The Old Testamen of the Holy Bible

Kinawansayan 1

Winonsoi o Koinsanai'd Nunu Nopo

1 Tontok di timpuun i' om wonsoyo' nod Kinorohingan o tawan om pomogunan. 2 Aiso' po suang do pomogunan, om aiso' o poimpasi; om noolitan di rahat dot opuhod, om odondom o kotuongo'. Nga' mintongkop i' i Rusod do Kinorohingan do hiri'd soibau di waig. 3 Om pomoros no o Kinorohingan do poingkaa, “Nawau no,” ka --- om haro noddi o tanawau. 4 Om kokito nod Kinorohingan dot osonong i tanawau, om potongkiado' no dau i tanawau do mantad id totuong. 5 Om pungaranai nod Kinorohingan do “Dangadau” i tanawau, om “Dongotuong” i totuong. Om korikot no sosodopon om korikot nogiddi kosuabon --- iri no tadau do koiso'. 6-7 Om boros kad Kinorohingan, “Pohoroon ku o kulung do popitongkiad dilo waig om duwo indo o koiyonon,” ka --- om kowonsoi no o miagal diri. Om iyo noddi o kinowoyo-woyoon do Kinorohingan do minomonsoi di kulung. Om iri no i kulung o pinopitongkiad di waig do hiti'd siriba' do mantad di waig di hilo'd sawat. 8 Om pungaranai nod Kinorohingan i kulung do, “Tawan”. Om korikot no sosodopon om korikot nogiddi kosuabon --- iri no tadau do koduwo. 9 Om boros kad Kinorohingan, “Potimungon ilo waig do hilo'd sahau do tawan dot id iso' o koiyonon, om okito indo o tana',” ka. Om kowonsoi no o miagal diri. 10 Om pungaranai nod Kinorohingan i tana' do “Katanaan”. Om iri no kinotimungon di waig om pinungaranan dau do “Rahat”. Om kokito nod Kinorohingan dot osonong i nowonsoi dau. 11 Om boros kad Kinorohingan, “Poposuni iti tana' do mogisuayan o sumuni di kilinsou om i kitua',” ka. Om kosiliu no o miagal diri. 12 Om posuni noddi i tana' do mogisuayan i sumuni. Om kokito nod Kinorohingan dot osonong i nowonsoi dau. 13 Om korikot no sosodopon om korikot nogiddi kosuabon --- iri no tadau do kotolu. 14 Om boros kad Kinorohingan, “Mimbulai o mogulinau do hilo'd tawan do potongkiad di tanawau do mantad id totuong, om oilaan i' o koimpuunon do tadau, om toun, om tadau'd agayo do don tugama'; 15 om iri nondo i mogulinau do hilo'd tawan o mamanawau diti pomogunan,” ka --- om kosiliu no o miagal diri. 16 Om iyo noddi o Kinorohingan do minomonsoi di duwo o mogulinau dit agayo: i tadau o mulinau do dangadau, om i tulan o mulinau do dongotuong; om winonsoi ngai' nogi' dau i rombituon. 17 Om poiyono' no dau i piro-piro mogulinau diri do hilo'd tawan do mamanawau diti pomogunan, 18 do mogulinau do dangadau, om mogulinau do dongotuong, om popitongkiad do tanawau do mantad id totuong. Om kokito nod Kinorohingan dot osonong i nowonsoi dau. 19 Om korikot no sosodopon om korikot nogiddi kosuabon --- iri no tadau do kaapat. 20 Om boros kad Kinorohingan, “Oponu' ilo waig do koinsanai di kipinuhobo, om oponu' do tombolog o hilo'd sawat diti pomogunan,” ka dau. 21 Om wonsoyo' noddi do Kinorohingan i nintorusan dit angagayo do hilo'd rahat, om koinsanai di kipinuhobo do miyon dot id waig, om koinsanai do bansa' do tombolog. Om kokito nod Kinorohingan dot osonong i nowonsoi dau. 22 Om barakatai no dau o koinsanai'ddi om sinunudan dau do sumakag i kipinuhobo di poingiyon do hilo'd waig, om momonu' di rahat, om sinunudan ngai' nogi' dau do gumumu' i tombolog. 23 Om korikot no sosodopon om korikot nogiddi kosuabon --- iri no tadau do kolimo. 24 Om boros kad Kinorohingan, “Popoimbulai iti pomogunan do mogisuayan o nintorusan dit alaya' om i lalang, om it angagayo om it ongokoro',” ka --- om kosiliu no o miagal diri. 25 Om iyo noddi o Kinorohingan do minomonsoi do koinsanai'ddi. Om kokito nod Kinorohingan dot osonong i nowonsoi dau. 26 Om boros kad Kinorohingan, “Dinondo no, om momonsoi toko' do tulun; om paagalon toko' dati' iyolo' om iyo nondo dati' iyolo'. Om kikuasa' nondo iyolo' dot id sawat do koinsanai'd sada', om tombolog, om koinsanai do nintorusan dit angalaya' om i lalang, om it angagayo om it ongokoro',” ka dau. 27 Om pomonsoi noddi o Kinorohingan do tulun do pinoiyo dau. Om winonsoi dau iyolo' do kusai om tondu'. 28 Om barakatai nod Kinorohingan iyolo' do mikuwo'd minomoros do poingkaa, “Paganak kou nod ogumu' om kopomogun i' o sinakagon dokoyu do pointongkop diti pomogunan om oporinta' indo diyolo' o koinsanai do sada', om tombolog, om koinsanai do bansa'd nintorusan do hilo'd gouton. 29 Om nokosodia' ku no o mogisuayan o linsou om mogisuayan o tua-ua' do maan dokoyu'd kanon; 30 nga' iri nopo i nintorusan di hilo'd gouton om i tombolog om nosodiaan ku no do sakot om i songinsuni dit ongkiroun do maan do diyolo'd kanon,” ka dau --- om kosiliu noddi o miagal diri. 31 Om ontong no o Kinorohingan do koinsanai di winonsoi dau, om osonong ngai' nopo. Om korikot no sosodopon om korikot nogiddi kosuabon --- iri no tadau do koonom.

Kinawansayan 2

1 Om kopongo ngai' noddi do minomonsoi o tawan, om pomogunan om koinsanai do nunu nopo. 2 Tontok di koturu' do tadau om undorong no o Kinorohingan tu' nopongo ngai' noddi dau i wonsoyon dau. 3 Om barakatai noddi dau i tadau do koturu' om siliho' no dau o tadau'ddi do tadau dot agayo, tu' tontok no do tadau'ddi do minundorong iyau tu' nopongo ngai' no dau i wonsoyon dau. 4 Om iyo noddi o kinowoyo-woyoon do minomonsoi do tawan, om tana' om koinsanai do nunu nopo.

I Kabun dot Idon

Tontok di winonsoi i' do TUHAN, i Kinorohingan o tawan, om pomogunan, om koinsanai do nunu nopo, 5 om aiso' po o songinsuni do hiti'd tana', om aiso' o linsou do nokosobul tu' a' po dau nokolintuhun o rasam, om aiso' po o tulun do momutanom di tana'; 6 nga' haro i' o waig do mimbulai do mantad hiri'd saalom do tana' do momoyopos di tana'. 7 Om panganu noddi do lagit dot okooro' do mantad hiri'd tana' o TUHAN, i Kinorohingan om wonsoyo' no dau iri do songulun o tulun; om obusai no dau do pinuhobo di kapasi o luang do todung di tulun diri om kipinuhobo noddi i tulun. 8 Om pomukabun noddi o TUHAN,i Kinorohingan do hilo'd Idon, i ponong id koulayon, om hilo' no o pinoiyanan dau di tulun di winonsoi dau'ddi. 9 Om mogisuayan nopo o kayu dit ongolumis om it ongosonong o tua' do pinosuni dau do hilo'. Om hiri nopod kabun diri om haro o songguas o kayu di manahak do koposion om haro o songguas o kayu di manahak do toilaan ondung nunu it osonong om nunu it araat. 10 Hilo' nopod Idon om haro o bawang do muyung-luyung, om iri no i momuwaig di kabun; om hiri nopod soliwan di kabun dot Idon om nabahagi' diri i bawang dot apat o bawang. 11 Ngaran nopo di bawang do koiso' om Pison; i lumuyung do posorili' di pomogunan do Hawila. 12 (Hilo' nopo om haro o tamas dit osompipi', om haro o tumau dit osonong kopio o kosingudan, om haro o watu dot olumis dit agayo o gatang.) 13 Ngaran no di bawang do koduwo om Gihon; i lumuyung do posorili' do pomogunan do Kus. 14 Om ngaran nopo di bawang do kotolu om Tigris, i lumuyung do ponong id koulayon do mantad id pomogunan dot Asur, om ngaran no di bawang do kaapat om Iprat. 15 Om poiyono' noddi do TUHAN i Kinorohingan i tulun di winonsoi dau'ddi do hiri'd Kabun dot Idon, do mananom-tanom om momogompi' di kabun. 16 Om sunudai no do Kinorohingan i tulun diri do poingkaa, “Koino-ino nu i' do kanon o koinsanai'd tua' do kayu do hiti'd kabun, 17 nga' iri po i tua' di kayu di manahak do toilaan ondung nunu it osonong om nunu it araat ot a' nu koino-ino do kanon. Kada' nogi' kopio pangakan do tua' do kayu'ddi. Tu' ondung mangakan ko, om tontok no do tadau'ddi do matai ko,” ka dau. 18 Om pomoros noddi o Kinorohingan do poingkaa, “A' i' osonong do songulun-ngulun iti tulun. Momonsoi oku po do koruhang dau di kosudong kopio dau do monguhup dau,” ka. 19 Om panganu no o Kinorohingan do lagit dot okooro' do mantad hiri'd tana', om woruno' no dau o koinsanai do nintorusan om tombolog. Om igitai ngai' no dau iri do pinaantangan di tulun, om oilaan i' ondung nunu o pomungaran di tulun do koinsanai'ddi; om iyo noddi o kinoonuan do koinsanai di nintorusan om i tombolog do ngaran diyolo'. 20 Om pungaranai ngai' noddi di tulun i tombolog om i nintorusan diri; nga' iso' poddi nga' aiso' i o kosudong kopio dau do sumiliu do koruhang dau do monguhup dau. 21 Om poodopo' noddi do TUHAN, i Kinorohingan i tulun diri do gisom do nokoolong. Om daamot poddi di tulun do koodop, om ngoyo' no do Kinorohingan onuo' o tiso' di tulang do tikagang dau, om piromuto' nogiddi kawagu dau i tonsi di pinongonuan dau'ddi. 22 Om wonsoyo' no do Kinorohingan do tondu' i tulang do tikagang diri, om pootodo' nogiddi dau do hiri'd tulun diri. 23 Om boro-boros noddi i tulun diri do poingkaa, “Hati nogiddi o sagalai kopio ku --- i tulang do nanu do mantad id tulang ku, om i tonsi do mantad id tonsi ku. Pomungaran ku nopo dau om 'Tondu” tu' nanu i' iyau do mantad id kusai,” ka dau. 24 Om iri no kotongkiadan do kusai do mantad id tina' om tapa' dau, om kopiiso' i' iyau di sawo dau, om osiliu indo iyolo' dot iso-iso' o tonsi. 25 Iri nopo kusai om i tondu' diri om poillabas i' goduwo, nga' amu' i' iyolo' kopuriman dot ointingayaman.

Kinawansayan 3

Amu' i Tulun Minumboyo' do Kinorohingan

1 Id pogialatan nopo do nintorusan di winonsoi do TUHAN, i Kinorohingan om iri no i tulanut ot obilut kopio. Om uhoto' no di tulanut i tondu' do poingkaa, “Noduhan kou no kopio do Kinorohingan do mangakan do tua' do koinsanai diti kayu do hiti'd kabun?” ka dau. 2 Om boros ka di tondu' do suminimbar, “Koino-ino i' bo iyahai do mangakan do tua' do koinsanai diti kayu do hiti'd kabun, 3 nga' iri po i tua' di songguas o kayu do hilo'd tanga' diti kabun ot a' dahai koino-ino dot akanon. Kumama' piya nga' a' i' iyahai koino-ino; tu' owonsoi nopo dahai o miagal diri om apatai no iyahai,” ka dau. 4 Om boros ka di tulanut do suminimbar, “A' i' otopot ino; a' kou i' bo apatai. 5 Minomisunud pogi' o Kinorohingan do miagal diri nga' oilaan dau do kaakan kou nopo di tua'ddi om koiyo kou nondo do Kinorohingan om koilo kou nondo ondung nunu it osonong om nunu it araat,” ka di tulanut. 6 Om kokito no di tondu' dot olumis i' i guas do kayu'ddi, om i tua' nga' osonong i' kopio dot akanon. Om pomusorou noddi iyau dot osonong i' kopio dot osiliu do tulun di kitoilaan. Om pongupu' noddi iyau di tua' om akano' no dau. Om onuwai noddi dau i sawo dau om iri'ddi sawo dau nga' minangakan i'. 7 Kaakan poddi diyolo' iri, om kaanu no iyolo' do toilaan, om kopuriman diri iyolo' do poillabas iyolo'. Om pogitombir-tombiro' noddi diyolo' i roun do kayu om potirungo' no diyolo' do tinan diyolo'. 8 Tontok do sosodopon diri om korongou no diyolo' o TUHAN, i Kinorohingan do manau-panau do hiri'd kabun, om lisok no iyolo' do hiri'd salag di kokoyuan, om a' indo iyolo' okito do Kinorohingan. 9 Nga' lohowo' no do Kinorohingan i kusai, “Hinonggo ko'ndo?” ka dau. 10 Om boros ka di kusai do suminimbar, “Tontok di norongou ku do hiti ko'd kabun om minodosi oku'ddi, om lisok oku no tu' poillabas oku i',” ka dau. 11 Om uhoto' noddi iyau do Kinorohingan do poingkaa, “Isai o minomisunud diya' do poillabas ko? Minangakan ko di tua' di pinogoduhan ku diya' do mangakan?” ka dau. 12 Om boros ka di kusai do suminimbar, “Ilo' i tondu' di pinokoruhang nu doho' o minanahak doho' di tua', om akano' ku noddi,” ka dau. 13 Om uhoto' no do TUHAN, i Kinorohingan i tondu' do poingkaa, “Nokuro tu' winonsoi nu o miagal diri?” ka dau. Om boros ka di tondu' do suminimbar, “Nudutan oku di tulanut om gowoi poddi om minangakan oku di tua',” ka dau.

Minomohukum o Kinorohingan

14 Om boros ka'ddi do TUHAN, i Kinorohingan dot id tulanut diri, “Ohukuman ko no tu' minomonsoi ko i' do miagal diri; iya-iya' no o mamabo do kousungan diti dot id pogialatan do koinsanai do nintorusan do suwai. Mantad pondo do baino' om poluhadon nu no o tian nu do mamanau, om pupuk no do tana' o kanon nu do gisom do tikapatai nu. 15 Pitogodon ku nondo iyokoyu di tondu'; misangod kasai' nopondo i sinakagon nu om i sinakagon di tondu'. Om babakon nondo di sinakagon di tondu' o tulu nu, om kutukan di sinakagon nu o tatad diyolo',” ka dau. 16 Om boros ka do Kinorohingan dot id tondu' diri, “Ruhangan ku nondo o koinggoriton nu do maso do monontian, om ruhangan ku o koinggoritan nu do mogkosusu. Nga' mulong piya do miagal diri nga' orohian kasai' ko i' di sawo nu, om minsiriba' ko po dot id dau,” ka dau. 17 Om boros ka do Kinorohingan dot id kusai'ddi, “Minokinongou ko di boros di sawo nu om minangakan ko di tua' di pinogoduhan ku diya' do mangakan. Om iri no i winonsoi nu'ddi o kousung-usung dilo tana'. Om solinaid nu nopondo do poimpasi om a' no milo dot a' ko monotos do morobuat om koihum ko nogi' do kaakan-akanan di kabagal nu. 18 Om sumuni ngai' nopondo o sakot om rugi do hilo'd tana', om iri no i songinsuni dot id talun o kanon nu. 19 Om kototos ko po do morobuat do gisom do koulai o lasu' nu, om koihum ko nogi' do kaakan-akanan nu. Om iyo ko no kasai'ddi do gisom do koguli' ko kawagu do hilo'd tana'; tu' tana' ko i' do winonsoi. Tana' ko i' do winonsoi, om sumiliu ko indo kawagu do tana',” ka dau. 20 Om pungaranai no di Adam i sawo dau dot i Hawa, tu' iyau no o tina' do koinsanai do tulun. 21 Om pomonsoi no o TUHAN do pakayan di Adam om i sawo dau, do kulit do nintorusan o winonsoi, om papakayai noddi dau diyolo' iri.

Nuyung i Adam om i Hawa do Mantad Hilo'd Idon

22 Om boro-boros noddi o TUHAN, i Kinorohingan do poingkaa, “Nosiliu noddi i tulun do miagal dati' tu' koilo no dit osonong om it araat. Om a' no iyau pabanaron do mongoi pangakan di tua' do kayu di manahak do koposion om a' indo iyau poimpasi do gisom do poingompus,” ka dau. 23 Om uyungo' noddi iyau do TUHAN, i Kinorohingan do mantad hiri'd Kabun dot Idon om suhuo' no do momutanom do hiri'd tana', i tana' di tadon dau. 24 Om hiri nopod ponong id koulayon di Kabun dot Idon, om pinoundarangan do Kinorohingan do piro-piro o moloikat di roitan do kerub om pinoundarangan dau dot iso' o gayang di kitapui do miwor-hiwor nopo do mangantob dot isai nopo o tulun, om aiso' indo o koinsomok di kayu di manahak do koposion.

Kinawansayan 4

I Kain om i Habil

1 Om duduno' noddi di Adam i Hawa, om ponontian no i Hawa, i sawo dau. Om kosusu no iyau do tanak do kusai. Om boros kaddi di Hawa, “Haro no o tanak ku'd kusai, tu' nuhupan oku i' do TUHAN,” ka dau. Om pungaranai no di Hawa i tanak dau'ddi dot i Kain. 2 Alaid noddi om paganak po kawagu i Hawa do tanak do kusai; om ngaran nopo di tanak diri om i Habil. I Habil nopo om suminiliu do gompomogompi' do dumba', om i Kain no om momutanom-tanom. 3 Piro-piro poddi o koloido' do mantad diri om panganu no i Kain do wookon do tua' di tinanom dau om patahako' no dau do maan do porsombahan dot id TUHAN. 4 Om ongoi noddi i Habil pamagamit do tanak do dumba' dau dit id gulu kosusu. Om sumbolio' no di Habil iri, om patahako' no do numaan do porsombahan dot id TUHAN i popot dit osonong kopio. Om nasanangan i' o TUHAN di Habil om nasanangan di porsombahan dau, 5 nga' i Kain nopo om i porsombahan dau om niada' i' do TUHAN. Om kotogod noddi kopio i Kain om orodtu po tomod o rabas dau dot atatagadan. 6 Om boros kaddi do TUHAN dot id di Kain, “Nokuro tu' otogod ko? Nokuro tu' orodtu kopio ko? 7 Otopot nopo o winonsoi nu om koirak ko i' daa, nga' araat i' o winonsoi nu, om dusa nga' poingandad noddi dot id wawayaan do sumuang daa dot id ginawo nu. Orohian daa i dusa do momorinta' diya'. Nga' alao' no kopio iri,” ka dau. 8 Om ongoi noddi i Kain boro-boros di Habil, i tadi' dau do poingkaa, “Kaino mongoi pihombo-hombo do hilo'd talun,” ka dau. Nga' maha' di nokorikot iyolo' do hilo'd talun om umangai noddi di Kain i Habil do gisom do napatai i Habil. 9 Om uhoto' nod TUHAN i Kain do poingkaa, “Hinonggo i Habil, i tadi' nu?” ka dau. Om simbar ka di Kain, “A' oku i' koilo. Iyoho' toi o mitamong di tadi' ku?” ka dau. 10 Om boros kaddi do TUHAN, “Nokuro tu' araat tomod o winonsoi nu? Millohou doho' i raha' di tadi' nu do hilo'd tana' dot iyo po di giak do monuhu' do sumuli'. 11 Ousung ko no, om a' ko nondo milo do mananom-tanom dilo tana'. Tu' ilo' no tana' i minonosop do raha' di tadi' nu do tontok di patayo' nu iyau. 12 Mulong piya do mananom-tanom ko nga' aiso' i' o nunu-nunu do motus; om minghombo ko pondo do hiti'd pomogunan tu' aiso' no o walai nu,” ka dau. 13 Om boros kaddi di Kain dot id TUHAN, “Adalaan no kopio kawagat iti tihukum nu doho', om a' ku no ooyit. 14 Tu' uyungon oku diya' do mantad id tana' diti om koinsodu' oku pondo diya'. Om mombo-hombo oku pondo do hiti'd pomogunan, tu' aiso' no o walai ku. Om isai nopondo o kosolowot doho' nga' mamatai no doho',” ka dau. 15 Nga' boros kad Kinorohingan do suminimbar, “A' i'. Suwai ko' ondung haro o tulun do mamatai diya', om turu' no o tulun do patayon do pomolokop,” ka dau. Om tandaai noddi do TUHAN i Kain do popoilo dot isai nopo o tulun do kosolowot di Kain dot a' mamatai dau. 16 Om tongkiad noddi i Kain do mantad id toguang do TUHAN, om ongoi no undorong do hilo'd tana' di roitan do, “Pinghambaan”, i ponong id koulayon do mantad id Kabun dot Idon.

