piro o pisangod ku tu' pinorikatan oku i' diya' do kosusaan. Porikoto' no i tadau di nakabatos nu; inggorito' no i pisangod ku do miagal doho'. 22 Antangai ngai' no i kararaat diyolo', hukuman no iyolo' do miagal di pinomohukum nu doho', dot i dusa do winonsoi ku dot id diya' o kinopomohukuman nu doho'. Mingodoi oku po dot id suang do koinggoritan, tumongob oku po om aiso' o pokukurayan ku,” ka dau.
Hukuman do Tuhan o Yorusalim
1 Kinuluputan do Tuhan do totuong o Sion, tu' atatagadan no iyau. Pinataam dau do hiti'd pomogunan i kobontugo' dot Israil dit iyo pod tawan kasawat. Om iri piya walai dau do hilo'd Sion nga' a' nod Tuhan pinusou do tontok dit otogod kopio iyau. 2 Aiso' no o kosianan do Tuhan do miningraag do kawalayan do hilo'd Yohuda. Om hinaba' dau i kuta' do pogintirungan di mongintirung daa di pomogunan diri do gisom do naraag. Pinaratu' dau o pomorintaan om i piro-piro o boyoon do hiri do gisom do nointingayam iyolo'. 3 Nidu' dau i kinoris dot Israil, tu' atatagadan no kopio iyau. Om minada' iyau do monulung dati' do tontok di sinangod toko' do pisangod. Tuminogod o Tuhan dati' do miagal pod tapui, do mamaraag do koinsanai'd nunu nopo. 4 Pinotuduk dau i pana' dau dot id dati' do miagal po iyau'd pisangod; pinatai dau o koinsanai'd tulun di kasanangan kopio toko'. Om hiti nod Yorusalim do nopurimanan toko' o kototogod dau di kosorob o kolosuo'. 5 Miagal pod pisangod o Tuhan; do minomobog dot Israil. Om rinaag ngai' dau i kuta' do pogintirungan om i walai do raja', om pinorikatan dau i tulun do Yohuda do katangaban dit a' opupus-pupusan. 6 Minumuk dau i Walai'd Sasambayangan dot Agayo i tiyonon toko' do sumambayang dot id dau; pinolihu dau o tulun do tadau'd Sabat om i piro-piro o tadau dot agayo. Om a' nod Tuhan pusohon ot imam om raja' tu' otogod no kopio iyau. 7 Niada' do Tuhan i porsombahan do sinumbali' do hiri'd pananaraban do porsombahan dit olidang, om tinongkiadan dau i Walai'd Sasambayangan dot Agayo. Om pinologos dau i pisangod do minamaraag di tolig. Om mimpangkis po i pisangod do nakamanang do hirid kinoiyonon toko' do sumambayang do mikuwo'd osimbayan di gulu po. 8 Natantu' mantad nod Tuhan do habaon nondo i tolig do Sion; om notipong no dau i tolig do mongilo kopio om aayi' i' iri do momoromumuk. Om nosiliu poddi do pogun i walai'd akawas om i tolig do baino'. 9 Nongoolitan ngai' pod tana' i totobon, om i salampad nga' nongotipu'; om hilo' noddid pomogunan do pisangod i raja' om i tulun di kipangkat. A' noddi potudukon i Tourat do Tuhan, om aiso' o pinointalang do mantad id Tuhan dot aanu di piro-piro o nabi. 10 Aiso' no komi di molohing-lohingon do hiri'd bandar do Yorusalim do songirikau do hiri'd tana', om popingarab po iyolo' do pupuk do hiri'd tulu diyolo' om karung o pakayan diyolo' do popointalang do tumongob iyolo'. Iri piya kosumandakan nga' songintungub po do hiri'd tana'. 11 Obongkung-bongkung po o mato ku dot ouru'd mihad dot aiso' o kotingkadan, om tumongob tomod oku. Tumongob tomod oku po do kokito do kinaraagan di bansa', sanghadan-hadan po o tangaanak om i ragang po do hilo'd karalan-ralanan do hilo'd bandar. 12 Mingihad po iyolo' do minglohou di tina' diyolo' do mokianu'd taakanon. Koiliu tomod nopo iyolo' do hiri'd karalan-ralanan do miagal pod tulun di nosuhat; om monguyat indo do matai do poingkibit di tina' diyolo'. 13 Oi Yorusalim, oi Yorusalim i koupusan ku, nunu po o milo ku'd poboroson? Poingkuro oku pod monginsasamod diya'? Aiso' i' o nokoumbal do noinggorit do miagal diti. Irad pod rahat kagayo o suhat nu, aiso' no o soro-sorohon nu dot id dosunsudan. 14 Aiso' no o poboroson di piro-piro o nabi do boros nu do suwai ko' tudut; minonipu' diya' i ponunuduk diyolo' tu' a' i' popoimbulai do dusa nu. Sinuhu' ko diyolo' do momusorou dot a' ko i' minog do rumologo. 15 Mongirak-irak ngai' po om momohingi-hingi diya' i tulun di santalib-talib. Tu' naraag no kopio o pointongkop do Yorusalim. Boros ka diyolo', “Ilo' toi i bandar dot olumis kopio'ddi? Ilo' toi i bandar do kaandasan do pomogunan?” ka no diyolo'. 16 Momohingi-hingi ngai' nopo diya' i pisangod nu, om mulondou tomod o mato dot araatan diya'. Boros ka diyolo', “Naraag noddi dahai i bandar! Nokorikot noddi i maso di piandad-andad dahai!” ka. 17 Nabayaan no kopio'd Tuhan i natantu' mantad dau do wonsoyon dau i pinosunud dau dot id dati' di gulu po. Aiso' no o kosianan dau do minamaraag dati', nonuan dau do kamanangan i pisangod toko', om nonuan dau iyolo'd kaarapadan do nokokito di kinaalaan toko'. 18 Oi tolig do Yorusalim, pomolohou nod Tuhan! Poluyungon o romou nu do miagal do bawang di lumuyung do tadau om totuong. Pagayi-ayi' nopo do mihad, kada' tingkod do gisom dot ohuyan o tinan nu! 19 Pitungag-tungag no do lumohou'd Tuhan do mokiinsian dau do gisom dot osuaban; om poboroso' ngai' nopo ot id suang do ginawo nu, om pokionuo' no kopio dau do monginsian di tangaanak nu di louson, tu' pointikid nopod linsuk do ralan dot ahadan i tangaanak dot ololousanan! 20 Oi Tuhan, antangai no it inggoriton nu! Kanon diri di tongoondu' i tangaanak di kolisihan diyolo'! Om pimpatayan it imam om i piro-piro o nabi do hiri'd suang di Walai'd Sasambayangan dot Agayo. 21 Songingiliu poo i tongomulok po om i kongomolohingan do napatai do hiri'd karalan-ralanan, tangaanakwagu om tongoondu' nga' nangapatai di gayang do pisangod. Aiso' no o kosianan nu do minonumbali' diyolo', do tontok di tadau do tuminogod ko. 22 Nalap nu i pisangod ku do papaharo do poginakanan di noponu'd kororongit, om aiso' no tiso' do kopoggidu' do mantad id hukuman nu do tontok di tadau dot otogod ko. Pinatai diyolo' i tangaanak ku di ginompi' ku om kosianan ku.
Hukuman om Karalagaanan, om Pagandasan
1 Iyoho' no o tulun di nokopuriman do koinggoritan. Tu' hinukuman oku'd Kinorohingan. 2 Modu-sodu' nopo o ponguyungan dau doho' dot id totuong dit odondom o kotuongo'. 3 Pinimbabagan oku dau, om aiso' no o kosianan dau do tikoompus do tadau. 4 Nadalaan po tomod do suhat o tinan ku, om nongotipu' o tulang ku. 5 Kinuluputan oku dau do katangaban om kosusaan. 6 Sinansagan oku dau do miyon do hiri'd totuong, do miagal poddi tulun di laid no kapatai. 7 Aiso' no o ralan ku do lumabus, tu' kinagasan oku dau'd rantai. 8 Mininglohou oku do mokitulung nga' a' i' do Kinorohingan pinokinongou i sambayang ku. 9 Mikorobibi' oku pod mamanau, tu' kiwatu o wayaan ku, om hinonggo nopo o ngoyon ku nga' hiri no o tolig do poingantob. 10 Miagal po iyau di bohuang do magawang doho'; om miagal iyau di singa do madtalob doho'. 11 Ginusa' oku dau om pinasala' oku di ralan kopio, om pogitobilang-bilango' oku nogiddi om iduwai oku no dau. 12 Linanat dau i pana' dau om iyoho' o siniliu do papanaan di pana' dau. 13 Kolopuson nopo di pana' dau o tinan ku, om notobok o tundu-undu' ku. 14 Monongodou-ngodou po o tulun do momohingi-hingi doho'; maan oku po diyolo'd tiirak-irak. 15 Iri poo it opoit o pinatahak dau doho' do maan ku dot akanon om inumon. 16 Pinoisis dau o rabas ku do hilo'd tana', om pinarangop oku dau dot id kowotuan gisom do notipu' o nipon ku. 17 Alaid oku no dot a' osimbayan; nolihuan ku no ondung okuro-kuro o kosimbayanan. 18 Aiso' no o kobontugo' ku; om natanus o pogogondos ku dot id Tuhan. 19 Kosorou oku nopo di toruol ku om it aiso' o tulion ku; om miagal oku pod mangakan dot opoit di kawanit. 20 Osorou kasai' ku nopoti, om gisom do tumongob tomod oku po. 21 Nga' koguli' indo o pagandasan ku do kosorou oku do hal diti: 22 Iri nopo kosianan om kolisihan do Tuhan om mompus-ompus i' kasai'. 23 Tu' wagu kasai' nopori do monikid kosuabon, kotorodoko' nopod Tuhan om miagal di tadau di mulai do dongkosuabon. 24 Tuhan poo o haro dot id doho', om iyau no o pagandasan ku. 25 Osonong i' o Tuhan dot id tulun di mogondos dau, om id tulun di mogihum dau. 26 Om polonuto' nopo o ginawo do magandad do gisom do korikot o Tuhan do mongoi ponguhup dati'. 27 Om osonong no kopio do minsingilo do palanut do ginawo do maso pod omulok. 28 Tontok dot onuan toko'd Tuhan do koinggoritan, om kumadada' toko' nopo do mirikau dot iyati-yati' om polonuton toko' o ginawo. 29 Minsiriba' toko' nopo om mokisimoyo' toko', tu' haro po doti' o soro-sorohon toko' dot id dosunsudan. 30 Om mulong pod bobogon om indaraaton toko' nga' apatut nod romiton ngai' toko' nopori. 31-32 Mulong pod pologoson toko'd Tuhan dot oinggorit, nga' a' toko' i' dau iyadaan do gisom dot alaid. Tu' Tuhan nopo om obinglisiu i' om ogirot o kosianan dau om aiso' o kopupuson. 33 A' i' iyau asanangan do popologos dati' dot oinggorit om tumongob. 34 Oilaan id Tuhan dot iyo dit oonsitan o ginawo toko' dot id giil, 35 om oilaan i' dau dot a' toko' nonuan dit apatut toko' dot aanu di patahakon daa'd Tuhan, 36 om oilaan i' dau do somputulon it otulid dot id kut, om mamadul i' iyau dati'. 37 Owonsoi kasai' nopo om abayaan i korohian do Tuhan. 38 Owonsoi goduwo nopo it osonong om it araat ondung ponuhuan do Tuhan dot owonsoi o miagal diri. 39 Nokuro daa tu' moguhang toko', ondung i dusa toko' o kinopomohukuman dati'? 40 Sorisido' toko' no kopio o kowoyo-woyoo' toko' om gumuli' i' dot id Tuhan. 41 Poukabo' toko' no o ginawo toko' dot id Kinorohingan di hilo'd surga, om sumambayang i' do poingkaa, 42 “Nokowonsoi no iyahai'd dusa om suminaap iyahai diya' oi Tuhan, om a' po iyahai diya' noompunan. 43 Ginusa' nu iyahai om pinatai nu iyahai; notirung di kototogod nu i kosianan nu. 44 Iyo po di haun dit akapal kopio o kototogod nu gisom dot a' no olopuson do sambayang dahai. 45 Siniliu nu po iyahai do rinomos dot id pagantangan do toinsanan diti pomogunan. 46 Nindaraat iyahai om hiningi-hingi di pisangod dahai. 47 Noontok iyahai'd kosusaan om karaagan, om id koligagaanan po om kopoddosian o tiyonon dahai. 48 Lumuyung po o romou ku, tu' noontok i' do karaagan o tulun ku. 49 Mihad oku nopondo dot aiso' o kotingkadan, 50 gisom do podulon iyahai'd Tuhan di hilo'd surga. 51 Tumongob tomod oku do kokito di nosiliu dot id tongoondu' dot id bandar dahai. 52 Ginusa' oku di pisangod ku do miagal do tombolog, om aiso' i' o paantakan dau do rumaatan doho'. 53 Pinataam oku diyolo' do hiri'd torobong, om dumpaho' oku nogiddi do watu. 54 Om malit no daa'ddi doho' o waig, om osorou ku nopo nga' matai oku no. 55 Nga' luminohou oku dot id diya' oi Tuhan, do mantad hiri'd nanad di torobong dot aralom. 56 Om soira' di pinokianu kopio ku do mokinongou ko do lolohou ku om minokinongou ko iddi. 57 Sinimbar oku i' diya' om sinunudan oku diya' dot a' minog do moddosi. 58 Ruminikot ko i', om nongoi oku diya' polobuso', oi Tuhan, om napasi oku iddi diya'. 59-60 Nokito nu i' i karaaton do winonsoi dot id doho', i pomusarahan dot araat di pisangod ku dit araatan doho'. Iyo nopoddi om obiai no i hal ku, oi Tuhan. 61 Norongou nu i' iyolo' do minongindaraat doho', oi Tuhan, oilaan ngai' nu i' i pakat diyolo' dot araat. 62 Monongodou-ngodou nopo iyolo' do mimboros do pasal doho' om mogiupakat iyolo' do pakat dit araat, do momungou doho'. 63 Mantad pod kosuabon om gisom do totuong do maan oku do tiirak-irak. 64 Hukumai no iyolo' do miontok di nowonsoi diyolo', oi Tuhan. 65 Papalai no iyolo', pologoso' no iyolo' dot aiso' o pokukurayan. 66 Gusao' no iyolo' om patayo' ngai' no iyolo' do gisom dot atanus iyolo' do hiti'd pomogunan!” kangku.
Koinggoritan do Yorusalim di Naala'
1 Nangatalup no i tamas di songkilou-kilou, om songinromos poo do hilo'd ralan i watu do pinomonsoi di Walai'd Sasambayangan dot Agayo. 2 Miagal po daa do tamas dit agayo o gatang di tangaanakwagu do Sion di gulu po, nga' baino' nopoddi om iyoon po iyolo'd kuron di koubasanan. 3 Iri piya toni nga' posusu i' di tangaanak dau, nga' tulun ku nopo om miagal pod tombolog dot unta do hilo'd kowotuan tu' orongit dot id tangaanak dau. 4 Pologoson nopo diyolo' dot apatai dot ololousanan om otutuuhanan i tangaanak diyolo', om mingkianu po daa i tangaanak diyolo' do takanon, nga' aiso' no o manahak diyolo'. 5 Iri piya tulun dit oubas do mangakan di taakanon dit osonong di gulu po, om it osimbayan o koposi-posion, nga' mogihum poddi do taakanon do hiri'd kinotimungon do rinomos, om sampatai-patai poddi dot ololousanan do hilo'd karalan-ralanan. 6 Awaga-wagat po o nokoontok do hukuman dot id tulun ku ko' mantad di tulun do hilo'd Sodom, tu' nokirapan noo om karaag no iyolo' di longon do Kinorohingan. 7 Iri nopo i piro-piro o boyoon dahai di gulu po om olidang i' dot iyo poddi gapas dot opurak. Om okoris iyolo' om osonong tomod o tinan. 8 Nga' baino' noddi om a' no iyolo' otutunan do songingiliu do hilo'd ralan, tu' noitaman po o rabas diyolo', om oitom po ko' i tangud, om kulit diyolo' nga' miagal pod kayu kokoring om santaid-taid poo o kulit diyolo'. 9 Mogo-mogot nogi' i nangapatai dot id pisangadan, ko' i minatai dot ololousanan, tu' alaid dot oinggorit tu' aiso' no kopio o takanon. 10 Awagat no kopio i kosusaan do nokoontok do tulun ku, tu' iri ngai' piya i tina' dit obinsianan, nga' minamalasu' i' di tangaanak diyolo' do numaan kano'. 11 Pinourabus ngai' nod Tuhan i kototogod dau dot id Sion, i bandar dau, om sinorob dau do gisom do nouu do hiri'd tana'. 12 Aiso' i' daa o tiso'd tulun do hiri'd pomogunan om aiso' o raja', di monongkuyaan do kosuang o pisangod do wawayaan do Yorusalim. 13 Nga' nosiliu iddi o miagal diri tu' nokowonsoi ngai' id dusa i nabi om it imam. Minamatai iyolo'd tulun dit aiso' o sala'. 14 Mininghombo do hiri'd karalan-ralanan i piro-piro o boyoon diyolo', do miagal po di tulun do bolou, nga' aiso' no o tiso' piya'd tulun do katama' do mongoi kama' diyolo', tu' naramasan po tomod do raha' o pakayan diyolo'. 15 Boros ka di tongoulun, “Poggidu' kou'd hiti, sosomu' tomod kou! Kada' kou kama' dahai!” ka. Om minghombo nopoddi iyolo' dot id piro-piro o bansa', om aiso' i' o tiso' di bansa' dot orohian diyolo'. 16 A' noddid Tuhan antangan piya i tulun dau, tu' iyau i' o pinopotompias diyolo'. Om a' no pusohon i piro-piro ot imam, om a' insianan i boyoon dahai. 17 Miontong daa iyahai, gisom dot opodi' poo o mato dahai do miontong do monguhup dit a' iddi ruminikot-rikot. Minogondos daa iyahai do ponguhup do mantad id iso' o bansa' dit a' i' milo'd monguhup. 18 Poingontong kasai' nopo i pisangod, om a' no iyahai milo do mimpanau do hiri'd ralan. Nokorikot noddi o kooyion do tumur dahai, nokorikot no i koompokon. 19 Osiau po i momogusa' dahai ko' mantad di kondiu do sumondot do mantad hilo'd tawan. Suhuton i' iyahai diyolo' do hilo'd konuluhanan om awangan iyahai do hilo'd tana' do kowotuan. 20 Tinangkap diyolo' i raja' do pinili'd Tuhan, i tulun di pinagandasan dahai do mongintirung dahai do mantad id koinsanai'd pisangod. Om i manahak dahai'd koposion. 21 Pingirak nopo, oi bansa' dot Idom om Us; pokosonongo' nopo o ginawo do dinondo poo. Tu' rumikot i' moti' o dokoyu'd kosusaan; om iyokoyu nga' mikorobibi' pondo do poillabas om ointingayam tomod. 22 Noontok no o Sion do hukuman, dot i dusa di winonsoi dau o kinopomohukuman, nga' baino' noddi om a' noddi iyahai'd Tuhan pologoson tomod, om a' poongoyon dot id pomogunan do pisangod. Nga' Idom nopo om hukuman indod Tuhan, om pointalangon dau o dusa dau.
Sambayang do Mokiinsian
1 Soroho' no, i nosiliu dot id dahai, oi Tuhan. Ontong no dahai, om antangai noti kointingayamo' dahai. 2 Nangaanu nod tulun do suwai i dapu' di tungkusan dahai; om bansa'd suwai o poingiyon dot id walai dahai. 3 Nangapatai di pisangod i tapa' dahai, om nongopuadan poddi o tina' dahai, om aiso' o tapa' dahai. 4 Bolion i' dahai o waig do tinumon dahai; om i kayu do maan dahai'd siduwon. 5 Iyo po iyahai do nintorusan, do sansagan do kumaraja' dot awagat, ohuyan po tomod iyahai, nga' a' i' onuan do maso'd mundorong. 6 Om minongoi'ddi iyahai pokianu-anu do takano' do hilo'd Masir om hilo'd Asur, om a' i' iyahai louson. 7 Minomonsoi'd dusa i taki-aki dahai, nga' a' noddi iyolo' hino do baino', om iyahai'ddi ot oinggorit do gama' di dusa diyolo'. 8 Tulun nopo di momorinta' dahai' nga' a' i' poimogot ko' i turipon, om aiso' i' o milo'd poidu' dahai do mantad id kuasa' diyolo'. 9 Gampamatai po o minghombo do hilo'd soliwan do bandar; om mongoi piya daa iyahai pogihum do taakanon nga' haro i' o koligagaanan dahai. 10 Sogiton po iyahai tu' adalaan nod louson, om gisom do miagal pod sagang kalasu' o tinan dahai. 11 Nongoi kosoho' i tongoondu' do hilo'd Sion; om sinansagan i kongosumandakan do patahak do tinan diyolo' do hilo'd kawalayan do Yohuda. 12 Tinangkap om numaan giiso' o koinsanai di boyoon dahai; om a' noddi pusohon i kongomolohingan dahai. 13 Sinansagan i tangaanakwagu dahai do tumutu do gandum, om mikorobibi' po i tangaanak do kusai dot angawagatan do kayu, om gisom dot ahadan. 14 A' noddi tumimung do hilo'd wawayaan do bandar i kongomolohingan, om i kongomulakan nga' a' noddi popouni do tuunion. 15 Natagak no o kaarapadan dahai; katangaban po o suminowoli di pananari' dahai. 16 Aiso' no o noolu' di kaandasan daa dahai. Nobungou iyahai tu' minomonsoi i' iyahai'd dusa. 17 Mihad po tomod o ginawo dahai, om osomok no dot a' iyahai kokito dot otirung do romou dahai, 18 tu' oingou no om nopogiiduan o Nuluhon do Sion, om tasu pod gouton o minghombo'd hilo'. 19 Nga' iya' nopo, oi Tuhan, om kikuasa' i' do gisom do poingompus, om momorinta' do gisom dot alaid. 20 Nokuro tu' alaid kopio ko do potongkiad dahai? Olihuan nu nopo tuu iyahai do gisom dot alaid? 21 Pogulio' no iyahai kawagu dot id diya', oi Tuhan! Pogulio' no iyahai kawagu! Tondulio' no i koiyon-iyono' dahai do miagal di gulu po. 22 Ko' iyadaan nu tuu iyahai do gisom dot alaid? Aiso' no kopio o koompokon do kototogod nu dahai?
Tirikohonon do Kinorohingan do Dong Raja'
1-3 Tontok di tadau'd kolimo di tulan do kaapat, di toun do kotolu nohopod, di kolimo'd toun do mantad di natanggayan i Raja' Yoyakin dot id pomogunan do pisangod, om maso ku, iyoho' i Yohoskiol, it Imam, i tanak di Bus, do poingiyon do hilo'd somok di Bawang do Kibar, do hilo'd Babil, do poinsugku' di tulun do Yohudi do suwai di nangatanggayan do pisangod. Om sigog i' do koukab ilo tawan om kokito ku no o pinointalang do pasal do Kinorohingan. Om korongou ku no o Tuhan do minoro-boros doho' om kopurimanai ku no o sinundu dau. 4 Tingaha' oku no om kokito ku o tongus do mantad hilo'd utara. Mingkalab po o kodumaat do mantad id haun dit akapal, om mogulinau po o hiri'd posorili' di haun. Om haro'ddi o malab-kalab do miagal do tambaga' do mantad hiri'd kodumaat. 5 Om hiri nopod tanga-tanga' di tongus nga' haro o nokito ku dot apat o kerub, i koiyo-iyo'd tulun, 6 nga' saraapatan nopo iyolo'd rabas om saraapatan do talad. 7 Otulid nopo o gakod diyolo' om kisondulu do miagal do sondulu'd sapi'. Om okilou nopo i gakod do miagal di tambaga' do kinisasan. 8 Om suwai no ko' mantad di rabas diyolo' dot apat om talad dot apat, om saraapatan po iyolo'd longon do miagal do longon do tulun, dot id sahau do pointikid-tikid di talad diyolo'. 9 Iri nopo i duwo talad do pointikid-tikid di koiyo-iyo do tulun diri nga' poungkalad, om pabasagi' diri iyolo' tu' kopogitopis-topis i' i tompok do talad diyolo'. Om soira' nopo do mamanau iyolo' nga' oinsanan nopo iyolo'd mamanau om a' no minog do pokokoson o tinan. 10 Pointikid-tikid di koiyo-iyo'd tulun diri om saraapatan nopod rabas di mogisuayan: rabas do tulun ot id toguang, om rabas do singa o ponong id wanan, om rabas do sapi' o ponong id gibang, om rabas do kondiu o ponong id likud. 11 Pinoungkalad ponong id sawat o duwo di talad do pointikid-tikid di koiyo-iyo'd tulun diri, gisom do kotopis o tompok di talad diyolo' di talad di tiso' di hiri'd toning, om iri no duwo kawagu talad om pointokop do tinan diyolo'. 12 Sompori-pori nopo i koiyo-iyo'd tulun diri do potoguang dot id apat o kotoguangon, om milo indo ngai' iyolo' do mongoi'd honggo nopo o ngoyon diyolo' om a' no minog do kumokos o tinan. 13 Id tanga-tanga' nopo di koiyo-iyo'd tulun diri nga' haro o miagal-agal do tata' di kitapui di miwor-hiwor nopo. Om mikit-sikit i tapui do papakalab do kodumaat dot a' nopo otingkod-tingkod. 14 Om iri nogi' i koiyo-iyo'd tulun diri nga' mintulud nopo do kumaa ponong hilo' om kumaa ponong hiti do miagal pod kodumaat kosiau. 15 Om tontok di maso ku do poingontong dit apat o koiyo-iyo'd tulun diri om kokito ku ot apat o ruda' do poinsondot do hilo'd tana', dot id toning do pointikid-tikid di koiyo-iyo'd tulun diri. 16 Mogiagal nopo it apat o ruda'ddi om ongokilou ngai' do miagal do watu dit olumis dit agayo o gatang, om soroisaan pori do ruda' do suwai ko' iri do poindokot do hiri'd tanga' di ruda'. 17 Om milo indo i ruda'ddi do kumaa do honggo nopo dit apat o kotoguangon diri. 18 Iri nopo i riim di ruda' nga' noponu' do mato. 19 Om soira' nopod kumakat i koiyo-iyo'd tulun diri do mantad hiri'd tana' om kumakat no i ruda'. 20 Honggo nopo o korohian di koiyo-iyo'd tulun diri dot ongoyon diyolo', om iri ruda' nga' tumanud no diyolo', tu' iri i' i koiyo-iyo'd tulun o momohuruan diyolo'. 21 Om soira' nopoddi do mamanau ko' mundorong ko' kumakat i koiyo-iyo'd tulun diri om i ruda' nga' moyo' no diyolo'. 22 Hiri nod sawa-sawat di tulu di koiyo-iyo'd tulun diri om haro o poillokou-lokou do kristal di mogulinau tomod do winonsoi. 23 Om iri nopo i koiyo-iyo'd tulun diri nga' songingkakat dot id sahau di poillokou-lokou, om soroduwaan iyolo'd talad do poungkalad om mogitotopis i tompok di talad, om iri no i duwo kawagu talad om pointokop di tinan diyolo'. 24 Om norongou ku o kapo di talad diyolo' do tontok di tumulud iyolo' do miagal pod ngorod do rahat o karangahan, om miagal do lotung do laang do soudor dit ogumu', om miagal do tuni'd boros do Kinorohingan dit Osundu Kopio. Om soira' di kotingkod iyolo'd tumulud, om potokopon nondo diyolo' i talad diyolo' dot id tinan diyolo', 25 nga' haro kasai' i' o tuni do mantad hiri'd poillokou-lokou di hiri'd sawa-sawat do tulu diyolo'. 26 Hiri nopod sawa-sawat di poillokou-lokou'ddi om haro o miagal-agal do tirikohonon do raja' di watu nilam do winonsoi. Om haro o poirikau dot id tirikohonon diri do koiyo-iyo'd tulun, 27 dit okilou poo o kokitanan do miagal di tambaga' do poinsubo'd tapui. Om mogulinau nopo i koiyo-iyo'd tulun diri 28 do miagal po di buluntung tu' mogisuayan nopo o warna'. Iri nopo tulinau'ddi nga' popointalang do kagayaan do Tuhan di nakarapou'd hiri.
Linohou'd Kinorohingan i Yohoskiol do Sumiliu'd Nabi
1 Soira' di nokito ku'ri om kotungub oku nopo do hiri'd tana'. Om korongou ku noddi o boros do minomoros do poingkaa, “Oi tulun, ingkakat no. Tu' moro-boros oku diya',” ka. 2 Om tontok di moro-boros i boros diri, om suang no dot id doho' i Rusod do Kinorohingan om poingkakato' oku no dau. Om korongou ku po kawagu i boros do minoro-boros kawagu do poingkaa, 3 “Oi tulun, suhuon ku iya' do mongoi'd hilo'd tulun dot Israil di suminaap doho' om i tuminolikud doho', om maso po diyolo' do sumaap doho' do miagal di taki-aki diyolo' di gulu po. 4 Okodou tomod o ginawo diyolo' om a' momusou doho', om iri noddi o koponuhuan ku diya' do mongoi pomisunud diyolo' diti poboroson ku, dot id diyolo', iyoho' i Tuhan, i Kinorohingan dit Asawat Kopio. 5 Mokinongou tuu i sumosongkiwal diri ko' amu' nga' oilaan po diyolo' do haro o nabi do nokoongoi dot id pogialatan diyolo'. 6 Nga' iya' nopo, oi tulun, om kada' no kopio poddosi diyolo', ko' ooris po di poboroson diyolo'. A' ko i' moti' diyolo' pokonunu-nunuon om saapon ko diyolo'; om miagal ko pondod poingiyon dot id rolot do tompoluluhu. Nga' poingkuro piya, nga' kada' no poddosi di sumosongkiwal diri ko' ooris po di poboroson diyolo'. 7 Sunudan nopo iyolo' do nunu nopo i ponuhuan ku diya' do poposunud, do mokinongou tuu iyolo' ko' amu'. Sorohon no do sumosongkiwal mantad i' iyolo'. 8 Oi tulun, pokinongou no diti poboroson ku diya'. Kada' omit diyolo' tu' osongkiwal. Tungkabang, om kanon i' iti patahakon ku diya',” ka dau. 9 Om kokito ku no o longon do pointuduk dot id doho' do kiinigit do karatas di linopi. 10 Om ungkayao' noddi i karatas do linopi diri om kokito ku do notulisan o miampaping. Om tinulisan iri do koihadan om katangaban om kawagatan do ginawo.
1 Om boros kad Kinorohingan dot id doho', “Oi tulun, kano' no iti karatas do linopi om mongoi nogindo boro-boros di tulun dot Israil,” ka dau. 2 Om potungkabango' ku no o kabang ku om patahako' nod Kinorohingan doho' i karatas di linopi do paakanan doho'. 3 Boros ka dau, “Oi tulun, kano' no iti karatas do linopi diti patahakon ku diya'; ponuo' nodti o tian nu,” ka dau. Om kano' ku no i karatas diri, om miagal pod paha' koomis o kaakanan ku'ddi. 4 Om boros kaddi kawagu'd Kinorohingan, “Oi tulun, ongoi do hilo'd tulun dot Israil om poboroson no dot id diyolo' o koinsanai di ponuhuan ku diya' do poboros dot id diyolo'. 5 A' ku i' iya' suhuon do mongoi dot id bansa' di suwai o boros om it apagon do momit, nga' suhuon ku i' iya' do mongoi dot id bansa'd Israil. 6 Ondung suhuon ku daa iya' dot id bansa' dit agayo om i suwai o boros om it a' nu osuhutan o boros, om mokinongou i' iyolo' diya'. 7 Nga' aiso' i' moti' tiso' di tulun dot Israil dot orohian do mokinongou; tu' iyoho' piya nga' a' i' diyolo' pokinongohon. Oinsanan nopo iyolo' dot ongokodou o ginawo om ongosurilog. 8 Om silihon ku'ndo iya' do miagal diyolo' tu' osurilog om okodou o ginawo. 9 Pogiroton tiya' nondo do miagal di tontolob kogirot, om pokodohon ku iya' do miagal di mutiara' kokodou; nga' kada' poddosi di tulun di sumosongkiwal diri,” ka dau. 10 Om boro-boros po kawagu o Kinorohingan, “Oi tulun, pokinongou no kopio om sorohon ngai' no iti poboroson ku diya'. 11 Om mongoi nogindo do hilo'd tulun di bansa' nu di hilo'd pomogunan do pisangod om sunudan no iyolo' di poboroson ku dot id diyolo', iyoho' i Tuhan it Asawat Kopio. Sunudan nopo iyolo', do mokinongou tuu ko' amu',” ka dau. 12 Om poinsawato' oku noddi di Rusod do Kinorohingan, om korongou ku no o boros dot opuhod kopio dot id dolikudan ku do minomoros do poingkaa, “Royoho' no i kagayaan do Tuhan di hilo'd surga,” ka. 13 Om korongou ku no i talad di koiyo-iyo'd tulun diri do kopogitapap-tapap do mingkapo, om korongou ku i kudarak di ruda' do miagal pod guyuon o tana' kopuhod. 14 Om rikot no dot id doho' i sinundu'd Tuhan dot opuhod kopio do ruminikot, om soira' di pinoinsawat oku om di tinanggayan oku di Rusod dau, om araat tomod diri o kopurimanan ku, om otogod oku. 15 Om korikot oku noddi do hilo'd Til-Abib, it id toning di Bawang do Kibar, i kinoiyonon di tulun di tinanggayan do pisangod. Om undorong oku nod hiri do solinaid do turu' o tadau, tu' naranaban kopio oku di nokito ku om i norongou ku.
Pinili' do Tuhan i Yohoskiol do Sumiliu'd Madtatamong dot Israil
16 Om katalib poddi o turu' o tadau om boro-boros no o Tuhan dot id doho' do poingkaa, 17 “Oi tulun, silihon ku iya' do madtatamong diti bansa' dot Israil. Om polombuson no dot id diyolo' iti boros do popoinsan, di poboroson ku diya'. 18 Ondung poboroson ku do haro o tulun dot araat dot oruhai nod matai, nga' a' nu indo iyau ngoyon sunudai do poposimban do kowoyo-woyoon dau om apasi i' iyau; om apatai nondo iyau dot id suang do dusa dau. Om iya' nondo o potonggungan ku di kinapatayon dau. 19 Nga' ondung poinsanon nu i tulun dit araat diri, nga' a' indo iyau tumingkod do momonsoi'd araat, om apatai nondo iyau dot id suang do dusa dau. Nga' iya' nopo om apasi i'. 20 Ondung haro o tulun dit osonong, do tumimpuun do momonsoi'd dusa om pokoyoon ku iyau dot id kinoiyonon di kikoligagaanan kopio, om apatai no iyau ondung a' nu no iyau ngoyon poinsano'. Apatai nondo iyau dot obungou di dusa dau, om a' ku no sorohon it ongosonong do winonsoi dau dit id gulu ko' iri, nga' iya' indo o potonggungon ku di kinapatayan dau. 21 Nga' ondung ongoyon nu poinsano' i tulun dit osonong diri gisom dot a' nondo iyau momonsoi'd dusa, om mokinongou no iyau do nosihat nu, om a' ku no iyau hukuman, om iya' nga' apasi no,” ka dau.
Obobou nondo i Yohoskiol
22 Om kopurimanai ku no i sinundu'd Tuhan di hino'd hiri, om korongou ku no iyau do minoro-boros doho' do poingkaa, “Ingkakat no om mongoi i' do hilo'd rantai. Om hilo' nondo do moro-boros oku diya',” ka. 23 Om ongoi oku no do hiri'd rantai, om kokito ku no i kagayaan do Tuhan do mogulinau tomod, i tanda' do nakarapou o Tuhan do hilo', do miagal nopo di nokito ku di hilo'd toning di Bawang do Kibar. Om kotungub oku nopo do hiri'd tana', 24 nga' suang noddi dot id doho' i Rusod do Kinorohingan om poingkakato' oku no dau. Om boros kad Tuhan dot id doho', “Uli' do hilo'd walai om moguung nod hiri'd suang. 25 Om kagasan ko nondod tali, oi tulun, om a' ko nondo milo'd sumoliwan do mongoi solowot do tulun. 26 Om posokoton ku'ndo ino dila' nu do hino'd kahad nu gisom dot a' ko milo'd popoinsan diti tulun di sumosongkiwal. 27 Om soira' nopondod moro-boros kawagu oku diya' om poboroson ku nogindo iya' kawagu, om sunudan nondo iyolo' di poboroson ku dot id diyolo', iyoho' i Tuhan, it Asawat Kopio. Mokinongou indo o wookon diyolo', nga' a' i' mokinongou diya' o wookon, tu' iyolo' nopo om bansa' i' di sumosongkiwal,” ka dau.
Pinoiyaan i Yohoskiol di Ponurungku' do Yorusalim
1 Om boros kad Kinorohingan, “Oi tulun, ongoi anu dot iso' o bata' om poilihon i' dot id toguang nu. Om pinggorisan no o hiri'd sakai'ddi do poiyo-iyoon di bandar do Yorusalim. 2 Om ralan nod popointalang do noturungku' do pisangod o bandar diri, om ukadan do liang, om oligon do tana', om wansayan do kokiiman om wansayan do pakakas do pomohusu, o posorili' di bata'. 3 Om mongoi no anu do sangwatang o basi' dit alabi' om poturidongon nori do miagal-agal do tolig dot id pialatan nu om i bandar. Om tumoguang no dot id bandar diri do miagal-agal dot iya' o monurungku'ddi. Om iti nondo o sumiliu do tanda' dot id bansa' dot Israil. 4-5 Om lumii nondo do potogiging ponong id gibang nu, om pababaan ku indo diya' i kasalaan do bansa'd Israil. Om poingiyo ko nondoddi do potogiging do solinaid do 390 o tadau om oinggorit ko di kasalaan diyolo'. Om sangadau ko nopo do poinglii do miagal diri om tanda' do sontoun o tulun dot Israil do hukuman. 6 Om owonsoi nu pondo o miagal diri, om tumogiging nogi' do ponong id wanan nu, om purimonon no i pomohukum di kasalaan do Yohuda do solinaid dot apat nohopod o tadau, do sangadau nopo om tanda' do sontoun do hukuman iyolo'. 7 Antangan no kopio i pinonurungku' do Yorusalim. Poonggomon no o tonggom nu om paakangon no dot id bandar diri. Om poboroson no iti boros ku do pasal do hukuman dot id diyolo'. 8 Kagasan ku nondo iya' om a' ko i' milo do mitogiging-giging dot a' po opupusan i maso do monurungku'ddi. 9 Om baino' nodti, om ongoi anu do gandum, om barli, om kasang dot aragang dit angagayo, om kasang dot aragang dit ongokooro', om luong, om sadur. Om pogirolo-roloton ngai' nondo iri om wonsoyon nod roti. Om iri nondo o takanon nu do solinaid do 390 o tadau di maso nu do poillii do potogiging do ponong id gibang nu. 10 Om bohogion no i roti, om kanon nu nopondo do monikid tadau om 230 o gram, om a' no koino-ino dot lobi ko' iri. 11 Om waig do tinumon nu dot insan o tadau nga' haro i' o gisom tu' duwo no o sangkir. 12 Om pomurakit nu nopod tapui om i taii' do tulun di nokodou no, om onsokon nu nogindo i roti nu'd hiri, om akanon no i roti nu'ddi dot id dokito do koinsanai'd tulun,” ka dau. 13 Om boros kad Tuhan, “Iyo noddi o ralan di tulun dot Israil do mangakan do taakanon di pogoduhan daa di Tourat di Musa, do tontok di potompiason ku iyolo' dot id pomogunan do suwai,” ka dau. 14 Nga' boros kangku'd suminimbar, “A, a' oku i', oi Tuhan, it Asawat Kopio. Tu' a' oku i' insan ponosomu' do tinan ku, do mantad poddi tanak oku po om gisom do dinondo nga' a' oku i' insan kapangakan do tonsi do nintorusan di napatai toomod ko' i pinatai'd nintorusan dit orongit. A' oku i' insan kapangakan do taakanon di sosomu',” kangku. 15 Om boros kaddi do Kinorohingan, “Ookuro katuu. Pologoson ku i' iya' do manganu'ddi taii' do sapi' do ponowoli di taii' do tulun. Om onsokon nu indo i roti nu'd hiri,” ka dau. 16 Om boros ka kawagu dau, “Oi tulun, raagon ku nondo i taakanon do Yorusalim. Om atangkabo nondo i tulun do hilo' om tumongob do tontok di kikiton diyolo' do mangakan i taakanon dot akanon diyolo' om i waig dit inumon diyolo'. 17 Om ooyian nopondo iyolo'd roti om waig; om tumongob nondo iyolo', om apatai iyolo' tu' obungou di dusa diyolo',” ka dau.
Pinampadan di Yohoskiol o Tobuk Dau
1 Om boros kad Tuhan, “Oi tulun, ongoi anu do gayang dit atarom om bugaron iddi o ganggut nu om tobuk nu. Om timbangon nogindo i tobuk nu'ddi dot id ponimbangan om bohogion do tolu o bahagi'. 2 Om tutudan no i sompitolu'ddi do hiri'd tanga-tanga' di bandar do katalib i monurungku'. Om onuon no kawagu i koduwo di bohogian di sompitolu om pintotokon nogindo di gayang nu do maso nu do mimpanau do minsorili' di bandar. Om iri no kotolu do bohogian di sompitolu om potiason nopo do powoyoon di tongus om gusaon ku indo iri di gayang ku. 3 Nga' poolu' no dot ongokuuri' di tobuk nu'ddi om polopoton no do hiri'd lupi di rasuk nu. 4 Om posoliwanon nondo o tongokuuri'ddi om pataamon i' dot id tapui, om pologoson nopori dot osorob. Om mantad nondod hiri do tumongkop o tapui dot id koinsanai'd bansa' dot Israil,” ka dau. 5 Om boros kad Tuhan, it Asawat Kopio, “Ontong pogi' do Yorusalim. Pinoiyon ku iti bandar diti do hiti'd tanga-tanga' do pomogunan om nosorilian do piro-piro o pomogunan do suwai. 6 Nga' suminurilog i' o Yorusalim di pinonuhuan ku om pinopointalang dot araat po iyau ko' mantad di bansa'd suwai, om osongkiwal kopio ko' mantad di pomogunan di posorili' dau. Tinolibambanan do Yorusalim i pinonuhuan ku om a' minumboyo' dit oturan ku,” ka dau. 7 Om boros kad Tuhan, it Asawat Kopio, “Pokinongou no diti poboroson ku, oi Yorusalim. A' ko i' minumboyo' di ponudukan ku om a' ko minomogompi' dit oturan ku, om ogumu-gumu' noddi o karaato' nu ko' mantad di bansa' di posorili' diya'. Tu' tuminanud ko di kowoyo-woyoon do bansa'd suwai. 8 Om gowoi poddi om posunudon ku no diya' do nosiliu oku nod pisangod nu, iyoho' i Tuhan, it Asawat Kopio. Om porotuan ku nondo iya' do hukuman dot antang-antangan do bansa'd suwai. 9 Om hukuman ku nondo o tulun do Yorusalim, do hukuman dit a' ku po insan porotuo', om it a' ku no wonsoyon kawagu tu' karaatan ngai' ku i' i wonsoyon nu. 10 Om gowoi pondo om kanon do molohing i tangaanak diyolo', om kanon di tangaanak i molohing diyolo'. Om iyo noddi o pomohukum ku diyolo', om potongkopon ku do popotompias o koinsanai di poimpasi-pasi. 11 Iyoho' no o Kinorohingan di poimpasi, i Tuhan dit Asawat Kopio. Om poingkaa no o boros ku. Raagon ku nondo iya' om a' ku insianan tu' sinosomu' nu i' i walai ku di wowonsoyon nu dit araat, om i kososomu' kopio. 12 Sompitolu nopo do tulun nu om apatai do toruol om lous do hiri'd bandar; om sompitolu no kawagu om apatai do gayang do hiri'd soliwan di bandar; om pasasadon ku nondo i sompitolu kawagu dit id tohuri no do moyo' dilo tongus om gusaon ku nogindo do gayang ku. 13 Om opurimanan nu nondo kopio o kawagato' do kototogod om kalalasu' do ginawo ku do gisom dot opurintadan oku. Om osiliu ngai' nopondo iti om oilaan nu nogindo kopio dot iyoho', i Tuhan o pinopoboros diti dot id diya' tu' otogod oku no kopio dot a' ko tuminorodok. 14 Om oinsanan nopondo o tulun do mantad id bansa' di posorili' diya' do momohingi-hingi om minsodu' diya' do tontok di tumalib iyolo'. 15 Om soira' nopo dot otogod om alasu' kopio o ginawo ku om momohukum oku no diya', om ooris ngai' nopondo i bansa' di posorili' diya'. Om araatan tomod nondo iyolo' do kokito diya' om momohingi-hingi iyolo' diya'. 16 Om raagon ku nondo i taakanon dokoyu om pologoson ngai' ku i tulun do hiti do louson. Om opurimanan nu nondo i koruolo' do louson do miagal pod pana' dit alahis do tumobok do mamatai diya'. 17 Om porikot oku nondod mononglous om nintorusan dit orongit do mongoi pamatai di tangaanak nu, om porikot oku do toruol, om kororongit, om pisangadan do pamatai di tulun do poingiyon do hiti. Iyoho' no i Tuhan, o minomoros diti,” ka dau.
Papalan do Tuhan i Tumuku' dot id Tingolig
1 Om boro-boros no o Tuhan dot id doho' do poingkaa, 2 “Oi tulun, ontong no ponong id konuluhanan dot Israil om sunudan no iyolo' di boros ku do pasal do hukuman dot id diyolo'. 3 Sunudan no i konuluhanan dot Israil do mokinongou do boros ku iyoho' i Tuhan, it Asawat Kopio, om sunudan ngai' i nulu-nulu, om it ongotidong, om i rantai: Poporikot oku nondod gayang do mongoi pamaraag di tiyonon do tulun do tumuku' dot id tingolig. 4 Habaon ngai' nopondo i pananaraban do porsombahan om babakon i podtutudan do kominyan. Om oinsanan nopondo i tulun do hilo' dot apatai dot id toguang di piro-piro o tingolig diyolo'. 5 Om pasasadon ngai' ku nondo i rata' di tulun dot Israil; om pasasadon ku i tulang diyolo' do pointutuk di pananaraban do porsombahan. 6 Araag ngai' nopondo i kabandaran dot Israil, om kotonggoi ngai' dot ongomumuk i pananaraban diyolo' do porsombahan om i piro-piro o tingolig diyolo', om omumuk i poiyanan diyolo'd kominyan, om atagak ngai' nopondo i winonsoi diyolo'. 7 Pointongkop nopondo o tulun dot apatai, om iri nopondo it a' apatai om koilo nondo kopio dot iyoho' no o Tuhan. 8 Pologoson ku indo o wookon diyolo' do kopoggidu' do mantad id pamatayan diri om kasasad i' iyolo' dot id pogialatan do piro-piro o bansa'. 9 Om koiyon nondo iyolo' dot id pomogunan do pisangod. Om hilo' nondo dot osorou oku diyolo' om oilaan diyolo' dot iyoho' i minomohukum om minongintingayam diyolo', tu' a' i' iyolo' tuminorodok dot id doho' om tuminongkiad doho', om pinokouhang nogi' diyolo' i tingolig ko' iyoho'. Om araatan nondo iyolo' do tinan diyolo' tu' araat tomod i' o winonsoi diyolo' om kointingayam kopio. 10 Om oilaan nondo kopio diyolo' dot iyoho' no o Tuhan, om oilaan diyolo' dot okon i' ko' ponompurolosi ku no toomod i boros ku do pinopoinsan diyolo',” ka dau. 11 Om boros kad Tuhan, it Asawat Kopio, “Tongob kou no! Ihad kou no! Pingihad no dot atatangaban tu' araat i' kopio om kointingayam i winonsoi do tulun dot Israil. Om apatai no moti' iyolo' dot id suang do pisangadan, om mononglous, om toruol. 12 Iyolo' nopo i hilo'd sodu' om sumakit nondo om apatai; om iyolo' no i hiti'd somok om apatai dot id pisangadan; om iri no i toolu-olu' om apatai dot olikapan. Om opurimanan nondo kopio diyolo' o kawagato' do kototogod ku. 13 Om poinsasad nopondo o rata' diyolo' dot id pogialatan di piro-piro o tingolig om posorili' di piro-piro o pananaraban do porsombahan, om poinsasad dot id timpak do pointikid-tikid do nulu-nulu dit akawas, om id timpak do pointikid-tikid do nuluhon, om id sahau do pointikid-tikid do kayu dit okohob, om id pointikid-tikid do kinoiyonon di pinodtutudan diyolo' do porsombahan dot id piro-piro o tingolig diyolo'. Om koilo ngai' nogindo o tulun dot iyoho' no o Tuhan. 14 Atantu' no do paakangon ku nondo o longon ku do mamaraag do pomogunan diyolo', gisom dot oingou nopondo, do mantad po do hilo'd tana' do kowotuan di hilo'd salatan om gisom do hilo'd bandar do Ribla di hilo'd utara. Om aiso' no ot a' ku raagon dot id pogialatan di kinoiyonon di tulun dot Israil. Om koilo ngai' nondo o tulun dot iyoho' no o Tuhan,” ka dau.
Oruhai no dot Araag ot Israil
1 Om boro-boros no o Tuhan dot id doho' do poingkaa, 2 “Oi tulun. Iti no o poboroson ku, iyoho' i Tuhan, it Asawat Kopio, dot id pomogunan dot Israil: Iti no o kopupuson do pomogunan diti!” ka. 3 Boros kad Tuhan, “Oi Israil, norikot no o karaagan nu. Om opurimanan nu nondo o kototogod ku tu' butusan ku no iya' do miontok di nongowonsoi nu dit angaraat kopio. Sulian ku nondo iya' tu' araat i' o winonsoi nu. 4 A' ku nondo iya' insianan om a' ku ompunan. Hukuman tiya' no kopio do miontok di winonsoi nu dit angaraat; om oilaan nu indo kopio dot iyoho' no o Tuhan,” ka dau. 5 Poingkaa no o boros do Tuhan, it Asawat Kopio, dot id bansa' dot Israil, “Mogisuhu-suhut nopondo o kosusaan do rumikot dot id dokoyu. 6 Norikot no kopupuson. Iti no o karaagan nu. Aiso' noddi o soro-sorohon nu. 7 Rumikot no i kopupuson dot id dokoyu, i bansa' di poingiyon do hiti'd pomogunan diti. Aiso' noddi o rumamai do hilo'd podsubakan do hilo'd nuluhon, tu' angagangau ngai' poo. 8 Oruhai nod kopuriman kou do kawagato' do kototogod ku. Butusan ku nondo iyokoyu do miontok di nowonsoi dokoyu, om sulian ku iyokoyu tu' angaraat i' kopio i winonsoi dokoyu. 9 Om a' ku no iyokoyu insianan om a' ku ompunan. Hukuman ku no iyokoyu do miontok di nongowonsoi dokoyu dit araat kopio, om koilo kou indo dot iyoho' no o Tuhan, om iyoho' i minomohukum dokoyu,” ka. 10 Rumikot no i tadau do kosusaan do bansa'd Israil. Tu' muhang-ruhang po o kororongit. Om kasasawat do ginawo nga' nokototos no kopio. 11 Om iri no kororongit o popoinggumu' do kararaat. Om aiso' nondo ot oolu' dot id diyolo'; di kakayaan diyolo', om i kagayaan diyolo', om i kobontugo' diyolo'. 12 Rumikot no o maso. Osomok no i tadau dot aiso' ot aanu-anu di mogiboli-boli om i mogidagang-dagang tu' oontok ngai' nopondo iyolo' do hukuman do Kinorohingan. 13 Om aiso' no ot otogui di dumadagang do gisom do koguli' i kinorugian dau, tu' oontok ngai' nopo do kototogod do Kinorohingan o pointikid-tikid do tulun. Om a' no apasi i tulun dot angaraat. 14 Nokouni no i torumpit, om nokosodia' ngai' no o tulun. Nga' aiso' indo o tongoiso'd tulun do koongoi kasangod tu' oontok ngai' nopo do kototogod do Kinorohingan, o koinsanai'd tulun.
Hukuman i Dusa dot Israil
15 Haro o mogiuumang do hilo'd karalan-ralanan do hilo'd bandar, om mononglous om ongkioruol o hiri'd suang do walai. Om isai nopo i hilo'd soliwan do bandar om apatai no dot id pisangadan, om isai nopo i hiri'd suang di bandar om apatai no do toruol om mononglous. 16 Om haro indo o wookon do mogidu' do hilo'd konuluhanan do miagal di punai dit uyungon do mantad id rantai. Om songgiak-giak pondo iyolo' do kosorou di dusa diyolo'. 17 Ongolomok ngai' nopondo o longon do tulun, om gagaran o totud diyolo'. 18 Om manampakai nondo iyolo' do pakayan do mogihad om songgogor-gogor po iyolo'. Om obugaran nondo o tulu diyolo' om ointingayam iyolo'. 19 Om pataamon nopondo diyolo' i tamas om pirok diyolo' do hiri'd ralan do miagal di rinomos, do tontok di pourobuson do Tuhan i kototogod dau. A' no kapasi diyolo' i tamas om i pirok diyolo' tu' pinopohudsu nogi' diyolo' iri. Om a' nori milo do panganu di korohian do tinan diyolo' om a' milo'd ponuang do tian diyolo'. 20 Oondos tomod daa iyolo' di pongillumis do tinan diyolo' di gulu po, nga' winonsoi iddi diyolo' iri do tingolig di koindaraat kopio. Om gowoi poddi om siniliu'd Tuhan do korolosi diyolo' i dapu' diyolo'ddi. 21 Boros kad Tuhan dot id bansa' dot Israil, “Pologoson ku nondo o bansa'd suwai do mongoi panakau do dapu' dokoyu, om ngoyon ngai' nopondo di tulun dot araat ahawo' i dapu' dokoyu om sosomuon ngai' nogindo diyolo' iri. 22 Om a' oku i' monongkoilo do ngoyon piya'd tulun sosomuo' i Walai'd Sasambayangan dot Agayo, om tontok di raagon di gampanakau iri. 23 Tu' agangau ngai' nopondo o pointongkop diti pomogunan. Noponu' pod mogipapatai i bandar om noponu' do kororongit i pomogunan. 24 Porikoton ku nondod hiri i bansa' dit ongorongit kopio om pologoson ku iyolo' do mongoi ponolod di walai dokoyu. Om lumuhoi tomod nopondo o ginawo di tulun nu dit okoris piya kopio do pologoson ku i bansa'd suwai do mongoi pamaraag di kinoiyonon dot iyonon dokoyu'd sumambayang. 25 Rumikot no o katangaban om kosusaan. Mingihum kou daa'ndo do kosimbayanan nga' aiso' no ot okito dokoyu. 26 Mogisuhu-suhut nopondo o kosusaan, om a' opupus-pupusan o habar dot araat do rumikot. Om minsonsog kou pondo di piro-piro o nabi do poposunud mantad dit okito diyolo' do pasal dit osiliu dot id dosunsudan. Nga' aiso' nondo o milo di piro-piro ot imam do potudukon di tulun, om aiso' o nosihat do patahakon di piro-piro o boyoon. 27 Mihad pondo i raja', om aiso' o pokukurayan di tanak do raja', i posowolion mantad di raja', om i tulun nga' pananggagaran ngai' pondo dot opopoddosian. Om hukuman ku nondo iyokoyu do miontok di nongowonsoi dokoyu, om butusan ku iyokoyu do miagal di pinomutus dokoyu do tulun do suwai. Om koilo kou nogindo dot iyoho' no o Tuhan,” ka dau.
I Modsubak do Tingolig do Hilo'd Yorusalim
1 Tontok di tadau'd kolimo di tulan do koonom, di koonom do toun dahai dot id pomogunan do pisangod, om songirikau ngai' iyahai di piro-piro o boyoon do Yohuda di nangatanggayan do pisangod do hiri'd walai ku. Om sigog i' do porintao' oku di Rusod do Tuhan, it Asawat Kopio. 2 Tingaha' oku no om kokito ku o koiyo-iyo'd tulun dot id suang do pinointalang. Mantad nopod hiri'd tawak dau om gisom do hiri'd siriba' om miagal pod tapui o kokitanan, om mantad nod hiri'd tawak om gisom do hiri'd sawat om mogulinau poo do miagal do tambaga' di kinisasan o kokitanan. 3 Om poroloyo' no dau o koiyo-iyo'd longon om ngoyo' no gayato' o tobuk ku. Om id suang nopod pinointalang diti nga' pinoinsawat oku di Rusod do Kinorohingan om tanggayai oku no do hilo'd Walai'd Sasambayangan dot Agayo di hilo'd Yorusalim. Om pokoyoo oku no dau do hiri'd wawayaan di ponong id utara di Walai'd Sasambayangan dot Agayo. Om haro o tingolig di katagadan kopio'd Kinorohingan do hiri. 4 Om hilo' nod nokito kawagu ku i tulinau do kosorong kopio do popointalang do nakarapou o Kinorohingan dot Israil, do miagal nopo di nokito ku do tontok di hilo' oku'd tisan di Bawang do Kibar. 5 Om boros kad Kinorohingan dot id doho', “Oi tulun, ontong ponong hilo'd utara,” ka dau. Om ontong oku no. Om kokito ku no i tingolig do katagadan kopio'd Kinorohingan do hiri'd toning di pananaraban do porsombahan dit id toning di wawayaan di suangon. 6 Om boros kad Kinorohingan dot id doho', “Oi tulun, okito nu i' it osiliu do dinondo? Antangai pogi' iti piningwansayan do tulun dot Israil do hiti dit araat kopio, i moguyung diri doho' do minsodu' diti walai ku. Om haro po o tokito nu do pokitanan ku diya' dot araat ko' mantad diti,” ka dau. 7 Om igitai oku no dau do hiri'd wawayaan di natad ponong id soliwan om pointongo' oku no dau do luang do hiri'd tolig. 8 Om boros ka dau, “Oi tulun, raladai iti luang diti,” ka dau. Om raladai ku no iri om kokito ku no o wawayaan. 9 Om boros ka dau dot id doho', “Suang pogi' om antangan i' o karaaton om i kososomu' tomod do pingwonsoyon diyolo'd hiti,” ka dau. 10 Om soruang oku no om pingontong oku no. Om notongkop pod lukisan do mogisuayan o tulanut om nintorusan di sosomu' om piro-piro o lukisan do tingolig di tukuon do tulun dot Israil, o hiri'd limput. 11 Haro o turu' nohopod o boyoon do tulun dot Israil do hiri, om hiri nogi' i Yaasania, i tanak di Sapan. Om ongkiinigit ngai' nopo iyolo' do podtutudan do kominyan, om mogolisun tomod i kominyan. 12 Om uhoto' oku nod Kinorohingan do poingkaa, “Oi tulun, okito nu no iti lisok-lisokon do tulun dot Israil do momonsoi? Sumambayang ngai' nopo iyolo' dot id bilik di noponu' pod tingolig. Om ponguwaan nopo diyolo' nga' poingkaa, ‘A' no iyahai'd Tuhan okito! Tu' notongkiadan no dau iti pomogunan diti,’ ka diyolo',” ka dau. 13 Om boros kaddi do Tuhan dot id doho', “Okito nu pondo iyolo' do mingwonsoi dit araat ko' mantad dilo',” ka. 14 Om pokoyoo' oku no dau do hiri'd wawayaan ponong id utara di Walai'd Sasambayangan dot Agayo om pointongo' oku no dau do tongoondu' do mogihad do kinapatayan di Tamus, i ponokokinorohingan diyolo'. 15 Om uhoto' oku nod Tuhan, “Oi tulun, okito nu i' ilo'? Om haro po o tokito nu dit araat ko' mantad diti,” ka dau. 16 Om pokoyoo' oku no dau do hiri'd natad di ponong id suang di Walai'd Sasambayangan dot Agayo. Om hilo' no dot id toning di wawayaan di sumuang di bilik dit olidang, it id pialatan di pananaraban do porsombahan om i ralan, do haro o duwo nohopod om limo o tulun. Songintolikud iyolo' di bilik dot olidang om songingotud ngai' do potimbaba' ponong id koulayon do tumuku' dot id tadau di mulai nogi'. 17 Om boros kad Tuhan dot id doho', “Oi tulun, nokito nu i' iri? A' nopo apaas-paasan iti tulun do Yohuda do mingwonsoi di wowonsoyon di koindaraat tomod do miagal di nokito nu, om a' iyolo' apaasan do popintongkop do kororongit do hiti'd pomogunan. Tu' rumikot po iyolo' do hiti'd walai ku do mingwonsoi do miagal diri, gisom do monubuan po do kototogod ku. Antangai pogi' nga' magaayi-ayi' no moti' kopio iyolo' do mongindaraat doho' tu' mingwonsoi po diti kososomu' kopio. 18 Om opurimanan nondo diyolo' o kawagato' do kototogod ku. Om a' ku no iyolo' insianan om a' ku ompunan. Om tumotos piya daa iyolo' do popinggiak do sambayang diyolo' dot id doho' nga' a' oku no mokinongou,” ka dau.
Hukuman o Yorusalim
1 Om korongou ku noddi o Kinorohingan do minomoros dot opuhod do poingkaa, “Kainou do hiti, oi tulun di mongoi paparatu' do pomohukum ku diti bandar. Om igitan ngai' no i rapo-rapo dokoyu,” ka. 2 Om insan-insan nopo do ruminikot ot onom o tulun do mantad hiri'd soliwan di wawayaan ponong id utara di Walai'd Sasambayangan dot Agayo, om ongkiinigit ngai' nopo iyolo' do rapo-rapo. Om moyo-woyo' nopo diyolo' nga' songulun i kirasuk do kain linan, om kiinigit di maan do ponulis. Om suang ngai' nopo iyolo' om ingkakat no do hiri'd toning di pananaraban do porsombahan di tambaga' do winonsoi. 3 Om kakat noddi i tulinau di kosorong di tanda' do nakarapou o Kinorohingan dot Israil do mantad hiri'd kerub, it ongkitalad di koiyo- iyo'd tulun, i hiri'd niyonon mantad diri, om pakayaai no do hiri'd wawayaan di Walai'd Sasambayangan dot Agayo. Om lohowo' nod Tuhan, i tulun di kirasuk do linan diri do poingkaa, 4 “Ongoi tongkop diti bandar do Yorusalim om tandaan no o turos do pointikid-tikid di tulun dit osusa' om i tumongob do gama' di kangaraaton do pingwonsoyon do tulun do hiti'd bandar diti,” ka. 5 Om korongou ku no o Kinorohingan do minomoros dot id piro-piro o tulun do suwai do poingkaa, “Tanud kou dau do tumongkop diti bandar, patayon no o pointikid-tikid di tulun. Om kada' no iyolo' ompunai. 6 Patayon no i kongomolohingan, om i tongomulok po, om i tongoondu', om i tongokusai om i tongotapa' om i tongotina', om i tangaanak. Nga' kada' dokoyu ngoyo' kuroi-kuroyo' i tulun di kitanda' o turos. Impuunon nopo dokoyu o hiti'd Walai'd Sasambayangan dot Agayo,” ka dau. Om timpuun no iyolo' do minamatai ngai' di boyoon dot Israil di songingkakat do hiri'd Walai'd Sasambayangan dot Agayo. 7 Om boros kad Kinorohingan dot id diyolo', “Raagon nopo i Walai'd Sasambayangan dot Agayo. Om ponuon nopo do rata' i natad di walai'ddi. Timpuun kou no do kumaraja' do dinondo!” ka dau. Om timpuun no iyolo' do minimpatai di tulun do hiri'd bandar diri. 8 Om soira' di maso diyolo' do mimpatai, om iso-iso' oku noddi. Om otud oku no do hiri'd tana' om pomoros oku no dot opuhod do poingkaa, “Oi Tuhan, it Asawat Kopio, adalaan ko no kopio dot otogod do Yorusalim gisom do patayon ngai' nu nopo i tulun di noolu-olu' do hiti'd Israil,” kangku. 9 Om boros kad Kinorohingan do suminimbar, “Kasala' o tulun dot Israil om Yohuda tu' miningwonsoi iyolo'd dusa dit agayo kopio. Minimpatai iyolo'd tulun do pointongkop diti pomogunan om sinosomu' diyolo' do karaaton o Yorusalim. Boros ka diyolo' om tinongkiadan ku kaka o pomogunan diyolo' om a' oku no kaka'ddi kokito di wonsoyon diyolo'. 10 Nga' a' ku no iyolo' insianan; wonsoyon ku no dot id diyolo' o miagal di winonsoi diyolo' dot id tulun do suwai,” ka dau. 11 Om guli' noddi i tulun di kirasuk do kain linan diri om posunudo' no dau dot id Tuhan i winonsoi dau. Boros ka dau, “Nowonsoi ngai' ku no i pinonuhuan nu oi Tuhan,” ka.
Tuminongkiad o Tuhan di Walai'd Sasambayangan dot Agayo
1 Ontong oku no di poillokou-lokou di hiri'd sawa-sawat di tulu di kerub, i kitalad dit ongkoiyo-iyo'd tulun, om haro'ddi o miagal-agal do tirikohonon do raja' do hiri'd mahau-sahau diyolo', do watu nilam do winonsoi. 2 Om boros kad Kinorohingan dot id tulun di kirasuk do linan diri, “Ongoi do hilo'd pialatan dilo ruda' dot id siriba' dilo koiyo-iyo'd tulun, om manu nod popou dot ongosongonggom. Om potiason nogindo i popou'ddi do pointongkop di bandar,” ka. Om tonudo' no dau iri om piantangan ku iyau. 3 Iri nopo it ongkitalad di koiyo-iyo'd tulun diri nga' songingkakat do ponong hiri'd salatan di Walai'd Sasambayangan dot Agayo do tontok di suminuang iyau, om haro'ddi o haun do minomonu' di natad di ponong hiri'd suang, om minomonu' do koinsanai di Walai'd Sasambayangan dot Agayo. 4 Om undaliu noddi i tulinau di kosorong kopio, i tanda' do nakarapou o Tuhan, do mantad hiri'd ongkitalad di koiyo-iyo'd tulun diri, om ongoi no do hiri'd wawayaan di Walai'd Sasambayangan dot Agayo. Om koponu' noddi do haun i Walai'd Sasambayangan dot Agayo, om mogulinau poddi tomod o hiri'd natad. 5 Om iri nopo kapo di talad di koiyo-iyo'd tulun diri nga' rongo-rongohon do hiri'd natad di ponong id soliwan. Om miagal-agal do tuni'd boros do Kinorohingan, it Osundu Kopio, o karangahan diri. 6 Om soira' di sinuhu'd Tuhan i tulun di kirasuk do linan diri do mongoi panganu di popou do mantad hiri'd piolitan di ruda' dit id sahau dit ongkitalad do koiyo-iyo'd tulun diri, om suang no i tulun om ingkakat no dot id toning do tiso' di ruda'. 7 Om poroloyo' no di tiso' di koiyo-iyo'd tulun o longon dau do hiri'd tapui dit id rolot diyolo', om anu nod popou, om pakahangai no dau iri di tulun di kirasuk do linan. Om onuo' noddi di tulun i popou'ddi om tongkiad no. 8 Om kokito ku do haro ngai' nopo o longon do miagal do don tulun it ongkitalad di koiyo-iyo'd tulun diri, do hiri'd dalakapan di talad diyolo'. 9-10 Om nokito ku nogi' do haro ot apat o ruda', do mogiagal nopo; om iso' nopo i koiyo-iyo'd tulun diri om iso' no o ruda' do pointoning. Om mogulinau tomod i ruda' do miagal pod watu dit olumis dit agayo o gatang. Om nadakatan ngai'd ruda' do suwai o pointikid-tikid di ruda'ddi. 11 Om soira' di mamanau i koiyo-iyo'd tulun diri om milo i' iyolo' do mongoi do hinonggo nopo o kotoguangon diyolo', om milo iyolo' do mongoi do honggo nopo o korohian diyolo', om a' no iyolo' minog do kumokos. 12 Om notongkop nopod mato i tinan, om likud, om longon, om talad, om i ruda' diyolo'. 13 Om iri nopo ruda'ddi nga' miagal nopo di ruda' di nokito ku dot id pinointalang dit insan ku i' kokito. 14 Saraapatan nopod rabas i koiyo-iyo'd tulun diri. Iri nopo rabas do koiso' nga' koiyo-iyo'd rabas do sapi', om iri no koduwo om koiyo-iyo'd rabas do tulun, om iri no kotolu om koiyo-iyo'd rabas do singa, om iri no kaapat om koiyo-iyo'd rabas do kondiu. 15 Iri nopo koiyo-iyo'd tulun diri nga' iri i koiyo-iyo'd tulun di nokito ku di hilo'd disan do Bawang do Kibar. Soira' nopod tumulud i koiyo-iyo'd tulun diri, 16 om di mundaliu iyolo', om tumanud nopo i ruda' diyolo'. Om soira' nopod poungkaladon diyolo' i talad diyolo' do tumulud, om iri ruda' nga' moyo' no diyolo'. 17 Om soira' di mundorong i koiyo-iyo'd tulun diri, om mundorong no i ruda'; om soira' di tumulud i koiyo-iyo'd tulun diri om moyo' no i ruda' diyolo', tu' iri i' i koiyo-iyo'd tulun o momohuruan. 18 Om tongkiad noddi di wawayaan di Walai'd Sasambayangan dot Agayo i tulinau di kosorong kopio, di tanda' do nakarapou o Tuhan. Om pakayaai noddi di tulinau'ddi do hiri'd sawa-sawat di koiyo-iyo'd tulun diri. 19 Om poungkalado' no diyolo' i talad diyolo' om tulud no do mantad hiri'd tana' di maso ku do poingontong, om iri ruda' nga' tuminanud nogi' diyolo'. Om undorong-dorong no iyolo' do hiri'd wawayaan do ponong id koulayon di Walai'd Sasambayangan dot Agayo, om hiri'd sawa-sawat diyolo' i tulinau di kosorong tomod. 20 Om kotutunai ku no iyolo' dot iri i koiyo-iyo'd tulun di nokito ku dot id sahau'd Kinorohingan dot Israil, di hilo'd Bawang do Kibar. 21 Om saraapatan nopo iyolo'd rabas, om saraapatan do talad, om kilongon ngai' iyolo' do miagal-agal do longon do tulun, dot id dalakapan di talad diyolo'. 22 Om iri rabas diyolo' nga' aiso' no o pisuayan di rabas di nokito ku di hilo'd toning do Bawang do Kibar. Om kumaa ngai' nopo do ponong id dosunsudan i koiyo-iyo'd tulun diri.
Hinukuman o Yorusalim
1 Om poinsawato' oku no di Rusod do Kinorohingan om tanggayai oku nod kumaa do hiri'd wawayaan di ponong id koulayon di Walai'd Sasambayangan dot Agayo. Om kokito ku no o duwo nohopod om limo o tulun do hiri'd toning di wawayaan. Om i Yaasania, i tanak di Asur, om i Pilasa, i tanak di Bonaya, i boyoon goduwo do bansa' nga' hiri nogi'. 2 Om boros kad Kinorohingan dot id doho', “Oi tulun, minsorou ngai' nopod araat o tulun diti, om poboros do nosihat di kapalid do hiti'd bandar diti. 3 Tu' boros ka diyolo', ‘Oruhai toko' nod momonsoi kawagu do walai. Miagal daa do lansang iti bandar om miagal toko' do daging do hiri'd suang, nga' maha' po katuu dot otirung toko' po di lansang, om a' toko' iddi osondikot di tapui,’ ka. 4 Iyo nopoddi, om pasalao' no iyolo', om sunudan no iyolo' do pasal di pomohukum ku diyolo', oi tulun,” ka dau. 5 Om porintao' oku noddi di Rusod do Tuhan om sunudai oku nod Tuhan do popoboros do boros diti dot id tulun diri, “Oi tulun dot Israil, oilaan ku i' ino pimboroson dokoyu om ino pinsarahan dokoyu do wonsoyon dokoyu. 6 Adalaan no kopio kogumu' o tulun do napatai nu do hiti'd bandar diti gisom do noponu' pod rata' ilo karalan-ralanan do hiti. 7 Om poingkaa'ddi o poboroson ku, iyoho' i Tuhan it Asawat Kopio, dot id dokoyu. Otopot nogi' do lansang iti bandar, nga' nunu ma i daging dit id suang di lansang diri? Iri nopo om i rata' do tulun di pinimpatai dokoyu! Om okon kou nondo ko' hiti tu' uyungon ku nondo iyokoyu do sumoliwan diti bandar! 8 Moddosi kou'd gayang? Porikot oku nondod tulun dit ongkigayang do mongoi panangod dokoyu. 9 Posoliwanon ku nondo iyokoyu diti bandar om patahakon ku iyokoyu dot id bansa'd suwai. Norotuan ku no iyokoyu do hukuman do kapatayon. 10 Om aala' kou pondo dot id pisangadan do hiti'd pomogunan dokoyu, om koilo ngai' nogindo o tulun dot iyoho' no o Tuhan. 11 A' kou i' ointirungan diti bandar diti do miagal di daging dit id suang di lansang dot ointirungan di lansang. Tu' honggo kou nopondod poundorong do hiti'd pomogunan dot Israil nga' gusaon ku i' om hukuman ku iyokoyu. 12 Om oilaan nogindo dokoyu dot iyoho' no o Tuhan, om oilaan dokoyu do hukuman ku pogi' iyokoyu nga' tuminolibamban kou i' dit oturan ku om suminurilog kou di pinonuhuan ku do tontok di tuminanud kou dot oturan di piro-piro o bansa' dit id posorili' dokoyu,” ka. 13 Om tontok di mimboros oku do boros diri om sigog nopo om kahaba' no i Pilasa om kapatai noddi iyau. Om otud oku nopoddi do hiri'd tana' om pinggarang oku no do poingkaa, “Atuukoi, Tuhan it Asawat Kopio! Maan ngai' nu no kopio patayo' o koinsanai'd tulun di noolu-olu' do hiti'd Israil?” kangku.
Batos do Kinorohingan dot id Tulun dit id Pomogunan do Pisangod
14 Om boro-boros po kawagu o Tuhan dot id doho' do poingkaa, 15 “Oi tulun, mimboros po do pasal diya' om pasal di tulun dot Israil do suwai dit id pomogunan do pisangod i tulun do hilo'd Yorusalim. Boros ka no diyolo', ‘Adalaan no kopio kosodu' i tulun di natanggayan do pisangod do mongoi sambayang dot id Tuhan do hiti'd Yorusalim. Om iyati' no o nonuan do Tuhan do koinsanai'dti tana' dot Israil,’ ka no. 16 Iyo nopoddi, om sunudai ngai' no i tambalut nu di nangatanggayan do pisangod diti poboroson ku. Iyoho' no, i pinopoongoi om i pinopoundorong diyolo' dot id pomogunan dit id sodu' om iyoho' i pinopotompias diyolo' dot id pomogunan do suwai. Nga' daamot nopod hilo' iyolo', om moyo-woyo' oku i' diyolo' do hilo'd pomogunan di nokoongoyon diyolo'. 17 Iyo nopoddi, om sunudan no iyolo' diti poboroson ku, iyoho', i Tuhan it Asawat Kopio. Timungon ku indo iyolo' om posoliwanon ku iyolo' do mantad hiri'd pomogunan di pinotompiasan ku diyolo', om patahakon ku nondo kawagu diyolo' i tana' dot Israil. 18 Om koguli' nopondo iyolo', om pataamon ngai' nondo diyolo' o koinsanai di tingolig dot araat om i kososomu' kopio dit okito diyolo'. 19 Om onuan ku'ndo iyolo' do ginawo do wagu om pomusarahan do wagu. Om iduwon ku'ndo i ginawo diyolo' dit okodou om it osurilog, om onuan ku iyolo'd ginawo di mumboyo' doho'. 20 Om umboyoon nondo diyolo' it oturan ku om otorodok iyolo' do tumanud do koinsanai di ponuhuan ku. Om osiliu nondo iyolo'd tulun ku, om iyoho' nga' osiliu nondod Kinorohingan diyolo'. 21 Nga' hukuman ku'ndo i tulun dit orohian do tumuku' dot id tingolig dit araat om i kososomu' kopio. Hukuman ku nondo iyolo' tu' araat i' o kowoyo-woyoon diyolo',” ka dau. Iyo noddi o boros do pinoboros do Tuhan, it Asawat Kopio.
Tuminongkiad o Kinorohingan do Yorusalim
22 Om timpuun noddi do tumulud it ongkitalad di koiyo-iyo'd tulun diri om woyo' no diyolo' i ruda'. Om mahau-sahau diyolo' i tulinau di kosorong tomod do tanda' do nakarapou o Kinorohingan dot Israil. 23 Om tongkiad noddi di bandar do Yorusalim i tulinau di kosorong tomod diri om pakayaai no do hiri'd nuluhon di ponong id koulayon do mantad id bandar diri. 24 Om poinsawato' oku noddi di Rusod do Kinorohingan om pogulio' oku no do hiri'd tulun di hilo'd Babil i pomogunan do pisangod, dot id suang do pinointalang diri. Om tanus noddi i pinointalang diri. 25 Om sunudai ngai' ku noddi i tulun dit id pomogunan do pisangod diri, do koinsanai di pinointalang do Tuhan dot id doho'.
Miningiyo-iyo'd Tulun di Mogidu' i Nabi Yohoskiol
1 Om boro-boros no o Tuhan dot id doho' do poingkaa, 2 “Oi tulun, iya' nopondo om poingiyon ko dot id rolot do tulun dit obinsaap. Kimato i' daa iyolo'; nga' a' i' iyolo' kokito. Om kitolingo iyolo' nga' a' i' iyolo' korongou, tu' obinsaap i' iyolo'. 3 Iyo nopoddi, om posuangon no i konunu-nunuan nu do hiri'd simpulan om piwongkoson nori oi tulun, do miagal di wonsoyon do tulun di mogidu', om mamanau no dot a' po otuong. Pokitonon ngai' no o tulun do tumongkiad ko om mongoi ko dot id kinoiyonon do suwai. Om nunu koilo-ilo nga' kokito nopondo diya' i tulun di sumosongkiwal diri, om kopuriman i' daa'ndo iyolo' di kosongkiwalo' diyolo'. 4 Rumpasan no om wongkoson no i simpulan nu dit anawau po, om okito ko i' diyolo', om pologoson iyolo' do miontong diya' di mamanau ko do dongsosodopon do miagal-agal do tanggayan ko dot id pomogunan do pisangod. 5 Om tontok di poingontong iyolo' om lobuon no i limput di walai nu om poulaon no di luang diri i simpulan nu. 6 Om pokitonon no iyolo' do sandangon nu i simpulan nu, om mamanau no dot otuong om somponon o mato nu, om a' ko i' kokito di ralan do wayaan nu. Om iri nondo i wonsoyon nu'ddi o sumiliu'd popoinsan di tulun dot Israil,” ka dau. 7 Om wonsoyo' ku no o miagal di pinonuhuan do Tuhan doho' do momonsoi. Om tadau iddi dit anawau po do minonuang-suang oku om linopot ku'ddi iri do simpulan do miagal di wonsoyon do tulun di mogidu'. Om tontok di tumuong no, om lobuo' ku no i limput do walai ku do longon ku o pinomolobu ku, om soliwan oku noddi do minaya' di luang di linobu ku. Om soira' di songingontong ngai' doho' i tulun om sandango' ku no i simpulan ku om pamanau oku no. 8 Om kosuabon noddi om boro-boros no o Tuhan dot id doho' do poingkaa, 9 “Oi tulun, baino' noddi tu' moguhot ilo tulun dot Israil di sumasaap, ondung nunu ino wonsoyon nu, 10 om sunudan no iyolo' do moro-boros oku diyolo', iyoho' i Tuhan, it Asawat Kopio. Iti nopo boros ku'dti nga' poboroson ku dot id raja' do Yorusalim om id koinsanai di tulun di songingiyon do hilo'd bandar diri. 11 Sunudan no iyolo' dot iri nopo winonsoi nu nga' poiyaan dit osiliu dot id diyolo' tu' mogidu' nondo iyolo' om angatangkap do pisangod. 12 Sandangon nondo di raja' diyolo' i simpulan dau do dongotuong om mogidu' nondo iyau do maya' di luang di linobu di tulun do hiri'd tolig do sumoliwan. Om somponon nondo dau o mato dau om a' i' iyau kokito di wayaan dau. 13 Nga' pawaladon ku nondo i rambot ku do pamagamit ku dau om kosulung indo iyau'd hiri. Om tanggayan ku nogindo iyau do hilo'd bandar do Babil, om hilo' no o kapatayon dau, dot a' piya iyau insan kokito do bandar diri. 14 Om potompiason ku nopondo do hinonggo nopo o kokoyoon o koinsanai di tulun do hiri'd walai di raja' om kohompit no i piro-piro o ponosihat om i madtatamong di raja', om ihumon nondo iyolo'd tulun do maan patayo'. 15 Om soira' pondod potompiason ku iyolo' dot id pogialatan do bansa'd suwai om pomogunan do suwai om oilaan nogindo diyolo' dot iyoho' no o Tuhan. 16 Om pologoson ku indo ot okuuri' diyolo' dot a' apatai dot id pisangadan, om a' apatai do mononglous om toruol, om hiri pondo iyolo'd rolot di bansa'd suwai om oilaan nogi' diyolo' o karaato' di kowoyo-woyoo' diyolo' om mangakun nondo iyolo' dot iyoho' no o Tuhan,” ka dau.
I Nabi do Gagaran
17 Om boro-boros no o Tuhan dot id doho' do poingkaa, 18 “Oi tulun, gagarai no do maso nu'd makan om gagarai no dot opopoddosian do maso nu'd minum. 19 Sunudan no o koinsanai di bansa' dot iti no o boros ku, iyoho' i Tuhan, it Asawat Kopio, dot id tulun do Yorusalim di maso pod poundorong do hilo'd pomogunan diyolo'. Gagaran nondo iyolo' do maso diyolo'd makan om gagaran dot opopoddosian do tontok do minum iyolo'. Om a' nopondo sunian i tana' diyolo', tu' tuminolibamban ngai' nopo dit oturan i tulun do poingiyon do hilo'. 20 Om angaraag nondo i kabandaran di poimponu'd tulun do dinondo, om osiliu do tana' dit a' sunian i koumaan do hilo'. Om koilo nogindo iyolo' dot iyoho' no, i Tuhan,” ka dau.
Suriban di Korohian do Tulun om i Suriban dit a' Korohian do Tulun
21 Om boro-boros no o Tuhan dot id doho' do poingkaa, 22 “Oi tulun, nokuro tu' orohian o tulun dot Israil do mirrait do suriban diti, ‘Alaid noddi om aiso' i' o nangabayaan di pinoboros mantad dot osiliu dot id dabantalan,’ ka? 23 Ngoyo' no iyolo' sunudai diti tisimbar ku, iyoho' i Tuhan, it Asawat Kopio, do pasal diri. Tonuson ku nondo i suriban diri, om a' nondo iri pimboroson do hilo'd Israil. Sunudan no iyolo' do ponowoli nopoddi om poingkaa, ‘Nokorikot no i maso om abayaan ngai' no i pinoboros mantad dit osiliu dot id dosunsudan!’ ka. 24 Om aiso' nondo o pinointalang dit a' otopot om aiso' i' o poboroson do pasal dit osiliu dot id dosunsudan do hilo'd Israil. 25 Iyoho' nondo i Tuhan, it Asawat Kopio o moro-boros dot id bansa' dot Israil, om nunu nopo i poboroson ku nga' owonsoi ngai' no, om a' no popiurut-uruton. Pokinongou no, oi bansa' dit obinsaap, wonsoyon ngai' ku nondo i nokoinsan mantad ku dot id dokoyu dot osiliu do solinaid dokoyu'd poimpasi. Iyoho' no, i Tuhan, it Asawat Kopio, o minomoros diti,” ka dau. 26 Om boros kad Tuhan dot id doho', 27 “Oi tulun, osorou nopo di tulun dot Israil om abayaan nopo i pinointalang dot id diya' om i pinoboros nu do pasal dit osiliu dot id dosunsudan om sumonu'. 28 Iyo nopoddi, om sunudan no iyolo' do momoros oku, iyoho' i Tuhan, it Asawat Kopio do poingkaa: Nunu nopo i nokoboros ku om atantu' no dot abayaan, om a' no popiurut-uruton. Iyoho' no, i Tuhan, it Asawat Kopio, o minomoros diti!” ka dau.
It Osiliu dot id Dosunsudan do pinoboros di piro-piro o Nabi di Goudut
1 Om boro-boros no o Tuhan dot id doho' do poingkaa, 2 “Oi tulun, pasalao' ngai' no i nabi do hilo'd Israil di popimboros do pasal dit osiliu dot id dosunsudan di pinsarahan i' toomod diyolo'. Suhuon no iyolo' do mokinongou'd boros ku,” ka dau. 3 Poingkaa no o boros do Tuhan, it Asawat Kopio, “Obungou ngai' no i nabi di basug! Iri nopo i toilaan diyolo' om mantad i' dot id pomusarahan diyolo', om i pinointalang do poboroson diyolo' nga' a' i' otopot. 4 Oi tulun dot Israil, iri ngai' nopo i nabi do mantad id dokoyu'ddi om aiso' i' o guna', tu' miagal no di toni di songingiyon dot id pogialat-alatan di kinaraagan do bandar. 5 Tu' a' i' iyolo' madtamong do hiri'd kinoiyonon di nangaraag o tolig om a' diyolo' wonsoyon kawagu i tolig. Om a' iddi ointirungan ot Israil do rumikot o pisangadan do tontok di tadau do rumikot oku, iyoho' i Tuhan, do mongoi pomohukum dokoyu. 6 A' ngai' i' otopot i pinointalang do poboroson diyolo', om a' otopot i poboroson diyolo' do pasal dit osiliu dot id dosunsudan. Poboroson diyolo' do mantad id doho' i boros di popimboroson diyolo' nga' a' oku i' nokoponuhu' diyolo' do moro-boros. Om sorohon indo daa diyolo' dot abayaan i boros diyolo'! Nga' poingkuro kaka daa dot abayaan iri? 7 Sunudan ku no iyolo' dot: Iri nopo i pinointalang dot okito diyolo'ddi om a' i' otopot, om iri poboroson diyolo' do pasal dit osiliu dot id dosunsudan nga' tudut ngai' i'. Posongonuan daa diyolo' doho' i boros diri, om a' oku i' insan kopomoros dot id diyolo',” ka dau. 8 Gowoi poddi om poingkaa o boros do Tuhan, it Asawat Kopio dot id diyolo', “A' i' otopot ino boros dokoyu, om ino pinointalang nga' tudut ngai' i'. Saapon ku no iyokoyu. 9 Hukuman ku nondo iyokoyu, i piro-piro o nabi di popimboros do pinointalang di pininsarahan i' toomod om popoboros do pasal dit osiliu dot id dosunsudan dit a' otopot. A' kou nondo koino-ino do mongoi rapou do tontok do tumimung i tulun ku do mogiupakat do momonsoi'd nunu nopo. Om oidu' nondo o ngaran dokoyu do mantad id bansa' dot Israil, om a' kou no koguli' dot id pomogunan dokoyu. Om oilaan nogindo dokoyu dot iyoho' no o Tuhan, it Asawat Kopio. 10 Oi koinsanai di nabi di goudut! Pinalid dokoyu i tulun ku tu' mimboros kou dot ongosonong ngai' i' om aiso' o koligagaanan. Nga' otopot nopo kopio om a' i' iyo'ddi. Pinopoingkakat i tulun ku do tolig dit ongoluwau o watu, om rikot kou no iyokoyu do minongoi panaat diri dot opurak. 11 Oi koinsanai di nabi di goudut, humaba' indo i tolig dokoyu'ddi. Tu' porikot oku nondod rasam dit asapou. Ootungan nondo'ri do karambatu om obuntul do tongus dot opuhod. 12 Om ahaba' nondo i tolig, om muhot ngai' nopondo o tulun dokoyu ondung nunu noo kinootuk-otukon do sinaat dot opurak i tolig diri,” ka. 13 Om poingkaa no o boros do Tuhan, it Asawat Kopio, “Porikot oku nondod tongus dit opuhod dot atatagadan oku, om porikot oku'd rasam dot asapou om karambatu do pamaraag di tolig. 14 Nokopomusorou mantad oku nod raagon ku i tolig di sinaat dokoyu'd opurak diri, om babakon ku'ri, gisom dot iri pondo watu do pinoimpahan ot oolu'. Apatai ngai' kou nopondo dot ahabaan di tolig. Om koilo ngai' kou nogindo dot iyoho' no o Tuhan. 15 Om kopuriman nondo do kawagato' do kototogod ku i tolig om i tulun di minanaat dot opurak di tolig diri. Om sunudan ku nogindo iyokoyu dot a' no hino i tolig diri do miagal dokoyu i minanaat diri tu' a' nondo hino. 16 Oi koinsanai di nabi di goudut! Pinoboros dokoyu dot ongosonong-sonong ngai' om aiso' o koligagaanan do Yorusalim, om maso ka dot aiso' nogi' o kasanang-sanangan!” ka. Miagal noddi o boros do Tuhan, it Asawat Kopio.
I Pinoboros di Piro-Piro Nabi di Goudut do Pasal dit Osiliu dot id Dosunsudan
17 Boros kad Tuhan, “Dinondo no, oi tulun, om antangan no i tongoondu' dit id pogialatan do tulun nu di popimboros dit osiliu dot id dosunsudan. Pasalaon no iyolo'. 18 Om sunudan no iyolo' diti poboroson ku, iyoho' i Tuhan, it Asawat Kopio, dot id diyolo'. Obungou kou no, iyokoyu i tongoondu' di popimboros dit osiliu dot id dosunsudan. Monombir kou'd kain do poriliton dot id lunggayan do maan do gimat om momonsoi kou'd kulu di kilimu' do maan do kuluonon do tulun, om kikuasa' i' i tulun di mamakai'ddi dot id koposi-posion do tulun do suwai. Orohian kou do kaanu'd kuasa' dot id koposi-posion om kapatayon do tulun ku om pakayon dokoyu i kuasa'ddi do maan dokoyu'd kountungan dokoyu. 19 Minongindaraat kou doho' dot id toguang do tulun ku do mokimaanu-anu kou dit a' i' kopiro tonggom do barli om a' kopiro o liob do roti. Patayon nogi' dokoyu i tulun dit aiso' o sala', om posion nogi' dokoyu i tulun dit apatut daa do patayon. Om pingudutan dokoyu i tulun ku, om monongkuyaan nondo iyolo' dokoyu,” ka dau. 20 Om poingkaa no o boros do Tuhan, it Asawat Kopio, dot id tongoondu' di popimboros dit osiliu dot id dosunsudan, “Araatan oku do kokito di gimat do poriliton dot id lunggayan, i pakayon dokoyu do maan daa do pongigit do koposion om kapatayon di tulun ku. Gayaton ku nondo i gimat di poriliton diri do mantad id longon dokoyu om poiduwon ku i tulun di kuasaon daa dokoyu. 21 Undaton ku nondo i kulu dokoyu di kilimu', om poiduwon ku i tulun ku do mantad id karaato' dokoyu gisom dot a' nondo dokoyu aanu kawagu iyolo' do gisom dot alaid. Om koilo kou nogindo dot iyoho' no o Tuhan. 22 Poluhoyon dokoyu o ginawo do tulun dit ongosonong, i tulun dit a' ku i' daa pokorualan dot ino tudut dokoyu o maan dokoyu'd popoluhoi. Posonongon dokoyu o ginawo di tulun dot araat gisom dot a' nondo iyolo' tumingkod do momonsoi'd dusa om a' iyolo' apasi. 23 Baino' nopondo, om opupusan no i pinointalang om i popimboroson dokoyu dit a' otopot do pasal dit osiliu dot id dosunsudan. Poiduwon ku no i tulun ku do mantad id kuasa' dokoyu dit araat. Om koilo kou indo dot iyoho' no o Tuhan,” ka dau.
Hukuman do Tuhan i Modsubak do Tingolig
1 Haro o piro-piro di boyoon do tulun dot Israil do minongoi ponguhot doho' do pasal do korohian do Tuhan. 2 Om boro-boros noddi o Tuhan dot id doho' do poingkaa, 3 “Oi tulun, nakatahak ngai' nodti tulun o koposion diyolo' dot id tingolig om gowoi poddi om nabayayat iyolo' do momonsoi'd dusa. Om ondos daa diyolo' om sumimbar oku po diyolo'? 4 Iyo nopoddi, om ongoi no boro-boros diyolo', om sunudan no iyolo' diti poboroson ku, iyoho' i Tuhan, it Asawat Kopio, dot id diyolo' do poingkaa, ‘Pointikid-tikid do tulun dot Israil di pinapatahak do tinan dau dot id tingolig om i nagayat diri do momonsoi'd dusa, om mongoi i' daa'ndo pokinosihat do nabi, om simbaron ku no dot isimbar dit apatut dot aanu ngai' di tingolig dau dit ogumu' kopio! 5 Pinopotongkiad ngai' no di tulun ku do mantad id doho' i tingolig, nga' maha' daa om gumuli' kawagu iyolo' dot id doho' dot osimbar ku iyolo' do miagal diti,’ kanto. 6 Om sunudan nogi' i tulun dot Israil diti poboroson ku iyoho' i Tuhan, it Asawat Kopio, do poingkaa, ‘Rologo kou no di dusa dokoyu, om tongkiadai ngai' no dokoyu i tingolig dokoyu di kososomu' kopio,’ kanto. 7 Soira' nopo do haro o tongoiso' di tulun dot Israil ko' ongoiso' di bansa'd suwai di poingiyon do poirrolot di tulun dot Israil, do tumongkiad doho' om tumuku' do tingolig, nga' mongoi i' daa'ndo pokinosihat di nabi, om iyoho' nondo o sumimbar dau! 8 Saapon ku nondo iyau, om silihon ku iyau do poiyaan dot id tulun do suwai. Om potongkiadon ku nondo iyau do mantad id tulun ku, om koilo indo i tulun ku dot iyoho' no o Tuhan. 9 Ondung aakalan o nabi, gisom do kopolombus iyau dot isimbar dit a' otopot, om iyoho' i' o minagakal dau'ddi. Om potongkiadon nondo iyau do mantad id tulun dot Israil, dot iyoho' i Tuhan, it Asawat Kopio, o popotongkiad. 10 Miagal nopo o hukuman do porotuon dot id nabi om id tulun di mongoi pokinosihat di nabi. 11 Wonsoyon ku pogi' o miagal diri nga' maan ku'd pangantob di tulun dot Israil do tumongkiad doho' om pangantob ku diyolo' do monosomu' do tinan diyolo' dot i dusa diyolo' o kososomu'. Om osiliu nondo iyolo'd tulun ku, om osiliu oku do Kinorohingan diyolo'. Iyoho' no i Tuhan, it Asawat Kopio, o minomoros diti,” ka dau.
I Nuu, om i Danil om i Ayub
12 Om boro-boros no o Tuhan dot id doho' do poingkaa, 13 “Oi tulun, ondung momonsoi'd dusa o tiso' o pomogunan om a' tumorodok dot id doho', om hukuman ku no o pomogunan diri. Om raagon ku i taakanon do songingopi'd hiri. Poporikot oku nondod mononglous om patayon ku o tulun om nintorusan do hiri. 14 Om mulong piya daa do songingiyon do hilo' i Nuu, om i Danil om i Ayub, nga' iyolo' nod tolu ot apasi di kosonongo' diyolo'. Iyoho' no, i Tuhan it Asawat Kopio, o minomoros diti. 15 Ko' poporikot oku pod nintorusan dit orongit do mongoi pamatai di tulun do poingiyon dot id pomogunan diri, gisom do kikoligagaanan nondo i pomogunan diri, om gowoi pondo om aiso' no o songulun piya do kobulun do maya'd hiri. 16 Om mulong piya do poingiyon daa i Nuu, om i Danil om i Ayub do hilo', nga' sumumpa' oku no dot id suang do ngaran ku, iyoho' i Kinorohingan di poimpasi, i Tuhan dit Asawat Kopio, dot iri piya i tangaanak diyolo' nga' a' i' diyolo' apasi. Iyolo' noo ot apasi, om iri nopondo pomogunan om osiliu i' do tana' dit a' sunian. 17 Ko' poporikot oku pod pisangadan dot id pomogunan diri, om porikot oku do rapo-rapo do don sumasangod di mamaraag om momunso do tulun om nintorusan. 18 Om mulong piya do poingiyon daa'd hilo' i tolu o tulun diri, nga' sumumpa' oku no dot id suang do ngaran ku, iyoho' i Kinorohingan di poimpasi, i Tuhan dit Asawat Kopio, dot a' i' iyolo' milo do mamasi dot isai nopo, dot iri piya i tangaanak diyolo', nga' a' i' apasi. Tu' iyolo' noo ot apasi. 19 Ko' poporikot oku do toruol di mogkoroliu dot id pomogunan diri, om pourobusan ku do kototogod ku, gisom do patayon ngai' ku nopo o tulun om nintorusan. 20 Om mulong piya daa do poingiyon i Nuu, om i Danil om i Ayub do hilo', nga' sumumpa' oku no dot id suang do ngaran ku, iyoho' i Kinorohingan di poimpasi, i Tuhan dit Asawat Kopio, dot a' i' iyolo' kapasi do tulun do suwai, tu' iri piya tangaanak diyolo' nga' a' i' diyolo' apasi. Diyolo' nod ginawo ot apasi di kosonongo' diyolo',” ka dau. 21 Poingkaa no o boros do Tuhan, it Asawat Kopio, “Porotuon ku nondo it apat o hukuman ku dit awagat kopio dot id Yorusalim do mamatai do tulun om nintorusan: pisangadan, om mononglous, om nintorusan dit orongit om toruol. 22 Om ondung haro o toolu-olu' diyolo' om i kapasi do tangaanak diyolo', om antangan no kopio iyolo' do mongoi iyolo' solowot diya'. Antangan no i kararaat diyolo', om kopuriman indo i tulun ku dot apatut i' i hukuman do pinorikot ku dot id Yorusalim. 23 Om oilaan nogindo diyolo' dot otopot ngai' i' i paantakan do kinapamansayan ku do miagal diri. Iyoho' no, i Tuhan, it Asawat Kopio, o minomoros diti,” ka dau.
Guas dot Anggur o Pinoinukadan
1 Om boro-boros no o Tuhan dot id doho' do poingkaa, 2 “Oi tulun, nunu o pisuayan do guas dot anggur om i guas do kayu'd suwai do hilo'd gouton? Nunu o poimaha' di guas dot anggur do pataladon di kokoyuan do hilo'd gouton? 3 Milo toi i guas dot anggur diri do wonsoyon do nunu nopo? Milo toi iri do wonsoyon do pososoitan do pakakas? 4 Iri nopo om milo nod maan do siduwon om aiso' no o guna'd suwai ko' iri, om osorob nopondo o misingompok om oohun o hiri'd tanga-tanga' om haro po tuu o guna'ddi? 5 Aiso'! Tontok piya dit a' po otutudan nga' aiso' mantad no o guna'ddi. Om okon-okon poddi do nosorob om nouu,” ka dau. 6 Om gowoi poddi om poingkaa o poboroson do Tuhan, it Asawat Kopio, “Poingkuro nopo i guas dot anggur dot onuon do mantad hilo'd talun om tutudan nondo, om iyo nogiddi o wonsoyon ku dot id tulun di hilo'd Yorusalim! 7 Om hukuman ku nondo iyolo'. Nokopoggidu' piya daa iyolo' do mantad id tapui di koinsan i' nga' tapui kasai' indo o monorob diyolo' do baino'. Om koilo nogindo iyolo' dot iyoho' no o Tuhan. 8 Silihon ku nondo o pomogunan diti do tana' dit a' sunian tu' a' i' iyolo' tuminorodok dot id doho'. Iyoho' no, i Tuhan it Asawat Kopio, o minomoros diti,” ka dau.
A' Otorodok o Yorusalim
1 Om boro-boros po kawagu o Tuhan dot id doho' do poingkaa, 2 “Oi tulun, pointalango' no dot id Yorusalim i nongowonsoi dau dit araat kopio,” ka. 3 Om suhuo' oku nod Tuhan, it Asawat Kopio, do popoboros do boros diti dot id Yorusalim, “Oi Yorusalim, iya' nopo om pinaganak do hilo'd pomogunan do Kanaan. Tapa' nu nopo om tulun dot Amori om tina' nu no om tulun do Hit. 4 Tontok nopo di pinogkosusu ko, om aiso' i' o minongimpusod diya', om aiso' o minomodsu' diya', om aiso' o minomoluhad diya'd silaon, om aiso' o minongumut diya'. 5 Aiso' i' o songulun piya do nosianan diya' do gisom do sipomonsoi do miagal diri dot id diya'. Tontok di pinogkosusu ko, om aiso' i' ot osianan diya'. Pataamo' ko nopo do hiri'd talun. 6 Om talib oku noddi om kokito tiya' no do mura-gura' do poirrolot di raha' nu. Notongkop ko po daa'd raha', nga' mada' oku i' do matai ko. 7-9 Om ongoi oku noddid waig om isuo' ku no i raha' dot id tinan nu. Om luhado' ku'd tumau do saitun o tinan nu. Om pogoyoo' ku no iya' do miagal do tanom dit orombung o sunion. Om oruuhai ko'd suminuni, om osonong o tinan nu om aranggou ko, om nokosumandak ko. Om gumayo noddi o susu nu om anaru o tobuk nu, nga' poillabas ko i'. Om soira'ddi tuminalib kawagu oku, om kokito ku no do norikot no o maso nu do monokiuhang-uhang. Om porosukai ku no diya' i rasuk ku tu' poillabas ko i' om pamatos oku nod papatahak do kosianan ku dot id diya'. Pinogirot ku o batos ku do mangawin diya', om nosiliu ko do doho'd songonuon. Iyoho' no, i Tuhan it Asawat Kopio, o minomoros diti. 10 Om rosukai tiya' noddi do gaun di rinindaan om nonuan ku iya' do kasut di kulit dit osonong kopio do winonsoi, om kulu do kain linan, om kulabai do sutara'. 11 Om nonuan ku iya' do watu dot olumis dit agayo o gatang, om nonuan tiya' do golong om karo do maan do pongillumis. 12 Nonuan ku iya' do tanting do todung, om tanting do tolingo om tupi' do dong raja' dit olumis. 13 Pongillumis nu nopo om tamas ngai' nopo om pirok do winonsoi, om posokoton nu nga' kain linan kasai' nopo om sutara' di norindaan. Roti di kanon nu nga' tapung kasai' nopo dit osonong kopio o wonsoyon, om haro o paha' om tumau do saitun do kanon nu. Kosorong poo o kolumiso' nu om nosiliu ko'ddi do raja'd tondu'. 14 Om nabantug ko'ddi dot id pointikid-tikid do bansa' tu' i kolumiso' nu dit aiso' o bohiton o pinapabantug diya', om iyoho' no o pinopolumis diya'. Iyoho' no i Tuhan, it Asawat Kopio, o minomoros diti. 15 Nga' pinokirayahan nu i' i kolumiso' nu om i kobontugo' nu, om duminudun ko'd modop dot isai nopo o tongokusai di katalib. 16 Nanu nu'ddi o wookon di rasuk nu do pinongillumis di tiyonon nu do tumuku' dot id tingolig nu, om patahako' nu nopo o tinan nu dot id koinsanai di tongokusai, do miagal po di tondu'd sundal. 17 Om nongoi nu i pongillumis di tamas om pirok do winonsoi, i pinatahak ku diya', om winonsoi nu'ddi iri do piro-piro o tininganak do kusai, om minonokiampahu' ko'ddi di tininganak diri. 18 Om ngoyo' nu no i rasuk di rinindaan di tinahak ku diya' om porosukai nu no di piro-piro o tininganak, om pinatahak nu diyolo' i tumau do saitun om i kominyan di pinatahak ku diya'. 19 Nonuan ku iya' do takanon dot i tapung dit osonong no kopio o winonsoi, om i tumau do saitun dit osompipi', om paha', nga' pinosubak ngai' nu i' iri do numaan do porsombahan do pomolumbok do ginawo di piro-piro o tingolig. Iyoho' no, i Tuhan it Asawat Kopio, o minomoros diti. 20 Om ngoyo' nu noddi i tangaanak to'd kusai om tondu' om patahako' nu no do numaan do porsombahan di sumbolion dot id tingolig. A' toi ula' no o karaato' dot a' tumorodok dot id doho', 21 dot a' piya daa ngoyon i tangaanak to do patahakon dot id piro-piro o tingolig? 22 Tontok di maso nu'd sundal, i koposi-posion nu di kososomu' kopio, om a' nu i' insan kosorou i nosiliu dot id diya' di tanak ko po, do tontok di poillabas ko po, om mura-gura' ko po do poirrolot di raha' nu,” ka dau.
Koposi-Posion do Yorusalim do Miagal do Sundal
23 Om boros kad Tuhan, it Asawat Kopio, “Nobungou ko no! Nobungou ko no kopio! Tu' piningwonsoi ngai' nu i' it angaraat. 24 Pomonsoi ko pod tiyonon do tumuku' dot id tingolig do hilo'd toning do ralan om pagampahu' ko nogi'. 25 Sinosomu' nu i kolumiso' nu. Om isai nopo i tongokusai do tumalib nga' patahakan nu no do tinan nu. Om muhang-ruhang nopoddi o kosusundal nu do pointikid do tadau. 26 Pinologos nu i tulun do Masir, i songkoduwo nu dit ongoorot-orot kopio om i bonduwon do mongoi dudun diya'd modop. Om iri no i kosusundal nu o pinoningkau nu do kototogod ku. 27 Om baino' noddi om iduwon ku no i bahagi' di barakat ku, om hukuman tiya' nondo. Om nakatahak ku no iya' dot id tulun do Pilistin, it araatan diya' om i sosomuan do kokito dino kowoyo-woyoon nu do sosomu'. 28 A' ko i' ouru-uru di suwai, om ongoi ko poddi gusa' di tulun dot Asur. Om nosiliu ko'ddi do sundal diyolo' nga' iyolo' piya nga' a' i' nokouru diya'. 29 Om nokoumbal ko i' do suminiliu'd sundal dot id tulun do Babil, i bansa' do dumadagang diri, nga' iyolo' piya nga' a' i' nokouru diya',” ka dau. 30 Poingkaa no o boros do Tuhan, it Asawat Kopio, “Miagal ko po di sundal dit aiso' o tingayam do miningwonsoi ngai'ddi. 31 Tikido' nu nopo i ralan do winansayan do tiyonon do tumuku' dot id tingolig om iyonon do minsundal. Nga' okon i' ko' tusin o tihumon nu do miagal di sundal do koubasanan. 32 Nga' iya' nopo om miagal do tondu' di magampahu' dot id kusai'd suwai om a' nogi' orohian di dau'd sawo. 33 Iri nopo sundal om bayaran i', nga' iya' nopo om minomuhawang nogi' do koinsanai di kongouhangan nu om sinisipan nu iyolo' do tusin, om rumikot indo iyolo' do mantad id piro-piro o kinoiyonon do mongoi dudun diya'd modop. 34 Suwai-suwai no kopio o diya'd kosusundal. Tu' aiso' i' o minononsog diya' do sumiliu'd sundal. Om a' ko binayaran; tu' iya' nogi' o minambayar diyolo'! Suwai-suwai ko no kopio iya'!” ka dau.
Hukuman do Kinorohingan o Yorusalim
35 Iyo nopoddi om pokinongoho' no iti boros do Tuhan, it Asawat Kopio, oi Yorusalim, i sundal! 36 Poingkaa no o boros do Tuhan, it Asawat Kopio, “Nidu' ngai' nu i rasuk nu, om pinatahak nu o tinan nu dot id kongouhangan nu om id koinsanai di tingolig nu di kososomu' kopio, om pinatai nu i tangaanak nu do siniliu'd porsombahan dot id piro-piro o tingolig nu. 37 Gowoi poddi om porikoton ngai' ku nondo i tuhang-uhang nu di gulu po, i korohian nu om i karaatan nu. Om songintutuk nopondo diya' iyolo' do songingkakat, om labasan tiya' nogindo om kokito i' iyolo' diya' do poillabas. 38 Om pasalaon ku nondo iya' tu' i tampahu' nu om i minamatai ko o kapasalaan ku. Om hukuman ku iya' do kapatayon tu' atatagadan oku no om alasu' o ginawo ku. 39 Om posuangon ku nondo iya' dot id kuasa' diyolo', om huyason nondo diyolo' i tiyonon nu do magampahu' om tumuku' dot id tingolig. Om onuon ngai' nondo diyolo' i pakayan nu om i pongillumis nu, gisom do poillabas ko pondo tomod. 40 Om suhuon nondo diyolo' i tulun dot ogumu' do momodumpau diya'd watu, om pimpopoton ko nondo diyolo' di gayang diyolo'. 41 Om tutudan nondo diyolo' i walai nu om pologoson o tongoondu' dot ogumu' do miontong di pomohukum diya'. Om tingkodon ku nondo iya' do magampahu' om tingkodon ku iya' do papatahak dot ipuhawang dot id kongouhangan nu. 42 Om katalib pondo o kototogod ku, om koundorong oku nogindo. Om a' oku nondo otogod om a' oku moguhang. 43 Nolihuan nu i pinomogompi' ku diya' dit okoro' ko po, om hinukuman ku'ddi iya' tu' i piningwonsoi nu o kinopomohukuman ku, om pinotogod oku diya' dino pingwonsoyon nu dit angaraat. Nokuro toi tu' ruhangan nu pod tampahu' o koinsanai di piningwonsoi nu do kososomu' kopio? Iyoho' no, i Tuhan it Asawat Kopio, o minomoros diti,” ka dau.
Poingkuro nopo i Tina' om Iyo noddi i Tanak Dau
44 Boros kad Tuhan, “Popimboroson nondod tulun o suriban diti do pasal diya', oi Yorusalim, ‘Poingkuro nopo i tina' om iyo noddi i tanak dau,’ ka nondo diyolo'. 45 Tanak ko no kopio'd tondu' di tina' nu. Tu' araatan iyau do kokito di sawo dau om i tangaanak dau. Om miagal ko nopo di tongotobpinai nu'd tondu' tu' araatan di sawo diyolo' om i tangaanak diyolo'. Tina' nu nopo om i tongotobpinai nu, iri no i piro-piro o bandar do suwai, om bansa' do Hit, om tapa' no dokoyu om i bansa' dot Amori. 46 Taka' nu nopod tondu' om Samaria, i ponong hilo'd utara, om i kawalayan do hilo'. Om tadi' nu nod tondu' om Sodom. Om koinsanai di kawalayan do hilo', i ponong hilo'd salatan. 47 Nabagalan ko no toi do tuminanud di diyolo'd kowoyo-woyoo' om minomit di pingwonsoyon diyolo' di kososomu' kopio? Amu', tu' a' no alaid om araat po ko' i diyolo'd kowoyo-woyoo' o koinsanai di diya'd wowonsoyon,” ka dau. 48 Boros kad Tuhan, it Asawat Kopio, “Sumumpa' oku no, dot id suang do ngaran ku, i Kinorohingan di poimpasi, dot a' nogi' kopio insan pomonsoi i tobpinai nu; i Sodom om koinsanai di kawalayan do hilo', di karaaton do miagal di diya'd winonsoi om i kawalayan nu. 49 Oondos tomod o Sodom om i kawalayan do hilo' tu' osima' i' iyolo'd kanon om osimbayan do momogun-mogun tu' aiso' no o kagangau, nga' a' i' iyolo' minomogompi' di tulun do mosikin om i tulun dot oinggorit. 50 Ongoondos kopio iyolo' om ongosurilog om mingwonsoi di katagadan ku om gowoi poddi om rinaag ku iyolo'; om iya' nga' koilo iddi. 51 A' i' kosongintanga-tanga' di diya'd dusa, o dusa do Samaria. Om araat ko no kopio iya' ko' iyau. Om pitaladon kou nopo nga' miagal pod aiso' o kasalaan di piro-piro o tobpinai nu'd tondu' do katalad di diya'd kararaat. 52 Om baino' noddi om boboon nu no o kointingayamo' nu. Tu' araat no kopio i diya'd dusa ko' mantad di dusa di piro-piro o tobpinai nu'd tondu', om gisom do miagal pod aiso' o kasalaan diyolo' dot ataladan di diya'd dusa. Kointingayamai no om boboon no o tingayam nu tu' miagal pod aiso' o bohiton di piro-piro o tobpinai nu do katalad diya',” ka dau.
Otonduli' Indo Kawagu o Sodom om Samaria
53 Om boros kad Tuhan dot id Yorusalim, “Tondulion ku indo om posimbayanon ku kawagu o Sodom om i kawalayan do hilo', om Samaria om i kawalayan do hilo'. Om iya' nogi' nga' tondulion ku i' om posimbayanon ku kawagu. 54 Om ointingayaman ko nondo, om iri no i kointingayamo' nu o popointalang do nokoundar ngai' i tobpinai nu'd tondu'. 55 Om osimbayan nondo kawagu iyolo' om iya' om i kawalayan nu nga' otonduli' indo kawagu. 56 A' ko toi minomohingi-hingi do Sodom do tontok dit oondos ko po om tontok dit a' po nokointalang i karaato' nu? 57 Baino' nopoddi om miagal ko nopo dau tu' tiirak-irak po di tulun dot Idom, om i tulun do Pilistin, om i songkoduwo nu'd suwai dit araatan diya'. 58 Om mositi' no dot oinggorit ko tu' sosomu' i' kopio om koindaraat tomod i nowonsoi nu. Iyoho' no i Tuhan o minomoros diti,” ka dau.
Tumpongo di Poingompus
59 Boros kad Tuhan, it Asawat Kopio, “Wonsoyon ku nondo dot id diya' o miontok di nowonsoi nu, tu' a' nu i' sinulung om tinolibambanan nu i tumpongo ku. 60 Nga' pusohon ku i' i tumpongo di pinoumpongo ku diya' dit okoro' ko po, om momonsoi oku do tumpongo di poingompus dot id diya'. 61 Om osorou nu nondo i kowoyo-woyoon nu om ointingayaman ko do koguli' i taka' nu om i tadi' nu'd tondu'. Om silihon ku nondo iyolo' do miagal do tanak nu'd tondu', do mulong piya dot a' i' daa iri poinsuang di tumpongo ku dot id diya'. 62 Om inwoguan ku nondo i tumpongo ku dot id diya' om oilaan nu nogindo dot iyoho' no o Tuhan, 63 om ompunan ngai' ku nondo i kasalaan do nowonsoi nu, nga' osorou kasai' nu indo ngai' iri, om a' ko nondo milo do momoros do nunu nopo tu' ointingayaman ko po. Iyoho' no i Tuhan it Asawat Kopio, o minomoros diti,” ka dau.
Kondiu om Guas dot Anggur o Pinoinukadan
1 Om boro-boros no o Tuhan dot id doho' do poingkaa, 2 “Oi tulun, sunudan no i tulun dot Israil do poinukadan diti, 3 do popoilo diyolo' do poboroson ku, iyoho' i Tuhan, it Asawat Kopio, dot id diyolo': Haro o kondiu dot agayo di kitalad dot olumis om agayo om okoris. Om tulud nori do kuminaa do hilo'd konuluhanan do Libanon om ponipu' no do tunduk do kayu sedar. 4 Om tanggayai no dau iri do hiri'd bandar dit ogumu' o tulun do dumadagang. 5 Om ongoi noddi iyau panganu do sompuun o totonomon dit okoro' po do mantad hilo'd pomogunan dot Israil, om potonomo' no dau iri do hiri'd tana' dit oruak, it opiyopos kasai' do waig. 6 Om suni no i tinanom diri, om guas iddi dot anggur dit osiriba'. Om agayo o kinoroloyon di raan. Om kuminawas diri i raan diri do pointuduk ponong id kondiu'ddi, om nokogirot tomod o gamut diri do hiri'd tana'. Om okohob tomod o tuntu di guas dot anggur diri. 7 Om haro po kawagu o kondiu dit agayo om alaab o talad om akapal o hulu. Om poroloyo' no di guas dot anggur o gamut dau do poinroloi do ponong id kondiu'ddi, om pinotimbaba' ngai' i raan dot id kondiu'ddi, tu' mokimamaha' dot oonuan do waig dit agayo ko' mantad di hiri'd kabun di pinatanaman dau. 8 Nga' iri nopo guas dot anggur diri om nakatanom no dot id tana' dit oruak, om osima' do waig, om okohob diri o tuntu, om mongua' dot asapou, om nosiliu do guas dot anggur dit osonong kopio. 9 Om ponguhot oku noddi, iyoho' i Tuhan, it Asawat Kopio, do poingkaa: Sumuni i' tuu om kumohob i' ilo guas dot anggur dilo'? A' i' tuu di kondiu dit id gulu, ngoyon utuso' ilo', om ngoyon upuo' i tua', om ngoyon tipuo' i raan do gisom dot oriou? Tu' a' i' mokimokoris do tulun om a' mokimokoris do bansa' do mongutus diri. 10 Apanggor nogi' o pinananom diti, nga' sumuni i' tuu om kumohob iti? A' i' tuu rumiou iti dot oontok di tongus do mantad id koulayon? A' i' tuu rumiou ilo' do hilo'd pinatanaman do dinondo?” ka dau.
Pinosondot o Komoyon di Pinoinukadan
11 Om boros kad Tuhan dot id doho', 12 “Uhoto' daa iti sumosongkiwal ondung koilo iyolo' do komoyon di poinukadan diri. Sunudan no iyolo', do minongoi'd hilo'd Yorusalim i raja' do Babil om tinanggayan dau i raja' do Yohuda om i piro-piro o pagawai do Yohuda do kuminaa do hilo'd Babil. 13 Om ngoyo' no dau o songulun do mantad hiri'd sompiiyon di raja' do Yohuda'ddi, om ponokiumpongo no iyau dau, om suhuo' no dau iyau do sumumpa' do tumorodok dot id dau. Om tinanggayan di raja' do Babil i tulun dit angabantug. 14 Om a' indo koingkakat i bansa' do Yohuda om ogirot nondo om osulung i piniumpangaan diri. 15 Nga' suminaap i' i raja' do Yohuda om minonuhu' nogi' iyau'd tulun do minongoi'd hilo'd Masir do mongoi panganu do kuda' om soudor dit ogumu'. Kamanang i' tuu iyau'ddi? Milo i' tuu iyau do mogidu'? Ondung rinaag dau i piniumpangaan diri om atantu' no dot ohukuman iyau. 16 Sumumpa' oku no, dot id suang do ngaran ku, iyoho' i Kinorohingan di poimpasi, i Tuhan dit Asawat Kopio, dot apatai nondo i raja' do Yohuda do hilo'd Babil, tu' a' i' dau sinulung i sumpa' om i tumpongo di pinoboros dau dot id raja' do Babil, i pinoposiliu dau'd raja'. 17 Om iri piya i piro-piro o soudor do Masir dit okoris nga' a' no milo do monguhup dau do sumaap di tulun do Babil. Tu' momonsoi nondo iyolo' do tolig do ponurungku', om mongukad do parit, om ogumu' i' o tulun dot apatai'd hiri. 18 A' dau sinulung i sumpa' dau om i tumpongo do winonsoi dau. Om a' no iyau kopoggidu' tu' winonsoi i' dau o miagal diri,” ka dau. 19 Boros kad Tuhan, it Asawat Kopio, “Sumumpa' oku no, dot id suang do ngaran ku, i Kinorohingan di poimpasi, do hukuman ku no i raja' do Yohuda tu' a' i' dau sinulung i tumpongo di pinoboros dau dot id suang do ngaran ku dot id raja' do Babil. 20 Om pataanon ku nondo o lawa' om atangkap ku i' iyau. Om tanggayan ku nondo iyau do hilo'd Babil om hukuman ku iyau'd hilo' tu' a' i' iyau tuminorodok dot id doho'. 21 Om angapatai ngai' nondo i soudor dau dit ongosiou dot id pisangadan, om iri no i toolu-olu' om pointongkop nopondo o kotompiason. Om oilaan nogindo di tulun ku dot iyoho' no i Tuhan, o minomoros diti,” ka dau.
Pinapabatos o Kinorohingan do Haro o Pagandasan
22 Iti no pinoboros do Tuhan, it Asawat Kopio, “Onuon ku nondo i tunduk do kayu sedar dit akawas om monipu' oku do raan dit okooro'; om tonomon ku nondo iri dot id nuluhon dit akawas. 23 Potonomon ku'ri dot id nuluhon dot Israil dit akawas kopio. Om momuraan nondo iri om mongua' om osiliu do kayu sedar dit akawas. Om mogisuayan nopondo o tombolog do miyon do hiri om mintulungung do hiri'd dolungungan diri. 24 Om oinsanan nopondo i kayu do hiri'd pomogunan diri do koilo dot iyoho' no o Tuhan. Tagadon ku nondo i kayu dot angakawas om posunion ku do gisom dot angakawas i kayu dit ongoniiba'. Riohon ku nondo i kayu dot ongotomou om potolidon ku om pokohobon ku i kayu di nongoriou. Iyoho' no i Tuhan, o minomoros diti. Om wonsoyon ku i' o miagal di pinoboros ku do wonsoyon ku,” ka dau.
Sorompori-pori do Sumimbar
1 Om boro-boros no o Tuhan dot id doho' do poingkaa, 2 “Nokuro tu' pinghulitan kopio iti suriban diti do hilo'd pomogunan dot Israil? ‘Iri molohing o mangakan di tua' dot oonsom, nga' iri nondo tangaanak ot angaro,’ ka no diyolo'. 3 Sumumpa' oku, dot id suang do ngaran ku, iyoho' i Tuhan it Asawat Kopio, dot a' nondo pinghulitan iti suriban do hilo'd Israil. 4 Tu' iyoho' ngai' i' o sanganu do ginawo'd tulun, i ginawo di molohing om i ginawo di tanak dau. Om isai nopo i kowonsoi'd dusa om iri no o matai. 5 Ondung haro o tulun dit osonong, om it otopot om it otulid o ginawo, 6 om a' i' iyau tumuku' dot id tingolig do tulun dot Israil om a' iyau mangakan di taakanon di nokosubak dot id podsusubakan do tingolig. Om a' iyau insan ongoi pangasou do sawo do kusai'd suwai om a' iyau mongoi dudun do tondu' di maso'd pomulanan. 7 Om a' iyau insan do monipu', om a' manakau. Om pogulion kasai' dau i konunu-nunuan di pinasanda' do tulun di kiutang dot id dau. Om paakanon dau i tulun do louson om onuan dau do pakayan i tulun dit aiso' o pakayan. 8 Om a' iyau mokibunga di paalasan dau. Om a' iyau momonsoi dot araat, om otulid kasai' o pomumutus dau do nunu nopo o pisongkiwalan. 9 Mumboyo' i' iyau do ponuhuan ku om tumanud dit oturan ku. Om tulun no do miagal diri ot otulid o ginawo om apasi. Iyoho' no i Tuhan it Asawat Kopio, o minomoros diti. 10 Nga' ondung kianak o tulun diri, om iri nopo tanak dau nga' manakau om mamatai, om mingwonsoi nopo dit angaraat do suwai ko' iri, 11 it a' di tapa' dau insan kowonsoi. Om mangakan iyau do taakanon di nokosubak dot id podsusubakan do tingolig. Om mongoi iyau ponugku' om mongoi dudun do sawo do kusai'd suwai. 12 Om monipu' iyau di tulun do mosikin, om manakau om onuon dau i konunu-nunuan di pinasanda' do tulun di kiutang dot id dau. Om mongoi iyau do hiri'd podsusubakan do tulun dit a' kotutun do Tuhan, om tumuku' iyau dot id tingolig di kososomu' kopio. 13 Om mokibunga iyau di tusin di paalasan dau. Apasi i' tuu o tulun do miagal diri? Amu', a' i' iyau apasi. Tu' nowonsoi ngai' no dau i wowonsoyon di kososomu' kopio om poingkuro piya nga' matai kasai' no iyau! 14 Om ondung kianak i tulun di miningwonsoi dot araat diri, om nokito ngai' di tanak i dusa di piningwansayan di tapa' dau nga' a' i' iyau minomit diri. 15 Om a' i' iyau tumuku' dot id tingolig di tulun dot Israil, om a' iyau mangakan di pinosubak dot id podsusubakan do tingolig. Om a' iyau mongoi pangasou do sawo do kusai'd suwai. 16 Om a' iyau mongulok-ulok dot isai nopo om a' iyau manakau. Om pogulion dau i konunu-nunuan di pasandaon do tulun di kiutang dot id dau. Om paakanon dau i tulun di louson, om onuan dau do pakayan i tulun dit aiso' o pakayan. 17 Om a' iyau insan do momonsoi dot araat om a' mokibunga di tusin di paalasan dau. Om a' i' i tanak diri apatai dot obungou di dusa di tapa' dau, suwai ko' apasi i' iyau. 18 Nga' iri nopo tapa' dau, i minonipu' om minanakau, om i miningwonsoi dot araat do suwai ko' iri, om apatai no dot obungou di dusa dau. 19 Nga' haro i' doti' daa o tulun do muhot ondung nokuro tu' a' humompit i tanak do mamabo di dusa di tapa' dau. Om isimbar nopoddi nga' iri nopo tanak om osonong i' om otulid o ginawo. Tinanud i' dau it oturan ku om otorodok i' om otulid o ginawo. Tinanud i' dau it oturan ku om otorodok iyau do minumboyo'ddi, om atantu' no dot apasi i' iyau. 20 Isai nopo o tulun di momonsoi'd dusa om iri no ot apatai. A' i' apatut do mamabo' i tanak do kootuson di dusa di tapa' dau, om i tapa' nga' a' i' apatut do mamabo do kootuson di dusa di tanak dau. Tu' tulun nopo dit osonong om somulian no dot osonong tu' minomonsoi i' iyau dit osonong. Om tulun no dit araat om oinggorit no tu' araat i' o winonsoi dau. 21 Ondung tumingkod do momonsoi'd dusa i tulun dot araat, om tumanud nondo dit oturan ku, om ondung momonsoi nondo iyau dit otopot om osonong, om a' no iyau apatai. 22 Om oompunan ngai' indo o dusa dau; om apasi iyau tu' otopot i' o winonsoi dau. 23 Ondos nu daa om orohian kopio oku iyoho' i Tuhan, it Asawat Kopio, do kokito di tulun dot araat dot apatai? A' oku i' kopio orohian! Tu' orohian oku nogi' kopio do kokito dau do tumongkiad di dusa dau om apasi i' iyau. 24 Nga' ondung haro o tulun dit osonong, do tumingkod do momonsoi dit osonong, tu' momonsoi nogindo iyau dit araat, om i kososomu' kopio, i koubasanan do tulun dot araat do mingwonsoi, om apasi kasai' po tuu i tulun diri? Amu'! Tu' aiso' nondo o tiso' po di winonsoi dau dit osonong do sorohon kawagu. Om apatai nondo iyau tu' minomonsoi i' iyau'd dusa om a' tuminorodok dot id doho'. 25 Om haro i' doti' o momoros do poingkaa, ‘A' i' otulid i winonsoi'd Tuhan!’ ka. Pokinongou kou no, oi tulun dot Israil! A' toi otulid i winonsoi ku? Iyokoyu nogi' it a' otulid o wonsoyon. 26 Soira' nopod tumingkod i tulun dot osonong do momonsoi dot osonong, tu' momonsoi nogindo iyau dit araat, om apatai no iyau, tu' araat i' o winonsoi dau. 27 Nga' ondung tumingkod i tulun dot araat do momonsoi'd dusa, om momonsoi nondo iyau dit otopot om it osonong, om apasi no iyau. 28 Tu' nopurimanan ngai' no dau i wonsoyon dau, om tumingkod nondo iyau'd momonsoi'd dusa. Om atantu' no dot a' iyau apatai suwai ko' apasi no iyau. 29 Om boros ka daa dokoyu, oi tulun dot Israil, ‘A' otulid iti wonsoyon nu oi Tuhan,’ ka. Nga' ino nogi' dokoyu'd wonsoyon ot a' otulid,” ka dau. 30 Om boros kad Tuhan, it Asawat Kopio, “Oi tulun dot Israil, butusan ku nondo o pointikid-tikid do tulun do miontok di nowonsoi dau. Rologo kou no di dusa dokoyu. Om kada' pologoso' ino dusa dokoyu do mamaraag do koposi-posion dokoyu. 31 Tingkadai ngai' no dokoyu o koinsanai dit araat di pingwonsoyon dokoyu, om pologoson no do koinwagu o pomusorou om ginawo dokoyu. Nokuro toi tu' uhang dokoyu'd matai kou? 32 A' oku i' orohian do haro ot ongoiso' piya'd tulun dot apatai. Tongkiadai ngai' no dokoyu i dusa dokoyu, om apasi kou i'. Iyoho' no, i Tuhan it Asawat kopio, o minomoros diti,” ka dau.
Sinding do Pogihad
1 Om suhuo' oku nod Kinorohingan do modsinding diti sinding do pogihad, do pogihad do duwo o raja' dot Israil: 2 Tina' nu nopo om iyo po di singa do tondu' dit oilo kopio om i suwai kopio ko' i koubasanan. Ginompi' dau i tangaanak dau dot id rolot do singa dit ongorongit. 3 Tinudukan dau o tiso' di tanak dau do mongintorus; om nosiliu'ddi iyau do singa dit orongit om i mangakan do tulun. 4 Om iri nopo piro-piro o bansa' do nokorongou do pasal dau, om popouni no do tuunion di popoilo do haro o koligagaanan. Om kosuang no iyau dot id luang, om tangkapo' noddi, om godingai noddi diyolo' iyau om gayato' no do hilo'd Masir. 5 Om andad nopo daa i molohing di singa, di tanak dau, om koilaai noddi dau dot aiso' no ot andadon dau. Om tudukai no dau i tanak dau di suwai, do sumiliu'd singa dit orongit om okoris. 6 Om soira' di nakagayo i tanak di singa'ddi, om rolot no iyau di singa do suwai. Om mininsingilo iyau do mongintorus, om suminiliu do mangangakan do tulun. 7 Minomohuyas iyau do kuta' do pogintirungan, om minamaraag iyau do piro-piro o bandar. Om ongooris ngai' nopo i tulun do hiri'd pomogunan do nokorongou di garom dau. 8 Om pogisokodung ngai' no i bansa' do mongoi saap dau. Honggo nopo o tadon nga' nokorikot ngai' no. Om pataano' no diyolo' i garing do panganu dau, om kaanu no diyolo' iyau. 9 Om pokurungo' no diyolo' iyau do hiri'd kukurungan do singa om pootodo' no do hilo'd pomogunan do Babil, do nongoi posolowoto' di raja'. Om tamangai no kopio diyolo' iyau, om a' i' orongou kawagu i garom dau do hilo'd konulu-nuluan dot Israil dit angakawas. 10 Iri nopo tina' nu nga' miagal pod guas dot anggur do pointanom do hiri'd kabun dit id toning do luyu'. Om orombung o sunion diri om mongua' tu' osima' i' do waig o hiri. 11 Iri nopo raan dau nga' ongokodou, om a' obintipu', gisom do nosiliu do sukud do raja' di momorinta'. Om kuminawas i tuntu dau do nokorikot do hilo'd haun, om koimayaan ngai' nopo iyau'd tulun tu' akawas i' iyau om okohob o tuntu dau. 12 Nga' nongoi iddi iyau utuso' do longon di tulun dit otogod, om lonoto' no di ribut do mantad id koulayon i tua' dau. Om iri raan dau nga' nongotipu', om koriou noddi om tutudai no. 13 Om baino' noddi om pointanom iyau do hilo'd tana' do kowotuan, i tana' dit otuu om aiso' o waig. 14 Om kotutudai no i guas dot anggur diri, om kosorob ngai' nopo i raan om i tua' dau. Om a' noddi okodou i raan dau, om a' no milo'd silihon do sukud do raja' di momorinta'. Iti no o sinding do pogihad di pihulit-hulit di tulun do modsinding.
Korohian do Kinorohingan om Karaato' do tulun
1 Tontok nopo di tadau'd kohopod do tulan di kolimo, di koturu' nod toun dahai dot id pomogunan do pisangod, om haro'ddi o piro-piro di boyoon do tulun dot Israil do minongoi ponguhot doho' ondung poingkuro o korohian do Tuhan, om irikau no iyolo' dot id toguang ku. 2 Om boro-boros noddi o Tuhan doho' do poingkaa, 3 “Oi tulun, boro-boros no dot id piro-piro o boyoon diri om sunudan no iyolo' diti poboroson ku, iyoho' i Tuhan, it Asawat Kopio do poingkaa: Minongoi kou daa uhot ondung poingkuro o korohian ku koii? Nga' sumumpa' oku no dot id suang do ngaran ku, i Kinorohingan di poimpasi, dot a' ku i' iyokoyu pologoson do monguhot doho' do nunu nopo. Iyoho' no i Tuhan, it Asawat Kopio, o minomoros diti. 4 Oi tulun, nokosodia' ko nod paratu' do hukuman dot id diyolo'? Ondung nokosodia' ko om wonsoyo' no o miagal diri. Posoroho' no iyolo' di piningwansayan di komolohingan diyolo' di koindaraat tomod di gulu po. 5 Sunudan no iyolo' diti poboroson ku. Tu' tontok di pinili' ku ot Israil, om minomonsoi oku do tumpongo dot id diyolo'. Om minintalang oku dot id diyolo' di hilo'd Masir, om sinunudan ku iyolo' dot, ‘Iyoho' no i Tuhan, i Kinorohingan dokoyu,’ kangku. 6 Om tontok nogiddi do minamatos oku do posoliwan diyolo' do mantad hilo'd Masir om pakaa diyolo' dot id pomogunan di nopili' ku do pomogun-mogunan diyolo', i pomogunan di kaya' om oruak o tana', i tana' dit osonong no kopio do pointongkop diti pomogunan. 7 Om sinuhu' ku nogi' iyolo' do papataam di tingolig di kososomu' kopio i koupusan tomod daa diyolo', om a' i' diyolo' ososomu' o tinan diyolo' do tumuku' di ponokokinorohingan do Masir, tu' iyoho' no i Tuhan, o Kinorohingan diyolo'. 8 Nga' suminongkiwal nogi' iyolo' doho' om a' minokinongou doho'. A' i' diyolo' pinataam i tingolig diyolo' di kososomu' kopio'ddi, om a' iyolo' tuminingkod do tumuku' dot id ponokokinorohingan do tulun do Masir. Om posodia' oku no daa'ddi do popurimon kopio diyolo' do kawagato' do kototogod ku di maso po diyolo' do hilo'd Masir. 9 Nga' a' ku iddi winonsoi o miagal diri om a' i' ointingayam di piro-piro o bansa' o ngaran ku do hiri'd kinoiyonon diyolo'. Tu' nokoboros ku no dot id tulun dot Israil, dot id toguang di tulun do hilo'd Masir do posoliwanon ku iyolo' do mantad id pomogunan diri. 10 Om posoliwano' ku noddi iyolo' do mantad hilo'd Masir om pokoyoo' ku no iyolo' do hilo'd tana' do kowotuan. 11 Om poboroso' ku no diyolo' i ponuhuan ku om potuduko' ku it oturan ku, tu' tulun nopo di mumboyo'ddi om apasi no. 12 Om sinuhu' ku iyolo' do momusou di tadau'd Sabat do tanda' di tumpongo ku dot id diyolo', om poposorou diyolo' dot iyoho' no, i Tuhan o pinopotobilang diyolo' do songonuon ku. 13 Nga' tontok piya di hilo' iyolo'd tana' do kowotuan nga' suminongkiwal i' iyolo' doho'. Tinolibambanan i' diyolo' it oturan ku om a' tinanud i pinonuhuan ku, i mamajamin dot apasi no i tulun di mumboyo'ddi. Nga' nindaraat tomod nogi' om sinosomu' diyolo' i tadau'd Sabat. Om posodia' oku no daa'ddi do popuriman diyolo' di kawagato' do kototogod ku di hilo' iyolo'd tana' do kowotuan om apatai i' daa iyolo'. 14 Nga' a' ku iddi winonsoi o miagal diri tu' kointingayam nopo do ngaran ku dot id pogialatan di bansa' di nokokito doho' do pinoposoliwan dot Israil do mantad hilo'd Masir. 15 Om pamatos oku noddi dot id diyolo' di hilo'd tana' do kowotuan dot a' ku iyolo' poongoyon do hilo'd tana' di pinosodia' ku do patahakon ku diyolo', i pomogunan di kaya' om oruak o tana', i tana' dit osonong no kopio do pointongkop diti pomogunan. 16 Minamatos oku do miagal diri tu' a' i' diyolo' tinanud i pinonuhuan ku, om sinurilog diyolo' it oturan ku, om sinosomu' i tadau'd Sabat. Uhang nogi' diyolo' do tuminuku' dot id tingolig diyolo'. 17 Nga' kosianai oku iddi diyolo'. Om a' ku iddi iyolo' pinatai do hilo'd tana' do kowotuan. 18 Suwai ko' poinsano' mantad ku nopoddi i sukodwagu dit id pogialatan diyolo'. Boros kangku, ‘Kada' dokoyu tonudo' it oturan do winonsoi di komolohingan dokoyu; om kada' kou usui di koubasanan diyolo' om kada' dokoyu sosomuo' o tinan dokoyu dot i tumuku' dot id tingolig diyolo' o ponosomu'. 19 Tu' iyoho' no o Tuhan, i Kinorohingan dokoyu. Umboyo' kou no dit oturan om i ponuhuan ku. 20 Om pusohon no dokoyu i tadau'd Sabat, om osiliu i' iri do tanda' di tumpongo ku dot id dokoyu, om poposorou dokoyu dot iyoho' no o Tuhan, i Kinorohingan dokoyu,’ kangku. 21 Nga' iri sukodwagu'ddi nga' suminongkiwal i' doho'. Tuminolibamban i' iyolo' dit oturan ku om a' tuminanud di pinonuhuan ku, i mamajamin dot apasi ot isai nopo o tulun di mumboyo'ddi. Om posodia' oku no daa'ddi do popuriman diyolo' do kawagato' do kototogod ku di hilo'd tana' do kowotuan om patayon ngai' ku daa iyolo'. 22 Nga' a' ku iddi winonsoi o miagal diri tu' kointingayam nori do ngaran ku dot id pogialatan di bansa' di nokokito doho' do pinoposoliwan dot Israil do mantad hilo'd Masir. 23 Om pobotoso' ku po kawagu ot iso' kawagu o batos do suwai di hilo'd tana' do kowotuan, tu' suminumpa' oku do potompias diyolo' do pointongkop diti pomogunan. 24 Winonsoi ku o miagal diri tu' a' i' diyolo' tinanud i pinonuhuan ku, om tinolibambanan diyolo' it oturan ku, om minonosomu' iyolo' di tadau'd Sabat, om tuminuku' iyolo' do tingolig di tinuku' di komolohingan diyolo' di gulu po. 25 Om onuwai ku noddi iyolo' dot oturan dit a' osonong om nonuan ku iyolo' do ponuhuan dit a' kapasi. 26 Pologoso' ku nopoddi iyolo' do monosomu'd tinan diyolo', do monumbali' di tangaanak diyolo'd kusai dit id dotuo do maan do podsubak di tingolig. Tu' iti no o pomohukum ku diyolo' om popointalang dot id diyolo' dot iyoho' no o Tuhan. 27 Om baino' nodti, oi tulun, om sunudan no i tulun dot Israil diti poboroson ku, iyoho' i Tuhan, it Asawat Kopio, dot id diyolo'. Om iri po kawagu it a' iyolo' tuminorodok dot id doho' o pinongindaraat di komolohingan diyolo' doho'. 28 Om pootodo' ku no iyolo' dot id pomogunan di pinabatos ku do patahakon ku diyolo'. Om soira' di nokito diyolo' i nulu-nulu dit angakawas om i kayu dot ongokohob, om siliho' ngai' nopo diyolo' iri do podsusubakan. Om pinopotogod tomod diri iyolo' doho' tu' pinapatahak i' iyolo' do porsombahan di sorobon om porsombahan do waig dot anggur do hiri. 29 Om uhoto' ku no iyolo', ‘Nunu toi iti kinoiyonon dot angakawas diti tu' rikoton dokoyu?’ kangku. Om mantad poddi om roitan nod ‘Kinoiyonon dit Angakawas’, o kinoiyonon diri. 30 Om baino' nondo om sunudan no i tulun dot Israil diti poboroson ku, iyoho' i Tuhan, i Kinorohingan it Asawat Kopio, dot id diyolo' do poingkaa: Nokuro tu' wonsoyon po dokoyu i dusa do miagal di winonsoi di komolohingan dokoyu om tumanud kou di piro-piro o tingolig diyolo' di kososomu' kopio? 31 Om dinondo piya nga' posubak kou i' do porsombahan do miagal diri om monosomu' kou do tinan dokoyu dot i tingolig o ponosomu', tu' patahakon i' dokoyu i tangaanak dokoyu do maan do porsombahan di sumbolion dot id tingolig. Om rumikot kou i' daa'ndo, iyokoyu i tulun dot Israil, do mongoi ponguhot ondung poingkuro o korohian ku! Sumumpa' oku no, dot id suang do ngaran ku, iyoho' i Kinorohingan di poimpasi, i Tuhan dit Asawat Kopio, dot a' ku no kopio iyokoyu pologoson do monguhot doho' do pasal do nunu nopo. 32 Tu' iso-iso' no o ginawo dokoyu dot orohian do momit di bansa'd suwai, do miagal di tulun di songingiyon dot id pomogunan do suwai tu' tumuku' dot id kayu om id tontolob. Nga' a' i' diyolo' aanu i pokioonuan diyolo' do miagal diri,” ka dau.
Momohukum om Mangampun o Kinorohingan
33 Boros kad Tuhan, “Poinsanon ku no iyokoyu dot id suang do ngaran ku, i Kinorohingan di poimpasi, i Tuhan dit Asawat Kopio, dot awagat nondo om oruol o pomomorinta' ku dokoyu. 34 Om popurimonon ku nondo iyokoyu do kuasa' ku om kototogod ku do timungon ku iyokoyu kawagu om pogulion ku iyokoyu do mantad id koinsanai'd pomogunan di nokotompiason dokoyu. 35 Om pokoyoon ku nondo iyokoyu do hilo'd ‘Tana' do Kowotuan do Piro-Piro o Bansa’, om hilo' nondo do hukuman ku iyokoyu. 36 Om hukuman ku nondo iyokoyu do baino' do miagal di pinomohukum ku di komolohingan dokoyu di hilo'd tana' do kowotuan do Sinai. Iyoho' no, i Tuhan it Asawat Kopio, o minomoros diti. 37 Om porintaon ku nondo kopio iyokoyu om mumboyo' kou i' di tumpongo ku. 38 Om potongkiadon ku nondo dokoyu i tulun dit obinsaap om it araat. Om posoliwanon ku iyolo' do mantad id pomogunan dit iyonon diyolo' do dinondo, om a' ku iyolo' pologoson do gumuli' do hilo'd pomogunan dot Israil. Om oilaan nogindo dokoyu dot iyoho' no o Tuhan,” ka dau. 39 Om boros kad Tuhan, it Asawat Kopio, “Dinondo nodti, oi tulun dot Israil, om wonsoyon nopo dokoyu i korohian dokoyu! Tilombus kou nopo do momonsoi'd dusa do modsubak di piro-piro o tingolig dokoyu! Nga' poinsanon mantad ku iyokoyu dot atalib pondo iti om a' no milo dot a' kou mumboyo' doho' om tumingkod do mongindaraat do ngaran ku dit olidang, dot ino podsusubak dokoyu'd tingolig o pongindaraat. 40 Om oinsanan kou nopondo, i tulun dot Israil, do tumuku' dot id doho' do hilo'd pomogunan diri, do hiri'd timpak di nuluhon ku dit olidang, i nuluhon dot akawas do hilo'd Israil. Om asanangan oku nondo dokoyu om piontong ku iyokoyu do papatahak dot id doho' di porsombahan dokoyu, i porsombahan dit osonong kopio, om i porsombahan di potobilangon do maan do doho'. 41 Kosoliwan ku nopondo iyokoyu do mantad hilo'd pomogunan di kinotompiason dokoyu, om otimung ngai' ku iyokoyu, om romiton ku nondo i porsombahan di sorobon dokoyu, om koilo nondo o koinsanai'd bansa' dot iyoho' noo o Kinorohingan. 42 Om koguli' ku nopondo iyokoyu do hilo'd Israil, i pomogunan di nakabatos ku do patahakon ku dot id komolohingan dokoyu, om koilo kou nogindo dot iyoho' no o Tuhan. 43 Om osorou ngai' nogindo dokoyu i piningwonsoi dokoyu dit araat tomod diri om i pinonosomu' dokoyu do tinan dokoyu. Om araatan tomod kou nondo do tinan dokoyu tu' angaraat i' i piningwansayan dokoyu. 44 Om soira' nopondod haro o wonsoyon ku do maan do kosuahan do ngaran ku, om oilaan nogindod tulun dot Israil, om oilaan ngai' dokoyu, dot iyoho' no o Tuhan, tu' a' ku i' wonsoyon dot id dokoyu o miontok kopio di kowoyo-woyoon dokoyu dot araat. Iyoho' no, i Tuhan it Asawat Kopio, o minomoros diti,” ka dau.
Tapui do Ponong Hilo'd Salatan
45 Om boro-boros no o Tuhan dot id doho' do poingkaa, 46 “Oi tulun, ontong no do ponong hilo'd salatan. Om pasalaon no i tana' do ponong id salatan om i puru' do hilo'. 47 Sunudan no i puru' do ponong hilo'd salatan do mokinongou diti poboroson ku, iyoho' i Tuhan, it Asawat Kopio. Antangai pogi'! Nga' popurakit oku moti'd tapui, om monorob nondo'ri do koinsanai'd kayu do hilo' dot i tuu it otomou po ko' i noriou no. Om aiso' nondo o kopisok diri. Om rumalad nondo'ri do mantad hilo'd salatan do kumaa ponong id utara, om kopuriman ngai' nopondo o tulun do kolosuo'ddi. 48 Om oinsanan nopondo iyolo' do koilo dot iyoho' no, i Tuhan, o minomurakit di tapui'ddi, om aiso' no o kopisok diri,” ka dau. 49 Nga' a' oku i' nakaakun. Om boros kangku, “Oi Tuhan, it Asawat Kopio, kada' oku sansagai do momonsoi'ddi! Tu' somboro-boros ngai' no o tulun dot a' monongkorohian tu' poinukadan kasai' i' o poboroson ku,” kangku.
Gayang do Tuhan
1 Om boro-boros no o Tuhan dot id doho' do poingkaa, 2 “Oi tulun, papalai no o Yorusalim. Om papalan i kinoiyonon do tulun do sumambayang. Om poinsanon no i pomogunan dot Israil. 3 Tu' momoros oku no, iyoho' i Tuhan, do poingkaa: Pisangod oku noddi dokoyu. Om kodongon ku nondo i gayang ku om patayon ngai' ku nopo iyokoyu, dot iri tuu it osonong ko' iri po it araat. 4 Om songodon ku nondo o koinsanai'd tulun do mantad pod hilo'd utara om gisom do korikot do hilo'd salatan, dot i gayang ku o panangod ku. 5 Om koilo ngai' nondo o tulun dot iyoho' no, i Tuhan, i nokopongodong di gayang ku om a' ku no paangkapon kawagu iri. 6 Oi tulun pingodoi no do miagal pod aiso' o pokukurayan nu. Om pingodoi no dot atatangaban do hilo'd kinoiyonon dit okito ngai' ko'd tulun dot Israil. 7 Om soira' nopondod monguhot iyolo' ondung nokuro tu' mingodoi ko, om sunudan no iyolo' dot i habar do pasal di rumikot dot oruhai o kopingadayan nu. Tu' korikot nopondo'ri om moddosi ngai' pondo iyolo', om lumomok ngai' o longon, om lumuhoi o ginawo, om gagaran o totud diyolo'. Nokorikot no i maso'ddi; om osiliu ngai' nondo iri. Iyoho' no, i Tuhan, it Asawat Kopio, o minomoros diti,” ka dau. 8 Om boros kad Tuhan dot id doho', 9 “Oi tulun, poboroso' no it osiliu dot id dosunsudan. Om sunudan ngai' no ilo tulun diti poboroson ku, iyoho' i Tuhan, do poingkaa, ‘Haro o gayang, i gayang do nataraman. I gayang di naasa', om it akalab. 10 Nasa' iri do maan do pamatai, om kinisasan, om akalab i'. Aiso' no o kataadan di tulun ku tu' aiso' nopo o pinadul diyolo' di pinopoinsan om i pinomohukum ku diyolo'. 11 Nasa' i gayang, om posodia' kasai' i' do pakayon. Om patahakon nogindod tulun di gampamatai. 12 Pingihad no dot atatangaban, oi tulun, pinggarang no, tu' iti nopo gayang om panangod di tulun ku om panangod do koinsanai di boyoon dot Israil. Patayon ngai' no iyolo' do mitonggoi do koinsanai di bansa'. Duntungo' no o kangkab nu dot atatangaban tu' aiso' no o pokukurayan! 13 Pogumbalan ku o tulun ku, om ondung a' iyolo' kumorologo, om abayaan ngai' noti dot id diyolo',’ ka,” ka dau. 14 “Om dinondo nodti, oi tulun, om poboroson no it osiliu dot id dosunsudan. Pitapapo' no o palad nu do maan do tanda' do tumimpuun nod mimpatai i gayang. Iri nopo nga' gayang di mamatai, om gayang di kooris kopio. 15 Mongoris iri do tulun ku do gisom do katahub iyolo'. Akangan ku'd gayang i bandar diyolo', dot i gayang di mingkalab do miagal po di kodumaat om i posodia' nod mamatai. 16 Pintibas no do hilo'd wanan om hilo'd kotimbabaon nu, om honggo nopo o korohian nu. 17 Om iyoho' nondo nga' popitapap i' do palad om atanus indo o kototogod ku. Iyoho' no, i Tuhan, o minomoros diti,” ka dau.
Gayang di Raja' do Babil
18 Om boro-boros no o Tuhan dot id doho' do poingkaa, 19 “Oi tulun, pilio' no duwo ralan di milo di raja'd Babil do wayaan do rumikot do kiinigit di gayang dau. Om koimpuunon nopo goduwo di ralan diri om iso' i' o pomogunan. Om poturidangan nod papan di popotuduk o hiri'd pitongkiadan di ralan. 20 Iso' nopoddi nga' popotunud di raja' di ralan do kumaa'd hilo'd bandar do tulun dot Amon, i bandar do Raba, om iri no tiso' di ralan om kumaa do hilo'd Yohuda, om poirikot do hilo'd Yorusalim, i bandar di kitolig. 21 Om mingkakat nondo i raja' do Babil do hiri'd toning di papan do popotuduk, i hiri'd pitongkiadan di ralan. Om kungguon nondo dau i pana'; om uhoton dau i tingolig dau, om antangan i tundu-undu' di nintorusan di pinosubak dau. 22 Om iri nopo longon dau'd wanan nga' kiinigit di pana' di tinandaan do ‘Yorusalim’! Om iri no o momisunud dau do mongoi panangod do bandar do Yorusalim, om mongoi posodia' do pakakas do pomohuyas, om mamangkis do mangangat do mongoi sangod, om mongoi posodia' do pakakas do pamaraag do hiri'd wawayaan dot agayo, om popotimbun do tana' do maan do tolig do ponurungku', om mongukad do parit. 23 Om a' i' daa otumbayaan i tulun do Yorusalim diti tu' haro i' o tumpongo do winonsoi diyolo' dot id Babil. Nga' iti nopo pinoboros do pasal dit osiliu dot id dosunsudan om popoinsan diyolo' dot atangkap iyolo' tu' nokowonsoi i' iyolo'd dusa. 24 Om poboroson ku no, iyoho' i Tuhan, it Asawat Kopio, do nongoilaan no i dusa dokoyu. Om koilo ngai' no do nakasala' kou. Tu' nunu nopo o wonsoyon dokoyu nga' kointalang no i dusa dokoyu. Norikot no o maso do kopomohukuman ku dokoyu, om patahakon ku no iyokoyu dot id pisangod dokoyu. 25 Om poingkaa o boros ku dot id raja' dot Israil, ‘Rumikot no i tadau do kopogoyi-oyian ku do momohukum diya', oi raja' dit araat om sosomu'! 26 Iyoho' no, i Tuhan, it Asawat Kopio, o minomoros diti. Iduwo' ino tupi' do don raja' om ino sigar nu. Aiso' nondo o miagal di gulu po, tu' kosimban ngai' nopondo. Onuwai no do kuasa' i mosikin! Om poinsiribaon no i pomorintaan di tulun di maso'd momorinta'! 27 Raagon ku nondo kopio o bandar diti, gisom do pointongkop poo o kinaraagan. Nga' a' po osiliu iti dot a' po korikot i tulun di nopili' ku do momohukum diti bandar. Om patahakon ku nondo iti dot id dau,’ ka,” ka dau.
Sumaap do Tulun dot Amon i Gayang do Tuhan
28 Om boros kad Tuhan, “Oi tulun, poboroso' no it osiliu dot id dosunsudan. Popimboroso' no iti poboroson ku, iyoho' i Tuhan, it Asawat Kopio, dot id tulun dot Amon, i mongindaraat dot Israil. Poboroson no dot id diyolo' o poingkaa, ‘Posodia' no o gayang do monumbali'; naasa' nori do maan do pamatai om akalab poo do miagal di kodumaat. 29 Tudut ngai' i' i pinointalang do nokito nu, om iri pimboroson nu dot osiliu dot id dosunsudan nga' aiso' i' ot otopot. Araat ko i' om orongit ko, om rumikot no i tadau do kopogoyi-oyian ku do momohukum diya'. Sumondot no dot id liou nu i gayang. 30 Oi tulun dot Amon! Paangkapo' no i gayang dokoyu! Butusan ku nondo iyokoyu do hilo'd kinoiyonon di pinamansayan dokoyu, om i hilo'd pomogunan di kinosusuon dokoyu. 31 Om opurimanan nondo dokoyu i kototogod ku do pourobuson kopio ku dot id dokoyu do miagal di tapui do molob-ngolob. Om patahakon ku nondo iyokoyu dot id tulun dit orongit kopio, it ongoilo kopio do mamatai. 32 Om osorob kou nondod tapui. Om kotuntug o raha' dokoyu dot id pomogunan dokoyu, om aiso' nondo o songulun piya do kosorou dokoyu. Iyoho' no i Tuhan, o minomoros diti,’ ” ka dau.
Karaaton do Yorusalim
1 Om boro-boros no o Tuhan dot id doho' do poingkaa, 2 “Oi tulun, nokosodia' ko nod momisara' di bandar di noponu'd gampamatai? Poboroson no dot id dau o koinsanai di nongowonsoi dau di kososomu' kopio. 3 Sunudan no i bandar diti poboroson ku, iyoho' i Tuhan, it Asawat Kopio, do poingkaa: Norikot no o maso do kopomisaraan diya' tu' ogumu' kopio i' i napatai nu di tulun nu om sinosomu' nu o tinan nu tu' tuminuku' ko i' dot id tingolig. 4 Kasala' ko no tu' minamatai ko i' om nososomu' ko di tingolig di winonsoi nu, om gowoi poddi om rumikot no o maso do kopomisaraan diya', om nopupusan no o surupu' nu! Om iri noddi o kinapalagasan ngai' ku di bansa' do mongirak-irak diya' om koinsanai di pomogunan do monguntotori' diya'. 5 Momohingi-hingi ngai' nopo diya' i pomogunan do hilo'd sodu' om hiti'd somok tu' suminurilog ko i' dit oturan om i ponudukan. 6 Sumondiu ngai' nopo i boyoon dot Israil di kinoris diyolo', om mamatai iyolo'. 7 Aiso' no tiso'd tulun do hiri'd bandar do momusou do molohing dau. Om monipu' kou do bansa'd suwai om mongulok-ulok kou do tongoondu' di nopuadan om i tangaanak dit aiso' o molohing tu' maan no dokoyu'd ponginguntungan iyolo'. 8 Sinosomu' dokoyu i tiyonon do sumambayang, om a' dokoyu pinusou o tadau'd Sabat. 9 Haro o piro-piro tulun dot id pogialatan di tulun nu do mingudut do pasal do tulun do suwai, do mokimohilo-hilo' dot apatai o tulun diri. Om haro nogi' diyolo' o mangakan do taakanon di nokosubak dot id tingolig. Om haro it orohian nopod momonsoi di korohian do tinan diyolo'. 10 Om haro diyolo' o mongoi dudun di monohonok diyolo', i sawo do tapa' diyolo'. Om haro o mononsog do tongoondu' do dumudun diyolo'd modop do maso piya do pomulanan di tongoondu'. 11 Haro o magampahu', om haro o mongoi pangasou di tongoondu' do monongiwan diyolo', ko' i tobpinai diyolo'd tongoondu', dit iso-iso' o tapa' nga' misuwai po o tina'. 12 Om haro nogi' o piro-piro di tulun nu do mamatai tu' mokianu do gadsi'. Om haro o mokibunga do tontok do popoolos do tusin dot id sompi' ko' tulun dot Israil; om kumaya' tomod nondo tu' monipu' i' iyolo' di tulun diri. Nolihuan oku noddi kopio diyolo'. Iyoho' no, i Tuhan, it Asawat Kopio, o minomoros diti. 13 Om bobogon ku nondo iyokoyu tu' manakau kou i' om mamatai kou. 14 Ondos daa dokoyu om kasaap kou po om okoris kou po do popoinsawat do longon, dot ohukuman ku iyokoyu? Iyoho' no, i Tuhan, it Asawat Kopio, o minomoros diti, om bayaanon ku i' o boros ku. 15 Potompiason ku nondo o tulun nu dot id pointikid-tikid do pomogunan om bansa'; om tingkodon ku i pingwonsoyon dokoyu dit araat. 16 Om hingi-hingion kou nondo do bansa'd suwai, om oilaan nogindo dokoyu dot iyoho' no o Tuhan,” ka dau.
Tapui di Momolidang
17 Om boros kad Tuhan dot id doho', 18 “Oi tulun, aiso' no o guna' do tulun dot Israil, dot id doho'. Iyolo' nopo om miagal pod kinikis do tambaga', om tin, om basi', om gundol, tu' iri po i noolu-olu' di nosompipi' i pirok do hiri'd tapui. 19 Om baino' no, om sunudan ku iyolo', iyoho' i Tuhan, it Asawat Kopio, do miagal po iyolo'ddi tu' aiso' no o guna'. Om timungon ku nondo iyolo' do hilo'd Yorusalim 20 do miagal di monimung do kinikis do pirok, om tambaga' om basi', om gundol, om tin do maan posuboo' di tapui do ponompipi'. Om iri nondo kototogod ku om i kolosuo' do ginawo ku o mamalanak diyolo', do miagal di kinikis do basi' tu' lanakon do tapui. 21 Timungon ku nondo iyolo' do hilo'd Yorusalim om siduan ku iyolo' om lanakon ku iyolo' di tapui di kototogod ku. 22 Om alanak nondo iyolo' do hilo'd Yorusalim, do miagal poddi pirok tu' alanak dot id tapui. Om oilaan nogindo diyolo' dot iyoho' no, i Tuhan, o pinopourabus di kototogod ku dot id diyolo',” ka dau.
Dusa di Piro-Piro o Boyoon dot Israil
23 Om boro-boros po kawagu o Tuhan dot id doho' do poingkaa, 24 “Oi tulun, sunudan no i tulun dot Israil do nososomu' no i pomogunan diyolo', om hukuman ku noddi tu' atatagadan oku no. 25 Iri nopo i piro-piro o boyoon nga' iyo pod singa do minggarom di nakapamatai do nintorusan. Mamatai iyolo' di rayat, om magahau do koinsanai'd tusin om dapu' dit aahau-ahau diyolo', om ogumu' o tongoondu' do nopuadan tu' minimpatai i' iyolo'd tulun. 26 Iri piya it imam nga' tumolibamban ngai' i' dit oturan ku om monosomu' di nongkotobilang do maan do doho'. Id diyolo' nopo om aiso' no o pisuayan di nongkotobilang do maan do doho', om it a' nongkotobilang do maan do doho'. Om a' iyolo' popotuduk do pisuayan dit olidang om it a' olidang do tumanud dot oturan do tugama'. Om a' diyolo' podulon i tadau'd Sabat. Om indaraaton oku di tulun dot Israil. 27 Om iri piya i piro-piro o pagawai do pomorinta' nga' iyo pod toni do popogitobilang-bilang di nintorusan do napatai diyolo'. Mamatai nopo iyolo' do mokikakaya'. 28 Om iri po i piro-piro o nabi nga' minomolisok i' diti dusa, do miagal di tulun di minanaat do limput di sosomu' do saat dot opurak. Iri nopo pinointalang dot okito diyolo' om aiso' i' ot otopot om iri pimboroson diyolo' do pasal dit osiliu dot id dabantalan nga' tudut ngai' i'. Popimboroson diyolo' do Tuhan, it Asawat Kopio, o tadon di boros diyolo', nga' a' oku i' iyoho' i Tuhan, nokoboro-boros diyolo'. 29 Mintipu' poo om mimpanakau i tulun do kaya'. Om a' diyolo' pokonunu-nunuon i tulun do mosikin om ponginguntungan diyolo' i bansa'd suwai. 30 Om pogontong oku no daa do tulun di milo do momonsoi'd tolig, om i milo do mingkakat do hiri'd kinoiyonon di nohuyas o tolig do madtamong di pomogunan, do tontok di potiraagon nod kototogod ku'ri, nga' aiso' i' o tiso'd tulun do nokito ku. 31 Om urobu-robuson ku nondo o kototogod ku dot id diyolo', om miagal oku pondod tapui do mamaraag diyolo' tu' iyo kopio iddi o nongowonsoi diyolo'. Iyoho' no i Tuhan, it Asawat Kopio, o minomoros diti,” ka dau.
Duwo o Tondu' di Miobpinai do Kidusa
1 Om boro-boros no o Tuhan dot id doho' do poingkaa, 2 “Oi tulun, haro o duwo tondu' do miadi-adi' di gulu po. 3 Om tontok dit okoro' po iyolo' om poingiyon iyolo' do hilo'd Masir. Om hilo' no iyolo' do notoning do tongokusai, om suminiliu diri iyolo'd sundal. 4 Iri nopo it id dotuo nga' i Ohola o pinomungaran om iri no it id domulok om pinungaranan dot i Oholiba. I Ohola nopo nga' poiyaan do Samaria om i Oholiba no om poiyaan do Yorusalim. Om kowino' goduwo ku no iyolo' om paganak noddi iyolo'. 5 Om mulong piya daa do sawo ku i Ohola, nga' a' i' iyau tuminingkod do sundal om rumohian tomod nogi' iyau di kongouhangan dau do mantad hilo'd Asur. 6 Iyolo' nopo nga' soudor di kipakayan dit oiyo nopo, dot otomou daragang- ragang; om sinakagon iyolo'd raja', om angasawat o pangkat diyolo' dot id pomorinta', om oinsanan nopo iyolo' dot ongoligkang om soudor dit ongkikuda'. 7 Om minagampahu' i Ohola do koinsanai di pagawai dot Asur, om kabayayat no iyau di korohian do tinan dau do tumuku' di piro-piro o tingolig dot Asur. 8 Om tilombus nopo iyau do suminiliu'd sundal do mantad poddi tuminimpuun i' iyau do suminiliu'd sundal di hilo' pod Masir. Om mantad po dit okoro' po iyau om dudun-dudunon no iyau do tongokusai, om ponokosundal no diyolo' iyau. 9 Om patahako' ku noddi iyau di tulun dot Asur, i kongouhangan dau di koupusan kopio dau. 10 Om labasai no diyolo' iyau, om ngoyo' ngai' diyolo' i tangaanak dau'd kusai om tondu', om patayo' nogiddi diyolo' iyau do gayang o pinamatai. Om oinsanan nopo o tongoondu' do somboro-boros do pasal di kinootuson dau dot araat diri. 11 Om mulong piya'd nokokito i tadi' dau, i Oholiba do hal diri, nga' okon- okon o dau do kosusundal om pagagampahu' ko' di Ohola. 12 I Oholiba nogi' nga' rumohian tomod i' di tulun dot Asur di sinakagon do raja', om i piro-piro o pagawai, om i piro-piro o soudor dit ongkipinakai do pakayan dit oiyo nopo dot otomou daragang-ragang; iri no i tongokusai dit ongoligkang om i piro-piro o soudor di kikuda'. 13 Om nokito ku nogi' do kusayon tomod iyau, do miagal di taka' dau. 14-15 Om maid-laid nga' muhang-ruhang o kararaat dau. Om otohirik tomod iyau di gambar di piro-piro o pagawai do Babil dit ongkipangkat, i pinokikir do hiri'd tolig om i sinaat do saat dit osindak o karagango', om it ongkitagkos om ongkisigar dot olumis. 16 Om maha' di nokito kopio dau i gambar diri om a' no ogina-gina' iyau do rumohian diyolo'. Om ponuhu' no iyau do piro-piro o gunsiou do mongoi solowot diyolo' do hilo'd Babil. 17 Om rikot noddi i tulun do Babil dot id dau om ongoi no dudun dau'd minodop. Om pinadalaan tomod iddi diyolo' o pinangasou om pinonosomu' diyolo' dau, gisom do naraatan diri iyau diyolo'. 18 Om pointalango' nopoddi kopio dau dot id kogumuan do sundal iyau, om gisom dot aiso' no ot a' koilo do sundal iyau. Om araatan tomod oku'ddi dau, do miagal di naraatan oku di taka' dau. 19 Om maid-laid nga' maru-saru' iyau do magampahu'. Om kowoyo-woyoon nopo dau, om miagal nopo kopio di kowoyo-woyoon dau dit okoro' po iyau, di maso po dau'd sundal do hilo'd Masir. 20 Om poimponu' po iyau'd korohian do rumahi di tongokusai dit a' milo dot uruon o korohiano' do dumudun do tongoondu' om i miagal pod dongkuda' om dongkaladai o kowoyo-woyoon, tu' a' nopo milo dot ouru,” ka dau. 21 (Oi Oholiba, orohian ko pod gumuli' di kosusundal nu dit okoro' ko po di hilo'd Masir, tontok di pingigitan pod tongokusai o susu nu om piningkasou ko do tongokusai'd Masir.)
Binutusan do Kinorohingan i Oholiba
22 Om boros kad Tuhan, it Asawat Kopio, “Oi Oholiba, apaasan ko no daa'ddi di kongouhangan nu nga' potogodon ku nondo iyolo' diya' om porikoton ku iyolo' do mongoi ponurungku' diya'. 23 Porikoton ngai' ku nopondo i kongouhangan nu do mantad hilo'd Babil om hilo'd Kaldia, om hilo'd Pikod, om Soa, om Koa, om koinsanai di tulun dot Asur. Om timungon ngai' ku nopondo i tangaanakwagu i sinakagon ngai' do raja', om i piro-piro o pagawai, om koinsanai di pagawai dit angabantug om i pagawai do soudor di kikuda' dit angasawat o pangkat. 24 Om ngoyon ko nondo diyolo' songodo' do mantad ponong hilo'd utara, om ogumu' o soudor diyolo' di kikorita'-kuda' do don sumasangod om i kikorita'-kuda' di pinasakayan do kokoriu. Om ongkikolid om ongkitupi' kolidar iyolo' do mongoi sangod dokoyu. Om patahakon tiya' nondo dot id diyolo', om butusan ko nondo do tumanud dit oturan diyolo'. 25 Om pologoson ku nondo iyolo' do mingwonsoi do nunu nopo dot id diya' tu' atatagadan oku no diya'. Om sinsibon nondo diyolo' o todung nu om tolingo nu om patayon diyolo' o tangaanak nu. Ngoyon nondo diyolo' i tangaanak nu do mantad id diya' om maan nondo diyolo' miaho' do monutud. 26 Om labasan ko nopondo diyolo' om onuon ngai' diyolo' i pongillumis nu'd tinan nu. 27 Om tingkodon ku nondo i korohian do tinan nu om i kosusundal nu di piningwonsoi nu do mantad po di hilo' ko pod Masir. Om a' ko nondo montong do nunu nopo o tingolig om a' ko sumondiu do Masir,” ka dau. 28 Poingkaa o boros do Tuhan, it Asawat Kopio, “Patahakon tiya' nondo dot id tulun di karaatan kopio nu. 29 Om ngoyon ngai' nopondo diyolo' o koinsanai di pininghuyanan nu'd minogihum, om pologoson ko nopondod poillabas, do miagal pod sundal, tu' araatan no iyolo' diya'. Iri no i korohian do tinan nu om i kosusundal nu, 30 o pinoporikot diti dot id diya'. Nosiliu ko pod sundal di piro-piro o bansa'ddi om sinosomu' nu o tinan nu di tingolig diyolo'. 31 Susui ko nopo di nulokon di taka' nu, om gowoi pondo om miagal nopo di pinomohukum ku di taka' nu o pomohukum ku diya',” ka dau. 32 Om boros kad Tuhan, it Asawat Kopio, “Minum ko nondo do mantad id sangkir di taka' nu, i sangkir dit agayo om aralom. Om oinsanan nopondo o tulun do momohingi-hingi, om mongindaraat diya'; tu' iri no o suang di sangkir diri. 33 Aawuk ko nondo om oinggorit dot obungou'ddi, i hukuman di mamaraag om kooris kopio, i hukuman do nokoontok do Samaria, i taka' nu. 34 Om inumon nu nopondo'ri do gisom dot aayi', om iri nondo i kinababakan di sangkir nu o kosuhat do kangkab nu. Iyoho' no, i Tuhan, it Asawat Kopio, o minomoros diti,” ka dau. 35 Poingkaa no o boros do Tuhan, it Asawat Kopio, “Iyo nopoddi tu' linihuan oku om tinolikudan oku diya', om oinggorit ko no do gama' di korohian do tinan nu dot araat om i kosusundal nu,” ka dau.
Pomohukum do Kinorohingan di Duwo Tondu' di Miobpinai
36 Om boros kad Tuhan dot id doho', “Oi tulun, nokosodia' ko nod momohukum di Ohola om i Oholiba? Pasalao' no iyolo' tu' araat kopio i' o piningwonsoi diyolo'. 37 Minagampahu' iyolo' om minamatai; minagampahu' iyolo' di tingolig om minamatai di tangaanak ku di pinaganak diyolo'. Pinatahak diyolo' dot id tingolig diyolo' do siniliu'd porsombahan di sumbolion i tangaanak ku. 38 Om okon i' ko' iri-iri o winonsoi diyolo'. Tu' minonosomu' po iyolo' di Walai'd Sasambayangan dot Agayo om sinosomu' diyolo' i tadau'd Sabat, i tinantu' mantad ku do potobilangon do maan do doho'. 39 Om tontok di tadau di pinatai diyolo' i tangaanak ku do numaan do porsombahan do sinumbali' dot id tingolig, om ongoi goduwo no iyolo' do hiri'd Walai'd Sasambayangan dot Agayo do minongoi ponosomu'ddi! 40 Miguli-guli' nopo iyolo' do monuhu'd tulun do mongoi pomolohou do tongokusai do mantad hilo'd sodu', om rumikot nondo i tongokusai'ddi. Om modsu' no i duwo tondu' do miobpinai'ddi om mamadak no, om manampakai nod pongillumis do tinan do sumuwau di tongokusai. 41 Om mirikau nondo iyolo' dot id toodopon dot olumis do potorungak do mija' di noponu'd taakanon dit angawasiu, om hiri nogi' i kominyan om i tumau do saitun di pinatahak ku diyolo'. 42 Om orongou nondo o hiyo do tulun dot ogumu', i tongokusai dot ogumu' do mantad hilo'd tana' do kowotuan. Om sulungan no diyolo'd golong i longon di duwo o tondu' di miobpinai'ddi om tupian diyolo'd tupi' dit olumis. 43 Om momusorou oku'ddi do ponokosundal poo diyolo' i tongoondu' di nouru-uru pod tampahu'. 44 Om miguli-guli' nopo i tongokusai'ddi dot id duwo o sundal diri. Miguli-guli' nopo iyolo' dot id di Ohola om id di Oholiba, i tongoondu'd sundal diri. 45 Om pasalaon nondo iyolo'd tulun dit otopot dot i tampahu' om i pamamatai diyolo'; tu' magampahu' nopo iyolo' om notounan do raha' o palad diyolo',” ka dau. 46 Poingkaa no o boros do Tuhan, it Asawat Kopio, “Porikot nod sonsinompuruan o tulun do mongoi ponginggorit diyolo' om mongoi panakau do konunu-nunuan diyolo'. 47 Om pologoson nopo i tulun dot ogumu'ddi do momodumpau diyolo'd watu, om mamatai diyolo' do gayang o pamatai, om mamatai di tangaanak diyolo', om modtutud di walai diyolo'. 48 Om tingkodon ku nondo o pogioompohuan do pointongkop diti pomogunan do maan do popoinsan do koinsanai di tongoondu' dot a' magampahu' do miagal di nowonsoi diyolo'. 49 Om iyokoyu nod miadi-adi', oi Ohola, om oi Oholiba, om hukuman ku no tu' minagampahu' kou i' om minomonsoi kou'd dusa tu' tuminuku' kou i' dot id tingolig. Om oilaan nogindo dokoyu dot iyoho' no o Tuhan, it Asawat Kopio,” ka dau.
Lansang di Togoron
1 Om tontok di tadau'd kohopod di tulan do kohopod di kosiam do toun dahai dot id pomogunan do pisangod, om boro-boros no o Tuhan dot id doho' do poingkaa, 2 “Oi tulun, tuliso' no o haribulan do tadau'd baino', tu' tadau nod baino' do tumimpuun i raja' do Babil do monurungku' do Yorusalim. 3 Om sunudan no i tulun ku dit obinsongkiwal diti ponukadan do poboroson ku, iyoho', i Tuhan, do poingkaa: Parakano' i lansang do hilo'd sagang, om ponuon nori do waig. 4 Om potobungon no i tonsi dit osonong kopio, i tonsi do toliip om i tonsi do poo, om ponuon di popot dit osonong di kitulang. 5 Onuon no i tonsi di dumba' dit olomu' om it okoro' po, gumuon no kayu do pogudung. Om pogolokon no i waig; om onsokon no i tulang om i tonsi,” ka. 6 Poingkaa o boros do Tuhan it Asawat Kopio, “Obungou no i bandar di noponu' do gampamatai! Tu' miagal po di lansang di togoron, om it a' insan kokisasai. Om soriso-isoon i tonsi do mononduk, om aiso' no tiso' dot oolu'. 7 Haro o mimpatai do tulun do hiri'd bandar nga' a' i' pinoluyung do hiri'd tana' i raha' suwai ko' pinoluyung nogi' do hiri'd tontolob di potimpalang tomod. Gowoi poddi om a' milo dot olitan i raha'. 8 Om pologoso' ku no i raha'ddi do hiri, om okito i' om kopokilokop indo!” ka dau. 9 Poingkaa no o boros do Tuhan, it Asawat Kopio, “Obungou no iti bandar di noponu' do gampamatai! Om iyoho' no o mogudung do tapui do ponorob diti. 10 Ongoi-ongoi po do pogudung! Siduwai no i tapui! Onsokon no i tonsi! Timbubusan no! Om pokogutan no i tulang! 11 Om parakanon nondo i lansang do tambaga' dit aiso' o suang diri do hiri'd tapui do gisom id karagang, om opulang nogindo kawagu i lansang diri do tumanud dot oturan do tugama'. 12 Nga' a' indo osorob ngai' i togor diri do hiri'd tapui. 13 Oi Yorusalim, nososomu' tomod ko no di kowoyo-woyoon nu dit araat. Om mulong piya do minumbal oku daa do minomolidang diya' nga' a' no milo dot iduwon o kososomuo' nu. Om a' ko no olidangan kawagu dot a' ko po kopuriman do kawagato' do kototogod ku. 14 Iyoho' no, i Tuhan it Asawat Kopio, o minomoros diti. Norikot noddi o maso ku do momonsoi di wonsoyon ku. A' ku no lihuan i dusa nu, om a' oku mangampun om a' oku monginsian diya'. Om ohukuman ko nondo do miontok di winonsoi nu. Iyoho' no i Tuhan it Asawat Kopio, o minomoros diti,” ka dau.
Kinapatayon do Sawo di Nabi
15 Om boro-boros no o Tuhan dot id doho' do poingkaa, 16 “Oi tulun, sigog indo do ngoyon ku i tulun di koupusan kopio nu do potigowoon ku o pongongongoi. Om kada' pimboros dot atatangaban, om kada' ihad om kada' pomuromou. 17 Kada' pologoso' dot orongou ko'd wokon di mingut-singut ko. Kada' lagasai o tulu nu om kada' pimpanau dot aiso' o kasut do popointalang do tumongob ko. Kada' sompono' o rabas nu om kada' pangakan di taakanon di mogigihad,” ka dau. 18 Om tontok dit osuab po om monokiboro-boros oku no di bansa'ddi. Om totuong poddi om kapatai no i sawo ku. Om tadau po kawagu om wonsoyo' ku no o miagal di pinonuhuan doho'. 19 Om ponguhot no doho' i piro-piro o tulun, “Nokuro tu' mingiyo ko'dti, oi aman? Nunu o komoyon diti dot id dahai?” ka diyolo'. 20 Om boros kangku, “Sinuhu' oku'd Tuhan, 21 do poposunud do boros diti dot id dokoyu: Oondos kou do kogiroto' di Walai'd Sasambayangan dot Agayo. Orohian kou do mintong om mongoi suang diri, nga' maan nondod Tuhan sosomuo' iri. Om angapatai nondo dot id pisangadan i tongomulok po dot id sompiiyon dokoyu, i nokoundorong do hilo'd Yorusalim. 22 Om wonsoyon nondo dokoyu o miagal di winonsoi ku. A' indo dokoyu somponon o rabas dokoyu om a' kou mangakan di taakanon do mogigihad. 23 Om a' dokoyu lagasan o tulu dokoyu, om a' kou mongidu'd kasut do tontok do mamanau om a' kou mihad om a' kou mogihad. Om oinggorit kou nondo dot obungou di dusa dokoyu om songodoi-odoi kou pondo. 24 Om iyoho' nondo ot osiliu dot omitan dokoyu; om wonsoyon ngai' nopondo dokoyu o miagal di nowonsoi ku. Om boros kad Tuhan om osiliu nopondo o miagal diri, om oilaan nogindo dokoyu dot iyau no o Tuhan dit Asawat Kopio,” kangku. 25 Om boros kad Tuhan dot id doho', “Oi tulun, raagon ku'ndo i Walai'd Sasambayangan dot Agayo, it apanggor diri om i nosiliu do kaandasan om kaarapadan diyolo', om i korohian diyolo' do mongoi salakoi. Om ngoyon ngai' ku i tangaanak diyolo'd kusai om tondu'. 26 Om tontok nopondo di tadau do wonsoyon ku'ti, om haro nondo o songulun di kopoggidu' do mantad id karaagan diri do mongoi pomisunud diya' do pasal diri. 27 Om tontok indod tadau'ddi do koboros ko kawagu, om a' ko nondo bobou. Om moro-boros ko nondo di tulun diri. Om iri nondo o sumiliu'd tanda' dot id diyolo', om koilo nogindo iyolo' dot iyoho' no o Tuhan,” ka dau.
I Pinoboros do Pomohukum dot Amon do Koimbagu
1 Om boro-boros no o Tuhan dot id doho' do poingkaa, 2 “Oi tulun, papalai no o pomogunan dot Amon. 3 Om sunudan no iyolo' do mokinongou diti boros ku, iyoho' i Tuhan, it Asawat Kopio, do poingkaa, ‘Norohian tomod kou daa do nokokito di Walai'd Sasambayangan dot Agayo do nososomu', om i pomogunan dot Israil do naraag, om bansa' do Yohudi do natanggayan do pisangod. 4 Om gowoi pondo, om pologoson ku i piro-piro payat do tulun do mantad hilo'd tana' do kowotuan di ponong id koulayon, do mongoi panangod dokoyu. Om powonsoyon nondo diyolo' o kiim diyolo' do hino'd pomogunan dokoyu om mundorong iyolo'd hino. Om mingakan nondo iyolo' di tua-ua' dokoyu om monginum iyolo' di susu di tayam-tayam dokoyu. 5 Om silihon ku'ndo i bandar do Raba do poiiyanan dot unta, om oinsanan i pomogunan dot Amon do silihon ku'd pomogompian do dumba', om koilo kou indo dot iyoho' no o Tuhan,’ kanto,” ka dau. 6 Poingkaa no o boros do Tuhan it Asawat Kopio, “Minomitapap ko daa'd palad om mininsayau ko do natataadan. Om minonguntotori' ko do pomogunan dot Israil. 7 Om gowoi pondo om patahakon ku iya' dot id bansa'd suwai, i mongoi panakau om mongoi pagahau do konunu-nunuan nu. Om padalaan ku nopondo kopio iya' do mamaraag gisom dot okon ko nondo ko' bansa' dot agayo om aiso' o pomogunan nu. Om koilo ko nogindo dot iyoho' no o Tuhan,” ka dau.
I Pinoboros do Pomohukum do Muab do Koimbagu
8 Om boros kad Tuhan, it Asawat Kopio, “Iri no i minomoros o Muab dot iyo ngai' nod bansa'd suwai o Yohuda, 9 o kapalagasan ku di piro-piro bandar di mongintirung daa di wolit do Muab dot asangod do pisangod, om kohompit ngai' no i bandar dit ongolumis --- i bandar do Bait-Yosimot, om Baal-Mion, om Kiriataim. 10 Om pologoson ku nondo i piro-piro o bansa'd tulun di mantad hilo'd tana' do kowotuan di ponong id koulayon do mangala' do Muab, om Amon, om opunso indo o tulun do Muab. 11 Hukuman ku nondo o Muab, om koilo indo iyolo' dot iyoho' no o Tuhan,” ka dau.
I Pinoboros do Pomohukum dot Idom do Koimbagu
12 Om boros kad Tuhan, it Asawat Kopio, “Nakasala' no kopio ot Idom tu' orongit i' iyau dot id Yohuda do tontok di suminuli' iyau. 13 Om baino' nodti om poboroson ku do hukuman ku no ot Idom om oyion ku nopod mamatai i tulun om nintorusan do hilo'. Om raagon ku nondo o pointongkop do pomogunan diri do mantad pod hilo'd bandar do Timan om korikot di bandar do Didan. Om angapatai ngai' nondo i tulun dot id pisangadan om oingou nondo o hilo'. 14 Om iri no i tulun ku, i tulun dot Israil, o pakayon ku do monuli' dot Idom, om popurimonon nondo kopio diyolo' ot Idom di kototogod ku dit a' ogina-gina'. Om koilo nogindo ot Idom do komoyon dot orotuan do kototogod ku. Iyoho' no, i Tuhan it Asawat Kopio, o minomoros diti,” ka dau.
I Pinoboros do Pomohukum do Pilistin do Koimbagu
15 Om boros kad Tuhan, it Asawat Kopio, “Oruol tomod o pinonuli' di tulun do Pilistin di pisangod diyolo' di mantad po di gulu po. Pinatai diyolo' iyolo' tu' atatagadan no kopio iyolo'. 16 Om gowoi pondo om poboroson ku do songodon ku'ndo o tulun do Pilistin om patayon ku iyolo'. Om patayon ngai' ku nopo i tulun di poingiyon do hilo'd tisan do rahat do Pilistin. 17 Om padalaan ku nondo kopio iyolo' do momohukum om magayi-ayi' oku do sumuli' diyolo'. Om opurimanan pondo kopio diyolo' o kototogod ku, om oilaan nogindo diyolo' dot iyoho' no o Tuhan,” ka dau.
I Pinoboros do Pomohukum do Tirus do Koimbagu
1 Tontok di tadau'd koiso' do tulan di natantu', di kohopod om iso' do toun dahai dot id pomogunan do pisangod, om boro-boros no o Tuhan dot id doho' do poingkaa, 2 “Oi tulun, iti no o popinggarangon di tulun do hilo'd Tirus, ‘Naraag noddi o Yorusalim! Natagak noddi o kuasa' dau dot id pogidagang-dagangan! Aiso' noddi o monokialib-alib dati',’ ka,” ka dau. 3 Om boro-boros noddi o Tuhan, it Asawat Kopio do poingkaa, “Pisangod oku noddi diya', oi bandar do Tirus. Om poporikot oku'ndod pisangod dot ogumu' do mongoi panangod diya', om miagal pondo iyolo' di tumbak do rahat do rumikot. 4 Om raagon nondo diyolo' o tolig do bandar nu om huyason i walai nu dit angakawas. Om imuhawon ngai' ku nogindo i pupuk, om tontolob pondo di pointalang tomod ot oolu' do hiri'd tanga'd rahat. 5 Om posisidangan pondod tulun di monginginsada' di rambot diyolo' i tontolob diri. Iyoho' no i Tuhan it Asawat Kopio, o minomoros diti. Ngoyon nondo do piro-piro o bansa' patayo' o tulun do Tirus. 6 Om pimpanakahan nondo diyolo' om pimpatayan diyolo' di gayang diyolo' i tulun do poingiyon do hiri'd kabandaran do rantai'd Tirus. Om koilo ngai' nogindo i tulun do hilo'd Tirus dot iyoho' no o Tuhan,” ka dau. 7 Om boros kad Tuhan, it Asawat Kopio, “Porikoton ku nondo i Raja' Nobukadnisar do mantad hilo'd Babil, do mongoi panangod diya', oi Tirus. Om rumikot nondo i raja' dot okoris kopio do mantad ponong hilo'd utara do miwoyo' do soudor dau dit ogumu', om kuda' om korita'-kuda', om soudor di songinsakai'd kuda'. 8 Om angapatai nondo dot id pisangadan i tulun do songingiyon do hiri'd kabandaran dit id rantai. Om mongukad nondo i pisangod do parit, om popoolig do tana' do maan do tolig do ponurungku', om popogitatalad do kolid dit angagayo do maan do pogintirungan do sumaap diya'. 9 Om lopusonon nondo diyolo' i tolig nu do pakakas do pamaraag o pomolopuson, om huyason diyolo' i walai nu dit angakawas do basi' o pomohuyas. 10 Om otounan ko nopondo di pupuk dot ounggar di kuda' diyolo' dit ogumu'. Om koguyu' iddi tolig nu i karatak di kuda' do mamagayat do korita'-kuda' di don sumasangod om i korita' di poiyanan do kokoriu do tontok di tumalib iyolo' di piro-piro o wawayaan di bandar do naraag diri. 11 Om tumias nopondo i soudor diyolo' di songinsakai'd kuda' do tumongkop di karalan-ralanan nu do mimpatai di tulun nu, dot i gayang diyolo' o pamatai. Om angkataam ngai' do hiri'd tana' i torigi nu dit ongolumis om it angapanggor. 12 Om panakahon ngai' nopondo di pisangod dokoyu i kakayaan om i dapu' do dagangon dokoyu. Om raagon nopondo diyolo' i tolig nu om huyason i walai dokoyu dit ongolumis. Om pataamon ngai' nopondo diyolo' do hilo'd rahat i watu om i papan om i tana' di pinomonsoi do walai dokoyu. 13 Om tingkodon ku'ndo i sinding nu, om i tuni do kecapi nu. 14 Om tontolob pondo dit aiso' i' o nunu-nunu do sumuni o pooluon ku do maan poddi gomponginsada' do posidangan di rambot diyolo'. A' nondo owonsoi kawagu i bandar diri. Iyoho' no, i Tuhan it Asawat Kopio, o minomoros diti,” ka dau. 15 Poingkaa o poboroson do Tuhan it Asawat Kopio, dot id bandar do Tirus, “Ngoyon ko nopondo songodo' om ongorolosi pondo i tulun di poingiyon do hilo'd tisan do rahat do korongou di giniakan do tulun di pimpatayon. 16 Om oinsanan nopondo i raja' di poingiyon do hilo'd tisan do rahat do lumintuhun do mantad id tirikohonon diyolo' di don raja'. Om iduwon nopondo diyolo' i rasuk diyolo' di don raja' om i rasuk di norindaan om pananggagaran pondo iyolo' do poirikau do hiri'd tana'. Om adalaan pondo tomod iyolo' dot orolosi di nosiliu dot id diya', gisom dot a' no iyolo' otingkod do gagaran. 17 Om sindingon nondo diyolo' iti sinding do pogihad diya': Naraag no i bandar dot abantug! Noidu' ngai' no i kapal dau do hilo'd rahat; kikuasa' daa do hilo'd rahat o tulun do bandar diti, om minonompurolosi iyolo' do koinsanai'd tulun di poingiyon do hilo'd tisan do rahat. 18 Nga' baino' noddi om naala' ko no, om pananggagaran ngai' po i tulun do hilo'd piro-piro pulou, om ongkotigowo po ngai' iyolo' do kokito di kinaraagan nu dit a' no ogina-gina',” ka dau. 19 Om boros kad Tuhan, it Asawat Kopio, “Silihon tiya' nondod pogun do miagal di bandar dit a' iyonon do tulun. Om olitan ku iya' do waig do rahat. 20 Om pokoyoon ku'ndo iya' do hilo'd pomogunan do tulun do napatai, om kosugku' ko i' di tulun di poimpasi di gulu po. Om pologoson tiya' do poundorong do hilo'd pomogunan do tulun do napatai dot id pogialatan di kinaraagan, i poinraag kasai' do gisom dot alaid do poinsugku' di tulun di napatai. Om gowoi pondo om a' nondo oiyon kawagu'd tulun i pomogunan nu om aiso' o koiyonon nu dot id pomogunan di tulun di poimpasi. 21 Om silihon ku'ndo iya' do poiyaan di koronob kopio, om iri nondo o kopupuson do surupu nu. Om umbalan ko i' daa'd tulun do mogihum nga' a' ko no okito kawagu, iyoho' no i Tuhan, it Asawat Kopio, o minomoros diti,” ka dau.
Sinding do Pogihad do Tirus
1 Om boro-boros no o Tuhan, it Asawat Kopio dot id doho' do poingkaa, 2 “Oi tulun, podsinding nod sinding do pogihad do Tirus, 3 i bandar di hilo'd tisan do rahat om i monokidagang dot id tulun di songingiyon dot id poingompus do tisan do rahat. Om sunudan no iyau diti boros ku, iyoho' i Tuhan, it Asawat Kopio, do poingkaa: Oi Tirus, oondos ko dino kolunduso' nu. 4 Walai nu nopo nga' ilo rahat. Om winonsoi ko do miagal di kapal do rahat dit olumis. 5 Iri nopo numaan diyolo'd tolig nu nga' i kayu sedar do mantad hilo'd nuluhon do Hormon. Om i kayu sedar do Libanon o numaan do torigi. 6 I kayu dot angagayo do mantad hilo'd Basan o winonsoi diyolo' do pangayu nu; om i kayu sedar do mantad hilo'd Siprus o winonsoi do taap nu, om linopisan ko po do lamai dit agayo o gatang. 7 Iri nopo layar nu nga' kain linan do winonsoi, i kain linan do rinindaan do mantad hilo'd Masir, iri nopo tanda' nu nga' kain dit osonong kopio do winonsoi, i kain dot otomou daragang-ragang do mantad hilo'd Siprus. 8 Iri nopo tulun do mangangayu diya' nga' mantad hilo'd bandar do Sidon om Arwad. Om iri no papamanau do kapal om i tulun nu dit ongoilo kopio. 9 Iri no tukang kayu di minomonsoi di kapal nu om tulun dit ongoilo do mantad hilo'd Gibal. Om oinsanan nopo i papamanau'd kapal do mantad id pointikid-tikid do pomogunan do sumakai di kapal do rahat do mongoi pomoli-moli do hiri'd kadai nu. 10 Soudor nu nopo nga' tulun do mantad hilo'd Porsia, om Lidia, om Libia. Om songinsait i kolid om tupi' kolidar diyolo' do hiri'd tolig nu. Iyolo' no i minonguhup diya' do minangala' ngai' di pisangod nu, om pinapabantug diya'. 11 I piro-piro o soudor do mantad hilo'd Arwad o madtamong di tolig nu, om i tulun do mantad hilo'd Gamad o madtamong di walai nu dit angakawas. Om songinsait i kolid diyolo' do hiri'd tolig nu. Iyolo' no i tulun di minongillumis diya'. 12 Minongoi ko pongindapu' do hilo'd Sepanyol om minigit ko do pirok, om basi' om tin om gundol di numaan do pambayar di dapu' nu dot ogumu'. 13 Minongindapu' ko do hilo'd Yunani, om hilo'd Tubal, om hilo'd Misik, om pinoolon nu i dapu' nu do turipon om i pakakas do tambaga'. 14 Om padagango' nu no i dapu' nu do numaan do pomoli do korita'-kuda', om kuda' do sakayon di sumasangod, om bagal, do mantad hilo'd Bait-Togarma. 15 Iri nogi' i tulun do Rodus nga' minonokidagang-dagang i' diya'; ogumu' o tulun do mantad id kinoiyonon dot id tisan do rahat do minanahak diya' do lamai; om kayu dit oitom do maan do pogolon di dapu' nu. 16 Om iri tulun do Siria nga' minomoli nogi' di dapu' do padagangon nu, om i winonsoi nu di mogisuayan dit ogumu'. Om pinomoli nopo diyolo' di dapu' nu om kain dot otomou daragang-ragang, om rinda', om kain linan dit aalus, om karang, om watu delima. 17 Pinomoli nod Yohuda om Israil di dapu' nu, om gandum, om paha', om tumau do saitun, om rampa. 18-19 Om iri tulun do Damsik nga' minomoli nogi' di dapu' do dagangon nu om i winonsoi nu di mogisuayan nopo. Pinomoli nopo diyolo' nga' waig dot anggur do mantad hilo'd Hilbon, om hulu'd dumba' do mantad hilo'd Sahar. Om pinoolon diyolo' di dapu' nu i basi' do tinantan om i rampa diyolo'. 20 Om pinomoli no di tulun do Didan di dapu' nu, om i kain do wonsoyon do pakol. 21 Om pinomoli no di tulun dot Arab om i piro-piro o pomorinta' do pomogunan do Kidar di dapu' do dagangon nu, om tanak do dumba', om dumba' do tontoluhan om kambing. 22 Om pinomoli nopo di piro-piro o dumadagang do mantad hilo'd Siba om Raima di dapu' nu, om i pongillumis do tinan dit agayo o gatang, om tamas om rampa dit ongosonong kopio. 23 Duminagang nogi' om minomoli do mantad id diya' i kabandaran do Haran, om Kani, om Idon, om i piro-piro o dumadagang do mantad hilo'd Siba, om i kabandaran dot Asur om Kilmad. 24 Pinapadagang iyolo' do pakayan dit agayo o gatang, om kain dit otomou daragang-ragang, om kain di kirinda', om i pamalapik do sirang di mogisuayan nopo o bunga, om tali di pongogos dit alanut. 25 Iri nopo dumadagang nu nga' poinsakai'd kapal do rahat di dong dumadagang dit angagayo. Miagal ko no kopio'd kapal do hilo'd rahat dot agayo, i poimponu'd dapu' dit angawagat. 26 Tontok di nayu ko di mangangayu diya', do kumaa'd hilo'd rahat, om raago' ko nod tongus do mantad hilo'd koulayon di hilo' ko pod tanga'd rahat. 27 Koinsanai nopo i dapu' do dagangon nu, om koinsanai nopo i papamanau di kapal nu, i tukang kayu, om i dumadagang, om koinsanai di soudor do poinsakai, do natagak do nolonsod do hilo'd rahat, do tontok di naraag om nolonsod i kapal nu. 28 Iri nopo giniakan di papamanau di kapal do rahat do tontok di motilonsod no, om orongou i' do hiri'd tisan di rahat. 29 Notongkiadan ngai' noddi o kapal, om nokoongoi ngai' nod hilo'd katanaan i papamanau do kapal. 30 Mogihad ngai' poddi iyolo' diya', popingarab po iyolo' do pupuk do hiri'd tulu diyolo' om mingisis do hiri'd pupuk do pointalang dot adalaan iyolo'd tumongob. 31 Linagasan diyolo' o tulu diyolo' dot iya' o kinapamalagasan. Om minanampakai iyolo' do pakayan do mogihad. Om tumongob tomod iyolo' di maso diyolo'd mogihad diya'. 32 Om modsinding iyolo' do sinding do pogihad diya' do poingkaa, ‘Isai po o koiyo do Tirus, Tirus it aiso' noddi o komi do hilo'd nanad do rahat? 33 Soira' di minongoi do hilo'd soborong do rahat i tulun nu di dumadagang do poinsakai'd kapal do rahat di poimponu'd dapu' di dagangon, om pinatahak ngai' nu i' i pinokianu do koinsanai'd bansa'. Nangkakaya' nu o raja', tu' ogumu' kopio i' o dapu' nu. 34 Om baino' noddi om poingraag ko po do hilo'd rahat; om nolonsod ko do hilo'd rahat dit aralom om i dapu' nu om i tulun do pakaraja' dot id diya', nga' natagak ngai' no do nokowoyo' diya' do nolonsod do hilo'd rahat,’ ka. 35 Kotigowo ngai' nopo i tulun di songingiyon do hilo'd tisan do rahat do korongou di kinootuson nu. Om iri piya raja' diyolo' nga' ongooris i', om moddosi ngai' poo o kokitanan do rabas diyolo'. 36 Natagak ko no, om a' ko no hino do gisom dot alaid, om ongooris po o koinsanai'd tulun di dumadagang do pointongkop diti pomogunan; tu' ooris iyolo' dot iyo di diya' o kootuson diyolo',” ka dau.
Hinukuman i Raja' do Tirus
1 Om boro-boros no o Tuhan dot id doho' do poingkaa, 2 “Oi tulun, sunudan no i raja' do Tirus diti poboroson ku dau, iyoho' i Tuhan it Asawat Kopio, do poingkaa: Asawat tomod o ginawo nu, om momoros ko daa do kinorohingan ko. Boros ka nu om miagal ko pod kinorohingan do poirikau dot id tirikohonon do don raja', do kikuasa' dot id sawat do koinsanai'd rahat. Om minsorupai-rupai ko daa do kinorohingan ko, nga' okon ko i' ko' kinorohingan, tu' tulun ko i' toomod. 3 Om ondos nu daa om oilo ko po ko' i Danil, om aiso' o milo'd lisokon do mantad id diya'. 4 Iri no i toilaan nu om i koiloo' nu o pinapakaya' diya', gisom do kidapu' ko, om kitamas om kipirok ko. 5 Om oilo ko do mongingusin om haro kasai' nopo o tuntung nu. Om oondos tomod ko'ddi di kakayaan nu! 6 Iyo nopoddi, om pokinongou no diti boros ku, iyoho' i Tuhan, it Asawat Kopio. Tu' momusorou ko daa dot iyo ko'd Kinorohingan. 7 Om porikot oku nondod pisangod dit ongorongit do mongoi panangod diya'. Om raagon ngai' nondo diyolo' o koinsanai di dapu' dit ongolumis di nangaanu nu tu' oilo ko i' om opintar ko. 8 Om patayon ko nondo diyolo' om lobongon ko do hilo'd rahat. 9 Om rumikot nopondo iyolo' do mongoi pamatai diya' om momoros ko pod Kinorohingan ko? Kotimbaba' ko nopondo di mamatai diya' om tulun ko indo toomod, om okon ko i' ko' Kinorohingan. 10 Om patayon ko nondo do miagal pod tulun dit aiso' o ngaran-ngaran, tu' iri i tulun di bansa'd suwai, it a' kotutun do Kinorohingan o mamatai diya'. Iyoho' no, i Tuhan it Asawat Kopio, o minomoros diti,” ka dau.
Kinaalaan di Raja' do Tirus
11 Om boro-boros po kawagu o Tuhan dot id doho' do poingkaa, 12 “Oi tulun, pogihadai no o raja' do Tirus. Om sunudan no iyau diti poboroson ku dot id dau, iyoho' i Tuhan, it Asawat Kopio, do poingkaa: Di nopo di gulu po om iya' no o poiyaan dit aiso' o bohiton. Tu' oilo ko om oligkang ko! 13 Poingiyon ko do hilo'd Idon, i kabun do Kinorohingan, om pakayan nu nga' linumis do watu dit agayo o gatang, di mogisuayan, i watu do delima, om mutiara', om topas, om pirus, om Yakut, om ratna, om cempaka, om nilam, om samrud, om watu alkali dit aragang. Om ogumu' o tamas do pongillumis nu. Iri nopo om winonsoi do bagi diya' do tontok di tadau do winonsoi ko. 14 Om minonuhu' oku do moloikat di koronob kopio do madtamong diya' do hilo'. Om poingiyon ko dot id nuluhon ku dit olidang. Om mimpanau ko dot id pogialatan di watu dot olumis dit angagayo o gatang di songkilou-kilou. 15 Aiso' i bohi-bohiton do kowoyo-woyoo' nu dit a' po norikot i tadau di tuminimpuun ko do momonsoi'd araat. 16 Agangau ko pod mongingusin; om iri no o nokobungou diya' do ruminaat om minomonsoi'd dusa. Om uyungo' ku noddi iya' do mantad hiri'd nuluhon ku dit olidang, om i moloikat di madtamong diya' nga' minonguyung i' diya' do mantad hiri'd watu dit olumis dit angagayo o gatang di songkilou-kilou'ddi. 17 Pinopoondos diya' i koligkango' nu, om pinapabasug diya' i kobontugo' nu. Om gowoi poddi om pinodumpau ku iya' do hilo'd tana', om siniliu ku iya' do popoinsan di piro-piro o raja' do suwai,” ka dau. 18 Om boro-boros no kawagu o Tuhan do poingkaa, “Oi Tirus araat tomod o kowoyo-woyoo' nu do padagang om momoli gisom dot iri piya tiyonon nu'd sumambayang nga' nososomu' ngai' i'. Om tutudai ku noddi i bandar gisom dot naawu. Om tauu ko poddi dot okito do koinsanai'd tulun. 19 Natagak ko noddi, om a' ko no hino do gisom dot alaid. Om oinsanan nopo i bansa' di nokotutun diya' dot ongooris, tu' moddosi dot oontok do miagal di nokoontok diya',” ka dau.
I Pinoboros do Pomohukum do Sidon do Koimbagu
20 Om boro-boros no o Tuhan dot id doho' do poingkaa, 21 “Oi tulun, papalan no o bandar do Sidon. 22 Sunudan no i tulun do hilo' diti poboroson ku dot id diyolo', iyoho' i Tuhan, it Asawat Kopio, do poingkaa: Iyoho' no o pisangod nu, oi Sidon; om royohon oku nondod tulun dot i wonsoyon ku dot id diya' o kapamarayahan. Om koilo nondo iyolo' dot iyoho' no o Tuhan it olidang om araatan dit angaraat, do tontok do hukuman ku i tulun di songingiyon do hilo'. 23 Om porikatan ku nondo iyokoyu do toruol om poluyungon ku o raha' do hilo'd karalan-ralanan. Om tutukan kou nopondod tulun do manangod, om angapatai nondo o tulun nu. Om koilo ko nogindo dot iyoho' no o Tuhan,” ka dau.
Barakatan Nondo ot Israil
24 Om boros kad Tuhan, “Aiso' nondo o tiso' di pomogunan do posorili' dot Israil, i minongulok-ulok daa dot Israil, do koumbal kawagu do miagal do rugi om sakot di kohorob do pokoruol dot Israil. Om koilo nondo iyolo' dot iyoho' no o Tuhan it Asawat Kopio,” ka dau. 25 Om boros kad Tuhan it Asawat Kopio, “Pogulion ku nondo kawagu i tulun dot Israil do mantad id koinsanai'd pomogunan di hilo'd sodu' di pinotompiasan ku diyolo'. Om koilo ngai' nogindo i bansa' dot olidang oku. Om miyon nondo kawagu i tulun dot Israil do hilo'd pomogunan diyolo', i pomogunan di pinatahak ku dot id di Yakub, i susuhuon ku. 26 Om aiso' indo o koligagaanan diyolo' do poingiyon do hilo'. Om mamaal nondo iyolo' do walai om mananom do kabun dot anggur. Om hukuman ngai' ku nondo i songkoduwo diyolo', i nokoumbal do minongulok-ulok diyolo', om osimbayan nondo ot Israil. Om koilo kou nogindo dot iyoho' no i Tuhan, i Kinorohingan,” ka dau.
Pomohukum do Masir
1 Tontok di tadau'd kohopod om duwo, di tulan do kohopod, om toun di kohopod do hiri iyahai'd pomogunan do pisangod, om boro-boros no o Tuhan dot id doho' do poingkaa, 2 “Oi tulun, pasalao' no i raja' do Masir. Sunudan no iyau do hukuman iyau om koinsanai di tulun do hilo'd pomogunan do Masir,” ka dau. 3 Om suhuo' oku nod Tuhan it Asawat Kopio, do popoboros dot id raja' do Masir diti boros dau do poingkaa, “Iyoho' no o pisangod nu, oi buayo dit agayo, i poillatan do hilo'd bawang. Boros ka nu, om iya' no o sanganu di Bawang do Nil, om iya' o minomonsoi'ddi. 4 Koiton ku nondod tapon ino roo nu om posokoton ku do sisi' nu i sada' do hilo'd bawang. Om gayaton ku nondo iya' do tumindal di Bawang do Nil do mitonggoi di sada' di songinsokot do sisi' nu. 5 Om pataamon ku nondo iya' do hilo'd tana' do kowotuan do mitonggoi di sada' do poinsokot diya'. Om poingiliu pondo do hiri'd tana' o tinan nu, om aiso' o tulun do mongoi pomolobong. Om patahakon ku nondo iri dot id tombolog om id nintorusan do maan diyolo'd kanon. 6 Om koilo ngai' nogindo i tulun do hilo'd Masir dot iyoho' no o Tuhan,” ka dau. Boros kad Tuhan, “Suminondiu daa i tulun dot Israil dokoyu, oi bansa' do Masir, nga' miagal ko nod sukud dit opihoi. 7 Soira' di suminondiu iyolo' diya' om kotipu' ko no, om kotodok o pokilok diyolo', gisom do mitohirod-hirod po iyolo'. 8 Om gowoi poddi om sunudan ku iya', iyoho' i Tuhan it Asawat Kopio: do porikot oku nondod soudor do mongoi panangod diya' do gayang o panangod. Om patayon nondo diyolo' i tulun nu om i tayam-tayam nu. 9 Om osiliu nondo o Masir do pogun dit oingou. Om koilo kou nogindo dot iyoho' no o Tuhan,” ka dau. Om boros kad Tuhan, “Oi raja' do Masir, minomoros ko do diya' di Bawang do Nil, om iya' o minomonsoi'ddi. 10 Om osiliu oku nondod pisangod nu om pisangod di Bawang do Nil. Silihon ngai' ku nopondod pogun o pointongkop do Masir do mantad pod hilo'd bandar do Migdol, i ponong hilo'd utara om gisom di bandar dot Aswan do ponong id salatan, om poingompus di wolit dot Etiopia. 11 Om aiso' nondo o tulun ko' nintorusan do maya'd hiri. Om aiso' o tulun do miyon do hiri do solinaid dot apat nohopod o toun. 12 Om silihon ku nondo o Masir do pomogunan dit oingou kopio, dot id pogialatan do pomogunan do suwai dit ongoingou. Om poinraag nopondo i kabandaran do Masir do solinaid dot apat nohopod o toun, om i naraag no kopio ko' mantad di suwai. Om silihon ku nondo i tulun do Masir do tulun dit aiso' o pomogunan. Mogidu' nondo iyolo' do kumaa dot id pointikid-tikid do pomogunan om miyon do poinsugku' do bansa'd suwai,” ka dau. 13 Om boros kad Tuhan, it Asawat Kopio, “Katalib pondo ot apat nohopod o toun om pogulion ku nogi' kawagu i tulun do Masir do mantad id pomogunan di pinotompiasan ku diyolo'. 14 Om pologoson ku nogindo iyolo' do momogun-mogun do hilo'd Masir do ponong id salatan, i pinomogun-mogunan mantad diyolo'. Om oluhoi nondo o pomorintaan diyolo' do hilo'. 15 I pomorintaan dit oluhoi no kopio do pointongkop diti pomogunan. Om a' nondo iyolo' momorinta' do bansa'd suwai. Om poluhoyon ku nondo kopio iyolo' gisom dot a' no iyolo' milo do mononsog do nunu nopo o bansa'd suwai do tumanud do diyolo'd korohian. 16 Om Israil nga' a' nondo mumbal do sumondiu diyolo'. Tu' iri nondo i kinootuson do Masir o poposorou dot Israil do kasala' do sumondiu diyolo'. Om koilo nogindo ot Israil dot iyoho' no o Tuhan, it Asawat Kopio,” ka dau.
Aala' di Raja' Nobukadnisar o Masir
17 Tontok di tadau'd koiso' do tulan do koiso', di koduwo nohopod om turu' do toun dahai do hiri'd pomogunan do pisangod, om boro-boros no o Tuhan dot id doho' do poingkaa, 18 “Oi tulun, noongoi no di Raja' Nobukadnisar, i mantad hilo'd Babil, kasangod o Tirus. Sinuhu' dau i piro-piro o soudor dau do sumaan dit awagat kopio do gisom do nongouul o tobuk do tulu diyolo' do nokisasan, om nongosuhat o lihawa diyolo'. Nga' aiso' i' o naanu-anu di raja' om i piro-piro o soudor dau dot iyo tomod piya'ddi o kinoudipono' diyolo'. 19 Om gowoi poddi do poingkaa o poboroson ku, iyoho' i Tuhan, it Asawat Kopio: Patahakon ku i pomogunan do Masir dot id di Raja' Nobukadnisar. Om solodon ngai' nopondo dau i kakayaan do Masir om tanggayan ngai' dau iri do maan do pamagadsi' di piro-piro o soudor dau. 20 Patahakon ku o Masir dot id dau do maan ku do pamagadsi' di karaja' dau, tu' kuminaraja' i' i piro-piro o soudor dau dot id doho'. Iyoho' no i Tuhan, it Asawat Kopio, o minomoros diti. 21 Om osiliu nopondo o miagal diri, om pokorison ku nondo o tulun dot Israil om pologoson ku iya', oi Yohoskiol, do mimboros dot opuhod om it id dorongou ngai'd tulun om koilo i' iyolo' dot iyoho' no o Tuhan,” ka dau.
Hukuman do Tuhan o Masir
1 Om boro-boros po kawagu o Tuhan dot id doho' do poingkaa, 2 “Oi tulun, poboroso' no it osiliu dot id dabantalan om popimboroson no iti boros ku, iyoho' i Tuhan, it Asawat Kopio, dot id bansa'd Masir. Poboroson no dot id diyolo' o poingkaa do mikuwo'd mihad: Rumikot no o tadau'd Tuhan, i tadau di kopoddosian kopio. 3 Oruhai no i tadau'ddi, i tadau do kapamansayan do Tuhan di wonsoyon dau, mituong nondo o tadau'ddi om tadau'd kosusaan dot id piro-piro o bansa' dit orotuan do hukuman. 4 Haro nondo o pisangadan do hilo'd Masir, om haro o koinggoritan do hilo'd Etiopia. Ogumu' nondo ot apatai do hilo'd Masir. Apanakahan nondo i pomogunan diri om osiliu'd pogun. 5 Om angapatai ngai' nondo dot id pisangadan diri i soudor di ginodsian di mantad hilo'd Etiopia, om hilo'd Lidia, Libia, om hilo'd Arab, om hilo'd Kub, om mantad id pogialatan di tulun ku,” ka dau. 6 Om boros kad Tuhan it Asawat Kopio, “Mantad po do hilo'd Migdol i ponong hilo'd utara om gisom do hilo'd Aswan i ponong hilo'd salatan, om oinsanan nopo i soudor di sumokodung do Masir dot apatai dot id pisangadan. Iyoho' no i Tuhan, it Asawat Kopio, o minomoros diti,” ka dau. 7 “Om osiliu nondo o pomogunan diri do pomogunan dit oingou kopio dot id pogialatan di pomogunan do suwai dit ongoingou. Om osiliu'd pogun i kabandaran do hilo'. 8 Om otutudan ku pondo o Masir om angapatai ngai' i sumokodung dau om koilo nogindo iyolo' dot iyoho' no o Tuhan. 9 Orikot nopo o tadau'ddi om araag o Masir, om monuhu' oku nondod tulun do mongoi poporomut di habar, om sumakai iyolo' do kapal do rahat. Om tigowoon nondo diyolo' i tulun dot Etiopia dit a' i' nokoinsan mantad, om moddosi nondo iyolo'. Rumikot no i tadau'ddi!” ka dau. 10 Om boros kad Tuhan it Asawat Kopio, “Pakayon ku'ndo i Nobukadnisar, i raja' do Babil do mamaraag do koinsanai di kakayaan do Masir. 11 Rumikot nondo i Nobukadnisar do miwoyo' do koinsanai di soudor dau dit a' mangampun do mongoi pamaraag do pomogunan diri. Songodon nondo diyolo' do gayang o Masir, om oponu' pondod rata' i pomogunan diri. 12 Om rasakan ku'ndo i Bawang do Nil om patahakon ku nondo o koinsanai do Masir dot id tulun dit araat diri. Om bansa' nondod suwai o suhuon ku'd mamaraag do pointongkop do pomogunan diri. Iyoho' no i Tuhan, o minomoros diti,” ka dau. 13 Om boros kad Tuhan it Asawat Kopio, “Raagon ngai' ku'ndo i tingolig om i tininganak do hilo'd Mimpis. Om aiso' nondo o raja' do Masir, om rolosion ngai' ku i tulun do hilo'. 14 Poingohon ku nopondo o pointongkop do Masir i ponong id salatan om tutudan ku i bandar do Soan i ponong hilo'd utara. Om hukuman ku nondo o Tibi i bandar dot agayo. 15 Om raagon ku o kakayaan dau. Popurimonon ku'ndo kopio di kototogod ku i bandar do Polusium, i kuta' do pogintirungan do Masir. 16 Tutudan ku nondo o Masir, om oinggorit pondo o bandar do Polusium. Araag nondo i tingolig do bandar do Tibi om oluyudan i bandar diri. 17 Angapatai nondo dot id pisangadan i tangaanakwagu do bandar do Hiliopolis om Bubastis, om angatanggayan do pisangod i tongoondu'. 18 Om tumuong nondo o bandar do Tapanhis dot aala' ku o Masir om araag ku i kuasa' diyolo' di tiondos-ondos kopio diyolo'. Om olikupan nondod haun o Masir, om oinsanan nopondo i tongoondu' do kabandaran do hilo' dot atanggayan do pisangod. 19 Om ohukuman ku pondo o Masir do miagal diti om koilo nogindo iyolo' dot iyoho' no o Tuhan,” ka dau.
Nopupusan o Kuasa' di Raja' do Masir
20 Tontok di tadau do koturu', di tulan do koiso', di kohopod om iso' do toun dahai dot id pomogunan do pisangod, om boro-boros no o Tuhan dot id doho' do poingkaa. 21 “Oi tulun, notipu' ku no i longon di raja' do Masir. Om aiso' i' o minongoi pomorilit di longon dau om aiso' o minongoi pongurut do momolingos om okoris i' daa kawagu do mongigit do gayang. 22 Om gowoi poddi do poingkaa o poboroson ku, iyoho' i Tuhan it Asawat Kopio: Nosiliu oku nod pisangod di raja' do Masir. Om ngoyon ku po kawagu tipuo' goduwo i longon dau, dot it a' notipu', om i notipu' no mantad om oilihan nopondo dau i gayang. 23 Om potompiason ku nondo i tulun do Masir do pointongkop diti pomogunan. 24 Om pokorison ku nondo o longon di raja' do Babil om poigitan ku dau i gayang ku. Nga' tipuon ku'ndo goduwo i longon di raja' do Masir, om modoi-odoi pondo iyau om apatai dot id toguang di raja' do Babil i pisangod dau. 25 Poluhoyon ku'ndo i raja' do Masir om pokorison ku i raja' do Babil. Om patahakon ku nopondo dau i gayang ku om paakangon no dau do hilo'd Masir, om koilo ngai' nogindo o tulun dot iyoho' no o Tuhan. 26 Om potompiason ku nondo i tulun do Masir do pointongkop diti pomogunan. Om koilo nogindo iyolo' dot iyoho' no o Tuhan,” ka dau.
Pinoiyo o Masir do Kayu Sedar do Libanon
1 Tontok di tadau'd koiso', di tulan do kotolu, di kohopod om iso' do toun dahai dot id pomogunan do pisangod, om boro-boros no o Tuhan dot id doho' do poingkaa, 2 “Oi tulun, poboroson no iti boros ku dot id raja' do Masir om id koinsanai'd tulun dau: Okoris kopio ko', oi Masir! Nunu po daa o poiyaan ku diya'? 3 Iyo ko di kayu sedar do Libanon, ogumu' om olumis o raan nu, om orindog o guas nu, om korikot i' do hilo'd haun o kakawaso' nu. 4 Haro i' o waig do poposuni'ddi, om haro o waig do hiri'd tana' do poporombung diri. Siniram diyolo' o hiri'd puun di kayu. Om siniram ngai' i kayu'd suwai. 5 Akawas iddi ko' i kayu'd suwai i kayu'ddi di nokosuni kopio, tu' osima' i' do waig. Angagayo om anganaru i raan dau. 6 Mogisuayan nopo o bansa' do tombolog do momirumun do hiri; om paganakan do nintorusan o hiri'd dolungungan. Minundorong ngai' i bansa' dot angagayo do pointongkop diti pomogunan dot id dolungungan di kayu'ddi. 7 Olumis tomod dot okito i kayu'ddi. Orindog o guas, om gamut nga' nakaladsong do hilo'd saalom do gisom do nokorikot di tudan do waig do hilo'd saalom do tana'. 8 Aiso' i' o kayu sedar do hiri'd kabun do Kinorohingan do koiyo'ddi. Aiso' i' o kayu sanobar ko' kayu berangan do miagal di kayu'ddi kanaru o raan. 9 Iyoho' i' o pinopolumis diri, gisom dot anganaru o raan. Mosol ngai' nopo di kayu'ddi i kayu do hilo'd Idon, i kabun do Kinorohingan. 10 Nga' baino' nopondo, om sunudan ku iya', iyoho' i Tuhan, it Asawat Kopio o momisunud, dit osiliu dot id kayu'ddi, i suminuni do gisom do nokorikot do hilo'd haun. Soira' di mawas-kawas i kayu'ddi do sumuni om mawat-sawat no o ginawo dau. 11 Om gowoi poddi om niadaan ku iyau om patahakon ku dot id bansa'd suwai. Om wonsoyon nondo dau dot id kayu'ddi o miontok di nowonsoi dau dot araat. 12 Tagadon nondo iri om tongkiadan di soudor do bansa'd suwai dit a' mangampun. Om rumatu' nondo i raan di kayu'ddi dot id pointikid-tikid do nuluhon om kubong do hiri'd pomogunan diri. Om mogidu' ngai' nopondo i bansa' di songillungung daa do hiri'd sahau'ddi. 13 Om mongoi nondo sako i tombolog do hiri'd kayu di nahaba'ddi, om pingulakan di nintorusan i raan. 14 Gowoi pondo om mantad nopod baino', om aiso' nondo o kayu dot iyo kopio'ddi o kakawaso'; om aiso' no o kayu di korikot do hilo'd haun dot osima' piya daa'd waig. Oinsanan nopo iyolo' do matai do miagal do tulun toomod, om koongoi kosugku' di tulun di lumintuhun do hilo'd pomogunan do tulun do napatai,” ka dau. 15 Iti no o poboroson do Tuhan, it Asawat Kopio, “Tontok nopondo di tadau do mongoi i kayu do hilo'd pomogunan do napatai, om pooliton ku nondo di kayu i waig dit id saalom do tana', do tanda' do mogihad. Om wokokon ku nondo i bawang om a' ku poluyungon i luyu-luyu'. Om potuongon ku nondo o hilo'd Libanon om riohon ngai' ku i kayu do hiri'd puru', tu' napatai no i kayu'ddi. 16 Om tontok nopondod pokoyoon ku i kayu'ddi do hilo'd pomogunan do tulun do napatai, om iri po i kurubut dau do humaba' nga' popogogor i' do koinsanai'd bansa'. Om oinsanan nopondo i kayu dot Idon dit ongosonong kopio om i kayu dit opiyopos do waig do hilo'd Libanon di nokoongoi no do hilo'd pomogunan do tulun do napatai dot angasanangan do nahaba' i kayu'ddi. 17 Om tumanud nondo iyolo'ddi do mongoi do hilo'd pomogunan do tulun do napatai, do mongoi sugku' di nokopogulu nod nahaba'. Om oinsanan nopondo i minongoi daa intulungung di kayu'ddi do kotias dot id piro-piro o bansa'. 18 Iri nopo kayu'ddi nga' poiyaan di raja' do Masir om koinsanai di rayat dau. Aiso' i' o koiyo'ddi kakawas om kolumis di kayu do hilo'd Idon. Nga' baino' nopoddi om iyo i' di kayu di hilo'd Idon i kayu'ddi tu' koongoi i' do hilo'd pomogunan di tulun do napatai om kosugku' di tulun dit a' kotutun do Kinorohingan om i nangapatai dot id pisangadan. Iyoho' no i Tuhan, it Asawat Kopio, o minomoros diti,” ka dau.
Pinoiyo do Buayo i Raja' do Masir
1 Tontok di tadau'd koiso', di tulan do kohopod om duwo, di kohopod om duwo'd toun dahai dot id pomogunan do pisangod, om boro-boros no o Tuhan dot id doho' do poingkaa, 2 “Oi tulun, poinsanon no kopio i raja' do Masir. Sunudan no iyau diti boros do mantad id doho' do poingkaa: Mingiyo-iyo ko daa di singa dit okoro' po dot id pogialatan do bansa', nga' iyo ko nogi' di buayo di mingkurabug do hilo'd bawang. Lobohon nu do gakod nu i waig om sosomuon nu o koinsanai di bawang. 3 Om soira' nopondod tumimung ngai' o bansa', om gomiton ku nondo iya' do hiri'd rambot ku om pologoson ku nogindo iyolo' do mamagayat di rambot diri do potindal. 4 Om podumpahon ku nondo iya' do hiri'd tana' om porikoton ngai' ku nogindo i tombolog om nintorusan do pointongkop diti pomogunan do mongoi pangakan diya'. 5 Om tongkopon ku nopondo i konuluhanan om i kokubang-kubangan di rata' nu di napasa'. 6 Om potuntugon ku i raha' nu do gisom do koyopos di nuluhon om koponu' di kabawang-bawangan. 7 Om soira' nopondod patayon tiya', om potuongon ku nondo ilo tawan om tirungon ku i rombituon. Om tumirung nondo ilo tadau di haun om a' mogulinau i tulan. 8 Om pisokon ngai' ku nondo i tulinau do hilo'd tawan om potuongon ku o pomogunan nu. Iyoho' no i Tuhan, it Asawat Kopio, o minomoros diti. 9 Om ogumu' nondo o pomogunan dot angagangau do potongkopon ku o habar do kinaraagan nu dot id piro-piro o pomogunan dit a' nu po noilaan do gulu. 10 Om iti nopo wonsoyon ku dot id diya' nga' popotigowo dot ogumu' o bansa'. Om soira' di paakangon ku o gayang ku, om pananggagaran ngai' pondo i raja' dot opopoddosian. Om tontok nopondo di tadau do kahabaan nu, om oinsanan nopondo iyolo' do gagaran dot ooris dot apatai,” ka dau. 11 Om boros kad Tuhan it Asawat Kopio, dot id raja' do Masir, “Akangan ko nondo di gayang do raja' do Babil. 12 Pologoson ku nondo i soudor do mantad id bansa' dit ongorongit do mongodong do gayang diyolo', om mamatai do koinsanai'd tulun nu. Oinsanan nopondo i tulun nu om oinsanan i kaandasan nu dot angaraag. 13 Sumbolion ngai' ku nopondo i tayam-tayam nu dot id pointikid-tikid do bawang di tiinuman diyolo'. Aiso' nondo o tiso' pod tulun ko' nintorusan po do momolobou di bawang. 14 Pologoson ku nondo do posinonod i waig nu om oniniting i', om pologoson ku i bawang nu dot osimbayan do lumuyung. Iyoho' no i Tuhan it Asawat Kopio, o minomoros diti. 15 Soira' pondod silihon ku do tana' dit a' sunian dit oingou o Masir om patayon ngai' ku i songingiyon do hilo', om koilo nogindo iyolo' dot iyoho' no o Tuhan. 16 Om osiliu nondod sinding do pogihad iti boros do popoinsan. Om sindingon nondo di tongoondu' di bansa'd suwai o sinding diti do pogihad do Masir om koinsanai di tulun do hilo'. Iyoho' no i Tuhan, it Asawat Kopio, o minomoros diti,” ka dau.
Pomogunan do Tulun di Napatai
17 Tontok di tadau'd kohopod om limo, di tulan do koiso', di kohopod om duwo do toun dahai dot id pomogunan do pisangod, om boro-boros no o Tuhan dot id doho' do poingkaa, 18 “Oi tulun, pogihadai no i tulun do Masir dit ogumu'ddi. Pokoyoo' no iyolo' om i bansa'd suwai dit ongokoris do hilo'd pomogunan do tulun di napatai. 19 Om sunudan no iyolo' do poingkaa: Ondos nu daa om pointalib kopio ko' wokon o diya'd kolumiso'? Kasaalom ko nondo do hilo'd pomogunan do tulun di napatai om poliiyon ko'd hilo', do poinsugku' di tulun dit a' kotutun do Kinorohingan. 20 Om angapatai nondo i tulun do Masir do kotonggoi di tulun dit angapatai dot id pisangadan. Posodia' no o gayang do pamatai diyolo'. 21 Om iri po i piro-piro o gunsiou om i tulun di suminaap do minuhup do Masir dot id pisangadan nga' sumuwau ngai' nopondo di tulun do Masir di kumaa iyolo' do hilo'd pomogunan do tulun do napatai. Minggiak pondo iyolo' do poingkaa, ‘Nokoongoi nod hiti it a' kotutun do Kinorohingan, i nangapatai dot id pisangadan; om hiti nondo o liiyon diyolo'!’ ka. 22-23 Asur nga' hilo' nogi', om pointutuk nopo dau i lobong di piro-piro o soudor dau. Nangapatai ngai' nopo i soudor dau dot id pisangadan, om songintutuk di pinamalabangan dau i diyolo'd lobong di hiri'd saalom kopio. Om nokoumbal i' daa iyolo' di poimpasi po iyolo' do minongoris do tulun di hilo' po iyolo'd pomogunan. 24-25 Ilam nga' hilo' nogi', om pointutuk dau i lobong do soudor dau. Nangapatai ngai' no iyolo' dot id pisangadan dit a' po iyolo' nosunatan, om saalom ngai' nopoddi iyolo' do hilo'd pomogunan do tulun di napatai. Di nopo di poimpasi po iyolo' om mongongoris iyolo', nga' baino' nopoddi om napatai no iyolo' om nointingayam do mitonggoi di tulun di nangapatai dot id pisangadan. 26 Misik om Tubal nga' hilo' nogi', om pointutuk diyolo' i lobong do soudor diyolo'. A' ngai' nopo iyolo' nosunatan, om nangapatai ngai' dot id pisangadan. Nga' nopo di songimpasi po iyolo', om minongoris i' daa iyolo' do tulun di hilo' po iyolo'd pomogunan. 27 A' i' pinusou i kinapamalabangan diyolo' do miagal di pomolobong do gunsiou di gulu po, tu' tinanggayan ngai' i' di rapo-rapo do sumangod do tontok di linobong; pinoulunanan i gayang diyolo' om pinasakai di tinan diyolo' i kolid. Iti nopo piro-piro o gunsiou diti nga' ongokoris kopio di poimpasi po iyolo' do gisom do moddosi ngai' nopo diyolo' i tulun. 28 Om iyo nondoddi i tulun do Masir do lobongon om poingiliu tomod dot id pogialatan do tulun dit a' kotutun do Kinorohingan i tulun di nangapatai dot id pisangadan. 29 Idom nga' hilo' nogi' do mogiwoyo-woyo' di piro-piro o raja' om pomorinta' dau. Soudor daa iyolo' dit ongokoris di gulu po, nga' baino' noddi om songingiliu po iyolo' do hilo'd pomogunan do tulun di napatai do poinrolot di tulun dit a' kotutun do Kinorohingan, i nangapatai dot id pisangadan. 30 Iri i piro-piro o pomorinta' do ponong hilo'd utara om i tulun do Sidon nga' hilo' nogi'. Kooris tomod i kuasa' diyolo' di gulu po, nga' baino' noddi om nointingayam po tomod iyolo' do poinrolot di tulun di nangapatai dot id pisangadan, om i songingiliu poo; om aiso' i' o nosunatan diyolo'. Om iyolo' nga' ointingayam no do miagal di tulun di nakakaa do hilo'd pomogunan do tulun di napatai. 31 Om oinsasamadan nondo i raja' do Masir om i soudor dau do kokito di tulun di nangapatai dot id pisangadan. Iyoho' no i Tuhan, it Asawat Kopio, o minomoros diti. 32 Di nopo gulu po om pinologos ku i' o Masir do minongoris di tulun di songimpasi, nga' angapatai indo i soudor dau, om iyau nogi' nga' apatai i' om lobongon do poinsugku' di tulun dit a' kotutun do Kinorohingan, i nangapatai dot id pisangadan. Iyoho' no i Tuhan, it Asawat Kopio, o minomoros diti,” ka dau.
Pinili' do Kinorohingan i Yohoskiol do Sumiliu'd Madtatamong
1 Om boro-boros no o Tuhan dot id doho' do poingkaa, 2 “Oi tulun, sunudan no i tulun nu dit osiliu do tontok do porikoton ku o pisangadan dot id iso' o pomogunan. Poingkaa nondo ot osiliu: Momili' nondo i rayat do songulun dot id pogialatan diyolo' do sumiliu do madtatamong. 3 Om soira' nopo dot okito dau i pisangod do rumikot, om pounion nondo dau i pouunion do momisunud do haro o koligagaanan, om koinsan ngai' i' o tulun. 4 Ondung haro o songulun do korongou'ddi pomisunud diri, om a' indo mamadul diri, om rumikot nondo i pisangod do mongoi pamatai dau, om dau nod sala' o kapatai dau. 5 Sala' no dau o kapatai dau, tu' a' i' iyau minamadul di pinomisunud dau, nga' ondung minamadul daa iyau di pinomisunud diri om kopoggidu' i' doti' daa iyau. 6 Nga' ondung okito di madtatamong i pisangod do rumikot om a' indo iyau popouni di pouunion do momisunud do haro o koligagaanan, om rumikot nondo i pisangod om patayon ngai' no diyolo' i tulun do kidusa'ddi. Nga' iri indo i madtatamong o pababaan ku di kinapatayan diyolo'. 7 Om baino' nodti, oi tulun, om silihon ku iya' do madtatamong do bansa' dot Israil. Om polombuson no dot id diyolo' i boros ku do popoinsan do poingkaa, 8 ‘Ondung poboroson ku do matai o songulun dot araat, om a' nu i' iyau ngoyon poinsano' do posimban do kowoyo-woyoon dau, om apasi i' iyau, om apatai nondo iyau, di maso dau do kidusa, om iya' nondo o pababaan ku di kinapatayan dau. 9 Nga' ondung ngoyon nu poinsano' o tulun dit araat om tumomod indo o tulun diri dot a' tumingkod do momonsoi'd dusa, om matai nondo iyau do maso dau do kidusa, nga' iya' nopondo om apasi i',’ kanto,” ka dau.
Tonggungan do Pointikid-Tikid do Tulun
10 Om boro-boros no o Tuhan dot id doho' do poingkaa, “Oi tulun, poboroson no dot id tulun dot Israil i popimboroson dot id diyolo' do poingkaa, ‘Nawagatan po iyahai'd dusa dahai om i kasalaan do winonsoi dahai. Motipatai no iyahai. Poingkuro po iyahai'dti dot apasi?’ ka. 11 Om sunudan no iyolo' do sumumpa' oku, dot id suang do ngaran ku, i Kinorohingan do poimpasi, i Tuhan it Asawat Kopio, dot a' oku i' moti' kopio asanangan do kokito'd tulun di kidusa dot apatai. Orohian oku nogi' daa kopio do kokito dau do rumologo'd dusa om apasi i' iyau. Oi tulun dot Israil, rologo kou no koti' do momonsoi'd araat. Nokuro tu' uhang dokoyu'd apatai kou? 12 Om dinondo no, oi tulun, om sunudan no i tulun dot Israil do soira' nopo do momonsoi'd dusa i tulun dit osonong, om a' no kapasi dau it ongosonong do nowonsoi dau dit id gulu. Om ondung tumingkod do momonsoi dot araat i tulun dot araat, om a' no iyau ohukuman, om ondung tumimpuun i tulun dot osonong do momonsoi dot araat om a' no iyau apasi. 13 Papabatos oku i' doti' daa do koposion dot id tulun dit osonong, nga' ondung tumimpuun iyau do momusorou do kabagal no i kosonongo' dau'ddi di maso di nakatalib, om momonsoi nondo iyau'd dusa, om a' ku no sorohon it ongosonong do winonsoi dau. Om matai no iyau dot obungou di dusa dau. 14 Om haro i' doti' do nokoinsan ku no o tulun dot araat do matai no iyau, nga' ondung tumingkod iyau do momonsoi'd dusa om momonsoi nondo dit otopot om it osonong, 15 do miagal ko', ngoyon dau pogulio' i pinasanda' di tulun di minongutang dot id dau ko' pogulion dau i pinanakau dau, om ondung tumingkod iyau do momonsoi'd dusa om tumanud nondo dit oturan di papakaa dot id koposion, om a' indo iyau apatai, suwai ko' apasi i' iyau. 16 Om ompunan ku indo i dusa do nowonsoi dau, om apasi indo iyau, tu' nowonsoi no dau it otopot om it osonong. 17 Om momoros po i bansa' nu dot a' otulid i wonsoyon ku do miagal diri. Nga' iri nogi' i diyolo'd winonsoi ot a' otulid. 18 Om poboroson ku po kawagu do soira' nopo do tumingkod o tulun dit osonong do momonsoi dit osonong om tumimpuun nogindo iyau do momonsoi'd araat, om apatai no iyau dot obungou'ddi. 19 Om soira' nopo do tumingkod o tulun dot araat do momonsoi'd dusa om momonsoi nondo dit otopot om osonong, om apasi no iyau. 20 Nga' boros ka nu, oi Israil, om a' i' otulid i wonsoyon ku do miagal diri. Om butusan ku nondo iyokoyu do miontok di winonsoi dokoyu,” ka dau.
Habar do Kinaraagan do Yorusalim
21 Tontok di tadau'd kolimo, di tulan do kohopod, di kohopod om duwo'd toun dahai dot id pomogunan do pisangod, om rikot no dot id doho' ot iso' o tulun, i nokopoggidu' do mantad hilo'd Yorusalim, do minongoi pomisunud doho' do naraag no i bandar do Yorusalim. 22 Di nopo totuong dit a' po iyau nokorikot om nopurimanan ku no i sinundu do Tuhan. Om soira' di nokorikot i tulun diri dot id doho' di kosuabon, om koboros oku noddi kawagu om a' oku no bobou.
Dusa di Bansa'
23 Om boro-boros no o Tuhan dot id doho' do poingkaa, 24 “Oi tulun, mimboros ngai' po i tulun di songingiyon do hilo'd kinaraagan do kabandaran dot Israil do poingkaa, ‘Songulun no i Abraham, om noinsanan i' iti tana' do pinatahak dot id dau. Om ogumu' toko' i' iyati', om dati' noddi diti tana’ ka diyolo',” ka dau. 25 Om gowoi poddi om suhuo' oku nod Tuhan it Asawat Kopio do mongoi popoboros dot id diyolo' diti boros dau do poingkaa, “Mangakan kou id daging di kiraha' po. Om tumuku' kou dot id tingolig. Om mamatai kou. Om nunu kopio daa'ddi o katama-tama' dokoyu do manansanganu diti tana'? 26 Sumondiu kou di gayang dokoyu. Om ino kowoyo-woyoon dokoyu nga' koindaraat tomod. Magampahu' ngai' kou nopo. Om nunu kopio daa'ddi o katama- tama' dokoyu do manansanganu diti tana'? 27 Sunudan no iyolo' do sumumpa' oku, iyoho' i Tuhan it Asawat Kopio dot id suang do ngaran ku i Kinorohingan do poimpasi, om poinsanon mantad ku iyolo' dot iri ngai' nopo tulun di poingiyon do hiri'd kinaraagan di bandar om angapatai nondo. Om iri no i songingiyon do hiri'd talun om angaakan do nintorusan. Om iri no songinlisok do hilo'd nuluhon om id luang do nuluhon om angapatai do toruo-ruol. 28 Om silihon ku nondo do tana' dit a' sunian om oingou i pomogunan diri, om i kuasa' di kaandasan tomod diyolo' nga' opupusan nondo. Om oingou tomod nondo i konuluhanan do hilo'd Israil om obulungkutan gisom dot aiso' no o tongosongulun piya do kawaya'd hiri. 29 Soira' nopondod hukuman ku i tulun tu' i dusa diyolo' o kopomohukuman ku, om di silihon ku do pomogunan dot oingou i pomogunan diyolo', om koilo nogindo iyolo' dot iyoho' no o Tuhan,” ka dau.
Kinootuson di Boros di Nabi
30 Om boros kad Tuhan, “Oi tulun, iya' po i pimboroson di tulun di bansa' nu do tontok do kopogisosolowot iyolo' do hilo'd toning do tolig do bandar om hilo'd wawayaan do walai diyolo'. Boros ka no diyolo' do mogiboro-boros, ‘Kainou mongoi pokinongou ondung nunu ka do boros do Tuhan do tadau'd baino',’ ka.HK015A.pcx|col|||Walai om tolig do bandar|33.30 31 Om gumurumung nopondo i tulun ku do mongoi pokinongou do poboroson nu, nga' a' i mando diyolo' wonsoyon i ponuhuan nu diyolo' do momonsoi. Osianan i' o koboro-boroso' diyolo' nga' ginawo nopo diyolo' om poimponu' nod korohian do mogihum do kountungan. 32 Id diyolo' nopo om miagal ko no di modsisinding do minsinding do sinding do pasal do mogiuhang-uhang, om miagal di tulun dot oilo do mongombit do kecapi. Pokinongohon ngai' i' diyolo' i boros nu nga' aiso' i' tiso' piya dot umboyoon diyolo'ddi. 33 Nga' soira' pondo dot angabayaan i pinoboros nu, om atantu' no dot angabayaan i' iri, om oilaan nogindo diyolo' do haro o nabi do nokoongoi dot id pogialatan diyolo',” ka dau.
I Piro-Piro o Gompomogompi' dot Israil
1 Om boro-boros no o Tuhan dot id doho' do poingkaa, 2 “Oi tulun, pasalaon ngai' no i raja' dot Israil. Om sunudan no iyolo' diti poboroson ku, iyoho' i Tuhan it Asawat Kopio, dot id diyolo', ‘Nobungou kou no, iyokoyu i gompomogompi' dot Israil! Tu' gompion i' dokoyu o tinan dokoyu nga' a' kou i' insan do momogompi' di dumba' dokoyu. 3 Minginum kou id gatas di dumba' om manampakai kou do pakayan do hulu di dumba' do winonsoi, om mogkorot kou om mangakan kou di dumba' dit olomu'. Nga' a' kou i' insan do momogompi' di dumba' dokoyu. 4 A' i' dokoyu ginompi' i dumba' dit ongoluhoi, om a' dokoyu nubatan i sumakit om a' dokoyu rinilitan i nosuhat, om a' dokoyu nongoi ihumo' i napalid om i natagak. Suwai ko' pinokorualan nogi' dokoyu iyolo'. 5 Om kopogitongkiad-kiad nopoddi i dumba' om naakan do nintorusan, tu' aiso' no o gompomogompi' di dumba'. 6 Om gowoi poddi om mininghombo i dumba' ku do hilo'd konuluhanan dit akawas. Om kotompias nopo iyolo' do pointongkop diti pomogunan, om aiso' i' o tiso' piya'd tulun do minongoi pogihum diyolo' ko' minumbal po do minongoi pogontong diyolo'. 7 Iyo nopoddi om pokinongou kou no, iyokoyu i gompomogompi' do dumba', diti poboroson ku dot id dokoyu, iyoho' i Tuhan it Asawat Kopio. 8 Monuhu' oku no dokoyu dot id suang do ngaran ku iyoho' i Kinorohingan do poimpasi, do mokinongou kopio kou doho'. Nongoi tabpaai di nintorusan i dumba' ku om pinatai om nakan diyolo' tu' aiso' i' o gompomogompi'. Om iri gompomogompi' di dumba' ku nga' a' i' minumbal do minongoi pogihum di dumba'. Diyolo' nod tinan o gompion diyolo' om a' i' momogompi' di dumba'. 9 Iyo nopoddi, om pokinongou kou no doho', iyokoyu i gompomogompi' do dumba'. 10 Poboroson ku dot id dokoyu do nosiliu oku nod pisangod dokoyu, iyoho' i Tuhan it Asawat Kopio. Ngoyon ku nondo i dumba' ku'ddi do mantad id dokoyu om a' ku no pologoson do sumiliu kou do gompomogompi' diyolo'; om iyokoyu nga' a' ku no pologoson do momogompi' do tinan dokoyu. Poiduwon ku noddi i dumba' ku do mantad id dokoyu om a' ku iyokoyu pologoson do mangakan di dumba'ddi,’ ” ka dau.
I Gompomogompi' dot Osonong
11 Boros kad Tuhan, it Asawat Kopio, “Iyoho' nondo o mogihum di dumba' ku om iyoho' o momogompi' diyolo'. 12 Do miagal di pomogompi' di gompomogompi'd dumba', di dumba' dau, om i pogigihum dau di dumba' dau di nokotompias gisom do notimung iddi kawagu dau iri. 13 Posoliwanon ku nondo iyolo' do mantad id pogialatan do bansa' om pomogunan do suwai, om timungon ku nondo iyolo', om pogulion ku kawagu do hilo'd pomogunan diyolo'. Om woyoon ku nondo iyolo' do gumuli' do hilo'd konuluhanan om hilo'd kabawang-bawangan dot Israil, om paakan-akanon ku iyolo' dot id kobuturan dit aiso' o koligagaanan, om gompion ku iyolo'. 14 Om pologoson ku nondo iyolo' dot osimbayan do mangakan-ngakan do hilo'd kobuturan dit orombung di hilo'd konuluhanan om i hilo'd rantai do pomogunan dot Israil. 15 Om iyoho' nondo o gompomogompi' di dumba' ku, om pogihuman ku iyolo' do tiyonon. Iyoho' no i Tuhan, it Asawat Kopio, o minomoros diti. 16 Om ihumon ku nondo i nangatagak, om pogulion ku i nangapalid, om rilitan ku i nongosuhat, om ubatan ku i kitoruol; nga' iri nopo it ongolomu' om ongokoris om patayon ku no, tu' iyoho' nopo om gompomogompi' i' dit osonong. 17 Iyo nopoddi, om pokinongou kou no, oi baanan do dumba' ku, do poboroson ku iyoho' i Tuhan, it Asawat Kopio, dot id dokoyu. Soriso-isoon ku nopondo iyokoyu do momisara' om pisuwai-suwayon ku it osonong om it araat, i dumba' om i kambing. 18 Haro i' o piro-piro dokoyu dot a' abagalan do mangakan di sakot dot orombung; om pingulakan dokoyu it a' dokoyu kanon! Om minum kou no di waig dit oniniting om lobohon nondo dokoyu it a' dokoyu inumon! 19 Om iri pondo i sakot do piningulakan dokoyu o kanon di dumba' ku'd suwai, om iri waig di linobou dokoyu ot inumon diyolo'. 20 Gowoi poddi, do baino' nopo om sunudan ku no iyokoyu do butusan ku nondo, iyoho' i Tuhan, it Asawat Kopio, o momutus di dumba' dit ongokoris om i dumba' dit ongoluhoi. 21 Sinungu dokoyu om pinosuwai-suwai dokoyu i dumba' di kitoruol do mantad hiri'd baanan. 22 Nga' ngoyon ku indo posio' i dumba' ku'ddi, om a' ku i' iyolo' pologoson dot inggoriton. Om butusan ku nondo o pointikid-tikid di dumba' ku om pisuwai-suwayon ku it osonong om it angaraat. 23 Om onuan ku nondo iyolo' do raja' do miagal di Daud, i susuhuon ku, do sumiliu'd gompomogompi' diyolo', om gompion indo dau iyolo'. Om iyau noo o gompomogompi' diyolo'. 24 Om iyoho' nondo i Tuhan, o sumiliu'd Kinorohingan diyolo', om haro nondo o raja' do miagal di Daud, i susuhuon ku, do sumiliu'd raja' diyolo'. Iyoho' no o Tuhan, o minomoros diti. 25 Om momonsoi oku nondod tumpongo dot id diyolo' do papatantu' do haro o kosimbayanan diyolo'. Om uyungon ngai' ku nopondo i nintorusan dit orongit di hiri'd pomogunan diri, om aiso' nondo o koligagaanan di dumba' ku do mundorong do hiri'd kobuturan om modop do hiri'd gouton. 26 Om barakatan ku nondo iyolo' om pologoson ku do mundorong do hiri'd posorili' di nuluhon ku dit olidang. Om hilo' nondo dot onuan ku iyolo' do rasam dit asapou do soira-ira' nopod mokianu iyolo'. 27 Om mongua' nondo i kouwaan, om sunian do totonomon i tumo, om oinsanan nopondo o tulun dot osimbayan do poundorong do hiri'd tana' diyolo'. Om soira' nopondod pututon ku i rantai do poingkogos di tulun ku, om tontok di poiduwon ku iyolo' do mantad id tulun di minoniliu diyolo'd turipon, om koilo nogindo kopio iyolo' dot iyoho' no o Tuhan. 28 Om a' nondo iyolo' ngoyon panakahai di bansa' dit a' kotutun doho', om a' iyolo' ngoyon patayo' di nintorusan dot orongit. Osimbayan nopondo iyolo', om aiso' no o tiso' piya'd tulun do korolosi diyolo'. 29 Poruakon ku nondo i tumo diyolo' gisom dot aiso' nondo o mononglous do hiri'd pomogunan diri. Om a' nondo iyolo' hingi-hingion di bansa'd suwai. 30 Om koilo ngai' nopondo o tulun dot intirungan ku ot Israil om koilo iyolo' do tulun ku iyolo'. Iyoho' no i Tuhan, it Asawat Kopio, o minomoros diti. 31 Iyokoyu no kopio i dumba' ku, om i baanan do sumadon ku. Om iyokoyu no o tulun ku, om iyoho' o Kinorohingan dokoyu. Iyoho' no o Tuhan, it Asawat Kopio, o minomoros diti,” ka dau.
Pomohukum do Kinorohingan dot Idom
1 Om boro-boros no o Tuhan dot id doho' do poingkaa, 2 “Oi tulun, papalai no i pomogunan dot Idom. 3 Om sunudan ngai' no i tulun do hilo' diti poboroson ku, iyoho' i Tuhan, it Asawat Kopio do poingkaa: Iyoho' no o pisangod dokoyu, oi koinsanai'd tulun di poingiyon dot id konuluhanan dot Idom! Om silihon ku nondo iya' do pomogunan dit oingou. 4 Raagon ngai' ku nondo i bandar nu om a' iyonon do tulun o pomogunan nu; om koilo ko nogindo dot iyoho' no o Tuhan. 5 Sumangod kasai' ko nopo dot Israil do mantad di gulu po. Om pologoson nu iyolo' dot angapatai di maso diyolo' dot oontok do kosusaan, i maso do kopomohukuman dit id tohuri no di dusa diyolo'. 6 Om gowoi poddi om sumumpa' oku, dot id suang do ngaran ku iyoho' i Tuhan, it Asawat Kopio, i Kinorohingan do poimpasi, do kapatayon no o kootuson dokoyu, om a' ko no milo do mogidu'. Tu' kasalaan nopo dokoyu nga' minamatai kou, om musa-gusa' nondo dokoyu o kapatayon. 7 Silihon ku nondo do kinoiyonon dit oingou o hiri'd konuluhanan dot Idom, om patayon ngai' ku i tulun do kawaya' do hilo'. 8 Om tongkopon ku nopondo do rata' i konuluhanan, om iri pondo rata' di tulun di nangapatai dot id pisangadan o pointongkop di nulu-nulu om i kokubangan. 9 Om silihon ku nondod tana' dit a' sunian o pomogunan nu do gisom dot alaid, om a' nondod tulun iyonon. Om koilo kou nogindo dot iyoho' no o Tuhan. 10 Poboroson dokoyu dot iri nopo tana' do Yohuda om Israil om dokoyu i', om iyokoyu o sanganu, do mulong piya dot iyoho', i Tuhan o Kinorohingan diyolo'. 11 Iyo nopoddi, om poboroson ku no dot id suang do ngaran ku, i Kinorohingan di poimpasi, i Tuhan dit Asawat Kopio, do sulian ku nondo iyokoyu, tu' otogod kou i', om osolon kou, om araatan kou di tulun ku. Om koilo nondo iyolo' do hukuman ku pogi' iyokoyu nga' iyo iddi o winonsoi dokoyu dot id diyolo'. 12 Om koilo kou nondo do norongou ku i', iyoho' i Tuhan, i pinomohingi-hingi dokoyu dot Israil do tontok di minomoros kou do poingkaa, ‘Oingou noddi i konuluhanan dot Israil, om nakatahak iri dot id dati' do maan toko'd dati',’ ka dokoyu. 13 Oi tulun dot Idom, oburuak kopio kou daa om minggayo-gayo o koboro-boroso' dokoyu dot id doho'. Nga' norongou ngai' ku i' iri. 14 Om poingkaa no o poboroson ku, iyoho' i Tuhan dit Asawat Kopio, ‘Asanangan ngai' nopondo o pointongkop diti pomogunan dot osiliu ku'd pomogunan dit oingou o pointongkop do pomogunan nu, 15 do miagal dokoyu tu' nasanangan tomod do nokokito dot Israil, i doho'd songonuon, do nosiliu'd pomogunan dit oingou. Om i konuluhanan do Soir, om pointongkop di pomogunan dot Idom nga' oingou nondo. Om koilo ngai' nopondo o tulun dot iyoho' no o Tuhan,’ kangku nondo,” ka dau.
Barakat do Kinorohingan dot id Israil
1 Om boros kad Tuhan, “Oi tulun, pomoros no dot id konuluhanan dot Israil, om sunudan no iyolo' do mokinongou di boros do poboroson ku, 2 dot id diyolo', iyoho' i Tuhan, it Asawat Kopio do poingkaa: Momohingi-hingi po i pisangod dot Israil om mimboros dot, ‘Dahai noddi dilo konulu-nuluan di gulu-gulu po!’ ka no. 3 Poboroson no it osiliu dot id dabantalan om poboroson iti boros ku, iyoho' i Tuhan it Asawat Kopio. Tontok di naala' di bansa' di hiri'd posorili' i konuluhanan dot Israil, om oinsanan nopo iyolo' do minongindaraat dot Israil. 4 Iyo nopoddi om pokinongou kou no do poboroson ku, iyoho' i Tuhan it Asawat Kopio, oi dokoyu i nuluhon om nulu-nulu, om kabawang-bawangan, om kokubang-kubangan, om kabandaran do nangaraag, om bandar do nongotongkiadan om i napanakahan om nuntotori' do koinsanai'd bansa' dit id posorili'. 5 Nokolombus ku no, di maso ku dot otogod kopio do sumaap oku di bansa' di posorili', om okon-okon pondo om id Idom, tu' songirak-irak poo om koindaraat tomod o kinowoyo-woyoo' diyolo' do minonolod di tana' ku om minanansanganu di kobuturan do hilo'. 6 Iyo nopoddi om poboroso' no it osiliu dot id dabantalan dot id pomogunan dot Israil; sunudan no i konuluhanan, om i konulu-nuluan, om i kabawang-bawangan, om i kokubang-kubangan, diti poboroson ku, iyoho' i Tuhan it Asawat Kopio, tu' otogod oku no kopio, do nindaraat om nulak-ulakan iyolo' di piro-piro o bansa'. 7 Sumumpa' oku no, iyoho' i Tuhan, it Asawat Kopio, dot atantu' no dot oindaraat i piro-piro o bansa' dit id posorili' diya'. 8 Nga' hilo' nopod konuluhanan dot Israil, om momutolid indo kawagu i kokoyuan om mongua' do maan dokoyu'd kanon, oi Israil, i tulun ku. Om oruhai kou nod koguli' kawagu. 9 Mogobi' oku i' dokoyu, om tontuon ku i' kopio dot aradu kawagu i tana' dokoyu, om atanaman kawagu do totonomon. 10 Pogumuon ku indo iyokoyu. Om miyon kou nondo kawagu do hilo'd kabandaran om sonongon dokoyu i nangaraag. 11 Om pogumuon ku nondo o tulun om tayam-tayam. Om ogumu' kou pondo ko' mantad di gulu po, om ogumu' o tangaanak dokoyu. Om poiyonon ku nondo iyokoyu'd hilo' do miagal di koiyon-iyono' dokoyu di gulu po, om posimbayanon ku iyokoyu ko' mantad di kosimbayano' dokoyu di gulu po. Om koilo kou nogindo dot iyoho' no o Tuhan. 12 Om pogulion ku nondo iyokoyu do mongoi iyon do hiri'd pomogunan diri, oi Israil, i tulun ku. Om asanganu nondo kopio dokoyu i tana' om haro kasai' o hasil diri do gisom dot a' nondo louson i tangaanak dokoyu. 13 Poingkaa no o poboroson ku, iyoho' i Tuhan it Asawat Kopio! Otopot nogi' do roitan do tulun do mangangakan do tulun i pomogunan diri, om boroson diyolo' do magagahau do tangaanak di tulun di poundorong do hilo'. 14 Nga' mantad pondod baino' om a' nondo mangakan do tulun om a' magahau do tangaanak dokoyu i pomogunan diri. Iyoho' no i Tuhan, it Asawat Kopio, o minomoros diti. 15 A' nondo korongou di piro-piro o bansa' do monguntotori' i pomogunan diri om a' kokito do tulun do momohingi-hingi. Om a' nondo i pomogunan diri magahau di tangaanak di tulun do poingiyon do hiri. Iyoho' no, i Tuhan it Asawat Kopio, o minomoros diti,” ka dau.
Noinwoguan ot Israil
16 Om boro-boros no o Tuhan dot id doho' do poingkaa, 17 “Oi tulun, tontok di poingiyon po i tulun dot Israil do hilo'd pomogunan diyolo', om sinosomu' diyolo' di kowoyo-woyoon om wowonsoyon diyolo' o pomogunan diri. Om id pagantangan ku nopo nga' miagal po di tondu' do maso'd pomulanan o kososomuo' di kowoyo-woyoon diyolo'. 18 Om pinologos ku'ddi iyolo' do kopuriman do kawagato' do kototogod ku tu' ogumu' i' o tulun do pinatai diyolo' om sinosomu' diyolo' i pomogunan diri di tingolig diyolo'. 19 Hinukuman ku iyolo' tu' araat i' o kowoyo-woyoo' om i pingwonsoyon diyolo', om pinotompias ku'ddi iyolo' dot id pomogunan do suwai. 20 Om honggo nopo o nokokoyoon diyolo' nga' hilo' no do noindaraat o ngaran ku dit olidang tu' minimboros o tulun do poingkaa, ‘Iti nopo tulun diti nga' tulun do songonuon do Kinorohingan. Nga' a' no milo dot a' iyolo' tumongkiad di pomogunan di tinahak do Kinorohingan diyolo' dot id diyolo',’ ka. 21 Om iri noddi o nokobinsuhu' doho' do momusorou do pasal di ngaran ku dot olidang, tu' honggo nopo o koongoyon di tulun dot Israil nga' hiri no dot oindaraat i ngaran ku dit olidang. 22 Iyo nopoddi om polombuson no dot id tulun dot Israil, iti boros ku, iyoho' i Tuhan it Asawat Kopio do poingkaa, ‘Iti nopo wonsoyon ku om okon i' ko' iyokoyu o kapamansayan ku, oi tulun dot Israil, suwai ko' iri i ngaran ku dit olidang, i nindaraat dokoyu do honggo nopo o koongoyon dokoyu, o kapamansayan ku. 23 Soira' nopod pointalangon ku dot id piro-piro o bansa', i kolidango' diti ngaran ku dit abantug, i ngaran di nindaraat dokoyu dot id pogialatan diyolo', om koilo nogindo iyolo' dot iyoho' noo o Tuhan. Iyoho' no, i Tuhan it Asawat Kopio, o minomoros diti. Om iyokoyu nondo o pakayon ku do popointalang dot id piro-piro o bansa' dot olidang oku. 24 Ngoyon ku nondo iyokoyu do mantad id pointikid-tikid do bansa' om pomogunan, om pogulion ku iyokoyu do hilo'd pomogunan mantad dokoyu. 25 Iyasan ku nondo iyokoyu'd waig dit oniniting do momolidang dokoyu do mantad id koinsanai di tingolig om koinsanai di nokososomu' dokoyu. 26 Om onuan ku nondo iyokoyu do ginawo'd wagu om pomusarahan do wagu. Om iduwon ku nondo i ginawo dokoyu dit okodou, i miagal pod watu kokodou. Om onuan ku nondo iyokoyu do ginawo dit obingumboyo'. 27 Om posuangon ku nondo i Rusod ku dot id ginawo dokoyu om piantangan ku indo kopio om atanud i' ngai' dokoyu it oturan ku om atanud ngai' dokoyu i pinonuhuan ku dokoyu. 28 Om koiyon kou nogindo do hiri'd pomogunan di pinatahak ku di komolohingan dokoyu. Om osiliu kou nondod tulun ku, om osiliu oku do Kinorohingan dokoyu. 29 Om poiduwon ku indo iyokoyu do mantad id koinsanai di nokososomu' dokoyu. Om suhuon ku i gandum do rumombung om a' kou i' koumbal do mononglous. 30 Om posopohon ku nondo o tua' di tua-ua' om poinggumuon ku o hasil di tumo dokoyu. Om a' kou i' koumbal do mononglous, i mongintingayam dokoyu dot id pogialatan do bansa'. 31 Om osorou nondo dokoyu i kowoyo-woyoon dokoyu dot araat om i nongowonsoi dokoyu dot araat, om araatan kou nondo do tinan dokoyu tu' nokowonsoi kou i' do dusa om it araat kopio. 32 Oi Israil, orohian oku do koilo kou dot okon i' ko' iyokoyu ngai' o nakapamansayan ku do miagal diti. Suwai ko' orohian oku do kopuriman kopio kou do kointingayamo' om karaato' di wonsoyon dokoyu. Iyoho' no, i Tuhan it Asawat Kopio, o minomoros diti,’ ka,” ka dau. 33 Boros kad Tuhan it Asawat Kopio, “Soira' nopondod lidangan ku iyokoyu do mantad id koinsanai'd dusa dokoyu, om pologoson ku nogindo iyokoyu do miyon kawagu do hilo'd kabandaran dokoyu om momonsoi kawagu di nangaraag. 34 Koinsanai di tulun dit oubas do tumalib di tumo dokoyu nga' nokokito ngai' no dot a' no sunian do totonomon i tumo dokoyu'ddi, nga' pologoson ku indo iyokoyu do mongumo kawagu'ddi. 35 Om karait ngai' nopondo o tulun dot iti nopo pomogunan di gulu po nga' miagal pod tana' dit a' sunian, nga' baino' noddi om miagal pod kabun dot Idon. Om iri kabandaran di nangaraag om napanakahan om i pogun poo di gulu po, nga' iyonon noddid tulun om apanggor o pinongolig do baino'. 36 Om koilo ngai' nogindo i bansa' di noolu-olu' do hilo'd posorili' dot iyoho' no, i Tuhan, o minomonsoi kawagu do bandar di nangaraag om mananom kawagu do tumo dit a' sunian. Iyoho' no, i Tuhan, o minamatos do wonsoyon ku o miagal diti, om atantu' no do wonsoyon ku'ti,” ka dau. 37 Om boros kad Tuhan, it Asawat Kopio, “Om pologoson ku nondo kawagu o tulun dot Israil do mokiuhup doho', om pologoson ku iyolo' do sumapou do miagal do baanan do dumba'. 38 Om ilo' pondo kabandaran di songingraag do dinondo nga' oponu' nondod tulun do miagal do Yorusalim di gulu po, tu' poimponu' do dumba' di patahakon do maan do porsombahan do sumbolion, dot id poginakanan. Om koilo nogindo iyolo' dot iyoho' no o Tuhan,” ka dau.
Kubong di Noponu'd Tulang
1 Om kopurimanai ku noddi o sinundu do Tuhan, om tanggayai oku no di rusod dau om poiliho' oku no dot id kubong di noponu'd tulang di nongotuu no. 2 Om pohomboo' oku nod Tuhan di kubong diri om kokito ku no dot ogumu' tomod o tulang di nongotuu no tomod. 3 Om boros kad Tuhan dot id doho', “Oi tulun, milo po tuu do masi kawagu o tulang diti?” ka dau. Om boros kangku'd suminimbar, “Oi Tuhan it Asawat Kopio, iya' noo o koilo!” kangku. 4 Om boros kaddi dau, “Poboroson no o boros ku do poingkaa dot id kotulang-tulangan diti. Sunudan no iti kotulang-tulangan do mokinongou do boros do Tuhan. 5 Sunudan no iyolo' diti boros ku, iyoho' i Tuhan it Asawat Kopio do poboroson ku dot id diyolo': Onuan ku nondo iyokoyu do pinuhobo om posion ku iyokoyu kawagu. 6 Om onuan ku iyokoyu do tuhat, om tonsi, om likupan ku iyokoyu do kulit. Om onuan ku iyokoyu do pinuhobo om apasi kou i' kawagu. Om koilo kou nogindo dot iyoho' no o Tuhan,” ka dau. 7 Om pimboros oku noddi iyoho' i Yohoskiol dot id kotulang-tulangan diri do miagal di pinonuhuan do Tuhan dot id doho'. Om soira' di maso ku'd mimboros om korongou ku o sangarak-ngarak. Om timpuun no i tulang do minongoi pogituma-tuma'. 8 Om piantangan ku'ddi ngai' i tulang diri do tinongkop do tuhat, om tonsi om linikupan do kulit. Nga' aiso' i' o pinuhobo di tinan. 9 Om boros kad Kinorohingan dot id doho', “Oi tulun, pimboros no dot id tongus. Om sunudan no i tongus do suhuon iyau'd Tuhan it Asawat Kopio, do rumikot do mantad id hinonggo nopo, do poposuang do pinuhobo dot id tinan di songimpatai'dti, om apasi indo kawagu iyolo',” ka dau. 10 Om pimboros oku noddi do miagal di pinonuhuan do Tuhan dot id doho'. Om tongus no i tongus diri om kosuang noddi o pinuhobo dot id tinan diri om kangapasi no iyolo'. Om ingkakat noddi iyolo'. Om ogumu' no kopio iyolo' gisom do kabagal i' do sonsinompuruan o soudor. 11 Om boros kad Kinorohingan dot id doho', “Oi tulun, iri nopo tulun dot Israil nga' iyo ngai' nod tulang diti. Tu' boros ka diyolo' om notuu no tomod iyolo', om aiso' no o kosunsudon om aiso' o soro-sorohon dot id dosunsudan. 12 Om iyo nopoddi om popimboroso' no it osiliu dot id dabantalan dot id Israil, i tulun ku, om sunudan no iyolo' dot iyoho' no, i Tuhan it Asawat Kopio, o mongoi pongukab di lobong diyolo'. Om posoliwanon ku nondo iyolo' do mantad hiri om pogulion ku do hilo'd pomogunan dot Israil. 13 Om soira' nopondo dot ukaban ku i lobong di pinamalabangan diyolo' i tulun ku, om tontok di posoliwanon ku iyolo', om koilo nogindo iyolo' dot iyoho' no o Tuhan. 14 Om posuangon ku nondo o pinuhobo ku dot id diyolo' om apasi indo kawagu iyolo', om pologoson ku iyolo' do miyon do hilo'd pomogunan mantad diyolo'. Om koilo nogindo iyolo' dot iyoho' no o Tuhan. Nakabatos ku no do wonsoyon ku o miagal diti, om atantu' nod wonsoyon ku. Iyoho' no, i Tuhan, o minomoros diti,” ka dau.
Kopiiso' o Pomorintaan do Yohuda om Israil
15 Om boro-boros po kawagu o Tuhan dot id doho' do poingkaa, 16 “Oi tulun, ongoi anu dot iso' o sukud, om tulisan id boros do poingkaa, ‘Pomorintaan do Yohuda’ ka. Om mongoi no anu kawagu dot iso' o sukud do suwai, om tulisan iri do boros do poingkaa, ‘Pomorintaan dot Israil,’ ka. 17 Om piromuton nondo o tompok di duwo o sukud diri dot igitan nu, om iso' pondo o sukud do kokitanan. 18 Om soira' nopondod mokituduk diya' do komoyon diri, i bansa' nu, 19 om sunudan no iyolo' dot iyoho' no, i Tuhan it Asawat Kopio, o manganu di sukud do poiyaan dot Israil do piisoon ku nondo iri di sukud di poiyaan do Yohuda. Om piisoon ku nondo i duwo o sukud di poingigit ku'ddi. 20 Igitan no i duwo o sukud diri, om poontongon no di sukud diri i tulun dot ogumu'. 21 Om sunudan nondo iyolo' dot iyoho no, i Tuhan it Asawat Kopio, o popoidu' di tulun ku do mantad id piro-piro o bansa' di nokoongoyon diyolo', om timungon ku nondo iyolo', om pogulion ku do hilo'd pomogunan mantad diyolo'. 22 Om silihon ku nondo iyolo' dot iso' o bansa' do hilo'd pomogunan, om hilo'd konuluhanan dot Israil. Om iso' pondo o raja' do momorinta' diyolo', om a' nondo opiduwo i bansa' diyolo', om a' opisuwai-suwai o pomorintaan. 23 Om a' nondo diyolo' sosomuon o tinan diyolo' dot i tumuku' dot id piro-piro o tingolig di kososomu' o ponosomu', om a' iyolo' momonsoi'd dusa. Om poiduwon ku indo iyolo' do mantad id koinsanai do kowoyo-woyoon diyolo' dit araat i kobinsuhu' diyolo' do mongindaraat doho'. Lidangan ku nondo iyolo'; om osiliu nondo iyolo' do tulun ku, om osiliu oku do Kinorohingan diyolo'. 24 Om haro nondo o raja' do miagal di Daud, i susuhuon ku, dot osiliu do raja' diyolo' do gisom dot alaid. Om otorodok nondo iyolo' do mumboyo' dot oturan ku. 25 Om miyon nondo iyolo' do hilo'd tana' di pinatahak ku dot id di Yakub, i susuhuon ku, om i tana' do pinomogunan di komolohingan diyolo'. Om hilo' kasai' nondo o tiyonon diyolo' do gisom dot alaid, om iri nogi' tangaanak om sinakagon diyolo' nga' hilo' no o tiyonon. Om iri nondo i raja', i miagal di Daud, i susuhuon ku, o momorinta' diyolo' do gisom dot alaid. 26 Om momonsoi oku nondo do tumpongo dot id diyolo', i mamajamin dot osimbayan iyolo' do gisom dot alaid. Om barakatan ku nondo iyolo' om posopohon ku iyolo', om hiloon ku'd pomogunan diyolo' i Walai'd Sasambayangan dot Agayo, om hilo' nondo kasai' iri do gisom dot alaid. 27 Om sumugku' oku nondo diyolo'd miyon do hilo'; om osiliu oku nondo do Kinorohingan diyolo' om osiliu iyolo'd tulun ku. 28 Om soira' nopondod hiloon ku i Walai'd Sasambayangan dot Agayo, om hiloon ku nod pogialatan diyolo' iri do gisom dot alaid, om koilo ngai' nogindo i bansa'd suwai do nopili' ku, iyoho' i Tuhan, ot Israil do sumiliu do tulun ku,” ka dau.
Panakapakakas do Kinorohingan i Gog
1 Om boro-boros no o Tuhan dot id doho' do poingkaa, 2 “Oi tulun, papalai no i Gog, i boyoon do raja' do pomorinta' do bansa'd Misik, om Tubal do hilo'd pomogunan do Magog, 3 om sunudan no iyau dot iyoho' no, i Tuhan it Asawat Kopio, o pisangod dau. 4 Pokokoson ku no iyau, om koiton ku di kakait o roo dau, om gayaton ku iyau do mamanau do miwoyo' do koinsanai di soudor dau. Ogumu' tomod i soudor om kuda', om i soudor do songinsakai'd kuda' dot oiyo o pakayan, om otikid do kolid om gayang i soudor dau. 5 Om tulun nopo do manud-tanud dau nga' haro i' o mantad do hilo'd Porsia, om Etiopia, om Libia, om ongkigayang ngai' nopo iyolo' om ongkitupi' kolidar. 6 Om koinsanai nopo i tulun do sumasangod do mantad hilo'd pomogunan do Gomor, om hilo'd Bait-Togarma, i ponong hilo'd utara, do tuminanud dau. Om ogumu' nogi' o tulun do mantad id pomogunan do suwai. 7 Sunudan no iyau do sumodia' om posodia' ngai' di soudor di minoyo' dau. 8 Om katalib pondo o piro-piro o toun om suhuon ku nogindo iyau do mongoi panangod do pomogunan do tulun di tinimung do mantad id piro-piro o pomogunan, om it aiso' no o koligagaanan do pisangadan. Om ngoyon nondo dau songodo' i konuluhanan dot Israil, it aiso' o sumuni om i laid no kotongkiadai'd tulun, om noponu' poo do kinaraagan, nga' it iyonon noddi do tulun om aiso' no o koligagaanan do baino'. 9 Om sumangod nondo iyau, om i soudor dau, om i piro-piro o bansa'd suwai di moyo-woyo' dau, om miagal pondo iyolo'd tongus dot opuhod do sumaap, om miagal do haun do tumokop di pomogunan,” ka dau. 10 Poingkaa no o boros do Tuhan it Asawat Kopio dot id di Gog, “Orikot nopondo o maso'ddi om tumimpuun ko nondo do minsorou do momonsoi dot araat. 11 Momusorou ko nondo do mongoi panangod do pomogunan dit aiso' o tolig; i pomogunan dit osimbayan om aiso' o koligagaanan do tulun di songingiyon do hiri, i kabandaran dit aiso' o tolig om aiso' o madtatamong. 12 Om ngoyon nu nondo soruango' om ngoyon nu panakahai i tulun do songingiyon do hiri'd kabandaran di songinraag di gulu po. Tinimung-timung i' iyolo' do mantad id piro-piro o pomogunan, om baino' noddi om ogumu' noddi o tayam-tayam om dapu' diyolo', om poingiyon iyolo' dot id ralan do pogirurubaan do hiti'd pomogunan. 13 Om muhot nondo diya' i tulun do Siba om Didan, om i piro-piro i dumadagang do mantad hilo'd kabandaran do Sepanyol, do poingkaa, ‘Notimung nu no i soudor nu do mongoi panangod, om mongoi ponoruang om kapanakau i' iyolo'? Momusorou ko do mongoi panganu do pirok om tamas, om tayam-tayam om dapu' om tanggayan ngai' nu nogindo it angaanu nu'ddi?’ ka,” ka dau. 14 Om suhuo' oku noddid Tuhan it Asawat Kopio, do mongoi pomisunud di Gog di boros dau do poingkaa, “Mamanau no do maso pod Israil, i tulun ku dot osimbayan do momogun-mogun. 15 Mamanau nod mantad hino'd kinoiyonon nu do ponong hino kopio'd utara, om woyoon i' o soudor dit ogumu' om it ongokoris do mantad id piro-piro o bansa'. Om i songinsakai ngai' nopod kuda'. 16 Om miagal ko pondod tongus dit opuhod do tumongkop di pomogunan do manangod dot Israil, i tulun ku. Om orikot nopondo o maso'ddi, om porikoton ku nondo iya' do mongoi ponolod di pomogunan ku om kointalang i' dot id koinsanai'd bansa' ondung isai oku, om popointalang do kolidango' ku i wonsoyon ku do pawayaon ku diya'. 17 Iya' no i komoyon ku di gulu poddi, do tontok di pinoboros ku do pinolombus di piro-piro o susuhuon ku, i piro-piro o nabi do mantad id Israil, do maso nopondo dot osunsudan om poporikot oku nondo do songulun do mongoi panangod dot Israil. Iyoho' no, i Tuhan it Asawat Kopio, o minomoros diti,” ka dau.
Pomohukum do Kinorohingan di Gog
18 Om boros kad Tuhan it Asawat Kopio, “Tontok nopondo di tadau do ngoyon di Gog songodo' ot Israil, om tumogod oku nondo kopio. 19 Om poboroson ku nondo dot atatagadan oku do gumuyu' nondo o tana' do hilo'd Israil dot opuhod kopio do tontok do tadau'ddi. 20 Om oinsanan nopondo o sada' om tombolog, om nintorusan dit agayo om it okoro', om pointikid-tikid do tulun do hiti'd pomogunan do gagaran tu' ooris do tumimbaba' doho'. Tumuhan nondo o nuluhon om rumulus o pampang om humaba' ngai' o tolig. 21 Om rolosion ku nondo i Gog do mogisuayan o kosusaan. Iyoho' no, i Tuhan it Asawat Kopio, o minomoros diti. Om mogitotobok nondod gayang i tulun dau dot iyolo' i' om iyolo'. 22 Om hukuman ku nondo iyau do toruo-ruol om mogipapatai iyolo', tu' iri no o pomohukum ku diyolo'. Om sumondot nopondo dot id dau o rasam dit asapou om karambatu, om tapui, om i tana' di kitapui. Om ootungan ngai' nondoddi i soudor dau om i piro-piro o bansa' di muhup dau. 23 Om iti nondo o kopointalangan ku dot id koinsanai'd bansa' dot abantug om olidang oku. Om koilo nogindo iyolo' dot iyoho' no o Tuhan,” ka dau.
Kinaalaan di Gog
1 Om boros kad Tuhan it Asawat Kopio, “Oi tulun, pasalaon no i Gog, i raja' dot agayo do mantad id pomogunan do Misik om Tubal, om sunudan no iyau do pisangod oku dau. 2 Pokoyoon ku nondo iyau dot id ralan do wagu om posoliwanon ku iyau do mantad hilo'd ponong id utara kopio, om pootodon nu nondo iyau do gisom do korikot do hilo'd konuluhanan dot Israil. 3 Om bobogon ku nogindo i pawakasan di pana' di poingigit di longon dau'd gibang, om porotuon ku i pana' di poingigit di longon dau'd wanan. 4 Om ahaba' nopondo om apatai i Gog om i piro-piro o soudor dau do hilo'd konuluhanan dot Israil, om patahakon ku nondo i rata' diyolo' dot id koinsanai'd tombolog om nintorusan do maan diyolo' dot akanon. 5 Om angapatai nondo iyolo' do hiri'd koumaan. Iyoho' no i Tuhan it Asawat Kopio, o minomoros diti. 6 Om popurakit oku nondod tapui do hilo'd pomogunan do Magog om hilo'd poinsusui dilo tisan do rahat, i pomogun-mogunan do tulun dit aiso' o kagangau-gangau, om koilo ngai' nogindo o tulun dot iyoho' no o Tuhan. 7 Om poiloon ku indo kopio i tulun dot Israil, di ngaran ku dit olidang, om a' ku nondo pologoson o ngaran ku dot oindaraat kawagu. Om koilo ngai' nogindo o bansa' dot iyoho' no o Tuhan, i Kinorohingan dot Israil dit olidang,” ka dau. 8 Om boros kad Tuhan, it Asawat Kopio, “Atantu' nod rumikot i tadau di komoyon ku'ddi. 9 Sumoliwan nondo i tulun do poingiyon do hilo'd kabandaran dot Israil do mogiwoyo-woyo' nopo do mongoi ponimung di rapo-rapo do sumangod di nongotongkiadan, do maan do siduwon. Om poudungon nondo diyolo'd tapui i kolid, om i gayang, om i pawakasan do pana', om i pana', om i bobobog, om kabagal i' iri do maan do siduwon do solinaid do turu' o toun. 10 Om a' no minog do mongoi iyolo' pokisiduwon do hiri'd dumo ko' mongoi panagad do kayu do hiri'd gouton do maan do siduwon, tu' haro po i rapo-rapo do sumangod di nongotongkiadan diri do pogudung diyolo'. Om ngoyon nondo diyolo' soruango' om ngoyon diyolo' panakaho' o dapu' di tulun di minonoruang diyolo' om i minanakau di dapu' diyolo'. Iyoho' no o Tuhan it Asawat Kopio, o minomoros diti,” ka dau.
Linobong i Gog
11 Om boros kad Tuhan, “Abayaan ngai' pondo iti, om onuan ku nondo i Gog do tana' do pamalabangan do hilo'd tana' dot Israil, i hilo'd rantai di roitan do Rantai do Sosoborongon, i ponong id koulayon do mantad id Rahat do Napatai. Lobongon nopondod hilo' i Gog om i soudor dau, om roitan nondo i rantai'ddi do ‘Rantai di Soudor di Gog’. 12 Koloido' nopondo di tulun dot Israil do momolobong ngai' di rata' diyolo', om turu' o tulan, om a' indo sosomu' i pomogunan. 13 Oinsanan nopondo o tulun do hiri'd pomogunan diri do muhup do momolobong, om pusohon nondo iyolo' tu' minomonsoi i' iyolo'ddi do tontok do tadau'd kamanangan ku. Iyoho' no, i Tuhan it Asawat Kopio, o minomoros diti. 14 Om katalib pondo o turu' o tulan om haro nondo o piro-piro o tulun do suhuon do mamanau do tumongkop di pomogunan do mogihum om momolobong di rata' di songingiliu po do hiri'd tana', om olidangan indo kopio i pomogunan diri. 15 Om soira' di tumongkop iyolo' di pomogunan, om tandaan nondo diyolo' ot id toning di tulang do tulun dot okito diyolo', om oongoi i' di momomolobong kolobong iri do hiri'd rantai di roitan do Rantai do Soudor di Gog. 16 (Om haro nondo o bandar do hiri'd rantai'ddi do pungaranan do ngaran di soudor di Gog do koimbagu.) Om iyo noddi o wonsoyon om olidangan i' kawagu i pomogunan diri,” ka dau. 17 Om boros kad Tuhan it Asawat Kopio dot id doho', “Oi tulun, tinongo' ngai' no i tombolog om i nintorusan do suwai do mongoi pangakan do porsombahan do sinumbali' do patahakon ku diyolo'. Om iri no o poginakanan dot agayo do pohoroon ku do hilo'd konuluhanan dot Israil, tu' hiri no do kaakan iyolo'd daging om koinum do raha'. 18 Om mangakan nondo iyolo'd tinan di soudor om monginum do raha' di pomorinta' do pomogunan, i nangapatai do miagal do dumba' do tontoluhan om tanak do dumba', om kambing do tontoluhan, om sapi' dit olomu'! 19 Om soira' nopondod patayon ngai' ku i tulun diti do miagal do porsombahan di sumbolion, om kanon nondo di tombolog om i nintorusan om koinsanai di lunok diyolo' do gisom dot abangat iyolo' om inumon diyolo' i raha' do gisom dot aawuk iyolo'. 20 Om mingakan nopondo iyolo' do hiri'd mija' ku do gisom dot oiyahan iyolo' di kuda' om i sumasakai di kuda' om i soudor om i tulun di sumasangod. Iyoho' no, i Tuhan it Asawat Kopio, o minomoros diti,” ka dau.
Tondulion ot Israil
21 Om boros kad Tuhan, “Pokitonon ngai' ku nondo ilo bansa' do kagayaan ku om pointongon ku iyolo' do kowoyo-woyoo' ku do mamakai'd kuasa' ku do popowonsoi di natantu' ku do wonsoyon ku dit otulid. 22 Om mantad pondoddi om koilo no o tulun dot Israil dot iyoho' no o Tuhan, i Kinorohingan diyolo'. 23 Om koilo ngai' nondo i bansa' do nokoongoi dot id pomogunan do pisangod, i tulun dot Israil do gama' di dusa do winonsoi diyolo' dot id doho'. Tinongkiadan ku iyolo' om pinologos ku i pisangod do minangala' om minamatai diyolo' dot id pisangadan. 24 Winonsoi ku dot id diyolo' o miontok di kososomuo' om karaato' di kowoyo-woyoon diyolo', om tinongkiadan ku iyolo',” ka dau. 25 Om boro-boros no o Tuhan, it Asawat Kopio do poingkaa, “Nga' baino' noddi om osianan oku iddi do sinakagon di Yakub, i tulun dot Israil, om posimbayanon ku kawagu iyolo'. Om ogompi' ku i' o ngaran ku dit olidang om pusohon indo kasai'. 26 Om soira' nopondo dot osimbayan kawagu iyolo' do momogun-mogun do hilo'd pomogunan diyolo', dit aiso' o monompurolosi diyolo', om olihuan nondo diyolo' i kinointingayamo' diyolo' di minongindaraat doho'. 27 Om pointalangon ku nondo dot id ogumu' o bansa' dot olidang oku, om pogulion ngai' ku nondo i tulun ku do mantad id koinsanai'd pomogunan do pisangod diyolo'. 28 Om koilo nogindo o tulun ku dot iyoho' no i Tuhan, i Kinorohingan diyolo'. Oilaan nondo diyolo' iti, tu' pinoongoi ku i' iyolo' dot id pomogunan do pisangod di gulu po, nga' baino' noddi om timungon ku no kawagu iyolo' do pogulion do hilo'd pomogunan mantad diyolo', om aiso' no tiso' diyolo' dot a' koguli'd hilo'. 29 Om potuntugon ku nondo o Rusod ku dot id bansa' dot Israil, om a' ku nondo iyolo' tongkiadan kawagu. Iyoho' no, i Tuhan it Asawat Kopio, o minomoros diti,” ka dau.
Tinanggayan i Yohoskiol do hilo'd Yorusalim
1 Tontok nopoddi nga' tadau'd kohopod, di tulan di koiso', i koduwo nohopod om limo do toun do mantad di natanggayan iyahai dot id pomogunan do pisangod, di kohopod om apat do toun do mantad di kinaalaan do Yorusalim. Om nopurimanan ku o sinundu'd Tuhan do tontok do tadau'ddi, om tanggayai oku no dau. 2 Om kokito ku'ddi dot id pinointalang do tinanggayan oku'd Kinorohingan do hilo'd pomogunan dot Israil om pinakaa oku dot id nuluhon dit akawas. Om kokito ku no do haro o piro-piro o walai dot angagayo dot id dotoguangan ku, om koiyo-iyo iri do bandar. 3 Om poinsomoko' oku no dau, om kokito ku o songulun o kusai do mogulinau do miagal do tambaga'. Om poingkakat iyau dot id toning do wawayaan. Om kiinigit iyau do tali do ponukat om kiinigit iyau do kayu do ponipong. 4 Om boros ka dau dot id doho', “Ontong no kopio, oi tulun. Om mokinongou no om montong no kopio do koinsanai di pointangan ku diya', tu' iti no o kinapaangayan diya'd hiti. Om sunudan no i bansa' dot Israil do koinsanai dit okito nu,” ka dau.
Wawayaan di Ponong id Koulayon
5 Nokito ku nopo nga' i Walai'd Sasambayangan dot Agayo om haro nogi' o tolig do pointutuk di walai'ddi. Om onuo' no di kusai'ddi i kayu di ponipong dau, i tolu o mito do konoruo', om tipongo' no dau i tolig. Om kasawato' nopo di tolig nga' tolu o mito om kakapalo' nga' tolu i' o mito. 6 Om ongoi noddi iyau do hiri'd wawayaan di potimbaba' ponong id koulayon. Om salakoi no iyau di tukad, om hiri poddid sawat kopio, om tipongo' nogi' dau o kakapalo' di wawayaan diri. Om kakapalo' nopoddi nga' tolu o mito. 7 Om hiri nopod dotolikudan di wawayaan nga' haro o ralan, om nopiompopingan do tolu o bilik do madtatamong. Angabasagi' ngai' nopo i bilik diri, om sorotolu-tolu nopo mito do konoruo' do pointikid-tikid di limput. Om iri no limput do pinanapad om duwo ngai' nopo om satanga' mito do kakapalo'. Om hiri nod tolikud di bilik do madtatamong om haro po o ralan do tolu mito do konoruo'. Om poinrikot iri dot id bilik dit agayo di potimbaba' di Walai'd Sasambayangan dot Agayo. 8-9 Om tipongo' no dau i bilik diri, om koilaai noddi dot apat o mito do kasawato'ddi. Om iti no it id dompok di wawayaan di poinsomok kopio di Walai'd Sasambayangan dot Agayo, om kakapalo' nopo di limput di ponong id dompok no om somito. 10 (Iri nopo bilik do madtatamong di miampaping di ralan nga' oiyo nopo o kogoyoo', om oiyo o kakapalo' di limput do pinanapad.) 11 Om tipongo' noddi di kusai o kalaabo' di wawayaan; om kalaabo' nopo nga' onom om satanga' mito, om konoruo' no om limo o mito. 12 Om hiri nopod dotimbabaan do pointikid-tikid di bilik do madtatamong diri, nga' haro o limput dot osiriba'; do kasawato' nopo om satanga' mito i'. (Iri nopo bilik diri nga' tolu o mito do konoruo' do pointikid-tikid di limput.) 13 Om tipongo' no dau o kosoduwo' di limput di ponong id dolikud di bilik om gisom do korikot di limput di ponong id dolikud di bilik di hiri'd hapak, om kosoduwo' nopo nga' hopod om duwo om satanga' mito. 14 Om iri no bilik do ponong id dompok no, i posongguyung di natad do ponong id soliwan, om tipongo' no dau i bilik diri, om koilaai no do hopod o mito do konoruo'. 15 Om kosoduwo' nopo do mantad id tolig di wawayaan ponong id soliwan om gisom do korikot di limput di bilik dit id dompok no kopio i potimbaba' di Walai'd Sasambayangan dot Agayo, om duwo nohopod om limo mito. 16 Om haro ngai' nopo o liligaon dot ongokooro' di bilik diri do hiri'd limput ponong id soliwan, om haro nogi' o liligaon do hiri'd limput di ponong id soruang, i pinanapad diri. Om haro o guas do kurma do pinokikir di wawayaan di ponong id soruang, i potimbaba' di ralan.
I Natad do Ponong id Soliwan
17 Om angatai oku no di kusai'ddi do minaya' di wawayaan om kuminaa do hiri'd natad di ponong id soliwan di Walai'd Sasambayangan dot Agayo. Om pointutuk nopoddi nga' tolu nohopod o bilik di songinghapak di limput ponong id soliwan. Om hiri nod dotimbabaan di bilik diri om haro o sirang di linopisan do watu, 18 do pointutuk nopori di natad. Iti nopo natad ponong id soliwan nga' poinsiriba-riba' no ko' mantad di natad do ponong id suang. 19 Om haro po o wawayaan di poinsawa-sawat do suangon do mongoi do hiri'd natad di ponong id suang. Om tipongo' no di kusai o kosoduwo' dot id pialatan di duwo o wawayaan diri; om koilaai no do limo nohopod o mito do kosoduwo'.
Wawayaan di Ponong id Utara
20 Om tipongo' noddi di kusai i wawayaan do ponong id utara, i wawayaan do kumaa do hiri'd natad di ponong id soliwan. 21 Iri nopo tolu bilik do madtatamong do miampaping di ralan, om i limput do pinanapad om i bilik dot agayo nga' miagal ngai' nopo di hiri'd wawayaan do ponong id koulayon o sukatan. Konoruo' nopo di ralan nga' duwo nohopod om limo mito om kalaabo' no om hopod om duwo om satanga' mito. 22 Miagal ngai' nopo di hiri'd wawayaan di ponong id koulayon; i bilik dot agayo, om i liligaon, om i guas do kurma do pinokikir. Hiri nopo nga' haro o turu' o taang do tukad do poingkaa do hiri'd wawayaan, om iri nopo bilik dot agayo nga' hiri'd dompok, om potimbaba' di natad ponong id soliwan di Walai'd Sasambayangan dot Agayo. 23 Om hiri nopod hapak diti natad do mantad id wawayaan ponong id utara om haro po kawagu o wawayaan do suangon do kumaa do hiri'd natad ponong id suang; do miagal nopo di hiri'd wawayaan ponong id koulayon. Om tipongo' noddi di kusai'ddi o kosoduwo' do pialatan di duwo o wawayaan diri, om koilaai no do limo nohopod o mito do kosoduwo'.
Wawayaan do Ponong id Salatan
24 Om angatai oku no di kusai'ddi do kuminaa do hiri'd wawayaan di ponong id salatan. Om haro po o wawayaan do nokito dahai'd hiri. Om tipongo no dau iri, om miagal nopo di wawayaan do suwai o sukatan. 25 Om haro o liligaon do hiri'd bilik do ponong id wawayaan diti, do miagal nopo kopio di liligaon do suwai; konoruo' nopo di ralan nga' duwo nohopod om limo mito, om kalaabo' no om hopod om duwo om satanga' mito. 26 Taang nopo di tukad di poirikot do hiri'd wawayaan nga' turu', om iri bilik dot agayo nga' hiri nogid ponong id dompok do potimbaba' di natad di ponong id soliwan di Walai'd Sasambayangan dot Agayo. Om haro o guas do kurma do pinokikir do hiri'd limput di ponong id suang, i potimbaba' di ralan. 27 Om hiti nogi' nga' haro o wawayaan do suangon do kumaa do hiri'd natad di ponong id suang. Om tipongo' noddi di kusai'ddi o kosoduwo' dot id pialatan di duwo o wawayaan diri; om koilaai no do limo nohopod o mito do kosoduwo'.
I Wawayaan do Ponong id Salatan di Suangon do Kumaa do Hiri'd Natad di Ponong id Suang
28 Om angatai oku noddi di kusai do minaya' di wawayaan di ponong id salatan do kumaa do hiri'd natad di ponong id suang. Om tipongo' no dau i wawayaan di ponong id salatan diri, om miirad nopo di wawayaan di ponong id soliwan. 29-30 Om iri bilik do madtatamong, om i bilik dot agayo, om i limput di ponong id suang, nga' irad ngai' nopo di wawayaan do suwai o kogoyoo'. Om haro ngai' nopo o liligaon di bilik diri. Om konoruo' nopo di wawayaan diri nga' duwo nohopod om limo o mito om kalaabo' no om hopod om duwo om satanga' mito. 31 Iri nopo bilik dot agayo nga' potimbaba' di natad di ponong id soliwan, om pinokikir o guas do kurma do hiri'd limput di ponong id suang do potimbaba' di ralan. Iri nopo walu' o taang do tukad diri om poingkaa do hiri'd wawayaan.
Wawayaan di Ponong id Koulayon do Kumaa do Hiri'd Natad di Ponong id Suang
32 Om angatai oku noddi di kusai do minaya' di wawayaan di ponong id koulayon do kumaa do hiri'd natad di ponong id suang. Om tipongo' no dau i wawayaan diri om miirad nopo di wawayaan do suwai. 33 Iri nopo i piro-piro o bilik di madtatamong, om i bilik dit agayo, om i limput di ponong id suang om irad i' di hiri'd wawayaan do suwai o sukatan. Om winansayan ngai' nopod liligaon o pointutuk di bilik diri, om hiri'd bilik dit agayo nga' winansayan i'. Konoruo' nopo do ralan diri om duwo nohopod om limo o mito om kalaabo' no om hopod om duwo om satanga' mito. 34 Iri nopo i bilik dit agayo om potimbaba' di natad do ponong id soliwan. Om kinikiran do guas do kurma o hiri'd limput do poingompus di ralan. Om walu' o taang do tukad do poirikot dot id wawayaan diti.
I Wawayaan do Ponong id Utara di Suangon do Kumaa do Hiri'd Natad di Ponong id Suang
35 Om pokoyoo' oku noddi di kusai'ddi do hiri'd wawayaan di ponong id utara. Om tipongo' no dau iri, om sukatan nopoddi om miagal i' di wawayaan di suwai. 36 Om miagal nogi' di suwai tu' haro i' o bilik do madtatamong, om haro o limput di kinikiran di ponong id suang, om haro o bilik dot agayo, om notutuk ngai' iri do liligaon. Konoruo' nopo di ralan diri nga' duwo nohopod om limo mito, om kalaabo' no om hopod om duwo om satanga' mito. 37 Iri nopo bilik dot agayo nga' potimbaba' di natad ponong id soliwan. Om kinikiran do guas do kurma i limput di ponong id suang do potimbaba' di ralan. Walu' o taang di tukad do poirikot di wawayaan diti.
Kawalayan dot id Toning di Wawayaan di Ponong id Utara
38 Iri nopo i natad di ponong id soliwan nga' haro o tiso' bilik do pinatambing do ponong hiri'd wawayaan ponong id utara, om haro o wawayaan do hiri'd bilik di pinatambing diri do poingkaa do hiri'd bilik dot agayo. Om hiri nod bilik dot agayo diri o pongougan do tulun do tayam-tayam di maan do porsombahan do sorobon. 39 Om hiri nopod bilik dit agayo'ddi nga' haro ot apat o mija', do duwo o ponong id wanan om duwo o ponong id gibang. Om hiri nod sakai di mija'ddi o pagkaratan do tulun do tayam-tayam do patahakon do maan do porsombahan do sorobon, ko' maan do porsombahan do pangampun do dusa ko' maan pod porsombahan do pambayar do tutang. 40 Om hiri'd soliwan di bilik dit agayo'ddi nga' haro nogi' ot apat o mija' do miagal diri, om duwo o ponong id wanan om duwo o ponong id gibang di wawayaan do ponong id utara'ddi. 41 Oinsanan nopo nga' haro o walu' o mija' do ponumbolian do tayam-tayam do maan do porsombahan do sumbolion: apat o hiri'd suang di bilik om apat o hiri'd natad ponong id soliwan. 42 Iri nopo it apat o mija' di hiri'd bilik di pinatambing diri, om pakayon do posodia' do porsombahan do sorobon dit insanan nopo do monorob, om watu ngai' nopo di sinangkap iri do winonsoi. Kasawato' nopo di mija'ddi nga' satanga' mito, om kogoyoo' no om abasagi' do turu' nohopod om limo sontimito do konoruo' om kalaabo'. Pasakayon ngai' nopo do hiri'd mija'ddi o koinsanai di pakakas do pogkorot di tayam-tayam do maan do porsombahan do sumbolion. 43 Om nisanan o pointutuk di mija'ddi do turu' nohopod om limo milimito do kalaabo'. Om hirion ngai' nopod sakai di mija'ddi i daging do maan do porsombahan do sinumbali'. 44 Om angatai oku noddi di kusai'ddi do hiri'd natad di ponong id suang. Om haro o duwo o bilik do hiri, iso' o potimbaba' ponong hiri'd salatan, id toning di wawayaan do ponong id utara, om iri no tiso' om potimbaba' do ponong id utara, i hiri'd toning di wawayaan ponong id salatan. 45 Om sunudai oku no di kusai, dot iri nopo bilik di potimbaba' ponong id salatan diri nga' maan di piro-piro ot imam di maganu-anu do hiri'd Walai'd Sasambayangan dot Agayo, 46 om iri no i bilik di potimbaba' ponong id utara om maan dit imam di maganu-anu do hiri'd pananaraban do porsombahan. Om mositi' no do mantad ngai' id sinakagon di Sadok o koinsanai dit imam diri, iri no i sinakagon di Sadok i mantad id payat di Liwi o koino-ino do tumimbaba' do Tuhan do mogobi-obi' dau do tontok do sumambayang.
I Natad Ponong id Suang om i Walai'd Sasambayangan dot Agayo
47 Om tipongo' no di kusai'ddi i natad do ponong id suang om abasagi' nopori do limo nohopod o mito. Iri nopo Walai'd Sasambayangan dot Agayo nga' ponong hiri'd kotonobon, om id dotimbabaan nopoddi nga' haro ot iso' o pananaraban do porsombahan. 48 Om angatai oku noddi di kusai'ddi do mongoi do hiri'd bilik di gulu kabantalai it id suang di Walai'd Sasambayangan dot Agayo. Om tipongo' no dau i bilik diri om kalaabo' nopo nga' duwo om satanga' mito, om konoruo' no om turu' o mito, om nopiompopingan iri do limput do somito om satanga' o kakapalo'. 49 Om haro o tukad do solokoyon do mongoi do hiri'd bilik diri, do konoruo' nopo om hopod o mito om kalaabo' no om onom o mito. Om haro o duwo o torigi do miampaping di bilik diri.
1 Om angatai oku no di kusai'ddi do hiri'd bilik dit id tanga', i roitan do Kinoiyonon dot Olidang. Om tipongo' no dau i ralan do kumaa'd hiri: om konoruo' nopo nga' tolu o mito, 2 om limo mito do kalaabo', om nopiompopingan iri do limput do kakapalo' nopo nga' duwo om satanga' mito. Om tipongo' no dau i Kinoiyonon dot Olidang diri, om konoruo' nopo nga' duwo nohopod o mito, om kalaabo' no om hopod o mito. 3 Om ongoi noddi iyau do hiri'd bilik di hiri'd gogok kopio. Om tipongo' no dau i ralan do kumaa'd hiri, om somito o konoruo' om tolu mito do kalaabo', om nopiompopingan iri do limput do kakapalo' nopo nga' tolu om satanga' mito. 4 Om tipongo' no dau i bilik diri, om abasagi' nopori do hopod o mito; hopod o mito do konoruo' om hopod o mito do kalaabo'. Om boros kaddi dau dot id doho', “Iti no i Kinoiyonon dot Olidang Kopio,” ka.
I Piro-Piro Bilik di Winonsoi do Hiri'd Topis di Limput di Walai'd Sasambayangan dot Agayo
5 Om tipongo' noddi di kusai'ddi o kakapalo' di limput do ponong id suang di Walai'd Sasambayangan dot Agayo'ddi: om koilaai no do tolu o mito do kakapalo'. Om pointutuk nopodti Walai'd Sasambayangan dot Agayo'dti do pointopis di limput, nga' haro o piro-piro o bilik do duwo no o mito do kalaabo'. 6 Iri nopo piro-piro o bilik diri nga' tolu sontingkat, om iso' nopo o tingkat nga' winansayan do tolu nohopod o bilik, om irad ngai' nopoddi o kogumuo' do bilik do pointikid-tikid di tolu o tingkat. Iri nopo limput di ponong id soliwan do pointikid-tikid di tingkat diri nga' onipis no ko' mantad di limput di tingkat do hiri'd siriba', gisom do milo i' do potopison di limput i piro-piro o bilik diri. Om a' i' minog do luangan i limput di Walai'd Sasambayangan dot Agayo. 7 Om ondung antangan do mantad id soliwan nga' oiyo nopo o kakapalo' di limput di Walai'd Sasambayangan dot Agayo, do mantad hiri'd siriba' om gisom do hiri'd sawat. Om pointopis no di limput di Walai'd Sasambayangan dot Agayo di ponong id soliwan, i ponong id soliwan di piro-piro o bilik diri om winansayan do duwo o tukad dit agayo, om osonong indo o tulun do sumalakoi do mantad hiri'd tingkat dot id siriba' om kumaa do hiri'd tingkat di koduwo om kumaa do hiri'd tingkat di kotolu. 8-11 Iri nopo limput do ponong id soliwan di piro-piro o bilik diri nga' duwo om satanga' mito do kakapalo', om haro o tiso' o wawayaan do hiri'd walai diri do kumaa do hiri'd piro-piro o bilik do ponong hiri'd utara di Walai'd Sasambayangan dot Agayo, om iso' o wawayaan do kumaa do hiri'd piro-piro o bilik di ponong id salatan. Om kokito ku do haro o miagal do sibor do pointutuk di Walai'd Sasambayangan dot Agayo, do duwo om satanga' mito do kalaabo', om kasawato' no om tolu o mito do poinrantai di pinoimpahan di piro-piro o bilik di hiri'd topis do limput di Walai'd Sasambayangan dot Agayo. Om id pialatan nopo di koiyo-iyo'd sibor diri om i bilik dit imam, om haro o kakilima' do hopod o mito do kalaabo', do miomputul di Walai'd Sasambayangan dot Agayo.
I Walai dot Agayo di Ponong id Kotonobon
12 Hiri nopod ponong id dompok di kakilima' di hiri'd bombong ponong id kotonobon di Walai'd Sasambayangan dot Agayo om haro o walai dot agayo dot apat nohopod om limo o mito do konoruo' om tolu nohopod om limo mito do kalaabo'; om kakapalo' no di limput om duwo om satanga' mito.
Sukatan do Koinsanai di Walai'd Sasambayangan dot Agayo
13 Om sukato' no di kusai'ddi i ponong id soliwan di Walai'd Sasambayangan dot Agayo: om konoruo' nopo nga' limo nohopod o mito. Om mantad no do hiri'd tolikud di Walai'd Sasambayangan dot Agayo om gisom do korikot di limput dot id tolikud di walai dot agayo di ponong id kotonobon diri, om limo nohopod o mito. 14 Om kalaabo' no di ponong id wawayaan di Walai'd Sasambayangan dot Agayo, di potimbaba' ponong id koulayon do kohompit i kakilima' di ponong id gibang om i kakilima' di ponong id wanan, om limo nohopod o mito do kalaabo'. 15 Om tipongo' no di kusai'ddi o konoruo' di walai dot agayo di potimbaba' di natad do kohompit i limput do ponong id gibang om i ponong id wanan, om limo nohopod o mito.
Piro-Piro o Bohogian do Suwai di Walai'd Sasambayangan dot Agayo
Iri nopo i bilik di Walai'd Sasambayangan dot Agayo, om i bilik dit id gulu kabantalai om i Kinoiyonon dot Olidang, om i Kinoiyonon dot Olidang Kopio, 16 om linopisan ngai' do kayu, do mantad po do hiri'd liligaon om kosondot do hiri'd siliu. Om iri ngai' nopo liligaon nga' milo ngai' nopo do tabanan do tirai. 17 Iri nopo limput do ponong id suang di Walai'd Sasambayangan dot Agayo, gisom do hiri'd sawat di wawayaan, om notongkop nopo dot ukiran do pinoiyo-iyo 18 do guas do kurma om moloikat di roitan do kerub. Piniolot-olot nopo do pinopokikir i pinoiyo-iyo'd guas do kurma om i pinoiyo-iyo do moloikat di roitan do kerub. Om duwo ngai' nopo o rabas di pinoiyo-iyo do moloikat di roitan do kerub diri: 19 rabas do tulun o potoguang di pinoiyo-iyo do guas do kurma di ponong id gibang, om rabas do singa o potoguang di pinoiyo-iyo do guas do kurma di ponong id wanan. Iyo ngai' nopodti ot ukiran do pointutuk di limput 20 do mantad hiri'd siliu om gisom do hiri'd sawat di wawayaan. 21 Angabasagi' ngai' nopo i torigi di wawayaan do hiri'd Kinoiyonon dot Olidang.
Pananaraban do Porsombahan di Kayu do Winonsoi
Hiri nopod dotimbabaan di wawayaan do ponong id Kinoiyonon dot Olidang Kopio, nga' haro o koiyo-iyo do pananaraban do porsombahan 22 di kayu do winonsoi. Kasawato' nopoddi nga' somito om satanga', om kayu ngai' nopod winonsoi i pinongorigi, om i tuwou, om i tolig di pananaraban do porsombahan diri. Om boros kaddi di kusai'ddi dot id doho', “Iti no o mija' di poilihon dot id dotimbabaan di koropohon do Tuhan,” ka dau.
Wawayaan di Walai
23 Hiri nopod dompok di ralan do poingkaa do hiri'd Kinoiyonon dot Olidang, om haro ot iso' o wawayaan, om iyo nogiddi o hiri'd dompok di ralan do poingkaa do hiri'd Kinoiyonon dot Olidang Kopio. 24 Om soroduwaan nopod totobon dot id tanga' o pongukaban o pointikid-tikid di wawayaan diri. 25 Iri nopo i totobon di wawayaan di Kinoiyonon dot Olidang diri nga' kinikiran do pinoiyo-iyo do guas do kurma om moloikat di roitan do kerub do miagal di pinokikir di hiri'd limput. Om haro o ponirung do kayu do winonsoi do ponong id soliwan di wawayaan di bilik dit id gulu kabantalai. 26 Om kililigaon nogi' o miomputul di bilik diri, om iri limput nga' nukiran nogi' do pinoiyo-iyo do guas do kurma.
I Duwo o Walai do Hiri'd Toning di Walai'd Sasambayangan dot Agayo
1 Om angatai oku noddi di kusai'ddi do mongoi do hiri'd natad do ponong id soliwan om pootodo' oku no dau dot id tiso' o walai, i ponong id utara di Walai'd Sasambayangan dot Agayo, it a' i' osodu' no do mantad hiri'd walai dit agayo, di ponong id kotonobon do mantad id Walai'd Sasambayangan dot Agayo. 2 Iri nopo i walai'ddi nga' limo nohopod o mito do konoruo' om duwo nohopod om limo o mito do kalaabo'. 3 Id somputul nopo di walai'ddi nga' potimbaba' di kakilima', i hopod o mito do kalaabo', i pointoning di Walai'd Sasambayangan dot Agayo, om hiri nod somputul kawagu om potimbaba' di sirang di linopisan do watu di hiri'd natad di ponong id soliwan. Iri nopo i walai'ddi nga' tolu o tingkat. Om iri nopo tingkat dit id sawat nga' okoro-koro' no ko' mantad di tingkat dit id siriba'. 4 Id dotimbabaan nopo di piro-piro o bilik diri, do ponong id suang nga' haro o ralan do kalaabo' nopo om limo o mito om konoruo' no om limo nohopod o mito. Om iri nopo i piro-piro o wawayaan diri nga' potimbaba' ponong id utara. 5 Iri nopo piro-piro o bilik di hiri'd tingkat dot id sawat om poingkoro'-koro' no ko' mantad di piro-piro o bilik dit id tingkat di hiri'd siriba-riba', tu' iri nopo i ralan dit id dotimbabaan di piro-piro o bilik dit id sawat nga' alaab-laab no ko' mantad di ralan dit id siriba'. 6 Tolu ngai' nopo sontingkat i piro-piro o bilik diri, om a' i' tinukod do torigi do miagal di walai di hiri'd liwan. 7-8 Hiri nopod sombohogian di tingkat dit id siriba, om poingolig nopo o limput do duwo nohopod om limo o mito do konoruo', do songintanga' kopio do konoruo' di walai; om iri no bohogian di tiso', om duwo nohopod om limo mito do konoruo', om winansayan do piro-piro o bilik. Om hiri nopod tingkat dot id sawat kopio om winansayan do piro-piro o bilik di poingompus di walai'ddi. 9-10 Id siriba' nopo di duwo o bilik dit id dompok do walai'dti, do ponong id salatan, do hiri'd pinoimpuunan di limput, om haro o wawayaan do kumaa do hiri'd natad ponong id soliwan. Hiri nopod bombong ponong id salatan di Walai'd Sasambayangan dot Agayo om haro po kawagu o walai do miagal diri, it a' i' osodu' no do mantad di walai di ponong id kotonobon. 11 Id dotimbabaan nopo di piro-piro o bilik diri nga' haro o ralan do miagal nopo kopio di ralan di ponong id utara. Miirad nopo o sukatan, om miiyo o pinomonsoi, om miagal o wawayaan. 12 Id siriba' no di piro-piro o bilik dit id bombong ponong id salatan diri, om it id dompok ponong id koulayon, i hiri'd pinoimpuunan di limput, om haro po ot iso' o wawayaan. 13 Om boros ka di kusai'ddi dot id doho', “Ilo' nopo duwo o walai dilo' nga' olidang goduwo nopo. Om hilo' no o pangakanan di piro-piro ot imam, i koino-ino do sumuang dot id dotoguangan do koropohon do Tuhan, di porsombahan di sinumbali' dit olidang kopio. Om hilo' no o poiyanan dit imam di porsombahan do sinumbali' dit olidang kopio. Iri no i porsombahan do gandum, om i porsombahan di pongidu' do dusa ko' i porsombahan do pambayar do tutang. 14 Ondung kopongo it imam do maganu-anu do hiri'd Walai'd Sasambayangan dot Agayo om siongoi no iyolo' do hiri'd natad do ponong id soliwan, om mositi' nod poilihon diyolo' i rasuk di papakayon diyolo' do maganu-anu do tontok do sumambayang dot id piro-piro o bilik diri. Om mositi' no do manampakai iyolo' do pakayan do suwai do tintod do sumoliwan do pakayaan do hiri'd kinoiyonon do titimungon do tulun dot ogumu',” ka.
Sukatan do Pointutuk di Walai'd Sasambayangan dot Agayo
15 Om soira' di nopongo di kusai'ddi do monukat i ponong id suang di Walai'd Sasambayangan dot Agayo, om angatai oku no dau do suminoliwan do minaya' di wawayaan do ponong id koulayon om sukato' noddi dau o pointutuk di Walai'd Sasambayangan dot Agayo. 16 Om ngoyo' no dau i sukud di ponunukat dau om sukato' no dau i bombong do ponong id koulayon. Om konoruo' nopoddi nga' duwo nahatus om limo nohopod o mito. 17-19 Om sukato' no dau i bombong ponong id utara, om ponong id salatan, om i ponong id kotonobon; om oiyo nopo do duwo nahatus om limo nohopod o mito do konoruo'. 20 Om pabasagi' nopoddi o tana' do nokoiyonon di Walai'd Sasambayangan dot Agayo, do duwo nahatus om limo nohopod o mito do kalaabo' om irad iddi o konoruo'. Om nolig o posorili' di tana'ddi do panapad di kinoiyonon di pinotobilang do maan do don Tuhan om i kinoiyonon di maan do dong kogumuan.
Guminuli' o Tuhan do Hiri'd Walai'd Sasambayangan dot Agayo
1 Om angatai oku noddi di kusai'ddi do minongoi do hiri'd wawayaan di potimbaba' ponong id koulayon. 2 Om hiri no do nokito ku i tulinau di kosorong kopio do mantad ponong id koulayon do tanda' do nakarapou o Kinorohingan dot Israil. Iri nopo boros do Kinorohingan nga' miagal di ngorod do rahat o karangahan, om mogulinau po iti pomogunan dot otitihan di tulinau do kinarapahan do Kinorohingan. 3 Iti nopo nokito ku'dti nga' miagal nopo di nokito ku di ruminikot o Kinorohingan do minongoi pamaraag do Yorusalim, om miagal di nokito ku di hilo'd toning do Bawang do Kibar. Om hunduk oku nopoddi do minotud do hiri'd tana'. 4 Om waya' no i tulinau di kosorong kopio'ddi, di wawayaan di ponong id koulayon, om suang no di Walai'd Sasambayangan dot Agayo. 5 Om poinsawato' oku no di Rusod do Tuhan, om tanggayai oku no do hiri'd natad di ponong id suang. Om hilo' noddi do nokito ku do noponu' pod tulinau do koropohon do Tuhan i Walai'd Sasambayangan dot Agayo. 6 Om tontok di poingkakat po i kusai'ddi do hiri'd toning ku, om korongou ku no o Tuhan do minoro-boros dot id doho' do mantad hiri'd suang di Walai'd Sasambayangan dot Agayo. 7 Boros ka dau, “Oi tulun, hiti no o tirikohonon ku do dong raja'. Om hiti nondo o tiyonon ku do poinsugku' di tulun dot Israil om momorinta' oku diyolo' do gisom dot alaid. Om a' nondo koumbal i tulun dot Israil om i raja' diyolo' do mongindaraat do ngaran ku dit olidang, do tumuku' dot id tingolig ko' momolobong do rata' di raja' diyolo' do hiti'd kinoiyonon diti o pongindaraat. 8 Pinamansayan nopo di piro-piro o raja' di tuulokon om i torigi di wawayaan di walai diyolo' do dong raja' di gulu po om hiri kopio'd hapak di tuulokon om i torigi di walai'd Sasambayangan dot Agayo, gisom dot iso' poo o limput do piolitan. Nindaraat tomod diyolo' i ngaran ku dot olidang tu' kososomu' kopio i' o winonsoi diyolo', om gowoi poddi om pinatai ku iyolo' do natatagadan oku. 9 Om baino' nondo om mositi' nod tumingkod iyolo' do tumuku' dot id tingolig om ngoyon powoliho' i rata' di piro-piro o raja' diyolo'. Ondung wonsoyon diyolo' o miagal diri, om mundorong oku nogindo do poinsugku' diyolo' do gisom dot alaid,” ka dau. 10 Om boros ka kawagu'd Tuhan, “Oi tulun, sunudan no i tulun dot Israil do pasal di Walai'd Sasambayangan dot Agayo, om popurimonon no iyolo' do gisom id ointingayam iyolo' di kowoyo-woyoon diyolo' di mingwonsoi'd dusa. 11 Om ointingayaman pondo iyolo' di nowonsoi diyolo', om tudukan nogindo iyolo' do kowoyo-woyoon do momonsoi di Walai'd Sasambayangan dot Agayo: i pomomonsoi, i piro-piro o wawayaan do sumuang om sumoliwan, i koiyon-iyono' do pomomonsoi, i pongungulud do koinsanai'd nunu nopo, om it oturan om i kowoyo-woyoo' do hiri. Om tulison ngai' noti do bagi' diyolo' om kokito indo kopio iyolo' do kowoyo-woyoon do mongulud do koinsanai'ddi, om katanud iyolo' do koinsanai dit oturan. 12 Iti no o kowoyo-woyoo' di Walai'd Sasambayangan dot Agayo: Oinsanan nopo i kinoiyonon do posorili' di timpak do nuluhon diri dot olidang kopio,” ka dau.
I Pananaraban do Porsombahan
13 Iti no o sukatan di pananaraban do porsombahan do tumanud di ponipong di pinonipong di Walai'd Sasambayangan dot Agayo. Posorili' nopo di pinoimpahan di pananaraban do porsombahan om haro o parit do satanga' mito o korolomo' om satanga' mito o kalaabo'. Iri nopo pinongisan di parit do ponong id soliwan om duwo nohopod om limo o sontimito do kasawato'. 14 Kasawato' nopo do mantad hiri'd parit om gisom di hiri'd poingkorot di pananaraban do porsombahan dit id siriba' kopio om somito. Om iri no poingkorot dot id tanga' om duwo o mito do kasawato', om satanga' mito do poingkoro' mantad ko' i tutuk di pinoimpahan di pananaraban do porsombahan. Om iri nogi' i poingkorot di kotolu it id sawat kopio nga' satanga' mito i' o poingkoro' do mantad ko' i tutuk di poingkorot dit id tanga'. 15 Iri nopo poingkorot di ponong id sawat kopio, i poingkorot di kotolu'ddi om maan do pananaraban do porsombahan di sumbolion; om kasawato' nopoddi nga' duwo o mito. Om ongkilahis ngai' nopo do koiyo-iyo'd sungu o hiri'd pointikid dit apat o sunduk. 16 Pabasagi' nopo do soronom-onom o mito it apat o tisan dit id sawat kopio di pananaraban do porsombahan. 17 Iri nogi' i poingkorot do hiri'd tanga-tanga' nga' pabasagi' i'; do soroturu-turu' o mito do pointikid-tikid dit apat o tisan, om haro o pinongisan do ponong id soliwan do kasawato' nopo nga' duwo nohopod om limo o sontimito. (Kalaabon nopo di parit nga' satanga' mito.) Iri nopo tukad do solokoyon do kumaa do hiri'd sakai di pananaraban do porsombahan nga' id tisan ponong id koulayon di pananaraban do porsombahan.
Sinambayangan i Pananaraban do Porsombahan
18 Om boros kad Tuhan, it Asawat Kopio dot id doho', “Oi tulun, pokinongou nodti poboroson ku diya'. Owonsoi nopondo i pananaraban do porsombahan, om sambayangan nori, do ralan nopod manambayang om panaraban do porsombahan di sinumbali' o hiri'd sakai om wawasan do raha' do tayam-tayam di numaan do porsombahan do sinumbali' o hiri. 19 Om imam nopo do maganu-anu dot id toguang ku om iri no it imam do mantad id sinagakon di Liwi, om i suminolusuk di Sadok. Iyoho' no, i Tuhan it Asawat Kopio, o monuhu' do momonsoi do miagal diti. Om onuan no iyolo' do songinan o sapi' do tontoluhan dit okoro' po do maan do porsombahan do pongidu'd dusa. 20 Om manu nod ongokuuri' do raha' di sapi'ddi om pogihilon nori di sinangau-sangau di hiri'd apat o sunduk dit id sakai di pananaraban do porsombahan, om hiri'd sunduk di poingkorot dot id tanga' di pananaraban do porsombahan, om hiri'd pointutuk di pinongisan di pananaraban do porsombahan. Om iyo nodti o ralan nu do momolidang om popotobilang di pananaraban do porsombahan diri do maan do doho'. 21 Om ngoyon nondo i sapi' do tontoluhan, do patahakon do maan do pongidu'd dusa'ddi, om sorobon nondo do hiri'd kinoiyonon di natantu' mantad, it id soliwan di kinoiyonon di Walai'd Sasambayangan dot Agayo. 22 Om tadau nopondo kawagu om mongoi no panganu do songinan o kambing do tontoluhan dit aiso' i' o bohiton do tinan om patahakon i' do maan do porsombahan do pongidu'd dusa. Om lidangan no di raha' di kambing diri i pananaraban do porsombahan do miagal di winonsoi nu dot id raha' di sapi' do tontoluhan dit okoro' poddi. 23 Om owonsoi nu pondo o miagal diri, om mongoi no anu do songinan o sapi' do tontoluhan dit okoro' po om songinan o kambing do tontoluhan dit okoro' po, om it aiso' goduwo nopo o bohiton do tinan. 24 Om pootodon nogindo iri do hiti'd doho'. Om sasadan nondo di piro-piro ot imam, do silaon i duwo o tayam-tayam diri om sorobon nogindo do maan do porsombahan di sumbolion do patahakon dot id doho'. 25 Monikid tadau nopondo, do solinaid do turu' o tadau do papatahak kou do songinan o kambing, om songinan o sapi' do tontoluhan, om songinan o kambing do tontoluhan, do maan do porsombahan do pongidu'd dusa. Om a' i' koino-ino do haro o bohiton do tinan di tayam-tayam diri. 26 Om wonsoyon nondo dit imam i natantu' mantad do wonsoyon do panambayang di pananaraban do porsombahan do solinaid do turu' o tadau om mikuwo'd poposodia'ddi om milo indo do pakayon. 27 Om atalib pondo o turu' o tadau, om tumimpuun nogindo it imam do papatahak di porsombahan do sorobon, om i porsombahan do piombolutan, do hiri'd sakai di pananaraban do porsombahan do maan di tulun dot ogumu'. Om asanangan oku nogindo ngai' dokoyu. Iyoho' no, i Tuhan it Asawat Kopio, o minomoros diti,” ka dau.
Guna' di Wawayaan do Ponong id Koulayon
1 Om pootodo' oku no kawagu di kusai'ddi do hiri'd wawayaan di ponong id soliwan, i ponong id koulayon do mantad hiri'd kinoiyonon di Walai'd Sasambayangan dot Agayo. Om iri nopo wawayaan diri nga' pointobon. 2 Om boros kaddi do Tuhan dot id doho', “Pointobon nondo kasai' iti wawayaan diti om a' no iwangan. A' no koino-ino o tongoiso' piya'd tulun do maya'dti tu' nawayaan ku i' iti, iyoho' i Tuhan, i Kinorohingan dot Israil do suminuang diti Walai'd Sasambayangan dot Agayo. Pointobon nondo kasai' iti. 3 Nga' iri nopo i raja' di momorinta' om koino-ino i' do mongoi do hiri'd ralan di kumaa do hiri'd wawayaan diri do mongoi pangakan do taakanon dit olidang dot id toguang ku. Om wayaan nopo dau do sumuang om sumoliwan om mositi' no dot i wawayaan do kawaya' di bilik dot agayo,” ka dau.
Oturan do Sumuang di Walai'd Sasambayangan dot Agayo
4 Om angatai oku noddi di kusai'ddi do minaya' di wawayaan do ponong id utara, it id dotimbabaan di Walai'd Sasambayangan dot Agayo. Om soira' di minontong kopio oku, om kokito ku do noponu' pod tulinau di kosorong kopio, i tanda' do karapahan do Tuhan, i Walai'd Sasambayangan dot Agayo. Om hunduk oku nopoddi do minotud. 5 Om boro-boros noddi o Tuhan dot id doho' do poingkaa, “Oi tulun, ilaan no kopio o koinsanai dit okito om orongou nu. Sunudan ku iya' do koinsanai dot oturan om kowoyo-woyoo' do pasal diti Walai'd Sasambayangan dot Agayo. Om tulison no kosonong-sonong ondung isai i koino-ino do sumuang di Walai'd Sasambayangan dot Agayo om tulison ondung isai it a' koino-ino do sumuang. 6 Sunudan no i tulun dot Israil, i tulun dot obinsongkiwal diri, dot a' ku noddi iyoho' i Tuhan, it Asawat Kopio, pologoson iyolo' do momonsoi di sosomu'. 7 Sinosomu' diyolo' i Walai'd Sasambayangan dot Agayo, tu' pinopologos iyolo' do bansa'd suwai dit a' nosunatan, i tulun dit a' mumboyo' doho', do suminuang di Walai'd Sasambayangan dot Agayo, do tontok di maso do patahakon dot id doho' i porsombahan do lunok om raha'. Om tinolibambanan diri di tulun ku i tumpongo ku dot id diyolo', tu' miningwonsoi i' iyolo' di kososomu' kopio'ddi. 8 Okon nogi' ko' iyolo' o minongilo-ilo di natantu' mantad do wonsoyon dit ongolidang do hiri'd suang di Walai'd Sasambayangan dot Agayo, suwai ko' iri nogi' tulun di bansa'd suwai o sinuhu' diyolo' do momonsoi'ddi. 9 Iyoho' no i Tuhan, it Asawat Kopio, o popoboros dot a' koino-ino do sumuang di Walai'd Sasambayangan dot Agayo o bansa'd suwai dit a' nosunatan, om i tulun dit a' mumboyo' doho'. Om iri piya i bansa'd suwai di momogun-mogun do poirolot dot Israil, i tulun ku nga' a' i' koino-ino,” ka dau.
Nidu' i Tulun do Liwi do Mantad id Karaja' di Dong Imam
10 Om boros kad Tuhan dot id doho', “Hukuman ku nondo i tulun do Liwi, tu' miagal nopo iyolo' di tulun dot Israil do suwai, do tuminongkiad doho' om tuminuku' dot id tingolig. 11 Nga' milo i' iyolo' do momonsoi'd karaja' ku do hiri'd Walai'd Sasambayangan dot Agayo do madtatamong di wawayaan om maganu-anu do hiri. Om koino-ino i' iyolo' do mogkorot di tayam-tayam i patahakon di tulun dot ogumu' do maan do porsombahan do sorobon om porsombahan do sumbolion, om mositi' no do kumaraja' kasai' iyolo' do mogobi-obi' di tulun dot ogumu'. 12 Ginayat ngai' diyolo' i tulun dot id suang do dusa tu' minodsubak i' iyolo' do tingolig do mogobi' di tulun dot Israil. Gowoi poddi om sumumpa' oku no, iyoho' i Tuhan, it Asawat Kopio, do mositi' nod hukuman iyolo'. 13 A' no iyolo' koino-ino do sumiliu'd imam do mogobi-obi' doho' ko' mongoi po insomok do nunu nopo it olidang dot id doho', om a' koino-ino do sumuang di Kinoiyonon dot Olidang Kopio. Iti no o pomohukum di winonsoi diyolo' di kososomu' kopio. 14 Buruon nopo do patahakon ku diyolo' om iri po i buruon di koubasanan do hiri'd Walai'd Sasambayangan dot Agayo,” ka dau.
It Imam
15 Om boros kad Tuhan, it Asawat Kopio, “Nga' iri nopo it imam do mantad id sinakagon di Liwi, om i suminolusuk di Sadok, om otorodok i' kasai' do mogobi-obi' doho' do hiri'd Walai'd Sasambayangan dot Agayo do tontok di nokotongkiad no doho' i tulun dot Israil di suwai. Om baino' nondo om iyolo' no it apatut do mogobi-obi' doho' om i minsomok dot id toguang ku do mongoi papatahak di lunok om i raha' do tayam-tayam di numaan do porsombahan dot id doho'. 16 Iyolo' poo o koino-ino do sumuang di Walai'd Sasambayangan dot Agayo, om i maganu-anu do hiri'd pananaraban do porsombahan di doho', om momoyo' do sumambayang do hiri'd Walai'd Sasambayangan dot Agayo. 17 Soira' nopod sumuang iyolo' di wawayaan di kumaa do hiri'd natad di ponong id suang di Walai'd Sasambayangan dot Agayo, om mositi' nod manampakai iyolo' do pakayan di kain linan. Om a' no iyolo' koino-ino do manampakai do pakayan di hulu'd dumba' do winonsoi, do tontok do maganu-anu iyolo' do hiri'd natad di ponong id suang ko' hiri pod suang di Walai'd Sasambayangan dot Agayo. 18 Om mositi' nod manampakai iyolo'd sigar do kain linan om soluar do kain linan, nga' a' indo manangagkos, om a' i' iyolo' losuan. 19 Om tintod nopo diyolo' do mongoi'd hiri'd natad di ponong id soliwan, i kotimungon do tulun dot ogumu', om mositi' nod iduwon po diyolo' i pakayan diyolo' di pinakai do maso'd maganu-anu do hiri'd Walai'd Sasambayangan dot Agayo, om poilihon iri do hiri'd bilik dit olidang. Om mositi' nod manampakai iyolo' do pakayan do suwai om a' i' koporikot do kosusaan dot id tulun dot ogumu' i pakayan diyolo' di papakayon do maganu-anu. 20 Imam nopo om a' i' koino-ino do mamalagas do tulu om a' koino-ino do papanaru kopio'd tobuk. Mositi' no do pampadan dot oniba' i tobuk diyolo' do tumanud dit oturan di natantu' mantad. 21 Om iri nopo it imam nga' a' no koino-ino do monginum do waig dot anggur do tintod do mongoi'd hiri'd natad di ponong id suang. 22 Om a' koino-ino ot imam do manansawo do tondu' di naadaan; tu' koino-ino nopo dau do kowinon om sumandak nod Israil om i tondu' do nakasawo'd gulu dot imam, nga' napatai noddi i sawo dau. 23 Om mositi' nod tudukan dit imam i tulun ku do pisuayan di nokotobilang do maan do doho' om it a' nokotobilang, om pisuayan dit olidang om it a' olidang do tumanud do toturan do tugama'. 24 Soira' nopod haro o pigulatan, om iri no it imam o momutus diri do miontok dit oturan ku. Om mositi' nod gompion diyolo' i tadau dot agayo do don tugama' do miontok dit oturan om i ponuhuan ku, om mositi' do pusohon kasai' diyolo' i tadau'd Sabat, i tadau di nokotobilang do maan do doho'. 25 A' i' koino-ino it imam do monosomu' do tinan dau dot i koigit do rata' o kososomu', ondung okon no ko' rata' di molohing dau, ko' i tangaanak dau, ko' i tobpinai dau'd kusai ko' i tobpinai dau'd tondu' dit a' po nakasawo. 26 Om soira' nopondo dot olidang kawagu iyau, om mositi' no do mandad po iyau do solinaid do turu' o tadau, 27 om mongoi nogindo iyau do hiri'd natad di ponong id suang di Walai'd Sasambayangan dot Agayo, om papatahak do porsombahan do pomolidang do tinan dau, om koino-ino indo kawagu iyau do maganu-anu do hiri'd Walai'd Sasambayangan dot Agayo. Iyoho' no, i Tuhan it Asawat Kopio, o minomoros diti. 28 Tungkusan nopo do pogitungkus-tungkusan dit imam om iri no i karaja' diyolo' do dong imam, tu' iri no o tungkusan do pinatahak ku diyolo' dot id pogialatan do tulun dot Israil. Om a' iyolo' koino-ino do manansanganu do nunu nopo do hilo'd Israil; tu' iyoho' no o ponokodapu' diyolo'. 29 Akanon nopo dit imam om i porsombahan do gandum, om i porsombahan do pongidu'd dusa, om i porsombahan do pambayar do tutang, om iyolo' no o kaanu do koinsanai di nokotobilang do maan do doho' do hilo'd Israil. 30 Om iri no it imam o kaanu di tomot dot id gulu omoto', it ongosonong kopio, om koinsanai di suwai do patahakon dot id doho'. Pointikid-tikid do momonsoi'd roti i tulun ku om mositi' nod tahakon diyolo' dit imam it id gulu kopio diyolo' kowonsoi, om barakatan ku i' i walai diyolo'. 31 Om iri nopo it imam nga' a' i' koino-ino do mangakan do nunu nopo koombolog ko' bansa' do nintorusan di minatai toomod ko' i pinatai do nintorusan do suwai,” ka dau.
I Piro-Piro Kinoiyonon do Tana' do Hiri'd Pomogunan di Pinotobilang do Maan do don Tuhan
1 Bohogion nopondo i tana' do potikidon do pointikid-tikid di payat, om mositi' nod patahakon o sombohogian di tana'ddi dot id Tuhan. Konoruo' nopod tana'ddi nga' hopod om duwo om satanga' kilomito om kalaabo' no om hopod o kilomito. Om oinsanan nopo i kinoiyonon diri do poboroson dot olidang. 2 Om hiri nod tana'ddi o pawansayan di Walai'd Sasambayangan dot Agayo. Om pabasagi' nopo o kinoiyonon diri do duwo nahatus om limo nohopod o mito do konoruo', om irad iddi o kalaabo'. Om obian do maan do liwan o hiri'd posorili'ddi do duwo nohopod om limo mito do kalaabo'. 3 Songintanga' nopo do kinoiyonon diri, do hopod om duwo om satanga' kilomito do konoruo' om limo kilomito' do kalaabo', om maan do waalan di Walai'd Sasambayangan dot Agayo, i kinoiyonon dit olidang kopio. 4 Om iri nondo o tana' dot olidang dot id suang do pomogunan diri, do potobilangon do maan dit imam, i mogobi-obi' do Tuhan do hiri'd Walai'd Sasambayangan dot Agayo. Om hiri o koiyonon di kawalayan diyolo', om sombohogian no di tana'ddi om waalan do Walai'd Sasambayangan dot Agayo. 5 Om iri no songintanga' di tana'ddi do 12.5 o kilomito do kogoyoo' om potobilangon do maan di tulun do Liwi, i mogobi-obi' do hiri'd suang di Walai'd Sasambayangan dot Agayo. Om haro nondo o kabandaran do hiri dot iyonon diyolo'. 6 Om suwai no ko' mantad di kinoiyonon dot olidang, om haro po tiso' kawagu bohogian do tana' do hopod om duwo om satanga' kilomito do kalaabo'. Om potobilangon nori do wansayan do bandar do maan dot iyonon dot isai nopo di tulun dot Israil.
Tana' do Patahakon di Raja' di Momorinta'
7 Om haro nogi' o tana' do potobilangon do patahakon di raja'. Iti nopo tana'dti nga' poimpuunon di wolit di tana' di pinotobilang do maan do don Tuhan om poillombus nopo do gisom do korikot di Rahat do Tanga'; om mantad no di wolit do ponong id koulayon do mantad di tana' di pinotobilang diri, om poirikot nopo dot id wolit di pomogunan di ponong id koulayon. Om konoruo' nopo do tana'dti nga' irad di konoruo' do tana' di pinabahagi' dot id pointikid-tikid di payat dot Israil. 8 Om iti no o kinoiyonon do tana' dot aanu di raja' do momorinta' do hilo'd pomogunan dot Israil, om a' indo iyau monginggorit di rayat, suwai ko' pologoson i' dau i kinoiyonon do tana'd suwai do hiri'd pomogunan diri dot asanganu di payat dot Israil do suwai.
Tonggungan di Raja' do Momorinta'
9 Om boros kad Tuhan, it Asawat Kopio, “Alaid kou noddi kopio do momonsoi'd dusa, oi pomorinta' dot Israil: Tongkiadai no dokoyu ino kororongit om ino pongulok-ulok dokoyu di rayat. Wonsoyon no dokoyu it otopot om it otulid. Om kada' kou nondo kopio umbal do moguyung di tulun ku do mantad hilo'd pomogunan diyolo'. Iyoho' no, i Tuhan it Asawat Kopio, o monuhu' dokoyu do momonsoi'd miagal diti. 10 Mositi' nod mamakai o pointikid-tikid do tulun do timbangan om pagadang di koontok: 11 Iso' nopo ot ipa do pagadang dit ongotuu om mositi' no do miirad do suang dit iso' o bat do pagadang di miagal-agal do waig. Popiirad nopo nga' iso' o homor. Om miagal diti o kopogiirad-iradan di pagagadang diri: 1 homor = 10 ipa = 10 bat 12 Om ponimbang no dokoyu om miagal diti: 1 sikal = 20 gira. 1 Mina = 60 sikal. 13-15 Iti no o pagagadang di natantu' mantad do pagadang di porsombahan: Gandum: 1/60 o bahagi di tomot dokoyu. Barli: 1/60 o bahagi di tomot dokoyu. Tumau do saitun: 1/100 o bahagi di tumau do kayu saitun. (Pagadang nopoddi nga' i bat: 10 bat = 1 homor = 1 kor) Dumba': 1 o dumba' do mantad id pointikid-tikid do 200 o dumba'. Om papatahak kou nod porsombahan do gandum, om porsombahan di sorobon, om porsombahan di piombolutan, om oompunan i' o dusa dokoyu. Iyoho' no, i Tuhan it Asawat Kopio, o monuhu' do momonsoi do miagal diti. 16 Om mositi' nod papatahak o koinsanai'd tulun do hiri'd pomogunan diri do porsombahan diti dot id raja' di momorinta' dot Israil. 17 Om iyau no ot apatut do posodia' do tayam-tayam do maan do porsombahan do sorobon, om i maan do porsombahan do gandum, om i porsombahan do waig dot anggur do maan do koinsanai di bansa' dot Israil do tontok di piro-piro o tadau dot agayo, i Tadau dot Agayo do Tulan do Wagu, om tadau'd Sabat, om tontok di tadau dot agayo do suwai. Om iyau nogi' o poposodia' di maan do porsombahan do pangampun do dusa, om porsombahan do gandum, om porsombahan di sorobon, om porsombahan do piombolutan do maan do kopokiompunan do dusa di tulun dot Israil,” ka dau.
I Piro-Piro o Tadau dot Agayo
18 Om boros kad Tuhan, it Asawat Kopio dot id tulun dau, “Pointikid-tikid do tadau do koiso', do tulan di koiso', om papatahak kou no do sapi' do tontoluhan dit aiso' o bohiton do tinan do maan do porsombahan do sumbolion do pomolidang di Walai'd Sasambayangan dot Agayo. 19 Om manu nondo it imam di raha' do mantad id porsombahan di pongidu'd dusa'ddi, om pogihilon nondo do hiri'd tisan di wawayaan di Walai'd Sasambayangan dot Agayo, om gihilan it apat o sunduk di pananaraban do porsombahan, om hiri'd tisan di wawayaan di suangon do kumaa do hiri'd natad di ponong id suang. 20 Om tontok no do tadau'd koturu' do tulan diri, om wonsoyon po kawagu dokoyu o miagal diri do bagi'd isai nopo o tulun di kowonsoi'd dusa dot a' tomodon om i kowonsoi'd dusa tu' a' i' nokoilo mantad. Om iti no o ralan dokoyu do momolidang kasai' di Walai'd Sasambayangan dot Agayo. 21 Om tontok di tadau'd kohopod om apat, di tulan do koiso', om tumimpuun kou no do mamaramai di Tadau dot Agayo do Paska. Om kanon nopo do koinsanai'd tulun do solinaid do turu' o tadau om i roti dit a' rinalatan do pangambang. 22 Om tontok di tadau'd koiso' do karamayan diri, om mositi' nod papatahak i raja' do songinan o sapi' do tontoluhan do maan do porsombahan do sumbolion do pongidu'd dusa dau om dusa do koinsanai di rayat dau. 23 Pointikid-tikid do tadau do solinaid di turu' o tadau'd karamayan diri, om mositi' nod papatahak iyau dot id Tuhan do porsombahan do sumbolion do turu' o sapi' do tontoluhan om turu' o dumba' do tontoluhan dit aiso' o bohiton do tinan, om songkoyuon ngai' nopori do monorob. Om papatahak nogi' iyau do porsombahan do sumbolion do songinan o kambing do tontoluhan do pointikid do tadau, do maan do pangampun do dusa. 24 Om potonggoyon nopo do pointikid-tikid di songinan o sapi' om 17.5 lito do gandum, om potonggoyon no do pointikid-tikid do songinan o dumba' do tontoluhan om 3 o lito do tumau'd saitun. 25 Om tontok no di Tadau dot Agayo do Kinuhub-Kuhub, i tumimpuun do tadau'd kohopod om limo di tulan do koturu', om miagal iddi o porsombahan do patahakon di raja' do pointikid-tikid do tadau do solinaid di turu' o tadau, i porsombahan do pangampun do dusa, om i porsombahan do sorobon, om i porsombahan do gandum om i tumau do saitun,” ka dau.
I Raja' om i Piro-Piro ot Oturan do Pasal do Tadau dot Agayo
1 Om boros kad Tuhan, it Asawat Kopio, “Iri nopo wawayaan di ponong id koulayon, i wayaan do kumaa do hiri'd natad do ponong id suang om mositi' nod tabanan do solinaid dit onom o tadau do koporobuatan, nga' tontok nopo do tadau'd Sabat om di Tadau dot Agayo do Tulan do Wagu, om mositi' nod iwangan iri. 2 Om sumuang nondo i raja' do momorinta' do tontok do piro-piro o tadau'ddi, do hiri'd bilik dit agayo do mantad hiri'd natad dit id soliwan, om mongoi nondo iyau ingkakat do hiri'd toning di tisan do wawayaan, do daamot dit imam do monorob do koinsanai di porsombahan do sinumbali' om i porsombahan do piombolutan di pinatahak di raja'. Om motud nondo i raja' do tumuku' dot id Tuhan do hiri'd wawayaan diri om sumoliwan nogindo iyau. Om a' no koino-ino do tabanan i wawayaan diri do gisom do totuong. 3 Pointikid-tikid do tadau'd Sabat om Tadau dot Agayo do Tulan do Wagu, om oinsanan nopo i rayat dot apatut do mongoi otud do tumuku' dot id Tuhan do hiri'd dotimbabaan di wawayaan diri. 4 Om tontok nopod tadau'd Sabat om mositi' nod papatahak i raja' dot id Tuhan do porsombahan do sorobon dot onom o tinan do tanak do dumba' om songinan o dumba' do tontoluhan, om it aiso' ngai' nopo o bohiton do tinan. 5 Om potonggoyon nopo do pointikid-tikid di dumba' do tontoluhan diri, om porsombahan do gandum do 17.5 o lito do kogumuo', om potonggoyon no do pointikid-tikid di tanak do dumba' om songkuro nopo o kogumuo' do gandum do korohian dau do papatahak. Om potonggoyon no do pointikid-tikid di porsombahan do gandum, om 3 o lito do tumau do saitun. 6 Om tontok no di Tadau dot Agayo do Tulan do Wagu om porsombahan nopo do patahakon om songinan o sapi' do tontoluhan dit okoro' po, om onom o tinan do tanak do dumba', om songinan o dumba' do tontoluhan, dit aiso' ngai' nopo o bohiton do tinan. 7 Om potonggoyon nopo do pointikid-tikid do songinan o sapi' do tontoluhan om i kambing do tontoluhan, om porsombahan do gandum do 17.5 o lito do kogumuo', om potonggoyon no do pointikid-tikid di dumba' om songkuro nopo o kogumuo' do porsombahan do korohian di raja' do papatahak. Om tolu o lito do tumau'd saitun do patahakon do potonggoyon do pointikid-tikid do porsombahan do gandum. 8 Soira' nopod mongoi i raja' sambayang do hiri'd Walai'd Sasambayangan dot Agayo, om mositi' nod maya' iyau do hiri'd bilik dot agayo' om sumoliwan nga' maya' i' di wawayaan di winayaan dau di suminuang i'. 9 Soira' nopod mongoi sambayang dot id Tuhan i tulun dot ogumu' do tontok do tadau dot agayo do nunu nopo, om iri nopo i tulun do suminuang do minaya' di wawayaan do ponong hiri'd utara, om mositi' nod maya' di wawayaan do ponong id salatan do sumoliwan, om iri no i minaya' di wawayaan do ponong id salatan di suminuang i' om mositi' nod maya' di wawayaan di ponong id utara do sumoliwan. Om a' koino-ino do haro o songulun piya do maya' kawagu di wawayaan di sinuang dau do sumoliwan iyau, suwai ko' i wawayaan dit id hapak o wayaan dau. 10 Om iri nopo raja' nga' mositi' nod sumuang di Walai'd Sasambayangan dot Agayo do poingandad di tulun dot ogumu', om mandad iyau diyolo' do sumoliwan. 11 Tontok nopo di tadau dot agayo, om di moginakan, om porsombahan nopod gandum om 17.5 o lito do kogumuo' do potonggoyon do pointikid-tikid do songinan o sapi' do tontoluhan ko' dumba' do tontoluhan, om potonggoyon nopo di pointikid-tikid do songinan o tanak do dumba', om songkuro nopo o korohian di tulun di sumambayang do papatahak. Om potonggoyon nopo do pointikid-tikid di porsombahan do gandum, om tolu o lito do tumau'd saitun. 12 Soira' nopo dot orohian i raja' do papatahak do porsombahan dot iri tuu porsombahan do sorobon ko' i porsombahan do piombolutan, om iwangan indo i wawayaan di ponong id koulayon, i wawayaan do kumaa do hiri'd natad di ponong id suang, do wayaan di raja'. Om kowoyo-woyoo' nopo dau do papatahak di porsombahan di sumbolion diri nga' miagal nopo di kowoyo-woyoo' dau do papatahak do porsombahan do tontok do tadau'd Sabat. Om kosoliwan pondo iyau om lomusan no do monobon kawagu i wawayaan,” ka dau.
I Porsombahan do Monikid Tadau
13 Om boros kad Tuhan, “Pointikid-tikid do kosuabon om mositi' nod papatahak dot id Tuhan do tanak do dumba' di sontoun nogi' o tumur, om it aiso' o bohiton do tinan do maan do porsombahan do sorobon. Om mositi' nod patahakon o porsombahan diti do monikid kosuabon. 14 Om papatahak nogi' do porsombahan do gandum do duwo kilogram do kogumuo' do monikid kosuabon, om sonlito o tumau'd saitun do poroloton di gandum. Om oturan nopod pasal do porsombahan do gandum diti, i patahakon dot id Tuhan do pointikid do tadau, nga' poinggirot kasai' nopo do gisom dot alaid. 15 Mositi' nod patahakon kasai' dot id Tuhan o porsombahan diti do monikid kosuabon: songinan o tanak do dumba', om gandum, om tumau'd saitun. Om mositi' nod patahakon iti do monikid kosuabon do gisom dot alaid,” ka dau.
I Tana' di Don Raja'
16 Om poingkaa no o ponuhuan do Tuhan it Asawat Kopio, “Ondung patahakon di raja' o songkoiyonon di tana' dau dot id tangaanak dau'd kusai do maan di tanak do tungkusan, om asanganu no di tanak iri, om osiliu do tungkusan di sompiiyon dau. 17 Nga' ondung papatahak i raja' do songkoiyonon di tana' dau dot id iso' di susuhuon dau, om koguli' i' kawagu dot id raja' iri dot orikot i Toun do Kopogulian. Tu' iri i raja' o sanganu'ddi, om iyau no om i tangaanak dau'd kusai o kasanganu kasai'ddi do gisom dot alaid. 18 Om iri nopo raja' nga' a' no kopio koino-ino do manganu di tinungkusan di rayat dau. Koinsanai di tana' di patahakon dau dot id tangaanak dau'd kusai, om mositi' no dot i tana' di nokotobilang mantad do maan do dau om a' i' iyau koponginggorit dot isai nopo di tulun ku, om a' iyolo' kotongkiad di tana' di tinungkusan diyolo',” ka dau.
Dapur di Walai'd Sasambayangan dot Agayo
19 Om tanggayai oku noddi di kusai'ddi do kuminaa do hiri'd wawayaan di bilik dit olidang di potimbaba' ponong id utara, it id toning di wawayaan do ponong id salatan di natad do ponong id suang. Iti nopo nga' bilik dit imam. Om tuduko' no dau ot iso' o kinoiyonon dit id bombong di bilik do ponong id kotonobon, 20 om boro-boros nod poingkaa, “Hiti nod kinoiyonon diti o pomolosuan dit imam do daging di pinatahak do maan do porsombahan do pongidu'd dusa om i porsombahan do pambayar do tutang. Om hiti o pagansakan di porsombahan do gandum, om aiso' i' ot ongokooro' piya di porsombahan dot olidang dot oigitan do hilo'd natad di ponong id soliwan, om a' i' oontok do kosusaan i tulun dot ogumu',” ka dau. 21-22 Om angatai oku noddi dau do hiri'd natad di ponong id soliwan om pointongo' oku no dau dot otikid nopod natad dot ongokooro' it apat o linsuk. Kogoyoo' nopo di natad diri nga' 20 o mito do konoruo' om 15 o mito do kalaabo'. 23 Om ongkitolig ngai' nopod watu o pointutuk di natad diri, om kiropuhan do pointopis di tolig. 24 Om boros ka di kusai'ddi dot id doho', “Iti ngai' no i dapur dot iyonon di susuhuon do hiti'd Walai'd Sasambayangan dot Agayo do mamalasu' di porsombahan do sinumbali', i pinatahak di tulun dot ogumu',” ka dau.
Tudan do Waig do Hiri'd Walai'd Sasambayangan dot Agayo
1 Om pogulio' oku no kawagu di kusai'ddi do hiri'd wawayaan do sumuang di Walai'd Sasambayangan dot Agayo. Om kokito ku do lumuyung nopo o waig do mantad hiri'd siriba' di wawayaan diri, om lumuyung do ponong id koulayon, i kotimbabaon di Walai'd Sasambayangan dot Agayo. Om lumuyung i waig diri do mantad ponong id salatan do hiri'd siriba' di Walai'd Sasambayangan dot Agayo, om kawaya' di pananaraban do porsombahan do ponong id salatan. 2 Om posoliwano' oku noddi di kusai'ddi do mantad hiri'd Walai'd Sasambayangan dot Agayo do minaya' di wawayaan do ponong id utara om posorilio' oku no do minongoi'd hiri'd wawayaan di potimbaba' ponong id koulayon. Om haro o bawang dot okooro' do lumuyung do sumoliwan do mantad ponong id salatan di wawayaan diri. 3 Om tipongo' no di kusai di sukud do poninipong dau o poingugus di bawang dot okooro'ddi do limo nahatus o mito do kosoduwo' do poingkaa ponong id koulayon, om sinuhu' oku dau do sumoborong di bawang diri. Om korikot no dot id tampangil ku i waig do hiri. 4 Om tipongo' no kawagu dau o limo nahatus o mito, om korikot noddi dot id totud ku i waig do hiri. Om tipongo' no kawagu dau o limo nahatus o mito do poingugus om korikot noddi dot id tawak ku i waig do hiri. 5 Om tipongo' no kawagu dau o limo nahatus o mito do mantad hiri, om aralom tomod diri i waig, gisom dot a' oku no milo do mamanau. Om a' no milo'd a' kumaau do sumoborong diri. 6 Om boros ka dau dot id doho', “Oi tulun, antangai ngai' no kopio iti,” ka dau. Om tanggayai oku no kawagu dau do guminuli' do hiri'd tisan di bawang, 7 om soira' di nokorikot oku'd hiri, om kokito ku dot ogumu' o kayu do hiri'd mitingisan di bawang. 8 Om boros ka dau dot id doho', “Iti nopo waig om lumuyung do ponong id koulayon do mantad id pomogunan diti, om korikot do hilo'd Rantai do Bawang do Yordan om gisom do korikot di Rahat do Napatai. Om koluyung nopondo iti do hilo'd Rahat do Napatai om otingalanan nondod waig dot osonong i waig dot oosin do hilo'. 9 Om honggo nopo o koluyungon diti bawang diti, om hilo' no o koiyonon do piro-piro o bansa'd nintorusan om sada'. Om osiliu nondo di bawang diri i Rahat do Napatai, do waig dit a' oosin, om honggo nopo o koluyungon do waig diti, om haro no o koposion do hiri. 10 Om mantad poddi do hiri'd tudan do waig dot In-Gidi om poingompus nopo do gisom do korikot di tudan do waig dot In-Iglaim, om ogumu' no o tulun do monginginsada' do hiri'd tisan, om hilo' no o pawaladan diyolo' di rambot diyolo'. Om miagal pondo di hilo'd Rahat do Tanga' o kogumuo' do bansa'd sada' do hilo'. 11 Nga' iri nopo waig di hiri'd buyut om i hiri'd botung do poingompus di tisan diri om oosin kasai' i' o waig. Iyo kasai' iddi tu' tadon do silaon. 12 Om mitingisan nopo di bawang diri om mogisuayan nopondo o kayu do sumuni di taakanon o tua'. Om a' i' tumatak i roun di kayu'ddi om a' tumingkod do mongua'. Haro kasai' nopondo o tua' tu' mongua' kasai' nopo do monikid tulan, tu' opiyopos i' di waig do mantad hiri'd Walai'd Sasambayangan dot Agayo. Om iri nondo i tua' di kayu'ddi o taakanon, om iri no roun om maan do tubat,” ka dau.
Wolit di Tana'
13 Om boros kad Tuhan, it Asawat Kopio, “Iti no o wolit di tana' di bohogion do potikidon di hopod om duwo o payat dot Israil. Om iri nopo payat di Yusup nga' kaanu do duwo o bahagi'. 14 Nokosumpa' oku no dot id komolohingan dokoyu do patahakon ku diyolo' iti tana'; iyo nopoddi, om onuo' no iti tana' om iyoon no o pamahagi' dot id pogialatan dokoyu. 15 Iri nopo wolit do ponong id utara nga' mimpuun di Rahat do Tanga' om poingkaa ponong id koulayon do gisom do korikot di bandar do Hitlon, om poingkaa do hilo'd bandar do Hamat, om potilombus do hilo'd bandar do Sidad, 16 om poingkaa do hilo'd bandar do Birota, om bandar do Sibraim (i kabandaran do hilo'd pialatan do Bandar do Damsik om Bandar do Hamat), om poingkaa do hilo'd bandar do Hasar-Inan, it id piwolitan do bandar do Hauran. 17 Iri nopo wolit do ponong id utara om mimpuun do mantad di Rahat do Tanga' om poingkaa ponong id koulayon, do gisom do korikot do hilo'd bandar do Hasar-Inan; om ponong id utara nopo do wolit diti nga' i watas do Damsik om Hamat. 18 Om wolit nod ponong id koulayon, om poingkaa ponong id salatan, do pinoimpuun dot id iso' o kinoiyonon dot id piolitan do watas do Damsik om watas do Hauran. Om iri no i Bawang do Yordan o ponokowolit di tana' dot Israil do ponong id kotonobon, om Giliad o ponokowolit do ponong id koulayon, do gisom do hilo'd Tamar, i hilo'd tisan do Rahat do Napatai. 19 Om wolit no do ponong id salatan om poingkaa ponong id salatan do ponong id kotonobon, om mimpuun do hilo'd Tamar, om korikot do hilo'd tudan do waig do Kadis-Moriba, om wolit no do poingkaa do ponong id utara do pongid kotonobon do poinsusui di piwolitan do pomogunan do Masir, om gisom do korikot do hilo'd Rahat do Tanga'. 20 Om wolit no do ponong id kotonobon om i tisan do Rahat do Tanga', om poingkaa nondo do ponong id utara, do gisom do korikot dot id iso' o kinoiyonon di ponong id kotonobon do mantad di ralan do kumaa do hilo'd Hamat. 21 Bohogion no i tana'ddi dot id pogialatan dokoyu, i payat dot Israil, 22 om iyokoyu no o kasanganu do tana'ddi do gisom dot alaid. Om iri nogi' i bansa'd suwai di poingiyon dot id rolot dokoyu, om i hiti'd pomogunan diti o kinosusuon do tangaanak diyolo', nga' mositi' nod kaanu do bahagi' di tana' do tontok do bohogion dokoyu. Om mositi' nod poiyoon iyolo' di bansa' dot Israil, om kopongundi' iyolo' do manganu di bahagi' di tana' do miagal di payat dot Israil. 23 Pointikid-tikid di bansa'd suwai di momogun-mogun do hiti'd pomogunan diti om mositi' nod onuan do bahagi' do miagal di payat dot Israil di kinosugkuon diyolo'. Iyoho' no, i Tuhan it Asawat Kopio, o minomoros diti,” ka dau.