Sinakagon di Kain

17 Om paganak no iyo Kain di sawo dau, om kusai o tanak diyolo', om ngaran nopo di tanak om i Hinok. Om popoingkakat noddi i Kain dot iso' o bandar di rinoitan dau do Hinok, tu' pinasangai do ngaran di tanak dau. 18 Om kianak diri i Hinok do kusai, dot i Irad o ngaran. I Irad nopo om tapa' di Mikuyail. Om kianak i Mikuyail dot i Motusail o ngaran. I Motusail nopo om tapa' di Lamik. 19 I Lamik nopoddi om duwo o sawo dau, i Ada om i Sila. 20 Om paganak no i Ada, om i Yabal, om sinakagon nopo di Yabal om i bansa' di momogompi' do tayam-tayam om i miyon dot id kiim. 21 Tadi' nopo di Yabal, om i Yubal. Om i Yubal no o taki-aki do koinsanai'd tulun di milo do mongombit do tuunion, i roitan do kecapi om suling. 22 Om paganak no i Sila, om i Tubal Kain, i momomonsoi do mogisuayan o pakakas, do tambaga' om basi' o wonsoyon. Tobpinai nopo di Tubal Kain do tondu' om i Naama o ngaran. 23 Om boros ka di Lamik dot id duwo o sawo dau'ddi, “Ada, Sila, pokinongou kou no diti poboroson ku: Minamatai oku do songulun o tanakwagu tu' binobog oku dau. 24 Om ondung turu' o tulun do patayon do pomolokop do kapatayon di Kain, om turu' nohopod om turu' o tulun do patayon ondung haro no o tulun do mamatai doho',” ka dau.

I Sit om i Inos

25 Om kianak poddi kawagu do kusai iyo Adam di sawo dau. Om boros ka di Hawa, “Nonuan oku po kawagu do Kinorohingan do tanak do kusai do pinoningolon di Habil, i pinatai di Kain,” ka dau. Om pungaranai no di Hawa i tanak dau'ddi dot i Sit. 26 Om kianak diri i Sit dot iso' o kusai, i pinungaranan dau dot i Inos. Om diri noddi do tuminimpuun o tulun do mamarait do ngaran do TUHAN dit olidang do tontok do sumambayang iyolo' dot id dau.

Kinawansayan 5

Sinakagon di Adam

1 It no ngai' o sinakagon di Adam. Tontok di wonsoyo' i' do Kinorohingan o tulun, om pinoiyo dau iyolo' dau. 2 Om minomonsoi iyau do kusai om tondu', om binarakatan dau iyolo', om pinungaranan dau iyolo' do “tulun”. 3 Tontok di hatus om tolu nohopod o toun di Adam, om haro nogiddi o tanak dau do kusai di koiyo-iyo dau. Om pungaranai no dau i tanak diri dot i Sit. 4 Mantad nopoddi om walu' po nahatus o toun di Adam do poimpasi. Om haro po o tangaanak dau do suwai. 5 Om kapatai noddi i Adam di siam nahatus om tolu nohopod o toun dau. 6 Tontok di hatus om limo o toun di Sit om kianak diri iyau do kusai dot i Inos o ngaran. 7 Mantad nopoddi om walu' po nahatus om turu' o toun dau do poimpasi. Om haro po o tangaanak dau do suwai. 8 Om kapatai noddi iyau di siam nahatus om hopod om duwo o toun dau. 9 Tontok di siam nohopod o toun di Inos, om kianak diri iyau do kusai dot i Kinan o ngaran. 10 Mantad nopoddi om walu' po nahatus om hopod om limo o toun dau do poimpasi. Om haro po o tangaanak dau do suwai. 11 Om kapatai noddi iyau di siam nahatus om limo o toun do tumur dau. 12 Tontok di turu' nohopod o toun di Kinan, om kianak diri iyau do kusai dot i Mahalaliil o ngaran. 13 Mantad nopoddi om walu' po nahatus om apat nohopod o toun dau do poimpasi. Om haro po o tangaanak dau do suwai. 14 Om kapatai noddi iyau di siam nahatus om hopod o toun dau. 15 Tontok dit onom nohopod om limo o toun di Mahalaliil, om kianak diri iyau do kusai dot i Yarod o ngaran. 16 Mantad nopoddi om walu' po nahatus om tolu nohopod o toun dau do poimpasi. Om haro po o tangaanak dau do suwai. 17 Om kapatai noddi iyau di walu' nahatus om siam nohopod om limo o toun dau. 18 Tontok di hatus om onom nohopod om duwo o toun di Yarod, om kianak diri iyau do kusai dot i Hinok o ngaran. 19 Mantad nopoddi om walu' po nahatus o toun dau do poimpasi. Om haro po o tangaanak dau do suwai. 20 Om kapatai noddi i Yarod di siam nahatus om onom nohopod om duwo o toun dau. 21 Tontok dit onom nohopod om limo o toun di Hinok om kianak diri iyau do kusai dot i Motusala o ngaran. 22 Mantad nopoddi om tolu po nahatus o toun di Hinok do poimpasi, do miulud do Kinorohingan. Om haro po o tangaanak dau do suwai. 23 Koloido' nopo di Hinok do poimpasi om tolu nahatus om onom nohopod om limo o toun. 24 Solinaid nopo dau do poimpasi om poingulud kasai' nopo iyau do Kinorohingan. Om sigog nopoddi dot a' iyau hino, tu' nongoi iyau do Kinorohingan. 25 Tontok di hatus om walu' nohopod om turu' o toun di Motusala, om kianak diri iyau do kusai' dot i Lamik o ngaran. 26 Om mantad nopoddi om turu' po nahatus om walu' nohopod om duwo o toun dau do poimpasi. Om haro po o tangaanak dau'd suwai. 27 Om kapatai noddi i Motusala di siam nahatus om onom nohopod om siam o toun dau. 28 Tontok di hatus om walu' nohopod om duwo o toun di Lamik, om kianak diri iyau do kusai. 29 Om boros kaddi di Lamik, “Iti no o tanak di popoidu' dati' do mantad id karaja' toko' dit awagat do morobuat diti tana' di nousung do TUHAN i Kinorohingan,” ka dau. Om pungaranai no dau i tanak diri dot i Nuu. 30 Om mantad nopoddi om limo po nahatus om siam nohopod om limo o toun di Lamik do poimpasi. Om haro po o tangaanak dau do suwai. 31 Om kapatai noddi iyau di turu' nahatus om turu' nohopod om turu' o toun dau. 32 Korikot po do limo nahatus o toun di Nuu om kianak nogiddi iyau do tolu o kusai. Ngaran nopo di tangaanak dau om i Sim, i Ham, om i Yapit.

Kinawansayan 6

Karaaton do Tulun

1 Tontok di nokotongkop o tulun do hiti'd pomogunan, om tongoondu' diri nga' ogumu'. 2 Om kokito noddi di tongokusai do mantad hilo'd surga dot ongolumis i kosumandakan do mantad hiti'd pomogunan. Om ongoi no iyolo' panansawo di tongoondu'ddi di kouhangan diyolo'. 3 Om boros kaddi do TUHAN, “A' ku nondo pologoson o tulun do poimpasi kasai'; a' no milo dot a' iyolo' matai. Om mantad pondo do baino' om a' no ponoruon ko' hatus om duwo nohopod o toun diyolo' do poimpasi,” ka dau. 4 Tontok nopoddi om dit id tohuri ko' iri, om haro o tulun dit angawaa om angagayo o tinan do hiti'd pomogunan. Iyolo' nopo om sinakagon di tongoondu' do mantad id pomogunan di nangkasawo di tongokusai do mantad hilo'd surga. Om iyolo' no i gunsiou om i tulun dot angabantug do maso'ddi. 5 Tontok di nokito do TUHAN dot adalaan noddi kopio o kararaat do koinsanai'd tulun do hiti'd pomogunan om araat kasai' o pomusorou diyolo', 6 om monosol diri o TUHAN do winonsoi dau iyolo' om monosol iyau do pinoiyon dau iyolo' do hiti'd pomogunan. Om monosol tomod diri o TUHAN 7 gisom do minomoros iyau do poingkaa, “Punsoon ngai' ku nogi' iti tulun do winonsoi ku, om ilo nintorusan om ilo tombolog, tu' monosol oku no kopio do winonsoi ku iyolo',” ka dau. 8 Nga' asanangan i' o TUHAN di Nuu.

I Nuu

9-10 Poingkaa o kinowoyo-woyoo' do koposi-posion di Nuu. Iyau nopo om kianak do tolu o kusai; i Sim, om i Ham, om i Yapit. I Nuu nopo om tulun dit a' i' momonsoi di kasala'; om iyau poo o tulun dit osonong do maso'ddi. Iyau nopo om poingulud kasai' i' do Kinorohingan. 11 Nga' tulun nopod suwai om oinsanan nopo dot angaraat dot id pagantangan do Kinorohingan. Om kororongit nga' nokotongkop no do hinonggo nopo. 12 Om ontong no o Kinorohingan diti pomogunan om kokito no dau dot araat no kopio, tu' angaraat ngai' nopo o kowoyo-woyoon di tulun do hiri. 13 Om boros kaddi do Kinorohingan dot id di Nuu, “Natantu' ku no dot id suang do ginawo ku do punsoon ngai' ku o tulun. Insanan ku nopo iyolo' do mamatai tu' noponu' no iti pomogunan do kororongit diyolo'. 14 Nga' iya' nopo om momonsoi nod kapal do rahat dot i kayu dot ongotiru' o wonsoyon; om pogibilik-bilikon no o hiri'd suang, om saaton no do tir o ponong id suang om ponong id soliwan di kapal. 15 Konoruo' nopo di kapal do wonsoyon nu om hatus om tolu nohopod om tolu o mito, om duwo nohopod om duwo o mito do kalaabo', om hopod om tolu o mito do kasawato'. 16 Om wansayan no do taap i kapal, om pialatan nopo di taap om i tolig om apat nohopod om apat o sontimito. Om wansayan no do tolu o rinantai di mogisimbau-simbau, om wansayan no do wawayaan o ponong id bombong. 17 Poporikot oku nondo do sakob do hiti'd pomogunan do pamaraag do koinsanai di kipinuhobo. Om oinsanan nopondo dot apatai i hiti'd pomogunan. 18 Nga' momonsoi oku i' do tumpongo dot id diya'. Sumuang no do hiri'd kapal, do miwoyo' di sawo nu, om i tangaanak nu'd kusai, om koinsanai di sawo diyolo'. 19-20 Om posuang no do hiri'd kapal do sarampasang-pasang o pointikid-tikid do bansa' do nintorusan om tombolog, om a' i' iyolo' apatai. 21 Om migit nogi' do mogisuayan o taakanon dokoyu om taakanon di nintorusan,” ka dau. 22 Om tonudo' ngai' nopo di Nuu i pinonuhuan do Kinorohingan diri.

Kinawansayan 7

I Sakob

1 Om boros kaddi do TUHAN dot id di Nuu, “Suang no do hilo'd kapal do miwoyo' di sompiiyon nu. Tu' iya' poo i momonsoi do korohian ku do hiti'd pomogunan. 2 Om mongigit no do turu' o pasang do pointikid-tikid do nintorusan di koino-ino dot akanon, om sapasang o pointikid-tikid do nintorusan dit a' koino-ino dot akanon. 3 Om migit nogi' do turu' o pasang do pointikid-tikid do bansa' do tombolog. Wonsoyon no o miagal diri om angapasi i' om angasakag kawagu o koinsanai di bansa' do nintorusan om tombolog do hiti'd pomogunan. 4 Turu' po tadau do mantad baino' om parasamon ku no dot a' tumodu-todu' do solinaid dot apat nohopod o tadau om apat nohopod o totuong, om angapatai i' o koinsanai dit ongkipinuhobo do winonsoi ku,” ka dau. 5 Om tonudo' ngai' nopo di Nuu i pinonuhuan do Kinorohingan diri. 6 Tumur nopo di Nuu do tontok di minadsakob o hiti'd pomogunan om onom nahatus o toun. 7 Om suang no i Nuu om i sawo dau, om i tangaanak dau'd kusai, om koinsanai di sawo di tangaanak dau do hiri'd kapal, om a' i' iyolo' apatai di sakob. 8 Koinsanai'ddi tontoluhan om tondu', om tandaha' om golupo do pointikid-tikid do bansa' do nintorusan om tombolog dit a' sosomu' om i sosomu' 9 nga' suminuang ngai' nopo do hiri'd kapal do tuminanud di Nuu, tu' iyo noddi o pinonuhuan do Kinorohingan. 10 Turu' poddi o tadau do mantad diri, om timpuun no do minadsakob. 11 Tontok dit onom no nahatus o toun di Nuu, do koontok di tadau do kohopod om turu' do tulan do koduwo, om oinsanan nopo i tudan do waig do suminimpulak do mantad id saalom do tana', om miniwang ngai' i totobon do waig do hilo'd tawan. 12 Om sondot noddi o rasam dot asapou do hiti'd pomogunan dot apat nohopod o tadau om apat nohopod o totuong do koloido'. 13 Om tontok i' do tadau'ddi do suminuang i Nuu, om i sawo dau, om i tolu o tanak dau'd kusai: i Sim, om i Ham, om i Yapit, om koinsanai di sawo diyolo' do hiri'd kapal do rahat. 14 Om tuminanud ngai' diyolo' o pointikid-tikid do bansa' do nintorusan dit angalaya' om i lalang, om it angagayo om it ongokoro', om koinsanai do bansa' do tombolog. 15 I tontoluhan om i tondu', om i tandaha' om i golupo, do pointikid-tikid do bansa' di kipinuhobo nga' tuminanud ngai' nopo di Nuu do suminuang di kapal. 16 Tu' miagal noddi o pinonuhuan do Kinorohingan. Om kosuang ngai' poddi iri om tabanai nogiddi do TUHAN i wawayaan di kapal. 17 Om padsakob no dot apat nohopod o tadau, om aralom noddi i waig tu' kahampung no i kapal do rahat. 18 Om marom-ralom nopoddi i waig do gisom do mampung-hampung poo i kapal do hiri'd waig. 19 Om murut-surut nopo o kogoyoo' di waig, gisom do nongoolitan ngai'ddi i nuluhon dit angakawas tomod. 20 Om a' nopo tumingkod i waig do gumayo do gisom do turu' o mito do nokosoibau di timpak do konuluhanan dot angakawas. 21 Om kapatai ngai' nopoddi it ongkipinuhobo di songingiyon do hiti'd pomogunan --- koinsanai di bansa' do tombolog, om nintorusan om tulun. 22 Nunu nopo i kipinuhobo do hiti'd pomogunan nga' nangapatai ngai' no. 23 Tu' rinaag ngai' no do Kinorohingan it ongkipinuhobo di songingiyon do hiti'd pomogunan --- koinsanai'd tulun, om nintorusan, om tombolog. Om i Nuu poo om koinsanai di poinsugku' dau do hiri'd kapal o napasi. 24 Om a' i' numinonos i waig do solinaid do hatus om limo nohopod o tadau.

Kinawansayan 8

Nononos I Sakob

1 Om a' i' do Kinorohingan nolihuan i Nuu om koinsanai di nintorusan do poinsugku' dau do hiri'd suang di kapal do rahat; om potonguso' noddi do Kinorohingan o tongus, om timpuun no do numinonos i waig. 2 Om koinsanai di tudan do waig do hilo'd saalom do tana', om i wawayaan do waig do hilo'd tawan nga' kosompon ngai' nopoddi. Om todu' noddi i rasam, 3 om monos-nonos nopoddi i waig do solinaid do hatus om limo nohopod o tadau. 4 Tontok di tadau do kohopod om turu' do tulan do koturu', om kosorod noddi i kapal do rahat dot id iso' o nuluhon do hilo'd konuluhanan dot Ararat. 5 Om monos-nonos nopoddi i waig, om tontok di tadau do koiso' do tulan do kohopod om ongkoulai nogi' o tompok di konuluhanan. 6 Katalib poddi ot apat nohopod o tadau om iwangai nogi' di Nuu i liligaon di kapal do rahat. 7 Om potuludo' no di Nuu ot iso' o bangkahak nga' a' no guminuli' kawagu iri. Suwai ko' tilombus nopo do minintulud do gisom do narasak kopio i waig. 8 Om potuludo' no di Nuu ot iso' o punai do mongoi pogontong ondung narasak no kopio i waig. 9 Nga' guminuli' i' kawagu i tombolog diri do hiri'd kapal do rahat tu' poingalit pod waig iti pomogunan, om aiso' po o sokoon dau. Om gomito' no di Nuu i punai'ddi, om posuango' no kawagu dau do hiri'd kapal. 10 Om andado' no di Nuu do gisom do norikot o turu' o tadau, om potuludo' nogi' kawagu dau i punai. 11 Om poguliai po kawagu di punai dot id di Nuu di dongsosodopon, nga' kitinangau noddi i punai do roun do saitun dit omulok po. Om koilaai noddi di Nuu do narasak no i waig. 12 Om andado' po kawagu di Nuu do turu' kawagu o tadau, om potuludo' no dau kawagu i punai; nga' diri nopo om a' no guminuli' kawagu i punai dot id dau. 13 Tontok dit onom nahatus om iso' o toun di Nuu, di tadau do koiso' do tulan do koiso', om narasak noddi kopio i waig. Om ukabai no di Nuu i totobon di kapal, om pikorowo-rowo no iyau, om kokito no dau do tumuu no i tana'. 14 Korikot poddi di koduwo nohopod om turu' o tadau di tulan do koduwo, om kotuu nogi' kopio i tana'. 15 Om boros kaddi do Kinorohingan dot id di Nuu, 16 “Labus no do mantad hino'd kapal do rahat, do miwoyo' di sawo nu, om i tangaanak nu, om i sawo diyolo'. 17 Om posoliwanon ngai' no i tombolog om i nintorusan do kaandad diya' om kasakag i' iyolo' om kotongkop diti pomogunan,” ka dau. 18 Om soliwan noddi i Nuu, om i sawo dau, om i tangaanak dau, om i sawo di tangaanak dau. 19 Om oinsanan nopo i nintorusan om i tombolog do luminabus do mantad hiri'd kapal do rahat do tuminunud di diyolo'd bansa'.

Pinapatahak i Nuu do Porsombahan

20 Om pomonsoi no i Nuu dot iso' o pananaraban do porsombahan di don TUHAN; om panganu no iyau do soronginan-nginan do mantad id pointikid-tikid do bansa' di nintorusan om tombolog di koino-ino dot akanon, om songkoyuo' nopo dau do minonorob iri do hiri'd pananaraban do porsombahan do numaan do porsombahan di sinumbali'. 21 Om nasanangan diri o TUHAN di winongi' di porsombahan diri. Om boros kaddi do TUHAN dot id suang do ginawo dau, “A' ku nondo kopio papalan kawagu iti pomogunan, dot i wonsoyon do tulun o kapamapalan; tu' oilaan ku i' do mantad po dit omulok po o tulun om araat no mantad o pomusorou dau. 22 Om solinaid nopo do hino iti pomogunan, om atantu' nondo o maso do mananom om mongomot. Om haro kasai' ot osogit om alasu', om haro o maso do magadau om maso do rumasam, om haro o dangadau om dongotuong,” ka dau.

Kinawansayan 9

Tumpongo do Kinorohingan dot id di Nuu

1 Om barakatai noddi do Kinorohingan i Nuu om koinsanai di tangaanak dau do kusai. Boros ka dau, “Paganak kou no dot ogumu', om kotongkop i' do mongiyon-iyon do hiti'd pomogunan o sinakagon dokoyu. 2 Om koinsanai do nintorusan, om tombolog, om sada' nga' moddosi indo dokoyu, tu' iyolo' nopo om id siriba' i' do kuasa' dokoyu. 3 Angaakan ngai' i' dokoyu iri, om i songinsuni dit ongotomou nga' angaakan ngai' i' dokoyu; tu' patahakon ngai' ku no iri do maan dokoyu'd kanon. 4 Nga' iso' poo ot a' dokoyu koino-ino dot akanon; iri po i tonsi di kiraha'. Pogoduhan ku pogi' iti nga' ginawo nopo om hiri id raha'. 5 Isai nopo o tulun do mamatai dot oiyo ko' tulun, om ohukuman no. Om nunu nopo o bansa' do nintorusan di mamatai do tulun om patayon ku no. 6 Tu' tulun nopo om winonsoi i' do pinoiyo do Kinorohingan, om iri no o kokuwaan dot isai nopo o mamatai do sompi' ko' tulun, om iyau nga' patayon nondo do tulun. 7 Maganak kou no dot ogumu', om kotongkop i' do hiti'd pomogunan o sinakagon dokoyu,” ka dau. 8 Om boros kad Kinorohingan dot id di Nuu, om id tangaanak di Nuu di tongokusai, 9 “Baino' no do momonsoi oku do tumpongo dot id dokoyu om id sinakagon dokoyu, 10 om id koinsanai di kipinuhobo --- koinsanai di tombolog, om i nintorusan --- koinsanai di luminabus do mantad hiri'd kapal do rahat do minoyo' dokoyu. 11 Om iti no o boros dit osiliu do tumpongo ku dot id dokoyu: mamatos oku no dot id koinsanai di kipinuhobo dot a' nondo kopio iyolo' patayon do sakob; tu' a' nondo kawagu raagon do sakob iti pomogunan. 12 Sumiliu nopo do tanda' do poinggirot kasai' iti tumpongo ku dot id dokoyu, om id koinsanai di kipinuhobo, 13 om i buluntung do polotingon ku do hilo'd tawan. 14 Soira' nopo do kulumutan ku do haun ilo tawan, om okito nondo i buluntung, 15 om ahandaman ku no i tumpongo ku dot id dokoyu, om id koinsanai di nintorusan, dot a' no kawagu raagon do sakob o koinsanai di kipinuhobo. 16 Soira' nopo do haro o buluntung do hilo'd tawan, om okito ku nondo iri, om ahandaman ku i tumpongo di poinggirot kasai' dot id pialatan ku om koinsanai di kipinuhobo do hiti'd pomogunan. 17 Iri no o tanda' di tumpongo do winonsoi ku dot id koinsanai di kipinuhobo do hiti'd pomogunan,” ka dau.

I Nuu om i Tangaanak Dau

18 Iri nopo i tangaanak di Nuu do tongokusai, i luminabus do mantad hiri'd kapal do rahat om i Sim, i Ham, om i Yapit (I Ham nopo om tapa' di Kanaan). 19 Iri no i tolu tangaanak di Nuu diri o taki-aki do koinsanai'd tulun do hiti'd pomogunan. 20 I Nuu nopo om mongungumo, om iyau no ot id gulu kopio pomutanom dot anggur. 21 Tontok di nokoinum i Nuu do waig dit anggur dau, om kaawuk noddi iyau. Om labas no iyau, om lii no do hiri'd suang di kiim dau. 22 Om kokito nopoddi di Ham (i Ham nopo om tapa' di Kanaan), do poillabas i tapa' dau, om soliwan no iyau do minongoi pomisunud di duwo o tobpinai dau. 23 Om ongoi noddi i Sim om i Yapit do rasuk dit anaaru. Om ungkalado' no diyolo' i rasuk om polikudo' no do minongigit. Om pamanau noddi iyolo' do posunsuri do suminuang di kiim, om kumutai no diyolo' i tapa' diyolo', om a' i' iyolo' poingontong, tu' mada' iyolo' do kokito di tapa' diyolo' do poillabas. 24 Om tontok di notibanasan i Nuu om koilaai nogi' dau i winonsoi di tanak dau dit id domulok. 25 Om boros kaddi dau, “Ousung no i Kanaan! Osiliu nondo iyau do turipon di tongotobpinai dau. 26 Royohon no o TUHAN, i Kinorohingan di Sim! Osiliu nondo i Kanaan do turipon di Sim. 27 Maha' daa om posopohon do Kinorohingan o sinakagon di Yapit! Maha' daa om poinsugku' i sinakagon dau do sinakagon di Sim! I Kanaan nopondo om osiliu do turipon di Yapit,” ka dau. 28 Tontok di nolimpanus i sakob om tolu po nahatus om limo nohopod o toun di Nuu do poimpasi. 29 Om kapatai noddi i Nuu di siam nahatus om limo nohopod o toun dau.

Kinawansayan 10

Sinakagon di Tangaanak di Nuu

1 Iti no o sinakagon di Sim, om i Ham, om i Yapit, i tangaanak di Nuu do tongokusai. Koinsanai diyolo'd tolu om kianak ngai' nopo di nakatalib i sakob. 2 Tangaanak nopo di Yapit om i Gomor, i Magog, i Madai, i Yawan, i Tubal, i Misik, om i Tiras. Om iyolo' ngai' no o taki-aki do koinsanai di bansa' di kingaran do ngaran diyolo'. 3 Sinakagon nopo di Gomor om i bansa' dot Askinas, om Ripat om Togarma. 4 Sinakagon nopo di Yawan om i bansa' dot Ilisa, om Sepanyol, om Siprus, om Rodis. 5 Om iyolo' no o taki-aki do tulun di momogun-mogun do hilo'd potoropis do tisan do rahat om i hilo'd kopulawan. Iyolo' ngai' no i sinakagon di Yapit, nga' nokopogisuwai-suwai no o pomogunan do tiyonon diyolo' do tumanud di payat diyolo', om mogisuwai-suwai o boros diyolo'. 6 Om tangaanak no di Ham do tongokusai om i Kus, om i Masir, om i Libia, om i Kanaan. Om iyolo' ngai' no o taki-aki di bansa' di kingaran do ngaran diyolo'. 7 Sinakagon nopo di Kus, om i bansa' do Siba, om Hawila, om Sabta, om Raima, om Sabtika. Sinakagon nopo di Raima om i bansa' do Siba om Didan. 8 Om kianak i Kus do kusai dot i Nimrod o ngaran. Om iyau no o nosiliu do raja' dit okoris kopio dit id gulu kopio do hiti'd pomogunan. 9 Om nuhupan iyau'd TUHAN do gisom do nosiliu iyau do magagasu dit otorus kopio. Om iri noddi o koboro-boros do tulun do poingkaa, “Silihon ko po daa do TUHAN do magagasu do miagal di Nimrod tu' nabantug dot otorus!” ka. 10 Porintaon nopo dau dit id gulu i' kopio om Babil, Irik, om Akad. Iti nopo tolu o kinoiyonon diti om id suang ngai' do pomogunan do Babilonia. 11 Om mantad no dot id pomogunan diri, om pakayaai po di Nimrod do hilo'd pomogunan dot Asur, om wonsoyo' no dau i bandar do Niniwi, om Rihobot Ir, om Kala, 12 om Risin, it id piolitan do Niniwi om i bandar dot agayo di roitan do Kala. 13 Sinakagon nopo di Masir om i bansa' do Lidia, om Ananim, om Lihab, om Naptuhim, 14 om Patrusim, om Kasluhim, om Kaptorim. Iyolo' no i taki-aki do tulun do Pilistin. 15 Om tangaanak nopo di Kanaan do tongokusai om i Sidon, it id dotuo, om i Hit. Om iyolo' no o taki-aki di bansa' di kingaran do ngaran diyolo'. 16 Om i Kanaan nogi' o taki-aki di bansa' do Yobusi, om Amori, om Girgasi, 17 om Howi, om Arki, om Sini, 18 om Arwadi, om Somari, om Hamati. Om kotongkop noddi i piro-piro o sinakagon di Kanaan, 19 gisom do wolit nopoddi di pomogunan do bansa' do Kanaan om ruminalad do mantad hilo'd Sidon om poingkaa ponong id salatan do gisom do korikot do hilo'd Gorar, it id somok do Gasa; om ruminalad ponong id koulayon do gisom do korikot do hilo'd Sodom, om Gomura, om Adma, om Siboyim, it id somok do Lasa. 20 Iyolo' ngai' no i sinakagon di Ham, nga' nokopogisuwai-suwai no o pomogunan do tiyonon diyolo' do tumanud di payat diyolo', om mogisuwai-suwai o boros diyolo'. 21 I Sim noo, it id dotuo' ko' i Yapit, om taki-aki do bansa' dot Ibrani. 22 Iti ngai' no o tangaanak di Sim do tongokusai --- i Ilam, om i Asur, om i Arpaksad, om i Lud, om i Aram. Om iyolo' no o taki-aki di bansa' di kingaran do ngaran diyolo'. 23 Sinakagon nopo di Aram, om i bansa' dot Us, om Hul, om Gitir, om Mas. 24 I Arpaksad nopo om tapa' di Sila, i tapa' di Ibir. 25 I Ibir nopo om kianak do duwo o kusai: pinomungaran nopo di tiso' do tanak dau om i Pilig, tu' tontok nopo di poimpasi po iyau om nopogitongkiad-kiad o tulun do hiti'd pomogunan; om ngaran no di tanak dau di koduwo om i Yoktan. 26 Sinakagon nopo di Yoktan om i bansa' dot Almodad, om Silip, om Hasarmawit, om Yira; 27 om Hadoram, om Usal, om Dikla, 28 om Obal, om Abimail, om Siba, 29 om Opir, om Hawila, om Yobab. Iyolo' nopodti om sinakagon ngai' nopo di Yoktan. 30 Iri nopo tana' do kinoiyonon diyolo' om mantad po do hilo'd Misa om gisom do korikot do hilo'd Sipar, it id konuluhanan di ponong id koulayon. 31 Iyolo' ngai' no i sinakagon di Sim, nga' nokopogisuwai-suwai no o pomogunan do tiyonon diyolo', do tumanud di payat diyolo', om mogisuwai-suwai o boros diyolo'. 32 Koinsanai di bansa'ddi om sinakagon ngai' nopo di Nuu, i mogisuayan o bansa' do tumanud di diyolo' do sinolusukan. Id tohuri nopo ko' i minadsakob om sinakagon ngai' no di tangaanak di Nuu do kusai o bansa'd tulun do hiti'd pomogunan.

Kinawansayan 11

I Walai dot Akawas do Babil

1 Di nopo di gulu po, om iso' no o bansa' do boros do tulun do hiti'd pointongkop do pomogunan om oiyo nopo o boros diyolo'. 2 Om tontok di mininghombo iyolo' do ponong id koulayon, om kobontol no iyolo' do tana' dot arantai do hilo'd Babilonia, om pomogun-mogun noddi iyolo' do hiri. 3 Om pogiboro-boros noddi iyolo' do poingkaa, “Kainou momonsoi do bata', om uhubon toko' om okodou i',” ka diyolo'. Om haro noddi o bata' diyolo' do maan do powonsoyon, om haro o tir do popogisosokot diri. 4 Om boros kaddi diyolo', “Baino' nopo, om popoingkakat toko' dot iso' o bandar om momonsoi toko' dot iso' o walai dot akawas, i kosunggu do hilo'd tawan o kasawato', om koinggayo i' o ngaran toko', om a' toko' indo kopogitongkiad-kiad do hiti'd pomogunan,” ka diyolo'. 5 Om lintuhun noddi o TUHAN do minongoi ontong di bandar om i walai dit akawas di winonsoi di tongoulun diri. 6 Om boros kaddi do TUHAN, “Iti nopo tulun diti om iso' i' o bansa' om iso-iso' o bansa' do boros. Iti nopodti om koimpuunon nogi' di pokiwawansayan diyolo'. Om a' no alaid om owonsoi ngai' no diyolo' o nunu nopo i korohian diyolo'. 7 Osonong nogi' do lumintuhun toko' om pogisuwai-suwayon toko' i' o boros diyolo', om a' i' iyolo' kopogisuhu-suhut do mogiboro-boros,” ka dau. 8 Om pogitongkiad-kiado' noddi do TUHAN iyolo' do pinotongkop diti pomogunan. Om tingkadai noddi diyolo' do momonsoi i bandar diri. 9 Om iri nopo i bandar diri nga' pinungaranan do “Babil”. Tu' hilo' no o TUHAN do pinopogisuwai-suwai do boros do tulun, om hilo' nogi' do pinogitongkiad-kiad dau o tulun do pinotongkop diti pomogunan.

Sinakagon di Sim

10 Iti ngai' no o sinakagon di Sim. Tontok di duwo no toun do mantad di minadsakob, di hatus no o toun di Sim, om kianak diri iyau dot iso' o kusai, dot i Arpaksad o ngaran. 11 Om mantad nopoddi om limo po nahatus o toun di Sim do poimpasi. Om haro po o tangaanak dau do suwai. 12 Om tontok di tolu nohopod om limo o toun di Arpaksad, om kianak diri iyau do kusai, dot i Sila o ngaran. 13 Om mantad nopoddi om apat po nahatus om tolu o toun di Arpaksad do poimpasi. Om haro po o tangaanak dau do suwai. 14 Om tontok di tolu nohopod o toun di Sila, om kianak diri iyau do kusai, dot i Ibir o ngaran. 15 Om mantad nopoddi, om apat po nahatus om tolu o toun di Sila do poimpasi, om haro po o tangaanak dau do suwai. 16 Om tontok di tolu nohopod om apat o toun di Ibir om kianak diri iyau do kusai, dot i Pilig o ngaran. 17 Om mantad nopoddi, om apat po nahatus om tolu nohopod o toun di Ibir do poimpasi. Om haro po o tangaanak dau do suwai. 18 Om tontok di tolu nohopod o toun di Pilig, om kianak diri iyau do kusai, dot i Rohu o ngaran. 19 Om mantad nopoddi om duwo po nahatus om siam o toun di Pilig do poimpasi. Om haro po o tangaanak dau do suwai. 20 Om tontok di tolu nohopod om duwo o toun di Rohu, om kianak diri iyau do kusai, dot i Sorug o ngaran. 21 Om mantad nopoddi, om duwo po nahatus om turu' o toun di Rohu do poimpasi. Om haro po o tangaanak dau do suwai. 22 Om tontok di tolu nohopod o toun di Sorug, om kianak diri iyau do kusai, dot i Nahur o ngaran. 23 Om mantad nopoddi, om duwo po nahatus o toun di Sorug do poimpasi. Om haro po o tangaanak dau do suwai. 24 Tontok di duwo nohopod om siam o toun di Nahur, om kianak diri iyau do kusai, dot i Tira o ngaran. 25 Om mantad nopoddi, om hatus po om hopod om siam o toun di Nahur do poimpasi. Om haro po o tangaanak dau do suwai. 26 Om tontok di turu' nohopod o toun di Tira, om kianak diri iyau do tolu o kusai. Ngaran nopo di tangaanak dau'ddi om i Abram, i Nahur, om i Haran.

Sinakagon di Tira

27 Iti ngai' no o sinakagon di Tira: I Tira nopo om tapa' di Abram, om i Nahur, om i Haran. I Haran nopo om tapa' di Lut. 28 Om kapatai no i Haran do hilo'd Ur, i hilo'd Babilonia, i bandar di tadon mantad dau, di poimpasi po i tapa' dau. 29 Om panansawo no i Abram om i Sarai, om panansawo no i Nahur om i Milka, i tanak di Haran. Om kianak po i Haran do suwai, dot i Yiska o ngaran. 30 I Sarai nopo nga' a' maganak. 31 Om angatai no di Tira i Abram, i tanak dau, om i Lut i manangaki dau, om i Sarai i monongiwan dau, i sawo di Abram, do tuminongkiad do mantad hilo'd Babilonia. Ongoyon nopo daa kopio di Tira om hilo'd pomogunan do Kanaan. Nga' maha' di nokorikot iyolo' do hilo'd Haran, om pomogun-mogun no iyolo' do hilo'. 32 Om hiri noddi id kinoiyonon diri o kinapatayon di Tira di duwo nahatus om limo nohopod o toun dau.

Kinawansayan 12

Linohou do Kinorohingan i Abram

1 Om boros ka do TUHAN dot id di Abram, “Tongkiad nodti pomogunan nu, om i koobpinayan nu, om i walai di tapa' nu, om mongoi i' do hilo'd pomogunan do potudukon ku diya'. 2 Om onuan ku indo iya' do sinakagon dot ogumu', om iyolo' nondo o sumiliu do bansa' dot agayo. Om barakatan ku nogindo iya' om pobontugon ku o ngaran nu, om osiliu ko i' do barakat dot id tulun dot ogumu'. 3 Om barakatan ku nondo i tulun di mamarakat diya', nga' papalan ku indo i tulun di momopol diya'. Om iya' no o pawayaan ku do barakat do patahakon dot id toinsanan o bansa' do hiti'd pomogunan,” ka dau. 4-5 Tontok di turu' nohopod om limo o toun di Abram, om pamanau no iyau do tuminongkiad di bandar do Haran, do tuminanud di pinonuhuan do TUHAN dot id dau. Om angatai no di Abram i Sarai i sawo dau, om i Lut i manangaman dau, om i tongoturipon di naanu diyolo' do hilo'd Haran, om nigitan o koinsanai di dapu' dau, om pamanau nogiddi iyolo' do kuminaa do hilo'd Kanaan. Om tontok di nokorikot iyolo' do hilo'd Kanaan, 6 om pinghombo no i Abram do tuminongkop di pomogunan, gisom do nokorikot iyau do hiri'd guas do kayu di hilo'd Mori, i tiiyonon do sumambayang do hilo'd Sikim. (Om maso nopoddi nga' kakal po do tulun do Kanaan do momogun-mogun do hilo'.) 7 Om intalang no o TUHAN dot id di Abram, om boro-boros no dau do poingkaa, “Iti no i pomogunan do patahakon ku di sinakagon nu,” ka dau. Om pomonsoi noddi i Abram do pananaraban do porsombahan do hiri, do don TUHAN, i minintalang dot id dau. 8 Katalib poddi iri, om pamanau no i Abram do kuminaa ponong id salatan, do minongoi do hiri'd konulu-nuluan di ponong id koulayon do mantad id bandar do Baitol, om powonsoyo' no dau i kiim dau dot id piolitan di bandar do Baitol om i bandar dot Ai. Baitol nopo nga' ponong id kotonobon, om Ai no om ponong id koulayon. Om hilo' nga' minomonsoi nogi' i Abram do pananaraban do porsombahan, om suminambayang iyau dot id TUHAN. 9 Om lombus noddi kawagu iyau do minamanau do milombus-pilombus do mantad id iso' o kinoiyonon om kumaa dot id kinoiyonon do suwai do kuminaa ponong id salatan di tana' do Kanaan.