Pinamahagi' di Tana' dot id Pogialatan di Payat
1-7 Iri nopo wolit do ponong id utara om pinoimpuun do hiri'd Rahat do Tanga'; om poingkaa i wolit diri do ponong id koulayon, do gisom do korikot di bandar do Hitlon, om i ralan do kumaa do hilo'd Hamat, om i bandar do Hasar- Inan, om gisom do korikot di wolit dit id pialatan do bandar do Damsik om bandar do Hamat. Pointikid-tikid do payat diti om mositi' no dot onuan do bahagi' di tana', do kogoyoo' nopo om mantad di wolit ponong id koulayon om poingkaa ponong id kotonobon om gisom do korikot di Rahat do Tanga', om mantad id utara om gisom dot id salatan do pogisuhut-suhuton do mamahagi' do miagal diti: Dan Asur Naptali Manasi Ipraim Rubin Yohuda
Watas di Pinotobilang do Hiri'd Tanga' di Pomogunan
8 Om iti no bahagi'd tana' diti om mositi' no do potobilangon do maan di natantu' mantad. Om konoruo' nopodti nga' 12.5 o kilomito, do mantad id wolit di ponong id utara om gisom do ponong id salatan. Om miagal iddi o konoruo' di wolit do ponong id koulayon, om i wolit do ponong id kotonobon, do miagal di bahagi' do pinatahak di payat dot Israil. Om hiri no o pamaalan di Walai'd Sasambayangan dot Agayo. 9 Om hiri nopod tanga-tanga' do bohogian do tana'dti om haro o songkoiyonon o tana' do potobilangon do maan do don Tuhan, do 12.5 kilomito do konoruo', om 10 o kilomito do kalaabo'. 10 Om mositi' no do bohogian do tana' it imam do mantad id tana' dot olidang diti. Kogoyoo' nopo di diyolo'd bahagi' do mantad ponong id koulayon om poingkaa ponong id kotonobon om 12.5 o kilomito, om limo o kilomito do mantad ponong id utara om poingkaa ponong id salatan. Om hiri nod tanga-tanga' do kinoiyonon do tana'dti o waalan di Walai'd Sasambayangan dot Agayo. 11 Iti nopo kinoiyonon do tana' dit olidang diti nga' patahakon dit imam di sinakagon di Sadok. Tu' otorodok kopio i' iyolo' do minogobi-obi'd Tuhan om a' tuminanud di tulun dot Israil do suwai do minomonsoi dot araat, do miagal di tulun do suwai do mantad id payat di Liwi, i payat di tadon diyolo'. 12 Om kaanu nondo i sinakagon di Sadok do kinoiyonon di potobilangon dot id toning di kinoiyonon do tana' dot aanu di tulun do Liwi. Om iri nondo i tana' do pinotobilang diri o kinoiyonon dit olidang kopio. 13 Om konoruo' nopo di tana' di tulun do Liwi om 12.5 o kilomito do mantad ponong id koulayon om korikot do ponong id kotonobon, om kalaabo' no om limo o kilomito do mantad ponong id utara om korikot do ponong id salatan. Om pointalad iti di tana' dit imam. 14 Iri nopo i tana' di pinotobilang do maan do don Tuhan, om iri no i tana' dit osonong kopio do hiri'd pomogunan diri, om a' no koino-ino do padagangon o tongosanrangau piya di tana'ddi ko' poolonon ko' posongonuan do tulun do suwai. Tu' iri nopo tana'ddi om nokotobilang no do maan do don Tuhan, om iyau no o sanganu'ddi. 15 Iri nopo noolu-olu' di tana' di pinotobilang diri, i 12.5 o kilomito do konoruo' om 2.5 o kilomito do kalaabo', i ponong id salatan, om a' no olidang, om milo no di rayat do maan do pomogun-mogunan om paakan-akanan do tayam-tayam. Om mositi' no do wansayan do bandar o hiri'd tanga-tanga'ddi. 16 Om pabasagi' nondo i bandar diri do 2,250 o mito do konoruo' om irad iddi o kalaabo'. 17 Om posorili' nopo di bandar diri nga' haro o linanggaan do 125 o mito do kalaabo'. 18 Om iri nopondo i tana' dot oolu' dot owonsoi i bandar diri, i tana' di ponong id salatan kopio di kinoiyonon dot olidang diri, i limo po kilomito do konoruo' om 2.5 o kilomito do kalaabo' do ponong id koulayon, om limo kilomito do konoruo' om 2.5 o kilomito do kalaabo' do ponong id kotonobon, om patahakon di tulun di songingiyon do hiri'd bandar do maan diyolo'd pomutanam-tanaman. 19 Isai nopo i poingiyon do hiri'd bandar diri, do mantad id koinsanai'd payat dot Israil, om koino-ino i' do momutanom do hiri'd tana'ddi. 20 Om koinsanai nopo do tana'ddi, do kohompit i tana' di pinotobilang, om i tana' di wansayan do bandar, om pabasagi' nopo do 12.5 o kilomito do konoruo' om irad iddi o kalaabo'. 21-22 Ponong id kotonobon nopo om ponong id koulayon do mantad id tana' di pinotobilang diri, dot i waalan di Walai'd Sasambayangan dot Agayo, om i tana' dit imam, om i tana' di tulun do Liwi, om i wansayan do bandar, om iri no i raja' o sanganu. Hiri nopod ponong id koulayon do tana'ddi om poillombus nopo do gisom do korikot di piwolitan do ponong id koulayon; om ponong id kotonobon no om gisom do korikot di Rahat do Tanga', dot id pialatan di tana' do Yohuda om tana' do Binyamin.
Tana' di Payat do Suwai
23-27 Ponong id salatan nopo di tana' do pinotobilang diri, om bohogion do poikidon di piro-piro o payat dit a' po nobohogian do tana'; i tana' do mantad id wolit do ponong id koulayon om poingkaa ponong id kotonobon do gisom do korikot di Rahat do Tanga', do pogisuhut-suhuton nopo do mamahagi' do poikidon diyolo' do mantad hiri'd utara' om poingkaa ponong id salatan: Binyamin Simion Isakar Sibulon Gad 28 Ponong id salatan nopo di tana' do pinabahagi' dot id di Gad, i mimpuun do mantad ponong id salatan do ponong id kotonobon do mimpuun do hilo'd Tamar, do kawaya' di tudan do waig do Kadis-Moriba, om poingkaa nogindo do ponong id utara do ponong id kotonobon, do poinsusui di piwolitan do Masir do gisom do korikot di Rahat do Tanga'. 29 Om boros kad Tuhan, it Asawat Kopio, “Iyo noddi o karalan-ralano' do mamahagi' di tana' do potikidon di payat dot Israil do maan do diyolo'd songonuon,” ka dau.
I Piro-Piro o Wawayaan do Yorusalim
30-34 Haro o hopod om duwo o wawayaan do sumuang di bandar do Yorusalim. Om oiyo nopo o konoruo' dit apat o tolig di bandar diri, do 2.25 o kilomito, om sorotoluan do wawayaan o pointikid-tikid dit apat o tolig. Om pinasangai ngai' nopo do ngaran di payat dot Israil o ngaran di wawayaan diri. Iri nopo piro-piro o wawayaan do ponong id utara nga' pinungaranan do Rubin, om Yohuda, om Liwi; om iri no i piro-piro o wawayaan di hiri'd tolig do ponong id koulayon om pinungaranan do Yusup, Binyamin, om Dan; om iri no i piro-piro o wawayaan do hiri'd tolig do ponong id salatan om pinungaranan do Simion, Isakar om Sibulon; om iri no i piro-piro o wawayaan do hiri'd tolig do ponong id kotonobon om pinungaranan do Gad, om Asur om Naptali. 35 Konoruo' nopo do pointikid-tikid di tolig di bandar diri om 9 o kilomito. Om ngaran nopondoddi bandar diri do pomungaran do tulun do mantad do baino' om: “Hino-o-Tuhan-do-Hiti”!
Tangaanakwagu do Yohudi do Hiri'd Walai di Raja' Nobukadnisar
1 Tontok di kotolu nod toun di Raja' Yoyakim do momorinta' do Yohuda, om ngoyo' nod i Nobukadnisar i raja' do Babil, songodo' o Yorusalim om tinurungku' dau i bandar diri. 2 Om pologoso' no iyau'd Tuhan do minanangkap di Raja' Yoyakim om minagahau do wookon di dapu' dot angagayo gatang do mantad hiri'd Walai'd Sasambayangan dot Agayo. Om minononggoi nogi' iyau do piro-piro o tulun di nangatangkap dau, om poiyono' no dau iyolo' do hiri'd walai di ponokokinorohingan dau do hilo'd Babil. Om poopio' no dau i dapu' do nahau dau'ddi do hiri'd walai di tingolig dau. 3 Om suhuo' noddi di raja' i Aspinas, i boyoon do walai'd raja' do momili' do piro-piro o tulun dot id pogialatan di tulun dot Israil di nangatanggayan diri; i piro-piro o tangaanakwagu do sinakagon do raja' om i sinakagon do tangaanak do raja'. 4 Om mositi' nod oligkang, om oilo, om i nokopinsingilo do nunu nopo om it opintar, om it ogumu' o toilaan, om aiso' o bohiton do tinan, o tangaanakwagu'ddi, om osorupai i' do kumaraja' do hiri'd walai di raja'. Om sinuhu' nogi' i Aspinas do monuduk diyolo' do mambasa' om monulis do boros do Babil. 5 Om minonuhu' nogi' i Raja' do manahak diyolo' do taakanon om waig dot anggur dot inumon do miagal di patahakon di tulun do suwai do hiri'd walai di raja', do pointikid do tadau. Om atalib pondo o tolu o toun do kopinsingilaan diyolo', om potimbabaon nogindo iyolo' di raja'. 6 Iri nopo wookon di tangaanakwagu di nopili'ddi nga' i Daniol, i Hanania, i Misail om i Asaria, i mantad ngai' nopo id payat do Yohuda. 7 Om pungaranai no iyolo' di boyoon do walai'd raja' do ngaran do wagu: i Biltisasar, i Sadrak, i Misak, om i Abidnigo, o pinomungaran diyolo'. 8 Om tontuo' no di Daniol dot id suang do ginawo dau dot a' iyau monosomu' do tinan dau, dot i taakanon om i waig dot anggur do mantad hiri'd walai di raja' o kososomu'. Om pokianu noddi iyau di Aspinas do taakanon do suwai. 9 Om polisiho' noddi do Kinorohingan di Daniol i Aspinas. Om nuhupan i' i Daniol do Kinorohingan tu' ninsianan iddi iyau di Aspinas. 10 Nga' moddosi i' i Aspinas di raja', om boros kaddi dau dot id di Daniol, “Natantu' mantad no di raja' o taakanon om tinumon nu, om ondung a' koiyo di tangaanakwagu'd suwai o kosonongo' do tinan nu, om atantu' no do patayon oku di raja',” ka dau. 11 Om ongoi noddi i Daniol boro-boros di tulun do sinuhu' di Aspinas do madtamong dau om i tolu o tambalut dau'd suwai. Boros kad Daniol, 12 “Toinuon nopo iyahai do solinaid do hopod o tadau; onuan nopo iyahai'd rinapa' dot akanon om waig toomod do tinumon. 13 Om pataladon nogindo iyahai di tangaanakwagu'd suwai di mangakan do taakanon di natantu' mantad di raja', om poboroson nopondo o tosorou nu do miontok di kokitanan nu dahai,” ka dau. 14 Om pangakun no iyau dot umbalan diyolo' o miagal diri do solinaid do hopod o tadau. 15 Om katalib noddi o hopod o tadau, om osonong-sonong nogiddi o kokitanan do tinan diyolo' om okoris ko' mantad di tulun do suwai di minangakan di taakanon di don raja'. 16 Om mantad poddi om pologoso' no iyolo' di madtatamong do mangakan do rinapa', om monginum do waig toomod, om a' mangakan di taakanon do patahakon di raja' dot id diyolo'. 17 Om onuwai nod Kinorohingan it apat o tangaanakwagu'ddi do toilaan om koiloo' do mambasa' om mongilo do komoyon di songintulis dot id buuk om komiloo' do momusorou. Om suwai no ko' mantad diri, om onuwai po dau i Daniol do toilaan do mongilo do komoyon dit okito dot id pinointalang om nipi. 18 Om katalib poddi i tolu o toun di tinantu' di raja' do kopinsingilaan diyolo', om potimbabao' no di Aspinas o koinsanai di tangaanakwagu'ddi dot id di Raja' Nobukadnisar. 19 Om boro-boros ngai' nopo iyolo' di raja', nga' i Daniol no, om i Hanania, om i Misail, om i Asaria o poimaha' o toilaan dot id suang do nunu nopo ko' mantad di tulun do suwai. Om pilio' noddi iyolo' do kumaraja' do hiri'd walai di raja'. 20 Om nunu nopo o tuhoton dot uhoton di raja', ko' nunu nopo o kosusaan di poboroson dau, nga' iti nopo tapat o tangaanakwagu om inghopod po karalom o toilaan ko' mantad di mogogontong om i bobolian do pointongkop do pomorintaan di raja'. 21 Om pakaraja' kasai' no i Daniol do hiri'd walai di raja' do gisom do naala' di Koris i raja' do Porsia, o Babil.
Nipi di Nobukadnisar
1 Tontok di koduwo nod toun di Raja' Nobukadnisar do momorinta', om pongipi no iyau. Om atangkabo tomod diri iyau do kosorou di nipi dau, gisom dot a' no iyau koodop. 2 Om lohowo' noddi dau i mogogontong, om i piro-piro bobolian, om i mogogontong do nasip, om it ongoilo do limu', do mongoi poilo dau do komoyon di nipi dau'ddi. Om soira'ddi minongoi rapou di raja' i piro-piro tulun diri, 3 om boros ka dau dot id diyolo', “Atangkabo tomod oku do kosorou di nipi ku. Om mokiilo oku ondung nunu o komoyon diri,” ka. 4 Om boros ka diyolo' do minomoros do boros dot Aram, “Maha' daa om otogui o raja'! Susuyo' no ino nipi nu om poboroson i' dahai o komoyon diri dot id diya',” ka diyolo'. 5 Om boros ka di raja' dot id diyolo', “Natantu' ku no dot id suang do ginawo ku dot iyokoyu o monusui di nipi ku om sunudan oku nogindo do komoyon diri. Ondung a' kou koilo, om pogitobilang-bilangon ku nopondo o tinan dokoyu om huyason ku o walai dokoyu. 6 Nga' ondung koilo kou do momisunud doho' di nipi ku om i komoyon diri, om somulian ku nondo iyokoyu dot ipuhawang om pangkat dot asawat. Sunudai oku nod dinondo ondung nunu i nipi ku'ddi om ondung nunu o komoyon diri,” ka dau. 7 Om boros ka kawagu diyolo' dot id raja', “Ondung susuyan daa iyahai do Tuan Raja' di nipi'ddi, om posunudon i' dahai o komoyon diri,” ka. 8 Om boros ka di raja', “Otopot no kopio i tosorou ku! Orohian kou nod mangayi'd maso, tu' noilaan no dokoyu do nokopomusorou oku no dot 9 iyoon ku o pomohukum dokoyu ondung a' dokoyu posusuyon dot id doho' i nipi ku. Nokopogipapakat kou no do mongudut doho' tu' mogondos kou nopo daa do posimbanon ku i natantu' mantad ku. Sunudai oku pogi' di nipi, om oilaan ku nogindo do milo kopio kou do posunud do komoyon diri,” ka dau. 10 Om boros kaddi di mogogontong dot id raja', “Iso' piya'd tulun do pointongkop diti pomogunan nga' aiso' i' o milo do posunud dot id Tuan Raja' di pokionuon nu. Aiso' i' o nokoumbal dot ongoiso' piya'd raja', dot iri piya it agayo om it okoris kopio, do monuhu' di mogogontong, om i bobolian, om it ongoilo do limu', do momonsoi'd miagal diti. 11 Iti nopo ponuhuan do Tuan Raja' om adalaan no kopio kapagon, om aiso' no songulun piya do milo'd momonsoi'ddi do suwai ko' kinorohingan, nga' a' i' iyolo' poingiyon dot id rolot do tulun,” ka diyolo'. 12 Om gowoi poddi do kotogod no tomod i raja' do nokorongou'ddi. Om ponuhu' no iyau do mamatai ngai' di tulun dit ongoilo kopio do hilo'd Babil. 13 Om poboroso' noddi di raja' i tisuhu' dau do mamatai ngai' diyolo', om kohompit nogi' i Daniol om iri ngai' i tambalut dau do patayon.
Pinointalang do Kinorohingan dot id di Daniol i Nipi om Komoyon di Nipi
14 Om ongoi noddi i Daniol solowot di Ariok, i boyoon do madtatamong di raja', om i nosuhu' do mongoi pamatai. 15 Om boro-boros noddi iyau dot opian do minuhot di Ariok ondung nokuro tu' minonuhu' i raja' do momonsoi'd miagal kopio'ddi karaat. Om sunudai nod i Ariok i Daniol di nosiliu. 16 Om tilombus nopoddi i Daniol do minongoi pokianu'd maso dot anaru-naru do mongoi solowot di raja' om osunudan i' dau i raja' do komoyon di nipi'ddi. 17 Om uli' noddi i Daniol do minongoi pomisunud di piro-piro tambalut dau: i Hanania, i Misail om i Asaria, di nosiliu'ddi. 18 Om sunudai no dau iyolo' do sumambayang dot id Kinorohingan di hilo'd surga do mokiinsian dau om potudukon i' dau i nipi dit a' oilaan diri dot id diyolo', om a' indo iyolo' apatai do kotonggoi di tulun do suwai dot ongoilo do hilo'd Babil. 19 Om totuong poddi om pointalango' nod Kinorohingan it a' oilaan diri dot id di Daniol dot id pinointalang. Om royoho' noddi dau i Kinorohingan do hilo'd surga. 20 Boros ka dau, “Kinorohingan nopo om kitoilaan i' om kisinundu, royohon no iyau do gisom dot alaid. 21 Iyau no i manantu' do maso om kooyu-oyuo' do talun, om iyau o posiliu om iyau o mongidu' do raja'. Iyau no i manahak do toilaan, om pomusarahan di kosuhut. 22 Popointalang iyau di songinlisok dit angaralom kopio. Oilaan i' dau i poinlisok dot id totuong, om nosorilian iyau do tanawau. 23 Royohon ku iya', om pusohon ku iya', oi Kinorohingan di komolohingan ku. Nonuan oku diya' do toilaan om kokorisan, om nosimbar nu o sambayang ku. Om notudukan nu iyahai ondung nunu o posunudon dahai dot id raja',” ka dau.
Sinusui di Daniol i Nipi di Raja' om Pinoboros Dau o Komoyon Diri
24 Om ongoi noddi i Daniol solowot di Ariok, i sinuhu' di raja' do mongoi pamatai di tulun dot ongoilo'ddi. Om boros kad i Daniol dot id di Ariok, “Kada' iyolo' patayo'. Ngoyo' oku posolowoto' di raja', om sunudan ku i' iyau do komoyon di nipi dau,” ka dau. 25 Om tilombus nopo i Ariok do minongoi posolowot di Daniol di Raja' Nobukadnisar, om sunudai no dau i raja' do poingkaa, “Haro o nabantalan ku'd iso' di tulun do Yohudi di nangatanggayan do hiti do koilo'd posunud do komoyon di nipi do Tuan Raja',” ka dau. 26 Om boros ka di raja' dot id di Daniol, i pinungaranan dot i Biltisasar, “Milo ko i' do momisunud doho' di nipi ku om komoyon diri?” ka dau. 27 Om boros kad Daniol, “Oi Tuan Raja', aiso' i' o tulun dit oilo, om i mogogontong, om i mogogontong do nasip, om i mongingilo do komoyon do rombituon do milo'd posunud diri dot id Tuan Raja'. 28 Nga' haro i' o Kinorohingan do hilo'd surga do popointalang do koinsanai di poillisok. Sinunudan ko dau, oi Tuan Raja', dit osiliu do koimbagu. Om sunudan ku nondo iya' di nipi, om i pinointalang do nokito nu di maso nu'd koodop. 29 Tontok di koodop ko oi Tuan Raja', om nokoipi ko do pasal dit id dabantalan. Om pinointalangan ko'd Kinorohingan, i popointalang do koinsanai di poinlisok, dit osiliu do koimbagu. 30 Om iri nopo i poinlisok daa'ddi nga' pinointalang i' dot id doho', om okon i' ko' aralom o toilaan ku ko' isai nopo, nga' popoilo no do Tuan Raja' do komoyon di nipi nu om kosuhut ko i' di pomusarahan do nosorou nu, oi Tuan Raja'. 31 Oi Tuan Raja', id suang nopo di pinointalang do nokito nu'ddi om nokokito ko do tininganak dot agayo do poingkakat dot id toguang nu. Om mogulinau tomod iri, nga' koronob iddi kopio o kokitanan. 32 Iri nopo tulu di tininganak diri nga' tamas di nosompipi' do winonsoi; om iri no kangkab om longon om pirok do winonsoi; om iri no tawak om poo om tambaga' do winonsoi; 33 om iri nopo gakod om basi' do winonsoi, om iri no lapap om basi' do winonsoi o sampaping, om lagit do winonsoi o sampaping. 34 Om soira'ddi poingontong ko daa di tininganak diri, om liid no o watu dot agayo do mantad hiri'd rungas, om aiso' i' o tulun do minongoi kimbir-kimbir diri. Om koonong no di watu'ddi i lapap do basi' om lagit di tininganak, om komumuk nopo. 35 Om tontok iddi do nahaba' i tininganak diri, om nosiliu do kinotimungon do basi' om lagit, om tambaga' om pirok, om tamas, do miagal poddi pupuk do hilo'd pamagamasan do gandum do dongmagadau. Om kotilib ngai' nopo do tongus i pointimung diri, om aiso' no o noolu-olu'. Nga' suminiliu iddi do nuluhon i watu dot agayo, i minamahaba' di tininganak diri do gisom dot irad do nuluhon kagayo om nokoponu' diti pomogunan. 36 Iri no i nipi nu'ddi, oi Tuan Raja', om sunudan ku nondo o Tuan Raja' do komoyon diri. 37 Oi Tuan Raja', iya' no o raja' dit agayo kopio. Siniliu ko'd Kinorohingan di hilo'd surga do raja' dot id sawat do koinsanai'd raja', om nonuan ko dau diti pomorintaan diti, om nonuan ko do kuasa', om kokorisan, om kobontugan. 38 Siniliu ko dau do pomorinta' do koinsanai'd kinoiyonon di kitulun do hiti'd pomogunan om pomorinta' dot id sawat do koinsanai'd tombolog om nintorusan do suwai. Iya' no i tulu do tamas di tininganak diri. 39 Nga' opupusan nopondo o pomorintaan nu, om haro po kawagu o pomorintaan do suwai do sumusuhut, nga' a' no koiyo diti pomorintaan nu kagayo. Om sumusuhut noddi, om haro po o pomorintaan do kotolu, i pomorintaan dot i tambaga' o pinoiyaan, i momorinta' do pointongkop diti pomogunan. 40 Om haro pondo o pomorintaan do kaapat, i miagal do basi' kokodou, tu' kababak om kopurok do nunu nopo. Om poingkuro nopo do momurok om mamaraag i basi' do nunu nopo, om miagal noddi i pomorintaan do kaapat diri do momurok om mamaraag do koinsanai'd pomorintaan do suwai. 41 Om nokito nu nogi' iri dot i nopo lapap om i tunturu'd lapap do tininganak diri nga' lagit o sampaping om basi' o sampaping. Om komoyon nopodti nga' mibahagi' nondo o pomorintaan diri do koimbagu. Nga' haro i' o kokorisan do pomorintaan diri tu' kirolot i' do basi' i lagit. 42 Iri nopo i tunturu'd lapap di basi' o wookon om lagit o wookon, om komoyon nopoddi nga' okoris o sombohogian di pomorintaan nga' oluhoi i' o sombohogian. 43 Om nokito nu nogi' do pinorolot i basi' di lagit. Komoyon nopodti nga' mumbal daa i pomorinta' do pomorintaan diri do popogiso-iso' di sompiiyon diyolo', tu' mumbal daa iyolo' do mogikawin-kawin nga' aiso' i' o kotutukon di wonsoyon diyolo' do miagal diri, do miagal nod basi' tu' a' i' milo no do poroloton kopio'd lagit. 44 Om tontok nondo do maso di piro-piro o raja'ddi do momorinta' do popoingkakat i Kinorohingan do hilo'd surga do pomorintaan dit a' milo dot opupusan do gisom dot alaid, om a' insan dot aala' dot isai nopo o bansa'. Om magayi-ayi' nopondo o pomorintaan diri do mamaraag do koinsanai'd pomorintaan di suwai. 45 Om nokito nu nogi' do liid tomod nopo i watu do mantad hiri'd rungas, om aiso' i' o tulun do nokokimbir-kimbir diri, om minongoi diri otung di tininganak di basi', om tambaga', om lagit, om pirok, om tamas do winonsoi. Om kopurok nopoddi i tininganak diri. Sunudan ko do Kinorohingan dit agayo, dit osiliu dot id dabantalan. Om nosunudan ku no o Tuan Raja' do nipi do Tuan Raja'ddi, om nokoboros ku nogi' o komoyon diri dit otopot,” ka dau.
Sinomulian di Raja' i Daniol
46 Om otud noddi i Raja' Nobukadnisar do hiri'd toguang di Daniol om ponuhu' di rayat do sumuwau om papatahak do porsombahan di sorobon dot id di Daniol, om papatahak do piro-piro o porsombahan do suwai. 47 Om boros ka di raja', “Otopot no, dot iri no i Kinorohingan nu ot agayo kopio dot id pogialatan do koinsanai'd ponokokinorohingan do suwai, om iyau o pomorinta' dot id sawat do koinsanai'd raja', om i popointalang do koinsanai'ddi poinlisok. Oilaan ku no kopio iti tu' minilo ko i' do pinopotuduk do komoyon di poinlisok diri,” ka dau. 48 Om onuwai noddi dau i Daniol do pangkat dot asawat, om pinuhawangan dau iyau do piro-piro o nipuhawang dit olumis, om siniliu iyau do gobunor di watas do Babil, om siniliu do boyoon dit id sawat kopio do koinsanai di gomponosihat di raja'. 49 Om pokionuo' no di Daniol, om siliho' noddi di raja' i Sadrak, om i Misak, om i Abidnigo do pomorinta' di watas do Babil, om i Daniol nopo om minundorong i' do hiri'd walai di raja'.
Minonuhu' i Nobukadnisar do Koinsanai'd Tulun do Tumuku' dot id Tininganak do Tamas
1 Insan o maso, om ponuhu' no i Raja' Nobukadnisar do minomonsoi dot iso' o tininganak do tamas do kasawato' nopo nga' 27 o mito om kalaabo' no om oruhai nod 3 o mito. Om pinoingkakat dau iri do hilo'd rantai do Dura it id watas do Babil. 2 Om suhuo' no di raja' o koinsanai di pagawai dau do tumimung --- i tangaanak do raja' di ponokowakil dau, om i gobunor, om i wakil di gobunor om i ponosihat do pomorinta', om i popoopi' do tusin, om i gompomutus, om i mongilo-ilo dit otulid, om i koinsanai di boyoon do pagawai dau'd suwai do hiri'd piro-piro o watas. Om mositi' nod karapou ngai' iyolo' di kapanambayangan di tininganak do pinoingkakat di Raja' Nobukadnisar. 3 Om soira' di nokotimung ngai' i pagawai do ruminapou di kapanambayangan diri om songingkakat diri iyolo' dot id toguang di tininganak, 4 om haro'ddi o tulun do pinopoilo do kopoilaan do mantad id raja' dot opuhod o boros do poingkaa, “Oi tulun do mantad id koinsanai'd pomogunan, om bansa' om boros! Pokinongou kou no do ponuhuan do raja' do poingkaa: 5 Korongou kou nopondo do tuni do torumpit, om susuhutonon do tuni do suling, om rebab, om gambus, om kecapi, om serdam, om koinsanai'd tuunion do suwai, om mositi' nod motud kou do tumuku' di tininganak do tamas di pinoingkakat di Raja' Nobukadnisar diri. 6 Isai nopo it a' motud do tumuku' om tilombuson nopo do papataam do hilo'd tapui di molob-ngolob,” ka dau. 7 Om korongou poddi i tuni di tuunion om otud no o koinsanai di tulun do mantad id toinsanan o pomogunan, om bansa', om boros do tuminuku' di tininganak do tamas.
Tinondos dot A' Minumboyo' do Boros di Raja' i Tolu o Tambalut di Daniol
8 Om tontok noddi do maso'ddi do minanganu'd ralan i piro-piro di tulun do Babil do papasala' di tulun do Yohudi. 9 Boros ka diyolo' do pinoposunud dot id di Raja' Nobukadnisar, “Maha' daa om otogui o Tuan Raja'! 10 Nokoponuhu' no o Tuan Raja' do kotimpuun nopod monguni i tuunion, om motud ngai' no o tulun do tumuku' di tininganak do tamas, 11 om isai nopo it a' motud do tumuku'ddi om pataamon no dot id tapui di molob-ngolob. 12 Nga' haro o piro-piro o tulun do Yohudi, i siniliu nu'd boyoon do watas do Babil, i Sadrak, i Misak, om i Abidnigo, dot a' minumboyo' di pinonuhuan do Tuan Raja'. A' iyolo' tuminuku' dot id kinorohingan nu om a' iyolo' tuminuku' dot id tininganak do tamas di pinoingkakat nu,” ka diyolo'. 13 Om kotogod noddi tomod i raja' do nokorongou'ddi, om ponuhu' no iyau do posolowot dau di tolu o tulun diri. 14 Om boros ka dau dot id diyolo', “Sadrak, Misak, Abidnigo! Otopot toi do mada' kou do tumuku' dot id kinorohingan ku om a' kou motud do tumuku' di tininganak do tamas do pinoingkakat ku? 15 Baino' nopo, om orongou nopo dokoyu i tuni do tuunion, om motud kou no om tumuku' no di tininganak diri. Tu' ondung amu' om tilombuson kou nopo moti' do papataam do hiri'd tapui di molob-ngolob. Ondos daa dokoyu om haro po o kinorohingan do milo do mamasi dokoyu do mantad id kuasa' ku?” ka dau. 16 Om boros kad Sadrak, om i Misak, om i Abidnigo, do suminimbar, “Oi Tuan Raja', a' i' iyahai mumbal do popotopot do tinan dahai. 17 Ondung milo i Kinorohingan di tukuon dahai do mamasi dahai do mantad id tapui di molob-ngolob diri, om mantad id kuasa' nu, om atantu' no do wonsoyon i' dau o miagal diri. 18 Nga' mulong piya dot a' dau wonsoyon o miagal diri, nga' ilaai no oi Tuan Raja', dot a' i' kopio iyahai tumuku' dot id kinorohingan nu, om a' iyahai tumuku' di tininganak do tamas di pinoingkakat nu,” ka diyolo'.
Hinukuman do Kapatayon i Sadrak, om i Misak, om i Abidnigo
19 Om a' noddi di Raja' Nobukadnisar nopusus o kototogod dau, om aragang po o rabas dau dot atatagadan di Sadrak, om i Misak, om i Abidnigo. Om suhuo' noddi dau i tulun dau do poposikit di tapui do gisom diri dot inturu' kalasu' ko' mantad di koubasanan. 20 Om suhuo' noddi dau o piro-piro di tulun dit ongokoris kopio dot id pogialatan di soudor dau do mongogos di Sadrak, om i Misak, om i Abidnigo, om papataam diyolo' do hiri'd tapui di molob-ngolob dit alasu' kopio. 21 Om kagasai no diyolo' i tolu o tulun diri, om aiso' i' o nidu' di pakayan diyolo', tu' kirasuk i' iyolo' dit oniiba' om kirasuk dit anaru, om kitupi', om poimpakai ngai' diyolo' o pakayan diyolo'd suwai, om pataamo' noddi iyolo' do hiri'd tapui di molob-ngolob diri. 22 Om kosorob diri di linasu' di tapui i piro-piro o tulun di pinapataam di Sadrak, om i Misak, om i Abidnigo, do hiri'd tapui, tu' minonuhu' i' i raja' do poposikit kopio di tapui do gisom dot alasu' po ko' mantad di koubasanan. 23 Om karatu' nopo i Sadrak, om i Misak, om i Abidnigo do hiri'd tanga' di tapui do molob-ngolob diri, om songingkogos iyolo'. 24 Om sigog iddi do kosimbul i Raja' Nobukadnisar do nosusuayan. Om uhoto' no dau i pagawai dau, “Okon toi ko' tolu no tulun diri do kinagasan toko' om pinataam do hilo'd tapui di molob-ngolob,” ka dau. Om boros ka diyolo' do suminimbar, “Oo, oi Tuan Raja',” ka. 25 Om boros ka di raja', “Nga' nokuro tu' apat o tulun dot okito ku do sampanau-panau do hilo'd tanga' dilo tapui? Om a' i' iyolo' kinagasan, om miagal dit a' i' iyolo' orualan! Om ilo no kaapat om miagal-agal do kinorohingan o kokitanan,” ka dau.
Pinalabus i Tolu o Tulun om Pinoinsawat o Pangkat
26 Om ongoi noddi i Nobukadnisar do hiri'd somok di wawayaan do kinoiyonon di tapui'ddi om pomolohou no dot opuhod do poingkaa, “Sadrak, Misak, Abidnigo, iyokoyu no o susuhuon do Kinorohingan dit Asawat Kopio! Soliwan kou no do mantad hino'd tapui!” ka dau. Om olomus nopoddi iyolo' do suminoliwan. 27 Om oinsanan nopo i tangaanak do raja' di ponokowakil om i gobunor, om i wakil do gobunor, om i piro-piro o pagawai dau'd suwai do guminurumung do minongoi ontong di tolu o tulun dit a' i' nokuro-kuro di tapui. A' i' nongosorob i tobuk diyolo' om a' nosorob i rasuk diyolo', om a' i' iyolo' osingud do lisun. 28 Om boros ka di raja', “Royohon no i Kinorohingan do tukuon di Sadrak, om i Misak, om i Abidnigo! Tu' sinuhu' dau i moloikat dau do minongoi pamasi di tolu o susuhuon dau di monongkuyaan dau. Kada' nopo iyolo' umboyo' di nisuhu' ku tu' pinokouhang no diyolo' dot apatai o tinan diyolo' ko' modsubak po om tumuku' dot id kinorohingan do suwai ko' i diyolo'd Kinorohingan. 29 Om dinondo nodti om poboroson ku dot ondung haro o songulun do mantad id nunu nopo o pomogunan, ko' bansa', om boros, do mongindaraat do Kinorohingan di tukuon di Sadrak, om i Misak, om i Abidnigo, om pogitobilang-bilangon nopondo o tinan dau, om huyason o walai dau do gisom dot osiliu pondo do kinotimungon do kinaraagan. Tu' aiso' no o kinorohingan do suwai di milo do mamasi do miagal diti,” ka dau. 30 Om poinsawato' no di raja' o pangkat di Sadrak, om i Misak, om i Abidnigo do hiri'd watas do Babil, gisom do nosiliu diri iyolo' do pagawai dit angasawat kopio o pangkat.
Nipi di Nobukadnisar di Koduwo
1 Om potongkopo' no di Raja' Nobukadnisar o boros diti dot id koinsanai'd tulun do mantad id koinsanai'd pomogunan, om bansa', om boros do pointongkop di pomogunan. Poingkaa i boros diri, “Tumabi' oku ngai' dokoyu! 2 Pokinongou kou nodti susuyon ku do pasal do koimayaan om i kosuayan kopio do pinointalang di Kinorohingan dot Asawat kopio dot id doho'. 3 Koimayaan no kopio i winonsoi dau! Koronob no kopio i kongosuayan do wonsoyon dau! Kinorohingan no o momorinta' do gisom do poingompus. Iyau no o kikuasa' do gisom dot alaid.” 4 Osimbayan tomod oku do poingiyon do hiri'd walai ku do don raja', om kaya' oku. 5 Nga' insan o totuong om nokoipi oku di korolosi kopio om nokokito oku do pinointalang di kotompurolosi kopio di maso ku'd koodop. 6 Om ponuhu' oku no do poposolowot ngai' doho' do koinsanai di tulun dit ongoilo do hiti'd Babil om osunudan oku i' diyolo' do komoyon di nipi ku'ddi. 7 Om porikoto' ngai' nopoddi i mogogontong do nasip, om i bobolian, om i koilo do limu', om i koilo do komoyon do rombituon. Om sunudai ku no iyolo' di nipi ku nga' aiso' i' o tiso' diyolo' do milo do posuhut doho' do komoyon di nipi ku'ddi. 8 Om korikot noddi i Daniol, i pinungaranan dot i Biltisasar do pinasangai di ngaran do kinorohingan ku. I Daniol nopo om noporinta' do rusod di piro-piro o kinorohingan dit olidang. Om sunudai ku noddi iyau di nipi ku. Boros kangku dot id dau, 9 “Oi Biltisasar, i boyoon do mogogontong, oilaan ku no do porintaon ko di rusod do piro-piro o kinorohingan dit olidang, gisom diri do kosuhut ko do koinsanai di poillisok. Pokinongou nodti nipi ku, om sunudan oku no do komoyon diti. 10 Tontok di maso ku'd koodop om haro o nokito ku do songguas o kayu dot agayo do hiti'd tanga' do pomogunan. 11 Om kawas-kawas nopoddi i kayu'ddi do gisom do nokorikot do hilo'd tawan om okito ngai' nopod tulun do hiti'd pomogunan. Om agayo o guas di kayu'ddi om ogirot. 12 Roun nopo di kayu'ddi om ongolumis, om nawagatan pod tua', om kabagal i' do kanon do koinsanai'd tulun do hiti'd pomogunan. Mintilungung ngai' nopo o nintorusan do hiri'd linungung di kayu'ddi, om pomirumunan do tombolog i karaan-raanan, om koinsanai nopo di songimpasi do mangakan di tua' di kayu. 13 Om soira'ddi maso ku do momusorou do pasal di nokito ku'ddi, om kokito ku o moloikat do lumintuhun do mantad hilo'd surga, i posodia' kasai' om poingontong kasai'. 14 Om poboroso' no dau dot opuhod o poingkaa, ‘Tagado' ilo kayu om tutuon ilo raan, om anggagon ngai' o roun om pasasadon o tua'. Uyungon ngai' i nintorusan do hiri'd lungung om ugadan ngai' i tombolog di hiri'd karaanan. 15 Nga' pologoson piya i tuod dot a' utuson, nga' kagasan iri do rantai'd basi' om tambaga'. Om pologoson nopo iri do hilo'd talun dot id rolot di sakot. Om pologoson nopo iri dot abalabahan, om pologoson do poirolot do nintorusan om tanom-tanom. 16 Om turu' nondo o toun dau do dong nintorusan do pomusarahan, om okon no ko' don tulun do pomusarahan. 17 Iti no o natantu' dahai, i moloikat di posodia' kasai' om i poingontong kasai'. Om koilo indo o koinsanai'd tulun do honggo nopo do kikuasa' i Kinorohingan dit Asawat Kopio dot id sawat do pomorintaan do tulun om milo iyau do papatahak do pomorintaan dot id isai nopo i pilion dau, do tulun piya dit aiso' kopio o ngaran-ngaran!’ ka. 18 Iyo noddi i nipi ku, om sunudai oku nondo do komoyon diri, oi Biltisasar. Aiso' i' o tiso' piya di tulun dit ongoilo do hiti'd pomorintaan ku do milo do popoilo doho' do komoyon diri, nga' milo ko i' iya' tu' noporinta' ko i' di rusod di piro-piro o kinorohingan dot olidang,” ka dau.
Sinusui di Daniol o Komoyon di Nipi
19 Om kotigowo tomod diri i Daniol, i roitan dot i Biltisasar, do nokorongou'ddi, gisom dot a' no iyau nokoboros do piro-piro o saat. Om boros ka di Raja' Nobukadnisar dot id dau, “Oi Biltisasar, kada' kooris di nipi om i komoyon diri,” ka dau. Om boros kad i Biltisasar do suminimbar, “Oi Tuan Raja', osonong no daa kopio dot i pisangod nu ot oontok di komoyon di nipi nu, om okon daa ko' iya'. 20 Iri nopo i kayu di nokito nu'ddi nga' akawas kopio, gisom do nokorikot do hilo'd tawan, om okito ngai' do tulun do hiti'd pomogunan. 21 Om i roun di kayu'ddi nga' ongolumis tomod, om kabagal i' do kanon do koinsanai'd suang diti pomogunan i tua' di kayu'ddi. Om lumungung ngai' o nintorusan do hiri'd sahau om momirumun o tombolog do hiri'd karaanan. 22 Oi Tuan Raja', iya' no i kayu'ddi, it akawas om ogirot, om nakabantug tomod ko do gisom do nokorikot do hilo'd tawan o kobontugo' nu, om pomorintaan nu nga' nokotongkop diti pomogunan. 23 Om soira' di poingontong ko, oi Tuan Raja', om lintuhun no o moloikat do mantad hilo'd surga, om pomoros nod poingkaa, ‘Tagado' ilo kayu om raagon i', nga' pologoson piya i tuod do poingudong do hilo'd tana'. Om kagasan nori do rantai'd basi' om tambaga' om pologoson nopo do poirolot di sakot do hilo'd talun. Om pologoson nopo dot abalabahan om pologoson do poirolot do nintorusan do solinaid do turu' o toun,’ ka. 24 Poingkaa o komoyon diri, oi Tuan Raja', om iri no o pinoboros do Kinorohingan it Asawat Kopio do pasal dit osiliu dot id diya' do koimbagu. 25 Ouyung ko nondo do mantad id pogialatan do tulun om miyon ko nondo do hilo'd talun do poirolot do nintorusan. Om turu' nondo o toun nu do mangakan do sakot do miagal di sapi', om hilo'd liwan o toodopon nu, om abalabahan ko nondo. Om okunon nu nogindo do Kinorohingan it Asawat Kopio, o kikuasa' dot id sawat do koinsanai'd pomorintaan do tulun, om milo iyau do papatahak di pomorintaan diri dot id isai nopo i pilion dau. 26 Pinoboros i' di moloikat do pologoson i tuod do poingudong do hiri'd tana'. Om komoyon nopoddi nga' osiliu ko i' kawagu do raja' dot aakun nu do Kinorohingan o momorinta' do koinsanai diti pomogunan. 27 Iyo nopoddi, om osonong daa kopio do tumanud ko do nosihat ku, oi Tuan Raja'. Kada' nondo pomonsoi kawagu'd dusa, suwai ko' wonsoyon no it osonong om it otulid, om insianan no i tulun do mosikin. Om osimbayan ko indo kasai',” ka dau. 28 Om kosiliu ngai' nopo o miagal diri dot id doho', iyoho' i Raja' Nobukadnisar. 29 Hopod poddi om duwo o tulan do mantad diri, do tontok di mimpanau oku do hiri'd tinanaman do bunga dit id sakai di taap do walai ku do don raja' do hilo'd Babil, 30 om pomoros oku no do poingkaa, “Antangai pogi', nga' agayo no moti' o bandar do Babil! Om winonsoi ku iti bandar ku'd agayo do popointalang do kuasa' om kokoriso' om kagayaan, om kobontugo' ku,” kangku. 31 Nga' maha' dit a' ku po nopupusan i boros ku, om korongou ku no o boros do mantad hilo'd surga do poingkaa, “Oi Raja' Nobukadnisar, pokinongou nodti poboroson ku! Baino' nopo om noongoi no do mantad id diya' o kuasa' nu do don raja'. 32 Om uyungon ko nondo do mantad id pogialatan do tulun om poinsugku' ko pondo do nintorusan do hilo'd talun. Om mangakan ko nondo do sakot do miagal di sapi' do solinai'd do turu' o toun. Om okunon nu nogindo do haro o kuasa' do Kinorohingan it Asawat Kopio dot id sawat do pomorintaan do tulun om milo iyau do papatahak di pomorintaan diri dot id disai nopo i pilion dau,” ka dau. 33 Om diiri i' om diiri do nabayaan i boros diri. Tu' nouyung oku'ddi, iyoho' i Nobukadnisar, do mantad id pogialatan do tulun om mangakan oku'ddi do sakot do miagal do sapi'. Om oyopos poddi do bolobou o tinan ku, om i tobuk ku nga' numinaru'ddi do rompok di talad do kondiu, om sondulu ku nga' nakanaru do miagal pod sondulu do tombolog.
Minamarayou'd Kinorohingan i Nobukadnisar
34 Om katalib poddi i turu' o toun, “om tingaha' oku no do hilo'd tawan, om koguli' no i pomusarahan ku dit osonong. Om royoho' ku no i Kinorohingan dit Asawat Kopio om pinusou ku om pinoinggayo ku iyau, i poimpasi do gisom do poingompus. Kinorohingan no o momorinta' do gisom dot alaid. Om iyau o kikuasa' do gisom do poingompus. 35 Aiso' i' toomod o kuasa' do tulun do hiti'd pomogunan dot id pagantangan dau. Id suang ngai' i' do kuasa' dau o moloikat do hilo'd surga om tulun do hiti'd pomogunan. Aiso' i tiso' do tulun do milo do sumaap do korohian dau, ko' katama' po do monguhot ondung nunu o wonsoyon dau. 36 Soira' di nokoguli' i pomusarahan ku dit osonong, om iri nogi' i kobontugo' ku om i kagayaan ku om i kobontugo' do pomorintaan ku nga' pinoguli' ngai' nogi' dot id doho'. Rinamit oku i' do koinsanai di pagawai ku om i tulun ku dit ongkipangkat. Om pinatahak kawagu dot id doho' i pomorintaan ku. Om abantug oku poddi ko' mantad di gulu po. 37 Om baino' noddi, om iyoho' no i Nobukadnisar, o mamarayou om popoinsawat, om popoinggayo di Raja' do Surga. Koinsanai'ddi wonsoyon dau nga' otopot i' om otulid, om milo iyau do popoinsiriba' dot isai nopo o tulun di minggayo-gayo,” ka.
Pinapaharo do Poginakanan i Raja' Bilsasar, i Tanak di Nobukadnisar
1 Insan o tadau om pangalap no i Raja' Bilsasar do soribu o tulun dau dit ongkipangkat do rumapou dot id poginakanan dot agayo, om ponginum no iyolo' do waig dot anggur. 2 Om soira' di maso diyolo'd minum, om ponuhu' no i Bilsasar do mongongoi di sangkir om mangkuk do tamas om pirok, i tinanggayan di Nobukadnisar i tapa' dau, do mantad hiri'd Walai'd Sasambayangan dot Agayo di hilo'd Yorusalim. Pinokianu pogi' di Raja' Bilsasar iri nga' koinum indo iyau, om i tulun dau di kipangkat, om iri ngai' i sawo dau, om i tongoondu' do ponokosawo dau dot i sangkir diri o ponginuman. 3 Om olomus nopo do nongoi patahako' dot id di Bilsasar i sangkir om i mangkuk do tamas diri, om ponginumai no diyolo' iri do waig dot anggur. 4 Om pamarayou no iyolo' di ponokokinorohingan di pirok, tambaga', basi', kayu om watu do winonsoi. 5 Om sigog id intalang o palad do tulun om pintulis nori do hiri'd limput di walai'd raja' do hiri'd kotitihon kopio di lampung. Om kokito'ddi di raja' i palad diri do maso nod monulis. 6 Om koposi' nopo iyau dot opopoddosian, om totud po dau nga' gagaran po tomod. 7 Om pomogiak no iyau do minomolohou do songulun do mongoi pomolohou di bobolian, om it ongoilo do limu', om i milo do mogontong do komoyon do rombituon. Om soira'ddi nakasalakoi iyolo' om boros ka di raja' dot id diyolo', “Isai nopo i milo do mambasa' diti tulis om i milo do momisunud doho' do komoyon diti, om rosukan ku no do rasuk do don raja' dit otomou daragang-ragang, om sulungan ku'd karo do tamas, do maan do pomusou, om silihon ku do pomorinta' dit id siriba-riba' di wakil ku,” ka dau. 8 Om insomok ngai' no i tulun dit ongoilo, nga' aiso' i' o tiso' piya diyolo' do kabasa' di tulis diri ko' milo po do momisunud di raja' do komoyon diri. 9 Om oposi' poddi tomod i raja' dot adalaan do moddosi, om iri tulun dau dit ongkipangkat nga' aiso' no o pokukurayan diyolo'. 10 Om korongou'ddi di tina' di raja' dot ohiyo i raja' om i tulun dit ongkipangkat, om suang no iyau do hiri'd kinoiyonon do moginakan. Om boros ka dau, “Maha' daa om otogui o raja'! Kada' kopio katangkabo om kada' umposi'. 11 Tu' haro i' o songulun o kusai do hiti'd pomorintaan nu di porintaon do rusod do piro-piro kinorohingan dit olidang. Tontok di maso pod raja' i tapa' nu om nokointalang kopio dot oilo om obinsuhut om kitoilaan dot aralom do miagal do toilaan do kinorohingan i tulun diri. Om siniliu nogi' di Raja' Nobukadnisar i tapa' nu, i tulun diri do boyoon di mogogontong do nasip, om i bobolian, om it ongoilo do limu', om i mongingilo do komoyon do rombituon. 12 Aralom no kopio ko' dombokon o toilaan dau, om atarom o pomusarahan, om oilo do komoyon do nipi, om milo do sumimbar dit angapagon, om milo do popotuduk do komoyon di songinlisok. Lohowo' no o tulun diri, i roitan dot i Daniol, om pinungaranan nogi' iyau di raja' dot i Biltisasar, om sunudan ko indo dau do komoyon diti tulis,” ka dau.
Pinosunud di Daniol o Komoyon di Tinulis
13 Om diiri i' om diiri do nongoi posolowoto' di raja' i Daniol. Om boros ka di raja' dot id dau, “Iya' nogi' i roitan dot i Daniol, i tulun do Yohudi do tinanggayan di tapa' ku do hiti do mantad hilo'd Yohuda? 14 Nokorongou oku do porintaon ko di rusod do kinorohingan dot olidang, om oilo ko, om obinsuhut ko om kitoilaan dot aralom. 15 Nongolohou ngai' ku no i tulun dit ongoilo, om i mogogontong, do mongoi pambasa' diti tulis diti om momisunud daa doho' do komoyon diti, nga' aiso' i' o koilo diyolo' do komoyon diti. 16 Om nokorongou oku'ddi do koilo ko do popointalang di songinlisok om milo ko do sumimbar di tuhoton dit angapagon. Ondung milo ko do mambasa' diti tulis om milo ko do momisunud doho' do komoyon diti, om rosukan tiya' no do rasuk do don raja' dit otomou daragang-ragang, om sulungan tiya' do karo do tamas do tanda' do pomusou, om silihon tiya' do pomorinta' dit id siriba-riba' di wakil ku,” ka dau. 17 Om boros kad Daniol do suminimbar, “A' i' minog do patahakon doho' ino tipuhawang nu, patahakon nopo iri dot id tulun do suwai. Basaon ku i' diya' i nokotulis oi Tuan Raja', om sunudan ku iya' do komoyon diri. 18 Siniliu do Kinorohingan, it Asawat Kopio, i Nobukadnisar i tapa' nu do raja' dot agayo om nonuan dau iyau do kagayaan om kobontugan. 19 Iyau nopo om abantug kopio, gisom dot oinsanan nopo o tulun do mantad id koinsanai'd pomogunan, om bansa', om boros do moddosi dau, om gisom do pananggagaran po iyolo' dot opopoddosian. Ondung sipamatai iyau dot isai nopo o tulun, om ngoyon no kopio dau patayo'. Om ondung sipamasi iyau dot isai nopo o tulun, om posion no kopio dau. Isai nopo o korohian dau do momusou, om pusohon no dau, om iri no i karaatan dau om intingayamon no dau, do tumanud do korohian do ginawo dau. 20 Nga' tontok di mininggayo-gayo iyau, om di kuminodou o ginawo dau om ruminongit iyau, om koidu' noddi iyau do mantad hiri'd tirikohonon dau do don raja', om natagakan iyau di kobontugo' dau. 21 Nouyung diri iyau do mantad id pogialatan do tulun, om nosiliu'ddi do miagal do pomusarahan do nintorusan o pomusarahan dau. Om poirolot diri iyau di kaladai do lalang om mangakan iyau do sakot do miagal do sapi', om modop nopo iyau do hiri'd liwan, om aiso' i' o ponokop piya do tinan dau dit abalabahan. Om alaid noddi om okuno' nogi' dau do Kinorohingan dit Asawat Kopio o kikuasa' dot id sawat do koinsanai'd pomorintaan do tulun om milo iyau do papatahak di pomorintaan diri dot id disai nopo i pilion dau. 22 Nga' iya' tu' tanak dau, om i nongkoilo ngai' do pasal diti, nga' a' i' mininsiriba' o ginawo. 23 Suminaap ko i' do Tuhan di hilo'd surga, tu' nongoi nu i sangkir om i mangkuk di nanu do mantad hilo'd Walai'd Sasambayangan dot Agayo. Pinonginuman dokoyu di tulun nu dit ongkipangkat, om i piro-piro sawo nu, om i tongoondu' di ponokasawo nu do waig dot anggur, i sangkir diri. Om pamarayou kou nogiddi di ponokokinorohingan di winonsoi do mantad id tamas, om pirok, om tambaga', om basi', om kayu, om watu, i ponokokinorohingan dit a' kokito om a' korongou, om it aiso' o toila-ilaan. Om a' ko nogi' minomusou do Kinorohingan di mongilo ondung masi ko ko' matai po, om i manantu' do koinsanai'd wonsoyon nu. 24 Om iri no o kinoponuhuan do Kinorohingan di palad do minongoi ponulis do boros dau'ddi. 25 Poingkaa no i tulis diri, ‘Intobo', intobo', timbango', bohogio',’ ka. 26 Om poingkaa o komoyon diri, ‘Intobo'’, nointob nod Kinorohingan o tadau do koloido' do pomorintaan nu om pupusan no dau; 27 ‘Timbango'’, notimbang ko no dot id ponimbangan om noilaan no dot adalaan kopio ko kagaan; 28 ‘bohogio'’, nabahagi' no o pomorintaan nu om patahakon no dot id tulun do Modia om tulun do Porsia,” ka. 29 Om olomus nopoddi i Bilsasar do minonuhu' di piro-piro o pagawai dau do mamarasuk di Daniol do rasuk di don raja' dit otomou daragang-ragang, om mangaro dau do karo do tamas. Om siniliu'ddi dau iyau do pomorinta' dit id siriba-riba' di wakil di raja'. 30 Nga' totuong iddi do pinatai i Bilsasar, i raja' do Babil diri.
Pinosuang i Daniol do Hiri'd Luang do Singa
1 Om di nopoddi napatai i Bilsasar, om ahawo' no di Darius i tulun do Modia, i pomorintaan di Bilsasar. Tontok nopoddi om onom no nohopod om duwo o toun dau. 2 Om bohogio' no di Darius i pomorintaan dau do hatus om duwo nohopod o watas. Om ongkigobunor ngai' do momorinta' o hiri'd pointikid-tikid di watas. 3 Om suwai no ko' mantad diri, om pinili' nogi' dau i Daniol, om duwo o tulun do suwai do mitoinu' di piro-piro o gobunor diri om a' i' orugi' i raja'. 4 Om a' po alaid nga' koilaai no do poimaha' o di Daniol do toilaan do kumaraja' ko' mantad di piro-piro o pagawai om i piro-piro o gobunor do suwai. Om pomusorou noddi i raja' do moniliu di Daniol do mongilo-ilo ngai' do koinsanai di pomorintaan do raja', tu' poimaha' i' kopio ko' i wokon o toilaan di Daniol. 5 Om umbal no daa'ddi i piro-piro pagawai do suwai om i piro-piro gobunor do suwai do mogihum do kasalaan do karaja' di Daniol dot id pomorinta', nga' aiso' i' ot okito diyolo' tu' i Daniol nopo nga' otulid i' koulun, om otorodok om a' insan do momonsoi di kasala' ko' it araat. 6 Om boros kaddi diyolo' do mogiboro-boros, “Aiso' i' o nunu-nunu dot okito toko' do kapasalaan di Daniol ondung okon ko' kagait do tugama' dau,” ka diyolo'. 7 Om ongoi noddi iyolo' solowot di raja' om boro-boros no do poingkaa, “Oi Raja' Darius, maha' daa om otogui ko! 8 Oinsanan nopo iyahai, i mongilo-ilo dot id pomorintaan nu dot i mongilo- ilo om i gobunor, om i wakil do gobunor, om i piro-piro o pagawai'd suwai, do nokopogipapakat dot apatut do pokirim ko dot iso' o surat di potulisan do ponuhuan om apatut do torodokon kopio iri do tumanud. Monuhu' no, do solinaid nopo do tolu nohopod o tadau om aiso' no o tiso' piya'd tulun do pologoson do mokianu do nunu nopo do mantad id nunu nopo o kinorohingan ko' mantad po dot isai nopo o tulun, do suwai ko' mantad id Tuan Raja'. Om isai nopo ot a' tumanud diti ponuhuan diti om pataamon no dot id luang di noponu'd singa. 9 Om iyo nopoddi om pokionuon no dahai o Tuan Raja' do manain di surat diri, om ogirot i' kopio do sumiliu dot oturan do Modia om Porsia, it a' no milo'd simbanan,” ka diyolo'. 10 Om soinai noddi di Raja' Darius i surat di pinotulisan di ponuhuan diri. 11 Om soira' di nokoilo i Daniol do nosoinan i surat do tinulis diri, om uli' no iyau do hiri'd walai dau. Om hiri nopod bilik dit id sawat di walai dau nga' haro o liligaon di poingiwang ponong hilo'd Yorusalim. Om otud no iyau do suminambayang dot id Kinorohingan dau do hiri'd toning di liligaon di pongiwang diri, dot intolu do sangadau do miagal di koubasanan dau. 12 Om soira' di nokito di pisangod di Daniol i Daniol do sumambayang dot id Kinorohingan dau, 13 om oinsanan nopo iyolo' do minongoi solowot di raja' do mongoi papasala' di Daniol. Boros ka diyolo', “Oi Tuan Raja', nosoinan nu no i surat di tinulisan dot id suang nopo do tolu nohopod o tadau'dti, om isai nopo i mokianu do nunu nopo do mantad id isai nopo o kinorohingan ko' mantad id isai nopo o tulun do suwai ko' iya', om pataamon no dot id luang di noponu'd singa,” ka diyolo'. Om boros ka di raja', “Otopot iri. Iri nopo nga' ponuhuan dit apatut do tonudon, tu' nosiliu nori dot oturan do tulun do Modia om Porsia, om it a' no milo'd simbanan,” ka dau. 14 Om boros kaddi diyolo' dot id raja', “I Daniol nopo, i tulun do tinanggayan do mantad hilo'd Yohuda, om a' i' momusou do Tuan Raja' om a' mumboyo' di boros nu. Intolu kasai' i' iyau do sumambayang do sangadau,” ka diyolo'. 15 Om soira' di norongou di raja' iri, om tuminongob diri om tuminangkabo iyau om tuminotos daa do mogihum do ralan do mamasi di Daniol. Om umbal i' daa iyau do mogihum do ralan do gisom do nosodop. 16 Om guli' noddi i tulun diri do hiri'd raja', om boro-boros no dot, “Oilaan id Tuan Raja' do tumanud nopo dot oturan do Modia om Porsia, om aiso' no ot oturan di nokoboros do raja' do milo'd simbanan,” ka diyolo'. 17 Om ponuhu' noddi i raja' do manangkap di Daniol, om pataamo' noddi i Daniol do hiri'd luang do singa. Om boros ka di raja' dot id di Daniol, “Maha' daa om posion ko di Kinorohingan nu di tukuon nu do mikuwo'd otorodok kopio,” ka dau. 18 Om sinompon diri do watu dot agayo i kabang di luang, om sinaapan di raja' do saap do don raja' om sinaapan di saap do tulun dau dit ongkipangkat i watu diri, om aiso' no o tulun do milo do mongoi popoidu' di Daniol do mantad id singa'ddi. 19 Om guli' noddi i raja' do hiri'd walai dau, om a' nopo iyau nokoodop di totuong om a' minakan om a' milo dot insasamadan. 20 Om osuab poddi om tungag no i raja' om arau-arau no iyau do minongoi do hiri'd luang do singa. 21 Om soira' di nokorikot iyau do hiri om pillohou no iyau do mikuwo'd tumongob om awagat o ginawo dau. “Oi Daniol, i susuhuon do Kinorohingan do poimpasi! Napasi ko i' di Kinorohingan nu di tukuon nu do mikuwo'd otorodok kopio, do mantad id singa,” ka dau. 22 Om korongou noddi dau o boros di Daniol do suminimbar do poingkaa, “Maha' daa om otogui o Tuan Raja'. 23 Sinuhu' id Kinorohingan ku i moloikat dau do minongoi polantom do kabang di singa om a' i' iyolo' minanabpo doho'! Pinasi oku i' do Kinorohingan tu' oilaan i' dau dot aiso' o sala' ku dot id dau om a' oku nakasala' dot id diya', oi Tuan Raja',” ka dau. 24 Om osonong tomod diri o ginawo di raja' om ponuhu' no iyau do papalabus di Daniol do mantad hiri'd luang diri. Om posoliwano' no diyolo' iyau om kokito no diyolo' dot a' i' nosuhat i Daniol, tu' minogondos i' iyau do Kinorohingan dau. 25 Om ponuhu' noddi i raja' do mongoi panangkap do koinsanai di tulun di pinapasala' di Daniol. Om pataamo' noddi iyolo' do mitonggoi ngai' di sawo om tangaanak diyolo' do hiri'd luang di noponu'd singa. Om a' po iyolo' nokosondot kopio do hiri'd luang, om natabpaan no iyolo' di singa, om kotipu' ngai' nopo o tulang diyolo'. 26 Om ponulis noddi i Raja' Darius do surat do patahakon dot id koinsanai'd tulun, do mantad id koinsanai do pomogunan, om bansa', om boros do hiti'd pomogunan do poingkaa, “Tumabi' oku dot id dokoyu! 27 Monuhu' oku do koinsanai'd tulun do pointongkop do pomogunan di porintaon ku dot apatut do rumonok om momusou do Kinorohingan di tukuon di Daniol! Iyau no o Kinorohingan di poimpasi do gisom do poingompus, om iyau no o momorinta' do gisom do kopupuson diti pomogunan. A' i' araag o pomorintaan dau, om a' aayi' o kokoriso' dau. 28 Mamasi iyau om popoidu', momonsoi iyau do koimayaan om kopusahan do hilo'd surga om hiti'd pomogunan. Ginompi' i' dau i Daniol gisom dot a' iyau napatai di singa,” ka. 29 Om asawat kasai' i' o pangkat di Daniol do solinaid do pomorintaan di Darius om pomorintaan di Koris, i tulun do Porsia.
Apat o Nintorusan do Nokito di Daniol dot id Pinointalang
1 Tontok di sontoun nogi' i Bilsasar do raja' do Babil, om minongipi oku, om nokokito oku do pinointalang do tontok dot insan o tuong. Om tuliso' ku no i noipi ku, om iti no o tinulis ku 2 do pasal di nokito ku dot id pinointalang diri: Tumongus tomod nogi' dot opuhod om posorili' nopo o tadon di tongus gisom do guminayo diri i tumbak do rahat. 3 Om imbulai no ot apat o nintorusan dit angagayo do mantad hilo'd rahat, om mogisuayan o bansa' di nintorusan diri. 4 Iri nopo koiso' nga' miagal-agal do singa o kokitanan nga' kitalad i' do miagal do dong kondiu. Om di nopo di maso ku do poingontong diri om sigog id kouul i talad di nintorusan diri. Om koinsawat noddi i nintorusan diri do mantad hiri'd tana' om poingkakato' no do miagal do tulun tu' duwo o gakod. Om onuwai nori do pomusarahan do don tulun. 5 Iri no nintorusan do koduwo om miagal-agal do bohuang, om poingkakat iri do duwo no o gakod. Om kitinangau iri do tolu o tulang do tikagang, om haro'ddi o boros do minomoros dot id nintorusan diri do poingkaa, “Pimbangat nopod mangakan do daging!” ka nogi'. 6 Om maso ku po do poingontong diri nga' imbulai po kawagu o nintorusan do suwai. Iri no om miagal-agal do tontokinon nga' haro iddi ot apat o talad do hiri'd likud, do miagal-agal do talad do tombolog, om apat o tulu di nintorusan diri. Om kokitanan nopo nga' miagal do haro o kuasa'. 7 Om tontok di poingontong oku'ddi om imbulai no kawagu o nintorusan di kaapat. Om iri nopo nga' okoris kopio om orongit om korolosi. Ogop-ogopon nopo di nintorusan diri i nintorusan di kanon dau, tu' angagayo i' o nipon dau om okodou do miagal do basi', om pingulakan nopo dau i topod dau do minangakan. Nga' iri nopo om suwai no ko' mantad di piro-piro nintorusan dit id gulu ko' iri, tu' iri nopo om kisangau do hopod. 8 Om tontok di poinsonsod oku di sangau, om kokito ku ot iso' o sangau do suwai dit okooro' do suminuni dot id pogialatan di sangau. Om iduwo' nopo di sangau dot okooro'ddi o tolu dot id pogialatan di sangau mantad. Iti nopo sangau dot okooro'dti nga' kimato do miagal do don tulun, om kikabang di mimboros tomod do minggayo-gayo.
Pinointalang di Nokito di Daniol do Pasal di Poimpasi do Gisom do Poingompus
9 Tontok di maso ku do poingontong diri om haro nogiddi o piro-piro o tirikohonon do raja' do nongoi posodiawo'. Om ongoi no irikau dot id tiso' di tirikohonon do raja' i poimpasi do gisom do poingompus. Iri nopo pakayan om tobuk dau nga' miagal pod gapas kopurak. Om iri no tirikohonon dau om kiruda' di kitapui do molob-ngolob. 10 Om iyo pod poluyungon i tapui do lumabus do mantad hiri'd tirikohonon di don raja'ddi. Om rinibuan po o tulun do mogobi-obi' dau'd hiri, om bojuta-juta o tulun do songingkakat dot id toguang dau. Om timpuun noddi i bisara' om ukabai ngai' no i buuk. 11 Om tontok di maso ku do poingontong, om rongo-rongohon ku i sangau dit okooro'ddi do mimboros tomod do mokirayou-rayou om minggayo-gayo. Om poingontong oku do nongoi patayo' i nintorusan di kaapat, om pinataam diri i tinan dau do hiri'd sinikit do tapui om hiri no o kinopupuson diri. 12 Nga' iri nopo nintorusan do suwai om nongoi no iduwo' i kuasa' diyolo', om pinologos i' do poimpasi do gisom dot orikot i maso di natantu' mantad. 13 Om id suang nopod pinointalang di nokito ku di totuong diri om nokokito oku do miagal-agal do tulun. Om mongoi nogi' rapou doho' i tulun diri, om nosorili' po nogid haun i tulun diri. Om ongoi no iyau insomok di poimpasi do gisom do poingompus om pinointutun diri iyau dot id poimpasi di gisom do poingompus. 14 Om nonuan diri iyau do kuasa' om karayahan, om kuasa' do don raja', om oinsanan indo o tulun do mantad id koinsanai'd pomogunan, om bansa', om boros do mogobi-obi' dau. Om mompus-ompus nondo kasai' o kuasa' dau om a' aala' o pomorintaan dau.
Pinosunud o Komoyon di Pinointalang
15 Om nokoborulong diri doho' i nongokito ku dot id pinointalang diri, om agangau tomod o ginawo ku. 16 Om ongoi oku no rapou di songulun dit id pogialatan di songingkakat do hiri om pokisunud oku no do komoyon ngai'ddi. Om sunudai oku no dau do komoyon diri. 17 Om boros ka dau, “Iri nopo it apat o nintorusan dit angagayo'ddi nga' apat o pomorintaan do mingkakat do hiti'd pomogunan. 18 Om kaanu nondod kuasa' do momorinta' i tulun do songonuon do Kinorohingan dit Asawat Kopio, om mompus-ompus o pomorintaan diyolo',” ka dau. 19 Om orohian oku pod koilo do komoyon di nintorusan di kaapat, tu' suwai kopio iri ko' mantad di nintorusan do suwai, i nintorusan di kotompurolosi om it ogop-ogopon nopo i nintorusan dit atabpaan dau, dot i sondulu do tambaga' om nipon do basi' o pomoruta' dau, om pingulakan nogindo i topod dau'd mangakan. 20 Om mokiilo oku po do pasal di hopod o sangau do hiri'd tulu di nintorusan diri om i sangau dit okooro' di suminusuhut do minimbulai, i minongidu' do tolu di sangau mantad. Iri nopo nga' kimato om kikabang di mimboros po tomod do minggayo-gayo. Om korolosi no kopio iri ko' mantad di sangau'd suwai. 21 Om tontok di maso ku do poingontong, om sangod no i sangau'ddi di tulun do songonuon do Kinorohingan, om kaala' no dau iyolo'. 22 Om rikot noddi i poimpasi do gisom do poingompus do minongoi popoboros dot ibutus di popotopot di tulun di songonuon do Kinorohingan dit Asawat Kopio. Om nokorikot no i maso do koonuan di tulun di songonuon do Kinorohingan do kuasa' do momorinta'. 23 Om poingkaa no o komoyon diri do pinosusui dot id doho', “Iri nopo nintorusan do kaapat nga' pomorintaan di kaapat do hiti'd pomogunan, om i suwai kopio ko' mantad do pomorintaan di suwai. Om mumukon nopondo om raagon di pomorintaan diri o pointongkop diti pomogunan om pingulakan dau it ongoolu' dau. 24 Iri nopo i hopod o sangau'ddi om hopod o raja' do momorinta' do pomorintaan diri. Om haro nondo o tiso' o raja' do mimbulai; om iyau nopo om suwai kopio ko' mantad di piro-piro raja' dit id gulu, om mangala' iyau do tolu o raja'. 25 Om mimboros nondo iyau do sumaap do Kinorohingan dit Asawat Kopio om mongulok-ulok iyau do tulun di songonuon do Kinorohingan. Om umbalan nondo dau do monimban it oturan om i tadau'd agayo do tugama' diyolo', om id suang nondod kuasa' dau i tulun di songonuon do Kinorohingan do solinaid do tolu o toun om satanga'. 26 Om tumimung nondo i momumutus di hilo'd surga, om iduwon nondo i kuasa' dau, om patayon nopondo kopio iyau. 27 Om patahakon nondo i kuasa' om kagayaan do koinsanai di pomorintaan do hiti'd pomogunan dot id tulun di songonuon do Kinorohingan dit Asawat Kopio. Om a' nondo opupus-pupusan i kuasa' diyolo' do don raja' om oinsanan nopondo o pomorinta' do hiti'd pomogunan do mogobi-obi' om mumboyo' diyolo',” ka. 28 Iri-iri no i susuyon diri. Om moddosi tomod oku'ddi do gisom do minumposi' oku, om pakangkabo' ngai' ku nopori. Aiso' i' o tiso' piya'd tulun do sinunudan ku'ddi.
Kambing do Tontoluhan om Dumba'd Tontoluhan do Nokito di Daniol dot id Pinointalang
1 Om tontok di kotolu nod toun di Raja' Bilsasar do momorinta', om haro po kawagu o pinointalang dot id doho'. 2 Id suang nopod pinointalang diri om hilo' oku nogid bandar do Susan di kitolig, i bandar dot agayo do Porsia, it id watas dot Ilam, om poingkakat oku nogi' do hiri'd toning di Bawang dot Ulai. 3 Om kokito ku no o songinan o dumba' do tontoluhan do hiri'd tisan di bawang, do kisangau'd duwo dit anaaru. Nga' iri nopo tiso' di sangau, nga' anaru-naru om wagu-wagu ko' mantad di tiso'. 4 Om piantangan ku'ddi i dumba' di tontoluhan diri do popinsungu di sangau dau do ponong id kotonobon, om ponong id utara, om ponong id salatan. Aiso' no o tiso'd nintorusan do kasaap dau ko' koidu' po do mantad id kuasa' dau. Mingwonsoi nopo iyau do tumanud di korohian dau om muhang-ruhang o kasasawat do ginawo dau. 5 Om tontok di minguhot ot id suang do ginawo ku ondung nunu o komoyon diri, om okohus nopo o songinan o kambing do tontoluhan do tuminangkus do mantad ponong hilo'd kotonobon. Om osiau tomod i kambing diri gisom dot a' no kosondot do tana' o gakod dau. Om haro nogi' o sangau di kambing diri dit atalang tomod do hiri'd pialatan di duwo o mato dau. 6 Om pakayaai no di kambing do tontoluhan diri do ponong hiri'd dumba' di tontoluhan, i nokito ku do poingkakat do hiri'd tisan di bawang. Om tohubai no di kambing i dumba'ddi do mikuwo'd naayi-ayi' no o kinoris dau. 7 Om piantangan ku'ri do suminaap di dumba' di tontoluhan diri. Om adalaan no kopio i kambing do tontoluhan do tumogod gisom do tohubai nopo dau i dumba' do tontoluhan diri, gisom do kotipu' goduwo nopo i sangau di dumba'ddi. Om a' no kotori' do sumaap i dumba' do tontoluhan diri. Kataam nopo i dumba'ddi do hiri'd tana' om nopingulakan, om aiso' no tiso' piya'd tulun do milo do monguhup dau. 8 Om muhang-ruhang nopoddi o kasasawat do ginawo di kambing do tontoluhan diri. Nga' maha' di nokoinggayo no kopio'ddi o kuasa' dau, om kotipu' no i sangau dau dit agayo. Nga' sowoliai nori dot apat o sangau di suwai-suwai kopio, om i mogisuayan o kotudukon. 9 Om tolidai no o tiso' di sangau'ddi do sangau dot okooro'. Om kuasa' nopo di sangau dot okooro'ddi nga' nokorikot do hilo'd salatan om hilo'd koulayon om ponong hilo'd Tana' di Pinabatos. 10 Om ruminuhang iddi o kokoriso' di sangau'ddi gisom do nakasaap iyau do soudor do surga, iri no i rombituon, om haro piro-piro di rombituon do pinataam dau do hilo'd tana' om piningulakan diri dau. 11 Om minongindaraat nogi' iyau di boyoon do soudor do surga, om tiningkod dau i porsombahan do sumbolion di monikid tadau do patahakon dot id boyoon diri. Om hinuyas dau i Walai'd Sasambayangan dot Agayo. 12 Om timpuun noddi i tulun do hilo' do mingwonsoi'd dusa do hiri om a' iyolo' pinapatahak do porsombahan di sinumbali' do miagal di natantu' mantad do wonsoyon, om pinataam nogiddi diyolo' do hilo'd tana' i sambayang dit otopot. Om nunu nopo i wonsoyon di sangau'ddi nga' owonsoi ngai' nopo. 13 Om korongou ku'ddi o tiso' o moloikat do minuhot di tiso' dau do poingkaa, “Songkuro nopo o koloido' di nongokito dot id pinointalang diri dot iyo'ddi? Songkuro nopo o koloido' di dusa dot agayo'ddi do sumowoli di porsombahan di sumbolion do monikid tadau? Piro nopo o koloido' di soudor do surga om ilo Walai'd Sasambayangan dot Agayo dot opingulakan?” ka dau. 14 Om korongou ku no i tiso' di moloikat do suminimbar do poingkaa, “Miagal kasai' nopondoddi do solinaid do soribu om hatus om limo nohopod o tadau, om solinaid nodti dot a' katahak i porsombahan do sinumbali' di dongkosuabon om i dongsosodopon. Om katalib pondo iti om owonsoi nogi' kawagu i Walai'd Sasambayangan dot Agayo,” ka dau.
Pinosunud di Moloikat Gabriol o Komoyon di Pinointalang Diri
15 Om maso ku daa do mumbal do mongilo'd komoyon di nongokito ku dot id pinointalang diri om sigog id ingkakat o koiyo-iyo'd tulun do hiri'd dotoguangan ku. 16 Om korongou ku'ddi o boros do minomolohou do mantad hiri'd soborong do Bawang dot Ulai. Boros ka, “Oi Gabriol, sunudai iyau do komoyon di nongokito dau'ddi,” ka. 17 Om rikot no i Gabriol om ingkakat no do hiri'd toning ku, om ooris tomod oku'ddi gisom do kahaba' oku nopo do hiri'd tana'. Om boros ka di Gabriol dot id doho', “Oi tulun, ilaai no o komoyon di pinointalang diri. Iri nopo i pinointalang diri nga' pasal do kopupuson diti pomogunan,” ka dau. 18 Om maso po dau do moro-boros nga' kahaba' oku no do hiri'd tana' do nahadan. Nga' nigitan oku i' dau om pinoingkakat oku dau kawagu. 19 Om boros kaddi dau, “Sunudan tiya' dit osiliu do kootuson di kototogod do Kinorohingan. Om iri nopo pinointalang diri nga' pasal do kopupuson diti pomogunan. 20 Iri nopo dumba'd tontoluhan di duwo o sangau di nokito nu'ddi om poiyaan di pomorintaan do Modia om Porsia. 21 Om iri no kambing do tontoluhan om poiyaan do pomorintaan do Yunani, om iri nopo sangau dit atalang kopio'ddi do hiri'd piolitan di duwo o mato dau nga' i raja' di koiso' i'. 22 Om iri no it apat o sangau do minimbulai di notipu' i sangau di koiso', om poiyaan dit apat o pomorintaan dot abahagi' i pomorintaan do Yunani. Om iso' poddi nga' a' no koiyo do kokoriso' di pomorintaan dit id gulu. 23 Om soira' nopondo dot oruhai-ruhai o kopupuson di piro-piro o pomorintaan diri om tontok di kototos kopio o kararaat diyolo' om a' nondo milo'd a' iyolo' hukuman, om haro nondo o songulun o raja' dit okodou kopio o ginawo, om araat, om oilo kopio do magakal. 24 Om kumoris nondo kopio iyau, nga' okon i' ko' mantad dot id dau i kokorisan dau. Om porikot nondo iyau do karaagan di koronob kopio om nunu nopo i wonsoyon dau nga' owonsoi ngai' nopo. Om porikot nondo iyau do karaagan dot id tulun dit okoris om id tulun di songonuon do Kinorohingan. 25 Om owonsoi ngai' nopondo dau i wonsoyon dau do pagakal tu' oilo i' kopio iyau do momorulong. Om oondos nondo iyau om ogumu' o tulun do patayon dau, om a' i' iyau popoinsan diyolo'. Om iri piya'ndo Raja' dit Agayo Kopio nga' saapon i' dau, nga' apatai indo iyau, nga' okon i' ko' kinoris do tulun o kapatai dau. 26 Iri nopo pinointalang do pasal di porsombahan do sumbolion do dongkosuabon om di dongsosodopon di pinosusui dot id diya'ddi om atantu' no dot abayaan. Nga' pakangkabon ngai' nopori do baino' poo, tu' alaid pori dot abayaan. Om kada' posunudo' iri dot id ongoiso' piya o tulun,” ka dau. 27 Om tumongob oku'ddi om oluhoi oku om suminakit oku do piro-piro o tadau do koloido'. Om tungag oku noddi om guli' oku no do minongoi pomonsoi di karaja' di pinonuhuan di raja' doho'. Nga' maso ku pod atangkabo do kosorou di nongokito ku dot id pinointalang diri, om a' oku kosuhut do komoyon diri.
Sinambayangan di Daniol i Bansa' Dau
1-2 Tontok di sontoun nogi' i Darius, i tulun do Modia, i tanak do kusai di Ahaswiros, do momorinta' do hilo'd Babil, om mimbasa' oku di buuk do don tugama'. Om momusorou oku do pasal di turu' nohopod o toun do poingraag o Yorusalim, do tumanud di pinosunud do Tuhan dot id di Yoromia. 3 Om sambayang oku noddi dot id Tuhan i Kinorohingan, do mikuwo'd aayi-ayi' kopio o ginawo ku om mokiinsian kopio oku dau, om puasa oku, om minanampakai oku'd pakayan do mogihad, om minirikau oku do hiri'd pupuk. 4 Om sambayang oku no dot id Tuhan, i Kinorohingan ku om okuno' ku no i dusa do bansa' ku. Boros kangku, “Oi Tuhan, i Kinorohingan, iya' nopo om agayo i', om pusohon dahai iya'. Om otorodok ko dot id tumpongo nu om pointalang ko do kosianan nu dit aiso' o kopupuson dot id tulun dit osianan diya' om i momonsoi do ponuhuan nu. 5 Nokowonsoi no iyahai'd dusa, om araat iyahai, om nokowonsoi iyahai'd sala'. A' dahai winonsoi i pinonuhuan nu dahai'd momonsoi om tuminongkiad iyahai do mantad id ponudukan nu dit ongotopot. 6 A' iyahai minokinongou di susuhuon nu, i piro-piro di minimboros dot id suang do ngaran nu dot id piro-piro o raja' dahai, om id pomorinta' dahai, om id kongomolohingan dahai, om id koinsanai'd bansa' dahai. 7 Iya' nopo, oi Tuhan, om osonong kasai' i' om otulid o wonsoyon nu, nga' iyahai nopo om managalai nopo do moningayam do tinan dahai. Miagal ngai' nopoddi iyahai, i poingiyon do hilo'd Yudia om i hilo'd Yorusalim om koinsanai'd tulun dot Israil di pinotompias nu dot id pomogunan dit id sodu', om it id somok tu' a' i' iyolo' otorodok dot id diya'. 8 Kointingayam tomod o kowoyo-woyoon do koinsanai'd raja' om pomorinta' om komolohingan dahai, om minomonsoi iyolo'd dusa dot id toguang nu, oi Tuhan. 9 Nga' obinsianan ko i' om obingampun ko do mulong piya do suminaap daa iyahai diya'. 10 A' iyahai minokinongou diya', oi Tuhan, i Kinorohingan dahai, do tontok di minomisunud ko dahai do tumanud dit oturan do pinatahak nu dahai, do pinolombus di piro-piro o nabi, i susuhuon nu'ddi. 11 Oinsanan nopo o tulun dot Israil do tuminolibamban dit oturan nu om minada' do mokinongou di pinoboros nu. Nokowonsoi iyahai'd dusa dot id toguang nu, om gowoi poddi om pinaratu' nu dot id dahai i popol di nokotulis do hiri'd Tourat di Musa, i susuhuon nu'ddi. 12 Om wonsoyo' nu no o miagal di pinabatos nu do wonsoyon nu dot id dahai om id pomorinta' dahai. Om awagat no kopio o pinomohukum nu'd Yorusalim ko' mantad di bandar do suwai do hiti'd pomogunan. 13 Pinorikot ngai' nu nopo dot id dahai o koinsanai di hukuman do nokotulis do hiri'd Tourat di Musa. Nga' iyo piya'ddi, oi Tuhan i Kinorohingan dahai, nga' a' i' kasai' iyahai mumbal do tumongkiad do dusa ko' mumbal pod tumanud di ponudukan nu, do poposonong do ginawo nu. 14 Iya' no, oi Tuhan i Kinorohingan dahai, o minomohukum dahai di kosusaan di nokosodia' mantad, tu' osonong kasai' i' om otulid o wonsoyon nu, nga' a' i' iyahai minokinongou diya'. 15 Oi Tuhan, i Kinorohingan dahai, pinointalang nu i kuasa' nu do tontok di pinoposoliwan ko do tulun nu do mantad hilo'd Masir, om osorou kasai' po i kuasa' nu'ddi. Nokowonsoi no iyahai'd dusa, om nakasala' iyahai. 16 Minogobi' ko i' dahai di gulu po, om iyo nopoddi om kada' nondo kotogod do Yorusalim. Tu' iri nopo om bandar nu i' om nuluhon nu dit olidang. Om poinsiriba-ribaon poddi di tulun di hiri'd pomogunan do posorili' do Yorusalim i tulun nu do gama' di dusa dahai, om i karaaton di komolohingan dahai. 17 Oi Kinorohingan, pokinongoho' no iti sambayang ku om iti pokionuon ku. Tondulio' no i Walai'd Sasambayangan dot Agayo, i naraag diri; sonongo' nori om koilo ngai' i' o tulun dot iya' no o Kinorohingan. 18 Pokinongoho' no iyahai, oi Kinorohingan; antangai no iyahai, om antangai no iti kosusaan dahai om i koinggoritan di bandar di pinungaranan do ngaran nu. Sumambayang iyahai dot id diya' tu' oilaan i' dahai dot obinsianan ko, om okon i' ko' mantad do kosonongo' do winonsoi dahai o poimpahan nu'd kosianan nu. 19 Oi Tuhan, pokinongoho' no iyahai, om ompunai no iyahai om wonsoyo' no kopio'd oruhai it apatut nu'd wonsoyon. Kada' kalaid, om koilo ngai' indo o tulun dot iya' no o Kinorohingan. Tu' diya' i' di bandar diri om diya' di tulun,” kangku.
Sinusui di Gabriol o Komoyon di Pinoboros do Pasal dit Osiliu dot id Dabantalan
20 Om a' oku i' tuminingkod do suminambayang, om mingakun do dusa ku om i dusa di bansa' ku, iri no i bansa' dot Israil, om mikuwo'd mokianu'd Tuhan i Kinorohingan ku, do tondulion dau i Walai'd Sasambayangan dot Agayo, it Olidang diri. 21 Om tontok di maso ku'd sumambayang, om rikot no i Gabriol, do mulud-tulud do hiri'd toning ku. Iyau no i nokito ku dot id pinointalang dit id gulu ko' iti. Om maso nopoddi nga' kapatahakan nod porsombahan di sumbolion di dongsosodopon. 22 Om boros ka dau, “Oi Daniol, ruminikot oku'd hiti do mongoi diya' posuhut do komoyon di pinoboros do pasal dit osiliu dot id dabantalan. 23 Tontok di tuminimpuun ko do mokianu do Kinorohingan om simbaro' ko no dau. Osianan i' iyau diya', om nokorikot oku'ddi do mongoi pomisunud diya' dit isimbar dau. Om dinondo nodti om mokinongou no do maso ku'd popoboros do komoyon di pinointalang diri. 24 Iri nopo i maso do natantu' do Kinorohingan do polobuson i bansa' nu om i bandar dokoyu dot olidang do mantad id dusa om karaaton nga' inturu' o turu' nohopod o toun. Ompunan nondo o koinsanai'd dusa om pogiroton do gisom do poingompus it otulid, om abayaan i' i pinointalang om i pinoboros do pasal dit osiliu dot id dabantalan, om asambayangan indo kawagu do patahakon dot id Tuhan i Walai'd Sasambayangan dot Agayo, it olidang diri. 25 Tuliso' noti, om ilaan no kopio: Mantad nopo di maso do koponuhuan do mononduli' do Yorusalim, om inturu' pondo i turu' o toun do koloido'. Om owonsoi nondo kawagu o Yorusalim om awansayan do ralan om tolig dit ogirot. Om poingiyo kasai' nondoddi do solinaid dot inturu' ot onom nohopod om duwo o toun, nga' tontok nopondod maso'ddi om maso dit osusa' kopio. 26 Om kooyion nopondod maso'ddi om apatai nondo i boyoon do nopili'd Kinorohingan, nga' aiso' i' o sala' dau. Om araag nondo i bandar om i Walai'd Sasambayangan dot Agayo do raagon do soudor dit ongokoris kopio. Om miagal pondod luyud i kopupuson do pomogunan do rumikot tu' mongigit do pisangadan om karaagan di natantu' mantad nod Kinorohingan. 27 Om haro nondo o piumpangaan do pomorinta' diti, dit ogirot kopio dot id tulun dot ogumu', do solinaid do turu' o toun, om piintangaan nopondod maso'ddi, om tingkodon nondo dau o porsombahan di sumbolion om i piro-piro o porsombahan di suwai. Om poiyonon nondo i Karaaton di Mamaraag, do hiri'd Walai'd Sasambayangan dot Agayo, om hiri kasai' nondo iri do gisom pod orikatan do kapatayon di natantu' mantad do Kinorohingan i pinopoiyon diri do hiri,” ka dau.
Sinambayangan di Daniol i Bansa' Dau
1 Tontok di kotolu'd toun di Raja' Koris do momorinta' do Porsia, om haro o boros do pinointalang dot id di Daniol, i pinungaranan dot i Biltisasar. Iri nopo i boros diri om otopot i' kopio nga' apagon kopio do mongilo o komoyon. Om iri nopo komoyon di boros diri om pinotuduk dot id di Daniol dot id suang do pinointalang. 2 Tontok nopoddi nga' mogihad oku do solinaid do tolu kopio o minggu'. 3 Om a' oku i' minangakan do nunu nopo o taakanon dit awasiu ko' tikanas po, om a' oku minonginum do waig dot anggur, om a' ku sinudai o tobuk ku dot a' po natalib i tolu o minggu'. 4 Tontok di tadau'd koduwo nohopod om apat, di tulan do koiso' do toun diri, om poingkakat oku do hiri'd tisan do Bawang do Tigris, i bawang dot agayo. 5 Tingaha' oku no om kokito ku o songulun do kipakayan dot opurak om kitagkos do tamas di nosompipi'. 6 Om mogulinau nopo o tinan dau do miagal do watu dit olumis om it agayo o gatang. Om rabas dau nga' miagal pod kanawaho' do kodumaat, om iri mato dau nga' abahang tomod do miagal do tapui. Om iri longon om gakod dau nga' okolong poo do miagal do tambaga' di kinisasan, om iri tuni do boros dau nga' miagal pod boros do tulun dot ogumu'. 7 Om iso-iso' oku do nokokito do pinointalang diri. Aiso' i' o nokokito di tulun di moyo-woyo' doho', nga' nooris i' ma iyolo', om poggidu' no iyolo' do minongoi lisok. 8 Om iso-iso' oku noddi do noolu'd hiri do miontong di pinointalang di kosuayan kopio'ddi. Om oluhoi no o tinan ku, om rabas ku po nga' nokosimban tomod do gisom dot aiso' no matuu daa o kotutun doho'ddi. 9 Om soira'ddi norongou ku i boros dau, om kahaba' oku nopo do hiri'd tana' do nahadan, om hiri oku noddi do pointungub. 10 Om haro'ddi o longon do minongoi kama' doho' om pinapakakat do longon om totud ku; nga' gagaran kasai' oku po. 11 Om boros kaddi di moloikat dot id doho', “Oi Daniol, osianan i' o Kinorohingan diya', ingkakat no om pokinongohon no kopio iti poboroson ku. Tu' sinuhu' oku do mongoi solowot diya',” ka dau. Om soira'ddi nokoboros dau o miagal diri, om ingkakat oku no, nga' maso ku pod gagaran. 12 Om boros kaddi dau dot id doho', “Oi Daniol, kada' poddosi. Tu' norongou id Kinorohingan i sambayang nu do mantad poddi tadau do mininsiriba' ko do mokianu'd toilaan. Om ruminikot oku'ddi dot isimbar di sambayang nu. 13 Suminaap doho' i moloikat do mongintirung do pomorintaan do Porsia do solinaid do duwo nohopod o tadau. Om rikot noddi i Mikail, i tiso' di boyoon do moloikat, do minongoi uhup doho', tu' iso-iso' oku no do noolu' do hilo'd Porsia. 14 Nokorikot oku do mongoi popoilo diya' ondung nunu ot osiliu dot id bansa' nu dot id maso dot abantalan. Iti no o pinointalang do pasal dit osiliu dot id dabantalan,” ka dau. 15 Soira'ddi noboros dau o miagal diri, om tuku' oku nopoddi, om a' oku no nokoboros. 16 Om poroloyo' noddi di moloikat, i koiyo-iyo do tulun diri, i longon dau, om ngoyo' no kamao' o munung ku. Om boros kangku dot id dau, “Oi Tuan, olomok oku po tomod do nokokito diti pinointalang, om a' oku nopoddi otingkod do gagaran. 17 Miagal oku pod turipon do poingkakat dot id toguang di Tuan dau. Poingkuro oku pod moro-boros diya'dti oi Tuan, tu' olomok oku no, om mumpak- sumpak poo o pinuhobo ku,” kangku. 18 Om ngoyo' oku po kawagu dau kamao' om okoris-koris noddi o nopurimanan ku. 19 Om boros ka dau, “Osianan i' o Kinorohingan diya', om kada' pologoso' o nunu nopo do katangkabo diya' ko' kooris po diya',” ka dau. Om soira'ddi noboros dau o miagal diri om nokokoris oku poddi kawagu. Om boros kangku'ddi, “Oi Tuan, sunudai oku nopod poboroson nu. Tu' nokokoris oku no diya',” kangku. 20-21 Om boros ka dau do suminimbar, “Oilaan nu i' ondung nokuro tu' ruminikot oku'd hiti'd diya'? Kinorikatan ku nopo om mongoi popoboros dot id diya', di nokotulis do hiri'd Buuk do Katapatan. Om gumuli' oku noddi do mongoi sangod di moloikat do mogintirung do Porsia. Om atalib nori, om rumikot no i moloikat do mongintirung do Yunani. Om aiso' no o monguhup doho' do suwai ko' i Mikail, i moloikat do mongintirung dot Israil, i pomogunan nu.
1 Iyau no i sinuhu' do monguhup om mogobi' doho', do tontok di sontoun nogi' i Darius, i tulun do Modia, do momorinta'. 2 Om iti nopo posunudon ku diya'dti om otopot i' kopio,” ka dau.
Pomorintaan do Masir om Pomorintaan do Siria
Om boros ka di moloikat, “Tolu po o raja'd suwai do kopomorinta' do Porsia, om susuhutonon no di raja' do kaapat, i kaya' kopio ko' mantad di suwai. Om koinggayo nopondo kopio o kuasa' dau om koinggumu' o kakayaan dau om momusorou nondo iyau do manangod do Yunani. 3 Om mimbulai nondo o songulun o raja' di gunsiou. Om agayo nondo o pomogunan do porintaon dau, om nunu nopo o korohian dau om iri no o wonsoyon dau. 4 Nga' maha' di koinggayo kopio o kuasa' dau, om abahagi' indo o pomorintaan dau dot apat o bohogian. Sumowoli nopondo dau do momorinta' om raja' dit okon ko' mantad id sinakagon dau, nga' a' no iyolo' koiyo dau kokoris. 5 Om kumoris nondo i raja' do Masir. Nga' haro nondo o tiso' di boyoon do soudor dau dot okoris ko' mantad dau, om agayo-gayo pondo o pomogunan do porintaon diri. 6 Om atalib pondo o piro-piro toun, om monokiambalut nondo i raja'd Masir di raja' do Siria, om pokowinan dau di raja' do Siria i tanak dau'd tondu'. Nga' a' i' alaid i piombolutan diri, om patayon indo i tanak do tondu' di raja'ddi, om i sawo dau, om i tanak dau, om koinsanai di susuhuon do tuminanud di tondu'. 7 Om a' pondo alaid do mantad diri, om osiliu nod raja' o tiso' di koobpinayan di tanak do raja'd tondu'ddi. Om ngoyon nondo dau songodo' i raja' do Siria, om ngoyon soruango' i kuta' do pogintirungan diyolo', om aala' nondo dau iyolo'. 8 Om tanggayan nondo dau do hilo'd Masir i tininganak do tingolig di pisangod dau om i piro-piro o pakakas do tamas om pirok di nakatahak dot id tingolig diri. Om atalib pondo o piro-piro toun do haro o kosimbayanan, 9 om ngoyon nondo di raja' do Siria songodo' o Masir, nga' aala' i' iyau, om koguli' iyau do hilo'd pomogunan dau. 10 Om sumodia' nondod mongoi sangod i tangaanak do kusai di raja' do Siria, om monimung iyolo' do soudor dot ogumu'. Om iri nopo tiso' diyolo' nga' miagal pod luyud do rumudsu', om ngoyon nondo dau soruango' o kuta' do pogintirungan di pisangod dau. 11 Om atatagadan nopondo i raja' do Masir om mongoi nondo iyau sangod di raja' do Siria om aala' nondo dau i soudor do Siria dit ogumu'ddi. 12 Om oondos tomod nondo iyau di kinamanangan dau tu' ogumu' i' o pisangod do napatai dau, nga' a' i' mando iyau kamanang kasai'. 13 Om gumuli' nondo i raja' do Siria om monimung po kawagu iyau do soudor dit ogumu' ko' mantad di gulu. Om orikot pondo i maso, om pogulian no dau kawagu do miwoyo' di soudor dit ogumu'ddi, om it ongkirapo-rapo ngai' do mongoi sangod. 14 Om ogumu' nondo o tulun do sumaap di raja' do Masir. Om haro nondo o tulun dit ongorongit do mantad id bansa' nu do sumaap, oi Daniol, tu' nokokito i' iyolo' do pinointalang, nga' aala' i' iyolo'. 15 Om turungkuon nondo di raja' do Siria o tiso' do bandar di kitolig, om aanu nondo diyolo' iri. Om a' nondo milo'd tumilombus do sumangod i soudor do Masir; tu' iri piya it osiou kopio diyolo' nga' a' nondo kogoos. 16 Om wonsoyon nopondo di raja' do Siria o nunu nopo o korohian dau dot id diyolo', om aiso' i' o kaantob-antob dau do momonsoi'ddi. Om osolod nondo dau i Tana' di Pinabatos, om oporinta' nopondo kopio dau iri. 17 Om suhuon poddi raja' do Siria o koinsanai di soudor dau do mongoi panangod do Masir. Om ralan nopo dau do momorinta' do koinsanai'd pomorintaan di pisangod dau, om monokiambalut iyau dau om pokowinan dau di raja'd Masir i tanak dau'd tondu'; nga' aiso' i' mando o kotutuk-tutukon di wonsoyon dau'ddi. 18 Om katalib pondo iri om ngoyon nondo dau songodo' i bansa' do hilo'd potoropis do rahat om ogumu' nondo ot aala' dau. Nga' haro nondo o songulun o boyoon do mantad id pomogunan do suwai do kaala' dau om moningkod di pongindaraat dau; om iyau nondo ot indaraaton di boyoon di mantad id pomogunan do suwai'ddi. 19 Om gumuli' nondo i raja' do Siria do hiri'd kuta' do pogintirungan do hiri'd pomogunan dau, nga' aala' no mando iyau, om aiso' nondo o habar do pasal dau. 20 Om sowolion nondo iyau dot iso' kawagu o raja', i monuhu' do pagawai dau dit orongit do mongoi ponginggorit di tulun, tu' sansagan dau iyolo' do mambayar do sukai do pomoruhang di kakayaan do pomorintaan dau. Nga' a' pondo alaid om patayon no i raja'ddi, nga' okon i' ko' id dokito'd tulun dot ogumu', om okon ko' id pisangadan o kapatayon dau,” ka dau.
I Raja' do Siria dit Araat
21 Om posunudo' po kawagu di moloikat dot id doho', o poingkaa, “Iri nopo i raja' do Siria di sumusuhut om tulun dit araat, om it a' i' daa osorupai do sumiliu'd raja', nga' sigog i' do rumikot iyau do mangahau'd kuasa' di don raja' tu' magakal i' iyau. 22 Om isai nopo i sumaap dau dot iri piya i Boyoon dot Agayo dot Imam, nga' oimuhau tomod nopondo om apatai. 23 Om monokitaru' nondo iyau do maan do pagakal do bansa'd suwai. Om muhang- ruhang nopondo o kokoriso' dau, do mulong piya dot okooro' daa o pomogunan do porintaon dau. 24 Om ngoyon nondo dau tigowoo' do manangod i watas dit ongoluhub o tana', om mingwonsoi nondo iyau dit a' di komolohingan dau noumbalan do momonsoi. Om bohogion nondo dau dot id tulun di tuminanud dau i konunu-nunuan om i dapu' do naanu dau dot id pisangadan. 25 Om osiou tomod nondo iyau do mongoi sangod do raja'd Masir tu' monimung i' iyau do soudor dot ogumu', nga' iri raja' do Masir nga' posodia' nogi' do sumuli'd sumangod do miwoyo' di soudor dau dit ogumu' om ongorongit. Nga' a' i' kamanang i raja'd Masir tu' kosuang indo iyau'd takal. 26 Om iri i gomponosihat dau dit ogirot kopio o piombolutan dot id dau o paparatu' dau. Om ogumu' nondo o soudor dau dot apatai, om aiso' nondo o soudor dau. 27 Om mitorungak nondod makan i duwo o raja'ddi nga' sorohon nopo mandod ginawo diyolo' om araat i', tu' sopiudut-udut nopo iyolo' goduwo. Om a' indo diyolo' aanu i pokioonuan diyolo' tu' a' po norikot i maso'ddi. 28 Om gumuli' nondo i raja' do Siria do hilo'd pomogunan dau do mitonggoi di konunu-nunuan di nangaanu dau, tu' iso-iso' no kopio o ginawo dau do sipananus do tugama' di tulun do songonuon do Kinorohingan. Om wonsoyon pondo dau i korohian dau om gumuli' nogindo iyau do hilo'd pomogunan dau. 29 Om alaid-laid pondo om ngoyon nogi' dau kawagu songodo' o Masir, nga' diri nopondo om suwai no o kootuson. 30 Tu' rumikot nondo i tulun do Rum do songinsakai'd kapal do rahat do mantad hilo'd Siprus do mongoi panangod dau, om moddosi nondo tomod iyau. Om gumuli' nondo iyau do mikuwo'd otogod tomod om mumbal no daa'ndo iyau do mananus do tugama' do tulun di songonuon do Kinorohingan. Om tumanud nondo iyau'd nosihat do tulun di tuminongkiad do tugama'ddi. 31 Om haro nondo o piro-piro di soudor dau do mongoi ponosomu' di Walai'd Sasambayangan dot Agayo. Om tingkodon nondo diyolo' i porsombahan do sumbolion di patahakon do monikid tadau om poingkakaton nogindo diyolo'd hiri i Karaaton di Mamaraag. 32 Om sokodungon nondo i raja'ddi di tulun di tumongkiad di tugama' diyolo' tu' kosuang tomod nopo iyolo'd takal, nga' sumaap indo do sumuli' i tulun di maso'd otorodok dot id Kinorohingan. 33 Om potudukon nondo di piro-piro o boyoon dit ongoilo i toilaan diyolo' dot id piro-piro tulun do suwai. Nga' daamot nopondoddi, om haro nondo o wookon diyolo' dot apatai dot id pisangadan om sorobon do gisom dot apatai, om haro ot apanakahan om maan pogiilo'. 34 Om tontok di maso'd haro o mimpatai, om a' indo kosongkuro o mongoi uhup di tulun do songonuon do Kinorohingan, om iri piya i koongoi kouhup diyolo' nga' obinsuhu' i' toomod di pokioonuan diyolo' o kaangayan kouhupai. 35 Om haro nondo o wookon di boyoon dot ongoilo'ddi dot apatai, nga' iti nogindo o kolidang di tulun. Om miagal kasai' nopondodti do gisom id orikot i maso do kopupuson do pomogunan, i maso do natantu' mantad do Kinorohingan. 36 Om mingwonsoi nopondo i raja' do Siria do nunu nopo o korohian dau. Om oondos tomod nondo iyau tu' agayo i' iyau ko' mantad do nunu nopo o ponokokinorohingan, om asawat ko' mantad di Kinorohingan dot Asawat Kopio. Om milo po iyau do mingwonsoi do miagal diri dot a' po orikot i maso dau do hukuman do Kinorohingan. Om wonsoyon indo do Kinorohingan o miagal di natantu' mantad dau. 37 Om a' nondo di raja' podulon i ponokokinorohingan di sinubak do komolohingan dau, om i ponokokinorohingan do subakon do tongoondu'. Om aiso' nopo o ponokokinorohingan do podulon dau tu' sorohon nopo dau dot agayo iyau ko' mantad diyolo'. 38 Nga' pusohon nogindo dau i ponokokinorohingan do mongintirung do kuta' di pogintirungan. Om patahak nondo iyau do porsombahan do tamas, om pirok, om watu dit olumis dit agayo gatang, om piro-piro o tipuhawang dit angagayo gatang dot id ponokokinorohingan dit a' di komolohingan dau insan subako'. 39 Om suhuon nondo dau o tulun do tumuku' dot id ponokokinorohingan do suwai di mongintirung di kuta' do pogintirungan dau. Om suahon tomod nondo dau i tulun di moniliu dau do raja', om onuan dau iyolo' do karaja' dit asawat, om onuan dau do tana' do maan do pamagadsi'. 40 Om soira' nopondod muhai-ruhai dot orikot o maso do kopupuson di pomorintaan di raja' do Siria, om ngoyon nondo iyau songodo' di raja' do Masir, om tumotos no daa'ndo i raja' do Siria do sumuli' do mamakai di korita'-kuda' om kuda', om piro-piro o kapal do rahat. Om ngoyon nondo dau songodo' o piro-piro o pomogunan do miagal po iyau'd luyud di rumudsu'. 41 Om iri piya i Tana' do Pinabatos nga' ngoyon i' dau songodo' om piro-piro nopondo nohopod noribu o tulun do patayon dau, nga' iri nopondo pomogunan dot Idom, om Muab om i noolu-olu' do pomorintaan dot Amon om a' i' dau ngoyon songodo'. 42 Om soira' nopondod ngoyon ngai' dau songodo' o pomogunan diri, om osolod ngai' dau iri, om Masir piya'ndo nga' a' no oolu'. 43 Om tanggayan nondo dau i dapu' do Masir di songinlisok, i tamas, om i pirok om i piro-piro o dapu' do suwai dit agayo kopio o gatang. Om aala' nondo dau o Libia om Etiopia. 44 Om ooris nondo iyau di habar do mantad hilo'd koulayon om hilo'd utara, om tumotos nondo iyau'd sumangod, om ogumu' tomod nondo o tulun dot apatai dau. 45 Om gisom do powonsoyon dau i kiim dau don raja' dit agayo om akawas do hiri'd pialatan di rahat om i nuluhon di pinoingkakatan di Walai'd Sasambayangan dot Agayo. Nga' apatai i' iyau, om aiso' o tongosongulun piya'd hiri do monguhup dau,” ka dau.
I Kopupuson do Pomogunan
1 Om boros ka kawagu di moloikat di kipakayan dot opurak, “Tontok nopondod maso'ddi om mimbulai nondo i Mikail, i moloikat dot agayo'ddi, om i mongintirung do bansa' nu. Om haro nondo o maso do kosusaan dit araat no kopio, om aiso' no o koiyo'ddi do mantad di timpuun i' do haro o bansa' dot agayo. Om orikot nopondo o maso'ddi om apasi indo i tulun di mantad id bansa' nu, i nongkotulis o ngaran do hiri'd buuk do Kinorohingan. 2 Om ogumu' nondo i nangapatai no dot apasi kawagu; haro nondo o kaanu do koposion dit aiso' o kopupuson om haro o kaanu do kointingayaman dit aiso' o kopupuson. 3 Om mogulinau ngai' nopondo i boyoon dit ongoilo do miagal pod kanawaho' do tawan. Om iri tulun di minonuduk do piro-piro o tulun do momonsoi'd otopot om it otulid nga' mogulinau nondo do miagal do rombituon do gisom dot alaid,” ka dau. 4 Om boros ka di moloikat dot id doho', “Posompono' nondo ino buuk oi Daniol, om saapan no do monompon om poinsompon i' kasai' do gisom do kopupuson diti pomogunan. Nga' daamot nopodti om ogumu' nondo o tulun do mumbal do mongilo ondung nokuro tu' miagal diri ot osiliu. Nga' aiso' i' o kotutuk- tutukon di wonsoyon diyolo'ddi,” ka dau. 5 Om kokito ku'ddi o duwo o kusai do poingkakat dot id tisan do bawang, om miampaping nopo iyolo' di tisan di bawang. 6 Om ponguhot no di moloikat di poingkakat do hiri'd sarayo-rayo di bawang, o tiso' diyolo'. Boros ka, “Songkuro nopo o koloido' do gisom dot opupusan iti piro-piro ot osiliu di kosuayan kopio'dti?” ka dau. 7 Om poinsawato' goduwo no di moloikat o longon dau do pointuduk do hilo'd tawan om sumpa' no dot id suang do ngaran do Kinorohingan di poingompus. Om norongou ku'ddi iyau do minomoros do poingkaa, “Tolu o toun om satanga' o koloido' dot osiliu o miagal diri. Opupusan pondod monginggorit i tulun do songonuon do Kinorohingan, om osiliu ngai' nogi' iti,” ka dau. 8 Om norongou ku i' i pinoboros dau nga' a' oku i' maddi kosuhut. Om ponguhot oku noddi do poingkaa, “Nga' poingkuro nondo iri dot opupusan, oi Tuan” kangku. 9 Om boros ka dau, “Mamanau ko nondo, oi Daniol, tu' iti nopo boros diti om a' i' popimboroson om lisokon do gisom pod orikot o kopupuson do pomogunan. 10 Om ogumu' nondo o tulun dot olidangan. Om iri nopondo it angaraat om a' i' kosuhut, om tumilombus nopo iyolo' do momonsoi dot araat; iri no i milo'd momusorou o kosuhut. 11 Mantad nopondo di kinoponingkadan di porsombahan do sumbolion di patahakon do monikid tadau, om mantad di kopoingkakatan di Karaaton di Mamaraag, om 1,290 o tadau do koloido'. 12 Om olumaag no i tulun dit otorodok kasai' do gisom dot atalib o 1,335 o tadau! 13 Om tumorodok no do gisom do kopupuson, oi Daniol. Om matai ko nga' tumungag ko indo kawagu do mongoi ramit di ponomuli' diya' do kopupuson do pomogunan,” ka dau.
1 Iti no i boros do Tuhan do pinoboros dau dot id di Hosia, i tanak di Biiri, do tontok di maso di Usia, om i Yotam, om i Ahas, om i Hiskia do raja' do Yohuda, om di maso di Yirobiam i tanak di Yihoas, do raja' dot Israil.
Sawo om Tangaanak di Hosia
2 Tontok di boro-boros i' o Tuhan dot id bansa' dot Israil do pinolombus di Hosia, om poingkaa o boros do Tuhan, “Oi Hosia, ongoi panansawo do tondu'd sundal om iri'ndo i tangaanak nu nga' miagal nopondo dau. Om iyo no di sawo nu i tulun ku do tuminongkiad doho' om a' tuminorodok dot id doho',” ka dau. 3 Om kowino' noddi di Hosia ot iso' o tondu' di roitan dot i Gomor, i tanak di Diblaim. Om kosusu noddi i tanak diyolo' di koiso', om kusai i tanak diri. 4 Om boro-boros noddi o Tuhan dot id di Hosia, “Pungaranai dot i Yisriil ilo tanak nu tu' a' no alaid do hukuman ku i raja' dot Israil tu' minimpatai i' do tulun i Yohu, i taki dau, do hilo'd Yisriil. Pupusan ku no o pomorintaan di sinakagon di Yohu. 5 Om hilo' nondod Rantai do Yisriil do raagon ku i kinoris do soudor dot Israil do tontok do maso'ddi,” ka dau. 6 Om haro po kawagu o tanak di Gomor do koduwo; om iti no om tondu'. Om boros kad Tuhan dot id di Hosia, “Pungaranan no ino tanak nu dot it ‘A' Insianan’, tu' a' ku nondo insianan i tulun do bansa' dot Israil om a' ku iyolo' ompunan. 7 Nga' insianan ku indo i tulun do Yohuda. Om iyoho' no i Tuhan, i Kinorohingan diyolo', o mamasi diyolo', nga' okon i' ko' pisangadan o pawayaan ku do mamasi diyolo', om okon ko' gayang ko' pana' ko' kuda' ko' tulun di sumasakai do kuda',” ka dau. 8 Om soira' di nokotingkod di Gomor do sumusu i tanak dau, om ponontian no kawagu iyau. Om iti noo om kusai. 9 Om boros kad Tuhan dot id di Hosia, “Pungaranan no ino tanak nu dot it ‘Okon ko' Tulun Ku’, tu' okon no ko' tulun ku i tulun dot Israil. Om iyoho' nga' okon no ko' Kinorohingan diyolo',” ka dau.
Tondulion o Koiyon-Iyono' dot Israil
10 Om miagal nondod pasir do rahat o kogumuo' do tulun dot Israil, tu' a' no ointob-intob. Om poingkaa o boros do Kinorohingan dot id diyolo', “Okon kou no ko' tulun ku,” ka. Nga' rumikot indo i tadau do kapamarasan dau dot id diyolo' do poingkaa, “Iyoho' no o Kinorohingan di poimpasi, om iyokoyu no o tangaanak ku,” ka. 11 Om opisugku' nondo kawagu i tulun do Yohuda om i tulun dot Israil. Om momili' nondo iyolo'd songulun o boyoon diyolo', om gumumu' nondo iyolo' om osimbayan kawagu do hilo'd pomogunan diyolo'. Tadau nopo do Yisriil om atantu' no do tadau dit agayo!
1 Iyo nopoddi om roitan no i sompi' ko' tulun dot Israil do “Tulun do Songonuon do Kinorohingan” om it “Insianan do Tuhan,” ka dau.
I Gomor i Tondu' dit A' Otorodok o Poiyaan dot Israil
2 Om boros kad Tuhan, “Oi tangaanak ku, lugu-lugutai no ilo tina' dokoyu do mulong piya dot okon ku noddi ko' sawo iyau, om okon oku ko' sawo dau. Lugu-lugutan no iyau do tumingkod do magampahu' om tumingkod do sundal. 3 Tu' ondung a' iyau tumingkod do sundal, om labasan ku no iyau do miagal di pogkosusuo' i' iyau. Om silihon ku nondo iyau do miagal do tana' dit otuu om it a' sunian, om apatai nondo iyau dot otutuuhanan. 4-5 Om a' nondo insianan i tangaanak dau tu' iyolo' nopo om tangaanak i' do mantad id kosusundal dau. Om tina' diyolo' nga' sundal dit a' no milo dot ointingayaman. Om boros ka dau, ‘Mongoi oku nondod hilo'd kongouhangan ku tu' manahak i' iyolo' doho' do taakanon om tinumon, om hulu do dumba' om kain linan om tumau do saitun om waig dot anggur,’ ka. 6 Om gowoi pondo, om pagaron ku iyau do rugi om momonsoi oku'd tolig do pagantob do ralan dau. 7 Om gumusa' no daa'ndo iyau di kongouhangan dau nga' a' no dau okosupan iyolo'. Om pingihumon nondo dau iyolo' nga' a' no dau okito iyolo'. Om momoros nondo iyau do poingkaa, ‘Gumuli' oku nogi' dot id sawo ku dit id gulu, osonong-sonong oku nogi' di hilo' oku po ko' iti baino',’ ka. 8 Om a' no di tina' nu okunon dot iyoho' o minanahak dau di gandum, om i waig dot anggur, om i tumau do saitun, om koinsanai di pirok om tamas di pakayon dau do tumuku' dot id Baal. 9 Om gowoi pondo om dongmongomot nopo om ngoyon ku nondo kawagu i pinopuhawang ku, dot i gandum om anggur, om i hulu'd dumba' om i kain linan di pinatahak ku dau do rosukon dau. 10 Labasan ku nondo iyau do hiri'd toguang di kongouhangan dau, om aiso' nondo o songulun piya diyolo' do milo do popoidu' dau do mantad id kuasa' ku. 11 Om tingkodon ku nondo o koinsanai di poginakanan dau, i poginakanan dau do monikid toun om monikid tulan om i karamayan do tadau'd Sabat, om koinsanai'd tadau'd agayo do don tugama'. 12 Om raagon ku nondo i guas dot anggur om i guas dot ara dau, i pinatahak di kongouhangan dau dot id dau do gadsi' dau do mogobi-obi' diyolo'. Om silihon ku nondod gouton i kabun dau'd anggur om i kabun dau'd ara, om raagon iri do nintorusan. 13 Om hukuman ku nondo iyau tu' nokolihu i' iyau doho' do piro-piro o koloido', om minodtutud iyau do kominyan dot id Baal om minanampakai iyau do tamas do mongoi gusa' di kongouhangan dau. Iyoho' no i Tuhan o minomoros diti,” ka dau.
Kosianan do Tuhan do Tulun Dau
14 Boros kad Tuhan, “Iyo nopoddi om tanggayan ku nondo kawagu iyau do hilo'd tana' do kowotuan om hilo' nondo dot insasamadan ku iyau om sunudan ku iyau dot osianan oku dau. 15 Om pogulion ku nondo kawagu dot id dau i kabun dot anggur om silihon ku do wawayaan do pagandasan i Kubong do Kosusaan. Om hilo' nondo do rumamit iyau doho' do miagal di winonsoi dau dit omulok po iyau, tontok di kososoliwan dau do mantad hilo'd Masir. 16 Om roitan oku nondo dau do sawo dau, om a' oku nondo dau roitan do Baal. 17 Om a' ku nondo kawagu iyau pologoson do mamarait do ngaran do Baal. 18 Om tontok nopondo do maso'ddi om momonsoi oku nondod tumpongo dot id nintorusan om id tombolog, om a' i' iyolo' pokoruol do tulun ku. Om iduwon ngai' ku nogi' o koinsanai'd rapo-rapo do sumangod do mantad id pomogunan diri, om koinsanai'd gayang om pana', om tingkodon ku o koinsanai'd pisangadan om osimbayanan i' om aiso' o koligagaanan di tulun ku do momogun-mogun do hilo'. 19 Oi Israil, silihon ku nondo iya' do sawo ku; otulid oku i' om otorodok oku. Pointalangan kasai' ku i' iya' do kosianan om kolisihan om iyoho' nondo o sanganu diya' do gisom dot alaid. 20 Sulungon ku indo i batos ku om songonuon ku iya', om okunon nu nondo dot iyoho' o Tuhan nu. 21-22 Tontok nopondo do maso'ddi om simbaron ku indo o sambayang dot Israil i tulun ku. Om pasandatan ku'd rasam iti tana' om posuni' nondod gandum om anggur om saitun iti tana'. 23 Pomogun-mogunon ku nondo i tulun ku do hiri'd pomogunan diyolo', om posimbayanon ku iyolo'. Pointalangan ku nondo do kosianan i tulun di roitan dot ‘A' Insianan’ om iri nogi' i tulun di roitan dot ‘Okon ko' Tulun Ku’ nga' roitan ku nondo dot ‘Iyokoyu no o Tulun Ku’ om sumimbar nondo iyolo' dot ‘Iya' no o Kinorohingan dahai,’ ka,” ka dau.
I Hosia om i Sawo Dau dit A' Otorodok
1 Om boros kad Tuhan dot id doho', “Pamanau po kawagu, om pointalangon i' o kosianan nu dot id tondu' di magampahu'. Om mositi' no dot osianan ko dau do miagal doho' tu' osianan do tulun dot Israil, do mulong piya do tuminongkiad iyolo' doho' om tuminuku' iyolo' dot id tingolig om papatahak do porsombahan do roti do kismis dot id tingolig,” ka dau. 2 Om pabayaro' ku noddi o hopod om limo o tusin do pirok om hatus om limo nohopod o kilogram do barli do pinomoli ku di tondu'ddi. 3 Om sinunudan ku iyau dot alaid nondo iyau dot a' ku toningon nga' solinaid nopodti om a' no iyau koino-ino do magampahu' ko' sumiliu pod sundal, om tontok no do maso'dti dot andadon ku iyau. 4 Om miagal nondodti o tulun dot Israil do momogun-mogun do piro-piro o koloido', dot aiso' o raja' om aiso' o boyoon, om aiso' o porsombahan do sumbolion om aiso' o torigi'd watu di don tingolig, om aiso' o tingolig, om aiso' o gimat di pongilaan dit osiliu dot id dosunsudan. 5 Nga' rumikot nondo o maso do gumuli' kawagu i tulun dot Israil dot id Tuhan, i Kinorohingan diyolo', om gumuli' iyolo' dot id iso' o sinakagon di Daud, i raja' diyolo'. Om oronok nondo om momusou iyolo'd Tuhan om kaanu iyolo' do barakat do mantad id Tuhan.
Pinasala' do Tuhan ot Israil
1 Haro o kapasalaan do Tuhan do tulun di poingiyon do hiti'd pomogunan diti. Pokinongou kou no do poboroson dau, oi Israil, “Aiso' no o kotorodoko' om kosianan do hiti'd pomogunan, om ilo tulun do hiti nga' a' magakun do Kinorohingan oku. 2 Mimbatos iyolo' nga' a' indo diyolo' sulungon; om mongudut iyolo' om mamatai, om manakau, om magampahu'. Muhang-ruhang nopo o karaaton om tulun di patayon nga' mogisuhut-suhut nopo. 3 Gowoi pondo om tumuu i tana' do pomogunan diri om matai ngai' i songingiyon do hilo'. Oinsanan nopondo i nintorusan om i tombolog dot apatai om iri piya sada' nga' apatai i',” ka.
Pinasala' do Tuhan it Imam
4 Om boros kad Tuhan, “Kada' pologoso' do haro o papasala' ko' monogod po di tulun ku, tu' pasalaon ku nopo om iyokoyu it imam. 5 Mingwonsoi kou nopo di kasala' do tadau om totuong, om iri nabi nga' miagal nopo dokoyu. Gowoi pondo om patayon ku ot Israil, i tina' nu. 6 Obungou no o tulun ku tu' a' i' iyolo' minamadul doho' om iyokoyu nogi' it imam nga' a' i' minamadul doho' om minagada' kou di ponudukan ku, om gowoi pondo om iyadaan ku iyokoyu om a' ku okunon do sumiliu'd imam di mogobi-obi' doho' i tangaanak dokoyu. 7 Ogumu-gumu' kou ot imam, nga' ogumu-gumu' no o dusa dokoyu dot id doho', om silihon ku nondo do kointingayaman i ngaran dokoyu'd osonong. 8 Kuminaya' kou tu' i dusa do tulun ku o nakakaya-kaya' dokoyu, om orohian kou nopoddi do momonsoi kasai' iyolo'd dusa. 9 Om miagal nopondo o hukuman do karatu' dot id dokoyu om id rayat! Hukuman ku nondo iyokoyu do miontok di nowonsoi dokoyu. 10 Kaakan kou piya di dokoyu'd bahagi' di porsombahan nga' louson kou pondo kasai'. Om tumuku' kou piya dot id tingolig di kororombung nga' aiso' kasai' i' o tanak dokoyu, tu' tuminongkiad kou i' doho'; om tuminuku' kou nogi' dot id tingolig,” ka dau.
Hinukuman do Tuhan i Tulun di Tumuku' dot id Tingolig
11 Om boros kad Tuhan, “Managak do pomusarahan dot osonong do tulun ku o waig dot anggur di wagu om i laid! 12 Mokianu kou'd pinointalang do mantad id sallangod o kayu-kayu! Sukud noo o momisunud dokoyu di pokiilaan dokoyu! Nokotongkiad kou no doho'. Nakatahak no dokoyu o tinan dokoyu dot id tingolig, do miagal po di tondu' di suminiliu'd sundal. 13 Papatahak kou do porsombahan di sinumbali' dot id kinoiyonon do modsubak do tingolig do hilo'd timpak do nulu-nulu, om modtutud kou do kominyan dot id sahau di kayu dit okohob tu' osonong tomod i' o hiri'd dolungungan diri! Om gowoi poddi om suminiliu ngai' do sundal i tangaanak dokoyu'd tondu' om iri tongoondu' di monongiwan dokoyu nga' magampahu' ngai' nopo. 14 Nga' a' ku i' iyolo' hukuman dot iyo piya'dti o winonsoi diyolo', tu' iyokoyu nga' mongoi i' dudun do sundal di mogobi-obi' do tingolig, om mogiwoyo-woyo' kou nopo diyolo' do papatahak do porsombahan di sinumbali' dot id tingolig, om otopot no kopio i boros do komolohingan do poingkaa, ‘Tulun nopo dit atagakan do pomusarahan dot osonong om araag no,’ ka. 15 Mulong piya dot a' otorodok o tulun dot Israil dot id doho', nga' maha' daa om a' iyo'ddi o kasalaan do tulun do Yohuda. Kada' ongoi sambayang do hilo'd Gilgal ko' hilo' pod Baitol, ko' mimbatos pod hilo' dot id suang do ngaran do Tuhan di poimpasi. 16 Miagal pod kaladai kosurilog i tulun dot Israil. Om poingkuro oku po daa'ndo do momogompi' dokoyu do miagal di dumba' do paakan-akanon do hiri'd kobuturan? 17 Nolimu' tomod nopod tingolig i tulun dot Israil. Pologoson nopo iyolo' do tumanud do korohian diyolo'. 18 Om aawuk nopondo iyolo' do koinum do waig dot anggur, om asanangan tomod nondo iyolo'd sumiliu'd sundal, om pokouhangon nogindo diyolo' o kointingayaman ko' ngaran dot osonong. 19 Om gowoi pondo om atanus iyolo' do miagal pod notilib do ribut, ointingayam nondo iyolo' tu' pinapatahak i' iyolo' do porsombahan di sinumbali' dot id tingolig,” ka dau.
1 Boros kad Tuhan, “Pokinongou kou nodti, iyokoyu it imam! Mokinongou kou no kopio, oi tulun dot Israil! Pokinongou kou no, iyokoyu i sinakagon do raja'. Otopot nopo kopio om apatut daa dot otulid o pomumutus dokoyu, nga' a' i', om gowoi pondo om porotuan ku iyokoyu do hukuman! Nosiliu kou nogi' do lawa' do hilo'd Mispa, om nosiliu kou'd kasip do hilo'd nuluhon do Tabor. 2 Om nosiliu kou'd luang dit aralom do hilo'd Bandar do Sitim, om gowoi pondo om hukuman ngai' ku iyokoyu. 3 Oilaan ngai' ku i' o wonsoyon dot Israil, tu' a' i' iyau milo'd popolisok do nunu nopo do mantad id doho'. A' iyau tuminorodok dot id doho' om iri tulun dau nga' a' no osorupai do tumuku' dot id doho',” ka dau.
Popoinsan do Tulun di Tumuku' dot id Tingolig
4 Mangantob no di tulun do gumuli' dot id Kinorohingan i karaaton do winonsoi diyolo'. Naanggaman no kopio iyolo' di podsusubak diyolo'd tingolig gisom dot a' no iyolo' mamadul do Tuhan. 5 Atalang tomod i koondos do tulun dot Israil, om iri no i popointalang kopio di dusa diyolo'. Papatahub om paparatu' diyolo' i dusa diyolo', om iri poddi tulun do Yohuda nga' kotonggoi i' diyolo' dot aratu'. 6 Om ihumo' po daa diyolo' o Tuhan do ralan nopod minogihum om pinapatahak do dumba' om sapi' do numaan do porsombahan di sinorob, nga' aiso' no o guna'ddi. Tu' notongkiadan no iyolo'd Tuhan, om a' no diyolo' oihum iyau. 7 Tu' a' i' iyolo' tuminorodok dot id Tuhan; om okon noddi ko' iyau o sanganu di tangaanak diyolo'. Om gowoi poddi om oruhai no iyolo'd araag do mitonggoi di koumaan diyolo'.
Pisangadan dot id Pialatan do Yohuda om Israil
8 Pounio' no i torumpit do momolohou'd mongoi sangod do hilo'd Gibia! Pounio' no i maan do popoinsan do mongoi sangod do hilo'd Rama! Popongkiso' no i pangkis do mongoi sangod do hilo'd Baitol! Ongoi no sangod, oi tulun do Binyamin! 9 Rumikot no i tadau do kopomohukuman, om apatai nondo o tulun dot Israil. Atantu' no dot osiliu iti, oi tulun dot Israil! 10 Boros kad Tuhan, “Otogod oku tu' sinangod i' do boyoon do Yohuda ot Israil om nongoi diyolo' solodo' i tana' diyolo'. Om gowoi pondo om rotuan ku iyolo'd hukuman di miagal pod luyud. 11 Oinggorit tomod ot Israil dot ulak-ulakan; om naahawan iyau do tana' di dau'd tinungkusan tu' suminonsog i' iyau do minongoi pokiuhup do tulun dit a' milo'd monguhup dau. 12 Om porikatan ku nondod karaagan ot Israil om porikatan ku'd kapatayon o tulun do Yohuda. 13 Soira'ddi nopurimanan dot Israil dot adalaan tomod iyau do sumakit, om di nokito'd Yohuda i dau'd suhat, om ongoi noddi ot Israil do hilo'd Asur do mongoi pokiuhup di raja' dot agayo, nga' a' i' iyau kolingos om a' koubat di suhat diyolo'. 14 Om iyo oku pondod singa do mongoi saap di tulun dot Israil om Yohuda. Om iyoho' nondo o popogitobilang-bilang do tinan diyolo' om tongkiadan ku nogindo. Om soira' nopondod gayaton ku iyolo' do mogidu', om aiso' nondo o tongoiso' piya'd tulun do milo'd mamasi diyolo'. 15 Om tongkiadan ku nondo i tulun ku do gisom pod ongopurimanan ngai' diyolo' i koinggoritan do nobungou di dusa diyolo' om rumikot nogi' daa'ndo iyolo' do mongoi pogihum doho'. Tu' mumbal i' doti' daa'ndo iyolo' do mogihum doho' dot id suang iyolo'd koinggoritan,” ka dau.
A' Iso-Iso' o Ginawo di Tulun dot Israil do Rumologo
1 Om boros ka ngai' di tulun, “Kainou gumuli' dot id Tuhan. Tu' norualan toko' no daa dau, nga' atantu' no do lingasan toko' i' dau; om sinuhat toko' daa dau, nga' rilitan i' bo dau i suhat toko'ddi. 2 Duwo no ko' tolu tadau, om posonongon toko' no dau kawagu om poimpasi toko' indo do pigompian dau. 3 Kainou pogi' tumotos do mintutun do Tuhan. Tu' atantu' no do rumikot i' iyau do miagal di tadau do dongkosuabon tu' rumikot i', om miagal di rasam tu' rumikot i' do momoyopos diti pomogunan do tontok di kararasaman,” ka diyolo'. 4 Nga' boros kad Tuhan, “Oi Israil om Yohuda, kukuroyon ku no ma iyokoyu'ndo? Tu' miagal nod bolobou do dongkosuabon o kosianan dokoyu dot id doho' tu' osuab po om otuu no, om miagal di haun do dongkosuabon tu' oruhai om atanus no. 5 Om iri no o kinoporikatan ku di piro-piro o nabi do boros ku dot id dokoyu do popolombus di boros ku do momohukum om mamaraag. Om osuhutan i' om atarang i pokionuon ku do mantad id dokoyu. 6 Pokionuon ku nopo dokoyu om osianan kasai' kou doho', om okon i' ko' i porsombahan dokoyu di sumbolion. Orohian oku nogid kotutun kou doho' ko' mantad do papatahak kou do porsombahan di sorobon dot id doho'. 7 Nga' iyo kou i' di Adam tu' tinolibambanan i' dokoyu i tumpongo ku dot id dokoyu. 8 Giliad nopo om bandar di noponu' do tulun dot araat om gampamatai. 9 Iri ngai' nopo it imam om miagal pod sinompuruan do gampanakau do magawang do tulun di tumalib. Hilo' piya'd ralan di poingkaa do hilo'd kinoiyonon dot olidang di hilo'd Sikim nga' mamatai i' iyolo'd tulun. Om tomodon ngai' i' diyolo'd momonsoi it angaraat diri. 10 Araat no kopio i nokito ku do hilo'd Israil: minonosomu' i tulun ku do tinan diyolo' tu' tuminuku' i' iyolo' dot id tingolig. 11 Om iyokoyu nogi', i tulun do Yohuda, nga' haro no o maso do natantu' ku do kopomohukuman ku dino wonsoyon dokoyu,” ka dau.
1 “Pointikid-tikid dot orohian oku daa do momolingos dot Israil, i tulun ku, om mononduli' do koiyon-iyono' diyolo', om okito ku nopo nga' iri po karaato' om i kasalaan diyolo'. Mogiudut-udut nopo iyolo', dot iyolo' ngai'; om monoruang iyolo'd walai do tulun do mongoi panakau; om ngoyon diyolo' panakahai i tulun do sampanau-panau do hilo'd ralan. 2 A' i' daa diyolo' osorou-sorou dot osorou ngai' ku i karaaton diri; nga' nosorili' po iyolo' di dusa diyolo', om atalang tomod i' iri dot okito ku,” ka dau.
Pakat dot Araat do Hiri'd Walai'd Raja'
3 Om boros kad Tuhan, “Akalan do tulun i raja' diyolo' om i piro-piro o pagawai di raja' dot i pakat diyolo'd araat o pagakal. 4 Araat ngai' nopo iyolo' om a' otorodok dot id doho'. Iri nopo kararaat do ginawo diyolo' nga' miagal po di tapui do hiri'd ropuhan, tu' a' i' di mogogonsok siduan dot a' po posodia' i roti dot onsokon. 5 Tontok di tadau do karamayan di raja', om numaan diyolo' owuko' di waig dot anggur i raja' om koinsanai di pagawai di raja', om gisom do mingwonsoi poddi iyolo' di dongkababasug. 6 Om alaid noddi, om monokiambalut tomod diri i raja' di tulun dot angaraat diri. Iyo po di tapui do hiri'd ropuhan i korohian diyolo'd araat do mikit-sikit dot id ginawo diyolo' di dongotuong, om kosuabon nopondo nga' molob-ngolob poo do miagal di tapui. 7 Om soira'ddi nokototos noddi kopio o kototogod diyolo' om patayo' nopo diyolo' i boyoon diyolo'. Om mogisuhut-suhut nopo i raja' diyolo' do numaan diyolo' patayo', nga' iyo piya kopio'ddi karaat i nosiliu, nga' aiso' i' o tiso' diyolo' do suminambayang do mokiuhup doho',” ka dau.
Israil om i Piro-Piro o Bansa'd Suwai
8 Om boros kad Tuhan, “Iri nopo tulun dot Israil om miagal do roti di sampaping no o noonsok tu' monokisokodung i' iyolo' di piro-piro o bansa' di posorili' diyolo'. 9 Om a' i' iyolo' kopuriman dot atagak o kinoris diyolo' do tontok do monokisokodung iyolo' di piro-piro o bansa'ddi, oruhai no o kapatayan diyolo', nga' a' i' diyolo' oilaan iri. 10 Iri i kasawato' do ginawo do tulun dot Israil o papasala' diyolo'. Om mulong piya do nongosiliu ngai' o miagal diri, nga' a' po iyolo' guminuli' dot id doho', i Tuhan i Kinorohingan diyolo'. 11 Minghombo po ot Israil do miagal di punai do basug; mongoi po pokiuhup do Masir i tulun dau, om tumangkus do mongoi pokiuhup dot Asur! 12 Nga' pataan oku nondod lawa' om agamit i' iyolo' do miagal do tombolog, do tumalib iyolo'. Hukuman ku nondo iyolo' tu' araat i' i winonsoi diyolo'. 13 Nobungou no iyolo'! Tu' tuminongkiad i' iyolo' doho' om suminaap doho'. Apatai no moti' iyolo'ddi. Posion ku i' daa iyolo', nga' maan i' diyolo' toomod i pananambayang diyolo' dot id doho'. 14 A' i' iso-iso' o ginawo diyolo' do suminambayang dot id doho', tu' luminapos nogi' iyolo' om miningihad do miagal di tulun dit a' kotutun doho'. Om tontok di sumambayang iyolo' do mokianu'd gandum om waig dot anggur, om pinsuhaton nopo diyolo' o tinan diyolo' do miagal do wonsoyon di tulun do modsubak do tingolig. Sumasaap no kopio iyolo'! 15 Om mulong piya dot iyoho' o pinapagayo om pinopokoris diyolo', nga' mogiupakat i' iyolo' do sumaap doho'. 16 A' no iyolo' tumingkod do mogidu' do mantad id doho', om kumaa nogi' dot id ponokokinorohingan dit aiso' o sinundu. Miagal no kopio iyolo' do pawakasan do pana' di poingkilong tu' a' no milo'd pakayon. Om araat nondo o kapatai- patayo' diyolo', tu' minggayo-gayo kopio i' o koboro-boroso' di boyoon diyolo'. Om tiirak-irak pondo iyolo' di tulun do Masir,” ka dau.
Hinukuman do Tuhan ot Israil Tu' Tuminuku' i' Iyolo' do Tingolig
1 Om boros kad Tuhan, “Pounio' no i pouunion do popoinsan do haro o koligagaanan. Tu' miagal pod kondiu do monimbit di kanon dau o pisangod do mongoi panangod do pomogunan ku! Om iri tulun ku nga' tuminolibamban di tumpongo ku dot id diyolo' om suminaap iyolo' di ponudukan ku. 2 Om mulong piya do roitan oku diyolo'd Kinorohingan diyolo' om magakun iyolo' do tulun ku om kotutun iyolo' doho', 3 nga' niada' i' diyolo' it osonong. Om gowoi pondo om gusaon iyolo' di pisangod diyolo'. 4 Minomili' i tulun ku do raja', nga' pimpori-pori nopo iyolo' om a' i' minuhot doho'. Pomili' nopo iyolo' do boyoon om a' oku po nakaakun. Nongoi diyolo' i pirok om i tamas diyolo' do winonsoi diyolo'd tingolig, om iri no o mamaraag diyolo'. 5 Araatan tomod oku'ddi di tingolig do tamas do pinoiyo-iyo do sapi' di tukuon di tulun do hilo'd bandar do Samaria. Otogod oku no kopio diyolo'. Songkuro po tuu o koloido' om iyadaan nogi' diyolo' i tingolig diyolo'ddi? 6 Tukang i' do bansa'd Israil o minomonsoi di tingolig diri, om okon i' ko' Kinorohingan! Omumuk nopondo i sapi' do tamas di tukuon do hilo'd Samaria! 7 Soira' nopod patanom iyolo'd ribut, om omoton nopondo diyolo' om tongus dot opuhod! Gandum nopo dit a' monsok om a' i' milo'd wonsoyon do roti. Om oonsok piya daa iri nga' bansa' id suwai o mongoi panganu! 8 Aiso' noddi o pisuayan dot Israil om i bansa'd suwai, om miagal po ot Israil di lansang di lawasan tu' aiso' no o guna'. 9 Sumunsud nopo iyolo' do momonsoi di diyolo'd korohian, tu' miagal po iyolo' di kaladai di lalang kosurilog. Minongoi iyolo' pokiuhup dot Asur, om ginodsian ngai' diyolo' o piro-piro o bansa'd suwai do mongintirung diyolo'. 10 Nga' timungon ku nondo iyolo' om hukuman ku. Oruhai nod modos-lodos iyolo' dot orurualan tu' rumikot no i raja' dot Asur do mongoi ponginggorit diyolo'. 11 Ogumu-gumu' o pananaraban do porsombahan do wonsoyon di tulun dot Israil do maan kaka daa do pongidu'd dusa, nga' ogumu-gumu' no o kinoiyonon diyolo' do momonsoi'd dusa! 12 A' no ointob-intob o ponudukan do tinulis ku do patahakon ku daa diyolo', nga' niada' i' diyolo' iri, tu' suwai-suwai kopio kaka iri om okon ko' miagal di koubasanan diyolo'. 13 Papatahak i' daa iyolo' do porsombahan di sinumbali' dot id doho', om kanon diyolo' i tonsi di sinumbali'ddi. Nga' a' oku i', iyoho' i Tuhan, orohian di porsombahan di sinumbali'ddi. Sorohon ku indo i dusa diyolo' om hukuman ku iyolo' dot i dusa diyolo' o kopomohukuman ku, om pogulion ku nondo iyolo' kawagu do hilo'd Masir! 14 Nokopomonsoi no i tulun dot Israil do walai'd raja' nga' nolihuan iddi diyolo' i Minomonsoi diyolo'. I tulun do Yohuda nga' nokowonsoi nod bandar do kitolig. Nga' porikot oku nondod tapui do monorob di walai'd raja' diyolo' om i kabandaran diyolo'ddi,” ka dau.
Pinoboros di Hosia o Hukuman dot id Israil
1 Oi bansa' dot Israil, tingkod kou no do mamaramai di poginakanan dokoyu do miagal di piro-piro bansa'd suwai. Nokoinsodu' kou noddi do Kinorohingan dokoyu, om a' kou tuminorodok dot id dau. Pointongkop nopodti pomogunan dot id pointikid-tikid do pamagamasan do gandum do pinapadagang kou do tinan dokoyu do miagal do sundal dot id tingolig do Baal, i ponokokinorohingan dokoyu, om nasanangan tomod kou di gandum di sorohon dokoyu do pinamagadsi' di tingolig diri dot id dokoyu. 2 Nga' oruhai no dot a' kabagal o gandum om tumau do saitun dokoyu, om aiso' nondo o waig dot anggur dokoyu. 3 Om okon nondo ko' hilo' kasai'd pomogunan di pinatahak do Tuhan dot id bansa'd Israil o tiyonon dokoyu, tu' koguli' kou nondo kawagu do hilo'd Masir, om kaakan kou nondo do taakanon di sosomu' dot id pagantangan do tugama', do hilo'd Asur. 4 Om hilo' kou nopondod pomogunan do bansa'd suwai, om a' kou no milo'd patahak do porsombahan do waig dot anggur om porsombahan do sorobon do maan do poposonong do ginawo'd Tuhan. Iri nopondo taakanon dokoyu nga' kososomu' ngai' nopo di tulun di mangakan, tu' miagal po iri do taakanon dit akanon do tontok do haro tulun dot apatai. Iri nopo taakanon diri om maan no dokoyu'd kanon; om aiso' i' ot igitan do maan do porsombahan dot id Walai'd Sasambayangan dot Agayo. 5 Om tontok nopo di piro-piro tadau dot agayo do don tugama' di pomusou'd Tuhan, om aiso' nondo o milo dokoyu'd wonsoyon do pamaramai'ddi. 6 Om korikot nopondo i koinggoritan, om pokoyoon kou dot id pomogunan do suwai, om iri nopondo it oolu-olu' dot id pogialatan dokoyu om timungon nondo di tulun do Masir do maan patayo' om lobongon do hilo'd Mimpis! Om sunian nondo do rugi om sakot o hiri'd winaalan di walai dokoyu di gulu po om i konunu-nunuan dokoyu di pirok dit agayo gatang do winonsoi. 7 Norikot noddi i maso do kopomohukuman, i maso do koonuan do tulun dot isomuli' do miontok di kowoyo-woyoon dau. Om osiliu pondo o miagal diri, om kopuriman nogindo ot Israil! Boros ka dokoyu, “Iti nopo nabi diti om basug. Iti nopo tulun do noporinta' do rusod diti om mulau,” ka no daa dokoyu. Mimboros kou pogi' do miagal diri nga' araatan tomod kou doho' om agayo kopio o dusa dokoyu. 8 Sinuhu' oku'd Kinorohingan do sumiliu'd nabi do popoinsan dokoyu, i tulun dau. Nga' honggo nopo o ngoyon ku, nga' mumbal kou nopo daa do mamalawa' doho' do miagal oku po di tombolog. Id suang piya'd pomogunan di songonuon do Kinorohingan nga' pisangod i' do nabi i tulun do hiri. 9 Araat no kopio o wowonsoyon dokoyu, aiso' nopo o pisuayan di winonsoi di tulun do hilo'd Gibia. Om atantu' no dot osorou id Kinorohingan i kasalaan dokoyu'ddi om hukuman kou nondo dau dot i dusa dokoyu o kopomohukuman.
Dusa dot Israil om Kootuson Diri
10 Om boros kad Tuhan, “Di nopo di kabantalai ku i' ot Israil om otood oku nopo, dot iyo pod tulun di nokobontol do guas dot anggur di kitua' di poinsuni do hilo'd tana' do kowotuan. Di nopoddi kokito ku i' i komolohingan dokoyu, om otood oku nopo do miagal pod tulun di nokokito do tua' dot ara di gulu i' do hilo'd Nuluhon do Pior, om timpuun no iyolo' do tumuku' dot id Baal, om a' po alaid om kosiliu no iyolo' do miagal di ponokokinorohingan di tukuon diyolo' tu' kososomu' tomod. 11 Om tumulud nondo i kobontugo' dot Israil do miagal do tombolog, om aiso' nondo o monontian om aiso' o tangaanak dot opogkosusu. 12 Om mulong piya daa do haro o tangaanak diyolo' do kagayo diyolo' nga' ngoyon ku i' iyolo' tanggayai om aiso' no tiso' piya dot oluon ku do poimpasi. Om tongkiadan ku nopondo o tulun dot Israil, om angaraat tomod nondo ot osiliu dot id diyolo',” ka dau. 13 Oi Tuhan, okito ku no i tangaanak diyolo' do gusaon om patayon. 14 Nunu po daa o pokionuon ku diya' do bagi'd tulun diti? Kada' ponontiano' i tongoondu' diyolo'! Pologoso' nopo dot a' iyolo' koposusu di tangaanak diyolo'!
Hukuman do Tuhan dot id Israil
15 Om boros kad Tuhan, “Tinimpuun nopo kopio do kowoyo-woyoon diyolo'd araat om hilo'd Gilgal. Om hilo' no o kinoimpuuno' ku dot araatan diyolo'. Om uyungon ku nondo iyolo' do mantad hiti'd tana' ku tu' araat i' kopio i winonsoi diyolo'. Om a' oku osianan diyolo' tu' suminaap ngai' doho' i boyoon diyolo'. 16 Iri nopo tulun dot Israil nga' miagal do tanom di nokoring o gamut om it a' mongua'. Om a' nondo iyolo' maganak. Om maganak piya daa iyolo' nga' patayon ku i' i tangaanak di koupusan tomod diyolo',” ka dau.
Minimboros i Nabi do Pasal dot Israil
17 Om iyadaan nondo di Kinorohingan di pogobi-obian ku i tulun dau tu' a' i' iyolo' minokinongou dau. Om mimpanau pondo iyolo' dot id pogialatan do piro-piro o bansa'.
1 Iri nopo tulun dot Israil om miagal do guas dot anggur di nolimbagatan do tua'. Ogumu-gumu' o kakayaan diyolo' nga' ogumu-gumu' no o pananaraban do porsombahan do wonsoyon diyolo'. Om ogumu-gumu' o hasil di tana' diyolo' nga' pamaha-mahaon no diyolo' o pomolumis di torigi'd watu do tingolig di tukuon diyolo'. 2 Om a' no milo dot a' oinggorit i tulun dot oudut tu' i dusa diyolo' o koponginggoritan. Om babakon nondod Kinorohingan i pananaraban do porsombahan om raagon dau i torigi'd watu do tingolig diyolo'. 3 Om a' po alaid om mimboros nondo iti tulun do poingkaa, “Aiso' pogi' o raja' toko' nga' gama' nod a' toko' ruminonok do Tuhan. Nga' nunu po daa'ddi o milo'd raja' do wonsoyon dot id dati', do sokiro piya'd haro?” ka nondo diyolo'. 4 Boros nopod pimboroson diyolo' om i boros dot aiso' o suang, om mamatos iyolo' nga' a' i' diyolo' sulungon om momonsoi iyolo'd tumpongo dit aiso' o guna'. Somputulon diyolo' it oturan om gowoi poddi om iri nopo it a' otulid nga' miagal pod sakot di kawanit do poinsuni dot id tumo di naradu no. 5 Om moddosi nondo i tulun do poingiyon do hilo'd bandar do Samaria, om mogihad iyolo' di sapi' do tamas, tu' a' noddi iri hino do hilo'd Baitol. Om pogihadan pondo diyolo' om it imam di modsubak di tingolig i tingolig diri. Minggarang pondo iyolo'd mihad, tu' aiso' noddi o kagayaan di tingolig diyolo'. 6 Om atanggayan nondo i tingolig diri do hilo'd Asur do maan dot ipuhawang dot id raja' dot agayo. Om oindaraat nondo om ointingayam ot Israil tu' tuminanud i' di tingolig diri. 7 Om iri i raja' dau nga' atanggayan indo do miagal pod giniab do kayu dot orulun do waig. 8 Om angaraag nondo i kinoiyonon do modsubak di hilo'd timpak do nulu-nulu do Baitol, i kinoiyonon do tulun dot Israil do tumuku' dot id tingolig. Om okurumbutan pondod sakot om rugi i pananaraban do porsombahan diyolo'. Om millohou ngai' pondo i tulun di nuluhon dot, “Lisoko' iyahai!” ka no, om millohou di konulu-nuluan dot, “Tirungo' iyahai!” ka.
Pinorotuan do Tuhan do Hukuman ot Israil
9 Om boros kad Tuhan, “A' po notingkod do momonsoi'd dusa do sumaap doho' ilo tulun dot Israil do mantad poddi pomonsoi iyolo'd dusa di hilo'd Gibia. Om hilo' nondod Gibia dot okosupan iyolo' do pisangadan. 10 Saapon ku nondo om hukuman ku iti tulun do kidusa. Om mogiuhup nopondo o piro-piro o bansa' do sumaap diyolo', om ohukuman nondo iyolo' tu' ogumu' i' o dusa diyolo'. 11 Di nopoddi gulu po om miagal po daa'd sapi' dit okoro' po om i noubas no tomod, om i posodia' no om orohian do momogomos do gandum. Nga' pinokuan ku'ddi i liou dau dot olumis om sinansagan ku do kumaraja' dot awagat. Pinagayat ku o Yohuda di radu om pinagayat ku ot Israil di ragus. 12 Om boros kangku, ‘Pamaradu no do tana'd wagu do maan dokoyu, om patanom no do katapatan, om mongomot kou indo do barakat do kootuson di kotorodoko' dokoyu dot id doho'. Norikot noddi o maso dokoyu do gumuli' dot id doho', i Tuhan dokoyu, om rumikot oku indo do mongoi potuntug do barakat dot id dokoyu,’ kangku. 13 Nga' karaaton nogi' o pinatanom dokoyu, om it a' otulid o nomot dokoyu. Naakan noddi dokoyu i tua' do tudut dokoyu,” ka dau. Boros ka kawagu'd Tuhan, “Oi tulun dot Israil, suminondiu kou di korita'- kuda' dokoyu di don sumasangod om i kogumuo' do soudor dokoyu. 14 Gowoi pondo om orikatan nondod pisangadan i tulun dokoyu, om araag ngai' nopondo i kuta' do pogintirungan dokoyu. Om miagal pondo iri di tadau di rinaag di Raja' Salman i bandar do Bait-Arbil di maso do pisangadan, tu' nangapatai ngai'ddi i tina' om i tangaanak diyolo'. 15 Om miagal noddi ot osiliu dot id dokoyu, oi tulun do Baitol, tu' araat i' kopio i winonsoi dokoyu. Om kotimpuun nopo i pisangadan om matai no i raja' dot Israil,” ka dau.
Kosianan do Kinorohingan dot id Tulun Dau dit Obinsaap
1 Om boros kad Tuhan, “Tontok di tanak po ot Israil, om ninsianan ku i' iyau om linohou ku do suminoliwan do mantad hilo'd Masir, do miagal po iyau do tanak kopio ku. 2 Nga' asaru-saru' oku do momolohou dau, nga' modu-sodu' nogi' iyau do mantad id doho'. Pinapatahak i tulun ku do porsombahan do sinumbali' dot id Baal; om minodtutud iyolo' do kominyan dot id tingolig. 3 Om inda' ka dot iyoho' i' o minonuduk dot Israil do mamanau, kinibit ku i' i tulun ku, om kinosianan ku, nga' a' i' diyolo' okunon dot iyoho' o minomogompi' diyolo'. 4 Pinoinsomok ku iyolo' doho' do mikuwo'd osianan om olisiu oku diyolo'. Kinibit ku iyolo' om tinunguban ku; om minirikau oku do pinapaakan diyolo'. 5 Minada' iyolo' do gumuli' dot id doho' om gowoi poddi om a' no milo dot a' iyolo' gumuli' do hilo'd Masir, om bansa' nondod Asur o momorinta' diyolo'. 6 Tumongkop nopondo di bandar diyolo' o pisangadan om angahaba' ngai' o totobon di bandar. Om iri nondo o karaag di tulun ku tu' momonsoi i' iyolo' di diyolo'd korohian. 7 Osonsog i' iyolo' do tumolikud doho'. Om minggiak pondo iyolo'd oinggoritan, nga' aiso' i' o milo do mongoi poidu' diyolo',” ka dau. 8 Boros kad Tuhan, “Poingkuro oku daa do magada' kopio diya', oi Israil? Poingkuro oku daa do monongkiad tomod diya'? Milo oku i' tuu daa do mamaraag diya' do miagal di winonsoi ku dot id Adma ko' momohukum po diya' do miagal di pinomohukum ku do Siboyim? A' i' kopio ooyit o ginawo ku do wonsoyon ku o miagal diri! Tu' adalaan i' kopio kagayo o kosianan ku diya'. 9 A' ku i' iyokoyu hukuman dot otogod oku piya; a' ku nondo raagon kawagu ot Israil. Tu' iyoho' nopo om Kinorohingan i', om okon oku i' ko' tulun. Moyo-woyo' oku i' dokoyu, iyoho' it Olidang kopio. Om a' oku no otogod dokoyu,” ka dau. 10 Boros kad Tuhan, “Om tumanud indo doho' i tulun ku do mamagarom oku do miagal do singa do momorolosi di pisangod diyolo'. Om olomus nopondo iyolo'd rumikot dot id doho' do mantad hilo'd kotonobon. 11 Om rumikot nondo iyolo' do mantad hilo'd Masir do miagal pod tombolog kosiau, om miagal do punai dot ogumu' do rumikot do mantad hilo'd Asur. Pogulion ku nondo kawagu iyolo' do hilo'd walai diyolo'. Iyoho' no, i Tuhan o minomoros diti,” ka dau.
Hinukuman o Yohuda om Israil
1 Om boros kad Tuhan, “Nosorilian oku pod tulun dot Israil do tudut om poninipu', om maso di tulun do Yohuda do sumaap doho', i Kinorohingan dot Olidang om otorodok. 2 Koinsanai di wonsoyon do tulun dot Israil do mantad do kosuabon om gisom do totuong nga' aiso' ngai' nopo o kootuk-otukon, om karaag iri do miagal di tongus do mantad id koulayon. Muhang-ruhang nopo o kororongit om kouudut diyolo'. Om monokitaru' iyolo' dot Asur om monokidagang-dagang do Masir,” ka dau. 3 Pasalaon do Tuhan o tulun do Yohuda; om Israil nogi' nga' hukuman i' dau tu' i kowoyo-woyoon di tulun dau'ddi o kopomohukuman. Sulian nondo dau i nongowonsoi diyolo'. 4 I Yakub nopo, i taki-aki diyolo', om suminolod no mantad di tapid dau, di hiri pod tian di tina' dau. Om soira' dit agayo i Yakub om minonokigogol po iyau'd Kinorohingan. 5 Minonokigogol iyau do moloikat om nakamanang i' iyau. Om minihad diri iyau do minokianu'd barakat. Om rikot no o Kinorohingan dot id di Yakub, i taki-aki toko', do hilo'd Baitol, om boro-boros no iyau dau. 6 Iyau no i Tuhan i Kinorohingan dit Osundu Kopio --- om Tuhan no o ngaran dau. Om pokionuon dau o tulun do tumuku' dot id ngaran dau'ddi. 7 Iyo nopoddi, oi sinakagon di Yakub, om pogondos kou no dot id Kinorohingan dokoyu do dinondo, om guli' kou no dot id dau. Tumorodok kou no, om wonsoyon no dokoyu it otulid, om polonuton no dokoyu o ginawo do mandad do Kinorohingan dokoyu do momonsoi dit apatut dau'd wonsoyon.
Piro-Piro Kawagu o Pomohukum dot Israil
8 Om boros kad Tuhan, “Iri nopo tulun dot Israil om miagal po di tulun do Kanaan kobinguduto'; asanangan nopo iyolo' do monipu' di tulun do mongoi boli dot id diyolo' tu' mamakai iyolo'd timbangan dit a' koontok. 9 ‘Kaya' toko' no,’ ka no diyolo'. ‘Ogumu' no o dapu' toko'. Om aiso' no o milo'd papasala' dati' dot a' piya otulid o karalan-ralano' toko' do kuminaya',’ ka no diyolo'. 10 Nga' iyoho' indo, i Tuhan i Kinorohingan dokoyu, i pinapalabus dokoyu do mantad hilo'd Masir, o popoiyon kawagu dokoyu dot id kiim do miagal di ruminikot oku dot id dokoyu di hilo'd tana' do kowotuan. 11 Minoro-boros oku dot id piro-piro o nabi om haro piro-piro o pinointalang ku dot id diyolo'. Om pinawaya' ku di piro-piro o nabi diri o boros ku do popoinsan di tulun ku. 12 Nga' maso id tukuon i tingolig do sapi' do hilo'd Giliad om isai nopo i tumuku' dot id tingolig diri nga' apatai no. Sapi' nga' pinatahak i' do maan do porsombahan do sinumbali' do hilo'd Gilgal, om osiliu pondod kinotimungon do watu i pananaraban do porsombahan do hilo'd koumaan,” ka dau. 13 Om minogidu' diri i Yakub, i taki-aki toko' do hilo'd pomogunan do Misopotamia. Om hilo' no iyau'd kuminaraja' dot id iso' o tulun, do madtamong do dumba' om kaanu i' iyau'd sawo. 14 Om ponuhu' no o Tuhan do nabi do mongoi poidu' di tulun dot Israil do mantad id ponguripanan do hilo'd Masir om momogompi' diyolo'. 15 Nga' pinotogod tomod di tulun dot Israil o Tuhan; om apatut no daa do hukuman iyolo' dot i kararaat diyolo' o kopomohukuman. Om atantu' nod hukuman do Tuhan iyolo' tu' nindaraat i' diyolo' iyau.
Pomohukum di Kolimpupuson No dot id Israil
1 Di nopo di gulu po, om moro-boros nopo ot Ipraim om ooris nopo i payat dot Israil do suwai; tu' suahon i' diyolo' ot Ipraim. Nga' minomonsoi iddi do dusa i payat dot Ipraim, tu' tuminuku' iyolo' dot id Baal, om gowoi poddi om angapatai iyolo'. 2 Aiso' i' o kotingkadan diyolo' do momonsoi'd dusa tu' momonsoi kasai' nopo iyolo'd tininganak do pirok do maan diyolo'd tukuon, i winonsoi do longon do tulun. Om momoros nogindo iyolo' do poingkaa, “Papatahak nod porsombahan di sumbolion dot id tingolig diti,” ka no. Poingkuro'ddi kopio do milo o tulun do tumungub dot id tingolig diri, tu' iri nopo tingolig diri om pinoiyo- iyo i' do sapi'. 3 Om gowoi pondo om tumagak ngai' o tulun diti do miagal di haun do dongkosuabon om miagal di bolobou tu' osuab po om atanus no. Om miagal iyolo' di rahami di tilibon do ribut do mantad hiri'd pamagamasan, om miagal do lisun do mantad hiri'd kawayaon do lisun. 4 Om boros kad Tuhan, “Iyoho' no i Tuhan, i Kinorohingan dokoyu, i pinoposoliwan dokoyu do mantad hilo'd Masir. Aiso' no o Kinorohingan dokoyu'd suwai ko' iyoho'. Iyoho' no o gampamasi dokoyu. 5 Ginompi' ku i' iyokoyu do hilo'd tana' dit a' sunian do hilo'd tana' do kowotuan. 6 Nga' soira'ddi nokosuang kou di pomogunan dot osonong, om nayahan kou, om osonong o kopurimanan dokoyu, om mininggayo-gayo kou iddi, om kolihuwai oku no dokoyu. 7 Om gowoi pondo om iyo oku pod bohuang do sumaap dokoyu. Om miagal oku pondod singa do magawang dokoyu do hiri'd ralan. 8 Om saapon ku nondo iyokoyu do miagal po di bohuang di natagakan do tanak, om pogitobilang-bilangon ku nopondo iyokoyu. Om miagal oku pondod singa do mangakan dokoyu do hiri'd pinanabpaan ku dokoyu, om pogitobilang-bilangon ku nopondo iyokoyu do miagal di wonsoyon do nintorusan dot orongit. 9 Patayon ku nondo iyokoyu, oi tulun dot Israil! Om isai po daa'ndo o milo'd monguhup dokoyu? 10 Minokianu kou do raja' om boyoon nga' poingkuro daa iyolo'd kapasi di rayat diyolo'? 11 Otogod oku i' di pinapatahak oku dokoyu'd raja', om alasu' i' o ginawo ku di nidu' ku iyolo'd raja'. 12 Nongotulis no i dusa om kasalaan dot Israil, om nokoopi' ngai' no i pinotulisan diri. 13 Milo po daa'd masi ot Israil, nga' mada' i' iyau do poimpasi do gama' di kababasug dau, do miagal po iyau di ragang di pogkosusuon no daa, nga' mada' i' do sumoliwan do mantad hiri'd tian di tina' dau. 14 Om a' ku i' posion o tulun diti do mantad id pomogunan do tulun do napatai om a' ku iyolo' poiduwon do mantad id kuasa'd dusa. Porikoto' no i pamamatai nu, oi kapatayon! Porikoto' no i karaagan, oi pomogunan do tulun do napatai! Tu' a' ku no insianan o bansa'dti. 15 Om mulong piya do miagal po di sakot dot orombung o kosimbayano' dot Israil, nga' porikot oku indo do tongus dot alasu' do mantad hilo'd koulayon, i mantad hilo'd tana' do kowotuan, om arasak ngai' indo i bawang om torobong diyolo'. Om atanggayan ngai' nopondo i kiguna'.
1 Mositi' nod hukuman o Samaria tu' suminaap i' iyau doho'. Apatai indo i tulun dau dot id pisangadan; om pataamon nopondo i ragang po do hilo'd tana', om ulayakon nopondo o tian di tongoondu' di monontian,” ka dau.
Pinokianu Kopio di Hosia do Rumologo ot Israil
2 Guli' kou no dot id Tuhan, i Kinorohingan dokoyu, oi tulun dot Israil. Iri no i dusa dokoyu o pinapasadu om pinaparatu' dokoyu. 3 Guli' kou no dot id Tuhan, om silihon no o sambayang diti do ponokoporsombahan dot id dau, “Ompunai ngai' no i dusa dahai, om romito' no iti sambayang dahai, om royohon indo dahai iya' do miagal di nakabatos dahai. 4 A' i' milo'd mamasi dahai ot Asur, om a' milo'd mongintirung dahai o kuda' do don sumasangod. Om a' nondo iyahai momoros do kinorohingan dahai i tingolig di winonsoi dahai. Oi Tuhan, pointalang ko i' do kosianan dot id tulun dit aiso' o sondihon,” kanto dokoyu.
Pinapabatos o Tuhan do Koposion do Wagu dot id Israil
5 Om boros kad Tuhan, “Pogulion ku i' i tulun ku dot id doho', i tulun ku di suminansala'. Om aayi-ayi' indo o ginawo ku dot osianan diyolo'; a' oku noddi otogod diyolo'. 6 Om iyo oku pondod rasam dot id tana' dit otuu, dot id tulun dot Israil. Om mongusak nondo iyolo' do miagal do bunga; om kagamut nondo kopio iyolo' do miagal di kayu sedar do hilo'd Libanon. 7 Om apasi nondo iyolo' kawagu om olumis do miagal di guas do saitun. Om owongi' indo iyolo' do miagal di kayu sedar do hilo'd Libanon. 8 Om poimpasi indo kawagu iyolo', om intirungan ku iyolo'. Om osonong tomod nondo o sunion diyolo', do miagal po di gandum di pointanom dot id tana' dit oruak. Om abantug iyolo' do miagal dit anggur do hilo'd Libanon. 9 Om taamon nondo di tulun dot Israil i tingolig diyolo', om simbaron ku o sambayang diyolo' om gompion ku iyolo'. Om intirungan ku nondo iyolo' do miagal di kayu dit okohob o tuntu; iyoho' no o tudan do koinsanai'd barakat diyolo'. Iyoho' no i Tuhan, o minomoros diti,” ka dau.
Pongolimpupus
10 Maha' daa do kosuhut i tulun do kitoilaan di songintulis do hiti, om poopion kopio diyolo' iti dot id suang do ginawo diyolo'. Otopot i' o ponudukan do Tuhan, om apasi no i tulun dit otorodok dot id ponudukan do tumanud no iyolo'ddi. Nga' tulun nopo di kidusa om kasadu i' om aratu' tu' a' i' iyolo' tumanud do ponudukan diri.
1 Iti no o boros do Tuhan dot id di Yoil, i tanak di Potuil.
Minogihad i Tulun dot Israil di Totonomon Diyolo' di Naayi' do Katat
2 Pokinongou kou no, iyokoyu i komolohingan, mokinongou ngai' nopo o koinsanai'd tulun do hiti'd Yohuda. Nokoumbal toi do haro o nosiliu do miagal kopio'dti do solinaid dokoyu do poimpasi ko' i maso di poimpasi po i komolohingan dokoyu? 3 Sunudan no i tangaanak dokoyu do pasal diri; om osunudan i' diyolo' i diyolo'd tangaanak, i momisunud kawagu di sinakagon di sumusuhut. 4 Mogisowoli-woli nopo i katat dot ogumu' do tumokop do hiri'd tanom; haro nopo it oolu-olu' di katat dit id gulu tokop, om aayi' nod aakan di sumusuhut do tumokop. 5 Posik kou no, om mihad i', oi tulun di magagauk; ihad kou no, oi tulun di mogiginum do waig dot anggur; tu' nangaraag no i tua' dot anggur di wonsoyon mantad daa do waig dot anggur do wagu. 6 Sinangod do katat o pomogunan toko'; okoris iyolo' om a' no ointob-intob tu' adalaan no kogumu'; nipon diyolo' nga' miagal pod nipon do singa katarom. 7 Rinaag diyolo' i guas dot anggur toko'; om nakan diyolo' i guas dot ara toko'. Nanit diyolo' i kulit di kayu, gisom dot opurak ngai' po i raan. 8 Ihad kou no, oi koinsanai'd tulun, do miagal di tondu' do mogihad do kinapatayan di kusai di mangawin mantad daa dau. 9 Aiso' no o gandum ko' waig pod anggur do patahakon do maan do porsombahan do hilo'd Walai'd Sasambayangan dot Agayo; mingihad ngai' po it imam tu' aiso' no o porsombahan diyolo' dot id Tuhan. 10 Alana' ngai' nopo o tumo; om mihad po o tana' tu' naraag no i gandum om nongokoring i tua' dot anggur, om nongoriou i guas do saitun. 11 Tongob kou no, oi gompongumo; ihad kou no, iyokoyu i momogompi' do kabun dot anggur, tu' iri nopo gandum om i barli om koinsanai'd tanom-tanom nga' nangaayi' no. 12 Nongoriou no i guas dot anggur om i guas dot ara; om i guas dot ipol om guas do kurma om guas do delima. Koinsanai nopo i kouwaan do nongoriou. Aiso' no o kataadan do tulun. 13 Panampakai nod karung om mingihad i'; oi imam di maganu-anu do hilo'd pananaraban do porsombahan! Ongoi nod hilo'd Walai'd Sasambayangan dot Agayo om monuaban i' do mihad! Tu' aiso' no o gandum ko' waig pod anggur do patahakon dot id Kinorohingan dokoyu. 14 Suhuo' no i tulun nu do puasa, papaharo nod iso' o pitimungan dot agayo! Timungo' ngai' no i boyoon om i molohing-lohingon om koinsanai di tulun do Yohuda do hiri'd Walai'd Sasambayangan dot Agayo, i walai'd Tuhan, i Kinorohingan dokoyu, om sumambayang no om millohou no do mokitulung dau. 15 Oruhai nod orikot i tadau do Tuhan; i tadau do koporikatan dit Osundu Kopio do karaagan. Kotompurolosi no kopio o tadau'ddi tu' porikot do kosusaan dot agayo om karaagan! 16 Poingontong toko' po om aiso' no o pokukurayan toko' do tontok do pingraagon i tanom toko'. Aiso' no o kaarapadan do hilo'd Walai'd Sasambayangan dot Agayo, i walai do Kinorohingan toko'. 17 Kumoring tomod nopo i linsou do hilo'd tana' dit otuu. Aiso' no o gandum do poopion, om songingraag poddi i sulap do poiyanan do gandum, tu' aiso' no o suang. 18 Songuni-uni ngai' po i tayam-tayam, tu' aiso' no o sakot do kanon diyolo'; om iri baanan do dumba' nga' oinggorit po tomod. 19 Lumohou oku po do mokitulung diya', oi Tuhan, tu' nongoriou no i sakot om i kokoyuan, do miagal pod nosorob do tapui. 20 Ilo' piya nintorusan nga' lumohou i' diya' do mokitulung tu' nangarasak ngai' no o bawang, om a' no iyolo' koinum.
I Katat o Popoinsan do Korikatan do Tadau'd Tuhan
1 Pounio' no i torumpit; pounio' i pouunion do popoinsan do tulun do haro o koligagaanan do hilo'd Sion, i nulu-nulu dot iyonon do Kinorohingan toko'. Pananggagarai no, oi tulun do Yohuda! Tu' oruhai nod orikot i tadau'd Tuhan. 2 Tadau nopondoddi om otuong om oluhung, om dondom om momihaun. Rumikot no i katat dot ogumu' kopio gisom dot otuong poo o tawan do hilo'd konuluhanan. A' i' nokoumbal do haro o miagal diri, om aiso' nondo kawagu ot osiliu do miagal diri do gisom dot alaid. 3 Miagal po iyolo'd tapui do monorob do koinsanai di totonomon. Id dosunsudan nopo di katat om miagal pod kabun dot Idon i tana', nga' hiri nopod dotolikudan di katat om miagal pod tana' dit aiso' o sumuni. Aiso' no o milo do mogidu' do mantad id diyolo'. 4 Koiyo-iyo iyolo'd kuda'; om iyo di kuda' do don sumasangod o pananangkus diyolo'. 5 Tontok di minsimpod iyolo' do hilo'd timpak do nuluhon, om angarak po o karangahan diyolo' do miagal do korita'-kuda'; songkopit-kopit po iyolo' do miagal do sakot di nokoring do tutudan. Abaris nopo iyolo' do miagal do soudor dit ongokoris do posodia' do mongoi sangod. 6 Soira' di minsomok iyolo', om oinsanan nopo o tulun do moddosi; mumposi' ngai' nopo o rabas do tulun. 7 Miagal po iyolo' do gunsiou do sumangod; om miagal po iyolo' do soudor do mindakod di tolig. Poburuan nopo diyolo' do mamanau om a' no iyolo' sumala' di ralan. 8 Om a' iyolo' mogisogulu-gulu, lumopuson nopo iyolo' di tantob, om aiso' no o milo do mangantob diyolo'. 9 Soruangon nopo diyolo' i bandar, solokoyon nopo diyolo' i tolig; indokodon ngai' nopo diyolo' i walai om maya' do liligaon do sumuang do miagal pod mananakau. 10 Oguyu' nopo iti tana' do tontok di rumikot iyolo'; gumogor nopo ilo tawan. Tumuong ilo tadau om ilo tulan om rombituon po nga' a' no mogulinau. 11 Miagal pod tinggoron o boros do Tuhan, do monuhu' ngai' di soudor dau. Iri nopo i soudor di winoyo' dau om ogumu' om ongokoris. Korolosi no kopio i tadau'd Tuhan! Om iso' pod tulun nga' aiso' no ot apasi do tontok diri.
Lolohou do Kumorologo
12 Boros kad Tuhan, “Nga' dinondo piya, nga' rologo kou no do mikuwo'd aayi-ayi' o ginawo om guli' kou no dot id doho', do mikuwo'd puasa om mihad. 13 Pologoso' no do mantad id ginawo dokoyu o monosol om pointalang do katangaban dokoyu; okon i' ko' pakayan noo dokoyu o hurakon,” ka dau. Guli' no dot id Tuhan, i Kinorohingan dokoyu. Obinglisiu i' iyau om osianan kasai', alanut i' o ginawo dau om batos dau nga' sulungon i' dau; posodia' kasai' i' iyau do mangampun om a' i' orohian do monginggorit. 14 Tu' wolihan i' doti' do Tuhan, i Kinorohingan dokoyu o pomusarahan dau, om barakatan kou indo do gisom dot a' aayi-ayi'. Om milo kou indo do papatahak do porsombahan do gandum om waig dot anggur dot id dau. 15 Pounio' no i torumpit do hilo'd Sion, i nuluhon do Kinorohingan. Ponuhu' no di tulun dot ogumu' do puasa om papaharo do pitimungan! 16 Timungo' ngai' no i tulun; posodiawo' no iyolo' do rumapou do pitimungan dot agayo; angatan no i komolohingan no; timungon no i tangaanak om i nogi' i ragang po. Iri piya wagu po kakawin nga' mositi' no do lumabus do mantad id bilik diyolo' do mongoi rapou di pitimungan. 17 Iri nopo imam, i maganu-anu do hiri'd Walai'd Sasambayangan dot Agayo do hiri'd pialatan di pananaraban do porsombahan om i kakilima' di ponong id wawayaan, nga' mositi' nod mihad om sumambayang do poingkaa: “Kosianai nod tulun nu, oi Tuhan. Kada' pologoso' o bansa'd suwai do pokoruol dahai om momohingi-hingi dahai do mimboros do poingkaa, ‘Honggo no i Kinorohingan dokoyu?’ ka,” kanto.
Pinoluhub Kawagu do Kinorohingan i Tana'
18 Om pinadul iddi do Tuhan i tana' dau; om ninsianan dau i tulun dau. 19 Sinimbar dau iyolo' do poingkaa: “Onuan ku nondo iyokoyu do gandum om waig dot anggur om tumau do saitun, do maan dokoyu dot akanon om angayahan ngai' kou indo. Om a' kou nondo indaraaton om a' irak-irakan do bansa'd suwai. 20 Poinsoduwon ku nondo i katat dot ogumu' do mantad hilo'd utara om uyungon ku o wookon diyolo' do hilo'd tana' do kowotuan. Iri nopo i borisan diyolo' dit id gulu om ouyung do hilo'd Rahat do Napatai, om iri no i borisan dot id tohuri om kakaa do hilo'd Rahat do Tanga'. Om outong pondo i rata' diyolo'. Patayon ku nondo iyolo' tu' minonginggorit i' iyolo' dokoyu. 21 Kada' kooris, oi koumaan, suwai ko' kooropod no om posonongon no o ginawo om sorohon no i kosonongo' do Tuhan dot id dokoyu. 22 Kada' kooris, oi nintorusan. Otomou no o sakot dot akanon dokoyu; mongua' no i kouwaan, om osima' nod tua' dot ara om tua' dot anggur. 23 Kooropod kou no oi tulun do Sion, kotood no tu' osonong i' o Tuhan, i Kinorohingan dokoyu dot id dokoyu. Nonuan kou dau do rasam dit osuhatan no kopio do tontok di maso do lumahanggang o roun do kayu. Om pinorikot dau dot id dokoyu i rasam di maso dot osogit om pinorikot dau i rasam di maso di momuroun kawagu o kayu, do miagal di gulu. 24 Opudsuan nopondo do gandum i kinoiyonon do momogomos do gandum; om oponu' i kinoiyonon di pamagaan dot anggur om i pamagaan do tumau'd saitun. 25 Pogulion ku indo kawagu i natagak do mantad id dokoyu do tontok di piro-piro o toun do nongoi di katat oiyo' do minangakan i tanom-tanom dokoyu. Tu' iyoho' i' o minonuhu'ddi do mongoi panangod dokoyu. 26 Baino' nopondo om osima' kou no do kanon, om ayahan kou. Om royohon nondo dokoyu o Tuhan, i Kinorohingan dokoyu, i minomonsoi do koinsanai di koimayaan kopio dot id dokoyu. A' nondo koumbal kawagu dot oindaraat o tulun ku. 27 Om oilaan nogindo dokoyu oi tulun dot Israil, dot id pogialatan oku dokoyu, om oilaan dokoyu dot iyoho' no, i Tuhan, o Kinorohingan dokoyu, om aiso' no o suwai ko' iyoho'. A' nondo koumbal dot ointingayam o tulun ku,” ka dau.
I Tadau do Tuhan
28 Boros kad Tuhan, “Koimbagu nopondo om potuntugon ku o Rusod ku dot id koinsanai'd tulun: popimboros nondo do boros ku i tangaanak dokoyu do tongokusai om tongoondu'; koipi nondo i komolohingan dokoyu, om kokito do pinointalang i tangaanakwagu om i kosumandakan. 29 Tontok nopondo do maso'ddi om potuntugon ku nondo i Rusod ku dot id susuhuon piya dokoyu do tongokusai om tongoondu'. 30 Manahak oku nondo do pogintutunan do hilo'd tawan om hiti'd pomogunan do rumikot i tadau'ddi. Haro nondo o mogipapatai, om tapui om lisun dot akapal. 31 Tumuong nondo ilo tadau, om rumagang do miagal do raha' ilo tulan do tintod do korikatan di tadau'd Tuhan di korolosi kopio. 32 Nga' apasi indo o koinsanai'd tulun di mokiuhup do Tuhan. Do miagal di nokoboros do Tuhan do poingkaa: ‘Haro i' o piro-piro di tulun do kalabus do mantad id Yorusalim; apasi indo i tulun di pilion ku,’ ka,” ka dau.
Butusan do Kinorohingan o Koinsanai di Bansa'
1 Om boros kad Tuhan, “Tontok nopondo do maso'ddi om posimbayanon ku nondo kawagu o Yohuda om Yorusalim. 2 Timungon ngai' ku nondo o koinsanai di bansa' om angatan ku iyolo' do hilo'd Kubong do Pomutusan. Hilo' nondo do butusan ku iyolo' tu' araat i' o winonsoi diyolo' dot id Israil, i tulun ku. Pinasasad diyolo' i tulun dot Israil do hilo'd pomogunan do suwai om pinogibahagi-hagi' diyolo' do minanganu i tana' dot Israil. 3 Nundi' diyolo' do mongilo ondung isai o kaanu di tulun di natangkap diri. Dinagang diyolo' o tangaanak do tongokusai om tongoondu' dot id ponguripanan, do maan do pambayar do sundal om waig dot anggur. 4 Nunu daa o wonsoyon dokoyu dot id doho', oi Tirus, om Sidon, om koinsanai di watas do Pilistin? Mumbal kou daa do sumuli' doho'? Ondung sumuli' kou, om iyoho' nga' a' i' alaid do sumuli' dokoyu. 5 Tinanggayan dokoyu i pirok om tamas ku, om nigitan dokoyu i dapu' ku dot angagayo o gatang do hilo'd walai'd tingolig dokoyu. 6 Tinanggayan dokoyu i tulun do Yohuda om Yorusalim do mininsodu' do pomogunan diyolo' om nadagang dokoyu iyolo' dot id bansa' do Yunani. 7 Baino' nondo om posoliwanon ku iyolo' do mantad hilo'd piro-piro o kinoiyonon di pinadagangan dokoyu diyolo'. Om wonsoyon ku nondo dot id dokoyu o miagal di winonsoi dokoyu dot id diyolo'. 8 Pologoson ku nondo i tangaanak dokoyu do kusai om tondu' dot adagang dot id tulun do Yohuda om dagangon nondo diyolo' iyolo' dot id tulun do Siba, i pomogunan do hilo'd sodu'. Iyoho' no, i Tuhan, o minomoros diti. 9 Poboroso' no o kopoilaan diti dot id koinsanai'd bansa': ‘Sodia' nod sumangod; lohowo' ngai' no i gunsiou dokoyu; timungo' ngai' no i soudor dokoyu om mamanau no! 10 Dunsulon no i lahis do radu dokoyu do maan do gayang om silihon do tandus i pisau di ponunutu' dokoyu. Iri piya i tulun dot ongoluhoi nga' mositi' nod kaakun do mongoi sangod. 11 Lomusai nod rumikot, koinsanai dokoyu i bansa' dot id posorili', om tumimung i' do hilo'd rantai,’ ka dau. Polintuhuno' ngai' no i soudor nu do mongoi panangod diyolo', oi Tuhan. 12 Om boro-boros no kawagu o Tuhan do poingkaa, ‘Mositi' nod sumodia' ngai' i bansa', om rumikot do hilo'd kubong di roitan do Kubong do Pomutusan. Om hilo' oku nondo, iyoho' i Tuhan, do mirikau do momutus do koinsanai'd bansa' di posorili' di tulun ku. 13 Angaraat tomod iyolo'; tataso' no iyolo' do miagal do gandum di dongmongomot; pagao' no iyolo' do miagal di pamaga' do tua' dot anggur dot id pamagaan di noponu' no; om gisom do kalabai om koluyung i waig dot anggur. 14 Rinibuan po o tulun do hilo'd kubong di roitan do Kubong do Pomutusan. Tu' hilo' no do rumikot i tadau'd Tuhan om a' no alaid do rumikot iri. 15 Tumuong no o tadau om tulan, om a' mogulinau i rombituon,’ ka,” ka dau.
Barakatan Indo do Kinorohingan i Tulun Dau
16 Mamagarom o Tuhan do mantad hilo'd Sion, i nuluhon dau; ongorod po i boros dau do mantad hilo'd Yorusalim; gumogor po o tawan om tana'. Nga' obian id Tuhan i tulun dau. 17 “Om koilo kou nogindo oi Israil, dot iyoho' no o Tuhan, i Kinorohingan dokoyu. Poingiyon oku do hilo'd Sion, i nulu-nulu ku dit olidang. Osiliu nondo do bandar dot olidang o Yorusalim; om a' nondo kawagu iri aala' do bansa'd suwai. 18 Tontok nopondo do maso'ddi om otongkop nopo do kabun dot anggur ilo konuluhanan, om haro ngai' nopo o tayam-tayam dot abantalan dot id pointikid-tikid do nuluhon dit ongoluhub; om kiwaig kasai' nopondo i bawang do hilo'd Yohuda. Om haro nondo o bawang do lumuyung do mantad hiri'd Walai'd Sasambayangan dot Agayo, om momoyopos nondo iri di Rantai dot Akasia. 19 Osiliu nondo do tana' do kowotuan o Masir, om osiliu do pogun ot Idom, tu' minanangod i' iyolo' di pomogunan do Yohuda om minamatai di tulun do hilo' dit aiso' o sala'. 20-21 Obian ku indo do sumuli' i tulun do nangapatai, a' ku no olu-oluon i tulun do kisala'. Nga' Yohuda nopondo om Yorusalim om iyonon kasai' i' do tulun do gisom dot alaid, om iyoho' i Tuhan, nga' miyon i' do hilo'd Sion, i nuluhon ku dit olidang,” ka dau.
1 Iti no o boros di Amos, i gompomogompi'd dumba' do mantad hilo'd bandar do Tokua. Tontok dit i Usia o raja' do Yohuda, om i Yirobiam i tanak di Yihoas o raja' dot Israil, om pointalango' ngai' nod Kinorohingan o piro-piro hal do pasal dot Israil dot id di Amos, di duwo po o toun dot a' nokorikatan di guminuyu' o tana'. Om tontok noddi do nosiliu i Amos do nabi. 2 Boros kad i Amos, “Gumarom o Tuhan do mantad hilo'd Nuluhon do Sion; ongorod i boros dau do mantad hilo'd Yorusalim. Kumoring ngai' nopo i sakot, om rumiou i sakot do hilo'd Nuluhon do Karmol,” ka dau.
Hukuman do Kinorohingan i Pomogunan dot id Posorili' dot Israil
Siria
3 Om boros kad Tuhan, “Miguli-guli' nopod momonsoi'd dusa i tulun do Damsik, om gowoi pondo om hukuman ku no kopio iyolo'. Om pinadalaan tomod diyolo' do monginggorit i tulun do Giliad. 4 Om porikatan ku nondod tapui i walai'd raja' di winonsoi di Raja' Hasail om uuhon ku do monorob i piro-piro kuta' do pogintirungan di Raja' Binhadad. 5 Raagon ku nopondo i totobon do bandar do Damsik om uyungon ku i tulun do songingiyon do hilo'd Rantai dot Awon om i pomorinta' do hilo'd Bait-Idon nga' iduwon ku do mantad id tirikohonon dau do don raja'. Om atanggayan nondod pisangod i tulun do Siria do kumaa'd hilo'd pomogunan do Kir,” ka dau.
Pilistin
6 Om boros kad Tuhan, “Miguli-guli' nopo do momonsoi'd dusa i tulun do Gasa, gowoi pondo om hukuman ku no kopio iyolo'. Om oiyo' nopo diyolo' do minononggoi ot iso' o bansa'd tulun om dagango' no diyolo' do siniliu'd turipon dot id tulun dot Idom. 7 Om porikatan ku nondod tapui i tolig do bandar do Gasa om osorob ngai' i' i kuta' do pogintirungan. 8 Uyungon ku nondo i pomorinta' do bandar dot Asdod om Askilon. Hukuman ku nondo i bandar dot Ikron, om iri nopondo i tulun do Pilistin dit oolu-olu' om apatai ngai' no,” ka dau.
Tirus
9 Om boros kad Tuhan, “Miguli-guli' nopo do momonsoi'd dusa i tulun do Tirus. Om gowoi pondo om hukuman ku no kopio iyolo'. Tu' minononggoi i' iyolo' dot iso' o bansa'd tulun do pinakaa dot id ponguripanan do hilo'd pomogunan dot Idom, om tinolibambanan diyolo' i pinitoruan do piombolutan di winonsoi diyolo'. 10 Om gowoi pondo om porikatan ku'd tapui i tolig do bandar do Tirus om uuhon ngai' ku do monorob i kuta' do pogintirungan,” ka dau.
Idom
11 Om boros kad Tuhan, “Miguli-guli' nopo do momonsoi'd dusa i tulun dot Idom, om gowoi pondo om hukuman ku no kopio iyolo'. Sinangod ngai' diyolo' i tobpinai diyolo', iri no i tulun dot Israil, om a' i' diyolo' ninsian-sianan. Aiso' no kopio o kotingkadan do kototogod diyolo', om sisuli' kasai' iyolo'. 12 Om gowoi pondo om porikatan ku'd tapui i bandar do Toman om tutudan ngai' ku i kuta' do pogintirungan do Bosra,” ka dau.
Amon
13 Om boros kad Tuhan, “Miguli-guli' nopo do momonsoi'd dusa i bansa' dot Amon, om gowoi pondo om hukuman ku no kopio iyolo'. Tontok di minongoi iyolo' sangod do mokimaanu-anu do tana', om iri piya i tongoondu' do monontian do hilo'd Giliad nga' numaan i' diyolo' ulayako' o tian. 14 Om gowoi pondo om porikatan ku'd tapui i tolig do bandar do Raba om uuhon ngai' ku do monorob i kuta' do pogintirungan. Om giniakan pondo ot orongou do tontok diri, om miagal pondod tongus dot opuhod o karangahan di mogisasangod. 15 Om atanggayan nondod kumaa dot id ponguripanan i raja' diyolo' om i boyoon do suwai,” ka dau.
Muab
1 Om boros kad Tuhan, “Miguli-guli' nopo do momonsoi'd dusa i tulun do Muab, om gowoi pondo om hukuman ku no kopio iyolo'. Tu' a' diyolo' pinusou i tulang do raja' dot Idom; tu' nukad diyolo' i lobong dau om tinutudan diyolo' i tulang dau do gisom do naawu. 2 Om gowoi pondo om porikatan ku'd tapui i pomogunan do Muab om uuhon ngai' ku'd monorob i kuta' di pogintirungan do Kiriot. Om angapatai nondo i tulun do Muab dot id suang do kagangahan do pisangadan, do tontok di mimpangkis ngai' i soudor do sumangod om di popingunion i torumpit. 3 Patayon ku nondo i pomorinta' do Muab om koinsanai di boyoon do hiri'd pomogunan diri,” ka dau.
Yohuda
4 Om boros kad Tuhan, “Miguli-guli' nopo do momonsoi'd dusa i tulun do Yohuda. Om gowoi pondo om hukuman ku no kopio iyolo'. Sinurilog diyolo' i ponudukan ku om a' diyolo' tinanud i ponuhuan ku. Napalid iyolo' di tingolig di tinuku' di komolohingan diyolo'. 5 Om gowoi pondo om porikatan ku'd tapui o Yohuda om uuhon ngai' ku'd monorob i kuta' do pogintirungan do Yorusalim,” ka dau.
Hukuman do Kinorohingan dot id Israil
6 Om boros kad Tuhan, “Miguli-guli' nopo do momonsoi'd dusa i tulun dot Israil. Om gowoi pondo om hukuman ku no kopio iyolo'. Tu' mamadagang iyolo' do tulun dit otulid o ginawo dot id ponguripanan, i tulun dit a' kabayar do tutang diyolo' om i tulun do mosikin dit a' kabayar do tutang do gatang piya'd kasut nga' a' no kabayar. 7 Ulak-ulakan nopo diyolo' i tulun dot oluhoi om it aiso' o pokukurayan om uyungon diyolo' i tulun do mosikin. Mongoi goduwo nopo i tapa' om i tanak dau'd kusai dudun do modop dot iso' o tondu'd turipon; om iri no o kososomu' do ngaran ku dit olidang. 8 Om id pointikid-tikid do kinoiyonon do sumambayang om piadapan nopod tulun i rasuk do nanu diyolo' do mantad id tulun di mosikin, i pinasanda' do tontok di minutang iyolo', om hilo' iyolo'd Walai'd Sasambayangan dot Agayo, i walai ku i Kinorohingan diyolo', do monginum di waig dot anggur di nanu diyolo' do mantad id tulun di nokoutang do tusin diyolo'. 9 Om iyokoyu nogi' daa kopio o kinopomunsaan ku di tulun dot Amori, i tulun dit angaranggou do miagal po di guas dot aras, om miagal di guas do tarbantin kokoris. 10 Pinosoliwan ku iyokoyu do mantad hilo'd Masir, om winoyo' ku iyokoyu do minaya' di tana' do kowotuan do solinaid dot apat nohopod o toun, om pinatahak ku om pinosongonuan ku dokoyu i pomogunan do tulun dot Amori. 11 Pinili' ku o wookon di tangaanak dokoyu do suminiliu do nabi; om pinili' ku o wookon di tangaanakwagu dokoyu do sumiliu'd Nasir. A' toi otopot iti, oi tulun dot Israil? Iyoho' no, i Tuhan o minomoros diti. 12 Nga' pinoinum i' dokoyu'd waig dot anggur i suminiliu'd Nasir, om noduhan dokoyu do polombus do boros ku i nabi. 13 Om poisison ku no iyokoyu do hilo'd tana', om modoi-odoi kou pondo do miagal di guyudan di gayaton di nopudsuan do gandum. 14 Iri piya'ndo tulun dot ongosiau do manangkus nga' a' no kopoggidu'; om i tulun dot ongokoris nga' atagakan tomod nopo do kinoris, om iri piya soudor nga' a' no kapasi do diyolo' piya'd tinan. 15 Iri piya i gampamana' nga' a' no kasaap, om iri it ongosiau do manangkus nga' a' no kopoggidu', om i tulun do songinsakai'd kuda' nga' a' no kopoggidu'. 16 Tontok nopondo do tadau'ddi om iri piya soudor di gunsiou kopio nga' ilihan nopo o rapo-rapo do don sumasangod om manangkus nod mogidu'. Iyoho' no i Tuhan, o minomoros diti,” ka dau.
1 Oi tulun dot Israil, pokinongoho' no iti boros do Tuhan do pinoboros dau do pasal dokoyu, i bansa' do pinosoliwan dau do mantad hilo'd Masir. Poingkaa o boros dau, 2 “Id pogialatan nopo do bansa' do hiti'd pomogunan om iyokoyu no i bansa' dot otutunan ku om i ginompi' kopio ku. Om iri no o kagayo-gayo kopio di dusa dokoyu, om iri o kopomohukuman ku dokoyu,” ka dau.
Karaja' di Nabi
3 Kopitanud toi o duwo o tulun do mamanau ondung a' iyolo' nokopibatos do misolowot? 4 Mamagarom toi o singa do hilo'd gouton ondung a' po iyau nakaanu'd nintorusan do kanon dau? Minggarom toi o tanak do singa do hiri'd luang dau ondung aiso' po o natabpaan dau? 5 Kosulung toi o tombolog do lawa' ondung a' pinataan i lawa'? Awakas toi o lawa' ondung aiso' o nokosulung diri? 6 A' toi kotompurolosi di tulun i torumpit do tanda' do haro o pisangadan do hiri'd bandar? Rumikot toi dot id bandar o kosusaan ondung a' do Tuhan porikoton iri? 7 A' i' o Tuhan, it Asawat Kopio, momonsoi do nunu nopo dot a' po dau kointalang iri dot id nabi, i susuhuon dau. 8 Ondung mamagarom o singa, om isai po daa ot a' moddosi? Ondung moro-boros o Tuhan, i Kinorohingan, om isai po daa ot a' popolombus di boros dau?
Karaagan do Samaria
9 Poboroson no dot id tulun di songingiyon do hilo'd walai'd raja' do Masir om Asdod o boros do poingkaa, “Timung kou no do hilo'd konuluhanan di posorili' do Samaria om miontong i' di kagangahan dot agayo do hilo' om i karaaton do pingwonsoyon do hilo',” ka. 10 Om boros kad Tuhan, “Ponuon nopodti tulun i walai diyolo' do dapu' dit araat om kororongit o kinoonu-onuan. A' no iyolo' milo do momonsoi dit otulid. 11 Om gowoi pondo om ngoyon do pisangod turungkuo' i pomogunan diyolo', om ngoyon panakahai o hiri'd walai diyolo' dit angagayo. 12 Miagal nopo di gompomogompi' do dumba' tu' ongoduwo po o gakod ko' ongoiso' o tolingo di dumba' dot aanu dau do naakan do singa, om iyo noddi tu' okuri' nondo o tulun do Samaria dot apasi, i songillii daa do toodopon dit ongolomok do dinondo poo,” ka dau. 13 Boros kad Tuhan it Osundu Kopio, om it Asawat Kopio, “Pokinongou nod dinondo, om poinsanon no i sinakagon di Yakub. 14 Tontok nopo di tadau do hukuman ku ot Israil di dusa diyolo', om raagon ku nondo i pananaraban do porsombahan do hilo'd Baitol. Babakon ngai' ku nopondo i sinangau-sangau do hiri'd sunduk di pananaraban do porsombahan om angaratu' nondo iri do hiri'd tana'. 15 Raagon ngai' ku nopondo i walai do tuundorongon di maso dot osogit om i tuundorongon di maso dot alasu'. Iri piya i walai di linumis do lamai nga' araag i'; araag ngai' nopondo i walai dit angagayo.
1 Pokinongoho' noti, oi tongoondu' do Samaria, i lumombon no do miagal do sapi' dit olunok do hilo'd Basan! Iyokoyu i mongulok-ulok di tulun dit ongoluhoi, om i monginggorit di tulun do mosikin, om i mononsog do sawo do manahak diyolo'd tiinumon di kaawuk! 2 Iyoho' no o Tuhan, it Asawat Kopio, i Tuhan dit Olidang, o minamatos do rumikot nondo o tadau do gayaton kou di kakait om oinsanan kou nopondo do miagal di sada' di nakait do tapon. 3 Gayaton kou nopondo do pakaa do hilo'd Hormon om pataamon kou nogindo do hiri'd soliwan do pawayaon di luang do tolig dit id somok. Iyoho' no i Tuhan o minomoros diti,” ka dau.
A' Mokinongou ot Israil
4 Om boros kad Tuhan, it Asawat Kopio, “Oi tulun dot Israil, ongoi kou nopo do hilo'd kinoiyonon do sumambayang di hilo'd Baitol om momonsoi nopod dusa do hilo' do sipomonsoi kou kopio'd dusa! Ongoi kou nopod hilo' om mongigit id nintorusan do maan do porsombahan do sumbolion do monikid kosuabon, om migit do porsombahan di sompihopod dot insan do tolu o tadau. 5 Ongoi kou nopod hilo' om patahak kou id roti do maan do kounsikahan dot id Kinorohingan, om pokirayahan nopo dokoyu i porsombahan di pinoruhang dokoyu'ddi! Iti no kopio i korohian dokoyu'd momonsoi. 6 Iyoho' i' i pinoporikot do mononglous dot id toinsanan o bandar dokoyu, nga' a' kou i' guminuli' dot id doho'. 7 Pinusus ku i rasam do tontok di mokirasam kopio daa i totonomon dokoyu. Pinarasam ku ot id iso' o bandar, nga' a' ku i' pinarasam ot id bandar do suwai. Narasaman i' o tiso' di tumo nga' noriou i' i tanom do hiri'd tumo di suwai. 8 Om olomo-lomok pod tuuhan i tulun do mantad id piro-piro o bandar do kumaa dot id bandar do suwai di sorohon daa diyolo' do haro o waig, nga' a' i' kabagal o waig do hiri. Om iyo piya'ddi nga' a' kou i' guminuli' dot id doho'. 9 Pinoporikot oku'd tongus dit alasu' do minomoriou di tanom-tanom dokoyu. Naayi' di katat do minangakan i guas dot anggur dokoyu, om i guas dot ara, om i guas do saitun dokoyu, om i tanom-tanom dokoyu'd suwai. Nga' a' kou i' guminuli' dot id doho' dot iyo piya'ddi o nosiliu. 10 Pinorikatan ku iyokoyu'd toruol do miagal di pinorikot ku do hilo'd Masir. Pinatai ku i tangaanakwagu dokoyu dot id pisangadan om nongoi ngai' ku tanggayai i kuda' dokoyu. Pinonu' ku'd rata' o hiri'd kiim dokoyu i kosusuk pod todung o koutongo'. Nga' a' kou i' guminuli' dot id doho'. 11 Rinaag ku o wookon dokoyu do miagal di pinamaraag ku'd Sodom om Gomura. Om iri nopo i nangapasi dot id pogialatan dokoyu om miagal pod kayu-kayu di nosorob do nongoi do mantad id tapui. Om iyo piya'ddi nga' a' kou i' guminuli' dot id doho'. 12 Om gowoi pondo om hukuman ku no iyokoyu, oi tulun dot Israil. Om sodia' kou nod tumimbaba' di pomohukum ku dokoyu,” ka dau. 13 Kinorohingan no i minomonsoi do nuluhon om i minomonsoi'd tongus. Om pointalangon dau dot id tulun i pomusarahan dau; silihon dau do totuong o dangadau. Om mimpanau iyau do hilo'd timpak do konuluhanan dot akawas. Tuhan no i Kinorohingan dit Osundu Kopio o minomonsoi ngai'dti.
Lolohou do Kumorologo
1 Pokinongoho' no iti sinding do pogihad, oi tulun dot Israil, tu' sindingon ku iti do pogihad ku dokoyu. 2 Naratu' no ot Israil i sumandak, a' no iyau kotungag kawagu! Poillii po tomod iyau do hiri'd tana' do tinongkiadan, om aiso' i' o tiso' do mongoi potungag dau. 3 Om boros kad Tuhan it Asawat Kopio, “Haro o bandar do hilo'd Israil do minonuhu' do soribu o soudor do mamanau, nga' hatus poo o nokoguli'; om haro no o bandar do suwai do minonuhu' do hatus o soudor do minamanau, nga' hopod po o nokoguli',” ka dau. 4 Om boros kad Tuhan dot id tulun dot Israil, “Guli' kou no dot id doho', om apasi kou i'. 5 Kada' kou ongoi sambayang do hilo'd Borsiba. Kada' kou umbal do mogihum doho' do hilo'd Baitol, tu' tumanus i' o Baitol. Kada' kou ongoi do hilo'd Gilgal, tu' atanggayan nondod pisangod i tulun do hilo',” ka dau. 6 Guli' kou no dot id Tuhan, om apasi kou i'. Ondung a' kou gumuli' dot id dau, om miagal pondo iyau di tapui do monorob do tulun dot Israil. Om sorobon nondo di tapui i tulun do hilo'd Baitol, om aiso' no o songulun piya do kopisok diri. 7 Obungou kou no, iyokoyu i monomputul dit otulid, iyokoyu i monipu' do tulun, gisom dot a' diyolo' aanu it apatut dot aanu diyolo'! 8 Tuhan i' o minomonsoi do rombituon do hilo'd tawan, dot i muru-puru om i walatik. Silihon dau do totuong o tanawau, om tanawau no om silihon dau do totuong. Om potuntugon dau do hiti'd katanaan i waig do rahat. Tuhan no o minomonsoi do koinsanai'ddi. 9 Porikatan dau do karaagan i tulun dot okoris om it intirungon diyolo'. 10 Araatan kou do tulun di sumaap dit a' otulid om i popoboros dot otopot dot id kut. 11 Nulak-ulakan dokoyu i tulun do mosikin om pinanakau dokoyu i gandum diyolo'. Om gowoi pondo om a' kou koiyon di walai do watu dit olumis di winonsoi dokoyu, om a' kou koinum di waig dot anggur do mantad id kabun dot anggur dit osonong tomod do tinanom dokoyu. 12 Oilaan ku no o kogumuo' do dusa dokoyu om kogoyoo' do karaaton do winonsoi dokoyu. Mongulok-ulok kou'd tulun dit ongosonong, om manganu kou di ponisip, om mada' kou dot obutusan dit otulid i tulun do mosikin dot id kut. 13 Iyo nopo kopio'ddi i wonsoyon dokoyu, om wonsoyon nopo dit osonong kopio dot osorou'd tulun, do maso do miagal kopio'ddi karaat, om a' nopo mungkomi! 14 Tumotos no do momonsoi dit osonong, om kada' pomonsoi dit araat, om apasi kou i'. Om moyo-woyo' nogindo kopio dokoyu o Tuhan it Osundu Kopio, do miagal di popimboroson dokoyu. 15 Karaatai kou no dit araat, om korohiai kou no dit osonong, om wonsoyon no kopio dokoyu it otulid. Tu' nunu o koilo-ilo nga' osianan i' doti' o Tuhan do tulun dot Israil di noolu-olu'. 16 Om boros kad Tuhan, i Kinorohingan dit Osundu Kopio, “Haro nondo o minggiak do mihad dot atatangaban do hilo'd karalan-ralanan do bandar. Iri piya'ndo i gompongumo nga' lohowon i' do mongoi pogihad di tulun di nangapatai do rumuhang di tulun di godsian do mogihad do tulun do napatai. 17 Om haro ngai' nopondo o mihad do hilo'd kokobunan dot anggur. Osiliu ngai' nondo o miagal diti tu' rumikot oku no do mongoi pomohukum dokoyu. Iyoho' no, i Tuhan o minomoros diti,” ka dau. 18 Obungou no i tulun di lumangad do tadau'd Tuhan! Nunu po kopio o guna' do tadau'ddi dot id dokoyu? Tu' id dokoyu nopo om tadau nopoddi om tadau di totuong om okon i' ko' tanawau. 19 Kowoyo-woyoo' nopo do tontok do tadau'ddi om miagal do tulun di manangkus do mogidu' do mantad id singa nga' kobontol indo do bohuang! Ko' miagal pod tulun di muli' no daa do hiri'd walai dau om pakabayon no daa dau di limput o longon dau, nga' otinduk nogid tulanut. 20 Iri nopo tadau'd Tuhan om poporikot do totuong om okon i' ko' tanawau. Iri nopondo om tadau do luhung, om aiso' no o tanawau. 21 Om boros kad Tuhan, “Araatan oku di karamayan dokoyu do tadau'd agayo do don tugama', om sosomuan oku do kokito'ddi. 22 Soira' nopod mongoi kou daa papatahak dot id doho' do porsombahan di sorobon om porsombahan do gandum, om a' ku i' romiton iri. A' ku i' romiton i tayam-tayam di pinolomu' dokoyu do maan do porsombahan do piombolutan do patahakon dot id doho'. 23 Tingkadai dokoyu ino sinding dokoyu dit ohiyo; a' oku i' sirongou dino kecapi dokoyu. 24 Nga' osonong nogi' do tumotos kou do momonsoi dit otulid gisom do lumuyung pondo do miagal do waig om momonsoi kou dit otopot do gisom do lumuyung iri do miagal do bawang dit a' insan do rumasak. 25 Oi tulun dot Israil, a' oku i' minokianu do porsombahan di sumbolion om porsombahan do nunu nopo do solinaid dit apat nohopod o toun do winoyo' ku iyokoyu do hilo'd tana' do kowotuan. 26 Nga' baino' noddi, tu' tumuku' kou dot id Kiwan, i rombituon do ponokokinorohingan dokoyu, om mositi' no dot igitan dokoyu i tingolig diri. 27 Pokoyoon ku nondo iyokoyu dot id pomogunan do pisangod, it osodu' po ko' hilo'd Damsik. Iyoho' no, i Tuhan i kingaran do Kinorohingan dit Osundu Kopio, o minomoros diti,” ka dau.
Karaagan dot Israil
1 Obungou kou no, it osimbayan tomod daa o koposi-posion do hilo'd Sion, om iyokoyu it aiso' no o koligagaanan do hilo'd Samaria --- iyokoyu, i tulun dot ongkipangkat do bansa'd Israil, i bansa' dot agayo, i toongoyon do tulun pokiuhupai! 2 Ongoi kou no ontong di bandar do Kalni. Om potilombusan o hilo'd Hamat, i bandar dot agayo'ddi om poruhukan do hilo'd bandar do Gat, i bandar do tulun do Pilistin. Poimaha-maha' tuu i piro-piro o bandar diri ko' mantad do pomorintaan do Yohuda om Israil? Agayo toi o diyolo'd watas ko' i dokoyu? 3 A' kou daa otumbayaan do rumikot no o tadau do kosusaan, nga' poporuhai nogi' do korikatan do tadau'ddi ino pingwonsoyon dokoyu. 4 Obungou kou no, i songillatan do hino'd timpohon dokoyu dit ongolumis, om i mangakan do tonsi'd dumba' om sapi' dit ongokoro' po do tontok do moginakan! 5 Orohian kou do modsinding om ompoton dokoyu iri do kecapi do miagal di koubasanan di Daud. 6 Om oiyon nopo dokoyu'd monginum o waig dot anggur do mantad id sangkir di poimponu' do waig dot anggur, om momowongi-wongi' kou do tumau dit owongi' kopio, nga' a' kou i' mogihad do karaagan dot Israil. 7 Om gowoi pondo om iyokoyu o kopogulu dot atanggayan dot id pomogunan do pisangod. Opupusan nondo i pogiginakan om karamayan dokoyu. 8 Nokoboros nod Tuhan, i Kinorohingan dit Osundu Kopio om it Asawat Kopio, o boros do poingkaa, “Araatan oku di kasawato' do ginawo'd tulun dot Israil; a' tomod oku orohian di walai diyolo' dit angagayo om ongolumis. Om patahakon ngai' ku nondo i bandar diyolo'd agayo om koinsanai dit id suang di bandar diri dot id pisangod,” ka dau. 9 Ondung haro daa o hopod o tulun do mongoi lisok dot id iso' o walai, om apatai ngai' nopondo iyolo'. 10 Om ngoyon nondo di koobpinayan di tulun do napatai posoliwano' i rata' do mantad hiri'd walai, i koobpinayan dit apatut do momolobong di rata'. Om momolohou nondo i koobpinayan diri dot id isai nopo i tulun do noolu' do hiri'd walai do hiri'd ponong id tolikud, do poingkaa, “Haro po tulun do koruhang nu?” ka. Om haro nondo o sumimbar dot, “Aiso'!” ka. Om moro-boros nondo i koobpinayan diri dot, “Kada' kohiyo! A' to no koino-ino do karait do ngaran do Tuhan,” ka. 11 Soira' nopondod koboros o Tuhan do monuhu', om oinsanan nopondo i walai dit angagayo om it ongokoro' dot angaraag. 12 Milo toi o kuda' do manangkus dot id kaantalaban? Nokoumbal toi o tulun do mamaradu do rahat do sapi' o pamaradu? Nga' sinomputul i' dokoyu it otulid, gisom do nosiliu'ddi iri do kawanit di kapatai. 13 Oondos tomod kou do naala' dokoyu i bandar do Lodibar. Om mimboros kou do mokirayou-rayou dot, “Okoris toko' i', om osolod toko' i' o bandar do Karnaim,” ka no dokoyu. 14 Om Tuhan no, i Kinorohingan it Asawat Kopio, o moro-boros do poingkaa, “Oi tulun dot Israil, poporikot oku nondod soudor do mantad id iso' o pomogunan do suwai, do mongoi poningolod diti pomogunan dokoyu. Om inggoriton kou nondo diyolo' do mantad pod hilo'd ralan di poingkaa do hilo'd Hamat di ponong id utara om gisom do korikot di Rantai dot Araba do ponong id salatan,” ka dau.
PINOINTALANG DO PASAL DO HUKUMAN DO MANTAD ID TUHAN
Katat
1 Haro o pinointalang do mantad id Tuhan it Asawat Kopio do nokito ku. Nokito ku nogi' iyau do minomonsoi'd katat dot ogumu' kopio do tontok di nogorib no i sakot di dong raja' om tontok di tumimpuun nogi' do sumuni kawagu i sakot. 2 Om id suang nopo di pinointalang dot id doho'ddi om nokito ku do pingakanon nopo di katat o nunu nopo it ongotomou-tomou do hiri'd pomogunan. Om boros kangku'ddi, “Oi Tuhan, it Asawat Kopio, ompunai no ilo tulun nu! Poingkuro poddi iyolo' do masi? Tu' ongokooro' kopio iyolo' om ongoluhoi po,” kangku. 3 Om posimbano' nod Tuhan o pomusarahan dau, om boro-boros nod, “A' i' osiliu o miagal di nokito nu,” ka dau.
Tapui
4 Om haro po kawagu o pinointalang do mantad id Tuhan, it Asawat Kopio, do pinokitanan doho'. Nokito ku nogi' iyau do sumodia' nod momohukum di tulun dau, om tapui nogi' o pomohukum. Om sinorob nogi' di tapui i rahat dot agayo, it id saalom diti tana', om timpuun po kawagu do monorob di katanaan. 5 Om boros kangku'ddi, “Pisoko' kopio ilo tapui, oi Tuhan i Kinorohingan! Poingkuro poddi i tulun nu do masi? Tu' ongokooro' kopio iyolo' om ongoluhoi po,” kangku. 6 Om posimbano' po kawagu'd Tuhan o pomusarahan dau, om boro-boros nod, “A' i' abayaan o miagal diri,” ka dau.
Tali do Pomoloting
7 Om haro po kawagu o pinointalang do Tuhan dot id doho'. Nokito ku nogi' iyau do poingkakat dot id toning do limput di linotingan do tali do tontok di minomonsoi'ddi. Om haro nogi' o tali do pomoloting do poingigit dau do pongilo ondung otulid i limput diri ko' amu'. 8 Om boros ka dau dot id doho', “Nunu ot okito nu, oi Amos?” ka dau. “Tali do pomoloting,” kangku do suminimbar. Om boros kaddi dau, “Iti nopo om maan ku'd popointalang dot iri nopo tulun ku om miagal di limput dit a' otulid. A' ku nondo posimbanon o pomusarahan ku do momohukum diyolo'. 9 Angaraag nondo i piro-piro kinoiyonon di toongoyon di sinakagon di Isak podsubakai do tingolig. Om pogun pondo i tiyonon do tulun dot Israil do sumambayang. Punsoon ku nondo i sinakagon di Raja' Yirobiam,” ka.
I Amos om i Amasia
10 Om porikot noddi i Amasia it Imam do hilo'd Baitol, do boros dot id di Yirobiam, i raja' dot Israil, do poingkaa, “Mogupakat no i Amos om i tulun dot ogumu' do sumaap diya', oi raja'. Karaag nodti pomogunan i koboro-boroso' dau. 11 Tu' boros ka dau, ‘Apatai nondo dot id suang do pisangadan i Yirobiam, om atanggayan do pisangod i tulun dot Israil do mantad id pomogunan diyolo' om kakaa dot id pomogunan do pisangod,’ ka no dau,” ka dau. 12 Om boros kaddi di Amasia dot id di Amos, “Ula' po no, oi nabi! Poguliai nogi' do hilo'd Yohuda om mimboros nopod hilo'. Om ogodsian ko i' diyolo'. 13 Kada' nondo pimboros do pasal dit osiliu dot id dabantalan do hiti'd Baitol. Tu' iti nopo om kinoiyonon di nokotobilang do tiyonon di raja' do sumambayang, om sasambayangan do koinsanai'd rayat,” ka dau. 14 Om boros ka di Amos, “Iyoho' nopo om okon i' ko' nabi di mokigadsi' do mimboros do pasal dit osiliu dot id dabantalan. Iyoho' nopo om gompomogompi' nod tayam-tayam om mongungupu' do tua'd ara. 15 Nga' pinotongkiad oku i' do Tuhan do mantad id karaja' ku'ddi om sinuhu' oku'ddi dau do mongoi popimboros di boros dau do pasal dit osiliu dot id dabantalan dot id Israil, i tulun dau. 16 Pokinongou nogidti boros do Tuhan dot id diya'. Suhuon oku daa diya' do tumingkod do mimboros do papasala' dot Israil, 17 om gowoi pondo om poingkaa o boros do Tuhan dot id diya', oi Amasia, ‘Osiliu nondod sundal i sawo nu do hilo'd karalan-ralanan do bandar, om angapatai i tangaanak nu dot id pisangadan. Om bohogion nondo i tana' nu om patahakon dot id tulun do suwai. Om kapatayon nu nopondo om id pomogunan do tulun dit a' kotutun do Kinorohingan, om atanggayan no kopio o tulun dot Israil dot id pomogunan do pisangod om koinsodu' iyolo' di pomogunan diyolo',’ ka,” ka dau.
Sambalatak o Tua-ua' do Nokito dot id Suang do Pinointalang
1 Om haro po kawagu o pinointalang do Tuhan, it Asawat Kopio, dot id doho'. Om nokito ku nogi' o sambalatak o tua-ua'. 2 Om ponguhot no o Tuhan doho' do poingkaa, “Oi Amos, nunu ot okito nu?” ka dau. “Okito ku o sambalatak o tua-ua',” kangku. Om boros kad Tuhan dot id doho', “Nokorikot noddi o kapatayon dot Israil, i tulun ku. Om a' ku no posimbanon o pomusarahan ku do momohukum diyolo'. 3 Tontok nopondod tadau'ddi om osiliu nondod tihad i sinding do hilo'd walai'd raja'. Om poirromos pondo o rata' do tulun do napatai. Om aiso' nopondo o komi do tulun do popintaam diri,” ka dau.
Hukuman dot id Israil
4 Pokinongou kou nodti, oi dokoyu i mongulok-ulok di tulun di mosikin om i mumbal do mongonsit-onsit di tulun do mosikin dot id pomogunan diti do gisom dot apatai iyolo'. 5 Boros ka no dokoyu, “A' no iyahai kaandad do kolimpupuson diti tadau'd agayo tu' sipadagang no iyahai'd gandum dahai. Soira' toi'd opupusan o tadau'd Sabat, om otuntunan i' dahai do papadagang i padagangon dahai? Om popidala-dalaan indo dahai o gatang, om pakayon dahai i timbangan dit a' koontok, om simbanan dahai i timbangan do ponipu' di tulun do mongoi boli. 6 Om iri piya'ndo gandum dit araat no nga' pamahalon i' dahai o gatang. Om mogihum iyahai do tulun do mosikin, it a' kabayar do tutang dau, it aiso' no pambayar do gatang piya'd kasut. Om bolion toko' indo iyau do maan do turipon,” ka no dokoyu. 7 Om nokosumpa' no o Tuhan, i Kinorohingan dot Israil, do poingkaa, “A' ku nondo kopio lihuan i wowonsoyon diyolo'd araat. 8 Om gumuyu' nondo o tana', om oinsanan nopondo o tulun do hiri'd pomogunan dot agangau. Kogogor ngai' nopondo o pointongkop di pomogunan; om miinsawat piinsiriba' pondo i tana' do miagal di Bawang do Nil. 9 Rumikot no o maso do potonobon ku ilo tadau do dong pitangaadau, om potuongon ku iti pomogunan do tangaadau. Iyoho' no i Tuhan, it Asawat Kopio, o minomoros diti. 10 Silihon ku nondo do tadau'd mogihad i tadau do karamayan dokoyu om silihon ku do tihad dot atatangaban i sinding do kaarapadan dokoyu. Om pologoson ku nopondo iyokoyu do gisom do bugaran dokoyu o tulu dokoyu om manampakai kou'd karung do pointalang do tumongob kou. Om miagal kou pondo di molohing do mogihad di tanak dau dit iso' no daa do napatai. Om araat nondo kopio i tadau'ddi do gisom do kopupuson,” ka dau. 11 Om boros kad Tuhan, it Asawat Kopio, “Rumikot no o maso do porikatan ku'd mononglous o pomogunan diti. Om louson ngai' nondo i tulun, nga' okon i' ko' roti o kolousanan; om tuuhan iyolo' nga' okon i' ko' tuuhan do waig. Louson nondo iyolo' om tuuhan do boros do mantad id doho'. 12 Om minghombo nopondo o tulun do mantad hilo'd utara om kumaa dot id salatan, om mantad id koulayon om pakayaan dot id kotonobon. Om oongoi ngai' no diyolo' do mongoi daa pogihum do boros ku, nga' aiso' i' ot okito diyolo'. 13 Om tontok nopondod tadau'ddi, om iri piya tangaanakwagu om i kosumandakan dit ongosonong o tinan nga' humaba' tomod nopo dot otutuuhanan. 14 Om iri nopondo tulun di sumumpa' dot id suang do ngaran di tingolig do Samaria, om i momoros dot, ‘Id suang do ngaran di tingolig do Dan,’ ka, ko' momoros dot, ‘Id suang do ngaran di tingolig do Borsiba,’ ka --- om aratu' nondo i tulun diri om a' no kotungag kawagu,” ka dau.
Hukuman do Mantad id Tuhan
1 Om kokito ku o Tuhan do poingkakat do hiri'd toning do pananaraban do porsombahan. Om boros ka dau do minonuhu', “Ngoyo' bobogo' dot opuhod ilo tompok do torigi do Walai'd Sasambayangan dot Agayo om oguyu' ngai' i' i kakilima'. Babakon ngai' no i torigi om pologoson nopo do kootung do tulu di tulun. Om iri nopondo tulun do suwai dit a' apatai om patayon ku no dot id pisangadan. Om aiso' indo o tiso' po diyolo' do kopoggidu'; om aiso' o songulun piya dot apasi. 2 Om mulong piya do poukadon diyolo' o wayaan diyolo' do hilo'd pomogunan do tulun do napatai nga' okosupan ku i' iyolo' om mulong piya do mindakod iyolo' do hilo'd tawan, nga' polintuhunon ku i' kawagu iyolo'. 3 Om ondung lumisok iyolo' do hilo'd timpak do Nuluhon do Karmol, om ihumon ku i' iyolo', om atangkap ku i' iyolo'. Om ondung lumisok iyolo' do hilo'd nanad do rahat, om suhuon ku indo i naga' di hilo'd rahat do mongokot diyolo'. 4 Ondung tanggayan iyolo' di pisangod diyolo' dot id pomogunan do pisangod, om monuhu' oku indo di pisangod do mamatai diyolo'. Iso-iso' no kopio o ginawo ku do mamatai diyolo', om a' oku no monulung diyolo',” ka dau. 5 Kamaon nod Tuhan it Asawat Kopio, om it Osundu Kopio, iti pomogunan, om gumuyu' nopo iti pomogunan; om mihad ngai' nopondo i tulun di poingiyon do hiti. Poingkuro nopo i Bawang do Nil do migayo-pikoro', om iyo noddi iyolo' di minsawat nga' aratu' indo. 6 Wonsoyon do Tuhan o walai dau do hilo'd tawan, om gisaman dau o tawan do momolingkup diti pomogunan. Om potuntugon dau i waig do rahat do hiti'd katanaan. Om Tuhan no o minomonsoi do koinsanai'ddi. 7 Om boros kad Tuhan, “Oi tulun dot Israil, piiyoon ku nopo o pamamadul ku dokoyu om i tulun dot Etiopia. Nigitan ku i tulun do Pilistin do mantad hilo'd Krita om nigitan ku i tulun do Siria do mantad hilo'd Kir, do miagal dokoyu tu' nigitan ku do mantad hilo'd Masir. 8 Iyolo' no o mintong diti pomorintaan do tulun dot Israil, i bansa' do kidusa. Om tonuson ku nondo o bansa'dti do hiti'd pomogunan. Nga' a' ku indo insanan kopio do mamatai i sinakagon di Yakub. Iyoho' no, i Tuhan, it Asawat Kopio o minomoros diti. 9 Om poboroson ku nondo i ponuhuan ku om atapan ku o tulun dot Israil do miagal do tulun di mangatap do gandum. Om atapan ku nondo iyolo' dot id pogialatan do bansa' do mongidu' dit aiso' o guna'. 10 Om angapatai nondo dot id pisangadan i tulun do kidusa dot id pogialatan di tulun ku om oinsanan o tulun di momoros dot, ‘A' i' bo kopio'd Kinorohingan pologoson do haro o kosusaan do korikot dot id dati',’ ka,” ka dau.
Otonduli' Indo o Koiyon-Iyono' dot Israil do Koimbagu
11 Om boros kad Tuhan, “Rumikot indo o tadau do tondulion ku o koiyon-iyono' di tulun dot Israil do miagal di maso pod pomorintaan di Raja' Daud. Iyo po daa iyolo'd walai di naraag do dinondo poo. Nga' wonsoyon ku indo kawagu i limput diri, om gisom do miagal di gulu po. 12 Om ngoyon nondo kawagu di tulun dot Israil onuo' i noolu-olu' do pomogunan dot Idom om koinsanai di bansa' di songonuon ku di gulu po. Iyoho' no i Tuhan, o minomoros diti, om bayaanon ku i' iti,” ka dau. 13 Boros kad Tuhan, “Rumikot no i tadau, dot okosupan di gandum dit id tohuri tonomo' i gandum di maso dot omot-omoton, gisom dot aiso' nopondo o kotingkadan do mongomot; om okosupan dit anggur dit id tohuri tonomo' it anggur di pagaon no, gisom dot aiso' nopondo kotingkadan do mamaga' do tua'd anggur. Om moninuru' pondo do waig dot anggur dit oomis o hilo'd konuluhanan, om i konulu-nuluan nga' oluyungan ngai' nopondoddi. 14 Pogulion ku nondo kawagu i tulun ku do hilo'd pomogunan diyolo'. Om wonsoyon nondo diyolo' kawagu i bandar diyolo' di nangaraag om iyonon kawagu diyolo'; mananom nondo iyolo'd kabun dot anggur om oinum diyolo' i waig dot anggur diyolo'. Om momukabun nondo iyolo' om aakan diyolo' i tua' di potonomon diyolo'. 15 Poiyonon ku nondo i tulun ku do hilo'd pomogunan di pinatahak ku dot id diyolo', om a' nondo iyolo' ouyung kawagu. Iyoho' no i Tuhan, i Kinorohingan diyolo', o minomoros diti,” ka dau.
Hukuman Indo do Tuhan ot Idom
1 Iti no o pinoboros di Obadia do pasal dot osiliu dot id dabantalan; pinopolombus iyau do boros do Tuhan, it Asawat Kopio, do pasal do bansa' dot Idom: Sinuhu' do Tuhan i susuhuon dau dot id piro-piro o bansa', om norongou toko' no i boros do pinolombus di susuhuon diri do poingkaa, “Sodia' no do mongoi sangod! Kainou no mamanau do mongoi panangod dot Idom,” ka. 2 Om boros kad Tuhan dot id Idom, “Poluhoyon tiya' nondo, gisom do hingi-hingion ko do toinsanan do bansa'. 3 Noudutan ko di kasasawat do ginawo nu. Iri no i bandar nu dot agayo o pogintirungan nu dot ogirot, i watu do winonsoi; iyonon nu nopo om hiti'd timpak do nuluhon dit akawas. Om gowoi poddi do momusorou ko dot, ‘Isai po daa o kaala' doho'?’ ka nu. 4 Mulong piya do wonsoyon nu o walai nu dot iyo di rumun do kondiu kasawat, om iyo di rombituon do hilo'd tawan kasawat, nga' milo oku i' do mongoi pomohuyas diri. 5 Iri nopo i manakau do rumikot do dongotuong om iri no i korohian dau o ngoyon dau. Om iri tulun di mongupu' do tua' dot anggur dau do hilo'd kabun dau, nga' poolu' kasai' i' do piro-piro o tua'. Nga' iya' nopo om tonuson nopondo kopio di pisangod. 6 Oi Isau, napanakau no o dapu' nu, om nopogibahagi-hagi' nori. 7 Nakalan ko di suminokodung diya', om nuyung ko do mantad id pomogunan nu. Naala' ko di tongotambalut nu, om pinohudsu ko di tulun di poingilang diya'd makan. Om mogiuhot-uhot nopo iyolo' do pasal diya' do poingkaa, ‘Hinonggo ngai' noddi i toilaan dau?’ ka. 8 Tontok nopondo di tadau do hukuman ku ot Idom, om patayon ngai' ku nopondo i tulun do hilo' dit ongoilo. Om atagak ngai' nopondo i toilaan diyolo', om aiso' noo o waya'ddi. 9 Om ongooris ngai' pondo i gunsiou do mantad hilo'd Timan, om angapatai ngai' i soudor dot Idom,” ka dau.
Kopomohukuman dot Idom
10 Boros kad Tuhan, “Orongit kopio ko dot id tobpinai nu, i sinakagon di Yakub. Om gowoi pondo om patayon ko, om pakaraaton ko'd tulun do gisom dot alaid. 11 Hilo' ko'd sodu' do poingkakat, do tontok do tadau di rinaag do pisangod i totobon do wawayaan do Yorusalim, om di naala' diyolo' o bandar diri. Aiso' i' o komi nu do tontok di tinanggayan ngai' diyolo' i kakayaan do Yorusalim om bohogio' noddi diyolo' dot id pogialatan diyolo'. Om iya' nga' iyo nopo di pisangod karaat. 12 A' i' daa apatut dot asanangan ko dot araat o kinootuson do Yohuda. Om a' apatut dot otood ko do tontok di tadau do napatai iyolo'. A' i' daa apatut do koirak ko do tontok dit osusa' iyolo'. 13 A' ko i' osorupai do sumuang di bandar do tulun ku, do mongoi ponguntotogod di tulun do maso dot oinggorit, om mongoi panakau di dapu' diyolo' do tontok do tadau dit osusa' iyolo'! 14 A' ko i' apatut do mongoi ingkakat do hilo'd pogitotongkiadan do ralan do mongoi padtalob do tulun di maso do mogidu' do mantad id pisangod, om papatahak diyolo' dot id pisangod do tontok di tadau do noontok iyolo'd kosusaan,” ka dau.
Butusan do Kinorohingan i Piro-Piro o Bansa'
15 Boros kad Tuhan, “Oruhai no kopio i tadau do bisaraon ku, iyoho' i Tuhan, i piro-piro o bansa'. Om nunu nopondo i wonsoyon dot Idom om iyo noddi o posulion dot id dau. Om aanu nondo kawagu dau i pinatahak dau. 16 Hilo' nod nuluhon ku dit olidang o pinonginuman di tulun ku di tinumon di poiyaan do hukuman dot id diyolo'. Nga' iri nopondo it oinum do piro-piro o bansa' dot id pomogunan diti om opoit po ko' iri. Om a' no diyolo' milo dot ilagon i hukuman diri, mositi' no dot inumon diyolo' iri do gisom dot aayi'. Om opunso nondo iyolo' do gisom dot alaid,” ka dau.
Kamanangan dot Israil
17 Boros kad Tuhan, “Nga' hilo' nopod nuluhon do Sion, om haro i' ot apasi, om osiliu i nuluhon diri do kinoiyonon di pinotobilang do maan do doho'. Om aanu nondo kawagu do sinakagon di Yakub i tana' di tinungkusan diyolo'. 18 Om iyo pondod tapui do monorob di rahami do hilo'd tumo, ot Israil i tulun ku, do monorob di sinakagon di Isau do gisom dot ouu. Om aiso' nondo o tongosongulun piya di sinakagon di Isau do kopoggidu'. Iyoho' no i Tuhan o minomoros diti! 19 Om osolod nondo di tulun do hilo'd Yohuda i ponong id salatan do pomogunan dot Idom. Om aala' di tulun do mantad hilo'd konuluhanan di ponong id kotonobon i watas do Pilistin. Om osolod nondo di payat do Binyamin o tana' do Giliad, om oporinta' dot Israil, i tulun ku, o pointongkop dot Ipraim om Samaria. 20 Om koguli' nondo i tulun dot Israil di ponong id utara do mantad id pomogunan do pisangod om osolod diyolo' o Ponisia om gisom do hilo'd Saprat. Om iri tulun do Yorusalim di natanggayan do hilo'd Sardis, nga' koguli' nondo om kaala' di kabandaran di ponong id salatan do Yohuda. 21 Om iyolo' ngai' nondo di tulun do Yorusalim do suwai o mongoi panangod dot Idom om aala' indo diyolo' iri. Om iyoho' nondo i Tuhan, o raja' do momorinta',” ka dau.
A' i Yunus Minumboyo' do Pinonuhuan do Tuhan
1 Insan o tadau, om boro-boros no o Tuhan dot id di Yunus i tanak di Amitai: 2 Boros ka dau, “Pamanau no do mongoi'd hilo'd Niniwi, i bandar dot agayo'ddi om pasalaon no iyolo', tu' noilaan ku no o karaato' di tulun do hilo',” ka dau. 3 Nga' pasansala' nogi' o nongoi di Yunus tu' mumbal daa iyau do mogidu' do mantad id Tuhan. Pinakayaan nogi' dau do hilo'd Yopa. Om hilo' no o kinokitanan dau do kapal do rahat di kumaa do hilo'd Sepanyol. Om patahako' no dau o tambang dau om sakai no di kapal do miwoyo' di papapanau di kapal do kumaa do hilo'd Sepanyol; tu' mogidu' iyau do mantad id Tuhan. 4 Nga' porikoto' nod Tuhan o tongus dot opuhod kopio do hiri'd rahat, gisom dot motiraag no daa'ddi i kapal diri. 5 Om oinsanan nopo do norolosi i papamanau di kapal. Om sompori-pori nopoddi iyolo' do mininggiak do mokitulung di ponokokinorohingan diyolo'. Om popintaamo' no diyolo' do hiri'd rahat i konunu-nunuan di hiri'd kapal do popoinggaan-gaan daa di kapal. Nga' i Yunus nopo om nokolintuhun no do hiri'd tuwou di kapal. Om poillii diri iyau'd hiri dot oolong tomod do koodop. 6 Om lintuhun no i boyoon di papamanau di kapal do hiri'd tuwou di kapal om kabantalai no dau i Yunus do koodop do hiri. Om boros ka dau, “Nokuro ko iya' tu' oolong tomod do koodop? Tungag kopio om sumambayang i' do mokitulung di ponokokinorohingan nu. Ulan toi' daa om insianan toko' dau, om posion toko' indo dau,” ka. 7 Om kasalakoi poddi i Yunus om i boyoon diri do hiri'd sawat om pogiboro-boros noddi i papamanau di kapal. Boros ka diyolo', “Undion toko' nogi' ondung isai kopio o nakasala' di kobungou diti kosusaan toko'dti,” ka diyolo'. Om pongundi' no iyolo' om koontok no i Yunus. 8 Om boros kaddi diyolo' dot id di Yunus, “Sunudai daa iyahai ondung iya' kopio o kobungou diti kosusaan diti. Honggo o tadon nu? Nunu o bansa' nu? Om nokuro tu' hiti ko?” ka diyolo'. 9 Om boros ka di Yunus do suminimbar, “Iyoho' nopodti om tulun dot Ibrani. Om sumambayang oku dot id Tuhan i Kinorohingan di hilo'd surga, i minomonsoi do rahat om katanaan,” ka dau. 10 Om ongooris tomod diri iyolo' tu' sinunudan i' dau iyolo' do minogidu' iyau do mantad id Tuhan. Om boros kaddi di papamanau di kapal diri dot id di Yunus, “Dongkababasug no kopio dino winonsoi nu!” ka dau. 11 Om muhod-puhod nopoddi i tongus om mayo-gayo i tumbak. Om uhoto' noddi di piro-piro papamanau di kapal i Yunus, “Kukuroyon no ma dahai iya'dti om otingkod i' iti tongus dot opuhod?” ka diyolo'. 12 Om boros ka di Yunus do suminimbar, “Pataamo' oku nopo dokoyu do hilo'd rahat, om otingkod i' iti tongus dot opuhod tu' oilaan ku noddi dot iyoho' o kobungou diti tongus dot opuhod do nokoontok dokoyu,” ka dau. 13 Nga' ponotos nogi' daa iyolo' do minangayu di kapal do papakaa do hiri'd tisan nga' a' no milo, tu' rubaon nogi' iyolo' di tongus dot opuhod. 14 Om pomogiak noddi iyolo' do luminohou'd Tuhan do poingkaa, “Oi Tuhan, kada' iyahai hukumai do kapatayon, do patayon piya dahai iti tulun dit a' nokowonsoi do kasalaan dot id dahai. Tu' iya' no oi Tuhan i pinoposiliu ngai'dti,” ka diyolo'. 15 Om pataamo' noddi diyolo' i Yunus do hiri'd rahat. Om diiri i' om diiri do tuminingkod i tongus dot opuhod. 16 Om ongooris tomod diri do Tuhan, i tulun di papamanau di kapal, gisom do pinapatahak iyolo' do porsombahan di sinumbali' dot id Tuhan om minamatos do tumorodok dot id dau di nokotindal iyolo'. 17 Om suhuo' nod Tuhan o songinan o sada' dit agayo do minongoi ponolon di Yunus. Om id suang diri i Yunus do tian di sada'ddi do solinaid do tolu o tadau om tolu o totuong.
Sambayang di Yunus
1 Om sambayang no i Yunus dot id Tuhan, i Kinorohingan dau, di maso dau do hiri'd suang do tian di sada'. Boros ka dau, 2 “Luminohou oku diya', oi Tuhan, di maso ku'd osusa', om sinimbar oku i' diya'. Minokitulung oku diya' di hilo' oku'd pomogunan do tulun do napatai, om norongou oku i' diya' om pinadul oku diya'. 3 Pinataam oku diya' do hilo'd daralom, gisom do nolonsod oku do hilo'd nanad do rahat. Om hilo' no do noolitan oku'd waig, om opingimpit oku di tumbak dit opuhod. 4 Om osorou ku nopo nga' nouyung oku no kopio diya' do mantad id toguang nu, oi Tuhan, om a' oku no kokito kawagu di Walai'd Sasambayangan dot Agayo dit olidang. 5 Om alit no doho' i waig di rahat, om a' oku noddi kohobo; koolitai oku nopo kopio di rahat, om songinrilit pod tulu ku i sakot do hilo'd rahat. 6 Nakasaalom oku do hilo'd tuwou di nuluhon, i kinoiyonon di poontiil kasai' o wawayaan do gisom dot alaid. Nga' iya' no, oi Tuhan, i Kinorohingan ku, o pinopoidu' om minamasi doho' do mantad id kapatayon. 7 Om soira' di nopurimanan ku dot oruhai nod oputut o pinuhobo ku, om sambayang oku noddi dot id diya' oi Tuhan, om norongou oku i' diya' do hilo'd walai nu. 8 Iri nopo tulun di tumuku' dot id tingolig dit aiso' o kootuk-otukon, om nokotingkod no do tumorodok dot id diya'. 9 Nga' iyoho' nopo om modsinding oku i' do mamarayou diya'. Om papatahak oku do porsombahan di sumbolion dot id diya' om wonsoyon ku i pinabatos ku. Iya' no o Tuhan di mamasi,” ka dau. 10 Om suhuo' noddi do Tuhan i sada' do mongoi poilob di Yunus do hiri'd tindal, om wonsoyo' no di sada' o miagal diri.
Minumboyo' i Yunus di Ponuhuan do Tuhan
1 Om boro-boros po kawagu o Tuhan dot id di Yunus. 2 Boros ka dau, “Pamanau no do mongoi do hilo'd Niniwi, i bandar dot agayo, om polombuson no dot id tulun do hilo' iti boros ku do posunudon ku diya',” ka dau. 3 Om pamanau no i Yunus do minongoi do hilo'd bandar do Niniwi do tuminanud di pinonuhuan do Tuhan dot id dau. Agayo no kopio o bandar do Niniwi, gisom do tolu o tadau do koloido' do mamanau do dumarapas diri. 4 Om timpuun no i Yunus do minamanau do tuminongkop di bandar. Om kasangadahai po iyau do minamanau om popimboroso' nogiddi dau o poingkaa, “Apat po moti' nohopod o tadau om raagon no iti bandar do Niniwi!” ka dau. 5 Om kotumbayaai ngai' no i tulun do Niniwi di boros do Kinorohingan diri, om popinsunudo' noddi diyolo' dot apatut do puasa ngai' i tulun, om oinsanan o komolohingan om i tangaanak do manampakai do karung do pointalang do kumorologo iyolo'd dusa. 6 Om soira' di nokorongou i raja' do bandar do Niniwi do pasal diri om lintuhun nopo iyau do mantad hiri'd tirikohonon dau do don raja' om iduwo' no dau i pakayan dau do don raja', om panampakai no iyau'd karung om irikau no do hiri'd pupuk. 7 Om ponuhu' no iyau'd tulun do mongoi popimboros dot id tulun do Niniwi di boros do poingkaa, “Iti no o boros di raja' om i piro-piro montiri' dau: kada' nod haro o makan om minum dot id pogialatan do tulun om sapi' om dumba' om i tayam-tayam do suwai. 8 Om koinsanai'd tulun om tayam-tayam nga' manampakai ngai' nopod karung do pointalang do kumorologo iyolo'. Om sompori-pori do tumorodok do sumambayang dot id Kinorohingan, do mikuwo'd rumologo di kowoyo-woyoon dot araat, om i wowonsoyon di poimponu'd dusa. 9 Tu' nunu koilo-ilo nga' wolihan nopo doti'd Kinorohingan o pomusarahan dau; om a' indo dau potilombuson i kototogod dau, om iyati' nga' a' i' daa'ndo dau patayon!” ka. 10 Om kokito noddi do Kinorohingan i winonsoi diyolo'; om koilaai no dau do nokorologo iyolo' di kowoyo-woyoon diyolo' dit araat. Om a' iddi dau pinotilombus i pomusarahan dau do momohukum diyolo' do miagal di nokoboros mantad daa dau.
Tuminogod i Yunus om Minangampun o Kinorohingan
1 Om kotogod tomod no i Yunus tu' a' iyau orohian di winonsoi'd Kinorohingan diri. 2 Om sambayang no iyau do poingkaa, “Oi Tuhan, okon toi ko' nokoboros mantad ku no di maso ku pod hilo'd pomogunan ku do miagal diti o wonsoyon nu? Om iri no o kinopoggiduan kopio ku daa do hilo'd Sepanyol! Tu' noilaan mantad ku no dot iya' nopo om Kinorohingan dit obinsianan, om obinglisiu, om alanut o ginawo om a' obintogod, om i posodia' kasai' do poposimban do pomusarahan, om gisom dot a' indo abayaan do momohukum. 3 Onuo' nopo iti ginawo ku do dinondo, oi Tuhan, tu' osonong nogi' dot apatai oku ko' poimpasi!” ka dau. 4 Om boros kad Tuhan, “Aiso' i' o paantakan nu do tumogod dot iyo kopio'ndo!” ka dau. 5 Om soliwan no i Yunus do mantad id bandar diri do kuminaa ponong id koulayon do mantad id bandar diri. Om pomonsoi no iyau do maan do lungungon do daamot do magandad dit osiliu dot id bandar do Niniwi. Om irikau no iyau do hiri'd dolungungan diri. 6 Om posunio' nod Kinorohingan ot iso' o totonomon di rumoloi do pomolungung di Yunus om osonong-sonong i' ot opurimanan dau. Om otood tomod diri i Yunus tu' haro i' o tanom diri. 7 Nga' maha'ddi minnanawau no di tadau kawagu, om suhuo' nod Kinorohingan ot iso' o tataru do minongoi pangakan di guas di totonomon diri do gisom do noriou. 8 Om soira'ddi do nokoulai o tadau, om porikoto' nod Kinorohingan o tongus dot alasu' kopio do mantad id koulayon, om tinitiu do tadau dit alasu' kopio, gisom dot oruhai nod ahadan i Yunus dot ololosuan di tadau. Om piontong no daa dau dot apatai iyau. Om boros ka dau, “Osonong nogi' dot apatai oku ko' poimpasi,” ka. 9 Nga' boros kad Kinorohingan dot id dau, “A' ko i' apatut do tumongob dot iyo kopio'ndo dot iri no tanom diri o katangaban,” ka dau. Om boros ka di Yunus do suminimbar, “Nokuro daa tu' amu'. Apatut oku i' do tumogod do gisom piya dot apatai oku!” ka dau. 10 Nga' boros kad Tuhan dot id dau, “Oupus ko no kopio di guas di tanom diri, tu' okon i' ko' tunturu' nu o minananom om okon ko' iya' o pinoposuni. It insan no o totuong om kosuni no om tadau po kawagu nga' koriou no, om iyo piya'ddi nga' oupus ko i' daa'ddi do noriou iri. 11 Om okuro-kuro nogi' daa o koupuso' ku iyoho' do Niniwi, i bandar dot agayo'ddi. Tu' suang nopoddi om ogumu' i' ko' hatus om duwo nohopod noribu o tangaanak dit aiso' o sala', om ogumu' o tayam-tayam,” ka dau.
1 Tontok di maso'd pomorintaan di Raja' Yotam, om i Ahas, om i Hiskia, do hilo'd Yohuda, om poboroso' nod Tuhan o boros diti dot id di Mika, i mantad hilo'd bandar do Morisit i bandar dot okooro'. Om pinointalang ngai' do Tuhan o boros dau'dti do pasal do Samaria om Yorusalim.
Pogihad do Samaria om Yorusalim
2 Pokinongoho' noti, oi koinsanai'd bansa'; pokinongoho' noti, oi koinsanai dokoyu i poingiyon do hiti'd pomogunan! Pasalaon kou'd Tuhan, it Asawat Kopio, dot id pomisaraan, tu' iyau no o sasi' do papasala' do koinsanai dokoyu! Pokinongoho' no iyau do moro-boros do mantad hilo'd walai dau dit olidang di hilo'd surga. 3 Rumikot no o Tuhan do mantad id kinoiyonon dau dit olidang; lumintuhun no iyau do mongoi pimpanau do hilo'd sakai do konuluhanan do hiti'd pomogunan. 4 Om lumanak ngai' nopondo ilo nuluhon dot oulakan dau, do miagal pod rilin di kosubo dot id tapui; om otuhan nopondo i konuluhanan om koluyung do hiri'd kokubangan, do miagal po di waig do mantad id konulu-nuluan do lumuyung do hiri'd siba'. 5 Om osiliu ngai' nopondo o miagal diti tu' nokowonsoi i' do dusa o tulun dot Israil om suminaap iyolo'd Kinorohingan. Isai daa o nakasala' gisom do momonsoi'd dusa ot Israil? Samaria no o nakasala', i bandar dot agayo do pomogunan diri! Isai daa o nakasala' do nokobungou do Yohuda do tumuku' dot id tingolig? Yorusalim no o nakasala'! 6 Om gowoi poddi om minomoros o Tuhan do poingkaa, “Silihon ku nondo do pogun o Samaria do hilo'd talun, om pomutanaman pondod tulun dot anggur. Om liidon ku nondo do hilo'd kubong i watu do kinaraagan di bandar diri, om gisom dot angaragang i pinoimpahan di bandar. 7 Opurok ngai' nopondo i tingolig dit angagayo o gatang, i tiupus-upus tomod daa dau om osorob ngai' i pinopintahak di tongoondu' do sundal di maganu-anu do hiri'd walai'd tingolig, om oinsanan nopondo i tingolig do raagon. Tinimung ngai' do Samaria o konunu-nunuan diri do maan do podsubak di tingolig do kororombung. Nga' baino' nopondo om tanggayan ngai' nopo di pisangod dau iri do maan do tukuon dot id kinoiyonon do suwai,” ka dau. 8 Om boros kaddi di Mika, “Om iri no o kobungou doho' do tumongob om millompud do mihad. Om mimpanau oku nopondo dot aiso' o kasut om aiso' o pakayan do popointalang do tumongob oku. Om millahung oku nondo do miagal do toni om minguni do miagal di tombolog dot unta. 9 A' no milo'd lingoson i suhat do Samaria, om Yohuda nga' oruhai nod koiyo'ddi o koinggoritan; nokorikot nod wawayaan do Yorusalim i kinoiyonon do bansa' ku, i kosusaan dot agayo,” ka dau.
Osomok no do Hilo'd Yorusalim i Pisangod
10 Kada' sunudai i pisangod dahai do hilo'd Gat di kinaalaan dahai; kada' iyolo' pologoso' do kokito dokoyu do mihad. Oi tulun do Bait-Liapra, pingisis kou no do hilo'd pupuk do pointalang dot aiso' o pokukurayan dokoyu! 11 Oi tulun do Sapir, ongoi kou no do hilo'd pomogunan do pisangod do poillabas om ointingayaman. A' no kobulun do sumoliwan di bandar diyolo' i tulun do poingiyon do hilo'd Saanan. Om orongou nopondo dokoyu do mogihad i tulun do hilo'd Bait-Haisol, om oilaan no dokoyu dot aiso' ot intirungon do hilo'. 12 Noponu' pod kopoddosian i tulun do Marot do magandad do ngoyon uhupai, tu' nokoinsomok nod Tuhan o kosusaan do hilo'd wawayaan do Yorusalim. 13 Pagayatai nod kuda' i korita'-kuda', oi tulun di poingiyon do hilo'd Lakis. Tu' minomit kou di dusa dot Israil om gowoi poddi om nobinsuhu' o Yorusalim do momonsoi'd dusa. 14 Om baino' nodti, oi tulun do Yohuda, om atagakan kou nondo do bandar do Morisit Gat. Tu' a' no ouhupan di mantad id bandar dot Aksib i raja' dot Israil. 15 Oi tulun do Marisa, patahakon kou nondod Tuhan dot id pisangod di mongoi ponolod do bandar dokoyu. Om mongoi ngai' pondo lisok i boyoon dot Israil do hilo'd koluang-luangan do nuluhon do hilo'd Adulam. 16 Oi tulun do Yohuda, pampadan no o tobuk dokoyu do tanda' do mogihad di tangaanak di kosianan dokoyu. Bugaran nopo o tulu dokoyu do miagal di tombolog do mangangakan do rata', tu' angatanggayan nondo o tangaanak dokoyu dot id pomogunan do pisangod.
Kootuson do Tulun di Mongulok-ulok do Tulun do Mosikin
1 Obungou no i tulun dit a' nopo koodop do koihi id minsorou do momonsoi'd araat! Om kosuabon nopondo, om soira-ira' nopod haro o ralan diyolo', om wonsoyon nopo diyolo' it araat di nosorou mantad diyolo'd wonsoyon. 2 Soira' nopod sianu iyolo' do tumo, om mongoi nopo iyolo' ponolod do tumo; om soira-ira' nopo iyolo' do sianu do walai, om ngoyon nopo diyolo' solodo' o walai'd wokon. Poimponu' pod koligagaanan o sompiiyon dot aayi' dot apanakau o dapu' diyolo'. 3 Om iri noddi o kinapamarasan do Tuhan do poingkaa, “Nokopomusorou oku nod poporikot do kosusaan dot id dokoyu om a' kou no milo do mogidu' do mantad diri. Om opurimanan nogindo dokoyu dot osusa' kou, om a' kou nondo milo do minggayo-gayo. 4 Orikot nopondo o maso'ddi om maan pondod tulun do poiyaan do kosusaan i nosiliu dot id dokoyu. Om sindingon nondo diyolo' iti sinding do mogihad do pasal diri: Naraag toko' no kopio! Tu' nanu do Tuhan i pomogunan toko' om pinatahak dau dot id tulun di minononggoi dati',” ka dau. 5 Om gowoi pondo dot orikot nopondo i maso do kopogulian di tana' dot id tulun do songonuon do Tuhan, om aiso' no o tongosongulun piya do mantad id pogialatan dokoyu do kaanu do bahagi'ddi. 6 Tu' mimboros i tulun dot id doho' do poingkaa, “Kada' iyahai tudukai. Kada' pintuduk do pasal ngai'ddi. Tu' a' i' o Kinorohingan mongintingayam dahai. 7 Ondos nu daa om napapalan do Tuhan ot Israil? Nga' Tuhan nopo om alanut kasai' i' o ginawo om a' i' kopio dau wonsoyon o miagal diri. Tu' a' toi osonong i' o boros dau dot id tulun di momonsoi dot otopot?” ka no diyolo'. 8 Om boros kad Tuhan do suminimbar, “Miagal pod pisangod i tulun ku do ngoyon dokoyu saapo'. Gumuli' no i tongokusai do mantad id pisangadan, om osorou no daa diyolo' dot aiso' o koligagaanan dot id suang do walai, nga' hilo' kou no do poingandad do mongoi panakau di rasuk diyolo'. 9 Nuyung dokoyu i tongoondu' di tulun ku do mantad id sompiiyon di kosianan kopio diyolo', om nahawan nu iyolo' di tangaanak diyolo' di barakat ku daa dot id diyolo' do gisom dot alaid. 10 Ingkakat no om mamanau i'; tu' aiso' no o kosimbayanan do hiti. Nobungou di dusa dokoyu o kinoiyonon diti, gowoi poddi om raagon o kinoiyonon diti. 11 Korohian nopod tulun diti om i nabi di goudut om i gomponipu'. I mimboros do poingkaa, ‘Poboroson ku do lumuyung nondo o waig dot anggur om tiinumon do kaawuk do gisom i' dot a' dokoyu aayi-ayi' do koimbagu,’ ka,” ka dau.
Batos do Pasal do Koposion
12 Om boros ka kawagu'd Tuhan, “Nga' timungon ku indo iyokoyu, koinsanai dokoyu i tulun dot Israil di noolu-olu'. Timungon ku indo kawagu iyokoyu om uludon ku do miagal di dumba' do gumuli' do hiri'd kandang. Om miagal pondo di kobuturan do noponu'd dumba' o pomogunan dokoyu tu' oponu' nondo kawagu'd tulun dot ogumu'. 13 Iwangan nondo kawagu do Kinorohingan o ralan dokoyu om posoliwanon kou dau do mantad id pomogunan do pisangod. Raagon nopondo dokoyu i totobon do wawayaan do bandar do sumoliwan kou, om kalabus kou nondo. Om posoliwan nopo dokoyu om iyoho' i' i Tuhan, i raja' dokoyu,” ka dau.
Pinasala' Ngai' di Mika i Boyoon dot Israil
1 Pokinongou kou no, oi pomorinta' dot Israil! Apatut nopo daa om orohian kou dit otulid, 2 nga' araatan kou nogi' dit osonong om orohian kou nogindo dit araat. Miahon nopo dokoyu do mongidu'd kulit i tulun ku om iduwon dokoyu i tonsi diyolo' do mantad hiri'd tulang. 3 Mangakan kou do bansa' ku. Oniton nopo dokoyu i kulit diyolo', om tipuon no dokoyu i tulang diyolo', om popoton no dokoyu iyolo' do miagal do daging dit onsokon do hiri'd lansang. 4 Rumikot nondo o maso do lumohou kou daa do mokiuhup do Tuhan, nga' a' kou no dau simbaron. Om a' no iyau mokinongou do sambayang dokoyu, tu' araat i' o winonsoi dokoyu. 5 Nakalan di piro-piro nabi i bansa' ku, tu' pinopoboros i' iyolo' do haro o kosimbayanan dot id tulun di manahak diyolo'd tusin nga' pisangadan i' o poboroson diyolo' dot id tulun dit a' manahak diyolo'd tusin. Poingkaa no o poboroson do Tuhan dot id piro-piro o nabi, 6 “Oi nabi; oruhai nod aayi' o maso dokoyu; tumonob no o tadau dokoyu. Tu' magakal kou i' di tulun ku, om aiso' nondo o pointalangon ku dot id dokoyu do pasal di natantu' mantad ku'd wonsoyon ku, om a' kou nondo milo do popoboros do nunu nopo dit osiliu dot id dosunsudan,” ka dau. 7 Tulun nopo di popimboros dot osiliu dot id dosunsudan om ointingayam no tu' aiso' i' ot abayaan di poboroson diyolo'. Ointingayam ngai' nopondo iyolo' tu' a' no iyolo'd Kinorohingan simbaron. 8 Nga' iyoho' nopo om noporinta' oku nod Tuhan di rusod om sinundu dau. Om nonuan oku dau do ginawo di kosuhut dit otulid om nonuan oku dau do kasangalo' do momisunud di tulun dot Israil di dusa di nongowonsoi diyolo'. 9 Pokinongou kou no doho', iyokoyu i pomorinta' dot Israil, iyokoyu it araatan dit otulid om i monomputul do katapatan. 10 Wonsoyon daa dokoyu o Yorusalim, i bandar do Kinorohingan, nga' poimpahan nopo dokoyu om i pogipapatayan om it a' otulid. 11 Momorinta' pogi' i piro-piro pomorinta' do bandar nga' mokimaanu-anu nod tusin di ponisip, om i piro-piro ot imam nga' mokimaanu-anu nod gadsi' o koponudukan di Tourat do Tuhan, om mokimaanu-anu nod tusin o kapabarasan di nabi di pinointalang dot id diyolo'. Nga' magakun ngai' i' mando iyolo' do manud-tanud o Tuhan diyolo'. Boros ka diyolo', “Aiso' i' bo o kosusaan do korikot dot id dati', tu' moyo-woyo' i' o Tuhan dati',” ka no diyolo'. 12 Om iri no i karaato' dokoyu o kobungou do Sion dot aradu do miagal do tumo, om Yorusalim nga' osiliu nondo do pogun, om i nulu-nulu do kinoiyonon di Walai'd Sasambayangan dot Agayo nga' osiliu nondo do gouton.
Oulud o Pomorintaan do Tuhan dot id Pomogunan
1 Koimbagu nopondo om iri nopo nulu-nulu di pinoingkakatan di Walai'd Sasambayangan dot Agayo om osiliu do nuluhon dot akawas kopio, it akawas po ko' mantad di konulu-nuluan do suwai. Om ogumu' nondo o bansa'd tulun do mogiwoyo-woyo' do mongoi'd hiri. 2 Om momoros nondo i tulun diri do poingkaa, “Kainou tumakad do hilo'd nulu-nulu do Tuhan, do kumaa do hilo'd Walai'd Sasambayangan dot Agayo di tukuon dot Israil, i tulun dau. Tudukan toko' nondo dau di korohian dau do wonsoyon toko'; om sumusui toko' nondo di ralan di nopili' dau. Tu' tadon nopo do ponudukan do Tuhan om hilo'd Yorusalim; om hilo'd Sion o tadon do Tuhan do moro-boros dot id tulun dau,” ka nondo diyolo'. 3 Salasayon nondod Tuhan o pogitatagadan dot id pogialatan di bansa' do hiti'd pomogunan, om id pogialatan do pomogunan dit ongokoris di hilo'd sodu' om i hiti'd somok. Om wonsoyon nondo diyolo' do radu i gayang diyolo' om wonsoyon do pisau do ponunutu' i tandus. Om a' nondo mogisasangod i piro-piro o bansa', om a' sumodia' do mongoi sangod. 4 Osimbayan ngai' nopondo o tulun do mongiyon-ngiyon dot id pogialatan di kabun dot anggur om i kabun dot ara diyolo'; om aiso' i' o songulun piya do monompurolosi diyolo'. Tu' nakabatos nod Tuhan, it Osundu Kopio o miagal diri. 5 Pointikid-tikid do bansa' do hiti'd pomogunan, om mumboyo' i' om tumuku' dot id tingolig dau. Nga' iyati' nga' mumboyo' indo do Tuhan i Kinorohingan toko', om tumuku' toko' dot id dau do gisom dot alaid.
Gumuli' ot Israil do Mantad id Pomogunan do Pisangod
6 Boros kad Tuhan, “Rumikot no i maso do timungon ngai' ku i tulun ku di hinukuman ku, i nongoinggorit do hilo'd pomogunan do pisangod. 7 Nongokimpaan iyolo' om nokoinsodu' do mantad id walai diyolo', nga' onuan ku indo do sinakagon do wagu i tulun di nongoolu-olu', om osiliu indo iyolo' do bansa' dit agayo om okoris. Om hilo' oku nondod nulu-nulu do Sion do momorinta' diyolo' do gisom dot alaid,” ka dau. 8 Om iya' nogi', oi Yorusalim, it iyonon do Kinorohingan do madtamong di tulun dau, do miagal po di gompomogompi' do dumba' do madtamong di dumba' dau, nga' osiliu ko indo kawagu do bandar dot agayo di pomorintaan nu. 9 Nokuro tu' mompud-lompud kopio ko'd mihad? Nokuro tu' oinggorit tomod ko do miagal pod tondu' di mogkosusu? Iti toi it aiso' o raja' om nangapatai ngai' i gomponosihat o koihadan nu? 10 Pinguritos no om pingodoi no, oi tulun do Yorusalim, do miagal di tondu' do mogkosusu, tu' norikot noddi o maso do tumongkiad kou diti bandar om mongoi kou nondo iyon do hilo'd talun. Om a' no milo dot a' kou koongoi do hilo'd Babil, nga' hilo' nopondo om poiduwon kou id Tuhan do mantad id pisangod dokoyu. 11 Ogumu' no o bansa' do nokotimung do mongoi sangod dokoyu. Boros ka no diyolo', “Mositi' no do raagon o Yorusalim! Okito toko' nondo iti bandar dot araag!” ka no diyolo'. 12 Nga' a' i' koilo iti piro-piro o bansa' dot id suang do pomusarahan do Tuhan. A' i' diyolo' opurimanan do notimung no iyolo' do maan hukumai do miagal di gandum di notimung no do maan gomoso'. 13 Om boros kad Tuhan, “Oi tulun do Yorusalim, ngoyo' dokoyu hukumai i pisangod dokoyu! Pokorison ku indo iyokoyu do miagal di sapi' di basi' o sungu om tambaga' o sondulu. Om ogumu' nondo o bansa' dot araag dokoyu, om patahakon nondo dokoyu dot id doho' i dapu' di nangaanu diyolo' dot id pisangadan. Tu' iyoho' no o Tuhan do koinsanai'd pomogunan,” ka dau. 14 Oi tulun do Yorusalim, timungo' no o soudor nu! Tu' noturungku' toko' no! Manangod iyolo' di boyoon dot Israil.
Pinapabatos o Kinorohingan do Songulun o Pomorinta' do Mantad Hilo'd Baitlahim
1 Boros kad Tuhan, “Oi Baitlahim Iprata, iya' no daa i bandar dot okooro' kopio do hiti'd Yohuda, nga' iya' nogi' o tadon do songulun o pomorinta' do poingkakaton ku do momorinta' dot Israil. Sompiiyon nopo do sinolusukan dau om mantad po di gulu po kopio,” ka dau. 2 Om pologoson nondod Tuhan i tulun dau do porintaon do pisangod diyolo' do gisom dot osusu i tondu' di natantu' mantad do sumiliu do tina' di pomorinta' diri. Om kosugku' nogindo kawagu i tulun di nangatanggayan do pisangod di bansa' diyolo'. 3 Korikot nopondo i pomorinta' diri, om porintaon nondo dau i tulun dau do mikuwo'd kokorisan dau do mantad id Tuhan, om mikuwo'd kobontugo' do Tuhan i Kinorohingan dau. Om osimbayan nondo do mongiyon-ngiyon i tulun dau tu' oinsanan nopo o tulun do pointongkop diti pomogunan do magakun do kogoyoo' dau. 4 Om porikot nondo iyau do kouludan.
Kolobusan om Hukuman
Soira' nopo do rumikot i soudor dot Asur do mongoi panangod do pomogunan toko', om mongoi pamaraag di pogintirungan toko', om suhuon toko' nondo i boyoon toko' dit ongokoris kopio do mongoi saap diyolo'. 5 Om aala' nondo diyolo' i tulun dot Asur tu' ogumu' i' o rapo-rapo diyolo', om apasi toko' indo diyolo' do mantad id tulun dot Asur di mongoi daa panangod do pomogunan toko'. 6 Om iri nopondo i tulun dot Israil di noolu-olu' om miagal po do bolobou dit osogit di mantad id Tuhan do poposonong do kopurimanan dot ogumu' o bansa', do miagal po di rasam dot id tanom di sumuni nogi'. Om sumondiu nondo iyolo' do Kinorohingan om okon i' ko' tulun o sondihon diyolo'. 7 Om iri nopondo tulun dot Israil dit oolu' dot id pogialatan di bansa' om miagal pod singa di mogihum do taakanon dot id puru' ko' id kasakat-sakatan, tu' mongoi nopo i singa'ddi rolot di dumba', om tabpaan no dau i dumba', om pogianat-anaton nopo i dumba' do gisom dot sokoro-koro' no, om aiso' i' o rumikot do mongoi ponguhup di dumba'ddi. 8 Om aala' ngai' nondo dot Israil i pisangod dau om patayon ngai' nopo dau iyolo'. 9 Boros kad Tuhan, “Tontok nopondo do maso'ddi om tonuson ku nondo o koinsanai di kuda' nu om raagon ngai' ku i korita'-kuda' nu di don sumasangod. 10 Raagon ngai' ku nopondo i bandar do hilo'd pomogunan dokoyu om huyason ngai' ku i pogintirungan dokoyu. 11 Om raagon ngai' ku i gimat do tiigitan dokoyu om tonuson ku i mogogontong do nasip dokoyu. 12 Raagon ngai' ku nondo i tingolig om i torigi'd watu do tingolig dokoyu; om a' kou nondo tumuku' dot id nunu nopo di winonsoi do longon dokoyu. 13 Om habaon ku nondo i tininganak di Asira, i ponokokinorohingan dokoyu do hilo'd pomogunan dokoyu om raagon ngai' ku i bandar dokoyu. 14 Om atatagadan oku nopondo om sulian ngai' ku nopo o karaaton di bansa' dit a' minumboyo' doho',” ka dau.
Kapasalaan do Tuhan dot Israil
1 Pokinongoho' no iti kapasalaan do Tuhan dot Israil. Ingkakat no oi Tuhan, om poboroso' no i poboroson nu; pologoso' no do korongou ngai' ilo nuluhon om ilo nulu-nulu di poboroson nu. 2 Iyokoyu, oi konuluhanan, om iyokoyu i pinoimpahan diti pomogunan, nga' mokinongou no di poboroson do Tuhan! Haro o poboroson do Tuhan do papasala' dot Israil i tulun dau. Popoboros iyau do kapasalaan dau dot Israil. 3 Boros kad Tuhan, “Oi tulun ku, nunu o winonsoi dot id dokoyu? Poingkuro oku do minonusa' dokoyu? Simbaro' oku no. 4 Pinosoliwan ku iyokoyu do mantad hilo'd Masir; om pinoidu' ku iyokoyu do mantad id ponguripanan; om sinuhu' ku i Musa, om i Harun om i Miriam do minomoyo' dokoyu. 5 Oi tulun ku, soroho' pogi' dokoyu ondung kukuroyon kou daa di Balak, i Raja' do Muab, om ondung poingkuro o pinonimbar di Biliam i tanak di Bior, dot id dau. Soroho' no dokoyu i nongosiliu do hiri'd tanga'd ralan do mantad hilo'd pinomukiiman do hilo'd Sitim om kuminaa do hilo'd Gilgal. Sorohon ngai' no dokoyu iri om opurimanan i' dokoyu i winonsoi ku do minamasi dokoyu,” ka dau.
I Porsombahan di Pokionuon do Tuhan
6 Nunu toi ot apatut do patahakon ku dot id Tuhan, i Kinorohingan di hilo'd surga, do tontok do mongoi oku sambayang dot id dau? Migit oku tuu do tanak do sapi' dit osonong kopio do patahakon do maan do porsombahan do sorobon dot id dau? 7 Asanangan tuu o Tuhan ondung migit oku do boribu-ribu o dumba', ko' tumau do saitun dit a' aayi-ayi' do patahakon dot id dau? Patahakon ku tuu dau i tanak ku dot id dotuo do maan do pamalapus di dusa ku? 8 A' i' kopio! Tu' nosunudan toko' nod Tuhan ondung nunu it osonong. Iti no o pokionuon dau do mantad id dati': momonsoi dit otulid, om popointalang do kosianan dit aiso' o kotingkadan, om monokiulud do Kinorohingan toko' do mikuwo'd osiriba' o ginawo. 9 Oilo toko' no kopio ondung rumonok toko' nod Tuhan. Boros ka dau dot id tulun dot id bandar, “Pokinongou kou no, iyokoyu i tulun do tumimung do hilo'd bandar. 10 Id suang nopod walai di tulun dot araat om noponu' pod dapu' dit a' otulid o ralan do minanganu. I pagadang dot a' koontok o pakayon diyolo', om iri no i wowonsoyon do karaatan kopio ku. 11 Poingkuro oku pod mangampun do tulun di mamakai do timbangan om pagagadang dit a' koontok? 12 Mongonsit-onsit di tulun do mosikin i tulun do kaya' do hilo'd bandar dokoyu, om goudut ngai' kou nopo. 13 Om gowoi poddi om notimpuunan ku no iyokoyu do momobog om mamaraag do gama' di dusa dokoyu. 14 Om kaakan kou piya nga' a' kou i' ayahan, tu' louson kou po kasai'. Ogumu' nondo o konunu-nunuan dot igitan dokoyu, nga' a' i' dokoyu milo do poopion iri; tu' nunu nopo i koopi-opi' dokoyu nga' raagon ku i' dot id pisangadan. 15 Patanom kou daa do gandum nga' a' i' dokoyu aanu o tua'ddi. Om manganu kou daa do tumau do mantad id tua' do saitun, nga' a' i' dokoyu apakai iri. Om momonsoi kou daa do waig dot anggur nga' a' indo dokoyu oinum iri. 16 Osiliu nondo o miagal diri tu' tuminanud kou i' di kowoyo-woyoon dot araat di Raja' Omri, om i tanak dau i Raja' Ahab. Tuntunai nopo dokoyu i diyolo'd kowoyo-woyoon om oturan, om gowoi pondo om pokoyoon ku iyokoyu dot id karaagon, om oinsanan nopondo o tulun do monguntotori' om momohingi-hingi dokoyu. Om nunu nopo o bansa' do tulun nga' mongindaraat nopo dokoyu,” ka dau.
Ruminaat o Kowoyo-woyoon dot Israil
1 Obungou oku no! Tu' miagal oku pod tulun di louson no dit aiso' o takanon. Aiso' no o tua' do hiti'd kouwaan om aiso' ot okito do tua' dot anggur do hiri'd guas dot anggur. Nongoupu' ngai' no i tua' dot anggur om i tua' dot ara dit ongoomis. 2 Aiso' no o songulun piya dit otulid o kowoyo-woyoon do noolu' do hiri'd pomogunan, aiso' no o tiso' piya dot otorodok dot id Kinorohingan. Songingandad ngai' nopo o tulun do sompi' ko' iyolo' ngai'. 3 Ongoilo tomod iyolo' do momonsoi'd araat. Iri pagawai om i gompomutus nga' mokisisip ngai' nopod tusin. Sansagan iyolo' di tulun dit ongkipangkat do momonsoi di korohian diyolo', om mogipapakat nondo iyolo'. 4 Iri piya it osonong no kopio om otulid o ginawo dot id pogialatan diyolo' nga' miagal nod sakot tu' aiso' i' o guna'. Norikot no o tadau do kopomohukuman do Kinorohingan do koinsanai di tulun dau do miagal di nokoinsan mantad dau do pinolombus di piro-piro o nabi. Angagangau tomod diri ot id pogialatan diyolo'. 5 Kada' ponongkuyaai di songkoduwo nu om kada' pogondos di tambalut nu. Antaan-taan no o poboroson nu dot id sawo nu piya. 6 Tu' tontok nopod maso do miagal diti, om miagal pod basug o tapa' do saapon di tanak dau'd kusai, om i tangaanak do tongoondu' nga' sumaap di tina' diyolo', om i tongoondu' dit ongomulok po nga' monokisongkiwal di tiwanon diyolo'd tondu'. Pisangod nopod tulun om id suang id sompiiyon dau. 7 Nga' iyoho' nopo om mogondos oku i' do Tuhan; om mogondos kopio oku'd Kinorohingan om mandad oku dau do mamasi doho'. Om orongou i' do Kinorohingan o sambayang ku.
Mamasi o Tuhan
8 Aiso' i' o paantakan di pisangod toko' do mongirak-irak dati'. Naratu' toko' no daa, nga' tumungag toko' i' kawagu. Id suang toko' daa do totuong do baino' poo, nga' onuan toko' indod Tuhan do tanawau. 9 Nokowonsoi toko'd dusa dot id Tuhan, om gowoi poddi om kopuriman toko' do kototogod dau do dinondo. Nga' a' no alaid dot obian toko' dau om onuan toko' dau dit otulid. Om pokoyoon toko' nondo dau dot id tanawau; om kokito toko' po do ngoyon toko' dau posio'. 10 Om okito nondo di pisangod toko' i wonsoyon do Tuhan dot id dati' om ointingayam nondo i pisangod di minomohingi-hingi dati' di gulu po, tu' mininguhot iyolo' do, “Honggo no o Tuhan, i Kinorohingan dokoyu?” ka no. Om okito toko' indo iyolo' dot aala' om opingulakan do miagal pod burutak do hilo'd karalan-ralanan. 11 Oi tulun do Yorusalim, rumikot no o maso do tondulion ilo tolig do bandar nu. Om tontok nopondo do maso'ddi om koinggayo nondo o watas dokoyu. 12 Om gumuli' nondo i tulun nu do mantad id piro-piro o kinoiyonon do mantad hilo'd Asur di ponong id koulayon, om mantad hilo'd Masir i ponong id salatan, om mantad do hilo'd watas do Bawang dot Iprat, om mantad hilo'd soborong do rahat om mantad do hilo'd konuluhanan di hilo'd sodu'. 13 Nga' sumiliu nondod tana' dit a' sunian iti pomogunan tu' araat i' o tulun di songingiyon do hiti.
Sambayang do Mokiinsian do Tuhan do Bagi' dot Israil
14 Gompio' no i tulun nu, oi Tuhan, i tulun di nopili' nu. Tu' mulong po do hilo' iyolo'd gouton do poingiyon nga' haro i' o tana' dot oluhub do posorili' diyolo'. Pologoso' no iyolo' do mongoi pangakan-ngakan di sakot do hilo'd Basan om hilo'd Giliad; do miagal di koubasanan diyolo' di gulu po. 15 Pomonsoi no do kopusahan do bagi' dahai, oi Tuhan, do miagal di winonsoi nu di pinosoliwan nu i' iyahai do mantad hilo'd Masir. 16 Om okito nondo di bansa' iti om ointingayam tomod nopondo iyolo' tu' opurimanan nondo diyolo' dot aiso' i' o guna' di kokorisan diyolo'. Om atagakan nopondo iyolo' do pomusarahan gisom dot a' no iyolo' milo do moro-boros om a' milo'd mokinongou. 17 Om miagal pondo iyolo'd tulanut do misis do hiri'd tana'; om sanggagaran pondo iyolo' do moddosi do sumoliwan do mantad id kuta' do pogintirungan diyolo'. Om rumikot nondo iyolo' dot id Tuhan, i Kinorohingan toko'. 18 Aiso' no o Kinorohingan do suwai do koiyo diya', oi Tuhan, tu' mangampun ko do dusa di tulun nu di noolu-olu'. Om a' ko i' otogod do gisom dot alaid, suwai ko' asanangan ko i' do popointalang di kosianan nu dit aiso' o kotingkadan dot id dahai. 19 Osianan ko indo kawagu dahai om mangampun ko dahai. Om alaon nu i dusa dahai om pataamon nu do hilo'd nanad do rahat! 20 Om pointalangon nu indo i kotorodoko' nu om i kosianan nu dit aiso' o kotingkadan dot id tulun nu, i sinakagon di Abraham om i Yakub, do miagal di nakabatos nu dot id komolohingan dahai di gulu po.
1 Iti no o boros do Kinorohingan do pasal do Niniwi. Iti nopo om monusui do pasal di pinointalang di nokito di Nabi Nahum, i mantad hilo'd Ilkos.
Katagadan do Tuhan dot id Niniwi
2 Mada' o Kinorohingan do haro o mongoi iyo-iyo dau; om hukuman dau i tulun di sumaap dau. Sulian dau iyolo' di kowoyo-woyoon diyolo' tu' atatagadan no kopio iyau. 3 A' i' obintogod o Tuhan, om kisinundu iyau om a' i' dau pologoson dot a' ohukuman i tulun do kisala'. Honggo nopo o koulokon do Tuhan, om mimbulai no o tongus dot opuhod do hiri; ilo' nopo haun om lisohu i' toomod dot oulakan dau! 4 Barasan nopo dau ilo rahat, om rumasak nopo! Om rasakon ngai' dau i bawang. Rumiou nopo i sakot do Basan, om sumilou o kokoyuan do Nuluhon do Karmol, om lumotu' o tusak do kobungaan do Libanon. 5 Gumuyu' nopo o konuluhanan do karapou o Tuhan; lumanak ngai' nopo o nulu-nulu dot id toguang dau. Gumuyu' nopo iti tana' do mintalang o Tuhan; om gagaran iti pomogunan om koinsanai'd tulun do hiti. 6 Isai po daa o kasaap ondung tumogod o Tuhan? Isai po daa o koidu' do mantad id kototogod dau? Urobuson nopo dau i kototogod dau dit a' ogina-gina'; om omumuk nopo o tontolob dot id toguang dau. 7 Osonong i' o Tuhan; om uhupan i' dau i tulun dau do tontok do haro o kosusaan diyolo'; om gompion i' dau i tulun do rumikot do mongoi pokiintirung dau. 8 Miagal po iyau di luyud dit opuhod do mamaraag do koinsanai di pisangod dau; patayon ngai' nopo dau i sumaap dau. 9 Nunu daa o kopongupakatan dokoyu dot araat do sumaap do Tuhan? Atantu' nod patayon kou i' dau. Tu' aiso' i' o tulun do milo do monginduwo do sumaap di pisangod dau suwai ko' insan noo. 10 Om miagal kou pondo do bulungkut do rugi om i rahami di nokoring, tu' tutudan kou nondo! 11 Haro o songulun do mantad hilo'd Niniwi, di poimponu' pod pomusarahan dot araat, i minongupakat do sumaap do Tuhan. 12 Om poingkaa no o poboroson do Tuhan dot id Israil i tulun dau, “Mulong po dot okoris om ogumu' i tulun dot Asur, nga' araag i' iyolo' om opunso. Ninggorit ku iyokoyu, oi tulun ku, nga' a' ku nondo wonsoyon kawagu o miagal diri. 13 Pupusan ku nondo o kuasa' dot Asur di momorinta' dokoyu om pututon ku i rantai di pinongogos diyolo' dokoyu,” ka dau. 14 Iti no o pinatantu' do Tuhan dot osiliu dot id bansa' dot Asur, “Aiso' nondo o sinakagon diyolo' do popotilombus do ngaran di bansa' diyolo'. Raagon ngai' ku nondo i tingolig di hiri'd walai di tingolig diyolo'. Posodia' oku nod lobong do pamalabangan do bansa' dot Asur tu' a' no iyolo' osorupai do poimpasi!” ka dau. 15 Antangai pogi', nga' kumulapai nod nuluhon o songulun do mongoit do habar dot osonong! Hilo' no iyau'd tanga'd ralan do mongoi popolombus di kinamanangan! Oi tulun do Yohuda, ramayo' no dokoyu i tadau'd agayo dokoyu om patahako' no dokoyu dot id Kinorohingan i pinabatos dokoyu dot id dau. Tu' a' nondo i tulun dot araat mongoi ponolod do pomogunan dokoyu. Tu' nopunso no iyolo'!
Kinaraagan do Niniwi
1 Oi Niniwi, songodon ko no moti'! Nokorikot no i momoromumuk diya'. Tamangai no i kuta' di pogintirungan! Tamangai no i karalan-ralanan! Sodia' nod mongoi sangod! 2 (Oruhai nod Tuhan do tondulion i kagayaan dot Israil, do miagal dit a' po iyau napanakahan di pisangod dau.) 3 Ongkiinigit i soudor do kolid dot aragang om ongkirasuk dot aragang. Sumodia' no iyolo' do mongoi sangod! Malab-kalab po i korita'-kuda' diyolo' do miagal do tapui! Minsimbul po i kuda' diyolo'! 4 Santalib-talib po do hilo'd karalan-ralanan i korita'-kuda' dot ongosiau tomod, om a' no oila-ilaan o kokoyoon diyolo' do minghombo do hiri'd titimungon do tulun do hiri'd suang di bandar. Mingkalab po iyolo' do miagal do tata' di kiapui, om osiau iyolo' do miagal pod kodumaat. 5 Nolohou nod mamanau i boyoon do soudor, om angkasadu po iyolo' do mamanau do mongoi sangod. Arau-arau nopo i sumasangod do minongoi do hiri'd tolig di bandar, om nokosodia' no i pakakas do pomohuyas. 6 Miwang ngai' nopo i wawayaan dot id toning di bawang; om poimponu' pod kopoddosian o hiri'd walai do raja'. 7 Natangkap i raja'd tondu'; mingihad po i susuhuon dau do tongoondu' do miagal pod punai, om sonduntung-duntung po iyolo'd kangkab dot atatangaban. 8 Miagal pod waig dit okohus do mantad id tolig di nohusu i tulun do murabus do mantad hilo'd Niniwi! Om haro o minggiak dot “Undorong! Undorong!” ka --- nga' aiso' no tiso' diyolo' do gumuli'. 9 Ngoyo' panakaho' i pirok! Ngoyo' panakaho' i tamas! Noponu' pod dapu' di kigatang i bandar diri! 10 Naraag no o Niniwi, om notongkiadan no, om oingou poddi! Lumuhoi ngai' no o ginawo dot opopoddosian; gagaran ngai' po o totud diyolo', om ongoluhoi no; ongoposi' po ngai' o rabas diyolo' dot ongooris. 11 Honggo noddi i bandar di miagal do luang do singa di gulu po, i kinoiyonon do paakanan di tangaanak do singa, i kinoiyonon do pogintirungan di singa do tondu' om i singa do tontoluhan, om i tangaanak do singa? 12 Tinabpaan di singa i nintorusan do hilo' om pogitobilang-bilango' nopo do patahakon di singa di tondu' om i tangaanak dau; noponu' pod tonsi do nintorusan i luang dau. 13 “Iyoho' no o pisangod nu!” kad Tuhan it Osundu Kopio. “Tutudan ku nondo i korita'-kuda' nu. Om angapatai nondo dot id pisangadan i soudor nu, om ngoyon ngai' ku nopondo i nangaanu nu do mantad id tulun do suwai. Om a' nondo arangahan do hiti'd pomogunan o kogoyoo' do kuasa' nu,” ka dau.
1 Nobungou no o bandar diti di noponu' do tudut om gampamatai, i poimponu' do dapu' do ngoyon panakaho' om it ongoyon ahawo'. 2 Pokinongoho' no i kopit do pipikot, om i kudarak do ruda', om i tulok do kuda', om i ngarak do korita'-kuda'! 3 Sumaap i soudor di poinsakai'd kuda', kumalab o gayang, om kumilap o tandus! Asawat no o kinotimungon do rata', om a' no ointob-intob i tulun di nangapatai, om kototohubon pori do tulun! 4 Nohukuman no o Niniwi i sundal diri. Olumis no daa kopio iyau om noponu' do kolulundus di kapatai, linimu' dau i piro-piro o bansa' om siniliu dau iyolo' do turipon. 5 Om boros kad Tuhan, it Osundu Kopio, “Hukuman tiya' no, oi Niniwi! Labasan tiya' om pokitonon ku diya' i piro-piro o bansa'ddi, om ointingayam ko i' dot id toguang diyolo'. 6 Indaraaton ku nondo iya', om paagalon ku pondo iya' do rinomos di sosomu'. Om songinsonsod pondo o tulun diya' om ongooris ngai' nopo iyolo'. 7 Minsodu' ngai' nopo it ongkokito diya'. Mimboros nondo iyolo' dot, ‘Pogun pondo o Niniwi! Isai po daa ot osianan dau? Isai po daa o monginsasamod dau?’ ka no diyolo',” ka dau. 8 Oi Niniwi, osonong ko toi iya' ko' Tibi, i bandar dot agayo do Masir? Tibi nogi' nga' haro i' o bawang do mongintirung dau do miagal do tolig --- iri no i Bawang do Nil o mongintirung dau. 9 Pinorinta' do Tibi o Etiopia om Masir, aiso' no o kogisomon do kuasa' dau, om sumokodung dau o Libia. 10 Nga' iyo piya'ddi nga' natanggayan i' dot id pomogunan do pisangod i tulun do hilo'd Tibi. Honggo nopo i pogitongkiad-kiadan do ralan om hiri no i tangaanak diyolo'd pinimbabagan do gisom do napatai. Om i tulun diyolo' dit ongkipangkat nga' kinagasan ngai' do rantai om pinogibahagi-hagi iyolo' di tulun di minanangkap diyolo' do minononggoi. 11 Oi Niniwi, iya' nga' ahadan indo dot oowukan! Iya' nogi' nga' mumbal indo daa do mogidu' do mantad id pisangod nu. 12 Iri ngai' nopo i kuta' do pogintirungan nu om miagal pod guas dot ara di nongoonsok no o tua', tu' guyuon nopo i guas dot ara diri om misuang nopo i tua' dot id kabang di tulun di momoguyu'! 13 Miagal pod tongoondu' koluhoi i soudor nu, om aiso' no o pokukurayan di pomogunan nu do sumaap do pisangod. Om osorob nondod tapui i salampad di totobon nu. 14 Ongoi no panganu'd waig do maan do tinumon do solinaid do turungkuon ko di pisangod. Pogiroto' no i kuta' do pogintirungan nu! Pingulakan no i lagit do wonsoyon do bata', om posodiawon no i bata' do maan do tantob! 15 Om poingkuro piya daa o wonsoyon dokoyu nga' apatai kasai' kou no do sorobon ko' apatai po dot id pisangadan. Aayi' kou nopondo kopio do miagal po di totonomon do naayi' di katat do mangakan. Miagal kou po daa do katat do guminumu' di gulu po! 16 Ogumu' po ko' ilo rombituon do hilo'd tawan o dumadagang do hilo'! Nga' a' noddi iyolo' hino do baino' do miagal di katat do poungkalad do talad om tumulud nod mogidu'. 17 Iri nopo pagawai nu om miagal pod sinompuruan do katat di songinsako do mongoi intirung di tolig do tontok di maso'd osogit. Nga' otitihan pondo di tadau om tumulud no iyolo', om aiso' no o koilo do pinakayaan diyolo'! 18 Oi raja' dot agayo do pomogunan dot Asur, nangapatai no i piro-piro gobunor nu om koodop no do gisom dot alaid i wakil di gobunor nu! Nongkotompias no do hilo'd nuluhon i rayat nu, om aiso' no o songulun piya do milo do popouli' kawagu diyolo'. 19 Aiso' no o pongubat dino toruol nu, om a' no milo do lingoson ino suhat nu. Santapap-tapap pod palad i tulun di korongou do habar do kinaraagan nu, tu' atataadan iyolo'. Haro po toi o tongoiso'd tulun do nokoidu' do mantad id kororongit dokoyu dit a' opupus-pupusan?
1 Iti no o boros do Tuhan do pinoboros dau dot id di Nabi Habakuk.
Minimboros i Habakuk tu' Aiso' no ot Otulid
2 Oi Tuhan, piro po o koloido' ku do millohou do mokitulung? Soira' ko'd mokinongou om popoidu' dahai do mantad id kororongit? 3 Nokuro tu' pokitonon oku diya' do karaaton do miagal kopio'dti? Poingkuro kopio ko iya'd kotoron do montong do kowoyo-woyoon dot araat do miagal kopio'dti? Posorili' nopo doho' i mamaraag om kororongit, om pointongkop nopo o mogiumang om mogisosongkiwal. 4 A' no podulon it oturan, tu' a' no insan do wonsoyon it otulid. Iri nogi' i tulun dot araat o kamanang om okon nogi' ko' i tulun dot otulid o ginawo. Nosomputul tomod nopo it otulid.
Isimbar do Tuhan
5 Om boros kaddi do Tuhan dot id tulun dau, “Piantangan no kopio o koinsanai di bansa' dit id posorili' dokoyu, om kotigowo kou i' motindo dit okito dokoyu. Tu' haro nondo o wonsoyon ku dit a' daa dokoyu ponongkuyaan dit orongou i' dokoyu. 6 Silihon ku nondo do bansa' di kikuasa' kopio i bansa'd Babil, i tulun dit orongit om it a' kogintoron. Maso no diyolo' do manangod om mangala' do piro-piro o bansa' do hiti'd pointongkop do pomogunan. 7 Potongkop no iyolo' do kopoddosian om i korolosi. Iyadaan ngai' nopo diyolo' ot oturan tu' asawat no kopio o ginawo diyolo'. Om iri po it oturan di korohian diyolo' o tonudon diyolo'. 8 Osiau po ko' rimau i kuda' diyolo' om orongit iri ko' i toni di louson do dongotuong. Tadon nopo di tulun diyolo' di songinsakai'd kuda' om hilo'd pomogunan dit id sodu'. Om miagal po iyolo'd kondiu do sumondot do mongoi ponimbit di kosiakanan diyolo'. 9 Songodon di soudor diyolo' o piro-piro pomogunan om alaon diyolo' do mikuwo'd kororongit diyolo'. Om gagaran ngai' po o tulun do kokito diyolo'd rumikot. Miagal pod togis kogumu' i tulun do natangkap diyolo'. 10 Indaraaton diyolo' o koinsanai'd raja' om hingi-hingion ngai' diyolo' i pagawai dot angasawat o pangkat. Aiso' no tiso' pod kuta' do pogintirungan do kaantob diyolo', tu' timbunan nopo diyolo'd tana' o posorili'ddi om solodon no diyolo'. 11 Om miagal po iyolo'd tongus kosiau do tumalib do piro-piro o pomogunan, iyolo' i monginorohingan di kokorisan diyolo',” ka dau.
Minimboros Kawagu i Habakuk dot id Tuhan
12 Oi Tuhan, mantad poddi gulu po om Kinorohingan ko no. Iya' no o Kinorohingan ku dit olidang om it aiso' o kopupuson. Oi Tuhan, i Kinorohingan ku om i mongintirung doho', nopili' nu no i tulun do Babil om pinokoris nu iyolo' om milo iddi iyolo' do momohukum dahai. 13 Nokuro tu' pologoson nu nopo i tulun dit angaraat? A' ko toi olidang i' kopio, om a' ko siontong dit araat? A' ko toi araatan dit a' otulid? Nga' nokuro'ddi tu' aiso' i' o wonsoyon nu do tontok do pimpatayon do tulun dit angaraat i tulun dit ongosonong? 14 Poingkuro ko iya'd popoiyo do tulun do miagal do sada' do hilo'd rahat om i songrinayatan o kilau tu' aiso' o boyoon? 15 Tapon o panangkap do tulun do Babil do tulun, tu' sada-sadaon nopo diyolo' i tulun. Rambatan nopo diyolo' i tulun om mimpangkis pondo iyolo'd atataadan di naanu diyolo'. 16 Om iri piya'ndo rambot diyolo' nga' tukuon i' diyolo' om onuan diyolo'd porsombahan di sumbolion tu' iri no i manahak diyolo'd koinsanai'd nunu nopo it osonong. 17 Pakayon kasai' nopo tuu diyolo' i gayang diyolo'ddi dot aiso' o kotingkadan, om tumilombus nopod mamatai do tulun om a' no mangampun?
Pinonimbar do Tuhan di Habakuk
1 Sumalakoi oku nondo do hiri'd pogigimpaan ku om mandad oku nopo ondung nunu o poboroson do Tuhan dot id doho' om ondung nunu o ponimbar dau di tuhoton ku. 2 Om posimbaro' nod Tuhan o miagal diti dot id doho', “Tarangon no o ponunulis dot id lagit di potutulisan diti pointalangon ku dot id diya', om osonong i' do mambasa'. 3 Potulison noti, tu' a' po norikot o maso do wonsoyon iti. Nga' oruhai nod korikot i maso'ddi, om atantu' nod abayaan iti pointalangon ku dot id diya'. Koiyo-iyo doti' daa dot alaid po dot abayaan iti, nga' andadon nopo, tu' atantu' no dot abayaan iti om a' no popiloid-loidon. 4 Om iti no i boros di potulison, ‘Tulun nopo dit araat om a' no apasi, nga' tulun nopo di momonsoi'd korohian do Kinorohingan om apasi i' tu' otorodok i' iyolo' dot id Kinorohingan,’ ka,” ka dau.
Pomopol di Tulun dit Araat
5 Popohudsu nod tulun o kakayaan. Tulun nopo di tamaha' om asawat no o ginawo om a' kogintoron. Om miagal po iyolo'd kapatayon tu' a' milo dot oumbagalan. Om iri no o kokuwaan do mogisuhut-suhut nopo o pomogunan dot alaon diyolo'. 6 Om indaraaton nondo di tulun di nangatangkap i tulun di minanangkap diyolo', om pointalangon nopondo kopio diyolo' o kototogod diyolo'. Om momoros nondo iyolo' do poingkaa, “Mongoi kou panganu dit okon ko' dokoyu, nga' nobungou kou no bo! Songkuro po o koloido' dokoyu do kumaya' do ralan nopod kumaya' om mononsog di tulun di kiutang dot id dokoyu do mambayar di tutang diyolo'?” ka dau. 7 Nga' a' i' dokoyu opurimanan dot iyokoyu piya nondo i minangala' do tulun do suwai nga' kiutang i'. Om sansagan kou nondod mambayar do bunga di nutang dokoyu'ddi. Rumikot nondo o pisangod do mongoi panakau do dapu' dokoyu gisom do gagaran kou pondo dot opopoddosian. 8 Ogumu' no tulun do mantad id piro-piro o bansa' do pinanakahan dokoyu, nga' ngoyon kou nondo iyokoyu panakahai di tulun di nongoolu-olu' tu' minimpatai kou id tulun om orongit kou dot id tulun di hiri'd pomogunan om id kabandaran diyolo'. 9 Ousung kou no! Tu' pinakaya' dokoyu o sompiiyon dokoyu di pininganu dokoyu dot orongit o ralan dokoyu do minanganu. Om minumbal kou daa do posimbayan di sompiiyon dokoyu om popoinsodu' diyolo' do mantad id kosusaan om karaagon. 10 Nga' minoningayam noddi sompiiyon dokoyu i nosorou dokoyu'ddi tu' pinoporikot kou nod korugian dot id dokoyu do tontok di minongoi kou panakau do dapu' do piro-piro o ginumu' do bansa'd tulun. 11 Ilo' piya watu do hilo'd tolig nga' minggiak i' do momopol dokoyu, om poulinggohon di torigi do walai o giniakan diri. 12 Ousung kou no! Tu' winonsoi dokoyu i bandar do pinoimpou do karaaton om i mamatai'd tulun. 13 Aiso' nopo o kinootuk-otukon di huyan do bansa' di nangaala' dokoyu, tu' nosorob ngai' nopo i piningwonsoi diyolo'. Om iyo noddi o korohian do Tuhan, it Osundu Kopio. 14 Nga' oponu' nondod toilaan do pasal do Tuhan om kuasa' dau iti pomogunan do miagal dilo rahat tu' noponu'd waig. 15 Ousung kou no! Tu' tontok di natatagadan kou om tiningayam om nindaraat dokoyu i songkoduwo dokoyu; iyokoyu no o pinopokorobibi' diyolo' gisom do miagal po iyolo'd tulun di naawuk. 16 Om iyokoyu nondo ot intingayamon om a' pusohon. Om monginum kou nondoddi do gisom dot aawuk om mikorobibi' kou pondo. Iyokoyu nondo o sansagan do Tuhan do monginum do mantad hiri'd sangkir di noponu'd pomohukum do Tuhan dokoyu. 17 Tinagad nu i puru' do Libanon; om baino' nondo om iyokoyu no ot atagad. Pinatai ngai' dokoyu i nintorusan; om baino' nondo om orolosi kou no di nintorusan. Om osiliu nondo o miagal diti tu' minamatai kou i' do tulun om orongit kou dot id tulun dit id kabandaran do hiti'd pomogunan. 18 Nunu kopio o guna' do tingolig? Iri nopoddi om winonsoi-wonsoi id tulun, om aiso' i' o posunudon diri dot id dokoyu do suwai ko' tudut. Nunu daa kopio ot osonong do nowonsoi'ddi, do gisom do milo'd pagandasan di tulun di minomonsoi'ddi. Iri nopo om tingolig i' dit a' milo do moro-boros! 19 Ousung kou no! Tu' boros ka no dokoyu dot id sallangod o kayu om, “Posik!” ka, om id watu no om, “Tungag!” ka. Haro toi o nunu-nunu do pointalangon di tingolig dot id dokoyu? Nourogupan i' doti' daa iri do pirok om tamas, nga' aiso' i' o pinuhobo'ddi. 20 Hilo' nod Walai'd Sasambayangan dot Agayo dit olidang, o Tuhan; mositi' nod kumadada' ngai' nopo o tulun do hiti'd pomogunan dot id toguang dau.
Sambayang di Habakuk
1 Iti no o sambayang di Nabi Habakuk. 2 Nokorongou oku no di winonsoi nu, oi Tuhan, om poimponu' oku pod koimayaan. Wonsoyo' no kawagu do baino' i pingwonsoyon nu dit angagayo, do miagal di winonsoi nu di gulu po. Insianai no iyahai do mulong piya dot otogod ko. 3 Rumikot no kawagu o Kinorohingan it Olidang Kopio do mantad hilo'd Timan; rumikot no o Kinorohingan dit olidang do mantad hilo'd konuluhanan do Paran. Koponu' do tawan i kagayaan dau; om iti pomogunan nga' poimponu' pod pamarayou dau. 4 Rumikot iyau do mikuwo'd tulinau di kosorong; om malab-kalab o tulinau do mantad hiri'd palad dau, i pinolisakan dau do sinundu dau. 5 Sinuhu' dau i toruo-ruol do mogulu dau, om sinuhu' dau o kapatayon do sumusuhut dau. 6 Soira' nopo do mundorong iyau, om gumuyu' noti pomogunan; om alambayan nopod mato dau nga' pananggagaran no i bansa'. Otuhan i' i konuluhanan di hino kasai' piya, om minsiriba' i konulu-nuluan dit a' piya tumanus, i konulu-nuluan di pinimpanahan dau di gulu po. 7 Moddosi po i tulun do Kusan dot okito ku om sanggagaran i tulun do Midian. 8 Ilo' toi bawang o pinopotogod diya', oi Tuhan? Ilo' toi rahat o pinapalasu' do ginawo nu? Suminakai ko do haun; om korita'-kuda' nu nopo di don sumasangod om i haun do mitonggoi'd tongus; do tontok di minanahak ko do kamanangan dot id tulun nu. 9 Nokounda' nu no i pana' nu, om posodia' ko no do papana' di pana' nu. Pinitas nu iti pomogunan dot i kodumaat nu o pinomitas nu. 10 Soira' di nokokito diya' i konuluhanan, om koguyu' nopo iri; om miagal pod posougon o waig do rasam do mantad hilo'd tawan. Ongorod po i waig dot id saalom diti tana', om agayo tomod i tumbak. 11 Mundorong nopo ilo tadau om tulan dot okohusan di pana' nu dit osiau om akalaban di tandus nu dit okilou. 12 Mindarapas ko podti pomogunan dot atatagadan; om pingulakan nu i bansa' dot atatagadan ko. 13 Suminoliwan ko do minongoi pamasi di tulun nu, om mongoi pamasi di raja' di nopili' nu. Pinaratu' nu i boyoon di tulun dot angaraat om pinunso nu i soudor di tuminanud dau. 14 Notobok di pana' nu i boyoon di soudor do pisangod do tontok di ruminikot iyolo' do mongoi popogitompias-pias dati', om mingirak iyolo' do monguntotogod do miagal poddi tulun do momolisok-lisok i' do mongulok-ulok di tulun do mosikin. 15 Piningulakan di kuda' nu i rahat, gisom do mogimputa' poddi i waig do rahat. 16 Gagaran oku po do tontok di nokorongou ngai' oku'ddi; munung ku nga' gagaran poo dot opopoddosian. Lumomok nopo o tinan ku, om kasadu o gakod ku, om a' oku no kapanau. Mundorong oku nopondo do magandad di maso do kopomohukuman do Kinorohingan di manangod dati'. 17 Mulong pod aiso' o tua' di guas dot ara om aiso' o tua' di guas dot anggur, om mulong piya dot aiso' o hasil di saitun om a' sunian do gandum o hilo'd dumo, om mulong piya do matai ngai' o dumba' om aiso' o suang di kandang do tayam-tayam, 18 nga' otood kasai' oku i', tu' Tuhan no i Kinorohingan o gampamasi doho'. 19 Onuan oku'd Tuhan do kokorisan. Pokorison dau o gakod ku do miagal do gakod do tambang. Gompion oku i' diya', om aiso' indo o koligagaanan ku do tontok do mamanau oku do hilo'd konuluhanan.
1 Iti no o boros do Tuhan do pinoboros dau dot id di Sipania do tontok dit i Yosia, i tanak di Amon o raja' do Yohuda. (I Sipania nopo om sinakagon di Raja' Hiskia tu' suminolusuk i' iyau di Kusi, om i Godalia, om i Amaria.)
Tadau do Koporotuan do Tuhan do Hukuman
2 Om boros kad Tuhan, “Raagon ngai' ku nopondo o suang diti pomogunan. 3 Kohompit ngai' no o tulun, om nintorusan, om tombolog om sada'. Patayon ku nondo i tulun dot angaraat. Om patayon ngai' ku o tulun, gisom dot aiso' no songulun piya dot oolu'. Iyoho' no i Tuhan, o minomoros diti. 4 Hukuman ku nondo o koinsanai'd tulun do Yorusalim om Yohuda. Om punsoon ku i tulun di noolu-olu' di tumuku' dot id Baal do hilo', om gisom dot aiso' nondo o songulun piya do kosorou dit imam do mogobi-obi' do tingolig di minodsubak do Baal. 5 Om patayon ngai' ku i tulun di mongoi do hilo'd sakai do taap do mongoi tuku' dot id tadau, om tulan, om rombituon. Om iri tulun di tumuku' dot id doho' om i mangakun do tumorodok dot id doho' nga' patayon ku i' tu' sumumpa' i' iyolo' dot id suang do ngaran di Milkom, i ponokokinorohingan diyolo'. 6 Om patayon ku nogi' i tulun di tuminongkiad doho' om it a' tuminanud doho', i tulun dit a' rumikot dot id doho', om it a' mokituduk doho',” ka dau. 7 Oruhai nod orikot i tadau'd Tuhan, i tadau do kapamansayan do Kinorohingan di wonsoyon dau; iyo nopoddi om kada' kou no komi-komi dot id toguang dau. Tu' sumodia' no o Tuhan do monumbali' di tulun dau do miagal di porsombahan do sumbolion. 8 Boros kad Tuhan, “Tontok nopondo do tadau'd koponumbolian diri, om hukuman ngai' ku nondo i pagawai om i tangaanak di raja', om koinsanai di tulun di musui do kowoyo-woyoon do tulun di bansa'd suwai. 9 Koinsanai di tulun di sumambayang do miagal do tulun dit a' kotutun doho', om i manakau om mamatai do mokimohilo-hilo' dot oponu' do dapu' di pinanakau i walai do boyoon diyolo', nga' patayon ngai' ku nopo,” ka dau. 10 Boros kad Tuhan, “Tontok nopondo do tadau'ddi, om haro nondo ot orongou dokoyu do mogihad do hilo'd wawayaan di roitan do Wawayaan do Sada' do hilo'd Yorusalim. Om korongou kou do sollompud-lompud do mihad do ponong hiri'd kinoiyonon di wagu kowonsoi do hiri'd bandar om haro ot orongou do kurubut dot opuhod do hilo'd konuluhanan. 11 Pinggiak kou no om mingihad no dot orongou dokoyu o miagal diri, koinsanai dokoyu i poingiyon do hilo'd bandar dit id siba'; tu' nangapatai ngai' no i dumadagang! 12 Tontok nopo do maso'ddi om manu oku nondo do lampung om ngoyon ku pingantangai o pointongkop do Yorusalim. Om hukuman ku nondo i tulun dit oondos om mogondos do tinan dau, i mimboros dot, ‘Aiso' nopo o koburuluanai do wonsoyon do Tuhan, tu' a' i' miagal diti, om a' miagal dilo',’ ka no. 13 Angapanakau nondo i dapu' diyolo' om angaraag i kawalayan diyolo'. Om a' indo iyolo' koiyon di walai do waalon diyolo' om a' koinum do waig dit anggur do tonomon diyolo',” ka dau. 14 Oruhai nod orikot i tadau'd Tuhan, i tadau do kopomisaraan. Om a' no alaid dot orikot iri! Tadau nopoddi om araat tomod tu' iri piya'ndo i soudor di gunsiou nga' mingihad poo tu' aiso' no o pokukurayan! 15 Tadau nopoddi om tadau do katagadan; om tadau do kosusaan om karaagan, om tadau dit otuong om kikatangaban, om tadau dit oluhung om momihaun. 16 Om tadau di noponu' pod tuni do torumpit do sumasangod om pinongkisan do soudor di manangod do bandar di kitolig om walai dit angakawas. 17 Om boros kad Tuhan, “Porikot oku nondo do kosusaan dit awagat kopio dot id tulun gisom do sanghawor-hawor pondo ngai' o tulun do miagal di tulun do bolou. Minomonsoi iyolo'd dusa dot id doho', om gowoi pondo om potuntugon ku o raha' diyolo' do miagal pod waig, om mumang pondo pasa' i rata' diyolo' do songingiliu do hilo'd tana',” ka dau. 18 Tontok nopod tadau di kopointalangan do Tuhan do kototogod dau, om iri piya nondo i pirok om tamas nga' a' no kapasi diyolo'. Tu' oinsanan nopo dot araag om alanak do tapui do kototogod dau iti pomogunan. Om potigowoon nondo dau do mamatai o tulun do hiti'd pomogunan.
Boros do Monuhu' do Kumorologo
1 Oi bansa' dit a' milo dot ointingayaman, purimono' no dokoyu 2 dot a' kou po olotu' om apatai do miagal do tusak do bunga, om a' po karatu' dot id dokoyu i kototogod do Tuhan dit a' ogina-gina', om a' po orikot i tadau do kopointalangan dau di kototogod dau. 3 Guli' kou no dot id Tuhan; koinsanai dokoyu it ongosiriba' o ginawo do hiti'd pomogunan, i mumboyo' do boros dau. Wonsoyon no dokoyu it otopot, om minsiriba' no dot id toguang do Tuhan. Tu' koidu' kou i' doti' daa'ndo do mantad id hukuman do tontok di tadau do kopointalangan do Tuhan di kototogod dau.
Kootuson di Piro-Piro Bansa' do Posorili' dot Israil
4 Songulun po nga' aiso' no ot oolu' do hilo'd bandar do Gasa. Om Askilon pondo nga' opogiiduan. A' i' kasangadau om ouyung no i tulun dot Asdod, om i tulun dot Ikron nga' ouyung nogi' do mantad id bandar diyolo'. 5 Ousung no i tulun do Pilistin, i tulun di poingiyon di poingompus do tisan do rahat. Norotuan kou nod Tuhan do hukuman. Om patayon kou no dau, om aiso' no o tiso' dokoyu do pooluon. 6 Iri nopondo tana' dokoyu do hiri'd toning do rahat om osiliu pod tomulok dot ongkisulap do madtamong do dumba' om ongkikandang do dumba'. 7 Om singolodon nondo di nongoolu-olu' do tulun do Yohuda i tana' dokoyu. Om hilo' nondo o paakan-akanan diyolo' di baanan do dumba' diyolo' om hiri'd kawalayan dot Askilon o toodopon diyolo', om woyoon indo iyolo'd Tuhan, i Kinorohingan diyolo' om posimbayanon kawagu dau iyolo'. 8 Om boros kad Tuhan, it Osundu Kopio, “Norongou ku no i tulun do Muab om Amon do mongindaraat om mongirak-irak di tulun ku, om mimboros do mongoi poningolod di pomogunan diyolo'. 9 Om sumumpa' oku tu' Kinorohingan dot Israil di poimpasi, dot atantu' no dot araag do miagal do Sodom om Gomura, o Muab om Amon. Osiliu pondo iyolo'd luang do noponu' do silaon om pogun do gisom dot alaid, om okurumbutan do gouton. Om ngoyon nondo di tulun ku di nongoolu-olu' panakahai iyolo' om iri piya'ndo i tana' diyolo' nga' osingolod i' diyolo',” ka dau. 10 Om miagal noddi o pomohukum di tulun do Muab om Amon tu' mininggayo-gayo i' iyolo' om ongorongit, om kawagu po nga' minongindaraat iyolo' di tulun di songonuon do Tuhan, it Osundu Kopio. 11 Om rolosion nondo iyolo'd Tuhan. Pakaisoon nondo dau i ponokokinorohingan do tulun do hiti'd pomogunan. Om oinsanan nopondo o bansa' do tumuku' dau, dot id pomogunan diyolo'. 12 Om hukuman do Tuhan do kapatayon i tulun do hilo'd Etiopia. 13 Om pakayon nondod Tuhan i sinundu dau do mamaraag dot Asur. Om silihon dau do pogun i bandar do Niniwi, om silihon dau do tana' do kowotuan dit aiso' o waig. 14 Osiliu pondo iri do tuundorongon do dumba', om sapi', om piro-piro o bansa' do nintorusan. Om ngoyon di puok iyono' i pogun do walai diyolo' om minguni pondo iri do hiri'd liligaon. Tiiyonon pondod bangkahak o hiri'd tukad do walai. Alangkab ngai' nopondo i limput di kawalayan di kayu sedar do winonsoi. 15 Miagal noddi ot osiliu dot id bandar dit oondos kopio do kuasa' dau om i momusorou dot aiso' o koligagaanan. Osorou nopo daa di tulun do hiri om iri no i diyolo'd bandar ot agayo kopio do hiti'd pomogunan. Nga' osiliu pondo do kinoiyonon dit oingou do koimbagu o kinoiyonon diri om osiliu do tiiyonon do nintorusan! Kotigowo ngai' nopondo om ooris o koinsanai'd tulun di kawaya'd hiri.
Hinukuman om Pinasi o Yorusalim
1 Ousung no o Yorusalim, i bandar dot araat om obinsaap do Tuhan, om i mongulok-ulok do tulun dau. 2 A' i' i bandar diri minokinongou do boros do Tuhan om a' minomusou do ponudukan dau. A' i' iri minogondos do Tuhan om a' minokiuhup dau. 3 Miagal pod singa di sanggarom-garom i pagawai dau; om i gompomutus nga' miagal pod toni di louson; om adalaan no kopio kodoot, tu' a' no sipoolu' dot ongoiso' piya o tulang do gisom do kosuabon. 4 Aiso' nopo o monongkoilo di nabi om a' iyolo' otorodok dot id Tuhan; om sosomuon dit imam it ongolidang, om somputulon diyolo' it oturan do Kinorohingan do maan do diyolo'd koinsanangan. 5 Nga' hilo' po kasai' id bandar diri o Tuhan, om osonong kasai' i' o wonsoyon dau om a' iyau insan pomonsoi di kasala'. Monikid kosuabon nopo do papatahak iyau dit otulid dot id tulun dau. Om inda' ka do momonsoi kasai' pod araat i tulun dot a' otulid, om a' nopo iyolo' ointingayaman. 6 Om boros kad Tuhan, “Nopunso ku no o piro-piro o bansa'; nangaraag ku no i kabandaran diyolo' om songingraag po o tolig om walai diyolo' dit angakawas. Nopogitotongkiadan po i kabandaran; om aiso' no tulun do hiri'd karalan-ralanan. 7 Ondos ku daa om momusou nondo i tulun doho' om mamadul di ponudukan ku, om a' nondo kolihu di pinonudukan ku diyolo'. Nga' a' i' alaid om miagal no di gulu karaat o kowoyo-woyoon diyolo',” ka dau. 8 Boros kad Tuhan, “Andado' nopo, andado' nopo i tadau do kapasalaan ku do piro-piro o bansa'. Nokopomusorou oku no do monimung do koinsanai'd bansa' om pomogunan, do popuriman diyolo' do kawagato' do kototogod ku. Oinsanan nopondo iti pomogunan dot araag di tapui do kototogod ku. 9 Om simbanan ku nondo o ginawo di tulun do mantad id koinsanai'd bansa', om iyoho' o tukuon diyolo' om okon no ko' i ponokokinorohingan. Om oinsanan nopondo iyolo' do mumboyo' doho'. 10 Iri piya tulun ku di nokoongoi do hilo'd Etiopia, i hilo'd sodu' kopio, nga' rumikot i' do mongoi papatahak do porsombahan dot id doho'. 11 Tontok nopondo do maso'ddi om a' kou nondo ointingayam, oi tulun ku, do mulong piya do suminaap kou daa doho'. Poinsoduwon ku nondo o koinsanai'd tulun di minggayo-gayo om it oondos, om a' kou nondo mumbal kawagu do sumaap doho' do hilo'd nuluhon ku dit olidang. 12 Om poundorongon ku nondod hilo' i tulun dit ongosiriba' o ginawo om i rumikot dot id doho' do mongoi pokiuhup. 13 Om iri nopondo tulun dot Israil di noolu-olu' om aiso' i' o songulun piya do momonsoi'd araat dot id tulun do suwai, om a' mongudut, om a' mumbal do monipu'. Om osimbayan nondo iyolo' om aiso' o koligagaanan om aiso' o poddosi,” ka dau.
Sinding do Kaarapadan
14 Podsinding no om mimpangkis nod atataadan, oi tulun dot Israil! Kaayi-ayi' no o ginawo dot ooropod, oi Yorusalim! 15 Nopupusan nod Tuhan o hukuman nu; nouyung ngai' no dau i pisangod nu. Moyo-woyo' no dokoyu o Tuhan, i raja' dot Israil; om aiso' no o paantakan dokoyu do moddosi. 16 Rumikot no i maso do moro-boros iyolo' dot id Yorusalim do poingkaa, “Kada' no kooris om kada' katangkabo, oi bandar do Sion! Kada' pologoso' do lumomok o longon nu! 17 Moyo-woyo' i' diya' o Tuhan, i Kinorohingan dit okoris, om manahak diya' do kamanangan i sinundu dau. Om asanangan nondo o Tuhan diya', om onuan ko dau do koposion do wagu tu' osianan i' iyau diya'. Om modsinding nondo iyau tu' atataadan iyau diya', 18 do miagal pod tulun dit id karamayan o kooropodo' dau,” ka dau. Om boros kad Tuhan, “Nopupusan ku no i boros do ponompurolosi do haro o kosusaan om noidu' ku i tingayam dokoyu. 19 Rumikot no i maso! Om hukuman ku nondo i minongulok-ulok dokoyu; om poiduwon ngai' ku nondo i nongokimpaan om poulion ku i tulun do nangatanggayan do pisangod dot id walai diyolo'. Silihon ku nondo do kosuahan i tingayam diyolo' om oinsanan nopondo o pomogunan do mamarayou diyolo'. 20 Rumikot no o maso! Om pogulion ku nondo dot id diya' i tulun nu di nokotompias; om pobontugon ku nondo iya' do pointongkop diti pomogunan om posimbayanon kawagu ku iya',” ka dau. Iyo noddi o pinoboros do Tuhan.
Monuhu' o Tuhan do Momonsoi Kawagu di Walai'd Sasambayangan dot Agayo
1 Tontok di koduwo do toun di Darius do raja' do Porsia, di tadau do koiso' do tulan do koonom, om boro-boros no o Tuhan, do pinawaya' dau di Nabi Hagai. Iri nopo boros diri nga' poboroson dot id di Sorubabil i tanak di Sialtiol, i gobunor do Yohuda; om id di Yosua, i tanak di Yosadak i Boyoon dot Agayo dot Imam do maso'ddi. 2 Boros kad Tuhan, it Osundu Kopio, dot id di Hagai, “Minomoros iti bansa' dot a' po norikot o maso do mamaal kawagu diti Walai'd Sasambayangan dot Agayo,” ka. 3 Om suhuo' noddi do Tuhan i Hagai do popolombus do boros dau dot id tulun dau do poingkaa, 4 “Oi tulun ku, nokuro tu' miyon kou no dot id walai'd ongolumis om ongogirot om maso pod poingraag i Walai'd Sasambayangan dot Agayo? 5 A' toi dokoyu okito iti nosiliu dot id dokoyu? 6 Ogumu' tomod o gandum do tinanom dokoyu nga' okuri' i' o nomot dokoyu. Haro i' daa o takanon dokoyu nga' a' i' dokoyu kayahan. A' i' kouru dokoyu i waig dot anggur dokoyu! Om kipakayan kou i' daa nga' a' i' kalasu' do tinan dokoyu. Om a' kooput do koposi-posion di susuhuon o gadsi' diyolo'. 7 A' i' dokoyu oilaan ondung nokuro tu' nosiliu o miagal diti? 8 Ongoi kou no do hilo'd konulu-nuluan do dinondo om manganu nod kayu, om waalon i' kawagu i Walai'd Sasambayangan dot Agayo; om asanangan oku nogindo om kasambayang kou dot id doho' do tumanud di ralan di koontok. Antangai no kopio dokoyu ino koiyon-iyono' dokoyu. 9 Soro-sorohon daa dokoyu dot ogumu' o tomot dokoyu nga' okuri' i' kopio o naanu dokoyu. Om soira' di nigitan dokoyu'd muli' i tomot dokoyu'ddi om maai ku po tilibo'd ribut do gisom do naayi'. Nokuro tu' winonsoi ku o miagal diri? Isimbar nopo om poingkaa: Tu' poingraag po kasai' i Walai'd Sasambayangan dot Agayo, om iyokoyu no om agangau poo do momonsoi di walai dokoyu. 10 Iri no o kokuwaan dot aiso' o rasam, om gowoi poddi om aiso' no o sumuni do totonomon. 11 Pinagadau ku o hiti'd pomogunan om hilo'd konulu-nuluan, om hilo'd koumaan, om hilo'd kabun dot anggur, om hilo'd kabun do saitun, om nadau ngai' nopo o tanom-tanom di poinsuni do hiti'd tana', om kohompit nogi' o tulun om nintorusan, om koinsanai di totonomon di tonomon dokoyu,” ka dau.
Minumboyo' i Tulun dot Israil do Boros do Tuhan
12 Om wonsoyo' noddi di Sorubabil, om i Yosua, om koinsanai di tulun dot Israil di nokoguli' do mantad hilo'd pomogunan do Babil i pomogunan do pisangod, i pinonuhuan do Tuhan diyolo'd momonsoi. Tu' ongooris iyolo' om umboyo' noddi iyolo' di boros di Nabi Hagai, i pinopolombus di boros do Tuhan. 13 Om polombuso' noddi di Hagai i boros do Tuhan dot id tulun dot ogumu'ddi do poingkaa, “Mamatos oku do moyo-woyo' oku i' dokoyu,” ka dau. 14 Om tingkaho' ngai' noddi do Tuhan o ginawo di tulun do momonsoi di Walai'd Sasambayangan dot Agayo, dot i Sorubabil i gobunor do Yohuda om i Yosua, i Boyoon dot Agayo dot Imam, om koinsanai di tulun di nokoguli' do mantad id pomogunan do pisangod. Om timpuun no iyolo' do momonsoi di Walai'd Sasambayangan dot Agayo di don Tuhan, it Osundu Kopio, i Kinorohingan diyolo', 15 do tontok di tadau do koduwo nohopod om apat do tulan di koonom, di koduwo do toun di Darius do nosiliu'd raja'.
Kolumiso' di Walai'd Sasambayangan dot Agayo
1 Tontok di tadau do koduwo nohopod om iso' di tulan di koturu' do toun diri, om boro-boros no kawagu o Tuhan dot id di Nabi Hagai. 2 Om sinunudan dau i Hagai do mongoi boro-boros di Sorubabil i gobunor, om id di Yosua i Boyoon dot Agayo dot Imam, om id toinsanan o tulun. Om poboroson nopo dot id diyolo' ngai' nga' poingkaa, 3 “Haro po ot id pogialatan dokoyu do kosorou do kolumiso' di Walai'd Sasambayangan dot Agayo di gulu po? Okuro-kuro noddi iti dot okito dokoyu do baino'. 4 Nga' kada' nogi' do haro o tiso' dokoyu do lumuhoi o ginawo. Potilombuso' nopo dokoyu iti buruon diti tu' moyo-woyo' oku i' dokoyu. 5 Tontok di suminoliwan kou do mantad do hilo'd Masir om minamatos oku do moyo-woyo' kasai' oku dokoyu. Om moyo-woyo' oku po kasai' dokoyu diti dinondo, om kada' kou no poddosi. 6 A' no alaid om guyuon ku no o tawan om pomogunan, om katanaan om rahat. 7 Alaon ngai' ku nondo o koinsanai'd bansa', om oigitan ngai' nopondo do hiti i dapu' diyolo', om oponu' nopondo di dapu' diyolo' ilo Walai'd Sasambayangan dot Agayo. 8 Doho' ngai' i' di pirok om tamas do hiti'd pomogunan. 9 Olumi-lumis pondo iti Walai'd Sasambayangan dot Agayo do wagu ko' mantad dit id gulu, om hilo' no dot onuan ku i tulun ku do kouludan om kosimbayanan,” ka dau. Iyo noddi o boros do Tuhan, it Osundu Kopio.
Minokinosihat i Hagai di Piro-Piro Imam
10 Tontok di tadau do koduwo nohopod om apat do tulan do kosiam di koduwo do toun do raja' i Darius, om boro-boros po kawagu o Tuhan, it Osundu Kopio dot id di Nabi Hagai. 11 Boros ka dau, “Ongoi pokianu dit imam dot oturan do pasal do hal diti: 12 Sokiro do haro tulun do mongoi anu do sonsinsib o tonsi dit olidang tu' nanu do mantad id porsombahan di sinumbali' do maan do don Tuhan om polopoton nondo dau iri di rasuk dau om katahambai nondo i rasuk dau'ddi di roti, ko' i taakanon di noonsok, ko' waig dot anggur, ko' tumau do saitun, ko' nunu nopo o taakanon, om kotonggoi ngai' no tuu'ndo iri dot olidang?” ka dau. Om soira' di nongoi di Hagai uhoto' iri om nisimbar nopo dit imam om, “Amu',” ka. 13 Om ponguhot noddi kawagu i Hagai, “Sokiro no do haro o tulun do nososomu' tu' nakakama' iyau do rata', om ondung kakama' nondo iyau do tongoiso' diti taakanon diti, om kohompit no tuu'ndo dot ososomu' i taakanon diri?” ka dau. Om boros ka dit imam do suminimbar, “Oo, ososomu' nori,” ka diyolo'. 14 Om boros kaddi di Hagai, “Boros kad Tuhan om miagal nogiddi ot oturan dot id tulun dot Israil do hiti'd pomogunan diti, om id koinsanai di hasil diyolo', om gowoi poddi om sosomu' ngai' nopo i patahakon diyolo' do hiti'd pananaraban do porsombahan,” ka dau.
Pinabatos do Tuhan o Barakat Dau
15 Om boros kad Tuhan, “A' toi dokoyu okito iti nosiliu dot id dokoyu do dinondo? Tontok dit a' kou po nokotimpuun do momonsoi kawagu di Walai'd Sasambayangan dot Agayo, 16 om mongoi kou no daa do hiri'd pinotimungan di gandum, dot osorou nopo daa dokoyu om haro o duwo nahatus o kilogram do tonsi di gandum, nga' hatus no o kilogram do tonsi'ddi. Om mongoi kou no daa timbauk do hatus o lito do waig dot anggur do mantad hiri'd pinotimungan diri, nga' apat po nohopod o lito di waig dot anggur do hiri. 17 Pinoporikot oku do tongus dot alasu' om karambatu do pinamaraag ngai' di totonomon dokoyu, nga' a' kou i' guminuli' dot id doho'. 18 Om tadau nopodti om tadau do koduwo nohopod om apat do tulan do kosiam, i tadau do kinapangaan di pinoimpahan diti Walai'd Sasambayangan dot Agayo. Om antangan nopo dokoyu ondung nunu ot osiliu do mantad do tadau'd baino'. 19 Mulong po dot aiso' no o gandum do noolu', om a' po nokouwa' it anggur, om it ara, om i delima, om i saitun, nga' barakatan ku no iyokoyu do mantad do baino',” ka dau.
Batos do Tuhan dot id di Sorubabil
20 Om tontok i' do tadau'ddi, di tadau do koduwo nohopod om apat do tulan do kosiam, om boro-boros po kawagu o Tuhan dot id di Hagai do koinduwo do poboroson 21 dot id di Sorubabil, i gobunor do Yohuda do poingkaa, “Oruhai ku no do guyuon o tawan om pomogunan. 22 Om raagon ku o pomorintaan om iduwon ku i kuasa' diyolo'. Sombolikon ngai' ku nondo i korita'-kuda' om i papamanau'ddi, om angapatai nondo i kuda', om mogipapatai i songinsakai'ddi. 23 Tontok nopondo do tadau'ddi, om silihon ku nondo iya' oi Sorubabil, i susuhuon ku do pomorinta' do momorinta' dot id suang do ngaran ku. Tu' iya' no i nopili' ku,” ka dau. Iyo noddi o boros do Tuhan, it Osundu Kopio.
Linohou'd Tuhan i Tulun Dau do Gumuli' dot id Dau
1 Tontok di tulan do kawalu' di koduwo'd toun di Darius do raja' do Porsia, om poboroso' nod Tuhan o boros diti dot id doho', i Nabi Sakaria, i tanak di Birikia, i manangaki di Ido. 2 Om sinunudan oku'd Tuhan, it Osundu Kopio, do momisunud ngai' di tulun do poingkaa, “Otogod tomod oku daa, iyoho' i Tuhan, di komolohingan dokoyu di gulu po. 3 Nga' baino' nopondo om moro-boros oku dokoyu do poingkaa, Guli' kou no dot id doho', om gumuli' oku indo iyoho' dot id dokoyu. 4 Kada' kou omit di taki-aki dokoyu. Di nopo di gulu po om sinunudan iyolo' do piro-piro o nabi ku, do mogodu diyolo' do mingwonsoi'd dusa om it araat. Nga' a' i' iyolo' minokinongou doho' om a' minumboyo'. 5 Aiso' no o songimpasi di taki-aki dokoyu om i piro-piro nabi diri do baino'. 6 Sinuhu' ku om pinoinsan ku i taki-aki dokoyu do pinawaya' ku di piro-piro o nabi, i susuhuon ku, nga' a' i' diyolo' pinadul iri om gowoi poddi om noinggorit iyolo'. Om rologo nogiddi iyolo' om minangakun dot iyoho', i Tuhan it Osundu Kopio, o minomohukum diyolo' do miontok di nowonsoi diyolo' om miagal di nosorou mantad ku do wonsoyon ku,” ka dau.
I Kuda' do Nokito di Nabi dot id Pinointalang
7 Tontok di koduwo'd toun di kinosilihan di Darius do raja', tontok di tadau do koduwo nohopod om apat do tulan di kohopod om iso' (iri no i tulan do Sibat) om boro-boros no o Tuhan dot id doho' dot id suang do pinointalang dau dot id doho' di dongotuong. 8 Nokito ku o moloikat do Tuhan do poinsakai'd kuda' dot aragang. Om undorong no iyau do hiri'd rolot do koguasan do murad dot id iso' o kinoiyonon dot apatau, om hiri nopod tohuri-huri dau nga' piro-piro po kawagu o kuda', do haro o kuda' dot aragang, om haro ot oposi' o karagango', om haro ot opurak. 9 Om uhoto' ku no iyau, “Oi Tuan, nunu komoyon diti piro-piro kuda'dti?” kangku. Om boros ka dau, “Pokitonon tiya' indo ondung nunu o komoyon diti. 10 Nga' iyolo' nopodti om sinuhu'd Tuhan do mongoi pogontong kopio diti pomogunan,” ka. 11 Om boros ka di piro-piro o kuda'ddi do minomisunud di moloikat, “Notongkop no dahai iti pomogunan om noilaan no dahai dot aiso' no o pokukurayan diti pomogunan tu' naala' no,” ka diyolo'. 12 Om boros kaddi di moloikat, “Oi Tuhan, it Osundu Kopio, turu' noddi nohopod o toun nu dot otogod do Yorusalim om i kabandaran do Yohuda. Songkuro po koloido' nu dot otogod om ompunan nu nogi' iyolo'?” ka dau. 13 Om simbaro' nod Tuhan i moloikat diri do boros di koinsasamod tomod. 14 Om sunudai oku no di moloikat do popoboros di pinoboros do Tuhan, it Osundu Kopio do poingkaa, “Osianan oku i' kopio om agayo o ginawo ku do monongkoilo do Yorusalim, i bandar ku dit olidang. 15 Om otogod tomod oku di bansa' dit ongosimbayan om aiso' o kagangahan. Tu' tontok di pusus-pususon ku daa o kototogod ku dot id tulun ku, om ruhangai nogi' di piro-piro o bansa'ddi i koinggoritan di tulun ku. 16 Om iri noddi o kinogulian ku do hilo'd Yorusalim do mongoi pangampun di bandar diri. Om otonduli' indo kawagu i Walai'd Sasambayangan dot Agayo om owonsoi kawagu i bandar diri,” ka dau. 17 Om sinuhu' oku nogi' di moloikat do popimboros do poingkaa: “Boros kad Tuhan it Osundu Kopio do minamatos, osimbayan indo kawagu i bandar dau om uhupan kawagu dau o Yorusalim om songonuon dau i bandar diri,” ka.
I Sangau do Nokito dot id Pinointalang
18 Om id suang nod pinointalang do suwai om kokito ku no ot apat o sangau do sapi'. 19 Om uhoto' ku no i moloikat di minoro-boros doho', “Nunu o komoyon diti sangau'dti?” kangku. Om boros ka dau, “Iti nopo sangau'dti om poiyaan di piro-piro o pomorintaan dot ongokoris di pinopotompias di tulun do Yohuda, om Israil, om Yorusalim,” ka dau. 20 Om pokitono' oku nod Tuhan dot apat o tulun do sangkaraja' dot ongkiinigit do dunsul. 21 Om uhoto' ku no iyau, “Nunu o kinorikatan diti tulun diti?” kangku. Om boros ka dau, “Nokorikatan nopo diyolo' om mongoi ponompurolosi om mongoi pangala' di piro-piro o bansa' di minamaraag do pomogunan do Yohuda om i pinopotompias di tulun do hilo',” ka dau.
Pinabatos do Tuhan o Kolobusan di Tulun Dau
1 Pokianu nod Tuhan do rasam do tontok di momuroun kawagu o kayu. Tu' Tuhan i' o poporikot do haun di kirasam om rasam dit asapou, om otomou i' i koumaan do koinsanai'd tulun. 2 Mongoi o tulun uhot do tingolig om i mogogontong do nasip, nga' isimbar nopo dot aanu diyolo' om tudut ngai' no om it aiso' i' o komoyon. Haro nogi' i poposuhut do komoyon do nipi nga' mamalid no dokoyu iri; tu' aiso' i' o guna' di ponginsasamod diyolo'. Om gowoi poddi om minghombo poo o tulun do miagal do dumba' di natagak, om id suang iyolo'd kosusaan tu' aiso' i' o boyoon diyolo'. 3 Om boros kad Tuhan, “Otogod oku no kopio di bansa'd suwai di momorinta' di tulun ku, om hukuman ku no iyolo'. Iri nopo tulun do Yohuda om iyoho' i' o sanganu, om iyoho' i Tuhan dit Osundu Kopio, o momogompi' diyolo'. Om iyolo' no silihon ku'd kuda' do don sumasangod dit ongokoris kopio. 4 Om id pogialatan no diyolo' o pomilian ku do pomorinta', om boyoon, om boyoon do soudor do momorinta' diti tulun ku. 5 Om iri nopondo tulun do Yohuda om miagal di soudor do nakamanang tu' mingulok di pisangod diyolo' do miagal po di burutak di hilo'd karalan-ralanan. Om sumaap nondo iyolo' tu' uhupan i' iyolo'd Tuhan, om iri piya nondo i pisangod diyolo' do songinsakai'd kuda' nga' aala' i' diyolo'. 6 Pokorison ku indo i tulun do Yohuda; om posion ku i tulun dot Israil. Osianan oku i' diyolo' om poulion ngai' ku i' iyolo' do hilo'd pomogunan diyolo'. Om miagal pondo dot a' ku iyolo' insan kadaai. Iyoho' no o Tuhan, i Kinorohingan diyolo', om simbaron ku o sambayang diyolo'. 7 Om okoris pondo do miagal do soudor i tulun dot Israil. Om ooropod do miagal di tulun do nokoinum do waig dot anggur. Om osorou kasai' indo di sinakagon diyolo' o kinamanangan diti do gisom dot alaid, om otood tu' i winonsoi do Tuhan dot id diyolo' o kataadan. 8 Lohowon ku nondo i tulun ku, om timungon ngai' ku iyolo'. Om poiduwon ku iyolo' om posopohon ku do miagal di gulu po. 9 Mulong pod nokotompias ku daa iyolo' dot id pogialatan do bansa', nga' hilo' piya'd sodu' nga' osorou kasai' oku i' diyolo'. Om apasi i' iyolo' om i tangaanak diyolo' om mogiwoyo-woyo' indo iyolo' do gumuli' do hilo'd pomogunan diyolo'. 10 Poulion ku nondo iyolo' do mantad hilo'd Masir om hilo'd Asur. Om poundorongon ku iyolo' do hilo'd pomogunan diyolo'. Om poundorongon ku nogi' iyolo' do hilo'd Giliad om hilo'd Libanon; gisom dot oponu' nopondod tulun i pomogunan. 11 Om soira' nopod kawaya' iyolo' do rahat do kosusaan, om iyoho' i' i Tuhan, o rumuba' di tumbak; om tumuu nopondo i hiri'd daralom do Bawang do Nil. Om koinsiriba' nondo ot Asur tu' asawat i' o ginawo dau. Om Masir tu' okoris nga' oidu' indo o kuasa' dau. 12 Pokorison ku nondo i tulun ku; om sumambayang nondo om mumboyo' iyolo' doho'. Iyoho' no, i Tuhan, o minomoros diti,” ka dau.
Kinorotuan di Pomorintaan dit Araat
1 Poiwango' ino totobon nu, oi Libanon, om osorob i' do tapui ino kayu sedar nu! 2 Ihad no, om pillompud nod mihad, oi kayu sedar, nahaba' no i kayu sedar, nangahaba' no i kayu dot ongosonong! Ihad no, om pillompud nod mihad oi kayu tarbantin do hilo'd Basan tu' nangatagad no i puru'! 3 Mingihad pod atatangaban i piro-piro o pomorinta'; aiso' noddi i kagayaan diyolo'! Pokinongou nod garom do singa do hilo'd gouton, naraag no i puru' do panakawalai diyolo' do poinsusui di Bawang do Yordan!
I Duwo o Gompomogompi'd Dumba'
4 Om boros kad Tuhan i Kinorohingan, dot id doho', “Pingiyo-iyo no di gompomogompi'd dumba' di potisumbolion no i dumba' do pigompian dau. 5 Om patayon nondo di sanganu di dumba' i dumba' diyolo', om iyo piya'ddi nga' a' i' iyolo' ohukuman. Om pobolion no diyolo' i daging di dumba'ddi om mimboros nod, ‘Royohon no o Tuhan! Tu' kaya' toko' noddi!’ ka no diyolo'. Om iri piya i gompomogompi' di dumba' nga' a' no osianan di dumba',” ka dau. 6 Boros kad Tuhan, “A' oku nondo monginsian dot isai nopo do hiti'd pomogunan. Om iyoho' nondo o poposuang do koinsanai di tulun dot id suang do kuasa' di pomorinta' diyolo'. Om raagon nopondo kopio di piro-piro o pomorinta' iti pomogunan, om a' ku i' ahawon iti do mantad id kuasa' diyolo',” ka dau. 7 Om godsiai oku no di tulun di minomoli om i pinapadagang di dumba' do kumaraja' do hiri'd dau, om momogompi' oku'ddi di dumba' di maan sumbolio'. Om anu oku nod duwo o sukud. Iri nopo tiso' om pinungaranan ku dot “Opuhawang” om iri no tiso' om pinungaranan ku do “Kopiisaan”. Om iyoho' no o minomogompi' di dumba'ddi. 8 Om a' ku noddi milo do pususon o ginawo ku dot otogod di tolu o gompomogompi'd dumba' do suwai, tu' araatan iyolo' doho', om insan i' o tulan do pinoidu' ngai' ku iyolo'. 9 Om boros kangku'ddi dot id baanan do dumba' di gompion ku, “Okon oku nondo ko' gompomogompi' dokoyu. Baya' nopod apatai i patayon, om baya' dot araag i raagon. Om iri nondo it oolu-olu' nga' mogipapatai poo,” kangku. 10 Om ngoyo' ku noddi i sukud di pinungaranan ku dot “Opuhawang” om tipuo' ku nori, do mananus di tumpongo do winonsoi'd Tuhan dot id toinsanan o bansa'. 11 Om tadau noddi do natanus i tumpongo'ddi. Om songingontong po doho' i tulun do momoli om i padagang do dumba', om oilaan no diyolo' do moro-boros o Tuhan do pinawaya' di winonsoi ku. 12 Om boros kangku dot id diyolo', “Ondung kaakun kou, om patahako' dokoyu doho' i gadsi' ku, nga' a' nopo, om poopion nopo dokoyu,” kangku. Om godsiai oku no diyolo' do tolu nohopod o tusin do pirok. 13 Om boros kad Tuhan dot id doho', “Ngoyo' poopio' ino do hilo'd poopian do tusin do hilo'd Walai'd Sasambayangan dot Agayo,” ka dau. Om ngoyo' ku noddi i tolu nohopod o tusin do pirok diri, i gatang ku dot agayo tomod dot osorou diyolo', om ngoyo' ku nori poopio' do hiri'd poopian do tusin do dong Walai'd Sasambayangan dot Agayo. 14 Om tipuo' ku no i kayu di koduwo, i roitan do “Kopiisaan”, om naraag diri o kopiisaan do Yohuda om Israil. 15 Om boros kaddi do Tuhan dot id doho', “Pingiyo-iyo po kawagu do gompomogompi'd dumba', nga' baino' noo om miyo di gompomogompi'd dumba' dit araat. 16 Nokoponuhu' oku nod tulun do madtamong di baanan do dumba' ku, nga' a' i' dau tinulung i dumba' di haro o koligagaanan do kapatayon; om a' dau ngoyon ihumo' i dumba' di natagak, om a' dau ubatan i nongosuhat, om a' sumadon i nongoolu-olu'. Suwai ko' ngoyon nogi' dau kano' i dumba' dit olomu' kopio om pingiduan dau do sondulu! 17 Ousung no i gompomogompi'd dumba' dit aiso' o guna'! Tu' tinongkiadan dau i baanan do dumba'. Om pupusan nondo do pisangadan i kuasa' dau. Om lumomok nondo o longon dau, om mumang bolou i mato dau do ponong id wanan,” ka dau.
Posion o Yorusalim do Koimbagu
1 Poingkaa no o boros do Tuhan do pasal dot Israil, i Tuhan di pinapawalad do tawan, om i minomonsoi diti pomogunan, om i minanahak do koposion dot id tulun. Boros ka dau, 2 “Silihon ku nondo o Yorusalim do miagal do sansangkir o waig dot anggur; om minum nondo i piro-piro o bansa' do posorili' dau om mikorobibi' pondo iyolo' do miagal do tulun di naawuk. Om turungkuon nopondo o Yorusalim, om i kabandaran do Yohuda do suwai nga' kotonggoi nod oturungku'. 3 Nga' orikot nopondo o maso'ddi om silihon ku nondo o Yorusalim do miagal do watu dit awagat, gisom dot isai nopo i mumbal do mangakat diri om orualan no. Om pogisusugkuon nopondo do koinsanai'd bansa' do hiti'd pomogunan o soudor diyolo' do mongoi panangod do Yorusalim. 4 Tontok nopondod maso'ddi om tompurolosion ngai' ku i kuda' diyolo' om borulongon ku o pomusarahan di tulun di songinsakai di kuda'. Piantangan ku i' i tulun do Yohuda nga' bolohon ku indo i mato di kuda' di pisangod diyolo'. 5 Om moro-boros indo i piro-piro o sompiiyon do Yohuda dot id ginawo diyolo' dot, ‘Onuan id Tuhan, it Osundu Kopio, do kokorisan i tulun dau di poingiyon do hilo'd Yorusalim,’ ka. 6 Tontok nopondod maso'ddi om silihon ngai' ku nondo i sompiiyon do Yohuda do miagal do tapui do hilo'd puru' ko' hilo'd tumo di nongoonsok no o gandum, tu' raagon nondo diyolo' i piro-piro o bansa' do hiri'd posorili'. Om aiso' nondo o koligagaanan di tulun do Yorusalim do poingiyon do hiri'd bandar. 7 Om poguluonon ku iyoho' i Tuhan, do manahak do kamanangan i piro-piro o soudor do Yohuda om iri nopondo i kosuahan dot aanu di sinakagon di Daud om i tulun do Yorusalim om a' i' agayo ko' mantad di kosuahan di naanu do tulun do Yohuda di suwai. 8 Om tontok nopondod maso'ddi om intirungan ku indo i tulun do poingiyon do hilo'd Yorusalim om gisom dot iri piya'ndo it oluhoi kopio nga' koiyo i' di Daud kokoris. Om woyoon nondo iyolo' di sinakagon di Daud, i miagal pod moloikat ku. Om iyo po dit iyoho' kopio o momoyo'. 9 Om tontok nopondo do maso'ddi om raagon ku nondo o pointikid-tikid do bansa' di mumbal do sumaap do Yorusalim. 10 Om onuan ku nondo i sinakagon di Daud om tulun do suwai do hilo'd Yorusalim do ginawo dit obingampun om it orohian do sumambayang. Om soira' nopo do mintong iyolo' di tulun di tinobok diyolo' do minamatai, om pogihadan nondo diyolo' iyau do miagal do mogihad di tanak di napatai dit iso' no daa. Om mogihad tomod nondo iyolo' do miagal di mogihad do tanak do kusai diyolo' dit id dotuo di napatai. 11 Om tontok nopondoddi om i nopo mogihad do hilo'd Yorusalim om miagal poddi mogihad di hilo'd Hadad-Rimon kopuhod, i hilo'd rantai do Mogido. 12-14 Om sompori-pori nopondo do mogihad i piro-piro o sompiiyon do hiri'd pomogunan diri, i sompiiyon di suminolusuk di Daud, om i sompiiyon di suminolusuk di Natan, om i sompiiyon do suminolusuk di Liwi, om i sompiiyon di suminolusuk di Simoi, om koinsanai di sompiiyon do suwai, om sompori-pori nopondo i sompiiyon do mogihad, iri nopondo tongokusai dit id pointikid-tikid do sompiiyon om posuwai-suwai di tongoondu' do mogihad,” ka dau.
1 Boros kad Tuhan it Osundu Kopio, “Orikot nopondo o maso'ddi, om haro nondo o tudan do waig do sumimpulak do pomolidang di sinakagon di Daud om i tulun do Yorusalim, do mantad id dusa om i poniningolig diyolo'. 2 Om tontok nopondod maso'ddi om tonuson ngai' ku nondo i ngaran di tingolig do mantad hiri'd pomogunan diri, om aiso' nondo o kosorou'ddi. Om patayon ngai' ku i tulun di momoros do nabi iyau om tonuson ku i korohian do tulun do tumuku' do tingolig. 3 Om ondung haro o tulun dit osonong do mimboros do pasal dit osiliu dot id dosunsudan, om iri indo i tapa' om tina' dau o momisunud dau dot apatut do hukuman iyau'd kapatayon, tu' tudut i' i popimboroson dau. Om ondung mangakun kasai' iyau do nabi iyau, om iri indo tapa' om tina' dau o monobok dau do gisom dot apatai iyau. 4 Om orikot nopondo o tadau'ddi om aiso' nondo o nabi dot oondos di nongokito dau dot id pinointalang, ko' mingiyo-iyo pod nabi o kowoyo-woyoon, ko' manampakai pod rasuk do nabi do maan do pagakal do tulun. 5 Suwai ko' poboroson nopondo do nabi om poingkaa, ‘Okon oku i' ko' nabi. Gompongumo oku no do solinaid ku'd poimpasi,’ ka nondo diyolo'. 6 Om ondung haro o tulun do muhot dau do poingkaa, ‘Nunu o nokosuhat dino kangkab nu?’ ka. Om sumimbar nondo iyau dot, ‘Nosuhat oku do hilo'd walai di tambalut ku,’ ka nondo dau,” ka dau.
Monuhu' do Mamatai di Gompomogompi'd Dumba' di Sinuhu'd Kinorohingan
7 Om boros kad Tuhan, it Osundu Kopio, “Posik no, oi gayang. Om ngoyon i' saapo' i gompomogompi'd dumba' di pakaraja' dot id doho'! Patayon no iyau om kopogitongkiad-kiad i' i dumba'. Saapon ku nondo i tulun ku, 8 om duwo nondo o bohogian do mantad di tolu o bohogian do tulun dot apatai do pointongkop diti pomogunan. 9 Om sompitolu pondo di tolu o bohogian do tulun diri ot apasi. Om lidangan ku nondo iyolo' do miagal do pirok di sompipion do tapui, om umbalan ku iyolo' do miagal do tulun di monompipi' do tamas. Om sumambayang nondo iyolo' dot id doho', om simbaron ku nondo iyolo'. Om sunudan ku nondo iyolo' do tulun ku iyolo', om okunon diyolo' do Kinorohingan oku diyolo',” ka dau.
Yorusalim om i Piro-Piro Bansa' do Tulun
1 Oruhai no i tadau do kopomutusan do Tuhan. Om panakahan nondo o Yorusalim, om poontong-ontongon kou nopondo do bohogion i pinanakau'ddi. 2 Om timungon ngai' nopondod Tuhan i bansa' do mongoi sangod do Yorusalim. Om osingolod nondo i bandar, om apanakahan i kawalayan, om ongokasou do tongokusai i tongoondu'. Om songintanga' nopondo di tulun om atanggayan do pisangod, nga' iri nopondo suwai om a' i' atanggayan do mantad hiri'd bandar. 3 Om sumoliwan nogindo o Tuhan do mongoi saap di bansa'ddi, do miagal di winonsoi dau di gulu. 4 Om tontok nopondo do tadau'ddi om mingkakat nondo iyau do hilo'd Nulu- Nulu do Saitun, i ponong id koulayon om gisom do hilo'd kotonobon do mantad id Yorusalim. Om opipitas nondo i Nulu-Nulu do Saitun do mantad hilo'd koulayon om gisom do hilo'd kotonobon, do kubong dit agayo o kopitas. Om kumaa nondo ponong id utara o sampaping di nulu-nulu'ddi om kumaa ponong id salatan o sampaping. 5 Om mogidu' kou nondo do maya' diti kubong di minomitas di nulu-nulu'ddi. Om mogidu' kou nondo do miagal di komolohingan dokoyu do tontok di guminuyu' o tana' di maso dit i Usia o raja' do Yohuda. Om rumikot nondo o Tuhan, i Kinorohingan ku do miwoyo' do koinsanai di moloikat dau. 6 Om orikot nopondo o tadau'ddi om aiso' nondo o tongus dot osogit om aiso' ot ais. 7 Om aiso' nondo o totuong. Anawau kasai' nopondo do dangadau, om dongotuong piya nga' anawau i'. Nga' Tuhan noo o koilo do maso dot osiliu ngai' o miagal diti. 8 Om orikot nopondo o tadau'ddi, om lumuyung nondo o waig dot oniniting do mantad hilo'd Yorusalim. Om lumuyung nondo o songintanga' di waig diri do hilo'd Rahat do Napatai om iri no songintanga' om lumuyung do hilo'd Rahat do Tanga'. Om muyung-luyung kasai' nopondo i waig diri do tikoompus do toun, di maso do magadau om di maso do rumasam. 9 Om Tuhan nondo o raja' do momorinta' do pointongkop diti pomogunan; om oinsanan nopondo o tulun do tumuku' dot id dau, i Kinorohingan, om iso' pondo o ngaran dau dot otutunan ngai' diyolo'. 10 Om alampai nopondo i kinoiyonon do mantad pod hilo'd Giba i ponong hilo'd utara om gisom do hilo'd Rimon, i ponong hilo'd salatan. Nga' Yorusalim nondo o poinsawat kopio dot id pogialatan di kinoiyonon di hiri'd posorili'; om kogoyoon nopo di bandar diri om mantad po di wawayaan di roitan do Wawayaan do Binyamin om gisom do korikot di wawayaan do roitan do Wawayaan do Linsuk, i kinoiyonon di wawayaan di gulu po, om mantad di Walai'd Akawas do Hananil om gisom di pamagaan dot anggur di don raja'. 11 Om osimbayan ngai' nondo o tulun do momogun-mogun dot id bandar diri tu' a' no orolosi di mongoi pamaraag. 12 Om porikatan nondod Tuhan do toruol dit araat kopio o koinsanai di bansa' di minongoi sangod do Yorusalim. Mumang nopondo momos o tinan diyolo' di maso po diyolo'd poimpasi; om mato om dila' diyolo' nga' mumang nopo momos. 13 Om tontok nopondo do tadau'ddi om borulongon nondod Tuhan o pomusarahan diyolo' om rolosion dau, gisom do tabpaan nopondo diyolo' i tambalut diyolo' di pointoning diyolo' om saapon no diyolo'. 14 Om sumaap nondo i tongokusai do Yohuda do mogobi' do Yorusalim. Om onuon ngai' nopondo diyolo' i kakayaan di bansa', i tamas, om i pirok, om i pakayan dot ogumu' tomod. 15 Om haro nogi' o toruol dit araat tomod do rumikot dot id kuda', om bagal, om unta, om kaladai, om id koinsanai di tayam-tayam do hilo'd kiim do pisangod. 16 Om oinsanan nopondo i tulun do noolu-olu' dot id pogialatan di bansa' di suminangod do Yorusalim do mongoi dot id bandar diri do pointikid do toun, do mongoi tuku' dot id Raja', i Tuhan dit Osundu Kopio, om mongoi pamaramai di Tadau dot Agayo do Kinuhub-Kuhub. 17 Om ondung haro o bansa' dot a' mongoi'd hilo'd Yorusalim do mongoi tuku' dot id Raja'ddi, i Tuhan dit Osundu Kopio, om a' nondo arasaman i pomogunan diyolo'. 18 Ondung a' i tulun do Masir mamaramai di Tadau dot Agayo do Kinuhub-Kuhub, om oontok no iyolo' do toruol di porikoton do Tuhan dot id pointikid-tikid do bansa' dit a' mongoi sambayang. 19 Om iri no o hukuman do porotuon dot id Masir om id koinsanai'd bansa', ondung a' no iyolo' mamaramai di Tadau dot Agayo do Kinuhub-Kuhub. 20 Om tontok nopondoddi om iri piya i lunsing do hiri'd pakayan di piro-piro o kuda' nga' kinikiran ngai' id boros do poingkaa, “Pinotobilang do maan do don Tuhan,” ka. Om iri piya'ndo i lansang do hiri'd Walai'd Sasambayangan dot Agayo nga' miagal i' di mangkuk do hiri'd dotimbabaan di pananaraban do porsombahan o kogoyoo'd guna'. 21 Om oinsanan nopondo i lansang do hilo'd Yorusalim om hilo'd Yohuda do potobilangon do maan do pakayon do sumambayang dot id Tuhan it Osundu Kopio. Om pomolosuan nondo di tulun, di daging di pinatahak do numaan do porsombahan i lansang diri. Om orikot nopondo o maso'ddi om aiso' nondo o tulun do dumagang do hiri'd Walai'd Sasambayangan dot Agayo di don Tuhan, it Osundu Kopio.
I Tali do Ponipong do Nokito dot id Pinointalang
1 Om id suang nod pinointalang do suwai om nokito ku o songulun o kusai do kiinigit do tali do ponipong. 2 Om boros kangku do minonguhot, “Honggo ngoyon nu?” kangku. Om boros ka dau do suminimbar, “Mongoi oku ponipong do Yorusalim, do mongoi pogontong ondung songkuro o konoruo' om kalaabo' do bandar diri,” ka dau. 3 Om kokito ku'ddi do luminaang ponong id dosunsudan i moloikat di minoro-boros doho', om ongoi no o tiso' di moloikat do suwai solowot dau. 4 Om boros kaddi di moloikat dit id gulu dot id moloikat di koduwo, “Panangkus kopio om ngoyon i' sunudai ilo tanakwagu dilo kiinigit do tali do ponipong. Om sunudan no iyau dot adalaan tomod nondo kogumu' o tulun om tayam-tayam do hilo'd Yorusalim gisom dot a' no milo'd wansayan do tolig o posorili'. 5 Tu' nakabatos nod Tuhan dot iyau indo o sumiliu'd tolig do miagal do tapui do posorili' di bandar do mongintirung diri om hilo' nondo iyau do poingiyon do mikuwo'd sinundu om kagayaan dau,” ka dau.
Linohou do Gumuli' i Tulun di Nangatanggayan do Pisangod
6-7 Om boros kad Tuhan dot id tulun dau, “Pinotompias ku iyokoyu dot id koinsanai'd kinoiyonon. Nga' baino' nopo, oi tulun di nangatanggayan do pisangod, om poggidu' kou no do mantad hino'd Babil om gumuli' no do hilo'd Yorusalim. 8 Om isai nopo i sumaap dokoyu om miagal nori do sumaap di koupusan kopio ku,” ka dau. Om suhuo' oku noddi do Tuhan, it Osundu Kopio, do poposunud diti boros dot id piro-piro o bansa' di minongoi panakau di dapu' di tulun dau: 9 “Tuhan indo o sumaap dokoyu, om panakahan kou di susuhuon daa dokoyu di gulu po,” ka. Om abayaan nopondo iri, om koilo ngai' kou nondo do Tuhan, it Osundu Kopio, o minonuhu' doho'. 10 Om boros kad Tuhan, “Podsinding no dot atataadan, oi tulun do Yorusalim! Tu' mundorong oku nondo dot id pogialatan dokoyu,” ka dau. 11 Om tontok nopondo do maso'ddi om ogumu' nondo o bansa'd tulun do rumikot dot id Tuhan om sumiliu do tulun dau. Om miyon nondo iyau dot id pogialatan dokoyu, om koilo kou nogindo do Tuhan o minonuhu' doho'. 12 Om songonuon nondo kawagu'd Tuhan om silihon dau do dau kopio'd songonuon o Yohuda do hilo'd tana' dau dit olidang, om Yorusalim nondo o bandar di koupusan kopio dau. 13 Kada' nod haro o tiso' dokoyu do minghiyo dot id toguang do Tuhan, tu' rumikot no iyau do mantad hilo'd kinoiyonon dau dit olidang.