Hilo'd Masir i Abram

10 Om pononglous noddi o hilo'd Kanaan, dot adalaan kopio, gisom do minundaliu kawagu'ddi i Abram do kuminaa do hilo'd Masir, i ponong id salatan no kopio, do mongoi iyon do hilo' do daamot. 11 Om tontok di mirririkot no iyolo' do hilo'd Masir, om boros ka di Abram dot id di Sarai i sawo dau, “Iya' nopo om olumis kopio koondu'. 12 Om soira' nopondo do kokito diya' i tulun do Masir, om roitan ko nondo diyolo' do sawo ku. Om patayon oku nondo diyolo', om iya' po o posion. 13 Nga' sunudan no iyolo' dot iya' nopo om tobpinai ku i'. Om iya' nondo o kaantob diyolo' do mamatai doho'. Om gompion oku indo diyolo' kosonong-sonong,” ka dau. 14 Om otopot iddi kopio dot olumis i Sarai, i sawo di Abram diri do nokito di tulun do Masir di nokorikot iyolo' do hilo'd Masir. 15 Om haro'ddi o piro-piro di pagawai di raja' do nokokito di Sarai. Om ngoyo' noddi diyolo' sunudai i raja' dot olumis kopio i tondu'ddi. Om pootodo' noddi diyolo' i Sarai do hiri'd walai di raja'. 16 Om osonong tomod diri i raja' dot id di Abram, dot i Sarai o nakapamansayan dau do miagal diri dot id di Abram. Om nonuan diri di raja' i Abram dot ogumu' o turipon, om dumba', om kambing, om sapi', om kaladai om unta. 17 Om iri no i nongoi di raja' i Sarai do pinorikot diri do TUHAN o toruol dit araat kopio dot id raja' diri, om id tulun di poingiyon do hiri'd walai di raja'. 18 Om lohowo' noddi di raja' i Abram, om uhoto' no dau iyau do poingkaa, “Nunu kopio o winonsoi nu dot id doho'? Nokuro tu' a' oku diya' sinunudan do sawo nu i Sarai? 19 Nokuro tu' minomoros ko do tobpinai nu i Sarai, om pinologos oku diya' do minanansawo dau? Diya iti sawo nu! Ongoyo' ilo'! Om poggidu' kou!” ka dau. 20 Om suhuo' noddi di raja' o piro-piro di pagawai dau do popoggidu' di Abram. Om posoliwano' noddi diyolo' do mantad id pomogunan diri i Abram om i sawo dau, om koinsanai'ddi di Abram do songonuon.

Kinawansayan 13

Minitongkiad i Abram om i Lut

1 Om pakayaai no di Abram do ponong id utara do suminoliwan di pomogunan do Masir, om pakayaai no dau do ponong hiri'd salatan do pomogunan do Kanaan, do miwoyo' di sawo dau om koinsanai di dau do songonuon. Om i Lut nga' tuminanud nogi' dau. 2 I Abram nopo om tulun di kaya' kopio tu' kidumba', om kikambing, om kisapi' iyau. Om haro nogi' o tamas om pirok dau. 3 Om tongkiad noddi i Abram do hilo', om pamanau no do milombus-pilombus do mantad id iso' o kinoiyonon om kumaa no dot id kinoiyonon do suwai do kuminaa do hilo'd Baitol. Om korikot no iyau do hiri'd kinoiyonon dit id piolitan do Baitol om Ai, i pinomukiiman dau di gulu po, 4 om hiri no o pinoingkakatan dau do pananaraban do porsombahan. Om hilo' no iyau do suminambayang dot id TUHAN. 5 Om i Lut nga' haro nogi' o sompiiyon, om haro o susuhuon, om dumba', om kambing, om sapi'. 6 Om a' diri kabagal o pangakan-ngakanan di tayam-tayam diyolo', dot ondung misugku' kasai' iyolo', tu' sopigumuan kopio i' iyolo' do tayam-tayam. 7 Om gowoi poddi do minogisosongkiwal i tongoulun di madtamong di tayam-tayam di Abram om i tayam-tayam di Lut. (Tontok nopoddi nga' kakal po do tulun do Kanaan om tulun do Poris o momogun-mogun do hiri.) 8 Om boros kaddi di Abram dot id di Lut, “Iyato nopodti om miobpinai i', om a' i' osonong do misongkiwal ilo tulun to. 9 Nga' iyo nopodti om osonong nogi' do mitongkiad to. Pobpili' nopo do tana' di korohian nu. Om mongoi ko nopo iya' dot id iso' o kinoiyonon om mongoi oku no iyoho' dot id kinoiyonon do suwai,” ka dau. 10 Om ontong no i Lut dot id posorili' di kinoiyonon diyolo', om kokito no dau dot osima' do waig i Rantai do Yordan, om poirrikot do hilo'd Suar, do miagal po di kabun do TUHAN ko' i pomogunan do Masir. (Tontok nopodti om a' po do TUHAN naraag i bandar do Sodom om Gomura.) 11 Om pilio' no di Lut o dau, om insanai nopo dau i Rantai do Yordan do minanganu. Om pamanau noddi iyau do kuminaa ponong id koulayon. Om iyo noddi o kinowoyo-woyoo' diyo' Abram di Lut do minitongkiad. 12 I Abram nopo om tuminimporon i' do hilo'd Kanaan, nga' i Lut no om minomukiim dot id pogialatan di kabandaran di hiri'd rantai, it id somok do Sodom. 13 Iri nopo tongoulun di poingiyon dot id bandar do Sodom diri om angaraat om kidusa dot id TUHAN.

Minongoi i Abram do Hilo'd Hibron

14 Tontok di nakapamanau i Lut do mantad hiri'd kinoiyonon di Abram, om boro-boros no o TUHAN dot id di Abram do poingkaa, “Pikorowo-rowo no do hino'd kinoingkokoton nu om antangan ngai' no o posorili' nu, antangan no o ponong id koulayon om ponong id kotonobon, om antangan o ponong id utara om ponong id salatan. 15 Patahakon ku i' diya' om i sinakagon nu o toinsanan di tana' dit okito nu. Om diya' nondo kasai'ddi do gisom dot alaid. 16 Om onuan ku po iya' do sinakagon dot ogumu', gisom dot aiso' no tiso' po do kointob do kogumuon diyolo'; do miagal do pupuk do hiti'd tana' tu' aiso' no o tulun do kointob. 17 Ngoyo' ngai' no tongkopo' do mogontong ilo tana' tu' patahakon ngai' ku no diya' ilo',” ka dau. 18 Om powoliho' noddi di Abram i kiim dau, om undorong no iyau dot id somok di koguasan do kayu di tiiyonon do sumambayang do hilo'd Mamri, it id somok do Hibron. Om hiri no iyau do minomonsoi do pananaraban do porsombahan di don TUHAN.

Kinawansayan 14

Tinulung di Abram i Lut

1 Haro ot apat o raja': i Amrapil i mantad hilo'd Babil, om i Ariok i mantad hilo'd Ilasar, om i Kidorlamor i mantad hilo'd Ilam, om i Tidal i mantad hilo'd Goyim, 2 do suminaap do limo o raja' do suwai: i Bira i mantad hilo'd Sodom, om i Birsa i mantad hilo'd Gomura, om i Sinab, i mantad hilo'd Adma, om i Simibir i mantad hilo'd Siboyim, om i raja' do Bila (ko' Suar). 3 Iri nopo limo o raja' diri om minogiaamung om tuminimung do hilo'd Rantai do Sidim, i roitan do Rahat do Napatai do baino'. 4 Id suang i' daa iyolo' do pomorintaan di Raja' Kidorlamor do solinaid do hopod om duwo toun, nga' tontok di kohopod om tolu do toun om saap noddi iyolo' dau. 5 Om tontok di kohopod om apat do toun, om rikot no i Kidorlamor, om i ponokipakat dau do miwoyo' di soudor diyolo' dot ogumu' do minongoi pangala' di tulun do Ropaim do hilo'd Astirot-Karnaim, i tulun do Susim do hilo'd Ham, om i tulun dot Imim di hilo'd Siawi-Kiriataim, 6 om i tulun do Hori do hilo'd konuluhanan dot Idom om gusao' po diyolo' iyolo' do gisom do nokorikot do hilo'd Ilparan, it id tisan do tana' do kowotuan. 7 Om tutuk nogiddi iyolo' do hilo'd Kadis (i roitan dot In-Mispat do maso'ddi.) Om kosolod ngai' nopo diyolo' i pomogunan dot Amalik om naala' i tulun dot Amori di poingiyon do hilo'd Hasison-Tamar. 8 Om timungo' ngai' noddi di raja' do Sodom, om Gomura, om Adma, om Siboyim, om Bila i soudor diyolo' do hilo'd Rantai do Sidim do mongoi sangod di 9 raja' dot Ilam, om Goyim, om Babilonia, om Ilasar. Om limo diri o raja' do suminaap dit apat no o raja'. 10 Hiri nopod rantai diri nga' ogumu' o nukadan do pinongonuan do tir, om tontok di minumbal daa do minogidu' ngai' i raja' do Sodom om Gomura do mantad hiri'd pisangadan diri, om kongosuang nogi' iyolo' di nukadan diri, nga' iri nopo i tolu o raja' do suwai om nokopoggidu' i' do kuminaa do hiri'd konuluhanan. 11 Om onuo' ngai' nopoddi dit apat o raja' o konunu-nunuan do hiri'd pomogunan do Sodom om Gomura, om pinotonggoi ngai' nogi' o taakanon, om tongkiad nogiddi iyolo'. 12 I Lut nopo, i manangaman di Abram, om poingiyon daa do hilo'd Sodom. Om iyau nga' tinanggayan i' di piro-piro o pisangod do mitonggoi do koinsanai di dapu' dau. 13 Nga' haro o songulun po do nokopoggidu', om iyau poddi o minongoi popoilo di Abram, i tulun dot Ibrani diri, do koinsanai di nongosiliu'ddi. I Abram nopo om poingiyon do hiri'd somok di koguasan do kayu di tiiyonon do sumambayang. Om sanganu nopo di koguasan do kayu'ddi om i Mamri, i tulun dot Amori. I Mamri nopo om i tobpinai dau do tongokusai, i Iskol om i Anor, om koombolutan i' om ponokisokodung di Abram. 14 Om soira' di nokorongou i Abram do natanggayan do pisangod i manangaman dau, om timungo' ngai' no dau do hiri'd kokiiman dau i tulun dau dit ongoubas do sumangod. Om kogumuo' nopo diyolo' di notimung om tolu nahatus om hopod om walu' o tulun. Om gusao' no diyolo' it apat o raja' do gisom do nokorikot do hilo'd bandar do Dan. 15 Om pogibohogi-hogio' noddi di Abram i tulun dau do piro-piro o posukan di nokorikot iyolo'd hilo'. Om ngoyo' no diyolo' songodo' i pisangod di dongotuong, om naala' iddi diyolo' i pisangod. Om gusao' po dau iyolo' do gisom do nokorikot do hilo'd Hoba, i ponong id utara do Damsik. 16 Om naanu iddi kawagu di Abram i dapu' di tinanggayan daa di pisangod. Om i Lut, i manangaman dau nga' naahau nogi' dau do mitonggoi do koinsanai di dapu' di Lut, om i nogi' i tongoondu', om koinsanai di tulun do suwai di natanggayan daa di pisangod.

Binarakatan di Milkisidik i Abram

17 Tontok di nokoguli' i Abram do mantad id nakamanangan dau do suminaap di raja' Kidorlamor om i piro-piro o raja' do suwai, om soliwan no i raja' do Sodom do mantad hiri'd pomogunan dau do minongoi solowot di Abram do hilo'd Rantai do Siawi, (i roitan nogi' do Rantai di dong Raja'). 18 Om i Milkisidik, i raja' do Salim, om it imam po do mogobi-obi' do Kinorohingan dit Asawat Kopio, nga' minigit nogi' do roti om waig dot anggur do patahakon di Abram. 19 Om barakatai no di Milkisidik i Abram do poingkaa, “Pokionuon ku o Kinorohingan, it Asawat Kopio, i minomonsoi do tawan om pomogunan, do mamarakat di Abram! 20 Royohon no o Kinorohingan, it Asawat Kopio, i minanahak diya' do kamanangan do suminaap di pisangod nu!” ka. Om onuwai noddi di Abram i Milkisidik do sompihopod do koinsanai di dapu' di nigitan dau, i naahau kawagu dau do mantad id pisangod. 21 Om boros kaddi di raja' do Sodom dot id di Abram, “Onuo' ngai' nopo ino dapu' di naahau nu, nga' pogulion ngai' po doho' i tulun ku,” ka dau. 22 Om boros ka di Abram do suminimbar, “Sumumpa' oku no dot id toguang do TUHAN, i Kinorohingan, it Asawat Kopio, i minomonsoi do tawan om pomogunan, 23 dot ongoiso' piya nga' a' oku i' manganu di diya' mantad do songonuon. Banang-banang piya ko' tali-tali do kasut nga' a' oku i' manganu. Om a' ko indo milo do momoros dot, 'Iyoho' o pinapakaya' di Abram,' ka. 24 A' oku i' manganu do nunu nopo do maan ku'd doho'. Iri no i nangapakai di tulun ku ot onuon ku. Nga' pologoson nopo i piro-piro o ponokisokodung ku, i Anor, om i Iskol, om i Mamri, do manganu di diyolo' do gontok,” ka dau.

Kinawansayan 15

Tumpongo do Kinorohingan dot id di Abram

1 Om katalib poddi iri, om haro'ddi o pinointalang do nokito di Abram, om korongou no dau o TUHAN do minoro-boros dau do poingkaa, “Kada' poddosi, oi Abram, intirungan ku i' iya' do mantad id koligagaanan om onuan ku iya' dot isomuli' dot agayo,” ka. 2 Nga' boros ka di Abram do suminimbar, “Oi TUHAN, i Kinorohingan, nunu o guna' dit isomuli' nu doho', tu' iyoho' nopo om aiso' i' o tanak? Om i Iliasar noo, i tulun do Damsik, i turipon ku, o tumungkus do dapu' ku. 3 Tu' a' oku i' diya' nonuan do tanak, om gisom diri do songulun no dot id pogialatan dilo turipon ku o tumungkus do dapu' ku,” ka dau. 4 Om korongou poddi kawagu di Abram o TUHAN do minoro-boros dau do poingkaa, “Okon i' ko' i turipon nu o kotungkus dilo dapu' nu, suwai ko' tanak nu i' kopio o kotungkus,” ka. 5 Om angatai noddi do TUHAN i Abram do suminoliwan, om boro-boros no iyau dot id di Abram do poingkaa, “Tingaha' pogi' do hilo'd tawan om umbalan do mongintob ilo rombituon ondung piro no o ginumu'; om iyo noddi o kogumuon do sinakagon nu,” ka dau. 6 Om pogondos nod TUHAN i Abram. Om TUHAN diri nga' nohubayaan i' dau. 7 Om boro-boros po kawagu o TUHAN dot id di Abram do poingkaa, “Iyoho' no i TUHAN, i minomoyo' diya' do suminoliwan do mantad hilo'd Ur, i hilo'd Babilonia, do papatahak diya' diti tana' do sumiliu do diya'd songonuon,” ka. 8 Nga' boros ka di Abram, “Oi TUHAN, it Asawat Kopio, poingkuro oku do koilo dot asanganu kopio ku iti tana'?” ka dau. 9 Om boros kad TUHAN do suminimbar, “Ngoyo' oku diya' onuwai do songinan o sapi', om songinan o kambing do tondu', om songinan o dumba' di tontoluhan, dot i tolu ngai' nogi' o toun do tumur. Om songinan o punai, om songinan o sikukur,” ka. 10 Om pootodo' no di Abram i nintorusan diri dot id Kinorohingan, om pipapaso' ngai' no dau iri. Om patadsaro' ngai' nogiddi dau iri do duwo o rulud do pinogiontok-ontok i pinogipapas-papas; nga' i nopo tombolog om a' i' dau pinapas. 11 Om rikot no daa o tombolog di mangangakan do tonsi do nintorusan di napatai do mongoi daa pangakan di nintorusan di pinapas di songingiliu'ddi, nga' nougadan i' di Abram iri. 12 Tontok di motingkotonob no o tadau, om koodop no i Abram do gisom do nokoolong tomod. Om sumarat diri iyau om moddosi. 13 Om boros kad TUHAN dot id dau, “Osiliu nondo do sompogunan o sinakagon nu do hilo'd pomogunan do suwai. Om osiliu iyolo' do turipon do hilo', om inggori-goriton iyolo' do solinaid dot apat nahatus o toun. 14 Nga' hukuman ku indo o bansa' di monguripon di sinakagon nu, om soira' nopondo do tumongkiad i sinakagon nu do mantad id pomogunan diri, om ogumu' nondo o dapu' dot oigitan diyolo'. 15 Iya' nopo om otogui i', om osonong o kapatai-patayo' nu, om id lobong i' o pamalabangan diya'. 16 Ingapat po kopilombus o sinakagon di tangaanak nu, om koguli' nogindo kawagu iyolo' do hiti, tu' a' ku po uyungon i tulun dot Amori dot a' po adalaan kopio o kararaat diyolo' do gisom dot a' nondo milo dot a' hukuman,” ka dau. 17 Tontok di notonob o tadau, dit otuong noddi, om sigog i' do haro o lansang di mogolisun om haro o tata' di kitapui do mandak-bandak do tuminalib dot id pogiolitan di papas di nintorusan di songintadsar. 18 Om tontok nogiddi dot id kinoiyonon diri do minomonsoi o TUHAN do tumpongo dot id di Abram. Boros kad TUHAN, “Mamatos oku no do patahakon ku do sinakagon nu o koinsanai do tana' diti, do mantad di wolit do tana' do Masir om gisom do korikot di bawang dot Iprat, 19 om kosuang ngai' no o tana' do tulun do Kini, om Kinas, om Kadmon, 20 om Hit, om Poris, om Ripaim, 21 om Amori, om Kanaan, om Girgasi, om Yobus,” ka dau.

Kinawansayan 16

I Hagar om I Ismail

1 I Sarai nopo i sawo di Abram diri, om aiso' po o tanak. Nga' haro o songulun o sumandak do bansa' do Masir do nanu dau do turipon, dot i Hagar o ngaran. 2 Om boros ka di Sarai dot id di Abram, “A' nod TUHAN, i Kinorohingan pologoson diti do kianak oku. Osonong nogi' dot ongoyon nu duduno' i turipon ku, ulan toi' om kianak iyau do maan ku do tanak ku,” ka dau. Om kookunai noddi di Abram i pinoboros di Sarai. 3 Om podudunai noddi di Sarai di Abram i Hagar do maan di Abram do panakasawo. (Iti nopo nga' nosiliu di hopod no o toun di Abram do poingiyon do hilo'd Kanaan.) 4 Om duduno' noddi di Abram i Hagar, om ponontian no iyau. Nga' soira'ddi do noilaan di Hagar do monontian iyau, om oondos tomod diri iyau, om mongulok-ulok iyau di Sarai. 5 Om boros kaddi di Sarai dot id di Abram, “Iyoho' i' o pinapatahak di Hagar dot id diya' nga' soira' nopoddi do noilaan dau do monontian iyau om mongulok-ulok iddi iyau doho'! Om diya' nod kasalaan diti. Om TUHAN no o momutus dato, ondung isai dato ot otopot. Iya' tuu ko' iyoho',” ka dau. 6 Om boros ka di Abram do suminimbar, “Osonong i' bo no, dot iyau nopo om turipon nu i', om id siriba' i' iyau do kuasa' nu, om poingkuro nopo o korohian nu om wonsoyon nopo dot id dau,” ka dau. Om araat diri i Sarai dot id di Hagar. Om gowoi poddi om poggidu' no i Hagar. 7 Om ongoyo' noddi di moloikat do TUHAN solowoto' i Hagar do hiri'd somok di tudan do waig do hilo'd tana' do kowotuan do hiri'd ralan do kumaa do hilo'd tana' do kowotuan do Sur. 8 Om boros ka di moloikat do TUHAN, “Oi Hagar, i turipon di Sarai, honggo tadon nu'ndo om hinonggo o pakayaan nu?” ka dau. Om boros ka di Hagar do suminimbar, “Mogidu' oku do mantad id tondu' di kinarajaan ku,” ka dau. 9 Om boro-boros noddi i moloikat do poingkaa, “Poguliai no do hilo'd di Sarai om sumiliu nopo do turipon dau,” ka dau. 10 Om boro-boros po kawagu i moloikat do poingkaa, “Onuan ku indo iya' do sinakagon dot ogumu' gisom dot aiso' no o tiso' pod tulun do kointob diyolo'. 11 Om kianak ko nondo dot iso' o tanak do kusai, om pungaranan no dot i Ismail, tu' norongou nod TUHAN i tihad nu dot oinggoritan. 12 Nga' iri nopo i tanak nu do kusai'ddi om miagal do kaladai di lalang, om monokisaap nopondo iyau dot isai nopo o tulun, om isai nopo o tulun nga' sumaap no dau. Om posuwai-suwai nondo do mantad id koobpinayan dau o tiyonon dau,” ka dau. 13 Om minonguhot diri ot id suang do ginawo di Hagar do poingkaa, “Otopot no tuu do nokokito oku do Kinorohingan, i mamadul doho'?” ka dau. Om roitai noddi dau i TUHAN di minoro-boros dau do, “Kinorohingan di Mamadul”. 14 Om iri noddi o kinopomoroitan do tulun di torobong di hilo'd piolitan do Kadis om Birid do, “Torobong dau I Poimpasi om I Mamadul doho' “. 15 Om kosusu noddi i Hagar om kusai o tanak dau, om pungaranai no di Abram i tanak diri dot i Ismail. 16 Tontok nopoddi om walu' no nohopod om onom o toun di Abram.

Kinawansayan 17

I Sunat o Tanda' di Tumpongo

1 Tontok di siam nohopod om siam o toun di Abram, om intalang noddi o TUHAN dot id dau. Om boro-boros nod poingkaa, “Iyoho' no o Kinorohingan dit Asawat Kopio. Umboyo' no doho', om momonsoi no kasai' di korohian ku. 2 Om pogiroton ku o tumpongo ku dot id diya' om onuan ku iya' do sinakagon dot ogumu',” ka dau. 3 Om otud noddi i Abram do tuminuku'. Om boro-boros noddi o Kinorohingan do poingkaa, 4-5 “Iti no o tumpongo do wonsoyon ku dot id pialatan to: Mamatos oku dot osiliu ko nondo do taki-aki dot ogumu' o bansa'. Om okon nondo ko' i Abram o ngaran nu, suwai ko' i Abraham, tu' silihon tiya' no do taki-aki do tulun dot ogumu' o bansa'. 6 Om onuan tiya' nondo do sinakagon dot ogumu', om haro nogi' ot id pogialatan diyolo' dot osiliu do raja'. Om ogumu' nondo kopio o sinakagon nu gisom dot osiliu iyolo' do mogisuwai-suwai o bansa'. 7 Pogiroton ku nondo iti tumpongo ku dot id diya' om id sinakagon nu om id sinakagon diyolo' do koimbagu. Iti nopo tumpongo diti nga' poinggirot kasai' i' do gisom do poingompus. Om iyoho' nondo o Kinorohingan nu, om Kinorohingan di sinakagon nu. 8 Patahakon ku nondo diya' om id sinakagon nu iti tana' diti niyonon nu do tuminindapou. Om koinsanai'dti tana' do Kanaan nga' asanganu nondo di sinakagon nu do gisom dot alaid. Om iyoho' nondo o Kinorohingan diyolo',” ka dau. 9 Om boro-boros po kawagu o Kinorohingan dot id di Abraham do poingkaa, “Iya' om i sinakagon nu om i sumolusuk diya' do koimbagu nga' apatut nogi' dot ogirot o pongingigit diti tumpongo om tumorodok do tumanud diti. 10 Mositi' no do kaakun ngai' kou di sinakagon nu do monunat do koinsanai'd kusai dot id pogialatan dokoyu. 11-12 Mantad pondo do tadau'd baino' om sunatan no kopio o pointikid-tikid do tangaanak do kusai di walu' o tadau do mantad di kinosusuan. Om kohompit ngai' nogi' o tangaanak do turipon di nosusu dot id walai nu, om i turipon di binoli nu do mantad id tulun do bansa'd suwai. Om iti no sunat o sumiliu do tanda' do haro no o tumpongo dot id pialatan to. 13 Om mositi' no do sunatan o pointikid-tikid do tulun, tu' iri no o sumiliu do tanda' dit okito do popointalang do poinggirot kasai' i tumpongo ku dot id diya' do gisom dot alaid. 14 Isai nopo o kusai dit a' nosunatan, om a' no iyau kohompit di tulun ku, tu' a' i' iyau tuminanud di tumpongo ku,” ka dau. 15 Om boro-boros po o Kinorohingan dot id di Abraham do poingkaa, “Kada' nondo roitai dot i Sarai ilo sawo nu, tu' mantad pondo do baino' om i Sara no o ngaran dau. 16 Om barakatan ku nondo iyau om maganak nondo iyau dot iso' o kusai do patahakon ku diya'. Om barakatan ku nondo i Sara, om osiliu nondo iyau do todu' do mogisuayan o bansa'd tulun. Om haro o piro-piro do mantad id pogialatan do sinakagon dau dot osiliu do raja',” ka dau. 17 Om otud no i Abraham do tuminuku', nga' koirak i' ot id suang do ginawo dau do kosorou'ddi, tu' boros ka dot id suang do ginawo dau, “Kianak po tuu kaka o kusai di hatus no toun do tumur? Om maganak po tuu kaka i Sara tu' siam no nohopod o toun do tumur?” ka. 18 Om uhoto' no di Abraham o Kinorohingan do poingkaa, “Nokuro tu' okon nogi' ko' i' Ismail o tumungkus do dapu' ku?” ka dau. 19 Nga' boros kad Kinorohingan, “Okon i'! Tu' maganak i' do tanak do kusai i Sara i sawo nu, om pungaranan no i tanak diri dot i Isak. Pogiroton ku indo iti tumpongo dot id tanak diri om id sinakagon dau do gisom dot alaid. Iti nopo tumpongo om poinggirot kasai' i' do gisom dot alaid. 20 Norongou ku no i pinokianu nu dot i Ismail o kopokionuan nu, om barakatan ku indo iyau, om onuan ku iyau do tangaanak dot ogumu', om sinakagon dot ogumu'. Om iyau no o sumiliu do taki-aki do hopod om duwo o raja', om silihon ku o sinakagon dau dot iso' o bansa' dot agayo. 21 Nga' id di Isak i tanak nu, o pogiratan ku'dti tumpongo ku, tu' iyau no o pogkosusuon di Sara do dongiyo-iyo'dti do toun dot abantalan,” ka dau. 22 Om kongoboros ngai' poddi do Kinorohingan iri dot id di Abraham, om tongkiad nogiddi iyau dau. 23 Om tontok i' do tadau'ddi do tinanud di Abraham i pinonuhuan do Kinorohingan diri, om sunatai no dau i Ismail, i tanak dau om koinsanai di tongokusai do hiri'd walai dau, om kohompit ngai' no i turipon di pinogkosusu dot id suang do walai dau, om i turipon di binoli dau. 24 Tumur nopo di Abraham di sinunatan iyau om siam no nohopod om siam o toun. 25 Tumur no di Ismail i tanak dau, om hopod om tolu o toun. 26 Om insan-insan nopo o tadau do sinunatan iyolo'. 27 Om poingandad nogi' diyolo' do sinunatan i piro-piro o turipon di Abraham.

Kinawansayan 18

Pinabatos do Kinorohingan o Tanak do Kusai dot id di Abraham

1 Om intalang no o TUHAN dot id di Abraham do hilo'd koguasan do kayu di tiiyonon do sumambayang do hilo'd Mamri. Tontok nopoddi nga' alasu' kopio o tadau. Om poirikau diri i Abraham do hiri'd wawayaan di kiim dau. 2 Om hangog no i Abraham om kokito no dau o tolu tulun do poingkakat do hiri'd dotimbabaan dau. Om tontok di nokito dau iyolo' om panangkus nopo iyau do minongoi solowot diyolo'. Om otud no iyau do tuminuku', 3 om boro-boros no iyau do poingkaa, “Oi Tuan, kada' kou po talib diti kinoiyonon ku. Umbaya' kou po, tu' hiti oku i' do koobi' dokoyu. 4 Ongoi oku pod waig do pongoug dino lapap dokoyu. Om mundorong kou po do hiti'd lungung diti kayu. 5 Om ongoyon ku indo iyokoyu surungai do taakanon do gisom do kabagal dokoyu. Om okoris kou indo do lumombus do mamanau. Minomusou kou i' doho' tu' minumbaya' kou i' do hiti'd walai ku. Om paakanon ku pondo iyokoyu,” ka dau. Om boros ka diyolo' do suminimbar, “Pounsikou no kopio; tumumboyo' i' iyahai dino tiangat nu,” ka diyolo'. 6 Om arau-arau nopoddi i Abraham do suminuang di kiim, om boro-boros no iyau di Sara, “Ongoi kopio anu do sontobubut di tapung nu dit osonong om momonsoi i' do roti. Kada' kalaid,” ka dau. 7 Om panangkus no i Abraham do minongoi'd hiri'd baanan do sapi' dau om pomili' no iyau do songinan o tanak do sapi' dit omulok po om it olomu', om patahako' nogiddi dau di susuhuon dau. Om olomus nopoddi i susuhuon dau'ddi do minomuru' diri. 8 Om ongoi no i Abraham panganu di susu, om i susu di kilunok, om i tikanas, om posurungo' no dau di tulun diri. Om i Abraham i' o minodsurung diyolo' do hiri'd dolungungan di kayu. Om akan noddi iyolo'. 9 Om uhoto' noddi diyolo' i Abraham, “Hinonggo i Sara i sawo nu?” ka. Boros ka di Abraham do suminimbar, “Hilo' iyau'd suang do kiim,” ka dau. 10 Om boros kaddi di tiso' diyolo', “Siam po tulan do mantad do baino' om mongoi oku no kawagu do hiti. Om kianak nondo do kusai i Sara i sawo nu,” ka dau. Om maso nopoddi nga' mokinongou i Sara do hiri'd wawayaan di kiim dot id dolikudan di Abraham. 11 Tontok nopoddi om molohing no kopio iyo' Abraham di Sara. Om notingkod no o pomulanan di Sara. 12 Om koirak diri ot id suang do ginawo di Sara, om boros ka dau, “Molohing oku no om nokurimbit oku po tomod, om milo oku po tuu daa do monokidudun do kusai? Tu' ilo sawo ku nga' molohing no kadauu,” ka dau. 13 Nga' uhoto' noddi do TUHAN i Abraham do poingkaa, “Nokuro tu' nokoirak i Sara om minomoros dot, 'Kianak oku po tuu kopio'dti do miagal diti kolohing?' ka. 14 Nga' haro toi ot a' do TUHAN milo do wonsoyon? Do miagal di nokoboros ku di tiinu' tu' siam po tulan do mantad do baino' om gumuli' oku no kawagu do hiti. Om kianak nondod kusai i Sara do tontok diri,” ka dau. 15 Om pogolim noddi i Sara, tu' moddosi i' iyau. Boros ka dau, “A' oku i' nokoirak,” ka. Nga' boros kad TUHAN do suminimbar, “Nokoirak ko i',” ka dau.

Pinokiompunan di Abraham o Sodom

16 Om pamanau noddi i tolu o tulun diri om woyo' no i Abraham diyolo'. Om ongoi noddi iyolo' dot id iso' o kinoiyonon di koimpa' do pomogunan do Sodom, om oimpa' i' diyolo' i pomogunan diri. 17 Om boros ka dot id suang do ginawo do TUHAN, “A' ku i' lisokon dot id di Abraham iti wonsoyon ku. 18 Sinakagon nopondo dau om osiliu do bansa' dit agayo om okoris, om iyau no o pawayaan ku do barakat do patahakon ku dot id toinsanan o bansa'd tulun do hiti'd pomogunan. 19 Nopili' ku no i Abraham om milo indo iyau do momisunud do tangaanak dau om sinakagon dau do mumboyo' doho' om momonsoi dit ongotopot om it otulid. Om ondung wonsoyon diyolo' iri, om bayaanon ku no o koinsanai di nangkabatos ku dot id di Abraham,” ka dau. 20 Om boro-boros noddi o TUHAN dot id di Abraham do poingkaa, “Haro o boros dot awagat kopio do papasala' do Sodom om Gomura, om dusa diyolo' nga' nokoinggayo no kopio. 21 Om a' no milo dot a' oku lumintuhun do mongoi pongimuwai ondung ongotopot kopio ko' amu' i boros di papasala' do nongorongou ku,” ka dau. 22 Om tongkiad noddi i duwo o tulun diri om pamanau no do kuminaa do hilo'd Sodom, nga' hiri pod toning di Abraham i TUHAN. 23 Om ongoi noddi i Abraham insomok do TUHAN om ponguhot no iyau dau do poingkaa, “Raagon nu no kopio i tulun dit aiso' o sala' do potonggoyon di tulun do kisala'? 24 Ondung haro daa o limo nohopod o tulun dit aiso' o sala' dot id suang dilo bandar, om raagon nu po tuu daa o koinsanai dilo bandar? A' ko no kopio mangampun dilo bandar do mamasi daa di limo nohopod o tulun diri? 25 Atantu' no dot a' nu i' patayon o tulun dit aiso' o sala' do potonggoyon di tulun di kisala'. A' i' kopio milo do miagal diri! Tu' a' ko i' momonsoi do miagal diri. Tu' ondung wonsoyon nu o miagal diri om i tulun dit aiso' o sala' nga' ohukuman nondo do kotonggoi di tulun di kisala',” ka dau. 26 Om boros kaddi do TUHAN do suminimbar, “Ondung haro o toilaan ku do limo nohopod o tulun dit aiso' o sala' do hilo'd Sodom, om ompunan ku i' o koinsanai di hilo'd bandar dot i limo nohopod o tulun o kopongompunan ku,” ka dau. 27 Om boros ka kawagu di Abraham, “Ompunai oku no tu' katama' kopio oku i' do moro-boros kawagu diya', oi TUHAN. Iyoho' nopodti om tulun i' toomod, om a' i' daa osorupai do popoboros do nunu nopo. 28 Nga' ondung haro daa ot apat nohopod om limo o tulun dit aiso' o sala', om a' piya kolimo nohopod. Om raagon nu po tuu daa o koinsanai dilo bandar do noidu' piya i limo tulun?” ka dau. Om boros kad TUHAN do suminimbar, “A' ku i' raagon ilo bandar ondung haro po ot apat nohopod om limo o tulun dit aiso' o sala',” ka dau. 29 Om boros ka kawagu di Abraham, “Poingkuro daa ondung haro daa ot apat nohopod o tulun?” ka dau. Om boros kad TUHAN do suminimbar, “A' ku i' raagon ondung haro po ot apat nohopod o tulun,” ka dau. 30 Om boros ka kawagu di Abraham, “Kada' kotogod, oi TUHAN, tu' moro-boros oku po kawagu. Poingkuro no daa ondung haro po tolu nohopod o tulun?” ka dau. Om boros kad TUHAN do suminimbar, “A' ku i' wonsoyon o miagal diri ondung haro po o tolu nohopod o tulun,” ka dau. 31 Om boros ka kawagu di Abraham, “Ompunai oku no tu' katama' kopio oku i' do moro-boros kawagu diya', oi TUHAN. Poingkuro no daa ondung haro po duwo nohopod o tulun?” ka dau. Om boros kad TUHAN do suminimbar, “A' ku i' raagon ilo bandar dot ondung haro po duwo nohopod o tulun,” ka dau. 32 Om boros ka kawagu di Abraham, “Kada' kotogod, oi TUHAN, tu' moro-boros oku po kawagu dot ongoinsan. Poingkuro no ondung haro po daa o hopod o tulun?” ka dau. Om boros kad TUHAN do suminimbar, “A' ku i' raagon dot ondung haro po o hopod o tulun,” ka dau. 33 Om kopongo poddi o TUHAN do moro-boros di Abraham, om tongkiad noddi iyau. Om uli' noddi i Abraham do hiri'd walai dau.

Kinawansayan 19

Dusa do Sodom

1 Tontok di nokorikot i duwo o moloikat diri do hilo'd Sodom do totuong diri, om poirikau i Lut do hiri'd wawayaan di bandar. Om soira' di nokito di Lut i moloikat, om olomus nopo iyau do minongoi solowot diyolo'. Om otud no iyau do tuminuku' dot id toguang di moloikat. 2 Om boros ka dau, “Oi Tuan, hino oku i' do koobi' dokoyu. Om rikot kou nopo do hilo'd walai ku. Ougan nopo o lapap dokoyu, om modop kou nopod hilo'. Om sumuab kou id lumombus do mamanau'd suab,” ka dau. Nga' boros ka diyolo' do suminimbar, “A' piya minog, modop nopo iyahai do hiti'd talun-alun diti bandar,” ka. 3 Nga' sansagai i' di Lut iyolo', om tanud noddi iyolo' di Lut do minongoi do hiri'd walai dau. Om ponuhu' noddi i Lut di susuhuon dau do momonsoi do roti om posodia' do taakanon dit angawasiu do paakan di tombului dau. Om akan noddi iyolo'. 4 Tontok dit a' po nokoongoi koodop i tombului dau'ddi, om rikot no o tulun do Sodom do tuminutuk di walai di Lut. Om hino ngai' nopod hiri i tongokusai dit id bandar diri, dot i molohing no, om it ongomulok po. 5 Om lohowo' no diyolo' i Lut, om uhoto' no diyolo' iyau, “Hinonggo no i tulun di minongoi odop do hiti'd walai nu? Posoliwano' iyolo'd hiti, om ompohuon i' dahai iyolo',” ka diyolo'. 6 Om labus no i Lut do mantad hiri'd walai dau om tabanai noddi dau i wawayaan. 7 Om boros ka dau dot id tulun do Sodom diri, “Oi tobpinai-tobpinai ku, pokionuon ku no kopio dot a' kou momonsoi do miagal diri karaat! 8 Pokinongou kou po pogi', kianak oku i' do duwo o tondu' dit a' po nodudun do kusai. Om iyolo' nogi' o patahakon ku dokoyu, om nunu nopo o korohian dokoyu do wonsoyon dot id diyolo', om wonsoyon nopo dokoyu. Nga' kada' po doho' dokoyu kuroi-kuroyo' iti tulun diti; tu' iyolo' nopo om tombului i' do hiti'd walai ku, om iyoho' no ot apatut do mongintirung diyolo',” ka dau. 9 Nga' boros ka di tulun do Sodom dot id di Lut, “Undaliu oi indapou! Isai kopio ko daa tu' katama' kopio do monuduk dit apatut dahai'd wonsoyon? Undaliu! Undaliu nogi' kopio! Dot a' ko nopo moti' mundaliu, om ara-raat po moti' o wonsoyon dahai dot id diya' ko' mantad di wonsoyon dahai dot id duwo o tulun diri,” ka diyolo'. Om sudsuro' nopoddi diyolo' i Lut do pinopoundaliu, om ongoyon no daa'ddi diyolo' raago' i totobon. 10 Nga' poroloyo' no di duwo o tombului di Lut diri o longon diyolo' do minamagayat di Lut do suminuang do hiri'd walai, om tabanai nogiddi diyolo' i wawayaan. 11 Om boloho' noddi diyolo' o koinsanai do mato di tulun di hiri'd soliwan diri, gisom dot a' noddi iyolo' kotunud di wawayaan di walai.