It Imam dot Agayo do Nokito di Nabi dot id Pinointalang
1 Id suang nod pinointalang do suwai om pinokito oku'd Tuhan di Yosua, i Boyoon dot Agayo dot Imam, do poingkakat do hiri'd toguang do moloikat do Tuhan. Om poingkakat nod hiri'd toning di Yosua om i Rogon, do posodia' nod papasala' dau. 2 Om boros ka di moloikat do Tuhan dot id Rogon diri, “Tuhan no o momohukum diya', oi Rogon! I Tuhan dot osianan do Yorusalim o momohukum diya'. Tu' iti nopo tulun om miagal pod tompok do kayu di kinodong do mantad id tapui,” ka dau. 3 Om hiri no i Yosua do poingkakat do kirasuk dit omurong tomod. 4 Om boros ka di moloikat dot id piro-piro o susuhuon dau di hilo'd surga, “Ngoyo' dokoyu iduwo' ilo rasuk dot omurong do poimpakai diti tulun diti,” ka dau. Om boros kaddi dau dot id di Yosua, “Noidu' ku no i dusa nu om onuan ku nondo iya'd rasuk do wagu do pakayon nu,” ka dau. 5 Om suhuo' no di moloikat i piro-piro o susuhuon dau do monigar di Yosua do sigar dit opulang. Om wonsoyo' no diyolo' o miagal diri, om rosukai diyolo' iyau do rasuk di wagu. Om poingontong diyolo' i moloikat do Tuhan. 6 Om sunudai noddi di moloikat i Yosua di 7 pinoboros do Tuhan do poingkaa, “Ondung mumboyo' ko dot oturan ku om momonsoi ko di karaja' do nakatahak ku diya', om kotilombus ko i' do momohuruan do hiri'd Walai'd Sasambayangan dot Agayo om hiri'd piro-piro o natad do hilo'. Om pokinongohon ku indo o sambayang nu do miagal do pokikinongou ku do sambayang di moloikat dot id toguang ku. 8 Iyo nopoddi om pokinongou no kopio, oi Yosua, i Boyoon dot Agayo dot Imam, om iyokoyu it imam do suwai. Om iyokoyu no o poiyaan di maso dot osonong dot id dabantalan. Om pointalangon ku nondo i susuhuon ku di roitan dot i ‘Tolid’ do tontok diri! 9 Poilihon ku nondo dot id dotoguangan di Yosua ot iso' o watu di turu' o sunduk. Om pokikiron ku nondo o tulis do hiri. Om insan no o tadau do pataamon ku o dusa do mantad id pomogunan diti. 10 Om orikot nopondo i tadau'ddi om sompori-pori kou nopondod mangalap di songkoduwo dokoyu do rumikot do mongoi pomurimon di kouludan om kosimbayanan do hiri'd kabun dot anggur om koguasan dot ara dokoyu,” ka dau.
I Potimpakan do Lampung do Nokito dot id Pinointalang
1 Om rikot no kawagu i moloikat di minoro-boros doho' om ngoyo' oku no dau posikai, do miagal pod minomosik do tulun di koodop. 2 “Nunu ot okito nu?” ka dau do minonguhot doho'. Om boros kangku'd suminimbar, “Okito ku ot iso' o potimpakan do lampung do tamas do winonsoi. Hiri nopod dompok kopio'ddi om haro o mangkuk do poiyanan do tumau. Om hiri nod potimpakan do lampung do pointutuk di mangkuk diri om haro o turu' o lampung do pointimpak, om otikid nopori do posusukan do turu' o rombu. 3 Om haro o duwo kayu'd saitun do miampaping di potimpakan do lampung,” kangku. 4 Om uhoto' ku no i moloikat, “Nunu o komoyon ngai'dti?” kangku. 5 “A' ko toi koilo?” ka dau do minonguhot doho'! “Amu', a' oku i' koilo, oi Tuan,” kangku.
Batos do Kinorohingan dot id di Sorubabil
6 Om sunudai oku no di moloikat do poboros dot id di Sorubabil diti boros do mantad id Tuhan do poingkaa, “Kamanang ko i' nga' okon i' ko' i kokoriso' do soudor, ko' i kokoriso' nu o papamanang, suwai ko' i Rusod ku. 7 Irad piya daa do nuluhon o kogoyoo' di kaantob diya' nga' oidu' i' iri. Om wonsoyon nu indo kawagu i Walai'd Sasambayangan dot Agayo. Om soira' nopondod powonsoyon nu i watu di kolimpupuson no do powonsoyon om mimboros ngai' nondod opuhod i tulun dot, ‘Olumis, olumis!’ ka,” ka. 8 Om haro po kawagu o pinoboros do Tuhan dot id doho'. 9 Boros ka dau, “Nokowonsoi nod i Sorubabil i watu do poimpahan di Walai'd Sasambayangan dot Agayo om opongo indo dau i Walai'd Sasambayangan dot Agayo'ddi. Om abayaan nopondo iti om koilo nogindo kopio i tulun ku dot iyoho' o minonuhu' diya' dot id diyolo'. 10 Oluhoi no daa o ginawo diyolo' tu' a' i' kosongkuro o koburuon di wonsoyon diyolo'. Nga' okito indo diyolo' i Sorubabil do tumuntun do maal di Walai'd Sasambayangan dot Agayo, om ongotood nondo iyolo',” ka dau. Om boros ka di moloikat dot id doho', “Ilo' nopo turu' o lampung nga' poiyaan di turu' o mato do Tuhan, i miontong do pointongkop diti pomogunan,” ka dau. 11 Om uhoto' ku no kawagu iyau, “Nunu o komoyon dilo duwo guas do saitun do miampaping dilo potimpakan do lampung? 12 Om nunu o komoyon dilo duwo o raan do saitun dot id toning dilo duwo o solunsug do tamas, i koluyungon di tumau do saitun?” kangku. 13 Om boros ka dau dot id doho', “A' ko toi koilo?” ka dau. “Amu', a' oku i' koilo, oi Tuan,” kangku. 14 Om boros kaddi dau, “Iti no i duwo tulun do nopili'd Kinorohingan om i siniliu dau do mogobi-obi' dau, i Tuhan do koinsanai'd pomogunan,” ka dau.
I Karatas do Linopi do Mintulud do Nokito dot id Pinointalang
1 Om ontong oku no kawagu, om kokito ku no o karatas do linopi do mintulud. 2 Om uhoto' oku no di moloikat ondung nunu ot okito ku. Om simbaro' ku no iyau dot, “Okito ku ot iso' o karatas do linopi do mintulud. Konoruo' nopoddi om siam o mito, om kalaabo' no om apat om satanga' mito,” kangku. 3 Om boros kaddi dau dot id doho', “Ilo' nopo om pinotulisan di popol dot id pointongkop diti pomogunan. Om hiri nopod sampaping di karatas diri om pinotulisan do boros dot oinsanan nopondo o gampanakau dot ouyung do mantad hiti'd pomogunan diti; om hiri nod sampaping kawagu om pinotulisan dot oinsanan nopo dot ouyung i tulun di mongudut do sumumpa'. 4 Om boros kad Tuhan it Osundu Kopio, om porikoton nondo dau i popol diri, dot id pointikid-tikid di walai di gampanakau om i walai di mongudut do sumumpa'. Om oontok kasai' nopondo i walai diyolo'ddi do popol diri do gisom dot angaraag,” ka dau.
I Tondu' dot id Suang do Balatak do Nokito dot id Pinointalang
5 Om intalang po kawagu i moloikat diri om boro-boros nod, “Ontong pogi'! Haro po kawagu o rumikot,” ka dau. 6 “Nunu'ri?” kangku'd minuhot. Om boros ka dau, “Balatak, om iri no o poiyaan do dusa do koinsanai'dti pomogunan,” ka dau. 7 Iri nopo balatak diri om kisompon do tambaga'. Om tontok di poingontong oku, om pinoukab nogi' i sompon, om id suang nopo di balatak diri nga' haro o songulun o tondu' do poirikau'd hiri. 8 Om boros ka di moloikat, “Iti nopo tondu' om poiyaan do karaaton,” ka dau. Om pososoko' no dau kawagu i tondu'ddi do hiri'd balatak om posompono' no i sompon. 9 Om tingaha' oku no om kokito ku o duwo o tondu' do tumulud do kumaa ponong id doho' om kitalad iyolo' dit okoris tomod do miagal pod talad do montis dit angagayo. Om ngoyo' no diyolo' tangahai i balatak diri om tulud no, do pointangau i balatak diri. 10 Om uhoto' ku no i moloikat, “Honggoon diyolo' ilo balatak dilo'?” kangku. 11 Om boros ka dau, “Hiloon id Babil. Om wansayan nondo diyolo'd walai do tingolig ilo' do hiloo'. Om opongo nopondo i walai do tingolig diri om pohirion nondo i balatak diri do maan do tukuon,” ka dau.
Apat o Korita'-Kuda' do Nokito dot id Pinointalang
1 Om haro po kawagu o pinointalang dot id doho'. Om baino' noo om nokito ku ot apat o korita'-kuda' do don sumasangod do minimbulai dot id pialatan do duwo o nulu-nulu do tambaga'. 2 Iri nopo korita'-kuda' di koiso' om ginayat do kuda' dit angaragang, om iri no koduwo om ginayat do kuda' dit ongoitom, 3 om iri no kotolu om ginayat do kuda' dit ongopurak, om iri no kaapat om ginayat do kuda' di balang-balang. 4 Om uhoto' ku noddi i moloikat, “Oi Tuan, nunu o komoyon diti korita'- kuda'dti?” kangku. 5 Om boros ka dau, “Iti no it apat o tongus do mantad id apat o kinoiyonon; koririkot diyolo' do mantad hilo'd dotoguangan do Tuhan do koinsanai'dti pomogunan,” ka dau. 6 Iti nopo korita'-kuda' do gayaton di kuda' dot ongoitom om pakayaan ponong id utara, do mongoi'd hilo'd Babil, om iri no kuda' dot ongopurak om pakayaan ponong id kotonobon, om iri no kuda' do balang-balang om pakayaan ponong id salatan. 7 Om tontok di suminoliwan i kuda' di balang-balang diri, nga' a' no iyolo' kaandad-andad do kaangayan kapagantangai diti pomogunan. Om boros ka di moloikat, “Ngoyo' no dokoyu antangai iti pomogunan!” ka dau. Om ngoyo' no diyolo' antangai. 8 Om giakai oku noddi di moloikat, “Iri nopo kuda' di pinakayaan do hilo'd Babil om pinoposogi-sogit do kototogod do Tuhan,” ka dau.
Monuhu' do Monupi' di Yosua do Tupi' di Don Raja'
9 Om poboroso' nod Tuhan dot id doho' o boros diti. 10 Boros ka dau, “Ngoyo' i porsombahan di pinopuhawang di Hildai, om i Tobia, om i Yodaya, i piro-piro tulun di wagu koguli' do mantad id pomogunan do pisangod. Om igitan no i porsombahan diyolo'ddi om tumilombus nod mongoi do hilo'd walai di Yosia, i tanak di Sipania. 11 Momonsoi nod tupi' do don raja' do pirok om tamas di pinatahak diyolo' o wonsoyon, om potupion i' iri di Yosua, i Boyoon dot Agayo dot Imam, i tanak di Yosadak. 12 Om sunudan no iyau do poingkaa o boros do Tuhan, it Osundu Kopio, ‘Iri nopo tulun di roitan dot I Tolid om minggayo nondo do hiri'd koundorongon dau om wonsoyon nondo kawagu dau i Walai'd Sasambayangan dot Agayo di don Tuhan. 13 Om iyau no i momonsoi di walai'ddi om iyau o kaanu do karayahan do miagal do don raja', om iyau o momorinta' do tulun dau. Om haro nondo o songulun ot imam do mingkakat do hiri'd toning do tirikohonon dau di don raja', om miuhup nondo iyolo' do kumaraja' dot id suang do kosimbayanan om kouludan,’ kanto. 14 Om iri nopondo tupi' do don raja' diri om poopion do hilo'd Walai'd Sasambayangan dot Agayo do maan do kopomuhandaman di Hildai, om i Tobia, om i Yodaya om i Yosia. 15 Om haro nondo o tulun di poingiyon do hilo'd sodu' do rumikot do mongoi uhup do momonsoi kawagu di Walai'd Sasambayangan dot Agayo. Om owonsoi nopondo kawagu iri om koilo nogindo iyolo' dot iyoho', i Tuhan it Osundu Kopio, o minonuhu' diya' dot id diyolo'. Om abayaan ngai' i' iti ondung umboyoon no kopio dokoyu i pinonuhuan ku dokoyu, iyoho' i Tuhan, i Kinorohingan dokoyu,” ka dau.
Pinasala' do Tuhan i Sambayang do Mikuwo'd Puasa di Maan Toomod
1 Tontok di kaapat do toun di Raja' Darius do momorinta', di tadau'd kaapat do tulan di kosiam (i tulan do Kislip), om boro-boros no o Tuhan dot id doho'. 2 Sinuhu' di tulun do Baitol i Sarisir, om i Rigim-Milik do miwoyo' di tulun diyolo' do mongoi'd hiri'd Walai'd Sasambayangan dot Agayo do Tuhan, it Osundu Kopio, do mongoi sambayang do mokianu'd barakat do Tuhan, 3 om mongoi ponguhot di piro-piro ot imam om i piro-piro o nabi do tuhoton diti, “Potilombuson po tuu dahai i pogigihad do kinaraagan do Walai'd Sasambayangan dot Agayo, om sumambayang do mikuwo'd puasa do pointikid di tulan do kolimo do miagal di nowonsoi dahai do piro-piro toun do koloido'?” ka diyolo'. 4 Om iti no o boros do Tuhan do pinoboros dau dot id doho'. 5 Boros ka dau, “Sunudan no i tulun di poingiyon do hiti'd pomogunan diti om i piro-piro ot imam, do tontok nopo di sumambayang iyolo' do mikuwo'd puasa, om di mogihad iyolo' do tontok do tulan do kolimo om tulan do koturu' do solinaid do turu' nohopod o toun diri, om okon i' ko' pomusou doho'. 6 Om tontok di minoginakan om minonginum-nginum iyolo' om maan no diyolo' iri do ponguru di korohian do tinan diyolo',” ka dau. 7 Om iri no o pinoboros do Tuhan do pinolombus di piro-piro o nabi dit id gulu po, do tontok di maso pod osimbayan o bandar do Yorusalim om di poimponu' pod tulun i bandar diri. Om di maso pod ogumu' o tulun do poingiyon do hiri'd kabandaran do posorili' di bandar dot agayo, om hilo'd kinoiyonon do ponong id salatan om hilo'd guas do nuluhon di ponong id kotonobon.
I Kosurilogo' Diyolo' o Kinatanggai-tanggayan Diyolo' dot id Pomogunan do Pisangod
8 Om poboroso' nod Tuhan, it Osundu Kopio, o boros diti dot id doho', 9 “Di nopo di gulu po om sinunudan ku o tulun ku do boros diti. ‘Mositi' nod antaan-taan kopio dokoyu om owonsoi i' it otulid, om mositi' nod popointalang kou do kopuhawango' om kosianan dot id koinsanai'd tulun. 10 Kada' dokoyu inggorito' i tongoondu' do nopuadan, om i tangaanak dot aiso' o molohing, om i tulun do bansa'd suwai di poingiyon do poirolot dokoyu, ko' isai nopo i kikosusaan. Om kada' kou pogihum do ralan do pokoruol do tulun do suwai,’ ka. 11 Nga' pinokodou nogi' di tulun ku o ginawo diyolo' om a' iyolo' minokinongou. 12 Om pinokodou diyolo' o ginawo diyolo' do gisom do miagal pod watu kokodou. Om kotogod oku noddi tomod tu' a' i' iyolo' tuminanud di ponudukan ku do pinolombus di piro-piro o nabi ku di gulu po. 13 Om a' oku no suminimbar di sambayang diyolo'. Tu' a' i' iyolo' minokinongou do tontok di minoro-boros oku. 14 Om miagal oku poddi do tongus dot opuhod do minonilib diyolo' tu' pinakaa ku iyolo' dot id pomogunan do suwai. Om nopogitotongkiadan poddi iti tana' dot osonong, om aiso' no songulun piya do poingiyon do hiti,” ka dau.
Minamatos o Tuhan do Mononduli' do Yorusalim
1 Om poboroso' nod Tuhan it Osundu Kopio, o boros diti dot id doho', 2 “Orohian oku no daa kopio do monguhup do Yorusalim tu' osianan oku i' kopio di tulun do hilo', gisom do nobinsuhu' oku'ddi do tumogod di pisangod dau. 3 Gumuli' oku indo do hilo'd Yorusalim, i bandar ku dit olidang, om mundorong oku'd hilo'. Om roitan nondo'ri do bandar dit otorodok, om iri no nuluhon do Tuhan it Osundu Kopio, om roitan do nuluhon dit olidang. 4 Om songirikau nondo kawagu do hiri'd pogisasalawatan do hiri'd bandar i komolohingan no, om i taki-aki om i todu-odu' dot ongkisukud poo do gama' do komolohingo'. 5 Om iri nondo karalan-ralanan nga' oponu' pod tangaanak do kusai om tondu' do minganak-anak. 6 Om a' no doti' daa milo'd owonsoi o miagal diti dot osorou di noolu-olu' do bansa'ddi, nga' milo ku i' iti do wonsoyon. 7 Om posoliwanon ku nondo i tulun ku do mantad id piro-piro o pomogunan do pisangod diyolo'. 8 Om pogulion ku iyolo' do mantad hilo'd koulayon om hilo'd kotonobon, om poiyonon ku nondo iyolo' do hilo'd Yorusalim. Om osiliu nondo iyolo'd tulun ku, om osiliu oku iyoho' do Kinorohingan diyolo', do momorinta' diyolo' do mikuwo'd otorodok om otulid,” ka dau. 9 Boros kad Tuhan dot id tulun dau, “Pokoriso' no ginawo dokoyu! Tu' rongo-rongohon no dokoyu o boros do miagal di pinoboros di piro-piro o nabi do tontok di powonsoyo' i' i pinoimpahan di winonsoi kawagu iti Walai'd Sasambayangan dot Agayo. 10 Tu' tontok dit a' po norikot o maso'ddi om aiso' i' o songulun piya do milo'd mamagadsi' do tulun ko' moniwa' do tayam-tayam, om aiso' o kosimbayanan tu' gangahon nopo do pisangod. Om pinogitotogod ngai' ku i tulun. 11 Nga' baino' nopo, om suwai no o wonsoyon ku dot id bansa'dti di noolu-olu'. 12 Osimbayan indo iyolo' do patanom di totonomon diyolo'. Om mongua' it anggur diyolo', om posuni do totonomon iti tana', om asaru' do rumasam. Patahakon ngai' ku nopondo o barakat diti dot id tulun ku di maso pod poimpasi, do mantad id bansa'dti. 13 Oi tulun do Yohuda om Israil! Di nopo di gulu po om poingkaa o pomomopol di tulun do bansa'd suwai, ‘Oontok kou po daa iyokoyu do kosusaan do miagal di nokoontok do Yohuda om Israil,’ ka. Nga' posion ku i' iyokoyu om mogiboro-boros indo i bansa'd suwai do poingkaa, ‘Maha' daa om kaanu ko'd barakat do miagal di naanu do Yohuda om Israil!’ ka. Iyo nopoddi om pokoriso' no o ginawo dokoyu om kada' kou kooris,” ka dau. 14 Om boros kad Tuhan, it Osundu Kopio, “Tontok di pinotogod oku di komolohingan dokoyu, om pomusorou oku noddi do poporikot do hukuman dit awagat dot id diyolo', om a' ku no winolihan o pomusarahan ku, tu' wonsoyo' ku nopo kopio i nosorou mantad ku. 15 Nga' baino' noddi om mamarakat oku no do tulun do Yorusalim om Yohuda. Om kada' kou nondo kooris. 16 Om iti no o piro-piro ponuhuan dit apatut do wonsoyon dokoyu: Poboroson no it otopot dot id koinsanai'd tulun. Om wonsoyon no it otulid om otopot do hilo'd pomisaraan, i milo do popiulud. 17 Kada' kou pomusorou do mogihum do ralan do pokoruol dot isai nopo o tulun, om kada' kou pongudut do sumumpa'. Tu' araatan oku i' di goudut, om it a' otulid om it orongit,” ka dau. 18 Om poboroso' nod Tuhan it Osundu Kopio, o boros diti dot id doho' do polombuson dot id tulun dau, 19 “Iri nopo i sumambayang do mikuwo'd puasa di pohoroon kasai' daa do tontok di tulan do kaapat, om kolimo, om koturu', om kohopod, om osiliu nondod poginakanan di poimponu' do kaarapadan om kataadan dot id pogialatan do tulun do Yohuda. Om mositi' no dot asanangan kou dit otopot om it otulid,” ka dau. 20 Om boros kad Tuhan, it Osundu Kopio, “Rumikot no o maso do mongoi'd hilo'd Yorusalim o piro-piro tulun do mantad id ogumu' o bandar. 21 Om mogiboro-boros pondo i tulun do mantad id iso' o bandar dot id tulun di mantad id bandar do suwai do poingkaa, ‘Kainou mongoi tuku' dot id Tuhan, it Osundu Kopio, om mongoi sambayang do mokibarakat dau. Kainou pogi' tumanud dahai!’ ka. 22 Om ogumu' nondo o tulun om ogumu' o bansa' do mantad id pomogunan dit ongokoris do mongoi do hilo'd Yorusalim do mongoi sambayang dot id doho', i Tuhan it Osundu Kopio, do mokianu'd barakat. 23 Om tontok nopondo do maso'ddi om haro i' o hopod o tulun do bansa'd suwai do mongoi rapou do songulun o Yohudi om momoros dot, ‘Orohian iyahai do kaanu do kolumaagan do miagal dokoyu, tu' nokorongou iyahai do barakatan kou'd Kinorohingan,’ ka,” ka dau. Iyo noddi o pinoboros do Tuhan, it Osundu Kopio.
Hukuman dot id Bansa' di posorili' dot Israil
1 Poingkaa no o boros do Tuhan: Nokoboros no dau do momohukum iyau do pomogunan do Hadrak om bandar do Damsik. Okon i' ko' iri no sinakagon dot Israil o songonuon do Tuhan, suwai ko' iri nogi' i bandar dot agayo do pomogunan do Siria nga' don Tuhan i'. 2 Pomogunan do Hamat, i poiwolit do pomogunan do Hadrak, nga' don Tuhan i', om iri nogi' i bandar do Tirus om Sidon, do mitonggoi di toilaan di tulun do hilo'. 3 Minomonsoi o Tirus do tolig dau om minonimung nogi' do pirok om tamas dot ogumu' gisom do miagal pod pupuk do hilo'd ralan o kogumuo'ddi! 4 Nga' ngoyon indod Tuhan onuo' o koinsanai di haro dot id Tirus. Om pataamon nondod Tuhan i kakayaan do bandar diri do hilo'd rahat om ouu dot osorob i bandar diri. 5 Om ooris nondo i bandar dot Askilon do kokito'ddi, om kopuriman do moddosi o bandar do Gasa. Om iyo nogiddi ot Ikron tu' aiso' nondo o pagandasan dau. Oidu' nondo i raja' do Gasa, om opogitotongkiadan ot Askilon. 6 Om iri nondo i tulun do sinakagon do piro-piro o bansa' o poingiyon do hilo'd Asdod. Boros kad Tuhan, “Intingayamon ku nondo iti tulun do Pilistin dit angasawat o ginawo. 7 Om a' nondo iyolo' mangakan do daging do mitonggoi'd raha', ko' nunu nopo i taakanon do pogoduhan. Osiliu ngai' nopondod tulun ku, i tulun di noolu-olu' do poimpasi, om kohompit di tulun ku om osiliu dot iso' o pinuruan do sompiiyon dot id suang do payat do Yohuda. Om osiliu do tulun ku i tulun dot Ikron do miagal di tulun do Yobus di gulu po. 8 Om intirungan ku nondo i pomogunan ku om antaban ku o pisangod di maya'd hiri. Om a' ku pologoson i tulun dot araat do monginggorit kawagu di tulun ku. Tu' nokito ku no o kinoinggoritan di tulun ku,” ka dau.
I Raja' do Koimbagu
9 Kotood kou no, kotood kou no, oi tulun do Sion! Pimpangkis nod atataadan, oi tulun do Yorusalim! Antangai pogi' nga' rumikot no dot id dokoyu i raja' dokoyu! Rumikot iyau do mikuwo'd kataadan do nakamanang, nga' osiriba' i' o ginawo dau do poinsakai'd kaladai --- poinsakai'd kaladai dit okoro' po di pagagandaran. 10 Om boros kad Tuhan, “Pataamon ku nondo i korita'-kuda' do don sumasangod di hilo'd Ipraim om punsoon ku i kuda' do hilo'd Yorusalim; om raagon ngai' ku i pana' do maan do sumangod. Om iri nondo i raja' dokoyu o papaharo do piuludan dot id pogialatan do bansa'; kogoyoo' nopo do pomorintaan dau om mantad id rahat do tiso' om gisom do korikot dot id rahat do suwai, mantad hilo'd Bawang dot Iprat om gisom do hilo'd tisan diti tana',” ka dau.
Koponondulian do Koiyon-iyono' di Tulun do Songonuon do Kinorohingan
11 Om boros kad Tuhan dot id tulun dau, “Polobuson ku i' o tulun nu, poiduwon ku i' iyolo' do mantad id pomogunan do pisangod, i miagal pod torobong dot aiso' o waig. Tu' haro i' o tumpongo ku dot id dokoyu, i pinogirot do raha' do porsombahan di sinumbali'. 12 guli' kou no, oi tulun di natanggayan do pisangod, iyokoyu i haro noddi o pagandasan. Guli' kou no do hilo'd kinoiyonon dit intirungon dokoyu. Sunudan ku iyokoyu do dinondo, do barakatan ku indo iyokoyu dot induwo kogumu'. 13 Pakayon ku nondo o Yohuda do miagal di pawakasan do pana' di pakayon do soudor, om Israil no om miagal di pana' di papanaon no. Om pakayon ku nondo i tulun do Sion do miagal do gayang, do sumaap di tulun do Yunani,” ka dau. 14 Om mintalang nondo o Tuhan dot id tulun dau; om pawakason dau i pana' dau do miagal do kodumaat. Pounion nondod Tuhan, it Asawat Kopio, i torumpit, do tanda'd sumangod, om rumikot iyau do mikuwo'd tongus dot opuhod do mantad hilo'd salatan. 15 Intirungan id Tuhan, it Osundu Kopio, i tulun dau, om patayon diyolo' i pisangod diyolo'. Om mimpangkis pondo iyolo' dot id pisangadan do miagal di tulun di naawuk, om paawason diyolo' o raha' di pisangod diyolo'. Om miagal pondo iri do raha' di porsombahan do sinumbali' do potuntugon do hiri'd pananaraban do porsombahan. 16 Om orikot nopondo o tadau'ddi, om poiduwon nondod Tuhan i tulun dau, do miagal di gompomogompi'd dumba', do popoidu' di dumba' do mantad id koligagaanan. Om mogulinau nondo iyolo' do hilo'd pomogunan do Tuhan do miagal do watu dit olumis om it agayo o gatang di mogulinau dot id tupi' do raja'. 17 A' nondo ogina-gina' o kosonongo' om kolumiso' di pomogunan diri! Om kumoris nondo i tulun dit ongomulok po do kaakan di gandum om koinum di waig dot anggur do hilo'.
1 Iti no o boros do pinoboros do Tuhan dot id di Maliaki do poboroson dot id tulun dot Israil.
Kosianan do Tuhan dot id Israil
2 Boros kad Tuhan dot id tulun dau, “Osianan kasai' oku i' dokoyu,” ka dau. Nga' boros ka diyolo', “Poingkuro ko do pinopointalang do kosianan nu dot id dahai?” ka. Om boros kad Tuhan, “Miobpinai i' daa iyo Isau di Yakub, nga' ninsianan ku i' i Yakub om i sinakagon dau. 3 Nga' naraatan oku i' di Isau om i sinakagon dau. Rinaag ku i pomogunan di Isau di hilo'd sokid om pinologos ku i tana' do pinogiiduan om iyonon poddi do nintorusan,” ka dau. 4 Ondung momoros daa i sinakagon di Isau, i tulun dot Idom do, “Naraag i kabandaran dahai nga' wonsoyon i' dahai kawagu iri,” ka, om simbaron indo do Tuhan iyolo' do poingkaa, “Pologoson nopo iyolo' do momonsoi kawagu'ddi nga' ngoyon ku indo raago' kawagu. Om roitan nondo iyolo' do tulun do ‘Pomogunan dit Araat’ om ‘I bansa' do katagadan do Tuhan do gisom dot alaid,’ ka,” ka dau. 5 Om mato nondo kopio di bansa' dot Israil o kokito'ddi, om momoros nondo iyolo' dot, “Okoris i' o Tuhan dot id soliwan piya do pomogunan dot Israil!” ka.
Tinogod do Tuhan it Imam
6 Om boros kad Tuhan, it Osundu Kopio, dot id imam, “Pusohon i' do tanak i tapa' dau, om pusohon di susuhuon i tuan dau. Om iyoho' no o tapa' dokoyu, nga' nokuro tu' a' kou momusou doho'? Tuan oku i' dokoyu nga' nokuro tu' a' kou oronok doho'? Indaraaton oku i' dokoyu, om inda' ka do muhot kou i' daa dot, ‘Poingkuro iyahai do minongindaraat diya'?’ ka no dokoyu. 7 Poingkaa kou do minongindaraat doho': Pinapatahak kou dot id doho' do taakanon dit aiso' o guna' do hiri'd pananaraban do porsombahan. Om monguhot kou po daa do, ‘Poingkuro iyahai dot a' minomusou diya'?’ ka. Sunudai ku pogi' iyokoyu --- a' kou minomusou di pananaraban do porsombahan dot id doho'. 8 Soira' nopod mongoit kou do tayam-tayam di nobolou ko' i sumakit ko' i kakung do maan do patahakon dot id doho', om ondos daa dokoyu om aiso' o sala'ddi? Umbal kou pogi' do papatahak do tayam-tayam do miagal diri dot id gobunor! Orohian i' tuu iyau dokoyu om osonong i' tuu o wonsoyon dau dot id dokoyu?” ka dau. 9 Umbal kou pogi' do mokiinsian do Kinorohingan, oi imam. A' no moti' dau simbaron i sambayang dokoyu, om dokoyu id sala'ddi. 10 Om boros kad Tuhan, it Osundu Kopio, “Orohian oku nogi' daa kopio do haro o tongoiso' dokoyu do mongoi podtobon di wawayaan do Walai'd Sasambayangan dot Agayo om aantaban i' i mongoi parakit do tapui dit aiso' o guna' do hilo'd pananaraban do porsombahan dot id doho'. A' oku i' orohian dokoyu; om a' ku romiton i porsombahan do patahakon dokoyu dot id doho'. 11 Momusou ngai' i' doho' o tulun do mantad id koinsanai'd bansa' do pointongkop diti pomogunan. Honggo nopo nga' modtutud i' iyolo' do kominyan dot id doho' om papatahak do porsombahan dit osonong do pomusou diyolo' doho'. Momusou ngai' i' iyolo' doho'! 12 Nga' iyokoyu no om a' i' momusou doho' do tontok di momoros kou dot aiso' o guna' di pananaraban do porsombahan dot id doho', om tontok di patahak kou do taakanon di niada-ada' dokoyu do hiri'd sakai di pananaraban do porsombahan diri. 13 Boros ka no dokoyu, ‘Apaasan noddi iyahai do mingwonsoi ngai'dti,’ ka. Om a' kou no momusou doho'. Porsombahan nopo dokoyu dot id doho' om i tayam-tayam do pinanakau om i nakakung ko' i sumakit. Ondos daa dokoyu om romiton ku iri? 14 Ousung po i tulun di gomponipu' tu' patahak do tayam-tayam dit aiso' o guna' dot id doho', om haro i' daa o tayam-tayam dit osonong do hiri'd baanan dau di nakabatos dau do patahakon dot id doho'! Tu' iyoho' nopo om raja' dot agayo, om oronok ngai' nopo doho' o tulun do mantad id koinsanai'd bansa',” ka dau.
1 Om boros kad Tuhan, it Osundu Kopio, dot id imam, “Iti no o ponuhuan ku dokoyu: 2 Pusohon oku no dokoyu dot i wonsoyon dokoyu o pomusou. Ondung a' kou mokinongou diti poboroson ku om ousung kou no. Papalan ngai' ku nopo it aramit dokoyu di maan daa dokoyu'd kosukup-sukupan. Otopot nopo kopio om napapalan ku no ngai' iri, tu' a' i' dokoyu pinadul kopio i pinonuhuan ku. 3 Hukuman ku nondo i tangaanak dokoyu om pokisason ku o rabas dokoyu dot id taii' di tayam-tayam do patahakon dokoyu do maan do porsombahan, om pokoyoon kou nondo do hilo'd kinotimungon do taii'. 4 Om koilo kou nogindo do nokoboros ku dokoyu o pinonuhuan diti, om a' indo araag i tumpongo ku dot id imam, iri no i sinakagon di Liwi. 5 Id suang nopod tumpongo ku'ddi om pinabatos ku dot id diyolo' do kaanu iyolo'd koposion om kasanang-sanangan, om iri no kopio i pinatahak ku diyolo', om pusohon oku i' diyolo'. Om tontok nopoddi om minomusou i' kopio iyolo' om ruminonok iyolo' doho'. 6 Om pinotuduk diyolo' it otopot om okon i' ko' i kasala'. Om poingulud kasai' iyolo' doho'; tu' okon nopo ko' minomonsoi iyolo' dit otopot, nga' minonguhup nogi' iyolo' do tulun do suwai do tumingkod do momonsoi'd araat. 7 Om karaja' i' dot imam do potuduk di ponudukan dot otopot do pasal doho', i Tuhan, it Asawat Kopio. Om apatut no do mongoi o tulun pokituduk do korohian ku do mantad id diyolo' tu' iyolo' no o susuhuon ku. 8 Nga' baino' noddi om tuminolikud kou iyokoyu it imam, di ralan dit otopot. Minangangat nogi' dot ogumu' o tulun i ponudukan dokoyu do minomonsoi di kasala'. Rinaag dokoyu i tumpongo do winonsoi ku dot id dokoyu. 9 Om gowoi poddi om iyoho' nga' mominsuhu' no di tulun dot Israil dot a' momusou dokoyu tu' a' kou i' mumboyo' do korohian ku. Om soira' nopo do monuduk kou'd tulun ku, om a' i' dokoyu iyoon o ponunuduk diyolo',” ka dau.
A' i Tulun Tuminorodok dot id Kinorohingan
10 Okon toi ko' iso-iso' i' o tapa' toko'? Okon toi ko' iso-iso' i' o Kinorohingan do minomonsoi dati'? Nga' nokuro'ddi tu' a' toko' mogisulung-sulung do batos, om nokuro tu' a' toko' podulon i tumpongo do Kinorohingan dot id komolohingan toko'? 11 A' di tulun do Yohuda sinulung i batos diyolo' dot id Kinorohingan om araat tomod o winonsoi diyolo' do hilo'd Yorusalim om pointongkop diti pomogunan. Om sinosomu' nogi' diyolo' i Walai'd Sasambayangan dot Agayo di kosianan tomod do Tuhan. Om minanansawo i tongokusai do tongoondu' di tumuku' dot id ponokokinorohingan do bansa'd suwai. 12 Pologoson nopo dot uyungon do Tuhan do mantad id tulun dot Israil o tulun do miagal diri, om a' no iyau pologoson kawagu do mongoi amung do papatahak do porsombahan dot id Tuhan, it Osundu Kopio, do moyo' diti bansa' toko'. 13 Iti po kawagu i winonsoi dokoyu. pinonu' dokoyu'd romou i pananaraban do porsombahan dot id Tuhan, tu' miningihad kou om mininglompud do minihad tu' a' noddi dau romiton i porsombahan do patahakon dokoyu. 14 Muhot kou ondung nokuro tu' a' dau romiton iri. Om a' pogi' dau romiton iri nga' noilaan no dau dot a' dokoyu sinulung i batos dokoyu dot id tondu' di kinawin dokoyu dit omulok kou po. Iyau nopo om tontok i' daa dokoyu, nga' a' i' dokoyu sinulung i batos dokoyu dot id dau, mulong piya do minamatos kou dot id toguang do Kinorohingan do tumorodok kou dot id dau. 15 A' toi do Kinorohingan pinoiso-iso' o tinan om rusod dokoyu? Nunu toi o kinopongiyo'ddian do Tuhan diri? Kinopongiyo'ddian nopo dau'ddi nga' maganak kou nondo do tangaanak di songonuon kopio'd Kinorohingan. Iyo nopoddi om antaan-taan no kopio dokoyu dot araag i batos dokoyu dot id sawo dokoyu. 16 “Araatan oku di miada',” kad Tuhan, i Kinorohingan dot Israil, “Araatan oku no kopio ondung haro o tiso' dokoyu do momonsoi do miagal diri karaat dot id sawo dau. Antaan-taan no kopio dokoyu dot araag i batos dokoyu do tumorodok dot id sawo dokoyu,” ka dau.
Oruhai no i Tadau'd Kopomutusan
17 Minongudipon nod Tuhan ino koboro-boroso' dokoyu. Nga' muhot kou i' daa'ndo do poingkaa, “Poingkuro kopio iyahai do minongudipon do Tuhan?” ka. Poingkaa o pinongudipon dokoyu dau, minomoros kou dot, “Osonong i' i gompomonsoi'd araat dot osorou'd Tuhan, it Osundu Kopio; asanangan i' iyau diyolo',” ka dokoyu. Om muhot kou do, “Honggo kopio i Kinorohingan dit otulid kaka'ddi?” ka dokoyu.
1 Om boros kad Tuhan, it Osundu Kopio, “Suhuon ku nondo i susuhuon ku do mongoi posodia' do wayaan ku. Om sigog indo do rumikot o Tuhan dit ihumon dokoyu do hilo'd Walai'd Sasambayangan dot Agayo. Om rumikot nondo i susuhuon dit andad-andadon no dokoyu do mongoi posunud di tumpongo ku,” ka dau. 2 Nga' isai po mando o kasangal do tontok di tadau do korikatan dau? Isai po mando ot apasi do kointalang kopio iyau? Tu' miagal po iyau do sabun di kopulang kopio, om miagal do tapui di monompipi' do basi'. 3 Om rumikot nondo iyau do mongoi pomutus do miagal do tulun di mongisas om monompipi' do pirok. Om poingkuro nopo i modsusupu' do monompipi' di pirok om tamas, om iyo noddi i susuhuon do Tuhan do momolidang dit imam, om papatahak indo iyolo' di porsombahan di korohian do Tuhan. 4 Om korohian indod Tuhan i porsombahan dot igitan di tulun do Yohuda om Yorusalim dot id dau, do miagal di koubasanan di gulu po. 5 Om boros kad Tuhan, it Osundu Kopio, “Mintalang oku nondo dot id dokoyu do mongoi pomutus, om moro-boros oku nondo do pasal di tulun dit ongkiinigit do gimat, om i tulun di magampahu', om i popoboros do tudut do pasal do tulun do suwai, om i tulun di monipu' do mamagadsi' di songingkaraja' dot id dau, om i mongulok-ulok do tongoondu' do nopuadan om i tangaanak dot aiso' o molohing om i tulun di bansa'd suwai, saapon ngai' ku nopo o koinsanai'd tulun dit a' momusou doho',” ka dau.
Kapatahakan do Porsombahan di Sompihopod
6 Boros kad Tuhan, “Iyoho' no o Tuhan, om a' oku i' sumimban. Om iri no ot a' dokoyu kinopunsaan kopio, oi sinakagon di Yakub. 7 Iyokoyu nga' miagal nopo di komolohingan dokoyu di gulu po tu' tuminolikud dit oturan ku om a' minumboyo'ddi. Guli' kou no dot id doho', om gumuli' oku i' dot id dokoyu. Nga' muhot kou po do, ‘Poingkuro o wonsoyon dahai do gumuli' kawagu dot id diya'?’ ka. 8 Muhot oku dokoyu, apatut i' toi o tulun do monipu' do Kinorohingan? Atantu' nod amu', nga' monipu' kou i' iyokoyu doho'. ‘Poingkuro kopio?’ ka daa dokoyu do monguhot. Om boros kangku, ‘Id suang do hal do manahak do porsombahan do sompihopod om i porsombahan do suwai. 9 Ousung kou no ngai' tu' oinsanan nopo iti bansa' do monipu' doho'. 10 Igitan ngai' no i porsombahan dokoyu di sompihopod do hilo'd Walai'd Sasambayangan dot Agayo, om osima' i' do taakanon o hilo'. Umbalai oku pogi' dokoyu, om okito i' dokoyu do poiwangon ku ilo liligaon do surga om potuntugon ku i' dot id dokoyu o koinsanai dit ongosonong do gisom i' dot a' dokoyu aayi- ayi'. 11 Om a' ku indo pologoson o mangakan-ngakan do mamaraag di tanom dokoyu, om it anggur dokoyu nga' olimbagatan ngai' pod tua'. 12 Om oinsanan nopondo o tulun do mantad id koinsanai'd bansa' do mamarait dokoyu do tulun di nongkoundar tu' osonong i' kopio dot iyonon i pomogunan dokoyu,’ ka,” ka dau.
Batos do Kinorohingan do Monginsian
13 Boros kad Tuhan, “Araat tomod o pinimboros dokoyu do pasal doho'. Nga' muhot kou i' do, ‘Nunu kopio o pinimboros dahai do pasal diya'?’ ka dokoyu. 14 Poingkaa o pinoboros dokoyu, ‘Aiso' i' o guna' do mogobi-obi' do Kinorohingan. Nunu kopio o guna' do tumanud di ponuhuan do Tuhan, it Osundu Kopio, om nunu o guna' do mumbal do pointalang dot id dau do monosol toko' di nowonsoi toko'? 15 Okito nopo dahai om iri nogi' i tulun dit angasawat o ginawo ot ongosimbayan tomod. Okon nopo ko' rumuhang o kohoroo' di tulun dot araat, nga' mogumbal nogi' iyolo' do kolonuto' do ginawo'd Kinorohingan dot i wowonsoyon diyolo'd araat o pogumbal om aiso' i' o nunu-nunu dot osiliu dot id diyolo',’ ka dokoyu,” ka dau. 16 Om pogiboro-boros noddi i tulun dit oronok do Tuhan om pokinongoho' nod Tuhan, om norongou i' dau i pinoboros diyolo'. Om tuliso' noddi dot id iso' o buuk dot id toguang do Tuhan o ngaran do koinsanai di tulun dit oronok om momusou do Tuhan. 17 Boros kad Tuhan, it Osundu Kopio, “Osiliu indo iyolo' do tulun ku. Om tontok nopondo do tadau di kapamansayan ku di wonsoyon ku, om osiliu nondo iyolo' do tulun di songonuon ku. Om osianan oku nondo diyolo' do miagal di tapa' dot osianan di tanak di mogobi-obi' dau. 18 Om kokito pondo kawagu I tulun dit araat om I tulun dit osonong, om pisuayan do tulun di mogobi-obi' doho' om it a' mogobi-obi' doho',” ka dau.
Rumikot no o Tadau'd Tuhan
1 Om boros kad Tuhan, it Osundu Kopio, “Rumikot no i tadau do sorobon i tulun di minggayo-gayo om it araat do miagal do sakot do nokoring. Om tontok nopondo do tadau'ddi om ouu nopo iyolo' dot osorob, om aiso' no ot oolu'. 2 Nga' iyokoyu nopo i mumboyo' doho', om mulinau indo dot id dokoyu i sinundu ku do mamasi, do miagal di tadau om manahak do kolingasan do miagal di tinitiu do tadau. Om ongotood kou nondo do miagal di tangaanak do sapi' do tontok di polobuson do mantad id kandang tu' iyokoyu' nga' kalabus indo. 3 Om tontok nopod tadau do powonsoyon ku i wonsoyon ku, om aala' nondo dokoyu i tulun dot araat, om miagal pondo iyolo' do pupuk do pingulakan dokoyu. 4 Soroho' no dokoyu i ponudukan di Musa, i susuhuon ku. I piro-piro ot oturan om ponuhuan di pinoboros ku dau di hilo'd Nuluhon do Sinai dot umboyoon do koinsanai'd tulun dot Israil. 5 Nga' tontok dit a' po korikot i tadau'd Tuhan dot agayo om i korolosi kopio'ddi, i natantu' mantad ku'ddi, om porikoton ku nondo dot id dokoyu i Nabi Ilia. 6 Om piuludon nondo kawagu dau i tapa' dot id tangaanak diyolo'; om a' oku i' rumikot do mongoi pamaraag diti pomogunan dokoyu,” ka dau.
The New Testament of our Lord and Saviour Jesus Christ
Ngaran di Komolohingan di Yesus Kristus
1 Iti ngai' no ngaran di komolohingan di Yesus Kristus, i sinakagon di Daud, om i sinakagon di Abraham. Mantad nopo di Abraham om di gisom do napaganak i Daud om iti ngai' no ngaran do komolohingan di Yesus do nokotulis: 2-6 I Abraham, i Isak, i Yakub, i Yohuda om i piro-piro tobpinai di Yohuda, i Piris om i Sira (ngaran nopod tina' diyolo' om i Tamar), i Hisron, i Ram, i Aminadab, i Nahason, i Salmon, i Buas (tina' nopo dau om i Rahab), i Obid (tina' nopo dau om i Rut), i Isai, om i Raja' Daud. 6-11 Mantad no di Daud om gisom di natanggayan do pisangod o bansa'd Israil do hilo'd Babil om iti ngai' o ngaran do komolohingan di Yesus do nokotulis: I Suliman (tina' nopo dau om i sawo daa di Uria di gulu po), i Rihabiam, i Abia, i Asa, i Yosapat, i Yoram, i Usia, i Yotam, i Ahas, i Hiskia, i Manasi, i Amon, i Yosia, i Yikonia om i piro-piro tobpinai dau. 12-16 Mantad no di natanggayan do pisangod o bansa'd Israil do hilo'd Babil om gisom di kinosusuon di Yesus om iti ngai' o ngaran do komolohingan dau do nokotulis: i Yikonia, i Salatiol, i Sorubabil, i Abihud, i Iliakim, i Asur, i Sadok, i Akhim, i Iliud, i Iliasar, i Matan, i Yakub, om i Yusup i sawo di Maria. Om i Maria no minogkosusu di Yesus, i roitan do Kristus. 17 Om mantad no di Abraham om gisom do napaganak i Daud, om hopod om apat o sinolusukan dot oinsanan. Om mantad no di Daud om gisom di tinanggayan do pisangod o bansa' dot Israil do hilo'd Babil om hopod i' om apat o sinolusukan dot oinsanan. Om mantad no di tinanggayan do pisangod i bansa' dot Israil do hilo'd Babil om gisom do korikot di kinosusuon di Kristus om hopod i' om apat o sinolusukan.
Kinosusuon di Yesus Kristus
18 Poingkaa no susui di kinosusuon di Yesus Kristus. I Maria nopo i tina' dau, om nokopitunang no di Yusup. Nga' tontok dit a' po iyolo' nokopikawin, om monontian no i Maria. Nga' a' i' di Yusup oilaan do monontian i Maria do mantad id sinundu do Rusod do Kinorohingan. 19 I Yusup nopo, i tunang di Maria diri nga' tulun dit otorodok do tumanud dot oturan do tugama'. Om pututon daa'ddi dau i pitunangan diyolo' di Maria. Nga' lisok-lisokon i' daa dau do momutut om a' i' ointingayam dot id toguang do tulun dot ogumu' i Maria. 20 Nga' maso' po di Yusup do momusorou'ddi, om pongipi no iyau. Om id suang nopo di nipi dau nga' nokokito iyau dot iso' o moloikat do Tuhan do minoro-boros dau do poingkaa, “Oi Yusup, i sinakagon di Daud, kada' kooris do mangawin di Maria; tu' iri nopo tanak di ponontianon dau om mantad i' do sinundu do Rusod do Kinorohingan. 21 Osusu nondo i Maria om kusai o tanak dau. Om pungaranan no kopio i tanak diri dot i Yesus, tu' iyau no popoidu' di tulun dau do mantad id dusa diyolo',” ka. 22 Om nosiliu ngai' pogi' o miagal diri nga' mamayaan di boros do Tuhan do pinolombus di nabi dau do poingkaa, 23 “Haro nondo tondu' dit a' po nodudun do kusai do monontian om mogkosusu dot iso' o tanak do kusai. Om pungaranan nondo i tanak diri dot i Imanuil,” ka. (Imanuil nopo om boros dot Ibrani do komoyon nopo om “moyo-woyo' o Kinorohingan dati',” ka.) 24 Om koposik poddi i Yusup, om wonsoyo' no dau o miagal di pinoboros di moloikat do Tuhan dot id dau. Om kowino' no dau i Maria. 25 Nga' solinaid nopo dit a' po i Maria nosusu di tanak diri, om a' po i Yusup duminudun di Maria do miagal di wonsoyon do tulun di misasawo. Om kosusu noddi i tanak diri, om pungaranai no di Yusup iyau dot i Yesus.
Ruminikot o Tulun dit Ongoilo do Mantad Hilo'd Koulayon
1 I Yesus nopo om pinogkosusu do hilo'd bandar do Baitlahim, it id pomogunan do Yudia. Iri nopo raja' do tontok diri om i Horudis. Om tontok noddi do ruminikot do hilo'd Yorusalim o piro-piro tulun dit ongoilo do komoyon do rombituon. Tadon nopo diyolo' om hilo'd ponong id koulayon. 2 Om boros ka diyolo', “Hinonggo i tanak di nosusu do sumiliu'd raja' do tulun do Yohudi? Nokito dahai i rombituon dau do minimbulai do ponong id koulayon, om ruminikot diri iyahai'd hiti do mongoi tuku' dot id dau,” ka diyolo'. 3 Om kotigowo nopoddi i Raja' Horudis do nokorongou'ddi, om iri i tulun do hilo'd Yorusalim nga' nongkotigowo ngai' nogi'. 4 Om lohowo' ngai' noddi di Horudis i boyoon dot imam om i guru do Tourat do tumimung. Om uhoto' no dau iyolo', “Honggo kosusuon di Raja' di pinabatos mantad do Kinorohingan?” ka dau. 5 Om simbar ka diyolo', “Hilo'd bandar do Baitlahim, i hilo'd pomogunan do Yudia. Tu' poingkaa tinulis do songulun o nabi, 6 ‘Baitlahim nopo, i hilo'd pomogunan do Yudia, om okon i' ko' it okoro' kopio dot id pogialatan di bandar dot angagayo do hilo'. Tu' Baitlahim no tadon do songulun o boyoon di sumiliu'd gompomogompi' dot Israil, i tulun ku,’ ka.” 7 Om koilo poddi i Horudis di boros do miagal diri, om pomolisok-lisok no iyau do minomolohou di tulun dit ongoilo diri. Om uhoto' no dau iyolo' ondung soira' kopio diyolo' kokito i rombituon diri. 8 Om suhuo' no dau iyolo' do minongoi do hilo'd Baitlahim om bilinai no dau iyolo', “Pamanau kou no, om ihumon no kopio dokoyu i tanak diri. Om abantalan nopondo dokoyu, om sunudan oku no, om koongoi oku i' iyoho' kotuku' dot id tanak diri,” ka dau. 9-10 Om pamanau noddi iyolo'. Om hiri noddid tanga'd ralan, om kokito no kawagu diyolo' i rombituon di nokito diyolo' di gulu po do minulai do ponong id koulayon. Om otood tomod diri iyolo' do nokokito di rombituon diri do hiri'd doburuan diyolo'. Om undorong no i rombituon do hiri'd hapak di nokoiyonon di tanak. 11 Om suang no iyolo' do hiri'd walai'ddi, om kokito no diyolo' i tanak om i Maria, i tina' di tanak. Om otud no iyolo' do tuminuku' di tanak. Om ukabai no diyolo' i pinoiyanan di nigitan diyolo', om popuhawango' no diyolo' o tamas, om kominyan om mur dot id tanak diri. 12 Om poinsano' no iyolo'd Kinorohingan dot id suang do nipi dot a' gumuli' dot id di Horudis. Om uli' noddi iyolo' do minaya' do ralan do suwai.
Minongoi do Hilo'd Masir
13 Om kapamanau poddi i tulun dit ongoilo do komoyon do rombituon, om intalang no moloikat do Tuhan dot id suang do nipi di Yusup. Om boros ka di moloikat, “Ihumon motindo di Horudis ilo tanak do maan dau patayo'. Nga' tungag nogi' om tanggayan no ilo tanak om ilo tina' dau do mogidu', om mongoi do hilo'd Masir. Om mundorong nopondod hilo' do gisom do moro-boros kawagu oku diya',” ka. 14 Om tungag no i Yusup, om totuong iddi do tinanggayan dau i tanak om i tina' di tanak do minongoi do hilo'd Masir. 15 Om undorong nopoddi iyolo' do hilo'd Masir do gisom do napatai i Horudis. Om iyo noddi do nabayaan i pinoboros do Tuhan do pinolombus di nabi dau do poingkaa, “Lohowon ku i Tanak ku do mantad hilo'd Masir,” ka.
Pinatai i Tangaanak
16 Om koilaai poddi di Horudis do nakalan iyau di tulun dit ongoilo di mantad hilo'd koulayon diri, om kotogod tomod no iyau. Om ponuhu' no iyau do mamatai do koinsanai di tangaanak do kusai di duwo toun om it id siriba' ko' duwo toun do tumur do hilo'd Baitlahim om hiri'd posorili' do kinoiyonon diri. Tu' iyo noddi o koloido' do tumanud di norongou dau di pinoboros do tulun dit ongoilo do komoyon do rombituon, do mantad di kokito i' diyolo' i rombituon. 17 Om iyo noddi do nosiliu i pinoboros di Nabi Yoromia, do poingkaa, 18 “Haro o mihad dot orongou do mantad hilo'd Rama do minglompud do mihad do mogihad. Mogihad i Rasil di tangaanak dau; om a' no iyau milo dot insasamadan, tu' nangapatai ngai' no iyolo',” ka.
Guminuli' do Mantad Hilo'd Masir
19 Om kapatai poddi i Horudis, om intalang no kawagu o moloikat do Tuhan dot id di Yusup dot id suang do nipi, di hilo' pod Masir i Yusup. 20 Boros ka di moloikat, “Iri nopo tulun di mamatai daa dilo tanak om nangapatai no. Om tungag nogi' om ngoyo' ilo tanak om ilo tina' dau, om gumuli' kou i' do hilo'd Israil,” ka. 21 Om tungag noddi i Yusup, om tanggayai no dau i tanak diri om i Maria do guminuli' do hilo'd Israil. 22 Nga' korongou noddi i Yusup dot i Arkilaus i tanak di Horudis, o suminowoli di Horudis do suminiliu'd raja' do pomogunan do Yudia. Om moddosi iddi i Yusup do mongoi'd hilo'. Om kosunudai poddi iyau do Tuhan dot id suang do nipi, om pakayaai no dau do hilo'd watas do Galilia. 23 Om undorong no iyau'd hilo', dot id iso' bandar di roitan do Nasarit. Om iyo noddi do nabayaan i pinoboros di piro-piro nabi dot i tanak o komoyon, “Roitan nondo iyau do Tulun do Nasarit,” ka.
Ponudukan di Yohanis Gampamatis
1 Om tontok noddi do ruminikot i Yohanis Gampamatis do hiri'd tana' do kowotuan do Yudia, om timpuun no iyau do monuduk. 2 Boros ka dau, “Korologo kou no do momonsoi'd dusa, tu' a' no alaid om korikot no Pomorintaan do surga!” ka. 3 Om i Yohanis no i tulun di komoyon di Nabi Yosaya, do tontok di minomoros iyau do poingkaa, “Haro o tulun do mimboros dot opuhod do hilo'd tana' do kowotuan do poingkaa, ‘Rontisan no ralan do wayaan do Tuhan; potingon no i ralan do wayaan dau,’ ka,” ka dau. 4 Pakayan nopo di Yohanis om winonsoi mantad id hulu dot unta, om tagkos no dau om mantad id kulit do nintorusan. Om kanon nopo dau om godu om paha' do mantad hiri'd gouton. 5 Om ogumu' o tulun do mantad hilo'd Yorusalim, om mantad id pointongkop do pomogunan do Yudia om mantad id piro-piro watas di potoropis di Bawang do Yordan, do ruminikot dot id di Yohanis. 6 Om okuno' no diyolo' i dusa diyolo', om botisai noddi iyolo' di Yohanis do hiri'd Bawang do Yordan. 7 Om ogumu' i' daa o tulun do Parisi om Saduki do ruminikot do mongoi pokibatis. Nga' soira' di nokito di Yohanis iyolo' do rumikot, om boros ka dau, “Iyokoyu no tulun dit angaraat! Isai o minomisunud dokoyu do milo kou do moggidu'd mantad id hukuman do Kinorohingan dit oruhai no dau do porikoton? 8 Pointalango' po dokoyu do nokorologo kopio kou do momonsoi'd dusa. 9 Kada' nogi' dokoyu soroho' do koidu' kou do mantad id hukuman, do momoros kou piya dot i Abraham o taki dokoyu. Ilaai no dokoyu, dot iti piya watu nga' milo id Kinorohingan do silihon do sinakagon di Abraham! 10 Nokosodia' no kapak do panagad di kayu do porotopon do tana' o pananagad. Pointikid-tikid do kayu dit a' mongua' dot osonong om tagadon no om pataamon do hiri'd tapui. 11 Iyoho' nopo om waig noo pamatis ku dokoyu do popointalang do nokorologo kou do momonsoi'd dusa; nga' iyau nopo i rumikot do kosusuhut doho', om mamatis indo dokoyu do Rusod do Kinorohingan om tapui. Iyau nopo om agayo po ko' iyoho'. Om a' oku i' osorupai do mongigit piya di kasut dau. 12 Poingigit no dau o bakul do pangatap di gandum do gisom dot osompipian. Timungon nondo dau i gandum do posuangon do hiri'd sulap, nga' iri nopondo i tapol om tutudan dau do hiri'd tapui dit a' milo'd pisokon,” ka.
Binotisan i Yesus
13 Om tongkiad no i Yesus do mantad hilo'd Galilia om pakayaai no do hiri'd Bawang do Yordan do mongoi pokibatis di Yohanis. 14 Nga' mada' i' daa i Yohanis do mamatis di Yesus. Boros ka di Yohanis, “Iyoho' nogi' o tosorupai do botisan nu. Nga' iya' nogiddi o rumikot dot id doho'!” ka dau. 15 Nga' boros ka di Yesus do suminimbar, “Botisai oku nopo diya' do baino' poo. Om owonsoi ngai' to indo i korohian do Kinorohingan,” ka dau. Om botisai noddi di Yohanis i Yesus. 16 Om kobotisai poddi i Yesus, om tilombus nopo iyau do tuminindal. Om sigog nopoddi do miniangkang o tawan om kokito no di Yesus i Rusod do Kinorohingan do luminintuhun dot id dau do miagal do punai o kowoyo-woyoo' do suminondot. 17 Om korongou noddi o boros do Kinorohingan do mantad hilo'd tawan do poingkaa, “Iti no i Tanak ku di kosianan ku. Om iyau no i kohubayaan kopio do ginawo ku,” ka.
Pinogumbalan i Yesus
1 Om angatai noddi i Yesus di Rusod do Kinorohingan do kuminaa do hiri'd tana' do kowotuan, om opogumbalan i' iyau do Rogon. 2 Om a' i Yesus minakan do solinaid dot apat nohopod o tadau om apat nohopod o totuong. Om louson tomod diri iyau. 3 Om rikot noddi i Rogon om boro-boros no di Yesus, “Okon toi ko' Tanak ko'd Kinorohingan? Suhuo' pogi' ilo watu do sumiliu'd roti,” ka dau. 4 Nga' boros kad i Yesus, “Nokotulis no dot id Buuk do Kinorohingan o poingkaa: Okon i' ko' roti noo o kapasi'd tulun, suwai ko' iri nogi' i pointikid-tikid do boros di poboroson do Kinorohingan,” ka dau. 5 Om igitai po di Rogon i Yesus do minongoi do hilo'd Yorusalim, i bandar dot olidang. Om hirio' no di Rogon i Yesus id timpak di Walai'd Sasambayangan dot Agayo. 6 Om boros kaddi di Rogon dot id di Yesus, “Okon toi ko' Tanak ko'd Kinorohingan? Tuhun pogi', tu' haro i' o nokotulis dot id Buuk do Kinorohingan do poingkaa, ‘Suhuon indo do Kinorohingan i moloikat dau do mongintirung diya', om kahangan ko indo diyolo' om a' i' kootung do watu o gakod nu,’ ka,” ka dau. 7 Om boros ka di Yesus, “Nga' haro i' o nokotulis dot id Buuk do Kinorohingan do poingkaa, ‘Kada' pogumbal do Tuhan i Kinorohingan nu,’ ka,” ka dau. 8 Om igitai po kawagu di Rogon i Yesus do minongoi dot id iso' o nuluhon dit akawas kopio. Om potuduko' no di Rogon dot id dau o koinsanai'd pomorintaan do hiti'd pomogunan om koinsanai di kakayaan do hiri. 9 Om boros ka di Rogon dot id di Yesus, “Patahakon ngai' ku nopo daa iti dot id diya', ondung motud ko no do tumuku' doho',” ka dau. 10 Om boros ka di Yesus, “Poggidu' no oi Gampamalid! Nokotulis no dot id Buuk do Kinorohingan o poingkaa, ‘Tuku' no dot id Tuhan, i Kinorohingan nu, om iyau noo pogobi-obian!’ ka,” ka dau. 11 Om tongkiad noddi di Yesus i Rogon. Om rikot no piro-piro moloikat do minongoi ponguhup di Yesus.
Tuminimpuun i Yesus do Kumaraja'
12 Om korongou poddi i Yesus do nokogiil i Yohanis, om pakayaai no dau do hilo'd Galilia. 13 Om undaliu no iyau do mantad hilo'd Nasarit om ongoi no iyau iyon do hiri'd bandar do Kapornaum, i tid disan di Tasik Galilia, id watas do Sibulon om Naptali. 14 Om kabayaai noddi i pinoboros di Nabi Yosaya, di nowonsoi di Yesus o miagal diri. Poingkaa o pinoboros di Nabi Yosaya, 15 “Iri nopo tana' do Sibulon om tana' do Naptali, i ralan do kumaa hilo'd tasik, i tid soborong do Bawang do Yordan, iri no i pomogunan do Galilia, i tana' do tulun dot okon ko' Yohudi! 16 Kokito indo do tanawau di kosorong kopio i tulun di poingiyon dot id totuong! Oulinahan indo do tanawau di kosorong kopio i tulun di poingiyon do hiri'd dasahawan do kapatayon!” ka. 17 Om mantad poddi om popinsusui no i Yesus do poingkaa, “Korologo kou nod momonsoi'd dusa, tu' a' no alaid om korikot no Pomorintaan do surga!” ka dau.
Minomolohou i Yesus dot Apat o Tulun di Monginginsada'
18 Om tontok di manau-panau i Yesus do hiri'd tisan di Tasik Galilia, om kokito no dau o duwo tulun do monginginsada' di miobpinai. Iyolo' nopo om i Simun (i pinungaranan dot i Pitrus) om i Andarias, i tadi' dau. Om tontok nopoddi nga' maso diyolo' do mirrambot do hiri'd tasik. 19 Om boros ka di Yesus dot id diyolo', “Tanud kou pogi' doho', om tudukan ku i' iyokoyu do mamarambot do tulun,” ka dau. 20 Om olomus nopoddi iyolo' do tuminongkiad di rambot om tanud no di Yesus. 21 Om lombus po kawagu i Yesus do minamanau, om kokito no dau o duwo kawagu tulun do miobpinai. Iyolo' nopo nga' i Yakub om i Yohanis, i tangaanak di Sabidi. Om maso diyolo' om i tapa' diyolo' do monombir di rambot do hiri'd parau'. Om iyolo' nga' linohou i' di Yesus. 22 Om diiri i' om diiri do tinongkiadan diyolo' i parau' om i tapa' diyolo', om tanud no iyolo' di Yesus.
Minonuduk, om Minonusui do Boros do Kinorohingan, om Minomolingos do Tulun i Yesus
23 Om tongkop no i Yesus di pomogunan do Galilia. Om minonuduk iyau do hiri'd walai'd sasambayangan om pinopopinsusui iyau di Habar dot Osonong do Pomorintaan do Kinorohingan. Om ogumu' o tulun do liningasan dau do mantad id mogisuwayan o toruol. 24 Om nokotongkop o habar di Yesus dot id do pomogunan do Siria, gisom dot ogumu' tomod diri o tulun do ruminikot dot id dau. Om pootodo' no diyolo' dot id dau o koinsanai'd tulun di mogisuayan o toruol om kosusaan. I tulun di norusadan do rusod dot araat, om i kakaran, om it a' koundaliu nga' liningasan ngai' nopo di Yesus. 25 Iri nopo tulun di minoyo' di Yesus do maso'ddi nga' ogumu' kopio. Haro mantad hilo'd Galilia, om haro mantad hilo'd Hopod o Bandar, om haro mantad hilo'd Yorusalim, Yudia, om haro po mantad id pomogunan dit id soborong do Yordan.
Minonuduk i Yesus do Hiri'd Nulu-Nulu
1 Om soira' di nokito di Yesus i tulun dot ogumu'ddi, om takad no iyau do hiri'd nulu-nulu, om irikau no. Om rikot ngai' no i tumatanud dau dot id dau, 2 om timpuun no iyau do minonuduk diyolo':
Kolumaagan
3 Boros ka dau, “Olumaag no i tulun di kopuriman do mosikin dot id suang do rusod; tu' kasanganu indo iyolo' do Pomorintaan do surga! 4 Olumaag no i tulun di tumongob; tu' insasamadan i' iyolo'd Kinorohingan! 5 Olumaag no i tulun dit osiriba' o ginawo; tu' asanganu indo diyolo' iti pomogunan. 6 Olumaag no i tulun dit orohian do momonsoi'd korohian do Kinorohingan, do poinghalib mantad ko' korohiano' do minum ko' makan; tu' pohubayaan indo i korohian do ginawo diyolo'. 7 Olumaag no i tulun dit osianan do tulun do suwai; tu' iyolo' nga' kosianan indo do Kinorohingan! 8 Olumaag no i tulun dit olidang o ginawo; tu' kokito indo iyolo'd Kinorohingan. 9 Olumaag no i tulun di popiulud; tu' roitan indo iyolo'd tangaanak do Kinorohingan! 10 Olumaag no i tulun dit inggoriton tu' momonsoi iyolo'd korohian do Kinorohingan; kasanganu indo iyolo' do Pomorintaan do surga! 11 Olumaag kou no dot indaraaton kou piya, om inggoriton, om pinsingudutan, dot i tumanud kou doho' o kopongiyo'ddian. 12 Tu' iri piro-piro nabi dit id gulu ko' iyokoyu nga' noinggorit i' do miagal diri. Kotood kou no om kooropod kou no kopio, tu' agayo i' o tisomuli' do nokoopi'd Tuhan do hilo'd surga do patahakon dokoyu,” ka dau.
Silaon om Tanawau
13 Om boros ka kawagu di Yesus, “Iyokoyu no miagal do silaon dot id toinsanan o tulun do hiti'd pomogunan. Nga' ondung manau i silaon, om a' no kopio milo do mosin kawagu. Om aiso' no guna'ddi, suwai ko' pataamon poo, om pingulakan pondo'd tulun. 14 Iyokoyu no miagal do tanawau diti pomogunan. Iri nopo bandar dit id timpak do nulu-nulu om a' no milo'd lisokon. 15 Aiso' i' o tulun di modtutud do lampung om tinggouban nogindod kakanan. Suwai ko' potimpakon i' dau i lampung diri dot id podtitimpakan kasai' do lampung, om otitihan ngai' indo o koinsanai'd tulun do hiri'd suang di walai. 16 Om iyo nogiddi tu' potitihon no kopio o tanawau dokoyu dot id tulun do suwai, om okito indo diyolo' i wonsoyon dokoyu dit osonong, om royohon nondo diyolo' i Tapa' dokoyu di hilo'd surga,” ka dau.
Ponudukan di Tourat
17 Om boros ka di Yesus, “Kada' kou pomusorou do kinorikatan ku nopo om mongoi pananus ngai' di Tourat di Musa om i ponudukan di nabi. Okon i' ko' mongoi pananus diri o kinorikatan ku, suwai ko' mongoi pamayaan di komoyon kopio'ddi. 18 Ilaai no dokoyu! Do solinaid nopod haro o tawan om pomogunan, om iso' pod hurup ko' titik do hurup dit okooro' dot id Tourat nga' aiso' i' o tonuson, dot a' po angabayaan ngai' iri! 19 Iyo nopoddi, om isai nopo tulun di tumolibamban dot ongoiso' piya di toturan diri, dot iri piya daa i toturan dit okooro', om i tulun di monuduk do tulun do suwai do momonsoi do miagal diri, om osiliu nod tulun dit aiso' kopio o ngaran-ngaran dot id suang do Pomorintaan do surga. Nga' isai nopo tulun di tumanud di Tourat om i monuduk do tulun do suwai do momonsoi'd miagal diri, om osiliu nod tulun dit agayo o ngaran dot id suang do Pomorintaan do surga. 20 Iyo nopoddi, om soro-soroho' no dokoyu: Milo kou id sumuang di Pomorintaan do surga, ondung poimaha' o kotorodoko' dokoyu ko' i guru do Tourat om i tulun do Parisi, do momonsoi di korohian do Kinorohingan!” ka dau.
Ponudukan do Mogodu'd Tumogod
21 Om boros ka kawagu di Yesus, “Koilo kou i' di ponudukan di taki-aki toko' do poingkaa, ‘Kada' kou pamatai; tu' isai nopo i mamatai om bisaraon no,’ ka. 22 Nga' baino' nopo om poingkaa o doho'd poboroson dot id dokoyu: Isai nopo i tumogod do tulun do suwai, om bisaraon no; om isai nopo i momolupu' do tulun do suwai, om mositi' nod bisaraon dot id toguang di momimisara' do tumanud di toturan do tugama'. Om isai nopo o momoros do, ‘Basug!’ ka, do tulun do suwai o komoyon, om apatut no do pataamon do hilo'd tapui naraka. 23 Iyo nopoddi, om ondung haro o tiso' dokoyu di maso'd papatahak do porsombahan dot id Kinorohingan, om sigog indo dot osorou dau do haro o katagadan do tulun do suwai dot id dau, 24 om mositi' no do tongkiadan po dau i porsombahan dau'ddi do hiri'd dotimbabaan di pananaraban do porsombahan, om mongoi po ponokibabas di tulun dit otogod dau. Om gumuli' nogindo do mongoi papatahak di porsombahan dau dot id Kinorohingan. 25 Ondung haro o tulun di mamadawa dokoyu om i mangangat dokoyu do mibisara' dot id kut, om lumomus kou no kopio do mongoi ponokibabas dau do daamot pod haro o maso, om a' po koongoi dot id kut. Tu' ondung amu', nga' patahakon kou nondo di tulun diri dot id hakim, om patahakon kou nondo di hakim dot id pulis. Om posuangon kou nondo di pulis dot id giil. 26 Om ilaai no dokoyu dot: A' kou no milo'd lumabus do mantad hiri'd giil, dot a' po dokoyu abayaran ngai' i nakadanda' dokoyu,” ka dau.
Ponudukan do Mogodu'd Magampahu'
27 Om boros ka kawagu di Yesus, “Koilo kou i' do haro o ponudukan do poingkaa, ‘Kada' kou pagampahu',’ ka. 28 Nga' baino' nopo om poingkaa o doho'd poboroson dot id dokoyu. Isai nopo o kusai di montong do tondu' do mikuwo'd orohian daa do monokidudun di tondu'ddi; om nakapagampahu' no dot id tondu'ddi dot id suang do ginawo dau! 29 Ondung i mato dokoyu'd wanan o kobungou dokoyu do momonsoi'd dusa, om irulon nogi' om pataamon i mato'ddi. Mogo-mogot nogid atagakan kou dot ongoiso' do pakakas do tinan dokoyu ko' oinsanan o tinan dokoyu do kataam do hilo'd naraka. 30 Ondung i longon dokoyu'd wanan o kobungou dokoyu do momonsoi'd dusa, om potodon nogi' om pataamon i longon diri! Mogo-mogot nogi' dot atagakan kou do tiso' o longon dokoyu ko' oinsanan o tinan dokoyu do kosuang do naraka,” ka dau.
Ponudukan do Mogodu'd Magada' do Sawo
31 Om boros ka kawagu di Yesus, “Om haro po o ponudukan do poingkaa: pointikid-tikid do kusai di magada' do sawo dau, om mositi' no dot onuan dau do surat do kopiadaan i tondu'ddi. 32 Nga' baino' nopo om poingkaa o doho'd poboroson dot id dokoyu: isai nopo o kusai di magada' do sawo dau om a' i' daa miningraraat i sawo dau'ddi, om iyau no o kobungou di sawo dau do magampahu', do kakawin kawagu no i sawo dau'ddi. Om isai nopo i mangawin di tondu' di naadaan diri, om kapagampahu' no,” ka dau.
Ponudukan do Mogodu'd Sumumpa'
33 Om boros ka kawagu di Yesus, “Koilo kou i' do poingkaa po daa o ponudukan di taki-aki toko', ‘Sulungon kasai' no dokoyu i batos dokoyu. Nunu nopo i nakabatos dokoyu do mikuwo'd suminumpa' kou dot id toguang do Kinorohingan, om mositi' no do sulungon dokoyu iri,’ ka. 34 Nga' baino' nopo om poingkaa o doho'd poboroson dot id dokoyu: Kada' kou nopo kopio sumpa' do rumait do tawan, tu' ilo' nopo tawan om tirikohonon i' do Kinorohingan do momorinta'. 35 Om kada' kou sumpa' do rumait do pomogunan, tu' iti nopo pomogunan om koulokon do lapap do Kinorohingan. Om kada' kou sumpa' do rumait do Yorusalim tu' iri no o bandar di Raja' dot agayo. 36 Om kada' kou sumpa' do rumait do tulu dokoyu, tu' a' kou i' milo do popurak ko' popoitom po dino tobuk dokoyu, dot ongoiso-iso' piya. 37 Poboroson nopo om, ‘Oo,’ ka, ko', ‘Amu',’ ka, tu' ogumu' nopo ko' iri o boros om mantad no dot id Rogon,” ka dau.
Ponudukan do Mogodu'd Sumuli'
38 Om boros ka kawagu di Yesus, “Koilo kou i' do haro po o ponudukan do poingkaa, ‘mato o pomolokop do mato om nipon o pomolokop do nipon,’ ka. 39 Nga' baino' nopo om poingkaa o doho'd poboroson dot id dokoyu: Kada' dokoyu suliai dot araat i tulun di nokowonsoi'd araat dot id dokoyu. Suwai ko' ondung haro o tulun do monompiling do pingas dokoyu'd wanan, om pologoson nopo i tulun diri do monompiling do pingas dokoyu'd gibang. 40 Om ondung haro o tulun do porikot dokoyu dot id hakim do hilo'd kut, do mamadawa dokoyu, tu' pokioonuan di tulun diri i rasuk dokoyu dit a' i' agayo no o gatang, om patahakon nopo dokoyu kawagu dau i rasuk dokoyu dit agayo o gatang. 41 Om ondung haro o soudor do mononsog dokoyu do mamabo do binabo dau do songkilomito o kosoduwo', om boboon nopo dokoyu iri do duwo o kilomito do kosoduwo'. 42 Ondung haro o tulun di haro kopio o pokionuon dot id dokoyu, om patahakon nopo iri dot id tulun diri, om haro nopo o tulun do molos do nunu nopo do mantad id dokoyu, om pooloson nopo dokoyu i tulun diri,” ka dau.
Ponudukan do Monuhu' dot Osianan do Pisangod
43 Om boros ka kawagu di Yesus, “Koilo kou i' do haro po o ponudukan do poingkaa, ‘kosianai kou no di tambalut dokoyu om karaatai kou no di pisangod dokoyu,’ ka. 44 Nga' baino' nopo om poingkaa o doho'd poboroson dot id dokoyu: Kosianai kou no di pisangod dokoyu, om sambayangai no dokoyu i tulun di monginggorit dokoyu, 45 om osiliu kou i' do tangaanak di Tapa' dokoyu di hilo'd surga. Tu' potitihon id Kinorohingan ilo tadau dau dot id tulun dit osonong om id tulun dit araat. Om onuan dau'd rasam i tulun di momonsoi'd otopot om i tulun di momonsoi'd araat. 46 Tu' ondung iri no i tulun dit osianan dokoyu o kosianan dokoyu, om nunu daa o koponomulian do Kinorohingan dokoyu? Tu' a' toi iyo iddi i tulun di gomponimung do sukai? 47 Om ondung iri no i tambalut dokoyu o suahon dokoyu om nunu'ddi kopio o komogoto' dokoyu ko' mantad di tulun di suwai? Tu' iri piya i tulun dot a' kotutun do Kinorohingan nga' momonsoi i' do miagal diri! 48 Iri nopo i Tapa' dokoyu di hilo'd surga om osianan i' kopio do koinsanai'd tulun. Om iyokoyu nga' apatut nogi' dot osianan kopio do koinsanai'd tulun,” ka dau.
Ponudukan do Pasal do Momuhawang
1 Om boros ka kawagu di Yesus do minonuduk, “Soro-sorohon no kopio dokoyu. Kada' kou nogi' kopio pomonsoi di ponuhuan do tugama' dokoyu dot id toguang do tulun dot ogumu' do popokito-kito nod tulun. Tu' ondung iyo'ddi o wonsoyon dokoyu, om a' kou no somulian di Tapa' dokoyu di hilo'd surga. 2 Iyo nopoddi, om soira' nopo do momuhawang kou do tulun di mosikin, om kada' kou pokimokito-kito'd tulun, do miagal di wonsoyon do tulun di minsorupai-rupai no toomod. Tu' korohian nopo diyolo' do momuhawang do tulun om hilo'd walai'd sasambayangan om hilo'd talun-alun, om arayou indo iyolo'd tulun do suwai. Nga' ilaai no dokoyu, do naanu ngai' no diyolo' i tisomuli' diyolo'. 3 Nga' iyokoyu nopo, om soira' nopo do momuhawang kou, om kada' dokoyu popimboroso' iri, om aiso' i' o tulun do suwai do koilo, dot iri piya i tambalut kopio dokoyu. 4 Pologoson nopo dot aiso' o tulun do koilo di winonsoi dokoyu'ddi, do suwai ko' i Tapa' dokoyu di hilo'd surga. Tu' okito i' dau i winonsoi dokoyu dit a' okito'd tulun do suwai, om somulian kou indo dau,” ka dau.
Monuduk do Sumambayang
5 Om boros ka kawagu di Yesus, “Soira' nopo do sumambayang kou, om kada' kou omit di tulun di minsorupai-rupai no toomod. Tu' korohian nopo diyolo' om mingkakat do sumambayang do hilo'd walai'd sasambayangan om hilo'd kopogisasalawatan do ralan, om okito' i' iyolo'd tulun. Ilaai no dokoyu, dot iri-iri no moti' o tisomuli' dot aanu diyolo'ddi. 6 Nga' iyokoyu nopo, om soira' nopo do sumambayang kou om sumuang kou po dot id bilik, om tabanan i wawayaan, om sumambayang nogindo dot id Tapa' dokoyu dit a' okito. Om somulian kou indo di Tapa' dokoyu, tu' okito i' dau i wonsoyon dokoyu di poillisok diri. 7 Om soira' nopo do sumambayang kou, om kada' kou pindala' tomod do boros dit aiso' o komoyon, do miagal di tulun dit a' kotutun do Kinorohingan. Tu' ondos daa diyolo' om kogumuo' do boros diyolo'd sumambayang o korongou-rongou'd Tuhan di sambayang diyolo'. 8 Kada' kopio kou omit di sambayang diyolo'. Tu' oilaan no di Tapa' dokoyu it apatut dot aanu dokoyu do tontok piya dit a' po dokoyu opokianu iri. 9 Iyo nopoddi, om sumambayang kou no do poingkaa, ‘Oi Tapa' dahai i hilo'd surga: Iya' no o Kinorohingan, om aiso' no o suwai. Pokionuon dahai do tumuku' om momusou diya' o koinsanai'd tulun. 10 Iya' no o Raja' dahai. Pokionuon dahai dot iya' o momorinta' do hiti'd pomogunan; om atanud o korohian nu'd hiti do miagal dot atanud do hino'd surga. 11 Onuwai no iyahai do takanon di kabagal dahai do tadau'd baino'. 12 Ompunai no iyahai di kasalaan dahai, tu' iyahai nga' nakapangampun no di kasalaan do tulun di kisala' dot id dahai. 13 Kada' pologoso' do tumanus o kotumbayaan dahai do tontok dit oontok iyahai'd pogumbalan, suwai ko' poiduwo' no iyahai do mantad id kuasa' di Yaraat. Iya' no o Raja' di kikuasa' om i kikagayaan do gisom do poingompus.’ Amin. 14 Ondung mangampun kou di tulun di kasala' dot id dokoyu, om ompunan kou no di Tapa' dokoyu di hilo'd surga di kasalaan dokoyu. 15 Nga' ondung a' kou mangampun do kasalaan do tulun do suwai, om iri Tapa' dokoyu do hilo'd surga nga' a' no mangampun do kasalaan dokoyu,” ka dau.
Ponudukan do Kowoyo-woyoo' do Puasa
16 Om boros ka kawagu di Yesus, “Soira' nopo do puasa kou, om kada' kou omit di tulun di minsorupai-rupai no toomod tu' minglunggui-lunggui. A' no diyolo' sonong-sonongon o rabas diyolo' do mokimohilo-hilo'd oilaan do tulun do suwai do puasa. Nga' ilaai no dokoyu, dot iri-iri no moti' o tisomuli' dot aanu diyolo'ddi. 17 Nga' puasa kou nopo iyokoyu om monginglagup kou no, om monudai, 18 om aiso' indo o tulun do suwai do koilo do puasa kou, do suwai ko' iri no i Tapa' dokoyu dit a' okito. Okito i' dau i wonsoyon dokoyu dit a' okito'd tulun do suwai, om somulian kou indo dau,” ka dau.
Dapu' do Hilo'd Surga
19 Om boros ka kawagu di Yesus, “Kada' kou ponimung do dapu' dokoyu do hiti'd pomogunan, tu' hiti nopo om haro i' o tanai om togor do mamaraag di dapu', om haro o tulun do mongoi panakau'ddi. 20 Nga' potimung kou no do dapu' dokoyu do hilo'd surga, tu' aiso' no o tanai om aiso' o togor do mamaraag, om aiso' o tulun do mongoi panakau di dapu'ddi. 21 Tu' hinonggo nopo o koiyonon di dapu' dokoyu om hiri no o kosokoton do ginawo dokoyu,” ka dau.
Lampung do Tinan
22 Om boros ka kawagu di Yesus, “Mato nopo om miagal do lampung do tinan. Osonong nopo o mato dokoyu om anawau ngai' no o tinan dokoyu. 23 Nga' ondung a' kokito o mato dokoyu, om otuong no o tinan dokoyu. Iyo nopoddi, om ondung otuong i lampung do tinan dokoyu, om odondom no kopio o kotuongo'ddi,” ka dau.
Kinorohingan om Kakayaan
24 Om boros ka kawagu di Yesus, “Aiso' i' o tulun do milo do sumiliu'd turipon do duwo o tuan. Tu' poinggayo-gayo nondo o kosianan dau do tiso' di tuan dau ko' mantad di tuan dau di tiso'. Om otorodok iyau do tumanud di boros di tuan dau di tiso' nga' a' indo dau pusohon i tuan dau di tiso'. Om iyokoyu nga' iyo nogiddi, tu' a' kou i' milo do sumiliu'd turipon do Kinorohingan om turipon pondo do kakayaan. 25 Iyo nopoddi, om soro-sorohon no dokoyu; kada' kou katangkabo dot id suang do koposi-posion dokoyu, kada' kou katangkabo ondung nunu o takanon om inumon dokoyu, om ondung nunu o pakayon dokoyu. Tu' a' toi agayo i' o guna' do koposion ko' mantad do taakanon, om agayo o guna' do tinan ko' mantad do pakayan? 26 Antangai pogi' dokoyu ilo tombolog nga' a' i' moti' momutanom, om a' mongomot, om a' potimung di tua' do totonomon dot id sulap. Nga' iyo piya'ddi, nga' gompion i' di Tapa' dokoyu di hilo'd surga ilo tombolog. Om a' toi poingharo kou i' kopio iyokoyu ko' mantad dilo tombolog? 27 Om mulong piya do tumangkabo kou nga' aiso' i' o tiso' dokoyu do kooput do tumur dot ongoniba' piya. 28 Nokuro tu' tumangkabo kou ondung nunu o pakayon dokoyu? Antangai pogi' dokoyu ilo bunga do poinsuni do hiti'd talun, a' i' ilo bunga morobuat om a' mangawol; 29 nga' i Raja' Suliman piya tu' kaya' kopio nga' aiso' i' o pakayan dit iyo dilo dombunga kolumis! 30 Sumuni no ilo sakot do baino', om suab pondo om aayi' nod tutudan. Nga' iyo piya'ddi nga' lumison id Kinorohingan ilo sakot. Om okuro-kuro kou nogindo daa iyokoyu! Nga' okoro' kopio o kotumbayaan dokoyu! 31 Kada' kou katangkabo, gisom do momoros kou dot, ‘Nunu no ma o kanon toko'?’ ka, ko', ‘Nunu no ma o tinumon toko'?’ ka, ko', ‘Nunu no ma o pakayon toko'?’ ka. 32 Iri ngai' no i tihumon do tulun dit a' kotutun do Kinorohingan. Nga' iri nopo i Tapa' dokoyu do hilo'd surga, om koilo i' dot apatut dot angaanu ngai' dokoyu iri. 33 Iyo nopoddi, om poguluonon no kopio dokoyu'd momusou o Pomorintaan do Kinorohingan om wonsoyon no dokoyu i korohian dau. Om patahakon nogindod Kinorohingan dot id dokoyu o koinsanai di suwai ko' iri. 34 Iyo nopoddi, om kada' kou katangkabo do tumimbaba' do tadau'd suab. Tu' haro po o katangkabaan do suwai do tadau'd suab. Ula' no i kosusaan do tadau'd baino', kada' no dokoyu ruhangai iri,” ka dau.
Mogodu do papasala' do Tulun do Suwai
1 Om boros ka kawagu di Yesus, “Kada' kou papasala' do tulun do suwai, om a' kou i' iyokoyu pasalaon do Kinorohingan. 2 Tu' poingkuro nopo o ralan dokoyu do papasala' do tulun do suwai, om iyo noddi o Kinorohingan do papasala' dokoyu. Om nunu nopo o toturan di pakayon dokoyu do papasala'd tulun do suwai, om iri no o pakayon do Kinorohingan do papasala' dokoyu. 3 Nokuro tu' okito nogi' kopio dokoyu o giniab do kayu dit okooro' do nokoliwata' do mato do tobpinai dokoyu om a' i' dokoyu opurimanan o kayu di songwatang i' o kogoyoo' do nokoliwata' do mato dokoyu iyokoyu? 4 Poingkuro kou do milo'd momoros dot id tobpinai dokoyu dot, ‘Hondi, iduwo' ku diya' ino giniab do kayu dot okooro' do nokoliwata' do mato nu,’ ka, om maso i' do haro o watang do kayu do nokoliwata' do mato dokoyu iyokoyu? 5 Oi tulun di minsorupai-rupai no toomod! Iduwo' po dokoyu i watang do kayu do nokoliwata' do mato dokoyu, om atarang nogindo kopio o pogogontong dokoyu, om milo kou do mongidu' di giniab do kayu dit okooro' do nokoliwata' do mato di tobpinai dokoyu. 6 Kada' dokoyu patahako'd tasu o nunu nopo it olidang, tu' gumuli' no moti' i tasu'ddi om mongoi no pongokot dokoyu. Om kada' dokoyu patahako' do wogok o mutiara', tu' pingulakan no moti' di wogok i mutiara'ddi,” ka dau.
Mokianu, Mogihum om Mogkoritik
7 Om boros ka kawagu di Yesus, “Pokianu kou no, om oonuan kou i'; pogihum kou no, om okito i' dokoyu; pogkoritik kou nod totobon, om iwangan kou indo. 8 Tu' iri nopo tulun di mokianu, om kaanu no; om i tulun di mogihum nga' kokito no; om i tulun di mogkoritik do totobon nga' iwangan no. 9 Haro toi o tapa' dot id pogialatan dokoyu di patahak do watu dot id tanak dau, do roti o pokionuon di tanak dau? 10 Ko' patahak pod tompoluluhu do sada' o pokionuon di tanak dau? 11 Mulong piya dot angaraat kou nga' milo kou i' do papatahak dit ongosonong dot id tangaanak dokoyu. Om a' nogi' tuu'ndo milo do papatahak dit ongosonong i Tapa' dokoyu di hilo'd surga? Iyau nopo om koilo po ko' iyokoyu do papatahak dit ongosonong dot id tulun di mokianu dau. 12 Wonsoyon no dokoyu dot id tulun do suwai o poingkuro nopo i korohian dokoyu do wonsoyon diyolo' dot id dokoyu. Iri no o komoyon kopio di Tourat di Musa om i ponudukan di piro-piro o nabi,” ka dau.
I Wawayaan dit Okikip
13 Om boros ka kawagu di Yesus, “Suang kou no di wawayaan dit okikip; tu' iri nopo i wawayaan om i ralan do kumaa do hilo'd naraka om agayo, om ogumu' o tulun do maya'ddi. 14 Nga' iri nopo i wawayaan om i ralan do wayaan do tulun do kumaa dot id koposion om okikip om aradaat po. Om okuuri' o tulun do kotunud diri,” ka dau.
I Kayu om i Tua' di Kayu
15 Om boros ka kawagu di Yesus, “Antaan-taan no dokoyu i nabi di goudut. Tu' mingiyo-iyo daa iyolo' do dumba' do rumikot dot id dokoyu, nga' otopot nopo kopio om iyo i' iyolo' di toni tu' orongit. 16 Otutunan indo dokoyu iyolo' dot i kowoyo-woyoon diyolo' o kotutun-tutun. Iri nopo bulungkut do korugian om a' i' mongua' do tua'd anggur, om i guas do rugi nga' a' i' mongua' do tua'd ara. 17 Orombung nopo i kayu om osonong no i tua'. Nga' a' nopo orombung i kayu om araat no o tua'. 18 Kayu nopo dit orombung om a' i' mongua'd araat, om i kayu dit a' orombung nga' a' i' mongua'd osonong. 19 Om iri nopo kayu dot a' osonong o tua', om tagadon no om tutudan. 20 Om iyo noddi i nabi di goudut. Otutunan indo dokoyu iyolo' dot i kowoyo-woyoon diyolo' o kotutun-tutun,” ka dau.
I Wonsoyon om Okon i' ko' i Boros
21 Om boros ka kawagu di Yesus, “Okon i' ko' oinsanan o tulun di mamarait doho' do, ‘Tuhan, Tuhan,’ ka, do kosuang di Pomorintaan do surga. Suwai ko' iri no i tulun di momonsoi'd korohian do Tapa' ku do hilo'd surga. 22 Orikot nopondo i Tadau'd Kopomutusan, om ogumu' nondo o tulun do momoros dot id doho' do poingkaa, ‘Tuhan, Tuhan, okon toi ko' id suang i' do ngaran do Tuhan do pinopopinsusui iyahai do boros do Kinorohingan? Om okon toi ko' id suang i' do ngaran do Tuhan do minonunsub iyahai'd rusod dot araat om miningwonsoi iyahai do piro-piro o koimayaan?’ ka no. 23 Nga' poingkaa nondo o posimbaron ku, ‘A' oku i' kotutun dokoyu! Poggidu' kou nogi', iyokoyu i mingwonsoi dot araat!’ kangku nondo,” ka dau.
I Tulun dit Oilo om i Tulun di Basug do Minamaal do Walai
24 Om boros ka kawagu di Yesus, “Iyo nopoddi, om iri nopo i tulun di korongou do boros ku om tumanud nondo kopio'ddi, om iyo no di tulun dit oilo tu' minamaal do walai dau do poingimpou do watu. 25 Tu' tontok di ruminasam dot asapou, om luminuyud dot agayo, om tuminongus dot opuhod do nokobuntul di walai dau, om a' i' nahaba' i walai dau tu' hiri id watu o pinawaalan dau di walai dau. 26 Om iri no i tulun di korongou diti boros ku nga' a' indo tumanud diti, om iyo di tulun do basug di minamaal do walai dau do hiri'd togis. 27 Om tontok di ruminasam dot asapou, om luminuyud dot agayo, om tuminongus dot opuhod do nokobuntul di walai dau, om kahaba' nopo i walai dau'ddi. Om karaag nopo kopio i walai dau!” ka dau.
Kuasa' di Yesus
28 Om kopongo noddi i Yesus do minonuduk, om ongoimayaan nopo i tulun di hino'd hiri do nokorongou di ponudukan dau. 29 Tu' i Yesus nopo om haro i' kopio o kuasa' do monuduk, om a' i' iyo di guru do Tourat diyolo'.
Minomolingos i Yesus do Tulun di Kitoruol o Kulit dit Araat Kopio
1 Om ruhuk noddi i Yesus di nulu-nulu, om ogumu' tomod o tulun do minoyo' dau. 2 Om tontok noddi do ruminikot o songulun di kitoruol do kusta. Om ongoi no otud i tulun diri dot id toguang di Yesus, om boro-boros nod poingkaa, “Tuan, ondung orohian ko, om milo ko i' do momolingos doho',” ka dau. 3 Om ngoyo' no di Yesus kamao' i tulun diri om boro-boros nod, “Orohian oku i'. Olingasan ko i'!” ka dau. Om diiri i' om diiri do nolingos i toruol di tulun diri. 4 Om boros kaddi di Yesus dot id dau, “Soro-sorohon no! Kada' nogi' kopio posusuyo' iti dot id disai nopo. Nga' ongoi nogi' solowot dit imam om mokiporisa' i' dau do mongilo kopio ondung nolingasan ko. Om papatahak nogindo do porsombahan di sorobon do miagal di pinonuhuan di Musa, do popointalang dot id tulun do suwai do nolingasan kopio ko!” ka dau.
Minomolingos i Yesus di Susuhuon di Boyoon do Soudor do Rum
5 Tontok di nokorikot i Yesus do hilo'd Kapornaum, om rikot no dot id dau o songulun o boyoon do soudor do Rum, do minongoi pokitulung dau. 6 Boros ka di boyoon do soudor, “Tuan, sumakit i susuhuon ku do hilo'd duwalai. Om a' no iyau koundaliu do poinglii do hiri'd toodopon, om oinggorit tomod iyau,” ka dau. 7 Om boros ka di Yesus, “Ngoyon ku i' iyau lingasai,” ka dau. 8 Nga' boros ka di boyoon do soudor, “A' i' minog do mongoi, oi Tuan. A' oku i' osorupai do pasalakoi diya' di walai ku. Pomoros nopo do momolingos di toruol dau om olingasan i' i susuhuon ku. 9 Tu' iyoho' nga' id siriba' id kuasa' di pagawai dit asawat ko' doho' o pangkat. Om haro o piro-piro o soudor dot id siriba' do kuasa' ku. Om ondung, ‘Pamanau!’ kangku nopo do monuhu' do songulun di soudor ku, om mamanau no iyau. Om ondung moro-boros oku do, ‘kaino'd hiti!’ kangku nopo dot id soudor ku di suwai, om rumikot no iyau. Om ondung, ‘wonsoyon iti!’ kangku do monuhu' di susuhuon ku, om wonsoyon no dau,” ka dau. 10 Om noimayaan tomod diri i Yesus do nokorongou di pinoboros di boyoon do soudor diri. Om boros kaddi dau dot id tulun di manud-tanud dau, “Oimayaan oku no kopio do kotumbayaan do tulun diti. Id pogialatan piya do tulun dot Israil nga' a' oku po nokosolowot do tulun di kikotumbayaan dot irad diti kagayo! 11 Otopot i' kopio, dot ogumu' nondo o tulun do rumikot do mantad hilo'd koulayon om hilo'd kotonobon do mongoi ponokioropod do poinsugku' di Abraham, om i Isak, om i Yakub, do hiri'd poginakanan dot id suang di Pomorintaan do surga. 12 Nga' maha' nogindo i tulun dit apatut daa do kosuang di Pomorintaan do Kinorohingan om pataamon do hiri'd totuong, i hiri'd soliwan. Om hiri nondo iyolo' do mingihad om oinggorit,” ka dau. 13 Om boros kaddi di Yesus dot id boyoon do soudor diri, “Poguliai no, om poingkuro nopo i kotumbayaan nu, om osiliu no kopio o miagal diri,” ka dau. Om diiri i' om diiri do nolingasan i susuhuon di boyoon do soudor diri.
Minomolingos i Yesus do Tulun dot Ogumu'
14 Ongoi no i Yesus do hiri'd walai di Pitrus, om kokito no dau i tiwanon di Pitrus do tondu' do poinglii do hiri'd toodopon do sogiton tomod. 15 Om ngoyo' no di Yesus kamao' o longon di tiwanon di Pitrus, om kolingos nopoddi i sogiton dau. Om tungag noddi iyau om ongoi no pogobi-obi' di Yesus. 16 Sosodopon noddi, om rikot no o tulun dot id di Yesus do minongoi papaatod dot ogumu' o tulun di nongorusadan do rusod dot araat. Om iso' no o boros di Yesus do minonunsub ngai' di rusod dot araat diri om minomolingos ngai' di tulun di sumakit. 17 Om winonsoi ngai' pogi' di Yesus o miagal diri nga' mamayaan di pinoboros di Nabi Yosaya do poingkaa, “Binabo dau o koinggoritan toko' om liningos dau i toruol toko',” ka.
I Tulun dit Orohian Daa do Tumanud di Yesus
18 Nga' kokito nopoddi di Yesus dot ogumu' tomod o tulun do hiri'd posorili' dau, om suhuo' no daa dau i tumatanud dau do sumoborong di tasik. 19 Nga' rikot nogiddi o songulun o guru do Tourat dot id di Yesus, om boro-boros nod poingkaa, “Guru, orohian oku do tumanud diya' do hinonggo nopo o pakayaan nu!” ka. 20 Om boros ka di Yesus do suminimbar, “Toni nopo om kiluang i', om tombolog nga' haro i' o rumun, nga' aiso' i' moti' o liiyon do Tanak do Tulun,” ka dau. 21 Om boros kaddi do songulun di tumatanud dau di suwai, “Nga' Guru, potumboyoo' oku po daa diya' do muli' do mongoi pomolobong di tapa' ku,” ka. 22 Nga' boros ka di Yesus do suminimbar, “Tanud nopo doho', om pologoson nopo i tulun do napatai do momolobong dit oiyo ko' napatai,” ka.
Minoningkod i Yesus do Tongus dit Opuhod
23 Om sakai noddi i Yesus do parau', om woyo' no dau i tumatanud dau. 24 Om sigog nopoddi do rikot o tongus dit opuhod tomod do hiri'd tasik gisom dot osuangan do tumbak i parau'. Tontok nopoddi om koodop i Yesus. 25 Om ngoyo' noddi iyau posikai di tumatanud dau. Boros ka diyolo', “Guru tulungo' iyahai! Olonsod toko' moti'!” ka. 26 Om boros ka di Yesus, “Nokuro tu' moddosi kou? Noo, nga' a' kou i' monongkuyaan kopio doho'!” ka dau. Om ingkakat noddi i Yesus om suhuo' no dau do tumingkod i tongus dit opuhod om i tumbak dot agayo di hiri'd tasik. Om kotingkod nopoddi i tongus dot opuhod om i tumbak dot agayo. 27 Om ongosuayan tomod diri i tumatanud di Yesus. Boros ka diyolo', “Nunu maddi kopio koulun ilo' tu' tongus piya om tumbak nga' tumanud i' do boros dau!” ka.
Minomolingos i Yesus do Duwo o Tulun di Norusadan do Rusod dot Araat
28 Om korikot noddi i Yesus do hiri'd soborong di tasik, it id watas do Gadara. Om rikot no dot id dau o duwo o tulun di norusadan do rusod dot araat. Iri nopo duwo o tulun diri nga' orongit tomod gisom dot aiso' no o tongoiso' piya'd tulun do kobulun do maya'd hiri. 29 Om soliwan no iyolo' do mantad hiri'd luang di pamalabangan, om pinggiak nod, “Oi Tanak do Kinorohingan, kukuroyon nu iyahai? Mongoi ko no ponginggorit dahai dot a' po orikot o maso?” ka. 30 Om hiri nopod sodu-odu' diyolo' nga' haro ot ogumu' o wogok do sonsungal-sungal. 31 Om boros ka di rusod dot araat dot id di Yesus, “Sunsubon nu nopo iyahai do posoliwan om suhuon no iyahai do mongoi suang dilo wogok,” ka. 32 Om boros ka di Yesus, “Ongoi kou!” ka. Om soliwan noddi i rusod dot araat do mantad id duwo o tulun diri, om ongoi no suang di wogok dot ogumu'ddi. Om panangkus ngai' nopoddi i wogok om ongoi no do hiri'd koimpa' do piras, om tuhun nod hiri'd tasik. Om kongolondod ngai' nopoddi i wogok diri. 33 Om panangkus ngai' noddi i gompomogompi' di wogok do minongoi do hiri'd bandar, om popinsusuyo' no diyolo' o koinsanai di nosiliu'ddi om iri nogi' i nosiliu dot id duwo o tulun di norusadan do rusod dot araat. 34 Om ongoi ngai' nopoddi solowot di Yesus i tulun di hiri'd bandar diri. Om kosolowot poddi diyolo' i Yesus om pokionuo' no kopio diyolo' do tumongkiad i Yesus di watas diyolo'.
Minomolingos i Yesus do Tulun do Sumakit dit A' Koundaliu
1 Om sakai no i Yesus do parau' om soborong no di tasik, do guminuli' do hiri'd kampung dau. 2 Om hilo' no o piro-piro o tulun do pinapaatod dot id di Yesus do songulun it a' koundaliu, om poinglii po dot id sarasai. Om kokito nopoddi di Yesus o kogoyoo' do kotumbayaan di tulun diri, om boro-boros no iyau di tulun dit a' koundaliu'ddi do poingkaa, “Oi tanak ku, pogiroto' no o ginawo nu! Tu' noompunan ngai' no o dusa nu,” ka. 3 Om haro'ddi o piro-piro o guru do Tourat di hino'd hiri do momusorou do poingkaa, “Mongindaraat id Kinorohingan o tulun diti!” ka. 4 Nga' oilaan i' di Yesus it osorou diyolo', om boros kaddi dau, “Nokuro tu' iyo kopio'ddi karaat o pomusarahan dokoyu? 5 Honggo ma ot osonong-sonong do popoboros, ‘Noompunan no o dusa nu’ ka, ko' ‘Ingkakat no, om mamanau i'’ ka? 6 Nga' pointalangon ku no do dinondo do kikuasa' i Tanak do Tulun do mangampun do dusa do hiti'd pomogunan,” ka dau. Om boros kaddi di Yesus dot id tulun dit a' koundaliu'ddi, “Ingkakat, om saano' ino liniiyon nu, om muli' nondo!” ka dau. 7 Om ingkakat no i tulun dit a' koundaliu'ddi, om uli' no do hiri'd walai dau. 8 Om kokito ngai' poddi i tulun di nosiliu'ddi, om kongooris no iyolo', om pamarayou noddi iyolo'd Kinorohingan; tu' iyo i' kopio'ddi kagayo o kuasa' do pinatahak dau dot id tulun.
Linohou di Yesus i Matius
9 Om tongkiad noddi i Yesus do kinoiyonon diri. Om tontok di manau-panau iyau, om kokito no dau o songulun o gomponimung do sukai dot i Matius o ngaran, do poirikau do hiri'd tupis di pambayaran do sukai. Om boros ka di Yesus dot id dau, “Kaino tanud doho'!” ka. Om ingkakat noddi i Matius om tanud no iyau di Yesus. 10 Om tontok di maso di Yesus do makan do hiri'd walai di Matius, om rikot no o gomponimung do sukai dot ogumu' om piro-piro o tulun di pakaraaton do tulun dot ogumu', do minongoi akan do potorungak di Yesus om i tumatanud dau. 11 Om haro'ddi o piro-piro o tulun do Parisi do nokokito diyolo'. Om uhoto' no diyolo' i tumatanud di Yesus, “Nokuro tu' mongoi i guru dokoyu akan do potorungak di gomponimung do sukai om i tulun dit angaraat?” ka diyolo'. 12 Nga' norongou i' di Yesus i tuhoton diyolo'ddi, om boros ka dau do suminimbar, “Iri nopo tulun dit aiso' o toruol om a' i' minog do porikatan do dokutur, suwai ko' iri no i tulun di kitoruol. 13 Sorisidon no dokoyu o komoyon dit ayat dot id suang do Buuk do Kinorohingan do poingkaa, ‘Korohian ku nopo om kosianan, om okon i' ko' porsombahan do tayam-tayam di maan sorobo',’ ka. Tu' kinorikatan ku nopo om okon i' ko' mongoi pomolohou di tulun di momusorou dot osonong iyau, suwai ko' momolohou di tulun di kopuriman dot araat iyau,” ka dau.
Tuhoton do Pasal do Puasa
14 Om rikot noddi i tumatanud di Yohanis Gampamatis dot id di Yesus. Om ponguhot no iyolo' do poingkaa, “Nokuro tu' iyahai nopo om i tulun do Parisi om puasa i' nga' iri nopo i tumatanud nu iya' oi Guru, om a' i' puasa?” ka diyolo'. 15 Om boros ka di Yesus do suminimbar, “Poingkuro o dokoyu'd tosorou? Milo toi do tumongob i tulun di nalap dot id poginakanan do pikowinan do maso po di kusai do kuminawin do poinsugku' diyolo'? Atantu' no dot a' i'! Nga' orikot indo o maso do potongkiadon do mantad id diyolo' i kusai di kuminawin. Om diri pondo om puasa nogi' iyolo'. 16 Aiso' i' o tulun do mangampin do rasuk di laid no, do kain di wagu po o pangampin. Tu' kumongkong indo i kain di pinangampin om otori' nondo i rasuk di nompinan diri, om ohurak nondo do gisom dot araladan nogindo i nohurak mantad. 17 Om iyo nogiddi tu' aiso' i' o tulun do posuang do waig dot anggur di wagu dot id poiiyanan do waig dot anggur, di kulit do winonsoi, di laid no. Tu' tumobuk indo i poiiyanan diri om araag, om orubat tomod nopo i waig dot anggur. Iri nopo i waig dot anggur di wagu om mositi' no do posuangon dot id poiiyanan di wagu kowonsoi, om a' indo orubat goduwo iri,” ka dau.
Tanak di Boyoon do Walai'd Sasambayangan om i Tondu' di Minongoi Igit do Pakayan di Yesus
18 Om nopo di moro-boros po i Yesus di tumatanud di Yohanis Gampamatis, om rikot no o songulun o boyoon do walai'd sasambayangan. Om otud no iyau dot id toguang di Yesus om boro-boros nod poingkaa, “Wagu po koiduwai'd ginawo i tanak ku'd tondu'. Nga' pokionuon ku daa iya' do mongoi pangama' dau, om apasi indo iyau kawagu,” ka. 19 Om ingkakat no i Yesus om i tumatanud dau, om woyo' no iyolo' di tulun diri. 20-21 Hiri noddid tanga'd ralan om haro o songulun o tondu' di hopod no om duwo o toun do sumakit do pomulanan, do minongoi insomok di Yesus, do mantad hiri'd tohuri di Yesus. Osorou nopo dau nga', “koigit oku po daa di pakayan dau, om olingasan oku no,” ka. Om ongoi no iyau igit di tompok di pakayan di Yesus. 22 Om tontok iddi do kuminoili i Yesus om kokito no dau i tondu'. Om boros kaddi di Yesus dot id tondu'ddi, “Oi tanak ku, pogiroto' no o ginawo nu! Olingasan ko i', tu' otumbayaan ko i' doho'!” ka dau. Om tontok iddi do nolingasan i tondu'ddi. 23 Om korikot noddi i Yesus do hiri'd walai di boyoon do walai'd sasambayangan diri. Om soira'ddi nokito dau i tulun do popouni do tuunion do maan do pogihad om i tulun dot ogumu' dot angagangau, 24 om boros ka dau dot id diyolo', “Soliwan ngai' kou! Iti nopo tanak diti om a' i' napatai; koodop no toomod ilo',” ka. Om irak-irakai no diyolo' i Yesus. 25 Om kosoliwan ngai' poddi i tulun, om suang no i Yesus di bilik di tanak diri om ngoyo' no dau igitai i longon di tanak. Om tungag noddi i tanak do tondu'ddi. 26 Om kotongkop nopo i habar diri dot id watas diri.
Minomolingos i Yesus do Duwo o Tulun do Bolou
27 Om tongkiad no i Yesus do kinoiyonon diri, nga' hiri noddid tanga'd ralan om tanud no dau o duwo o tulun do bolou. Om pinggiak no iyolo' do poingkaa, “Oi Tanak di Daud, kosianai no dahai!” ka. 28 Om kosuang poddi i Yesus do hiri'd walai, om rikot no dot id dau i duwo o tulun do bolou'ddi. Om uhoto' no di Yesus iyolo', “Otumbayaan kou i' do milo oku do momolingos dokoyu?” ka dau. “Otumbayaan i' iyahai oi Guru,” ka diyolo' do suminimbar. 29 Om kamao' noddi di Yesus i mato diyolo' om boro-boros nod, “Owonsoi no kopio i soro-sorohon dokoyu, tu' monongkuyaan kou i',” ka dau. 30 Om kokito noddi iyolo'. Om poinsano' no kopio di Yesus iyolo' dot a' momisunud dot isai nopo di nosiliu'ddi. 31 Nga' okon nogi' do nongoi diyolo' popinsunudo' i habar do pasal di Yesus do pointongkop do watas diri.
Minomolingos i Yesus do Tulun do Bobou
32 Om soira'ddi nakapamanau i duwo o tulun diri, om ngoyo' no pootodo' dot id di Yesus o songulun o bobou di norusadan do rusod dot araat. 33 Om sunsubo' no di Yesus i rusod dot araat om tontok iddi do nokoboros kawagu i tulun diri. Om ongosuayan ngai' nopoddi i tulun dot ogumu'ddi om boros ka diyolo', “A' po iyahai insan kokito dot iyo kopio'dti do hiti'd Israil!” ka diyolo'. 34 Nga' boros ka di tulun do Parisi, “Iri i boyoon do rusod dot araat o minanahak dau do kuasa' do monunsub di rusod dot araat diri,” ka diyolo'.
Nosianan i Yesus do Nokokito di Tulun dot Ogumu'
35 Om iyo noddi i Yesus do mintikid do mongoi dot id iso' o bandar om kumaa dot id bandar do suwai, om mantad no dot id iso' o kampung om kumaa no dot id kampung do suwai. Om monuduk iyau do hiri'd piro-piro o walai'd sasambayangan, om popinsusui di Habar dot Osonong do pasal do Pomorintaan do Kinorohingan. Om minomolingos iyau do tulun di sumakit do mogisuayan o toruol, om i haro o bohiton do tinan. 36 Om soira'ddi nokito di Yesus i tulun dot ogumu'ddi, om osianan diri iyau diyolo', tu' oborulong nopo iyolo' om aiso' o pokukurayan, dot iyo pod dumba' dit aiso' o momogompi'. 37 Om boros kaddi di Yesus dot id tumatanud dau, “Agayo tomod daa iti tomoton nga' okuri' iddi kopio o mongomot. 38 Om pokianu kou no di sanganu diti tumo om monuhu' i' iyau do tulun do mongoi pongomot di tomoton dau,” ka dau.
I Hopod om Duwo o Rasul
1 Insan o tadau om lohowo' ngai' no di Yesus do tumimung i hopod om duwo o tumatanud dau. Om onuwai no dau iyolo' do kuasa' do monunsub do rusod dot araat om momolingos do mogisuayan o toruol om bohiton do tinan. 2 Iti ngai' no o ngaran di hopod om duwo o tulun di sinuhu'ddi: Koiso' nopo nga' i Simun (i roitan nogi' dot i Pitrus) om i Andarias i tobpinai di Simun; om i Yakub nogiddi om i Yohanis i tobpinai di Yakub, i tangaanak di Sabidi. 3 Om i Pilipus nogiddi, om i Bartolomius, om i Tumas, om i Matius i gomponimung do sukai, om i Yakub i tanak di Alpius, om i Tadius; 4 om i Simun, i rinoitan do Patriot om i Yudas Iskariot, i pinapadagang di Yesus.
Karaja' di Rasul
5 Om suhuo' noddi di Yesus i hopod om duwo o tulun di sinuhu'ddi do mamanau om bilinai no dau do poingkaa, “Kada' kou ongoi do hilo'd watas do tulun dit okon ko' Yohudi. Om kada' kou ongoi do hilo'd kabandaran do tulun do Samaria. 6 Nga' ngoyon nopo kopio dokoyu om id tulun dot Israil, om okon-okon po om id tulun dot Israil di nangapalid. 7 Sunudan no dokoyu iyolo' dot oruhai nod korikot i Pomorintaan do surga. 8 Lingasan no dokoyu i tulun di kitoruol; om posion no dokoyu i tulun di nangapatai; om lingasan no dokoyu i tulun di kitoruol do kusta, om sunsubon no dokoyu i rusod dot araat. Tu' koinsanai'ddi om pinopuhawang i' toomod dot id dokoyu. Om iyokoyu nga' apatut nogi' do popuhawang diri. 9 Kada' kou igit do tusin do tamas, ko' tusin do pirok ko' tusin pod tambaga'. 10 Om kada' kou igit do kantung do poiiyanan di nipuhawang do mantad id tulun do suwai, om kada' kou igit do duwo o rasuk do pakayon do hilo'd tanga'd ralan, ko' kasut ko' sukud po. Tu' iri nopo i tulun di pakaraja' om apatut i' dot onuan do nunu nopo it apatut dot aanu dau. 11 Korikot kou nopo dot id iso' o bandar ko' kampung, om mogihum kou no do tulun dit orohian do pasalakoi dokoyu. Om mundorong kou nopo do hiri'd walai di tulun diri do gisom do mamanau kou kawagu. 12 Soira' nopo do sumalakoi kou dot id walai, om momoros kou nod, ‘Maha' daa om barakatan kou'd Tuhan,’ kanto dokoyu. 13 Om ondung romiton kou di tulun di manangwalai om pologoson nopo i boros dokoyu do suminuwau do tumimporon dot id diyolo'. Nga' ondung a' kou diyolo' romiton, om onuon no dokoyu kawagu i komoyon di boros dokoyu di suminuwau'ddi. 14 Ondung haro o walai ko' bandar dit a' rumamit dokoyu ko' it a' mokinongou dokoyu, om tongkiadan nopo dokoyu i kinoiyonon om tantagon no i pupuk do mantad id lapap dokoyu. 15 Ilaai no dokoyu! Dot orikot nopo i Tadau'd Kopomutusan, om milo-milo nogid Kinorohingan dot ompunan i tulun do hilo'd bandar do Sodom om Gomura ko' i tulun dit id bandar diri!” ka dau.
Koinggoritan dot id Dabantalan
16 Om boros ka kawagu di Yesus, “Ilaai no kopio dokoyu; do suhuon ku moti' iyokoyu'd mamanau do miagal di dumba' dit aiso' no o pokukurayan dot id pogialatan do toni dit orongit. Om antaan-taan no kopio dokoyu do miagal di tulanut tu' mumbangan-bangan kasai', om mositi' no dot alamaya' kou do miagal di punai. 17 Antaan-taan no dokoyu, tu' atangkap kou motindo om pokoyoon kou dot id kut. Om inggoriton kou dot id suang do walai'd sasambayangan. 18 Om potimbabaon kou nondo do pomorinta' om raja' tu' tumanud kou i' doho'. Nga' iri no o maso dokoyu do poposusui do pasal doho' dot id diyolo' om id tulun dit okon ko' Yohudi. 19 Nga' ondung igitan kou dot id bisara', om kada' kou katangkabo ondung nunu it apatut dokoyu'd poboroson, om ondung poingkuro kou do moro-boros. Tu' nunu nopo it apatut dokoyu'd poboroson, om kosunud indo dot id dokoyu do tontok diri. 20 Tu' iri nopondo i moro-boros do tontok diri om okon no ko' iyokoyu suwai ko' i Rusod di Tapa' do hilo'd surga, i moro-boros dot id ginawo dokoyu. 21 Om orikot nondo o maso do patahakon nopod tulun i tobpinai dau do maan patayo'. Om iyo iddi ot osiliu dot id pialatan do tapa' om i tanak dau. Om sumaap nondo o tangaanak di molohing diyolo', om patahakon nopo diyolo' i molohing diyolo' do maan patayo'. 22 Om karaatan kou nondo do toinsanan o tulun tu' tumatanud kou i' doho'. Nga' iri nopondo i tulun dit ogirot do gisom do kopupuson om apasi no. 23 Ondung inggoriton kou dot id iso' o bandar, om mogidu' kou no do kumaa dot id bandar do suwai. Nga' sunudan mantad ku iyokoyu dot a' po dokoyu oongoi ngai' i kabandaran dot Israil, om korikot no i Tanak do Tulun. 24 Iri nopo i tudukan om a' i' agayo ko' i monuduk dau, om i susuhuon nga' a' i' agayo ko' i tuan dau. 25 Ula' no do koiyo po i tulun di tudukan di monuduk dau, om koiyo i susuhuon di tuan dau. Tu' ondung pungaranan i boyoon do sompiiyon dot i Biilsibul, om okuro-kuro nogindo it id suang do sompiiyon dau. Araa-raat nondo o ngaran do pomungaran diyolo'!” ka dau.
Kooris kou nod Kinorohingan
26 Om boros ka kawagu di Yesus, “Kada' kou kooris do tulun. Tu' aiso' i' o poillisok dot a' okito do koimbagu, om aiso' i lisok-lisokon daa dot a' oimbulayan. 27 Iti nopo poboroson ku dokoyu do dongotuong, om poboroson no kopio dokoyu kawagu do dangadau. Om iri nopo i poburungon dot id tolingo dokoyu om popinsunudon no kopio dokoyu do hinonggo nopo! 28 Kada' kou kooris do tulun di milo nod mamatai do tinan, nga' a' i' milo do mamatai'd rusod. Nga' kooris kou nod Kinorohingan, i kikuasa' do mamatai'd tinan om rusod do hilo'd naraka. 29 Duwo nopo tinan do pirit om sousin noo o pomoli. Nga' iyo piya'ddi nga' aiso' i' o tongosonginan piya di pirit dot aratu' do hilo'd tana' dot okon ko' korohian di Tapa' dokoyu. 30 Om ino piya tobuk dokoyu nga' nointob i' dau o kogumuo'. 31 Iyo nopoddi om kada' kou kooris! Tu' iyokoyu nopo om poingharo i' ko' i pirit!” ka dau.
Mangakun di Yesus dot id Toguang do Tulun dot Ogumu'
32 Om boros ka kawagu di Yesus, “Isai nopo i mangakun do tumatanud iyau doho' dot id toguang do tulun dot ogumu' om iyoho' nga' mangakun no dau dot id toguang di Tapa' ku do hilo'd surga. 33 Nga' isai nopo i mogolim do tumatanud iyau doho' dot id toguang do tulun dot ogumu' om iyoho' nga' mogolim no dau dot id toguang di Tapa' ku do hilo'd surga,” ka dau.
Okon i' ko' Piuludan Suwai ko' Pisaapan
34 Om boros ka kawagu di Yesus, “Kada' kou pomusorou do piuludan ot igitan ku do hiti'd pomogunan. Okon i' ko' piuludan o nigitan ku, suwai ko' pisaapan. 35 Ruminikot oku do popisongkiwal di tanak do kusai di tapa' dau, om popisongkiwal di tanak do tondu' di tina' dau, om popisongkiwal di tondu' di monongiwan di tiwanon dau'd tondu'. 36 Otopot no kopio, dot iri nopo it osiliu do pisangod dot agayo, om i hiri'd dau'd sompiiyon. 37 Iri nopo tulun di poinggayo o kosianan di tapa' dau om i tina' dau ko' mantad do kosianan dau doho', om a' i' osorupai do sumiliu'd tumatanud doho'. Om iri tulun di poinggayo o kosianan di tanak dau'd tondu' om kusai ko' mantad di kosianan dau doho', nga' a' i' osorupai do sumiliu'd tumatanud doho'. 38 Om iri tulun dit a' sumaan do salib dau do tumanud doho', nga' a' i' osorupai do sumiliu'd tumatanud doho'. 39 Iri nopo tulun di mumbal do momogompi' do dau'd koposion, om okon nogi' dot atagakan di koposion dau; nga' iri nopo tulun dit atagakan do koposion dau dot it otorodok dot id doho' o katagak-tagak, om aanu nogindo kawagu dau i koposion dau'ddi,” ka dau.
Isomuli' di Wonsoyon dot Osonong
40 Om boros ka kawagu di Yesus, “Iri nopo tulun di rumamit dokoyu, om rumamit no doho'. Om iri tulun di rumamit doho', nga' rumamit no di minonuhu' doho'. 41 Iri nopo tulun di rumamit do susuhuon do Kinorohingan tu' i susuhuon iyau'd Kinorohingan o kopomoromitan, om kaanu no dot isomuli' do miagal dit isomuli' do susuhuon do Kinorohingan. Om isai nopo i rumamit do tulun dit osonong, tu' i kosonongo' di tulun diri o kopomoromitan, om kaanu no dot isomuli' do miagal dit isomuli' do tulun dit osonong. 42 Om isai nopo o manahak do tinumon, do waig piya toomod dit osogit, dot id ongoiso' di tulun di tumatanud ku dit aiso' i' o ngaran-ngaran, tu' i tumatanud iyau doho' o kapanahakan, om kotumbayaai kou no, dot atantu' no do kaanu i' iyau dot isomuli'!” ka dau.
Minonuhu' i Yohanis Gampamatis di Tumatanud Dau do Minongoi Solowot di Yesus
1 Om kongobilinai poddi di Yesus i hopod om duwo o tumatanud dau, om tongkiad no iyau do mantad id kinoiyonon diri. Om ongoi no iyau ponuduk om pinopopinsunud iyau do boros do Kinorohingan do hiri'd kabandaran dit id kasamakan. 2 Om korongou no i Yohanis Gampamatis do pasal di pingwonsoyon di Kristus di maso di Yohanis do poinggiil. Om suhuo' noddi dau o piro-piro di tumatanud dau do mongoi ponguhot di Yesus. Boros ka di tumatanud dau, 3 “Iya' nogi' i tulun di rumikot di pinabatos do Kinorohingan, ko' mandad po tuu iyahai do tulun do suwai?” ka diyolo'. 4 Om boros ka di Yesus do suminimbar, “Guli' kou no do hilo'd di Yohanis om posunudon no i norongou om i nokito dokoyu. 5 Nokoungkalat i tulun do bolou, om nakapanau i tulun dit a' koundaliu, om nolingasan i tulun di kitoruol do kusta, om i tulun do bosukon nga' nokorongou, om i tulun do napatai nga' noposian kawagu, om i Habar dot Osonong do mantad id Kinorohingan nga' popinsusuyon dot id tulun do mosikin. 6 Olumaag no i tulun dit a' lumuhoi o kotumbayaan dot id doho' do kokito di pingwonsoyon ku,” ka dau. 7 Om kapamanau poddi i tulun di sinuhu' di Yohanis, om timpuun no i Yesus do minoro-boros dot id tulun dit ogumu' do pasal di Yohanis. Boros ka dau, “Nunu o nongoi dokoyu antangai do hilo'd tana' do kowotuan? I sakot di tilibon do ribut? 8 Nunu o nongoi dokoyu antangai do hilo'? I tulun dit osonong o pakayan? Nga' tulun nopo dit osonong o pakayan om hilo' id walai'd raja' o tiyonon! 9 Nga' nokuro tu' minongoi kou do hilo'd tana' do kowotuan? Minongoi kou tuu ontong do nabi? Otopot nogi' do nabi iyau, nga' agayo po iyau ko' nabi. 10 Tu' i Yohanis no o komoyon dit ayat dot id Buuk do Kinorohingan di poingkaa, ‘Iti no i tulun di suhuon ku, kad Kinorohingan. Suhuon ku iyau do mogulu diya', om orontisan i' dau i ralan do wayaan nu,’ ka. 11 Ilaai no dokoyu! Do hiti nopod pomogunan om a' i' nokoumbal do haro o tulun dit agayo ko' i Yohanis Gampamatis. Nga' iyo piya'ddi, nga' iri nopo tulun di kopupuson no dot aiso' kopio o ngaran-ngaran dot id suang di Pomorintaan do surga om agayo i' ko' i Yohanis. 12 Mantad poddi timpuun i' i Yohanis do minonuduk om gisom do dinondo, om saapon no i Pomorintaan do surga do tulun di tumotos daa do mangala' diyolo' do mikuwo'd kororongit. 13 Oinsanan nopo i Tourat di Musa om i ponudukan di piro-piro nabi do pinoposunud di Pomorintaan diri, do gisom do kinorikatan di Yohanis. 14 Om ondung monongkuyaan kou, om i Yohanis no i Ilia diri, i nokosunud mantad no di gulu po o korikatan dau. 15 Pokinongou kou no, do kitolingo kou no! 16 Nunu po daa o poiyaan ku diti tulun do dinondo? Iyo po iyolo' di tangaanak di songirikau do hilo'd tomu. Om boros ka no di tangaanak di mogiuruk-uruk dot id tangaanak do suwai, 17 ‘Pounion no dahai i tuunion do popotood om a' kou i' manari'! Om modsinding no iyahai di sinding do pogihad do tulun do napatai om a' kou i' mihad!’ ka no diyolo'. 18 Korikot no i Yohanis, om puasa nopo iyau om a' monginum do waig dot anggur; om momoros i' o tulun do, ‘Norusadan iyau'd rogon!’ ka. 19 Om korikot noddi i Tanak do Tulun, om makan iyau om minum; om momoros i' o tulun dot, ‘Ontong pogi' dilo tulun! Odoot, nga' magagauk, om tambalut di tulun di moninimung do sukai om tambalut do tulun di kidusa,’ ka no. Iyo piya'ddi, nga' kointalang i' o kotopoto' do toilaan do Kinorohingan dot i kootuson diri o popointalang,” ka dau.
I Kabandaran dit A' Monongkuyaan
20 Om pasalao' noddi di Yesus i kabandaran di pinamansayan dau dot ogumu' kopio o koimayaan, tu' a' i' i tulun do hiri kumorologo do mantad id dusa diyolo'. 21 Boros ka dau, “Obungou kou no, oi tulun do Kurasin! Obungou kou no, oi tulun do Baitsaida! Ondung winonsoi daa i kongoimayaan di nongowonsoi dot id pogialatan dokoyu do hilo'd bandar do Tirus om Sidon, om atantu' no do laid no daa i tulun do hilo' korologo do mantad id dusa diyolo', om nakapanampakai no iyolo' do pakayan di dong mogihad om naaraban diyolo'd pupuk o tulu diyolo'. 22 Ilaai no dokoyu, do Tadau nopondo do Kopomutusan, om iri nopo i tulun do hilo'd Tirus om hilo'd Sidon, om milo-milo nogid Kinorohingan dot ompunan ko' iyokoyu! 23 Om iyokoyu, oi tulun do Kapornaum! Poinsawaton kou tuu'ndo do gisom do hilo'd surga? Amu'! Suwai ko' pataamon kou nogindo do hilo'd naraka! Tu' ondung winonsoi daa do hilo'd Sodom i kongoimayaan di winonsoi dot id pogialatan dokoyu, om hino kasai' po daa o Sodom do gisom do dinondo! 24 Ilaai no dokoyu, do Tadau nopod Kopomutusan, om milo-milo nogid Kinorohingan dot ompunan i tulun do Sodom ko' iyokoyu!” ka dau.
Rikot kou no dot id Doho'
25 Om tontok noddi do suminambayang i Yesus do poingkaa, “Oi Apa', i Tuhan do momorinta' do tawan om pomogunan! Mongunsikou oku no diya' tu' pinolisok ngai' nu i' iri do mantad id tulun dit ongoilo om it ongkitoilaan, nga' pinotuduk nu i' iri dot id tulun dit aiso' o toilaan. 26 Tu' iyo noddi o korohian nu, oi Apa',” ka dau. 27 Om boros kaddi kawagu di Yesus, “Nangkatahak ngai' nu no doho' o koinsanai'd nunu nopo, oi Apa'. Aiso' i' o tongosongulun piya do kotutun di Tanak, suwai ko' iya' noo, oi Apa'. Om aiso' nogi' o suwai do kotutun diya', oi Apa', do suwai ko' i Tanak, om i tulun di pointutunon di Tanak diya', oi Apa'. 28 Rikot kou no dot id doho', koinsanai dokoyu it ongohuyan, om i kopuriman dot awagat o binabo; om onuan ku i' iyokoyu do koinsanangan. 29 Tonudo' no dokoyu i ponuhuan ku om pinsingilo kou no do mantad id doho'. Tu' iyoho' nopo om alamaya' om osiriba' o ginawo, om osonong indo o topurimanan dokoyu. 30 Tu' iri nopo i ponuhuan ku om popoinsonong i', om iri i pababaan ku dokoyu nga' agaan i',” ka dau.
Tuhoton do Pasal di Tadau'd Sabat
1 Tontok dot insan o tadau'd Sabat di nakawaya' i Yesus do tumo do tinanaman do gandum, om pingkotu' no i tumatanud dau di rawo do gandum, om ompurio' no diyolo' om kano' no, tu' louson i' kopio iyolo'. 2 Nga' kokito no iyolo' di tulun do Parisi, om uhoto' no di tulun do Parisi i Yesus, “Antangai pogi'! Nga' tumolibamban moti' ilo tumatanud nu do Tourat toko', tu' momonsoi i' iyolo' di pogoduhan do tontok do tadau'd Sabat,” ka diyolo'. 3 Om boros ka di Yesus do suminimbar, “A' kou toi insan kabasa' di winonsoi di Daud om i tulun dau do tontok di linouson iyolo'? 4 Suang nopo iyau di Walai'd Sasambayangan dot Agayo om pangakan no iyau di roti di nakatahak no dot id Kinorohingan. Nga' tumanud nopo daa do Tourat, om a' i' iyau om i tulun dau koino-ino do mangakan di roti'ddi, tu' iri no imam o koino-ino do mangakan diri. 5 Om a' kou toi insan kabasa' do hiri'd Tourat di Musa do pointikid-tikid nopo do tadau'd Sabat it imam di maganu-anu do hiri'd Walai'd Sasambayangan dot Agayo do kotolibamban di toturan do tadau'd Sabat, nga' a' indo iyolo' pasalaon? 6 Ilaai no kopio dokoyu iti poboroson ku: hino id hiti it agayo ko' iti Walai'd Sasambayangan dot Agayo. 7 Nokotulis no dot id Buuk do Kinorohingan o poingkaa: Kosianan o korohian ku, okon i' ko' porsombahan do tayam-tayam di maan sorobo'. Om ondung kosuhut kopio kou di boros diri, om atantu' no dot a' kou i' papasala' do tulun dit aiso' o sala'. 8 Tu' haro i' o kuasa' di Tanak do Tulun dot id sawat do tadau'd Sabat,” ka dau.
I Tulun di Napatai o Tiso'd Longon
9 Om tongkiad no i Yesus do kinoiyonon diri om ongoi no iyau dot id iso' o walai'd sasambayangan. 10 Om hiri nopo nga' haro o tulun di napatai o tiso'd longon. Om haro'ddi o piro-piro o tulun di mogihum do kasalaan di Yesus, do minonguhot di Yesus do poingkaa, “Kotolibamban tuu di Tourat toko' do momolingos do tulun do tontok do tadau'd Sabat?” ka. 11 Om boros ka di Yesus do suminimbar, “Ondung haro o songulun dot id pogialatan dokoyu do haro o songinan o dumba', om aratu' nondo i dumba'ddi dot id luang dit aralom do tontok do tadau'd Sabat; om a' tuu tumotos i sanganu di dumba'ddi do poposoliwan di dumba' do mantad hiri'd luang? 12 Om tulun nopo om poingharo i' ko' mantad do dumba'! Iyo nopoddi, om popokoino-ino i' i Tourat toko' do monulung do tulun do tontok do tadau'd Sabat,” ka dau. 13 Om boros kaddi di Yesus dot id tulun di napatai o tiso'd longon, “Palatano' ino longon nu,” ka. Om palatano' no di tulun i longon dau, om kolingos noddi i longon dau om osonong do miagal di longon dau'd tiso'. 14 Nga' tongkiad noddi i tulun do Parisi do mantad hiri'd walai'd sasambayangan diri, om pogipapakat no iyolo' do mamatai di Yesus.
I Susuhuon di Pinili' do Kinorohingan
15 Om oilaan i' di Yesus do haro o pomusarahan dot araat di tulun do Parisi dot id dau. Om tongkiad noddi iyau do mantad hiri'd kinoiyonon diri nga' ogumu' i' o tulun do tuminanud dau. Om lingasai ngai' noddi dau i tulun di kitoruol. 16 Nga' noduhan i' dau iyolo' do popinsunud do pasal dau dot id tulun do suwai. 17 Om iri no o minamayaan di boros do Kinorohingan do pinolombus di Nabi Yosaya, do poingkaa, 18 “Iti no i susuhuon ku di nopili' ku, i tulun di kosianan ku om i kohubayaan do ginawo ku. Patahakon ku indo dau i Rusod ku, om popinsusuyon dau i kotulido' ku dot id koinsanai'd bansa'. 19 A' i' iyau monokisongkiwal om a' minggarang, om a' mimboros do monuduk do hilo'd karalan-ralanan. 20 Alamaya' i' iyau dot id tulun dit oluhoi, om obinguhup iyau di tulun dit aiso' o pokukurayan. Om a' i' iyau mundorong dot a' po owonsoi it otulid, 21 om oinsanan nopondo o bansa'd tulun do mogondos dau,” ka.
I Yesus om i Biilsibul
22 Om pootodo' noddi dot id di Yesus o songulun o bolou di bobou, tu' norusadan do rusod dot araat i tulun diri. Om lingasai no di Yesus i tulun diri, gisom do nokoboros om nokokito'ddi i tulun diri. 23 Om osuayan ngai' nopoddi i tulun di winonsoi di Yesus diri. Boros ka diyolo', “Okon tuu ko' ilo' nogi' i tanak di Daud di pinabatos diri?” ka. 24 Nga' tontok di norongou di tulun do Parisi o boros do miagal diri, om simbar no iyolo' do poingkaa, “Milo pogi' iti tulun diti do monunsub do rusod dot araat nga' noonuan no iyau di Biilsibul, i boyoon do rusod dot araat diri, do kuasa',” ka. 25 Nga' oilaan i' di Yesus i pomusarahan di tulun do Parisi'ddi. Om boros kaddi dau dot id diyolo', “Ondung haro o pomogunan dit opogibahagi' dot id piro-piro o bohogian di mogisasangod, om a' i' ogirot o pomogunan diri. Om i bandar ko' i sompiiyon dit a' mogiuulud nga' araag i'. 26 Om iyo nogiddi o pomorintaan do Rogon; tu' ondung haro o tiso' o sinompuruan do monunsub do sinompuruan do suwai, om nokopogipori-pori no i pomorintaan di Rogon, om a' nondo ogirot i pomorintaan diri. 27 Momoros kou daa do monunsub oku do rusod dot araat do mantad id kuasa' di Biilsibul. Iyo nopoddi, om disai nanu' do kuasa' do pakayon di tumatanud dokoyu do monunsub do rusod dot araat. Iri i tumatanud dokoyu o popointalang do kasala' kou! 28 Nga' iyoho' nopo om kuasa' i' do Rusod do Kinorohingan o ponunsub ku do rusod dot araat. Om komoyon nopoddi nga' nokorikot no i Pomorintaan do Kinorohingan dot id pogialatan dokoyu. 29 Poingkuro toi o tulun do kosuang do walai di tulun dot okoris do mongoi panakau di dapu' dau, dot a' po dau akagasan i tulun dot okoris diri? Nga' akagasan po dau i tulun dit okoris om milo nogi' iyau do mongoi panganu di dapu' di tulun diri. 30 Iri nopo tulun dit a' sumokodung doho', om atantu' no do sumaap doho'. Om iri tulun dit a' monguhup doho' nga' pointantu' no do mamaraag di karaja' ku! 31 Iyo nopoddi, om ilaai no dokoyu, do tontok nopo do momonsoi o tulun do dusa om mimboros do mongindaraat om oompunan po! Nga' ondung mongindaraat o tulun do Rusod do Kinorohingan om a' no iyau oompunan! 32 Ondung mimboros o tulun do sumaap di Tanak do Tulun om oompunan po iyau, nga' mongindaraat nopo di Rusod do Kinorohingan, om a' no iyau oompunan, do dinondo tuu ko' tontok di tadau do kopomutusan!” ka dau.
Tua' di Kayu o Kotutun-tutun di Guas
33 Om boros ka kawagu di Yesus, “Mositi' no dot osonong o ponuni-suni di kayu om ongosonong indo i tua'ddi. Ondung a' osonong o ponuni-suni di kayu, om iri piya'ndo i tua' nga' a' no osonong. Iri i tua' di kayu o kotutun-tutun ondung osonong tuu o ponuni-suni di kayu ko' amu'. 34 Iyokoyu nopo om tulun dit angaraat, om poingkuro po daa do milo kou do mimboros dot osonong, dot angaraat kou? Tu' nunu nopo i koboros om iri no it id suang do ginawo! 35 Iri nopo tulun dit osonong om popoboros i' dit osonong tu' poimponu' i' iyau do kosonongo'. Nga' iri nopo tulun dit araat om popoboros no dit angaraat tu' poimponu' i' iyau do karaaton. 36 Iyo nopoddi, om soro-soroho' no dokoyu do Tadau nopondo do Kopomutusan, om tonggungon i' do pointikid-tikid do tulun i boros di nokolombus diyolo'. 37 Tu' iri no i boros dokoyu o maan do pongilo ondung kisala' kou ko' aiso',” ka dau.
Sinuhu' di Tulun do Parisi i Yesus do Momonsoi'd Koimayaan
38 Om boros kaddi do piro-piro di guru do Tourat om i tulun do Parisi, “Oi Guru, sikito daa iyahai diya' do momonsoi'd koimayaan,” ka. 39 Om boros ka di Yesus do suminimbar, “Araat no kopio om a' kotutun do Kinorohingan o tulun do maso'd baino'! Monuhu' kou daa doho' do momonsoi'd koimayaan? Nga' a' kou no pokitonon dot ongoiso' piya o koimayaan, do suwai ko' i koimayaan di nosiliu dot id di Nabi Yunus. 40 Tolu o tadau om tolu o totuong di Yunus do poinsuang di tian di sada' dot agayo. Om iri Tanak do Tulun nga' tolu indo o tadau om tolu o totuong do pasaalom do tana'. 41 Orikot nopondo i Tadau'd Kopomutusan om tumungag nondo i tulun do hilo'd Niniwi do mogiaandad diti tulun do dinondo, om pasalaon nondo diyolo' iti tulun do dinondo. Tu' iri nopo tulun do hilo'd Niniwi om kuminorologo i' do dusa diyolo' di minonusui i Yunus do boros do Kinorohingan dot id diyolo'. Nga' dinondo nopodti om hino id hiti it agayo ko' i Yunus! 42 Orikot nopondo i Tadau'd Kopomutusan om tumungag nondo i raja' do tondu' do mantad hilo'd pomogunan di ponong id salatan do kaandad diti tulun do dinondo, om pasalaon nondo dau iyolo'. Tu' pamanau nopo i raja' do tondu' dot osodu' piya o pinamanau do mantad hilo'd tisan diti pomogunan do mongoi pokinongou di ponudukan di Suliman dit angaralom kopio. Nga' dinondo nopodti om hino id hiti it agayo ko' i Suliman!” ka dau.
Gumuli' Kawagu i Rusod dot Araat
43 Om boros ka kawagu di Yesus, “Soira' nopo do kopoggidu' o rusod dot araat do mantad id iso' o tulun, om mintikid nopondo i rusod diri do piro-piro o kinoiyonon dit otuu do mogihum daa do tiyonon, nga' aiso' i' ot okito dau. 44 Om moro-boros nondo i rusod diri do poingkaa, ‘Gumuli' oku nogi' di walai di notongkiadan ku,’ ka. Om korikot nopondo iyau'd hiri, om aiso' i' o suang di walai om noimuhawan om noulud o hiri'd suang. 45 Om mamanau nondo iyau do mongoi pangangat do turu' o rusod do suwai dit araat po ko' iyau. Om sumuang nondo iyolo' di tulun diri, om mundorong do hiri. Om araat pondo ko' i kowoyo-woyoon di gulu po o kowoyo-woyoon di tulun diri. Om iyo nogiddi ot osiliu dot id tulun dit angaraat do tontok do maso'd baino',” ka dau.
I Tina' om i Tobpinai di Yesus
46 Om maso po di Yesus do moro-boros di tulun dit ogumu'ddi, om korikot no i tina' om i tobpinai dau. Om poingkakat iyolo' do hiri'd soliwan om mogihum daa iyolo'd ralan do mongoi boro-boros di Yesus. 47 Om haro'ddi o songulun dot id pogialatan di tulun dot ogumu' do minoro-boros dot id di Yesus do poingkaa, “Guru, hoodi moti'd soliwan i tina' om i tobpinai nu. Mongoi daa iyolo' boro-boros diya',” ka. 48 Om boros ka di Yesus do suminimbar, “Isai o tina' ku? Om isai o tobpinai ku?” ka dau. 49 Om tuduko' no dau i tumatanud dau om boro-boros nod, “Diya no ngai' o tina' om tobpinai ku. 50 Iri nopo tulun di momonsoi'd korohian di Tapa' ku do hilo'd surga om iri no o tobpinai ku'd kusai, om tobpinai ku'd tondu' om tina' ku,” ka dau.
Tulun di Pinapasasad do Linsou o Pinoinukadan
1 Om tontok i' do tadau'ddi do tuminongkiad i Yesus di walai'ddi, om ongoi no iyau irikau do hiri'd tisan di tasik. 2 Om ongoi noddi i Yesus irikau dot id suang do tiso' o parau' tu' ogumu' i' kopio o tulun do minongoi gurumung dau. Om iri nopoddi i tulun dot ogumu' om songingkakat do hiri'd tisan di tasik. 3 Om ogumu' o pinotuduk di Yesus dot id diyolo', do poinukadan o pinawayaan dau do minonuduk. Om boros ka di Yesus do minonusui, “Haro o tiso' o gompongumo do minongoi pasasad do linsou. 4 Om tontok di maso dau do papasasad, om karatu' no o wookon di linsou do hiri'd ralan. Om rikot noddi o tombolog om oiyo' nopo di tombolog do minoninduk i linsou. 5 Om haro o linsou do nakasasad dot id kowotuan om it oniipis o tana'. Om oruhai do suminuni i linsou tu' onipis i' i tana' do hiri. 6 Nga' asawat nopoddi o tadau, om kolotu' no i sobul, om koriou no om kapatai noddi kopio tu' a' i' aralom o kinoroloyon di gamut. 7 Om haro o linsou do nakasasad do hiri'd rolot do korugian, om kosidung noddi di rugi i sobul di linsou'ddi gisom do napatai i sobul. 8 Nga' haro i' o linsou do nakasasad do hiri'd tana' dot oruak. Om pongua' noddi i tanom diri, om haro i' ot inghatus piluap o kosopoho', om haro ot ingonom nohopod om haro ot intolu nohopod piluap o kosopoho' do tua',” ka dau. 9 Om kosusui poddi di Yesus i poinukadan diri, om boro-boros no iyau do poingkaa, “Kitolingo kou nopo, om pokinongou kou no kopio!” ka.
Koponudukan di Yesus do Pawayaon do Poinukadan
10 Om rikot noddi i tumatanud di Yesus om uhoto' no diyolo' i Yesus, “Guru, nokuro tu' moninukadan ko nopo do moro-boros dot id tulun dot ogumu'?” ka diyolo'. 11 Om boros ka di Yesus do suminimbar, “Iyokoyu nopo om noonuan no do toilaan do mongilo di poillisok do pasal di Pomorintaan do surga, nga' iyolo' nopo om a' i' noonuan. 12 Tu' iri nopo tulun di haro mantad no o toilaan om onuan nogindo do lobi ko' iri, gisom dot ogumu' nondo kopio o toilaan dau. Nga' iri nopo tulun dit aiso' o toila-ilaan om imumuyon nogindo do mongoi panganu i toilaan dau dit okuuri' kopio daa. 13 Om iri no o koponudukan ku do pawayaon do poinukadan do tontok do moro-boros oku dot id tulun dot ogumu', tu' kokito i' daa iyolo' nga' iyo no iyolo' di tulun dit a' kokito; om korongou i' daa iyolo' nga' iyo no iyolo' di tulun dit a' korongou om it a' kosuhut. 14 Om nabayaan no i pinoboros mantad di Nabi Yosaya do poingkaa, ‘Boros kad Kinorohingan: Korongou kou indo kopio nga' a' kou i' kosuhut; om poingontong kopio kou nga' aiso' i' o tokito dokoyu. 15 Tu' nokokodou no kopio o ginawo do tulun diti, om nosonsong o tolingo om nokoungkodom o mato diyolo'; om iyo nodti o nosiliu om a' i' kokito o mato diyolo', om a' korongou o tolingo diyolo', om a' kosuhut o pomusorou diyolo', om a' indo iyolo' koguli' dot id doho', om a' ku iyolo' olingasan,’ ka,” ka dau. 16 Om boros ka kawagu di Yesus dot id tumatanud dau, “Nga' nokoundar kou nogi' kopio iyokoyu, tu' kokito kou i' kopio om korongou kou. 17 Ilaai no dokoyu, dot ogumu' i' o nabi om i tulun dit otorodok dot id Kinorohingan dit orohian daa do kokito dit okito dokoyu do dinondo, nga' a' i' iyolo' nokokito'ddi. Orohian i' daa iyolo' do korongou dit orongou dokoyu do dinondo nga' a' i' iyolo' nokorongou'ddi,” ka dau.
Pinotuduk di Yesus o Komoyon di Poinukadan do Pasal di Tulun di Pinapasasad do Linsou
18 Om boros ka kawagu di Yesus, “Pokinongou kou no do komoyon di poinukadan do pasal di tulun di pinapasasad do linsou'ddi. 19 Iri nopo linsou di nakasasad do hiri'd ralan om poiyaan di tulun di nokorongou do habar do pasal do pomorintaan do Kinorohingan; nga' a' iddi nokosuhut kopio'ddi. Om rikot noddi i Yaraat, om ngoyo' no dau ahawo' i nakasasad daa do hiri'd ginawo diyolo'. 20 Om iri no linsou di nakasasad do hiri'd kowotuan, om poiyaan di tulun di nokorongou do habar diri, om it osonong nopo o ginawo om olomus do minonongkuyaan diri. 21 Nga' a' iddi guminamut kopio i habar diri dot id ginawo diyolo', om a' guminirot. Om koontok poddi iyolo' do kosusaan ko' koinggoritan dot i habar diri o nokoponginggoritan, om pitilombus nopo iyolo' do luminuhoi o kotumbayaan. 22 Om iri no linsou di nakasasad do hiri'd rolot di korugian om poiyaan do tulun di nokorongou do habar diri, nga' atangkabo iyolo' do pasal do koposi-posion diyolo', om orohian nopod kaya'. Gowoi poddi om noolitan i habar do mantad id Kinorohingan dit id suang do ginawo diyolo', om a' minongua'. 23 Om iri no linsou di nakasasad do hiri'd tana' dit oruak om poiyaan do tulun di nokorongou do habar diri om nokosuhut. Om pongua' noddi iyolo' dot asapou, om haro ot inghatus piluap o kogumuo' do tua', om haro ot ingonom nohopod, om haro ot intolu nohopod piluap,” ka dau.
I Paka' dot id Rolot do Gandum o Pinoinukadan
24 Om ponusui po kawagu i Yesus dot iso' o poinukadan dot id tulun dot ogumu' do poingkaa, “Iyo diti poinukadan i Pomorintaan do surga: Haro o tiso' o gompongumo do pinapatanom do linsou dit osonong do hiri'd tumo dau. 25 Nga' insan o totuong, di nokoodop ngai' no o tulun, om rikot no i pisangod di gompongumo do minongoi pasasad do linsou do paka' do hiri'd rolot di gandum. Om tongkiad noddi iyau. 26 Om di nopoddi nokosuni i gandum, om di nokoulai i silau, om kokito nogiddi i paka'. 27 Om ongoi noddi i kuli' di gompongumo solowot di gompongumo'ddi, om boro-boros nod, ‘Tuan, okon toi ko' i linsou dot osonong o tinanom nu do hilo'd tumo nu? Nga' nokuro'ddi tu' haro o paka' do hilo'?’ ka diyolo'. 28 Om boros ka di gompongumo do suminimbar, ‘Iri no pisangod o minongoi pasasad dino,’ ka dau. Om ponguhot po kawagu i kuli' di gompongumo'ddi, ‘Tuan, uhang nu i' do ngoyon dahai utuso' i paka'ddi?’ ka. 29 Om boros ka di gompongumo do suminimbar, ‘Amu', tu' ngoyon nopondo utuso' i paka'ddi, om kotonggoi nondo i gandum dot outus. 30 Pologoson nopo i paka' do poinsuni do gisom do mongomot. Om sunudan ku indo i tulun di mongoi pongomot do poingkaa: Utuson po dokoyu i paka', om wongkoson nondo, om tutudan. Om ngoyon nogindo onuo' i gandum om poopion nondo dot id sulap,’ ka di gompongumo,” ka dau.
Linsou dit Okooro' o Pinoinukadan
31 Om ponusui po kawagu i Yesus dot iso' o pinoinukadan dot id tulun dit ogumu'. Boros ka dau, “Iyo diti poinukadan i Pomorintaan do surga: Haro o linsou dot okooro' do nongoi dot iso' o tulun, om tonomo' no dau do hiri'd tumo dau. 32 Iri nopo linsou'ddi nga' kopupuson no kopio dot okoro'. Nga' kosuni nopondo, om iri no ot agayo kopio dot id pogialatan di totonomon. Om osiliu nondo iri do kayu, gisom do rumikot i tombolog do mongoi pomirumun do hiri'd karaan-raanan diri,” ka dau.
Sasad o Pinoinukadan
33 Haro po o tiso' kawagu o poinukadan do sinusui di Yesus dot id tulun dot ogumu'. Boros ka dau, “Kowoyo-woyoo' nopo di Pomorintaan do surga om iyo di sasad di ngoyon do songulun o tondu', do maan poroloto' dot apat nohopod o lito do tapung do torigu gisom dot akambang ngai' i tapung diri,” ka dau.
Koponudukan di Yesus do Pawayaon do Poinukadan
34 Om potuduko' ngai' nopo di Yesus iri dot id tulun dot ogumu' do pinawaya' do poinukadan. 35 Om iyo noddi do nabayaan i pinoboros mantad di nabi do poingkaa, “Moninukadan oku do moro-boros diyolo'; popinsunudon ku nondo o koinsanai'ddi songillisok do mantad di wonsoyo' i' iti pomogunan,” ka.
Pinotuduk di Yesus o Komoyon di Pinoinukadan do Paka' do Poirolot do Gandum
36 Om tongkiad noddi i Yesus di tulun dot ogumu'ddi, om suang no iyau do hiri'd walai. Om rikot no i tumatanud dau, om boro-boros no iyolo'd poingkaa, “Guru, sunudai daa iyahai do komoyon di poinukadan do pasal di paka' dot id rolot do gandum diri,” ka diyolo'. 37 Om boros ka di Yesus do suminimbar, “Iri nopo tulun di pinapasasad do linsou dot osonong diri om i Tanak do Tulun. 38 Iri no tumo om iti pomogunan. Om iri nopo linsou dot osonong diri om i tulun di nasanganu di Pomorintaan do Kinorohingan. Om iri no paka' om i tulun di tumatanud do Rogon. 39 Iri nopo pisangod di pinapasasad di paka' om i Rogon. Om maso nod kapangamatan om i Tadau'd Kopomutusan, om iri no i mongoi pongomot, om i moloikat. 40 Om poingkuro nopo i paka' do timungon om tutudan do hiri'd tapui, om iyo nogiddi o wonsoyon do Tadau'd Kopomutusan. 41 Suhuon nondo di Tanak do Tulun i moloikat dau do mongoi ponimung do koinsanai'd tulun di mominsuhu' do tulun do momonsoi'd dusa om koinsanai di tulun do suwai di momonsoi'd araat, dot id pogialatan di tulun do songonuon dau. 42 Om pataamon ngai' nopondo iyolo' do hiri'd tapui di molob-ngolob; om hiri nondo iyolo' do mihad om oinggorit. 43 Om iri nopondo i tulun di momonsoi'd korohian do Kinorohingan om iyo pod tadau do mogulinau do hiri'd Pomorintaan do Kinorohingan, i Tapa' diyolo'. Iyo nopoddi, om kitolingo kou nopo, om pokinongou kou no!” ka dau.
I Dapu' do Poillisok o Pinoinukadan
44 Om boros ka kawagu di Yesus, “Iyo diti poinukadan o Pomorintaan do surga: Haro o songulun do nokobontol do dapu' do hiri'd saalom do tana', om polobongo' po kawagu dau i dapu'ddi do hiri'd tana'. Om atataadan noddi kopio i tulun diri, gisom do padagango' ngai' nopo dau i haro dot id dau, om guli' no kawagu do minongoi pomoli di tana'ddi,” ka dau.
Mutiara' dit Olumis o Pinoinukadan
45 Om boros ka kawagu di Yesus, “Iyo diti poinukadan o Pomorintaan do surga: Haro o touki di mingihum do mutiara' dit agayo o gatang. 46 Om kobontol nopondo iyau dot iso' o mutiara' dit olumis kopio ko' mantad di suwai, om olomus nopondo iyau do mongoi padagang do koinsanai'ddi haro dot id dau om bolion nondo dau it iso' o mutiara' dit olumis kopio'ddi,” ka dau.
Rambot o Pinoinukadan
47 Om boros ka kawagu di Yesus, “Kowoyo-woyoo' nopo do Pomorintaan do surga om iyo di rambot do poromboton do hilo'd tasik. Om karambot nondo nga' mogisuayan nopo o bansa'd sada' dot arambatan. 48 Om ogumu' pondo o sada' do kosulung di rambot, om gayaton no di monginginsada' i rambot diyolo' do popotindal. Om mirikau nondo iyolo' do monompipi' do sada'ddi: iri nopo i sada' dot osonong om posuangon do hiri'd luping nga' iri no it araat om pataamon. 49 Om iyo noddi ot osiliu do Tadau'd Kopomutusan. Potongkiadon nondo di moloikat i tulun dit angaraat do mantad id tulun di momonsoi'd korohian do Kinorohingan. 50 Om pataamon nondo i tulun dit angaraat diri dot id tapui di molob-ngolob. Om hiri nondo iyolo' do mingihad om oinggorit,” ka dau.
I Konunu-nunuan do Wagu om i Laid
51 Om uhoto' no di Yesus iyolo', “Osuhutan ngai' no dokoyu iri?” ka dau. “Oo, osuhutan ngai' no dahai, oi Guru,” ka diyolo'. 52 Om boros kaddi di Yesus, “Om iri no o kokuwaan do pointikid-tikid do guru do Tourat di nosiliu do tulun do tumatanud do hiri'd Pomorintaan do surga, dot iyo di tulun do monongwalai do poposoliwan do konunu-nunuan di wagu om i laid do mantad hiri'd poiiyanan dau do konunu-nunuan,” ka dau.
Niada' i Yesus di Tulun do Nasarit
53 Om kosusui ngai' poddi di Yesus i piro-piro o poinukadan diri, om tongkiad no iyau do kinoiyonon diri. 54 Om poguliai no dau do hiri'd kampung dau. Om ongoi no iyau ponuduk do hiri'd walai'd sasambayangan do hilo', om ongosuayan ngai' nopoddi i tulun di nokorongou dau do minonuduk do hiri. Boros ka diyolo', “Honggo kopio o kinoonuan do tulun diti do toilaan dot iyo kopio'ddi? Om honggo o kinoonuan dau do sinundu do momonsoi'd koimayaan? 55 Okon toi ko' tukang kayu noo o sanganak dau. Okon toi ko' i Maria, o tina' dau; om tobpinai no dau om i Yakub, om i Yusup, om i Simun om i Yudas? 56 Om okon toi ko' hiti ngai' i' do poingiyon i tobpinai dau'd tondu'? Nga' honggo kopio o kinoonuan ngai' dau'ddi?” ka no diyolo'. 57 Om a' iddi i tulun diri minonongkuyaan di Yesus. Om boros kaddi di Yesus dot id diyolo', “Pusohon i' o nabi do hinonggo nopo o kinoiyonon do suwai, nga' a' nogindo iyau pusohon do hiri'd kampung dau om hiri'd walai dau,” ka dau. 58 Om a' iddi ogumu' o koimayaan do winonsoi di Yesus do hiri tu' a' i' i tulun ongotumbayaan.
Kinapatayon di Yohanis Gampamatis
1 Om tontok noddi do nokorongou i Horudis, i pomorinta' do pomogunan do Galilia, do pasal di Yesus. 2 Om boros ka di Horudis dot id pagawai dau, “Atantu' no dot i Yohanis Gampamatis iri do napasi kawagu! Om iri no o kokuwaan do haro o kuasa' dau do momonsoi'd koimayaan,” ka. 3 Tu' nopo dit id gulu po ko' iri om minonuhu' i Horudis do manangkap di Yohanis om mongogos dau, om posuango' nogiddi i Yohanis dot id giil. Winonsoi pogi' di Horudis o miagal diri nga' gama' no di Horudias, i sawo di Pilipus, i tobpinai dau. 4 Tu' nokoumbal i' i Yohanis do minomoros dot id di Horudis do poingkaa, “A' ko i' koino-ino do mangawin di Horudias!” ka. 5 Otopot nopo kopio om pokipapatayan daa di Horudis i Yohanis; nga' ooris iddi iyau di tulun, tu' sorohon i' diyolo' do nabi i Yohanis. 6 Tontok di minonguramat i Horudis do kinoulitan do toun do tumur dau, om panari' no i tanak di Horudias do tondu' do hiri'd toguang do koinsanai di tulun di nakarapou'd hiri. Om asanangan tomod i Horudis do nokokito di pananari' dau. 7 Gisom do pamatos nopo i Horudis do mikuwo'd suminumpa' do papatahak dot id tanak do tondu'ddi do nunu nopo o pokionuon dau. 8 Om boros kaddi di tanak do tondu'ddi, “Pokionuon ku i tulu di Yohanis Gampamatis do pasakayon do talam do dinondo!” ka dau; tu' notudukan no iyau di tina' dau do poboroson. 9 Om tumongob tomod daa'ddi i Horudis do nokorongou'ddi. Nga' patahako' nopoddi dau i pinokianu di tanak do tondu'ddi tu' nokosumpa' no iyau dot id toguang di tulun di nalap dau. 10 Om ponuhu' no iyau'd tulun do mongoi pongidu'd tulu di Yohanis do hiri'd giil. 11 Om igitai noddi i tulu di Yohanis do suminuang do pinasakai'd talam, om patahako' no dot id tanak do tondu'ddi. Om ngoyo' noddi di tanak do tondu'ddi patahako' iri dot id tina' dau. 12 Om ngoyo' noddi di tumatanud di Yohanis i rata' di Yohanis, om lobongo' no diyolo'. Om pamanau no iyolo' do minongoi posunud do habar diti dot id di Yesus.
Pinapaakan i Yesus do Limo Noribu o Tulun
13 Om soira'ddi nokorongou i Yesus do habar diri, om sakai no iyau do parau' dot iso-iso' iyau, om tongkiad no do kinoiyonon diri. Om ongoi noddi iyau dot id iso' o kinoiyonon dit oingou. Nga' tontok di nokorongou i tulun dot ogumu' do nakapamanau i Yesus, om tongkiadai nopo diyolo' i kabandaran diyolo' om ongoi no gusa' di Yesus do minaya' di ralan dit a' kosoborong di tasik. 14 Nga' tindal no i Yesus om kokito no dau i tulun dot ogumu' om osianan tomod diri iyau diyolo'. Om lingasai ngai' noddi dau i tulun dit ongkitoruol dot id pogialatan diyolo'. 15 Om sosodopon noddi om rikot no dot id di Yesus i tumatanud dau, om boro-boros nod, “Osodop noddi om aiso' o kawalayan dot id kinoiyonon diti. Om osonong nogi' do suhuon nu'd tumongkiad iti tulun om koongoi i' iyolo' koboli do taakanon do hilo'd kawalayan,” ka diyolo'. 16 Nga' boros ka di Yesus do suminimbar, “A' i' minog do suhuon iyolo'd tumongkiad. Paakanon nopo dokoyu iyolo',” ka dau. 17 Om boros ka di tumatanud di Yesus, “Roti nopo dahai om limo poo, om sada' nga' duwo po tinan,” ka diyolo'. 18 Om boros ka di Yesus, “Igitai ngai' do hiti, ino,” ka dau. 19 Om suhuo' noddi dau i tulun dot ogumu' do mirikau do hiri'd butur. Om ngoyo' noddi dau i limo o liob do roti om i duwo o tinan do sada', om tingaha' no iyau do hilo'd tawan om pongunsikou nod Kinorohingan. Om pogikobing-kobingo' nogiddi dau i roti'ddi om patahako' no dot id tumatanud dau, do potikidon dot id tulun dot ogumu'ddi. 20 Om akan ngai' nopo iyolo' do gisom do nangayahan. Om timungo' nogiddi di tumatanud di Yesus i noolu' di taakanon diri, om hopod po om duwo o balatak do noponu'. 21 Iri nopo minakan do tontok diri om haro i' o limo noribu o tulun, nga' a' po poinghompit i tongoondu' om i tangaanak.
Minamanau i Yesus dot id Soibau do Waig
22 Om suhuo' noddi di Yesus i tumatanud dau do sumakai di parau' om mogulu do sumoborong di tasik, do daamot dau do minsuhu' di tulun dot ogumu' do muli'. 23 Om kapamanau ngai' poddi i tulun dot ogumu', om takad no i Yesus dot iso' o nulu-nulu do mongoi sambayang dot iyau-iyau. Om hiri kasai' po i Yesus dit otuong no, om iso-iso' iyau. 24 Om tontok nopoddi nga' hiri nod tanga' di tasik i parau' di sinakai di tumatanud di Yesus. Om kopiguli-guli' poo i parau' dot oontok di tumbak tu' asasakan nogi' di parau' i tongus. 25 Om rikot noddi i Yesus dot id diyolo' do minamanau dot id soibau di waig dit id piolitan do jam kotolu om jam koonom do minsusuab. 26 Om soira'ddi nokito iyau di tumatanud dau do manau-panau do hiri'd soibau di waig om kooris no tomod iyolo', “Tombiruo!” ka diyolo' do minomogiak dot opopoddosian. 27 Nga' olomus nopo i Yesus do suminimbar do, “Kada' kou kagangau! I Yesus oku i'. Kada' kou poddosi!” ka dau. 28 Om boros kaddi di Pitrus, “Ondung i Yesus kopio ko, om suhuo' oku daa iyoho' do mamanau dot id soibau'd waig,” ka dau. 29 “Kaino!” ka di Yesus. Om lintuhun no i Pitrus do mantad hiri'd parau', om pamanau no iyau dot id soibau di waig do mongoi rapou di Yesus. 30 Nga' soira'ddi nopurimanan di Pitrus i tongus dot opuhod do hiri'd tasik, om kooris no iyau om lumonsod no daa'ddi iyau. Nga' pomogiak no iyau, “Tuhan, tulungo' oku!” ka dau. 31 Om olomus nopo i Yesus do minongoi pamagayat di Pitrus om boro-boros nod, “Pitrus, Pitrus, a' no kopio ogirot o kotumbayaan nu. Nokuro tu' mikoduwo po o ginawo nu dot otumbayaan doho'?” ka dau. 32 Om sakai goduwo noddi iyolo' di parau', om kotingkod no i tongus. 33 Om otud ngai' noddi i tumatanud di Yesus do tuminuku' dot id dau. Om boros ka diyolo', “Otopot no kopio do Tanak ko'd Kinorohingan, oi Tuhan!” ka.
Minomolingos i Yesus do Tulun di Sumakit do Hilo'd Ginisarit
34 Om kosoborong poddi iyolo' di tasik, om dampir no iyolo' do hilo'd Ginisarit. 35 Om soira'ddi nokito di tulun do hiri dot i Yesus i nokorikot, om popinsunudo' no diyolo' iri dot id koinsanai'd watas dit id potoropis do bandar diri. Om oinsanan nopoddi i tulun do sumakit do nongoi pootodo' dot id di Yesus. 36 Om pokitumboyo' no iyolo' dau do mongoi igit di rasuk dau dit anaru, do hiri nopod dompok di rasuk. Om kolingasai ngai' nopoddi i tulun di minongoi igit di rasuk dau.
Koubasanan do Komolohingan
1 Om haro'ddi o piro-piro o tulun do Parisi om i guru do Tourat do mantad hilo'd Yorusalim do ruminikot dot id di Yesus. Om uhoto' no diyolo' i Yesus. 2 Boros ka diyolo', “Nokuro tu' a' i tumatanud nu tumanud di koubasanan di komolohingan toko'? Tu' a' i' iyolo' momoug do tintod do makan, do miagal do ponuhuan di toturan!” ka diyolo'. 3 Om boros ka di Yesus do suminimbar, “Om nokuro kou no iyokoyu tu' a' tumanud di ponuhuan do Kinorohingan, dot iri no tumanud do koubasanan do komolohingan dokoyu ot a' dokoyu kotonud-tonudan? 4 Tu' boros kad Kinorohingan, ‘Pusoho' no dokoyu o tapa' om tina' dokoyu,’ ka, om, ‘Isai nopo i mongindaraat do tapa' om tina' dau, om mositi' no do hukuman do kapatayon,’ ka. 5 Nga' poingkaa o dokoyu'd potudukon: Ondung momoros o tulun dot id molohing dau do, ‘Nakatahak ku no dot id Kinorohingan i tusin di patahakon mantad ku daa dot id dokoyu oi apa', om oi ina',’ ka. 6 Om a' no minog i tulun diri do momusou di molohing dau. Om pagaan-gaanon diri dokoyu o boros do Kinorohingan do gama' no di koubasanan do komolohingan dokoyu. 7 Iyokoyu no i tulun di minsorupai-rupai no toomod! Miontok nopo kopio i pinoboros mantad di Yosaya do pasal dokoyu do poingkaa, 8 ‘Poingkaa o boros do Kinorohingan: Boros no toomod do tulun diti do tumuku' dot id doho', tu' ginawo nopo diyolo' om osodu' i' do mantad id doho'. 9 Aiso' i' ot aanu-anu diyolo' do tumuku' dot id doho', tu' iri nopo toturan do winonsoi'd tulun om potudukon nopo diyolo' dot iyo pod toturan di winonsoi ku,’ ka,” ka dau.
I Kososomu' do Tulun
10 Om lohowo' noddi di Yesus i tongoulun om boro-boros no dot id diyolo' do poingkaa, “Pokinongou kou no om kosuhut kou i'! 11 Iri nopo i sumuang do kabang om a' i' kososomu'd tulun; iri no i sumoliwan do mantad id kabang o kososomu'd tulun,” ka dau. 12 Om rikot noddi i tumatanud di Yesus dot id dau om boro-boros nod, “Oilaan nu i' dot ongotogod i tulun do Parisi do nokorongou diya' do minomoros do miagal diri?” ka diyolo'. 13 Om boros ka di Yesus do suminimbar, “Pointikid-tikid do totonomon dit okon ko' i Tapa' ku do hilo'd surga o minananom om utuson indo. 14 Pologoson nopo i tulun do Parisi. Tu' iyolo' nopo om boyoon di nongobolou. Om ondung mumbal i tulun do bolou do mangahak di tulun do bolou, om aratu' goduwo nopondo iyolo' dot id parit,” ka dau. 15 Om boros ka di Pitrus, “Posuhuto' daa iyahai do komoyon do poinukadan diri, oi Guru!” ka dau. 16 Om boros ka di Yesus do suminimbar diyolo', “Dot a' kou po iyokoyu kosuhut? 17 A' kou i' koilo dot iri nopo i posuangon do kabang om kumaa i' do hiri'd tian, om sumoliwan nondo kawagu? 18 Nga' iri nopo i sumoliwan do mantad id kabang, om mantad i' dot id ginawo, om iri no i kososomu' do tulun. 19 Tu' mantad no dot id ginawo i pomusarahan dot araat, i mominsuhu' do tulun do mamatai, om magampahu', om momonsoi di kososomu', om manakau, om mingudut, om mongindaraat. 20 Iri ngai' no i kososomu'd tulun, om okon i' ko' i makan dot a' kopomoug,” ka dau.
Kotumbayaan di Tondu' do Bansa'd Kanaan
21 Om tongkiad noddi i Yesus do kinoiyonon diri om ongoi no iyau do hiri'd watas dit id somok do bandar do Tirus om Sidon. 22 Om rikot no dot id di Yesus o songulun o tondu' do bansa'd Kanaan do mantad id watas diri. Om mohou-lohou iyau do poingkaa, “Oi Tanak di Daud, kosianai no doho'! Norusadan do rogon i tanak ku'd tondu'. Om adalaan no kopio iyau,” ka dau. 23 Nga' a' i' di Yesus sinimbar i tondu'ddi. Om rikot noddi i tumatanud di Yesus dot id di Yesus om boro-boros nod, “Guru, suhuo' nogid tumongkiad ilo tondu'. Minghiyo nopo tomod iyau do muhut-suhut dati'!” ka diyolo'. 24 Om boros ka di Yesus, “Iyoho' nopo om sinuhu' no do mongoi dot id bansa' dot Israil, om okon-okon po om id tulun dot Israil di nangapalid,” ka dau. 25 Om rikot noddi i tondu'ddi om otud no do hiri'd toguang di Yesus om boro-boros nod, “Tulungo' oku no, oi Tuan,” ka. 26 Om boros ka di Yesus do suminimbar, “A' i' osonong do ngoyon patahako'd tasu i taakanon do tangaanak,” ka. 27 Nga' simbar no i tondu' do poingkaa, “Otopot i' oi Tuan, nga' iri piya tasu nga' mangakan i' di mumu' dit aratu' do mantad hiri'd mija' di tuan dau,” ka dau. 28 Om boros kaddi di Yesus dot id tondu'ddi, “Agayo no kopio o kotumbayaan nu, oi inan! Nunu nopo i pokionuon nu om osiliu no!” ka dau. Om diiri i' om diiri om kolingasai no i tanak di tondu'ddi.
Minomolingos i Yesus dot Ogumu' o Tulun do Sumakit
29 Om tongkiad no i Yesus do kinoiyonon diri, om pamanau no do suminusui di tisan do Tasik Galilia. Om takad noddi iyau dot iso' o nulu-nulu om irikau no iyau'd hiri. 30 Om ogumu' diri o tulun do ruminikot dot id dau do pinapaatod do tulun di kimpo', om i bolou, om it a' koundaliu, om i bobou, om ogumu' po o tulun do suwai di kitoruol. Om poiliho' no diyolo' i tulun diri dot id toguang di Yesus, om lingasai no di Yesus i tulun diri. 31 Om nongosuayan tomod diri i tulun dot ogumu' di hiri do tontok do nokito diyolo' do nongkoboros i bobou, om nolingasan i kimpo', om nangkapanau it a' koundaliu, om nokokito i bolou. Om royoho' noddi diyolo' o Kinorohingan do tulun dot Israil.
Pinapaakan i Yesus dot Apat Noribu o Tulun
32 Om lohowo' noddi di Yesus i tumatanud dau om boro-boros nod, “Osianan oku nodti tulun dot ogumu', tu' tolu noddi o tadau diyolo' do manud-tanud doho', om naayi' noddi o kokoriu diyolo'. A' oku i' sipologos diyolo'd muli' dot a' po kaakan, tu' olikapan i' dotindo iyolo' do hilo'd tanga'd ralan,” ka dau. 33 Om uhoto' noddi di tumatanud di Yesus i Yesus do poingkaa, “Honggo daa o ngayan toko'd taakanon do paakan do tulun dot irad diti kogumu' do hiti'd kinoiyonon diti tu' aiso' i' o kawalayan dot id somo-somok?” ka diyolo'. 34 Nga' uhoto' no di Yesus iyolo', “Piro poo roti dokoyu,” ka dau. “Turu' po liob, om okuri' no o sada' dot ongokooro',” ka diyolo'. 35 Om suhuo' noddi di Yesus i tulun dot ogumu'ddi do mirikau do hiri'd tana'. 36 Om ngoyo' no dau i turu' o roti om i sada'ddi, om pongunsikou no iyau'd Kinorohingan. Om pogikobing-kobingo' nogiddi dau i roti om pogikodut-koduto' dau i sada', om patahako' no dau iri dot id tumatanud dau. Om potikido' noddi diyolo' iri dot id tulun dit ogumu'. 37 Om akan ngai' noddi i tulun diri do gisom do nangayahan iyolo'. Om kangaakan poddi iyolo', om timungo' no di tumatanud di Yesus i nongoolu' di taakanon, om turu' po o balatak do noponu' do notimung ngai' iri. 38 Om kogumuon nopo do tongokusai nogi' do minakan do tontok diri om apat noribu o tulun, om a' po kohompit i tongoondu' om i tangaanak. 39 Om suhuo' noddi di Yesus i tulun dot ogumu' do muli'. Om iyau no om suminakai do parau' do pinakayaan do hilo'd watas do Magadan.
Sinuhu' di Tulun do Parisi i Yesus do Momonsoi'd Koimayaan
1 Om rikot no dot id di Yesus o piro-piro o tulun do Parisi om tulun do Saduki do mongoi daa pogumbal dau. Om suhuo' no daa diyolo' i Yesus do momonsoi'd koimayaan do popointalang kopio do mantad iyau id Kinorohingan. 2 Om boros ka di Yesus, “Tontok nopo di tumonob o tadau, om momoros kou nod, ‘Osonong o talun, tu' aragang no ilo tawan,’ ka dokoyu. 3 Om dongkosuabon noo, om momoros kou dot, ‘Rumasam nod baino', tu' aragang ilo tawan om oluhung o tadau,’ ka. Antangai pogi' nga' milo kou i' do mongilo do kooyu-oyuo' do talun dot okito dokoyu ondung okuro-kuro ilo tawan, nga' a' kou indo milo do mongilo do komoyon dit ongosiliu do dinondo!. 4 Araat no kopio om koindaraat do Kinorohingan o tulun do dinondo. Monuhu' kou daa doho' do momonsoi'd koimayaan, nga' a' kou no pokitonon dot ongoiso' piya o koimayaan do suwai mantad ko' i koimayaan di nosiliu dot id di Nabi Yunus,” ka dau. Om koboros poddi di Yesus o miagal diri om pamanau no iyau do tuminongkiad diyolo'.
I Pangambang do Roti di Tulun do Parisi om Tulun do Saduki
5 Tontok di nokorikot i tumatanud di Yesus do hiri'd soborong di tasik, om koilaai nogi' diyolo' do nokolihu iyolo' do migit do roti. 6 Om boros ka di Yesus dot id diyolo', “Antaan-taan no dokoyu i pangambang do roti di tulun do Parisi om Saduki,” ka dau. 7 Om di nopoddi norongou di tumatanud di Yesus i boros di Yesus diri, om pogiboro-boros no iyolo', “Momoros pogi' iyau dot iyo'ddi nga' a' toko' i' nokoigit do roti,” ka diyolo'. 8 Nga' oilaan i' di Yesus i pogibara-barasan diyolo'. Om boros kaddi dau, “Nokuro tu' it aiso' o roti do pogibara-barasan dokoyu? A' no kopio agayo o kotumbayaan dokoyu. 9 A' kou po kasai' kosuhut? A' no dokoyu osorou i limo no roti do pinogikabing-kabing ku do pinapaakan di limo noribu o tulun? Piro po toi o balatak do roti do noolu' di tinimung dokoyu'ddi? 10 Om poingkuro no i turu' o roti do pinaakanan dit apat noribu o tulun diri? Piro po toi o balatak do roti do noolu' di tinimung dokoyu? 11 Nokuro tu' a' kou i' kosuhut dot okon i' ko' pasal do roti o poboroson ku dot id dokoyu? Antaan-taan no dokoyu i pangambang do roti di tulun do Parisi om i tulun do Saduki!” ka dau. 12 Om alaid noddi om kosuhut nogi' i tumatanud di Yesus dot okon i' ko' monuhu' i Yesus diyolo' do mumbangan-bangan di pangambang do roti nga' mumbangan-bangan di ponudukan di tulun do Parisi om i tulun do Saduki.
Nakun di Pitrus do Kristus i Yesus
13 Om ongoi no i Yesus do hiri'd watas dit id somok do bandar do Kaisaria Pilipi. Om hilo' no iyau do minonguhot di tumatanud dau. Boros ka dau, “Isai i Tanak do Tulun dot osorou'd tulun?” ka dau. 14 Om boros ka di tumatanud di Yesus do suminimbar, “Haro i' o momoros dot i Yohanis Gampamatis, om haro o momoros dot i Ilia. Om tulun nod suwai om momoros dot i Yoromia, ko' iso' po do mantad id pogialatan di nabi,” ka diyolo'. 15 Om boros ka di Yesus, “Nga' isai oku dot osorou dokoyu?” ka dau. 16 Om boros ka di Simun Pitrus do suminimbar, “Iya' no i Raja' di Gampamasi, i Tanak do Kinorohingan di poimpasi,” ka dau. 17 Om boros ka di Yesus, “Olumaag ko no, oi Simun i tanak di Yona! Tu' okon i' ko' tulun o minomisunud diya'ddi suwai ko' i Tapa' ku do hilo'd surga. 18 Iyo nopoddi om ilaai no dot iya' no oi Pitrus, i watu dit okodou. Om iri no i watu'ddi o poimpahan ku di sidang ku do wonsoyon ku, om a' i' iti aala'; om kapatayon piya nga' a' i' kaala'! 19 Patahakon ku nondo diya' i kunsi' di Pomorintaan do surga. Om nunu nopondo i pogoduhan nu do hiti'd pomogunan om pogoduhan no do hilo'd surga. Om nunu nopo i ponuhuan nu do hiti'd pomogunan, om ponuhuan no do hilo'd surga,” ka dau. 20 Om poinsano' noddi di Yesus i tumatanud dau dot a' momisunud dot isai nopo dot iyau i Raja' do Gampamasi.
Pinoboros Mantad di Yesus i Koinggoritan om Kapatayon Dau
21 Om mantad poddi om poboroson nopo kopio di Yesus dot id tumatanud dau, om a' no dau lisok-lisokon, do mositi' no do mongoi iyau do hilo'd Yorusalim om oinggorit tomod nondo dot inggoriton di piro-piro o boyoon, om i piro-piro o boyoon dot imam, om i piro-piro guru do Tourat. Om patayon nondo iyau, nga' kotolu nopondod tadau, om posion indo iyau kawagu. 22 Om gayato' noddi di Pitrus i Yesus do pinopotongkiad di wokon om togodo' no dau i Yesus. Boros ka dau, “Maha' daa om poinsoduwon do Kinorohingan o miagal diri, oi Tuhan! Om a' indo osiliu ot iyo'ddi dot id diya', oi Tuhan!” ka dau. 23 Om koili no i Yesus om boro-boros no iyau di Pitrus, “Poggidu' do mantad hiti, oi Mogugumbal! Mangantob ko daa doho'. Tu' ino nopo pomusarahan nu om don tulun i'; om okon i' ko' pomusarahan do Kinorohingan!” ka dau. 24 Om boros kaddi di Yesus dot id tumatanud dau, “Iri nopo tulun dit orohian do tumanud doho', om mositi' no do lihuan i dau'd korohian, om sumaan do salib dau, om tumilombus nopo do tumanud doho'. 25 Tu' iri nopo tulun dit orohian do momogompi' do koposion dau, om okon nogi' dot atagakan do koposion dau. Nga' iri nogindo tulun di papatahak do koposion dau do gisom piya'd apatai dot iyoho' o kapatahakan, om kaanu nogindo kopio do koposion. 26 Nunu'ddi o kountungan do tulun, dot aanu ngai' piya dau o koinsanai'dti pomogunan, nga' atagakan indo iyau do koposion dau? Milo toi o koposion do poolonon do nunu nopo? 27 A' no alaid om rumikot no i Tanak do Tulun do miwoyo' di moloikat dau do mikuwo'd kuasa' di Tapa' dau. Om tontok nondoddi do somulian ngai' dau o pointikid-tikid do tulun do miontok di winonsoi di tulun diri. 28 Ilaai no dokoyu! Dot id pogialatan piya dokoyu'd hiti nga' haro i' it a' po apatai dot a' po kokito di Tanak do Tulun do rumikot do miagal do Raja'!” ka dau.
Pinoinggayo i Yesus
1 Tontok dit onom o tadau do mantad diri, om angatai no di Yesus i Pitrus om i Yakub om i Yohanis i tobpinai di Yakub, do minongoi dot id iso' o nuluhon dit akawas, dot iyolo-yolo'. 2 Om kosimban noddi o korupa-rupao' di Yesus di maso diyolo'd poingontong dau. Rabas nopoddi di Yesus nga' iyo pod tadau tu' mogulinau, om i pakayan dau nga' kosorong tomod o kopurako'. 3 Om kokito no di tolu o tumatanud di Yesus, i Musa om i Ilia do monokiboro-boros di Yesus. 4 Om boros kaddi di Pitrus dot id di Yesus, “Tuhan, osonong no kopio do hiti toko'. Ondung orohian ko, oi Tuhan, om popowonsoi oku do tolu o kiim do hiti: iso' o diya', oi Tuhan, om iso' o di Musa, om iso' o di Ilia,” ka dau. 5 Nga' maso po di Pitrus do moro-boros om kokulumutai no iyolo'd haun di mogulinau tomod, om haro'ddi o minomoros do mantad id haun diri do poingkaa, “Iti no i Tanak ku di kosianan kopio ku. Iyau no i kohubayaan do ginawo ku. Om pokinongou kou no dau!” ka. 6 Om soira'ddi norongou di tumatanud di Yesus i boros diri, om nongooris tomod diri iyolo' gisom do kongotungub nopo iyolo' do hiri'd tana'. 7 Nga' rikot no i Yesus do minongoi pangama' diyolo'. Om boros ka dau, “Ingkakat kou! Kada' kou kooris!” ka dau. 8 Om hangog noddi iyolo', om aiso' no o nokito diyolo', do suwai ko' i Yesus poo. 9 Om di nopoddi ruminuhuk iyolo' di nuluhon, om bilinai no di Yesus iyolo' do poingkaa, “Kada' dokoyu posunudo' dot id disai nopo i nokito dokoyu di tiinu'ddi, dot a' po apasi kawagu o Tanak do Tulun do mantad id kapatayon,” ka dau. 10 Om uhoto' no di tumatanud di Yesus i Yesus, boros ka diyolo', “Nokuro tu' i Ilia po o mogulu'd rumikot, ka di guru do Tourat?” ka. 11 Om boros ka di Yesus do suminimbar, “Atantu' no do rumikot i Ilia om iyau no o posodia' do koinsanai'd nunu nopo. 12 Nga' poboroson ku dot id dokoyu, do nokorikot no i Ilia, nga' a' i' iyau notutunan do tulun, om wonsoyo' nopo diyolo' dot id dau o nunu nopo i korohian diyolo'. Om iyo nogiddi o wonsoyon diyolo' dot id Tanak do Tulun,” ka dau. 13 Om kongosuhut noddi i tumatanud di Yesus dot i Yohanis Gampamatis o komoyon di Yesus diri.
Minomolingos i Yesus do Tanak di Norusadan do Rusod dot Araat
14 Om soira'ddi guminuli' i Yesus om i tolu o tumatanud dau'ddi do hiri'd tulun dot ogumu', om rikot no o songulun o kusai do minongoi otud dot id toguang di Yesus. 15 Om boros ka di kusai, “Tuan, kosianai no di tanak ku, tu' kakaran iyau. Om adalaan no kopio o toruol dau gisom dot asaru' no iyau do kosubo dot id tapui om asaru' nogi' dot aratu' dot id waig. 16 Om nakaatod ku no daa iyau dot id tumatanud nu nga' a' i' iyolo' nokolingos dau,” ka dau. 17 Om boros ka di Yesus, “Atuuk ku dokoyu'dti! Sumansala' kou no kopio iyokoyu om a' otumbayaan. Songkuro po tuu o koloido' ku do poinsugku' kasai' dokoyu om papalanut do ginawo ku dot id dokoyu? Ngoyo' hitio' i tanak diri!” ka dau. 18 Om suhuo' noddi di Yesus do sumoliwan i rusod dot araat dit id suang di tanak diri. Om soliwan noddi i rusod dot araat, om diiri i' om diiri do nolingasan i tanak. 19 Om ongoi noddi i tumatanud di Yesus do hiri'd di Yesus dot iyolo-yolo', om uhoto' no diyolo' iyau. Boros ka diyolo', “Guru, nokuro tu' a' iyahai milo do minonunsub di rusod dot araat diri?” ka diyolo'. 20 Om boros ka di Yesus do suminimbar, “A' ogirot o kotumbayaan dokoyu. Ilaai no dokoyu! Dot ondung haro o kotumbayaan dokoyu dot ongoirad nopod linsou dit okooro', om milo kou no do moro-boros dot id nulu-nulu diti do poingkaa, ‘Undaliu do mantad hiti om ongoi'd hiilo',’ ka, om atantu' no do mundaliu no kopio ilo nulu-nulu. Iso' po nga' aiso' i' ot a' dokoyu milo'd wonsoyon! 21 Nga' rusod nopod araat do miagal diti om sambayang poo om puasa o kosunsub,” ka dau.
Pinoboros kawagu di Yesus i Kapatayon Dau
22 Tontok di tuminimung i tumatanud di Yesus do hilo'd Galilia, om boros ka di Yesus dot id diyolo', “A' no alaid om patahakon no i Tanak do Tulun dot id kuasa'd tulun. 23 Om patayon nondo iyau, nga' kotolu nopondod tadau om posion i' kawagu iyau,” ka dau. Om tumongob tomod ngai'ddi i tumatanud dau.
Pambayar di Sukai di Walai'd Sasambayangan dot Agayo
24 Tontok di nokorikot i Yesus om i tumatanud dau do hilo'd Kapornaum, om rikot no i gomponimung do sukai di Walai'd Sasambayangan dot Agayo dot id di Pitrus om ponguhot nod, “Mambayar i' i guru dokoyu do sukai di Walai'd Sasambayangan dot Agayo ko' amu'?” ka. 25 Om boros ka di Pitrus do suminimbar, “Mambayar!” ka dau. Om koguli' poddi i Pitrus om pogulu no i Yesus do minoro-boros dau. Boros ka dau, “Simun, poingkuro o diya'd tosorou? Isai tuu it apatut do mambayar do lisin ko' sukai dot id raja' do pomogunan diti? Iri tuu i rayat ko' iri po bansa'd suwai?” ka dau. 26 Om boros ka di Pitrus do suminimbar, “I bansa'd suwai,” ka. Om boros kaddi di Yesus, “Iyo nopoddi, om rayat nopo om a' i' minog do mambayar. 27 Nga' iyo piya'ddi nga' kada' to i' potogodo' iyolo'. Nga' ongoi pangapon do hilo'd tasik. Om onuon no i sada' dit id gulu nu kaapon. Om okito nu nondo o tusin do hiri'd kabang di sada' do kabagal do pambayar to di sukai do koontok dato. Om onuon no i tusin om patahakon no dot id diyolo' do pambayar to di sukai to di Walai'd Sasambayangan dot Agayo,” ka dau.
Isai it Agayo Kopio o Ngaran?
1 Om tontok noddi do ruminikot i tumatanud di Yesus dot id di Yesus, do minongoi ponguhot dau. Boros ka diyolo', “Isai ma it agayo kopio o ngaran dot id suang do Pomorintaan do surga?” ka. 2 Om pomolohou no i Yesus dot iso' o tanak dit okoro' po, om poingkakato' no dau do hiri'd dotoguangan diyolo'. 3 Om boros kaddi di Yesus, “Kotumbayaai kou no! Kosuang kou nopo di Pomorintaan do surga om kosimban o kowoyo-woyoon dokoyu om koiyo di tangaanak. 4 Tulun nopo di minsiriba' om i sumiliu do miagal do tanak diti, om iri no it agayo kopio o ngaran dot id suang di Pomorintaan do surga. 5 Om iri tulun di rumamit do tanak do miagal diti dot iyoho' o kopomoromitan, nga' miagal nod rumamit doho',” ka dau.
I Kobinsuhu' do Tulun do Momonsoi'd Dusa
6 Om boros ka kawagu di Yesus, “Isai nopo i mamalid dot ongoiso' diti tangaanak dot ongokoro' po, gisom dot a' nondo iyolo' monongkuyaan doho', om osonong nogi' do lontoidan do watu di pongingisar o liou dau, om londodon nogindo do hilo'd rahat dit aralom. 7 Obungou no iti pomogunan tu' i mominsuhu' do tulun do momonsoi'd dusa o kobungou-bungou. Om a' no milo dot a' haro kasai' ot osiliu do miagal diri, nga' obungou no kopio i tulun di mominsuhu' do momonsoi'd dusa! 8 Ondung kabayayat dokoyu do momonsoi'd dusa ino longon ko' ino gakod dokoyu, om potodon nogi' om pataamon iri, tu' osonong nogi' do poimpasi kou do poinsugku' do Kinorohingan dot aiso' piya o tiso'd longon ko' tiso'd gakod, ko' mantad do hino goduwo o longon om gakod do kataam do hilo'd tapui naraka. 9 Om ondung kabayayat dokoyu do momonsoi'd dusa ino mato dokoyu, om irulon nopo om pataamon no. Osonong nogi' dot aiso' o tiso'd mato do poimpasi pod poinsugku'd Kinorohingan ko' hino goduwo o mato om kataam i' do hilo'd tapui do naraka,” ka dau.
Dumba' di Natagak o Pinoinukadan
10 Om boros ka kawagu di Yesus, “Umbangan-banganan no dokoyu! Kada' dokoyu hingi-hingio' o tongoiso' piya diti tangaanak dot ongokoro' podti. Ilaai no dokoyu dot iri nopo i moloikat diyolo' om id toguang kasai' i' di Tapa' ku do hilo'd surga. 11 Tu' kinorikatan nopod Tanak do Tulun om mongoi pamasi di tulun di napalid. 12 Poingkuro toi o dokoyu'd tosorou? Ondung haro o tulun di kidumba' do hatus o tinan, om atagak nondo o tongoiso' di dumba' dau'ddi, om nunu tuu'ndo o wonsoyon di tulun diri? Atantu' no do tongkiadan nopo dau i dumba' di siam nohopod om siam o tinan do hilo'd nulu-nulu, om ngoyon nondo dau ihumo' i natagak. 13 Om okito nopondo dau i dumba' di natagak diri, om otumbayaan oku do poinggayo nogi' o kotoodo' dau do nokokito di dumba' di songinan diri ko' mantad di siam nohopod om siam o dumba' dit a' natagak. 14 Om iyo nogiddi i Tapa' dokoyu do hilo'd surga tu' mada' i' do haro o tongoiso' piya dot apalid di tulun di wagu po kotumbayaai doho',” ka dau.
It Apatut do Wonsoyon Ondung Kowonsoi nod Dusa i Tobpinai Dokoyu
15 Om boros ka kawagu di Yesus, “Ondung kowonsoi'd dusa i tobpinai dokoyu, om mongoi kou no solowot dau om poboroson no i kasalaan dau dot id dau, di duwo-duwo kou. Om ondung tumanud iyau di boros nu, om kopiulud kou no kawagu di tobpinai nu. 16 Nga' ondung a' iyau mokinongou, om mangangat no dot iso' ko' duwo o tulun do suwai. Tu' haro i' o nokotulis dot id suang do buuk do Kinorohingan do poingkaa, ‘Mositi' no do haro o duwo ko' tolu o tulun do sasi' do popointalang do kisala' i tulun di notondos do kisala',’ ka. 17 Ondung a' iyau rumamit do nosihat di piro-piro o tulun diri, om posunudon no o hal diri dot id sidang. Nga' ondung a' iyau orohian do rumamit do nosihat di sidang, om poiyoon nopo iyau di tulun di gomponimung do sukai om it a' kotutun do Kinorohingan,” ka dau.
I Pogoduhan om i Ponuhuan
18 Om boros ka kawagu di Yesus, “Ilaai no dokoyu: Do nunu nopo i pogoduhan dokoyu do hiti'd pomogunan om pogoduhan nori do hilo'd surga. Om nunu nopo i ponuhuan dokoyu do hiti'd pomogunan, om ponuhuan nori do hilo'd surga. 19 Om ilaai no dokoyu: Dot ondung haro o duwo o tulun dot id pogialatan dokoyu do misokodung do nunu nopo do hiti'd pomogunan, om sambayangan nondo diyolo' iri, om simbaron i' do Tapa' ku do hilo'd surga i sambayang diri. 20 Tu' honggo nopo o duwo ko' tolu o tulun di tumatanud ku do tumimung do momusou doho' o kotimungan om hiri oku nod sugku' diyolo',” ka dau.
Susuhuon dit A' Mangampun do Tulun do Suwai o Pinoinukadan
21 Om ngoyo' no di Pitrus uhoto' i Yesus. Boros ka dau, “Tuhan, ondung kowonsoi'd dusa dot id doho' i tobpinai ku, om gisom tuu dot impiro dot ompunan ku iyau? Gisom tuu dot inturu'?” ka dau. 22 Om boros ka di Yesus do suminimbar, “Amu', okon i' ko' gisom no dot inturu' suwai ko' inturu' i turu' nohopod. 23 Tu' iyo do poinukadan diti o Pomorintaan do surga. Haro o songulun o raja' di minongintob do tutang do koinsanai di kuli' dau. 24 Om tontok di maso dau do mongintob diri, om haro'ddi o songulun di kuli' dau do nongoi posolowoto' dau, do kiutang dot id dau do piro-piro o juta. 25 Om a' no i kuli' kabayar diri. Om ponuhu' noddi i raja' do papadagang di kuli' dau'ddi do miwoyo' di sawo om i tangaanak di kuli'ddi, om koinsanai di dapu' di kuli'ddi do maan do pambayar di tutang dau. 26 Nga' otud nopo i kuli' di raja'ddi dot id toguang di raja' om boro-boros no iyau do mokiinsian di raja'. Boros ka dau, ‘Oi Tuan, kosianai no doho'. Tu' bayaran ngai' ku i' i tutang ku'ddi,’ ka dau. 27 Om nosianan iddi i raja' di kuli' dau'ddi, gisom do tonuso' ngai' nopo dau i tutang di kuli'ddi. 28 Om soliwan noddi i kuli' dau'ddi, om kosolowot no dau i tambalut dau, it oiyo ko' kuli', om i kiutang dot id dau do piro-piro noribu. Om tabpaai no dau i tambalut dau, om kotolo' no daa dau, om boro-boros nod, ‘Bayarai ngai' no kama i tutang nu!’ ka. 29 Om otud nopo i tambalut dau dot id toguang dau om pokiinsian no. Boros ka dau, ‘Kosianai no doho', oi tambalut ku. Tu' bayaran ngai' ku i' i tutang ku'ddi,’ ka. 30 Nga' a' no iyau nakaakun. Tu' ngoyo' nopo dau pogiilo' i tulun diri do gisom dot abayaran di tulun diri i tutang dau. 31 Om tumongob tomod diri i kuli' di suwai do nokokito di nosiliu do miagal diri. Om ngoyo' noddi diyolo' posunudo' di raja' i hal diri. 32 Om lohowo' noddi di raja' i kuli' dit araat diri om boro-boros no dot id dau do poingkaa, ‘Araat ko no iya'd kuli'! Tonuso' ngai' ku nopo i diya'd tutang tu' minokiinsian ko i' doho'! 33 Om a' toi daa apatut dot iya' nga' monginsian i' di tambalut nu do miagal doho' tu' minonginsian diya'?’ ka di raja'. 34 Om otogod tomod diri i raja' gisom do pogiilo' nopo dau i kuli' dit araat diri do gisom i' dot abayaran ngai' di kuli'ddi i tutang dau,” ka dau. 35 Om poingkaa o boros di Yesus do pinongolimpupus dau di sinusui dau, “Om iyo nogiddi o wonsoyon di Tapa' ku di hilo'd surga dot id dokoyu, ondung a' no aayi-ayi' o ginawo dokoyu do mangampun di tobpinai dokoyu,” ka dau.
Ponudukan di Yesus dot A' Koino-ino do Magada'd Sawo
1 Om kongoboros ngai' poddi di Yesus iri, om tongkiad no iyau do mantad hilo'd Galilia om ongoi no iyau do hilo'd watas do Yudia, it id soborong di Bawang do Yordan. 2 Om ogumu' o tulun do minoyo' dau, om lingasai no dau iyolo' dot id kinoiyonon diri. 3 Om rikot noddi i tulun do Parisi do mongoi daa pogumbal di Yesus. Boros ka diyolo' do minoguhot dau, “Tumanud nopod Tourat toko', om koino-ino toi o kusai do magada'd sawo dau do nunu nopo o paantakan?” ka diyolo'. 4 Om boros ka di Yesus do suminimbar, “A' kou po toi nakabasa' dot id suang do Buuk do Kinorohingan do nopo di timpuun i' om minomonsoi'd tulun i Gompomonsoi, om winonsoi nopo dau om kusai om tondu'? 5 Om kowonsoi poddi dau iyolo', om boro-boros no iyau do poingkaa, ‘Iri no o kotongkiadan do kusai di tina' om tapa' dau om kopiiso' i' iyau di sawo dau, om iyolo' nopondo goduwo om osiliu dot iso-iso',’ ka. 6 Om okon noddi ko' duwo po iyolo', suwai ko' iso' poo. Om iri no o kokuwaan do nunu nopo i nopiiso' do Kinorohingan om a' no koino-ino do pitongkiadon do tulun,” ka dau. 7 Om uhoto' po iyau kawagu di tulun do Parisi. Boros ka diyolo', “Iyo nopoddi, om nokuro tu' minanahak do toturan i Musa di popokoino do manahak do surat do kopiadaan dot id tondu' dit adaan?” ka diyolo'. 8 Om boros ka di Yesus do suminimbar, “Pinotumboyo' kou pogi' di Musa do magada'd sawo nga' mantad i' dot a' dokoyu komiloo'd tudukan. Nga' otopot nopo kopio om a' i' daa iyo'ddi di timpuun i'. 9 Iyo nopoddi, om pokinongoho' no dokoyu iti: Isai nopo o kusai di magada' do sawo dau, om a' i' daa i sawo dau minomonsoi'd araat, om kumawin nondo kawagu do tondu'd suwai, om magampahu' no i kusai'ddi,” ka dau. 10 Om boros kaddi di tumatanud di Yesus dot id di Yesus, “Ondung iyo'ddi o kowoyo-woyoon do misasawo, om osonong nogi' dot a' manansawo,” ka diyolo'. 11 Om boros ka di Yesus do suminimbar, “Okon i' ko' oinsanan o tulun do milo'd tumanud do ponudukan do miagal diri; suwai ko' iri no i tulun di natantu' do Kinorohingan do miagal diri. 12 Tu' haro i' o tulun dot a' milo'd manansawo tu' iyo noddi o kowoyo-woyoo' dau do mantad di kosususu. Om haro o tulun dit a' milo'd manansawo tu' haro o winonsoi'd tulun do suwai dot id dau gisom dot a' diri iyau milo'd manansawo. Om haro nogi' o tulun di tumomod dot a' manansawo, om milo indo iyau do momonsoi'd karaja' do Pomorintaan do surga. Om iri nopo tulun di milo do tumanud do ponudukan diti, om pologoson nopo do tumanud,” ka dau.
Minamarakat i Yesus do Tangaanak
13 Om haro o piro-piro o tulun do pinapaatod di tangaanak diyolo' dot id di Yesus do pokikamaan diyolo' dau o tulu di tangaanak om pokisambayangan diyolo'. Nga' togodo' no di tumatanud di Yesus i tulun diri. 14 Nga' boros ka di Yesus dot id tumatanud dau, “Pologoso' nopo ilo tangaanak do rumikot dot id doho'! Kada' dokoyu iyolo' oduhai tu' iri no tulun do miagal do tangaanak diti o kasanganu di Pomorintaan do surga,” ka dau. 15 Om kamao' noddi di Yesus o tulu di tangaanak om barakatai no dau iyolo'. Om tongkiad nogiddi iyau do mantad id kinoiyonon diri.
I Tanakwagu di Kaya'
16 Insan o tadau om rikot no o songulun o kusai dot id di Yesus. Om boro-boros no iyau dau, “Guru, nunu ma o wonsoyon dot osonong dit apatut ku'd wonsoyon om kaanu oku id koposion dit otopot kopio om it aiso' o kopupuson?” ka dau. 17 Om boros ka di Yesus do suminimbar, “Nokuro tu' monguhot ko doho' ondung nunu it osonong? Iso' noo ot osonong. Om ondung orohian ko'd apasi, om tonudon no i ponuhuan do Kinorohingan,” ka dau. 18 Om ponguhot po i tulun diri, “I ponuhuan di honggo'ddi?” ka dau. Om boros ka di Yesus do suminimbar, “Kada' pamatai, kada' pagampahu'; om kada' panakau; om kada' pongudut; 19 om pusohon no o tapa' om tina' nu; om kosianai nod sompi' ko' iyau ngai' do miagal dot osianan ko do diya'd tinan,” ka dau. 20 Om boros ka di tanakwagu'ddi, “Natanud ngai' ku no i ponuhuan diri. Nga' nunu po ot apatut ku'd wonsoyon?” ka dau. 21 Om boros ka di Yesus dot id dau, “Ondung orohian ko dot osiliu'd tulun dit aiso' o kabara-barasan, om ngoyon ngai' no padagango' i dapu' nu. Om patahakon no i tusin di gatang di dapu' nu'ddi dot id tulun do mosikin, om kaanu ko indo do dapu' do hilo'd surga. Om owonsoi nu pondo o miagal diri, om rumikot no do mongoi tanud doho'!” ka dau. 22 Nga' korongou poddi di tanakwagu'ddi i boros do miagal diri, om tongkiad no iyau do mikuwo'd tumongob tomod, tu' kaya' i' kopio iyau. 23 Om boros kaddi di Yesus dot id tumatanud dau, “Poboroson ku no dokoyu, do tulun nopod kaya' om osusa' no kopio do kosuang di Pomorintaan do surga. 24 Om iti po o poboroson ku dokoyu: osonong-sonong nogi' o songinan ot unta do sumuang di luang do dalat, ko' mantad do tulun do kaya' do sumuang di Pomorintaan do Kinorohingan,” ka dau. 25 Om soira'ddi norongou di tumatanud di Yesus i boros di Yesus do miagal diri, om osuayan tomod diri iyolo'. Boros ka diyolo', “Iyo nopoddi, om isai poo ot apasi?” ka. 26 Om ontong noddi i Yesus diyolo' om boro-boros nod, “A' no daa kopio milo'd tulun do wonsoyon o miagal diri, nga' milo ngai' id Kinorohingan do wonsoyon,” ka dau. 27 Om boros kaddi di Pitrus, “Antangai pogi', nga' aiso' no ot a' dahai tinongkiadan tu' tumanud no iyahai diya'. Om nunu nondo ot aanu-anu dahai?” ka dau. 28 Om boros ka di Yesus dot id diyolo', “Kotumbayaai kou no! Do hilo' nopondod Pomogunan do Wagu di Winonsoi'd Kinorohingan, om mirikau nondo i Tanak do Tulun do hiri'd tirikohon dau do momorinta' di kikagayaan. Om tontok nopondoddi om poirikau kou nondo iyokoyu, i tumatanud ku dot id hopod om duwo o tirikohonon di don raja', om butusan dokoyu i hopod om duwo o payat do bansa'd Israil! 29 Om pointikid-tikid do tulun di nokotongkiad do walai dau ko' tobpinai dau'd kusai ko' tondu' ko' tina' om tapa' ko' tangaanak, ko' tumo dau dot iyoho' o kinotongkiadan, om kaanu no i tulun diri dot inghatus piluap ko' mantad diri. Om kaanu po i tulun diri do koposion dit otopot kopio om i poingompus. 30 Nga' ogumu' indo o tulun dit id gulu daa do dinondo poo do kotohuri, om iri no it id tohuri do dinondo om kopogulu nogindo,” ka dau.
Kuli' dot id Kabun dot Anggur o Pinoinukadan
1 Om boros ka kawagu di Yesus, “Iyo do poinukadan diti o Pomorintaan do surga: Haro o tiso' o tulun di kikabun dot anggur do minamanau dit osuab po do minongoi pogihum do tulun do pakarajaon do hiri'd kabun dot anggur dau. 2 Om kookunai poddi dau do mamagadsi' iyolo' dot iso' o tusin do pirok do sangadau, om suhuo' no dau iyolo' do mongoi karaja' do hiri'd kabun dot anggur dau. 3 Om pamanau po kawagu i sanganu di kabun dot anggur diri di jam kosiam no do dongkosuabon, om kokito no dau o piro-piro tulun do sampanau-panau dot aiso' tomod o karaja' do hiri'd tomu. 4 Om boros ka dau dot id diyolo', ‘Ongoi kou nogi' karaja' do hilo'd kabun dot anggur ku. Om godsian ku i' iyokoyu do tumanud dit apatut do pamagadsi',’ ka dau. 5 Om ongoi noddi karaja' i tulun diri. Om pamanau po kawagu i sanganu di kabun dot anggur di jam do kohopod om duwo do pitangaadau om di jam kotolu do sosodopon, om iyo i' di gulu o winonsoi dau. 6 Om pamanau po iyau kawagu di jam kolimo no do dongsosodopon, om kokito no dau do haro po o piro-piro tulun do sampanau-panau dot aiso' o karaja'. Om uhoto' no dau iyolo', ‘Nokuro tu' monongodou kou nopo do songingkakat do hiti om aiso' i' o buruon dokoyu?’ ka dau. 7 Om boros ka di tulun diri do suminimbar, ‘Aiso' o tulun do manahak dahai'd karaja',’ ka. Om boros kaddi di sanganu di kabun, ‘Iyo nopondo, om ongoi kou nogi' karaja' do hilo'd kabun dot anggur ku,’ ka. 8 Sosodopon noddi, om boros ka di sanganu di kabun diri dot id mandur dau, ‘Lohowon no i tulun di minongoi karaja'. Om godsian ngai' no iyolo'. Om poguluonon nopo do mamagadsi' om it id tohuri korikot om gisom dot orikot it id gulu korikot,’ ka dau. 9 Om korikot noddi i tulun di jam kolimo do sosodopon do tuminimpuun do kuminaraja'. Om kaanu ngai' nopo iyolo' do gadsi' do soroisaan do tusin do pirok. 10 Id tohuri noddi om rikot no i tulun di kuminaraja' do mantad di kosuabon po. Om osorou nopo daa diyolo' nga' poinggumu-gumu' no o diyolo'd gadsi'. Nga' soroisaan no iyolo'd tusin do pirok do gadsi' diyolo'. 11 Om moguhang daa'ddi iyolo' di sanganu di kabun dot anggur di naramit diyolo' i tusin. 12 Boros ka diyolo', ‘Sajaam poo o nakakarajaan di tulun dit id tohuri kopio korikot. Nga' iyahai nopo om kasangadahai nopo do kuminaraja' dot otimpalangan do tadau dit alasu' tomod, nga' irad i' di pinamagadsi' nu dahai o pinamagadsi' nu diyolo'!’ ka diyolo'. 13 Om simbaro' no di sanganu di kabun dot anggur o tiso' diyolo'. Boros ka dau, ‘Oi tambalut ku, aiso' i' o sala' ku dot id diya'. Tu' a' ko toi nakaakun i' do godsian dot iso' o tusin do pirok dot osongodou'd kumaraja'? 14 Na, onuo' iti gadsi' nu, om mamanau nondo. Tu' orohian oku no do mamagadsi' di tulun dit id tohuri no rikot, dot irad di pinamagadsi' ku dokoyu. 15 A' oku toi koino-ino do momonsoi do poingkuro nopo o korohian ku di tusin ku? Ko' osolon ko dot opuhawang kopio oku?’ ka di sanganu di kabun dot anggur,” ka dau. 16 Om boros kaddi kawagu di Yesus, “Om iyo nogiddi tu' iri nogiddi i tulun di nokotohuri om kopogulu, om iri nogindo i tulun di nokopogulu om kotohuri,” ka dau.
Kointolu di Yesus do Popoboros do pasal do Kapatayon Dau
17 Om tontok di pakayaan di Yesus do hilo'd Yorusalim, di hiri nod tanga'd ralan, om lohowo' no dau i hopod om duwo o tumatanud dau do tumimung dot iyolo-yolo'. Om boros kaddi dau dot id diyolo', 18 “Pokinongou kou pogi'! Kumaa toko' nodti do hilo'd Yorusalim. Om hilo' nopondo om patahakon nondo o Tanak do Tulun dot id boyoon dot imam om id guru do Tourat. Om hukuman nondo iyau do kapatayon. 19 Om patahakon nogindo dot id tulun dit okon ko' Yohudi. Om hingi-hingion nondo diyolo' iyau, om inggoriton, om posolibon. Nga' kotolu nopondod tadau, om posion indo iyau kawagu,” ka dau.
Pokionuon di Tina' di Yakub om i Yohanis
20 Om rikot noddi dot id di Yesus i sawo di Sabidi, do mogiwoyo-woyo' di tangaanak dau. Om otud no iyau dot id toguang di Yesus tu' haro o pokionuon dau. 21 Om uhoto' no iyau di Yesus, “Nunu o pokionuon nu, oi inan?” ka. Om boros ka dau do suminimbar, “Pokionuon ku do koirikau iti duwo o tanak ku do miampaping diya', dot iso' ot id dogibangan om iso' ot id dawananan nu, dot osiliu ko'd Raja',” ka dau. 22 Om boros ka di Yesus dot id diyolo', “A' kou i' koilo ondung nunu kopio i pokionuon dokoyu'ddi. Kasaap kou i' tuu do monginum do mantad hiri'd sangkir do koinggoritan di mositi' no dot inumon ku?” ka dau. Om boros ka diyolo'd suminimbar, “Kasaap i',” ka. 23 Om boros ka di Yesus, “Otopot i' dot iyokoyu nga' koinum indo do mantad hiri'd sangkir ku. Nga' pasal no di koirikau dot id dogibangan om id dawananan ku om okon i' ko' iyoho' o kikuasa' do manantu'ddi. Iri nopo kinoiyonon diri om patahakon di tulun di natantu' mantad no di Tapa' ku,” ka dau. 24 Om di nopoddi nokorongou i hopod o tumatanud di Yesus di suwai do pasal diri, om kotogod no iyolo' di duwo o miobpinai'ddi. 25 Om iri noddi o kinapamalahawan ngai' di Yesus diyolo'; om boro-boros nod, “Koilo kou i' dot iri nopo boyoon do bansa' dit a' kotutun do Kinorohingan om mongulok-ulok nopo di rayat diyolo'. Om mongudipon di rayat i tulun diyolo' dit ongkipangkat. 26 Nga' iyokoyu nopo om a' i' koino-ino do miagal diri. Tu' iri nopo it orohian dot agayo o ngaran dot id pogialatan dokoyu, om mositi' no do sumiliu'd susuhuon dokoyu. 27 Om iri tulun dit orohian do kopogulu dot id pogialatan dokoyu, nga' mositi' no do sumiliu'd turipon dokoyu. 28 Dot iyo di Tanak do Tulun tu' kinorikatan nopo om okon i' ko' mokiobi-obi', ko' mokisurung, suwai ko' mongoi pogobi-obi', om papatahak do koposion dau do gisom dot apatai do mamasi'd tulun dot ogumu',” ka dau.
Minomolingos i Yesus do Duwo o Tulun do Bolou
29 Om tontok di tuminongkiad iyolo' do mantad hilo'd Yorikou om ogumu'ddi o tulun do tuminanud di Yesus. 30 Om haro o duwo o tulun do bolou do poirikau do hiri'd tisan di ralan. Om soira'ddi norongou diyolo' do tumalib i Yesus, om pinglohou no iyolo' do poingkaa, “Oi Tanak di Daud, kosianai no dahai!” ka. 31 Om togodo' no iyolo' di tulun dot ogumu' om sinuhu' iyolo' dot a' minghiyo. Nga' okon nogi' dot opuhod-puhod iyolo' do minglohou dot, “Oi Tuan, i Tanak di Daud, kosianai no dahai!” ka. 32 Om undorong noddi i Yesus, om lohowo' no dau iyolo'. Om boros ka dau, “Nunu daa o korohian dokoyu do wonsoyon ku dot id dokoyu?” ka. 33 Om boros ka diyolo' do suminimbar, “Tuan, orohian iyahai'd kokito,” ka. 34 Om kosianai no i Yesus diyolo', om kamao' no dau i mato diyolo'. Om diiri i' om diiri do nokokito iyolo', om tanud noddi iyolo' di Yesus.
Pinusou i Yesus do Ruminikot do Hilo'd Yorusalim
1 Om tontok di pakayaan no di Yesus om i tumatanud dau do hilo'd Yorusalim. Om korikot no iyolo' do hilo'd Baitpagi, i hilo'd Nulu-Nulu do Saitun. Om hilo' nod sinuhu' di Yesus do mogulu diyolo'd mamanau o duwo di tumatanud dau. 2 Om boros ka di Yesus do minomilin diyolo', “Mongoi kou no do hilo'd kampung dit id dabantalan dokoyu. Om okito nondo dokoyu o kaladai do poingkogos om pointalad di kaladai i tanak dau. Iyadan no dokoyu iri, om gayaton no do kumaa'd hiti. 3 Om ondung haro o tulun do muhot dokoyu om sunudan no dot, ‘Pakayon do Tuhan iti,’ kanto dokoyu, om pologoson nopondo di tulun do gayaton i kaladai'ddi,” ka dau. 4 Om nosiliu pogi' o miagal diri nga' mamayaan di nokoboros mantad di nabi do poingkaa, 5 “Poboroson no dot id bandar do Sion do maso no di Raja' dokoyu do rumikot dot id dokoyu. Osiriba' o ginawo dau om sumakai iyau dot iso' o kaladai, om iso' o tanak do kaladai dit okoro' po,” ka. 6 Om pamanau noddi i duwo o tumatanud di Yesus diri, om wonsoyo' no diyolo' o miagal di pinobilin di Yesus diyolo'. 7 Om gayato' no diyolo' i kaladai'ddi do piniwoyo' di tanak di kaladai. Om lopikai no diyolo' di rasuk diyolo' dot id soibau i likud di duwo o kaladai'ddi. Om sakai noddi i Yesus di kaladai. 8 Om ogumu' tomod o tulun do hiri do pinopinglapik di rasuk diyolo' dit id soibau do hiri'd ralan. Om iri no tulun do suwai om minongoi pinganu do raan do kayu om popingiliho' nogiddi do hiri'd ralan. 9 Om mimboros poddi dot opuhod i tulun dot ogumu' di hiri'd gulu-gulu di Yesus om it id dohuri dau do poingkaa, “Royohon no i Tanak di Daud! Barakatan i' do Kinorohingan i rumikot dot id suang do ngaran do Tuhan! Royohon no o Kinorohingan it Asawat Kopio!” ka no diyolo'. 10 Om di nopoddi sumuang i Yesus di bandar do Yorusalim, om agangau ngai' nopoddi i tulun do hiri'd bandar diri. “Isai kopio iti?” ka no diyolo' do minguhot. 11 Om boros ka di tulun dot ogumu' di moyo-woyo' di Yesus, “Ilo' nopo om i Yesus, i nabi do mantad hilo'd Nasarit, it id pomogunan do Galilia,” ka diyolo'.
Suminuang i Yesus do Hiri'd Walai'd Sasambayangan dot Agayo
12 Om suang noddi i Yesus do hiri'd Walai'd Sasambayangan dot Agayo, om uyungo' ngai' no dau i tulun di mogidagang-dagang do hiri. Om pinsomboliko' ngai' no dau i mija' di tulun di monukar do tusin, om i timpohon di tulun di padagang do punai. 13 Om boros kaddi dau dot id tulun diri, “Nokotulis no dot id suang do Buuk do Kinorohingan do minomoros o Kinorohingan do poingkaa, ‘Roitan nondo do tiyonon do sumambayang i walai ku,’ ka. Nga' siniliu nogiddi dokoyu iti do lilisokon do gampanakau,” ka dau. 14 Om rikot no i tulun do bolou om i kimpo' dot id di Yesus do hiri'd Walai'd Sasambayangan dot Agayo, om lingasai no di Yesus iyolo'. 15 Nga' ongotogod tomod i boyoon dot imam om i guru do Tourat do nokokito di piro-piro o koimayaan di winonsoi di Yesus. Om otogod iyolo' do korongou di tangaanak do mimboros dot opuhod dot, “Royohon no i Tanak di Daud!” ka, do hiri'd Walai'd Sasambayangan dot Agayo. 16 Om boros ka diyolo' dot id di Yesus, “Orongou nu i' ilo pimboroson diyolo'?” ka. Om boros ka di Yesus do suminimbar, “Oo, orongou ku i'. A' kou toi insan kabasa' dit ayat dot id Buuk do Kinorohingan do poingkaa, ‘Notudukan ku no i tangaanak om i tangaanak di ragang po do mamarayou diya' di pamarayou dit otopot kopio,’ ka,” ka dau. 17 Om tongkiad noddi i Yesus diyolo', om soliwan no iyau di bandar. Om pakayaai no dau do hilo'd Baitani om hilo' no iyau'd minodop.
Pinapalan di Yesus i Guas dot Ara
18 Tadau noddi kawagu dit osuab po, om linouson i Yesus di hiri no iyolo'd tanga'd ralan do pakayaan do hiri'd bandar. 19 Om kokito no iyau do songguas ot ara do hiri'd tisan di ralan. Om ongoi no daa iyau bontol di guas dot ara diri, nga' aiso' i' o tongoiso' piya'd tua'ddi, tu' roun ngai' noo. Om boros kaddi di Yesus dot id guas dit ara diri, “A' ko nondo mongua' kawagu?” ka dau. Om pitilombus nopo i guas dot ara diri do ruminiou. 20 Om soira'ddi nokito di tumatanud di Yesus i nosiliu do miagal diri, om osuayan tomod diri iyolo'. Om boros ka diyolo' do minuhot, “Poingkuro kopio do minitilombus do noriou i guas dot ara?” ka diyolo'. 21 Om boros ka di Yesus do suminimbar, “Otopot no kopio do poboroson ku dokoyu dot ondung otumbayaan kou om a' no mikoduwo o ginawo, om milo kou i' do momonsoi do miagal di winonsoi ku dot id guas dot ara diti. Om okon i' ko' iri noo, suwai ko' milo kou i' do moro-boros dot id nulu-nulu diti dot, ‘Kakat om tumaam i' do hilo'd rahat,’ ka; om osiliu nondo kopio o miagal diri. 22 Nunu nopo i pokionuon dokoyu dot id suang do sambayang dokoyu, om aanu nondo kopio dokoyu iri, ondung monongkuyaan kou no kopio,” ka dau.
Minonguhot do pasal do Kuasa' di Yesus
23 Om guli' noddi i Yesus do hiri'd Walai'd Sasambayangan dot Agayo om suang no iyau, om ponuduk no iyau'd hiri. Om maso dau do monuduk, om rikot no do minongoi ponguhot dau i piro-piro boyoon dot imam om i piro-piro boyoon do bansa' do Yohudi. Boros ka diyolo', “Nunu kopio o kuasa' nu do momonsoi ngai'dti? Isai o minanahak diya'd kuasa'?” ka diyolo'. 24 Om boros ka di Yesus do suminimbar, “Iyoho' nga' haro i' o tuhoton ku dokoyu. Om ondung simbaron dokoyu, om iyoho' nga' poposunud indo ondung disai'd kuasa' ku do mingwonsoi ngai'dti. 25 Honggo o tadon di kuasa' di Yohanis do mamatis do tulun? Kinorohingan ko' tulun?” ka dau. Om pogiboro-boros noddi i piro-piro o boyoon dot imam om i boyoon do bansa'd Yohudi. Boros ka diyolo', “Ondung poboroson toko' do, ‘Mantad id Kinorohingan,’ ka, om poboroson nondo dau dot, ‘Iyo nopoddi, om nokuro tu' a' kou minonongkuyaan dau?’ ka. 26 Nga' poboroson toko' no do, ‘Mantad id tulun,’ ka, om ooris toko' i' dilo tulun dot ogumu', tu' oinsanan nopo iyolo' do momoros do nabi i Yohanis,” ka diyolo'. 27 Om boros kaddi diyolo' do suminimbar, “A' i' iyahai koilo,” ka. Om boros kaddi di Yesus dot id diyolo', “Iyo nopondo, om iyoho' nga' a' i' poposunud dot id dokoyu ondung mantad id disai o kuasa' ku do momonsoi ngai'dti,” ka dau.
Duwo o Tanak do Pinoinukadan
28 Om boros ka kawagu di Yesus, “Poingkuro no o tosorou dokoyu do pasal diti? Do haro o tiso' o kusai do kianak do duwo o tanak do kusai. Om ongoi no i tulun diri boro-boros di tanak dau dot id dotuo do poingkaa, ‘Ondu', ongoi karaja' do hilo'd kabun dot anggur do baino',’ ka. 29 Om simbar no i tanak diri, ‘A, a' oku i' mongoi,’ ka dau. Nga' alaid- laid noddi om kosimban i' o tosorou dau, om ongoi iddi iyau do hiri'd kabun dot anggur. 30 Om ongoi no i tulun boro-boros di tanak dau di koduwo, om iyo i' di pinoboros dau di tanak dau'd tiso' o pinoboros dau. Om simbar ka di tanak dau di koduwo, ‘Oo, mongoi oku i', oi Apa',’ ka. Nga' a' iddi iyau minongoi kopio. 31 Om id piolitan nopo di duwo o tanak diri, om honggo'ddi o minomonsoi di pinonuhuan di tapa' dau?” ka dau. Om boros ka di piro-piro boyoon dot imam om i boyoon do bansa'd Yohudi, “It id dotuo,” ka. Om boros kaddi di Yesus dot id diyolo', “Ponongkuyaai kou no: Dot iri nogindo i gomponimung do sukai, om i tongoondu' do sundal o kopogulu ko' iyokoyu do kosuang di Pomorintaan do Kinorohingan. 32 Tu' korikot no i Yohanis Gampamatis, om tudukai kou no daa dau do kowoyo-woyoon di korohian do Tuhan, nga' a' kou i' minonongkuyaan di ponudukan dau; nga' minonongkuyaan i' dau i gomponimung do sukai om i tongoondu'd sundal. Nga' nokito ngai' piya dokoyu iri, nga' a' i' dokoyu pinosimban o ginawo dokoyu, om a' kou minonongkuyaan do Tuhan,” ka dau.
Tulun di Minoniwa' do Kabun dot Anggur o Pinoinukadan
33 Om boros ka kawagu di Yesus, “Pokinongou-nongou kou po diti tiso' kawagu o poinukadan. Haro o tiso' o tulun di kitana' dot agayo, om tanamai no dau iri dot anggur. Om pagaro' no dau o pointutuk di kabun diri, om minongukad iyau do luang do poiyanan di pamagaan do tua'd anggur, om pomonsoi po iyau do sinurambi' dot akawas dot iyonon do madtamong. Om posiwaai noddi dau i kabun dot anggur diri dot id piro-piro o tulun, om ongoi noddi iyau dot id pomogunan do suwai. 34 Om tontok di norikot o kopongupuan di tua' dot anggur, om suhuo' no di tulun di sanganu di tana' i susuhuon dau do mongoi solowot di tulun di minoniwa' di kabun dau'ddi, do mongoi daa panganu di dau'd bahagi'. 35 Nga' tangkapo' nogiddi di tulun di minoniwa' di kabun diri i susuhuon di sanganu di tana': haro binobog, om haro pinatai, om haro dinumpau'd watu. 36 Om ponuhu' po kawagu i sanganu di tana'ddi do piro-piro o susuhuon dau di suwai dot ogumu' ko' i sinuhu' dau di tinsan i'. Nga' iyolo' piya nga' niyo i' di susuhuon dit id gulu i' ongoi. 37 Om alaid noddi om suhuo' no di sanganu di tana'ddi i tanak dau do mongoi solowot di tulun di minoniwa'. Om osorou nopo daa dau nga' poingkaa, ‘Atantu' no do pusohon i' bo i tanak ku,’ ka dau. 38 Nga' soira'ddi nokito di tulun di minoniwa' di kabun i tanak di sanganu di tana'ddi do rumikot, om pogiboro-boros no iyolo' do poingkaa, ‘Na, ilo' no moti' o tumungkus diti kabun. Nga' maai toko' nogi' patayo' ilo', om iyati' indo o kotungkus diti kabun!’ ka. 39 Om ngoyo' noddi diyolo' tangkapo' i tanak diri om pataamo' no do hiri'd soliwan, om patayo' noddi,” ka. 40 Om ponguhot noddi i Yesus, “Gumuli' nopondo i sanganu di kabun dot anggur diri, om kukuroyon tuu nondo dau i tulun di minoniwa'ddi?” ka dau. 41 Om boros ka diyolo'd suminimbar, “Atantu' no do patayon dau i tulun dit angaraat diri, om posiwaan nondo dau i kabun dot anggur diri dot id tulun do suwai di papatahak di bahagi' do tua' dot id sanganu, dot orikot i maso do kapatahakan,” ka diyolo'. 42 Om boros ka di Yesus dot id diyolo', “A' kou toi insan kabasa' di nokotulis dot id Buuk do Kinorohingan do poingkaa, ‘Iri nogi' i watu dit a' pinowonsoi do mamamaal om iri nogiddi i nosiliu do watu dit agayo kopio o guna'. Iri no o winonsoi'd Tuhan; om koimayaan toko' no kopio iri!’ ka,” ka dau. 43 Om boros kaddi di Yesus, “Iyo nopoddi, om soro-soroho' no dokoyu. Tu' ngoyon nondo do mantad id dokoyu i Pomorintaan do Kinorohingan om patahakon nondo iri dot id tulun di momonsoi do ponuhuan do Kinorohingan. 44 Tulun nopo dit aratu' do kootung di watu'ddi om omumuk nopo; om iri tulun dit ootungan di watu'ddi nga' omumuk nopondo dot iyo pod pupuk,” ka dau. 45 Om kongorongou nopoddi di piro-piro boyoon dot imam om i tulun do Parisi i piro-piro o pinoinukadan di Yesus diri, om koilaai no diyolo' dot iyolo' i' o komoyon di Yesus. 46 Om pogihum no iyolo'd ralan do manangkap dau. Nga' ooris i' iyolo' di tulun dot ogumu' tu' roitan i' di tulun dot ogumu' do nabi i Yesus.
Poginakanan do Pikowinan o Pinoinukadan
1 Om ponuduk po kawagu i Yesus di tulun dot ogumu' do pinawaya' dau do poinukadan. 2 Boros ka dau, “Iyo do poinukadan diti o Pomorintaan do surga: Haro o songulun o raja' do pinapaharo do poginakanan do pikowinan di tanak dau'd kusai. 3 Om suhuo' no di raja' i susuhuon dau do mongoi pomolohou di tulun di naalap do rumapou dot id poginakanan diri. Nga' aiso' i' o tiso' di tulun di naalap do norohian do mongoi rapou. 4 Om suhuo' po kawagu di raja' i susuhuon dau'd suwai. Boros ka dau dot id diyolo', ‘Sunudan no i tulun di naalap diri do poingkaa: Nongkosodia' no i kanon do moginakan. Nongosumbali' ku no i sapi', om i piro-piro o tanak do sapi' ku di nopili' no o kosonongo'. Nongkosodia' ngai' no. Om rumikot kou no kopio dot id poginakanan do kopikowinan,’ kanto dokoyu,” ka dau. 5 “Nga' aiso' i' o tiso' di tulun di naalap diri do minomusou di boros do momolohou. Sompori-pori nogi' iyolo' do minongoi'd hiri'd karajaon diyolo', om minindahu' do hiri'd dumo o songulun, om iri no suwai om minongoi do hiri'd kadai dau; 6 om iri no suwai om minongoi panangkap di susuhuon di raja' om pimbabagai no diyolo' om patayo' nogiddi. 7 Om korongou poddi di raja' i nosiliu do miagal diri, om kotogod no tomod iyau. Om porikoto' no dau i soudor dau do mongoi pamatai di tulun di minamatai'ddi, om mongoi ponutud di bandar diyolo'. 8 Om lohowo' noddi dau i susuhuon dau, om boros ka dau, ‘Nokosodia' no iti poginakanan do kopikowinan, nga' a' i' osorupai do rumikot i tulun di nangaalap. 9 Om ongoi kou nogi' do hilo'd karalan-ralanan, om mangalap kou nopo do songkuro nopo o kogumuo' do tulun dot id poginakanan do pikowinan diti,’ ka dau. 10 Om pamanau noddi i susuhuon. Om ongoi no iyolo' do hiri'd karalan-ralanan om alapo' ngai' nopo diyolo' i tulun dit osolowot diyolo'd hiri, i tulun dit ongosonong om i tulun dit angaraat. Om koponu' noddi do tulun i tiyonon do moginakan. 11 Om suang noddi i raja' do mongoi pogontong di tulun do nongolohou. Om kokito no dau o songulun do hiri'd poginakanan diri dot a' minanampakai do pakayan di dong moginakan do pikowinan. 12 Om uhoto' noddi dau i tulun diri, ‘Oi tambalut, poingkuro ko do nokosuang do hiti dot aiso' o pakayan do dong moginakan do pikowinan?’ ka dau. Om aiso' noddi o milo do poboroson di tulun diri. 13 Om boros kaddi di raja' dot id susuhuon dau, ‘Ngoyo' dokoyu kagasai o gakod om longon do tulun diti, om pataamon i' do hilo'd dotuong do hilo'd soliwan. Om hilo' nondo iyau do mingihad om oinggorit,’ ka dau,” ka di Yesus. 14 Om boros kaddi di Yesus do minongolimpupus di poinukadan diri, “Ogumu' i' o tulun do lohowon, nga' okuri' indo it opili',” ka dau.
Tuhoton do pasal do Mambayar do Sukai
15 Om ongoi noddi i tulun do Parisi pogiboro-boros ondung poingkuro o ralan diyolo' do momurunsut di Yesus, do poguhatan o pakayon. 16 Om suhuo' noddi diyolo' i tumatanud diyolo' do minongoi solowot di Yesus, do pinogiwoyo-woyo' do piro-piro o tulun di mantad id sinompuruan do pati di Horudis. Om boros ka di tulun diri dot id di Yesus, “Oi Guru, oilaan i' dahai dot otopot o poboroson nu. Potudukon nu nopo kopio om aiso' no o lisok-lisokon nu do pasal di korohian do Kinorohingan do wonsoyon do tulun, om a' ko i' ooris dit osorou dot isai nopo o tulun. Tu' iya' nopo om a' ko i' montong do pangkat do tulun. 17 Om sunudai daa'ndo iyahai ondung koino-ino toko' do mambayar do sukai dot id di Kaisar ko' amu', do tumanud do Tourat toko',” ka diyolo'. 18 Om oilaan i' di Yesus it osorou diyolo'd araat, om boros kaddi dau, “Oi tulun di minsorupai-rupai no toomod! Nokuro daa tu' momurunsut kou doho'? 19 Pokitono' oku daa dokoyu di tusin di pakayon dokoyu do pambayar do sukai!” ka dau. Om onuwai noddi diyolo' iyau dot iso' o tusin do pirok. 20 Om uhoto' no di Yesus iyolo', “Disai'd gambar diti, om disai'd ngaran diti?” ka dau. 21 “Di Kaisar,” ka diyolo' do suminimbar. Om boros kaddi di Yesus dot id diyolo', “Iyo nopoddi, om patahakon no kawagu dot id di Kaisar i di Kaisar, om patahakon kawagu dot id Kinorohingan i dong Kinorohingan,” ka dau. 22 Om osuayan nopoddi iyolo' do nokorongou di pinonimbar dau dot iyo'ddi. Om tongkiad noddi iyolo' di Yesus.
Poguhatan do pasal do Tulun dot Apasi Kawagu do Mantad id Kapatayon
23 Om tontok i' do tadau'ddi do ruminikot dot id di Yesus o piro-piro o tulun do Saduki. Om iyolo' no o tiso' o sinompuruan do tulun di momoros dot a' no apasi kawagu i tulun do napatai. 24 Om boros ka diyolo', “Guru, poingkaa o pinonudukan di Musa: Ondung apatai ot iso' o kusai om aiso' po o tanak dau, om mositi' no do kowinon di tobpinai dau i tondu' di sawo daa dau, om oonuan i' do sinakagon i tulun di napatai,” ka. 25 “Om nokoumbal i' do haro o turu' o tulun do mogiobpinai do nokoiyon do hiti. Om kawin no daa it id dotuo nga' aiso' po tanak dau om kapatai no iyau. Om iri noddi i tobpinai dau o minangawin di tondu' di sawo daa dau. 26 Nga' alaid noddi om kapatai no i tobpinai dau om aiso' po o tanak. Om iyo ngai' nopoddi o nosiliu dot id tobpinai dau di kotolu om iri ngai' i tobpinai dau di suwai do gisom do noinsanan i turu' o mogiobpinai. 27 Om alaid noddi om kapatai no i tondu'. 28 Om orikot nopondo i maso do posion kawagu i tulun do nangapatai, om isai nondo o sonsawo di tondu'ddi? Tu' nakapangawin ngai' nopo di tondu' i turu' o kusai?” ka diyolo'. 29 Om boros ka di Yesus do suminimbar, “Kasala' kou no kopio'd momusorou tu' a' kou i' kosuhut do komoyon di Buuk do Kinorohingan, om i sinundu do Kinorohingan. 30 Tu' apasi nopondo kawagu i tulun do napatai, om a' no iyolo' kumawin kawagu. Tu' iyo pondo iyolo' di moloikat do hilo'd surga. 31 A' kou toi insan kabasa' di pinoboros do Kinorohingan do pasal di tulun do napatai do posion kawagu? Boros kad Kinorohingan, 32 ‘Iyoho' no i Kinorohingan di Abraham, om Kinorohingan di Isak om Kinorohingan di Yakub,’ ka. Om Kinorohingan nopo om okon i' ko' Kinorohingan do tulun di poimpatai, suwai ko' Kinorohingan di tulun do poimpasi!” ka di Yesus. 33 Om korongou poddi di tulun dot ogumu' i pinoboros di Yesus do miagal diri, om oimayaan tomod diri iyolo' di ponudukan dau.
I Ponuhuan dit Agayo Kopio
34 Om tontok di nokorongou i tulun do Parisi dot a' no nokosimbar i tulun do Saduki di pinoboros di Yesus dot id diyolo', om pogititimung ngai' noddi iyolo'. 35 Om haro'ddi o songulun o guru do Tourat dot id pogialatan diyolo' do minumbal do momurunsut di Yesus tu' minonguhot iyau dot iso' o tuhoton. 36 Boros ka dau, “Oi Guru, nunu o ponuhuan dit agayo kopio dot id suang di Tourat?” ka dau. 37 Om boros ka di Yesus do suminimbar, “Kosianai nod Tuhan, i Kinorohingan nu do mikuwo'd aayi-ayi' o ginawo nu, om aayi-ayi' o koposi-posion nu, om aayi-ayi' o pomusarahan nu. 38 Iri no i ponuhuan dit agayo kopio, om it apatut kopio'd tonudon! 39 Om i ponuhuan do koduwo nga' iyo i' di ponuhuan di koiso', poingkaa iri: kosianai no do sompi' ko' iyau ngai' do miagal dot osianan ko do diya'd tinan. 40 Iti no o duwo o ponuhuan diti o pinoimpahan do koinsanai di Tourat di Musa om i ponudukan di nabi,” ka dau.
Tuhoton do pasal di Raja' do Gampamasi
41 Om tontok di pointimung pod hiri i tulun do Parisi, om uhoto' no di Yesus iyolo'. Boros ka dau, 42 “Poingkuro o dokoyu'd tosorou do pasal di Raja' do Gampamasi? Sinakagon tuu iyau disai?” ka dau. Om boros ka diyolo'd suminimbar, “Sinakagon di Daud,” ka. 43 Om boros ka di Yesus do minoguhot kawagu diyolo', “Ondung iyo'ddi, om nokuro tu' nonuan di Rusod do Kinorohingan do toilaan i Daud do mamarait di Raja' do Gampamasi do ‘Tuhan’ ka? Tu' poingkaa o pinoboros di Daud, 44 ‘Boros kad Tuhan dot id Tuhan ku; Irikau no do hiti'd dawananan ku do gisom do poinsiribaon ngai' ku diya' i pisangod nu,’ ka. 45 Om ondung roitan di Daud do ‘Tuhan’ i Raja' do Gampamasi, om poingkuro'ddi do sinakagon iyau di Daud?” ka dau. 46 Om iso' po di tulun nga' aiso' i' o nokosimbar di Yesus. Om mantad poddi do tadau'ddi, om aiso' no o tiso'd tulun do katama' do monguhot do nunu nopo dot id di Yesus.
Popoinsan do Mumbangan-bangan di Guru do Tourat om i Tulun do Parisi
1 Om boros kaddi di Yesus dot id tulun dit ogumu' om id tumatanud dau, 2 “Iri nopo i guru do Tourat om i tulun do Parisi om noonuan i' do kuasa' do popotuduk do komoyon di Tourat di Musa. 3 Om tonudon ngai' no dokoyu i ponuhuan diyolo'. Nga' kada' kou pomonsoi do miagal di wonsoyon diyolo', tu' a' i' diyolo' wonsoyon kopio i potudukon diyolo'. 4 Monuhu' i' iyolo' do momonsoi dit angapagon tomod do momonsoi, om manahak do toturan dit angawagat. Nga' a' indo kopio iyolo' mongoi ponulung do tulun do momonsoi'ddi. 5 Iri ngai' nopo i diyolo'd wonsoyon om maan no do popokito-kito'd tulun. Tumomod i' iyolo' do mamakai di kain dit angalaab do pinotulisan dot ayat do boros do Tuhan, i pokogoson diyolo' dot id ponong id turos diyolo' om poriliton dot id longon. Om tomodon diyolo' do papanaru di raboi-raboi di rasuk diyolo' dit id soibau! 6 Orohian iyolo' di tiyonon dit ongosonong dot id poginakanan, om orohian iyolo' di tirikohonon dit ongkipangkat do hilo'd walai'd sasambayangan. 7 Orohian iyolo' do pusohon do tulun do hilo'd tomu, om orohian iyolo' do roitan do ‘Guru’. 8 Nga' iyokoyu nopo, om kada' kou nogi' korohiai do roitan do ‘Guru’, tu' guru nopo dokoyu om iso' noo, om iyokoyu ngai' nopo om mogiobpinai i'. 9 Om kada' kou pamarait do ‘Tapa'’ dot isai nopo o hiti'd pomogunan, tu' iso' noo o Tapa' dokoyu, iri no i Tapa' do hilo'd surga. 10 Om kada' kou korohiai do roitan do ‘Boyoon’, tu' boyoon nopo dokoyu om iso' noo, iri no i Raja' do Gampamasi, i pinabatos mantad do Kinorohingan. 11 Iri nopo tulun dit agayo kopio o ngaran dot id pogialatan dokoyu, om mositi' no do sumiliu'd susuhuon dokoyu. 12 Iri nopo tulun di minggayo-gayo om poinsiribaon indo, om iri no tulun di minsiriba' om poinggoyoon nogindo,” ka di Yesus.
Pinasala' di Yesus i Kowoyo-woyoon di Minsorupai-rupai no Toomod
13 Om boros ka kawagu di Yesus, “Obungou kou no, iyokoyu i guru do Tourat om i tulun do Parisi! Iyokoyu nopo om minsorupai-rupai no toomod om mangantob kou do tulun do sumuang di Pomorintaan do surga. A' kou i' orohian do sumiliu'd tulun di songonuon do Kinorohingan, om iri tulun do suwai dit orohian daa nga' antaban i' dokoyu. 14 Obungou kou no, iyokoyu i guru do Tourat om i tulun do Parisi; iyokoyu nopo om minsorupai-rupai no toomod om magakal kou di tongoondu' di nopuadan om ahawan dokoyu iyolo' di walai diyolo'. Om anganaru nondo o sambayang dokoyu do pangalit-alit di karaato' dokoyu. Om iri no o kawagat- wagat do pomohukum dokoyu do koimbagu. 15 Obungou kou no, iyokoyu i guru do Tourat om i tulun do Parisi! Iyokoyu nopo om minsorupai-rupai no toomod! Osodu' tomod o ngoyon dokoyu do gisom do hilo'd soborong do rahat, om kopinghombo do hiri'd katanaan do mongoi no posuang dot ongoiso' o tulun dot id tugama' dokoyu. Om kosuang nopondo do tugama' dokoyu i tulun diri, om silihon nondo dokoyu iyau do tulun dit induwo po kopiluap i dokoyu'd karaato' o karaato', i hilo' nod naraka o kokoyoon. 16 Obungou kou no ngai', iyokoyu i boyoon di bolou! Poingkaa o potudukon dokoyu, ‘Ondung sumumpa' o tulun do rumait di Walai'd Sasambayangan dot Agayo, om a' i' akagasan no kopio i tulun diri di sumpa' dau; nga' ondung sumumpa' iyau do rumait di tamas do hiri'd suang di Walai'd Sasambayangan dot Agayo, om akagasan no iyau di sumpa' dau'ddi,’ ka. 17 Iyokoyu no o tulun di basug om bolou! Honggo toi it agayo, i tamas ko' i Walai'd Sasambayangan dot Agayo di popolidang di tamas? 18 Om popotuduk kou po do poingkaa, ‘Sumumpa' nopo o tulun do rumait di pananaraban do porsombahan om a' i' i tulun diri akagasan di sumpa' dau; nga' ondung sumumpa' iyau do rumait di porsombahan di hiri'd sakai di pananaraban do porsombahan, om akagasan no iyau di sumpa' dau'ddi,’ ka dokoyu. 19 Bolou kou no kopio! Honggo toi'ddi ot agayo? I porsombahan ko' i pananaraban do porsombahan di popolidang di porsombahan? 20 Iyo nopoddi, om ondung haro o tulun do sumumpa' do rumait di pananaraban do porsombahan, om komoyon nopoddi nga' sumumpa' no iyau do rumait diri, om rumait do koinsanai di porsombahan dit id sakai di pananaraban do porsombahan diri. 21 Om ondung sumumpa' o tulun do rumait di Walai'd Sasambayangan dot Agayo, om komoyon nopoddi nga' sumumpa' iyau do rumait di Walai'd Sasambayangan dot Agayo, om rumait do Kinorohingan, i poundorong do hiri. 22 Om ondung sumumpa' o tulun do rumait do surga, om komoyon nopoddi nga' sumumpa' no iyau do rumait do tirikohonon do Tuhan do momorinta', om rumait do ngaran do Kinorohingan di poirikau dot id tirikohonon do momorinta'ddi. 23 Obungou kou no, iyokoyu i guru do Tourat om i tulun do Parisi! Iyokoyu nopo om minsorupai-rupai no toomod. Manahak kou nogi' kopio do sompihopod di pamarampa, dot i baing, om i sogumau, om i jintan, dot id Tuhan. Nga' iri nogindo it angagayo kopio o komoyon do hiri'd Tourat, do miagal dit: otulid, osianan, otorodok, om a' nogi' dokoyu torodokon kopio do tumanud. Om iri nogi' daa kopio it apatut dokoyu'd wonsoyon, om a' nogi' toliban do momonsoi i suwai-suwai ko' iri. 24 Iyokoyu no kopio o boyoon di nongobolou! Siringon nogi' kopio dokoyu'd mongidu' o langau di katabung dot id tinumon dokoyu om tolonon nogindo dokoyu ot unta! 25 Obungou kou no, iyokoyu i guru do Tourat om i tulun do Parisi! Iyokoyu nopo om minsorupai-rupai no toomod! Pulangon tomod dokoyu o pomolihung do hiri'd soibau di piring om i mangkuk dokoyu, om inda' ka do sosomu' tomod i' i hiri'd suang, do kososomu' nopo om i nangaanu dokoyu do mantad id korongito' om katamahao' dokoyu. 26 Oi tulun do Parisi di nongobolou! Pulango' po kopio dokoyu o pomolihung di hiri'd suang di piring om i mangkuk dokoyu, om opulang indo o hiri'd soliwan. 27 Obungou kou no, iyokoyu i guru do Tourat om i tulun do Parisi! Iyokoyu nopo om minsorupai-rupai no toomod! Iyo kou po di lobong di sinaat dot opurak o hiri'd soliwan, om osonong tomod daa o kokitanan nga' hiri nopondod suang di lobong om noponu' pod tulang om hino ngai' nopo it ongoutong. 28 Om iyokoyu nga' iyo nopo kopio'ddi. Tu' kokitanan nopo daa'd tulun om osonong kou nopo; nga' id suang nopod ginawo dokoyu om poimponu' id kouudut om kararaat,” ka di Yesus.
Pinoboros Mantad di Yesus o Hukuman do Koontok di Guru do Tourat om i Tulun do Parisi
29 Om boros ka kawagu di Yesus, “Obungou kou no, iyokoyu i guru do Tourat om i tulun do Parisi! Iyokoyu nopo om minsorupai-rupai no toomod! Sonongon tomod dokoyu i lobong di nabi, om lumison dokoyu i piro-piro o tanda' do kopomuhandaman di tulun dit ongosonong o kowoyo-woyoon. 30 Om moro-boros kou dot, ‘Ondung poimpasi daa iyahai di hino po i taki-aki dahai di gulu po, om a' i' daa iyahai moyo' diyolo' do mamatai di piro-piro nabi,’ ka dokoyu. 31 Iyo nopoddi, om mangakun kou no do sinakagon kou di tulun di minamatai di nabi! 32 Om potilombuso' nopo dokoyu om pongoo' nopo dokoyu do momonsoi i dusa di tinimpuunan di taki-aki dokoyu. 33 Angaraat kou no kopio, om sinakagon kou do tulun dit angaraat! Poingkuro kou po daa do mogidu' do mantad id hukuman do hilo'd naraka? 34 Pokinongou kou no pogi' kopio! Porikatan ku nondo iyokoyu do piro-piro nabi, om tulun dit ongoilo om i gomponuduk; nga' songintanga' nopondo diyolo' om patayon i' dokoyu, om iri no suwai om posolibon dokoyu. Om haro o maan dokoyu inggorito' do hilo'd walai'd sasambayangan, om haro o gusaon dokoyu do gisom do kopikaa-kaa pondo iyolo' dot id piro-piro o bandar. 35 Om gowoi pondo om hukuman kou tu' minamatai kou i' di tulun dit aiso' o sala' do mantad poddi pinatai i Habil, i tulun dit aiso' o sala', om gisom di pinamatayan di Sakaria, i tanak di Borokia, i pinatai dokoyu dot id pialatan di Walai'd Sasambayangan dot Agayo om i pananaraban do porsombahan. 36 Kotumbayaai kou no: dot oinsanan nopondo iri do boboon do tulun di poimpasi do dinondo!” ka di Yesus.
Nosianan i Yesus di Tulun do Hilo'd Yorusalim
37 Om boros ka kawagu di Yesus, “Oi tulun do Yorusalim, oi tulun do Yorusalim! Pinatai ngai' dokoyu i nabi. Om dinumpau dokoyu'd watu i susuhuon do Kinorohingan do gisom i' do nangapatai iyolo'. A' oku no daa impiro-piro korohiai do mongibit do koinsanai dokoyu i poingiyon dot id bandar diti, do miagal di manuk do maganak di mongungkub di tangaanak dau, nga' mada' kou i'! 38 Om ka pogiddi dot a' kou'd Kinorohingan woyoon. 39 Ilaai no dokoyu: Do mantad pod baino' om a' kou no kokito doho' do gisom do momoros kou do poingkaa, ‘Abarakatan no i rumikot dot id suang do ngaran do Tuhan,’ ka,” ka di Yesus.
Pinoboros di Yesus o Karaagan di Walai'd Sasambayangan dot Agayo
1 Om di nopoddi tuminongkiad i Yesus di Walai'd Sasambayangan dot Agayo, om rikot no dot id dau i tumatanud dau, om tuduko' no diyolo' i Walai'd Sasambayangan dot Agayo. 2 Om boros ka di Yesus dot id diyolo', “Okito ngai' daa dokoyu ilo'. Nga' ilaai no dokoyu dot aiso' nondo o tongoiso' piya di watu do pinamaal diti dot oolu' do mogitimpak-timpak do hilo'd pinouludan mantad tu' oinsanan nopondo do habaon,” ka dau.
Kosusaan om Koinggoritan
3 Om ongoi noddi i Yesus do hiri'd Nulu-Nulu do Saitun. Om di nopo di poirikau iyau om rikot no i tumatanud dau do minongoi boro-boros dau dot iyolo-yolo'. Om boros kaddi diyolo' dot id dau, “Sunudai daa iyahai ondung soira' dot ongosiliu ngai' iti. Om nunu o pogintutunan do korikatan nu om kopupuson diti pomogunan?” ka diyolo'. 4 Om boros ka di Yesus do suminimbar, “Antaan-taan no kopio dokoyu om a' kou i' apalid. 5 Tu' ogumu' nondo o tulun do rumikot do mamakai'd ngaran ku om momoros dot, ‘Iyoho' no i Raja' do Gampamasi!’ ka. Om ogumu' tomod nondo o tulun dot aakalan diyolo'. 6 Om korongou kou nondo do tuni do mogisasaap om habar do mogisasangod; nga' kada' kou kooris. Tu' a' no milo'd a' osiliu ngai' o miagal diri, nga' okon po mando ko' kopupuson kopio'd pomogunan iri. 7 Mogisasaap nondo o bansa'd tulun, om mogisasangod o pomogunan. Om pointongkop nopondo o mononglous om gumuyu' o tana'. 8 Nga' iri ngai' nopoddi om koimpuunon nogi' do miagal noddi tondu' do monohoruol nogi' do tontok dit oruhai nod osusu. 9 Om ngoyon kou nogindo tangkapo' om inggoriton kou om patayon kou. Om oinsanan nopondo o hiti'd pomogunan dot araatan dokoyu tu' tumatanud kou i' doho'. 10 Om tontok nopondoddi om ogumu' nondo o tulun do tumanus o kotumbayaan, om ogumu' o tulun do popohudsu do tulun do suwai om mogitotogod. 11 Ogumu' nondo o nabi di goudut do rumikot, om magakal nondo iyolo' dot ogumu' o tulun. 12 Om tumongkop nopondo kopio o karaaton gisom dot ogumu' nondo o tulun dit a' no milo dot osianan. 13 Nga' iri nopondo tulun dit ogirot do gisom do kopupuson om posion indo. 14 Om popinsunudon nondo dot id pointongkop do pomogunan i Habar dot Osonong do pasal do Pomorintaan do Kinorohingan, om kongorongou ngai' indo o tulun diri. Om osiliu pondo o miagal diri om orikot nogi' o kopupuson diti pomogunan,” ka dau.
I Karaaton di Mamaraag
15 Om boros ka kawagu di Yesus, “Kokito kou nondo di ‘karaaton di mamaraag’, do miagal di pinoboros di Nabi Daniol, do poingkakat do hiri'd kinoiyonon dit olidang. (Kopoilaan dot id tulun di mambasa': Ilaan no kopio o komoyon diti.) 16 Tontok nopondoddi, om mositi' no do mogidu' do hilo'd konuluhanan i tulun do hilo'd Yudia. 17 Om iri nopo tulun do hiri'd sakai di taap do walai dau, om a' no minog do lumintuhun do mongoi panganu do nunu nopo do mantad hiri'd suang di walai dau. 18 Om iri tulun di hiri'd dumo nga' kada' no guli' do mongoi'd rasuk dau. 19 Nga' araat no kopio o tadau'ddi dot id tongoondu' di monontian, om i tongoondu' di maso do posusu do tanak dau! 20 Sumambayang kou no om a' i' koontok do dongrumasam om tadau'd Sabat o tadau di kopoggiduan dokoyu! 21 Om tontok nopondo di piro-piro o tadau di korolosi kopio'ddi, om haro nondo o kosusaan dit agayo kopio dit a' po insan kosiliu do mantad di wonsoyo' i' iti pomogunan om gisom do dinondo. Om a' no osiliu kawagu o miagal diri. 22 Om ondung a' daa'd Kinorohingan poinnibaon o maso'ddi om aiso' no daa o tiso' piya'd tulun dot apasi. Nga' poinnibaon id Kinorohingan o maso'ddi, dot i tulun di songonuon dau o kopoinnibaan. 23 Tontok nopondoddi, om ondung haro o tulun do momoros dot id dokoyu dot, ‘Ontong pogi', nga' nokorikot no moti'd hiti i Raja' do Gampamasi!’ ka, ko', ‘Nokorikot no iyau'd hilo’ ka, om kada' kou nogi' ponongkuyaai di tulun diri. 24 Tu' mimbulai motindo o piro-piro o gampamasi di goudut om piro-piro o nabi di goudut. Om mingwonsoi nondo iyolo' do piro-piro o koimayaan, om i kosuayan kopio do maan do pagakal do tulun, om milo-milo nopo om pagakal nogi' do tulun piya di nasanganu nod Kinorohingan. 25 Iyo nopoddi, om umbangan-banganan no kopio dokoyu! Nokosunud mantad ku no dokoyu iti do tontok dit a' po osiliu o miagal diri. 26 Ondung haro o tulun do momoros dot id dokoyu dot, ‘Ontong pogi', nga' hilo' no moti' iyau'd tana' do kowotuan!’ ka, om kada' kou nogi' ongoi'd hilo'. Om ondung momoros iyolo' dot, ‘Ontong pogi', nga' poillisok moti' iyau dot id bilik diti!’ ka, om kada' kou nogi' ponongkuyaai'ddi. 27 Tu' korikatan nopod Tanak do Tulun om iyo noddi kodumaat do kumalab do hilo'd koulayon om kababang do hilo'd kotonobon. 28 Om honggo nopo o haro o rata' om hiri no o timungan do tombolog di mangangakan do rata',” ka di Yesus.
Korikatan di Tanak do Tulun
29 Om boros ka kawagu di Yesus, “Om a' pondo alaid do mantad di haro o kosusaan do maso'ddi, om tumuong nondo ilo tadau, om a' mogulinau ilo tulan. Om rumatu' nondo ilo rombituon do mantad hilo'd tawan, om angagangau ngai' nopondo i monguasa' do hilo'd tawan. 30 Om osiliu pondo o miagal diri, om haro nondo o pogintutunan di Tanak do Tulun dot okito do hilo'd tawan. Om tontok nopondoddi om mihad ngai' nopondo o bansa'd tulun do hiti'd pomogunan. Om okito nondo diyolo' i Tanak do Tulun do rumikot do poinsakai'd haun do mikuwo'd kuasa' om kagayaan dau dit agayo kopio. 31 Om pounion nondo i torumpit dit agayo, om suhuon nondo di Tanak do Tulun i moloikat dau do mongoi ponimung di tulun di songonuon dau do mantad id apat o linsuk diti pomogunan, om mantad id tisan do tawan om korikot dot id tisan ponong id sampaping,” ka dau.
Ponudukan dot Aanu do Mantad id Guas dot Ara
32 Om boros ka kawagu di Yesus, “Pinsingilaan no dokoyu o ponudukan dot aanu do mantad id guas dot ara. Tu' tumomou nopo om mongomulok i raan do kayu'ddi om tumimpuun do momutolid, om oilaan no dokoyu dot oruhai nod orikot i maso dot alasu'. 33 Om iyo nogiddi, tu' okito nopo dokoyu dot ongosiliu o miagal diri, om oilaan no dokoyu dot oruhai no kopio dot orikot o maso'ddi. 34 Ilaai no dokoyu! Dot a' po angapatai ngai' iti tulun do songimpasi do dinondo, om ongosiliu no o miagal diri. 35 Tumanus i' o tawan om pomogunan, nga' boros ku nopo om hino kasai' i' do gisom do poingompus,” ka dau.
Aiso' i' o Tulun do Koilo do Tadau ko' Jam Diri
36 Om boros ka kawagu di Yesus, “Aiso' i' o koilo ondung soira' o tadau om jam diri, om iri piya i moloikat di hilo'd surga nga' a' i' koilo, om iri Tanak do Kinorohingan nga' a' i' koilo suwai ko' iri no i Tapa' o koilo. 37 Rumikot nopondo i Tanak do Tulun, om kowoyo-woyoo' nopo do korikatan dau om iyo do kowoyo-woyoo' di poimpasi po i Nuu di gulu po. 38 Tontok di piro-piro po o tadau do mantad do korikatan di sakob dot agayo, om mangakan-ngakan nopo om monginum-nginum om mogikakawin i tulun. Om iyo nopo kasai'ddi do gisom do norikot i tadau di suminuang i Nuu di kapal do rahat. 39 Om korikatai poddi iyolo' di sakob om kopurimanai nogi' daa'ddi diyolo' i nosiliu'ddi. Om iyo noddi o kowoyo-woyoo' do rumikot o Tanak do Tulun do koimbagu. 40 Tontok nopondoddi, om haro nopondo o duwo o tulun do morobuat do hiri'd tumo, om ngoyon nondo o songulun om tongkiadan nopo i tiso'. 41 Om haro nopo o duwo o tondu' do tumutu do gandum, om ngoyon nondo o songulun om tongkiadan nopo i tiso'. 42 Iyo nopoddi, om antaan-taan no dokoyu, tu' a' i' dokoyu oilaan ondung soira' i Tuhan dokoyu do rumikot. 43 Ilaai no dokoyu iti! Ondung oilaan daa di sanganu di walai o jam do korikatan di tulun di mongoi panakau do dongotuong, om a' i' daa iyau modop, om a' indo i tulun do manakau kasalakoi di walai dau. 44 Iyo nopoddi, om iyokoyu nga' apatut nogi' do posodia' kasai' nopo. Tu' rumikot indo i Tanak do Tulun do tontok do maso dit a' i' daa dokoyu soro-sorohon,” ka dau.
Susuhuon dit Otorodok om Susuhuon dit A' Otorodok
45 Om boros ka kawagu di Yesus, “Iyo nopoddi, om isai ma o susuhuon dit otorodok om it oilo? Iri no i tulun di siniliu di tuan dau do boyoon di susuhuon do suwai, om oonuan i' dau iyolo' do takanon do tontok di maso do natantu' mantad. 46 Olumaag no kopio i susuhuon di maso do momonsoi di karaja' dau dot orikatan di tuan dau. 47 Ponongkuyaai kou no, do silihon nondo di tuan i susuhuon dau'ddi do mongilo-ilo ngai' di dapu' dau. 48 Nga' ondung araat i susuhuon diri, om momusorou nondo iyau dot, 49 ‘Alaid po bo do gumuli' i tuan ku'ddi!’ ka, om pimbobogon nondo dau i susuhuon do suwai, om mongoi sugku' di magagauk do mangakan-ngakan om moginum. 50 Om korikot nondo i tuan dau do tontok di tadau om jam dit a' i' daa dau soro-sorohon. 51 Om oi-oiyon nopondo di tuan o pomohukum di susuhuon dau, om pataamon dau i susuhuon dau'ddi dot id kinoiyonon di tulun di minsorupai-rupai no toomod. Om mingihad pondo iyolo' om oinggorit do hiri,” ka dau.
Hopod o Sumandak do Pinoinukadan
1 Om boros ka kawagu di Yesus, “Tontok nopoddi om kowoyo-woyoo' nopo di Pomorintaan do surga om iyo do poinukadan diti: Haro o hopod o sumandak di mongoi ruba' do kusai di kumawin do sorompori-pori nopo do minigit do lampung, om pamanau noddi do minongoi ruba' di kusai do kumawin diri. 2 Iri nopo limo diyolo' nga' basug, om iri no limo om ongoilo. 3 Iri nopo limo sumandak di basug diri om igit nopod lampung nga' a' iddi minigit do tumau do maan do ponuang kawagu. 4 Iri no limo sumandak dit ongoilo om sopiigito' nopod lampung om tumau do maan do ponuang kawagu. 5 Nga' alaid kopio iddi i kusai di kumawin do nokorikot, om siniodop diri i kongosumandakan, om kongoodop noddi iyolo'. 6 Pitangatuong poddi, om korongou nogi' o boros dot opuhod do poingkaa, ‘Nokorikot no i kusai di kumawin! Ngoyo' toko' iyau rubao'!’ ka. 7 Om koposik ngai' nopo i hopod o sumandak diri, om tutudai no diyolo' i lampung diyolo'. 8 Om boros ka di kosumandakan do basug dot id kosumandakan dit ongoilo, ‘Onuwai daa iyahai dino tumau dokoyu dot ongokooro', tu' mumang pisok iti lampung dahai,’ ka diyolo'. 9 Nga' boros ka di kosumandakan dit ongoilo, ‘A! A' toko' i' iti kabagal. Ongoi kou nogi' boli do hilo'd kadai,’ ka. 10 Om ongoi noddi boli do tumau i kongosumandakan di basug diri. Om a' po iyolo' nokoguli' nga' korikot no i kusai di kuminawin. Om iri nopoddi i limo o sumandak di nongkosodia' om tanud nopo di kusai do kuminawin do suminuang do hiri'd kinoiyonon di moginakan. Om potobono' noddi i totobon! 11 Om korikot nogi' daa'ddi i limo o sumandak di basug diri. Om pinglohou no iyolo', ‘Tuan, Tuan, iwangai iyahai,’ ka. 12 Nga' boros ka di kusai di kuminawin do suminimbar, ‘A' oku i' kotutun dokoyu!’ ka,” ka dau. 13 Om boros kaddi di Yesus do minongolimpupus di poinukadan diri, “Iyo nopoddi, om antaan-taan no dokoyu tu' a' i' moti' dokoyu oilaan o tadau ko' jam poddi,” ka dau.
Tolu o Susuhuon do Pinoinukadan
14 Om boros ka kawagu di Yesus, “Tontok nopoddi om kowoyo-woyoo' nopo di Pomorintaan do surga om iyo do poinukadan diti. Haro o songulun o kusai di kumaa dot id iso' o kinoiyonon di hilo'd sodu'. Om lohowo' no dau i susuhuon dau, om suhuo' no dau iyolo' do mongilo-ilo di dapu' dau. 15 Om onuwai ngai' nopo dau i susuhuon dau'ddi do tusin do tumanud di koiloo' diyolo'. Iri nopo tiso' om nonuan dau do limo noribu o tusin do tamas. Om iri no tiso' om nonuan dau do duwo noribu o tusin do tamas. Om iri no tiso' om nonuan dau do soribu o tusin do tamas. Om pamanau noddi iyau. 16 Iri nopo i susuhuon di nonuan do limo noribu o tusin do tamas om olomus nopo do minongoi pongindapu', om kaanu poddi iyau do limo kawagu noribu o tusin do tamas do kinountungan. 17 Om iyo iddi o winonsoi di susuhuon di nakaanu do duwo noribu o tusin do tamas, tu' duwo i' kawagu noribu o tuntung do naanu dau. 18 Nga' iri nopo susuhuon di nonuan do soribu o tusin do tamas om ongoi nogi' pongukad do luang do hiri'd tana', om polisoko' no dau'd hiri i tusin di tuan dau. 19 Alaid poddi do mantad diri, om koguli' nogi' i tuan di susuhuon diri, om timpuun no iyau do minguhot ondung poingkuro no i pinatahak dau diyolo'. 20 Om rikot no i susuhuon di nonuan do limo noribu o tusin do tamas, om patahako' noddi dau o hopod noribu. Om boros ka dau, ‘Tuan, limo noribu o tusin do tamas do pinatahak nu doho', om antangai pogi' nga' nakaanu oku i' moti' do limo kawagu noribu do kinountungan,’ ka dau. 21 Om boros ka di tuan, ‘Osonong no kopio. Iya' no o susuhuon dit osonong om it otorodok. Onuan ku nondo iya' dot ogumu', tu' minilo ko i' do mongilo-ilo dit okuuri'. Suang no, om otood ko i' do poinsugku' doho',’ ka dau. 22 Om rikot noddi i susuhuon di nonuan do duwo noribu o tusin do tamas, om boro-boros nod, ‘Tuan, nonuan oku diya' do duwo noribu o tusin do tamas. Om antangai pogi' nga' nakaanu oku po moti' do duwo kawagu noribu do kinountungan,’ ka dau. 23 Om boros ka di tuan, ‘Osonong no kopio, iya' no o susuhuon dit osonong om otorodok. Onuan ku pondo iya' dot ogumu' tu' minilo ko i' do mongilo-ilo dit okuuri'. Suang no, om otood ko i' do poinsugku' doho',’ ka dau. 24 Om rikot noddi i susuhuon di nonuan do soribu o tusin do tamas, om boro-boros nod, ‘Tuan, oilaan ku i' dot araat ko koulun. Tu' mongoi ko nopo pongupu' do tua' do hiri'd okon ko' iya' o minananom, om mongoi ko panganu'd tua' do hiri'd okon ko' iya' o pinapasasad do linsou. 25 Om ooris oku'ddi, om ngoyo' ku no polisoko' i tusin nu do hilo'd saalom do tana', oi Tuan. Om diya no i tusin nu'ddi, oi Tuan,’ ka dau. 26 Om boros kaddi di tuan, ‘Iya' no o susuhuon dit araat om gungkaul! A' nu toi noilaan no do mongoi oku pongupu'd tua' do hiri'd okon ko' iyoho' o minananom om mongoi oku panganu'd tua' do hiri'd okon ko' iyoho' o pinapasasad do linsou? 27 Iyo nopo daa'ddi, om ngoyo' nu po daa poopio' i tusin ku'ddi do hilo'd bing, om koguli' oku nopondo om aanu ku i' kawagu i tusin ku om i bunga di tusin ku'ddi,’ ka dau. 28 Om boros kaddi di tuan dot id kuli' dau di suwai, ‘Iyo nopoddi, om ngoyo' nogi' i tusin diri do mantad id dilo', om patahakon i' di tulun di nakaanu do hopod noribu o tusin do tamas. 29 Tu' iri nopo tulun di haro mantad no o naanu, om onuan po dot ogumu' ko' iri, om gisom dot a' nondo dau aayi-ayi'. Nga' iri nopondo tulun dit aiso' o naanu, om iri piya'ndo it okuuri' dot id dau nga' imumuyon nopo do manganu. 30 Om iri nopo i susuhuon dit aiso' o guna'ddi, om pataamon nopo do hilo'd soliwan, i hilo'd kinoiyonon dit otuong. Om hilo' nondo iyau do mingihad om oinggorit!’ ka di tuan,” ka di Yesus.
Butusan nondo di Tanak do Tulun o Koinsanai'd Tulun
31 Om boros ka kawagu di Yesus, “Rumikot nopondo i Tanak do Tulun do miagal do raja' do miwoyo' do koinsanai'ddi moloikat dau, om mirikau nondo iyau do hiri'd tirikohonon dau do momorinta' di kikagayaan. 32 Om timungon ngai' nopondo o tulun do mogisuayan o bansa' do hiri'd toguang dau. Om pisompipion nondo dau iyolo' do duwo o kotimungon, do miagal di gompomogompi'd dumba' do popotongkiad di dumba' do mantad id kambing. 33 Om iri nopondo tulun di momonsoi'd korohian do Kinorohingan om potimungon do hiri'd dawananan dau, om iri no suwai om potimungon do hiri'd dogibangan dau. 34 Om moro-boros nondo i raja'ddi dot id tulun di hiri'd dawananan dau do poingkaa, ‘Kainou ngai', iyokoyu i nabarakatan di Tapa' ku. Suang kou no dot id pomorintaan di pinosodia' mantad do patahakon dot id dokoyu di wonsoyo' i' iti pomogunan. 35 Tu' tontok di linouson oku, om pinaakan oku i' dokoyu, om tontok di tinuuhan oku, nga' pinoinum oku i' dokoyu. Om di sompogunan oku nga' pinasalakoi oku i' dokoyu do hiri'd walai dokoyu. 36 Om di nopo dit aiso' o pakayan ku, om nonuan oku i' dokoyu do pakayan. Om tontok di sumakit oku nga' nubatan oku i' dokoyu, om tontok di poinggiil oku nga' tinulung oku i' dokoyu,’ ka dau. 37 Om moro-boros nondo i tulun diri do poingkaa, ‘Tuhan, soira' iyahai kokito diya' do louson om nongoi'ddi dahai iya' paakano', om soira' dahai iya' kokito do tuuhan om nongoi'ddi dahai iya' poinumo'? 38 Soira' dahai iya' kokito do miagal do tulun do sompogunan, om posolokoyo' noddi dahai iya' do hiri'd walai dahai? Soira' ko do nokoumbal dot aiso' o pakayan, om nonuan diri dahai iya' do pakayan? 39 Soira' iyahai kokito diya' do sumakit ko' poinggiil, om nongoi'ddi dahai iya' tulungo'?’ ka diyolo'. 40 Om posimbaron nondo di raja' o poingkaa, ‘Ilaai no dokoyu: Do tontok di minomonsoi kou do miagal diri dot id ongoiso' piya di tobpinai ku dit aiso' i' o ngaran-ngaran, om komoyon nopoddi nga' winonsoi no dokoyu o miagal diri dot id doho'!’ ka dau. 41 Om moro-boros nondo i raja'ddi dot id tulun dit id dogibangan dau do poingkaa, ‘Poggidu' kou no do mantad hiti, koinsanai dokoyu i tulun dot angaraat! Suang kou no do hilo'd tapui dit a' milo'd pisokon, i pinosodia' do pataaman di Rogon om i moloikat dau! 42 Tu' tontok di linouson oku, om a' oku i' dokoyu nongoi paakano'; om tontok di tinuuhan oku nga' a' oku i' dokoyu nongoi poinumo'. 43 Om tontok di sompogunan oku om a' oku i' dokoyu pinasalakoi do hiri'd walai dokoyu. Om dit aiso' o pakayan ku nga' a' oku i' dokoyu nonuan do pakayan. Om tontok di sumakit oku om di poinggiil oku nga' a' oku i' dokoyu nongoi ubatai,’ ka dau. 44 Om moro-boros no daa'ndo iyolo' dot id dau do poingkaa, ‘Tuhan, soira' iyahai kokito diya' do louson, ko' tuuhan, ko' sompogunan, ko' aiso' o pakayan, ko' sumakit, ko' poinggiil, om a' iddi dahai iya' nongoi tulungo', oi Tuhan?’ ka diyolo'. 45 Om sumimbar nondo i raja'ddi do poingkaa, ‘Ilaai no dokoyu: do soira' nopo dot a' kou monulung dot ongoiso' di tulun dit aiso' i' o ngaran-ngaran diri, om komoyon nopoddi nga' a' kou no minonulung doho',’ ka dau. 46 Om iri nopondo tulun diri om hukuman nondo do hukuman dit aiso' o kopupuson, nga' iri nopondo tulun di momonsoi do korohian do Kinorohingan om kaanu no do koposion dit otopot kopio om it aiso' o kopupuson,” ka dau.
Pakat do Manangkap di Yesus
1 Om kongotuduk ngai' poddi di Yesus iri, om boro-boros no iyau di tumatanud dau. Boros ka dau, 2 “Oilaan i' dokoyu do duwo po tadau om Tadau nod Agayo do Paska, om patahakon nondo i Tanak do Tulun do maan posolibo'!” ka dau. 3 Tontok nopoddi nga' pointimung no i piro-piro boyoon dot imam om i boyoon do tulun do Yohudi do hiri'd walai di Kayapas, i Boyoon dot Agayo dot Imam, i walai dit iyo pod walai'd raja'. 4 Om minogipapakat iyolo' do lumisok-lisok do mongoi panangkap di Yesus, om patayon nogindo diyolo' iyau. 5 Om boros ka diyolo', “Nga' kada' toko' pondo wonsoyo' o miagal diri di maso'd haro o karamayan, tu' tumogod ngai' motindo ilo rayat,” ka diyolo'.
Tinuntugan i Yesus do Tumau do Hilo'd Baitani
6 Tontok di hilo'd Baitani i Yesus, do hiri'd walai di Simun, i kitoruol do kusta di gulu po; 7 om rikot no o songulun o tondu' dot id di Yesus. Om minigit i tondu'ddi dot iso' o kakanan dit okooro' di marmar do winonsoi, do sinuangan do tumau dit owongi' om agayo o gatang. Tontok di poirikau i Yesus do makan om potuntugo' no di tondu' i tumau dit owongi'ddi do hiri'd tulu di Yesus. 8 Om kongotogod noddi i tumatanud di Yesus do nokokito'ddi. Boros ka diyolo', “Nunu noddi o kinokoyo-koyoon dilo' do rinubat tomod. 9 Tu' milo i' daa do padagangon i tumau dot owongi'ddi, om amahal i' o gatang. Om patahakon nogindo i tusin diri dot id tulun do mosikin!” ka diyolo'. 10 Nga' oilaan i' di Yesus i pomusarahan diyolo', om boros kaddi dau, “Nokuro tu' papasala' kou diti tondu'? Tu' iri nopo winonsoi dau dot id doho' om osonong i' om apatut i' do royohon. 11 Tulun nopod mosikin om hino kasai' i' dot id pogialatan dokoyu, nga' iyoho' nopo om a' i' poinsugku' kasai' dokoyu do gisom dot alaid. 12 Tu' di nopo di tinuntugan dau di tumau dit owongi' o tinan ku, om pinoposodia' iyau doho' do maan lobongo'. 13 Ponongkuyaai kou no! Do honggo nopondo o posusuyan di Habar dot Osonong do mantad id Kinorohingan, do pointongkop diti pomogunan, om iti piya'ndo winonsoi do tondu'dti nga' popinsusuyon nogindo do kopomuhandaman dau,” ka di Yesus.
Nakaakun i Yudas do Papadagang di Yesus
14 Om haro'ddi o songulun dot id pogialatan di hopod om duwo o tumatanud di Yesus, i roitan dot i Yudas Iskariot, do minongoi solowot di piro-piro boyoon dot imam. 15 Om boros ka dau dot id diyolo', “Nunu daa o patahakon dokoyu doho' do patahakon ku daa dokoyu i Yesus?” ka dau. Om intobo' noddi diyolo' o tolu nohopod o tusin do pirok, om patahako' no diyolo' dot id dau i tusin diri. 16 Om mantad poddi om mogihum nopoddi i Yudas do maso dit osonong do papatahak di Yesus dot id diyolo'.
Minangakan i Yesus do Taakanon do Dong Paska do potorungak di Tumatanud Dau
17 Tontok di tadau'd koiso' di Tadau'd Agayo do Roti dit A' Kipangambang, om rikot no i tumatanud di Yesus dot id dau. Om ponguhot no iyolo', “Honggo o korohian nu do posodiaan dahai do takanon di dong paska do maan nu, oi Guru?” ka diyolo'. 18 Om boros ka di Yesus do suminimbar, “Ongoi kou solowot dot iso' o tulun do hilo'd bandar om sunudan no iyau do poingkaa, ‘Boros ka di Guru: Norikot noddi o maso ku; om orohian oku do mamaramai do paska do hilo'd walai nu, do miwoyo' di tumatanud ku, ka dau,’ kanto dokoyu,” ka dau. 19 Om wonsoyo' no di tumatanud di Yesus o miagal di pinonuhuan di Yesus diyolo'. Om ongoi no iyolo' posodia' di taakanon do dong Paska. 20 Otuong noddi, om irikau no i Yesus om i hopod om duwo o tumatanud dau do minakan. 21 Maso po diyolo'd makan om boro-boros no i Yesus do poingkaa, “Pokinongou kou no: haro nondo o songulun dot id pogialatan dokoyu do papadagang doho',” ka dau. 22 Om tuminongob tomod diri i tumatanud di Yesus do nokorongou'ddi. Om pogisowoli-woli nopoddi iyolo' do minonguhot di Yesus do poingkaa, “Okon i' bo kopio ko' iyoho' o komoyon nu'ddi, koi Guru?” ka. 23 Om boros ka di Yesus do suminimbar, “Isai nopo i kaandad doho' do papatabung di roti dau do hilo'd mangkuk, om iri no tulun diri o papadagang doho'. 24 Atantu' no dot apatai indo i Tanak do Tulun, do miagal di nokotulis dot id Buuk do Kinorohingan. Nga' obungou no i tulun di papadagang di Tanak do Tulun! Osonong nogi' daa dot a' nopo kopio napaganak i tulun diri!” ka dau. 25 Om boros kaddi di Yudas i papadagang di Yesus, “Okon i' bo kopio ko' iyoho' o komoyon nu, koii Guru?” ka. Om boros ka di Yesus do suminimbar, “Ino nondo ino boros nu!” ka dau.
Porjomuan di don Tuhan
26 Om tontok di makan iyolo', om ongoi no i Yesus anu di roti, om sambayang no iyau do minongunsikou. Om pogikobing-kobingo' noddi dau i roti om potikido' no dau di tumatanud dau, om boro-boros no iyau'd poingkaa, “Onuo' no dokoyu iti, om kanon no; tu' iti no o tinan ku,” ka dau. 27 Om ongoi no iyau anu do sonsangkir o waig dot anggur, om pongunsikou no iyau'd Kinorohingan. Om patahako' noddi dau i sangkir diri dot id tumatanud dau, om boro-boros no iyau'd poingkaa, “Inum ngai' kou nodti. 28 Tu' iti no o raha' ku di popogirot kopio di batos do Kinorohingan, i raha' di potuntugon do bagi'd tulun dot ogumu' om oompunan i' o dusa diyolo'. 29 Ponongkuyaai kou no: Dot a' oku nondo koinum kawagu do waig dot anggur diti do gisom dot orikot i maso ku do monginum kawagu di waig dot anggur di wagu do potorungak dokoyu do hilo'd Pomorintaan di Tapa' ku,” ka dau. 30 Om podsinding noddi iyolo' dot iso' o sinding do pamarayou. Om ongoi nogiddi iyolo' do hilo'd Nulu-Nulu do Saitun.
Pinoboros Mantad do Mogolim Nondo i Pitrus di Yesus
31 Om boros kaddi di Yesus dot id tumatanud dau, “Totuong idti do mogidu' ngai' kou nopondo do tumongkiad doho'; tu' nokotulis mantad no dot id Buuk do Kinorohingan o poingkaa: Boros kad Kinorohingan, ‘Patayon ku nondo i gompomogompi'ddi, om opogitongkiad-kiad nopondo i baanan do dumba' dau,’ ka. 32 Nga' apasi oku nopondo kawagu, om mogulu oku nondo dokoyu do mongoi do hilo'd Galilia,” ka dau. 33 Om boros ka di Pitrus dot id di Yesus, “Tumongkiad piya ngai' diya' ilo wokon, oi Guru, nga' a' oku no kopio iyoho' tumongkiad diya'!” ka dau. 34 Nga' boros ka di Yesus dot id dau, “Antaan-taan. Tu' totuong idti, dit a' po koponingkukuhuk o manuk, om intolu ko no kopogolim doho',” ka dau. 35 Om boros ka di Pitrus do suminimbar, “Mulong piya do potonggoyon oku diya'd patayon nga' a' oku i' kopio momoros dot a' kotutun diya', oi Guru,” ka dau. Om iyo ngai' nopoddi o pinoboros di tumatanud di Yesus di suwai.
Suminambayang i Yesus do hilo'd Gitsamani
36 Om pamanau noddi i Yesus om i tumatanud dau om ongoi no iyolo' dot id iso' o kinoiyonon di roitan do Gitsamani. Om hilo' no i Yesus do minoro-boros diyolo'. Boros ka dau, “Irikau kou pod hiti, do daamot ku'd mongoi sambayang,” ka. 37 Om angatai noddi dau i Pitrus om i duwo tanak di Sabidi do minoyo' dau. Om timpuun noddi iyau do tumongob om atangkabo. 38 Om boros kaddi dau dot id tumatanud dau, “Tumongob oku no kopio; iyo poddi matai no o topurimanan ku. Undorong kou nopod hiti, om tumonggoi kou no doho' do mumbangan-bangan,” ka dau. 39 Om pamanau-manau noddi i Yesus do minongoi'd hiri'd sodu-odu', om tungub nopo iyau do hiri'd tana' om sambayang nod poingkaa, “Oi Apa', ondung milo daa, om poinsoduwo' no do mantad id doho' iti koinggoritan dit otimbabaan ku, om it a' ku no milo dot a' opurimanan. Nga' a' indo tumanud do doho'd korohian, nga' tumanud nopo do korohian do Tapa',” ka dau. 40 Om guli' noddi i Yesus do hiri'd tolu o tumatanud dau om kabantalai no dau iyolo' do kongoodop. Om boros ka dau dot id di Pitrus, “Mogot po om kotoron kou po dot a' modop do tumonggoi doho' dot ongosajaam? 41 Mumbangan-bangan kou no, om sumambayang kou no, om a' kou i' oontok do pogumbalan. Atantu' no dot orohian i' daa o ginawo dokoyu do momonsoi dit otopot nga' a' kou no milo, tu' oluhoi i' o kowoyo-woyoo' do tulun,” ka dau. 42 Om ongoi po kawagu i Yesus sambayang. Boros ka dau, “Oi Apa', ondung a' no kopio milo dot a' ku opurimanan iti koinggoritan diti, om a' milo do poinsoduwon doho', om pologoson nopo dot owonsoi i korohian do Tapa',” ka dau. 43 Om guli' no kawagu i Yesus, om koodop i' i tumatanud dau do nabantalan dau tu' siodop no kopio iyolo'. 44 Om tongkiadai po kawagu di Yesus iyolo' om kointolu noddi dau do mongoi sambayang, om iyo kasai' iddi gulu o poboroson dau do tontok do sumambayang. 45 Om guli' no kawagu iyau do hiri'd tumatanud dau om boro-boros nod, “Koodop kou po kasai' do potingkod do huyan dokoyu? Ontong kou pogi' nga' norikot no moti' i maso do Tanak do Tulun do patahakon dot id kuasa' do tulun di kidusa. 46 Tungag kou, om mamanau toko' i'! Ontong kou pogi'! Nga' nokorikot no moti' i tulun di papadagang doho'!” ka dau.
Tinangkap i Yesus
47 Om maso po di Yesus do moro-boros nga' korikot no i Yudas, i tiso' di hopod om duwo o tumatanud di Yesus. Om ogumu' po o tulun do suwai do moyo-woyo' dau dot ongkiinigit do gayang om bobobog. Iyolo' nopoddi nga' sinuhu' di piro-piro boyoon dot imam om i boyoon do tulun do Yohudi. 48 Om nosunudan no iyolo' di tulun di papadagang diri do pogintutunan diyolo'. Boros ka dau, “Isai nopo i tunguban ku om iri no i tulun diri. Om tangkapon nopo dokoyu iyau!” ka dau. 49 Om korikot poddi iyolo' dot id kinoiyonon diri, om pitilombus nopo i Yudas do minongoi solowot di Yesus, om boro-boros nod, “Maha' daa om osonong-sonong ko, oi Guru!” ka. Om tungubai no dau i Yesus. 50 Om boros ka di Yesus do suminimbar, “Nunu o kinaangayan nu'd hiti, oi tobpinai?” ka dau. Om insomok noddi i tulun dot ogumu' do minongoi panangkap di Yesus. 51 Om haro'ddi o tiso' di tumatanud di Yesus di hino'd hiri, do minongodong di gayang dau om tibaso' no dau i turipon di Boyoon dot Agayo dot Imam, gisom do kaansap nopo o tolingo di tulun. 52 Om boros kaddi di Yesus dot id tumatanud dau'ddi, “Paangkapo' nogi' kawagu ino gayang nu, tu' oinsanan nopo motindo i tulun do mongodong do gayang, do gayang o kapatai. 53 Ondos nu daa om a' oku milo'd mokitulung di Tapa' ku, om olomus nopondo iyau do porikot do moloikat dot ogumu' po ko' hopod om duwo o sinompuruan do soudor di boribu-ribu. 54 Nga' ondung osiliu ot iyo'ddi, om poingkuro daa'ndo dot abayaan o miagal di nokoboros mantad dot id suang do Buuk do Kinorohingan dot a' no milo'd a' osiliu o miagal diti dinondo?” ka dau. 55 Om boros kaddi di Yesus dot id tulun dit ogumu', “Tulun oku toi'dti dot araat, gisom do rumikot kou dot ongkiinigit do gayang om bobobog do mongoi panangkap doho'? Monikid tadau oku i' do monuduk do hilo'd Walai'd Sasambayangan dot Agayo, om a' oku i' dokoyu ngoyon tangkapo'! 56 Nga' a' no milo'd a' iyo'ddi om abayaan indo o miagal di nokotulis di piro-piro o nabi dot id suang do Buuk do Kinorohingan,” ka dau. Om poggidu' ngai' nopoddi i tumatanud di Yesus do tuminongkiad dau.
Pinotimbaba' i Yesus di Gompomutus do Don Tugama'
57 Om pootodo' noddi di tulun di minanangkap di Yesus, i Yesus do hiri'd walai di Kayapas, i Boyoon dot Agayo dot Imam. Om nokotimung nod hiri i guru do Tourat om i piro-piro boyoon do tulun do Yohudi. 58 Om tanud i' i Pitrus di Yesus do gisom do nokorikot do hiri'd natad di walai di Boyoon dot Agayo dot Imam. Om ongoi noddi i Pitrus do hiri'd natad, om irikau no iyau'd hiri do poinsugku' di madtatamong, tu' orohian iyau'd koilo ondung poingkuro kopio'ndo o kootuson diri. 59 Om tumotos tomod diri i boyoon dot imam om koinsanai di Gompomutus do Don Tugama' do mogihum do tulun di goudut do maan do sasi', om milo indo diyolo' do hukuman do kapatayon i Yesus. 60 Ogumu' piya daa i tulun di suminiliu'd sasi' di goudut nga' aiso' i' o tiso' do noihum diyolo' di milo kopio do silihon do poimpahan do momohukum di Yesus do kapatayon. Nga' alaid noddi om ongoi no timbaba' diyolo' o duwo tulun. 61 Om boros ka diyolo', “Minomoros iti tulun diti do poingkaa, ‘Milo oku i' do mamaraag diti Walai'd Sasambayangan dot Agayo, om tolu nopo tadau nga' owonsoi ku no kawagu,’ ka dau,” ka diyolo'. 62 Om ingkakat noddi i Boyoon dot Agayo dot Imam, om boro-boros no iyau di Yesus, “A' nu i' simbaron i pinonondos diya'?” ka. 63 Nga' a' i' minungkomi i Yesus. Om boro-boros po kawagu i Boyoon dot Agayo dot Imam dot id di Yesus. Boros ka dau, “Suhuon ku iya' do sumumpa' dot id suang do ngaran do Kinorohingan di poimpasi, do popoboros kopio dot id dahai ondung iya' i Raja' do Gampamasi, i Tanak do Kinorohingan,” ka dau. 64 Om boros ka di Yesus do suminimbar, “Ino nondo ino boros nu. Nga' ponongkuyaai kou no do mantad pondod maso'dti, om okito no dokoyu i Tanak do Tulun do poirikau do hiri'd dawananan do Kinorohingan dit Agayo Kuasa', om rumikot dot id sakai do haun do hilo'd tawan!” ka dau. 65 Om hurako' nopo di Boyoon dot Agayo dot Imam i pakayan dau, om boro-boros nod, “Mongindaraat iyau'd Kinorohingan! A' no minog do haro o sasi'. Nokorongou ngai' kou no di boros dau do mongindaraat do Kinorohingan. 66 Om poingkuro o dokoyu'd tosorou do dinondo'dti?” ka dau. Om boros ka diyolo' do suminimbar, “Kisala' no iyau, om apatut nod patayon,” ka. 67 Om dulaai noddi diyolo' o rabas di Yesus, om pimbabagai no diyolo' iyau. Om haro o tulun do minonompiling dau, 68 om boro-boros nod poingkaa, “Tonduwai daa om sunudan i' iyahai, oi Raja' do Gampamasi, ondung isai i minonompiling diya'!” ka no diyolo'.
Minogolim i Pitrus di Yesus
69 I Pitrus nopo om poirikau do hiri'd natad dit id soliwan. Om ongoi no solowot di Pitrus o tiso' di susuhuon do tongoondu'. Om boros ka dau dot id di Pitrus, “Okon toi ko' iya' nga' kinoruhangan ngai' nogi' di Yesus, i tulun do Galilia'ddi?” ka. 70 Nga' pogolim no i Pitrus dot id toguang ngai' diyolo'. Boros ka dau, “A' oku i' koilo dino komoyon nu,” ka dau. 71 Om ongoi noddi iyau do hiri'd wawayaan di wayaan do sumoliwan do mantad hiri'd natad di walai. Om haro'ddi o tiso' di susuhuon do tongoondu' do nokokito di Pitrus, om boros ka di tondu'ddi dot id tulun di hino'd hiri, “Iti tulun diti nga' moyo-woyo' i' di Yesus di tiinu', i tulun do mantad hilo'd Nasarit diri,” ka. 72 Om pogolim po kawagu i Pitrus, om sumpa' no iyau do poingkaa, “Sumumpa' oku no kopio dot a' oku kotutun do tulun diri!” ka dau. 73 Om a' po alaid do mantad diri om ongoi no i tulun di songingkakat do hiri boro-boros di Pitrus. Boros ka diyolo', “Atantu' no dot iya' nga' kinoruhangan ngai' i' di tulun di tuminanud di Yesus. Oilaan tomod i' do mantad dino kologu-loguo' do boros nu,” ka. 74 Om boros kaddi di Pitrus, “Sumumpa' oku no dot otopot iti poboroson ku! Hukuman oku nopod Kinorohingan do mongudut oku no! A' oku i' kopio kotutun di tulun diri!” ka dau. Om diiri i' om diiri do minoningkukuhuk i manuk. 75 Om kahandamai noddi di Pitrus do nokopomisunud mantad no i Yesus do poingkaa, “A' po koponingkukuhuk o manuk om intolu ko no pogolim doho',” ka. Om soliwan noddi i Pitrus, om pingihad no tomod iyau dot atatangaban.
Pinotimbaba' i Yesus di Pilatus
1 Osuab poddi, om oinsanan nopo i boyoon dot imam om i piro-piro boyoon do tulun do Yohudi do minogiupakat do mamatai di Yesus. 2 Om kagasai no diyolo' iyau, om suhuo' nod minamanau, om patahako' noddi diyolo' iyau dot id di Pilatus, i gobunor do pomorintaan do Rum.
Napatai i Yudas
3 Om kokito poddi di Yudas i pinapadagang di Yesus diri, do nohukuman i Yesus, om ponosol noddi iyau. Om ngoyo' noddi dau pogulio' i tolu nohopod o tusin do pirok diri dot id piro-piro boyoon dot imam om id boyoon do tulun do Yohudi. 4 Boros ka dau, “Nokowonsoi oku no kopio'd dusa do pinapadagang do tulun dit aiso' o sala', om gowoi poddi om hinukuman iyau'd kapatayon!” ka dau. Nga' boros ka diyolo', “Nunu daa o kopodulan dahai'ndo? Ino nopo om diya' nod tonggungan!” ka. 5 Om pataamo' nopoddi di Yudas i tusin diri do hiri'd suang di Walai'd Sasambayangan dot Agayo, om pamanau no do minongoi giis. 6 Om ngoyo' no di piro-piro boyoon dot imam i tusin diri, om boros ka diyolo', “Iti nopo tusin diti om gatang do ginawo'd tulun. Om tumanud nopod Tourat toko' om a' i' koino-ino iti tusin diti do posuangon do hiri'd poiiyanan do porsombahan do hilo'd Walai'd Sasambayangan dot Agayo,” ka. 7 Om pogipapakat noddi iyolo' do popoboli di tusin diri dot iso' o kinoiyonon do tana' di roitan do Tana' di Gompomonsoi'd Kuron. Om iri nopo tana'ddi nga' numaan do kalabangan do tulun di bansa'd suwai. 8 Om iri no o kinopomungaranan di tana'ddi do “Tana'd Raha'” do gisom piya'd baino'. 9 Om kabayaai noddi i pinoboros di Nabi Yoromia do poingkaa, “Om kaanu no iyolo' do tolu nohopod o tusin do pirok, tu' iri no o gatang di nookunan di bansa'd Israil do maan do pambayar dau. 10 Om pakayo' noddi diyolo' i tusin diri do pomoli'd tana' di Gompomonsoi'd Kuron, do miagal di pinonuhuan do Tuhan dot id doho',” ka.
Pininguhatan di Pilatus i Yesus
11 Tontok di pinotimbaba' i Yesus di Pilatus, i gobunor do pomogunan diri, om uhoto' no iyau di Pilatus. Boros ka dau, “Raja' ko nogi' do tulun do Yohudi?” ka. Om boros ka di Yesus do suminimbar, “Ino nondo ino boros nu,” ka. 12 Nga' di nopoddi minimboros i piro-piro boyoon dot imam om i boyoon do bansa'd Yohudi do papasala' di Yesus, om a' i' i Yesus suminimbar diyolo'. 13 Om boros kaddi di Pilatus dot id dau, “A' nu toi orongou ngai' ilo boros diyolo' do papasala' diya'?” ka dau. 14 Nga' a' i' i Yesus suminimbar dot ongoiso' piya o boros. Om gisom dot osuayan tomod diri i gobunor.
Hinukuman i Yesus do Kapatayon
15 Pointikid-tikid do Tadau'd Agayo do Paska, om koubasan no di gobunor do papalabus do songulun di songinggiil do tumanud do pokionuon di tulun dot ogumu'. 16 Om tontok nopoddi nga' haro o songulun do poinggiil di nabantug no o karaato'. Ngaran nopo do tulun diri om i Yesus Barabas. 17 Om kongotimung ngai' poddi i tulun dot ogumu', om uhoto' no iyolo' di Pilatus. Boros ka dau, “Isai o korohian dokoyu do polobuson ku? I Yesus Barabas ko' i Yesus i roitan do Kristus?” ka. 18 Om pinoboros pogi' di Pilatus o miagal diri, nga' oilaan i' dau do kinapatahakan nopo di piro-piro boyoon do Yohudi di Yesus dot id dau nga' osolon i' toomod iyolo'. 19 Om tontok di poirikau i Pilatus do hiri'd tiyonon do momisara', om posunudai no iyau di sawo dau do boros do poingkaa, “Kada' nogi' kopio hompit do hal di tulun dit aiso' o sala'ddi, tu' iyau no o nokoipi-ipi ku do nipi di korolosi tomod di tadau baino',” ka. 20 Nga' a' nopo otingkod-tingkod i piro-piro boyoon dot imam om i boyoon do tulun do Yohudi do mamayayat di tulun dot ogumu' do mokilabus di Pilatus di Barabas om hukuman nondo do kapatayon i Yesus. 21 Om uhoto' po iyolo' di gobunor, “Isai o pokilobusan dokoyu doho' dot id pialatan diti duwo o tulun?” ka dau. Om boros ka diyolo' do suminimbar, “I Barabas,” ka. 22 Om boros kaddi di Pilatus do minonguhot diyolo', “Iyo nopoddi, om kukuroyon ku nondo i Yesus i roitan do Kristus?” ka dau. Om boros ka diyolo', “Posolibon nopo iyau!” ka. 23 “Nga' nunu toi o kasalaan dau?” ka kawagu di Pilatus do minonguhot. Nga' okon nogi' dot opuhod tomod iyolo' do mininggiak do, “Posolibon nopo iyau!” ka. 24 Om alaid noddi om kopurimanai no di Pilatus dot aiso' no o milo dau'd wonsoyon, om ooris iyau do sumaap dotindo i tulun dot ogumu'. Om ongoi noddi iyau'd waig, om ougai no dau o palad dau dot id toguang di tulun dot ogumu', om boro-boros nod, “A' oku no monongkuro-kuro do kapatayon do tulun diti! Iyokoyu no o monongkoilo!” ka dau. 25 Om oinsanan nopoddi i tulun dot ogumu' do suminimbar do, “Ba, pologoson nopo iyahai om i tangaanak dahai do mamabo do hukuman do kapatayon dau!” ka diyolo'. 26 Om polobuso' noddi di Pilatus i Barabas do tumanud di pinokianu diyolo', om ponuhu' no iyau'd tulun do minomikot di Yesus; om patahako' nogiddi dau i Yesus dot id soudor do maan posolibo'.
Hiningi-hingi di Soudor i Yesus
27 Om posuango' noddi di soudor di Pilatus i Yesus do hiri'd walai di gobunor, om oinsanan nopo i soudor do tuminimung do hiri'd posorili' di Yesus. 28 Om iduwo' no diyolo' i pakayan di Yesus om pakayai no diyolo' iyau do rasuk dit anaaru dit otomou daragang-ragang. 29 Om pomonsoi no iyolo'd iso' o tupi' do raan-raan di kirugi o winonsoi, om posigaro' no di Yesus, do maan do ponokotupi' di don raja'. Om poigitai no diyolo' di longon dau'd wanan o tiso' o sukud, om motud nogindo iyolo' dot id toguang dau do momohingi-hingi dau. Om mimboros nondo iyolo' do, “Tabi', oi Raja' do tulun do Yohudi!” ka no. 30 Om pindulaan diyolo' iyau. Om ngoyon nondo diyolo' i sukud diri om pobobogon no di tulu di Yesus. 31 Om kohingi-hingi poddi diyolo' i Yesus, om iduwo' no diyolo' i rasuk dit otomou daragang-ragang om porosukai no diyolo' kawagu i rasuk mantad di Yesus. Om posoliwano' noddi diyolo' i Yesus do ngoyon posolibo'.
Pinasalib i Yesus
32 Hiri noddid tanga'd ralan om kosolowot no diyolo' o songulun i mantad hilo'd Kirini. Ngaran nopo di tulun diri nga' i Simun. Om sansagai noddi diyolo' i tulun diri do sumaan di salib di Yesus. 33 Om korikot noddi iyolo' dot id iso' o kinoiyonon di roitan do Gulguta. Komoyon nopod ngaran diri nga' “kinoiyonon do korulung do tulu”. 34 Om hilo' no do pinoinum diyolo' i Yesus do waig dot anggur di rinalatan do tompodu. Nga' koumbalai poddi di Yesus iri, om minada' iddi iyau do minonginum diri. 35 Om posolibo' noddi diyolo' iyau, om pogiduwo-duwoo' no diyolo' i pakayan dau, do nundi' do minomiduwo. 36 Om irikau noddi iyolo'd hiri do minadtamong di Yesus. 37 Om palantako' no diyolo' do hiri'd sawa-sawat di tulu di Yesus i pinotulisan di pinotondos dot id dau do poingkaa, “I Yesus i Raja' do Tulun do Yohudi,” ka. 38 Om pinapasalib po iyolo' do duwo o tulun di mananakau do pinaandad di Yesus. Om iri nopo tiso' nga' id dawananan di Yesus, om iri no tiso' om id dogibangan dau. 39 Om songbingog-bingog pod tulu i tulun di katalib do hiri do momohingi-hingi di Yesus. 40 Om boros ka no diyolo', “Iya' no i minomoros do mamaraag di Walai'd Sasambayangan dot Agayo, om owonsoi i' kaka'ndo do tolu no tadau do momonsoi! Ondung Tanak ko'd Kinorohingan, om lintuhun pogi' do mantad hino'd salib, om posion i' o tinan nu!” ka. 41 Om i piro-piro boyoon dot imam om i guru do Tourat om i boyoon di tulun do Yohudi nga' momohingi-hingi nogi' di Yesus. Boros ka no diyolo', 42 “Mamasi i' iyau'd tulun do suwai, om a' indo milo do mamasi do dau'd tinan! Ondung raja' iyau dot Israil, om lumintuhun nopo daa iyau do mantad hilo'd salib do dinondo, om monongkuyaan nogindo iyahai dau. 43 Monongkuyaan i' iyau'd Kinorohingan, om momoros do Tanak iyau'd Kinorohingan. Om antangai toko' daa ondung posion kopio iyau'd Kinorohingan do baino',” ka diyolo'. 44 Om i tulun di mananakau di pinasalib do tandad di Yesus nga' momohingi-hingi i' di Yesus do miagal diri.
Kinapatayon di Yesus
45 Om pitangaadau noddi, om tuong nopo o pointongkop do pomogunan diri do solinaid do tolu o jam. 46 Om pomogiak noddi i Yesus dot opuhod di jam kotolu do sosodopon. Boros ka dau, “Iloi, Iloi, lama sabaktani,” ka. Komoyon nopoddi nga', “Oi Kinorohingan ku, oi Kinorohingan ku, nokuro tu' tinongkiadan oku diya'?” ka. 47 Om haro'ddi o piro-piro o tulun do nokorongou di giniakan dau'ddi. Om boros ka diyolo', “Momolohou iyau di Ilia!” ka. 48 Om osiau nopoddi o tiso' diyolo' do minongoi panganu di koiyo-iyo'd rongilut. Om poobugo' nori do waig dot anggur dit oonsom. Om posuluho' no dau iri do hiri'd tompok dot iso' o kayu om poinsawato' nogiddi do pinopotopis do munung di Yesus. 49 Nga' boros ka di tulun do suwai, “Kada' po, antangai toko' po ondung rumikot i Ilia do mongoi pamasi dau!” ka. 50 Om pomogiak poddi kawagu i Yesus dot opuuhod, om koidu' noddi o ginawo dau. 51 Om iri tirai di poinrinding do hiri'd Walai'd Sasambayangan dot Agayo nga' kopiduwo nopo do nohurak do mantad pod hiri'd sawat om gisom do nokosondot do hiri'd siriba'. Om guminuyu' o tana' om nangababak o pampang. 52 Om nongoukaban o lobong, om ogumu' o tulun di nangapatai no, i songonuon do Kinorohingan do napasi kawagu. 53 Om soliwan no iyolo' do mantad hiri'd lobong di napasi i Yesus do mantad id kapatayon. Om ongoi no iyolo' do hilo'd Yorusalim. Om ogumu'ddi o tulun do nokokito diyolo'd hilo'. 54 Om minodosi tomod diri i boyoon di soudor om koinsanai di soudor di madtamong daa di Yesus do nokito diyolo' i tana' do guminuyu', om iri ngai' i nongosiliu do miagal diri. Om boros kaddi diyolo', “Otopot no kopio do Tanak iyau'd Kinorohingan!” ka. 55 Om ogumu' nogi' o tongoondu' do hiri'd sodu' do miontong ngai'ddi. Om iyolo' no i tuminanud di Yesus do minonguhup dau do mantad poddi hilo' pod Galilia. 56 Id pogialatan nopo diyolo' om i Maria Magdalina, om i Maria i tina' di Yakub om i Yusup, om i tina' di tangaanak di Sabidi.
Linobong i Yesus
57 Om rikot noddi o tiso' o tulun do kaya' do mantad hilo'd Arimatia do totuong diri. Ngaran nopo di tulun diri om i Yusup. Om iyau nga' tumatanud i' di Yesus. 58 Om ongoi no iyau solowot di Pilatus, om pokionuo' no dau i rata' di Yesus. Om ponuhu' noddi i Pilatus do papatahak di rata' di Yesus dot id dau. 59 Om ngoyo' no di Yusup i rata'ddi, om lopoto' no dau do kain linan di wagu po. 60 Om ngoyo' no dau lobongo' i rata' di Yesus do hiri'd lobong di dau mantad daa, i lobong di pinoluang dot id pampang. Om liido' no dau o watu dot agayo do pinonompon di wawayaan di lobong, om pamanau nogiddi iyau. 61 Nga' i Maria Magdalina nopo om i Maria i tiso' om poirikau'd hiri do potimbaba' di lobong.
I Minadtamong di Lobong di Yesus
62 Tadau noddi kawagu, di tadau'd Sabat, om ongoi ngai' nopo solowot di Pilatus i piro-piro boyoon dot imam om i tulun do Parisi. 63 Om boros ka diyolo', “Tuan, ahandaman diri dahai do di nopo poimpasi po i gomponipu'ddi, om nokoboros iyau dot, ‘Atalib pondo o tolu o tadau om apasi oku no kawagu,’ ka. 64 Om monuhu' nod tulun do mongoi kopio padtamong di lobong diri do gisom do korikot di tadau'd kotolu, om a' i' di tumatanud dau oongoi kapanakau i rata' dau, om mimboros nondo dot id tulun do napasi no kawagu iyau do mantad id kapatayon. Tu' araat po motindo ko' it id gulu o poninipu' diti sumusuhut,” ka diyolo'. 65 Om boros ka di Pilatus dot id diyolo', “Panganu kou nopod soudor do popodtomongon, om ngoyon nopo kopio dokoyu tamangai i lobong do gisom dot aayi-ayi' no kogirot o padtatamong,” ka dau. 66 Om ongoi noddi iyolo' do hiri'd lobong, om saapai no diyolo'd saap i watu di pinonompon di lobong om suhuo' no diyolo' i madtatamong do tumamong do hiri'd dotimbabaan di lobong, om aiso' indo o mongoi ponguro-kuro di lobong.
Napasi Kawagu i Yesus
1 Om katalib poddi i tadau'd Sabat, dit osuab po di tadau'd minggu', om ongoi no ontong di lobong i Maria Magdalina om i Maria di tiso'. 2 Om sigog ka nopoddi do guyu' i tana' dot opuhod tomod. Om lintuhun no o tiso' o moloikat do Tuhan do mantad hilo'd surga om ngoyo' no dau poliido' i watu di pinonompon di lobong, om irikau noddi do hiri'd sakai di watu'ddi. 3 Rabas nopo di moloikat diri nga' iyo pod kodumaat om i pakayan dau nga' opurak tomod. 4 Om minodosi tomod diri i soudor di minadtamong do hiri gisom do gagaran po tomod iyolo', om iyo poddi iyolo' do tulun do napatai. 5 Om boros ka di moloikat dot id tongoondu'ddi, “Kada' kou kooris! Oilaan ku i' do mogihum kou daa di Yesus, i pinasalib diri. 6 Nga' a' no iyau hino'd hiti. Tu' napasi no iyau kawagu do miagal di pinoboros mantad dau di gulu po, ongoi kou pogi' ontong dilo pinoliiyan dau. 7 Nga' arau-arau kou nogi' do mongoi pomisunud di tumatanud dau do poingkaa, ‘Napasi no iyau kawagu, om dinondo nopodti om nokopogulu no iyau dokoyu do minongoi'd hilo'd Galilia. Om okito indo dokoyu iyau'd hilo',’ kanto dokoyu. Soro-soroho' no dokoyu i pinoboros ku dokoyu'ddi,” ka dau. 8 Om arau-arau nopoddi i tongoondu'ddi do tuminongkiad di lobong. Om ooris nga' otood iyolo' do tontok di minanangkus iyolo' do minongoi poposunud diri dot id tumatanud di Yesus. 9 Om sigog nopod korikot i Yesus do minongoi solowot di tongoondu'ddi om boro-boros nod, “Maha' daa om osonong-sonong kou,” ka dau. Om insomok noddi iyolo' dau om gopuso' no diyolo' o gakod di Yesus om tuku' no iyolo' dot id dau. 10 Om boros ka di Yesus dot id diyolo', “Kada' kou kooris. Nga' ngoyo' nogi' dokoyu sunudai i tobpinai ku do mongoi'd hilo'd Galilia, om hilo' pondo om kokito nogi' iyolo' doho',” ka dau.
I Pinosunud di Soudor do Minadtamong di Lobong
11 Om kapamanau poddi i tongoondu', om haro'ddi o piro-piro di soudor di minadtamong di lobong diri do guminuli' do hiri'd bandar, do minongoi posunud dot id piro-piro boyoon dot imam do koinsanai'ddi nongosiliu. 12 Om pogiboro-boros noddi i piro-piro boyoon dot imam om i boyoon do tulun do Yohudi, om onuwai no diyolo'd tusin dot ogumu' i piro-piro soudor di minadtamong diri. 13 Om bilinai no diyolo' iyolo' do poingkaa, “Mositi' no do poboroson dokoyu do ruminikot i tumatanud di Yesus di dongotuong, om ngoyo' noddi diyolo' panakaho' i rata' dau di daamot dokoyu'd koodop. 14 Om korongou nopondo i gobunor do hal diri, om sunudan indo kopio dahai iyau, om a' kou indo oontok do nunu-nunu o kosusaan,” ka diyolo'. 15 Om onuo' noddi di soudor i tusin, om wonsoyo' no diyolo' o miagal di pinobilin dot id diyolo'. Om gowoi poddi om popimboroson kasai' po i susui do miagal diri dot id pogialatan do tulun do Yohudi do gisom piya'd baino'.
Minintalang i Yesus dot id Tumatanud Dau
16 Om ongoi ngai' noddi i hopod om iso' o tumatanud di Yesus dot id iso' o nulu-nulu do hilo'd Galilia do tumanud di pinonuhuan di Yesus dot id diyolo'. 17 Om kokito poddi diyolo' i Yesus do hiri, om otud ngai' no iyolo' do tuminuku' dot id dau. Nga' haro po ot id pogialatan diyolo' do mikoduwo o ginawo dot otumbayaan. 18 Om insomok noddi i Yesus diyolo' om boro-boros nod, “Nakatahak ngai' no dot id doho' o koinsanai'd kuasa' do hilo'd surga om hiti'd pomogunan. 19 Iyo nopoddi, om ongoi kou no dot id pointikid-tikid do bansa'd tulun do pointongkop diti pomogunan, om silihon no iyolo' do tumatanud ku. Botisan no iyolo' do mikuwo'd rumait di ngaran do Tapa', om Tanak om Rusod do Kinorohingan. 20 Om tudukan no iyolo' do tumanud do koinsanai'ddi pinonuhuan ku dokoyu. Om soro-sorohon no dokoyu do moyo-woyo' kasai' oku i' dokoyu do gisom do kopupuson diti pomogunan,” ka di Yesus.
Ponudukan di Yohanis Gampamatis
1 Iti no o Habar dot Osonong do pasal di Yesus Kristus, i Tanak do Kinorohingan. 2 Iti nopo Habar dot Osonong diti om mimpuun do miagal di tinulis di Nabi Yosaya do poingkaa, “ ‘Iti no o susuhuon ku,’ kad Kinorohingan. ‘Suhuon ku iyau do mogulu diya', om kopomonsoi i' iyau'd ralan do wayaan nu,’ ka. 3 Haro o tulun do mimboros dot opuhod do hilo'd tana' do kowotuan do poingkaa, ‘Rontisan no o ralan do Tuhan; Potingon no o ralan do wayaan dau,’ ka,” ka di Yosaya. 4 Om korikot noddi i Yohanis do mantad hilo'd tana' do kowotuan do miagal di notulis mantad diri; om minamatis iyau'd tulun om pinopopinsusui iyau di habar do mantad id Kinorohingan. Boros ka dau, “Korologo kou no do momonsoi'd dusa om mokibatis kou no, om oompunan kou id Kinorohingan,” ka. 5 Om ongoi ngai' nopoddi pokinongou di Yohanis i tulun do mantad hilo'd pomogunan do Yudia om mantad hilo'd Yorusalim. Om okuno' no diyolo' i dusa diyolo'. Om botisai noddi di Yohanis iyolo' do hiri'd Bawang do Yordan. 6 Om pakayan nopo di Yohanis om hulu'd unta do winonsoi, om tagkos no dau om kulit do nintorusan do winonsoi, om taakanon nopo dau om godu om paha' do mantad hiri'd gouton. 7 Om popinsusuyo' no di Yohanis o habar do poingkaa, “Haro nondo o tulun do sumusuhut doho'; it agayo o kuasa' ko' iyoho'. Tu' tali piya'd kasut dau nga' a' oku i' osorupai do mongiad. 8 Iyoho' nopo om waig no o pamatis ku dokoyu, nga' iyau nopo om Rusod do Kinorohingan o pamatis dau dokoyu,” ka.
Binotisan di Yohanis i Yesus
9 Om tontok iddi do nokorikot i Yesus do mantad hilo'd bandar do Nasarit, it id watas do Galilia. Om botisai no di Yohanis i Yesus do hilo'd Bawang do Yordan. 10 Om kotindal poddi i Yesus do mantad hiri'd bawang diri, om kokito no dau do haro o noukab do hilo'd tawan, om lintuhun noddi dot id dau i Rusod do Kinorohingan do miagal do punai o kowoyo-woyoo' do suminondot dot id dau. 11 Om korongou noddi dau o Kinorohingan do minoro-boros do poingkaa, “Iya' no i Tanak ku di kosianan kopio ku. Om iya' no o kohubayaan kopio do ginawo ku,” ka.
Pinogumbalan do Rogon i Yesus
12 Om katalib poddi iri, om tilombuso' nopo di Rusod do Kinorohingan do minonuhu' i Yesus do mongoi do hilo'd tana' do kowotuan. 13 Om apat diri nohopod o tadau do koloidon dau do poundorong do hiri'd tana' do kowotuan. Om hilo' no iyau do pinogumbalan do Rogon. Om haro nogi' o nintorusan dit ongorongit do hiri. Nga' rikot no o piro-piro o moloikat do minongoi ponguhup di Yesus.
Minomolohou i Yesus dot Apat o Gomponginsada'
14 Tontok di nokogiil no i Yohanis, om pakayaai no di Yesus do hilo'd pomogunan do Galilia do mongoi popinsusui do Habar dot Osonong do mantad id Kinorohingan. 15 Boros ka dau, “Norikot no i maso. Oruhai nod korikot i Pomorintaan do Kinorohingan! Rologo kou no do momonsoi'd dusa, om kotumbayaai kou no di Habar dot Osonong do mantad id Kinorohingan,” ka. 16 Om tontok di manau-panau i Yesus do hiri'd tisan di Tasik Galilia, om kokito no dau o duwo o tulun do monginginsada', iyolo' nopoddi nga' i Simun om i Andarias, i Andarias nopo om tadi' di Simun. Om tontok nopoddi om maso diyolo' do minrambot do hiri'd tasik. 17 Om boros ka di Yesus dot id diyolo', “Tanud kou pogi' doho'. Om tudukan ku i' iyokoyu do mamarambot do tulun,” ka dau. 18 Om olomus nopoddi iyolo' do tuminongkiad di rambot diyolo' om tanud no di Yesus. 19 Om lombus po kawagu i Yesus do minamanau, om kokito po dau o duwo o tulun do miobpinai. Iyolo' nopoddi nga' i Yakub om i Yohanis, i tangaanak di Sabidi. Om maso diyolo' do mongulud di rambot diyolo' do hiri'd suang di parau'. 20 Om iyolo' nogi' nga' tilombusai nopo di Yesus do minomolohou. Om tongkiadai noddi diyolo' i tapa' diyolo' om i susuhuon diyolo' do hiri'd poinsakai di parau'. Om ongoi no iyolo' tanud di Yesus.
Tulun di Norusadan do Rusod dot Araat
21 Om korikot no i Yesus om i piro-piro o tumatanud dau do hilo'd bandar do Kapornaum. Om korikot poddi i tadau'd Sabat do minggu'ddi om ongoi no i Yesus do hiri'd walai'd sasambayangan, om timpuun no do minonuduk. 22 Om ongosuayan nopoddi i tulun do nokorongou di kowoyo-woyoo' dau do monuduk. Tu' kikuasa' kopio iyau do monuduk. Om a' i' miagal di guru do Tourat. 23 Nga' maso nopoddi om haro o songulun do norusadan do rusod dot araat do suminuang do hiri'd walai'd sasambayangan, om pamagarang no iyau do poingkaa, 24 “Oi Yesus i tulun do Nasarit, kukuroyon nu iyahai'dti? Momohukum toi dahai o kinorikatan nu'd hiti? Koilo oku i' ondung isai ko: Dot iya' no i susuhuon dit olidang do mantad id Kinorohingan,” ka dau. 25 Om oduhai noddi di Yesus i rusod diri. Boros ka dau, “Tingkod! Soliwan no do mantad id tulun diti,” ka. 26 Om popinggogoro' tomod noddi di rusod dot araat i tulun diri mikuwo'd mininggiak dot opuhod, om soliwan nogiddi do mantad id tulun diri. 27 Om ongosuayan tomod diri i tulun, om mogiuhot-uhot po iyolo' do poingkaa, “Atuk, nunu kopio'ti? Ponudukan tuu iti'd wagu? Tu' kisinundu iyau om kikuasa' kopio do monuhu' do rusod dot araat do sumoliwan, gisom do mihuboyo-boyo' nopo dau,” ka diyolo'. 28 Om oruhai'ddi kopio do nokotongkop o habar do pasal di Yesus do hiri'd pointongkop do watas do Galilia.
Minomolingos i Yesus dot Ogumu' o Tulun
29 Om soliwan noddi i Yesus om i piro-piro o tumatanud dau do mantad hiri'd walai'd sasambayangan diri. Om ongoi no iyolo' salakoi do hiri'd walai di Simun om i Andarias. Om i Yakub, om i Yohanis nga' tuminanud nogi' diyolo' do minongoi'd hiri. 30 Nga' maso nopoddi om poillii do hiri'd toodopon dau i tiwanon di Simun do tondu' do sogiton tomod. Om sunudai noddi i Yesus do pasal diri, di kasasalakoi dau om i piro-piro o tumatanud dau do hiri'd walai'ddi. 31 Om ongoi noddi i Yesus insomok di tiwanon di Simun do tondu', om igitai no dau o longon di tondu'ddi om potungago' noddi dau iyau. Om kotingkod noddi i sogiton di tiwanon di Simun diri. Om pongobi-obi' noddi iyau diyolo'. 32 Om sosodopon noddi di notonob o tadau, om haro'ddi o piro-piro o tulun do pinapaatod dot id di Yesus do koinsanai'd tulun di kitoruol om i nongorusadan do rusod dot araat. 33 Om koinsanai nopoddi i tulun do hiri'd bandar diri do tuminimung do hiri'd ponong id wawayaan di walai'ddi. 34 Om ogumu'ddi o tulun do liningasan di Yesus do mantad id mogisuayan o toruol. Om minonunsub nogi' iyau dot ogumu' o rusod dot araat. Om a' no di Yesus pinologos do mimboros i rusod dot araat diri, tu' koilo i' iyolo' ondung isai kopio i Yesus.
Minonuduk i Yesus do Hilo'd Galilia
35 Om otuong-tuong po di sinuabon kawagu, om tungag no i Yesus om tongkiad no iyau di walai, om ongoi no iyau do hiri'd kinoiyonon dit oingou do hiri'd soliwan di bandar, om sambayang no iyau'd hiri. 36 Nga' ongoyo' noddi di Simun om i piro-piro o tambalut di Simun ihumo' iyau. 37 Om kabantalai no diyolo' i Yesus, om boro-boros no iyolo' dau do poingkaa, “Mogihum ngai' nopo diya' i tulun, oi Guru,” ka diyolo'. 38 Nga' boros ka di Yesus do suminimbar, “Mositi' no do lumombus toko' do mamanau do mongoi'd hilo'd kabandaran do suwai di posorili'd hiti. Om mositi' no do koponuduk oku'd hilo', tu' iri no o kinorikatan ku'd hiti,” ka dau. 39 Om iri no o kinaangayan di Yesus do pointongkop do pomogunan do Galilia, om monuduk do hiri'd piro-piro o walai'd sasambayangan. Om minonunsub nogi' iyau do rusod dot araat.
Minomolingos i Yesus do Tulun di Kitoruol o Kulit dit Araat Kopio
40 Rikot noddi dot id di Yesus o songulun di kitoruol do kusta. Om otud no i tulun diri dot id toguang di Yesus mikuwo'd minoro-boros do poingkaa, “Oi Tuan, ondung orohian ko om milo ko i' do momolingos doho',” ka dau. 41 Om kosianai noddi kopio i Yesus di tulun diri. Om kamao' noddi dau iyau om boro-boros nod, “Orohian oku i'. Olingasan ko i',” ka dau. 42 Om diiri i' om diiri do natanus i toruol dau om kolingasai noddi iyau. 43 Om suhuo' noddi di Yesus i tulun diri do muli'. Om sunudai no dau do poingkaa, 44 “Kada' no kopio popinsusuyo' iti dot id disai nopo. Nga' ongoi nogi' solowot dit imam om suhuon no iyau do pointalang kopio do nolingasan kopio ko. Om papatahak nogindod porsombahan do sorobon do miontok di pinonuhuan di Musa, tu' iri no o popointalang kopio dot id koinsanai'd tulun do nolingasan kopio ko,” ka dau. 45 Nga' pamanau noddi i tulun diri om ngoyo' no dau popinsusuyo' i nosiliu'ddi do hinonggo nopo, gisom dot a' noddi kosuang i Yesus do hiri'd bandar diri dot a' lumisok-lisok poo do sumuang. Om hiri poddi i Yesus id soliwan di bandar dot id kinoiyonon dot oingou. Nga' ogumu' kasai' i' o tulun do rumikot dot id dau do mantad id hinonggo nopo o kinoiyonon.
Ponudukan di Yesus dot A' Koino-ino do Magada'd Sawo
1 Om tongkiad noddi i Yesus do kinoiyonon diri, om pakayaai no dau do hilo'd watas do Yudia om hilo'd watas dit id soborong do Bawang do Yordan. Om ogumu' po kawagu o tulun do ruminikot do tuminimung do posorili' di Yesus. Om ponuduk noddi i Yesus diyolo' do miagal di koubasanan kasai' dau. 2 Om rikot no dot id dau o piro-piro tulun do Parisi do mongoi daa pomurunsut dau. Om uhoto' no diyolo' i Yesus do poingkaa, “Tumanud nopo do Tourat toko', om koino-ino toi o kusai do magada'd sawo dau?” ka diyolo'. 3 Om boros ka di Yesus do suminimbar, “Nunu ka dot oturan di tinahak di Musa dokoyu?” ka dau. 4 Om boros ka diyolo' do suminimbar, “I Musa nopo om potumboyo' i' do kusai do magada' do sawo dau, do kopomonsoi po iyau'd surat do kopiadaan,” ka. 5 Om boros ka di Yesus dot id diyolo', “Minonulis pogi' i Musa dot oturan do miagal diri nga' mantad id kongosongkiwalo' dokoyu. 6 Tontok di wonsoyo' id Kinorohingan o tulun om pinoboros dot, ‘Winonsoi iyolo'd Kinorohingan do kusai om tondu',’ ka. 7 ‘Om iri no o kotongkiadan do kusai do mantad id tina' om tapa' dau om kosugku' i' iyau di sawo dau, 8 om osiliu nondo iyolo' dot iso-iso',’ ka. Om okon noddi ko' duwo po iyolo', suwai ko' iso' poo iyolo'. 9 Om iri no o kokuwaan, do nunu nopo i pinopiiso' do Kinorohingan om a' no koino-ino do pitongkiadon do tulun!” ka di Yesus. 10 Om kosuang poddi iyolo' do hiri'd walai, om ponguhot no di Yesus i piro-piro tumatanud dau do pasal diri. 11 Boros kaddi di Yesus dot id diyolo', “Isai nopo o kusai do magada' do sawo dau om kumawin indo kawagu do tondu'd suwai, om magampahu' no i kusai'ddi dot id sawo dau dit id gulu. 12 Om iyo nogiddi o tondu' di magada' do sawo dau om mokikawin indo do kusai'd suwai, tu' iyau nga' kapagampahu' nogi',” ka dau.
Minamarakat i Yesus do Tangaanak
13 Om haro o piro-piro tulun do pinapaatod do tangaanak dot id di Yesus do pokikamaan diyolo' dau om pokibarakatan. Nga' togodo' noddi di piro-piro tumatanud di Yesus i tulun diri. 14 Om kokito poddi di Yesus o miagal diri, om kotogod no iyau. Om boros kaddi dau dot id piro-piro di tumatanud dau, “Pologoso' nopo ilo tangaanak do rumikot dot id doho'. Kada' dokoyu iyolo' oduhai, tu' iyo no diyolo' o tulun di kasanganu do Pomorintaan do Kinorohingan. 15 Soro-sorohon no dokoyu iti: Isai nopo i rumikot dot id Kinorohingan dot a' iyo do tanak o kowoyo-woyoo', om a' no kosuang di Pomorintaan do Kinorohingan,” ka dau. 16 Om koboros poddi di Yesus o miagal diri, om gopuso' noddi dau i tangaanak diri, om pintikido' no dau do mangama' i tangaanak do mamarakat diyolo'.
I Tulun do Kaya'
17 Tontok di luminombus i Yesus do minamanau, om haro'ddi o songulun do mangkus-tangkus nopo do ruminikot dot id di Yesus. Om otud no iyau dot id toguang di Yesus. Om boros ka dau do minonguhot, “Oi Guru dit osonong, nunu ot apatut ku'd wonsoyon om kaanu oku i' do koposion dit otopot kopio om i poingompus?” ka dau. 18 Om boros ka di Yesus do suminimbar, “Nokuro tu' roitan oku diya' dot osonong? Tu' aiso' i' ot osonong, suwai ko' Kinorohingan noo. 19 Noilaan ngai' nu no it oturan do Kinorohingan do poingkaa, ‘Kada' pamatai, kada' pagampahu', kada' panakau, kada' pongudut, kada' ponipu', om pusohon no o tapa' om tina' nu,’ ka,” ka dau. 20 Boros ka di tulun diri, “Koinsanai dit oturan diri om nangatanud ngai' ku no, do mantad po dit okoro' oku po, oi Guru,” ka dau. 21 Om ontong no i Yesus di tulun diri do mikuwo'd osianan iyau dau, om boro-boros noddi iyau do poingkaa, “Iso' poo ot apatut nu'd wonsoyon. Ngoyon ngai' no padagango' i dapu' nu; om patahakon no i tusin do gatang diri dot id tulun do mosikin, om kaanu ko nondod dapu' do hilo'd surga. Om owonsoi nu pondo o miagal diri, om rumikot no do mongoi tanud doho',” ka dau. 22 Nga' korongou poddi di tulun diri i boros di Yesus do miagal diri, om lunggui nopo iyau, om tongkiad no iyau do mantad id kinoiyonon diri do mikuwo'd tumongob tomod, tu' kaya' i' kopio iyau. 23 Om ontong noddi i Yesus di piro-piro tumatanud dau, om poboroso' no dau diyolo' o poingkaa, “Osusa' no kopio o tulun do kaya' do sumuang di Pomorintaan do Kinorohingan!” ka dau. 24 Nga' ongosuayan ngai' nopo i tumatanud di Yesus do nokorongou di boros di Yesus do miagal diri. Nga' boro-boros po kawagu i Yesus diyolo' do poingkaa, “Oi tangaanak ku, atantu' no dot osusa' do sumuang di Pomorintaan do Kinorohingan! 25 Osonong-sonong nogi' o songinan ot unta do sumuang dot id luang do dalat ko' mantad do tulun do kaya' do sumuang di Pomorintaan do Kinorohingan,” ka dau. 26 Om ongosuayan tomod i tumatanud di Yesus do nokorongou di pinoboros dau do miagal diri, gisom do mogiuhot-uhot po iyolo' do poingkaa, “Iyo nopoddi, om isai po ot apasi?” ka no diyolo'. 27 Om ontong no i Yesus diyolo' om boro-boros no iyau do suminimbar diyolo', “A' no daa kopio milo'd wonsoyon do tulun o miagal diri, nga' aiso' i' ot a' milo'd Kinorohingan do wonsoyon, milo ngai' id Kinorohingan do wonsoyon,” ka dau. 28 Om boros kaddi di Pitrus, “Antangai pogi', nga' aiso' no ot a' dahai tinongkiadan tu' tumanud no iyahai diya',” ka dau. 29 Om boros ka di Yesus, “Kotumbayaai kou no: Do tulun nopod tuminongkiad do sompiiyon dau, ko' tobpinai dau do tongokusai ko' tobpinai dau do tongoondu', ko' tina' dau ko' tapa' dau ko' tangaanak dau ko' tumo dau, dot iyoho' om i Habar dot Osonong do mantad id Kinorohingan o kotongkiadan, 30 om ogumu' pondo ko' iri ot aanu di tulun diri do maso'd dinondo. Kaanu i' iyau dot inghatus kopiluap o kogumuon do walai, om tobpinai'd kusai, om tobpinai'd tondu', om tina' om tangaanak, om tumo, --- om koinggoritan nogi'. Nga' koimbagu nopondo om kaanu nondo iyau do koposion dit otopot kopio om i poingompus. 31 Nga' ogumu' nondo o tulun dit id gulu daa do dinondo poo nga' kotohuri indo do koimbagu, om ogumu' o tulun di potohuri daa do dinondo poo, nga' kopogulu indo do koimbagu,” ka dau.
Kointolu no di Yesus do Pinopoboros do Pasal do Kapatayon Dau
32 Om tontok di manau-panau no i Yesus om i piro-piro tumatanud dau do pakayaan do hilo'd Yorusalim, om hiri'd gulu diyolo' i Yesus do manau-panau, om atangkabo ngai' nopo i tumatanud dau. Om iri tulun di muhut-suhut diyolo' nga' kopuriman ngai' nogi' do moddosi. Om lohowo' ngai' noddi di Yesus i tumatanud dau dot iyolo-yolo' om poiloo' no dau iyolo' dit osiliu dot id dau. 33 Boros ka dau, “Pokinongou kou no! Kumaa toko' nodti do hilo'd Yorusalim. Om hilo' nopondo om patahakon nondo i Tanak do Tulun dot id piro-piro o boyoon dot imam om id guru do Tourat. Om hukuman nondo iyau do kapatayon, om patahakon nogindo dot id tulun dit okon ko' Yohudi. 34 Om hingi-hingion nondo diyolo' iyau, om pindulaan, om inggoriton, om posolibon iyau. Nga' kotolu nopondod tadau om apasi indo kawagu iyau,” ka dau.
Pokionuon di Yakub om i Yohanis
35 Om rikot noddi dot id di Yesus i Yakub om i Yohanis. Iyolo' nopo om tangaanak di Sabidi. Om boros ka diyolo' dot id di Yesus, “Oi Guru, haro daa ot iso' do korohian dahai do wonsoyon nu dot id dahai,” ka diyolo'. 36 “Nunu o korohian dokoyu'd wonsoyon ku dot id dokoyu?” ka di Yesus do minonguhot diyolo'. 37 Om boros ka diyolo'd suminimbar, “Orohian daa iyahai do poirikohonon nu ot iso' dahai dot id dawananan nu om iso' ot id dogibangan nu, do momorinta' ko do mikuwo'd kagayaan,” ka diyolo'. 38 Om boros ka di Yesus dot id diyolo', “A' kou i' koilo ondung nunu kopio i pokionuon dokoyu'ddi. Kasaap kou i' tuu do monginum dot id sangkir do koinggoritan dit inumon ku, om sumuang dot id lansang do koinggoritan di suangon ku?” ka dau. 39 “Kasaap,” ka diyolo'd suminimbar. Om boros ka kawagu di Yesus dot id diyolo', “Otopot i' dot iyokoyu nga' koinum indo dot id sangkir do koinggoritan dit inumon ku om kosuang kou do hiri'd lansang do koinggoritan di suangon ku. 40 Nga' pasal no di koirikau dot id dawananan om id dogibangan ku om okon i' ko' iyoho' o kikuasa' do manantu'ddi. Kinorohingan i' o manantu' ondung isai o koirikau do hiri'd kinoiyonon diri,” ka dau. 41 Om tontok di nokorongou i hopod o tumatanud di Yesus di suwai do pasal diri, om kotogod no iyolo' di Yakub om i Yohanis. 42 Om lohowo' ngai' noddi di Yesus iyolo', om boro-boros no iyau do poingkaa, “Koilo kou i' dot iri nopo i piro-piro o boyoon do bansa' dit a' kotutun do Kinorohingan om mongulok-ulok nopo di rayat diyolo'. Om mongudipon di rayat i tulun dit ongkipangkat. 43 Nga' iyokoyu nopo om a' i' koino-ino do miagal diri. Tu' tulun nopo dit orohian dot agayo o ngaran dot id pogialatan dokoyu, om mositi' no do sumiliu'd mogobi-obi' dokoyu. 44 Om iri tulun dit orohian do kopogulu dot id pogialatan dokoyu, nga' mositi' no do sumiliu'd turipon do koinsanai'd tulun. 45 Tu' iri Tanak do Tulun nga' okon i' ko' mokiobi-obi' o kinorikatan, suwai ko' kinorikatan nopo dau om mongoi pogobi-obi', om papatahak do tinan dau do gisom dot apatai do mamasi do tulun dot ogumu',” ka dau.
Minomolingos i Yesus di Bartimius, i Tulun do Bolou
46 Om korikot noddi iyolo' do hilo'd Yorikou. Om tontok di tuminongkiad i Yesus om i piro-piro tumatanud dau, om i tulun dot ogumu' do mantad id bandar diri, om haro'ddi o songulun o bolou dot i Bartimius o ngaran, i tanak di Timius, do poirikau do hiri'd tisan do ralan do mokipuhawang. 47 Om korongou noddi iyau dot iri nopo i kawaya' do hiri nga' i Yesus, i tulun do Nasarit. Om pinglohou noddi iyau do poingkaa, “Oi Yesus i Tanak di Daud! Kosianai no doho',” ka. 48 Om togodo' no iyau di tulun dot ogumu' om oduhai no diyolo' iyau do minglohou. Nga' okon nogi' do pomolohou kawagu iyau dot opuhod dot, “Oi Tanak di Daud! Kosianai no doho'!” ka. 49 Om undorong noddi i Yesus om boro-boros nod, “Lohowo' iyau,” ka. Om lohowo' noddi diyolo' i tulun do bolou'ddi. Om boro-boros no iyolo' dau, “Kotood no! Tu' lohowon ko no di Yesus, ingkakat!” ka. 50 Om pataamo' nopo di tulun di bolou i rasuk dau dit id soibau om olomus nopoddi do miningkakat do minongoi rapou di Yesus. 51 Om boros ka di Yesus do minonguhot dau, “Nunu daa o korohian nu'd wonsoyon ku dot id diya'?” ka. Om boros ka di tulun di bolou'ddi do suminimbar, “Oi Guru, orohian oku'd kokito,” ka dau. 52 Om boros ka di Yesus, “Pamanau no, nolingasan ko no, tu' otumbayaan ko i' doho',” ka dau. Om diiri i' om diiri do nokokito i tulun diri. Om tanud noddi iyau di Yesus do minamanau.
Pinusou i Yesus do Ruminikot do Hilo'd Yorusalim
1 Tontok di mirririkot no iyolo' do hilo'd Yorusalim, om korikot no iyolo' do hilo'd bandar do Baitpagi om hilo'd Baitani, i hilo'd guas di Nulu-Nulu do Saitun. Om hilo' no do sinuhu' di Yesus o duwo di tumatanud dau do mogulu dau. 2 Boros ka dau dot id diyolo', “Ongoi kou do hilo'd kampung dit id dabantalan dokoyu. Om korikot kou nopondo do hiri'd kampung diri om okito nondo dokoyu ot iso' o tanak do kaladai do poingkogos, it a' po noumbalan do tulun do sumakai. Om iyadan nopo dokoyu i kaladai'ddi om gayaton no do kumaa'd hiti. 3 Om ondung haro o tulun do monguhot dokoyu ondung nokuro tu' iyadan dokoyu i kaladai'ddi, om sunudan no dot, ‘Gunaon do Tuhan iti, om pogulion i' dau dot oruhai,’ kanto dokoyu,” ka dau. 4 Om pamanau goduwo noddi i tumatanud di Yesus diri, om kokito no diyolo' ot iso' o tanak do kaladai do poingkogos do hiri'd wawayaan di walai dit id tisan do ralan, om iyado' no diyolo' i polihan di kaladai'ddi. 5 Om uhoto' no iyolo' di piro-piro o tulun di poingkakat do hiri, “Ooi, kukuroyon dokoyu no? Nokuro tu' iyadan dokoyu ino tanak do kaladai?” ka. 6 Om simbaro' no diyolo' i tulun diri do miagal di pinoboros di Yesus dot id diyolo'. Om pologoso' nopoddi di tulun diri do ginayat diyolo' i kaladai. 7 Om korikot noddi iyolo' do hiri'd di Yesus, om lopikai no diyolo' di rasuk diyolo' dit id soibau i likud di kaladai, om sakai noddi i Yesus di kaladai'ddi. 8 Om ogumu'ddi o tulun do hiri do pinapalapik di rasuk diyolo' dit id soibau do hiri'd tanga'd ralan, om iri no suwai om minongoi panatas do raan do kayu do hiri'd kokoyuan, om popingiliho' nogiddi do hiri'd ralan. 9 Om mimboros ngai' poddi dot opuhod i tulun di hiri'd gulu-gulu di Yesus om i hiri'd tohuri dau do poingkaa, “Royohon no o Kinorohingan! Abarakatan no i rumikot dot id suang do ngaran do Tuhan! 10 Barakatan id Kinorohingan i pomorintaan di rumikot do koimbagu --- i pomorintaan di Daud, i taki-aki toko'! Royohon no o Kinorohingan it Asawat Kopio!” ka diyolo'. 11 Om korikot noddi i Yesus do hilo'd Yorusalim, om suang no iyau do hiri'd Walai'd Sasambayangan dot Agayo. Om mingontong diri iyau do hiri'd posorili' dau. Nga' oruhai noddi dot otuong om pamanau no iyau do kuminaa do hilo'd Baitani do mogiwoyo-woyo' di hopod om duwo o tumatanud dau.
Minomopol i Yesus do Songguas ot Ara
12 Om tadau noddi kawagu di manau-panau no iyolo' do mantad hilo'd Baitani, om louso' no i Yesus. 13 Om hiri pod sodu' om kokito no dau o songguas ot ara dit okohob o tuntu. Om ongoi noddi iyau do hiri'd guas dit ara do minongoi pogontong ondung haro o tua'ddi. Nga' di nopoddi nokorikot iyau do hiri'd guas diri, om aiso' i' o tua' suwai ko' roun noo. Tu' okon po ko' maso do koponguaan dot ara. 14 Om boro-boros noddi i Yesus di guas dot ara diri do poingkaa, “Mantad pod baino' om aiso' no o tongosongulun piya do kaakan do tua' nu!” ka dau. Om kongorongou i' i tumatanud di Yesus di boros dau'ddi.
Suminuang i Yesus do Hiri'd Walai'd Sasambayangan dot Agayo
15 Om korikot noddi iyolo' do hilo'd Yorusalim, om ongoi no kawagu i Yesus do hiri'd Walai'd Sasambayangan dot Agayo. Om uyungo' ngai' no dau i tulun di mogidagang-dagang do hiri. Om pinsomboliko' ngai' no dau i mija' di tulun di monukar do tusin, om i timpohon di tulun do padagang do punai. 16 Om iso' pod tulun nga' aiso' no o pologoson dau do mongigit do nunu nopo do maya' do hiri'd natad di Walai'd Sasambayangan dot Agayo. 17 Om ponuduk noddi i Yesus di tulun do hiri do poingkaa, “Nokotulis no dot id suang do Buuk do Kinorohingan do minomoros o Kinorohingan do poingkaa, ‘Roitan nondod tiiyonon do sumambayang do koinsanai'd bansa' i walai ku,’ ka. Nga' siniliu nogi' dokoyu iti do lilisokon do gampanakau!” ka dau. 18 Om korongou noddi di piro-piro o boyoon dot imam om i guru do Tourat i boros dau'ddi, om pogihum noddi iyolo' do ralan do mamatai di Yesus. Nga' ooris i' iyolo' dau tu' ongoimayaan ngai' nopo i tulun do korongou di ponudukan dau. 19 Om sosodopon noddi om tongkiad no i Yesus om i piro-piro o tumatanud dau di bandar diri.
Ponudukan dot Aanu do Mantad id Guas dot Ara
20 Tontok dit osuab po di tadau kawagu, di nakawaya' kawagu iyolo' di guas dit ara diri, om kokito no diyolo' do napatai no i guas om i gamut di kayu'ddi. 21 Om kosorou noddi di Pitrus i nosiliu di sangadau nogi' do mantad diri. Om boro-boros no i Pitrus di Yesus, “Oi Guru, antangai pogi' nga' noriou no moti'lo guas dot ara di pinapalan nu'ddi!” ka dau. 22 Om boros ka di Yesus, “Kotumbayaai nod Kinorohingan. 23 Tu' milo kou i' do momoros dot id nulu-nulu diti do, ‘Kakat no om tumaam i' do hilo'd rahat,’ ka. Om osiliu indo kopio o miagal diri dot id dokoyu dot a' no mikoduwo o ginawo dokoyu, om otumbayaan kou no kopio dot osiliu o nunu nopo i poboroson dokoyu. 24 Iyo nopoddi om soro-sorohon no dokoyu iti: Soira' nopod sumambayang kou do mokianu do nunu nopo, om kotumbayaai kou no do nakatahak nod Kinorohingan dot id dokoyu i pinokianu dokoyu'ddi. Om aanu indo kopio dokoyu iri. 25 Ondung sumambayang kou, om haro indo o karaatan dokoyu dot id iso' o tulun, om ompunan po dokoyu'd gulu i tulun diri, om ompunan indo di Tapa' di hilo'd surga o koinsanai di dusa dokoyu. 26 Ondung a' kou mangampun do tulun do suwai, om i Tapa' dokoyu do hilo'd surga nga' a' no mangampun di dusa dokoyu,” ka.
Tuhoton do Pasal do Kuasa' di Yesus
27 Om guli' noddi kawagu iyolo' do hilo'd Yorusalim. Om tontok di manau-panau i Yesus do minsorili' di Walai'd Sasambayangan dot Agayo, om rikot no i piro-piro o boyoon dot imam, om guru do Tourat, om i boyoon do tulun do Yohudi dot id di Yesus. 28 Om uhoto' no diyolo' i Yesus do poingkaa, “Nunu kopio o kuasa' nu do minomonsoi ngai'dti? Isai o minanahak diya'd kuasa'?” ka diyolo'. 29 Om boros ka di Yesus, “Iyoho' nga' haro i' o tuhoton dot id dokoyu. Om osimbar po dokoyu iri, om poboroson ku nogindo dot id dokoyu ondung isai o minanahak doho'd kuasa' do mingwonsoi ngai'dti. 30 Sunudai oku daa dokoyu ondung honggo o tadon di kuasa' di Yohanis do mamatis do tulun. Kinorohingan ko' tulun?” ka dau. 31 Om pogiboro-boros noddi i piro-piro o boyoon dot imam, om i boyoon do tulun do Yohudi. Boros ka diyolo', “Ondung poboroson toko' do, ‘Mantad id Kinorohingan,’ ka, om poboroson nondo dau do, ‘Nokuro tu' a' kou minonongkuyaan di Yohanis?’ ka nondo dau. 32 Nga' osusa' indo do poboroson do, ‘Mantad id tulun,’ ka, tu' sorohon ngai' idti tulun dot ogumu', do nabi i Yohanis,” ka diyolo'. 33 Om posimbaro' noddi diyolo' o poingkaa, “A' i' iyahai koilo,” ka. Om boros kaddi di Yesus dot id diyolo', “Iyo nopoddi, om iyoho' nga' a' i' poposunud dokoyu ondung disai'd kuasa' ku do mingwonsoi ngai'dti,” ka dau.
I Tulun do Moniwa' do Kabun dot Anggur o Pinoinukadan
1 Om timpuun noddi i Yesus do moro-boros dot id piro-piro o boyoon dot imam om i guru do Tourat, om i boyoon do tulun do Yohudi do pinawaya' do poinukadan do poingkaa, “Haro o songulun do minananom dot anggur dot id kabun dau, om pagaro' no dau o pointutuk di kabun diri. Om pongukad no iyau'd luang do pawansayan do pamagaan di tua' dot anggur, om pomonsoi nogiddi iyau do sinurambi' dot akawas dot iyonon do madtamong di kabun diri. Om posiwaai noddi dau i kabun dot anggur diri do piro-piro o tulun, om pamanau no iyau do minongoi do hilo'd pomogunan do suwai. 2 Om korikot poddi o maso do kopongupuan di tua' dit anggur, om ponuhu' no i sanganu di kabun dot anggur, dot iso' o susuhuon dau do mongoi solowot di tulun di minoniwa' di kabun dot anggur diri, do mongoi panganu di dau'd bahagi'. 3 Nga' tangkapo' nogi' di tulun di minoniwa' di kabun dot anggur i susuhuon diri. Om bobogo' no diyolo' iyau, om poulio' tomod nopo diyolo' i susuhuon diri dot aiso' i' o tinahak. 4 Om ponuhu' po kawagu i sanganu di kabun dot anggur diri do songulun o susuhuon dau'd suwai do mongoi dot id diyolo'. Nga bobogo' i' di tulun di moniwa' di kabun dot anggur o tulu di susuhuon diri, om uyungo' no diyolo' iyau om pininglupuan. 5 Om ponuhu' po kawagu i sanganu di kabun diri do songulun di susuhuon dau'd suwai, do minongoi dot id diyolo'. Nga' iri nopo i susuhuon diri, om patayo' nopo diyolo'. Om ogumu' po o susuhuon do suwai do minaan diyolo' iyoo'ddi: tu' haro i' o binobog om haro o pinatai. 6 Om iso' poddi i tanak di sanganu di kabun, di kosianan kopio dau do milo dau'd suhuon do mongoi kawagu dot id diyolo'. Om suhuo' noddi dau i tanak dau'ddi do mongoi do hiri'd tulun di minoniwa' di kabun dau. Poingkaa daa ot osorou dau, ‘Atantu' no do podulon i' bo diyolo' i tanak ku'ddi,’ ka. 7 Nga' pogiboro-boros no i tulun di minoniwa' di kabun dau do poingkaa, ‘Ilo' no moti' o tumungkus diti kabun diti. Kainou patayo' toko' iyau, om aanu toko' indo iti tungkusan dau!’ ka. 8 Om tangkapo' no diyolo' i tanak diri om patayo' no. Om pataamo' no diyolo' i rata' di tanak do hiri'd soliwan di kabun diri,” ka di Yesus. 9 Om ponguhot noddi i Yesus diyolo' do poingkaa, “Nunu mando o wonsoyon di sanganu di kabun diri! Atantu' no dot ongoyon dau patayo' i tulun di minoniwa' di kabun dau'ddi, om posiwaan nondo dau'd tulun do suwai i kabun diri. 10 Atantu' no do nakapambasa' kou i' dot ayat diti, dot id suang do Buuk do Kinorohingan do poingkaa, ‘Iri nopo i watu di nadaan di piro-piro o tukang mamaal do walai, om nosiliu nogiddi do watu dit agayo o guna'. 11 Iti no o winonsoi'd Tuhan; om koimayaan toko' no kopio iri,’ ka,” ka di Yesus. 12 Om pokitatangkapan diri di piro-piro o boyoon do Yohudi i Yesus di nokorongou iyolo' di poinukadan diri. Tu' oilaan no diyolo' dot iyolo' i' o komoyon di poinukadan diri. Nga' moddosi i' iyolo' di tulun dot ogumu'. Om tongkiadai noddi diyolo' i Yesus.
Tuhoton do Pasal do Mambayar do Sukai
13 Haro o piro-piro o tulun do Parisi om piro-piro o tulun do mantad id pati' di Horudis do sinuhu' do mongoi pomurunsut di Yesus do piro-piro o ponguhatan. 14 Om rikot noddi iyolo' dot id di Yesus, om boro-boros nod poingkaa, “Oi Guru, oilaan dahai dot otopot i' o poboroson nu, om a' ko nogi' okurai-kurayan dot osorou'd tulun do suwai om posondoton nu nopo kopio o ponunuduk do pasal do korohian do Kinorohingan dot id tulun. Tu' a' ko i' montong do pangkat do tulun. Sunudai daa iyahai ondung koino-ino iyahai do mambayar do sukai dot id di Kaisar ko' amu' do tumanud do Tourat? Apatut tuu do mambayar di sukai'ddi ko' amu'?” ka diyolo'. 15 Nga' oilaan i' di Yesus do maan i' toomod diyolo' i ponguhatan diyolo'ddi. Om simbaro' noddi dau do poingkaa, “Nokuro tu' momurunsut kou daa doho'? Onuwai oku daa dot iso' o tusin do pirok,” ka dau. 16 Om patahako' no diyolo' dot id di Yesus ot iso' o tusin do pirok. Om ponguhot no i Yesus diyolo', “Disai dilo gambar, om disai dilo ngaran?” ka dau. “Di Kaisar,” ka diyolo'd suminimbar. 17 Om boros kaddi di Yesus dot id diyolo', “Iyo nopoddi om apatut id patahakon dokoyu di Kaisar i di Kaisar, om patahakon dokoyu'd Kinorohingan i dong Kinorohingan,” ka dau. Om ongosuayan nopoddi iyolo' do nokorongou di boros dau'ddi.
Ponguhatan do Pasal dot Apasi Kawagu do Mantad id Kapatayon
18 Om haro'ddi o piro-piro o tulun do mantad id sinompuruan do tulun do Saduki do ruminikot dot id di Yesus. (Iyolo' nopodti nga' iso' o sinompuruan do tulun dit a' otumbayaan do posion kawagu i tulun di napatai.) 19 Om boro-boros no iyolo' di Yesus do poingkaa, “Oi Guru, notulis no di Musa ot oturan dot id dati' do poingkaa, ‘Ondung apatai o songulun o kusai dit aiso' po o tanak om iri no tobpinai dau ot apatut do mangawin di tondu', i sawo daa dau'ddi. Om oonuan i' do sinakagon i tulun di napatai,’ ka. 20 Om nokoumbal i' do haro o turu' o tulun do mogiobpinai, om kawin no daa it id dotuo, nga' aiso' po o tanak dau om kapatai no iyau. 21 Om kowino' no di tobpinai dau di koduwo i sawo daa dau, om kapatai i' i kusai di koduwo'ddi dit aiso' po o tanak diyolo'. Om iyo iddi o nosiliu dot id tobpinai dau di kotolu, 22 om iyo ngai' nopoddi o nosiliu do gisom do noinsanan i turu' o mogiobpinai. Om alaid noddi om kapatai no i tondu'ddi. 23 Om tontok nopondo do tadau di posion kawagu o tulun di napatai, om isai nondo o sansawo di tondu'ddi? Tu' nakapangawin ngai' nopo di tondu' i turu' o kusai'ddi?” ka diyolo'. 24 Om boros ka di Yesus do suminimbar, “Napalid kou no kopio. Tu' a' kou i' kosuhut do komoyon di Buuk do Kinorohingan om i sinundu do Kinorohingan. 25 Tu' apasi nopondo kawagu i tulun di nangapatai, om a' nondo iyolo' kumawin kawagu. Tu' iyo pondo iyolo' di moloikat do hilo'd surga. 26 Om pasal no di tulun di napatai do posion kawagu, om a' kou toi nakabasa' di buuk di Musa do pasal di bulungkut do mikit-sikit o tapui'ddi? Om nokotulis no dot id suang dot ayat diri do minomoros o Kinorohingan dot id di Musa do poingkaa, ‘Iyoho' no o Kinorohingan di Abraham om Kinorohingan di Isak, om Kinorohingan di Yakub,’ ka. 27 Kinorohingan nopo om okon i' ko' Kinorohingan di tulun di napatai. Suwai ko' Kinorohingan iyau di tulun di songimpasi. Napalid kou no kopio'd momusorou,” ka di Yesus.