Tuminongkiad i Lut do Sodom

12 Om boro-boros no i duwo o tombului di Lut diri dot id di Lut do poingkaa, “Ondung haro o tangaanak nu'd kusai, ko' tongoondu', ko' i monongiwan diya', ko' tanak do koworisan nu do suwai di poingiyon do hiti'd bandar diti, om angatan no iyolo' do mogidu' do mantad hiti, 13 tu' raagon moti' dahai iti bandar do Sodom. Tu' norongou nod TUHAN o boros dit awagat kopio do papasala' do tulun do hiti, om sinuhu'ddi iyahai do mongoi pamaraag diti bandar do Sodom,” ka diyolo'. 14 Om ongoyo' noddi di Lut sunudai i duwo o tanakwagu i tunang di tangaanak dau do tondu'. Om boros ka dau, “Kainou kopio sumoliwan do mantad hiti; tu' raagon no moti'd TUHAN o kinoiyonon diti,” ka dau. Nga' ondos nopo daa diyolo' om mogkoringau no toomod i Lut. 15 Tontok di minnanawau no di dongkosuabon, om ara-raho' noddi di duwo o moloikat diri i Lut. Boros ka diyolo', “Lomusai no! Angatai no ilo sawo nu, om ilo duwo tanak nu'd tondu' do mogidu', om a' kou i' apatai do raagon iti bandar,” ka. 16 Nga' mikoduwo-duwo i' daa o ginawo di Lut. Nga' osianan i' kopio o TUHAN dau, om ahako' noddi di duwo o tombului dau'ddi i Lut, om i sawo dau om i duwo tanak dau'd tondu', om posoliwano' noddi diyolo' iyolo' do mantad id bandar diri. 17 Om boros ka di tiso' di moloikat, “Panangkus kopio kou, om apasi kou i'! Kada' kou no koili dot id tohuri, om kada' kou undorong do hilo'd rantai. Manangkus kou nopo do kumaa do hilo'd nuluhon, om a' kou i' apatai,” ka dau. 18 Nga' boros kad i Lut do suminimbar, “Kada' no iyahai suhuo' do mongoi do hilo'd nuluhon, oi Tuan. 19 Agayo no kopio i kinotulungan nu doho', om napasi oku diya'. Nga' ilo' nopo konuluhanan om adalaan no kopio kosodu'. Om okosupan oku i' doti'ndo di mamaraag, om a' oku po korikot do hilo' om apatai oku no. 20 Intong pogi' nga' haro i' o bandar dot okooro' do hiti'd somok. Pologoso' oku nogi' do mongoi'd hilo', om apasi oku i',” ka dau. 21 Om boros ka di moloikat, “Okuro i' katuu, potumboyoon tiya' nopo. A' ku i' raagon ilo bandar dot okooro' dilo'. 22 Siahai no! Panangkus no! Tu' aiso' po milo ku'd wonsoyon dot a' ko po korikot do hilo',” ka dau. Om pungaranai noddi i bandar diri do Suar, tu' rinoitan i' di Lut dot okooro' i bandar diri.

Naraag o Sodom om Gomura

23 Di nopo nokorikot i Lut do hiri'd bandar do Suar, om mulai nogi' o tadau. 24 Om sigog iddi do polintuhunai do TUHAN do tana' do kitapui do miagal pod rasam kasapou o pointongkop di bandar do Sodom om Gomura, 25 gisom do naraag i duwo o bandar diri om napatai ngai' o tulun do hiri, om nosorob i songinsuni do hiri'd kinoiyonon diri. 26 Nga' iri nopo i sawo di Lut om kuminoili do hiri'd dohuri, om kosiliu noddi iyau do silaon do miagal-agal do torigi o kokitanan. 27 Osuab poddi di kosuabon kawagu, om arau-arau noddi i Abraham do minongoi do hiri'd nundorong dau di suminolowot iyau do TUHAN di sangadau no do mantad diri. 28 Om impa' no i Abraham di bandar do Sodom om Gomura om pointongkop di rantai do hilo', om kokito no dau do muntu-nguntu' nopo o lisun do mantad hiri, do miagal pod lisun do mantad id podtutudan dot agayo. 29 Nga' tontok di rinaag do Kinorohingan i kabandaran di hiri'd rantai di pinomogunan di Lut, om nosorou i' do Kinorohingan i Abraham, om tinulung iddi dau i Lut do mogidu', om napasi iddi i Lut.

Tadon do Tulun do Muab om Tulun dot Amon

30 Nga' moddosi iddi i Lut do mundorong do hilo'd Suar, om takad noddi iyau do hiri'd konuluhanan do miwoyo' di duwo o tanak dau do tondu'. Om iyon noddi iyolo' dot id suang dot iso' o luang do nuluhon do hiri. 31 Om boros ka di tanak di Lut do tondu' dit id dotuo dot id tadi' dau, “Molohing noddi ilo tapa' to, om aiso' no ot ongoiso' piya do kusai do pointongkop diti pomogunan do mangawin dato, do koonuan to'd tanak. 32 Kaino, maai to owuko' ilo tapa' to. Om milo kito i' do mongoi dudun dau do modop, om kianak to indo,” ka dau. 33 Om popoginumo' no diyolo' do waig dot anggur i tapa' diyolo' do totuong diri, om ongoi noddi dudun di Lut i tanak di Lut dot id dotuo, nga' i Lut nopo om nadalaan no do naawuk gisom dot a' no iyau nokopuriman di nosiliu dot id dau di totuong diri. 34 Tadau noddi kawagu, om boros ka di tanak di Lut dot id dotuo dot id tadi' dau, “Nokodudun oku no iyoho' di tapa' di kosodop, om owuk-owukon to po kawagu i tapa' do totuong do baino', om iya' nondo o mongoi dudun dau. Om haro i' goduwo o tanak to,” ka dau. 35 Om owuko' noddi diyolo' kawagu i tapa' diyolo' do totuong diri, om ongoi noddi dudun di Lut i tanak di Lut dit id domulok. Om diri nga' nadalaan nogi' kopio i Lut do naawuk, gisom dot a' no iyau nokopuriman di nosiliu dot id dau do totuong diri. 36 Om ponontian noddi goduwo iyolo' dot i tapa' diyolo' o nokotian diyolo'. 37 Om kosusu noddi i tanak di Lut dit id dotuo, om kusai o tanak dau, om pungaranai no dau dot i Muab. Om iyau no o taki-aki dilo tulun do Muab do dinondo. 38 Om kosusu no it id domulok, om kusai i' o tanak dau, om pungaranai no dau dot i Bin-Ami. Om i Bin-Ami no o taki-aki dilo tulun dot Amon do dinondo.

Kinawansayan 20

I Abraham om i Abimilik

1 Om undaliu no i Abraham do mantad hilo'd Mamri, do kuminaa ponong id salatan do Kanaan, om pomogun-mogun no iyau do hiri'd piolitan do Kadis om Sur. Alaid-laid noddi do mantad diri, di maso po di Abraham do poingiyon do hilo'd Gorar, 2 om poboroso' no dau dot i Sara nopo, i sawo dau'ddi om tadi' i' dau. Gowoi poddi om pinokiatadan di Raja' Abimilik i Sara dot id dau. I Abimilik nopoddi om raja' do Gorar. 3 Nga' insan o totuong, om intalang no o Kinorohingan dot id di Abimilik dot id nipi dau, om boro-boros no do poingkaa, “Matai ko no moti', tu' nongoi nu i' iti tondu'; tu' ilo' nopo om kisawo no,” ka. 4 Nga' a' po di Abimilik notoning i tondu'ddi. Om boros kaddi dau, “Oi TUHAN, a' oku i' nokowonsoi dot araat! Patayon oku nanu' kopio diya' do mitonggoi diti tulun ku? 5 Tu' i Abraham i' o minomoros do tobpinai dau i tondu'ddi, om iri tondu' nga' iyo iddi o pinoboros. Osimbayan i' o ginawo ku do minomonsoi'dti, om aiso' i' ot araat do nowonsoi ku,” ka dau. 6 Om id nipi iddi do sinimbar iyau do Kinorohingan do poingkaa, “Otopot, oilaan ku i' dot osimbayan o ginawo nu do minomonsoi'ddi, om iri noddi o kinapangantaban ku diya' do momonsoi do dusa dot id toguang ku, om a' tiya' pinologos do kuminama' dilo tondu'. 7 Nga' ngoyo' nogi' kopio pogulio' ilo tondu' do hilo'd sawo dau do dinondo. Iri nopo sawo diti tondu' om nabi i', om sambayangan ko indo dau, om a' ko i' apatai. Nga' ondung a' nu pogulion ilo tondu', om poinsanon mantad ku nogi' iya', do matai ko no moti' do mitonggoi do toinsanan diti tulun nu,” ka dau. 8 Om osuab poddi di kosuabon kawagu, om lohowo' no di raja' Abimilik o koinsanai di pagawai dau, om sunudai no dau iyolo' di nosiliu dot id dau, om ongooris tomod diri iyolo'. 9 Om lohowo noddi di Abimilik i Abraham om uhoto' no dau iyau, “Nunu kopio iti winonsoi nu dot id dahai? Nunu kopio ot araat do nowonsoi ku dot id diya', do gisom diri do porikatan oku diya' om iti pomorintaan ku do koligagaanan dot agayo? A' ko i' apatut do momonsoi do miagal diri dot id doho'. 10 Nokuro tu' iyo'ddi o winonsoi nu?” ka dau. 11 Om boros ka di Abraham do suminimbar, “Ondos ku nopo daa om aiso' no kopio o tulun do hiti di moddosi do Kinorohingan, om ooris oku daa'ddi do patayon oku diyolo' do sumolod dilo sawo ku. 12 Nga' otopot nopo kopio om tobpinai ku nogi' bo'lo'. Tu' ilo' nopo om tanak i' kopio di tapa' ku, nga' sopisuwai pondo o tina' dahai, om kowino' ku noddi ilo'. 13 Om soira' di sinuhu' oku do Kinorohingan do tumongkiad do mantad id walai di tapa' ku do kumaa dot id pomogunan do suwai, om sunudai ku no'lo sawo ku do poingkaa, 'Milo ko i' do popointalang do kotorodoko' nu dot id doho', do poboroson nu no dot id koinsanai'd tulun do tobpinai oku diya',' kangku,” ka dau. 14 Om pogulio' noddi di Abimilik i Sara dot id di Abraham. Om tontok nogiddi do nonuan dau i Abraham do piro-piro kogumuo' do turipon, om dumba', om sapi'. 15 Om boros kaddi di Abimilik dot id di Abraham, “Diya ngai' noti tana' ku; om mongoi nopo iyon do hinonggo nopo o diya'd korohian,” ka dau. 16 Om boros ka dau dot id di Sara, “Onuan ku ilo tobpinai nu do soribu o kaping do pirok do maan do koilaan do koinsanai'd tulun di poinsugku' diya' dot aiso' i' kopio o kasalaan nu, om koilo ngai' indo o tulun dot a' ko nokowonsoi'd araat,” ka dau. 17-18 Om iri no i nosiliu dot id di Sara diri, i sawo di Abraham, ot a' daa'ddi do TUHAN kapalagasan do koinsanai di tongoondu' di hiri'd walai di Abimilik do maganak. Nga' sambayangai noddi di Abraham i Abimilik, om lingasai iddi iyau do Kinorohingan. Om i sawo di Abimilik, om i turipon dau do tongoondu' nga' liningasan nogi' do Kinorohingan, om maganak ngai' iddi iyolo'.

Kinawansayan 21

Kinosusuon di Isak

1 Om barakatai noddi do TUHAN i Sara do miagal di nakabatos mantad dau. 2 Om ponontian no i Sara om kosusu no iyau do tanak do kusai, do tontok di molohing no i Abraham. Iri nopo tanak diri om nosusu do tontok di maso di nokoboros mantad do Kinorohingan do kosusuan dau. 3 Om pungaranai no di Abraham i tanak diri dot i Isak. 4 Om soira' di norikot o walu' o tadau do tumur di Isak, om sunatai no di Abraham iyau do miagal di pinonuhuan do Kinorohingan. 5 Hatus no toun di Abraham di nosusu i Isak. 6 Om boros ka di Sara, “Noonuan oku no do Kinorohingan do kataadan om koirak oku noddi. Om isai nopondo o korongou'dti om kongoirak no do miagal doho',” ka dau. 7 Om boros ka kawagu dau, “Isai po tuu daa o momoros dot id di Abraham do koumbal po i Sara do poposusu'd tanak? Nga' noonuan ku iddi i Abraham do tanak di nokolohing iyau,” ka dau. 8 Om mayo-gayo nopoddi i tanak diri, om tontok di pinotingkod iyau do sumusu, om papaharo noddi i Abraham do poginakanan dot agayo.

Sinuhu' i Hagar om i Ismail do Moggidu'

9 Insan o tadau, om mogkoringau i Ismail di Isak. I Ismail nopo om tanak diyo' Abraham di Hagar, i tondu' do Masir diri, om i Isak noo om tanak di Sara. 10 Om kokito noddi di Sara iyolo' om sunudai no dau i Abraham, boros ka dau, “Suhuon nogi' do mogidu' do mantad hiti ilo turipon ku'd tondu' om ilo tanak dau. Tu' ilo' nopo tanak dau om a' no apatut do kaanu do bahagi' di dapu' nu, tu' i Isak no, i tanak ku, ot apatut do tumungkus diri,” ka dau. 11 Om tumongob diri i Abraham do kosorou'ddi tu' i Ismail nga' tanak i' dau. 12 Nga' boros kaddi do Kinorohingan dot id di Abraham, “Kada' katangkabo do momusorou di tanak diri om i Hagar, i turipon nu. Pohubayaan nopo i pinoboros di Sara dot id diya', tu' id di Isak no o koonuan nu'd sinakagon di nakabatos mantad ku diya'ddi. 13 Om ilo tanak dilo turipon nu nga' onuan ku i' do sinakagon dot ogumu', om osiliu indo iyolo' dot iso' o bansa'. Tu' ilo' nga' tanak nu i',” ka dau. 14 Om osuab poddi di kosuabon kawagu, om onuwai no di Abraham i Hagar do taakanon, om waig do noponu' o kantung do kulit do maan diyolo' do kokoriu. Om pababaai nogiddi di Abraham di Hagar i tanak diri om suhuo' no dau iyolo' do mogidu'. Om pamanau noddi i Hagar om pinghombo no do hiri'd tana' do kowotuan do hilo'd Borsiba. 15 Om soira' di naayi' i waig diyolo' om poiliho' no di Hagar i tanak dau do hiri'd dolungungan di kokoyu-koyuan, 16 om ongoi nogiddi iyau irikau do hiri'd sodu-odu'; do haro i' doti' o hatus o mito do kosoduwo' do mantad hiri. Om boros kaddi dot id suang do ginawo dau, “A' oku no kasaap do montong-ontong dilo tanak ku'd matai,” ka dau. Om ihad noddi i Hagar di poirikau iyau'd hiri. 17 Nga' norongou i' do Kinorohingan i tihad di Ismail, om boro-boros noddi o moloikat do Kinorohingan do mantad hilo'd tawan dot id di Hagar do poingkaa, “Nunu o katangkabaan nu, oi Hagar? Kada' no kooris tu' norongou nod Kinorohingan o tihad dilo tanak nu. 18 Ingkakat nogi', om ngoyon i' kibito' ilo tanak, om insasamadan no iyau. Om silihon ku i' do bansa' dot agayo o sinakagon dau,” ka dau. 19 Om poungkalato' noddi kopio'd Kinorohingan o mato di Hagar, om kokito noddi dau o tiso' o torobong. Om ngoyo' noddi dau suangai'd waig i kantung do kulit. Om poinumo' noddi dau i tanak dau. 20 Om moyo-woyo' kasai' i' o Kinorohingan di tanak diri do gisom do nakagayo iyau. Om ongoi noddi iyau iyon do hiri'd tana' do kowotuan di hilo'd Paran. Om nosiliu'ddi iyau do magagasu dit otorus kopio. 21 Om pogihumai noddi iyau di tina' dau do sawo, dot iso' o tondu' do bansa'd Masir.

Taru' di Abraham om i Abimilik

22 Tontok nopoddi om piwoyo' no iyo Raja' Abimilik di Pikol, i boyoon do sumasangod dau do minongoi solowot di Abraham. Om boros ka diyolo', “Woyoon kasai' ko i' do Kinorohingan dot id suang do nunu nopo o wonsoyon nu. 23 Iyo nopoddi om sumpa' no dot id toguang do Kinorohingan dot a' ko monipu' doho', om i tangaanak ku, om i sinakagon ku tu' otorodok oku i' dot id diya'. Iyo nopoddi om pamatos no do tumorodok ko iya' dot id doho', om id pomogunan diti tiyonon nu,” ka dau. 24 Om boros ka di Abraham, “Mamatos oku i',” ka dau. 25 Nga' poguhangan nopo di Abraham di Abimilik om i torobong do nongoi solodo' di piro-piro o susuhuon di Abimilik. 26 Om boros ka di Abimilik, “A' oku i' nokoilo ondung isai o suminolod. Tu' a' ko i' minomisunud doho', om iti nogindo do koilo oku'dti,” ka dau. 27 Om onuwai noddi di Abraham i Abimilik do piro-piro o tinan do dumba' om sapi', om pomonsoi nogiddi iyolo' do taru'. 28 Om pamagamit no i Abraham do turu' o tinan do tanak do dumba' om potongkiado' no dau do mantad hiri'd baanan di dumba' dau. 29 Om boros kaddi di Abimilik do minonguhot dau, “Nokuro tu' miagal dino o wonsoyon nu?” ka dau. 30 Om boros ka di Abraham do suminimbar, “Romito' no iti turu' o tanak do dumba'. Tu' kapatahakan ku nopo diya'dti om maan do koilaan kopio do kotumboyo' ko dot iyoho' o minongukad diti torobong,” ka dau. 31 Om iri no o nokopomungaranan di kinoiyonon diri do Borsiba, tu' hilo' no iyolo' goduwo do minomonsoi'd batos do mikuwo'd sumpa'. 32 Om kowonsoi poddi diyolo' i pinitoruan diri do hilo'd Borsiba, om uli' nogiddi i Abimilik om i Pikol do hilo'd pomogunan do tulun do Pilistin. 33 Om pananom noddi i Abraham do songguas o kayu do roitan do tamariska do hilo'd Borsiba. Om sambayang no iyau dot id TUHAN, i Kinorohingan di Hino Kasai' do Gisom do Poingompus. 34 Om alaid i' i Abraham do momogun-mogun do hilo'd pomogunan do tulun do Pilistin.

Kinawansayan 22

Sinuhu' do Kinorohingan i Abraham do Patahak di Isak

1 Om alaid-laid noddi do mantad diri om pogumbalai nod Kinorohingan i Abraham, do mogontong ondung songkuro no o kotorodoko' di Abraham dot id dau. Om lohowo' no dau i Abraham, “Oi Abraham!” ka dau. Om boros ka di Abraham do suminimbar, “Diya oku i', oi TUHAN,” ka dau. 2 Om boros kad Kinorohingan, “Angatai i Isak, i tanak nu, i tanak nu'd kusai dit iso' noo, i kosianan kopio nu, om mongoi i' do hilo'd pomogunan do Moria. Om hilo' nondo, dot id timpak di nuluhon do potudukon ku diya' do patahakon nu doho' i tanak nu do maan do porsombahan di sorobon,” ka dau. 3 Osuab poddi di kosuabon kawagu om ongoi no i Abraham pamalangod do siduwon do maan do pogudung di porsombahan do sorobon diri. Om gandarai nogiddi di Abraham di siduwon diri i kaladai dau, om angatai no dau i Isak, om potonudo' dau o duwo di susuhuon dau. Om pamanau noddi iyolo' do kuminaa do hiri'd kinoiyonon di pinotuduk do Kinorohingan dot id di Abraham. 4 Tontok di kotolu'd tadau, om kokito no di Abraham i kinoiyonon diri di hiri po iyolo'd sodu'. 5 Om boros kaddi di Abraham dot id duwo o susuhuon dau'ddi, “Hiti kou nopo iyokoyu do mundorong, om ilo kaladai nga' hition nopo. Iyahai no'lo tanak ku o mongoi'd hilo' do mongoi sambayang dot id TUHAN. Om gumuli' indo kawagu iyahai'd hiti,” ka dau. 6 Om pasaanai no di Abraham di Isak i siduwon do pogudung di porsombahan do sorobon, om i Abraham no om minigit do pisau, om popou do maan do pomurakit. Om tontok di manau-panau no iyolo', 7 om boro-boros no i Isak, “Apa'!” ka dau. Om boros ka di Abraham do suminimbar, “Nunu ri'ddi, oi ondu'?” ka dau. Om boros ka di Isak do minonguhot, “Okito ku i' do nokoigit ko do tapui, nga' hinonggo'ddi o tanak do dumba' do maan do porsombahan di sorobon?” ka dau. 8 Om boros ka di Abraham do suminimbar, “Kinorohingan i' o manahak do tanak do dumba',” ka dau. Om pamanau no goduwo iyolo'. 9 Om soira' di nokorikot iyolo' di kinoiyonon di pinotuduk do Kinorohingan dot id di Abraham, om pomonsoi noddi i Abraham do pananaraban do porsombahan, om pouludo' no dau i siduwon do hiri'd sakai. Om kagasai nogiddi dau i tanak dau, om pawantayo' no dau do hiri'd pananaraban diri, dot id sakai di siduwon. 10 Om paakango' noddi dau i pisau do pamatai daa dau di Isak. 11 Nga' pomolohou no di Abraham i moloikat do TUHAN do mantad hilo'd tawan dot, “Abraham, Abraham!” ka. Om boros ka di Abraham do suminimbar, “Diya oku i', oi TUHAN,” ka dau. 12 Om boros ka di moloikat, “Kada' pokorualai ino tanak, om kada' iyau kuroi-kuroyo'. Tu' noilaan ku no dot oronok ko i' om mihuboyo-boyo' ko do boros do Kinorohingan, tu' a' nu i' pinusus-pusus do papatahak ino tanak nu dot id Kinorohingan, do mulong piya dot ino noo o tanak nu,” ka dau. 13 Om pikorowo-rowo noddi i Abraham do hiri'd posorili' dau om kokito dau o songinan o dumba' do tontoluhan do nakasait o sungu do hiri'd kokoyu-koyuan. Om ongoyo' no di Abraham i dumba' diri om patahako no dau dot id TUHAN do numaan do porsombahan di sorobon do pinotingolon di tanak dau. 14 Om pungaranai no di Abraham i kinoiyonon diri do “Poposodia' i' o TUHAN dit Apatut do Haro”. Om gisom piya'd baino' nga' momoros kasai' i' o tulun do, “Poposodia' i' o TUHAN dit Apatut do Haro do hilo'd nuluhon dau,” ka. 15 Om pomolohou no kawagu di Abraham i moloikat do TUHAN do mantad hilo'd tawan do pinopoboros di boros do TUHAN dot id di Abraham do poingkaa, 16 “Sumumpa' oku no dot id suang do ngaran ku, do barakatan ku nondo iya' do gisom dot a' aayi-ayi'. Om iri no i winonsoi nu do miagal diri om it a' kopio nu pinusus-pusus do papatahak dot id doho' i tanak nu dit iso' noo, 17 o kapamatasan ku do puhawangan ku nondo iya' do sinakagon do miagal dilo rombituon do hilo'd tawan kogumu', ko' miagal dilo togis do hilo'd tisan do rahat kogumu'. Om aala' indo di sinakagon nu o pisangod diyolo'. 18 Om oinsanan nopondo o bansa' do hiti'd pomogunan do mokianu doho'd barakat do miagal di pinabarakat ku dot id sinakagon nu --- tu' tinanud nu i' i pinonuhuan ku,” ka dau. 19 Om poguliai noddi di Abraham do hiri'd duwo o susuhuon dau, om pogiwoyo-woyo' nogiddi iyolo' do guminuli' do hilo'd Borsiba, i pinomogun-mogunan di Abraham.

Sinakagon di Nahur

20 Alaid-laid noddi do mantad diri om korongou no i Abraham do walu' no o tanak di Milka, i sawo di Nahur. I Nahur nopoddi om tobpinai di Abraham do kusai. 21 Iri nopo it id dotuo di tangaanak diri om i Us o ngaran; om iri no tobpinai dau do suwai om i Bus, om i Komuil, i tapa' di Aram, 22 om i Kisid, om i Haso, om i Pildas, om i Yidlap om i Botuil, 23 i tapa' di Robika. Om iti no i walu' o tanak do kusai diyo' Milka di Nahur, i tobpinai di Abraham do kusai. 24 Om tangaanak no di Rima, i panakasawo di Nahur, om i Tiba, i Gaham, i Tahas, om i Maaka.

Kinawansayan 23

Napatai i Sara om Minomoli i Abraham do Tana' do Pamalabangan

1 Di nopo di minatai i Sara om hatus no om duwo nohopod om turu' o toun dau. 2 Kinapatayon nopo di Sara om hilo'd Hibron, it id pomogunan do Kanaan. Om pinogihadan tomod diri di Abraham i Sara i sawo dau, di minatai i Sara. 3 Om tongkiadai no di Abraham i rata' di sawo dau, om ongoi noddi iyau do hiri'd tulun do Hit. Om boros ka dau, 4 “Iyoho' nopodti om tindapou i' toomod do hiti'd dokoyu; om pobolion oku daa dokoyu do tana' dot ongokooro' do pamalabangan ku di sawo ku,” ka dau. 5 Om boros ka diyolo' do suminimbar, 6 “Pokinongou po bo daa dahai, oi Tuan. Iya' nopondo om nosiliu no dahai do molohingon dit agayo dot id pogialatan dahai'd hiti, om lobongon nopo ino sawo nu do hilo'd pamalabangan dit osonong no kopio di naanu dahai. Ongosonong ngai' i' o ginawo dahai do manahak diya' do tana' do pamalabangan, om olobong nu i' ino sawo nu,” ka diyolo'. 7 Om otud no i Abraham do tuminuku' dot id toguang diyolo', 8 om boros kaddi dau, “Ondung osonong o ginawo dokoyu do lobongon ku i sawo ku'd hiti, om ngoyon no doho' sunudai i Ipron, i tanak di Sohar do kusai, 9 do papadagang dot id doho', di Luang do Nuluhon di hilo'd Makpila, i hilo'd tisan do tumo dau. Sunudan no iyau do momorikot di gatang kopio, do padagangon dau i tana'ddi dot id doho', do hiti'd toguang dokoyu, om asanganu ku i' i tana'ddi do maan do pamalabangan,” ka dau. 10 Om i Ipron nga' poirikau nogi' do poinsugku' di tulun do Hit do suwai do hiri'd pogititimungan kasai' do tulun, i hiri'd wawayaan di bandar. Om simbar no i Ipron di Abraham dot id toguang di tulun dot ogumu'. Boros ka dau, 11 “Patahakon ku i' diya' o koinsanai di tana' om i luang do nuluhon do hilo'. Om patahakon ku no diya' iri do hiti'd toguang do bansa' ku om olobong nu i' ino sawo nu,” ka dau. 12 Om otud noddi i Abraham do tuminuku' dot id toguang di tulun do Hit diri, 13 om boro-boros no iyau dot id di Ipron, om korongou ngai' i' i tulun dot ogumu'. Boros ka dau, “Pokionuon ku daa iyokoyu do mokinongou. Tu' bolion ngai' ku nopo i tana'. Om romito' no iti pambayar ku, om olobong ku i' i sawo ku do hilo',” ka dau. 14 Om boros ka di Ipron do suminimbar, 15 “Oi Tuan, ilo' nopo tana' om apat no nahatus o kaping do pirok do gatang --- Nga' nunu no kopio toi iri dot id dato? Ngoyon nopo pogi' lobongo' i sawo nu'd hilo',” ka dau. 16 Om kookunai noddi di Abraham o gatang dot irad diri, om timbango' no dau ot apat nahatus o kaping do pirok do miagal di pinoboros di Ipron, dot id toguang di tulun dot ogumu', do tinimbang di poninimbang di pakayon di dumadagang. 17 Om iyo noddi o kinoonu-onuan di Abraham di tana' di Ipron di hilo'd Makpila, i ponong id koulayon do mantad id Mamri. Nokosuang nopo di naanu dau om i tana', om i luang do nuluhon do hiri, om koinsanai di kayu do hiri do gisom do korikot do hiri'd tisan di tana' do naanu dau. 18 Om koinsanai nopoddi i tulun do Hit di hiri'd pitimungan diri do nongkotumboyo' dot i Abraham noddi o sanganu di tana' diri. 19 Om lobongo' noddi di Abraham i Sara i sawo dau, do hiri'd luang do nuluhon do hilo'd tana' do Kanaan. 20 Om iri nopoddi i tana' di tulun do Hit di gulu po, om i luang do nuluhon do hiri, om naanu noddi di Abraham do maan do tana' do pamalabangan.

Kinawansayan 24

Sawo di Isak

1 Om molohing noddi kopio i Abraham, om nabarakatan no iyau do Kinorohingan dot id suang do nunu nopo i winonsoi dau. 2 Om boros ka di Abraham dot id susuhuon dau dit otuo kopio, i mongilo-ilo do koinsanai di dapu' dau, “Pakamao' ino palad nu do hiti'd piolitan diti poo ku om sumumpa' i'. 3 Pokionuon ku do sumumpa' ko dot id suang do ngaran do TUHAN, i Kinorohingan, i momorinta' do tawan om pomogunan, dot a' nu pogihuman do sawo ilo tanak ku dot id pogialatan do tulun do hiti'd Kanaan. 4 Nga' mositi' no do gumuli' ko do hilo'd pomogunan do kinosusuon ku, om hilo' no o pogihuman nu do sawo di Isak, i tanak ku do kusai'ddi. Pogihuman no doho' iyau do sawo dot id pogialatan di koworisan ku,” ka dau. 5 Nga' boros ka di susuhuon dau do minonguhot di Abraham, “Poingkuro no ondung a' no i sumandak sitongkiad di walai dau, om a' tumanud doho' do kumaa'd hiti? Pootodon ku po tuu ilo tanak nu do hilo'd pomogunan di kinosusuon nu?” ka. 6 Om boros ka di Abraham do suminimbar, “Kada' nogi' kopio angatai ilo tanak ku do gumuli'd hilo'. 7 Tu' TUHAN i', i Kinorohingan do momorinta' do tawan, o minongigit doho' do mantad hilo'd walai di tapa' ku, i hilo' pod tana' di koworisan ku, om nokogirot no tomod do Kinorohingan o batos dau, do patahakon dau di sinakagon ku iti pomogunan diti. Monuhu' i' iyau do moloikat do mogulu diya', om koihum ko indo do tondu' do hilo' do maan do sawo di tanak ku. 8 Ondung a' tumanud diya' i tondu', om koidu' ko no do mantad diti sumpa'. Nga' poingkuro piya, nga' kada' no angatai ilo tanak ku do gumuli'd hilo',” ka dau. 9 Om pakamao' noddi di susuhuon di Abraham i palad dau do hiri'd piolitan di poo di Abraham, i tuan dau; om sumpa' nogiddi iyau do tumanud di pinonuhuan di Abraham. 10 Om panganu noddi do hopod o tinan dot unta i susuhuon di mongilo-ilo di dapu' di Abraham diri, om igitai no dau do kuminaa do hilo'd bandar di kinoiyonon di Nahur di gulu po, i ponong id utara do Misopotamia. 11 Om soira' di nokorikot iyau'd hilo', om pogupuo' ngai' no dau it unta do hiri'd somok di torobong dit id soliwan di bandar. Tontok nopoddi om sosodopon no, om kaangayan no di tongoondu' kasagahai. 12 Om sambayang noddi i susuhuon diri do poingkaa, “Oi TUHAN, i Kinorohingan di Abraham, i tuan ku, tulungo' oku no om haro i' o kootuson diti karaja' ku do tadau'd baino', om igitai no kasai' i batos nu dot id tuan ku. 13 Hati oku nod doros diti torobong, i toongoyon sagahai di koongonduan do bandar diti. 14 Om moro-boros oku nondo dot id iso' diyolo' do poingkaa, 'Potimbouko' daa ino timbauk nu, om poinumon oku po,' kangku nondo. Om sumimbar nopo iyau dot, 'Na, inum no; om ino unta nu nga' ongoyon ku i' onuwai'd waig,' ka, om iri no i tondu'ddi o pilion nu do maan do sawo di Isak, i susuhuon nu. Om ondung owonsoi o miagal diri, om oilaan ku nondo do poingigit nu i' i batos nu dot id tuan ku,” ka dau. 15 A' po iyau nokopongo do sumambayang om korikot no i Robika do kisinaan do kakanan. Iyau nopo om tanak di Botuil, om i Botuil no om tanak diyo Nahur di Milka. Om i Nahur nopo om tobpinai di Abraham. 16 I Robika nopoddi nga' olumis kopio koondu', om a' po iyau notoning do kusai. Om ongoi no iyau do hiri'd torobong om ponuo' no dau do waig i kakanan dau om poguliai noddi dau. 17 Om tangkus no i susuhuon di Abraham do minongoi solowot di Robika, om boro-boros nod, “Poinumo' oku daa dot ongokooro' dino waig nu,” ka dau. 18 Om boros ka di sumandak do suminimbar, “Minum nogi', oi Tuan,” ka dau. Om olomus nopo iyau do pinopoiliu di kakanan di poinsaan dau om poinumo' no dau i susuhuon diri. 19 Om koinum poddi i susuhuon di Abraham, om boros ka di sumandak, “Ongoyon ku po onuwai'd waig ilo unta nu do gisom dot ongourudtuu,” ka dau. 20 Om olomus nopo iyau do pinopotungu di waig dit id kakanan dau do hiri'd poiinuman di unta, om tangkus po kawagu iyau do minongoi do hiri'd torobong do minongoi kawagu'd waig do gisom do nongourudtuu ngai' it unta di susuhuon diri. 21 Om poingontong diri i susuhuon di Abraham, nga' aiso' id komi dau, tu' monoinu iyau ondung pinootus kopio do TUHAN i karaja' dau'ddi ko' amu'. 22 Kongoinum ngai' poddi di sumandak it unta, om ngoyo' no di susuhuon di Abraham i tanting-anting do tamas dit agayo o gatang, om poonting-ontingo' no dau do hiri'd todung di sumandak diri, om onuo' no dau o duwo o golong do tamas dit agayo om posulungo' no dau do hiri'd lunggayan di sumandak. 23 Om boros kaddi di susuhuon di Abraham, “Sunudai oku daa ondung isai o tapa' nu. Haro i' tuu daa o tiyonon dahai diti tulun ku do hilo'd walai dau do modop do totuong do baino'?” ka dau. 24 Om boros ka di Robika, “Tapa' ku nopo om i Botuil, i tanak diyo' Nahur di Milka,” ka dau. 25 Om boros ka kawagu dau, “Haro i' o todopon dokoyu do hilo'd walai dahai, om ogumu' i' o sakot do nokoring om taakanon do tayam-tayam do hilo',” ka dau. 26 Om otud noddi i susuhuon di Abraham do suminambayang dot id TUHAN. 27 Boros ka dau, “Royohon no TUHAN, i Kinorohingan di Abraham, i tuan ku, tu' otorodok i' do mongigit di batos dau dot id tuan ku. Om winoyo' oku i' do TUHAN do ruminikot do hiti'd koworisan di tuan ku,” ka dau. 28 Om panangkus noddi i sumandak diri do minuli' do hiri'd walai di tina' dau om posusuyo' no dau o koinsanai di nongosiliu'ddi. 29-30 I Robika nopoddi om haro o tobpinai do kusai dot i Laban o ngaran. Om nokorongou i' iyau di sinusui di tadi' dau'ddi do pasal di pinoboros di susuhuon diri. Om nokokito iyau di tanting-anting do todung om i golong do poinsulung di tadi' dau. Om panangkus noddi i Laban do suminoliwan do mantad hiri'd walai do mongoi solowot di susuhuon di Abraham diri, i poingkakat do hiri'd toning di piro-piro ot unta dau do hiri'd doros di torobong. 31 Om boros ka di Laban, “Tanud doho' do mongoi do hilo'd walai. Iya' no i noonuan do TUHAN do barakat. Om kada' no undorong do hiti'd soliwan. Tu' haro no o tiyonon do nosodia' ku dokoyu do hilo'd walai ku. Om poiyanan dilo unta nu nga' haro i'!” ka dau. 32 Om salakoi noddi i susuhuon di Abraham do hiri'd walai, om ngoyo' nod Laban takaso' i ginandar dit unta, om onuwai ngai' no dau do sakot di nokoring om susumad it unta. Om ngoyo' no dau onuwai do waig i susuhuon di Abraham om koinsanai di tulun dau do maan do pongoug do lapap diyolo'. 33 Om soira' di nokosurung o takanon, om boros ka di susuhuon di Abraham, “A' oku po makan dot a' ku po koboros iti poboroson ku,” ka dau. Om boros kad Laban, “Boro-boros nopo,” ka. 34 Om timpuun noddi i susuhuon di Abraham do minoro-boros do poingkaa, “Iyoho' nopodti om susuhuon di Abraham. 35 Om iri nopo tuan ku om binarakatan kopio'd TUHAN, gisom do nosiliu iyau do tulun do kaya'. Om nonuan iyau do TUHAN do piro-piro kogumuon do dumba', om kambing, om sapi', om unta, om kaladai, om pirok, om tamas, om susuhuon do kusai om susuhuon do tongoondu'. 36 Om tontok di molohing no i Sara, i sawo di tuan ku, om paganak no iyau do kusai. Om nakatahak ngai' no di tuan ku i dapu' dot id tanak dau'ddi. 37 Om sinuhu' oku di tuan ku do minamatos do mikuwo'd suminumpa' do tumanud oku dot isuhu' dau. Boros ka dau, 'Kada' doho' pogihumai do sawo ilo tanak ku'd kusai dot id pogialatan do kosumandakan do tulun do Kanaan. 38 Suwai ko' lumomus nogi' do mongoi do hilo'd bansa' di tapa' ku, i hilo'd koobpinayan ku. Om momili' no do tondu' do maan do sawo dilo tanak ku'd kusai,' ka dau. 39 Om uhoto' ku no iyau, 'Poingkuro no dot a' no tumanud doho' i tondu'?' kangku. 40 Om boros ka dau do suminimbar, 'Suhuon id TUHAN i moloikat dau do momoyo' diya' om monulung diya' do popootus di karaja' nu. Tu' TUHAN no it umboyoon kasai' ku. Om koihum ko indo do tondu' do mantad id bansa' ku, om mantad id koobpinayan di tapa' ku, do kowinon diti tanak ku. 41 Iso' po o ralan do koidu-idu' nu do mantad id sumpa' nu'dti: Tu' ondung a' ko di koobpinayan ku romiton, do koongoi ko do hilo'd diyolo', om koidu' ko no!' ka dau. 42 Tontok di korikot oku i' do hilo'd torobong di tadau baino' om sambayang oku no dot id suang do ginawo ku do poingkaa, 'Oi TUHAN, i Kinorohingan di Abraham, i tuan ku, tulungo' oku no om haro i' o kootuson diti wonsoyon ku. 43 Diya oku no, do poingkakat do hiti'd doros diti torobong. Om soira' nopondo do haro o sumandak do mongoi sago' do hiti'd torobong, om mokiinum oku nondo dot ongokooro' di waig do hiri'd kakanan dau. 44 Om ondung kotumboyo' iyau do popoinum doho' om ongoyon dau poinumo' ilo unta ku, om maha' daa om iri no o nopili' nu do sumiliu do sawo di tanak di tuan ku,' kangku. 45 Om a' ku poddi nopupusan i sambayang ku'ddi dot id suang do ginawo ku, om korikot no i Robika do kisinaan do kakanan, om ongoi no iyau sago' do hiri'd torobong. Om boros kangku'ddi dot id dau, 'Poinumo' oku daa,' kangku. 46 Om olomus nopo iyau do pinopoiliu di kakanan do poinsaan dau om boro-boros nod, 'Na, minum nogi'; om ilo unta nu nga' ongoyon ku i' poinumo',' ka dau. Om inum oku noddi, om ngoyo' no dau poinumo' it unta ku. 47 Om uhoto' ku noddi iyau, 'Isai o ngaran do tapa' nu?' kangku. Om boros ka dau do suminimbar, 'Tapa' ku nopo om i Botuil, i tanak diyo' Nahur di Milka,' ka. Om ongoyo' ku noddi poonting-ontingo' do todung dau i tanting-anting do tamas om sulungai ku do golong o lunggayan dau. 48 Om otud oku no do suminambayang dot id TUHAN. Om rinayou ku o TUHAN, i Kinorohingan di Abraham, i tuan ku, tu' iyau no o minomoyo' doho' do ruminikot do hiti'd koobpinayan di tuan ku, gisom do nokosolowot oku do sumandak diti do pokowinan di tanak dau. 49 Nga' dinondo nopodti, om ondung orohian kou do momonsoi dot osonong dot id tuan ku, om momonsoi dit apatut dokoyu'd wonsoyon dot id dau, tu' tobpinai i' dokoyu iyau, om poboroson no dot id doho'; om sokiro dot amu', nga' poboroson i' dot id doho' om oilaan ku i' ondung poingkuro nondo o wonsoyon ku,” ka dau. 50 Om boros ka diyo' Laban di Botuil do suminimbar, “Iti nopo om mantad i' dot id TUHAN, okon i' ko' iyahai ot apatut do sumimbar diti. 51 Diya iloi Robika, potonudon nopo dokoyu ilo'. Om ilo' no o sumiliu do sawo di tanak di tuan nu do miagal di nokoboros mantad do TUHAN,” ka diyolo'. 52 Soira' di norongou di susuhuon di Abraham o miagal diri, om otud no iyau do tuminuku' dot id TUHAN. 53 Om posoliwano' noddi dau i pakayan, om i tamas, om i pirok, om patahako' no dau di Robika. Om panahak po kawagu iyau do hino ngai' it angagayo o gatang do pinopuhawang dau di tobpinai di Robika do kusai om i tina' di Robika. 54 Om akan nogiddi om inum i susuhuon di Abraham om koinsanai di tulun dau, om odop no iyolo' do hiri do totuong diri. Om kosuabon noddi, om boro-boros no i susuhuon di Abraham, “Muli' oku no daa'ndo do hilo'd tuan ku,” ka dau. 55 Nga' boros kaddi di tina' di Robika om i tobpinai dau do kusai, “Pologoson po daa i Robika do mundorong do hiti do poinsugku' dahai dot ongoturu' o tadau ko' hopod o tadau, om mamanau nogindo iyau,” ka diyolo'. 56 Nga' boros ka di susuhuon diri, “Kada' no iyahai himpagangai. Tu' nokootus no kopio'd TUHAN iti panau ku. Om pologoso' oku no do gumuli' do hilo'd tuan ku,” ka dau. 57 Om boros ka diyolo' do suminimbar, “Lohowo' toko' nogi' i Robika om oilaan toko' i' ondung nunu ka dau,” ka diyolo'. 58 Om lohowo' noddi diyolo' i Robika om uhoto' no diyolo' iyau, “Orohian ko i' do tumanud diti tulun diti?” ka diyolo'. Om boros ka di Robika do suminimbar, “Orohian i',” ka dau. 59 Om pologoso' noddi diyolo' i Robika om i mitatamong dau di molohing no, do tumanud di susuhuon di Abraham, om i tulun dau. 60 Om barakatai noddi diyolo' i Robika diti boros do poingkaa, “Maha' daa om osiliu ko, oi Robika, do tina' do jutaan o tulun, maha' daa om angaala' di sinakagon nu i kabandaran do pisangod diyolo',” ka. 61 Om pongopi-opi' no i Robika om i piro-piro o susuhuon dau do tongoondu' dit ongomulok po, om sakai noddi iyolo' dit unta. Om pamanau ngai' noddi iyolo' do tuminanud di susuhuon di Abraham. 62 I Isak nopo om nokorikot no do mantad hiri'd tana' do kowotuan, i kawaya' di torobong di roitan dot “Iyau I Mamadul Doho' “. Om minundorong diri iyau do hiri'd ponong id salatan do Kanaan. 63 Insan o sosodopon, om soliwan no iyau do mantad hiri'd kiim dau do minongoi pipanau-panau do hiri'd koumaan om kokito no dau o piro-piro ot unta do rumikot. 64 Om soira' di nokito di Robika i Isak, om lintuhun no iyau do mantad hiri'd unta dau, 65 om uhoto' no dau i susuhuon di Abraham, “Isai ilo kusai do hoodi'd dumo dilo' do rumapou dati'?” ka dau. “Ilo' no i tuan ku,” ka di susuhuon di Abraham do suminimbar. Om onuo' noddi di Robika i kulu dau om potirungo' no do rabas dau. 66 Om sunudai no di susuhuon diri i Isak do koinsanai di winonsoi dau. 67 Om angatai no di Isak i Robika do sumuang do hiri'd kiim di niyon di Sara, i tina' dau, di gulu po. Om i Robika noddi o nosiliu do sawo dau. Om osianan tomod i' i Isak di Robika, om noinsasamadan noddi kopio iyau, do mulong piya do tumongob daa iyau tu' napatai no i tina' dau.