I Ponuhuan dot Agayo Kopio
28 Om rikot no o songulun o guru do Tourat do minongoi pokinongou di pibara-barasan di Yesus om i tulun do mantad id sinompuruan do Saduki. Om kokito no di gomponuduk do tugama'ddi dot osonong nopo i Yesus do suminimbar di tulun diri. Om uhoto' no dau i Yesus do poingkaa, “Nunu o ponuhuan dit agayo kopio dot id pogialatan do koinsanai di ponuhuan diri?” ka dau. 29 Om boros ka di Yesus do suminimbar, “Ponuhuan nopo dit agayo kopio om poingkaa, ‘Pokinongou kou no, oi bansa' dot Israil! Iri nopo Tuhan i Kinorohingan toko', om Tuhan dit iso' noo. 30 Kosianai nod Tuhan, i Kinorohingan nu do mikuwo'd aayi-ayi' o ginawo nu, om aayi-ayi' o koposion om pomusorou nu, om mikuwo'd aayi-ayi' o kokorisan nu,’ ka. 31 Ponuhuan nod koduwo om poingkaa, ‘Kosianai nod sompi' ko' iyokoyu ngai', do miagal dot osianan ko do diya'd tinan,’ ka. Om aiso' no o ponuhuan dot agayo ko' mantad diti duwo o ponuhuan diti,” ka di Yesus. 32 Om boros ka di guru do Tourat diri dot id di Yesus, “Koontok no kopio iri oi Guru. Dot otopot i' i pinoboros nu do poingkaa: Tuhan no i Kinorohingan dit iso' noo, om aiso' no o Kinorohingan do suwai. 33 Om mositi' no dot osianan o tulun do Kinorohingan do mikuwo'd aayi-ayi' o ginawo dau om pomusorou dau, om aayi-ayi' o kokorisan dau. Om mositi' no dot osianan iyau'd tulun di sompi' ko' iyau ngai' do miagal dot osianan do dau'd tinan. Om iri no ot osonong kopio, ko' mantad do papatahak do porsombahan di sorobon, om i piro-piro o porsombahan do suwai do patahakon dot id Kinorohingan,” ka dau. 34 Om koilaai noddi di Yesus dot osonong kopio o nisimbar di guru do Tourat. Om boro-boros noddi i Yesus dau do poingkaa, “Osomok ko no di Pomorintaan do Kinorohingan,” ka dau. Om aiso' noddi o tongosongulun piya do katama' do mongoi ponguhot di Yesus.
Tuhoton do Pasal di Raja' do Gampamasi
35 Tontok di maso di Yesus do monuduk do hiri'd Walai'd Sasambayangan dot Agayo, om uhoto' no di Yesus iyolo'. Boros ka dau, “Poingkuro i piro-piro o guru do Tourat do milo do momoros do sinakagon di Daud i Raja' do Gampamasi? 36 Dot i Daud piya --- do notudukan di Rusod do Kinorohingan nga' minomoros i' do poingkaa, ‘Boros kad Tuhan dot id Tuhan ku; irikau no dot id dawananan ku, gisom do poinsiribaon ku dot id diya' i piro-piro o pisangod nu,’ ka. 37 Om ondung rinoitan di Daud do, ‘Tuhan’, i Raja' do Gampamasi, om poingkuro'ddi iyau do sinakagon di Daud!” ka di Yesus.
Popoinsan do Mumbangan-bangan di Piro-piro o Guru do Tourat
38 Om boro-boros no i Yesus diyolo' do poingkaa, “Umbangan-banganan no dokoyu i piro-piro o guru do Tourat. Tu' iyolo' nopo om orohian dot anganaru o pakayan do mimpanau, om orohian do suahon do tulun do hiri'd pasar. 39 Om orohian nopo iyolo'd mirikau do hiri'd tirikohonon di tulun dit ongkipangkat, di hirid walai'd sasambayangan, it iyonon dot ongosonong di hiri'd poginakanan. 40 Om monipu' nogi' iyolo' di tongoondu' di nopuadan, om magahau di walai diyolo'. Om anaru tomod nondo o sambayang diyolo' do pangalit-alit diyolo' di kararaat diyolo'. Nga' hukuman indod Kinorohingan iyolo'ddi dit awagat kopio do koimbagu,” ka di Yesus.
Porsombahan do Songulun o Tondu' di Nopuadan
41 Om tontok di poirikau i Yesus do hiri'd hapak di poiiyanan do porsombahan di hiri'd Walai'd Sasambayangan dot Agayo. Om piantangan dau i tulun dot ogumu' do mongoi poposuang di tusin diyolo' do hiri'd pati' di poiiyanan di porsombahan. Om ogumu' o tulun do kaya' do minongoi poposuang do tusin dot ogumu'. 42 Om rikot noddi o songulun o tondu' di nopuadan om mosikin. Om ongoi no iyau poposuang do duwo no o tusin do tambaga' do taparak dit okuri' no kopio o suang. 43 Om lohowo' ngai' no di Yesus i tumatanud dau, om boro-boros no diyolo' do poingkaa, “Ilaai no dokoyu iti: Dot ilo' nopo tondu' do nopuadan om mosikin, om ogumu' nogi' o dau'd pinosuang do hilo'd pati' ko' mantad di pinosuang do koinsanai di tulun do suwai. 44 Tu' iyolo' ngai' nopo om pinapatahak dit a' no diyolo' aayi-ayi'. Nga' iri nopo tondu' di nopuadan diri om imumuyo' nopo dau do papatahak o koinsanai di haro dot id dau, i pomoli i' daa dau do kaakan-akanan,” ka dau.
Pinopoboros i Yesus do Pasal do Karaagan di Walai'd Sasambayangan dot Agayo
1 Om di nopo di tuminongkiad i Yesus di Walai'd Sasambayangan dot Agayo, om boro-boros no di Yesus o songulun do mantad id pogialatan di tumatanud dau. Boros ka dau, “Oi Guru, intong pogi' dilo piro-piro o walai. Om ilo watu do pinawaal. Nga' a' no ogina-gina' o kolumiso',” ka dau. 2 Om boros ka di Yesus, “Okito nu daa ilo piro-piro o walai dot angagayo dilo' koii? Aiso' nondo o tongoiso' piya di watu di pinamaal dilo' dot oolu' do mogitimpak-timpak do hilo'd pinawaalan dilo'. Raagon ngai' nopondo ilo',” ka dau.
Kosusaan om Koinggoritan
3 Om ongoi noddi i Yesus do hiri'd Nulu-Nulu do Saitun, i hiri'd dotimbabaan di Walai'd Sasambayangan dot Agayo. Om irikau no iyau'd hiri. Om rikot no dot id dau i Pitrus, om i Yakub, om i Yohanis, om i Andarias do mongoi boro-boros dau dot iyolo-yolo'. 4 Boros ka diyolo', “Sunudai daa iyahai ondung soira' dot ongosiliu ngai' i komoyon nu'ddi, om nunu o pogintutunan diri dot orikot o maso'ddi?” ka. 5 Om simbar no i Yesus diyolo', “Antaan-taan no dokoyu, om a' kou i' aakalan. 6 Tu' ogumu' motindo o tulun do rumikot do manansanganu do ngaran ku, om momoros nondo dot, ‘Iyoho' no iyau!’ ka. Om ogumu' nondo o tulun dot aakalan. 7 Om korongou kou nopondo do mogisasaap om korongou kou do habar do pisangadan om kada' kou poddosi. Tu' a' no milo dot a' ongosiliu ngai' iri, nga' iri nopo om okon po ko' kopupuson do pomogunan. 8 Om mogisasaap nondo o bansa' om mogisasaap o pomogunan. Om hinonggo- honggo nopo nga' gumuyu' nondo o tana', om mononglous. Om koinsanai'dti om koimpuunon nogi' do koinggoritan, do miagal di tondu' do monohoruol nogi' do mogkosusu. 9 Nga' mositi' no do mumbangan-bangan kou, tu' tangkapon kou motindo om gayaton kou dot id pomisaraan dot id toguang do gompomutus. Om pimbabagan kou nondo do hiri'd walai'd sasambayangan. Om potimbabaon kou nondo di piro-piro o pomorinta' om i piro-piro o raja', tu' tumatanud kou i' doho'. Om iri no o maso dokoyu do pasasi' do pasal doho' dot id diyolo'. 10 Om mositi' no do popinsusuyon po iti Habar dot Osonong do mantad id Kinorohingan dot id koinsanai'd bansa'. 11 Om soira' nopo dot atangkap kou om porikoton kou dot id pomisaraan, om kada' kou katangkabo ondung nunu o poboroson dokoyu do tontok do maso'ddi. Do nunu nopo i potudukon dot id dokoyu do maso'ddi, om poboroson nopo dokoyu dot orikot i maso dokoyu'd moro-boros. Tu' okon i' ko' dokoyu di boros di poboroson dokoyu'ddi, suwai ko' mantad id Rusod do Kinorohingan. 12 Om haro nondo o tulun dot i piya tobpinai dau nga' pohudsuon i' dau do gisom do patayon. Om iyo nogiddi ot osiliu dot id pialatan do miaanak. Tu' i tangaanak nga' sumaap di molohing dau, om papatahak diyolo' do maan patayo'. 13 Om katagadan kou nogi' do koinsanai'd tulun, tu' tumatanud kou i' doho'. Nga' iri nopondo i tulun dit ogirot kasai' do gisom do kopupuson, om posion no iyau,” ka dau.
Karaaton di Mamaraag
14 Om boros ka kawagu di Yesus, “Kokito kou nondo di ‘Karaaton di Mamaraag’ do poingkakat do hiri'd kinoiyonon di pogoduhan daa do poingkakatan dau. (Kopoilaan dot id tulun di mambasa: Ilaan no kopio o komoyon diti!) Do tontok nopoddi, om mositi' no do mogidu' do mongoi'd hilo'd konuluhanan i tulun di hilo'd Yudia. 15 Om iri nopo tulun do hiri'd sakai do taap do walai dau, om kada' no lintuhun do mongoi suang di walai do mongoi panganu do nunu nopo do mantad hiri'd walai dau. 16 Om i tulun di hiri'd dumo dau nga' kada' no guli' do mongoi panganu di rasuk dau di posoibahon. 17 Araat no kopio o tadau'ddi dot id tondu' di monontian, om i tongoondu' di poposusu do tanak! 18 Sumambayang kou no om a' i' ongosiliu iri do tontok do dongrumasam. 19 Om tontok nopo di piro-piro o tadau di korolosi kopio'ddi om haro nondo o kosusaan dit a' po insan kosiliu do mantad di wonsoyo' id Kinorohingan iti pomogunan om gisom do baino', om a' nondo osiliu kawagu o miagal diri. 20 Ondung a' daa'd Kinorohingan ponibaon o maso'ddi, om aiso' no daa o tiso' piya'd tulun dot apasi. Nga' ponibaon id Kinorohingan i maso'ddi, dot i tulun do songonuon dau o kopoinibaan. 21 Tontok nopoddi, om ondung haro o songulun do moro-boros dot id dokoyu dot, ‘Ontong pogi', hino no moti'd hiti i Raja' do Gampamasi,’ ka, ko', ‘Hino no iyau'd hilo'!’ ka --- om kada' kou nogi' ponongkuyaai di tulun diri. 22 Tu' rumikot motindo o piro-piro di gampamasi di goudut om piro-piro o nabi di goudut. Om mingwonsoi nondo iyolo' do piro-piro o koimayaan, om i kosuayan kopio do maan daa do pagakal do tulun, om milo-milo nopo om pagakal nogi' do tulun piya di nasanganu nod Kinorohingan. 23 Iyo nopoddi, om antaan-taan no kopio dokoyu! Nokosunud ngai' ku no dokoyu iti do tontok dit a' po osiliu o miagal diri,” ka.
Korikatan di Tanak do Tulun
24 Om boros ka kawagu di Yesus, “Om katalib pondo i kosusaan diri, om tumuong nondo ilo tadau, om a' mulinau ilo tulan. 25 Om rumatu' ngai' nondo ilo rombituon do mantad hilo'd tawan, om angagangau ngai' nopondo i pomorinta' do hilo'd tawan. 26 Om tontok nopondoddi om okito nondo i Tanak do Tulun do rumikot dot id rolot do haun do mikuwo'd kuasa' om kagayaan dau. 27 Om suhuon nondo dau i piro-piro o moloikat do mongoi ponimung di tulun di nongopili' dau do mantad id apat o linsuk diti pomogunan, om mantad id tisan do tana' om korikot do hilo'd tisan do tawan,” ka di Yesus.
Ponudukan dot Aanu do Mantad id Guas dot Ara
28 Om boros ka kawagu di Yesus, “Pinsingilaan no dokoyu i ponudukan dot aanu do mantad id guas dot ara. Tu' tumomou nopo om mongomulok om momutolid i raan do kayu'ddi, om oilaan no dokoyu dot oruhai no dot orikot i maso dot alasu'. 29 Om iyo nogiddi, tu' okito nopo dokoyu dot ongosiliu o miagal diri, om oilaan no dokoyu dot oruhai no kopio dot orikot o maso'ddi. 30 Ilaai no dokoyu! Dot a' po angapatai ngai' iti tulun do songimpasi do dinondo, om ongosiliu ngai' no o miagal diri. 31 Tumanus i' o tawan om pomogunan, nga' boros ku nopo om hino kasai' i' do gisom do poingompus,” ka dau.
Aiso' i' o Tulun do Koilo do Tadau ko' Jam Diri
32 Om boros ka kawagu di Yesus, “Mulong pod miagal diri, nga' aiso' i' o songulun piya do koilo ondung soira' o tadau ko' jam diri. Iri piya i moloikat do hilo'd surga nga' a' i' koilo, om i Tanak nga' a' i' koilo, suwai ko' iri no i Tapa' o koilo. 33 Iyo nopoddi om apatut no do minsan-insan om mumbangan-bangan kou, tu' a' kou i' koilo ondung soira' dot orikot i maso'ddi! 34 Kowoyo-woyoo' nopo do korikatan dau, om iyo di kowoyo-woyoo' do songulun di tuminongkiad di walai dau om minongoi do hiri'd pomogunan dit osodu'. Om minonuhu' iyau di piro-piro o susuhuon dau do mongilo-ilo do hiri'd walai dau di daamot dau do nokotongkiad. Om tontuo' nogiddi dau o karaja' do pointikid-tikid di susuhuon dau. Om bilinai no dau i susuhuon dau di sinuhu' do madtamong di wawayaan do mumbangan-bangan kopio. 35 Iyo nopoddi om iyokoyu nga' apatut do mumbangan-bangan no, tu' a' i' dokoyu oilaan ondung soira' do koguli' i sanganu di walai'ddi, dongsosodopon tuu ko' pitangatuong, ko' minsusuab po tuu ko' i mulai nogi' o tadau. 36 Tu' ondung sigog indo do korikot iyau, om kada' pondo do koodop kou dot orikatan dau. 37 Tu' koinsanai'dti nokoboros ku dokoyu om poboroson ngai' ku nogi' iti dot id koinsanai'd tulun: iri no tu' mumbangan-bangan kou no kasai'!” ka dau.
Pakat do Sumaap di Yesus
1 Di nopo di duwo po o tadau om orikot no i karamayan do Tadau'd Agayo do Paska om i Tadau'd Agayo dit A' Kipangambang, om pogiupakat no i piro-piro o boyoon dot imam om i guru do Tourat do mogihum do ralan do lumisok-lisok i' do manangkap di Yesus. Om patayon nogindo daa diyolo' iyau. 2 Om boros ka diyolo', “Nga' kada' toko' po wonsoyo' o miagal diri do maso pod haro o karamayan, tu' gumangau nondo om sumaap dati' ilo tulun dot ogumu',” ka.
Tinuntugan i Yesus do Tumau dot Osonong o Kosingudan
3 Tontok di hilo' i Yesus id Baitani, di hiri'd walai di Simun, i kitoruol do kusta di gulu po, om rikot no o songulun o tondu' dot id di Yesus. Om minigit iyau dot iso' o kakanan dit okooro' do marmar do winonsoi, do kisuang do tumau dot osonong o kosingudan om it aiso' o rolot, om agayo o gatang. Tontok di poirikau i Yesus do makan, om babako' no di tondu' i poiiyanan diri om potuntugo' no i tumau'ddi do hiri'd tulu di Yesus. 4 Om kongotogod noddi i piro-piro di tulun di hino'd hiri, om mogiboro-boros nopoddi iyolo' do poingkaa, “Nunu'ddi o kinokoyo-koyoon dilo' do rubaton tomod. 5 Tu' milo i' daa do padagangon i tumau'ddi, om ogumu' i' daa ko' tolu nahatus o tusin do pirok do gatang diri. Om patahakon nogindo i tusin di gatang diri dot id tulun do mosikin!” ka diyolo'. Om otogod diri iyolo' di tondu'ddi. 6 Nga' boro-boros noddi i Yesus do poingkaa, “Pologoso' nopo dokoyu iyau. Nokuro tu' papasala' kou dau! Tu' iri nopo i winonsoi dau'ddi dot id doho' om osonong i' om apatut do royohon. 7 Tu' iri nopo tulun do mosikin om hino kasai' i' dot id pogialatan dokoyu, om soira' nopo dot orohian kou do monulung diyolo' om milo kou i' do monulung diyolo'. Nga' iyoho' nopo om a' i' poinsugku' kasai' dokoyu. 8 Iti nopo tondu'dti om minomonsoi di milo dau'd wonsoyon. Om tinuntugan oku dau di tumau dit osonong o kosingudan do poposodia' doho' do maan lobongo' dot a' po orikot i maso'ddi. 9 Ponongkuyaai kou no! Do honggo nopondo o posusuyan di Habar dot Osonong do mantad id Kinorohingan, do hiti'd pointongkop diti pomogunan, om iti winonsoi diti tondu' diti nga' popinsusuyon nogindo do kopomuhandaman dau,” ka di Yesus.
Nakaakun i Yudas do Papadagang di Yesus
10 Om haro'ddi o songulun dot id pogialatan di hopod om duwo di tumatanud di Yesus, i roitan dot i Yudas Iskariot, do minongoi solowot di piro-piro o boyoon dot imam do papadagang di Yesus dot id diyolo'. 11 Om ongosonong nopo o ginawo diyolo' do nokorongou di boros di Yudas Iskariot diri, om pamatos noddi iyolo' do manahak di Yudas do tusin. Om mantad noddi do mogihum nopoddi i Yudas do maso dit osonong do papatahak di Yesus dot id diyolo'.
Minangakan i Yesus do Taakanon do Dong Paska do Potorungak di Piro-Piro o Tumatanud Dau
12 Tontok di tadau'd koiso' di Tadau'd Agayo do Roti dit A' Kipangambang --- tontok do monumbali' o tulun do dumba' di dong Paska, om rikot no dot id di Yesus i piro-piro o tumatanud dau. Om ponguhot no iyolo' dau do poingkaa, “Hinonggo o korohian nu do posodiaan dahai do taakanon di dong Paska do maan nu oi Guru?” ka diyolo'. 13 Om ponuhu' no i Yesus do duwo o tulun dot id pogialatan diyolo'. Boros ka dau, “Ongoi kou do hilo'd bandar, do hilo' nopo om haro o songulun o kusai do kiinigit do kakanan do kisuang do waig, do mongoi solowot dokoyu. Om tumanud kou nopo dau 14 do mongoi do hiri'd walai di solokoyon dau om sunudan no i sanganu di walai do poingkaa, ‘Monguhot i Guru, ondung hinonggo o tiyonon dau om i tumatanud dau do mangakan-ngakan di taakanon di dong Paska,’ kanto dokoyu. 15 Om tudukan kou nondo dau dot iso' o bilik dot agayo do hiri'd sawat di nosodia' mantad no, om haro nogi' o konunu-nunuan do hiri. Om hiri no o posodiaan dokoyu do taakanon do maan toko' akano',” ka dau. 16 Om pamanau noddi i duwo di tumatanud di Yesus diri do minongoi do hiri'd bandar, om kosiliu nopo kopio o miagal di pinoboros di Yesus dot id diyolo'. Om posodiawo' noddi diyolo' i taakanon do dong Paska. 17 Om otuong noddi om rikot nod hiri i Yesus om i hopod om duwo o tumatanud dau. 18 Om maso poddi diyolo' do songirikau do makan om boro-boros no i Yesus do poingkaa, “Pokinongou kou no: haro nondo o songulun dot id pogialatan dokoyu di potorungak doho' do makan do dinondo do papadagang doho',” ka dau. 19 Om tuminongob tomod diri i tumatanud di Yesus do nokorongou'ddi. Om pogisowoli-woli nopoddi iyolo' do minonguhot di Yesus do poingkaa, “Okon i' bo ko' iyoho' o komoyon nu'ddi oi Guru!” ka diyolo'. 20 Om boros ka di Yesus do suminimbar, “Iri nopo tulun diri om id pogialatan i' dokoyu i hopod om duwo tumatanud ku, i kaandad doho' do papatabung do roti do hilo'd mangkuk. 21 Atantu' no dot apatai i Tanak do Tulun, do miagal di nokotulis dot id Buuk do Kinorohingan. Nga' obungou no i tulun di papadagang di Tanak do Tulun! Osonong nogi' daa dot a' nopo kopio nopogkosusu o tulun diri!” ka dau.
Porjomuan di don Tuhan
22 Om tontok di makan iyolo', om anu no i Yesus dot iso' o roti, om sambayang no iyau do minongunsikou'd Kinorohingan. Om pogikobing-kobingo' noddi dau i roti'ddi om potikido' no dau dot id tumatanud dau, om boro-boros nod, “Onuo' no dokoyu iti, om akanon no; tu' iti no o tinan ku,” ka dau. 23 Om ongoi no iyau anu do sansangkir o waig dot anggur, om sambayang no iyau do mongunsikou'd Kinorohingan, om patahako' noddi dau i sangkir diri dot id tumatanud dau. Om inum ngai' noddi iyolo' dit anggur diri. 24 Om boro-boros noddi i Yesus do poingkaa, “Iti no o raha' ku di popogirot kopio di tumpongo do Kinorohingan, i raha' di potuntugon do bagi'd tulun dot ogumu'. 25 Ponongkuyaai kou no: Tu' a' oku nondo koinum kawagu do waig dot anggur diti do gisom dot orikot i maso ku do monginum di waig dot anggur di wagu do potorungak dokoyu do hilo'd Pomorintaan do Kinorohingan,” ka dau. 26 Om podsinding noddi iyolo' dot iso' o sinding do pamarayou. Om ongoi nogiddi iyolo' do hilo'd Nulu-Nulu do Saitun.
Pinoboros Mantad do Mogolim i Pitrus di Yesus
27 Om boro-boros noddi i Yesus dot id piro-piro di tumatanud dau do poingkaa, “Oinsanan kou nopondod mogidu' do tumongkiad doho'. Tu' nokotulis no dot id Buuk do Kinorohingan o poingkaa, ‘Patayon nondod Kinorohingan i gompomogompi'd dumba' dau, om kopogitongkiad-kiad nopondo i dumba' dau'ddi,’ ka. 28 Nga' apasi oku nopondo kawagu, om mogulu oku nondo dokoyu do mongoi do hilo'd Galilia,” ka dau. 29 Om boros ka di Pitrus dot id di Yesus, “Tumongkiad ngai' piya diya' ilo wokon, oi Guru, nga' a' oku i' kopio iyoho' tumongkiad diya',” ka dau. 30 Nga' boros ka di Yesus, “Mumbangan-bangan. Tu' a' po koponingkukuhuk dot induwo o manuk do totuong diti om intolu ko no kopogolim doho',” ka dau. 31 Om boros ka kawagu di Pitrus do pinoposunud kopio, “Mulong piya do patayon oku do potonggoyon diya' nga' a' oku i' kopio momoros dot a' oku kotutun diya', oi Guru!” ka dau. Om iyo ngai' nogiddi o pinoboros di tumatanud do suwai.
Suminambayang i Yesus do Hilo'd Gitsamani
32 Om korikot noddi iyolo' do hiri'd iso' o kinoiyonon di roitan do Gitsamani, om boro-boros noddi i Yesus di piro-piro o tumatanud dau do poingkaa, “Irikau kou pod hiti, do daamot ku do mongoi sambayang,” ka dau. 33 Om angatai noddi di Yesus i Pitrus, om i Yakub, om i Yohanis do minoyo' dau. Om timpuun noddi i Yesus do tumongob om atangkabo. 34 Om boros kaddi dau dot id tumatanud dau, “Tumongob oku no kopio; iyo poddi matai no ot opurimanan ku. Undorong kou nopod hiti, om mumbangan-bangan kou no!” ka dau. 35 Om pamanau noddi i Yesus do minongoi do hiri'd sodu-odu', om tungub nopo iyau do hiri'd tana' om sambayang no. Om id suang nopod sambayang dau om pinokianu dau dot a' iyau minog dot oontok di koinggoritan, do milo-milo no. 36 Om sambayang no iyau do poingkaa, “Apa', oi Apa', iya' nopo om aiso' i' o tiso' dot a' nu milo'd wonsoyon. Poinsoduwo' no do mantad id doho' iti koinggoritan diti. Nga' a' indo tumanud do doho'd korohian, suwai ko' tumanud nopo do korohian do Tapa',” ka dau. 37 Om guli' noddi i Yesus do hiri'd piro-piro o tumanud dau om kabantalai no dau iyolo' do koodop. Om boro-boros no iyau di Pitrus, “Oi Simun, koodop ko i' pama? Mogot po om kogoos ko dot a' koodop dot ongosajaam piya!” ka dau. 38 Om boro-boros noddi i Yesus diyolo' do poingkaa, “Umbangan-banganan no dokoyu, om sumambayang kou no om a' kou i' oontok do pogumbalan. Atantu' no dot orohian i' daa o rusod dokoyu do momonsoi dot otopot, nga' a' kou i' milo do momonsoi tu' oluhoi i' o kowoyo-woyoo' do tulun,” ka dau. 39 Om ongoi po kawagu i Yesus sambayang dot iyo kasai' iddi gulu o pinoboros dau. 40 Om guli' no kawagu i Yesus do hiri'd tumatanud dau. Om kabantalai po kawagu dau do koodop i' iyolo', tu' siodop no kopio iyolo'. Om aiso' noddi o milo diyolo'd poboroson dot id di Yesus. 41 Om tontok di guminuli' kawagu i Yesus, dot id diyolo' di kointolu no, om boro-boros noddi iyau diyolo' do poingkaa, “Koodop kou po pama kasai' do popotingkod do huyan dokoyu? Ula' po dokoyu no! Tu' norikot no moti' i maso do Tanak do Tulun do patahakon dot id longon do tulun di kidusa. 42 Tungag kou, om mamanau toko' i'! Ontong kou pogi'! Nga' nokorikot no moti' i tulun di papadagang doho'!” ka dau.
Tinangkap i Yesus
43 Om maso po di Yesus do moro-boros, nga' korikot no i Yudas i songulun dot id pogialatan di hopod om duwo di tumatanud di Yesus. Om ogumu' po o tulun do suwai dot ongkiinigit do gayang om bobobog do manud-tanud di Yudas. Iyolo' nopoddi om sinuhu' di piro-piro o boyoon dot imam om i guru do Tourat, om i boyoon do tulun do Yohudi. 44 Om nosunudan mantad no iyolo' di tulun di papadagang diri dot iso' o tanda' do maan diyolo'd pogintutunan. Boros ka dau, “Isai nopo o tulun di tunguban ku, om iri no i tulun diri. Om tangkapon nopo dokoyu iyau om oiton no do mikuwo'd tamangan kopio,” ka dau. 45 Om rikot no i Yudas, om pitilombus nopo iyau do minongoi rapou di Yesus, om boro-boros nod, “Oi Guru!” ka. Om tungubai noddi dau i Yesus. 46 Om tangkapo' noddi di tulun di moyo-woyo' di Yudas i Yesus, om kagasai no diyolo' iyau. 47 Nga' haro'ddi ot iso' di tulun di hino'd hiri do minongodong di gayang dau om tibaso' no dau i turipon di Boyoon dot Agayo dot Imam, gisom do kaansap nopo o tolingo di turipon diri. 48 Om boros kaddi di Yesus dot id diyolo', “Tulun oku toi'dti dot araat, do gisom do rumikot kou dot ongkiinigit do gayang om bobobog do mongoi panangkap doho'? 49 Monikid tadau oku i' do monuduk do hilo'd Walai'd Sasambayangan dot Agayo, dot id toguang ngai' dokoyu, nga' a' oku i' dokoyu tinangkap. Nga' iyo nobo'dti ot osiliu om abayaan i' i nokotulis dot id suang do Buuk do Kinorohingan,” ka dau. 50 Om poggidu' ngai' nopoddi i tumatanud di Yesus do tuminongkiad dau. 51 Om haro'ddi ot iso' o tanakwagu do tuminanud di Yesus do kikurilib nod kain. Om tangkapo' no daa di tulun diri i tanakwagu'ddi, 52 nga' patatako' nopo dau i kain dau'ddi, om panangkus no do minogidu' do poillabas.
Pinotimbaba' i Yesus di Gompomutus do Don Tugama'
53 Om pootodo' noddi i Yesus do hiri'd walai di Boyoon dot Agayo dot Imam. Om nokotimung nod hiri i piro-piro o boyoon dot imam om i boyoon do tulun do Yohudi om i guru do Tourat. 54 Om tanud i' i Pitrus di Yesus nga' hiri'd sodu-odu' do gisom do nokorikot do hiri'd natad di walai di Boyoon dot Agayo dot Imam. Om irikau no iyau do hiri'd somok di tapui do minagamut do poinsugku' di piro-piro o madtatamong. 55 Om tumotos tomod diri i piro-piro o boyoon dot imam om koinsanai di Gompomutus do Don Tugama' do mogihum do kointalangan kopio do poimpahan do papasala' di Yesus, om milo indo diyolo' do hukuman do kapatayon i Yesus. Nga' aiso' i' o tiso' piya do nokito diyolo' do kointalangan kopio do milo'd poimpahan do kapasalaan di Yesus. 56 Ogumu' i' daa i tulun di suminiliu'd sasi' di linohou do poposunud dit a' otopot do pasal di Yesus, nga' a' i' mogiiyo o poboroson diyolo'. 57 Om ingkakat noddi o piro-piro di sasi' do pinopoboros dit a' otopot do pasal di Yesus. Boros ka diyolo', 58 “Norongou dahai iti tulun diti do minomoros do poingkaa, ‘Raagon ku'ti Walai'd Sasambayangan dot Agayo diti winonsoi'd tulun, om katalib pondo o tolu o tadau om popoingkakat oku nondo do walai'd sasambayangan dit okon ko' tulun o momonsoi,’ ka dau,” ka diyolo'. 59 Nga' a' i' mogiiyo i pinoboros di tulun di suminiliu'd sasi'ddi. 60 Om ingkakat no i Boyoon dot Agayo dot Imam dot id toguang ngai' diyolo', om uhoto' no dau i Yesus do poingkaa, “A' nu i' simbaron i pinotondos diyolo' diya'ddi?” ka dau. 61 Nga' a' nopo minungkomi i Yesus. Om a' iyau suminimbar. Om uhoto' po kawagu di Boyoon dot Agayo dot Imam i Yesus do poingkaa, “Iya' nogi' i Raja' do Gampamasi, i Tanak do Kinorohingan dit Olidang Kopio?” ka dau. 62 Om boros ka di Yesus do suminimbar, “Iyoho' nogi' iri. Om kokito ngai' kou nondo do Tanak do Tulun do poirikau do hiri'd dawananan do Kinorohingan dit Osundu Kopio, om rumikot iyau dot id rolot do haun do mantad hilo'd tawan!” ka dau. 63 Om hurako' nopo di Boyoon dot Agayo dot Imam i pakayan dau, om boro-boros nod, “A' no minog do haro o sasi'! 64 Nokorongou ngai' kou no di boros dau do mongindaraat do Kinorohingan. Poingkuro no o dokoyu'd tosorou do dinondo?” ka dau. Om oinsanan nopo iyolo' do pinopoboros do kisala' i Yesus om apatut do hukuman do kapatayon. 65 Om timpuun noddi o piro-piro o tulun do mindula' di Yesus, om sompono' no diyolo' o mato dau om pimbabagai nogi', om moro-boros do poingkaa, “Tonduwai daa ondung isai i minomobog diya'?” ka. Om iri nogi' i piro-piro o madtatamong nga' minintompiling i' di Yesus.
Minogolim i Pitrus di Yesus
66 Tontok di hiri i Pitrus id natad, om rikot noddi do hiri o tiso' o tondu' do susuhuon di Boyoon dot Agayo dot Imam. 67 Om kokito no dau i Pitrus do magamut do hiri'd somok di tapui, om sonsodo' no dau o rabas di Pitrus, om boro-boros nod, “Okon toi ko' iya' nga' songkoruhangan ngai' nogi' di Yesus, i tulun do Nasarit diri?” ka dau. 68 Nga' pogolim no i Pitrus. Boros ka dau do suminimbar di susuhuon diri, “A' oku i' koilo om a' oku kosuhut dino komoyon nu,” ka dau. Om ongoi noddi i Pitrus do hiri'd wawayaan do sumuang do hiri'd natad di walai di Boyoon dot Agayo dot Imam. Om diiri nod minoningkukuhuk i manuk. 69 Om kokito po kawagu di tondu' diri i Pitrus, om boro-boros noddi iyau dot id koinsanai di tulun di hino'd hiri, “Atantu' nod iyau nga' songkoruhangan nogi' diyolo',” ka. 70 Nga' pogolim po kawagu i Pitrus. Om a' po alaid do mantad diri om boro-boros no dot id di Pitrus i tulun di hino'd hiri do poingkaa, “A' nu no milo dot olimon dot iya' nga' songkoruhangan i' diyolo', tu' iya' nga' mantad i' do hilo'd Galilia!” ka diyolo'. 71 Om boros kaddi di Pitrus, “Sumumpa' oku no dot otopot i' iti poboroson ku! Hukuman oku nopod Kinorohingan do mongudut oku no!” ka dau. 72 Om diiri nod minoningkukuhuk i manuk do koinduwo. Om kahandamai noddi di Pitrus do nokopomisunud mantad no i Yesus dau dot, “A' po koponingkukuhuk o manuk dot induwo, om intolu kono pogolim doho',” ka. Om pingihad tomod noddi i Pitrus.
Pinotimbaba' i Yesus dot id di Pilatus
1 Osuab poddi kopio, om oinsanan nopo i Gompomutus do Don Tugama' om i boyoon dot imam om i boyoon do tulun do Yohudi om i guru do Tourat do minogiboro-boros dot oruuhai. Om kagasai noddi diyolo' i Yesus, om suhuo' no diyolo' iyau do minamanau om patahako' noddi diyolo' iyau dot id di Pilatus. 2 Om uhoto' no di Pilatus i Yesus do poingkaa, “Otopot no do raja' ko do tulun do Yohudi?” ka dau. Om boros ka di Yesus do suminimbar, “Iyo nondo ino boros nu,” ka dau. 3 Om ogumu' o pinoboros di piro-piro o boyoon dot imam do papasala' di Yesus. 4 Om uhoto' po kawagu di Pilatus i Yesus, “A' ko i' nangku sumimbar? Tu' antangai pogi' nga' ogumu' no i pinoboros diyolo' do papasala' diya'!” ka dau. 5 Nga' a' nopo suminimbar i Yesus dot ongoiso' piya, gisom do nosuayan i Pilatus.
Hinukuman i Yesus do Kapatayon
6 Pointikid-tikid do Tadau'd Agayo do Paska, om koubasan no di Pilatus do papalabus do songulun di songinggiil do tumanud do pokionuon di tulun dot ogumu'. 7 Om haro'ddi o songulun dot id pogialatan di tulun di songinggiil di nakapamatai'd tulun do tontok di suminaap iyolo'd porinta. Ngaran nopo di tulun diri om i Barabas. 8 Om timung ngai' noddi i tulun dot ogumu', om pokionuo' no diyolo' do polobuson di Pilatus o songulun di poinggiil do miagal di koubasan do wonsoyon di Pilatus. 9 Om uhoto' no di Pilatus iyolo'. Boros ka dau, “Uhang i' dokoyu do polobuson ku dokoyu ilo raja' do tulun do Yohudi?” ka. 10 Tu' pinoboros pogi' di Pilatus o miagal diri nga' noilaan no dau do kinapatahakan nopo di piro-piro o boyoon dot imam, di Yesus dot id dau nga' osolon i' toomod iyolo'. 11 Nga' a' nopo otingkod-tingkod i piro-piro o boyoon dot imam do mominsuhu' di tulun dot ogumu' do monuhu' di Pilatus do papalabus di Barabas. 12 Om uhoto' po kawagu di Pilatus i tulun dot ogumu'ddi, “Iyo nopoddi, om nunu'ddi ot apatut ku'd wonsoyon dot id tulun di roitan dokoyu'd raja' do tulun do Yohudi'ddi?” ka. 13 Om pagarango' no diyolo' o poingkaa, “Posolibon nopo iyau,” ka. 14 Nga' boros ka di Pilatus do minuhot diyolo', “Nunu o karaaton dau?” ka dau. Nga' okon nogi' dot opuhod iyolo' do pinapagarang do, “Posolibon nopo iyau!” ka. 15 Om polobuso' noddi di Pilatus i Barabas. Om ponuhu' no iyau'd tulun do momobog di Yesus, om patahako' nogiddi do posolibon. Tu' poposonong i Pilatus do ginawo di tulun dot ogumu'.
Hiningi-Hingi di Piro-Piro o Soudor i Yesus
16 Om posuango' noddi di piro-piro o soudor i Yesus do hiri'd tiiyonon do momisara' i hiri'd walai do gobunor, om oinsanan nopoddi i posukan do soudor do linohou do tuminimung. 17 Om pakayai nogiddi diyolo' i Yesus do rasuk dot otomou daragang-ragang, dit anaru, om pomonsoi no iyolo' do tupi' do raan-raan di kirugi do ponokotupi' do raja', om potupiyai noddi diyolo' di Yesus. 18 Om boro-boros noddi iyolo' do sumuwau dau, “Tabi' Raja' do tulun do Yohudi!” ka. 19 Om bobogo' nogiddi diyolo' di sukud o tulu di Yesus. Om pindulaai diyolo' iyau. Om minotud iyolo' dot id toguang di Yesus. 20 Kohingi-hingi poddi diyolo' iyau, om iduwo' no diyolo' i rasuk dit otomou daragang-ragang om porosukai no diyolo' kawagu i rasuk mantad di Yesus, om posoliwano' noddi iyau dot ongoyon posolibo'.
Pinasalib i Yesus
21 Hiri noddid tanga'd ralan om sansagai no diyolo' ot iso' o tulun do sumaan di salib di Yesus. Iri nopo tulun diri om mantad id kampung, om pakayaan do hiri'd bandar. (Ngaran nopo dau om i Simun, i mantad hilo'd Kirini di gulu po --- i tapa' di Aliksandor om i Rupus.) 22 Om pokoyoo' noddi diyolo' i Yesus dot id iso' o kinoiyonon di roitan do Gulguta. Komoyon nopoddi nga', “Kinoiyonon do Korulung do Tulu”. 23 Om hiri no do pinoinum daa diyolo' i Yesus do waig dot anggur i rinalatan do mur, nga' a' i' mininum i Yesus di waig dot anggur diri. 24 Om posolibo' noddi diyolo' i Yesus, om pogibohogi-hogio' no diyolo' i pakayan dau, do nundi' do minanantu' dit aanu do pointikid-tikid diyolo'. 25 Om jam kosiam nogid kosuabon do pinasalib diyolo' i Yesus. 26 Om posokoto' no diyolo' do hiri'd dompok ponong id sawat di salib di Yesus i pinotulisan do pinotondos dot id dau do poingkaa, “Iti no i Raja' do tulun do Yohudi,” ka. 27 Om pinapasalib po iyolo' do duwo o tulun di mananakau do pinaandad di Yesus. Om iri no tiso' om id dawananan di Yesus, om iri no tiso' om id dogibangan dau. 28 Om iyo noddi do nabayaan i nokotulis dot id Buuk do Kinorohingan do poingkaa, “Pohompiton iyau do tulun dit angaraat,” ka. 29 Om songbingog-bingog do tulu i tulun di katalib do hiri om momohingi-hingi di Yesus. Boros ka diyolo', “Iya' no i minomoros do mamaraag di Walai'd Sasambayangan dot Agayo, om kowonsoi i' kaka'ndo iri dot id suang do tolu o tadau. 30 Lintuhun daa do mantad hino'd salib, om posion no o tinan nu!” ka diyolo'. 31 Om i piro-piro o boyoon dot imam om i guru do Tourat nga' monguntotogod nogi' di Yesus. Boros ka diyolo' do mogiboro-boros, “Mamasi i' iyau'd tulun do suwai, om a' indo milo do mamasi do dau'd tinan! 32 Ondung raja' iyau dot Israil, om Raja' di Gampamasi, om lumintuhun nopo daa iyau do mantad hilo'd salib do dinondo, om kokito i' iyahai om otumbayaan indo iyahai dau!” ka. Om i tulun di pinasalib do poindamot di Yesus nga' momohingi-hingi i' dau.
Kinapatayon di Yesus
33 Om pitangaadau noddi, om tuong nopo o pointongkop do pomogunan diri do solinaid do tolu o jam. 34 Om pomogiak no i Yesus dot opuhod di jam kotolu nod sosodopon. Boros ka dau, “Iloi, Iloi, lama sabaktani?” ka. Komoyon nopoddi nga', “Oi Kinorohingan ku, oi Kinorohingan ku, nokuro tu' tinongkiadan oku diya'?” ka. 35 Om haro'ddi o piro-piro o tulun do hiri do nokorongou do giniakan diri. Om boros ka diyolo', “Momolohou iyau di Ilia!” ka. 36 Om osiau nopo i tiso' diyolo' do minongoi panganu di koiyo-iyo'd rongilut. Om poobugo' nori do waig dot anggur dit oonsom. Om posuluho' no dau do tompok dot iso' o kayu, i koiyo-iyo'd rongilut diri om poinsawato' noddi dau do pinopotopis di munung di Yesus, mikuwo'd minoro-boros do poingkaa, “Andad toko' po, antangai toko' po ondung rumikot i Ilia do mongoi popolintuhun dau do mantad hilo'd salib,” ka. 37 Om pomogiak noddi i Yesus, om koidu' no o ginawo dau. 38 Om i tirai di pinorinding do hiri'd Walai'd Sasambayangan dot Agayo nga' kopiduwo nopo do nohurak do mantad po do hiri'd sawat om gisom do nokosondot do hiri'd siriba'. 39 Om i soudor di poingkakat dot id somok di salib nga' nokokito nogi' do kowoyo-woyoo' di Yesus do minatai. Om boros ka di soudor diri, “Otopot no kopio do Tanak do Kinorohingan o tulun diti,” ka dau. 40 Om haro nogi' o piro-piro o tongoondu' do hiri'd sodu' do nokokito ngai'ddi. Id pogialatan nopo diyolo'ddi om hino nogi' i Salomi, om i Maria Magdalina, om i Maria i tina' di Yakub it omulok poddi, om i Yosis. 41 Om iyolo' no i tongoondu' di tuminanud di Yesus om minonguhup dau di hilo' po iyau id Galilia. Om ogumu' po o tongoondu'd suwai do hiri di nangkatanud di Yesus do minongoi do hilo'd Yorusalim.
Linobong i Yesus
42-43 Om tumuong noddi, om korikot no i Yusup i mantad hilo'd Arimatia. Iyau nopo om id pogialatan nogi' di Gompomutus do Don Tugama' di pusohon kopio. Om iyau nga' mandad-andad nogi' do korikatan di Pomorintaan do Kinorohingan. Tadau nopoddi om tadau do Kopongumpayan. (Iri no i tadau dit a' po orikot o tadau'd Sabat.) Om iri noddi o nakatama-tama' di Yusup do mongoi solowot di Pilatus do mokianu di rata' di Yesus. 44 Nga' osuayan no i Pilatus do nokorongou do napatai no i Yesus. Om ponuhu' noddi i Pilatus do tulun do mongoi pomolohou di boyoon do soudor, om uhoto' no di Pilatus iyau ondung laid no kapatai i Yesus. 45 Om korongou poddi di Pilatus i boros di boyoon do soudor diri, om pabanaro' noddi di Pilatus i Yusup do minongongoi di rata' di Yesus. 46 Om pomoli noddi i Yusup do kain linan dit osonong kopio, om polintuhuno' no dau i rata' di Yesus, om lopoto' no dau di kain. Om ongoyo' no dau lobongo' i rata' di Yesus do hiri'd lobong di pinoluang do hiri'd pampang. Om liido' no dau o watu dot agayo do pinonompon di wawayaan di lobong. 47 Om nokito i' di Maria Magdalina, om i Maria i tina' di Yosis, i pinoilihan di rata' di Yesus.
Napasi Kawagu i Yesus
1 Om katalib poddi i tadau'd Sabat, om ongoi no i Maria Magdalina, om i Maria i tina' di Yakub om i Salomi, pomoli do tumau dit osonong o kosingudan do pongumau di rata' di Yesus. 2 Om osuab po di tadau'd koiso' do minggu'ddi, di mulai nogi' o tadau, om ongoi no iyolo' do hiri'd lobong. 3-4 Om tontok di hiri po iyolo'd tanga'd ralan om pogiboro-boros no iyolo' do poingkaa, “Isai ma o monulung dati' do momoliid di watu di pinonompon di wawayaan di lobong diri?” ka. Tu' iri nopo i watu'ddi om agayo kopio. Om korikot noddi iyolo' do hiri'd lobong, nga' kokito no diyolo' do noliid no i watu. 5 Om suang noddi iyolo' do hiri'd lobong diri. Om kokito no diyolo' o songulun o tanakwagu do kipakayan dot anaru dot opurak, do poirikau do hiri'd suang di lobong do hiri'd dawananan diyolo'. Om kapagag nopo iyolo'. 6 Om boros ka di tanakwagu'ddi dot id diyolo', “Kada' kou kooris! Oilaan ku i' do mogihum kou daa di Yesus i tulun do Nasarit i pinasalib diri. A' no iyau hino'd hiti. Tu' napasi no iyau kawagu! Ongoi kou pogi' ontong dilo kinoliiyon dau. 7 Nga' pamanau kou nogi' do dinondo do mongoi pomisunud di piro-piro o tumatanud dau om i Pitrus do habar diti. Om poboroson no o poingkaa, ‘Mogulu- gulu iyau dokoyu do kumaa do hilo'd Galilia. Om okito indo dokoyu i Yesus do hilo', do miagal di nokoboros mantad dau dokoyu,’ kanto,” ka di tanakwagu. 8 Om soliwan no iyolo' do mantad hiri'd lobong om panangkus noddi iyolo' tu' nakapagag kopio iyolo' om moddosi. Om aiso' i' o pinosunud diyolo' dot id disai nopo tu' moddosi tomod iyolo'.
PONGOLIMPUPUS DO TINULIS DI MARKUS DO TUMANUD DO SOLINAN DI GULU PO
Minintalang i Yesus dot id di Maria Magdalina
9 Om kapasi poddi kawagu i Yesus do mantad id kapatayon dit osuab po di tadau'd Minggu', om intalang no iyau dot id di Maria Magdalina. (Sinunsub di Yesus o turu' o rusod dot araat do mantad id dau di gulu po.) 10 Om pamanau no i Maria Magdalina do minongoi poposunud di nongosiliu'ddi dot id tongotambalut di Yesus, i maso pod mogihad. 11 Nga' a' i' iyolo' notumbayaan do nokorongou di boros di Maria Magdalina do napasi kawagu i Yesus om nokito di Maria iyau.
Minintalang i Yesus dot id Duwo o Tumatanud Dau
12 Om intalang poddi kawagu i Yesus dot id duwo o tumatanud dau, nga' suwai no o kowoyo-woyoo' di Yesus do minintalang dot id diyolo'. Tu' minintalang iyau di maso diyolo' do manau-panau do kumaa dot id iso' o kampung. 13 Om poguliai noddi diyolo' do minongoi poposunud diri dot id kinoruhangan diyolo'd suwai. Nga' a' i' iyolo' notumbayaan.
Minintalang i Yesus dot id Piro-Piro o Tumatanud Dau
14 Om id tohuri noddi om intalang no i Yesus dot id hopod om iso' di tumatanud dau, di masaan diyolo'd makan. Om togodo' noddi di Yesus iyolo' tu' a' i' ogirot o kotumbayaan diyolo' om ongokodou o ginawo, gisom dot a' iyolo' minonumbayaan di tulun di nokokito kopio di Yesus do napasi kawagu. 15 Om boro-boros noddi i Yesus diyolo' do poingkaa, “Ongoi kou no dot id pointongkop do pomogunan om popinsusuyon no dokoyu i Habar dot Osonong do mantad id Kinorohingan dot id pointikid-tikid do tulun. 16 Iri nopo tulun dit otumbayaan om i nobotisan om apasi no. Nga' iri nopo tulun dit a' otumbayaan om hukuman no. 17 Koinsanai'd tulun dit otumbayaan doho' om onuan nondo iyolo'd kuasa do momonsoi'd koimayaan: monunsub nondo iyolo' do rusod dot araat dot id suang do ngaran ku, om mimboros iyolo' di boros dit a' diyolo' noilaan mantad. 18 Ondung koigit iyolo'd tulanut ko' koinum di kawanit om a' i' iyolo' matai. Om ondung sukabayan diyolo' i tulun do sumakit om ongolingasan nopo i tulun diri,” ka di Yesus.
Pinoinsawat i Yesus do Hilo'd Surga
19 Om boro-boros poddi i Tuhan Yesus diyolo', om poinsawato' no iyau do hilo'd surga. Om hilo' no iyau'd momorinta' do poinsugku'd Kinorohingan. 20 Om pamanau noddi i piro-piro o tumatanud dau do pinopopinsusui di habar do mantad id Kinorohingan do hinonggo-honggo nopo. Om Tuhan nga' minuhup i' diyolo' do momonsoi do karaja'ddi. Om pinopointalang kopio dot otopot kopio i popinsusuyon diyolo' dot i kongoimayaan o pinopointalang kopio.
PONGOLIMPUPUS DO TUMANUD DO SOLINAN DO SUWAI
9 Om ongoi noddi i tongoondu'ddi solowot di Pitrus om i piro-piro tambalut di Pitrus, om susuyo' no diyolo' dot oniiba' o koinsanai di pinoboros di tanakwagu'ddi dot id diyolo'. 10 Om i Yesus piya'ddi nga' pinopopinsusui i' do pinolombus di tongotumatanud dau, di habar dot olidang om i poingompus do pasal do koposion dit aiso' o kopupuson, do mantad pod hilo'd koulayon om gisom do hilo'd kotonobon.
Minomolingos i Yesus do Songulun dit A' Koundaliu
1 Om piro-piro noddi o tadau do mantad diri om uli' no i Yesus do hilo'd Kapornaum. Om kotongkop noddi o habar diri do hino iyau do hiri'd walai. 2 Om ogumu'ddi o tulun do ruminikot. Om timung nopo iyolo'd hiri gisom dot aiso' no o tiyonon. Om hiri piya'd wawayaan nga' nosolot id tulun. Om ponusui noddi i Yesus do habar do mantad id Kinorohingan dot id tulun dot ogumu'ddi. 3 Om tontok di maso di Yesus do moro-boros, om korikot no ot apat o tulun do magantayang do songulun dit a' koundaliu. 4 Nga' a' i' iyolo' nokoinsomok di Yesus tu' ogumu' kopio i' o tulun. Om raago' nopo diyolo' i taap dit id hapak kopio di Yesus. Om pouluho' noddi diyolo' i tulun dit a' koundaliu'ddi do mitonggoi di pinoliiyan dau. 5 Soira' di nokito di Yesus o kogoyoo' do kotumbayaan diyolo' om boro-boros no i Yesus di tulun dit a' koundaliu'ddi do poingkaa, “Oi tanak ku, noompunan ngai' no o dusa nu,” ka dau. 6 Nga' haro'ddi o piro-piro o guru do Tourat do songirikau'd hiri do momusorou do poingkaa, 7 “Katama' kopio ilo'd tulun do mimboros do miagal dilo'. Mongindaraat no kopio iyau'd Kinorohingan. Isai daa o milo do mangampun do dusa, suwai ko' Kinorohingan no,” ka diyolo'. 8 Nga' oilaan i' di Yesus o pomusarahan diyolo'ddi do maso'ddi. Om boro-boros noddi iyau do poingkaa, “Nokuro tu' iyo'ddi o ponguhatan dot id ginawo dokoyu? 9 Honggo'dti ot osonong-sonong do popoboros, ‘Noompunan no o dusa nu’, ka ko', ‘Ingkakat no, om saanon i' ino liniiyon nu om mamanau nogindo,’ ka? 10 Nga' pointalangon ku do dinondo dot id dokoyu do kikuasa' i' i Tanak do Tulun do mangampun do dusa do hiti'd pomogunan,” ka dau. Om pomoros po kawagu i Yesus dot id tulun dit a' koundaliu'ddi do poingkaa, 11 “Ingkakat no, om saano' ino liniiyon nu, om muli' i',” ka. 12 Om ingkakat noddi i tulun diri om olomus nopo do minanaan di liniiyon dau om pamanau no do suminoliwan dot antang-antangan di tulun dot ogumu'. Om kosuayai ngai' noddi i tulun dot ogumu' do nokokito'ddi. Om oinsanan nopoddi i tulun do hiri do minamarayou'd Kinorohingan. Boros ka diyolo', “A' toko' po insan kokito do miagal diti,” ka.
Linohou di Yesus i Liwi
13 Om pamanau noddi i Yesus do guminuli' kawagu do hilo'd tisan do Tasik Galilia. Om ogumu'ddi o tulun do ruminikot dot id dau. Om tudukai noddi di Yesus iyolo'. 14 Om maso di Yesus do manau-panau do hiri'd kinoiyonon diri, om kokito no dau o songulun o gomponimung do sukai dot i Liwi o ngaran, i tanak di Alpius, do poirikau do hiri'd tupis do pambayaran do sukai. Om boro-boros noddi i Yesus dau do poingkaa, “Tanud doho',” ka. Om ingkakat noddi i Liwi om tanud no iyau di Yesus. 15 Om tontok di maso di Yesus do makan do hiri'd walai di Liwi, om rikot no ot ogumu' tulun di gomponimung do sukai om i tulun dit a' pokosonongon do tulun dot ogumu', do minongoi torungak di Yesus om i piro-piro o tumatanud di Yesus do makan. Tu' ogumu' i' ot id pogialatan diyolo' do tuminanud di Yesus. 16 Om haro'ddi o piro-piro o guru do Tourat do mantad id sinompuruan do Parisi do nokokito di Yesus do makan do potorungak di tulun di gomponimung do sukai om i tulun dit a' pokosonongon diri. Om uhoto' noddi diyolo' i tumatanud di Yesus do poingkaa, “Nokuro tu' makan i guru dokoyu do potorungak dilo tulun do gomponimung do sukai om ilo tulun dot a' ongosonong?” ka diyolo'. 17 Om korongou noddi di Yesus i ponguhatan diyolo'ddi, om simbar no iyau diyolo' do poingkaa, “A' i' rumikot dot id dokutur i tulun dit aiso' o toruol, suwai ko' iri no i tulun di kitoruol. Kinorikatan ku nopo om okon i' ko' mongoi pomolohou di tulun di momusorou dot osonong iyau, suwai ko' mongoi pomolohou di tulun di momusorou dot a' iyau osonong,” ka dau.
Tuhoton do Pasal do Sumambayang om Puasa
18 Tontok dot insan o maso om suminambayang om puasa i piro-piro tumatanud di Yohanis Gampamatis om i tulun do Parisi. Om haro'ddi o tulun do ruminikot dot id di Yesus om ponguhot no iyau dau do poingkaa, “Nokuro tu' sumambayang om puasa i tumatanud di Yohanis Gampamatis om i tumatanud di tulun do Parisi om a' i' sumambayang om a' puasa ilo tumatanud nu iya'?” ka diyolo'. 19 Om boros ka di Yesus do suminimbar diyolo', “A' toi makan i tulun di nalap dot id poginakanan do pikowinan? Atantu' no do makan i' iyolo' do maso po do poinsugku' diyolo' i kusai di kuminawin. 20 Nga' orikot indo o maso do potongkiadon do mantad id diyolo' i kusai di kuminawin. Om diri nogindo dot a' iyolo' makan. 21 Aiso' i' o tulun do mangampin do rasuk di laid noo, do kain do wagu o pangampin. Tu' kumongkong nondo i kain di pinangampin diri om okon nogi' dot araladan i nohurak. 22 Om iyo nogiddi tu' aiso' i' o tulun do poposuang do waig dot anggur di wagu dot id poiiyanan do waig di kulit do winonsoi di laid noo. Tu' otobuk nopo i poiiyanan diri dot osuangan di waig dot anggur di wagu. Om orubat goduwo nopondo iri. Iri nopo i waig dot anggur do wagu om mositi' no do posuangon dot id poiiyanan do waig di wagu,” ka dau.
Ponguhatan do Pasal do Tadau'd Sabat
23 Tontok dot insan o tadau'd Sabat, di nakawaya' i Yesus om i piro-piro o tumatanud dau do tumo do tinanaman do gandum, om pogkotu' no i tumatanud dau di rawo di gandum. 24 Om ponguhot noddi i tulun do Parisi di Yesus do poingkaa, “Nokuro tu' tumolibamban ilo tumatanud nu do Tourat toko', tu' momonsoi iyolo' di pogoduhan do tontok do tadau'd Sabat?” ka diyolo'. 25-26 Om boros ka di Yesus do suminimbar, “A' kou po nakabasa' di winonsoi di Daud do tontok dit i Abiatar o Boyoon dot Agayo dot Imam. Tontok di linouson i Daud om i tulun dau, om dit aiso' no o takanon diyolo', om suang no i Daud do hiri'd Walai'd Sasambayangan dot Agayo, om pangakan no iyau di roti di nakatahak no daa dot id Kinorohingan. Om nonuan nogi' di Daud i tulun dau di roti'ddi. Nga' tumanud nopo daa do Tourat toko', om iri no it imam o koino-ino do mangakan di roti'ddi,” ka dau. 27 Om boros ka kawagu di Yesus dot id diyolo', “Tadau nopod Sabat om winonsoi do bagi'd tulun. Okon i' ko' tulun o winonsoi do bagi'd tadau'd Sabat. 28 Iyo nopoddi om kikuasa' i' i Tanak do Tulun dot id sawat piya do tadau'd Sabat,” ka dau.
Tulun di Napatai o Tiso'd Longon
1 Om guli' no kawagu i Yesus do hiri'd walai'd sasambayangan. Om hiri nopo nga' haro o songulun do napatai o tiso'd longon. 2 Nga' hiri nopo om haro o piro-piro o tulun do mogihum do kasalaan di Yesus, om adawa indo diyolo' iyau. Om piantangan diri diyolo' i Yesus ondung momolingos iyau do tulun di kitoruol do tontok do tadau'd Sabat. 3 Om boros ka di Yesus dot id tulun di napatai o tiso'd longon diri, “Kaino, ingkakat do hiti'd gulu,” ka. 4 Om ponguhot noddi i Yesus di tulun di songintimung do hiri do poingkaa, “Nunu no o koino-ino'd wonsoyon do tontok do tadau'd Sabat do tumanud do Tourat? Momonsoi dot osonong ko' momonsoi dot araat? Mamasi do tulun ko' mamatai?” ka dau. Om kada' nopo iyolo' ungkomi. 5 Om ontong no i Yesus do hiri'd posorili' dau do mikuwo'd otogod, nga' tumongob i' iyau tu' ongokodou i' kopio o ginawo diyolo'. Om boro-boros no iyau di tulun di napatai o tiso'd longon diri do poingkaa, “Palatano' ino longon nu,” ka. Om palatano' noddi di tulun i longon dau. Om kolingos noddi i longon dau. 6 Om soliwan noddi i tulun do Parisi do mantad hiri'd walai'd sasambayangan diri, om olomus nopo iyolo' do minogiupakat di piro-piro o tulun di sumokodung di Horudis do mamatai di Yesus.
I Tulun dot Ogumu' do Hiri'd Tisan di Tasik Galilia
7 Om tongkiad noddi i Yesus om i piro-piro o tumatanud dau do pinakayaan do hilo'd Tasik Galilia. Om ogumu'ddi kopio o tulun do tuminanud dau do mantad id watas do Galilia, om ogumu' nogi' o tulun do ruminikot do mantad hilo'd Yudia, 8 om mantad hilo'd Yorusalim, om mantad hilo'd watas dot Idumia, om mantad ponong hilo'd koulayon do mantad id Bawang do Yordan, om mantad id posorili' do bandar do Tirus, om Sidon. Om rikot ngai' nopo iyolo' dot id di Yesus tu' nongkorongou ngai' iyolo' di nongowonsoi di Yesus. 9 Om suhuo' noddi di Yesus i piro-piro o tumatanud dau do poposodia' do parau' do sakayon dau tu' ogumu' kopio i' i tulun, om a' i' iyau oimpit di tulun dot ogumu'ddi. 10 Om ogumu' tomod o tulun do liningasan dau, gisom do mogiimpit-impit po i tulun do kitoruol do mongoi insomok di Yesus do mongoi kama' dau. 11 Nga' pointikid-tikid do kokito di Yesus i tulun di norusadan do rusod dot araat om tumuku' nopo iyolo' dot id toguang dau om momogiak nod, “Iya' no o Tanak do Kinorohingan!” ka. 12 Nga' oduhai noddi kopio di Yesus i piro-piro o rusod dot araat diri do popimboros dot ondung isai kopio iyau.
Minomili' i Yesus do Hopod om Duwo o Tulun do Sumiliu'd Tumatanud Dau
13 Om takad noddi i Yesus dot id iso' o nulu-nulu, om pomolohou no iyau do piro-piro o tulun di korohian dau. Om rikot ngai' noddi i tulun diri; 14 om pilio' noddi di Yesus o hopod om duwo o tulun do mantad id pogialatan diyolo'. Om boros ka di Yesus dot id diyolo', “Pilion ku iyokoyu om kowoyo' kou i' doho', om osuhu' ku indo iyokoyu do mongoi poposusui do Habar dot Osonong do mantad id Kinorohingan. 15 Om kaanu kou nondod kuasa' do monunsub do rusod dot araat,” ka dau. 16 Iti no o ngaran di hopod om duwo o tulun di nopili'ddi: i Simun (i roitan nogi' dau dot i Pitrus), 17 i Yakub, om i Yohanis, i tobpinai di Yakub. Iyolo' nopo om tangaanak di Sabidi (rinoitan goduwo nopo di Yesus iyolo' do Boanirgis, komoyon nopoddi nga', “tanak do tinggoron”), 18 om i Andarias, om i Pilipus, om i Bartolomius, om i Matius, om i Tumas, om i Yakub i tanak di Alpius, om i Tadius, om i Simun, i roitan dot i Patriot, 19 om i Yudas Iskariot i pinapadagang di Yesus.
I Yesus om i Biilsibul
20 Om uli' noddi i Yesus do hiri'd walai. Nga' rikot po kawagu i tulun dot ogumu', gisom dot a' no i Yesus om i piro-piro tumatanud dau kosiwat do makan. 21 Om mimboros ngai' i tulun do, “Mulau no iyau,” ka. Om korongou poddi di sompiiyon di Yesus o miagal diri, om ongoyo' no daa'ddi diyolo' i Yesus. 22 Om i piro-piro guru do Tourat di mantad hilo'd Yorusalim nga' minomoros nogi' do, “Norusadan no iyau di Biilsibul! Om iri no i boyoon do rusod dot araat diri o minanahak dau'd kuasa' do monunsub do rusod dot araat,” ka. 23 Om lohowo' noddi di Yesus i tulun dot ogumu', om susuyai no dau iyolo' do piro-piro o poinukadan. Boros ka dau, “Milo toi o rusod dot araat do monunsub dot araat? 24 Ondung haro o pomogunan dit opogibahagi-hagi' dot id piro-piro o sinompuruan di mogisasangod om a' i' ogirot o pomogunan diri. 25 Om i sompiiyon dit a' mogiuulud, om mogisasaap nopo nga' araag i'. 26 Om i nogi' i pomorintaan do Rogon di mogisasaap nopo om mogipori-pori om atantu' no dot a' ogirot o pomorintaan diri om atanus indo. 27 Om aiso' i' o tiso'd tulun do kosuang do hiri'd walai di tulun dot okoris do mongoi panakau di dapu' dau, dot a' po dau akagasan i tulun dit okoris diri. Akagasan po dau i tulun dit okoris diri om milo nogi' iyau do mongoi panakau di dapu' dau'ddi. 28 Ilaai no dokoyu! Do tontok nopo do momonsoi o tulun do dusa om mimboros do mongindaraat, om oompunan i' iyau. 29 Nga' ondung mongindaraat iyau'd Rusod do Kinorohingan, om a' no iyau oompunan! Tu' i nopo pongindaraat do miagal diri om dusa no dit a' oompunan do Kinorohingan,” ka dau. 30 (Kinapamarasan nopo di Yesus do miagal diri nga' haro o tulun do minomoros do norusadan i Yesus do rusod dot araat.)
I Tina' om i Piro-Piro o Tobpinai di Yesus
31 Om korikot noddi i tina' om i piro-piro o tobpinai di Yesus. Om songingandad iyolo' do hiri'd soliwan. Om ponuhu' noddi iyolo' do songulun do mongoi pomolohou di Yesus. 32 Om maso nopoddi nga' ogumu' tomod o tulun do poirikau do posorili' di Yesus, om boros ka diyolo' dot id dau, “Oi Guru, hino moti'd hilo'd soliwan i tina' om i piro-piro o tobpinai nu. Om mogihum iyolo' diya',” ka diyolo'. 33 Boros ka di Yesus, “Isai o tina' ku? Om isai o tobpinai ku?” ka dau. 34 Om ontong no i Yesus di tulun dot ogumu' di songirikau do poinsorili' dau om boro-boros nod, “Iti ngai' no o tina' om tobpinai ku. 35 Isai nopo o momonsoi do korohian do Kinorohingan om iri no o tobpinai ku'd kusai om tobpinai ku'd tondu', om tina' ku,” ka dau.
Tulun do Papasasad do Linsou o Poinukadan
1 Om ponuduk po kawagu i Yesus do hiri'd tisan di Tasik Galilia. Om ogumu' tomod diri i tulun do guminurumung dau. Om ongoi noddi i Yesus suang dit iso' o parau' di hiri'd waig, om irikau no iyau'd hiri. Om songingkakat diri i tulun dot ogumu' do hiri'd tisan di tasik. 2 Om ogumu'ddi o pinotuduk di Yesus di tulun dot ogumu' do pinawaya' dau do poinukadan. Om poingkaa o pinotuduk dau diyolo', 3 “Pokinongou kou no! Haro o songulun o gompongumo do minongoi pasasad do linsou. 4 Tontok di maso dau'd papasasad om haro o linsou do nakasasad do hiri'd ralan. Om rikot no o tombolog do minongoi poninduk di linsou diri, om kaayi' nopo i linsou'ddi. 5 Om haro nogi' o nakasasad do hiri'd kowotuan dit oniipis o tana'. Om oruhai'ddi i linsou do suminuni tu' oniipis i' i tana'. 6 Nga' maha' dit asawat o tadau om kolonot no i sobul om koriou no om kapatai noddi. Tu' a' i' nakaralom no i gamut di sobul diri. 7 Om haro nogi' o linsou do nakasasad do hiri'd salag do korugian, om suni noddi i rugi om kosidung noddi i suni di linsou'ddi, gisom dot a' noddi minongua'. 8 Nga' haro i' o linsou do nakasasad do hiri'd tana' dot oruak om suni no i linsou'ddi gisom dot agayo, om pongua' noddi. Om haro o minongua' dot intolu nohopod kopiluap, om haro ot ingonom nohopod, om haro ot inghatus piluap,” ka dau. 9 Om kopupusai poddi di Yesus do monusui i poinukadan diri, om boro-boros no iyau do poingkaa, “Pokinongou kou no do kitolingo kou no,” ka.
Koponudukan di Yesus do Pawayaon do Poinukadan
10 Om tontok dit iso-iso' i Yesus om rikot noddi o piro-piro o tulun di nokorongou di ponudukan dau, do miwoyo' di hopod om duwo di tumatanud dau. Om pokisunud no iyolo' di Yesus do komoyon di pinoinukadan diri. 11 Om boro-boros no i Yesus diyolo' do poingkaa, “Iyokoyu nopo om nopuhawangan no do toilaan do mongilo di poillisok do pasal di Pomorintaan do Kinorohingan. Nga' iri nopo i tulun dit id soliwan, om poinukadan i' o maan do ponuduk 12 tu', ‘Poingontong piya iyolo' nga' a' i' koilo ondung nunu it osiliu, om korongou i' iyolo' nga' a' i' kosuhut. Om iyo nodti ot osiliu, om a' i' iyolo' kokito om a' kosuhut, om a' korikot dot id Kinorohingan, om a' iyolo' ompunan do Kinorohingan,’ ka,” ka dau.
Pinotuduk di Yesus o Komoyon di Poinukadan do Pasal di Tulun di Pinapasasad do Linsou
13 Om boros kaddi di Yesus dot id diyolo', “Ondung a' kou kosuhut do komoyon di poinukadan diri, om poingkuro kou'ndo do kosuhut di poinukadan di suwai? 14 Iri nopo i pinapasasad do linsou diri, om iri no i tulun di mongoi popinsusui di habar do mantad id Kinorohingan. 15 Om iri no i linsou di nakasasad do hiri'd ralan, om poiyaan di tulun di nokorongou di habar do pasal do kowoyo-woyoo' do Kinorohingan do momorinta'. Tu' korongou nopo diyolo' iri om rikot no i Rogon do minongoi panganu di nakasasad daa dot id ginawo diyolo'. 16 Om iri no i linsou di nakasasad do hiri'd tana' do kowotuan, om poiyaan di tulun di nokorongou di habar diri om olomus nopo do ruminamit diri, mikuwo dot osonong o ginawo. 17 Nga' a' i' kopio nakagamut i habar diri dot id ginawo diyolo', om gowoi poddi om a' tuminimporon. Tu' koontok nopo iyolo'd kosusaan ko' koinggoritan dot i habar diri o koponginggoritan, om pitilombus nopo iyolo' do tuminanus o kotumbayaan. 18 Om iri no i linsou di nakasasad do hiri'd salag do korugian, om poiyaan di tulun di nokorongou do habar diri, 19 nga' atangkabo nopo do koposi-posion diyolo', om orohian nopod kumaya'. Om mogisuayan nopo o korohian do don tinan do sumuang dot id ginawo diyolo'. Gowoi poddi om noolitan i habar di mantad id Kinorohingan dit id ginawo diyolo', om a' iddi minongua'. 20 Om iri no i linsou di nakasasad do hiri'd tana' dit oruak, om poiyaan di tulun di nokorongou di habar diri om i ruminamit kopio. Om pongua' noddi iyolo' dot asapou, om haro'ddi ot intolu nohopod om haro ot ingonom nohopod om haro ot inghatus piluap o kogumuo' do tua',” ka dau.
Lampung do Tininggouban do Kakanan
21 Om boro-boros po kawagu i Yesus diyolo' do poingkaa, “Haro toi o tulun do nokoumbal do modtutud nopod lampung om tinggouban nondod kakanan, ko' posusuton po dau dot id sahau do toodopon dau? Okon toi ko' tutudan dau i lampung om potimpakon do hiri'd potitimpakan di lampung? 22 Om koinsanai di poillisok om poimbulayon indo; om i lisok-lisokon dau nga' oilaan indo. 23 Om iyo nopoddi om pokinongou kou no do kitolingo kou no,” ka dau. 24 Om boros ka kawagu di Yesus, “Soro-sorohon no kopio dokoyu iti nongorongou dokoyu: Nunu nopo it oturan do poimpahan dokoyu do momutus do tulun do suwai, om iri no it oturan diri o poimpahan do Kinorohingan do momutus dokoyu --- nga' awagat po mando ko' iri. 25 Tu' i nopo tulun di haro o naanu om ruhangan nogi' kawagu, nga' i nopo tulun dit aiso' o naanu, om imumuyon nogi' do manganu it okuuri' di haro dot id dau,” ka dau.
I Linsou di Suminuni o Poinukadan
26 Om oputai po di Yesus i ponudukan dau. Boros ka dau, “Kowoyo-woyoo' nopo di Pomorintaan do Kinorohingan om iyo di tulun do pinapatanom do linsou dot id tumo dau, 27 tu' dongotuong nopo om modop no iyau; om kosuabon nondo om tumungag no iyau. Om daamot nopoddi om muni-suni om mayo-gayo i linsou di pinasasad dau. Sumuni tomod nopo i linsou'ddi, om a' i' koilo i tulun di minananom. 28 Tu' iri i' i tana' o poposuni'ddi. Om sumuni po i guas om monilau nogi' om momuonsi nogindo. 29 Om oonsok pondo i gandum diri om omoton nogindo di tulun iri, tu' norikot noddi o kapangamatan,” ka dau.
Linsou dit Okooro' o Poinukadan
30 Om boros ka kawagu di Yesus, “Okuro-kuro ma i Pomorintaan do Kinorohingan? Nunu tuu poinukadan do milo'd poposuhut diri? 31 Iyo iri do poinukadan diti: Haro o linsou dit okooro' do nongoi do songulun tonomo' do hiti'd tana'. Nga' iri nopo linsou dit okooro'ddi om kopupuson nod okoro' do hiti'd pomogunan. 32 Nga' kosuni pondo iri om agayo po ko' i totonomon do suwai. Tuntu nopo di totonomon diri nga' okohob kopio gisom do milo do pomirumunan do tombolog o hiri'd karaanan,” ka dau. 33 Om iyo noddi i Yesus do minonuduk diyolo' do pinawaya' dot ogumu' o poinukadan do gisom dot osuhutan diyolo'. 34 Poinukadan kasai' nopo o pakayon di Yesus do monuduk di tulun dot ogumu'. Nga' iri nopondo i tumatanud dau om potudukon ngai' i' dau diyolo' o komoyon diri.
Pinopotingkod i Yesus do Tongus dot Opuhod
35 Om sosodopon noddi do tadau'ddi om boros ka di Yesus dot id piro-piro di tumatanud dau, “Kainou soborong toko' diti tasik,” ka. 36 Om sakai noddi i Yesus do parau', om tongkiadai noddi di piro-piro i tumatanud dau i tulun dot ogumu' di hiri'd tisan di tasik, om sakai noddi iyolo' di parau' di sinakai di Yesus. Om haro nogi' o piro-piro o parau' do suwai do hiri. Om pamanau noddi i Yesus om i piro-piro i tumatanud dau do poinsakai di parau'. 37 Om a' po alaid do mantad diri, om rikot no o tongus dot opuhod. Om opuhod diri o tumbak gisom do kosuang do hiri'd parau' diyolo', om oruhai no daa'ddi dot oponu' do waig i parau' diyolo'. 38 Nga' i Yesus nopo om koodop do ponong id tohuri di parau' do poulunan do bantal. Om ongoyo' no di tumatanud di Yesus posikai i Yesus. Boros ka diyolo', “Guru, uhang ngai' nu i' dot apatai toko',” ka. 39 Om tungag noddi i Yesus om suhuo' no dau do tumingkod i tongus dot opuhod. Om barasai no dau i tasik do poingkaa, “Tingkod no om sinonod no!” ka. Om kotingkod no i tongus dot opuhod diri, om sinonod no i tasik. 40 Om boro-boros noddi i Yesus di tumatanud dau, “Nokuro tu' ooris kou? Nokuro tu' a' kou otumbayaan doho'?” ka dau. 41 Om kongooris noddi iyolo', om mogiboro-boros nopoddi iyolo' do poingkaa, “Isai kopio tuu o tulun diti tu' tongus piya om tumbak nga' mumboyo' nopo dau?” ka.
Minomolingos i Yesus do Tulun do Norusadan do Rusod dot Araat
1 Om korikot noddi i Yesus om i piro-piro i tumatanud dau do hiri'd soborong di Tasik Galilia, i hiri'd watas do Garasa. 2 Om maha' di nokolintuhun nogi' i Yesus do mantad id parau', om ngoyo' no iyau solowoto' do songulun o kusai di suminoliwan do mantad hiri'd luang do nuluhon di pamalabangan. 3 Iri nopo i tulun diri om norusadan do rusod dot araat. Om hiri kasai' nopo iyau'd kalabangan do mundorong. Om a' no iyau milo do kagasan do rantai piya o pongogos. 4 Om asaru' nod kagasan do rantai o gakod om longon dau, nga' pututon kasai' nopo dau i rantai'ddi om tipuon dau i basi' di pinarangkap do gakod dau. Om aiso' no o songulun piya do kopusus dau tu' okodou i' kopio iyau. 5 Monuab-nuaban nopo om monongodou-ngodou iyau do minggiak om mimpanau do hiri'd kalabangan om hiri'd nulu-nulu, om pinsuhaton dau do watu o tinan dau. 6 Om tontok di nokito dau i Yesus do rumikot di hiri pod sodu', om panangkus no iyau do minongoi otud do hiri'd toguang di Yesus, 7 om pamagarang no iyau dot opuhod do poingkaa, “Oi Yesus, i Tanak do Kinorohingan it Asawat Kopio! Kukuroyon oku diya'dti? Pokionuon ku no dot id suang do ngaran do Kinorohingan dot a' ko monginggorit doho',” ka. 8 Minomoros pogi' i tulun diri do miagal diri nga' nabarasan no iyau di Yesus do poingkaa, “Oi rusod dot araat soliwan no do mantad id tulun diti,” ka. 9 Om ponguhot no i Yesus dau, “Isai o ngaran nu?” ka. Om boros ka di tulun diri do suminimbar, “I Logiun o ngaran ku, tu' ogumu' i' kopio iyahai'dti,” ka dau. 10 Om momilugu-lugut nopoddi daa iyau di Yesus dot a' monuhu' di piro-piro o rusod dot araat diri do sumoliwan do mantad id watas diri. 11 Nga' hiri nopod somok do kinoiyonon diri nga' haro ot ogumu' o wogok do minsungal do hiri'd guas di nulu-nulu. 12 Om boro-boros noddi i piro-piro o rusod dot araat diri di Yesus do poingkaa, “Suhuo' nogi' iyahai do mongoi suang dilo baanan do wogok,” ka. 13 Om kookunai noddi di Yesus iri. Om soliwan ngai' noddi i rusod dot araat do mantad id tulun diri, om ongoi no suang di baanan do wogok. Om oinsanan nopoddi i wogok do minanangkus om tuhun no do hiri'd tasik do mantad hiri'd piras do ngangab. Om kongolondod ngai' nopoddi i wogok. 14 Om panangkus ngai' no i gompomogompi' di wogok do kuminaa do hiri'd bandar, om popinsusuyo' no diyolo' i nosiliu'ddi dot id pointongkop di bandar diri om hiri'd kokompungan di posorili'd hiri. Om soliwan ngai' nopo i tulun do minongoi ontong di nosiliu'ddi. 15 Om ongoi noddi iyolo' solowot di Yesus, om kokito noddi diyolo' i tulun di norusadan daa do rusod dot araat di gulu po, do poirikau no om kipakayan noddi iyau om kopunong noddi o pomusorou dau. Om kongooris ngai' nopo iyolo'. 16 Om susuyo' noddi di tulun di nokokito kopio di nosiliu dot id tulun di norusadan di rusod dot araat om id baanan do wogok i nongosiliu'ddi. 17 Om suhuo' noddi di tulun do hiri'd watas diri i Yesus do tumongkiad di watas. 18 Om tontok di suminakai i Yesus di parau', om pokibanar no daa'ddi di Yesus i tulun di norusadan do rusod dot araat diri do tumanud iyau di Yesus. 19 Nga' a' i' nakaakun i Yesus. Boros ka dau, “Uli' nogi', om posusuyon noti nowonsoi do Tuhan dot id diya' dot id koobpinayan nu,” ka dau. 20 Om pamanau noddi i tulun diri do minongoi do hiri'd watas di roitan do Hopod o Bandar do popinsusui di nowonsoi di Yesus dot id dau. Om ongosuayan ngai' nopo i tulun do korongou'ddi.
I Tanak di Yairus om i Tondu' do Minongoi Igit di Pakayan di Yesus
21 Om guli' noddi kawagu i Yesus do hiri'd soborong di tasik. Om ogumu'ddi o tulun do tuminimung do posorili' dau dot id tisan di tasik. 22 Om rikot no o songulun dot i Yairus o ngaran. Iyau nopo om boyoon dot id walai'd sasambayangan dot id bandar diri. Om tontok di nokito dau i Yesus om otud no iyau dot id toguang dau. 23 Om pokitulung no kopio iyau dau. Boros ka dau, “Adalaan tomod do sumakit i tanak ku'd tondu'. Om angatan ku daa iya' do mongoi pangama' dau, om olingasan i' iyau, om a' indo iyau apatai,” ka dau. 24 Om pamanau noddi i Yesus do minoyo' di Yairus. Nga' ogumu' tomod o tulun do minoyo' dau, om oimpit tomod nopoddi iyau. 25 Id pogialatan nopo di tulun dot ogumu'ddi om haro o songulun o tondu' do hopod no om duwo o toun do koloido' dau dot oinggorit di toruol dau do pomulanan. 26 Aiso' no o songulun piya do koubat di toruol dau, gisom do naayi' ngai' no dau o dapu' dau do pambayar dau do dokutur di mongubat daa dau. Nga' okon nogi' do sumurut i toruol dau. 27 Om i nopo tondu'ddi nga' ogumu' no o norongou dau do pasal di Yesus. Om ongoi noddi iyau insomok di Yesus do mantad ponong id tohuri, dot id pogialatan di tulun dot ogumu'ddi; 28 tu' poingkaa ot osorou dau, “Koigit oku nopo dilo pakayan dau nga' olingasan oku no!” ka. 29 Om ongoi noddi iyau igit di pakayan di Yesus. Om diiri i' om diiri do notingkod i pomulanan dau. Om kopurimanai noddi dau do nolingasan iyau. 30 Om tontok iddi do nopurimanan di Yesus do haro o kuasa' do noidu' do mantad id tinan dau. Om koili noddi i Yesus do minontong di tulun dot ogumu', om ponguhot noddi iyau diyolo' do poingkaa, “Isai i minongoi igit do pakayan ku?” ka dau. 31 Om boro-boros noddi i tumatanud di Yesus, “Oi Guru, okito nu i' dot ogumu' kopio iti tulun do koimpit diya' om monguhot ko po ondung isai o nokoigit diya'?” ka diyolo'. 32 Nga' mingontong i' kasai' i Yesus do hiri'd posorili' dau do mogihum di tulun di minongoi igit dau. 33 Om iri nopoddi i tondu' di nokoilo di nosiliu dot id tinan dau om ongoi nopoddi otud dot id toguang di Yesus, mikuwo'd gagaran om ooris. Om poboroso' ngai' nopo dau iri. 34 Om boro-boros noddi i Yesus di tondu'ddi do poingkaa, “Oi tanak ku, iri no i kotumbayaan nu dot id doho' o nokolingos diya'! Uli' no om sumonong-sonong, tu' nolingasan ko no kopio,” ka dau. 35 Om maso po di Yesus do moro-boros, om rikot no o piro-piro o susuhuon do mantad id walai di Yairus do mongoi pomisunud di Yairus. Boros ka diyolo', “Napatai no i tanak nu'd tondu', oi Tuan. Om kada' no ponusa' dilo Guru,” ka. 36 Om a' i' di Yesus pinusou i pinoboros di tulun diri, om boro-boros no i Yesus di Yairus do poingkaa, “Kada' kooris, nga' kotumbayaai nopo,” ka dau. 37 Om lombus nopo i Yesus do minamanau, nga' a' i' dau uhang do haro o songulun piya do tulun do suwai do tumanud dau, suwai ko' i Pitrus no om i Yakub om i Yohanis, i tobpinai di Yakub. 38 Om korikot noddi iyolo' do hiri'd walai di Yairus, om kokito no di Yesus dot agangau nopo o hiri om norongou dau o tihad do mogihad dot opuhod tomod. 39 Om salakoi noddi i Yesus om boro-boros no diyolo', “Nokuro tu' agangau kopio kou om songihad-ihad? Dot ilo' nopo tanak dilo' om a' i' napatai; suwai ko' koodop noo,” ka dau. 40 Nga' irak-irakai nogi' diyolo' i Yesus. Om suhuo' ngai' noddi di Yesus iyolo' do sumoliwan. Om angatai no dau i tina' om i tapa' di tanak diri om i tolu di tumatanud dau do sumuang do hiri'd bilik di tanak. 41 Om igitai no di Yesus i longon di tanak diri om boro-boros no iyau do poingkaa, “Talita kum,” ka, komoyon nopoddi nga', “Oi tanak do tondu', moro-boros oku diya': tungag!” ka. 42 Om olomus nopod tuminungag i tanak diri, om pamanau no. (Hopod no om duwo o toun do tumur dau.) Ongosuayan ngai' nopoddi i tulun do nokokito di nosiliu'ddi. 43 Om oduhai noddi kopio di Yesus iyolo' do popinsusui'ddi dot id disai nopo. Om boro-boros noddi iyau do poingkaa, “Onuwai dokoyu do takanon ilo tanak,” ka.
A' di Tulun do Nasarit Rinamit i Ponudukan di Yesus
1 Om hiri nod kinoiyonon diri o tadon di Yesus om i tumatanud dau do minuli' do hilo'd kampung dau. 2 Om tontok nopoddi di tadau'd Sabat om timpuun no i Yesus do monuduk do hiri'd walai'd sasambayangan. Om ogumu'ddi o tulun do hiri. Om ongosuayan ngai' nopoddi i tulun do nokorongou di ponudukan di Yesus. Om mogiboro-boros nopoddi iyolo' do poingkaa, “Hinonggo kopio o kinoonuan do tulun diti do koinsanai'ddi? Okuro-kuro kopio o toilaan do naanu do tulun diti? Hinonggo o kinoonuan dau'd kuasa' do momonsoi'd koimayaan? 3 Okon toi ko' i tukang kayu ilo', i tanak di Maria om i tobpinai di Yakub om i Yosis om i Yudas om i Simun? Om poundorong i' do hiti i tobpinai dau do tongoondu'?” ka. Om iri noddi ot a' diyolo' kinoponongkuyaan dau. 4 Om boros kaddi di Yesus dot id diyolo', “Pusohon i' o nabi do hinonggo nopo, nga' a' nogindo iyau pusohon do hiri'd kampung dau om hiri'd pogialatan do koobpinayan om sompiiyon dau,” ka dau. 5 Om a' i' i Yesus minilo do minomonsoi dot ongoiso' piya o koimayaan do hiri'd kinoiyonon diri, suwai ko' haro no o piro-piro o tulun do sumakit do liningasan dau do kinama' dau do minomolingos. 6 Om osuayan i Yesus tu' a' i' kopio iyolo' otumbayaan.
Sinuhu' di Yesus do Minamanau i Hopod om Duwo o Tumatanud Dau
7 Om lohowo' ngai' noddi dau i tumatanud dau di hopod om duwo. Om suhuo' nogiddi dau iyolo' do mamanau do soroduwo-duwo. Om onuwai no di Yesus iyolo' do kuasa' do monunsub do rusod dot araat. 8 Om bilinai nogiddi di Yesus iyolo' do poingkaa, “Kada' kou pongigit do nunu nopo do maan do hilo'd ralan, suwai ko' sukud nopo ot igitan. Om kada' kou pongokoriu, om kada' kou igit do kantung do poiyanan di popuhawangon do tulun toi ko' tusin. 9 Manangkasut kou nopo, nga' kada' kou no igit do duwo o rasuk,” ka dau. 10 Om boro-boros po kawagu i Yesus do poingkaa, “Ondung sumalakoi kou dot id iso' o walai om mundorong kou nopod hiri do gisom do tumongkiad kou di bandar diri. 11 Nga' ondung korikot kou nopo dot id iso' o kinoiyonon dit a' papasalakoi dokoyu o tulun do hiri, om a' iyolo' mokinongou dokoyu, om tumongkiad kou nopo di kinoiyonon diri. Om tantagon no dokoyu o pupuk do mantad id lapap dokoyu. Om iri no o tanda' dot id diyolo' do hukuman nondo iyolo',” ka dau. 12 Om pamanau noddi i hopod om duwo i tumatanud di Yesus diri. Om ongoi noddi iyolo' popinsusui do habar dot apatut no do rumologo o tulun do mantad id koinsanai'd dusa diyolo'. 13 Om ogumu' nogi' o rusod dot araat do sinunsub di tumatanud di Yesus. Om linuhad diyolo'd tumau do saitun i tulun di kitoruol om liningasan diyolo' iyolo'.
Napatai i Yohanis Gampamatis
14 Om korongou noddi di Raja' Horudis o koinsanai di nongosiliu'ddi. Tu' abantug noddi i Yesus do hinonggo nopo. Om haro o tulun do momoros do, “Noposian kawagu i Yohanis Gampamatis! Om iri noddi o kokuwaan do haro kopio o kuasa' dau do momonsoi'd koimayaan,” ka. 15 Nga' iri no i tulun do suwai om momoros dot, “Iyau nopo om i Ilia,” ka. Om haro nogi' o momoros dot, “Iyau nopo om nabi do miagal di nabi di gulu po,” ka. 16 Om soira' di nokorongou i Horudis diri, om boros ka dau, “I Yohanis Gampamatis no kopio iti, i pinonuhuan ku do momulos o tulu di gulu po. Om poimpasi noddi kawagu iyau do baino',” ka. 17 Tu' di nopo di gulu po om minonuhu' i Horudis do tulun do mongoi panangkap di Yohanis om posuangon i' dot id giil. Winonsoi pogi' di Horudis o miagal diri nga' gama' di Horudias, i sawo di Pilipus i tobpinai dau. Tu' kinawin di Horudis i Horudias. 18 Om asaru' no i Yohanis do monogod di Horudis do pasal diri. Boros ka dau, “A' i' koino-ino do kowinon nu i sawo di tobpinai nu,” ka. 19 Om iri noddi o katagadan kasai' di Horudias di Yohanis om pokipapatayan dau iyau, nga' a' i' dau milo do wonsoyon o miagal diri tu' oduhan i' iyau di Horudis. 20 Tu' nokoponuhu' no i Horudis do tulun do momogompi' kopio di Yohanis do hiri'd giil, tu' moddosi i' iyau di Yohanis. Dot oilaan no dau dot i Yohanis nopo om tulun dit osonong di sinuhu'd Kinorohingan. Om asanangan kasai' i' i Horudis do mokinongou do soira' nopo do moro-boros i Yohanis, do mulong piya dot atangkabo kasai' nopo iyau do pointikid-tikid do korongou iyau di boros di Yohanis. 21 Nga' alaid noddi om haro'ddi o ralan di Horudias do momonsoi'ddi do tontok di minonguramat do toun di Horudis. Om tontok noddi do pinapaharo i Horudis do poginakanan. Om alapo' no dau o koinsanai di pagawai dit angasawat o pangkat dot id pomorinta' om i boyoon do soudor om i boyoon do tulun do hiri'd Galilia. 22 Om panari' no i tanak di Horudias do tondu' dot id poginakanan diri, om orohian tomod i Horudis om i tulun di nangkarapou do hiri'd poginakanan diri do kokito di pananari' di tanak do tondu'ddi. Om boro-boros noddi i Horudis dot id tanak do tondu'ddi do poingkaa, “Pokianu nopo do nunu nopo o korohian nu. Om patahakon ku i' iri dot id diya',” ka dau. 23 Om pamatos noddi i Horudis dot id tanak do tondu'ddi do mikuwo'd suminumpa'. Boros ka dau, “Nunu nopo o pokionuon nu om patahakon ku i'. Do mulong piya do songintanga' diti pomorintaan ku nga' patahakon ku i',” ka dau. 24 Om soliwan noddi i tanak di tondu'ddi om ongoi no uhot di tina' dau do poingkaa, “Ina' nunu ma ot osonong do pokionuon ku?” ka dau. Om boros ka di tina' dau do suminimbar, “Pokionuon i tulu di Yohanis Gampamatis,” ka. 25 Om olomus nopoddi i tanak do tondu'ddi do guminuli' do hiri'd di Horudis. Om boro-boros nod, “Pokionuon ku do dinondo i tulu di Yohanis Gampamatis om pasakayon nod talam!” ka dau. 26 Nga' tumongob tomod diri i Horudis do nokorongou di pokionuon diri. Nga' a' noddi iyau milo dot a' papatahak di pinokianu'ddi tu' nokosumpa' no iyau dot id toguang di tulun di nalap dau. 27 Om olomus nopoddi i Horudis do minonuhu' do songulun o soudor di madtatamong dau do mongoi pomulos do tulu di Yohanis Gampamatis. Om pamanau noddi i soudor diri do minongoi'd hiri'd giil do mongoi pomulos di tulu di Yohanis Gampamatis. 28 Om igitai no dau i tulu diri do poinsakai'd talam om patahako' nogiddi dau di tanak do tondu'ddi. Om patahako' no di tanak do tondu'ddi dot id tina' dau i tulu. 29 Om korongou poddi di tumatanud di Yohanis o hal diri, om ongoyo' noddi diyolo' i rata' di Yohanis om lobongo' no diyolo'.
Pinapaakan i Yesus do Limo Noribu o Tulun
30 Om koguli' ngai' noddi i rasul, i sinuhu' di Yesus do minamanau'ddi, om kotimung no kawagu iyolo' om posunudo' ngai' no diyolo' dot id di Yesus o koinsanai di nongowonsoi om i nongkotuduk diyolo'. 31 Nga' ogumu' nopoddi i tulun do rumikot om songuli-uli' o wokon, gisom dot aiso' no o maso di Yesus om i piro-piro i tumatanud dau do makan. Om boro-boros noddi i Yesus di tumatanud dau do poingkaa, “Kainou, ongoi toko' undorong do hilo'd kinoiyonon dit oingou, om koundorong kou i' dot ongoruhai,” ka dau. 32 Om pamanau noddi iyolo' do suminakai dot iso' o parau' do kuminaa dot id kinoiyonon dit oingou. 33 Nga' ogumu' iddi o tulun do nokokito diyolo' do tuminongkiad do kinoiyonon diri, om kotutun iyolo' diyolo'. Om panangkus ngai' noddi i tulun di mantad id watas diri do minaya' di ralan dit a' kosoborong, do suminogulu di Yesus om i piro-piro i tumatanud dau. 34 Om kolintuhun poddi i Yesus do mantad hiri'd parau', om kokito no dau i tulun dot ogumu'. Om kosianai noddi iyau diyolo', tu' iyolo' nopo om iyo di dumba' dit aiso' o momogompi'. Om timpuun noddi i Yesus do monuduk diyolo' do piro-piro o ponudukan. 35 Om sosodopon noddi om ongoi no boro-boros i tumatanud di Yesus dot id dau, “Oi Guru, oruhai noddi dot otuong om osodu' toko' nogi' do kawalayan. 36 Om osonong nogi' do suhuon nu ilo tulun do mamanau. Om koongoi i' iyolo' koboli do taakanon do hilo'd kawalayan om hilo'd kokompungan do hiti'd posorili' do kinoiyonon diti,” ka. 37 Om boros ka di Yesus do suminimbar, “Paakanon nopo dokoyu iyolo',” ka dau. Om boros ka di tumatanud di Yesus, “Gatang piya'd duwo nahatus o tusin do pirok do roti dot ongoyon bolio' nga' a' i' kabagal do paakan diti tulun do miagal diti kogumu',” ka diyolo'. 38 Om boros ka di Yesus dot id tumatanud dau, “Ngoyo' dokoyu antangai om songkuro poo roti dokoyu,” ka dau. Om ngoyo' noddi diyolo' antangai, om boros ka diyolo', “Limo po o liob do roti om duwo o tinan do sada',” ka. 39 Om suhuo' noddi di Yesus o koinsanai di tulun diri do mirikau do mogitumpuk-tumpuk do hiri'd sakot dit otomou. 40 Om ulud noddi i tulun do minirikau do mogitumpuk-tumpuk. Om haro o hatus o tulun dot id iso' o kinotumpukon om haro o limo nohopod o tulun. 41 Om ngoyo' noddi di Yesus i limo o liob do roti om i duwo o tinan di sada', om tingaha' no iyau do hilo'd tawan om pongunsikou no iyau'd Kinorohingan. Om pogikobing-kobingo' noddi di Yesus i roti'ddi om patahako' no di tumatanud dau do maan potikido' di tulun dot ogumu'. Om i sada' nga' minaan nogi' potikido'. 42 Om akan ngai' noddi i tulun diri do gisom do nangayahan. 43 Om ngoyo' noddi di tumatanud di Yesus timungo' i roti om i sada' di noolu' diyolo'ddi om nokoponu' po do hopod om duwo o balatak. 44 Ginumu' nopo do tongokusai do minangakan di roti'ddi om haro i' doti' o limo noribu o tulun.
Minamanau i Yesus dot id Soibau do Waig
45 Om olomus nopoddi i Yesus do minonuhu' di piro-piro i tumatanud dau do sumakai'd parau' do mogulu dau do sumoborong di tasik, do kumaa do hilo'd Baitsaida, do damot dau do monuhu' di tulun dot ogumu' do muli'. 46 Om kopongintod-ngintod poddi i Yesus di tulun dot ogumu'ddi om ongoi nogi' iyau dot id iso' o nulu-nulu do minongoi sambayang. 47 Om otuong noddi, om iri nopo i parau' di sinakai di piro-piro o tumatanud di Yesus diri om hiri nod tanga' di tasik. Nga' i Yesus nopo om hiri pod tindal. 48 Om kokito no di Yesus i piro-piro tumatanud dau dot osusa' kopio do mangayu di parau' diyolo' tu' asasakan diyolo' i tongus. Om ongoi noddi i Yesus rapou diyolo' do minamanau do hiri'd soibau di waig dot id piolitan doti' do jam kotolu om jam do koonom do minsusuab. Om pamanau nopo iyau do miagal-agal do tumalib diyolo'. 49 Om tontok di nokito diyolo' do manau-panau iyau do hiri'd soibau di waig, om ondos nopo daa diyolo' om tombiruo i Yesus. 50 Gisom do songgiak-giak po iyolo' dot opopoddosian. Tu' nokokito ngai' nopo iyolo' dau om ongooris tomod diri iyolo'. Nga' boro-boros noddi i Yesus diyolo' do poingkaa, “Kada' kou kooris! I Yesus oku i'. Kada' kou poddosi!” ka dau. 51 Om sakai noddi i Yesus di parau' di sinakai diyolo', om kotingkod noddi i tongus diri. Om ongosuayan tomod diri i tumatanud di Yesus. 52 Om iri piya i koimayaan di limo o liob do roti diri nga' a' po diyolo' osuhutan. Tu' apagon kopio iyolo' do kosuhut.
Minomolingos i Yesus dot Ogumu' o Tulun di Kitoruol do Hilo'd Ginisarit
53 Om tontok di nokorikot iyau do hiri'd soborong di tasik, om dampir noddi iyolo' do hilo'd Ginisarit, om pokogoso' no diyolo' i parau' do hiri'd tisan di tasik. 54 Tontok di nokosoliwan nogi' kopio iyolo' do mantad hiri'd parau', om kokito no di tulun dot i nopo nokorikot diri nga' i Yesus. 55 Om panangkus nopoddi iyolo' do tuminongkop do watas diri. Om sarasayai noddi diyolo' i tulun dit ongkitoruol om pootodo' no dot id di Yesus. Om ondung orongou diyolo' do hino i Yesus dot id iso' o kinoiyonon om ongoyon no diyolo' pootodo' do hiri i tulun di sumakit. 56 Om honggo nopo o bandar ko' kawalayan do koongoyon di Yesus, om hiri no o tulun dot ogumu' do mongoi papaatod ngai' di tulun dit ongkitoruol dot ongoyon poiliho' do hiri'd karalan-ralanan. Om pokionuon no diyolo' i Yesus do popologos dit ongkitoruol do mongoi po daa igit di tompok di pakayan dau. Om isai nopo i tulun di koigit di pakayan di Yesus om ongolingasan ngai' no.
Ponudukan di Koubasanan do Komolohingan
1 Om rikot noddi dot id di Yesus ot iso' o tinimungan do tulun do Parisi om i piro-piro o guru do Tourat do mantad hilo'd Yorusalim. 2 Om kokito no diyolo' o piro-piro di tumatanud di Yesus do makan dot a' opulang o palad dot id pagantangan do tugama', tu' a' iyolo' minomoug do palad do tumanud dit oturan do tugama'. 3 Dot i nopo tulun do Parisi om koinsanai di tulun do Yohudi om ongotorodok kopio do tumanud di koubasanan di komolohingan diyolo'. Do tintod nopo diyolo'd makan om mositi' no do momoug iyolo' do tumanud di kowoyo-woyoo' di natantu' mantad. 4 Om iyo nogiddi do tontok do haro ot oboli diyolo' do taakanon do mantad hiri'd pasar tu' mositi' nod ougan diyolo' om akanon nogi'. Om ogumu' po ot oturan do suwai do pinotuduk di komolohingan diyolo' di tonudon kopio diyolo'. Do miagal ko' oturan do momolidang do sangkir, om mangkuk, om i ngai' i pakakas do tambaga'. 5 Om ponguhot noddi i tulun do Parisi om i piro-piro o guru do Tourat dot id di Yesus do poingkaa, “Nokuro ilo piro-piro o tumatanud nu tu' a' momoug do tintod do makan? Nokuro tu' a' iyolo' tumanud do koubasanan di komolohingan toko',” ka diyolo'. 6 Om boros ka di Yesus do suminimbar, “Iyokoyu nopo om tulun di minsorupai-rupai no toomod! Kabayaai nopo i pinoboros mantad di Yosaya do pasal dokoyu do poingkaa, ‘Iti nopo tulun diti om boros no toomod diyolo' do tumuku' dot id doho', tu' ginawo nopo om osodu' i' doho'. 7 Aiso' i' o guna' do tumuku' piya iyolo' dot id doho', tu' potudukon diyolo' it oturan do mantad id tulun do miagal nopo kopio dot oturan ku!’ ka. 8 Om iyada' nogi' dokoyu i ponuhuan do Kinorohingan, om tonudon nogi' kopio dokoyu it oturan do tulun,” ka dau. 9 Om boros ka kawagu di Yesus, “Milo kou no kopio do magada' di ponuhuan do Kinorohingan, om atanud indo dokoyu i dokoyu'd ponudukan. 10 Nokoponuhu' no i Musa do poingkaa, ‘Podulo' no o tapa' om tina' nu. Om isai-isai nopo o mongindaraat do tapa' om tina' dau, om mositi' no do hukuman iyau do kapatayon,’ ka. 11 Nga' iyokoyu nopo om monuduk kou dot: Ondung haro o tulun do moro-boros dot id molohing dau dot, ‘Iri nopo daa it apatut do patahakon ku dot id tapa' om id tina' ku, om nakatahak ku nori dot id Kinorohingan,’ ka. 12 Om poiduwon no dokoyu i tulun diri do mantad id tonggungan dau do monulung di tapa' om tina' dau. 13 Om iri no o ponudukan dokoyu di potudukon dokoyu do tulun, do ralan dokoyu do pakaiso' di boros do Kinorohingan. Om ogumu' po o suwai do miagal diri do pingwansayan dokoyu,” ka dau.
I Kososomu' do Tulun
14 Om lohowo' po kawagu di Yesus i tulun dot ogumu'ddi, om boro-boros no iyau diyolo', “Pokinongou kou no, om kosuhut kou i'! 15 Aiso' i' o tongoiso' piya do mantad id soliwan di kosuang dot id tulun do kososomu' dau. Nga' nunu nopo i sumoliwan do mantad id tulun diri om iri no o kososomu' dau. 16 Iyo nopoddi om pokinongou kou no do kitolingo kou no.” ka dau. 17 Om tontok di tuminongkiad i Yesus di tulun dot ogumu'ddi om suang no iyau do hiri'd walai, om ponguhot noddi di Yesus i piro-piro tumatanud dau do komoyon di poinukadan diri. 18 Om boros ka di Yesus dot id diyolo', “A' kou po pama iyokoyu kosuhut? A' kou i' koilo dot iri nopo i sumuang dot id tulun om a' i' kososomu' di tulun diri? 19 Tu' iri nopo i sumuang om a' i' kawaya' dot id ginawo dau, suwai ko' kawaya' no dot id tian, om kosoliwan no kawagu,” ka dau. Om iyo noddi o boros di Yesus do pinopoilo dot aakan ngai' o taakanon. 20 Om boro-boros po kawagu i Yesus do poingkaa, “Nunu nopo o sumoliwan do mantad id tulun om iri no o kososomu' dau. 21 Tu' mantad no dot id suang do ginawo do mimbulai o pomusarahan dot araat om iri no o mominsuhu'd tulun do momonsoi di sosomu', om manakau, om mamatai, 22 om magampahu', om monipu', om mongindaraat do wokon, om mingwonsoi do koinsanai dit angaraat, om mominsuhu' dot agayo o mamaha', om it a' osinondot, om osolon, om minggayo-gayo, om a' milo'd tudukan. 23 Om koinsanai dit angaraat diti om mantad ngai' i' dot id suang do ginawo'd tulun, om iri no o kososomu' do tulun,” ka dau.
Kotumbayaan di Songulun o Tondu'
24 Om tongkiad noddi i Yesus do kinoiyonon diri, om pakayaai no dau do hilo'd watas dit id somok do bandar do Tirus. Om salakoi no iyau do hiri'd iso' o walai, om mada' daa iyau dot oilaan do tulun do hino iyau'd hiri. Nga' a' i' iyau milo do lumisok. 25 Om haro ot iso' o tondu' do kianak do tondu' do norusadan do rusod dot araat do nokorongou do pasal di Yesus. Om rikot no iyau dot id di Yesus om otud no dot id toguang dau, 26 do minokitulung di Yesus do monunsub di rusod dot araat do mantad id tanak diri. I nopo tondu'ddi om okon i' ko' tulun do Yohudi. Kinosusuon nopo dau om hilo'd watas do Ponisia, i hilo'd pomogunan do Siria. 27 Om boros ka di Yesus dot id dau, “Poguluonon nopod papaakan om i tangaanak. A' i' osonong do patahakon nogi' do tasu o taakanon do tangaanak,” ka dau. 28 Nga' boros ka di tondu' do suminimbar, “Tuan, iri piya i tasu di hiri'd sahau di mija' nga' mangakan id mumu' di porotuon di tangaanak,” ka dau. 29 Boros kaddi di Yesus dot id tondu'ddi, “Uli' no, nokosoliwan no i rusod dot araat do mantad id tanak nu; tu' iyo iddi o pinonimbar nu!” ka dau. 30 Om uli' noddi i tondu'ddi. Om korikot no iyau do hiri'd walai, om kokito no dau i tanak dau'ddi do poingodop do hiri'd toodopon. Om otopot i' kopio do nokosoliwan no i rusod dot araat do mantad id tanak dau'ddi.
Minomolingos i Yesus do Songulun o Bobou om Bosukon
31 Om tongkiad noddi i Yesus di watas do Tirus, om pamanau no iyau do minaya' do hiri'd bandar do Sidon do pinakayaan do hilo'd Tasik Galilia. Om waya' no iyau di ralan di kawaya' di watas di roitan do Hopod o Bandar. 32 Om hiri no do haro o tulun do pinapaatod dot id di Yesus do songulun o bobou om bosukon. Om pokikamaai no diyolo' di Yesus i tulun diri. 33 Om angatai noddi di Yesus i tulun di bobou om bosukon diri do tumongkiad do mantad id tulun dit ogumu'. Om posonsongo' no di Yesus i tunturu' dau dot id tolingo goduwo di tulun diri. Om pomodula' no i Yesus, om tuduo' no dau di dula' dau i dila' di tulun diri. 34 Om tingaha' noddi i Yesus do hilo'd tawan, om pomuhobo no iyau dot opuhod, om boro-boros nogiddi iyau di tulun diri do poingkaa, “Ipata,” ka, komoyon nopoddi om, “Ukab no!” ka. 35 Om diiri i' om diiri do nokorongou i tulun diri, om noidu' i katakong di dila' dau, om osonong noddi iyau do moro-boros. 36 Om oduhai noddi di Yesus iyolo' do popinsusui'ddi dot id disai nopo o tulun. Nga' maha' nogi' dit oduhan kopio iyolo' di Yesus do popinsusui'ddi om okon nogi' do popinsusuyo' diyolo' iri. 37 Om oinsanan nopo i tulun di nokorongou'ddi dot ongoimayaan. Boros ka diyolo', “Ongosonong ngai' nopo i winonsoi dau! Tu' iri piya i bosukon nga' korongou noddi, om i bobou nga' koboros noddi!” ka.
Pinapaakan i Yesus dot Apat Noribu o Tulun
1 Om a' po alaid do mantad diri, om haro po kawagu ot iso' o tinimungan do tulun do ruminikot do tuminimung. Om lohowo' ngai' noddi di Yesus i tumatanud dau tu' aiso' no ot akanon di tulun dot ogumu'ddi. Boros ka dau, 2 “Osianan oku no dilo tulun dot ogumu'. Tu' tolu noddi o tadau diyolo' do moyo-woyo' doho' om aiso' noddi o takanon diyolo'. 3 Om ondung suhuon ku iyolo'd muli' dot a' kaakan, om olikapan dotindo iyolo' do hilo'd tanga'd ralan. Om okon-okon pondo om i tulun dit osodu' o tadon,” ka dau. 4 Om boros ka di tumatanud di Yesus do suminimbar, “Kinoiyonon nopodti om osodu' do kawalayan, om hinonggo'ddi o pongonuan do taakanon do kabagal do paakan do koinsanai'd tulun diti?” ka diyolo'. 5 Om uhoto' no di Yesus iyolo', “Piro poo roti dokoyu?” ka dau. “Turu' poo,” ka diyolo'. 6 Om suhuo' noddi di Yesus i tulun dot ogumu' do mirikau do hiri'd tana'. Om ngoyo' no dau i turu' o roti'ddi. Om pongunsikou no iyau'd Kinorohingan. Om pogikobing-kobingo' noddi dau i roti'ddi. Om patahako' no dau di piro-piro i tumatanud dau do potikidon di tulun. Om wonsoyo' noddi di tumatanud dau o miagal diri. 7 Om haro nogi' o piro-piro po tinan do sada' dot ongokooro'. Om pongunsikou no i Yesus dot id Kinorohingan dot i sada' o kinopongunsikahan. Om suhuo' no dau i piro-piro tumatanud dau do popotikid di sada'ddi. 8-9 Om akan noddi iyolo' do gisom do nangayahan om haro i' doti' ot apat noribu o ginumu' di tulun diri do minakan. Om timungo' noddi di tumatanud di Yesus i noolu' di taakanon diri --- om turu' po o balatak do noponu'. Om suhuo' nogiddi di Yesus i tulun diri do muli'. 10 Om olomus nopoddi i Yesus om i piro-piro tumatanud dau do minongoi sakai di parau' do minongoi'd hilo'd watas do Dalmanuta.
Sinuhu' di Tulun do Parisi i Yesus do Momonsoi do Koimayaan
11 Om rikot noddi dot id di Yesus o piro-piro o tulun do Parisi, om timpuun no iyolo' do monokisimbar-simbar dau do maan daa diyolo' do pomurunsut dau. Om suhuo' no diyolo' i Yesus do momonsoi do koimayaan do maan do tanda' do mantad kopio iyau dot id Kinorohingan. 12 Om awagat no kopio o ginawo di Yesus. Om simbar no iyau'd poingkaa, “Nunu o kobungou diti tulun do baino' tu' monuhu' doho' do momonsoi'd koimayaan? Amu'! A' oku i' momonsoi do tanda' do miagal diri dot id diyolo'!” ka dau. 13 Om tongkiad noddi i Yesus diyolo', om sakai no iyau di parau' om pamanau no do kuminaa do hiri'd soborong di tasik.
Pangambang do Tapung do Tulun do Parisi om i Tulun di Horudis
14 Nga' nokolihu i piro-piro tumatanud di Yesus do mongigit do roti di kabagal diyolo'. Om iso' poddi o roti diyolo' do hiri'd parau'. 15 Om boros ka di Yesus dot id diyolo', “Antang-antangan no kopio dokoyu i pangambang do tapung di tulun do Parisi om i pangambang do tapung di Horudis,” ka dau. 16 Om timpuun noddi i piro-piro i tumatanud di Yesus do mogiboro-boros do pasal diri. Boros ka diyolo', “Minomoros pogi' iyau do miagal diri, nga' aiso' o roti toko',” ka. 17 Om oilaan i' di Yesus i pogibara-barasan diyolo'ddi. Om ponguhot noddi iyau diyolo', “Nokuro tu' mogiboro-boros kou do pasal dot aiso' o roti? A' kou toi koilo, om a' kou po toi kosuhut? A' no kopio atarom o pomusarahan dokoyu? 18 Kimato kou i', om nokuro tu' a' kou kokito? Kitolingo kou i', om nokuro tu' a' kou korongou? A' toi dokoyu osorou 19 i limo no liob do roti di pinogikabing-kabing ku do pinaakanan di limo noribu o tulun? Om piro po o balatak do noponu' do noolu' di taakanon diri di nongoi dokoyu timungo'?” ka dau. “Hopod po om duwo o balatak,” ka diyolo'd suminimbar. 20 Om uhoto' po kawagu di Yesus iyolo', “Tontok di pinogikabing-kabing ku i turu' o liob di roti do pinaakanan dit apat noribu o tulun, om piro po o balatak do noponu' di noolu' di taakanon diri di nongoi dokoyu timungo'?” ka dau. “Turu' po o balatak,” ka diyolo'. 21 Om boros ka kawagu di Yesus, “Iyo nopoddi, om a' kou po kasai' kosuhut?” ka dau.
Minomolingos i Yesus do Tulun do Bolou do Hilo'd Baitsaida
22 Om korikot no iyolo' do hilo'd Baitsaida. Om hiri no do pinapaatod o tulun dot id di Yesus do songulun o bolou do pokikamaan diyolo' dau, om olingasan indo iyau. 23 Om igitai no di Yesus i longon di tulun di bolou'ddi om ahako' no dau do suminoliwan di bandar. Om dulaai no di Yesus i mato di tulun do bolou'ddi. Om kamao' no dau i mato di tulun diri. Om uhoto' no dau iyau do poingkaa, “Haro noddi ot okito nu?” ka dau. 24 Om ontong no i tulun diri dot id dotimbabaan dau, om boro-boros nod, “Haro. Kokito oku noddi do tulun do manau-panau; nga' miagal no iyolo'd kayu,” ka dau. 25 Om kamao' po kawagu di Yesus i mato di tulun diri. Om sonsod noddi kopio i tulun diri do minontong. Om kolingos no i mato dau. Om atarang ngai' nopoddi do tokito dau. 26 Om boro-boros noddi i Yesus di tulun diri, “Uli' no, om kada' no guli' kawagu dot id bandar diri,” ka dau.
Minangakun i Pitrus dot i Yesus no i Raja' do Gampamasi
27 Om ongoi no i Yesus om i piro-piro tumatanud dau do hiri'd kokompungan di posorili' do Kaisaria Pilipi. Om maha' di hiri no iyolo'd tanga'd ralan, om uhoto' no di Yesus iyolo' do poingkaa, “Isai oku'dti dot osorou'd tulun?” ka dau. 28 Om boros ka diyolo' do suminimbar, “Haro i' o momoros dot: i Yohanis Gampamatis ko, om haro nogi' o momoros dot i Ilia ko; om haro nogi' o momoros dot iya' nopo om iso' di nabi di gulu po,” ka. 29 Om ponguhot po kawagu i Yesus, “Nga' isai oku dot osorou dokoyu?” ka dau. Om boros ka di Pitrus do suminimbar, “Iya' nopo om i Raja' di Gampamasi,” ka dau. 30 Om sunudai noddi di Yesus iyolo' dot a' poposunud dot id disai nopo do pasal dau.
Pinopoilo i Yesus do Pasal do Koinggoritan Dau om Kapatayon Dau
31 Om katalib poddi iri om timpuun no i Yesus do monuduk di piro-piro tumatanud dau, do mositi' nod ogumu' o koinggoritan di Tanak do Tulun om saapon nondo iyau di piro-piro o boyoon, om i boyoon dot imam om i piro-piro guru do Tourat. Om patayon nondo iyau, nga' kotolu nopondod tadau om posion nondo kawagu iyau do mantad id kapatayon. 32 Om posondoto' nopo di Yesus do pinopoboros iri dot id piro-piro di tumatanud dau. Om gayato' noddi di Pitrus i Yesus do mininsodu-odu' di piro-piro tumatanud di Yesus di suwai, om togodo' no dau iyau. 33 Nga' koili no i Yesus om ontong no iyau di piro-piro tumatanud dau, om togodo' no dau i Pitrus. Boros ka dau, “Poggidu' do mantad hiti, oi Mogugumbal. Dot ino nopo pomusarahan nu om don tulun id pomusarahan; okon i' ko' pomusarahan do dong Kinorohingan,” ka dau. 34 Om lohowo' noddi di Yesus i tulun dot ogumu' di hino'd hiri om i piro-piro tumatanud dau. Om boro-boros noddi iyau diyolo' do poingkaa, “Tulun nopo dot orohian do tumanud doho', om mositi' nod lihuan i dau'd korohian, om sumaan do salib dau, om tumanud nondo doho'. 35 Tu' tulun nopo dit orohian nod momogompi' do dau'd koposion, om okon nogindo dot atagakan di koposion dau. Nga' tulun nopo di papatahak do koposion dau do gisom dot apatai dot iyoho' o kapatahakan om i Habar dot Osonong do mantad id Kinorohingan om apasi nogindo kopio iyau. 36 Tu' nunu no o kountungan do tulun, dot asanganu ngai' piya dau o pomogunan, nga' atagakan indo iyau do koposion dau? 37 Milo toi o koposion do poolonon do nunu nopo? 38 Ondung ointingayaman o tulun do mangakun do tumatanud iyau doho'; om it a' poposusui diti ponudukan ku dot id tulun dit angaraat om it a' otumbayaan do Kinorohingan do maso'dti, om i Tanak do Tulun nga' ointingayaman nondo do mangakun do tumatanud dau o tulun diri, do rumikot iyau do mikuwo'd kuasa' do Tapa' dau, om miwoyo' di piro-piro o moloikat dit olidang,” ka di Yesus.
1 Om poboroso' po kawagu di Yesus diyolo' o poingkaa, “Ilaai no dokoyu! Id pogialatan piya dokoyu'd hiti nga' haro i' ot a' po apatai dot a' po kokito'd Pomorintaan do Kinorohingan do mikuwo'd kuasa',” ka dau.
Pinoinggayo i Yesus
2 Om katalib poddi ot onom o tadau om angatai no di Yesus i Pitrus om i Yakub om i Yohanis, i tobpinai di Yakub do tuminakad dot iso' o nuluhon dit akawas dot iyolo-yolo'. Om kosimban noddi o korupa-rupao' di Yesus di maso diyolo'd poingontong dau. 3 Om i pakayan dau nga' minumang purak gisom do mogulinau po o kopurako'. Om aiso' no o songulun piya do hiti'd pomogunan di momumupu' do kain, do milo do momupu' do miagal kopio'ddi kopurak. 4 Om kokito noddi di tolu o tumatanud di Yesus do moro-boros i Yesus di Ilia om i Musa. 5 Om boro-boros noddi i Pitrus di Yesus do poingkaa, “Oi Guru, osonong no kopio do hiti toko'. Osonong nogi' do popowonsoi iyahai do kiim, dot iso' o diya' om iso' o di Musa om iso' kawagu o di Ilia,” ka dau. 6 Otopot nopo kopio om a' no i Pitrus koilo ondung nunu it apatut dau'd poboroson, tu' moddosi no kopio iyau om i duwo tambalut dau. 7 Om tokop noddi o haun dot id diyolo', om mantad no dot id haun diri do norongou diyolo' o boros do poingkaa, “Iti no o Tanak ku di kosianan kopio ku. Pokinongou kou no dau!” ka. 8 Om olomus nopo iyolo' do mikoroontong do hiri'd posorili' diyolo', om aiso' noddi o nokito diyolo'd tulun do suwai do poinsugku' diyolo', do suwai ko' i Yesus noo. 9 Om tontok di rumuhuk iyolo' di nuluhon diri, om sunudai no di Yesus iyolo' do poingkaa, “Kada' dokoyu posunudo' dot id disai nopo i nokito dokoyu di tiinu'ddi dot a' po apasi do mantad id kapatayon i Tanak do Tulun,” ka dau. 10 Om minumboyo' i' iyolo' di pinosunud di Yesus diri, nga' id pogialatan nopo diyolo' om tuminimpuun no iyolo' do mogiboro-boros ondung nunu o komoyon di Yesus di boros dau dot, “apasi kawagu do mantad id kapatayon,” ka. 11 Om uhoto' no diyolo' i Yesus, “Nokuro tu' momoros i piro-piro guru do Tourat dot, ‘Mositi' no dot i Ilia po o mogulu do rumikot?’ ka,” ka diyolo'. 12 Om boros ka di Yesus do suminimbar, “Atantu' no dot i Ilia o mogulu do rumikot do mongoi posodia' do koinsanai'd nunu nopo. Nga' poingkuro no i Tanak do Tulun? Nokuro tu' nokotulis dot id suang do Buuk do Kinorohingan dot ogumu' nondo o koinggoritan dau om indaraaton iyau'd tulun? 13 Nga' poboroson ku no dokoyu: Dot i Ilia nopo om nokorikot no, om wonsoyo' nopod tulun dot id dau o poingkuro nopo i korohian diyolo', om miontok nopo kopio iri di nokotulis mantad dot id Buuk do Kinorohingan do pasal dau,” ka dau.
Minomolingos i Yesus do Tanak di Norusadan do Rusod dot Araat
14 Om soira' di nokoguli' i Yesus om i tolu o tumatanud dau dot id piro-piro o tumatanud dau'd suwai, om kokito no diyolo' dot ogumu' o tulun do hiri. Om haro nogi' o piro-piro guru do Tourat do maso do monokisimbar-simbar di piro-piro tumatanud di Yesus. 15 Om kokito noddi di tulun i Yesus, om kongotigowo nopo iyolo', om santangkus-tangkus nopoddi iyolo' do mongoi suwau dau. 16 Om uhoto' no di Yesus i piro-piro tumatanud dau do poingkaa, “Nunu i pogisimbar-simbaran dokoyu di piro-piro o gomponuduk do tugama'ddi?” ka dau. 17 Om simbar no i songulun dot id pogialatan di tulun dot ogumu' do poingkaa, “Oi Guru, pootodon ku dot id diya' iti tanak ku. Bobou iyau tu' norusadan iyau'd rusod dot araat. 18 Ondung inggoriton iyau di rusod diri, om popinliidon nopo iyau dot id tana'. Om mogimputa' nondo o kabang dau, om marit-ngarit o nipon, om kumodou nopo o tinan dau. Om nosuhu' ku no daa i piro-piro tumatanud nu do monunsub di rusod dot araat diri, nga' a' i' iyolo' nokosunsub,” ka dau. 19 Om boros ka di Yesus dot id diyolo', “Aranaban oku no kopio dokoyu'dti! Otopot no kopio do tulun kou dit a' otumbayaan. Songkuro po o koloido' ku do poinsugku' kasai' dokoyu om papalanut do ginawo ku dot id dokoyu? Ngoyo' hitio' i tanak diri!” ka dau. 20 Om ngoyo' noddi diyolo' hirio'd di Yesus i tanak diri. Nga' kokito nopo di rusod dot araat i Yesus om pokohiso' nopo di rusod dot araat i tinan di tanak om kohunduk nopoddi i tanak diri gisom do minliid po do hiri'd tana'. Om muta'-puta' tomod o kabang dau. 21 Om uhoto' no di Yesus i tapa' di tanak, “Songkuro no o koloidon dilo' do miagal diti?” ka dau. “Mantad po dit okoro' po,” ka di tapa' di tanak do suminimbar. 22 Boros ka kawagu di tapa' di tanak, “Asaru' no i rusod dot araat do tumotos daa do mamatai dilo tanak, do maan no posuboo' do tapui om porotuon no dot id waig. Nga' milo ko nopo daa do monulung, om insianai no iyahai om tulungo' no kopio iyahai!” ka dau. 23 Om boros ka di Yesus do suminimbar, “Nunu ka nu'ddi? Ondung milo ko no, ka nu? Milo ngai' i' do wonsoyon dot otumbayaan i tulun!” ka dau. 24 Om pagarango' nopo di tapa' di tanak o poingkaa, “Otumbayaan oku i' oi Tuhan. Nga' a' kosongkuro kogiroto' do kotumbayaan ku. Tulungo' oku no om kogirot i' o kotumbayaan ku!” ka dau. 25 Om soira' di nokito di Yesus i tulun dot ogumu' do tumimpuun nod murugun, om barasai no dau i rusod dot araat diri, “Oi rusod di bosukon om i bobou, suhuon ku iya' do sumoliwan do mantad id tanak diti, om kada' nondo kopio guli' do mongoi suang dau,” ka dau. 26 Om pomogiak no i rusod dot araat diri om pokohiso' no dau o tinan di tanak, om soliwan nogiddi. Om iyo poddid rata' o kokitanan di tanak, gisom dot oinsanan nopo i tulun do minomoros do, “Napatai no iyau!” ka. 27 Nga' igitai no di Yesus o longon di tanak do pinopotungag. Om tungag noddi i tanak diri. 28 Om kasalakoi poddi i Yesus do hiri'd walai, om rikot no i piro-piro o tumatanud dau do hiri dot iyolo-yolo'. Om uhoto' no diyolo' i Yesus, “Nokuro ma tu' a' iyahai nokosunsub di rusod dot araat diri?” ka. 29 Om boros ka di Yesus do suminimbar, “Rusod nopod araat do miagal diri, om a' i' milo do sunsubon do poingkuro nopo o ralan do monunsub, suwai ko' sumambayang poo,” ka dau.
Pinopoboros po Kawagu i Yesus do Pasal do Kapatayon Dau
30 Om tongkiad noddi do kinoiyonon diri i Yesus om i tumatanud dau, om lombus no iyolo'd minamanau do minaya' do hilo'd Galilia. Om mada' i' i Yesus dot oilaan do tulun do suwai i kinoiyonon dau, 31 tu' maso dau do monuduk di tumatanud dau. Boros ka di Yesus, “Patahakon nondo i Tanak do Tulun dot id kuasa' do tulun, om patayon nondo iyau, nga' kotolu nopondod tadau om apasi indo iyau kawagu!” ka. 32 Om a' i' kosuhut i tumatanud di Yesus di pinotuduk di Yesus diri, nga' ooris iyolo' do monguhot dau.
Isai it Agayo Kopio o Ngaran
33 Om korikot noddi iyolo' do hilo'd Kapornaum. Om kasalakoi poddi iyolo' do hiri'd walai, om uhoto' no di Yesus i piro-piro tumatanud dau, “Nunu i pogisimbar-simbaran dokoyu di hilo'd tanga'd ralan di tiinu'ddi?” ka dau. 34 Nga' a' nopo iyolo' suminimbar, tu' minogisimbar-simbar i' iyolo' ondung isai it agayo o ngaran di hiri po iyolo'd tanga'd ralan. 35 Om irikau noddi i Yesus om lohowo' no dau i hopod om duwo o tumatanud dau'ddi. Om poboroso' no dau dot id diyolo' o poingkaa, “Isai nopo o tulun dot orohian dot id gulu om mositi' no do tumohuri iyau. Om sumiliu iyau do susuhuon do koinsanai'd tulun,” ka dau. 36 Om ngoyo' no di Yesus o tiso' tanak dit okoro' po om poingkakato' no dau i tanak diri dot id dotoguangan diyolo'. Om gopuso' no dau i tanak om boro-boros no iyau di piro-piro tumatanud dau do poingkaa, 37 “Tulun nopo di rumamit do songulun o tanak do miagal diti dot iyoho' o kopomoromitan, om komoyon nopoddi om rumamit no iyau doho'. Om i tulun di rumamit doho' nga' okon i' ko' iyoho' noo o romiton dau nga' rumamit nogi' iyau di minonuhu' doho',” ka dau.
Isai Nopo ot A' Sumaap Dati' om Sumokodung no Dati'
38 Om boro-boros noddi i Yohanis di Yesus do poingkaa, “Oi Guru, nokokito iyahai dot iso' o tulun do monunsub do Rogon do rumait do ngaran nu. Om oduhai noddi dahai iyau tu' iyolo' nopo om okon i' ko' mantad id pogialatan toko',” ka dau. 39 Nga' boros ka di Yesus, “Kada' dokoyu iyau oduhai, tu' aiso' i' o tongosongulun piya do milo do momonsoi'd koimayaan do rumait do ngaran ku di mitilombus nopondo do momohingi-hingi doho'. 40 Tu' tulun nopo dit a' sumaap dati' om sumokodung no dati'. 41 Soro-sorohon no dokoyu! Tulun nopo di popoinum dokoyu dot i tumanud kou di Raja' do Gampamasi o kopoinuman dau dokoyu, om atantu' no do somulian i' iyau'ddi,” ka dau.
I Kobungou'd Tulun do Momonsoi'd Dusa
42 Om poboroso' po kawagu di Yesus o poingkaa, “Isai nopo i mamalid dot ongoiso' diti tangaanak dot ongokoro' podti, do gisom dot a' nondo iyolo' otumbayaan doho', om osonong nogi' do lontoidan do watu di pongingisar o liou dau, om pataamon do hilo'd rahat. 43 Ondung ino longon nu o kobungou diya' do momonsoi'd dusa, om potodon nogi' i longon nu'ddi! Osonong nogi' do poimpasi ko do poinsugku'd Kinorohingan dot iso-iso' piya o longon nu ko' mantad do hino goduwo o longon nu do kosuang do tapui naraka dit a' milo'd pisokon. 44 Hilo' nopo om a' no milo'd pisokon i tapui, om giuk nga' a' i' matai. 45 Om ondung gakod nu o kobungou diya' do momonsoi'd dusa, om potodon nopo i gakod nu'ddi, tu' osonong nogi' do poimpasi ko do poinsugku'd Kinorohingan dot iso-iso' piya o gakod ko' mantad do hino goduwo o gakod nu do kosuang di tapui naraka. 46 Om hilo' nopo om a' no milo'd pisokon i tapui, om giuk nga' a' i' matai. 47 Om ondung mato nu o kobungou diya' do momonsoi'd dusa, om irulon nopo i mato nu'ddi. Osonong nogi' dot aiso' piya o tiso'd mato do sumuang do Pomorintaan do Kinorohingan ko' hino goduwo o mato nu om pataamon ko indo do hilo'd tapui naraka. 48 Om hilo' nopo om a' no milo'd pisokon i tapui, om giuk nga' a' i' matai. 49 Pointikid-tikid do tulun om lidangan indo do tapui, do miagal di porsombahan di sinumbali', tu' lidangan di silaon. 50 Silaon nopo om osonong kopio, nga' ondung oidu' o koosino' di silaon diri, om a' nori milo do mosin kawagu. Iyo nopoddi, om siliu kou no do miagal do silaon --- mogiuulud kou no,” ka dau.
Ponimpuun
1 Oi Tiopilus, Ogumu' no o tulun do tuminotos kopio do minumbal do minonulis dot oulud o pinonulis do pasal di nongosiliu dot id pogialatan toko'. 2 Tinulis diyolo' iri do tumanud di pinosusui di tulun di nongkokito kopio di nongosiliu'ddi do mantad di kinoimpuunon nogi' om di pinopinsusui i habar diri. 3 Om kosorisid ngai' ku poddi iri do mantad di koimpuuno' i' om osorou ku'ddi dot osonong do monulis oku dot iso' o buuk dit oulud kopio o ponunulis do maan do popoilo diya' oi Tuan. 4 Koponulisan ku nopodti om popoilo diya' dot iri nopo i nokotuduk dot id diya' om otopot i' kopio.
Pinosunud o Kosusuan di Yohanis Gampamatis
5 Tontok dit i Horudis o raja' do hilo'd pomogunan do Yudia, om haro o songulun ot imam dot i Sakaria o ngaran. Iyau nopo om mantad id sinompuruan dot imam di suminolusuk di Abia. Ngaran nopod sawo dau om i Ilisabit, om iyau nga' sinakagon nogi' dot imam. 6 Mumboyo' goduwo nopo iyolo' do koinsanai di ponuhuan om it oturan do Tuhan, om aiso' no o tolib-toliban diyolo'. Om kohubayaan do Kinorohingan o koposi-posion diyolo' goduwo. 7 Om molohing no iyolo' goduwo, nga' aiso' i' o tanak diyolo', tu' a' i' maganak i Ilisabit. 8 Insan o tadau, do tontok dit di Abia do sinompuruan o noontok do kumaraja', om i Sakaria o kuminaraja' di karaja' dit imam di mongoi timbaba' do Kinorohingan. 9 Om undio' noddi di piro-piro ot imam do tumanud di koubasanan do wonsoyon diyolo', om i Sakaria diri o nopili' do sumuang dot id Sasambayangan dot Agayo do modtutud di kominyan. 10 Om tontok di maso do tutudan i kominyan, om sumambayang i tulun dot ogumu' do hiri'd soliwan. 11 Om tontok noddi do minintalang o moloikat do Tuhan dot id di Sakaria, do poingkakat do hiri'd ponong id wanan di mija' di podtutudan do kominyan. 12 Om kotigowo nopo i Sakaria do nokokito di moloikat diri om nooris iyau. 13 Nga' boro-boros noddi i moloikat do poingkaa, “Kada' kooris, oi Sakaria. Tu' norongou nod Kinorohingan i sambayang nu. Om maganak nondo i Ilisabit, i sawo nu dot iso' o tanak do kusai. Om pungaranan no kopio i tanak diri dot i Yohanis. 14 Om osusu nopondo i tanak diri om otood ko nondo kopio om ogumu' nogi' o tulun do suwai dot otood. 15 Om iyau nopo om sumiliu nondo do tulun dot agayo o ngaran dot id pagantangan do Tuhan, om a' iyau monginum do waig dot anggur om a' monginum di tiinumon di kaawuk. Om porintaon mantad no iyau do Rusod do Kinorohingan do mantad di kosususu po iyau. 16 Om ogumu' nogi' o tulun dot Israil dot aangatan dau do gumuli' dot id Kinorohingan, i Tuhan diyolo'. 17 Om osiliu nondo iyau do susuhuon do Tuhan dit okoris om kikuasa' do miagal di Ilia. Om popiulud nondo iyau di tapa' dot id tangaanak, om i tulun dit a' minumboyo' nga' tudukan nondo dau do gumuli' dot id pomusarahan dit otopot. Om iyo noddi iyau do poposodia'd tulun do rumamit do Tuhan,” ka dau. 18 Om ponguhot no i Sakaria di moloikat diri do poingkaa, “Poingkuro o koilaan ku dot osiliu kopio o miagal diri? Tu' molohing oku no, om i sawo ku nga' molohing no,” ka dau. 19 Om boros ka di moloikat do suminimbar, “Iyoho' nopodti om i Gabriol, i mogobi-obi' do Kinorohingan, om sinuhu' oku dau do mongoi popoboros do habar dot osonong diti dot id diya'. 20 Om nunu nopo i poboroson ku om ongosiliu ngai' nondo iri dot orikot i maso. Nga' iyo nopondo tu' a' ko otumbayaan, om a' ko nondo koboros; obobou ko nondo do gisom dot osiliu i pinoboros ku,” ka dau. 21 Om sangandad-andad diri di Sakaria i tulun dot ogumu'. Om ongosuayan ngai' iyolo' ondung nokuro tu' alaid kopio i Sakaria do hiri'd suang di Walai'd Sasambayangan dot Agayo. 22 Om kosoliwan noddi iyau, nga' a' noddi iyau milo do moro-boros dot id diyolo'. Om pimbouran po dau di longon dau iyolo' tu' notilombus no iyau'd nobobou. Om koilaai noddi di tulun do nokokito iyau do pinointalang do hiri'd Walai'd Sasambayangan dot Agayo. 23 Om kopongo poddi di Sakaria o karaja' dau do hiri'd Walai'd Sasambayangan dot Agayo, om uli' noddi iyau do hiri'd walai dau. 24 Om a' poddi alaid do mantad diri, om ponontian no i Ilisabit, i sawo dau. Om indualai nopoddi i Ilisabit do solinaid do limo o tulan. 25 Om boros ka di Ilisabit, “Tinulung oku nogiddi do Tuhan. Om tinanus dau o kointingayaman ku,” ka.
Pinosunud o Kosusuan di Yesus
26 Om tontok dit onom no o tulan di Ilisabit do monontian, om suhuo' nod Kinorohingan i moloikat Gabriol do mongoi do hilo'd Nasarit it iso' o bandar di hilo'd watas do Galilia. 27 Om suhuo' no dau i Gabriol do mongoi solowot dot iso' o tondu' dit a' po notoning do kusai, dot i Maria o ngaran. Iri nopo i sumandak diri nga' kitunang no dot i Yusup o ngaran, i sinakagon di Raja' Daud. 28 Om ongoi no i moloikat diri solowot di Maria om boro-boros nod poingkaa, “Osimbayan ko no! Iya' i nabarakatan do Tuhan di poimaha' kopio. Tuhan no o moyo-woyo' diya'!” ka dau. 29 Om kotigowo nopo i Maria do nokorongou di boros di moloikat diri. Om momusorou iyau ondung nunu kopio o komoyon di podsusuwau. 30 Om boro-boros noddi i moloikat dot id dau, “Kada' kooris oi Maria, tu' kohubayaan ko i' do Kinorohingan. 31 Om monontian ko nondo, om mogkosusu ko dot iso' o tanak do kusai, i mositi' no do pungaranan nu dot i Yesus. 32 Om abantug nondo iyau om roitan iyau do Tanak do Kinorohingan dit Asawat Kopio. Om Tuhan no i Kinorohingan o moniliu dau do raja' do miagal di Raja' Daud, i taki-aki dau. 33 Om iyau nondo o momorinta' do miagal do raja' di sinakagon di Yakub do gisom dot alaid. Om aiso' nondo o kopupuson do pomorintaan dau,” ka dau. 34 Boros kad Maria dot id moloikat diri, “Poingkuro'ddi dot osiliu o miagal diri, tu' a' oku i' nokoumbal do notoning do kusai,” ka dau. 35 Om boros ka di moloikat do suminimbar, “Rumikot nondo o Rusod do Kinorohingan dot id diya', om olopot ko nondod kuasa' do Kinorohingan. Om iri no o kopomoroitan di tanak di pogkosusuon diri dot Olidang, om Tanak do Kinorohingan. 36 Soroho' pogi' i Ilisabit i koobpinayan nu, i roitan do tulun dot a' maganak, nga' onom no o tulan dau do monontian do molohing piya iyau. 37 Tu' aiso' i' ot a' milo'd Kinorohingan do wonsoyon,” ka dau. 38 Om boros kaddi di Maria, “Iyoho' nopo om susuhuon id Tuhan; om powonsoyon nopo dot id doho' o miagal dino nokoboros nu,” ka dau. Om tongkiad noddi di Maria i moloikat.
Minongoi i Maria Pogolimbuha' di Ilisabit
39 Om oruhai poddi do mantad diri om ongoi noddi i Maria dot id iso' o bandar do hilo'd Yudia, i hiri'd konuluhanan. 40 Om ongoi no iyau do hiri'd walai di Sakaria. Om kasalakoi noddi i Maria, om boro-boros no iyau do suminuwau di Ilisabit. 41 Om soira' di norongou di Ilisabit i boros di Maria do suminuwau dau om pinggura' nopo i ragang dot id tian di Ilisabit. Om koporinta' noddi i Ilisabit do Rusod do Kinorohingan. 42 Om boro-boros noddi iyau dot opuhod do poingkaa, “Iya' no i nabarakatan kopio dot id pogialatan do koinsanai'd tongoondu'! Om barakatan no i tanak di pogkosusuon nu! 43 Isai kopio oku'dti tu' rumikot dot id doho' i tina' do Tuhan? 44 Tu' soira' do nokorongou oku do boros nu do suminuwau om inggura' nopo ilo ragang do hilo'd tian ku dot atataadan. 45 Olumaag ko no, tu' notumbayaan ko dot ongosiliu ngai' o nunu nopo i nokoboros do Tuhan dot id diya',” ka dau.
Boros di Maria do Mongunsikou
46 Boros ka di Maria, “Mamarayou oku nod Tuhan, 47 om otood oku no kopio dot i Kinorohingan di gampamasi doho' o kataadan ku. 48 Tu' nosorou oku i' dau, i susuhuon dau dit aiso' i' o ngaran-ngaran! Tu' mantad pondod baino', om oinsanan nopo o bansa' do pokolumaag doho'. 49 Tu' winonsoi id Kinorohingan dit Osundu Kopio it agayo kopio dot id doho'. Olidang no o ngaran dau; 50 om insianan i' do Tuhan, o koinsanai do sinakagon do tulun dit oronok dau. 51 Nga' iri nopo tulun di minggayo-gayo, om popogitompias-piason id Tuhan dot i kokoriso' dau o popogitompias-pias, om raagon dau i nosorou mantad diyolo' do wonsoyon diyolo'. 52 Om i piro-piro o raja' nga' polintuhunon dau do mantad id tirikohonon diyolo' do don raja', om poinsawaton dau i tulun dit aiso' o ngaran-ngaran. 53 Om i tulun di louson nga' pingyahanon nondo dau do koinsanai dit ongosonong, om uyungon dau i tulun do kaya' do gisom dot aiso' no ot oigit-igitan dau. 54 Tulungon i' dau ot Israil i susuhuon dau, do tumanud di batos dau di pinabatos dau dot id taki-aki toko'. 55 A' id Tuhan olihuan i batos dau, do momuhawang dot id di Abraham om id sinakagon dau do gisom dot alaid,” ka dau. 56 Om haro i' doti' o tolu o tulan do koloido' di Maria do poundorong do hilo'd di Ilisabit, om uli' nogi' iyau do hiri'd walai dau.
Kinosusuon di Yohanis Gampamatis
57 Om korikot noddi o tulan do kosusuan di Ilisabit. Om kosusu noddi iyau om kusai o tanak dau. 58 Om korongou noddi i tulun di hiri'd doros-oros diyolo' om i koobpinayan diyolo' do kosonongo' do Tuhan dot id di Ilisabit, om iyolo' nga' tuminonggoi nogi' dau dot ongotood. 59 Om korikot poddi do walu' o tadau do tumur di tanak diri, om rikot noddi i tulun do minongoi ponunat di tanak. Om pungaranai daa'ddi diyolo' i tanak diri dot i Sakaria tu' pasangayon diyolo' di ngaran di tapa' di tanak. 60 Nga' boros ka di tina' dau, “Okon i' ko' ino o pomungaran dau; pungaranan iyau dot i Yohanis,” ka dau. 61 Nga' boros ka diyolo' dot id dau, “Nga' aiso' i' o tongosongulun piya dot id pogialatan do koobpinayan nu do kingaran dot iyo'ddi,” ka. 62 Om bourai no diyolo' i Sakaria do minonguhot ondung isai o korohian dau do pomungaran di tanak. 63 Om pokianu no i Sakaria dot iso' o watu do ponulisan om tuliso' no dau o poingkaa, “Ngaran nopo dau om i Yohanis,” ka. Om kosuayai ngai' nopo iyolo'. 64 Om maso nogiddi do nokoboros kawagu i Sakaria om pamarayou noddi iyau'd Kinorohingan. 65 Om kongooris ngai' nopoddi i tulun dit id doros-oros diyolo', om kotongkop noddi o habar diri do pointongkop do hiri'd konuluhanan do Yudia. 66 Om koinsanai di tulun di nongkorongou do habar diri, om monguhot ngai' nopo ot id ginawo diyolo' do poingkaa, “Nunu ma o kosilihon dilo tanak dilo' do koimbagu?” ka no. Tu' atalang no kopio do moyo-woyo' i' o Tuhan di tanak diri.
Pinoposunud i Sakaria do Habar do Mantad id Tuhan
67 Om koporinta' noddi do Rusod do Kinorohingan, i Sakaria, i tapa' di tanak diri, om posunudo' noddi dau i boros do mantad id Tuhan. Boros ka dau, 68 “Kainou mamarayou'd Tuhan, i Kinorohingan do bansa' dot Israil! Nokorikot no iyau do mongoi ponulung do tulun dau om mongoi papalabus diyolo'. 69 Minanahak iyau dati' do gampamasi dit okoris, i sinakagon di Daud, i susuhuon dau. 70 Tu' nakabatos mantad nod Tuhan do pinolombus di piro-piro o nabi di pinili' dau di gulu po, 71 do popoidu' iyau dati' do mantad id pisangod toko', om mantad id kuasa' di tulun dit angaraatan dati'. 72 Om popointalang do kopuhawango' dau dot id taki-aki toko', om sulungon kasai' dau i batos dau dit olidang. 73-74 Om nokosumpa' no iyau dot id di Abraham i tapa' toko', om nakabatos iyau do popoidu' dati' do mantad id pisangod toko', om a' toko' indo ooris do momonsoi do karaja' dau. 75 Om sumambayang kasai' toko' i' dot id dau, om poposonong do ginawo dau do solinaid toko' do poimpasi. 76 Oi tanak ku, roitan ko nondo do nabi do Kinorohingan it Asawat Kopio. Iya' no i sinuhu' do mogulu do Tuhan do mamarantis do ralan do wayaan dau, 77 om popoilo dot id tulun di songonuon do Tuhan do posion nondo iyolo', dot oompunan do Kinorohingan i dusa diyolo'. 78 Opuhawang i' o Tuhan toko' om obinsianan iyau; tu' kinorikatan nopo dau om mongoi pamasi dati'. Om iyo po iyau'd tadau di mulai do dongkosuabon, 79 om iyo noddi iyau'd monitiu do koinsanai'd tulun di poimpasi dot id totuong om id kopoddosian. Om mangahak iyau dati' do sumusui di ralan do kumaa id kosimbayanan,” ka dau. 80 Om mayo-gayo nopoddi i tanak di Sakaria'ddi, om muhang-ruhang o kokoriso' dau di don rusod. Om undorong nopoddi i tanak di Sakaria'ddi do hilo'd tana' do kowotuan do gisom do norikot i maso dau do mintalang dot id bansa' dot Israil.
Kinosusuon di Yesus
1 Om tontok nopoddi om ponuhu' no i Kaisar Agustus do koinsanai di rayat do pomorintaan do Rum do mongoi pokitulis do ngaran do hiri'd pongintaban do tulun. 2 Om iti nopo pinongintaban do tulun dit insan nogidti om pinaharo di tontok dot i Kirinius o gobunor do pomogunan do Siria. 3 Om oinsanan nopoddi i tulun do minongoi pokitulis do ngaran do hiri'd bandar di tadon diyolo'. 4 Om i Yusup nogi' i mantad id bandar do Nasarit it id watas do Galilia, nga' minongoi nogi' do hilo'd bandar do Baitlahim, it id watas do Yudia, i kinosusuon di Raja' Daud. Tu' i Yusup nopo om sinakagon di Daud. 5 Om pokitulisai noddi di Yusup o ngaran dau do miwoyo' di Maria, i tunang dau, di monontian no. 6 Om di nopo di hilo' iyolo'd Baitlahim om korikot noddi o maso do kosusuan di Maria. 7 Om kosusu no iyau dot iso' o tanak do kusai. Om iri no o tanak dau dit id gulu. Om rilitai no di Maria do kain i tanak diri, om poodopo' no dau do hiri'd ponunumadan do sapi' di kisuang do sakot do nokoring; tu' aiso' no o niyonon diyolo' do hiri'd walai'd sisiwaan.
I Gompomogompi' do Dumba' om i Moloikat
8 Om totuong iddi do haro o piro-piro o gompomogompi'd dumba' do madtamong do dumba' diyolo' do hiri'd kobuturan dot id watas diri. 9 Om sigog id intalang o moloikat do Tuhan dot id diyolo', om kotitiu no iyolo' do tulinau do mantad id Tuhan di kosorong tomod. Om moddosi tomod diri iyolo'. 10 Nga' boro-boros noddi i moloikat dot id diyolo' do poingkaa, “Kada' kou poddosi, tu' iyoho' nopodti om poporongou dokoyu do habar dot osonong. Iri no i habar do popotood do koinsanai'd tulun. 11 Tu' tadau nod baino' do nosusu do hilo'd bandar di Daud i Raja' do Gampamasi dokoyu, iri no i Kristus, i Tuhan. 12 Iti no o tanda' do koilaan dokoyu dot otopot iti: Okito nondo dokoyu i ragang do rinilitan do kain om poingodop dot id iso' o ponunumadan do sapi',” ka dau. 13 Om sigog nopoddi om ogumu' o moloikat do suwai do poiruhang di moloikat diri. Om modsinding iyolo' do mamarayou'd Kinorohingan do poingkaa, 14 “Royohon no o Kinorohingan di hilo'd tawan dit id sawat kopio! Om osimbayan no o ginawo di tulun do hiti'd pomogunan di kohubayaan do Tuhan,” ka. 15 Nga' soira'ddi do nokotongkiad diyolo' i moloikat diri, do guminuli' iyolo' do hilo'd surga, om pogiboro-boros noddi i gompomogompi'd dumba'ddi do poingkaa, “Kainou mongoi'd hilo'd Baitlahim do mongoi ontong di nosiliu'ddi, do miagal di pinoboros do Tuhan dot id dati',” ka. 16 Om arau-arau nopoddi i gompomogompi' do dumba'ddi do minamanau. Om kabantalai noddi diyolo' i Maria om i Yusup, om i ragang di poingodop do hiri'd ponunumadan do sapi'. 17 Om soira' di nokito di gompomogompi' do dumba'ddi i ragang diri, om posunudo' no diyolo' i pinoboros di moloikat dot id diyolo' do pasal di ragang. 18 Om ongosuayan ngai' nopoddi i tulun di nokorongou di pinosusui di gompomogompi'd dumba'ddi. 19 Nga' pakangkabo' ngai' nopo di Maria iri, om pinsarahan dau o komoyon. 20 Om uli' ngai' noddi i gompomogompi' do dumba'ddi do hiri'd kobuturan do mikuwo'd popoinggayo om mamarayou'd Kinorohingan. Tu' koinsanai di norongou om i nokito diyolo' nga' miontok ngai' nopo di pinoboros di moloikat dot id diyolo'.
Pinungaranan i Yesus
21 Om korikot poddi o walu' o tadau do tumur di tanak diri, om sunatai no i tanak. Om pungaranai no diyolo' iyau dot i Yesus, do miagal di pinomungaran mantad di moloikat di tanak diri di ponontianon nogi' iyau di tina' dau.
Pinatahak i Yesus dot id Tuhan do Hiri'd Walai'd Sasambayangan dot Agayo
22 Om korikot noddi i maso di Yusup om i Maria do momonsoi di wonsoyon di natantu' mantad do pomolidang do tinan do tumanud di Tourat di Musa, om igitai no diyolo' i tanak diri do mongoi'd hilo'd Yorusalim dot ongoyon patahako' dot id Tuhan. 23 Tu' nokotulis no dot id suang dot oturan do Tuhan o poingkaa, “Pointikid-tikid do tanak do kusai dit id gulu om mositi' no do patahakon dot id Tuhan,” ka. 24 Om papatahak po iyolo' do porsombahan di sumbolion, do tumanud di natantu' mantad dot id suang dit oturan do Tuhan. Patahakon nopo diyolo' om mipasang o sikukur om duwo o tinan do punai dit okoro' po. 25 Om tontok nopoddi nga' haro o tulun do hilo'd Yorusalim dot i Simion o ngaran. Iyau nopo om osonong koulun, it oronok do Kinorohingan, om maso dau do magandad di maso'd Kinorohingan do mamasi do tulun dot Israil. Om moyo-woyo' dau o Rusod do Kinorohingan. 26 Om nosunudan no iyau do Rusod do Kinorohingan dot a' po iyau apatai dot a' po iyau kokito di Raja' do Gampamasi, i pinabatos do Tuhan. 27 Om suang noddi i Simion do hiri'd Walai'd Sasambayangan dot Agayo, tu' sinuhu' iyau'd Rusod do Kinorohingan. Tontok nopoddi om nigitan di Yusup om i Maria i Yesus, it okoro' poddi do hiri'd suang di Walai'd Sasambayangan dot Agayo do momonsoi di natantu' mantad do wonsoyon di ponuhuan di Tourat. 28 Om ongoyo' noddi di Simion kibito' i tanak diri, om pamarayou no iyau'd Kinorohingan. Boros ka dau, 29 “Baino' nopoddi oi Tuhan, om nabayaan nu no i batos nu. Om pologoso' oku nopo iyoho' i susuhuon nu dot osimbayan do matai. 30 Tu' nokokito oku noddi kopio di Gampamasi di mantad id diya'. 31 Iri nopo i Gampamasi'ddi om pinosodia' nu do bagi'd koinsanai'd bansa': 32 Do miagal do tanawau di monitiu do ralan do koinsanai'd bansa'd suwai, do rumikot dot id diya'; i tanawau di poporikot do kosuahan dot id Israil i tulun nu,” ka. 33 Om osuayan nopo i tapa' om i tina' di tanak diri do nokorongou di boros di Simion do pasal di tanak. 34 Om barakatai noddi di Simion iyolo', om boro-boros no iyau di Maria, i tina' di tanak diri do poingkaa, “Nopili' no do Kinorohingan iti tanak diti do mamatai om mamasi dot ogumu' o tulun dot Israil. Om sumiliu iyau do tanda' do mantad id Kinorohingan, i saapon dot ogumu' o tulun. 35 Om kointalang indo it id suang do ginawo diyolo'. Om tumobok nondo dot id ginawo nu o katangaban do miagal po di gayang dot atarom,” ka dau. 36 Om haro nogi' o songulun o nabi do tondu' di molohing no. Ngaran nopo dau om i Hana, i tanak di Panuil, i mantad id payat di Asur. Om turu' no o toun di Hana do kisawo, 37 om kopuadai no iyau. Om walu' noddi nohopod om apat o toun do tumur dau do baino'. Om hiri kasai' nopo iyau id Walai'd Sasambayangan dot Agayo. Om monongodou-ngodou nopo om monuaban iyau do sumambayang dot id Kinorohingan do mikuwo'd puasa, do ralan do tumuku' dot id dau. 38 Om nokoontok no do nokorikot i Hana do maso'ddi om pamarayou noddi iyau'd Kinorohingan, om minimboros iyau do pasal di tanak diri do kumaa id koinsanai di tulun di magandad do maso'd Kinorohingan do popoidu' do Yorusalim do mantad id kosusaan.
Guminuli' do Hilo'd Nasarit
39 Om kowonsoi ngai' poddi di Yusup om i Maria it apatut diyolo'd wonsoyon do tumanud dot oturan do Tuhan, om uli' noddi iyolo' do hilo'd Nasarit i hilo'd watas do Galilia. 40 Om mayo-gayo nopoddi i tanak diri, om murut-surut o kokoriso'. Om oilo kopio iyau om kosianan kopio iyau'd Kinorohingan.
Hiri i Yesus id Walai'd Sasambayangan dot Agayo
41 Pointikid-tikid do toun om mongoi kasai' nopo i molohing di Yesus do hilo'd Yorusalim do mongoi pamaramai di Tadau'd Agayo do Paska. 42 Om tontok di hopod om duwo o toun do tumur di Yesus, om ongoi no iyolo' rapou di karamayan diri do miagal di koubasanan diyolo'. 43 Om kopupusai noddi i karamayan diri om uli' no iyolo', nga' i Yesus nopo, i tanak diri, om poundorong po do hilo'd Yorusalim, nga' a' i' nokoilo i tapa' om i tina' dau. 44 Osorou nopo daa diyolo' om poinrolot i' iyau di tulun di songkoruhangan diyolo'. Om kasangadahai poddi iyolo' do manau-panau, om ihumo' nogiddi diyolo' iyau do hiri'd pogialatan di koobpinayan om i kongoombolutan diyolo'. 45 Nga' a' i' diyolo' nokito iyau. Om poguliai noddi diyolo' do hilo'd Yorusalim do mongoi pogihum dau. 46 Om kotolu poddid tadau diyolo' do mogihum, om kokito nogi' diyolo' iyau do hiri'd Walai'd Sasambayangan dot Agayo. Om poirikau iyau do mokinongou di piro-piro o gomponuduk do tugama', om minguhot iyau diyolo' do piro-piro o tuhoton. 47 Om oinsanan nopo i tulun dot ongosuayan do korongou di koiloo' dau'd sumimbar. 48 Om iri piya molohing dau nga' osuayan i' do kokito dau. Om boros ka di tina' dau dot id dau, “Nokuro tu' iyo'dti o winonsoi nu dot id dahai oi ondu'? Tu' atangkabo oku po om ilo tapa' nu do mogihum diya'!” ka dau. 49 Om boros ka di Yesus do suminimbar, “Nokuro tu' ihumon oku dokoyu diloi' apa' oi ina'? A' kou toi koilo do mositi' no do hiti oku'd walai di Tapa' ku?” ka dau. 50 Nga' a' i' iyolo' kosuhut di komoyon kopio di pinosimbar di Yesus diri. 51 Om woyo' noddi i Yesus diyolo' do minuli' do hilo'd Nasarit. Om mumboyo' kasai' i' i Yesus do boros diyolo'. Om pakangkabo' ngai' nopo di tina' dau o koinsanai'ddi. 52 Om mayo-gayo i Yesus nga' muhang-ruhang o toilaan dau, om kosianan iyau'd Kinorohingan om kasanangan iyau'd tulun.
I Pinosusui di Yohanis Gampamatis
1 Om tontok di kohopod om limo do toun do pomorintaan di Kaisar Tiborius, om i Pontius Pilatus o nosiliu do gobunor do hilo'd pomogunan do Yudia, om i Horudis o momorinta' do hilo'd Galilia. Om i Pilipus, i tobpinai di Horudis o momorinta' do hilo'd pomogunan dot Ituria om Trakonitis, om i Lisanias o momorinta' do hilo'd Abilini. 2 Om i Hanas om i Kayapas, i boyoon dot agayo dot imam do tontok diri. Om tontok no do toun diri do minoro-boros o Kinorohingan dot id di Yohanis, i tanak di Sakaria di hilo' iyau'd tana' do kowotuan. 3 Om pamanau noddi i Yohanis do tuminongkop di watas do Bawang do Yordan do popinsusui di habar do mantad id Kinorohingan. Boros ka dau, “Korologo kou no do momonsoi'd dusa om mokibatis kou no om oompunan kou i' do Kinorohingan,” ka dau. 4 Iri nopo om miontok i' di nokotulis dot id buuk di Nabi Yosaya do poingkaa, “Haro o tulun do mimboros dot opuhod do hilo'd tana' do kowotuan do poingkaa, ‘Rontisan no o ralan do wayaan do Tuhan; potingon no i ralan do wayaan dau. 5 Om timbunan ngai' no i kubong, om lampayon ngai' i nuluhon om i nulu-nulu. Om potingon ngai' i ralan dit ongokilong, om sonongon ngai' it ongorumpad. 6 Om kongokito ngai' i' do Kinorohingan do mamasi'd tulun, o koinsanai'd tulun do pointongkop do pomogunan!’ ka,” ka dau. 7 Om ogumu' o tulun do ruminikot dot id di Yohanis do mongoi pokibatis. Om boros ka di Yohanis dot id diyolo', “Iyokoyu no o tulun dit angaraat! Isai o minomisunud dokoyu do milo kou do mogidu' do mantad id hukuman do Kinorohingan di porikoton no? 8 Pointalango' no dokoyu dot id wonsoyon dokoyu do nokorologo kou di dusa dokoyu. Kada' kou nogi' pomoros dot i Abraham o taki-aki dokoyu. Ilaai no dokoyu, dot iti piya watu nga' milo id Kinorohingan do silihon do sinakagon di Abraham. 9 Nokosodia' no o kapak do panagad di kayu do porotopon do tana' o pananagad. Pointikid-tikid do kayu dit a' mongua' dot osonong om tagadon no om pataamon do hiri'd tapui,” ka dau. 10 Om ponguhot noddi di Yohanis i tulun dot ogumu' do poingkaa, “Iyo nopondo om nunu'ddi ma ot apatut dahai'd wonsoyon?” ka diyolo'. 11 Om boros ka di Yohanis do suminimbar, “Tulun nopo di haro o duwo o rasuk dau, om patahakon no o tiso' di rasuk dau dot id tulun dit aiso' o rasuk; om i tulun di haro o takanon nga' mositi' no do momiduwo di tulun do suwai dit aiso' o takanon,” ka dau. 12 Ogumu' nogi' o tulun di gomponimung do sukai do ruminikot dot id di Yohanis do minongoi pokibatis. Om uhoto' no diyolo' i Yohanis do poingkaa, “Oi Guru, nunu ot apatut dahai'd wonsoyon?” ka. Om boros ka di Yohanis do suminimbar, 13 “Kada' kou ponuhu'd tulun do mambayar do sukai do lobi ko' mantad di natantu' mantad,” ka dau. 14 Om haro nogi' o soudor do minuhot di Yohanis do poingkaa, “Poingkuro no iyahai? Nunu ot apatut dahai'd wonsoyon?” ka. Om boros ka di Yohanis do suminimbar, “Kada' kou ponginggorit dot isai nopo o tulun do ralan dokoyu'd magahau'd tusin diyolo', om kada' kou pagahau'd tusin dot i pononondos dit a' otopot o ralan dokoyu'd magahau. Poumbagalon nopo dokoyu i gadsi' dokoyu!” ka dau. 15 Om tontok noddi do minogiuhot-uhot i tulun diri dot ondung i Yohanis i Raja' do Gampamasi dit andad-andadon diyolo'. 16 Om boro-boros noddi i Yohanis diyolo' do poingkaa, “Iyoho' nopo om waig no o pamatis ku dokoyu; nga' haro indo o tulun do rumikot di kikuasa' ko' iyoho'. Tu' mongiad piya'd tali do kasut dau nga' a' oku i' osorupai. Om iyau no o mamatis dokoyu'd Rusod do Kinorohingan om tapui. 17 Poingigit no dau o bakul do pangatap do koinsanai di gandum do gisom dot osompipian. Om timungon nondo dau i gandum do posuangon do hiri'd sulap, nga' iri ngai' nopondo i tapol om tutudan dau do hiri'd tapui dit a' milo'd pisokon,” ka dau. 18 Iyo noddi i Yohanis do minonuduk ngai' di tulun, do mogisuayan o ralan dau do minonuduk, di maso dau do popinsusui di Habar dot Osonong. 19 Nga' i Horudis nopo, i momorinta' do hilo'd Galilia om tinogod di Yohanis tu' kinawin dau i Horudias i sawo di tobpinai di Horudis, om tinogod nogi' di Yohanis i Horudis dot iri ngai' i winonsoi dau'd suwai ko' iri dit angaraat o kinapanagadan. 20 Nga' okon nogi' do rinuhangan di Horudis i karaaton dau tu' ponuhu' po iyau do popogiil di Yohanis.
Binotisan i Yesus
21 Om kongobotisai ngai' poddi i tulun, om botisai noddi i Yesus. Om tontok di maso di Yesus do sumambayang, om haro'ddi o noukaban do hilo'd tawan, 22 om lintuhun no o Rusod do Kinorohingan dot id di Yesus do miagal-agal do punai. Om korongou noddi o Kinorohingan do moro-boros do poingkaa, “Iya' no i Tanak ku di kosianan ku. Om iya' no i kohubayaan ku,” ka.
Ngaran di Komolohingan di Yesus
23 Tontok di tuminimpuun i Yesus do kuminaraja' om tolu no doti' nohopod o toun dau. Tumanud nopo dot osorou'd tulun, om tanak iyau di Yusup, i tanak di Ili, 24 i tanak di Matat, i tanak di Liwi, i tanak di Malki, i tanak di Yanai, i tanak di Yusup, 25 i tanak di Matisa, i tanak di Amos, i tanak di Nahum, i tanak di Hisli, i tanak di Nagai, 26 i tanak di Maat, i tanak di Matisa, i tanak di Simoi, i tanak di Yosik, i tanak di Yoda, 27 i tanak di Yohanan, i tanak di Risa, i tanak di Sorubabil, i tanak di Sialtiol, i tanak di Nori, 28 i tanak di Malki, i tanak di Adi, i tanak di Kosam, i tanak di Ilmadam, i tanak di Ir, 29 i tanak di Yosua, i tanak di Iliosor, i tanak di Yorim, i tanak di Matat, i tanak di Liwi, 30 i tanak di Simion, i tanak di Yohuda, i tanak di Yusup, i tanak di Yonam, i tanak di Ilyakim, 31 i tanak di Milia, i tanak di Mina, i tanak di Matata, i tanak di Natan, i tanak di Daud, 32 i tanak di Isai, i tanak di Obid, i tanak di Boas, i tanak di Salmon, i tanak di Nahason, 33 i tanak di Aminadab, i tanak di Admin, i tanak di Arni, i tanak di Hisron, i tanak di Piris, i tanak di Yohuda, 34 i tanak di Yakub, i tanak di Isak, i tanak di Abraham, i tanak di Tira, i tanak di Nahor, 35 i tanak di Sorug, i tanak di Rohu, i tanak di Pilig, i tanak di Ibir, i tanak di Salmun, 36 i tanak di Kinan, i tanak di Arpaksad, i tanak di Sim, i tanak di Nuu, i tanak di Lamik, 37 i tanak di Motusala, i tanak di Hinok, i tanak di Yarid, i tanak di Mahalaliil, i tanak di Kinan, 38 i tanak di Inos, i tanak di Sit, i tanak di Adam, i tanak do Kinorohingan.
Pinogumbalan do Rogon i Yesus
1 Om porintao' noddi i Yesus do Rusod do Kinorohingan di tuminongkiad di Bawang do Yordan. Om angatai noddi i Yesus di Rusod do Kinorohingan do minongoi do hilo'd tana' do kowotuan. 2 Om hilo' no iyau do pinogumbalan do Rogon do solinaid dot apat nohopod o tadau. Om solinaid diri om a' i' iyau minangakan do nunu nopo. Om louson tomod diri iyau dit alaid. 3 Om boro-boros no i Rogon di Yesus do poingkaa, “Okon toi ko' Tanak ko'd Kinorohingan? Suhuo' pogi' ilo watu do sumiliu'd roti,” ka. 4 Nga' boros ka di Yesus do suminimbar, “Nokotulis no dot id Buuk do Kinorohingan dot, ‘Okon i' ko' roti no kapasi'd tulun,’ ka,” ka dau. 5 Om pokoyoo' no di Rogon i Yesus do hiri'd iso' o kinoiyonon dit asawat kopio. Om poontongo' no di Rogon i Yesus do koinsanai do pomorintaan do hiti'd pomogunan dot oruuhai kopio do pinopoontong. 6 Om boros kaddi di Rogon dot id di Yesus, “Patahakon ngai' ku nopo diya' o koinsanai do pomorintaan om iti kakayaan tu' nakatahak ngai' noti dot id doho', om milo oku i' do papatahak diti dot id isai nopo o korohian ku do patahakan. 7 Om asanganu ngai' nu nopo daa ilo' dot ondung motud ko do tumuku' doho'!” ka dau. 8 Om boros ka di Yesus do suminimbar, “Nokotulis no dot id Buuk do Kinorohingan o poingkaa, ‘Tuku' no dot id Tuhan, i Kinorohingan nu, om iyau noo o pogobi-obian,’ ka,” ka dau. 9 Om pokoyoo' po di Rogon i Yesus do hilo'd Yorusalim; om pokoyoo' no dau iyau do hiri'd timpak di Walai'd Sasambayangan dot Agayo. Om boros ka di Rogon dot id di Yesus, “Okon toi ko' Tanak ko'd Kinorohingan? Tuhun pogi' do mantad hiti; 10 tu' haro i' o nokotulis dot id Buuk do Kinorohingan do poingkaa, ‘Suhuon indod Kinorohingan i piro-piro o moloikat dau do momogompi' kopio diya',’ ka. 11 Om haro po o nokotulis do poingkaa, ‘Kahangan ko indo di piro-piro o moloikat om a' indo kootung dilo watu o gakod nu,’ ka,” ka di Rogon. 12 Om boros ka di Yesus do suminimbar, “Nga' haro i' o nokotulis dot id Buuk do Kinorohingan do poingkaa, ‘Kada' pogumbal do Tuhan i Kinorohingan nu,’ ka,” ka dau. 13 Om kotingkod poddi i Rogon do mogumbal di Yesus do mogisuayan o ralan do minogumbal, om tongkiad nogiddi i Rogon di Yesus do magandad kawagu'd maso dit osonong do mogumbal.
Tuminimpuun i Yesus do Kuminaraja' do Hilo'd Galilia
14 Om guli' noddi i Yesus do hilo'd Galilia; om porintao' no iyau di Rusod do Kinorohingan. Om nokotongkop no dot id watas diri o habar do pasal dau. 15 Om minonuduk iyau do hiri'd piro-piro o walai'd sasambayangan, om oinsanan nopo o tulun do mamarayou dau.
A' i Tulun do Nasarit Notumbayaan di Ponudukan di Yesus
16 Om ongoi no i Yesus do hilo'd Nasarit, i hilo'd kinogoyoon dau. Om ongoi no iyau do hiri'd walai'd sasambayangan do tontok di tadau'd Sabat, do miagal di koubasan dau. Om ingkakat no iyau do mambasa' di Buuk do Kinorohingan. 17 Om onuwai no iyau di buuk do pinotulisan di boros di Nabi Yosaya; om ungkalado' no dau i buuk di linopi diri om kokito no dau ot ayat do poingkaa, 18 “Id suang ku i Rusod do Tuhan, tu' nopili' oku no dau do mongoi poposusui do Habar dot Osonong dot id tulun do mosikin. Sinuhu' oku dau do popoilo do polobuson i tulun di nangatanggayan do pisangod, om lingasan i tulun di bolou, om poiduwon i tulun dit ulak-ulakan. 19 Om poporongou'd tulun do norikot no o maso do kopomosian do Tuhan di tulun di songonuon dau,” ka. 20 Om lopio' no kawagu di Yesus i buuk diri, om patahako' no dau dot id tulun di mongilo-ilo'ddi, om irikau noddi iyau. Om songingontong ngai' nopo dau i tulun di hiri'd suang di walai'd sasambayangan. 21 Om boro-boros noddi i Yesus diyolo' do poingkaa, “Tadau nod baino' do nabayaan i nokotulis dot id ayat do Buuk do Kinorohingan do tontok di norongou dokoyu iri,” ka dau. 22 Ongoimayaan ngai' nopo iyolo' do nokorongou di boros dau dit ongosonong kopio'ddi, om sumokodung iyolo' dau. Om boros kaddi diyolo', “Okon toi ko' tanak iyau di Yusup?” ka. 23 Om boros ka di Yesus dot id diyolo', “Atantu' no dot iyoho' nondo o komoyon do suriban diti do poingkaa, ‘Oi Dokutur, lingasai po o diya'd tinan. Wonsoyon no i kongoimayaan di nongorongou dahai do winonsoi nu di hilo'd Kapornaum do hiti'd diya'd kampung,’ ka nondo daa dokoyu?” ka dau. 24 Om boro-boros po kawagu i Yesus do poingkaa, “Ilaai no dokoyu, dot aiso' i' o nabi do pusohon do hiri'd dau'd kampung. 25 Nga' pokinongoho' no dokoyu iti: dot di nopo poimpasi po i Ilia, om minagadau do solinaid do tolu o toun om satanga'. Om pononglous noddi dot adalaan kopio o pointongkop diti pomogunan. Om tontok nopoddi om ogumu' o tongoondu' do nopuadan do hilo'd Israil. 26 Nga' iyo piya'ddi, nga' a' id Kinorohingan sinuhu' i Ilia do mongoi solowot dot ongoiso' piya di tongoondu' di nopuadan diri, suwai ko' suhuo' nogid Kinorohingan i Ilia do minongoi do hiri'd iso' o tondu' do nopuadan di hilo'd Sarpat, i hilo'd watas do Sidon. 27 Om iyo nogiddi di poimpasi po i Nabi Ilisa, om ogumu' o tulun do kitoruol do kusta do hilo'd Israil. Nga' aiso' i' o tongosongulun piya do nolingasan do mantad id pogialatan diyolo'. Suwai ko' i Naaman noo, i tulun do Siria,” ka dau. 28 Nga' kongotogod ngai' noddi i tulun di hiri'd walai'd sasambayangan do nokorongou di boros di Yesus diri. 29 Om ingkakat ngai' nopo iyolo' om suhuo' nopo diyolo' i Yesus do sumoliwan di bandar, om angatai nogiddi diyolo' iyau do minongoi do hiri'd timpak di nuluhon di winansayan di bandar diyolo' tu' maan daa diyolo' sudsuro' i Yesus do paparatu'. 30 Nga' pamanau nopo i Yesus do tuminalib do hiri'd pogiintanga-tangaan di tulun dot ogumu' om pamanau no do tuminongkiad.
Tulun di Norusadan do Rusod dot Araat
31 Om ongoi noddi i Yesus do hilo'd bandar do Kapornaum, i hilo'd Galilia. Om hilo' no iyau do minonuduk do tulun dot ogumu' do tontok di tadau'd Sabat. 32 Om ongoimayaan ngai' diri iyolo' do nokokito di kowoyo-woyoo' dau do monuduk, tu' kikuasa' i' kopio iyau do tontok do moro-boros iyau. 33 Nga' hiri nopod walai'd sasambayangan diri om haro o songulun do norusadan do rusod dot araat. Om pinggarang no i tulun diri, 34 “Oi Yesus, i tulun do Nasarit, kukuroyon nu iyahai'dti? Mamatai dahai o kinorikatan nu'd hiti? Kotutun oku i' diya': dot iya' nopo om susuhuon dit olidang do mantad id Kinorohingan!” ka. 35 Boros ka di Yesus do minogodu kopio di rusod dot araat diri, “Tingkod do mimboros! Soliwan no do mantad id tulun diti!” ka dau. Om poloposo' noddi di rusod dot araat i tulun diri do hiri'd dotoguangan ngai' diyolo', om soliwan noddi i rusod dot araat do mantad id tulun diri, om a' i' di rusod dot araat pinokorualan i tulun. 36 Om kongosuayai ngai' nopo i tulun. Om pogiboro-boros noddi iyolo' do poingkaa, “Koimayaan no kopio o boros dau. Tu' suhuon nopo dau o rusod dot araat do sumoliwan do mikuwo'd kuasa' om sinundu, om sumoliwan nopo i rusod dot araat,” ka. 37 Om kotongkop noddi o habar do pasal di Yesus do hiri'd watas diri.
Minomolingos i Yesus dot Ogumu' o Tulun
38 Om soliwan noddi i Yesus do mantad hiri'd walai'd sasambayangan diri, om ongoi no do hiri'd walai di Simun. Nga' tontok nopoddi om sogiton tomod i tiwanon di Simun do tondu'. Om ongoyo' noddi di tulun sunudai i Yesus do pasal diri. 39 Om ongoi noddi i Yesus suang do hiri'd toodopon di tondu'ddi, om sunsubo' noddi di Yesus i sogiton di tondu'. Om kotingkod noddi i sogiton. Om pitilombus nopoddi do tuminungag i tiwanon di Simun diri om ongoi no pogobi-obi' diyolo'. 40 Om maha' di mintotonob no i tadau, om pootodo' ngai' noddi di tulun dot id di Yesus i tobpinai diyolo', di mogisuwai-suayan nopo o toruol. Om tikido' nopo di Yesus do mangama' iyolo'. Om kolingasai ngai' no iyolo'. 41 Om soliwan ngai' noddi i rusod dot araat do mantad id ogumu' o tulun, om pinggarang nod, “Iya' no o Tanak do Kinorohingan!” ka. Nga' oduhai noddi di Yesus i rusod dot araat diri om a' dau pinologos iyolo' do mimboros, tu' koilo i' iyolo' dot iyau i Raja' di Gampamasi.
Minonuduk i Yesus dot id Piro-Piro o Walai'd Sasambayangan
42 Om tongkiad noddi i Yesus do mantad hiri'd bandar diri di mulai nogi' o tadau, om ongoi no iyau do hiri'd kinoiyonon dit oingou. Nga' ihumo' noddi iyau di tulun dot ogumu'. Om kabantalai noddi diyolo' i Yesus. Om oduhai noddi daa diyolo' iyau do tumongkiad diyolo'. 43 Nga' boros ka di Yesus, “A' oku no milo dot a' mongoi poposusui do hilo'd piro-piro o bandar do suwai diti Habar dot Osonong do pasal do Pomorintaan do Kinorohingan, tu' iri no o kinoponuhuan do Kinorohingan doho' do ruminikot do hiti'd pomogunan,” ka dau. 44 Om iri noddi o kinoponudukan di Yesus do hiri'd piro-piro o walai'd sasambayangan do pointongkop di pomogunan do Yudia.
Minomili' i Yesus do Tumatanud Dau dit id Gulu
1 Om tontok di poingkakat i Yesus do hiri'd tisan di Tasik Ginisarit, om ogumu' tomod diri o tulun do mogiimpit-impit do mongoi pokinongou di habar do mantad id Kinorohingan. 2 Om kokito'ddi di Yesus o duwo o parau' do hiri'd tisan di tasik diri; om i nopo monginginsada' diri nga' nokolintuhun no do mantad id parau' diri, om maso no diyolo' do mongoug di rambot diyolo'. 3 Om sakai noddi i Yesus di tiso' di parau'ddi. Sanganu nopo di parau' om i Simun. Om suhuo' no dau i Simun do popoimpit di parau'ddi do popoinsodu-odu' do mantad hiri'd tisan di tasik. Om irikau noddi i Yesus do hiri'd parau' om ponuduk no iyau di tulun dot ogumu'. 4 Om kopongo poddi i Yesus do monuduk, om boro-boros no iyau di Simun do poingkaa, “Koyuo' dokoyu ino parau' do hilo'd daralom, om poromboton nogindo ino rambot dokoyu,” ka dau. 5 Om boros ka di Simun do suminimbar, “Oi Guru, nokototos no iyahai do miningrambot do gisom do nosuaban nga' aiso' i' o naanu dahai. Nga' ondung monuhu' ko, do paparambot oi Guru, om poromboton ku i' kawagu iti rambot,” ka dau. 6 Om kowonsoi poddi diyolo' o miagal diri, om kaanu no iyolo' do sada' dot ogumu' gisom dot oruhai nod nongohurak i rambot diyolo'. 7 Om pokiuhup noddi iyolo' di piro-piro o tambalut diyolo' di hiri'd parau' do suwai. Om rikot noddi i tambalut diyolo'ddi, om pogiuhupai noddi diyolo' do poposuang i sada' do hiri'd duwo o parau', gisom dot oruhai no dot olonsod goduwo i parau' diyolo' tu' noponu'd sada'. 8 Om otud noddi i Simun dot id toguang di Yesus do nokokito iyau do miagal diri. Om boro-boros nod, “Oi Tuhan, tongkiad nopo do mantad id doho' oi Tuhan, tu' iyoho' nopo om tulun do kidusa,” ka dau. 9 Om osuayan tomod diri i Simun om i tulun di moyo-woyo' dau do nokokito di sada' dot ogumu' do naanu diyolo'. 10 Om i tambalut di Simun nga' ongosuayan nogi' --- i Yakub, om i Yohanis, i tanak goduwo di Sabidi. Om boro-boros noddi i Yesus di Simun do poingkaa, “Kada' kooris, tu' mantad nod baino' dot osiliu ko do gampamarambot do tulun,” ka dau. 11 Om gayato' noddi di Simun om i tambalut dau i parau' diyolo' do pinopotindal. Om tongkiadai ngai' nopo diyolo' i parau'ddi, om tanud noddi di Yesus.
Minomolingos i Yesus do Songulun o Kitoruol o Kulit dit Araat Kopio
12 Tontok dot insan o tadau, om hiri i Yesus id iso' o bandar. Om hiri nopod bandar diri nga' haro ot iso' o kusai di kitoruol o kulit dit araat kopio do pointongkop nopo do tinan dau. Tontok di nokito dau i Yesus, om otud no iyau dot id toguang dau, om boro-boros nod, “Oi Tuan, ondung orohian ko, om milo ko i' do momolingos doho',” ka dau. 13 Om kamao' noddi di Yesus i tulun diri om boro-boros nod, “Orohian oku i'. Olingasan ko i'!” ka. Om diiri i' om diiri do nolingos i toruol dau. 14 Om oduhai noddi di Yesus i tulun diri do popinsusui'ddi dot id isai nopo. Boros ka dau, “Ongoi no solowot dit imam om mokiilo i' dau ondung nolingasan kopio ko, om mongoi nogindo papatahak do porsombahan di sorobon do miagal di pinonuhuan di Musa, do popointalang dot id tulun dot ogumu' do nolingasan kopio ko!” ka dau. 15 Nga' okon nogi' do nokotongkop i habar do pasal di Yesus diri do hinonggo-honggo nopo. Om ogumu'ddi o tulun do ruminikot dot id di Yesus do mongoi pokinongou dau om mongoi pokilingos di toruol diyolo'. 16 Om ongoi noddi i Yesus sambayang do hiri'd kinoiyonon dit oingou.
Minomolingos i Yesus do Songulun dit A' Koundaliu
17 Insan o tadau di maso di Yesus do monuduk, om haro o piro-piro tulun do Parisi om piro-piro o guru do Tourat do mantad hilo'd Yorusalim, om mantad hilo'd piro-piro o bandar do Galilia om mantad hilo'd Yudia do poirikau'd hiri. Om haro o sinundu do Tuhan dot id di Yesus do momolingos do tulun di kitoruol. 18 Om tontok nopoddi om haro o piro-piro tulun do pinapaatod do songulun dit a' koundaliu, do pinolii dot id sarasai. Om tumotos no daa iyolo' do poposuang di tulun diri do hiri'd walai om koiliu i' diyolo' iyau do hiri'd toguang di Yesus. 19 Nga' a' i' iyolo' nokosuang do mongoi papaatod di tulun diri, tu' ogumu' kopio o tulun do hiri. Om antayango' noddi diyolo' i tulun diri do suminalakoi do hiri'd taap di walai. Om lungkabo' no diyolo' i taap, om pouluho' noddi diyolo' i tulun di sumakit diri do mitonggoi di sarasai, do hiri'd dotoguangan di Yesus di hiri'd pogialatan di tulun dot ogumu'. 20 Om tontok di nokito di Yesus o kogoyoo' do kotumbayaan diyolo', om boro-boros no iyau di tulun di sumakit diri do poingkaa, “Oi tobpinai, noompunan no o dusa nu,” ka. 21 Om timpuun noddi i piro-piro o guru do Tourat om i tulun do Parisi do mogiuhot-uhot do poingkaa, “Isai kopio iti tulun diti tu' katama' kopio do mongindaraat do Kinorohingan? Tu' aiso' i' o tulun do milo do mangampun do dusa, suwai ko' Kinorohingan noo,” ka. 22 Nga' oilaan i' di Yesus i ponguhatan diyolo'ddi. Om boros kaddi dau, “Nokuro tu' iyo'ddi o ponguhatan dot id suang do ginawo dokoyu? 23 Honggo ot osonong-sonong do popoboros, ‘Noompunan no o dusa nu,’ ka ko', ‘Ingkakat no om mamanau i'!’ ka? 24 Nga' pointalangon ku no do dinondo dot id dokoyu do kikuasa' i' o Tanak do Tulun do mangampun do dusa do hiti'd pomogunan,” ka dau. Om boros kaddi di Yesus dot id tulun dit a' koundaliu'ddi, “Ingkakat no om saano' ino liniiyon nu, om muli' i',” ka dau. 25 Om olomus nopo i tulun diri do miningkakat do hiri'd dotoguangan ngai' diyolo'. Om saano' no dau i liniiyon dau, om uli' no do mikuwo'd minamarayou'd Kinorohingan. 26 Om ongosuayan ngai' nopoddi iyolo'. Om pamarayou noddi iyolo'd Kinorohingan. Om ooris diri iyolo', om pomoros nod poingkaa, “Koimayaan no kopio i nosiliu baino' di nokito toko',” ka diyolo'.
Linohou di Yesus i Liwi
27 Om soliwan noddi i Yesus, om kokito no dau o songulun o gomponimung do sukai, dot i Liwi o ngaran, do poirikau do hiri'd tupis dau. Om boro-boros no i Yesus dau do poingkaa, “Tanud doho'!” ka dau. 28 Om ingkakat no i Liwi om tongkiadai ngai' nopo dau i hiri; om tanud no iyau di Yesus. 29 Om katalib poddi iri, om papaharo no i Liwi do poginakanan do hiri'd walai dau do pomusou dau di Yesus. Om ogumu'ddi o tulun do gomponimung do sukai om i tulun do suwai do tuminorungak diyolo'd minakan. 30 Om haro'ddi o piro-piro tulun do Parisi om guru do Tourat dot a' asanangan diri, om boro-boros noddi iyolo' di tumatanud di Yesus, “Nokuro tu' makan om minum kou do potorungak di gomponimung do sukai, om ilo tulun dot a' ongosonong?” ka diyolo'. 31 Om boros ka di Yesus do suminimbar, “Tulun nopo dit aiso' o toruol om a' i' minog do haro o dokutur, suwai ko' iri no i kitoruol. 32 Kinorikatan ku nopo om okon i' ko' mongoi pomolohou di tulun di momusorou dot osonong iyau, suwai ko' mongoi pomolohou di tulun di kidusa, om rumologo i' iyolo' di dusa diyolo',” ka dau.
Tuhoton do Pasal do Puasa
33 Om boro-boros no i piro-piro o tulun dot id di Yesus do poingkaa, “Iri nopo i tumatanud di Yohanis om i tumatanud do tulun do Parisi om asaru' i' do puasa. Nga' ilo' nopo tumatanud nu om makan i' om minum,” ka. 34 Om boros ka di Yesus do suminimbar, “Milo kou i' toi do monuhu' do tulun di linohou do hiri'd poginakanan do kumawin do puasa do maso po di kusai di kuminawin do poinsugku' diyolo'? Atantu' no dot a' i' milo! 35 Nga' orikot indo o maso do potongkiadon do mantad id diyolo' i kusai di kuminawin diri. Om diri nogindo do puasa iyolo',” ka dau. 36 Om susuyo' noddi di Yesus dot id diyolo' o poinukadan diti, “Aiso' i' o tulun do mangampin do rasuk dau di laid dot i rasuk dau di wagu o pongonuan do pangampin. Tu' momohurak no tomod iyau di rasuk dau di wagu'ddi. Om kawagu po nga' a' i' osonong i kain do wagu do pangampin di rasuk di laid. 37 Om iyo nogiddi tu' aiso' i' o tulun do poposuang do waig dot anggur di wagu dot id poiiyanan do waig dot anggur di kulit do winonsoi di laid no kowonsoi. Tu' lumoput nondo i poiiyanan diri dot osuangan di waig dot anggur do wagu om araag nondo i poiiyanan diri om orubat nondo i waig dot anggur. 38 Waig nopo dot anggur do wagu om mositi' no do posuangon do hiri'd poiiyanan di wagu kowonsoi. 39 Iyo nogiddi tu' aiso' i' o tulun dot orohian do monginum di waig dot anggur di wagu do koinum di waig dot anggur di laid. Tu' boros kando diyolo', ‘Oomis nogi' i waig dit anggur di laid,’ ka,” ka di Yesus.
Tuhoton do Pasal do Tadau'd Sabat
1 Tontok dot insan o tadau'd Sabat di nakawaya' i Yesus do tumo do tinanaman do gandum, om pogkotu' no i tumatanud dau di rawo do gandum, om ompurio' no diyolo' i gandum diri om akano' no. 2 Om boro-boros noddi o piro-piro o tulun do Parisi do poingkaa, “Nokuro tu' tumolibamban kou do Tourat toko', tu' momonsoi kou di pogoduhan do wonsoyon do tontok do tadau'd Sabat?” ka. 3 Om boros ka di Yesus do suminimbar, “A' kou toi insan kabasa' di winonsoi di Daud om i tulun dau do tontok di linouson iyolo'? 4 Suang no i Daud di Walai'd Sasambayangan dot Agayo om panganu no iyau di roti di nakatahak no dot id Kinorohingan om akano' no dau. Om onuwai noddi dau di roti i tulun dau. Nga' tumanud nopo daa do Tourat toko', om iri no it imam o koino-ino do mangakan di roti'ddi,” ka dau. 5 Om boro-boros po kawagu i Yesus, “Kikuasa' i' o Tanak do Tulun dot id sawat do tadau'd Sabat,” ka.
I Tulun di Napatai o Tiso'd Longon
6 Om tontok dit insan kawagu o tadau'd Sabat, om ongoi no i Yesus ponuduk do hiri'd walai'd sasambayangan. Om hiri nopo nga' haro o tulun di napatai o tiso'd longon. 7 Om haro'ddi o piro-piro o guru do Tourat om tulun do Parisi di mogihum do kasalaan di Yesus, om milo indo diyolo' do dawahon iyau. Om pitoinuan kasai' nopo diyolo' i Yesus ondung momolingos iyau'd tulun do tontok do tadau'd Sabat. 8 Nga' oilaan i' di Yesus i tosorou diyolo'ddi, om boros kaddi dau dot id tulun di napatai o tiso'd longon, “Kaino, ingkakat do hiti'd gulu!” ka. Om ongoi noddi ingkakat i tulun diri do hiri. 9 Om uhoto' noddi di Yesus i tulun di hino'd hiri do poingkaa, “Tumanud nopo do Tourat, om nunu o koino-ino do wonsoyon toko' do tontok do tadau'd Sabat? Momonsoi dot osonong ko' momonsoi dot araat? Mamasi do tulun ko' mamatai?” ka dau. 10 Om ontong no i Yesus dot id diyolo'. Om boro-boros no iyau di tulun di napatai o tiso'd longon do poingkaa, “Palatano' ino longon nu,” ka. Om palatano' no di tulun i longon dau, om kolingos noddi i longon dau. 11 Nga' otogod tomod diri i piro-piro o guru do Tourat om i tulun do Parisi om timpuun noddi iyolo' do mogiboro-boros ondung nunu o wonsoyon diyolo' dot id di Yesus.
Minomili' i Yesus do Hopod om Duwo o Rasul
12 Om tontok noddi do tuminakad i Yesus dot iso' o nulu-nulu do minongoi sambayang. Om hiri no iyau do suminambayang dot id Kinorohingan do gisom do nosuaban. 13 Om kosuabon poddi, om lohowo' ngai' no di Yesus i tumatanud dau, om pilio' no dau o hopod om duwo o tulun do mantad id pogialatan diyolo'. Om roitai no di Yesus do rasul i hopod om duwo o tulun diri. Iyolo' nopoddi nga': 14 i Simun (i roitan nogi' dot i Pitrus), om i Andarias i tobpinai di Simun, om i Yakub, om i Yohanis, om i Pilipus om i Bartolomius, 15 om i Matius, om i Tumas, om i Yakub, i tanak di Alpius, om i Simun, (i roitan do Patriot), 16 om i Yudas, i tanak di Yakub, om i Yudas Iskariot, i pinapadagang diri di Yesus dit alaid.
Minonuduk i Yesus om Minomolingos Iyau'd Tulun
17 Om ruhuk noddi i Yesus di nulu-nulu diri do mogiwoyo-woyo' di piro-piro o tulun di sinuhu'ddi, om undorong noddi iyolo', om ingkakat no dot id kinoiyonon dit alampai. Om hiri nga' ogumu' nogi' o tumatanud dau'd suwai. Om ogumu' o tulun do ruminikot do mantad id hinonggo-honggo nopo do pointongkop do Yudia, om hilo'd Yorusalim, om mantad hilo'd kabandaran do Tirus om Sidon i hiri'd potoropis do rahat. 18 Kinorikatan nopo diyolo'ddi om mongoi pokinongou di Yesus, om mongoi pokilingos do toruol diyolo'. Om i nongorusadan do rogon nga' ruminikot nogi'. Om liningasan iyolo'. 19 Om oinsanan nopo i tulun do mogihum do ralan do mongoi kama' di Yesus, tu' haro o sinundu do sumoliwan do mantad id tinan di Yesus di kolingos ngai' diyolo'.
Kataadan om Katangaban
20 Om ontong no i Yesus di piro-piro o tumatanud dau, om boro-boros nod poingkaa, “Olumaag kou no i tulun di mosikin, tu' iyokoyu no o kasanganu di Pomorintaan do Kinorohingan. 21 Olumaag kou no, i louson do dinondo; tu' pingyahanon kou indo. Olumaag kou no i mihad do dinondo, tu' koirak kou indo. 22 Olumaag kou no i karaatan, om it iyadaan om it indaraaton, om i pimbarasan dot araat dot i tumanud kou di Tanak do Tulun o kopongiyo'ddian. 23 Tu' i piro-piro o nabi di gulu po nga' niyo iddi. Ondung osiliu o miagal diri om posonongon nopo dokoyu o ginawo om manari' dot atataadan, tu' agayo i' o tisomuli' di nokosodia' no do hilo'd surga do patahakon dot id dokoyu. 24 Nga' obungou kou no i kaya' do dinondo, tu' nongopurimanan no dokoyu i kosonongo'ddi. 25 Obungou kou no it oiyahan do dinondo; tu' louson kou indo! Obungou kou no i koirak do dinondo; tu' tumongob kou indo, om mihad. 26 Obungou kou no, ondung royohon kou do koinsanai'd tulun; tu' iyo nogiddi i taki-aki dokoyu di gulu po, tu' minamarayou iyolo' di piro-piro nabi di goudut,” ka di Yesus.
Osianan do Pisangod
27 Om boro-boros po kawagu i Yesus do poingkaa, “Nga' iyokoyu nopo i mokinongou doho' do baino', om poboroson ku iti boros do poingkaa: Kosianai kou no do pisangod dokoyu. Om momonsoi no dot osonong dot id tulun dit araatan dokoyu. 28 Barakatan no i tulun di momopol dokoyu, om sambayangan no i tulun dit araat dot id dokoyu. 29 Tu' ondung tompilingan do tulun o sampaping do pingas dokoyu, om pologoson nopo i tulun diri do monompiling kawagu do sampaping do pingas dokoyu. Om ondung ahawon i rasuk dokoyu dit id soibau om patahakon nopo i rasuk piya dokoyu dit id saalom. 30 Om ondung haro o pokionuon do tulun dot id dokoyu, om patahakon nopo dau iri, om ondung ongoyon do tulun ahawo' i diya'd songonuon, om kada' nori pokiguliai. 31 Wonsoyon no dokoyu dot id tulun do suwai, o poingkuro nopo o korohian dokoyu do wonsoyon diyolo' dot id dokoyu. 32 Ondung iri no i tulun dit osianan dokoyu o kosianan dokoyu, om nunu daa'ndo o kapagandadan dokoyu'd barakat? Tu' iri piya i tulun di kidusa nga' osianan i' di tulun dit osianan diyolo'. 33 Om ondung iri no i tulun di momonsoi dot osonong dot id dokoyu, o pamansayan dokoyu dot osonong, om nunu daa'ndo o kapagandadan dokoyu'd barakat? Tu' iri piya i tulun do kidusa nga' momonsoi i' do miagal diri. 34 Om ondung iri no i tulun di milo do mambayar kawagu dokoyu o pooloson dokoyu'd tusin, om nunu daa'ndo o kapagandadan dokoyu'd barakat? Tu' i tulun di kidusa nga' popoolos i' do tusin dot id tulun di kidusa, om pokibayaran i' diyolo' iri. 35 Nga' iyokoyu nopo om a' i' apatut dot iyo'ddi. Iyokoyu nopo om mositi' no dot osianan do pisangod dokoyu, om momonsoi dit osonong dot id diyolo'. Om mositi' no do popoolos kou, om kada' no soro-soroho' do koguli' kawagu iri. Ondung miagal diri, om agayo indo o tisomuli' dokoyu om osiliu kou do tangaanak do Kinorohingan, it Asawat Kopio. Tu' Kinorohingan nopo om osonong i' dot id tulun dit a' piya koilo do mongunsikou, om osonong dot id tulun dit angaraat. 36 Monginsian kou nod tulun do suwai do miagal do Tapa' dokoyu tu' monginsian,” ka dau.
Mogodu do Papasala' do Tulun do Suwai
37 Om boro-boros po kawagu i Yesus do poingkaa, “Kada' kou papasala' do tulun do suwai, om a' kou i' iyokoyu pasalaon do Kinorohingan. Om kada' kou pomohukum do tulun do suwai. Om a' kou i' iyokoyu hukuman do Kinorohingan. Ompunan no o tulun do suwai, om oompunan kou i' iyokoyu'd Kinorohingan. 38 Manahak kou nod tulun do suwai, om onuan kou i' iyokoyu'd Kinorohingan; om kaanu kou nondo do nipuhawang do gisom dot a' aayi-ayi', i ninsok tomod o pinagadang. Tu' nunu nopo i pinagadang dokoyu di don tulun do suwai om iri no o pakayon do Kinorohingan do pagadang di dokoyu,” ka dau. 39 Om susuyo' nogiddi di Yesus dot id diyolo' o poinukadan diti, “Ondung tulun do bolou o mangahak do sompi' ko' bolou, om atantu' no do kopirundun nopo iyolo' dot aratu' do hiri'd luang. 40 Iri nopo i tudukan po om a' i' agayo ko' mantad di monuduk dau. Nga' kopongo nopondo do minsingilo i tudukan diri om koiyo nondo iyau di minonuduk dau. 41 Nokuro tu' okito nogi' kopio dokoyu o giniab do kayu dit okooro' do nokoliwata' do mato do tobpinai dokoyu, om a' i' dokoyu opurimanan o watang do kayu do nokoliwata' do mato dokoyu iyokoyu? 42 Poingkuro kou do milo'd momoros dot id tobpinai dokoyu dot, ‘Hondi', iduwo' ku diya' ino giniab do kayu dot okooro' do nokoliwata' dino mato nu,’ ka, om maso i' do haro o watang do kayu do nokoliwata' do mato dokoyu iyokoyu? Oi dokoyu i tulun di minsorupai-rupai no toomod! Iduwo' po dokoyu i watang do kayu do nokoliwata' do mato dokoyu, om atalang nogindo ot okito dokoyu, om milo kou do mongidu' di giniab do kayu dit okooro' do nokoliwata' do mato di tobpinai dokoyu,” ka dau.
Tua' o Kotutun-tutunan di Kayu
43 Om boros ka kawagu di Yesus, “Guas nopod kayu dit orombung om a' i' mongua' di tua' dot araat. Om iyo nogiddi o guas do kayu dot a' orombung tu' a' i' mongua' di tua' dit osonong. 44 Tu' pointikid-tikid do guas do kayu nga' i tua' o kotutunan di guas. I nopo bulungkut do korugian om a' i' mongua' do tua' dot ara, om i guas do rugi nga' a' i' mongua' do tua' dot anggur. 45 Tulun nopo dit osonong, om osonong no o kowoyo-woyoon dau, tu' lumabai i' it osonong do mantad id ginawo dau. Om iri no tulun dit araat om araat no o kowoyo-woyoon dau, tu' noponu' pod karaaton o ginawo dau. Tu' nunu nopo i poboroson dau om iri no o mantad id ginawo dau,” ka dau.
I Tulun dit Oilo om i Tulun do Basug do Minamaal do Walai
46 Om boros ka kawagu di Yesus, “Nokuro tu' mamarait kou doho' do, ‘Tuhan, Tuhan,’ ka, om a' kou i' momonsoi di pinoboros ku dot id dokoyu? 47 Isai o poiyaan toko' di tulun di rumikot dot id doho', om mokinongou di boros ku, om momonsoi'ddi --- Potudukon ku iri dot id dokoyu. 48 Iyau nopo om iyo di tulun dit oilo tu' tontok di minamaal iyau di walai dau om minongukad iyau dot aralom om poimpoho' noddi dau do watu i walai dau. Om soira' do luminuyud, om kalampayai no i walai dau, om a' i' nahaba' i walai tu' pinoimpou i' dau i walai dau'ddi dot id pinoimpahan dit osonong. 49 Nga' i nopo tulun di korongou diti boros ku, om a' indo dau tonudon, om iyo no iyau di tulun di minamaal di walai dau dit a' winansayan do pinoimpahan dot osonong. Om luyud noddi om minallampai om a' po alaid om kahaba' no i walai dau. Om karaag nopo kopio i walai'ddi,” ka dau.
Minomolingos i Yesus di Susuhuon di Pagawai do Soudor do Rum
1 Om kopongo poddi di Yesus do pinopoboros ngai'ddi dot id tulun dot ogumu', om ongoi no iyau do hilo'd Kapornaum. 2 Hiri nopo om haro o pagawai do soudor do Rum do kisusuhuon di kosianan kopio dau. Om sakit no i susuhuon dau'ddi do gisom dot oruhai nod apatai. 3 Om tontok do nokorongou i pagawai do soudor diri do pasal di Yesus, om ponuhu' no iyau do piro-piro o boyoon do tulun do Yohudi do mongoi pangangat di Yesus do mongoi pomolingos di susuhuon dau. 4 Om korikot noddi i tulun dot id di Yesus, om pokionuo' no kopio diyolo' do mongoi i Yesus ponulung di pagawai do soudor diri. Boros ka diyolo', “Osorupai no iyau'd tulungon nu oi Tuan, 5 tu' iyau nopo om osianan do bansa' toko' om nakapamaal no iyau do walai'd sasambayangan dahai,” ka. 6 Om tanud noddi i Yesus diyolo'. Om maha' dit osomok noddi i Yesus di walai'ddi, om ponuhu' no i pagawai do soudor diri di piro-piro o tambalut dau do mongoi pomisunud di Yesus do poingkaa, “A' i' minog do minsusa' do mongoi do hilo'd walai ku, oi Tuan. A' oku i' osorupai do papasalakoi do Tuan do hiri'd walai ku. 7 Om iri no ot a' ku katama-tama' do mongoi solowot do Tuan. Pomoros nopo, om olingasan i' i susuhuon ku. 8 Tu' iyoho' nga' id siriba' i' do kuasa' dit asawat ko' doho'd pangkat. Om haro nogi' o piro-piro o soudor dot id siriba' do kuasa' ku. Om ondung, ‘Pamanau!’ kangku do monuhu' do songulun di soudor ku, om mamanau no iyau. Om ondung moro-boros oku do, ‘Kaino'd hiti!’ kangku nopo dot id soudor ku'd suwai, om rumikot no iyau; om ondung, ‘Wonsoyo' iti!’ kangku, do monuhu' di susuhuon ku, om wonsoyon no dau,” ka. 9 Om noimayaan tomod diri i Yesus do nokorongou'ddi. Om koili noddi iyau di tulun dot ogumu' di manud-tanud dau om boro-boros nod, “Oimayaan oku no kopio do kotumbayaan do tulun diti. Id pogialatan piya'd tulun dot Israil nga' a' oku po insan kosolowot do tulun di kikotumbayaan dot irad diti kagayo!” ka dau. 10 Om soira' di nokoguli' do hiri'd walai i tulun di sinuhu' di pagawai do soudor diri, om nolingasan no i susuhuon diri.
Minamasi i Yesus do Songulun o Tanak do Tondu' di Nopuadan
11 Om a' noddi alaid do mantad diri, om ongoi no i Yesus do hilo'd bandar do Nain. Om i piro-piro o tumatanud dau nga' minoyo' i' dau, om ogumu' po o tulun do suwai do tuminanud dau. 12 Om tontok di nokorikot i Yesus do hiri'd somok di wawayaan di bandar, om maso no di tulun do sumoliwan di bandar do mangantayang do rata' do tulun. I nopo napatai'ddi nga' tanak do kusai dot iso' o tondu' do nopuadan. Om iso' no daa iri o tanak dau. Om ogumu' o tulun do mantad hiri'd bandar diri do minoyo' di tondu'ddi. 13 Soira' di nokito di Yesus i tondu'ddi, om kosianai noddi kopio iyau dau. Boros ka di Yesus dot id dau, “Tingkod nondo do mihad oi inan!” ka. 14 Om insomok noddi i Yesus di sarasai di pinanarasai di rata'ddi, om kabayai no dau iri. Om undorong noddi i tulun di minangantayang di sarasai. Om boros ka di Yesus, “Oi tanakwagu, suhuon ku iya' do tumungag,” ka dau. 15 Om tungag noddi i tanakwagu di napatai'ddi do minirikau, om boro-boros noddi. Om patahako' noddi di Yesus i tanakwagu'ddi dot id tina' dau. 16 Om oinsanan nopoddi i tulun do hiri do nongooris om minamarayou'd Kinorohingan. Boros ka diyolo', “Nokorikot no o songulun o nabi dit abantug do hiti'd pogialatan toko'. Nokorikot no o Kinorohingan do mongoi pamasi di tulun di songonuon dau,” ka. 17 Om kotongkop noddi o habar do pasal di Yesus dot id pointongkop do pomogunan do Yudia om id watas di hiri'd posorili'.
Susuhuon do Mantad id di Yohanis Gampamatis
18 Om sunudai noddi di piro-piro o tumatanud di Yohanis, i Yohanis do koinsanai di nongosiliu'ddi. Om lohowo' noddi di Yohanis o duwo o tulun di tumatanud dau, 19 om suhuo' no dau do mongoi solowot di Tuhan Yesus om monguhot dau do poingkaa, “Tuan, iya' nogi' i tulun di rumikot do tumanud di pinabatos do Kinorohingan, ko' mandad po tuu iyahai do tulun do suwai?” ka. 20 Om ongoi noddi do hiri'd di Yesus i duwo i tumatanud di Yohanis. Boros ka diyolo', “Sinuhu' iyahai di Yohanis Gampamatis do monguhot diya' oi Tuan, ondung iya' no i tulun di rumikot do tumanud di pinabatos do Kinorohingan, ko' mandad po iyahai do tulun do suwai?” ka. 21 Om tontok nopoddi, om maso no di Yesus do momolingos do tulun dot ogumu', om monunsub dot ogumu' o rusod dot araat, om pinopoungkalat nogi' iyau dot ogumu' o tulun di nobolou. 22 Om boros kaddi di Yesus dot id susuhuon di Yohanis, “Guli' kou no do hilo'd di Yohanis om posunudon no dot id dau i norongou om i nokito dokoyu: nokoungkalat i bolou, om nakapanau i tulun dit a' koundaliu, om nolingasan i kitoruol do kusta, om i bosukon nga' nokorongou, om i tulun do napatai nga' noposian kawagu, om i Habar dot Osonong do mantad id Kinorohingan nga' popinsusuyon dot id tulun do mosikin. 23 Olumaag no i tulun dit a' mikoduwo o ginawo dot otumbayaan doho' do kokito diti nongowonsoi'dti,” ka dau. 24 Om kapamanau poddi i tulun di sinuhu' di Yohanis, om timpuun no i Yesus do minoro-boros dot id tulun dot ogumu' do pasal di Yohanis. Boros ka dau, “Nunu o nongoi dokoyu antangai do hilo'd kowotuan? I sakot dit otilib do ribut? 25 Nunu o nongoi dokoyu antangai? I tulun dit osonong o pakayan? Nga' tulun nopo dit osonong o pakayan, om i tulun do kaya' om hilo'd walai do raja' o tiyonon! 26 Nga' nunu o nongoi dokoyu antangai? Minongoi kou tuu ontong do songulun o nabi? Oo, otopot nogi' do nabi iyau, nga' agayo po ko' i nabi. 27 Tu' i Yohanis no i komoyon dit ayat dot id Buuk do Kinorohingan do poingkaa, ‘Boros kad Kinorohingan: Iti no o tulun do suhuon ku, suhuon ku iyau do mogulu diya', om orontisan i' dau i ralan do wayaan nu,’ ka,” ka di Yesus. 28 Om boro-boros po kawagu iyau do poingkaa, “Ilaai no dokoyu! Do hiti nopod pomogunan om a' i' nokoumbal do haro o tulun dot abantug ko' i Yohanis Gampamatis. Nga' iyo piya'ddi, nga' iri nopo i tulun dit aiso' no kopio o ngaran-ngaran dot id suang di Pomorintaan do Kinorohingan, om agayo i' ko' i Yohanis Gampamatis,” ka dau. 29 Om oinsanan nopo i tulun, om i nogi' i gomponimung do sukai do nokorongou di Yesus do minomoros do miagal diri. Tu' iyolo' no i tulun di tuminanud di ponuhuan do Kinorohingan, om i minokibatis di Yohanis. 30 Nga' i nopo tulun do Parisi om i guru do Tourat om a' i' otumbayaan di natantu' mantad do Kinorohingan do wonsoyon dau dot id diyolo'. Mada' i' iyolo' do botisan di Yohanis. 31 Boros ka kawagu di Yesus, “Nunu po daa o poiyaan ku diti tulun do dinondo? Iyo ma iyolo' disai dilo'? 32 Iyo po iyolo' di tangaanak di songirikau do hilo'd pasar. Om boros ka no di tangaanak di mogigurumung-rumung dot id tangaanak do suwai, ‘Pounion no dahai i tuunion di popotood, om a' kou i' manari'! Om modsinding no iyahai di sinding do pogihad do tulun do napatai, om a' kou i' mihad!’ ka no diyolo'. 33 Korikot no i Yohanis Gampamatis, om sumambayang no iyau do mikuwo'd puasa om a' monginum do waig dot anggur, om momoros kou i' do, ‘Norusadan iyau'd rogon!’ ka. 34 Om korikot noddi i Tanak do Tulun, om makan iyau om minum, om momoros kou i' dot, ‘Ontong pogi' dilo tulun! Odoot, om magagauk, om tambalut di gomponimung do sukai, om tambalut di tulun do kidusa,’ ka. 35 Nga' mulong po dot iyo'ddi, nga' kointalang i' o toilaan do Kinorohingan dot id koinsanai'd tulun di rumamit diri,” ka dau.
Hiri i Yesus id Walai di Simun
36 Haro o tiso' o tulun do Parisi, dot i Simun o ngaran do minangangat di Yesus do makan. Om ongoi no i Yesus do hiri'd walai di tulun do Parisi'ddi om irikau no iyau do minakan. 37 Nga' hiri nopod bandar diri, om haro o songulun o tondu' di mingwonsoi nopod dusa. Om korongou noddi iyau do hiri i Yesus id walai di tulun do Parisi'ddi do makan, om igit no iyau do tumau dot osonong o kosingudan do poinsuang dot iso' o kakanan dot okooro' di marmar do winonsoi. 38 Om ingkakat noddi i tondu'ddi do hiri'd dotolikudan di Yesus do hiri'd toning di gakod dau. Om ihad no iyau om yoposo' nopo dau do romou dau i kolung di Yesus. Om pihidai noddi dau di tobuk dau i kolung di Yesus, om tungubai no dau om tuntugai no dau di tumau dit osonong o kosingudan. 39 Om kokito noddi i tulun do Parisi di minangangat di Yesus do makan, i tondu'ddi, om boros ka dot id ginawo dau, “Ondung otopot do nabi iti tulun diti, om atantu' no do koilo i' iyau ondung isai ilo tondu' dilo minongoi igit dau om koilo do mingwonsoi'd dusa ilo tondu',” ka. 40 Om boro-boros noddi i Yesus di Simun do poingkaa, “Oi Simun, haro o poboroson ku dot id diya',” ka dau. “Poboroso' nopo oi Guru,” ka dau do suminimbar. 41 Om boros ka di Yesus, “Haro o duwo o tulun do kiutang dot id tulun di pongungutangan do tusin. Iri nopo tiso' om kiutang do limo nahatus o tusin do pirok, om iri no tiso' om kiutang do limo nohopod o tusin do pirok. 42 Om aiso' goduwo nopo o pamalapus diyolo' di tutang diyolo'ddi. Om tonuso' noddi di tulun di pinongutangan diyolo'd tusin i tutang diyolo'ddi. Om isai'ddi ot id pialatan di duwo o tulun diri ot osianan kopio di pinongutangan diyolo'ddi?” ka dau. 43 Boros ka di Simun, “Osorou ku nopo om iri no i tulun dit ogumu' o tutang do tinanus,” ka. Boros ka di Yesus do suminimbar, “Otopot i' ino tosorou nu,” ka. 44 Om ontong no i Yesus di tondu'ddi, om boro-boros no iyau di Simun do poingkaa, “Okito nu i' iti tondu'dti? Ruminikot oku do hiti'd walai nu nga' a' ko i' pinoposodia' do waig do pongoug do lapap ku. Nga' iti nopo tondu'dti, om nougan dau o lapap ku do romou dau, mikuwo'd pinihidan dau do tobuk dau. 45 Iya' nopo om a' i' tuminungub doho' do suminuwau. Nga' ilo' nopo tondu' om korikot nopo iyau om a' no otingkod-tingkod do monungub dilo gakod ku. 46 Om a' ko nogi' minongumau do tulu ku, nga' ilo' nopo tondu' om tinuntugan dau o gakod ku do tumau dit osonong o kosingudan. 47 Om ilo' no kosianan dau dot agayo o popointalang do nongoompunan no i dusa dau dit ogumu'! Tu' tulun nopo dit okuri' o dusa dot ompunan om okoro' no o kosianan dau!” ka dau. 48 Om boro-boros noddi i Yesus di tondu'ddi do poingkaa, “Nongoompunan no i dusa nu,” ka. 49 Om pogiboro-boros noddi i tulun di potorungak di Yesus do makan, “Isai kopio iti tulun diti tu' milo do mangampun do dusa?” ka. 50 Nga' boro-boros no i Yesus di tondu'ddi do poingkaa, “Posion ko no tu' otumbayaan ko i' doho'. Pamanau no dot id suang do kosimbayanan,” ka dau.
I Tongoondu' di Mongunguhup di Yesus
1 Om a' poddi alaid do mantad diri om ongoi no i Yesus do hiri'd kabandar-bandaran, om hiri'd kokompungan do mongoi popinsusui di Habar dot Osonong do pasal di Pomorintaan do Kinorohingan. Om i hopod om duwo o tumatanud dau nga' minoyo' i' dau. 2 Om tuminanud nogi' di Yesus i piro-piro o tongoondu' di nolingasan di Yesus do mantad id toruol om i sinunsub dau o rusod dot araat do mantad id diyolo' di gulu po. Ngaran nopo diyolo' om: i Maria, i pinungaranan dot i Magdalina (turu' o rusod dot araat do sinunsub di Yesus do mantad id dau di gulu po.) 3 I Yohana i sawo di Kusa, i pagawai do hiri'd walai di Horudis; i Susana, om ogumu' po o tongoondu'd suwai. Om iyolo' no o pinoposoliwan do balansa' do pinonulung di Yesus om i tumatanud ngai' dau.
I Tulun do Pinapasasad do Linsou o Pinoinukadan
4 Om songrikot-rikot kasai' nopoddi dot id di Yesus i tulun do mantad id piro-piro o bandar. Om kotimung poddi i tulun dot ogumu' om ponusui nogiddi i Yesus dot iso' o poinukadan dot id diyolo'. Boros ka dau, 5 “Haro o tiso' o gompongumo do minongoi pasasad do linsou. Om tontok di papasasad iyau, om karatu' no o wookon di linsou do hiri'd ralan. Om kongoulakai noddi do tulun i wookon, om iri no suwai om notinduk do tombolog. 6 Om haro o linsou do nakasasad do hiri'd kowotuan. Om tontok di nokosuni i linsou'ddi, om a' i' alaid om koriou no tu' otuu i tana'. 7 Om haro o linsou do nakasasad do hiri'd rolot do korugian. Om i rugi nga' suminuni nogi' do poinrolot di linsou. Om kosidung noddi di rugi i suni di linsou'ddi, om kapatai noddi. 8 Nga' haro i' o linsou do nakasasad do hiri'd tana' dot oruak. Om kosuni no i linsou'ddi om pongua' noddi; om haro i' ot inghatus kopiluap o kosopoho' do tua',” ka dau. Om kopupusai poddi di Yesus do monusui i poinukadan diri, om boro-boros no iyau do poingkaa, “Kitolingo kou nopo om pokinongou kou no kopio!” ka dau.
Koponudukan di Yesus do Pawayaon do Poinukadan
9 Om uhoto' noddi i Yesus di tumatanud dau ondung nunu o komoyon di poinukadan diri. 10 Om simbar no i Yesus diyolo', “Iyokoyu nopo om noonuan no do toilaan do mongilo di poillisok do pasal do Pomorintaan do Kinorohingan. Nga' iri nopo tulun do suwai om tudukan i' do pawayaon do poinukadan, om poingontong piya'ndo iyolo', nga' a' i' iyolo' koilo ondung nunu i nosiliu, om a' kosuhut do korongou piya daa iyolo',” ka dau.
Pinotuduk di Yesus o Komoyon di Poinukadan do Pasal di Gompongumo do Pinapasasad do Linsou
11 Om boros ka kawagu di Yesus, “Iti no o komoyon di poinukadan diri: iri nopo i linsou diri, om iri no i boros do Kinorohingan. 12 Om iri no linsou di naratu' do hiri'd ralan, om poiyaan di tulun di nokorongou di boros diri. Nga' rikot no o rogon, om ngoyo' no ahawo' i boros diri do mantad id ginawo diyolo', om a' indo iyolo' otumbayaan om a' iyolo' apasi. 13 Om iri no linsou di nakasasad do hiri'd kowotuan, om poiyaan di tulun di nokorongou do boros diri, om osonong nopo o ginawo do ruminamit diri. Nga' a' iddi guminamut kopio i boros diri dot id ginawo diyolo'. Om oruhai iyolo' do minonongkuyaan, tu' koontok poddi iyolo'd pogumbalan, om katanus no o kotumbayaan diyolo'. 14 Om iri no i linsou di nakasasad do hiri'd rolot di korugian om poiyaan do tulun di nokorongou do boros diri, nga' atangkabo nopo iyolo' do koposi-posion diyolo', om orohian nopo do kumaya' om sumimbayan do hiti'd pomogunan. Om iri ngai' noddi o nokoonsit diyolo', gisom dot aiso' o nokotuo do tua' diyolo'. 15 Om iri no i linsou di nakasasad do hiri'd tana' dit oruak om poiyaan do tulun di nokorongou do boros diri, om i pinopoopi' kopio'ddi dot id suang do ginawo dit osonong om it otulid. Om ogirot iyolo' do gisom do nokopongua',” ka dau.
Lampung di Tininggouban do Kakanan
16 Om boros ka kawagu di Yesus, “Aiso' i' o tulun do modtutud do lampung om tinggouban indod kakanan, ko' posusuton po dot id toodopon dau. Suwai ko' potimpakon i' dau iri do hiri'd potitimpakan do lampung, om kokito i' di tanawau'ddi o tulun di sumuang di walai. 17 Tu' nunu nopo i lisokon, nga' kointalang indo; om it olimon nga' oimbulayan indo om oilaan. 18 Iyo nopoddi, om soro-sorohon no kopio o koinsanai di norongou dokoyu. Tu' iri nopo tulun di haro mantad ot id dau, om ruhangan nogi' dot ogumu' ko' iri; nga' iri nopo tulun dit aiso' o nunu-nunu dot id dau, om imumuyon nogindo do manganu it okuuri' di haro dot id dau,” ka dau.
I Tina' om i Piro-Piro o Tobpinai di Yesus
19 Om rikot noddi i tina' om i piro-piro o tobpinai di Yesus do mongoi solowot dau. Nga' a' i' iyolo' nokosolowot di Yesus tu' ogumu' kopio o tulun. 20 Om haro'ddi o songulun do minoro-boros di Yesus do poingkaa, “Hoodi' moti'd soliwan i tina' om i piro-piro o tobpinai nu. Mongoi daa iyolo' solowot diya',” ka dau. 21 Nga' boros ka di Yesus dot id diyolo' ngai', “Isai nopo o tulun di mokinongou do boros do Kinorohingan om i tumanud diri, om iyolo' no o tina' ku om tobpinai ku,” ka.
Minoningkod i Yesus do Tongus dot Opuhod
22 Insan o tadau om sakai no i Yesus om i tumatanud dau do parau'. Om boros ka di Yesus, “Kainou ongoi toko' do hilo'd soborong diti tasik,” ka. Om pamanau noddi iyolo'. 23 Nga' tontok di manau-panau iyolo' do poinsakai di parau' om koodop no i Yesus. Om sigog nopo om rikot o tongus dot opuhod do hiri'd tasik. Om tumimpuun noddi dot osuangan do waig i parau' diyolo', gisom do haro'ddi o koligagaanan diyolo'. 24 Om ngoyo' noddi di tumatanud di Yesus posikai i Yesus. Boros ka diyolo', “Guru, Guru, matai toko' no moti'dti,” ka. Om ingkakat noddi i Yesus, om suhuo' no dau do tumingkod i tongus dot opuhod om i tumbak dit agayo'ddi. Om tingkod nopoddi i tongus om i tumbak diri, om ododog nopoddi i tasik. 25 Om boro-boros noddi i Yesus di tumatanud dau, “Nokuro tu' a' kou otumbayaan doho'?” ka dau. Om ongoimayaan tomod diri iyolo' om ongooris. Om mogiboro-boros nopoddi iyolo' do poingkaa, “Isai kopio iti tulun diti? Tu' minonuhu' dilo tongus om ilo tumbak do tumingkod, om umboyoo' nopo iyau!” ka.
Minomolingos i Yesus do Tulun di Norusadan do Rusod dot Araat
26 Om tilombus nopo i Yesus om i piro-piro o tumatanud dau do minamanau do poinsakai di parau' do kuminaa do hilo'd watas do Garasa, i hilo'd soborong di Tasik Galilia. 27 Om tontok di tuminindal i Yesus, om ngoyo' no iyau bontolo' do songulun o kusai di norusadan do rusod dot araat. Iri nopo tulun diri nga' mantad do hiri'd bandar. Om alaid no iyau dot aiso' o pakayan om a' iyau orohian do mundorong do hiri'd walai. Om hiri nod koluang-luangan do nuluhon di pamalabangan o korohian dau'd miyon. 28 Om tontok di nokito dau i Yesus om pinggiak no iyau do mikuwo'd minotud dot id toguang di Yesus, om boro-boros no dot opuhod do poingkaa, “Oi Yesus i Tanak do Kinorohingan, it Asawat Kopio! Kukuroyon oku diya'dti? Pokionuon ku no kopio dot a' oku diya' inggoriton,” ka dau. 29 Kinapamarasan nopo di tulun diri do miagal diri nga' monuhu' i Yesus di rusod dot araat do sumoliwan do mantad id dau. Om asaru' no iyau dot orusadan di rusod dot araat diri, gisom do kagasan piya do rantai o longon om gakod dau om pitamangan kopio iyau nga' koputut kasai' i' iyau di rantai om tanggayan iyau di rusod dot araat do mongoi'd hilo'd tana' do kowotuan. 30 Om uhoto' no di Yesus i tulun diri, “Isai o ngaran nu?” ka dau. “Ngaran ku nopo om i Logiun,” ka di tulun diri do suminimbar, tu' ogumu' i' i rusod dot araat do suminuang dau. 31 Om pokionuo' no kopio di rusod dot araat diri dot a' iyolo' di Yesus posuangon di Luang do Kapatayon. 32 Om hiri nopod somo-somok diyolo'ddi nga' haro o wogok dot ogumu' kopio do sonsungal-sungal do hiri'd guas di nulu-nulu. Om pokibanar no kopio di Yesus i rusod dot araat diri do sumuang di wogok diri. Om potumboyoo' no iyolo' di Yesus. 33 Om soliwan ngai' noddi i rusod dot araat diri do mantad id tulun diri, om ongoi no suang di wogok. Om panangkus ngai' nopo i wogok om ongoi no do hiri'd piras di tasik, om tuhun noddi do hiri'd tasik do mantad hiri'd piras. Om kongolondod ngai' nopoddi i wogok. 34 Om kokito no di piro-piro o gompomogompi' di wogok i nongosiliu'ddi. Om panangkus ngai' no iyolo' do minongoi do hiri'd bandar, om hiri'd kokompungan di posorili', om popinsusuyo' no diyolo' o koinsanai di nosiliu. 35 Om ongoi noddi i piro-piro o tulun ontong di nongosiliu'ddi. Om rikot no iyolo' dot id di Yesus, om kokito no diyolo' i tulun di nokoidu' do mantad id rusod dot araat diri do poirikau no do hiri'd toning do gakod di Yesus, om kipakayan noddi iyau om kopunong o pomusorou dau. Om ongooris diri iyolo'. 36 Om susuyo' noddi di tulun di nokokito kopio di nosiliu'ddi dot id tulun dit ogumu' ondung poingkuro kopio i tulun diri do nolingasan. 37 Om oinsanan nopoddi i tulun do hiri'd watas do Garasa do minononsog di Yesus do tumongkiad do mantad hiri'd kinoiyonon diri, tu' ongooris ngai' nopo iyolo'. Om sakai noddi i Yesus do parau' do minuli'. 38 Om mokitatanud daa'ddi di Yesus i tulun di nokoidu' do mantad id rusod dot araat diri. Nga' suhuo' nogi' iyau di Yesus do muli', 39 boros ka di Yesus, “Uli' nogi', om popinsusuyon i' ino nowonsoi do Kinorohingan dot id diya',” ka dau. Om pamanau noddi i tulun diri do mongoi poposusui di nowonsoi di Yesus dot id dau, dot id pointongkop do bandar diri.
I Tanak di Yairus om i Tondu' do Minongoi Igit do Pakayan di Yesus
40 Om tontok di nokoguli' i Yesus do mantad hiri'd soborong di tasik, om ongotood nopo i tulun do suminuwau di Yesus, tu' sangandad-andad no iyolo' dau. 41 Om rikot noddi o songulun dot i Yairus o ngaran. Iyau nopo om boyoon di walai'd sasambayangan do hiri'd kinoiyonon diri. Om otud no iyau dot id toguang di Yesus do minangangat kopio di Yesus do mongoi'd hiri'd walai dau, 42 tu' oruhai nod apatai i tanak dau'd tondu' di hopod no om duwo o toun do tumur. Om iso' nori o tanak dau'd tondu'. Om maha' di hiri no iyolo'd tanga'd ralan do pakayaan do hiri'd walai di Yairus om mogiimpit-impit nopo i tulun dot ogumu' do minsomok di Yesus. 43 Om id pogialatan nopo di tulun dot ogumu'ddi om haro o songulun o tondu' di hopod no om duwo o toun do sumakit do pomulanan om naayi' no dau o nunu nopo i haro dot id dau do pinambayar do tubat dot id dokutur, nga' aiso' i' o nokolingos dau. 44 Om ongoi no i tondu'ddi insomok di Yesus, do mantad hiri'd tohuri, om ongoi no iyau igit do tompok di pakayan di Yesus. Om diiri i' om diiri do notingkod i toruol dau do pomulanan. 45 Om boros ka di Yesus do minonguhot, “Isai i minongoi kama' doho'?” ka dau. Nga' mogolim ngai' nopo i tulun. Om boros kaddi di Pitrus, “Oi Guru, ogumu' kopio iti tulun do hiti'd pogurumung diya', om opingimpit ko'ddi diyolo',” ka. 46 Nga' boros ka kawagu di Yesus, “Haro i' kopio o tulun do minongoi kama' doho', tu' nopurimanan ku i' do haro o sinundu do nokosoliwan do mantad id doho',” ka dau. 47 Om koilaai noddi di tondu' do noilaan i winonsoi dau'ddi. Om rikot no iyau dot id di Yesus do gagaran tomod do minotud dot id toguang dau. Om susuyo' no dau do hiri'd toguang di tulun dot ogumu', ondung nokuro tu' minongoi iyau igit di pakayan di Yesus. Om pinosunud nogi' dau do maso iddi do nolingasan iyau di toruol dau. 48 Om boros kaddi di Yesus dot id tondu'ddi, “Oi tanak ku, iri no i kotumbayaan nu dot id doho' o nokolingos diya'. Uli' no, om sumonong-sonong,” ka. 49 Om maso di Yesus do moro-boros, om rikot no o songulun do mantad id walai di Yairus do minongoi pomisunud di Yairus do poingkaa, “Napatai no i tanak nu, oi Tuan. Om kada' no ponusa' dilo Guru,” ka. 50 Nga' korongou noddi di Yesus iri, om boro-boros no iyau dot id di Yairus, “Kada' kooris. Kotumbayaai nopo tu' olingasan i' i tanak nu,” ka dau. 51 Om soira'ddi nokorikot i Yesus do hiri'd walai di Yairus, om a' i' di Yesus uhang do haro o tulun do suwai do tumanud dau do sumuang, do suwai ko' i Pitrus no om i Yohanis om i Yakub om i molohing di tanak. 52 Om oinsanan nopo i tulun do hiri do mihad do mogihad di tanak di napatai'ddi. Nga' boros ka di Yesus dot id diyolo', “Kada' kou ihad, tu' a' i' napatai ilo tanak dilo', koodop no iyau,” ka dau. 53 Nga' irak-irakai nopo diyolo' i Yesus, tu' noilaan no diyolo' dot iri nopo tanak do tondu'ddi om napatai no. 54 Om igitai noddi di Yesus o longon di tanak diri, om boros ka dau, “Tungag oi oyo'!” ka dau. 55 Om koposiai noddi kawagu i tanak diri om pitilombus nopod tuminungag. Om suhuo' noddi di Yesus iyolo' do manahak di tanak do takanon. 56 Om nosuayan tomod diri i molohing di tanak. Nga' noduhan i' di Yesus iyolo' do popimboros diri dot id disai nopo.
Sinuhu' di Yesus do Minamanau i Hopod om Duwo o Tumatanud Dau
1 Om lohowo' no di Yesus i hopod om duwo o tumatanud dau, om onuwai no dau iyolo' do kuasa' do monunsub do rusod dot araat om momolingos do tulun do sumakit. 2 Om suhuo' noddi di Yesus iyolo' do mamanau do mongoi pomolingos do tulun di kitoruol, om mongoi poposusui do habar do pasal di Pomorintaan do Kinorohingan. 3 Om boros ka di Yesus dot id diyolo', “Kada' kou igit do nunu nopo do kuyutan do mamanau. Om kada' kou igit do sukud, om kantung do poiyanan do nipuhawang do tulun do suwai, om kada' kou igit do taakanon, ko' tusin, om kada' kou igit do rasuk do poningalanan. 4 Om isai nopo i papasalakoi dokoyu om mundorong kou nopod hiri do gisom do tumongkiad kou di bandar diri. 5 Om ondung a' kou romiton do hinonggo nopo, om tantagon no dokoyu o pupuk do mantad id lapap dokoyu do tumongkiad kou di bandar diri, do tanda' do hukuman iyolo' tu' a' i' iyolo' ruminamit dokoyu,” ka dau. 6 Om pamanau ngai' noddi i tumatanud di Yesus diri, do kuminaa do hiri'd kokompungan do mongoi posusui di Habar dot Osonong, om momolingos do tulun di kitoruol do hinonggo nopo.
Noborulong i Horudis
7 Om tontok di nokorongou i Horudis, i momorinta' do hilo'd Galilia, do koinsanai di nongosiliu'ddi, om koborulong no iyau. Tu' haro i' o tulun do momoros do noposian kawagu i Yohanis i Gampamatis, 8 om haro nogi' o momoros do nokorikot kawagu i Ilia. Om tulun nod suwai om momoros do haro ot iso' do mantad id pogialatan di nabi di gulu po do napasi kawagu. 9 Boros ka di Horudis, “Nokoponuhu' oku nod tulun do momulos do tulu di Yohanis. Nga' isai kopio nanu' ino tulun dino? Tu' ogumu' no o norongou ku do pasal dau,” ka dau. Om mokikikito no daa i Horudis di Yesus.
Pinapaakan i Yesus do Limo Noribu o Tulun
10 Om koguli' ngai' noddi i rasul di Yesus diri, om susuyo' no diyolo' dot id di Yesus o koinsanai di nongowonsoi diyolo'. Om angatai noddi di Yesus iyolo' dot iyolo-yolo' do minongoi do hilo'd bandar do Baitsaida. 11 Nga' koilaai noddi di tulun dot ogumu' iri, om tanud no iyolo' di Yesus. Om pologoso' noddi di Yesus iyolo' do tuminanud. Om sunudai noddi dau iyolo' do pasal di Pomorintaan do Kinorohingan. Om minomolingos nogi' iyau do tulun di kitoruol dot id pogialatan diyolo'. 12 Om tontok di tumonob noddi o tadau, om rikot no i hopod om duwo o tumatanud di Yesus dot id dau, om boro-boros no iyolo'd, “Oi Guru, iti nopo kinoiyonon diti om osodu' do kawalayan. Om osonong nogi' do suhuon ngai' nu ilo tulun do mamanau om koongoi i' iyolo' kopogihum do taakanon, om tiyonon diyolo' do hilo'd kokompungan om hilo'd kawalayan di hiti'd posorili',” ka. 13 Nga' boros ka di Yesus, “Paakanon nopo dokoyu iyolo',” ka. Om boros ka di tumatanud di Yesus, “Nga' limo po liob do roti om duwo o tinan do sada' dahai. Om mongoi tuu'ddi iyahai pomoli do papaakan ngai'dti tulun diti?” ka diyolo'. 14 (Kogumuo' nopo di tulun diri om haro i' doti' o limo noribu o tulun do tongokusai nogi'.) Om boro-boros no i Yesus dot id tumatanud dau, “Suhuo' ngai' dokoyu ilo tulun do mirikau do mogitumpuk-tumpuk dot ongolimo doti' nohopod o tulun dot iso' o tumpuk,” ka dau. 15 Om wonsoyo' noddi di tumatanud di Yesus i pinonuhuan dau diyolo'ddi. 16 Om ngoyo' noddi di Yesus i limo o tinan do roti om i duwo o tinan do sada', om tingaha' no iyau do hilo'd tawan om pongunsikou nod Kinorohingan. Om pogikobing-kobingo' nogiddi dau i roti om pogikodut-koduto' i sada' om patahako' no dau iri dot id tumatanud dau, do potikidon di tulun dot ogumu'. 17 Om akan ngai' no iyolo' do gisom do nongoyahan. Om timungo' noddi di tumatanud di Yesus i noolu' di taakanon diri, om hopod po om duwo o balatak do noponu'.
Nakun di Pitrus do Kristus i Yesus
18 Insan o tadau, om ongoi no i Yesus sambayang dot iso-iso' iyau. Om rikot ngai' no i tumatanud di Yesus dot id dau. Om uhoto' no di Yesus iyolo', “Isai oku dot osorou'd tulun?” ka. 19 Om boros ka diyolo' do suminimbar, “Haro i' o momoros dot iya' nopo om i Yohanis Gampamatis, om haro nogi' o momoros dot i Ilia ko. Om tulun nod suwai om momoros dot iya' nopo om iso' di nabi di gulu po do napasi kawagu,” ka. 20 Om boros ka kawagu di Yesus, “Nga' isai oku dot osorou dokoyu?” ka dau. Om boros kad Pitrus do suminimbar, “Iya' no i Raja' do Gampamasi, di pinabatos do Kinorohingan,” ka dau.
Pinoboros Mantad di Yesus o Koinggoritan om Kapatayon Dau
21 Om boro-boros no i Yesus di tumatanud dau, “Kada' no kopio dokoyu popinsunudo' o hal diri dot id disai nopo,” ka. 22 Om boro-boros po kawagu iyau do poingkaa, “A' no milo dot a' ogumu' o koinggoritan di Tanak do Tulun, om saapon iyau di piro-piro o boyoon om i boyoon dot imam, om i guru do Tourat. Om patayon nogindo iyau, nga' kotolu nopondod tadau om posion indo kawagu iyau,” ka dau. 23 Om boro-boros noddi i Yesus dot id koinsanai di tulun di hino'd hiri do poingkaa, “Iri nopo tulun dit orohian do tumanud doho', om mositi' no do lihuan dau i dau'd korohian, om sumaan do salib dau do pointikid-tikid do tadau, om tumanud kasai' doho'. 24 Tu' iri nopo tulun do momogompi' do koposion dau, om okon nogi' dot atagakan do koposion. Nga' iri nopondo i tulun di papatahak do koposion dau do gisom dot apatai dot iyoho' o kapatahakan, om aanu nogindo dau i koposion dau. 25 Nunu'ndo o kountungan do tulun, dot aanu ngai' piya dau o koinsanai'dti pomogunan ondung araag om atagak o koposion dau? 26 Dot ondung ointingayaman i tulun do mangakun doho' om i ponudukan ku, om i Tanak do Tulun nga' ointingayaman indo do mangakun di tulun diri do tontok do rumikot iyau do mikuwo'd kuasa' dau om mikuwo'd kuasa' do Tapa' om mikuwo'd kuasa' di moloikat dit ongolidang! 27 Ilaai no dokoyu: Dot id pogialatan nopo dokoyu'd hiti om haro i' ot a' po apatai dot a' po kokito do Pomorintaan do Kinorohingan,” ka dau.
Pinoinggayo i Yesus
28 Tontok di sominggu' no doti' do mantad di pinopotuduk i Yesus do koinsanai'ddi, om angatai noddi di Yesus i Pitrus om i Yohanis, om i Yakub do minongoi do hiri'd timpak dot iso' o nuluhon do minongoi sambayang do hiri. 29 Om tontok di maso no di Yesus do sumambayang, om kosimban no o rabas dau om pakayan dau nga' okilou o kopurako'. 30-31 Om sigog id intalang o duwo o tulun, i Musa om i Ilia do kitulinau do mantad hilo'd surga. Om monokiboro-boros iyolo' di Yesus do pasal do kapatayon di Yesus dit a' no alaid do hilo'd Yorusalim. 32 Nga' maso nopoddi om koodop i Pitrus om i piro-piro o tambalut dau, nga' sigog id koposik iyolo', om kokito no diyolo' i Yesus do mogulinau om haro o duwo o tulun do poingkakat dot id toning dau. 33 Om tontok di tumongkiad noddi di Yesus i duwo o tulun diri, om boro-boros no i Pitrus di Yesus, “Oi Guru, osonong no kopio do hiti toko'. Osonong nogi' do popowonsoi iyahai do tolu o kiim do hiti dot: iso' o diya', oi Tuan, om iso' o di Musa, om iso' o di Ilia,” ka dau. (Om poboroso' nopo di Pitrus o miagal diri nga' a' i' dau oilaan no kopio o komoyon dau'ddi.) 34 Nga' maso po di Pitrus do moro-boros, om sondot no o haun om kokuluputai nopo iyolo', gisom do minodosi iyolo'. 35 Om korongou noddi diyolo' o boros do mantad hiri'd haun do minoro-boros do poingkaa, “Iti no o Tanak ku di nopili' ku. Pokinongou kou no dau!” ka. 36 Om kotingkod poddi i moro-boros diri, om kokito no diyolo' dot iso-iso' i' i Yesus do hiri. Om kada' nopoddi di piro-piro o tumatanud di Yesus ungkomiai o pasal ngai'ddi, om a' diyolo' pinopimboros dot id disai nopo i nokito diyolo'ddi.
Minomolingos i Yesus do Tanak di Norusadan do Rusod dot Araat
37 Om tadau noddi kawagu om ruhuk no i Yesus om i tolu o tumatanud dau do mantad hiri'd nuluhon diri, om ogumu'ddi o tulun do ruminikot dot id di Yesus. 38 Om haro'ddi ot iso' o kusai do hiri'd pogialatan di tulun dot ogumu'ddi do minomogiak, boros ka dau, “Oi Guru, ongoi kopio daa ontong dilo tanak ku, iso' no'lo' o tanak ku! 39 Soira' nopo do rusadan iyau do rusod dot araat om minggiak no iyau om kumohis nopo o tinan dau om mogimputa' o kabang. Om a' nopo di rusod dot araat tingkadan iyau do monginggorit om a' sumoliwan do mantad id dau. 40 Om nopokisunsuban ku no daa di piro-piro o tumatanud nu i rusod dot araat diri, nga' a' i' iyolo' nokosunsub,” ka dau. 41 Om boros ka di Yesus do suminimbar, “Atuuk, ku dokoyu'dti! Sumansala' kou no kopio iyokoyu om a' otumbayaan. Songkuro po tuu o koloido' ku do poinsugku' dokoyu, om papalanut do ginawo ku dot id dokoyu? Ongoyo' pootodo' i tanak nu'd hiti!” ka dau. 42 Om maso po di tanak diri do manau-panau do pakayaan dot id di Yesus, om poloposo' no iyau di rusod dot araat om pinokohis o tinan dau. Nga' suhuo' noddi di Yesus i rusod dot araat diri do sumoliwan, om kolingasai noddi i tanak diri. Om patahako' noddi i tanak diri dot id tapa' dau. 43 Om ongosuayan ngai' nopo i tulun di nokokito do kogoyoo' do sinundu'd Kinorohingan.
Pinoboros Kawagu di Yesus o Pasal do Kapatayon Dau
44 “Soro-sorohon no kopio dokoyu om kada' no dokoyu lihuwai iti poboroson ku: Do patahakon nondo o Tanak do Tulun dot id kuasa' do tulun,” ka. 45 Nga' a' i' i tumatanud di Yesus kosuhut do komoyon di pinoboros di Yesus diri. Tu' a' i' pinatarang o komoyon diri dot id diyolo'. Om a' indo iyolo' kosuhut. Nga' a' i' iyolo' katama' do monguhot di Yesus ondung nunu o komoyon diri.
Isai ot Agayo Kopio o Ngaran?
46 Om haro'ddi o pogisimbar-simbaran di piro-piro o tumatanud di Yesus do pasal dot isai ot agayo o ngaran dot id pogialatan diyolo'. 47 Nga' noilaan i' di Yesus i pomusarahan diyolo'ddi, om ngoyo' no di Yesus ot iso' o tanak dit okoro' po, om poingkokoto' no dau i tanak diri do hiri'd toning dau. 48 Om boro-boros noddi i Yesus di piro-piro o tumatanud dau do poingkaa, “Tulun nopo di rumamit do tanak diti dot iyoho' o kopomoromitan, om rumamit no doho' i tulun diri. Om i tulun di rumamit doho', nga' rumamit no di minonuhu' doho'. Tu' isai nopo o tulun dit aiso' kopio o ngaran-ngaran dot id pogialatan dokoyu, om iyau no ot agayo o ngaran,” ka dau.
Tulun Nopo dit A' Sumaap Dokoyu om Sumokodung no Dokoyu
49 Boros ka di Yohanis, “Oi Tuan, nokokito iyahai do tulun do monunsub do rogon do rumait do ngaran nu. Om oduhai noddi dahai iyau, tu' okon iyau ko' mantad id pogialatan di tumatanud nu,” ka dau. 50 Boros ka di Yesus dot id di Yohanis om id tumatanud di Yesus do suwai, “Kada' oduhai i tulun diri tu' tulun nopo dit a' sumaap dokoyu om sumokodung no dokoyu,” ka.
It Iso' o Kampung do Hilo'd Samaria dot A' Ruminamit di Yesus
51 Om tontok dit oruhai no i Yesus do poinsawaton do hilo'd surga, om tontuo' noddi dau do mongoi iyau do hilo'd Yorusalim. 52 Om ponuhu' no iyau'd tulun do mogulu dau. Om pamanau noddi i tulun di sinuhu' dau'ddi, om ongoi no do hiri'd iso' o kampung do hilo'd Samaria do mongoi posodia' do koinsanai do nunu nopo do bagi' di Yesus. 53 Nga' a' iddi i tulun do hiri'd kampung diri orohian do rumamit di Yesus tu' oilaan no kopio do hilo'd Yorusalim o pakayaan dau. 54 Om koilaai noddi di Yakub om i Yohanis, i tumatanud di Yesus o pasal diri, om boro-boros no iyolo' di Yesus do poingkaa, “Oi Tuhan, uhang nu i' do mokianu iyahai do tapui do mantad hilo'd tawan do pamatai di tulun diri?” ka diyolo'. 55 Om koili noddi i Yesus, om togodo' no dau iyolo'. 56 Om pakayaai noddi diyolo' do hiri'd kampung do suwai.
I Piro-Piro o Tulun dit Orohian do Sumiliu'd Tumatanud di Yesus
57 Nga' maso po di Yesus om i piro-piro o tumatanud dau do manau-panau, om haro'ddi o tulun do minoro-boros di Yesus do poingkaa, “Oi Tuan, tumanud oku nopo diya' do hinonggo nopo o pakayaan nu,” ka. 58 Om boros ka di Yesus do suminimbar, “Toni nopo om kiluang i', om tombolog nga' kirumun i', nga' aiso' i' moti' o liiyon do Tanak do Tulun,” ka dau. 59 Nga' boros kaddi di Yesus dot id iso' o tulun do suwai, “Tanud no doho',” ka. Nga' boros ka di tulun diri, “Oi Guru, pabanaro' oku po diya' do muli' do mongoi pomolobong di tapa' ku,” ka. 60 Nga' boros ka di Yesus do suminimbar, “Pologoson nopo i tulun di napatai do momolobong di tulun dit oiyo ko' napatai. Nga' iya' nopo om pamanau nopo om popinsusuyon no o habar do Pomorintaan do Kinorohingan,” ka dau. 61 Om haro nogi' o tulun do suwai do minoro-boros dot, “Oi Guru, tumanud oku i' diya', nga' pabanaro' oku po do mongoi pongintod-intod do hilo'd walai ku,” ka. 62 Boros ka di Yesus dot id tulun diri, “Tulun nopo di kotimpuun do mamaradu, om kumoili indo, om aiso' i' o koonong-onongon do hiri'd Pomorintaan do Kinorohingan,” ka.
Minonuhu' i Yesus do Turu' Nohopod di Tumatanud Dau do Mamanau
1 Om pomili' po kawagu o Tuhan do tumatanud dau do turu' nohopod o tulun, om suhuo' noddi dau iyolo' do mamanau do soroduwo-duwo do mogulu dau do mongoi do hiri'd pointikid-tikid do bandar om kinoiyonon dit ongoyon dau. 2 Om boro-boros no i Yesus diyolo' do poingkaa, “Agayo no iti tomoton, nga' okuuri' o tulun do mongomot. Iyo nopoddi om pokianu kou no di sanganu do tomoton diti, om monuhu' i' iyau'd tulun do mongoi pongomot di tomoton dau. 3 Pamanau kou no! Suhuon ku iyokoyu'd mamanau do miagal do dumba' do kumaa dot id rolot do toni. 4 Kada' kou pongigit do poiiyanan do tusin ko' kantung do poiiyanan do nipuhawang do tulun do suwai, om kada' kou igit do kasut. Om kada' kou no undorong do hilo'd tanga'd ralan do sumuwau dot ongoiso' piya o tulun. 5 Ondung sumalakoi kou dot id iso' o walai, om momoros kou pod gulu do poingkaa, ‘Maha' daa om ongosimbayan o hiti'd walai'dti,’ kanto dokoyu. 6 Ondung haro o tulun do hiri dot orohian do haro o kouludan, om tumimporon no dot id diyolo' i kosimbayanan di pinosuwau dokoyu diyolo'ddi; nga' ondung a' iyolo' orohian, om onuon no dokoyu kawagu i boros do kosimbayanan di pinosuwau dokoyu'ddi! 7 Mundorong kou nopo dot id iso' noo o walai. Kada' kou no pingwaliu dot id walai'd suwai. Om akanon nopo dokoyu o nunu nopo i posurungon diyolo' dokoyu, tu' iri nopo tulun di pakaraja' om apatut i' do kaanu'd gadsi'. 8 Korikot kou nopo dot id iso' o bandar, om romiton kou no diyolo' kosonong-sonong, om akanon nopo dokoyu o nunu nopo o posurungon diyolo' dokoyu. 9 Lingasan no dokoyu i tulun di kitoruol do hiri'd bandar diri, om sunudan no dokoyu iyolo' do poingkaa, ‘Osomok no dokoyu i Pomorintaan do Kinorohingan,’ kanto dokoyu. 10 Nga' ondung korikot kou do hiri'd iso' o bandar om a' kou no diyolo' romiton, om sumoliwan kou nopo do kumaa do hiri'd ralan om poboroson no dokoyu o poingkaa, 11 ‘Iti piya pupuk do bandar dokoyu do kosokot do lapap dahai, nga' tantagon i' dahai do maan do tanda' do hukuman kou, tu' a' kou i' ruminamit. Nga' ilaai no dokoyu dot osomok no dokoyu i Pomorintaan do Kinorohingan,’ kanto dokoyu. 12 Sorohon no dokoyu, dot orikot nopondo i tadau do kopomutusan diti, om milo-milo nogid Kinorohingan dot ompunan i tulun do hilo'd Sodom ko' i tulun di hiri'd bandar diri!” ka dau.
I Piro-Piro o Bandar dit A' Monongkuyaan
13 Om boros ka kawagu di Yesus, “Obungou kou no, oi tulun do Korasim! Obungou kou no, oi tulun do Baitsaida! Ondung winonsoi daa i kongoimayaan di nongowonsoi dot id pogialatan dokoyu, do hilo'd bandar do Tirus om Sidon, om atantu' no do laid no daa korologo di dusa diyolo' i tulun do hilo', om nakapanampakai no daa iyolo' di pakayan di dong mogigihad om naaraban diyolo' do pupuk o tulu diyolo'. 14 Do tadau nopondod kopomutusan om iri nopo tulun do hilo'd Tirus om hilo'd Sidon, om milo-milo nogid Kinorohingan dot ompunan ko' mantad dokoyu. 15 Om iyokoyu oi tulun do Kapornaum! Ondos daa dokoyu om poinsawaton kou do gisom do korikot do hilo'd surga? A' i' kopio! Suwai ko' pataamon kou nogindo do hilo'd naraka!” ka dau. 16 Om boro-boros noddi i Yesus dot id piro-piro o tumatanud dau do poingkaa, “Tulun nopo di mokinongou dokoyu om mokinongou no doho'. Om i tulun di magada' dokoyu, nga' magada' no doho', om i tulun di magada' doho' nga' magada' no di minonuhu' doho',” ka dau.
Nokoguli' i Turu' Nohopod i Tumatanud Dau
17 Om ongotood no kopio i turu' nohopod o tumatanud diri di nokoguli' iyolo' om boro-boros no iyolo' di Yesus do poingkaa, “Oi Tuhan, mihuboyo-boyo' ngai' nopo i rusod dot araat do tontok do sinunsub dahai iyolo' dot id suang do ngaran do Tuhan!” ka. 18 Om boros ka di Yesus do suminimbar diyolo', “Nokito ku i Rogon do naratu' do mantad hilo'd tawan do miagal do kodumaat. 19 Ilaai no dokoyu, do noonuan ku no iyokoyu do kuasa' do gisom do milo kou do mongulok do tulanut om tompoluluhu om mangala' do koinsanai do kokorisan do pisangod om aiso' no o nunu nopo do milo do pokoruol dokoyu. 20 Nga' mulong po dot iyo'ddi tu' mihuboyo-boyo' nopo dokoyu i rusod dot araat nga' kada' kou kotood diri. Nga' kotood kou nogi' do notulis o ngaran dokoyu do hilo'd surga,” ka dau.
Otood i Yesus
21 Om tontok nogiddi dot otood i Yesus tu' noporinta' iyau do Rusod do Kinorohingan. Boros ka di Yesus, “Oi Apa', i Tuhan do momorinta' do tawan om pomogunan! Mongunsikou oku no diya' tu' pinolisok ngai' nu i' iri do mantad id tulun dit oilo om it ongkitoilaan, nga' pinotuduk nu i' dot id tulun dit aiso' o toilaan. Tu' iyo noddi o korohian nu, oi Apa'. 22 Nangkatahak nu no doho' o koinsanai'd nunu nopo oi Apa'. Aiso' i' o kotutun di Tanak, suwai ko' iya' no oi Apa'. Om aiso' nogi' o kotutun diya' oi Apa', suwai ko' iri no i Tanak; om i tulun di pointutunon di Tanak diya', oi Apa',” ka dau. 23 Om koili noddi i Yesus di piro-piro o tumatanud dau, om boro-boros no iyau diyolo' dit iyolo-yolo' do poingkaa, “Ountung kou no tu' nokokito kou di nokito dokoyu di baino'. 24 Tu' soroho' pogi': Ogumu' i' o nabi om raja' dot orohian do kokito di nokito dokoyu di baino', nga' a' i' iyolo' nokokito'ddi. Orohian i' daa iyolo' do korongou di norongou dokoyu di baino', nga' a' i' iyolo' nokorongou'ddi,” ka dau.
Tulun do Samaria di Kikosianan o Pinoinukadan
25 Om rikot noddi o tiso' o guru do Tourat dot id di Yesus, do momurunsut daa dau, om uhoto' no di guru do Tourat i Yesus do poingkaa, “Oi Guru, nunu ma ot apatut ku'd wonsoyon om kaanu oku i' do koposion dit otopot kopio om i poingompus?” ka dau. 26 Om boros ka di Yesus do suminimbar, “Nunu ka toi di nokotulis dot id Buuk do Kinorohingan? Om poingkuro o diya'd osorou do pasal diri?” ka dau. 27 Om boros ka di tulun diri do suminimbar, “Poingkaa, ‘Kosianai nod Tuhan i Kinorohingan nu do mikuwo'd aayi-ayi' o ginawo nu, om aayi-ayi' o koposi-posion nu om koinsanai do kokorisan nu, om koinsanai do pomusorou nu, om kosianai nod tulun dit iyokoyu ngai' do miagal dot osianan ko do diya'd tinan,’ ka,” ka dau. 28 Om boros ka di Yesus, “Otopot no ino nisimbar nu. Om wonsoyo' no o miagal diri om apasi ko i',” ka dau. 29 Nga' orohian i' i guru do Tourat diri do popotopot do dau'd tinan. Om ponguhot po kawagu iyau di Yesus do poingkaa, “Isai toi o komoyon nu do tulun dit iyahai ngai'?” ka dau. 30 Om posimbaro' no di Yesus o poingkaa, “Insan o maso, om haro o songulun o kusai do mantad hilo'd Yorusalim do minongoi do hilo'd Yorikou. Om maha' di hilo' no iyau'd tanga'd ralan om saapo' no iyau do tulun di gampanakau, om nahawan iyau do koinsanai di haro dot id dau, om pinimbabagan tomod iyau, gisom dot oruhai no iyau'd apatai, om tongkiadai nogiddi iyau do poingiliu poo do hiri'd ralan do nongosuhat tomod. 31 Nga' koontok no do maso'ddi do nakawaya' o songulun ot imam do hiri'd ralan diri. Om tontok di nokito dau i tulun diri, om soborong no iyau di ralan om pamanau no do luminombus. 32 Om iyo nogiddi i songulun o tulun do Liwi, i minaya'd hiri; tontok di nokito dau i tulun diri, om insomok no iyau do minongoi ontong dau. Om iyau nga' suminoborong i' di ralan, om tilombus no do minamanau. 33 Nga' kawaya' noddi o songulun o Samaria do hiri. Tontok di nokito dau i tulun diri, om kosianai no kopio iyau dau. 34 Om ongoi no iyau do hiri'd toning di tulun diri, om udasai noddi dau do waig dot anggur i nongosuhat om ubatai dau di tumau om rilitai nogiddi dau i nongosuhat. Om pasakayo' noddi dau i tulun diri dot id kaladai dau, om pootodo' no dau do hiri'd walai do sisiwaan, om ubatai no dau iyau. 35 Sinuabon noddi om anu no iyau do duwo o tusin do pirok om patahako' no dau di sanganu di walai di sisiwaan, om boro-boros no iyau dau do poingkaa, ‘Gompion noti tulun diti, om ondung haro o tusin dot apakai nu do suwai ko' iti tinahak ku, om bayaran ku i' do koguli' oku kawagu,’ ka dau,” ka di Yesus. 36 Om ponguhot noddi i Yesus dau do pinongolimpupus di sinusui dau'ddi. Boros ka dau, “Id pogialatan nopo di tolu o tulun diri om isai diyolo' o minomonsoi dit apatut do wonsoyon do tulun dit iyau ngai' dot id tulun di napanakahan diri dot osorou nu?” ka dau. 37 Om boros ka di guru do Tourat diri do suminimbar, “I tulun di minonulung di tulun diri,” ka. Om boros kaddi kawagu di Yesus, “Pamanau no, om wonsoyon no o miagal diri,” ka.
Minongoi i Yesus Pogolimbuha' di Marta om i Maria
38 Om lombus noddi i Yesus om i piro-piro o tumatanud dau do minamanau, om korikot no iyolo' dot id iso' o kampung. Hiri nopod kampung diri nga' haro ot iso' o tondu' dot i Marta o ngaran, om angatai no dau i Yesus do mongoi do hiri'd walai dau. 39 Om haro o tobpinai di Marta dot i Maria o ngaran. Om irikau no i Maria do hiri'd toning di Tuhan Yesus do mokinongou di ponudukan dau. 40 Nga' i Marta nopo om agangau nopo do maganu-anu do hiri'd walai dau. Om ongoi noddi iyau dot id di Yesus om boro-boros nod poingkaa, “Oi Tuhan, pologoson nu nopo i Maria do pokoiso-iso' doho' do maganu-anu? Suhuo' pogi' iyau do mongoi uhup doho'!” ka dau. 41 Nga' boros kad Tuhan do suminimbar dau, “Oi Marta, Marta! Ogumu' nopo ot osorou nu do katangkabaan om kagangahan nu, 42 nga' iso' noo it agayo kopio o guna'. Om nopili' no di Maria it osonong kopio it a' no aahau do mantad id dau,” ka dau.
Ponudukan di Yesus do Pasal do Sumambayang
1 Insan o tadau om sambayang no i Yesus dot id iso' o kinoiyonon. Om kopongo noddi iyau do sumambayang, om boro-boros no dot id dau ot iso' di tumatanud dau, “Oi Tuhan, tudukai daa iyahai do sumambayang do miagal di Yohanis tu' minonuduk di tumatanud dau do sumambayang,” ka. 2 Om boro-boros noddi i Yesus diyolo' do poingkaa, “Soira' nopo do sumambayang kou, om poingkaa o poboroson dokoyu, ‘Oi Apa': Iya' no o Kinorohingan, dit iso' noo; Iya' no o tukuon om pusohon. Iya' no o Raja' dahai. Pokionuon dahai do momorinta' ko do hiti'd pomogunan. 3 Onuwai no iyahai do taakanon di kabagal dahai do pointikid do tadau. 4 Ompunai no o dusa dahai, tu' iyahai nga' mangampun i' do kasalaan do pointikid-tikid di tulun di kasala' dot id dahai. Kada' pologoso' dot atagak o kotumbayaan dahai do tontok dot oontok iyahai'd pogumbalan,’ kanto dokoyu,” ka di Yesus. 5 Om boro-boros po kawagu i Yesus di piro-piro o tumatanud dau, “Ondung haro o songulun dot id pogialatan dokoyu do mongoi do hiri'd walai di tambalut dau do pitangatuong, om moro-boros nondo iyau dot id dau do poingkaa, ‘Ambalut, onuwai oku daa dot ongotolu o roti, 6 tu' haro o tambalut ku do minumbaya' do hilo'd walai ku, om aiso'ddi o paakan ku dau,’ ka. 7 Ondung poingkaa o posimbaron di tambalut nu do hiri'd suang di walai dau, ‘Kada' no ponusa' doho'! Tu' nontiilan no ilo wawayaan, om modop oku no. Om ilo tangaanak ku nga' nokoodop no. A' oku no milo do tumungag do mongoi panahak diya' do nunu nopo,’ ka doti' dau,” ka di Yesus. 8 Om boros ka kawagu di Yesus, “Om nunu mando o wonsoyon dau dot osorou dokoyu? Poboroson ku no do mulong piya do tambalut nu iyau nga' a' i' iyau tumungag do mongoi panahak diya' di roti. Nga' ondung a' ko ointingayaman do mugut-lugut kasai' dau do mokianu om tumungag indo iyau om patahakon no dau diya' i pokionuon nu'ddi. 9 Om iti no o kapamarasan ku dot id dokoyu do: Pokianu kou no, om oonuan kou i'; pogihum kou no, om okito indo dokoyu iri, pogkoritik kou nod totobon, om iwangan kou indo. 10 Tu' tulun nopo di mokianu om kaanu no; om i tulun di mogihum nga' kokito no; om i tulun di mogkoritik do totobon nga' iwangan indo. 11 Haro i' toi o tapa' dot id pogialatan dokoyu do papatahak do taakanon di kawanit dot id tanak dau, di mokianu'd sada'? 12 Ko' patahak pod tompoluluhu do tontolu' o pokionuon di tanak? 13 Mulong piya dot angaraat kou, nga' koilo kou i' do papatahak dit ongosonong dot id tangaanak dokoyu. Om a' nogi' tuu'ndo kopio koilo i Tapa' do hilo'd surga! Patahakon indo dau o Rusod dau dot id tulun di mokianu dau,” ka di Yesus.
I Yesus om i Biilsibul
14 Insan o tadau om ponunsub no i Yesus do rusod dot araat do mantad id iso' o tulun do bobou. Om kosoliwan poddi i rusod dot araat diri, om koboros nogiddi i tulun diri. Om ogumu'ddi o tulun dot ongosuayan, 15 nga' haro i' o tulun do momoros do poingkaa, “Milo pogi' iyau'd monunsub do rusod dot araat nga' noonuan no iyau di Biilsibul, i boyoon di rusod dot araat do kuasa',” ka. 16 Om haro nogi' o tulun do suwai do momurunsut daa di Yesus, om suhuo' no diyolo' i Yesus do momonsoi do koimayaan do tanda' dot otopot kopio do mantad iyau id Kinorohingan. 17 Nga' oilaan i' di Yesus i pomusarahan diyolo'ddi. Om boro-boros noddi iyau diyolo', “Ondung haro o pomogunan dit opogisuwai-suwai dot id piro-piro o sinompuruan do tulun di mogisasaap, om a' i' ogirot o pomorintaan diri. Om i sompiiyon dit a' mogiulud om i mogisasaap nopo nga' araag indo. 18 Om iyo nogiddi o pomorintaan do Rogon; tu' ondung haro o tiso' o sinompuruan do sumaap do sinompuruan do suwai, om araag nondo i pomorintaan diri. Om momoros kou daa do monunsub oku do rusod dot araat do mantad id kuasa' di Biilsibul. 19 Om iyo nopoddi om disai nanu' do kuasa' di piro-piro o tumatanud dokoyu do monunsub do rusod dot angaraat? Iri i' i tumatanud dokoyu o popointalang do kasala' kou! 20 Nga' iyoho' nopo om kuasa' id Kinorohingan o ponunsub ku do rusod dot angaraat. Om komoyon nopoddi nga' nokorikot no dot id pogialatan dokoyu i Pomorintaan do Kinorohingan. 21 Om tulun nopo dot okoris om i haro ngai' o rapo-rapo, do madtamong di walai dau, om ogompi' ngai' no o koinsanai di dau'd songonuon. 22 Nga' ondung haro o tulun do sumaap dau dit okoris ko' iyau om aala' nondo iyau om apanakau ngai' no di tulun dit okoris o koinsanai di rapo-rapo di pagandasan daa di sanganu di walai, om pogibohogi-hogion no di tulun dit ongokoris o koinsanai di dapu' di tulun diri. 23 Iri nopo i tulun dit a' sumokodung doho', om atantu' no do sumaap doho'. Om iri i tulun dit a' muhup doho' nga' atantu' no do mamaraag di karaja' ku!” ka di Yesus.
Guminuli' Kawagu i Rusod dot Araat
24 Om boros ka kawagu di Yesus, “Soira' nopo do kopoggidu' i rusod dot araat do mantad id iso' o tulun, om mintikid nopondo i rusod diri dot id piro-piro o kinoiyonon dit otuu do mogihum do tiyonon dau'd mundorong, nga' aiso' i' o tokito dau. Om moro-boros nondo iyau do poingkaa, ‘Gumuli' oku nogi' do hilo'd walai di notongkiadan ku,’ ka. 25 Om korikot nopondo iyau'd hiri, om okito nondo dau i walai'ddi do noimuhawan om oulud o hiri'd suang. 26 Om mamanau nondo iyau do mongoi pangangat do turu' o rusod do suwai, dit araat po ko' iyau. Om sumuang nondo iyolo' dot id tulun diri, om mundorong nod hiri. Om araat pondo ko' i kowoyo-woyoon di gulu po o kowoyo-woyoon di tulun diri,” ka dau.
Kolumaagan dit Otopot Kopio
27 Om koboros poddi di Yesus o miagal diri, om boro-boros no dot id dau o tiso' o tondu' dot id pogialatan di tulun dot ogumu'ddi, “Olumaag no kopio i tondu' di minogkosusu diya', om i pinoposusu diya'!” ka dau. 28 Nga' boros ka di Yesus do suminimbar, “Nga' okon-okon po o kolumaago' di tulun di mokinongou do boros do Kinorohingan om i mumboyo'ddi!” ka dau.
Sinuhu' di Tongoulun i Yesus do Momonsoi do Koimayaan
29 Om maso poddi di tulun do pogurumung di Yesus, om poboroso' po kawagu dau dot id diyolo' o poingkaa, “Angaraat no kopio iti tulun do maso'd dinondo. Mokiontong daa iyolo' do koimayaan, om otumbayaan i' iyolo' doho', nga' a' no iyolo' pokitonon dot ongoiso' piya o koimayaan, do suwai ko' i koimayaan di nosiliu dot id di Nabi Yunus. 30 Om poingkuro nopo i Nabi Yunus do nosiliu do koimayaan di tulun do bandar do Niniwi, om iyo nogiddi o Tanak do Tulun do sumiliu do koimayaan do tulun do maso'd baino'. 31 Orikot nopondo o tadau'd kopomutusan, om apasi nondo kawagu i Raja'd Tondu' di mantad id pomogunan di ponong id salatan do kaandad diti tulun do dinondo, om pasalaon nondo dau iyolo'. Tu' pamanaho' nopo di Raja'd Tondu' dot osodu' piya o pinamanau do mantad hilo'd disan diti pomogunan, do minongoi pokinongou di ponudukan di Suliman dit angaralom kopio. Nga' dinondo nopodti om haro po it agayo ko' i Suliman! 32 Om orikot nopondo o tadau'd kopomutusan, om apasi nondo kawagu i tulun do hilo'd Niniwi do kaandad diti tulun do dinondo, om pasalaon nondo diyolo' iti tulun do dinondo. Tu' iri nopo tulun do hilo'd Niniwi om kuminorologo i' di dusa diyolo' di minonusui i Yunus do boros do Kinorohingan dot id diyolo'. Nga' hiti nopo do dinondo'dti om haro po ot agayo ko' i Yunus!” ka di Yesus.
Tanawau om Totuong
33 Om boros ka kawagu di Yesus, “Aiso' i' o tulun do modtutud do lampung om polisokon nogindo ko' tinggouban do kakanan. Suwai ko' potimpakon indo dau i lampung diri dot id potitimpakan kasai' di lampung, om kokito indo di tanawau i tulun di sumuang do hiri. 34 Mato nopo om miagal do lampung do tinan. Om atarang nopo o mato dokoyu, om anganawau ngai' no o tinan dokoyu. Nga' ondung a' atarang o tokito do mato dokoyu, om odondom no o kotuongo' do pointongkop do tinan dokoyu. 35 Om iyo nopoddi om antang-antangan no kopio dokoyu om a' i' tumuong i tanawau dokoyu. 36 Ondung anganawau o pointongkop do tinan dokoyu, om aiso' no o totuong, om anawau no o tinan dokoyu do miagal po dot otitihan do lampung,” ka di Yesus.
Pinasala' di Yesus i Tulun do Parisi om i Guru do Tourat
37 Om kotingkod poddi i Yesus do minoro-boros, om angatai no iyau do songulun o tulun do Parisi do mongoi akan do hiri'd walai dau. Om ongoi noddi i Yesus akan do hiri. 38 Om ongosuayan diri i tulun do Parisi do nokokito di Yesus dot a' minomoug do tintod do makan, do tumanud dit oturan do tugama'. 39 Om iri noddi o kinapamarasan di Tuhan dot id dau do poingkaa, “Ongoubas kou nogi' bo iyokoyu i tulun do Parisi do momolihung do mangkuk om piring do hiri nod soibau o lihungan, nga' poimponu' id kororongit om kararaat ot id suang do ginawo dokoyu. 40 Basug kou no kopio! Okon toi ko' Kinorohingan i' o minomonsoi dit id soliwan, om iyau nogi' o minomonsoi dit id suang. 41 Do nunu nopo it id suang di piring ko' i mangkuk dokoyu'ddi, om iri no o patahakon dokoyu dot id tulun do mosikin, om iri nondo o kolidang ngai'ddi dot osorou dokoyu. 42 Obungou kou no, oi tulun do Parisi! Do manahak kou i' do sompihopod do mantad id totonomon dokoyu, do miagal do baing om sogumau om i totonomon do suwai di maan do rampa, nga' a' nogindo dokoyu podulon it otopot om i kosianan dot id Kinorohingan. Om iri nogi' daa kopio it apatut dokoyu'd wonsoyon, om a' nogi' toliban do momonsoi i suwai ko' iri. 43 Obungou kou no i tulun do Parisi! Tu' iyokoyu nopo om orohian kou nopo do hiri'd tiiyonon dit ongkipangkat do hiri'd walai'd sasambayangan, om orohian do suahon do tulun do hiri'd pasar. 44 Obungou kou no! Tu' iyokoyu nopo om miagal no di lobong dit aiso' o tanda' tu' a' no oilaan om piulak-ulakan pod tulun,” ka dau. 45 Om boro-boros no o songulun di guru do Tourat dot id di Yesus, “Oi Guru, i nopo boros nu'ddi om pongindaraat nu i' dahai piya?” ka. 46 Om boros ka di Yesus do suminimbar, “Iyokoyu nga' obungou nogi', oi guru do Tourat! Tu' iyokoyu nopo om monuhu' kou do momonsoi dit angapagon do momonsoi, om a' kou indo kopio iyokoyu monguhup diyolo' do momonsoi'ddi. 47 Obungou kou no! Tu' iyokoyu nopo om minomonsoi kou do lobong di piro-piro o nabi di pinatai di taki-aki dokoyu. 48 Iyo nopoddi om minangakun kou no do kosokodung kou di winonsoi di taki-aki dokoyu; dot iyolo' piya daa o minamatai di piro-piro o nabi diri, nga' iyokoyu i' o pinopowonsoi di pinamalabangan diyolo'. 49 Om iri noddi o nokoboro-boros do Toilaan do Kinorohingan do poingkaa, ‘Porikatan ku nondo iyokoyu do piro-piro o nabi om i susuhuon ku; nga' patayon indo dokoyu o wookon diyolo', om iri no suwai om inggoriton dokoyu,’ ka. 50 Wonsoyon pogi'd Kinorohingan o miagal diri nga' pomohukum di tulun di maso'd baino', tu' i kinapamatayan do koinsanai di nabi di mantad di wonsoyo' i' iti pomogunan, o kopomohukuman, 51 do mantad poddi pinatai i' i Habil om gisom di pinatai i Sakaria, do hiri'd pialatan di pananaraban do porsombahan om i Walai'd Sasambayangan dot Agayo. Kotumbayaai kou no: Dot atantu' no do hukuman ngai' nopondo iti tulun di maso'dti do koinsanai'ddi o kopomohukuman. 52 Obungou kou no, oi guru do Tourat! Tu' iri nopo kunsi' do pongiwang di wawayaan di pinoopian do toilaan, om haro i' dot id dokoyu, nga' iyokoyu i' o tumomod dot a' sumuang do hiri do mongoi pogihum di toilaan diri. Nga' mangantob kou nogi' di tulun di tumotos daa do sumuang do hiri,” ka dau. 53 Om kotongkiad poddi i Yesus do hiri'd kinoiyonon diri, om pasalaon tomod diri di guru do Tourat om i tulun do Parisi i Yesus. Om mogihum iyolo'd ralan do popohudsu dau om mimboros indo iyau do pasal dot ogumu' o hal. 54 Om mogihum nogi' kopio iyolo' ondung haro o boros di Yesus do kasala'.
Popoinsan di Tulun di Minsorupai-Rupai no Toomod
1 Om haro'ddi o piro-piro noribu o tulun do mogiimpit-impit nopo do gisom do haro ot ongoulakan o lapap. Om maso po di tulun dot ogumu' diri do pogurumung, om boro-boros no i Yesus di piro-piro o tumatanud dau do poingkaa, “Antang-antangan no dokoyu o pangambang do tapung do tulun do Parisi, komoyon ku nopodti nga' i kowoyo-woyoon diyolo' di minsorupai-rupai no toomod. 2 Aiso' i' i poillisok dot a' okito do koimbagu. Om aiso' i lisok-lisokon dot a' oimbulayan do koimbagu. 3 Iri nopo i poboroson dokoyu do dongotuong, om orongou nondo iri do dangadau; om i poburungon dokoyu do popoboros do hiri'd bilik di nontiilan nga' pagarangon indo do popimboros do hinonggo nopo,” ka dau.
Kooris nod Tuhan
4 Om boros ka kawagu di Yesus, “Sorohon no dokoyu, oi tambalut ngai' ku! Kada' kou poddosi di tulun di milo no do mamatai do tinan dokoyu, nga' a' i' milo do momonsoi dit awagat ko' iri. 5 Potudukon ku dot id dokoyu ondung isai it apatut do koorisan kopio dokoyu. Kooris kou nod Kinorohingan! Tu' kikuasa' i' iyau do mamatai do tinan, om kikuasa' iyau do poposubo dot id tapui naraka. Kotumbayaai kou no, dot iyau it apatut dokoyu'd koorisan. 6 Limo nopo o tinan do pirit do maan padagango' om duwo no o tusin dit okuuri' o suang do gatang. Nga' iyo piya'ddi nga' aiso' i' o tongosonginan piya'ddi dot olihuan do Kinorohingan. 7 Om ino piya tobuk dokoyu nga' nointob ngai' no dau o kogumuo'. Iyo nopoddi om kada' kou kooris; tu' iyokoyu nopo om poimaha' i' ko' i pirit,” ka dau.
Mangakun di Kristus dot id Toguang do Tulun dot Ogumu'
8 Om boros ka kawagu di Yesus, “Soro-sorohon no kopio dokoyu: Tulun nopo di mangakun dot id toguang do tulun dot ogumu' do tumatanud iyau doho', om okunon no iyau di Tanak do Tulun dot id toguang di moloikat do Kinorohingan. 9 Nga' tulun nopo di mogolim dot id toguang do tulun dot ogumu' do tumatanud iyau doho', om olimon no iyau di Tanak do Tulun dot id toguang di moloikat do Kinorohingan. 10 Soira' nopo do momoros o tulun do sumaap iyau do Tanak do Tulun, om oompunan i' iyau; nga' soira' nopo do mongindaraat iyau di Rusod do Kinorohingan, om a' no iyau oompunan. 11 Ondung pokoyoon kou do hiri'd walai'd sasambayangan do maan butusai dot id toguang do gobunor ko' pomorinta, om kada' kou katangkabo ondung poingkuro kou do popotopot do tinan dokoyu om ondung nunu ot apatut dokoyu'd poboroson. 12 Tu' iri nopo it apatut dokoyu'd poboroson, om potudukon indo di Rusod do Kinorohingan dot id dokoyu do tontok do maso'ddi,” ka dau.
I Tulun di Kaya' di Basug o Poinukadan
13 Om boro-boros no dot id di Yesus o songulun dot id pogialatan di tulun dot ogumu' do poingkaa, “Oi Guru, suhuo' doho' ilo tobpinai ku do momiduwo doho' di dapu' di pinotungkusan di tapa' dahai dot id dahai,” ka dau. 14 Nga' boros ka di Yesus do suminimbar, “Oi tobpinai ku, isai o pinoposiliu doho'd gompomutus dokoyu, ko' momiduwo po di dapu' do tungkusan dokoyu,” ka. 15 Om boro-boros noddi i Yesus dot id koinsanai di tulun di hino'd hiri do poingkaa, “Soro-sorohon no dokoyu, om umbangan-banganan no, kada' kou kadalaai do mokimamaha', tu' koposion nopod tulun om a' i' poinsondiu do kakayaan, do mulong piya dot a' aayi-ayi' i dapu' dau,” ka dau. 16 Om ponusui noddi i Yesus dot iso' o poinukadan dot id diyolo' do poingkaa, “Haro o songulun o kaya' om ogumu' tomod o tua' di totonomon dau do hiri'd tana' dau. 17 Om pomusorou noddi i tulun di kaya'ddi do poingkaa, ‘Aiso' noddi o poiyanan ku di tua' di totonomon ku. Om nunu maddi o wonsoyon ku'dti?’ ka dau. 18 Om pomusorou no kawagu iyau do poingkaa, ‘Oo, poingkaa o wonsoyon ku: Monuhu' oku nondod mamaraag di gudang ku, om mamaal nogindo do gudang dit agayo ko' iri. Om hiri nondo o poopian ku do koinsanai di gandum ku om i dapu' ku di suwai. 19 Om moro-boros oku nondo dot id suang do ginawo ku do poingkaa: Nokoundar oku no! Tu' nangaanu ngai' ku no it ongosonong, om a' no aayi-ayi' iri do piro-piro piya o toun. Om mundorong nopodti! Om makan no, om minum, om sumimbayan nopo!’ kangku. 20 Nga' boros kad Kinorohingan dot id tulun diri, ‘Oi tulun do basug! Totuong idti dot apatai ko. Om isai noddi o kaanu ngai' di kakayaan di tinimung nu'ddi!’ ka. 21 Om iyo noddi ot osiliu dot id pointikid-tikid do tulun di tumotos do kumaya' do maan nod dau'd tinan. Nga' a' i' iyolo' monotos do kumaya' dot id pagantangan do Kinorohingan,” ka di Yesus.
Kotumbayaai nod Kinorohingan
22 Om boro-boros noddi i Yesus di piro-piro o tumatanud dau do poingkaa, “Iri no o kapamarasan ku dot, ‘Kada' kou katangkabo do pasal do koposi-posion dokoyu; ondung nunu i takanon dokoyu, om ondung nunu o pakayan dokoyu,’ ka. 23 Tu' agayo i' o komoyon do koposion ko' taakanon, om agayo o komoyon do tinan ko' pakayan. 24 Antangai pogi' dokoyu i bangkahak! Iri nopo om a' i' momutanom, om a' mongomot, om aiso' o gudang. Nga' iyo piya'ddi nga' gompion i' do Kinorohingan. Om okon-okon kou pondo iyokoyu tu' poimaha' i' ko' i tombolog. 25 Om mulong piya do tumangkabo kou nga' haro toi o tiso' dokoyu do milo do mongoput do tumur dau dot ongoniiba' piya? 26 Om ondung a' kou milo do momonsoi dit ongokooro' piya, om nokuro tu' tumangkabo kou po di suwai ko' iri? 27 Antangai pogi' dokoyu ilo bunga do poinsuni do hiti'd talun. A' i' morobuat ilo bunga om a' mangawol. Nga' i Raja' Suliman piya tu' kaya' kopio nga' aiso' i' o pakayan dot iyo dilo dombunga kolumis! 28 Sumuni no ilo sakot do baino', om suab pondo om aayi' nod tutudan. Nga' iyo piya'ddi nga' lumison id Kinorohingan ilo sakot. Om a' nogindo tuu kopio iyau manahak dokoyu iyokoyu do pakayan? Nga' oluhoi i' kopio o kotumbayaan dokoyu! 29 Iyo nopoddi om kada' kou no katangkabo om kada' kou koborulong do momusorou ondung nunu o takanon om tinumon dokoyu. 30 Tu' koinsanai nopoddi om ihumon ngai' i' di tulun dit a' kotutun do Kinorohingan. Om oilaan i' daa di Tapa' dokoyu do kiguna' kou ngai'ddi. 31 Nga' poinggoyoon nogi' kopio dokoyu o Pomorintaan do Kinorohingan, om patahakon indo do Kinorohingan dot id dokoyu o koinsanai'd di suwai,” ka di Yesus.
Dapu' do Hilo'd Surga
32 Om boros ka kawagu di Yesus, “Kada' kou kooris, iyokoyu it okuuri' o nintaban. Tu' orohian i' i Tapa' dokoyu do manahak dokoyu'd barakat do mantad id Pomorintaan dau. 33 Padagangon no dokoyu i dokoyu'd songonuon, om patahakon nod tulun do mosikin i tusin do gatang diri. Pomonsoi kou nod poiiyanan do tusin dit a' rumaag, om poopion no dokoyu o dapu' dokoyu do hilo'd surga. Tu' hilo' nopod surga om aiso' no o tulun do mongoi panakau om aiso' o tanai do mamaraag di dapu'. 34 Tu' hinonggo nopo o koiyonon di dapu' dokoyu om hiri no o kosokoton do ginawo!” ka dau.
Susuhuon di Posodia' Kasai'
35 Boros ka kawagu di Yesus, “Mumbangan-bangan kasai' kou no do tumimbaba' do nunu nopo. Om mositi' no do kipakayan kasai' kou om kitapui kasai' o lampung, 36 do miagal di susuhuon di magandad do kogulian di tuan dau do mantad id poginakanan do kumawin. Tu' soira' do korikot i tuan dau, om mogkoritik no iyau di totobon, om mipuwoyo' nopo i susuhuon dau do mongoi pongiwang di totobon. 37 Olumaag no i susuhuon di posodia' kasai' do magandad do korikatan di tuan dau. Kotumbayaai kou no: do sumodia' nondo i tuan diri om suhuon no dau, i susuhuon dau do mirikau om modsurung nondo iyau diyolo'. 38 Olumaag no kopio i susuhuon di posodia' kasai' do magandad do korikatan di tuan dau do mulong piya do pitangatuong ko' alaid ko' iri. 39 Soroho' no dokoyu iti! Tu' ondung oilaan daa di sanganu di walai o korikatan di manakau, om tamangan i' daa dau i walai dau, om a' i' kosuang i manakau do hiri'd walai dau. 40 Om iyo nopoddi om mositi' no do mumbangan-bangan kou om sumodia', tu' rumikot nondo i Tanak do Tulun do tontok dit a' i' daa dokoyu insan-insanon,” ka dau.
Susuhuon dit Otorodok om Susuhuon dit A' Otorodok
41 Om uhoto' no di Pitrus i Yesus do poingkaa, “Oi Tuhan, iyahai no tuu o tudukan nu di ponudukan nu'ddi, ko' koinsanai pod tulun o tudukan?” ka. 42 Om boros kad Tuhan do suminimbar, “Isai ma i susuhuon dit otorodok om it oilo? Iyau nopo om i tulun di siniliu di tuan dau do boyoon di susuhuon dau'd suwai, om oonuan i' dau iyolo' do taakanon do tontok di maso di natantu' mantad. 43 Olumaag no kopio i susuhuon di maso do momonsoi di karaja' dau dot orikatan di tuan dau! 44 Kotumbayaai kou no, do silihon nopondo di tuan diri i susuhuon dau'ddi do mongilo-ilo ngai' di dapu' dau. 45 Nga' ondung momusorou i susuhuon diri dot, ‘Alaid po bo do gumuli' i tuan ku'ddi,’ ka, om pimbabagan ngai' nondo dau i susuhuon do suwai, om mangakan-ngakan nogindo iyau om moginum do gisom dot aawuk. 46 Om korikot nondo i tuan dau do tontok di tadau om jam dit a' i' daa dau soro-sorohon. Om oi-oiyon nopondo di tuan o pomohukum di susuhuon dau'ddi, om poiyoon di kootuson do tulun dit a' mumboyo'd Kinorohingan o kootuson dau. 47 Iri nopo susuhuon di koilo do korohian di tuan dau, om a' indo sumodia' om a' momonsoi'ddi, om padalaan no kopio do momobog. 48 Nga' iri nopo susuhuon dit a' koilo mantad ondung nunu o korohian di tuan dau, om kowonsoi nondo iyau'd sala' gisom dot apatut no iyau do bobogon om a' i' di tuan padalaan o pomobog di susuhuon dau'ddi. Tu' tulun nopo di noonuan dot ogumu' om ogumu' no o pokionuon do mantad id dau. Om i tulun dit ogumu' o pinosongonuan, nga' ogumu' nondo o pokionuon do mantad id dau,” ka di Yesus.
Okon i' ko' Kouludan Suwai ko' Pisaapan
49 Om boros ka kawagu di Yesus, “Kinorikatan ku nopo om mongoi paparakit do tapui do podtutud diti pomogunan. Om osonong no daa kopio do nokosikit i tapui'ddi! 50 Om haro po o koinggoritan dit awagat kopio dit a' no milo dot a' ku timbabaon. Om a' nopo osimbayan o ginawo ku dot a' po katalib iri. 51 Ondos daa dokoyu om kouludan o nigitan ku do hiti'd pomogunan. Okon i' ko' piuludan o nigitan ku suwai ko' pisaapan. 52 Tu' mimpuun nod baino', do haro o pisongkiwalan dot id pialatan di limo o tulun dot id iso' o sompiiyon. Sumaap nondo i tolu o tulun di duwo o tulun, ko' i duwo o tulun do sumaap di tolu o tulun. 53 Om i tapa' nga' sumaap nondo di tanak dau'd kusai, om i tanak dau'd kusai nga' sumaap nondo di tapa' dau. Om i tina' nga' sumaap nondo di tanak dau'd tondu', om i tanak dau'd tondu' nga' sumaap nondo di tina' dau. Om i tiwanon do tondu' nga' sumaap nondo di monongiwan dau'd tondu', om i monongiwan do tondu' nga' sumaap nondo di tiwanon dau'd tondu',” ka dau.
Pogintutunan do Maso
54 Om boro-boros no i Yesus di tulun dot ogumu' do poingkaa, “Ondung okito dokoyu o haun do minsawat ponong id kotonobon om olomus kou nopo do momoros do, ‘Rumasam nod baino',’ ka. Om rumasam no kopio. 55 Om ondung opurimanan dokoyu o ribut do mantad id salatan, do tumongus om moro-boros kou no do, ‘Magadau nod baino',’ ka. Om magadau no kopio. 56 Iyokoyu no i tulun di minsorupai-rupai no toomod! Koilo kou i' do mongintutun do kooyu-oyuo' dilo tawan om iti pomogunan. Nga' nokuro tu' a' kou koilo do komoyon di piro-piro o tanda' do maso'dti?” ka dau.
Monokiulud no di Pisangod Dokoyu
57 Om boros ka kawagu di Yesus, “Nokuro tu' a' dokoyu butusan dot id pogialatan dokoyu ondung nunu it otopot! 58 Ondung haro o tulun di mamadawa dokoyu om i poporikot dokoyu dot id kut, om tumotos kou no kopio do manalasai di hal diri dot id tulun diri dot a' po korikot do hiri'd kut. Tu' ondung amu', nga' sansagan kou nondo di tulun diri do tumimbaba' do gompomutus, om patahakon kou nondo di gompomutus dot id pulis, om posuangon kou nondo di pulis dot id giil. 59 Kotumbayaai kou no! A' kou no milo do lumabus do mantad id giil dot a' po dokoyu abayaran i nakadanda' dokoyu,” ka dau.
Ondung A' Rumologo do Dusa om Apatai no
1 Tontok nopoddi om haro o piro-piro o tulun do hiri do minomisunud di Yesus, do haro piro-piro tulun do Galilia do pinatai di Pilatus di maso diyolo' do papatahak dot id Kinorohingan di porsombahan do sinumbali'. 2 Om boros ka di Yesus dot id diyolo', do nokorongou di sinusui diyolo'ddi, “Ondos nopo daa dokoyu om iri o kointalangan kopio dot agayo no kopio o dusa diyolo' ko' mantad do koinsanai di tulun do Galilia do suwai, tu' iyo iddi o nakapatai diyolo'? 3 A' i' moti' kopio. Nga' soroho' no dokoyu dot ondung a' kou rumologo di dusa dokoyu, om apatai ngai' kou no do miagal diyolo'. 4 Poingkuro no i hopod om walu' o tulun di napatai do noonsitan di walai'd akawas di hilo'd Siloam? Ondos daa dokoyu om iri no o popointalang dot agayo o dusa diyolo' ko' mantad do dusa do koinsanai di tulun do suwai di hilo'd Yorusalim? 5 A' i' kopio iyo'ddi! Poboroson ku po kawagu dot: ondung a' kou rumologo di dusa dokoyu, om iyokoyu moti' nga' apatai i' do miagal diyolo',” ka dau.
Guas dot Ara dit A' Mongua' o Pinoinukadan
6 Om ponusui noddi i Yesus do poinukadan do poingkaa, “Haro o songulun do kiguas dot ara do hiri'd kabun dot anggur dau. Insan tadau om ongoi no daa iyau pogontong do tua' dit ara diri, nga' aiso' i' ot ongoiso' piya'd tua' do nokito dau. 7 Om boro-boros noddi iyau di momogompi' di kabun di tulun diri do poingkaa, ‘Tolu noddi o toun ku do miontong dilo guas dot ara do mongua' om iso' pod tua' nga' aiso' i'. Tagadon nogi'lo', do magayi' nopod rinuak diti tana',’ ka dau. 8 Nga' boros ka di momogompi' di kabun diri do suminimbar, ‘Pologoson pod a' tagadon ilo' dot osontounan poo, oi Tuan. Umbalan ku po do manangkul o pointutuk do puun, om bajaan ku. 9 A' i' oila-ilaan do mongua' nopondo ilo' do toun koimbagu. Om a' nopondo mongua', om monuhu' nogindo o Tuan do managad dilo',’ ka dau,” ka di Yesus.
Minomolingos i Yesus do Songulun o Tondu' di Tongkud do Tontok do Tadau'd Sabat
10 Tontok dot insan o tadau'd Sabat, om ongoi no i Yesus ponuduk dot id iso' o walai'd sasambayangan. 11 Hiri nopo nga' haro o songulun o tondu' do sumakit, do hopod no om walu' o toun do koloido', tu' haro o rusod dot araat dot id suang do tinan dau. Iri nopo tondu'ddi nga' tongkud, om a' no milo do rumindog do mingkakat. 12 Om kokito noddi di Yesus i tondu'ddi om lohowo' no dau, “Oi inan koidu' ko i' do mantad id toruol nu'ndo!” ka dau. 13 Om kamao' noddi di Yesus i tondu'ddi. Om diiri i' om diiri do nokorindog o pongingkakat dau. Om pamarayou noddi iyau'd Kinorohingan. 14 Om kotogod noddi i boyoon do walai'd sasambayangan, tu' minomolingos i' i Yesus do tulun di kitoruol do tontok do tadau'd Sabat. Boros ka dau, “Onom i' o tadau do kakarajaan, om tontok nod tadau'ddi do rumikot do mongoi pokilingos, nga' kada' po rikot do tontok do tadau'd Sabat!” ka dau. 15 Om boros kad Tuhan do suminimbar, “Iyokoyu no i minsorupai-rupai no toomod! Okon toi ko' oinsanan i' o tulun do papalabus do sapi' om kaladai do mantad id kandang, om ongoyon no poinumo' do tontok do tadau'd Sabat? 16 Om dinondo nodti om haro o songulun o tondu' di sinakagon di Abraham, om nakagasan iyau'd rogon do hopod no om walu' o toun do koloido'. A' toi apatut i' do poiduwon iyau do mantad id kogos diri do tontok piya do tadau'd Sabat?” ka dau. 17 Nga' kongointingayamai nopo i tulun dit otogod di Yesus do nokorongou di nisimbar di Yesus do miagal diri. Nga' iri nopo tulun do suwai om angasanangan ngai' nopo do nokokito di koimayaan di winonsoi di Yesus.
Linsou dot Okooro' o Pinoinukadan
18 Om ponguhot no i Yesus do poingkaa, “Okuro-kuro ma i Pomorintaan do Kinorohingan? Nunu o poiyaan ku'ddi? 19 Iyo diti poinukadan do poingkaa: Haro o tiso' o tulun do minanganu do linsou dot okooro', om potonomo' no dau do hiri'd kabun dau. Om kosuni noddi i linsou'ddi om agayo diri o guas, gisom do pomirumunan do tombolog o karaanan di kayu'ddi,” ka dau.
Pangambang do Roti o Pinoinukadan
20 Om ponguhot po kawagu i Yesus do poingkaa, “Nunu ma o milo ku'd poiyaan di Pomorintaan do Kinorohingan? 21 Iyo di pangambang do roti di ngoyon do songulun o tondu', om poroloton nondo dau dot id tapung dot apat nohopod o lito do kogumuo', gisom dot akambang ngai' nopondo i tapung diri,” ka dau.
I Wawayaan dit Okikip
22 Om pamanau no i Yesus do kumaa do hilo'd Yorusalim, om kawaya' no iyau dot id piro-piro o bandar om kampung, om ponuduk no iyau'd tulun do hiri. 23 Om haro'ddi o songulun do minonguhot di Yesus. Boros ka dau, “Oi Tuan, okuri' toi o tulun di posion?” ka. 24 Om boros ka di Yesus do suminimbar, “Tumotos no do sumuang di wawayaan dot okikip. Nga' sorohon no! Tu' ogumu' i' daa o tulun do monotos do sumuang diri, nga' a' i' kosuang. 25 Tu' tontok dit ongoyon di sanganu di walai ontiilai i totobon om poingkakat kou do hiri'd soliwan do mogkoritik di totobon. Om moro-boros kou nondo dot, ‘Oi Tuan, iwangai iyahai!’ ka. Om sumimbar nondo i sanganu di walai'ddi do poingkaa, ‘A' oku i' kotutun dokoyu!’ ka nondo dau. 26 Om sumimbar kou nondo do, ‘Nokotorungak i' iyahai do Tuan do makan om minum, om nokoponuduk ko dahai di hiri'd karalan-ralanan do hiri'd bandar dahai,’ ka nondo dokoyu. 27 Nga' moro-boros nondo kawagu i sanganu di walai'ddi dot, ‘A' oku i' koilo ondung hinonggo o tadon dokoyu. Poggidu' kou no do mantad hiti, iyokoyu i minomonsoi dot angaraat!’ ka nondo dau. 28 Om tontok do kokito kou di Abraham, om i Isak, om i Yakub, om koinsanai di nabi do hiri'd suang di Pomorintaan do Kinorohingan, om mihad kou nondo om oinggorit tu' uyungon kou i' iyokoyu do posoliwan! 29 Om rumikot ngai' nopondo i tulun di mantad id koulayon om mantad id kotonobon, om mantad id utara om id salatan, om tumorungak do hiri'd poginakanan di Pomorintaan do Kinorohingan. 30 Om otopot no kopio dot i tulun di kotohuri nga' kopogulu indo, om i tulun di nokopogulu nga' kotohuri indo,” ka di Yesus.
Nosianan i Yesus di Tulun do Yorusalim
31 Om haro nogi' o piro-piro tulun do Parisi do ruminikot dot id di Yesus do tontok diri. Boros ka diyolo', “Kada' no undorong do hiti! Pamanau no do mongoi'd hilo'd kinoiyonon do suwai, tu' pokipapatayan ko di Horudis,” ka. 32 Om boros ka di Yesus do suminimbar, “Ngoyo' dokoyu sunudai i tulun dit aiso' o guna-guna'ddi do poingkaa, ‘Baino' nopo om suab om monunsub oku po do rusod dot araat, om momolingos oku'd tulun do sumakit, nga' kotolu nopondod tadau om opongo ku nondo o karaja' ku,’ ka dau. 33 Nga' mulong po dot iyo'ddi nga' mositi' no do lumombus oku do mamanau do baino', om suab, om suab diino, tu' a' i' osonong o nabi do patayon dot id soliwan do Yorusalim,” ka dau. 34 Om boro-boros noddi kawagu i Yesus do poingkaa, “Oi tulun do Yorusalim, oi tulun do Yorusalim! Pinatai ngai' dokoyu i nabi. Om pinindumpahan ngai' dokoyu'd watu i susuhuon do Kinorohingan gisom do nangapatai iyolo'. A' oku no impiro-piro dot orohian do monimung do koinsanai dokoyu i poingiyon dot id bandar diti, do miagal do manuk di maganak do mongungkub di tangaanak dau, nga' mada' kou i'! 35 Om iri noddi o kotongkiadan do Kinorohingan do mantad id dokoyu. Ilaai no dokoyu, do mantad pod baino' om a' kou no kokito doho' do gisom do momoros kou'd poingkaa, ‘Abarakatan no i rumikot dot id suang do ngaran do Tuhan,’ ka,” ka dau.
Minomolingos i Yesus do Songulun o Kitoruol
1 Tontok dot insan o tadau'd Sabat, om ongoi no i Yesus akan do hiri'd walai do songulun o boyoon do tulun do Parisi. Om hiri nopo nga' haro o piro-piro tulun do monoinu di Yesus. 2 Om rikot noddi dot id di Yesus o songulun o kitoruol do lumonit o gakod om longon dau. 3 Om ponguhot noddi i Yesus di piro-piro o guru do Tourat om i tulun do Parisi di hino'd hiri do poingkaa, “Tumanud nopo do Tourat, om koino-ino toko' i' tuu do momolingos do tulun do sumakit do tontok do tadau'd Sabat?” ka dau. 4 Om a' ngai' nopo minungkomi i guru do Tourat om i tulun do Parisi. Om lohowo' noddi di Yesus i tulun do sumakit diri om lingasai no dau iyau. Om suhuo' noddi di Yesus i tulun diri do tumongkiad. 5 Om boro-boros noddi i Yesus di tulun diri do poingkaa, “Ondung haro o songulun dokoyu do haro o tanak ko' haro o sapi', om aratu' nondo iri do hiri'd torobong do tontok do tadau'd Sabat; om a' i' tuu pitilombusan nopo dau do mongoi poposoliwan i tanak di sapi'ddi do mantad hiri'd torobong do tontok do tadau'ddi?” ka dau. 6 Nga' aiso' i' o songulun piya do nokosimbar di Yesus do pasal diri.
Osiriba' o Ginawo om Opuhawang
7 Om kokito noddi di Yesus do haro o piro-piro di tulun di nongolohou do hiri do momili' do tiyonon dit ongosonong kopio. Om ponuduk noddi iyau diyolo' do poingkaa, 8 “Soira' nopo dot olohou kou dot id poginakanan do kumawin, om kada' kou ongoi pimpori-pori do mirikau do hiri'd tiirikohonon dit ongkipangkat. Tu' a' i' oila-ilaan nga' haro i' doti' i tulun dit agayo o pangkat ko' iyokoyu do nolohou dot id poginakanan diri, 9 om rumikot nondo i sanganu di walai'ddi di minomolohou goduwo dokoyu, om sunudan kou nondo dau do, ‘Mokiampun oku, tu' iti nopo tirikohonon diti nirikau dokoyu om nosodia' mantad no do poirikahanan diyolo',’ ka nondo dau. Om ointingayam kou nondo kopio om a' kou no milo dot a' mongoi irikau do hiri'd tirikohonon dit id tohuri no kopio. 10 Iyo nopoddi om soira' nopo dot olohou kou dot id poginakanan, om mirikau kou nogi' do hiri'd tirikohonon dit id tohuri kopio, om rumikot nondo i sanganu di walai om moro-boros nondo dot, ‘Oi ambalut, kaino ongoi irikau do hiti'd tirikohonon dit osonong-sonong,’ ka. Om suahon kou nondo dot id toguang do koinsanai di tulun di nongolohou. 11 Tu' pointikid-tikid do tulun di minggayo-gayo om poinsiribaon nogindo, nga' i nopo tulun di minsiriba' om poinggoyoon nondo,” ka dau. 12 Om boro-boros noddi i Yesus di sanganu di walai do poingkaa, “Soira' nopo do momolohou ko'd tulun do hiri'd poginakanan nu, do dangadau ko' dongotuong, om kada' no pomolohou di tambalut nu, ko' i tobpinai nu, ko' iri po i kowori-worisan nu, ko' iri po i tulun di kaya' di hiri'd doros-oros nu. Tu' iyolo' nopo om momolohou indo diya', om osomulian ko i' di winonsoi nu'ddi. 13 Nga' momolohou ko nopod tulun do rumapou dot id poginakanan nu, om lohowon i tulun do mosikin, om i tulun dit a' iyo'd dombokon o tinan, om i tulun dit a' koundaliu, om i tulun di bolou. 14 Om abarakatan ko indo, tu' iyolo' nopo om a' i' milo do sumomuli' di kosonongo' nu. Om somulian ko indod Kinorohingan di kosonongo' nu'ddi do tontok do posion kawagu i tulun dit ongosonong do mantad id kapatayon,” ka di Yesus.
Poginakanan dit Agayo o Pinoinukadan
15 Om korongou no di songulun di nokotorungak di Yesus do makan i boros di Yesus diri, om boros ka dau, “Olumaag no i tulun di kotorungak di poginakanan do hiri'd Pomorintaan do Kinorohingan,” ka. 16 Nga' boros ka di Yesus dot id tulun diri, “Tontok dot insan o maso, om haro o songulun do pinapaharo do poginakanan dot agayo. Om minomolohou iyau dot ogumu' o tulun do rumapou dot id poginakanan diri. 17 Om soira' di norikot o maso do potimpuunon i poginakanan diri, om ponuhu' no iyau di susuhuon dau do mongoi pomisunud di tulun di nongolohou, do poingkaa, ‘Rumikot no tu' nokosodia' ngai' no!’ ka. 18 Nga' mogisuhut-suhut nogi' i tulun di linohou'ddi, do mongoi pokiampun dot a' iyau koongoi. Boros ka di tiso' dot id susuhuon diri, ‘Wagu oku po koboli do tana' om ngoyon ku po daa antangai iri,’ ka. 19 Om i tiso' nga' minokiampun nogi'. Boros ka dau, ‘Wagu oku po koboli do limo o pasang do sapi', om ngoyon ku po daa umbalai do paradu iri,’ ka. 20 Om iri no suwai om minomoros dot, ‘Wagu oku po kakawin om a' oku no milo do rumikot,’ ka. 21 Om guli' noddi i susuhuon diri do minongoi poposunud di tuan di pinosimbar diyolo'ddi. Om kotogod noddi kopio i tuan. Om ponuhu' po kawagu iyau di susuhuon dau. Boros ka dau, ‘Pamanau no om siahan no do kumaa do hilo'd karalan-ralanan om i hilo'd ralan do kumaa id bandar. Om angatan ngai' nopo i tulun do mosikin, om it a' iyo'd dombokon o tinan, om i tulun do bolou, om i tulun dit a' koundaliu,’ ka. 22 Om boros ka di susuhuon dau, ‘Oi Tuan, nokosunud ngai' no dahai o koinsanai di pinonuhuan nu, nga' mulong piya do miagal diri nga' haro po o tiyonon do hiri'd poginakanan,’ ka. 23 Om boros kaddi di tuan diri, ‘Ongoi-ongoi kou po do hilo'd karalan-ralanan do hilo'd bandar om hilo'd karalan-ralanan dit id soliwan do bandar, om sansagan ngai' nopo i tulun do rumikot do hiti'd poginakanan, om oponu' id tulun iti walai ku. 24 Tu' aiso' i' o songulun piya di tulun dit id gulu lohowo' do koumbal di taakanon di pinosodia' ku do hiti'd poginakanan,’ ka dau,” ka di Yesus.
Komoyon do Sumiliu'd Tumatanud di Yesus
25 Om ogumu'ddi o tulun do tuminanud di Yesus do minamanau, om koili no i Yesus diyolo', om boro-boros nod, 26 “Tulun nopo di rumikot dot id doho', om poinggayo indo o kosianan dau di tina' dau, om i tapa' dau, om i sawo dau, om i tobpinai dau, om tinan dau, om a' i' iyau milo do sumiliu'd tumatanud ku. 27 Tu' iri nopo tulun dit a' sumaan do salib dau do tumanud doho', om a' no iyau milo do sumiliu'd tumatanud ku. 28 Om ondung haro o songulun dot id pogialatan dokoyu dot orohian do mamaal do walai dot akawas, om atantu' no dot intobon mantad po dau o tusin om oilaan i' dau ondung kabagal i tusin do pomongo di walai di waalon dau ko' amu'. 29 Ondung kowonsoi ngai' no i poimpahan om a' indo kabagal o tusin do pomongo'ddi, om oinsanan nopondo i tulun do kokito'ddi do mongirak-irak dau. 30 Om moro-boros nondo iyolo' do poingkaa, ‘Nokotimpuun no o tulun diti do minaal om a' iddi dau nopongo!’ ka. 31 Om ondung haro o raja' do kisoudor do hopod noribu dot orohian do mongoi saap di raja' di kisoudor do duwo nohopod noribu, om atantu' no do momusorou mantad po i raja' ondung kasaap iyolo' di pisangod diri ko' amu'. 32 Nga' ondung opurimanan dau dot a' iyau kasaap di pisangod dau, om atantu' no do tontok dit osodu' po i pisangod dau om monuhu' no iyau di susuhuon dau do mongoi ponokiulud di pisangod dau'ddi,” ka dau. 33 Om boros ka di Yesus do minongolimpupus, “Iyo kou nogiddi iyokoyu, tu' aiso' i' o tongosongulun piya dot id pogialatan dokoyu do milo do sumiliu'd tumatanud ku, ondung a' no dau tongkiadan o koinsanai do nunu nopo,” ka dau.
Silaon di Noidu' o Koosino'
34 Boros ka kawagu di Yesus, “Silaon nopo om osonong i' kopio, nga' ondung oidu' i koosino' di silaon diri, om a' no milo do poosinon kawagu. 35 Om aiso' no o guna' diri do maan do hiri'd dumo ko' maan po do baja', suwai ko' pataamon poo. Isai nopo o kitolingo om mokinongou no kopio!” ka dau.
I Dumba' di Natagak
1 Insan o tadau, om ogumu' o tulun di gomponimung do sukai om i tulun dit a' osonong dot id pagantangan do tulun dot ogumu' do ruminikot do mongoi pokinongou di Yesus. 2 Om sontogod-togod nopo i tulun do Parisi om i guru do Tourat. Boros ka diyolo', “Antangai pogi' iti tulun nga' rumamit i' dilo tulun dit a' osonong, om tumorungak diyolo'd makan!” ka. 3 Om susuyai noddi di Yesus iyolo' dot iso' o poinukadan do poingkaa, 4 “Poingkuro o dokoyu'd osorou? Ondung haro ot iso' o tulun dot id pogialatan dokoyu do kidumba' do hatus o tinan, om atagak nondo o tongoiso' di dumba' dau'ddi, om nunu tuu'ndo o wonsoyon di tulun diri? Atantu' no do tongkiadan nopo dau i dumba' di siam nohopod om siam o tinan di hiri'd kobuturan, om ngoyon nondo dau ihumo' i dumba' di natagak diri do gisom dot okito dau. 5 Om okito nopondo dau i dumba'ddi, om otood tomod nondo iyau, om saanon nopondo dau i dumba'ddi, 6 dot igitan do muli'. Om momolohou nogindo iyau di piro-piro o tambalut dau om i songkoduwo dau, om moro-boros nondo iyau do poingkaa, ‘Kongotood toko' no tu' nokito ku no i dumba' ku di natagak!’ ka nondo dau. 7 Om iyo nogiddi o hilo'd surga tu' ongotood i' kopio do haro nopo o tongoiso'd tulun di korologo do dusa dau ko' mantad do haro o siam nohopod om siam o tulun dit osonong no mantad, it a' no minog do rumologo,” ka di Yesus.
Tusin di Natagak
8 Om boros ka kawagu di Yesus, “Ko' ondung haro o songulun o tondu', do kitusin do hopod o pirok, om atagak nondo o tiso' di tusin diri, om nunu tuu'ndo o wonsoyon dau'ddi? Modtutud nondo iyau do lampung om imuhawan dau i walai dau, om totoson nondo dau do mogihum i tusin di natagak diri do gisom dot okito dau. 9 Om okito nopondo dau i tusin dau'ddi, om lohowon nondo dau i piro-piro o tambalut dau om i songkoduwo dau. Om moro-boros nondo iyau do poingkaa, ‘Kongotood toko' no! Tu' nokito ku noddi kawagu i tusin ku di natagak. Om osonong noddi kopio o ginawo ku!’ ka nondo dau. 10 Om iri nogi' i moloikat do Kinorohingan nga' iyo nogiddi o kotoodo', ondung haro no o songulun di kidusa, do rumologo do koinsanai di dusa dau. Ponongkuyaai kou no!” ka dau.
Tanak di Natagak
11 Om poboroso' po kawagu di Yesus o poingkaa, “Haro o songulun o kusai do kianak do duwo o kusai. 12 Insan o maso om boro-boros no i tanak dit id domulok di tapa' dau do poingkaa, ‘Apa', patahako' doho' do dinondo o doho'd gontok dilo dapu' toko',’ ka. Om piduwoo' noddi di tapa' dau i dapu' do pinatahak di duwo o tanak dau'ddi. 13 Piro-piro noddi o tadau do mantad diri, om pobolio' no di tanak dit id domulok o koinsanai di dapu' di notungkusan dau. Om ongoi noddi iyau dot id pomogunan di hilo'd sodu', om hilo' noddi do pininsima-simaan dau i tusin dau'ddi, om a' osonong o kowoyo-woyoon dau. 14 Om tontok di naayi' noddi i tusin dau om pononglous no o hiri'd pomogunan diri dot adalaan kopio, om oinggorit tomod diri i tanak diri. 15 Om ongoi noddi iyau karaja' dot id iso' o tulun di poundorong do hiri'd pomogunan diri, om suhuo' no iyau di tulun diri do momogompi' do wogok do hiri'd tumo dau. 16 Om louson noddi tomod iyau, gisom do siakan no iyau di susumad di wogok. Nga' mulong piya do miagal kopio'ddi o kolousono' dau nga' aiso' i' o tongoiso' piya'd tulun do manahak dau'd takanon. 17 Om kopurimanai noddi dau i kowoyo-woyoon dau, om boros ka dau, ‘Iri ngai' nopo tulun di pakaraja' dot id tapa' ku om osima' id taakanon, om inda' ka doho'd hiti tu' oruhai nod apatai dot ololousanan. 18 Nga' osonong nogi' do pogulian ku'dti do hilo'd tapa' ku. Om boros kangku'ndo dot id tapa' ku om: Apa', nokowonsoi oku nod dusa dot id toguang do Kinorohingan om id toguang nu, oi Apa'. 19 Om a' oku noddi osorupai do roitan do tanak nu, nga' poiyoon oku nopo diya' di tulun di pakaraja' dot id diya', kangku'ndo,’ ka dau. 20 Om pamanau noddi iyau do pogulian kawagu dot id tapa' dau. Om hiri po iyau'd sodu', om kokito no iyau di tapa' dau. Nga' kosianai noddi tomod i tapa' dau om panangkus no i tapa' dau do minongoi ruba' dau, om gopuso' no om tungubai no iyau di tapa' dau'ddi. 21 Om boro-boros noddi i tanak diri di tapa' dau, ‘Apa', nokowonsoi oku nod dusa dot id toguang do Kinorohingan om id toguang nu oi Apa', om a' oku no osorupai do roitan do tanak nu!’ ka dau. 22 Nga' lohowo' nogi' di tapa' dau i piro-piro o susuhuon dau om boro-boros nod poingkaa, ‘Ongoi di rasuk dit olumis kopio om porosukan i' diti tanak ku. Om sulungan iyau do pondulung om kosutan. 23 Om ngoyon no i tanak do sapi' dit olomu' om sumbolion no. Om moginakan toko' i' do pogiaarapadan do nokogulian diti tanak ku. 24 Tu' napatai no daa ilo tanak ku nga' napasi noddi kawagu, om natagak daa nga' nokoguli' noddi kawagu!’ ka dau. Om timpuun noddi iyolo' do moginakan. 25 Maso nopoddi nga' hiri'd dumo i tanak dau dit id dotuo. Om uli' no i tanak dit id dotuo'ddi do hiri'd walai dau, om maha' dit osomok no iyau di walai, om korongou no dau o tuni do tuunion om kokito dau o tulun do santari-tari'. 26 Om lohowo' no dau o songulun di susuhuon di tapa' dau, om uhoto' no dau iyau, ‘Nokuro tu' iyo kopio'dti o hiti'd walai do baino'?’ ka. 27 Om simbar no i susuhuon diri do poingkaa, ‘Tuan, nokoguli' no i tadi' nu. Om nokoponuhu' no i tapa' nu do monumbali' do tanak do sapi' dit olomu', do maan do kopongunsikahan do nokogulian di tadi' nu, tu' nokoguli' noddi kawagu iyau!’ ka dau. 28 Nga' otogod tomod diri i tanak dit id dotuo'ddi, gisom dot a' nopo iyau suminoruang do hiri'd walai. Om soliwan noddi i tapa' dau do minongoi ponginsasamod om minangangat dau do sumalakoi. 29 Nga' boros ka di tanak dit id dotuo'ddi dot id tapa' dau, ‘Apa', iyoho' nopo om monontoun-toun oku no do monotos do kumaraja' dot id diya', om a' oku po nokoumbal dot a' mumboyo' do ponuhuan nu. Nga' nunu noo o ponomuli' nu doho'ddi? Tu' songinan-nginan piya o kambing nga' a' ko po nokoumbal do manahak doho', do maan ku'd poginakanan do kopogisasalawatan di piro-piro o tambalut ku. 30 Nga' maha' nogi' ilo tanak nu di minagayi' di dapu' nu do pinangambalut do tongoondu'd sundal, om koguli' nopo iyau nga' ponumboliyai nu no tomod iyau do sapi' dit olomu',’ ka dau. 31 Om boros ka di tapa' dau do suminimbar, ‘Oi tanak ku, iya' nopo om poinsugku' kasai' i' doho'. Om koinsanai dilo dapu' ku nga' diya' ngai' no. 32 Om apatut id papaharo kito do poginakanan do maan do kounsikahan do nokoguli' i tadi' nu, tu' napatai no daa iyau nga' napasi noddi kawagu, om natagak daa iyau, nga' nokoguli' noddi kawagu,’ ka dau,” ka di Yesus.
Pagawai do Kousinan dit Oilo
1 Om boro-boros no i Yesus di tumatanud dau do poingkaa, “Haro o tiso' o tulun do kaya'. Om haro o songulun o pagawai do kousinan do mongilo-ilo ngai' di dapu' dau. Om haro'ddi o tulun do minomisunud di tulun do kaya' dot i nopo tusin dau nga' pininsima-simaan di pagawai do kousinan do mamakai. 2 Om lohowo' noddi dau i pagawai do kousinan diri om boro-boros no iyau dau do poingkaa, ‘Otopot i' tuu iti norongou ku do pasal diya'? Patahako' daa doho' do dinondo i pinotulisan nu do koinsanai di dapu' ku. Tu' poiduwon tiya' no diti karaja' nu do pagawai do kousinan ku,’ ka dau. 3 Om pomusorou noddi i pagawai do kousinan diri do poingkaa, ‘Nunu mando o wonsoyon ku'dti? Tu' palapason oku'ddi di tuan diti karaja' ku. Manangkul oku nga' a' oku i' kogoos; om mokipuhawang nga' ointingayaman oku i'. 4 Nga' poingkaa o wonsoyon ku: kalapas oku nopondo om mositi' no dot ogumu' o tambalut ku di popoiyon doho' do hiri'd walai diyolo',’ ka. 5 Om lohowo' noddi di pagawai do kousinan o koinsanai di tulun di nokopongutang dot id tuan dau. Boros ka dau dot id iso' o tulun, ‘Songkuro o tutang nu dot id tuan ku?’ ka. 6 Om boros ka di tulun diri do suminimbar, ‘Hatus o kakanan do tumau do saitun,’ ka dau. Boros ka di pagawai do kousinan diri dot id dau, ‘Diya iti pinotulisan di tutang nu. Irikau no om lomusan no do monulis o limo nopo nohopod,’ ka dau. 7 Om boro-boros no iyau di tulun di koduwo, ‘Songkuro i diya'ddi do tutang oi tobpinai?’ ka dau. Om boros ka dau'd suminimbar, ‘Soribu o karung do gandum,’ ka. Om boros ka di pagawai do kousinan, ‘Diya iti pinotulisan di tutang nu. Tuliso' nopo o walu' nahatus,’ ka dau. 8 Om royoho' noddi di tuan dau i pagawai dit a' otorodok diri tu' oilo kopio i' iyau do minomonsoi do miagal diri; tu' ongoilo nogi' i tulun di tumanud do kowoyo-woyoon diti pomogunan do mongilo-ilo di diyolo'd korohian ko' mantad di tulun di poimpasi dot id tanawau,” ka dau. 9 Om boro-boros po kawagu i Yesus, “Pokinongou kou no! Pakayon no o kakayaan diti pomogunan do panganu do tambalut. Om koiyon kou indo do hilo'd tiyonon dit a' rumaag, dot aiso' o guna' diti kakayaan do dom pomogunan. 10 Tu' iri nopo tulun di milo do ponongkuyaanan do mongilo-ilo di hal dit ongokooro', om milo nori do ponongkuyaanan do mongilo-ilo di hal dit angagayo. Nga' iri nopo tulun dit a' milo do ponongkuyaanan do mongilo-ilo di hal dit ongokooro', om a' kopio iyau milo do ponongkuyaanan do mongilo-ilo di hal dit angagayo. 11 Iyo nopoddi om ondung a' kou milo do ponongkuyaanan do mongilo-ilo diti kakayaan do hiti'd pomogunan, om isai nogiddi ot orohian do monuhu' dokoyu do mongilo-ilo di kakayaan do don rusod? 12 Om ondung kointalang dot a' kou milo do ponongkuyaanan do mongilo-ilo di dombokon do songonuon, om isai po daa ot orohian do manahak dokoyu dit apatut daa dokoyu'd asanganu? 13 Aiso' i' o tongosongulun piya do milo'd sumiliu'd turipon do duwo o Tuan, tu' poinggayo nondo doti' o kosianan dau di tiso' ko' mantad di koduwo, ko' otorodok doti' iyau dot id tuan dau di tiso' ko' mantad di koduwo. Om iyo kou nogiddi, tu' a' kou i' milo do sumiliu'd turipon do Kinorohingan om turipon pondo do kakayaan,” ka di Yesus.
Piro-Piro o Pinoboros di Yesus
14 Om kongorongou noddi i tulun do Parisi do koinsanai di pinoboros di Yesus diri, om irak-irakai no diyolo' iyau, tu' iyolo' nopo nga' orohian do tusin. 15 Nga' boros ka di Yesus, “Iyokoyu nopo om mintopo-topot dot id toguang do tulun, nga' okito id Kinorohingan ot id suang do ginawo dokoyu. Tu' nunu nopo i sorohon do tulun dot agayo o ngaran, om aiso' indo o ngaran-ngaran dot id pagantangan do Kinorohingan. 16 Oinsanan nopo i Tourat di Musa om i ponudukan di piro-piro o nabi do poinggirot kasai' do gisom di kinorikatan di Yohanis Gampamatis. Om mantad poddi om pinopinsusui no iti Habar dot Osonong do pasal di Pomorintaan do Kinorohingan. Om monotos nopoddi o tulun do sumiliu do tulun do songonuon do Kinorohingan. 17 Nga' a' nogi' apagon do tumanus ilo tawan om pomogunan ko' mantad dot ongoiso' piya o titik do hurup dit okooro' do hiri'd Tourat do tumanus. 18 Om isai-isai o kusai do magada' do sawo dau om kumawin no kawagu do tondu'd suwai, om magampahu' no iyau'ddi. Om i nogi' tulun di mangawin di tondu' di naadaan do sawo, nga' magampahu' nogi',” ka dau.
I Tulun do Kaya' om i Lasarus
19 Om boros ka kawagu di Yesus, “Haro o tiso' o tulun do kaya'. Om manampakai kasai' nopo iyau do pakayan dit angagayo o gatang, om osima' kasai' iyau do taakanon do monikid tadau. 20 Om haro'ddi o songulun o mosikin dot i Lasarus o ngaran, do pinoiliu do hiri'd toning di wawayaan do walai dau, om notongkop pod gandas o tinan dau. 21 Om orohian daa iyau do mongoi pangakan di mumu' do takanon dit aratu' do mantad id mija' di tulun do kaya'. Nga' rikot nogi' i tasu do mongoi ponila' di gandas dau. 22 Om kapatai noddi i tulun do mosikin diri, om igitai no iyau di moloikat do hiri'd tiyonon dit osonong kopio, i hiri'd toning di Abraham do hilo'd surga. Om iri nogi' i tulun do kaya' nga' napatai nogiddi om linobong. 23 Om oinggorit tomod diri i tulun do kaya'ddi do hiri'd naraka. Om tingaha' no iyau do minontong, nga' kokito no dau i Abraham dot id iso' o kinoiyonon dit osodu' om i Lasarus nga' hiri nogid toning di Abraham. 24 Om pomolohou no i tulun do kaya'ddi do poingkaa, ‘Oi Apa' Abraham, kosianai no doho'. Suhuo' daa doho' i Lasarus do mongoi popotudu' do tunturu' dau dot id waig om ongoyon i' dau yoposo' o dila' ku. Tu' oinggorit oku no kopio'dti do hiti'd suang diti tapui!’ ka dau. 25 Nga' boros ka di Abraham do suminimbar, ‘Oi tanak ku, soroho' pogi': do solinaid di poimpasi ko po om nongopurimanan ngai' nu no it ongosonong, om i Lasarus no om nongopurimanan ngai' no dau it angaraat. Nga' baino' nopoddi om osimbayan no iyau. Om iya' no om oinggorit. 26 Om kawagu po nga' haro o luang dot agayo dot id pialatan toko'. Om tulun do mantad hiti nga' a' no milo do mongoi'd hino, om tulun do mantad hino nga' a' no milo'd mongoi'd hiti!’ ka dau. 27 Om boros kaddi di tulun do kaya', ‘Iyo nopondo, om pokionuon ku no kopio do suhuon nu i Lasarus do mongoi do hilo'd walai di tapa' ku. 28 Tu' limo po o tobpinai ku'd hilo'. Om suhuon no doho' i Lasarus do mongoi pomisunud diyolo', om a' i' iyolo' kakaa do hiti'd koinggoritan,’ ka dau. 29 Om boros ka di Abraham do suminimbar, ‘Ongkibuuk no iyolo'ddi, i Buuk di Musa om i piro-piro buuk do Nabi! Pologoson nopo iyolo' do tumanud di nongkotulis dot id buuk diri,’ ka dau. 30 Nga' boros ka di tulun do kaya'ddi, ‘A' i' kabagal iri, oi Apa' Abraham. Nga' ondung haro daa o tulun di napatai dot oposian kawagu do mongoi pomisunud diyolo', om rumologo i' daa iyolo' di dusa diyolo'ddi,’ ka dau. 31 Nga' boros ka di Abraham do suminimbar, ‘Ondung a' iyolo' mamadul di ponuhuan di Musa om i piro-piro o nabi, om atantu' no dot a' i' iyolo' otumbayaan do haro piya o tulun di napatai dot oposian kawagu,’ ka dau,” ka di Yesus.
I Kobinsuhu'd Tulun do Momonsoi'd Dusa
1 Om boro-boros no i Yesus di piro-piro o tumatanud dau do poingkaa, “Atantu' no do haro o piro-piro o hal do kobungou'd tulun do momonsoi'd dusa. Nga' obungou no i tulun di mominsuhu'ddi. 2 Om osonong nogi' do lontoidan do watu di pongingisar o liou dau, om pataamon nogindo do hilo'd rahat dit aralom, ko' kopominsuhu' iyau do tongoiso' piya diti tulun diti tongoluhoi podti, gisom do kowonsoi nondo iyolo'd dusa. 3 Iyo nopoddi, om mumbangan-bangan kou no kopio! Ondung kowonsoi'd dusa o tobpinai dokoyu, om ongoyon no iyau sunudai. Ondung monosol iyau do nokowonsoi iyau do miagal diri, om ompunan no iyau. 4 Ondung kowonsoi iyau'd dusa dot id diya' dot inturu' do sangadau om mongoi kasai' nopo iyau solowot diya' do momoros do, ‘Mokiampun oku,’ ka, do monikid di kasala' iyau, om ompunan kasai' no iyau,” ka dau.
Pasal do Kotumbayaan
5 Om boro-boros noddi i piro-piro o rasul dot id Tuhan Yesus do poingkaa, “Oi Tuhan, pogiroto' no o kotumbayaan dahai,” ka. 6 Om boros kad Tuhan do suminimbar, “Ondung haro o kotumbayaan dokoyu dot ongoirad nopo do linsou dit okooro' kopio, om milo kou no do momoros dot id guas dot ara do, ‘Sakat no om tumanom no do hilo'd rahat,’ ka, om atantu' no do mihuboyo-boyo' iri di boros dokoyu,” ka dau.
It Apatut do Wonsoyon do Susuhuon
7 Om boros ka kawagu di Yesus, “Ondung haro ot id pialatan dokoyu do haro o susuhuon do mamaradu do hiri'd dumo ko' momogompi' pod dumba'. Om angatan tuu dau i susuhuon dau'ddi do, ‘Kaino kopio makan,’ ka, do koguli' i susuhuon dau'ddi? 8 Atantu' no dot a' i' dau angatan, suwai ko' moro-boros nogi' iyau di susuhuon dau'ddi dot, ‘Ongoi posodia' do takanon ku. Om manampakai no di pakayan dit opulang, om tamangan oku no do gisom do kaakan om koinum oku; om kaakan oku po om makan ko nogindo iya',’ ka. 9 Om a' i' minog do royohon i susuhuon diri do minumboyo' piya iyau di pinonuhuan di tuan dau. 10 Om iyo kou nogiddi iyokoyu. Ondung ongowonsoi ngai' dokoyu i pinonuhuan dot id dokoyu, om momoros kou nopo dot, ‘Iyahai nopodti om susuhuon no toomod, om iti no ot apatut do wonsoyon dahai,’ kanto dokoyu,” ka di Yesus.
Minomolingos i Yesus do Hopod o Tulun di Kitoruol
11 Tontok di manau-panau i Yesus do kumaa do hilo'd Yorusalim, om kawaya' no iyau do hiri'd watas dot id piwolitan do pomogunan do Samaria om Galilia. 12 Di nopo manau-panau iyau do kumaa dot id iso' o kampung, om ongoyo' no iyau bontolo' do hopod o tulun di kitoruol do kusta. Om hiri pod sodu' i tulun diri, 13 om pinglohou no dot, “Oi Yesus, oi Tuan, kosianai no dahai!” ka. 14 Om ontong no i Yesus diyolo', om boro-boros nod poingkaa, “Ongoi kou no solowot di piro-piro ot imam om pokiporisaan no diyolo' ino tinan dokoyu!” ka dau. Nga' hiri po iyolo'd tanga'd ralan om kolingasai no iyolo' di toruol diyolo'. 15 Om kopurimanai noddi di songulun dot id pogialatan diyolo' do nolingasan iyau, om guli' no iyau dot id di Yesus om pamarayou no iyau'd Kinorohingan dot opuhod o boros. 16 Om otud no iyau dot id toguang di Yesus, do minongunsikou dau. Iyau nopoddi nga' tulun do Samaria. 17 Om boros kaddi di Yesus, “Okon toi ko' hopod kou tulun do nolingasan diri? Nga' hinonggo noddi i siam o tulun? 18 Nokuro tu' iti no tulun do bansa'd suwai o guminuli' do mongoi pongunsikou'd Kinorohingan?” ka dau. 19 Om boros kaddi di Yesus dot id tulun diri, “Ingkakat no om mamanau i'. Nolingasan ko no tu' notumbayaan ko i' doho',” ka dau.
I Maso do Korikatan do Pomorintaan do Kinorohingan
20 Om haro'ddi o piro-piro tulun do Parisi do minonguhot di Yesus ondung soira' do korikot i Pomorintaan do Kinorohingan. Om boros ka di Yesus do suminimbar, “A' i' dokoyu okito i Pomorintaan do Kinorohingan. 21 Aiso' i' o momoros dot, ‘Ontong pogi', nokorikot nod hiti!’ ka, ko', ‘Nokorikot nod hilo'!’ ka. Tu' iri nopo Pomorintaan do Kinorohingan om id suang i' dokoyu,” ka dau. 22 Om boro-boros noddi i Yesus di piro-piro o tumatanud dau do poingkaa, “Rumikot nondo o maso dot orohian kou do kokito dot ongoiso' o tadau di Tanak do Tulun, nga' a' kou i' kokito. 23 Om haro nondo o tulun do momoros dot id dokoyu dot, ‘Ontong pogi', hilo' iyau,’ ka, ko', ‘Ontong pogi', nga' hiti no iyau,’ ka. Nga' kada' kou soliwan do mongoi pogihum dau. 24 Tu' kowoyo-woyoo' nopo do Tanak do Tulun do tontok di tadau do mintalang iyau, om iyo noddi kodumaat do kumalab do dumarapas dilo tawan om kababang do mantad id iso' o tisan om kakaa dot id tisan ponong id sampaping. 25 Nga' id gulu nopo kopio om mositi' no do kopuriman iyau dot ogumu' o koinggoritan, om a' romiton di tulun do maso'dti. 26 Tu' tontok nopondod tadau do pointalangon i Tanak do Tulun, om kowoyo-woyoo' nopo dau om miagal do kowoyo-woyoo' di poimpasi po i Nuu di gulu po. 27 Tu' mangakan-ngakan nopo om monginum-nginum, om mogikakawin o tulun. Om iyo kasai' nopoddi iyolo' do gisom do norikot o kinosuangan di Nuu do hiri'd kapal, om korikot noddi i sakob do gisom do nangapatai ngai' i tulun. 28 Om iyo nogiddi di poimpasi po i Lut. Tu' mangakan-ngakan om monginum-nginum, om mogiboli-boli om mananom-tanom om maal do walai o tulun. 29 Nga' tontok di minogidu' i Lut do mantad hilo'd Sodom, om tadau iddi do suminondot o tapui di monomburalak po do mantad hilo'd tawan do minamatai ngai' di tulun. 30 Om iyo nogiddi o kowoyo-woyoo' do tontok di tadau do pointalangon i Tanak do Tulun. 31 Om tontok nopondo do tadau'ddi om iri nopo i tulun do hiri'd timpak do taap do walai dau, om a' no iyau minog do lumintuhun do mongoi panganu di konunu-nunuwai do hiri'd suang di walai dau. Om iyo nogiddi i tulun di hiri'd dumo dau, tu' a' no minog do gumuli' do hiri'd walai dau. 32 Soroho' pogi' dokoyu ondung nunu o nosiliu dot id sawo di Lut! 33 Iri nopo tulun di tumotos do momogompi'd koposion dau, om okon nogi' dot atagakan di koposion dau'ddi. Nga' iri nopo tulun dit atagakan do koposion dau, om okon nogi' dot ogompi' dau o koposion dau'ddi. 34 Kotumbayaai kou no: Tu' tontok nopondo do totuong diri om haro o duwo tulun do poingodop dot id iso' o toodopon, om ngoyon nondo i tiso' om tongkiadan nopo i tiso'. 35 Om haro nogi' o duwo o tondu' do tumutu do gandum, om ngoyon nondo i tiso', om tongkiadan no i tiso'. 36 Om haro nogi' o duwo o tulun do morobuat do hiri'd dumo, om ngoyon nondo i tiso', om tongkiadan nopo i tiso',” ka di Yesus. 37 Om ponguhot no i piro-piro o tumatanud di Yesus do poingkaa, “Hinonggo iri dot ongosiliu oi Tuhan?” ka diyolo'. Om boros ka di Yesus do suminimbar, “Hinonggo nopo o haro o nintorusan di napatai, om hiri no o timungon di tombolog di mangangakan do nintorusan di napatai,” ka dau.
I Tondu' di Nopuadan om i Gompomutus o Pinoinukadan
1 Om ponusui noddi i Yesus dot iso' o poinukadan do minonuduk di piro-piro o tumatanud dau, om sumambayang kasai' indo iyolo', om a' lumuhoi o ginawo dot otumbayaan. 2 Boros ka di Yesus, “Haro o songulun o gompomutus dot id iso' o bandar. Om iri nopo gompomutus diri nga' a' i' ooris do Kinorohingan om a' mamadul dot isai nopo o tulun. 3 Om hiri nopod bandar diri nga' haro o songulun o tondu' do nopuadan do miguli-guli' nopo do hiri'd gompomutus diri do mokiobi' dau. Boros ka di tondu' di nopuadan diri, ‘Tulungon oku no do sumimbar di ponokibisara' ku,’ ka. 4 Om haro i' o piro-piro koloido' do mada' i gompomutus diri do monulung di tondu'ddi. Nga' alaid noddi om kopomusorou no i gompomutus do poingkaa, ‘Mulong piya dot a' oku ooris do Kinorohingan om a' oku mamadul dot isai nopo o tulun, 5 nga' a' i' tumingkod do mamagangau doho' ilo tondu', om osonong nogi' do tulungon ku nopo iyau do sumimbar do mogobi' dau. Tu' a' nopo nga' rumikot kasai' indo iyau do mamagangau doho',’ ka dau,” ka di Yesus. 6 Om boros kaddi kawagu do Tuhan dot id diyolo', “Soroho' no dokoyu i boros di gompomutus dit a' otulid diri! 7 A' nogi' tuu o Kinorohingan mogobi' do tulun di songonuon dau, i lumohou dau do tadau om totuong? Popiurut-uruton tuu dau o maso do koponulungan dau diyolo'? 8 Kotumbayaai kou no: Olomus i' iyau do mogobi' diyolo'! Nga' soira' nopondo do rumikot o Tanak do Tulun om haro po tuu o tokito dau do tulun dit otumbayaan dau do hiti'd pomogunan?” ka dau.
I Tulun do Parisi om i Gomponimung do Sukai o Pinoinukadan
9 Om ponusui po kawagu i Yesus do poinukadan do monuduk di tulun di momusorou dot osonong iyau, nga' popoinsiriba-riba' indo do tulun do suwai. 10 Boros ka di Yesus, “Haro o duwo tulun do minongoi do hiri'd Walai'd Sasambayangan dot Agayo do mongoi sambayang. Iri nopo tiso' nga' tulun do Parisi, om iri no koduwo om gomponimung do sukai. 11 Om iri nopo tulun do Parisi diri nga' poingkakat dot iso-iso' do sumambayang do poingkaa, ‘Oi Kinorohingan, mongunsikou oku no kopio diya', tu' iyoho' nopo om a' oku i' miagal do tulun do suwai di tamaha', om i monipu', om i magampahu'. Om mongunsikou oku po tu' iyoho' nopo om a' oku i' miagal dilo gomponimung do sukai. 12 Tu' iyoho' nopo om induwo oku i' do puasa dot id suang do sominggu', om manahak oku po diya' do sompihopod do mantad do koinsanai dit aanu ku,’ ka dau. 13 Nga' iri nopo i gomponimung do sukai'ddi, om poingkakat iyau do hiri'd sodu', om a' i' iyau kasaap do tumingaha' do hilo'd tawan. Om duntungo' nopo dau o kangkab dau do popointalang do monosol iyau om kumorologo, om pomoros nod poingkaa, ‘Oi Kinorohingan, kosianai no doho' tu' tulun do kidusa,’ ka dau,” ka di Yesus. 14 Om boro-boros noddi kawagu i Yesus diyolo' do poingkaa, “Kotumbayaai kou no, do tontok di nokouli' goduwo iyolo'ddi do hiri'd walai diyolo', om iri nogiddi i gomponimung do sukai o rinamit do Kinorohingan, om okon i' ko' i tulun do Parisi. Tu' pointikid-tikid do tulun di minggayo-gayo, om poinsiribaon indo; om pointikid-tikid di tulun di minsiriba' om poinggoyoon nogindo,” ka dau.
Minamarakat i Yesus do Tangaanak
15 Haro o piro-piro o tulun do pinapaatod do tangaanak diyolo' dit ongokoro' po dot id di Yesus do pokikamaan diyolo' dau om pokibarakatan diyolo'. Om kokito noddi di piro-piro o tumatanud di Yesus iyolo', om togodo' no diyolo' i tulun diri. 16 Nga' lohowo' no di Yesus i tangaanak, om boro-boros no iyau di piro-piro o tumatanud dau, “Pologoso' nopo ilo tangaanak do rumikot dot id doho'! Kada' dokoyu iyolo' oduhai, tu' iyo no diyolo' o kasanganu di Pomorintaan do Kinorohingan. 17 Ilaai no dokoyu dot iri nopo tulun di tumimbaba' do Kinorohingan dot a' iyo do tanak o kowoyo-woyoo' dau, om a' no kasanganu di Pomorintaan do Kinorohingan,” ka dau.
I Tulun do Kaya'
18 Om haro'ddi o songulun o boyoon do tulun do Yohudi do minonguhot di Yesus do poingkaa, “Oi Guru dit osonong, nunu ma ot apatut ku'd wonsoyon om kaanu oku i' do koposion dit otopot kopio om i poingompus?” ka dau. 19 Om boros ka di Yesus do suminimbar, “Nokuro tu' roitan oku diya'd osonong? Tu' songulun po nga' aiso' i' ot osonong do suwai ko' Kinorohingan noo! 20 Nokoilo ko no di piro-piro o toturan do Kinorohingan do poingkaa, ‘Kada' pagampahu', kada' pamatai, kada' panakau, kada' pongudut, om pusohon no o tapa' om tina' nu,’ ka,” ka dau. 21 Om boros ka di tulun diri do suminimbar, “Natanud ngai' ku no i ponuhuan diri do mantad po dit okoro' oku po,” ka dau. 22 Om boros kaddi di Yesus do nokorongou'ddi, “Haro po o tiso' dot apatut nu'd wonsoyon: ngoyon ngai' no padagango' i dapu' nu, om patahakon no i tusin do gatang diri dot id tulun do mosikin, om kaanu ko indo do dapu' do hilo'd surga. Om owonsoi nu pondo o miagal diri om rumikot no do mongoi tanud doho',” ka dau. 23 Nga' korongou poddi di tulun i boros do miagal diri, om tumongob tomod diri iyau tu' kaya' i' kopio iyau. 24 Om oilaan i' di Yesus do tumongob kopio i tulun diri, om boro-boros no iyau do poingkaa, “Osusa' no kopio o tulun do kaya' do sumuang di Pomorintaan do Kinorohingan! 25 Osonong-sonong nogi' o songinan ot unta do sumuang do luang do dalat, ko' mantad do tulun do kaya' do sumuang do Pomorintaan do Kinorohingan,” ka dau. 26 Korongou poddi di piro-piro o tulun i boros di Yesus do miagal diri, om ponguhot no iyolo' dau, “Iyo nopoddi, om isai poo ot apasi?” ka. 27 Om boros ka di Yesus do suminimbar, “Iri piya it a' milo'd tulun do wonsoyon, nga' milo id Kinorohingan do wonsoyon,” ka dau. 28 Om boros kaddi di Pitrus, “Antangai pogi', nga' tongkiadai ngai' nopo dahai o sompiiyon dahai, tu' tumanud no iyahai diya',” ka dau. 29 Om boros ka di Yesus, “Kotumbayaai kou no: Iri nopo tulun do tuminongkiad do walai dau, ko' sawo dau, ko' tobpinai dau, ko' tapa' om tina' dau ko' tangaanak dau, dot i momonsoi'd karaja' do Pomorintaan do Kinorohingan o koponongkiadan, 30 om somulian indo iyau do kopiluap o kogumuo' do maso'd baino', om koimbagu nopondo om onuan iyau do koposion dit otopot kopio om i poingompus,” ka dau.
Kointolu di Yesus do Popoboros do Pasal do Kapatayon Dau
31 Om angatai no di Yesus i hopod om duwo o tumatanud dau do tumimung dot iyolo-yolo', om boro-boros noddi iyau diyolo' do poingkaa, “Pokinongou kou pogi'! Kumaa toko' nodti do hilo'd Yorusalim. Om hilo' nopondo, om ongowonsoi ngai' nopo i pinotulis di piro-piro o nabi do pasal di Tanak do Tulun. 32 Om patahakon nondo iyau dot id tulun dit okon ko' Yohudi, om hingi-hingion nondo diyolo' iyau, om indaraaton, om pindulaan. 33 Om inggoriton nondo diyolo' iyau om patayon. Nga' kotolu nopondod tadau om apasi indo kawagu iyau,” ka dau. 34 Koinsanai di pinoboros di Yesus diri, nga' a' i' di tumatanud dau osuhutan. Tu' iri nopo komoyon diri om a' i' pinatarang dot id diyolo'. Om a' i' iyolo' koilo ondung nunu o komoyon di pinoboros di Yesus diri.
Minomolingos i Yesus do Songulun o Bolou di Mokipuhawang-hawang Poo
35 Om tontok dit oruhai no i Yesus do korikot do hilo'd Yorikou, om haro o songulun o bolou do poirikau do hiri'd tisan do ralan do mokipuhawang do tulun. 36 Om soira' di norongou dau dot ogumu' o tulun do tumalib, om ponguhot no iyau, “Nokuro kopio iti?” ka. 37 Om boros ka diyolo', “Tumalib i Yesus, i tulun do Nasarit diri,” ka. 38 Om pinglohou noddi i tulun di nobolou'ddi dot opuhod do poingkaa, “Oi Yesus, i tanak di Daud, kosianai no doho',” ka. 39 Om togodo' no iyau di tulun di hiri'd gulu, om noduhan diyolo' iyau do minglohou. Nga' okon nogi' dot opuhod-puhod iyau do minggarang do poingkaa, “Oi tanak di Daud, kosianai no doho',” ka. 40 Om undorong noddi i Yesus, om ponuhu' no iyau'd tulun do mangahak di tulun di bolou'ddi do pokoyoon dot id dau. Om korikot poddi i tulun do bolou'ddi do hiri'd di Yesus, om uhoto' no di Yesus iyau do poingkaa, 41 “Nunu daa o korohian nu'd wonsoyon ku dot id diya'?” ka dau. Om boros ka di tulun di bolou'ddi do suminimbar, “Tuan, orohian oku'd kokito,” ka dau. 42 Om boros kaddi di Yesus, “Iyo nopondo om kokito ko no! Olingasan ko no tu' otumbayaan ko i' doho',” ka dau. 43 Om diiri i' om diiri om kokito no iyau. Om tanud noddi iyau di Yesus do mikuwo'd minongunsikou do Kinorohingan. Om pamarayou ngai' nopoddi do Kinorohingan i tulun dot ogumu' di nokokito di nosiliu'ddi.
I Yesus om i Sakius
1 Tontok di nokorikot i Yesus do hilo'd bandar do Yorikou, om pamanau no iyau do minaya' do hiri'd bandar diri. 2 Om hiri nopod bandar diri nga' haro o songulun o boyoon do gomponimung do sukai, di kaya' kopio. Ngaran nopo dau om i Sakius. 3 Om orohian kopio iyau do kokito di Yesus, nga' a' i' iyau kokito dau, tu' ogumu' i' kopio o tulun, om kawagu po nga' osiriba' kopio o kinoulunan dau. 4 Om panangkus noddi iyau do minogulu di tulun dot ogumu', om indakod no iyau dot iso' o kayu, om kokito indo iyau di Yesus, it a' no alaid om tumalib nod hiri. 5 Om tontok di nokorikot i Yesus do hiri'd guas di kayu'ddi, om tingaha' no iyau, om boro-boros nod poingkaa, “Oi Sakius! Lintuhun kopio, tu' a' oku no milo dot a' mumbaya' do hilo'd walai nu,” ka dau. 6 Om arau-arau nopoddi i Sakius do lumintuhun om otood nopo iyau do ruminamit di Yesus. 7 Nga' sontogod-togod ngai' nopo i tulun do nokokito do miagal diri. Boros ka diyolo', “Si! Nokuro tu' mongoi iyau salakoi do hilo'd walai do tulun dit a' osonong,” ka. 8 Om hiri poddi iyolo'd walai di Sakius, om ingkakat no i Sakius, om boro-boros no iyau di Yesus do poingkaa, “Oi Tuhan, songintanga' nopodti dapu' ku om patahakon ku di tulun do mosikin. Om isai nopo o tulun di noumbalan ku'd monipu' om bayaran ku no dot ingapat kopiluap mantad ko' i naanu ku,” ka dau. 9 Om boros kaddi di Yesus dot id di Sakius, “Tadau nod baino' do pinasi ko'd Kinorohingan, om koinsanai di sompiiyon nu. Om nonuan kou do koposion do wagu, tu' iya' nga' sinakagon i' di Abraham. 10 Tu' Kinorikatan nopod Tanak do Tulun om mogihum om mamasi di tulun di napalid,” ka dau.
Tusin do Tamas o Pinoinukadan
11 Tontok di maso po di tulun do mokinongou di boros di Yesus diri, om ponusui po kawagu iyau dot iso' o poinukadan. Tu' tontok nopoddi om osomok no iyau do hilo'd Yorusalim, om osorou nopod tulun nga' oruhai nod mintalang i Pomorintaan do Kinorohingan. 12 Boros ka di Yesus, “Haro o songulun dit agayo o pangkat do minongoi dot id pomogunan di hilo'd sodu', tu' iyau nopoddi om pilion do sumiliu'd raja'; om opili' pondo iyau do raja' om pogulian nogindo kawagu dau. 13 Om lohowo' no dau i hopod o susuhuon dau di tintod dau do minamanau. Om onuwai ngai' nogiddi dau iyolo' do soroisaan do tusin do tamas, om boros ka dau, ‘Poindopuon no dokoyu iti tusin diti do daamot ku do kotongkiad,’ ka. 14 Nga' angaraatan diri dau i tulun do hiri'd pomogunan dau, om ponuhu' no iyolo'd tulun do mongoi poposunud di nakapamanau iyau do boros do poingkaa, ‘Mada' i' iyahai do tulun diti do sumiliu'd raja' dahai,’ ka. 15 Nga' nopili' i' i tulun dit agayo o pangkat diri do sumiliu'd raja'. Om poguliai noddi dau do hiri'd pomogunan dau. Om olomus nopo iyau do minomolohou ngai' di susuhuon dau'ddi do mongoi solowot dau, tu' mongilo iyau ondung songkuro no o tuntung do naanu diyolo'. 16 Om rikot no i susuhuon di koiso' om boro-boros nod, ‘Oi Tuan, iri nopo tusin do tamas dit iso' noo di tinahak nu doho'ddi, om hopod noddi,’ ka dau. 17 Om boros ka di tuan, ‘Osonong no kopio, iya' no o susuhuon dot osonong. Om silihon ku nondo iya' do momorinta' do hopod o bandar, tu' otorodok ko i' do mongilo-ilo do hal dit okooro',’ ka dau. 18 Om rikot no i susuhuon di koduwo om boro-boros nod, ‘Oi Tuan, iri nopo i tusin do tamas dit iso' noo di tinahak nu doho'ddi, om limo noddi,’ ka dau. 19 Om boros ka di raja'ddi dot id dau, ‘Silihon ku nondo iya' do momorinta' do limo o bandar,’ ka. 20 Om rikot no i susuhuon di suwai, om boro-boros nod, ‘Diiya i tusin nu'ddi oi Tuan. Lopoto' ku nopo do somputangan om poopio' ku no. 21 Tu' moddosi oku diya', tu' oilaan ku no dot orongit ko. Om mongoi ko nopo panganu dit okon piya ko' diya', om mongoi ko pongupu' do tua' do hiri'd okon ko' iya' o minananom,’ ka dau. 22 Om boros kaddi di raja', ‘Iya' no o susuhuon dit araat! Hukuman ku no iya' do tumanud di pinoboros nu. Koilo ko i' dot orongit oku, om manganu oku dit okon ko' doho' om mongupu' oku do tua' do hiri'd okon ko' iyoho' o minananom. 23 Iyo nopoddi, om nokuro tu' a' nu nongoi poopio' i tusin ku'ddi do hilo'd bing, om koguli' oku nopondo, om aanu ku i' kawagu i tusin ku om i bunga di tusin ku'ddi?’ ka dau. 24 Om boros kaddi di raja' dot id tulun di songingkakat do hiri, ‘Ongoyo' nogi' onuo' i tusin diri do mantad id dilo', om patahakon i' di susuhuon di nakaanu do hopod o tusin do tamas,’ ka. 25 Nga' boros ka di tulun diri, ‘Nga' oi Tuan, hopod no o dau do naanu,’ ka diyolo'. 26 Om boros ka di raja' do suminimbar, ‘Ilaai no dokoyu: Tulun nopo di haro no mantad ot id dau, om onuan po dot ogumu' ko' iri. Nga' iri nopondo tulun dit aiso' mantad ot id dau om iri piya'ndo i haro dot id dau nga' ongoyon i' onuo'. 27 Om porikoto' ngai' nod hiti i pisangod ku dit a' asanangan doho' do sumiliu'd raja'. Om patayon ngai' nopo iyolo' dot id toguang ku!’ ka dau,” ka di Yesus.
Pinusou i Yesus do Ruminikot do Hilo'd Yorusalim
28 Om kongoboros ngai' poddi di Yesus iri, om ongoi no iyau do hiri'd gulu diyolo' do minamanau do kumaa'd hilo'd Yorusalim. 29 Om korikot poddi iyolo' do hilo'd Nulu-Nulu do Saitun, it id somok no do Baitpagi om Baitani, om suhuo' no di Yesus o duwo di tumatanud dau do mogulu diyolo' do mamanau. 30 Om boros ka di Yesus do minomilin diyolo', “Ongoi kou do hilo'd kampung dit id dabantalan dokoyu. Om korikot kou nopondod hilo' om okito nondo dokoyu o tiso' o tanak do kaladai do poingkogos, it a' po noumbalan do tulun do sumakai. Om iyadan no dokoyu iri om gayaton no do kumaa'd hiti. 31 Om ondung haro o tulun do monguhot ondung nokuro tu' iyadan dokoyu i kaladai, om poboroson no o poingkaa, ‘Gunaon do Tuhan,’ kanto dokoyu,” ka dau. 32 Om pamanau noddi goduwo i tumatanud di Yesus diri, om iyo ngai' nopo di nokoboros mantad di Yesus o nokito diyolo'. 33 Om tontok di maso diyolo' do mongiad di polihan di tanak do kaladai'ddi, om boro-boros no dot id diyolo' i sanganu di kaladai, “Nokuro tu' iyadan dokoyu ino kaladai?” ka dau. 34 Om boros ka diyolo' do suminimbar, “Gunaon do Tuhan iti,” ka. 35 Om gayato' noddi diyolo' i tanak do kaladai'ddi do pinaatod dot id di Yesus. Om lopikai no diyolo' di rasuk diyolo' dit id soibau i kaladai, om pasakayo' nogiddi diyolo' i Yesus di kaladai. 36 Om ogumu' tomod o tulun do pinopinglapik do rasuk diyolo' dit id soibau do hiri'd ralan dit awayaan di Yesus do poinsakai di kaladai. 37 Om maha' di rumuhuk no iyolo' di Nulu-Nulu do Saitun, dit osomok noddi i Yesus do hilo'd Yorusalim, om oinsanan nopo i tumatanud di Yesus dit ogumu'ddi do minamarayou'd Kinorohingan do mikuwo'd opuhod o boros om mongunsikou dau do koinsanai di koimayaan di nokito diyolo'. 38 Om pomoros no iyolo' dot opuhod do poingkaa, “Abarakatan no i Raja' di rumikot dot id suang do ngaran do Tuhan! Osimbayan no o hilo'd surga, om arayou o Kinorohingan!” ka no diyolo'. 39 Om boro-boros noddi di Yesus o piro-piro di tulun do Parisi di hiri'd pogialatan di tulun dot ogumu', “Oi Guru, oduhai ngai' ilo tumatanud nu do mimboros,” ka. 40 Om boros ka di Yesus do suminimbar, “Kotumbayaai kou no! Tu' ondung tumingkod iyolo', om ilo' piya'ndo watu nga' minggiak i',” ka dau.
Minogihad i Yesus do Yorusalim
41 Om tontok dit osomok noddi i Yesus do hilo'd Yorusalim, om di nokito dau i bandar diri, om pogihadai no dau i bandar. 42 Boros ka dau, “Osianan oku no diya', songkuro daa o kosonongo' ondung koilo ko daa di poporikot do kouludan do tadau'd baino'. Nga' a' ko no kokito'ddi. 43 Tu' koumbal ko nondo do koimbagu dot osorilian do piro-piro o pisangod di mangantob diya', om turungkuon ko nondo diyolo' om pointutuk iyolo' diya' do mongonsit diya'. 44 Om raagon ko nondo diyolo', do mitonggoi do koinsanai'd tulun di poingiyon do hiti. Om aiso' no o tongoiso' piya dilo watu do pologoson diyolo' do mogitimpak-timpak do hiri'd pinouludan mantad, tu' a' nu i' pinadul i maso do ruminikot o Kinorohingan do mongoi daa pamasi diya',” ka dau.
Suminuang i Yesus do Hiri'd Walai'd Sasambayangan dot Agayo
45 Om suang noddi i Yesus do hiri'd Walai'd Sasambayangan dot Agayo, om uyungo' ngai' no dau i tulun di mogidagang-dagang do hiri. 46 Om boro-boros noddi iyau diyolo' do poingkaa, “Nokotulis no dot id suang do Buuk do Kinorohingan o poingkaa: Boros kad Kinorohingan, ‘Roitan nondo do tiiyonon do sumambayang i Walai ku,’ ka. Nga' siniliu nogiddi dokoyu iti do tiiyonon do gampanakau!” ka dau. 47 Om monikid tadau nopo i Yesus do monuduk do hiri'd Walai'd Sasambayangan dot Agayo. Om sipamatai no daa dau i piro-piro o boyoon dot imam om i guru do Tourat om i boyoon do tulun do Yohudi, 48 nga' aiso' i' o ralan diyolo' do momonsoi do miagal diri, tu' oinsanan nopo i tulun do mongoi kasai' pokinongou di Yesus om orohian kopio iyolo' do mokinongou di boros dau.
Nuhot o Tadon di Kuasa' di Yesus
1 Insan o tadau, di maso di Yesus do monuduk do tulun do hiri'd Walai'd Sasambayangan dot Agayo, do mikuwo'd poporongou iyau diyolo' di Habar dot Osonong do mantad id Kinorohingan, om rikot no i piro-piro o boyoon dot imam, om i guru do Tourat, om i boyoon do tulun do Yohudi do minongoi ponguhot di Yesus. 2 Boros ka diyolo' dot id di Yesus, “Sunudai daa iyahai ondung nunu kopio o kuasa' nu do minomonsoi ngai'dti? Isai o minanahak diya' do kuasa'ddi?” ka. 3 Om boros ka di Yesus do suminimbar, “Iyoho' nga' haro i' o tuhoton. Sunudai oku daa dokoyu, 4 ondung disai di kuasa' di Yohanis do mamatis do tulun? Mantad tuu iri dot id Kinorohingan ko' mantad id tulun?” ka dau. 5 Om pogiboro-boros noddi iyolo', “Ondung poboroson toko' dot, ‘Mantad id Kinorohingan,’ ka, om poboroson nondo dau dot, ‘Iyo nopoddi, om nokuro tu' a' kou minonongkuyaan dau?’ ka nondo dau. 6 Nga' ondung poboroson toko' do, ‘Mantad id tulun,’ ka, om oinsanan nopondo ilo tulun do momodumpau dati' do watu, tu' iyolo' nopo om monongkuyaan ngai' i' do nabi i Yohanis,” ka diyolo'. 7 Om boros kaddi diyolo' do suminimbar, “A' i' iyahai koilo,” ka. 8 Om boros kaddi di Yesus dot id diyolo', “Iyo nopondo, om iyoho' nga' a' i' poposunud dot id dokoyu ondung mantad id disai o kuasa' ku do minomonsoi ngai'dti,” ka dau.
Tulun di Minoniwa' do Kabun dot Anggur o Pinoinukadan
9 Om ponusui po i Yesus dot id tulun diri do poinukadan do poingkaa, “Haro o tiso' o tulun do minananom dot anggur dot id kabun dau. Om posiwaai noddi dau i kabun di piro-piro o tulun, om ongoi no iyau dot id pomogunan do suwai, om alaid diri iyau do poundorong do hiri. 10 Om tontok di norikot o kopongupuan di tua' dot anggur, om suhuo' no di sanganu di kabun, i susuhuon dau do mongoi daa panganu di dau'd bahagi'. Nga' bobogo' nogi' di tulun di minoniwa' di kabun i susuhuon diri, om suhuo' no diyolo' iyau do muli' dot aiso' i' o nunu-nunu do pinatahak. 11 Om ponuhu' po kawagu i sanganu di kabun diri dot iso' di susuhuon dau do suwai; om iri nogi' nga' binobog i' di tulun di minoniwa' di kabun, om nindaraat diyolo' iyau, om suhuo' no diyolo' do muli' dot aiso' i' o pinatahak. 12 Om ponuhu' po kawagu i sanganu di kabun diri do susuhuon dau di kotolu. Om iri nogi' nga' binobog i' di tulun di minoniwa' di kabun diri, om pataamo' nogiddi diyolo' iyau do hiri'd soliwan di kabun. 13 Om boros kaddi di sanganu di kabun, ‘Nunu po pama o wonsoyon ku'dti? Suhuon ku no ilo tanak ku di kosianan kopio ku. Atantu' no do pusohon i' bo diyolo' ilo tanak ku,’ ka dau. 14 Nga' soira'ddi nokito di tulun di minoniwa' di kabun i tanak di sanganu di kabun diri, om pogiboro-boros no iyolo', ‘Ilo' no moti' o tumungkus diti kabun diti. Maai toko' nogi'lo' patayo', om iyati' indo o kotungkus diti kabun!’ ka diyolo'. 15 Om gayato' noddi diyolo' i tanak diri do pinoposoliwan do mantad hiri'd kabun om patayo' no diyolo' iyau,” ka di Yesus. Om uhoto' no di Yesus iyolo', “Koguli' nopondo i sanganu di kabun diri, om kukuroyon tuu'ndo dau i tulun di minoniwa' di kabun diri? 16 Atantu' no do patayon ngai' dau i tulun di minoniwa' di kabun dau'ddi. Om posiwaan nondo dau i kabun diri do tulun do suwai,” ka dau. Nga' tontok di norongou di tulun i boros di Yesus diri, om boros ka diyolo', “A' i' bo kopio dau patayon!” ka. 17 Om ontong no i Yesus diyolo' om boro-boros nod, “Iyo nopoddi, om nunu ma o komoyon di nokotulis do hiri'd Buuk do Kinorohingan do poingkaa? ‘Iri nogi' i watu dit a' pinowonsoi di mamamaal om iri nogiddi i nosiliu do watu dit agayo kopio o guna'!’ ka. 18 Om oinsanan nopo i tulun dit aratu' do kootung di watu'ddi dot angapatai; om it ootungan di watu nga' oruta' nopondo do miagal pod pupuk,” ka di Yesus.
Tuhoton do Pasal do Mambayar do Sukai
19 Om koilaai poddi di piro-piro o guru do Tourat om i boyoon dot imam dot iyolo' i' o komoyon di Yesus di poinukadan diri, om sipanangkap no daa'ddi iyolo' di Yesus do diiri no, nga' moddosi i' iyolo' di tulun dot ogumu'. 20 Om monotos tomod diri iyolo' do mogihum do maso dit osonong do manangkap dau. Om minonisip diri iyolo' do piro-piro o tulun do sinuhu' do minsorupai-rupai dot otulid o ginawo. Om suhuo' noddi diyolo' i tulun diri do mongoi pomurunsut di Yesus do ponguhatan o pakayon, om katahak i' diyolo' i Yesus dot id kuasa' do gobunor. 21 Om ongoi ngai' noddi i tulun di sinisipan diyolo'ddi boro-boros di Yesus do poingkaa, “Oi Guru, oilaan i' dahai do koinsanai di poboroson nu om i potudukon nu om ongotopot ngai' nopo. Om oilaan nogi' dahai do posondoton nu nopo kopio do popotuduk o pasal do korohian do Kinorohingan dot id tulun, tu' iya' nopo om a' i' montong do pangkat do tulun. 22 Om sunudai daa'ndo iyahai ondung koino-ino do mambayar do sukai dot id di Kaisar ko' amu' po, do tumanud do Tourat?” ka diyolo'. 23 Nga' oilaan i' di Yesus i koiloo' diyolo' do momurunsut dau. Om boros kaddi di Yesus dot id diyolo', 24 “Pokitono' oku daa dokoyu dot ongoiso' di tusin do pirok. Disai do gambar diti, om disai'd ngaran diti?” ka dau. “Di Kaisar,” ka diyolo'd suminimbar, 25 Om boros kaddi di Yesus dot id diyolo', “Iyo nopoddi, om patahakon no dot id di Kaisar, i di Kaisar, om patahakon dot id Kinorohingan i dong Kinorohingan,” ka dau. 26 Om aiso' iddi o nokito diyolo' dot ongoiso' piya do kasalaan di Yesus dot id toguang di tulun dot ogumu'. Om kada' nopoddi iyolo' ungkomi do nongoimayaan do nokorongou di pinonimbar dau.
Ponguhatan do Pasal dit Apasi Kawagu do Mantad id Kapatayon
27 Om haro'ddi o piro-piro o tulun do mantad id sinompuruan do tulun do Saduki do ruminikot dot id di Yesus. (Om iyolo' no i momoros dot a' no apasi kawagu i tulun di napatai.) Om uhoto' no diyolo' i Yesus do poingkaa, 28 “Oi Guru, tinulis di Musa iti toturan diti do bagi dati', ‘Ondung apatai ot iso' o kusai om aiso' po o tanak dau, om mositi' no do kowinon di tobpinai dau i sawo daa dau'ddi, om oonuan i' do sinakagon i tulun di napatai,’ ka. 29 Nokoumbal i' do haro o turu' o tulun do mogiobpinai. Om kakawin no it id dotuo, om kapatai no iyau dit aiso' po o tanak dau. 30 Om kowino' noddi di tobpinai dau di koduwo i sawo daa dau, om iyau nga' minatai nogi' dit aiso' po o tanak dau. 31 Om iyo iddi o nosiliu dot id tobpinai dau di kotolu do gisom do noinsanan i turu' o mogiobpinai'ddi. 32 Om alaid noddi om iri'ddi i tondu' nga' napatai nogi'. 33 Om orikot nopondo o maso do posion kawagu i tulun do nangapatai, om isai no mando o sansawo di tondu'ddi? Tu' nakapangawin ngai' nopo di tondu' i turu' o kusai'ddi?” ka diyolo'. 34 Om boros ka di Yesus do suminimbar, “Iti nopo tulun do songimpasi do dinondo om kumawin i', 35 nga' iri nopo tulun dit osorupai do posion kawagu do mantad id kapatayon, om i poimpasi do maso dit id dabantalan, om a' no kumawin. 36 Kowoyo-woyoo' nopo diyolo' om miagal pod moloikat, om a' no apatai. Om tangaanak no iyolo'd Kinorohingan, tu' pinasi i' kawagu iyolo' do mantad id kapatayon. 37 Tu' nokotuduk no kopio'd Musa do posion kawagu i tulun di napatai. Tu' iri nopo i tinulis dau do pasal di bulungkut di mikit-sikit do tapui om pinoboros dau do Tuhan nopo om, ‘Kinorohingan di Abraham, om Kinorohingan di Isak, om Kinorohingan di Yakub,’ ka. 38 Om Kinorohingan nopo om okon i' ko' Kinorohingan di tulun di napatai! Suwai ko' Kinorohingan iyau di tulun di poimpasi. Tu' bagi' nopod Kinorohingan om poimpasi ngai' i' iyolo',” ka di Yesus. 39 Om boro-boros noddi o piro-piro di guru do Tourat do poingkaa, “Osonong no kopio i pinonimbar nu oi Guru,” ka. 40 Om a' noddi iyolo' katama' do minonguhot di Yesus do nunu nopo o ponguhatan.
Tuhoton do Pasal di Raja' do Gampamasi
41 Om ponguhot no i Yesus diyolo' do poingkaa, “Poingkuro do milo'd roitan do sinakagon di Daud i Raja' do Gampamasi? 42 Tu' i Daud nga' nokoboros i' dot id Buuk do Sinding do poingkaa, ‘Boros kad Tuhan dot id Tuhan ku: Irikau no do hiti'd dawananan ku, 43 do gisom do poinsiribaon ngai' ku dot id diya' i pisangod nu,’ ka. 44 Om ondung roitan di Daud do ‘Tuhan’, i Raja' do Gampamasi, om poingkuro'ddi do sinakagon iyau di Daud?” ka di Yesus.
Popoinsan do Mumbangan-Bangan di Piro-Piro o Guru do Tourat
45 Om daamot po di tulun dot ogumu' do mokinongou di Yesus do moro-boros, om boro-boros no i Yesus di tumatanud dau do poingkaa, 46 “Umbangan-banganan no dokoyu i piro-piro o gomponuduk do tugama'. Tu' iyolo' nopo om orohian do mananrasuk dot anaru do tontok do mimpanau, om orohian do suahon do tulun do hilo'd pasar. Om orohian iyolo' do hiri'd tiyonon di tulun dit ongkipangkat do hiri'd walai'd sasambayangan, om i hiri'd poginakanan. 47 Om monipu' iyolo' di tongoondu' di nopuadan, om magahau iyolo' do walai diyolo'. Om anaru o sambayang diyolo' do pangalit diyolo' di karaaton diyolo'. Om awagat no motindo kopio o pomohukum diyolo'ddi!” ka dau.
Porsombahan dot Iso' o Tondu' do Nopuadan
1 Om kokito no di Yesus i piro-piro o tulun do kaya' do hiri'd Walai'd Sasambayangan dot Agayo, do mongoi poposuang do porsombahan diyolo' do hiri'd poiiyanan do porsombahan. 2 Om kokito no dau ot iso' o tondu' do nopuadan di mosikin kopio, do minongoi poposuang do duwo no tusin do tambaga'. 3 Om boros kaddi di Yesus, “Pokinongou kou pogi': Ogumu' nogi' o pinosuang dilo tondu' do nopuadan ko' mantad di pinosuang do koinsanai di tulun do suwai. 4 Tu' iri nopo pinatahak di tulun do suwai om it a' no diyolo' aayi-ayi'. Nga' iti nopo tondu'dti om mulong po do mosikin kopio iyau, nga' insanai nopo dau do pinapatahak i haro dot id dau, i pomoli i' daa dau do kaakan-akanan dau,” ka di Yesus.
Pinoboros di Yesus o Karaagan di Walai'd Sasambayangan dot Agayo
5 Om haro'ddi o piro-piro o tulun do moro-boros do pokosonong di Walai'd Sasambayangan dot Agayo di linumis do watu dit ongosonong om i konunu-nunuan di pinatahak dot id Kinorohingan. Om boro-boros noddi i Yesus diyolo' do poingkaa, 6 “Koinsanai diti tongokito dokoyu'dti, om raagon ngai' nondo dot orikot i maso, om aiso' no o tongoiso' piya diti watu dot oolu' do mogitimpak-timpak do hiti'd pinotimpakan mantad,” ka dau.
Kosusaan om Koinggoritan
7 Om uhoto' noddi diyolo' i Yesus do poingkaa, “Oi Guru, soira' dot ongosiliu ngai' iri? Om nunu o tanda' do pogintutunan dot orikot i maso dot ongosiliu iri?” ka diyolo'. 8 Om boros ka di Yesus do suminimbar, “Antaan-taan no dokoyu, om a' kou i' apalid. Tu' ogumu' motindo o tulun do rumikot do mamakai do ngaran ku, om momoros dot, ‘Iyoho' no iyau!’ ka, om, ‘Norikot no i maso'ddi,’ ka. Nga' kada' kou no kopio tanud diyolo'. 9 Om kada' kou kooris do soira' do korongou kou'd habar do mogisasaap om sumaap do porinta. Tu' a' no milo dot a' kopogulu dot ongosiliu o miagal diri. Nga' okon po ko' kopupuson do pomogunan iri,” ka dau. 10 Om boro-boros po kawagu i Yesus do poingkaa, “Mogisasaap nondo o bansa', om mogisasangod o pomorintaan do pomogunan. 11 Om hinonggo-honggo nopo nga' gumuyu' nondo o tana' dot opuhod kopio, om mononglous dot adalaan. Om haro o toruol di mogkoroliu. Om haro ot osiliu do korolosi om koronob kopio do hilo'd tawan. 12 Nga' id gulu nopo ko' iri, om ongoyon kou nondo tangkapo' om inggoriton kou. Om butusan kou nondo dot id walai'd sasambayangan om pogiilon kou nogindo. Om gayaton kou dot ongoyon potimbabao' di piro-piro o raja' om gobunor, tu' tumanud kou i' doho'. 13 Om iri no o maso dokoyu do poposusui di Habar dot Osonong do mantad id Kinorohingan. 14 Tontuon mantad no dokoyu ot id suang do ginawo dokoyu dot a' kou tumangkabo ondung nunu i poboroson dokoyu do pokotopot do tinan dokoyu. 15 Om onuan ku indo iyokoyu do boros om toilaan gisom dot aiso' i' o tongosongulun piya di pisangod dokoyu do kasaap dokoyu, om a' iyolo' kosongkiwal di boros dokoyu. 16 Om indaraaton kou nondo di tina' om tapa' dokoyu, om i tobpinai dokoyu, om i koobpinayan, om i kongoombolutan dokoyu. Om patayon nondo diyolo' o wookon dokoyu. 17 Om araatan ngai' nopondo o tulun dokoyu, tu' tumanud kou i' doho'. 18 Nga' iso' pod tobuk dokoyu nga' aiso' i' ot ouul. 19 Nga' ondung ogirot om alanut kasai' o ginawo dokoyu, om apasi kou i',” ka dau.
Pinoboros di Yesus o Karaagan do Yorusalim
20 Boros ka kawagu di Yesus, “Ondung okito dokoyu dot oturungku' do soudor ilo bandar do Yorusalim, om oilaan no dokoyu dot a' no alaid om raagon no'lo bandar. 21 Tontok nopoddi om mositi' no do mogidu' do hilo'd konuluhanan i tulun do hilo'd Yudia. Om i tulun di hiri'd suang di bandar nga' mositi' nod mogidu' do mantad hiri, om iri tulun di hiri'd soliwan di bandar nga' kada' no suang do hiri'd bandar. 22 Tu' tontok no do tadau'ddi o ‘Tadau do Koporotuan do Pomohukum’, om osiliu i' i nokotulis dot id Buuk do Kinorohingan. 23 Nga' araat no kopio o tadau'ddi, dot id tongoondu' di monontian, om i tongoondu' di poposusu do tanak dau! Om tontok nopondoddi, om awagat no kopio o kosusaan do koontok do pomogunan diti, om hukuman do Tuhan o bansa'dti. 24 Om haro nondo o wookon diyolo' dot apatai do gayang o pamatai, om haro o tanggayan do pisangod do kumaa dot id pomogunan do suwai; om ulak-ulakan nondo di tulun dit a' kotutun do Kinorohingan o Yorusalim do gisom dot aayi' i maso di natantu' mantad do Tuhan do bagi' diyolo',” ka dau.
Korikatan do Tanak do Tulun
25 Boros ka kawagu di Yesus, “Om okito nogindo dokoyu o tanda' do hilo'd tadau, om hilo'd tulan, om hilo'd rombituon. Om ongooris ngai' nopondo o bansa'd tulun do hiti'd pomogunan, om oborulong do korongou do ngorod om tongus dot opuhod om tumbak do rahat dit opuhod kopio. 26 Om ongoruhai no dot angapatai o tulun dot opopoddosian dot ongkokito dit ongosiliu do pointongkop do hiti'd pomogunan, tu' angagangau ngai' nopondo i momorinta' do hilo'd tawan. 27 Om tontok noddi do rumikot i Tanak do Tulun dot id rolot do haun do mikuwo'd kuasa' om kagayaan dau dit agayo kopio. 28 Om soira' do tumimpuun dot ongosiliu o miagal diri, om mingkakat kou no om humangog kou no, tu' oruhai kou nod posion,” ka dau.
Ponudukan dit Aanu do Mantad id Guas dot Ara
29 Om ponusui noddi i Yesus do poinukadan dot id diyolo' do poingkaa, “Antangan pogi' dokoyu i guas dot ara om i guas do suwai. 30 Soira' nopo do momuroun kawagu i kayu'ddi, om oilaan no dokoyu dot oruhai nod orikot o maso dot alasu'. 31 Om iyo nogiddi, tu' okito nopo dokoyu dot ongosiliu o miagal diri, om oilaan no dokoyu dot oruhai no kopio'd korikot i Pomorintaan do Kinorohingan. 32 Ilaai no dokoyu! Dot a' po angapatai ngai' iti tulun do songimpasi do dinondo, om ongosiliu ngai' no o miagal diri. 33 Tumanus indo o tawan om pomogunan, nga' boros ku nopo om hino kasai' i' do gisom do poingompus,” ka dau.
Apatut no do Mumbangan-Bangan Kasai'
34 Boros ka kawagu di Yesus, “Mumbangan-bangan kou no! Om kada' kou kadalaai dot agangau do moginakan om moginum di tiinumon di kaawuk, ko' adalaan po do momusorou do koposi-posion dokoyu, gisom dot a' kou indo kosodia' dot orikot i tadau'ddi, do tontok dit a' i' dokoyu insan-insanon. 35 Tu' rumikot nondo moti' o tadau'ddi do miagal do kasip do kosulungon ngai'd tulun do hiti'd pomogunan. 36 Mumbangan-bangan kou no, om sumambayang no kasai' om okoris kou indo do sumaap do koinsanai dit ongosiliu do koimbagu om milo kou do rumuba' di Tanak do Tulun,” ka dau. 37 Dangadau nopo om monuduk i Yesus do hiri'd Walai'd Sasambayangan dot Agayo. Om totuong no om mongoi iyau do hiri'd Nulu-Nulu do Saitun do mongoi undorong do hiri. 38 Monikid kosuabon nopo do mongoi ngai' i tulun do hiri'd Walai'd Sasambayangan dot Agayo do mongoi pokinongou di ponudukan di Yesus.
Pakat do Mamatai di Yesus
1 Iri nopo Tadau'd Agayo do Roti dit A' Kipangambang, i roitan do Paska, om oruhai no dot orikot. 2 Om maso no di piro-piro o boyoon dot imam om i guru do Tourat do mogihum do ralan do mamatai di Yesus, do lisok-lisokon, tu' moddosi iyolo' di tulun dot ogumu'.
Nakaakun i Yudas do Papadagang di Yesus
3 Om suang noddi o rogon dot id di Yudas, i roitan dot i Iskariot, iyau nopo om songulun do mantad id pogialatan di hopod om duwo di tumatanud di Yesus. 4 Om ongoi noddi iyau solowot di piro-piro o boyoon dot imam om i boyoon do madtatamong di Walai'd Sasambayangan dot Agayo do mongoi ponokirunding diyolo' ondung poingkukuro o ralan dau do papatahak di Yesus dot id diyolo'. 5 Om ongotood tomod diri iyolo' do nokorongou'ddi. Om pamatos no iyolo' do manahak di Yudas do tusin. 6 Om kookunai no di Yudas o miagal diri. Om timpuun noddi iyau do mogihum do maso dot osonong dit a' oilaan do tulun do papatahak di Yesus dot id diyolo'.
Posodia' do taakanon do dong Paska
7 Om korikot noddi i Tadau dot Agayo do Roti dit A' Kipangambang. Om tontok noddi o koponumbolian diyolo'd dumba' dot akanon do tontok do Paska. 8 Om lohowo' noddi di Yesus i Pitrus om i Yohanis, om boro-boros no diyolo'd poingkaa, “Ongoi kou posodia' do taakanon do dong Paska do maan toko'!” ka dau. 9 Om boros ka diyolo' do minuhot di Yesus, “Hinonggo o korohian nu dot ongoyon dahai posodiaai?” ka. 10 Om boros ka di Yesus do suminimbar, “Tontok do sumuang kou do hilo'd bandar, om haro nondo o songulun o kusai do kiinigit do kakanan do kisuang do waig do mongoi solowot dokoyu. Om tumanud kou nopo dau do kumaa do hiri'd walai di solokoyon dau. 11 Om sunudan nondo i sanganu di walai'ddi do poingkaa, ‘Muhot i guru ondung hinonggo o tiyonon dau om i piro-piro o tumatanud dau do mangakan do taakanon do dong Paska?’ kanto dokoyu. 12 Om potudukon indo di sanganu di walai dot id dokoyu o bilik dot agayo do hiri'd louting, i haro mantad no o konunu-nunuwai. Om posodiawon ngai' no dokoyu i taakanon do hiri,” ka dau. 13 Om pamanau noddi i Pitrus om i Yohanis, om iyo ngai' nopo di pinoboros di Yesus o nokito diyolo'. Om posodiawo' noddi diyolo' i taakanon do dong Paska do hiri.
Porjomuan di don Tuhan
14 Om korikot noddi o kapangakanan di taakanon do dong Paska, om torungak no i Yesus di piro-piro o tumatanud dau do makan. 15 Om boro-boros noddi i Yesus diyolo' do poingkaa, “Orohian kopio oku do tumorungak dokoyu'd mangakan do taakanon di dong Paska dot a' oku po oinggorit! 16 Kotumbayaai kou no dot: A' oku no kaakan kawagu do taakanon diti do gisom do kointalang i komoyon diti poginakanan dot id suang di Pomorintaan do Kinorohingan,” ka dau. 17 Om ongoyo' noddi di Yesus i sangkir di kisuang do waig dot anggur, om sambayang no do minongunsikou'd Kinorohingan. Om boro-boros no di piro-piro o tumatanud dau do poingkaa, “Romito' no dokoyu iti sangkir, om minum ngai' kou nodti. 18 Ilaai no dokoyu dot a' oku nondo koinum kawagu do waig dot anggur diti do gisom do korikot i Pomorintaan do Kinorohingan,” ka dau. 19 Om ongoyo' noddi di Yesus i roti, om sambayang no do minongunsikou. Om pogikobing-kobingo' noddi dau i roti'ddi, om potikido' no dau di piro-piro o tumatanud dau. Om boro-boros no diyolo' dot, “Iti no o tinan ku, i patahakon do bagi' dokoyu. Om wonsoyon no dokoyu o miagal diti do kopomuhandaman doho',” ka dau. 20 Om niyo nogiddi dau i sangkir di kisuang do waig dot anggur diri, tu' kaakan poddi iyolo' om potunuyo' no dau i sangkir dot id diyolo', om boro-boros no dot, “Iti no sangkir o tumpongo'd Kinorohingan do wagu, i pinogirot di raha' ku i raha' di potuntugon do bagi' dokoyu,” ka dau. 21 Boros ka kawagu di Yesus, “Antangai pogi' dokoyu! Nga' hino id hiti i tulun di papadagang doho'! 22 Atantu' no dot apatai nondo i Tanak do Tulun, do miagal di natantu' mantad do Kinorohingan. Nga' obungou no i tulun di papadagang dau!” ka dau. 23 Om mogiuhot-uhot nopoddi iyolo' dot ondung isai ot id pogialatan diyolo' do momonsoi'd miagal diri.
Mogisosongkiwal Ondung Isai ot Agayo o Ngaran
24 Om timpuun noddi i piro-piro o tumatanud di Yesus do mogisosongkiwal do pasal dot isai diyolo' ot agayo kopio o ngaran. 25 Boros ka di Yesus dot id diyolo', “Iri nopo i piro-piro o raja' do pomogunan, dit a' kotutun do Kinorohingan, om mongulok-ulok iyolo' di rayat, om i piro-piro o pomorinta' nga' roitan dot, ‘Mongintirung do rayat’. 26 Nga' iyokoyu nopo om a' i' iyo'ddi, tu' isai nopo it orohian dot agayo o ngaran dot id pogialatan dokoyu, om mositi' nod sumiliu iyau do miagal dit aiso' o ngaran-ngaran, om i boyoon nga' mositi' no do sumiliu do miagal do susuhuon. 27 Isai toi ot agayo: i tulun di surungan ko' i modsurung? Atantu' no dot i surungan ot agayo. Nga' iyoho' nopodti dot id pogialatan dokoyu om miagal i' di modsusurung. 28 Moyo-woyo' kasai' kou i' doho' dot id suang do koinsanai do kosusaan ku. 29 Om onuan ku'ddi iyokoyu do kuasa' do momorinta' do miagal di Tapa' ku tu' minanahak doho' do kuasa' do momorinta'. 30 Om kowoyo' kou nondo doho' do makan om minum do hiri'd Pomorintaan ku. Om koirikau kou nondo di hopod om duwo o tirikohonon do don raja' om momorinta' kou di hopod om duwo o payat dot Israil,” ka dau.
Pinoboros Mantad di Yesus do Mogolim Nondo Dau i Pitrus
31 Boros ka di Yesus, “Oi Simun, Simun, pokinongou no! Noonuan nod kabanaran i rogon do mongoi pogumbal dokoyu; do miagal di gandum dot atapan gisom dot opisompipi' it osonong om it araat. 32 Nga' nakasambayang oku no do bagi' diya' oi Simun, om a' i' koluhoi o kotumbayaan nu. Om koguli' ko nopondo kawagu dot id doho' om mositi' no do pogiroton ngai' nu o kotumbayaan di tobpinai nu,” ka dau. 33 Om boros ka di Pitrus do suminimbar, “Oi Tuhan, uhang ku i' do korundun piya diya' do kogiil, om tumonggoi diya' do matai',” ka dau. 34 Boros ka di Yesus do suminimbar, “Kotumbayaai no oi Pitrus, dot a' po koponingkukuhuk o manuk do tadau'd baino' om intolu ko no kopogolim doho'!” ka dau.
Poiiyanan do Tusin om Kantung om Gayang
35 Om boro-boros noddi i Yesus dot id diyolo' do poingkaa, “Tontok di sinuhu' ku iyokoyu di gulu do minamanau di noduhan ku iyokoyu do mongigit do poiiyanan do tusin om kantung om kasut, om haro toi o kinokurangan dokoyu'ddi?” ka dau. “Aiso' i',” ka diyolo'd suminimbar. 36 Om boros ka kawagu di Yesus, “Nga' baino' nodti om: isai nopo i haro o poiiyanan do tusin ko' kantung, om mositi' no dot igitan dau iri; om isai nopo it aiso' o gayang, om padagangon nopo o rasuk dau dit id soibau do pomoli do gayang. 37 Kotumbayaai no, dot iri nopo om nokotulis no dot id Buuk do Kinorohingan do, ‘Roitan nondo iyau'd tulun dit araat,’ ka, om mositi' no dot osiliu dot id doho'. Tu' nunu nopo i nongkotulis dot id Buuk do Kinorohingan do pasal doho', om maso nori dot osiliu do dinondo,” ka dau. 38 Om boros ka di piro-piro o tumatanud di Yesus, “Oi Tuhan, ontong pogi', nga' haro i' o duwo o gayang do hiti,” ka diyolo'. Om boros ka di Yesus do suminimbar, “Ula' po nod boros,” ka dau.
Suminambayang i Yesus do Hilo'd Nulu-Nulu do Saitun
39 Om tongkiad noddi i Yesus di bandar, om ongoi no do hilo'd Nulu-Nulu do Saitun, do miagal di koubasan dau. Om tanud no dau i piro-piro o tumatanud dau. 40 Om korikot poddi iyolo' do hiri, om boro-boros no i Yesus diyolo' do poingkaa, “Sambayang kou no om a' kou i' kowonsoi'd dusa do tontok dot oontok kou'd pogumbalan,” ka dau. 41 Om tongkiad noddi i Yesus diyolo' do minongoi sambayang do hiri'd sodu-odu', dot orikot no doti' do momigod do watu o kosoduwo' do mantad id diyolo', 42 om otud no iyau om sambayang noddi do poingkaa, “Oi Apa', ondung milo no daa, om poinsoduwon no do mantad id doho' iti koinggoritan dit otimbabaan ku. Nga' a' indo tumanud di doho'd korohian, suwai ko' tumanud nopo do korohian do Tapa',” ka dau. 43 Om rikot noddi o tiso' o moloikat do minongoi popokoris dau. 44 Om oinggorit tomod diri ot id suang do ginawo di Yesus, gisom do suminambayang iyau do mikuwo'd aayi-ayi' o ginawo. Om iyo poddi do raha' o lasu' dau do tumuru' do hiri'd tana'. 45 Om kopongo poddi i Yesus do suminambayang, om guli' noddi iyau do hiri'd piro-piro o tumatanud dau. Om kabantalai no dau iyolo' dot ongkoodop tu' tumongob tomod iyolo'. 46 Om boros kaddi di Yesus dot id diyolo', “Nokuro tu' koodop kou? Tungag kou om sumambayang kou i', om a' kou i' oontok do pogumbalan,” ka dau.
Tinangkap i Yesus
47 Om maso po di Yesus do moro-boros, om korikot no o sonsinompuruan o tulun do winoyo' di Yudas, i songulun dot id pogialatan di tumatanud di Yesus. Om ongoi no i Yudas rapou di Yesus om tungubai no dau iyau. 48 Nga' boros ka di Yesus dot id di Yudas, “Oi Yudas, tunguban nu toi do papadagang i Tanak do Tulun?” ka dau. 49 Om koilaai poddi di piro-piro o tumatanud di Yesus di hino'd hiri o kootuson diri, om boro-boros no iyolo' do poingkaa, “Oi Tuhan, sumaap nopo iyahai dot iti gayang o pakayon dahai!” ka diyolo'. 50 Om haro'ddi o tiso' di tumatanud di Yesus do minonibas di susuhuon di Boyoon dot Agayo dot Imam do gayang o pinonibas, gisom do kaansap nopo o tolingo'd wanan di susuhuon diri. 51 Nga' boros ka di Yesus, “Ula' nori!” ka dau. Om kamao' noddi di Yesus i tolingo di tulun diri om kolingos no. 52 Om boros kaddi di Yesus dot id piro-piro o boyoon dot imam om i piro-piro o soudor di madtatamong di Walai'd Sasambayangan dot Agayo, om i boyoon do tulun do Yohudi di nokorikot do hiri do mongoi panangkap dau, “Tulun oku toi'dti dot araat, tu' gisom do rumikot kou dot ongkiinigit do gayang om bobobog do mongoi panangkap doho'? 53 Tu' monikid tadau oku i' do poiruhang dokoyu do hilo'd Walai'd Sasambayangan dot Agayo, om a' oku i' dokoyu tinangkap. Nga' iti no o maso do kapamansayan dokoyu'd miagal diti, tu' kumaraja' no o kuasa' do totuong,” ka dau.
Minogolim i Pitrus di Yesus
54 Om tangkapo' no diyolo' i Yesus om pootodo' noddi diyolo' do hiri'd walai di Boyoon dot Agayo dot Imam. Om muhut-suhut i Pitrus do hiri'd sodu'. 55 Hiri nopod tanga-tanga' di natad diri om haro o rinubpu' do tinutudan, om ongoi noddi i Pitrus irikau dot id toning di tulun di songirikau do posorili' di tapui. 56 Nga' kokito no di tiso' o susuhuon do tondu' i Pitrus do poirikau do hiri'd doros di tapui. Om sonsodo' no di susuhuon diri i Pitrus do mogintong kopio, om boro-boros nod, “Iti tulun diti nga' moyo-woyo' i' di Yesus di tiinu',” ka dau. 57 Nga' minogolim i' i Pitrus, boros ka dau, “A' oku i' kopio kotutun do tulun dino!” ka dau. 58 Nga' oruhai po do mantad diri, om kokito po kawagu do tulun do suwai i Pitrus. Boros ka dau, “Iya' nga' kinoruhangan nogi' diyolo!” ka. Nga' boros ka di Pitrus do suminimbar, “Okon i', okon oku i' ko' kinoruhangan diyolo',” ka dau. 59 Om sajaam no doti' do mantad diri, om ongoi po kawagu boro-boros dau ot iso' o tulun dot apatog o boros do poingkaa, “Atantu' no dot iti tulun diti nga' tumatanud nogi' di Yesus, tu' tulun i' iyau do Galilia!” ka. 60 Nga' boros ka di Pitrus do suminimbar, “A' oku i' koilo dino komoyon nu!” ka dau. Om maso po di Pitrus do moro-boros, om poningkukuhuk no o tandaha'. 61 Om koili no i Yesus om ontong no iyau di Pitrus. Om kahandamai noddi di Pitrus i nokoboros mantad do Tuhan dot id dau do poingkaa, “A' po koponingkukuhuk o manuk do tadau'd baino', om intolu ko no kopogolim doho',” ka. 62 Om soliwan noddi i Pitrus do mantad hiri, om pingihad tomod no iyau.
Hiningi-Hingi om Pinimbabagan i Yesus
63 Om iri nopo i piro-piro o tulun di madtamong di Yesus, om minomohingi-hingi om minomobog dau. 64 Om sompono' no diyolo' o mato di Yesus, om boro-boros nod, “Tonduwai daa om isai i minomobog diya'ddi?” ka no diyolo'. 65 Om ogumu' po o boros diyolo'd suwai do pongindaraat diyolo' di Yesus.
Pinotimbaba' i Yesus di Gompomutus do Don Tugama'
66 Om kosuabon noddi, om timung no i piro-piro o boyoon do Yohudi om i boyoon dot imam om i guru do Tourat om ongoyo' nogiddi diyolo' potimbabao' i Yesus di Gompomutus do Don Tugama'. 67 Boros ka diyolo' dot id di Yesus, “Sunudai daa iyahai, ondung iya' kopio i Raja' do Gampamasi?” ka. Om boros ka di Yesus do suminimbar, “Mulong piya do poboroson ku dot id dokoyu nga' a' kou i' otumbayaan. 68 Om ondung monguhot oku dokoyu, nga' a' kou i' sumimbar. 69 Nga' mantad pondod baino', om poirikau nondo o Tanak do Tulun do hiri'd dawananan do Kinorohingan dit Osundu Kopio,” ka dau. 70 Boros ka ngai' diyolo', “Iyo nopoddi, om Tanak ko no kopio'd Kinorohingan?” ka. Boros ka di Yesus do suminimbar, “Iyo nondo pinoboros dokoyu,” ka dau. 71 Om boros ka diyolo', “A' no minog do haro o sasi'! Nokorongou ngai' toko' no di boros dau!” ka.
Pinotimbaba' i Yesus di Pilatus
1 Om ingkakat ngai' nopo i tulun di songintimung do hiri, om ngoyo' no diyolo' i Yesus potimbabao' di Pilatus. 2 Om hiri noddi iyolo' do pinapasala' dau. Boros ka diyolo', “Nokito dahai iti tulun diti do mamalid do rayat, om mogodu iyau'd tulun do mambayar do sukai dot id di Kaisar. Tu' boros ka dau om iyau no o Kristus, om raja' iyau,” ka. 3 Om uhoto' noddi di Pilatus i Yesus, “Otopot toi do raja' ko do tulun do Yohudi?” ka dau. Om boros ka di Yesus do suminimbar, “Iyo nondo boros nu,” ka. 4 Om boros ka di Pilatus dot id piro-piro o boyoon dot imam, om id tulun dot ogumu', “Aiso' i' o tongoiso' piya do kasalaan do tulun diti do noilaan ku do kopomohukuman dau,” ka dau. 5 Nga' okon nogi' do posonsogon diyolo' o poingkaa, “Iri no i ponudukan do tulun diti o pamayayat dau'd tulun do pointongkop do Yudia do sumaap do porinta. Tuminimpuun iyau do hilo'd Galilia, om nokorikot noddi do hiti'd baino',” ka diyolo'.
Pinotimbaba' i Yesus di Horudis
6 Om korongou poddi di Pilatus o miagal diri, om ponguhot no iyau, “Otopot toi kopio do tulun do Galilia o tulun diti?” ka dau. 7 Om koilaai poddi di Pilatus do hilo'd Galilia o tadon di Yesus, i hilo'd pomogunan di porintaon di Horudis, om pokoyoo' noddi dau i Yesus dot id di Horudis, i hilo'd Yorusalim do tontok do maso'ddi. 8 Om asanangan tomod diri i Horudis do nokokito di Yesus. Tu' alaid no iyau do mongou-rongou do pasal di Yesus, om sisolowot iyau dau. Om siontong iyau dau do momonsoi'd koimayaan. 9 Om iri no o kinoponguhatan di Horudis do tuhoton dot ogumu' dot id di Yesus. Nga' a' nopo i Yesus suminimbar. 10 Om i piro-piro o boyoon dot imam om i guru do Tourat nga' hiri ngai' nogi', om papasala' ngai' iyolo' di Yesus. 11 Om hingi-hingio' noddi di Horudis om i piro-piro o soudor dau i Yesus om nindaraat diyolo' iyau, om rosukai nogiddi diyolo' iyau do rasuk di don raja', om pootodo' no kawagu diyolo' iyau dot id di Pilatus. 12 Om tontok i' do tadau'ddi do nokopiambalut kawagu iyo Horudis di Pilatus, i mitogod daa di gulu po.
Hinukuman do Kapatayon i Yesus
13 Om timungo' ngai' no di Pilatus i boyoon dot imam om i woyo-woyoon om i rayat. 14 Om boro-boros no iyau diyolo', “Pinaatod dokoyu iti tulun diti dot id doho', om poboroson dokoyu do mamalid iyau'd tulun. Nga' nouhot ku no iyau dot id toguang dokoyu, om aiso' i' kopio o tongoiso' piya do karaaton dau do noimbulayan ku do miagal di pinotondos dokoyu. 15 Om i Raja' Horudis nga' iyo iddi doho' ot osorou, om iri no o kinopogulian dau di Yesus dot id dati'. A' i' iti tulun diti minomonsoi dot ongoiso' piya do kasalaan dit apatut do kopomohukuman do kapatayon. 16 Iyo nopoddi om bobogon ku nopo iyau, om poiduwon ku nondo iyau,” ka dau. 17 Om pointikid-tikid do tadau dot agayo do Paska, om koubasan no di Pilatus do papalabus do songulun di songinggiil, do tumanud do pokionuon di tulun dot ogumu'. 18 Om oinsanan nopo i tulun di pointimung do hiri do pinapagarang do, “Patayon nopo iyau, om polobuson no dahai i Barabas!” ka. 19 I Barabas nopoddi om poinggiil tu' nokohompit iyau do suminaap do porinta do hiri'd bandar, om nakapamatai iyau'd tulun. 20 Om pomoros po kawagu i Pilatus dot id tulun dot ogumu' do poiduwon dau i Yesus. 21 Nga' pamagarang nogi' iyolo' do, “Posolibon nopo iyau! Posolibon nopo iyau!” ka. 22 Om boro-boros po kawagu i Pilatus dot id diyolo' do kointolu no do poingkaa, “Nunu o kasalaan do tulun diti? Tu' aiso' i' o noimbulayan ku dot ongoiso' piya do kasalaan dau do kopomohukuman dau'd kapatayon. Bobogon ku nopo iyau om poiduwon ku nondo iyau,” ka dau. 23 Nga' a' nopo iyolo' tumingkod do minggarang do gisom do kototos tomod iyolo', do monuhu' do papasalib di Yesus. Om alaid noddi om kamanang iddi iyolo'. 24 Om hukumai noddi di Pilatus do kapatayon i Yesus, do tumanud di pinokianu di tulun dot ogumu'ddi. 25 Om polobuso' no dau i tulun di pinokilobusan di tulun dot ogumu', iri no i tulun di pinogiil tu' nokohompit i' do sumaap do porinta om minamatai'd tulun. Om patahako' noddi di Pilatus i Yesus dot id tulun dit ogumu'ddi, om owonsoi i' diyolo' dot id di Yesus o poingkuro nopo o korohian diyolo'.
Pinasalib i Yesus
26 Om tanggayai no di piro-piro o soudor i Yesus do minamanau. Om maha' di hiri no iyolo'd tanga'd ralan, om kosolowot no diyolo' o tiso' o tulun, i roitan dot i Simun, i tulun do Kirini, di sumuang nogi' daa iyau do hiri'd bandar. Om ongoyo' no diyolo' iyau pususo' om sansagai no diyolo' do sumaan di salib di Yesus om sumusuhut nondo di Yesus. 27 Om ogumu'ddi o tulun do minoyo' di Yesus, om haro nogi' o piro-piro o tongoondu' dot id pogialatan diyolo'. Om mihad diri i tongoondu'ddi do mogihad di Yesus. 28 Nga' koili no i Yesus diyolo', om boro-boros no iyau do poingkaa, “Oi tongoondu' do Yorusalim! Kada' oku dokoyu pogihadai. Nga' pogihadan nogi' dokoyu o tinan dokoyu, om tangaanak dokoyu. 29 Tu' rumikot indo o maso do mimboros o tulun dot, ‘Olumaag no kopio i tongoondu' dit a' insan ponontian, it a' nokoumbal do kianak, om it a' nokoumbal do posusu'd tanak!’ ka. 30 Om tontok nopondoddi, om minggarang nondo o tulun dot id konuluhanan dot, ‘Onsitai iyahai!’ ka. Om minggarang iyolo' dot id konulu-nuluan dot, ‘Olitai iyahai!’ ka. 31 Tu' ondung iyo'dti o wonsoyon do tulun dot id kayu di miyau, om okuro- kuro nogindo tuu o wonsoyon diyolo' dot id kayu di napatai!” ka dau. 32 Om haro po o duwo o tulun do suwai --- do tulun dot araat goduwo do hinukuman do kapatayon do nakaandad di Yesus do hinukuman. 33 Om korikot poddi iyolo' dot id iso' o kinoiyonon di roitan do “Korulung do Tulu”, om posolibo' noddi diyolo' i Yesus do hiri. Om hiri nogi' o pinosoliban di duwo o tulun dot araat diri, do songulun o ponong id wanan om songulun o ponong id gibang di Yesus. 34 Om sambayang noddi i Yesus do poingkaa, “Oi Apa', ompunai no iyolo', tu' a' i' iyolo' koilo ondung nunu ilo wonsoyon diyolo',” ka dau. Om pogibohogi-hogio' no diyolo' i pakayan di Yesus, do nundi' do minamahagi'. 35 Om ogumu' o tulun do songingkakat do hiri do miontong do daamot di piro-piro o boyoon do Yohudi do mimboros do momohingi-hingi di Yesus do poingkaa, “Minamasi i' iyau do tulun do suwai; umbalai daa kopio dau posio' o dau'd tinan do dinondo, ondung otopot no kopio do Raja' iyau di Gampamasi, i nopili' do Kinorohingan,” ka no diyolo'. 36 Om i piro-piro o soudor nga' minomohingi-hingi i' di Yesus. Om ngoyo' no diyolo' iyau onuwai do waig dot anggur dit oonsom, 37 om boros ka diyolo', “Ondung raja' kopio ko do tulun do Yohudi om posio' no o tinan nu,” ka. 38 Om id dompok ponong id sawat nopo di kayu di pinosoliban di Yesus, om tinulisan do boros do poingkaa, “Iti no o Raja' do Tulun do Yohudi,” ka. 39 Om i tiso' di tulun dot araat di nakasalib diri, nga' minongindaraat i' di Yesus. Boros ka dau, “Okon toi' ko' Raja' ko di Gampamasi? Posio' pogi' o diya'd tinan, om posion indo iyahai,” ka dau. 40 Nga' togodo' no di tiso' di tulun dot araat i tambalut dau, boros ka dau, “A' ko iya' ooris do Kinorohingan? Tu' iya' nga' hinukuman i' do kapatayon do miagal dau. 41 Nga' iti nopo hukuman dot id dato om miontok i' di winonsoi to. Nga' iyau nopo om aiso' i' kopio o sala'!” ka dau. 42 Om boros kaddi dau dot id di Yesus, “Oi Yesus, sorohon oku no do rumikot ko do miagal do Raja'!” ka. 43 Om boros ka di Yesus do suminimbar dau, “Kotumbayaai no do tadau id baino' do kosugku' ko doho' do hilo'd Pirdaus,” ka dau.
Kinapatayon di Yesus
44 Om jam kohopod om duwo noddi doti' iri do pitangaadau om sigog nopo om aiso' no o tulinau do tadau, om otuong nopo o pointongkop do pomogunan diri. Om otuong nopoddi do gisom do nokorikot do jam kotolu do sosodopon. 45 Om tontok nogiddi do kopiduwo nopo do nohurak i tirai di poirinding do hiri'd Walai'd Sasambayangan dot Agayo. 46 Om pomolohou noddi i Yesus dot opuhod do poingkaa, “Oi Apa'! Patahakon ku no o rusod ku dot id suang do palad nu!” ka dau. Om koboros poddi dau o miagal diri, om kapatai no iyau. 47 Om kokito poddi di boyoon do soudor do miagal diri o nosiliu, om pamarayou no iyau'd Kinorohingan. Om boros ka dau, “Otopot no kopio dot aiso' o sala' dau,” ka. 48 Om iri nopo tulun dot ogumu' di ruminikot do hiri do minongoi ontong, om nokokito ngai' nopo di nosiliu do miagal diri. Om uli' ngai' noddi iyolo' do mikuwo'd minonosol tomod. 49 Om oinsanan nopo i nongkotutun di Yesus, om i tongoondu' di minoyo' dau do mantad hilo'd Galilia do songingkakat do hiri'd sodu-odu', om nokokito ngai' iyolo' di nongosiliu'ddi.
Linobong i Yesus
50-51 Om haro o tiso' o tulun dot i Yusup o ngaran, i mantad hilo'd bandar dot Arimatia, it id pomogunan do Yudia. Iyau nopo om osonong koulun, om pusohon do tulun, om iyau nga' mandad-andad no do korikatan di Pomorintaan do Kinorohingan. Om mulong piya do poinghompit iyau di piro-piro o Gompomutus do Don Tugama', nga' a' i' iyau kosokodung di pinomutus om i winonsoi di Gompomutus do Don Tugama'ddi. 52 Om ongoi no iyau solowot di Pilatus, om pokionuo' no dau i rata' di Yesus. 53 Om ngoyo' noddi dau polintuhuno' i rata' di Yesus do mantad hiri'd kayu salib, om lopoto' no dau do kain linan. Om ngoyo' no dau lobongo' i rata'ddi do hiri'd lobong di pinoluang dot id pampang --- om it a' po insan kapamalabangai'd tulun. 54 Tontok nopod tadau'ddi, om tadau do kolimo; om oruhai no dot orikot o tadau'd Sabat. 55 Om iri nogi' i tongoondu' di minoyo' di Yesus do hilo'd Galilia nga' minoyo' nogi' di Yusup, om nokokito iyolo' di lobong diri. Om nokokito nogi' iyolo' do kowoyo-woyoo' do pinopoiliu di rata' di Yesus do hiri'd suang di lobong. 56 Om uli' noddi iyolo', om posodia' no iyolo' do tubat om tumau dot ongosonong o kosingudan do ponuntug di rata' di Yesus. Om undorong noddi iyolo' do tontok di tadau'd Sabat do tumanud di ponuhuan do Tourat.
Napasi Kawagu i Yesus
1 Om osuab poddi di tadau'd Minggu', om ongoi no i tongoondu' do hiri'd lobong do minongigit do tubat di nosodia' mantad no diyolo'. 2 Om soira' di nokorikot iyolo'd hiri, om kokito no diyolo' do noidu' no i watu di pinonompon di lobong. 3 Om suang no iyolo' do hiri'd lobong, nga' a' no hino'd hiri i rata' di Tuhan Yesus. 4 Om daamot po diyolo' do songingkakat do hiri, om ongoborulong do momusorou do pasal diri, om sigog nopo om poingkakat o duwo o tulun do kipakayan do mogulinau tomod do hiri'd toning diyolo'. 5 Om otud nopo i tongoondu' do hiri'd tana' dot opopoddosian. Om boros ka di duwo o tulun diri dot id diyolo', “Nokuro tu' mogihum kou di tulun di poimpasi dot id pogialatan do tulun di napatai? 6 A' i' iyau hino'd hiti. Napasi no kawagu iyau. Soroho' pogi' dokoyu i pinoboros dau dot id dokoyu di hilo' po iyau'd Galilia do poingkaa, 7 ‘Patahakon nondo i Tanak do Tulun dot id tulun di kidusa, om posolibon nogindo iyau. Nga' apasi indo kawagu iyau do kotolu'd tadau,’ ka,” ka diyolo'. 8 Om kosorou noddi di tongoondu' i boros di Yesus do miagal diri. 9 Om koguli' poddi iyolo' do mantad hiri'd lobong, om posusuyo' no diyolo' i nongosiliu'ddi dot id hopod om iso' di rasul, om id koinsanai di tumatanud di Yesus do suwai. 10 Iri nopo i tongoondu' di pinoposunud do koinsanai'ddi dot id piro-piro o tumatanud di Yesus nga: i Maria Magdalina, om i Yohana, om i Maria i tina' di Yakub, om piro-piro o tongoondu'd suwai di moyo-woyo' diyolo'. 11 Nga' a' i' ongotumbayaan i rasul di sinusui di tongoondu'ddi, tu' osorou nopo daa diyolo' om maan i' toomod di tongoondu' i sinusui diyolo'. 12 Nga' ingkakat nopo i Pitrus om panangkus no do minongoi'd hiri'd lobong om kungkub no iyau do minontong do hiri'd suang di lobong, om kokito no dau dot iri po kain dit opurak di pinomorilit di rata' o hino'd hiri. Om osuayan tomod diri i Pitrus, om uli' no iyau do mikuwo'd ogumu' o tuhoton dot id suang do ginawo dau do pasal di nosiliu'ddi.
Hiri'd Tindalanon do Kumaa do Hilo'd Imaus
13 Om tontok i' do tadau'ddi, do haro o duwo o tulun di tumatanud di Yesus do manau-panau do kumaa dot id iso' o kampung di roitan dot Imaus. Om kosoduwo' nopod Imaus do mantad hilo'd Yorusalim nga' haro i' doti' o hopod om iso' o kilomito. 14 Om maso nopo diyolo' do manau-panau om miboro-boros iyolo' do pasal di nongosiliu'ddi. 15 Om maso diyolo' do miboro-boros om miuhot-uhot do pasal diri, om sigog id rikot i Yesus dot id diyolo' om tanud no iyau diyolo' do minamanau. 16 Om kokito no diyolo' i Yesus, nga' a' nopo diyolo' notutunan iyau. 17 Om boro-boros noddi i Yesus diyolo' do poingkaa, “Nunu iti pibara-barasan dokoyu do hiti'd tanga'd ralan?” ka dau. Om undorong nopo iyolo' do mikuwo'd tumongob tomod. 18 Om ponguhot no di Yesus o tiso' diyolo', i roitan dot i Kiliopas, do poingkaa, “Iya' po kopio o sompogunan do hilo'd Yorusalim dit a' nokoilo di nosiliu do hilo'd Yorusalim di wagu poddi?” ka dau. 19 Om boros ka di Yesus, “Nunu i nosiliu?” ka dau. Om boros ka diyolo' do suminimbar, “I nosiliu dot id di Yesus, i tulun do Nasarit diri. Iyau nopo om nabi i'. Om haro kopio o kuasa' do boros dau om kikuasa' i wonsoyon dau --- dot id pagantangan do Kinorohingan om id pagantangan do koinsanai'd tulun. 20 Nga' pinatahak iyau di piro-piro o boyoon dot imam, om i boyoon do bansa' toko' do hukuman do kapatayon, om posolibo' noddi diyolo' iyau. 21 Om iyau i' daa o soro-sorohon dahai do popoidu' do tulun dot Israil! Om kotolu nogi' do tadau'd baino' do mantad di nosiliu o miagal diri. 22 Om kawagu po nga' haro o piro-piro o tongoondu' do mantad id pogialatan dahai do pinoposunud di kosuayan kopio dahai. Tu' osuab po di kosuab om ongoi no iyolo' do hiri'd lobong, 23 nga' a' no hino'd hiri i rata' di Yesus. Om koguli' diri iyolo' om posunudo' no diyolo' dahai do nokokito kaka iyolo' do moloikat, om pinoposunud i moloikat diri do napasi no kaka i Yesus. 24 Om ongoi noddi o piro-piro o tulun dot id pogialatan dahai do hiri'd lobong, om kokito no diyolo' dot otopot kopio i' i pinoboros di tongoondu'ddi, nga' a' i' iyolo' nokokito di Yesus,” ka diyolo'. 25 Om boro-boros noddi i Yesus diyolo', “Basug kou no kopio! A' kou no kopio monongkuyaan di pinoboros di piro-piro o nabi diri. 26 Okon toi ko' mositi' pod oinggorit i Raja' do Gampamasi, om kaanu nogindo iyau do kagayaan?” ka dau. 27 Om susuyo' noddi di Yesus diyolo' o koinsanai di nongkotulis dot id suang di Buuk do Kinorohingan do pasal dau do minimpuun di piro-piro o buuk di Musa om i buuk di piro-piro o nabi. 28 Om osomok noddi iyolo' do korikot dot id kampung di rikoton diyolo', om pamanau no i Yesus do miagal-agal do lumombus do mamanau. 29 Nga' oduhai no diyolo' iyau. Boros ka diyolo', “Osodop noti om tumuong no, om tumanud nopo dahai do baino',” ka diyolo'. Om woyo' noddi i Yesus diyolo' do minongoi do hiri'd niyonon diyolo'. 30 Om tontok di mogitotorungak iyolo'd makan, om ngoyo' no di Yesus i roti, om sambayang no iyau do minongunsikou'd Kinorohingan, om pogikobing-kobingo' no dau i roti'ddi, om patahako' no dau diyolo'. 31 Om koilaai nogiddi diyolo' dot i Yesus i tulun diri. Nga' a' noddi diyolo' nokito i Yesus. 32 Om piboro-boros noddi iyolo', “Okon toi ko' notingkau tomod o ginawo to do nokorongou di boros dau di hilo' to'd tanga'd ralan diri, do tontok di pinoposuhut iyau do komoyon di songintulis dot id Buuk do Kinorohingan dot id dato?” ka diyolo'. 33 Nga' maso iddi, do miningkakat iyolo' om pamanau no iyolo' do guminuli' do hilo'd Yorusalim. Om korikot noddi iyolo' do hilo'd Yorusalim, om kokito no diyolo' do songintimung no i hopod om iso' o tumatanud di Yesus do mogiaamung di tulun do suwai. 34 Om somboro-boros nopo iyolo' do poingkaa, “Otopot no kopio do napasi kawagu i Tuhan! Tu' nokointalang no iyau dot id di Simun!” ka no diyolo'. 35 Om susuyo' no di duwo o tumatanud di Yesus di wagu po korikot diri i nosiliu di hiri iyolo'd tanga'd ralan, om susuyo' diyolo' ondung poingkuro iyolo' do nokotutun di Tuhan do tontok di minangabing iyau di roti.
Minintalang i Yesus dot id Piro-Piro o Tumatanud Dau
36 Om maso po diyolo' do mogiboro-boros, om sigog nopo om poingkakat i Yesus dot id pogialatan diyolo'. Om boro-boros no iyau'd poingkaa, “Ongosimbayan kou po!” ka dau. 37 Om kongotigowo ngai' nopo iyolo' om moddosi. Tu' ondos daa diyolo' om tomburio i nokito diyolo'. 38 Nga' boros ka di Yesus, “Nokuro tu' moddosi kou? Nokuro tu' mikoduwo o ginawo dokoyu? 39 Antangai pogi' dokoyu iti palad ku om iti kolung ku. Ilaai no dokoyu, dot iyoho' i' kopio iti! Ngoyo' nopo dokoyu kamao' o tinan ku, om sonsodon no kopio. Tu' tomburio nopo om aiso' i' o tonsi om aiso' o tulang, do miagal doho' dot okito dokoyu,” ka dau. 40 Om tontok di moro-boros i Yesus do miagal diri, om poontongo' no dau iyolo' di palad om i kolung dau. 41 Nga' tontok dit a' po iyolo' otumbayaan, tu' adalaan no kopio iyolo' dot otood om osuayan, om uhoto' no iyolo' di Yesus, “Haro po o taakanon dokoyu'd hiti?” ka dau. 42 Om onuwai no diyolo' i Yesus do songkorot o sada' di noonsok. 43 Om romito' no di Yesus i sada'ddi, om akano' no dau dot id toguang diyolo'. 44 Om boro-boros noddi kawagu i Yesus diyolo', “Tontok di poinsugku' oku po dokoyu, om nokoboros mantad ku no dot id dokoyu o miagal diti: ‘Pointikid-tikid di nokotulis do pasal doho' dot id suang di Tourat di Musa, om id suang di piro-piro buuk do nabi om id suang di Buuk do Sinding, om a' no milo dot a' angabayaan,’ kangku,” ka dau. 45 Om onuwai no di Yesus iyolo' do toilaan om kosuhut i' iyolo' do komoyon dit id suang do Buuk do Kinorohingan. 46 Om boros kaddi dau dot id diyolo', “Nokotulis no dot id Buuk do Kinorohingan, dot iri nopo Raja' di Gampamasi, om oinggorit nondo om apatai. Nga' apasi indo kawagu iyau do kotolu'd tadau. 47 Om id suang nogi' do ngaran di Raja' do Gampamasi do mositi' no do popinsusuyon dot id koinsanai'd bansa', dot apatut do rumologo ngai' o tulun do momonsoi'd dusa. Om popinsusuyon do mangampun o Kinorohingan do dusa. Om timpuunon nopo do posusuyan diti habar, om hilo'd Yorusalim. 48 Iyokoyu no o sumiliu'd sasi' do koinsanai'ddi. 49 Om porikoton ku nogindo dot id dokoyu i nakabatos di Tapa'. Nga' mositi' no do mandad kou do hiti'd bandar diti do gisom dot olopot kou di kuasa' do mantad id Kinorohingan,” ka dau.
Pinoinsawat i Yesus do Hilo'd Surga
50 Om koboros poddi di Yesus iri, om angatai no dau iyolo' do sumoliwan di bandar do minamanau do gisom do nokorikot do hilo'd Baitani. Om hilo' no do pinoinsawat di Yesus o longon dau do minamarakat diyolo'. 51 Om maso di Yesus do mamarakat diyolo', om koinsawat noddi iyau do hilo'd surga. Om kotongkiad noddi iyau do mantad id diyolo'. 52 Om otud ngai' no iyolo' do tuminuku' dot id di Yesus. Om uli' noddi iyolo' do hilo'd Yorusalim do mikuwo'd otood tomod. 53 Om hiri kasai' nopoddi iyolo'd Walai'd Sasambayangan dot Agayo do mamarayou'd Kinorohingan.
I Boros do Manahak do Koposion
1 Di nopo di timpuun i' dit a' po nowonsoi iti pomogunan, om hino mantad no i Boros. Iri nopo Boros diri om poinsugku' do Kinorohingan, om miagal nopo kopio'd Kinorohingan i Boros diri. 2 Mantad poddi timpuun i' om poinsugku' mantad no iyau do Kinorohingan. 3 Om iyau no o pinawayaan do Kinorohingan do minomonsoi do koinsanai'd nunu nopo, om aiso' i' o tiso' piya di songinwonsoi do winonsoi dot a' pinawaya' dau. 4 Iri nopo Boros diri om tudan do koposion, om iri no koposion diri o manahak do tanawau dot id tulun. 5 Iri nopo tanawau'ddi om tumitiu dot id totuong, om a' i' kopisok o totuong di tanawau'ddi. 6 Om porikoto' nod Kinorohingan i susuhuon dau, dot i Yohanis o ngaran. 7 Kinorikatan nopo dau om minongoi poposusui do pasal di tanawau'ddi, om otumbayaan ngai' indo o tulun do korongou di habar diri. 8 Okon i' ko' iyau i tanawau'ddi; tu' iyau nopo om ruminikot no do minongoi poposusui do pasal di tanawau'ddi. 9 Iri nopo tanawau dit otopot, om ruminikot do hiti'd pomogunan om tuminitiu dot id koinsanai'd tulun. 10 Hiti no daa'd pomogunan i Boros diri nga' mulong piya dot iyau o pinawayaan do Kinorohingan do minomonsoi'dti pomogunan, nga' a' i' iti pomogunan nokotutun dau. 11 Rikot no iyau do hiri'd pomogunan dau nga' a' i' iyau rinamit di bansa' dau. 12 Nga' haro iddi o piro-piro tulun do ruminamit dau om notumbayaan dau; om onuwai noddi dau iyolo' do kosorupayan do sumiliu'd tangaanak do Kinorohingan. 13 Om okon i' ko' miagal di kowoyo-woyoo' di koubasanan o kinosilihan diyolo' do tangaanak do Kinorohingan, do miagal di tangaanak do pogkosusuon do tulun, tu' tulun i' o tapa'; nga' tadon nopo di koposion do wagu om Kinorohingan i'. 14 Om iri nopo i Boros diri om suminiliu'd tulun, om nokoiyon dot id pogialatan toko', om nokokito toko' i' di kagayaan dau. Iri nopo kagayaan dau'ddi om naanu dau do mantad id Tapa' dau, tu' iso' no iyau o tanak di Tapa'. Om id dau no o kokitanan toko' do Kinorohingan om i kosianan do Kinorohingan dot id dati'. 15 Om i Yohanis no o suminiliu do sasi' dau, om i pinopopinsunud do poingkaa, “Ilo' no i komoyon ku di pinoboros ku do poingkaa: Rumikot nondo iyau do kosusuhut doho', nga' iyau nopo om agayo i' o kuasa' ko' iyoho', tu' di nopo dit a' oku po hino, om hino mantad no iyau,” ka. 16 Iyau nopo om poimponu' do kosianan; om aiso' o kotingkadan dau do mamarakat dati'. 17 Iri nopo Tourat om pinatahak do Kinorohingan do pinawaya' di Musa. Nga' kosianan nopo om kotorodoko' do Kinorohingan om i Yesus Kristus i' o pinopointalang. 18 Aiso' i' o nokoumbal do nokokito do Kinorohingan, do suwai ko' iri no i tanak di Tapa' dit iso' noo, i miagal kopio di Tapa' om i poingulud kopio dau. Iyau no i pinopointalang di Tapa' dot id dati'.
I Pinoboros di Yohanis
19 Om suhuo' no di piro-piro boyoon do tulun do Yohudi di hilo'd Yorusalim i piro-piro imam om i tulun do Liwi do mongoi ponguhot di Yohanis ondung isai kopio iyau. 20 Om poboroso' nopo kopio di Yohanis o poingkaa, “Okon oku i' ko' i Raja' do Gampamasi,” ka. 21 Om ponguhot po kawagu iyolo', “Iyo nopondo, om isai kopio ko nanu'? I Ilia ko?” ka. “Okon,” ka di Yohanis do suminimbar. Om ponguhot po kawagu iyolo', “Iri ko tuu i Nabi?” ka. “Okon,” ka di Yohanis. 22 Om boros kaddi diyolo', “Iyo nopondo, om sunudai daa iyahai ondung isai kopio ko. Om milo i' iyahai do momisunud di tulun di minonuhu' dahai. Posunudo' daa ondung isai kopio ko,” ka diyolo'. 23 Om boros ka di Yohanis do suminimbar, “Iyoho' no i komoyon di Nabi Yosaya, do poingkaa, ‘I tulun di mimboros dot opuhod do hilo'd tana' do kowotuan do poingkaa: Potingo' no o ralan do wayaan do Tuhan!’ ka,” ka dau. 24 Om iri nopoddi i tulun di sinuhu' di tulun do Parisi'ddi 25 nga' minonguhot po dot, “Ondung okon ko ko' i Raja' do Gampamasi om okon ko ko' i Ilia, om okon ko ko' i Nabi om nokuro'ddi tu' mambatis ko?” ka diyolo'. 26 Om boros ka di Yohanis do suminimbar, “Waig no o pamatis ku iyoho'. Nga' haro i' o tulun dot id pogialatan dokoyu dit a' dokoyu otutunan. 27 Iyau nopo om id tohuri i' ko' iyoho' do rumikot, nga' a' oku i' mando osorupai do mongiad piya di tali do kasut dau,” ka dau. 28 Iri ngai' nopoddi om nosiliu do hilo'd Baitani, i ponong id koulayon do mantad id Bawang do Yordan, i kinoiyonon di Yohanis do mambatis do tulun.
I Tanak do Dumba' do Kinorohingan
29 Tadau noddi kawagu, om kokito no di Yohanis i Yesus do rumikot dot id dau. Om boros kaddi di Yohanis, “Ilo' no i Tanak do Dumba' do Kinorohingan di mongidu' do dusa do tulun do hiti'd pomogunan. 30 Om ilo' no i komoyon ku do rumikot dot id tohuri ko' iyoho', nga' agayo i' mando o kuasa' dau ko' iyoho', tu' di nopo dit a' oku po nopogkosusu om hino mantad no iyau. 31 Iyoho' nga' a' i' daa nokotutun ondung isai iyau di gulu po. Om inda' ka do ruminikot oku nogi' do mongoi pamatis do tulun do waig o pamatis om kotutun i' dau i tulun dot Israil,” ka dau. 32 Om poboroso' po di Yohanis i nokito dau. Boros ka dau, “Nokito ku i Rusod do Kinorohingan do miagal do punai o kowoyo-woyoo' do luminintuhun do mantad hilo'd tawan, om undorong no dot id dau. 33 Tontok nopoddi om a' oku po daa koilo ondung isai iyau. Nga' nosunudan oku nod Kinorohingan, i minonuhu' doho' do mamatis do tulun do waig o pamatis do poingkaa, ‘Okito nu nopondo i Rusod do Kinorohingan do lumintuhun om mundorong dot id iso' o tulun, om iri no tulun diri i mamatis do tulun do Rusod do Kinorohingan o pamatis,’ ka dau. 34 Om nokito ku no o miagal diri dot iyoho' kopio o nokokito, om poboroson ku no dot iyau no kopio i Tanak do Kinorohingan,” ka dau.
I Piro-Piro Tulun dit id Gulu Kopio do Tuminanud di Yesus
35 Tadau noddi kawagu om hiri pod kinoiyonon diri i Yohanis do miwoyo' do duwo di tumatanud dau. 36 Om soira'ddi nokito di Yohanis i Yesus do tuminalib, om boro-boros no iyau dot, “Intong kou pogi'! Ilo' no i Tanak do Dumba' do Kinorohingan,” ka. 37 Om korongou no di duwo o tumatanud di Yohanis i boros dau'ddi, om ongoi noddi iyolo' tanud di Yesus. 38 Om koili no i Yesus, om kokito no dau iyolo' do manud-tanud dau. Om uhoto' no dau iyolo', “Nunu o tihumon dokoyu?” ka dau. Om boros ka diyolo'd suminimbar, “Rabi, hinonggo o tiyonon nu?” ka diyolo'. (Komoyon nopod “Rabi” om guru.) 39 Om boros ka di Yesus, “Kainou pogi' mongoi ontong,” ka dau. Om woyo' no iyolo' dau om kokito no diyolo' i tiyonon dau. Tontok nopoddi nga' jam kaapat no do dongsosodopon, om undorong nopoddi iyolo' do hiri'd di Yesus do tadau'ddi. 40 Iri nopo tiso' di duwo o tulun di nokorongou di pinoboros di Yohanis om i tuminanud diri di Yesus nga' i Andarias, i tobpinai di Simun Pitrus. 41 Om olomus nopoddi i Andarias do minongoi pogihum di Simun, i tobpinai dau, om sunudai no dau do, “Nokosolowot no iyahai di Mosias!” ka. (Komoyon nopo do Mosias om Kristus, i Raja' do Gampamasi.) 42 Om pootodo' no di Andarias i Simun dot id di Yesus. Om sonsodo' no di Yesus i Simun om boro-boros nod, “Iya' nopondo oi Simun, i tanak di Yona, om roitan nondo dot i Kipas,” ka. (Komoyon nopod Kipas om miagal i' do komoyon do Pitrus, tu' komoyon nopo om pampang.)
Linohou di Yesus i Pilipus om i Natanil
43 Tadau noddi kawagu om korohiai no i Yesus do mongoi do hilo'd Galilia. Om kosolowot noddi dau i Pilipus om boro-boros nod, “Kaino, tanud doho',” ka. 44 I Pilipus nopoddi nga' mantad hilo'd Baitsaida, i kinoiyonon di Andarias om i Pitrus. 45 Om kosolowot no di Pilipus i Natanil om sunudai no dau iyau, “Nosolowot no dahai i tulun di noroitan di Musa dot id suang di Tourat, om i pinoboros di piro-piro o nabi. Iri nopo tulun diri om i Yesus, i mantad hilo'd Nasarit, i tanak di Yusup,” ka dau. 46 Nga' boros ka di Natanil, “Haro kopio tuu ot osonong do mantad hilo'd Nasarit?” ka. Om boros ka di Pilipus do suminimbar, “Kaino pogi' mongoi nogi' kopio ontong,” ka dau. 47 Om kokito no di Yesus i Natanil do rumikot, om boros kaddi dau dot i Natanil o komoyon, “Ilo' no o tulun kopio dot Israil. Om a' i' mongudut iti tulun diti,” ka. 48 Om uhoto' no di Natanil i Yesus. Boros ka dau, “Poingkuro ko do nokotutun doho'?” ka. Om boros ka di Yesus do suminimbar, “Di nopo dit a' ko po noongoi kolohou di Pilipus om nokito tiya' no di hiri ko'd sahau di guas dot ara,” ka. 49 Om boros ka di Natanil, “Oi Guru, iya' no kopio i Tanak do Kinorohingan! Iya' no i Raja' do bansa'd Israil!” ka dau. 50 Om boros ka di Yesus, “Monongkuyaan ko no, om minomoros oku nogi' do nokito tiya' do hilo'd sahau di guas dot ara? Nga' kokito ko indo dit angagayo ko' mantad diri!” ka dau. 51 Om boros ka kawagu di Yesus, “Ponongkuyaai no dot otopot i' kopio do kokito ko nondo dilo tawan dot oiwangan, om songindakod-dakod om songingkurus-kurus o moloikat dot id Tanak do Tulun,” ka dau.
Pikowinan do Hilo'd Kana
1 Duwo noddi o tadau do mantad diri om haro o poginakanan do pikowinan do hilo'd bandar do Kana, i hilo'd Galilia, om i tina' di Yesus nga' minongoi nogid hiri. 2 Om i Yesus om i tumatanud dau nga' naalap i' do mongoi rapou di poginakanan diri. 3 Soira' di naayi' i waig dot anggur, om boro-boros no i tina' di Yesus dot id dau. Boros ka dau, “Nooyian no iyolo'd waig dot anggur,” ka dau. 4 Om boros ka di Yesus do suminimbar, “Inan, kada' oku suhuo'. Tu' a' po orikot o maso ku do popointalang ondung isai kopio oku,” ka dau. 5 Nga' boros ka di tina' di Yesus dot id piro-piro di susuhuon, “Wonsoyon nopo dokoyu i poboroson dau dot id dokoyu,” ka. 6 Om haro ot onom o luping do hiri do poiiyanan do waig di pongongoug do tumanud di koubasanan do tulun do Yohudi. Orumpos nopo do pointikid-tikid di luping diri om haro i' doti' o hatus o lito. 7 Om boros ka di Yesus dot id piro-piro susuhuon diri, “Suangai ngai' dokoyu'd waig ilo luping,” ka. Om suangai ngai' no diyolo' i luping diri gisom do nongoponu'. 8 Om boros kaddi di Yesus dot id diyolo', “Ongoi kou anu dot ongokooro' dilo waig om patahakon i' di mongilo-ilo diti poginakanan,” ka dau. Om ngoyo' no diyolo' patahako' di mongilo-ilo di poginakanan i waig diri. 9 Om tiimai no dau i waig di nosiliu no do waig dot anggur. (Nga' a' i' iyau koilo ondung honggo o tadon di waig dot anggur diri. Iri no i susuhuon di pinoposuang di waig do hiri'd luping o koilo.) Om lohowo' noddi di mongilo-ilo di poginakanan i kusai di kuminawin, 10 om boro-boros no, “Koubasanan nopo om poguluonon pod moninggarung i waig dot anggur dit osonong kopio, om angabangat pondo do minum i tulun di nalap, om singgorungon nogindo i waig dot anggur di koubasanan. Nga' nokoolu' nu i' iya' i waig dot anggur dit osonong kopio do gisom piya'd dinondo!” ka dau. 11 Om iri no o koimayaan di gulu i' kopio di Yesus wonsoyo'. Om winonsoi dau iri do hilo'd Kana, i hilo'd Galilia. Om iri no i koimayaan di winonsoi dau'ddi o pinopointalang do kogoyoo' dau. Om kotumbayaai noddi dau i tumatanud dau. 12 Om ongoi noddi i Yesus do hilo'd Kapornaum do miwoyo' di tina' dau, om i piro-piro tobpinai dau om i tumatanud dau. Om hilo' no iyolo' do poundorong do solinaid do piro-piro o tadau.
Suminuang i Yesus di Walai'd Sasambayangan dot Agayo
13 Tontok dit oruhai nod orikot i Tadau'd Agayo do Paska do tulun do Yohudi, om ongoi no i Yesus do hilo'd Yorusalim. 14 Om di nopoddi hiri iyau id Walai'd Sasambayangan dot Agayo di hilo'd Yorusalim, om kokito no dau i dumadagang do sapi' om dumba', om punai, om i tulun do monukar do tusin do songirikau'd hiri. 15 Om pomonsoi no iyau do pipikot do tali o winonsoi om pinguyungo' ngai' noddi dau i tayam-tayam diri: i dumba' om i sapi', do mantad hiri'd Walai'd Sasambayangan dot Agayo. Om pinsomboliko' dau i mija' di tulun di monukar do tusin, om songinsasad poddi i tusin diyolo'. 16 Om boros kaddi di Yesus dot id tulun di padagang do punai, “Igitai ngai' dokoyu iti do sumoliwan do mantad hiti. Kada' dokoyu siliho' do tiiyonon do dumadagang iti walai'd Tapa' ku!” ka dau. 17 Om kosorou noddi di tumatanud dau it ayat dot id suang do Buuk do Kinorohingan do poingkaa, “Iyo pod tapui di molob-ngolob do hiti'd ginawo ku o kosianan ku di Walai nu, oi Kinorohingan,” ka. 18 Om boros kaddi di piro-piro boyoon do tulun do Yohudi do sumongkiwal di Yesus, “Pomonsoi daa do koimayaan do popointalang dot id dahai do haro o kuasa' nu do momonsoi'd miagal diti,” ka. 19 Om boros ka di Yesus do suminimbar, “Raago' pogi' dokoyu iti Walai'dti, om tolu nopo moti' o tadau nga' owonsoi ku no kawagu,” ka dau. 20 Om boros kaddi diyolo', “Apat i' nohopod om onom o toun do koloido' do minomonsoi diti Walai'd Sasambayangan dot Agayo, om tolu no daa'ndo tadau nu iya' do momonsoi'dti?” ka. 21 Nga' iri nopo Walai'd Sasambayangan dot Agayo do komoyon di Yesus om iri i tinan dau. 22 Om id tohuri noddi di napasi kawagu i Yesus do mantad id kapatayon, om kahandamai nogi' di tumatanud dau do nokoboros i Yesus do miagal diri. Om ponongkuyaai noddi iyolo' di nokotulis dot id suang do Buuk do Kinorohingan om i pinoboros di Yesus do miagal diri.
Koilo i Yesus do Kowoyo-woyoo' do Tulun
23 Nopo di hilo' i Yesus id Yorusalim di maso do Tadau'd Agayo do Paska om ogumu' o tulun do notumbayaan dau do nokokito di piro-piro o koimayaan do winonsoi dau. 24 Nga' a' i' i Yesus monongkuyaan diyolo', tu' koilo i' iyau do kowoyo-woyoo' do koinsanai'd tulun. 25 A' i' minog do haro o tulun do momisunud dau do pasal dot isai nopo, tu' koilo i' iyau dit id suang do ginawo'd tulun.
I Yesus om i Nikodimus
1 Haro o tiso' o boyoon do tulun do Yohudi dit id suang do sinompuruan do tulun do Parisi dot i Nikodimus o ngaran. 2 Insan o totuong om rikot no iyau dot id di Yesus, om boro-boros nod, “Guru, oilaan i' dahai do sinuhu' ko'd Kinorohingan. Tu' iso' pod tulun nga' aiso' i' o milo do momonsoi'd koimayaan do miagal di winonsoi nu, ondung a' o Kinorohingan moyo-woyo' dau,” ka dau. 3 Om boros ka di Yesus do suminimbar, “Ponongkuyaai no, dot aiso' i' o tiso'd tulun do kokito di Pomorintaan do Kinorohingan, dot a' po iyau apaganak kawagu,” ka dau. 4 Om boros ka di Nikodimus dot id di Yesus, “Milo po toi do paganakon kawagu o tulun di nokolohing. Milo po tuu iyau do gumuli' kawagu do hiri'd paganakan di tina' dau om pogkosusuon indo kawagu?” ka. 5 Om boros ka di Yesus do suminimbar, “Otopot i' kopio iti poboroson ku'dti dot: Ondung a' o tulun apaganak kawagu dot id suang do waig om id suang do Rusod do Kinorohingan, om a' i' kosuang di Pomorintaan do Kinorohingan. 6 Tumanud nopo do kowoyo-woyoo' do don tulun om paganakon i' i tulun diri di molohing dau, nga' tumanud no do kowoyo-woyoo' do don rusod om paganakon o tulun di Rusod do Kinorohingan. 7 Om kada' kosuayai do poboroson ku piya dot: apatut i' kopio dot apaganak kawagu ngai' kou. 8 Iri nopo ribut om tumongus nopo do hinonggo nopo o korohian dau; orongou toko' no i kohus di ribut nga' a' toko' i' oilaan ondung hinonggo o tadon om ondung hinonggo o pakayaan. Om iyo nogiddi i tulun dit apaganak do Rusod do Kinorohingan,” ka dau. 9 Om poguhot no i Nikodimus, “Poingkuro dot osiliu o miagal diri?” ka dau. 10 Om boros ka di Yesus do suminimbar, “Dot a' ko i' koilo om guru ko i' do hiti'd Israil? 11 Ponongkuyaai no: do poboroson nopo dahai om iri no i toilaan dahai, om i pososion dahai nga' iri no i nokito kopio dahai, nga' a' kou i' monongkuyaan di pinoboros dahai. 12 A' kou i' monongkuyaan di susuyan ku iyokoyu do pasal do kowoyo-woyoo' do hiti'd pomogunan om poingkuro kopio kou nogindo daa do monongkuyaan do susuyan ku daa iyokoyu di kowoyo-woyoo' do pasal do surga? 13 Aiso' i' o tiso' piya'd tulun do nokoinsawat do hilo'd surga, do suwai ko' iyau i luminintuhun do hiti'd pomogunan, iri no i Tanak do Tulun. 14 Om poingkuro nopo i Musa do pinopoinsawat di tulanut do tambaga' di pinorilit do kayu di pinoodsuk do hilo'd tana' do kowotuan, om iyo nogindoddi o Tanak do Tulun do poinsawaton. 15 Om kaanu indo do koposion dit otopot kopio om i poingompus o pointikid-tikid do tulun di monongkuyaan dau,” ka dau. 16 Tu' nosianan no kopio o Kinorohingan do tulun do hiti'd pomogunan, gisom do pinatahak dau i Tanak dau dit iso-iso', om pointikid-tikid do tulun di monongkuyaan dau om amu' no apatai, suwai ko' kaanu do koposion dit otopot kopio om i poingompus. 17 Tu' kinoporikatan nopod Kinorohingan di Tanak dau om okon i' ko' mongoi pomohukum diti pomogunan, suwai ko' mongoi pamasi. 18 Iri nopo tulun di monongkuyaan dau om a' no ohukuman. Nga' iri nopondo tulun dit a' monongkuyaan, om nohukuman nod Kinorohingan, tu' a' i' iyau monongkuyaan di Tanak do Kinorohingan dit iso-iso'. 19 Om iti nondo o kopomohukuman dau do tulun. Nokorikot no i tanawau do hiti'd pomogunan, nga' orohian nogi' o tulun do totuong ko' mantad di tanawau, tu' araat i' i pingwonsoyon diyolo'. 20 Pointikid-tikid do tulun dit araat o wonsoyon, om araatan no di tanawau, om a' iyau orohian do rumikot do hiri'd tanawau, tu' mada' i' iyau dot okito i wonsoyon dau dot araat. 21 Nga' iri nopo tulun di momonsoi'd korohian do Kinorohingan, om rumikot i' dot id tanawau, om kointalang indo do miontok di korohian do Kinorohingan i winonsoi dau.
I Yesus om i Yohanis Gampamatis
22 Om ongoi noddi i Yesus om i tumatanud dau do hilo'd Yudia. Om hilo' noddi iyau do poundorong do poinsugku' diyolo' do piro-piro o koloido', om minamatis iyau'd tulun. 23-24 Tontok nopoddi om a' po nokogiil i Yohanis. Om minamatis iyau'd tulun do hilo'd Ainon, it a' i' osodu' no do mantad hilo'd Salim, tu' osima' id waig o hilo'. Om somirikot noddi o tulun dot id dau, om botisai no dau iyolo'. 25 Om haro'ddi o piro-piro di tumatanud di Yohanis do minonokisongkiwal di tulun do Yohudi do pasal di toturan do momolidang do tinan. 26 Om rikot no iyolo' dot id di Yohanis om boro-boros nod, “Guru, osorou nu po i tulun di nokowoyo' diya' do hilo'd soborong di Bawang do Yordan diri, i pinotuduk nu dot id dahai di guulu? Mamatis no moti'ddi iyau, om oinsanan nopo o tulun do rumikot dot id dau!” ka diyolo'. 27 Om boros ka di Yohanis do suminimbar, “Aiso' i' ot osiliu do miagal diti dot id disai nopo o tulun ondung a' do Kinorohingan wonsoyon o miagal diri. 28 Om iyokoyu nga' nokorongou i' doho' do minomoros dot, ‘Okon oku i' ko' i Raja' do Gampamasi, sinuhu' oku nod mogulu dau,’ kangku. 29 Iri nopo tondu' di kowinon om iri no i kusai di mangawin o sanganu. Iri nopo i tambalut di kusai do kumawin diri, om poingkakat no toomod do mongoruhang om mokinongou, om orohian iyau do korongou do boros di kusai di kumawin. Om iyoho' nga' iyo nogiddi. Dinondo nopo om osonong noddi kopio o ginawo ku. 30 Om iyau no ot apatut do gumumu' o tulun do tumanud, om kumuri' piya'ndo tulun do tumanud doho',” ka dau.
Iyau i Mantad Hilo'd Surga
31 Iri nopo i mantad hilo'd sawat om agayo no ko' mantad do koinsanai'd tulun. Iri nopo i mantad hiti'd pomogunan om poinghompit no do tulun do pomogunan, om mimboros do pasal dit osiliu do hiti'd pomogunan. Nga' iri nopo i mantad hilo'd sawat om agayo no ko' mantad do koinsanai'd tulun. 32 Om popinsusui iyau di nongokito om i nongorongou dau, nga' iso' pod tulun nga' aiso' i' o monongkuyaan di popinsusuyon dau. 33 Iri nopo tulun di monongkuyaan di pinosusui dau, om monongkuyaan no dot otopot o Kinorohingan. 34 Tu' iri nopo tulun di sinuhu' do Kinorohingan om popolombus no do boros do Kinorohingan, tu' nakatahak ngai' no i Rusod do Kinorohingan dot id dau. 35 Osianan i' i Tapa' di Tanak dau om pinatahak ngai' dau i kuasa' dau dot id Tanak dau'ddi. 36 Om iri nopondo tulun di monongkuyaan di Tanak diri om kaanu no do koposion dit otopot kopio om i poingompus. Nga' iri nopondo tulun dit a' mumboyo' di Tanak diri om a' no kaanu do koposion. Om hukuman no iyau'd Kinorohingan do gisom do poingompus.
I Yesus om i Tondu' do Samaria
1 Om korongou noddi i tulun do Parisi dot ogumu-gumu' o tulun di nosiliu'd tumatanud di Yesus om ogumu' o nobotisan dau ko' mantad di Yohanis. 2 (Nga' otopot nopo kopio om a' i' i Yesus minamatis, tu' iri no i tumatanud dau o minamatis.) 3 Om soira'ddi noilaan di Yesus do nokorongou i tulun do Parisi do pasal diri, om tongkiad no iyau do mantad hilo'd Yudia om poguliai no dau do hilo'd Galilia. 4 Om tontok di pakayaan dau do hilo' om a' no milo dot a' iyau kawaya' do hilo'd Samaria. 5 Om korikot noddi i Yesus dot id iso' o bandar do hilo'd Samaria di roitan do Sikar, it a' i' osodu' no do mantad id tana' di pinatahak di Yakub dot id di Yusup, i tanak dau, di gulu po. 6 Om hilo' no i torobong di Yakub. Om ohuyan tomod diri i Yesus do minamanau, om irikau no iyau do hiri'd tisan di torobong. Om tontok nopoddi nga' jam kohopod om duwo no doti' do pitangaadau. 7-8 Om nokoongoi no i tumatanud di Yesus do hiri'd bandar do minongoi boli do taakanon. Om korikot noddi o songulun o tondu' do Samaria do mongoi sago'. Om boros ka di Yesus dot id dau, “Poinumo' oku daa,” ka. 9 Om boros ka di tondu' do Samaria do suminimbar, “Iya' nopo oi Tuan, om bansa'd Yohudi, om iyoho' no om bansa'd Samaria; om nokuro tu' mokiinum ko doho'?” ka dau. (Tu' bansa' nopod Yohudi om a' i' kopio mongoi ponongkokuro-kuro do bansa'd Samaria.) 10 Om boros ka di Yesus do suminimbar, “Ondung koilo ko daa di nipuhawang do Kinorohingan om ondung isai i mokiinum diya', om atantu' no dot iya' daa o mokiinum dau, om oonuan ko indo dau di waig do kapasi,” ka dau. 11 Om boros ka di tondu', “Aiso' i' o ponimbauk nu'ndo oi Tuan, om aralom i' moti' kopio iti torobong diti. Nga' honggo o ngayan nu'd waig di kapasi, oi Tuan? 12 I Yakub i', i taki-aki dahai o minanahak dahai diti torobong. Om hiti i' o nangayan dau di waig dot inumon dau; om i tangaanak om i tayam-tayam dau nga' hiti i' o ninuman. Om sorohon nu daa'ddi dot agayo ko iya' ko' i Yakub?” ka di tondu'. 13 Om boros ka di Yesus, “Iri nopo tulun di monginum do waig diti om tuuhan i' kawagu, 14 nga' iri nopondo tulun di koinum do waig di patahakon ku, om a' no koumbal kawagu do tuuhan do gisom dot alaid. Tu' iri nopondo waig di patahakon ku dau om sumiliu nondo do miagal do tudan do waig dot id suang dau om sumimpulak do sumoliwan om manahak dau iri do koposion dit otopot kopio om i poingompus,” ka dau. 15 Om boros ka di tondu'ddi, “Tuan, onuwai oku daa do waig dino, om a' oku i' tuuhan kawagu; om a' oku minog do gumuli'd hiti do mongoi sago',” ka dau. 16 Om boros ka di Yesus, “Ngoyo' po lohowo' i sawo nu, om gumuli' nogindo'd hiti,” ka dau. 17 Om boros kaddi di tondu' do suminimbar, “Aiso' i' o sawo ku,” ka dau. Om boros ka di Yesus, “Otopot i' ino boros nu dot aiso' o sawo nu. 18 Tu' inglimo ko no kakawin, om iri nopo kusai di poinsugku' diya' do dinondo om okon i' ko' sawo nu,” ka dau. 19 Om boros kaddi di tondu', “Oilaan ku noddi do nabi ko, oi Tuan. 20 Iri nopo i komolohingan dahai om hiti id nulu-nulu'dti o tiyonon do sumambayang dot id Kinorohingan, nga' boros ka di bansa' nu om hilo' nod Yorusalim o tiyonon do tulun do sumambayang dot id Kinorohingan,” ka dau. 21 Om boros ka di Yesus dot id dau, “Ponongkuyaai no, do rumikot indo o maso do sumambayang o tulun dot id Tapa', dot okon nondo ko' hiti'd nulu- nulu'dti om okon ko' hilo'd Yorusalim. 22 Iyokoyu nopo i bansa'd Samaria om a' i' kotutun di sambayangan dokoyu, nga' iyahai nopo i bansa'd Yohudi om kotutun i' di sambayangan dahai, tu' iri i bansa'd Yohudi o milo do popoilo do ralan do Kinorohingan do mamasi'd tulun. 23 Nga' rumikot indo o maso, om otopot nopo kopio om nokorikot no, do sumambayang nondo o tulun dot id Tapa' do woyoon di Rusod do Kinorohingan, om otutunan kopio diyolo' do Kinorohingan iyau dit otopot, do miagal di korohian do Tapa'. 24 Tu' Kinorohingan nopo om Rusod i', om isai nopo i sumambayang dot id Kinorohingan om mositi' nod woyoon di Rusod do sumambayang dot id dau do tumanud dit otopot,” ka dau. 25 Om boros kaddi di tondu'ddi dot id di Yesus, “Koilo oku i' do rumikot nondo i Raja' do Gampamasi (i roitan do Kristus). Om korikot nopondo iyau, om momisunud nondo iyau dati' do koinsanai'd nunu nopo,” ka dau. 26 Om boros ka di Yesus, “Iyoho' nogi' bo iyau'ddi, iyoho' i moro-boros diya' do dinondo,” ka dau. 27 Om koguli' noddi i tumatanud di Yesus. Om osuayan tomod daa iyolo' do nokokito di Yesus do monokiboro-boros do tondu'. Nga' aiso' i' o tiso' diyolo' do minonguhot di tondu' dot, “Nunu daa o pokionuon nu oi inan?” ka, ko' minonguhot po di Yesus do, “Nokuro tu' monokiboro-boros ko di tondu'ddi, oi Guru?” ka. 28 Om tongkiadai nopo di tondu'ddi i kakanan dau'd hiri, om panangkus no iyau do minongoi'd hiri'd bandar, om boro-boros no iyau di tulun do hiri. 29 Boros ka dau, “Kainou mongoi solowot di tulun di minomisunud doho' do koinsanai'ddi nongowonsoi ku. Om okon tuu ko' iyau nogi' i Raja' do Gampamasi'ddi?” ka dau. 30 Om tongkiadai ngai' nopoddi di tulun i bandar om ongoi no iyolo' solowot di Yesus. 31 Om daamot nopoddi om angatai no di tumatanud di Yesus, i Yesus do minakan. Boros ka diyolo', “Guru, akan,” ka. 32 Nga' boros ka di Yesus do suminimbar, “Haro i' o takanon ku dit a' dokoyu oilaan,” ka. 33 Om timpuun noddi i tumatanud dau do minogiuhot-uhot. Boros ka diyolo', “Haro tuu o tulun do minongoi dau paatod do taakanon?” ka. 34 Om boros kaddi di Yesus, “Taakanon ku nopo om i tumanud do korohian di minonuhu' doho', om momongo di karaja' di pinatahak dau dot id doho'. 35 Boros ka daa dokoyu om, ‘Apat po tulan om mongomot no!’ ka. Nga' monuhu' oku no dokoyu do montong dilo koumaan, tu' nongoonsok no ilo tua' dilo songintanom, om osuhatan nod tomoton! 36 Iri nopo tulun di mongomot om kaanu i' dot isomuli', om momoyo' do tulun do rumikot dot id koposion dit otopot kopio om i poingompus. Om iyo noddi dot otood goduwo i tulun di minananom om i tulun di mongomot. 37 Om otopot no kopio o komoyon do boros di poingkaa, ‘Suwai o tulun do mananom, om suwai o tulun do mongomot,’ ka. 38 Suhuon ku iyokoyu do mongoi pongomot do hilo'd tumo dit okon ko' iyokoyu o minananom; nakakaraja' no o tulun do suwai'd hilo', om iyokoyu nopo om mongoi po panganu di hasil di karaja' diyolo',” ka di Yesus. 39 Om ogumu'ddi o tulun do Samaria do mantad id bandar diri do notumbayaan di Yesus, tu' minomoros i' i tondu' dot, “Poboroso' ngai' nopo dau dot id doho' i nongoumbalan ku'd momonsoi,” ka. 40 Om tontok di nokosolowot di Yesus i tulun do Samaria, om sansagai no tomod diyolo' i Yesus do mundorong do hiri'd kinoiyonon diyolo'. Om undorong poddi i Yesus do hiri do solinaid do duwo o tadau. 41 Om koruhangai poddi o ginumu' do tulun di notumbayaan di Yesus do nokorongou iyolo' di ponudukan dau. 42 Om boros ka diyolo' dot id tondu'ddi, “Monongkuyaan noddi kopio iyahai, nga' okon no ko' i pinoboros nu dot id dahai o nokoponongkuyaan dahai, nga' iyahai'ddi kopio o nokorongou dau, om koilo iyahai dot iyau no kopio o Gampamasi do tulun do hiti'd pomogunan,” ka diyolo'.
Minomolingos i Yesus do Tanak do Pagawai
43 Om katalib poddi o duwo o tadau do poundorong i Yesus do hilo'd Sikar, om ongoi no iyau do hilo'd Galilia. 44 Om nokoboros i' i Yesus do poingkaa, “Nabi nopo om a' i' pusohon dot id pomogunan dau,” ka. 45 Nga' di nopo di nokorikot iyau do hilo'd Galilia, om ongosonong tomod i' o ginawo di tulun do hilo' do suminuwau dau, tu' hilo' i' iyolo'd Yorusalim do tontok di Tadau'd Agayo do Paska, om nongkokito ngai' iyolo' di winonsoi di Yesus do hilo'. 46 Om guli' noddi i Yesus do hilo'd Kana, i hilo'd Galilia, i pinamansayan dau do waig dot anggur dot i waig toomod o winonsoi. Om hiri nopod bandar diri nga' haro o songulun o pagawai do pomorinta' di maso'd sumakit o tanak do hilo'd Kapornaum. 47 Om soira'ddi nokorongou iyau do nokorikot i Yesus do hilo'd Galilia do mantad hilo'd Yudia, om ongoi no iyau solowot di Yesus om angatai no dau i Yesus do mongoi'd hilo'd Kapornaum do mongoi pomolingos di tanak dau di motingkapatai no. 48 Om boros ka di Yesus dot id pagawai do pomorinta'ddi, “Ondung a' kou kokito do koimayaan om a' kou i' otumbayaan,” ka. 49 Om boros ka di pagawai do pomorinta', “Tuan, kaino kopio, dot a' po apatai i tanak ku,” ka dau. 50 Om boros ka di Yesus dot id dau, “Pamanau no, tu' nolingasan no i tanak nu,” ka. Om ponongkuyaai nopo i tulun diri di boros di Yesus, om pamanau no iyau. 51 Om hiri noddi iyau'd tanga'd ralan om korikot no i susuhuon dau do minongoi pomisunud dau do, “Nolingasan no i tanak nu, oi Tuan,” ka diyolo'. 52 Om uhoto' noddi dau iyolo' ondung jam kopiro do nolingasan i tanak dau. Om boros ka diyolo', “Di jam koiso' doti'ddi di konihab do notingkod i sogiton dau,” ka. 53 Om kosorou noddi di tapa' di tanak diri do tontok noddi do minomoros i Yesus dot id dau do, “Nolingasan no i tanak nu,” ka. Om kotumbayaai noddi iyau di Yesus om i sompiiyon dau nga' koinsanai nopo do notumbayaan di Yesus. 54 Iri no o koimayaan di koduwo do winonsoi di Yesus do hilo'd Galilia di nokoguli' iyau do mantad hilo'd Yudia.
Minomolingos i Yesus do Tulun di Kitoruol do Hilo'd Kulam do Baitisda
1 Om id tohuri noddi ko' iri om haro o tadau'd agayo do tulun do Yohudi, om ongoi noddi i Yesus do hilo'd Yorusalim. 2 Hilo' nopod Yorusalim om haro o tiso' o kulam dit id somok di wawayaan di roitan do “Wawayaan do Dumba'”, i pinungaranan do Baitisda dot id suang do boros dot Ibrani. Om hiri nopoddi nga' haro o limo nokoiyonon do tinaapan. 3 Om hiri nopod tinaapan diri nga' ogumu' o tulun do sumakit do songillii; haro o bolou, om haro o kimpo', om haro it a' koundaliu. Om mandad ngai' nopo iyolo' do lingguon i waig. 4 Tu' haro i' o maso do lumintuhun o moloikat do Tuhan dot id kulam diri do mongoi pomolinggu' di waig. Om iri nopondo tulun di sumakit di kopogulu do tumabung do hiri'd kulam di ngoyon lingguo' i waig om olingasan no do mantad id nunu nopo o toruol dau. 5 Om hiri nopod kinoiyonon diri nga' haro o kusai di tolu no nohopod om walu' o toun do sumakit. 6 Om kokito no di Yesus i tulun diri do poinglii do hiri, om oilaan no dau do laid no kopio'd sumakit i tulun diri. Om uhoto' noddi di Yesus i tulun diri, “Orohian ko i' dot olingasan?” ka dau. 7 Om boros ka di tulun do sumakit diri do suminimbar, “Tuan, aiso' i' o tulun do hiti do mongoi patabung doho' do hilo'd kulam do tontok di ngoyon lingguo' ilo waig. Om daamot ku pondo do mongoi'd hilo'd kulam, om osoguluanan oku nod tulun do suwai,” ka dau. 8 Om boros kaddi di Yesus dot id dau, “Tungag no, om igitan i' ino galam nu om mamanau nondo,” ka dau. 9 Om diiri iddi om diiri do nolingasan i tulun diri. Om saano' nopo dau i galam dau om pamanau no. Nga' tadau nopoddi om tadau'd Sabat. 10 Om iri noddi o nokoboro-boros di piro-piro boyoon do tulun do Yohudi dot id tulun di kolilingasai'ddi do, “Baino' nopo moti' om tadau'd Sabat. Om pogoduhan i' di Tourat toko' do manaan dino galam nu,” ka diyolo'. 11 Nga' boros ka di tulun diri, “Iri tulun di minomolingos doho' di tiinu' o minonuhu' doho' do manaan diti galam ku om minonuhu' doho'd mamanau,” ka dau. 12 Om ponguhot po iyolo' dau, “Isai i minonuhu' diya' do manaan dino galam nu om i minonuhu' diya'd mamanau?” ka. 13 Nga' a' no i tulun di nolingasan diri nokoilo ondung isai i tulun di minonuhu' dau do momonsoi'd miagal diri, tu' nokorolot no i Yesus di tulun dot ogumu'. 14 Om kosolowot noddi di Yesus i tulun diri do hiri'd suang di Walai'd Sasambayangan dot Agayo, om boro-boros no iyau dau do poingkaa, “Nolingasan ko noddi. Om kada' nondo pomonsoi kawagu'd dusa, om a' ko i' oontok dit araat ko iri,” ka dau. 15 Om pamanau no i tulun diri om ngoyo' no dau sunudai i piro-piro boyoon do bansa'd Yohudi dot i Yesus o minomolingos dau. 16 Om iri noddi o kinoimpuunon di tulun do Parisi do monusa' di Yesus tu' minomolingos i' iyau'd tulun do tontok do tadau'd Sabat. 17 Nga' boros ka di Yesus dot id diyolo', “Kumaraja' kasai' i' i Tapa' ku do gisom do dinondo, om iyoho' nga' kumaraja' i',” ka dau. 18 Om iri no boros di Yesus do miagal diri o nokobinsuhu' kawagu di piro-piro boyoon do Yohudi do mogihum do ralan do mamatai dau. Om iyo pogi' iyolo'ddi nga' okon nopo ko' i nokotolibamban i Yesus di toturan do tugama' do pasal do tadau'd Sabat o kokuwaan nga' iri po nokoboros iyau do Tapa' dau o Kinorohingan; tu' komoyon nopoddi nga' miyo iyau do Kinorohingan.
Kuasa' di Tanak do Kinorohingan
19 Om boros kaddi di Yesus do suminimbar di tulun diri, “Ponongkuyaai kou no, dot a' i' i Tanak milo do mimpori-pori do momonsoi'd nunu nopo. Iri no it okito dau do wonsoyon di Tapa' dau o wonsoyon dau. Tu' nunu nopo i wonsoyon di Tapa', om iri no i wonsoyon di Tanak. 20 Tu' osianan i' i Tapa' om potudukon dau dot id Tanak o koinsanai di wonsoyon dau. Om potudukon po di Tapa' dot id Tanak o piro-piro o wonsoyon dit agayo ko' iri, om gisom dot ongosuayan ngai' kou nondo. 21 Iri nopo Tapa' om mamasi i' do tulun di napatai, om manahak diyolo'd koposion dit otopot kopio om i poingompus; om iri nogi' i Tanak nga' manahak i' do koposion dit otopot kopio om i poingompus dot id tulun di korohian dau do manahak do koposion. 22 Iri nopo Tapa' om a' i' momutus dot isai nopo o tulun. Tu' nakatahak ngai' no dau dot id Tanak dau i kuasa' do momutus. 23 Om winonsoi pogi' di Tapa' o miagal diri nga' monuhu' iyau'd koinsanai'd tulun do momusou di Tanak diri do miagal do pomumusou diyolo' di Tapa'. Iri nopo tulun dit a' momusou di Tanak om a' no momusou di Tapa', i minonuhu' di Tanak diri. 24 Otopot no kopio iti poboroson ku do poingkaa: Tulun nopo di mokinongou'd boros ku, om monongkuyaan no di minonuhu' doho', om kaanu no do koposion dit otopot kopio om i poingompus. Om a' no iyau ohukuman; tu' nokoidu' no iyau do mantad id kapatayon om nakaanu no do koposion. 25 Ponongkuyaai kou no: Rumikot indo o maso, om otopot nopo kopio om nokorikot no, do korongou nondo i tulun do napatai di boros do Tanak do Kinorohingan. Om iri nopondo tulun di korongou dau om apasi no. 26 Om poingkuro nopo i Tapa' do tudan do koposion, om i Tanak dau nga' silihon nogi' dau do tudan do koposion. 27 Om noonuan no dau i Tanak dau do kuasa' do momutus, tu' iyau no i Tanak do Tulun. 28 Kada' kou kosuayai do korongou'dti tu' rumikot indo o maso do korongou ngai' do boros dau i tulun di nangapatai. 29 Om sumoliwan nondo iyolo' do mantad hiri'd lobong. Om iri nopondo tulun dit osonong o winonsoi om apasi indo do kumaa dot id koposion. Nga' iri nopo tulun di minomonsoi'd araat om apasi nondo do kumaa dot id hukuman,” ka di Yesus.
I Popointalang Kopio do Pasal di Yesus
30 Om boros ka kawagu di Yesus, “A' oku i' milo do momonsoi'd nunu nopo do tumanud do doho'd korohian. Pomumutus ku nopo om tumanud no di ponuhuan do Kinorohingan. Om otulid i' o pomumutus ku tu' a' oku i' tumanud do doho'd korohian, suwai ko' i korohian di Tapa' ku, i minonuhu' doho', o tonudon ku. 31 Ondung iyoho' o popoboros do pasal doho', om a' i' doti' milo do ponongkuyaan i poboroson ku. 32 Nga' haro i' o tulun do suwai do pinopoboros do pasal doho', om oilaan ku i' dot otopot i pinoboros dau. 33 Nokoponuhu' kou nod tulun do minongoi ponguhot di Yohanis, om nokoposunud no iyau dit otopot do pasal doho'. 34 Om kapabarasan ku nopo do miagal diti om okon i' ko' sumondiu oku'd boros do mantad id tulun di popoboros di toilaan diyolo' do pasal doho', suwai ko' iyokoyu o pokipoposian ku. 35 I Yohanis nopoddi om miagal di lampung di kiapui om i popotitiu do tulinau. Om orohian kou i' do rumamit do daamot di boros dau'ddi, i miagal do tanawau. 36 Nga' iri nopo doho'd poboroson om agayo po ko' i pinoboros di Yohanis. Om iti nopo wonsoyon ku'd dinondo, iti karaja' di pinonuhuan doho' di Tapa' ku do momonsoi, om popointalang nogi' kopio dot i Tapa' o minonuhu' doho'. 37 Om i Tapa', i minonuhu' doho' nga' pinopoboros i' do pasal doho'. Iyokoyu nopo om a' i' nokoumbal do nokorongou'd boros dau ko' nokokito po do rabas dau. 38 Om a' i' poingopi' dot id suang do ginawo dokoyu i boros dau, tu' a' kou i' monongkuyaan doho', i sinuhu' dau. 39 Om minsingilo kou pogi' di nokotulis do hiri'd Buuk do Kinorohingan nga' momusorou kou dot iri o kaanu-anu dokoyu'd koposion dit otopot kopio om i poingompus. Om iri Buuk do Kinorohingan nga' pinopoboros i' do pasal doho'. 40 Nga' a' kou iddi rumikot dot id doho' om kaanu i' do koposion dit otopot kopio om i poingompus. 41 A' oku i' mogihum do karayahan do mantad id tulun. 42 Tu' otutunan ku i' iyokoyu om oilaan ku i' dot a' kou osianan do Kinorohingan dot id suang do ginawo dokoyu. 43 Ruminikot oku do mikuwo'd kuasa' di Tapa' ku, nga' a' kou i' ruminamit doho'. Nga' tulun nopondod suwai di rumikot do mikuwo'd dau'd kuasa' om romiton i' dokoyu. 44 Poingkuro kou'ndo do milo'd monongkuyaan, ondung mogihum kou nod karayahan do mantad id sompi' ko' tulun, om a' nogindo tumotos do mogihum do karayahan do mantad id Kinorohingan dit Iso-Iso'? 45 Kada' dokoyu soroho' dot iyoho' o papasala' dokoyu dot id toguang do Tapa'. Tu' iri nopo papasala' dokoyu om i Musa, i sondihon dokoyu. 46 Ondung monongkuyaan kou daa di Musa, om monongkuyaan kou no daa doho', tu' pasal i' doho' i tinulis dau. 47 Nga' ondung a' kou monongkuyaan di tinulis di Musa, om poingkuro kou nogi' daa'ndo do monongkuyaan di poboroson ku?” ka di Yesus.
Pinapaakan i Yesus do Limo Noribu Tulun
1 Om piro-piro noddi o koloido' do mantad diri om ongoi no i Yesus do hiri'd soborong di Tasik Galilia, i roitan nogi' do Tasik Tiborias. 2 Om di nopo nokorikot iyau'd hilo', om ogumu' tomod diri o tulun do tuminanud dau tu' nokokito iyolo' di kongoimayaan di winonsoi dau do tontok di minomolingos iyau do piro-piro o tulun di kitoruol. 3 Om takad no i Yesus dot iso' o nulu-nulu, om irikau no iyau'd hiri do mogiwoyo-woyo' di tumatanud dau. 4 Om tontok nopoddi nga' oruhai nod Tadau'd Agayo do Paska do tulun do Yohudi. 5 Om ontong no i Yesus do hiri'd posorili' dau, om kokito no dau o tulun dot ogumu' kopio do rumikot dot id dau. Om boros ka dau dot id di Pilipus, “Honggo o ngoyon toko' boliai do taakanon, om kaakan ngai' i' iti tulun?” ka dau. 6 (Oilaan i' di Yesus it apatut dau'd wonsoyon, nga' nakapamarasan nopo dau do miagal diri om mogumbal i' iyau toomod di Pilipus.) 7 Om boros ka di Pilipus do suminimbar, “Gatang piya'd duwo nahatus o tusin do pirok do roti nga' a' i' kabagal do paakan diti tulun dot ogumu'dti do sarakarayan piya daa,” ka dau. 8 Om haro'ddi o tiso' di tumatanud di Yesus do suwai, dot i Andarias o ngaran, i tobpinai di Simun Pitrus, do minoro-boros, 9 “Haro i' o tanak do kusai'd hiti do kikokoriu do limo roti barli om duwo o sada'. Nga' nunu noo o toontok-ontok diti dot irad diti kogumu' o tulun?” ka dau. 10 Om boros ka di Yesus, “Suhuo' ngai' ilo tulun do mirikau,” ka. Hiri nopod kinoiyonon diri nga' kobuturan, om irikau noddi i tulun do hiri'd sakot --- om oinsanan nopo nga' haro i' doti' o limo noribu o tulun do tongokusai nogi'. 11 Om ngoyo' noddi di Yesus i roti, om pongunsikou no iyau'd Kinorohingan. Om potikido' nogiddi dau di tulun dot ogumu' i roti'ddi. Om potikido' no dau i sada', om akan ngai' noddi iyolo' do gisom do nangayahan. 12 Om kangaakan ngai' poddi iyolo' do gisom do nangayahan, om boro-boros no i Yesus di tumatanud dau. Boros ka dau, “Ngoyo' dokoyu timungo' i noolu' di taakanon diri, om kada' dokoyu pologoso' do haro o kataam,” ka dau. 13 Om kotimung noddi diyolo' iri, om hopod po om duwo balatak do noponu' do noolu' di taakanon do mantad di limo roti barli do nakan di tulun dot ogumu'. 14 Om kokito poddi di tulun dot ogumu' i koimayaan di winonsoi di Yesus diri, om boros ka diyolo', “Otopot no kopio, dot iti Nabi dit andad-andadon do rumikot do hiti'd pomogunan!” ka. 15 Om oilaan i' di Yesus do mongoi daa pononsog dau do sumiliu'd raja' diyolo' o kinorikatan di tulun dot ogumu'ddi. Om ongoi noddi iyau do hiri'd konulu-nuluan dot iso-iso' iyau.
Minamanau i Yesus do Hiri'd Soibau do Waig
16 Tontok di sumodop noddi, om ongoi no i tumatanud di Yesus do hiri'd tasik. 17 Om sakai no iyolo'd parau' do suminoborong di tasik do pakayaan do hilo'd Kapornaum. Om otuong noddi, nga' a' po i Yesus nokorikot dot id diyolo'. 18 Om timpuun noddi do gumayo o tumbak do hiri'd tasik tu' opuhod tomod o tongus. 19 Om tontok di haro no doti' o limo ko' onom o kilomito do kosoduwo' diyolo' do mantad hiri'd tisan, om kokito no diyolo' i Yesus do kumaa do ponong hiri'd parau' diyolo' do manau-panau do hiri'd soibau di waig. Om moddosi tomod diri iyolo'. 20 Nga' boros ka di Yesus dot id diyolo', “Kada' kou poddosi, iyoho' i' iti!” ka dau. 21 Om osonong nopoddi o ginawo diyolo' do pinapasakai dau do hiri'd parau', om diiri iddi om diiri do nokorikot i parau' diyolo' do hiri'd ngoyon diyolo'.
Minogihum di Yesus i Tulun dit Ogumu'
22 Tadau noddi kawagu om koilaai no di tulun dot ogumu', i hiri pod soborong di tasik, dot iso' noo o parau' do hiri di konihabon po. Om oilaan i' diyolo' do nakapamanau no i tumatanud di Yesus do suminakai di parau', nga' i Yesus nopo om a' i' tuminanud diyolo'. 23 Om korikot noddi o piro-piro o parau' do mantad hilo'd bandar do Tiborias do minongoi dampir do hiri'd toning di pinangakanan di tulun dot ogumu' di roti di nokopongunsikou i Tuhan. 24 Om koilaai nopoddi di tulun dot ogumu' dot okon no ko' hiri i Yesus om i tumatanud dau, om sakai no iyolo' di piro-piro o parau'ddi om ongoi no iyolo' do hilo'd Kapornaum do minongoi pogihum di Yesus.
I Yesus no i Roti di Manahak do Koposion
25 Om kosolowot poddi di tulun dot ogumu'ddi i Yesus do hiri'd soborong di tasik, om uhoto' no diyolo' iyau, “Guru, soira' ko po korikot do hiti?” ka. 26 Om boros ka di Yesus do suminimbar, “Otopot nopo kopio, om kopogihuman nopo dokoyu doho' om okon i' ko' i nokosuhut kou do komoyon di piro-piro o koimayaan do winonsoi ku, nga' iri no i nayahan kou do nakaakan di roti. 27 Nga' kada' kou karaja' do kakarajaan nopo om mogihum nod taakanon di milo'd mayi' om munos. Nga' karaja' kou nogi' do mogihum do taakanon dit a' milo'd mayi' om it a' munos, om i manahak do koposion dit otopot kopio om i poingompus. Om patahakon indo di Tanak do Tulun i taakanon diri dot id dokoyu, tu' nokointalang no do nopili' no iyau'd Kinorohingan Tapa',” ka dau. 28 Om uhoto' noddi diyolo' i Yesus, “Nunu ot apatut dahai'd wonsoyon om owonsoi i' i korohian do Kinorohingan?” ka. 29 Om boros ka di Yesus, “Poingkaa o korohian do Kinorohingan do wonsoyon dokoyu: Kotumbayaai kou no dau, i sinuhu' do Kinorohingan,” ka. 30 Om boros ka diyolo', “Iyo nopoddi, om nunu o popointalang kopio di milo nu'd pointalangon om kokito i' iyahai om otumbayaan indo iyahai diya'? Nunu nondo o wonsoyon nu? 31 Iri nopo komolohingan dahai om minangakan do manna do hilo'd tana' do kowotuan, do miagal di nokotulis dot id Buuk do Kinorohingan do poingkaa, ‘Pinaakan dau iyolo'd roti do mantad hilo'd surga,’ ka,” ka diyolo'. 32 Om boros kaddi di Yesus dot id diyolo', “Ponongkuyaai kou no; okon i' ko' i Musa, suwai ko' i Tapa' ku o manahak dokoyu do roti dit otopot kopio do mantad hilo'd surga. 33 Tu' iri nopo roti do patahakon do Kinorohingan om iyau i luminintuhun do mantad hilo'd surga om i manahak do koposion dot id tulun do hiti'd pomogunan,” ka dau. 34 Om boros ka diyolo', “Guru, onuan kasai' daa iyahai do roti do miagal dino,” ka. 35 Om boros ka di Yesus dot id diyolo', “Iyoho' no i roti di manahak do koposion om iri nopondo tulun di rumikot dot id doho' om a' no louson kawagu do gisom dot alaid. Om iri tulun di monongkuyaan doho' nga' a' no tuuhan kawagu do gisom dot alaid. 36 Nga' nokoboros ku no dokoyu, do nokokito kou piya doho' nga' a' kou i' otumbayaan. 37 Pointikid-tikid do tulun di pinatahak do Tapa' ku dot id doho' om rumikot i' dot id doho' om a' oku i' magada' dot isai nopo o tulun di rumikot dot id doho'. 38 Tu' kinolintuhunan ku nopo do mantad hilo'd surga om okon i' ko' mongoi pomonsoi di doho'd korohian, suwai ko' mongoi pomonsoi do korohian di minonuhu' doho'. 39 Om poingkaa o korohian di minonuhu' doho': iri no tu' koinsanai'd tulun di patahakon dau dot id doho', om aiso' indo o tiso' pod atagak suwai ko' angapasi ngai' ku indo iyolo' do kopupuson diti pomogunan. 40 Poingkaa no kopio o korohian di Tapa' ku: iri no tu' oinsanan nopondo i tulun do kokito di Tanak om i monongkuyaan dau do kaanu do koposion dit otopot kopio om i poingompus, om posion ku kawagu iyolo' do kopupuson diti pomogunan,” ka dau. 41 Om timpuun no i tulun do Yohudi do sontogod-togod di Yesus, tu' minomoros i' iyau dot, “Iyoho' no i roti do luminintuhun do mantad hilo'd surga,” ka. 42 Om boros ka diyolo', “Okon toi ko' i Yesus ilo', i tanak di Yusup? Kotutun i' iyahai di tapa' om i tina' dau! Om poingkuro kopio'ddi do milo iyau'd momoros do luminintuhun iyau do mantad hilo'd surga?” ka diyolo'. 43 Om boros kaddi di Yesus dot id diyolo', “Kada' kou sontogod-togod. 44 Tu' aiso' i' o tiso' piya'd tulun do milo'd rumikot dot id doho', ondung a' iyau porikoton di Tapa' ku dot id doho', om isai nopondo i rumikot om posion ku no kawagu do kopupuson diti pomogunan. 45 Haro i' o nokotulis dot id suang di piro-piro buuk do nabi do poingkaa, ‘Oinsanan nopondo o tulun do tudukan do Kinorohingan,’ ka. Om oinsanan nopondo i tulun di korongou di Tapa' om i minsingilo dot id dau, do rumikot dot id doho'. 46 Nga' komoyon nopoddi om okon i' ko' haro o tulun do nokokito di Tapa'. Tu' iyau no i mantad id Kinorohingan o nokokito di Tapa'. 47 Ilaai no dokoyu: Tulun nopo dit otumbayaan om haro no o koposion dit otopot kopio om i poingompus. 48 Iyoho' no i roti di manahak do koposion. 49 Iri nopo komolohingan dokoyu om minangakan nogi' di manna do hilo'd tana' do kowotuan nga' napatai i' iyolo'. 50 Nga' a' i' iyo'ddi i roti do mantad hilo'd surga; tu' iri nopondo tulun di mangakan diri om a' no matai. 51 Iyoho' no i roti do luminintuhun do mantad hilo'd surga --- i roti di manahak do koposion. Om iri nopondo tulun di mangakan di roti'ddi om poimpasi no do gisom do poingompus. Om iri nopo roti di patahakon ku do pamasi'd tulun do hiti'd pomogunan om iti no tonsi ku,” ka dau. 52 Om pogisosongkiwal noddi i tulun do Yohudi do nokorongou di boros dau do miagal diri. Boros ka diyolo', “Poingkuro'ddi o tulun diti do papatahak do tonsi dau do paakanan dati'?” ka no diyolo'. 53 Om boros kaddi di Yesus dot id diyolo', “Ponongkuyaai kou no: Ondung a' kou mangakan do tonsi di Tanak do Tulun om a' kou monginum do raha' dau, om a' kou po poimpasi kopio. 54 Iri nopo tulun di mangakan do tonsi ku om i monginum do raha' ku om haro no o koposion dit otopot kopio om i poingompus, om posion ku nondo iyau kawagu do kopupuson diti pomogunan. 55 Tu' iti nopo tonsi ku om taakanon i' kopio, om raha' ku nga' tinumon i' kopio. 56 Iri nopo tulun di mangakan do tonsi ku om i monginum do raha' ku om poingiso' no kasai' doho' om iyoho' nga' poingiso' no dau. 57 Iri Tapa' di poimpasi o minonuhu' doho', om i Tapa' no o kapasi-pasi ku iyoho'. Om iyo nogiddi i tulun di mangakan do tonsi ku tu' apasi nondo tu' iyoho' o kapasi diyolo'. 58 Iti no i roti di luminintuhun do mantad hilo'd surga: om a' i' miagal di roti di nakan di komolohingan dokoyu iti. Tu' nakaakan piya iyolo' di roti'ddi nga' napatai i' iyolo'. Nga' iri nopondo tulun di kaakan do roti'dti om poimpasi no do gisom do poingompus,” ka dau. 59 Om poboroso' ngai' nopo di Yesus iri do tontok di monuduk iyau do hiri'd walai'd sasambayangan do hilo'd Kapornaum.
Boros di Manahak do Koposion dit Otopot Kopio om i Poingompus
60 Om kongorongou poddi iyolo' di boros di Yesus do miagal diri, om ogumu'ddi ot id pogialatan di tumatanud dau do minomoros dot, “Awagat no kopio o ponudukan do miagal diri. Isai po daa o milo'd tumanud diri?” ka. 61 Om oilaan i' di Yesus do somboro-boros i tumatanud dau dot iri pinoboros dau o kokuwaan diyolo'. Om boros kaddi dau, “Okua-kuwaan kou do nokorongou'ddi boros do miagal diri? 62 Poingkuro nondod kokito kopio kou di Tanak do Tulun do minsawat kawagu do hilo'd kinoiyonon dau mantad? 63 Mamasi nopod tulun om iri i Rusod do Kinorohingan. Om aiso' i' o guna' do kokorisan do tulun. Iti nopo boros do poboroson ku dokoyu'dti om boros i' do Rusod do Kinorohingan om boros di manahak do koposion. 64 Nga' haro i' ot id pogialatan dokoyu dot a' monongkuyaan,” ka dau. (Oilaan mantad no di Yesus do mantad di timpuun i' ondung isai it a' monongkuyaan, om i monongkuyaan, om ondung isai i papadagang dau.) 65 Om boros ka kawagu di Yesus, “Om iri no o kinopomisunudan ku dokoyu dot iso' pod tulun nga' aiso' i' o milo do rumikot dot id doho', ondung okon ko' i Tapa' o poporikot dau,” ka. 66 Om mantad poddi om ogumu'ddi i tumatanud di Yesus do tuminongkiad dau, om a' noddi sitanud kawagu dau. 67 Om uhoto' noddi di Yesus i hopod om duwo o tumatanud dau. Boros ka dau, “Tumongkiad kou i' iyokoyu doho'?” ka. 68 Om boros ka di Simun Pitrus, “Tuhan, id disai po daa o ngoyon dahai? Iri no boros do Tuhan o manahak do koposion dit otopot kopio om i poingompus. 69 Notumbayaan no iyahai om atantu' no kopio ot id suang do ginawo dahai dot otumbayaan do Tuhan no o susuhuon dit olidang do mantad id Kinorohingan,” ka dau. 70 Om boros ka di Yesus, “Okon toi ko' iyoho' o minomili' dokoyu ngai' do hopod om duwo o tulun? Nga' iso' nopo dokoyu om rusod i' dot araat!” ka. 71 Komoyon nopo di Yesus diri nga' i Yudas i tanak di Simun Iskariot. Tu' mulong piya dot id pogialatan i Yudas di hopod om duwo o tumatanud di Yesus, nga' papadagang indo iyau di Yesus.
I Yesus om i Tongotobpinai Dau
1 Id tohuri noddi ko' iri om pimpanau no i Yesus do hilo'd Galilia. Nga' a' no iyau minongoi do hilo'd watas do Yudia tu' mokipamatai no dau i tongoboyoon do bansa'd Yohudi. 2 Om tontok nopoddi nga' oruhai nod orikot i Tadau'd Agayo do Kinuhub-Kuhub. 3 Om boros kaddi di piro-piro tobpinai di Yesus dot id dau, “Tongkiad nogi' do mantad hiti om mongoi i' do hilo'd Yudia, om kokito indo i tumatanud nu diti wonsoyon nu. 4 Aiso' i' o tulun do momolisok-lisok di wonsoyon dau ondung orohian iyau'd abantug. Om ondung momonsoi ko do miagal diri, om apatut i' do kongoilo o pointongkop diti pomogunan!” ka diyolo'. 5 (Tu' iri piya tongotobpinai di Yesus nga' a' i' monongkuyaan dau.) 6 Om boros ka di Yesus dot id diyolo', “A' po norikot i maso ku. Nga' iyokoyu nopo om soira-ira' nopo nga' milo i'. 7 Iyokoyu nopo om a' i' karaatan diti tulun do hiti'd pomogunan. Nga' iyoho' nopo om atantu' no do karaatan diti tulun do hiti'd pomogunan, tu' poboroson kasai' ku i' dot id diyolo' dot araat o wonsoyon diyolo'. 8 Ongoi kou nopo iyokoyu dot id karamayan diri. A' oku i' iyoho' mongoi tu' a' po norikot o maso ku,” ka dau. 9 Om iyo noddi o pinoboros di Yesus dot id piro-piro o tobpinai dau, om undorong poddi iyau do hilo'd Galilia.
Minongoi i Yesus Rapou di Tadau'd Agayo do Kinuhub-Kuhub
10 Om kapamanau poddi i tongotobpinai di Yesus do minongoi rapou di Tadau'd Agayo'ddi, om ongoi nogiddi i Yesus iyau dot iso-iso', om a' i' iyau noilaan do tulun. 11 Om solinaid nopo do karamayan diri om mingihum po dau i tongoboyoon do tulun do Yohudi om minguhot dot, “Hinonggo iyau?” ka no diyolo'. 12 Om ogumu'ddi o tulun do minogikonos-konos dot i Yesus o komoyon. Om haro o momoros dot, “Iyau nopo om tulun dot osonong,” ka. Om haro kawagu o momoros dot, “Okon! Mamalid i' iyau do tulun dot ogumu'!” ka no. 13 Nga' aiso' i' o tiso' diyolo' do katama' kopio do popimboros do pasal dau tu' ooris i' iyolo' di tongoboyoon do tulun do Yohudi. 14 Om piintangaan noddi di karamayan diri, om suang no i Yesus di Walai'd Sasambayangan dot Agayo, om timpuun no iyau do minonuduk. 15 Om ongosuayan tomod diri i tongoboyoon do tulun do Yohudi om boro-boros no iyolo', “Poingkuro kopio dot ogumu' o toilaan diti tulun, om a' i' insan kosikul?” ka no. 16 Om boros ka di Yesus do suminimbar, “Iti nopo potudukon ku'dti om okon i' ko' doho'd ponudukan, suwai ko' ponudukan di minonuhu' doho'. 17 Iri nopo tulun dit orohian do tumanud do korohian do Kinorohingan om koilo i' ondung mantad id Kinorohingan ko' mantad id doho' toomod iti ponudukan ku. 18 Tulun nopoddi popotuduk di dau'd ponudukan, om mogihum no do kosuahan do tinan dau. Nga' tulun nopo di mogihum do kosuahan do bagi' di minonuhu' dau om otulid i' o ginawo, om a' kopio iyau mongudut. 19 A' kou toi noonuan no di Musa di Tourat? Nga' aiso' i' o tiso' dokoyu do tuminanud di Tourat diri. Nokuro daa tu' pokipapatayan oku dokoyu?” ka dau. 20 Om boros ka di tulun dot ogumu' do suminimbar, “Mulau ko indo! Isai daa o sipamatai diya'?” ka diyolo'. 21 Om boros ka di Yesus do suminimbar, “Iso' noo o karaja' do winonsoi ku di tadau'd Sabat, om osuayan kou no. 22 Nonuan kou di Musa do toturan do monunat, mulong piya dot otopot nopo kopio om okon i' ko' i Musa o tadon di sunat diri suwai ko' i komolohingan dit id gulu ko' i Musa. Om iri noddi o ponguwaan dokoyu, do tadau piya'ddi do Sabat nga' monunat kou i' do tulun. 23 Ondung wonsoyon dokoyu o miagal diri do mada' do kotolibamban di Tourat di Musa do pasal do monunat, om nokuro tu' otogod kou doho' do momolingos do tulun do gisom dot osonong kopio o tinan dau do tontok do tadau'd Sabat? 24 Kada' kou pomutus do tulun dot it okito dokoyu o maan do poimpahan do momutus, suwai ko' poimpahan nopod momutus om it otulid,” ka di Yesus.
Otopot Kopio Tuu dot i Yesus i Raja' do Gampamasi?
25 Om haro'ddi o piro-piro o tulun di hilo'd Yorusalim do minomoros dot, “Okon toi ko' iti nogi' i tulun dit ihum-ihumon do maan patayo'? 26 Ontong pogi' nga' mimboros nopo moti' iyau dot id toguang do tulun dot ogumu', om aiso' i' o tiso' piya'd tulun do moro-boros do sumaap dau! Nokoilo no tuu'ddi i tongoboyoon toko' dot ilo' kopio i Raja' do Gampamasi? 27 Nga' iri nopo i Raja' do Gampamasi do rumikot om aiso' i' o tongoiso' piya'd tulun do koilo do tadon dau! Nga' iti nopo tulun diti om oilaan toko' i' o tadon,” ka diyolo'. 28 Om maso poddi di Yesus do monuduk do hiri'd Walai'd Sasambayangan dot Agayo, om boro-boros no iyau dot opuhod do poingkaa, “Kotutun kou i' kopio doho'ndo, koilo kou i' do tadon ku? A' oku i' ruminikot do tumanud do doho'd korohian, suwai ko' sinuhu' oku i' dau, iyau i kikuasa' do monuhu' doho', om milo i' iyau do ponongkuyaanan. Nga' iyokoyu nopo om a' i' kotutun dau. 29 Iyoho' nopo om kotutun i' dau tu' mantad oku i' dot id dau, om iyau no i minonuhu' doho',” ka dau. 30 Om tontok no daa'ddi do tangkapon diyolo' i Yesus, nga' aiso' iddi o katama' kopio do mongoi pomusus dau, tu' a' po norikot i maso dau. 31 Om ogumu' noddi ot id pogialatan di tulun diri do monongkuyaan dau, om momoros dot, “Ondung korikot i Raja' do Gampamasi, om ogumu' po tuu o koimayaan do wonsoyon dau ko' mantad di winonsoi do tulun diti?” ka diyolo'.
Minonuhu' do Manangkap di Yesus
32 Om korongou no di tulun do Parisi i pogikanas-kanasan di tulun dot ogumu'ddi do pasal di Yesus. Om iri noddi o kinoponuhuan diyolo' om i boyoon dot imam, do piro-piro di madtatamong do Walai'd Sasambayangan dot Agayo do mongoi panangkap di Yesus. 33 Om boros ka di Yesus dot id tulun dot ogumu' di hiri'd Walai'd Sasambayangan dot Agayo, “A' oku no alaid do poinsugku' dokoyu. Om gumuli' oku nondo dot id dau, i minonuhu' doho'. 34 Om ihumon oku daa'ndo dokoyu nga' a' oku no dokoyu okito; tu' a' kou i' milo'd mongoi do hilo'd kinoiyonon di koongoyon ku,” ka dau. 35 Om pogiboro-boros noddi i tongoboyoon do tulun do Yohudi do poingkaa, “Honggo'ddi kopio o ngoyon do tulun diti gisom dot a' toko' iyau osolowot? Mongoi tuu iyau do hilo'd tulun do Yohudi di poundorong do hilo'd pomogunan do suwai, i hilo'd pogialatan do tulun do Yunani, om monuduk nondo iyau di tulun do Yunani? 36 Nunu tuu o komoyon dau di boros dau do mogihum toko' piya dau nga' a' toko' no iyau osolowot om a' toko' milo'd mongoi do hilo'd kinoiyonon di ngoyon dau?” ka diyolo'.
Waig di Manahak do Koposion
37 Tontok di tadau do kooyion no do karamayan diri, i tadau dit agayo kopio, om ingkakat no i Yesus do hiri'd Walai'd Sasambayangan dot Agayo om pomoros nod opuhod do poingkaa, “Isai nopo o tulun di tuuhan om rumikot no dot id doho' do mongoi inum. 38 Om nokotulis no dot id suang do Buuk do Kinorohingan, dot i tulun dit otumbayaan doho' o komoyon do poingkaa, ‘Lumuyung nondo o waig di manahak do koposion do mantad id ginawo dau,’ ka,” ka di Yesus. 39 (Komoyon nopo di Yesus diri nga' i Rusod do Kinorohingan, it aramit do koinsanai'd tulun di monongkuyaan dau. Tontok nopoddi om a' po nakatahak i Rusod do Kinorohingan; tu' a' po i Yesus nokoinggayo tu' a' po iyau napatai om a' po napasi kawagu do mantad id kapatayon.)
Mogisuwai-Suwai o Tosorou di Tulun dot Ogumu'
40 Om ogumu' o tulun do nokorongou di pinoboros di Yesus, om haro ot id pogialatan diyolo' do momoros dot, “Atantu' no dot i Nabi ilo tulun dilo'!” ka. 41 Om iri no suwai om momoros dot, “Ilo' no i Raja' do Gampamasi!” ka. Nga' haro i' o momoros dot, “A, do hilo' kopio tuu'd Galilia o tadon di Raja' do Gampamasi? 42 Id suang nopod Buuk do Kinorohingan om iri nopo Raja' do Gampamasi om sinakagon i' di Daud om mantad hilo'd Baitlahim, i kampung di Daud,” ka diyolo'. 43 Alaid noddi om mogisosongkiwal diri i tulun dot ogumu' do pasal di Yesus. 44 Om haro i sipanangkap daa dau, nga' aiso' i' o tiso'd tulun do minongoi pomusus dau.
A' Monongkuyaan i Piro-Piro Boyoon do Tulun do Yohudi
45 Om soira'ddi nokoguli' i madtatamong di Walai'd Sasambayangan dot Agayo, i sinuhu' daa do minongoi panangkap di Yesus, om uhoto' no iyolo' di piro-piro boyoon dot imam, om i tulun do Parisi. Boros ka diyolo', “Nokuro tu' a' dokoyu iyau nigitan do hiti?” ka. 46 Om boros ka di piro-piro madtatamong do suminimbar, “A' po nokoumbal do haro o tulun do minimboros dot iyo kopio dau!” ka. 47 Om boros ka di piro-piro tulun do Parisi, “Do napalid kou i' pama iyokoyu piya? 48 Haro ot id pogialatan di piro-piro boyoon toko' om i tulun do Parisi do monongkuyaan dau? 49 Nga' iti nopo tulun dot ogumu' diti om a' i' kosuhut di Tourat di Musa, om poingkuro piya nga' nousung mantad no iyolo',” ka diyolo'. 50 Iri nopo songulun dot id pogialatan di tulun do Parisi'ddi nga' i Nikodimus, i nokoumbal do minongoi solowot di Yesus. Om boros ka di Nikodimus dot id tulun do Parisi di suwai, 51 “Tumanud nopo do Tourat, om a' i' koino-ino do hukuman ot isai nopo o tulun dot a' po orongou o boros di tulun, om a' po osorisid kopio i winonsoi dau,” ka dau. 52 Om boros ka diyolo' do suminimbar, “Mantad ko i' pama iya' do hilo'd Galilia? Sorisido' nopo pogi' ilo Buuk do Kinorohingan! Om okito nu indo dot aiso' i' o nabi do mantad hilo'd Galilia!” ka diyolo'.
Tondu' di Nokosupan do Monokiampahu'
1 Om uli' ngai' noddi i tulun do hiri'd walai diyolo'. Nga' ongoi no i Yesus do hiri'd Nulu-Nulu do Saitun. 2 Om tadau noddi kawagu, dit osuab po, om ongoi po kawagu i Yesus do hiri'd Walai'd Sasambayangan dot Agayo, om ogumu' o tulun do ruminikot dot id dau. Om irikau no iyau, om timpuun no iyau do monuduk. 3 Om tontok noddi do pinaatod di piro-piro guru do Tourat om i tulun do Parisi dot id di Yesus o songulun o tondu' di nokosupan do magampahu'. Om suhuo' no diyolo' i tondu'ddi do mingkakat do hiri'd tanga-tanga' diyolo'. 4 Om boro-boros no iyolo' dot id di Yesus do poingkaa, “Guru, iti nopo tondu'dti om nokosupan do magampahu'. 5 Om id suang nopod Tourat om minonuhu' i Musa do momodumpau do watu do tondu' do miagal diti do gisom dot apatai iyau. Om poingkuro o diya'd tosorou, oi Guru?” ka diyolo'. 6 Om minuhot pogi' iyolo' do miagal diri nga' pomurunsut daa diyolo' di Yesus, om haro indo o ralan diyolo' do papasala' dau. Nga' tudu' nopo i Yesus om ponulis no iyau do hiri'd tana' do tunturu' dau o pinonulis. 7 Tontok dit osonsog kopio iyolo', om hangog no iyau om boro-boros nod, “Isai nopo o tulun dit aiso' o dusa dot id pogialatan dokoyu, om iri no mogulu do momodumpau'd watu diti tondu'dti,” ka dau. 8 Om tudu' noddi kawagu i Yesus, om pintulis no do hiri'd tana'. 9 Om korongou poddi diyolo' i boros di Yesus do miagal diri om tongkiad no iyolo' do mantad hiri, do soroiso-iso' iyolo' do tuminongkiad, do minogulu nopo om i molohing no kopio. Om alaid noddi om iso' po i Yesus do hiri om poingkakat kasai' po i tondu' do hiri'd pinoingkakatan dau. 10 Om hangog noddi i Yesus om boro-boros no dot id tondu'ddi, “Honggo ngai' no iyolo'ddi? Aiso' i' o tiso' diyolo' do minomohukum diya'?” ka. 11 Om boros ka di tondu'ddi do suminimbar, “Aiso' i' oi Tuan,” ka dau. Om boros ka di Yesus, “Iyo nopondo, om iyoho' nga' a' i' momohukum diya'. Pamanau nopo, nga' kada' nogi' kopio pomonsoi kawagu'd dusa,” ka.
I Yesus o Tanawau do Pomogunan
12 Om boros ka kawagu di Yesus dot id tulun dot ogumu', “Iyoho' no o tanawau diti pomogunan. Iri nopo tulun di tumanud doho' om a' no kapamanau dot id dotuong, suwai ko' kaanu no di tanawau di manahak do koposion,” ka dau. 13 Om boros ka di tulun do Parisi dot id dau, “Baino' noddi om popoboros ko do pasal do tinan nu dot iya' i' om iya' o popoboros. A' i' bo otopot ino poboroson nu'ndo,” ka diyolo'. 14 Om boros ka di Yesus do suminimbar, “Mulong piya do popoboros oku do pasal do tinan ku dot iyoho' om iyoho' o popoboros nga' otopot i' iti poboroson ku; tu' koilo oku i' ondung honggo o tadon ku om honggo o tongoyon ku. Iyokoyu nopo om a' i' koilo ondung honggo o tadon ku om honggo o pakayaan ku. 15 Iyokoyu nopo om momutus do tulun do don tulun do kowoyo-woyoo' do momutus; nga' iyoho' nopo om a' i' momutus dot ongoiso' piya'd tulun. 16 Nga' ondung momutus oku'd tulun om otulid i' o pomumutus ku, tu' a' oku i' iso-iso' do momutus; moyo-woyo' i' doho' i Tapa' ku, i minonuhu' doho'. 17 Haro i' o nokotulis dot id Tourat dokoyu do poingkaa: Iri nopo poboroson dit otopot om i poboroson do duwo o tulun do sasi', ka. 18 Om duwo i' i popoboros do pasal doho' --- iyoho' om i Tapa', i minonuhu' doho',” ka dau. 19 Om boros ka diyolo', “Honggo o Tapa' nu'ndo?” ka. Om boros ka di Yesus do suminimbar, “A' kou i' kotutun doho', om i Tapa' ku nga' a' i' dokoyu otutunan. Ondung kotutun kou daa doho', om atantu' no do kotutun kou i' di Tapa' ku,” ka dau. 20 Om pinoboros ngai' nopo di Yesus iri do tontok di maso dau do monuduk do hiri'd Walai'd Sasambayangan dot Agayo, do hiri'd toning di piro-piro o pati' do poiyanan do tusin do porsombahan. Nga' aiso' i' o tiso'd tulun do minongoi panangkap dau tu' a' po norikot i maso dau.
A' Kou i' Koongoi do Hilo'd Tongoyon Ku
21 Om boros ka kawagu di Yesus dot id diyolo', “Tumongkiad oku nondo, om ihumon oku no daa'ndo dokoyu, nga' apatai kou nogindo dot id suang do dusa dokoyu. Om a' kou i' koongoi do hilo'd kinoiyonon di ngoyon ku,” ka dau. 22 Om boros ka di tongoboyoon do Yohudi, “Kumiros doti' iyau, tu' minomoros no dot, a' kou koongoi do hilo'd kinoiyonon di ngoyon ku, ka,” ka diyolo'. 23 Om boros kaddi di Yesus dot id diyolo', “Iyokoyu nopo om mantad i' do hiti'd siriba'; nga' iyoho' nopo om mantad i' do hilo'd sawat. Iyokoyu nopo om mantad i' do hiti'd pomogunan; nga' iyoho' nopo om okon i' ko' mantad hiti'd pomogunan. 24 Om iri no o kinabarasan ku dot id dokoyu dot apatai kou indo dot id suang do dusa dokoyu. Om apatai kou no kopio dot id suang do dusa dokoyu, ondung a' kou no monongkuyaan di boros dot, iyoho' no i roitan dot IYOHO' I HINO KASAI',” ka di Yesus. 25 Om boros ka diyolo' do minonguhot, “Isai kopio ko toi'ndo?” ka. Om boros ka di Yesus do suminimbar, “Nunu po daa gorong do moro-boros dokoyu! 26 Ogumu' po daa i poboroson ku do pasal dokoyu om i butusan ku. Nga' iri nopo minonuhu' doho' om milo i' do ponongkuyaan. Om nunu nopo it orongou ku do mantad id dau om iri no i posunudon ku dokoyu do hiti'd pomogunan,” ka di Yesus. 27 Nga' a' i' diyolo' osuhutan dot iri nopo i poboroson dau dot id diyolo' om pasal i' di Tapa'. 28 Om iri no o kinapabarasan di Yesus dot id diyolo' do, “Koinsawat nopondo dokoyu i Tanak do Tulun, om koilo kou nogindo dot ‘Iyoho' no i roitan dit IYOHO' I HINO KASAI'’ om oilaan dokoyu dot iso' po di winonsoi ku nga' aiso' i' o mantad id doho'd korohian. Iri no i pinotuduk di Tapa' dot id doho' o poboroson ku. 29 Om iri minonuhu' doho' nga' moyo-woyo' i' doho'. A' i' iyau insan do popologos doho' dot iso-iso' tu' momonsoi kasai' oku i' di korohian dau,” ka di Yesus. 30 Om kongoboros poddi di Yesus o miagal diri om ogumu' diri o tulun do minonongkuyaan dau.
I Kinorohingan dit Otopot o Popoidu' Dokoyu
31 Om boros kaddi di Yesus dot id tulun do Yohudi dit otumbayaan dau, “Ondung tonudon kopio dokoyu i ponudukan ku, om otopot no kopio do tumatanud kou doho'. 32 Om kotutun kou nondo di Kinorohingan dit otopot, om iri no o popoidu' dokoyu om okon kou nondo ko' turipon,” ka dau. 33 Om boros ka diyolo', “Iyahai nopo om sinakagon i' di Abraham, om a' i' iyahai insan kosiliu do turipon dot isai nopo! Om nunu'ddi o komoyon nu do momoros ko do, ‘Poiduwon kou nondo,’ ka?” ka diyolo'. 34 Om boros ka di Yesus dot id diyolo', “Otopot i' kopio iti poboroson ku dokoyu dot iri nopo tulun di momonsoi'd dusa, om turipon nod dusa. 35 Om turipon nopo om a' i' poundorong kasai' dot id sompiiyon, nga' tanak nopo om poundorong kasai' i' dot id sompiiyon do gisom dot alaid. 36 Om ka pogiddi, dot ondung i tanak o popoidu' dokoyu om koidu' kou no kopio. 37 Oilaan ku i' do sinakagon kou di Abraham. Nga' sipamatai kou indo doho', tu' mada' kou i' do ponudukan ku. 38 Nunu nopo it okito ku dot id Tapa' ku om iri no i poboroson ku. Nga' iyokoyu nopo om momonsoi i' di pinotuduk di tapa' dokoyu dot id dokoyu,” ka dau. 39 Om boros ka diyolo' do suminimbar, “I Abraham bo o tapa' dahai,” ka. Om boros ka di Yesus, “Ondung otopot kopio do tangaanak kou di Abraham, om atantu' no do momonsoi kou i' daa di winonsoi di Abraham. 40 Momisunud oku daa dokoyu di boros dit otopot di norongou ku do mantad id Kinorohingan, nga' sipamatai kou nogi' doho'. Nga' i Abraham nopo om a' i' iyo'ddi. 41 Ino nopo dokoyu'd wonsoyon om iri i winonsoi di tapa' dokoyu,” ka dau. Om boros ka diyolo' do suminimbar, “Iyahai nopo om okon i' ko' tanak ngampang. Tu' iso' noo o tapa' dahai; Kinorohingan noo,” ka diyolo'. 42 Om boros kaddi di Yesus dot id diyolo', “Ondung Kinorohingan kopio o Tapa' dokoyu, om osianan kou i' daa doho', tu' mantad oku i' dot id Kinorohingan. Om a' oku i' ruminikot do tumanud do doho'd korohian tu' iyau i' o minonuhu' doho'. 43 Nokuro tu' a' kou kosuhut di pinoboros ku? Kokuwaan nopoddi nga' mada' kou i' do mokinongou di ponudukan ku. 44 Rogon i' o tapa' dokoyu, om orohian kou do tumanud do korohian di tapa' dokoyu. Mantad poddi timpuun i' om gampamatai no o Rogon. Om a' i' iyau insan do sumokodung dit otopot, tu' a' i' iyau popoboros dit otopot. Mongudut nopo iyau om kodou-douwo' no tu' iri no o kowoyo-woyoo' dau. Iyau nopo om goudut, om tadon do koinsanai'd tudut. 45 Nga' iyoho' nopo om popoboros i' dit otopot om iri no ot a' dokoyu koponongkuyaan doho'. 46 Isai no ot id pogialatan dokoyu do milo'd popointalang kopio do kidusa oku? Ondung otopot o poboroson ku, om nokuro tu' a' kou monongkuyaan doho'? 47 Tulun nopo di mantad id Kinorohingan, om mokinongou i' do boros do Kinorohingan. Nga' iyokoyu nopo om okon i' ko' mantad id Kinorohingan, om iri no ot a' dokoyu kopokinangahan di boros do Kinorohingan,” ka di Yesus.
I Yesus om i Abraham
48 Om boros ka di tulun do Yohudi do suminimbar di Yesus, “A' toi otopot i pinoboros dahai do tulun ko'd Samaria di norusadan do rogon?” ka. 49 Om boros ka di Yesus do suminimbar, “A' oku i' norusadan do rogon. Momusou oku i' di Tapa' ku, nga' iyokoyu nopo om mongindaraat nogi' doho'. 50 A' oku i' mogihum do kosuahan do doho'd tinan. Nga' haro i' o songulun do mogihum do kosuahan do bagi doho', om iyau no i momutus. 51 Otopot i' kopio iti poboroson ku, do tulun nopo di tumanud do boros ku, om a' no apatai do gisom dot alaid,” ka dau. 52 Om boros kaddi di tulun do Yohudi dot id di Yesus, “Oilaan noddi kopio dahai do norusadan ko'd rogon! I Abraham piya nga' napatai i' om i piro-piro nabi nga' nangapatai ngai' i'. Nga' momoros ko indo iya' do, ‘Tulun nopo di tumanud do boros ku om a' no apatai do gisom dot alaid,’ ka nu. 53 Ondung napatai i Abraham, om noinsanan do napatai i nabi, om isai ko daa kopio iya'? Agayo kopio ko tuu daa iya' ko' i Abraham, i tapa' dahai?” ka diyolo'. 54 Om boros ka di Yesus do suminimbar, “Ondung mogihum oku daa do kosuahan do doho'd tinan, om aiso' i' o guna'ddi. Iri nopo i momusou doho' om iri i Tapa' ku, i sorohon dokoyu do Kinorohingan dokoyu. 55 Inda' ka dot a' kou i' kotutun dau. Nga' iyoho' nopo om kotutun i' dau. Ondung poboroson ku daa dot a' oku kotutun dau, om goudut oku no, do miagal ngai' dokoyu. Nga' iyoho' nopo om kotutun i' dau, om mumboyo' oku do boros dau. 56 I Abraham nopo, i tapa' dokoyu, om orohian tomod i' do kokito do tadau ku. Om nokokito no iyau'ddi om asanangan tomod iyau do nokokito!” ka dau. 57 Om boros kaddi di tulun do Yohudi dot id di Yesus, “A' po kolimo nohopod o toun nu, om nokokito ko no di Abraham?” ka diyolo'. 58 Om boros ka di Yesus do suminimbar, “Otopot no kopio iti poboroson ku dokoyu do nopo dit a' po nopogkosusu i Abraham om hino oku no iyoho',” ka dau. 59 Om ongoi no daa'ddi do watu i tulun do Yohudi do pomodumpau diyolo' di Yesus, nga' ongoi no lisok i Yesus, om tongkiad noddi iyau di Walai'd Sasambayangan dot Agayo.
Pinopoungkalat i Yesus do Tulun di Bolou Mantad di Kosususu
1 Tontok di manau-panau i Yesus, om kokito no dau o tulun di bolou do mantad di kosususu. 2 Om uhoto' no di tumatanud di Yesus, i Yesus. Boros ka diyolo', “Guru, nokuro tu' bolou mantad iti tulun di pogkosusuo' i'? Iri tuu nokowonsoi iyau'd dusa o nokobungou dau ko' iri po i dusa di molohing dau?” ka diyolo'. 3 Om boros ka di Yesus do suminimbar, “Okon i' ko' i dusa dau ko' dusa po di molohing dau o nokobolou dau, suwai ko' iti nopo om popokito nod tulun di koimayaan di Kinorohingan noo o milo'd momonsoi dot id tinan do tulun diti. 4 Mositi' no do momonsoi toko' do karaja' di minonuhu' doho' do maso pod anawau. Tu' tumuong i' motindo om aiso' no o tiso' pod tulun do milo'd kumaraja'. 5 Iyoho' no o tanawau do hiti'd pomogunan, do solinaid ku po do hiti'd pomogunan,” ka dau. 6 Om koboros poddi di Yesus o miagal diri om pomodula' no iyau do hiri'd tana', om piunango' no dau di tana' i dula' dau. Om polihuto' nogiddi dau i tana' di nounang diri do hiri'd mato di tulun diri. 7 Om boro-boros no i Yesus dot id tulun diri, “Ongoi ponginglagup do hilo'd Kulam do Siluam,” ka. (Komoyon nopod boros do “Siluam” om “sinuhu'”.) Om ongoi no i tulun diri ponginglagup. Om di nopoddi guminuli' iyau, om kokito noddi iyau. 8 Om oinsanan nopoddi i hiri'd songkoduwo di tulun diri, om i tulun di nokokito dau do mokipuhawang di gulu po do minomoros dot, “Okon toi ko' ilo' i tulun dit oubas do poirikau do mokipuhawang diri?” ka. 9 Om haro'ddi ot id pogialatan diyolo' do minomoros dot, “Ilo' nogi' kopio iri,” ka. Nga' haro i' o momoros dot, “Okon, ilo' nopo om koiyo-iyo no di tulun diri,” ka. Nga' boros ka di tulun diri, “Iyoho' nogi' bo iri,” ka. 10 Om boros ka diyolo' dot id dau, “Poingkuro kopio tu' kokito ko noddi?” ka diyolo'. 11 Om boros ka dau, “Minongunang do tana' dot okooro' i tulun di roitan dot i Yesus, om polihuto' nogiddi dau dot id mato ku, om boro-boros no, ‘Ongoi ponginglagup do hilo'd Kulam do Siluam,’ ka. Om ongoi oku noddi. Om tontok di minonginglagup oku, om kokito oku noddi,” ka dau. 12 Om ponguhot po iyolo' dau, “Hinonggo noddi ino tulun?” ka. Om boros ka dau, “Uka, a' oku no koilo,” ka.
Minongimudong i Tulun do Parisi di Tulun do Bolou di Nolingasan
13-14 Tadau nopo di minongunang i Yesus do tana' do dula' dau o pinongunang, do pinopoungkalat di tulun do bolou'ddi, om nokoontok no do tadau'd Sabat. Om ngoyo' noddi i tulun do bolou di nolingasan diri posolowoto' di tulun do Parisi. 15 Om iyolo' nogi' nga' minonguhot i' dau ondung poingkuro iyau do nokokito. Om boros ka dau, “Linihut dau do burutak iti mato ku, om ongoi oku noddi ponginglagup om kokito oku noddi,” ka dau. 16 Om haro'ddi o piro-piro di tulun do Parisi do minomoros dot, “Okon i' kopio ko' mantad id Kinorohingan i tulun di minomonsoi'd miagal dino, tu' a' i' iyau momusou do tadau'd Sabat,” ka. Nga' boros ka di piro-piro tulun do suwai, “Poingkuro tuu kopio o tulun do kidusa do momonsoi do kongoimayaan do miagal diti?” ka. Om mogisuwai-suwai nopoddi o poboroson diyolo'. 17 Om uhoto' po kawagu di tulun do Parisi i tulun diri, “Poingkuro o diya'd tosorou do pasal di tulun do pinopoungkalat do mato nu?” ka. Om boros ka di tulun diri, “Iyau nopo om nabi,” ka. 18 Nga' a' i' i piro-piro boyoon do tulun do Yohudi monongkuyaan do bolou i tulun diri do mantad di kosususu, om kokito noddi do tontok diri. Om lohowo' noddi diyolo' i molohing di tulun diri, 19 om uhoto' no dot, “Otopot nogi' dot iti i tanak dokoyu di bolou do mantad di nosusu i'? Poingkuro'ddi tu' kokito iddi iyau do baino'?” ka diyolo'. 20 Om boros ka di molohing di tulun diri do suminimbar, “Iti nogi' kopio i tanak dahai; om otopot i' do bolou iyau do mantad di kosususu. 21 Nga' a' i' iyahai koilo ondung poingkuro'ddi iyau'd nokokito diti baino'. Om a' iyahai koilo ondung isai i pinopoungkalat do mato dau. Nga' uhoto' nopo ilo' tu' agayo no'lo'; om milo no do mimpori-pori'd sumimbar,” ka diyolo'. 22 Iyo pogiddi o pinoboros di molohing di tulun diri nga' ooris iyolo' di piro-piro boyoon do tulun do Yohudi; tu' nokopogipapakat no iyolo' dot isai nopo o tulun di momoros dot i Yesus o Raja' do Gampamasi om a' no koino-ino do sumuang di walai'd sasambayangan. 23 Om iri no o kinapabarasan di molohing di tulun diri dot, “Agayo no'lo'; om uhoton nopo dokoyu iyau,” ka. 24 Om lohowo' poddi kawagu diyolo' i bolou daa di gulu po, om barasai nod poingkaa, “Sumpa' no do popoboros ko dit otopot. Oilaan i' dahai do kidusa i tulun diri,” ka. 25 Om boros ka di tulun diri do suminimbar, “Kidusa tuu ko' aiso' i tulun diri, nga' a' oku i' koilo. Nga' iso' noo o toilaan ku tu' nopo di gulu po om bolou oku, nga' baino' noddi om kokito oku no,” ka dau. 26 Om uhoto' po kawagu diyolo' iyau, “Nunu o winonsoi dau dot id diya'? Poingkuro iyau do pinopoungkalat diya'?” ka diyolo'. 27 Om boros ka di tulun diri do suminimbar, “Nosusui ku nori dot id dokoyu nga' a' kou i' minokinongou. Om nokuro daa tu' sirongou kou po kawagu? Orohian kou i' daa iyokoyu do sumiliu'd tumatanud dau?” ka. 28 Om papalai noddi diyolo' iyau om boro-boros nod, “Iya' i tumatanud dau; okon i' ko' iyahai! Iyahai nopo om tumatanud i' di Musa. 29 Oilaan i' dahai do Kinorohingan o minoro-boros dot id di Musa. Nga' iri nopo tulun diri, om a' i' iyahai koilo ondung honggo o tadon,” ka diyolo'. 30 Om boros ka di tulun diri, “Suwai no kopio dot a' kou koilo ondung honggo o tadon di tulun diri, om nokoungkalat no dau o mato ku, gisom do kokito oku noddi. 31 Oilaan toko' i' do tulun nopo di kidusa om a' i' do Kinorohingan pokinongohon, suwai ko' iri no i tulun di momusou'd Kinorohingan om i momonsoi'd korohian dau o pokinongohon dau. 32 Mantad poddi kinoimpuunon diti pomogunan om a' po nokoumbal do haro o nakahabar do tulun di milo do popoungkalat do mato do tulun di bolou do mantad di kosususu. 33 Ondung okon ko' mantad id Kinorohingan i tulun diri, om a' i' daa iyau milo do momonsoi'd nunu nopo,” ka dau. 34 Om boros ka diyolo' do suminimbar, “Nunu hoi? Monuduk kopio ko daa dahai, iya' i' noponu'd dusa do mantad di kosususu?” ka. Om mantad poddi om a' no iyau posolokoyon di walai'd sasambayangan.
Bolou o Mato'd Ginawo
35 Om korongou no di Yesus dot a' noddi diyolo' posuangon di walai'd sasambayangan i tulun diri. Om ngoyo' noddi dau ihumo' i tulun diri om boro-boros nod, “Monongkuyaan ko i' di Tanak do Tulun?” ka. 36 Om boros ka di tulun diri, “Isai i tulun diri, oi Tuan? Sunudai oku daa, om otumbayaan oku indo dau,” ka. 37 Om boros ka di Yesus, “Nokokito ko no dau. Om iyau no i monokiboro-boros diya' do dinondo,” ka. 38 Om boros kaddi di tulun diri, “Otumbayaan oku i' oi Tuhan,” ka. Om otud noddi iyau dot id toguang di Yesus. 39 Om boros ka di Yesus, “Kinorikatan ku nopo do hiti'd pomogunan om mongoi pomutus; om kokito indo i tulun do bolou, om obolou i tulun di kokito,” ka dau. 40 Om haro'ddi o piro-piro di tulun do Parisi di hiri do nokorongou di Yesus do minomoros do miagal diri, om uhoto' no diyolo' iyau, “Do komoyon nu i' pama iyahai'd bolou?” ka diyolo'. 41 Om boros ka di Yesus do suminimbar, “Ondung bolou kou daa, om a' kou nogi' kidusa. Nga' i minomoros kou do, ‘Kokito i' iyahai,’ ka, o popointalang kopio do kidusa kou po,” ka dau.
I Gompomogompi'd Dumba' om i Dumba' Dau o Pinoinukadan
1 Om boros ka kawagu di Yesus, “Otopot no kopio iti poboroson ku do poingkaa: Iri nopo tulun di sumuang do kandang do dumba' do mindakod di pagar, om a' nogi' maya' di wawayaan, tu' mindakod nogi' do maya'd ralan do suwai, om manakau i' om parampuk. 2 Nga' tulun nopo di sumuang di kandang do maya' di wawayaan kopio, om gompomogompi' no di dumba'. 3 Iwangan i' di madtatamong do kandang i wawayaan do wayaan dau, om tuminong i' i dumba' do korongou di boros dau, do tontok do lohowon dau i dumba' dau do tikidon do mamarait i ngaran di dumba', om woyoon dau i dumba' do sumoliwan. 4 Om kongosoliwan ngai' pondo i dumba', om hiri nondod gulu do mamanau i gompomogompi'd dumba'ddi, om moyo' ngai' nopondo dau i dumba' tu' kotutun i' i dumba' do boros dau. 5 Om a' indo iyolo' tumanud do tulun do suwai, suwai ko' mogidu' nogi' iyolo' do mantad id tulun diri, tu' a' i' iyolo' kotutun do boros do tulun do suwai,” ka di Yesus. 6 Om iti nopo poinukadan diti om sinusui di Yesus dot id diyolo', nga' a' i' iyolo' kosuhut di komoyon kopio dau.
I Yesus no o Miagal do Gompomogompi'd Dumba' dit Osonong
7 Om boros ka kawagu di Yesus, “Otopot i' kopio iti poboroson ku do poingkaa: Iyoho' no i wawayaan do dumba'. 8 Koinsanai'ddi rumikot dot id gulu ko' iyoho' om mananakau no om parampuk. Nga' a' i' di dumba' pokinongohon o boros diyolo'. 9 Iyoho' no i wawayaan do dumba'. Isai nopo o sumuang do maya' doho' om aiso' no o koligagaanan; om misuang-suang nopondo iyau om misoliwan-liwan do mongoi pangakan-ngakan. 10 Iri nopo tulun do manakau om mongoi no panakau, om mongoi pamatai, om mongoi pamaraag o korikatan dau. Nga' kinorikatan ku nopo iyoho' om mongoi pamasi'd tulun, om aiso' i' o kokurangan dot id suang do koposi-posion diyolo'. 11 Iyoho' no o miagal di gompomogompi'd dumba' dot osonong. Iri nopo gompomogompi'd dumba' dot osonong om posodia' i' do matai do bagi' di dumba' dau. 12 Tulun nopo di godsian om it okon ko' gompomogompi' di dumba', om it okon ko' sanganu di dumba'ddi, om mogidu' i' do tumongkiad di dumba', ondung haro o toni dot okito dau do rumikot. Om ngoyon nondo di toni tabpaai om ngoyon pogitongkiad-kiado' i dumba'ddi. 13 Om mogidu' nondo i tulun di godsian diri, tu' iri no gadsi' o kakarajaan dau. A' i' iyau mamadul di dumba'. 14-15 Iyoho' no o miagal do gompomogompi'd dumba' dit osonong. Poingkuro nopo i Tapa' do kotutun doho', om iyoho' nga' kotutun no di Tapa', om iyo oku no iyoho'ddi do kotutun di dumba' ku om iyolo' nga' kotutun i' doho'. Om posodia' oku do matai do bagi' diyolo'. 16 Haro po o dumba'd suwai di doho'd songonuon, nga' a' i' iyolo' poinghompit do baanan do dumba'dti. Om iyolo' nga' apatut ku i' do ngoyon angatai, om mokinongou nondo iyolo' do boros ku. Om osiliu ngai' nondo iyolo' dot iso' po o baanan do dumba' om iso-iso' o gompomogompi'. 17 Osianan i' doho' i Tapa' tu' posodia' oku id matai, om apasi oku indo kawagu. 18 Aiso' i' o tiso'd tulun do milo'd mamatai doho' dot ondung a' ku iyau pologoson do mamatai doho'. Iyoho' i' o popologos do patayon oku. Om milo oku i' do popologos do tinan ku'd patayon, om milo oku'd masi kawagu. Tu' iri no o pinonuhuan doho' di Tapa' ku do momonsoi,” ka di Yesus. 19 Om iri no i boros di Yesus do miagal diri o nokoimpuunon di tulun do Yohudi do mogisosongkiwal. 20 Om ogumu' o tulun do momoros dot, “Norusadan iyau'd rogon! Mulau iyau! Nunu kopio o kopokinangahan dokoyu dau?” ka no. 21 Nga' haro indo i momoros dot, “Tulun nopoddi norusadan do rogon om a' i' iyo'ddi o koboro-boroso'! Milo toi o rogon do popoungkalat di bolou, do gisom do kokito nondo?” ka no.
A' o Tulun Monongkuyaan di Yesus
22 Hilo' nopod Yorusalim nga' maso tomod do tulun do mamaramai di Tadau'd Agayo do Koponguramatan di Walai'd Sasambayangan dot Agayo. Tontok nopoddi nga' maso dot osogit. 23 Om mimpanau i Yesus do hiri'd kakilima di roitan do Kakilima di Suliman do hiri'd Walai'd Sasambayangan dot Agayo 24 do tontok di ruminikot i tulun dot ogumu' do tuminutuk dau, om boros ka diyolo', “Songkuro po toi koloido' do pologoson nu do mikoduwo o ginawo dahai? Poboroso' nogi' kopio, ondung iya' kopio i Raja' do Gampamasi,” ka. 25 Om boros ka di Yesus, “Nokoboros ku no dokoyu, nga' a' kou i' monongkuyaan. Iri no i winonsoi ku dot id suang do ngaran do Tapa' ku, o popointalang kopio do pasal doho'. 26 Nga' a' kou i' monongkuyaan tu' a' kou i' nokohompit di dumba' ku. 27 Iri nopo dumba' ku om korongou i' do boros ku. Om kotutun oku i' diyolo', om tumanud iyolo' doho'. 28 Onuan ku i' iyolo'd koposion dit otopot kopio om i poingompus, om a' no iyolo' apatai do gisom dot alaid. Om iso' pod tulun nga' aiso' i' o milo'd magahau diyolo' do mantad id doho'. 29 Iri nopo Tapa' ku, i pinapatahak diyolo' dot id doho', om agayo i' ko' koinsanai'd nunu nopo. Om iso' pod tulun nga' aiso' no o milo'd magahau diyolo' do mantad id di Tapa'. 30 Iyoho' nopo om i Tapa' om iso-iso' i',” ka di Yesus. 31 Om ongoi po daa'ddi kawagu'd watu i tulun dot ogumu' do pomodumpau di Yesus. 32 Nga' boros ka di Yesus dot id diyolo', “Ogumu' no o nowonsoi ku dit ongosonong dot antang-antangan dokoyu, i pinonuhuan di Tapa' doho' do momonsoi. Om id pogialatan nopo di winonsoi ku'ddi, om honggo'ddi o kopomodumpahan dokoyu doho'?” ka dau. 33 Om boros ka di piro-piro tulun do Yohudi, “Okon i' ko' i winonsoi nu dit ongosonong o kopomodumpahan dahai diya'd watu, nga' i mongindaraat ko'd Kinorohingan. Tulun ko i' daa toomod, om mingiyo-iyo ko id Kinorohingan,” ka diyolo'. 34 Om boros ka di Yesus, “A' toi nokotulis i' dot id suang do Tourat dokoyu o poingkaa: Boros kad Kinorohingan, ‘Iyokoyu nopo om ponokokinorohingan i',’ ka, koii? 35 Om oilaan toko' i' do poinggirot kasai' do gisom dot alaid i nokotulis dot id suang do Buuk do Kinorohingan, om ondung roitan do Kinorohingan do ponokokinorohingan i tulun di rumamit do boros dau, 36 om nokuro tu' momoros kou'd mongindaraat oku'd Kinorohingan di momoros oku'd Tanak oku'd Kinorohingan? Om pinili' oku i' di Tapa' om sinuhu' oku dau do mongoi'd hiti'd pomogunan. 37 Ondung a' ku winonsoi i pinonuhuan di Tapa', om kada' kou ponongkuyaai doho'. 38 Nga' iyo nopodti tu' winonsoi ku i' iri, om ponongkuyaai kou no di winonsoi ku'ddi, dot a' kou piya monongkuyaan doho'. Om iri nondo o koilo-ilo dokoyu, om kosuhut kou nondo dot iyoho' nopo om i Tapa' om iso-iso' i',” ka di Yesus. 39 Om tumotos po daa iyolo'd mongoi panangkap di Yesus, nga' nokopoggidu' i' iyau do mantad id diyolo'. 40 Om guli' no i Yesus do hilo'd soborong do Bawang do Yordan, i kinoiyonon di Yohanis do minamatis do tulun di gulu po, om undorong no iyau'd hilo'. 41 Om rikot no o tulun dot ogumu' dot id dau. Om boros ka diyolo', “A' i' i Yohanis minomonsoi'd koimayaan, nga' ongotopot ngai' nopo i pinoboros dau do pasal do tulun diti,” ka diyolo'. 42 Om ogumu'ddi o tulun do hiri do minonongkuyaan di Yesus.
Napatai i Lasarus
1 Haro ot iso' tulun do roitan dot i Lasarus do poingiyon do hilo'd Baitani do poinsugku' di Maria om i Marta, i tobpinai dau. 2 Om i Maria no i tondu' do pinopotuntug do tumau dit owongi' do hiri'd gakod do Tuhan, om i minomoluhad diri di tobuk dau. Insan o maso, om sakit no i Lasarus. 3 Om posunudai no di duwo o tobpinai dau'd tondu' i Yesus do poingkaa, “Tuhan, sumakit i tobpinai dahai di kosianan kopio nu'ddi,” ka. 4 Om soira'ddi nokorongou i Yesus do habar diri, om boros ka dau, “A' i' bo mongoit dot id kapatayon i toruol di Lasarus diri. Nga' nosiliu pogi' o miagal diri nga' maan i' do popoinggayo'd Kinorohingan, om koinggayo nondo i Tanak do Kinorohingan,” ka dau. 5 Om osianan i' kopio i Yesus di Marta, om i Maria, om i Lasarus. 6 Nga' soira'ddi nokorongou i Yesus do sumakit i Lasarus, om tomod i' iyau do minundorong do hiri'd kinoiyonon dau do duwo po o tadau. 7 Om katalib poddi o duwo o tadau, om boro-boros nogi' iyau dot id tumatanud dau, “Kainou gumuli' do hilo'd Yudia,” ka dau. 8 Om boros ka diyolo', “Guru, wagu pod mantad di dumpahon ko daa di tulun do watu, om gumuli' ko no kawagu'd hilo'?” ka. 9 Nga' boros ka di Yesus, “Okon toi ko' dangadau nopo om hopod om duwo jam do koloido'? Tulun nopo di mamanau'd dangadau om a' i' kasadu tu' kokito i' iyau di mamanawau diti pomogunan. 10 Nga' iri nopondo tulun di mamanau do dongotuong om kasadu no, tu' aiso' i' o tanawau dot id dau,” ka dau. 11 Om iyo noddi o pinoboros di Yesus. Om boros ka kawagu dau, “Nokoodop no i Lasarus, i tambalut toko', nga' ngoyon ku indo iyau posikai,” ka dau. 12 Om boros ka di tumatanud di Yesus, “Tuhan, ondung koodop toomod i Lasarus om olingasan i' iyau,” ka. 13 Komoyon nopo kopio di Yesus diri om napatai i Lasarus. Nga' ondos daa diyolo' om koodop no kopio i Lasarus do komoyon di Yesus. 14 Om iri noddi o kinapabarasan kopio di Yesus dot id diyolo' do, “Napatai no i Lasarus,” ka. 15 Om boros ka kawagu di Yesus, “Nga' uhang ku i' dot a' oku piya hino'd hilo', tu' osonong nogindo kopio iti dot id dokoyu, om otumbayaan kou i'. Nga' kainou mongoi'd hilo'd di Lasarus do dinondo,” ka dau. 16 Om boros kad i Tumas (i roitan dot i “Miapid”) dot id piro-piro tambalut dau, i sompi' ko' tumatanud di Yesus, “Kainou tumanud nopo, om ookuro i' do tumonggoi toko' dau'd matai!” ka dau.
I Yesus i Mamasi Kawagu om i Manahak do Koposion
17 Tontok di nokorikot i Yesus dot id kinoiyonon diri, om apat no tadau di Lasarus do poillobong. 18 Baitani nopo om id somok do Yorusalim; amu' i' korikot nod tolu kilomito o kosoduwo'. 19 Om ogumu' o tulun do mantad hiri'd Yudia do nokorikot do minongoi'd hiri'd di Marta om hiri'd di Maria do mongoi ponginsasamod diyolo', tu' napatai no i tobpinai diyolo'. 20 Om soira'ddi nokorongou i Marta do rumikot i Yesus, om soliwan no iyau do minongoi ruba' di Yesus, nga' i Maria nopo om minundorong i' do hiri'd walai. 21 Om boros kad i Marta dot id di Yesus, “Tuhan, ondung hiti ko daa do tontok diri, om atantu' no dot a' i' daa napatai i tobpinai ku. 22 Nga' iyo piya'ddi nga' oilaan ku i' do dinondo piya'dti nga' patahakon id Kinorohingan o nunu nopo i pokionuon do Tuhan dot id dau,” ka dau. 23 Om boros ka di Yesus dot id di Marta, “Apasi i' kawagu i tobpinai nu,” ka dau. 24 Om boros ka di Marta do suminimbar, “Oilaan ku i' dot apasi kawagu i Lasarus do posion kawagu i tulun do nangapatai do kopupuson diti pomogunan,” ka dau. 25 Om boros ka di Yesus dot id di Marta, “Iyoho' no i manahak do koposion om i mamasi kawagu do tulun do napatai. Om isai nopo o tulun dit otumbayaan doho' om apasi indo do mulong piya dot apatai iyau. 26 Om iri nopondo tulun di poimpasi kopio, it otumbayaan doho' om a' no matai do gisom dot alaid. Monongkuyaan koi'ddi?” ka dau. 27 Om boros ka di Marta do suminimbar, “Tuhan, monongkuyaan oku i' do Tanak ko'd Kinorohingan, i Raja' do Gampamasi di rumikot do hiti'd pomogunan,” ka dau.
Minihad I Yesus
28 Om koboros poddi di Marta o miagal diri, om ngoyo' no dau sunudai i Maria, i tobpinai dau. Om kanasai no dau iyau, “Hiti i Guru, om momolohou iyau diya',” ka dau. 29 Om korongou poddi di Maria iri om olomus nopo iyau do miningkakat om ongoi no iyau solowot di Yesus. 30 Tontok nopoddi nga' a' po i Yesus nokorikot do hiri'd kampung diri. Hiri kasai' po iyau'd kinoiyonon di nokorubaan di Marta dau. 31 Om soira'ddi nokito di piro-piro tulun do Yudia di maso do monginsasamod di Maria do hiri'd walai do miningkakat i Maria, om osiau nopod suminoliwan; om ongoi no iyolo' tanud dau, tu' ondos daa diyolo' om mongoi iyau pogihad do hiri'd lobong. 32 Om soira'ddi nokorikot i Maria do hiri'd kinoiyonon di Yesus, om di nokito dau i Yesus, om otud no i Maria do hiri'd toguang dau om boro-boros nod, “Tuhan, ondung hiti ko daa do tontok diri, om atantu' no dot a' i' daa napatai i tobpinai ku,” ka dau. 33 Om soira'ddi nokito di Yesus i Maria do mihad, om i tulun do Yudia di manud-tanud dau do songihad-ihad, om olisiu'ddi iyau, om osudu' iyau. 34 Om uhoto' no dau iyolo', “Hinonggo o pinamalabangan dokoyu dau?” ka. “Kaino, oi Tuhan, mongoi ontong,” ka diyolo'. 35 Om ihad noddi i Yesus. 36 Om boros kaddi diyolo', “Antangai pogi', nga' a' no moti' ogina-gina' o kogoyoo' do kosianan dau di Lasarus!” ka. 37 Nga' haro i' ot id pogialatan diyolo' do minomoros do, “Milo i' iyau'd poungkalat do tulun do bolou, om nokuro tu' a' kopio haro o winonsoi dau, om a' i' daa i Lasarus napatai?” ka.
Pinasi Kawagu i Lasarus
38 Om osudu' tomod diri i Yesus om ongoi no iyau do hiri'd pinamalabangan. Om iri nopo lobong diri nga' luang i' do pampang, do sinompon do watu dot agayo. 39 Om boros kaddi di Yesus, “Iduwo' ilo watu'd pinonompon,” ka dau. Nga' boros kad Marta, i tobpinai di tulun di napatai'ddi, “Nga' Tuhan, apat no tadau dau'd poillobong. Om outong no!” ka dau. 40 Om boros ka di Yesus dot id di Marta, “A' ku toi nokoboros no diya' dot, ‘Ondung monongkuyaan ko, om kokito ko indo do kogoyoo'd kuasa' do Kinorohingan!’ kangku,” ka dau. 41 Om iduwo' noddi diyolo' i watu'ddi. Om tingaha' no i Yesus do hilo'd tawan om boro-boros nod, “Pounsikou oi Apa', tu' minokinongou ko i' doho'. 42 Oilaan ku i' do mokinongou kasai' ko doho', nga' poboroson ku pogi' o miagal diti nga' parangahan ku'dti tulun do hiti; om monongkuyaan i' iyolo' dot iya' o minonuhu' doho',” ka dau. 43 Om koboros poddi di Yesus o miagal diri, om pomolohou no iyau dot opuhod do poingkaa, “Lasarus, soliwan!” ka. 44 Om soliwan no i tulun di napatai'ddi. Om iri nopo longon om gakod dau nga' nongorilitan pod kain di pomorilit do rata', om rabas dau nga' poinsompon po di kain di pinonokop do rabas. Om boros kaddi di Yesus dot id tulun di hino'd hiri, “Iduwo' dokoyu ilo kain dilo pinomorilit dau, om osonong i' iyau'd mamanau,” ka dau.
Pakat do Sumaap di Yesus
45 Om ogumu'ddi ot id pogialatan di tulun do Yudia di nokorikot do minongoi'd hiri'd di Maria, do minonongkuyaan di Yesus, di nokokito iyolo' di nosiliu do miagal diri. 46 Nga' haro i' o piro-piro diyolo' do minongoi solowot di tulun do Parisi do minongoi poposunud di winonsoi di Yesus. 47 Om iri noddi o kinapaharaan di tulun do Parisi om i piro-piro boyoon dot imam do pogibara-barasan dot iyolo' ngai' di Gompomutus do Don Tugama'. Om boros ka diyolo', “Nunu no ma o wonsoyon toko'dti? Ogumu'ddi kopio o koimayaan do wonsoyon di tulun diri! 48 Om ondung pologoson toko' iyau'd iyo kasai'ddi om oinsanan nopondo ilo tulun do monongkuyaan dau. Om alaid nopondo om rumikot nondo i momorinta' do Rum do mongoi pamaraag di Walai'd Sasambayangan dot Agayo om apatai o koinsanai'dti bansa' toko'!” ka diyolo'. 49 Om haro'ddi o songulun dot id pogialatan diyolo', i roitan dot i Kayapas, i Boyoon dot Agayo dot Imam do toun diri, do minomoros dot, “Aiso' no kopio o dokoyu'd toila-ilaan. 50 A' i' dokoyu osorou dot osonong nogid apatai o tiso' o tulun do sumowoli diti rayat ko' mantad dot oinsanan iti bansa'd apatai?” ka dau. 51 Otopot nopo kopio om iri nopo pinoboros di Kayapas diri om okon i' ko' mantad id dau'd pomusarahan. Nga' pinopoboros mantad iyau do matai nondo i Yesus dot i bansa'd Yohudi o kapatayan, tu' iyau i' o Boyoon dot Agayo dot Imam do toun diri. 52 Om okon i' ko' iri no bansa'd Yohudi o kapatayan di Yesus, suwai ko' monimung nogi' om popiiso' di tangaanak do Kinorohingan di nokopogitongkiad-kiad. 53 Om mantad nod tadau'ddi do minogiupakat i piro-piro boyoon do tulun do Yohudi do mamatai di Yesus. 54 Om iri noddi ot a' di Yesus nokointalangan kopio dot id tulun dot ogumu' do hilo'd Yudia. Om tongkiad no iyau do mantad hilo'd Yudia, om ongoi no dot id iso' o bandar di roitan dot Ipraim, it id somok di tana' do kowotuan. Om hilo' no iyau'd minundorong do mogiwoyo-woyo' di tumatanud dau. 55 Om tontok nopoddi nga' oruhai nod orikot i Tadau'd Agayo do Paska do tulun do Yohudi. Om ogumu' no o tulun do mantad hiri'd kokompungan do nokoongoi'd hilo'd Yorusalim do mongoi pomonsoi di natantu' mantad do wonsoyon do pomolidang do tinan do tintod di karamayan diri. 56 Om ihumo' no daa diyolo' i Yesus, om di nopo di pointimung iyolo'd hiri'd Walai'd Sasambayangan dot Agayo, om mogiboro-boros diri iyolo' do, “Poingkuro no o dokoyu'd tosorou? A' i' doti' iyau rumikot dot id karamayan diti'd baino',” ka no diyolo'. 57 Om pinoboros pogi' diyolo' o miagal diri nga' nokoponuhu' no i boyoon dot imam om i tulun do Parisi dot isai nopo diyolo' o koilo ondung honggo i Yesus, om mositi' nod posunudon, om atangkap indo diyolo' i Yesus.
Tinuntugan i Yesus do Tumau dit Owongi' do Hilo'd Baitani
1 Tontok dit onom po tadau dot a' orikot i Tadau'd Agayo do Paska, om ongoi no i Yesus do hilo'd Baitani. Om hilo' no o kinoiyonon di Lasarus, i pinasi kawagu di Yesus do mantad id kapatayon. 2 Om hilo' nod pinaakan diyolo' i Yesus, om maganu-anu nopo nga' i Marta. I Lasarus no om i tulun do suwai om songirikau do potorungak di Yesus do makan. 3 Om rikot noddi i Maria do kiinigit do tumau dit owongi' om agayo gatang, do haro i' doti' o satanga' lito do kogoyoo' di tumau'ddi. Om potuntugo' no dau i tumau'ddi do hiri'd kolung di Yesus, om luhado' nogiddi dau di tobuk dau. Om koponu' nopoddi di winongi' di tumau'ddi o hiri'd walai. 4 Nga' boros ka di Yudas Iskariot, i tiso' di tumatanud di Yesus nga' i pinapadagang di Yesus di koimbagu --- 5 om, “Nokuro tu' a' nogi' padagangon ilo tumau'd owongi' do tolu nahatus o tusin do pirok o pamagatang, om patahakon nogindo i tusin di gatang diri dot id tulun do mosikin?” ka dau. 6 Kinapamarasan nopo di Yudas do miagal diri nga' okon i' ko' mamadul kopio iyau di tulun do mosikin, nga' mantad i' di kabanakaho' dau. Asaru' iyau do manganu'd tusin do mantad hiri'd poiiyanan do tusin di pogiuhupan diyolo', tu' iyau i' o mongingigit di tusin diri. 7 Nga' boros ka di Yesus, “Pologoso' nopo ilo tondu'! Wonsoyon pogi' dau o miagal dilo' nga' maan di tadau'd kapamalabangan doho'. 8 Iri nopo tulun do mosikin om hino kasai' i' dot id pogialatan dokoyu, nga' iyoho' nopo om a' i' hino kasai',” ka dau.
Pakat do Sumaap di Lasarus
9 Om ogumu'ddi o tulun do Yohudi do nokorongou do hilo'd Baitani i Yesus, om ongoi noddi iyolo'd hilo'. Om kinaangayan nopo diyolo'd hilo' nga' okon nopo ko' mongoi solowot di Yesus, nga' mongoi nogi' ontong di Lasarus i pinasi di Yesus do mantad id kapatayon. 10 Om iri no daa'ddi o kapamatayan di piro-piro o boyoon dot imam di Lasarus piya, 11 tu' iyau no o kabayayat dot ogumu' di tulun do Yohudi do tumongkiad diyolo' om tumanud nogindo di Yesus om otumbayaan iyolo' dau.
Sinuwau i Yesus do Suminuang do Hilo'd Yorusalim
12 Tadau noddi kawagu om korongou no i tulun dot ogumu' di ruminikot do mongoi pamaramai do Paska, do hiri nod tanga'd ralan i Yesus do pakayaan do hilo'd Yorusalim. 13 Om ongoi noddi iyolo' panganu do papa' do palma, om ngoyo' no diyolo' rubao' i Yesus, do mikuwo'd sanggara-gara' do popimboros do poingkaa, “Royohon no o Kinorohingan! Barakatan nod Kinorohingan i rumikot dot id suang do ngaran do Tuhan. Barakatan nod Kinorohingan i Raja' dot Israil!” ka diyolo'. 14 Om ongoyo' no di Yesus o songinan o kaladai dit okoro' po, om sakai no iyau'ddi. Om kabayaai noddi i nokotulis dot id suang do Buuk do Kinorohingan do poingkaa, 15 “Kada' kooris, oi bandar do Sion! Antangai pogi' nga' rumikot no i Raja' nu, do poinsakai'd kaladai dit okoro' po!” ka. 16 Tontok nopoddi om a' po i tumatanud di Yesus kosuhut do komoyon ngai'ddi. Nga' koinggayo poddi i Yesus di napasi kawagu iyau do mantad id kapatayon, om kosorou nogiddi diyolo' dot iri nopo i winonsoi di tulun diri dot id di Yesus nga' nokotulis mantad no dot id Buuk do Kinorohingan dot iyau o komoyon. 17 Om iri nopoddi tulun di hino do tontok di linohou di Yesus i Lasarus do sumoliwan do mantad hiri'd lobong, om minamasi dau do mantad id kapatayon om popimboros nopoddi do pasal diri. 18 Om iri no o kinorikatan di tulun dot ogumu' dot id di Yesus tu' nokorongou no iyolo' dot iyau o minomonsoi do koimayaan diri. 19 Om boros ka di tulun do Parisi do mogiboro-boros, “Aiso' no o milo toko'd wonsoyon! Antangan nopo nga' oinsanan nopo moti' o tulun do hiti'd pomogunan do tumanud dau!” ka diyolo'.
Minogihum di Yesus o Piro-Piro Tulun do Yunani
20 Id pogialatan nopo di tulun do minongoi'd hilo'd Yorusalim do mongoi sambayang do tontok do tadau'd agayo'ddi om haro o piro-piro tulun do Yunani. 21 Om ongoi no iyolo' solowot di Pilipus om boro-boros nod, “Tobpinai, ondung milo daa om orohian daa iyahai do sumolowot di Yesus,” ka diyolo'. (I Pilipus nopoddi nga' mantad hilo'd Baitsaida, i hilo'd Galilia.) 22 Om ngoyo' no di Pilipus posunudo' iri dot id di Andarias, om piwoyo' nogiddi iyolo' do minongoi pomisunud di Yesus. 23 Om boros ka di Yesus dot id diyolo', “Norikot noddi i maso do poinggoyoon i Tanak do Tulun. 24 Otopot i' kopio iti poboroson ku do poingkaa: Ondung a' potonomon do hilo'd tana' o sowatu o gandum do gisom dot apatai iri, om sowatu-watu kasai' no iri. Nga' ondung apatai i sowatu o gandum diri, om milo nogindo do mongua' dot asapou. 25 Tulun nopo dit osianan do dau'd koposion om okon nogi' dot atagakan di koposion dau. Nga' tulun nopo dit okon ko' dau nod koposion o kosianan do hiti'd pomogunan diti, om ogompi' nogindo dau iri do kumaa dot id koposion dit otopot kopio om i poingompus. 26 Tulun nopo dit orohian do momonsoi'd karaja' ku om mositi' no do tumanud doho'; om kowoyo' indo doho' do hinonggo oku nopo do poundorong. Tulun nopo di momonsoi'd karaja' ku om momusou no di Tapa' ku,” ka di Yesus.
Pinoboros di Yesus o Pasal do Kapatayon Dau
27 Om boros ka kawagu di Yesus, “Agangau'ddi o ginawo ku; om nunu po mando o poboroson ku'dti do dinondo? Poboroson ku tuu o poingkaa, ‘Apa', poiduwo' oku do mantad id maso'dti,’ kangku tuu? Nga' kinorikatan ku nopo om mongoi nogi' kopio pomurimon do koinggoritan do maso'dti. 28 Poinggoyoo' no o ngaran nu, oi Apa'!” ka di Yesus. Om korongou noddi o boros do mantad hilo'd tawan do minomoros do poingkaa, “Nokoinggayo' ku no iri, om poinggoyoon ku pondo kawagu,” ka. 29 Om iri tulun dot ogumu' di hino'd hiri nga' nongkorongou i' di boros diri. Om boros ka diyolo', “Tinggoron!” ka. Nga' haro i' o minomoros dot, “Okon! Moloikat i' iri do minoro-boros dau,” ka. 30 Om boros kaddi di Yesus dot id diyolo', “Norongou pogi' i boros diri nga' maan do parangahan dokoyu om okon i' ko' iyoho' o porongohon. 31 Dinondo nopodti om norikot no o maso do kopomutusan diti pomogunan; om dinondo no dot alaon i boyoon diti pomogunan. 32 Nga' iyoho' nopo, om koinsawat oku nopondo do mantad hiti'd pomogunan, om mamayayat oku nondo dot ogumu' o tulun do rumikot dot id doho',” ka dau. 33 Om pinoboros pogi' dau o miagal diri nga' poposunud iyau do kowoyo-woyoo' dau'd matai. 34 Om boros ka di tulun dot ogumu' dot id dau, “Tumanud nopo di Tourat dahai om poimpasi kasai' i' i Raja' do Gampamasi. Om nokuro'ddi tu' poboroson nu do mositi' do poinsawaton i Tanak do Tulun do mantad hiti'd pomogunan? Isai toi i Tanak do Tulun diri?” ka diyolo'. 35 Om boros ka di Yesus do suminimbar, “Oruuhai i tanawau do hino dot id pogialatan dokoyu. Iyo nopoddi, om mamanau kou no do solinaid pod hino i tanawau, om a' kou i' orikatan di totuong. Tulun nopoddi mamanau dot id suang do totuong, om a' i' koilo ondung honggo o pakayaan dau. 36 Ponongkuyaai kou no di tanawau'ddi do solinaid po di tanawau dot id pogialatan dokoyu, om osiliu kou i' do tangaanak do tanawau,” ka di Yesus.
A' Monongkuyaan i Tulun do Yohudi
Om koboros poddi di Yesus o miagal diri, om tongkiad no iyau do mantad hiri om a' noddi iyau minintalang dot id diyolo'. 37 Mulong piya dot ogumu' no o koimayaan do nowonsoi di Yesus dot id toguang diyolo', nga' a' po iyolo' monongkuyaan dau. 38 Om kabayaai noddi i pinoboros di Nabi Yosaya do poingkaa, “Tuhan, isai poo o monongkuyaan di pinoboros dahai? Isai poo o pokitonon di sinundu do Tuhan?” ka. 39 Iti no ot a' diyolo' koponongkuyaan tu' nokoboros mantad no di Yosaya o poingkaa, “Boros kad Kinorohingan, 40 ‘Bolohon ku o mato diyolo', om pokodohon ku o ginawo diyolo'; om a' indo kokito o mato diyolo', om a' kosuhut o pomusarahan diyolo'. Om a' iyolo' koguli' dot id doho'; om a' ku iyolo' olingasan,’ ka,” ka dau. 41 Minomoros pogi' i Yosaya do miagal diri nga' nokokito no iyau do kagayaan di Yesus, om nokopimboros iyau do pasal dau. 42 Iyo piya'ddi nga' ogumu' i' o tulun dot id pogialatan piya di piro-piro boyoon do tulun do Yohudi do minonongkuyaan di Yesus. Nga' a' i' iyolo' katama' do popoboros kopio, tu' ooris iyolo' dot a' pabanaron di tulun do Parisi do sumuang di walai'd sasambayangan. 43 Orohian nogi' iyolo' do royohon do tulun ko' mantad do pusohon do Kinorohingan.
I Boros di Yesus o Momutus
44 Om boros kaddi di Yesus dot opuhod, “Iri nopo tulun dit otumbayaan doho', om okon i' ko' iyoho' o kotumbayaan dau, suwai ko' i minonuhu' doho'. 45 Om iri tulun di kokito doho' nga' kokito no di minonuhu' doho'. 46 Ruminikot oku do hiti'd pomogunan do miagal do tanawau, om a' indo koundorong dot id totuong o koinsanai'd tulun dit otumbayaan doho'. 47 Tulun nopo di korongou do ponudukan ku, om a' indo tumanud diri, om okon no ko' iyoho' o momohukum dau. Tu' okon i' ko' mongoi pomohukum o kinorikatan ku do hiti'd pomogunan, suwai ko' mongoi pamasi'd tulun do hiti'd pomogunan. 48 Iri nopo tulun di magada' doho' om it a' mokinongou do boros ku, om haro no i momutus dau. Iti no boros di pinolombus ku o momutus dau dot orikot o kopupuson diti pomogunan. 49 Tu' a' oku i' moro-boros do tumanud do doho'd korohian; suwai ko' iri i Tapa', i minonuhu' doho', o monuhu' doho' do popoboros dit apatut ku'd poboroson om popolombus dit apatut ku'd polombuson. 50 Om oilaan ku i' dot iri nopo ponuhuan dau'ddi om manahak do koposion dit otopot kopio om i poingompus. Om poingkuro nopo i pinotuduk di Tapa' ku dot id doho', om iri no o polombuson ku,” ka dau.
Minongoug i Yesus do Lapap di Tumatanud Dau
1 Di nopo di sangadau po dot a' orikot i Tadau'd Agayo do Paska, om oilaan no di Yesus do norikot noddi i maso dau do tumongkiad diti pomogunan, om gumuli' nondo iyau dot id Tapa' dau. Om osianan i' iyau di tulun do hiti'd pomogunan, i nosiliu do dau'd songonuon, om osianan kasai' i' iyau diyolo' do gisom do kopupuson. 2 I Yesus nopo om i tumatanud dau om maso no diyolo' do makan do dongotuong. Om nokosuang no di Rogon o korohian dot araat dot id suang do ginawo di Yudas, i tanak di Simun Iskariot, do mongoi papadagang di Yesus. 3 Om oilaan di Yesus do nakatahak ngai' no di Tapa' o koinsanai'd kuasa' dot id dau. Om oilaan dau do mantad iyau dot id Kinorohingan om gumuli' kawagu iyau dot id Kinorohingan. 4 Om iri noddi o kinoingkakatan dau, mikuwo'd minongidu' di rasuk dau dit id soibau, om poogkoso' no dau o tuala' dot id tawak dau. 5 Om potungu noddi iyau do waig dot id iso' o mimpun, om timpuun no do mongoug do lapap di tumatanud dau. Om i tuala do poingagkos dau o pomihid dau. 6 Om korikatai noddi dau i Simun Pitrus do mongoug, om boro-boros no i Simun Pitrus, “Tuhan, nokuro tu' iya' nogi' o mongoug do gakod ku?” ka. 7 Om boros ka di Yesus do suminimbar, “A' ko po kosuhut diti wonsoyon ku do dinondo poo, nga' kosuhut ko indo do koimbagu,” ka. 8 Nga' boros ka di Pitrus, “Atuuk, Tuhan, kada' nogi' kopio pongoug do lapap ku!” ka. Nga' boros ka di Yesus do suminimbar, “Ondung a' ku iya' ougan, om okon ko no ko' tumatanud ku,” ka. 9 Om boros ka di Simun Pitrus, “Iyo nopoddi, oi Tuhan, om okon nopo ko' lapap o pokiowugan ku nga' longon po om tulu ku!” ka dau. 10 Om boros ka di Yesus dot id di Pitrus, “Tulun nopo di nokopodsu' om opulang ngai' no o tinan. Om a' no minog do pulangan kawagu; suwai ko' iri po lapap dau ot ougan. Ongopulang kou nodti, nga' a' po mando oinsanan,” ka dau. 11 (Oilaan no di Yesus i tulun di papadagang dau. Om iri no o kinapabarasan dau dot, “Ongopulang kou nodti, nga' a' po mando oinsanan,” ka.) 12 Om koougai poddi di Yesus o lapap diyolo', om pakayo' no kawagu dau i rasuk dau dit id soibau om irikau no iyau kawagu. Om boros kaddi dau dot id diyolo', “Kosuhut kou i' di winonsoi ku dot id dokoyu di tiinu'ddi? 13 Roitan oku dokoyu'd Guru om Tuhan. Om iyo nogi' kopio'ddi. 14 Om ondung mongoug oku do lapap dokoyu, iyoho' i Tuhan om Guru dokoyu, om iyokoyu nga' apatut nogi' do mogioug-oug do lapap. 15 Om winonsoi ku o miagal diri do maan dokoyu'd omitanan, om momonsoi kou indo iyokoyu do miagal di winonsoi ku dot id dokoyu. 16 Otopot i' kopio iti poboroson ku dot id dokoyu do poingkaa: turipon nopo om a' i' agayo ko' i tuan dau, om i sinuhu' nga' a' i' agayo ko' i minonuhu'. 17 Ondung nongoilaan ngai' dokoyu iti, om olumaag kou no ondung wonsoyon dokoyu o miagal diti. 18 Iti nopo poboroson ku'dti om okon i' ko' koinsanai dokoyu o komoyon ku. Oilaan ku i' ondung isai ngai' i nongopili' ku. Nga' haro i' o nokotulis dot id suang do Buuk do Kinorohingan, di mositi' dot abayaan do poingkaa, ‘Iri nopo tulun di potorungak doho'd makan, om sumaap indo doho',’ ka. 19 Om poboroson mantad ku iti dot id dokoyu dot a' po osiliu iti, tu' osiliu nopondo o miagal diri, om monongkuyaan kou nondo dot iyoho' i roitan dot IYOHO' I HINO KASAI'. 20 Otopot no kopio iti poboroson ku do poingkaa: Isai nopo o tulun di rumamit do tulun di suhuon ku om rumamit no doho'. Om isai nopo i rumamit doho' om rumamit no di minonuhu' doho',” ka di Yesus.
Pinoboros Mantad di Yesus do Padagangon Iyau
21 Om koboros poddi di Yesus o miagal diri, om tumongob tomod diri iyau. Om boros kaddi dau, “Otopot no kopio iti poboroson ku dokoyu do haro nondo o songulun dot id pogialatan dokoyu do papadagang doho',” ka dau. 22 Om pogioontong nopo i tumatanud dau do mikuwo'd osuayan tu' a' i' iyolo' koilo ondung isai o komoyon dau. 23 Iri nopo tumatanud di Yesus di kosianan kopio dau om poirikau do hiri'd toning di Yesus. 24 Om bourai no iyau di Simun Pitrus do monuhu' dau do monguhot di Yesus ondung isai kopio o komoyon dau. 25 Om topis noddi di Yesus i tumatanud diri, om ponguhot nod, “Isai i komoyon nu'ddi, oi Tuhan?” ka. 26 Om boros ka di Yesus do suminimbar, “I tulun dit onuan ku'd roti di potobungon ku do hilo'd mangkuk,” ka dau. Om anu no i Yesus dot iso' o roti om potobungo' no dau do hiri'd mangkuk; om patahako' noddi dau di Yudas, i tanak di Simun Iskariot. 27 Om karamit poddi di Yudas i roti, om suang no o Rogon dot id ginawo dau. Om boros kaddi di Yesus dot id dau, “Lomusai nogi' kopio do momonsoi i korohian nu'd momonsoi,” ka dau. 28 Om aiso' i' o tiso' diyolo' di makan do hiri do kosuhut ondung nokuro tu' minomoros i Yesus dot iyo'ddi dot id di Yudas. 29 Om haro i' o kosorou do minonuhu' i Yesus di Yudas do mongoi pomoli di maan diyolo' dot id poginakanan diri, ko' minonuhu' po do mongoi panahak di tulun do mosikin do tusin dot ongokuuri' --- tu' i Yudas i' o mongingigit di tusin diyolo'. 30 Om karamit poddi di Yudas i roti'ddi, om pitilombus nopo iyau do suminoliwan. Om otuong no do tontok diri.
Ponuhuan do Wagu
31 Om kapamanau poddi i Yudas, om boro-boros no i Yesus do poingkaa, “Poinggoyoon noddi do baino' i Tanak do Tulun, om Kinorohingan nga' koinggayo nondo dot iyau o kopoinggayo. 32 Ondung koinggayo o Kinorohingan dot iyau o popoinggayo, om iyau nga' poinggoyoon indo do Kinorohingan, do Kinorohingan o popoinggayo, om oruhai no do poinggoyoon iyau'd Kinorohingan. 33 Oi tangaanak ku, a' oku no alaid do poinsugku' dokoyu. Om ihumon oku no daa'ndo dokoyu, nga' poingkuro nopo i nokoboros ku dot id piro-piro boyoon do tulun do Yohudi, om iyo iddi o poboroson ku dokoyu tu' a' kou indo koongoi do hiri'd kinoiyonon di ngoyon ku. 34 Iti no o ponuhuan do wagu do poboroson ku dot id dokoyu: Pogiinsian-sian kou no. Om poingkuro oku nopo do nosianan dokoyu, om apatut dot iyokoyu nga' iyo nogiddi do mogiinsian-sian. 35 Ondung mogiinsian-sian kou, om oinsanan nopondo o tulun do koilo do tumatanud kou doho',” ka di Yesus.
Pinoboros Mantad di Yesus do Mogolim Dau i Pitrus
36 Om boros ka di Simun Pitrus do minonguhot di Yesus, “Honggo o ngoyon nu, oi Tuhan?” ka. Om boros ka di Yesus do suminimbar, “Hilo' nopod ngoyon ku om a' ko po milo'd moyo' do dinondo poo. Nga' kosusuhut ko nopo doho' om koimbagu,” ka. 37 Om boros ka kawagu di Pitrus do minonguhot, “Tuhan, nokuro tu' a' oku milo'd moyo' diya' do dinondo poo? Uhang ku i' do patayon oku dot iya' o kapamatayan!” ka dau. 38 Om boros ka di Yesus do suminimbar, “Otopot i' toi kopio dot uhang nu'd patayon ko dot iyoho' o kapamatayan? Ilaai no, dot a' po koponingkukuhuk o manuk do tiinu', om intolu nu no poboroso' dot a' ko kotutun doho'!” ka.
I Yesus no o Ralan do Kumaa dot id Tapa'
1 Om boros ka di Yesus dot id diyolo', “Kada' kou katangkabo. Kotumbayaai kou nod Kinorohingan om kotumbayaai kou doho'. 2 Hilo' nopod walai di Tapa' ku om ogumu' i' o tiyonon. Om mongoi oku'd hilo' do mongoi posodia' do tiyonon dokoyu. Om a' ku i' daa poboroson iti dot id dokoyu ondung a' daa iti otopot kopio. 3 Om koongoi oku pondo koposodia' do tiyonon dokoyu, om gumuli' oku nogindo do mongoi pangangat dokoyu, om hinonggo oku nopondod poingiyon, om hiri kou no iyokoyu. 4 Om koilo kou i' do ralan do kumaa'd hiri'd kinoiyonon di ngoyon ku,” ka dau. 5 Om boros kaddi di Tumas dot id di Yesus, “Tuhan, a' i' iyahai koilo ondung honggo o ngoyon nu, om poingkuro nondo iyahai'd koilo do ralan do kumaa'd hilo'?” ka dau. 6 Om boros ka di Yesus do suminimbar, “Iyoho' no i ralan, i katapatan, om i koposion! Om iso' pod tulun nga' aiso' i' o korikot dot id di Tapa', ondung a' sumusui doho'. 7 Ondung kotutun kou doho', om atantu' no do kotutun kou no di Tapa' ku. Om nokotutun kou noddi dau, om nokokito kou dau,” ka di Yesus. 8 Om boros kad Pilipus dot id di Yesus, “Tuhan, pokitono' daa iyahai di Tapa', om a' indo iyahai muhot-uhot,” ka dau. 9 Nga' boros ka di Yesus do suminimbar, “Alaid oku no do mugku-sugku' dokoyu, om a' ko po kotutun doho' oi Pilipus? Iri nopo tulun di nokokito doho', om nokokito no di Tapa'. Om nokuro tu' momoros ko po dot, ‘Pokitono' daa iyahai di Tapa’ ka? 10 Oi Pilipus! A' ko i' otumbayaan dot iyoho' nopo om i Tapa' om iso-iso' i'? Iti nopo poboroson ku diya'dti om okon i' ko' pimpori-porian ku. Iri i Tapa', i poingiso' doho' o momonsoi ngai'dti. 11 Kotumbayaai no doho', dot iyoho' nopo om i Tapa' om iso-iso' i'. Nga' ondung a' ko otumbayaan diri, om kotumbayaai poo dot i nongowonsoi ku o koponongkuyaan. 12 Otopot no kopio iti poboroson ku do tulun nopo di monongkuyaan doho', om milo no do momonsoi do miagal di winonsoi ku --- om agayo ko' iri nga' milo i' dau do wonsoyon --- tu' mongoi oku no do hilo'd Tapa'. 13 Om nunu nopo o pokionuon dokoyu dot id suang do ngaran ku, om wonsoyon ku nori dot id dokoyu, om koinggayo i' i Tapa' dot i Tanak o popoinggayo. 14 Nunu nopo i pokionuon dokoyu dot id suang do ngaran ku, om wonsoyon ku no iri,” ka di Yesus.
Pinabatos di Yesus i Rusod do Kinorohingan
15 Om boros ka kawagu di Yesus, “Ondung osianan kou doho', om wonsoyon i' dokoyu i ponuhuan ku. 16 Pokionuon ku nondo di Tapa' om onuan kou nondo dau do Gomponguhup do suwai, i poinsugku' kasai' dokoyu do gisom dot alaid. 17 Iri nopo gomponguhup diri nga' i Rusod do Kinorohingan, i popointalang dit otopot do pasal do Kinorohingan. Iti nopo tulun do hiti'd pomogunan dit a' otumbayaan om a' i' milo do rumamit dau, tu' a' i' iyolo' kokito om a' iyolo' kotutun dau. Nga' iyokoyu nopo om kotutun i' dau, tu' poinsugku' i' iyau dokoyu om poingiso' nondo iyau dokoyu. 18 A' ku i' iyokoyu tongkiadan tomod dot iyokoyu-koyu do miagal di tangaanak dot aiso' o molohing; tu' gumuli' oku indo kawagu dot id dokoyu. 19 Oruhai no dot a' kokito doho' iti tulun do hiti'd pomogunan. Nga' kokito kou indo iyokoyu doho'! Om apasi kou indo, tu' poimpasi oku i'. 20 Osiliu nopondo o miagal diri, om oilaan nogindo dokoyu dot iyoho' om i Tapa' nga' iso-iso' i', om iyokoyu nga' poingiso' i' doho', om iyoho' nga' poingiso' dokoyu. 21 Tulun nopo di rumamit di ponuhuan om i momonsoi'ddi, om osianan no doho' o tulun diri. Om i Tapa' ku nga' osianan i' di tulun dit osianan doho'. Om iyoho' nga' osianan i' do tulun diri om mintalang oku dot id dau,” ka di Yesus. 22 Om ponguhot no i Yudas (okon i' ko' i Yudas Iskariot) di Yesus, “Tuhan, nokuro tu' mintalang ko dot id dahai om a' ko indo mintalang dot id tulun do suwai di hiti'd pomogunan?” ka dau. 23 Om boros ka di Yesus do suminimbar, “Tulun nopo dit osianan doho', om mumboyo' i' do ponudukan ku. Om osianan i' i Tapa' ku do tulun diri. Om rumikot nondo iyahai di Tapa' ku dot id dau om mundorong iyahai dot id dau. 24 Tulun nopo dit a' osianan doho' om a' no tumanud di ponudukan ku. Om iri nopo ponudukan di norongou dokoyu'ddi om okon i' ko' mantad id doho', suwai ko' mantad i' dot id di Tapa', i minonuhu' doho'. 25 Om poboroson ngai' ku nopo iti do solinaid po do poinsugku' oku dokoyu. 26 Nga' iri indo i Rusod do Kinorohingan, i Gomponguhup di suhuon di Tapa' dot id suang do ngaran ku o monuduk dokoyu do koinsanai'ddi, om poposorou dokoyu do koinsanai di pinosunud ku dokoyu. 27 Poopungan ku iyokoyu do kosimbayanan do ginawo. Om i kosimbayanan do mantad id doho' o patahakon ku dokoyu. Iri nopo patahakon ku'ddi om a' i' miagal di patahakon diti pomogunan dot id dokoyu. Kada' kou katangkabo om kada' kou kooris. 28 Nokorongou kou no doho' do minomoros do poingkaa, ‘Mamanau oku nondo nga' gumuli' oku i' kawagu dot id dokoyu,’ kangku. Ondung osianan kou doho', om otood kou i' do mongoi oku do hilo'd di Tapa', tu' i Tapa' nopo om agayo i' ko' iyoho'. 29 Om posunudon mantad ku iti dot id dokoyu do dinondo, dot a' po angabayaan ngai' iti; angabayaan ngai' nopondo iti om otumbayaan kou nondo. 30 A' ku no ponoruon o poboroson ku dokoyu, tu' norikot no o maso do korikatan di boyoon diti pomogunan. Nga' aiso' i' o kuasa' dau dot id sawat ku. 31 Nga' a' no kopio milo dot a' ongosiliu ngai' o miagal diri om koilo indo o tulun do hiti'd pomogunan dot osianan oku di Tapa' om momonsoi oku do koinsanai'ddi ponuhuan di Tapa' doho'. Kainou tumongkiad do mantad hiti,” ka di Yesus.
I Yesus no o Miagal do Guas dot Anggur dit Otopot Kopio
1 Om boros ka kawagu di Yesus, “Iyoho' no o miagal do guas dot anggur dit otopot kopio, om i Tapa' ku o gompomogompi' di guas dot anggur. 2 Pointikid-tikid do raan dit a' mongua', om tutuon no dau, om pointikid-tikid do raan di mongua' om piralapan dau o roun, om pillanggaan dau i raan om sumapou indo o tua'. 3 Ongolidang kou no tu' i ponudukan do pinotuduk ku dokoyu o nokolidang. 4 Miso' kasai' kou no doho' om poingiso' kasai' oku indo iyoho' dokoyu. Iri nopo raan om a' i' milo do mongua' dot ondung a' poindokot kasai' di guas. Om iyokoyu nga' milo nopod mongua' om poingiso' kasai' kou doho'. 5 Iyoho' no i guas dot anggur om iyokoyu i raan di guas dot anggur. Iri nopo tulun di poingiso' kasai' doho' om poingiso' oku iyoho' dau om mongua' no dot asapou; tu' ondung potongkiad kou doho', om aiso' i' o milo dokoyu'd wonsoyon. 6 Iri nopondo tulun dit a' poingiso' doho' om pataamon no do miagal di raan, om rumiou nondo. Om iri nopo raan do miagal diri om timungon nondo om pataamon do hiri'd tapui do tutudan. 7 Ondung poingiso' kasai' kou doho' om poingopi' dot id suang do ginawo dokoyu i ponudukan ku, om pokianu kou no di Tapa' do nunu nopo i korohian dokoyu; om patahakon indo dau i pokionuon dokoyu'ddi. 8 Ondung ogumu' o tua' dokoyu, om koinggayo no i Tapa' ku; om osiliu kou nondo kopio do tumatanud ku. 9 Om poingkuro nopo i Tapa' dot osianan doho', om iyo oku no iyoho'ddi dot osianan dokoyu. Om mositi' no do miagal di kowoyo-woyoo' do tulun di kosianan ku o kowoyo-woyoo' dokoyu. 10 Ondung mumboyo' kou di ponuhuan ku, om ogirot kasai' kou no dot id kosianan ku, do miagal doho' tu' ogirot kasai' dot id kosianan di Tapa' tu' mumboyo' oku i' di pinonuhuan dau. 11 Posunudon ngai' ku nopo iti dot id dokoyu, om haro i' o kataadan di mantad id doho' dot id suang do ginawo dokoyu, om otood kou indo kopio om aiso' o koiyo di kataadan dokoyu'ddi. 12 Iti no o ponuhuan ku: pogiinsian-sian kou no do miagal doho' tu' nosianan dokoyu. 13 Tulun nopo dit osianan kopio do tambalut dau om uhang no dot iyau ot apatai ko' apatai po i tambalut dau. 14 Iyokoyu no o tambalut ku ondung momonsoi kou no di ponuhuan ku dokoyu. 15 A' ku no iyokoyu roitan do susuhuon, tu' susuhuon nopo om a' i' koilo ondung nunu i wonsoyon di tuan dau. Roitan ku no iyokoyu do tambalut tu' nokosunud ngai' ku no dokoyu i nongorongou ku do mantad id di Tapa'. 16 Okon i' ko' iyokoyu o minomili' doho', suwai ko' iyoho' o minomili' dokoyu, om iyoho' o monuhu' dokoyu do mongua'd asapou --- i tua' dit a' rumaag. Om onuan kou indo di Tapa' do nunu nopo i pokionuon dokoyu dau dot id suang do ngaran ku. 17 Iti no o ponuhuan ku dokoyu: Pogiinsian-sian kou no,” ka di Yesus.
Karaatan Kou do Tulun do Hiti'd Pomogunan
18 Om boros ka kawagu di Yesus, “Soira' nopo do karaatan kou'd tulun do hiti'd pomogunan, om soroho' no dokoyu dot iyoho' i' o nokopogulu do kinaraatan diyolo'. 19 Ondung posokodung kou diti tulun do hiti'd pomogunan, om kosianan kou i' daa diyolo' do miagal di tulun di kosokodung diyolo'. Nga' nopili' ku no iyokoyu om a' kou i' posokodung di tulun do hiti'd pomogunan, om a' kou noddi kosokodung diyolo'. Om iri no o kokuwaan dot araatan dokoyu iti tulun do hiti'd pomogunan. 20 Soroho' no dokoyu i nokoboros ku dokoyu dot, ‘Iri nopo susuhuon om a' i' agayo ko' i tuan dau,’ kangku. Ondung minonginggorit iyolo' doho', om iyokoyu nga' inggoriton i' diyolo'. Ondung tuminanud iyolo' di ponudukan ku om tumanud no iyolo' do ponudukan dokoyu. 21 Om wonsoyon indo diyolo' o koinsanai'ddi dot id dokoyu tu' tumatanud kou i' doho', tu' a' iyolo' kotutun di minonuhu' doho'. 22 Ondung a' oku daa ruminikot om a' oku pinopoboros ngai'ddi dot id diyolo', om a' i' daa iyolo' nokowonsoi'd dusa. Nga' baino' nopoddi om a' no iyolo' milo do momoros do poingkaa, ‘A' i' iyahai koilo do dusa i winonsoi dahai,’ ka. 23 Iri nopo tulun dit araatan doho' om araatan no di Tapa' ku. 24 Ondung a' ku daa winonsoi dot id pogialatan diyolo' it a' insan kowonsoi do tulun do suwai, om a' i' daa iyolo' nokowonsoi'd dusa. Nga' nokokito no iyolo' di winonsoi ku, om araatan iddi iyolo' doho' om araatan di Tapa' ku. 25 Nga' a' no milo dot a' osiliu o miagal diri, om abayaan i' i nokotulis do hiri'd Tourat diyolo' do poingkaa, ‘Araatan iyolo' doho' dot aiso' o paantakan,’ ka. 26 Nga' suhuon ku indo do rumikot dot id dokoyu i Gomponguhup, i mantad id di Tapa'. Om iyau no i Rusod di popointalang dit otopot do pasal do Kinorohingan. Om korikot nopondo iyau, om popoilo indo iyau do pasal doho'. 27 Om iyokoyu nga' mositi' no do popinsusui do pasal doho', tu' nokopitanud-tanud kou i' doho' do mantad di timpuun i'.
1 Nokosunud ngai' ku no dokoyu iti om a' indo tumanus o kotumbayaan dokoyu. 2 Om a' kou nondo diyolo' pabanaron do sumambayang do hiri'd walai'd sasambayangan. Om rumikot nondo o maso dot ondos daa di tulun di mamatai dokoyu om momusou iyau'd Kinorohingan do momonsoi iyau'd miagal diri. 3 Om momonsoi pogi' iyolo'd miagal diri dot id dokoyu nga' a' po iyolo' kotutun di Tapa' om a' kotutun doho'. 4 Nga' poboroson ku pogi' iti dot id dokoyu do dinondo nga' abayaan nopondo iti, om ahandaman indo dokoyu do nokosunud mantad ku no iti dot id dokoyu,” ka di Yesus.
Karaja' do Rusod do Kinorohingan
Om boros ka kawagu di Yesus, “A' ku i' mantad pinosunud dokoyu iti di timpuun kou i' do tuminanud doho', tu' poinsugku' oku po dokoyu. 5 Nga' baino' noddi om gumuli' oku no dot id dau, i minonuhu' doho'; om aiso' i' o tiso' dokoyu do minonguhot ondung honggo o ngoyon ku. 6 Nga' tumongob kou nogiddi, tu' pinoboros ku i' o miagal diri dot id dokoyu. 7 Nga' otopot i' kopio o poboroson ku dokoyu do poingkaa: Osonong nogi' kopio dot id dokoyu do kotongkiad oku; tu' ondung a' oku kotongkiad om a' indo i Gomponguhup rumikot dot id dokoyu. Nga' ondung kotongkiad oku, om suhuon ku indo i Gomponguhup do rumikot dot id dokoyu. 8 Korikot nopondo iyau, om pointalang nondo iyau dot id tulun do hiti'd pomogunan do komoyon kopio'd dusa, om it otopot, om pasal do kowoyo-woyoo' do Kinorohingan do momohukum. 9 Om pointalangon nondo dau do dusa i' it a' monongkuyaan doho'. 10 Om pointalangon dau dot otopot oku, tu' mongoi oku no dot id di Tapa' om a' kou nondo kokito kawagu doho'. 11 Om pointalangon dau do nokotimpuun no o Kinorohingan do momohukum, tu' nohukuman no i boyoon diti pomogunan. 12 Ogumu' po daa o poboroson ku dokoyu nga' a' kou po kosuhut do dinondo poo. 13 Nga' korikot nopondo i Rusod, i popotuduk dit otopot do pasal do Kinorohingan, om poiloon kou nondo dau do koinsanai'd dit ongotopot. Om a' i' iyau mimpori-pori'd mimboros tu' iri no i norongou dau o poboroson dau, om sunudan kou dau dit ongosiliu do koimbagu. 14 Om poinggoyoon oku indo dau tu' iri nopo polombuson dau dot id dokoyu om iri i norongou dau do mantad id doho'. 15 Koinsanai'ddi nasanganu di Tapa' om nasanganu ku no iyoho'. Om iri no o nakapabarasan ku dot iri nopo polombuson di Rusod dot id dokoyu, om norongou i' dau do mantad id doho',” ka di Yesus.
Kosusaan om Kataadan
16 Om boros ka kawagu di Yesus, “Oruhai noddi kopio dot a' kou nondo kokito doho', nga' a' i' alaid om kokito kou no kawagu doho',” ka dau. 17 Om haro'ddi o piro-piro di tumatanud di Yesus do mogiuhot-uhot. Boros ka diyolo', “Nunu o komoyon dau dot id dati' dot, ‘Oruhai noddi kopio, om a' kou nondo kokito doho', om a' i' alaid om kokito kou no kawagu doho’ ka? Om nunu o komoyon dau dot, ‘Mongoi oku'd hilo'd di Tapa'’ ka?” ka diyolo'. 18 Om mogiuhot-uhot po iyolo', “Nunu o komoyon dot, ‘Oruhai noddi kopio,’ ka? A' toko' i' kosuhut ondung nunu o komoyon dau!” ka no diyolo'. 19 Om oilaan i' di Yesus do siponguhot no daa iyolo' dau. Om boro-boros noddi iyau, “Boros kangku di tiinu' om, ‘Oruhai noddi kopio om a' kou nondo kokito doho', om a' i' alaid om kokito kou no kawagu doho',’ kangku. Iri o pogiuhat-uhatan dokoyu? 20 Ponongkuyaai kou no, do mihad kou nondo om mogihad kou, nga' otood indo o tulun do hiti'd pomogunan. Om tumongob kou nondo, nga' sumiliu indo do kataadan i katangaban dokoyu. 21 Ondung haro o tondu' dit oruhai nod osusu, om tumongob no daa'ndo iyau, tu' norikot no i maso dau'd oinggorit. Nga' osusu pondo i tanak dau, om olihuan nopo di tondu' i koinggoritan dau tu' atataadan do haro o tanak do nosusu do hiti'd pomogunan. 22 Om iyokoyu nga' iyo nogiddi! Tumongob kou daa do dinondo poo, nga' kosolowot oku indo kawagu dokoyu, om otood kou nondo; om iso' pod tulun nga' aiso' no o milo'd mongoi pongidu' di kataadan diri do mantad id ginawo dokoyu. 23 Om tontok nopondo do tadau'ddi, om aiso' no o tuhoton dokoyu doho'. Ponongkuyaai kou no do nunu nopo i pokionuon dokoyu di Tapa' dot id suang do ngaran ku, om patahakon no do Tapa' iri dot id dokoyu. 24 Gisom nopod dinondo, om a' kou po nokopokianu do nunu-nunu dot id suang do ngaran ku. Pokianu kou no, om kaanu kou i'; om otood kou indo kopio do gisom dot aiso' no o koiyo di kotoodo' dokoyu,” ka di Yesus.
Kamanangan dot id Sawat diti Pomogunan
25 Om boros ka kawagu di Yesus, “Posiribanon ku i' o popoboros ku dokoyu do koinsanai'dti. Nga' orikot indo o maso dot a' ku posiribanon, tu' posondoton ku nopondo kopio o pomisunud ku dokoyu do pasal di Tapa'. 26 Om tontok nopondoddi om mokianu kou nondo di Tapa' dot id suang do ngaran ku, om ilaai no dokoyu, dot a' ku i' iyokoyu pokionuan do nunu nopo do mantad id di Tapa', 27 tu' i Tapa' nga' osianan i' dokoyu. Om osianan pogi' iyau dokoyu nga' osianan kou i' doho', om otumbayaan kou do mantad oku dot id Kinorohingan. 28 Otopot nogi' kopio do mantad oku dot id di Tapa', om ruminikot oku do hiti'd pomogunan. Nga' baino' noddi om tumongkiad oku nodti pomogunan tu' gumuli' oku no dot id di Tapa',” ka di Yesus. 29 Om boros kaddi di tumatanud di Yesus dot id dau, “Posondoton nu nopoddi kopio o pomomoros nu'd baino', oi Tuhan, om a' nu no posiribanon. 30 Om oilaan dahai do koilo ko i' do koinsanai'd nunu nopo, om a' no minog do haro o tongosongulun piya do monguhot do nunu nopo dot id diya', oi Tuhan. Om iri no o koponongkuyaanan dahai do mantad ko dot id Kinorohingan,” ka diyolo'. 31 Om boros kaddi di Yesus do suminimbar diyolo', “Otumbayaan kou noddi kopio? 32 Soro-soroho' dokoyu! Tu' rumikot nondo i maso, om otopot nopo kopio om nokorikot no, do pogitotongkiadon kou nondo. Om sompori-pori kou nopondod muli' dot id walai dokoyu, om iso' oku pondo do pogiiduan dokoyu. Nga' a' oku i' iso-iso' tu' moyo-woyo' i' doho' i Tapa' ku. 33 Om poboroson ngai' ku nopo iti, om kaanu kou i' do kosimbayanan do ginawo tu' poingiso' kou no doho'. Hiti nopod pomogunan om oinggorit kou no. Nga' pogiroton nopo dokoyu o ginawo dokoyu! Tu' naala' ku no iti pomogunan!” ka di Yesus.
Sinambayangan di Yesus i Tumatanud Dau
1 Om koboros poddi di Yesus o miagal diri, om tingaha' no iyau do hilo'd tawan, om boro-boros nod, “Apa', norikot noddi i maso. Om poinggoyoo' no i Tanak nu, om poinggoyoon i' di Tanak i Tapa'. 2 Om nakatahak nu no o kuasa' dot id sawat do koinsanai'd tulun dot id Tanak diri, oi Apa', om kapanahak i' iyau'd koposion dit otopot kopio om i poingompus dot id koinsanai'd tulun di patahakon do Tapa' dot id dau. 3 Om iti no o komoyon di koposion dit otopot kopio om i poingompus tu' kotutun o tulun di Tapa', i Kinorohingan dit iso' noo dit otopot, om kotutun di Yesus Kristus, i sinuhu' di Tapa'. 4 Nokoinggayo ku no i Tapa' do hiti'd pomogunan tu' nowonsoi ngai' ku i' i karaja' di pinonuhuan di Tapa' doho'. 5 Apa'! Poinggoyoo' oku no dot id toguang nu do dinondo, do miagal di pinopoinggayo ko doho' dit a' po nowonsoi iti pomogunan. 6 Nokointutun ku no o Tapa' dot id tulun do hiti'd pomogunan, id tulun di pinatahak nu dot id doho'. Iya' i' oi Apa', o sanganu diyolo', om nakatahak nu noddi iyolo' dot id doho'. Om natanud no diyolo' i boros nu, oi Apa'. 7 Om dinondo nopoddi om koilo no iyolo' do koinsanai'ddi patahakon do Tapa' dot id doho' om mantad no dot id Tapa'. 8 Nokolombus ku no dot id diyolo' i boros di pinosunud nu doho'; om notumbayaan no iyolo'ddi. Om oilaan no kopio diyolo' do mantad oku dot id diya', oi Apa', om monongkuyaan iyolo' dot iya' o minonuhu' doho'. 9 Om sambayangan ku no iyolo'. Nga' a' ku i' sambayangan ngai' i tulun do hiti'd pomogunan, suwai ko' iri no i tulun di nakatahak nu dot id doho' o sambayangan ku, oi Apa', tu' iyolo' no o nasanganu nu. 10 Koinsanai di doho'd nasanganu om nasanganu nu no iya', oi Apa'; om koinsanai di diya'd nasanganu nga' asanganu ku no iyoho'. Om koinggayo oku dot id pogialatan diyolo'. 11 Om mongoi oku noddi dot id diya', oi Apa'. A' oku noddi poundorong do hiti'd pomogunan; nga' iyolo' nopo om hiti pod pomogunan. Oi Apa', dit olidang! Gompio' no iyolo' di kuasa' do ngaran nu, i ngaran di pinatahak nu dot id doho' --- om osiliu i' iyolo' dot iso-iso', do miagal dato tu' iso- iso', oi Apa'. 12 Tontok di poinsugku' oku po diyolo', om ginompi' ku i' iyolo' dot i kuasa' di ngaran nu o pinomogompi' ku, i ngaran di pinatahak nu doho'. Ginompi' ku i' iyolo' om iso' po diyolo' nga' aiso' i' o natagak do suwai indo ko' i tulun di tumagak no mantad; om abayaan i' i nokotulis dot id suang do Buuk do Kinorohingan. 13 Dinondo nopodti om mongoi oku no dot id diya', oi Apa'. Om poboroson ngai' ku nopo diyolo' iti do daamot ku po do hiti'd pomogunan, om opurimanan i' kopio diyolo' o kataadan ku. 14 Om nokolombus ku no dot id diyolo' i boros nu, oi Apa'. Om araatan diri diyolo' iti tulun do hiti'd pomogunan tu' a' i' iyolo' kosokodung diti tulun do hiti'd pomogunan, do miagal doho' tu' a' kosokodung diti tulun do hiti'd pomogunan. 15 A' ku i' iyolo' pokiangayan diya' do mantad hiti'd pomogunan, nga' pokigompian ku no diya' iyolo' do mantad id di Yaraat. 16 Om poingkuro nopo dot a' oku iyoho' kosokodung diti tulun do hiti'd pomogunan, om iyolo' nga' a' nogi' kosokodung diti tulun do hiti'd pomogunan. 17 Siliho' no iyolo'd diya' kopio'd songonuon, oi Apa', dot it otopot o poposiliu, iri no i boros nu ot otopot. 18 Om poingkuro ko nopo iya' do minonuhu' doho' do rumikot do hiti'd pomogunan, oi Apa', om iyo oku nogiddi iyoho' do monuhu' diyolo' do hiti'd pomogunan. 19 Iyolo' no o kinapatahakan ku'd tinan ku do sumiliu'd diya' kopio'd songonuon, oi Apa', om osiliu indo iyolo' do diya' kopio'd songonuon, dot it otopot o poposiliu. 20 Om okon i' ko' iyolo' noo o sambayangan ku, suwai ko' sambayangan ku po i tulun dit otumbayaan doho' do koimbagu, do korongou iyolo' di posusuyon diyolo'. 21 Om pokionuon ku no oi Apa', dot osiliu iyolo' dot iso-iso' do miagal dato oi Apa', tu' iso-iso'. Om koiso' indo iyolo' dato om monongkuyaan iti tulun do hiti'd pomogunan dot iya' o minonuhu' doho'. 22 Noonuan ku no iyolo' do kagayaan, dot i kagayaan di nakatahak nu doho' o pinatahak ku, om osiliu i' iyolo' dot iso-iso' do miagal dato tu' iso-iso'; 23 do poingiso' oku diyolo', om poingiso' ko doho' om kopogiiso' indo kopio iyolo'. Om koilo indo iti tulun do hiti'd pomogunan dot iya' o minonuhu' doho', om koilo dot osianan ko diyolo' do miagal dot osianan ko doho', oi Apa'. 24 Oi Apa', orohian oku no kopio do poinsugku' iyolo' doho' do hiti'd kinoiyonon ku, iyolo' i pinatahak nu dot id doho', om kokito indo iyolo' di kagayaan ku; iri no i kagayaan di pinatahak nu doho', tu' nosianan ko i' doho' dit a' po nowonsoi iti pomogunan, oi Apa'. 25 Oi Apa', it otulid! Iti nopo tulun do hiti'd pomogunan om a' i' kotutun diya', nga' iyoho' nopo om kotutun i' diya'; om kongoilo i tulun ku dot iya' o minonuhu' doho', oi Apa'. 26 Om pinoilo ku iyolo' ondung isai kopio ko; om poiloon kasai' ku po iyolo' do pasal diya', om koiyon i' dot id suang do ginawo diyolo' i kosianan nu dot id doho', om koiso' oku i' diyolo',” ka di Yesus do suminambayang.
Tinangkap i Yesus
1 Om kasambayang poddi i Yesus do miagal diri, om ongoi no iyau do mogiwoyo-woyo' di tumatanud dau, do hiri'd soborong di Bawang do Kidron. Om hiri nopo nga' haro o tiso' kabun om ongoi no i Yesus om i tumatanud dau do hiri'd kabun diri. 2 I Yudas nopo, i papadagang diri, om koilo i' do kinoiyonon diri; tu' asaru' no i Yesus do mongoi'd hiri do mogiwoyo-woyo' di tumatanud dau. 3 Om ongoi noddi i Yudas dot id kinoiyonon diri do minitanud do somposukan o soudor do Rum om piro-piro o tulun di madtatamong di Walai'd Sasambayangan dot Agayo, i sinuhu' di piro-piro boyoon dot imam om i tulun do Parisi. Om minigit iyolo' do pakakas do sumangod, om lampung om tata'. 4 Om oilaan ngai' no di Yesus it osiliu dot id dau. Om ongoi no iyau insomok di tulun diri om uhoto' no dau iyolo', “Isai o tihumon dokoyu?” ka dau. 5 Om boros ka diyolo' do suminimbar, “I Yesus, i tulun do Nasarit,” ka diyolo'. “Iyoho' nogi' iri,” ka di Yesus. I Yudas nopo, i papadagang diri, om poingkakat id hiri, dot id pogialatan diyolo'. 6 Om tontok di minomoros i Yesus dot id diyolo' dot, “Iyoho' nogi' iri,” ka, om kosunsuri ngai' nopo iyolo' om kangahaba' no do hiri'd tana'. 7 Om uhoto' po kawagu di Yesus iyolo', “Isai o tihumon dokoyu?” ka dau. Om boros ka diyolo'd suminimbar, “I Yesus, i tulun do Nasarit,” ka. 8 Om boros ka di Yesus, “Nokoboros ku no dot iyoho' iri. Om ondung iyoho' kopio ot ihumon dokoyu, om pologoson nopoti suwai'd tumongkiad,” ka dau. 9 (Om koboros poddi dau o miagal diri, om kosiliu no i pinoboros di Yesus dit id gulu po di poingkaa, “Apa', aiso' i' o tiso' di tulun do pinatahak nu dot id doho' do natagak,” ka.) 10 Nga' i Simun Pitrus nopo, i kiniabil do gayang, om kodongo' nopo dau i gayang om tibaso' no dau o tiso' di turipon di Boyoon dot Agayo dot Imam, gisom do kaansap nopo o tolingo'd wanan di turipon diri. Ngaran nopo di turipon diri om i Malkus. 11 Om boros kaddi di Yesus dot id di Pitrus, “Paangkapo' kawagu ino gayang nu! Ondos nu daa om a' ku inumon i sangkir do sinuangan do koinggoritan di pinatahak di Tapa' dot id doho'?” ka dau.
Pinaatod i Yesus dot id di Hanas
12 Om tangkapo' noddi di piro-piro soudor do Rum om i boyoon diyolo' om i piro-piro madtatamong i bansa'd Yohudi, i Yesus, om kinagasan diyolo' iyau. 13 Om ngoyo' po diyolo' posolowoto' i Yesus di Hanas, i tiwanon di Kayapas. I Kayapas nopo om Boyoon dot Agayo dot Imam do tontok do toun diri. 14 Om iyau no i minomisunud di piro-piro o boyoon do tulun do Yohudi dot osonong nogid apatai o tiso' o tulun ko' mantad dot apatai o koinsanai'd tulun.
Minogolim i Pitrus di Yesus
15 Om woyo' no di Yesus i Simun Pitrus om iso' kawagu o tumatanud di Yesus do suwai. Iri nopo tumatanud di Yesus di tiso'ddi nga' otutunan i' di Boyoon dot Agayo dot Imam; om woyo' nopoddi iyau di Yesus do suminuang do hiri'd natad di walai di Boyoon dot Agayo dot Imam. 16 Nga' i Pitrus nopo om poingandad do hiri'd soliwan, do hiri'd toning di wawayaan. Om soliwan noddi i tumatanud di Yesus di tiso' om ongoi no iyau boro-boros di susuhuon do tondu' di madtamong di wawayaan, om posuango' noddi dau i Pitrus. 17 Om boros ka di susuhuon do tondu'ddi dot id di Pitrus, “Okon toi ko' iya' nga' tumatanud i' di tulun diri?” ka dau. “Okon,” kad Pitrus. 18 Tontok nopoddi nga' osogit kopio, om nokopomurakit nod tapui i piro-piro susuhuon om i madtatamong, om magamut noddi iyolo'd hiri. Om ongoi no i Pitrus iyau'd hiri om ingkakat no iyau do minagamut dot id rolot diyolo'.
Nuhot di Boyoon dot Agayo dot Imam i Yesus
19 Om uhoto' no di Boyoon dot Agayo dot Imam i Yesus do pasal di piro-piro tumatanud dau om pasal di ponudukan dau. 20 Om boros ka di Yesus do suminimbar, “Poinsondot kasai' i' o pomomoros ku dot id toguang do tulun dot ogumu'. Om asaru' oku'd monuduk dot id piro-piro o walai'd sasambayangan om hilo'd Walai'd Sasambayangan dot Agayo, i koubasanan do tulun do Yohudi do tumimung. A' oku i' insan umbal do lumisok-lisok do popoboros do nunu nopo. 21 Om nokuro'ddi tu' uhoton oku diya'? Uhoto' nopo i tulun di nokorongou doho'd monuduk. Atantu' no do koilo i' iyolo' di pinoboros ku,” ka dau. 22 Om soira'ddi minomoros i Yesus do miagal diri, om tompilingai no iyau do tiso' di tulun do madtatamong do hiri om boros ka di madtatamong diri, “Katama' ko no daa kopio do momoros do miagal diri dot id Boyoon dot Agayo dot Imam!” ka. 23 Om boros ka di Yesus, “Ondung haro o nakasala' di pinoboros ku, om poboroso' nogid hiti i nasalaan ku! Nga' ondung otopot i pinoboros ku om nokuro tu' monompiling ko doho'?” ka dau. 24 Om ponuhu' noddi i Hanas do tulun do mongoi paatod di Yesus dot id di Kayapas, i Boyoon dot Agayo dot Imam, di kikogos po o longon di Yesus.
Minogolim Kawagu i Pitrus di Yesus
25 I Simun Pitrus nopo om poingkakat pod magamut do hiri. Om boros kaddi di piro-piro tulun di poingkakat do hiri, “Okon toi ko' tumatanud ko i' iya' di tulun diri?” ka. Nga' boros ka di Pitrus do minogolim, “Okon!” ka. 26 Om haro'ddi o tiso' di turipon di Boyoon dot Agayo dot Imam, i koworisan di tulun di tinibas di Pitrus o tolingo do minomoros dot, “Okon toi ko' iya' i nokito ku do moyo-woyo' dau do hilo'd kabun diri?” ka. 27 Om boros kad Pitrus do minogolim kawagu, “Okon,” ka dau. Om tontok noddi do minoningkukuhuk i manuk.
Pinotimbaba' i Yesus di Pilatus
28 Osuab poddi om pootodo' no diyolo' i Yesus do hiri'd walai di gobunor, do mantad hiri'd walai di Kayapas. Iri nopo tulun do Yohudi om a' i' suminuang do hiri'd walai di gobunor tu' mada' iyolo'd ososomu' dot id pagantangan do tugama', tu' sipangakan i' iyolo' di taakanon do Paska. 29 Om iri noddi o kinosoliwanan di Pilatus do minongoi ponguhot diyolo'. Boros ka dau, “Nunu o kapamadawahan dokoyu do tulun diti?” ka dau. 30 Om boros ka diyolo'd suminimbar, “Ondung a' iti tulun kisala', om a' i' daa dahai porikoton dot id diya', oi Gobunor,” ka diyolo'. 31 Om boros kad Pilatus dot id diyolo', “Tanggayai nopo dokoyu ilo', om butusan nopo do tumanud dot oturan dokoyu!” ka dau. Nga' boros ka di tulun do Yohudi, “A' i' iyahai koino-ino'd momohukum do tulun do kapatayon o pomohukum,” ka diyolo'. 32 (Om nosiliu pogi' o miagal diti nga' mamayaan di nokoboros mantad di Yesus do pasal do kowoyo-woyoo' dau'd matai.) 33 Om suang no kawagu i Pilatus do hiri'd walai dau om lohowo' no dau i Yesus, om uhoto' no dau iyau, “Raja' ko nogid tulun do Yohudi?” ka dau. 34 Om boros ka di Yesus do suminimbar, “Iya' kopio o muhot diti ko' tuhoton do tulun do suwai di minomisunud diya' do pasal doho'?” ka dau. 35 Om boros kad Pilatus do suminimbar, “Tulun oku toi'd Yohudi? Iri nopo pinapatahak diya' dot id doho' om iri i bansa' nu om i piro-piro boyoon dot imam. Nunu toi o winonsoi nu?” ka dau. 36 Om boros kad Yesus, “Pomorintaan ku nopo om okon i' ko' mantad hiti'd pomogunan. Tu' ondung mantad daa do hiti'd pomogunan, om tumotos i' daa i tulun di tumanud doho' do monguhup doho', om a' oku i' katahak dot id piro-piro boyoon do tulun do Yohudi. Nga' okon i' kopio ko' mantad hiti'd pomogunan o pomorintaan ku,” ka dau. 37 Om uhoto' po iyau di Pilatus, “Iyo nopoddi, om raja' ko i' no?” ka dau. Om boros kad Yesus do suminimbar, “Nokoboros nu no do raja' oku. Om iri no o kinopogkosusuan doho' om kinorikatan ku do hiti'd pomogunan tu' mongoi popoboros do pasal dit otopot. Om iri nopo tulun di tumanud dit otopot diri om mokinongou i' doho',” ka dau. 38 Om uhoto' no iyau di Pilatus, “Nunu o komoyon dit otopot?” ka dau.
Hinukuman i Yesus do Kapatayon
39 Nga' tumanud nopo di koubasanan dokoyu om papalabus kasai' oku i' do songulun di poinggiil do tontok do Tadau'd Agayo do Paska. Orohian kou i' do polobuson ku dokoyu i raja' do tulun do Yohudi?” ka dau. 40 Om boros ka diyolo' do mikuwo'd songgiak-giak, “Amu', okon i' ko' iyau o polobuson, nga' i Barabas!” ka diyolo'. (I Barabas nopo nga' parampuk.)
1 Om suang noddi i Pilatus om ponuhu' no iyau'd tulun do momobog di Yesus. 2 Om pomonsoi no i piro-piro soudor do ponokotupi' do raja' dot i raan-raan do kirugi o winonsoi. Om posigaro' no diyolo' di Yesus iri. Om pakayai no diyolo' iyau do rasuk dit otomou daragang-ragang. 3 Om miguli-guli' nopoddi iyolo' do mongoi pomoros dot id dau dot, “Otogui po daa o raja' do tulun do Yohudi!” ka. Om pintompilingan nondo diyolo' iyau. 4 Om soliwan no kawagu i Pilatus om boro-boros no iyau di tulun dot ogumu', “Diya! Posoliwanon ku no iyau do patahakon ku dokoyu om oilaan i' dokoyu dot aiso' o kasalaan dau dot ongoiso' piya do noimbulayan ku,” ka dau. 5 Om soliwan no i Yesus do kisigar do rugi om kirasuk dit otomou daragang- ragang. Om boros kad Pilatus dot id diyolo', “Ontong kou pogi' nga' diya no iti tulun,” ka dau. 6 Om soira'ddi nokito di piro-piro boyoon dot imam om i madtatamong i Yesus, om pomogiak no iyolo' do, “Posolibo' iyau! Posolibo' iyau!” ka no diyolo'. Om boros kad Pilatus dot id diyolo', “Ngoyo' nopo dokoyu ilo', om posolibon nopo dokoyu, nga' iyoho' nopo om aiso' i' o noimbulayan ku dot ongoiso' piya do kasalaan dau,” ka dau. 7 Om boros ka di tulun do Yohudi, “Tumanud nopod toturan dahai om a' no milo'd a' iyau patayon tu' mangakun i' iyau do Tanak iyau'd Kinorohingan,” ka diyolo'. 8 Om korongou poddi di Pilatus do mimboros iyolo'd miagal diri om okon nogiddi do moddosi iyau. 9 Om suang no kawagu iyau do hiri'd walai dau, om kosuang poddi i Yesus, om uhoto' no di Pilatus iyau, “Honggo o tadon nu?” ka dau. Nga' a' i' i Yesus suminimbar. 10 Om boros kaddi kawagu di Pilatus, “Dot a' ko i' moro-boros doho'? Ilaai no do kikuasa' oku i' moti'dti do popoidu' diya' om kikuasa' oku'd papasalib diya'!” ka dau. 11 Om boros ka di Yesus do suminimbar, “Ondung a' ko daa'd Kinorohingan nonuan do kuasa', om aiso' i' daa kopio o kuasa' nu dot id sawat doho'. Om kaa pogi' dot iri nopo tulun di pinapatahak doho' dot id diya' om agayo po ko' diya'd dusa o dusa diyolo',” ka dau. 12 Om korongou poddi di Pilatus iri, om tumotos tomod daa'ddi iyau do popoidu' di Yesus. Nga' okon nogid minggiak i tulun do Yohudi, “Polobuson nu nopo iyau, om okon ko no ko' tambalut di Kaisar! Tu' tulun nopod momoros do raja' iyau om pisangod no di Kaisar!” ka no diyolo'. 13 Om korongou poddi di Pilatus i boros do miagal diri, om posoliwano' no dau i Yesus om irikau noddi iyau do hiri'd tirikohonon do momutus, i kinoiyonon do roitan do Sirang do Watu (id suang nopod boros dot Ibrani om roitan iri do Gabata.) 14 Tontok nopoddi nga' oruhai nod jam kohopod om duwo do dangadau di sangadau poo ot a' korikatan di Tadau'd Agayo do Paska. Om boros kaddi di Pilatus dot id tulun diri, “Diya iti raja' dokoyu!” ka dau. 15 Om minggiak poo iyolo' dot, “Patayo' iyau! Patayo' iyau! Posolibo' iyau!” ka no diyolo'. Om ponguhot no i Pilatus, “Posolibon ku tuu iti raja' dokoyu?”ka dau. Om boros ka di piro-piro boyoon dot imam, “I Kaisar noo o raja' dahai!” ka diyolo'. 16 Om patahako' noddi di Pilatus i Yesus dot id diyolo' do maan posolibo'. Om ngoyo' no diyolo' i Yesus om tanggayai no diyolo' iyau do minamanau.
Pinasalib i Yesus
17 Om soliwan no i Yesus do kisinaan di salib dau do kumaa'd hiri'd kinoiyonon di roitan do “Kinoiyonon do Korulung do Tulu”. (Id suang nopod boros dot Ibrani om roitan iri do Gulguta.) 18 Om hiri no iyau'd pinasalib. Om haro po o duwo o tulun do suwai do pinasalib do tandad dau; do songulun ot id dogibangan dau, om songulun ot id dawananan dau. Om i Yesus o hiri'd tanga'. 19 Om ponuhu' no i Pilatus do papalantak di tinulisan dot, “I Yesus i mantad hilo'd Nasarit, i Raja' do tulun do Yohudi” ka, do hiri'd salib di Yesus. 20 Om ogumu' tomod diri o tulun do Yohudi do nakabasa' di tulis diri tu' iri nopo kinoiyonon do pinosoliban di Yesus nga' a' i' osodu' no do mantad hiri'd bandar. Iri nopo boros diri nga' tinulis dot id suang do boros dot Ibrani, om Latin, om Yunani. 21 Om boros ka di piro-piro boyoon dot imam dot id di Pilatus, “Kada' potuliso' do, Raja' do tulun do Yohudi, ka, suwai ko' potulison nopo om, ‘Boros ka do tulun diti om: Raja' oku'd tulun do Yohudi,’ ka,” ka diyolo'. 22 Nga' boros ka di Pilatus do suminimbar, “Poingkuro nopo i nokotulis ku om poingiyo noddi,” ka dau. 23 Om kasalib poddi di soudor i Yesus, om ngoyo' no diyolo' i pakayan dau. Om piapato' no diyolo' do minamahagi' i pakayan diri; om kaanu ngai' nopo iyolo' dot iso' o bohogian. Om ngoyo' po diyolo' i rasuk dau dit id soibau. Iri nopo rasuk diri nga' aiso' i' o tombir tu' songkoyuo' nopo do minangawol. 24 Om pogiboro-boros no i soudor, “A' toko' i' pogihurak-hurakon iti rasuk. Mongundi' toko' nogi' do manantu' ondung isai o kaanu'dti,” ka diyolo'. Om nosiliu pogi' o miagal diri nga' mamayaan di nokotulis dot id suang do Buuk do Kinorohingan do poingkaa, “Pinogibahagi-hagi' diyolo' i pakayan ku, om nundi' do mongilo ondung isai o kaanu di rasuk ku dit id soibau,” ka. Om iyo no kopio'ddi o winonsoi di soudor diri. 25 Poingkakat nopod hiri'd toning di salib di Yesus om i tina' di Yesus, om i tobpinai di tina' dau'd tondu', om i Maria i sawo di Klopas, om i Maria Magdalina. 26 Om soira'ddi nokito di Yesus i tina' dau om i tumatanud dau di kosianan kopio dau do poingkakat do hiri, om boros ka dau dot id tina' dau, “Inan, ilo' no o tanak nu,” ka. 27 Om boros kaddi di Yesus dot id tumatanud dau'ddi, “Ilo' no o tina' nu,” ka. Om mantad poddi om poiyono' no di tumatanud di Yesus i tina' di Yesus do hiri'd walai dau.
Napatai i Yesus
28 Om oilaan no di Yesus do nongowonsoi ngai' noddi it apatut dot owonsoi, om pomoros noddi iyau dot, “Tuuhan oku,” ka, do mamayaan di nokotulis mantad dot id suang do Buuk do Kinorohingan. 29 Om hiri nopo nga' haro ot iso' mangkuk di noponu'd waig dot anggur dit oonsom. Om ngoyo' noddi do tulun potobungo' di waig dot anggur diri o koiyo- iyo'd rongilut, om potonduwo' nogiddi do sompatod o guas do kayu-kayu di roitan do hisop, om poinsawato' nori do poposuhu' di Yesus. 30 Om kososop poddi di Yesus i waig dot anggur diri, om boro-boros no iyau dot, “Nowonsoi ngai' no!” ka. Om tudu' noddi iyau, om kapatai no.
Sinuhak o Tobik di Yesus
31 Iri nopo piro-piro boyoon do bansa'd Yohudi nga' mada' i' do hiri kasai'd kayu salib i rata' di tulun do tontok do tadau'd Sabat, om okon-okon pondo do tontok do Sabat diri tu' Tadau kopio'd Agayo. Tu' tadau nopo di pinasalib i Yesus nga' miririkot no o tadau'd Sabat, om pokibanar noddi di Pilatus i tulun do Yohudi do mongoi ponipu' do gakod di tulun di pinasalib, om kolintuhun i' diyolo' i rata' do mantad hiri'd salib. 32 Om pamanau no i piro-piro soudor om poguluono' no diyolo' do minongoi ponipu' o gakod di duwo o tulun do suwai di tandad di Yesus do pinasalib. 33 Om korikatai poddi diyolo' i Yesus, om kokito no diyolo' do napatai no iyau. Om a' noddi diyolo' tinipu' o gakod dau. 34 Nga' suhako' pod songulun di soudor diri o tobik di Yesus, om luyung nopo o raha' om waig. 35 Om iri no tulun di nokokito kopio di nosiliu'd miagal diri o poposunud diti, om monongkuyaan kou indo iyokoyu. Om otopot i' i posunudon dau, om oilaan dau dot otopot kopio iri. 36 Om nosiliu pogi' o miagal diri nga' mamayaan di nokotulis mantad dot id suang do Buuk do Kinorohingan do poingkaa, “Aiso' i' o tiso'd tulang dau dot otipu',” ka. 37 Om haro po o nokotulis dot id suang do Buuk do Kinorohingan do poingkaa, “Mintong nondo o tulun dau, i sinuhak diyolo',” ka.
Linobong i Yesus
38 Om pokibanar noddi i Yusup, i tulun do mantad hilo'd Arimatia, do mongoi panganu di rata' di Yesus. (I Yusup nopo om tumatanud i' di Yesus nga' a' i' oilaan do tulun dot ogumu', tu' ooris i' iyau di piro-piro boyoon do tulun do Yohudi.) Om potumboyoo' no iyau di Pilatus, om ngoyo' noddi dau i rata' di Yesus. 39 Om i Nikodimus, i nokoumbal do minongoi solowot di Yesus do dongotuong nga' minongoi i' woyo' di Yusup. Om igit no i Nikodimus do mur do mirolot do gaharu dot oinsanan nopo om haro i' doti' o tolu nohopod o kilogram do kawagato'. 40 Om ngoyo' no di duwo o tulun diri i rata' di Yesus, om rilitai no diyolo'd kain di pomorilit do rata' do pinitonggoi di mur om i gaharu, i pomowongi'ddi, do tumanud do koubasanan do tulun do Yohudi do momolobong do tulun do napatai. 41 Hiri nopod kinoiyonon di pinosoliban di Yesus nga' haro o kabun. Om hiri nopod kabun diri nga' haro ot iso' o lobong di wagu po, om it a' po napamalabangan do tulun. 42 Om lobongo' noddi diyolo' i Yesus do hiri'd lobong diri tu' iri no ot id somok, om kawagu po nga' oruhai nod orikot o tadau'd Sabat.
Lobong dit Aiso' o Suang
1 Tontok dit otuong-tuong po di kosuabon do tadau'd Minggu', om ongoi no i Maria Magdalina do hiri'd lobong. Om kokito no dau do nokoimpit no i watu di pinonompon daa di luang di lobong. 2 Om panangkus noddi iyau do minongoi pogihum di Simun Pitrus om i tumatanud di kosianan kopio di Yesus, om boro-boros nod, “Noongoi no diyolo' i Tuhan do mantad hiri'd lobong om a' oku no koilo ondung hinonggo diyolo' iyau,” ka dau. 3 Om ongoi no i Pitrus om i tumatanud di tiso' do hiri'd lobong. 4 Om panangkus goduwo nopo iyolo', nga' osiau i' ko' i Pitrus i tumatanud di tiso', om nokopogulu iddi iyau do nokorikot do hiri'd lobong. 5 Om liing no iyau do hiri'd lobong om kokito no dau i kain di pinomorilit di rata' do poingiliu'd hiri, nga' a' iddi iyau suminuang. 6 Om kosusuhut nogiddi i Simun Pitrus, om pitilombus nopo iya'd suminuang do hiri'd lobong. Om kokito no dau i kain di pinomorilit do poingiliu'd hiri. 7 Nga' iri nopo kain di pinokogos dot id tulu di Yesus om okon i' ko' hiri'd toning di pinomorilit, suwai ko' posuwai-suwai do poillopi. 8 Om suang noddi i tumatanud di nokopogulu do nokorikot do hiri'd lobong. Om kokito poddi dau iri om kotumbayaai no iyau. 9 (Om gisom piya'ddi nga' a' po iyolo' kosuhut do komoyon di nokotulis dot id suang do Buuk do Kinorohingan do mositi' nod apasi kawagu iyau do mantad id kapatayon,ka.) 10 Om uli' noddi i tumatanud di Yesus diri.
Minintalang i Yesus dot id di Maria Magdalina
11 Om poingkakat diri i Maria Magdalina do mihad-ihad do hiri'd soliwan di lobong. Om liing no iyau do hiri'd lobong do mikuwo'd mihad-ihad. 12 Om kokito no dau o duwo o moloikat do kipakayan dot opurak. Om poirikau i duwo o moloikat diri do hiri'd pinoilihan di rata' di Yesus, dot iso' o hiri'd ponong id tulu, om iso' o hiri'd ponong id gakod. 13 Om ponguhot no i duwo o moloikat diri, “Nokuro tu' mihad ko, oi inan?” ka. 14 Om koboros poddi dau o miagal diri, om koili no iyau do hiri'd dotolikudan dau om kokito no dau i Yesus do poingkakat do hiri. Nga' a' po dau oilaan dot i Yesus iri. 15 Om uhoto' no iyau di Yesus, “Inan, nokuro tu' mihad ko? Isai o tihumon nu?” ka dau. Om ondos daa di Maria om i tukang kabun i minoro-boros, om boros ka dau, “Aman, ondung iya' i pinapawaliu dau do mantad hiti, om sunudai oku po ondung hinonggo nu, om oongoi ku i' iyau,” ka dau. 16 Om boros ka di Yesus dot id dau, “Maria!” ka. Om koili no i Maria di Yesus om boro-boros no dot id suang do boros dot Ibrani dot, “Rabuni!” ka. (Komoyon nopoddi nga', “Guru!” ka.) 17 Om boros ka di Yesus dot id dau, “Kada' po igit doho', tu' a' oku po nokoinsawat do hilo'd di Tapa'. Nga' ongoi nogi' solowot di piro-piro tobpinai ku, om sunudan no iyolo' do minsawat oku noddi do hilo'd Tapa' ku, i Tapa' dokoyu iyokoyu, om i Kinorohingan ku, om i Kinorohingan dokoyu iyokoyu,” ka dau. 18 Om ngoyo' noddi di Maria sunudai i piro-piro tumatanud di Yesus do nokokito iyau di Tuhan om i Tuhan o pinopoboros ngai'ddi dot id dau.
Minintalang i Yesus dot id Piro-Piro di Tumatanud Dau
19 Om totuong i' do tadau'd minggu'ddi do tuminimung i piro-piro tumatanud di Yesus dot id iso' o walai. Om nontiilan ngai' diyolo' i wawayaan, tu' moddosi iyolo' di piro-piro boyoon do tulun do Yohudi. Om sigog i' do rikot i Yesus do poingkakat do hiri'd pogialatan diyolo', om boro-boros nod, “Ongosimbayan kou po,” ka dau. 20 Om koboros poddi dau o miagal diri, om pokitono' no dau iyolo' di palad om tobik dau. Om ongotood tomod diri iyolo' do nokokito di Tuhan. 21 Om boros kaddi kawagu di Yesus dot id diyolo', “Ongosimbayan kou po. Om poingkuro nopo i Tapa' ku do minonuhu' doho' om iyo oku no iyoho'ddi do monuhu' dokoyu,” ka dau. 22 Om poobuso' noddi dau o pinuhobo dau dot id diyolo' om boro-boros nod, “Romito' no dokoyu o Rusod do Kinorohingan. 23 Ondung mangampun kou do dusa dot isai nopo o tulun, om Kinorohingan nga' mangampun no di dusa dau'ddi. Nga' ondung a' kou mangampun do dusa dot isai nopo o tulun, om Kinorohingan nga' a' no mangampun di dusa dau'ddi,” ka dau.
I Yesus om i Tumas
24 I Tumas nopo (i roitan do “Miapid”), i tiso' di hopod om duwo o tumatanud di Yesus, om a' hino do tontok di ruminikot i Yesus. 25 Om boros kaddi di tumatanud di Yesus di suwai dot id di Tumas, “Nokokito iyahai di Tuhan!” ka diyolo'. Nga' boros kad Tumas, “Ondung a' oku po kokito di pilat di linantak do hiri'd palad dau, om a' ku po kotudu' o tonturu' ku do hiri'd pilat di linantak diri, om a' ku po kakama' o palad ku do hiri'd tobik dau, om a' oku po kopio monongkuyaan,” ka dau. 26 Om sominggu' noddi do mantad diri om hiri po kawagu'd kinoiyonon diri i tumatanud di Yesus, om i Tumas nga' hino i' do tontok diri. Om nongoontiilan ngai' nopo i wawayaan. Nga' korikot i' i Yesus om ongoi no iyau ingkakat do hiri'd pogialatan diyolo', om boro-boros nod, “Ongosimbayan kou po,” ka dau. 27 Om boros kaddi di Yesus dot id di Tumas, “Ontong diti palad ku, om potuduwon' ino tunturu' nu'd hiti. Om ngoyo' pakamao' ino palad nu'd hiti'd tobik ku. Kada' no pikoduwo o ginawo, nga' ponongkuyaai nogi' kopio!” ka dau. 28 Om boros kad Tumas dot id di Yesus, “Oi Tuhan ku, i Kinorohingan ku!” ka. 29 Om boros ka di Yesus dot id dau, “Otumbayaan ko nopo om nokokito ko doho', koii? Olumaag no i tulun dit otumbayaan nopo dot a' piya kokito doho'!” ka dau.
Kogunaan diti Buuk
30 Om ogumu' po o kongoimayaan do suwai do winonsoi di Yesus dot id toguang di tumatanud dau, nga' a' i' iri nokotulis dot id buuk diti. 31 Nga' iti ngai' noo o nokotulis, om otumbayaan kou i' dot i Yesus no i Raja' do Gampamasi, i Tanak do Kinorohingan, om iyokoyu nopondo it otumbayaan dau om kaanu nod koposion.
Minintalang i Yesus dot id Turu' di Tumatanud Dau
1 Om intalang poddi kawagu i Yesus dot id tumatanud dau do hilo'd Tasik Tiborias. Poingkaa o nosiliu. 2 Insan o tadau, om timung no iyo Simun Pitrus, om i Tumas i roitan do Miapid, om i Natanil i mantad hilo'd Kana, i hilo'd Galilia, om i tangaanak di Sabidi, om i duwo o tumatanud di Yesus do suwai. 3 Om boros kad Simun Pitrus dot id tumatanud di suwai, “Mongoi oku pokisada',” ka dau. “Tumanud iyahai,” ka diyolo'. Om ongoi no iyolo' sakai'd parau'. Nga' aiso' i' o naanu diyolo' do totuong diri, do gisom do nosuaban. 4 Om tontok di mingungulai no o tadau, om poingkakat i Yesus do hiri'd tisan, nga' a' i' diyolo' oilaan dot i Yesus iri. 5 Om boros ka di Yesus dot id diyolo', “Oi tangaanak ku, haro i' o sada' dokoyu?” ka dau. “Aiso',” ka diyolo'. 6 Om boros ka di Yesus dot id diyolo', “Poromboto' dokoyu ino rambot dokoyu do hino'd dawananan dino parau', om kaanu kou id sada',” ka dau. Om poromboto' no diyolo' i rambot diyolo'. Om a' noddi iyolo' kagayat di rambot tu' ogumu' tomod o sada' do nokosulung. 7 Om boros ka di tumatanud di kosianan kopio di Yesus dot id di Pitrus, “I Tuhan i' ilo'!” ka dau. Om korongou poddi di Simun Pitrus dot i Tuhan iri, om panangrasuk no iyau (tu' aiso' i' mantad o rasuk dau), om tuhun no iyau do hiri'd waig. 8 Om susuhut noddi i tumatanud do suwai do poinsakai di parau' do miningisan, do mikuwo'd mamagayat iyolo' di rambot di noponu'd sada'. Om a' i' iyolo' osodu' no do mantad hiri'd disan, haro no doti' o hatus o mito do kosoduwo'. 9 Om kolintuhun poddi iyolo' do mantad hiri'd parau', om kokito no diyolo' o popou do pinomoluguan do sada' om haro o roti'd hiri. 10 Om boros ka di Yesus dot id diyolo', “Hiitio' daa o wookon di sada' di kaanu dokoyu,” ka dau. 11 Om suang no i Simun Pitrus di parau', om gayato' no dau i rambot dau do pinopotindal. Om noponu' nopod sada' dit angagayo i rambot diri. Om kogumuon' nopo di sada'ddi om hatus om limo nohopod om tolu o tinan. Nga' iyo piya kopio'ddi o kogumuon' di sada' nga' a' i' nohurak i rambot. 12 Om boros ka di Yesus dot id diyolo', “Kainou makan,” ka. Om aiso' i' o tiso' di tumatanud dau do katama' do monguhot dot, “Isai ko?” ka, tu' oilaan no diyolo' dot i Tuhan iyau. 13 Om insomok noddi i Yesus diyolo', om ngoyo' no dau i roti, om patahako' no dau diyolo'. Om i sada' nga' niyo i' dau'ddi. 14 Om diri no do kointolu di Yesus do minintalang dot id tumatanud dau di napasi kawagu iyau do mantad id kapatayon.
I Yesus om i Pitrus
15 Om kaakan poddi iyolo' om boro-boros no i Yesus dot id di Simun Pitrus. Boros ka dau, “Simun, i tanak di Yona, agayo i' o diya'd kosianan doho' ko' mantad do kosianan diyolo' doho'?” ka dau. Om boros kad Pitrus do suminimbar, “Oo, oi Tuhan, oilaan nu i', oi Tuhan dot osianan oku diya',” ka dau. Om boros ka di Yesus dot id dau, “Gompion no i tangaanak di dumba' ku,” ka. 16 Om uhoto' po kawagu di Yesus i Pitrus do koinduwo, “Oi Simun, i tanak di Yona, osianan ko i' doho'?” ka. Om boros kad Pitrus do suminimbar, “Oo, oi Tuhan. Oilaan nu i' dot osianan oku diya',” ka dau. Om boros ka di Yesus dot id dau, “Gompion no i dumba' ku,” ka. 17 Om uhoto' po kawagu di Yesus i Pitrus do kointolu dot, “Oi Simun, i tanak di Yona, osianan ko i' doho'?” ka dau. Om tumongob diri i Pitrus tu' intolu nopo i Yesus ponguhot dau. Om boros ka kawagu di Pitrus do suminimbar, “Tuhan, oilaan nu i' o koinsanai'd nunu nopo. Om oilaan nu i' oi Tuhan, dot osianan oku diya'!” ka dau. Om boros kaddi di Yesus dot id dau, “gompion no i dumba' ku. 18 Otopot no kopio iti poboroson ku do nopo dit omulok ko po om mimpori-pori ko i' do manangagkos, om mongoi ko do honggo nopo o korohian nu'd ngoyon nu. Nga' molohing ko nopondo, om poroloyon nu no o longon nu, om tulun indod suwai o mongogos diya' om pakaa diya' dot id kinoiyonon dit a' nu korohian do mongoi,” ka dau. 19 (Om kinapamarasan nopod i Yesus do miagal diri nga' popoilo do kowoyo-woyoo' di Pitrus dot apatai do koimbagu do popoinggayo'd Kinorohingan.) Om boros kaddi di Yesus dot id di Pitrus, “Tanud no doho'!” ka dau.
I Yesus om i Tumatanud Dau di Tiso'
20 Koili no i Pitrus, om kokito no dau i tumatanud di kosianan kopio di Yesus. (Iyau no i minirikau dot id toning di Yesus do tontok di minakan, om i minonguhot dau dot, “Tuhan, isai kopio o papadagang diya'?” ka.) 21 Om uhoto' noddi di Pitrus i Yesus di nokito dau i tumatanud diri, “Tuhan, poingkuro no'lo'?” ka dau. 22 Nga' boros ka di Yesus, “Ondung korohian ku do poimpasi kasai' ilo' do gisom do korikatan ku, om okon i' ko' iya' o monongkoilo. Nga' tanud nopo pogi' iya' doho'!” ka dau. 23 Om kotongkop noddi o habar dot id pogialatan di tumatanud di Yesus dot a' matai i tumatanud diri. Om a' i' di Yesus nokoboros dot a' matai i tumatanud diri, tu' pinoboros nopo dau om poingkaa no, “Ondung korohian ku'd poimpasi iyau do gisom do korikatan ku, om okon i' ko' iya' o monongkoilo,” ka. 24 I Yohanis no i pinopoboros do pasal do koinsanai di nongosiliu'ddi, om iyau i minonulis diti. Om oilaan toko' i' dot ongotopot i pinoboros dau.
Boros do Pongolimpupus
25 Om ogumu' po o suwai ko' iti do winonsoi di Yesus. Om ondung tulison ngai' daa iri, om osorou ku dot a' i' orumpos do hiti'd pomogunan i buuk do ponulisan diri.
1 Oi Tiopilus, Iri nopo i nokotulis ku dot id buuk ku di koiso', om pinotulis ku o koinsanai di nongowonsoi om i pinotuduk di Yesus do mantad di timpuun i' iyau do kuminaraja', 2 om gisom di pinoinsawat iyau do hilo'd surga. Tontok dit a' po iyau nokoinsawat do hilo'd surga om binilinan dau do mikuwo'd kuasa' di Rusod do Kinorohingan o koinsanai di tulun di pinili' dau do sumiliu'd rasul dau. 3 Om di nopo di napatai i Yesus om asaru' iyau do popoilo dot atarang kopio dot id rasul dau do poimpasi kopio iyau, do solinaid dot apat nohopod o tadau. Om nokito nogi diyolo' iyau. Om pinoboros dau dot id diyolo' o kowoyo-woyoo' do Pomorintaan do Kinorohingan. 4 Om tontok di poingamung po iyau diyolo' om bilinai no dau iyolo' do poingkaa, “Kada' kou po tongkiad do hilo'd Yorusalim. Mandad kou nopod hilo' do gisom do katahak di Tapa' dot id dokoyu i nakabatos mantad dau, i nokoboros mantad ku dokoyu di gulu po. 5 Tu' i Yohanis nopo om waig no o pinamatis do tulun, nga' iyokoyu nopo om oruhai no do botisan do Rusod do Kinorohingan,” ka.
Pinoinsawat i Yesus do Hilo'd Surga
6 Om tontok di pointimung i piro-piro rasul do poingamung diyolo' i Yesus, om ponguhot no iyolo' di Yesus, “Oi Tuhan, poingkokoton nu'ddi kawagu o Pomorintaan do bansa' dot Israil do baino'?” ka diyolo'. 7 Om boros ka di Yesus do suminimbar, “A' kou i' minog do koilo do pasal diri, tu' i Tapa' ku o manantu' do tadau om maso'ddi tu' iyau no o kikuasa' do manantu'ddi. 8 Nga' kaanu kou nondod kuasa' do korikot i Rusod do Kinorohingan dot id dokoyu. Om popinsusui kou nondo do pasal doho' do hilo'd Yorusalim, om pointongkop do pomogunan do Yudia, om hilo'd Samaria, om gisom do korikot do hilo'd tisan do tana',” ka dau. 9 Om koboros poddi di Yesus iri, om poinsawato' no iyau do hilo'd surga di songingontong iyolo' dau om kokuluputai noddi iyau do haun om a' noddi diyolo' iyau nokito. 10 Om maso po diyolo' do songintingaha' do hilo'd tawan, di nokoinsawat i Yesus, om sigog id haro o duwo o tulun di kipakayan dot opurak do poingkakat do hiri'd toning diyolo'. 11 Om boros ka di duwo o tulun diri, “Oi tulun do Galilia, nokuro tu' songingkakat kou'd hiti do songintingaha' do hilo'd tawan? Dot i Yesus nopo i nokito dokoyu do pinoinsawat do hilo'd surga dit antang-antangan dokoyu om gumuli' indo kawagu do miagal di nokito dokoyu di tiinu' o kowoyo-woyoo' dau'd gumuli',” ka diyolo'.
I Suminowoli di Yudas
12 Om guli' noddi i piro-piro tulun di sinuhu'ddi do hilo'd Yorusalim do mantad hilo'd Nulu-Nulu do Saitun. Iri nopo nulu-nulu'ddi om songkilomito i' doti' o kosoduwo' do mantad hilo'd Yorusalim. 13 Om ongoi noddi iyolo' do hiri'd walai di niyonon diyolo' di hilo'd Yorusalim, om salakoi no iyolo' do hiri'd bilik di hiri'd sawat. Iri nopo i piro-piro tulun di sinuhu'ddi om: i Pitrus, i Yohanis, i Yakub, i Andarias, i Pilipus om i Tumas, i Bartolomius, i Matius, i Yakub i tanak di Alpius, i Simun i roitan dot i Patriot, om i Yudas i tanak di Yakub. 14 Om iso-iso' kasai' nopo o ginawo diyolo' do tumimung do sumambayang. Om mogiaamung nopo iyolo' di tongoondu' do sumambayang, om hino nogi' i Maria i tina' di Yesus om i tongotobpinai di Yesus. 15 Insan o tadau, di songintimung no iyolo' --- om haro i' doti' o hatus om duwo nohopod o tulun di pointimung do hiri --- om ingkakat noddi i Pitrus do minoro-boros. Boros ka dau, 16 “Oi tobpinai-tobpinai! Nunu nopo i nokotulis dot id Buuk do Kinorohingan om mositi' nod abayaan. Di nopo di gulu po om nokoboros no do Rusod do Kinorohingan di pinolombus di Daud do pasal di Yudas, i boyoon di tulun di minanangkap di Yesus. 17 I Yudas nopo om mantad i' dot id pogialatan toko', om nopili' iyau do moyo' dati' do kumaraja',” ka dau. 18 (I Yudas nopoddi nga' nakaanu do tana' do pamalabangan dau do gadsi' di winonsoi dau dot araat o pinomoli dau di tana'. Om naratu' iyau om kapatai no do noulayak o tian dau, om gisom do nongkosoliwan ngai' o tinaii' dau. 19 Om koinsanai'd tulun do hilo'd Yorusalim nga' nongkoilo ngai' no do hal diri. Om iri noddi o kinopomungaranan diyolo' di tana'ddi dot Akildama, dot id suang do boros diyolo'. Komoyon nopoddi om “Tana' do Raha'”.) 20 “Tu' haro i' o nokotulis dot id Buuk do Sinding do poingkaa, ‘Pologoson nopo i kinoiyonon dau'ddi dot oingou gisom dot aiso' no ot ongoiso' pod miyon do hiri,’ ka. Om haro nogi' kawagu o nokotulis do poingkaa, ‘Pologoson nopo o tulun do suwai do sumowoli di karaja' dau,’ ka. 21-22 Om iyo nopoddi, om mositi' no do haro ot iso' o tulun do kumoruhang dati' do sumiliu'd sasi' di popinsusui do napasi kawagu i Tuhan Yesus do mantad id kapatayon. pilion toko' nopo o mantad id pogialatan di tulun di moyo-woyo' kasai' dati' do solinaid di moyo-woyo' toko' di Tuhan Yesus do hinonggo nopo o tongoyon dau do mantad di tuminimpuun i' i Yohanis do minamatis om gisom di pinoinsawat i Yesus do hilo'd surga do mantad id pogialatan toko',” ka di Pitrus. 23 Om poboroso' noddi di tulun di hino'd hiri o duwo o tulun. Iri nopo i duwo o tulun diri om: i Yusup i roitan dot i Barsabas (om roitan nogi' iyau dot i Yustus), om i Matias. 24-25 Om sambayang noddi iyolo' do poingkaa, “Oi Tuhan, oilaan ngai' nu i' ot id suang do ginawo do koinsanai'd tulun om noidu' noddi i Yudas do mantad id karaja' dau do don rasul, om napatai iyau. Om potuduko' no dot id dahai i pilion do Tuhan dot id pialatan diti duwo o tulun diti dot onuan do karaja'dti do sumowoli di Yudas,” ka diyolo'. 26 Om kasambayang poddi iyolo', om undio' no diyolo' i duwo' o ngaran do tulun diri, om i Matias o noundi'. Om iyau noddi o nopili' do sumiliu'd rasul do rumuhang di hopod om iso' o rasul di suwai.
Nokorikot o Rusod do Kinorohingan
1 Om korikot poddi i tadau'd Pintakosta, om timung ngai' no i tulun di notumbayaan do Tuhan dot id iso' o kinoiyonon. 2 Om sigog id korongou diyolo' o tuni do mantad hilo'd tawan do miagal do tongus dot opuhod kopio o karangahan. Om koponu' nopo i walai di niyonon diyolo' do tuni'ddi. 3 Om kokito no diyolo' o piro-piro koiyo-iyo'd binandak do tapui di koiyo-iyo'd dila' do tuminikid do minongoi timpak do tulu diyolo'. 4 Om koporinta' ngai' nopo iyolo'd Rusod do Kinorohingan. Om timpuun noddi iyolo' do mimboros do mogisuayan o bansa'd boros. Om mimboros nopo iyolo' do tumanud di boros do pinatahak di Rusod diri dot id diyolo'. 5 Om tontok nopoddi om ogumu' o tulun do Yohudi dit ongotorodok dot id Kinorohingan, di poundorong do hilo'd Yorusalim. Tadon nopo diyolo'ddi om mogisuayan o kinoiyonon do pointongkop diti pomogunan. 6 Om tontok di norongou i tuni'ddi, om ogumu' tomod diri o tulun do minongoi gurumung do hiri. Om ongosuayan diri iyolo' do korongou di tulun di nongotumbayaan di mimboros di diyolo'd boros di mogisuayan o bansa'. 7 Om ongosuayan tomod diri iyolo' om ongoimayaan. Om boros ka diyolo', “Okon toi ko' tulun ngai' id Galilia ilo tulun do mimboros do miagal dilo'? 8 Om poingkuro'ddi kopio tu' orongou ngai' toko' do mimboros iyolo' do boros toko' di mogisuayan o bansa'? 9 Tu' iyati' nopo om tulun do mantad id pomogunan do Partia, om Midia, om Ilam; om Misopotamia, om Yudia, om Kapadokia, om Pontus, om Asia, 10 om Pirgia, om Pampilia, om Masir, om mantad id piro-piro watas do Libia i tidsomok do Kirini, om haro nogi' ot id pogialatan toko' do mantad hilo'd Rum, 11 om haro o tulun do Yohudi om haro nogi' o bansa'd suwai di nokosuang do tugama' do Yohudi; om haro nogi' o mantad hilo'd Krita om hilo'd Arab. Om orongou ngai' toko' nopo iyolo' do mimboros do boros toko' di mogisuayan o bansa' do monusui di nongowonsoi do Kinorohingan di kongoimayaan kopio!” ka diyolo'. 12 Om osuayan ngai' nopoddi iyolo', om ongoimayaan om mogiuhot-uhot po iyolo' dot, “Poingkukuro ma kopio iti?” ka. 13 Nga' haro nogi' o wookon di tulun do mongirak-irak. Boros ka diyolo', “Nangaawuk i' bo ilo tulun dilo'!” ka.
Ponudukan di Pitrus
14 Om ingkakat noddi i Pitrus om i hopod om iso' o rasul. Om boro-boros noddi iyau dot opuhod dot id tulun dot ogumu'ddi do poingkaa, “Oi tobpinai-tobpinai, i tulun do Yohudi, om koinsanai di tulun di poundorong do hiti'd Yorusalim! Pokinongou kou no kopio. Tu' apatut no kopio do poiloon ku iyokoyu do hal diti. 15 Tu' iti nopo tulun diti om a' i' angaawuk, do miagal dit osorou dokoyu. Tu' dinondo nopo om jam kosiam nogi' do dongkosuabon. 16 Nga' iti nopo om nokoboros mantad no do Kinorohingan do pinolombus di Nabi Yoil do poingkaa: 17 Boros kad Kinorohingan, ‘Oruhai nopondod kopupuson diti pomogunan, om potuntugon ku nondo o Rusod ku dot id koinsanai'd tulun. Om i tangaanak dokoyu'd tongokusai om i tangaanak dokoyu'd tongoondu' nga' momisunud nondo dokoyu do koinsanai di posunudon ku dot id diyolo'. Om i tulun dit ongomulok po nga' kokito nondo do pinointalang om i kongomolohingan dokoyu nga' mongipi nondo di poipian ku diyolo'. 18 Om i susuhuon ku di tongokusai om i tongoondu' nga' tuntugan ku i' do Rusod ku do tontok do tadau'ddi. Om popinsunud nondo iyolo' di posunudon ku dot id diyolo'. 19 Om momonsoi oku nondo do kongoimayaan do hilo'd tawan; om momonsoi oku di kongosuayan kopio do hiti'd pomogunan; om haro nondo o raha' om tapui om haro o lisun dot akapal. 20 Om ilo tadau nga' tumuong nondo, om ilo tadau nga' rumagang do miagal do raha' dit a' po orikot o Tadau do Tuhan, i Tadau dit agayo om i kikagayaan. 21 Om tontok nopondoddi om posion indo i tulun di lumohou do Tuhan,’ ka. 22 Oi tobpinai-tobpinai, i tulun dot Israil! Pokinongoho' no dokoyu iti poboroson ku: i Yesus nopo i tulun do Nasarit diri, om nonuan do Kinorohingan do karaja' do bagi' dokoyu om nokointalang no kopio iri dot id dokoyu dot i kongoimayaan om i kongosuayan kopio di winonsoi'd Kinorohingan dot id pogialatan dokoyu do pinawaya' dau di Yesus. Om koinsanai'ddi om noilaan ngai' no dokoyu. 23 Om tontuo' nod Kinorohingan do patahakon dau i Yesus dot id dokoyu do tumanud di natantu' mantad dau. Om tontok di pinatahak dau iyau, om patayo' no dokoyu iyau tu' pinologos dokoyu i tulun dit angaraat do pinapasalib dau. 24 Nga' pinasi i' kawagu iyau'd Kinorohingan do mantad id pogialatan di tulun di napatai. Notolon no daa iyau do kapatayon, nga' pinoidu' i' iyau'd Kinorohingan, tu' a' i' iyau milo do porintaon kasai' do kapatayon. 25 Om nokoumbal nogi' i Daud do minomoros do pasal di Yesus do poingkaa, ‘Okito ku i' kasai' o Tuhan dot id dotoguangan ku; moyo-woyo' i' iyau doho', om a' noddi milo o tulun do mamagangau doho'. 26 Om iri no o kataadan do ginawo ku, om popoboros kasai' oku do pamarayou om iti tinan ku nga' osimbayan nopondo do mandad do hiri'd lobong. 27 Tu' a' oku i' diya' pologoson do potimporon do hilo'd pomogunan do tulun di napatai. a' nu i' pologoson dot apasa' do hiri'd lobong i susuhuon nu dit otorodok. 28 Tinudukan oku i' diya' do ralan do kumaa dot id koposion dit otopot kopio. Om a' no orumpo-rumpos dot id ginawo ku o kataadan ku, tu' moyo-woyo' kasai' ko i' doho',’ ka. 29 Oi tobpinai-tobpinai, pologoso' oku no do poposondot kopio do popoboros do pasal di Daud, i taki-aki toko'. Napatai no iyau, om nolobong no; om hino kasai' pod hiti ilo lobong dau do gisom do dinondo. 30 Om nakapamatos no o Kinorohingan dot id di Daud do mikuwo'd sumpa' do haro o songulun dot id sinakagon di Daud do silihon do Kinorohingan do raja'. Tu' i Daud nopo om nokoilo no di batos diri, tu' iyau nga' nabi i'; 31 om koilo nogi' iyau do nunu i wonsoyon do Kinorohingan dot id dabantalan. Om nokoboros mantad no di Daud dot apasi indo kawagu i Raja' do Gampamasi, i pinabatos do Kinorohingan diri, do mantad id kapatayon. Boros kad i Daud, ‘A' i' iyau pologoson do potimporon dot id pomogunan di tulun di nangapatai; a' i' apasa' o tinan dau do hiri'd lobong,’ ka. 32 Om i Yesus no i komoyon diri di pinasi kawagu'd Kinorohingan do mantad id kapatayon. Om nongkokito ngai' toko'ddi. 33 Om pinoinsawat do Kinorohingan o pangkat dau om nonuan iyau do kuasa' om kaanu noddi iyau do Rusod do Kinorohingan di pinabatos mantad di Tapa'. Om iti nopo it orongou dokoyu om iti tokito dokoyu do baino'dti om iri i Rusod di pinotuntug dau dot id dahai. 34 I Daud nopo om a' i' pinoinsawat do hilo'd surga, nga' minomoros i' iyau do poingkaa, ‘Boros kad Tuhan dot id Tuhan ku: Irikau no dot id dawananan ku, 35 gisom do poinsiribaon ngai' ku dot id diya' i pisangod nu!’ ka. 36 Om apatut no do koilo kopio o koinsanai'd tulun dot Israil dot i Yesus nopo i pinasalib dokoyu'ddi, om iyau no i pinabatos do Kinorohingan do sumiliu'd Tuhan om Raja' do Gampamasi,” kad Pitrus. 37 Om soira'ddi nongkorongou i tulun diri di pinoboros di Pitrus, om tumongob tomod diri iyolo'. Om ponguhot noddi iyolo' di Pitrus om i piro-piro rasul di suwai, “Oi tobpinai-tobpinai, nunu nondo ot apatut dahai'd wonsoyon diti?” ka diyolo'. 38 Om boros ka di Pitrus do suminimbar, “Rumologo kou no di dusa dokoyu. Om mokibatis ngai' kou no dot id suang do ngaran di Yesus Kristus, om ongoompunan i' o dusa dokoyu. Om kaanu kou indo do Rusod do Kinorohingan, i popuhawangon do Kinorohingan. 39 Tu' iri nopo pinabatos do Kinorohingan diri nga' patahakon dot id dokoyu om id sinakagon dokoyu om id tulun di poingiyon do hilo'd sodu' --- iri no i koinsanai'd tulun di nolohou'd Kinorohingan i Tuhan toko' do rumikot dot id dau,” ka dau. 40 Om iyo noddi i Pitrus do pinopoilo kopio'ddi dot id diyolo'. Om ogumu'ddi o boros di Pitrus do suwai do minonuhu' diyolo' do tumongkiad do mantad id tulun dit angaraat diri, om a' indo iyolo' ohukuman do Kinorohingan do miagal di pomohukum do Kinorohingan di tulun dit angaraat diri. 41 Om ogumu'ddi o tulun do notumbayaan di pinoboros di Pitrus, om botisai noddi iyolo'. Om tadau iddi do noruhangan kawagu i tulun do notumbayaan do tolu noribu o tulun. 42 Om ongotorodok iyolo' do mokituduk kasai' di piro-piro rasul om tumimung kasai' iyolo'. Om mogitotorungak iyolo'd makan, om mogiaamung do sumambayang.
Kowoyo-woyoon di Tulun di Notumbayaan
43 Om ogumu' tomod diri o koimayaan do nongowonsoi di piro-piro o tulun di sinuhu'ddi, gisom dot oinsanan nopo i tulun dot ongoimayaan om ongooris. 44 Mogiuulud kasai' nopoddi i tulun di nongotumbayaan diri, om sogiaan nopo diyolo' o nunu nopo o haro dot id diyolo'. 45 Om sorompori-pori nopoddi iyolo' do papadagang di piro-piro o konunu-nunuan om i dapu' diyolo', om pogibohogi-hogion nogindo diyolo' i tusin do gatang diri do tumanud do kogunaan do pointikid-tikid diyolo'. 46 Om monikid tadau nopoddi iyolo' do tumimung do hiri'd Walai'd Sasambayangan dot Agayo, om mogitotorungak do makan do hiri'd walai diyolo', om ongotood ngai' iyolo' om ongosiriba' o ginawo. 47 Om mamarayou kasai' nopo iyolo'd Kinorohingan. Om asanangan ngai' nopo o tulun diyolo'. Om monikid tadau nopo dot oruhangan o ginumu' diyolo', tu' onuan i' iyolo'd Tuhan do tulun di posion do Kinorohingan.
Liningasan i Tulun dit a' Koundaliu
1 Insan o tadau om ongoi no i Pitrus om i Yohanis do hiri'd Walai'd Sasambayangan dot Agayo, di jam kotolu nod sosodopon, i maso do kasambayangan do tulun. 2 Om haro'ddi ot iso' o kusai dit a' koundaliu do mantad di kosususu, do poirikau do hiri'd toning di wawayaan dit agayo, i roitan do “Wawayaan dot Olumis”. Om monikid tadau nopo iyau do pootodon do tulun do hiri, do mokipuhawang di tulun di sumuwang do hiri'd Walai'd Sasambayangan dot Agayo. 3 Om tontok di nokito di tulun diri i Pitrus om i Yohanis do motisuang no di Walai'd Sasambayangan dot Agayo, om pokipuhawang no iyau diyolo'. 4 Om sonsod no iyolo' dau, om boro-boros noddi i Pitrus dau do poingkaa, “Ontong pogi' dahai!” ka. 5 Om ontong noddi i tulun diri dot id diyolo', dot osorou nopo dau om haro o patahakon diyolo' dau. 6 Nga' boro-boros nogi' i Pitrus dau do poingkaa, “Aiso' i' kopio o tusin ku. Nga' nunu nopo i haro dot id doho', om iri no o patahakon ku diya': Iri no tu' id suang do kuasa' di Yesus Kristus i tulun do Nasarit diri, om suhuon ku iya' do mamanau!” ka dau. 7 Om igitai no di Pitrus o longon do wanan di tulun dit a' koundaliu'ddi, om poingkakato' no dau iyau. Om pitilombus nopoddi do nokokoris i gakod om i tampangil di tulun diri. 8 Om silok nopo iyau do miningkakat, om pimpanau no. Om woyo' noddi iyau di Pitrus om i Yohanis do suminuang do hiri'd Walai'd Sasambayangan dot Agayo, om mimbul-simbul nopo iyau do mamanau om mayou-rayou'd Kinorohingan. 9 Om oinsanan nopo i tulun do kokito dau do manau-panau do mayou-rayou'd Kinorohingan. 10 Om kotutunai noddi diyolo' dot iyau no i poirikau kasai' do hiri'd toning di wawayaan di roitan do “Wawayaan dot Olumis”, di hiri'd Walai'd Sasambayangan dot Agayo do mokipuhawang do tulun do suwai. Om osuayan ngai' diri iyolo' mikuwo'd ongoimayaan do nokokito di nosiliu dot id tulun diri.
Ponudukan di Pitrus di Hiri'd Walai'd Sasambayangan dot Agayo
11 Om manud-tanud nopoddi i tulun diri di Pitrus om i Yohanis. Om tontok di nokorikot iyolo'd tolu do hiri'd kakilima di roitan do “Kakilima di Suliman”, om ongopusahan diri i tulun om oinsanan nopoddi i tulun do minongoi gurumung diyolo'. 12 Om tontok di nokito di Pitrus i tulun diri om boro-boros no iyau dot id diyolo' do poingkaa, “Oi tulun dot Israil, nokuro tu' ongosuayan kou di nosiliu do miagal diri? Nokuro tu' sumonsod kou dahai? Andasan daa dokoyu om dahai'd sinundu ko' kotorodoko' dahai dot id Kinorohingan o nokolingos diti tulun diti? 13 I Kinorohingan di tukuon di Abraham, om i Isak, om i Yakub, i taki-aki toko' o pinopoinggayo di Yesus i susuhuon dau. I Yesus no i pinatahak dokoyu dot id porinta, om i sinaap dokoyu dot id toguang di Pilatus, do tontok di poiduwo daa di Pilatus iyau. 14 Iyau nopo om olidang i' om osonong, nga' sinaap i' dokoyu iyau om sinansagan dokoyu i Pilatus do papalabus di songulun o gampamatai. 15 Om pinatai dokoyu i Yesus. Om iyau nogi' daa o tadon do koposion do koinsanai'd tulun. Nga' pinasi i' iyau kawagu'd Kinorohingan do mantad id kapatayon. Om nokokito i' kopio iyahai'ddi. 16 Nokokito kou no ondung nunu o nosiliu dot id tulun dit a' koundaliu'ddi. Nokokoris no iyau om nolingasan tu' notumbayaan i' iyau di Yesus om i kuasa' dau. Om iri no i kotumbayaan di tulun diri dot id di Yesus o nokolingos dau dot antang-antangan ngai' dokoyu. 17 Oi tobpinai-tobpinai! Oilaan ku noddi dot it aiso' o toila-ilaan dokoyu om i piro-piro boyoon dokoyu o nokowonsoi-wonsoi dokoyu'd miagal diri dot id di Yesus. 18 Om iri no o nakabaya-bayaan di pinoboros do Kinorohingan di gulu po do pinolombus di piro-piro nabi dau, tu' a' no milo dot a' oinggorit i Raja' do Gampamasi, i pinabatos diri. 19 Om iyo nopoddi oi tobpinai-tobpinai, om rologo kou no di dusa dokoyu, om guli' kou no dot id Kinorohingan, om tonuson i' dau o koinsanai di dusa dokoyu. 20 Om rumikot nondo o Tuhan dot id dokoyu, om kopuriman kou nondo do kokorisan di don rusod. Om suhuon nondo do Tuhan i Yesus do rumikot dot id dokoyu, tu' natantu' mantad no iyau'd Kinorohingan do sumiliu'd Raja' do Gampamasi dokoyu. 21 Om mositi' no do poundorong kasai' iyau do hilo'd surga do gisom dot orikot o kopoingwoguan ngai' do Kinorohingan do koinsanai'd nunu nopo, do miagal di pinoboros do Kinorohingan di pinolombus di piro-piro nabi dau di gulu po. 22 Tu' nokoumbal i' i Musa do minomoros do poingkaa, ‘Monuhu' nondo o Kinorohingan, i Tuhan dokoyu, do songulun o nabi do mantad id bansa' dokoyu, do miagal di minonuhu' iyau doho'. Om mositi' no do pokinongohon dokoyu o koinsanai di poboroson di nabi diri dot id dokoyu. 23 Tulun nopo dit a' mokinongou di poboroson di nabi diri, om potongkiadon nondo iyau do mantad id tulun di songonuon do Kinorohingan om patayon nondo,’ ka. 24 Om iri nogi' i piro-piro nabi di suwai, do tuminimpuun do mantad id di Nabi Somuil do habar do mantad id Kinorohingan, nga' nokoponusui nogi' do pasal dot osiliu diti maso'd baino'. 25 Om iri nopo i piro-piro batos do Kinorohingan di pinolombus di piro-piro nabi diri, om iyokoyu nogi' ot onuan diri, oi tobpinai-tobpinai. Id suang nopo di tumpongo do Kinorohingan dot id taki-aki dokoyu, om minomoros o Kinorohingan dot id taki-aki dokoyu, om minomoros o Kinorohingan dot id di Abraham do poingkaa, ‘Iri no i sinakagon nu o pawayaan ku do mamarakat do koinsanai'd bansa' do hiti'd pomogunan,’ ka. Om i tumpongo'ddi nga' bagi' nogi' dokoyu. 26 Om iri noddi o kinopomilian om kinoponuhuan do Kinorohingan di susuhuon dau do rumikot po dot id dokoyu'd gulu, om abarakatan kou i' dau. Om ralan nopo dau do mamarakat dokoyu nga' monuhu' dokoyu do rumologo do mantad id kowoyo-woyoon dokoyu dot angaraat,” kad Pitrus.
Pinotimbaba' i Pitrus om i Yohanis di Gompomutus do Don Tugama'
1 Om maso po di Pitrus om i Yohanis do moro-boros di tulun dot ogumu'ddi, om rikot no dot id diyolo' i piro-piro boyoon dot imam, om i boyoon do madtatamong di Walai'd Sasambayangan dot Agayo, om i tulun do Saduki. 2 Om ongotogod tomod diri iyolo' di Pitrus om i Yohanis tu' minonusui iyolo' dot id tulun dot ogumu'ddi do napasi kawagu i Yesus do mantad id kapatayon. Tu' iri no o popointalang kopio dot apasi kawagu i tulun do napatai. 3 Om tangkapo' noddi diyolo' goduwo i rasul diri, om pogiilo' no do gisom do nosuaban tu' otuong no do maso'ddi. 4 Nga' ogumu' i' o tulun do nongotumbayaan do nokorongou di ponudukan di piro-piro tulun di sinuhu'ddi, om koruhangai noddi o ginumu' diyolo' gisom dot oruhai no do limo noribu o tulun. 5 Om tadau noddi kawagu om timung no do hilo'd Yorusalim i piro-piro boyoon do Gompomutus do Don Tugama', om i piro-piro boyoon do tulun do Yohudi, om i piro-piro guru do Tourat. 6 Om ongoi no iyolo' solowot di Hanas i Boyoon dot Agayo dot Imam, om i Kayapas, om i Yohanis, om i Aliksandor om koinsanai dit id sompiiyon di Boyoon dot Agayo dot Imam diri. 7 Om ngoyo' no i Pitrus om i Yohanis potimbabao' diyolo', om uhoto' no diyolo' iyo Pitrus di Yohanis do poingkaa, “Poingkuro o ralan dokoyu do minomolingos di tulun dit a' koundaliu'ddi? Disai'd kokorisan om disai'd kuasa' dokoyu do minomonsoi do miagal diri?” ka diyolo'. 8 Om simbar noddi i Pitrus, i noporinta' no do Rusod do Kinorohingan do poingkaa, “Oi tuan i boyoon do bansa', om koinsanai di Gompomutus do Don Tugama'. 9 Ondung butusan iyahai do baino', dot i minomonsoi dot osonong do minonulung di tulun dit a' koundaliu, om i mokiilo kou do poingkuro i tulun diri do nolingasan, o kopomutusan dokoyu dahai, 10 om ilaai ngai' no kopio dokoyu, om koinsanai do bansa' dot Israil do nokolingos nopodti tulun di poingkakat do dinondo'dti dot id toguang dokoyu, om mantad id kokorisan om kuasa' di Yesus Kristus i tulun do Nasarit diri. Om pinasalib dokoyu i Yesus, nga' pinasi i' iyau kawagu'd Kinorohingan. 11 I Yesus no o komoyon dit ayat dot id suang do Buuk do Kinorohingan diri do poingkaa, ‘Iri nogi' i watu di niadaan dokoyu, iyokoyu i mamamaal do walai, o nosiliu do watu dot agayo kopio o guna',’ ka. 12 I Yesus noo o milo'd mamasi'd tulun. Tu' pointongkop nopo diti pomogunan dot id pogialatan do tulun om aiso' no ot ongoiso' piya'd tulun do suwai do nakaanu do kuasa' do mantad id Kinorohingan do mamasi dati',” ka di Pitrus. 13 Om ongosuayan ngai' nopoddi i tulun di hiri'd suang di pitimungan do momumutus do nokokito di Pitrus om i Yohanis do katama' tomod, om okon-okon poddi di nokoilo iyolo' dot iri nopo i duwo o tulun di sinuhu'ddi om tulun i' toomod om aiso' i' o sikul. Om kotutunai nogiddi diyolo' dot iri nopo duwo o tulun do sinuhu'ddi nga' i tulun di minoyo' di Yesus. 14 Om aiso' noddi o milo diyolo'd poboroson, tu' poingkakat i' do hiri'd dotoguangan diyolo' i tulun di nolingasan diri do pointoning di Pitrus om i Yohanis. 15 Om suhuon' noddi diyolo' i duwo o tulun do sinuhu'ddi do sumoliwan do mantad hiri'd niyonon diyolo'd tuminimung. Om pogiboro-boros noddi iyolo'. 16 Boros ka diyolo', “Nunu po o wonsoyon toko' dot id tulun diri? Do koinsanai'd tulun do hiti'd Yorusalim om nongkoilo no di koimayaan di winonsoi diyolo'ddi. Om a' toko' no milo dot olimon iri. 17 Nga' rolosion nogi' iyolo' goduwo'ddi om a' po daa kopintongkop kopio iti habar dot id tulun do suwai. Om sunudan toko' nondo kopio iyolo' dot a' no iyolo' koino-ino do moro-boros kawagu dot id ongoiso' piya o tulun do rumait do ngaran di Yesus,” ka diyolo'. 18 Om lohowo' noddi kawagu diyolo' i duwo o tulun di sinuhu'ddi do sumuwang kawagu, om sunudai no diyolo' dot a' no kopio iyolo' koino-ino do mamarait ko' monuduk po do rumait do ngaran di Yesus. 19 Nga' boros kad Pitrus om i Yohanis do suminimbar, “Oi tuan, soroho' no kopio dokoyu ondung hinonggo ot otopot dot id toguang do Kinorohingan: i tuu tumanud di ponuhuan dokoyu ko' tumanud po di ponuhuan do Kinorohingan. 20 Tu' a' no dahai milo do tingkadan do popimboros it iyahai kopio o nokokito om nokorongou,” ka diyolo'. 21 Om aiso' noddi o paantakan di tulun dit id pitimungan diri do momohukum di Pitrus om i Yohanis. Nga' rolosio' noddi kawagu diyolo' i duwo o tulun di sinuhu'ddi. Om posoliwano' noddi diyolo' iyolo' do mantad hiri, tu' oinsanan nopo i tulun do mamarayou'd Kinorohingan do nongkokito di nosiliu'ddi. 22 Iri nopo i tulun di nokopuriman do kolingasan di koimayaan kopio'ddi om lobi no dot apat nohopod o toun do tumur dau.
Suminambayang dot id Tuhan i Tulun di Nongotumbayaan do Mokianu do Kasangango'
23 Om kalabus poddi i Pitrus om i Yohanis, om guli' no iyolo' do hiri'd tambalut diyolo' om susuyo' ngai' noddi diyolo' i pinoboros di piro-piro boyoon dot imam om i piro-piro tulun do Yohudi dot id diyolo'. 24 Om korongou poddi di tambalut diyolo' iri, om insan-insan nopo iyolo' do suminambayang dot id Kinorohingan, do mikuwo'd iso-iso' o ginawo. Boros ka diyolo', “Oi Tuhan, iya' no o minomonsoi'd tawan om pomogunan om rahat om koinsanai di songingiyon do hilo'. 25 Nokoumbal ko i' do minoro-boros dot i Rusod nu o pinopoboros do pinolombus di Daud i taki-aki dahai, i susuhuon nu'ddi do poingkaa, ‘Nokuro tu' ongotogod i tulun dit okon ko' Yohudi; om nokuro ngai' i bansa' tu' mogipapakat dot aiso' o kotutuk-tutukon. 26 Nokosodia' ngai' no i raja' do hiti'd pomogunan do mongoi sangod, om nokopogisosokodung no i boyoon do sumaap do Tuhan om i Raja' do Gampamasi!’ ka. 27 Tu' otopot id nokopogiboro-boros no i Horudis om i Pontius Pilatus di tulun dit okon ko' Yohudi om i tulun dot Israil di hiti'd bandar diti. Om mogiupakat iyolo' do sumaap di Yesus i susuhuon nu dit olidang, i nopili' nu do sumiliu'd Raja' do Gampamasi. 28 Om mogisosokodung nopo iyolo' do momonsoi do koinsanai'ddi, i natantu' mantad nu no di gulu po dot ongosiliu. Om tinantu' nu'ri do mikuwo'd kuasa' nu om id suang do korohian nu. 29 Intangai pogi' o pomorolosi diyolo' dahai do baino'dti, oi Tuhan. Om pologoso' no iyahai i susuhuon nu dot a' moddosi do popinsusui di boros nu. 30 Om tulungo' no iyahai om olingasan i' i tulun dot ongkitoruol om kointalang i' i kongoimayaan om i kongosuayan do mikuwo'd kuasa' om kokorisan dot id suang do ngaran di Yesus, i susuhuon nu dit olidang,” ka diyolo'. 31 Om kasambayang poddi iyolo', om koguyu' nopo i niyonon diyolo'd tuminimung. Om koporinta' ngai' noddi iyolo' do Rusod do Kinorohingan, om angkatama' tomod diri iyolo' do popinsusui di boros do Kinorohingan.
Sogiyaan o Nunu Nopo
32 Om iso-iso' nopoddi o ginawo om pomusorou do koinsanai di tulun di nongotumbayaan diri. Om aiso' no tiso' diyolo' do momusorou dot iyau no o sanganu di haro dot id dau. Om sogiyaan nopo diyolo' o nunu nopo i haro dot id diyolo'. 33 Om popinsusuyon nopoddi di piro-piro rasul do mikuwo'd kuasa' dit agayo kopio, do napasi no kawagu i Yesus. Om barakatai noddi kopio'd Kinorohingan iyolo'. 34 Om aiso' no o tongosongulun piya dot id pogialatan diyolo' do haro o kokurangan. Tu' isai nopo diyolo' o kitana' ko' kiwalai om padagangon no diyolo' i tana' ko' i walai diyolo'ddi, om igitan nondo diyolo' i tusin di gatang diri, 35 om patahakon nondo di piro-piro rasul. Om pogibohogi-hogion nogindo di piro-piro rasul i tusin diri do potikidon di tulun do miontok di kogunaan diyolo'. 36-37 Om i Yusup nga' minomonsoi nogi' do miagal diri. Tu' iyau nga' pinapadagang i' di tana' dau om patahako' nogiddi dau di piro-piro rasul i tusin di gatang di tana'ddi. I Yusup nopoddi om sinakagon di Liwi, om roitan iyau di piro-piro rasul dot i Barnabas (komoyon nopoddi nga' Gomponginsasamod).
I Ananias om i Sapira
1 Nga' haro ot iso' o kusai dot i Ananias o ngaran, om i Sapira o ngaran di sawo dau. Om pinapadagang iyolo' do songkoiyonon o tana' diyolo'. 2 Om pipakat noddi iyolo' di sawo dau do manganu di songintanga' di tusin di gatang di tana'ddi, om igitai no di Ananias i songintanga' di tusin diri do pinatahak di piro-piro rasul. 3 Om boros kaddi di Pitrus dot id dau, “Oi Ananias, nokuro tu' pinologos nu o rogon do momorinta' do ginawo nu, gisom do minongudut ko dot id Rusod do Kinorohingan, tu' lisok-lisokon nu i' do manganu i songintanga' di tusin di gatang di tana' nu? 4 Okon toi ko' diya' iddi tana'ddi, dit a' nu po nakadagang? Om diri piya di nakadagang nu no i tana'ddi nga' diya' kasai' po di tusin. Om nokuro tu' minomusorou ko do momonsoi'd miagal diri? Om okon i' ko' tulun o pinongudutan nu'ddi, nga' Kinorohingan,” ka. 5 Om korongou poddi di Ananias i boros diri, om kohunduk no iyau, om kapatai no. Om moddosi ngai' nopoddi i tulun do nokorongou di nosiliu do miagal diri. 6 Om ngoyo' noddi di tangaanakwagu lopoto' i rata' di Ananias diri, om antayango' no diyolo' do pinoposoliwan do ngoyon lobongo'. 7 Om haro no doti' o tolu o jam do mantad diri, om suang no i sawo di Ananias. a' i' iyau nokoilo di nosiliu'ddi. 8 Om boros ka di Pitrus dot id dau, “Poiloo' oku daa: ondung otopot dot iti-iti no o gatang di tana' di pinadagang di sawo nu'ddi?” ka dau. Om boros ka di Sapira do suminimbar, “Otopot, ino-ino no i gatang diri,” ka. 9 Om boros kaddi kawagu di Pitrus dot id dau, “Nokuro tu' miniupakat kou di sawo nu do mogumbal do Rusod do Tuhan? Pokinongoho' pogi' nga' nokoguli' no ilo tulun do minongoi pomolobong di sawo nu. Om iya' moti' nga' antayangon i' diyolo' do poposoliwan,” ka dau. 10 Om diiri i' om diiri om kohunduk no i sawo di Ananias, om kapatai no dot id toguang di Pitrus. Om tontok di suminuang i tangaanakwagu'ddi, om kabantalai no diyolo' iyau do napatai no. Om antayango' no diyolo' i rata'ddi do suminoliwan om ngoyo' no diyolo' lobongo' do hiri'd doros di lobong di sawo dau. 11 Om kongooris ngai' nopoddi i tulun do sidang om i tulun do suwai do nokorongou di nosiliu do miagal diri.
I Kongosuayan om i Kongoimayaan Kopio
12 Om ogumu'ddi o kosuayan kopio om i koimayaan do nongowonsoi di piro-piro rasul, dot id pogialatan di tulun dot ogumu'. Om iso-iso' nopoddi o ginawo di tulun di notumbayaan do tuminimung do hiri'd kakilima' di Suliman di hiri'd Walai'd Sasambayangan dot Agayo. 13 Om a' no katama' i tulun dit a' notumbayaan do mongoi amung di tulun di nongotumbayaan diri. Nga' pusohon i' kopio di tulun dot ogumu' i tulun di nongotumbayaan. 14 Om muhang-ruhang nopoddi o tulun dot otumbayaan do Tuhan --- do tongokusai om tongoondu'. 15 Om gisom do pootodo' noddi diyolo' do hiri'd ralan i tulun dit ongkitoruol do songinglii dot id toodopon ko' id galam, om olindungan pondo iyolo' di sangai di Pitrus do tumalib iyau'd hiri. 16 Om ogumu' tomod diri o tulun do ruminikot do mantad hiri'd kabandaran di posorili' do Yorusalim, do pinapaatod do tulun do kitoruol om i norusadan do rusod dot araat. Om nongolingasan ngai' nopoddi i tulun diri.
Ninggorit i Piro-Piro Rasul
17 Om ongosolon diri i Boyoon dot Agayo dot imam om i piro-piro o tumatanud dau, iri no i tulun do Saduki. Om pomusorou noddi iyolo' ondung nunu it apatut do wonsoyon diyolo'. 18 Om tangkapo' noddi diyolo' i piro-piro tulun di sinuhu'ddi om pogiilo' no do hiri'd pogigiilan do tulun dot ogumu'. 19 Nga' totuong iddi om ngoyo' no dot iso' o moloikat do Tuhan iwangai ngai' i wawayaan di giil, om angatai no dau i tulun di sinuhu'ddi do sumoliwan. Om boro-boros no i moloikat dot id diyolo' do poingkaa, 20 “Mongoi kou no ingkakat do hilo'd Walai'd Sasambayangan dot Agayo, om poboroson no dokoyu dot id tulun o pasal diti koposion do wagu'dti,” ka dau. 21 Om osuab poddi di kosuabon om ongoi no iyolo' do hiri'd Walai'd Sasambayangan dot Agayo, om timpuun no iyolo' do monuduk di tulun do hiri. Tu' minumboyo' iyolo' di pinoboros di moloikat dot id diyolo'. Nga' korikot noddi i Boyoon dot Agayo dot imam om i piro-piro tumatanud dau, om papaharo no iyolo' do pitimungan do momisara' dot iyolo' ngai' di piro-piro boyoon do tulun do Yohudi. Om ponuhu' noddi iyolo' do tulun do mongongoi di piro-piro tulun di sinuhu'ddi do mantad hiri'd giil do ngoyon potimbabao' diyolo'. 22 Nga' tontok di nokorikot i tulun di sinuhu' di piro-piro boyoon diri do hiri'd giil, om a' no hino'd hiri i rasul. Om poguliai noddi diyolo' do minongoi poposunud diri do hiri'd pitimungan do momisara'. Boros ka diyolo', 23 “Tontok di nokorikot iyahai do hiri'd giil, om poontiil i' kopio i wawayaan di giil om songintamong ngai' i madtatamong di giil. Nga' soira'ddi niwangan dahai i wawayaan diri, om aiso' no o tulun do hiri'd suang,” ka diyolo'. 24 Om tontok di norongou di boyoon do soudor di madtatamong di Walai'd Sasambayangan dot Agayo, om i piro-piro boyoon dot imam i boros diyolo'ddi, om oborulong nopo iyolo' do momusorou ondung poingkuro kopio o nosiliu dot id piro-piro tulun di sinuhu'ddi. Om ooris diri iyolo' do haro o wonsoyon dot id diyolo'. 25 Om rikot noddi ot iso' o kusai do minongoi pomisunud diyolo'. Boros ka dau, “Pokinongou kou no, oi tuan, dot iri nopo i tulun di pinogiil dokoyu'ddi om maso no do monuduk do tulun dot ogumu' do hilo'd Walai'd Sasambayangan dot Agayo!” ka. 26 Om pogiwoyo-woyo' noddi i boyoon do soudor di madtatamong di Walai'd Sasambayangan dot Agayo om i piro-piro soudor do suwai do minongoi pangangat di piro-piro tulun di sinuhu'ddi. Nga' a' i' diyolo' potogod-togodon o pangangat tu' ooris iyolo' di tulun dot ogumu'; tu' a' i' oila-ilaan do momodumpau nopo diyolo'd watu i tulun dot ogumu'. 27 Om ngoyo' noddi diyolo' potimbabao' i piro-piro tulun di sinuhu'ddi do hiri'd pomisaraan, om pinguhatai noddi iyolo' di Boyoon dot Agayo dot imam. 28 Boros ka dau, “Nooduhan no kopio dahai iyokoyu dot a' monuduk do tulun do pasal di tulun diri. Nga' nunu'ddi iti winonsoi dokoyu'd baino'? Pinopintongkop dokoyu do hiti'd Yorusalim o ponudukan dokoyu, om monondos kou dahai do minamatai di tulun diri,” ka dau. 29 Om boros ka di Pitrus om i piro-piro tulun di sinuhu'd suwai do suminimbar, “ Kinorohingan no ot apatut dahai'd umboyoon, om okon i' ko' tulun. 30 Tu' i Yesus nopo i pinasalib dokoyu'ddi om napasi no kawagu do mantad id kapatayon do pinasi'd Kinorohingan di taki-aki toko'. 31 Om noonuan no iyau'd Kinorohingan do pangkat om kuasa' dit asawat, tu' iyau no o Boyoon om Gampamasi; om oonuan i' o bansa' dot Israil do maso do kumorologo do mantad id dusa diyolo', om kaanu indo iyolo' do koompunan. 32 Om iyahai no o sasi' do koinsanai'ddi --- iyahai om iri nogi' i Rusod do Kinorohingan di pinatahak do Kinorohingan dot id tulun di tumanud di ponuhuan dau,” ka diyolo'. 33 Om korongou poddi di tulun di hiri'd pitimungan do Gompomutus do Don Tugama' i boros di piro-piro tulun di sinuhu'ddi om kotogod noddi kopio iyolo', om pogipapakat no iyolo' do mamatai di piro-piro tulun di sinuhu'ddi. 34 Nga' ingkakat no ot iso' o tulun dot id pogialatan di tulun di momisara'ddi, i roitan dot i Gamaliol. Iyau nopo om tulun do Parisi om guru do Tourat, om pusohon kopio iyau do koinsanai'd tulun. Om ponuhu' noddi iyau do tulun do poposoliwan kopio'd oruhai di piro-piro o tulun di sinuhu'ddi. 35 Om boro-boros no iyau di tulun di Gompomutus do Don Tugama'ddi do poingkaa, “Oi tobpinai-tobpinai, i tulun dot Israil! Momusorou kou no kopio ondung nunu o wonsoyon dokoyu dot id tulun diri. 36 Tu' di nopo di gulu om ruminikot i Tiudas do mininggayo-gayo, gisom do haro i' doti' ot apat nahatus o tulun do tuminanud dau. Nga' pinatai iddi iyau. Om koinsanai di tumatanud dau nga' nokopogitongkiad-kiad iddi. Om aiso' i' o kinootus-otuson di winonsoi diyolo'ddi. 37 Om rikot po kawagu i Yudas, i tulun do Galilia, do tontok di haro o pongintaban do tulun. Om ogumu'ddi o tulun do tuminanud dau tu' nabayayat iyolo' dau. Om iyau nogi' nga' pinatai i', om i tulun di tuminanud dau nga' nokopogitongkiad-kiad nogi'. 38 Om iti noddi nosiliu'd baino', om poingkaa o doho'd nosihat: Kada' dokoyu kuroi-kuroyo' i tulun diri, suwai ko' pologoson nopo iyolo'. Tu' mantad nopo dot id tulun i ponudukan om i pingwonsoyon diyolo' om tumanus indo i ponudukan om i wonsoyon diyolo'ddi do koimbagu. 39 Nga' mantad nopo dot id Kinorohingan om a' kou i' kaala' diyolo'. suwai ko' kointalang nogi' doti' do sumaap kou'd Kinorohingan,” ka dau. Om tonudo' no di tulun di momutus diri i pinoboros di Gamaliol. 40 Om lohowo' noddi diyolo' i piro-piro tulun di sinuhu'ddi, om pinglapasai no diyolo', om oduhai nogiddi diyolo' iyolo' do popotuduk kawagu do pasal di Yesus. Om posoliwano' nogiddi iyolo'. 41 Om ongotood nopoddi i piro-piro tulun di sinuhu'ddi do tuminongkiad di tiyonon do Gompomutus do Don Tugama' tu' pinosorupai i' iyolo'd Kinorohingan dot indaraaton dot i tumanud iyolo' di Yesus o kopongindaraatan. 42 Om monuduk kasai' nopo iyolo' do pointikid-tikid do tadau do hiri'd Walai'd Sasambayangan dot Agayo, om hiri'd piro-piro walai'd tulun. Iri nopo i potudukon om i popinsusuyon diyolo'ddi om i Habar dot Osonong dot i Yesus no i Raja' do Gampamasi di pinabatos diri.
Turu' o Tulun do Pinili' do Mongunguhup di Rasul
1 Om maid-laid nga' muhang-ruhang nopo o ginumu' di tumatanud di Yesus. Tontok nopoddi om iri nopo tulun do Yohudi di dong Yunani do boros om a' asanangan di tulun do Yohudi dit a' nakakaa dot id pomogunan do suwai. Boros ka di tulun di dong Yunani do boros, “Iri nopo i tongoondu' dahai di nongopuadan om a' i' nobohogian di ponulung di potikidon dot id tulun di pointikid-tikid do tadau,” ka. 2 Om timungo' noddi di hopod om duwo o rasul o koinsanai di tumatanud. Om boro-boros no i piro-piro rasul diri dot id diyolo', “A' i' osonong do tumingkod iyahai'd popinsusui do boros do Kinorohingan dot i mongilo-ilo do taakanon o kotingkadan. 3 Osonong nogi' do momili' kou do turu' o tulun dot id pogialatan dokoyu dit osonong o kowoyo-woyoon om i noporinta' do Rusod do Kinorohingan om it oilo, i milo dahai do suhuon do kumaraja' do mongilo-ilo do hal diri, 4 tu' iyahai nopo om sumambayang no om popotuduk do boros do Kinorohingan,” ka diyolo'. 5 Om kookunai ngai' nopoddi di tulun i pinoboros di piro-piro o nabi diri. Om pilio' noddi diyolo' i Stipanus, dot iyau nopo om ogirot kopio o kotumbayaan dot id di Yesus, om noporinta' iyau'd Rusod do Kinorohingan. Om nopili' nogi' i Pilipus, om i Prokorus, om i Nikanor, om i Timon, om i Parminas, om i Nikolaus, i mantad hilo'd Antiokia, iyau nopo om okon i' ko' tulun do Yohudi nga' nokosuang iyau'd tugama' do Yohudi. 6 Om posolowoto' noddi diyolo' di piro-piro rasul i turu' o tulun diri. Om sambayang noddi i tulun di sinuhu'ddi do minokianu'd Tuhan do barakat do bagi' diyolo'. 7 Om iyo noddi i habar do mantad id Kinorohingan do nokotongkop, om muhang-ruhang nopoddi o kogumuon do tumatanud di Yesus do hilo'd Yorusalim. Om ogumu' nogi' o tulun do notumbayaan di Yesus.
Tinangkap i Stipanus
8 Om binarakatan kopio'd Kinorohingan i Stipanus, gisom dot ogumu'ddi o nowonsoi dau do kosuayan om koimayaan dot id pogialatan di tulun dot ogumu'. 9 Nga' haro'ddi o piro-piro tulun do suminaap dau; iyolo' nopo om mantad id sasambayangan di roitan do Walai'd Sasambayangan do Tulun di Nongkoidu'. Iri nopo tulun do Yohudi di mantad id Walai'd Sasambayangan diri nga' mantad hilo'd Kirini om hilo'd Aliksandria om iyolo' no di tulun do Yohudi di mantad hilo'd Kilikia om hilo'd Asia o suminongkiwal di Stipanus. 10 Nga' a' i' iyolo' kosongkiwal di Stipanus, tu' kitoilaan i' iyau do mimboros do mantad id Rusod do Kinorohingan. 11 Om ponisip noddi iyolo' do piro-piro tulun do sinuhu' diyolo'd popoboros do poingkaa, “Nokorongou iyahai diti tulun diti do mongindaraat di Musa om Kinorohingan,” ka. 12 Om iyo noddi iyolo' do minominsuhu' di tulun dot ogumu', om i boyoon do Yohudi om i piro-piro guru do Tourat. Om tangkapo' noddi diyolo' i Stipanus, om ngoyo' no diyolo' potimbabao' di Gompomutus do Don Tugama'. 13 Om angatai noddi diyolo' i piro-piro tulun do sasi' di popoboros dit a' otopot do pasal di Stipanus. Boros ka di piro-piro sasi'ddi, “Iti nopo tulun diti om managalai nopo do mongindaraat di Walai'd Sasambayangan dot Agayo dit olidang, om mongindaraat di Tourat di Musa. 14 Om norongou dahai iyau do minomoros do raagon nondo di Yesus, i mantad hilo'd Nasarit iti Walai'd Sasambayangan dot Agayo, om simbanan ngai' nogindo dau i kaadat-adato' di pinotuduk di Musa dati'!” ka diyolo'. 15 Om ontong ngai' nopo di Stipanus i tulun di hino'd hiri'd pitimungan di Gompomutus do Don Tugama'. Om tontok noddi do nokito diyolo' i rabas di Stipanus do miagal pod rabas do moloikat.
I Pinoboros di Stipanus
1 Om uhoto' noddi di Boyoon dot Agayo dot Imam i Stipanus, “Otopot ngai' i' i pinoboros di tulun diri?” ka. 2 Om boros kad Stipanus do suminimbar, “Oi tobpinai-tobpinai, om i molohing-lohingon! Pokinongou kou daa diti poboroson ku. Tontok dit a' po nokoundaliu i Abraham i taki-aki toko' do kuminaa do hilo'd Haran di poundorong po iyau do hilo'd Misopotomia, om intalang no o Kinorohingan i kikagayaan dot id dau. 3 Om boros ka dau, ‘Tongkiadai noti pomogunan nu om koobpinayan nu. Om mongoi i' do hilo'd pomogunan do potudukon ku diya',’ ka. 4 Om tongkiad noddi i Abraham di pomogunan do Kasdim, om ongoi noddi iyau do hilo'd Haran. Om kapatai poddi i tapa' di Abraham om poundoliho' nogid Kinorohingan i Abraham do pinakaa do hilo'd pomogunan di nokoiyonon dokoyu'd baino'. 5 Tontok nopo do maso'ddi om aiso' i' o tongosongkoiyonon piya'd tana' do pinatahak do Kinorohingan dot id di Abraham do sumiliu'd dau'd songonuon dot id pomogunan diti. Nga' pamatos noddi o Kinorohingan dot id di Abraham do papatahak diti tana' diti do sumiliu do songonuon dau om songonuon di sinakagon dau. Om tontok nopoddi om aiso' po o tanak di Abraham. 6 Nga' minoro-boros i' o Kinorohingan dot id dau do poingkaa, ‘Koundorong nondo o sinakagon nu dot id pomogunan do bansa'd suwai, om silihon nondo iyolo'd tulun do hiri'd pomogunan diri do turipon, om inggoriton nondo iyolo' do solinaid dot apat nahatus o toun. 7 Nga' hukuman ku nondo i bansa' di monguripon diyolo', om kosoliwan nondo iyolo' do mantad id pomogunan diri om sumambayang dot id doho' do hiti'd pomogunan diti,’ ka. 8 Om pogiroto' noddi do Kinorohingan i tumpongo dau'ddi do sunat o pinomogirot. Om sunatai noddi di Abraham i Isak i tanak dau di walu' nogi' o tadau do tumur. Om i Isak nga' minonunat nogi' di Yakub i tanak dau. Om i Yakub nga' minonunat nogi' di hopod om duwo o tanak dau, om iri no o nosiliu do taki-aki do bansa'd Yohudi. 9 Om iri nopo i taki-aki toko' nga' nosolon di Yusup, gowoi poddi om dagango' no diyolo' i Yusup do sumiliu do turipon do hilo'd Masir. Nga' moyo-woyo' i' o Kinorohingan dau, 10 om pinoidu' id Kinorohingan i Yusup do mantad id koinsanai di kosusaan dau. Om nonuan iyau'd Kinorohingan do kowoyo-woyoon dot osonong om toilaan do tontok di pinotimbaba' iyau di Piraun, i raja' do Masir. Om siliho' noddi di Piraun i Yusup do gobunor do hiri'd pomogunan do Masir, om mongilo-ilo do hiri'd walai di Raja' Piraun. 11 Om pononglous noddi dot adalaan kopio o pointongkop do pomogunan do Masir om Kanaan gisom dot ongoinggorit tomod poo o tulun. Om aiso' noo o takanon di taki-aki toko'. 12 Om tontok di nokorongou i Yakub do haro o gandum do hilo'd Masir om suhuon' no dau i tangaanak dau, iri no i taki-aki toko' do mongoi'd hilo'. Om koinsan nogi' diyolo'ddi do minongoi'd hilo'. 13 Om koinduwo poddi diyolo' do minongoi'd hilo', om posunudo' nogi' di Yusup di tongotobpinai dau dot i Yusup iyau. Om koilaai nogiddi di raja' do Masir i sompiiyon di Yusup. 14 Om pomilin noddi i Yusup do popoongoi di Yakub i tapa' dau, om koinsanai di sompiiyon di tapa' dau do mongoi'd hilo'd Masir. Kogumuon' nopo diyolo'ddi do kuminaa do hilo'd Masir om turu' nohopod om limo o tulun. 15 Om undaliu noddi i Yakub do kuminaa do hilo'd Masir, om hilo' no o kinapatayon dau om i komolohingan toko'. 16 Nga' iri nopo i rata' diyolo' om nigitan i' kawagu do pinakaa do hilo'd Sikim, om lobongo' no do hiri'd pamalabangan di binoli di Abraham do mantad id bansa' do Himor di hilo'd Sikim, do tusin o pinomoli dau. 17 Om tontok dit oruhai noddi o kapamayaan do Kinorohingan di nabatos dau dot id di Abraham, om nokoinggumu' noddi o bansa' toko' do hilo'd Masir. 18 Om alaid noddi om haro'ddi ot iso' o raja' do suwai do momorinta' do hilo'd Masir dit a' nokotutun di Yusup. 19 Om mongulok-ulok diri i raja'ddi di bansa' toko' om orongit tomod iyau dot id taki-aki toko'. Gisom do minononsog iyau diyolo' do papataam do tangaanak diyolo' di wagu po kosususu, om apatai indo. 20 Om tontok nogi' do maso'ddi do nosusu i Musa; i Musa nopoddi om olumis kopio o kinaanak-anako'. Om tolu no o tulan dau do poinggompi' iyau di molohing dau do hiri'd walai dau. 21 Om tontok di nakataam iyau, om ngoyo' no iyau di tanak di Piraun do tondu', om gompio' no dau iyau do siniliu'd tanak kopio dau. 22 Om tudukai noddi diyolo' i Musa do koinsanai di toilaan do bansa' do Masir, gisom do nosiliu iyau'd tulun di kikuasa' kopio o boros om wonsoyon. 23 Om tontok dit apat noddi nohopod o toun do tumur di Musa, om kosorou'ddi iyau dot orohian do mongoi ontong do koiyon-iyono' di tulun dot Israil i bansa' dau. 24 Om kokito noddi dau o songulun o bansa' dot Israil dot inggoriton do tulun do Masir, om patayo' no dau i tulun do Masir diri, tu' minogobi' iyau di tulun dit inggoriton diri. 25 Ondos nopo daa di Musa om kosuhut i bansa' dau do pakayon iyau'd Kinorohingan do popoidu' diyolo'. Nga' a' i' iyolo' kosuhut. 26 Om sinuabon noddi om kokito po dau o duwo o tulun dot Israil do miodu om tumotos no daa i Musa do popiulud diyolo'. Boros ka dau, ‘Iyokoyu nopondo om miobpinai i'. Nokuro tu' miodu kou?’ ka dau. 27 Nga' sudsuro' nogi' di tulun di minomobog di tambalut dau i Musa, om boro-boros nod, ‘Isai o minomili' diya' do sumiliu'd boyoon om minomili' do sumiliu'd gompomutus dahai? 28 Patayon oku po daa iyoho' diya' do miagal di tulun do Masir di pinatai nu konihab?’ ka dau. 29 Om tontok di norongou di Musa i boros di tulun diri, om poggidu' no iyau do mantad hilo'd Masir om ongoi noddi iyau iyon do hilo'd pomogunan do Midian. Om hilo' no iyau do gisom do duwo o tanak dau. 30 Apat poddi nohopod o toun do mantad diri, om rikot no o tiso' o moloikat dot id di Musa do hilo'd tana' do kowotuan do hilo'd somok do Nuluhon do Sinai. Iri nopo moloikat diri om ruminikot dot id suang do tapui di molob-ngolob dot id bulungkut. 31 Om osuayan diri i Musa do nokokito'ddi, om ongoi no iyau insomok do mongoi pogontong ondung nunu kopio iri. Om korongou noddi dau o boros do Tuhan do poingkaa, 32 ‘Iyoho' no o Kinorohingan di taki-aki nu; iyoho' no i Kinorohingan di Abraham, om i Isak, om i Yakub,’ ka. Om gagarai nopo i Musa dot opopoddosian, om a' noddi iyau kasaap do montong di bulungkut diri. 33 Om boro-boros po kawagu o Tuhan dot id dau do poingkaa, ‘Iduwo' ino kasut nu, tu' iti nopo tana' di ningkokoton nu om tana' dit olidang. 34 Nokito ku no om nongoilaan ku no o koinggoritan di tulun ku do hilo'd Masir. Om norongou ku no o todoi diyolo', om nokolintuhun oku no do mongoi popoidu' diyolo'. Baino' nopodti om suhuon ku iya' do gumuli' kawagu do hilo'd Masir,’ ka. 35 I Musa nopodti om niada' do bansa' dot Israil, om a' diyolo' rinamit tu' minomoros i' iyolo' do poingkaa, ‘Isai o minomili' diya' do sumiliu do boyoon om gompomutus dahai?’ ka. Nga' iyau nogi' kopio i tulun di sinuhu'd Kinorohingan do sumiliu do boyoon om i gampamasi do nuhupan di moloikat di minintalang dot id dau di hiri'd bulungkut di molob-ngolob o tapui. 36 Om i Musa no o minomoyo' do bansa' dot Israil do suminoliwan do mantad hilo'd Masir, mikuwo'd minomonsoi do kongosuayan om koimayaan do hilo'd Masir, om hilo'd Rahat dot Aragang, om hilo'd tana' do kowotuan do solinaid dot apat nohopod o toun. 37 Om i Musa nogi' o minomoros dot id bansa' dot Israil do poingkaa, ‘Onuan kou nondod Kinorohingan do songulun o nabi di pilion do mantad id pogialatan dokoyu, do miagal di minomili' iyau doho',’ ka. 38 Om i Musa nogi' i poinsugku' di bansa' dot Israil di hilo'd tana' do kowotuan, i suminiliu do popiromut dot id moloikat om id taki-aki toko' do tontok di minoro-boros i moloikat dot id dau di hilo'd Nuluhon do Sinai. Om iyau nogi' i nakaramit di habar dit a' tumanus do mantad id Kinorohingan, i polombuson dot id dati'. 39 Nga' mulong po dot iyo'ddi nga' a' i' minumboyo' dau i taki-aki toko'. Om niada' i' diyolo' i Musa, om siguli' nogiddi iyolo' do hilo'd Masir. 40 Om boro-boros no iyolo' di Harun do poingkaa, ‘Pamansayai nogi' iyahai do tininganak, om iri indo i tininganak o momoyo' dahai. Tu' a' no dahai oilaan ondung nunu o nosiliu dot id di Musa, i minomoyo' dahai do suminoliwan do mantad hilo'd Masir,’ ka diyolo'. 41 Om pomonsoi noddi iyolo' do tininganak do pinoiyo-iyo do tanak do sapi', om pinapatahak iyolo' do porsombahan di sinumbali' dot id tininganak diri, om minoginakan iyolo' do pamarayou di tininganak di winonsoi diyolo'. 42 Om tongkiadai noddi iyolo'd Kinorohingan, om pologoso' no dau iyolo' do tumuku' do rombituon di hilo'd tawan. Iri nopo om miontok nopo kopio di nokotulis dot id piro-piro buuk do nabi do poingkaa, ‘Oi tulun dot Israil! Okon i' ko' id doho' o kinoponumbolian om kinapatahakan dokoyu di tayam-tayam di solinaid dot apat nohopod o toun di hilo'd tana' do kowotuan. 43 Om piniigit-igitan dokoyu i kiim di tingolig di Molok, om i tininganak di pinoiyo-iyo do rombituon di roitan do Ripan, om iri no i tininganak di winonsoi dokoyu o maan dokoyu'd tukuon, om iri o kapakayaan ku dokoyu do hilo'd pomogunan do Babil, i hilo'd sodu' kopio,’ ka. 44 Om haro o kiim di taki-aki toko' do hilo'd tana' do kowotuan, i Koropohon do Kinorohingan do tontok di rumikot iyau dot id tulun. Om pinomonsoi nopoddi kiim diri om tumanud di pinonuhuan do Kinorohingan di Musa, om pinoomit di pinokitanan do Kinorohingan dot id di Musa. 45 Om nigitan nogi' di taki-aki toko' i kiim diri do tontok di winoyo' iyolo' di Yosua do minongoi pagahau do pomogunan toko'dti do mantad id kuasa' do piro-piro bansa'd suwai di momorinta' mantad do pomogunan diti, i nuyung do Kinorohingan di ruminikot iyolo'. Om hiri kasai' po i kiim diri do gisom di hino no i Daud. 46 I Daud nopo om kohubayaan do Kinorohingan. Om pokionuon no dau do pologoson iyau'd Kinorohingan do popoingkakat iyau dot iso' o walai do dong Kinorohingan di tukuon di Yakub. 47 Nga' i Suliman iddi o pinopoingkakat di walai do Kinorohingan diri. 48 Nga' a' i' minundorong i Kinorohingan dit Agayo Kopio dot id suang di walai di winonsoi'd tulun; tu' nokotulis no dot id buuk do nabi o poingkaa, 49 ‘Ilo tawan o tirikohonon ku do momorinta', om iti pomogunan o koulokon do lapap ku. Okuro-kuro daa o walai do wonsoyon dokoyu doho'? Hinonggo o tiyonon ku'd mundorong? 50 Okon toi ko' iyoho' i' o minomonsoi do koinsanai'd nunu nopo?’ kad boros do Kinorohingan. 51 Ongokodou no kopio o ginawo dokoyu oi tobpinai-tobpinai, om apagon kou no kopio do mumboyo' do Kinorohingan! Om iyo kou pod bosukon dot a' korongou di boros do Kinorohingan! Miagal kou nopo di taki-aki dokoyu; i sumaap kasai' do Rusod do Kinorohingan! 52 Inggorito' ngai' nopo di taki-aki dokoyu i nabi. Om pinatai diyolo' i susuhuon do Kinorohingan di gulu po i pinopoboros do korikatan di susuhuon do Kinorohingan dit otopot. Om iyokoyu nga' pinapadagang i' om minamatai di susuhuon do Kinorohingan diri. 53 Om naramit no dokoyu i Tourat do Kinorohingan, i pinaatod do piro-piro moloikat, nga' a' i' dokoyu tinanud iri!” ka di Stipanus.
Dinumpau do Watu i Stipanus
54 Om kongotogod noddi i piro-piro Gompomutus do Don Tugama' diri do nokorongou di boros di Stipanus, om karaatai noddi kopio iyolo' dau. 55 Nga' tingaha' noddi do hilo'd tawan i Stipanus i noporinta' do Rusod do Kinorohingan. Om kokito no dau o kagayaan do Kinorohingan, om i Yesus do poingkakat do hiri'd dawananan do Kinorohingan i tiyonon di noonuan do kuasa'. 56 Om boro-boros no i Stipanus do poingkaa, “Intong pogi', okito ku o surga do noiwangan, om poingkakat i Tanak do Tulun dot id dawananan do Kinorohingan!” ka dau. 57 Om sonsongo' ngai' nopo di tulun di gompomutus diri o tolingo diyolo' do mikuwo'd songgiak-giak, om insan-insan nopo iyolo' bontol do tuminabpo di Stipanus. 58 Om gayato' no diyolo' iyau do poposoliwan di bandar om pindumpahai no diyolo' iyau'd watu. Om iri nopo i piro-piro tulun di minongoi ontong di nosiliu'ddi nga' pinatamangan diyolo' i pakayan diyolo' do songulun o tanakwagu dot i Saulus o ngaran. 59 Om di nopo di maso no diyolo' do mindumpau di Stipanus, om pomomoros no i Stipanus dot opuhod do poingkaa, “Oi Tuhan Yesus, romito' no o rusod ku!” ka dau. 60 Om otud noddi iyau om boro-boros no dot opuhod do poingkaa, “Oi Tuhan, kada' pababaai diyolo' iti dusa diyolo'!” ka. Om koboros poddi di Stipanus o miagal diri om kapatai no iyau.
1 Om i Saulus nga' nokotumboyo' i' di pinamatayan diri.
Minonginggorit i Saulus di Tulun di Nongotumbayaan
Om tontok nod tadau'ddi do tuminimpuun o koinggoritan do sidang do hilo'd Yorusalim. Om koinsanai nopo i tulun di notumbayaan do nopogitongkiad-kiad dot id pointongkop do watas do Yudia om Samaria, om iri poddi piro-piro rasul ot amu' nopogitongkiad-kiad. 2 Om lobongo' noddi di tulun dit oronok do Kinorohingan i Stipanus. Om pogihadai no diyolo' iyau do mikuwo'd tuminongob tomod iyolo'. 3 Nga' i Saulus nopo om a' nopo tumingkod do mananus di sidang. Om tikidon nopo dau i walai do minsalakoi do mongoi pamagayat do poposoliwan di tulun di nongotumbayaan om pogiilon nondo dau iyolo'.
Pinosusui i Habar dot Osonong do Mantad id Kinorohingan do Hilo'd Samaria
4 Om iri nopoddi tulun di nongotumbayaan di nopogitongkiad-kiad diri, nga' popinsusui nopoddi di Habar dot Osonong do mantad id Kinorohingan do hinonggo- honggo nopo. 5 Om ongoi no i Pilipus do hiri'd bandar do Samaria om susuyai no dau i tulun do hiri do pasal di Raja' do Gampamasi di pinabatos do Kinorohingan. 6 Om soira'ddi nokorongou i tulun di pinoboros di Pilipus diri om di nongkokito iyolo' di kongoimayaan do winonsoi dau, om ogumu'ddi o tulun do mokinongou kopio di poboroson di Pilipus. 7 Tu' songgiak-giak po i rusod dot araat do sumoliwan do mantad id ogumu' o tulun di nongorusadan do rogon. Om ogumu' nogi' o tulun dit a' koundaliu om i kimpo' do nongolingasan. 8 Om ongotood nopoddi kopio i tulun do hilo'd bandar do Samaria. 9 Hiri nopod bandar diri om haro o songulun o kusai dot i Simun o ngaran. Iyau nopo om haro o toilaan di dong bobolian om iri no o pakayon dau do pamayayat di tulun do Samaria do piro-piro no o koloido'. Om poboroson dau dot id diyolo' dot iyau nopo om aiso' no o tulun do koiyo. 10 Om oinsanan nopo i tulun do hiri'd bandar diri dot it aiso' o ngaran- ngaran om it ongkipangkat do mokinongou kopio dau. Om somboro-boros po iyolo' do poingkaa, “Nokolintuhun no i ponokokinorohingan di roitan do kuasa' dit Agayo, om iti no tulun diti iri,” ka no diyolo'. 11 Om mokinongou kopio'ddi iyolo' di poboroson dau tu' alaid no iyau do mamayayat diyolo' dot i kuasa' di toilaan dau o pamayayat. 12 Nga' susuyai noddi di Pilipus iyolo' di Habar dot Osonong do pasal di Pomorintaan do Kinorohingan, om sinusuyan dau iyolo' do pasal di Yesus Kristus, i Raja' do Gampamasi. Om kotumbayaai noddi iyolo' di habar di pinosusui di Pilipus diri. Om botisai noddi iyolo' --- dot i tongokusai om i tongoondu'. 13 Om i Simun nga' notumbayaan nogi'. Om tanud noddi iyau di Pilipus di nobotisan iyau. Om osuayan diri i Simun do kokito di kongoimayaan di nongosiliu'ddi. 14 Om korongou noddi di piro-piro rasul di poundorong do hilo'd Yorusalim do notumbayaan i tulun do Samaria do boros do Kinorohingan, om suhuon' noddi diyolo' i Pitrus om i Yohanis do mongoi'd hilo'. 15 Om korikot poddi i Pitrus om i Yohanis do hilo', om sambayangai no diyolo' i tulun do Samaria'ddi om kaanu i' iyolo' di Rusod do Kinorohingan, 16 tu' a' po nokolintuhun i Rusod do Kinorohingan do momorinta' dot ongosongulun piya dot id pogialatan diyolo'; nongobotisan nogi' iyolo' dot id suang do ngaran do Tuhan Yesus. 17 Om sukabayai noddi di Pitrus om i Yohanis i tulun do Samaria'ddi, om karamit noddi iyolo' di Rusod do Kinorohingan. 18 Om kokito noddi di Simun do nangkaramit i tulun diri do Rusod do Kinorohingan di nosukabayan iyolo' di piro-piro rasul, om panahak no daa'ddi i Simun do tusin dot id di Pitrus om i Yohanis, 19 om boro-boros nod, “Onuwai oku daa iyoho'd kuasa' do miagal diri, om isai nopondo ot osukabayan ku om karamit nondo iyolo'd Rusod do Kinorohingan,” ka dau. 20 Nga' boros kad Pitrus do suminimbar, “Kopitonggoi kou nopondo tusin nu'd obungou! Ondos nu nopo daa om milo'd bolion do tusin o nipuhawang do Kinorohingan? 21 Aiso' i' o diya'd kosorupayan do momonsoi'dti karaja' dahai, tu' a' i' otopot o ginawo nu dot id toguang do Kinorohingan. 22 Iyo nopoddi om rologo no do mantad id pomusarahan nu dit araat, om sambayang no dot id Tuhan do mokiampun dau di pomusarahan nu dit araat diri! 23 Tu' oilaan ku i' do poimponu' pod kaasalan o ginawo nu om nosiliu ko'd turipon do dusa,” ka di Pitrus. 24 Om boros kaddi di Simun do suminimbar di Pitrus om i Yohanis, “Tulungo' oku no do mokianu dot id Tuhan om aiso' i' o tongoiso' piya di pinoboros dokoyu'ddi dot osiliu dot id doho' oi tobpinai-tobpinai,” ka dau. 25 Om koboros poddi diyo Pitrus di Yohanis iri om di nokopinsusui diyolo' i boros do Tuhan om poguliai no diyolo' do hilo'd Yorusalim. Om ogumu' po o kampung do hilo'd Samaria di nawayaan diyolo' do nopinsusuyan diyolo' di Habar dot Osonong diri.
I Pilipus om i Songulun o Pagawai dit Asawat o Pangkat do Mantad Hilo'd Itiopia
26 Om boro-boros no o tiso' o moloikat do Tuhan dot id di Pilipus do poingkaa, “Sumodia' no, om mamanau i' do kumaa ponong id salatan do kumaa do hilo'd ralan di wayaan do mongoi'd hilo'd Gasa do mantad hilo'd Yorusalim,” ka. Iri nopo ralan diri nga' oingou. 27-28 Om sodia' noddi i Pilipus om pamanau no iyau. Om tontok nopoddi om haro o songulun o pagawai do hiri'd walai'd raja' dot Itiopia di poulian no do hilo'd pomogunan dau. Om iri nopo tulun diri nga' pagawai dit asawat kopio o pangkat, i mongilo-ilo do koinsanai'd kakayaan di Kandiki, i raja'd tondu' do pomogunan dot Itiopia. Om iri nopo tulun diri nga' minongoi do hilo'd Yorusalim do minongoi sambayang dot id Kinorohingan. Om tontok nopoddi om poulian no dau do poinsakai di korita'-kuda' dau. Om mambasa' iyau di Buuk di Nabi Yosaya, di poirikau iyau do hiri'd suang di korita'-kuda' dau. 29 Om boro-boros no o Rusod do Kinorohingan dot id di Pilipus do poingkaa, “Ongoi insomok dilo korita'-kuda',” ka. 30 Om ongoi noddi i Pilipus insomok di korita'-kuda'ddi, om korongou no dau i tulun diri do mambasa' di Buuk di Yosaya. Om uhoto' no di Pilipus i tulun diri do poingkaa, “Oi tuan, kosuhut ko indo basaon nu?” ka dau. 31 Om boros kaddi tulun diri do suminimbar, “Poingkuro oku'd kosuhut dot aiso' o tulun do papatarang diti dot id doho'?” ka dau. Om angatai noddi dau i Pilipus do sumakai di korita'-kuda' om patalado' no dau iyau do mirikau. 32 Ayat nopod basaon dau dot id buuk diri om poingkaa, “Miagal iyau di dumba' di nongoi gayato' do maan sumbolio', miagal iyau di tanak do dumba dit a' i' monguni di maso'd guntingon o hulu, om iyo noddi iyau tu' a' i' mungkomi. 33 Hiningi-hingi iyau om a' otulid o winonsoi dot id dau, om pinatai iyau, om aiso' i' o tongoiso' piya'd tulun di milo do monusui'd sinakagon dau,” ka. 34 Om boro-boros noddi di Pilipus i pagawai dit asawat o pangkat diri, i mantad hilo'd Itiopia, do poingkaa, “Sunudai oku daa ondung isai o komoyon di nabi diti. Iyau tuu ko' tulun do suwai?” ka dau. 35 Om susuyai noddi di Pilipus i pagawai dit asawat o pangkat diri di Habar dot Osonong do pasal di Yesus dot it ayat diri o pinoimpuunan do minonusui. 36 Om tontok di manau-panau iyolo' om korikot no iyolo' dot id iso' o kinoiyonon di haro o waig, om boro-boros no i pagawai, “Hoodi daa o waig! Nunu po o koontobon do mamatis doho'?” ka dau. 37 Om boros kad Pilipus do suminimbar, “Ondung aayi-ayi' kopio o ginawo nu dot otumbayaan oi tuan, om milo ko nod botisan,” ka dau. Om boros kaddi pagawai dit asawat o pangkat, i mantad hilo'd Itiopia'ddi, “Otumbayaan oku no dot i Yesus Kristus nopo om Tanak do Kinorohingan,” ka dau. 38 Om ponuhu' noddi i pagawai do popoundorong di korita'-kuda' dau, om lintuhun goduwo no iyolo' di Pilipus. Om ongoi no iyolo' tabung do hiri'd waig om botisai noddi di Pilipus i pagawai'ddi. 39 Om kotindal poddi iyolo' do mantad hiri'd waig, om ngoyo' nod Rusod do Kinorohingan i Pilipus do mantad hiri, om a' noddi iyau nokito di pagawai dit asawat o pangkat di mantad hilo'd Itiopia'ddi. Om otood nopoddi o ginawo di pagawai'ddi do luminombus do minamanau. 40 Om puriman kad Pilipus nga' hilo' no iyau id Asdod. Om tontok di luminombus iyau'd minamanau, om pintikid no iyau dot id koinsanai di bandar do popinsusui di Habar dot Osonong do pasal di Yesus, do gisom do nokorikot iyau do hilo'd Kaisaria.
Notumbayaan di Yesus i Saulus
1 Nga' daamot nopoddi om a' nopo tumingkod i Saulus do momorolosi om mongoi pamatai di tumatanud di Tuhan Yesus. Om ongoi no iyau solowot di Boyoon dot Agayo dot Imam, 2 do mongoi pokianu'd surat kuasa' do pokitanan dau di piro-piro boyoon do sasambayangan do tulun do Yohudi do hilo'd Damsik. Om ondung haro ot osolowot dau do tulun di notumbayaan di Yesus do hilo', om milo nondo iyau'd manangkap diyolo' om papakaa diyolo' do hilo'd Yorusalim. 3 Nga' tontok di manau-panau i Saulus do kumaa'd hilo'd Damsik, dit osomok no iyau di bandar diri, om sigog id haro o tulinau do mantad hilo'd tawan do tuminitiu do posorili' dau. 4 Om karatu' nopo i Saulus do hiri'd tana' om korongou noddi dau do haro o minoro-boros dau do poingkaa, “Saulus, Saulus! Nokuro tu' monginggorit ko doho'?” ka. 5 Om ponguhot noddi i Saulus do poingkaa, “Isai ko, oi tuan?” ka. Om simbar no i minoro-boros diri, “Iyoho' no i Yesus, it inggoriton nu. 6 Nga' ingkakat nod dinondo om mongoi i' do hilo'd bandar, om sunudan ko indo'd hilo' ondung nunu it apatut nu'd wonsoyon,” ka. 7 Om i tulun di moyo-woyo' di Saulus nga' dodog ngai' nopo do nongkotigowo tu' nokorongou iyolo' di boros, nga' aiso' i' o tulun do nokito diyolo'. 8 Om ingkakat noddi i Saulus om ungkalat no daa iyau, nga' a' no iyau kokito. Om ahako' noddi diyolo' i Saulus do ruminikot do hilo'd Damsik. 9 Om tolu'ddi o tadau di Saulus dot a' kokito, om solinai'd nopoddi om a' no iyau minakan om a' mininum. 10 Hilo' nopod Damsik om haro o songulun o tumatanud di Tuhan Yesus dot i Ananias o ngaran. Om intalang no o Tuhan dot id dau, om boro-boros nod, “Ananias!” ka. “Hiti oku i', oi Tuhan!” ka dau do suminimbar. 11 Om boros kaddi do Tuhan dot id dau, “Sodia' no om mamanau i' do mongoi'd hilo'd walai di Yudas, i hilo'd ralan di roitan do Ralan dot Otulid. Om ihumon nod hilo' o songulun di roitan dot i Saulus, i mantad hilo'd bandar do Tarsus. Tu' dinondo nopo om maso no dau do sumambayang, 12 om kokito nondo iyau dot id suang do pinointalang do songulun o kusai dot i Ananias o ngaran do rumikot do mongoi ponukabai dau om kokito indo kawagu iyau,” ka. 13 Om boros kad Ananias do suminimbar, “Oi Tuhan, ogumu' no o tulun do norongou ku'd mimboros do pasal do tulun diri, dot a' no ogina-gina' o ponginggorit dau do tulun di songonuon nu di hilo'd Yorusalim. 14 Om haro o kabanaran dau do mantad id piro-piro boyoon dot imam do rumikot do hiti do mongoi panangkap do koinsanai'd tulun di notumbayaan diya',” ka dau. 15 Nga' boros ka kawagu'd Tuhan dot id dau, “Ongoi nopo, tu' nopili' ku no iyau do sumiliu'd susuhuon ku, om popinsusui nondo iyau'd pasal doho' dot id bansa'd suwai, om id piro-piro o raja' om id tulun nogi' dot Israil. 16 Om sunudan ku nondo iyau do koinsanai'd koinggoritan dit a' no milo dot a' dau opurimanan dot iyoho' o koponginggoritan,” ka dau. 17 Om ongoi noddi i Ananias do hiri'd walai'ddi, om sukabayai no dau i Saulus do mikuwo'd minoro-boros do poingkaa, “Oi Saulus, i tobpinai ku. Iri no Tuhan Yesus di nokito nu di maso nu'd manau-panau do pakayaan do hiti o minonuhu' doho' do rumikot do hiti, om kokito ko indo kawagu, om oporinta' ko do Rusod do Kinorohingan,” ka dau. 18 Om diiri i' om diiri do haro o nolungkab do koiyo-iyo'd sisi' do sada' do mantad id mato di Saulus, om kokito noddi iyau kawagu. Om ingkakat noddi iyau om pokibatis no. 19 Om kaakan poddi i Saulus om kokoris nogi' kawagu iyau.
Minonuduk i Saulus do Hilo'd Damsik
Om undorong no i Saulus do hilo'd Damsik do piro-piro tadau do poinsugku' di piro-piro tumatanud di Yesus. 20 Om tilombus nopoddi iyau do minongoi do hiri'd piro-piro walai'd sasambayangan, om timpuun no iyau do poposusui dot i Yesus no i Tanak do Kinorohingan. 21 Nga' ongosuayan ngai' nopo i tulun do nokorongou di boros di Saulus. Om mogiuhot-uhot po iyolo' do poingkaa, “Okon toi ko' iyau nogi' i minamatai ngai' di tulun di notumbayaan di Yesus do hilo'd Yorusalim? Om okon toi ko' kinaangayan nopo dau'd hiti om mongoi panangkap diyolo', om tanggayan nondo do ngoyon potimbabao' di piro-piro boyoon dot imam?” ka diyolo'. 22 Nga' muhang-ruhang nopoddi o kuasa' di ponudukan di Saulus. Om atarang kopio o ponudukan dau do pinopoingod kopio dot i Yesus no i Raja' di Gampamasi, gisom dot aiso' no o posimbaron di tulun do Yohudi di poingiyon do hilo'd Damsik. 23 Om piro-piro noddi o tadau do mantad diri, om pogiupakat no i tulun do Yohudi do mamatai di Saulus. 24 Nga' noilaan i' di Saulus i pakat diyolo'ddi. Om poingawang kasai' nopo iyolo' do hiri'd wawayaan dot agayo di bandar diri do tadau om totuong do mamatai daa di Saulus. 25 Nga' insan o totuong om ongoyo' no i Saulus di piro-piro tumatanud dau, om pouluho' no diyolo' iyau do pinawaya' do hiri'd luang do tolig di bandar do pinosuang iyau do balatak.
Hilo'd Yorusalim i Saulus
26 Om ongoi noddi i Saulus do hilo'd Yorusalim, om ongoi no daa iyau amung di tumatanud di Yesus do hilo'. Nga' moddosi i' daa'ddi iyolo' dau, tu' a' i' iyolo' otumbayaan dot otopot kopio do nosiliu iyau'd tumatanud di Yesus. 27 Om ongoi noddi i Barnabas solowot di Saulus om angatai no dau iyau do mongoi solowot di piro-piro tulun di sinuhu'ddi. Om susuyo' no di Barnabas dot id diyolo' ondung poingkukuro i Saulus do nokokito'd Tuhan di maso dau do manau-panau do kumaa'd hilo'd Damsik, om ondung poingkuro o Tuhan do minoro-boros dot id dau. Om sinusui dau i kasangango' di Saulus do monuduk dot id suang do ngaran di Yesus do hilo'd Damsik. 28 Om undorong noddi i Saulus do poinsugku' diyolo'd hilo', om a' nopo iyau moddosi do monuduk dot id suang do ngaran do Tuhan do pointongkop do hilo'd Yorusalim. 29 Om minoro-boros i Saulus om minonokisimbar-simbar iyau di tulun do Yohudi di dong Yunani do boros. Nga' pokipapatayan kasai' i' diyolo' iyau. 30 Om koilaai poddi di tulun di notumbayaan o pasal diri, om angatai no diyolo' i Saulus do mongoi'd hilo'd Kaisaria, om pokoyoon nogindo diyolo' iyau do hilo'd Tarsus. 31 Om ongosimbayan nopoddi o sidang do pointongkop do pomogunan do Yudia om Galilia, om Samaria. Om muhang-ruhang o ginumu' om kogiroto' di piro-piro o sidang diri, om ongoronok iyolo'd Kinorohingan tu' uhupan i' iyolo'd Rusod do Kinorohingan.
Hilo'd Lida om Hilo'd Yopa i Pitrus
32 Om mimpanau nopoddi i Pitrus do mongoi pogompuya' di piro-piro o sidang. Insan o tadau om ongoi no iyau do hilo'd Lida do minongoi pogompuya' di tulun di songonuon do Tuhan do hilo'. 33 Om kosolowot no dau'd hilo' o songulun o kusai dit a' koundaliu dot i Inias o ngaran, om walu' no o toun do koloido' dau dot a' nopo kotungag do poillii do hiri'd toodopon dau. 34 Om boro-boros no i Pitrus di Inias do poingkaa, “Oi Inias, lingasan ko i' di Yesus Kristus. Tungag no, om sonongon i' ino toodopon nu,” ka dau. Om diiri i' om diiri do tuminungag i Inias. 35 Om koinsanai nopo i tulun do hiri'd Lida om Saron do notumbayaan do Tuhan do nokokito di Inias do nolingasan. 36 Om haro o songulun o tondu' do hilo'd Yopa dot i Tabita o ngaran. (Ngaran nopo dau do dong Yunani om i Dorkas, om komoyon nopoddi om “tambang”.) Iyau nopo om otumbayaan kopio di Yesus. Om osonong kasai' o wonsoyon dau om monulung iyau di tulun do mosikin. 37 Om tontok nopoddi om suminakit iyau om kapatai noddi iyau. Om kopodsu' poddi diyolo' i rata' dau om ngoyo' no diyolo' posuango' di bilik dit id sawat. 38 Bandar nopod Yopa om osomok i' do hilo'd bandar do Lida. Om tontok di nokorongou i tumatanud di Yesus di hilo'd Yopa do hilo'd Lida i Pitrus do tontok diri, om ponuhu' noddi iyolo'd duwo o tulun do mongoi pomisunud di Pitrus do poingkaa, “Lomusan no do mongoi'd hiti,” ka. 39 Om olomus nopo i Pitrus do miningkakat om tanud no iyau diyolo' do minamanau. Om korikot poddi i Pitrus do hilo', om angatai no iyau do mongoi do hiri'd bilik di hiri'd sawat. Om ogumu'ddi o tongoondu' di nopuadan do guminurumung di Pitrus om songihad-ihad, om popingontong iyolo' di Pitrus di rasuk diyolo' om i rasuk diyolo' dit id soibau di tinombir di Dorkas, do pinatahak dau diyolo' di poimpasi po iyau. 40 Om suhuon' ngai' noddi di Pitrus iyolo' do sumoliwan, om otud no iyau do suminambayang. Om toguang no iyau di rata' di Dorkas, om boro-boros no iyau'd poingkaa, “Oi Tabita, tungag no!” ka. Om ungkalat no i Dorkas, om kokito no dau i Pitrus om irikau noddi iyau. 41 Om igitai noddi di Pitrus o longon di Dorkas do pinopoingkakat dau. Om lohowo' ngai' noddi di Pitrus i tongoondu' di nopuadan om i tulun do suwai di notumbayaan, om patahako' no dau diyolo' i Dorkas, i noposian noddi. 42 Om kotongkop noddi o habar do pasal di koimayaan di nosiliu'ddi do pointongkop do Yopa om ogumu'ddi o tulun do notumbayaan dot i Yesus i Raja' do Gampamasi diyolo'. 43 Om undorong noddi i Pitrus do hiri do piro-piro tadau do koloido', do hiri'd walai do songulun o tukang kulit dot i Simun o ngaran.
I Pitrus om i Kornolius
1 Hilo' nopod Kaisaria om haro o songulun o kusai dot i Kornolius o ngaran. Iyau nopo om boyoon do soudor di roitan do “Posukan dot Italia”. 2 Om iyau nopo om tulun dit oronok do Kinorohingan, om tumuku' dot id Kinorohingan o koinsanai di sompiiyon dau. Om asaru' iyau do monulung di tulun do Yohudi di mosikin, om sumambayang kasai' iyau dot id Kinorohingan. 3 Om insan o tadau di jam kotolu no doti'd sosodopon, om kokito no dau ot iso' o moloikat do Kinorohingan dot id suang do pinointalang om lohowo' no iyau di moloikat diri, “Oi Kornolius!” ka. 4 Om ontong no i Kornolius di moloikat do mikuwo'd ooris, om boro-boros no iyau dot, “Nunu ri oi tuan ?” ka dau. Om boros ka di moloikat do suminimbar, “Norongou nod Kinorohingan i sambayang nu om noilaan dau i kopuhawango' nu, om simbaron ko nod Kinorohingan. 5 Om ponuhu' nod tulun do kumaa do hilo'd Yopa do mongoi pangangat di Simun, i roitan nogi' dot i Simun Pitrus. 6 Niyonon nopo dau om hiri'd walai do songulun o tukang kulit dot i Simun o ngaran. Walai nopoddi om hiri'd tisan do rahat,” ka. 7 Om kotongkiad poddi i moloikat di minoro-boros di Kornolius diri om pomolohou no i Kornolius do duwo o tulun di susuhuon dau om songulun o soudor di madtatamong dau dit otumbayaan do Kinorohingan. 8 Om susuyo' noddi di Kornolius i nosiliu'ddi dot id diyolo', om suhuon' nogiddi dau iyolo' do mongoi'd hilo'd Yopa. 9 Om tadau noddi kawagu di manau-panau iyolo' dit oruhai no iyolo'd korikot do hilo'd Yopa, om ongoi no i Pitrus salakoi do hiri'd taap di walai do mongoi sambayang. 10 Om louson noddi tomod i Pitrus, om mokiaakan no daa iyau. Om daamot po di tulun do poposodia' di taakanon, om haro'ddi o pinointalang do nokito dau. 11 Om kokito no dau ilo tawan do noiwangan om kokito no dau o miagal do kain dot alaab do pinoulu do hiti'd pomogunan do nigitan o hiri'd apat o sunduk di kain do pinopoulu. 12 Om hiri nopod suang diri, om hino ngai' nopo o bansa' do nintorusan, it apat o gakod om i sangkamang-kamang do hiti'd tana' om i piro-piro tombolog. 13 Om korongou no di Pitrus o moro-boros do poingkaa, “Oi Pitrus, ingkakat om sumbolion i' ilo' om akanon i'!” ka. 14 Om boros kad Pitrus do suminimbar, “Mada' oku i' oi Tuhan! Tu' a' oku po insan pangakan di nintorusan di pogoduhan do mangakan om i sosomu',” ka dau. 15 Nga' boro-boros po kawagu i minoro-boros diri do poingkaa, “Nunu nopo i poboroson do Kinorohingan dot olidang om kada' no soroho' do sosomu',” ka. 16 Om intolu dau kokito i pinointalang diri, om poinsawato' nogiddi i kain do hilo'd surga. 17 Om oborulong nopo i Pitrus do momusorou ondung nunu o komoyon di nokito dau dot id suang do pinointalang diri. Om maso po di Pitrus do momusorou do pasal diri, om korikot no do hiri'd walai di Simun i tulun di sinuhu' di Kornolius diri, om hiri no iyolo'd wawayaan di walai. 18 Om pomolohou no iyolo'd tulun om ponguhot no iyolo', “Haro o tulun do nakaapit do hiti do roitan dot i Simun Pitrus?” ka. 19 Om daamot nopoddi om momusorou kasai' po i Pitrus ondung nunu kopio o komoyon di pinointalang di nokito dau'ddi. Om boro-boros no o Rusod do Kinorohingan dot id dau do poingkaa, “Oi Pitrus, haro o tolu o tulun do mogihum diya'. 20 Lintuhun kopio do hilo'd siriba' om kada' pikoduwo o ginawo do tumanud diyolo', tu' iyoho' i' o minonuhu' diyolo'ddi,” ka. 21 Om lintuhun noddi i Pitrus om boro-boros no di tulun diri do poingkaa, “Iyoho' no it ihumon dokoyu'ddi oi tobpinai-tobpinai. Nunu o kinaangayan dokoyu'd hiti?” ka dau. 22 Om boros ka diyolo'd suminimbar, “Sinuhu' iyahai di Kornolius i boyoon do soudor do mongoi'd hiti. Iyau nopo om osonong kopio koulun om oronok iyau'd Kinorohingan, om pusohon kopio iyau do koinsanai'd tulun do Yohudi. Om sinuhu' iyau dot iso' o moloikat do Kinorohingan do poongoi diya' do hilo'd walai dau. Om sinuhu' iyau do mokinongou di poboroson nu dot id dau, tu' iri no o tisimbar di sambayang dau,” ka diyolo'. 23 Om angatai noddi di Pitrus iyolo' do sumalakoi om modop pondod hiri. Om tadau poddi kawagu om pamanau noddi i Pitrus do tuminanud di tulun diri. Om haro nogi' o piro-piro tulun di notumbayaan do mantad hilo'd Yopa do tuminanud diyolo'. 24 Om sangadau poddi do mantad diri om korikot nogi' iyolo' do hilo'd Kaisaria. Om songintimung nod hiri i Kornolius om i koobpinayan dau om i piro-piro tambalut dau do linohou dau, do magandad do korikatan di Pitrus. 25 Om korikot poddi i Pitrus do hiri, om ongoyo' no di Kornolius rubao' iyau om otud no dot id toguang di Pitrus. 26 Nga' poingkakato' no di Pitrus iyau, om boro-boros nod, “Ingkakat no, dot iyoho' nga' tulun i' toomod,” ka dau. 27 Om maso po di Pitrus do moro-boros di Kornolius, om salakoi no iyolo' do hiri'd walai. Om kokito no dau o tulun dot ogumu' do songintimung nod hiri. 28 Om boro-boros noddi i Pitrus diyolo' do poingkaa, “Oi tobpinai- tobpinai, iyokoyu nga' nokoilo id ponudukan nopod tugama' do Yohudi om oduhan i tulun do Yohudi do mongoi amung ko' mongoi ambalut di bansa'd suwai. Nga' tinudukan oku'd Kinorohingan dot a' oku i' apatut do pokososomu' ko' a' pokolidang dot isai nopo. 29 Om iri noddi o kinaangayan ku'd hiti do soira' do nokorongou oku di boros do tuan do pinopoongoi doho'. Om muhot oku'ddi ondung nunu o kinapaangayan do tuan doho' do hiti,” ka di dau. 30 Om boros kad i Kornolius do suminimbar, “Di nopo di tolu no o tadau'd nakatalib, di dongiyo'dti doti'ddi di jam do kotolu do sosodopon, do suminambayang oku do hiti'd walai ku, om sigog id haro o songulun o kusai do poingkakat do hiri'd dotoguangan ku, do mogulinau tomod o pakayan dau. 31 Om boro-boros no iyau doho' do poingkaa, ‘Oi Kornolius! Norongou nod Kinorohingan i sambayang nu, om osorou dau i kopuhawango' nu. 32 Om ponuhu' nod tulun do mongoi do hilo'd Yopa do mongoi pangangat di tulun di roitan dot i Simun Pitrus. Poingiyon iyau do hiri'd walai di songulun o tukang kulit, i roitan dot i Simun. Walai nopo dau om hiri'd tisan do rahat,’ ka. 33 Om olomus oku nopoddi do minonuhu' do tulun do mongoi pangangat diya', oi tuan. Om osonong i' kopio o ginawo do tuan do ruminikot do hiti. Om dinondo'dti om songintimung ngai' no iyahai dot id toguang do Kinorohingan do mokinongou do koinsanai di ponuhuan do Kinorohingan diya' do popoboros dot id dahai,” ka dau.
I Pinoboros di Pitrus
34 Om boro-boros noddi i Pitrus do poingkaa, “Nosuhutan ku nogi' kopio'd baino' do Kinorohingan nopo om oiyo i' o wonsoyon dot id koinsanai'd tulun. 35 Om a' i' o Kinorohingan momili' do bansa'd tulun, suwai ko' isai nopo it otumbayaan dau om momonsoi dot otopot om romiton ngai' no dau. 36 Om nongkoilo kou i' di komoyon kopio di habar do pinorikot do Kinorohingan dot id bansa' dot Israil, iri no i Habar dot Osonong do pasal do kosimbayanan, dot i Yesus Kristus, i Tuhan do koinsanai'd tulun o poposimbayan. 37 Om nokongoilo kou nogi' di nongosiliu do pointongkop do hilo'd Yudia, i tuminimpuun do hilo'd Galilia di nokoponuduk i Yohanis do pasal do botisan. 38 Om kongoilo kou nogi' do nopili' do Kinorohingan i Yesus, i tulun do Nasarit diri, om nonuan iyau'd Rusod do Kinorohingan om kuasa'. Om koilo kou nogi' do mimpanau i Yesus do tuminongkop do hinonggo nopo do mingwonsoi dot ongosonong om minomolingos do koinsanai'd tulun di norusadan do rogon, tu' moyo-woyo' kasai' i' o Kinorohingan dau. 39 Om iyahai nogi' i nokokito kopio do koinsanai di winonsoi dau do hilo'd pomogunan do tulun do Yohudi, om hilo'd Yorusalim. Nga' mulong po dot iyo kopio'ddi nga' pinasalib i' diyolo' iyau do minamatai dau. 40 Nga' pinasi i' iyau'd Kinorohingan di kotolu'd tadau om pinointalang dau iyau dot id tulun. 41 Nga' a' i' oinsanan o tulun do nokokito dau, suwai ko' iyahai noo i nopili' mantad do Kinorohingan do sumiliu'd sasi' dau. Om nokotorungak po iyahai dau do makan om minum di napasi kawagu iyau do mantad id kapatayon. 42 Om sinuhu' iyahai dau do popinsusui do Habar dot Osonong dot id tulun om popoilo diyolo' do nopili' iyau'd Kinorohingan do sumiliu'd Gompomutus di tulun di nangapatai. 43 Om oinsanan nopo i nabi do nokopomoros do pasal dau. Om minomoros iyolo' dot iri ngai' nopo i tulun dit otumbayaan di Yesus om oompunan no o dusa dau, dot i kuasa' di Yesus o kaampun,” ka dau.
Nakaramit do Rusod do Kinorohingan i Tulun dit Okon Ko' Yohudi
44 Om daamot po di Pitrus do moro-boros, om lintuhun no o Rusod do Kinorohingan do minomorinta' do koinsanai di tulun di mokinongou di habar diri. 45 Om ongosuayan diri i tulun do Yohudi di notumbayaan di Yesus, i mantad hilo'd Yopa di minoyo' di Pitrus, do nokokito di tulun dit okon ko' Yohudi do nonuan do Kinorohingan do Rusod dau. 46 Tu' norongou diyolo' i tulun diri do mimboros do boros do mogisuayan o bansa' om mamarayou do kogoyoo'd Kinorohingan. Om boro-boros noddi i Pitrus dot id diyolo' do poingkaa, 47 “Intangai pogi' dokoyu, nga' nakaramit nod Rusod do Kinorohingan iti tulun diti do miagal dati'. Iyo nopoddi om milo po toi o tulun do mangantob diyolo' do mokibatis do waig,” ka dau. 48 Om suhuon' noddi di Pitrus iyolo' do mokibatis dot id suang do ngaran di Yesus Kristus. Om pokionuo' poddi di tongoulun i Pitrus do mundorong do hiri'd poinsugku' diyolo' do piro-piro tadau'd koloido'.
I Pinosunud di Pitrus dot id Sidang do Hilo'd Yorusalim
1 Om korongou noddi i piro-piro rasul om i tulun di notumbayaan di pointongkop do pomogunan do Yudia dot i tulun dot okon ko' Yohudi nga' nakaramit id boros do Kinorohingan. 2 Om tontok di nokorikot i Pitrus do hilo'd Yorusalim, om pasalao' no i Pitrus di piro-piro tulun do Yohudi di nongotumbayaan no. Iyolo' nopo nga' monuhu'd monunat di tulun dit okon ko' Yohudi. Boros ka diyolo', 3 “Nokuro tu' mongoi ko salakoi dot id walai do tulun dit okon ko' Yohudi om it a' po nosunatan? Om minilang ko po diyolo'd makan!” ka. 4 Om impuuno' noddi di Pitrus do monusui dot id diyolo' o koinsanai di nongosiliu. Boros ka dau, 5 “Tontok di suminambayang oku do hilo'd bandar do Yopa, om haro o nokito ku dot id suang do pinointalang do koiyo-iyo'd sombidang o kain dot alaab do pinoulu do mantad hilo'd tawan do nigitan o hiri'd apat o sunduk di kain do pinopoulu, do pinoulu dot id toning ku. 6 Om ngoyo' ku no kopio antangai o hiri'd suang diri, om kokito ku no do poinsuang do hiri ot ogumu' o nintorusan dit apat o gakod, om nintorusan dit ongorongit, om i nintorusan di sangkamang-kamang om tombolog. 7 Om korongou ku noddi do haro o minoro-boros doho' do poingkaa, ‘Ingkakat no oi Pitrus, ngoyo' sumbolio' ilo' om akanon i'!’ ka. 8 Nga' boros kangku'd suminimbar, ‘Mada' oku i', oi Tuhan! Tu' a' oku i' insan pangakan do taakanon di pogoduhan ko' i sosomu',’ kangku. 9 Om boros ka di minoro-boros do mantad hilo'd tawan do suminimbar, ‘Nunu nopo it olidang do poboroson do Kinorohingan om kada' no soroho' do sosomu',’ ka. 10 Om intolu ku nopo kokito i pinointalang diri, om poinsawato' ngai' nogiddi kawagu iri do hilo'd surga. 11 Om tontok nogi' do maso'ddi do haro o tolu o tulun do mantad hilo'd Kaisaria, i sinuhu' do mongoi solowot doho', do nokorikot do hiri'd walai di niyon ku. 12 Om suhuon' oku noddi do Rusod do Kinorohingan do tumanud diyolo' do mikuwo'd a' mikoduwo' o ginawo. Om tanud noddi doho' iti onom o tulun diti do kuminaa do hilo'd Kaisaria, om salakoi ngai' no iyahai do hiri'd walai di Kornolius. 13 Om susuyo' no di Kornolius dot id dahai do nokokito iyau dot iso' o moloikat do poingkakat do hiri'd walai dau, om minoro-boros i moloikat diri do poingkaa, ‘Ponuhu' nod tulun do mongoi do hilo'd Yopa do mongoi pangangat di songulun o kusai do roitan dot i Simun Pitrus. 14 Tu' poporongou nondo iyau diya' do habar di mamasi diya' om i sompiiyon nu,’ ka dau. 15 Om tontok di tuminimpuun oku nogi' do moro-boros dot id diyolo', om lintuhun no o Rusod do Kinorohingan dot id diyolo' do miagal di nosiliu dot id dati' di timpuun i'. 16 Om kosorou ku noddi i nokoboros mantad do Tuhan do poingkaa, ‘I Yohanis nopo om waig no o pamatis nga' iyokoyu nopo om obotisan nondo do Rusod do Kinorohingan,’ ka. 17 Om atalang no kopio do manahak i' o Kinorohingan do nipuhawang dot id tulun dit okon ko' Yohudi do miagal di pinopuhawang dau dot id dati' do tontok di notumbayaan toko' do Tuhan Yesus Kristus. Iyo nopoddi, om poingkuro oku daa do mogodu do Kinorohingan!” ka dau. 18 Om korongou poddi diyolo' iri, om a' noddi iyolo' pinapasala' di Pitrus. Om pamarayou noddi iyolo' do Kinorohingan. Boros ka diyolo', “Iyo nopoddi, om onuan id Kinorohingan do maso it okon ko' tulun do Yohudi do rumologo di dusa diyolo' om kaanu nondo iyolo' di koposion dit otopot kopio,” ka.
Sidang do Hilo'd Antiokia
19 Om di nopoddi napatai i Stipanus, om pinggusaan diri i tulun di nongotumbayaan di Yesus do gisom do nokopogitongkiad-kiad iyolo' om nakakaa dot id piro-piro kinoiyonon. Om haro o minogidu' do pinakayaan do hilo'd Pinisia, om haro o kuminaa do hilo'd Siprus om hilo'd Antiokia. Om popinsusui no iyolo'd habar dot osonong do mantad id Kinorohingan dot id pogialatan di tulun do Yohudi. 20 Nga' iri nopo i tulun di notumbayaan di mantad hilo'd Siprus om hilo'd Kirini om haro i' o piro-piro dot id pogialatan diyolo' do kuminaa do hilo'd Antiokia. Om pinoposusui iyolo' do Habar dot Osonong do pasal di Yesus dot id tulun dit okon ko' Yohudi. 21 Om ogumu'ddi o tulun do notumbayaan, om tuminahak kopio dot id Tuhan. Tu' kikuasa' i' do mantad id Tuhan i tulun di pinopopinsusui'ddi. 22 Om karangahai noddi di sidang do hilo'd Yorusalim i habar diri. Om suhuon' no diyolo' i Barnabas do mongoi do hilo'd Antiokia. 23 Om tontok di nokorikot i Barnabas do hilo', om otood tomod diri iyau do nokokito di kowoyo-woyoo' do Kinorohingan do minamaramit di tulun diri. Om odsuuro' noddi dau iyolo' do magayi-ayi' do ginawo do tumorodok dot id Tuhan. 24 I Barnabas nopodti om osonong koulun om noporinta' do Rusod do Kinorohingan, om otumbayaan kopio'd Tuhan, gisom dot ogumu'ddi o tulun do notumbayaan do Tuhan do naangatan dau. 25 Om ongoi noddi i Barnabas do hilo'd Tarsus do minongoi pogihum di Saulus. 26 Om kosolowot poddi dau i Saulus om angatai no dau iyau do mongoi do hilo'd Antiokia, om sontoun kopio'ddi o koloido' diyolo' do poinsugku' di sidang do hilo', om ogumu' o tulun do tudukan diyolo'd hilo'. Om hilo' nod Antiokia o kinoimpuunon do rinoitan do tulun do Kristian o tulun di notumbayaan di Yesus. 27 Om tontok nopoddi om haro o piro-piro nabi do mantad hilo'd Yorusalim do minongoi do hilo'd Antiokia. 28 Om haro'ddi ot id pogialatan di nabi diri dot i Agabus o ngaran, do pinopoboros do mononglous nondo dot adalaan kopio o pointongkop do pomogunan. Tu' bininsuhu' iyau do Rusod do Kinorohingan do popoboros diri. (Om nosiliu i' kopio o miagal diri dit i Kaisar Klaudius o momorinta'.) 29 Om pogiupakat noddi i tumatanud di Yesus do manahak do nunu nopo i dau'd patahakon do ponulung di tulun di poundorong do hilo'd Yudia, om sorompori-pori nopoddi iyolo' do pinapatahak do songkuro nopo i milo diyolo'd patahakon. 30 Om kopogiokun-okunai iddi diyolo' do momonsoi o miagal diri, om suhuon' no diyolo' i Barnabas om i Saulus do mongoi papaatod di pinonulung diyolo'ddi dot id piro-piro boyoon do sidang.
Muhang-Ruhang o Koinggoritan
1 Om tontok noddi do tuminimpuun i Raja' Horudis do monginggorit di piro-piro tulun dot id suang do sidang. 2 Om ponuhu' no iyau do mamatai di Yakub, i tobpinai di Yohanis do gayang o pamatai. 3 Om soira' di nokito di Horudis do kohubayaan do tulun i winonsoi dau do miagal diri, om ponuhu' no kawagu iyau do tulun do manangkap di Pitrus do tontok di Tadau'd Agayo do Roti dit A' Kipangambang. 4 Om katangkap poddi i Pitrus om pogiilo' no iyau. Om patamangai no i Pitrus dot apat o posukan do soudor, do mogisowoli-woli do madtamong --- dot iso' nopo o posukan do soudor om apat o tulun. Tu' osorou nopo di Raja' Horudis om katalib po i Tadau'd Agayo do Paska om butusan nogi' i Pitrus do hiri'd toguang do tulun dot ogumu'. 5 Om iri no o nokopogiilan di Pitrus; nga' iri nopo tulun di hiri'd sidang om sumambayang kasai' nopo dot id Tuhan do bagi' di Pitrus do mikuwo'd aayi- ayi' kopio o ginawo do sumambayang.
Pinosoliwan i Pitrus do Mantad id Giil
6 Nopo di totuong di sinuabon pondo om ongoyon no di Horudis potimbabao' i Pitrus dot id tulun dot ogumu' do maan butusai, om koodop i Pitrus do kinagasan do duwo o rantai do piniompopingan iyau do duwo o soudor di madtamong. Om iri no wookon di soudor om pointamong do hiri'd wawayaan di giil. 7 Om sigog id ingkakat o moloikat do Tuhan do hiri'd doros di Pitrus om tuminitiu o tulinau do hiri'd suang di giil. Om guyuon' no di moloikat i Pitrus do momosik dau. Om boro-boros noddi i moloikat dot id dau do poingkaa, “Oi, posik kopio,” ka. Om diiri iddi om diiri om koidu' no i rantai'd basi' di poingkogos di longon di Pitrus. 8 Om boros kaddi di moloikat diri, “Pakayo' ilo pakayan nu om pokogoso' ino tali do kasut nu,” ka. Om pakayo' noddi di Pitrus i pakayan dau om pokogoso' no dau i tali di kasut dau. Om boros ka kawagu di moloikat, “Rosuko' ino rasuk nu dit id soibau om tumanud i' doho',” ka dau. 9 Om tanud noddi i Pitrus di moloikat diri do suminoliwan di giil. Nga' a' i' di Pitrus oilaan dot otopot kopio i winonsoi di moloikat diri. Tu' osorou nopo dau om id suang id pinointalang. 10 Om katalib poddi iyolo' di wawayaan di tamangan di soudor dit id gulu kobontol om i koduwo, om korikot noddi iyolo' do hiri'd wawayaan do kitotobon do basi', i wawayaan do sumuwang do hiri'd bandar. Om iwang tomod nopo i wawayaan diri dot aiso' i' o tulun do minongiwang, om soliwan noddi iyolo', om susui noddi iyolo' dit iso' o ralan. Om sigog iddi do tongkiad di Pitrus i moloikat. 11 Om koilaai nogiddi kopio di Pitrus i nosiliu dot id dau. Om boro-boros noddi iyau do poingkaa, “Noilaan ku noddi kopio do sinuhu'd Tuhan i moloikat dau do popoidu' doho' do mantad id kuasa' di Horudis om mantad id koinsanai di wonsoyon daa di tulun do Yohudi dot id doho',” ka. 12 Om koilaai poddi kopio di Pitrus i nosiliu do miagal diri, om ongoi no iyau do hiri'd walai di Maria, i tina' di Yohanis i roitan nogi' dot i Markus. Om ogumu'ddi o tulun do pointimung do hiri do maso'd sumambayang. 13 Om koritiko' no di Pitrus i totobon di wawayaan, om ongoi noddi i Rodi, i songulun o susuhuon do tondu' do hiri'd wawayaan do mongoi daa pongiwang di wawayaan. 14 Om kotutunai no dau o boros di Pitrus, om a' no dau noiwangan i totobon tu' atataadan no kopio iyau, om osiau nogiddi iyau do guminuli' kawagu do minongoi pomisunud di tulun do hiri do hino nod hiri'd soliwan i Pitrus. 15 Om boros ka diyolo', “Mulau ko no!” ka. Nga' osonsog i' i Rodi do momoros dot otopot kopio dot i Pitrus iri. Om boros kaddi diyolo', “Moloikat id Pitrus ino,” ka. 16 Om a' i' tumingkod i Pitrus do mogkoritik di totobon. Om ngoyo' noddi diyolo' iwangai i totobon di wawayaan om kokito no diyolo' i Pitrus, om ongosuayan noddi kopio iyolo'. 17 Om pobilido' no di Pitrus o longon dau do popotingkod diyolo' do minghiyo. Om susuyo' no dau dot id diyolo' ondung poingkukuro o Tuhan do pinoposoliwan dau do mantad id giil. Om suhuon' nogiddi dau iyolo' do poporongou di Yakub om i piro-piro tobpinai do suwai do habar diri. Om tongkiad noddi i Pitrus do mantad hiri do minongoi dot id kinoiyonon do suwai. 18 Om kosuabon noddi om angagangau tomod diri i piro-piro soudor di madtamong di giil, om oborulong nopo iyolo'd momusorou ondung poingkuro o nosiliu dot id di Pitrus. 19 Om ponuhu' noddi i Horudis do tulun do mogihum di Pitrus, nga' a' i' diyolo' nokito iyau. Om ponuhu' noddi i Horudis do monguhot kopio di piro-piro soudor di minadtamong diri, om patayo' nogiddi iyolo'. Om tongkiad noddi i Horudis do mantad hilo'd Yudia. Om ongoi no iyau do hilo'd Kaisaria do piro-piro koloido'.
Napatai i Horudis
20 Om kotogod noddi kopio i Horudis di tulun do hiri'd Tirus om Sidon. Om insan-insan nopoddi iyolo' do minongoi solowot di Horudis. Nga' ngoyo' poddi diyolo' lugu-lugutai i Blastus, i boyoon do hiri'd walai di Horudis di don raja', do gisom do suminokodung i Blastus diyolo'. Om ongoi nogiddi iyolo' solowot di Horudis do mongoi daa ponokiulud dau, tu' mantad i' do hiri'd pomogunan di Horudis o koonuan diyolo'd taakanon. 21 Om tontok di tadau di natantu' mantad, om pamakai noddi i Horudis di pakayan dau do don raja', om ongoi no iyau irikau do hiri'd tirikohonon dau di don raja', om timpuun no do moro-boros dot id toguang di rayat. 22 Om boros ka di rayat do nokorongou di boros di Horudis, “Okon i' ko' tulun ilo mimboros, suwai ko' boros id di ponokokinorohingan,” ka. 23 Om diiri i' om diiri om tapapo' no di moloikat do Tuhan i Horudis, tu' a' i' iyau momusou'd Kinorohingan. Om kapatai noddi i Horudis tu' nakan iyau'd tonggiluang di hiri'd tian dau. 24 Om mumu-gumu' nopoddi o tulun do nokorongou do boros do Kinorohingan, om minonongkuyaan iyolo'ddi. 25 Om kopongo poddi di Barnabas om i Saulus i karaja' diyolo', om poguliai no diyolo' do mantad hilo'd Yorusalim, om angatai no diyolo' i Yohanis i roitan dot i Markus do tuminanud diyolo'.
Pinili' om Sinuhu' i Barnabas om i Saulus
1 Hiri nopod sidang dot Antiokia om haro o piro-piro nabi om gomponuduk, iyolo' nopoddi om: i Barnabas om i Simion i pinungaranan dot it Oitom, om i Lukius i mantad hilo'd Kirini, om i Minahim i guminayo do poinsugku' di Raja' Horudis, om i Saulus. 2 Om tontok di maso diyolo' do sumambayang dot id Tuhan do mikuwo'd puasa, om boro-boros no o Rusod do Kinorohingan dot id diyolo' do poingkaa, “pilion no i Barnabas om i Saulus do potobilangon do bagi' doho', om owonsoi i' diyolo' i karaja' di natantu' mantad ku do wonsoyon diyolo',” ka. 3 Om kasambayang poddi iyolo' do mikuwo'd puasa, om sukabayai no diyolo' i Barnabas om i Saulus om suhuon' goduwo nogiddi iyolo' do mamanau.
Hilo'd Siprus
4 Om pamanau noddi i Barnabas om i Saulus do kuminaa do hilo'd Siliukia. Tu' sinuhu' iyolo'd Rusod do Kinorohingan do mongoi'd hilo'. Om hilo' noddi o tadon diyolo' do kuminaa do hilo'd Pulou do Siprus do suminakai do kapal do rahat. 5 Om korikot poddi iyolo' do hilo'd Salamis, om poposusui no iyolo' do boros do Kinorohingan do hiri'd piro-piro walai'd sasambayangan do tulun do Yohudi. Om i Yohanis i roitan dot i Markus o monulung diyolo' do tontok di mimpanau iyolo'. 6 Om pimpanau nopo iyolo' do tuminongkop di pulou diri, gisom do nokorikot do hilo'd Papos. Om hilo' no do nosolowot iyolo' do songulun o tulun do Yohudi dot i Bar Yesus o ngaran. Iyau nopo om bobolian om mangakun do nabi. 7 I Sorgius Paulus nopo i gobunor do hiri'd pulou'ddi om tambalut kopio di bobolian diri. Iri nopo i gobunor diri om oilo kopio om opintar. Om lohowo' no di gobunor i Barnabas om i Saulus, tu' orohian iyau do mokinongou'd boros do Kinorohingan. 8 Nga' i Barnabas nopo om i Saulus om sinongkiwal daa di Ilimas i bobolian diri, tu' tumotos daa i Ilimas (iri no o ngaran dau do dong Yunani) do mogodu di gobunor dot otumbayaan di Yesus. 9 Nga' i Saulus nopo i rinoitan dot i Paulus diri om noporinta' do Rusod do Kinorohingan gisom do sonsodo' nopo dau i bobolian diri, 10 om boro-boros no iyau do poingkaa, “Oi gomponipu' i tanak dit araat! Iya' no o pisangod do koinsanai dit ongosonong. Nokuro tu' a' ko tumingkod do mamaraag di natantu' mantad do Kinorohingan do wonsoyon dau do mamasi'd tulun? 11 Dinondo no moti' do hukuman ko'd Tuhan! Om obolou ko nondo, om a' ko nondo kokito do tinitiu dilo tadau do daamot,” ka dau. Om diiri i' om diiri do tuminuong o nokito di Ilimas, om mikorobibi' poddi iyau do mawor-hawor do mogihum do tulun do mangahak dau. 12 Om kotumbayaai nopoddi di Yesus i gobunor diri do nokokito di nosiliu'ddi, tu' oimayaan no kopio iyau di ponudukan do pasal do Tuhan.
Hilo'd Bandar dot Antiokia it id Pomogunan do Pisidia
13 Om pamanau noddi i Paulus om i piro-piro tambalut dau do suminakai'd kapal do rahat do mantad hilo'd Papos do kuminaa do hilo'd Pirga it id pomogunan do Pampilia. Om hilo' noddi i Yohanis i roitan dot i Markus do tuminongkiad diyolo', om poguliai no dau do hilo'd Yorusalim. 14 Nga' iyolo' nopo om tuminilombus pod minamanau do mantad hilo'd Pirga do kuminaa do hilo'd bandar dot Antiokia i hilo'd pomogunan do Pisidia. Om ongoi noddi iyolo' suang do hiri'd walai'd sasambayangan di norikot i tadau'd Sabat. 15 Om kotingkod poddi i tulun do mambasa' di Tourat di Musa om i piro-piro buuk do nabi om ponuhu' no i piro-piro boyoon do sasambayangan diri do tulun do mongoi boro-boros di Paulus om i piro-piro tambalut di Paulus, do poingkaa, “Ondung haro o potudukon do tobpinai- tobpinai dot id tulun diti om poboroson nopo,” ka diyolo'. 16 Om ingkakat no i Paulus om pobilido' no dau o longon dau, om boro-boros nod poingkaa, “Oi tobpinai-tobpinai ku, i bansa' dot Israil om koinsanai di tobpinai- tobpinai ku'd hiti dit okon ko' do Yohudi, dit otorodok dot id Kinorohingan! Pokinongou kou nodti poboroson ku. 17 Kinorohingan nodti bansa' dot Israil o minomili' di taki-aki toko', om pinoposiliu do bansa'dti do bansa' dot agayo di poundorong po iyolo' do hilo'd Masir, i pomogunan do sompogunan. Om kuasa' id Kinorohingan dot agayo o pinoposoliwan diyolo' do mantad hilo'd Masir. 18 Om alanut i' o ginawo'd Kinorohingan do kokito di kowoyo-woyoon diyolo' di solinaid dot apat nohopod o toun do koloido' diyolo' do hilo'd tana' do kowotuan. 19 Om pinatai nogi' dau o turu' o bansa' do tulun do hilo'd Kanaan om pogiongkib-ongkibo' nogiddi i tana'ddi do pinatahak dot id bansa' dot Israil, om asanganu i' diyolo' i pomogunan diri. 20 Om nosiliu ngai' iri do solinaid dot apat nahatus om limo nohopod o toun do koloido'. Om kopogiangkib-angkib poddi i tana' do pomogunan do Kanaan diri, om onuwai nogid Kinorohingan iyolo' do piro-piro gompomutus. Om i Somuil no i Nabi, o nosiliu do gompomutus di kolimpupuson no kopio. 21 Om pokianu noddi iyolo' do tulun do sumiliu'd raja' diyolo'. Om patahako' nod Kinorohingan diyolo' i Saul i tanak di Kis, i mantad id sinakagon di Binyamin do sumiliu'd raja' diyolo' do solinaid dot apat nohopod o toun. 22 Om iduwo' noddi do Kinorohingan iyau do mantad id pangkat dau do raja', om pilio' nogiddi do Kinorohingan i Daud do suminiliu do raja' diyolo'. Om iti noddi o pinoboros do Kinorohingan do pasal di Daud, ‘Noilaan ku no i Daud i tanak di Isai diri, do tulun di kohubayaan kopio ku. Om iyau nondo o popowonsoi do koinsanai di korohian ku,’ ka. 23 Om id pogialatan nod sinakagon di Daud o pinongonuan do Kinorohingan do songulun o Raja' do Gampamasi do bagi' di bansa' dot Israil do miagal di nakabatos mantad dau. Om i Yesus no i Raja' do Gampamasi'ddi. 24 Nga' tontok dit a' po nokotimpuun i Yesus do kuminaraja' om nokoponuduk no i Yohanis do tulun dot Israil do rumologo di dusa diyolo' om mokibatis. 25 Tontok dit oruhai no di Yohanis dot aayi' i karaja' dau, om boro-boros no iyau di tulun diri do poingkaa, ‘Isai oku dot osorou dokoyu? Iyoho' nopo om okon i' ko' it andad-andadon dokoyu, nga' iyau nopo om rumikot nogindo do sumusuhut doho'; om mongiad piya do tali do kasut dau nga' a' oku i' osorupai,’ ka dau. 26 Oi tobpinai-tobpinai ku, i sinakagon di Abraham, om koinsanai dit okon ko' Yohudi dit ongotorodok dot id Kinorohingan! Iyati' no moti' o pinorikatan do Kinorohingan di habar do pasal do koposion, 27 tu' i nopo i tulun do hiti'd Yorusalim om i piro-piro boyoon diyolo' om a' i' iyolo' nokoilo dot i Yesus no i Gampamasi'ddi. Om a' i' iyolo' nokosuhut di ponudukan di piro-piro nabi di basaon kasai' do monikid do tadau'd Sabat, gisom do hinukuman diyolo' i Yesus. Om iri noddi do nabayaan i nokoboros mantad di piro-piro nabi diri. 28 Nga' mulong piya dot aiso' i' o noilaan diyolo' do kopomohukuman di Yesus do kapatayon nga' pokionuo' i' diyolo' i Pilatus do momohukum dau do kapatayon. 29 Om kowonsoi ngai' poddi diyolo' o koinsanai di nokotulis dot id suang do Buuk do Kinorohingan do pasal di Yesus, om polintuhuno' nogi' diyolo' i rata' di Yesus do mantad hiri'd kayu salib om lobongo' nogiddi diyolo'. 30 Nga' pinasi i' kawagu iyau'd Kinorohingan do mantad id kapatayon, 31 om haro poddi o piro-piro tadau do minintalang iyau dot id tulun di minoyo' dau do mantad id Galilia do kuminaa do hilo'd Yorusalim. Om iyolo' noddi o popinsusui do pasal di Yesus dot id bansa' dot Israil do baino'. 32 Om iyahai'dti nga' poporongou nogi' dokoyu di Habar dot Osonong diri do dinondo: iri nopo i nakabatos mantad do Kinorohingan dot id taki-aki toko', 33 om nowonsoi no dau dot id dati' tu' napasi no kawagu dau i Yesus do mantad id kapatayon. Tu' haro i' o nokotulis dot id Buuk do Sinding di koduwo do poingkaa, ‘Iya' no o Tanak ku, om tadau nod baino' do nosiliu oku do Tapa' nu,’ ka. 34 Om napasi no iyau kawagu'd Kinorohingan do mantad id kapatayon, om a' noddi iyau apatai kawagu, om a' olobong. Om poingkaa o nokoboros do Kinorohingan do pasal diri, ‘Patahakon ku nondo dot id diya' i batos dit olidang dit atantu' no do bayaanon, i nakabatos mantad ku dot id di Daud,’ ka. 35 Om miagal nogiddi o nokoboros dot id ayat do suwai, ‘A' nu i' pologoson dot apasa' do hiri'd lobong i susuhuon nu dit otorodok,’ ka. 36 Om kowonsoi poddi di Daud i pinonuhuan do Kinorohingan dot id dau, om kapatai nogiddi iyau. Om lobongo' no iyau do hiri'd toning di pinamalabangan di taki-aki dau. Om kapasa' noddi i rata' di Daud. 37 Nga' i Yesus nopo i pinasi kawagu'd Kinorohingan do mantad id kapatayon, om a' i' napasa'. 38-39 Om iyo nopoddi om mositi' no do koilo kou oi tobpinai-tobpinai dot i Yesus no o pinawayaan di habar do pasal do koompunan do dusa di pinosusui dot id dokoyu. Om mositi' no do koilo kou dot isai-isai nopo o tulun dot otumbayaan di Yesus om koidu' no do mantad id koinsanai'd dusa, nga' iri nopo Tourat di Musa om amu' i' milo'd popoidu' dokoyu do mantad id dusa. 40 Om iyo nopoddi om antaan-taan no kopio dokoyu om a' i' osiliu dot id dokoyu o miagal di nokoboros di piro-piro nabi do poingkaa, 41 ‘Antaan-taan no dokoyu oi tulun dit orohian do mongindaraat! Ongosuayan kou nondo om apatai kou! Tu' wonsoyon ku no do dinondo it a' dokoyu iyokoyu ponongkuyaanan, do mulong pod haro o tulun do popotuduk diri dot id dokoyu,’ ka,” ka di Paulus. 42 Om tontok di sumoliwan no i Paulus om i Barnabas do hiri'd walai'd sasambayangan diri, om pomoros po i tulun di hiri'd sasambayangan do popoguli' kawagu diyolo' do hiri dot orikot kawagu o tadau'd Sabat do mongoi popotuduk kawagu diyolo' di sinusui diyolo'ddi. 43 Om kosoliwan poddi i tulun do mantad hiri'd walai'd sasambayangan diri, om ogumu'ddi o tulun do Yohudi om i tulun dit okon ko' Yohudi di nokosuang do tugama' do Yohudi, do tuminanud di Paulus om i Barnabas. Om sunudai noddi iyolo' di piro-piro rasul do tumilombus do sumondiu kopio di kosonongo'd Kinorohingan. 44 Om korikot noddi i tadau'd Sabat, om oruhai no do noinsanan i tulun di hiri'd bandar diri do minongoi pokinongou do boros do Tuhan. 45 Nga' tontok di nokito di tulun do Yohudi i tulun dot ogumu'ddi, om osolon tomod diri iyolo'. Om suminongkiwal tomod iyolo' do koinsanai di pinoboros di Paulus om nindaraat diyolo' iyau. 46 Nga' okon nogi' dot osiou i Paulus om i Barnabas do poposondot kopio di posunudon diyolo'. Boros ka diyolo', “Otopot i' dot iyokoyu ot apatut do gulu kosusuyai do boros do Kinorohingan. Nga' iyo nopoddi tu' a' kou ruminamit diri, om natantu' noddi dokoyu dot a' kou apatut do kaanu do koposion dit otopot kopio om i poingompus, om tumongkiad no iyahai dokoyu'dti, om mongoi no iyahai do hilo'd tulun dit okon ko' Yohudi. 47 Tu' iti no o nisuhu' do Tuhan dot id dahai. Boros kad Tuhan, ‘Nopili' ku no iyokoyu do sumiliu do tanawau dot id tulun dit okon ko' Yohudi om iyokoyu no o poporikot di koposion dot id pointongkop diti pomogunan,’ ka,” ka diyolo'. 48 Om ongotood nopoddi i tulun dit okon ko' Yohudi do nokorongou di boros diri, mikuwo'd minamarayou di boros do Tuhan. Om kotumbayaai noddi i tulun di natantu' mantad do Kinorohingan do kaanu'd koposion dit otopot kopio om i poingompus. 49 Om kotongkop noddi i boros do Tuhan dot id watas diri. 50 Nga' borulongo' noddi di tulun do Yohudi i piro-piro boyoon do bandar diri om i tongoondu' dit okon ko' Yohudi dit ongkingaran-ngaran dit oronok do Kinorohingan. Om timpuun noddi iyolo' do monginggorit di Paulus om i Barnabas om uyungo' no diyolo' iyolo' do popoggidu' do mantad id watas diri. 51 Om tantago' noddi di duwo o tulun di sinuhu'ddi o pupuk dot id lapap diyolo' dot id toguang di tulun diri do maan do popoinsan diyolo'; om pamanau noddi iyolo' do kuminaa do hilo'd Ikonium. 52 Om iri nopoddi i piro-piro tumatanud diri di hiri'd Antiokia om ongotood tomod, om nongoporinta' do Rusod do Kinorohingan.
Hilo'd Ikonium
1 Om iyo iddi gulu o nosiliu dot id di Paulus om id di Barnabas di hilo' iyolo'd Ikonium. Om ongoi no iyolo' do hiri'd walai'd sasambayangan do tulun do Yohudi, om atarang kopio i pinoboros diyolo' om oingod, gisom dot ogumu'ddi o tulun do Yohudi om it okon ko' Yohudi do notumbayaan di Yesus. 2 Nga' iri nopoddi i tulun do Yohudi dit a' notumbayaan om minongoi pamayayat di tulun dit okon ko' Yohudi gisom do naraatan diri iyolo' di tulun di notumbayaan di Yesus. 3 Om iri noddi o kinoundarangan di Paulus om i Barnabas dot alaid-laid do hilo' om a' iyolo' ooris do popinsusui do pasal do Tuhan. Om onuwai noddi do Tuhan iyolo' do kuasa' do momonsoi do kongoimayaan om kongosuayan kopio do popointalang dot otopot kopio i ponudukan diyolo' do pasal do kosianan do Tuhan. 4 Nga' mogisuwai-suwai nopoddi o korohian di tulun do hiri'd bandar diri, wokon nopo diyolo' om sumokodung di tulun do Yohudi, om wookon no om sumokodung di piro-piro tulun di sinuhu'ddi. 5 Om pogiupakat noddi i tulun do Yohudi om i piro-piro boyoon diyolo', om i tulun dit okon ko' Yohudi do monginggorit di duwo o rasul diri om momodumpau diyolo'd watu. 6 Nga' koilaai noddi di duwo o tulun di sinuhu'ddi o hal diri, om poggidu' no iyolo' do kuminaa do hilo'd Listra om hilo'd Dorbi, i kabandaran di hilo'd Likaunia, om kuminaa do hiri'd watas dit id posorili'. 7 Om popinsusui po iyolo' do Habar dot Osonong do hilo'.
Hilo'd Listra om Hilo'd Dorbi
8 Om hilo' nopod Listra om haro o songulun o kusai dit olomok o gakod do mantad di kosususu, om a' no iyau kapanau. 9 Om poirikau iyau do mokinongou di Paulus do moro-boros. Om kokito noddi di Paulus dot otumbayaan i tulun diri, om milo iyau do lingasan di toruol dau tu' otumbayaan i' iyau. Om ontong noddi i Paulus dau. 10 Om boro-boros no i Paulus dot opuhod do poingkaa, “Ingkakat no!” ka. Om silok nopo i tulun diri do miningkakat om pamanau no. 11 Om kokito poddi di tulun dot ogumu' i winonsoi di Paulus diri om gara' nopo iyolo' do minomoros dot id suang do boros do Likaunia do poingkaa, “Nokolintuhun no do hiti'd pomogunan i ponokokinorohingan do miniyo do tulun,” ka. 12 Om pungaranai noddi diyolo' i Barnabas dot i Sius, om i Paulus no om pinungaranan diyolo' dot i Hormis, tu' iyau no o moro-boros kopio. 13 Om it imam di mogobi-obi' di Sius i ponokokinorohingan diri, i potimbaba' di bandar o walai do poningoligan, nga' ruminikot i' do hiri'd wawayaan di bandar do kiginayat do piro-piro sapi' do tontoluhan om kiinigit do bunga dot ogumu'. Om orohian iyau do tumanud di tulun dot ogumu' do papatahak do porsombahan do sumbolion dot id piro-piro tulun di sinuhu'ddi. 14 Om tontok di norongou di Barnabas om i Paulus i wonsoyon daa di tulun diri, om kiniso' no diyolo' i pakayan diyolo', om panangkus no iyolo' do minongoi intanga' di tulun dot ogumu'ddi, om boro-boros no dot opuhod do poingkaa, 15 “Nokuro tu' momonsoi kou do miagal diti? Iyahai nga' tulun i' do miagal dokoyu! Kinaangayan nopo dahai'd hiti om mongoi poposusui dot id dokoyu diti Habar dot Osonong. Om tumongkiad kou i' diti wowonsoyon dokoyu dit aiso' o kootuk-otukon. Om rumikot kou indo dot id Kinorohingan di poimpasi, i minomonsoi do tawan om tana' om ilo rahat om koinsanai di songingiyon do hilo'. 16 Di nopo di gulu po om pinologos id Kinorohingan o piro-piro bansa' do momonsoi di diyolo'd korohian. 17 Nga' mulong po dot iyo'ddi nga' a' i' iyau nokolihu do pinopointalang do kowoyo-woyoo' dau dot i winonsoi dau'd osonong o pinopointalang. Om minanahak iyau dokoyu do rasam do mantad hilo'd tawan om nonuan kou do tua' do totonomon do tontok di maso do koponguaan. Om nonuan kou dau do takanon om pinoposonong iyau do ginawo dokoyu,” ka diyolo'. 18 Nga' mulong piya dot iyo'ddi i boros di duwo o tulun di sinuhu'ddi nga' a' i' daa milo dot oduhan i tulun diri do papatahak do porsombahan di sumbolion dot id diyolo'. 19 Om rikot noddi o piro-piro tulun do Yohudi do hilo'd Listra, i mantad hilo'd Antiokia i hilo'd pomogunan do Pisidia, om mantad hilo'd Ikonium do minongoi pamayayat di tulun dot ogumu'ddi, do gisom do suminokodung diri diyolo' i tulun dot ogumu'ddi. Om pindumpahai noddi diyolo' i Paulus do watu, om gayato' no diyolo' iyau do poposoliwan do mantad hiri'd bandar. Tu' osorou nopo diyolo' om napatai no i Paulus. 20 Nga' tungag noddi i Paulus di nokotimung i tulun di notumbayaan do hiri'd posorili' dau, om poguliai noddi kawagu dau do hiri'd bandar. Om sinuabon poddi om pamanau nogi' iyau om i Barnabas do kuminaa do hilo'd Dorbi.
Guminuli' i Paulus om i Barnabas do Hilo'd Antiokia
21 Om poposusui no i Paulus om i Barnabas do Habar dot Osonong do hilo'd Dorbi om ogumu'ddi o tulun do notumbayaan di Yesus. Om guli' nogiddi iyolo' do hilo'd Listra, om ongoi no iyolo' do hilo'd Ikonium om pakayaai nogiddi diyolo' do hilo'd Antiokia, i hilo'd pomogunan do Pisidia. 22 Om sunudai noddi diyolo' i tumatanud di Yesus di hilo'd kabandaran diri do popogirot do kotumbayaan diyolo' om mogondos kopio di Yesus. Boros ka diyolo', “Mositi' no do kopuriman toko' po dot ogumu' o koinggoritan, om kosuang nogindo di Pomorintaan do Kinorohingan,” ka di piro-piro rasul do minonuduk di tumatanud di Yesus di hiri'd kabandaran diri. 23 Om pomili' noddi i Paulus om i Barnabas do tulun do sumiliu'd boyoon dot id pointikid-tikid do sidang diri. Om sambayang noddi iyolo' do mikuwo'd puasa do pinapatahak di piro-piro boyoon diri dot id Tuhan i kinotumbayaan diyolo'ddi. 24 Om lombus nogiddi i Paulus om i Barnabas do kuminaa do hilo'd Pampilia do minaya' do hiri'd watas do Pisidia. 25 Om koponusui po iyolo' do boros do Kinorohingan do hilo'd Pirga, om pakayaai nogi' diyolo' do hilo'd Atalia. 26 Om mantad noddi do hilo' do suminakai iyolo' do kapal do rahat do guminuli' do hilo'd Antiokia. Om hiri nod bandar diri di gulu po do pinatahak iyolo' dot id Kinorohingan do pokigompian do Kinorohingan. Om owonsoi i' diyolo' i karaja' di nopongo noddi diyolo'd baino'. 27 Om korikot poddi iyolo' do hilo'd Antiokia om timungo' no diyolo' i tulun do mantad id sidang diri, om susuyo' ngai' no diyolo' i winonsoi'd Kinorohingan dot iyolo' o pinawayaan do minomonsoi, om i kinowoyo-woyoo' dau do minongiwang do ralan di tulun dot okon ko' Yohudi do notumbayaan. 28 Om alaid diri i Paulus om i Barnabas do poundorong do hilo' do poingamung di tulun di nongotumbayaan.
Miting do Hilo'd Yorusalim
1 Om haro'ddi o piro-piro tulun do mantad hilo'd Yudia do nokorikot do hilo'd Antiokia om ponuduk no iyolo' di tulun di notumbayaan di hilo'd Antiokia dot a' nopo osunatan nga' a' nod Kinorohingan posion do tumanud di Tourat di Musa. 2 Om suminongkiwal tomod diri i Paulus om i Barnabas di ponudukan do miagal diri. Om tontuo' noddi di Paulus om i Barnabas om piro-piro tulun do suwai do mantad hilo'd Antiokia do mongoi popoboros do kosusaan diri dot id piro-piro rasul om id piro-piro boyoon do hilo'd Yorusalim. 3 Om pootodo' no iyolo' di tulun di hiri'd sidang dot Antiokia do gisom do nokorikot iyolo' do hiri'd soliwan di bandar, om pamanau noddi iyolo' do minaya' do hilo'd Pinisia om Samaria. Om hilo' no iyolo'd pinoposusui ondung poingkukuro i tulun dit okon ko' Yohudi do notumbayaan do Kinorohingan. Om otood tomod diri i tulun di nongotumbayaan do nokorongou'd habar diri. 4 Om korikot noddi iyolo' do hilo'd Yorusalim, om ongosonong o ginawo di tulun dit id sidang do hilo' om i piro-piro rasul om i piro-piro boyoon do sidang do ruminamit diyolo'. Om susuyo' noddi diyolo' dot id tulun diri o koinsanai di winonsoi'd Kinorohingan, dot iyolo' o minomonsoi dot id suang do kuasa'd Kinorohingan. 5 Nga' haro'ddi o piro-piro o tulun do Parisi di notumbayaan do miningkakat om minoro-boros do poingkaa, “Tulun nopod okon ko' Yohudi om mositi' nod sunatan om suhuon do tumanud di Tourat di Musa,” ka. 6 Om timung noddi i piro-piro rasul om i piro-piro boyoon do mogiboro-boros do pasal do hal diri. 7 Om alaid poddi iyolo'd mogiuhot-uhot do pasal diri, om ingkakat noddi i Pitrus om boro-boros no iyau'd poingkaa, “Oi tobpinai-tobpinai, noilaan no dokoyu dot alaid oku no kopili'd Kinorohingan do mantad id pogialatan dokoyu do poposusui'd Habar dot Osonong dot id tulun dit okon ko' Yohudi, om korongou i' iyolo' om otumbayaan indo. 8 Om Kinorohingan i', i koilo do ginawo'd tulun o pinopointalang do romiton dau i tulun dot okon ko' Yohudi; tu' nonuan i' dau iyolo'd Rusod do Kinorohingan do miagal di tinahak dau dot id dati'. 9 Id Kinorohingan nopo om aiso' i' o pisuwayan toko' diyolo'. Tu' nolidangan nod Kinorohingan o ginawo diyolo' tu' notumbayaan i' iyolo' dau. 10 Iyo nopoddi om nokuro tu' sumaap kou'd Kinorohingan tu' monuhu' kou i' di piro-piro tumatanud diri do tumanud dit oturan dot awagat, it a' di taki- aki toko' om a' toko' iyati' agaasan do tumanud? 11 Nga' notumbayaan toko' i' om pinasi toko' tu' nosianan i' o Tuhan Yesus dati'; om iyolo' nga' iyo nogiddi,” ka di Pitrus. 12 Om a' nopoddi minungkomi i tulun di songintimung do hiri do nokorongou'ddi. Om pokinongou noddi iyolo' di Barnabas om i Paulus do minonusui do koinsanai di kosuayan om i koimayaan kopio do winonsoi'd Kinorohingan, dot iyolo' o pinawayaan do minomonsoi dot id pogialatan di tulun dit okon ko' Yohudi. 13 Om kotingkod poddi iyolo' do minoro-boros, om boro-boros no i Yakub do poingkaa, “Oi tobpinai-tobpinai, pokinongou kou nodti poboroson ku. 14 Wagu po i Simun ponusui do kinoimpuunon do Kinorohingan do pinopointalang do kosianan dau dot id tulun dit okon ko' Yohudi, dot i minomili' o Kinorohingan do piro-piro tulun do mantad id pogialatan diyolo' do silihon do tulun di dau'd songonuon o pinopointalang. 15 Iri no o miontok kopio di nokoboros mantad di piro-piro nabi, i nokotulis do poingkaa, 16 ‘Boros kad Tuhan, katalib pondo iri om rumikot oku nondo kawagu do momonsoi kawagu di walai'd Daud di nahaba'; om sonongon kawagu ku i nangaraag om poingkakaton kawagu ku. 17 Om mogihum indod Tuhan o koinsanai'd tulun di nongoolu', koinsanai'd tulun dit okon ko' Yohudi, i nolohou ku do sumiliu'd tulun di doho'd songonuon,’ ka. Om iyo noddi o boros do Tuhan, 18 i pinoposunud mantad diri di gulu po,” ka di Yakub. 19 Om boro-boros po kawagu i Yakub do poingkaa, “Osorou ku nopo iyoho' om a' toko' i' milo'd monusa' di tulun dit okon ko' Yohudi dit otumbayaan do Kinorohingan. 20 Nga' apatut nopo om monulis toko' nopod surat do patahakon diyolo' do mogodu diyolo'd mangakan di taakanon di sosomu' do tumanud dot oturan do tugama', i nokosubak dot id tingolig, om a' mangakan do nintorusan di napatai'd linawaan om a' mangakan do raha'. Om sunudan iyolo' dot a' magampahu'. 21 Tu' mantad po di gulu po do basaon kasai' i Tourat di Musa do hiri'd walai'd sasambayangan do monikid do tadau'd Sabat, om popinsusuyon nogi' iri dot id koinsanai'd bandar,” ka dau.
Surat dot id Tulun dit okon' ko' Yohudi, di Nongotumbayaan
22 Om iso-iso' nopoddi o ginawo di piro-piro rasul om i piro-piro boyoon om koinsanai di sidang do momili' do piro-piro tulun do suhuon do kumaa do hilo'd Antiokia do tumanud di Paulus om i Barnabas. Om i Silas diri om i Yudas i roitan dot i Barsabas, o nopili' diyolo'. Om boyoon goduwo nopo iyo Silas di Yudas di pusohon kopio dot id pogialatan di tulun di nongotumbayaan do hilo'd Yorusalim. 23 Om poigitai no diyolo' di tulun di nopili' diyolo'ddi i surat di tinulisan do poingkaa, “Oi tobpinai-tobpinai di nongotumbayaan, i mantad id tulun dit okon ko' Yohudi di hilo'd Antiokia om hilo'd Siria om hilo'd Kilikia. Tumabi' ngai' iyahai dokoyu, om tumabi' nogi' dokoyu i piro-piro rasul om i piro-piro boyoon do sidang, i tobpinai-tobpinai dokoyu. 24 Nokorongou iyahai do haro o piro-piro tulun do mantad id pogialatan dahai do minongoi'd hino'd dokoyu do minonuduk dokoyu di ponudukan di monusa' om koborulong dokoyu. Nga' a' i' dahai sinuhu' iyolo'ddi do momonsoi'd miagal diri. 25 Om kaakun ngai' nopoddi iyahai do minomili' do piro-piro tulun do suhuon dahai do kumaa'd hino'd dokoyu. Iyolo' nopoddi om tumanud di Barnabas om i Paulus, i tobpinai di kosianan dahai. 26 Iri nopo duwo o tulun diri nga' nokoumbal no dot oruhai nod apatai, tu' minomonsoi i' iyolo' do karaja'd Tuhan toko', i Yesus Kristus. 27 Om iri no o kinoponuhuan dahai di Yudas om i Silas do mongoi'd hiti'd dokoyu tu' iyolo' no o popoboros dot id dokoyu di pinotulis dot id suang do surat diti. 28 Tu' kinohubayaan nod Rusod do Kinorohingan om kinohubayaan nogi' dahai dot a' kou no onuan dot oturan dit awagat, do suwai mantad ko' iti toturan diti, it apatut kopio dokoyu'd tonudon. 29 Iri no tu' kada' kou pangakan do taakanon di nokosubak dot id tingolig, om kada' kou pangakan do raha' om i nintorusan do napatai'd linawaan. Om kada' kou pagampahu'. Om ondung a' kou momonsoi'd miagal diri, om osonong no o nowonsoi dokoyu. Iti-iti no, sumonong-sonong kou!” ka. 30 Om kopogiintod-intod poddi iyolo', om pamanau nogiddi i tulun di pinoigitan di surat diri do kumaa'd hilo'd Antiokia. Om korikot noddi iyolo'd hilo' om lohowo' no diyolo' o koinsanai di tulun do sidang do tumimung om patahako' no diyolo' i surat diri. 31 Om ongotood tomod diri o koinsanai di tulun do sidang do nakabasa' di surat diri tu' koinsasamod kopio iri do ginawo diyolo'. 32 Om i Yudas om i Silas nga' alaid nogi' do moro-boros di tulun di nongotumbayaan do hilo'd Antiokia do mongodsuur diyolo' om popogirot do ginawo diyolo'. I Yudas nopo di Silas diri om nabi i'. 33 Om koundorong poddi i Yudas om i Silas do hilo' do piro-piro o koloido', om suhuon' nogi' iyolo' di tulun di nongotumbayaan do hilo'd Antiokia do gumuli' dot id tulun di minonuhu' diyolo', om minonuhu' nogi' iyolo' do poporikot do tabi' diyolo' dot id tulun di minonuhu' diyolo'ddi. 34 Nga' i Silas nopo om minundorong po do hilo'd Antiokia. 35 Om i Paulus di Barnabas nga' minundorong nogi' do hilo'd Antiokia do piro-piro koloido'. Om minonuduk po iyolo' om pinoposusui do boros do Tuhan dot iyolo' ngai' di piro-piro tulun do suwai.
Minitongkiad iyo Paulus di Barnabas
36 Om a' poddi alaid do mantad diri om boro-boros no i Paulus di Barnabas, “Ongoyon to no gulio' do mongoi pogompuya' i tobpinai-tobpinai di nongotumbayaan di Yesus do hilo'd pointikid-tikid do bandar di nosusuyan to do boros do Tuhan; om oilaan to i' ondung poingkuro-kuro no iyolo',” ka dau. 37 Nga' sipangangat daa'ddi kawagu i Barnabas di Yohanis, i roitan dot i Markus. 38 Nga' osorou nopod Paulus om a' i' osonong dot angatan i Markus tu' a' i' iyau tuminanud kasai' diyolo' do kuminaraja' om tuminongkiad iyau diyolo' di hilo'd Pampilia. 39 Om iri noddi o kinoimpuunon di Paulus om i Barnabas do minisongkiwal tomod, om pitongkiad noddi iyolo'. Om angatai noddi di Barnabas i Markus do suminakai'd kapal do rahat do kuminaa do hilo'd Siprus. 40 Om pilio' noddi di Paulus i Silas. Om piwoyo' no iyolo'd minamanau di nakatahak iyolo' di piro-piro tobpinai di hilo'd Antiokia dot id Tuhan, do pokigompian do Tuhan. 41 Om pimpanau noddi iyolo'd tuminongkop do hilo'd Siria om hilo'd Kilikia do popogirot do kotumbayaan di sidang do hilo'.
Tuminanud i Timotius di Paulus om i Silas
1 Om lombus noddi i Paulus do kuminaa do hilo'd Dorbi, om ongoi nogiddi iyau do hilo'd Listra. Om hilo' nopo nga' haro o songulun o tumatanud di Yesus dot i Timotius o ngaran. Tina' nopo dau om tulun do Yohudi di notumbayaan di Yesus; om tapa' no dau om tulun do Yunani. 2 Om i Timotius no ot abantug dot osonong koulun dot id pogialatan do tulun di nongotumbayaan do hilo'd Listra om hilo'd Ikonium. 3 Om orohian diri i Paulus do mangangat di Timotius do tumanud dau; om sunatai noddi di Paulus i Timotius. Winonsoi pogi' dau o miagal diri nga' nongkoilo no i tulun do Yohudi di hiri'd watas diri do tulun do Yunani o tapa' di Timotius. 4 Om pointikid-tikid di bandar dit oongoi diyolo', om poiloon ngai' nopo diyolo' i tulun di notumbayaan do pasal di nangatantu' di piro-piro rasul om i piro-piro boyoon do hilo'd Yorusalim. Om suhuon nogi' diyolo' i tulun di nongotumbayaan diri do tumanud dit oturan diri. 5 Om muhang-ruhang nopoddi o kogiroto' do kotumbayaan di tulun do hiri'd sidang, om monikid tadau nopo dot oruhangan o ginumu' diyolo'.
Nokokito i Paulus do Pinointalang di Hilo' Iyau'd Truas
6 Om pamanau noddi i Paulus om i Silas do minongoi do hilo'd watas do Prigia om Galatia, tu' noduhan iyolo'd Rusod do Kinorohingan do poporongou do boros do Kinorohingan do hiri'd pomogunan dot Asia. 7 Om korikot poddi iyolo' do hilo'd wolit do pomogunan do Misia, om umbal noddi daa iyolo'd sumuwang do pomogunan do Bitinia, nga' noduhan i' iyolo' di Rusod di Yesus do mongoi'd hiri. 8 Om lombus noddi iyolo' do hilo'd Truas do minaya' do hilo'd Misia. 9 Om totuong iddi di hilo' iyolo'd Truas, om kokito no i Paulus dot iso' o pinointalang. Id suang nopo di pinointalang diri om nokokito iyau do songulun o tulun do Makidunia do poingkakat dot id dotimbabaan dau do mangangat kopio dau do mongoi'd hilo'd Makidunia do mongoi ponulung diyolo'. 10 Kokito poddi di Paulus i pinointalang diri, om tilombus nopo iyahai do suminodia' do mamanau do mongoi do hilo'd Makidunia, tu' otumbayaan no kopio iyahai do suhuon iyahai'd Kinorohingan do mongoi poposusui di Habar dot Osonong dot id tulun do hilo'.
Hilo'd Pilipi: Notumbayaan do Kinorohingan i Lidia
11 Om sakai noddi iyahai'd kapal do rahat do mantad hilo'd Truas om pakayaai no dahai do hilo'd bandar do Samotraki. Om sinuabon noddi om lombus no iyahai do kuminaa do hilo'd Niapolis. 12 Om mantad nod hilo' om lombus po iyahai do kuminaa do hilo'd Pilipi, i bandar dit id watas do koiso' do hilo'd Makidunia. Pilipi nopo om porintaon do pomorintaan do Rum. Om minundorong iyahai'd hilo' do piro-piro tadau do koloido'. 13 Om tontok di tadau'd Sabat, om ongoi no iyahai do hiri'd tisan do bawang di hiri'd soliwan di wawayaan di bandar tu' oilaan dahai do hiri nopo om haro o tiiyonon do tulun do Yohudi do sumambayang. Om hiri no iyahai'd songirikau do monokiboro-boros di tongoondu' di songintimung do hiri. 14 Om haro'ddi o songulun o tondu' dot id pogialatan diyolo' dot i Lidia o ngaran. Iyau nopo om mantad hilo'd Tiatira om papadagang iyau do kain dit otomou daragang-ragang. Om iyau nopo om osianan kopio'd Kinorohingan. Om tingkaho' noddi do Tuhan o ginawo dau do rumamit di ponudukan di potudukon di Paulus. 15 Om kobotisai noddi i Lidia, om koinsanai di tulun dit id suang do walai dau. Om kobotisai poddi iyolo' om angatai noddi iyahai dau do mongoi'd hiri'd walai dau. Boros ka dau, “Ondung okito do tobpinai-tobpinai do notumbayaan kopio oku di Yesus, om kainou ongoi kou odop do hilo'd walai ku,” ka dau. Om sansagai noddi iyahai dau do tumumboyo' dau.
Pinogiil i Paulus do Hilo'd Pilipi
16 Insan o tadau, di maso dahai do manau-panau do kumaa'd hiri'd tiiyonon do sumambayang, om kosolowot no dahai o songulun o tondu'; om iyau nopoddi nga' turipon. Om iri nopo tondu'ddi om noporinta' do rusod dot araat, om koilo iyau do popoboros dit osiliu dot id dosunsudan. Om iri no komiloo' dau do popoilo dit osiliu dot id tulun dot id dosunsudan o koonu-onuan di tuan dau do tuntung dot ogumu'. 17 Om tilombus nopoddi i tondu'ddi do tuminanud dahai diyo Paulus do mikuwo'd marang-garang do mimboros do poingkaa, “Iti nopo tulun diti om susuhuon do Kinorohingan dit agayo kopio! Om ruminikot iyolo' do mongoi popoilo do tobpinai-tobpinai ondung poingkuro o ralan dokoyu dot apasi!” ka dau. 18 Om marang-garang kasai' nopo i tondu'ddi dot iyo kasai'ddi o popigarang-garangon dau do piro-piro tadau do koloido'. Om karaatai noddi i Paulus, om koili no iyau, om boro-boros no iyau di rusod diri do poingkaa, “Id suang do ngaran di Yesus Kristus om suhuon tiya' do sumoliwan do mantad id tondu'dti!” ka. Om diiri i' om diiri do suminoliwan i rusod diri do mantad id tondu'ddi. 19 Nga' tontok di nongkoilo ngai' i tuan di tondu'ddi dot aiso' noddi o pakayon diyolo' do mogihum do tusin, om tangkapo' no diyolo' i Paulus om i Silas om gayato' no diyolo' do pakaa do hiri'd tiiyonon do momisara' di hiri'd tomu do nongoi potimbabao' di tulun di kikuasa'. 20 Om ngoyo' noddi diyolo' potimbabao' i Paulus om i Silas di piro-piro pagawai do pomorinta' do Rum, om boro-boros noddi iyolo'd poingkaa, “Iti nopo tulun diti om tulun do Yohudi. Om iyolo' no o mamagangau do hiti'd bandar toko'. 21 Tu' mangangat iyolo'd tulun do tumanud di kaadat-adato' dit a' miontok dit oturan toko', iyati' i tulun do Rum. Om a' toko' i' milo do rumamit ko' tumanud di kaadat-adato'ddi,” ka. 22 Om i tulun dot ogumu' nga' sumaap i' di Paulus om i Silas. Om gayato' no di piro-piro pagawai do pomorinta' do minongidu' i pakayan di Paulus om i Silas, om ponuhu' nogiddi iyolo'd tulun do momobog goduwo diyolo'. 23 Om kadalaai poddi iyolo'd pinimbabagan om pogiilo' nogiddi iyolo'. Om suhuon' noddi i boyoon do hiri'd giil do madtamong kopio diyolo'. 24 Om posuango' noddi di boyoon di hiri'd giil i Paulus om i Silas do hiri'd bilik dit id gogok kopio di giil, om rangkapo' nogiddi do papan o gakod diyolo'. 25 Om di nopoddi pitangatuong no doti'ddi, om maso di Paulus om i Silas do sumambayang om modsinding do mamarayou'd Kinorohingan. Om i tulun do suwai di songinggiil nga' mokinongou diyolo'd modsinding. 26 Om sigog id guyu' o tana' dot opuhod kopio, gisom do noguyu' i pinawaalan di giil. Om koiwangai ngai' nopo i wawayaan di giil om i rantai di pinamarangkap ngai' di tulun di songinggiil nga' kalangkang ngai' nopo. 27 Om koposik noddi i boyoon di madtatamong di giil do nokotigowo. Om tontok di nokito dau do noiwangan ngai' i wawayaan di giil, om kodongo' nopo dau i gayang dau do kumiros daa tu' osorou nopo dau om nongkopoggidu' ngai' no i tulun di songinggiil. 28 Nga' pomolohou no i Paulus dot opuhod do poingkaa, “Kada' kiros! Hiti ngai' i' iyahai'dti!” ka dau. 29 Om pokianu no i boyoon di giil diri do lampung om panangkus nogiddi iyau do suminuang do hiri'd giil do mikuwo'd gagaran tomod, om otud noddi iyau dot id toguang di Paulus om i Silas. 30 Om angatai noddi dau iyolo' do sumoliwan, om boro-boros no iyau'd poingkaa, “Oi tuan, nunu ot apatut ku'd wonsoyon om apasi oku i'?” ka. 31 Om boros ka di Paulus om i Silas do suminimbar, “Kotumbayaai nod Tuhan Yesus, om apasi ko i' om koinsanai'd tulun di hiri'd walai nu!” ka. 32 Om susuyai noddi di Paulus om i Silas do boros do Tuhan i boyoon do madtamong do giil diri, om koinsanai di tulun di hiri'd walai dau. 33 Om tontok id totuong diri do nangatan dau iyolo' do minoyo' dau om udasai noddi dau i suhat diyolo'. Om botisai noddi iyau om koinsanai'd tulun di hiri'd walai dau. 34 Om angatai noddi dau i Paulus om i Silas do mongoi'd hiri'd walai dau om paakano' noddi dau iyolo'. Om otood tomod diri iyau om koinsanai di sompiiyon dau tu' notumbayaan noddi iyolo'd Kinorohingan. 35 Kosuabon noddi om ponuhu' nod pulis i pagawai do pomorinta' do Rum do mongoi'd hiri'd giil do mongoi ponuhu' do poposoliwan di Paulus om i Silas do mantad hiri'd giil. 36 Om sunudai noddi di boyoon di madtatamong di giil i Paulus di ponuhuan diri, “Oi tuan, monuhu' i piro-piro pagawai do pomorinta' do poposoliwan dokoyu. Om koino-ino kou nod muli', om sumonong-sonong kou'd mamanau,” ka dau. 37 Nga' boros ka di Paulus dot id pulis diri, “A' po iyahai nobutusan om pimbabagai no iyahai dot id toguang do tulun dot ogumu', om rayat i' iyahai'd Rum. Om pogiilo' noddi iyahai diyolo'. Baino' noddi om lisok-lisokon iddi iyahai diyolo'd poposoliwan. a' i' iyahai sumoliwan. suhuon po i piro-piro pagawai do pomorinta'ddi do rumikot do hiti do mongoi poposoliwan dahai,” ka dau. 38 Om posunudo' noddi di pulis i boros di Paulus diri dot id piro-piro pagawai do pomorinta' do Rum. Om ongooris diri i piro-piro pagawai'ddi do nokorongou do rayat do Rum i Paulus om i Silas. 39 Om ongoi noddi iyolo' pokiampun di Paulus om i Silas. Om woyoo' noddi diyolo' i Paulus om i Silas do sumoliwan di giil om suhuon' no diyolo' iyolo' do mogidu' do mantad hiri'd bandar diri. 40 Om tongkiad noddi i Paulus om i Silas do mantad hiri'd giil om pamanau no iyolo' do minongoi'd hiri'd walai di Lidia. Om kongosolowot poddi i Paulus om i Silas di tulun di nongotumbayaan do hiri, om di nokoboro-boros iyolo' do mongodsuur diyolo', om pamanau nogiddi iyolo'.
Hilo'd Tosolunika
1 Om lombus no kawagu i Paulus om i Silas do minamanau. Om kawaya' no iyolo' do hilo'd Ampipulis om hilo'd Apolonia om korikot noddi iyolo' do hilo'd Tosolunika. Hilo' nopo om haro o walai'd sasambayangan do tulun do Yohudi. 2 Om ongoi noddi i Paulus do hiri'd walai'd sasambayangan do tulun do Yahudi' --- do miagal di wonsoyon kasai' dau --- do minogiuhot-uhot di tulun do hiri do pasal di ayat dit id suang do Buuk do Kinorohingan. Om otuntud nopo dot intolu o tadau'd Sabat do minongoi i Paulus do hiri. 3 Om posondoto' nopo kopio di Paulus do popoboros om pinointalang kopio dau do miontok dit ayat dit id suang do Buuk do Kinorohingan dot a' milo dot a' oinggorit i Raja' do Gampamasi, i pinabatos do Kinorohingan. Om apasi kawagu iyau do mantad id kapatayon. Boros kad Paulus, “I Yesus nopo i posusuyon ku dokoyu, om Raja' do Gampamasi di pinabatos,” ka dau. 4 Om haro'ddi o piro-piro tulun do notumbayaan. Om tanud noddi iyolo' di Paulus om i Silas; om ogumu'ddi i tulun do Yunani dit oronok mantad do Kinorohingan do notumbayaan di Yesus, om ogumu' o tongoondu' dit angabantug do notumbayaan. 5 Nga' osolon diri i tulun do Yohudi. Om pangangat no iyolo' di tulun dot angaraat di sampanau-panau do minonimung do tulun dot ogumu' do mamagangau do pointongkop di bandar diri. Om ngoyo' noddi diyolo' soruango' i walai di Yason do mogihum di Paulus om i Silas do maan daa diyolo' potimbabao' di tulun dot ogumu'. I Yason nopo om tulun di notumbayaan no. 6 Nga' a' iddi diyolo' nokito i Paulus om i Silas, om gayato' noddi diyolo' i Yason om i piro-piro tulun do suwai do nongotumbayaan do nongoi potimbabao' di piro-piro pagawai di kikuasa' do hiri'd bandar diri, do mikuwo'd minoro-boros iyolo' dot opuhod do poingkaa, “Iti nopo tulun diti om mimpanau nopo do mamagangau, om nokorikot no iyolo'd hiti'd bandar toko'. 7 Om pinasalakoi iyolo' di Yason do hilo'd walai dau. Om papasala' iyolo' dit oturan di Kaisar, i raja' do Rum, tu' momoros iyolo' do haro po o raja'd suwai dot i Yesus o ngaran,” ka. 8 Om kongotogod noddi kopio i tulun dot ogumu' om i piro-piro boyoon do hiri'd bandar diri do nokorongou'ddi. 9 Om suhuon' noddi di tulun di kikuasa' i Yason om i piro-piro tulun do suwai di notumbayaan do mambayar do tusin do pamajamin diyolo' do tinan diyolo', om posoliwano' nogiddi iyolo' do mantad hiri.
Hilo'd Biria
10 Om totuong iddi om suhuon' no di tulun di nongotumbayaan dot id bandar diri i Paulus om i Silas do mongoi'd hilo'd Biria. Om korikot noddi iyolo'd hilo' om ongoi no iyolo' do hiri'd walai'd sasambayangan do tulun do Yohudi. 11 Nga' tulun nopod hiri om osonong i' ko' i tulun do hilo'd Tosolunika, tu' nongkosodia' no kopio o ginawo diyolo' do mokinongou di habar do pasal di Yesus, om monikid tadau nopo iyolo' do monorisid kopio do mambasa' di Buuk do Kinorohingan do mongilo kopio ondung otopot i ponudukan di Paulus. 12 Om ogumu'ddi o tulun dot id pogialatan diyolo' do notumbayaan di Yesus, om ogumu' nogi' o tongokusai om tongoondu' do tulun do Yunani dit angabantug do notumbayaan. 13 Nga' koilaai noddi di tulun do Yohudi di hilo'd Tosolunika do monuduk i Paulus do boros do Kinorohingan do hilo'd Biria, om ongoi no iyolo' suhut di Paulus om i Silas do hilo' do minongoi pamayayat di tulun do hilo' om pinapatangkabo iyolo' do ginawo diyolo'. 14 Om ara-raho' no di tulun do hilo'd Biria do papaatod i Paulus do hiri'd tisan do rahat, nga' i Silas nopo di Timotius om poundorong i' do hiri'd bandar diri. 15 Om kaatod poddi diyolo' i Paulus do hilo'd Atina, om bilinai noddi di Paulus iyolo' do momisunud di Silas om i Timotius do marau-arau do sumusuhut dau.
Hilo'd Atina
16 Om daamot poddi di Paulus do magandad di Silas om i Timotius do hilo'd Atina, om tumongob tomod diri iyau do kokito di bandar diri tu' noponu' pod tingolig. 17 Om ongoi noddi i Paulus ponokiboro-boros di tulun do Yohudi om it okon ko' Yohudi di sumambayang dot id Kinorohingan do hiri'd walai'd sasambayangan. Om monikid tadau nogi' iyau do mongoi ponokiboro-boros di tulun do hiri'd tomu. 18 Om haro nogi' o piro-piro tulun di gomponuduk di tumanud di Ipikuros om i Stoa do suminongkiwal dau. Boros kad piro-piro diyolo', “Nunu no o toilaan do tulun diti? Okuri i' daa o toilaan dau nga' adala' i' kopio o boros,” ka diyolo'. Om haro nogi' o piro-piro tulun do suwai do momoros do poingkaa, “Iyo-iyo'd poposusui iyau do pasal do ponokokinorohingan do bansa'd suwai,” ka. Kapamarasan nopo diyolo'd miagal diri, om poposusui i Paulus do pasal di Yesus om pasal dot apasi kawagu i tulun do napatai. 19 Om angatai noddi diyolo' i Paulus do hiri'd titimungon do tulun dot ogumu' di roitan do Nulu-Nulu dot Ariopagus. Om hilo' no iyolo'd minoro-boros di Paulus, “Mokiilo daa iyahai di ponudukan do wagu di pinotuduk nu'ddi. 20 Tu' minonusui ko dahai'd ponudukan di suwai kopio dot orongou dahai. Om mokiilo iyahai ondung nunu o komoyon diri,” ka diyolo'. 21 (Tu' tulun nopod Atina om i tulun do bansa'd suwai di poundorong do hiri om ongorohian kopio'd mokinongou do tulun di popotuduk do ponudukan dit a' po diyolo' insan korongou om orohian iyolo'd mogiboro-boros do pasal diri.) 22 Om ingkakat noddi i Paulus do hiri'd dotoguangan di tulun do pointimung do hiri'd Ariopagus diri, om boro-boros no iyau'd poingkaa, “Oi tulun dot Atina! Okito ku do kitugama' ngai' kou i'. 23 Tu' tontok di mimpanau oku'd hiti'd bandar dokoyu, om di mingontong oku di tiyonon dokoyu'd sumambayang om nokokito oku dot iso' o kinoiyonon dit iyonon dokoyu'd papatahak do porsombahan di sumbolion. Om tinulisan o kinoiyonon diri do poingkaa, ‘Dong Kinorohingan Dit a' Otutunan,’ ka. Om iri no i Kinorohingan di tukuon dokoyu'ddi, nga' it a' i' dokoyu otutunan o posusuyon ku dot id dokoyu, 24 Kinorohingan no o minomonsoi'dti pomogunan om koinsanai di hiti'd pomogunan, om iyau no o Tuhan do hilo'd tawan om hiti'd pomogunan. Om a' i' iyau miyon do hiri'd walai di ponokokinorohingan di winonsoi'd tulun. 25 Om a' nogi' iyau minog do tulungon do tulun, tu' iyau no o manahak do koposion om pinuhobo om koinsanai'd nunu nopo dot id tulun. 26 Om mantad nod iso' o tulun o pinawayaan dau do minomonsoi'd koinsanai'd bansa'd tulun, om sinuhu' dau iyolo' do miyon do pointongkop diti pomogunan. Om iyau nogi' o minanantu' do mantad di gulu po ondung soira' iyolo'd poimpasi, om ondung hinonggo o koiyonon diyolo'. 27 Om winonsoi pogi'd Kinorohingan o miagal diri nga' ponuhu' dau diyolo' do mogihum dau. Om maha' daa'ndo om osolowot diyolo' iyau do tontok di mogihum iyolo' dau. Nga' otopot nopo kopio om a' i' osodu' o Kinorohingan do mantad id pointikid-tikid dati', 28 do miagal di nokoboros do tulun do poingkaa, ‘Poimpasi toko' om mimpanau toko' om hino toko' do hiti'd pomogunan tu' i kuasa' dau o powonsoi do miagal diri,’ ka. Om miagal nogiddi i nokoboros di piro-piro tulun dit ongoilo do boros dit angaralom do poingkaa, ‘Tangaanak ngai' toko' i' dau,’ ka. 29 Om iyo nopoddi tu' tangaanak ngai' toko'd Kinorohingan, om a' i' apatut do sorohon toko' do Kinorohingan nopo om iyo noddi tingolig di tamas ko' pirok ko' watu do winonsoi, i winonsoi do tumanud do toilaan do tulun. 30 Nga' a' nod Kinorohingan sorohon i maso pod aiso' o toila-ilaan toko', nga' baino' nopo om suhuon dau o koinsanai'd tulun do pointongkop diti pomogunan do kumorologo di dusa diyolo'. 31 Tu' natantu' no dau ot insan o maso do kopomutusan do pointikid-tikid do tulun do hiti'd pointongkop diti pomogunan do mikuwo'd otulid o pomumutus. Om i tulun di nopili' mantad do Kinorohingan o momutus. Om iri no o koila-ilaan do koinsanai'd tulun dot otopot iri tu' napasi no kawagu'd Kinorohingan i tulun diri do mantad id kapatayon,” ka di Paulus. 32 Nga' haro'ddi o piro-piro tulun dot id pogialatan di tulun diri do mongirak-irak di Paulus do tontok di nokorongou iyolo' do pasal dot apasi kawagu i tulun di napatai. Om haro nogi' o tulun do momoros do poingkaa, “Orohian po kawagu iyahai'd korongou diya' do popotuduk do pasal diri,” ka. 33 Om tongkiad noddi i Paulus do mantad hiri'd tiiyonon do tulun do tumimung. 34 Nga' haro i' ot id pogialatan diyolo' do suminokodung di Paulus om notumbayaan di Yesus. Id pogialatan nopo diyolo'ddi om: i Dionisius, it iso' o tulun dot id pogialatan di mongilo-ilo dit Ariopagus, om songulun o tondu' dot i Damaris o ngaran, om haro po o piro-piro tulun do suwai.
Hilo'd Korintus
1 Om katalib poddi iri om tongkiad no i Paulus do hilo'd Atina om ongoi no iyau do hilo'd Korintus. 2 Om hilo' no o kinasalawatan dau do songulun o Yohudi dot i Akuila o ngaran. Om pomogunan nopo kopio di Akuila om hilo'd Pontus. Om koririkot dau do hilo'd Korintus do mantad hilo'd Italia do miwoyo' di sawo dau. Ngaran nopo di sawo dau om i Priskila. Kinaangayan nopo diyolo'd hilo'd Korintus nga' minonuhu' i Kaisar Klaudius do poposoliwan ngai' di tulun do Yohudi do mantad hilo'd Rum. Om ongoi noddi i Paulus solowot goduwo diyolo'. 3 Om undorong noddi i Paulus do poinsugku' diyolo'd kumaraja', tu' miagal i' o pogihuman diyolo'd tusin, do momomonsoi'd kiim. 4 Nga' mongoi kasai' nopo i Paulus do hiri'd walai'd sasambayangan do pointikid-tikid do tadau'd Sabat do mongoi ponokiboro-boros di tulun do Yohudi om i tulun do Yunani do mangangat diyolo'd monongkuyaan di Yesus. 5 Om korikot poddi i Silas om i Timotius do mantad hilo'd Makidunia, om popinsusui kasai' nopoddi i Paulus dot id tulun do Yohudi di habar do mantad id Kinorohingan, dot i Yesus i Raja' do Gampamasi di pinabatos do Kinorohingan. 6 Nga' a' nopo tumingkod do sumongkiwal di Paulus i tulun do Yohudi om papasala' iyolo' dau, om tantago' noddi di Paulus i pupuk do mantad id pakayan dau do popointalang do kasala' iyolo'. Om boro-boros nogiddi iyau diyolo' do poingkaa, “Ondung ohukuman kou, om dokoyu nod sala'. a' oku no iyoho' monongkoilo dokoyu! Om mantad nod baino' do mongoi oku nondod hilo'd tulun dit okon ko' Yohudi,” ka dau. 7 Om tongkiad noddi i Paulus diyolo' om ongoi no iyau undorong do hiri'd walai di hiri'd sampaping di walai'd sasambayangan. Sanganu nopo di walai'ddi om i Titius Yustus, i tulun dit okon ko' Yohudi, nga' sumambayang i' iyau dot id Kinorohingan. 8 Om i Krispus i boyoon di walai'd sasambayangan diri om i sompiiyon dau nga' otumbayaan i' di Tuhan Yesus. Om ogumu' o tulun do suwai do hiri'd Korintus do notumbayaan di Yesus, om minokibatis do nokorongou di pinosusui di Paulus. 9 Insan totuong om boro-boros no o Tuhan dot id di Paulus dot id suang do pinointalang, “Kada' kooris! Popinsusui nopo. Om kada' tingkod. 10 Tu' moyo-woyo' oku i' diya'. Om aiso' i' o tongosongulun piya do milo'd momonsoi'd araat dot id diya', tu' ogumu' i' o tulun ku dot id suang do bandar diti,” ka. 11 Om undorong noddi i Paulus do hilo'd Korintus do sontoun om satanga' o koloido' om monuduk iyau di tulun do hilo' do boros do Kinorohingan. 12 Nga' tontok di nosiliu i Galio do gobunor do hilo'd Akaya, om pogiupakat noddi i tulun do Yohudi do sumongkiwal di Paulus om tangkapo' no diyolo' iyau do pinakaa do hiri'd pomisaraan. 13 Om boro-boros no iyolo' do papasala' di Paulus, “Iti nopo tulun diti om mamayayat do tulun do sumambayang dot id Kinorohingan do kasala' dit oturan di Musa o kowoyo-woyoo' do sumambayang!” ka. 14 Om sisimbar no daa i Paulus. Nga' boro-boros nogiddi i Galio di tulun do Yohudi, “Oi tulun do Yohudi, ondung otopot do kasalaan ko' karaaton iti pinoboros dokoyu'dti om apatut i' daa do pokinongohon kopio ku. 15 Nga' iti nopo om pogisosongkiwalan nod pasal do boros, om ngaran om oturan dokoyu om pimpori-porianan nopo dokoyu'd momutus iti. a' oku i' orohian do momutus do hal dot iyo'dti,” ka dau. 16 Om uyungo' no di Galio iyolo' do poposoliwan do mantad hiri'd pomisaraan. 17 Om tangkapo' noddi diyolo' i Sostinis, i boyoon do walai'd sasambayangan diri, om pimbabagai no diyolo' iyau do hiri'd dotimbabaan di tiyonon do momutus. Nga' a' i' di Galio pinusou i hal diri.
Guminuli' i Paulus do Hilo'd Antiokia
18 Om alaid poddi i Paulus do poundorong do hilo'd Korintus do mantad diri. Om pongintod-intod noddi iyau di tulun di nongotumbayaan do hiri. Om sakai nogiddi iyau'd kapal do rahat do minongoi do hilo'd Siria do miniwoyo' diyo Priskila om i Akuila. Nga' pokibugarai no di Paulus i tobuk dau di hilo'd Kingkria tu' pinanaru dau i tobuk dau do pamayaan dau di batos dau do mikuwo'd sumpa' dot id Tuhan. 19 Om korikot poddi iyolo' do hilo'd Iposus, om tongkiad noddi i Paulus di Priskila om i Akuila, om ongoi no iyau do hiri'd walai'd sasambayangan do mongoi ponokiboro-boros di tulun do Yohudi. 20 Om angatai no daa'ddi diyolo' i Paulus do mundorong dot alaid-laid do hilo'd Iposus, do poinsugku' diyolo' nga' a' i' i Paulus minundorong. 21 Nga' mulong pod iyo'ddi, nga' minoro-boros i' iyau di tintod dau do minamanau do poingkaa, “Ondung korohian do Kinorohingan om gumuli' oku i' kawagu'd hiti,” ka dau. Om sakai noddi iyau'd kapal do rahat do mantad hilo'd Iposus di nokoboros dau o miagal diri. 22 Om korikot poddi iyau do hilo'd Kaisaria, om ongoi no iyau do hilo'd Yorusalim do minongoi poporikot do tabi' dot id sidang do hilo'. Om lombus no iyau do hilo'd Antiokia. 23 Om alaid poddi iyau do poundorong do hilo'd Antiokia, om ongoi nogiddi iyau pimpanau do hilo'd watas do Galatia om Prigia do mongoi popogirot do kotumbayaan di tulun di nongotumbayaan do hilo'.
Hilo'd Iposus om Hilo'd Korintus i Apolos
24 Om korikot no do hilo'd Iposus o songulun o tulun do Yohudi dot i Apolos o ngaran, i nosusu do hilo'd bandar dot Aliksandria. Iyau nopo om kosuhut kopio do komoyon di hiri'd suang do Buuk do Kinorohingan om oilo iyau'd mimboros, 25 om notudukan iyau di ponudukan do pasal di Yesus. Om agayo kopio o ginawo dau do popotuduk dot osorisid kopio o ponunuduk do pasal di Yesus, do mulong piya dot iri nogi' i botisan di Yohanis o noilaan dau. 26 Om timpuun noddi iyau do monuduk di tulun do hiri'd walai'd sasambayangan. Om angatai noddi di Priskila om i Akuila i Apolos do hiri'd walai diyolo' do nokorongou iyolo' di ponudukan di Apolos. Om tudukai noddi kawagu diyolo' i Apolos do pinopopunong kopio do pasal di natantu' mantad do Kinorohingan do wonsoyon dau do mamasi'd tulun dot id suang di Yesus. 27 Om orohian diri i Apolos do mongoi'd hilo'd Akaya. Om ponulis noddid surat i tulun di notumbayaan di Yesus do hilo'd Iposus do patahakon di tulun di nongotumbayaan do hilo'd Akaya do monuhu' diyolo' do rumamit di Apolos. Om di nopoddi nokorikot i Apolos do hilo'd Akaya om agayo no kopio o kinotulungan dau di tulun di notumbayaan di Yesus di hilo', dot i kosonongo'd Kinorohingan dot id diyolo' o nokotumbaya-bayaan diyolo' di Yesus. 28 Om kikuasa' i' kopio i Apolos do monokisimbar-simbar di tulun do Yohudi, gisom do nokosoibau iyau do suminimbar di tulun do Yohudi dot id toguang di tulun dot ogumu'. Om iri no it ayat do mantad id Buuk do Kinorohingan o rinait dau do pinopointalang kopio dot i Yesus no i Raja' do Gampamasi di pinabatos mantad.
Hilo'd Iposus i Paulus
1 Om daamot po di Apolos do hilo'd Korintus, om tongkop no i Paulus do minimpanau do hiri'd kabandaran do ponong id sokid dot id suang do watas diri om korikot noddi iyau do hilo'd Iposus. Om hilo' no do nokosolowot iyau do piro-piro tulun di notumbayaan di Yesus. 2 Om uhoto' no di Paulus iyolo', “Nakaramit kou nod Rusod do Kinorohingan di kotumbayaai kou i' di Yesus?” ka dau. Om boros ka diyolo'd suminimbar, “Amu'. a' po iyahai insan korongou do haro o Rusod do Kinorohingan,” ka. 3 Om uhoto' noddi kawagu di Paulus iyolo', “Iyo nopoddi, om nunu o komoyon di binotisan kou do noilaan dokoyu?” ka dau. Om boros ka diyolo'd suminimbar, “Komoyon nopoddi om i botisan di pinoboros di Yohanis,” ka. 4 Om boros kaddi di Paulus, “I Yohanis nopo om minamatis do tulun do popointalang do nokorologo iyolo' do koinsanai di dusa diyolo'. Nga' tontok nogiddi do minomisunud i Yohanis di tulun dot Israil do mositi' no dot otumbayaan iyolo' di tulun di rumikot do sumusuhut dau, iri no i Yesus,” ka dau. 5 Om tontok di nokorongou iyolo'ddi, om botisai noddi iyolo' dot id suang do ngaran di Tuhan Yesus. 6 Om tontok di sinukabayan di Paulus iyolo', om koporinta' noddi iyolo' do Rusod do Kinorohingan, om timpuun noddi iyolo' do mimboros do mogisuwai-suwai o bansa'd boros di kosuayan kopio, om popinsusui iyolo' do habar do mantad id Kinorohingan. 7 Kogumuon' nopo diyolo'ddi om haro i' doti' o hopod om duwo o tulun. 8 Om tolu o tulan do koloido' di Paulus do monuduk kasai' om a' i' iyau ooris do popimboros diri dot id tulun do hiri'd walai'd sasambayangan, om monokisimbar-simbar iyau diyolo' do poposuhut kopio diyolo' do pasal di Pomorintaan do Kinorohingan. 9 Nga' haro i' o piro-piro tulun dot id pogialatan diyolo' dot okodou kopio o ginawo, om a' otumbayaan. Om pasalaon nopo diyolo' do hiri'd toguang do tulun di songintimung do hiri i ponudukan do pasal di natantu' mantad do Kinorohingan do wonsoyon dau do mamasi'd tulun dot id suang di Yesus. Om iri noddi o kinotongkiadan di Paulus diyolo', om ongoi no iyau do hiri'd piro-piro tumatanud di Yesus dit id suang di bilik dit agayo, i tiiyonon di Tiranus do monuduk do tulun dot ogumu'. Om hiri no i Paulus do monokisimbar-simbar do tulun do pointikid-tikid do tadau. 10 Om iyo kasai' nopoddi o wonsoyon dau do solinaid do sontoun, gisom do nokorongou ngai'd boros do Tuhan i tulun do Yohudi om it okon ko' Yohudi do hiri'd pointongkop do pomogunan dot Asia.
I Tangaanak di Skiwa
11 Om pinakai'd Kinorohingan i Paulus do momonsoi di kongoimayaan kopio. 12 Ondung patahakon dot id tulun di sumakit o somputangan ko' tagkos di noumbalan di Paulus do mamakai om olingos nopo i toruol diyolo' om i rusod do rogon nga' sumoliwan nopo do mantad id tulun diri. 13 Nga' haro o piro-piro tulun do Yohudi di bobolian do mimpanau nopo do mongoi poposoliwan do rusod dot araat do mantad id tulun. Om mumbal daa iyolo'd mamarait do ngaran do Tuhan Yesus do poposoliwan di rusod do rogon. Boros ka diyolo' dot id rusod do rogon diri, “Id suang do ngaran di Yesus i posusuyon di Paulus, om posoliwanon ku iyokoyu!” ka. 14 Om iri nogi' i turu' o tangaanak do tongokusai di Skiwa, i boyoon dot imam diri nga' minomonsoi nogi' do miagal diri. 15 Nga' boro-boros nogi' i rusod do rogon do suminimbar diyolo' do poingkaa, “Kotutun oku i' di Yesus om i Paulus, nga' isai kou iyokoyu?” ka. 16 Om simbul nopoddi i tulun di norusadan do rogon diri do tuminabpo diyolo' do suminaap, om panangkus nopoddi iyolo' do minogidu' do mantad hiri'd walai, do nongosuhat poo om aiso' o pakayan tu' ginayat di tulun diri i pakayan diyolo' om koidu' nopo do poimpakai diyolo'. 17 Om ongooris tomod diri i tulun do Yohudi om it okon ko' Yohudi di poundorong do hilo'd Iposus do nokorongou di habar diri, om royohon diri o ngaran do Tuhan Yesus. 18 Om ogumu'ddi o tulun di nongotumbayaan di Yesus do ruminikot do minangakun di nowonsoi diyolo' di gulu po dot id toguang di tulun dot ogumu'. 19 Om ogumu' nogi' o tulun di bobolian do minonimung di buuk diyolo' om tutudai nogiddi do hiri'd toguang di tulun dot ogumu'. Om haro i' doti' o limo nohopod noribu o tusin do pirok do gatang ngai'ddi. 20 Om mumu-gumu' nopoddi o tulun do korongou di boros do Tuhan om mumu-gumu' o tulun dot otumbayaan diri.
Kagangahan dot Agayo do Hilo'd Iposus
21 Om katalib poddi i nongosiliu do miagal diri, om tontuo' no di Paulus do mongoi iyau do hilo'd Makidunia om hilo'd Akaya om lumombus nogindo iyau do hilo'd Yorusalim. Om boros ka dau, “Koongoi ngai' oku pondod hilo', om mositi' nod mongoi oku do hilo'd Rum,” ka. 22 Om suhuon' noddi dau i Timotius om i Irastus, i duwo o tulun di mongunguhup dau do minogulu dau do mongoi'd hilo'd Makidunia do daamot dau'd poundorong do piro-piro tadau'd koloido' do hiri'd pomogunan dot Asia. 23 Tontok no doti'ddi do tuminimpuun o kagangahan dot agayo do hilo'd Iposus, dot i ponudukan do pasal di Yesus o kinoimpuunon. 24 Tu' hiri nopod bandar diri om haro o songulun o tukang pirok dot i Dimitrius o ngaran, i momomonsoi do winalai-walai di podsubakan di Artimis, i ponokokinorohingan diyolo'. Iri nopo wonsoyon di tulun diri om popountung kopio di tulun di pakaraja' dot id dau. 25 Om timungo' noddi dau i tulun di songingkaraja' dot id dau om i tulun di songingkaraja' dot id piro-piro tukang pirok do suwai, om boro-boros no iyau dot id diyolo' do poingkaa, “Oi tobpinai-tobpinai, koilo kou i' dot iti no o karaja'dti o koonuan toko'd tuntung dot agayo. 26 Om nokokito kou no om nokorongou kou di winonsoi'd i Paulus diri. Tu' minomoros iyau dot iti nopo ponokokinorohingan di winonsoi'd tulun om okon i' ko' kinorohingan kopio. Om ogumu' no o tulun do notumbayaan di ponudukan di Paulus, dot okon nopo ko' hiti nod Iposus, nga' oruhai nod kotongkop do hiti'd pomogunan dot Asia. 27 Iyo nopoddi, om okon nopo ko' iti no karaja' toko' ot oindaraat diri, suwai ko' ilo' piya walai di Artimis, i ponokokinorohingan toko' di tukuon do koinsanai'd tulun do hiti'd Asia om hiti'd pointongkop do pomogunan nga' a' noddi pokonunu-nunuon om a' iyau pusohon,” ka. 28 Om kongotogod noddi i tulun dot ogumu' do nokorongou di boros di pinoboros di tukang pirok diri, om boro-boros no iyolo' dot opuhod do poingkaa, “Abantug i' i Artimis, i ponokokinorohingan do tulun dot Iposus!” ka. 29 Om kotongkop nopoddi do hiri'd bandar diri i kagangahan diri. Om tounai nopoddi diyolo' do minanangkap i Gayus om i Aristarkus, i duwo o tulun do Makidunia, i koruhang di Paulus do mimpanau, om gayato' no diyolo' i duwo o tulun diri do kuminaa do hiri'd titimungon do tulun dot ogumu' dot id bandar diri. 30 Om sumuwang daa'ddi i Paulus do hiri do mongoi tanud diyolo' nga' oduhai no iyau di tulun di nongotumbayaan di Yesus. 31 Om haro'ddi o piro-piro tulun dit angasawat o pangkat do hiri'd pomogunan dot Asia do tambalut di Paulus do minonuhu' do tulun do mongoi pogodu di Paulus do sumuwang do hiri'd titimungon do tulun dot ogumu'ddi. 32 Om agangau nopoddi i tulun di songintimung do hiri'd kinoiyonon diri, om mogisuwai-suwai nopo o popinggarangon diyolo', tu' kogumuan no diyolo'd a' i' koilo ondung nunu o kinotimungan diyolo'd hiri. 33 Om suhuon' noddi di tulun do Yohudi i Aliksandor do minongoi'd hiri'd dotoguangan di tulun dot ogumu', om ondos daa di wookon di tulun dot ogumu'ddi om iyau o kinoimpuunon di kagangahan diri. Nga' pobilido' no daa'ddi di Aliksandor o longon dau do mogodu di tulun do minghiyo, om umbal no daa iyau'd moro-boros do poposunud dot aiso' o sala' dau. 34 Om koilaai noddi diyolo' do tulun iyau'd Yohudi, om insan-insan nopo iyolo'd pinapagarang do boros do poingkaa, “Abantug i' i Artimis, i ponokokinorohingan do tulun dot Iposus!” ka. 35 Om alaid noddi om kotingkod i' di gomponulis do hiri'd bandar diri i tulun dot ogumu' di sanggara-gara'. Om boro-boros noddi iyau do poingkaa, “Oi tulun dot Iposus, ongkoilo ngai' i' o tulun do bandar nod Iposus o momogompi' di walai di Tingolig dot Artimis om i watu dit olidang di ruminatu' do mantad hilo'd tawan. 36 Om aiso' i' o songulun piya do milo'd sumurilog do hal diti. Om kada' kou nondo kohiyo. Om kada' kou pomonsoi do nunu nopo dot a' po kopomusorou kopio. 37 Om tinangkap dokoyu iti tulun diti om a' i' iyolo' minanakau do hilo'd walai di ponokokinorohingan toko' om a' iyolo' minongindaraat diri. 38 Nga' ondung haro o tulun do pasalaon di Dimitrius om i tulun di pakaraja' dot id dau om osonong dot igitan o hal diri dot id pomisaraan. Tu' poingiwang kasai' i' i pomisaraan om hino kasai' id hilo' i pagawai do pomorinta'. 39 Om ondung haro i pokionuon dokoyu'd suwai, om mositi' nod salasayon iri dot id pogititimungan do tulun dot ogumu' di natantu' mantad do tumanud dot oturan. 40 Tu' iti nopo nosiliu baino'dti om sumiliu i' do koligagaanan toko'. Om aiso' i' o paantakan toko' do mingwonsoi'd miagal diti. Om otondos toko' i' moti'dti do sumaap do porinta', dot iti kagangahan diti o kapanandasan dati',” ka dau. 41 Om kongoboros poddi di gomponulis do bandar diri o miagal diri om suhuon' no dau'd muli' i tulun dot ogumu'.
Minongoi i Paulus do Hilo'd Makidunia om Hilo'd Yunani
1 Om kotingkod poddi i kagangahan do hilo'd Iposus, om lohowo' noddi di Paulus i tulun do sidang do tuminimung om boro-boros no iyau diyolo' do minongodsuur diyolo'. Om pongintod-intod noddi iyau diyolo'. Om pamanau noddi iyau do minongoi'd hilo'd Makidunia. 2 Om pimpanau noddi i Paulus do tuminongkop do hiri'd watas do Makidunia do minongoi ponuduk di tulun di notumbayaan di Yesus, om minongodsuur iyau diyolo'. Om pamanau nogiddi iyau do kuminaa do hilo'd Yunani. 3 Om tolu o tulan do koloido' dau do poundorong do hilo'. Om maha' dit oruhai noddi o kapamanahan dau do mongoi'd hilo'd Siria, om korongou no dau o habar do mogiupakat i tulun do Yohudi do mamatai dau. Om tontuo' noddi dau do gumuli' kawagu iyau do kawaya' kawagu do hilo'd Makidunia. 4 Om tanud noddi dau i Sopatir, i tanak di Pirus, i mantad hilo'd Biria; om tuminanud nogi' i Aristarkus om i Sikundus i tulun do Tosolunika, om i Gayus i tulun do Dorbi, om i Timotius, om i Tikikus om i Tropimus, i piro-piro tulun do mantad hilo'd pomogunan dot Asia. 5 Om pogulu noddi iyolo' dahai do minongoi'd hilo'd Troas, om hilo' no iyolo'd minagandad dahai. 6 Om katalib poddi i Tadau dot Agayo do Roti dit A' Kipangambang, om sakai noddi iyahai'd kapal do rahat do mantad hilo'd Pilipi. Om katalib poddi o limo tadau, om kosolowot nogi' iyahai diyolo' do hilo'd Troas. Om sominggu' diri o koloido' dahai do poundorong do hilo'.
Kolimpupuson di Paulus do Minongoi'd Hilo'd Troas
7 Om tontok di totuong no di tadau'd koonom, om timung noddi iyahai do minakan do kopogiuludan, om pomoros no i Paulus di tulun do hiri do gisom do pitangatuong, tu' osorou dau do lumombus no iyau'd mamanau di kosuabon. 8 Om ogumu'ddi o lampung do hiri'd bilik di hiri'd sawat di niyonon dahai'd tuminimung. 9 Om haro'ddi o tanakwagu dot i Iutikus o ngaran do poirikau do hiri'd liligaon. Om koodop noddi iyau do hiri'd liligaon dit alaid kopio i Paulus do moro-boros di tulun. Om karatu' noddi i Iutikus do mantad hiri'd liligaon di bilik di hiri'd tingkat kotolu. Om ngoyo' noddi daa iyau di tulun nga' napatai no iyau. 10 Nga' lintuhun noddi i Paulus, om loubai no dau i tanakwagu'ddi do minamagapus. Om boro-boros no i Paulus, “Kada' kou katangkabo, tu' poimpasi po iyau,” ka dau. 11 Om salakoi noddi kawagu i Paulus do hiri'd sawat, om potikido' no dau i roti om akan ngai' noddi iyolo'. Om boro-boros poddi kawagu i Paulus di tulun do gisom do nosuaban. Om pamanau noddi i Paulus. 12 Om angatai noddi di tulun i tanakwagu'ddi do minuli' do hiri'd walai dau, tu' noposian iddi kawagu iyau, om noinsasamadan tomod diri o ginawo diyolo'.
Mantad id Troas om Kumaa do Hilo'd Militus
13 Om pamanau noddi iyahai do minogulu di Paulus do suminakai'd kapal do rahat do kuminaa do hilo'd bandar dot Asos do mongoi kunomo' di Paulus do hilo'. Tu' iyo noddi i pinonuhuan di Paulus. Tu' iyau nopo om minaya' do hiri'd katanaan do kuminaa'd hilo'. 14 Om kosolowot poddi i Paulus dahai di hilo'd Asos, om sakai noddi i Paulus di kapal do rahat om pamanau noddi iyahai do kuminaa do hilo'd Mitilini. 15 Om mantad nod hilo' om pamanau no iyahai do poinsakai'd kapal do rahat om korikot noddi iyahai do hiri'd hapak di Pulou do Kiyos di sinuabon. Om tadau noddi kawagu, om korikot no iyahai do hilo'd Samos, om tadau poddi kawagu, om korikot nogiddi iyahai do hilo'd Militus. 16 Tu' natantu' nod Paulus dot a' mumbaya' do hilo'd Iposus, om a' i' kalaid kopio do hilo'd watas dot Asia. Tu' arau-arau iyau do mokiririkot do hilo'd Yorusalim do mingkosup di Tadau'd Agayo do Pintakosta.
Minongintod i Paulus di Piro-Piro Boyoon do Sidang dot Iposus
17 Om pomilin noddi i Paulus do popoongoi di piro-piro boyoon do sidang do hilo'd Iposus, do mongoi solowot dau do hilo'd Militus. 18 Om korikot poddi iyolo', om boro-boros no i Paulus dot id diyolo', “Oi tobpinai-tobpinai, kongoilo kou i' ondung poingkuro-kuro o kowoyo-woyoon ku do solinaid ku'd poinsugku' dokoyu do mantad di kinorikoto' ku i' do hilo'd Asia. 19 Om aayi-ayi' no o kosiribao' do ginawo ku om nokoturu' tomod o romou ku do minomonsoi'd karaja' di don Tuhan do tontok di noinggorit oku tu' araat i' o winonsoi di tulun do Yohudi dot id doho'. 20 Om kongoilo kou nogi' dot aiso' i' ot a' ku nouyuhan do popotuduk dot id dokoyu di nunu nopo i kiguna' dot id dokoyu. Om nokoponuduk oku nogi' dokoyu dot id pogititimungan do tulun dot ogumu' om id pointikid-tikid do walai. 21 Om asaru' oku nogi' do monuduk do tulun do Yohudi om it okon ko' Yohudi, dot apatut iyolo' do rumologo'd dusa diyolo' om rumikot dot id Kinorohingan om otumbayaan do Tuhan Yesus. 22 Om baino' nodti om kumaa oku nod hilo'd Yorusalim do tumanud dot isuhu'd Rusod do Kinorohingan. Om a' oku i' koilo ondung nunu ot osiliu dot id doho' do korikot oku'd hilo'. 23 suwai ko' iri no o toilaan ku tu' pointikid-tikid do bandar di koongoyon ku om popoinsan kasai' nopo doho' o Rusod do Kinorohingan do kogiil oku nondo om inggoriton oku. 24 Nga' a' ku i' sorohon o tinan ku dot apatai tuu ko' amu', dot opongo ku po daa iti karaja' di pinonuhuan do Tuhan Yesus doho', om otorodok oku pod poposusui diti Habar dot Osonong do pasal di kosonongo'd Kinorohingan dot id tulun do gisom do tikapatai ku. 25 Om nokosolowot ngai' oku no dokoyu om nokoponuduk oku dokoyu do pasal do Pomorintaan do Kinorohingan. Om opurimanan ku noddi dot a' oku no kosolowot kawagu dokoyu, oi tobpinai-tobpinai ku. 26 Om iti no o kapamarasan ku kopio'dti dot id dokoyu, tu' okon no ko' doho'd kasalaan do haro piya ot id pogialatan dokoyu dot apatai. 27 Tu' a' oku i' nokoumbal do tuminongkiad diti karaja' ku do monuduk dokoyu do koinsanai di natantu' mantad do Kinorohingan do wonsoyon dau. 28 Mumbangan-bangan kou no, om gompion no dokoyu o koinsanai di sidang di pinatahak do Rusod do Kinorohingan do pogompian dokoyu; tu' nopili' kou no do mongilo-ilo do sidang diri. Om gompion no kopio dokoyu i sidang do Kinorohingan do miagal di gompomogompi'd dumba' di momogompi' kopio di dumba' dau. Tu' nasanganu nod Kinorohingan i sidang diri dot i kinapatayon di Tanak dau o kinopononsongonuan. 29 Oilaan ku no do kapamanau oku podti om rumikot nondo i toni dit orongit dot id pogialatan dokoyu. Om akanon nondo di toni dit orongit i tulun di pigompian dokoyu'ddi. 30 Om mimbulai nondo o tulun do mantad id pogialatan dokoyu do popoboros dit a' otopot, do mamalid di tulun di nongotumbayaan di Yesus. Om gisom do tumanud nondo diyolo' i tulun diri. 31 Iyo nopoddi, om umbangan-banganan no kopio dokoyu! Soroho' no dokoyu do tolu o toun do koloido' ku do mikuwo'd tihad ku, dot a' nopo kotingkod do monuduk do pointikid-tikid dokoyu do tadau om totuong. 32 Baino' nopodti om patahakon ku no iyokoyu dot id Kinorohingan om gompion kou i' dau. Om otumbayaan kou i' kopio di habar di norongou dokoyu do pasal do kosonongo'd Kinorohingan dot id dokoyu. Tu' kikuasa' i' o Kinorohingan do popokoris dokoyu om manahak dokoyu do barakat di pinosodia' mantad dau do patahakon do koinsanai'd tulun di songonuon dau. 33 Om a' oku i' nokoumbal do rumohian do tusin ko' pakayan po dot isai nopo o tulun. 34 Om oilaan id tobpinai-tobpinai do kuminaraja' oku i' do mogihum do kosukup-sukupan ku, om kosukup-sukupan di piro-piro tambalut ku di tuminanud doho'. 35 Nowonsoi ngai' ku no i maan dokoyu dot omitanan, om mositi' nod tumotos kou do kumaraja' do monulung di tulun dit oluhoi. Tu' mositi' nod sorohon toko' i pinoboros di Tuhan Yesus do poingkaa, ‘Olumaag nogi' i tulun di manahak ko' i rumamit,’ ka,” ka dau. 36 Om kopongo poddi i Paulus do minoro-boros, om otud noddi iyau om koinsanai di tulun do hiri do suminambayang. 37 Om oinsanan nopoddi iyolo' do minihad om minongoi gapus di Paulus om minongintod iyolo' dau. 38 Om tumongob diri iyolo' tu' minomoros i' i Paulus dot id diyolo' dot a' no iyolo' kosolowot kawagu dau. Om woyoo' noddi diyolo' i Paulus do gisom do nokorikot do hiri'd kapal do rahat.
Minongoi i Paulus do Hilo'd Yorusalim
1 Om pongintod noddi iyahai di piro-piro boyoon do sidang di mantad hilo'd Iposus, om tongkiad nogiddi iyahai diyolo'. Om pamanau no iyahai do suminakai'd kapal do rahat do kuminaa do hilo'd Pulou Kos; om sinuabon noddi om korikot no iyahai do hilo'd Pulou Rodis. Om mantad nod hilo' om pamanau no iyahai do suminakai'd kapal do rahat do ruminikot do hilo'd podompiran do kapal do hilo'd Patara. 2 Om kokito noddi iyahai dot iso' o kapal di hilo'd Patara do pakayaan do hilo'd Pinisia. Om sakai no iyahai di kapal diri om pamanau noddi iyahai. 3 Om korikot no iyahai dot id iso' o kinoiyonon dit okito o pulou Siprus dot id dogibangan dahai, nga' pamanau nopo iyahai do poinsakai di kapal do kuminaa do hilo'd Siria. Om lintuhun noddi iyahai do hilo'd Tirus, tu' hilo' no o pinolintuhunan di suang di kapal di sinakai dahai. 4 Om ongoi noddi iyahai solowot di tulun di nongotumbayaan di Yesus do hilo', om undorong no iyahai do poinsugku' diyolo' do solinaid do sominggu'. Om tudukai noddi iyolo' do Rusod do Kinorohingan do mogodu di Paulus do mongoi'd hilo'd Yorusalim. 5 Nga' korikot no i maso di kapamanahan dahai kawagu, om tongkiadai noddi dahai iyolo' do luminombus do minamanau, om mogianak-anak nopoddi iyolo' do pinapaatod dahai do gisom do nokosoliwan iyahai di bandar. Om otud ngai' noddi iyahai do hiri'd tisan di rahat do suminambayang. 6 Om kasambayang poddi iyahai, om pogitatabi' no iyahai om sakai noddi iyahai di kapal, om poguliai no diyolo' do hiri'd walai diyolo'. 7 Om pamanau noddi iyahai do mantad hilo'd Tirus, do kuminaa do hilo'd Ptolimais do suminakai'd kapal do rahat. Om hilo' nod minongoi iyahai solowot di tulun di nongotumbayaan, do mongoi ompuya' diyolo', om sangadau'ddi iyahai do poinsugku' diyolo'. 8 Om tadau poddi kawagu om lombus nogi' iyahai do kuminaa do hilo'd Kaisaria. Om ongoi noddi iyahai salakoi do hiri'd walai di Pilipus, i tulun di popirongou do Habar dot Osonong. Iyau nopo om iso' do mantad id pogialatan di turu' o tulun di nopili' do hilo'd Yorusalim. 9 Om kianak iyau dot apat o sumandak. Om nonuan ngai' nopod Kinorohingan do toilaan do popinsusui do habar do mantad id Kinorohingan it apat o tangaanak dau'ddi. 10 Om piro-piro poddi o tadau do koloido' dahai do poundorong do hilo', om rikot no i nabi dot i Agabus o ngaran, do mantad hilo'd Yudia. 11 Om ongoi no iyau do hiri'd dahai, om onuo' no dau i tagkos di Paulus om kagasai no dau di tagkos diri o gakod om longon dau. Om boro-boros no iyau, “Iti no o pinoboros do Rusod do Kinorohingan: Iyo nodti o pongongogos di tulun do Yohudi do hilo'd Yorusalim di tulun di sanganu diti tagkos, om patahakon nogindo iyau dot id tulun dit okon ko' Yohudi,” ka dau. 12 Om oinsanan nopoddi iyahai om i tulun di hilo'd Kaisaria do mogodu daa kopio di Paulus do mongoi do hilo'd Yorusalim di nokorongou iyahai do miagal diri. 13 Nga' boros ka di Paulus do suminimbar, “Nokuro tu' miagal kopio'dti o pongingihad dokoyu, oi tobpinai-tobpinai, do gisom dot osudu' o ginawo ku iyoho'? Tu' okon nopo ko' nokosodia' oku'd tangkapon do hilo' nga' kosodia' oku nogid patayon piya dot i Tuhan Yesus o kapamatayan doho',” ka dau. 14 Om tingkod noddi iyahai do mogodu, tu' a' no i Paulus milo'd oduhan. Om boros kaddi dahai dot id dau, “Pologoson nopo o korohian do Tuhan dot osiliu,” ka. 15 Om piro-piro poddi o tadau dahai'd poundorong do hilo', om pogopi-opi' no iyahai do kuminaa do hilo'd Yorusalim. 16 Om tanud noddi dahai o piro-piro tulun do mantad hilo'd Kaisaria do pinapaatod dahai do hiri'd walai di Manason, tu' hiri nod walai dau o tiyonon dahai. (I Manason nopo om tulun do Siprus dit alaid no do nosiliu'd tumatanud di Yesus.)
Minongoi i Paulus Solowot di Yakub
17 Tontok di nokorikot iyahai do hilo'd Yorusalim, om ongosuwau nopo i tulun do hilo' do minongoi ruba' dahai. 18 Om sinuabon noddi om tanud no i Paulus dahai do minongoi solowot di Yakub. Om i piro-piro boyoon do sidang nga' hiri ngai' nogi'. 19 Om katabi' poddi i Paulus diyolo', om susuyo' ngai' nogiddi dau dot id diyolo' o koinsanai di nowonsoi'd Kinorohingan dot id pogialatan di tulun dit okon ko' Yohudi, dot i Paulus o pinakai'd Kinorohingan do minomonsoi'ddi. 20 Om pamarayou ngai' nopoddi iyolo' do Kinorohingan do nokorongou di sinusui di Paulus diri. Om boro-boros noddi iyolo' dau do poingkaa, “Oi Paulus, ilaai no dot iri nopo i piro-piro noribu o tulun do Yohudi di notumbayaan di Yesus diri, om it otorodok kopio do tumanud di Tourat di Musa. 21 Om nokorongou no iyolo' do monuduk ko do koinsanai di tulun do Yohudi di songingiyon do hilo'd pomogunan do tulun dit okon ko' Yohudi, om monuhu' ko diyolo' do mangada' di Tourat di Musa. Om mogodu ko diyolo' do monunat di tangaanak diyolo', om mogodu ko do tumanud di kaadat-adato' do tulun do Yohudi. 22 Atantu' no do nongkorongou noddi i tulun do Yohudi di nongotumbayaan diri. Iyo nopoddi, om poingkukuro no mando'dti? 23 Osonong nogi' do tumanud ko'dti boros dahai. Haro ot apat o tulun dot id pogialatan dahai do nakapamatos dot id Tuhan. 24 Om osonong do tumanud ko diyolo' do magadat do momolidang do tinan nu, om bayaran no i bayaran diyolo', om obugaran indo o tobuk diyolo'. Om oilaan i' do koinsanai'd tulun dot a' otopot i norongou diyolo' do pasal diya' tu' iya' nga' maso id tumanud di Tourat di Musa. 25 Nga' iri nopo tulun dit okon ko' Yohudi di nongotumbayaan di Yesus, om noonuan no dahai iyolo'd surat do pinopoilo di noputus dahai dot a' iyolo' koino-ino do mangakan do taakanon di nokosubak dot id tingolig, om a' koino-ino do mangakan do raha', om i nintorusan di napatai do linawaan. Om a' iyolo' koino-ino do magampahu',” ka diyolo'. 26 Sinuabon noddi om ongoi no i Paulus om it apat o tulun diri pomolidang do tinan diyolo' do tumanud dit oturan. Om suang noddi iyolo' do hiri'd Walai'd Sasambayangan dot Agayo do minongoi poposunud ondung piro o tadau do koloido' di kopomolidangan do tinan diyolo' om i kapatahakan diyolo' do porsombahan di sumbolion do bagi'd pointikid-tikid diyolo'.
Tinangkap i Paulus do Hiri'd Walai'd Sasambayangan dot Agayo
27 Om tontok di motingkaayi' no i turu' o tadau'ddi, om haro'ddi o piro-piro o tulun do Yohudi do mantad hilo'd Asia do nokokito di Paulus do hiri'd Walai'd Sasambayangan dot Agayo. Om bayayato' noddi diyolo' i tulun dot ogumu' om ongoyo' no diyolo' pususo' i Paulus, 28 om mikuwo'd popinggarang do poingkaa, “Oi tulun dot Israil, uhupai iyahai! Tu' iti no i tulun di mimpanau nopo do mongoi ponuduk ngai' do tulun di ponudukan do sumaap do tulun dot Israil, om sumaap di Tourat di Musa om iti Walai'd Sasambayangan dot Agayo. Om minangangat po iyau dilo tulun dot okon ko' Yohudi do suminuang diti Walai'd Sasambayangan dot Agayo do minonosomu' diti kinoiyonon dot olidang!” ka. 29 (Kinapamarasan nopo diyolo' do miagal diri om nokokito iyolo' do manud-tanud di Paulus do suminuang do hiri'd bandar diri i Tropimus i tulun dot Iposus; om andasan nopo diyolo' om nangatan di Paulus iyau do suminuang do hiri'd Walai'd Sasambayangan dot Agayo.) 30 Om angagangau ngai' nopoddi i tulun do pointongkop di bandar diri, om santangkus-tangkus ngai' nopoddi i tulun do minongoi gurumung. Om tangkapo' noddi diyolo' i Paulus, om gayato' no diyolo' iyau do pinosoliwan do mantad hiri'd Walai'd Sasambayangan dot Agayo, om tontok iddi do tinabanan i wawayaan di Walai'd Sasambayangan dot Agayo. 31 Om daamot po di tulun di mamagangau'ddi do tumotos daa do mamatai di Paulus, om haro'ddi o tulun do minongoi pomisunud di boyoon do soudor do Rum di kagangahan do hiri'd bandar do Yorusalim. 32 Om arau-arau nopoddi i boyoon do soudor do minangangat do piro-piro pagawai do soudor om piro-piro soudor, om osiau nopo iyolo' do minongoi rapou di tulun dot ogumu' dit angagangau'ddi. Om kokito poddi di tulun dot ogumu' i boyoon do soudor om i piro-piro soudor do suwai, om tingkadai nogi' diyolo' do mimbobog i Paulus. 33 Om ongoyo' noddi di boyoon do soudor tangkapo' i Paulus, om ponuhu' noddi iyau'd tulun do mongogos di Paulus. Om pinguhot nogiddi i boyoon do soudor di tulun dit ogumu' ondung isai i Paulus om nunu o winonsoi dau. 34 Om mogisuwai-suwai nopo o tisimbar di tulun dot ogumu'ddi. Om a' iddi di boyoon oilaan ondung poingkuro kopio i nosiliu tu' angagangau tomod nopo o hiri. Om ponuhu' noddi iyau'd tulun do papakaa di Paulus do hiri'd kuta' di pogintirungan. 35 Om korikot poddi iyolo' do hiri'd tukad di kuta'ddi om antayango' no di piro-piro soudor i Paulus, tu' pokiuumangan no kopio diyolo' iyau. 36 Om santanud-tanud nopo i tulun dot ogumu' do hiri'd dohuri di piro-piro o soudor do sanggarang-garang do poingkaa, “Patayo' no iyau!” ka.
Pinoposusui i Paulus do Kowoyo-Woyoon Dau
37 Om tontok di posuangon no daa di soudor i Paulus do hiri'd kuta', om boro-boros no i Paulus di boyoon do soudor do poingkaa, “Koino-ino oku i' do moro-boros diya' dot ongoruhai oi tuan?” ka dau. Om boros ka di boyoon do soudor do minonguhot dau, “Koilo ko i' do boros do Yunani? 38 Iyo nopondo, om okon ko i' ko' i tulun do Masir di minamagangau di gulu poddi, om pangangat noddi dot apat noribu o tulun dit ongkirapo-rapo do kuminaa do hilo'd tana' do kowotuan?” ka dau. 39 Om boros ka di Paulus do suminimbar, “Iyoho' nopo om tulun id Yohudi, om hilo'd bandar do Tarsus o kinosusuon ku, i bandar dot agayo do hilo'd Kilikia. Pabanaro' oku daa diya' do moro-boros dot id tulun dot ogumu' dilo',” ka dau. 40 Om pabanaro' noddi di boyoon do soudor iyau do moro-boros. Om ingkakat noddi i Paulus do hiri'd tukad di kuta', om pobilido' no dau o longon dau do popotingkod di tulun do minghiyo. Om tingkod ngai' nopo iyolo'. Om boro-boros noddi i Paulus diyolo' dot id suang do boros dot Ibrani do poingkaa,
1 “Oi molohing-lohingon, om i tobpinai-tobpinai. Popoboros oku dot id dokoyu dot a' oku i' apatut do hukuman. Om pokinongoho' no dokoyu!” ka dau. 2 Om tontok di nokorongou iyolo' di Paulus do moro-boros dot id suang do boros dot Ibrani, om a' noddi iyolo' ohiyo. Om boro-boros noddi kawagu i Paulus do poingkaa, 3 “Tulun oku i' do Yohudi, om hilo'd Tarsus it id pomogunan do Kilikia o kinosusuon ku. Nga' hiti'ddi id Yorusalim o kinogoyoon ku, om notudukan oku kopio di Gamaliol, i boyoon do gomponuduk, do tumanud kopio di Tourat di taki-aki toko', om aparu' oku do momonsoi di ponuhuan do Kinorohingan do miagal dokoyu. 4 Om nokoponginggorit oku nogi' di tulun di tumanud di ponudukan di wagu'ddi gisom do haro o nangapatai diyolo'. Om tangkapon ngai' ku nopo o tongokusai om tongoondu' do pogiilon ku. 5 Om i Boyoon dot Agayo dot Imam om koinsanai di Gompomutus do Don Tugama' nga' nokoilo id otopot iti pinoboros ku. Tu' iyolo' nogi' i minanahak doho' do surat kuasa' do kopoilaan dot id tulun do Yohudi di hilo'd Damsik. Om kikabanaran oku noddi do manangkap do tulun di nongotumbayaan di ponudukan diri, om milo oku'd mongoit diyolo' do hiti'd Yorusalim do maan hukumai,” ka dau.
Minonusui i Paulus di Nongoumbalan Dau
6 Om boro-boros no kawagu i Paulus do poingkaa, “Tontok di manau-panau oku do pakayaan do hilo'd Damsik, dit oruhai oku no daa do korikot do hilo' di pitangaadau no, om sigog id titiu o tulinau di kosorong kopio do mantad hilo'd tawan do hiri'd posorili' doho'. 7 Om karatu' oku nopo do hiri'd tana', om korongou ku no do haro o minoro-boros doho' do poingkaa, ‘Oi Saulus, Saulus! Nokuro tu' monginggorit ko doho'?’ ka. 8 Om ponguhot oku noddi, ‘Isai ko oi tuan?’ kangku. Om simbar no i minoro-boros diri do poingkaa, ‘Iyoho' no i Yesus i tulun do Nasarit it inggoriton nu'ddi!’ ka. 9 Om i piro-piro tulun di manud-tanud doho' nga' nokokito nogi' di tulinau'ddi, nga' a' i' iyolo' nokorongou di minoro-boros doho'. 10 Om boro-boros oku noddi kawagu do minonguhot do poingkaa, ‘Oi Tuhan nunu nondo ot apatut ku'd wonsoyon?’ kangku. Om boros kad Tuhan do suminimbar, ‘Ingkakat no om mongoi i' do hilo'd Damsik. Om sunudan ko indo do hilo' do koinsanai di korohian do Kinorohingan dot apatut nu'd wonsoyon,’ ka dau. 11 Om kobolou oku nopo do notitihan di tulinau di kosorong kopio'ddi. Om ahako' oku noddi di piro-piro tambalut ku do ruminikot do hilo'd Damsik. 12 Om hilo' nopod Damsik om haro o songulun dot i Ananias o ngaran. Om iyau nopo om tulun dit otorodok do tumanud di Tourat toko' om sumambayang kopio dot id Kinorohingan. Om pusohon kopio iyau do koinsanai'd tulun do Yohudi di poingiyon do hilo'd Damsik. 13 Om rikot noddi iyau do minongoi ontong doho', om ingkakat no iyau do hiri'd toning ku om boro-boros nod poingkaa, ‘Oi tobpinai ku Saulus, kokito ko no kawagu,’ ka dau. Om diiri i' om diiri do huminangog oku, om kokito ku noddi iyau. 14 Om boro-boros noddi iyau doho' do poingkaa, ‘Nopili' ko nod Kinorohingan di taki-aki toko', om koilo ko indo do korohian dau, om kokito ko di Yesus, i susuhuon do Kinorohingan di minomonsoi'd korohian dau, om nokorongou ko'd boros di Yesus dot iyau kopio o minoro-boros diya'. 15 Om iya' no o popinsusui dot id koinsanai'd tulun do poporongou diyolo' di nokito nu om i norongou nu. 16 Ingkakat no do dinondo. Kada' no andad dot alaid, om mokibatis i'. Om sambayang no dot id Tuhan om koidu' ko i' do mantad id koinsanai di dusa nu,’ ka di Ananias,” ka di Paulus.
Sinuhu' do Kinorohingan i Paulus do Monusui'd Boros do Kinorohingan dot id Tulun dit Okon ko' Yohudi
17 Om boros ka kawagu di Paulus, “Om kouli' oku poddi kawagu do hiti'd Yorusalim, om ongoi oku noddi sambayang do hilo'd Walai'd Sasambayangan dot Agayo. Om diri nod noporinta' oku di Rusod do Kinorohingan. 18 Om kokito ku noddi o Tuhan; om boro-boros no iyau doho' do poingkaa, ‘Lomusai no do tumongkiad do mantad hiti'd Yorusalim tu' a' i' ongotumbayaan o tulun do hiti do ponudukan nu do pasal doho',’ ka dau. 19 Om boros kangku do suminimbar, ‘Oi Tuhan, nongkoilo no kopio iyolo' do nokosuang oku dot id piro-piro walai'd sasambayangan do mongoi panangkap diyolo', om mimbobog oku di tulun di nongotumbayaan diya'. 20 Om di pinatai i Stipanus i popinsusui do pasal diya', nga' hino oku nogi' iyoho' do tontok diri, om kosokodung oku nogi' di kinapamatayan di Stipanus diri. Om iyoho' nogi' o tuminamong di pakayan di tulun di minamatai dau,’ kangku. 21 Nga' boro-boros nogi' kawagu o Tuhan doho' do poingkaa, ‘Mongoi nopo, tu' suhuon ku iya' do mongoi do hilo'd kinoiyonon dit id sodu', hilo'd pogialatan do tulun dit okon ko' Yohudi,’ kad Tuhan,” ka di Paulus. 22 Om hiri no o gisom di boros di Paulus do pinokinongou di tulun dot ogumu', om timpuun noddi kawagu iyolo' do minggarang dot opuhod kopio do poingkaa, “Patayon nopo o tulun do miagal dilo'! a' no iyau apatut do poimpasi!” ka no diyolo'. 23 Om sanggarang-garang iyolo', om santantag-tantag do pakayan diyolo', om sontias-tias do pupuk. 24 Om ponuhu' noddi i boyoon do soudor do Rum do tulun do mangangat di Paulus do sumuwang do hiri'd kuta' diri, om ouhot i' kopio iyau mikuwo'd pillapasan do mongilo kopio ondung nokuro tu' sampalak-palak kopio i tulun do Yohudi dot iyau o komoyon. 25 Om kagasai noddi i Paulus do maan daa loposo'. Om boro-boros no i Paulus di soudor di poingkakat do hiri'd toning dau do poingkaa, “Koino-ino i' tuu do loposon o rayat do Rum dot a' po obutusan kopio?” ka dau. 26 Om korongou noddi i soudor di boros di Paulus do miagal diri, om ongoi no iyau solowot di boyoon do soudor, om boro-boros no iyau dau do poingkaa, “Kukuroyon nu nondo iyau'ddi, do rayat i' iyau do Rum?” ka dau. 27 Om ongoi noddi i boyoon do soudor do hiri'd di Paulus, om boro-boros no do minonguhot dau do poingkaa, “Sunudai oku daa, ondung otopot kopio ko do rayat ko'd Rum?” ka dau. Om boros kad Paulus do suminimbar, “Otopot, rayat oku nogi' kopio'd Rum,” ka dau. 28 Boros ka di boyoon do soudor, “Iyoho' nopo om amahal i' o pinambayar ku do suminiliu'd rayat do Rum,” ka dau. Om boros kad Paulus do suminimbar, “Nga' iyoho' nopo om rayat mantad nod Rum tu' rayat id Rum i molohing ku,” ka dau. 29 Om olomus nopoddi i soudor di mongimuhot daa di Paulus do mininsodu', om i boyoon do soudor nga' moddosi diri do nokoilo do rayat do Rum i Paulus, tu' nakagasan no dau iyau.
Pinotimbaba' i Paulus di Gompomutus do Don Tugama'
30 Om sinuabon noddi, om lohowo' no di boyoon do soudor i piro-piro o boyoon dot imam om i Gompomutus do Don Tugama' do tumimung tu' pokiilaan kopio dau ondung nunu o kapasalaan di tulun do Yohudi di Paulus. Om iduwo' noddi i kogos di Paulus om ngoyo' no iyau potimbabao' diyolo' ngai'.
1 Om sonsodo' no di Paulus i piro-piro tulun do gompomutus diri, om boro-boros no iyau diyolo' do poingkaa, “Oi tobpinai-tobpinai ku, a' i' kasala' o kopurimanan do ginawo ku do kowoyo-woyoo' do koposion ku dot id toguang do Kinorohingan do gisom piya'd baino',” ka dau. 2 Nga' ponuhu' noddi i Ananias i Boyoon dot Agayo dot Imam, di tulun di poingkakat do hiri'd toning di Paulus do manapap do kabang di Paulus di minomoros i Paulus do miagal diri. 3 Om boro-boros noddi i Paulus di Boyoon dot Agayo dot imam, “Iya' nga' atantu' nod tapapon id Kinorohingan, iya' i minsorupai-rupai no toomod dot olidang. Om poirikau ko daa'd hiti do momutus doho' do tumanud di Tourat, om inda' ka do tuminolibamban ko i' iya' di Tourat diri tu' minonuhu' ko id tulun do minanapap doho'!” ka dau. 4 Om boros ka di piro-piro tulun dit id toning di Paulus dot id di Paulus, “Mongindaraat ko i' pama di Boyoon dot Agayo dot Imam do Kinorohingan!” ka diyolo'. 5 Om boros kad Paulus do suminimbar, “O, om a' oku i' koilo oi tobpinai- tobpinai dot iyau i Boyoon dot Agayo dot Imam. Otopot i' do haro o nokotulis dot id suang do Buuk do Kinorohingan do poingkaa, ‘Kada' pongindaraat di boyoon do bansa' nu!’ ka,” ka di Paulus. 6 Om kokito noddi di Paulus do tulun do Saduki o wookon di gompomutus, om tulun do Parisi o wookon, om boro-boros noddi iyau diyolo', “Oi tobpinai- tobpinai ku, iyoho' nopo om tulun oku i' do Parisi, om komolohingan ku nga' tulun id Parisi. Om iri no it otumbayaan oku dot apasi kawagu i tulun do napatai o kopomisaraan doho'd hiti,” ka dau. 7 Om koboros poddi di Paulus o miagal diri, om timpuun noddi o pisongkiwalan dot id pialatan di tulun do Parisi om i tulun do Saduki, om kopibahagi' noddi i piro-piro tulun di momumutus diri. 8 (Tu' tulun nopod Saduki om a' otumbayaan dot apasi kawagu o tulun di napatai, om a' iyolo' monongkuyaan do haro o moloikat om haro o rusod. Nga' tulun nopod Parisi om otumbayaan i' do haro ngai' iri.) 9 Om inggayo noddi kopio i pisongkiwalan diri. Om haro'ddi o piro-piro tulun do Parisi di nosiliu do guru do Tourat do miningkakat om suminongkiwal kopio. Boros ka diyolo', “Dahai nopod osorou om aiso' i' o tongokooro' piya do kasalaan diti tulun diti. Tu' haro nogi' doti' o rusod ko' moloikat do minoro-boros dau!” ka diyolo'. 10 Nga' mininggayo iddi kopio i pisongkiwalan diri, om suhuon' noddi di boyoon do soudor i piro-piro soudor do suwai do mongoi popotongkiad di Paulus do mantad id pogialatan di tulun diri, om pokoyoon do hiri'd kuta'. Tu' moddosi i boyoon do soudor do pogiuuhapan diyolo'd mamatai i Paulus. 11 Om totuong noddi, om ingkakat no o Tuhan Yesus do hiri'd toning di Paulus, om boro-boros no dau do poingkaa, “Pogiroto' no o ginawo nu! Tu' mositi' nod poposusui ko do pasal doho' do hilo'd Rum do miagal di pinosusui nu do hiti'd Yorusalim,” ka dau.
Pakat do Tulun do Yohudi do Mamatai di Paulus
12 Om kosuabon noddi om pogiupakat no i tulun do Yohudi do mamatai di Paulus. Om sumpa' no iyolo' dot a' makan om a' minum dot a' po diyolo' apatai i Paulus. 13 Om lobi i' dot apat nohopod o tulun di minogiupakat diri. 14 Om ongoi noddi iyolo' solowot di piro-piro boyoon dot imam om i piro-piro boyoon do tulun do Yohudi. Om boro-boros no iyolo' diyolo' do poingkaa, “Nokosumpa' ngai' no iyahai dot a' mangakan om a' monginum do nunu nopo dot a' po dahai apatai i Paulus. 15 Iyo nopoddi om mogipapakat kou no di Gompomutus do Don Tugama' o monulis do surat do patahakon di boyoon do soudor do Rum do monuhu' dau do papaatod di Paulus dot id dokoyu do miagal-agal dot orohian kawagu kou do monorisid kopio di hal dau. Om awangan nondo dahai do mamatai i Paulus dot a' po iyau korikot do hiti,” ka diyolo'. 16 Om korongou noddi di tanak di tobpinai di Paulus do tondu' i pakat diri. Om ongoi no iyau do hiri'd kuta' do minongoi posunud di Paulus di pakat diri. 17 Om lohowo' noddi di Paulus o songulun di pagawai do soudor om boro-boros no iyau dau, “Pootodo' doho' iti tanak diti do mongoi solowot di boyoon do soudor tu' haro o poboroson dilo' dau,” ka dau. 18 Om pootodo' noddi di pagawai do soudor i tanak diri do hiri'd boyoon di soudor. Om boro-boros no i pagawai do soudor diri dot id boyoon do soudor, “Linohou oku di Paulus, i pointahan diri, do mongoi pomoyo' diti tanak diti do mongoi solowot diya', tu' haro o poboroson dau dot id diya',” ka dau. 19 Om ahako' no di boyoon do soudor i tanak diri om angatai no dau dot iyolo-yolo' do hiri'd sodu-odu', om uhoto' no dau iyau do poingkaa, “Nunu o poboroson nu doho'?” ka dau. 20 Om boros ka di tanak do suminimbar, “Nokopogiupakat no i tulun do Yohudi do monuhu' diya' oi tuan do papaatod di Paulus do suab do ngoyon potimbabao' kawagu di Gompomutus do Don Tugama' do miagal-agal dot orohian kawagu iyolo' do mongimuhot kopio dau. 21 Nga' kada' no kopio pohubayaai i pokionuon diyolo'ddi oi tuan, tu' haro moti' o poingawang do hilo'd ralan do lobi dot apat nohopod o tulun do nokosumpa' no dot a' po iyolo' makan om a' minum dot a' po diyolo' apatai i Paulus. Om posodia' no moti' iyolo'ddi, om magandad po iyolo' dot isimbar nu,” ka di tanak diri. 22 Om boro-boros noddi i boyoon do soudor diri do poingkaa, “Kada' pomisunud dot isai nopo do nokosunud nu iti dot id doho',” ka dau. Om suhuon' noddi dau i tanak diri do muli'.
Pinaatod i Paulus do Hilo'd di Piliks
23 Om pomolohou noddi i boyoon do soudor do duwo o pagawai do soudor, om boro-boros no iyau dot id diyolo' do poingkaa, “Posodiawon no o duwo nahatus o soudor om turu' nohopod o soudor di sumakai'd kuda' om duwo nahatus o soudor di migit do tandus om mongoi i' do hilo'd Kaisaria do jam kosiam do totuong diti. 24 Om posodia' nogi' do kuda' do sakayon di Paulus, om woyoon no iyau kosonong-sonong do gisom do korikot do hilo'd di Gobunor Piliks,” ka dau. 25 Om ponulis noddi i boyoon do soudor diri do surat do poingkaa o pinoboros, 26 “Oi tuan Gobunor Piliks, poporikot oku do tabi' dot id diya', iyoho' i Klaudius Lisias. 27 Iti nopo tulun diti om tinangkap di tulun do Yohudi, om patayon no daa diyolo' iyau. Om korongou ku noddi do rayat i' iyau do Rum om pogiwoyo-woyo' noddi iyahai di soudor do suwai do minongoi popoidu' dau. 28 Om woyoo' ku noddi iyau do mongoi potimbaba' di Gompomutus do Don Tugama', tu' mokiilo kopio oku ondung nunu o kinapasalaan diyolo' dau. 29 Om koilaai noddi kopio dot i pasal dit oturan do tugama' diyolo' o kinapasalaan diyolo' dau. Om aiso' iddi o kasalaan dau di nokointalang kopio do kopomohukuman dau do kapatayon ko' kopogiilan dau. 30 Om haro'ddi o minomisunud doho' di pakat do tulun do Yohudi dot araat dot id dau. Om potilombusai ku nopoddi do monuhu'd tulun do papaatod dau dot id diya' oi tuan Gobunor. Om suhuon' ku noddi i tulun di papasala' dau do mongoi timbaba' diya' do mongoi popoboros di pokisalasayan diyolo', oi tuan,” ka. 31 Om wonsoyo' noddi di piro-piro soudor i pinonuhuan diri. Om ngoyo' no diyolo' i Paulus om woyoo' noddi diyolo' iyau do kuminaa do hilo'd Antipatris do totuong iddi. 32 Om sinuabon noddi om suhuon' no di piro-piro soudor i soudor di songinsakai'd kuda' do minomoyo' di Paulus. Om poguliai noddi di soudor di minamanau do gakod do hiri'd kuta' do pogintirungan. 33 Om korikot poddi i piro-piro soudor di songinsakai'd kuda' diri do hilo'd Kaisaria, om ngoyo' no diyolo' patahako' i surat diri dot id gobunor. Om ngoyo' nogiddi diyolo' pootodo' i Paulus dot id dau. 34 Om kabasa' poddi di gobunor i surat diri, om uhoto' no dau i Paulus ondung hinonggo kopio o pomogunan do tadon dau. Om koilaai noddi di gobunor do mantad i Paulus do hilo'd Kilikia. 35 Om boro-boros no iyau do poingkaa, “Osonong ino! Sorisidon ku indo kopio o hal nu do korikot do hiti i tulun di papasala' diya',” ka dau. Om ponuhu' noddi iyau do manahan di Paulus do hiri'd walai di Raja' Horudis.
Pinasala' di Tulun do Yohudi i Paulus
1 Om limo noddi o tadau do mantad diri, om ongoi no do hilo'd Kaisaria i Ananias i Boyoon dot Agayo dot Imam om i piro-piro boyoon do tulun do Yohudi om songulun o luyar dot i Tortulus o ngaran. Om ongoi no iyolo' timbaba' di Gobunor Piliks om poboroso' no diyolo' i kapasalaan diyolo' di Paulus. 2 Om kolohou poddi i Tortulus do mongoi do hiri'd gulu om boro-boros no iyau do papasala' di Paulus, “Oi tuan Gobunor! Osimbayan nopo o pomogunan dahai do porintaon nu. Om i koiloo' do tuan do momorinta' o nokoinsonong do bansa' dahai. 3 Om kasanangan ngai' nopo dahai iri, om mongunsikou kasai' iyahai diya', om a' kopio dahai pagaan-gaanon iri. 4 Nga' pokionuon ku po daa dot ongoruhai do mokinongou o tuan diti poboroson dahai dot oniba'. 5 Tu' iti nopo tulun diti om noilaan dahai do mamagangau om sumiliu'd koligagaanan. Tu' iyau no o minonimpuun do pogisasaapan do tulun do Yohudi do pointongkop diti pomogunan. Om iyau no o boyoon di pati' do tulun do Nasarit. 6 Om minumbal daa iyau do minonosomu' di Walai'd Sasambayangan dot Agayo, nga' natangkap iddi dahai iyau. Om osorou daa dahai do momisara' dau do tumanud di Tourat dahai. 7 Nga' ngoyo' nogi' di Lisias i boyoon do soudor ahawo' i Paulus do mantad id dahai. 8 Om minonuhu' iyau diti tulun di pinapasala' di Paulus do mongoi timbaba' diya' oi tuan. Ondung sorisidon do mongilo iti tulun diti oi tuan, om orongou nu indo o poboroson dau dot otopot ngai' i pinoboros dahai dot id diya' do pasal dau,” ka. 9 Om papasala' ngai' nopo di Paulus i tulun do Yohudi di hino'd hiri, om popotopot ngai' di pinoboros di Tortulus.
Pinoboros di Paulus dot id toguang di Piliks dot a' Iyau Apatut do Hukuman
10 Om bourai noddi di gobunor i Paulus do popoilo dau do koino-ino i' iyau do moro-boros. Om boro-boros noddi i Paulus do poingkaa, “Nokoilo oku no do piro-piro no o toun do koloidon do tuan do nosiliu do gompomutus do hiti'd pomogunan diti. Om iri noddi o korohian ku'd popoboros dot id toguang do tuan dot a' oku i' apatut do hukuman. 11 Om oilaan id tuan do hopod no om duwo o tadau do gisom dit ongoi oku sambayang do hilo'd Yorusalim. 12 Om a' i' nokoumbal o tulun do Yohudi do nokokito doho' do monokisongkiwal do tongosongulun piya ko' mangangat pod tulun do tumimung do hilo'd Walai'd Sasambayangan dot Agayo ko' hilo' pod sasambayangan do suwai ko' hilo' pod bandar do mogihum do kopogisosongkiwalan. 13 Om a' iddi iyolo' milo do popointalang kopio do katapatan di pononondos diyolo' doho' dot id toguang nu oi tuan. 14 Om okunon ku no dot id toguang do tuan do sumambayang oku i' dot id Kinorohingan di taki-aki dahai do tumanud di ponudukan di Yesus, i komoyon diyolo' do kasala'. Nga' otumbayaan kasai' oku i' ma do koinsanai di nongkotulis dot id suang di Tourat di Musa om id suang di piro-piro buuk do Nabi. 15 Om iyoho' nga' iyo i' diyolo' tu' otumbayaan do posion kawagu'd Kinorohingan o koinsanai di tulun di napatai --- dot i tulun dit ongosonong om i tulun dit angaraat! 16 Om iri no o kapanatasan ku kopio, om osonong i' o kopurimanan do ginawo ku dot id toguang do Kinorohingan om id toguang dot oiyo ko' tulun. 17 Om piro-piro poddi o toun ku dot a' nokoongoi do hilo'd Yorusalim, om poguliai ku nogiddi kawagu do hilo' do minongoi papaatod do tusin do ponulung di bansa' ku, om mongoi papatahak do porsombahan di sumbolion dot id Kinorohingan. 18 Om tontok no di maso ku do momonsoi'ddi do nokito oku diyolo' do hiri'd Walai'd Sasambayangan dot Agayo di nokopongo oku do momolidang do tinan ku do tumanud dit oturan do tugama'. Nga' a' i' ogumu' o tulun do hiri do maso'ddi, om aiso' i' o kagangahan do hiri. 19 suwai ko' haro no o piro-piro tulun do Yohudi di mantad hilo'd Asia do poingamung doho'd hiri. Om ondung haro daa o kapasalaan diyolo' doho' om iyolo' nogi' daa ot apatut do mongoi timbaba' do tuan do papasala' doho'. 20 Ko' pologoson po iti tulun diti do popoboros di noilaan diyolo' do karaaton ku do tontok di pinotimbaba' oku di Gompomutus do Don Tugama'. 21 suwai ko' iti no o boros di pinoboros ku dot id toguang di gompomutus. Boros kangku: Kapamadawahan nopo diyolo' doho' do baino' om i monongkuyaan oku do posion kawagu i tulun di napatai,” kangku. 22 Om boro-boros noddi i Piliks do poingkaa, “Butusan ku nopo o hal diti om korikot i Lisias i boyoon do soudor,” ka dau. Tu' i Piliks nga' ogumu' i' o toilaan do ponudukan do pasal di Yesus. 23 Om suhuon' noddi di Piliks i piro-piro pagawai do soudor di moyo-woyo' di Paulus do madtamong kasai' di Paulus. Nga' a' i' diyolo' oduhan i tongotambalut di Paulus do mongoi papatahak dot id di Paulus di pokionuon dau.
Pinotimbaba' i Paulus Diyo Piliks di Drusila
24 Om katalib poddi o piro-piro tadau do mantad diri, om rikot no i Piliks do mitanud di Drusila i sawo dau, i tulun do Yohudi. Om ponuhu' noddi i Piliks do tulun do mongongoi kawagu di Paulus, om pokinongou nogiddi i Piliks do minonusui i Paulus do pasal do kotumbayaan dot id Kristus Yesus. 25 Nga' tontok di minomoros i Paulus do pasal dit otulid, om momusus do korohian do tinan om pasal do hukuman dot orikot o kopupuson diti pomogunan, om ooris diri i Piliks. Om boro-boros noddi iyau do poingkaa, “Koino-ino nod mamanau ko'ndo. Haro nopo o maso om lohowon tiya' i' kawagu,” ka dau. 26 Om tayon-tayon no daa di Piliks dot onuan iyau di Paulus do tusin do ponisip dau. Om iri noddi o kosoruan dau do monuhu'd tulun do mongoi pangangat di Paulus do monokiboro-boros dau. 27 Nga' katalib poddi o duwo o toun do mantad diri om kosowoliai noddi i Piliks di Porkius Pistus do gobunor, om pologoso' nopoddi di Piliks i Paulus do poinggiil tu' poposonong iyau do ginawo di tulun do Yohudi.
Minangapil i Paulus dot id Kaisar
1 Om tolu noddi o tadau do gisom di kinorikatan di Pistus do hiri'd watas diri, om pamanau no iyau do mantad hilo'd Kaisaria do kuminaa do hilo'd Yorusalim. 2 Om hilo' nod pinorikot di piro-piro boyoon dot imam om i piro-piro boyoon do Yohudi dot id dau i pamadawa diyolo' di Paulus. Om a' nopo iyolo' tumingkod do momolugu-lugut di Pistus, 3 om sumokodung indo iyau diyolo', om monuhu' nondo iyau do popoongoi di Paulus do hilo'd Yorusalim, tu' nokopogiupakat no iyolo' do mamatai di Paulus do hiri'd tanga'd ralan. 4 Nga' boros kad Pistus do suminimbar, “I Paulus nopo om pointahan no do hilo'd Kaisaria. Om iyoho' nga' oruhai nod gumuli' do hilo'. 5 Iyo nopoddi, om pologoson nopo i piro-piro boyoon dokoyu do tumanud doho' do mongoi'd hilo'd Kaisaria om mongoi pamadawa dau ondung nokowonsoi kopio iyau'd sala',” ka dau. 6 Om walu' po doti' ko' hopod o tadau di Pistus do poundorong do hilo'd Yorusalim do mantad diri, om poguliai nogiddi dau do hilo'd Kaisaria. Om sinuabon noddi, om ongoi no iyau do hiri'd tiiyonon do momutus. Om ponuhu' no iyau'd tulun do mongoi potimbaba' diyolo' di Paulus. 7 Om korikot noddi i Paulus, om tutukai nopo iyau di tulun do Yohudi di mantad hilo'd Yorusalim. Om timpuun no iyolo'd mimboros do monondos di Paulus do minomonsoi dit angaraat kopio. Nga' a' i' iyolo' milo kopio'd popointalang dot otopot i pononondos diyolo'ddi. 8 Nga' boro-boros noddi i Paulus do pointalang dot aiso' i' o sala' dau. Boros ka dau, “A' oku i' nokowonsoi'd ongoiso' piya di kotolibamban di Tourat di Musa om a' oku nakasala' dot id Walai'd Sasambayangan dot Agayo, om a' oku nokopomoros dot araat do sumaap di Kaisar do Rum,” ka dau. 9 Om monginsonong-sonong diri i Pistus do ginawo di tulun do Yohudi, om uhoto' noddi dau i Paulus, “Kaakun ko i' do mongoi do hilo'd Yorusalim, om bisaraon ku indod hilo' ondung otopot kopio i pinonondos diyolo' diya'?” ka dau. 10 Nga' boros ka di Paulus do suminimbar, “Pokionuon ku no kopio dot i Kaisar o momisara' diti hal ku. Om hilo' no ot apatut do kopomutusan doho'. Tu' oilaan id tuan dot a' oku i' nakasala' dot id tulun do Yohudi. 11 Ondung tuminolibamban oku dit oturan om nokowonsoi oku'd sala' dit apatut do kopomohukuman doho'd kapatayon, om uhang ku i' do patayon oku. Nga' ondung aiso' o katapatan di pononondos diyolo' doho', om aiso' i' o tongosongulun piya do milo'd papatahak doho' dot id diyolo'. Tu' pokionuon ku po dot i Kaisar o momisara' doho',” ka dau. 12 Om koponokiboro-boros poddi i Pistus di piro-piro ponosihat dau, om boros kaddi dau do suminimbar, “Mokibisara' ko nopo di Kaisar, om mongoi ko no timbaba' di Kaisar,” ka dau.
Pinotimbaba' i Paulus di Agripa om i Borniki
13 Om a' no alaid do mantad diri om korikot no i Raja' Agripa om i Borniki do hilo'd Kaisaria do mongoi suwau di Pistus. 14 Om undorong noddi iyolo' do hilo'd Kaisaria do piro-piro tadau, om posunudo' noddi di Pistus i hal di Paulus dot id di Raja' Agripa. Boros ka di Pistus, “Haro o songulun do pointahan do hiti do tinahan di Piliks. 15 Di nopo di hilo' oku'd Yorusalim, om porikoto' no di piro-piro boyoon dot imam om i piro-piro boyoon do tulun do Yohudi dot id doho' i pamadawa diyolo' do tulun diri. Om sinuhu' oku daa diyolo' do momohukum di tulun diri. 16 Nga' simbaro' ku nopo iyolo' do tulun nopod Rum om a' i' oubas do momohukum di tulun di dawahon dot a' po kopitimbaba' i tulun di dawahon om i tulun di mamadawa dau. Om pologoson nogi' i tulun di dawahon do sumimbar di mamadawa dau. 17 Om kotimung poddi iyolo'd hiti om a' oku no minandad dot alaid, tu' sinuabon poo om ongoi oku nod hiri'd tiiyonon do momutus om ponuhu' oku noddi do mongoi potimbaba' doho' di tulun diri. 18 Om tontok di songingkakat i tulun di mamadawa dau, om aiso' iddi o pinoboros kopio diyolo' do kasalaan di tulun diri do miagal di nosorou ku'd poboroson diyolo'. 19 suwai ko' iri no i mogisuwai-suwai o tosorou diyolo' do pasal do tugama' diyolo', om pasal do songulun i roitan dot i Yesus. Iri nopo tulun diri om napatai no, nga' posonsogon i' di Paulus do poimpasi i tulun diri. 20 Om a' oku noddi koilo ondung poingkuro oku'd mongilo kopio ondung honggo'ddi ot otopot kopio do pasal diri, om uhoto' ku noddi i Paulus ondung kaakun iyau do mongoi do hilo'd Yorusalim om bisaraon indo do hilo'. 21 Nga' pangapil nogiddi i Paulus, om pokionuo' no dau do pogiilon kasai' nopo iyau do gisom do butusan iyau di Kaisar. Om ponuhu' oku noddi do popogiil dau do gisom do haro o maso ku'd papaatod dau do hilo'd di Kaisar,” ka dau. 22 Om boro-boros noddi i Agripa di Pistus, “Iyoho' nga' sirongou i' do poboroson dino tulun,” ka dau. Om boros kad Pistus do suminimbar, “Korongou ko i' bo dau'd suab, oi tuan,” ka dau. 23 Om sinuabon noddi om ongoi no i Raja' Agripa om i Borniki do hiri'd bandar diri, om ogumu' tomod o winonsoi di tulun do hiri do ponuwau diyolo', om minoyo' nogi' di Raja' Agripa om i Borniki i piro-piro boyoon do soudor om i tulun dit ongkipangkat do suminuang do hiri'd pomumutusan. Om ponuhu' noddi i Pistus do tulun do minongoi paatod di Paulus do hiri. 24 Om boro-boros noddi i Pistus, “Oi Raja' Agripa om koinsanai'dti tulun do songintimung. Iti no i tulun di dinawa dot oinsanan o tulun do Yohudi di hilo'd Yorusalim om i hiti. Om sanggarang-garang iyolo' do momoros dot a' apatut do poimpasi iti tulun diti. 25 Nga' aiso' i' o noilaan ku dot ongoiso' piya do nowonsoi dau di kasala' do paantakan do momohukum dau do kapatayon. Nga' iyau i' o minokianu dot i Kaisar o momutus dau. Om pohubayaai ku nopoddi do pootodon iyau do hilo'd di Kaisar. 26 Nga' aiso' poo o milo ku'd potulison dot id suang do surat ku do patahakon di Kaisar do pasal do tulun diti. Om iti noddi o kopotimbabaan ku dau dot id dokoyu ngai' om okon-okon po om id di Raja' Agripa. Om haro indo o potulison ku dot id surat ku, do katalib o pomisaraan diti. 27 Tu' osorou ku nopo om a' i' apatut do monuhu'd paatod do hilo'd di Kaisar do tulun di tinahan dot a' poboroson o kasalaan dau,” ka di Pistus.
Pinoboros di Paulus dot id toguang di Agripa dot Aiso' o Sala' Dau
1 Om boro-boros noddi i Agripa di Paulus, “Pabanaron ko id popoboros do diya'd poboroson,” ka dau. Om pobilido' noddi di Paulus o longon dau om boro-boros no iyau do poingkaa, 2 “Oi Raja' Agripa! Osorou ku dot ountung oku no tu' milo oku i' do popoboros di doho'd poboroson dot id toguang do Raja', do ponimbar ngai' ku di pamadawa do tulun do Yohudi doho'. 3 Om kawagu nogi' nga' koilo i' kopio o Raja' do kaadat-adato' om kosusaan do tulun do Yohudi. Om iri no o kopokionuan ku'd Raja' do kaandad daa do mokinongou diti poboroson ku. 4 Ongkoilo ngai' i' o tulun do Yohudi do kowoyo-woyoon ku do mantad dit okoro' oku po. Om koilo i' iyolo' do hilo'd Yorusalim o kinogoyoon ku do poinrolot di bansa' ku do mantad dit okoro' oku po. 5 Om alaid no iyolo' do koilo doho'. Om ondung orohian daa iyolo' do poposusui, om milo i' iyolo' do monusui do mantad po di gulu po om tulun oku nod Parisi om otorodok oku do tumanud dot oturan do tugama' dahai dot iri ngai' piya it angawagat kopio. 6 Om kopoingkakatan nopoddi doho'd hiti do baino' om bisaraon dot it otumbayaan oku di batos do Kinorohingan di pinabatos dau dot id taki-aki dahai o kopomisaraan. 7 Om iri nogi' i batos diri o soro-sorohon di hopod om duwo o payat dot Israil, om gisom diri do sumambayang iyolo' dot id Kinorohingan do tadau om totuong. Om iri no it otumbayaan oku di batos diri o kapasalaan do tulun do Yohudi doho', oi tuan Raja'. 8 Oi tobpinai-tobpinai, i tulun do Yohudi, nokuro tu' a' kou otumbayaan do posion kawagu'd Kinorohingan i tulun do napatai? 9 Iyoho' nga' nokopomusorou oku i' di gulu po do mositi' nod magayi-ayi' oku do momonsoi'd nunu nopo do sumaap di Yesus, i mantad hilo'd Nasarit diri. 10 Om iyo noddi i winonsoi ku do hilo'd Yorusalim. Om ogumu' o tulun dit otorodok dot id Kinorohingan do pinogiil ku di nakaanu oku do surat kuasa' do mantad id piro-piro boyoon dot imam. Om iyoho' nga' nakaakun nogi' do hukuman iyolo'd kapatayon. 11 Om asaru' oku nod monginggorit diyolo' dot id piro-piro walai'd sasambayangan, do mononsog diyolo' do magada' di kinotumbayaan diyolo'. Om otogod oku no kopio diyolo' gisom do pigusa-gusa' ku nopo iyolo' do mongoi ponginggorit do hilo' piya'd kabandaran do suwai,” ka di Paulus.
Minonusui i Paulus di Nongoumbalan Dau
12 Om boros ka kawagu di Paulus, “Om iri nogi' o kinaangayan ku do hilo'd Damsik, om kinopongigitan ku di surat kuasa' do mantad id piro-piro boyoon dot imam. 13 Nga' tontok di hilo' oku'd tanga'd ralan, di pitangaadau no, om kokito oku nod tulinau do mantad hilo'd tawan dot anawau po ko' ilo tadau do nokotitiu do hiri'd posorili' doho' om id posorili' di tulun di manud-tanud doho', oi tuan Raja'. 14 Om karatu' ngai' nopo iyahai do hiri'd tana'. Om korongou ku noddi do haro o moro-boros doho' dot id suang do boros dot Ibrani do poingkaa, ‘Oi Saulus, Saulus! Nokuro tu' a' ko tumingkod do monginggorit doho'? Orualan ko no motindo dot a' ko no tumingkod do sumaap di ponuhuan di tuan nu,’ ka. 15 Om boro-boros oku nod poingkaa, ‘Isai ko, oi tuan?’ kangku. Om boros kad Tuhan do suminimbar, ‘Iyoho' no i Yesus it inggoriton nu. 16 Tungag no om mingkakat i'! Tu' kinointalangan ku nopo dot id diya'dti om silihon ku iya' do susuhuon ku. Om mositi' nod posusuyon nu dot id tulun do suwai iti nokito nu baino' do pasal doho' om i pointalangon ku dot id diya' do koimbagu. 17 Om poiduwon ku indo iya' do mantad id tulun dot Israil om mantad id tulun dit okon ko' Yohudi. Om suhuon tiya' nondo do kumaa dot id diyolo', 18 do mongoi popoungkalat do mato diyolo', om koidu' i' iyolo' do mantad id totuong om kosuang dot id tanawau, om koidu' iyolo' do mantad id porintaon do rogon, om Kinorohingan nondo o momorinta' diyolo'. Om ongoompunan indo o dusa diyolo' dot i kotumbayaan diyolo' dot id doho' o kaampun, om osiliu indo iyolo'd tulun di songonuon do Kinorohingan do poinsugku' di tulun di nongopili' do Kinorohingan,’ ka dau,” ka di Paulus.
Minonusui i Paulus do Karaja' Dau
19 Om boros ka kawagu di Paulus, “Om ka pogiddi do tuminotos oku nod tuminanud di pinointalang do Kinorohingan dot id doho'ddi, oi Raja' Agripa. 20 Om posondoto' ku nopoddi kopio do pinopotuduk dot id tulun do mositi' nod rumologo iyolo' di dusa diyolo' om papatahak do tinan diyolo' dot id Kinorohingan, om pointalangon nogindo diyolo' o kowoyo-woyoon dot osonong do koilaan do nokorologo kopio iyolo' di dusa diyolo'. Om hilo' nod Damsik o nimpuun ku do potuduk do miagal diri, om hilo' nogiddi'd Yorusalim om pointongkop do Yudia om id pogialatan do tulun dit okon ko' Yohudi. 21 Om iri noddi o kinapanangkapan di tulun do Yohudi doho' di hiri oku'd Walai'd Sasambayangan dot Agayo. Om pokipapatayan oku'ddi diyolo'. 22 Nga' intirungan oku id Kinorohingan do gisom do baino', om hiti oku poddi do poingkakat do poposusui di karaja' ku dot id koinsanai'd tulun --- dot i tulun dit ongkingaran-ngaran om i tulun dit aiso' o ngaran-ngaran. Iti nopo poboroson ku'dti om iri no i nokoboros mantad di piro-piro nabi om i Musa; 23 dot inggoriton nondo i Raja' do Gampamasi di pinabatos do Kinorohingan om iyau no ot id gulu kopio posio' do mantad id kapatayon; om milo indo iyau do popinsusui dot id tulun do Yohudi om id tulun dit okon ko' Yohudi, do milo iyolo'd posion, om iri no o miagal do tanawau dot id diyolo',” ka dau. 24 Om maso pod Paulus do popoboros diri om pamagarang no i Pistus do minoro-boros do poingkaa, “Mulau ko indo oi Paulus! Ino i kogumuon do toilaan nu o nokoulau diya'!” ka dau. 25 Nga' boros kad Paulus do suminimbar, “A' oku i' mulau, oi tuan , suwai ko' popoboros oku i' do boros dit otopot om i mantad id pomusarahan di kopunong. 26 Iya' piya oi Raja' Agripa nga' koilo i' do koinsanai'd hal diri. Om iti no o katama-tama' ku do moro-boros kopio dot id toguang do tuan Raja'. Oilaan ku i' kopio dot aiso' o tongoiso' piya do hal diri dot a' do tuan Raja' oilaan, tu' koinsanai'ddi om okon i' ko' id kinoiyonon di poillisok do nosiliu. 27 Otumbayaan ko i' di pinoboros di piro-piro nabi, oi Raja' Agripa? Osorou ku dot otumbayaan ko i'!” ka di Paulus. 28 Om boro-boros no i Agripa di Paulus, “Ondos nu nopo daa om oruhai ko do posiliu doho'd tulun do Kristian?” ka dau. 29 Om boros kad Paulus do suminimbar, “Mulong piya dot oruhai ko' alaid o maso nga' pokionuon ku i' dot id Kinorohingan dot iya' om koinsanai diti tulun do nokorongou doho' do moro-boros do dinondo do koiyo ngai' doho' --- nga' a' po daa'ndo akagasan do miagal diti,” ka dau. 30 Om ingkakat noddi i raja', om i gobunor om i Borniki om koinsanai di tulun do suwai. 31 Om kosoliwan poddi iyolo', om pogiboro-boros no iyolo', “Aiso' i' o tongoiso' piya'd nowonsoi diti tulun diti do kopomohukuman dau do kapatayon ko' kopogiilan po dau,” ka diyolo'. 32 Om boro-boros noddi i Agripa di Pistus do poingkaa, “Kosoliwan no bo daa iti tulun diti dot a' daa iyau minangapil do mongoi pokibutus di Kaisar,” ka dau.
Minongoi i Paulus do Hilo'd Rum
1 Om katantu' poddi do pokoyoon iyahai do hilo'd Italia, om patahako' noddi diyolo' i Paulus om i tulun do suwai di songinggiil dot id di Yulius, i boyoon do posukan do soudor di Kaisar. 2 Om sakai noddi iyahai di kapal do rahat, i mantad hilo'd Adramitium, om woyo' noddi iyahai di kapal diri, i nokosodia' nod mamanau do mongoi dot id piro-piro podompiran do kapal do rahat dot id pomogunan dot Asia. Om i Aristarkus, i tulun do Makidunia, i mantad hilo'd Tosolunika nga' suminakai nogi' di kapal di sinakai dahai. 3 Om sinuabon noddi om korikot no iyahai do hilo'd Sidon. Om osonong tomod i Yulius dot id di Paulus, om pologoso' noddi dau i Paulus do minongoi solowot di kongoombolutan di Paulus om oonuan i' diyolo' iyau di pokionuon dau. 4 Om pamanau noddi iyahai do mantad hiri do poinsakai di kapal do rahat. Om asasakan diri dahai i tongus, om susui noddi iyahai do tisan di pulou Siprus, tu' a' adalaan nod kasasak di tongus o hiri. 5 Om waya' noddi iyahai do hiri'd rahat dit id hapak do Kilikia om Pampilia. Om korikot noddi iyahai do hilo'd Mira, i hilo'd pomogunan do Likia. 6 Om hilo' no o kinokitanan di pagawai do soudor do kapal do mantad hilo'd Aliksandria do pakayaan do hilo'd Italia. Om suhuon' noddi iyahai dau do mongoi sakai di kapal diri. 7 Om haro iddi o piro-piro tadau dot ogonoi no kopio i kapal do mamanau. Om alaid noddi om korikot iddi iyahai do hilo'd bandar do Knidus dot osusa' piya kopio i pinamanahan dahai. Om a' noddi iyahai milo do maya' di ralan mantad tu' opuhod kasai' po i tongus. Om waya' noddi iyahai do ponong id salatan di pulou do Krita, i kawaya' do hilo'd Tanjung Salmoni, om a' i' oontok kopio di tongus. 8 Om osusa' tomod iyahai do suminusui do hiri'd tisan di pulou'ddi. Om alaid noddi om korikot iddi iyahai do hiri'd iso' o kinoiyonon di roitan do Podompiran dit Olumis, it osomok nod hilo'd bandar do Lasia. 9 Om tontok nopoddi om nakatalib no o Tadau dot Agayo di Kopongompunan do Dusa di ramayon do tulun do Yohudi. Om alaid kopio iyahai, gisom do norikot noddi i maso di haro o koligagaanan do mamanau. Om boro-boros noddi i Paulus do minonosihat diyolo', 10 “Oi tobpinai-tobpinai, osorou ku dot agayo kopio moti' o koligagaanan do lumombus toko' nod mamanau. Tu' ondung lumombus toko'dti, om okon nopo ko' iti no suang diti kapal om iti kapal ot araag, nga' iyati' piya nga' apatai i'!” ka dau. 11 Nga' a' i' monongkuyaan i pagawai do soudor di boros di Paulus, tu' monongkuyaan nogi' iyau di boros di papamanau di kapal om i boyoon di kapal. 12 Om kawagu po nga' a' osonong o kapal do poindampir do hiri'd podompiran diri do tontok do maso'd osogit. Om iri no o kinokuwaan do kogumuan no di tulun di songingkaraja' do hiri'd kapal dot orohian do lumombus do mamanau om kotongkiad i' di podompiran diri, tu' mokiririkot iyolo' do hilo'd Piniks, om hilo' indo o tundorongon diyolo' do solinaid di maso dot osogit. Piniks nopo om pododompiran do kapal do rahat do hilo'd Krita di potimbaba' do ponong id salatan do ponong id kotonobon om potimbaba' do ponong id utara do ponong id kotonobon.
Tongus dot Opuhod do Hiri'd Rahat
13 Om tontok nopoddi om a' i' opuhod no i ribut do mantad id salatan. Om osorou nopo di songingkaraja' do hiri'd kapal nga' milo no iyolo'd lumombus kawagu do mamanau. Om gayato' noddi diyolo' i basi' di pinomolimbagat di kapal, om pamanau nod suminusui di tisan di pulou do Krita. 14 Nga' a' po alaid do mantad diri, om rikot no o tongus dot opuhod kopio --- i tongus do roitan do Tongus dot Utara do ponong id Koulayon --- do mantad hiri'd pulou, 15 om koontok noddi i kapal di sinakai dahai. Om a' noddi kasasak di tongus i kapal om pologoso' nopoddi dahai i kapal do rumulun do kowoyo' di tongus. 16 Om a' daa'ddi iyahai noontok kopio di tongus di nakawaya' iyahai do ponong id salatan di pulou Kauda dit okooro'. Om hilo' no dot osusa' tomod iyahai do minanganu di parau' di kapal dahai. 17 Om kasakai poddi i parau' di kapal, om koruto' nod tali i parau' do pomogirot di kapal. Om poinsiribao' no i layar di kapal tu' ooris do kosorod do hiri'd togis dit aralom di hilo'd Sirtis, om pologoso' nopoddi i kapal do kowoyo' di tongus. 18 Om a' nopoddi tumingkod i tongus dot opuhod om popintaamo' noddi do hiri'd rahat i suang di kapal di sinuabon. 19 Om tadau noddi kawagu om popintaamo' no di songingkaraja' do hiri'd kapal do hiri'd rahat i piro-piro pakakas di kapal. 20 Om otuong nopoddi o kokitanan diti pomogunan do piro-piro tadau, tu' a' nopo okito o tulinau do tadau, om a' okito o rombituon, om a' tumingkod o tongus dot opuhod do koontok di kapal di sinakai dahai. Om a' noddi dahai osorou dot apasi po iyahai. 21 Om haro noddi o piro-piro tadau dot a' makan i tulun do hiri. Om ongoi noddi i Paulus ingkakat dot id pogialatan diyolo', om boro-boros no iyau do poingkaa, “Ondung tuminanud kou daa di boros ku'ddi oi tobpinai-tobpinai, om a' daa luminombus do minamanau do mantad hilo'd Krita, om a' i' daa araag iti kapal om a' haro ot orubat. 22 Nga' baino' piya nga' suhuon ku i' iyokoyu do popogirot do ginawo. Tu' aiso' i' ot apatai dot ongoiso' piya o tulun dot id pogialatan dokoyu, oi tobpinai-tobpinai; suwai ko' iti no kapal ot araag. 23 Tu' di nopo kosodop om ruminikot dot id doho' i moloikat di mantad id Kinorohingan di tukuon ku om i sanganu doho'. 24 Om minoro-boros i moloikat diri dot id doho' do poingkaa, ‘Oi Paulus, kada' kooris! Tu' kotimbaba' kasai' ko i' di Kaisar. Om angapasi ngai' i' ilo tulun di poinsugku' diya' do hiti'd kapal tu' osianan i' o Kinorohingan diya',’ ka. 25 Iyo nopoddi, oi tobpinai-tobpinai, om pogiroto' no dokoyu o ginawo dokoyu! Tu' otumbayaan oku id Kinorohingan dot owonsoi ngai' indo o miagal di pinoboros dau dot id doho'. 26 Nga' koimpit toko' nondo dot id tisan dot iso' o pulou,” ka dau. 27 Om korikot noddi i totuong do kohopod om apat do mimboriud nopo iyahai dot orulun do hiri'd Rahat do Tanga'. Om maha' di pitangatuong no matuu'ddi om kopurimanai no di tulun di songingkaraja' do hiri'd kapal do miririkot dot id katanaan i kapal. 28 Om porongulu noddi iyolo'd tali do hiri'd rahat do pinakagasan do watu do ponipong diyolo' ondung songkuro po o korolomo' di rahat. Om koilaai noddi diyolo' dot oruhai nod apat nohopod o mito do korolomo' di rahat. Om a' po alaid do mantad diri, om tipongo' no diyolo' kawagu, om oruhai nod tolu nohopod o mito do korolomo' di rahat do hiri. 29 Om polintuhuno' noddi diyolo' ot apat di basi' do pomolimbagat di kapal do mantad ponong id tohuri, tu' ooris iyolo' do kosorod do watu i kapal. Om orohian nopo daa'ddi iyahai dot oruhai'd osuab. 30 Nga' lumisok-lisok i' daa i tulun di songingkaraja' do hiri'd kapal do mogidu' do mantad hiri'd kapal. Om pouluho' no diyolo' i parau' do pinopolintuhun do hiri'd rahat, do miagal-agal do popoulu di basi' di pomolimbagat di kapal di ponong id gulu. 31 Nga' boro-boros noddi i Paulus di pagawai do soudor om i piro-piro soudor do suwai, “Ondung mogidu' do mantad hiti'd kapal ilo tulun dilo songingkaraja' do hiti'd kapal, om angapatai ngai' kou no, oi tobpinai-tobpinai,” ka dau. 32 Om rantaso' noddi di piro-piro soudor i tali di pinongogos di parau'ddi om korulun no i parau'. 33 Om pangangat noddi i Paulus diyolo' do makan di motingkosuab no. Om boro-boros no i Paulus diyolo', “Hopod noddi om apat o tadau dot a' kou minakan do magandad kou dot otingkod iti kosusaan. 34 Nga' mangangat oku dokoyu'd makan dot ongokooro', om okoris kou i' kawagu. Tu' angapasi ngai' kou indo om a' kou i' okurai-kurayan,” ka dau. 35 Om koboros poddi di Paulus o miagal diri, om anu no iyau di roti om sambayang no iyau do minongunsikou'd Tuhan dot id toguang diyolo'. Om potikido' no dau i roti om akan noddi iyolo'. 36 Om ongosonong-sonong nogiddi o topurimanan diyolo' om torungak ngai' nogiddi iyolo' do minakan. 37 Kogumuon' nopo di tulun do hiri'd kapal diri om duwo nahatus om turu' nohopod om onom o tulun. 38 Om kangaakan poddi ngai' iyolo' do gisom do nongoiyahan, om popintaamo' nogiddi diyolo' do hiri'd rahat i gandum di poinsuang di kapal do monginggaan-gaan di kapal.
Naraag i Kapal
39 Om anawau poddi, om kokito no di tulun di songingkaraja' do hiri'd kapal o katanaan, nga' a' diyolo' oilaan ondung nunu o ngaran di kinoiyonon diri. Om kokito no diyolo' o suwok om i tisan di suwok, om osorou'ddi diyolo' do podompiron i kapal do hiri do milo noo. 40 Om rantaso' ngai' nopo diyolo' i tali di pinongogos di pinomolimbagat, om pologoso' nopoddi i pinomolimbagat do nolonsod do hiri'd rahat. Om iyado' diyolo' i tali di pinongogos di komudi', om ungkalado' no diyolo' i layar di ponong id gulu di kapal om kowoyo' i' di ribut i kapal do koimpit do ponong id tisan. 41 Nga' kosorod nogi' i kapal do hiri'd pasir. Om kasangat noddi i ponong id gulu om a' nopoddi koinsud, om iri no i ponong id tohuri om karaag nopo do noontok di tumbak dit opuhod tomod. 42 Om pokipapatayan daa'ddi di piro-piro soudor i tulun di mantad id giil, tu' moddosi iyolo' do kumaau ngai' i tulun diri om kotindal nopondo om mogidu' nondo iyolo'. 43 Nga' oduhai noddi di pagawai di soudor i piro-piro soudor do momonsoi do miagal diri, tu' orohian iyau dot apasi i Paulus. Om suhuon' ngai' noddi dau i tulun di koilo'd kumaau do mogulu'd kumaau do mongoi do hiri'd tisan. 44 Om iri wokon nga' sumusuhut nogindo do kumabai do papan ko' i kinaraagan di kapal. Om iyo noddi o winonsoi dahai do gisom dot ongosonong ngai' iyahai do nokorikot do hiri'd tindal.
Hilo'd Malta
1 Om kotindal ngai' poddi iyahai, om koilaai nogiddi dahai do Malta o ngaran di pulou'ddi. 2 Iri nopo tulun do hiri om ongosuwau i' kopio dahai, om tulungo' no iyahai diyolo'. Om podsiduwai no iyahai diyolo', tu' tumimpuun nod rumasam om osogit diri kopio. 3 Om ongoi noddi i Paulus ponimung do kayu, om poudungo' no dau i kayu'ddi do hiri'd tapui. Om daamot pod Paulus do mogudung om urilai no o tiso' o tulanut do nouhub di tapui, om tinduko' no o longon di Paulus. 4 Om di nopoddi nokito di tulun do hiri'd pulou'ddi do pointaid i tulanut do hiri'd longon di Paulus, om pogiboro-boros no iyolo', “Tulun no kopio iyau do gampamatai, tu' mulong piya do nokoidu' no iyau do mantad id koligagaanan do hilo'd rahat nga' a' i' di ponokokinorohingan di roitan dot Otulid pologoson do poimpasi iyau,” ka diyolo'. 5 Nga' tantago' noddi di Paulus i tulanut diri do hiri'd tapui om aiso' i' o toruol dot opurimanan dau. 6 Nga' ondos nopo daa diyolo' om lumonit nondo i longon di Paulus ko' sigog nopo om humunduk no iyau do matai. Om alaid noddi iyolo'd poingandad nga' aiso' iddi o nunu-nunu do nosiliu dot id di Paulus. Om kosuwai noddi o tosorou diyolo', om pomoros no iyolo' dot i Paulus nopo om ponokokinorohingan i'. 7 Hiri nopod somok do kinoiyonon diri om haro o tana' dot i Publius o sanganu, i boyoon do pagawai do hiri'd pulou'ddi. Om osonong kopio o ginawo dau do pinapasalakoi dahai om tolu diri o tadau do koloido' dahai do poundorong do hiri'd dau. 8 Tontok nopoddi om sumakit i tapa' dau do sogiton om oruak o nakan. Om ongoi noddi i Paulus ontong di tapa' di Publius di sumakit diri, om sambayang no iyau om sukabayai no dau iyau. Om kolingasai noddi iyau. 9 Om kosiliu poddi o miagal diri om rikot noddi dot id di Paulus o koinsanai di tulun di sumakit do hiri'd pulou'ddi. Om kolingasai ngai' nopoddi iyolo'. 10 Om ogumu'ddi o pinatahak-tahak diyolo' dahai, om pootodo' noddi diyolo' do hiri'd kapal di minamanau iyahai o koinsanai di gunaon dahai dot id tindalanon.
Mantad Hilo'd Malta om Kuminaa do Hilo'd Rum
11 Om tolu poddi o tulan do koloido' dahai do poundorong do hiri'd pulou'ddi, om pamanau nogiddi iyahai do mantad hiri do suminakai'd kapal do rahat di mantad hilo'd Aliksandria, i poindampir do hiri'd pulou'ddi do solinaid di maso dot osogit. Ngaran nopoddi kapal diri om, “Ponokokinorohingan di Miapid, i Kastur om i Poluks.” 12 Om dampir no iyahai do hiri'd bandar do Sirakusa om tolu o tadau dahai do poundorong do hiri. 13 Om mantad nod hilo' om pamanau no iyahau kawagu do suminusui di tisan do rahat do gisom do nokorikot iyahai do hilo'd bandar do Rigium. Om rikot po o tongus do mantad id salatan di sinuabon, om duwo poddi o tadau dahai'd manau-panau, om korikot no iyahai do hilo'd bandar do Putiyoli. 14 Om hilo' nod nokosolowot iyahai do piro-piro tulun di notumbayaan di Yesus. Om angatai noddi iyahai diyolo' do minundorong do hilo' do solinaid do sominggu'. Om lombus nogiddi iyahai do kuminaa do hilo'd Rum. 15 Om korongou noddi i tulun do Rum di notumbayaan di Yesus do habar dahai, om ongoi noddi iyolo' do hiri'd pasar di roitan do Pasar dot Apius om hiri'd walai di roitan do Tolu o Walai'd Sisiwaan do minongoi ruba' dahai. Om pongunsikou noddi i Paulus do Kinorohingan do mikuwo'd nokogirot o ginawo dau di nokosolowot iyau diyolo'.
Hilo'd Rum
16 Om tontok di nokorikot iyahai do hilo'd Rum, om pologoso' noddi i Paulus dot iso-iso', nga' tinamangan i' iyau do songulun o soudor. 17 Om tolu noddi o tadau do mantad diri, om pomolohou no i Paulus di piro-piro boyoon do tulun do Yohudi di poundorong do hilo'. Om kotimung poddi iyolo', om boro-boros no i Paulus, “Oi tobpinai-tobpinai! Tinangkap oku do hilo'd Yorusalim om pinatahak oku dot id tulun do Rum do mulong piya dot aiso' o nowonsoi ku di kasala' dot id bansa' toko' om a' oku tuminolibamban di tadat di koubasanan di notungkusan toko' do mantad id taki-aki toko'. 18 Om kosorisid poddi kopio diyolo' i hal ku om aiso' iddi o tiso' po do noilaan diyolo' do kasalaan ku dit apatut do kopomohukuman doho' do kapatayon, om poiduwo oku i' daa'ddi diyolo'. 19 Nga' a' ngai' nopo mangakun i tulun do Yohudi, om kasansagai oku noddi do mangapil do mokibisara' di Kaisar do Rum, dot a' oku piya papasala' do bansa' ku. 20 Om iri no o kinapamalahawan ku dokoyu, om koponokiboro-boros oku i' dokoyu, tu' iri no i Gampamasi dit andad-andadon do bansa' dot Israil o kinapangagasan doho'd rantai,” ka dau. 21 Om boros kaddi diyolo', “Aiso' i' o surat do naramit dahai do mantad hilo'd Yudia do pasal diya'. Om aiso' nogi' o tongosongulun piya do mantad hilo'd Yudia do nokorikot do hiti do minonusui do pasal diya' ko' popoboros do kasalaan nu. 22 Nga' orohian nogi' iyahai do mokinongou do pasal do kinotumbayaan nu, tu' nokorongou ngai' no iyahai do pasalaon do tulun i ponudukan di tinanud nu,” ka diyolo'. 23 Om tontuo' noddi diyolo' om i Paulus ot insan o tadau do kopogititimungan diyolo'. Om rikot noddi o tulun dot ogumu' do hiri'd niyonon di Paulus do tontok diri. Om posusuyo' noddi di Paulus dot id diyolo' o habar do pasal do Pomorintaan do Kinorohingan. Om umbal noddi i Paulus do monotos do mangangat diyolo' dot otumbayaan di Yesus dot it ayat di nongkotulis dot id suang di Tourat di Musa om id suang di piro-piro buuk do Nabi o pinoimpahan dau do mangangat diyolo'. Om kasadapai nopo i Paulus do minonusui'ddi. 24 Om haro'ddi o piro-piro diyolo' do notumbayaan di boros dau, nga iri nopo tulun do suwai om a' i' notumbayaan. 25 Om mogisuwai-suwai nopoddi o tosorou diyolo'. Om tongkiad noddi iyolo' do mantad hiri do nokoboros di Paulus dot id diyolo' o poingkaa, “Otopot no i nokoboros do Rusod do Kinorohingan di pinolombus di Nabi Yosaya, dot id taki-aki dokoyu do poingkaa, 26 Boros kad Kinorohingan, ‘Ongoi no do hilo'd bansa'dti om poboroson no iti: Mokinongou kou i' daa kopio, nga' a' kou i' kosuhut; om poingontong kou i' nga' a' kou i' koilo ondung nunu kopio it osiliu. 27 Tu' iti nopo bansa'dti om nokokodou no o ginawo, om tolingo nga' nobosuk om mato nga' pinoungkodom. Iyo noddi o nosiliu, om a' indo kokito o mato diyolo'. om a' korongou o tolingo diyolo', om a' kosuhut o pomusarahan diyolo', om a' indo iyolo' gumuli' dot id doho', om a' ku iyolo' olingasan,’ ka,” ka di Paulus. 28 Om pomoros poddi kawagu i Paulus do poingkaa, “Ilaai no dokoyu, oi tobpinai-tobpinai, dot iri nopo habar do pasal do koposion do mantad id Kinorohingan om nokosusui no dot id tulun dit okon ko' Yohudi. Om tumanud indo iyolo'ddi!” ka dau. 29 Om koboros poddi di Paulus iri, om tongkiad no i tulun do Yohudi do mantad hiri'd kinoiyonon diri om pogisosongkiwal no iyolo'. 30 Om duwo diri o toun di Paulus do poundorong do hiri'd walai di siniwaan dau do hilo'd Rum. Om posolokoyon ngai' nopo dau i tulun di mongoi pogkorumo dau. 31 Om poboroson nopo dau dot id diyolo' o pasal do Pomorintaan do Kinorohingan, om pasal di Tuhan Yesus Kristus. Om a' i' iyau ooris do poposusui'ddi. Om osimbayan nopo i Paulus do momonsoi'd miagal diri om aiso' i' o kaantob dau.
1 Oi tobpinai-tobpinai ngai' ku do hiti'd Rum, i kosianan do Kinorohingan om i nolohou'd Kinorohingan do sumiliu'd tulun di songonuon dau. Nopili' oku no om natantu' oku nod Kinorohingan do sumiliu'd tulun di popinsusui di Habar dot Osonong do mantad id Kinorohingan. 2 Iri nopo Habar dot Osonong diri, om nakabatos mantad nod Kinorohingan do mantad di gulu po do pinolombus di piro-piro o nabi dau om nokotulis dot id suang do Buuk do Kinorohingan. 3 Iri nopo Habar dot Osonong diri nga' pasal di Tanak do Kinorohingan, i Yesus Kristus, i Tuhan toko'. Tumanud nopo do kowoyo-woyoo' do don tulun om sinakagon iyau di Daud. 4 Nga' tumanud no do kowoyo-woyoo' do don rusod, om nokointalang i' kopio do Tanak iyau'd Kinorohingan. Om iri no i napasi kawagu iyau do mantad id kapatayon dot i kuasa' dit aiso' o koiyo o minamasi, o pinopointalang dot otopot kopio iti. 5 Om Kinorohingan no o minonuhu' dau do manahak doho' do nipuhawang do sumiliu'd rasul, om kapangangat oku indod tulun do mantad id koinsanai'd bansa', om monongkuyaan i' iyolo' om mumboyo', om iti no o pomusou ku'd Kristus. 6 Komoyon nopo do koinsanai'd bansa' nga' iyokoyu ngai' no i hiti'd Rum; tu' iyokoyu nga' nolohou i' do sumiliu'd tulun di songonuon di Yesus Kristus. 7 Om iri no o nokoponulisan ku'dti dot id dokoyu. Pokionuon ku no o Kinorohingan, i Tapa' toko' om i Tuhan Yesus Kristus, do manahak dokoyu'd barakat om kosimbayanan do ginawo.
Sambayang do Mongunsikou
8 Id gulu nopo kopio om mongunsikou oku'd Kinorohingan, dot iyokoyu ngai' o kopongunsikahan ku. Om i Yesus Kristus no o pinopomilo doho'd mongunsikou. Tu' nokorongou ngai' no o hiti'd pomogunan dot otumbayaan kopio kou di Kristus. 9 Osorou kasai' ku i' iyokoyu do tontok do sumambayang oku. Om Kinorohingan no o sasi' dot otopot i pinoboros ku. Iyau no o Kinorohingan di pogobi-obian ku do mikuwo'd aayi-ayi' kopio o ginawo ku do popinsusui di Habar dot Osonong do pasal di Tanak dau. 10 Om pokionuon ku no kopio o Kinorohingan do potumboyo' doho' do baino' do mongoi ompuya' dokoyu. 11 Tu' orohian oku no kopio do kosolowot dokoyu, om obohogian ku i' iyokoyu di nipuhawang do mantad id Rusod do Kinorohingan do popogirot do ginawo dokoyu. 12 Om kopogisokodung-kodung toko' indo, tu' nongotumbayaan ngai' toko' no di Yesus Kristus. 13 Oi tobpinai-tobpinai ku! Orohian oku do koilo kou dot asaru' oku no daa do siongoi pogolimbuha' dokoyu, nga' haro kasai' nopo o koontobon. Orohian oku do haro kopio o tua' do karaja' ku dit okito dot id pogialatan dokoyu iyokoyu, do miagal di tua' do karaja' ku dot id pogialatan do tulun dit okon ko' Yohudi dot id piro-piro o kinoiyonon do suwai. 14 Tu' haro i' o tonggungan ku dot id koinsanai'd bansa': id tulun di nakamaju' no om id tulun dit a' po nakamaju', om id tulun di kitoilaan om id tulun dit aiso' o toilaan. 15 Om iri no o kagayaan kopio'd ginawo ku do mongoi poposusui di Habar dot Osonong dot id dokoyu i poingiyon do hiti'd Rum.
Kuasa' di Habar dot Osonong
16 Monongkuyaan oku i' kopio di Habar dot Osonong diri, tu' iri no i habar diri o pakakas do Kinorohingan do mamasi do koinsanai'd tulun dit otumbayaan: iri po i tulun do Yohudi, om iri nogindo i tulun dot okon ko' Yohudi. 17 Tu' iri no i Habar dot Osonong diri o pinawayaan do Kinorohingan do popoilo do ralan dau do popoulud kawagu'd tulun dot id dau; ralan nopo om monongkuyaan do Kinorohingan, do mantad di timpuunon om gisom do kopupuson. Iri nopo om miagal di nokotulis dot id suang do Buuk do Kinorohingan do poingkaa, “Tulun nopo di monongkuyaan do Kinorohingan do gisom do koulud kawagu iyau dot id Kinorohingan, om apasi no!” ka.
Kasalaan do Tulun
18 Nokointalang no o kototogod do Kinorohingan do mantad hilo'd surga dot id koinsanai'd dusa om karaaton do tulun, tu' iri no i karaaton o mangantob do tulun do mintutun di ponudukan dot otopot do pasal do Kinorohingan. 19 Iri nopo i milo'd tulun dot oilaan do pasal do Kinorohingan om atarang no dot id suang do ginawo'd tulun, tu' nokointalang nod Kinorohingan iri dot id tulun. 20 Mantad poddi wonsoyo' id Kinorohingan iti pomogunan, om iri nopo i kowoyo-woyoo' do Kinorohingan dit a' okito, i kowoyo'-woyoo' dau do dong Kinorohingan om i kuasa' dau dit aiso' o kopupuson, om osuhutan no daa'd tulun do mantad id koinsanai di nongowonsoi'd Kinorohingan. Iyo nopoddi om aiso' no kopio o paantakan do tulun do popotopot do tinan dau. 21 Kotutun i' daa o tulun do Kinorohingan, nga' a' id tulun pinusou o Kinorohingan do miagal dit apatut do pomumusou'd Kinorohingan, om a' iyolo' minongunsikou dau. Tu' mininsorou nogi' o tulun di dong kababasug; om kasala' ngai' ot osorou'd ginawo diyolo'. 22 Mingilo-ilo daa iyolo', nga' otopot nopo kopio om basug tomod i' iyolo'. 23 Okon nogi' ko' Kinorohingan di poimpasi kasai' o tukuon diyolo', suwai ko' iri nogi' i tininganak di pinoiyo-iyo'd tulun, om tombolog, om nintorusan dit apat o gakod, om i nintorusan di sangkamang-kamang, tu' matai i' o tukuon diyolo'. 24 Gowoi poddi om pologoso' nopod Kinorohingan iyolo' dot oporinta' di korohian do ginawo diyolo' do momonsoi dit angaraat, gisom do momonsoi nopoddi iyolo' di kointingayam dot id sompi' ko' iyolo' ngai'. 25 Sinowolian nogi' diyolo' dit a' otopot i Kinorohingan dit otopot. Okon nogi' ko' i Minomonsoi, suwai ko' iri nogi' i winonsoi o tukuon om pogobi-obian diyolo'. Om otopot nopo kopio om iri nogi' i minomonsoi ot apatut do royohon do gisom dot alaid! Amin. 26 Om pologoso' nopoddi do Kinorohingan o tulun do tumanud di korohian do tinan diyolo' di kointingayam kopio, tu' iyo iddi o winonsoi diyolo'. Om iri poddi tongoondu' diyolo' nga' a' nogiddi muhang do tongokusai, do miagal di koubasanan do tulun, suwai ko' muhang nogiddi iyolo' di sompi' ko' tongoondu'. 27 Om iri tongokusai nga' iyo iddi; tu' a' nogiddi iyolo' sitoning do tongoondu' om momonsoi dit apatut do wonsoyon dot id pialatan do kusai om tondu', nga' muhang nogiddi kopio iyolo' om sitoning iyolo' di sompi' ko' tongokusai. Om momonsoi'ddi i tongokusai di wonsoyon do kointingayam kopio dot id oiyo ko' kusai, om gowoi poddi om hinukuman iyolo' do miontok di winonsoi diyolo' dit araat diri. 28 Om iri no i ginawo'd tulun do momusorou dot a' minog do mintutun do Kinorohingan o kinapalagasan do Kinorohingan dot araag o pomusarahan diyolo', gisom do mingwonsoi'ddi iyolo' dit a' daa diyolo' apatut do wonsoyon. 29 Noponu' po dit angaraat om it a' ongotopot o ginawo diyolo', om noponu' do katamahao', om kararaat, om koosol; om sipamatai nopo iyolo', om monokiumang, om magakal om sisuli'. Om orohian iyolo' do mongumang-umang do tulun do suwai, 30 om orohian do mongindaraat do ngaran do tulun do suwai; om asawat o ginawo diyolo' om minggayo-gayo, om araatan do Kinorohingan om orohian do mingudut. Oilo tomod daa iyolo' do mogihum do ralan do suwai do momonsoi dit araat. Sumongkiwal iyolo' do molohing; 31 om a' iyolo' mamadul do tulun do suwai; om a' iyolo' sumulung do batos om aiso' o kosianan om a' olisiu do tulun do suwai. 32 Om koilo i' iyolo', do tumanud nopo dot oturan do Kinorohingan, om tulun nopo di mingwonsoi'd miagal diri om apatut no do hukuman do kapatayon. Nga' iyo piya'ddi, nga' mingwonsoi i' iyolo' do miagal diri; om kosokodung iyolo'd tulun do suwai do mingwonsoi'd miagal diri.
Hukuman do Mantad id Kinorohingan
1 Iyo nopoddi, oi tobpinai-tobpinai ku, om isai kopio ko daa iya', oi tobpinai, tu' papasala' ko'd tulun do suwai? Aiso' i' o nunu-nunu nu do paantakan nu do popotopot do tinan nu! Tu' ondung papasala' ko'd tulun do suwai, om momonsoi ko i' iya' do miagal di wonsoyon diyolo', om paparatu' ko no do hukuman dot id tinan nu. 2 Om oilaan toko' i' dot ondung porotuan do Kinorohingan do hukuman o tulun di mingwonsoi'd miagal diri, om otulid i' i pinomutus do Kinorohingan diri. 3 Nga' iyokoyu nopo, oi tobpinai-tobpinai ku, om mingwonsoi kou i' di pingwonsoyon di tulun di pasalaon dokoyu! Ondos daa dokoyu om koidu' kou iyokoyu do mantad id hukuman do Kinorohingan. 4 Ko' pagaan-gaanon po dokoyu i kopuhawango'd Kinorohingan om i kosonongo' dau om i kolonuto'd ginawo dau dit a' ogina-gina'? Atantu' no do koilo kou i' do pinointalang pogi'd Kinorohingan o kosonongo' dau nga' orohian iyau do rumorologo kou do koinsanai di dusa dokoyu. 5 Nga' pinokodou i' dokoyu o ginawo dokoyu om osurilog kou. Om gowoi poddi om iyokoyu i' om iyokoyu o momoruhang do kawagato' di hukuman do pomohukum dokoyu dot orikot o Kopupuson diti Pomogunan; tontok di pointalangon do Kinorohingan o kototogod dau om momutus iyau dot otulid o pomumutus. 6 Tu' sulian indod Kinorohingan o pointikid-tikid do tulun do miontok di nowonsoi dau. 7 Onuan id Kinorohingan do koposion dit otopot kopio om i poingompus o tulun dit otorodok do momonsoi'd osonong, om kaanu indo iyolo' di kikagayaan, om i pusohon, om i koposion dit aiso' o kopupuson. 8 Nga' tulun nopo di momusorou nod dau'd tinan om it a' mumboyo'd Kinorohingan, tu' tumanud nogi' dit angaraat, om katagadan no iyolo'd Kinorohingan. 9 Pointikid-tikid do tulun dit orohian do momonsoi'd araat om oinggorit nondo om oudipon; dot iri po i tulun do Yohudi o poguluonon, om iri ngai' nogindo i tulun dot okon ko' Yohudi. 10 Nga' pointikid-tikid do tulun dit orohian do momonsoi'd osonong om onuan nondod Kinorohingan do kagayaan om kosuahan om kosimbayanan do ginawo; dot iri po tulun do Yohudi o poguluonon om iri ngai' nogindo i tulun dit okon ko' Yohudi. 11 Tu' oiyo i' o pomumutus do Kinorohingan do koinsanai'd tulun. 12 Iri nopo tulun dot okon ko' Yohudi do momonsoi'd dusa om a' i' koilo di Tourat di Musa. Om pomohukum nopondo diyolo' om id soliwan i' di Tourat diri. Nga' iri nopo tulun do Yohudi om nokoilo no daa di Tourat diri nga' minomonsoi i' iyolo'd dusa; om gowoi pondo do hukuman nondo iyolo' dot i Tourat diri o maan do poimpahan do momohukum. 13 Tu' koulud pogi' kawagu o tulun dot id Kinorohingan nga' okon i' ko' i nokoilo i tulun diri di Tourat; suwai ko' i minomonsoi iyau di ponuhuan di Tourat o nokoulud-ulud dau. 14 Iri nopo tulun dot okon ko' Yohudi om a' i' haro o Tourat. Nga' ondung kopiontok di ponuhuan di Tourat o wonsoyon diyolo', do mantad i' daa toomod do korohiano' do ginawo diyolo' do momonsoi'd miagal diri, om iri no i korohian do ginawo diyolo'ddi o sumiliu dot oturan dot id diyolo', do mulong piya dot aiso' o Tourat diyolo'. 15 Kointalang i' dot id kowoyo-woyoon diyolo' do nokotulis no dot id suang do kopurimanan do ginawo diyolo' i ponuhuan di Tourat. Om i kopurimanan do ginawo diyolo' nga' popointalang i' dot otopot iri, tu' iyolo' piya nga' koumbal i' do pasalaon om koumbal do potopoton do pomusarahan diyolo'. 16 Om iyo noddi ot osiliu dot orikot i tadau di natantu' mantad diri. Tontok nopondod tadau'ddi do tumanud di Habar dot Osonong di popinsusuyon ku om butusan nondod Kinorohingan, dot i Yesus Kristus o popomutuson, do koinsanai di songillisok dot id suang do ginawo om pomusarahan do pointikid-tikid do tulun.
I Tulun do Yohudi om i Tourat
17 Nga' baino' noddi, om poingkuro kou no iyokoyu, oi tobpinai-tobpinai ku? Mangakun ko i' do tulun ko'd Yohudi. Om sumondiu ko do Tourat om oondos ko do nopili' ko'd Kinorohingan. 18 Notudukan ko i' di Tourat, gisom do koilo ko di korohian do Kinorohingan om koilo ko do momili' dit osonong. 19 Oilaan nu no kopio do boyoon ko di tulun do bolou, om tanawau ko dot id tulun dit id dotuong; 20 om monunuduk ko di tulun dit aiso' o toila-ilaan, om guru ko do tulun di basug. Om oilaan nu no kopio do haro ngai' dot id diya' o koinsanai do toilaan om ponudukan dit otopot dit id suang di Tourat. 21 Monuduk ko nod tulun do suwai; nga' nokuro tu' a' nu tudukan o diya'd ginawo? Mogodu ko'd wokon do manakau, om manakau ko indo iya'! 22 Mogodu ko'd wokon do magampahu', om magampahu' ko indo iya'! Araatan ko'd tingolig, om mongoi ko indo panganu do konunu-nunuan do mantad id walai di poningoligan. 23 Oondos tomod ko do nakaanu ko di Tourat do Kinorohingan, om inda' ka dot indaraaton nu i' o Kinorohingan, tu' a' ko i' tumanud dit oturan dau. 24 Haro i' o nokotulis dot id suang do Buuk do Kinorohingan do poingkaa, “Iyokoyu no, i tulun do Yohudi, o nokobungou di tulun dot okon ko' Yohudi' do minongindaraat do Kinorohingan,” ka. 25 Ondung otorodok ko do mumboyo'ddi Tourat, om haro no o guna' di sunat nu. Nga' ondung a' ko oubas do tumanud di ponuhuan di Tourat diri, om aiso' i' tomod o guna' di sunat nu. 26 Ondung haro o tulun dit okon ko' Yohudi dit a' nosunatan, do tumanud di Tourat, om a' toi'd Kinorohingan sorohon do nosunatan i tulun diri? 27 Om iri nondo i tulun dit okon ko' Yohudi, it amu' nosunatan diri o papasala' diya', iya' i tulun do Yohudi, tu' naanu nu no i buuk do Tourat om nosunatan ko, nga' tinolibambanan nu iddi i Tourat diri. Iyolo' nopo om a' i' daa nosunatan, nga' iyolo' nogiddi i tumanud di Tourat. 28 Tu' tulun nopod Yohudi dit otopot kopio, om okon i' ko' i ngaran no toomod dau do tulun iyau'd Yohudi; om iri tulun dit otopot kopio do nosunatan nga' okon i' ko i tulun di nosunatan no toomod o tinan. 29 Suwai ko', tulun nopod Yohudi dit otopot kopio, om i tulun do Yohudi o ginawo; om sunat nopo dit otopot om sunat dit id ginawo, i winonsoi di Rusod do Kinorohingan, om okon i' ko' i pinotulis dot id Tourat. Tulun nopod miagal diri om arayou nod Kinorohingan, om okon i' ko' tulun noo o mamarayou.
1 Iyo nopoddi om nunu noddi o kosuulan do tulun do Yohudi do pataladon di tulun dot okon ko' Yohudi? Om nunu noo o guna' do tumanud di toturan do monunat? 2 Atantu' no dot ogumu' i o kosuulan! Koiso' nopo om iri i' i tulun do Yohudi o pinaharapan do Kinorohingan di boros dau. 3 Nga' poingkuro nondo dot a' no otorodok o wookon di tulun do Yohudi? Iri no tuu o kokuwaan do Kinorohingan dot a' tumorodok? 4 Atantu' no dot okon i! Tu' kointalang i' kopio do Kinorohingan nopo om otopot i' kasai, do mongudut ngai' piya o tulun. Om nokotulis no dot id suang do Buuk do Kinorohingan o poingkaa, “Mositi' no do kointalang kopio dot otopot ko dot id suang do nunu nopo o poboroson nu; om kamanang ko do tontok do butusan ko,” ka. 5 Nga' ondung i wonsoyon toko' dit a' otopot o popointalang do kotulido' do Kinorohingan, om nunu po o poboroson toko'? Poboroson toko' tuu daa dot a' otulid o Kinorohingan dot ondung momohukum iyau dati'? (Om kopunong i' kopio iti poguhatan diti do tumanud do pomusarahan do tulun.) 6 Nga' a' i' kopio! Tu' ondung a' otulid o Kinorohingan om poingkuro daa iyau do milo'd momutus do koinsanai'd tulun do hiti'd pomogunan? 7 Nga' ondung iri nogindo i wonsoyon dit a' otopot o popointalang kopio dit otopot do pasal do Kinorohingan, gisom do royohon nondo iyau, om nokuro tu' pasalaon po i tulun di momonsoi dot araat om roitan do tulun do kidusa? 8 Om nokuro tu' a' toko' koino-ino do momoros dot, “Momonsoi toko' nogi' dot araat om kointalang i' it osonong?” ka. Haro i' kopio o tulun do mongindaraat doho', tu' monondos iyolo' doho' do minomoros oku do miagal diri, nga' tulun nopo do miagal diri om apatut no kopio do hukuman do Kinorohingan.
Aiso' i' o Tiso'd Tulun do Momonsoi do Korohian do Kinorohingan
9 Iyo nopoddi om poimogot toko' tuu'ddi iyati' i tulun do Yohudi ko' mantad dit okon ko' Yohudi? A' i' kopio! Nokoboros ku no dot iri tulun do Yohudi om it okon ko' Yohudi, nga' oinsanan nopo do noporinta'd dusa. 10 Do miagal di nokotulis dot id suang do Buuk do Kinorohingan do poingkaa, “Aiso' i' o tiso'd tulun dot otopot, 11 aiso' i' o tiso'd tulun do kosuhut om aiso' o tiso'd tulun do tumuku' dot id Kinorohingan. 12 Oinsanan nopo o tulun do nokoinsodu' do mantad id Kinorohingan; om noinsanan do napalid. Aiso' i' o tiso'd tulun do momonsoi dit otopot; iso' pod tulun nga' aiso' i'! 13 Iyo pod lobong dit a' nosompon, o tatalanan diyolo'; tudut poo o lumuyung do mantad id dila' diyolo', om popinsasad pod pongindaraat o munung diyolo', do miagal po di paliu do tulanut. 14 Noponu' pod popol om poniguras o kabang diyolo'. 15 Osiau nopo o kalaang-laango' diyolo' do mongoi ponginggorit om mongoi pamatai'd tulun. 16 Karaagon po om kosusaan o popinsasadon diyolo' do hinonggo nopo. 17 A' no iyolo' kokito di ralan do koonuan do kosimbayanan do ginawo. 18 Om a' iyolo' momusou do Kinorohingan,” ka. 19 Om baino' nopoddi om koilo toko' no dot iri ngai' nopo i pinotulis dot id suang do Tourat, om bagi' no di tulun dit id siriba' di Tourat diri. Om kaa pogiddi dot iso' pod tulun nga' aiso' no o milo'd popoboros do ponguwaan do pokotopot do tinan dau, om milo nod Kinorohingan do butusan o koinsanai'd tulun do hiti'd pomogunan. 20 Tu' aiso' i' o tiso'd tulun do koulud dot id Kinorohingan do momonsoi di ponuhuan di Tourat. Tu' iri nopo Tourat om popoilo no toomod do tulun do kidusa o tulun.
Ralan do Kinorohingan do Pinopoulud do Tulun dot id Dau
21 Nga' baino' noddi om nokotuduk nod Kinorohingan o ralan do tulun do mulud dot id dau. Om iri nopo i ralan di pinotuduk dau'ddi om a' i' kokuro-kuro di toturan, do mulong piya dot iri nopo Tourat di Musa om i piro-piro buuk do nabi nga' popointalang i' do hal diri, 22 do ralan nopod tulun do mulud dot id Kinorohingan om monongkuyaan di Yesus Kristus. Om iti no o wonsoyon do Kinorohingan dot id koinsanai'd tulun di monongkuyaan do Kristus; tu' aiso' i' o pisuayan: 23 tu' oinsanan nopo o tulun do nokowonsoi'd dusa om osodu' do mantad id Kinorohingan dit orohian do mamasi diyolo'. 24 Iri po kosianan do Kinorohingan di pinopuhawang dau o pinopoulud kawagu'd tulun dot id Kinorohingan; do ralan nopod pinopoulud om: Pinoidu' di Kristus Yesus o tulun do mantad id kinapasalaan diyolo'. 25 Om patahako' nopod Kinorohingan i Kristus Yesus do numaan do porsombahan di sinumbali', do popointalang do nokoidu' o tulun do mantad id kasalaan, dot i kinapatayan di Kristus Yesus o popoidu' diyolo', ondung otumbayaan no iyolo' dau. Om winonsoi pogi'd Kinorohingan o miagal diri nga' popointalang iyau do kotulido' dau. Tu' di nopo di gulu po om polonuto' nopod Kinorohingan o ginawo dau do minomonsoi piya'd dusa o tulun, gisom dot a' i' dau hinukuman iyolo'. 26 Nga' dinondo noddi om hukuman no kopio dau o dusa do popointalang kopio do kotulido' dau. Om iri no o ralan dau do popointalang dot otopot iyau; om pointikid-tikid do tulun di monongkuyaan di Yesus, om poboroson nod Kinorohingan do nokoulud kawagu dot id dau i tulun diri. 27 Iyo nopoddi om aiso' no o paantakan toko' do minggayo-gayo. Nokuro? Iri tuu i minomonsoi toko' di ponuhuan di Tourat o koiyaan diri? Okon. Nga' i notumbayaan toko'. 28 Tu' poingkaa kopio o komoyon diti: Ralan nopod tulun do koulud kawagu dot id Kinorohingan, om okon i' ko' i minomonsoi iyau di ponuhuan di Tourat, suwai ko' i monongkuyaan iyau di Yesus Kristus. 29 Ko' tulun no tuu'd Yohudi o kasanganu'd Kinorohingan? Okon tuu ko' Kinorohingan iyau'd tulun dit okon ko' Yohudi? Atantu' no, do Kinorohingan i' iyau do bansa' piya'd suwai! 30 Tu' Kinorohingan nopo om iso' noo. Om iyau no o popomilo do tulun do Yohudi do mulud kawagu dot id Kinorohingan, dot i kotumbayaan diyolo' o kopouludan dau diyolo'. Om iyau i' o popomilo do tulun dit okon ko' Yohudi do mulud kawagu dot id Kinorohingan; tu' notumbayaan i' iyolo'. 31 Om iyadaan toko' no tuu'ndo i Tourat do notumbayaan toko'd Kristus? Iyo tuu'ddi o komoyon diri? A' i' kopio iyo'ddi! Suwai ko' tonudon toko' nogi' kopio i Tourat diri.
I Abraham ot Omitanan
1 Iyo nopoddi, om nunu po mando o poboroson toko' do pasal di Abraham, i taki-aki diti bansa' toko'? Poingkuro ma o dau'd noumbalan? 2 Ondung i nongowonsoi di Abraham o kinopomoromitan do Kinorohingan dau, om kohubayaan iyau'd Kinorohingan, om haro i' daa o paantakan dau do minggayo-gayo. Nga' a' i' iyau mininggayo-gayo dot id toguang do Kinorohingan. 3 Om nokotulis i' dot id suang do Buuk do Kinorohingan o poingkaa, “Notumbayaan i' i Abraham do Kinorohingan, om iri no i kotumbayaan dau o kinopomoromitan do Kinorohingan dau, om kohubayaan iyau'd Kinorohingan,” ka. 4 Tulun nopo di kumaraja' om kaanu i' do gadsi'; om a' i' milo'd roitan do pinopuhawang i gadsi' dau, tu' iri nopo om apatut i' dau'd aanu. 5 Nga' haro i' o tulun dit a' sumondiu di winonsoi dau; tu' mogondos nopo iyau'd Kinorohingan, i milo'd popoboros do nokoidu' do mantad id kasalaan i tulun di kidusa. Om iri no i kotumbayaan di tulun diri o kopomoromitan do Kinorohingan do tulun diri, om kohubayaan iyau'd Kinorohingan. 6 I Daud nga' iyo iddi o nosuhutan om iri no o kinapamarasan dau dot olumaag no kopio i tulun di naramit do Kinorohingan, om i kohubayaan dau, om a' nod Kinorohingan sorohon i nongowonsoi di tulun diri. Poingkaa o pinoboros di Daud, 7 “Olumaag no i tulun di noompunan ngai' o kasalaan om i nolobong do Kinorohingan o dusa! 8 Olumaag no i tulun dit a' do Tuhan imbulayan o dusa!” ka. 9 Iri no tuu tulun di tumanud di toturan do monunat o komoyon dot olumaag? Ko' kohompit tuu i tulun dit a' tumanud di toturan do monunat? Nokoboros no dahai di tiinu', do kinopomoromitan nopod Kinorohingan di Abraham gisom do kinohubayaan diri iyau'd Kinorohingan, om mantad i' di kotumbayaan di Abraham dot id Kinorohingan. 10 Om soira' toi'd Kinorohingan poboroso' o miagal diri? Tontok tuu dit a' po nosunatan i Abraham ko' diri po di nosunatan no iyau? Dit a' po iyau nosunatan, om okon i' ko' di nosunatan no iyau. 11 Id tohuri no ko' iri do sinunatan iyau. Om iri nopo sunat dau om panakatanda' noo do naramit iyau'd Kinorohingan om kinohubayaan iyau'd Kinorohingan, tu' notumbayaan i' iyau'd Kinorohingan. Naramit no iyau'd Kinorohingan do tontok dit a' po iyau nakatanud do toturan do monunat. Om i Abraham no o nosiliu'd panakatapa' do koinsanai'd tulun dit otumbayaan do Kinorohingan, om iri no o kinopomoromitan do Kinorohingan diyolo', om kinohubayaan diri dau iyolo', do mulong piya dot a' iyolo' tuminanud di toturan do monunat. 12 Om i Abraham i' o panakatapa' di tulun di tuminanud do toturan do monunat dot okon nopo ko' i tuminanud iyolo' di toturan do monunat, nga' iri nogi' i kotumbayaan diyolo' dot id Kinorohingan, do miagal di winonsoi di Abraham dit a' po iyau nakatanud di toturan do monunat.
Kotumbayaan o Kaanu-Anu di Batos do Kinorohingan
13 Minamatos o Kinorohingan dot id di Abraham om id sinakagon dau dot asanganu nondo di Abraham iti pomogunan. Kinapabatasan nopod Kinorohingan do miagal diri om okon i' ko' i kotorodoko' di Abraham dot id Tourat, suwai ko' i kotumbayaan di Abraham dot id Kinorohingan, do gisom do naramit iyau'd Kinorohingan, om kinohubayaan iyau dau. 14 Tu' ondung iri no tulun di tumanud di Tourat o kaanu di pinabatos do Kinorohingan diri, om aiso' tomod i' o guna' do monongkuyaan do Kinorohingan, om aiso' o suang di batos do Kinorohingan. 15 Iri nopo Tourat om poporikot nod hukuman do mantad id Kinorohingan. Nga' ondung aiso' daa o toturan, om aiso' no daa o kotolibamban do toturan. 16 Om pinoboros pogid Kinorohingan i batos diri nga' notumbayaan i' i Abraham dau. Om iri no o sumiliu'd kotontuan dot id koinsanai'd sinakagon di Abraham dot iri nopo batos diri om pinopuhawang i' toomod do Kinorohingan dot id diyolo'; om okon nopo ko' id tulun no di tumanud do Tourat, nga' id tulun nogi' dit otumbayaan do Kinorohingan do miagal di Abraham tu' notumbayaan do Kinorohingan. Tu' i Abraham no o panakatapa' ngai' toko'. 17 Tu' poingkaa o pinoboros do Kinorohingan dot id di Abraham, “Nosiliu tiya' nod tapa' dot ogumu' o bansa'd tulun,” ka. Om iyo noddi o Kinorohingan do minamatos dot id di Abraham. Om notumbayaan i' i Abraham do Kinorohingan. Iyau no i Kinorohingan di mamasi'd tulun di napatai, om iyau o Kinorohingan di poboroson nopo dau nga' owonsoi nopo it a' insan kowonsoi. 18 Om a' i' tuminingkod i Abraham do minagandad om minonongkuyaan do mulong piya dot aiso' no daa o paantakan dau do magandad. Om iri no o kinosili-silihan dau do tapa' dot ogumu' o bansa'd tulun, do miagal di nokotulis dot id suang do Buuk do Kinorohingan do poingkaa, “Sumapou nondo kopio o sinakagon nu,” ka. 19 Tontok nopoddi om oilaan nod i Abraham dot a' no iyau maganak, tu' adalaan no iyau kolohing, om tumur dau nga' oruhai nod hatus o toun; om kawagu po nga' a' no mantad maganak i Sara, i sawo dau. Nga' a' i' luminuhoi o kotumbayaan di Abraham. 20 Minonongkuyaan kasai' i' iyau om a' minikoduwo o ginawo dau do monongkuyaan di batos do Kinorohingan. Tu' pinopogirot nogid ginawo dau i kotumbayaan dau, gisom do minamarayou iyau'd Kinorohingan. 21 Monongkuyaan i' kopio iyau do milo o Kinorohingan do momonsoi'd nunu nopo i pinabatos dau. 22 Om iri no o kinopomoromitan do Kinorohingan di Abraham, om kinohubayaan diri iyau'd Kinorohingan. 23 Om iri nopo boros dot, “Rinamit tu' kinohubayaan id Kinorohingan,” ka, om okon i' ko' i Abraham noo o kinoponulisan, 24 suwai ko' iyati' nga' kohompit nogi'. Iyati' nga' romiton indo om kohubayaan toko'd Kinorohingan, tu' monongkuyaan toko' id Kinorohingan, i minamasi di Yesus, i Tuhan toko', do mantad id kapatayon. 25 Nakatahak no i Yesus do maan patayo', dot i dusa toko' o kinapamatayan; om posio' noddi kawagu iyau'd Kinorohingan om koulud toko' i' kawagu dot id Kinorohingan.
Koulud Kawagu dot id Kinorohingan
1 Baino' nopoddi tu' nokoulud toko' nod Kinorohingan dot id dau tu' notumbayaan toko' i' dau, om haro noddi o piuludan toko'd Kinorohingan dot i Yesus Kristus, i Tuhan toko', o pinopoulud dati'. 2 Om pinopuriman kopio toko'ddi di Yesus di kosianan do Kinorohingan tu' monongkuyaan toko' i' di Yesus, om iri no kosianan diri ot opurimanan toko' do dinondo. Om iri no o kataadan toko' tu' haro noddi o soro-sorohon toko' do kaanu toko' di kosimbayanan do patahakon do Kinorohingan! 3 Nga' okon i' ko' iri noo, tu' id suang piya'd koinggoritan nga' otood toko' i', tu' oilaan toko' i' do koinggoritan nopo om popinsingilo dati' do papalanut kopio'd ginawo, 4 om alanut nopondo o ginawo toko' om kohubayaan toko' nod Kinorohingan, om kohubayaan toko' nopondod Kinorohingan om haro no o soro-sorohon toko'. 5 Om iri nopo soro-sorohon toko'ddi om a' i' mongiman-iman dati', tu' nokosuang nod Kinorohingan i kosianan dau dot id ginawo toko'. Ralan nopo dau do pinoposuang diri om pinawaya' dau di Rusod dau, i nokopuhawang no dau dati'. 6 Di nopo di maso pod aiso' o pokukurayan toko', do popoidu'd tinan toko', om kapatai no o Kristus do suminowoli dati', do tontok di maso do natantu' mantad do Kinorohingan; om tulun toko' i' dot araat. 7 Osusa' i' kopio do haro o tulun dot orohian do matai do sumowoli'd tulun dit otulid piya o ginawo. Nga' haro i' doti' o tulun dot orohian do matai do sumowoli'd tulun dit osonong. 8 Nga' nokointalang nod Kinorohingan o kosianan dau dati' di minatai o Kristus do suminowoli dati', do tontok di kidusa toko' po. 9 Om nokoulud toko' noddi kawagu dot id Kinorohingan di napatai o Kristus; om iri noddi o katantu-tantu' do poiduwon toko'd Kristus do mantad id kototogod do Kinorohingan. 10 Ondung nokoulud toko' dot id dau dot i kinapatayan di Tanak dau o pinopoulud, do tontok di pisangod toko' pod Kinorohingan, om okon-okon pondod dinondo tu' nokoulud toko' kawagu dot id Kinorohingan, nga' atantu' kopio do posion toko' tu' poimpasi i' o Kristus. 11 Om okon i' ko' iri noo, suwai ko' otood toko' po dot i kosonongo'd Kinorohingan di nokointalang di Tuhan toko', i Yesus Kristus. Tu' Kristus no o popopuriman kopio dati' di kosonongo'd piuludan toko'd Kinorohingan.
I Adam om i Kristus
12 Iso' no o tulun do minomonsoi'd dusa do hiti'd pomogunan, om kapatai noddi iyau tu' minomonsoi i' iyau'd dusa. Om oinsanan nopoddi o tulun do matai, tu' nokowonsoi ngai' id dusa o tulun. 13 Di nopo dit a' po nakatahak o Tourat, om haro no o dusa do hiti'd pomogunan. Nga' a' pod Kinorohingan pinotulis i dusa, tu' aiso' po o toturan dit otolibambanan. 14 Nga' mantad poddi poimpasi po i Adam om gisom do nokorikot di maso di poimpasi i Musa, om sampatai-patai ngai' no o tulun. Om iri piya tulun dit a' iyo dit di' Adam o dusa do nowonsoi nga' napatai i'. Om i Adam no o poiya-iyaan di tulun di natantu' mantad do rumikot. 15 Nga' a' i' iyolo' miiyo kopio: tu' iri nopo popuhawangon do Kinorohingan dot id tulun, om agayo po kopio do pataladon di dusa do nowonsoi di Adam. Otopot i' kopio dot ogumu'ddi o tulun do napatai tu' nokowonsoi id dusa it iso' noo o tulun. Nga' agayo-gayo o kootuson di kosianan do Kinorohingan om i koposion do popuhawangon dau, i pinopuhawang dau dot id ogumu' o tulun, dot i kosonongo'd songulun noo, iri no i Yesus Kristus, o kinopopuhawangan dau'ddi. 16 Iri i nipuhawang do Kinorohingan diri nga' agayo i' kopio ko' mantad di dusa dit iso' o tulun diri. Tu' kowonsoi poddid dusa i songulun diri, om koimbulai no o pomohukum di tulun di, “kisala'”. Nga' ogumu' piya'ddi o tulun do nokowonsoi'd dusa nga' nokorikot i' i nipuhawang do mantad id Kinorohingan di popoboros dot, “Aiso' o Sala'”. 17 Om mantad no di dusa di songulun noo do tuminongkop o dusa do hinonggo- honggo nopo, do nobungou dit iso' noo o tulun. Nga' okon-okon pondo o kogoyoo' do kootuson di winonsoi dit iso' o tulun do suwai'ddi, iri no i Yesus Kristus. Iyau no o pinawayaan do Kinorohingan do pinapalabai di kosianan dau dot id ogumu' o tulun, om mantad i' do kopuhawango'd Kinorohingan do nokoulud kawagu i tulun dot ogumu' dot id Kinorohingan; om iyolo' nondo o kikuasa' do hiti'd pomogunan dot i Kristus o koonu-onuan diyolo'd kuasa'. 18 Om poingkuro nopo do hukuman dot id koinsanai'd tulun o kootuson di dusa dot iso' noo o tulun, om iyo nogiddi i winonsoi dit iso' noo o tulun di tuminanud do korohian do Kinorohingan, tu' kootuson nopo nga' koidu' ngai' o tulun do mantad id kasalaan om oonuan iyolo'd koposion. 19 Om poingkuro nopod nokotonggoi ngai' o tulun do kidusa do nobungou dit iso' noo o tulun dot a' minumboyo', om iyo nogiddi tu' ogumu' nondo o tulun do koulud kawagu dot id Kinorohingan dot it iso' noo o tulun di minumboyo'd Kinorohingan o popoulud. 20 Iri nopo pinapatahak di Tourat om Kinorohingan i'. Nga' maha' nogid tumotos o tulun do mumboyo' di Tourat diri, om okon nogid otolibambanan diyolo' iri om kowonsoi iyolo'd dusa dot id toguang do Kinorohingan. Nga' maha' di muhang-ruhang o dusa'd tulun, om okon nogid muhang-ruhang o kosianan do Kinorohingan diyolo'. 21 Om otopot nopo daa kopio om apatai toko' no tu' minomonsoi toko' id dusa. Nga' nosianan i' o Kinorohingan dati' om nonuan toko' i' dau'd ralan do mulud kawagu dot id dau. Om di nopoddi nokoulud toko' kawagu dot id Kinorohingan, om onuwai toko' poddi dau'd koposion dit otopot kopio om i poingompus dot i Yesus Kristus i Tuhan toko' o pinapatahak.
Poimpatai dot id Dusa om Poimpasi do Poingiso' do Kristus
1 Iyo nopoddi, om nunu ma o poboroson toko'? Tumilombus toko' nopo tuu'd momonsoi'd dusa om muhang-ruhang indo o kosianan do Kinorohingan dati'? 2 Amu', a' i' kopio! Tu' aiso' noddi o kuasa'd dusa dot id dati', om poingkuro po daa'ddi do tumilombus toko'd momonsoi'd dusa? 3 Koilo kou i' do nokoiso' toko' no dot id Kristus Yesus, do tontok di binotisan toko'. Komoyon nopodti nga' nokotonggoi toko' dau'd minatai. 4 Tu' id suang nod botisan do tumonggoi toko'd Kristus do lobongon om tumonggoi toko dau'd matai, om poingkuro nopondo i Kristus do pinasi kawagu do mantad id kapatayon dot i kuasa' di Tapa' di kikagayaan o minamasi, om iyati' nga' poimpasi nondo dot id suang do koposion do wagu. 5 Ondung nokoiso' toko' dot id Kristus tu' tuminonggoi toko' i' dau do minatai, om koiso' toko' pondo dau tu' nokotonggoi toko' i' dau do pinasi kawagu. 6 Om oilaan toko' dot iri nopo kowoyo-woyoo' toko' do don tulun di gulu om napatai no do nokotonggoi do Kristus do hiri'd kayu salib, om atanus i' i kuasa' di kowoyo-woyoo' toko' di kidusa'ddi; om a' toko' nondo osiliu'd turipon do dusa. 7 Tu' iri nopo tulun di napatai, om nokoidu' no do mantad id kuasa'd dusa. 8 Ondung nokotonggoi toko' di Kristus do minatai, om monongkuyaan toko' no dot iyati' nga' kotonggoi no dau dot apasi. 9 Tu' oilaan toko' i' do napasi no o Kristus do mantad id kapatayon om a' no iyau apatai kawagu; om aiso' no o kuasa'd kapatayon dot id dau. 10 Iri nopo kapatayon do nopurimanan di Kristus diri nga' kinapatayon dot id dusa. Om insan no kopio kosiliu iri, om a' no kawagu osiliu o miagal diri do gisom dot alaid. Om iri nopoddi koposion dau'd dinondo om dong Kinorohingan no. 11 Om iyokoyu nga' mositi' nod momusorou do napatai kou no dot id dusa, nga' poimpasi kou noddi do mikuwo'd ogirot o piuludan dot id Kinorohingan do poingiso' di Kristus Yesus. 12 Kada' no dokoyu pologoso' o dusa do momorinta'd tinan dokoyu di matai, om a' kou i' katanud do korohian dokoyu dit araat. 13 Om kada' dokoyu patahako' dot id kuasa'd dusa o nunu nopo o pakakas do tinan dokoyu do maan do pomonsoi dit araat. Nga' patahako' no dokoyu o tinan dokoyu dot id Kinorohingan, tu' nokoundaliu kou no do mantad id kapatayon om nakakaa kou no dot id koposion. Oyi-oyio' no dokoyu do papatahak o tinan dokoyu dot id Kinorohingan om kopomonsoi indo iri do korohian do Kinorohingan. 14 A' i' milo do dusa o momorinta' dokoyu, tu' a' kou noddi porintaon di Tourat, suwai ko' i kosonongo'd Kinorohingan o momorinta' dokoyu.
Susuhuon di Korohian do Kinorohingan
15 Om poingkuro noddi? Koino-ino toko' i' tuu do momonsoi'd dusa dot iri kosonongo'd Kinorohingan o momorinta' dati', om okon noddi ko' i Tourat? Amu', a' i' kopio! 16 A' kou toi' koilo dot ondung patahakon dokoyu o tinan dokoyu dot id isai nopo o tulun do momonsoi di korohian dau, om susuhuon kou no di tulun dit umboyoon dokoyu'ddi; do susuhuon tuu'd dusa di pakaa dokoyu dot id kapatayon, ko' susuhuon po di mumboyo'd Kinorohingan, om koulud kou indo kawagu dot id Kinorohingan. 17 Nga' pounsikou nod Kinorohingan! Tu' di nopo daa di gulu po om susuhuon kou id dusa, nga' baino' noddi om iso-iso' noddi o ginawo dokoyu do tumanud di ponudukan dit otopot, i pinotuduk dot id dokoyu. 18 Nokoidu' kou nod mantad id dusa, om nosiliu kou noddi do susuhuon di korohian do Kinorohingan. 19 Om manganu oku nondod poiyaan dit osiliu'd susuhuon om oruhai kou id kosuhut, tu' a' kopio kou i' obinsuhut. Di nopo di gulu po om patahako' ngai' nopo dokoyu o tinan dokoyu do siniliu'd susuhuon do momonsoi di sosomu' om it angaraat, dot araat o kapamansayan. Om iyo nogiddi do baino' tu' mositi' nod oyi-oyion dokoyu do papatahak o tinan dokoyu do sumiliu'd susuhuon di korohian do Kinorohingan, do momonsoi di natantu' mantad do Kinorohingan. 20 Di nopo di susuhuon kou pod dusa, om a' kou i' porintaon di korohian do Kinorohingan. 21 Om nunu noddi o kinountungan dokoyu do minomonsoi di kointingayam dokoyu'd baino'? Iri nopo i piningwonsoi dokoyu'ddi om papakaa no dokoyu dot id kapatayon! 22 Nga' baino' nopoddi om nokoidu' kou no do mantad id dusa, om nosiliu kou nod susuhuon do Kinorohingan. Om kountungan nopo dokoyu nga' dong Kinorohingan diri kopio'd koposion dokoyu, om kootuson nopoddi om koposion dit otopot kopio om i poingompus. 23 Tu' kapatayon nopo om ponuli' do dusa; nga' iri nopo koposion dit otopot kopio om i poingompus do poingiso' di Kristus Yesus i Tuhan toko', om nipuhawang id Kinorohingan di pinatahak toomod dau.
I Toturan do Mikawin o Pinoiyaan
1 Oi tobpinai-tobpinai ku! Nokoilo ngai' kou nod toturan. Om koilo kou do tontok no di poimpasi po o tulun do haro o kuasa di toturan dot id dau. 2 Om miagal di tondu' di kisawo tu' solinaid no di sawo dau'd poimpasi dot akagasan iyau di toturan do miiso' di sawo dau. Nga' apatai nopondo i sawo dau'ddi, om koidu' no i tondu' do mantad id toturan di popoiso' dau dot id sawo dau. 3 Nga' ondung mongoi i tondu'ddi sugku' do kusai'd suwai do solinaid po di sawo dau'd poimpasi, om magampahu' no i tondu'ddi. Nga' ondung napatai i sawo di tondu', om nokoidu' no i tondu'ddi do mantad id toturan diri. Om akawin piya kawagu iyau'd kusai'd suwai nga' a' no iyau magampahu'. 4 Om iyokoyu nga' iyo nogiddi, oi tobpinai-tobpinai ku. Napatai kou no dot id Tourat, tu' nokoiso' kou noddi dot id tinan do Kristus om nasanganu kou no dau, i pinasi kawagu do mantad id kapatayon, om kiguna' toko' indo dot id Kinorohingan dot id suang do koposi-posion toko'. 5 Tu' di nopo di gulu po om tumanud toko' nopo di kowoyo-woyoo' do don tulun dot id suang do koposi-posion toko'. Om tontok nopoddi nga' iri po korohian toko' di kidusa o momorinta'd koposi-posion toko'; om iri nopo korohian toko'ddi nga' notingkau di Tourat. Om iri no o kobinsuhu' dati' do momonsoi di papakaa' dot id kapatayon. 6 Nga' baino' noddi om a' toko' no poingkogos di Tourat. Napatai toko' no dot id Tourat di momorinta' daa dati' di gulu po. Om a' toko' noddi sumambayang do tumanud di kowoyo-woyoo' di gulu, do tumanud di toturan di pinotulis. Baino' nopoddi om sumambayang toko' nod tumanud di kowoyo-woyoo'd wagu, i potudukon di Rusod do Kinorohingan dot id dati'.
Tourat om Dusa
7 Iyo nopoddi, om nunu po ma o poboroson toko'? Poboroson toko' tuu dot araat i Tourat? Amu', a' i' kopio! Nga' iri nogi' i Tourat o minonuduk doho' ondung nunu o komoyon do dusa. A' oku i' daa koilo ondung nunu o komoyon do tamaha', ondung a' daa i Tourat minomoros dot, “Kada' katamaha',” ka. 8 Iri no i toturan diri o pinawayaan di dusa do moningkau'd mogisuayan o korohian do tumamaha' dot id suang do ginawo ku, tu' ondung aiso' daa i toturan do tugama', om poimpatai i' daa o dusa. 9 Poimpasi oku i' daa di gulu po, dit aiso' po o toturan do tugama'. Nga' di nopoddi haro o toturan do tugama', om timpuun noddi do masi o dusa, 10 om kapatai oku noddi. Om iri nopoddi toturan do tugama' di maan daa'd pamasi, om pinapakaa nogiddi doho' dot id kapatayon. 11 Tu' iri no toturan di tugama'ddi o winayaan do dusa do magakal om mamatai doho'. 12 Iri nopo Tourat diri om mantad i' dot id Kinorohingan, om pointikid-tikid di ponuhuan dot id suang do toturan diri nga' mantad i' dot id Kinorohingan, om kaa pogi' dot otulid i' om osonong i toturan diri. 13 Iyo nopoddi, om iri tuu'ddi it osonong o papakaa doho' dot id kapatayon? Okon i' kopio! Iri i dusa o papakaa dot id kapatayon. Iri no it osonong o pinawayaan do dusa do papakaa doho' dot id kapatayon, do popointalang kopio do kowoyo-woyoo' di dusa ku. Om iri ngai' no i ponuhuan do Kinorohingan o pinopointalang kopio dot a' ogina-gina' o karaato'd dusa.
Pisaapan dot id Suang do Ginawo'd Tulun
14 Oilaan toko' i' do tadon nopo di Tourat om i Rusod do Kinorohingan; nga' iyoho' nopo om tulun i' dit oluhoi. Om nakadagang oku nod siniliu'd turipon do dusa. 15 Tu' iyoho' piya nga' a' i' kosuhut di wonsoyon ku. Maha' nogi' i korohian ku'd momonsoi om a' ku nogi' owonsoi; nga' iri nogindo i karaatan ku, om iri nogi' ot owonsoi ku. 16 Iyo nopoddi, om ondung owonsoi ku it a' ku daa korohian, om komoyon nopoddi nga' okunon ku i' dot osonong i Tourat. 17 Om komoyon nopoddi nga' okon noddi ko' iyoho' kopio i momonsoi'ddi, suwai ko' i dusa di momorinta' doho'. 18 Oilaan ku i' dot aiso' i' o tiso' piya dot osonong dot id suang ku; dot id suang do kowoyo-woyoo' ku'd don tulun. Tu' haro i' daa o korohian ku'd momonsoi'd osonong, nga' a' ku indo owonsoi kopio iri. 19 A' ku nogi' owonsoi i korohian ku daa'd momonsoi; tu' iri nogi' it angaraat, it a' ku daa korohian do momonsoi, ot owonsoi ku. 20 Ondung owonsoi ku it a' ku daa korohian do momonsoi, om komoyon nopoddi nga' okon no ko' iyoho' kopio o momonsoi'ddi, suwai ko' i dusa di momorinta' doho'. 21 Om kinotutukon nopoddi di nosorou ku nga' iri i' it oturan diri o kikuasa': tu' ondung orohian oku daa'd momonsoi dit osonong, om iri nogi' it araat o kointalang. 22 Ginawo ku nopo om orohian i' kopio dit oturan do Kinorohingan. 23 Nga' opurimanan ku i' do haro kawagu o toturan do suwai di kikuasa' dot id suang ku, iri no i toturan di sumaap di toturan di korohian do pomusarahan ku. Om kaa pogiddi dot akagasan oku di toturan do dusa di momorinta' doho'. 24-25 Poingkaa no o kowoyo-woyoo' ku: tonudon ku i' i toturan do Kinorohingan dot id suang do pomusarahan ku, nga' tumanud oku id dusa dot id suang do kowoyo-woyoo' ku di don tulun. Obungou oku no kopio! Isai poddi o milo do mamasi doho' do mantad id tinan ku'dti di pakaa doho' dot id kapatayon? Pounsikou nod Kinorohingan! Tu' orohian i' iyau'd mamasi doho', dot i Yesus Kristus o pamasi.
Kowoyo-Woyoon do Tumanud di Rusod do Kinorohingan
1 Baino' nopoddi, om aiso' no o hukuman do koontok di tulun di poingiso' dot id Kristus Yesus. 2 Tu' iri no i toturan do Rusod do Kinorohingan, i pinopiiso' dati' dot id Kristus o pinopoidu' doho' do mantad id toturan di poporikot do dusa om kapatayon. 3 Om iri nopo it a' di Tourat milo'd wonsoyon, do gama'd koluhoyo' toko' tu' tulun, om nowonsoi id Kinorohingan. Naala' nod Kinorohingan o kuasa'd dusa dot id suang do kowoyo-woyoon do tulun, tu' pinolintuhun dau i Tanak dau do miniyo'd kowoyo-woyoo' do tulun di kidusa, do mongoi pananus do dusa. 4 Winonsoi pogid Kinorohingan o miagal diri nga' powonsoi iyau di korohian dau di nokointalang dot id Tourat, dot id suang do koposi-posion toko', do tumanud di ponuhuan di Rusod do Kinorohingan om okon i' ko' tumanud di kowoyo-woyoo' do don tulun. 5 Tulun nopo di tumanud do kowoyo-woyoo' do don tulun dot id suang do koposi-posion dau, om iri kasai' nopo i korohian do don tulun o sorohon. Nga' iri nopo tulun di tumanud do ponuhuan do Rusod do Kinorohingan dot id suang do koposi-posion dau, om momusorou kasai' i' di korohian do Rusod do Kinorohingan. 6 Ondung kowoyo-woyoon do don tulun o momorinta' do pomusarahan dokoyu, om kootuson nopoddi om kapatayon. Nga' ondung Rusod do Kinorohingan o momorinta' do pomusarahan dokoyu, om kootuson nopoddi om koposion om piuludan dot id Kinorohingan. 7 Tulun nopoddi porintaon do kowoyo-woyoo' do don tulun o pomusarahan, om sumaap nod Kinorohingan; tu' a' i' i tulun diri minsiriba' dot id toturan do Kinorohingan; om a' no bo kopio iyau milo'd minsiriba' dot id toturan do Kinorohingan diri. 8 Iri nopo tulun di tumanud do kowoyo-woyoo' do don tulun dot id suang do koposi-posion dau, om a' no kohubayaan do Kinorohingan. 9 Nga' iyokoyu nopo om a' i' tumanud di kowoyo-woyoo' do don tulun. Iyokoyu nopo om tumanud i' di ponuhuan di Rusod do Kinorohingan ondung atantu' no kopio dot i Rusod do Kinorohingan o momorinta' dot id suang do koposi-posion dokoyu. Iri nopo tulun dit aiso' o Rusod do Kristus dot id suang dau, om okon no ko' Kristus o sanganu dau. 10 Nga' ondung hino o Kristus dot id suang do koposi-posion dokoyu, om mulong piya'd matai o tinan dokoyu dot i dusa o kapatai, nga' onuan kou indo di Rusod do Kinorohingan do koposion, tu' nokoulud kou no dot id Kinorohingan. 11 Ondung poingiyon dot id suang dokoyu i Rusod do Kinorohingan, i minamasi di Kristus do mantad id kapatayon, om iyau no i minamasi di Kristus do mantad id kapatayon diri, o mamasi do tinan dokoyu di matai i' daa'ddi. Om pamasi nopo dau nga' i Rusod dau di poingiyon dot id suang dokoyu. 12 Om kaa pogiddi, oi tobpinai-tobpinai ku, do kitonggungan toko'; nga' okon i' ko' tonggungan dot id kowoyo-woyoo' do don tulun, tu' a' toko' no minog do tumanud di korohian do don tulun. 13 Tu' ondung tumanud kou di korohian do kowoyo-woyoo' do don tulun, om apatai kou i'; nga' ondung pipatai-patai dokoyu i wowonsoyon dokoyu di kidusa, dot i kuasa'd Rusod do Kinorohingan o pamatai, om apasi kou no. 14 Iri nopo tulun di pitudukan do Rusod do Kinorohingan om tangaanak nod Kinorohingan. 15 Tu' iri nopo Rusod di pinatahak do Kinorohingan dot id dokoyu, om a' i' poposiliu dokoyu'd turipon, do gisom dot ooris kou nopo. Suwai ko' iri nopo Rusod do Kinorohingan om poposiliu dokoyu'd tangaanak do Kinorohingan. Om iri no i kuasa' di Rusod do Kinorohingan o popomilo dati' do momolohou'd Kinorohingan dot, “Apa', oi Apa'!” ka. 16 Iri no i Rusod do Kinorohingan om i rusod toko' o popoilo dati' do tangaanak toko'd Kinorohingan. 17 Om ondung tangaanak toko' dau, om iyati' nga' kotungkus no di barakat di nokosodia' nod Kinorohingan do patahakon di tangaanak dau. Om kotonggoi toko' nondod Kristus do kaanu do koinsanai di nokosodia'd Kinorohingan do patahakon dot id Kristus; tu' ondung kotonggoi toko' di Kristus dot oinggorit, om iyati' nga' kotonggoi no dau'd poinggoyoon.
Kagayaan di Poingompus
18 Osorou ku nopo iyoho', om iti ngai' nopo koinggoritan toko'd dinondo, om a' i' kopio kotimbang di kagayaan do pointalangon dot id dati' do koimbagu. 19 Oinsanan nopo i songiwonsoi do mandad do mikuwo'd langadon tomod di maso do kopointalangan do Kinorohingan di tangaanak dau. 20 Tu' pologoso' ngai' nopo i winonsoi'd Kinorohingan dot aiso' o kotutuk- tutukon, om okon i' ko' mantad id korohian diyolo' dot osiliu o miagal diri, suwai ko' Kinorohingan i' o pinopologos do miagal diri. Nga' iyo piya'ddi, nga' haro po o soro-sorohon. 21 Tu' korikot indo o maso do poiduwon o koinsanai di winonsoi'd Kinorohingan do mantad id kuasa' di mamaraag diyolo', om koidu' nondo iyolo' om koinggayo do kotonggoi di tangaanak do Kinorohingan. 22 Oilaan toko' i' do gisom piya'd dinondo nga' mingodoi ngai' po i winonsoi'd Kinorohingan dot ongoinggoritan do miagal poddi tondu' dit oinggorit tomod do tontok di mogkosusu. 23 Om okon i' ko' iri ngai' no i winonsoi'd Kinorohingan o mingodoi; nga' iyati' piya nga' mingodoi i' dot id suang do ginawo toko'. Nakaramit toko' no daa di Rusod do Kinorohingan, i nipuhawang do Kinorohingan di koiso' i' kopio, nga' magandad kasai' toko' pod Kinorohingan do popoidu' kopio do tinan toko' om poposiliu dati' do tangaanak dau. 24 Napasi toko' iddi tu' minogondos toko' i' di soro-sorohon toko'. Nga' ondung nokito toko' no i soro-sorohon toko'ddi, om okon noddi ko' soro-sorohon pori: Tu' isai po daa o morou-sorou di nokito dau? 25 Nga' ondung mogondos toko' di soroho-sorohon toko', om it a' toko' po nokito, om polonuton toko' nopondo o ginawo do magandad diri. 26 Om iyo nogiddi i Rusod do Kinorohingan do rumikot do mongoi ponulung dati' do tontok dit oluhoi toko'. Tu' a' toko' i' koilo ondung poingkuro o ralan toko'd sumambayang; om iri nopondo Rusod o rumikot dot id Kinorohingan do mogobi' dati' do mokianu, om mikuwo'd lumangad tomod iyau do mokianu gisom dot a' no milo'd susuyon i kalangadan dau. 27 Om Kinorohingan indo, i koilo dot id suang do ginawo'd tulun o kosuhut do pokionuon di Rusod diri; tu' iri nopo Rusod diri om iri i tulun di songonuon do Kinorohingan o kopokionuan dau, om miontok do korohian do Kinorohingan i pokionuon dau. 28 Oilaan toko' i' do Kinorohingan o monongkoilo do koinsanai'd nunu nopo, gisom do poporikot i' iyau dit osonong dot id tulun dit osianan dau, i linohou dau do miontok di natantu' mantad dau. 29 Iri nopo i nongopili' do Kinorohingan, om natantu' mantad no di timpuun i' do miyo di Tanak dau, i Yesus Kristus. Om iri noddi i Tanak diri o nosiliu'd kotuahan dot id pogialatan dot ogumu' o mogiobpinai. 30 Om iyo noddi o Kinorohingan do momolohou di tulun di natantu' mantad dau do mantad di timpuun i', om pinoulud dau kawagu dot id dau i tulun di nongolohou dau'ddi. Om iri nopo i nokoulud kawagu'd Kinorohingan dot id dau, om kaanu nod tintanga' di kagayaan dau.
Pinointalang di Yesus Kristus o Kogoyoo'd Kosianan do Kinorohingan dot id Dati'
31 Nunu poddi o poboroson do pasal ngai'ddi? Ondung mogobi' o Kinorohingan dati', om isai po o kasaap dati'? 32 Iri piya i Tanak dau nga' a' i' dau pinusus, suwai ko' patahako' nopo dau do maan do koinsanangan ngai' toko'; om a' nogi' tuu'ndo dau patahakon ngai' i suwai ko' iri? 33 Isai po o milo'd papasala' dati', iyati' i tulun di nopili' do Kinorohingan, ondung Kinorohingan o pinopoboros dot aiso' o sala' toko'? 34 Haro tuu o tulun do papasala' dati'? I Kristus Yesus indo o mogobi' dati'! Iyau no i napatai, om iyau nogi' kopio i napasi kawagu do mantad id kapatayon om i pointalad do Kinorohingan do hiri'd kinoiyonon di kikuasa'. 35 Haro tuu o mangantob di Kristus dot osianan dati'? Milo tuu do mangantob dau o kosusaan, ko' koinggoritan, ko' kolousanan, ko' komosikinan, ko' koligagaanan, ko' kapatayon po? 36 Nokotulis no dot id suang do Buuk do Kinorohingan o boros do poingkaa, “Monongodou-ngodou nopo iyahai dot id suang do koligagaanan do patayon dot iya' o kapamatayan. Om iyoon po iyahai di dumba' di potisumbolion no,” ka. 37 Amu'! Suwai ko' kaanu nogindo iyahai'd kamanangan dit agayo dot id suang ngai'ddi, dot iyau it osianan dahai o papamanang dahai! 38 Tu' monongkuyaan oku i' kopio do hiti nopod pointongkop diti pomogunan om kapatayon piya ko' koposion, om moloikat ko' pomorinta', om i korolosi do dinondo ko' i korolosi do koimbagu ko' it ongokoris do suwai ko' iri; 39 om i hilo'd tawan, ko' i hiti'd pomogunan ko' nunu nopo i suwai, nga' aiso' i' o kaantob do Kinorohingan dot osianan dati', do miagal di nokointalang dau do pinointalang di Kristus Yesus, i Tuhan toko'.
Kinorohingan om i Tulun di Nopili' Dau
1 Iti nopo poboroson ku'dti om otopot i' tu' Kristus no o sanganu doho'. A' oku i' mongudut. Om kopurimanan do ginawo ku di porintaon do Rusod do Kinorohingan nga' sumokodung i' do popogirot do ginawo ku dot otopot iti boros ku. 2 Tumongob tomod oku om oudipon o ginawo ku, 3 do kosorou di piro-piro o tobpinai ku di sompi' ko' bansa' ku. Om uhang ku i' do papalan oku'd Kinorohingan om potongkiadon oku do mantad id Kristus, dot iyolo' o kopongiyo'ddian. 4 Iyolo' no i tulun di nopili' om i siniliu'd Kinorohingan do tangaanak dau, om pinointalang dau o sinundu dau dot id diyolo'. Om minomonsoi iyau do tumpongo dot id diyolo' om nonuan dau iyolo' di Tourat. Om sinunudan iyolo'd Kinorohingan do ralan diyolo' do sumambayang om naanu ngai' no diyolo' i batos dau. 5 Iyolo' nopo om sinakagon i' di komolohingan toko'. Om i Kristus nga' mantad i' dot id bansa' diyolo' dot id pagantangan do tulun. Om iyau no it id sawat kopio ko' koinsanai diyolo'. Royohon no o Kinorohingan do gisom dot alaid! Amin. 6 A' oku i' momoros dot a' nabayaan i batos do Kinorohingan; nga' okon i' ko' oinsanan o tulun dot Israil do tulun di nopili'd Kinorohingan. 7 Okon i' ko' oinsanan i sinakagon di Abraham do tangaanak do Kinorohingan. Tu' boros kad Kinorohingan dot id di Abraham, “Iri no i sinakagon di Isak o roitan do sinakagon nu,” ka. 8 Komoyon nopoddi nga' iri no i sinakagon di Abraham di nosusu dot i batos do Kinorohingan o nokosusu-susuan ot osiliu do tangaanak do Kinorohingan; om okon i' ko' oinsanan i sinakagon dau. 9 Tu' poingkaa o batos do Kinorohingan, “Orikot nopondo i maso di natantu' mantad, om gumuli' oku nondo kawagu, om kianak nondo i Sara dot iso' o kusai,” ka. 10 Om okon i' ko' iri noo. Tu' paganak no i Robika do duwo o kusai, om iso- iso' i' o tapa' diyolo', dot i Isak i taki-aki toko'. 11 Di nopo dit a' po nosusu i duwo o tanak diri, om natantu' mantad nod Kinorohingan i pilion dau. Iri nopo i pinili' do Kinorohingan diri om okon i' ko' i milo'd tulun do wonsoyon o pinoimpahan, suwai ko' pinoimpahan nopo om i lolohou'd Kinorohingan. Tu' nopo dit a' po goduwo milo i tanak do kusai di Robika'ddi do momonsoi dit osonong ko' it araat, 12 om nokoboros nod Kinorohingan dot id di Robika o poingkaa, “Iri nondo it id dotuo o mogobi-obi' dit id domulok,” ka. 13 Om nokotulis dot id suang do Buuk do Kinorohingan do pinoboros do Kinorohingan o poingkaa, “Osianan oku di Yakub, nga' araatan oku i' di Isau,” ka. 14 Iyo nopoddi om nunu poddi o poboroson toko'? A' tuu otulid i winonsoi'd Kinorohingan diri? Nga' atantu' no dot otulid i' i winonsoi'd Kinorohingan! 15 Tu' boros kad Kinorohingan dot id di Musa, “Insianan ku indo i tulun dit insianan ku; om olisiu oku di tulun di kolisihan ku,” ka. 16 Iyo nopoddi, om iri nopo i wonsoyon do Kinorohingan om okon i' ko' i kagayaan do ginawo'd tulun ko' i wonsoyon do tulun o maan dau'd poimpahan, suwai ko' mantad i' do kosianan do Kinorohingan dot id tulun di pilion dau. 17 Tu' nokotulis i' dot id suang do Buuk do Kinorohingan o poingkaa, “Boros kad Kinorohingan dot id Raja' do Masir, ‘Kinoponilihan ku nopo diya' do raja' om wayaan ku do pointalang do kuasa' ku, om kabantug indo o ngaran ku do pointongkop diti pomogunan,’ ka dau,” ka. 18 Iyo nopoddi om osianan i' o Kinorohingan dot id isai nopo o tulun di kosianan dau. Om pokodohon do Kinorohingan o ginawo dot isai nopo o tulun di pokodohon dau o ginawo.
Kototogod do Kinorohingan om Kosianan Dau
19 Iyo nopoddi, om moro-boros ko no dotindo doho' do poingkaa, “Iyo nopoddi om nokuro tu' pasalaon kasai' pod Kinorohingan o tulun? Tu' iso' pod tulun nga' aiso' no o koodu do korohian do Kinorohingan,” ka. 20 Nga', tobpinai! Iya' nopo om tulun i' toomod. Om a' ko' i' koino-ino do sumurilog do Kinorohingan! Milo toi i kuron do monguhot di tulun di minomorun dau dot, “Nokuro tu' iyo'dti o pinomonsoi nu doho'?” ka. 21 A' toi kikuasa' i' i tulun di momorun di kuron do momorun di lagit do poingkuro nopo o korohian dau? Sombulugu' nopo o tana' om milo i' di tulun di gompomorun do worunon do duwo o kuron di misuayan: iso' ot osonong, om iso' ot a' songkuro o kosonongo'. 22 Om iyo nogiddi i wonsoyon do Kinorohingan. Pourobuson no daa kopio dau o kototogod dau om popokito iyau do kuasa' dau. Nga' alanut i' o ginawo dau dot id toguang ngai' di tulun dit apatut dau do hukuman tu' pinopotogod i' iyolo' dau. 23 Om orohian o Kinorohingan do popointalang dot id dati' di kosimbayanan dit a' ogina-gina', i patahakon dau dot id dati', i kosianan dau. Om nokosodia' toko' no dau do rumamit di kosimbayanan diri. 24 Iyati' no i nolohou dau, om okon i' ko' mantad no dot id tulun do Yohudi, nga' mantad nogi' dit okon ko' Yohudi. 25 Tu' nokoboros no o Kinorohingan dot id suang do buuk di Nabi Hosia, do poingkaa, “Iri nopo tulun dit okon ko' tulun di songonuon ku, om roitan nondo do, ‘Tulun di doho'd songonuon!’ ka. Iri nopo bansa' dit a' ku kosianan, om roitan nondo do, ‘Kosianan ku,’ ka. 26 Om hiri nopondod kinoiyonon di binarasan o tulun dot, ‘Okon kou i' ko' tulun di songonuon ku,’ ka, om hiri nogindo do roitan i tulun diri do tangaanak do Kinorohingan di poimpasi,” ka. 27 Om nokoinod no kopio di Nabi Yosaya, o pinomoros dau do pasal di bansa' dot Israil do poingkaa, “Mulong piya dot iyo di pasir do hilo'd rahat o kogumuon di tulun dot Israil, nga' okuri' indo ot apasi; 28 tu' oruhai no o Tuhan do paparatu' do hukuman dot id pointongkop diti pomogunan,” ka. 29 Om minomoros po i Yosaya do poingkaa, “Ondung a' daa pinopoolu' o Kinorohingan it Osundu Kopio do sinakagon toko', om atantu' no do noinsanan toko' no daa do nokoiyo do bandar do Sodom om Gomora,” ka.
I Tulun di Songonuon do Kinorohingan om i Habar dot Osonong do Mantad id Kinorohingan
30 Om kootuson nopoddi nga' poingkaa: Iri nopo tulun dit okon ko' Yohudi om a' i' tuminotos do monokiulud do Kinorohingan. Nga' pinoulud iddi kawagu iyolo'd Kinorohingan dot id dau tu' minonongkuyaan i' iyolo'. 31 Nga' iri nopo i tulun do Yohudi om tumotos tomod i' daa do mumboyo' di toturan om koulud i' kawagu iyolo' dot id Kinorohingan. Nga' a' i' iyolo' milo do minulud dot id dau. 32 Nokuro tu' a' iddi iyolo' nokoulud dot id Kinorohingan? A' pogi' iyolo' nokoulud nga' okon i' ko' i kotumbayaan diyolo' dot id Kinorohingan o ralan diyolo' do monokiulud, suwai ko' iri i' i wonsoyon diyolo'. Om gowoi poddi om nakasadu iyolo' di “Watu do Kosoduwon”. 33 Om poingkaa o nokotulis do pasal di watu'ddi dot id suang do Buuk do Kinorohingan, “Ilaai no dokoyu. Do nokoiliu ku no ot iso' o watu do hilo'd Sion, i watu di kososoduwon do tulun, i watu dit agayo do kototohubon do tulun. Nga' iri nopo tulun di monongkuyaan dau om a' no oiman-iman,” ka.
1 Oi tobpinai-tobpinai ku! Orohian oku no kopio dot apasi i bansa' ku. Om magayi-ayi' oku no kopio'd ginawo do sumambayang dot id Kinorohingan do bagi' diyolo'. 2 Katama' oku i' do momoros dot aparu' i' kopio iyolo'd sumambayang dot id Kinorohingan. Nga' iri nopo koporuo' diyolo'ddi om a' i' poingimpou di toilaan do mantad id Kinorohingan. 3 A' i' iyolo' koilo di ralan do Kinorohingan do popoulud kawagu'd tulun dot id dau. Om tumanud nopo iyolo' di diyolo'd ralan do mulud dot id Kinorohingan, om a' nogi' tumanud di ralan di pinotuduk do Kinorohingan. 4 Nopongo no di Kristus o paantakan di Tourat, om nopupusan noddi o kuasa'ddi. Om kaa pogi'ddi do pointikid-tikid do tulun di monongkuyaan di Kristus om koulud no kawagu dot id Kinorohingan.
Koinsanai'd Tulun Nga' Milo id Posion
5 Nokotulis no di Musa dot iri nopo tulun di mulud dot id Kinorohingan dot i Tourat o poimpahan do monokiulud, om apasi indo i tulun diri tu' mumboyo' i' iyau di Tourat. 6 Nga' iri nopondo kotumbayaan dot id Kinorohingan o poimpahan do tulun do monokiulud do Kinorohingan, om poingkaa o pinoboros dot id suang do Buuk do Kinorohingan, “Kada' kou no ponguhot dot id suang do ginawo dokoyu do poingkaa, ‘Isai nondo o minsawat do hilo'd surga?’ ka. (Komoyon nopo om mongoi polintuhun di Kristus), 7 ko' monguhot dot, ‘Isai nondo o lumintuhun do hilo'd pomogunan do tulun do napatai?’ ka. (Komoyon nopo om mongoi pamasi di Kristus do mantad id kapatayon),” ka. 8 Komoyon nopoddi nga' poingkaa, “Id somok no kopio dokoyu i habar do mantad id Kinorohingan; hino nod kabang dokoyu om id suang nod ginawo dokoyu,” ka. Om iri no i habar do popinsusuyon dahai; i habar do momisunud do mositi' nod monongkuyaan o tulun di Yesus Kristus. 9 Tu' ondung poboroson nu dot okunon nu do, “Tuhan, i Yesus,” om monongkuyaan ko dot id suang do ginawo nu do pinasi do Kinorohingan i Yesus do mantad id kapatayon, om apasi ko no. 10 Tu' ginawo id tulun o totumbayaan, gisom do romiton iyau'd Kinorohingan tu' nokoulud no iyau dot id Kinorohingan. Om poboroson do tulun diri do mangakun iyau dot otumbayaan, gisom dot apasi nondo iyau. 11 Nokotulis no dot id suang do Buuk do Kinorohingan o poingkaa, “Tulun nopo di monongkuyaan om a' no oiman-iman,” ka. 12 Komoyon nopoddi om oinsanan nopo o tulun, tu' aiso' i' o pisuayan dot id pialatan do tulun do Yohudi om it okon ko' Yohudi. Iso' noo o Kinorohingan do Tuhan do koinsanai'd tulun. Om manahak i' iyau do barakat do gisom dot a' aayi-ayi' dot id koinsanai'd tulun di mokitulung dau. 13 Om nokotulis dot id suang do Buuk do Kinorohingan o poingkaa, “Koinsanai'd tulun di lumohou'd Tuhan om apasi no,” ka. 14 Nga' poingkuro daa o tulun do lumohou'd Tuhan dot a' po iyolo' monongkuyaan? Om poingkuro daa iyolo' do monongkuyaan do Tuhan dot a' po iyolo' korongou do pasal dau? Om poingkuro daa iyolo' do korongou do pasal do Tuhan, ondung aiso' o mongoi pomisunud diyolo'? 15 Om poingkuro daa o tulun do mongoi poposunud do habar diri, ondung a' iyolo' suhuon? Nokotulis no o poingkaa dot id suang do Buuk do Kinorohingan, “Osonong no kopio o korikatan di tulun di mongigit do Habar dot Osonong do mantad id Kinorohingan!” ka. 16 Nga' a' i' oinsanan o tulun do rumamit di Habar dot Osonong diri. Tu' boros ka di Yosaya, “Tuhan, isai daa o monongkuyaan di pinosusui dahai?” ka. 17 Om kaa pogi' do monongkuyaan nopo o tulun di habar om, korongou iyolo' di habar, om norongou pogi' i habar nga' haro i' o tulun do minongoi popinsusui do pasal do Kristus. 18 Nga' muhot oku: A' kopio toi iyolo' nokorongou di habar diri? Atantu' no do nokorongou i'! Tu' nokotulis i' dot id suang do Buuk do Kinorohingan o poingkaa, “Nokotongkop no do hiti'd pomogunan o boros diyolo', om nokorikot nod hilo'd tisan do tana' o boros diyolo',” ka. 19 Om muhot oku po kawagu: A' po tuu nokoilo i bansa'd Israil do pasal diri? Pologoson po i Musa do mogulu do monimbar diti tuhoton. Boros kad Musa, “Poingkaa o boros do Kinorohingan, ‘Poosolon ku nondo iyokoyu dot iso' o bansa' dit okon i' daa ko' bansa' kopio, om potogodon ku nondo iyokoyu dot iso' o bansa' di basug,’ ka dau,” kad Musa. 20 Om nakatama' kopio i Yosaya do minomoros do poingkaa, “Poingkaa o boros do Kinorohingan, ‘Iri nopo tulun dit a' minogihum doho', om nokosolowot nogi' doho'; om minintalang oku dot id tulun dit a' mininguhot do pasal doho',’ ka,” ka di Yosaya. 21 Nga' boros ka di Yosaya dot i bansa' dot Israil o komoyon, “Poingkaa o boros do Kinorohingan, ‘Monongodou-ngodou oku nopo do mingkapoi do momolohou do bansa' dit okodou o ginawo om it a' obintanud,’ ka,” ka dau.
Kosianan do Kinorohingan dot id Bansa' dot Israil
1 Monguhot oku po: Nakataam no tuu kopio'd Kinorohingan i tulun di songonuon dau? Atantu' nod a' i'! Iyoho' piya nga' bansa' i' dot Israil di sinakagon di Abraham, om mantad oku id payat di Binyamin. 2 A' i' kopio! A' id Kinorohingan pataamon i tulun dau di nopili' mantad dau di gulu po. Koilo kou i', oi tobpinai-tobpinai, di nokotulis dot id suang do Buuk do Kinorohingan dot i Ilia o komoyon, do tontok di pinosunud dau dot id Kinorohingan o pasal dot Israil. Boros ka di Ilia, 3 “Oi Tuhan, nangapatai nod tulun i piro-piro o nabi do boros nu om nangaraag diyolo' i tiyonon do papatahak do porsombahan di sumbolion dot id diya'. Iso' oku po do noolu', om iyoho' nga' pokipapatayan no diyolo',” ka dau. 4 Nunu kad nisimbar do Kinorohingan dot id di Ilia? Boros kad Kinorohingan do suminimbar, “Nokoolu' ku no o turu' noribu o tulun di doho'd songonuon. Om a' i' iyolo' insan koumbal do tumuku' dot id Baal, i tingolig diri,” ka dau. 5 Om baino' nga' iyo iddi: Haro i' o tulun dot okuuri' do nopili'd Kinorohingan dot i kosianan dau o kinopomilian dau. 6 Om pinili' pogi' dau iyolo' nga' mantad i' do kosianan dau om okon i' ko' i winonsoi diyolo' o kinopomilian. Tu' ondung i wonsoyon do tulun o kinopomilian do Kinorohingan diyolo', om iri nopoddi kosianan do Kinorohingan diri om okon noddi ko' kosianan dit otopot kopio. 7 Iyo nopoddi, om poingkuro poo? A' i' i tulun dot Israil nakaanu di tihumon diyolo'. Iri nopo nakaanu'ddi om okuri' i' kopio, iri no i tulun di nopili'd Kinorohingan. Iri ngai' nopo i suwai om kuminodou ngai' o ginawo do nokorongou di lolohou'd Kinorohingan. 8 Tu' nokotulis no dot id suang do Buuk do Kinorohingan o poingkaa, “Pinabasug do Kinorohingan o ginawo om pomusarahan diyolo'; om gisom piya do dinondo nga' a' i' kokito o mato diyolo' om a' korongou o tolingo diyolo',” ka. 9 Om boros ka kawagu di Daud, “Pologoson nopo dot osiliu'd lawa' di kosulungon diyolo' i poginakanan diyolo', om osiliu iri do luang di korotuon om kapatayon diyolo'! 10 Pologoson nopo dot otuong o tokito diyolo' om a' i' iyolo' kokito; om pologoson nopo dot ongotongkud iyolo' dot ouruan dot oinggorit do gisom dot alaid,” ka. 11 Monguhot oku po kawagu: Aratu' nopo i tulun do Yohudi om pamatai tuu diyolo' iri? Amu', a' i' kopio! Nga' pinasi nogiddi i tulun dit okon ko' Yohudi, om mosol indo i tulun do Yohudi diyolo'. 12 Binarakatan diri'd Kinorohingan i tulun do suwai do hiti'd pomogunan tu' nokowonsoi id dusa i tulun do Yohudi, om i komosikino' diyolo' do don rusod o pinoporikot do barakat dot ogumu' dot id tulun dit okon ko' Yohudi. Om okon-okon po daa'ndo do koulud kawagu o tulun do Yohudi dot id Kinorohingan; nga' atantu' no dot agayo-gayo o barakat do patahakon do Kinorohingan dot id diyolo'.
Koposion dot Aanu do Tulun dit Okon ko' Yohudi
13 Dinondo nodti om moro-boros oku dot id dokoyu, oi tobpinai-tobpinai ku dit okon ko' Yohudi! Solinaid nopodti, om poinggoyoon tomod ku i' o karaja' ku di dong rasul dot id tulun dit okon ko' Yohudi. 14 Om mogondos oku nopo do koponingkau oku daa do ginawo di bansa' ku, gisom do mosol nondo iyolo', om apasi i' daa'ndo o wookon diyolo'. 15 Tu' tontok di niadaan do Kinorohingan iyolo', om koulud noddi dot id Kinorohingan o tulun do hiti'd pomogunan; om okon-okon po daa'ndo dot aramit do Kinorohingan i tulun do Yohudi! Atantu' no dot iyo pondo iyolo' do tulun di napatai do noposian kawagu! 16 Ondung nakatahak dot id Kinorohingan o sangkabing o roti dit id gulu kobingo', om komoyon nopoddi nga' noinsanan no i roti do nakatahak dot id Kinorohingan. Om ondung Kinorohingan o sanganu di gamut do kayu, om komoyon nopoddi nga' iyau no o sanganu ngai' di raan. 17 Tinipu' o piro-piro di raan di guas do saitun i poiyaan di tulun do Yohudi. Om hiri nopoddid kinotipuan om pinokowinan di raan do guas do saitun di hilo'd gouton, i poiyaan di tulun dit okon ko' Yohudi. Om pinakawin ko'ddi do hiri, om kopuriman ko i' do koinsanai dit ongosonong do mantad id koposi-posion di don rusod di tulun do Yohudi. 18 Iyo nopoddi om kada' dokoyu ulak-ulakai i nongoidu' do miagal di raan do tinipu'. Mositi' no dot ahandaman dokoyu dot iyokoyu nopo om raan no toomod. Om okon i' ko' i raan o paakan di gamut, suwai ko' i gamut o paakan di raan. 19 Nga' momoros ko no doti' daa'ndo dot, “Oo, nga' kinoponipuan nopo di raan om papakawin doho' dot id guas diri!” ka nu doti' daa'ndo. 20 Otopot nogi' iri. Nga' pinataam pogi' iyolo' nga' gama' i' dot a' iyolo' minonongkuyaan, om iya' no om rinamit ko pogi' nga' minonongkuyaan ko i'. Om kada' nogi' kopio pinggaya-gayaai iti; suwai ko' apatut nogi' dot ooris ko. 21 Tu' ondung a' o Kinorohingan noupus do pinapataam di tulun do Yohudi, i miagal di raan mantad diri, om kada' nogi' soroho' dot oupus iyau diya' om a' sipataam diya'! 22 Om hiti nod oilaan toko' dot a' ogina-gina' o kosonongo'd Kinorohingan om a' ogina-gina' o kototogod dau. Otogod no kopio iyau di tulun di momonsoi'd dusa, nga' osonong i' iyau dot id diya' ondung momonsoi kasai' ko no di korohian dau, gisom dot osianan nondo iyau diya'! Nga' ondung amu', om iya' nga' pataamon indo. 23 Om iri no i tulun do Yohudi, om ondung tumingkod iyolo' di kowoyo-woyoo' diyolo' dot a' monongkuyaan, om romiton indo kawagu iyolo'd Kinorohingan, tu' kikuasa' i' o Kinorohingan do mamaramit kawagu diyolo'. 24 Iya' nopo tu' okon ko' tulun do Yohudi om miagal-agal di raan do guas do saitun di hilo'd gouton. Om ondung milo ko iya' do pokowinon di guas do saitun di pigompian, it okon ko' diya' mantad do guas, om okon-okon pondo i tulun do Yohudi, i pinoiyo do raan di guas do saitun di pigompian diri. Atantu' no dot osonong-sonong o Kinorohingan do popoguli' kawagu diyolo' do hiri'd guas mantad do saitun diri.
Kosianan do Kinorohingan dot id Koinsanai'd Tulun
25 Oi tobpinai-tobpinai ku! Mogondos oku nopo dot a' kou momusorou do nongoilaan ngai' dokoyu iri. Tu' haro i' i korohian do Kinorohingan, nga' a' po noilaan do tulun. Om orohian oku do koilo kou'ddi; iri no tu': kumodou indo o ginawo do wookon di tulun do Yohudi, nga' iri nopondo kowoyo-woyoo' diyolo' dot okodou o ginawo om a' i' potilombus, suwai ko' gisom no do korikot ngai' dot id Kinorohingan i tulun dot okon ko' Yohudi. 26 Om iyo noddi dot apasi ngai' o tulun do Yohudi. Tu' nokotulis no dot id suang do Buuk do Kinorohingan o poingkaa, “Rumikot nondo i Raja' do Gampamasi do mantad hilo'd Sion, tonuson ngai' nondo dau i karaato' di sinakagon di Yakub. 27 Pogiroton ku nondo iti tumpongo dot id diyolo' do tontok dit ompunan ku o dusa diyolo',” ka. 28 Nosiliu'ddi i tulun do Yohudi do pisangod do Kinorohingan, tu' a' i' iyolo' ruminamit di Habar dot Osonong do mantad id Kinorohingan; nga' iri nogiddi o nosiliu do kountungan dokoyu it okon ko' tulun do Yohudi. Nga' kosianan kasai' id Kinorohingan i tulun do Yohudi, tu' pinili' i' iyolo'd Kinorohingan, om osorou dau i taki-aki diyolo'. 29 Tu' ondung momili' o Kinorohingan do tulun om mamarakat iyau do tulun diri, om a' no insan do monimban kawagu o Kinorohingan di winonsoi dau. 30 Di nopo di gulu po om a' kou i' iyokoyu, i tulun dot okon ko' Yohudi, minumboyo' do boros do Kinorohingan. Nga' baino' noddi om nokoboros nod Kinorohingan do nokoidu' kou no do mantad id kasalaan, tu' a' i' minumboyo' i tulun do Yohudi. 31 Om iti tulun do Yohudi nga' iyo nogiddi. Tu' a' iyolo' mumboyo' do boros do Kinorohingan do dinondo poo, om koidu' kou i' iyokoyu do mantad id kasalaan. Nga' iyolo' piya'ndo nga' koidu' i' do mantad id kasalaan do koimbagu. 32 Tu' pologoso' nopod Kinorohingan o koinsanai'd tulun dot oporinta' di korohian dot a' mumboyo', om kointalang indo dau o kosianan dau dot id koinsanai diyolo'.
Pamarayou do Kinorohingan
33 A' no kopio ogina-gina' o kakayao' do Kinorohingan! Om aralom kopio o toilaan om it osuhutan dau! Isai po daa o kosuhut di natantu' dau do wonsoyon dau? Isai po daa o kosuhut di kowoyo-woyoo' dau'd kumaraja'? 34 Nokotulis no dot id suang do Buuk do Kinorohingan o poingkaa, “Isai poo o koilo do pomusarahan do Tuhan? Isai poo o milo do monosihat dau? 35 Isai daa o nokoumbal do minanahak do Tuhan do nunu nopo gisom do milo do mokisomuli' dau?” ka. 36 Kinorohingan no o minomonsoi do koinsanai'd nunu nopo. Koinsanai'ddi om mantad ngai' i' dot id Kinorohingan om dong Kinorohingan ngai'ddi. Royohon no o Kinorohingan do gisom do poingompus! Amin.
Kowoyo-Woyoo' Toko' do Momonsoi'd Karaja'd Kinorohingan
1 Oi tobpinai-tobpinai ku! Osonong no kopio o Kinorohingan dot id dati'. Om iri no o koponuhuan kopio ku dokoyu do papatahak do koposi-posion dokoyu dot id Kinorohingan do sumiliu'd porsombahan di poimpasi di potobilangon do maan do dong Kinorohingan, om i kohubayaan kopio dau. Iyo noddi o ralan dokoyu do sumambayang dot id Kinorohingan di koontok kopio. 2 Kada' kou kopio tanud di koubasan diti pomogunan. Pologoson no o Kinorohingan do popoinwagu do kowoyo-woyoon dokoyu, om kosimban kou i'. Om milo kou indo do mongilo do korohian do Kinorohingan, iri no it osonong om i kohubayaan dau om it aiso' no o koiyo do kosonongo'. 3 Noonuan oku nod Kinorohingan do nipuhawang. Om iri no o koponosihatan ku ngai' dokoyu, oi tobpinai-tobpinai ku. Kada' kou kadalaai do minggayo-gayo, suwai ko' pokosuhat-suhatanon i' o pogogontong do kosonongo' do dau'd kowoyo-woyoo' do miontok dit otopot. Posiribaon o ginawo do mongilo'd kosonongo' do dau'd kowoyo-woyoo', om sompori-pori do mongilo'd kosonongo' do dau'd kowoyo-woyoo' do tumanud di komilaan do pinatahak do Kinorohingan dot id dau tu' monongkuyaan i' iyau di Yesus. 4 Tinan toko' nopo om ogumu' o pakakas. Om pointikid-tikid di pakakas diri nga' haro ngai' nopo o karaja'. 5 Om iyati' nga' iyo nogiddi. Mulong piya dot ogumu' toko', nga' iso-iso' i' o tinan toko' tu' nokoiso' toko' no dot id Kristus. Om mogiiso' toko' tu' pakakas ngai' toko' i' dot iso' o tinan. 6 Noonuan ngai' toko' nod mogisuayan o nipuhawang do kumaraja'. Om Kinorohingan i' o pinapatahak ngai'ddi dot id dati' do tumanud di kosianan dau. Iyo nopoddi om mositi' nod pakayon ngai' toko' i nipuhawang diri. Iri nopo tulun di noonuan do nipuhawang do popinsusui di habar do mantad id Kinorohingan, om mositi' nod popinsusui iyau di habar do mantad id Kinorohingan diri do tumanud di komiloo' dau. 7 Iri nopo tulun di noonuan do nipuhawang do monulung do tulun do suwai, om mositi' nod monulung. Iri nopo tulun di noonuan do nipuhawang do monuduk, om mositi' nod monuduk. 8 Iri nopo tulun di noonuan do nipuhawang do monginsasamod om mongodsuur do tulun do suwai, om mositi' nod monginsasamod om mongodsuur. Iri no tulun di noonuan do nipuhawang do manahak do tulun do suwai do nunu nopo i haro dot id dau, om mositi' nod momonsoi do miagal diri dot otopot-topot kopio o ginawo do momuhawang. Iri nopo tulun di noonuan do nipuhawang do sumiliu'd boyoon, om mositi' nod otorodok do momoyo'. Iri nopo tulun di noonuan do nipuhawang do monginsian do tulun do suwai, om mositi' nod momonsoi do miagal diri do mikuwo'd osonong o ginawo. 9 Mositi' nod osianan kou do mikuwo'd iso-iso' kopio o ginawo'd osianan. Karaatai kou no dit araat, om anggamai no kopio dokoyu it osonong. 10 Mogiinsian-sian kou no, do miagal di mogiobpinai dot id suang dot iso' o sompiiyon, om mogisogulu-gulu kou nod sumuwau. 11 Kumaparu' kou nod kumaraja', kada' kou kakaul. Momonsoi kou nod karaja' di don Tuhan do mikuwo'd kokorisan do mantad id Rusod do Kinorohingan. 12 Mogondos kou nod Tuhan do mikuwo'd otood o ginawo, om polonuton nopo o ginawo dot id suang do kosusaan, om tumorodok kou nod sumambayang. 13 Uhup kou nod monulung di tulun do Kristian di haro o kokurangan, om romiton no dokoyu dot id walai dokoyu i tulun di notumbayaan di dokoyu'd kinotumbayaan dot a' piya dokoyu iyolo' otutunan, do mikuwo'd osonong o ginawo. 14 Pokibarakatan no dokoyu'd Kinorohingan i tulun dit orongit dot id dokoyu. Pokibarakatan no kopio dokoyu iyolo'd Kinorohingan, om kada' kou nogi' pomopol. 15 Tumonggoi kou nod otood do tontok dit id sugku' di tulun dot ongotood, om tumonggoi kou'd mihad do tontok dit id sugku' di tulun di mihad. 16 Mogiuulud kou no. Kada' kou kasawat o ginawo, suwai ko' miyo kou nopo di tulun dit osiriba' o pangkat. Kada' dokoyu soroho' dot aralom o toilaan dokoyu ko' mantad di toilaan kopio dokoyu. 17 Ondung araat o wonsoyon do tulun dot id dokoyu, om kada' dokoyu iyolo' suliai dit araat. Wonsoyon no dokoyu it osonong dot id pagantangan do koinsanai'd tulun. 18 Iyokoyu nopo, om tumotos kou no kopio do monokiulud do koinsanai'd tulun. 19 Oi tobpinai-tobpinai ku! Kada' kou nogi' kopio suli', suwai ko' pologoson nopod Kinorohingan o momohukum. Tu' nokotulis i' dot id suang do Buuk do Kinorohingan o poingkaa, “Iyoho' no o monuli'. Iyoho' nondo o momohukum dau,” kad Tuhan. 20 Tu' ondung louson o pisangod dokoyu, om paakanon no dokoyu iyau, om ondung tuuhan iyau, om poinumon no dokoyu iyau. Tu' ondung momonsoi kou'd miagal diri, om iri no o pongintingayam dokoyu dau. 21 Kada' dokoyu pologoso' dot aala' kou dit araat, suwai ko' pologoso' nod aala' dokoyu di kosonongo' it araat.
Tonggungan dot id Porinta
1 Mositi' nod mumboyo' do porinta o pointikid-tikid do tulun, tu' aiso' i' o porinta dit okon ko' Kinorohingan o kinoonuan do kuasa'. Om iri nopo porinta do dinondo om tumanud i' di pinonuhuan do Kinorohingan o pamamakai dau di kuasa' dau. 2 Om kaa pogi' dot iri nopo tulun di sumaap do porinta, om miagal nopod sumaap di natantu' mantad do Kinorohingan. Om tulun nopod miagal diri om ohukuman no. 3 Tu' iri nopo tulun di momonsoi dot osonong om a' i' minog dot ooris do porinta. Iri no i tulun dot araat o moddosi do porinta. Ondung orohian ko dot a' ooris do porinta, om mositi' nod momonsoi ko dit osonong, om arayou ko indo. 4 Tu' porinta nopo om susuhuon id Kinorohingan, om kumaraja' iyolo' do maan do koinsanangan nu. Nga' ondung momonsoi ko'd araat, om atantu' nod ooris ko'd porinta, tu' okon i' ko' maan toomod do kikuasa' o porinta do momohukum do tulun. Porinta nopo om susuhuon id Kinorohingan, i paparatu'd hukuman do mantad id Kinorohingan dot id tulun di momonsoi dot araat. 5 Om iri no o kotonudan nu'd boros do porinta --- dot okon nopo ko' mada'd ohukuman, nga' tumanud nogi' di kopurimanan do ginawo nu. 6 Om iri no o kapambayaran dokoyu'd sukai, tu' porinta no o pagawai'd Kinorohingan do momonsoi'd karaja'dti. 7 Iyo nopoddi om pabayaron no dot id porinta it apatut do pabayaron nu. Om mambayar nod sukai, ondung haro no i sukayan nu; om bayaran o lisin do haro no i lisinan nu. Podulon ngai' no it apatut nu'd podulon, om pusohon it apatut nu'd pusohon.
Kowoyo-Woyoon dot id Tulun do Suwai
8 Kada' kou pongutang do nunu nopo dot id isai nopo, suwai ko' mogiutang- utang kou nogid kosianan. Tu' iri nopo tulun dit osianan do tulun do suwai, om katanud ngai' no di Tourat. 9 Tu' iri nopo toturan do tugama'd Yohudi di poingkaa: Kada' pagampahu', kada' pamatai, kada' panakau, kada' korohiai do nunu nopo i dombokon; iti ngai' nopo om i toturan do suwai, om notimung no dot id iso' noo o toturan do poingkaa, “Kosianai nod tulun do suwai do miagal dot osianan ko do diya'd tinan,” ka. 10 Iri nopo tulun dit osianan do tulun do suwai, om a' i' momonsoi dot araat dot id tulun diri: Komoyon nopoddi, om iri nopo tulun dit osianan do tulun do suwai om nakatanud ngai' no di ponudukan do Tourat. 11 Om suwai no ko' iri, om oilaan i' dokoyu'd dinondo no o maso do koposikan dokoyu. Tu' oruhai noddi kopio i maso do kopomosian do Kinorohingan dati'd baino', ko' mantad di ponongkuyaai toko' i'. 12 Oruhai nod katalib o totuong; om a' no alaid om anawau no. Om tumingkod toko' no kopio'd momonsoi di wowonsoyon do don totuong. Om mositi' nod monongrapo-rapo toko' di rapo-rapo do don tanawau. 13 Om mositi' nod momonsoi toko' di wowonsoyon di pusohon do tulun, i miagal di koubasanan do tulun do momonsoi do dangadau; kada' kou kadalaai do moginakan om rumamai, om kada' kou pagawuk. Kada' kou pagampahu', om posinondoton no dokoyu o kowoyo-woyoon. Kada' kou pogisosongkiwal, om kada' kou osol. 14 Pologoson no o Tuhan Yesus Kristus do manantu' dit apatut dokoyu'd wonsoyon. Om kada' kou tanud di kowoyo-woyoo'd tulun di kidusa do ponguru di korohian do tinan dokoyu.
Kada' Kou Papasala'd Tulun do Kristian di Suwai
1 Iri nopo tulun dit a' po haro o kotontuan kopio di ponongkuyaanan dau, om mositi' nod romiton kosonong-sonong dot id pogialatan dokoyu. Kada' kou ponokisongkiwal dau do pasal di dau'd ponongkuyaanan. 2 Haro i' o tulun do monongkuyaan do koino-ino iyau'd mangakan do nunu nopo. Nga' haro i' o tulun dit a' ogirot kopio o ponongkuyaanan do pasal diri; tu' opurimanan dau do rarapaon noo o koino-ino dau'd akanon. 3 Iri nopo tulun di mangakan do nunu nopo om a' i' apatut do popoinsiriba-riba' di tulun di piro-piro no o taakanon di natantu' o kanon; om iri tulun di mangakan di piro-piro noo o takanon di natantu' dot akanon, nga' a' i' apatut do papasala' di tulun di mangakan do nunu nopo, tu' naramit nod Kinorohingan i tulun diri. 4 Isai kopio ko toi tu' mongilo ko ondung kasala' ko' amu' i susuhuon do tulun do suwai? Tu' aratu' piya ko' poingkakat i susuhuon diri nga' iri i tuan dau o monongkoilo. Om atantu' nod poingkakat i' i susuhuon diri, tu' milo i' o Tuhan do popoingkakat dau. 5 Haro i' o tulun do popoinggayo dot iso' o tadau ko' mantad di tadau'd suwai, om tulun nod suwai om oiyo nopo o tadau do kasarahan dau. Pologoson nopo o tulun do sompori-pori'd manantu' do dau'd korohian. 6 Iri nopo tulun di popoinggayo do piro-piro o tadau di natantu', om pomusou i' do Tuhan o kopoinggayaan dau'ddi. Om iri tulun di mangakan do nunu nopo, nga' pomusou id Tuhan o kapangakanan dau'ddi, tu' mongunsikou i' iyau'd Kinorohingan di taakanon diri. Om iyo nogiddi i tulun di mangakan di taakanon no di natantu' o kanon; iri tulun diri nga' momusou id Tuhan om mongunsikou iyau'd Kinorohingan. 7 Aiso' i' o tiso' dati' do poimpasi do dau nod tinan o koposian; om aiso' o tiso' dati' do dau nod tinan o kapatayan. 8 Poimpasi toko' nga' momusou toko' id Tuhan. Om matai toko' nga' momusou toko' id Tuhan. Om poimpasi ko' poimpatai toko' nga' Tuhan no o sanganu dati': 9 Napatai no o Kristus om napasi kawagu iyau. Om iri no o nokosilihan dau do Tuhan di tulun di songimpasi om iri nogi' i tulun di nangapatai no. 10 Iyo nopoddi, oi tobpinai-tobpinai, om nunu'ddi o kapasalaan nu di tobpinai nu dit oiyo dot iso-iso' o kinotumbayaan? Om nokuro tu' poinsiriba-ribaon nu iyau? Tumimbaba' ngai' toko' indod Kinorohingan do maan butusai. 11 Haro i' o nokotulis dot id suang do Buuk do Kinorohingan do poingkaa, “Boros kad Tuhan, Otopot no kopio, do motud ngai' nopondod tumuku' dot id doho' o pointikid-tikid do tulun; om mangakun ngai' o pointikid-tikid do tulun dot iyoho' o Kinorohingan,” ka. 12 Iyo nopoddi om sompori-pori toko' nopondod monusui di dati'd winonsoi dot id Kinorohingan.
Kada' Pamalid do Tulun do Kristian do Suwai
13 Iyo nopoddi om kada' toko' pogisala-sala'. Suwai ko' tumotos toko' nogi' dot a' momonsoi do nunu nopo i sumiliu'd pogumbalan om sumiliu'd korotuon dot id dusa dot isai nopo o tulun dit oiyo o kinotumbayaan. 14 Tu' iyoho' nopo di nokoiso' oku dot id Tuhan Yesus, om monongkuyaan oku no kopio dot aiso' i' o nunu nopo do sosomu' mantad. Nga' sosomu' indo'ri dot id tulun, dot ondung sorohon di tulun diri do sosomu' iri. 15 Nga' ondung pokoruol do ginawo'd tobpinai nu dit oiyo o kinotumbayaan it akanon nu, om iri nopo winonsoi nu'ddi om a' no poingimpou do kosianan. Ondung napatai o Kristus do suminowoli'd tulun diri, om kada' no patayo' i tulun diri dot i takanon nu o kapatai. 16 Om kaa pogi' do kada' pologoso' it osonong dot osorou nu, do sumiliu'd a' osonong do sorohon do tulun do suwai. 17 Tu' Pomorintaan nopod Kinorohingan om okon i' ko' kagait di takanon om i tinumon. Suwai ko', iri nopo it agayo kopio om tumanud o tulun do korohian do Kinorohingan, om osimbayan o ginawo dau, om kaanu iyau do kataadan di patahakon di Rusod do Kinorohingan. 18 Iri nopo tulun di momonsoi'd karaja' do dong Kristus do miagal diri, om koposonong nod ginawo'd Kinorohingan om pusohon iyau'd tulun do suwai. 19 Iyo nopoddi om pokiwawansayan toko' nopo kopio om i popiulud kasai' om i popogirot do ginawo'd tulun do suwai. 20 Kada' nogi' pologoso' dot araag nu do taakanon, i winonsoi'd Kinorohingan. Tu' koinsanai'd taakanon om osonong ngai' i' dot akanon; nga' ondung kowonsoi'd dusa o tulun do suwai dot it akanon nu o kobungou, om kasala' ko no. 21 Osonong nogi' dot a' mangakan do daging ko' a' monginum do waig dot anggur ko' a' momonsoi'd nunu nopo ondung iri no o kobungou di tobpinai nu dit iso-iso' o kinotumbayaan do momonsoi'd dusa. 22 Wonsoyon nopo i ponongkuyaan nu do koino-ino nu iya'd wonsoyon dot id toguang do Kinorohingan. Tu' olumaag no i tulun dit aiso' o kapanasalan do nakasala' iyau dot id nunu nopo i pokotopoton dau. 23 Nga' iri nopo tulun di mikoduwo o ginawo do mangakan dot iso' o bansa' do taakanon, om mangakan indod taakanon diri, om pasalaon nod Kinorohingan o tulun diri, tu' minomonsoi i' i tulun diri dit a' miontok di ponongkuyaanan dau do pasal dit otopot om i kasala'. Om nunu nopo i wonsoyon dot a' iso-iso' o ginawo'd momonsoi om dusa no.
Kada' Popoinsonong do Diya' nod Ginawo
1 Iyati' nopo i koilo no kopio ondung nunu i ponongkuyaanan toko', om apatut nod polonuton nopo o ginawo dot id piro-piro o kawagatan do ginawo di tulun dit a' ogirot no o ponongkuyaanan. Kada' toko' popoinsonong do dati' nod ginawo. 2 Suwai ko' sompori-pori toko' nogid popoinsonong do ginawo di tobpinai toko'd suwai, om osiliu i' iri do koinsanangan dau, om kogirot indo o ponongkuyaanan dau. 3 Tu' i Kristus piya nga' a' i' minomusorou do dau'd koinsanangan. Om haro i' o nokotulis dot id suang do Buuk do Kinorohingan do poingkaa, “Kountun ngai' nopo dot id doho' i pinongindaraat daa diya',” ka. 4 Iri ngai' nopo i songintulis dot id suang do Buuk do Kinorohingan om maan i' do ponuduk dati': Tu' iri nopo ponudukan dot aanu toko' do mantad id Buuk do Kinorohingan om papalanut i' do ginawo toko' om popogirot, gisom do mogondos toko' nondod Kinorohingan. 5 Om Kinorohingan, i manahak do kolonuto'd ginawo om koinsasamadan dot id tulun, o pagandasan ku'd monulung dokoyu do popogiiso' do ginawo, do momit di winonsoi'd Kristus Yesus. 6 Om iso-iso' ngai' nopondo o ginawo dokoyu do mamarayou'd Kinorohingan, i Tapa' do Tuhan toko', i Yesus Kristus.
Habar dot Osonong dot id Tulun dit Okon ko' Yohudi
7 Iyo nopoddi om pogirami-ramit kou no do mikuwo'd osonong o ginawo, do miagal di Kristus tu' minamaramit dokoyu do popoinggayo'd Kinorohingan. 8 Tu', soroho' pogi', nga' Kristus nopo om minogobi-obi' i' do tulun do Yohudi do popointalang dot otorodok o Kinorohingan do mamayaan do koinsanai di batos dau dot id taki-aki toko'. 9 I Yesus nga' nakabayayat nogi' di tulun dot okon ko' Yohudi do popoinggayo'd Kinorohingan tu' osonong kopio i' iyau dot id diyolo'. Om haro i' o nokotulis dot id suang do Buuk do Kinorohingan do poingkaa, “Iyo nopoddi om royohon ku indo iya' dot id pogialatan di tulun dot okon ko' Yohudi, om modsinding oku do mamarayou'd ngaran nu,” ka. 10 Om haro po o nokotulis do poingkaa, “Kotood kou no, iyokoyu i tulun dot okon ko' Yohudi do moyo' di tulun di nasanganu do Kinorohingan, royoho' no iyau, oi koinsanai'd bansa'!” ka. 11 Om haro po o poingkaa, “Royohon no o Kinorohingan, oi koinsanai'd tulun dit okon ko' Yohudi; mositi' nod mamarayou ngai' dau o koinsanai'd bansa'!” ka. 12 Om poingkaa po o pinoboros di Yosaya, “Haro nondo o songulun do mantad id sinakagon di Isai do momorinta' do tulun dit okon ko' Yohudi; om iyau no o pagandasan ngai' di bansa',” ka. 13 Kinorohingan no o milo dokoyu'd pagandasan. Om iyau no o pokionuon ku do momonu'd ginawo dokoyu do kataadan om kosimbayanan tu' monongkuyaan kou no dau, om muhang-ruhang indo o kogiroto' do pogogondos dokoyu'd Kinorohingan do mikuwo'd kuasa' do Rusod do Kinorohingan.
Kinoponulisan di Paulus do Surat di Poinod Kopio
14 Oi tobpinai-tobpinai ku! Oilaan ku i' dot ogumu' o kosonongo' dokoyu. Om ogumu' o toilaan dokoyu om milo kou do mogituduk-tuduk. 15 Nga' pasal nondod piro-piro o hal, om poinsanon ku i' iyokoyu dot id suang do surat diti, tu' nopuhawangan oku nod Kinorohingan do karaja'dti. 16 Siniliu oku dau do susuhuon di Kristus Yesus dot id pogialatan di tulun dit okon ko' Yohudi. Om iyo-iyo di dong imam o wonsoyon ku, do poposusui di Habar dot Osonong do mantad id Kinorohingan, om osiliu i' i tulun dot okon ko' Yohudi do miagal do porsombahan dot id Kinorohingan di milo dau'd romiton. Om pokionuon ku no i Rusod do Kinorohingan do posiliu diyolo'd iso' o porsombahan di pinotobilang do maan do dong Kinorohingan. 17 Om oondos oku nodti karaja' ku do dong Kinorohingan, tu' nokoiso' oku no dot id Kristus Yesus. 18 Nga' katamaan ku nopod momoros om pasal no di nowonsoi'd Kristus dot iyoho' o pinawayaan do momonsoi do papatanud di tulun dot okon ko' Yohudi di boros do Kinorohingan. Om winonsoi ku'ri dot id suang do koboro-boroso' om i wonsoyon ku, 19 do mitanud di kongoimayaan om i kongopusahan kopio; i mantad ngai' id kuasa' di Rusod do Kinorohingan. Nokopinsusui ngai' ku no i Habar dot Osonong do pasal di Kristus dot id ogumu' o tulun, do mantad pod hilo'd Yorusalim om gisom do hilo'd Ilirikum. 20 Kagayaan nopo kopio'd ginawo ku om popinsusui di Habar dot Osonong do mantad id Kinorohingan do hilo'd piro-piro kinoiyonon dit a' po o tulun nokorongou'd pasal di Kristus. Tu' mada' oku i' do koponimpuun do karaja' do hiri'd notimpuunan do tulun do suwai. 21 Haro i' o nokotulis dot id suang do Buuk do Kinorohingan do poingkaa, “Iri nopondo tulun dit a' po insan korongou'd habar dau, om ongkokito nondo; om it a' insan korongou nga' kosuhut nondo,” ka.
Pomusarahan di Paulus do Mongoi'd Hilo'd Rum
22 Om iri no o nokotobon doho', om asaru' oku nod aantaban do mongoi ompuya' dokoyu. 23 Nga' nopongo ku noddi o karaja' ku dot id piro-piro o watas diri. Om piro-piro no o toun do koloido' do siongoi oku pogolimbuha' dokoyu. 24 Om koumbaya' oku nopondod hino'd bandar dokoyu, do pakayaan ku'd hilo'd Sepanyol, om mogondos oku nopod kosolowot oku dokoyu om kopogiooropod ngai' toko' i' dot ongoruuhai. Om mogondos oku nopod milo kou'd monguhup doho' do kumaa oku'd hilo'd Sepanyol. 25 Nga' dinondo nopodti om pakayaan ku do hilo'd Yorusalim do mongoi paatod do ponulung di tulun di songonuon do Kinorohingan do hilo'. 26 Tu' nakaakun no i piro-piro o sidang do hilo'd Makidunia om i hilo'd Akaya do manahak do ponulung di tulun do mosikin dot id pogialatan di tulun do nasanganu'd Kinorohingan do hilo'd Yorusalim. 27 Om agaan nopo o ginawo diyolo' do minangakun do momonsoi'd miagal diri. Om apatut i' kopio do monulung iyolo' di tulun do mosikin do hilo'd Yorusalim diri; tu' mantad i' id tulun do Yohudi o kinoonuan di tulun dot okon ko' Yohudi do barakat do mantad id Kinorohingan. Om apatut pogi'ddi i tulun dot okon ko' Yohudi do monulung di tulun do Yohudi dot i konunu-nunuan di nakabarakat dot id diyolo' o maan do ponulung. 28 Opongo ku nopondo iti karaja' ku'dti, om katahak ku di tulun do hilo'd Yorusalim i notimung do maan do ponulung diyolo', om mongoi oku nopondo do hilo'd pomogunan do Sepanyol, om kawaya' oku nondo do hino'd bandar dokoyu. 29 Om mongoi oku nopondod hino'd dokoyu, om atantu' no dot ogumu' o barakat do mantad id Kristus do pobohogion ku dokoyu. 30 Pokionuon ku no kopio iyokoyu, dot i Tuhan toko' i Yesus Kristus, om i kosianan di pinatahak di Rusod do Kinorohingan o kopokionuan ku dokoyu, do sumambayang kou dot id Kinorohingan do bagi' doho', do muhup doho'. 31 Sumambayang kou no om poiduwon oku id Kinorohingan do mantad id longon di tulun dit a' monongkuyaan di hilo'd Yudia, om ongosonong indo o ginawo di tulun di dong Kinorohingan di hilo'd Yorusalim do rumamit diti karaja' ku do poporikot di maan do ponulung diyolo'd hilo'. 32 Iyo nopoddi, om ondung korohian do Kinorohingan, om koongoi oku i' do hino'd dokoyu do mikuwo'd osonong o ginawo ku. Om koundorong-dorong oku indo dot id pogialatan dokoyu; om osimbayan indo ot opurimanan ku. 33 Om pokionuon ku no o Kinorohingan, i manahak do kosimbayanan dot id tulun, do momoyo' ngai' dokoyu. Amin.
Boros do Podsusuwau
1 Orohian oku do pointutun di Pibi, i tobpinai toko', dot id dokoyu. Iyau nopo om mogobi-obi' di sidang do hilo'd Kingkria. 2 Romiton no dokoyu iyau do miagal do pamaramit do tulun di songonuon do Tuhan. Tu' apatut no dot iyo'ddi i tulun di monongkuyaan do Kinorohingan do mogirami-ramit. Tulungon no dokoyu iyau, do mokitulung no iyau dokoyu, tu' ogumu' no o tulun do notulung dau, om iyoho' piya nga' notulung i' dau. 3 Porikoton no o tabi' ku dot id di Priskila om id di Akuila; i tambalut ku dit oiyo do momonsoi'd karaja' di Kristus Yesus. 4 Oruhai no iyolo'd apatai do minongoi ponulung doho'. Om ounsikou oku no kopio diyolo' om okon i' ko' iyoho' noo, suwai ko' iri ngai' nogi' i sidang dit okon ko' tulun do Yohudi, nga' mongunsikou nogi' diyolo'. 5 Om porikoton no o tabi' ku dot id sidang di tumimung dot id walai diyolo'. Tumabi' oku nogi' di Ipinitus, i kosianan ku. Iyau no i tulun dit id gulu kopio ponongkuyaai do Kristus do hilo'd watas dot Asia. 6 Tumabi' oku nogi' di Maria. Tu' noudipon tomod iyau do kuminaraja' do bagi' dokoyu. 7 Porikoton no o tabi' ku dot id di Andronikus om i Yunias. Iyolo' nopo om mantad id payat di sinolusukan ku iyoho' om nokoumbal do nokogiil do poinsugku' doho'. Iyolo' nopo om id gulu no kotumbayaai do Kristus ko' iyoho'. Om abantug iyolo' dot id pogialatan di piro-piro o rasul. 8 Tumabi' oku di Ampliatus, i kosianan ku, tu' nokopiiso' no iyahai dot id Tuhan. 9 Porikoton no o podsusuwau ku di Urbanus, i tambalut toko' di muhup dati' do kumaraja' do bagi'd Kristus. Om sumuwau oku di Stakis, i kosianan ku. 10 Tumabi' oku di Apilis. Om nokointalang no kopio i kotorodoko' dau dot id Kristus. Om tumabi' oku di sompiiyon di Aristobulus, 11 om i Hirodion. Iyau nopo om mantad id payat di sinolusukan ku iyoho'. Om tumabi' oku di piro-piro o tobpinai dit iso-iso' o kinotumbayaan dit id sompiiyon di Narkisus. 12 Tumabi' oku di Tripina om i Triposa, i tumotos tomod do momonsoi'd karaja'd Tuhan, om i Porsis, i kosianan ku. Iyau nga' tuminotos tomod nogi' do momonsoi'd karaja' do don Tuhan. 13 Tumabi' oku di Rupus om i tina' dau, it iyo pod tina' kopio ku. I Rupus no o tulun di nopili' do Tuhan dit oilo kopio. 14 Porikoton no o tabi' ku dot id di Asinkritus, om i Pligon, om i Hormis, om i Patrobas, om i Hormas, om koinsanai di tobpinai dit iso-iso' o kinotumbayaan dit id sugku' diyolo'. 15 Tumabi' oku di Pilologus om i Yulia, om i Nirius om i tobpinai dau'd tondu'; om i Olimpas om koinsanai di tulun dit otumbayaan di poinsugku' diyolo'. 16 Mogitatabi' kou no dot id suang do kouludan, do miagal di kowoyo-woyoo' do tulun do Kristian. Oinsanan nopo i sidang do Kristus do poporikot do tabi' dot id dokoyu, oi tobpinai ngai' ku.
Nosihat di Kolimpupuson no
17 Oi tobpinai-tobpinai ku! Pokionuon ku no kopio do minsan-insan kou di tulun di monimpuun do pogisosongkiwalan om i mamaraag do kotumbayaan do tulun dot id Tuhan. Tu' iri nopo om a' i' miontok di nokotuduk dot id dokoyu. Insodu' kou no do mantad id tulun do miagal diri. 18 Tu' tulun nopo di mingwonsoi'd miagal diri om a' i' momonsoi'd karaja' di dong Kristus, i Tuhan toko', suwai ko' monguru nod korohian do tinan diyolo'. Om lugutan i' diyolo' om oomis tomod o pomomoros diyolo' do mamalid di tulun dit aiso' o toila-ilaan. 19 Koilo ngai' no o tulun dot otorodok kou dot id ponudukan do pasal do Habar dot Osonong di mantad id Kinorohingan. Om orohian oku no kopio'd miagal kou'ddi. Orohian kopio oku dot ongoilo kou di hal dit ongosonong, om basug kou dot id hal dit angaraat. 20 Kinorohingan no, i manahak do kosimbayanan do ginawo dot id tulun, o mangala' do Rogon om popoinsiriba'ddi dot id kuasa' dokoyu, om a' no alaid om wonsoyon no dau o miagal diri, om raagon nondo dau o Rogon. Pokionuon ku nod barakatan kasai' kou di Yesus Kristus i Tuhan toko'! 21 I Timotius, i tambalut ku, nga' poporikot i' do tabi' dau dot id dokoyu, om i Lukius, om i Yason, om i Sosipator; i mantad ngai' id payat di sinolusukan ku iyoho'. 22 Iri nopo monulis do surat diti om iyoho', i Tortius. Om porikot oku'd tabi' do kopogiobpinayan dot id dokoyu. 23 I Gayus nga' poporikot i' do tabi' dot id dokoyu. Poingiyon oku do hiri'd walai dau, om i sidang dahai nga' tumimung nogid hiri. I Irastus, i mongilo-ilo do kousinan do bandar, nga' poporikot i' do tabi' dau dot id dokoyu. Om i Kwartus nga' porikot id tabi' dau dot id dokoyu. 24 Om pokionuon ku no i Tuhan toko', i Yesus Kristus do mamarakat ngai' dokoyu. Amin.
Pongolimpupus do Surat
25 Royohon no o Kinorohingan! Iyau no i kikuasa' do popogirot do kotumbayaan dokoyu do miontok di Habar dot Osonong do mantad id Kinorohingan di popinsusuyon ku do pasal di Yesus Kristus. Om popinsusuyon ku i habar diri do miontok di pinointalang do Kinorohingan; iri no i pasal di natantu' mantad do Kinorohingan do wonsoyon dau di piro-piro no o toun do koloido' dot a' noilaan do tulun. 26 Nga' baino' nopoddi, do tumanud di ponuhuan do Kinorohingan, i hino kasai', om nokointalang noddi i natantu' mantad diri om pinoilaan dot id koinsanai'd bansa' dot id suang di tinulis di piro-piro o nabi, om otumbayaan ngai' i' iyolo' om mumboyo'd Kinorohingan. 27 Iyau noo o Kinorohingan, it oilo kopio. Om iyau no o poinggoyoon do gisom do poingompus dot i winonsoi di Yesus Kristus o popoinggayo! Amin!
1-3 Oi tobpinai-tobpinai, i sidang do Kinorohingan di hiti'd Korintus! Nolohou kou nod Kinorohingan do sumiliu'd tulun dau tu' nasanganu kou no di Kristus Yesus, do mihompit do koinsanai'd tulun do honggo nopo di tumuku' do Tuhan toko', i Yesus Kristus, iri no i Tuhan diyolo' om i Tuhan toko' iyati'. Mogondos no kopio iyahai --- iyoho' i Paulus om i Sostinis, i tobpinai toko', dot onuan kou'd Kinorohingan i Tapa' toko', om i Tuhan Yesus Kristus, do barakat om kosimbayanan do ginawo. Om tulison ku'ti surat tu' tulun oku nod sinuhu' di Kristus Yesus, i pinili' do Kinorohingan do tumanud do korohian dau.
Barakat do Mantad id Kinorohingan do Patahakon di Yesus Kristus dot id Dokoyu
4 Mongunsikou kasai' oku nopod Kinorohingan dot iyokoyu o kopongunsikahan ku, tu' nakaramit kou nod nipuhawang do Kinorohingan dot i Kristus Yesus o pinapatahak. 5 Om osima' kou no do nunu nopo tu' nasanganu kou nod Kristus. Aralom tomod o toilaan dokoyu do pasal do nunu nopo, om oilo kou do popotuduk di toilaan diri. 6 Om iri no o popointalang do nokogirot no kopio i habar do pasal di Kristus dot id suang do ginawo dokoyu, 7 gisom dot a' kou no okurangan dot ongoiso' piya o barakat, do daamot dokoyu do magandad do korikatan do Tuhan toko', i Yesus Kristus, om dit okito iyau do koinsanai'd tulun. 8 I Kristus no o mamajamin dokoyu do gisom do kopupuson; om aiso' indo o kapasalaan dokoyu do rumikot iyau kawagu. 9 Milo i' kopio do ponongkuyaanan o Kinorohingan. Om iyau no o Kinorohingan di minomolohou dokoyu do miso' di Tanak dau, i Yesus Kristus, i Tuhan toko'!
A' Mogiuulud o Hiri'd Sidang
10 Oi tobpinai-tobpinai! Pokionuon ku no kopio dot id suang do ngaran di Tuhan toko', i Yesus Kristus, do mogiulud kou om iso-iso' o pakat; om aiso' i' ot a' kopogiuludan dot id pogialatan dokoyu. Mogiuulud kou no, om koiso-isoon no o ginawo om korohian. 11 Tu' haro o piro-piro tulun do mantad id sompiiyon di Kloi do minomisunud doho' do mogisosongkiwal kou. 12 Komoyon ku nopo nga' haro ot id pogialatan dokoyu do momoros dot, “Tumanud oku di Paulus,” ka, om haro o momoros dot, “Tumanud oku di Apolos,” ka, om haro o momoros dot, “Tumanud oku di Pitrus,” ka, om haro o tulun do suwai do momoros dot, “Tumanud oku di Kristus,” ka. 13 Pinogipori-pori toi i Kristus? A' i' i Paulus napatai do pinasalib do suminowoli dokoyu! Om a' kou binotisan do sumiliu'd tumatanud di Paulus. 14 Pounsikou po kopio tu' a' oku minamatis dot ongoiso' piya o tulun dot id pogialatan dokoyu, suwai ko' i Krispus om i Gayus. 15 Kada' nogi' kopio do haro o tongoiso'd tulun do momoros do binotisan ku iyau do sumiliu'd tumatanud ku. 16 (Nga' iyoho' i' o minamatis di Stipanus om i sompiiyon dau. Nga' suwai nopo ko' iyolo' do gisom dot osorou ku, om aiso' no tulun do suwai do nobotisan ku.) 17 Okon i' ko' mongoi pamatis do tulun o pinonuhuan do Kristus doho', suwai ko' mongoi poposusui di Habar dot Osonong do mantad id Kinorohingan; om a' oku i' mimboros do mamakai do toilaan do don tulun do popinsusui'ddi, om a' i' oidu' o komoyon di kuasa' do mantad id kinapatayon do Kristus do hiri'd salib.
Kristus o Pinopointalang do Kuasa' om Toilaan do Kinorohingan
18 Tu' id tulun nopo di kumaa dot id kapatayon, om aiso' i' o katapatan di habar do pasal do kinapatayon di Kristus do hiri'd salib. Nga' id dati' nopo, i pinasi do Kinorohingan, om iri nopo habar diri om ralan id Kinorohingan do popointalang do kuasa' dau. 19 Tu' nokoboros no o Kinorohingan dot id suang do Buuk do Kinorohingan do poingkaa, “Raagon ku nondo i toilaan do tulun dit ongoilo, om tonuson ku it ongosuhutan do tulun di nongkopinsingilo,” ka. 20 Nunu'ddi o guna' di tulun dit ongoilo'ddi? Om nunu o guna' di guru do Tourat? Om nunu o guna' di tulun dit angatarom o pomusarahan do hiti'd pomogunan? Nokointalang nod Kinorohingan do toilaan nopo di dom pomogunan om aiso' tomod i' o komoyon! 21 Tu' poingkuro piya o koiloo' do tulun, nga' a' i' iyau milo do mintutun do Kinorohingan dot i koiloo' dau o pakayon do mintutun. Nga' mantad i' do koiloo' do Kinorohingan do norohian iyau do mamasi'd tulun di monongkuyaan dau do korongou di habar di popinsusuyon dahai, i roitan do tulun dot aiso' o katapatan. 22 Iri nopo tulun do Yohudi om mokianu do koimayaan do maan do kointalangan kopio, om iri no tulun do Yunani om popoinggayo do toilaan di dom pomogunan. 23 Nga' iyati' no om popinsusui noo di Kristus di napatai do hiri'd salib. Om iri nopo habar diri nga' paparaat do ginawo do tulun do Yohudi, om sorohon di tulun dot okon ko' Yohudi do habar dit aiso' o katapatan, om sorohon do tulun dit okon ko' bansa'd Yohudi do dongkababasug i' di habar diri. 24 Nga' id tulun nopo di nolohou'd Kinorohingan --- do tulun do Yohudi ko' it okon ko' Yohudi --- om iri nopo habar diri nga' ralan id Kinorohingan do pointalang do kuasa' om koiloo' dau. 25 Tu' iri nopo i roitan daa'd tulun do kababasug do Kinorohingan, om oilo i' ko' mantad di koiloo' do tulun; om iri daa i roitan do tulun do koluhayan do Kinorohingan nga' okoris i' ko' mantad di kinoris do tulun.
Kuasa'd Kinorohingan om Koluhayan do Tulun
26 Oi tobpinai-tobpinai! Umbalai pogi' dokoyu'd momusorou o kowoyo-woyoo' dokoyu di lohowo' kou id Kinorohingan. Okuuri' kopio ot id pogialatan dokoyu dit oilo, ko' kikuasa', ko' kipangkat dot asawat dot id pagantangan do tulun. 27 Tu' tinomod id Kinorohingan do minomili' i roitan do tulun do hiti'd pomogunan do basug do pongintingayam di tulun dit ongoilo. Om tinomod do Kinorohingan do minomili' i roitan do tulun do hiti'd pomogunan dot oluhoi, do pongintingayam di tulun dit ongokoris. 28 Pinili' pogid Kinorohingan i sorohon do tulun do hiti'd pomogunan dot aiso' o ngaran-ngaran, om a' pusohon, om a' pokonunu-nunuon, nga' maan do Kinorohingan do pamaraag di sorohon do tulun do hiti'd pomogunan dot agayo o komoyon. 29 Om aiso' nondo o tiso' piya'd tulun do milo'd minggayo-gayo dot id toguang do Kinorohingan. 30 Kinorohingan no o minomonsoi do miagal diri gisom do nokoiso' kou dot id Kristus Yesus. Om Kristus no o minanahak dati' do toilaan. Om iyau o pinopoulud kawagu dati' dot id Kinorohingan, om siniliu toko' dau do tulun di dong Kinorohingan do songonuon, om iyau o pinopoidu' dati'. 31 Om abayaan i' i nokotulis dot id suang do Buuk do Kinorohingan do poingkaa, “Tulun nopo dit orohian do minggayo-gayo, om mositi' no do minggayo-gayo dot i winonsoi'd Tuhan o kopinggaya-gayaan,” ka.
Habar do Pasal di Kinapatayon di Kristus do Hiri'd Salib
1 Oi tobpinai-tobpinai! Di nopo di rikot oku i' do hino'd dokoyu do minongoi poporongou dokoyu do pasal di natantu' mantad do Kinorohingan do wonsoyon dau, it a' po noilaan do tulun do hiti'd pomogunan, om a' oku i' minamakai do toilaan di dom pomogunan ko' minimboros po do boros dit angaralom. 2 Tu' nokopomusorou mantad oku no do solinaid ku nopo do poinsugku' dokoyu, om a' oku i' popoboros do nunu nopo, do suwai ko' pasal di Yesus Kristus; om okon-okon po om i kinapatayon dau do hiri'd salib. 3 Di nopo di poinsugku' oku po dokoyu om oluhoi oku no om gagaran oku pod ooris. 4 Om iri nopo habar di pinosunud ku dokoyu om a' ku i' pinolombus do minamakai do boros di kagayat do ginawo do tumanud do toilaan do don tulun. Kowoyo-woyoo' ku nopod pinopolombus diri om minamakai oku'd ralan di popointalang do kikuasa' o Rusod do Kinorohingan. 5 Om iyo pogi'ddi o winonsoi ku nga' mada' oku i' dot i toilaan do tulun o poimpahan di kotumbayaan dokoyu dot id Kristus, suwai ko' poimpohon di kuasa'd Kinorohingan.
Toilaan di Dong Kinorohingan
6 Nga' mulong piya dot iyo'ddi, nga' id pogialatan nopo di tulun do nongkotuo o koposi-posion do don rusod, om moro-boros kopio oku i' do pasal do toilaan. Nga' iti nopo toilaan om okon i' ko' toilaan do dom pomogunan ko' toilaan po do pomorinta' do hiti'd pomogunan do dinondo tu' tumagak i' i kuasa' dau do momorinta'. 7 Iti nopo toilaan diti om a' i' oilaan do tulun do hiti'd pomogunan, nga' nokosodia' mantad nod Kinorohingan iti dit a' po nowonsoi iti pomogunan do maan do koinsanangan toko'. 8 Aiso' i' o songulun piya di pomorinta' do hiti'd pomogunan do dinondo do koilo do pasal di toilaan diri. Tu' ondung nokoilo daa iyolo' om atantu' no dot a' i' daa diyolo' pinasalib i Tuhan di kikagayaan diri. 9 Nga' iri nopo om miagal no kopio di nokotulis dot id suang do Buuk do Kinorohingan do poingkaa, “Iri no it a' insan do tulun kokito om a' insan korongou, om it a' insan koimbulai dot id suang do pomusarahan do tulun, o pinosodia' mantad do Kinorohingan do patahakon di tulun dit osianan dau,” ka. 10 Nga' nokointalang noddid Kinorohingan iri dot id dati', dot i Rusod dau o pinopointalang. Iri nopo Rusod do Kinorohingan om kosorisid i' do koinsanai'd nunu nopo, dot iri piya i nangatantu' mantad do Kinorohingan do wonsoyon dau di poillisok kopio. 11 Tu' okon toi ko' iri i rusod do tulun o koilo dit id suang do ginawo'd tulun? Om Kinorohingan nga' iyo iddi. Koilo nopo dit id suang do ginawo'd Kinorohingan om iri no i Rusod do Kinorohingan! 12 Om a' toko' i' nonuan do rusod di dom pomogunan, suwai ko' i Rusod di mantad id Kinorohingan, om koilo toko' i' do koinsanai di pinopuhawang do Kinorohingan dot id dati'. 13 Om kaa pogi' do tontok nopod popotuduk iyahai do pasal do Kinorohingan dot id tulun di haro o Rusod do Kinorohingan, om a' i' dahai potudukon do tumanud do toilaan do tulun, suwai ko' tumanud di ponudukan do Rusod do Kinorohingan. 14 Iri nopo tulun dit aiso' o Rusod do Kinorohingan, om a' i' kaanu di pointalangon di Rusod diri. Tu' tulun nopo do miagal diri om a' i' kosuhut do komoyon diri, tu' iyo nod kababasug dot osorou dau. Tu' iri nopo om oilaan nopo o komoyon om i don rusod do toilaan o pongilo. 15 Iri nopo tulun di haro o Rusod do Kinorohingan om milo i' do mongilo do komoyon do koinsanai'd nunu nopo, nga' aiso' i' o tiso' pod tulun do haro o kosorupayan do mongilo do dau'd kowoyo-woyoo'. 16 Do miagal di nokotulis dot id suang do Buuk do Kinorohingan do poingkaa, “Isai toi o koilo do pomusarahan do Tuhan? Om isai o milo do monosihat dau?” ka. Iyati' no i nakaanu do pomusorou di miagal do dong Kristus!
Susuhuon do Kinorohingan
1 Otopot nopo kopio, om a' oku i' milo do moro-boros dokoyu do miagal do moro-boros di tulun di haro o Rusod do Kinorohingan. Suwai ko' pomomoros ku nopo dokoyu om miagal di pomomoros ku di tulun di maso pod tumanud do korohian do dom pomogunan; om miagal do pomomoros dot id tulun di tanak po dot id suang do kotumbayaan dau do Kristus. 2 Di nopo di gulu po om iri no taakanon do tangaanak po o milo ku'd paakanan dokoyu, om okon i' ko' i taakanon do tulun dit angagayo no, tu' a' kou po kotolon do mangakan diri. Nga' gisom piya'd dinondo nga' a' kasai' kou po kotolon diri, 3 tu' maso po dokoyu'd tumanud di kowoyo-woyoon dokoyu di don tulun. Tu' ondung mogiosol-osol kou om mogisosongkiwal, om okon toi ko' iri no o popointalang do maso po dokoyu do tumanud di kowoyo-woyoon do don tulun, do miagal di tulun dit a' kotutun do Kinorohingan? 4 Ondung haro o moro-boros dot, “Tumanud iyahai di Paulus,” ka, om iri no suwai om momoros dot, “Tumanud oku di Apolos,” ka, om okon toi ko' iri no o popointalang do miagal pod kowoyo-woyoon do tulun do hiti'd pomogunan o kowoyo-woyoon dokoyu? 5 Isai kopio toi i Apolos diri? Om isai i Paulus? Iyahai nopo om susuhuon no toomod do Kinorohingan, i minonuduk dokoyu do monongkuyaan di Kristus. Iyahai nopo om momonsoi noddi karaja' di pinonuhuan do Tuhan dahai. 6 Iyoho' o patanom, om i Apolos o moniram, nga' Kinorohingan i' o poposuni di tinanom diri. 7 Iyo nopoddi om Kinorohingan o poinggoyoon tu' iyau i' i poposuni. Iri nopo i mananom om i moniram om a' i' poinggoyoon; 8 tu' iyolo' nopo om miagal nopo om aiso' i' o pisuayan. Om sopipori-pori indo do rumamit dot isomuli' do tumanud di karaja' dau. 9 Iyahai nopo om tulun di pakaraja' dot id Kinorohingan; om iyokoyu no om miagal do tumo do Kinorohingan. Om iyo kou'd walai do Kinorohingan. 10 Om iyoho' no o miagal di tukang do momonsoi'd walai do pinopowonsoi di poimpahan di walai, do mikuwo di toilaan do pinatahak do Kinorohingan dot id doho', om tulun nondod suwai o mamaal do walai do hiri'd timpak di poimpahan diri. Om pointikid-tikid do tulun nga' mositi' no do momusorou kopio ondung poingkuro iyau do maal do hiri'd sakai di poimpahan di waalan diri. 11 Tu' nokoiliu nod Kinorohingan i Yesus Kristus do miagal do poimpahan di walai'ddi, om iyau noo o poimpahan; aiso' no o poimpahan do suwai. 12 Haro i' o mamaal do walai do hiri'd sakai di poimpahan diri do tamas o pakayon, om haro o mamakai'd pirok, om haro o mamakai'd watu dit agayo o gatang, om haro o mamakai'd kayu, om sakot di nokoring ko' rahami po. 13 Om okito indo o karaja' do pointikid-tikid do tulun dot orikot i maso do korikatan kawagu di Kristus. Tu' tontok nopondo do tadau'ddi om tapui nondo o popointalang do karaja' do pointikid-tikid do tulun. Om tapui o pogumbal om panantu' do kosonongo' di karaja'ddi. 14 Ondung a' osorob do tapui i walai di winonsoi'd tulun do hiri'd sakai di poimpahan diri, om kaanu nod isomuli' i tulun diri. 15 Nga' ondung osorob i winonsoi di tulun, om orugi' no iyau; apasi indo iyau, nga' iyo po di tulun di nokosoliwan do mantad id tapui. 16 A' kou toi koilo do Walai kou'd Kinorohingan? Om poingiyon i Rusod do Kinorohingan dot id suang dokoyu? 17 Ondung haro o tulun di mamaraag do Walai'd Kinorohingan, om Kinorohingan nga' mamaraag no do tulun diri. Tu' Walai nopod Kinorohingan om dong Kinorohingan no kopio, om iyokoyu no i walai'ddi. 18 Kada' kou kotipu' dit osorou do ginawo dokoyu. Ondung haro o tulun dot id pogialatan dokoyu di kopuriman dot oilo iyau dot id pagantangan do tulun do hiti'd pomogunan, om mositi' no do sumiliu pod basug i tulun diri, om osiliu i' iyau do tulun dit otopot-topot kopio dot oilo. 19 Tu' iri nopo roitan do tulun do hiti'd pomogunan dot oilo, om basug i' dot id pagantangan do Kinorohingan. Do nokotulis no dot id suang do Buuk do Kinorohingan o poingkaa, “Lawaan do Kinorohingan di toilaan diyolo' i tulun dit ongoilo,” ka. 20 Om haro po o nokotulis do poingkaa, “Oilaan id Tuhan do pomusarahan nopod tulun dit ongoilo om aiso' i' o guna',” ka. 21 Iyo nopoddi om kada' nod haro o tongosongulun piya do popoinggayo'd tulun, tu' nakatahak ngai' nori dot id dokoyu: 22 I Paulus, om i Apolos, om i Pitrus, om iti pomogunan diti, om koposion om kapatayon, om iti maso'd dinondo om i maso'd abantalan, nga' iyokoyu ngai' no o sanganu. 23 Om iyokoyu nga' nasanganu nod Kristus, om nasanganu'd Kinorohingan o Kristus.
I Piro-Piro o Rasul do Kristus
1 Sorohon nopo dokoyu iyahai do susuhuon do Kristus di kitonggungan do popinsusui di natantu' mantad do Kinorohingan do wonsoyon dau, it a' po noilaan do tulun do hiti'd pomogunan. 2 Koiso' nopo kopio dot apatut do wonsoyon do susuhuon do miagal diri om tumorodok dot id tuan dau. 3 Id doho' nopo, om a' i' monguro no ondung poingkuro o pomusarahan dokoyu ko' isai nopo tulun --- do pasal doho'. Om iri piya sorohon ku iyoho' do pasal do tinan ku nga' a' i' sumiliu tomod no do kawagatan. 4 A' oku i' kasala' dot id suang do nunu nopo do tumanud do kopurimanan ku, nga' okon i' ko' iri o sumiliu'd kointalangan dot aiso' o sala' ku. Tuhan no o manantu' kopio ondung kisala' oku ko' aiso'. 5 Iyo nopoddi, om ondung a' po orikot i maso do natantu' mantad, om kada' kou po kolomus do manantu' ondung kisala' ko' aiso' o sala' dot isai nopo o tulun. Andadon nopo do gisom do korikatan do Tuhan do koimbagu. Iyau indo i popointalang do koinsanai di lisok-lisokon daa, i songillisok dot id dotuong. Om iyau no i popoimbulai do koinsanai do korohian di poingopi' dot id suang do ginawo'd tulun. Om tontok pondoddi, om aanu nogi' do pointikid-tikid do tulun i pamarayou dit apatut dau'd aanu do mantad id Kinorohingan. 6 Oi tobpinai-tobpinai! Nokoontok ngai' ku nori dot id di Apolos om id doho', do maan do koinsanangan dokoyu. Do koiyo'ddian nopoddi nga' iri nondo winonsoi dahai o koilaan dokoyu do minsingilo do komoyon di boros do poingkaa, “Tonudon no dokoyu i toturan di songintulis mantad,” ka. Om aiso' indo tiso' dokoyu do popoinggayo-gayo dot iso' o tulun, om popoinsiriba-riba' di suwai. 7 Isai toi o pinopoinggayo dokoyu do mantad ko' tulun do suwai? Okon toi ko' Kinorohingan i' o koonuan dokoyu do koinsanai'd nunu nopo? Om nokuro'ddi tu' minggayo-gayo kou, dot iyo pod a' pinatahak do Kinorohingan dot id dokoyu i haro dot id dokoyu? 8 Aiso' no bo o pokionuon dokoyu! Kaya' kou no! Nosiliu kou nod raja'! Nga' iyahai nopo om a' i'. Om songkuro daa o kosonongo' do nosiliu kopio kou daa'd raja', om kopomorinta' i' iyahai do kotonggoi dokoyu. 9 Tu' tumanud nopo dot osorou ku iyoho', om iyahai nopo i rasul om siniliu'd Kinorohingan do tiintangan do tulun om moloikat. Om iyo po iyahai'd tulun dit aiso' o ngaran-ngaran do pinorotuan do hukuman do kapatayon dot id toguang do tulun dot ogumu' om irak-irakan do tulun do hiti'd pomogunan. 10 Iyahai nopo om pokobosugon tu' tumanud i' iyahai di Kristus, om iyokoyu no om tulun do Kristian dit ongoilo! Iyahai nopo om oluhoi i', nga' iyokoyu no om okoris! Iyahai nopo om pasalaon, om iyokoyu no om pingroyohon! 11 Gisom piya'd dinondo nga' louson i' iyahai om tuuhan; om iti po poimpakai dahai o pakayan dahai; inggoriton iyahai'd tulun; om aiso' o tiyonon dahai'd mundorong; 12 om ohuyan tomod iyahai do kumaraja' do mogihum do kaakan-akanan. Om tontok nopo do papalan iyahai, om barakat nogi' o posulion dahai; om inggoriton nopo iyahai, om alanut i' o ginawo dahai; 13 pakaraaton nopo iyahai'd tulun, om boros i' dit osonong o posimbaron dahai. Iyo po iyahai'd rinomos toomod do hiti'd pomogunan; om gisom piya'd dinondo nga' roitan kasai' i' iyahai do rinomos di sosomu' do hiti'd pomogunan. 14 Koponulisan ku nopodti dot id dokoyu om okon i' ko' mongintingayam dokoyu, nga' monosihat kopio oku dokoyu do miagal do tangaanak kopio ku iyokoyu. 15 Tu' iyoho' no o nosiliu do tapa' dokoyu, do mulong piya'd hopod noribu o guru dokoyu, tu' nosiliu kou nod Kristian. Id suang nopod koposi-posion dokoyu di nokoiso' kou dot id Kristus, om iyoho' no o nosiliu'd tapa' dokoyu, tu' iyoho' i' o minongoi pomisunud dokoyu di Habar dot Osonong do pasal di Kristus. 16 Om iri no o koponuhuan kopio ku dokoyu do momit di winonsoi ku. 17 Om nosuhu' ku no i Timotius do mongoi'd hino'd dokoyu. Iyau nopo om iyo pod tanak kopio ku di kosianan ku, tu' tumatanud i' iyau do Kristus. Iyau nopo om milo i' kopio do ponongkuyaanan. Om posorohon kou indo dau di kowoyo-woyoo' ku di notumbayaan oku'd Kristus, iri no i kowoyo-woyoo' di potudukon ku dot id pointikid-tikid do sidang do hinonggo nopo. 18 Haro o piro-piro tulun dot id pogialatan dokoyu do minggayo-gayo, tu' ondos daa diyolo' om a' oku no mongoi kawagu'd hino. 19 Nga' ondung korohian do Tuhan, om koongoi oku po do hino'd dokoyu dot a' no alaid do mantad do baino'. Om diri pondo om iyoho' nga' kokito indo ondung nunu noo i milo'd wonsoyon di tulun di minggayo-gayo'ddi; om okon i' ko' iri no i boros diyolo' ot orongou. 20 Tu' iri nopo Pomorintaan do Kinorohingan om okon i' ko' kogumuo' nod boros, suwai ko' kuasa. 21 Iyo nopoddi om pilion nopo ondung nunu o korohian dokoyu! Orohian kou tuu do rumikot oku do mongoi ponuduk dokoyu do mikuwo'd monogod ko' rumikot oku po do mongoi ponuduk do mikuwo'd alamaya' om osianan?
Tampahu' dot id Suang do Sidang
1 Nokorongou oku nod haro ot id pogialatan dokoyu do minomonsoi dit araat kopio, tu' kosumbang no kopio. Tu' haro ot id pogialatan dokoyu do minagampahu' di monohonok dau'd tondu'. Iri piya tulun dot a' kotutun do Tuhan nga' a' i' momonsoi do miagal diri! 2 Nga' mulong piya dot iyo'ddi nga' asawat kasai' po o ginawo dokoyu. Om apatut nopo daa kopio om tumongob kou, om posoliwanon dokoyu do mantad id sidang dokoyu i tulun di minomonsoi'd miagal diri. 3-4 Tinan ku nopo om osodu' i' dokoyu, nga' ginawo ku nopo om poingamung i' dokoyu. Om iti nopondo wonsoyon ku om miagal nopo di wonsoyon ku di poingamung oku dokoyu. Om poboroson ku no dot id suang do ngaran do Tuhan Yesus Kristus, do tulun nopo di minomonsoi'd miagal kopio'ddi kososomu', om mositi' nod hukuman! Tumimung kou nopo, om sorohon oku nopo dokoyu'd poingamung oku dokoyu, om id suang nod kuasa'd Tuhan toko' i Yesus, 5 do mositi' nod patahakon dokoyu o tulun diri dot id Rogon om apatai i' o tinan dau, nga' apasi indo o rusod dau dot orikot o korikatan kawagu'd Tuhan. 6 A' kou i' apatut do minggayo-gayo. Om nokoilo kou no doti'd boros do komolohingan do poingkaa, “Sasad piya dit okuuri' nga' kakambang i' di tapung di wonsoyon do roti!” ka. 7 Pataamon po i sasad do laid, iri no i sasad do dusa, om osiliu kou i' do miagal di roti di wagu po kowonsoi, tu' a' naralatan do sasad do dusa di laid; om oilaan ku i' dot iyo kou'ddi. Tu' nokosodia' no i poginakanan toko' do dong Paska, tu' nakatahak nod numaan do porsombahan di sinumbali', i Kristus, i nosiliu do miagal do dumba' do Paska toko'. 8 Iyo nopoddi, om ramayo' toko' no i poginakanan toko'ddi do mikuwo'd mangakan do roti dit a' naralatan do pangambang, iri no i roti di tanda' do kolidangan om tanda' do koinsanai di kohubayaan do Kinorohingan. Kada' toko' ramayo' i poginakanan toko' di don Paska dot i roti di naralatan do sasad do laid ot akanon, iri no i sasad do dusa om karaaton. 9 Id suang nopo di surat ku dit id gulu om sinunudan ku iyokoyu dot a' monokiambalut do tulun di magampahu'. 10 Komoyon ku nopoddi om okon i' ko' i tulun di magampahu' ko' i tamaha', ko' i magakal ko' i tumuku' dot id tingolig, dit a' kotutun do Kinorohingan. Okon i'! Okon i' ko' iyolo' o komoyon ku; tu' ondung minsodu' kou do mantad id diyolo', om atantu' no dot apatut nod sumoliwan kopio kou do mantad hiti'd pomogunan. 11 Komoyon ku nopo nga' a' monokiambalut di tulun di momoros do tulun iyau'd Kristian, om magampahu' indo, ko' tamaha', ko' tumuku' dot id tingolig, ko' orohian do mongindaraat do tulun do suwai, ko' magagauk, ko' mananakau. Om tumorungak piya'd makan do tulun do miagal diri nga' a' i' koino-ino! 12-13 Otopot nopo kopio om okon i' ko' doho'd tonggungan do momutus do tulun dit okon ko' Kristian. Kinorohingan noo o momutus diyolo'. Nga' iri nopo i tulun dot id suang do sidang dokoyu, om okon toi ko' iyokoyu ot apatut do momutus diyolo'? Tu' nokotulis no dot id suang do Buuk do Kinorohingan o poingkaa, “Uyungon no i tulun dot araat dot id pogialatan dokoyu,” ka.
Mamadawa do Sompi' ko' Tulun do Kristian
1 Nokuro tu' haro ot id pogialatan dokoyu do kasaap kopio do mongoi dot id gompomutus dit a' kotutun do Kinorohingan, do mamadawa di tulun dit iso-iso' o kinotumbayaan, do tontok do haro o pigulatan dot id tulun diri? Nokuro tu' a' nogi' iyau monuhu' di dong Kinorohingan do tulun do manalasai do hal diri? 2 A' kou toi koilo dot iri indo i dong Kinorohingan do tulun o momutus diti tulun do hiti'd pomogunan? Om ondung iyokoyu o momutus diti tulun do hiti'd pomogunan, om nokuro tu' a' kou milo'd manalasai do hal dit angagaan? 3 A' kou toi koilo dot iyati' indo o momutus do moloikat? Om songkuro nogindo kopio iti pasal nod koposi-posion do monikid tadau! 4 Om ondung haro o hal do miagal diri, om ngoyon nogindo dokoyu pokisalasayai do tulun dit aiso' kopio o ngaran-ngaran dot id sidang? 5 Pointingayam no kopio! Atantu' nod haro i' o tongoiso'd tulun dot id pogialatan dokoyu di milo'd manalasai do pogisosongkiwalan dot id pogialatan di tulun dot oiyo ko' Kristian! 6 Nga' mongoi nogi' i tulun do Kristian solowot dit okon ko' Kristian do mokisalasai di hal dau dot id tulun dit oiyo ko' Kristian! 7 Om okuro-kuro nogindod mongoi pokisalasai'd tulun dit okon ko' Kristian; tu' iri nopo haro o pogisosongkiwalan dot id pogialatan dokoyu nga' iso' no o kinaalaan dokoyu. Okon toi ko' osonong nogi' dot iyokoyu o pasalaon dot a' piya otopot o kapasalaan? Om okon toi ko' osonong nogi' dot iyokoyu o rugion? 8 Nga' iyokoyu nogi' o papasala'd tulun do suwai dot a' otopot o kapasalaan. Om iyokoyu o momorugi' do tulun do suwai. Om wonsoyon i' dokoyu o miagal diri dot id tulun piya dit oiyo do notumbayaan! 9 A' kou toi koilo dot iri nopo tulun dit a' tumanud do korohian do Kinorohingan om a' no kasanganu di Pomorintaan do Kinorohingan? Kada' kou kapalid! Tu' tulun nopo di magampahu', om i tulun do tumuku' dot id tingolig, om i lumapau, om i magampahu' dot oiyo ko' kusai, 10 om i manakau, om i tamaha', om i magauk, om i mongindaraat do tulun do suwai, om i monipu'd tulun do suwai --- om a' ngai' nopo kasanganu do Pomorintaan do Kinorohingan. 11 Om haro i' o piro-piro dot id pogialatan dokoyu dot iyo'ddi o kowoyo-woyoon di gulu po. Nga' baino' nopoddi om nokoidu' kou no do mantad id dusa. Om nosiliu kou nod dong Kinorohingan do tulun. Nokoulud kou no kawagu dot id Kinorohingan, tu' minonongkuyaan kou i' do Tuhan Yesus Kristus do mikuwo di kuasa' di Rusod do mantad id Kinorohingan toko'.
Popomoroyoho' nod Kinorohingan o Tinan Dokoyu
12 Haro i' o tulun do momoros do koino-ino'd momonsoi'd nunu nopo o pointikid-tikid do tulun. Nga' id doho' nopo om a' i' oinsanan iri'd kiguna'. Om mulong piya do koino-ino oku'd momonsoi do nunu nopo, nga' a' ku i' pologoson o tinan ku dot oporinta' do nunu nopo. 13 Om haro o tulun do momoros do taakanon nopo om maan nod tian, om tian nga' maan nod poiyanan do taakanon. Nga' tonuson goduwo indod Kinorohingan iri. Om a' i' koino-ino do popogompohuon o tinan, suwai ko' maan do pomonsoi'd karaja' di don Tuhan. Om gompion indod Tuhan i tinan diri. 14 Napasi nod Kinorohingan o Tuhan Yesus do mantad id kapatayon, om iyo nogiddi o Kinorohingan do mamasi dati' dot i kuasa' dau o pamasi. 15 Oilaan i' dokoyu, oi tobpinai-tobpinai, do pakakas do tinan do Kristus o tinan dokoyu. Om koino-ino oku toi do moniliu'd ongoiso' di pakakas do tinan do Kristus do pakakas do tinan do sundal? Atantu' nod amu'! 16 Om a' kou po toi koilo do tulun nopo di mongoi dudun do sundal, om kopiiso' no di sundal diri? Tu' nokotulis no dot id suang do Buuk do Kinorohingan o poingkaa, “Osiliu nondo iyolo' goduwo dot iso-iso',” ka. 17 Nga' tulun nopo di popoiso' do tinan dau dot id Tuhan, om kopiiso' no i Rusod do Tuhan om i rusod do tulun diri. 18 Insodu' kou no do mantad id tampahu'. Tu' iri ngai' nopo dusa'd suwai di wonsoyon do tulun, om id soliwan i' do tinan di tulun diri. Nga' tulun nopo di magampahu', om momonsoi nod dusa dot id tinan dau. 19 Om mositi' nod koilo kou do tinan nopo dokoyu om tiyonon di Rusod do Kinorohingan. Om poingiyon dot id suang dokoyu i Rusod diri. Om Kinorohingan no o pinapatahak di Rusod diri dot id dokoyu. Okon no ko' iyokoyu o sanganu'd tinan dokoyu, suwai ko' Kinorohingan o sanganu. 20 Noboli kou nod Kinorohingan om nabayaran ngai' no dau iri. Iyo nopoddi, om pakayon no dokoyu o tinan dokoyu do popoinggayo'd Kinorohingan.
Tuhoton do Pasal do Pikowinan
1 Dinondo no, om moro-boros oku do pasal di noroitan dokoyu do hiri'd surat dokoyu. Ondung a' kumawin o songulun o kusai, om osonong i'. 2 Nga' osonong nogi' do haro ngai' o sawo do pointikid-tikid do kusai om pointikid-tikid do tondu', om a' i' abayayat do magampahu'. 3 Mositi' nod wonsoyon di kusai it apatut dau'd wonsoyon dot id sawo dau, om i tondu' nga' apatut i' do momonsoi dit apatut do wonsoyon dau dot id sawo dau; do sopipori-pori nopo do momonsoi dit apatut do wonsoyon dot id diyolo' goduwo. 4 Aiso' i' o kuasa' di tondu' dot id tinan dau, tu' i nopo kikuasa' dot id tinan dau om i sawo dau. Om iyo nogiddi tu' i kusai nga' aiso' i' o kuasa' dot id tinan dau; tu' i nopo kikuasa' om i sawo dau. 5 Kada' kou sopikada-kada' do midudun do miagal dit apatut do wonsoyon do misasawo. Nga' koino-ino indo dot a' midudun dot ongoruhai, do kotumboyo' no goduwo. Om milo indo goduwo do sumambayang dot aiso' o kagangau. Nga' owonsoi pondo o miagal diri, om midudun indo kawagu do miagal dit apatut do wonsoyon di misasawo. Tu' ondung a' iyo'ddi, om katanud kou i' dotindo di pamayayat do rusod dot araat, tu' a' kou i' okoris do momusus do korohian do tinan dokoyu. 6 Om poboroson ku o miagal diti nga' okon i' ko' oturan kopio, suwai ko' nosihat noo. 7 Otopot nopo kopio om orohian oku nogi' daa do miyo ngai' doho' o tulun. Nga' pointikid-tikid do tulun om nakaanu ngai' do nipuhawang di mogisuwai-suwai do mantad id Kinorohingan. Iso' nopo o kowoyoon do nipuhawang dot aanu dot iso' o tulun, om suwai no o nipuhawang dot aanu do tulun do suwai. 8 Poingkaa o nosihat ku dot id tulun dit a' po nakakawin, om id tongoondu' di nopuadan: Osonong nogi' do mingiso-iso' kasai' nopo iyolo' dot iyo doho'. 9 Nga' ondung a' ko kopusus do korohian do tinan nu, om osonong nogi' do kumawin ko. Tu' osonong nogi' do kumawin ko, ko' mantad dot oporinta' ko di korohian do tinan nu dit a' opusus. 10 Om poingkaa o ponuhuan ku dot id tulun di nakakawin: (Otopot nopo kopio om okon i' ko' iyoho' o monuhu', suwai ko' Tuhan i'.) Tondu' nopo di nakakawin om kada' no kopio ponokiada' di sawo dau. 11 Nga' ondung nakaada' iyau, om mositi' no dot a' nopo iyau manansawo kawagu, do suwai indo ko' gumuli' kawagu iyau di sawo dau mantad. Om iri kusai nga' a' i' koino-ino do magada' di sawo dau. 12 Om id tulun nod suwai, om poingkaa o nosihat ku: --- iti nopo om doho'd nosihat, om okon i' ko' mantad id Tuhan --- ondung haro o kusai di nosiliu'd Kristian do kisawo dit a' otumbayaan do Kristus, om orohian i' i tondu' do poinsawo kasai' dau, om a' i' koino-ino i kusai'ddi do magada' di sawo dau. 13 Om ondung haro o tondu' di nosiliu'd Kristian do kisawo dit a' otumbayaan do Kristus, om orohian indo i kusai do poinsawo kasai' dau, om a' i' koino-ino i tondu'ddi do magada' di sawo dau. 14 Tu' iri kusai dit a' otumbayaan nga' posorupayon indo do sumiliu'd dong Kinorohingan do tulun tu' nakakawin i' iyau do tulun di nasanganu do Kinorohingan. Om iyo nogiddi i tondu' dit a' otumbayaan tu' posorupayon i' do sumiliu'd dong Kinorohingan do tulun tu' nakawin no iyau do kusai di nasanganu do Kinorohingan. Tu' ondung a' iyo'ddi, om antantu' no dot iyo pondod tangaanak do tulun dit a' kotutun do Kinorohingan i tangaanak diyolo', om kohompit i' daa do dong Kinorohingan do tulun i tangaanak diyolo'ddi. 15 Nga' ondung mada' i kusai dit a' otumbayaan di tondu' di sawo dau'ddi, ko' mada' i tondu' di sawo dau di nosiliu nod Kristian, om a' piya minog dot oduhan i mada'. Tu' id suang nopod hal diti om aiso' no o koontobon di kusai ko' i tondu' di Kristian diri do mobpili', tu' korohian id Kinorohingan dot oulud ot id suang do koposi-posion dokoyu. 16 Tu' iya', oi tondu' di kisawo --- i notumbayaan nod Tuhan --- poingkuro ko do koilo kopio dot a' ko milo do mamasi di sawo nu? Om iyo ko nogiddi iya', oi kusai di Kristian di kisawo, poingkuro ko do koilo kopio dot a' ko milo do mamasi di sawo nu?
Tumanud no di Ponuduk do Tuhan Diya' dot id Suang do Koposi-Posion Nu
17 Apatut i' do sompori-pori nopo o tulun do mongulud do koposi-posion dau do tumanud di ponudukan do Tuhan, om miagal di natantu' mantad do Kinorohingan do bagi' dau do tontok di lohowo' i' iyau'd Kinorohingan do monongkuyaan dau. Iri no ot oturan do potudukon ku dot id pointikid-tikid do sidang. 18 Miagal ko', iso' o tulun di nosunatan mantad no di lohowo' iyau'd Kinorohingan. Tulun nopo do miagal diri om a' no minog do tumotos do mananus di sinunatan diri. Om iyo nogiddi, tu' ondung haro o tulun dit a' nosunatan di lohowo' i' iyau'd Kinorohingan om a' no minog do mokisunat. 19 Tu' tumanud piya dot oturan do sunat ko' amu', nga' miagal nopo dot aiso' goduwo o komoyon. Nga' agayo nopo kopio om tumanud di ponuhuan do Kinorohingan. 20 Apatut i' do sompori-pori nopo o tulun do tumilombus dot id kowoyo-woyoo' do koposi-posion dau do miagal di lohowo' i' iyau'd Kinorohingan. 21 Ondung turipon ko do tontok di lohowo' ko i', om a' piya minog do minsusa' do momusorou do pasal diri. Nga' ondung polobuson ko do koimbagu, om lumabus no. 22 Tu' turipon nopo di notumbayaan do Tuhan, om osiliu nod tulun di songonuon do Tuhan di nakalabus. Om i tulun di poillabus di notumbayaan do Tuhan, nga' susuhuon nod Kristus. 23 Noboli ko nod Tuhan om nabayaran ngai' no dau i gatang nu. Iyo nopoddi om kada' no patahako' o tinan nu do sumiliu'd turipon do tulun. 24 Iyo nopoddi, oi tobpinai-tobpinai, om poingkuro nopo o koiyon-iyono' dokoyu di lohowo' kou i', om tumilombus kou nopo do miagal diri do poingulud kasai' do Kinorohingan.
Pasal di Tulun dit A' po Nakakawin om i Nongopuadan
25 Baino' no om moro-boros oku do pasal do tulun dit a' po nakakawin. Om pasal nopodti om aiso' i' o boros do naanu ku do mantad id Tuhan. Nga' poboroson ku nopo o ponosihat ku, tu' tulun oku i' dit apatut do ponongkuyaanan, tu' nosianan i' o Tuhan doho'. 26 Osorou ku dot osonong nogi' do tumilombus nopo o tulun dot id koiyon- iyono' dau do miagal di koiyon-iyono' dau do dinondo, tu' ogumu' noddi kopio o kosusaan di korolosi kopio do baino'. 27 Ondung haro o kusai di kisawo om kada' no ponokiada' di sawo dau. Nga' ondung a' ko po nakakawin om a' piya minog do kumawin. 28 Nga' ondung nakakawin ko, om okon i' ko' dusa iri. Om iyo nogiddi, tu' ondung haro o sumandak do kumawin, om okon i' ko' dusa iri. Nga' ogumu-gumu' nondo o kosusaan do timbabaon di nakakawin. Om orohian oku dot a' kou kotimbaba' do kosusaan do miagal diri. 29 Poingkaa o komoyon ku, oi tobpinai-tobpinai: A' no alaid o maso toko'. Om mantad pondod baino', om pointikid-tikid do kusai di kisawo, om mositi' nod sorohon nopo dot aiso' o sawo dau; 30 om iri tulun di mihad, nga' sorohon nopo dot a' iyau tumongob; om iri tulun di koirak, nga' sorohon nopo dot a' iyau otood; om iri tulun di haro o binoli, nga' sorohon nopo dot aiso' o nunu-nunu dau; 31 om iri tulun di mongindapu' do hiti'd pomogunan, nga' sorohon nopo dot a' iyau agangau di tindopuon dau. Tu' a' no alaid om tumanus no iti pomogunan, do miagal do kowoyo-woyoo' do dinondo! 32 Orohian oku do koidu' kou do mantad id kosusaan. Om iri nopondo tulun dit aiso' o sawo om iri po i karaja' do don Tuhan o sorohon dau, tu' orohian i' iyau do kohubayaan do Tuhan. 33 Nga' iri nopo kusai di kisawo om ogumu' i' ot osorou dau di dom pomogunan, tu' orohian i' iyau do poposonong do ginawo di sawo dau; 34 om gowoi pondo om opogiduwo-duwo o pomusarahan dau. Iri nopo tondu' dit aiso' o sawo, ko' i sumandak poo, om ogumu' i' o sorohon do pasal do don Tuhan, tu' orohian i' iyau dot asanganu kopio'd Kinorohingan o ginawo om koinsanai'd koposi-posion dau. Nga' tondu' nopo di kisawo, om iri po i dom pomogunan o sorohon dau, tu' orohian iyau do poposonong do ginawo di sawo dau. 35 Koponulisan ku nopodti om maan do koinsanangan dokoyu, om okon i' ko' mogodu di mogisuayan nopo o pogoduhan. Korohian ku nopo kopio om momonsoi kou dit otopot om it apatut, om kotumpu i' dot id Tuhan o pomusarahan dokoyu. 36 Ondung haro o tulun di kopuriman dot a' dau nowonsoi it apatut dau'd wonsoyon dot id tunang dau, om ondung a' dau opusus o korohian do tinan dau, om opurimanan dau dot apatut dau'd kowinon i sumandak diri, om wonsoyon nopo dau it osonong dot opurimanan dau. A' i' iyau kowonsoi'd dusa do mikawin piya iyolo'. 37 Nga' ondung haro o tulun do nokopomusorou no kopio dot a' mangawin di tunang dau om a' dau sansag-sansagan do momonsoi o miagal diri, om osonong i' i wonsoyon dau'ddi, dot ogirot po o ginawo dau do momonsoi'd miagal diri. 38 Otopot nopo kopio om i tulun di kumawin, nga' osonong i', om i tulun dit a' kumawin, nga' okon-okon o kosonongo'. 39 Tondu' nopo di nakakawin om akagasan no di sawo dau do solinaid po di sawo dau do poimpasi. Ondung apatai i sawo dau, om aiso' no o kaantob di tondu' do mokikawin kawagu di tulun di korohian dau; do dong Kristian poo di kopikowinan. 40 Nga' koundar nogi' ma daa iyau dot a' kumawin kawagu. Iyo noddi ot osorou ku iyoho', nga' opurimanan ku i' do mantad id kuasa' do Rusod do Kinorohingan i pinoboros ku'ddi.
Pasal do Taakanon di Nokosubak dot id Tingolig
1 Dinondo no, om pasal di taakanon di nokosubak dot id tingolig o poboroson ku. Otopot i' kopio i poboroson do tulun do poingkaa, “Ongoilo ngai' toko' no,” ka. Nga' iri no i toilaan o papasawat do ginawo'd tulun, nga' kosianan nopo om kogirot i' do ginawo. 2 Iri nopo tulun di momusorou dot ogumu' no o nongoilaan dau, om otopot nopo kopio om a' po iyau nokoilo dit apatut dot ilaan dau. 3 Nga' tulun nopo dit otopot kopio dot osianan do Kinorohingan, om otutunan i' iyau'd Kinorohingan. 4 Iri no tuhoton do pasal do taakanon di nokosubak dot id tingolig, om oilaan toko' i' dot iri no i tingolig o maan do ponongkuiyo-iyo dit aiso' i' daa kopio. Om oilaan toko' dot iso' noo o Kinorohingan; om aiso' no o suwai. 5 Otopot nogi' dot ogumu' i roitan do ponokokinorohingan om tuhan; dot i hilo'd tawan om i hiti'd pomogunan. 6 Nga' id dati' nopo, om iso' noo o Kinorohingan. Iyau no i Tapa', i minomonsoi do koinsanai'd nunu nopo. Om poimpasi toko' do bagi' dau. Om Tuhan nga' iso' noo, iri no i Yesus Kristus. Om iyau no o pinawayaan do minomonsoi do koinsanai'd nunu nopo, om iyau no o manahak dati' do koposion. 7 Mulong piya dot iyo'ddi nga' okon i' ko' koinsanai'd tulun do koilo do pasal diri. Haro i' o tulun dit oubas do tumuku' dot id tingolig di gulu po. Om gowoi poddi om gisom piya'd dinondo nga' osorou i' diyolo' dot iri nopo i taakanon di nokosubak dot id tingolig om taakanon nod tingolig. Om mangakan nopondo iyolo' do taakanon diri, om kowonsoi nod dusa dot osorou diyolo'; tu' a' po ogirot no o kopurimanan do ginawo diyolo'. 8 Otopot nopo kopio om taakanon nopo toomod om a' i' popogirot do piuludan toko' dot id Kinorohingan. Tu' ondung mangakan toko' do taakanon diri, om aiso' i' ot aanu-anu toko'. Om a' toko' mangakan di taakanon diri nga' aiso' i' o korugian toko'. 9 Nga antaan-taan! Kada' indo do gisom do kowonsoi'd dusa o tulun do suwai --- tu' a' po ogirot no o ponongkuyaanan diyolo' --- dot aiso' piya kopio o koontobon nu iya' do momonsoi'd nunu nopo. 10 Poingkaa o komoyon ku: Sokiro nopo do poirikau ko'd makan do hilo'd walai'd tingolig, iya' it ogirot no o kopurimanan do ginawo, om haro nondo o tulun do kokito diya'd makan do hiri. Om ondung a' ogirot o kopurimanan do ginawo di tulun diri, om okon toi ko' iri nondo o kabayayat dau do mangakan do taakanon di nokosubak dot id tingolig? 11 Om gowoi pondo om i ponongkuyaanan nu iya' o mamalid do ponongkuyaanan di tulun dit a' po ogirot. Om inda' ka do minatai i' o Kristus do suminowoli do tulun diri. 12 Om ondung kowonsoi kou'd sala' do miagal diri dot id tulun di sompi' ko' tulun do Kristian --- tu' mamaraag kou di kopurimanan do ginawo diyolo' dit oluhoi om kowonsoi kou nod dusa dot id Kristus. 13 Om kaa pogi'ddi, dot ondung taakanon o kobungou di tobpinai ku do momonsoi'd dusa, om a' oku nogindo kopio mangakan di taakanon diri. Tu' nunu o koilo-ilo dot iri nopo wonsoyon ku o kobungou di tobpinai ku do momonsoi'd dusa.
It Apatut dot Aanu om i Tonggungan di Rasul
1 Okon oku toi ko' tulun di poillabus om okon i' ko' turipon? Okon oku toi ko' rasul? A' oku toi insan kokito di Yesus, i Tuhan toko'? Okon kou toi ko' tua' di karaja' ku do don Tuhan? 2 Om mulong piya dot a' o tulun do suwai monongkuyaan do tulun oku di sinuhu', nga' monongkuyaan kou po daa iyokoyu! Tu' ino no koposi-posion dokoyu do dong Kristian o kointalangan kopio do tulun oku di sinuhu'. 3 Ondung pasalaon oku'd tulun, om posimbaron ku indo o poingkaa: 4 A' oku toi apatut i' dot onuan do taakanon om tinumon do gontok diti karaja' ku? 5 A' oku toi koino-ino i' do powoyo' do sawo di Kristian do tontok do mimpanau oku, do miagal di winonsoi di piro-piro o tobpinai di Tuhan Yesus om i rasul di suwai, om kohompit nogi' i Pitrus? 6 Ko' i Barnabas no tuu om iyoho' o suhuon do mimpori-pori do mogihum do kaakan-akanan? 7 Aiso' i' o soudor di mimpori-pori do mogihum do kaakan-akanan dau dot id suang di posukan do soudor di mongoi sangod! Aiso' i' o gompongumo do mananom dot anggur do hiri'd kabun dau om a' indo iyau mangakan do tua' dit anggur do hiri'd kabun dau'ddi! Aiso' i' o gompomogompi'd dumba' do momogompi'd dumba', om a' indo monginum di susu di dumba' dau'ddi. 8 Okon i' ko' mantad no di koubasanan do momonsoi'd pointikid do tadau o kapabarasan ku'dti, suwai ko' id suang do Tourat nga' haro i' o boros do pasal diri. 9 Nokotulis no o poingkaa dot id suang do Tourat di Musa, “Iri nopo sapi' di mongulok di gandum do popotobilang di tua' do gandum do mantad hiri'd rawo, om a' i' apatut do kakangan o kabang,” ka. Iri toi i sapi' o pusohon kopio'd Kinorohingan? 10 Ko' iyati' po o komoyon diri? Atantu' no do kinoponulisan nopoddi om iyati' i' o komoyon. Tu' iri nopo tulun di mongumo om i tulun di morobuat di gandum dau, om kumaraja' pogi' nga' haro i' o soro-sorohon dau do kaanu do tintanga' do tua' di karaja' dau. 11 Nakapatanom no iyahai do linsou di don rusod dot id suang do koposi-posion dokoyu. Om ondung mongomot iyahai do barakat do konunu-nunuan do mantad id dokoyu, om ogumu' kopio toi iri do pokionuon dahai do mantad id dokoyu? 12 Ondung apatut o tulun do suwai do morou-sorou do kaanu'ddi do mantad id dokoyu, om okon toi ko' iyahai nogi' daa ot apatut kopio do kaanu, ko' mantad dot iyolo'? Nga' a' ku i' pakayon i kosorupayan ku do kaanu'ddi, suwai ko' uhang ku nogi' do pimpori-porianan ku do mananggung o koinsanai'd nunu nopo ko' mantad do moningkau do hal di sumiliu'd koontobon do popinsusui di Habar dot Osonong do pasal do Kristus. 13 Atantu' no do koilo kou i' dot iri nopo tulun di maganu-anu do hiri'd Walai'd Sasambayangan dot Agayo om kaanu nod takanon diyolo' do mantad hiri'd Walai'd Sasambayangan dot Agayo. Om iri tulun di maganu-anu do hiri'd tiyonon do papatahak do porsombahan di sorobon, nga' kaanu i' do bahagi di porsombahan di patahakon diri. 14 Om iyo nogiddi o Tuhan do pinapatantu' dot iri nopo tulun di popinsusui di Habar dot Osonong diri nga' apatut i' do kaanu do kaakan-akanan dau do mantad id karaja' dau di popinsusui. 15 Nga' a' oku po insan pamakai di kosorupayan diri. Om koponulisan ku'dti surat diti nga' okon i' ko' monuhu' oku do wonsoyon o miagal diri dot id doho' do baino'. Osonong nogi' dot apatai oku ko' mantad dot atagakan oku di kaandasan kopio ku. 16 Tu' ondung pasal no do popinsusui di Habar dot Osonong do mantad id Kinorohingan o komoyon diri, om aiso' i' o paantakan ku dot oondos, tu' sinuhu' oku id Kinorohingan do momonsoi'ddi. Obungou oku no, ondung a' oku no popinsusui di Habar dot Osonong diri! 17 Ondung wonsoyon ku i karaja'ddi do tumanud do doho'd korohian om milo oku no daa do mogondos do kaanu'd gadsi'. Nga' popinsusui oku pogi' di Habar dot Osonong diri nga' iri no o tonggungan ku. Om sinuhu' oku i' do Kinorohingan do momonsoi'd karaja'ddi. 18 Iyo nopoddi, om nunu noo o gadsi' dot aanu ku? Iti no o gadsi' ku: iri no tu' milo oku do popinsusui di Habar dot Osonong diri, mikuwo'd a' papawagat do tonggungan dot ongoiso' piya'd tulun do mamalansa' doho', tu' a' ku i' pokionuon it apatut daa dot aanu do tulun di popinsusui do Habar dot Osonong. 19 Iyoho' nopo om okon i' ko' turipon dot isai nopo o tulun; poillabus oku i'. Mulong piya dot iyo'ddi nga' nosiliu ku no o tinan ku do turipon do koinsanai'd tulun. Om winonsoi ku pogi' o miagal diri nga' mokimamaha' oku dot ogumu' o tulun dot aangatan ku do tumanud do Kristus. 20 Id pogialatan oku nopod tulun do Yohudi, om moyo' oku no di kowoyo-woyoo' do tulun do Yohudi om milo oku i' do mangangat di tulun do Yohudi do tumanud do Kristus. Om id pogialatan oku no di tulun di tumanud kopio di Tourat di Musa, om mingiyo-iyo oku no do tulun di maso po dot akagasan di Tourat diri, do mulong piya dot a' oku no daa akagasan di Tourat. Om wonsoyon ku pogi' o miagal diri nga' wayaan ku do mangangat diyolo' do sumiliu'd tumatanud do Kristus. 21 Om id pogialatan oku no di tulun dot okon ko' Yohudi om tumanud oku no di kowoyo-woyoo' diyolo' it okon ko' tulun do Yohudi, it id soliwan di Tourat. Om wonsoyon ku pogi' o miagal diri nga' wayaan ku do mangangat diyolo' do sumiliu'd tumatanud do Kristus. Nga' okon indo ko' gisom dot a' oku tumanud di ponuhuan do Kinorohingan; tu' porintaon oku i' di ponuhuan do Kristus. 22 Om id pogialatan oku nod tulun dit a' ogirot o ponongkuyaanan, om mingiyo-iyo oku no diyolo' tu' a' ogirot o ponongkuyaanan, om milo oku i' do mangangat diyolo' do sumiliu'd tumatanud do Kristus. Om iyo oku noddi do momit do koinsanai'd tulun, om poingkuro nopo o kowoyo-woyoo' nga' wonsoyon ku nopo, dot iri po o ralan do mamasi do wookon diyolo'. 23 Om wonsoyon ngai' ku nopo iri dot i Habar dot Osonong do mantad id Kinorohingan o kapamansayan ku, om kohompit oku i' iyoho' dot abarakatan. 24 Om atantu' no do koilo ko i' dot id suang nopo do pilumbaan do manangkus, om manangkus ngai' i' i tulun di monokilumbo, nga' iso' no o tulun di kaanu do hodia'. Iyo nopoddi om monotos nod manangkus om kaanu ko i' do hodia'. 25 Pointikid-tikid do tulun di maso'd torining, om koporinta' i' do tinan dau dot id suang do nunu nopo. Om wonsoyon pogi' dau o miagal diri nga' orohian iyau dot akaraan di karo do bunga do tanda' do kamanangan, i bunga dit oruuhai om oriou no. Nga' iyati' nopo om porintaon toko' pogi' o tinan toko' dot id suang do nunu nopo nga' orohian toko' dot akaraan di karo do bunga dit a' rumiou. 26 Om iri no o koponongkusan ku do mikuwo'd haro kopio o pokiririkatan. Do miagal dit id pilawanan do mitumbuk, tu' a' ku i' songkotumbuk-tumbuk dot a' oila-ilaan. 27 Om pologoson ku nopo o tinan ku dot opintumbukan om opimbobog do gisom do milo ku'd porintaon o tinan ku. Om wonsoyon ku pogi' o miagal diri, nga' mada' oku do kapangangat oku nod tulun do suwai do sumuang di pilumbaan, om a' oku iddi iyoho' kosuang.
Mogodu do Tumuku' dot id Tingolig
1 Oi tobpinai-tobpinai! Apatut no dot osorou dokoyu i nosiliu dot id taki- aki toko' di maso diyolo' do manud-tanud di Musa. Nointirungan ngai' i' iyolo' di haun, om osonong iddi iyolo' do suminoborong di Rahat dot Aragang. 2 Om nobotisan ngai' iyolo' di haun om nobotisan di rahat diri do sumiliu'd tumatanud di Musa. 3 Om minangakan ngai' iyolo' di taakanon do don rusod dit iso' i' o bansa'. 4 Om minonginum iyolo' do mantad hiri'd pampang do don rusod di moyo-woyo' diyolo'; om iri nopo pampang diri nga' Kristus nogi'. 5 Nga' iyo piya'ddi, nga' kogumuan no diyolo' dot a' id Kinorohingan kinohubayaan, om gowoi poddi do songirromos poo o rata' diyolo' do hilo'd tana' do kowotuan. 6 Iri ngai' no o sumiliu'd popoinsan dati', om poposorou dati' dot a' rumohian dit angaraat do miagal di winonsoi diyolo'. 7 Om popoinsan dati' dot a' tumuku' dot id tingolig do miagal di winonsoi do wookon diyolo'. Do nokotulis no dot id suang do Buuk do Kinorohingan o poingkaa, “Om timpuun no i bansa'ddi do mangakan-ngakan om monginum-nginum, om mintari' do tumuku' dot id tingolig,” ka. 8 A' toko' i' koino-ino do magampahu' do miagal di winonsoi do wookon diyolo'. Om kapatai nopo o duwo nohopod om tolu noribu o tulun dot id pogialatan diyolo' dot insan no tadau, tu' minomonsoi i' iyolo' do miagal diri. 9 A' toko' i' koino-ino do mogumbal do Tuhan do miagal di winonsoi do wookon diyolo' di gulu po, gisom do napatai iyolo' do tininduk do tulanut di kipaliu. 10 Om a' toko' koino-ino do somboro-boros dot araatan; do miagal di winonsoi do wookon diyolo' di gulu po. Om gowoi poddi do pinatai iyolo' di Moloikat di Mamamatai. 11 Om nongosiliu ngai' pogi' o miagal diri dot id diyolo' nga' maan do popoinsan do tulun do suwai. Om nongkotulis ngai' pogi' iri nga' popoinsan dati'. Tu' iyati' nopodti om poimpasi do tontok dit oruhai nod karaagon do pomogunan. 12 Iri nopo tulun di momusorou dot ogirot iyau, om mositi' no do minsan- insan; om a' i' iyau aratu'. 13 Pointikid-tikid di pogumbalan do koontok diya' om iri i' i koubasanan do koontok do tulun. Nga' otorodok i' o Kinorohingan dot id batos dau. Om a' ko i' dau pologoson dot opogumbalan dit a' nu ooyit. Om tontok nopo dot oontok ko'd pogumbalan, om onuan ko indo dau'd ralan do gumirot om ogirot ko i'. 14 Iyo nopoddi, oi tobpinai-tobpinai di kosianan ku, om karaatai toko' no kopio do tumuku' dot id tingolig. 15 Om moro-boros oku dot id dokoyu do miagal do moro-boros oku dot id tulun dit oilo. Om timbangon no kopio dokoyu iti boros ku. 16 Tontok nopo di monginum toko' do waig dot anggur do mikuwo'd mongunsikou dot id Kinorohingan, om okon toi ko' iri no o popointalang do nokoiso' toko' dot id Kristus dot id suang do kinapatayon dau? Om tontok di pogikobing-kobingon toko' i roti do maan toko' pogiandadai do mangakan, om okon toi ko' iri no o popointalang do nokoiso' toko' dot id tinan do Kristus? 17 Tu' iri nopo roti om iso' noo, om mangakan ngai' toko' nopo di roti dit iso' noddi, om iri no o popointalang dot ogumu' toko' piya nga' iso' no o tinan toko'. 18 Sorohon pogi' i tulun do Yohudi. Iri nopo i tulun di mangakan di nakatahak do hiri'd poiyanan di porsombahan do sorobon, om nokoiso' no i tulun di kinoiyonon diri. 19 Nunu tuu o komoyon ku do miagal diri? Iri nopo i tingolig om i taakanon di pinosubak dot id tingolig om aiso' i' kopio o komoyon. 20 Do nunu nopo i nakatahak do hiri'd poiyanan do podsubak do tingolig om a' i' pinatahak dot id Kinorohingan, suwai ko' id rusod dot angaraat. Om mada' oku i' do koiso' kou do rusod dot araat. 21 A' kou i' koino-ino do monginum do mantad hiri'd sangkir di kisuang do waig dot anggur do don Tuhan, om monginum indo do mantad hiri'd sangkir di kisuang do waig dot anggur do don rusod dot araat. Om a' kou koino-ino do makan do hiri'd mija' do don Tuhan, om makan indo do hiri'd mija' do don rusod dot araat. 22 Orohian toko' toi do popoosol do Tuhan? Okoris toko' toi ko' Tuhan? 23 Boros kad tulun om, “Koino-ino toko' i' do momonsoi do nunu nopo i korohian toko',” ka. Otopot nogi'! Nga' a' i' haro ngai' no o guna' di korohian toko'. “Koino-ino toko' i' do momonsoi do nunu nopo i korohian toko'” --- nga' a' i' kotulung ngai' iri dot id suang do koposi-posion toko'. 24 Kada' nod haro o tongoiso' pod tulun do tumotos do mogihum di dau nod koinsanangan. Suwai ko' apatut nogi' do tumotos do mogihum do koinsanangan do tulun do suwai. 25 Koino-ino kou i' do mangakan do nunu nopo i padagangon do hilo'd pasar do daging. Om a' piya minog do sorisidon do minguhot do tintod do momoli, om a' i' otingkau o kopurimanan do ginawo dokoyu. 26 Tu' haro i' o nokotulis dot id suang do Buuk do Kinorohingan do poingkaa, “Iti nopo pomogunan om koinsanai dit id suang do pomogunan om Tuhan i' o sanganu,” ka. 27 Ondung alapon kou'd makan, do tulun dit okon ko' Kristian om kaakun kou do mongoi, om kanon ngai' nopo i posurungon dau dokoyu. Om a' piya minog dot uhoton ondung honggo o tadon di taakanon diri, om a' i' otingkau o kopurimanan do ginawo dokoyu. 28 Nga' ondung haro o tulun do momisunud dokoyu dot, “Nokosubak no moti' dot id tingolig iti taakanon diti,” ka, om kada' kou no pangakan di taakanon, tu' apatut i' do podulon i tulun diri om i kopurimanan do ginawo. 29 Komoyon ku nopo om okon i' ko' i kopurimanan do ginawo dokoyu, nga' i kopurimanan do ginawo di tulun diri. Haro doti' o monguhot do poingkaa, “Nokuro tu' aantaban oku do kopurimanan do ginawo'd tulun do suwai? 30 Ondung mangakan oku'd taakanon do mikuwo'd mongunsikou dot id Kinorohingan, om nokuro tu' pasalaon oku pod tulun do mangakan do taakanon diri, om nounsikou ku no dot id Kinorohingan?” ka. 31 Nunu nopo o wonsoyon nu do makan ko tuu ko' minum nga' wonsoyon ngai' nori do popoinggayo'd Kinorohingan. 32 Wonsoyon kasai' no dokoyu o miagal diri om a' kou i' kobungou'd tulun do suwai do momonsoi'd dusa; dot iri tuu tulun do Yohudi ko' iri po tulun dot okon ko' Yohudi, ko' iri po sidang do Kinorohingan. 33 Momit kou no do doho'd kowoyo-woyoon. Tu' tumotos kasai' oku i' do poposonong do ginawo'd koinsanai'd tulun dot id suang do koinsanai'd nunu nopo, om a' ku no sorohon o doho'd koinsanangan. Tu' korohian ku nopo kopio om angapasi ngai' daa iyolo'.
1 Omit kou no do kowoyo-woyoon ku, do miagal doho' tu' momit do kowoyo-woyoon do Kristus.
Pasal do Mononsunduk do Sumambayang
2 Mamarayou oku no dokoyu tu' osorou kasai' oku i' dokoyu om tumanud kou di ponudukan di pinotuduk ku dokoyu. 3 Nga' orohian oku po do kongoilo kou dot iso' kawagu o ponudukan. Iri no tu' boyoon nopo do pointikid-tikid do kusai om Kristus; om boyoon nod tondu' om i sawo dau, om boyoon nod Kristus om Kinorohingan. 4 Ondung haro o kusai do mononsunduk do tontok do sumambayang ko' tontok do poposusui di habar do mantad id Kinorohingan, dot id toguang do tulun dot ogumu', om mongintingayam no iyau do Kristus. 5 Om ondung haro o tondu' dit a' mononsunduk do tontok do sumambayang ko' tontok do poposusui di habar do mantad id Kinorohingan dot id toguang do tulun dot ogumu', om mongintingayam no i tondu'ddi di sawo dau, i nosiliu do boyoon dau. Om iyo nopoddi om miagal pod nobugaran o tulu di tondu'ddi. 6 Tu' ondung a' o tondu' mononsunduk om osonong nogi' do pampadan o tobuk dau. Nga' ondung bugaran o tulu do tondu' ko' pampadan o tobuk dau, om kointingayam i' dau iri. Om osonong nogi' do mononsunduk iyau. 7 Tongokusai nopo om a' i' minog do mononsunduk, tu' iyau no o popointalang do kowoyo-woyoo' om kagayaan do Kinorohingan. Tongoondu' noo om popointalang do kagayaan do tongokusai, 8 tu' kusai nopo om a' i' winonsoi do mantad id tondu', suwai ko' tondu' o winonsoi do mantad id kusai. 9 Om kinapamansayan do kusai nga' okon i' ko' maan do koinsanangan do tondu', suwai ko' tondu' o winonsoi do maan do koinsanangan do kusai. 10 Iyo nopoddi, om mositi' no do mononsunduk o tongoondu' om asanangan i' i moloikat, tu' iri no o koilaan do minsiriba' iyau di sawo dau. 11 Mulong piya dot iyo'ddi, nga' id suang nopod koposi-posion toko' do pointikid do tadau, dot iyati' tu' tulun do Kristian, om a' i' poimpori-pori i tondu' do posuwai-suwai di kusai, om i kusai nga' a' i' poimpori-pori do posuwai-suwai di tondu'. 12 Tu' mulong piya do winonsoi do mantad id kusai o tondu' di timpuun i', nga' id tohuri noddi om tongoondu' i' o mogkosusu do tongokusai; om Kinorohingan i' o tadon do koinsanai'd nunu nopo. 13 Umbalai pogi' kopio dokoyu do momusorou iti: Osorupai toi o tondu' do sumambayang dot id Kinorohingan dot id toguang do tulun dot ogumu', dot a' mononsunduk? 14 Om notudukan kou no do mantad id koubasanan do tulun dot ogumu' dot anaru nopo o tobuk do kusai, om a' i' osonong no. 15 Nga' tongoondu' nopo, om tobuk no o pinatahak dot id dau do maan do ponokop do tulu dau om sumiliu'd kaandasan dau o tobuk dit anaru. 16 Ondung haro o sumurilog do pasal diti, om iso' noo o milo ku'd poboroson tu' iyati' nopo om i piro-piro o sidang do Kinorohingan di suwai, om iso' noo o koubasanan toko' dot id suang do sidang; om aiso' no o suwai ko' iri.
Porjomuan di don Tuhan
17 Iti no poboroson ku'd baino', om a' oku no mamarayou dokoyu. Tu' okon nogi' ko' osonong o kootuson di pitimungan dokoyu, suwai ko' araat nogi'. 18 Id gulu nopo kopio do norongou ku om haro o piro-piro sinompuruan do tulun dot a' mogiuulud dot id suang do pitimungan. Om osorou ku dot otopot i' o wookon di norongou ku'ddi. 19 Om a' i' milo dot aiso' kopio o pogisosongkiwalan dokoyu, tu' iri nogindo o pointalang kopio ondung isai ngai' i tulun do Kristian dit otopot. 20 Nga' tontok nopo di tumimung kou om okon i' ko' porjomuan do don Tuhan i wonsoyon dokoyu. 21 Tu' tontok nopod makan kou, om sompori-pori kou nopo do mongoi di taakanon dokoyu om mogiaahau kou. Om gisom do haro nondo ot aiso' i' ot aakan- akan, om inda' ka di suwai tu' nangaawuk poo. 22 Nokuro tu' miagal kopio kou'ddi? Aiso' toi o walai dokoyu? Milo kou i' do makan om minum do hiri'd walai dokoyu! Ko' orohian kou nod mongindaraat di sidang do Kinorohingan om mongintingayam di tulun do mosikin? Nunu poo o poboroson ku dokoyu'dti? Royohon ku po tuu iyokoyu? Amu'! A' oku no kopio mamarayou dokoyu. 23 Tu' iri nopo pinotuduk ku dokoyu om iri i pinotuduk do Tuhan dot id doho': do tontok nopo di totuong di padagangon no i Yesus, i Tuhan toko', om anu no iyau'd roti, 24 om kopongunsikou poddi iyau'd Kinorohingan di roti'ddi, om pogikobing-kobingo' no dau i roti, om boro-boros no iyau'd poingkaa, “Iti no poiyaan do tinan ku di patahakon do sumowoli dokoyu. Wonsoyon no dokoyu o miagal diti do kopomusarahan doho',” ka dau. 25 Om iyo iddi di nakaakan tu' anu no iyau do sansangkir o waig dot anggur om boro-boros nod poingkaa, “Iti no waig dot anggur o tumpongo do Kinorohingan di wagu, om pogiroton do raha' ku. Om pointikid-tikid do monginum kou'dti, om wonsoyon no o miagal diti do kopomusarahan doho',” ka dau. 26 Tu' pointikid-tikid do mangakan kou di roti om monginum kou di waig dot anggur diri, om poposusui kou no di kinapatayan do Tuhan, do gisom do korikot iyau. 27 Iyo nopoddi, om iri nopo tulun di mangakan di roti di don Tuhan om monginum di waig dot anggur di don Tuhan, dot a' apatut o kowoyo-woyoo' do mangakan om monginum diri, om kowonsoi no i tulun diri do dusa dot id toguang do Tuhan, i pinapatahak do tinan dau om raha' dau. 28 Iyo nopoddi, om mositi' no do sorisidon po kopio do pointikid-tikid do tulun o ginawo dau, om koino-ino nogindo iyau do mangakan di roti om monginum di waig dot anggur. 29 Tu' ondung haro o tulun di mangakan nopo di roti om monginum di waig dot anggur om a' indo momusou no do tinan do Tuhan o komoyon di porjomuan diri, om poporikot no do hukuman do Kinorohingan dot id tinan dau o kapangakanan om koponginuman dau'ddi. 30 Om iri no o kokuwaan dot ogumu' ot id pogialatan dokoyu do sumakit om oluhoi, om ogumu' o napatai. 31 Nga' ondung poguluonon toko' do monorisid kopio o ginawo toko', om a' toko' i' ohukuman do Kinorohingan. 32 Nga' ondung hukuman toko' do Kinorohingan, om bobogon toko' no dau, om a' toko' i' kotonggoi diti pomogunan do hukuman. 33 Iyo nopoddi, oi tobpinai-tobpinai ku, om ondung tumimung kou do mangakan di porjomuan do don Tuhan diri, om mogiandad-andad kou no do mangakan. 34 Ondung haro o louson, om makan mantad nogi' do hiri pod walai dau. Om ondung podulon dokoyu iti, om a' indo poporikot do hukuman do mantad id Kinorohingan dot id tinan dokoyu i pitimungan dokoyu'd sumambayang. Om iri no tuhoton do suwai ko' iti, om simbaron ku indo do korikot oku'd hino.
Nipuhawang do Mantad id Rusod do Kinorohingan
1 Om iti po nipuhawang do Rusod do mantad id Kinorohingan o patarangon ku, tu' orohian oku do koilo kopio kou dit otopot, oi tobpinai-tobpinai ku. 2 Soroho' no dokoyu do nopo dit a' kou po nokotutun do Tuhan, om nabayayat tomod kou do tumanud di tingolig dit a' poimpasi. 3 Om mositi' nod koilo kou do tulun nopo di pitudukan do Rusod do Kinorohingan om a' i' milo do moro-boros dot, “Ousung po i Yesus!” ka. Om iyo nogiddi tu' a' i' o tulun milo do momoros dot, “I Yesus no o Tuhan!” ka, ondung a' i tulun diri pitudukan di Rusod do Kinorohingan. 4 Haro i' o piro-piro kowoyoon do nipuhawang do mantad id Rusod do Kinorohingan, nga' iso-iso' i' o Rusod do manahak ngai'ddi. 5 Om haro piro-piro o kowoyoon do karaja' di don Tuhan. Nga' iso-iso' i' o Tuhan di pogobi-obian! 6 Haro i' o piro-piro kowoyoon do toilaan do momonsoi'd karaja' di don Tuhan, nga' iri nopo manahak do toilaan dot id pointikid-tikid do tulun di momonsoi di karaja' do nakatahak dot id dau'ddi om iso-iso' i' o Kinorohingan. 7 Kointalang i' i karaja' di Rusod do Kinorohingan dot id pointikid-tikid do tulun do koinsanangan ngai' toko'. 8 Haro i' o tulun do puhawangan di Rusod do toilaan do mimboros do kikuasa' kopio. Om haro o puhawangan di Rusod diri do toilaan do popotuduk do pasal do Kinorohingan. 9 Om iri i' i Rusod diri o momuhawang do tulun do suwai do kotumbayaan dot id Kristus dit ogirot ko' i koubasanan; om tulun nod suwai om puhawangan di Rusod do kuasa' do momolingos do toruol. 10 Om haro o tulun do puhawangan do kuasa' do momonsoi'd koimayaan om iri no tulun do suwai om puhawangan do toilaan do poposunud di natantu' mantad do Kinorohingan do wonsoyon dau. Om tulun nod suwai om puhawangan di Rusod do toilaan do mongintutun di nipuhawang do mantad id Rusod do Kinorohingan om it okon ko' mantad id dau. Om haro o puhawangan do toilaan do mimboros do mogisuayan o bansa'd boros di koimayaan kopio, om haro o puhawangan do toilaan do poposuhut do komoyon di boros do bansa'd suwai'ddi. 11 Iri nopoddi om mantad ngai' i' dot iso' noo o Rusod; om mogisuayan o nipuhawang do patahakon dot id pointikid-tikid do tulun, do tumanud do korohian di Rusod diri.
Ogumu' o Pakakas Nga' Iso' noo o tinan
12 Kristus nopo om miagal do tinan do tulun; iso' noo o tinan, nga' ogumu' i' o pakakas. Om mulong piya dot ogumu' i pakakas diri, nga' iso-iso' i' o tinan. 13 Om iyati' nga' iyo iddi, dot iri tulun do Yohudi om it okon ko' Yohudi, om turipon tuu ko' iri po it okon ko' turipon; tu' nongobotisan ngai' toko' no dot id suang dit iso' noo o Rusod, om opogiiso' toko' i' dot id tinan do Kristus. Om noonuan ngai' toko' no di Rusod diri. 14 Tu' tinan piya nga' okon i' ko' iso' noo o pakakas, suwai ko' ogumu' i' o pakakas. 15 Ondung momoros i gakod dot, “Okon oku i' ko' longon, om a' oku i' kohompit di tinan,” ka, om okon i' ko' a' no kopio kohompit di tinan i gakod diri. 16 Om ondung moro-boros i tolingo dot, “Okon oku i' ko' mato, om a' oku i' kohompit di tinan,” ka, om okon i' ko' a' no kopio kohompit di tinan i tolingo'ddi. 17 Ondung osiliu ngai' do mato i tinan, om poingkuro daa'ndo i tinan do korongou? Om ondung osiliu ngai' i tinan do tolingo, om poingkuro no daa'ndo do kosingud i tinan? 18 Oilaan toko' i' do Kinorohingan o pinopoiyon do pointikid-tikid di pakakas do tinan dot id tinan. Om pinoiyon ngai' iri do hiri'd apatut do poiyanan diri do tumanud di korohian do Kinorohingan. 19 Ondung oinsanan iri dot osiliu'd iso' noo o pakakas om honggo po daa'ndo o roitan do tinan? 20 Iyo nopoddi, om atantu' no dot ogumu' i' o pakakas do tinan nga' iso- iso' indo i tinan. 21 Om a' no milo o mato do moro-boros dot id longon dot, “Mada' oku i' diya'!” ka, ko' moro-boros po i tulu dot id gakod dot, “Mada' oku i' diya'!” ka. 22 Nga' kiguna' toko' i' kopio di pakakas do tinan di sorohon piya daa dot oluhoi; 23 om iri nopo pakakas do tinan toko' di sorohon toko' daa dot a' agayo no guna', om iri nogi' i pusohon kopio toko'. Om iri pakakas do tinan dit a' olumis no o kokitanan, nga' iri nogi' kopio i podulon toko'. 24 Iri nopo pakakas do tinan toko' dit osonong mantad o kokitanan om a' toko' nogi' minog nod gompion. Om noulud nod Kinorohingan iti tinan toko' gisom dot iri nogi' i pakakas do tinan dit a' haro no o guna' o pusohon kopio toko'. 25 Om iyo noddi o ralan dot a' opogipori-pori i tinan; tu' mogipadul-padul i pakakas di tinan. 26 Ondung oinggorit o tiso' di pakakas do tinan, om oinggorit ngai' no i pakakas do suwai; ondung royohon o tiso' di pakakas do tinan, om otood ngai' no i pakakas do suwai di hiri'd tinan diri. 27 Iyokoyu ngai' no i tinan do Kristus, om pointikid-tikid dokoyu nga' pakakas ngai' no di tinan diri. 28 Om iyo nogiddi dot id suang piya'd sidang, tu' natantu' mantad nod Kinorohingan o kogoyo-goyoo' do karaja'd tulun do hiri'd sidang: koiso' nopo om i rasul, om koduwo no om i nabi, om kotolu no om i gomponuduk, om iri nogi' i momonsoi do kongoimayaan, om iri nogi' i noonuan do nipuhawang do momolingos do toruol, om i monulung do tulun do suwai, om i momoyo' do tulun, om i mimboros do mogisuayan o bansa'd boros di koimayaan. 29 Okon i' ko' koinsanai diyolo' do nosiliu'd rasul, ko' nabi, ko' gomponuduk. Om a' i' haro ngai' o kuasa' do momonsoi'd koimayaan, 30 ko' momolingos do toruol, ko' mimboros do mogisuayan o bansa'd boros di koimayaan, ko' poposuhut do boros di koimayaan diri. 31 Iyo nopoddi, om tumotos kou nogi' kopio do mokiaanu di nipuhawang dit agayo kopio o guna'. Nga' poingkaa o ralan dit osonong kopio.
Kosianan
1 Mulong piya do milo oku'd mimboros do mogisuayan o bansa'd boros do tulun om boros do moloikat, nga' ondung a' oku osianan, om iri nopo boros ku'ddi om kohiyo-hiyo no toomod, om aiso' i' o komoyon. 2 Mulong piya dot oilo oku do popolombus di habar do mantad id Kinorohingan, om kosuhut ngai' oku dit angaralom, om kongoilo ngai' oku do nunu nopo, om otumbayaan kopio oku'd Kinorohingan, gisom do milo oku do popoundaliu do nuluhon, nga' ondung a' oku osianan, om aiso' i' o guna-guna' ku! 3 Mulong piya dot insanan ku nopod popuhawang dot id tulun do mosikin o nunu nopo i haro dot id doho', om patahakon ku o tinan ku do maan sorobo', nga' ondung a' oku osianan, om aiso' ngai' i' o guna-guna'ddi. 4 Tulun nopo dit osianan om alanut i' o ginawo om osonong koulun. A' i' iyau mosol, om a' mingudut, om a' minggayo-gayo. 5 A' i' iyau mokirayou-rayou, om a' ohurolo, om a' mononsog do tulun do suwai do tumanud do dau'd korohian, om a' obingkaus om a' obinsuli'. 6 Tulun nopo dit osianan om a' i' orohian dit araat, tu' korohian nopo dau om iri no it osonong. 7 Alanut i' o ginawo dau do tumimbaba' do nunu nopo, om monongkuyaan iyau; om amu' tumingkod do mogondos, om alanut o ginawo. 8 Kosianan nopo om aiso' i' o kopupuson. Dinondo nopodti om haro i' o tulun dit oilo do popolombus di habar do mantad id Kinorohingan, nga' tumingkod indo iyau do popolombus di habar diri. Dinondo nopodti om haro i' ot oilo do mimboros do mogisuayan o bansa'd boros di koimayaan, nga' koimbagu nopondo om kotingkod i' iyau do mimboros do boros diri. Dinondo nopodti om haro i' o tulun dit ogumu' o toilaan, nga' koimbagu nopondo om olihuan indo i noilaan diyolo'ddi. 9 Tu' iri nopo toilaan toko' om i komiloo' toko' do popinsusui di habar do mantad id Kinorohingan, om haro kasai' po o bohiton, tu' a' toko' po oilaan ngai'. 10 Nga' orikot indo o maso do koimbagu do patahakon ngai' do Kinorohingan iri, gisom dot aiso' nondo o bohiton, tu' oilaan ngai' toko' no, om oidu' nondo i haro o bohiton. 11 Tontok nopo di tanak oku po, om don tangaanak no do koboro-boroso' ku, om don tangaanak do pomurimon-rimon ku, om don tangaanak do kowoyo-woyoo' ku do momusorou. Dinondo nopoddi tu' agayo oku, om notingkadan ku no i kowoyo-woyoo' ku di don tangaanak. 12 Iti nopo tokito toko' do dinondo'dti om iyo no do sangai-sangai dit a' i' okito no kopio dot id pogotulan. Nga' koimbagu nopondo om kotimbaba' toko' nopo kopio om atalang indo o tokito toko'. A' ku po oilaan ngai' do dinondo poo, nga' koimbagu nopondo om ongoilaan ngai' ku indo do miagal do Kinorohingan tu' koilo do koinsanai'd kowoyo-woyoon ku. 13 Nga' daamot nopodti om haro o tolu o kowoyoon dit apatut do wonsoyon kasai' toko': otumbayaan, mogondos om mogiinsian-sian. Nga' iri nopo it agayo kopio dot id pogialatan di tolu'ddi, om it osianan do tulun do suwai.
Piro-Piro Kawagu o Ponudukan do Pasal di Nipuhawang do Mantad id Rusod do Kinorohingan
1 Tumotos kou no kopio dot osianan do tulun do suwai. Om tumotos kou no do mokiaanu di piro-piro o nipuhawang do patahakon di Rusod do Kinorohingan, om okon-okon po om i komiloo' do popolombus di natantu' mantad do Kinorohingan do wonsoyon dau dot id tulun. 2 Iri nopo tulun di mimboros do boros di koimayaan, om a' i' moro-boros dot id tulun, suwai ko' moro-boros dot id Kinorohingan. Aiso' i' o tulun do kosuhut di poboroson dau, tu' iri i' i Rusod do Kinorohingan o mominsuhu' dau do popimboros do boros di Kinorohingan noo o kosuhut. 3 Nga' iri nopo tulun di popolombus di habar do mantad id Kinorohingan, om tulun i' o polombusan do maan do popogirot diyolo', om pongodsuur do ginawo om ponginsasamod diyolo'. 4 Iri nopo tulun di mimboros do boros di koimayaan om popogirot no do dau'd ginawo, nga' iri nopo tulun di popolombus do habar do mantad id Kinorohingan om mongodsuur i' di sidang do gumirot dot id kotumbayaan diyolo'. 5 Osonong nogi' kopio do milo ngai' kou do mimboros do mogisuayan o bansa'd boros di koimayaan. Nga' iri nopo it osonong kopio om milo kou do popinsusui di natantu' mantad do Kinorohingan do wonsoyon dau. Tu' iri nopo tulun di popolombus do habar do mantad id Kinorohingan om agayo i' ko' mantad di tulun di mimboros do mogisuayan o bansa'd boros di koimayaan; nga' suwai indo ondung milo i tulun di mimboros do mogisuayan o bansa'd boros do koimayaan diri do poposuhut di pinoboros dau, tu' otulung i' o koinsanai di sidang. 6 Ondung rumikot oku dot id dokoyu om mimboros oku nondo do mogisuayan o bansa'd boros di koimayaan, om nunu no tuu o guna'ddi dot id dokoyu? Aiso' i' kopio o guna'ddi dot ongokooro' piya! Nga' suwai indo, ondung popolombus oku dot id dokoyu di pinointalang do Kinorohingan, ko' popotuduk oku do pasal do Kinorohingan, ko' popolombus oku do habar do mantad id Kinorohingan ko' monuduk oku. 7 Om iri piya tuunion dit aiso' o ginawo, do miagal di suling om kecapi, dot a' popunongon o popouni, nga' poingkuro daa dot oilaan do tulun o lagu' di pounion? 8 Haro po kawagu o poiyaan: Ondung a' popunongon o popouni do torumpit, om isai daa o sumodia' do mongoi sangod? 9 Om iyo nogiddi o komiloo' nu do mimboros do mogisuayan o bansa'd boros di koimayaan. Ondung oilo ko do mimboros do boros dit a' osuhutan, om iso' pod tulun nga' aiso' i' o kosuhut di poboroson nu. Om miagal nori do moro-boros ko dot aiso' o tulun do barasan. 10 Hiti nopod pomogunan om a' i' okuri-kuri' o bansa'd boros, nga' aiso' i' o tiso' di boros diri dot aiso' o komoyon. 11 Nga' ondung a' oku kosuhut di boros di poboroson dot iso' o tulun, om iri nopo tulun di mimboros diri om iyo nod sompogunan dot id doho'; om iyoho' nga' iyo nogiddi dot id dau. 12 Om iyokoyu nga' oilaan ku i' dot orohian kopio kou do kaanu do piro-piro o nipuhawang do mantad id Rusod do Kinorohingan. Nga' agayo nopo kopio om mositi' no do tumotos kopio kou do mamakai di nipuhawang di kotulung do sidang do gumirot dot id kotumbayaan. 13 Om iri no o kokuwaan do tulun nopo di mimboros do boros di koimayaan, om mositi' no do mokianu kopio'd Kinorohingan do toilaan do poposuhut di pinoboros dau'ddi. 14 Tu' ondung sumambayang oku dot id suang do boros di koimayaan, om sumambayang i' kopio o rusod ku, nga' a' i' kotonggoi o pomusarahan ku do sumambayang. 15 Om nunu po daa'ndo o wonsoyon ku? Poingkaa o wonsoyon ku: Sumambayang oku dot id suang do rusod ku om sumambayang oku dot id suang do pomusarahan ku. Modsinding oku dot id suang do rusod ku, om modsinding oku dot id suang do pomusarahan ku. 16 Tu' ondung mongunsikou ko'd Kinorohingan dot id suang nod rusod nu, om haro nondo o tulun do suwai dit a' kosuhut di boros do koimayaan do mantad id Rusod do Kinorohingan, om a' i' i tulun diri milo do momoros dot, “Kosokodung oku,” ka, dot id sambayang nu do mongunsikou'ddi; tu' a' i' iyau kosuhut di pinoboros nu. 17 Om mulong piya daa dot osonong tomod i sambayang nu do mongunsikou'd Tuhan, nga' aiso' i' o komoyon di sambayang nu'ddi dot id tulun do suwai. 18 Mongunsikou oku nod Kinorohingan tu' milo oku do mimboros do mogisuayan o bansa'd boros di koimayaan, dot ogumu' po ko' i dokoyu'd noilaan. 19 Nga' id suang nopod pitimungan do sumambayang dot id Tuhan, om orohian oku nogi' do popoboros dot ongolimo nopo o boros dot osuhutan pod tulun ko' mantad do popimboros do rinibuan o boros dot id suang di boros di koimayaan. Orohian oku nogi' kopio dot iyo'ddi om milo oku i' do monuduk do tulun. 20 Oi tobpinai-tobpinai! Kada' dokoyu paanak-anako' o pomusorou dokoyu. Ookuro do tangaanak kou dit ongokoro' po dot id wowonsoyon dit araat, nga' pomolohingon no kopio dokoyu o kowoyo-woyoo' dokoyu'd momusorou. 21 Tu' nokotulis no dot id suang do Buuk do Kinorohingan o poingkaa, “Boros kad Tuhan, ‘Moro-boros oku nondo dot id bansa' diti, dot i tulun di moro-boros dot id suang do boros dit a' osuhutan o popolombus. Iri nondo tulun do bansa'd suwai o popolombus do boros ku dot id tulun di songonuon ku; nga' iyo piya'ddi, nga' a' i' iyolo' mokinongou do boros ku,’ ka dau,” ka. 22 Om kaa pogi' dot iri nopo nipuhawang do mimboros do boros do koimayaan di mogisuayan o bansa', om pogintutunan no dot id tulun dit a' po notumbayaan, om okon i' ko' pogintutunan dot id tulun di notumbayaan. Om iri no nipuhawang do poposunud di natantu' mantad do Kinorohingan do wonsoyon dau dot id tulun, om pogintutunan dot id tulun di notumbayaan no, om okon i' ko' pogintutunan di tulun dit a' notumbayaan. 23 Iyo nopoddi, om ondung oinsanan nopo i tulun dot id pitimungan do sidang do mimboros do boros di koimayaan, om rumikot nondo o piro-piro o tulun do suwai dit a' oubas do tumimung ko' i tulun dit okon ko' Kristian, om atantu' no do pokoulahon kou diyolo'! 24 Nga' ondung oinsanan kou nopo do popolombus do habar do mantad id Kinorohingan, om rumikot nondo o songulun dit okon ko' Kristian ko' tulun do suwai dit a' oubas do tumimung, om iri nopondo boros di polombuson ngai' dokoyu'ddi om popointalang nondo do dusa di tulun diri om popopuriman dau do koinsanai di dusa dau. 25 Kointalang ngai' nopondo i poillisok dot id suang do ginawo dau, gisom do minsiriba' o ginawo dau om tumuku' nondo iyau dot id Kinorohingan. Om mangakun nondo iyau do hiri kopio'd pogialatan dokoyu o Kinorohingan.
Kowoyo-woyoo' dot Osonong do Tontok do Sumambayang i Sidang
26 Om nunu'ddi o komoyon ngai'ddi? Ondung tumimung kou do sumambayang dot id Tuhan, om haro nondo o modsinding, om haro o monuduk, om haro o popolombus di pinointalang do Kinorohingan, om haro o mimboros do boros di koimayaan, om haro o poposuhut do komoyon di pinoboros diri. Nga' mositi' no do wonsoyon ngai' iri do maan do ponuduk om koinsanangan do koinsanai'd tulun. 27 Ondung haro ot orohian do mimboros do boros di koimayaan, om mositi' no do duwo noo ko' tolu o tulun do mogisowoli-woli do mimboros. Om mositi' nod haro o tulun do poposuhut di pinoboros di tulun di minimboros diri. 28 Ondung aiso' o milo do poposuhut, om osonong nogi' dot a' nopo mimboros i tulun di mimboros do boros di koimayaan dot id suang di pitimungan. Om moro-boros nopo iyau dot id Kinorohingan dot id suang do ginawo dau. 29 Ongoduwo nopo ko' tolu o tulun do popolombus do boros do Kinorohingan, om iri nondo suwai om monimbang di boros di pinolombus diri. 30 Nga' ondung haro o habar do mantad id Kinorohingan do rumikot dot id iso' kawagu o tulun di poirikau dot id pitimungan diri, om mositi' no do tumingkod i tulun di maso do moro-boros. 31 Om iyo noddi o kowoyo-woyoo' dokoyu ngai', do mogisowoli-woli do popolombus do habar do mantad id Kinorohingan; om ongotudukan ngai' i' o tulun om kogirot dot id suang do kotumbayaan. 32 Iri nopo nipuhawang do mantad id Rusod di popolombus do habar do mantad id Kinorohingan om milo i' di tulun di popolombus di boros diri do pususon. 33 Kinorohingan nopo om Kinorohingan i' dit orohian do haro o kouludan; om okon i' iyau ko' Kinorohingan dit orohian dot agangau. Om poingkuro nopo it osiliu dot id koinsanai'd sidang do Kinorohingan, 34 om a' no kopio koino-ino do mimboros o tongoondu' dot id suang do pitimungan. Iyolo' nopo om a' i' pabanaron do mimboros. Om a' iyolo' koino-ino do sumiliu'd boyoon; tu' iyo noddi o kopiontok di ponudukan di Tourat. 35 Ondung haro o pokiilaan diyolo', om uhoton nopo diyolo' iri dot id sawo diyolo' om hiri iyolo'd duwalai. Kointingayam i' kopio o tongoondu' do mimboros dot id suang do pitimungan do sidang. 36 Iyokoyu toi o tadon di boros do Kinorohingan? Ko' iyokoyu no tuu o pinolombusan di boros diri? 37 Ondung haro o tulun di kopuriman do noonuan iyau do nipuhawang do popolombus do boros di mantad id Kinorohingan ko' noonuan iyau do nipuhawang do suwai do mantad id Rusod do Kinorohingan, om mositi' no do kopuriman o tulun diri dot iti nopo tulison ku om ponuhuan i' kopio'd Tuhan. 38 Nga' ondung haro o tulun dit a' rumamit diti, om kada' no dokoyu iyau pokinongoho'. 39 Iyo nopoddi, oi tobpinai-tobpinai, om tumotos kou no do popolombus do habar di mantad id Kinorohingan, nga' kada' indo dokoyu oduhai i tulun dit orohian do mimboros do mogisuayan o boros di koimayaan. 40 Nga' mositi' no dot osonong om oulud o kowoyo-woyoo' do momonsoi do koinsanai'ddi.
Napasi Kawagu o Kristus do Mantad id Kapatayon
1 Om dinondo nodti, oi tobpinai-tobpinai ku, om orohian oku do sorohon kawagu dokoyu i Habar dot Osonong do mantad id Kinorohingan di pinosusui ku dokoyu di gulu po. Om rinamit i' dokoyu iri, om notumbayaan kou di Kristus tu' nokorongou kou no di Habar dot Osonong. 2 Ondung tumanud kasai' kou di pinosusui ku'ddi, om kapasi no dokoyu i Habar dot Osonong diri; ondung a' kou no minonongkuyaan no toomod, om aiso' iddi o nosuhut-suhutan. 3 Iri nopo i pinosusui ku dokoyu'ddi om iri no i doho' do naanu. Iri nopo it agayo kopio, do miagal di nokotulis dot id suang do Buuk do Kinorohingan, om pinosusui ku i' dot id dokoyu, do minatai i Kristus do minongidu' di dusa toko' o kinapatayan; 4 om nolobong iyau, nga' napasi iddi kawagu di kotolu'd tadau. Om iri nga' nokotulis nogi' dot id suang do Buuk do Kinorohingan. 5 Om pinosunud ku nogi' dokoyu dot i Kristus nopo, i napasi kawagu'ddi, om minintalang i' dot id di Pitrus, om intalang nogiddi kawagu dot id hopod om duwo o tulun do suwai di sinuhu'ddi. 6 Om intalang nogiddi iyau dot id tumatanud dau dit ogumu' i' ko' limo nahatus o tulun, dot insan-insan o maso. Om kogumuan po di tulun diri do poimpasi do dinondo; okuri' po diyolo' o napatai. 7 Om intalang po kawagu i Kristus dot id di Yakub om intalang nogiddi iyau dot id koinsanai di rasul. 8 Id tohuri noddi kopio, om minintalang iyau dot id doho' --- iyoho' i miagal-agal do tanak di nosusu dot okon ko' i maso do kosusuan do nosusu! 9 Iyoho' no o rasul do Tuhan dit osiriba' no kopio o ngaran. Om a' oku no daa apatut do roitan do rasul, tu' nokoponginggorit oku i' di sidang do Kinorohingan. 10 Nga' nokoiyo oku i' diidti do baino', tu' nosianan i' o Kinorohingan doho'. Om haro i' kopio o kinountungan do Kinorohingan do minangampun doho'. Om iyoho' nogiddi o poimaha' o pangangaraja' ko' mantad do koinsanai di rasul. Nga' otopot nopo kopio om okon i' ko' mantad id kokorisan ku'ri, suwai ko' iri nopo om karaja' i' do Kinorohingan, i nosianan doho', om i monguhup doho' do kumaraja'. 11 Om kaa pogiddi, dot isai nopo o karangahan dokoyu di Habar dot Osonong diri --- dot iyoho' tuu ko' i tulun do suwai di sinuhu' --- nga' a' i' monguro. Iri nopo it agayo kopio om i poposusui iyahai di Habar dot Osonong diri, om monongkuyaan kou iyokoyu'ddi.
Posion Kawagu o Tulun do Mantad id Kapatayon
12 Ondung popinsusuyon dahai do napasi kawagu i Kristus do mantad id kapatayon, om nokuro tu' haro ot id pogialatan dokoyu do momoros dot a' posion kawagu i tulun do napatai? 13 Om ondung otopot daa dot a' posion kawagu i tulun di napatai, om komoyon nopoddi nga' Kristus piya nga' a' i' pinasi kawagu do mantad id kapatayon. 14 Om ondung a' daa o Kristus pinasi kawagu do mantad id kapatayon, om aiso' no o guna' dahai do popinsusui do nunu-nunu, om aiso' o guna' dokoyu do monongkuyaan, tu' aiso' i' o nunu-nunu do poimpahan di kotumbayaan dokoyu. 15 Om suwai no ko' iri, om kointalang no do mongudut iyahai do pasal do Kinorohingan, tu' popinsusuyon dahai do pinasi kawagu'd Kinorohingan o Kristus do mantad id kapatayon, om a' i' iyau'd Kinorohingan pinasi kawagu dot ondung otopot no daa kopio dot a' posion kawagu i tulun di napatai! 16 Tu' ondung a' posion kawagu i tulun do napatai, om Kristus nga' a' no pinasi kawagu do mantad id kapatayon. 17 Om ondung a' o Kristus pinasi kawagu, om iyo nod nipi toomod i kotumbayaan dokoyu'ddi; om komoyon nopoddi nga' id suang kasai' kou pod kowoyo-woyoon di kidusa, om aiso' o soro-sorohon dokoyu. 18 Om komoyon nopoddi nga' aiso' no o soro-sorohon di tulun do Kristian di nangapatai. 19 Om ondung daamot toko' no do poimpasi do hiti'd pomogunan do haro o soro-sorohon toko' dit id suang do Kristus, om iyati' no o nokoimamang kopio dot id pogialatan do koinsanai'd tulun do hiti'd pomogunan. 20 Nga' nokointalang no kopio do napasi kawagu i Kristus do mantad id kapatayon. Om iti no o kotontuan kopio do posion kawagu i tulun do napatai. 21 Tu' iso' no o tulun do tadon do kapatayon do suminuang do hiti'd pomogunan, om iyo nogiddi tu' iso' no o tulun do tadon do kopomosian kawagu do tulun do mantad id kapatayon. 22 Om poingkuro nopo do nokotonggoi ngai' di Adam o tulun do minatai tu' nokoiso' no iyolo' dau, om iyo nogindoddi tu' kotonggoi ngai' no di Kristus do posion o koinsanai'd tulun di nokoiso' dot id dau. 23 Nga' oulud indo o maso do koposian do pointikid-tikid do tulun: id gulu nopo kopio om i Kristus; om orikot pondo i maso do korikatan kawagu dau, om posion nogindo i tulun di nokohompit do tulun di songonuon do Kristus. 24 Om orikot nogindo o kopupuson diti pomogunan. Om tontok nopondoddi, om alaon ngai' nondo di Kristus o koinsanai'd pomorintaan, om koinsanai'd kuasa' om koinsanai dit ongokoris; om patahakon nondo dau i Pomorintaan dau dot id Kinorohingan, i Tapa' toko'. 25 Om mositi' no dot i Kristus kasai' o momorinta' do gisom dot paalaan ngai' do Kinorohingan di Kristus o koinsanai di pisangod di Kristus. 26 Om iri nopo pisangod di kolimpupuson no kopio dot alaon om kapatayon. 27 Nokotulis no dot id suang do Buuk do Kinorohingan o poingkaa, “Nokoinsiriba' ngai' nod Kinorohingan o koinsanai'd nunu nopo dot id dau,” ka. Om atarang i' do komoyon nopo do “koinsanai'd nunu nopo”, om a' i' kohompit o Kinorohingan, i pinopoinsiriba' do koinsanai'd nunu nopo dot id Kristus. 28 Nga' koinsiriba' ngai' pondo o koinsanai'd nunu nopo dot id pomorintaan do Kristus, om iyau nondo, i Tanak do Kinorohingan, nga' minsiriba' i' dot id Kinorohingan, i pinopoinsiriba' do koinsanai'ddi dot id dau. Om Kinorohingan nondo o momorinta' do koinsanai'ddi. 29 Ondung a' posion kawagu o tulun di napatai, om nokuro'ddi tu' haro o tulun do botisan do bagi' di tulun di napatai? Nunu'ddi o kapamansayan diyolo' do miagal diri? Ondung otopot daa kopio dot a' kopio posion kawagu i tulun do napatai, om nunu poddi o kapamansayan diyolo' do miagal diri? 30 Om nunu'ddi o kotimbabaan dahai do koligagaanan do pointikid do saat? 31 Oi tobpinai-tobpinai! Alanut i' o ginawo ku dot oinggorit oku piya do pointikid-tikid do tadau, om oondos oku i' dokoyu tu' notumbayaan ngai' kou no di Kristus Yesus, i Tuhan toko'. 32 Ondung don tulun noddi, om nunu'ddi o taanu-anu ku do tumotos tomod dot iyo pod monokisaap do nintorusan dit ongorongit do hiti'd bandar diti, i bandar dot Iposus? Ondung a' daa kopio posion kawagu i tulun do napatai, om osonong nogi' do tonudon toko' iti boros do poingkaa, “Kainou mangakan-ngakan om monginum-nginum om sumimbayan, tu' matai toko' nod suab,” ka. 33 Kada' kopio kou kaakalai! Tu' iri no monokiambalut dit angaraat o karaag do kowoyo-woyoon dit osonong. 34 Purimono' no kopio dokoyu o kowoyo-woyoo' dokoyu do dinondo, om kada' kou nondo pomonsoi'd dusa. Apatut nogi' kopio dot ointingayaman kou tu' haro po ot a' nokotutun do Kinorohingan dot id pogialatan dokoyu.
Tinan do Tulun dit Apasi Kawagu do Mantad id Kapatayon
35 Haro doti' o muhot do poingkaa, “Poingkuro ma o tulun do napatai do posion kawagu? Okuro-kuro ma o tinan do patahakon dot id diyolo' do posion kawagu iyolo'?” ka. 36 Basug no kopio! Ondung patanom kou do linsou do hilo'd tana', om a' i' i linsou sumuni dot a' po apatai. 37 Om iri nopo linsou do tonomon dokoyu'ddi --- do linsou tuu do gandum ko' linsou do totonomon do suwai --- om iri no i linsou, om okon i' ko' i totonomon di nopongo no o sunion. 38 Om Kinorohingan indo o manahak di linsou'ddi do kowoyo-woyoo' do tumanud dit osonong dot osorou dau. Om pogisuwai-suwayon do Kinorohingan o kowoyo-woyoo' do pointikid-tikid di linsou. 39 Koinan-inano' nopo dit ongkiginawo do dinondo om a' i' oiyo. Tulun nopo om iso' no o kowoyoon do tinan, om ilo nintorusan nga' suwai no o koinan-inano'; om tombolog no om suwai no o koinan-inano', om i sada' nga' suwai no o koinan-inano'. 40 Om iyo nogiddi i hilo'd tawan om i hiti'd pomogunan. Ilo' nopo hilo'd tawan om suwai no o kolumiso', om i hiti'd pomogunan nga' suwai-suwai no. 41 Ilo' nopo kolumiso' do tadau om suwai no ko' i kolumiso' do tulan. Om ilo rombituon nga' suwai no o kolumiso'. Om ilo' piya rombituon nga' mogisuwai-suwai i' o kolumiso'. 42 Om iyo nogiddi i tulun di posion kawagu. Iri nopo tinan di lobongon om iri i tinan di mumang pasa'; nga' iri nopondo tinan di posion kawagu, om tinan no dit a' mumang pasa'. 43 Tontok nopo di lobongon i' i tinan, om masa' no om araa-raat o kokitanan, nga' posion nopondo kawagu om osonong indo o kokitanan di tinan om okoris. 44 Di nopo di lobongon i' i tinan, om tinan i' do mantad id pomogunan i tinan diri; nga' apasi nopondo kawagu, om iri nopondo tinan om tinan i' di patahakon di Rusod do Kinorohingan. Haro i' o tinan do mantad id pomogunan om haro o tinan do mantad id Kinorohingan. 45 Haro i' o nokotulis dot id suang do Buuk do Kinorohingan do poingkaa, “Iri nopo tulun di koiso' i', i Adam, om suminiliu do tulun di poimpasi,” ka, nga' i Adam nopondo, it id tohuri om Rusod i' di manahak do koposion. 46 Iri nopo minogulu do ruminikot om i don tinan, om okon i' ko' i don rusod. Iri nopo don rusod om suminusuhut no do ruminikot. 47 I Adam nopo di koiso' om tana' i' do winonsoi, nga' i Adam no di koduwo om mantad hilo'd surga. 48 Iti nopo tulun do hiti'd pomogunan diti om miagal di Adam di koiso', i tana' do winonsoi, nga' iri nopo tulun do surga om iyo i' dau, i mantad hilo'd surga. 49 Om poingkuro toko' nopo dot iyo di Adam, do dinondo poo, om i tana' do winonsoi, om iyo toko' noddi dot osiliu do miagal dau i mantad hilo'd surga do koimbagu. 50 Komoyon ku nopo, oi tobpinai-tobpinai, om iri nopo tinan di raha' om tonsi do winonsoi om a' i' milo do sumuang di Pomorintaan do Kinorohingan; om iri tinan di matai nga' a' i' milo do sumiliu do tinan dit a' matai. 51 Pokinongou kou no dit a' mantad daa pinoilaan do tulun: Okon i' ko' oinsanan toko' dot apatai nga' oinsanan toko' indo dot osimbayan. 52 Om osiliu nondo o miagal diri dot oruhai kopio, dot okirapan noo, do tontok di pounion i torumpit di kolimpupuson no kopio. Tu' orongou nopondo i torumpit diri, om posion nondo kawagu i tulun do napatai dot onuan do tinan dit a' matai, om simbanan ngai' toko' nondo. 53 Om sowolian nondo iti tinan toko' diti matai do tinan dit a' matai, om sowolian di tinan do mantad hilo'd surga iti tinan diti mantad hiti'd pomogunan. 54 Ondung osowolian di tinan dit a' matai i tinan di matai, om osowolian di tinan do mantad hilo'd surga i tinan di mantad hiti'd pomogunan, om tontok nondoddi dot osiliu i nokotulis dot id suang do Buuk do Kinorohingan, do poingkaa, “Natanus no o kapatayon; om naanu no o kamanangan!” ka. 55 “Oi kapatayon, honggo noddi i kamanangan nu? Oi kapatayon, honggo noddi i kuasa' nu do pokoruol?” ka. 56 Kuasa' nopod kapatayon do pokoruol om mantad i' id dusa, om dusa no om tadon nopod kuasa' nga' mantad di Tourat. 57 Nga' pounsikou nod Kinorohingan; tu' noonuan toko' no dau do kamanangan dot i Yesus Kristus i Tuhan toko' o minanahak. 58 Iyo nopoddi, oi tobpinai-tobpinai di kongosianan ku, om kumoris kou no om gumirot kou no. Kada' kou tingkod do momonsoi di karaja' do don Tuhan do mikuwo'd iso-iso' kopio o ginawo, tu' oilaan i' dokoyu do koinsanai di wonsoyon dokoyu di don Tuhan om okon i' ko' maan toomod.
Ponulung di Sompi' ko' Tulun do Kristian
1 Om iri no tusin di maan dokoyu patahako' do ponulung di sompi' ko' tulun do Kristian, om potudukon ku nopo do wonsoyon dokoyu om miagal di nokotuduk ku di sidang do hilo'd Galatia. 2 Pointikid-tikid do tadau do koiso' do pointikid do minggu', om mositi' no do potobilang kou'd tusin, do miontok di kogumuon do tusin dot aanu dokoyu. Om poopion nopo i tusin diri do gisom do korikot oku, om a' indo minog do monimung do tontok diri. 3 Om korikot oku pondo, om suhuon ku nogindo i tulun di nongookunan dokoyu do mongoi'd hilo'. Om onuan ku indo iyolo' do surat do kopoilaan, om oigitan i' diyolo' i tusin do mongoi'd hilo'd Yorusalim. 4 Om ondung osonong do mongoi oku iyoho' woyo' diyolo', om tumanud oku indo diyolo'.
I Nosorou di Paulus do Wonsoyon Dau
5 Mongoi oku indo ompuya' dokoyu do kawaya' oku'd hilo'd Makidunia, tu' osorou ku do maya' oku'd hilo'. 6 Oruhai oku doti' do poinsugku' dokoyu; solinaid no doti' do maso'd osogit. Om milo kou nogindo do monulung doho' do mamanau do lumombus dot id kinoiyonon do suwai di ngoyon ku. 7 Okon i' ko' mongoi no tomod umbaya' o kaangayan ku'd hino'd dokoyu. Suwai ko' ondung korohian do Tuhan, om orohian oku i' dot alaid-laid oku do poinsugku' dokoyu. 8 Nga' daamot nopodti om mundorong oku nopo do hiti'd bandar dot Iposus, do gisom dot orikot o tadau'd Pintakosta. 9 Ogumu' i' kopio o maso do momonsoi'd karaja' di kiguna' do hiti, do mulong piya do haro o tulun di sumaap. 10 Korikot nopondo i Timotius om romiton no iyau kosonong-sonong om osonong i' o kopurimanan dau dot id pogialatan dokoyu, tu' iyau nga' iyo i' doho' do momonsoi'd karaja' di don Tuhan. 11 Kada' nogi' do haro o tulun do poinsiriba-riba' dau. Tulungon no dokoyu iyau di mamanau kawagu iyau do gumuli' dot id doho', om osonong-sonong i' iyau, tu' poingandad oku i' om i piro-piro o tobpinai'd suwai do korikatan dau. 12 I Apolos no, i tobpinai toko', om asaru' oku no do monuhu' dau om i piro-piro o tobpinai'd suwai do mongoi ompuya' dokoyu. Nga' a' po atantu' no o ginawo dau ondung apatut iyau do mongoi'd dinondo poo. Nga' ondung oiwangan o ralan dau do koimbagu, om atantu' no do mongoi i' iyau.
Pongolimpupus do Surat
13 Antaan-taan no dokoyu om gumirot kou no dot id suang do koposi-posion dokoyu di dong Kristian. Kumosiou kou no om kumoris kou no. 14 Wonsoyon no dokoyu do mikuwo'd kosianan o koinsanai di wonsoyon dokoyu. 15 Atantu' no do kotutun kou i' di Stipanus om i sompiiyon dau; om iyolo' no it id gulu kopio kosiliu do Kristian do hilo'd Akaya. Om iso-iso' tomod o ginawo diyolo' do mogobi-obi' di dong Kinorohingan do tulun. 16 Om mongodsuur oku no kopio dokoyu do moyo' do ponudukan do tulun do miagal diri, om i tulun do suwai di muhup diyolo' om i sumokodung diyolo' do kumaraja'. 17 Asanangan tomod oku do norikatan di Stipanus, om i Portunatus, om i Akaikus. Iyolo' no o miagal dokoyu dot id doho'. 18 Iyolo' no o pinopotood do ginawo ku, do miagal di pinopotood iyolo' dokoyu. Apatut no kopio do pusohon o tulun do miagal diyolo'. 19 Iti piro-piro o sidang do hiti'd Asia nga' poporikot nogi' do tabi' diyolo' dot id dokoyu. Om i Akuila om i Priskila om i sidang do tumimung do hiri'd walai diyolo' nga' poporikot i' do tabi' diyolo' di dong Kristian dit ogirot kopio dot id dokoyu. 20 Oinsanan nopo i tobpinai'd hiti do poporikot do tabi' dot id dokoyu. Mogisuwau-suwau kou no do miagal do tulun do Kristian di mogiobpinai. 21 Om poruhangon ku po iti tabi' do tulison ku do tunturu' kopio ku o popotulis: Tabi' do mantad id doho', i Paulus. 22 Iri nopo tulun dit a' osianan do Tuhan, om pologoson nopo dot ousung! Maranata --- Oi Tuhan dahai, rikot no! 23 Pokionuon ku o Tuhan Yesus do mamarakat dokoyu. 24 Kosianan ku iyoho' nga' moyo-woyo' ngai' i' dokoyu, i poingiso' dot id Kristus Yesus.
1 Oi tobpinai-tobpinai, i sidang do Kinorohingan do hiti'd Korintus om koinsanai'd tulun di songonuon do Kinorohingan do pointongkop do watas dot Akaya. Iyoho' no i Paulus i sinuhu' di Kristus Yesus, iyoho' i pinili' do tumanud do korohian do Kinorohingan, om i Timotius i tobpinai toko', 2 o mogondos do Kinorohingan, i Tapa' toko', om Tuhan Yesus Kristus do manahak dokoyu do barakat om kosimbayanan do ginawo.
Mongunsikou i Paulus dot id Kinorohingan
3 Royohon no o Kinorohingan, i Tapa' do Tuhan toko' i Yesus Kristus. Iyau no o Tapa' dit osonong kopio, om iyau o Kinorohingan di manahak do tulun do ginawo dit ogirot. 4 Popogirot kasai' i' iyau do ginawo dahai do pointikid-tikid dot oontok iyahai do kosusaan, om iri no i kokorisan dit aanu dahai do mantad id Kinorohingan diri o komilo-milo dahai do popogirot do ginawo do koinsanai'd tulun dit id suang do kosusaan. 5 Om iri nogi' i koinggoritan di nongoumbalan do Kristus nga' asaru' no dahai dot ongoumbalan. Om kogirot o ginawo dahai, do Kristus o popogirot. 6 Om ondung oontok iyahai do kosusaan om iri nopoddi om popogirot no do ginawo dokoyu om mamasi dokoyu. Tu' ondung ogirot o dahai'd ginawo, om iyokoyu nogi' nga' kotonggoi no dot ogirot, om alanut indo o ginawo dokoyu dot id suang kou piya do kosusaan do miagal di kosusaan di noumbalan dahai. 7 Otumbayaan kasai' i' iyahai om a' koumbal do mikoduwo o ginawo dahai do kosorou do pasal dokoyu, oi tobpinai-tobpinai, tu' oilaan i' dahai do nokotonggoi kou dahai do noinggorit, om iri no o kokuwaan do kotonggoi kou nogindo dahai dot ogirot o ginawo. 8 Oi tobpinai-tobpinai! Orohian iyahai do koilo kou di kosusaan di nongoumbalan dahai di hilo' iyahai id watas dot Asia. Om a' no ogina-gina' o kawagato' di koinggoritan diri, gisom dot a' no dahai osorou dot apasi po iyahai; 9 dot iyo nopoddi norotuan nod hukuman do kapatayon o kopurimanan dahai. Nga' nosiliu pogi' o miagal diri nga' poposorou dahai dot a' sumondiu di dahai'd kokorisan suwai ko' sumondiu do Kinorohingan, i mamasi kawagu do tulun do napatai. 10 Om iyau no o pinopoidu' dahai do mantad id koligagaanan do kapatayon do miagal diri kagayo. Om iyau nogindo o mamasi dahai do koimbagu, tu' iyau no o pagandasan dahai. 11 Om otumbayaan iyahai do poiduwon pondo kasai' iyahai do Kinorohingan do mantad id koligagaanan, tu' sumambayang kou i' do bagi' dahai, om orohian i' o Kinorohingan do mamarakat dahai, tu' sumimbar iyau di sambayang dit ogumu' no do bagi' dahai om ogumu' nondo o tulun do mongunsikou do Kinorohingan.
Sinimbanan di Paulus i Nosorou Mantad Dau do Wonsoyon Dau
12 Oondos no kopio iyahai, tu' pogiroton i' iyahai di kopurimanan do ginawo dahai do koposi-posion nopo dahai do hiti'd pomogunan diti --- dot okon-okon pondo i kopiisaan dahai dot id dokoyu --- nga' nowonsoi no dahai do mikuwo'd otulid o ginawo, om iso-iso' kopio o ginawo. Om winonsoi dahai iri nga' okon i' ko' mantad id toilaan do tulun, suwai ko' mantad id toilaan di pinatahak do Kinorohingan dot id dahai. 13-14 Tu' iri nopo tinulis dahai dot id dokoyu om iri no i milo dokoyu'd basaon om it osuhutan dokoyu. Tu' dinondo nopo om a' kou po koilo ngai' no do pasal dahai. Nga' mogondos oku do koilo kou i' kopio do pasal dahai do koimbagu. Om oondos kou indo dot iyahai o kaandasan dokoyu do tontok di korikatan kawagu do Tuhan Yesus, do miagal dahai tu' oondos dot iyokoyu o kaandasan dahai. 15 Om iri no i kotumbayaan ku'ddi o nokopomusarahan ku do mongoi solowot dokoyu di timpuun i', om kaanu kou indo do barakat dit induwo kopiluap. 16 Tu' osorou ku daa do mumbaya' oku do hino'd dokoyu di paangayan ku do hilo'd Makidunia om mumbaya' oku no kawagu do hino'd dokoyu di pogulian ku do mantad hilo', om milo kou i' do monulung doho' do mamanau oku'd lumombus do hilo'd Yudia. 17 Nga' nowolihan ku noddi i nosorou ku do miagal diri, om popointalang tuu'ddi dot a' nopo oila-ilaan o korohian ku? Tumanud oku tuu do doho'd korohian do tontok di momusorou oku dit apatut ku'd wonsoyon, tu' momoros oku no dot, “Oo,” ka, om koimbagu no om momoros oku nod, “Amu',” ka? 18 Id suang do ngaran do Kinorohingan, i milo do ponongkuyaanan, do poboroson ku no dot iri nopo i batos ku dot id dokoyu'ddi om okon i' ko' it, “Oo,” ka; om koimbagu nopondo, om momoros nod, “Amu',” ka. 19 Tu' i Yesus Kristus nopo, i Tanak do Kinorohingan, i nokosusui dot id dokoyu do pinosusui di Silas, om i Timotius, om i pinosusui ku iyoho', om okon i' ko' momoros dot, “Oo,” ka, om koimbagu nondo om momoros nod, “Amu',” ka. Tu' iyau nopo om ponokoponimbar dot, “Oo,” ka nopo do mantad id Kinorohingan. 20 Tu' i Yesus no o pinawayaan do Kinorohingan do minomoros dot, “Oo,” ka, dot id koinsanai di pinabatos dau. Om iri no o poimpahan toko' do momoros dot id Kinorohingan dot, “Amin,” ka, tu' i Yesus Kristus no o kapamarasan toko' do miagal diri. Om iyo pogiddi o wonsoyon dahai nga' orohian iyahai do koinggayo o Kinorohingan. 21 Kinorohingan no o pinopogirot do kopiisaan dahai om kopiisaan dokoyu dot id Kristus; om iyau nogi' o minomili' dati' do pinotobilang do maan do dau'd songonuon. 22 Om iri noddi o kinoponontuan do Kinorohingan om kinopogiratan kopio dau do sumiliu toko' do songonuon dau, om pinosuang dau o Rusod dau dot id ginawo toko' do maan do pamajamin do patahakon nondo dau dati' o koinsanai di pinabatos dau. 23 Om Kinorohingan no o sasi' ku --- tu' koilo i' iyau dot id suang do ginawo ku --- dot a' oku abayaan do mongoi do hino'd Korintus, tu' mada' oku do tumongob kou. 24 Om a' oku i' mononsog dokoyu, do pasal do nunu ot apatut dokoyu'd ponongkuyaanan, tu' notumbayaan kou no kopio do Kristus. Suwai ko' muhup oku no toomod dokoyu do kumaraja', om oruhangan i' o kataadan dokoyu.
1 Iyo nopoddi om nokopomusorou oku no kopio dot a' oku nondo kawagu mongoi olimbuha' dokoyu dot ondung popotongob oku no dokoyu. 2 Tu' ondung popotongob oku dokoyu, om isai poddi o monginsasamod doho', dot okon ko' iri kasai' i tulun di pinotongob ku? 3 Om iri no o kinoponulisan ku di surat diri dot id dokoyu. Tu' a' oku i' mongoi pogolimbuha' dokoyu dot ondung popotongob kou no doho', om iyokoyu nogi' daa it apatut do popotood doho'. Tu' oilaan ku no kopio dot ondung otood oku om iyokoyu ngai' nga' kotonggoi indo dot otood. 4 Tu' tontok nopod minonulis oku di surat diri om awagat tomod om osusa' o ginawo ku om monuru' po o romou ku. Nga' okon i' ko' poposusa' do ginawo dokoyu o kinoponulisan ku'ddi suwai ko' popoilo oku dokoyu dot osianan kopio oku dokoyu.
Koompunan di Tulun di Kisala'
5 Nga' ondung haro o tulun do pinotongob dot isai nopo, om okon i' ko' winonsoi dau iri dot id doho', suwai ko' winonsoi dau iri dot id piro-piro o tulun dot id pogialatan dokoyu, om a' oku i' orohian do monogod kopio dau. 6 Tu' ula' no i nihukum di tulun dot ogumu' di tulun di minomonsoi do miagal diri. 7 Om baino' nopo om mositi' no dot ompunan dokoyu i tulun diri, om insasamadan no iyau om a' i' iyau adalaan do tumongob gisom dot aiso' nondo o kokoyo-koyoon do pomusarahan dau. 8 Iyo nopoddi om suhuon ku no kopio iyokoyu do popoilo kopio dau dot otopot i' dot osianan kopio kou dau. 9 Tu' iri no o kinoponulisan ku di surat diri dot id dokoyu tu' pongilo kopio ku dokoyu ondung tumanud kasai' kou po di ponudukan ku. 10 Ondung mangampun kou do tulun di nakasala' dot id dokoyu, om iyoho' nga' mangampun nogi' di tulun diri. Tu' nunu nopo i noompunan ku dot ondung haro no it apatut dot ompunan --- om ompunan ku i' iri dot id toguang do Kristus do koinsanangan dokoyu. 11 Winonsoi ku pogi' o miagal diri nga' mada' oku do haro o ralan do rogon do momorinta' dati' tu' noilaan toko' no i natantu' mantad di rogon do wonsoyon dau.
Kinatangkabaan di Paulus di Hilo' Iyau id Troas
12 Om tontok di nokorikot oku do hilo'd Troas do minongoi poposusui do Habar dot Osonong do pasal do Kristus, om noiwangan nod Tuhan o ralan ku do kumaraja' dot id kinoiyonon diri. 13 Nga' a' nopo osimbayan o ginawo ku tu' a' oku nokosolowot di Titus, i tobpinai toko' do hilo'. Om pongintod-intod oku noddi di tulun do hiri, om pakayaai ku no do hilo'd Makidunia.
Kristus o Papamanang
14 Nga' pounsikou nod Kinorohingan! Tu' woyoon kasai' i' iyahai dau do tumanud di posukan di Kristus di nakamanang, tu' poimpasi i' iyahai do poingiso' do Kristus. Pinakai nogi' iyahai do Kinorohingan do popotongkop di habar do pasal do Kristus do miagal do tawau dit osonong o kosingudan tu' tumongkop do hinonggo-honggo nopo. 15-16 Tu' iyahai nopo om miagal do tawau do kominyan dit osonong o kosingudan, i tutudan do Kristus do patahakon dot id Kinorohingan. Id tulun nopo di kumaa no dot id karaagon, om iyo iyahai di tawau do kapatayon di mamatai; nga' id tulun nopo di maso do posion om iyahai nopo om miagal di tawau dit osonong o kosingudan di papakaa dot id koposion. Iyo nopoddi om isai o kowonsoi ngai' di karaja'ddi? 17 Om okon i' ko' miagal iyahai di kogumuan do tulun di mongigit diti habar do mantad id Kinorohingan do miagal no di dapu' di dagangon. Nga' iyahai nopo tu' sinuhu' do Kinorohingan om osonong i' o kapamansayan dahai'ddi, okito id Kinorohingan do posusui iyahai di habar diri do miagal do susuhuon do Kristus.
I Piro-Piro o Susuhuon di Popinsusui di Tumpongo do Wagu
1 Iyo nopoddi, om mamarayou tuu'ddi iyahai do tinan dahai do miagal diri? Ko' minog tuu'ddi iyahai do haro o surat do pamarayou do pokoyoon dot id dokoyu ko' mantad id dokoyu do miagal do tulun do suwai tu' kisurat do pamarayou? 2 Nga' iyokoyu no o surat di pamarayou dahai, i pointulis dot id ginawo dahai om it oilaan om it abasa' do pointikid-tikid do tulun. 3 Om okito no diyolo' dot iyokoyu no o miagal do surat di tinulis do Kristus i pinokirim dau do pinoigitan dahai. Nga' okon i' ko' i dawat o pinonulis di surat diri, suwai ko' i Rusod do Kinorohingan di poimpasi, om okon i' ko' tinulis do hiri'd watu di ponunulisan, suwai ko' hiri'd ginawo'd tulun. 4 Koboro-boros nopo dahai do miagal diti nga' ogirot i' kopio o pogogondos dahai dot id Kinorohingan dot i Kristus o kapagandasan. 5 Tu' aiso' i' o nunu-nunu do poimpahan dahai do popoboros do koilo iyahai do momonsoi do karaja'dti, nga' Kinorohingan i' o manahak dahai do komiloo' do momonsoi'dti. 6 Tu' iyau no o minanahak dahai do komiloo' do sumiliu do susuhuon di tumpongo do wagu, i tumpongo di poingimpou di Rusod do Kinorohingan, om okon i' ko' poingimpou dit oturan di tinulis. Tu' iri nopo i tinulis om papakaa no dot id kapatayon, nga' Rusod nopod Kinorohingan om manahak do koposion. 7 Tontok nopo di winonsoi om pinokikir do hiri'd watu i Tourat di papakaa dot id kapatayon diri om titiu no o tulinau do Kinorohingan di kosorong kopio dot id rabas di Musa. Iri nopo i tulinau'ddi nga' kosorong no kopio gisom dot a' no kasaap do montong di rabas di Musa i tulun dot Israil do mulong piya do tontok nopoddi om tumimpuun no do tumanus i tulinau'ddi. Om ondung miagal diri o kogoyoo' di kagayaan do pinorikot do tontok di pinatahak i Tourat di papakaa dot id kapatayon diri, 8 om okon-okon pondo o kogoyoo' do kagayaan di poimpuunon i tumpongo di pinatahak do Rusod do Kinorohingan. 9 Tu' ondung miagal diri o kagayaan di Tourat di momohukum do tulun diri, om okon-okon pondo o kogoyoo' do kagayaan di tumpongo di popoulud do tulun dot id Kinorohingan. 10 Nga' milo nod poboroson dot iri nopo i kagayaan di gulu po om aiso' no o kagayaan do baino', tu' notori' no di kagayaan di dinondo. 11 Tu' ondung kikagayaan it oruhai'd tumanus, om okon-okon pondo o kagayaan dit a' tumanus do gisom do poingompus. 12 Om iri noddi o katama-tama' dahai do popoboros do miagal diti tu' miagal no kopio'ddi o soro-sorohon dahai. 13 Om iyahai nopo om a' i' miagal di Musa tu' minonirung do rabas dau do mada' dot okito di tulun dot Israil do tumanus i tulinau do Tuhan dot id rabas dau. 14 Om poinsompon noddi o pomusarahan diyolo'. Om gisom piya do baino' nga' poinsompon kasai' poddi di pinonirung o pomusarahan diyolo' di tontok di minambasa' iyolo' di piro-piro o buuk di pinotulisan di tumpongo di laid diri. Nga' oidu' nopo i nokotirung diri om koiso' o tulun dot id Kristus. 15 Om dinondo piya nga' poinsompon kasai' i' di pinonirung o pomusarahan diyolo' do tontok di mambasa' iyolo' di Tourat di Musa. 16 Nga' ondung haro o tulun do tumimbaba' do Tuhan, om iduwon indo i pinonirung diri do mantad id rabas di tulun diri. 17 Komoyon nopod Tuhan di pinoboros do hiti om iri i Rusod. Om hinonggo nopo o haro o Rusod do Tuhan om hiri no do haro o kosimbayanan, om aiso' o kokogos. 18 Baino' nopoddi om oinsanan toko' nopo dot a' tirungon o rabas, om iyati' no o popotitiu di tulinau do mantad id Tuhan Yesus. Om iri no o poposimban kasai' do kowoyo-woyoon toko' do miyo dau. Om marang-tarang i' o tulinau toko'. Iri nopo i tulinau'ddi om mantad i' dot id Rusod, om iri nopo i Rusod diri om Tuhan i'.
Dapu' di Mantad Hilo'd Surga di Pinosuang do Poiiyanan di Tana' do Winonsoi
1 Momonsoi pogi' iyahai do karaja'dti nga' mantad i' di kosonongo' do Kinorohingan. Om iri noddi ot a' koluhoi-luhoi do ginawo dahai. 2 A' i' iyahai momonsoi di kowoyo-woyoo' di dongtotuong, i kointingayam. Om a' iyahai monipu' do kumaraja' om a' dahai somputulon o boros do Kinorohingan. Om Kinorohingan no o sasi' dahai dot iri no it otopot o poboroson dahai, om otumbayaan indo o tulun do suwai do milo iyahai'd ponongkuyaanan. 3 Ondung a' kasai' po osuhutan iti Habar dot Osonong di posusuyon dahai, om iri no i tulun di kumaa dot id kapatayon it a' kosuhut diri. 4 Iri no i ponokokinorohingan dit araat i momorinta' diti pomogunan o monompon do pomusarahan di tulun dit a' notumbayaan diri. Om iyau no o minangantob diyolo' om a' i' iyolo' kokito do tulinau do mantad id Habar dot Osonong diri, i pasal do kagayaan do Kristus i pinopointalang kopio'd Kinorohingan. 5 Tu' iri nopo i habar di popinsusuyon dahai'ddi om okon i' ko' habar do pasal dahai, suwai ko' iri nopo i habar diri om habar do pasal di Yesus Kristus; om pasal dot iyau no o Tuhan; om iyahai no o nosiliu do susuhuon dokoyu dot i Yesus o nokosilihan dahai. 6 Kinorohingan i' o minomoros do poingkaa, “Potitihon no o tanawau do mantad id totuong,” ka. Om iyau i' i Kinorohingan di pinopoulai di tanawau'ddi dot id suang do ginawo toko'. Om anawau i' o pomusarahan toko' om kosuhut toko' indo di tanawau do Kinorohingan di kosorong kopio do mulinau do mantad id rabas do Kristus. 7 Nga' iri nopo i dapu' di don rusod dit olumis diri om id suang do tinan dahai dit aiso' tomod o gatang, i tana' do winonsoi. Om kointalang no dot iri nopo kogoyoo' do kuasa'ddi om mantad i' dot id Kinorohingan, om okon i' ko' mantad id dahai. 8 Sumaap ngai' nopo dahai it id posorili' dahai, nga' a' i' iyahai aansip. Oborulong piya iyahai nga' a' indo lumuhoi kopio o ginawo dahai. 9 Om ogumu' o pisangod dahai nga' a' i' iyahai insan dot iyahai-yahai kopio. Om mulong piya dot asaru' no iyahai do pimbabagan do gisom dot ohunduk nga' a' i' iyahai apatai. 10 Om opurimanan kasai' nopo dahai i kinapatayon di Yesus dot id tinan dahai, om kointalang indo i koposion di Yesus dot id tinan dahai. 11 Solinaid po dahai do poimpasi, om pokipapatayan kasai' nopo iyahai dot i Yesus o kapamatayan, om kointalang indo o koposion di Yesus dot id tinan dahai diti matai i'. 12 Komoyon nopoddi om maso po o kapatayon do kumaraja' dot id suang do tinan dahai, nga' otood i' iyahai tu' koposion i' o maso do kumaraja' dot id suang do tinan dokoyu. 13 Nokotulis no dot id Buuk do Kinorohingan o boros do poingkaa, “Notumbayaan oku no, om iri noddi o koboro-boros ku,” ka. Om iyahai nga' otumbayaan i' do miagal diri kogirot, om iri noddi o kinapamarasan dahai, tu' notumbayaan i' iyahai. 14 Om otumbayaan no kopio iyahai do Kinorohingan i' di minamasi kawagu di Tuhan Yesus o mamasi kawagu dahai do kotonggoi di Yesus. Om iyau o mangangat dokoyu om mangangat dahai dot id toguang dau. 15 Om koinsanai'ddi om maan ngai' do koinsanangan dokoyu. Tu' mumu-gumu' o tulun do kopuriman do kosianan do Kinorohingan nga' mumu-gumu' no o sumambayang do mongunsikou dot id Kinorohingan; om koinggayo indo o Kinorohingan.
Poimpasi do Mikuwo'd Otumbayaan
16 Om iri no ot a' koluhoi-luhoi do ginawo dahai. Tu' mulong piya do muhang-ruhang o koluluhoi do tinan dahai nga' ginawo nopo dahai om oinwoguan i' do monikid tadau. 17 Om iti nopo kosusaan dit agaan diti dit opurimanan dahai do daamot, om popoimbulai i' do kosimbayanan dot id dahai dit a' ogina-gina' om i poingompus. Om iri nopo kosimbayanan diri om agayo i' kopio ko' mantad di kosusaan diri dot ondung pitaladon. 18 Tu' a' i' iyahai sumokot do montong dit okito, suwai ko' it a' okito o sorohon kopio dahai. Iri nopo it okito om oruhai i' do tumagak, nga' iri nopo it a' okito om a' i' tumagak om hino kasai' do gisom do poingompus.
1 Tu' oilaan no dahai dot ondung raagon i walai --- iri no i tinan --- it iyonon toko' do hiti'd pomogunan, om posodiawon id Kinorohingan o walai do hilo'd surga do patahakon dati', i winonsoi do Kinorohingan om a' rumaag do gisom do poingompus. 2 Tu' id suang nopo diti walai do dinondo'dti om apaasan toko' i' tu' langadon kopio toko' i' do mokiiyon di walai toko' do hilo'd surga. 3 Iri nopo i walai'ddi om iri no i tinan toko' di wagu. 4 Solinaid toko' po do poundorong do hiti'd walai toko' di hiti'd pomogunan, om oudipon toko' nopo tu' awagat kopio i' o tonggungan toko'. Om okon i' ko' orohian toko' do koidu' do mantad id tinan toko' di hiti'd pomogunan diti nga' mantad id kogoyoo' do ginawo toko' dot orohian dot oonuan di tinan di mantad hilo'd surga, om otingalanan i' di tinan di poimpasi iti tinan toko' di matai i'. 5 Om Kinorohingan i' o poposodia' dati' do maan tingalanai, om onuan toko' dau do Rusod dau do maan do pamajamin. 6 Om iri no o kokoris kasai' do ginawo dahai. Tu' oilaan i' dahai do solinaid nopo dahai do poundorong do hiti'd tinan dahai'dti, om osodu' po iyahai di walai di tiyonon nondo dahai do poinsugku' iyahai'd Tuhan. 7 Tu' pinoimpahan nopo do koposion dahai om i kotumbayaan dot id Kristus, om okon i' ko' pinoimpou dit okito, 8 om iri noddi o kogiro-girot do ginawo dahai. Om orohian nogi' kopio iyahai do kotongkiad diti tinan dahai, om kosugku' i' iyahai do Tuhan. 9 Om ka pogiddi do tumotos kopio iyahai do poposonong do ginawo dau do maso tuu dahai do hiti'd walai dahai'd hiti, ko' tontok po di hiloo'. 10 Tu' atantu' no do potimbabaon ngai' toko' i' dot id tiyonon do Kristus do momutus, om sompori-pori toko' do kaanu dot isomuli' do miontok di winonsoi toko' di hiti pod pomogunan dot i winonsoi dit osonong ko' it araat.
Koulud Kawagu Toko' dot id Kinorohingan do Kristus o Popoulud
11 Oilaan no dahai o komoyon dot oronok do Tuhan; om iri no o kopomisunudan kopio dahai'd tulun do suwai do rumikot dot id dau. Tu' Kinorohingan nopo om kotutun i' kopio dahai. Om mogondos oku dot iyokoyu nga' kotutun i' dahai dot id suang do ginawo dokoyu. 12 Om okon i' ko' mokimarayou-rayou iyahai dokoyu, suwai ko' manahak no iyahai dokoyu do paantakan dit osonong dot oondos kou dahai. Om koilo kou i' do sumimbar di tulun di montong nod pangkat do tulun om okon i' ko' i kowoyo-woyoon do tulun ot antangan. 13 Ondung okito dokoyu do mulau iyahai om iri i' i momonsoi iyahai do korohian do Kinorohingan o koiya-iyaan dahai'ddi. Om ondung okito dokoyu do kopunong o pomusarahan dahai om maan id koinsanangan dokoyu iri. 14 Kosianan nod Kristus o momorinta' dahai om oilaan no dahai dot ondung napatai o tiso' o tulun do suminowoli do koinsanai'd tulun om komoyon nopoddi om oinsanan no o tulun do napatai. 15 Napatai no o Kristus do suminowoli do koinsanai'd tulun om iri nondo i tulun di poimpasi nga' okon nondo ko' dau di koposion do tumanud di dau'd korohian, suwai ko' dong Kristus nod koposion dau, i Kristus di napatai om i pinasi kawagu do maan do koinsanangan diyolo'. 16 Om a' noddi iyahai mongilo do kowoyo-woyoon do tulun do tumanud di don tulun do pongingilo. Tu' mulong piya do nokoumbal iyahai do mongilo do kowoyo-woyoon do Kristus do tumanud di don tulun do pongingilo nga' baino' nopoddi om a' noddi iyahai momonsoi do miagal diri. 17 Tulun nopo di nokoiso' dot id Kristus, om nosiliu no kopio'd tulun do wagu. Iri nopo i laid om natanus noddi kopio om nosiliu ngai' nori do wagu. 18 Om koinsanai'ddi om Kinorohingan ngai' i' o minomonsoi. Om pinoulud toko' no kawagu do Kinorohingan dot id dau dot i Kristus o pinopoulud. Om suhuo' toko' noddi do Kinorohingan do kumaraja' om koulud indo i tulun do suwai dot id Kinorohingan. 19 Om popinsusuyon dahai do pinoulud kawagu do Kinorohingan o tulun dot id dau do Kristus o pinopoulud. Om wonsoyo' nopoddi do Kinorohingan o miagal diri om a' no dau sinorou i kasalaan di winonsoi do tulun dot id dau. Om sinuhu' iyahai'd Kinorohingan do popinsusui di habar diri. 20 Om iyahai noddi o susuhuon do Kristus. Om iyahai no o pakayon do Kinorohingan do popolombus di boros dau do miagal dot iyau kopio o popolombus. Om pokionuon kopio'ddi dahai dot id suang do ngaran do Kristus dot umboyoon dokoyu iti lolohou do Kinorohingan di milo do popoulud dokoyu dot id dau. 21 Kristus nopo om aiso' i' o dusa, nga' sinuhu' i' iyau'd Kinorohingan do minamabo do koinsanai do dusa toko'. Om koulud toko' i' kawagu dot id Kinorohingan tu' nokoiso' toko' no dot id Kristus.
1 Om iyo nopoddi tu' muhup iyahai do Kinorohingan do kumaraja', om pokionuon no kopio dahai dot a' dokoyu ruba-rubaton i kosonongo' do Kinorohingan diri. 2 Minomoros o Kinorohingan dot id Buuk do Kinorohingan do poingkaa, “Tontok di maso do kohubayaan ku, om norongou ku no iya', om notulung ku no iya' do tontok di tadau di kopomosian,” ka. Ilaai no kopio do baino' no i maso di kohubayaan diri. Om baino' i tadau di kopomosian! 3 Om a' i' iyahai asanangan do pasalaon iti karaja' dahai. Om ka pogiddi do tumotos kopio iyahai dot a' momonsoi di sumiliu do paantakan do tulun do papasala' diti karaja' dahai. 4 Suwai ko' nunu nopo o wonsoyon dahai om iri no o maan dahai do popointalang do susuhuon iyahai'd Kinorohingan. Tu' alanut i' o ginawo dahai do tontok di noontok iyahai do mogisuayan o koinggoritan: 5 tu' nokoumbal i' iyahai do ninggorit, om pinogiil om pinogiuuhupan iyahai'd tulun do mumang; om monotos kasai' i' iyahai do kumaraja' om asaru' dot a' koodop om asaru' dot aiso' o takanon. 6 Om iri no i kotulido' om i koiloo' om kolonuto' om kosonongo' do ginawo dahai o ralan dahai do pinopointalang do susuhuon iyahai'd Kinorohingan. Om sumondiu iyahai di Rusod do Kinorohingan do monguhup dahai, om mikuwo'd kosianan dahai dit otopot 7 om popinsusui iyahai di habar do mantad id Kinorohingan om pointalangon dahai do susuhuon iyahai do Kinorohingan dot i kuasa' do Kinorohingan o popointalang. Om poingigit kasai' dahai i korohian do Kinorohingan do maan dahai do ponokorapo-rapo do sumaap. Om maan dahai do pongintirung do tinan dahai. 8 Om pusohon iyahai nga' indaraaton i', om royohon iyahai nga' pasalaon indo. Om mulong po dot otulid o wonsoyon dahai nga' tondoson i' iyahai do goudut. 9 Om sorohon piya iyahai'd tulun dot a' abantug nga' kotutun ngai' i' o tulun dahai. Om mulong pod sorohon iyahai'd tulun do napatai no nga' poimpasi kasai' i' iyahai. Om mulong po dot oinggorit iyahai nga' a' i' iyahai apatai. 10 Om mulong po do potongobon o ginawo dahai, nga' otood kasai' i' iyahai, om mulong po do mosikin o kokitanan dahai nga' ogumu' no o tulun do nakakaya' dahai. Om aiso' no o nunu-nunu dahai dot okito'd tulun nga' otopot nopo kopio om iyahai nogi' o kasanganu do koinsanai'd nunu nopo. 11 Oi tobpinai-tobpinai di kosianan ku do hiti'd Korintus! Nokoboros ngai' no dahai dot id dokoyu om aiso' no o linisok-lisok dahai. Om nokosunud ngai' no dahai it id suang do ginawo dahai. 12 Om aiso' no o kosoit-soiton do ginawo dahai dot id dokoyu, nga' iyokoyu nogi' o haro o kosoiton do ginawo dot id dahai. 13 Dinondo nodti om pologoso' oku no do moro-boros dot id dokoyu do miagal do pomomoros ku'd tangaanak kopio ku. Om poboroso' ngai' no dokoyu iyokoyu dot id dahai it id suang do ginawo dokoyu.
Nosihat do Mogodu dot Abayayat di Tulun dit A' Kotutun do Kinorohingan
14 Kada' kou sokodung di tulun dit a' otumbayaan di Yesus; dot a' i' apatut o miagal diri. A' no kopio milo do miiso' ot osonong om it araat! Om a' milo do misugku' o tanawau om totuong. 15 Om a' milo o Kristus do monokisokodung do rogon. Nunu toi o kopiontok-ontok do pomusarahan do tulun do Kristian om i tulun dit okon ko' Kristian? 16 Om a' milo do piisoon o walai do Tuhan om walai do tingolig. Om iyati' no o walai'd Tuhan, i Kinorohingan di poimpasi. Tu' miagal di nokoboros do Kinorohingan do poingkaa, “Mundorong oku nondo dot id pogialatan diyolo', om miyon oku dot id sugku' diyolo'. Om sumiliu oku nondo do Kinorohingan diyolo', om iyolo' nga' osiliu nondo do tulun di songonuon ku. 17 Iyo nopoddi, om tongkiad no do mantad id tulun dit a' kotutun do Kinorohingan, om kada' ongoi sugku' diyolo'. Om kada' no ongoi ponongkuro-kuro di sosomu', om romiton ku indo iyokoyu. 18 Om sumiliu oku nondo do Tapa' dokoyu, om sumiliu kou do tangaanak ku, kad Tuhan it Osundu Kopio,” ka.
1 Oi tobpinai-tobpinai di kosianan ku! Koinsanai di batos diri om pinabatos i' dot id dati'. Iyo nopoddi om lidangai toko' no o tinan toko' do mantad id koinsanai di kososomu' do tinan om ginawo toko'. Om koronok toko' no do Kinorohingan, om milo toko' i' kopio do momonsoi di kohubayaan do Kinorohingan dot id suang do koposi-posion toko'.
Kataadan di Paulus
2 Romiton no iyahai. Tu' a' i' iyahai nokoumbal do nakasala' dot id tongoiso' piya o tulun, om a' iyahai nokoumbal do mamaraag do ngaran dot ongoiso' piya o tulun. Om a' kopio iyahai mogihum do kountungan do mantad id disai nopo. 3 Nga' okon i' ko' papasala' dokoyu o koboro-boros ku do miagal diti. Tu' osianan i' kopio iyahai dokoyu do miagal di pinoboros ku di gulu po, om mogiaambalut kasai' toko' do poimpasi toko' tuu ko' poimpatai. 4 Monongkuyaan oku i' kopio dokoyu, om oondos kopio oku dokoyu! Tu' mulong piya dot ogumu' o kosusaan dot ongopurimanan dahai nga' oinsasamadan i' o ginawo ku tu' iyokoyu o koinsasamod. Om otood kopio oku. 5 Tontok di nokorikot iyahai do hilo'd Makidunia, om a' nopo iyahai nokoundorong-dorong. Hinonggo nopo iyahai nga' haro no o kosusaan tu' haro o tulun do papasala' dahai, om kopuriman iyahai dot ooris. 6 Nga' pounsikou no kopio'd Kinorohingan tu' popogirot i' kasai' do ginawo do tulun dit aiso' o pokukurayan. Tu' ninsasamadan dau iyahai dot i kinorikatan di Titus o pinonginsasamod dau. 7 Om okon i' ko' iri no i kinorikatan di Titus o nokoinsasamod dahai, suwai ko' iri nogi' i nosusuyan iyahai di Titus do noinsasamadan iyau dokoyu. Om minomisunud nogi' iyau dahai do sisolowot kou noddi kopio doho' om monosol kou di nowonsoi dokoyu di gulu, om orohian kou noddi do mogobi' doho' do baino', om noruhangan poddi o kotoodo' do ginawo ku di nokorongou oku'ddi. 8 Mulong piya do nokotongob do ginawo dokoyu i surat ku'ddi nga' a' oku i' monosol do minonulis di surat diri. Otopot nogi' do tontok di noilaan ku i surat diri do popotongob do ginawo dokoyu --- do mulong piya dot ongoruhai kou do tumongob --- nga' monosol oku i' daa. 9 Nga' baino' nopoddi om otood oku no --- dot okon i' ko' i tuminongob kou o kataadan ku, suwai ko' i tuminongob kou do gisom do nosimbanan i kowoyo-woyoon dokoyu o kataadan ku. Om miontok i' do korohian do Kinorohingan i kinatangaban dokoyu'ddi. Iyo nopoddi om okon i' ko' pinotongob toomod dahai iyokoyu'ddi. 10 Tu' katangaban nopo do miagal diri om poposimban i' do ginawo om poporikot do koposion. Om aiso' no o tulun do monosol do miagal diri. Nga' katangaban nopo di miontok nod korohian do tulun om poporikot i' dot id kapatayon. 11 Soroho' pogi' dokoyu o kinootuson di katangaban di miontok do korohian do Kinorohingan: iri no tu' aayi-ayi' diri o ginawo dokoyu do tumotos do mongidu' dit araat. Om araatan kou'ddi do dusa, om ooris kou, om langadon kou, om aparu' kou, om kosodia' kou do momohukum di kasala'. Om id suang ngai' noddi do pinopointalang kou dot aiso' o sala' dokoyu. 12 Iyo nopoddi, om mulong piya dot iyo'ddi o tinulis ku dot id surat diri, nga' okon i' ko' i tulun di nokopomonsoi'd sala' om okon ko' i tulun dit oinggorit do nobungou di kasalaan diri o kinoponulisan ku'ddi, suwai ko' kinoponulisan ku nopo do surat diri om popuriman dokoyu dot id toguang do Kinorohingan do kogoyoo' di pamamadul dokoyu dahai. 13 Om iri no o nokoinsasamod do ginawo dahai. Nga' okon nopo ko' noinsasamadan noo iyahai suwai ko' noruhangan po o kotoodo' dahai do nokokito di kotoodo' di Titus, tu' noinsasamadan i' dokoyu iyau. 14 Rinayou ku i' iyokoyu dot id di Titus. Om pounsikou no tu' a' kou i' minongintingayam doho'. Tu' koinsanai di nokoboros ku do pasal dokoyu om ongotopot i' kopio. Om iyo nogiddi i pinamarayou dahai dokoyu dot id di Titus, tu' nokointalang nori dot otopot kopio. 15 Dinondo noddi om muhang-ruhang nopo o kosianan dau dokoyu tu' ahandaman dau dot orohian ngai' kou do tuminanud di ponudukan dau, om opusou kou do ruminamit dau. Om minihuboyo-boyo' kou di boros dau. 16 Om osonong tomod o ginawo ku tu' milo kou no do ponongkuyaanan dot id suang do nunu nopo.
Tusin di Maan do Ponulung do Mantad id Tulun do Kristian
1 Oi tobpinai-tobpinai, orohian iyahai do popoilo dokoyu do kosonongo' do Kinorohingan dot id piro-piro sidang do hilo'd Makidunia. 2 Noontok no iyolo' do piro-piro o kosusaan dit angawagat di mogumbal daa diyolo'. Nga' maso piya diyolo' dot id suang do kosusaan diri, nga' otood i' iyolo' om opuhawang kopio do manahak do maan do ponulung do tulun do suwai, do mulong piya do mosikin kopio iyolo'. 3 Om katama' oku no do popoboros dot iyolo' nopo om papatahak nopo do songkuro nopo i milo diyolo' do patahakon, om haro nogi' dot ogumu' ko' iri o patahakon diyolo'. Om aiso' i' o monuhu' diyolo'ddi, 4 nga' pokionuo' nopo kopio diyolo' dot id dahai, do muhup iyolo' do manahak do maan do ponulung di tulun di songonuon do Kinorohingan di hilo'd Yudia. 5 Om ogumu' i' ko' i nosorou mantad dahai i pinatahak diyolo'. Nga' id gulu nopo kopio om pinatahak diyolo' o tinan diyolo' dot id Tuhan, om patahako' nogiddi diyolo' dot id dahai, do tumanud di korohian do Kinorohingan. 6 Om iri no o kopongodsuuran dahai di Titus --- i minonimpuun do karaja'dti --- do popotilombus diti karaja' dot osonong dot id pogialatan dokoyu. 7 Iyokoyu nopo om kaya' do koinsanai do nunu nopo: Kaya' kou dot id suang do kotumbayaan, om toilaan do mimboros, om kaya' kou do toilaan, om aparu' kou do momonsoi do nunu nopo. Om agayo o kosianan dokoyu dot id dahai. Iyo nopoddi om kumaparu' kou no kopio iyokoyu dot id suang do karaja' dot osonong diti. 8 Okon i' ko' poboroson ku iti om silihon dot oturan. Nga' popoilo oku no do poingkuro o kogoyoo' do ginawo do tulun do suwai do monulung do wokon, om orohian oku nogi' do koilo ondung songkuro no o kogoyoo' do kosianan dokoyu. 9 Nokoilo kou no do kosianan kopio toko' di Yesus Kristus i Tuhan toko'. Tu' mulong po do kaya' iyau nga' suminiliu i' iyau do mosikin do maan do koinsanangan dokoyu, om kaya' kou i' dot i komosikino' dau o papakaya' dokoyu. 10 Osorou ku nopo iyoho' om tontok no do maso'dti do pootuson dokoyu i karaja' di notimpuunan dokoyu di toun di nakatalib. Tu' iyokoyu no o gulu kosorou do momonsoi do miagal diri. Om iyokoyu o minonimpuun do minomonsoi di karaja'ddi. 11 Iyo nopoddi om potilombuson no dokoyu i karaja'ddi do miagal di timpuun kou i' do minomonsoi tu' agayo o ginawo dokoyu do mangatur diti karaja'dti, om iyo noddi do gisom dot opongo do tumanud di songkuro nopo i milo dokoyu do wonsoyon. 12 Ondung osinggawa' o ginawo dokoyu do manahak om romiton no do Kinorohingan i pinatahak dokoyu'ddi do tumanud di haro dot id dokoyu, om okon i' ko' it aiso' dot id dokoyu. 13-14 Okon i' ko' koboro-boros ku do miagal diti om popoidu' oku do tulun do suwai do mantad id tonggungan diyolo'. Om papawagat oku do tonggungan dokoyu. Nga' ongosima' kou i' do dinondo, om apatut id manahak kou diyolo' i haro o kokurangan. Om soira pondo do haro o kokurangan dokoyu iyokoyu, om osima' iyolo', om iyolo' nondo o monulung dokoyu. Om kopitulung-tulung kou indo. 15 Tu' nokotulis no dot id Buuk do Kinorohingan o poingkaa, “I tulun dit ogumu' o naanu nga' a' i' adalaan kosima', om i tulun dit okuri' o naanu nga' aiso' i' o kokurangan,” ka.
Sinuhu' do Minamanau i Titus om i Tongotambalut Dau
16 Mongunsikou no kopio iyahai'd Kinorohingan tu' pinaparu' dau i Titus do monulung dokoyu do miagal dahai. 17 Tu' okon nopo ko' agaan noo o ginawo di Titus do momonsoi di ponuhuan dahai, suwai ko' agayo nogi' kopio o ginawo dau do monulung dokoyu gisom do tontuo' nopo dau dot iyau o mongoi do hino'd dokoyu. 18 Om pinatanud nogi' dahai di Titus o songulun o tobpinai di pusohon kopio do koinsanai do sidang dot i karaja' dau do popinsusui do Habar dot Osonong do mantad id Kinorohingan o kopomusahan. 19 Om iri nogi' i tulun diri o nopili' om tinantu' do sidang do mongoruhang dahai do mimpanau do popingatod di ponulung diri, om koinggayo indo o Tuhan. Om kokito kou indo do kogoyoo' do ginawo dahai do monulung. 20 Om antaan-taan i' kopio dahai om aiso' indo o tulun do papasala' do papatahak iyahai di maan do ponulung dot irad kopio'ddi kogumu'. 21 Korohian nopo dahai om otulid o wonsoyon dahai dot okon nopo ko' id toguang do Tuhan, nga' id toguang nogi' do tulun. 22 Potonudon nogi' dahai di Titus om i tobpinai di komoyon dahai'ddi o songulun o tobpinai'd suwai. Tu' asaru' no dahai dot umbalan iyau, om nokointalang no kopio dot orohian iyau do monulung. Om baino' noddi om okon-okon po o kogoyoo' do ginawo dau do monulung dokoyu tu' monongkuyaan kopio i' iyau dokoyu. 23 I Titus nopo, om tambalut ku, i muhup doho' do kumaraja' do monulung dokoyu. Om ilo' no duwo o tobpinai do manud-tanud dau om sinuhu' di piro-piro sidang, om osiliu i' iyolo' do kaandasan do Kristus. 24 Om mogondos iyahai do pointalangon dokoyu o kosianan dokoyu dot id diyolo', om ongkoilo indo o koinsanai'd sidang dot osianan kou diyolo'. Om ongkoilo iyolo' di kapamarayahan dahai dokoyu.
Ponulung do Tulun dit Oiyo do Kristian
1 Otopot nopo daa kopio om a' oku no minog do monulis dot id dokoyu do pasal do ponulung di pokirimon no dot id tulun di songonuon do Kinorohingan di hilo'd Yudia. 2 Tu' oilaan ku no dot orohian kou do monulung, om narayou ku no iyokoyu do hiri'd toguang di tulun do Makidunia. Om pinoboros ku nogi' dot id diyolo' dot osodia' kou do monulung di tulun dit oiyo do notumbayaan di hilo'd Akaya do mantad po di toun di nakatalib. Om ogumu' nogi' o tulun dot id pogialatan diyolo' do notingkau o ginawo dot orohian do monulung do nokorongou di kogoyoo' do ginawo dokoyu do monulung. 3 Om suhuon ku'ddi i Titus om iti duwo o tobpinai di moyo-woyo' dau do mongoi do hino'd dokoyu, om okon indo ko' maan toomod i boros dahai do minamarayou dokoyu. Iyo nopoddi om mositi' no do kosodia' kou no tu' nokoboros ku no dot id diyolo' do nokosodia' kou do momonsoi do miagal diri. 4 Ooris oku do haro nopondo o tulun do Makidunia do tumanud doho' do mongoi oku do hiti'd dokoyu, om korikot nondo iyolo' om a' kou i' doti' nokosodia'. Om ointingayam nondo kopio iyahai tu' nokoboros no dahai do monongkuyaan kopio iyahai dokoyu! Om iyokoyu piya'ndo nga' ointingayam i'. 5 Om iri no o kinoponuhuan ku diyolo' do mogulu doho' do mongoi do hiti'd dokoyu do mongoi pongilo-ilo di patahakon dokoyu di maan do ponulung do miagal di nakabatos mantad dokoyu'ddi. Winonsoi ku pogi' o miagal diri nga' korikot oku nopondo om posodia' mantad no i patahakon dokoyu do maan do ponulung. Om kointalang indo dot okon i' ko' sansagan poo dokoyu do monulung suwai ko' agaan i' kopio o ginawo dokoyu do pinapatahak diri. 6 Ilaai no dokoyu! Tulun nopo dit okuuri' o linsou do potonomon om okuri' nondo o tomoton dau, nga' tulun nopo dit ogumu' o linsou do potonomon om ogumu' nondo o tomoton. Om kada' nogi' panahak do mikoduwo o ginawo ko' i sansag-sansagan. 7 Tu' pointikid-tikid do tulun om mositi' no do manahak do mikuwo'd agaan o ginawo, tu' osianan i' o Kinorohingan di tulun dit agaan o ginawo do manahak. 8 Kikuasa' i' o Kinorohingan do manahak dokoyu do barakat do gisom dot a' aayi-ayi' om haro kasai' indo dot id dokoyu o koinsanai dit apatut do haro dot id dokoyu. Om gisom dot a' dokoyu aayi-ayi' iri om milo kou i' do momonsoi'd osonong, om milo kou do monulung do tulun do suwai. 9 Nokotulis no dot id suang do Buuk do Kinorohingan o pasal do Kinorohingan do poingkaa, “Opuhawang kopio iyau do manahak dot id tulun do mosikin, om aiso' o kopupuson di kopuhawango' dau,” ka. 10 Kinorohingan i' o poposodia' do linsou do potonomon di gompongumo, om manahak dati' do taakanon. Om iyau nogi' o poposodia' di totonomon dokoyu'ddi, om iyau o papasapou do tua' di totonomon dokoyu, om muhang-ruhang i' o kopuhawango' dokoyu. 11 Om osima' kasai' kou nondo do nunu nopo, om milo kasai' kou do momuhawang do mikuwo'd agaan o ginawo. Om ogumu' indo o tulun do mongunsikou dot id Kinorohingan dot i pomuhawang dokoyu di pogiduwo-duwoon dahai do papatahak diyolo' o kopongunsikahan. 12 Okon nopo ko' kotulung no di tulun di songonuon do Kinorohingan, di haro o kokurangan i winonsoi dokoyu dit osonong diri, suwai ko' moningkau nogi' do ginawo'd ogumu' o tulun do mongunsikou do Kinorohingan. 13 Om ogumu' nondo o tulun do Kristian do hilo'd Yudia do mamarayou do Kinorohingan tu' kokito iyolo' di kopuhawango' dokoyu om kokito di kotorodoko' dokoyu dot id Habar dot Osonong do pasal do Kristus, i tinanud dokoyu'ddi. Om mamarayou po nondo iyolo' do Kinorohingan tu' agaan kopio i' o ginawo dokoyu do minanahak dot id diyolo', om id koinsanai do tulun do suwai, di haro dot id dokoyu. 14 Om sumambayang nondo iyolo' do bagi' dokoyu do mikuwo'd osianan kopio dokoyu, tu' osonong kopio i' o Kinorohingan dot id dokoyu. 15 Om pongunsikou toko' nod Kinorohingan dot i nipuhawang dau dit agayo kopio o kopongunsikahan!
Pinokotopot di Paulus i Karaja' Dau
1 Dinondo no om haro o pokionuon kopio ku iyoho' i Paulus dot id dokoyu. Tu' roitan oku'd tulun dot alamaya' do hiri'd potoguang dokoyu nga' orongit oku i' kaka dot id dokoyu dot a' oku poinsugku' dokoyu. Mantad no di kalamayao' om kosonongo' do Kristus o 2 kopokionuan ku kopio, dot a' oku sansagan do rumongit dot id dokoyu do korikot oku'd hino. Tu' kosorou oku no do rumongit dot id tulun di momoros dot iri i korohian do dom pomogunan o kakarajaan dahai. 3 Mulong piya do poimpasi iyahai do hiti'd pomogunan, nga' okon i' ko' korohian do dom pomogunan o kobinsuhu' dahai do kumaraja'. 4 Iri nopo i rapo-rapo do pakayon dahai do monokisangod om okon i' ko' rapo-rapo do dom pomogunan suwai ko' i rapo-rapo do dong Kinorohingan di kikuasa'. Om iri no i rapo-rapo'ddi o milo do mamaraag di kuta' do pogintirungan do tulun, om pananus dahai di pogisosongkiwalan, 5 om pananus di kasawato'd ginawo do miagal do tolig di mangantob do tulun do mintutun do Kinorohingan. Om alaon dahai i pomusarahan do tulun om mumboyo' indo iyolo' do Kristus. 6 Om kointalang pondo kopio dokoyu o kotorodoko' dokoyu do mumboyo' om sumodia' nondo iyahai do momohukum do koinsanai di tulun dit a' mumboyo'. 7 Ilaai no kopio dokoyu i kowoyo-woyoon dit otopot. Tu' ondung haro o tulun do momusorou do natantu' no kopio do nasanganu iyau do Kristus, om mositi' no do sorohon no kopio dau o dau'd tinan, om mositi' dot oilaan dau dot iyahai nga' nasanganu nogi' do Kristus do miagal dau. 8 A' oku i' ointingayaman dot adala-dalaan oku piya dot oondos di kuasa' di tinahak do Tuhan dot id dahai, tu' iri nopo kuasa'ddi om popogirot i' dokoyu, om okon i' ko' popoluhoi. 9 Mada' oku i' do sorohon dokoyu do pomorolosi ku dokoyu i piro-piro o surat ku di pinokirim ku dot id dokoyu. 10 Tu' boros kad tulun, “Iri nopo i surat di Paulus om awagat kopio om koronob, nga' potoguang nopo kopio iyau dati' om alamaya' indo kopio iyau om a' korolosi o boros dau!” ka. 11 Osonong do kosuhut kopio i tulun di minomoros do miagal diri, do miagal i' di pinotulis dahai dot id surat dahai o wonsoyon dahai do hiri piya iyahai id pogialatan dokoyu. 12 Atantu' no dot a' i' iyahai katama' do miyo di tulun di momusorou dot asawat iyolo'. Tu' adalaan no kopio o kababasug do tulun do miagal diri. Om momonsoi iyolo' dot oturan diyolo', om iri no it oturan diri o pongilo diyolo' do kowoyo-woyoon diyolo'. 13 Nga' iyahai nopo om a' i' miagal diri. Ondung oondos iyahai om a' i' iyahai oondos do gisom do katalib dit apatut do kaandasan. Om a' i' iyahai tumolibamban do pinogisaman di karaja' di tinantu' mantad do Kinorohingan do wonsoyon dahai. Om iyokoyu nogi' nga' kosuang id karaja' dahai'ddi. 14 Om tontok di minongoi iyahai do hino'd dokoyu do minongoi poposusui di Habar dot Osonong do pasal do Kristus dot id dokoyu, om a' i' kopio iyahai nakatalib di pinogisaman di karajaon dahai. 15 Om a' i' iyahai mimboros do pasal di karaja' do tulun do suwai dit id soliwan di pinogisaman di natantu' mantad do Kinorohingan do bagi' dahai. Nga' iyahai nopo om hiri id suang di pinogisaman di tinantu' mantad do Kinorohingan do bagi' dahai, om mogondos nopo iyahai do muhang-ruhang o kotumbayaan dokoyu dot id Kristus, om milo i' iyahai do momonsoi do karaja' dit agayo ko' iri dot id pogialatan dokoyu. 16 Om milo i' iyahai do poporongou di Habar dot Osonong dot id piro-piro o pomogunan do suwai dot a' piya minog do minggayo-gayo do kopinggaya-gayaan nopo om i karaja' di winonsoi dot id kinoiyonon di tulun do suwai do kumaraja'. 17 Nokotulis no dot id Buuk do Kinorohingan o poingkaa, “Isai nopo o tulun dot oondos do nunu nopo, om mositi' no dot oondos di nowonsoi'd Tuhan,” ka. 18 Tu' iri nopo tulun dit arayou om i tulun di royohon do Tuhan, om okon i' ko' i tulun di mimpori-pori do mamarayou do dau'd tinan.
I Paulus Om i Piro-Piro o Tulun di Mingiyo-iyo do Rasul
1 Mulong piya do basug-basug oku, nga' pokionuon ku no daa do polonuton dokoyu o ginawo dokoyu dot id doho', kaa. 2 Langadon oku no dokoyu, do miagal do Kinorohingan tu' langadon dokoyu. Iyokoyu nopo om miagal po dot iso' o sumandak dit omulok po dit a' po notoning do kusai, iyokoyu i nakabatos ku do pokowinan do songulun o kusai, iri no i Kristus. 3 Nga' ooris oku dot abayayat o pomusarahan dokoyu gisom dot a' kou nondo tumorodok dot id Kristus do miagal di Hawa di gulu po tu' nabayayat di toilaan di tulanut. 4 Tu' koiyo-iyo dot osonong kou nopo do rumamit di tulun di rumikot do hino'd dokoyu do popotuduk do pasal di Yesus do suwai --- it okon ko' i Yesus i pinointutun dahai dot id dokoyu. Om orohian kou do rumamit do rusod om habar dot osonong di suwai kopio ko' mantad di Rusod do Kinorohingan om i Habar dot Osonong di naramit dokoyu do mantad id dahai. 5 Tu' opurimanan ku i' dot a' oku i' osiriba' ko' i piro-piro “rasul” kaka, dit ongoilo kopio'ddi! 6 Mulong piya dot a' oku koilo nod mimboros nga' okon i' ko' basug oku do pasal do toilaan. Om nokointalang no kopio dahai iri dot id dokoyu dot id suang do nunu nopo. 7 Tontok di pinoposusui oku do Habar dot Osonong do mantad id Kinorohingan dot id dokoyu, om a' oku i' kopio minokibalansa' dokoyu, om iyo noddi o ralan ku do mininsiriba'. Om winonsoi ku pogi' o miagal diri nga' popoinggayo oku dokoyu. Om kasalaan ku tuu iri dot id dokoyu? 8 Tontok di minonuduk oku dokoyu, om i sidang do suwai o minamalansa' doho'. Om iyo noddi do minomorugi' oku di piro-piro o sidang diri do minonulung dokoyu. 9 Tu' ondung haro o kokurangan ku do tontok diri, om a' oku i' nokoumbal do monusa' dot ongoiso' piya o tulun dot id pogialatan dokoyu. Tu' onuan kasai' oku i' di tongotobpinai di mantad hilo'd Makidunia do koinsanai dit apatut ku'd aanu. Om antaan-taan ku no kopio dot a' oku monusa' dokoyu dot id maso dot abantalan do miagal di gulu tu' a' oku minonusa' dokoyu. 10 Tu' iri no i ponudukan do Kristus dit otopot di poingigit ku ot a' katanus-tanus diti koondoso' ku do hinonggo nopo do pointongkop do pomogunan dot Akaya. 11 Nunu'ddi o koboro-boros ku do miagal diri? A' oku tuu osianan dokoyu'ddi? Oilaan id Kinorohingan dot osianan oku dokoyu. 12 Wonsoyon kasai' ku i' iti winonsoi ku baino', om aiso' i' o paantakan di piro-piro o “tulun do suwai di sinuhu'ddi” do minggayo-gayo om momoros do kumaraja' iyolo' do miagal dahai. 13 Tu' tulun nopo do miagal diri om rasul di mongudut, iyolo' no i tulun di monipu' do tulun tu' mingiyo-iyo di rasul kopio do Kristus. 14 Nga' a' toko' i' osuayan dot iyo'ddi o wonsoyon diyolo'; tu' i rogon nga' miningiyo-iyo i' do moloikat dot anawau. 15 Iyo nopoddi, om a' i' osuayan do mingiyo-iyo piya'd susuhuon di momonsoi'd korohian do Kinorohingan i susuhuon do rogon. Tu' somulian nondo iyolo' do miontok di winonsoi diyolo' do koimbagu.
Koinggoritan di Paulus do Momonsoi di Karaja' do don Rasul
16 Poboroson ku po kawagu i nokoboros ku: Kada' nod haro o tulun do momusorou do basug oku. Nga' mulong piya do sorohon oku dokoyu'd basug nga' pologoso' oku no dokoyu dot oondos dot ongokuuri' noo o kaandasan, do basug oku piya. 17 Om poboroson ku no iti kaandasan ku'dti nga' okon i' mando ko' Tuhan o minonuhu' doho' do popoboros diti. Tu' miagal oku po kopio di basug do popoboros do miagal diti. 18 Ogumu' i' o tulun dot oondos di dom pomogunan do kaandasan om iyoho' nga' orohian nogi' dot oondos. 19 Om polonuton nopo dokoyu o ginawo dokoyu dot id tulun di basug, tu' opurimanan no dokoyu dot ongoilo kou. 20 Pologoson nopo dokoyu o tulun do monguripon piya iyolo' dokoyu, ko' mongudipon dokoyu om manganu do kountungan do mantad id dokoyu, ko' minggayo-gayo ko' mantad ko' iyokoyu om katama' do monompiling dokoyu. 21 Nga' ointingayaman oku i' do popoboros dot iyahai nopo om adalaan no koluhoi om a' i' iyahai milo do momonsoi do miagal diri. Nga' ondung haro o tulun do suwai di katama' do minggayo-gayo om iyoho' nga' katama' i' do minggayo-gayo. (Nga' iyo nod koboro-boroso' do tulun do basug o koboro-boroso' ku'dti.) 22 Tulun toi iyolo' dot Ibrani? Iyoho' nga' tulun id Ibrani. Tulun toi iyolo' dot Israil? Iyoho' nga' tulun i' dot Israil. Sinakagon toi iyolo' di Abraham? Iyoho' nga' sinakagon i' di Abraham. 23 Susuhuon toi iyolo' do Kristus? Iyo pod mulau o koboro-boroso' ku do miagal diti. Nga' iyoho' nopo om susuhuon i' dit osonong ko' mantad do koinsanai diyolo'. Tu' iyoho' nopo om tuminotos oku i' do kuminaraja', om asaru-saru' oku iyoho' do kogiil, om asaru-saru' dot inggoriton, om asaru-saru' oku dot oruhai nod apatai. 24 Om illimo oku no inggorito' do tulun do Yohudi tu' pinillapasan oku diyolo' dot intolu nohopod om siam. 25 Om intolu oku pillapasai do tulun do Rum; om nokoumbal oku do pinindumpahan do watu, om intolu oku koumbal do nolonsod do poinsakai'd kapal do rahat, di sinakai ku, om duwo nohopod om apat o jam do mampung-hampung oku do hilo'd rahat. 26 Om asaru' oku do haro o koligagaanan dot id tindalanon tu' ligog-ligogon i' o luyud om tulun di manakau, om ligog-ligogon i' o tulun do mantad id tulun dit okon ko' Yohudi om i tulun do Yohudi, om haro o koligagaanan dot id suang di bandar om haro o koligagaanan dot id soliwan di bandar, om haro o koligagaanan do hilo'd rahat, om haro o koligagaanan do mantad id tulun di mangakun do tulun iyau'd Kristian om okon indo kopio. 27 Om minonotos oku no do kuminaraja' do gisom dot oruhai nod apatai o kopurimanan ku dot ohuhuyanan: om asaru' oku dot a' koodop, om a' kaakan, om a' koinum om asaru' oku nogi' dot a' osukupan do makan, om koumbal oku dot osogitan dot a' osukupan do pakayan om aiso' po o tiyonon ku. 28 Om suwai no ko' iri om atangkabo oku po do pointikid do tadau do morou-sorou do kowoyo-woyoo' do koinsanai di sidang. 29 Tu' tontok do haro o tulun dot oluhoi om iyoho' nga' kotonggoi no dot oluhoi. Om tontok do haro ot aratu' dot id dusa om tumongob oku no kopio. 30 Ondung oondos oku daa do nunu nopo om oondos oku no di popointalang di koluhayan ku. 31 Oilaan id Kinorohingan, i Tapa' do Tuhan Yesus, dot a' oku i' mongudut. Royohon no o ngaran dau do gisom do poingompus. 32 Tontok di hilo' oku'd Damsik om minonuhu' i gobunor, i momorinta' do hilo' dot id suang di pomorintaan di Raja' Aritas, do soudor do madtamong di wawayaan di bandar diri do manangkap daa doho'. 33 Nga' pinosuang oku po dot id balatak om pouluho' oku nogiddi do pinosoliwan di bandar do pinawaya' do luang do hiri'd tolig di bandar. Om iyo noddi o kinolobus-lobusan ku do mantad id longon di gobunor diri.
I Pinokitanan om i Pinoilaan do Kinorohingan dot id di Paulus
1 Atantu' no dot aiso' i' o kountungan ku dot oondos. Nga' oondos oku i' di pinoilaan do Kinorohingan dot id doho' dot id suang do pinointalang, om id pinokitanan. 2 Otutunan ku i' o tiso' o tulun do Kristian do pinoinsawat dot id kinoiyonon dit asawat kopio di hilo'd surga, di hopod no om apat o toun do mantad baino'. (Nga' a' i' oilaan ondung tinan kopio dau i pinoinsawat diri ko' pinointalang po toomod --- nga' oilaan id Kinorohingan iri.) 3-4 Om poboroson ku po kawagu i pinoboros ku: Tu' oilaan ku no do pinoinsawat i tulun diri do pinakaa do hilo'd Pirdaus. (Nga' a' ku i' oilaan ondung tinan po tuu kopio dau i pinoinsawat diri ko' pinointalang po toomod iri --- Kinorohingan noo o koilo.) Om hilo' no do nokorongou o tulun diri dit a' nod tulun milo do poboroson om a' o tulun pabanaron do popoboros diri. 5 Om pasal no di tulun diri o kaandasan ku, om okon i' ko' doho'd tinan o kaandasan ku. Tu' iyoho' nopo om iri no i popointalang do koluhayan ku o kaandasan ku. 6 Nga' ondung orohian oku dot oondos do nunu nopo, om a' oku i' popimboros dit a' otopot suwai ko' it otopot o poboroson ku. Nga' a' oku i' minggayo-gayo, om aiso' indo o tulun do popoinggayo-gayo doho' ko' mantad di winonsoi ku di nokito dau om i nokoboros ku di norongou dau. 7 Nga' a' oku i' adalaan do minggayo-gayo dot i pinointalang di koimayaan kopio'ddi o kopinggaya-gayaan ku, tu' haro o toruol dot id tinan ku di pakayon do rogon. Om iri no i toruol diri o pomobog doho' om a' oku i' minggayo-gayo. 8 Intolu oku no sambayang dot id Tuhan do mokiidu' di toruol diri do mantad id tinan ku, 9 nga' simbar nogi' o Tuhan do poingkaa, “Osianan oku i' diya' om kabagal nu no i kosianan ku diya'ddi: tu' kointalang nogi' kopio i kogoyoo' do kuasa' ku do tontok dit oluhoi ko,” ka dau. Om iri noddi o kaandasan ku tu' soira' dot oluhoi oku om tontok noddi dot opurimanan ku o Kristus do mongintirung doho' di kokorisan dau. 10 Om otood oku i' do haro piya o koluhayan ku. Om otood oku nogi' dot indaraaton oku piya do Kristus o kopongindaraatan doho'. Om otood oku nogi' do haro piya o kosusaan ku om gusa-gusaon oku piya, om inggoriton oku. Tu' tontok dit oluhoi oku, om tontok nogiddi do kokoris oku.
Atangkabo i Paulus do Kosorou di Tulun do Korintus
11 Iyo oku no kopio di tulun do basug --- nga' iyokoyu i' o nokobungou doho' do miagal diri. Tu' otopot nopo kopio om iyokoyu daa ot apatut do mamarayou doho'. Tu' mulong piya dot aiso' o ngaran-ngaran ku nga' a' oku i' kopio aala' di “rasul” dit ongoilo kopio'ddi. 12 Tu' nokointalang no dot id dokoyu o kongoimayaan om i kongosuayan kopio om i winonsoi di kongoimayaan kopio do mikuwo'd alanut o ginawo do popointalang do tulun kopio oku di sinuhu'. 13 Nunu po toi ot a' ku napadul dot id dokoyu do pataladon di piro-piro o sidang do suwai? Iti po: it a' oku minonusa' dokoyu do mamalansa' doho'. Ompunai oku no di kasalaan ku'ddi! 14 Kointolu ku nodti baino' do kosodia' do mongoi do hino'd dokoyu, om a' oku i' monusa' dokoyu tu' okon i' ko' i haro dot id dokoyu o korohian ku, suwai ko' iyokoyu. Tu' okon i' ko' tangaanak ot apatut do mogihum do kaakan-akanan do molohing, suwai ko' i molohing ot apatut do mogihum do kaakan-akanan do tangaanak. 15 Om ka pogiddi dot orohian oku do papatahak do nunu nopo dot id dokoyu, om tinan ku piya nga' patahakon ku i'. Ondung miagal diri o kosianan ku dokoyu, om apatut po tuu dot a' kou osianan doho'? 16 A' kou toi kosokodung i' dot a' oku insan ponusa' dokoyu? Nga' haro i' o momoros dot oilo kopio oku kaka do monipu' dokoyu; om manganu oku do kountungan do mantad id dokoyu dot i poninipu' ku dokoyu o ralan ku do manganu'ddi. 17 Nga' poingkuro kopio daa dot osiliu o miagal diri. Nokoumbal oku toi do minanganu do kountungan do mantad id dokoyu dot i tulun di sinuhu' ku o minongoi panganu do mantad id dokoyu? 18 Sinuhu' ku i Titus do mongoi do hino'd dokoyu, om haro nogi' o sinuhu' ku do tulun do Kristian do suwai do tuminanud dau. Haro toi o kountungan do nanu di Titus do mantad id dokoyu? Nga' miagal i' o kobinsuhu' do ginawo dahai do kumaraja'. Om miagal o kowoyo-woyoo' dahai. 19 Osorou nopo doti' dokoyu om solinaid nopodti om maso no dahai do tumotos do pokotopot do tinan dahai dot id dokoyu. Nga' oborulong kou i' do momusorou! Oilaan id Kinorohingan do nunu nopo i pinoboros dahai'ddi om miontok id korohian do Kristus. Om koinsanai di wonsoyon dahai nga' popogirot i' do koposi-posion dokoyu di don rusod. 20 Ooris oku do tontok nopondo do mongoi oku do hino'd dokoyu om a' kou indo miagal di soro-sorohon ku. Tu' haro i' dotindo ot id pogialatan dokoyu do mogisosongkiwal om osolon om otogod, om haro doti' i momusorou no do dau'd tinan, om haro o mongindaraat do wokon, om haro i mogisuwai-suwai o korohian om haro o minggayo-gayo om haro i mamagangau. 21 Om ooris oku do poinsiribaon oku nondod Kinorohingan dot id toguang dokoyu do korikot oku do hino'd dokoyu, om mihad oku nondo dot id toguang dokoyu tu' ogumu' i' ot id pogialatan dokoyu do nokowonsoi'd dusa di gulu, om aiso' i' o kinosimbanon di kowoyo-woyoon diyolo', om a' iyolo' ruminologo di wonsoyon diyolo' di magampahu', om i kososomu' om it a' ongosonong.
I Pinokitanan om i Pinoilaan do Kinorohingan dot id di Paulus
1 Iti no o kointolu ku do mongoi do hino'd dokoyu. Nokotulis no dot id Buuk do Kinorohingan o poingkaa, “Ondung haro o papasala' om apatut do duwo ko' tolu o tulun do sasi' do popoboros dot otopot iri om pokotopoton nogi' i papasala'ddi,” ka. 2 Iri nopo tulun di nongkowonsoi'd dusa di gulu om koinsanai di tulun do suwai, om nokoinsan mantad ku no di koinduwo ku'd minongoi do hino'd dokoyu. Baino' nodti, do daamot ku po do poinsodu' dokoyu om poinsanon ku po kawagu iyokoyu, dot ondung korikot oku kawagu om aiso' no o tongosongulun piya dot id pogialatan diyolo' do koidu' do mantad id hukuman. 3 Om okito nogindo dokoyu o koinsanai di popointalang kopio di korohian dokoyu do popointalang do Kristus kopio o somboros di polombuson ku. Tu' ondung haro o wonsoyon do Kristus dot id dokoyu, om a' i' iyau oluhoi do momonsoi'ddi. Suwai ko' pointalangon i' kopio dau o kuasa' dau dot id pogialatan dokoyu. 4 Otopot i' do tontok di pinasalib iyau, om oluhoi i' iyau, nga' baino' nopoddi om napasi no iyau do mantad id kapatayon dot i kuasa' do Kinorohingan o minamasi dau. Om iyahai nga' oluhoi nogi' dot id suang do koposion dahai di poingiso' do Kristus, nga' soira' nopondo do kotimbaba' iyahai dokoyu om okoris i' iyahai do kotonggoi do Kristus, do pokorison di kuasa' do Kinorohingan. 5 Ilaai pogi' kopio dokoyu o koposi-posion dokoyu ondung otopot kopio do poingimpou do kotumbayaan dot id Kristus. Atantu' no dot oilaan i' dokoyu dot id suang dokoyu o Kristus Yesus. Nga' suwai indo ondung a' kopio kou daa otumbayaan. 6 Mogondos oku do koilo kou i' dot iyahai nopo om okon i' ko' i tulun dit obinluhoi. 7 Nga' sumambayang iyahai dot id Kinorohingan om uhupan kou i' do Kinorohingan, om a' kou indo momonsoi di kasala'. Okon i' ko' popointalang iyahai dot oilo iyahai do momonsoi di karaja' dahai, suwai ko' mongodsuur iyahai dokoyu do momonsoi di korohian do Kinorohingan do mulong piya dot oluhoi o kokitanan dahai, nga' a' i' monguro. 8 Tu' a' i' iyahai milo do momonsoi dit a' otopot, suwai ko' mositi' no do tumanud iyahai dit otopot. 9 Orohian i' iyahai dot oluhoi iyahai om okoris kou po daa iyokoyu. Om sumambayang nogi' iyahai, om aiso' indo o koluhayan dokoyu. 10 Om iri no o kinoponulisan ku do surat diti dot a' oku po koongoi do hino'd dokoyu, om a' indo awagat o wonsoyon ku dot id dokoyu do korikot oku do hino'd dokoyu, do mamakai di kuasa' do tinahak do Tuhan dot id doho'. Tu' kinapatahakan nopod Tuhan di kuasa'ddi dot id doho' om popogirot dokoyu, om okon i' ko' popoluhoi dokoyu. 11 Baino' nodti, oi tobpinai-tobpinai, om kongotood kou no om tumotos kou no do sumiliu'd tulun dit ogirot kopio, om it aiso' o koluhayan. Tonudon ngai' no dokoyu i nosihat ku. Om koiso-isoon no dokoyu o ginawo, om mogiuulud kou no kopio. Tu' moyo-woyo' i' dokoyu o Kinorohingan dit obinsianan kopio om i popiulud. 12 Mogisuwau-suwau kou no do miagal do tulun do Kristian di mogiobpinai. Oinsanan nopo i tulun di nasanganu do Kinorohingan do pokirim do tabi' dot id dokoyu. 13 Tuhan Yesus Kristus no o mamarakat ngai' dokoyu, om kosianan kou do Kinorohingan, om woyoon kasai' kou di Rusod do Kinorohingan.
1-3 Oi tobpinai-tobpinai ku, it id piro-piro sidang dot id watas do Galatia. Mogondos oku no, iyoho' i Paulus, om koinsanai di koobpinayan do suwai di sompi' ko' Kristian, dot onuan kou'd Kinorohingan, i Tapa' toko', om i Tuhan Yesus Kristus, do barakat om kosimbayanan do ginawo. Nokosiliu-siliu ku nopod rasul om okon i' ko' tulun o pinoposiliu doho' om okon ko' pinili' oku'd tulun, suwai ko' pinoposiliu nopo doho'd rasul om i Yesus Kristus i' om Kinorohingan, i Tapa' toko', i minamasi kawagu di Yesus Kristus do mantad id kapatayon. 4 Tonudo' nopo do Kristus o korohian do Kinorohingan, i Tapa' toko', om patahako' nopo dau o tinan dau do siniliu'd porsombahan di sinumbali' om oompunan i' o dusa toko', om apasi toko' indo do mantad id maso dot araat diti. 5 Royohon no o Kinorohingan do gisom do poingompus! Amin.
Iso' Noo o Habar dot Osonong
6 Osuayan oku no kopio dokoyu oi tobpinai-tobpinai! Linohou kou'd Kinorohingan dot i kosianan do Kristus o kinapamalahawan, nga' baino' noddi om a' po alaid om tumongkiad kou nogiddi do Kinorohingan om tumanud kou nogi' di “habar dot osonong” do suwai ko' i Habar dot Osonong di mantad id Kinorohingan. 7 Otopot nopo kopio om aiso' no o “habar dot sonong” do suwai. Nga' haro o piro-piro o tulun di poposusui do “Habar dot Osonong” do pasal do Kristus di sinomputul diyolo', om gowoi poddi om ongoborulong kou. 8 Iri nopo tulun di poposusui do “habar dot osonong” do suwai ko' i Habar dot Osonong di pinosusui dahai, om pologoson nopo do hukuman do Kinorohingan --- dot iyahai piya tuu ko' moloikat po do mantad hilo'd surga, i tulun diri! 9 Nokoboros no dahai di gulu po, om poboroson po kawagu dahai do dinondo: dot iri nopo tulun di poposusui dot id dokoyu do “habar dot osonong” di suwai ko' i Habar dot Osonong di norongou dokoyu do mantad id dahai, om apatut nod hukuman do Kinorohingan! 10 Mokisokodung tuu do tulun o kapamarasan ku do miagal diri? Amu', a' i' kopio! Soro-sorohon ku nopo kopio'dti om kohubayaan oku daa do Kinorohingan. Tumotos oku tuu'dti do mamagayat do ginawo'd tulun om kasanangan oku indod tulun? Ondung iyo'ddi o wonsoyon ku om okon oku i' ko' susuhuon do Kristus.
Kinosili-Silihan di Paulus do Rasul
11 Apatut i' do koilo kou, oi tobpinai-tobpinai, dot iri nopo Habar dot Osonong di posusuyon ku'ddi om okon i' ko' mantad id tulun. 12 Okon i' ko' tulun o kinoonuan ku di habar diri, om aiso' i' o tiso' pod tulun do pinopotuduk diri dot id doho'. I Yesus Kristus i' o pinoposunud do tonsi di Habar dot Osonong diri dot id doho'. 13 Atantu' no do nokorongou kou do kowoyo-woyoo' ku di tumanud oku po di tugama' do Yohudi. Om nokoilo kou di kororongit ku dot id sidang do Kinorohingan om i winonsoi ku dit a' no ogina-gina' o karaato' do mumbal daa do mananus diri. 14 Id suang nopo do pananud-tanud ku do tugama' do Yohudi; om poimaha' oku no iyoho' ko' mantad do kogumuan do tulun do Yohudi di rampam-rampam ku. Ogirot tomod oku do tuminanud di tadat om koubasanan di taki-aki dahai. 15 Nga' mantad i' do kosianan do Kinorohingan, do pinili' oku dau dit a' oku po nosusu, om linohou oku'ddi dau do momonsoi'd karaja' dau. 16 Om pinointalang do Kinorohingan i Tanak dau dot id doho', om kopinsusui ku i' i Habar dot Osonong do pasal di Tanak dau dot id tulun dit okon ko' Yohudi. Tontok nopoddi om a' oku i' minongoi solowot dot ongoiso' piya do tulun do mongoi pokinosihat. 17 Om a' oku minongoi solowot di tulun do hilo'd Yorusalim, i nokopogulu doho' do nosiliu'd rasul. Suwai ko' ongoi oku nogi' do hilo'd pomogunan dot Arab, om poguliai ku nogiddi kawagu do hilo'd Damsik. 18 Tolu noddi o toun do mantad di notumbayaan oku om ongoi oku no do hilo'd Yorusalim do minongoi intutun di Pitrus. Om hopod no om limo tadau ku do poinsugku' dau. 19 Om a' oku i' nokosolowot di piro-piro o rasul do suwai, do suwai'ndo ko' i Yakub, i tobpinai di Tuhan. 20 Otopot i' kopio iti tulison ku'dti. Om oilaan id Kinorohingan dot a' oku mongudut! 21 Om pakayaai ku nogiddi do hilo'd piro-piro o watas do Siria om Kilikia. 22 Om tontok nopoddi nga' a' po i sidang do Kristian di hilo'd Yudia kotutun kopio doho'. 23 Norongou nopo diyolo' om iri no i popimboroson do tulun do suwai do poingkaa, “Iri nopo tulun di monginggorit dahai di gulu po, om popinsusui noddi di kotumbayaan di pokitotonusan daa dau di gulu po,” ka. 24 Om pamarayou noddi iyolo'd Kinorohingan dot iyoho' o kinapamarayahan.
I Paulus om i Piro-Piro o Tulun do Suwai di Sinuhu'
1 Hopod noddi om apat o toun do mantad diri, om poguliai ku no do hilo'd Yorusalim do miwoyo' di Barnabas, om pinowoyo' ku nogi' i Titus. 2 Minongoi oku pogi' do hilo'd Yorusalim nga' nokointalang nod Kinorohingan dot id doho' dot apatut oku do mongoi'd hilo'. Om patarango' ku noddi i Habar dot Osonong di popinsusuyon ku dot id tulun dit okon ko' Yohudi do tontok di suminolowot oku di piro-piro o boyoon do hilo'. Tu' mada' oku i' dot aiso' o kokoyo-koyoon di karaja' ku di gulu, om iti karaja' ku do dinondo. 3 I Titus nopo, i minongoruhang doho', om tulun i' do Yunani, nga' a' i' iyau sinansagan do tumanud di toturan do monunat, 4 do mulong piya daa do haro o piro-piro o tulun di mononsog do momonsoi'd miagal diri. Iyolo' no i tulun di mongoi ponoluku' dot id suang do sinompuruan toko', om i minsorupai-rupai do sompi' ko' tulun di nongotumbayaan. Momolisok-lisok i' iyolo' do sumuang do mongoi ponoinu' do kosimbayano' toko' di nokoiso' toko' dot id Kristus Yesus. Pogulion toko' daa kawagu diyolo' di kowoyo-woyoo' toko' di gulu po, di turipon toko' po, 5 nga' a' i' iyahai mininsiriba' dot id diyolo', tu' gompion i' kopio dahai i Habar dot Osonong, om a' i' iri osimbanan do korikot dot id dokoyu. 6 Nga' iyo piya'ddi, nga' aiso' i' o ponudukan di wagu do pinoboros diyolo' dot id doho', iyolo' i tulun di sorohon do boyoon --- nga' id doho' nopo om aiso' i' o pisuayan do boyoon tuu iyolo' ko' okon, tu' Kinorohingan nopo om a' i' montong do pangkat do tulun. 7 Nga' iri nogi' i tulun di sorohon do boyoon o nokosokodung do nonuan oku'd Kinorohingan do karaja' do poposusui di Habar dot Osonong dot id tulun dit okon ko' Yohudi, do miagal di minonuhu' o Kinorohingan di Pitrus do poposusui di Habar dot Osonong dot id tulun do Yohudi. 8 Tu' Kinorohingan i' o minoniliu di Pitrus do rasul dot id tulun do Yohudi, om iyau nogi' o minoniliu doho' do rasul dot id tulun dit okon ko' Yohudi. 9 I Yakub, om i Pitrus, om i Yohanis, i nosiliu do boyoon do sidang nga' nokopuriman i' om nokosokodung do nonuan oku'd Kinorohingan do karaja'dti. Om tuminabi' iyolo' dahai di Barnabas do popointalang do kosokodung iyolo'. Om kongotumboyo' noddi iyolo' om iyahai ngai' dot iyahai o kumaraja' dot id pogialatan di tulun dit okon ko' Yohudi; om iyolo' o kumaraja' dot id pogialatan di tulun do Yohudi. 10 Iso' noo o pinokianu diyolo' dahai; iri no tu' mamadul iyahai di tulun di mosikin. Om orohian oku nogi' kopio do momonsoi'd miagal diri.
Tinogod di Paulus i Pitrus di Hilo'd Antiokia
11 Di nopo di minongoi i Pitrus do hilo'd Antiokia, om timbabao' ku nopo kopio iyau do minonogod, tu' kasala' i' o winonsoi dau. 12 Tu' di nopo di timpuun i' om tuminorungak i' iyau do makan di tulun dot okon ko' Yohudi di sompi' do notumbayaan. Nga' korikot poddi i piro-piro o tulun di sinuhu' di Yakub, om tongkiad no iyau di tulun dit okon ko' Yohudi, om a' noddi iyau mongoi torungak diyolo'd makan, tu' ooris iyau di tulun di monuhu' do monunat do koinsanai'd tulun. 13 Om iri tulun do Yohudi di suwai di nongotumbayaan nga' omit ngai' nopo di Pitrus do mininsorupai-rupai, gisom dot i Barnabas piya nga' nokotonggoi i' daa diyolo' dot iyo'ddi o kowoyo-woyoon. 14 Om kokito ku poddi iyolo' dot a' miontok di Habar dot Osonong dit otopot o kowoyo-woyoon, om boros kangku'ddi dot id di Pitrus dot id toguang do koinsanai di tulun do nakarapou, “Ondung nokoiyo do don tulun dit okon ko' Yohudi o kowoyo-woyoon nu om tulun ko i' daa do Yohudi, om nokuro'ddi tu' mononsog ko do tulun do suwai do miyo iyolo' di kowoyo-woyoon do tulun do Yohudi?” kangku.
Otumbayaan no di Kristus o Ralan di Tulun do Yohudi om i Tulun dot Okon ko' Yohudi dot Apasi
15 Tumanud nopod bansa', om tulun mantad i' iyahai do Yohudi di pogkosusuo' nogi' iyahai, om okon i' iyahai ko' “tulun dit okon ko' Yohudi di kidusa”. 16 Nga' iyo piya'ddi, nga' oilaan i' dahai do koulud-ulud nopo kawagu do tulun dot id Kinorohingan om iri no it otumbayaan iyau di Yesus Kristus, om okon i' ko' i tumanud iyau di Tourat. Iyahai piya nga' notumbayaan i' di Yesus Kristus, om nokoulud iddi iyahai kawagu dot id Kinorohingan dot i kotumbayaan dahai o nokoulud-ulud dahai, om okon i' ko' i tuminanud iyahai di Tourat. Tu' tumanud nopo di Tourat om iso' pod tulun nga' aiso' i' o milo do koulud kawagu dot id Kinorohingan. 17 Tumotos i' iyahai do mulud kawagu dot id Kinorohingan di nokoiso' iyahai dot id Kristus. Nga' ondung owonsoi dahai o miagal diri, om kointalang kasai' po do maso dahai do “tulun di kidusa” om miagal kasai' iyahai di tulun dot okon ko' Yohudi, om Kristus tuu o nokobungou dahai do momonsoi'd dusa? Iyo tuu'ddi o komoyon diri? Atantu' nod a' i'! 18 Ondung mumbal oku kawagu do popogirot di kowoyo-woyoo' do Tourat di rinaag ku di gulu, om pointalang oku no do nosiliu oku do sumasaap di toturan. 19 Nga' napatai oku no dot id Tourat --- dot iri i Tourat diri o nakapatai doho' --- om milo oku indod masi do bagi'd Kinorohingan. Nakasalib oku no do nokotonggoi di Kristus. 20 Om dinondo nopoddi om okon no ko' iyoho' o poimpasi, nga' Kristus o poimpasi dot id suang ku. Om iti nopo kowoyo-woyoo' do koposion ku do dinondo om poingimpou po di kotumbayaan ku di Tanak do Kinorohingan, i nosianan doho' om i minatai do suminowoli doho'. 21 A' ku i' pagaan-gaanon i kosianan do Kinorohingan. Ondung tumanud di Tourat o ralan do tulun do koulud dot id Kinorohingan, om komoyon nopoddi nga' aiso' i' o guna' di kinapatayon di Kristus.
Tumanud di Tourat ko' Otumbayaan di Kristus
1 Oi tobpinai-tobpinai ku, i tulun do Galatia! Basug kou no kopio! Isai kopio toi o nakabayayat dokoyu? Tu' nakatarang ku no kopio dot id dokoyu om nokoingod tomod ku o ponunuduk ku dot id dokoyu do pasal di kinapatayon di Kristus do hiri'd salib. 2 Sunudai oku daa dokoyu do pasal diti hal dot iso' noo. Tuminanud toi di Tourat o nakaanu-anu dokoyu di Rusod do Kinorohingan, ko' mantad po do nokorongou kou di Habar dot Osonong do mantad id Kinorohingan om i notumbayaan kou di Kristus? 3 Nokuro tu' iyo kopio kou'dti kabasug? Nokotimpuun kou no do poimpasi dot id suang do koposi-posion do wagu do woyoon di Rusod do Kinorohingan, om kokorisan nogi' tuu'ndo dokoyu o popotilombus kopio dokoyu di koposion do wagu'ddi gisom do kooyion do tumur dokoyu? 4 Aiso' ngai' i' tuu o guna' di nongopurimanan dokoyu'ddi? Nga' kadsai ma dot aiso' o guna'! 5 Noonuan kou nod Kinorohingan di Rusod dau om minomonsoi iyau do piro-piro koimayaan dot id pogialatan dokoyu. Iri tuu tuminanud kou di Tourat o kinapamansayan do Kinorohingan do miagal diri ko' iri po i nokorongou kou di Habar dot Osonong om notumbayaan kou'ddi di Kristus? 6 Iti nopo om miagal i' di nokotulis dot id suang do Buuk do Kinorohingan do pasal di Abraham do poingkaa, “Notumbayaan i Abraham do Kinorohingan, om iri no i kotumbayaan dau o nokoromi-romitan do Kinorohingan dau, om kohubayaan diri iyau'd Kinorohingan,” ka. 7 Om mositi' no dot oilaan kopio dokoyu dot iri nopo tulun dit otopot-topot kopio do sinakagon di Abraham om iri no i tulun dit otumbayaan do Kinorohingan. 8 Nokoboros mantad no dot id suang do Buuk do Kinorohingan do ralan nopod Kinorohingan do popoulud kawagu dot id dau di tulun dot okon ko' Yohudi om it otumbayaan iyolo' dau. Nokosunud mantad no i Habar dot Osonong diri dot id di Abraham dot id suang do batos diti, “Iya' no o pawayaan do Kinorohingan do mamarakat do koinsanai'd tulun do hiti'd pomogunan,” ka. 9 Om notumbayaan i' i Abraham, om nabarakatan iddi iyau. Om iyo nogiddi o koinsanai di tulun dot otumbayaan, tu' abarakatan indo do miagal di Abraham. 10 Koinsanai di tulun di poinsondiu do Tourat om nangapapalan no. Tu' nokotulis no dot id suang do Buuk do Kinorohingan o poingkaa, “Iri nopo tulun dit a' otorodok do tumanud ngai' di nokotulis dot id suang di Tourat, om papalan nod Kinorohingan!” ka. 11 Iso' pod tulun nga' aiso' i' o nokoulud dot id Kinorohingan do tumanud di Tourat o ralan do minulud. Nokotuduk nori dot id suang do Buuk do Kinorohingan, “Iri no tulun dit otumbayaan do Kinorohingan do gisom do koulud kawagu iyau dot id Kinorohingan ot apasi!” ka. 12 Nga' iri nopo Tourat om okon i' ko' kotumbayaan o pinoimpahan. Nokotulis no dot id suang do Buuk do Kinorohingan dot iri nopo tulun di tumanud do toinsanan di Tourat, om iri no i Tourat diri o kapasi dau. 13 Nga' nokoidu' toko' nod Kristus do mantad id popol di Tourat diri. Om ralan nopo dau do minongidu'ddi nga' pinologos dau o tinan dau do nousung do suminowoli dati'. Tu' nokotulis no dot id suang do Buuk do Kinorohingan o poingkaa, “Nousung no o tulun di patayon do pogiison dot id kayu,” ka. 14 Om winonsoi pogi' di Kristus o miagal diri nga' papatahak po iyau di barakat di nakabatos do Kinorohingan dot id di Abraham dot id tulun dit okon ko' Yohudi. Om iri noddi o kaanu-anu toko' iyati', it otumbayaan do Kinorohingan, di Rusod di pinabatos do Kinorohingan diri.
I Tourat ko' i Batos do Kinorohingan
15 Oi tobpinai-tobpinai! Manganu oku'd poiyaan do mantad id kowoyo-woyoo' do pointikid do tadau. Ondung momonsoi o tulun do tumpongo om di nokogirot i tumpongo'ddi, om aiso' no o tiso' pod tulun do milo do pakaiso' di tumpongo'ddi, ko' momoruhang po di tumpongo. 16 Winonsoi do Kinorohingan i piro-piro o tumpongo dau dot id di Abraham. Om a' i' nokotulis dot id Buuk do Kinorohingan o poingkaa, “om id koinsanai di tulun do sinakagon di Abraham,” ka, do komoyon nopo nga' ogumu' o tulun. Iri nopo nokotulis om poingkaa, “om id tulun di sinakagon nu,” ka, do komoyon nopo om iso' no o tulun, iri no i Kristus. 17 Patarangon ku nopodti om: i batos do Kinorohingan di winonsoi dau om i pinogirot mantad dau di gulu po. Om a' no katanus di batos ko' koidu' po di batos do Kinorohingan i Tourat, i pinatahak dit 430 o toun dot id tohuri ko' iri. 18 Tu' ondung i Tourat o pinoimpahan di nipuhawang do Kinorohingan, om okon noddi ko' i nipuhawang di pinabatos i nipuhawang diri. Tu' pinatahak pogi' do Kinorohingan dot id di Abraham iri, nga' nakabatos no dau do patahakon dau iri dot id di Abraham. 19 Ondung iyo'ddi, om nunu po o kinapatahakan di Tourat? Ponimbar nopodti om pinoruhang pogi' i Tourat nga' popointalang do kasalaan do tulun. Iri nopo Tourat om tonudon no do gisom do korikot i songulun o sinakagon di Abraham, i noroitan dot id batos do Kinorohingan dot id di Abraham diri. Iri nopo Tourat diri om moloikat i' o pinoporomut dot id iso' o tulun di popolombus nondoddi dot id tulun do suwai. 20 Haro po o duwo o tulun om minog nogi' do haro o momiolitan. Nga' Kinorohingan nopo om a' i' minog do haro o momiolitan, tu' pimpori-porianai nopo dau do momonsoi i wonsoyon dau.
Kogunaan di Tourat
21 Iyo nopoddi, om misaap tuu o Tourat om i batos do Kinorohingan? Atantu' nod a' i'! Tu' ondung momuhawang do tulun do koposion o kinapatahakan di toturan do tugama', om milo no o tulun do mulud kawagu dot id Kinorohingan dot i toturan do tugama' o popoulud. 22 Nga' id suang nopod Buuk do Kinorohingan om nokotulis no dot oinsanan nopo o tulun do porintaon do dusa. Iyo nopoddi, om iri nopo nipuhawang di pinabatos diri, om patahakon no dot id tulun dit otumbayaan, dot i kotumbayaan diyolo' dot id di Yesus Kristus o kapatahakan. 23 Di nopo dit a' po norikot i maso do tulun do monongkuyaan di Kristus, om giniil toko' di Tourat; om iyo pod nuung toko' do gisom do nokorikot i maso do nokointalang i kotumbayaan. 24 Om iyo noddi o Tourat do nosiliu'd madtatamong dati' do gisom do nokorikot o Kristus do pinopoulud kawagu dati' dot id Kinorohingan, di notumbayaan toko' di Kristus. 25 Om baino' nopoddi, tu' norikot o maso do milo o tulun dot otumbayaan di Kristus, om a' toko' noddi pitamangan di Tourat. 26 Nokoiso' kou no dot id Kristus Yesus tu' notumbayaan kou i' dau; om nosiliu kou noddi do tangaanak do Kinorohingan. 27 Nobotisan ngai' kou no dot id suang do ngaran di Kristus, om naramit no dokoyu i kowoyo-woyoo' do Kristus dot id suang do koposi-posion dokoyu. 28 Om aiso' noddi o pisuayan do tulun do Yohudi om i tulun dot okon ko' Yohudi, om aiso' o pisuayan di turipon om it okon ko' turipon, om aiso' o pisuayan do kusai om tondu'. Kopogiiso' ngai' kou noddi tu' nokoiso' kou no dot id Kristus Yesus. 29 Ondung Kristus o sanganu dokoyu, om sinakagon kou no kopio di Abraham. Om aanu nondo dokoyu i pinabatos do Kinorohingan diri.
1-2 Nga' poingodon ku po kopio: do solinaid nopo dot a' po osukup o tumur di tanak di tumungkus di dapu', om haro i' o tulun do miontong dau om mongilo-ilo di dapu' dau do gisom pod orikot i tumur di tanak diri di natantu' mantad di tapa' dau do kaanu i tanak. Om tontok nopoddi om maso po dau do poiyoon do turipon, do mulong piya daa dot iyau kopio o sanganu do koinsanai di dapu'ddi. 3 Iyati' nga' iyo nogiddi: Di nopo dit a' toko' po nokotuo dot id suang di don rusod om nosiliu toko' do turipon di rusod di momorinta' do pomogunan diti. 4 Nga' korikot poddi i maso di natantu' mantad, om porikoto' nod Kinorohingan i Tanak dau do hiti'd pomogunan. Iri nopo Tanak dau'ddi nga' pinogkosusu do songulun o tondu', om guminayo dot id siriba' di Tourat. 5 Om iyo noddi iyau do pinopoidu' di tulun di poimpasi dot id siriba' di Tourat; om osiliu toko' indo iyati' do tangaanak do Kinorohingan. 6 Om suhuo' noddi do Kinorohingan i Rusod di Tanak dau do sumuang dot id ginawo dokoyu om id ginawo ku iyoho', tu' iyokoyu no o tangaanak do Kinorohingan. Sinuhu' nopo dau om i Rusod di millohou dot, “Apa', oi Apa' ku,” ka. 7 Iyo nopoddi, om okon kou noddi ko' turipon, suwai ko' tanak kou no. Om onuan kou nondod Kinorohingan do koinsanai di pinosodia' dau do patahakon di tangaanak dau.
Tumongob i Paulus do Kosorou di Tulun do Galatia
8 Di nopo di gulu po om a' kou i' kotutun do Kinorohingan, om gowoi poddi om nosiliu kou'd turipon di piro-piro o kuasa' di roitan do ponokokinorohingan nga' okon i' ko' Kinorohingan kopio. 9 Baino' nopoddi om kotutun kou nod Kinorohingan, ko' otopot nopo kopio om notutunan kou nod Kinorohingan. Nga' nokuro'ddi tu' gumuli' kou po dot id rusod do pomogunan diti, it ongoluhoi om aiso' o pokukurayan? Nokuro tu' sumiliu kou pod turipon di rusod diri? 10 Popoinggayo kou do piro-piro o tadau di tinantu' mantad, om piro-piro tulan om piro-piro toun di tinantu' mantad. 11 Nga' ooris oku dot aiso' o kotutuk-tutukon di huyan ku do kuminaraja' dot id pogialatan dokoyu. 12 Oi tobpinai-tobpinai! Pokionuon ku no kopio do momit kou doho'. Tu' iyoho' nga' miniyo i' dokoyu. Om aiso' i' o tiso' do kasala' di winonsoi dokoyu dot id doho'. 13 Atantu' no dot osorou po dokoyu i nakaangayan ku koponusuyai di Habar dot Osonong diri dot id dokoyu di timpuun i'. Kinaangayan ku nopo om iri i suminakit oku. 14 Tontok nopoddi om a' kou i' sosomuan doho', do mulong piya do pogumbalan no daa'd agayo dot id dokoyu o kokitanan do tinan ku do tontok diri. Suwai ko' romito' oku nopo dokoyu dot iyo pod rumamit kou do moloikat do Kinorohingan ko' rumamit di Kristus Yesus. 15 Osimbayan tomod o ginawo dokoyu do tontok poddi. Nga' baino' noddi om honggo no i kosimbayanan do ginawo dokoyu'ddi? Oilaan ku i' do tontok nopoddi om uhang i' dokoyu dot irulon piya o dokoyu'd mato do maan daa patahako' doho'; do milo daa do wonsoyon o miagal diri. 16 Sorohon oku no tuu'ddi dokoyu do pisangod do baino', do pinoboros ku dokoyu it otopot? 17 Aparu' tomod daa i tulun do suwai do mogihum dokoyu, nga' a' i' osonong o kopogihuman diyolo' dokoyu. Orohian no iyolo' do mamaraag do kouludan dokoyu dot id dahai, om orohian do minsimparu' kou do tumanud diyolo'. 18 Atantu' no dot osonong i' kopio do minsimparu' do momonsoi dit osonong, do momonsoi po kasai' dot iyo'ddi, om okon i' ko' tontok no di poinsugku' oku dokoyu do momonsoi do miagal diri. 19 Oi tangaanak ku di kosianan ku! Iyokoyu i' o koinggorit doho'dti do dinondo. Iyo oku pod tondu' dit oinggorit do tontok do mogkosusu om oinggorit oku po kasai', ondung a' po kogirot kopio o kowoyo-woyoo' do Kristus dot id suang do koposi-posion dokoyu! 20 Langadon oku no daa do poinsugku' dokoyu do dinondo, om suwai i' daa'ndo o poboroson ku dokoyu, tu' a' oku no koilo ondung poingkuro poo o wonsoyon ku dot id dokoyu!
I Hagar om i Sara o Poiyaan
21 Pokinongou kou bo doho', iyokoyu it orohian do poimpasi dot id suang do kuasa' di Tourat! Om sunudan ku i' iyokoyu ondung poingkuro kopio i nokotulis dot id suang do Tourat di Musa. 22 Nokotulis do hiri do duwo o tanak di Abraham: Tina' nopo di tiso' di tanak om turipon, om tina' no di tiso' di tanak om okon ko' turipon. 23 Iri nopo tanak di tondu' di turipon diri om koubasanan i' o kinosusu-susuan tu' mantad i' do korohian do tulun. Nga' iri nopo tanak di tondu' dit okon ko' turipon diri om mantad i' do batos do Kinorohingan o kinosusu-susuan. 24 Iti nopo om milo i' do maan do poiyaan. Iri nopo duwo o tondu'ddi om poiyaan do duwo o tumpongo: iri nopo tiso' om mantad hilo'd Nuluhon do Sinai --- om i Hagar nori; om iri nopo tanak dau om nosusu dot id suang do ponguripanan. 25 Om i Hagar nopoddi om i Nuluhon do Sinai, i hilo'd pomogunan dot Arab. Om iyau no o poiyaan di bandar do Yorusalim om koinsanai di tulun do hilo' di nongosiliu do turipon do dinondo. 26 Nga' iri nopo Yorusalim di hilo'd surga om okon i' ko' turipon, om iri no o tina' toko'. 27 Tu' nokotulis no dot id suang do Buuk do Kinorohingan o poingkaa, “Kotood no, oi tondu' dot a' maganak, om it a' insan pogkosusu! Kumotood no om mimpangkis no dot atataadan, iya' it a' insan koumbal do monohoruol do mogkosusu! Tu' ogumu' nogindo o tanak di tondu' di niduan di sawo dau ko' i tondu' di poinsugku' di sawo dau,” ka. 28 Oi tobpinai-tobpinai! Iyokoyu nga' tangaanak i' do Kinorohingan di pinogkosusu do mantad di batos do Kinorohingan; iyo kou nopo kopio di Isak. 29 Tontok nopoddi om i tanak di nosusu do mantad id korohian do tulun o monginggorit di tanak di nosusu do mantad id korohian do Rusod do Kinorohingan. Om dinondo piya nga' iyo iddi. 30 Nga' poingkuro toi o nokotulis dot id suang do Buuk do Kinorohingan? Poingkaa o nokotulis do hiri, “Uyungo' no i tondu' do turipon diri do miwoyo' di tanak dau, tu' a' i' i tanak di tondu' do turipon diri kotungkus do dapu' do miagal di tanak di tondu' dot okon ko' turipon,” ka. 31 Iyo nopoddi, oi tobpinai-tobpinai, om iyati' nopo om okon i' ko' tangaanak do tondu' di turipon; iyati' nopo om tangaanak i' do tondu' dit okon ko' turipon.
Gompion no i Kinolobusan do Mantad id Ponguripanan
1 Nakalabus toko' noddi do baino', om okon toko' no ko' turipon, tu' pinalabus toko' di Kristus! Iyo nopoddi, om gompion no dokoyu i kinolobusan dokoyu do mantad id ponguripanan, om kada' kou siliu kawagu do turipon. 2 Soroho' no dokoyu, dot ondung mokisunat kou, om komoyon nopoddi nga' aiso' i' o guna' do Kristus dot id dokoyu. Iyoho' kopio, i Paulus, o momoros do miagal diti. 3 Om poinsanon ku po kawagu i tulun di mokisunat, dot a' no milo'd a' dau tonudon ngai' i Tourat! 4 Ondung tumotos kou do mulud kawagu dot id Kinorohingan dot i Tourat o ralan do mulud, om komoyon nopoddi nga' nokotongkiad kou no do mantad id Kristus. Iyo nopoddi om posoliwan no do kosianan do Kinorohingan o koposi-posion dokoyu. 5 Nga' iyahai nopo, om mogondos nopo iyahai di Rusod do Kinorohingan di monguhup dahai, i kogirot do ginawo dahai dot i kotumbayaan dahai dot id Kristus, do pouludon iyahai do Kinorohingan dot id dau. 6 Tu' ondung nokoiso' toko' dot id Kristus Yesus, om a' no sumiliu'd kosusaan, do tumanud tuu' ko' a' tumanud di toturan do sunat. Agayo nopo om i monongkuyaan di Kristus, om kointalang i' iri dot id kosianan toko' do tulun do suwai. 7 Di nopo di gulu po om aparu' tomod kou i' do momonsoi dit otopot! Nga' baino' noddi om nokuro tu' a' kou noddi mumboyo' di korohian do Kinorohingan? Isai kopio o minamayayat dokoyu do minomonsoi do miagal diri? 8 Om atantu' no dot okon i' ko' Kinorohingan di minomolohou dokoyu o minomonsoi'ddi. 9 Boros kad tulun om, “Okuuri' o pangambang nga' kakambang i' di tapung,” ka. 10 Nga' iyo piya'ddi nga' monongkuyaan oku i' dot a' kou tumanud di kotumbayaan do suwai, tu' nokoiso' toko' no dot id Kristus. Om otumbayaan oku i' kopio dot isai nopo i minomorulong do pomusarahan dokoyu om hukuman nod Kinorohingan. 11 Pasal no doho', oi tobpinai-tobpinai, om nokuro tu' saapon kasai' oku ondung maso ku po do popinsusui dot apatut do tonudon i toturan do monunat? Ondung otopot daa do popinsusui oku do miagal diri, om a' i' daa poimbulai do poguhatan i popinsusuyon ku do pasal di salib do Kristus. 12 Osonong nogi' do tumilombus nopo kopio do sumoliwan do mantad id sidang i tulun di minomorulong do pomusarahan dokoyu! 13 Nolohou kou no do sumiliu'd tulun dit okon ko' uriponon. Nga' kada' i' dokoyu pakayo' i kosimbayano' dokoyu dot okon ko' turipon do tumilombus do momonsoi do nunu nopo i korohian dokoyu'd momonsoi, suwai ko' apatut nogi' do mogiinsian-sian kou, om mogiuhup-uhup kou. 14 Nokotimung ngai' no i Tourat dot id suang do ponuhuan diti tiso' noodti, “Mogiinsian-sian kou no do miagal dot osianan kou do dokoyu'd tinan,” ka. 15 Nga' ondung mogiumang kou om mogikokoruol do miagal di nintorusan dot orongit, om antaan-taan dokoyu, tu' kopogipapatai kou moti'.
Korohian di Rusod do Kinorohingan om Korohian do Tulun
16 Komoyon ku nopo om poingkaa: Tanud kou no di korohian di Rusod do Kinorohingan om kada' kou tanud di korohian do don tulun dot id suang do koposi-posion dokoyu. 17 Tu' korohian nopod tulun om misaap i' di korohian do Rusod do Kinorohingan, om iri korohian do Rusod do Kinorohingan nga' misaap i' di korohian do don tulun. Misaap i' iti duwo o korohian, om kaa pogi' dot a' kou milo do momonsoi di dokoyu'd korohian. 18 Nga' ondung i Rusod do Kinorohingan o momorinta' dokoyu, om a' kou no porintaon di Tourat. 19 Iri nopo korohian do don tulun om kointalang i' dot id suang do wowonsoyon diti: magampahu', om momonsoi di sosomu', om it a' apatut; 20 om tumuku' dot id tingolig om id toilaan do bobolian; om id pogisasangadan, om id pogitatagadan, om id kobimbioguho', om id kobintogodo', om i momusorou do dau nod korohian; om i mogipori-pori om aiso' o kouludan, 21 om i mogiosol-osol, om i magauk, om it adalaan o pogiginakan om suwai- suwai ko' iri. Om poinsanon ku po kawagu iyokoyu do dinondo, do miagal di pinopoinsan oku dokoyu di gulu po, dot iri nopo tulun di momonsoi do miagal diri om a' no kasanganu di Pomorintaan do Kinorohingan. 22 Nga' ondung porintaon o tulun di Rusod do Kinorohingan, om: Mogiinsian-sian iyolo', om ongotood, om mogiuulud, om alanut o ginawo, om osonong o kowoyo-woyoon, om osonong dot id tulun do suwai, om otorodok, 23 om osiriba' o ginawo, om kopusus kasai' do korohian do tinan. Aiso' i' o toturan do tugama' do mogodu do momonsoi do miagal diri. 24 Iri nopo tulun di nasanganu di Kristus Yesus, om napatai no diyolo' i kowoyo-woyoo' do don tulun om i korohian do don tinan om i korohian do don tulun. 25 Noonuan toko' no di Rusod do Kinorohingan do koposion di wagu; om kaa pogi'ddi dot iyau no ot apatut do momorinta' do koposi-posion toko'. 26 A' toko' i' koino-ino do minggayo-gayo, om mogikoruo-ruol do ginawo, ko' mogiosol-osol.
Mogiuhup-uhup
1 Oi tobpinai-tobpinai! Ondung haro o tulun dot oilaan do momonsoi'd dusa, om mositi' no do ngoyon dokoyu, iyokoyu i maso do tumanud di ponudukan di Rusod do Kinorohingan, potunudo' kawagu i tulun diri dot id ralan dit otopot. Nga' mositi' no dot alamaya' o koboro-boroso' dokoyu do popotunud dau, om antaan-taan dokoyu do kotonggoi kou iyokoyu dau. 2 Mogiuhup-uhup kou no do mamabo do binabo, om iri indo o katanud-tanud dokoyu di ponuhuan di Kristus. 3 Ondung haro o tulun do momusorou do poinggayo-gayo iyau, om a' i', om mongudut no o tulun diri dot id tinan dau. 4 Mositi' no do sompori-pori nopo o tulun do monorisid do kowoyo-woyoon dau, ondung osonong tuu ko' amu' po o kowoyo-woyoon dau. Ondung osonong om apatut i' iyau dot oondos. Nga' a' i' iyau apatut do patalad di kowoyo-woyoon dau di winonsoi'd tulun do suwai. 5 Tu' mositi' nod sompori-pori o tulun do mamabo di dau'd binabo. 6 Iri nopo tulun di rumamit do ponudukan do Kristus, om mositi' no do mamahagi' di minonuduk dau do koinsanai dit ongosonong dot id dau. 7 Kada' kou nogi' koudutai. Kinorohingan nopo om a' i' milo'd hingi-hingion! Tu' nunu nopo i potonomon, om iri no o tomoton. 8 Ondung patanom o tulun do tumanud di kowoyo-woyoon dau do don tulun, om kapatayon no o tomoton dau do mantad id kowoyo-woyoon dau do miagal diri. Nga' ondung patanom iyau do tumanud di ponudukan do Rusod do Kinorohingan, om mongomot no iyau do koposion dit otopot kopio om i poingompus do mantad id Rusod do Kinorohingan. 9 Iyo nopoddi, om kada' toko' nogi' kapaasai do momonsoi dit ongosonong, tu' ondung a' toko' tumingkod do momonsoi do miagal diri, om oomot toko' indo o tua'ddi do koimbagu. 10 Iyo nopoddi, om solinaid nopo do haro po o maso toko'; om mositi' no dot osonong o wonsoyon toko' dot id koinsanai'd tulun, om okon-okon po om id tobpinai toko' di sompi' ko' iso-iso' o kinotumbayaan.
Popoinsan om Podsusuwau
11 Podulon no kopio dokoyu o bohogian diti tulisan ku dot angagayo o tulis. 12 Iri nopo tulun dit orohian do popoinggayo-gayo di kowoyo-woyoo' do don tinan, om iyolo' no i mononsog dokoyu do tumanud di toturan do monunat. Nga' kapamansayan nopo diyolo'ddi om mada' no iyolo' dot oinggorit di tulun do Yohudi dot i salib di Kristus o koponginggoritan. 13 Iri piya tulun di tumanud do toturan do monunat nga' a' i' tumanud di Tourat. Nga' monuhu' i' iyolo' dokoyu do mokisunat, om milo indo diyolo' do pinggaya-gayaan do tuminanud kou di toturan diri. 14 Nga' iyoho' nopo om a' oku i' kopio popoinggayo-gayo do nunu nopo, do suwai ko' i Tuhan toko' i Yesus Kristus, i napatai dot id salib. Om iri no i kinapatayan dau do hiri'd salib o kinokuwaan dot aiso' noddi o nunu-nunu'd komoyon diti pomogunan dot id doho'. Om iyoho' nga' iyo pod napatai dot id korohian do dom pomogunan. 15 A' i' monguro do nosunatan piya ko' amu'. Tu' agayo nopo kopio o guna' om it osiliu do tulun do wagu. 16 Tulun nopo dit iyo'ddi o ponongkuyaanan, om id koinsanai'd tulun di songonuon do Kinorohingan, om mogondos oku nopod Kinorohingan do manahak diyolo' do kosimbayanan do ginawo om kosianan di mantad id dau. 17 Om kada' no daa'ndo do haro o tongoiso' pod tulun do monusa' kawagu doho', tu' haro no o kointalangan kopio do hiti'd tinan ku do tumatanud oku di Yesus. 18 Om pokionuon ku no o Tuhan toko', i Yesus Kristus do mamarakat kasai' dokoyu, oi tobpinai-tobpinai. Amin.
1 Kumaa id tulun di songonuon do Kinorohingan di hiti'd Iposus, it otorodok dot id Kristus Yesus! 2 Mogondos oku, iyoho' i Paulus, i nosiliu'd rasul do Kristus Yesus do tumanud do korohian do Kinorohingan, i Tapa' toko' om i Tuhan Yesus Kristus dot onuan kou do barakat dau om kosimbayanan do ginawo.
Barakat do Don Rusod do Patahakon di Kristus dot id Dati'
3 Royohon no o Kinorohingan, i Tapa' do Tuhan toko' i Yesus Kristus! Iyau no o minamarakat dati' do koinsanai di barakat do don rusod di mantad hilo'd surga, tu' nokoiso' toko' no dot id Kristus. 4 Tontok dit a' po nowonsoi iti pomogunan, om nopili' mantad toko' nod Kinorohingan dot id suang do Kristus. Om osiliu toko' i' kopio do dau'd songonuon, om aiso' o sala' dot id toguang dau. Tu' mantad no do kosianan do Kinorohingan, 5 do tinantu' mantad toko' dau do silihon do tangaanak dau dot id suang di Yesus Kristus. Om iri kopio o korohian dau'd momonsoi. 6 Royohon no o Kinorohingan i kikagayaan kopio, tu' id suang no di tanak dau di kosianan kopio dau do nosianan kopio iyau dati'. 7 Tu' iri no i kinapatayan do Kristus o kinopoiduan do Kinorohingan dati', komoyon nopoddi om noompunan no dau i dusa toko'. 8 Winonsoi pogi' dau o miagal diri nga' osianan kopio i' iyau dati', om poluyungo' no dau i kosianan dau dit a' ogina-gina' dot id dati' do mikuwo'd toilaan om komiloo' dau dit aralom kopio. 9 Om posunudo' noddi do Kinorohingan dot id dati' i natantu' mantad dau do wonsoyon dau, om it a' mantad daa dau pinosunud tu' iyo noddi o korohian dau. Om tinantu' dau do pongoon nondo i natantu' mantad dau do wonsoyon dot i Kristus o momongo'ddi. 10 Iri nopo i natantu' mantad dau'ddi do pongoon om iri no tu' popiiso' dot id Kristus do koinsanai di hilo'd surga om i hiti'd pomogunan, om Kristus no o sumiliu do boyoon. Om wonsoyon nondo do Kinorohingan iri dot orikot i maso dau do momonsoi. 11 Koinsanai'd nunu nopo om wonsoyon ngai' nopod Kinorohingan do tumanud di natantu' mantad dau om i korohian dau. Mantad poddi timpuun i' om nopili' mantad toko' nod Kinorohingan, tu' orohian i' iyau dot osiliu toko' do tulun di songonuon dau do koiso' toko' dot id Kristus. 12 Kainou no mamarayou'd Kinorohingan, iyati' i nokopogulu do mogondos do Kristus, dot i kagayaan do Kinorohingan o kapamarayahan. 13 Om iyokoyu nga' nosiliu nogi' do tulun di songonuon do Kinorohingan do tontok di nokorongou kou di boros do Kinorohingan, iri no i Habar dot Osonong, i manahak dokoyu do koposion. Om onuwai kou noddi do Kinorohingan do Rusod dau di pinabatos dau, do tanda' do songonuon kou dau, tu' otumbayaan kou i' di Yesus Kristus. 14 Om iri no i Rusod diri o pamajamin do kaanu toko' nondo di pinabatos mantad do Kinorohingan dot id tulun di songonuon dau. Om iri no i popogirot kopio do ginawo toko' do monongkuyaan do poiduwon indo do Kinorohingan i tulun di songonuon dau. Royohon no o Kinorohingan dot i kagayaan dau o kapamarayahan!
Sambayang di Paulus
15 Om mantad poddi di nokorongou oku do notumbayaan kou di Tuhan Yesus, om pasal di kosianan dokoyu dot id koinsanai do tulun di songonuon do Kinorohingan, 16 om a' oku nopoddi otingkod do mongunsikou dot id Kinorohingan dot iyokoyu o kopongunsikahan ku. Om roiton kasai' ku o ngaran dokoyu do tontok do sumambayang oku. 17 Om pokionuon ku o Kinorohingan di Tuhan toko' i Yesus Kristus, i Tapa' di kikagayaan do papatahak di Rusod dau dot id dokoyu. Om iri no i Rusod diri o manahak dokoyu do toilaan om popointalang do Kinorohingan dot id dokoyu do gisom do kotutun kopio kou dau. 18 Om pokionuon ku no dot ukaban do Kinorohingan o pomusarahan dokoyu om kokito kou i' di tanawau dau. Om kosuhut kou i' ondung nunu i soro-sorohon dokoyu'ddi do mantad id Kinorohingan i minomolohou dokoyu. Om koilo kou i' do barakat dit ongosonong kopio dit a' aayi-ayi' di pinosodia' do Kinorohingan do patahakon di tulun di songonuon dau; 19 om i kogoyoo' do kuasa'd Kinorohingan di kumaraja' dot id suang toko', iyati' i notumbayaan. Iri nopo i kuasa'd Kinorohingan diri nga' miagal di kogoyoo' do kuasa' dau, 20 di pinasi kawagu dau i Kristus do mantad id kapatayon. Om onuwai noddi do Kinorohingan iyau do pangkat dit asawat kopio do poinsugku' dau do hilo'd surga. 21 Iri nopo i pangkat do Kristus diri om asawat i' kopio ko' i pangkat do koinsanai'd pomorinta', om koinsanai di monguasa' om koinsanai di boyoon om koinsanai di woyo-woyoon om koinsanai di tulun dit ongkipangkat; dot iri tuu i poimpasi do maso'd baino' ko' iri po i poimpasi do maso'd tabantalan. 22 Om koinsanai'd nunu nopo nga' nokoinsiriba' ngai' no do Kinorohingan dot id kuasa' do Kristus om patahakon dau o Kristus dot id sidang do sumiliu'd boyoon do koinsanai do nunu nopo. 23 Iri no i sidang o tinan do Kristus, om iri nopo i momongo kopio'ddi om iyau i momongo do koinsanai do nunu nopo do hinonggo nopo.
Mantad id Kapatayon om Kumaa dot id Koposion
1 Iyokoyu nopo di gulu po om poimpatai o rusod tu' nokowonsoi kou i' do dusa om tuminolibamban kou do koinsanai dit oturan do Kinorohingan. 2 Tontok nopoddi om tuminanud kou di koubasanan do dom pomogunan. Komoyon nopoddi om tuminanud kou di monguasa' do hilo'd tawan, iri no i rusod di maso do momorinta' do ginawo di tulun dit a' mumboyo' do Kinorohingan. 3 Om iyati' di gulu po nga' iyo ngai' i' diyolo'; tu' tuminanud toko' di kowoyo-woyoo' toko' di don tulun om miningwonsoi toko' di korohian do tinan om i pomusorou toko'. Om iyati' nogi' nga' tulun i' di katagadan do Kinorohingan do tontok poddi, do miagal di tulun do suwai. 4 Nga' agayo no kopio o kosianan do Kinorohingan! Nosianan no kopio iyau dati', 5 gisom do pinasi kawagu toko' dau do pinotonggoi do Kristus, do tontok di poimpatai po o rusod toko' tu' tuminolibamban toko' i' dit oturan diri. Om iri po kopio kosianan do Kinorohingan o kinopomosian dau dokoyu. 6 Om pinasi toko' pogi' kawagu do Kinorohingan do pointonggoi do Kristus, nga' nokoiso' toko' no dot id Kristus Yesus. Om kopomorinta' toko' nondo do poinsugku' dau do hilo'd surga. 7 Winonsoi pogi' do Kinorohingan o miagal diri nga' popokito do tulun do kogoyoo' do kosianan do Kinorohingan do tontok do maso'd tabantalan. Iri nopo i kosianan diri om pinointalang do Kinorohingan tu' osonong i' iyau dot id dati' dot i Kristus Yesus o popointalang. 8-9 Om nosianan i' o Kinorohingan dokoyu, om iri no o kinopomosian dau dokoyu tu' notumbayaan kou i' di Yesus. Iri nopo koposion dokoyu'ddi om okon i' ko' mantad di winonsoi dokoyu. Iri nopo om nipuhawang id Kinorohingan. Iyo nopoddi om aiso' no o tiso' piya'd tulun do milo do minggayo-gayo do pasal diri. 10 Iyati' nopodti om winonsoi do Kinorohingan, om winonsoi toko' dau dot id suang di Kristus Yesus om momonsoi toko' indo dit ongosonong, i nokosodia' no dau do bagi' dati'.
Nokopogiiso' Tu' Pinogiiso' di Kristus
11 Oi tobpinai-tobpinai, iyokoyu it okon ko' tulun do Yohudi! Soroho' no dokoyu o kowoyo-woyoo' dokoyu di gulu po: Iyokoyu nopo om roitan do “tulun dit a' nosunatan”, dot i tulun do Yohudi di mangakun do nongosunatan o mamarait dokoyu do miagal diri. (Komoyon nopoddi om nakaanu do tanda' di winonsoi do tulun dot id tinan diyolo'.) 12 Tontok nopoddi om a' kou po nokoiso' dot id Kristus, om tulun kou pod suwai, it a' nokohompit do tulun di nopili' do Kinorohingan. Om a' kou i' nokosuang di tumpongo di winonsoi'd Kinorohingan dot id tulun di songonuon dau. Om poimpasi kou do hiti'd pomogunan diti dot aiso' o pagandasan om aiso' o Kinorohingan dokoyu. 13 Nga' iyokoyu'ddi it osodu' di gulu po, nga' nokoinsomok noddi do baino' dot i kinapatayon do Kristus o pinopoinsomok. Tu' nokoiso' kou no dot id Kristus Yesus. 14 Kristus no o pinopiulud dati'. Iyau no o pinopiiso' di tulun do Yohudi om it okon ko' tulun do Yohudi do sumiliu dot iso' poo o bansa'. Om iri i tolig di pinopitongkiad diyolo', iri no i pisangadan nga' naraag no di Kristus do tontok di pinatahak dau o tinan dau do maan patayo'. 15 I Tourat om i ponuhuan om i kaadat-adato' diyolo' nga' natanus ngai' no di Kristus, om osiliu i' i duwo o bansa'ddi dot iso' poo o bansa' do tulun do wagu di nokoiso' dot id Kristus. Om iyo noddi o Kristus do pinopiulud. 16 Om iri no i kinapatayon do Kristus do hiri'd salib o pinopiiso' di duwo o bansa'ddi, om pinopoulud diyolo' dot id Kinorohingan gisom do katanus nopoddi i pisangadan diri. 17 Om iri noddi o kinorikatan do Kristus do mongoi poposusui do Habar dot Osonong do pasal do kopiuludan dot id dokoyu, iyokoyu i tulun dot okon ko' Yohudi, it osodu' do Kinorohingan di gulu po, om i tulun do Yohudi dit osomok do Kinorohingan. 18 Om Kristus no o minomialatan dati' ngai' --- i tulun do Yohudi om it okon ko' Yohudi --- do gisom do nokoinsomok di Tapa' dot i Rusod do Kinorohingan dit iso' noo o pinopoinsomok dati'. 19 Iyo nopoddi, om iyokoyu i tulun dot okon ko' Yohudi nga' a' noddi poinghompit do tulun do suwai ko' sompogunan po. Baino' nopoddi om oiyo toko' no do tulun di songonuon do Kinorohingan. Om id suang kou do sompiiyon do Kinorohingan. 20 Om iyokoyu nga' winaal i' do pinoimpou dot id piro-piro o rasul om i piro-piro nabi, dot i Yesus Kristus o watu di pinomogirot. 21 Om iyau no o pinopogituma-tuma' do koinsanai di waalon diri gisom do nosiliu do Walai'd Sasambayangan dot Agayo di don Tuhan kopio'd songonuon. 22 Om iyokoyu nga' maso nogi' do waalon do miwoyo' di tulun do suwai do silihon do walai'd Kinorohingan, tu' nokoiso' kou no dot id Kristus. Om hiri no o Kinorohingan do miyon do miwoyo' di Rusod dau.
Karaja' di Paulus do Bagi' di Tulun dit Okon Ko' Yohudi
1 Iri no o nokogiil-giilan ku iyoho', i Paulus, dot i Yesus Kristus o kinopogiilan do maan do koinsanangan dokoyu it okon ko' tulun do Yohudi. 2 Atantu' no do nokorongou kou i' do nonuan oku'd Kinorohingan do karaja' diti tu' i kosonongo' dau o kinapanahakan dau diti do maan do koinsanangan dokoyu. 3 Pinointalang do Kinorohingan i natantu' mantad dau do wonsoyon dau dit a' daa dau pinosunud dot id tulun, nga' pinosunud iddi dau dot id doho'. (Om nokoponulis oku no do pasal diri dot oniiba', 4 om ondung mambasa' kou'dti om kosuhut kou i' do pasal do Kristus dit a' daa pinoilaan mantad, do miagal doho' tu' nokosuhut.) 5 Iri nopo it a' mantad daa pinoilaan diri di gulu po om a' i' insan posunudo' dot id tulun. Nga' baino' nopoddi om nokointalang ngai' no di Rusod do Kinorohingan iri dot id piro-piro o rasul om id piro-piro o nabi dau. 6 Iri nopo it a' mantad daa pinoilaan diri om iti no: i mantad id Habar dot Osonong diri o kinoonu-onuan do tulun dit okon ko' Yohudi do barakat do Kinorohingan di pinosodia' no daa do patahakon di tulun do Yohudi di gulu po. Om iri'ddi i tulun dot okon ko' Yohudi nga' nosiliu no do pakakas do tinan dit iso' noo. Om kaanu di pinabatos do Kinorohingan dot id suang di Kristus Yesus. 7 Nonuan oku'd Kinorohingan do nipuhawang --- iri no i karaja' do popinsusui di Habar dot Osonong. Naanu ku i nipuhawang diri do pinawaya' di kuasa' do Kinorohingan i kumaraja' dot id suang ku. 8 Iyoho' no it aiso' kopio o ngaran-ngaran dot id pogialatan do koinsanai'd tulun di songonuon do Kinorohingan. Nga' mulong po do miagal diri nga' nonuan oku id Kinorohingan do nipuhawang diti: i karaja' do popinsusui di Habar dot Osonong do pasal do kakayaan do Kristus dit aiso' o kooyion, dot id tulun dit okon ko' Yohudi; 9 om koilo indo o koinsanai'd tulun dot iyoho' o koilaan, do kowoyo-woyoo' do Kinorohingan i minomonsoi do pomogunan om koinsanai do nunu nopo, do popowonsoi di natantu' mantad dau do wonsoyon dau dit a' daa mantad pinointalang do hiti'd pomogunan do mantad di gulu po. 10 Kinopongiyo'ddian nopod Kinorohingan diri om iri nondo i sidang o popoilo do baino' dot id koinsanai do pomorinta' do hilo'd tawan do komiloo' do Kinorohingan di mogisuwai-suwai o kowoyoon. 11 Om winonsoi do Kinorohingan iri dot id suang di Kristus Yesus i Tuhan toko' do tumanud di natantu' mantad dau do wonsoyon dau dit aiso' o kopupuson. 12 Om aiso' noddi o kaantob dati' do minsomok do Kinorohingan do mikuwo'd otumbayaan kopio, tu' notumbayaan toko' no di Kristus om nokoiso' toko' dot id dau. 13 Iyo nopoddi, om pokionuon ku dot a' kou atangkabo diti koinggoritan ku dot iyokoyu o koponginggoritan, tu' koinsanai'dti om koinsanangan i' dokoyu.
Kosianan do Kristus
14 Om iri no o kootudan ku dot id toguang do Tapa'. 15 Om iyau no o koonuan do koinsanai dit ongkipinuhobo di hilo'd surga om i hiti'd pomogunan do pinuhobo diyolo'. 16 Om pokionuon ku no dot id Kinorohingan i kikagayaan do popogirot do ginawo dokoyu dot i Rusod dau o popogirot. 17 Om miyon i' o Kristus dot id ginawo dokoyu tu' notumbayaan kou i' dau, om poingimpou i' do kosianan o koposi-posion dokoyu, om oporinta' do kosianan. 18 Om pokionuon ku dot id suang do sambayang ku, om kosuhut kou i' kopio om i koinsanai di tulun di songonuon do Kinorohingan do kalaabo' om konoruo' om kasawato' om korolomo' do kosianan do Kristus, 19 it a' i' kopio milo dot osuhutan do pomusarahan do tulun. Om kosuhut kou i' di kosianan do Kristus diri, om oponu' kou indo do koinsanai di kowoyo-woyoo' do Kinorohingan. 20 Tu' iri no i kuasa' do Kinorohingan di kumaraja' dot aiso' o kotingkadan dot id suang toko' o pawayaan do Kinorohingan do momonsoi dot ogumu' po ko' mantad di nopokianu ko' i nosorou toko'. 21 Om Kinorohingan no ot apatut do poinggoyoon dot id suang do sidang do gisom do mogisolusuk-lusuk o sinakagon, dot id suang do Kristus Yesus. Royohon no o Kinorohingan do gisom do poingompus! Amin.
Koisaan do Tinan
1 Om iri noddi o koponuhuan kopio ku dokoyu --- iyoho' i nokogiil, dot i momonsoi'd karaja' do Tuhan o nokogiilan --- do poingkaa: Koposi-posion nopo dokoyu om mositi' no do miontok di kowoyo-woyoon di tulun di nolohou do Kinorohingan. 2 Om mositi' no dot osiriba' o ginawo dokoyu om alamaya' kou om alanut o ginawo. Om pointalangon no o kosianan dokoyu dot i mogiuhup-uhup kou o kointalangan. 3 Om tumotos no kopio do monokiulud, om ogompi' i' o kopiisaan di pinatahak do Rusod do Kinorohingan. 4 Iso' noo o tinan, om iso' o Rusod. Om iyo kou nogiddi tu' nolohou kou dot id iso' noo o pagandasan. 5 Iso' noo o Tuhan, om iso' o kotumbayaan om iso' o botisan, 6 om iso' o Kinorohingan i nosiliu do Tapa' do koinsanai'd tulun. Om iyau no o Tuhan do koinsanai do nunu nopo, om iyau i kumaraja' dot id suang do koinsanai'ddi, om i kikuasa' dot id suang do koinsanai'ddi. 7 Om nakaanu ngai' toko' no do nipuhawang do tumanud di pinatahak do Kristus. 8 Tu' nokotulis no dot id Buuk do Kinorohingan o poingkaa, “Tontok di mininsawat iyau do kuminaa do hilo'd kinoiyonon dit asawat kopio, om minononggoi iyau dot ogumu' o tulun di naanu dau, om papatahak iyau dot ogumu' o nipuhawang dot id tulun,” ka. 9 Ondung noboros do “mininsawat iya”, om komoyon nopoddi nga' nokolintuhun no iyau do hiti'd kinoiyonon dit osiriba' kopio do hiti'd pomogunan diti di gulu po. 10 Om iyau no i luminintuhun diri om mininsawat do hilo'd kinoiyonon dit asawat po kopio ko' mantad do koinsanai do tawan, gisom dot oponu' nopo do kagayaan di koropohon dau o pointongkop diti pomogunan. 11 Om iyau no o “minomuhawang do tulun do nipuhawang dot ogumu'”; i pinili' dau do sumiliu'd rasul o wookon, om iri no suwai om siniliu do nabi, om popinsusui do Habar dot Osonong o wookon. Om iri no suwai om siniliu dau do gomponuduk om gompomogompi' do sidang. 12 Winonsoi pogi' dau o miagal diri nga' poposodia' do koinsanai'd tulun di songonuon do Kinorohingan do momonsoi do karaja' do don Tuhan, om mamaal do tinan do Kristus. 13 Om osiliu toko' indo dot iso-iso' dot it iso-iso' o kinotumbayaan om it iso-iso' o nosuhutan toko' do pasal do Tanak do Kinorohingan o pinopiiso' dati'. Om osiliu toko' indo do tulun dit ongoilo. Om maid-laid nga' miyo-iyo o kowoyo-woyoo' toko' di kowoyo-woyoo' di Kristus. 14 Om a' toko' nondo miagal di tangaanak di kopiwoyo-woyo' om it opitanggai-tanggayan di tumbak di ponudukan di mogisuayan, i potudukon di tulun di goudut. Om mamalid iyolo' do tulun dot i toilaan diyolo' o mamalid diyolo'. 15 Nga' mositi' no do pointalangon toko' nogi' ot ongotopot do mikuwo'd ginawo di poimponu'd kosianan, om maid-laid nga' miyo-iyo toko' nondo di Kristus dot id suang do koinsanai do nunu nopo. Om Kristus no o nosiliu do boyoon toko', 16 om mantad no di pomomoyo' dau do kopogituma-tuma' o koinsanai di pakakas do tinan, om kopogiromu-romut di langaban o pointikid-tikid di pakakas. Om ondung kumaraja' i pointikid-tikid di pakakas diri do tumanud dit apatut diyolo'd wonsoyon, om oinsanan nondo i tinan diri do sumuni do gisom do kagayo om kokoris dot id suang do kosianan.
Koposion do Wagu dot id Suang do Kristus
17 Iyo nopoddi, om iti no o poboroson ku om poingodon kopio ku dot id dokoyu dot id suang do ngaran do Tuhan: kada' kou nondo pomonsoi do miagal di wonsoyon di tulun dit a' kotutun do Kinorohingan, i momusorou dit aiso' o kootuk-otukon. 18 Om otuong o pomusarahan diyolo'. Om a' i' iyolo' koilo di koposion di pinatahak do Kinorohingan tu' aiso' no kopio o toila-ilaan diyolo' do pasal do Kinorohingan. Iyo pogiddi iyolo' nga' okodou no kopio o ginawo diyolo'. 19 Om a' noddi iyolo' kopuriman dot ointingayaman gisom do wonsoyon ngai' nopo diyolo' o koinsanai di korohian do tinan diyolo', om magampahu' nopo iyolo' do tumanud di korohian diyolo'. 20 Nga' i Yesus Kristus nopo i notutunan dokoyu'ddi, om a' i' miagal diri! 21 Om nokorongou kou no do pasal dau; om notudukan kou nogi' iyokoyu i tumatanud dau do pasal do kowoyo-woyoon do Kinorohingan di kointalang dot id di Yesus! 22 Iyo nopoddi, om tongkiadai no dokoyu i kowoyo-woyoo' do tulun di laid, i momungou dokoyu do musui di kowoyo-woyoo' dokoyu di gulu --- i maso do raagon di kongorohian di kapalid. 23 Om mositi' no do poinwoguon ngai' o ginawo om pomusarahan dokoyu. 24 Om tumanud kou no di kowoyo-woyoo' di tulun di wagu, i pinoiyo do kowoyo-woyoo' do Kinorohingan; iri no i kowoyo-woyoo' dit otopot om it otulid om it olidang. 25 Iyo nopoddi, oi tobpinai ngai' ku, om kada' kou nondo pongudut. Om poboroson no it otopot dot id tulun do suwai, tu' iyati' nopodti om pakakas ngai' i' do tinan do Kristus. 26 Om ondung otogod kou, om kada' pologoso' i kototogod diri do kobungou dokoyu do momonsoi'd dusa. Om kada' kou kotogod do gisom dot asadapan. 27 Om a' i' oonuan o Rogon do ralan do momonsoi di dau'd korohian. 28 Om i tulun dit oubas do manakau nga' mositi' no do tumingkod do manakau. Om tumotos nogi' do kumaraja' om otulid no o ralan do koonu-onuan dau do kaakan-akanan dau, om koponulung indo iyau di tulun di kikokurangan. 29 Ondung moro-boros kou, om kada' kou pimboros di boros di sosomu'. Poboroson nopo i boros di kogirot do ginawo om i kotulung do tulun do suwai. Om boros nopo do miagal diri om popoinsonong i' di tulun di korongou'ddi. 30 Om kada' kou popotongob do Rusod do Kinorohingan. Tu' nasaapan kou no di Rusod do tanda' do nosiliu kou do songonuon do Kinorohingan. Om iri nogi' i Rusod diri o mamajamin do rumikot indo dot id dokoyu i Tadau di Kopoiduan. 31 Tonuson no o koinsanai di kopurimanan dit araatan om i sisuli' om it otogod. Om kada' kou nondo pimbalangas om kada' pimpopol, om kada' kou'd haro o kopurimanan dit araatan om i kopurimanan do suwai di miagal diri. 32 Suwai ko' miinsian-sian kou no om kumosonong kou no dot id tulun do suwai, om mogiampun-ampun kou no do miagal do Kinorohingan tu' minangampun dokoyu dot i Kristus o minangampun.
Poimpasi dot id Suang do Tanawau
1 Iyokoyu nopo om tangaanak kou no do Kinorohingan di kosianan dau, iyo nopoddi om tumotos kou no do momit do kowoyo-woyoon do Kinorohingan. 2 Om pokiporintaan no do kosianan ino koposi-posion dokoyu, do miagal do Kristus tu' nosianan dati'. Om pinatahak dau o tinan dau do gisom do napatai dot iyati' o kinapatahakan, do sumiliu do porsombahan dit osonong o wongi' om i kohubayaan kopio do Kinorohingan. 3 Om nosiliu kou no do tulun di songonuon do Kinorohingan, iyo nopoddi om iri nopo i wowonsoyon di sosomu' om it a' apatut, om i tamaha' om a' no kopio apatut iri do wonsoyon dot id pogialatan dokoyu. Om aiso' i' o paantakan do tulun do suwai do mamarait do momonsoi kou do miagal diri. 4 Om a' kou nogi' apatut do mimboros di sosomu', om i kagait do tampahu' om it a' apatut, suwai ko' mongunsikou kou nogi' do Kinorohingan. 5 Ilaai no dokoyu: do tulun nopo do magampahu' om it a' apatut o kowoyo-woyoon om i tamaha' (om kowoyo-woyoon nopo do miagal diri, om miagal nopo do tumuku' dot id tingolig) om tulun nopo do miagal diri om a' i' kaanu'd bahagi' do hiri'd Pomorintaan do Kristus om Kinorohingan. 6 Om kada' kou kaakalai di boboroson dit aiso' o suang. Tu' iri no o popotogod do Kinorohingan dot id tulun dit a' mumboyo' dau. 7 Iyo nopoddi, om kada' kou no kopio ongoi sokodung do tulun do miagal diri. 8 Iyokoyu di gulu po nga' hiri id suang do totuong. Nga' baino' nopoddi om hiri kou noddid suang do tanawau, tu' nosiliu kou no do tulun di songonuon do Tuhan. Iyo nopoddi, om mositi' no do poimpasi kou dot id suang do tanawau. 9 Tu' iri no i tanawau'ddi o tadon do koinsanai do wonsoyon dit ongosonong om it otulid om it otopot dot id pagantangan do Kinorohingan. 10 Om tumotos kou no do mongilo ondung nunu i kohubayaan do Tuhan. 11 Om kada' kou no pomonsoi di wowonsoyon dit aiso' o kotutuk-tutukon, i wowonsoyon di tulun di poimpasi dot id suang do totuong. Suwai ko' poimbulayon ngai' no dokoyu i wonsoyon do miagal diri dot id tanawau. 12 (Tu' mamarait piya toomod di lisokon diyolo' do momonsoi nga' kointingayam i'.) 13 Koinsanai di pointalangon dot id tanawau, om okito nondo kopio iri. 14 Tu' koinsanai dit okito kopio om iri no o tanawau. Om iri noddi o nokoboro-boros do poingkaa, “Posik no, iya' i koodop, om tungag no do mantad id kapatayon! Om kotitiu indo o Kristus dot id diya',” ka. 15 Iyo nopoddi, om sorisidon no kopio o kowoyo-woyoo' do koposi-posion nu. Om kada' kou omit di kowoyo-woyoo' do tulun di basug. Suwai ko' omit kou no di kowoyo-woyoo' di tulun dit oilo. 16 Om pakayon no kopio dokoyu kosonong-sonong o maso dokoyu tu' maso nopodti om maso dot araat. 17 Om kada' kou no kopio kabasug, suwai ko' ilaan no dokoyu ondung nunu i korohian do Tuhan do wonsoyon dokoyu. 18 Om kada' kou pagawuk do waig dot anggur, dot iri nopo om karaag i' dokoyu; suwai ko' mokiporinta' kasai' kou nogi' do Rusod do Kinorohingan. 19 Pakayon no dokoyu i boros do mantad id sinding, om i mantad id sinding di pamarayou'd Tuhan, om i sinding di don rusod, do tontok do mogiboro-boros kou. Om modsinding kou no do mamarayou'd Tuhan do mikuwo'd otood o ginawo. 20 Om mongunsikou kasai' kou no do koinsanai do nunu nopo dot id Kinorohingan i Tapa', dot id suang do ngaran di Yesus Kristus, i Tuhan toko'.
Kowoyo-woyoon do Misasawo
21 Piinsiriba-riba' kou no, tu' iri no o pomusou dokoyu do Kristus. 22 Oi tondu', insiriba' no dot id sawo nu, do miagal do minsiriba' ko dot id Tuhan. 23 Tu' iri no kusai o boyoon di sawo dau, do miagal do Kristus tu' boyoon do sidang. Om Kristus no o Raja' do Gampamasi do sidang i nosiliu do tinan dau. 24 Poingkuro nopo i sidang do minsiriba' dot id Kristus, om iyo nogiddi i tondu' tu' mositi' no do minsiriba' dot id sawo dau dot id suang do nunu nopo. 25 Oi kusai, kosianai no di sawo nu, do miagal do Kristus tu' nosianan do sidang om pinatahak dau o tinan dau do gisom do napatai, dot i sidang o kinapatahakan. 26 Winonsoi pogi' do Kristus o miagal diri nga' pomolihung dau di sidang diri, dot i ponudukan dau om i botisan dot id waig o pomolihung, om milo indo dau do patahakon i sidang diri dot id Kinorohingan. 27 Om iyo noddi o Kristus do pinopoingkakat di sidang diri do mikuwo'd kikagayaan om olidang dot id toguang dau om aiso' o bohi-bohiton om aiso' o kabara-barasan do nunu nopo. 28 Om iyo nogiddi i kusai tu' mositi' no dot osianan di sawo dau do miagal dot osianan iyau do dau'd tinan. Kusai nopo dit osianan do sawo dau om osianan no iyau do dau'd tinan. 29 (Aiso' i' o tulun do nokoumbal dot araatan do dau'd tinan. Suwai ko' pigompian i' dau om antaan-taan dau o tinan dau do miagal do Kristus do momogompi' di sidang dau. 30 Om oilaan toko' i' iri, tu' pakakas toko' i' do tinan do Kristus.) 31 Nokotulis no dot id Buuk do Kinorohingan o poingkaa, “Iyo nopoddi, om tumongkiad nondo i kusai di tapa' om tina' dau om sumugku' nondo iyau di sawo dau, om osiliu i' iyolo' dot iso-iso',” ka. 32 Iri nopo it ayat diri om aralom i' kopio o komoyon. Om poiyoon ku nopo iri do piuludan do Kristus om i sidang. 33 Nga' it ayat diri nga' milo i' dot iyokoyu kopio o komoyon: Mositi' no dot osianan o pointikid-tikid do kusai di sawo dau do miagal dot osianan do dau'd tinan. Om pointikid-tikid do tondu' nga' mositi' no do tumotos do momusou di sawo dau.
Tangaanak om Molohing
1 Oi tangaanak! Umboyo' kou no do boros do molohing dokoyu, tu' iri no ot apatut do wonsoyon dokoyu i tumatanud do Kristus. 2 “Pusohon no o tapa' om tina' nu,” ka di ponuhuan do Kinorohingan dit id gulu kopio do noputan do batos do poingkaa, 3 “Om osimbayan ko i' om otogui ko do hiti'd pomogunan,” ka. 4 Oi tobpinai-tobpinai, i tapa' di tangaanak! Kada' dokoyu wonsoyo' dot id tangaanak dokoyu o nunu nopo i popotogod diyolo'. Suwai ko' tudukan no iyolo' di kowoyo-woyoon dit osonong om i ponudukan di don Tuhan.
I Turipon om i Tuan Dau
5 Oi tobpinai-tobpinai i nosiliu do turipon! Wonsoyon no i ponuhuan di tuan nu di hiti'd pomogunan. Om wonsoyon nori do mikuwo'd momusou om mumboyo' om aayi-ayi' o ginawo do momonsoi, do sorohon nopo do wonsoyon dokoyu iri dot id Kristus. 6 Tu' okon i' ko' tontok no di piantangan kou do momonsoi kou do miagal diri, do mokimarayou-rayou nod tulun o kapamansayan. Suwai ko' wonsoyon no dokoyu iri do miagal do susuhuon do Kristus, i maso do tumanud do korohian do Kinorohingan do mikuwo'd aayi-ayi' o ginawo. 7 Om wonsoyon no dokoyu i karaja' dit apatut do wonsoyon di turipon do mikuwo'd otood o ginawo, om sorohon nopo do Tuhan i' o pongobi-obian dokoyu'ddi, om okon i' ko' tulun noo. 8 Om sorohon no do pointikid-tikid do tulun di turipon tuu ko' it okon ko' turipon nga' karamit indo dot isomuli' do mantad id Tuhan do ponomuli' di nongowonsoi dau dit ongosonong. 9 Oi tobpinai-tobpinai di nosiliu'd tuan, mositi' no dot iyo nogiddi o kowoyo-woyoon dokoyu iyokoyu dot id turipon dokoyu, om kada' kou nondo pomorolosi diyolo', om sorohon no dot iyokoyu nopo di turipon dokoyu'ddi om iso-iso' i' o tuan, iri no i Tuhan di hilo'd surga. Om a' i' iyau montong do pangkat do tulun.
Rapo-Rapo do Kinorohingan di Hino Ngai'
10 Iti no o poboroson ku dokoyu dot id tohuri no, iri no tu' kokoris kou no kasai' dot i kokorisan di naanu dokoyu do mantad id kuasa'd Tuhan o popokoris, tu' nokoiso' kou no dot id Tuhan. 11 Om pakayo' ngai' no dokoyu o koinsanai di rapo-rapo do monokisangod, i pinatahak do Kinorohingan dot id dokoyu, om okoris kou i' do sumaap do koinsanai do toilaan do Rogon dit araat. 12 Tu' okon i' ko' tulun i ponokisaap toko', suwai ko' monokisaap toko' di kuasa' do koinsanai do rogon di momorinta' do maso dot araat diti. Om monokisaap toko' di kuasa' di rusod dit angaraat di momorinta' do hilo'd tawan. 13 Iyo nopoddi, om pakayo' ngai' no dokoyu i rapo-rapo do monokisangod di dong Kinorohingan, om okoris kou i' do monokisaap do pisangod dokoyu do tontok di tadau dot araat. Om tontok piya'ndo di kopongo kou do monokisangod nga' okoris kasai' kou i'. 14 Iyo nopoddi, om sumodia' kou no kopio! Om pakayon no dokoyu i kotorodoko' dot id Kinorohingan do panakatagkos, om i kotulido' o panakarasuk do basi' di don sumasangod. 15 Om i korohiano' dokoyu do mongoi popinsusui do Habar dot Osonong di manahak do kosimbayanan do ginawo'd tulun o panakakasut dokoyu. 16 Om pakayon kasai' no i kotumbayaan dokoyu dot id Tuhan do monikid do maso do ponokokolid; om iri no i kotumbayaan dokoyu'ddi o milo do momisok di pana' di kitapui, i mantad id di Yaraat. 17 Pakayon no i koposion do ponokotupi' kolidar, om i boros do Kinorohingan o panakagayang do mantad id Rusod do Kinorohingan. 18 Om wonsoyon ngai' no dokoyu iri do mikuwo'd sumambayang do mokiuhup do Kinorohingan. Om sumambayang kasai' kou no do pointikid-tikid do maso do tumanud dit ituduk do Rusod do Kinorohingan dot id dokoyu. Om sumodia' kasai' kou no om kada' kou pokiala'. Om sumambayang kasai' kou no do bagi' do koinsanai'd tulun di songonuon do Kinorohingan. 19 Om sambayangan oku nogi' iyoho', om tudukan oku id Kinorohingan do popoboros di boros di koontok, om a' oku i' moddosi do popinsusui di tonsi kopio di Habar dot Osonong diri. 20 Tu' iri no i Habar dot Osonong o pinoposiliu doho' do susuhuon do Kristus, om poinggiil oku poddi do dinondo. Om sambayangan oku no dokoyu om a' oku i' moddosi do popimboros dit apatut ku'd poboroson do pasal di Habar dot Osonong.
Podsusuwau dit id Tohuri No
21 Om posusuyon indo di Tikikus i tobpinai toko', i susuhuon dit otorodok dot id karaja' di don Tuhan, o koinsanai do pasal doho', om koilo kou i' do koiyon-iyono' ku om karaja' ku. 22 Om iri no o koponuhuan ku dau do mongoi do hiti'd dokoyu, do momisunud ngai' dokoyu do koiyon-iyono' dahai, om ogirot i' o ginawo dokoyu. 23 Om pokionuon ku no i Kinorohingan Tapa' om i Tuhan Yesus Kristus do popogiiso' do koinsanai do sidang, om popogiinsian-sian diyolo' om popogirot kasai' do kotumbayaan diyolo' dot id Kristus. 24 Om pokionuon ku no o Kinorohingan do mamarakat do koinsanai di tobpinai- tobpinai dit osianan do Tuhan toko' i Yesus Kristus do mikuwo'd kosianan dit a' tumanus.
1 Oi tobpinai-tobpinai ku, i dong Kinorohingan do tulun di songingiyon do hiti'd Pilipi, om i nokoiso' dot id Kristus Yesus. Om iri nogi' i piro-piro o boyoon om i palayan dot id sidang! Mogondos oku iyoho', i Paulus, om i Timotius, iyahai i susuhuon di Kristus Yesus, 2 dot onuan kou do Kinorohingan i Tapa' toko' om i Tuhan Yesus Kristus do barakat om kosimbayanan do ginawo.
Sambayang di Paulus do Bagi' di Sidang
3 Pointikid-tikid dot osorou ku iyokoyu, om mongunsikou kasai' oku nopod Kinorohingan. 4 Om soira-ira' nopo do sumambayang oku do bagi' dokoyu ngai', om osonong kasai' nopo o ginawo ku do sumambayang. 5 Mongunsikou oku nod Kinorohingan tu' mantad poddi timpuun i' om gisom do baino', om nuhupan oku no dokoyu do popinsusui di Habar dot Osonong do mantad id Kinorohingan. 6 Kinorohingan i' o minonimpuun di karaja' dot osonong dot id suang dokoyu, om monongkuyaan oku i' do potilombuson dau i karaja'ddi do gisom dot opongo do tontok do Tadau'd Korikatan kawagu di Kristus Yesus. 7 Om atantu' no dot iyo'ddi o topurimanan ku dot id dokoyu, tu' osorou kasai' ku i' iyokoyu om osianan oku dokoyu. Om nokotonggoi kou doho' do nakaramit di nipuhawang do Kinorohingan di pinatahak dau doho'; do dinondo piya tu' poinggiil oku om tontok dit a' oku po poinggiil do pokotopot om popogirot di Habar dot Osonong diri. 8 Oilaan id Kinorohingan do langadon oku no kopio dokoyu do mikuwo'd kosianan do mantad id Kristus Yesus. 9 Iti no o sambayang ku do bagi' dokoyu i pokionuon ku no do muhang-ruhang o kosianan om toilaan dokoyu do pasal dit ongotopot, om pokionuon ku dot aralom o toilaan dokoyu. 10 Om koilo kou indo do momili' dit osonong kopio om oidu' indo do mantad id koposi-posion dokoyu o koinsanai dit araat om i kapasalaan di poingkuro nopo do tontok do tadau'd korikatan kawagu di Kristus. 11 Om lumuyung pondo do mantad id koposi-posion dokoyu o kowoyo-woyoon dit osonong kopio, it i Yesus Kristus noo o milo do popoimbulai; om poinggoyoon nondo om pingroyohon o Kinorohingan.
Poimpasi do Bagi'd Kristus
12 Orohian oku do koilo kou, dot iri nogi' i nosiliu dot id doho' o nokogumu-gumu' do tulun do nokorongou om notumbayaan di Habar dot Osonong diri. 13 Om kinootuson nopoddi, nga' nokoilo ngai'ddi i madtatamong di walai'd raja' om i tulun do suwai do hiti'd bandar diti, do kinogiil-giilan ku nopo om iri i' i momonsoi oku do karaja' di dong Kristus. 14 Om iti no nokogiil oku o nokogiro-girot do kotumbayaan dot id Tuhan dit ogumu' o tulun do Kristian dot id bandar diti, gisom do noruhangan nogiddi o kosisiou diyolo' do popinsusui di boros do Kinorohingan, om a' noddi iyolo' ooris. 15 Haro i' kopio o piro-piro dot id pogialatan diyolo' do popinsusui do pasal di Kristus do mosol i' o kopopinsusuyan om orohian do monokisongkiwal, nga' iri no suwai om osonong i' o kopopinsusuyan do pasal di Kristus. 16 Wonsoyon pogi' diyolo' o miagal diri nga' osianan i' iyolo'd Kinorohingan om osianan doho', tu' oilaan i' diyolo' do noonuan oku nod Kinorohingan do karaja' do popotuduk kopio dot otopot i Habar dot Osonong diri. 17 Nga' a' i' osonong o kopopinsusuyan do tulun do suwai do pasal di Kristus; tu' kopopinsusuyan nopo diyolo' om maan no diyolo'd kountungan do dau'd tinan. Om asanangan nogi' iyolo' dot oruhangan o kosusao' ku do hiti'd giil. 18 Nga' a' i' monguro dot iyo piya'ddi! Tu' poingkuro nopo, dot osonong tuu ko' kasala' daa o kopopinsusuyan diyolo', nga' kopinsusui kasai' i' i Kristus; om osonong i' o ginawo ku. Om iyo kasai' iddi o ginawo ku, 19 tu' oilaan ku i' do mikuwo nopo di sambayang dokoyu om uhupan do Rusod di Yesus Kristus, om kalabus oku indo. 20 Iri nopo i korohian kopio ku om i soro-sorohon ku om a' ku daa otongkiadan i karaja' ku. Suwai ko' mogondos oku nogi' do pointikid do maso, om okon-okon po om dinondo, dot osiou oku om aayi-ayi' o ginawo ku do maso ku tuu do poimpasi ko' poimpatai po do popoinggayo do Kristus. 21 Tu' iyoho' nopo do poimpasi om dong Kristus noo do koposion ku! Om apatai oku piya nga' haro i' o kountungan ku. 22 Nga' ondung milo oku do momonsoi do karaja' di poinggayo-gayo o guna' do poimpasi do hiti'd pomogunan diti, om a' oku no koilo ondung honggo'ddi o pilion ku. 23 Duwo nopo kagayat doho'. Orohian oku i' do kotongkiad diti pomogunan om koongoi oku indo kosugku' di Kristus, tu' iri kopio it osonong; 24 nga' sorohon nopondo o dokoyu'd koinsanangan om osonong nogi' do poundorong oku do hiti'd pomogunan. 25 Oilaan ku no kopio dot otopot iri. Om iri no o koilo-ilo ku do poinsugku' kasai' oku po ngai' dokoyu, om koponguhup oku po dokoyu do gumirot om otood o ginawo do monongkuyaan do Tuhan. 26 Iyo nopoddi, om gumuli' oku nopondo kawagu do hino'd dokoyu, om oruhangan pondo o kaandasan dokoyu doho' iyokoyu i nokoiso' dot id Kristus Yesus. 27 Om iri nopo it apatut kopio do wonsoyon dokoyu do dinondo om poontokon dokoyu di ponuhuan di Habar dot Osonong do pasal di Kristus o kowoyo-woyoon dokoyu. Om ondung iyo'ddi, om kosolowot oku tuu dokoyu ko' amu' nga' korongou oku i' dot ogirot o piuludan dokoyu om mogiuuhup do rumikot dot id iso' o rikoton om iso-iso' o korohian; iri no tu' poingimpou o kotumbayaan dot id Habar dot Osonong di mantad id Kinorohingan. 28 Kumosiou kasai' kou no, kada' kou kooris di pisangod dokoyu. Om iri no o ralan dokoyu do popointalang do pointantu' no dot aala' iyolo', om kamanang kou, tu' Kinorohingan no o manahak dokoyu do kamanangan. 29 Tu' noonuan kou nod Kinorohingan do nipuhawang dot okon nopo ko' monongkuyaan no di Kristus, nga' oinggorit nogi' do bagi di Kristus. 30 Om dinondo nga' kotonggoi kou i' doho' dot id suang do karaja' do miagal diri; i nokito dokoyu do winonsoi ku di gulu, om i maso ku po do wonsoyon do gisom do baino', do miagal dit orongou dokoyu do dinondo.
Kosiribaon do Ginawo om Kogoyoo' do Kristus
1 Okoris kou i', tu' nokoiso' kou no dot id Kristus. Om oinsasamadan kou tu' osianan i' o Kristus dokoyu! Woyoon kou i' do Rusod do Kinorohingan, om mogiinsian-sian kou om mogilisiu-lisiu kou. 2 Om umbal kou daa kopio do poposonong do ginawo ku om wonsoyo' no dokoyu o miagal diti: koiso-isoon no o ginawo dokoyu do mogiinsian-sian om oiyo o kowoyo-woyoo' do mogiinsian-sian, om iso-iso' o pomusarahan om iso-iso' o korohian. 3 Kada' kou pomonsoi do nunu nopo dot oodsuur di dokoyu'd korohian, ko' minggayo-gayo po suwai ko' sompori-pori kou nogi' do mogiinsiriba-riba' do ginawo, om sorohon dot osonong o tulun do suwai ko' mantad do dau'd tinan. 4 Kada' dokoyu soroho' o dokoyu nod koinsanangan; suwai ko' sopisorohon no do dombokon do koinsanangan. 5 Tiruwanan no dokoyu o kowoyo-woyoo' di Yesus Kristus. 6 Iyau nopo om miagal i' kopio do Kinorohingan, nga' a' i' iyau minomusorou dot apatut dau do pususon i kowoyo-woyoo' dau di dong Kinorohingan. 7 Suwai ko' tongkiadai ngai' nopo dau iri, om siliu noddi iyau do miagal do songulun o susuhuon. Om suminiliu iyau do miagal do tulun, om iyo do don tulun o koinan-inano' dau. 8 Mininsiriba' i' iyau, om minumboyo' kasai' do Kinorohingan do gisom do napatai iyau --- iri no tu' napatai do hiri'd salib. 9 Om iri noddi o kinopoinsawatan kopio'd Kinorohingan dau, om nonuan iyau do kuasa' dit agayo ko' mantad do koinsanai'd kuasa' do suwai. 10 Om oinsanan nopondo i songingiyon do hilo'd surga, om i hiti'd pomogunan, om i hilo'd saalom diti tana', do tumuku' dot id di Yesus, do momusou dau. 11 Om mangakun ngai' nondo iyolo' dot i Yesus Kristus no o Tuhan. Om koinggayo nondo o Kinorohingan Tapa'.
Tumitiu do Miagal di Tanawau do Papanawau do Hiti'd Pomogunan
12 Iyo nopoddi, oi tobpinai-tobpinai di kosianan ku, om poingkuro nopo do minumboyo' kasai' kou doho' di poinsugku' oku po dokoyu, om okon-okon po daa'ndo do dinondo tu' mogiinsodu' toko', nga' mumboyo' kopio kou doho'. Napasi kou nod Kinorohingan, iyo nopoddi om minsimparu' kou no kasai' om opongo i' o kosimbayanan do ginawo dokoyu. Om wonsoyon no dokoyu iri do mikuwo'd momusou om mumboyo' do Kinorohingan, 13 tu' Kinorohingan no o kumaraja' dot id suang dokoyu, om i poporohian dokoyu om popomilo dokoyu do poposonong do ginawo'd Kinorohingan. 14 Om wonsoyon no dokoyu o koinsanai'd nunu nopo dot a' muol-nguol dot araatan om a' mogitotogod. 15-16 Om iyo noddi o ralan dokoyu do popointalang do tangaanak kou'd Kinorohingan dit aiso' o kabara-barasan, it otulid om otopot o kowoyo-woyoon dot id pogialatan di tulun dit angaraat om it ongkidusa. Om tontok nopo do poposusui kou di habar di manahak do koposion dot id diyolo', om sumiliu kou no do miagal do tanawau dot id diyolo', i tumitiu do mamanawau diti pomogunan. Ondung iyo'ddi o kowoyo-woyoon dokoyu, om haro no o paantakan ku dot oondos dokoyu do korikatan kawagu di Yesus Kristus. Om iri no o kointalangan kopio dot okon i' ko' maan toomod i karaja' ku, om kointalangan do haro kopio o tua' di karaja' ku'ddi. 17 Om patayon oku dotindo om raha' ku nga' osiliu do miagal di porsombahan di potuntugon dot id sakai di porsombahan dokoyu dot id Kinorohingan, do maan do tanda' dot otumbayaan kou dau. Ondung a' milo dot a' osiliu o miagal diri, om mongunsikou oku nopo om tumonggoi oku dokoyu dot otood. 18 Om iyo kou nogi' daa'ddi iyokoyu tu' ounsikou om tumonggoi doho' dot otood.
I Timotius om i Ipaproditus
19 Monongkuyaan oku i' dot uhupan oku nopod Tuhan Yesus, om olomus oku i' do monuhu' di Timotius do mongoi do hino'd dokoyu, om oinsasamadan oku indo do korongou do habar dokoyu. 20 Iso' po i Timotius o kosuhut kopio do kopurimanan ku, om mamadul kopio dokoyu. 21 Iri ngai' nopo tulun do suwai om iri no i diyolo'd koinsanangan o sorohon, om a' i' diyolo' podulon i karaja' di Yesus Kristus. 22 Om iyokoyu nga' nokokito i' do nokointalang no kopio di Timotius o komiloo' dau. Tu' nokototos tomod iyau do kuminaraja' do minoyo' doho' do popinsusui di Habar dot Osonong do mantad id Kinorohingan. Iyahai nopo om miagal po do miaanak. 23 Iyo nopoddi, om oilaan ku pondo o kootuson diti hal ku, om suhuon ku iyau do mongoi'd hino'd dokoyu. 24 Om monongkuyaan oku i' dot uhupan oku nopod Tuhan, om iyoho' piya nga' a' no alaid om koongoi no koompuya' dokoyu. 25 Om pasal no di Ipaproditus, i tobpinai toko', i sinuhu' dokoyu do mongoi ponguhup doho', om opurimanan ku dot osonong i' do suhuon ku kawagu iyau do gumuli' do hino'd dokoyu. Om minoyo' i' iyau doho' do minomonsoi'd karaja' ku om i pokiwawansayan kopio ku. 26 Langadon no kopio iyau dokoyu ngai', om tumangkabo iyau tu' nokorongou kou i' do sumakit iyau. 27 Otopot nogi' do suminakit iyau do gisom dot oruhai nod apatai. Nga' nosianan i' o Kinorohingan dau; om okon i' ko' iyau noo, suwai ko' iyoho' nga' kinosianan nogid Kinorohingan, om a' i' oruhangan o katangaban ku. 28 Om iri no o kagayo-gayo do ginawo ku do monuhu' dau do gumuli' dot id dokoyu, om otood kou i' kawagu do kosolowot kou dau, om osimbayan o doho'd ginawo. 29 Iyo nopoddi, om romiton no dokoyu iyau do mikuwo'd osonong o ginawo, do miagal do tobpinai dit iso-iso' o kinotumbayaan. Om pusohon ngai' no dokoyu o tulun di miagal dau. 30 Oruhai no daa iyau dot apatai do momonsoi'd karaja' di dong Kristus; om uhang ngai' no daa dau dot apatai piya iyau do mongoi ponulung doho' do mobi' ngai' dokoyu.
It Otopot Kopio
1 Suwai no ko' iri, oi tobpinai-tobpinai ku, om kotood kou no tu' nokoiso' kou no dot id Tuhan. A' oku i' apaasan do popotulis kawagu di tinulis ku dot id dokoyu dit id gulu; tu' iri nopo om osonong om kointirung dokoyu. 2 Antaan-taan no dokoyu i tulun di momonsoi'd angaraat, i tulun di milo no do roitan do “tasu”. Tu' osoonong iyolo' do monuhu' do monunat do tulun. 3 Nga' iyati' nogi' o nosunatan di sunat dot otopot, om okon i' ko' iyolo'. Tu' tumuku' toko' i' dot id Kinorohingan do mikuwo'd tudukan di Rusod do Kinorohingan, om mongunsikou toko' tu' nokoiso' toko' no dot id Kristus Yesus. A' toko' i' sumondiu di piro-piro o wonsoyon do tumanud di toturan do tugama' dit id soibau noo. 4 Otopot nopo kopio om milo oku i' daa do sumondiu di piro-piro o wonsoyon do tumanud di toturan do tugama'. Tu' ondung haro daa o tongoiso' do tulun do kopuriman do haro o paantakan dau do sumondiu di wonsoyon do tumanud di toturan do tugama' dot id soibau noo, om okon-okon oku po daa iyoho' nga' haro kopio o paantakan ku. 5 Iyoho' nopo om sinunatan i' di walu' nogi' o tadau do tumur ku. Om nosusu oku dot id sompiiyon do tulun dot Israil, do mantad id payat di Binyamin; om pasok kopio oku dot Ibrani. Om pananud-tanud ku no di toturan do tugama' do Yohudi om poinsuang oku di sinompuruan do tulun do Parisi. 6 Om aparu' tomod oku gisom do minonginggorit oku'd sidang. Om ondung antangan do poimpohon di Tourat, om osonong oku i' koulun, om aiso' o kabara-barasan doho'. 7 Nga' Kristus no o pinopomilo doho' do momusorou dot iri ngai' nopo i kountungan daa dot osorou ku di gulu po, om nosiliu noddi do korugian do baino'. 8 Om okon i' ko' iri noo; suwai ko' nunu nopo i suwai nga' sorohon ngai' ku no do korugian iri. Om agayo nogi' kopio o gatang diti naanu ku do baino': iri no tu' nokotutun oku di Kristus Yesus, i Tuhan ku. Om Kristus no o nakapagadaan ngai' ku'ddi. Om sorohon ku po do rinomos toomod o koinsanai'ddi, om aanu ku i' o Kristus, 9 om koiso' oku indo kopio dau. Om a' oku noddi mimpori-pori do mulud dot id Kinorohingan do tumanud di Tourat o ralan do mulud. Nokoulud oku noddi kawagu dot id Kinorohingan, tu' notumbayaan oku no di Kristus. Om tadon nopo di kopiuludan om Kinorohingan i', dot i kotumbayaan dot id di Yesus Kristus o pinoimpahan. 10 Iso' no kopio o pokioonuan ku, iri no tu' kotutun oku di Kristus, om kopuriman di kuasa' di nakapasi dau do mantad id kapatayon. Orohian oku do kotonggoi dau dot oinggorit, om koiyo dau dot apatai. 11 Om mogondos oku dot iyoho' piya'ndo nga' apasi i' kawagu do mantad id kapatayon.
Manangkus do Kumaa id Rikoton
12 A' oku i' momoros do nangaanu ku no iyoho' iri, om a' oku momoros dot aiso' o kabara-barasan doho'. Nga' a' oku nopo tumingkod do monokiahau do manganu di hodia' do nokosodia' di Kristus Yesus. Om iri no o kokuwaan do nahau oku dau om pinili' oku dau do maan do dau'd songonuon. 13 Atantu' no, oi tobpinai-tobpinai, dot a' ku i' kopio sorohon do naanu ku no i hodia' diri. Nga' iso' noo o wonsoyon ku, iri no tu' lihuan ku nopo it id tohuri ku om tumotos oku no do mongoi panganu dit id dosunsudan ku. 14 Om iri no ot a' ku kotingkadan do manangkus do kumaa dot id rikoton kopio om kaanu oku i' do kamanangan, iri no i koposion di hilo'd surga; om iri no o kinapamalahawan do Kinorohingan dati' dot i Kristus Yesus o pinomolohou. 15 Iyati' ngai' nopo, i nongkotuo no dot id suang do don rusod, om mositi' no dot iyo'ddi o kowoyo-woyoo'. Nga' ondung haro ot id pogialatan dokoyu di suwai ko' iri o tosorou, om patarangon indod Kinorohingan iri dot id dokoyu. 16 Nga' ilaan no kopio dokoyu o hal diti: Mositi' no dot otorodok toko' do tumanud di toturan di tinanud toko' do solinaid diti. 17 Oi tobpinai-tobpinai ku! Omit kou no do kowoyo-woyoo' ku. Nokopointalang no iyahai do kowoyo-woyoo' dit otopot, om iyo nopoddi, om omitan no dokoyu o kowoyo-woyoo' di tulun di minomit do kowoyo-woyoo' dahai. 18 Asaru' ku no iyokoyu do sunudan om gulion ku po kawagu do posunud do mikuwo'd mihad oku, dot ogumu' o tulun do kowoyo-woyoon nopo diyolo' om mamaraag noo do komoyon di kinapatayon di Kristus do hiri'd salib. 19 Kootuson nopondo do koposi-posion do tulun do miagal diri om karaagon, tu' ponokokinorohingan nopo diyolo' om i korohian do tinan diyolo'. Om iri nogi' i kointingayam tomod o kaandasan diyolo', tu' sorohon nopo diyolo' om iri no i dom pomogunan. 20 Nga' iyati' nopo om hilo' id surga o pomogunan kopio toko'. Om hilo' nogi' o tadon di Raja', i Gampamasi dati', iri no i Tuhan Yesus Kristus. Om iyau no i piandad-andad toko' do rumikot do mantad hilo'. 21 Iti nopo tinan toko' diti toluhoi om i rumaag, om simbanan indod Kristus do sumiliu'd miagal di tinan dau di kikagayaan. Om milo i' iyau do momonsoi do miagal diri tu' kikuasa' i' iyau do momorinta' do koinsanai'd nunu nopo.
Piro-Piro o Ponudukan
1 Iyo nopoddi, oi tobpinai-tobpinai ku di kosianan ku, om iyo noddi o kowoyo-woyoo' do koposi-posion dokoyu dit apatut om mikuwo'd monongkuyaan kopio do Tuhan. Langadon oku no dokoyu! Iyokoyu no o kaandasan ku om i popotood doho'. 2 Oi tobpinai ku'd tongoondu', i Yuodia om i Sintiki! Pokionuon ku no daa kopio dot iso-iso' o ginawo dokoyu, tu' iso-iso' i' o kinotumbayaan dokoyu. 3 Om pokionuon ku nogi' iya' i tambalut ku dit otorodok, do monulung di duwo o tondu'ddi. Tu' nokototos tomod iyolo' do kuminaraja' do minoyo' doho' do pinopopinsusui di Habar dot Osonong do mantad id Kinorohingan, do miagal di Klimin om koinsanai di tulun do suwai di minoyo' doho' do kuminaraja'. Om nokosuang ngai' no o ngaran diyolo' do hiri'd Buuk do Tulun di Nangapasi. 4 Om maha' daa om otood kasai' kou tu' nokoiso' kou no dot id Tuhan. Om poboroson ku po kawagu do kongotood kou no! 5 Pologoson no do kokito o koinsanai'd tulun di kowoyo-woyoo' dokoyu dit osonong. Tu' a' no alaid om korikot no o Tuhan. 6 Kada' kou katangkabo do pasal do nunu nopo. Suwai ko' sumambayang nogi' do bagi'ddi, om poboroson i' i pokionuon dokoyu dot id Kinorohingan. Nunu nopo o pokionuon dokoyu, om poboroson kasai' nori dot id Kinorohingan do mikuwo'd mongunsikou. 7 Om iri indo i kosimbayanan do ginawo di mantad id Kinorohingan, it a' osuhutan do tulun, o poposimbayan do ginawo om pomusarahan dokoyu, i nokoiso' dot id Kristus Yesus. 8 Om poboroson ku nopo do pongolimpupus ku, oi tobpinai-tobpinai, om potumpuon no dokoyu o pomusarahan dokoyu dot id koinsanai di haro o guna', om it apatut do royohon, iri no it ongotopot, om i suahon, om it otulid, om it olidang, om i popoinsonong, om it osonong. 9 Wonsoyon no dokoyu i nongopinsingilaan dokoyu om i naanu dokoyu do mantad id doho'; i mantad id boros di pinoboros ku om i winonsoi ku. Om Kinorohingan no, i tadon do kosimbayanan do ginawo o momoyo' dokoyu.
Pongunsikou
10 Osimbayan tomod o kopurimanan ku dot id suang do koposi-posion ku di nokoiso' oku dot id Tuhan. Tu' iyo piya'ddi o koloido' nga' kosorou kasai' kou po doho'. Okon i' ko' komoyon ku do nokolihu kou doho'; tu' mamadul kou i' kopio doho', nga' gisom i' dot aiso' o ralan dokoyu do popointalang diri. 11 Okon i' ko' haro o kokurangan ku do kapabarasan ku'dti, tu' nokopinsingilo oku no dot abagalan do nunu nopo i haro dot id doho'. 12 Nokoumbal oku no dot okurangan om nokoumbal oku dot osima', gisom dot a' ku aayi-ayi'. Nokoilo oku nod ralan do tumimbaba' do poingkuro nopo o kowoyo-woyoo'; do tontok di haro o kosimbayanan ko' di maso do mosikin, om di maso'd osima' om di maso do haro o kokurangan. 13 Haro i' o kokorisan ku do tumimbaba' do poingkuro nopo o kowoyo-woyoo', do mikuwo di kuasa' di pinatahak do Kristus dot id doho'. 14 Nga' notulung oku no dokoyu dot id suang do kosusaan ku; om osonong i' kopio i winonsoi dokoyu'ddi. 15 Oi tobpinai-tobpinai ku, i tulun do Pilipi! Iyokoyu nga' koilo i' kopio do tontok nopo di tongkiad oku i' do mantad hilo'd Makidunia di gulu po, di koinsan ku nogi' do pinoposusui di Habar dot Osonong diri, om iyokoyu noo o sidang di minonulung doho'; om iyokoyu no kopio i nokotonggoi doho' do nokopuriman di kountungan om i kinorugian ku. 16 Tontok di hilo' oku'd Tosolunika om dit okurangan oku, om a' kou i' insan-insan do pinopokirim do maan do ponulung doho'. 17 Komoyon nopoddi om okon i' ko' orohian oku nod kaanu do nipuhawang. Suwai ko' korohian ku nopo kopio om kokito oku di tua' di koruhang di kountungan dokoyu. 18 Naanu ngai' ku nori om a' ku no aayi-ayi'! Iri ngai' nopo i pinopuhawang dokoyu doho' di pinaatod dokoyu om nangaanu ku no do mantad id di Ipaproditus. Om haro ngai' ku noddi do baino'. Om iri nopo i piro-piro o pinopuhawang dokoyu'ddi om iyo po di winongi' do porsombahan di sorobon di pinatahak dot id Kinorohingan om i kasanangan do Kinorohingan do rumamit. 19 Om Kinorohingan no, i tukuon ku, i haro o kakayaan dit a' aayi-ayi' dot id suang di Kristus Yesus, o papatahak do koinsanai di pokionuon dokoyu. 20 Royohon no o Kinorohingan, i Tapa' toko' do gisom dot alaid! Amin.
Podsusuwau dit id Tohuri no
21 Porikoton no o tabi' ku dot id koinsanai'd tulun di dong Kinorohingan, i nokoiso' dot id Kristus Yesus. Om romito' no dokoyu o tabi' di piro-piro o tobpinai'd suwai di poinsugku' doho'd hiti. 22 Oinsanan nopo i dong Kinorohingan do tulun do hiti'd bandar diti, om okon-okon po om i piro-piro o tulun do mantad id walai di raja' Kaisar, do poporikot do tabi' diyolo' dot id dokoyu. 23 Om pokionuon ku no i Tuhan Yesus Kristus do mamarakat ngai' dokoyu.
1-2 Oi tobpinai-tobpinai i hiti'd Kolosi, iyokoyu i tulun di songonuon do Kinorohingan om it ongotorodok do poingiso' dot id Kristus. Mogondos oku, iyoho' i Paulus, i pinili' do Kinorohingan do sumiliu'd rasul do Kristus Yesus, om i Timotius i tobpinai toko' dot onuan kou do Kinorohingan Tapa' do barakat om kosimbayanan do ginawo.
Sambayang do Mongunsikou
3 Momoros kasai' iyahai dot ounsikou dot id Kinorohingan, i Tapa' do Tuhan toko' i Yesus Kristus, do tontok do sumambayang iyahai do bagi' dokoyu, 4 tu' nokorongou iyahai di kotumbayaan dokoyu dot id Kristus Yesus om i kosianan dokoyu do koinsanai'd tulun di songonuon do Kinorohingan. 5 Otumbayaan kou om osianan kou, tu' soro-sorohon kopio dokoyu i nokosodia' do Kinorohingan do hilo'd surga do patahakon dau iri dot id dokoyu. Om nokorongou kou no do pasal diri do tontok di pinosusui dot id dokoyu i Habar dot Osonong dit otopot. 6 Om nokotongkop no do hiti'd pomogunan i habar do mantad id Kinorohingan, om abarakatan kasai' di habar diri o koposi-posion do tulun, do miagal di koposi-posion dokoyu di nabarakatan do mantad di tadau di korongou kou i' do pasal do kosianan do Kinorohingan, om di nosuhutan kopio dokoyu iri. 7 Iri nopo om pinotuduk di Ipapras, i tambalut dahai di kosianan dahai. Iyau nopo om otorodok do momonsoi di karaja' di dong Kristus do maan do koinsanangan toko'. 8 Om iyau no o kinarangahan dahai do mogiinsian-sian kou tu' i kuasa' do Rusod do Kinorohingan o pinopomilo dokoyu do mogiinsian-sian. 9 Om mantad poddi di nokorongou iyahai do pasal do kosianan dokoyu, om sumambayang kasai' no iyahai do bagi' dokoyu. Om pokionuon dahai dot id Kinorohingan dot onuan kou do Rusod do Kinorohingan do toilaan om ginawo dit obinsuhut, gisom do koilo kopio kou do koinsanai di korohian do Kinorohingan. 10 Om katanud i' di korohian do Kinorohingan o koposi-posion dokoyu om kohubayaan kasai' kou i' dau, om osonong kasai' ot owonsoi dokoyu dot id suang do nunu nopo. Om muhang-ruhang i' o toilaan dokoyu do pasal do Kinorohingan. 11 Om iri no i kuasa' do mantad id Kinorohingan di kikagayaan o popokoris dokoyu, om otial kou i' om alanut o ginawo om otood dot id suang do koinsanai'd koinggoritan, 12 om mikuwo'd momoros kou dot ounsikou dot id Tapa'. Tu' iri no i Tapa' o pinoposorupai dokoyu do kaanu di nokosodia' mantad do Kinorohingan do patahakon dot id tulun di songonuon dau dot id suang do pomorintaan dau dit anawau. 13 Om iyau no o pinopoidu' dati' do mantad id kuasa' do totuong, om pinoposuang dati' dot id pomorintaan di Tanak dau di kosianan dau. 14 Om iri no i Tanak dau o pinopoidu' dati'; komoyon nopoddi om nongoompunan no o koinsanai di dusa toko'.
Kristus om Karaja' Dau
15 Kinorohingan nopo om a' i' okito nga' Kristus no o pinopointalang kopio do Kinorohingan. Om Kristus no i tanak dot id dotuo, it agayo ko' mantad do koinsanai di winonsoi do Kinorohingan. 16 Kinorohingan no o minomonsoi, dot i Kristus o pinopomonsoi, do koinsanai do nunu nopo do hilo'd surga om hiti'd pomogunan, om koinsanai dit okito om it a' okito, om kohompit ngai' nogi' i rusod di kikuasa' om i momorinta'. Om winonsoi do Kinorohingan, dot i Kristus o pinopomonsoi do koinsanai diti pomogunan do patahakon dau do Kristus. 17 Hino mantad no o Kristus dit aiso' po o nunu nopo. Om oulud i' o koinsanai do nunu nopo dot id kinoiyonon diyolo' tu' nokoiso' no iyolo' dot id Kristus. 18 Om iyau no o tulu di tinan dau, iri no i sidang, tu' iyau no o tadon do koposion di sidang diri. Om iyau no o tanak dot id dotuo, om iyau nogi' ot id gulu posio' do mantad id kapatayon, om iyau indo, om iyau noo ot agayo ko' mantad do koinsanai do nunu nopo. 19 Om haro ngai' nopo dot id Tanak dau o nunu nopo di haro dot id Kinorohingan tu' iri no o korohian do Kinorohingan. 20 Om id suang no di Tanak diri do tinantu' do Kinorohingan do mulud kawagu dot id dau o koinsanai do nunu nopo --- do hiti'd pomogunan om hilo'd surga. Ralan nopod Kinorohingan do minomonsoi'ddi om pinawaya' di kinapatayon di Tanak dau do hiri'd kayu salib. 21 Iyokoyu nopo di gulu po om osodu' do Kinorohingan, om pisangod kou dau, tu' araat i' o kowoyo-woyoo' om pomusorou dokoyu. 22 Nga' baino' noddi om nokoulud kou nod Kinorohingan dot id dau dot i kinapatayon di Tanak dau o pinopoulud. Om olidang kou i' om aiso' o kabara-barasan, om aiso' o sala' dokoyu do tontok do potimbabaon kou do Kinorohingan. 23 Nga' mositi' no do tumorodok kou dot otumbayaan, om gumirot kopio dot id kinotumbayaan dokoyu. Om a' i' dokoyu oilihan i pagandasan di nakatahak dot id dokoyu do tontok di ruminamit kou i' di Habar dot Osonong do mantad id Kinorohingan. Iri nopo i habar diri om nokosusui no dot id pointikid-tikid do tulun do pointongkop do hiti'd pomogunan. Om iri noddi o kinosilihan ku iyoho', i Paulus, do susuhuon.
Karaja' di Paulus dot id Sidang
24 Baino' noddi om otood i' o ginawo ku dot oinggorit oku piya, do maan do koinsanangan dokoyu. Tu' iri no i koinggoritan do tinan ku o pomongo ku iyoho' di koinggoritan do Kristus dit apatut dot opurimanan dau do bagi' di sidang dau, iri no i tinan dau. 25 Sinuhu' oku'd Kinorohingan do sumiliu do susuhuon di sidang dau do maan do koinsanangan dokoyu. Om mositi' no do potudukon ngai' ku i habar do mantad id Kinorohingan; 26 iri no it a' daa do Kinorohingan pinoilaan dot id isai nopo o tulun di piro-piro no koloido' di gulu po, nga' baino' nopoddi om nokointalang no dau iri dot id tulun di songonuon dau. 27 Om id tulun no di songonuon dau o pointalangan do Kinorohingan di kosonongo' dau om i kagayaan dit a' mantad dau pinointalang di pinosodia' dau do bagi' do koinsanai'd tulun. Iri nopo it a' mantad pinoilaan diri om: iri no i Kristus i hino'd suang dokoyu, komoyon nopoddi om iyokoyu nondo nga' kaanu i' di kagayaan do Kinorohingan. 28 Om i Kristus no o popinsusuyon dahai dot id pointikid-tikid do tulun. Om pinosorou dahai iyolo' om pinotuduk ngai' dahai iri dot id diyolo' do mikuwo'd naayi-ayi' dahai o toilaan dahai do pinopotuduk. Kinoponudukan nopo dahai'ddi om milo indo o pointikid-tikid do tulun do potimbabaon do Kinorohingan do miagal do tulun di nongkotuo dot id suang di don rusod. Tu' nokoiso' no iyolo' dot id Kristus. 29 Om tumotos oku'ddi do kumaraja' om aanu ku i' iri. Om kumaraja' oku do mikuwo'd oiyo-iyon ku o kokorisan ku di tinahak do Kristus dot id doho', i maso po do kumaraja' dot id suang ku om i kikuasa' kopio.
1 Om orohian oku do koilo kou dot aayi-ayi' no kopio o ginawo ku do kumaraja' do bagi' dokoyu, om bagi' di tulun do hilo'd Laodikia om koinsanai di tulun dit a' po nokotutun kopio doho'. 2 Wonsoyon ngai' ku nopo o miagal diti om kokoris i' o ginawo diyolo' om mogiinsian-sian indo iyolo' om ogirot o piuludan diyolo'. Om kosuhut indo kopio iyolo' om monongkuyaan kopio om kotutun dit a' mantad do Kinorohingan pinoilaan, iri no i Kristus. 3 Om Kristus no o pinopointalang do koinsanai do komiloo' om toilaan do Kinorohingan di poinlisok di gulu po. 4 Kinoposunudan ku nopodti om a' kou i' aakalan dot isai nopo o tulun di momolumbok dokoyu. 5 Tu' mulong piya dot osodu' oku dokoyu, nga' sorohon nopo dokoyu do poinsugku' oku i' dokoyu. Om otood oku no do kokito di kouludo' dokoyu om i kogiroto' do kotumbayaan dokoyu dot id Kristus.
Koposi-posion dit Aiso' o Kabara-barasan
6 Poingkuro kou nopo do ruminamit di Kristus Yesus do sumiliu'd Tuhan dokoyu, om iyo nogindo'ddi tu' mositi' no do poisoon dokoyu o koposi-posion dokoyu dot id dau. 7 Om gumamut kou no dot id suang dau. Om pogiroton no dokoyu o koposi-posion dokoyu do poimpohon dot id Kristus. Om pogiroton no dokoyu o kotumbayaan dokoyu dot id Kristus do miagal di nokotuduk dot id dokoyu. Om mositi' no do poimponu' kasai' do kounsikahan o ginawo dokoyu. 8 Mumbangan-bangan kou no om aiso' i' ot id pogialatan dokoyu dot abayayat do toilan di don tulun dit aiso' o guna', i mamalid noo. Tu' iri nopo i toilaan diri om okon i' ko' mantad id Kristus, suwai ko' mantad no dot id pomusarahan do tulun om mantad id rusod di monguasa' diti pomogunan. 9 Tu' koinsanai do kowoyo-woyoo' do Kinorohingan om haro ngai' no dot id Kristus, it id suang do kowoyo-woyoo' dau di don tulun. 10 Om nonuan kou'ddi di koposion di haro ngai' no om aiso' no o bohiton. Tu' nokoiso' no dot id Kristus o koposi-posion dokoyu. Kristus no o boyoon do pointikid-tikid di rusod di kikuasa' om i momorinta'. 11 Om nosunatan kou noddi tu' nokoiso' kou no dot id Kristus, nga' okon i' ko' i sunat di winonsoi'd tulun, suwai ko' i sunat di winonsoi do Kristus, i pinopoidu' dokoyu do mantad id kuasa' di kowoyo-woyoon di kidusa. 12 Tu' tontok di botisai kou, om iri nod nokotonggoi kou do Kristus do linobong; om id suang nogi' di botisan diri do nokotonggoi kou do Kristus do pinasi kawagu, tu' notumbayaan kou i' di kuasa' do Kinorohingan do minamasi kawagu di Kristus do mantad id kapatayon. 13 Iyokoyu nopo di gulu po om napatai no dot id suang do rusod tu' kidusa kou i' om okon ko' tulun do Yohudi om a' kou koilo di Tourat di Musa. Nga' baino' nopoddi om napasi kou nod Kinorohingan do pinotonggoi di Kristus. Om noompunan nod Kinorohingan o koinsanai di dusa toko'. 14 Om nangatanus dau i tutang toko' di nongkotulis, om natanus dau it oturan di tutang di kokogos dati', tu' pinasalib dau i surat diri do hiri'd kayu salib do ralan do Kinorohingan do minananus do koinsanai di pinamadawa dati'. 15 Om hiri nod salib do nidu' do Kristus o kuasa' do koinsanai do rusod di momorinta' om i kikuasa'. Om paantangan poddi iyolo' do tulun dot ogumu' do tontok di tinanggayan do Kristus iyolo' do moyo' di baris di popointalang do kinamanangan dau, tu' nangatangkap no dau iyolo'. 16 Iyo nopoddi, om kada' no pologoso' o tulun do papasala' dokoyu do pasal do taakanon ko' tinumon, ko' pasal po do tadau'd agayo do tugama' ko' pasal po do karamayan do tontok do tulan do wagu, ko' pasal po do tadau'd Sabat. 17 Koinsanai'ddi om sangai-sangai no di rumikot do koimbagu; nga' kointalangon ngai' nopoddi om id Kristus. 18 Kada' dokoyu pologoso' o tulun di minsorupai-rupai do tulun dit osiriba' o ginawo om i tumuku' dot id piro-piro o moloikat do papasala' dokoyu. Tulun nopo do miagal diri om minggayo-gayo i' dot i pomusarahan diyolo' di dom pomogunan o kopinggaya-gayaan. Om oondos iyolo' di nokito diyolo' di kosuayan kopio, 19 gisom dot a' noddi iyolo' sumondiu do Kristus i nosiliu do boyoon. Om ogompi' nondo o koinsanai do pakakas do tinan om opogituma-tuma' iri di langaban, om sumuni indo do tumanud do korohian do Kinorohingan do woyoon do Kristus.
Apatai om Apasi do Kotonggoi di Kristus
20 Nokotonggoi kou no do Kristus do napatai, om nokoidu' kou no do mantad id kuasa' di piro-piro rusod di momorinta' diti pomogunan, om nokuro tu' iyo po di kowoyo-woyoon di tulun di maso po do porintaon diti pomogunan o kowoyo-woyoon dokoyu? Om nokuro tu' tumanud kou po dot oturan do miagal diti, 21 “Kada' kama' diti',” ka, om, “Kada' tiim dilo',” ka, om, “Kada' igit dilo',” ka no. 22 Koinsanai dot oturan do miagal diri om pasal i' dit apakai nopo om aiso' nondo o guna'. Tu' iri nopo om oturan i' om ponudukan di winonsoi do tulun. 23 Otopot i' kopio dot oilo o kokitanan diri tu' monuhu' do tulun do tumuku' dot id moloikat om monuhu' do minsiriba' om monginggorit do tinan, nga' koinsanai'ddi om aiso' i' o guna' do maan do pomusus di korohian do don tinan.
1 Napasi kou noddi kawagu do nokotonggoi do Kristus. Iyo nopoddi om mositi' no do monotos kou kopio do manganu di haro do hilo'd surga, i kinoiyonon do Kristus do momorinta' do poinsugku' do Kinorohingan. 2 Om potumpuon no o pomusarahan dokoyu di haro do hilo'd surga, om kada' dokoyu potumpuo' o pomusarahan dokoyu di nunu nopo i haro do hiti'd pomogunan. 3 Tu' napatai kou no, om koposion nopoddi dokoyu om poillisok no do mitonggoi do Kristus dot id suang do Kinorohingan. 4 Om Kristus no o tadon do koposion dokoyu dit otopot kopio, om soira' nopondo do kointalang o Kristus om iyokoyu nga' kointalang nogindo do miwoyo' dau dot id suang do kagayaan dau!
Kowoyo-Woyoon di Laid om Kowoyo-Woyoon di Wagu
5 Iyo nopoddi, om tonuson ngai' no dokoyu i kouhangan do dom pomogunan, i mominsuhu' dot id suang do ginawo dokoyu: i magampahu', om i kowoyo-woyoon dit a' osonong, om i korohian di don tinan, om i korohian dit araat om i tamaha', (tu' tamaha' nopo om miagal nopo do tumuku' dot id tingolig.) 6 Iri ngai' no o moningkau do kototogod do Kinorohingan dot id tulun dit a' mumboyo' dau 7 Om iyokoyu nga' mingwonsoi i' di korohian do miagal diri di gulu po, di maso po dokoyu do porintaon diri. 8 Nga' baino' nopoddi om iyadaan ngai' no dokoyu it angaraat dot id suang do ginawo dokoyu: om kada' kou no kobintogod, om kada' kou uhod, om kada' kou karaatai do tulun do suwai. Om kada' kou kopio pimboros di boros di pomomopol om i boros di kososomu'. 9 Kada' kou pogiudut-udut, tu' naadaan no dokoyu i kowoyo-woyoon do koposi-posion di laid om koinsanai di kowoyo-woyoon do miagal diri. 10 Baino' noddi om noonuan kou no do kowoyo-woyoon di wagu. Om tulun kou noddi do wagu, it iwoguan kasai' di minomonsoi dokoyu, iri no i Kinorohingan, do poiyoon di dau'd kowoyo-woyoon. Om kotutun toko' indo kopio do Kinorohingan. 11 Kootuson ngai' nopoddi om aiso' nondo o pisuayan do tulun do Yohudi om it okon ko' Yohudi, om aiso' o pisuayan di tulun di nosunatan om it a' nosunatan, om aiso' o pisuayan di tulun di nakamaju' om i tulun dit a' po nakamaju'; om aiso' o pisuayan di turipon om it okon ko' turipon, tu' Kristus nopo om Kristus dot id koinsanai diyolo', om id suang no o Kristus diyolo'. 12 Om iyokoyu no o tulun di songonuon do Kinorohingan. Nosianan o Kinorohingan dokoyu om pinili' kou dau do sumiliu'd dau kopio'd songonuon. Om iri noddi o kopointalangan dokoyu do kosianan, om mositi' no dot opuhawang kou, om osiriba' o ginawo, om alamaya' om alanut o ginawo dot id suang do koinggoritan. 13 Om mositi' no dot alanut o ginawo dokoyu dot id tulun do suwai, om miampun-ampun kou do haro no o katagadan dokoyu dot id tulun do suwai. Tu' norohian i' o Tuhan do minangampun dokoyu, om iyokoyu nga' apatut nogi' do mogiampun-ampun. 14 Om agayo nopo kopio om iri no tu': mositi' no do mogiinsian-sian kou tu' iri no i kosianan o popogiuulud kopio ngai' dokoyu. 15 Mositi' no do tontuon di kouludan di pinatahak do Kristus dot id suang do ginawo dokoyu i korohian dokoyu. Tu' kinapamalahawan nopod Kinorohingan dokoyu om silihon do pakakas dot iso' o tinan. Om poimpasi kou i' dot id suang do kouludan di mantad id Kristus diri. Om mongunsikou kou no. 16 Poopion no dot id ginawo dokoyu i ponudukan do Kristus, i poimponu' do barakat. Om oiyo-iyon no o toilaan dokoyu do mituduk-tuduk om moginosihat-nosihat. Sindingon no dokoyu i nokotulis dot id buuk do sinding, om sindingon i sinding di pamarayou, om sindingon i sinding di don rusod; om modsinding kou no dot id Kinorohingan do mikuwo'd ounsikou ot id suang do ginawo. 17 Om nunu nopo o wonsoyon dokoyu ko' i poboroson, om wonsoyon ngai' no dokoyu iri om poboroson dot id suang do ngaran do Tuhan Yesus. Om mongunsikou no dot id Kinorohingan Tapa' do koinsanai di nowonsoi do Kristus dot id dokoyu.
Kowoyo-Woyoon do Wagu do Pointikid-Tikid do Tulun
18 Oi tongoondu' di kisawo! Mumboyo' kou no di sawo dokoyu, tu' iyo noddi o kowoyo-woyoon dit apatut do tulun do Kristian. 19 Oi tongokusai di kisawo! Kosianai kou no di sawo dokoyu. Kada' kou kobintogod diyolo'. 20 Oi tangaanak, apatut kou i' kopio do mumboyo' kasai' do tapa' om tina' dokoyu, tu' nosiliu kou no do tulun do Kristian, dot iri no o kohubayaan do Kinorohingan. 21 Oi tobpinai-tobpinai i nosiliu nod tapa', kada' dokoyu toroo' o tangaanak dokoyu do gisom do kakaus iyolo'. 22 Oi tobpinai-tobpinai i nosiliu do turipon, tonudon ngai' no dokoyu o koinsanai di ponuhuan do tuan dokoyu di hiti'd pomogunan. Nga' okon i' ko' tontok no di poingontong iyolo' dokoyu do wonsoyon dokoyu i ponuhuan diyolo', do mokimoroyo-royohon kou no, suwai ko' tonudon no dokoyu i ponuhuan diyolo' do mikuwo'd aayi-ayi' o ginawo tu' pomusou i' dokoyu do Tuhan iri. 23 Om oiyo-iyon no dokoyu o ginawo do momonsoi do nunu nopo o karaja' di ponuhuan diyolo' dokoyu do momonsoi, om sorohon no do Tuhan i' o tumboyoon dokoyu'ddi, om okon i' ko' tulun noo. 24 Soro-sorohon no dokoyu do kaanu kou indo dot isomuli' di nokosodia' mantad do Tuhan do patahakon di tulun di songonuon dau. Tu' otopot nopo kopio om iri nopo i tuan di pongobi-obian dokoyu'ddi om Kristus i'. 25 Isai nopo o tulun do momonsoi di kasala', om iyau no o mamabo di kasalaan dau'ddi, tu' oiyo i' o pomumutus do Tuhan do koinsanai'd tulun.
1 Oi tobpinai-tobpinai i nongosiliu'd tuan, wonsoyon no dokoyu it otopot om it otulid dot id turipon dokoyu. Om sorohon no dokoyu dot iyokoyu nga' haro i' o tuan do hilo'd surga.
Piro-Piro o Nosihat
2 Om tumorodok kou no do sumambayang, mikuwo'd mumbangan-bangan, om mongunsikou kou no dot id Kinorohingan. 3 Om sambayangan nogi' iyahai, om onuan i' iyahai'd Kinorohingan do maso dit osonong do mongoi popinsusui do habar do pasal do Kristus, it a' mantad daa pinoilaan dot id tulun, om iri nogi' o nokopogiilan doho' do dinondo. 4 Om sambayangan oku no om milo oku i' do papatarang kopio dit apatut ku do poboroson do pasal di habar dit a' mantad daa pinoilaan diri. 5 Mositi' no dot oilo kou dot id suang do nunu nopo o wonsoyon dokoyu dot id tulun dit a' po notumbayaan, om mikuwo'd pakayon kopio o koinsanai'd maso do momonsoi dit apatut. 6 Om mositi' no do poposonong kasai' do ginawo om koinsasamod o poboroson dokoyu. Om mositi' no do koilo kou do ponimbar do pointikid-tikid di ponguhatan do tulun.
Pongolimpupus diti Surat om Podsusuwau
7 I Tikikus indo i tobpinai di kosianan toko' o monusui dot id dokoyu do koinsanai do pasal doho'. Tu' iyau nopo om otorodok kopio do kumaraja' do don Tuhan do muhup dahai. 8 Om iri no o kinoponuhuan ku dau do mongoi do hino'd dokoyu, tu' popoilo dokoyu do habar dahai om oinsasamadan kou i'. 9 Koruhang nopo di Tikikus om i Onisimus, i tulun i' do mantad hino'd dokoyu. Iyau nopo om otorodok kopio koulun, om osianan kopio iyahai dau. Om iyau no om i Tikikus o popoilo dokoyu do koinsanai di nosiliu do hiti'd kinoiyonon ku. 10 Porikot i Aristarkus do tabi' dot id dokoyu. Iyau nopo om poinsugku' doho' dot id giil. Om i Markus i tikid do molohing di Barnabas, nga' poporikot nogi' do tabi' dot id dokoyu. (Nosunudan kou no do mamaramit dau do korikot iyau do hino'd dokoyu.) 11 Om i Yesus i roitan dot i Yustus nga' poporikot id tabi' dot id dokoyu. Om tolu no iyolo' o tulun do Yohudi di notumbayaan di Tuhan Yesus o koruhang ku do momonsoi diti karaja' do Pomorintaan do Kinorohingan. Om iyolo' no i monulung kopio doho'. 12 Om poporikot nogi' i Ipapras do tabi' dot id dokoyu, om iyau nga' mantad i' do hino'd dokoyu. Om susuhuon iyau do Kristus Yesus, it otorodok om asaru' do sumambayang do bagi' dokoyu, om pokionuon kopio dau do Kinorohingan dot ogirot o kotumbayaan dokoyu om kotuo o pomusorou dokoyu om atanud ngai' indo dokoyu o kouhangan do Kinorohingan. 13 Nokito ku no kopio iyau do nokototos do kuminaraja' do bagi' dokoyu om bagi' do tulun do hilo'd Laodikia om hilo'd Hiorapolis. 14 Om i Dokutur Lukas, i kosianan toko', om i Dimas nga' poporikot nogi' do tabi' dot id dokoyu. 15 Om porikoton no dokoyu o tabi' dahai dot id tobpinai-tobpinai di sompi' ko' Kristian di hilo'd Laodikia; om porikoton nogi' dot id di Nimpa om id sidang di sumasambayang do hiri'd walai dau. 16 Om abasa' pondo dokoyu iti surat om pabasaan no kopio iti di sidang do hilo'd Laodikia. Om iyokoyu nga' apatut nogi' do mambasa' di surat di pokirimon dot id dokoyu do mantad hilo'd Laodikia. 17 Om sunudan no dokoyu i Arkipus do poingkaa, “Pongoon no i karaja' nu do don Tuhan di nakatahak dot id diya',” kanto dokoyu. 18 Tabi' do mantad id doho' i Paulus. Iti nopo bohogian diti om iyoho' i' o minonulis. Kada' dokoyu lihuwai do poinggiil oku po. Om pokionuon ku no o Tuhan do mamarakat dokoyu.
1 Oi tobpinai-tobpinai i sidang do hilo'd Tosolunika, i nosiliu do tulun di songonuon do Kinorohingan Tapa' om i Tuhan Yesus Kristus: Mogondos oku iyoho' i Paulus om i Silas om i Timotius dot onuan kou'd Kinorohingan do barakat om kosimbayanan do ginawo.
Kowoyo-Woyoo' om Kotumbayaan do Tulun do Tosolunika
2-3 Om mongunsikou kasai' nopo iyahai dot id Kinorohingan do koinsanai dokoyu o kounsikahan dahai. Pointikid-tikid do sumambayang iyahai dot id Kinorohingan i Tapa' toko', om osorou kasai' i' dahai iyokoyu. Om sumambayang kasai' i' iyahai do bagi' dokoyu. Om osorou i' dahai i winonsoi dokoyu do popointalang dot otumbayaan kou di Kristus, om i kosianan dokoyu dot id tulun do suwai, gisom do minongobi-obi' kou diyolo', om i kogiroto' do pogogondos dokoyu dot id Tuhan toko' i Yesus Kristus. 4 Oilaan no dahai, oi tobpinai-tobpinai dot osianan o Kinorohingan dokoyu om nopili' kou no dau do sumiliu kopio do dau'd songonuon. 5 Tu' poposusui iyahai diti Habar dot Osonong dot id dokoyu om okon i' ko' boros no toomod, suwai ko' poposusui iyahai do mikuwo'd kuasa' om mikuwo di Rusod do Kinorohingan. Om otumbayaan kopio iyahai di katapatan di Habar dot Osonong diri. Om koilo kou i' di kowoyo-woyoo' do koposi-posion dahai do maan do koinsanangan dokoyu do tontok di poinsugku' iyahai dokoyu. 6 Om minomit kou di kowoyo-woyoo' dahai om i kowoyo-woyoo' do Tuhan. Mulong piya dot oinggorit tomod kou, nga' otood i' o ginawo dokoyu do ruminamit di habar di pinosusui dahai dokoyu. Tu' iri nopo i kataadan diri om pinatahak i' di Rusod do Kinorohingan. 7 Om iyokoyu noddi o nosiliu do poiyaan do koinsanai do tulun do Kristian di hilo'd Makidunia om i hilo'd Akaya. 8 Tu' iyokoyu no o tadon di habar do pasal do Tuhan do tuminongkop do hilo'd Makidunia om hilo'd Akaya, om okon i' ko' iri noo; suwai ko' i habar do pasal do kotumbayaan dokoyu dot id Kinorohingan nga' nokotongkop nogi' do hinonggo-honggo nopo, gisom dot a' no iyahai minog do popimboros do nunu-nunu. 9 Oinsanan nopo i tulun diri do popimboros do pasal do kowoyo-woyoo' dokoyu do minamaramit dahai, di nokorikot i' iyahai do hiti'd dokoyu di gulu po. Om popimboros nogi' iyolo' ondung poingkuro kou do tuminongkiad di tingolig. Om ruminikot kou'ddi dot id Kinorohingan dit iso' noo, i poimpasi, om sumambayang kou'ddi dot id dau. 10 Om pinopimboros nogi' diyolo' o pasal do kowoyo-woyoo' dokoyu do mogondos do korikatan di Tanak do Kinorohingan do mantad hilo'd surga, iri no i Yesus i pinasi kawagu do Kinorohingan do mantad id kapatayon. Om i Yesus no o pinopoidu' dati' do mantad id katagadan do Kinorohingan di rumikot do sumonu'.
Karaja' di Paulus do Hilo'd Tosolunika
1 Oi tobpinai-tobpinai! Koilo kou i' dot okon i' ko' maan toomod dahai i kinaangayan dahai do hino'd dokoyu. 2 Oilaan i' dokoyu do tontok dit a' po iyahai nokorikot do hino'd dokoyu do hino'd Tosolunika, om noinggorit no iyahai om noindaraat di hilo' po iyahai'd Pilipi. Nga' mulong piya dot ogumu' o tulun do sumaap dahai, nga' nonuan i' iyahai'd Kinorohingan do kosioho' do poposusui dot id dokoyu di Habar dot Osonong di mantad id Kinorohingan. 3 Tu' okon i' ko' momorulong dokoyu i pinangangatan dahai, om okon ko' haro o tosorou dahai dit a' osonong ko' monipu' po iyahai. 4 A' i' kopio! Okon i' ko' momoros iyahai do poposonong no do ginawo'd tulun, suwai ko' poposonong iyahai do ginawo'd Kinorohingan, i mongilo kopio do ginawo dahai. Tu' iyahai nopo om pinosorupai do Kinorohingan do popinsusui diti Habar dot Osonong. 5 Oilaan i' dokoyu dot a' i' iyahai nokoumbal do popimboros di pomolumbok nod ginawo ko' pinopimboros po di boros di pangalit no di katamahao' dahai. Om Kinorohingan no o sasi' diti. 6 A' i' iyahai tuminotos do mokimoroyo-royohon do tulun --- dot iyokoyu tuu o mamarayou ko' tulun pod suwai. 7 Otopot nopo kopio om milo i' daa iyahai do mokianu dokoyu do nunu nopo, tu' rasul i' iyahai di Kristus. Nga' alamaya' i' o kowoyo-woyoo' dahai tontok di poinsugku' iyahai dokoyu, do miagal do tina' do momogompi' di tangaanak dau. 8 Om okon nopo ko' kosodia' no iyahai do papatahak dot id dokoyu di Habar dot Osonong do mantad id Kinorohingan, suwai ko' koposion piya dahai nga' patahakon i' dahai dokoyu tu' osisianan iyahai dokoyu. 9 Atantu' no dot osorou i' dokoyu i huyan dahai do tuminotos tomod do kuminaraja'. Om a' nopo iyahai otingkod do kuminaraja' do tadau om totuong, om a' i' iyahai nokoponusa' dot ongoiso' piya o tulun dot id pogialatan dokoyu do tontok di pinoposusui iyahai dot id dokoyu di Habar dot Osonong do mantad id Kinorohingan. 10 Kowoyo-woyoon nopo dahai om olidang i' om otopot, om aiso' o kasalaan dahai dot id dokoyu, i nongotumbayaan do Kristus. Om iyokoyu no om Kinorohingan o sasi' dahai. 11 Oilaan i' dokoyu do kowoyo-woyoo' nopo dahai dot id dokoyu om miagal no do kowoyo-woyoo' do tapa' dot id tangaanak dau. 12 Om minonosihat iyahai dokoyu om minongodsuur iyahai dokoyu om minonuhu' kopio iyahai dokoyu do momit do kowoyo-woyoo' do miagal diri om kohubayaan kou indo do Kinorohingan. Tu' nolohou kou nod Kinorohingan do kaanu'd bahagi' do hiri'd Pomorintaan dau om i kagayaan dau. 13 Om haro po o suwai do mominsuhu' dahai do mongunsikou dot id Kinorohingan. Iri nopo i kounsikahan dahai'ddi om i minokinongou kou om ruminamit kou di habar diri do tontok di nokosusui dahai iri dot id dokoyu, om rinamit dokoyu i habar diri do miagal do habar do mantad kopio id Kinorohingan om okon i' ko' habar do mantad id tulun. Om iyau no i maso do pakaraja' dot id suang do ginawo dokoyu, i nongotumbayaan do Kristus. 14 Iri nopo i nongoumbalan dokoyu'ddi oi tobpinai-tobpinai, om nongoumbalan no di piro-piro o sidang do Kinorohingan di hilo'd Yudia, i sidang di nasanganu do Kristus Yesus. Nokoumbal kou no do noinggorit di tulun do mantad id bansa' dokoyu, do miagal di noumbalan di sidang do Kinorohingan di hilo'd Yudia tu' noinggorit do tulun do Yohudi. 15 Iyolo' no i tulun di minamatai di Tuhan Yesus om i piro-piro nabi, om i minonginggorit dahai. Iyolo' nopo om sumaap do koinsanai'd tulun, om a' no kopio iyolo' kohubayaan do Kinorohingan. 16 Om mogodu nogi' daa iyolo' dahai do poposusui dot id tulun dit okon ko' Yohudi di habar di kapasi di bansa'ddi. Om iyo noddi i tulun do Yohudi dot a' otingkod-tingkod do minomoruhang di dusa diyolo' do gisom do nopongo o kogumuo'ddi, om norotuan noddi iyolo' do kototogod do Kinorohingan do baino'.
Orohian i Paulus do Mongoi Kawagu Solowot di Tulun do Tosolunika
17 Nga' tontok di nokotongkiad iyahai do daamot, do mantad id dokoyu oi tobpinai-tobpinai --- om tinan no dahai o nokotongkiad --- nga' ginawo nopo dahai om a' i' nokotongkiad tu' langadon kopio iyahai dokoyu om tumotos iyahai do mokioongoi solowot kawagu dokoyu! 18 Om kosorou i' iyahai do mongoi ompuya' dokoyu; om nokoumbal oku no daa iyoho' do mongoi do hino'd dokoyu dot insan ko' induwo'ddi nga' naantaban oku i' do Rogon. 19 Iyokoyu no o harapon dahai om i kataadan dahai. Tu' ondung orikot o maso do korikatan do Tuhan Yesus om kotimbaba' ngai' toko' dau, om iyokoyu no ot osiliu do kaandasan dahai. 20 Atantu' no dot iyokoyu no ot osiliu do kaandasan om kataadan dahai.
1 Om alaid noddi om kopurimanai no dahai dot a' no dahai opusus o ginawo dahai do langadon dokoyu. Om kosorou noddi dahai dot osonong nogi' dot iyahai-yahai piya o poundorong do hiti'd Atina, 2 om suhuon nogindo dahai i Timotius do mongoi do hino'd dokoyu. Iyau nopo om susuhuon do Kinorohingan om koruhang dahai do popinsusui do Habar dot Osonong do pasal do Kristus. Koponuhuan nopo dahai di Timotius do mongoi do hino'd dokoyu om mongoi popokoris dokoyu om mongoi pongodsuur dokoyu do gumirot kopio o kotumbayaan dot id Kristus. 3 Om aiso' indo o tongoiso' piya dokoyu do koluhoi dot iti koinggoritan toko' o koluhoi. Iyokoyu nga' koilo i' do koinsanai di koinggoritan diri om id suang i' do korohian do Kinorohingan dot osiliu dot id dati'. 4 Nokoboros mantad no dahai di poinsugku' po iyahai dokoyu dot oinggorit toko' nondo, om iyokoyu nga' koilo i' do nangabayaan no iri. 5 Om orohian kopio oku do koilo do kinosuruton do kogiroto' do kotumbayaan dokoyu dot id Kristus, om iri noddi o kinoponuhuan ku di Timotius do mongoi do hino'd dokoyu. Om ooris oku dot aratu' kou dot id pamayayat do Rogon, om gisom dot aiso' nondo o kotutuk-tutukon di huyan dahai. 6 Nga' nokoguli' noddi i Timotius om nokosunud dau dahai o habar dit osonong kopio do pasal do kotumbayaan dokoyu dot id Kristus, om pasal do mogiinsian-sian kou. Om nokosunud nogi' dau dahai dot osonong kasai' o ginawo dokoyu do kosorou dahai, om mokisosolowot kou no daa dahai do miagal dahai tu' sisolowot no dokoyu. 7 Om mulong poddi dot id suang iyahai do mogisuayan o kosusaan om koinggoritan, oi tobpinai-tobpinai nga' oinsasamadan i' iyahai do nokorongou di habar dokoyu. Iri no i kotumbayaan dokoyu dot id Kristus o nokoinsasamod do ginawo dahai, 8 gisom dot opurimanan noddi dahai do nokogirot kopio o ginawo dahai do nokorongou dot ogirot kasai' kou do poingiso' dot id Tuhan. 9 Agayo no kopio o kounsikahan dahai dot id toguang do Kinorohingan, dot i kataadan di nopurimanan dahai dot iyokoyu o kataadan, o kounsikahan dahai. 10 Sumambayang kasai' nopo iyahai do mikuwo'd aayi-ayi' o ginawo do tadau om totuong do mokianu dau, om kosolowot indo iyahai dokoyu, om oruhangan indo dahai o nunu nopo it apatut dot aanu dokoyu dot id suang do kotumbayaan dokoyu dot id Kristus. 11 Maha' daa om iwangan do Kinorohingan Tapa' toko', om Tuhan toko' i Yesus, o ralan dahai do mongoi solowot dokoyu! 12 Om pokionuon ku no do poinggoyoon do Tuhan o kosianan dokoyu dot id pogialatan dokoyu, om oruhangan indo o kosianan dokoyu dot id koinsanai'd tulun om gisom do muhang-ruhang o kosianan dokoyu do miagal do kosianan dahai dot id dokoyu. 13 Om pogiroton indo do Tuhan o ginawo dokoyu, om olidang kou i' om aiso' o kasalaan dokoyu dot id toguang do Kinorohingan i Tapa' toko', do tontok do korikatan di Yesus i Tuhan toko', do miwoyo' do koinsanai di tulun di songonuon dau.
Kowoyo-Woyoon di Kohubayaan do Kinorohingan
1 Om id tohuri nondo oi tobpinai-tobpinai, om poboroson dahai do noonuan no dahai iyokoyu dit omitanan dit osonong do pasal do kowoyo-woyoon do koposi-posion dokoyu di kohubayaan do Kinorohingan. Om otopot i' dot iyo'ddi o kowoyo-woyoon dokoyu. Nga' pokionuon po kopio dahai dokoyu do dinondo, dot id suang do kuasa'd Tuhan Yesus, om suhuon kopio dahai iyokoyu do momoruhang do koporuo' dokoyu do momonsoi do miagal diri. 2 Tu' nokoilo kou no di ponudukan di pinotuduk dahai dokoyu do mikuwo'd kuasa' do Tuhan Yesus. 3 Korohian nopod Kinorohingan om patahakon kopio dokoyu dot id dau o koposi-posion dokoyu om lumidang kou om minsodu' do koinsanai di wowonsoyon di kagait do tampahu'. 4 Om apatut do koilo o pointikid-tikid do kusai do kowoyo-woyoon dau dot id sawo dau, do tumanud di kohubayaan do Kinorohingan om kohubayaan do tulun. 5 Om kada' pomonsoi do nunu nopo do tumanud do korohian do don tinan dot id sawo nu, do miagal di wonsoyon di tulun dit a' kotutun do Kinorohingan. 6 Om kada' nod haro o tongosongulun piya do momonsoi'd sala' do miagal diri dot id tobpinai dau ko' monipu' po dau. Nokoinsan no kopio dahai iyokoyu do hukuman nondo do Tuhan o tulun do momonsoi do kasalaan do miagal diri. 7 Kinapamalahawan nopod Kinorohingan dati' om okon i' ko' momonsoi di kagait do tampahu' suwai ko' momonsoi di kohubayaan dau. 8 Tulun nopo dit a' rumamit diti ponudukan diti, om okon i' ko' tulun ot a' dau romiton suwai ko' Kinorohingan i' ot a' dau romiton, i papatahak do Rusod dau dit olidang dot id dokoyu. 9 Om a' no dahai minog do tulison dot id dokoyu ondung poingkuro kou dot osianan di tulun dit iso-iso' o kinotumbayaan, tu' notudukan kou nod Kinorohingan do mogiinsian-sian. 10 Om nowonsoi nogi' dokoyu o miagal diri dot id koinsanai di tulun dit iso-iso' o kinotumbayaan do pointongkop do Makidunia. Nga' pokionuon po kopio dahai, oi tobpinai-tobpinai, dot oruhangan o kosonongo' do kowoyo-woyoon dokoyu. 11 Om tumotos kou no dot a' minggangau, om a' mongoi hompit do hal do tulun do suwai. Mositi' no do kumaraja' kou do mogihum do kaakan-akanan dokoyu do miagal di pinonuhuan dahai dokoyu di gulu po. 12 Om ondung momonsoi kou do miagal diri, om a' kou nondo minog do sumondiu dot id isai nopo o tulun om iri piya'ndo i tulun dit a' otumbayaan do Kristus, nga' momusou i' dokoyu.
Korikatan do Tuhan
13 Oi tobpinai-tobpinai, orohian iyahai do koilo kopio kou do pasal di tulun di nangapatai; om a' kou i' tumongob do miagal di tulun do suwai dit aiso' o pagandasan. 14 Otumbayaan toko' i' do napatai i Yesus om napasi kawagu iyau. Om iri no o kotumbaya-bayaan toko' do posion kawagu'd Kinorohingan o koinsanai di tulun di nangapatai di notumbayaan di Yesus, om kosugku' indo iyolo' di Yesus. 15 Iti no o ponudukan do Tuhan do potudukon dahai dokoyu do pasal diri. Tontok nopod korikatan do Tuhan Yesus, om iyati' nopo i songimpasi om a' toko' i' kopogulu di tulun di nangapatai no. 16 Om moro-boros nogindo i moloikat dit agayo kopio dot opuhod om pounion i torumpit do Kinorohingan do maan do popoilo. Om lumintuhun nogindo i Tuhan Yesus do mantad hilo'd surga, om poguluonon nondo do mamasi i tulun do Kristian di nangapatai no. 17 Om poinsawaton toko' nogindo iyati' i songimpasi do miwoyo' diyolo' do hilo'd haun, do mongoi solowot do Tuhan do hilo'd tawan. Om poinsugku' toko' nondod Tuhan do gisom do poingompus. 18 Iyo nopoddi, om pogiodsuur-suur kou no dot iti boros diti o pongodsuur.
Sumodia' do Mandad do Korikatan do Tuhan
1 Oi tobpinai-tobpinai, a' no iyahai minog do monulis dot id dokoyu do popoilo ondung soira' kopio dot angabayaan iti komoyon dahai'dti. 2 Tu' iyokoyu nga' koilo no kopio do Tadau nopo do korikatan do Tuhan om miagal di manakau di rumikot do dongotuong. 3 Soira' nopod moro-boros o tulun dot, “Ongosimbayan ngai' i' om aiso' o koligagaanan,” ka, nga' tontok nogiddi do sigog indo dot oontok iyolo' do kosusaan dot agayo, om aiso' no o tiso' piya do tulun do kopoggidu'. Tu' sigog i' dot ongosiliu ngai' iri, om a' i' daa insan-insanon do miagal di toruol di rumikot dot id tondu' dit a' no alaid dot osusu. 4 Nga' iyokoyu nopo om okon i' ko' poimpasi dot id suang dot otuong gisom dot otigawaan kou di tadau'ddi, do miagal do korikatan do manakau. 5 Iyokoyu ngai' nopo, oi tobpinai-tobpinai, om poimpasi i' dot id suang do tanawau om poinghompit kou no dot id tanawau dit anawau kopio, om poinghompit toko' no do poimpasi dot id suang do tanawau, om okon toko' no ko' id suang do totuong dit odondom. 6 Iyo nopoddi, om a' toko' no milo do modop nopo do miagal do tulun do suwai. Suwai ko' mositi' no do mumbangan-bangan toko', om sumodia' kopio. 7 Tu' dongotuong nopo om modop o tulun, om dongotuong do magauk o tulun. 8 Nga' iyati' nopo om nokohompit no dot id tanawau dit anawau kopio. Iyo nopoddi, om mositi' no do sumodia' kopio toko'. Om mositi' no dot otumbayaan kasai' toko' do Tuhan om osianan do tulun do suwai do mikuwo'd mogondos kopio do posion toko' do Kinorohingan. Om iri no o rapo-rapo do mongintirung dati' do tontok di sumaap toko' do totuong. 9 Tu' okon i' ko' hukuman o kinopomilian do Kinorohingan dati', suwai ko' posion dot i Tuhan toko' i Yesus Kristus o pamasi. 10 Napatai no iyau dot iyati' o kinapatayan om rumikot nopondo iyau kawagu --- do poimpasi toko' po tuu ko' poimpatai po --- om kosugku' toko' no dau. 11 Iyo nopoddi, om pogiodsuur-suur kou no, om pogitulung-tulung kou no do miagal di wonsoyon dokoyu do dinondo.
Piro-Piro o Nosihat dit id Tohuri no om Podsusuwau
12 Oi tobpinai-tobpinai, pokionuon no kopio dahai do podulon dokoyu i tulun di kumaraja' dot id pogialatan dokoyu; iyolo' i nongopili' do Tuhan do momoyo' dokoyu om monosihat dokoyu. 13 Om podulon no kopio dokoyu iyolo' do mikuwo'd osianan diyolo' dot i winonsoi diyolo' o kopomodulan. Om mogiuulud kasai' kou no. 14 Om pokionuon nogi' dahai, oi tobpinai-tobpinai, do poinsanon om nosihatan dokoyu i tulun dit akaul, om pogiroton no o ginawo di tulun di moddosi, om tulungon i tulun dit apatut do tulungon, om polonuton no o ginawo dot id koinsanai'd tulun. 15 Antaan-taan no kopio om aiso' i' o tulun do sumuli' do karaaton dot it araat o ponuli'. Om tumotos no do momonsoi kasai' dot osonong, dot id sompi' ko' iyokoyu ngai' om id koinsanai'd tulun. 16 Kongotood kou no kasai', 17 om sumambayang kasai' kou no. 18 Om mongunsikou kasai' kou no, do poingkuro nopo o koiyon-iyono' dokoyu, tu' iri no o korohian do Kinorohingan do wonsoyon dokoyu, i tulun di nokoiso' dot id Kristus Yesus. 19 Om kada' dokoyu antabai o Rusod do Kinorohingan. 20 Om kada' dokoyu pagaan-gaano' i boros di mantad id Rusod do Kinorohingan. 21 Om toinuon ngai' no dokoyu o nunu nopo, om tonudon no kopio dokoyu it osonong. 22 Om tongkiad kou no do mantad id koinsanai dit angaraat. 23 Om Kinorohingan no o manahak dati' do kosimbayanan do ginawo. Om posiliu kopio dokoyu do tulun di pointahak kopio dot id Kinorohingan o koposi-posion. Om ogompi' kou i' kopio do Kinorohingan, tu' rusod om ginawo om tinan dokoyu nga' ogompi' i' dau do gisom dot aiso' o bohiton do gisom do korikatan kawagu do Tuhan toko', i Yesus Kristus. 24 Kinorohingan nopo i minomolohou dokoyu, om otorodok i' do momonsoi do koinsanai'ddi. 25 Om sambayangan no iyahai dokoyu, oi tobpinai-tobpinai. 26 Mogitatabi' ngai' kou no do mikuwo'd osuwau do miagal do tulun do Kristian di mogiobpinai. 27 Om pokionuon ku no kopio dokoyu dot id suang do kuasa'd Tuhan, do basaon dokoyu iti surat diti dot id koinsanai'd tulun dit iso-iso' o kinotumbayaan. 28 Om pokionuon ku no i Tuhan toko' i Yesus Kristus, do mamarakat dokoyu.
1 Oi tobpinai-tobpinai, i sidang do hilo'd Tosolunika, i nosiliu do tulun do songonuon do Kinorohingan, i Tapa' toko' om songonuon di Tuhan Yesus Kristus. Mogondos iyahai, iyoho' i Paulus om i Silas om i Timotius, 2 dot onuan kou do Kinorohingan Tapa' om Tuhan Yesus Kristus do barakat om kosimbayanan do ginawo.
Kopomutusan di Rumikot o Kristus
3 Oi tobpinai-tobpinai, apatut no do mongunsikou kasai' iyahai dot id Kinorohingan dot iyokoyu o kopongunsikahan. Om atantu' nod apatut i' do miagal diri o wonsoyon dahai tu' murut-surut i' o kotumbayaan dokoyu dot id Kristus, om muhang-ruhang o kosianan dokoyu dot id tulun do suwai. 4 Om iri no o koposusuyan dahai do pasal dokoyu dot id pointikid-tikid do sidang do Kinorohingan dit oongoi dahai koolimbuha'. Om oondos tomod iyahai do popinsusui do kogiroto' do kotumbayaan dokoyu dot id Kristus dot id suang kou piya do koinggoritan om koudipanan. 5 Om iti noddi o popointalang dot otulid o pomumutus do Kinorohingan; tu' noinggorit kou no dot i Pomorintaan do Kinorohingan o kinoinggoritan dokoyu. Om iri noddi o kinoposorupayan dokoyu do sumuang di Pomorintaan diri, 6 om wonsoyon indo do Kinorohingan it otulid. Om sulian dau do koinggoritan i tulun di minonginggorit dokoyu. 7 Om iyokoyu it oinggorit do baino' --- om iyahai nogi' --- nga' onuan indo do Kinorohingan do kosimbayanan do tontok di tadau'd kolintuhunan do Tuhan Yesus do mantad hilo'd surga do miwoyo' di moloikat dau dit ongokoris, 8 om mitonggoi do tapui di molob-ngolob. Om rumikot iyau do mongoi pomohukum di tulun dit a' mamadul do Kinorohingan, om it a' tumanud di Habar dot Osonong do pasal do Tuhan toko' i Yesus, dot id suang do koposi-posion diyolo'. 9 Om hukuman nogindo i tulun diri do koinggoritan dit aiso' o kopupuson, om potongkiadon do mantad id Tuhan om mantad id kuasa' dau dit agayo kopio; 10 do tontok di tadau di rumikot iyau do poinggoyoon do tulun di songonuon dau om pusohon do koinsanai di tulun di nongotumbayaan. Om iyokoyu nga' hino indo do poingamung di tulun di songonuon do Kinorohingan diri, tu' notumbayaan kou i' di habar di pinosusui dahai dot id dokoyu. 11 Om iri noddi ot a' dahai kotingkadan do sumambayang do bagi' dokoyu. Om sumambayang iyahai om posorupayon kou indo do Kinorohingan do momonsoi di korohian dau dot id suang do koposi-posion dokoyu, tu' iri no o kinapamalahawan do Kinorohingan dokoyu. Om Kinorohingan no o mamayaan di korohian dokoyu do momonsoi dit osonong do mikuwo'd kuasa' dau, om iyau o momongo do koinsanai do karaja' di wonsoyon dokoyu, tu' notumbayaan kou i' di Kristus. 12 Om iyo noddi do koinggayo dokoyu i Yesus i Tuhan toko', om iyokoyu nga' poinggoyoon indo di Yesus tu' osonong i' o Kinorohingan toko' om i Tuhan Yesus Kristus.
Tulun dot Araat
1 Om pasal no di korikatan do Tuhan toko' i Yesus Kristus, om i pasal do koponimungan do Tuhan dati' do posugkuon dau om iti no o posunudon kopio ku dokoyu. 2 Kada' kou koruhai kopio dot oborulong ko' tumangkabo do haro piya o habar do norikot no o tadau do korikatan kawagu do Tuhan Yesus. Tu' iri nopo doti' om pinoboros mantad do tulun di nakaanu do toilaan do pasal diri ko' mantad po dot id ponudukan, ko' haro doti' o mimboros do nokoumbal iyahai do minonulis do miagal diri dot id iso' di surat dahai. 3 Nga' poingkuro piya nga' kada' kou no pokitipu' do tulun. Tu' a' po orikot o Tadau'ddi dot a' po ongosiliu ngai' o miagal diti: Ogumu' nondo o tulun do magada' di kinotumbayaan, om sumaap do Kristus; om mintalang nondo i Tulun dot Araat, i natantu' mantad do posuangon dot id naraka. 4 Om sumaap nondo iyau om minggayo-gayo dot id pogialatan do koinsanai di tukuon do tulun, ko' i ponokokinorohingan di sorohon do tulun do Kinorohingan kopio. Om miyon nondo iyau do hiri'd Walai'd Sasambayangan dot Agayo, om popimboros dot iyau no i Kinorohingan kopio. 5 Sorohon no dokoyu do koinsanai'ddi om nokoboros ku no mantad dot id dokoyu di poinsugku' oku po dokoyu. 6 Om oilaan i' dokoyu i mangantob diri dot osiliu do dinondo. Nga' mintalang nondo i Tulun dit Araat diri dot orikot i maso di natantu' mantad do Kinorohingan. 7 Tu' iri nopo i kuasa' di momonsoi di karaaton diri om nokotimpuun nod kumaraja' nga' poillisok-lisok, nga' pusus-pususon po. Ondung oidu' i kopusus diri, 8 om okito nogindo kopio i Tulun dit Araat. Om soira' nopondo do korikot o Tuhan Yesus om patayon nondo dau di pinuhobo di mantad id kabang dau i Tulun dit Araat diri, om patayon dau iyau di tulinau, i tanda' do poirapou iyau. 9 Rumikot nondo i Tulun dot Araat diri do mitonggoi di kuasa' dot agayo do mantad id Rogon. Om mingwonsoi nondo iyau do mogisuayan o koimayaan om i kosuayan kopio di poimponu' do poninipu'. 10 Om mamakai nondo iyau di toilaan dot araat do pamalid di tulun di kumaa dot id kapatayon. Patayon nondo iyolo' tu' mada' i' iyolo' om a' iyolo' orohian di habar dit otopot do mantad id Kinorohingan, i milo daa do mamasi diyolo'. 11 Om iri noddi o kinoporikatan do Kinorohingan dot id diyolo' di kuasa' di mamalid, gisom do monongkuyaan nogiddi iyolo' dit a' otopot. 12 Kootuson nopoddi om hukuman ngai' nondo i tulun dit orohian do momonsoi'd dusa om it a' otumbayaan dit otopot.
Pinili' Kou do Maan Posio'
13 Oi tobpinai-tobpinai di kosianan do Tuhan! Apatut i' do mongunsikou kasai' iyahai dot id Kinorohingan dot iyokoyu o kopongunsikahan, tu' mantad po di timpuun i' om nopili' mantad kou no do Kinorohingan do maan dau posio'. Om kinosili-silihan nopo do miagal diri om iri i winonsoi di Rusod do Kinorohingan dot id dokoyu do poposiliu dokoyu do tulun dit olidang om i songonuon do Kinorohingan; om iri kotumbayaan dokoyu di habar dot otopot do mantad id Kinorohingan. 14 Om iri no o kinapamalahawan do Kinorohingan dokoyu dot i Habar dot Osonong di pinosusui dahai dot id dokoyu o pinawayaan dau do minomolohou. Linohou kou pogi' do Kinorohingan nga' orohian iyau do kaanu kou iyokoyu di kagayaan di Tuhan toko' i Yesus Kristus. 15 Iyo nopoddi, oi tobpinai-tobpinai, om gumirot kou no kopio om kada' dokoyu ilihai i ponudukan di nongkotuduk dahai dokoyu, i ponudukan dit iyahai kopio o pinopoboros dot id dokoyu, ko' iri po i ponudukan di tinulis dahai. 16-17 Om pokionuon ku no do Tuhan toko' i Yesus Kristus om Kinorohingan, i Tapa' toko', do monginsasamod om popokoris do ginawo dokoyu, om milo kou i' do momonsoi om popinsusui dit osonong. Tu' osianan i' o Kinorohingan dati', om iri i' i kosonongo' dau o papalanut kasai' do ginawo toko', om mogondos toko' indo dit ongosonong.
Sumambayang Kou no do Bagi' Dahai
1 Id tohuri nondo oi tobpinai-tobpinai, om pokionuon dahai do sumambayang kou do bagi' dahai. Sumambayang kou no om oruhai id kotongkop i habar do mantad id Tuhan, om aramit iri kosonong-sonong do miagal di nosiliu dot id dokoyu di gulu po. 2 Om sumambayang kou no om poiduwon i' iyahai do Kinorohingan do mantad id tulun dit angaraat om it ongorongit. Tu' a' i' oinsanan no o tulun do monongkuyaan di habar do mantad id Tuhan diri. 3 Nga' otorodok i' o Tuhan. Om pokorison kou indo dau om intirungan kou do mantad id di Yaraat. 4 Om monongkuyaan i' kopio iyahai do Tuhan do pasal di wonsoyon dokoyu, do masaan i' dokoyu do momonsoi di pinonuhuan dahai dokoyu om tumilombus kou do momonsoi'ddi. 5 Om pokionuon ku no o Tuhan do monuduk dokoyu; om kosuhut kou indo kopio dot osianan o Kinorohingan dokoyu om manahak dokoyu o Kristus do kolonuton do ginawo.
Apatut Kou i' do Kumaraja'
6 Oi tobpinai-tobpinai, suhuon ku iyokoyu do mikuwo'd kuasa' do Tuhan Yesus Kristus do minsodu' kou do mantad id koinsanai di tulun dit angakaul om it a' tumanud di ponudukan di pinotuduk dahai diyolo'. 7 Tu' koilo kou i' do mositi' no do momit kou dahai. 8 Iyahai nopo om a' i' akaul do tontok di poinsugku' iyahai dokoyu. A' i' iyahai minangakan do taakanon do wokon dit a' dahai binayaran. Om a' i' iyahai tumingkod do kumaraja' do tadau om totuong do gisom do kototos tomod iyahai do kumaraja', om a' i' iyahai koponusa' dot isai nopo dot id pogialatan dokoyu. 9 Om okon i' ko' aiso' o kosorupayan dahai do mokitulung dokoyu do kinapamansayan dahai do miagal diri, suwai ko' kinapamansayan nopo dahai do miagal diri om orohian iyahai do sumiliu iyahai dot usuyan dokoyu dit osonong. 10 Tontok di poinsugku' po iyahai dokoyu, om minanahak iyahai dot oturan do poingkaa, “Tulun nopo dit akaul om a' no koino-ino do makan,” ka. 11 Kinapamarasan nopo dahai do miagal diri nga' nokorongou iyahai do haro o tulun dot id pogialatan dokoyu dit angakaul. Aiso' i' o wonsoyon diyolo' do suwai ko' mongoi pamagangau do karaja' do tulun do suwai. 12 Om id suang no do kuasa' do Tuhan Yesus Kristus do suhuon dahai om poinsanon dahai o tulun do miagal diri do kumaraja' kosonong-sonong om mimpori-pori do mogihum do diyolo'd kaakan-akanan. 13 Nga' iyokoyu nopo om kada' kou kapaasai do momonsoi dit ongosonong. 14 Haro i' dotindo o tulun do koimbagu dot a' tumanud di pinoboros dahai dot id suang do surat diti. Nga' antaan-taan no dokoyu o tulun do miagal diri, om kada' kou ongoi ponokiambalut dau om ointingayam i' iyau. 15 Nga' kada' indo dokoyu iyau poiyoo' do miagal do pisangod; suwai ko' nosihatan nopo dokoyu iyau do miagal do tobpinai dokoyu.
Boros do Pongolimpupus
16 Tuhan no o tadon do kosimbayanan do ginawo toko'. Om pokionuon ku no iyau do manahak kasai' dokoyu do kosimbayanan do ginawo dot id suang do nunu nopo. Om Tuhan no o moyo-woyo' ngai' dokoyu, oi tobpinai-tobpinai. 17 Tabi' do mantad id doho', i Paulus. Iyoho' no kopio o monulis do bohogian diti. Om iyo nodti o pananain ku do koinsanai'd surat ku. 18 Om pokionuon ku no o Tuhan toko' i Yesus Kristus do mamarakat ngai' dokoyu, oi tobpinai-tobpinai.
1-2 Oi Timotius, i tanak kopio ku dot id suang do Tuhan! Iti nopo surat diti om mantad id doho', i Paulus, i nosiliu do rasul di Kristus Yesus, do tuminanud di pinonuhuan do Kinorohingan, i Gampamasi dati', om tuminanud di pinonuhuan di Kristus Yesus, i pagandasan toko'. Pokionuon ku no dot onuan ko'd Kinorohingan Tapa' om i Kristus Yesus, i Tuhan toko', do barakat, om kosianan, om kosimbayanan do ginawo.
Popoinsan do Pasal di Ponudukan di Mamalid
3 Orohian oku do mundorong ko nopo do hilo'd Iposus do miagal di pinoboros ku diya' do tontok di minongoi oku do hilo'd Makidunia. Tu' haro o piro-piro tulun di popintuduk do ponudukan dit a' otopot do hilo'd Iposus. Om mositi' no do tingkodon nu iyolo' do popintuduk diri. 4 Om sunudan no iyolo' do magada' di totongonon om i susui-susui do pasal do sinolusukan dit a' opupus-pupusan. Iri ngai' nopoddi om popoimbulai nod pogitatagadan, om a' i' popoburu' di natantu' mantad do Kinorohingan do wonsoyon dau. Tu' osuhutan nopo i natantu' mantad do Kinorohingan do wonsoyon dau'ddi om otumbayaan toko' dau. 5 Koponosihatan ku nopodti nga' orohian oku do kaanu o tulun do ginawo dit olidang, om kopurimanan do ginawo dit osonong, om kotumbayaan dot ogirot dot id Tuhan, om milo indo iyolo' do mogiinsian-sian do sompi' ko' iyolo' ngai'. 6 Haro no o piro-piro tulun dit a' iyo'ddi o kowoyo-woyoon, om napalid iyolo' dot id pogisosongkiwalan dit aiso' o kotutuk-tutukon. 7 Om orohian daa iyolo' do sumiliu'd guru do Tourat, nga' a' i' iyolo' kosuhut di boros di popimboroson diyolo', om a' kosuhut di pokotopoton kopio diyolo'. 8 Oilaan toko' i' dot osonong i Tourat, ondung koontok o panananud diri. 9 Om mositi' no do sorohon dot iri nopo toturan om okon i' ko' i tulun dot osonong o kinapamansayan, suwai ko' i tulun di tumolibamban do toturan, om i tulun dot araat, om i tulun dit a' otumbayaan do Kinorohingan, om i tulun di momonsoi'd dusa, om i tulun dot aiso' o tugama'; om i tulun di dom pomogunan o kowoyo-woyoon, om i tulun di mamatai do tina' om tapa' dau, om koinsanai'd tulun di gampamatai, 10 om i tulun di magampahu', om i magampahu' dot oiyo ko' kusai, om i mononggoi'd tulun dot araat o kapananggayan, om i goudut; om i mingudut do tontok do sumiliu'd sasi'; om isai nopo i mingwonsoi dit a' miontok do ponudukan dit otopot. 11 Om iri nopo i ponudukan dot otopot diri om id suang di Habar dot Osonong, i mantad id Kinorohingan di kikagayaan om it apatut do royohon.
Mongunsikou di Kosianan do Kinorohingan
12 Mongunsikou oku no di Kristus Yesus, i Tuhan toko'. Iyau no i minanahak doho' do kokorisan do momonsoi'd karaja' dau, om pinosorupai oku dau do momonsoi do karaja'dti, 13 do mulong piya do minongindaraat om minonginggorit oku, om minomohingi-hingi oku dau di gulu po. Nga' ninsianan oku id Kinorohingan, tu' tontok nopoddi om a' oku po nokotutun om a' oku notumbayaan di Yesus Kristus, om a' oku iddi kosuhut di pingwonsoyon ku. 14 Nga' tinuntugan oku i' di Tuhan do kosianan dau dit agayo kopio. Om nonuan oku dau do ginawo di milo dot otumbayaan dau om osianan do koinsanai'd tulun. Om pinatahak i' dot id dati' ngai' i komiloo' diri, iyati' i nokoiso' no dot id Kristus Yesus. 15 Otopot i' kopio o boros diti --- om ka pogi' dot apatut do romiton om ponongkuyaanan kopio ---, “Ruminikot i Kristus Yesus do hiti'd pomogunan do mongoi pamasi di tulun di kidusa,” ka. Om iyoho' no i tulun di kidusa dit araat no kopio. 16 Nga' iri nogi' o kinoponginsianan do Kinorohingan doho', om milo i' do Kristus Yesus do pointalangon kopio i kolonuto' do ginawo dau dot id doho', iyoho' i tulun dit agayo kopio o dusa. Om iti no ot osiliu dot iso' o poiyaan dot id koinsanai'd tulun dit otumbayaan dau do koimbagu om i kaanu do koposion dit otopot kopio om i poingompus. 17 Om apatut no do suahon om royohon kasai' o Kinorohingan, i Raja' do gisom do poingompus, tu' iyau nopo om aiso' i' o kopupuson, om a' okito om iso-iso'! Amin. 18 Oi Timotius, i tanak ku! Patahakon ku nopo dot id diya' iti karaja' diti, do tumanud di boros do Kinorohingan di pinolombus di piro-piro nabi dot id suang do sidang do pasal diya'. Om iri no i boros diri o sumiliu'd rapo-rapo nu do tontok do sumaap ko dot id suang di pisaapan dit osonong. 19 Igitan no kopio i kotumbayaan nu dit otopot do mikuwo'd osonong o kopurimanan do ginawo. Haro i' o tulun dit a' mamadul do kopurimanan do ginawo diyolo', om gowoi poddi om naraag o kotumbayaan diyolo'. 20 Id pogialatan nopo diyolo' om i Himonius om i Aliksandor. Iti nopo duwo o tulun diti om nohukuman ku no, do pinomohukum ku nopo om pinatahak ku iyolo' dot id Rogon, om minsingilo indo iyolo' do tumingkod do mongindaraat do Kinorohingan.
Monuhu' do Sidang do Sumambayang
1 Id gulu nopo kopio, om pokionuon ku kopio do sumambayang kou do bagi'd tulun do suwai, om sumambayang kou do mokianu kopio do mikuwo'd mongunsikou dot id Kinorohingan, do koinsanai'd tulun o sambayangan; 2 om sambayangan ngai' i raja' om koinsanai'd tulun di momorinta'. Om pokionuon no dokoyu dot osimbayan toko' do momogun-mogun om momusou toko' do Kinorohingan om osonong o kowoyo-woyoon toko'. 3 Iri no it osonong om i kohubayaan do Kinorohingan, i Gampamasi dati'. 4 Korohian nopo dau om apasi ngai' o tulun om kongoilo iyolo' dit otopot. 5 Tu' iso' noo o Kinorohingan, om iso-iso' i momialatan do Kinorohingan om tulun, iri no i Kristus Yesus. 6 Iyau no i pinapatahak do tinan dau do popoidu' do koinsanai'd tulun do mantad id toinsanan do dusa diyolo'. Om iri no o kointalangan kopio do pinointalang do Kinorohingan dot orohian iyau do mamasi do koinsanai'd tulun do tontok di maso di natantu' mantad. 7 Om iri no o kinoponuhuan dau doho' do kumaa do hilo'd tulun dit okon ko' Yohudi do mongoi poposusui di habar do pasal do kotumbayaan dit otopot. Iti nopo poboroson ku'dti om otopot i', om a' oku i' mongudut. 8 Om pokionuon ku no do sumambayang o tongokusai do hinonggo nopo do mikuwo'd olidang o ginawo, om a' tumogod om a' mogisosongkiwal. 9 Om tongoondu' nga' pokosuhat-suhatanon nopo o pomolumis do tinan om mamakai do pakayan dit osonong om it apatut. Om a' i' posuwayon kopio o ponunudai do tobuk do gisom dot a' osonong dot okito, om a' manampakai do tamas ko' mutiara' do maan do pongillumis, om a' manampakai do pakayan dit adalaan kopio kamahal. 10 Suwai ko', osonong nogi' do lumison o tinan dot i wowonsoyon dot osonong o pongillumis, do miagal dit apatut do wonsoyon do tondu' dit otorodok do sumambayang dot id Kinorohingan. 11 Tongoondu' nopo om mositi' no do mihuboyo-boyo' do tontok di minsingilo om a' apatut do minghiyo. 12 Om a' oku i' pabanar do tongoondu' do monuduk ko' momohuruan po do tongokusai; iyolo' nopo om mositi' no dot a' nopo mimboros. 13 Tu' iri nopo gulu wonsoyo' om i Adam i', om wonsoyo' nogiddi i Hawa. 14 Om okon i' ko' i Adam o notipu', suwai ko' i tondu', om gowoi poddi om nokotolibamban iyau di pinonuhuan do Kinorohingan. 15 Nga' iyo piya'ddi, nga' apasi indo o tongoondu' dot i mogkosusu o kapasi-pasi, ondung osiriba' no o ginawo dau do monongkuyaan kasai' do Kristus, om osianan kasai' do tulun do suwai om patahakon dau dot id Kinorohingan o koposi-posion dau.
I Piro-Piro o Boyoon do Sidang
1 Otopot i' kopio iti boros do poingkaa, “Iri nopo tulun dit orohian do sumiliu'd boyoon do sidang, om orohian no do karaja' dit osonong kopio,” ka. 2 Iri nopo tulun di sumiliu'd boyoon do sidang om mositi' no do tulun dit aiso' o kabara-barasan, om iso' noo o sawo, om kopusus do korohian do tinan dau, om milo'd momusorou, om osinondot o kowoyo-woyoon; om orohian do papasalakoi do tulun dot id walai dau, om milo'd monuduk do tulun; 3 om okon i' ko' i tulun di magagauk, ko' iri po i monokisongkiwal nopo, suwai ko' mositi' no do tulun iyau dit alamaya' o kowoyo-woyoo' om orohian do monokiulud, om a' i' iyau koino-ino dot adalaan do rumohian do tusin. 4 Om mositi' no do milo iyau do mongulud kosonong-sonong di sompiiyon dau, om monuduk do tangaanak dau do mumboyo' om momusou dau. 5 Tu' ondung a' o tulun milo do mongulud do dau'd sompiiyon, om poingkuro daa'ndo iyau do milo do mongulud do sidang do Kinorohingan? 6 Tulun nopo di silihon do boyoon do sidang om a' i' koino-ino do tulun di wagu po kosiliu'd Kristian, tu' minggayo-gayo dotindo iyau, om apapalan nondo do miagal di Rogon di gulu po. 7 Om mositi' no do tulun iyau di pusohon do tulun dit id soliwan piya do sidang; tu' ondung amu', nga' indaraaton indo iyau'd tulun, om gisom do kosulung iyau do lawa'd Rogon.
I Palayan dot id Sidang
8 Om iri tulun do silihon do palayan dot id sidang nga' mositi' nogi' do tulun dit osonong om it otulid o ginawo; om a' adalaan do rumohian do tusin om a' orohian do mindala' do monginum do waig dot anggur. 9 Om mositi' no do gumirot kopio iyolo' do mikuwo'd osonong o kopurimanan do ginawo dot id ponudukan di ponongkuyaanan do dong Kristian di nokointalang do Kinorohingan. 10 Mositi' no do toinuon po mantad iyolo', om kointalang pondo dot aiso' o kabara-barasan diyolo', om milo nogindo iyolo' do silihon do palayan dot id sidang. 11 Om sawo diyolo' nga' mositi' no do tulun dit osonong, om okon i' ko' it orohian do mimboros do kowoyo-woyoo' do tulun do suwai. Om mositi' no do koporinta' iyolo' do ginawo diyolo', om otulid o wonsoyon dot id suang do nunu nopo. 12 Om tulun nopo di palayan dot id sidang om mositi' no dot iso' noo o sawo. Om mositi' no do milo iyau do mongulud kosonong-sonong di tangaanak om i sompiiyon dau. 13 Iri nopo tulun dit osonong o pomomonsoi di karaja' diyolo' dot id sidang, om pusohon indo om muhang-ruhang o kasangango' do popinsusui di kotumbayaan dau dot id Kristus.
I Tonsi Kopio do Ponudukan do Tugama' Toko'
14 Mogondos oku nopo do koongoi oku do hino'd diya' dot oruhai. Nga' iyo piya'ddi, nga' tulison kasai' ku po iti surat dot id diya', 15 tu' alaid oku nopod koongoi, om koilo mantad ko po do kowoyo-woyoo' do koposi-posion toko' dot id suang do sompiiyon do Kinorohingan, iri no i sidang do Kinorohingan di poimpasi. Om iti no sidang o miagal do torigi do papapanggor om i momogompi' kopio di ponudukan dot otopot do mantad id Kinorohingan. 16 Aiso' no o songulun piya do milo'd mogolim do kogoyoo' do tonsi do ponudukan diti tugama' toko' do poingkaa: Minintalang iyau dot id koinsanai'd tulun, om pinokotopot iyau di Rusod do Kinorohingan, om nokito iyau do moloikat. Pinopinsusui dot id koinsanai'd bansa' o habar do pasal dau, om kinotumbayaan iyau do tulun do pointongkop do hiti'd pomogunan, om pinoinsawat iyau do hilo'd surga.
I Piro-Piro o Gomponuduk di Goudut
1 Om oingod no kopio i pinoboros di Rusod do Kinorohingan, do koimbagu nopondo om haro nondo o piro-piro tulun do magada' di kinotumbayaan diyolo', om mogolim iyolo' do Kristus. Om mumboyo' nogindo iyolo' di rusod di mamalid om tumanud do ponudukan di rusod dot araat, 2 i popinsusuyon do tulun di goudut om i minsorupai-rupai no toomod. Om a' no kotutun dit araat ko' it osonong o kopurimanan do ginawo do tulun do miagal diri. 3 Monuduk iyolo'd tulun dot a' koino-ino do kumawin om a' koino-ino do mangakan do piro-piro o taakanon di natantu' mantad. Nga' kinapamansayan nopod Kinorohingan do taakanon om maan nogid kanon di tulun di notumbayaan do Kristus om i nokoilo kopio di ponudukan dot otopot do mantad id Kinorohingan, do kopongunsikou iyolo'd Kinorohingan diri. 4 Koinsanai di winonsoi do Kinorohingan om ongosonong ngai' i' om aiso' i' o tiso' po do pokososomuon ondung rinamit no do mikuwo'd ounsikou dot id Kinorohingan. 5 Tu' iri no i barakat do mantad id Kinorohingan om i sambayang o pokolidang di taakanon diri.
Susuhuon do Kristus Yesus dit Osonong
6 Ondung potudukon ngai' nu'ri dot id tulun dit oiyo dot iso-iso' o kinotumbayaan, om osiliu ko no do susuhuon do Kristus Yesus dit osonong. Om ponuon kasai' no o ginawo nu do boros do Kinorohingan di kotumbayaan toko', om ponuon do koinsanai di ponudukan dit otopot, i tinanud nu do solinaid diti. 7 Insodu' no do mantad id koinsanai di totongonon dit a' momusou'd Kinorohingan, tu' aiso' i' o guna'ddi. Nga' mintingubas nogi' do sumambayang. 8 Sasais nopod tinan om a' i' kosongkuro no o guna', nga' sasais nopo di don rusod om kiguna' ngai' i', tu' iri nopo om kibatos do manahak do koposion do dinondo om koposion do koimbagu. 9 Om otopot i' kopio iri om apatut do romiton om ponongkuyaan kopio. 10 Om iri no o kopinghuyanan om katatasan toko' do kumaraja', tu' mogondos toko' i' kopio do Kinorohingan di poimpasi; om iyau no o Gampamasi do koinsanai'd tulun, om okon-okon po om i tulun dit otumbayaan. 11 Potudukon ngai' nori, om suhuon ngai' no o tulun do tumanud diri. 12 Kada' pologoso' do haro o tongoiso' pod tulun do popoinsiriba-riba' diya' dot ino tomulok ko po o kopoinsiriba-ribaan. Nga' sumiliu no do poiyaan dit osonong, dot omitanan di tulun di nongotumbayaan, dot id suang do koboro-boroso' nu om kowoyo-woyoon nu, om id suang do kosianan nu do koinsanai'd tulun om id suang do kotumbayaan nu dot id di Yesus Kristus, om id suang do koposi-posion nu dit olidang. 13 Om daamot nopo dot a' oku po korikot, om mositi' no do pakayon nu o maso om koporuo' nu do mambasa'd Buuk do Kinorohingan do parangahan do koinsanai'd tulun, om mongodsuur om monuduk diyolo'. 14 Kada' popioling-olingo' do mamakai i nipuhawang do mantad id Rusod do Kinorohingan, i nakatahak dot id diya' do tontok di sinukabayan ko di piro-piro o boyoon do sidang, om di pinolombus di piro-piro o nabi i bilin do Kinorohingan do pasal diya'. 15 Koiso-isoon no kopio o ginawo do momonsoi ngai'ddi om okito ngai' indo'd tulun o kouruton nu. 16 Antaan-taan no o kowoyo-woyoon nu om ponudukan nu. Om tumorodok no kopio do momonsoi ngai'ddi, om apasi nu indo o diya'd tinan om apasi i tulun di korongou diya'.
Tonggungan dot id Sompi' ko' Tulun dit Iso-Iso' o Kinotumbayaan
1 Kada' togodo' i tulun dit otuo ko' iya', suwai ko' angatan nogi' iyau do mokinongou'd boros nu dot iyo ko' tapa' nu iyau. Om iyoon nod tobpinai nu i kusai dit ongomulok po, 2 om iyoon nopo do tina' i tongoondu' di molohing no. Om i tongoondu' dit ongomulok po nga' iyoon nopo do tobpinai nu'd tondu', do mikuwo'd osonong om olidang o kowoyo-woyoon nu dot id diyolo'. 3 Pusohon no i tongoondu' do nopuadan dit obulun-bulun kopio. 4 Nga' ondung haro o tangaanak ko' i monongodu' do tondu' di nopuadan diri, om iyolo' no it apatut kopio do poguluonon do popopuriman dot apatut iyolo' do momogompi' dit id suang do sompiiyon diyolo', om iyolo' it apatut do monomuli' do kosianan di molohing om i todu' diyolo'ddi. Tu' iri no o korohian do Kinorohingan. 5 Iri nopo tondu' do nopuadan dit otopot kopio dot obulun-bulun, om it aiso' kopio o tulun do suwai do momogompi' dau, om i mogondos pod Kinorohingan, om monongodou nopo om mogkosuaban iyau do sumambayang dot id Kinorohingan do mokitulung dau. 6 Nga' iri nopo tondu' do nopuadan dit orohian nod minsimbayan, om napatai no do mulong piya daa do poimpasi iyau. 7 Om polombuson no dot id diyolo' iti ponudukan diti, om aiso' indo o bohiton do koposi-posion diyolo'. 8 Nga' ondung haro o tulun dit a' momogompi' di tobpinai dau, om okon-okon po om i dau'd sompiiyon, om mogolim no o tulun diri di kotumbayaan dau; om araat po iyau ko' i tulun dit a' notumbayaan. 9 Iri no i tongoondu' do nopuadan di miagal diti o kowoyo-woyoo' o koino-ino do potulison o ngaran do hiri'd potutulisan do ngaran do tongoondu' di nopuadan: it a' osiriba' ko' onom nohopod o toun, om it insan noo kakawin di gulu po, 10 om it abantug do mingwonsoi dit osonong, do miagal ko': osonong o pinomogompi' dau di tangaanak dau do gisom do nakagayo iyolo', om papasalakoi iyau do sompogunan do hiri'd walai dau, om mogobi-obi' iyau di tulun dot oiyo dot iso-iso' o kinotumbayaan, om monulung iyau di tulun dot osusa', om iso- iso' kopio o ginawo dau do momonsoi do koinsanai'd nunu nopo it osonong. 11 Kada' potuliso' o ngaran di tongoondu' do nopuadan dit ongomulok po. Tu' ondung a' diyolo' opusus o korohian do tinan diyolo', om mokikawin indo iyolo' kawagu, om tumongkiad nondo iyolo' do Kristus. 12 Om kasala' nondo iyolo' tu' a' i' diyolo' sulungon i batos diyolo' dot id Kristus di timpuun i'. 13 Om kawagu po nga' magayi' no iyolo'd maso do mongoi pinsongkoduwo dot id dombokon. Om iri no it araat ko' iri, om i mintingubas iyolo' do mongindaraat do ngaran do tulun do suwai om orohian do mongoi hompit do hal do tulun do suwai om mimboros dit a' apatut do pimboroson. 14 Om iri no o kabarasan ku dot orohian oku nogi' do kakawin kawagu i tongoondu' do nopuadan dit ongomulok po, om kianak indo iyolo' om kopomogompi' iyolo' di sompiiyon diyolo', om aiso' indo o paantakan di piro-piro o pisangod toko' do mongindaraat do ngaran toko'. 15 Tu' haro i' o piro-piro tongoondu' di nopuadan do napalid tu' tuminanud iyolo' di rusod dot araat. 16 Nga' ondung haro o tondu' di Kristian, do haro o tondu' di nopuadan dot id sompiiyon dau, om mositi' no do tulungon dau i tondu' di nopuadan diri; om a' i' apatut do pologoson dot i sidang o momogompi' dau. Om koponulung indo i sidang di tongoondu' do nopuadan dit aiso' kopio o tobpinai. 17 Iri nopo boyoon do sidang dit osonong o pomomonsoi di karaja' dau, om apatut i' dot onuan do gadsi' dot induwo kogumu' ko' i natantu' mantad, om okon-okon pondo om i tulun dit aparu' do monusui do boros do Tuhan om aparu' do monuduk. 18 Tu' nokotulis no dot id suang do Buuk do Kinorohingan o poingkaa, “Iri nopo sapi' di maso do mongulok do gandum do manantag di linsou di gandum do hiri'd rawo, om a' i' apatut do kakangan,” ka. Om haro po o poingkaa, “Iri nopo tulun di kumaraja', om apatut i' do kaanu di gadsi' dau,” ka. 19 Kada' ponongkuyaai do pononondos di papasala' do boyoon do sidang, ondung a' no haro o duwo tulun ko' lobi ko' iri do sasi' do popotopot diri. 20 Iri nopo tulun di kowonsoi'd dusa, om mositi' no do pointalangon i dusa dau om nosihatan dot id toguang do koinsanai'd tulun do hiri'd sidang, om ooris indo i wokon. 21 Om pokionuon ku no kopio, dot id toguang do Kinorohingan, om id toguang do Kristus Yesus, om id toguang di moloikat di nongopili', do tonudon kopio nu o koinsanai'dti ponudukan, om a' popoinggayo-gayo di diya'd osorou dot id isai nopo o tulun, om a' momogibang-gibang. 22 Kada' kolomus kopio do monukabai dot isai nopo o tulun do popogirot do nosiliu iyau do tulun di momonsoi'd karaja' di don Tuhan. Om ondung kowonsoi'd dusa o tulun do suwai om kada' ongoi hompit diri. Om antaan-taan no o kowoyo-woyoon nu om olidang i' kasai'. 23 Kada' nondo sompipio' kopio o waig dot inumon nu; suwai ko' monginum no dot ongokooro' do waig dot anggur, om osonong i' ot id suang do tian nu; om i maki-sakit ko nopo o koponginuman diri. 24 Dusa nopod wookon do tulun, om oilaan no do tontok piya dit a' po obutusan. Nga' dusa nod tulun do suwai om oilaan nopo om alaid. 25 Om iyo nogiddi tu' i winonsoi dot ongosonong nga' okito i' kopio. Om iri piya it a' daa okito no, nga' a' i' poillisok kasai'.
1 Iri nopo tulun do Kristian di nosiliu'd turipon, om mositi' no do momusorou dot apatut i' do suahon diyolo' i tuan diyolo', om a' i' o tulun milo do mongindaraat do ngaran do Kinorohingan ko' mongindaraat po di ponudukan toko'. 2 Om iri turipon di Kristian o tuan nga' a' i' koino-ino do papagaan-gaan di boros di tuan dau dot i Kristian goduwo iyolo' o kapagaan-gaanan. Suwai ko' apatut nogi' do ruhangan diyolo' o kosonongo' diyolo' do mogobi-obi' di tuan diyolo', tu' iso-iso' i' o kinotumbayaan diyolo' di tuan diyolo', om kosianan ngai' iyolo'.
Ponudukan dit A' Otopot om Kakayaan dit Otopot
Mositi' no do potudukon ngai' nu'ti om ponosihaton nu. 3 Om isai nopo i popotuduk do ponudukan do suwai ko' iti om it a' kosokodung di ponudukan dit otopot do mantad id Tuhan toko', i Yesus Kristus, om i ponudukan do tugama' toko', 4 om tulun nori di minggayo-gayo no toomod om aiso' o toila-ilaan! Om a' i' kopio osonong o kasanangan dau tu' orohian nopo iyau do monokisimbar-simbar om monokisongkiwal do pasal di boros do pomungaran do piro-piro o hal, gisom do moningkau do ginawo do mosol, om popoimbulai dot a' kopogiuludan, om mogiindara-raat, om minsorou do karaaton do wokon, 5 om popoimbulai do kopogitatagadan dit a' opupus-pupusan. Om pomusorou nopod tulun do miagal diri om naraag no om aiso' no o katapatan. Tu' sorohon daa diyolo' do tugama' nopo om wayaan no do kumaya'. 6 Otopot nogi' kopio do manahak do kountungan dit agayo o tugama', ondung oumbagalan no o tulun di haro dot id dau. 7 Tu' aiso' i' o nunu-nunu do nigitan toko' do hiti'd pomogunan, om aiso' nogi' o nunu-nunu do milo toko' dot igitan do sumoliwan! 8 Iyo nopoddi, om ondung haro po o taakanon om pakayan, om kabagal nori. 9 Nga' iri nopo tulun dit orohian do kumaya', om abayayat i' om oburunsut di mogisuayan o korohian di dongkababasug om i karaag. Om iri no i korohian do miagal diri o mamaraag om mamatai do tulun. 10 Tu' iri no i korohiano' do tusin o tadon do mogisuayan o karaaton. Haro i' o wookon do tulun dot adalaan kopio do rumohian do tusin gisom dot a' nondo tumanud di ponudukan do dong Kristus, om oontok nondo iyolo' dot ogumu' o koinggoritan di popotongob do ginawo diyolo'.
Ponudukan dot id di Timotius
11 Nga' iya' nopo om tulun i' di nasanganu nod Kinorohingan. Iyo nopoddi, om mositi' no do minsodu' ko do mantad id koinsanai'ddi. Om tumotos no do sumiliu'd tulun dit otopot dot id pagantangan do Kinorohingan, i sumambayang dot id Kinorohingan, om it otumbayaan do Kristus, om osianan do koinsanai'd tulun, om alanut o ginawo dot id suang do koinggoritan, om alamaya' o kowoyo-woyoo'. 12 Tumotos no kopio do tumanud di kowoyo-woyoon do dong Kristian om kaanu ko i' di hodia', iri no i koposion dit otopot kopio om i poingompus. Tu' iri no o kinapamalahawan do Kinorohingan diya' do tontok di nakun nu dot id toguang do tulun dot ogumu' dot otumbayaan ko di Kristus. 13 Om dinondo nodti, dot id toguang do Kinorohingan, i manahak do pinuhobo dot id koinsanai'd nunu nopo, om id toguang di Kristus Yesus, i pinopoboros dit otopot dot id di Pontius Pilatus, om suhuon ku iya' do 14 tumanud ngai' di ponuhuan diri do mikuwo'd olidang om aiso' o kabara-barasan do kowoyo-woyoo' do gisom dot orikot i tadau do gumuli' kawagu i Tuhan toko', i Yesus Kristus. 15 Om tontuon indod Kinorohingan i maso do korikatan di Kristus do tumanud di maso di natantu' mantad dau. Om iyau noo o Pomorinta'; om abantug iyau, om Raja' do koinsanai'd raja'; om Tuhan do koinsanai'd tuan. 16 Iyau noo it a' aala' do kuasa' do kapatayon; om poimpasi iyau dot id suang di tanawau dit a' milo'd insamakan dot isai nopo. Aiso' i' o tiso' pod tulun do nokoumbal do nokokito dau, ko' milo po do montong dau. Om iyau no ot onuan do pangkat om kuasa' do gisom dot alaid! Amin. 17 Om nosihatan no i tulun do kaya' do hiti'd pomogunan dot a' minggayo-gayo om a' sumondiu di konunu-nunuan di milo'd tumanus --- do miagal ko' i kakayaan. Apatut nogi' do sumondiu iyolo' dot id Kinorohingan, i papatahak do koinsanai'd nunu nopo dot id dati' do mikuwo'd a' aayi-ayi', om kopuriman toko' i' do kosonongo'ddi. 18 Om nosihatan no iyolo' do popointalang dit osonong, om kumaparu' do momonsoi dit ongosonong, om kumopuhawang, om orohian do manahak do nunu nopo dot id tulun do suwai. 19 Om iyo noddi o ralan diyolo' do monimung do dapu' di sumiliu'd poimpahan dit ogirot kopio do maan do koimbagu. Om iri nondo o kaanu-anu diyolo' do koposion dit aiso' o kopupuson, iri no i koposion dit otopot kopio. 20 Om gompion no kopio i pinaharapan diya', oi Timotius! Om minsodu' no di pogibara-barasan dit aiso' o guna', om i pogisimbar-simbaran do pasal di komoyon do “Toilaan” do sorohon do wookon do tulun di noborulong. 21 Tu' haro i' o piro-piro tulun di momoros do haro dot id diyolo' i toilaan diri, gisom do tumongkiad iyolo' do mantad id piro-piro o ponudukan do dong Kristian di kotumbayaan diyolo' di gulu po. Pokionuon ku no do barakatan kou'd Tuhan, oi tobpinai-tobpinai.
1-2 Oi Timotius, i tanak ku di kosianan ku! Tulison ku, iyoho' i Paulus, iti surat diti do patahakon ku diya', om mogondos oku dot onuan ko'd Kinorohingan i Tapa' toko' i Yesus Kristus do barakat, om kosianan om kosimbayanan do ginawo. Mantad i' do korohian do Kinorohingan do siniliu oku do rasul di Kristus Yesus om sinuhu' do mongoi popinsusui di koposion di pinabatos do Kinorohingan. Om aanu toko' i' i koposion diri tu' nokoiso' toko' no dot id Kristus Yesus.
Kounsikahan om Ponuhuan
3 Mongunsikou oku do Kinorohingan, i pogobi-obian ku do mikuwo'd osonong o kopurimanan do ginawo, do miagal di winonsoi di taki-aki ku di gulu po. Om mongunsikou kasai' oku nopo dot id Kinorohingan do pointikid-tikid dot osorou ku iya' dot id suang do sambayang ku, do dangadau om dongotuong. 4 Osorou ku i' i katangaban nu. Om iri noddi o korohian kopio ku daa do kosolowot diya' om otood oku indo kopio. 5 Osorou ku i' i kotumbayaan nu dit ogirot kopio dot id Kristus, do miagal di kotumbayaan di Lois i todu' nu, om i Yuniki, i tina' nu. Om monongkuyaan oku i' kopio dot iya' nga' iyo iddi o kotumbayaan. 6 Om iri no o kapasarahan ku diya' do tumilombus do mamakai di nipuhawang di nakatahak do Kinorohingan dot id diya' do tontok di sinukabayan ku iya'. 7 Tu' iri nopo Rusod do Kinorohingan di pinatahak dot id dati', om okon i' ko' Rusod di popooris dati'. Suwai ko' iri nopo Rusod do Kinorohingan diri om popokoris dati', om momonu' dati' do kosianan om gisom do milo toko'd momusus do korohian toko' di don tinan. 8 Iyo nopoddi, om kada' kotingayamai do popinsusui do pasal di Tuhan toko', om kada' kotingayamai doho', i nokogiil do Kristus o nokogiilan. Suwai ko' hompit nogi' iya' dot oinggorit dot i Habar dot Osonong diri o koinggoritan, dot i kokorisan do mantad id Kinorohingan o popokoris diya' do humompit diri. 9 Pinasi toko'd Kinorohingan om linohou toko' do sumiliu'd tulun di songonuon dau. Om kinapamansayan nopo dau do miagal diri om okon i' ko' i winonsoi toko' o pinoimpahan, suwai ko' i natantu' mantad dau do wonsoyon dau om i kosianan dau o pinoimpahan. Ninsianan toko' i' dau dot i Kristus Yesus o nosianan dit a' po nowonsoi iti pomogunan. 10 Om baino' noddi, om nokointalang nod Kinorohingan o kosianan dau dot id dati' tu' nokorikot no i Raja' do Gampamasi dati', iri no i Kristus Yesus. Om naala' no di Yesus i kuasa' do kapatayon om minongigit iyau di koposion di poingompus do pinawaya' di Habar dot Osonong diri. 11 Om kinopomilian nopod Kinorohingan doho' do sumiliu'd rasul om gomponuduk, nga' popinsusui di Habar dot Osonong. 12 Om iri no o kokuwaan dot oinggorit oku, dot iri ngai' o koinggorit doho', nga' ogirot kasai' i' o ginawo ku, tu' oilaan ku i' kopio ondung isai i kinotumbayaan ku. Oilaan ku i' kopio dot iri nopo i pinaharapan dau doho', om milo i' dau do gompion do gisom dot orikot o Tadau do Kopupuson diti Pomogunan. 13 Tonudon no kopio i ponudukan dit otopot di pinotuduk ku diya'. Om gumirot no kopio dot id kotumbayaan om kosianan, i nosiliu do dati'd songonuon tu' nokoiso' toko' no dot id Kristus Yesus. 14 Gompion no kopio kosonong-sonong o koinsanai di kiguna' kopio di pinaharapan diya', do mikuwo'd uhupan di Rusod do Kinorohingan, it id suang toko'. 15 Oilaan nu i' do nokotongkiad ngai' no doho' i tulun do mantad id pomogunan dot Asia, om nokohompit nogi' i Pigolus om i Hirmoginis. 16 Nga' iri nopo sompiiyon di Onisiporus om a' no impiro-piro do pinopotood do ginawo ku. Om maha' daa om orohian o Tuhan do pointalang do kosianan dau dot id diyolo'. Mulong piya do poinggiil oku, nga' a' i' i Onisiporus otingayaman diti koiyon-iyono' ku. 17 Tu' korikot nopo iyau do hilo'd Rum, om tilombus nopo iyau do minogihum doho' do gisom do nokosolowot iyau doho'. 18 Om oilaan nu i' dot asaru' tomod iyau do monulung doho' di hilo' oku'd Iposus. Om maha' daa do pointalangan iyau'd Tuhan do kosianan do tontok di tadau do butusan do Tuhan o koinsanai'd tulun.
Soudor do Kristus dit Otorodok
1 Oi Timotius, i tanak ku! Kumoris no dot i kosianan do nakatahak dot id dati' o kokoris, tu' nokoiso' toko' no dot id Kristus Yesus. 2 Iri nopo ponudukan ku di norongou nu di gulu po dot id toguang do tulun dot ogumu', om potudukon no dot id tulun di milo'd ponongkuyaanan om i milo do monuduk do tulun do suwai. 3 Iya' nga' mositi' i' do tumonggoi dot oinggorit do miagal do soudor do Kristus dit otorodok. 4 Iri nopo soudor di maso do kumaraja', om a' i' minggangau do momonsoi di dau'd karaja', tu' orohian i' iyau do poposonong do ginawo di boyoon dau. 5 Om iri tulun di mamain nga' a' i' kamanang dot id nunu nopo o pomoinan ondung a' no iyau tumanud di toturan. 6 Iri no gompongumo di noudipon do minorobuat ot apatut dot id gulu panganu do tua' di tanom dau. 7 Sorohon no om ilaan no o komoyon di pinoboros ku'ddi, tu' onuan ko indod Tuhan do toilaan do mongilo do komoyon do koinsanai'ddi. 8 Soroho' noti: Iri nopo Habar dot Osonong di popinsusuyon ku'ddi om habar do pasal di Yesus Kristus, i sinakagon di Daud; iyau no i Kristus i napasi kawagu do mantad id kapatayon. 9 Koinggori-goritan ku nopo om iri i popinsusui oku di Habar dot Osonong; om gisom dot akagasan oku do rantai do miagal do tulun dit araat. Nga' boros nopod Kinorohingan om a' i' milo do kagasan. 10 Iri no o kalanu-lanut do ginawo ku do tumanggung do koinsanai'ddi do maan do koinsanangan do koinsanai'd tulun di nongopili' do Kinorohingan, om kaanu i' iyolo' do koposion di patahakon di Kristus Yesus dot id diyolo', do mitonggoi do kagayaan dit aiso' o kopupuson. 11 Otopot no kopio iti boros do poingkaa, “Ondung nokotonggoi toko' dau do napatai, om kotonggoi toko' no dau dot apasi. 12 Ondung alanut o ginawo toko', om kopomorinta' toko' i' do kowoyo' dau. Ondung mogolim toko' do kotutun toko' dau, om iyau nga' mogolim nondo do kotutun iyau dati'. 13 Ondung a' toko' otorodok, om otorodok i' kasai' iyau, tu' a' i' iyau milo do sumansala' di dau mantad do kowoyo-woyoo',” ka.
I Tulun do Kumaraja' di Royohon
14 Posorohon ngai' no o tulun do koinsanai'dti. Om nosihatan no iyolo' dot id toguang do Kinorohingan, dot a' mogisongkiwal do boros nod pomungaran o kopogisosongkiwalan. Aiso' i' o guna'ddi, tu' momorulong nod tulun di korongou. 15 Tumotos no kopio do minsimparu' do kumaraja' om okunon ko i' do Kinorohingan do tulun dit osorupai kopio do momonsoi di karaja' dau. Minsimparu' no om a' ko' i' otingayaman dino karaja' nu, om koontok o ponunuduk nu di ponudukan dit otopot do mantad id Kinorohingan. 16 Insodu' no do mantad id boboroson dit aiso' o suang om i mongindaraat do Kinorohingan. Boboroson nopo do miagal diri om popoinsodu' nogi' kopio'd tulun dot id Kinorohingan. 17 Ponudukan nopod tulun do miagal diri om iyo pod gandas dit a' lumingos. Om id pogialatan nopo di piro-piro o gomponuduk diri om i Himonius om i Pilotus. 18 Nokotongkiad no iyolo' do mantad id ponudukan dit otopot, om minomorulong iyolo'd kotumbayaan do piro-piro o tulun. Momoros iyolo' do nakatalib no i maso dot apasi kawagu do mantad id kapatayon. 19 Nga' a' i' milo do guyuon i pinoimpahan dit ogirot do winonsoi'd Kinorohingan. Om notulisan no i pinoimpahan diri do poingkaa, “Otutunan i' do Tuhan i tulun di dau'd songonuon,” ka, om, “Iri nopo tulun di nasanganu dau, om mositi' no do tumingkod do momonsoi di kasala',” ka. 20 Id suang nopod walai dit agayo om mogisuayan o piring om tompurung. Haro i' o pirok ko' tamas do winonsoi, nga' haro i' i kayu ko' tana' do winonsoi. Haro i' i pakayon do tontok no di tadau'd agayo om haro i pakayon do maan di koubasanan no toomod. 21 Iri nopo tulun di momolidang do tinan dau do mantad id koinsanai dit angaraat, om iyau no o susuhuon do momonsoi dit osonong kopio. Om asanganu kopio iyau di tuan om kiguna' iyau dot id tuan dau. Om iyau o suhuon do momonsoi do pointikid-tikid do karaja' dit osonong. 22 Insodu' no do mantad id korohian do tulun dit ongomulok po. Tumotos no do tumanud di korohian do Kinorohingan dot id suang do koposi-posion nu, om tumorodok do tumanud di ponudukan dau, om osianan do koinsanai'd tulun, om haro kasai' o kosimbayanan do ginawo. Poiyoon noddi o kowoyo-woyoo' nu dot id sugku' di tulun di lumohou do mokitulung do Tuhan do mikuwo'd otulid o ginawo. 23 Kada' ponokiwoyo' do pogisimbar-simbaran do tulun di basug, it aiso' i' o toila-ilaan. Oilaan nu i' dot iri nopo om popoimbulai no do pogisosongkiwalan. 24 Iri nopo tulun di momonsoi do karaja' di don Tuhan om a' i' apatut do monokitogod; suwai ko' mositi' no dot osonong o kowoyo-woyoo' dau dot id koinsanai'd tulun, om osonong om alanut o ginawo do monuduk do koinsanai'd tulun. 25 Mositi' no dot alamaya' iyau do monuduk do tulun dit obinsaap; om maha' daa'ndo om onuan do Kinorohingan do maso i tulun diri do kumorologo do mantad id koinsanai di dusa diyolo' om kotutun indo iyolo' di ponudukan dot otopot. 26 Om iri no o ralan diyolo' do kopuriman kawagu', om koidu' do mantad id lawa' do Rogon, i minongogos daa diyolo' om minononsog diyolo' do tumanud di korohian dau.
It Osiliu do Tontok do Kopupuson do Pomogunan
1 Soro-sorohon noti: Motingkopupuson nopodti pomogunan om ogumu' nondo o kosusaan. 2 Om dau pondod tinan o sorohon do tulun, om adalaan do rumohian do tusin, om minsawat o ginawo om minggayo-gayo. Orohian nondo iyolo' do mongindaraat do tulun, om sumaap do molohing, om araatan di kowoyo-woyoo' di don rusod. 3 A' iyolo' mogiinsian-sian, om a' mangampun, om orohian do mongindaraat do ngaran do tulun do suwai, om pokoruol do mononsog, om orongit, om a' orohian dit osonong. 4 Orohian iyolo' do popohudsu, om mimilo-milo, om a' paparalom do pomusorou. Orohian nogi' iyolo' do karamayan do dom pomogunan ko' mantad do mumboyo'd Kinorohingan. 5 Mulong piya daa dot otorodok iyolo' do tumanud di ponuhuan do tugama' dit id soibau noo, nga' iyada' indo diyolo' i komoyon kopio di tugama'. Insodu' no do mantad id tulun do miagal diri. 6 Haro i' ot id pogialatan diyolo' di mongoi pinsalakoi do walai, om mongoi pamagayat do ginawo do tongoondu' dit ongoluhoi, om it ogumu' kopio o dusa om i noporinta' do mogisuayan o korohian do don tinan. 7 A' nopo otingkod do mokituduk o tongoondu' do miagal diri, nga' a' i' iyolo' insan do kosuhut kopio do ponudukan dit otopot do mantad id Kinorohingan. 8 Om poingkuro nopo i Yanis om i Yambris do suminaap di Musa di gulu po, om iyo noddi i tulun diri do sumaap di ponudukan do mantad id Kinorohingan. Naraag no o pomusarahan diyolo', om natanus o kotumbayaan diyolo'. 9 Nga' aiso' indo o nunu-nunu dot aanu diyolo' tu' oilaan ngai' indo do tulun i kababasug diyolo', do miagal di nosiliu dot id di Yanis om id di Yambris.
Piro-Piro o Nosihat
10 Nga' iya' nopo om tuminanud i' di ponudukan ku, om i kowoyo-woyoon ku, om i guna' ku do poimpasi. Om iya' no kopio o nokokito ondung poingkukuro oku do notumbayaan di Yesus Kristus do mikuwo'd iso-iso' o ginawo ku om osianan oku do koinsanai'd tulun; om oilaan nu i' o kolonuto' om kogiroto' do ginawo ku. 11 Nokokito ko i' doho' do noinggorit om norualan tomod. Oilaan ngai' nu i' i nosiliu dot id doho' di hilo' oku'd Antiokia, om di hilo' oku'd Ikonium om di hilo' oku'd Listra; om oilaan ngai' nu i' i kinoinggoritan ku! Nga' pinoidu' oku id Tuhan do mantad id koinsanai'ddi. 12 Atantu' no do koinsanai'd tulun dit orohian do momonsoi di wowonsoyon do tulun do Kristian, om it orohian do miso' kopio di Kristus Yesus om oinggorit no, 13 om iri no tulun dit araat om i monipu' om oruhangan nogindo o kararaat. Monipu' daa iyolo'd tulun do suwai nga' iyolo' piya'ndo nga' otipu' i'. 14 Nga' iya' nopo, oi Timotius, om igitan no kopio i ponudukan dit otopot, i nokotuduk dot id diya' om i ponongkuyaanan kopio nu; tu' oilaan nu i' ondung isai ngai' i minonuduk diya'. 15 Om apatut i' do sorohon nu do mantad po dit okoro' ko po om nokoilo ko no do pasal do Buuk do Kinorohingan. Om iri nopo Buuk do Kinorohingan diri om milo i' do monuduk diya' do ralan do kaanu'd koposion, dot it otumbayaan di Kristus Yesus o kaanu-anu. 16 Koinsanai di nokotulis dot id suang do Buuk do Kinorohingan om pinotuduk i' do Kinorohingan om kiguna' do popotuduk dit ongotopot, om popopuriman om popoontok di nakasala', om monuduk do tulun do tumanud do korohian do Kinorohingan dot id suang do koposi-posion dau. 17 Om iri no Buuk do Kinorohingan o milo do monuduk kopio do tulun di momonsoi'd karaja' do Kinorohingan, do gisom dot aiso' o kabara-barasan do tulun diri do momonsoi'd nunu nopo o kowoyoon do karaja' dit osonong.
1 Rumikot indo kawagu o Kristus Yesus do hiti'd pomogunan do mongoi pomutus do tulun di poimpasi om i poimpatai; om rumikot nondo iyau do mongoi pomorinta' do miagal do Raja'. Om iri no o koponuhuan kopio ku diya' dot id toguang do Kinorohingan om Kristus Yesus do: 2 Popinsusui ko di habar do mantad id Kinorohingan, om a' tumingkod do popinsusui om korongou i' o tulun, dot orohian tuu daa iyolo' ko' amu' po. Poiloon no kopio o tulun, om pointalangon no i kasala', om odsuuron no iyolo'. Om polonuton no o ginawo nu do monuduk do tulun. 3 Tu' rumikot i' moti'ndo o maso dot a' o tulun orohian do rumamit do ponudukan dit otopot. Tu' tonudon nogindo diyolo' o diyolo'd korohian, om monimung iyolo' dot ogumu' o gomponuduk om otudukan i' iyolo' di korohian diyolo'd mokinongou. 4 Sonsongon nopondo diyolo' o tolingo dot id nunu nopo it ongotopot, nga' mokinongou tomod nogindo iyolo' di tangon-tangon toomod. 5 Mulong piya dot iyo'ddi, nga' mositi' no do porintaon nu o tinan nu dot id suang do nunu nopo o kowoyo-woyoo'. Polonuton nopo o ginawo dot oinggorit piya, om wonsoyon no o karaja' nu do popinsusui di Habar dot Osonong, om wonsoyon no kopio kosonong-sonong it apatut nu'd wonsoyon tu' susuhuon ko nod Kinorohingan. 6 Nga' iyoho' no om norikot noddi o maso ku do matai do miagal ko' porsombahan di sumbolion do patahakon dot id Kinorohingan. Om a' no alaid om tumongkiad oku no do mantad id pomogunan diti. 7 Nakatanud oku no dot id ponongkusan om tuminotos oku do minanangkus; om nokorikot oku noddi di garis do kolimpupuson. Om otorodok kasai' oku i' dot id Kristus do gisom do kopupuson. 8 Om poingandad noddi i hodia' do kinamanangan ku. Om Tadau nopondod Kopupuson diti Pomogunan, om patahakon indo dot id doho' i hodia' diri, do Tuhan, i Gompomutus dit otulid o papatahak, tu' nokoulud oku no dot id Kinorohingan. Om okon nopo ko' iyoho' noo o kaanu di hodia'ddi, suwai ko' koinsanai nogid tulun di langadon kopio do magandad do korikatan do Tuhan.
Ponudukan dit id Tohuri no
9 Rumikot no kopio do hiti'd doho' dot oruhai, 10 tu' notongkiadan oku no di Dimas, tu' nosianan nogi' iyau diti pomogunan. Nokoongoi no iyau do hilo'd Tosolunika. Om i Kriskis no om minongoi do hilo'd Galatia, om i Titus no om minongoi do hilo'd Dalmatia. 11 I Lukas poo o moyo-woyo' doho'. Angatan no i Markus om powoyoon no iyau, tu' milo i' iyau do monguhup doho' do momonsoi diti karaja' ku. 12 Nosuhu' ku no i Tikikus do mongoi'd hilo'd Iposus. 13 Om mongoi ko nopondod hiti, om igitan no i rasuk di posoibahon do mamakai, i nokoiliu ku do hilo'd Truas, do hiri'd walai di Karpus. Om igitan ngai' no i buuk ku, om okon-okon po om i buuk di kulit do winonsoi. 14 Araat tomod o winonsoi di Aliksandor, i tukang basi' diri, dot id doho'. Om sulian indo iyau do Tuhan do miontok di winonsoi dau. 15 Iya' piya nga' antaan-taan no kopio do kosolowot ko dau, tu' sumaap tomod iyau di popinsusuyon toko'. 16 Tontok di koinsan ku i' do suminimbar dot id bisara', om aiso' i' o songulun piya do koruhang ku; koinsanai nopo iyolo' do tuminongkiad doho'. Om maha' daa om a' iyolo'd Kinorohingan pasalaon dot iyo piya'ddi o winonsoi diyolo'! 17 Nga' kinoruhang oku id Tuhan. Minanahak i' iyau do kokorisan gisom do milo oku do popinsusui do koinsanai di Habar dot Osonong diri, om orongou i' iri do koinsanai'd tulun dit okon ko' Yohudi. Om nokoidu' oku iddi do mantad id koligagaanan do kapatayon. 18 Atantu' no do poiduwon oku id Tuhan do mantad id pointikid-tikid di wonsoyon dot araat dot id doho'. Om pokoyoon oku indo dau do hiri'd suang di Pomorintaan dau do hilo'd surga. Om iyau no ot apatut do poinggoyoon do gisom dot alaid! Amin.
Podsusuwau dit id tohuri no
19 Tumabi' oku di Priskila om i Akuila, om i sompiiyon di Onisiporus. 20 I Irastus nopo om hilo'd Korintus, om i Tropimus no om pinoundorong ku do hilo'd Milotus tu' maso po dau do sumakit. 21 Mongoi no kopio'd hiti dot a' po orikot i maso dot osogit. Tumabi' dokoyu, i Ibulus, om i Pudis, om i Linus, om i Klaudia; om porikot nogi' do tabi' o koinsanai di tobpinai'd suwai dit iso-iso' o kinotumbayaan. 22 Pokionuon ku no o Tuhan do momoyo' diya'. Tuhan no o mamarakat dokoyu, oi tobpinai-tobpinai!
1 Oi tanak ku i Titus! Iyoho' no, i Paulus, i susuhuon do Kinorohingan, om i sinuhu' di Yesus Kristus, o minonulis diti surat diti. Pinili' oku om sinuhu' oku do monulung do tulun di nongopili' do Kinorohingan om kogirot i' iyolo' dot id kotumbayaan diyolo'. Om apatut nogi' do tudukan ku iyolo', om kosuhut i' iyolo' di ponudukan dot otopot di pinotuduk di tugama' toko'. 2 Iri nopo i ponudukan diri om poingimpou dot id pagandasan do kaanu toko' nondo do koposion dit otopot kopio om i poingompus. Nakabatos mantad nod Kinorohingan i koposion diri dit a' po nowonsoi iti pomogunan --- Kinorohingan nopo om a' i' kopio milo do mongudut. 3 Om pinointalang do Kinorohingan i batos dau'ddi do tontok di maso di natantu' mantad dau do kopointalangan, do pinointalang dot id suang di boros dau. Om iri nopo i boros diri om iyoho' o pinaharapan, om popinsusuyon ku'ddi iri do tumanud di nisuhu' do Kinorohingan, i Gampamasi dati'. 4 Oi Titus, iya' no o tanak kopio ku tu' notumbayaan goduwo to no do Kristus. Om mogondos oku no dot onuan ko do Kinorohingan i Tapa', om i Kristus Yesus, i Raja' do Gampamasi dati', do barakat om kosimbayanan do ginawo.
Karaja' di Titus do Hilo'd Krita
5 Pinoundorong ku iya' do hilo'd Krita om ongowonsoi i' it apatut nu do wonsoyon. Om kopomili' ko i' do piro-piro o boyoon do sidang dot id pointikid-tikid do bandar. Om sorohon ngai' noti potudukon ku diya': 6 Tulun nopo di silihon do boyoon do sidang om mositi' no dot i tulun dit aiso' o kabara-barasan, om mositi' no dot it iso' noo o sawo, om tangaanak dau nga' mositi' no do nongotumbayaan ngai' do Kristus om okon i' ko' i tangaanak dit abantug dot araat o kowoyo-woyoon om it a' milo do tudukan. 7 Komoyon nopod boyoon do sidang om i tulun di mongilo-ilo do karaja' di dong Kinorohingan, om a' i' apatut do haro o kabara-barasan do kowoyo-woyoon dau. Om a' nogi' iyau apatut do minggayo-gayo ko' obintogod, ko' magagauk ko' orohian po do monokisongkiwal, ko' adalaan po do rumohian do tusin. 8 Mositi' no dot orohian iyau do papasalakoi do tulun dot id walai dau, om orohian do momonsoi dit ongosonong, om koporinta' do tinan dau, om otulid om olidang o kowoyo-woyoon, om osonong o kowoyo-woyoon. 9 Om mositi' no dot igitan kopio dau i ponudukan di kinotumbayaan dau, do miagal di nokotuduk dot id dau. Om koilo indo iyau do monosihat do tulun do poingimpou di ponudukan dit otopot, om popointalang do kasalaan di tulun di sumongkiwal dau. 10 Tu' ogumu' o tulun dot orohian do sumongkiwal, om okon-okon pondo om i tulun di kitugama' di dong Yohudi di gulu po. Om monipu' iyolo' do tulun do suwai, dot i boros dit aiso' o suang o ponipu'. 11 Iri nopo i tulun do miagal diri om mositi' no dot oduhan do mimboros, tu' iri no i ponudukan diyolo' dit a' otopot o momorulong dot ogumu' o sompiiyon. Tu' kapamansayan nopo diyolo' do miagal diri om mogihum no iyolo' do tuntung, dot a' koontok o ralan do mogihum! 12 Haro nogi' o songulun o nabi dot id pogialatan diyolo', do mantad id Krita do minomoros do poingkaa, “Tulun nopod Krita om managalai-galai nopo do mongudut, om miagal po iyolo' do nintorusan dit orongit, om odoot om akaul iyolo',” ka. 13 Om otopot ngai' i' i pinoboros di nabi diri. Om iri no o koponudukan nu kopio diyolo' om gumirot i' kasai' iyolo' dot id ponudukan dit otopot, 14 om a' indo iyolo' tumanud kawagu di tangon-tangon di tulun do Yohudi ko' tumanud po di piro-piro o toturan di winonsoi di tulun di minada' di ponudukan dot otopot diri. 15 Tu' id tulun nopo dit olidang, om olidang ngai' no o nunu nopo. Nga' id tulun nopo di sosomu' o pomusarahan om it aiso' o kotumbayaan, om aiso' i' o tongoiso' piya dot olidang, tu' nososomu' no o pomusarahan om i kopurimanan do ginawo diyolo'. 16 Om momoros iyolo' do kotutun iyolo' do Kinorohingan nga' iri nopo i wonsoyon diyolo' om popointalang i' dot a' iyolo' otumbayaan do Kinorohingan. Om obinsaap iyolo' om a' mumboyo'; om iyolo' no i tulun dit a' milo do momonsoi dot ongosonong.
Tonsi di Ponudukan dit Otopot
1 Nga' iya' nopo oi Titus, om potudukon no i ponudukan dit otopot. 2 Om nosihatan no i tongokusai di molohing no, om milo i' iyolo'd sorou, om osonong o kowoyo-woyoon, om kopusus do korohian do tinan. Om mositi' no dot otumbayaan kasai' iyolo'd Kristus, om osianan do tulun dit iso-iso' o kotumbayaan, om alanut o ginawo do tumimbaba' do koinggoritan. 3 Om iyo nogiddi, tu' nosihatan no i tongoondu' di molohing no, om miontok i' di kowoyo-woyoon di tulun di nakatahak kopio dot id Kinorohingan o koposi-posion dau o kowoyo-woyoon diyolo'. Om a' no iyolo' koino-ino do mongindaraat do tulun do suwai, om a' koino-ino dot akagasan di tiinumon di kaawuk. Mositi' no do popotuduk iyolo' dit ongosonong. 4 Om koilo i' iyolo' do monuduk di tongoondu' dit ongomulok po dot osianan do sawo om tangaanak diyolo'. 5 Om milo indo iyolo' do momusorou om olidang o kowoyo-woyoon om osiliu do tina' dit osonong dot id suang do sompiiyon, om minsiriba' dot id sawo dau. Om aiso' indo o tulun do milo do papasala' di habar do mantad id Kinorohingan. 6 Om iyo nogiddi i tulun dit ongomulok po, tu' tudukan no iyolo' om milo i' iyolo' do momusorou. 7 Om mositi' no do sumiliu ko dot omitanan dit osonong o kowoyo-woyoon dot id suang do nunu nopo. Soira' nopo do monuduk ko om mositi' no dot otulid o ponunuduk nu om iso-iso' kopio o ginawo do monuduk. 8 Om poboroson no i boros di haro kopio o komoyon, it a' milo'd tulun do pasalaon, om ointingayam indo i tulun di sumaap diya', dot aiso' o kowoyo-woyoon dit araat do poimpahan diyolo' do momoro-moros dati'. 9 Om i turipon nga' mositi' no do minsiriba' dot id tuan diyolo', om mumboyo' ngai' do ponuhuan diyolo', om a' iyolo' koino-ino do sumongkiwal, 10 ko' manakau po. Suwai ko' mositi' no do pointalangon diyolo' o kowoyo-woyoon dit osonong om it otorodok, om iri indo i kowoyo-woyoon diyolo'ddi o kapamarayahan do tulun di ponudukan do pasal do Kinorohingan, i Gampamasi dati'. 11 Tu' nokointalang nod Kinorohingan o kosianan dau do pamasi do koinsanai'd tulun. 12 Om iri nopo i kosianan do Kinorohingan diri om monuduk dati' om a' toko' indo momonsoi di kowoyo-woyoon dit a' miontok do korohian do Kinorohingan om a' toko' nondo tumanud di korohian di dom pomogunan. Tu' notudukan toko' no do kowoyo-woyoo' do poimpasi do hiti'd pomogunan diti, do mikuwo'd momusus do korohian do tinan, om otulid o ginawo om otorodok dot id Kinorohingan. 13 Om dinondo nopodti om maso toko' no do magandad di Tadau dit andad- andadon toko'; tu' tontok nopo do Tadau'ddi om kokito nondo i tulun do hiti'd pomogunan do kagayaan do Kinorohingan, it Agayo Kopio om i Yesus Kristus i Raja' do Gampamasi toko'. 14 Pinatahak dau o tinan dau do pinatai do suminowoli dati' do pinopoidu' dati' do mantad id koinsanai'd karaaton, om pinoposiliu dati' do tulun di nokoidu' do mantad id dusa om siniliu toko'ddi do tulun dit iyau noo o sanganu, om it aparu' do momonsoi dit ongosonong. 15 Om potudukon ngai' no i pinoboros ku'ddi, om nosihatan no iyolo' om tudukan no kopio i mokinongou diya' do mikuwo'd kikuasa' kopio do monuduk, om kada' pologoso' o tongosongulun piya do popoinsiriba-riba' diya'.
Kowoyo-Woyoon do Tulun do Kristian
1 Posorohon no i tulun dit id suang do koinsanai di sidang nu do mositi' no do minsiriba' iyolo' dot id boyoon om id pomorinta' do pomogunan, om mumboyo', om posodia' do momonsoi do koinsanai dit ongosonong. 2 Om sunudan no iyolo' dot a' mongindaraat do tulun om a' monokisongkiwal dot isai nopo, suwai ko' kumosuwau kasai' no om alamaya' kasai' o kowoyo-woyoon diyolo' dot id koinsanai'd tulun. 3 Tu' iyati' di gulu po nga' basug i', om napalid om a' mumboyo'. Om nosiliu toko' do turipon do mogisuayan o korohian di don tinan om korohian do ginawo; om araat o korohian do ginawo toko' om mosol, om mogisuli-suli' dot araatan. 4 Nga' pinointalang i' do Kinorohingan, i Gampamasi toko', o kosianan om kosonongo' dau dot id dati'. 5 Om posio' toko' noddi dau, nga' okon i' ko' i minomonsoi toko' dot osonong o kinopomosian dau dati'. Suwai ko' pinasi toko' dau dot i Rusod do Kinorohingan o pinawayaan do minamasi, i manahak dati' do koposion do wagu om kowoyo-woyoon do wagu, dot i linihungan toko' dau o ralan dau do pinapatahak diri. 6 Om pinotuntug do Kinorohingan o Rusod dau dot id dati', dot i Yesus Kristus i Raja' do Gampamasi toko' o pinapatahak. 7 Om nokoulud toko' noddi kawagu dot id Kinorohingan dot i kosianan di Yesus o pinopoulud dati' om kaanu toko' noddi do koposion dit otopot kopio om i poingompus, it andad-andadon toko'. 8 Om otopot i' kopio iti boros diti. Om orohian oku do potudukon kopio nu iti, om monotos ngai' i' i tulun di notumbayaan do Kinorohingan do momonsoi do karaja' dit ongosonong om i kiguna' dot id koinsanai'd tulun. 9 Insodu' kou no do mantad id pogisimbar-simbaran dit aiso' o guna', om susui-susui do pasal do sinolusukan, om i pisongkiwalan, om i pisaapan do pasal di Tourat. Tu' koinsanai'ddi om aiso' i' o guna' om a' manahak do kountungan. 10 Om iri nopo i tulun di mamaraag do kouludan dot id suang do sidang, om ngoyon no nosihatai dot insan ko' induwo; om owonsoi nopondo o miagal diri om kada' nondo ongoi ponongkokuro-kuro dau. 11 Tu' oilaan nu i' do tulun nopo do miagal diri om tulun no dit araat kopio om iri no i dusa dau o popointalang do nakasala' iyau.
Piro-Piro o Ponudukan dit id Tohuri No
12 Korikot nopo i Artimas ko' i Tikikus do suhuon ku do mongoi do hino'd diya', om lomusan no do mongoi solowot doho' do hilo'd Nikopolis, tu' osorou ku'd mundorong oku'd hilo' do solinaid di maso dot osogit. 13 Tumotos no kopio do monulung di Sinas, i luyar diri, om i Apolos, om aiso' i' o kokurangan diyolo' do mamanau iyolo'. 14 Om mositi' no do minsingilo o tulun toko' do momonsoi dit osonong, om koilo i' iyolo' do monulung di tulun di kikokurangan kopio, om haro indo o guna' di koposi-posion diyolo'. 15 Om koinsanai di tulun di poinsugku' doho' nga' poporikot ngai' nopo do tabi' dot id diya'. Om porikoton no o tabi' dahai dot id tambalut toko' dit iso-iso' o kinotumbayaan. Om pokionuon ku no do barakatan ngai' kou do Tuhan.
1 Oi tobpinai ku i Pilimun, i tambalut om i koruhang dahai do kumaraja'! Iyoho', i Paulus, i poinggiil do Kristus Yesus o nokopogiilan, om i Timotius i tobpinai toko', o monulis diti surat diti dot id diya', 2 om id sidang di tumimung do hiri'd walai nu; om id di Apia, i tobpinai toko'd tondu', om id di Arkipus, i koruhang toko' do kumaraja'. 3 Mogondos iyahai do Kinorohingan i Tapa' toko' om Tuhan Yesus Kristus do manahak dokoyu do barakat om kosimbayanan do ginawo.
Kosianan om Kotumbayaan di Pilimun
4 Pointikid-tikid do sumambayang oku om roiton kasai' ku nopo o ngaran nu, oi tobpinai, om mongunsikou oku dot id Kinorohingan. 5 Tu' nokorongou oku dot otumbayaan kopio ko do Tuhan Yesus om osianan ko do koinsanai di tulun do songonuon do Kinorohingan. 6 Pokionuon ku nopo dot id sambayang ku, om iti nopo kopogiobpinayan toko', iyati' i notumbayaan, om popoimbulai daa do toilaan dit aralom do pasal do koinsanai di barakat di naanu toko' di nokoiso' toko' di Kristus. 7 Oi Pilimun i tobpinai ku, otood no kopio o ginawo ku om noodsuur oku di kosianan nu dot id koinsanai di tulun di songonuon do Kinorohingan. Oinsanan nopo i tulun di songonuon do Kinorohingan dot ongotood dot iya' o kataadan.
Pokionuon do Wonsoyon dot id di Onisimus
8 Iyo nopoddi, om a' oku no ointingayaman do monuhu' diya' do momonsoi dit apatut nu'd wonsoyon, tu' tobpinai oku no diya' dit iso-iso' o kinotumbayaan. 9 Nga' osianan oku i' diya', om mokianu oku nopo diya'. Iyoho' nopo om nokolohing no om poinggiil oku do dinondo dot i Kristus Yesus o nokogiilan ku. 10 Haro o tiso' o pokionuon ku diya', iyoho' i Paulus o mokianu, do wonsoyon nu dot id di Onisimus, i tanak ku dot id suang do Kristus. Tu' id suang no do giil diti do nosiliu oku dau do tapa' dau dot id suang do rusod. 11 Tu' aiso' i' o guna' dau dot id diya' di gulu po, nga' baino' nopoddi om kiguna' noddi iyau dot id diya' dot okon ko' iya' noo nga' iyoho' nga' kiguna' i' dau. 12 Baino' nopodti om suhuon ku i tulun di kosianan ku'ddi do gumuli' dot id diya'. 13 Otopot nopo kopio om orohian oku daa do poundorong iyau do poinsugku' doho' do sumowoli diya', om koponguhup i' iyau doho' do solinaid ku do poinggiil dot i poposusui do Habar dot Osonong do mantad id Kinorohingan o kinopogiilan. 14 Nga' a' oku i' momonsoi do nunu nopo dot a' ko po kaakun. Korohian ku nopo om iya' o manantu' do tumanud di kagaanan do ginawo nu; om a' oku i' mononsog diya'. 15 Iri no doti' o kinotongkiadan di Onisimus diya' dot oruhai, tu' asanganu nu indo kawagu iyau do gisom dot alaid. 16 Tu' baino' nopoddi om okon no ko' miagal do turipon nu iyau, suwai ko' osonong po ko' mantad diri. Iyau nga' tulun no do Kristian di kosianan kopio. Om kiguna' kopio iyau dot id doho', om okon-okon pondo dot id diya'. Tu' atantu' no do haro o guna' dau, do miagal do turipon ko' tobpinai dot id suang do Tuhan! 17 Iyo nopoddi, om ondung mambalut kopio ko doho', it oiyo do tulun do Kristian, om romiton no kawagu i Onisimus do miagal dot iyoho' o romiton nu. 18 Om ondung kisala' iyau ko' kiutang po dot id diya', om ookuro dot iyoho' piya o mananggung ngai'ddi. 19 Om tulison ku nopo o miagal diti dot iyoho' kopio o monulis: Iyoho' no, i Paulus o mambayar ngai'ddi. (Atantu' no dot a' no minog do posorohon ku iya' do kiutang ko dot id doho', dot i koposi-posion nu do wagu do nosiliu ko'd tulun do Kristian o tutang nu.) 20 Iyo nopoddi, om id suang nod ngaran do Tuhan, do pokionuon kopio ku iya' do monulung doho'. Om potoodo' no o ginawo ku do miagal do tobpinai oku diya' dot id suang do Kristus. 21 Kinoponulisan ku nopo do surat diti, om otumbayaan oku do wonsoyon nu i' i pokionuon ku dot id diya'. Om oilaan ku do momonsoi ko do lobi ko' mantad diri. 22 Om tulungon oku nogi' do poposodia' do bilik dot iyonon ku do hino'd walai nu, tu' mogondos oku i' do simbaron do Kinorohingan o sambayang do koinsanai dokoyu, oi tobpinai-tobpinai. Om pogulion oku kawagu dau do hino'd dokoyu.
Podsusuwau dit id Tohuri No
23 Om i Ipapras, i koruhang ku do poinggiil, do Kristus o kinopogiilan nga' poporikot nogi' do tabi' dot id diya'. 24 Om i Markus om i Aristarkus, om i Dimas om i Lukas i tambalut ku do kumaraja', nga' poporikot nogi' do tabi' dot id diya'. 25 Om pokionuon ku no do barakatan kou di Tuhan Yesus Kristus.
Minoro-boros o Kinorohingan dot i Tanak Dau o Pinopolombus
1 Di nopo di gulu po om kosoruan nod Kinorohingan do moro-boros dot id taki-aki toko' do mogisuayan o ralan do moro-boros, dot i piro-piro o nabi o popolombus dot id diyolo'. 2 Nga' dinondo nopo tu' motingkopupus no o pomogunan om moro-boros iyau dati' dot i Tanak dau o popolombus. Om iri no Tanak dau o pinawayaan do Kinorohingan do minomonsoi do tawan om pomogunan. Om natantu' nod Kinorohingan dot iri no Tanak dau ot osorupai do sumanganu do koinsanai'd nunu nopo. 3 Iyau no i popointalang do kagayaan do Kinorohingan dit anawau kopio; om iyau no o popointalang do kowoyo-woyoo' do Kinorohingan. Om iyau o momogompi' do koinsanai'd tawan om pomogunan om i songingiyon do hilo', dot i boros dau di kikuasa' kopio o pomogompi'. Om koidu' poddi dau o tulun do mantad id dusa diyolo', om irikau no iyau dot id tirikohonon do pomorintaan do hilo'd surga do pointalad do Kinorohingan, i Pomorinta' dit id sawat kopio.
Kogoyoo' di Tanak do Kinorohingan
4 Iri nopo Tanak diri om pinoinggayo po o pangkat ko' i pangkat di moloikat, om i ngaran di pinatahak do Kinorohingan dot id dau nga' agayo po ko' i ngaran di nakatahak dau di moloikat. 5 A' i' insan o Kinorohingan pomoros do miagal diti dot id ongoiso' piya o moloikat, “Iya' no o Tanak ku; om tadau nod baino' do nosiliu oku'd Tapa' nu,” ka. Om a' o Kinorohingan insan pomoros do miagal diti do pasal dot isai nopo o moloikat, “Osiliu oku nondo do Tapa' dau, om osiliu iyau do Tanak ku,” ka. 6 Nga' tontok di sinuhu' do Kinorohingan i Tanak dau dit id gulu do lumintuhun do hiti'd pomogunan, om poingkaa o pinoboros do Kinorohingan dot id dau, “Mositi' no do tumuku' ngai' o moloikat do Kinorohingan dot id Tanak diri,” ka. 7 Nga' poingkaa o pinoboros do Kinorohingan do pasal ngai' di moloikat, “Siniliu ngai'd Kinorohingan do tongus i moloikat dau, om siniliu ngai' dau'd sinikit do tapui i susuhuon dau,” ka. 8 Nga' poingkaa o boros do Kinorohingan dot id Tanak diri, “Hino kasai' indo do gisom dot alaid i tirikohonon nu'd momorinta', oi Kinorohingan. Otulid i' o pomorintaan nu. 9 Iya' nopo om orohian i' dit otulid, om araatan dit a' otulid; om iri no o kinopomilian do Kinorohingan diya', i Kinorohingan nu, om nonuan ko dau'd pangkat di poporikot do kataadan, dot agayo ko' i pangkat di piro-piro o tambalut nu,” ka. 10 Om boros ka kawagu'd Kinorohingan, “Iya' no, oi Tuhan, o minomonsoi diti pomogunan di timpuun i', om diya' kopio'd longon o minomonsoi'd tawan. 11 Tumanus ngai' indo iri, om rumomuk do miagal do kain; nga' iya' nopo om a' i' sumimban. 12 Lopion nu nopondo iti tawan om pomogunan do miagal di rasuk, om tingalanan nu nondo do suwai. Nga' iya' nopo om a' i' insan simban, om a' opupusan o koposion nu,” ka. 13 A' i' insan pomoros o Kinorohingan do miagal diti dot id tongoiso' piya o moloikat, “Irikau no do hiti'd dawananan ku, gisom dot apapalan ngai' ku diya' i pisangod nu,” ka. 14 Iyo nopoddi, om nunu kopio ngai' i moloikat diri? Iyolo' nopo om rusod noo di mogobi-obi' do Kinorohingan, om i suhuon do Kinorohingan do monguhup do tulun di kaanu do koposion.
Koposion dit Agayo Kopio
1 Om iri no o kopongigitan kopio toko' di piro-piro o ponudukan di norongou toko', om a' toko' i' oilihan i kotumbayaan toko'. 2 Nokointalang no dot otopot i' kopio i piro-piro o bilin do pinosunud di piro-piro o moloikat dot id taki-aki toko'. Om iri nopondo tulun dit a' tumanud ko' it a' mumboyo'ddi om ohukuman no do miontok di nowonsoi dau. 3 Om okon-okon pondo i koposion dit agayo ko' i piro-piro o bilin diri! Ondung a' toko' podulon i koposion diri, om atantu' no dot a' toko' koidu' do mantad id hukuman. Tu' Tuhan no ot id gulu kopio popoboros do pasal di koposion diri, om nokointalang no kopio dot id dati' di piro-piro o tulun dit id gulu korongou'ddi dot otopot i' kopio iri. 4 Om suwai no ko' iri, om pinogirot pod Kinorohingan i pinasasi' di piro-piro o tulun diri tu' minomonsoi iyau do piro-piro o kowoyoon do koimayaan om i kongosuayan kopio, om pinotikid dau o piro-piro o nipuhawang do mantad id Rusod do Kinorohingan, do tumanud di korohian dau.
I Poporikot do Tulun dot id Koposion
5 A' ngai' i' i moloikat kaanu do kuasa' do mantad id Kinorohingan do momorinta' dot id pomogunan di wagu di rumikot do sumonu', iri no i pomogunan di pimboroson toko' do dinondo. 6 Suwai ko' haro nogi' o nokotulis dot id iso' o bohogian dot id suang do Buuk do Kinorohingan do poingkaa, “Nunu kopio toi o tulun, oi Kinorohingan, tu' podulon nu iyau? Tulun nopo om tulun no toomod, nga' podulon nu i' iyau! 7 Pinoinsiriba' nu iyau dot oruhai ko' mantad di moloikat. Om nonuan nu iyau do kagayaan om pangkat di don raja'. 8 Om siniliu nu iyau do pomorinta' do koinsanai'd nunu nopo,” ka. Om ondung nokoboros do siniliu'd Kinorohingan o tulun do “pomorinta' do koinsanai'd nunu nopo”, om komoyon nopoddi nga' aiso' no o tiso' po dot okon ko' id suang do kuasa'd tulun. Nga' iyo piya'ddi, nga' a' toko' i' okito do dinondo do kikuasa' o tulun dot id sawat do koinsanai'd nunu nopo. 9 Nga' nokito toko' no i Yesus do kikuasa'! Pinoinsiriba-riba' iyau dot oruhai do mantad ko' i moloikat, om apatai indo iyau do sumowoli do koinsanai'd tulun, om iri nopoddi om mantad i' do kosonongo'd Kinorohingan. Om baino' nopoddi om okito toko' no iyau do noonuan do pangkat di kikagayaan om i suahon tu' noinggorit no iyau do gisom do napatai. 10 Om atantu' no dot apatut i' o Kinorohingan --- i minomonsoi do koinsanai'd nunu nopo do maan do dau'd kogunaan --- do minoniliu di Yesus do gampamasi di milo kopio'd mamasi dot i noinggorit iyau o kinoponilihan. Om iri no o komilo-milo'd Kinorohingan do mangangat dot ogumu' o tulun do poinggoyoon do potonggoyon di Yesus. Tu' i Yesus no i minongigit diyolo' dot id koposion. 11 Linihungan di Yesus o tulun do mantad id koinsanai'd dusa diyolo'; om iyau i minomolihung, om iyolo' i linihungan nga' iso-iso' i' o Tapa'. Om iri no ot a' di Yesus kointingayaman do popoboros do tobpinai dau iyolo'. 12 Boros ka di Yesus dot id Kinorohingan, “Popinsusuyon ku nondo dot id piro-piro o tobpinai ku o pasal diya'. Royohon ku nondo iya' dot id pitimungan diyolo',” ka dau. 13 Om nokoboros i' i Yesus dot, “Mogondos oku nondod Kinorohingan,” ka. Om minomoros po iyau dot, “Diya oku, do miwoyo' di tangaanak do pinatahak do Kinorohingan dot id doho',” ka. 14 Om siliu noddi i Yesus do miagal do tulun om iyo do don tulun o kowoyo-woyoo', tu' iri nopo tulun di roitan do tanak diri om tulun i' dit apatai. Om winonsoi pogi' dau o miagal diri nga' iri nondo i kapatayon dau o pangala' dau'd Rogon, i monguasa' do kapatayon. 15 Om iyo noddi o ralan dau do pinopoidu' do tulun di nosiliu'd turipon do solinaid diyolo' do poimpasi tu' moddosi iyolo' do kapatayon. 16 Om nokointalang no kopio dot okon i' ko' moloikat o tinulung dau, suwai ko' i sinakagon di Abraham. 17 Om komoyon nopoddi nga' a' no iyau milo'd a' miyo di piro-piro o tobpinai dau dot id suang do koinsanai'd nunu nopo. Om iri noddi o kinopomilian dau do suminiliu'd Boyoon dot Agayo dot Imam dit otorodok om i kikosianan. Om iri no i winonsoi dau o komilo-milo'd oompunan o dusa'd tulun. 18 Om iyau piya nga' nokoumbal i' do noinggorit om nopogumbalan, om milo iddi iyau do monguhup do tulun dit oontok do pogumbalan tu' iyau piya nga' nokoumbal i' do nopogumbalan om noinggorit.
Agayo i' i Yesus ko' i Musa
1 Oi tobpinai-tobpinai dit oiyo ko' Kristian di nolohou do Kinorohingan! Umbal kou pogi' do paparalom-ralom do pomusorou dokoyu do pasal di Yesus! Kinoporikatan nopo kopio'd Kinorohingan dau om siniliu'd Boyoon dot Agayo dot Imam dot id suang do tugama' di tonudon toko'. 2 Om otorodok i' iyau dot id Kinorohingan, i minomili' dau do momonsoi'd karaja'ddi, do miagal di Musa di gulu po tu' otorodok do minomonsoi di karaja' dau dot id koinsanai'd tulun di songonuon do Kinorohingan. 3 Nga' i Yesus nopo om apatut i' do kaanu'd pangkat dit agayo mantad ko' i pangkat di Musa. Tu' iri nopo i minomonsoi di walai om royohon no ko' mantad di walai. 4 Otopot i' do haro ngai' o minomonsoi do pointikid-tikid do walai, nga' iri nopo minomonsoi do koinsanai'd nunu nopo om Kinorohingan i'. 5 I Musa nopo om otorodok i' dot id suang do karaja' dau do mogobi-obi' do koinsanai di tulun do songonuon do Kinorohingan, om pinopolombus iyau di posunudon do Kinorohingan do pasal dit id dabantalan. 6 Nga' Kristus nopo om otorodok i' do mongilo-ilo di dong Kinorohingan do tulun, tu' Tanak i' iyau dau. Om iyati' no i tulun di songonuon do Kinorohingan diri, ondung ogirot kasai' toko' no om ogirot o ginawo toko' do mogondos do kaanu di soro-sorohon toko'!
Kosimbayanan do Patahakon dot id Tulun di Songonuon do Kinorohingan
7 Iyo nopoddi, om poingkuro nopo i pinoboros do Rusod do Kinorohingan dot, “Ondung korongou kou'd boros do Kinorohingan do tadau'd baino', 8 om kada' dokoyu pokodoho' o ginawo dokoyu, do miagal di taki-aki dokoyu, do tontok di suminaap iyolo'd Kinorohingan, om di minogumbal iyolo'd Kinorohingan di hilo'd tana' do kowotuan. 9 ‘Hilo' no i piro-piro i taki-aki dokoyu do minogumbal doho', om minonoinu' doho',’ kad Kinorohingan, ‘om inda' ka do nokokito no daa iyolo' di winonsoi ku do solinaid dot apat nohopod o toun,’ ka. 10 Om iri no o kinatagadan ku diyolo' om boros kangku'ddi, ‘A' kasai' nopo iyolo' otorodok, om a' mumboyo' di pinonuhuan ku,’ kangku. 11 Om kotogod oku noddi om sumpa' oku no do poingkaa, ‘A' nondo kopio iyolo' kosuang di pomogunan diri di koonuan daa diyolo' do kosimbayanan do poinsugku' doho',’ kangku,” ka dau. 12 Oi tobpinai-tobpinai ku, antaan-taan no kopio dokoyu om aiso' indo o tongoiso' do tulun dot id pogialatan dokoyu di kipomusarahan dot araat kopio, gisom dot atanus nondo o kotumbayaan dau, om gowoi pondo om sumunsuri iyau om minsodu' do Kinorohingan di poimpasi! 13 Iyo nopoddi, om poginosihat-nosihat kou no do pointikid do tadau, do solinaid toko' po do poimpasi dot id suang do maso di roitan do “Tadau'd Baino'” dot id suang do Buuk do Kinorohingan. Om aiso' indo o tongosongulun piya dot id pogialatan dokoyu dot apalid do dusa om gisom do sumaap nondod Kinorohingan. 14 Iyati' nopodti om tambalut ngai' i' di Kristus, ondung ogirot kasai' toko' no do mongigit di kotumbayaan di naanu toko' do mantad di timpuun i', om gisom do kopupuson. 15 Poingkaa o nokotulis dot id suang do Buuk do Kinorohingan, “Ondung korongou kou'd boros do Kinorohingan do tadau'd baino', om kada' nogi' dokoyu pokodoho' o ginawo dokoyu do miagal di taki-aki dokoyu, do tontok di suminaap iyolo'd Kinorohingan,” ka. 16 Om isai toi i tulun di nokorongou'd boros do Kinorohingan diri om i suminongkiwal dau? Okon toi' ko' iyolo' nopo om i tulun di winoyo' di Musa do suminoliwan do mantad hilo'd Masir? 17 Om isai toi o kinatagadan do Kinorohingan do solinaid dot apat nohopod o toun? Okon toi ko' i tulun di kidusa, i nangapatai do hilo'd tana' do kowotuan? 18 Tontok di suminumpa' o Kinorohingan do poingkaa, “A' nondo kopio iyolo' kosuang di pomogunan diri di koonuan daa'ndo diyolo'd kosimbayanan do poinsugku' doho',” ka, --- om isai no ma o komoyon do Kinorohingan diri? Okon toi ko' komoyon nopo dau om i tulun di suminaap do Kinorohingan? 19 Om osuhutan toko' noddi do baino', dot a' pogi' iyolo' nokosuang nga' a' i' iyolo' notumbayaan do Kinorohingan.
1 Om iyati' nga' sinunudan id Kinorohingan di batos dau'ddi, om kaanu toko' indo iyati' di kosimbayanan di pinabatos dau. Om iyo nopoddi, om antaan-taan toko' no kopio, om aiso' indo o tongoiso'd tulun dot id pogialatan dokoyu dot a' kaanu di kosimbayanan di pinabatos diri. 2 Tu' nokosusui no i Habar dot Osonong diri dot id dati' do miagal di nokosusui dot id diyolo'. Nga' aiso' i' o guna' di habar diri dot id diyolo'. Tu' tontok di nokorongou iyolo'ddi om a' i' iyolo' minonongkuyaan. 3 Nga' iyati' nopo i monongkuyaan om kaanu no di kosimbayanan di pinabatos do Kinorohingan diri. Om miontok no kopio iri di pinoboros do Kinorohingan do poingkaa, “Tuminogod oku om suminumpa' oku dot, a' nondo kopio iyolo' kosuang di koonuan daa'ndo di kosimbayanan do poinsugku' doho',” ka dau. Pinoboros do Kinorohingan o miagal diri do mulong piya do nopongo no daa dau o karaja' dau di wonsoyo' i' dau iti pomogunan. 4 Tu' haro i' o nokotulis dot id suang do Buuk do Kinorohingan do pasal di tadau'd koturu', do poingkaa, “Om undorong noddi o Kinorohingan di tadau'd koturu'!” ka. 5 Om haro po o nokotulis do pasal diri do poingkaa, “A' nondo kopio iyolo' kosuang do pomogunan diri di koonuan daa'ndo diyolo' di kosimbayanan do poinsugku' doho',” ka. 6 Om iri nopoddi tulun dit id gulu korongou di Habar dot Osonong diri, om a' i' nakaanu di kosimbayanan diri tu' a' i' iyolo' minonongkuyaan. Iyo nopoddi om nokointalang no kopio do haro indo o tulun do suwai do kaanu di kosimbayanan diri. 7 Tu' natantu' no kawagu'd Kinorohingan ot iso' kawagu o tadau di suwai, i roitan do “Tadau'd Baino'”. Om piro-piro noddi o toun do mantad diri om minomoros i' o Kinorohingan dot iri i' o komoyon, do pinolombus di Daud, dot id suang dit ayat di noroitan di tiinu', do poingkaa, “Ondung korongou kou do boros do Kinorohingan do tadau'd baino', om kada' no kopio dokoyu pokodoho' o ginawo,” ka. 8 Ondung noonuan daa di Yosua i tulun diri di kosimbayanan di pinabatos do Kinorohingan diri, om a' no daa o Kinorohingan moro-boros kawagu do pasal dot iso' o tadau di suwai. 9 Iyo nopoddi, om bagi nopo di dong Kinorohingan do tulun om haro kasai' po o batos do haro o kosimbayanan do miagal do Kinorohingan tu' minundorong om osimbayan di tadau'd koturu'. 10 Tu' iri nopo tulun di kaanu'd kosimbayanan di pinabatos do Kinorohingan dot id dau'ddi, om koundorong no do mantad id koinsanai'd karaja' dau, do miagal do Kinorohingan tu' minundorong. 11 Iyo nopoddi, om tumotos toko' no kopio do manganu di kosimbayanan di pinabatos do Kinorohingan diri. Om aiso' indo o tongoiso' dati' dot a' kaanu'ddi do miagal diyolo' di gulu po, tu' a' i' iyolo' minonongkuyaan do Kinorohingan. 12 Boros nopod Kinorohingan om poimpasi i' om kikuasa', om atarom ko' i gayang do duwo o tarom. Om tumanom nopo i boros diri do gisom do korikot dot id pitongkiadan do ginawo om rusod; om gisom do korikot dot id langaban om tutok do tulang, om gisom do kosorisid ngai' do pomusarahan om korohian do ginawo'd tulun. 13 Aiso' i' o tiso' piya di kipinuhobo dot a' okito'd Kinorohingan. Tu' oinsanan nopo do songingungkaya' om songintalang dot id toguang do Kinorohingan. Om id toguang no dau do susuyon ngai' toko' o koinsanai di nongowonsoi toko'!
I Yesus i Boyoon dot Agayo dot Imam
14 Om iri no o kopongigitan kopio toko' di kotumbayaan di naakun toko' dot otopot. Tu' haro no o Boyoon dot Agayo dot Imam toko' dit agayo kopio, i suminuang do gisom do nokotimbaba' kopio'd Kinorohingan --- om iyau nopo om i Yesus i Tanak do Kinorohingan. 15 Iri nopo i Boyoon dot Agayo dot Imam toko'ddi om okon i' ko' imam dit a' kopuriman do koinsanai di koluhayan toko'. Suwai ko', iyau nga' nopogumbalan no dot id suang do nunu nopo, do miagal dati'; nga' a' pondo iyau nokowonsoi'd dusa! 16 Iyo nopoddi, om kada' toko' kooris do minsomok do Kinorohingan tu' osonong i' o kowoyo-woyoo' dau do momorinta'. Om insianan toko' indo do Kinorohingan om barakatan toko' dau om otulung toko' i' do tontok di maso do mokitulung toko'.
1 Pointikid-tikid do boyoon dot agayo dot imam om pilion i' dot id pogialatan di bansa' dau, om silihon do mogobi-obi' do Kinorohingan do ponokowakil diyolo'. Karaja' nopo dau om papatahak dot id Kinorohingan do koinsanai di porsombahan om i porsombahan di sumbolion do maan do pangampun do dusa. 2 Iri piya i boyoon dot agayo dot imam diri nga' ogumu' i' o koluhayan, om iri no o komilo-milo dau dot alamaya' dot id tulun dit aiso' o toila-ilaan om id tulun di napalid. 3 Om a' iddi milo dot a' iyau papatahak do porsombahan di sumbolion, dot okon nopo ko' i dusa do tulun dot ogumu' o kapatahakan, nga' iri nogi' i dau'd dusa, tu' oluhoi i' iyau. 4 Aiso' i' o tiso' piya'd tulun do mimpori-pori do sumiliu'd boyoon dot agayo dot imam. Osiliu nopo o tulun do boyoon dot agayo dot imam om lohowon iyau'd Kinorohingan do momonsoi do karaja'ddi --- do miagal di Harun. 5 Om i Kristus nga' iyo nogiddi. A' i' iyau minimpori-pori do suminiliu do Boyoon dot Agayo dot Imam. Kinorohingan i' o minomili' dau. Boros kad Kinorohingan dot id dau, “Iya' no o Tanak ku; om tadau nod baino' do nosiliu oku'd Tapa' nu,” ka. 6 Om boros ka kawagu'd Kinorohingan dot id ayat do suwai om, “Iya' no ot imam do gisom do poingompus do miagal di Milkisidik it Imam diri,” ka. 7 Tontok di poimpasi po i Yesus do hiti'd pomogunan, om suminambayang iyau do minokianu do mikuwo'd mininggarang om minihad dot id toguang do Kinorohingan, i milo do mamasi dau do mantad id kapatayon. Om pinokinongou iddi iyau tu' mininsiriba' i' iyau do Kinorohingan do mikuwo'd ginawo di momusou kopio. 8 I Yesus nopo om Tanak i' do Kinorohingan, nga' iyo piya'ddi nga' mininsingilo i' iyau do minihuboyo-boyo' dot id suang di kinoinggoritan dau. 9 Om kosiliu poddi iyau do gampamasi di milo kopio'd mamasi, om kosiliu noddi iyau do tudan do koposion di poingompus do kumaa id koinsanai'd tulun dit otorodok dot id dau. 10 Om pinoboros kopio'd Kinorohingan dot iyau no i Boyoon dot Agayo dot Imam, do miagal di Imam Milkisidik!
Popoinsan
11 Ogumu' daa i posunudon dahai dokoyu do pasal di karaja' di Yesus di dong Boyoon dot Agayo dot Imam, nga' apagon i' iyahai do popotuduk diri tu' alaid kopio kou i' do kosuhut. 12 Otopot nopo kopio om norikot no daa o maso dokoyu do sumiliu'd guru, nga' atalang i' kopio do minog kou po do minsingilo do mantad id tulun do suwai do pasal di ponudukan do Kinorohingan dit oribau po, i ponudukan dit id gulu i' potuduko'. A' kou po milo do rumamit di taakanon dit okodou; tu' susu po kasai' o tinumon dokoyu. 13 Iri nopo tulun di susu po o tinumon, om komoyon nopoddi nga' ragang po iyau; om aiso' po o toila-ilaan dau ondung nunu it otopot om i kasala'. 14 Iri nopo taakanon dit okodou om iri no tulun di nongosukod o kaakan, tu' iyolo' nopo om oubas nod mongilo ondung honggo it osonong om honggo it araat.
1 Iyo nopoddi, om kainou no tumilombus do minsingilo di piro-piro o ponudukan di poiralom-ralom do pasal do tumuo dot id suang do koposi-posion do dong Kristus, om okon indo ko' iri no i ponudukan do tugama' toko' dit ongoribau po, it id gulu i' potuduko' o toilaan toko'! Kada' toko' no gulio' kawagu do minsingilo i ponudukan di koimpuunon nogi' dot apatut o tulun do tumingkod do momonsoi do nunu nopo it aiso' o guna' om mositi' do monongkuyaan do Kinorohingan, 2 ko' iri ponudukan di koimpuunon i' do pasal do botisan ko' pasal di monukabai'd tulu, ko' pasal dit apasi kawagu do mantad id kapatayon, ko' pasal di hukuman do poingompus. 3 Kainou no tumilombus do minsingilo di piro-piro o ponudukan di poiralom-ralom po, do korohian nod Kinorohingan! 4 Tu' iri nopo tulun di tuminongkiad do mantad id kinotumbayaan, om a' no milo dot angatan do gumuli' kawagu. Di nopo di gulu po om id suang no daa iyolo' di tanawau do mantad id Kinorohingan, om nokopuriman di pinopuhawang dau. Om iyolo' nga' noporinta' no daa di Rusod do Kinorohingan. 5 Om koilo no iyolo' do mantad id nongoumbalan diyolo' dot osonong i boros do Kinorohingan, om nokopuriman iyolo' di piro-piro o nipuhawang di poimponu'd kuasa' di maso dot id dabantalan. 6 Nga' adaai iddi diyolo' i kotumbayaan diyolo'! Om a' no kopio iyolo' milo do pogulion kawagu do rumologo do mantad id koinsanai di dusa diyolo'. Tu' posolibon kawagu'ddi diyolo' i Tanak do Kinorohingan om indaraaton diyolo' iyau dot id toguang do tulun dot ogumu'! 7 Iri nopo tana' dit asarabak do rasam di kosondot kasai'd hiri, om i posuni nondo do totonomon di haro o guna' dot id tulun di minananom om nabarakatan nod Kinorohingan i tana'ddi. 8 Nga' ondung paka' nogi' om rugi o sumuni do hiri'd tana'ddi, om aiso' i' o guna' di tana' om papalan indod Kinorohingan do koimbagu om uuhon do monorob do sumonu'. 9 Nga' iyo piya'ddi o boros dahai, oi tobpinai-tobpinai di kosianan ku, nga' oilaan i' kopio dahai dot a' kou i' iyokoyu iyo'ddi. Oilaan i dahai do nakaanu kou dit ongosonong ko' iri, iri no i piro-piro o barakat do kotonggoi di koposion do naanu dokoyu. 10 Kinorohingan nopo om okon i' ko' Kinorohingan dit a' otulid. A' i' dau olihuan i winonsoi dokoyu do bagi' dau, om i kosianan dokoyu dot id dau di pinointalang dokoyu do tontok di minonulung kou di tulun dit iso-iso' o kinotumbayaan, di gulu po om dinondo. 11 Orohian kopio iyahai do sompori-pori kou nopo dot ogirot kasai' do gisom do kopupuson, om aanu indo dokoyu i soro-sorohon dokoyu'ddi. 12 Mada' i' iyahai do kumaul kou. Nga' orohian kopio iyahai dot iyo kou di tulun di nakaramit di pinabatos do Kinorohingan, tu' minonongkuyaan i' iyolo' dau om alanut o ginawo do minagandad.
A' i' Sumimban o Batos do Kinorohingan
13 Tontok di minamatos o Kinorohingan dot id di Abraham, om suminumpa' iyau do momonsoi di nakabatos dau. Om sumpa' nopo iyau dot id suang do ngaran dau tu' aiso' no ot id sawat ko' mantad do Kinorohingan. 14 Boros ka dau, “Mamatos oku do mamarakat diya' om papasapou do sinakagon nu,” ka. 15 Om andado' nopo di Abraham iri do mikuwo'd alanut o ginawo, om kaanu iddi dau i pinabatos do Kinorohingan dot id dau. 16 Ondung sumumpa' o tulun, om sumumpa i' iyau dot id suang do ngaran do tulun do suwai dit id sawat ko' iyau, om iri no sumpa'ddi o moningkod do koinsanai'd boros dit a' daa sumokodung diri. 17 Om orohian o Kinorohingan do poingod kopio dot id tulun di karamit di batos dau'ddi, dot a' kopio dau simbanan i natantu' mantad dau do wonsoyon dau. Om iri no kinopomoruhangan dau do sumpa' dot id batos dau'ddi. 18 Om a' no milo'd simbanan i duwo o hal diti: A' i' kopio o Kinorohingan milo do mongudut dot id batos om sumpa' dau'ddi. Iyo nopoddi, om iyati' no i nokointirung dot id Kinorohingan, ot odsuuron kopio do mongigit di soro-sorohon di posodia' no dot id toguang toko'! 19 Iri nopo soro-sorohon toko'ddi om iyo po di limbagat do parau' di nakaralom tomod o kinotodsokon, om iri no o toidon toko' dit ogirot om aiso' nondo o ligogon dot id koposi-posion toko'. Om iri nopo soro-sorohon diri om katalib i' di tirai di Bilik dit Olidang Kopio do hiri'd Walai'd Sasambayangan dot Agayo do hilo'd surga. 20 Om noiwangan no di Yesus o ralan toko' do kumaa dot id kinoiyonon diri, om nokosuang no iyau'd hiri do suminiliu'd Boyoon dot Agayo dot Imam do bagi' dati' do gisom do poingompus, do miagal di Imam Milkisidik.
I Imam Milkisidik
1 I Milkisidik nopo om raja' do mantad hilo'd Salim om imam do pinili' do Kinorohingan it Asawat Kopio. Tontok di nokoguli' i Abraham do mantad id pinisangadan, di naala' dau i piro-piro o raja', om rikot no i Milkisidik do minongoi ruba' dau om minamarakat iyau dau. 2 Om patahako' no di Abraham dot id di Milkisidik o sompihopod do koinsanai di nangaahau dau. (Komoyon nopo di ngaran di Milkisidik do koiso' om, “Raja' dit Otulid”; om komoyon no kawagu di ngaran dau om “Raja' do Kosimbayanan”, tu' raja' i' iyau do mantad hilo'd Salim.) 3 I Milkisidik nopoddi om aiso' i' o nokotulis do honggo nopo do popoilo ondung kitapa' iyau ko' kitina' ko' kitaki-aki iyau; om aiso' o nokoboros do pasal do kinosusuon dau ko' kinapatayan po dau. Iyau nopo om miagal po do Tanak do Kinorohingan; om iyau no it imam do gisom do poingompus. 4 Om oilaan toko' no dot agayo kopio i Milkisidik diri; om agayo no kopio iyau gisom dot onuwai nopo iyau di Abraham, i taki-aki do bansa' toko', do sompihopod do koinsanai di naanu dau do mantad id pinisangadan diri. 5 Id suang nopod Tourat, om natantu' no dot i piro-piro ot imam di sinakagon di Liwi it apatut do monimung do sompihopod do koinsanai dit aanu di tulun dot Israil, i tobpinai i' diyolo', do sinakagon ngai' piya daa iyolo' di Abraham. 6 I Milkisidik nopo om okon i' ko' sinakagon di Liwi, nga' nakaanu i' iyau do sompihopod do koinsanai di nangaahau di Abraham, om minamarakat iyau di Abraham, i noonuan no di batos do Kinorohingan. 7 Om atantu' no dot iri nopo tulun di barakatan om osiriba' no ko' i tulun di mamarakat dau. 8 Iri nopo i piro-piro ot imam di kaanu di sompihopod diri om apatai i'. Nga' tumanud nopo dot id suang do Buuk do Kinorohingan, om i Milkisidik nopoddi, i nonuan di sompihopod diri om poimpasi kasai' i'. 9 Om milo id komoyon, dot i Liwi nopo --- i sanganu di sinakagon di monimung do porsombahan di sompihopod do mantad id tulun dot Israil --- om minambayar i' di bohogian diri do nokotonggoi di Abraham, do tontok di pinabayar di Abraham iri dot id di Milkisidik. 10 Mulong piya dot a' po i Liwi nopogkosusu, nga' milo nod komoyon dot id suang no iyau do tinan di Abraham i taki-aki dau, do tontok di suminolowot i Milkisidik di Abraham. 11 Om pinatahak i Tourat dot id tulun dot Israil dot i piro-piro ot imam do mantad id payat do Liwi o pinopotuduk diri. Om iri nopo i piro-piro ot imam do mantad id payat do Liwi di gulu poddi om a' i' milo do momonsoi dit apatut diyolo'd wonsoyon do gisom dot aiso' kopio o bohiton, om gowoi poddi om minog i' do haro ot imam do suwai, i miagal di Imam Milkisidik, om okon noddi ko' mantad id sinompuruan di Imam Harun. 12 Om ondung osimbanan it apatut do sumiliu'd imam, om i Tourat nga' apatut nogi' do simbanan. 13 Om komoyon nopoddi nga' i Tuhan toko': Iyau nopo om mantad i' do payat do suwai, om a' po insan do haro o tulun do mantad id payat dau do nosiliu dot imam. 14 Koilo ngai' i' o tulun dot iri nopo Tuhan toko' om mantad i' dot id payat di Yohuda; om a' i' di Musa insan koroitai i payat diri do tontok di minomoros iyau do pasal do piro-piro ot imam.
Iso' Kawagu ot Imam do Suwai do Miagal di Milkisidik
15 Om atarang poddi ko' mantad di gulu po i pinoboros diri, di nokorikot o songulun ot imam do suwai, i miagal di Milkisidik. 16 Kinoponilihan nopo dau dot imam om a' i' pinoimpou dot id toturan do tulun, suwai ko' pinoimpou di koposi-posion dau di kikuasa' om it aiso' o kopupuson. 17 Tu' haro no o nokoboros dot id suang do Buuk do Kinorohingan do poingkaa, “Iya' no ot imam do gisom do poingompus, do miagal di Imam Milkisidik,” ka. 18 Baino' nopoddi, om iri nopo toturan di laid diri om nadaan noddi, tu' a' i' ogirot om aiso' o guna'. 19 Iri nopo Tourat di Musa om a' i' milo do poposonong do nunu nopo do gisom dot aiso' o bohiton. Om iri no o kinapanahakan dati' dot iso' o soro-sorohon dit osonong ko' iri; om milo toko' indo do minsomok do Kinorohingan. 20 Kawagu po, om iri ngai' nopoddi om pinitonggoi i' do sumpa' do mantad id Kinorohingan. Aiso' i' o sumpa' do miagal diri do tontok di pinili' i piro-piro ot imam do suwai. 21 Nga' i Yesus nopo om siniliu dot imam do pinitonggoi'd sumpa', do tontok di minoro-boros o Kinorohingan dot id dau do poingkaa, “Nokosumpa' no o Tuhan, om a' no dau simbanan i nokoboros dau do poingkaa, ‘Iya' no ot imam do gisom do poingompus,’ ka,” ka dau. 22 Om iri noddi o nokosiliu-siliu di Yesus do pamajamin dot iso' o tumpongo dit osonong ko' iri. 23 Om haro po kawagu o hal do suwai: iri nopo piro-piro ot imam di suwai'ddi om ogumu' i'; tu' minatai ngai' i' iyolo' om gisom dot a' milo do popotilombus di karaja' diyolo'. 24 Nga' i Yesus nopo om poimpasi i' do gisom do poingompus, om iri nopoddi karaja' dau di dong imam om a' i' pinatahak dot id tulun do suwai. 25 Om iri noddi o komilo-milo di Yesus do mamasi kasai' di tulun di rumikot dot id Kinorohingan dot iyau o poporikot, tu' poimpasi kasai' i' iyau do gisom do poingompus do popoboros di pokionuon di tulun diri dot id Kinorohingan. 26 Iyo nopoddi, om i Yesus no o Boyoon dot Agayo dot Imam di milo kopio do monulung dati'. Iyau nopo om olidang i'; om aiso' o kasalaan om dusa dau. Pinotongkiad iyau do mantad id tulun di kidusa, om pinoinsawat iyau do hilo'd kinoiyonon dit asawat po ko' koinsanai'd tawan. 27 Iyau nopo om a' i' iyo di piro-piro o boyoon dot agayo dot imam di suwai, i monikid tadau nopo do papatahak do porsombahan di sumbolion dot iri po dusa diyolo' o kapanahakan, om iri nogindo i dusa di tulun dot ogumu'. I Yesus nopo om insan noo papatahak do porsombahan di sinumbali', i kabagal do gisom do poingompus, do tontok di pinatahak dau o tinan dau do siniliu do porsombahan di sinumbali'. 28 Iri nopo Tourat di Musa om momili' i' di tulun di haro piya o bohiton do silihon do boyoon dot agayo dot imam. Nga' id tohuri noddi ko' i Tourat diri, om pamatos no o Kinorohingan do mikuwo'd suminumpa' do silihon nondo dau do Boyoon dot Agayo dot Imam, i Tanak di nakabatos no mantad do silihon do Gampamasi di milo kopio'd mamasi, do gisom do poingompus.
I Yesus o Boyoon dot Agayo dot Imam Toko'
1 Tonsi nopo kopio do koinsanai'dti poboroson dahai'dti om: Haro i' o dati' do Boyoon dot Agayo dot Imam do miagal diri, i poirikau do momorinta' do poinsugku' do Kinorohingan, it Agayo Kopio do hilo'd surga. 2 Om iyau no i momonsoi do karaja' di dong Boyoon dot Agayo dot Imam do hiri'd Bilik dit Olidang Kopio, i hiri'd Kiim do Tuhan dit otopot kopio, i winonsoi'd Tuhan, om okon i' ko' winonsoi'd tulun. 3 Pointikid-tikid do boyoon dot agayo dot imam om pilion i' do papatahak do porsombahan di sumbolion ko' i porsombahan do suwai dot id Kinorohingan. Om iyo nogiddi i dati' do Boyoon dot Agayo dot Imam; tu' mositi' i' do haro o patahakon dau do maan do porsombahan. 4 Ondung hiti daa iyau id pomogunan, om a' i' iyau osiliu dot imam, tu' haro no ot imam di papatahak do porsombahan di sumbolion, i ponuhuan di Tourat do tulun do Yohudi. 5 Iri nopo karaja' di dong imam di wonsoyon diyolo' om otopot nopo kopio om poiyaan noo om sangai-sangai noo di hilo'd surga. Om nokosunud nod Kinorohingan iri dot id di Musa di gulu po, do tontok di winonsoi di Musa i Kiim do Tuhan. Poingkaa o pinoboros do Kinorohingan dot id di Musa, “Soro-sorohon no! Mositi' nod wonsoyon ngai' nu'ri do tumanud di poiyaan di pinokitanan diya' di hilo'd nuluhon,” ka. 6 Nga' baino' noddi om nakaanu no i Yesus do karaja' di dong imam dit agayo po ko' i winonsoi di piro-piro ot imam diri. Tu' iri nopo tumpongo di winonsoi dau dot id pialatan do Kinorohingan om tulun, om osonong po ko' i tumpongo di gulu, tu' pinoimpou i' di boros do pasal do piro-piro o hal dit osonong ko' iri. 7 Ondung aiso' daa o bohiton di tumpongo dit id gulu, om a' i' daa minog do haro o tumpongo di koduwo. 8 Nga' haro i' o kasalaan do nokito'd Kinorohingan do nowonsoi di tulun dau, gisom do minomoros o Kinorohingan do poingkaa, “Ilaai no, do rumikot indo o maso, do momonsoi oku do tumpongo di wagu dot id bansa' dot Israil, om id bansa' do Yohudi. 9 Om a' i' iri miagal di tumpongo di winonsoi ku dot id taki-aki diyolo' do tontok di winoyo' ku iyolo' do suminoliwan do mantad id pomogunan do Masir. A' i' iyolo' tuminorodok dot id tumpongo di winonsoi ku dot id diyolo'; om iri no ot a' ku kinopomodulan diyolo'. 10 Nga' baino' nopondo, om iti no o tumpongo do wonsoyon ku dot id tulun dot Israil do koimbagu, kad Tuhan: Posuangon ku nondo o toturan ku dot id suang do pomusarahan diyolo', om potulison ku dot id ginawo diyolo'. Osiliu oku nondo do Kinorohingan diyolo', om osiliu iyolo' do tulun ku. 11 Om a' no iyolo' minog do monuduk di tulun dit id suang do pomogunan diyolo', ko' momisunud po di tobpinai dau do poingkaa, ‘Intutun nod Tuhan,’ ka. Tu' oinsanan nopondo iyolo', dot it angagayo om it ongokoro', do kotutun doho'. 12 Om ompunan ku nondo o kasalaan diyolo', om a' ku sorohon kawagu i dusa diyolo',” ka. 13 Om di nopoddi pinoboros do Kinorohingan i tumpongo do wagu'ddi, om rinoitan diri dau do laid iri om rinoitan dau do noromuk, om a' no alaid om tumanus no.
Kowoyo-woyoo' do Sumambayang do Hiti'd Pomogunan om Kowoyo-woyoo' do Sumambayang do Hilo'd Surga
1 Id suang nopo di tumpongo di koiso' om haro o piro-piro o toturan do sumambayang, om haro o tiyonon do sumambayang di winonsoi'd tulun. 2 Haro ot iso' kiim do winonsoi do rinoitan do Bilik dit Olidang, i hiri'd gulu kopio kobontol. Om hiri nopod suang di bilik diri nga' haro o potimpakan do lampung, om haro o mija' di pinasakayan do roti, do patahakon dot id Kinorohingan. 3 Om hiri nod ponong id suang, it id dotirung di tirai di koduwo om haro o kinoiyonon di roitan do Bilik dit Olidang Kopio. 4 Hiri nopod bilik diri om haro o pananaraban do kominyan, i tamas do winonsoi, om haro o Kaban do Tumpongo, i kotongkop nopod nurogupan do tamas. Id suang nopo di Kaban diri om haro o balanga' do tamas do sinuangan do manna, om hiri i sukud di Harun di tinolidan, om hiri i duwo o kaping do watu do ponunulisan, i tinulisan di hopod o toturan do mantad id Kinorohingan. 5 Hiri nopod sawa-sawat di Kaban diri om haro o duwo o koiyo-iyo do moloikat di roitan do kerub, i tanda' do nakarapou o Kinorohingan. Om iri nopo duwo talad di kerub diri om poungkalad dot id sakai di sompon di Kaban, i tiyonon do mangampun do dusa. Nga' a' no osorisid ngai' do papatarang iri do dinondo. 6 Om iyo noddi o poiiyon ngai'ddi. Monikid tadau nopo i piro-piro ot imam do mongoi do hiri'd kinoiyonon dit id gulu kobontol di kiim diri do mongoi pomonsoi di karaja' diyolo'. 7 Nga' iri nopo sumuang do hiri'd ponong id gogok kopio di kiim om iri no i Boyoon dot Agayo dot Imam. Om insan nod sontoun do mongoi iyau'd hiri. Om tontok nopo di mongoi iyau'd hiri om migit iyau do raha' do maan patahako' dot id Kinorohingan do bagi'd tinan dau om bagi'd dusa di bansa'ddi dit a' diyolo' tinomod do momonsoi. 8 Om atarang no kopio i potudukon di Rusod do Kinorohingan do haro nopo o toturan do miagal diri, om solinaid nopo do poingkakat i kiim dit id gulu kobontol diri, om a' po noiwangan o ralan do sumuang do hiri'd Bilik dit Olidang Kopio. 9 Iri no o poiyaan diti maso do dinondo; om komoyon nopoddi om a' i' milo do poposonong kopio do kopurimanan do ginawo di tulun do pinapatahak di porsombahan, i piro-piro o porsombahan om i piro-piro o tayam-tayam di maan do porsombahan do sumbolion. 10 Tu' iri ngai' nopo i wonsoyon do tumanud do toturan diri om pasal no do taakanon, om tinumon, om piro-piro o kowoyoon do toturan do momolidang do tinan. Om iri ngai' nopoddi om toturan no do don tinan om i tonudon do gisom no dot orikot i maso do papaharo o Kinorohingan do koinwoguan. 11 Nga' i Kristus nopo om nokorikot no do sumiliu'd Boyoon dot Agayo dot Imam do koinsanai dit ongosonong di haro do dinondo. Iri nopo Kiim do Tuhan dit iyonon dau do momonsoi di karaja' dau di dong Boyoon dot Agayo dot Imam om abantug i' om aiso' o bohiton do katalad di kiim dit id gulu. Iri nopo om okon i' ko' tulun o minomonsoi; komoyon nopo nga' okon i' ko' iti pomogunan di winonsoi o tadon diri. 12 Insan noo i Kristus do suminuang di Bilik dit Olidang Kopio'ddi, om diri-diri no, om a' nondo iyau sumuang kawagu do gisom dot alaid. Om tontok nopoddi om okon i' ko' raha' do kambing di tontoluhan ko' raha' do tanak do sapi' o nigitan dau do numaan do porsombahan; suwai ko' nigitan nopo dau om iri i dau'd raha', om iri noddi o pinopoidu' dau dati' do gisom dot alaid. 13 Iri no raha' di kambing om i sapi' di tontoluhan o powowoson, om i tauu di tanak di sapi' di sinorob do numaan do porsombahan, o paarabon dot id tulun di nososomu' dot id pagantangan do toturan do tugama', om olidang indo iyolo'. Om ondung koidu' di kososomu' di tulun diri i raha' om i tauu diri, 14 om okon-okon pondo i raha' di Kristus! Om iri no i Rusod di hino kasai' o pinawayaan di Kristus do pinapatahak do tinan dau dot id Kinorohingan do suminiliu'd porsombahan di sinumbali' dit aiso' o bohiton. Om iri no i raha' dau o momolidang do kopurimanan do ginawo toko' do mantad id toturan do tugama' dit aiso' o guna', om milo toko' indo do mogobi-obi' do Kinorohingan di poimpasi. 15 Om iri no o kinosilihan do Kristus do Momialatan do momonsoi dot iso' o tumpongo di wagu, om kaanu i' i tulun di nolohou do Kinorohingan di barakat dit aiso' o kopupuson, i pinabatos do Kinorohingan. Om nosiliu ngai' i' o miagal diri tu' haro no i minatai, iri no i Kristus; om iri no i kinapatayon dau o pinopoidu' do tulun do mantad id koinsanai'd kasalaan di nowonsoi diyolo' di maso po do kikuasa' i tumpongo dit id gulu. 16 Ondung haro o surat do kopotungkusan do dapu', om mositi' no do haro o kointalangan kopio do napatai i minonulis di surat diri. 17 Tu' aiso' po o komoyon di surat do popotungkus diri do poimpasi po i tulun di minomonsoi'ddi. Haro nopo kopio o komoyon di surat diri om apatai i tulun diri. 18 Iyo nopoddi, om iri piya i tumpongo dit id gulu nga' mositi' i' do pogiroton do raha' o pomogirot. 19 Id gulu nopo do winonsoi di Musa om pinopolombus iyau do koinsanai di toturan dit id suang do Tourat dot id tulun dot Israil. Om ngoyo' nogiddi di Musa i raha' di tanak do sapi' om i raha' di kambing do tontoluhan, om ralatai no dau iri do waig, om powowoso' nogiddi dau do hiri'd buuk do Tourat om pinowowos dau dot id koinsanai'd tulun dot Israil, dot i koiyo-iyo do rongilut om i hulu do dumba' dit oitom o karagango' o pinakai dau do pinopowowos diri. 20 Om boros ka di Musa di maso dau do popingwowos diri om, “Iti no i raha' di popogirot di tumpongo do mantad id Kinorohingan, om iti no it apatut dokoyu do tonudon,” ka dau. 21 Om iyo iddi o kowoyo-woyoo' di Musa do pinopowowos di raha'ddi dot id Kiim do Tuhan om id koinsanai di pakakas do sumambayang. 22 Om otopot i' kopio, do tumanud nopo do Tourat, om oruhai nod raha' ngai' o pomolidang do koinsanai'd nunu nopo, om dusa nga' oompunan nopo om haro o raha' do kalawas.
Mananus do Dusa i Kristus di Siniliu'd Porsombahan di Sinumbali'
23 Om iyo noddi o kowoyo-woyoo' do pomolidang ngai' di konunu-nunuan di pinoiya-iyaan di hilo'd surga. Nga' maan nopo di hilo'd surga om mositi' no do haro o porsombahan di sumbolion dot osonong ko' i koubasanan. 24 Tu' Kristus nopo om okon i' ko' i Bilik dit Olidang di winonsoi'd tulun o suangon tu' iri nopo om poiyaan no di Bilik dot Olidang dit otopot kopio. Hilo' i' kopio id surga o sinuang di Kristus; om hilo' no iyau do dinondo do tumimbaba' do Kinorohingan do mobi' dati'. 25 Iri nopo Boyoon dot Agayo dot Imam di tulun do Yohudi om monikid toun nopo do sumuang do hiri'd Bilik dit Olidang Kopio, i hiri'd Walai'd Sasambayangan dot Agayo, om migit iyau do raha' do songinan o tayam-tayam. Nga' Kristus nopo om a' i' miniguli-guli' do suminuang do pinapatahak do tinan dau. 26 Tu' ondung iyo'ddi, om asaru' no iyau do noinggorit do pointonodon di wonsoyo' i' iti pomogunan. Nga' nokointalang no kopio, do tontok i' di motingkopupus no o pomogunan, do ruminikot iyau dot insan noo do minongoi pananus do dusa, tu' pinatahak i' dau o tinan dau do siniliu'd porsombahan di sinumbali'. 27 Om natantu' nod Kinorohingan dot insan noo o tulun do matai, om sumusuhut nopondo om butusan po iyolo'd Kinorohingan. 28 Om iyo nogiddi o Kristus tu' insan noo patahako' do numaan do porsombahan di sinumbali' do mananus do dusa do tulun dot ogumu'. Om rumikot indo kawagu iyau, nga' okon no ko' mongoi pamabo do dusa, suwai ko' mongoi pamasi ngai' do tulun di mandad-andad do korikatan dau.
1 Iri nopo Tourat do tulun do Yohudi om poiya-iyaan noo do koinsanai dit ongosonong di rumikot do koimbagu. Nga' a' i' atarang noti do maan do poiyaan. Om a' i' kopio milo i Tourat diri do momolidang kopio di tulun di rumikot do mongoi sambayang dot id Kinorohingan, do mongigit do porsombahan, do mulong piya do monikid toun nopo do papatahak do porsombahan di sumbolion dit iyo kasai'ddi. 2 Ondung nolidangan kopio daa do mantad id dusa i tulun do tumuku' dot id Kinorohingan diri, om aiso' no daa o kopurimanan do ginawo diyolo' do kidusa iyolo', om a' no daa papatahak kawagu do porsombahan di sumbolion. 3 Nga' kointalang i' kopio dot iri nopo porsombahan di sumbolion di patahakon do pointikid do toun om poposorou nogi' do tulun di dusa diyolo', 4 tu' a' i' kopio katanus do dusa i raha' do sapi' om i raha' do kambing do tontoluhan. 5 Om kaa pogi' do tontok nopo di ruminikot i Kristus do hiti'd pomogunan, om poingkaa o pinoboros dau dot id Kinorohingan, “A' ko i' orohian do porsombahan di sumbolion om i porsombahan do suwai; nga' nonuan oku nogi' diya' do tinan. 6 A' ko' i' orohian do porsombahan di sorobon ko' iri po porsombahan do pangampun do dusa. 7 Om boros kangku'ddi, ‘Hati' oku no, oi Kinorohingan! Om ruminikot oku do mongoi pomonsoi di korohian nu, do miagal di nokotulis do pasal doho' dot id suang do buuk do Tourat,’ kangku,” ka. 8 Id gulu nopo do pinoboros di Kristus om poingkaa, “A' ko i' orohian do porsombahan di sumbolion om i porsombahan do suwai; a' ko i' orohian di tayam-tayam di sorobon do maan do porsombahan, om a' ko orohian di porsombahan di sumbolion do maan do pangampun do dusa,” ka dau. Om iyo iddi o pinoboros di Kristus, do mulong piya do tumanud di Tourat o kowoyo-woyoo' do papatahak do koinsanai di porsombahan di sumbolion. 9 Om poboroso' nogiddi di Kristus o poingkaa, “Hati oku no, oi Kinorohingan! Om ruminikot oku do mongoi pomonsoi di korohian nu,” ka dau. Om tonuso' noddi do Kinorohingan o koinsanai di porsombahan di sumbolion dit id gulu, om sowoliai no dau di Kristus, i numaan do porsombahan di sinumbali'. 10 Nowonsoi no di Yesus Kristus i korohian do Kinorohingan om pinatahak dau o tinan dau do suminiliu'd porsombahan di sumbolion. Om iri no i porsombahan diri, i winonsoi dau dot i tinan dau o pinatahak dot insan noo do maan do gisom dot alaid, do nolidangan ngai' toko'ddi do mantad id dusa. 11 Pointikid-tikid dot Imam di tulun do Yohudi om momonsoi kasai' i' di karaja' dau do dong imam do pointikid do tadau, om miguli-guli' iyau do papatahak do porsombahan di sumbolion dit iyo kasai' nopoddi. Nga' iri nopo porsombahan di sumbolion diri om a' i' kopio katanus do dusa. 12 Suwai ko', iso' noo o porsombahan di sumbolion do pinatahak di Kristus do maan do pangampun do dusa, om poinggirot kasai' no i porsombahan do sinumbali'ddi do gisom dot alaid. Om katahak poddi i porsombahan di sinumbali', om irikau no i Kristus dot id dawananan do Kinorohingan om momorinta' diri iyau do poinsugku' do Kinorohingan. 13 Om dinondo nopodti om mandad po o Kristus do poinsiribaon ngai' do Kinorohingan dot id dau i pisangod dau. 14 Om iso' noo o porsombahan di sinumbali' do pinomolidang di Kristus do koinsanai'd tulun di nolihungan do mantad id dusa, gisom dot olidang kopio iyolo'. 15 Om popoingod i' dati' i Rusod do Kinorohingan do pasal diri. Boros ka di Rusod do Kinorohingan, 16 “Boros kad Tuhan, ‘Iti no o tumpongo di wonsoyon ku dot id diyolo' do koimbagu. Posuangon ku nondo dot id ginawo diyolo' i toturan ku om tulison ku'ri dot id suang do pomusarahan diyolo',’ ka,” ka dau. 17 Om nokoboros i' o Kinorohingan do poingkaa, “Lihuan ku nondo o koinsanai di dusa om i karaaton diyolo',” ka. 18 Iyo nopoddi, om iri ngai' nopo i dusa om i karaaton diri, om noompunan no. Om a' no minog do papatahak kawagu do porsombahan do sumbolion do maan do pangampun do dusa.
Kainou no Minsomok do Kinorohingan
19 Baino' nopoddi, oi tobpinai-tobpinai ku, om katama' toko' noddi do sumuang di Bilik dit Olidang Kopio tu' napatai no i Yesus. 20 Noiwangan no di Yesus ot iso' o ralan di wagu do wayaan toko', iri no i ralan di manahak do koposion. Iri nopo i ralan diri om kawaya' i' di tirai, iri no i tinan di Yesus. 21 Om baino' nopoddi om haro no o Boyoon dot Agayo dot Imam toko', i mongilo-ilo di tulun do songonuon do Kinorohingan. 22 Iyo nopoddi, om kainou no minsomok do Kinorohingan do mikuwo'd ginawo dit otulid om ogirot o kotumbayaan; om mikuwo'd kopurimanan do ginawo di nolidangan no do mantad id taraat, om mikuwo'd tinan di nolihungan no di waig dot oniniting. 23 Om igitan toko' no kopio i soro-sorohon di ponongkuyaan toko', tu' Kinorohingan nopo om milo i' do ponongkuyaanan do mamayaan kasai' di batos dau. 24 Om pogipadul-padul toko' no, om kopogiodsuur-suur toko' i' do mogiinsian-sian dot iyati' ngai', om kopomonsoi toko' dit ongosonong. 25 Om kumaparu' toko' no do mogititimung, om a' tukono' do miagal di tulun do suwai. Om apatut nogi' do ruhangan toko' o kotorodoko' toko' om mogiodsuur-suur toko', tu' oilaan toko' i' dot a' no alaid do rumikot o Tuhan. 26 Tu' ondung nokosusui no dot id dati' i habar dot otopot do mantad id Kinorohingan nga' tumilombus toko' indo do momonsoi'd dusa di tomodon do momonsoi, om aiso' no o porsombahan di sumbolion do koidu' di dusa toko' do miagal diri. 27 Tu' osunsudan toko' nopo om tumimbaba' pod Kinorohingan do momutus om tumimbaba' di tapui do kototogod dau, i monorob ngai' di tulun di sumaap dau do gisom dot ouu. 28 Iri nopo tulun dit a' tumanud di Tourat di Musa, om hukuman nopo do kapatayon, om aiso' no o koompunan, do kointalang kopio do nakasala' iyau, do pasalaon do duwo ko' tolu o tulun do sasi'. 29 Om okon-okon pondo o kawagato' do hukuman do porotuon dot id tulun di mongulok-ulok di Tanak do Kinorohingan. Tu' tulun nopo do miagal diri om papagaan-gaan di raha' do tumpongo do Kinorohingan, iri no i kinapatayon di Kristus, i momolidang daa dau do mantad id dusa. Om mongindaraat iyau di Rusod di manahak do nipuhawang. 30 Om koilo toko' i' ondung isai i minomoros do poingkaa, “Sumuli' oku indo! Momohukum oku indo!” ka, om i minomoros dot, “Butusan indod Tuhan i tulun do songonuon dau,” ka. 31 Korolosi no moti' kopio dot aratu' o tulun dot id longon do Kinorohingan di Poimpasi! 32 Soroho' no dokoyu o kowoyo-woyoo' dokoyu di gulu po. Tontok nopoddi, di notitihan kou di tanawau do Kinorohingan, om ogumu' tomod daa o kinoinggoritan dokoyu; nga' ogirot kasai' kou i' om aparu' kou do kuminaraja'. 33 Koumbal i' dot indaraaton kou om a' kopio osonong-sonong o wonsoyon diyolo' dot id dokoyu dot id toguang do tulun dot ogumu'. Om koumbal i' do kotonggoi kou di tulun do suwai dot oinggorit do tontok dot inggoriton iyolo', 34 om tumonggoi kou di tulun do poinggiil do tumongob. Om ngoyon ngai' nopo ahawo' do mantad id dokoyu i dokoyu'd songonuon, om osonong i' o ginawo dokoyu do tumimbaba'ddi, tu' oilaan i' dokoyu do haro po dot id dokoyu it osonong ko' iri, it a' rumaag do gisom do poingompus. 35 Iyo nopoddi, om kada' kou kapaasai, tu' ondung otumbayaan kasai' kou, om haro i' ot isomuli'ddi dit agayo! 36 Mositi' no do polonuton dokoyu o ginawo dokoyu, om milo kou i' do momonsoi di korohian do Kinorohingan om kaanu kou indo di pinabatos dau. 37 Tu' nokotulis no dot id suang do Buuk do Kinorohingan o poingkaa, “A' no alaid, dot iri nopondo i rumikot mantad diri, om rumikot nod oruhai; a' no dau popiurut-uruton o korikatan dau. 38 Om iri nopondo i tulun di doho' kopio'd songonuon om otumbayaan indo om apasi; nga' ondung haro ot id pogialatan diyolo' do sumunsuri, om a' oku no asanangan do tulun diri,” ka. 39 Iyati' nopodti om okon i' ko' tulun di suminunsuri om i napalid. Suwai ko' iyati' nopo om tulun i' dit otumbayaan do Kinorohingan om napasi toko'.
Kotumbayaan
1 Komoyon nopo dot otumbayaan om atantu' kopio o ginawo do monongkuyaan dot abayaan kopio i soro-sorohon toko', om komoyon nopoddi nga' haro kopio o ponongkuyaanan dot otopot i' kopio do haro it a' toko' okito. 2 Kinohubayaan i' do Kinorohingan i tulun di gulu po, tu' kikotumbayaan i' iyolo'. 3 Oilaan toko' i' dot i boros do Kinorohingan o minomonsoi diti pomogunan, tu' otumbayaan toko' i'; om komoyon nopoddi, nga' iri nopo it okito om winonsoi dot it a' okito o numaan wonsoyo'. 4 Om pinapatahak i Habil dot id Kinorohingan, do porsombahan di sinumbali' dit osonong ko' i di Kain, tu' kikotumbayaan i' iyau. Om iri no i kotumbayaan di Habil diri o kinopomoromitan do Kinorohingan di Habil do pinoiyo do tulun dit osonong, tu' nokointalang no do rinamit do Kinorohingan i porsombahan dau. Om napatai no daa i Habil nga' moro-boros kasai' po iyau do gisom piya do dinondo, tu' kikotumbayaan i' iyau. 5 Om i Hinok nopo om a' i' napatai tu' kikotumbayaan i' iyau om poinsawato' nopoddi iyau do pinakaa dot id Kinorohingan. Aiso' i' o tiso' pod tulun do nokokito dau do nihum piya daa iyau, tu' nokoinsawat no iyau do Kinorohingan. Om nokotulis i' dot id suang do Buuk do Kinorohingan do kinohubayaan do Kinorohingan i Hinok, do tontok dit a' po iyau nokoinsawat. 6 Aiso' i' o tiso' pod tulun do kohubayaan do Kinorohingan, ondung aiso' o kotumbayaan do tulun diri. Tu' iri nopo tulun di rumikot dot id Kinorohingan om mositi' no do monongkuyaan do haro o Kinorohingan, om monongkuyaan do monomuli' iyau do tulun di mogihum dau. 7 Om sinunudan pogi'd Kinorohingan i Nuu do pasal dit ongosiliu dot id maso dot abantalan, it a' po dau okito, nga' kikotumbayaan i' iyau. Om minumboyo' i Nuu do Kinorohingan gisom do minomonsoi iyau dot iso' o kapal do rahat. Om id tohuri noddi om iri no i kapal diri o nakapasi dau om i sompiiyon dau. Om hukumai noddi o pomogunan, nga' i Nuu nopo om pinoboros i' do Kinorohingan do tulun dit osonong, tu' haro i' o kotumbayaan dau. 8 Om umboyo' nopo i Abraham do Kinorohingan do tontok di lohowo' iyau do Kinorohingan om di sinuhu' iyau do kumaa dot id iso' o pomogunan di pinabatos do Kinorohingan dot id dau, tu' kikotumbayaan i' iyau. Om pamanau nopoddi i Abraham dot a' piya dau oilaan ondung hinonggo o pakayaan dau. 9 Om undorong nopo i Abraham do miagal do tulun di sompogunan do hiri'd pomogunan di pinabatos do Kinorohingan dot id dau'ddi, tu' kikotumbayaan i' iyau. Om undorong nopo i Abraham do hiri do poingiyon dot id kiim. Om iyo iddi o winonsoi di Isak om i Yakub, i nakaramit di batos do miagal diri do mantad id Kinorohingan. 10 Tu' mandad-andad no i Abraham di bandar di tinantu' mantad do wonsoyon om i winonsoi'd Kinorohingan do pinoimpou do pinoimpahan dit ogirot. 11 Om haro i' o sinakagon di Abraham do mantad id di Sara, do mulong piya do molohing no daa kopio iyau, om a' maganak i Sara, tu' kikotumbayaan i' iyau. Oilaan no kopio di Abraham do bayaanon do Kinorohingan i batos dau. 12 Mulong piya daa dot iyo pod napatai o tinan di Abraham do maso'ddi, nga' ogumu' i' o sinakagon dau, gisom dot a' no ointob o kogumuo' diyolo'. Iyo po iyolo' di rombituon do hilo'd tawan om iyo di togis do hilo'd tisan do rahat kogumu', tu' kikotumbayaan i' iyau. 13 Om kikotumbayaan kasai' i' o koinsanai di tulun diri do gisom piya do kinapatayon diyolo'. A' i' diyolo' naramit i pinabatos do Kinorohingan diri, suwai ko' nokito noo diyolo', nga' pinusou i' diyolo' iri do hiri piya'd sodu'. Om iri no o kinapamarasan diyolo' do sompogunan no toomod iyolo' om mombo-hombo do hiti'd pomogunan. 14 Om tulun nopo do momoros do miagal diri om popointalang no kopio do maso diyolo' do mogihum do pomogunan dit osiliu'd pomogunan kopio diyolo'. 15 Om okon i' ko' i pomogunan di tinongkiadan diyolo' o sorohon diyolo'. Tu' ondung iri daa, om milo i' daa iyolo' do gumuli' dot id pomogunan diri. 16 Nga' nokointalang no kopio do langadon i' iyolo' dot iso' o pomogunan dit osonong ko' iri, iri no i pomogunan do hilo'd surga. Om iri no ot a' do Kinorohingan kointingayaman do roitan piya diyolo' iyau do tapa' diyolo', tu' nokosodia' nod Kinorohingan ot iso' o bandar do patahakon dau dot id diyolo'. 17 Om iri i kotumbayaan di Abraham o kinapatahakan dau di Isak do maan do porsombahan do tontok di tinoinu' iyau do Kinorohingan. I Abraham no o nonuan do Kinorohingan di batos dau, nga' posodia' i' i Abraham do papatahak di tanak dau dit iso' noo. 18 Om nokoboros nod Kinorohingan o poingkaa dot id di Abraham, “I Isak no o koonuan nu do sinakagon di pinabatos ku diya',” ka. 19 Oilaan no kopio di Abraham do milo o Kinorohingan do mamasi kawagu di Isak do mantad id kapatayon, om milo nod poboroson, do naanu no kawagu di Abraham i Isak do mantad id kapatayon. 20 Om pinabatos di Isak dot id di Yakub om id di Isau i barakat di rumikot do koimbagu, tu' kikotumbayaan i' iyau. 21 Om di nopo dit a' po i Yakub napatai om pinatahak dau o barakat dau dot id tangaanak di Yusup, tu' kikotumbayaan i' iyau --- om tontok nopoddi om posikoron po iyau di tulu di sukud dau om tuminuku' iyau dot id Kinorohingan. 22 Om iri i kotumbayaan di Yusup --- do tontok dit oruhai no iyau do matai --- o kinapabarasan dau do pasal do kosoliwanan di tulun dot Israil do mantad hilo'd Masir, om pinobilin dau it apatut do wonsoyon dot id rata' dau. 23 Om i kotumbayaan di molohing di Musa o kinopolisakan dau di Musa do solinaid do tolu o tulan do mantad di kinosusuon dau. Om nokito diyolo' dot olumis kopio kaanak i Musa, om a' iddi iyolo' nooris do tuminolibamban di pinonuhuan di raja'. 24 Om i kotumbayaan di Musa o kinaadaan dau do roitan do tanak iyau do raja' do Masir dit agayo iyau. 25 Pinokouhang nogi' dau dot oinggorit do tumonggoi di tulun do songonuon do Kinorohingan ko' mantad do haro o kosimbayanan dit oruuhai dot id suang do koposi-posion di kidusa. 26 Noilaan i' di Musa dot agayo nogi' kopio o komoyon dot indaraaton piya dot i Raja' do Gampamasi di pinabatos do Kinorohingan o kopongindaraatan ko' mantad do kaanu do koinsanai di kakayaan do pomogunan do Masir. Tu' i Musa nopo om kosorou kasai' i' dit isomuli' do koimbagu. 27 Om tongkiad no i Musa do mantad hilo'd Masir, om a' i' iyau moddosi dot otogod piya i raja', tu' haro i' o kotumbayaan dau. Om pamanau nopo i Musa do ruminikot do hiri'd tongoyon dau dot iyo pod nokokito no iyau do Kinorohingan, it a' okito'ddi. 28 Om papaharo no i Musa do Paska om ponuhu' no do popowowos do raha' do hiri'd wawayaan di walai do tulun dot Israil om a' i' di Moloikat di Mamatai apatai i tanak diyolo' dit id gulu, tu' haro i' o kotumbayaan di Musa. 29 Om i tulun dot Israil nga' nokosoborong i' di Rahat dot Aragang, dot iyo pod minamanau iyolo' dot id tana' dit otuu, tu' kikotumbayaan i' iyolo', nga' iri nopo tulun do Masir om koolitai nopo di rahat, do tontok di minumbal daa iyolo' do suminoborong di rahat. 30 Om kahaba' nopo di tulun dot Israil i tolig do bandar do Yorikou di nokotutuk iyolo' di bandar diri do solinaid do turu' o tadau, tu' haro i' o kotumbayaan diyolo'. 31 Om i Rahab, i tondu' do sundal diri nga' a' i' napatai do nokotonggoi di tulun di suminaap do Kinorohingan, tu' kikotumbayaan i' iyau; om osonong o ginawo dau do pinapasalakoi di tulun dot Israil di minongoi ponoluku'. 32 Om milo oku i' daa do minsusui nopo, nga' aiso' no o maso ku. Tu' a' ku po noroitan i Gidion, om i Barak, om i Simson, om i Yipta, om i Daud, om i Somuil, om i piro-piro o nabi. 33 Om nangaala' i' diyolo' o piro-piro o pomorinta', tu' kikotumbayaan i' iyolo'. Om winonsoi i' diyolo' it otopot, om naanu iddi diyolo' i pinabatos do Kinorohingan. Om nakalantom diyolo' o kabang do singa. 34 Om nokopisok iyolo' do tapui di molob-ngolob, om nokoidu' iyolo' di tibason daa iyolo' do gayang. Oluhoi i' daa iyolo', nga' nokokoris iddi iyolo'; om ongosiou iyolo' dot id pisangadan, gisom do naala' ngai' diyolo' i soudor do bansa'd suwai. 35 Om aanu i' kawagu di tongoondu' i tobpinai diyolo' di napasi kawagu do mantad id kapatayon, tu' haro i' o kotumbayaan di tongoondu'. Om haro i' i pokilogos nopo dot inggoriton do gisom piya dot apatai, om minada' do polobuson, tu' orohian i' iyolo' do posion kawagu dot id koposion dit osonong ko' iri. 36 Om haro i' i hiningi-hingi om i binobog, om i kinagasan do rantai om i pinogiil. 37 Om dinumpau iyolo' do watu do gisom do napatai, om haro i pinapas do garagadi', om haro i pinatai do gayang o pinamatai. Om minghombo poo iyolo' do pakayan nopo om kulit pod dumba' ko' kulit do kambing do winonsoi; om mosikin iyolo', om nudipon om ninggorit. 38 Iti nopo pomogunan om a' i' osorupai do maan diyolo'd tiyonon. Minghombo nopo iyolo' do hilo'd tana' do kowotuan om hilo'd konulu-nuluan, om miyon iyolo' dot id luang do nuluhon om id luang do tana'. 39 Agayo no kopio o kinamanangan do tulun diri tu' kikotumbayaan i' iyolo'! Nga' a' i' diyolo' naanu i pinabatos do Kinorohingan, 40 tu' haro i' o natantu' mantad do Kinorohingan do patahakon dot id dati' dit osonong ko' mantad diri. Om iri nopo i natantu' mantad dau'ddi om opongo nopo kopio o kosonongo' diyolo' om kosugku' toko' iyati' diyolo'.
Kinorohingan o Tapa' Toko'
1 Iyati' noo, om nosorilian toko' no dot ogumu' o sasi'! Iyo nopoddi, om pataamo' ngai' toko' no i kawagat dati' om i dusa di sumokot kopio daa dot id dati'. Om tumotos toko' no do manangkus dot id pilumbaan dit id dabantalan toko'. 2 Om montong toko' no kopio di Yesus, tu' iyau no i minonimpuun do kotumbayaan toko' om i momogompi'ddi do mantad di koimpuunon i' om gisom do kopupuson. I Yesus nopo om nokotial i' do ninggorit do hiri'd kayu salib! Om uhang ngai' i' dau do kointingayam piya dot apatai do hiri'd kayu salib. Tu' sinorou nopo dau om i kataadan dau do katalib iri. Om dinondo noddi om poirikau no iyau dot id dawananan di tirikohonon do Kinorohingan do momorinta', om momorinta' iyau do poinsugku' do Kinorohingan. 3 Umbalai pogi' do momusorou i kinoinggoritan di Yesus do tuminimbaba' di tulun di kidusa, it ongorongit tomod do suminaap dau! Om kada' no poluhoyo' o ginawo om kada' panangkapaasai. 4 Tu' solinaid nopo dokoyu do sumaap do dusa, om a' kou po nokoumbal do sumaap do gisom do patayon kou. 5 Om kada' dokoyu lihuwai iti nosihat do Kinorohingan, i pinatahak dot id dokoyu, i tangaanak dau, “Oi tanak ku, podulon no kopio i ponudukan do Tuhan, om kada' kaus dot otogod piya iyau diya'. 6 Tu' tudukan id Tuhan o pointikid-tikid do tulun di kosianan dau, om loposon dau o pointikid-tikid do tulun di songonuon dau do tanak dau,” ka. 7 Om mositi' no do romiton dokoyu i pamalapos do Kinorohingan dokoyu do miagal do ponudukan do mantad id tapa'. Tu' haro toi o tanak dot a' nokoumbal do linapos di tapa' dau? 8 Ondung a' kou loposon do miagal di tangaanak dau'd suwai, om komoyon nopoddi nga' okon kou i' ko' tangaanak kopio dau, suwai ko' a' i' oilaan o dokoyu'd molohing. 9 Kitapa' toko' i' do hiti'd pomogunan, om monuduk i' iyau dati', om pusohon toko' i' iyau, om okon-okon pondo i Tapa' toko' di don rusod, iyau i hilo'd surga, nga' atantu' no do minsiriba' kopio toko' dot id dau, om apasi toko' i'. 10 Iri nopo molohing toko' do hiti'd pomogunan om daamot noo do monuduk dati', do tumanud dit osonong dot okito diyolo'. Nga' Kinorohingan nopo do monuduk dati' om maan i' do koinsanangan toko', om olidang toko' indo do miagal dau. 11 Otopot i' do tontok nopo di maso toko' do tudukan, om a' i' poposonong do ginawo toko' i pamalapos, suwai ko' popotongob noo. Nga' id tohuri nondo ko' iri, om iyati' nopo i notudukan, om iri nopo i pinamalapos diri, om mongodsuur i' dati' do tumanud di korohian do Kinorohingan, dot id suang do koposi-posion toko', om popoimbulai do kosimbayanan do ginawo toko'.
Ponuduk om Popoinsan
12 Iyo nopoddi, om pokorison no o longon dokoyu di lopuhon, om i totud dokoyu di gagaran! 13 Mamanau kasai' kou no do sumusui do ralan dit alampai, om a' i' okinsol o gakod dokoyu di kimpo', suwai ko' olingos nogindo. 14 Tumotos kou no do monokiulud do koinsanai'd tulun. Om tumotos kou no do popolidang do koposi-posion dokoyu, do Tuhan o kopomolidangan. Tu' aiso' i' o tiso' pod tulun do kokito'd Tuhan ondung a' olidang o koposi-posion dau. 15 Antaan-taan no kopio dokoyu om aiso' i' o tongoiso' do tulun do kosoliwan do mantad id kosianan do Kinorohingan. Om aiso' indo o tulun dot osiliu do miagal di sakot di kawanit dot id pogialatan dokoyu, om gisom do monimpuun do kosusaan om mamaraag dot ogumu' o tulun dot i kawanit o pamaraag. 16 Antaan-taan no dokoyu, om aiso' i' o tulun dit orohian do magampahu' om it a' momusou do kowoyo-woyoo' di don rusod, do miagal di winonsoi di Isau. Tu' padagango' nopo dau i kuasa' dau di don tanak do kotuahan, do pinoolon dau do samangkuk noo o taakanon. 17 Om oilaan i' dokoyu dot id tohuri noddi ko' iri om pokionuo' po daa dau i barakat diri do mantad id tapa' dau nga' a' no iyau nonuan. Tu' mulong piya do mihad-ihad po daa'ddi iyau do popoontok di nasalaan dau, nga' aiso' noddi o maso do popoontok diri. 18 Timbabaon nopo dokoyu om okon i' ko' miagal di tinimbaba' di bansa' dot Israil di gulu po. Tinimbaba' nopo diyolo' om i milo do kamaon, iri no i Nuluhon do Sinai om i tapui di molob-ngolob do hiri; tuminimbaba' iyolo' do totuong, om odondom kopio o kotuongo' om tongus dit opuhod; 19 om nokorongou iyolo' do tuni do torumpit om boros dit opuhod kopio. Om tontok di norongou di tulun dot Israil i boros diri om pokionuo' no kopio diyolo' dot a' moro-boros kawagu i minoro-boros diri dot id diyolo'. 20 Tu' a' i' iyolo' kasaap do mokinongou di ponuhuan di pinoboros di minoro-boros diri. Tu' boros ka di minoro-boros om, “Koinsanai di koulok do nuluhon diti, do nintorusan tuu ko' isai nopo o tulun, nga' mositi' nod dumpahon do watu do gisom dot apatai,” ka. 21 Om koronob no kopio i nokito di tulun dot Israil diri gisom do minomoros i Musa do poingkaa, “Moddosi oku om gagaran oku po!” ka dau. 22 Nga' iyokoyu nopo om nokorikot do hiti'd Nulu-Nulu do Sion om i bandar do Kinorohingan di poimpasi, iri no i Yorusalim di hilo'd surga, i kinoiyonon do rinibuan o moloikat dau. 23 Iyokoyu nopo om ruminikot dot id iso' o pitimungan di poimponu' do kataadan --- i pitimungan do koinsanai'd tangaanak do Kinorohingan dit id dotuo, i nongotulis o ngaran do hilo'd surga. Om mongoi kou timbaba' do Kinorohingan, i Gompomutus do koinsanai'd tulun. Om tumimbaba' kou do rusod di tulun dit ongosonong, it osonong no kopio om aiso' no o bohiton. 24 Ruminikot kou do mongoi timbaba' di Yesus, i Momialatan do minomonsoi di Tumpongo do wagu'ddi; om tumimbaba' kou di raha' di powowoson, i pamajamin dit ongosonong ko' mantad di jinamin di raha' di Habil. 25 Iyo nopoddi, om antaan-taan no dokoyu, om a' kou i' mada' do mokinongou dau, i minoro-boros diri. Iri nopo tulun dit a' minokinongou dau, i ruminikot do hiti'd pomogunan, om i pinopolombus di habar do mantad id Kinorohingan, om a' no milo do mogidu'. Om okon-okon toko' pondo iyati' i nokorongou dau do minoro-boros do mantad hilo'd surga! Ondung a' toko' mokinongou dau, om poingkuro toko' po daa'ndo do kopoggidu'! 26 Tontok nopoddi om koguyu' nopo di boros dau iti pomogunan. Nga' baino' noddi om minamatos iyau do, “Guyuon ku pondo kawagu iti pomogunan, om okon nopo ko' iti noo, nga' ilo' nogi' tawan,” ka dau. 27 Iri nopo boros do, “kawagu,” ka, om popointalang dot oinsanan nopondo i nongowonsoi do guyuon om iduwon, om iri nopondo it oolu' om iri po it a' milo'd guyuon. 28 Iyo nopoddi, om mongunsikou toko' nod Kinorohingan, tu' nakaanu toko' no dot iso' o pomorintaan do mantad id dau dit a' milo do guyuon. Om mositi' no do mongunsikou toko' om tumuku' toko' dot id Kinorohingan do mikuwo'd opusou om oronok, do tumanud di kowoyo-woyoo' di korohian dau. 29 Tu' iri nopo Kinorohingan toko' om iyo po di tapui di monorob.
Kongohubayaan do Kinorohingan
1 Pogiinsian-sian kasai' kou no do miagal do tulun do Kristian di mogiobpinai. 2 Kada' kou pikoduwo o ginawo do pasalakoi dot id walai dokoyu di tulun dit a' piya dokoyu otutunan. Tu' ondung momonsoi do miagal diri, om nokoumbal i' o tulun do nakapasalakoi do moloikat dot id walai dau, nga' a' i' dau oilaan do moloikat iri. 3 Kada' dokoyu kolihuwai i tulun di songinggiil, om sorohon nopo dokoyu do poinggiil kou iyokoyu do poinsugku' diyolo'. Om kada' dokoyu kolihuwai i tulun dit inggoriton, om sorohon nopo dokoyu dot inggoriton kou iyokoyu do miagal diyolo'. 4 Mositi' no do pokolidangon do koinsanai'd tulun o pikowinan. Om mositi' no do mitorodok kopio i misasawo. Tu' tulun nopo di momonsoi do sosomu' om i magampahu' om hukuman i' do Kinorohingan. 5 Kada' pologoso' dot oporinta' di rumohian do tusin o koposi-posion dokoyu, suwai ko' poumbagalon nopo i haro dot id dokoyu. Tu' nokoboros no o Kinorohingan do poingkaa, “A' ku i' iya' pologoson tomod, om a' ku iya' tongkiadan,” ka. 6 Om iri noddi o katama-tama' toko' do momoros do poingkaa, “Tuhan no o Gomponguhup doho', om a' oku no moddosi. Om nunu po daa o milo'd tulun do wonsoyon dot id doho'?” ka. 7 Kada' dokoyu kolihuwai i piro-piro o boyoon dokoyu di pinopolombus di boros do Kinorohingan dot id dokoyu. Soroho' no dokoyu i kinowoyo-woyoo' do koposi-posion diyolo', om i kinowoyo-woyoo' diyolo' do napatai, om omit kou no di kotumbayaan diyolo'. 8 A' i' sumimban i Yesus Kristus, do mantad di gulu, om gisom do baino', om gisom do poingompus. 9 Kada' dokoyu pologoso' do mamalid dokoyu o piro-piro o kowoyoon do ponudukan di suwai-suwai kopio. Mositi' no do pokorison di kosonongo' do Kinorohingan o ginawo toko', tu' iri no it osonong kopio; om okon i' ko' i piro-piro o toturan do pasal do taakanon o popokoris. Tu' iri nopo tulun do tuminanud di piro-piro o toturan diri di gulu po om aiso' i' o nunu-nunu do kountungan do naanu diyolo'. 10 Om iri i piro-piro ot imam di maganu-anu do hiri'd Kiim do Tuhan nga' aiso' i' o kosorupayan do mangakan di porsombahan do sinumbali' di hiri'd sakai di pananaraban diri. 11 Iri nopo raha' di nintorusan di pinatahak do maan do porsombahan do pangampun do dusa, om igitan i' di Boyoon dot Agayo dot Imam do mongoi do hiri'd Bilik dit Olidang Kopio, nga' iri nopo tinan di nintorusan om sorobon i' do hiri'd soliwan di kokiiman. 12 Om i Yesus diri nga' pinatai i' do hiri'd soliwan di wawayaan dot agayo di bandar, do momolidang di tulun dau do mantad id dusa diyolo', dot i raha' dau o pinomolidang dau. 13 Iyo nopoddi, om kainou no rumikot dot id dau do hilo'd soliwan di kokiiman om tumonggoi toko' i' dau dot indaraaton. 14 Tu' hiti nopod pomogunan om aiso' i' o tiyonon toko' dit aiso' o kopupuson; suwai ko' mogihum toko' di tiyonon di rumikot do koimbagu. 15 Iyo nopoddi, om mositi' no do mamarayou kasai' toko'd Kinorohingan, om i Yesus o popiromut di pamarayou toko'ddi dot id Kinorohingan; om iri no o ponokoporsombahan do kounsikahan toko' dot id dau, om i patahakon toko' dau do tontok di polombuson do kabang toko' do popoinggayo do ngaran dau. 16 Kada' kou kolihu do momonsoi dot osonong om mogiuhup-uhup, tu' iti no o ponokoporsombahan di kohubayaan do Kinorohingan. 17 Tanud kou no do ponuhuan di piro-piro o boyoon dokoyu, om insiriba' kou no dot id diyolo'. Tu' momogompi' kasai' i' iyolo' do rusod dokoyu, om iyolo' it apatut do poposusui dot id Kinorohingan do koinsanai di winonsoi diyolo'. Ondung mihuboyo-boyo' kou diyolo', om osimbayan no o ginawo diyolo' do kumaraja'; nga' ondung a' kou mumboyo', om tumongob no iyolo' do kumaraja', om a' i' iri poporikot do kountungan dot id dokoyu. 18 Sumambayang kasai' kou no do bagi' dahai. Om oilaan i' kopio dahai dot osonong o kopurimanan do ginawo dahai, tu' orohian kasai' i' iyahai do momonsoi dit otopot dot id suang do nunu nopo. 19 Om pokionuon kopio ku do sambayangan oku dokoyu om oruhai oku i' do pogulion kawagu do Kinorohingan do hino'd dokoyu.
Sambayang do Pongolimpupus
20 Napasi no kawagu'd Kinorohingan do mantad id kapatayon i Tuhan toko' i Yesus. Om iri no i kinapatayon dau o nokosiliu-siliu dau do gompomogompi' dati' dit Agayo Kopio, iyati' i ponokodumba' dau. Om iri nogi' i kinapatayon dau o pinopogirot di tumpongo di poingompus, i winonsoi do Kinorohingan dot id dati'. 21 Om maha' daa om onuan kou do Kinorohingan, i tadon do kosimbayanan do ginawo, do koinsanai dit apatut dot aanu dokoyu do momonsoi di korohian dau. Om maha' daa om wonsoyon do Kinorohingan i korohian dau dot id dati', dot i Yesus Kristus o pawayaan dau do momonsoi'ddi. Royohon no o Kristus do gisom do poingompus! Amin.
Pongolimpupus Diti Surat
22 Om pokionuon ku no do podulon kopio dokoyu i piro-piro o nosihat ku'ddi do mikuwo'd alanut o ginawo, tu' a' i' anaru no iti surat ku. 23 Om poiloon ku iyokoyu do nakalabus no do mantad id giil i Timotius, i tobpinai toko'ddi. Korikot nopondo iyau do hiti'd kinoiyonon ku, om powoyoon ku indo iyau do mongoi ompuya' dokoyu. 24 Porikoton no o tabi' dahai dot id koinsanai di boyoon dokoyu om id koinsanai di tulun di songonuon do Kinorohingan. Om romiton no dokoyu o tabi' di piro-piro o tobpinai do hilo'd Italia. 25 Om Tuhan no o mamarakat ngai' dokoyu.
1 Oi tobpinai-tobpinai, i tulun ngai' do songonuon do Kinorohingan, i nokopogitompias-pias do pointongkop do pomogunan. Tumabi' oku, iyoho' i Yakub, i susuhuon do Kinorohingan om i susuhuon di Tuhan Yesus Kristus.
Kotumbayaan om Toilaan
2 Oi tobpinai-tobpinai! Ondung oontok kou do mogisuayan o pogumbalan, om sorohon nopo dokoyu do kountungan dokoyu iri. 3 Tu' oilaan i' dokoyu, dot ondung otumbayaan kasai' kou do Tuhan do tontok piya dot oontok kou do pogumbalan, om kootuson nopoddi om alanut nondo o ginawo dokoyu. 4 Om igitan no kopio dokoyu iri, om murut-surut kasai' i' o kolonuto' do ginawo dokoyu do gisom dot aiso' no o bohiton dokoyu om aiso' ot okurang dokoyu dot id suang do nunu nopo. 5 Ondung haro o tongoiso' dot id pogialatan dokoyu dot a' sumongkuro o toilaan, om apatut do mokianu iyau do toilaan do mantad id Kinorohingan, om onuan indo iyau'd Kinorohingan do toilaan; tu' osianan i' iyau om manahak do pointikid-tikid do tulun. 6 Nga' tulun nopo di mokianu, om mositi' no dot otumbayaan kopio; om a' mikoduwo o ginawo. Tu' tulun nopo di mikoduwo o ginawo om miagal no di tumbak do rahat dot opitanggai-tanggayan do tongus. 7-8 Tulun nopo do miagal diri om a' atantu' o pomusarahan; om a' iyau milo do manantu' do nunu nopo o wonsoyon dau. Iyo nopoddi, om kada' no dau soro-soroho' do kaanu iyau do nunu nopo do mantad id Tuhan.
Komosikinan om Kakayaan
9 Tulun nopod Kristian di mosikin om mositi' no dot otood dot ondung poinggoyoon no iyau'd Kinorohingan. 10 Om i tulun do Kristian di kaya' nga' mositi' no dot otood dot ondung poinsiribaon no iyau do Kinorohingan. Tu' tulun nopo do kaya' om tumanus indo do miagal do tusak do sakot. 11 Koulai nopo o tadau dit alasu' om kumoring nondo i sakot, om lumotu' no i tusak om atanus no i linumis di tusak diri. Om iyo nogiddi i tulun do kaya' tu' apatai nondo di maso dau do kumaraja'.
Pogumbalan om i Kabayayat
12 Olumaag no i tulun dit otorodok kasai' dot oontok piya iyau do pogumbalan. Tu' soira' nopo dot atahan iyau dot id suang do pogumbalan diri om kaanu nondo iyau dot isomuli', iri no i koposion di pinabatos do Kinorohingan dot id tulun dit osianan do Kinorohingan. 13 Ondung haro o tulun dot abayayat di pogumbalan do miagal diri, om kada' pomoros dot, “Iti nopo kabayayat diti om mantad id Kinorohingan,” ka, tu' Kinorohingan nopo om a' i' abayayat dit araat, om a' nogi' iyau mogumbal do tongosongulun piya. 14 Nga' abayayat no o tulun dot id pogumbalan ondung agayat iyau om katanud iyau di korohian dau'd araat. 15 Om ondung atanud dau i korohian dau dit araat diri, om kowonsoi no iyau do dusa; om ondung koinggayo i dusa'ddi om kootuson nopo nga' kapatayon. 16 Kada' kou no kopio kotipu', oi tobpinai-tobpinai di kosianan ku. 17 Pointikid-tikid di popuhawangon dit osonong om i patahakon dit osonong kopio, om mantad i' do hilo'd surga, i pinolintuhun do Kinorohingan, i minomonsoi do koinsanai di tanawau do hilo'd tawan. Om iyau no o Kinorohingan dit a' sumimban om a' iyau poporikot dot otuong di poingkukuro nopo. 18 Om siniliu toko'd Kinorohingan do tangaanak dau do tumanud di korohian dau, dot i boros dau dit otopot o pinoposiliu. Om winonsoi pogi' dau o miagal diri nga' manahak iyau dati' do pangkat dit asawat kopio dot id pogialatan do koinsanai di winonsoi dau.
Mokinongou om Momonsoi
19 Sorohon no kopio dokoyu iti, oi tobpinai-tobpinai di kosianan ku! Pointikid-tikid do tulun om mositi' no dot oining do mokinongou nga' kada' kolomus do moro-boros om kada' kolomus do tumogod. 20 Tulun nopo dit otogod om a' no milo do momonsoi dit osonong, i kohubayaan do Kinorohingan. 21 Iyo nopoddi, om iyadaan no dokoyu o koinsanai di koubasanan di sosomu' om it araat. Om romiton no i boros di pinatanom do Kinorohingan dot id suang do ginawo dokoyu, do mikuwo'd osiriba' o ginawo, tu' iri nopo i boros diri om haro i' o kuasa' do mamasi dokoyu. 22 Om mositi' no do wonsoyon dokoyu i nokoboros do Kinorohingan, om okon i' ko' pokinongohon no toomod, tu' ondung pokinongohon no toomod dokoyu om monipu' kou no do tinan dokoyu. 23 Tulun nopo di mokinongou do boros do Kinorohingan nga' a' indo dau wonsoyon iri, om miagal no iyau di tulun di magatul do rabas dau dot id soromin. 24 Tu' kapagatul nopondo iyau om mamanau no iyau om mipuwoyo' nopo dot olihuan dau ondung okuro-kuro i karaba-rabaso' dau. 25 Oturan nopod Kinorohingan om osonong i' kopio om haro o kuasa' do popoidu' do tulun. Om iri nopo tulun di monorisid kopio om mamadul kopio om tumanud dit oturan diri, om barakatan nod Kinorohingan o nunu nopo o wonsoyon dau tu' a' i' iyau minokinongou noo om a' iyau minomolihu'ddi. 26 Om ondung haro o tulun do momusorou dot otorodok iyau dot id tugama', nga' a' indo dau oporinta' o dila' dau, om monipu' no iyau'd tinan dau; om aiso' i' o guna' di kotorodoko' dau dot id tugama' dau. 27 Kotorodoko' nopo dot id tugama' dit olidang om it otopot kopio dot id pagantangan do Kinorohingan Tapa' om: monulung di tangaanak dit aiso' o molohing om monulung di tongoondu' di nongopuadan dit oinggorit, om momogompi' do dau'd tinan, om a' i' ososomu' do korohian diti pomogunan.
Popoinsan dot A' Montong do Pangkat do Tulun
1 Oi tobpinai-tobpinai ku! Iyokoyu nopo i notumbayaan do Tuhan Yesus Kristus, i Tuhan di Kikagayaan, om kada' kou pomogibang-gibang do tulun do tumanud dit okito dokoyu. 2 Tu' ondung haro o tulun do kaya' di kipondulung do tamas om kipakayan dit osonong do rumikot dot id pitimungan dokoyu, om rumikot no o songulun o mosikin di nongohurak-hurak no o pakayan dau, 3 om suahon nondo kopio dokoyu i tulun di kipakayan dot olumis diri, om moro-boros kou nondo dot id dau do poingkaa, “Irikau do hiti'd tirikohonon dot osonong oi Tuan,” ka. Nga' iri nopo i tulun di mosikin om moro-boros kou nondo dot, “Ingkakat nopo do hino,” ka, ko', “Dumansaran nopod mirikau,” ka. 4 Om iyo nopoddi o winonsoi dokoyu, om popisuwai kou no di tulun dit id pogialatan dokoyu. Om mogontong kou do kosonongo'd tulun do tumanud di pomusarahan dokoyu dot araat. 5 Sorohon no kopio dokoyu iti, oi tobpinai-tobpinai di kosianan ku! Tulun nopo di mosikin do hiti'd pomogunan diti, om pinili' do Kinorohingan do sumiliu'd tulun do kaya' dot id suang do kotumbayaan. Om iyolo' no i tulun di silihon do tulun do songonuon do Kinorohingan do miagal di pinabatos do Kinorohingan di tulun dit osianan dau. 6 Nga' iyokoyu nopo om mongindaraat nogi' di tulun do mosikin, om iri nogi' daa i tulun do kaya' o mongulok-ulok dokoyu om mamagayat dokoyu dot id pomisaraan! 7 Om iyolo' no i mongindaraat do ngaran dokoyu dit osonong, i naanu dokoyu do mantad id Kinorohingan! 8 Otopot no i wonsoyon dokoyu, ondung wonsoyon no dokoyu it oturan di Pomorintaan diri di nokotulis dot id Buuk do Kinorohingan do poingkaa, “Kosianai nod tulun do suwai do miagal dot osianan ko do diya'd tinan,” ka. 9 Nga' ondung momogibang-gibang kou'd tulun do tumanud dit okito dokoyu, om kowonsoi kou nod dusa, om iri no i Tourat o popointalang do tumolibamban kou di Tourat diri. 10 Tulun nopo di tumolibamban dot ongoiso' nopo di Tourat, om komoyon nopoddi om nokotolibamban ngai' no iyau di Tourat diri. 11 Iri nopo i momoros dot, “Kada' pagampahu',” ka, om iri i' o minomoros do, “Kada' pamatai,” ka. Iyo nopoddi, om ondung a' kou magampahu' nga' mamatai kou i', om nokotolibamban kou no dit oturan diri. 12 Tontok nopo do moro-boros kou om momonsoi kou do nunu nopo om sorohon no dokoyu do butusan kou i' do tumanud dit oturan do Kinorohingan di popoidu' do tulun. 13 Tu' a' i' monginsian o Kinorohingan di tulun dit a' monginsian do tulun do suwai. Nga' kosianan nopo om okoris i' ko' i pomohukum!
Kotumbayaan om i Wonsoyon
14 Oi tobpinai-tobpinai! Nunu o guna' do tulun do momoros dot, “Otumbayaan oku,” ka, om aiso' indo o wonsoyon dau do popointalang di kotumbayaan dau? Kapasi i' tuu dau i kotumbayaan dau do miagal diri? 15 Ondung haro o tobpinai do kusai ko' tobpinai do tondu' dot aiso' o pakayan om a' kabagal o takanon dau do monikid tadau, 16 om nunu'ddi o guna' dokoyu do momoros do, “Manampakai no di pakayan dit angakapal, om makan no!” ka --- om a' kou indo manahak diyolo' di koburu-buruon kopio diyolo'? 17 Om iyo nogiddi o kotumbayaan tu' ondung a' pointalangon dot id wonsoyon, om aiso' i' o guna' di kotumbayaan diri. 18 Om haro i' doti' o tulun do momoros do poingkaa, “Haro i' o tulun do sumondiu di kotumbayaan dau om haro o tulun do sumondiu di wonsoyon dau,” ka. Simbaron ku iri do poingkaa, “Potuduko' daa doho' ondung poingkuro o tulun do kikotumbayaan dot a' miwoyo' do wonsoyon, om pointalangon ku nondo dot id wonsoyon ku do haro o kotumbayaan ku,” kangku nondo. 19 Otumbayaan kou i' dot iso' noo o Kinorohingan, a' toi? Nga' i rusod dot araat nga' otumbayaan i' om gagaran po iyolo' dot opopoddosian! 20 Basug kou no kopio! Minog ku po tuu do pointalangon dot id dokoyu dot aiso' i' o guna' do kikotumbayaan dot a' miwoyo' do wonsoyon? 21 Antangai pogi' i Abraham i taki-aki toko'. Rinamit i' iyau'd Kinorohingan dot i winonsoi dau o kinopomoromitan di tontok di pinatahak daa dau i Isak, i tanak dau dot id Kinorohingan dot id sakai di pananaraban do porsombahan. 22 Om iti no o koilo-ilo kopio do mositi' no do pointalangon dot id wonsoyon i kotumbayaan om kointalang i' dot otopot kopio i kotumbayaan diri. 23 Iyo noddi o miontok di nokotulis dot id Buuk do Kinorohingan do poingkaa, “I Abraham nopo om notumbayaan i' do Kinorohingan, om rinamit do Kinorohingan iyau do miagal di tulun di momonsoi do korohian do Kinorohingan tu' kikotumbayaan i' iyau,” ka. Om iri noddi o kinopomoroitan dot i Abraham nopo om, “Tambalut do Kinorohingan”. 24 Om oilaan noddi kopio dot iri nopo i tulun do romiton do Kinorohingan, om i winonsoi di tulun diri o koporomitan, om okon i' ko' iri no i kotumbayaan dau. 25 Soroho' pogi' i Rahab, i tondu' do sundal diri. Rinamit i' iyau do Kinorohingan tu' i winonsoi di Rahab o kinopomoromitan do tontok di pinapasalakoi iyau do hiri'd walai dau di piro-piro o gomponoluku' do bansa'd Israil, om tontok di minonulung iyau diyolo' do minogidu' do minaya' do ralan do suwai. 26 Iyo nopoddi om poingkuro nopo dot apatai o tinan dot aiso' o rusod, om iyo nogiddi o kotumbayaan dot a' miwoyo' do wonsoyon tu' poimpatai i' i kotumbayaan.
Dila' do Tulun
1 Oi tobpinai-tobpinai ku! Kada' kogumu' ot id pogialatan dokoyu dot orohian do sumiliu'd gomponuduk. Oilaan i' dokoyu dot iyati' nopo i sumiliu'd gomponuduk om butusan toko' nondo dot awagat po ko' mantad di pomumutus do tulun do suwai. 2 Koinsanai dati' om asaru' i' do kowonsoi di kasala'. Nga' tulun nopo dit a' insan kasala' dot id koboro-boroso' dau om tulun no iyau dit aiso' o bohiton, i milo do momorinta' do koinsanai do pakakas do tinan dau. 3 Om ondung kakangan toko' i kuda' do papatanud di kuda' di dati' do korohian, om milo toko' no do porintaon i kuda'ddi! 4 Om onuon toko' pogi' i kapal do rahat do maan do poiyaan. Mulong po do miagal diri kagayo i kapal om it atanggayan di tongus dot opuhod nga' oporinta' i' iyau di komudi' dit okooro' do tumanud di korohian di mongomudi'. 5 Iyo nogiddi o dila' toko'; tu' mulong po dot okoro' i dila' toko'ddi, nga' milo i' do minggayo-gayo do pasal di hal dit angagayo. Om soroho' pogi' i gouton dit agayo piya nga' osorob i' di tapui dit okoro'! 6 Dila' moti' nga' miagal i' do tapui. Id tinan nopo om dila' no o tadon ngai' do karaaton, i popotongkop do karaaton dot id koinsanai'd tinan toko'. Om kosorob nogi' i dila' do koinsanai'd koposi-posion toko' dot i tapui do mantad hilo'd naraka o ponorob. 7 Milo ngai' id ubason o koinsanai'd nintorusan dit ongorongit, om i tombolog om i nintorusan di sangkamang-kamang om sada' nga' noumbalan nogid tulun do mongubas. 8 Nga' dila' nopod tulun om aiso' no o songulun piya do milo'd mongubas. Tu' dila' nopo om araat kopio om a' milo do porintaon; om poimponu' do rasun di kapatai. 9 Dila' i' o pakayon toko' do mongunsikou'd Tuhan i Tapa' toko', om dila' i' o pakayon toko' do momopol do tulun do suwai, i winonsoi'd Kinorohingan do pinoiyo do kowoyo-woyoo' dau. 10 Iso-iso' i' o kabang do tadon do boros do mongunsikou om i boros do momopol. Nga' a' i' kopio apatut do miagal diri! 11 Tu' aiso' i' o tudan do waig do popoluyung do waig dit aanau om waig dit opoit dot iso' no o tudan do tadon. 12 Oi tobpinai-tobpinai ku, a' i' mongua' o guas dot ara do tua' do saitun om a' mongua' o guas dot anggur do tua' dot ara. Om i tudan di waig dot oosin nga' a' i' milo do popoluyung do waig dit aanau.
Toilaan do Mantad Hilo'd Sawat
13 Ondung haro ot id pogialatan dokoyu dot oilo om kitoilaan om mositi' no do pointalangon dau iri dot id kowoyo-woyoon dot osonong, om momonsoi dit ongosonong do mikuwo'd osiriba' o ginawo om kitoilaan. 14 Nga' ondung osolon kou, om araatan, om dau nod tinan o sorohon om kada' no koondos di toilaan dau'ddi, dot iyo nopoddi om monomputul kou i' di habar dit otopot di mantad id Kinorohingan. 15 Toilaan nopo do miagal diri om okon i' ko' mantad hilo'd surga, suwai ko' mantad i' do hiti'd pomogunan, om mantad id korohian do tulun om mantad id rogon. 16 Hinonggo nopo o haro o mosol om momusorou no do dau'd tinan, om hiri no do haro o pogisasaapan om haro ngai' i wonsoyon dot araat. 17 Nga' tulun nopo di kitoilaan do mantad hilo'd sawat om koiso' nopo kopio do kowoyo-woyoon dau om olidang, om orohian do monokiulud, om osuwau, om mihuboyo-boyo' do tudukan, om poimponu' iyau do kosianan om popointalang iyau do wowonsoyon dit osonong om a' iyau momogibang-gibang om a' minsorupai-rupai no toomod. 18 Om iri nopo it osonong om tua' di linsou di kouludan di pinatanom di tulun dit orohian do kouludan!
Monokiambalut diti Pomogunan
1 Honggo o tadon do koinsanai di pogisasaapan om pogisosongkiwalan dot id pogialatan dokoyu? Okon toi ko' i kongorohian dokoyu o tadon diri, it a' otingkod do misaap dot id suang do ginawo dokoyu do mokiaanu do kosimbayanan do hiti'd pomogunan. 2 Haro daa o korohian dokoyu nga' a' i' dokoyu aanu, om iri nondo o kapamatayan dokoyu'd tulun! Orohian kou daa do mogihum nga' a' i' dokoyu okito i pokiihuman dokoyu, om iri nondo o kopogisosongkiwalan dokoyu om kopogisasaapan dokoyu. Aiso' i' ot aanu dokoyu tu' a' kou i' mokianu dot id Kinorohingan. 3 Om mokianu kou piya daa nga' a' i' dokoyu aanu tu' kasala' i' i kopokionuan dokoyu tu' maan no dokoyu do dokoyu'd koinsanangan o kopokionuan dokoyu. 4 Iyokoyu no i tulun dit a' otorodok! Koilo kou i' toi dot ondung monokiambalut kou diti pomogunan, om osiliu kou no do pisangod do Kinorohingan? 5 Kada' soroho' dot aiso' o pinaantakan di boros dot id suang do Buuk do Kinorohingan do poingkaa, “Pinosuang do Kinorohingan dot id ginawo toko' i rusod dit osonsog kopio,” ka. 6 Nga' mulong po do miagal diri nga' iri nopo i kosianan do Kinorohingan di pinatahak dot id dati' om okoris i' ko' i korohian di rusod toko'ddi om iri nogi' o nokoponulisan dot id Buuk do Kinorohingan do poingkaa, “Saapon do Kinorohingan i tulun di minggayo-gayo, nga' kosianan i' dau i tulun dit osiriba' o ginawo,” ka. 7 Iyo nopoddi, om insiriba' kou no dot id Kinorohingan om saapon no dokoyu o Rogon, om mogidu' i' i Rogon do mantad id dokoyu. 8 Insomok kou no do Kinorohingan, om minsomok i' o Kinorohingan dokoyu! Ougai no dokoyu o palad dokoyu, iyokoyu i tulun dit ongkidusa! Om lidangai no o ginawo dokoyu, iyokoyu i mikoduwo o ginawo! 9 Mositi' no do monosol kopio kou om mikuwo'd tumongob om mihad; om sowolian nod tihad i tirak dokoyu, om sowolian do katangkabaan i kataadan dokoyu! 10 Insiriba' kou no dot id Tuhan, om poinggoyoon kou i' dau.
Kada' Papasala' do Tulun
11 Oi tobpinai-tobpinai ku, kada' kou pogindaraa-raat om kada' kou pogisala-sala'. Tulun nopo di mongindaraat ko' i papasala' do tobpinai dau dit oiyo do Kristian, om mongindaraat no iyau om papasala' di Tourat. Ondung papasala' kou di Tourat, om miagal nod a' kou tumanud di Tourat, tu' sumiliu kou do gompomutus di Tourat diri. 12 Nga' iso' noo o Kinorohingan di kikuasa' do manahak do tulun dot oturan om momutus do tulun, om iyau no o Kinorohingan di kikuasa' do mamasi om mamatai. Nga' isai kopio kou tu' papasala' kou do tulun do suwai?
Mogodu do Minggayo-Gayo
13 Iyokoyu nopo i momoros do, “Mongoi toko' do hilo'd bandar do baino' ko' suab, om mundorong toko'd hilo' dot ongosontoun do mongindapu' om mogihum do tusin,” ka, --- om pokinongoho' no dokoyu iti nosihat ku. 14 A' kou i' koilo ondung nunu ot osiliu dot id dokoyu do suab! Iyokoyu nopo om miagal nod lisun tu' oruhai dot okito, om atanus no. 15 Apatut nopod poboroson dokoyu om poingkaa, “Ondung korohian do Tuhan, om poimpasi toko' po, om owonsoi toko' indo iti ko' owonsoi toko' indo iri,” ka. 16 Nga' asawat i' o ginawo dokoyu om minggayo-gayo o koboro-boroso' dokoyu. Om koboro-boroso' nopo do miagal diri om kasala' i'. 17 Iyo nopoddi, om tulun nopo di koilo dit osonong dot apatut dau'd wonsoyon, nga' a' indo dau wonsoyon iri, om kowonsoi nod dusa i tulun diri.
Popoinsan di Tulun di Kaya'
1 Oi tobpinai-tobpinai, iyokoyu i tulun do kaya'! Pokinongoho' no dokoyu iti nosihat ku. Tongob kou no om mihad kou no, tu' oinggorit kou nondo do koimbagu. 2 Naraag no i kakayaan dokoyu, om i pakayan dokoyu nga' nangaakan nod tanai. 3 Togoron no i tamas om i pirok dokoyu; om iri no i togor diri o sumiliu'd sasi' do sumaap dokoyu om akanon nogindo di togor o tinan dokoyu do miagal dot osorob do tapui. Nokoponimung kou no do dapu' do tontok diti ponong id kopupuson no diti pomogunan. 4 A' kou i' minamagadsi' di tulun di kumaraja' do hilo'd tumo dokoyu. Dinondo nodti om pokinongoho' no dokoyu o boros diyolo' do papasala' dokoyu. Tu' norongou nod Kinorohingan i Tuhan dit Agayo o Kuasa' i giniakan di tulun di minongomot do hiri'd tumo dokoyu do mokitulung dau. 5 Koposi-posion nopo dokoyu do hiti'd pomogunan diti om poimponu' nod kakayaan om kosimbayanan. Om iyo kou po do popolombon do tinan dokoyu do maan sumbolio' do tontok di tadau'd koponumbolian. 6 Momohukum kou om mamatai kou di tulun dit aiso' o sala', om a' i' iyolo' sumaap dokoyu.
Kolonuto' do Ginawo om Sambayang
7 Iyo nopoddi oi tobpinai-tobpinai ku, om polonuton no dokoyu o ginawo dokoyu do gisom do korikatan do Tuhan. Antangai pogi' i tulun di gompongumo nga' alanut i' o ginawo do magandad do gisom do kopongua' i tanom-tanom dau. Om alanut o ginawo do magandad do rasam di maso di lumahanggang o roun do kayu, om i rasam di maso do mongusak o kayu. 8 Om iyokoyu nga' apatut nogi' dot alanut o ginawo, om ogirot o ginawo tu' oruhai no o korikatan do Tuhan. 9 Kada' kou no piindaraa-raat om kada' kou pogisala-sala' om a' kou i' ohukuman do Kinorohingan. Om sorohon no dot osomok no i gompomutus om posodia' no iyau do rumikot. 10 Oi tobpinai-tobpinai, sorohon no dokoyu i nabi di minoro-boros dot id suang do ngaran do Tuhan, do maan dokoyu'd omitan, tu' alanut i' om ogirot o ginawo diyolo' do mulong piya dot oinggorit. 11 Om rinoitan iyolo' dot olumaag tu' alanut i' o ginawo diyolo'. Om nokorongou kou di kolonuto' do ginawo di Ayub, om nokoilo kou nogi' do binarakatan diri do Tuhan iyau dit id tohuri. Tu' Tuhan nopo om obinsianan i' kopio om osonong. 12 Nga' agayo nopo kopio om iri no tu': Kada' kou no kopio rait do tawan ko' pomogunan ko' nunu nopo do tontok di sumumpa' kou. Suwai ko' poboroson nopo ot, “Oo,” ka do kaakun ko no, om “Amu',” ka dot a' ko no kaakun; om a' kou i' ohukuman do Kinorohingan. 13 Ondung haro ot id pogialatan dokoyu do maso dot osusa', om mositi' no do sumambayang iyau. Ondung haro o tulun dit otood, om mositi' no do modsinding iyau do mamarayou'd Kinorohingan. 14 Ondung haro ot id pogialatan dokoyu do sumakit, om mositi' no do momolohou iyau di piro-piro boyoon do sidang. Om mositi' no dot ongoyon di piro-piro boyoon diri sambayangai i tulun di sumakit diri, mikuwo'd momoluhad dau do tumau dot id suang do ngaran do Tuhan. 15 Ondung sumambayang iyolo' do mikuwo'd otumbayaan kopio, om lingasan indo do Tuhan i tulun di sumakit diri, om ompunan do Tuhan o dusa di nongowonsoi dau. 16 Iyo nopoddi, om mositi' no dot okunon dokoyu i kasalaan dokoyu dot id tulun do suwai, om mogisambayang-bayang kou no, om olingasan kou i'. Agayo i' moti' o kuasa' do sambayang di tulun di tumanud do korohian do Kinorohingan. 17 I Ilia nga' tulun i' do miagal dati'. Om suminambayang iyau dot iso-iso' o ginawo dot a' paparasam, om a' kopio noddi ruminasam, do solinaid do tolu o toun om satanga'. 18 Om sambayang poddi kawagu iyau, om rasam nogiddi om gisom do minongua' ngai' i tanom-tanom. 19 Oi tobpinai-tobpinai ku! Ondung haro ot id pogialatan dokoyu dot a' dii tumanud do ponudukan do mantad id Kinorohingan, om haro nondo o tulun do suwai do popoguli' kawagu do tulun diri dot id Kinorohingan, 20 om sorohon no ot ayat diti: Tulun nopo di mangangat do tulun di kidusa do gumuli' kawagu do mantad id ralan di nakasala', om iri no o mamasi do ginawo di tulun do kidusa'ddi do mantad id kapatayon, om i poporikot do koompunan di dusa dot ogumu'.
1-2 Oi tobpinai-tobpinai, i tulun do nopili' do Kinorohingan, i nokotompias dot id pointongkop do watas do Pontus, om Galatia, om Kapadokia, om Asia om Bitinia. Mogondos oku no, iyoho' i Pitrus, i rasul di Yesus Kristus, dot onuan kou do Kinorohingan do barakat om kosimbayanan do ginawo dit a' ogina-gina' kagayo. Nopili' kou do siniliu'd tulun di songonuon do Kinorohingan do miontok di natantu' mantad do wonsoyon do Kinorohingan, i Tapa'. Om nosiliu kou no di Rusod do Kinorohingan do tulun dit olidang, i pinotobilang do maan do dong Kinorohingan do tulun, om mumboyo' kou i' di Yesus Kristus om olidangan kou di raha' dau.
Soro-Sorohon di Pointantu' Kopio
3 Kainou no mongunsikou do Kinorohingan, i Tapa' do Tuhan toko', i Yesus Kristus! Nosianan tomod iyau dati', om iri no o kinapanahakan dau dati' do koposion di wagu, tu' pinasi i' kawagu dau i Yesus Kristus do mantad id kapatayon. Om iri no o manahak dati' do soro-sorohon di pointantu' kopio. 4 Mogondos toko' do kaanu di barakat di pinosodia' do Kinorohingan do patahakon di tulun di songonuon dau, iri no i barakat di pinoopi' dau do hilo'd surga, it a' rumaag, om a' apasa' om a' tumalup. 5 Aanu ngai' no dokoyu iri, tu' otumbayaan kou i' do Kinorohingan. Om gompion kou di kuasa' do Kinorohingan om kaanu kou i' di koposion di nokosodia' no do pointalangon do kopupuson diti pomogunan. 6 Iyo nopoddi, om kongotood kou no, do mulong piya do tumongob kou do daamot tu' oontok kou i' do piro-piro o pogumbalan di mogisuayan. 7 Kogunaan nopoddi nga' popointalang kopio ondung iso-iso' kopio o ginawo dokoyu dot otumbayaan do Tuhan ko' amu'. Iri piya i tamas di rumaag nga' sompipion i' do tapui. Om kotumbayaan nopo dokoyu om agayo po o guna' ko' mantad do tamas. Om kaa pogiddi dot apatut i' dot umbalan om kointalang i' o kogiroto'. Om arayou kou indo om pusohon om poinggoyoon do tontok di tadau do korikatan kawagu di Yesus Kristus. 8 Osianan kou i' dau do mulong piya dot a' kou nokokito mantad dau di gulu. Om otumbayaan kou i' dau do mulong piya dot a' kou kokito dau do dinondo. Om iri no o kataadan dokoyu, om haro o kataadan dokoyu dit agayo kopio om it a' no milo'd susuyon. 9 Tu' norikot no i pokiririkatan kopio di kotumbayaan dokoyu, iri no i koposion do rusod dokoyu. 10 Iti no i koposion di sinorisid kopio om i nihum kopio di nabi, o komoyon, om pinosunud mantad diyolo' o pasal di barakat di pinatahak do Kinorohingan dot id dokoyu. 11 Om sinorisid diyolo' ondung poingkuro om soira' iri dot osiliu, i komoyon di Rusod do Kristus, it id suang do ginawo diyolo'. Om tontok nopoddi nga' pinoboros mantad di Rusod diri dot id diyolo' o pasal di koinggoritan dit a' milo dot a' di Kristus opurimanan om pasal di kagayaan dau do katalib iri. 12 Om sinunudan do Kinorohingan i nabi diri dot iri nopo i wonsoyon diyolo' om okon i' ko' maan do koinsanangan diyolo' suwai ko' maan do koinsanangan dokoyu; iri no it ongorongou dokoyu dot atarang tomod do posusuyon di piro-piro o gomponusui di Habar dot Osonong diri do pasal di Yesus Kristus. Om pinolombus diyolo' iri dot id dokoyu do mikuwo'd kuasa' do Rusod do Kinorohingan, i pinolintuhun dau do mantad hilo'd surga. Om iri piya moloikat nga' orohian i' do koilo di habar di posusuyon diyolo'ddi.
Monuhu' do Popolidang do Kowoyo-Woyoon
13 Iyo nopoddi, om sumodia' kou no kopio. Antaan-taan no dokoyu om soro-sorohon no kopio i barakat di patahakon dot id dokoyu do korikot kawagu i Yesus Kristus. 14 Mumboyo' kou nod Kinorohingan, om kada' kou nondo tanud di kowoyo-woyoon do koposi-posion dokoyu di gulu po, dit a' kou po nokotutun do Kinorohingan. 15 Suwai ko' kumolidang kou no do nunu nopo i wonsoyon dokoyu, do miagal do Kinorohingan di minomolohou dokoyu tu' olidang. 16 Nokotulis no dot id suang do Buuk do Kinorohingan o poingkaa, “Kumolidang kou no, tu' olidang oku i',” ka. 17 Roitan dokoyu do Tapa' o Kinorohingan do tontok do sumambayang kou dot id dau. Om iyau no i Kinorohingan di momutus do tulun do miontok di nowonsoi do pointikid-tikid do tulun, om a' i' iyau momogibang-gibang do momutus. Iyo nopoddi, om solinaid nopo dokoyu do hiti'd pomogunan, om poinggoyoon no dokoyu o Kinorohingan dot id suang do koposi-posion dokoyu. 18 Om koilo kou i' di pinabayar do pinopoidu' dokoyu do mantad id koposi-posion dit aiso' o guna', i notungkusan dokoyu do mantad id taki-aki dokoyu. Om iri nopo pinambayar diri om okon i' ko' i milo'd rumaag do miagal do pirok ko' tamas, 19 suwai ko' it agayo o gatang; iri no i tinan di Kristus, i nosiliu do dumba' dit aiso' o bohiton om aiso' o kabara-barasan do pinatahak dot id Kinorohingan do numaan do porsombahan di sinumbali'. 20 Om nopili' nod Kinorohingan i Kristus do tontok dit a' po nowonsoi iti pomogunan. Om tontok no di miririkot o kopupuson do pomogunan, do ruminikot iyau do hiti'd pomogunan, om apasi kou indo. 21 Om id dau no o nokotumbayaan dokoyu do Kinorohingan, i minamasi kawagu dau do mantad id kapatayon om i pinopoinggayo dau. Om Kinorohingan no o kotumbayaan dokoyu om Kinorohingan o pagandasan dokoyu. 22 Om iri no i panananud dokoyu di ponudukan do mantad id Kinorohingan o kinopomolidangan dokoyu do tinan dokoyu om osianan kou do tulun dit iso-iso' o kinotumbayaan, do mikuwo'd iso-iso' kopio o ginawo. 23 Tu' id suang no di boros do Kinorohingan di poimpasi om i poingompus diri, do siniliu kou do tulun di wagu, it okon i' ko' pinogkosusu do tulun, suwai ko' mantad id Tapa' di hino kasai' do gisom do poingompus. 24 Om nokotulis no dot id suang do Buuk do Kinorohingan o poingkaa, “Oinsanan nopo o tulun do miagal do sakot, om i kagayaan dau nga' iyo no di tusak do sakot. Oriou no i sakot, om tumatak i tusak, 25 nga' iri nopo boros do Tuhan om hino kasai' i' do gisom do poingompus,” ka. Iri nopo boros diri om iri no i Habar dot Osonong di pinosusui dot id dokoyu.
Watu di Poimpasi om i Bansa' dot Olidang
1 Iyo nopoddi, om iyadaai no dokoyu o koinsanai dit angaraat, om kada' kou nondo pongudut, om kada' kou pinsorupai-rupai. Kada' kou osol, om kada' kou pongindaraat do tulun do suwai. 2 Mositi' no do miyo kou do tanak di wagu po kosusu, tu' tuuhan kasai' di susu do don rusod dit aiso' o rolot. Om iri no o ralan dokoyu do sumuni om apasi kou indo. 3 Haro i' o nokotulis dot id suang do Buuk do Kinorohingan do poingkaa, “Nokopuriman kou no kopio iyokoyu do kosonongo'd Tuhan,” ka. 4 Iyo nopoddi, om rikot kou no dot id Tuhan. Iyau no o miagal do watu di poimpasi, i watu di pinataam do tulun tu' sorohon daa diyolo' dot aiso' o guna'; nga' iri nogiddi i pinili' do Kinorohingan do watu dit agayo o guna'. 5 Iyokoyu no o miagal do watu dit ogumu' di songimpasi. Iyo nopoddi, om mositi' no dot orohian kou do pakayon do pomonsoi di walai'd Kinorohingan di don rusod. Om iyo noddi o ralan dokoyu dot osiliu'd imam di dong Kinorohingan no kopio do koposi-posion, om i papatahak dot id Kinorohingan do porsombahan di sinumbali' di don rusod, i kohubayaan do Kinorohingan, tu' i Yesus Kristus o popomilo dokoyu do papatahak diri. 6 Tu' nokotulis i' dot id suang do Buuk do Kinorohingan o poingkaa, “Nopili' ku no o tiso' o watu dit agayo o gatang, i pinoiliu ku do hilo'd Sion do maan do watu di pomogirot kopio; om iri nopondo tulun dit otumbayaan dau om a' no oiman-iman,” ka. 7 Iri nopo watu'ddi om agayo i' kopio o guna' dot id dokoyu it otumbayaan. Nga' id tulun nopondo dit a' otumbayaan, om abayaan no kopio it ayat dot id suang do Buuk do Kinorohingan do poingkaa, “Iri nopo watu dit a' pinakai di piro-piro tukang mamamaal diri, om nosiliu nogiddi kopio do watu dit agayo o guna',” ka. 8 Om haro po o poingkaa, “Iri no i watu di kosoduwon do tulun, i watu di kotohubon diyolo',” ka. Om kasadu pogi' iyolo' nga' a' i' iyolo' otumbayaan di boros do Kinorohingan. Om iyo noddi o natantu' do Kinorohingan dot osiliu dot id diyolo'. 9 Nga' iyokoyu nopo om bansa' i' di nopili', om imam di mogobi-obi' do raja', om bansa' dit olidang, i nokotobilang do maan do dong Kinorohingan, iyokoyu i tulun do songonuon do Kinorohingan. Pinili' kou do Kinorohingan om linohou kou dau do suminoliwan do mantad id totuong, om sumuang indo dot id suang do tanawau dau dit anawau kopio, om kopinsusui indo dokoyu o pasal di nongowonsoi dau di koimayaan kopio. 10 Tontok nopo di gulu po, om okon kou i' ko' tulun di songonuon do Kinorohingan, nga' baino' noddi om tulun kou no di songonuon do Kinorohingan. Di nopo di gulu po om a' kou i' kosianan do Kinorohingan, nga' baino' noddi om nakaramit kou no di kosianan dau.
I Piro-Piro Susuhuon do Kinorohingan
11 Oi tobpinai-tobpinai di kosianan ku! Iyokoyu nopo om sompogunan i' om mombo-hombo do hiti'd pomogunan. Om iri noddi o kopogoduhan kopio ku dokoyu do tumanud di korohian dokoyu di don tulun, it a' kasai' nopo kopisokodung do ginawo dokoyu. 12 Om mositi' no do posonongon kopio dokoyu o kowoyo-woyoon dokoyu dot id rolot do tulun dit a' kotutun do Tuhan, gisom do tondoson kou piya daa'ndo diyolo' do tulun dit araat nga' a' i' milo dot a' diyolo' okunon dot osonong i wonsoyon dokoyu, om mamarayou indo iyolo'd Kinorohingan do tontok di tadau do korikatan dau. 13 Mositi' no do minsiriba' kou dot id pointikid-tikid do tulun di momorinta', do Tuhan o koinsiribaan: dot id Kaisar tuu, i nosiliu'd pomorinta' dit agayo, 14 ko' id gobunor po di nopili' di Kaisar do momohukum di tulun di momonsoi'd araat om momusou di tulun di momonsoi'd osonong. 15 Tu' korohian id Kinorohingan dot i wowonsoyon dokoyu dit osonong o ponompon dokoyu'd kabang do tulun di mimboros do dongkababasug. 16 Mositi' no dot iyo di tulun dit okon ko' turipon o kowoyo-woyoon do koposi-posion dokoyu, nga' kada' dokoyu pakayo' i kosimbayanan dokoyu'ddi do maan do ponompon do karaaton, suwai ko' mositi' no dot iyo do dongsusuhuon do Kinorohingan o kowoyo-woyoon dokoyu. 17 Pusohon no o koinsanai'd tulun, om kosianai no di tulun di sompi' ko' tulun do Kristian. Koronok kou no do Kinorohingan, om pusohon no dokoyu i Kaisar.
I Koinggoritan di Kristus ot Omitan
18 Oi tobpinai-tobpinai di nosiliu do susuhuon, insiriba' kou no di tuan dokoyu do mikuwo'd momusou kopio diyolo'; om okon nopo ko' id tuan dit osonong koulun om it alamaya' nga' id tuan nogi' dit orongit. 19 Om barakatan kou indo do Kinorohingan, ondung koilo kou no do korohian do Kinorohingan, om alanut o ginawo dot a' piya otulid o wonsoyon dot id dokoyu. 20 Tu' nunu toi kopio o koimayaan dot alanut piya o ginawo dokoyu do mamabo'd hukuman dit apatut dokoyu'd boboon dot i kisala' kou o kinopomohukuman? Nga' ondung alanut o ginawo dokoyu do mamabo'd koinggoritan di koontok dokoyu dot it otopot o winonsoi do koponginggoritan, om barakatan kou i' do Kinorohingan. 21 Om iri no o kinapamalahawan do Kinorohingan dokoyu. Tu' noinggorit no i Kristus dot iyokoyu o kinoinggoritan, om iri no i winonsoi dau ot apatut dokoyu'd omitanan, om tumanud kou i' di winonsoi dau. 22 A' i' iyau insan pomonsoi'd dusa, om aiso' o tiso' pod tulun do nokorongou dau do minongudut. 23 Tontok di pinimpapalan iyau, om a' i' iyau suminuli' do minomopol. Om tontok di ninggorit iyau nga' a' i' iyau minimboros do sumuli'; suwai ko' tahak nopo iyau do Kinorohingan, i Gompomutus dit otulid. 24 I Kristus no o minamabo do koinsanai'd dusa toko' do hiri'd kayu salib, om koidu' toko' i' do mantad id pomorintaan do dusa, om miontok indo di korohian do Kinorohingan o kowoyo-woyoon toko'. Om iri no i suhat di Kristus o kolingos dokoyu. 25 Tontok nopo di gulu po om iyo kou poddi dumba' di napalid, nga' baino' noddi om nokoguli' kou no do tumanud di Madtatamong om i Gompomogompi' do ginawo dokoyu.
Kowoyo-Woyoo' di Misasawo
1 Om iyo kou nogiddi iyokoyu, i tongoondu' di kisawo, tu' mositi' no do minsiriba' dot id sawo. Om ondung haro ot id pogialatan di sawo dokoyu dot a' otumbayaan di habar do mantad id Kinorohingan, om milo indo i kowoyo-woyoon dokoyu do mamagayat diyolo' dot otumbayaan. Om a' kou i' minog do popoboros do nunu-nunu dot id diyolo', 2 tu' okito indo diyolo' i kowoyo-woyoon dokoyu dit olidang om it otorodok dot id kinotumbayaan dokoyu. 3 Kada' dokoyu pologoso' dot id soliwan noo o kolulumis dokoyu, do miagal do momolumis do tobuk ko' manampakai di poingillumis do tinan, ko' manampakai do pakayan dit angagayo o gatang. 4 Suwai ko' pologoso' no do mantad id ginawo o tadon di kolumiso' dit a' tumanus, iri no i kowoyo-woyoon dit alamaya' om it osinondot, it agayo kopio o gatang dot id pagantangan do Kinorohingan. 5 Om iyo noddi o kowoyo-woyoon di tongoondu' dit otorodok dot id tugama' om i mogondos do Kinorohingan, do momolumis do tinan diyolo' di gulu po, tu' mininsiriba' iyolo' dot id sawo diyolo'. 6 Om i Sara nga' iyo iddi. Minihuboyo-boyo' i' iyau di Abraham om rinoitan dau i Abraham do tuan dau. Om iyokoyu do dinondo nga' osiliu no do tangaanak di Sara, ondung momonsoi kou no dit ongosonong om a' kou ooris do nunu nopo. 7 Om iyokoyu nogi', i tongokusai dit ongkisawo nga' mositi' no do kosuhut kopio kou do kowoyo-woyoon di sawo dokoyu dot id pisompiiyanan dokoyu, om osorou kasai' dot iyolo' nopo om a' i' koiyo dokoyu kokoris. Suahon no dokoyu iyolo' tu' iyolo' nga' iyo i' dokoyu, do karamit di nipuhawang do koposion dit otopot kopio do mantad id Kinorohingan. Wonsoyon no dokoyu o miagal diti, om aiso' i' o kaantob do sambayang dokoyu.
Oinggorit dot i Momonsoi'd Osonong o Koponginggoritan
8 Tonsi nopo do toinsanan diti om: mositi' no dot iso-iso' o ginawo dokoyu om iso-iso' o pomusarahan. Mositi' no do mogiinsian-sian kou do miagal do tulun di mogiobpinai. Om mogikosonong-sonong kou no om mogiinsiriba-riba' do ginawo. 9 Kada' dokoyu suliai do karaaton it araat, om kada' suliai do popol o popol; suwai ko' ponuli' nopo om pokionuan o tulun diri do barakat do mantad id Kinorohingan. Tu' kinapamalahawan nopo do Kinorohingan dokoyu om papaanu dokoyu do barakat di mantad id dau. 10 Nokotulis no dot id suang do Buuk do Kinorohingan o poingkaa, “Iri nopo tulun dit orohian do kopuriman do kosonongo' do koposion om orohian do kopuriman do piro-piro o tadau dit osimbayan, om mositi' no do porintaon dau o kabang dau om a' i' kopimboros dit araat om a' kopoboros dit a' otopot. 11 Mositi' no do minsodu' iyau dit araat om momonsoi dit osonong; om mositi' no do tumotos kopio iyau do monokiulud. 12 Tu' podulon kasai' id Tuhan i tulun di tumanud do korohian dau, om mokinongou kasai' o Tuhan do sambayang diyolo'; nga' saapon id Tuhan i tulun di momonsoi'd araat,” ka. 13 Isai po toi ot orohian do momonsoi'd araat dot id dokoyu, ondung it osonong o korohian dokoyu'd momonsoi? 14 Nga' mulong piya dot oinggorit kou dot i momonsoi'd osonong o koponginggoritan nga' ountung kou i'! Kada' kou kooris dot isai nopo, om kada' kou katangkabo. 15 Nga' id suang nopod ginawo dokoyu, om patahakon no dot id Kristus o karayahan dit apatut do patahakon dot id dau tu' Tuhan. Om mositi' no do posodia' kasai' kou do sumimbar do pointikid-tikid do tulun di muhot do pasal di soro-sorohon dokoyu dot aanu dokoyu. 16 Nga' wonsoyon no dokoyu iri do mikuwo'd alamaya' o kowoyo-woyoon om osuwau. Om mositi' no dot osonong o kopurimanan do ginawo dokoyu, tu' ondung indaraaton kou dot it osonong o kowoyo-woyoon dokoyu, om i tumatanud kou di Kristus o kopongindaraatan, om ointingayaman indo i tulun di mongindaraat diri. 17 Om osonong nogi' dot oinggorit dot i momonsoi'd osonong o koponginggoritan --- ondung iyo'ddi o korohian do Kinorohingan --- ko' mantad dot oinggorit dot i nokowonsoi'd araat o koponginggoritan. 18 Tu' Kristus piya nga' insan noo kapatai, om diri noo do napatai do gisom do poingompus, dot i dusa'd tulun o nakapatayan --- iyau nopo om aiso' i' o sala', nga' minatai iyau do suminowoli do tulun di kisala'. Om winonsoi pogi' do Kristus o miagal diri nga' poporikot kawagu iyau dokoyu dot id Kinorohingan. Om pinatai o tinan dau, nga' pinasi i' kawagu dot id suang do kowoyo-woyoo' di don rusod. 19 Om id suang nod kowoyo-woyoo' dau di don rusod do minongoi iyau popinsusui di habar do mantad id Kinorohingan dot id rusod di nokogiil: 20 iri no i rusod do tulun dit a' minumboyo' do Kinorohingan do tontok di poimpasi po i Nuu. Tontok nopoddi om alanut i' o ginawo do Kinorohingan do minandad do solinai'd di Nuu do minomonsoi di kapal dau. Om iri no i tulun di hiri'd kapal --- do walu' no o tulun --- o napasi do mantad id sakob dot agayo'ddi. 21 Om iri nopo i nosiliu'ddi om poiyaan di botisan, i mamasi dokoyu do dinondo. Iti nopo botisan diti om okon i' ko' i wonsoyon di natantu' mantad do pomolihung do tinan do mantad id koinsanai di sosomu', suwai ko' ponokobatos nu i' dot id Kinorohingan do mikuwo'd kopurimanan do ginawo dit osonong. Om kapasi pogi' dokoyu i botisan nga' napasi no kawagu i Yesus Kristus do mantad id kapatayon, 22 om nokoinsawat iyau do hilo'd surga. Om baino' nopoddi om kikuasa' no iyau do poinsugku' do Kinorohingan om momorinta' iyau do koinsanai'd moloikat, om koinsanai'd pomorinta' om koinsanai dit ongkikuasa'.
Kowoyo-Woyoon di Wagu
1 Iyokoyu nga' apatut nogi' do popokoris do tinan dot i pomusorou do miagal di dong Kristus o popokoris, tu' noinggorit no o tinan do Kristus. Iri nopo tulun dit oinggorit o tinan, om a' no kowonsoi'd dusa. 2 Iyo nopoddi, om mantad pondod baino', om mositi' no do tumanud kou do korohian do Kinorohingan dot id suang do koposi-posion dokoyu do hiti'd pomogunan, om a' nondo tumanud di korohian do tulun. 3 Tontok nopo di gulu po, om alaid kou no kopio do miningwonsoi do miagal di korohian di tulun dit a' kotutun do Tuhan. A' i' kopio osonong o kowoyo-woyoon dokoyu di gulu po. Tu' tuminanud kou do korohian do tinan dokoyu, om minagauk kou, om adalaan kou do rumamai dit a' osonong o karamayan, om moginum kou, om tumuku' kou dot id tingolig di kososomu' tomod o kowoyo-woyoo' do tumuku'. 4 Om baino' nopoddi om osuayan diri i tulun dit a' kotutun do Tuhan do kokito dokoyu dot a' kou moyo' di kowoyo-woyoon diyolo' dit a' nopo otingkod- tingkod do mingwonsoi'd dusa. Om iri no o kopongindaraatan diyolo' dokoyu. 5 Nga' tumimbaba' indo iyolo' do Kinorohingan do koimbagu, do poposusui do koinsanai di nongowonsoi diyolo' dot id toguang do Kinorohingan, i nokosodia' no do momutus do tulun di poimpasi om i nangapatai no. 6 Om iri no o nokoposusuyan di Habar dot Osonong dot id tulun piya di nangapatai. Om kinoposusuyan nopo nga' mulong piya do norotuan no iyolo' do hukuman di koubasan do porotuon dot id tulun nga' apasi indo o rusod diyolo' do miagal do Kinorohingan tu' poimpasi. Iri nopo tulun diri om apatut i' do hukuman tu' i winonsoi diyolo' o kinopomohukuman do solinaid po diyolo' do poimpasi do hiti'd pomogunan diti, nga' orohian i' o Kinorohingan do manahak diyolo' do maso do rumamit di koposion di poingompus.
I Mongilo-Ilo di Nipuhawang do Mantad id Kinorohingan
7 Oruhai noddi dot orikot o kopupuson do koinsanai'd nunu nopo. Iyo nopoddi, om mositi' no do porintaon dokoyu o tinan dokoyu om mumbangan-bangan, om milo kou i' do sumambayang. 8 Om agayo nopo kopio do wonsoyon dokoyu nga' mositi' no do mogiinsian-sian kou om kosodia' kou do mogiampun-ampun. 9 Mogisalakoi-lakoi kou no dot id walai dokoyu do mikuwo'd a' mimboros dot araatan. 10 Nakaanu ngai' kou no do nipuhawang di mogisuayan do mantad id Kinorohingan. Iyo nopoddi, om sumiliu nopod tulun dit osonong o pongilo-ilo di nipuhawang do mantad id Kinorohingan diri, om mositi' no do pakayon dokoyu i nipuhawang diri do maan do koinsanangan do koinsanai'd tulun. 11 Iri nopo tulun di popolombus do boros, om mositi' no do popolombus di boros di mantad id Kinorohingan; om iri tulun di mogobi-obi' do tulun do suwai nga' mositi' no do mogobi-obi' do mikuwo'd kokorisan do mantad id Kinorohingan. Om koinggayo indo o Kinorohingan dot i Yesus Kristus o popoinggayo, dot id suang do nunu nopo o wonsoyon. Iyau no i kikuasa' om it apatut do poinggoyoon do gisom do poingompus. Amin.
Oinggorit Tu' Nosiliu no do Tulun do Kristian
12 Oi tobpinai-tobpinai di kosianan ku! Oinggorit tomod kou do dinondo poo tu' maso i' dokoyu do toinuon. Nga' kada' kou kosuayai do sorohon piya dokoyu do haro i suwai kopio ko' mantad di koubasanan do koontok dokoyu. 13 Suwai ko' kotood kou nogi' tu' kotonggoi kou i' do Kristus dot oinggorit. Om pointalangon nopondo i kagayaan do Kristus do koimbagu, om otood kou indo iyokoyu. 14 Ountung kou i' dot indaraaton kou piya dot i tumatanud kou do Kristus o kopongindaraatan. Tu' komoyon nopoddi nga' id suang dokoyu i Rusod di kikagayaan, iri no i Rusod do Kinorohingan. 15 Kada' nogi' kopio'd haro o tongoiso' dokoyu dot oinggorit do koponginggoritan nopo om i minamatai do tulun, ko' minanakau, ko' i kararaat, ko' i minongoi iyau hompit do hal do tulun do suwai, o koponginggoritan. 16 Nga' ondung oinggorit kou dot i tulun kou'd Kristian o koponginggoritan om kada' kou kointingayamai do hal diri. Nga' mongunsikou nogi' dot id Kinorohingan, tu' poposusui kou i' do ngaran do Kristus. 17 Norikot noddi i maso do kopomutusan do Kinorohingan diti pomogunan. Om iri no i tulun do songonuon do Kinorohingan o poguluonon do momutus. Om ondung iyati' o poguluonon do Kinorohingan do momutus, om okuro-kuro nogindo ot osiliu dot id tulun dit a' otumbayaan di Habar dot Osonong do mantad id Kinorohingan diri? 18 Nokotulis no dot id suang do Buuk do Kinorohingan o poingkaa, “Ondung apagon no do mamasi i tulun dit ongosonong, om okuro-kuro nogindo i tulun dit a' kotutun do Tuhan!” ka. 19 Iyo nopoddi, om ondung haro o tulun dit oinggorit tu' korohian i' do Kinorohingan dot osiliu o miagal diri, om mositi' no dot osonong o kowoyo-woyoon diyolo', om tumahak kopio dot id Minomonsoi diyolo', i mamayaan kasai' di batos dau.
I Baanan do Dumba' do Kinorohingan
1 Pokionuon ku no kopio i piro-piro boyoon do sidang dokoyu do mokinongou do boros ku. Om iyoho' nga' boyoon nogi' do sidang. Om nokokito kopio oku di kinoinggoritan di Kristus, om kohompit oku indo dot id kagayaan dau di pointalangon do koimbagu. Om pokionuon ku no kopio dokoyu 2 do gompion dokoyu i dumba' di nakatahak do Kinorohingan dot id dokoyu. Om gompion no dokoyu iyolo' do mikuwo'd osonong o ginawo do miagal di korohian do Kinorohingan, om okon i' ko' awagat o ginawo do momogompi'. Om kada' kou pomonsoi di karaja' dokoyu do mokimaanu-anu no do kountungan suwai ko' wonsoyon no dokoyu i karaja' dokoyu do mikuwo'd iso-iso' kopio o ginawo dot orohian do kumaraja'. 3 Kada' kou iyo do pomorinta' di tumanud do dau'd korohian do momorinta' di tulun do pinaharapan dokoyu, suwai ko' siliu kou no dot omitanan diyolo' dit osonong. 4 Om korikot nopondo i Boyoon do Gompomogompi' diri, om kaanu kou nondo di tupi' do don raja' dit olumis kopio, om it a' tumalup o kolumiso'. 5 Om iyo kou nogiddi iyokoyu, i tongomulok po. Insiriba' kou no dot id tulun dit ongotuo. Om mositi' no do minsiriba' ngai' o ginawo dokoyu om mogitulung-tulung do mikuwo'd osiriba' o ginawo. Tu' nokotulis no dot id suang do Buuk do Kinorohingan o poingkaa, “Saapon i' do Kinorohingan i tulun dit asawat o ginawo, nga' insianan i' dau i tulun dit osiriba' o ginawo,” ka. 6 Iyo nopoddi, om insiriba' kou no dot id longon do Kinorohingan di kikuasa', om poinggoyoon kou indo dau dot orikot i maso do kopoinggayaan. 7 Patahako' ngai' no dokoyu dot id Kinorohingan o koinsanai'd katangkabaan dokoyu tu' mamadul i' iyau dokoyu. 8 Mumbangan-bangan kou no om sumodia' kasai'! Tu' Rogon no o pisangod dokoyu. Om iyo po iyau di singa do mimpanau do hilo' om hiti do marom-garom do mogihum do kanon dau. 9 Saapon no dokoyu iyau do mikuwo'd ogirot o kotumbayaan, tu' oilaan i' dokoyu dot i tulun do Kristian do suwai do pointongkop diti pomogunan nga' oinggorit i' do miagal dokoyu. 10 Nga' oinggorit kou pondo dot ongoruhai, om silihon kou nondo do Kinorohingan do tulun dit aiso' o kabara-barasan. Om pogiroton kou indo dau om pokorison kou om poponggoron kou. Tu' iyau no o Kinorohingan dit obinsianan kopio, i minomolohou dokoyu do tumonggoi dau do momuriman do kosonongo' di kagayaan dau di poingompus do Kristus o popopurimon. 11 Iyau no i kikuasa' do gisom do poingompus! Amin.
Podsusuwau do Pongolimpupus do Surat
12 Iti nopo surat ku dot oniiba' diti om tulison ku dot id dokoyu do nuhupan oku di Silas do minonulis. I Silas no o ponokotobpinai kopio ku do Kristian dit otorodok. Orohian oku do mongodsuur dokoyu om popoilo kopio dokoyu dot iti nopo tulison ku'dti om boros i' dit otopot do pasal do kosianan do Kinorohingan. Om igitan no kopio dokoyu i kosianan diri. 13 Om i tobpinai dokoyu dit id sidang do hilo'd Babilon, i nopili' do Kinorohingan, nga' poporikot i' do tabi' dot id dokoyu; om i Markus, i tanak ku di kosianan kopio ku, nga' poporikot nogi' do tabi' dot id dokoyu. 14 Pogitatabi' kou no do mikuwo'd poimponu' do kosianan do miagal do tulun do Kristian di mogiobpinai. Pokionuon ku no o Tuhan do manahak ngai' dokoyu do kosimbayanan do ginawo, iyokoyu i nosiliu do tulun di songonuon do Kristus.
1 Oi tobpinai-tobpinai dit otumbayaan kopio do miagal dahai! Nonuan toko' i' di Yesus Kristus, i Kinorohingan om i Raja' di Gampamasi toko' do kotumbayaan dot id dau, tu' minomonsoi i' iyau dit otopot. Iti nopo surat diti om mantad id di Simun Pitrus, i susuhuon om i rasul di Yesus Kristus. 2 Pokionuan ku no iyokoyu do Kinorohingan do barakat om kosimbayanan do ginawo dit a' ogina-gina' o kogoyoo', tu' kotutun kou i' do Kinorohingan om i Yesus, i Tuhan toko'.
Lolohou om i Pilion do Tuhan
3 Iri no i kuasa' do Kinorohingan di dong Kinorohingan o pinakai dau do minanahak dati' do koinsanai dit apatut do haro dot id dati' dot id suang do koposi-posion toko', iyati' i tulun di kikotumbayaan. Om winonsoi dau iti do tumanud di noilaan toko' do pasal di Yesus Kristus, i minomolohou dati' do rumamit di kagayaan om i kosonongo' dau. 4 Om iyo noddi o ralan do Kinorohingan do minomuhawang dati' di piro-piro o barakat dit angagayo kopio om it angagayo kopio o guna' di nakabatos dau. Om iri no i piro-piro o barakat diri o popoidu' dokoyu do mantad id koinsanai do korohian dit araat kopio di mamaraag do pomogunan diti, om kaanu kou nondo di kowoyo-woyoon di dong Kinorohingan. 5 Iyo nopoddi, om tumotos kou no kopio do gumirot dot otumbayaan di Kristus, om sokodungon i kotumbayaan dokoyu'ddi do kowoyo-woyoon dokoyu dit osonong. Om suwai no ko' i kowoyo-woyoon dokoyu dit osonong, om apatut nogi' do sumiliu kou do tulun di kitoilaan, 6 om suwai no ko' i toilaan, om apatut nogi' do milo kou do momusus do korohian do tinan dokoyu. Om suwai no ko' i kopusus do korohian do tinan om apatut nogi' do minsingilo kou do papalanut do ginawo do tumimbaba' do koinsanai'd nunu nopo. Om suwai no ko' i papalanut do ginawo do tumimbaba' do koinsanai'd nunu nopo, om apatut nogi' do tumanud kou di korohian do Kinorohingan dot id suang do koposi-posion dokoyu. 7 Om i tumanud do korohian do Kinorohingan dot id suang do koposi-posion nga' apatut nogi' do ruhangan do kosianan do koinsanai'd tulun dit iso-iso' o kinotumbayaan. Om suwai no ko' iri, om ruhangan no i kosianan dokoyu dot id tulun dit iso-iso' o kinotumbayaan, do kosianan dot id koinsanai'd tulun. 8 Om iri ngai' no o kowoyo-woyoon dit apatut do haro dot id dokoyu. Om ondung haro dot id dokoyu o kowoyo-woyoon do miagal diri do gisom dot a' otingkod-tingkod, om osiliu kou no do tulun dit aparu' om haro kopio o kootuson di wonsoyon dokoyu, om kotutun kopio kou nondo di Yesus Kristus, i Tuhan toko'. 9 Nga' tulun nopo dit a' miagal diri o kowoyo-woyoon, om a' i' atarang no o pogogontong dau; a' i' iyau kokito om olihuan dau do nolihungan no i dusa dau dit id gulu. 10 Iyo nopoddi, oi tobpinai-tobpinai, om tumotos kou no kopio do popogirot di lolohou om i pinomili' do Kinorohingan dokoyu. Om ondung wonsoyon dokoyu o miagal diri, om a' no tumanus o kotumbayaan dokoyu. 11 Iyo nopoddi, om iyo noddi o kaanu-anu dokoyu do kosorupayan kopio do sumuang di pomorintaan di mompus-ompus, i pomorintaan do Tuhan om i Raja' do Gampamasi toko', i Yesus Kristus. 12 Om iri no o kosoruan ku do poposorou dokoyu do pasal diri, do mulong piya do nokoilo kou noddi om notumbayaan kopio kou di ponudukan do mantad id Kinorohingan di naramit dokoyu'ddi. 13 Solinaid ku nopo do poimpasi, om opurimanan ku i' do kitonggungan oku do poposorou dokoyu do pasal diri. 14 Tu' oilaan ku no dot a' no alaid om tumongkiad oku no do mantad id pomogunan diti, tu' nosunudan oku no kopio di Tuhan toko' i Yesus Kristus, do pasal diri. 15 Om tumotos oku no kopio do poposorou kasai' dokoyu'ddi, tu' apatai oku piya'ndo nga' osorou kasai' i' dokoyu iri.
I Pinosusui di Tulun di Nokokito Kopio do Kagayaan di Kristus
16 Tontok di minonusui iyahai dokoyu di kogoyoo' do kagayaan do Tuhan toko' i Yesus Kristus do tontok di kinorikatan dau, om a' i' miagal di totongonon no toomod do tulun i sinusui dahai. Tu' iri nopo kagayaan do Kristus diri om nokito no kopio dahai do dahai kopio'd mato o nokokito. 17 Hino i' iyahai'd hiri do tontok di pinusou om pinoinggayo iyau di Kinorohingan Tapa'. Tontok nopoddi om norongou o boros do mantad id dau it Agayo Kopio o Kagayaan, do minoro-boros do poingkaa, “Iti no i Tanak ku di kosianan ku. Om iyau no o kohubayaan do ginawo ku!” ka. 18 Iyahai no kopio o nokorongou di boros diri do mantad hilo'd surga do tontok di minoyo' iyahai dau do hiri'd timpak di nuluhon dit olidang diri. 19 Om iri noddi o kotumbayaan kopio dahai di boros do Kinorohingan di pinosusui di piro-piro o nabi. Om osonong no kopio do pusohon kopio dokoyu i boros diri, tu' iri nopo boros diri om miagal di lampung di tumitiu dot id kinoiyonon dit otuong do gisom dot orikot o kosuabon, om iyo di rombituon di roitan do soguanggo' do mogulinau dot id suang do ginawo dokoyu. 20 Sorohon no kopio dokoyu iti: Iri nopo boros do Kinorohingan di pinolombus di piro-piro o nabi om a' i' milo dot ilaan o komoyon do tumanud do toilaan do tulun. 21 Tu' a' i' insan polombuso' o boros do Kinorohingan do tumanud toomod do korohian do tulun. Nga' iri i Rusod do Kinorohingan o momorinta' do tulun do popolombus di boros do mantad id Kinorohingan.
Gomponuduk di Goudut
1 Tontok nopo di gulu po om haro i' o piro-piro tulun di suminiliu'd nabi di goudut dot id pogialatan di tulun di songonuon do Kinorohingan. Om iyo nogindoddi ot id pogialatan dokoyu tu' haro nondo o tulun do sumiliu do gomponuduk di goudut. Om popotuduk nondo iyolo' do piro-piro o ponudukan dit a' otopot, i karaag do tulun. Om olimon nondo diyolo' i Pomorinta' di pinopoidu' diyolo'. Om iyo noddi do poporikot iyolo' do kapatayon dot id tinan diyolo', om a' no alaid om rumikot no iri dot id diyolo'. 2 Mulong piya dot iyo'ddi, nga' ogumu' indo o tulun do tumanud do kowoyo-woyoon di piro-piro o gomponuduk do goudut diri, i noporinta' do korohian do tinan diyolo'. Om iri no i wonsoyon diyolo' o kobungou dot ogumu' o tulun do mongindaraat di Ralan dot Otopot do rumikot dot id Kinorohingan. 3 Om iri no i katamahao' diyolo' o kopopinsusuyan di gomponuduk di goudut do piro-piro o susuyon di pininsarahan i' tomod diyolo', do mokimaanu-anu do kountungan do mantad id dokoyu. Nga' alaid no kosodia' i gompomutus do paparatu' do hukuman dot id diyolo', om poingandad no diyolo' i kapatayon di natantu' mantad no do porikoton dot id diyolo'. 4 Iri piya i moloikat di momonsoi'd dusa nga' a' i' do Kinorohingan pologoson do koidu' do mantad id hukuman, suwai ko' pataamon nopo dau iyolo' dot id suang do naraka. Om posuangon iyolo' dot id luang dit otuong, om hiri kasai' nondo iyolo' do gisom dot orikot i Tadau'd Kopomutusan. 5 Om iyo noddi o nosiliu dot id pomogunan di gulu po; a' i' do Kinorohingan pinologos do nokoidu' iri do mantad id hukuman. Om pinorikatan do Kinorohingan do sakob dot agayo i pomogunan di tulun dit angaraat do maso'ddi. Om i Nuu no om i turu' o tulun do suwai o napasi, tu' pinopopinsusui i' i Nuu di kowoyo-woyoon di kohubayaan do Kinorohingan. 6 Om iyo nogiddi o nosiliu dot id bandar do Sodom om Gomura: Raago' nopo kopio do Kinorohingan i kabandaran diri do tapui o pinamaraag, om osiliu i' iri do poiyaan dit osiliu dot id tulun dit angaraat do koimbagu. 7 Nga' i Lut nopo om napasi i' do Kinorohingan om noinggorit tomod iyau di kowoyo-woyoon do tulun dot araat dit araat no kopio. 8 Om hiri nod pogialatan do tulun do miagal diri i Lut, i tulun dot osonong diri do poingiyon nga' oinggorit tomod i' o ginawo dau, tu' monikid tadau nopo iyau do kokito om korongou di wowonsoyon diyolo' dit araat. 9 Om milo i' o Tuhan do popoidu' di tulun di tumanud do korohian dau do tontok dot oontok iyolo' do pogumbalan. Om milo o Tuhan do popoolu' di tulun dit angaraat do maan inggorito' do tontok di Tadau'd Kopomutusan. 10 Om okon-okon po om i tulun di tumanud do korohian do tinan diyolo' di kososomu' om mongindaraat do kuasa' do Kinorohingan. Om angkatama' no kopio om angasawat o ginawo di piro-piro gomponuduk do goudut diri, gisom dot a' no iyolo' ooris-oris piya do mongindaraat dit ongkikagayaan di songingiyon do hilo' piya'd surga! 11 Om iri piya i moloikat dit okoris om kikuasa' ko' mantad di piro-piro o gomponuduk di goudut diri nga' a' i' monondos do papasala' dit ongkikagayaan diri do boros di koindaraat o poboroson do ponondos dot id toguang do Tuhan. 12 Nga' iri nopo i piro-piro o gomponuduk diri om a' no kopio ogina-gina' o karaato'. Iyo po iyolo' di nintorusan di maan no gomito' om maan patayo' o kinopogkosusuan. A' i' iyolo' momusorou, tu' wonsoyon nopo diyolo' o nunu nopo do tumanud di kopurimanan diyolo', gisom do songkiwalon nopo diyolo' it a' diyolo' osuhutan, dot i boros do koindaraat tomod o ponongkiwal. Iyo nopoddi, om apatai nondo iyolo' do miagal di nintorusan dit orongit. 13 Om oinggorit nondo iyolo' tu' iri no o tisomuli' di minonginggorit iyolo' do tulun do suwai. Kasanangan nopo diyolo' nga' mingwonsoi do nunu nopo di dangadau do ponguru di korohian do tinan diyolo'. Ondung kotoning iyolo' dokoyu do mirikau dot id poginakanan, om kososomu' tomod o kowoyo-woyoon diyolo' tu' aawuk po iyolo' do korohian do tinan diyolo'. 14 A' nopo iyolo' apaasan do momonsoi'd dusa, om korohian nopo diyolo' nga' montong no do tondu'd sundal. Om bayayaton diyolo' i tulun di wagu po kotumbayaai, om it a' po ogirot o kotumbayaan. Om noubas po tomod do tumamaha' o ginawo diyolo'. Iyolo' no i tulun di nousung! 15 Om apalid no iyolo' tu' a' i' iyolo' orohian do sumusui di ralan dot otulid. Suminusui nogi' iyolo' di ralan di winayaan di Biliam i tanak di Bior di gulu po. Tu' i Biliam nopoddi nga' orohian tomod do kaanu'd tusin do mantad id wowonsoyon dau dit araat. 16 Nga' awagat tomod iddi o boros do pinopoinsan dau dot i kararaat dau o kinopoinsanan, do tontok di minoro-boros i kaladai dau do miagal do tulun do moro-boros. Om sansagai noddi i nabi diri do tumingkod do momonsoi di wowonsoyon dau di dongkouulau'ddi. 17 Iri nopo piro-piro o gomponuduk do goudut diri om iyo po di tudan do waig di narasak om iyo di pituongon dot otilib di tongus dot opuhod. Nokosodia' nod Kinorohingan o tiso' o kinoiyonon dit otuong tomod do poiyanan diyolo'. 18 Mimboros iyolo' do minggayo-gayo om mimboros do boros dit aiso' o suang; om iri korohian do don tinan di kososomu' kopio o pomurunsut diyolo' di tulun di wagu po kotongkiad do mantad id pogialatan do tulun di nangapalid. 19 Papabatos i piro-piro o gomponuduk do goudut diri do kosimbayanan dot id tulun diri, om inda' ka dot iyolo' piya nga' turipon i' di kongoubasanan di karaag do tulun. Tu' ondung aala' o tulun do nunu nopo, om osiliu no iyau do turipon di nakaala' dau'ddi. 20 Iri nopo tulun di kotutun do Tuhan om nokotutun di Gampamasi dati', i Yesus Kristus, om nokoidu' no do mantad id koinsanai'd kuasa' do pomogunan di kososomu'd tulun. Nga' ondung akagasan kawagu iyau do gisom dot aala' iyau di kuasa'ddi, om araat pondo ko' i gulu o kowoyo-woyoon di tulun diri. 21 Osonong nogi' dot a' daa insan koilo di ralan dot otopot do mantad id Kinorohingan o tulun do miagal diri, ko' mantad do nokoilo no, nga' alaid nondo om a' i' tumanud ngai' di ponuhuan di pinatahak do Kinorohingan dot id diyolo'. 22 Iri no i wonsoyon diyolo' o popointalang dot otopot iti boros do poingkaa, “Gulion i' di tasu do mongoi pangakan i tilob dau,” ka, om “I wogok di nopodsu' no nga' gumuli' i' kawagu do mongoi pillobu do burutak,” ka.
Batos do Pasal do Korikatan do Tuhan
1 Oi tobpinai-tobpinai di kosianan ku! Iti no surat ku di koduwo dot id dokoyu. Om id suang nopo diti duwo o surat ku'dti, om tuminotos oku no kopio do popoimbulai do pomusarahan dokoyu dit olidang. 2 Om monuhu' oku daa kopio dokoyu do momusorou di boros do pinoboros di piro-piro nabi do boros do Kinorohingan di gulu po, om i ponuhuan do Tuhan, i Raja' do Gampamasi, i pinolombus dot id dokoyu di piro-piro rasul. 3 Id gulu nopo kopio, om mositi' no do koilo kou do tontok nopondo do ponong id kopupuson do pomogunan, om mimbulai nondo o tulun di noporinta' po do korohian diyolo' di don tinan o koposi-posion. Om hingi-hingion kou nondo diyolo', 4 tu' mimboros nondo iyolo' do poingkaa, “Minamatos kaka o Tuhan do rumikot! Om hinonggo noddi iyau'd baino'? Nangapatai no i taki-aki toko' nga' aiso' i' o nokosimban do nunu-nunu do mantad poddi wonsoyo' i' iti pomogunan!” ka no diyolo'. 5 Tumomod i' iyolo' dot a' monongkuyaan do winonsoi'd Kinorohingan o tawan om pomogunan om winonsoi dot i boros dau o pinomonsoi di gulu po. Iti nopo pomogunan om winonsoi dau do mantad id waig, om waig o pinomonsoi; 6 om waig i' --- iri no i waig do sakob dit agayo --- o pinamaraag do pomogunan di gulu po. 7 Nga' iti nopo tawan om pomogunan di hino do dinondo om gompion i' di boros do Kinorohingan diri do maan raago' do tapui do koimbagu. Nga' maso pod tawan om pomogunan do gompion do dinondo poo, do gisom dot orikot i tadau do kopomohukuman om kapamatayan di tulun dot angaraat. 8 Nga' kada' no kopio dokoyu lihuwai iti tiso' o hal, oi tobpinai-tobpinai ku: dot id pagantangan nopod Tuhan, om aiso' i' o pisuayan do sangadau om soribu o toun --- miagal nopo iri dot id dau. 9 A' i' o Tuhan alaid do papatahak di nakabatos dau, do mulong piya do haro daa o kosorou dot alaid o Tuhan do papatahak. Nga' alanut nogi' moti' o ginawo dau'ddi dot id dokoyu tu' mada' i' iyau do haro o tongoiso' pod tulun dot apatai. Orohian i' iyau do korologo ngai' o tulun do mantad id koinsanai'd dusa diyolo'. 10 Nga' rumikot indo i Tadau do Korikatan do Tuhan do miagal do korikatan do tulun di manakau. Tontok nopondo do Tadau'ddi, om tumanus nondo o tawan do mikuwo'd opuhod o ngorod, om ongosorob ngai' nondo i hilo'd tawan, om tumanus nondo o pomogunan om koinsanai dit id suang do pomogunan. 11 Iyo nopoddi o kowoyo-woyoo' do mamaraag ngai'ddi, om poingkuro nondo o kowoyo-woyoon dokoyu dit apatut? Mositi' no dot olidang o kowoyo-woyoon dokoyu om pointahak kopio dot id Kinorohingan, 12 do solinaid do magandad kou om lumangad kou do korikatan di Tadau do Kinorohingan. Tontok nopondo do tadau'ddi, om aayi' nopondo o tawan dot osorob, om iri i hilo'd tawan nga' angalanak ngai' nopo tu' alasu' no kopio. 13 Nga' iyati' nopo om magandad i' di pinabatos do Kinorohingan, iri no i tawan di wagu om i pomogunan do wagu, i kinoiyonon dit otulid o wonsoyon. 14 Iyo nopoddi, oi tobpinai-tobpinai di kosianan ku, om daamot nopo dokoyu do magandad do tadau'ddi, om tumotos kou no kopio do popolidang do kowoyo-woyoon dokoyu om aiso' i' o kabara-barasan dot id toguang do Kinorohingan. Om gompion no dokoyu i piuludan dot osonong dot id Kinorohingan. 15 Om sorohon no dokoyu dot iri nopo i kolonuto' do ginawo'd Tuhan toko', om maso i' dit osonong do pinatahak do Tuhan dot id dokoyu, om apasi kou i'. Om i Paulus i tobpinai toko' di kosianan toko', nga' nokoponulis i' do miagal diri dot id dokoyu. Om tinulis dau iri do mikuwo'd toilaan do pinatahak do Kinorohingan dot id dau. 16 Monulis kasai' nopo i Paulus do pasal diri dot id suang do pointikid-tikid di surat dau. Om otopot i' do haro o piro-piro hal dit apagon do mongilo do komoyon dot id suang di surat dau'ddi. Om iri no i bohogian diri o somputulon do tulun dit aiso' o toila-ilaan om it a' ogirot o kotumbayaan. Om a' i' kosuayan o hal diri, tu' iri piya i bohogian do suwai dot id suang do Buuk do Kinorohingan nga' somputulon i' diyolo'. Om iri nopo wonsoyon diyolo'ddi, om mamaraag no diyolo'. 17 Nga' iyokoyu nopo, oi tobpinai-tobpinai di kosianan ku, om nokoilo no do pasal diri. Iyo nopoddi, om antaan-taan no dokoyu, om a' kou i' atanggayan do hiri'd kinopolidon di tulun dot angaraat, gisom dot aratu' kou nondo do mantad id kinoiyonon dokoyu dit aiso' o koligagaanan. 18 Mositi' no do muhang-ruhang o topurimanan dokoyu di kosonongo' do kosianan di Tuhan Yesus Kristus, i Raja' do Gampamasi toko', om muhang-ruhang o toilaan dokoyu do pasal dau. Royohon no iyau do dinondo om gisom do poingompus! Amin.
Boros di Manahak do Koposion
1 Tonsi nopo kopio do surat diti om pasal di Boros di manahak do koposion, iri no i Boros di hino mantad do mantad di timpuun i'. Norongou no dahai iri, om nokito dahai do mato kopio dahai o nokokito. Om nosonsod kopio dahai iri, om noigitan kopio do palad dahai. 2 Tontok di pinointalang i koposion diri, om nokito i' kopio dahai iri. Om iri noddi o koponusuyan dahai do pasal diri. Posusuyon dahai dot id dokoyu o pasal di koposion dit otopot kopio om i poingompus, i poinsugku' mantad do Tapa' om i nokointalang no dot id dahai. 3 Tu' nunu nopo i nokito om i norongou dahai, om iri no o posusuyon dahai dot id dokoyu, om kopuriman kou i' iyokoyu do kosonongo' di koposion di koiso' dot id Tapa' om id Tanak dau, i Yesus Kristus. 4 Kinoponulisan nopo dahai'dti om popotood kopio do ginawo toko'.
Kinorohingan Nopo om Tanawau
5 Iti no o habar di norongou dahai do mantad id Tanak dau, i posusuyon dahai dot id dokoyu: Kinorohingan nopo om tanawau, om aiso' no kopio o totuong dot id suang dau. 6 Ondung momoros toko' do koposion toko' nopo om nokoiso' no dot id dau, om otuong indo o kowoyo-woyoon toko', om mongudut toko' noddi dot id boros toko' om id wonsoyon toko'. 7 Nga' ondung poimpasi toko' dot id suang do tanawau do miagal do Kinorohingan tu' id suang do tanawau, om mogiuulud toko' no om ogirot o piuludan toko', om iri no i raha' di Yesus, i Tanak dau, o momolihung dati' do mantad id koinsanai do dusa toko'! 8 Ondung momoros toko' dot aiso' o dusa toko', om monipu' toko' no do tinan toko'; om a' i' hino o Kinorohingan dot id suang do ginawo toko'. 9 Nga' ondung okunon toko' dot id Kinorohingan o koinsanai di dusa toko', om sulungon i' dau i batos dau om wonsoyon dau it otulid. Om ompunan i' dau o koinsanai di dusa toko' om lihungan toko' dau do mantad id koinsanai di nowonsoi toko' di kasala'. 10 Nga' ondung momoros toko' dot aiso' o dusa toko', om roitan toko' no do goudut o Kinorohingan om a' toko' pinoopi' dot id suang do ginawo toko' i boros do Kinorohingan.
Kristus o Gomponguhup Dati'
1 Oi tangaanak ku! Koponulisan ku nopodti dot id dokoyu om mogodu dokoyu do momonsoi'd dusa. Nga' ondung haro i nokowonsoi'd dusa, om haro i' o mogobi' dati', iri no i Yesus Kristus, it otulid diri; om moro-boros indo iyau dot id Tapa' do mogobi' dati'. 2 Om i Yesus Kristus no o popomilo do koinsanai di dusa toko' dot oompunan. Om okon i' ko' iri noo i dati'd dusa ot oompunan, suwai ko' iri nogi' i dusa do koinsanai'd tulun. 3 Ondung mumboyo' toko' do koinsanai di ponuhuan do Kinorohingan, om iri no o popointalang do kotutun toko' do Kinorohingan. 4 Tulun nopo di momoros do, “Kotutun oku do Kinorohingan,” ka, om a' i' iyau mumboyo' ngai' di ponuhuan do Kinorohingan, om oudut i' i tulun diri, om a' i' hino o Kinorohingan dot id suang do ginawo dau. 5 Nga' tulun nopo di mumboyo' di boros do Kinorohingan, om aayi-ayi' no kopio o ginawo di tulun diri dot osianan do Kinorohingan, om iri no o popointalang do nokoiso' toko' no dot id Kinorohingan. 6 Isai nopo o tulun do momoros do nokoiso' iyau dot id Kinorohingan, om mositi' no do momit iyau do kowoyo-woyoon do Kristus.
Ponuhuan di Wagu
7 Oi tobpinai-tobpinai di kosianan ku! Iti nopo tulison ku'dti om okon i' ko' ponuhuan do wagu. Iti nopo om ponuhuan i' di laid, i nokosunud no dot id dokoyu do mantad poddi kotumbayaai kou i' di Kristus; iri no i habar do mantad id Kinorohingan, i norongou dokoyu dit id gulu ko' iri. 8 Mulong piya do miagal diri, nga' iti nopo ponuhuan diti tulison ku om wagu i'; tu' iri nopo i katapatan diti, om okito i' dot id kowoyo-woyoon di Kristus om okito nogi' dot id kowoyo-woyoon dokoyu. Tu' manus-tanus no o totuong om tumitiu no i tanawau dit otopot. 9 Tulun nopo di momoros dot id suang iyau di tanawau, nga' araatan indo iyau di tobpinai dau, om id suang kasai' pod totuong i tulun diri do gisom piya do dinondo. 10 Tulun nopo dit osianan do tobpinai dau, om poimpasi no iyau'ddi dot id suang do tanawau, gisom dot aiso' no dot id suang do kowoyo-woyoon dau i kobungou do tulun do suwai dot aratu' dot id dusa. 11 Nga' tulun nopo dit araatan do tobpinai dau, om id suang po iyau do totuong. Manau-panau po iyau dot id suang do totuong, om a' i' iyau koilo ondung hinonggo o pakayaan dau, tu' iri no i totuong diri o kobungou dau dot a' kokito. 12 Monulis oku pogi' dot id dokoyu, oi tangaanak ku, nga' noompunan no i dusa dokoyu dot i Kristus o kinopongompunan. 13 Monulis oku pogi' dot id dokoyu, oi komolohingan do kusai, nga' nokotutun kou no dau, i hino mantad do mantad di timpuun i'. Monulis oku pogi' dot id dokoyu oi tangaanakwagu nga' naala' no dokoyu i Yaraat. 14 Monulis oku pogi' dot id dokoyu, oi tangaanak, nga' nokotutun kou no do Kinorohingan i Tapa'. Monulis oku pogi' dot id dokoyu oi komolohingan do kusai nga' nokotutun kou no di Boros di hino mantad do mantad di timpuun i'. Monulis oku pogi' dot id dokoyu, oi tangaanakwagu nga' ongokoris kou i', om id suang no do ginawo dokoyu i boros do Kinorohingan, om naala' dokoyu i Yaraat. 15 Kada' kou kosianai diti pomogunan, ko' nunu nopo it id suang diti pomogunan. Ondung osianan kou diti pomogunan om a' kou no osianan do Tapa'. 16 Koinsanai dit id suang do pomogunan diti --- i korohian do kowoyo-woyoon do tulun di kidusa, it okito do tulun om korohian nondo om i kopinggaya-gayaan do tulun --- koinsanai'ddi om okon i' ko' mantad id Tapa', suwai ko' mantad i' do hiti'd pomogunan. 17 Iti nopo pomogunan om koinsanai di hiti'd pomogunan, i korohian do tulun, om maso no do tumanus. Nga' tulun nopo di tumanud do korohian do Kinorohingan, om poimpasi kasai' i' do gisom do poingompus.
Pisangod do Kristus
18 Oi tangaanak ku, oruhai no do kopupuson diti pomogunan! Nosunudan mantad kou no do rumikot nondo i Pisangod do Kristus; om dinondo'dti nga' ogumu' no o tulun do nokointalang do sumaap do Kristus. Om iri no o koilaan dot oruhai no o kopupuson do pomogunan. 19 Iri nopo i pisangod do Kristus diri om iri no i tulun di tuminongkiad do mantad id dati', tu' otopot nopo kopio om okon i' ko' id suang iyolo' di sinompuruan do tulun toko'. Ondung id suang daa iyolo' do sinompuruan do tulun toko', om atantu' no do poinsugku' kasai' i' daa iyolo' dati'. Nga' tuminongkiad i' iyolo' dati', om oilaan no kopio dot aiso' i' o tongosongulun piya do mantad id pogialatan diyolo' dot otopot kopio do poinsuang do sinompuruan toko'. 20 Nga' iyokoyu nopo om nakaramit no di Rusod do Kinorohingan di pinatahak di Yesus Kristus om iri noddi o nokotutun-tutun dokoyu di ponudukan dit otopot. 21 Koponulisan ku nopodti dot id dokoyu om okon i' ko' it a' kou nokotutun di ponudukan dit otopot, suwai ko' i nokotutun kou'ddi o kinoponulisan ku, om koilo kou nogi' dot aiso' no o tudut dot id suang di ponudukan dit otopot diri. 22 Iri nopo i goudut om iri no i tulun di momoros dot i Yesus nopo om okon i' ko' i Raja' di Gampamasi di pinabatos do Kinorohingan. Iri nopo tulun diri om Pisangod i' do Kristus; tu' a' i' iyau otumbayaan di Tapa' om a' otumbayaan di Tanak. 23 Tulun nopo dit a' otumbayaan di Tanak, om komoyon nopoddi nga' a' no iyau rumamit di Tapa'. Om tulun nopo dit otumbayaan di Tanak, om komoyon nopoddi nga' rumamit no iyau di Tapa'. 24 Iyo nopoddi, om mositi' no do poiyonon kopio dokoyu dot id ginawo dokoyu i habar di norongou dokoyu do mantad di kotumbayaai kou i'. Ondung podulon kopio dokoyu i habar diri, om poingiso' kasai' kou no dot id Tanak om id Tapa'. 25 Om iti no o pinabatos di Kristus dot id dati': i koposion dit otopot kopio om i poingompus. 26 Om tulison ku dot id dokoyu o pasal di tulun di maso do tumotos do monipu' dokoyu. 27 Nga' pasal nopo dokoyu, om nakatahak no di Kristus i Rusod dau dot id dokoyu. Om solinaid nopo di Rusod dau dot id suang dokoyu, om a' no minog do haro o tulun do suwai do monuduk dokoyu. Tu' iri no i Rusod do Kristus o monuduk dokoyu do koinsanai do nunu nopo; om nunu nopo i potudukon dau om ongotopot ngai' no, om okon i' ko' tudut. Iyo nopoddi, om mositi' no do mumboyo' kasai' kou di potudukon di Rusod diri, om poingiso' kasai' kou dot id Kristus. 28 Iyo nopoddi, oi tangaanak ku, om mositi' no do poingiso' kasai' kou dot id Kristus, om katama' toko' i' do sumolowot dau do korikot iyau, om a' toko' lumisok dot ointingayaman. 29 Nokoilo kou no do Kristus nopo om tumanud i' do korohian do Kinorohingan. Iyo nopoddi, om apatut no do koilo kou do pointikid-tikid do tulun do tumanud di korohian do Kinorohingan om tangaanak nod Kinorohingan.
Tangaanak do Kinorohingan
1 Antangai toko' pogi' o kogoyoo' do kosianan do Kinorohingan dati', gisom do nakun toko' dau do tangaanak dau. Om otopot i' kopio do tangaanak toko' do Kinorohingan. Iri no ot a' kotutun-tutun dati' diti pomogunan dit araat, tu' a' i' iti pomogunan kotutun do Kinorohingan. 2 Oi tobpinai-tobpinai di kosianan ku! Tangaanak toko' noddi do Kinorohingan do baino', nga' iri nopo i koinan-inano' toko' do koimbagu om a' po nokointalang kopio. Nga' oilaan toko' i' do korikot nopo o Kristus, om koiyo toko' nondo dau, tu' okito toko' nondo i koinan-inano' kopio dau. 3 Koinsanai'd tulun di haro o soro-sorohon do miagal diti dot id Kristus, om mositi' no do mumbangan-bangan kopio om olidang i' kopio iyau, om olihungan do mantad id dusa do miagal do Kristus tu' olidang. 4 Tulun nopo di momonsoi'd dusa, om tumolibamban no iyau dit oturan do Kinorohingan; tu' komoyon nopod dusa om i tumolibamban dit oturan do Kinorohingan. 5 Koilo kou i' do kinorikatan nopod Kristus om mongoi pananus do koinsanai do dusa'd tulun, om aiso' i' o dau'd dusa. 6 Koinsanai di tulun di nokoiso' dot id Kristus om a' no iyau tumilombus do momonsoi'd dusa. Tu' tulun nopo di tumilombus nopo do momonsoi'd dusa, om a' i' insan kokito do Kristus om a' kotutun dau. 7 Oi tangaanak ku, kada' dokoyu pologoso' ot isai nopo o tulun do mamalid dokoyu. Tulun nopo di momonsoi do korohian do Kinorohingan om tanak nod Kinorohingan, do miagal do Kristus tu' Tanak do Kinorohingan. 8 Nga' tulun nopo dit a' tumingkod do momonsoi'd dusa om tangaanak nod Rogon, tu' Rogon nopo om kidusa mantad, do mantad di timpuun i'. Om iri no o kinorikatan di Tanak do Kinorohingan tu' mongoi pamaraag di karaja' do Rogon. 9 Tulun nopo di nosiliu do Tanak do Kinorohingan, om a' no tumilombus do momonsoi'd dusa, tu' haro no dot id dau i kowoyo-woyoon do Kinorohingan. Om a' noddi iyau milo do tumilombus do momonsoi'd dusa tu' Kinorohingan no o Tapa' dau. 10 Iti no o pisuayan do tangaanak do Kinorohingan om i tangaanak do Rogon: Isai nopo it a' momonsoi do korohian do Kinorohingan ko' it a' osianan do tobpinai dau, om okon no ko' tanak do Kinorohingan.
Mogiinsian-Sian
11 Mantad po di timpuun i' om nokosunud no dot id dokoyu o habar diti: Mositi' no do mogiinsian-sian toko'. 12 Kada' toko' no omit di Kain, i nosiliu do tanak do Rogon om minamatai di tobpinai dau. Nokuro tu' minamatai i Kain di tobpinai dau'ddi? Kinapamatayan nopo dau di tobpinai dau nga' kasala' i winonsoi dau. Nga' iri nopo i winonsoi di tobpinai dau om koontok i'. 13 Iyo nopoddi, oi tobpinai-tobpinai ku, om kada' kou no kosuayai do karaatan kou piya do tulun do hiti'd pomogunan. 14 Noilaan toko' i' do nokosoliwan toko' no do mantad id kapatayon, om nakakaa toko' no dot id koposion. Noilaan toko' i' iri, tu' osianan toko' no di tobpinai toko'. Tulun nopo dit a' osianan om komoyon nopoddi nga' porintaon kasai' po iyau do kapatayon. 15 Tulun nopo dit araatan do tobpinai dau om gampamatai i', om koilo kou no do tulun nopo di gampamatai om aiso' no o koposion dit otopot kopio om i poingompus. 16 Om iyo nodti o koila-ilaan toko' do kowoyo-woyoo' do mogiinsian-sian. Nakatahak nod Kristus o koposion dau do minatai do suminowoli dati'. Iyo nopoddi, om mositi' no do patahakon toko' o dati' do koposion gisom do matai do bagi'd tobpinai toko'! 17 Ondung haro o tulun dit aiso' no o kokurangan do kokito di tobpinai dau di haro o kokurangan, om a' indo iyau monulung di tobpinai dau'ddi, om poingkuro nondo iyau'ddi do milo do momoros dot osianan iyau do Kinorohingan? 18 Oi tangaanak ku! Kada' toko' pomoros dot osianan dot id kabang noo ko' boros no toomod dot osianan. Mositi' no dot otopot kopio dot osianan toko', om i kointalang kopio dot id wonsoyon toko'.
Katama' do Tumimbaba' do Kinorohingan
19 Iyo noddi o koila-ilaan toko' do nokohompit toko' do tangaanak do Kinorohingan dit otopot, om osimbayan o ginawo toko' dot id toguang do Kinorohingan. 20 Koilo toko' i' dot ondung pasalaon toko' do ginawo toko', om toilaan nopo do Kinorohingan om agayo po ko' i toilaan do ginawo toko', om oilaan toko' dot iyau nopo om koilo i' do koinsanai'd nunu nopo. 21 Iyo nopoddi, oi tobpinai-tobpinai di kosianan ku, om ondung a' toko' pasalaon do ginawo toko', om katama' toko' no do tumimbaba' do Kinorohingan. 22 Om nunu nopo i pokionuon toko' dot id dau, om aanu toko' no iri, tu' minumboyo' toko' i' do koinsanai di ponuhuan dau om minomonsoi toko' di kohubayaan dau. 23 Iti no o ponuhuan dau dati'. Mositi' no dot otumbayaan toko' di Tanak dau, iri no i Yesus Kristus, om mositi' no do mogiinsian-sian toko' do miagal di pinonuhuan do Kristus dot id dati'. 24 Koinsanai'd tulun di mumboyo' do ponuhuan do Kinorohingan om poingiso' no dot id Kinorohingan, om Kinorohingan nga' poingiso' no diyolo'. Om oilaan toko' no do poingiso' o Kinorohingan dati' tu' nakatahak no dau dati' i Rusod dau.
I Rusod dit Otopot om i Rusod di Goudut
1 Oi tobpinai-tobpinai di kosianan ku! Kada' kou ponongkuyaai do koinsanai di tulun di mangakun do haro o Rusod do Kinorohingan dot id suang dau, nga' toinuon po dokoyu iyolo'd gulu do mongilo ondung otopot do mantad kopio dot id Kinorohingan i rusod dit id suang diyolo' ko' amu'. Tu' ogumu' no o nabi di goudut do mimpanau do hinonggo-honggo nopo. 2 Om poingkaa o ralan do koilaan dokoyu ondung otopot kopio iri do Rusod do Kinorohingan ko' okon: Tulun nopo di mangakun do ruminikot i Yesus do hiti'd pomogunan do miniyo'd tulun, om hino no dot id suang do tulun diri i Rusod do mantad id Kinorohingan. 3 Nga' iri nopo tulun dit a' mangakun do miagal diri o nosiliu dot id di Yesus, om a' no hino i Rusod do Kinorohingan dot id suang dau. Iri nopo rusod dit id suang di tulun diri om mantad i' dot id Pisangod do Kristus. Nokorongou kou no do rumikot nondo i rusod diri, om dinondo nopodti om hiti no iyau id pomogunan. 4 Nga' iyokoyu nopo oi tangaanak ku, om nasanganu no do Kinorohingan. Nangaala' no dokoyu i piro-piro nabi di goudut diri, tu' iri nopo i Rusod dit id suang dokoyu om agayo i' o kuasa' ko' mantad di rusod dit id suang di tulun di nasanganu diti pomogunan diti. 5 Iri nopo i piro-piro nabi di goudut diri om pasal nopo do kowoyo-woyoon do dom pomogunan o popimboroson diyolo', om mokinongou i' iti pomogunan di boros diyolo' tu' nasanganu no iyolo' diti pomogunan. 6 Nga' iyati' nopo om tangaanak toko' no do Kinorohingan; om iri no i tulun di nokotutun do Kinorohingan o mokinongou do boros toko'. Tulun nopo dit a' nasanganu do Kinorohingan, om a' i' mokinongou di boros toko'. Om iyo nodti o ralan toko' do mongilo do pisuayan di Rusod do popotuduk do ponudukan dit otopot, om i rusod di mamalid.
Kinorohingan Nopo Om Obinsianan
7 Oi tobpinai-tobpinai di kosianan ku! Kainou no mogiinsian-sian tu' kosianan nopo om mantad i' dot id Kinorohingan. Tulun nopo dit osianan om tanak no iyau do Kinorohingan om kotutun iyau do Kinorohingan. 8 Tulun nopo dit a' osianan, om a' no iyau kotutun do Kinorohingan; tu' Kinorohingan nopo om obinsianan i'. 9 Pinointalang do Kinorohingan dot osianan iyau dati' tu' sinuhu' dau i Tanak dau dit iso-iso' do luminintuhun do hiti'd pomogunan, om kaanu toko' i' do koposion do patahakon di Tanak dau dot id dati'. 10 Iti no o komoyon do kosianan: Okon i' ko' iyati' o nosianan do Kinorohingan, nga' Kinorohingan o nosianan dati'. Om sinuhu' dau i Tanak dau do luminintuhun om kaanu toko' i' do koompunan do koinsanai di dusa toko' dot i Tanak dau o popomilo'ddi dot oompunan. 11 Oi tobpinai-tobpinai di kosianan ku, ondung miagal kopio'ddi o kosianan do Kinorohingan dati', om iyati' nga' mositi' no do mogiinsian-sian. 12 Aiso' i' o tongosongulun piya do nokoumbal do nokokito do Kinorohingan nga' ondung mogiinsian-sian toko', om poingiso' no o Kinorohingan dot id dati' om poimpongo nondo gisom dot aiso' no ot okurang di kosianan dau dot id suang toko'. 13 Nakatahak nod Kinorohingan i Rusod dau dot id dati', om iri noddi o koilo-ilo toko' do poingiso' toko' do Kinorohingan, om Kinorohingan nga' poingiso' no dot id dati'. 14 Nokokito no iyahai di Tanak do Kinorohingan, om popinsusuyon diri dahai dot iyau nopo om sinuhu' di Tapa' do sumiliu'd Raja' do Gampamasi do pomogunan diti. 15 Isai nopo o mangakun dot i Yesus nopo om Tanak do Kinorohingan, om poingiso' no o Kinorohingan dot id tulun diri, om i tulun diri nga' poingiso' no dot id Kinorohingan. 16 Nokoilo toko' no om notumbayaan toko' di kosianan do Kinorohingan dati'. Kinorohingan nopo om obinsianan i'. Tulun nopo di noporinta' do kosianan o kowoyo-woyoon, om poingiso' no i tulun diri dot id Kinorohingan, om Kinorohingan nga' poingiso' no dot id dau. 17 Kinapamangaan nopo di kosianan diri do gisom dot aiso' no ot okurang dot id suang toko' om papatama' dati' do tontok di Tadau'd Kopomutusan. Katama' toko' pogi'ndo nga' nokoiyo no do kowoyo-woyoon do Kristus o kowoyo-woyoon toko' do hiti'd pomogunan. 18 Tulun nopo di nokopuriman do kosonongo' do kosianan do Kinorohingan om a' no kopuriman dot ooris; tu' iri no i kosianan dit aiso' ot okurang diri o mananus do koinsanai di kopurimanan dot ooris. Iyo nopoddi om kointalang no dot a' po nokopuriman ngai' o tulun do kosonongo' di kosianan do Kinorohingan ondung ooris no i tulun diri do tumimbaba' di Tadau'd Kopomutusan. 19 Iyati' nga' osianan toko' no, tu' id gulu i' o Kinorohingan kosianai dati'. 20 Ondung haro o tulun do moro-boros dot, “Osianan oku do Kinorohingan,” ka, nga' a' indo iyau osianan di tobpinai dau, om goudut no i tulun diri. Tu' tulun nopo dit a' osianan do tobpinai dau dit okito dau, om a' no iyau milo dot osianan do Kinorohingan dit a' dau okito. 21 Iyo nopoddi, om iti no o ponuhuan di Kristus dot id dati': Isai nopo ot osianan do Kinorohingan om mositi' no dot osianan di tobpinai dau.
Kamanangan Toko' dot id Sawat Diti Pomogunan
1 Tulun nopo dit otumbayaan dot i Yesus no i Raja' do Gampamasi di pinabatos do Kinorohingan, om tanak nod Kinorohingan o tulun diri. Tulun nopo dit osianan do tapa', om osianan no iyau di tanak. 2 Om iti no o koilaan toko' dot osianan toko' di tangaanak do Kinorohingan tu' osianan toko' do Kinorohingan om mumboyo' toko' do koinsanai di ponuhuan dau. 3 Tu' komoyon nopod osianan toko' do Kinorohingan om mumboyo' toko' do koinsanai di ponuhuan dau. Om koinsanai di ponuhuan dau nga' a' i' awagat dot id dati', 4 tu' pointikid-tikid do tanak do Kinorohingan om haro no o kokorisan do mangala' diti pomogunan dit araat. Om pangala' toko' nopo diti pomogunan om i kotumbayaan toko'. 5 Isai toi i kaala' diti pomogunan? Iri no i tulun dit otumbayaan dot i Yesus nopo om Tanak do Kinorohingan.
I Sasi' do Pasal di Yesus Kristus
6 I Yesus Kristus no i ruminikot do hiti'd pomogunan do mitonggoi do waig di pinamatis dau om mitonggoi do raha' di napatai iyau. Tu' okon i' ko' ruminikot iyau do mitonggoi nod waig, suwai ko' mitonggoi do waig om raha'. Om iri no i Rusod do Kinorohingan o papasasi' dot otopot iri, tu' iri nopo i Rusod diri om a' i' nokoumbal do mongudut. 7 Haro o tolu sasi': 8 Rusod do Kinorohingan, waig om raha' --- oiyo nopo o pososion diti tolu o sasi' diti. 9 Otumbayaan toko' i' di pososion do tulun; nga' iri nopo i pososion do Kinorohingan om ogirot po ko' iri. Om iri no i pinasasi' do Kinorohingan do pasal di Tanak dau. 10 Iyo nopoddi, om tulun nopo di notumbayaan di Tanak do Kinorohingan, om naramit no dau dot id suang do ginawo dau i pinasasi' diri; nga' tulun nopo dit a' otumbayaan do Kinorohingan om momusorou no iyau do goudut o Kinorohingan tu' a' i' iyau otumbayaan di pinoboros do Kinorohingan do pasal di Tanak dau. 11 Iti no i pinasasi' diri: Nakatahak nod Kinorohingan dot id dati' i koposion dit otopot kopio om i poingompus, om iri no i Tanak dau o tadon di koposion diri, 12 om tulun nopo di nakaramit di Tanak do Kinorohingan om nakaanu no di koposion; om tulun no dit a' nakaramit di Tanak do Kinorohingan om a' no nakaanu di koposion diri.
Koposion dit Otopot Kopio om i Poingompus
13 Kinoponulisan ku nopodti dot id dokoyu, i notumbayaan di Tanak do Kinorohingan om popoilo dokoyu do nakaanu kou no di koposion dit otopot kopio om i poingompus. 14 Om katama' toko' no do tumimbaba' do Kinorohingan tu' otumbayaan toko' no kopio do simbaron do Kinorohingan i sambayang toko' ondung miontok nori di korohian dau. 15 Tu' oilaan toko' i' do mokinongou i' iyau dati' do tontok do mokianu toko' dau, om oilaan toko' nogi' do patahakon i' dau dot id dati' i pinokianu toko' dot id dau. 16 Ondung kokito toko' dot ongoiso' o tulun di sompi' ko' Kristian do momonsoi'd dusa dit a' momungou di tulun diri dot atagakan do koposion dit otopot kopio om i poingompus, om mositi' no do sumambayang kou dot id Kinorohingan; om patahakon id Kinorohingan i koposion diri dot id tulun diri. Iti nopo om pasal no di tulun di kidusa dit a' momungou diyolo' dot atagakan di koposion diri. Nga' haro i' o dusa di momungou do tulun dot atagakan do koposion. Nga' pasal nopoddi om a' ku i' iyokoyu suhuon do sumambayang dot id Kinorohingan. 17 Koinsanai di wowonsoyon di kasala', om dusa no nga' haro i' o dusa dit a' momungou do tulun dot atagakan do koposion dit otopot kopio om i poingompus. 18 Koilo toko' i' do koinsanai'd tulun di nosiliu do tanak do Kinorohingan, om a' no tumilombus do momonsoi'd dusa, tu' iri no i tanak do Kinorohingan o mongintirung dau, om a' noddi milo i Yaraat do momonsoi do nunu nopo dot id dau. 19 Koilo toko' no do nasanganu toko' nod Kinorohingan do mulong piya dot id suang ngai' do pomorintaan di Yaraat o pointongkop diti pomogunan. 20 Nokoilo toko' no do nokorikot no i Tanak do Kinorohingan om noonuan toko' no dau do toilaan, om kotutun toko' i' do Kinorohingan dit otopot. Nokoiso' toko' no dot id Kinorohingan dit otopot om nokoiso' toko' dot id tanak dau i Yesus Kristus. Iyau no o Kinorohingan dit otopot, om iyau o koposion dit otopot kopio om i poingompus. 21 Oi tangaanak ku; insodu' kou no do mantad id tingolig!
1 Kumaa dot id tondu' di nopili' do Kinorohingan, om kumaa dot id tangaanak di tondu'. Iti nopo surat diti om mantad id doho', i boyoon do sidang dit osianan kopio dokoyu. Om okon i' ko' iyoho' noo ot osianan dokoyu nga' oinsanan nogi' i tulun di nokotutun do Kinorohingan dit otopot dot osianan dokoyu. 2 Tu' poingiyon no o Kinorohingan dot id suang do ginawo toko', om moyo-woyo' kasai' iyau dati' do gisom do poingompus. 3 Pokionuon ku no dot onuan toko' do Kinorohingan Tapa', om i Yesus Kristus i Tanak di Tapa' diri, do barakat om kosianan om kosimbayanan do ginawo. Om pokionuon ku no dot aanu toko' ngai' iri do mikuwo'd otulid o ginawo om mikuwo'd osianan.
Katapatan om Kosianan
4 Otood oku no do nokoilo do haro o tangaanak nu, oi tondu', do miagal di ponuhuan do Kinorohingan i Tapa' dot id dati'. 5 Iyo nopoddi, oi tondu', om pokionuon ku no kopio do mogiinsian-sian toko'. Iti nopo poboroson ku dokoyu diti om okon i' ko' ponuhuan do wagu; iti nopo ponuhuan diti om nokoboros no dot id dati' do mantad di kotumbayaai toko' i'. 6 Komoyon nopod osianan om tumanud ngai' di ponuhuan do Kinorohingan. Om ponuhuan nopo di norongou dokoyu do mantad di timpuun i' om monuhu' kopio dokoyu do mogiinsian-sian. 7 Ogumu' no o gomponipu' do nokotongkop diti pomogunan. Iyolo' nopo om i tulun dit a' otumbayaan do ruminikot i Yesus do hiti'd pomogunan do suminiliu'd tulun. Tulun nopo do miagal diri om gomponipu' i' om Pisangod do Kristus. 8 Iyo nopoddi, om mumbangan-bangan kou no, om a' kou i' atagakan di pinanatasan dahai do momonsoi do bagi' dokoyu. Om tumotos kou no om angaanu ngai' i' dokoyu it isomuli' dokoyu do mantad id Kinorohingan. 9 Tulun nopo dit a' gumirot kopio dot id ponudukan di Kristus, tu' sumansala' nogi' do mantad id ponudukan di nokotuduk di Kristus om aiso' no dot id dau o Kinorohingan. Tulun nopo di poinggirot kasai' dot id ponudukan di Kristus om komoyon nopoddi om haro no dot id dau o Kinorohingan Tapa' om i Tanak. 10 Iyo nopoddi, om ondung haro o tulun do korikot do mongoi poposusui dot id dokoyu do ponudukan dit a' nokotuduk di Kristus, om kada' dokoyu posolokoyo' i tulun diri dot id walai dokoyu om kada' kou tabi' di tulun diri. 11 Tu' iri nopo tulun di tumabi' di tulun do miagal diri om kotonggoi no di tulun diri do momonsoi di wonsoyon dau dit araat.
Boros do Pongolimpupus
12 Ogumu' po daa kopio ot apatut ku'd posunudon dot id dokoyu nga' osorou ku dot osonong nogi' dot a' ku tulison do hiti'd surat. Om mogondos oku do koongoi oku kolimbuha' dokoyu, om koboro-boros oku i' kopio dokoyu, om ongotood ngai' toko' indo. 13 Om i tangaanak di tobpinai nu'd tondu', oi tondu', i nopili' nogid Kinorohingan nga' poporikot id tabi' dot id diya', oi tondu'.
1 Oi Gayus i tobpinai ku di kosianan kopio ku! Iyoho' no i boyoon do sidang it osianan kopio diya', 2 o sumambayang, om osonong-sonong ko i', om osimbayan ko, do miagal do ginawo nu tu' osimbayan. 3 Otood oku no kopio do tontok di nokorikot i piro-piro o tobpinai di Kristian do pinopoilo doho' do kotorodoko' nu dot id Kinorohingan dit otopot, tu' otopot i' dot otorodok kasai' ko do tumanud di ponudukan do Kinorohingan. 4 Aiso' no o popotood kopio doho' do suwai ko' i korongou oku do tumanud i tangaanak ku do ponudukan do Kinorohingan.
Rinayou i Gayus
5 Oi tobpinai ku! Otorodok ko no kopio do minomonsoi di karaja' nu do bagi' di tambalut nu di sompi' ko' Kristian; om iri piya i tulun do Kristian dit a' nu po notutunan nga' tinulung nu i'. 6 Nokosunud no diyolo' dot id sidang do hiti'd niyonon dahai o pasal do kosianan nu. Om tulungon no iyolo' om milo i' iyolo' do lumombus do mamanau om kohubayaan indo iyolo' do Kinorohingan. 7 Tu' tontok do manau-panau iyolo' do kumaraja' do bagi'd Kristus om a' i' iyolo' kaanu do nunu nopo o ponulung do mantad id tulun dit a' kotutun do Kinorohingan. 8 Iyo nopoddi, om mositi' no do monulung toko' iyati' i tulun do Kristian di tambalut toko' di sompi' ko' Kristian di miagal diri, om kotonggoi toko' i' iyati' di karaja' diyolo' di poposusui di ponudukan dit otopot di mantad id Kinorohingan.
I Diotripis om i Dimitrius
9 Nokoponulis oku no do surat dot oniiba' dot id sidang, nga' a' i' minamadul di boros ku i Diotripis it orohian do sumiliu'd boyoon dot id sidang diri. 10 Nga' korikot oku pondo do hino, om susuyon ngai' ku nogindo o koinsanai di nongowonsoi dau, iri no it angaraat om i tudut di pinoboros dau do pasal dahai. Nga' a' po dau ula' i winonsoi dau'ddi. Tu' tontok di nokorikot i piro-piro tambalut dau di sompi' ko' Kristian om a' i' iyau orohian do ruminamit diyolo'. Suwai ko' noduhan nogi' dau i tulun do rumamit di tulun diri, om suhuo' no dau i tulun diri do sumoliwan do mantad id sidang! 11 Oi tobpinai di kosianan ku! Kada' kou omit dit angaraat, suwai ko' omitan nopo it osonong. Tulun nopo di momonsoi dot osonong om nasanganu nod Kinorohingan. Nga' tulun nopo di momonsoi dot araat om a' po nokotutun do Kinorohingan. 12 Oinsanan nopo o tulun do mamarayou di Dimitrius. Om Kinorohingan piya nga' mamarayou i' dau. Om iyahai nga' mamarayou i' dau, om oilaan i' dokoyu do nunu nopo i posusuyon dahai om milo no do ponongkuyaanan.
Podsusuwau do Pongolimpupus diti Surat
13 Ogumu' po daa kopio ot apatut ku'd poboroson dot id dokoyu, nga' osorou ku dot osonong nogi' dot a' ku tulison do hiti'd surat. 14 Mogondos oku dot a' no alaid om koongoi oku no kolimbuha' dokoyu. Om kopogiboro-boros kopio toko' i'. 15 Pokionuon ku no do barakatan kou do Tuhan. Om iri nogi' i tambalut dokoyu do hiti'd kinoiyonon ku nga' poporikot nogi' do tabi' dot id dokoyu. Om porikoton no o tabi' ku dot id pointikid-tikid di tambalut toko'.
1 Oi tobpinai-tobpinai di nolohou no do Kinorohingan om i kosianan kopio do Kinorohingan Tapa', om i gompion do bagi' di Yesus Kristus, iyoho' no --- i Yudas --- i tobpinai di Yakub, i susuhuon di Yesus Kristus, 2 o mogondos dot: onuan kou do Kinorohingan do barakat, om kosianan om kosimbayanan do ginawo dit a' ogina-gina' o kogoyoo'.
I Piro-Piro Gomponuduk di Goudut
3 Oi tobpinai-tobpinai di kosianan ku! Kinoponulisan ku nopo kopio do surat diti dot id dokoyu om popoilo do pasal di koposion di naanu toko'. Nga' baino' nodti om noodsuur oku do monosihat dokoyu dot id suang do surat diti om tumilombus kou i' do tumotos kopio do pokotopot di kotumbayaan di pinatahak do Kinorohingan dot id tulun di songonuon dau dit insan noo patahako' do gisom dot alaid. 4 Tu' a' toko' i' noilaan do haro no o piro-piro o tulun dit araat do minomolisok-lisok do ruminikot dot id pogialatan toko'. Iyolo' no i tulun dit angaraat kopio di monomputul di habar do pasal do kosianan do Kinorohingan dot id dati', do mogihum iyolo' do ralan do monguru di korohian do tinan diyolo'. Om mada' iyolo' di Yesus Kristus, i Pomorinta' dit iso' noo om iyau noo, om iyau o Tuhan toko'. Mantad po di timpuun i' om nokoboros mantad no i pomohukum diyolo' dot id suang do Buuk do Kinorohingan. 5 Koinsanai'ddi om nongoilaan ngai' no dokoyu, nga' orohian oku po do popoboros dot id dokoyu do pasal do kowoyo-woyoo' do Tuhan do minamasi di tulun dot Israil do mantad id pomogunan do Masir, nga' pinatai iddi dau i tulun dit id pogialatan diyolo' dit a' notumbayaan. 6 Soroho' pogi' i piro-piro moloikat di tuminolibamban di diyolo'd kuasaon, gisom do tuminongkiad iyolo' di diyolo'd kinoiyonon. Nga' kagasai noddi do Kinorohingan i piro-piro moloikat diri do rantai di poingkogos kasai' do gisom do poingompus, dot id kinoiyonon dit otuong do hiti'd saalom do tana'. Om hilo' kasai' no iyolo' do gisom dot orikot i Tadau di koronob kopio di kopomohukuman diyolo'. 7 Soroho' pogi' i bandar do Sodom om Gomura om i kabandaran dot id posorili'; kowoyo-woyoon nopod tulun do hiri nga' miagal di winonsoi di piro-piro moloikat di noroitan di tiinu'. Miningwonsoi iyolo' dit araat om minagampahu' iyolo', gisom do ninggorit iyolo' do hukuman do tapui dit a' opisok do gisom do poingompus do maan do popoinsan do koinsanai'd tulun. 8 Om iyo nogiddi i tulun di noroitan di tiinu', tu' minsorou nopo iyolo' do gisom do kowonsoi iyolo'd dusa dot id tinan diyolo'. Om poinsiriba-ribaon diyolo' o kuasa' do Kinorohingan. Om mongindaraat dit ongkikagayaan di songingiyon do hilo'd surga. 9 Om i Mikail piya i boyoon di moloikat nga' a' i' insan pomonsoi do miagal diri. Tontok di minisongkiwal iyolo' di Rogon ondung isai diyolo' o kaanu di rata' di Musa, om a' i' nakatama' i Mikail do pinapasala' di Rogon do minimboros do boros do mongindaraat. Suwai ko' pomoros nopo i Mikail do poingkaa, “Togodon ko i' bo do Tuhan dino!” ka. 10 Nga' iti nopo tulun diti om songkiwalon nopo diyolo' om indaraaton o koinsanai dit a' diyolo' osuhutan. Miagal po iyolo' di nintorusan dit aiso' o toila-ilaan, tu' pongilo nopo diyolo' do nunu nopo om iri no i kopurimanan diyolo'. Nga' iri nogi' i karaag diyolo'. 11 Obungou no kopio iyolo'! Tu' suminusui i' iyolo' di ralan di winayaan di Kain. Mokimaanu-anu nopo iyolo'd tusin, om tumomod nopo iyolo' do rumatu' dot id kubong di kopolidon do miagal di Biliam. Om pinatai diri iyolo' tu' suminaap i' iyolo' do miagal di Kora. 12 Tontok do papaharo kou do poginakanan, om kososomu' no kopio i kowoyo-woyoon di tulun diri dot id pogialatan dokoyu. Tu' ongodoot kopio iyolo' do makan om a' ointingayaman om diyolo' nod tinan o sorohon diyolo'. Miagal no iyolo' di haun di tilibon do ribut, nga' a' i' poposondot do rasam. Om miagal nogi' iyolo' do kayu dit a' mongua' do tontok piya di maso do koponguaan; om miagal iyolo' di kayu di nutus do pinitonggoi do gamut om kapatai nopoddi kopio. 13 Miagal po iyolo' di tumbak dit opuhod do hilo'd rahat; tu' poporuab do puta' om iyolo' nga' popoimbulai nogi' di wowonsoyon diyolo' di kointingayam kopio, do miagal di puta' di koruab. Om miagal iyolo' di rombituon di mimpanau om nokosodia' no do Kinorohingan o tiyonon diyolo' di hiri'd kinoiyonon dit otuong kopio do gisom do poingompus. 14 I Hinok, i koturu' no do sinakagon do suminolusuk di Adam nga' nokoumbal i' do pinopoboros do pasal di tulun diri di gulu po. Boros kad Hinok, “Ontong pogi', rumikot nondo o Tuhan do miwoyo' do rinibuan o moloikat dau dit olidang 15 do mongoi pomutus do koinsanai'd tulun. Hukuman nondo do Tuhan i tulun dit araat tu' i piningwansayan diyolo' dit angaraat o kopomohukuman. Om hukuman dau i tulun dit ongkidusa om i tulun di mongingindaraat tu' i boboroson diyolo' do mongindaraat o kopomohukuman,” ka. 16 Iri nopo i tulun diri om managalai nopo do mimboros dot araatan om papasala' do tulun do suwai. Om mintanud iyolo' di kongorohian diyolo' di kidusa. Om mamarayou iyolo' do diyolo'd tinan, om mamarayou-rayou iyolo' do tulun do suwai do ralan diyolo' do manganu do kountungan.
Popoinsan om Nosihat
17 Nga' iyokoyu nopo, oi tobpinai-tobpinai di kosianan ku, om sorohon no dokoyu i nokoboros di piro-piro o rasul do Tuhan toko' i Yesus Kristus di gulu po. 18 Pinopoilo mantad iyolo' dokoyu di gulu po dot oruhai nopondo o kopupuson diti pomogunan om mimbulai nondo o tulun do momohingi-hingi dokoyu, iri no i tulun di kowoyo-woyoon nopo om tumanud di kongorohian diyolo' di kidusa. 19 Om iyolo' no i popoimbulai dot a' kopogiuludan. A' nogi' iyolo' porintaon di Rusod do Kinorohingan suwai ko' porintaon iyolo' di kongorohian di kowoyo-woyoon do dom pomogunan. 20 Nga' iyokoyu nopo, oi tobpinai-tobpinai ku, om tumilombus kou nopo do gumirot dot id kotumbayaan dokoyu dot id di Yesus Kristus. Iri nopo kotumbayaan dokoyu'ddi om olidang kopio. Daamot nopodti om sumambayang kou no do mikuwo'd kuasa' do Rusod do Kinorohingan. 21 Om pointirungon kasai' no dokoyu o koposi-posion dokoyu dot id kosianan do Kinorohingan do solinaid dokoyu do magandad di Yesus Kristus i Tuhan toko', do papatahak dot id dokoyu di koposion dit otopot kopio om i poingompus dot i kosianan dau o kapanahakan dau. 22 Pointalangon no dokoyu o kosianan dokoyu dot id tulun di mikoduwo o ginawo. 23 Gayaton no o tulun do suwai do poposoliwan do mantad id tapui, om apasi i' iyolo'. Pointalangon no dokoyu o kosianan dokoyu dot id tulun do suwai do mikuwo'd ooris, nga' karaatai kou no di pakayan piya diyolo' di nososomu' di korohian diyolo' di kidusa.
Sambayang do Mamarayou
24 Kinorohingan no o milo do momogompi' dokoyu om a' kou i' aratu', om iyau o milo do mongigit dokoyu dot id toguang dau di kikagayaan do mikuwo'd otood kou om aiso' o bohiton dokoyu dot id toguang dau, 25 om iyau noo o Kinorohingan, i Gampamasi dati' dot i Yesus Kristus i Tuhan toko' o pinamasi. Om iyau no o Kinorohingan di kikagayaan om it agayo kopio, om i kisinundu om i kikuasa' do mantad di gulu po om gisom do poingompus! Amin.
1 Tonsi nopo do buuk diti om pasal di pinointalang di Yesus Kristus do pasal dit ongosiliu do koimbagu. Om pinosunud do Kinorohingan iri dot id Kristus om kointalang indo dau dot id piro-piro o susuhuon do Kinorohingan it ongoruhai nod ongosiliu. Om sinuhu' do Kristus i moloikat dau do mongoi dot id di Yohanis, i susuhuon dau, do poposunud dot id dau dit ongosiliu'ddi. 2 Om susuyo' ngai' noddi di Yohanis i nongokito dau'ddi; om iti no i sinusui dau do pasal di boros do Kinorohingan, i pinogirot di Yesus Kristus dot i pinasasi' dau o pinomogirot. 3 Olumaag no i tulun di mambasa' om i mokinongou di pinoboros mantad do hiti'd buuk diti, om i mumboyo' di pinotulis dot id suang do buuk diti. Tu' a' no alaid om osiliu ngai' noti.
Podsusuwau dot id Turu' o Sidang
4 Oi tobpinai-tobpinai dit id turu' o sidang dot id pomogunan dot Asia! Mogondos oku no, iyoho', i Yohanis, do puhawangan kou do barakat om kosimbayanan do ginawo do mantad id Kinorohingan --- iyau i hino do dinondo, om i hino mantad, om i hino kasai' do gisom do poingompus --- om mantad nogi' di turu' o rusod dit id toguang do tirikohonon do Kinorohingan do momorinta', 5 om mantad id di Yesus Kristus, i sasi' dit otorodok. Iyau no it id gulu kopio posio' kawagu do mantad id kapatayon om iyau no i pomorinta' dot id sawat do koinsanai'd raja' do hiti'd pomogunan. Osianan i' i Yesus dati', om iri no kinapatayon dau o pinopoidu' dau dati' do mantad id koinsanai'd dusa toko', 6 om siniliu toko' dau dot imam, i momorinta' do miwoyo' di Kristus, om momonsoi do karaja' do dong Kinorohingan, i Tapa' dau. I Yesus Kristus no it agayo kopio om i kikuasa' do gisom do poingompus. Amin! 7 Ontong pogi', rumikot nondo iyau do poinsakai'd haun! Om oinsanan nopondo o tulun do kokito dau, om iri nogi' i tulun di minonobok dau nga' kokito i'. Om mihad ngai' nopondo o koinsanai'd bansa' do hiti'd pomogunan do mogihad dau. Atantu' no dot osiliu o miagal diri! Amin! 8 “Iyoho' no it id gulu om it id tohuri,” kad Tuhan, i Kinorohingan, i hino do dinondo, om i hino mantad, om i hino kasai' do gisom do poingompus, iyau it Agayo Kopio o Kuasa'.
Nokito i Kristus dot id Pinointalang
9 Iyoho' no, i Yohanis, i tobpinai dokoyu dit oinggorit dot iyo dokoyu, dot i koinggoritan dot oumbalan do pointikid-tikid di nakasanganu di Pomorintaan dau. Om pinataam oku do hiti'd pulou do Patmos tu' pinopopinsusui oku i' di boros do Kinorohingan, i pinogirot di kosianan di Yesus. 10 Tontok di tadau do Tuhan, om porintao' oku no di Rusod do Kinorohingan, om korongou oku nod boros dot opuhod do miagal do tuni do torumpit do moro-boros do hiri'd tohuri-huri ku. 11 Boros ka di minoro-boros, “Tulison no it okito nu, om pokirimon no i buuk diri dot id turu' o sidang diti: Iposus, Smirna, Porgamus, Tiatira, Sardis, Piladilpia, om Laudikia,” ka. 12 Om koili oku no do hiri'd tohuri ku do mogontong ondung isai i minoro-boros doho'. Om kokito ku no o turu' o potimpakan do lampung, di tamas do winonsoi. 13 Hiri nopod tanga' di potimpakan do lampung diri om haro o poingkakat di koiyo-iyo'd tulun o kokitanan. Om kirasuk iyau dot anaru, i kotontod o konoruo'. Om linakapan dau do lokop do kangkab di tamas do winonsoi o kangkab dau. 14 Om tobuk nopo dau om iyo pod hulu do dumba', om iyo do gapas kopurak. Om mato dau nga' iyo pod binuhang do tapui; 15 om gakod dau nga' okolong poo do miagal di tambaga' do tinantan om i kinisasan do mongilat. Om boros nopo dau om iyo pod kahas do wasai dit agayo. 16 Longon nopo dau'd wanan om kiinigit do turu' o rombituon, om haro o gayang dit atarom om i duwo o tarom do mantad id kabang dau. Om rabas dau nga' kosorong tomod o tulinau do miagal po di tadau do dong pitangaadau. 17 Tontok di nokito ku iyau, om kotungub oku nopo do hiri'd toguang dau, om iyo oku poddi di tulun di napatai. Nga' pakabayo' no dau doho' o longon dau'd wanan om boro-boros no iyau do poingkaa, “Kada' kooris! Iyoho' no it id gulu om it id tohuri. 18 Iyoho' no i poimpasi! Napatai oku no daa, nga' ontong pogi', nga' poimpasi oku noddi do gisom do poingompus. Om kikuasa' oku dot id sawat do kapatayon om id sawat do pomogunan di tulun do napatai. 19 Iyo nopoddi, om tulison no it ongokito nu, i maso dot osiliu do dinondo, om it osiliu do koimbagu. 20 Iti no it a' daa pinoilaan mantad do komoyon di turu' o rombituon di nokito nu do poingigit do longon ku'd wanan, om komoyon di turu' o potimpakan do lampung, di tamas do winonsoi: Iri nopo turu' o rombituon diri om i piro-piro o moloikat di turu' o sidang, om iri no i turu' o potimpakan do lampung om i turu' o sidang,” ka.
Boros do Poboroson dot id Iposus
1 Om boro-boros po kawagu i koiyo-iyo'd tulun o kokitanan do poingkaa, “Tulison no o poingkaa do pokirimon dot id moloikat do sidang di hilo'd Iposus: Iti no o boros do mantad id dau, i kiinigit di turu' o rombituon o longon do wanan, om i mimpanau dot id pogialatan di turu' o potimpakan do lampung, di tamas do winonsoi. 2 Oilaan ku i' i wonsoyon dokoyu: Aparu' tomod kou do kumaraja' om alanut tomod o ginawo dokoyu. Om oilaan ku i' dot a' kou orohian do poposimoyo' di tulun dot angaraat. Om tinoinu' i' dokoyu i tulun di mangakun do tulun iyolo' di sinuhu', nga' okon i' kopio ko' tulun iyolo' di sinuhu', om noilaan i' dokoyu do goudut iyolo'. 3 Atantu' i' o ginawo dokoyu om noinggorit kou dot iyoho' o kinoponginggoritan, om a' kou napaasan. 4 Nga' iti poo o kawagatan do ginawo ku dot id dokoyu: Tu' a' kou noddi osianan doho' do miagal di timpuun i'. 5 Iyo nopoddi, om ilaai no dokoyu do naratu' kou no kopio. Om rologo kou no do mantad id koinsanai'd dusa dokoyu, om wonsoyo' no dokoyu o miagal di winonsoi dokoyu di timpuun i'. Ondung amu', nga' rumikot oku nondo dot id dokoyu om ngoyon ku nondo iduwo' i potimpakan do lampung do mantad hiri'd pinoiyanan diri. 6 Nga' haro i' o tiso' dot osonong dot id dokoyu, iri no tu': Araatan kou di wowonsoyon di piro-piro o tumatanud di Nikolaus, i karaatan ku iyoho'. 7 Isai nopo i korongou, om mokinongou no kopio di pinoboros do Rusod do Kinorohingan dot id sidang! Om iri nopondo tulun di kamanang om pabanaron ku no do mangakan do tua' do kayu di tadon do koposion di poinsuni do hilo'd Kabun do Kinorohingan,” ka dau.
Boros do Poboroson dot id Smirna
8 Om boros ka kawagu di koiyo-iyo'd tulun o kokitanan, “Tulison no o poingkaa do pokirimon dot id moloikat di sidang do hilo'd Smirna: Iti no o boros do mantad id dau, it id gulu om it id tohuri --- i napatai nga' napasi iddi kawagu. 9 Oilaan ku i' o koinsanai di kosusaan dokoyu; om oilaan ku i' do mosikin kou --- nga' otopot nopo kopio om kaya' kou i'! Oilaan ku i' i boros do pongindaraat di tulun di mangakun do tulun do Yohudi, nga' otopot nopo kopio om okon i' iyolo' ko' tulun do Yohudi; iyolo' nopo om tulun i' di nasanganu do Rogon! 10 Kada' kou kooris di koinggoritan dit a' no alaid om koontok no dokoyu. Soro-sorohon no dokoyu, do posuangon nondo di Rogon dot id giil o wookon dokoyu do pogumbal dokoyu. Om oinggorit kou nondo do solinaid do hopod o tadau. Nga' mositi' no dot otorodok kou dot id doho' do gisom dot apatai, om onuan ku indo iyokoyu do koposion dit otopot kopio om i poingompus do maan dot isomuli' di kinamanangan dokoyu. 11 Isai nopo i korongou, om mokinongou no kopio di pinoboros di Rusod do Kinorohingan dot id sidang! Om iri nopondo tulun di kamanang, om a' no kopio oinggorit di kapatayon do koinduwo,” ka dau.
Boros do Poboroson dot id Porgamus
12 Om boros ka kawagu di koiyo-iyo'd tulun o kokitanan, “Tulison no o poingkaa do pokirimon dot id moloikat do sidang di hilo'd Porgamus: Iti no o boros do mantad id dau, i kiinigit di gayang dot atarom, iri no i gayang di duwo o tarom. 13 Oilaan ku i' o kinoiyonon dokoyu, tu' poingiyon kou do hino'd kinoiyonon di Rogon do momorinta'. Om otorodok kou i' dot id doho'. Tu' tontok piya di pinatai i Antipas, i sasi' ku dit otorodok diri, do hiri'd kinoiyonon di Rogon dot id dotoguangan dokoyu, nga' a' kou i' minogolim dot otumbayaan kou doho'. 14 Nga' haro po o piro-piro o hal dot a' ku korohian dokoyu: Haro o piro-piro tulun dot id pogialatan dokoyu do tumanud di pinotuduk di Biliam. Om tinudukan di Biliam i Balak do ralan do momurunsut do tulun dot Israil dot id suang do dusa; tu' ralan nopo om mamayayat diyolo' do mangakan di taakanon di nokosubak dot id tingolig om minagampahu'. 15 Om haro nogi' o tulun dot id pogialatan dokoyu do tumanud di ponudukan di tumatanud di Nikolaus. 16 Iyo nopoddi, om rologo kou no do mantad id koinsanai'd dusa dokoyu! Tu' ondung amu', nga' a' no alaid om rumikot oku no do hino'd dokoyu om songodon ku nondo i tulun diri do gayang di hiti'd kabang ku o panangod ku. 17 Isai nopo i korongou, om mokinongou no kopio di pinoboros di Rusod do Kinorohingan dot id sidang! Om iri nopondo i tulun di kamanang om pabanaron ku no do mangakan di manna di poillisok, om kaanu ngai' nopondo iyolo' do watu dit opurak do mantad id doho'. Om haro nondo o ngaran di wagu do pointulis dot id watu'ddi, it a' oilaan dot isai nopo o tulun, do suwai ko' i tulun di karamit diri,” ka.
Boros do Poboroson dot id Tiatira
18 Om boros ka kawagu di koiyo-iyo'd tulun o kokitanan, “Tulison no o poingkaa do pokirimon dot id moloikat do sidang do hilo'd Tiatira: Iti no o boros do mantad id Tanak do Kinorohingan, i mato nopo om obuhang po do miagal do tapui, om gakod no om okolong po do miagal do tambaga' di tinantan. 19 Oilaan ngai' ku i' i wonsoyon dokoyu --- oilaan ku i' do mogiinsian-sian kou, om otorodok kou, om kumaraja' kou, om alanut o ginawo dokoyu dot oinggorit piya. Om oilaan ku i' do baino' nopo om aparu' kou po ko' mantad di gulu po do kumaraja'. 20 Nga' iti no o kawagatan do ginawo ku dot id dokoyu: Tu' orohian kou do tumanud di Isibil, i tondu' di mangakun do susuhuon do Kinorohingan. Ogumu' no o susuhuon ku do notipu' dau om tinudukan dau do magampahu' om mangakan do taakanon di nokosubak dot id tingolig. 21 Noonuan ku no iyau do maso do kumorologo do mantad id koinsanai'd dusa dau, nga' mada' i' iyau do tumingkod do magampahu'. 22 Om antaan nopo! Nga' poloposon ku motindo iyau dot id toodopon do gisom i' dot orualan iyau. Om hiri nondo iyau om i tulun di minagampahu' dau dot ongoinggorit tomod. Om wonsoyon ngai' ku no o miagal diri do dinondo, nga' a' ku i' daa'ndo wonsoyon do tumingkod no iyolo' do momonsoi dit angaraat do miwoyo' dau. 23 Om iri piro-piro tumatanud dau nga' patayon ku nondo om koilo ngai' i' o sidang dot iyoho' no i koilo do pomusarahan om ginawo'd tulun. Om somulian ku indo iyokoyu do miontok di winonsoi dokoyu. 24 Nga' iyokoyu nopo i suwai do hino'd Tiatira om a' i' tuminanud di ponudukan dit araat diri, om a' mininsingilo di toilaan do Rogon. Om poboroson ku no dot a' ku i' ruhangan o tonggungan dokoyu do gisom do sumiliu'd kawagatan dokoyu. 25 Nga' igitan no kopio dokoyu i naanu dokoyu do gisom dot orikot i maso do korikatan ku. 26-27 Om iri nopondo tulun di kamanang, om i momonsoi kasai' di korohian ku do gisom do kopupuson, om onuan ku indo do kuasa' do miagal di naanu ku do mantad id Tapa' ku. Om karamit nondo iyolo' do kuasa' do mantad id doho' do momorinta' do koinsanai'd bansa', do sukud do basi' ot igitan do momorinta', om onuan ku iyolo' do kuasa' do momoromumuk do koinsanai'd bansa'ddi do gisom dot iyo pondo iyolo' di kuron do nomumuk. 28 Om karamit nondo iyolo' di rombituon di roitan do soguanggo' do mantad id doho'. 29 Isai nopo i korongou, om mokinongou no kopio di pinoboros di Rusod do Kinorohingan dot id sidang!” ka dau.
Boros do Poboroson dot id Sardis
1 Om boros ka kawagu di koiyo-iyo'd tulun o kokitanan, “Tulison no o poingkaa do pokirimon dot id moloikat do sidang do hilo'd Sardis: Iti no o boros dau, i sanganu di turu' o rusod do mantad id Kinorohingan om sanganu di turu' o rombituon. Oilaan ku i' i wonsoyon dokoyu. Nokoboros daa do poimpasi kou, nga' otopot nopo kopio om poimpatai kou i'! 2 Iyo nopoddi, om posik kou no, om pogiroton no i haro dot id dokoyu, dot a' pori apatai kopio. Tu' noilaan ku no dot iri nopo i winonsoi dokoyu om aiso' po o tiso' dot aiso' kopio o bohiton dot id toguang do Kinorohingan. 3 Iyo nopoddi, om soroho' no dokoyu i nokotuduk dot id dokoyu di gulu po om i norongou dokoyu. Wonsoyo' no dokoyu iri om rologo kou no do mantad id koinsanai'd dusa dokoyu. Ondung a' kou mosik, om rumikot oku nondo dot id dokoyu do miagal do tulun di manakau; om a' kou indo koilo di maso kopio do korikatan ku. 4 Nga' hiti nopod pogialatan dokoyu do hiti'd Sardis om haro po o tulun di mada' kopio dot ososomu' o pakayan. Om iyolo' nopo om moyo' nondo doho' do mamanau dot ongkipakayan dot opurak, tu' osorupai i' iyolo' do manampakai'ddi. 5 Om rosukan indo do rasuk dot opurak i tulun di kamanang. Om a' ku i' pisokon o ngaran diyolo' do hiri'd Buuk do Tulun di Napasi. Om okunon ku indo do songonuon ku iyolo' dot id toguang di Tapa' ku om i piro-piro o moloikat dau. 6 Isai nopo i korongou, om mokinongou no kopio di pinoboros di Rusod do Kinorohingan dot id sidang!” ka.
Boros do Poboroson dot id Piladilpia
7 Om boros ka kawagu di koiyo-iyo'd tulun o kokitanan, “Tulison no o poingkaa do pokirimon dot id moloikat do sidang do hilo'd Piladilpia: Iti no o boros do mantad id dau, it olidang om it otopot kopio. Iyau no o mongigit di kunsi' di Daud; ondung mongiwang iyau om aiso' no o tiso' pod tulun do milo do monobon diri, om ondung potobonon dau, om aiso' no o tiso' pod tulun do milo do mongiwang diri. 8 Oilaan ku i' i wonsoyon dokoyu. Oilaan ku i' dot a' kou i' okoris no; om natanud no dokoyu i pinonudukan ku om otorodok kou dot id doho'. Noiwangan ku no ot iso' o wawayaan do wayaan dokoyu, it a' milo do tabanan dot isai nopo o tulun. 9 Soroho' no dokoyu iti: Iri nopo i tulun di nosiliu do tulun do songonuon do Rogon diri, om tulun i' di goudut i mangakun do Yohudi iyolo', om okon i', om porikoton ku indo iyolo' do gisom do motud iyolo' dot id toguang dokoyu. Om koilo nondo iyolo' dot osianan oku i' dokoyu. 10 Om intirungan ku indo iyokoyu do mantad id maso do kosusaan di rumikot dot id pointongkop diti pomogunan tu' otorodok kou i' do tuminanud di pinonuhuan ku. Om osiliu pogi' o miagal diri nga' pogumbal do koinsanai'd tulun do hiti'd pomogunan. 11 Oruhai oku nod rumikot! Om gompion no kopio dokoyu i naanu dokoyu, om aiso' indo o tiso' pod tulun do magahau di hodia' do kinamanangan dokoyu. 12 Iri nopo i tulun di kamanang, om silihon ku nondo do torigi dot id suang di walai'd Kinorohingan ku dit olidang, om hiri nondo iyau do poundorong do gisom do poingompus. Om iri nondo i ngaran do Kinorohingan ku, om i ngaran di bandar do Kinorohingan ku --- iri no i Yorusalim do wagu di lumintuhun do mantad hilo'd surga, do mantad id Kinorohingan ku --- o tulison ku dot id tinan do tulun diri. Om tulison ku dot id tinan do tulun diri o ngaran ku di wagu. 13 Isai nopo i korongou, om mokinongou no kopio di pinoboros di Rusod do Kinorohingan dot id sidang!” ka.
Boros do Poboroson dot id Laodikia
14 Om boros ka kawagu di koiyo-iyo'd tulun o kokitanan, “Tulison no o poingkaa do pokirimon dot id moloikat do sidang do hilo'd Laodikia: Iti no o boros di roitan dot Amin, i sasi' dit otorodok om it otopot, i tadon do koinsanai'd nunu nopo di winonsoi'd Kinorohingan. 15 Oilaan ku i' i wonsoyon dokoyu; oilaan ku i' dot a' kou osogit om a' kou alasu'. Osonong nogi' daa dot indama' om osogit kopio ko' alasu' kou! 16 Nga' alasu-lasu' kou no; a' alasu' kopio, om a' osogit. Om iri no o kopongilaban ku dokoyu. 17 Momoros kou dot, ‘Kaya' i' iyahai om haro ngai' i' dahai,’ ka dokoyu. Nga' a' i' dokoyu oilaan do norutum tomod kou om aradaat kopio o koiyon-iyono dokoyu! Mosikin kou, om poillabas kou, om bolou kou. 18 Om iri no o kopomisunudan ku dokoyu do momoli'd tamas do mantad id doho', iri no i tamas dot osompipi', om kakaya' kou indo. Om momoli kou nogi' do pakayan dit opurak do mantad id doho' om kipakayan kou indo do ponirung do tinan dokoyu di poillabas om i kointingayam. Om momoli nogi' do tubat do pogihilon dot id mato dokoyu om kokito kou indo. 19 Iri nopo tulun di kosianan ku, om togodon ku i' om loposon ku do monuduk. Iyo nopoddi, om pokoiso-isoon no kopio dokoyu o ginawo dokoyu, om rumologo kou no do mantad id koinsanai'd dusa dokoyu. 20 Antangai pogi'! Poingkakat oku no dot id wawayaan do mogkoritik. Ondung haro o tulun do korongou do boros ku, om mongiwang no di totobon, om sumuang oku nondo do mongoi solowot dau; om tumorungak oku nondo dau do makan om iyau nga' potorungak no doho'd makan. 21 Iri nopondo tulun di kamanang om pabanaron ku no do mirikau dot id tirikohonon ku di don raja' do poinsugku' doho', do miagal doho' tu' nakamanang no, om poirikau oku noddi dot id talad do Tapa' ku dot id tirikohonon dau do momorinta'. 22 Isai nopo i korongou, om mokinongou no kopio do poboroson di Rusod do Kinorohingan dot id sidang!” ka dau.
Tuminuku' dot id Kinorohingan do Hilo'd Surga
1 Om kokito oku po kawagu do pinointalang. Om nokito ku ot iso' o wawayaan do noiwangan do hilo'd surga. Om korongou ku po kawagu o boros di minoro-boros doho' dit id gulu i' do miagal do tuni do torumpit o karangahan. Boros ka di minoro-boros, “Kaino'd hiti. Om pointongon ku indo iya' dit ongosiliu do koimbagu,” ka. 2 Om diiri i' om diiri do noporinta' oku do Rusod do Kinorohingan. Om kokito ku noddi do haro ot iso' o tirikohonon do don raja' do hilo'd surga, om haro ot iso' tulun do poirikau dot id tirikohonon diri. 3 Rabas nopo do tulun diri om mogulinau po do miagal do watu di roitan do yaspor om watu di roitan do sardis, i watu dot agayo kopio o gatang. Om pointutuk nopo di tirikohonon do don raja'ddi om buluntung di mogulinau do miagal do watu samrud. 4 Om haro o duwo nohopod om apat o tirikohonon do don raja' do pointutuk di tirikohonon do don raja'ddi. Om hiri no do poirikau o duwo nohopod om apat o boyoon dit ongkipakayan dot opurak, om ongkitupi' do tamas do miagal di tupi' do don raja'. 5 Om mingkalab poo o kodumaat do mantad hiri'd tirikohonon di don raja'ddi om hiri o tadon do tinggoron dit opuhod tomod. Om hiri nopod dotimbabaan di tirikohonon do don raja'ddi om haro o turu' o tata' di kitapui; iri no i turu' o Rusod do Kinorohingan. 6 Om haro nogi' o miagal di rahat do kasa' dot id dotimbabaan di tirikohonon do don raja'ddi, do miagal pod kristal o kanawaho'. Hiri nopod posorili' di tirikohonon do don raja'ddi, dot id pointikid-tikid di tisan om haro ot apat o kipinuhobo, i notongkop nopod mato o ponong id kangkab om ponong id likud. 7 Iri nopo i kipinuhobo di koiso' nga' koiyo-iyo'd singa. Iri no koduwo, om koiyo-iyo'd sapi' di tontoluhan. Iri no kotolu om kirabas do miagal do rabas do tulun. Om iri no kaapat, om koiyo-iyo'd kondiu di mulud-tulud o kokitanan. 8 Iri nopo it apat o kipinuhobo'ddi, om saraanaman nopod talad, om notongkop do mato ot id soibau om id saalom. Om a' nopo otingkod-tingkod do modsinding i kipinuhobo'ddi do tadau om totuong, do sinding do poingkaa, “Olidang, olidang, olidang no o Tuhan, i Kinorohingan dit Agayo Kopio o Kuasa'; i hino do dinondo, om i hino mantad, om i hino kasai' do gisom do poingompus,” ka. 9 Modsinding ngai' nopo it apat o kipinuhobo'ddi do sinding do pamarayou, om pomusou om pongunsikou dot id dau, i poirikau dot id tirikohonon do don raja'ddi, iyau i poimpasi do gisom do poingompus. Om tontok di modsinding it ongkipinuhobo'ddi, 10 om songingotud ngai' nopo i duwo nohopod om apat o boyoon do hiri'd tirikohonon di don raja', do tumuku' dot id dau, i poimpasi do gisom do poingompus. Om pataamo' nopoddi diyolo' i tupi' diyolo' di don raja' do hiri'd dotimbabaan di tirikohonon do don raja'ddi, do mikuwo'd minomoros do poingkaa, 11 “Oi Tuhan, i Kinorohingan dahai! Iya' noo ot osorupai do royohon, om pusohon om onuan do kuasa'. Tu' iya' no o minomonsoi do koinsanai'd nunu nopo, om mantad i' do korohian nu do nongosiliu ngai' om songimpasi o koinsanai'd nunu nopo,” ka.
I Buuk do Linopi om i Tanak do Dumba'
1 Om kokito ku noddi ot iso' o buuk do linopi do poingigit di poirikau do hiri'd tirikohonon di don raja'ddi. Iri nopo buuk diri nga' notongkop nopo do tulis o miampaping om sinorokot do turu' o saap. 2 Om kokito ku noddi o songulun o moloikat dit okoris kopio do mimboros dot opuhod do poingkaa, “Isai noo ot osorupai do mongidu' dilo saap om mongungkaya' diti buuk?” ka. 3 Nga' hilo' piya'd surga, om hiti'd pomogunan, om hilo'd saalom diti tana' nga' aiso' i' o tulun do milo do mongungkaya' di buuk, om aiso' o kasaap do montong do suang di buuk diri. 4 Om ihad oku nopo tu' aiso' i' o songulun piya dot osorupai do mongungkaya' di buuk diri, om it osorupai do montong do hiri'd suang di buuk. 5 Om haro'ddi o songulun dot id pogialatan di piro-piro o boyoon diri do minoro-boros dot id doho' do poingkaa, “Kada' ihad! Ontong pogi'! Nakamanang no i singa do mantad id payat do Yohuda, i sinakagon di Daud dit agayo'ddi. Om milo i' iyau do mongidu' dilo turu' o saap om koungkaya' iyau dilo buuk,” ka dau. 6 Om kokito ku noddi o songinan o Tanak do Dumba' do miningkakat do hiri'd tanga-tanga' di tirikohonon do don raja'ddi, do nosorilian dit apat o kipinuhobo om koinsanai di boyoon. Iri nopo Tanak do Dumba'ddi nga' iyo di nosumbali' no o kokitanan. Turu' o sungu dau om turu' o mato: iri no i turu' o rusod do mantad id Kinorohingan di sinuhu' do tumongkop diti pomogunan. 7 Om pamanau noddi i Tanak do Dumba'ddi do minongoi rapou om ngoyo' no dau i buuk di poingigit do longon do wanan di tulun di poirikau do hiri'd tirikohonon di don raja'. 8 Om daamot nopo di Tanak do Dumba'ddi do momonsoi'd miagal diri om otud ngai' nopo it apat o kipinuhobo om i duwo nohopod om apat o boyoon diri do hiri'd toguang di Tanak do Dumba'. Om ongkiinigit ngai' nopo iyolo' do kecapi om mangkuk do tamas di kisuang do kominyan, iri ngai' no i sambayang do tulun di songonuon do Kinorohingan. 9 Om modsinding iyolo' dot iso' o sinding di wagu do poingkaa, “Iya' no ot osorupai do manganu di buuk diri om mongidu' di saap do pinonorokot. Tu' napatai ko no, om iri no i kinapatayon nu'ddi, o pinomoli nu do tulun do mantad id koinsanai'd payat, om bansa'd boros, om pomogunan, om bansa'd tulun do patahakon dot id Kinorohingan. 10 Nosiliu nu no iyolo' do sinompuruan do tulun di nokotobilang do silihon dot imam om kopogobi-obi' i' iyolo'd Kinorohingan toko', om kopomorinta' do hiti'd pomogunan,” ka. 11 Om ontong oku po kawagu. Om korongou ku no o boros do moloikat di rinibuan i' om jutaan o kogumuo'. Songingkakat iyolo' do pointutuk di tirikohonon do don raja', dot iyolo' ngai' dit apat o kipinuhobo om i piro-piro o boyoon diri. 12 Om modsinding iyolo' dot opuhod do poingkaa, “Iri nopo Tanak do Dumba' di nosumbali'ddi om osorupai i' do kaanu do kuasa', om kakayaan, om toilaan, om kokorisan; osorupai i' iyau do pusohon, om poinggoyoon om pingroyohon!” ka. 13 Om korongou ku noddi o koinsanai di kipinuhobo do hilo'd tawan, om hiti'd pomogunan, om hilo'd saalom do tana' om hilo'd saalom do rahat --- dot oinsanan nopo it ongkipinuhobo do hilo'd tawan om hiti'd pomogunan --- do modsinding do poingkaa, “Iyau nopo i poirikau dot id tirikohonon di don raja', om i Tanak do Dumba'ddi, om royohon no kopio om pusohon om abantug om kikuasa' do gisom do poingompus!” ka. 14 Om boros ka dit apat o kipinuhobo'ddi do suminimbar, “Amin!” ka. Om otud ngai' nopo i boyoon diri do tuminuku'.
I Piro-Piro o Saap di Pinonorokot
1 Om kokito ku noddi i Tanak do Dumba'ddi do minongidu' di saap do koiso' dot id pogialatan di turu' o saap diri. Om korongou ku no o tiso' dit apat o kipinuhobo do minomoros dot, “Kaino!” ka. Om karangahan nopo di boros dau nga' iyo pod ngorod do tinggoron. 2 Om ontong oku no, om kokito ku no o songinan o kuda' dot opurak. Om iri nopo i poinsakai di kuda'ddi om kiinigit dot iso' o pawakasan do pana', om nonuan iyau dot iso' o tupi' di don raja'. Om pamanau no iyau do miagal do tulun di nakamanang no do mongoi panganu do kamanangan. 3 Om iduwo' no di Tanak do Dumba'ddi i saap di koduwo, om korongou ku no i kipinuhobo di koduwo do minomoros dot, “Kaino!” ka. 4 Om soliwan noddi o songinan o kuda' di suwai no. Iri nopo kuda'ddi om aragang. Om iri nopo i poinsakai di kuda'ddi om nonuan do kuasa' do mananus do kouludan do hiti'd pomogunan, om mogipapatai indo o tulun. Om onuwai no iyau dot iso' o gayang dit agayo. 5 Om iduwo' noddi di Tanak do Dumba'ddi i saap di kotolu. Om korongou ku no i kipinuhobo di kotolu do minomoros dot, “Kaino!” ka. Om ontong oku no, om kokito ku no o songinan o kuda' dit oitom. Om iri nopo i poinsakai di kuda'ddi om kiinigit do timbangan. 6 Om korongou ku noddi o miagal-agal do boros do tulun do moro-boros do mantad hiri'd tanga-tanga' dit apat o kipinuhobo'ddi. Om poingkaa o pinoboros di minoro-boros diri, “Horogo nopod songkilogram o gandum om irad do gadsi' do sangadau, om horogo do tolu kilogram do barli nga' irad i' do gadsi' do sangadau. Nga' kada' raago' i guas do saitun om i kabun dot anggur!” ka. 7 Om iduwo' noddi di Tanak do Dumba'ddi i saap di kaapat. Om korongou ku no i kipinuhobo di kaapat do minomoros dot, “Kaino!” ka. 8 Ontong oku no, om kokito ku no o songinan o kuda' dit oposi'. Om ngaran nopo di poinsakai di kuda'ddi om kapatayon. Om muhut-suhut dau i Pomogunan di Kapatayon. Om pinatahak dot id diyolo' o sompiapat diti pomogunan, om kapamatai i' iyolo', do pamatai nopo om pisangadan, om mononglous, om toruol di mogkoroliu om piro-piro o nintorusan dit ongorongit. 9 Om iduwo' noddi di Tanak do Dumba'ddi i saap di kolimo. Om kokito ku no do hiri nopod sahau di pananaraban do porsombahan om haro o piro-piro o ginawo do tulun di pinatai tu' pinokotopot i' diyolo' i boros do Kinorohingan do tontok di suminasi' iyolo'. 10 Om mimboros iyolo' dot opuhod do poingkaa, “Oi Tuhan it Agayo Kopio o Kuasa', it olidang om it otopot! Piro po o koloido' om butusan nu nogi' o tulun do hiti'd pomogunan om hukuman nu iyolo' tu' minamatai i' iyolo' dahai?” ka. 11 Om tikidai ngai' nopo iyolo' do rasuk dot opurak. Om suhuo' noddi iyolo' do mundorong-dorong dot ongoruhai, do gisom dot opongo o ginumu' di tambalut diyolo' do pakaraja' om i tobpinai diyolo' dot apatai do miagal diyolo' tu' pinatai. 12 Om kokito ku noddi i Tanak do Dumba'ddi do mongidu' di saap di koonom. Om guyu' noddi o tana' dot opuhod kopio. Om tuong nopo o tadau do miagal poddi kain dot oitom dit aparad, om iri tulan nga' ruminagang do miagal pod raha'. 13 Om sangratu-ratu' poo i rombituon do hiti'd pomogunan, do mantad hilo'd tawan, do miagal di tua' dot ara dit a' po noonsok do lumoho do tontok dot otongusan do tongus dit opuhod. 14 Om tanus nopo ilo tawan do miagal nod karatas di linundun, om oinsanan nopo o nuluhon om pulou do pinoundaliu do mantad hiri'd kinoiyonon mantad diri. 15 Om oinsanan nopoddi o raja' do pomogunan, om i tulun dit ongkipangkat, om i boyoon do soudor, om i tulun do kaya' om i tulun di kikuasa', om i tulun do suwai, dot iri turipon om it okon ko' turipon, do minongoi ngai' lisok dot id suang do luang do nuluhon om id pogiolit-olitan di pampang do hilo'd nuluhon. 16 Om minggiak poo iyolo' dot i nuluhon om i pampang o barasan do poingkaa, “Onsitai no iyahai! Tirungo' no iyahai do mantad id mato di poirikau dot id tirikohonon di don raja'ddi, om mantad id kototogod di Tanak do Dumba'ddi! 17 Nokorikot no i tadau di korolosi kopio, om pourobuson noddi diyolo' o kototogod diyolo', om aiso' no o tongoiso' pod tulun do katama' do tumimbaba' diyolo'!” ka no diyolo'.
Hatus om Apat Nohopod om Apat Noribu o Tulun do Mantad id Bansa'd Israil
1 Om kokito ku noddi ot apat o moloikat do poingkakat do hiri'd apat o linsuk do pomogunan. Om pinusus diyolo' it apat o tongus do hiti'd pomogunan, om aiso' indo o tongus do kotongus dot id katanaan ko' id rahat, ko' id kokoyuan. 2 Om kokito ku no kawagu o tiso' o moloikat do suwai do ruminikot do mantad ponong hilo'd koulayon. Om minigit iyau do saap do mantad id Kinorohingan di poimpasi. Om lohowo' no di moloikat dot opuhod o boros it apat o moloikat di nonuan do kuasa' do mantad id Kinorohingan do mamaraag do katanaan om rahat. 3 Boros ka di moloikat diri, “Kada' po dokoyu raago' o katanaan ko' iti rahat, ko' ilo kokoyuan dot a' po dahai asaapan ngai' o turos di susuhuon do Kinorohingan toko',” ka dau. 4 Om kosunudai oku noddi do haro o 144,000 o tulun di sinaapan o turos di saap do Kinorohingan. Iri nopo tulun diri om mantad ngai' id hopod om duwo o payat do bansa' dot Israil, 5 do 12,000 o tulun do mantad id pointikid-tikid do payat. Iyolo' nopo om mantad id payat di: Yohuda, om di Rubin, om di Gad, 6 om di Asor, om di Naptali, om di Manasi, 7 om di Simion, om di Liwi, om di Isakar, 8 om di Sibulon, om di Yusup om di Binyamin.
Tulun dit Ogumu' Kopio do Songintimung
9 Om ontong oku po kawagu, om kokito ku no o tulun dot ogumu' kopio do songintimung --- om ogumu' no kopio gisom dot aiso' no o tiso' piya'd tulun do kointob do ginumu' diyolo'. Iyolo' nopoddi om mantad id pointikid-tikid do bansa', om payat, om pomogunan, om bansa'd boros. Om kipakayan ngai' nopo iyolo' do rasuk dot opurak dit anganaru, om ongkiinigit do raan do kayu di roitan do palma, om songingkakat ngai' i tulun dot ogumu'ddi do potimbaba' di tirikohonon do don raja'. Om potimbaba' di Tanak do Dumba'ddi. 10 Om pomoros noddi iyolo' dot opuhod do poingkaa, “Tadon nopo do koposion toko' om i Kinorohingan toko', i poirikau dot id tirikohonon di don raja', om mantad id Tanak do Dumba'ddi!” ka. 11 Om oinsanan nopo i moloikat do miningkakat do pointutuk di tirikohonon do don raja', om iyolo' ngai' di boyoon om it apat o kipinuhobo'ddi. Om otud ngai' nopo i moloikat diri do hiri'd dotimbabaan di tirikohonon di don raja' do tuminuku' dot id Kinorohingan. 12 Om boro-boros no iyolo' dot opuhod do poingkaa, “Amin! Royohon no o Kinorohingan toko', it agayo kopio om it oilo kopio. Om iyau no ot apatut dot unsikohon, om pusohon kopio. Iyau no i kikuasa' om it okoris do gisom do poingompus! Amin,” ka. 13 Om uhoto' oku noddi do tiso' di boyoon diri do poingkaa, “Isai ilo tulun do kipakayan dot ongopurak dilo', om honggo o tadon diyolo'?” ka dau. 14 Om boros kangku do suminimbar, “A' oku i' koilo, oi Tuan. Tuan nogi' o koilo,” kangku. Om boros kaddi dau dot id doho', “Ilo' no i tulun di nakamanang do tontok di maso di koinggoritan dit awagat kopio. Nopupuan no diyolo' i pakayan diyolo' om opurak noddi dot i raha' di Tanak do Dumba' o pinomurak. 15 Om iri no o koingkakatan diyolo' dot id toguang di tirikohonon do Kinorohingan di don raja', om sumambayang iyolo' dot id dau do tadau om totuong do hiri'd Walai'd Sasambayangan dot Agayo. Om iyau i poirikau dot id tirikohonon di don raja'ddi nga' poingamung i' diyolo' do mongintirung diyolo'. 16 Om a' nondo iyolo' louson om a' tuuhan, om a' nondo iyolo' olosuan di tadau om a' olosuan di linasu' di tadau, 17 tu' iri indo i Tanak do Dumba' di poirikau do hiri'd tanga-tanga' di tirikohonon di don raja'ddi o sumiliu'd gompomogompi' diyolo'. Om woyoon nondo dau iyolo' do kumaa do hiri'd tudan do waig di manahak do koposion. Om pihidan nondod Kinorohingan o koinsanai do romou diyolo',” ka dau.
I Saap di Koturu'
1 Tontok di nidu' di Tanak do Dumba'ddi i saap di koturu', om kododog nopo om aiso' no ot ohiyo do hilo'd surga do solinaid doti' do satanga' jam. 2 Om kokito ku noddi i turu' o moloikat do poingkakat do hiri'd toguang do Kinorohingan, om onuwai no iyolo' do turu' o torumpit. 3 Om haro'ddi o tiso' kawagu o moloikat do kiinigit do poiiyanan do kominyan, do tamas do winonsoi, do ruminikot do minongoi andog do hiri'd dotimbabaan di pananaraban do porsombahan. Om onuwai no iyau do kominyan dot ogumu' kopio do poruhangon di sambayang do tulun di songonuon do Kinorohingan, om patahakon do hiri'd pananaraban do porsombahan di tamas do winonsoi, di hiri'd dotimbabaan di tirikohonon di don raja'. 4 Om mitonggoi nopondo i sambayang do tulun di songonuon do Kinorohingan, om i lisun di kominyan di maso do tutudan do minsawat do mantad id longon di moloikat di poingkakat do hiri'd toguang do Kinorohingan. 5 Om ngoyo' noddi di moloikat i poiiyanan do kominyan diri om suangai nod tapui do mantad hiri'd pananaraban do porsombahan, om pataamo' noddi dau iri do hiti'd pomogunan. Om kongorod nopoddi o tinggoron om a' otingkod-tingkod o kodumaat om guminuyu' o tana'.
I Piro-Piro o Torumpit
6 Om sodia' noddi i turu' o moloikat di kiinigit di turu' o torumpit, do popouni di torumpit. 7 Om pounio' no di moloikat di koiso' i torumpit dau, om asapou tomod diri o rasam dot ais om tapui do mirolot do raha' do suminondot do hiti'd pomogunan. Om kaayi' nopo do nosorob o sompitolu diti pomogunan; om nosorob ngai' o sompitolu do kokoyuan, om nosorob ngai' o sakot dit otomou. 8 Om pounio' noddi di moloikat di koduwo i torumpit dau, om haro'ddi ot agayo kopio, do kokitanan nopo om iyo do nuluhon di molob-ngolob do tapui, do pinataam do hilo'd rahat. Om kosiliu nopod raha' o sompitolu di rahat, 9 om kapatai noddi o sompitolu do koinsanai dit ongkipinuhobo do hilo'd rahat; om karaag noddi o sompitolu di kapal do rahat. 10 Om pounio' noddi di moloikat di kotolu i torumpit dau, om haro'ddi o rombituon dit agayo, do mikit-sikit do miagal do tata', do naratu' do mantad hilo'd tawan, om korotuwai no o sompitolu do koinsanai di bawang om tudan do waig. 11 (Ngaran nopo do rombituon diri om it “Opoit”.) Om opoit diri o sompitolu do waig, om ogumu' diri o tulun do napatai tu' nokoinum di waig dot opoit diri. 12 Om pounio' noddi di moloikat di kaapat i torumpit dau. Om kobobog no o sompitolu di tadau, om sompitolu di tulan, om sompitolu di rombituon gisom do katanus nopo o sompitolu do katarango' di tanawau diyolo'. Om a' diri anawau no o sompitolu do dangadau om odondom tomod o kotuongo' do sompitolu do dongotuong. 13 Om ontong oku no, om korongou ku no ot iso' o kondiu di mintulud do hilo'd sawat do mimboros dot opuhod do poingkaa, “Obungou no! Obungou no! Obungou no o koinsanai'd tulun do hiti'd pomogunan dot orongou i tolu kawagu o moloikat do popouni di torumpit diyolo' do tiinu'!” ka.
1 Om pounio' noddi di moloikat di kolimo i torumpit dau, om kokito ku no ot iso' o rombituon do naratu' do mantad hilo'd tawan om nokosondot diri do hiti'd pomogunan. Om iri nopo rombituon diri nga' nonuan do kunsi' di luang do kapatayon. 2 Om ukabai noddi di rombituon i luang do kapatayon diri, om soliwan no o lisun do mantad hiri do miagal do lisun do mantad id podsiduan dit agayo. Om kotuong nopo o tadau om tawan do noluhungan di lisun do mantad id luang diri. 3 Om soliwan noddi o godu dit ogumu' do mantad id lisun diri om sondot no do hiti'd pomogunan. Om iri nopo godu diri om nonuan i' do kuasa' do miagal di tompoluluhu. 4 Om noduhan i godu'ddi do mamaraag do sakot om i kokoyuan, om i totonomon do suwai. Suwai ko' iri no i tulun dit aiso' o saap do Kinorohingan dot id turos diyolo' o koino-ino di godu do saapon. 5 A' i' i godu diri pinabanar do mamatai di tulun diri, suwai ko' pinabanar no iyolo' do monginggorit diyolo' do solinaid do limo o tulan. Om koruolo' nopo di ponginggorit di godu'ddi om iyo di koruolo' dot okokot do tompoluluhu. 6 Om solinaid nopo di limo o tulan diri, om tumotos tomod daa i tulun diri do mokipapatai, nga' a' i' iyolo' apatai; om orohian daa iyolo'd matai nga' osodu' i' do mantad id diyolo' o kapatayon. 7 Iri nopo i godu'ddi om koiyo-iyo do kuda' di nokosodia' no do mongoi sangod o kokitanan. Om hiri nopod tulu di godu diri om haro o koiyo-iyo do tupi' di don raja' di tamas do winonsoi. Om rabas nopo diyolo' om miagal do rabas do tulun. 8 Tobuk nopo diyolo' om miagal do tobuk do tondu', om nipon no diyolo' om miagal do nipon do singa. 9 Kangkab nopo diyolo' om linakapan do miagal-agal do rasuk do basi' do winonsoi. Om tuni di talad diyolo' nga' iyo pod kurubut do korita'-kuda' dit ogumu' di maso do kumaa dot id pisangadan. 10 Om kitikiu om kisingot i godu diri do miagal do don tompoluluhu. Om hiri nod tikiu diyolo' o tadon di kinoris diyolo' do monginggorit do tulun do solinaid do limo o tulan. 11 Om kiraja' iyolo' do momorinta' diyolo', om iri nopo i raja'ddi om i moloikat di mongilo-ilo di luang do kapatayon. Ngaran nopo di moloikat diri dot id suang do boros dot Ibrani om Abadon; om ngaran no dot id suang do boros do Yunani om Apolion (do komoyon nopo om “Gampamaraag”.) 12 Nakatalib no i koinggoritan dit id gulu. Om sumusuhut nopondoddi om duwo po o koinggoritan. 13 Om pounio' no di moloikat di koonom i torumpit dau. Om korongou ku no o boros do mantad id apat o sunduk di pananaraban do porsombahan, i tamas do winonsoi, it id dotimbabaan do Kinorohingan. 14 Om boros ka di minoro-boros diri dot id moloikat di koonom diri, “Poiduwo' no it apat o moloikat di kinagasan diri di hilo'd Bawang dot Iprat!” ka. 15 Om poiduwo' noddi it apat o moloikat diri. Om nokosodia' no iyolo' do bagi'd jam, om tadau, om tulan om toun diri do mamatai do sompitolu do koinsanai'd tulun. 16 Om sinunudan oku do kogumuon nopo do koinsanai di soudor dot ongkikuda' diri om duwo nahatus juta'. 17 Om kokito ku no i kuda'ddi om i songinsakai di kuda' dot id suang do pinointalang. Om iri nopo i songinsakai di kuda'ddi nga' ongkirasuk do basi' do winonsoi dot osindak o karagango', om otomou do miagal di watu do roitan do nilam, om osilou do miagal do tana' di kitapui. Iri nopo tulu di kuda'ddi om koiyo-iyo do tulu do singa, om haro o tapui, om lisun, om tana' do kitapui do sumoliwan do mantad id kabang di kuda'ddi. 18 Om kapatai nopo o sompitolu do tulun do noontok di tolu o monginggorit diri; iri no i tapui, om i lisun om i tana' do kitapui do sumoliwan do mantad id kabang di kuda'ddi. 19 Tadon nopo di kinoris di kuda'ddi om hiri'd kabang om hiri'd tikiu diyolo'. Iri no tikiu di kuda'ddi om koiyo-iyo do tulanut om kitulu. Om iri no i tikiu di kuda'ddi o ponginggorit diyolo' do tulun. 20 Nga' iri piya i tulun di noolu-olu', it a' napatai di piro-piro o koinggoritan diri, nga' a' i' tuminongkiad di wowonsoyon diyolo'. A' i' iyolo' tumingkod do tumuku' dot id rusod dot araat, om id tingolig di winonsoi do mantad id tamas, om pirok, om tambaga', om watu, om kayu, it a' i' kokito om a' korongou, om a' milo do mamanau. 21 Om a' diyolo' tiningkadan i wowonsoyon diyolo' dit araat, iri no tu' mamatai'd tulun, om momirusapan, om magampahu' om manakau.
I Moloikat om i Buuk dot Okooro' di Linopi
1 Om kokito ku noddi ot iso' o moloikat do suwai dit okoris, do luminintuhun do mantad hilo'd surga. Iyau nopoddi nga' nokulumutan do haun, om haro o buluntung do pointutuk do tulu dau. Rabas nopo dau om mogulinau tomod dot iyo po do tapui di poorigi. 2 Om poingigit nopo dau om buuk dot okooro' di linopi, di poungkaya' no. Gakod nopo dau'd wanan om poingulok dot id rahat, om gakod no dau'd gibang om poingulok dot id katanaan. 3 Om pomoros no iyau dot opuhod do miagal do singa di mamagarom. Om kopomoros po i moloikat diri, om simbar ngai' nopo i turu' o tinggoron dot ongorod nopo do suminimbar. 4 Om koboros ngai' po i turu' o tinggoron diri, om tulison ku no daa'ddi iri, nga' korongou ku no o boros do mantad hilo'd surga do poingkaa, “Kada' popimboroso' dot id tulun do suwai i pinoboros di turu' o tinggoron diri; kada' tuliso' iri!” ka. 5 Om kokito ku noddi i moloikat di poingulok dot id rahat om poingulok dot id katanaan do pinopobilid do longon dau'd wanan do hilo'd tawan. 6 Om sumpa' no iyau dot id suang do ngaran do Kinorohingan di poimpasi do gisom do poingompus, i minomonsoi do tawan, om pomogunan om rahat om koinsanai do nunu nopo di poingiyon do hilo'. Boros ka di moloikat diri, “A' no poloidon kawagu i maso!” ka. 7 “Nga' tontok do pounion kawagu di moloikat di koturu' i torumpit dau, om wonsoyon nondod Kinorohingan i natantu' mantad dau do wonsoyon dau, do miagal di nokosunud dau dot id piro-piro o susuhuon dau, iri no i piro-piro o nabi,” ka dau. 8 Om boro-boros po kawagu doho' i minoro-boros do norongou ku do mantad hilo'd surga. Boros ka dau, “Ngoyo' onuo' i buuk di linopi di noungkayaan no do mantad id longon di moloikat di poingulok dot id rahat om id katanaan diri,” ka. 9 Om ongoi oku noddi rapou di moloikat diri om pokionuo' ku no i buuk dot okooro' di linopi diri. Om boros ka dau, “Ngoyo' nopoti, om akanon no. Mumang indo poit iti do hino'd tian nu, nga' oomis po do miagal do paha' do hino pod kabang nu,” ka dau. 10 Om ngoyo' ku no i buuk dot okooro' di linopi diri do mantad id longon dau om akano' ku nori. Om iyo pod paha' o kaakanan diri, nga' kotolon ku noddi, om poit noddi iri do nokosondot dot id tian ku. 11 Om suhuo' oku noddi do poingkaa, “Mositi' no do popinsusuyon nu kawagu i boros do Kinorohingan do pasal do koinsanai'd bansa'd tulun, om pomogunan, om bansa'd boros, om raja',” ka.
Duwo o Tulun do Sasi'
1 Om onuwai oku noddi do sallangod o kayu di koiyo-iyo do kayu di poninipong. Om suhuo' oku no do poingkaa, “Ngoyo' tipongo' i Walai'd Sasambayangan dot Agayo om i pananaraban do porsombahan. Om intobon no ondung piro o tulun di sumambayang do hiri. 2 Nga' kada' tipongo' i piro-piro o bilik do ponong id soliwan di Walai'd Sasambayangan dot Agayo, tu' iri nopo kinoiyonon diri om nakatahak no dot id tulun dit a' kotutun do Tuhan. Om piulok-ulok pondo diyolo' i bandar dot olidang diri do solinaid dot apat nohopod om duwo o tulan. 3 Om suhuon ku nondo o duwo tulun do sasi' ku do manampakai do pakayan do dong mogigihad, om popinsusui nondo iyolo' di boros do Kinorohingan do solinaid do 1,260 o tadau,” ka dau. 4 Iri nopo duwo o sasi' diri om duwo o guas do saitun om duwo o potimpakan do lampung di hiri'd dotimbabaan do Tuhan do koinsanai'dti pomogunan. 5 Ondung haro o tulun do mumbal do momonsoi dit a' osonong dot id diyolo', om sumoliwan nondo o tapui do mantad id kabang diyolo' do mamatai ngai' di pisangod diyolo'. Om iyo noddi dot oinsanan nopondo i tulun di mumbal do pokoruol diyolo' dot angapatai. 6 Om haro o kuasa' diyolo' do monompon do tawan om a' indo poposondot do rasam do solinaid diyolo' do popinsusui di habar do mantad id Kinorohingan. Om kikuasa' nogi' iyolo' dot id sawat do koinsanai'd tudan do waig, do poposiliu di waig do raha'. Om kikuasa' iyolo' do poporikot do mogisuayan o koinggoritan dit awagat kopio do hiti'd pomogunan, do soira-ira' nopo dot orohian iyolo' do momonsoi'ddi. 7 Om kopongo pondo iyolo' do popinsusui di habar diyolo'ddi, om saapon nondo iyolo' di nintorusan do sumoliwan do mantad hiri'd luang do kapatayon. 8 Om poingiliu pondo o rata' diyolo' do hiri'd talun-alun di bandar dot agayo, i pinosoliban di Tuhan diyolo'. Pongundadait nopo do bandar diri om Sodom ko' Masir. 9 Om oinsanan nopondo o tulun do mantad id koinsanai'd pomogunan, om payat, om bansa'd boros, om bansa'd tulun do kokito di rata' diyolo' do solinaid do tolu o tadau om satanga', om a' kabanar do momolobong di rata' diri. 10 Om ongotood nopondo i tulun do hiti'd pomogunan do napatai i duwo o sasi' diri. Om ramayon nondo diyolo' iri om mogitahak-tahak iyolo' do nipuhawang, tu' pinoporikot i' i duwo o nabi dot ogumu' o koinggoritan dot id koinsanai'd tulun do hiti'd pomogunan. 11 Om katalib poddi o tolu o tadau om satanga', om korikot no i pinuhobo do kapasi do mantad id Kinorohingan do suminuang kawagu dot id duwo o nabi diri. Om ingkakat noddi iyolo', gisom do nongooris tomod o koinsanai'd tulun di nokokito diyolo'. 12 Om korongou noddi i duwo o nabi diri do boros dot opuhod do minomolohou diyolo' do mantad hilo'd surga do poingkaa, “Kainou, insawat kou do hiti!” ka. Om insawat noddi iyolo' do hilo'd surga do nokulumutan do haun dot antang-antangan di piro-piro o pisangod diyolo'. 13 Om tontok noddi do guminuyu' o tana' dot opuhod kopio. Om karaag nopo o sompihopod di bandar diri, om turu' noribu o tulun do napatai do noontok di guminuyu' o tana'. Om kongooris tomod noddi i tulun do suwai. Om royoho' no diyolo' o kogoyoo' do Kinorohingan di hilo'd surga. 14 Om nakatalib noddi i koinggoritan di koduwo. Nga' ontong pogi'! A' no alaid om sumusuhut no i koinggoritan di kotolu.
Torumpit di Koturu'
15 Om pounio' no di moloikat di koturu' i torumpit dau, om haro'ddi o mimboros dot opuhod kopio do norongou do mantad hilo'd surga, do mimboros do poingkaa, “Kuasa' nopo do momorinta' do pomogunan do baino' om id suang no do longon do Tuhan toko' om i Raja' do Gampamasi di pinabatos dau. Om iyau no o momorinta' do gisom do poingompus!” ka. 16 Om otud ngai' nopo do tuminuku' dot id Kinorohingan i duwo nohopod om apat o boyoon di poirikau do hiri'd tirikohonon diyolo' di don raja', dot id toguang do Kinorohingan. 17 Boros ka diyolo', “Oi Tuhan, i Kinorohingan dit Agayo Kopio o Kuasa', i hino do dinondo, om i hino mantad! Mongunsikou iyahai diya' tu' pinakai nu no i kuasa' nu dit agayo kopio, om nokotimpuun ko no do momorinta'! 18 Iri nopo i tulun dit a' kotutun do Tuhan, om ongotogod poo tu' norikot noddi i maso do kopourobusan nu do kototogod nu, om norikot o maso nu do momutus do koinsanai'd tulun di nangapatai. Iti no o maso do koponomulian ngai' di susuhuon nu, iri no i piro-piro o nabi, om koponomulian do koinsanai di tulun do songonuon nu, iri ngai' no i tulun di sumambayang dot id diya', dot it angagayo om it ongokoro'. Iti no o maso do kapamatayan di tulun di minamaraag diti pomogunan!” ka. 19 Om koiwang noddi i Walai'd Sasambayangan dot Agayo do hilo'd surga, om kokito no i Kaban do Tumpongo do hiri'd suang. Om haro'ddi o kodumaat dot a' nopo otingkod-tingkod do mingkalab om ongorod o tinggoron om gumogor om gumuyu' o tana', om haro o rasam dot ais dit asapou tomod.
I Tondu' om i Naga'
1 Om haro'ddi o nokito do hilo'd tawan di kosuayan kopio om i suwai-suwai kopio. Haro o songulun o tondu' do pakayan nopo dau om ilo tadau om poingkakat iyau do hilo'd tulan. Om haro o tupi' dau di don raja' do pointupi' dau, om iri nopo tupi'ddi om rombituon i' do hopod om duwo. 2 Iri nopo tondu'ddi om monontian, om minggiak poo iyau dot orurualan tu' oruhai no o kosusuan dau. 3 Om haro po i kosuayan kopio do nokito do hilo'd tawan. Haro o songinan o naga' dot aragang dit agayo kopio do turu' o tulu om hopod o sungu. Om kitupi' ngai' nopo di don raja' o pointikid-tikid di tulu dau. 4 Om gayato' nopo di tikiu dau o sompitolu di rombituon do hilo'd tawan om pataamo' no dau do hiti'd pomogunan. Om ingkakat no i naga'ddi dot id toguang di tondu' di monohoruol nod mogkosusu do mongoi daa ponolon do tanak di tondu'ddi do kasawa' i tanak. 5 Om kosusu noddi i tondu'ddi dot iso' o tanak do kusai, i momorinta' do koinsanai'd bansa' do sukud do basi' ot igitan do momorinta'. Nga' nahau i' i tanak diri do mantad id tondu'ddi, om pokoyoo' noddi i tanak diri dot id Kinorohingan om pinotimbaba' di tirikohonon dau do momorinta'. 6 Om poggidu' noddi i tondu'ddi do hilo'd tana' do kowotuan, i tiyonon di nokosodia' mantad nod Kinorohingan do tiyonon di tondu'ddi. Om hiri no iyau do gompion do solinaid do 1,260 o tadau do koloido'. 7 Om haro'ddi o pisangadan do hilo'd surga. Om monokisangod i Mikail om i piro-piro i moloikat dau do sumaap di naga'ddi. Om iri naga' nga' sumaap i' di Mikail, om uhupan i naga' di piro-piro o moloikat dau. 8 Nga' naala' iddi i naga'ddi. Om a' noddi iyau om i piro-piro o moloikat dau pabanaron do miyon do hilo'd surga. 9 Om pataamo' no do hiri'd soliwan i naga' dit agayo'ddi! Iyau no i tulanut di gulu poddi, i roitan do Rogon ko' Rusod dot Araat, i monipu' dot id pointongkop do pomogunan. Om pinataam iyau do hiti'd pomogunan do mitonggoi do koinsanai di moloikat dau. 10 Om korongou ku noddi o boros dot opuhod do hilo'd surga do minoro-boros do poingkaa, “Dinondo no i maso do posion do Kinorohingan i tulun di songonuon dau! Dinondo no do pointalangon do Kinorohingan i kuasa' dau di don Raja'! Om dinondo no i Raja' do Gampamasi, i pinabatos diri do pointalang do kuasa' dau! Tu' nokosoliwan no do mantad hilo'd surga i papasala' di piro-piro o tobpinai toko' do tadau om totuong dot id toguang do Kinorohingan. 11 Naala' no iyau di piro-piro o tobpinai toko' dot i raha' di Tanak do Dumba' om i habar do katapatan do mantad id Kinorohingan di popinsusuyon diyolo' o pinangala'. Om agaan i' o ginawo diyolo' do pinapatahak do koposion diyolo' do gisom do napatai. 12 Iyo nopoddi, om mositi' no dot otood o hilo'd surga om koinsanai di poingiyon do hilo'! Nga' obungou no o pomogunan om rahat, tu' nokolintuhun no i Rogon do hilo' do mikuwo'd a' ogina-gina' o kototogod, tu' oilaan no dau dot a' no alaid o maso dau,” ka. 13 Tontok di noilaan di naga' do nakataam iyau do hiti'd pomogunan, om timpuun no iyau do momogusa' di tondu' di minogkosusu di tanak do kusai'ddi. 14 Nga' nonuan i' i tondu' do duwo o talad do kondiu dit agayo, om kotulud i' iyau do kumaa do hiri'd tiyonon dau di hilo'd tana' do kowotuan, om ogompi' i' iyau do solinaid do tolu o toun om satanga', om a' orikot di naga' do sumaap. 15 Om polobputo' no di naga' o waig dot agayo dot id tondu'ddi, do momorulun daa di tondu'. 16 Nga' nuhupan i' diti pomogunan i tondu'ddi; potungkabango' nopo diti pomogunan o kabang dau om tolono' ngai' no i waig di mantad id kabang di naga'ddi. 17 Om kotogod tomod noddi di tondu' i naga', gisom do nongoi dau saapo' i sinakagon do suwai di tondu'ddi, iri ngai' no i tulun di mumboyo' do koinsanai di ponuhuan do Kinorohingan, om i papasasi' do pasal di Yesus om i kuasa' dau. 18 Om ongoi noddi i naga' ingkakat do hiri'd tisan do rahat.
Duwo o Nintorusan
1 Om kokito ku noddi ot iso' o nintorusan do minimbulai do mantad hilo'd saalom do rahat. Om hopod o sungu di nintorusan diri om turu' o tulu dau. Om otikid nopo do tupi' di don raja' i sungu dau, om notulisan o pointikid-tikid di tulu dau dot iso' o ngaran do pongindaraat do Kinorohingan. 2 Iri nopo nintorusan di nokito ku'ddi om koiyo-iyo'd tontokinon o kokitanan, om gakod no dau om iyo di gakod do bohuang, om kabang no dau om iyo di kabang do singa. Om onuwai no di naga' i nintorusan diri do kinoris dau, om tirikohonon di don raja', om nonuan dau di kuasa' dau dot agayo. 3 Iri nopo tiso' di turu' o tulu di nintorusan diri nga' iyo di nadalaan do nosuhat o kokitanan, nga' nolingos no i suhat diri. Om oinsanan nopo i hiti'd pomogunan do minoyo' di nintorusan diri do mikuwo'd oimayaan tomod. 4 Om royohon tomod diyolo' i naga' diri tu' nakatahak no di naga' di nintorusan i kuasa' dau. Om royohon diyolo' i nintorusan diri. Boros ka diyolo', “Aiso' no o koiyo do nintorusan diti! Aiso' no o kasaap do sumangod dau!” ka no diyolo'. 5 Om pinotumboyo' i' i nintorusan diri do mimboros di popoinggayo-gayo tomod do dau'd tinan om i mongindaraat do Kinorohingan. Om pinabanar iyau do momorinta' do solinaid dot apat nohopod om duwo o tulan. 6 Om timpuun noddi i nintorusan diri do mongindaraat do ngaran do Kinorohingan. Om i tiyonon do Kinorohingan om koinsanai di poingiyon do hilo'd surga nga' nindaraat i' dau. 7 Om pinabanar iyau do sumaap di tulun di songonuon do Kinorohingan om mangala' diyolo'. Om pinatahak dot id dau o kuasa' dot id sawat do koinsanai di payat, om pomogunan, om bansa'd boros, om bansa'd tulun. 8 Om oinsanan nopondo o tulun di hiti'd pomogunan do tumuku' dot id nintorusan diri, nga' a' indo tumuku' i tulun di nokotulis mantad o ngaran dit a' po nowonsoi iti pomogunan, dot id suang di buuk di tulun di napasi, i songonuon di Tanak do Dumba' di nosumbali'. 9 Iyo nopoddi, om ondung korongou kou, om pokinongohon no kopio dokoyu iti habar diti, 10 “Tulun nopo dit a' no milo dot a' tanggayan do pisangod, om atantu' no dot atanggayan. Om iri tulun dit a' no milo dot a' patayon do gayang o pamatai nga' atantu' nod patayon do gayang. Om iri no o kokuwaan do mositi' no dot alanut o ginawo om otorodok i tulun do songonuon do Kinorohingan,” ka. 11 Om kokito ku no kawagu o nintorusan do suwai do minimbulai do mantad id saalom diti tana'. Iri nopo om kisungu do duwo do miagal do sungu do tanak do dumba'. Om tuni no dau om iyo di tuni do naga'. 12 Om pinakai i' dau i kuasa' dit agayo kopio, i naanu dau do mantad id nintorusan di koiso' iddi, dot id toguang di nintorusan diri. Om oinsanan nopo o pomogunan om koinsanai di poingiyon do hiti'd pomogunan do sinansagan dau do tumuku' dot id nintorusan di koiso' iddi, i nolingos no i nadalaan do nosuhat. 13 Iri nopo nintorusan di koduwo'ddi om mingwonsoi do piro-piro o koimayaan kopio. Om polintuhun nopo iyau do tapui do hiti'd pomogunan do mantad hilo'd tawan dot id toguang do koinsanai'd tulun. 14 Om tipuon ngai' nopo dau o tulun di poingiyon do hiti'd pomogunan dot i piro-piro o koimayaan di wonsoyon dau dot id toguang di nintorusan di koiso' i' o ponipu' dau. Om suhuo' ngai' nopo dau iyolo' do momonsoi dot iso' o tininganak do poiyoon di nintorusan di nosuhat do gayang, nga' i poimpasi i' kasai'. 15 Om iri nopo nintorusan di koduwo'ddi nga' pinabanar do manahak do pinuhobo dot id tininganak diri, do gisom do milo diri i tininganak do moro-boros om milo do mamatai do koinsanai'd tulun dit a' tumuku' dot id dau. 16 Om oinsanan nopo o tulun, dot it angagayo, om it ongokoro', om i kaya' om i mosikin, om i turipon om it okon ko' turipon, do sinansagan di nintorusan diri do tandaan ot id longon diyolo'd wanan ko' id turos diyolo'. 17 Aiso' no o tiso' pod tulun do milo do momoli ko' padagang po do nunu nopo, ondung a' iyau natandaan do tanda'ddi, iri no i ngaran di nintorusan diri, ko' iri po i numbur di popointalang do ngaran diri o pinananda'. 18 Apatut i' kopio do haro o toilaan do pasal diti. Tulun nopo di kitoilaan om milo i' do mongilo do komoyon do numbur di nintorusan diri, tu' iri nopo numbur diri om ngaran i' dot iso' o tulun. Iri nopo numbur diri om 666.
I Tanak do Dumba' om i Tulun do Songonuon Dau
1 Om ontong oku noddi, om kokito ku no i Tanak do Dumba' diri do poingkakat dot id timpak di Nulu-Nulu do Sion. Om poinsugku' dau o 144,000 o tulun di notulisan do ngaran dau om i ngaran do Tapa' dau ot id turos diyolo'. 2 Om korongou ku noddi o tuni do mantad hilo'd tawan dot akahas po do miagal di wasai dit agayo om miagal do ngorod do tinggoron dit opuhod. Karangahan nopod tuni diri nga' iyo di tuni do kecapi do pounion di tulun di popouni. 3 Om hiri nod toguang di tirikohonon do don raja' om id toguang dit apat o kipinuhobo om i piro-piro o boyoon di pointutuk di tirikohonon di don raja' i 144,000 o tulun diri do modsinding dot iso' o sinding do wagu. Om iri nopo sinding diri om a' i' milo do pinsingilaan dot ongoiso' piya o tulun do suwai ko' i 144,000 o tulun diri, i nokosoliwan do mantad hiti'd pomogunan. 4 Iri nopo tulun diri nga' a' i' nososomu', tu' a' i' iyolo' nokoumbal do dumidudun do tondu'. Om moyo-woyo' nopo iyolo' di Tanak do Dumba'ddi do honggo nopo o ngoyon dau. Om id pogialatan nopo do toinsanan o tulun, om iyolo' no i pinoidu' do siniliu'd porsombahan dit id gulu kopio dot id Kinorohingan om id Tanak do Dumba'. 5 A' i' iyolo' nokoumbal do mongudut; om aiso' i' o bohiton diyolo' dot ongokooro' piya.
Tolu o Moloikat
6 Om kokito ku noddi ot iso' kawagu o moloikat do mintulud do hilo'd sawat do hilo'd tawan. Iri nopo moloikat diri om minigit do habar do pasal di Habar dot Osonong di poingompus do polombuson dot id tulun do hiti'd pomogunan, dot id koinsanai'd bansa'd tulun, om payat, om bansa'd boros om pomogunan. 7 Om boro-boros no i moloikat diri dot opuhod do poingkaa, “Koronok kou nod Kinorohingan, om royohon no i kagayaan dau! Tu' norikot no o maso do kopomutusan do Kinorohingan do tulun. Tumuku' kou no dot id dau i minomonsoi'd tawan, om pomogunan, om rahat, om koinsanai'd tudan do waig!” ka. 8 Om susuhut no i moloikat di koduwo, di moloikat di koiso', om pomoros nod opuhod do poingkaa, “Naraag no! Naraag no i bandar do Babil dit agayo! Nawuk dau o koinsanai'd bansa' dot i waig dot anggur o pinangawuk dau --- iri no it anggur di korohiano' dau do magampahu'!” ka. 9 Om haro po o moloikat di kotolu do suminusuhut di duwo o moloikat diri, do mikuwo'd minomoros dot opuhod kopio do poingkaa, “Tulun nopo di tumuku' dot id nintorusan diri om id tininganak dau, om i kitanda' di tanda' do nintorusan diri dot id turos ko' id longon dau, 10 om koinum no o tulun diri dit anggur do Kinorohingan, iri no it anggur do kototogod dau di nokotungu no dau dot id sangkir dau, om a' i' ningkurian iri dot ongokooro' piya! Om oinsanan nopondo i tulun diri dot inggoriton dot id tapui om tana' di kitapui, dot id toguang di piro-piro o moloikat dit olidang om id toguang di Tanak do Dumba'ddi. 11 Om misun-lisun nopondo i tapui di ponginggorit do tulun diri do gisom do poingompus. Om aiso' nopo o koundarangan diyolo' dot oinggorit do tadau om totuong, iyolo' i tumuku' dot id nintorusan diri om id tininganak di nintorusan, iri no i koinsanai'd tulun di kitanda' do ngaran di nintorusan diri,” ka. 12 Om apatut no kopio dot alanut o ginawo di tulun do songonuon do Kinorohingan, i mumboyo' do koinsanai di ponuhuan do Kinorohingan, om it otorodok dot id di Yesus. 13 Om korongou oku noddi do boros do mantad hilo'd surga do minomoros do poingkaa, “Tuliso' no o poingkaa: Mantad pod baino', om ongolumaag no i tulun dit apatai do maso dau do momonsoi'd karaja' di don Tuhan!” ka. “Otopot i'!” ka di Rusod do Kinorohingan do suminimbar. “Tumingkod nondo iyolo' do kumaraja'd awagat, tu' moyo-woyo' kasai' indo diyolo' i tua' di karaja' diyolo',” ka dau.
Nomot Iti Pomogunan
14 Om ontong oku no, om kokito ku o haun dit opurak. Om hiri nopod sakai di haun diri nga' haro o poirikau do miagal-agal do tulun o kokitanan. Om haro o tupi' di don raja', do tamas do winonsoi do pointupi' dau, om poingigit dau ot iso' o gogorib dit atarom. 15 Om soliwan noddi ot iso' kawagu o moloikat do suwai do mantad hiri'd Walai'd Sasambayangan dot Agayo. Om pomoros no iyau dot opuhod dot i poirikau do hiri'd sakai di haun o binarasan do poingkaa, “Pogoribo' no ino gogorib nu om pongomot no do dinondo, tu' norikot no o maso do kapangamatan; noonsok no iti pomogunan, om milo nod omoton!” ka dau. 16 Om pogoribo' no di poirikau do hiri'd sakai di haun i gogorib dau do hiti'd pomogunan, om koomot noddi iti pomogunan. 17 Om kokito ku poddi ot iso' kawagu o moloikat do suwai do suminoliwan do mantad hiri'd Walai'd Sasambayangan dot Agayo di hilo'd surga. Om iyau nga' kiinigit i' dot iso' o gogorib dit atarom. 18 Om rikot noddi ot iso' kawagu o moloikat do suwai, i kikuasa' dot id sawat do tapui, do minongoi'd hiri'd pananaraban do porsombahan. Om pomoros no iyau dot opuhod dot i moloikat di kiinigit do gogorib dit atarom o binarasan do poingkaa, “Pogoribo' no ino gogorib nu do pongupu' di puru do tua' dot anggur do hilo'd pomogunan, tu' nongoonsok no i tua'!” ka dau. 19 Om pogoribo' no di moloikat i gogorib dau do hiti'd pomogunan om goribo' no dau i puru di tua' dot anggur di poingua' po, om pataamo' no do hiri'd pamagamasan do tua' dot anggur, iri no i kototogod do Kinorohingan dit a' ogina-gina'. 20 Om iri nopo tua' dit anggur diri nga' pinaga' do hiri'd soliwan di bandar, om iyo pod bawang o raha' do lumuyung do mantad id pamagamasan dot anggur diri, do tolu nahatus o kilomito do kosoduwo', om oruhai nod duwo o mito do korolomo'.
I Moloikat om i Ponginggorit di Kolimpupuson No
1 Om kokito ku noddi i kosuayan kopio om i suwai-suwai kopio o kokitanan do hilo'd tawan. Haro o turu' o moloikat do mitonggoi do turu' o ponginggorit di kolimpupuson no. Iti no o kolimpupuson kopio do Kinorohingan do popourabus do kototogod dau. 2 Om kokito ku noddi o miagal-agal do rahat do kasa' di mirolot do tapui o kokitanan. Om nokito ku nogi' o tulun di nakamanang no dot id sawat di nintorusan om i tininganak di nintorusan diri, om nakamanang iyolo' dot id sawat di tulun di numbur o pinananda' do ngaran. Om iri nopo i tulun di nakamanang diri om songingkakat do hiri'd tisan di rahat do kasa' om ongkiinigit iyolo' do kecapi di pinatahak do Kinorohingan dot id diyolo', 3 om modsinding iyolo' di sinding di Musa, i susuhuon do Kinorohingan diri om i sinding di Tanak do Dumba'. Poingkaa i sinding diri, “Oi Tuhan, i Kinorohingan dit Agayo Kopio o Kuasa', angagayo no kopio om koimayaan kopio i piningwonsoi nu! Oi Raja' do koinsanai'd bansa', otulid no kopio om otopot i winonsoi nu! 4 Isai po daa ot a' oronok diya', oi Tuhan? Isai po daa ot a' popinsusui di kogoyoo' nu? Iya' noo it olidang. Oinsanan nopondo o bansa' do rumikot do mongoi tuku' dot id diya' tu' nongokito ngai' nod tulun i winonsoi nu dit ongotulid,” ka. 5 Om kokito ku noddi i Walai'd Sasambayangan dot Agayo di hilo'd surga do noiwangan om hiri'd suang diri i Kiim do Tuhan. 6 Om soliwan noddi i turu' o moloikat do mitonggoi di turu' o ponginggorit diri do mantad hiri'd Walai'd Sasambayangan dot Agayo. Om pakayan nopo diyolo' nga' kain dot opurak dit opulang om okilat. Om kipinakai iyolo' do lokop do kangkab di tamas do winonsoi. 7 Om haro'ddi ot iso' dit apat o kipinuhobo'ddi do minanahak di turu' o moloikat diri do turu' o mangkuk do tamas, i noponu' do kototogod do Kinorohingan, --- i Kinorohingan di poimpasi do gisom do poingompus. 8 Om koponu' nopoddi do lisun do kagayaan om sinundu do Kinorohingan i Walai'd Sasambayangan dot Agayo'ddi. Om tontok nopo dit a' po nopupusan i turu' o ponginggorit diri, om aiso' i' o tiso' pod tulun do milo'd sumuang do hiri'd Walai'd Sasambayangan dot Agayo.
I Piro-Piro o Mangkuk do Kototogod do Kinorohingan
1 Om korongou ku noddi o boros dot opuhod do mantad hiri'd suang di Walai'd Sasambayangan dot Agayo do minomoros dot id turu' o moloikat diri do poingkaa, “Pamanau kou no om ngoyon i' potuntugo' i suang di turu' o mangkuk do kototogod do Kinorohingan diri do hilo'd pomogunan!” ka. 2 Om ngoyo' no di moloikat do koiso' potuntugo' i suang di mangkuk dau do hiti'd pomogunan. Om imbulai noddi o kupos dit araat kopio om it oruol kopio dot id tinan do koinsanai'd tulun di kitanda' do nintorusan diri, om id tulun di tumuku' dot id tininganak di nintorusan diri. 3 Om potuntugo' no di moloikat di koduwo i suang di mangkuk dau do hiri'd rahat. Om kosiliu noddi i waig do rahat do miagal di raha' do tulun do napatai, om kapatai ngai' nopoddi it ongkipinuhobo di poingiyon do hilo'd rahat. 4 Om potuntugo' no di moloikat di kotolu i suang di mangkuk dau dot id koinsanai'd bawang om tudan do waig, om kosiliu ngai' nopoddi do raha' i waig. 5 Om korongou ku no i moloikat di kikuasa' dot id sawat do waig do minomoros do poingkaa, “Otulid i' i pomohukum do pinaratu' nu, iya' it Olidang Kopio, i Kinorohingan di hino do dinondo, om i hino mantad! 6 Pinalawas diyolo' o raha' di tulun do songonuon do Kinorohingan om i raha' di piro-piro o nabi, om poinumo' nondo iyolo' do raha' do dinondo. Apatut no do wonsoyon o miagal diri dot id diyolo'!” ka dau. 7 Om korongou ku noddi o boros do mantad hiri'd pananaraban do porsombahan do poingkaa, “Oi Tuhan, i Kinorohingan dit Agayo Kopio o Kuasa', otopot no om otulid o koinsanai di pomohukum do porotuon nu!” ka dau. 8 Om potuntugo' noddi di moloikat di kaapat i suang di mangkuk dau dot id tadau, om pabanaro' noddi o tadau do monorob do tulun dot i kolosuo' dit a' ogina-gina' o ponorob. 9 Om osorob diri o tulun di kolosuo' di tadau, om pimpopol ngai' no iyolo' do ngaran do Kinorohingan, i kikuasa' dot id sawat di ponginggorit do miagal diri. Iyo piya'ddi, nga' a' i' iyolo' kumorologo do mantad id dusa diyolo' om a' mamarayou di kogoyoo' do Kinorohingan. 10 Om potuntugo' noddi di moloikat di kolimo o suang di mangkuk dau do hiri'd kurusi' do don raja' di nintorusan diri. Om kotuong nopoddi o pointongkop di pomorintaan di nintorusan diri, om kokoton pod tulun o dila' diyolo' dot orurualan. 11 Om pimpapalai noddi diyolo' o Kinorohingan di hilo'd surga tu' orurualan no iyolo' om kinuposon iyolo'. Nga' a' i' iyolo' kuminorologo do mantad id wowonsoyon diyolo' dit araat. 12 Om potuntugo' noddi di moloikat di koonom i suang di mangkuk dau do hiri'd Bawang dot Iprat dit agayo'ddi. Om karasak nopoddi i bawang diri gisom do milo'ddi i piro-piro o raja' do mantad hilo'd koulayon do mamanau do sumoborong di bawang diri. 13 Om kokito ku noddi o tolu o rusod dot araat do koiyo-iyo'd bonong. Om iri nopo bonong diri nga' suminoliwan do mantad id kabang di naga', om mantad id kabang di nintorusan, om mantad id kabang di nabi di goudut. 14 Iyolo' no i rusod dot araat di mingwonsoi di kongoimayaan. Om ongoi ngai' nopo i tolu o rusod diri dot id koinsanai di raja' do pointongkop do pomogunan do minonimung diyolo' do mongoi sangod do tontok di Tadau dot agayo, iri no i Tadau do Kinorohingan, it Agayo Kopio o Kuasa'. 15 “Pokinongou no! Rumikot oku nondo do miagal di tulun do manakau! Olumaag no i tulun di posodia' kasai' om i momogompi' do pakayan dau, gisom dot a' iyau poillabas do mamanau om a' ointingayam dot id toguang do tulun dot ogumu'!” ka. 16 Om timungo' noddi di rusod diri i piro-piro o raja'ddi dot id kinoiyonon di roitan do Harmagidon, dot id suang do boros dot Ibrani. 17 Om potuntugo' noddi di moloikat di koturu' i suang di mangkuk dau do hiri'd sawat. Om haro'ddi o norongou do boros dot opuhod do mantad hiri'd tirikohonon di don raja' do hiri'd Walai'd Sasambayangan dot Agayo, do minomoros do poingkaa, “Nopongo no!” ka. 18 Om a' nopoddi otingkod-tingkod o kodumaat do mingkalab om ongorod po om ongkogogor o ngorod do tinggoron, om guminuyu' o tana' dot opuhod tomod. Om a' po nokoumbal do nokoguyu' o tana' dot iyo kopio'ddi kopuhod do mantad di wonsoyo' i' o tulun. Diri no dot opuhod kopio o guyu' do tana'! 19 Om kopitolu nopo do nababak i bandar dit agayo'ddi, om karaag ngai' nopo i kabandaran do koinsanai'd pomogunan do hiti'd pomogunan. Om kosorou noddi do Kinorohingan o Babil dit agayo'ddi. Om poinumo' no iyau do mantad id sangkir dot anggur do Kinorohingan --- iri no it anggur di kototogod dau dit a' ogina-gina'. 20 Om katanus ngai' nopoddi o pulou, om natanus ngai' o nuluhon. 21 Om suminondot o rasam dot ais do mantad hilo'd tawan, do kawagato' nopo dot iso' di rasam dot ais om limo nohopod o kilogram. Om kongorotuwai nopo i tulun di rasam dot ais diri. Om pimpapalai no diyolo' o Kinorohingan, dot i rasam dot ais di koinggorit kopio o kinapamapalan.
I Sundal dit Abantug
1 Katalib noddi iri, om rikot no dot id doho' o tiso' di turu' o moloikat di kiinigit do turu' o mangkuk diri, om boro-boros nod, “Kaino, om pokitonon ku i' iya' ondung poingkuro i sundal dit abantug diri do hukuman, iri no i bandar dit agayo, i winonsoi dot id toning di kabawangan. 2 Monokiampahu' dau i piro-piro o raja' do pomogunan, om nangaawuk poo i tulun do hiti'd pomogunan do nokoinum dit anggur do tampahu' dau,” ka dau. 3 Om porintao' oku noddi di Rusod do Kinorohingan, om tanggayai oku no di moloikat do hilo'd tana' do kowotuan. Om hilo' no do nokito ku ot iso' o tondu' do poirikau dot id sakai dot iso' o nintorusan dit oitom o karagango', om i notongkop pod tulis do ngaran di pongindaraat do Kinorohingan. Om iri nopo nintorusan diri nga' turu' o tulu om hopod o sungu. 4 Iri nopo tondu'ddi om kirasuk dot oitom daragang-ragang om it oitom o karagango', om linumis di pongillumis do tamas do winonsoi, om watu dit agayo o gatang, om mutiara'. Om kiinigit iyau dot iso' o mangkuk do tamas di noponu' dit angaraat om i sosomu', i tua' di pagagampahu' dau. 5 Om notulisan dot iso' o ngaran o hiri'd turos dau, do komoyon nopo om a' i' pinatarang. Iri nopo ngaran diri om, “Babil dit Agayo, i tina' do koinsanai'd sundal om i tulun dot araat do hiti'd pomogunan,” ka. 6 Om kokito ku noddi do naawuk poo i tondu'ddi do raha' di tulun do songonuon do Kinorohingan om raha' di tulun di pinatai dot it otorodok iyolo' dot id di Yesus o kinapamatayan. Tontok di nokito ku i tondu'ddi, om kosuayai oku nopo kopio. 7 Om boros kaddi di moloikat dot id doho', “Nokuro tu' osuayan ko? Sunudan ku i' iya' do komoyon di tondu'ddi, om i nintorusan di sinakai dau, iri no i nintorusan di turu' o tulu, om hopod o sungu. 8 Iri nopo nintorusan diri om nokoumbal i' do poimpasi di gulu po, nga' baino' nopoddi om a' no poimpasi. A' no alaid om sumoliwan no iyau do mantad id luang do kapatayon om kumaa nondo iyau dot id kapatayon. Om iri nopo tulun di poingiyon do hiti'd pomogunan, it a' nokotulis o ngaran dot id suang do Buuk do Tulun di Napasi dit a' po nowonsoi iti pomogunan om osuayan nondo do kokito di nintorusan diri. Tu' nokoumbal i' do poimpasi i nintorusan diri di gulu po. Nga' baino' noddi om a' no poimpasi, nga' mimbulai indo kawagu. 9 Mositi' no do kitoilaan kopio om atarom o pomusarahan do mongilo do pasal diti. Iri nopo turu' o tulu diri om turu' o nulu-nulu; om iri no i nulu-nulu di nirikau di tondu'ddi. Om iri nopo turu' o tulu nga' turu' o raja'; 10 naala' no o limo diyolo', nga' maso po do momorinta' o tiso', om iri no tiso' om a' po nokorikot. 11 Om iri no nintorusan di nokoumbal do poimpasi di gulu po, nga' it a' noddi poimpasi do baino', om raja' di kawalu'. Om iyau nga' id pogialatan i' di turu' o raja'ddi, i maso no do kumaa dot id kapatayon do dinondo. 12 Iri nopo hopod o sungu di nokito nu'ddi om hopod o raja' dit a' po nokotimpuun do momorinta'. Nga' onuan indo iyolo' do kuasa' do momorinta' do miagal do raja' do miwoyo' di nintorusan diri do solinaid do sajaam. 13 Iso-iso' i' o pokiwawansayan di hopod o raja'ddi; patahako' ngai' nopo diyolo' o kinoris om kuasa' diyolo' dot id nintorusan diri. 14 Om sumangod nondo iyolo' do sumaap di Tanak do Dumba'ddi. Nga' alaon indo di Tanak do Dumba' om i piro-piro o tumatanud dau dit otorodok, i nongolohou om i nongopili' dau, i piro-piro o raja'ddi, tu' iyau no o Tuhan do koinsanai'd tuan, om iyau o Raja' do koinsanai'd raja',” ka dau. 15 Om boros ka kawagu di moloikat, “Iri nopo waig di nokito nu'ddi, i nirikau di tondu' do sundal diri, om iri no o piro-piro o bansa'd tulun, om rayat, om pomogunan, om bansa'd boros. 16 Iri nopo hopod o sungu di nokito nu'ddi om i nintorusan diri om araatan di tondu' do sundal. Om ahawon nondo diyolo' o koinsanai di songonuon di tondu' do sundal diri om labasan diyolo' iyau. Om akanon nondo diyolo' o tonsi dau om patayon diyolo' iyau do tapui o pamatai. 17 Tu' notingkau nod Kinorohingan o ginawo diyolo' do momonsoi di natantu' mantad do Kinorohingan do wonsoyon dau. Om pinogiiso' do Kinorohingan o ginawo diyolo' do papatahak do kuasa' diyolo' dot id nintorusan diri, om momorinta' indo i nintorusan diri, do gisom dot osiliu i pinoboros do Kinorohingan. 18 Iri nopo tondu' di nokito nu'ddi om iri no i bandar dot agayo, i momorinta' do koinsanai'd raja' do hiti'd pomogunan,” ka dau.
Naraag o Babil
1 Om kokito oku noddi dot iso' kawagu o moloikat do luminintuhun do mantad hilo'd surga. Om agayo kopio o kuasa' dau, om anawau nopo o pointongkop diti pomogunan dot otitihan di kolumiso' dau. 2 Om pomoros no iyau dot opuhod do poingkaa, “Naraag no! Naraag no o Babil dit agayo! Nosiliu noddi iyau do tiyonon do rogon om rusod dot araat do baino'. Om hilo' no o tiyonon do mogisuayan o tombolog di sosomu' om i karaatan do tulun. 3 Tu' nokoinum ngai' no o bansa' dit anggur do korohiano' dau do magampahu'. Monokiampahu' ngai' dau o raja' do hiti'd pomogunan, om nangkakaya' i piro-piro o mongingindapu' do hiti'd pomogunan dot i korohian do tinan dau dit a' opusus-pusus o pinapakaya',” ka dau. 4 Om korongou ku no o boros do suwai do mantad hilo'd surga do minomoros do poingkaa, “Soliwan no, oi tulun di songonuon ku! Soliwan kou no do mantad id dau! Kada' kou tanud di dusa dau, kada' kou hompit dot id pomohukum dau! 5 Tu' nountun tomod no o dusa dau do gisom do nokorikot do hilo'd tawan, om osorou do Kinorohingan i kararaat dau. 6 Wonsoyon nopo dokoyu dot id dau o miagal di winonsoi dau dot id dokoyu; sulian no iyau dot induwo kogumu' ko' mantad do koinsanai di winonsoi dau. Suangan no i mangkuk dau do tinumon dot induwo kopiluap o kopoito' ko' mantad di tiinumon di pinosodia' do poinuman dokoyu. 7 Onuan no iyau do koinggoritan om koudipanan dot irad di kagayaan om kakayaan di nanu dau do maan do dau'd songonuon. Tu' asaru' nopo iyau do momoros dot iyau o komoyon do poingkaa, ‘Iyoho' no o raja'd tondu' di momorinta'! Okon oku i' ko' tondu' di nopuadan; a' oku i' kopuriman do tumongob!’ ka no dau. 8 Om iri no o kokuwaan dot insan no o tadau om oontok no iyau do kosusaan dit agayo, --- toruol, katangaban, om kolousanan. Om sorobon nondo iyau do tapui, tu' kikuasa' i' o Tuhan i Kinorohingan, i momutus dau,” ka. 9 Iri nopondo raja' do pomogunan di tuminanud di tampahu' di tondu'ddi om i tuminanud di korohian di tondu'ddi di don tinan, om mihad pondo iyolo' do mogihad di bandar diri dot okito diyolo' i lisun do tapui di monorob do bandar diri. 10 Om mingkakat nondo iyolo' do hiri'd sodu' tu' moddosi iyolo' dot oontok di koinggoritan dau. Boros ka no diyolo', “Atuukoi, a' no kopio ogina-gina' o kosusaan do nokoontok diti bandar dot abantug diti --- i bandar do Babil dit ogirot! Sajaam noo om ohukuman ko no!” ka no diyolo'. 11 Om iri mongingindapu' do hiti'd pomogunan nga' mihad nondo om mogihad di tondu'ddi, tu' aiso' no o tiso' pod tulun do mongoi pomoli di dapu' do dagangon diyolo'. 12 Aiso' no o momoli do tamas, om pirok, om watu dit agayo o gatang, om i mutiara' diyolo'; om i kain dot opurak, om i kain dot oitom daragang-ragang, om i sutara', om i kain dot oitom o karagango'; om mogisuayan nopo o kayu dit ingkuuri' dot aanu, om i kayu dot agayo o gatang do winonsoi, om tambaga', om basi', om marmar; 13 om i kulit do kayu manis, om i rampa, om i setanggi, om mur, om kominyan, om anggur om tumau, om tapung om gandum, om sapi' om dumba', om kuda' om korita'-kuda', om turipon, om iri piya ginawo do tulun. 14 Om boros ka di piro-piro i mongingindapu' dot id tondu'ddi, “Aiso' noddi i kakayaan nu, om i kolumiso' nu nga' natanus no. Om a' nu no okito kawagu iri!” ka. 15 Om iri mongingindapu' di nakakaya' do mantad id dumagang-dagang dot id bandar diri nga' hiri'd sodu' ot ingkokoton, tu' ooris iyolo' dot oontok di koinggoritan dau. Om mihad nondo iyolo' do mogihad, 16 om momoros nondo iyolo' do poingkaa, “Atuukoi, araat no kopio o nokoontok diti bandar dot abantug! Koubasanan nopo dau do manampakai om kain dit opurak, om it oitom daragang-ragang om it oitom o karagango'; om koubasanan no dot otongkop iyau do pongillumis di tamas do winonsoi, om watu dit agayo o gatang, om mutiara'! 17 Nga' sajaam noo om katagakai no iyau do koinsanai di kakayaan dau'ddi!” ka diyolo'. Om hiri ngai' nopod sodu' do songingkakat i kopitan do kapal do rahat, om i tulun di sumakai, om i papamanau do kapal do rahat, om koinsanai di tulun di hilo'd rahat o pogihuman do kaakan-akanan. 18 Om momogiak nondo iyolo' dot okito diyolo' i lisun do minsawat do mantad id tapui di monorob do bandar diri. Om momoros iyolo' dot opuhod dot, “A' i' nokoumbal do haro o bandar do suwai do miagal do bandar diti tu' agayo!” ka. 19 Om popingarab iyolo' do pupuk dot id tulu diyolo' do tanda' do mogihad iyolo', om mingihad nondo iyolo' om minggiak dot, “Atuukoi, a' no kopio ogina-gina' o kosusaan do nokoontok do bandar dot agayo diti! Iri no i kakayaan do bandar diti o pinapakaya' do koinsanai'd tulun di kikapal do rahat! Nga' sajaam noo, om katagakai no iyau do koinsanai'ddi!” ka no diyolo'. 20 Oi surga, kotood no, tu' naraag no i bandar diri! Oi tulun di songonuon do Kinorohingan, om i rasul, om i nabi, kongotood kou no! Tu' nohukuman no iyau'd Kinorohingan do ponuli' di winonsoi dau dot id dokoyu! 21 Om katalib poddi iri, om haro o tiso' moloikat dit okoris do pinopobilid dot iso' o watu --- irad i' di watu do ponutuan dit agayo --- om pataamo' noddi dau iri do hilo'd rahat om boro-boros nod poingkaa, “Iyo nodti i bandar do Babil dit abantug diri do pataamon dot opuhod o podudumpau, gisom dot a' nondo okito kawagu. 22 A' nondo orongou do hino'd suang nu i tuni do kecapi do pounion di tulun di popouni, om i sinding di modsisinding, om i popouni do suling om i popouni do torumpit! Om aiso' o tiso' pod tukang dit oilo dot osolowot do hino, om i lobuk do watu di ponutuan nga' a' nondo orongou do hino. 23 Aiso' nondo o tinitiu do lampung dot okito'd tulun do hino'd suang nu; om aiso' o karamayan do poginakanan do pikowinan do hino. Iri nopo i mongingindapu' nu om iri no i tulun dit angabantug no kopio do hiti'd pomogunan, om akalan nu o koinsanai'd bansa' dot i toilaan nu do dong bobolian o pagakal nu!” ka dau. 24 Hinukuman pogi' o Babil nga' id suang no do bandar diri i raha' di piro-piro o nabi om i raha' di tulun di songonuon do Kinorohingan --- om i raha' do koinsanai'd tulun di pinatai do hiti'd pomogunan.
1 Om korongou ku noddi o miagal do gara' do tulun dot ogumu' do mantad hilo'd surga do mimboros dot opuhod do poingkaa, “Royohon no o Kinorohingan! Kinorohingan toko' nopo om Kinorohingan di mamasi; iyau no i Kinorohingan dit abantug om i kikuasa'! 2 Otulid i' om oilo o pomumutus dau! Nohukuman no dau i sundal dit abantug, i minamaraag diti pomogunan dot i kosusundal dau o pinamaraag. Nohukuman nod Kinorohingan i sundal diri, tu' minamatai i' iyau di piro-piro o susuhuon do Kinorohingan,” ka. 3 Om pomoros po kawagu dot opuhod i minoro-boros do miagal do gara' do tulun dot ogumu' diri do poingkaa, “Royohon no o Kinorohingan! A' nopondo tumingkod do minsawat i lisun do mantad id tapui di monorob do bandar dot agayo'ddi!” ka. 4 Om otud ngai' nopoddi i duwo nohopod om apat o boyoon om it apat o kipinuhobo di pointutuk di tirikohonon di don raja'ddi, om tuminuku' iyolo' dot id Kinorohingan, i poirikau do hiri'd tirikohonon di don raja'. Boros ka diyolo', “Amin! Royohon no o Kinorohingan!” ka.
Poginakanan do Pikowinan di Tanak do Dumba'
5 Om haro'ddi o norongou do boros do mantad id tirikohonon di don raja' do minomoros do poingkaa, “Royohon no o Kinorohingan, oi koinsanai dokoyu i susuhuon do Kinorohingan, om koinsanai'd tulun --- dot it angagayo om it ongokoro' --- di tumuku' dot id Kinorohingan!” ka. 6 Om korongou ku no o tuni do miagal do gara' do tulun dit ogumu' do pointimung; om iri nopo tuni diri nga' miagal do tumbak dit opuhod om miagal do ngorod do tinggoron. Om norongou ku iyolo' do mimboros do poingkaa, “Royohon no o Kinorohingan! Tu' momorinta' noddi do dinondo o Tuhan, i Kinorohingan toko' dit Agayo Kopio o Kuasa'. 7 Kumooropod toko' no om kumotood toko'; royoho' toko' no o kagayaan dau! Tu' norikot no i tadau do pikowinan di noonuan do pangkat do Tanak do Dumba', om nokosodia' no i kowinon dau dot id pikowinan diri. 8 Noonuan no iyau do kain linan do pakayon dau,” ka. (Iri nopo pakayan dot opurak diri om i wowonsoyon dot osonong do winonsoi di tulun do songonuon do Kinorohingan.) 9 Om boros kaddi di moloikat dot id doho', “Tuliso' noti, ‘Olumaag no i tulun di naalap dot id poginakanan do pikowinan di Tanak do Dumba'ddi,’ ka,” ka dau. Om boros ka kawagu di moloikat, “Iti no i habar dot otopot do mantad id Kinorohingan,” ka. 10 Om otud oku no dot id toguang di moloikat diri do tumuku' daa dot id dau, nga' boros ka dau dot id doho', “Kada'! Kada' tuku' dot id doho'; suwai ko' tuku' nogi' dot id Kinorohingan! Tu' iyoho' nga' susuhuon noo do miagal diya' om miagal do koinsanai di tobpinai nu dit ogirot kopio dot otumbayaan di kososian di Yesus!” ka dau. Tu' iri no i kososian di Yesus diri o manahak do toilaan dot id tulun di popoboros mantad dit osiliu do koimbagu.
I Poinsakai di Kuda' dot Opurak
11 Om kokito ku noddi o surga do noiwang, om kokito ku no o songinan o kuda' dit opurak. Om ngaran nopo di poinsakai'ddi om Iyau it Otorodok om Iyau it Otopot. Om otulid i' o pomumutus dau do tontok do momohukum iyau om otulid i' dot id pisangadan di songodon dau. 12 Mato nopo dau om iyo pod binuhang do tapui om ogumu' o tupi' di don raja' do pointupi' dau. Om haro ot iso' o ngaran do pointulis dot id tinan dau; om iyau noo o koilo do ngaran diri. 13 Iri nopo rasuk do poimpakai dau om nakatabung do raha'. Om roitan iyau do “Boros do Kinorohingan”. 14 Om moyo-woyo' dau i piro-piro o soudor do surga do songinsakai'd kuda' dit ongopurak, om ongkipakayan do kain linan dit opulang o kopurako'. 15 Om haro o gayang dot atarom do sumoliwan do mantad id kabang dau, om iri no i gayang diri o pangala' dau do koinsanai'd bansa', om iyau nondo o momorinta' diyolo' do sukud do basi' ot igitan do momorinta'. Om mamaga' nondo iyau dot anggur do hiri'd pamagaan dit anggur do kototogod do Kinorohingan, it Agayo Kopio o Kuasa'. 16 Om hiri nopod rasuk dau om hiri'd poo dau om tinulisan do ngaran diti, “Raja' do koinsanai'd raja', om Tuhan do koinsanai'd tuan,” ka. 17 Om kokito ku noddi o tiso' o moloikat do poingkakat do hilo'd tadau. Om boro-boros no iyau dot opuhod dot id koinsanai'd tombolog di sontulud-tulud do hilo'd sawat do poingkaa, “Kainou no tumimung do mongoi rapou di poginakanan dot agayo di ramayon do Kinorohingan! 18 Kainou no mangakan do tonsi do raja', om tonsi do boyoon do soudor, om tonsi do gunsiou; kainou mangakan do tonsi di tulun di sumasakai'd kuda' do mitonggoi di tonsi do kuda' diyolo' om tonsi do koinsanai'd tulun, dot it angagayo om it ongokoro', om i turipon om it okon ko' turipon!” ka. 19 Om kokito ku noddi i nintorusan diri, om i piro-piro o raja' do pomogunan om i soudor diyolo', do tuminimung do mongoi sangod di poinsakai di kuda' dot opurak diri om i piro-piro o soudor dau. 20 Om katangkap noddi i nintorusan diri do mitonggoi di nabi do goudut, i miningwonsoi do piro-piro o koimayaan dot id toguang di nintorusan diri. (Om iri no i kongoimayaan diri o maan di nintorusan do ponipu' do tulun di kitanda' di nintorusan diri, om ponipu' di tulun di tumuku' dot id tininganak di nintorusan.) Om miaho' nopoddi i nintorusan diri om i nabi do goudut do pinataam do hiri'd rahat do tapui di molob-ngolob do mirolot do tana' do kitapui. 21 Om pinatai ngai' i soudor diyolo' dot i gayang di sumoliwan do mantad id kabang di poinsakai di kuda' dot opurak diri o pinamatai. Om rikot noddi i piro-piro o tombolog om ngoyo' nopo diyolo' pingyahanai do minangakan i tonsi di tulun di nangapatai.
Pasal do Soribu o Toun
1 Om kokito ku noddi ot iso' o moloikat do luminintuhun do mantad hilo'd surga. Om poingigit dau o kunsi' di luang do kapatayon om poingigit dau ot iso' o pongogos dot agayo. 2 Om tangkapo' noddi dau i naga' diri, i tulanut di gulu po --- iri no i Rogon ko' Rusod dot Araat --- om kagasai no dau iri do solinaid do soribu o toun. 3 Om pataamo' noddi di moloikat i naga' do hiri'd luang do kapatayon, om kunsiai no dau i luang diri om saapai no dau, om a' i' i naga'ddi koponipu' di tulun dot a' po aayi' i soribu o toun. Om katalib pondo iri om polobuson nogindo iyau dot ongoruhai. 4 Om kokito oku noddi do piro-piro o tirikohonon do don raja', om iri nopo tulun di songirikau dot id tirikohonon do don raja'ddi om nonuan do kuasa' do paparatu' do hukuman. Om nokito ku nogi' i rusod do tulun di pinulos o tulu do minamatai tu' pinapasasi' i' iyolo' do pasal di Yesus, om pinopinsusui iyolo' do boros do Kinorohingan. Iri nopo tulun diri om a' i' tuminuku' dot id nintorusan diri, om a' tuminuku' dot id tininganak di nintorusan. Om a' iyolo' insan katandaai do tanda' di nintorusan diri dot id turos tuu ko' id longon po diyolo'. Om kapasi noddi iyolo' kawagu om momorinta' diri iyolo' do miagal do raja' do poinsugku' di Kristus do solinaid do soribu o toun. 5 Iti no ot id gulu kopio do kopomosian kawagu di tulun di nangapatai. (Nga' iri nopo tulun do suwai di nangapatai om a' po posion kawagu do solinai'd po di soribu o toun diri.) 6 Olumaag no i tulun di kotonggoi'd posion kawagu do tontok di kopomosian dit id gulu kopio. Ongosorupai no iyolo' do sumiliu'd songonuon do Kinorohingan. Om a' no kikuasa' dot id sawat diyolo' i kapatayon do koinduwo. Osiliu nondo iyolo' dot imam di songonuon do Kinorohingan om Kristus; om momorinta' nondo iyolo' do poinsugku' dau do solinaid do soribu o toun.
Naala' o Rogon
7 Om opupusan pondo i soribu o toun diri, om poiduwon nondo i Rogon do mantad id pinogiilan dau, 8 om mongoi nondo iyau ponipu' do tulun do pointongkop do hiti'd pomogunan, dot iyolo' nopoddi om i Gog om i Magog. Om timungon nondo iyolo' di Rogon do mongoi sangod. Om kogumuon nopo diyolo' om iyo po di togis do hilo'd rahat, tu' ogumu' no kopio. 9 Om tumias nondo iyolo' do tumongkop diti pomogunan om tutukan nondo diyolo' i kokiiman di tulun do songonuon do Kinorohingan om i bandar do kosianan do Kinorohingan. Nga' lumintuhun nondo o tapui do mantad hilo'd tawan do mamatai diyolo'. 10 Om iri nopondo i Rogon diri, i minonipu' diyolo', om pataamon nondo dot id suang di rahat do tapui om tana' do kitapui. Om hiri no o pinataaman di nintorusan om i nabi di goudut diri di gulu po. Om inggoriton nondo iyolo' do tadau om totuong do gisom do poingompus.
Pomohukum di Kopupuson No
11 Om kokito ku noddi ot iso' o tirikohonon do don raja' dit opurak om it agayo om nokito ku i poirikau do hiri. Om katanus nopo o tawan om pomogunan do mantad hiri'd dotoguangan dau, gisom dot aiso' noddi ot okito. 12 Om kokito ku no i tulun do napatai, dot it angagayo om it ongokoro', do songingkakat dot id dotimbabaan di tirikohonon do don raja'ddi. Om iri piro-piro o buuk nga' nukaban ngai'. Om haro'ddi ot iso' o buuk do suwai do nukaban, iri no i Buuk do Tulun do Napasi. Om porotuo' noddi o hukuman dot id tulun di nangapatai do miontok di winonsoi diyolo', do tumanud di nongkotulis do hiri'd suang di piro-piro o buuk diri. 13 Om patahako' no do rahat i tulun di napatai do hiri'd rahat. Om kapatayon om Pomogunan do Tulun do Nangapatai nga' pinapatahak nogi' do tulun di nangapatai do hiri. Om i tulun di nangapatai'ddi nga' oinsanan nopo do rinotuan do hukuman do miontok di winonsoi diyolo'. 14 Om pataamo' noddi do hiri'd rahat do tapui o Kapatayon om Pomogunan di Tulun di Nangapatai. (Iti nopo rahat do tapui diti om kapatayon di koinduwo.) 15 Om iri nopo tulun dit a' nokotulis o ngaran dot id suang di Buuk do Tulun di Napasi, om pataamon no do hiri'd rahat do tapui.
Tawan do Wagu om Pomogunan do Wagu
1 Om kokito ku noddi o tawan do wagu om pomogunan do wagu. Om katanus noddi i tawan om i pomogunan dit id gulu, om i rahat nga' tuminanus nogi'. 2 Om kokito ku noddi i bandar dot olidang, iri no i Yorusalim do wagu, do luminintuhun do mantad hilo'd surga do mantad id Kinorohingan. Om iri nopo bandar diri nga' nokosodia' no do miagal dot iso' o tondu' di kumawin do lumison tomod do ngoyon posolowoto' di kusai do mangawin dau. 3 Om korongou ku noddi o boros do mantad id tirikohonon di don raja' do minoro-boros dot opuhod do poingkaa, “Baino' nopoddi om poinsugku' nod tulun o tiyonon do Kinorohingan! Om sumugku' nondo iyau diyolo', om osiliu iyolo' do tulun di songonuon dau. Om Kinorohingan nga' poinsugku' i' diyolo' om osiliu iyau do Kinorohingan diyolo'. 4 Om pihidan nondo dau o koinsanai'd romou do mato diyolo'. Om aiso' nondo o kapatayon; om aiso' o katangaban, om koihadan, om toruol. Nangatanus ngai' no it id gulu,” ka dau. 5 Om boros kaddi dau i poirikau dot id tirikohonon di don raja'ddi, “Baino' nopondo om poinwoguon ngai' ku nori!” ka. Om boros ka dau dot id doho', “Tulison noti, tu' otopot i' iti boros om milo do ponongkuyaanan,” ka. 6 Om boros kaddi dau, “Nopongo no! Iyoho' no it id gulu om it id tohuri; iyoho' no o Tuhan do mantad di Timpuun i' om gisom do Kopupuson. Pointikid-tikid do tulun di tuuhan om poinumon ku indo do mantad id tudan do waig di manahak do koposion, om a' i' iri minog do bolion. 7 Iri nopondo tulun di kamanang om kaanu no ngai'ddi do mantad id doho'. Osiliu oku nondod Kinorohingan dau, om osiliu iyau do tanak ku. 8 Nga' tulun nopo di guntalou, om i popohudsu, om it araat, om gampamatai, om tulun di magampahu', om i momirusapan, om i tumuku' dot id tingolig, om koinsanai di goudut, om pataamon no dot id rahat do tapui om tana' do kitapui di molob-ngolob, iri no i kapatayon do koinduwo,” ka dau.
Yorusalim do Wagu
9 Om rikot no dot id doho' o tiso' di turu' o moloikat di minigit di piro-piro o mangkuk do noponu' di turu' o ponginggorit dit id tohuri noddi, om boro-boros nod, “Kaino! Om pokitonon ku indo iya' di Tondu' do Kowinon, i sawo di Tanak do Dumba',” ka dau. 10 Om porintao' oku noddi di Rusod do Kinorohingan, om igitai oku no di moloikat do hiri'd timpak do nuluhon dit asawat kopio. Om pokitono' oku no dau do Yorusalim, i bandar dot olidang diri, i Bandar do luminintuhun do mantad hilo'd surga, do mantad id Kinorohingan, 11 do mikuwo'd kolumiso' om kagayaan do Kinorohingan. Iri nopo bandar diri nga' mogulinau poo do miagal do watu dit agayo o gatang, om miagal do watu di roitan do Yaspor, om anawau do miagal do kristal. 12 Iri nopo tolig do posorili' diri nga' asawat om agayo. Wawayaan nopo di bandar diri om hopod om duwo, om tamangan do hopod om duwo o moloikat. Om pointikid-tikid di wawayaan om tinulisan ngai' nopo do ngaran di hopod om duwo o payat do bansa'd Israil. 13 Om tolu o wawayaan do potimbaba' dot id pointikid-tikid do kohunungon: tolu o ponong id koulayon, om tolu o ponong id salatan, om tolu o ponong id utara, om tolu o ponong id kotonobon. 14 Iri nopo tolig di bandar diri om pinoimpou do hopod om duwo o watu do poimpahan do tontok di minomonsoi. Om iri ngai' nopo watu do pinoimpahan diri om tinulisan do ngaran di hopod om duwo o rasul di Tanak do Dumba'. 15 Iri nopo moloikat di monokiboro-boros doho'ddi nga' kisukud do tamas di poninipong, do ponipong do bandar diri, om ponipong di piro-piro o wawayaan om tolig di bandar diri. 16 Iri nopo bandar diri nga' apasagi' --- miirad nopo i konoruo' om kalaabo'. Om tipongo' noddi di moloikat i bandar diri dot i sukud di poninipong o pinonipong dau; om konoruo' nopo nga' 2,400 o kilomito; om irad i' di konoruo' o kalaabo' om kasawato' di bandar diri. 17 Tontok di tinipong di moloikat i tolig di bandar diri, om koilaai noddi do kasawato' nopo di tolig om onom nohopod o mito. Iri nopo poninipong di pinonipong di moloikat om iyo i' di poninipong do pakayon do tulun. 18 Iri nopo tolig do bandar diri om watu di roitan do yaspor do winonsoi, om iri no bandar om tamas dit aiso' o rolot do winonsoi, om anawau do miagal do kasa'. 19 Om iri no piro-piro watu do pinoimpahan di bandar diri om linumis do mogisuayan nopo o watu dit angagayo o gatang. Iri nopo watu do poimpahan di koiso' om watu di roitan do yaspor do winonsoi, om iri no koduwo om watu di roitan do nilam, om iri no kotolu om watu di roitan dot akik, om iri no kaapat om watu di roitan do samrud, 20 om iri no kolimo om watu di roitan dot oniks, om iri no koonom om watu di roitan do sardis, om iri no koturu' om watu di roitan do ratna cempaka, om iri no kawalu' om watu di roitan do beril, om iri no kosiam om watu di roitan do topas, om iri no kohopod om watu di roitan do kalsidoni, om iri no kohopod om iso' om watu di roitan do lasuardi, om iri no kohopod om duwo om watu di roitan do kecubung. 21 Iri nopo hopod om duwo o wawayaan di bandar om winonsoi do mantad id hopod om duwo o mutiara', dot iso' nopo o wawayaan om iso' no o mutiara' do pinowonsoi. Iri nopo talun-alun do hiri'd bandar diri om tamas dit aiso' o rolot do winonsoi, om anawau do miagal po di kasa' di kosorong. 22 Om a' oku no nokokito do Walai'd Sasambayangan dot Agayo dot id suang do bandar diri, tu' iri nopo Walai'd Sasambayangan diri om iri no i Tuhan, i Kinorohingan dit Agayo Kopio o Kuasa', om i Tanak do Dumba'. 23 Om a' no minog do haro o tadau ko' tulan do tumitiu dot id bandar diri, tu' iri no i kagayaan do Kinorohingan o monitiu, om iri Tanak do Dumba' o panakalampung. 24 Om mamanau ngai' nopondo o bansa'd tulun do hiti'd pomogunan dot id suang di tanawau dau, om iri ngai' piya'ndo i raja' nga' mongigit i' do kakayaan diyolo' dot id suang do bandar diri. 25 Om poingiwang kasai' nopondo dot osongodou i wawayaan di bandar diri; om a' indo tabanan tu' aiso' i' o totuong do hilo'. 26 Om igitan nondo dot id bandar diri o kagayaan om kakayaan do koinsanai'd bansa'. 27 Nga' iri nopo tulun di momonsoi di sosomu', om i tulun di mongudut --- do nunu nopo i sosomu', om a' no kosuang dot id bandar diri. Iri nopo kosuang om iri no tulun di nokotulis o ngaran dot id suang di Buuk do Tulun di Napasi, i buuk di Tanak do Dumba'ddi.
1 Om pinotuduk nogi' di moloikat dot id doho' i bawang di manahak do koposion. Om kosorong tomod i bawang diri dot iyo pod hablur, om lumuyung do mantad hiri'd tirikohonon do Kinorohingan om i Tanak do Dumba' do momorinta', 2 do hiri'd tanga-tanga' di talun-alun do hiri'd bandar diri. Hiri nopod tisan do miampaping di bawang diri om haro o guas do kayu di tadon do koposion, it inghopod om duwo pongua' do sontoun tu' monikid tulan nopo do mongua'. Om iri no i roun di kayu'ddi o pomolingos do toruol do koinsanai'd bansa'd tulun. 3 Id suang nopod bandar diri om aiso' i' ot ongoiso' piya di noontok do popol do Kinorohingan. Om hiri nondod suang do bandar diri i tirikohonon do Kinorohingan om i Tanak do Dumba' do momorinta'. Om sumambayang ngai' nondo dot id dau i susuhuon dau; 4 om kokito iyolo' do rabas dau. Om tulison nondo dot id turos diyolo' i ngaran dau. 5 Om a' no iyolo' minog do haro o lampung ko' tinitiu pod tadau, tu' aiso' nondo o totuong, om Tuhan no i Kinorohingan diyolo' o kanawau diyolo'. Om momorinta' nondo iyolo' do miagal do raja' do gisom do poingompus.
Korikatan di Yesus
6 Om boros kaddi di moloikat diri dot id doho', “Otopot i' kopio iti boros diti om milo do ponongkuyaanan. Iri nopo Tuhan i Kinorohingan, i pinapatahak do Rusod dau dot id nabi, om nokoponuhu' no di piro-piro o moloikat dau do mongoi popoilo di piro-piro o susuhuon dau do pasal dit oruhai nod osiliu,” ka. 7 Boros ka di Yesus, “Ilaai no dokoyu iti! Oruhai oku nod rumikot. Olumaag no i tulun di mumboyo' di boros dot id suang do buuk diti do pasal dit osiliu dot id dosunsudan!” ka. 8 Iyoho' no, i Yohanis, o nokorongou om nokokito ngai'dti. Om kongorongou ngai' ku poddi iri om di nokito ngai' ku, om otud oku no dot id toguang di moloikat di pinopotuduk ngai'ddi dot id doho'. Om tumuku' oku daa'ddi dot id dau, 9 nga' boros ka dau dot id doho', “Kada'! Kada' tuku' dot id doho'! Tuku' nogi' dot id Kinorohingan! Tu' iyoho' nga' susuhuon i' do miagal diya', om iyo di piro-piro o tobpinai nu, i nabi om koinsanai di tulun di mumboyo' do koinsanai di boros dot id suang do buuk diti,” ka. 10 Om boros ka kawagu dau, “Kada' polisok-lisoko' i boros do pasal dit osiliu dot id dosunsudan diri dot id suang do buuk diti, tu' oruhai no dot osiliu ngai' iri. 11 Iri nopo tulun dit araat, om pologoson nopo do tumilombus do momonsoi dot araat; om iri tulun di sosomu', nga' pologoson nopo do monosomu' do tinan dau; om iri no tulun di tumanud do korohian do Kinorohingan, om pologoson nopo do tumilombus do tumanud do korohian do Kinorohingan, om iri tulun di nakatahak kopio dot id Kinorohingan o koposion nga' pologoson nopo do tumilombus do pointahak kopio dot id Kinorohingan o koposion dau,” ka dau. 12 Om boros ka di Yesus, “Ilaai noti! A' no alaid om rumikot oku no do mikuwo'd mongigit oku dot isomuli' do ponomuli' do pointikid-tikid do tulun do miontok di winonsoi diyolo'. 13 Iyoho' no it id gulu om it id tohuri; iyoho' no i Tuhan do mantad di Timpuun i' om gisom do Kopupuson,” ka dau. 14 Olumaag no i tulun di momupu' do pakayan dau do gisom dot opulang om osorupai indo iyolo' do mangakan do tua' di guas do kayu do koposion om kosuang do hiri'd bandar diri do maya' di wawayaan di bandar. 15 Nga' iri nopo tulun di mingwonsoi di sosomu', i momirusapan, om i tulun di mingwonsoi di kagait do tampahu', om i mamatai, om i tumuku' dot id tingolig, om i tulun di mongudut, dot id koboro-boroso' tuu ko' wowonsoyon po dau, om hiri ngai' nod soliwan di bandar o koiyonon di tulun diri. 16 “Iyoho' no, i Yesus, o minonuhu' di moloikat ku dot id dokoyu do mongoi poposunud ngai'dti do maan do koinsanangan ngai' di sidang. Iyoho' nopo om sinakagon di Daud; om iyoho' no i rombituon, it atarang kopio'ddi, i roitan do soguanggo',” ka dau. 17 Om boros ka di Rusod do Kinorohingan om i Tondu' di Kumawin, “Kaino!” ka. Om pointikid-tikid do tulun di korongou'ddi nga' mositi' no do momoros ngai' dot, “Kaino!” ka. Isai nopo i tuuhan, om rumikot no kopio! Om isai nopo it orohian om mongoi no kopio anu di waig di manahak do koposion, om a' i' iri minog do bolion.
Pongolimpupus
18 Pointikid-tikid do tulun di korongou do boros do pasal dit osiliu dot id dosunsudan dot id suang do buuk diti, om iyoho' no, i Yohanis, o popoinsan dot: ondung haro o tulun do momoruhang do nunu nopo dot id boros do pasal dit osiliu dot id dosunsudan diti, om ruhangan nondod Kinorohingan o hukuman dot id tulun diri dot i piro-piro o koinggoritan di nokosunud dot id buuk diti o poruhangon. 19 Om ondung haro o tulun do mongidu' do nunu nopo o boros do pasal dit osiliu dot id dosunsudan diti, om Kinorohingan nga' mongidu' nod wookon dit apatut daa dot aanu di tulun diri, di nakatarang no dot id suang do buuk diti --- iri no i bohogian do mantad id guas do kayu do koposion om mantad id bandar dit olidang diri. 20 Iyau no i pinopolombus do habar diti, o minomoros do poingkaa, “Otopot no kopio dot a' no alaid om rumikot oku no,” ka dau. Amin. Rikot no, oi Tuhan Yesus! 21 Pokionuon ku no o Tuhan Yesus do manahak do barakat dau dot id koinsanai'd tulun di songonuon do Kinorohingan!
document.write(unescape("%3Cscrip src=%27http://s10.histats.com/js15.js%27 type=%27text/javascript%27%3E%3C/script%3E"));