Kinawansayan 25

Sinakagon di Abraham do Suwai

1 Om panansawo noddi kawagu i Abraham do tondu' do suwai, dot i Kotura o ngaran. 2 Om paganak no i Kotura i sawo dau, om i Simran, i Yoksan, i Mudan, i Midian, i Isbak om i Sua. 3 I Yoksan nopo om tapa' di Siba om i Didan, om sinakagon nopo di Didan om tulun dot Asur, om tulun do Lotus om tulun do Lium. 4 Tangaanak nopo di Midian, om i Ipa, i Ipir, i Hinok, i Abida, om i Ildaa. Koinsanai diyolo'dti om sinakagon ngai' nopo di Kotura. 5 Nga' mulong piya dot i Isak o pinotungkusan di Abraham do koinsanai di dapu' dau; 6 nga' daamot nopo di poimpasi po i Abraham, om pinuhawangan i' dau do konunu-nunuan dot ogumu' o koinsanai di tangaanak di piro-piro o sawo dau'd suwai. Om suhuo' noddi di Abraham i tangaanak diri do mundaliu do kumaa dot id kinoiyonon di hilo'd Kanaan di ponong id koulayon, om koinsodu' i' iyolo' di Isak.

Napatai om Linobong i Abraham

7-8 Om kapatai noddi i Abraham di nokolohing kopio iyau, di hatus om turu' nohopod om limo o toun dau. 9 Om lobongo' noddi diyo' Isak di Ismail i tapa' diyolo' do hiri'd luang do nuluhon, i roitan do Makpila, it id tumo di ponong hilo'd koulayon do mantad id pomogunan do Mamri, i di Ipron di gulu po. I Ipron nopo om tanak di Sohar i tulun do Hit. 10 Om iri nopo tumo'ddi nga' binoli di Abraham do mantad id tulun do Hit. Om hilo' goduwo nopo o pinamalabangan di Abraham om i Sara, i sawo dau. 11 Di nopoddi napatai i Abraham, om barakatai nod Kinorohingan i Isak, i tanak di Abraham, i poingiyon do hilo'd somok di torobong di roitan dot, “Iyau I Mamadul Doho' “.

Sinakagon di Ismail

12 I Ismail nopo om tanak diyo' Abraham di Hagar, i tondu' do Masir, i turipon di Sara diri. 13-16 Iti ngai' no i hopod om duwo o tangaanak di Ismail do poingirus nopo do mantad id kotuahan om gisom dot id komulakan: i Nibayot, i Kidar, i Adbiil, i Mibsam, i Misma, i Duma, i Masa, i Hadad, i Tima, i Yitur, i Napis om i Kidma. Om iyolo' nopoddi om nosiliu ngai' nopo do taki-aki do hopod om duwo o bansa'. Om ngaran nopo di kampung om i pinomukiiman diyolo' nga' pinasangai ngai' nopo do ngaran diyolo'. 17 Di nopoddi minatai i Ismail om hatus no om tolu nohopod om turu' o toun dau. 18 Om iri nopo i sinakagon di Ismail om poingiyon do hilo'd kinoiyonon dit id piolitan do Hawila om Sur, i ponong id koulayon do mantad id Masir, i poingkaa do hilo'd Asur. Om poinsodu' iyolo' di pinomogun-mogunan di sinakagon di Abraham do suwai.

Kinosusuon di Isau om i Yakub

19 Om iti no susui do kinowoyo-woyoo' do koposi-posion di Isak, i tanak di Abraham. 20 Apat no nohopod o toun di Isak do tontok di kinawin dau i Robika, i tadi' di Laban, i tanak di Botuil. (I Botuil nopo om tulun dot Aram do mantad id Misopotamia.) 21 I Robika nopo om a' daa maganak. Nga' sambayang noddi i Isak dot id TUHAN do bagi' di Robika, i sawo dau. Om sinimbar i' kopio'd TUHAN i sambayang dau'ddi, tu' minonontian iddi i Robika. 22 Om iri nopo i ponontianon dau nga' miapid. Om tontok di hiri pod tian i ragang, om misaap mantad no iyolo'. Om boros kaddi di Robika, “Nokuro tu' osiliu o miagal diti dot id doho'?” ka dau. Om pokiilo noddi iyau do TUHAN. 23 Om boros kad TUHAN dot id dau, “Ino nopo ponontianon nu, om duwo o bansa'd tulun, osusu ko nondo do duwo o tulun di misangod; iri nopo tadi' om okoris i' ko' i taka', om it id dotuo ot osiliu do modsusurung dit id domulok,” ka dau. 24 Om korikot noddi i maso do kosusuan di Robika. Om kosusu no iyau, om miapid i tanak do kusai goduwo nopo. 25 Iri nopo it id gulu kasawa' om aragang-ragang o kokitanan, om kulit dau nga' miagal di rasuk di kihulu, om iri noddi o kinopomungaranan dau dot i Isau. 26 Om soira' di nasawa' i tanak do koduwo om oogot tomod o palad dau do poingigit do tatad di Isau. Om iri no o kinopomungaranan dau dot i Yakub. Om tontok nopo di nosusu iyolo', om onom no nohopod o toun di Isak.

Dinagang di Isau i Gontok Dau

27 Om mayo-gayo nopoddi goduwo i tanak diri. Om i Isau nopoddi nga' nosiliu do magagasu dit otorus kopio, om orohian iyau do hilo'd gouton. Nga' i Yakub nopo om obongung-bongung koulun om orohian iyau do poundorong dot id duwalai. 28 Om poinggayo-gayo po o kosianan di Isak di Isau; tu' orohian iyau do mangakan di nintorusan dit aanu di Isau; nga' i Robika no om poinggayo-gayo po kosianan dau di Yakub. 29 Insan o tadau, di masaan di Yakub do mogonsok do kasang dit aragang, om korikot no i Isau do mantad id pinogosuan. Om louson no kopio iyau. 30 Om boros kaddi dau dot id di Yakub, “Louson oku no kopio. Onuwai oku daa diya' dot okuuri' dino kasang nu'd aragang,” ka dau. (Iri noddi o kinopomoroitan dau dot i Idom.) 31 Om boros ka di Yakub do suminimbar, “Manahak oku i' diya' diti, do patahakon nu no doho' i gontok nu di don tanak do kotuahan,” ka dau. 32 Om boros ka di Isau, “Onuon nopo i gontok ku'ddi. Tu' motingkapatai oku nodti do louson. Om nunu poddi daa o guna' ku di gontok ku'ddi,” ka dau. 33 Om boros ka di Yakub do suminimbar, “Sumpa' poo, do patahakon kopio nu doho' i gontok nu,” ka dau. Om sumpa' noddi i Isau, om patahako' no dau i gontok dau di don tanak do kotuahan dot id di Yakub. 34 Om onuwai nogiddi di Yakub i Isau do roti om nonuan dau iyau di kasang dot aragang diri. Om akan noddi om inum i Isau, om pamanau nogiddi iyau. Om iyo noddi i Isau do pinapagaan-gaan di gontok dau di don tanak do kotuahan.

Kinawansayan 26

Minomogun-mogun i Isak do Hilo'd Gorar

1 Om korikatai po kawagu o pomogunan diri do mononglous do miagal di nosiliu di hino po i Abraham. Om ongoi no i Isak solowot di Abimilik, i raja' do tulun do Pilistin do hilo'd Gorar, do mongoi pokibanar do miyon iyau do hilo'. 2 Om iyo pogiddi o winonsoi dau nga' nokointalang no o TUHAN dot id di Isak om minomoros dot, “Kada' ongoi do hilo'd Masir. Undorong nopo do hiti'd pomogunan diti, do miagal di pinonuhuan ku diya'. 3 Om woyoon ku indo iya' om barakatan ku iya'. Om patahakon ngai' ku nopo diya' om i sinakagon nu o koinsanai'd watas diti. Tu' bayaanon kasai' ku i' i batos di pinabatos ku dot id di Abraham, i tapa' nu. 4 Om onuan tiya' i' do sinakagon do miagal dilo rombituon do hilo'd tawan kogumu'. Om tahakon ku do sinakagon nu o koinsanai diti tana' do hiti. Om oinsanan nopondo o bansa' do hiti'd pomogunan do mokianu doho' do barakat do miagal di barakat di pinatahak ku di sinakagon nu. 5 Om barakatan ku i' iya' tu' minihuboyo-boyo' i' i Abraham doho' om tuminanud do koinsanai dit oturan om i pinonuhuan ku,” ka dau. 6 Om pomogun-mogun noddi i Isak do hilo'd Gorar. 7 Om soira' di minonguhot di Isak i tulun do hiri, ondung isai i Robika, om poboroso' no di Isak dot i Robika nopo om tadi' i' dau, om okon i' ko' sawo dau. Tu' moddosi iyau do patayon di tulun do hiri do sumolod iyolo' di Robika. Tu' i Robika nopoddi nga' olumis koondu'. 8 Om tontok dit alaid-laid i Isak do poundorong do hiri, om liga' no i raja' Abimilik do hiri'd liligaon dau, om kokito no dau i Isak do mitungub di Robika. 9 Om lohowo' noddi di Abimilik i Isak, om boro-boros no iyau do poingkaa, “Noo, nga' sawo nu i' pama i tondu'ddi! Nokuro tu' pinoboros nu do tadi' nu iyau?” ka dau. Om boros ka di Isak do suminimbar, “Osorou ku nopo nga' patayon oku no, ondung poboroson ku do sawo ku iyau,” ka dau. 10 Om boros ka di Abimilik, “Nunu kopio iti winonsoi nu dot id dahai'dti? Tu' osoonong moti' ot isai nopo diti tulun ku do mongoi dudun dilo sawo nu, om ondung haro daa kopio ot iyo'ddi, om iya' no moti' o mamabo do kasalaan dahai,” ka dau. 11 Om poinsano' ngai' noddi di Abimilik i tulun dau do poingkaa, “Isai nopo moti' o paparaa-raat di Isak ko' ilo sawo dau om patayon no,” ka dau. 12 Om pananom-tanom noddi i Isak dot id pomogunan diri, om toun iddi do nakaanu iyau do tua' dot inghatus kopiluap ko' mantad di tinanom i' dau, tu' binarakatan i' iyau do TUHAN. 13 Om muhang-ruhang nopoddi o kakayaan di Isak do gisom do nosiliu iyau do tulun di kaya' kopio. 14 Om i Isak nopoddi nga' kidumba' om kisapi' dot ogumu', om ogumu' po o susuhuon dau. Om gowoi poddi om minosol dau i tulun do Pilistin. 15 Om ngoyo' noddi di tulun do Pilistin olitai o koinsanai di torobong di Isak, i nukadan di susuhuon di Abraham, i tapa' dau di poimpasi po iyau. 16 Om boros kaddi di Abimilik dot id di Isak, “Undaliu nogi' do mantad hiti'd pomogunan dahai. Tu' okoris ko nogiddi kopio iya' ko' iyahai,” ka dau. 17 Om tongkiad noddi i Isak di pomogunan diri. Om ongoi noddi iyau pomukiim do hiri'd Rantai do Gorar. Om hilo' noddi iyau do poingiyon do piro-piro o koloido'. 18 Om ngoyo' noddi di Isak ukadai i piro-piro i torobong di nukadan di poimpasi po i Abraham, i nongoi di tulun do Pilistin olitai di napatai i Abraham. Om pungaranai noddi di Isak i piro-piro o torobong diri do ngaran di pinomungaran mantad di tapa' dau. 19 Om ongoi no i piro-piro o susuhuon di Isak pongukad do torobong do hiri'd rantai'ddi, om kokito no iyolo' do waig. 20 Nga' pogisosongkiwal no i gompomogompi' do dumba' di mantad hilo'd Gorar, om i gompomogompi' do dumba' di Isak. Om boros ka diyolo', “Dahai idti waig,” ka. Om pungaranai noddi di Isak i torobong diri do “Pisongkiwalan”. 21 Om pongukad po kawagu i susuhuon di Isak dot iso' o torobong do suwai ko' iri. Om pungaranai noddi di Isak i torobong diri do “Pisaapan”. 22 Om undaliu no iyau do mantad hiri, om pongukad po kawagu do torobong do kotolu. Om iti nopo nga' aiso' noddi o pinisongkiwalan. Om pungaranai noddi dau i torobong diri do “Kosimbayanan”. Om boros kaddi di Isak, “Baino' nopoddi om nonuan toko' nod TUHAN do kosimbayanan do poundorong dot id pomogunan diti, om kakaya' toko' no do hiti,” ka dau. 23 Om pamanau noddi i Isak om ongoi no iyau do hilo'd Borsiba. 24 Om tontok di totuong diri om intalang no o TUHAN dot id di Isak om boro-boros no do poingkaa, “Iyoho' no i Kinorohingan di Abraham, i tapa' nu. Kada' poddosi; tu' moyo-woyo' oku i' diya'. Om barakatan ku indo iya' om onuan tiya' do sinakagon dot ogumu' tu' nakabatos mantad ku no iti dot id di Abraham, i susuhuon ku,” ka dau. 25 Om pomonsoi noddi i Isak do pananaraban do porsombahan do hiri om sambayang no iyau dot id TUHAN. Om pomukiim noddi iyau do hilo', om pongukad no kawagu do torobong i piro-piro o susuhuon di Isak.

Pinibatasan di Isak om i Abimilik

26 Insan o tadau, om korikot no i Abimilik do mantad hilo'd Gorar, do miwoyo' di Ahusat i ponosihat dau, om i Pikol i boyoon do soudor dau, do minongoi solowot di Isak. 27 Om ponguhot no i Isak diyolo' do poingkaa, “Nokuro'ddi do baino' tu' mongoi ko po solowot doho', tu' di nopo di gulu po om ongotogod kou i' doho', om minonuhu' kou do minundaliu do mantad id pomogunan dokoyu,” ka dau. 28 Om boros ka diyolo' do suminimbar, “Baino' nopoddi om oilaan no dahai do moyo-moyo' o TUHAN diya', om osorou diri dahai dot osonong nogi' do momonsoi toko' do taru'. Om pokionuon dahai do sumumpa' ko, 29 dot a' ko momonsoi dot araat dot id dahai, do miagal dahai tu' a' i' minomonsoi dot araat dot id diya'. Om osonong i' iyahai dot id diya' tu' pinologos i' dahai iya' dot osimbayan do tuminongkiad. Tu' baino' nopoddi om atalang no kopio do binarakatan ko do TUHAN,” ka diyolo'. 30 Om papaharo noddi i Isak do poginakanan do maan diyolo'. Om akan noddi iyolo' om minonginum-nginum. 31 Om osuab poddi di kosuabon kawagu, om sorompori-pori nopo iyolo' do pinopoboros di batos diyolo' do mikuwo'd sumumpa' do pinopogirot di batos diri. Om boro-boros nogiddi i Isak dot id diyolo' do poingkaa, “Sumonong-sonong kou do mamanau,” ka dau. Om pogitotongkiad noddi iyolo', nga' mogiambalut no maddi iyolo'. 32 Om tontok i' do tadau'ddi do nokorikot i piro-piro o susuhuon di Isak do minongoi popoilo dau do pasal di torobong di nukadan diyolo'. Boros ka diyolo', “Haro no waig do nokito dahai,” ka. 33 Om pungaranai noddi di Isak i torobong diri do “Sumpa' “. Om iri no o kinopomungaranan do bandar diri do Borsiba.

I Sawo di Isau do Bansa'd Suwai

34 Tontok dit apat no nohopod o toun di Isau, om panansawo noddi iyau do duwo o tondu' do mantad id payat di bansa' do Hit. Ngaran nopo diyolo' om: i Yudit i tanak di Biiri, om i Basmat i tanak di Ilon. 35 Iri nopo i duwo o tondu'ddi nga' mongudipon nopo kasai' di Isak om i Robika.

Kinawansayan 27

Binarakatan di Isak i Yakub

1 Insan o tadau di molohing noddi kopio i Isak, om mato dau nga' a' no kokito, om lohowo' no dau i Isau i tanak dau do kusai dit id dotuo. Boros ka dau, “Ondu' “ ka. Om boros ka di Isau do suminimbar, “Hoi, nunu'ri, oi apa',” ka dau. 2 Om boros ka di Isak, “Koilo ko i' koii, do molohing oku no, om a' oku no alaid do poimpasi. 3 Om ngoyo' no ilo pana' nu, om ongoyon oku i' pogosuwai dot ongosonginan do nintorusan do hilo'd gouton. 4 Om pagansakan oku no dot awasiu dot i korohian ku do mangakan, om ongoyon indo posurungo' doho'. Om kaakan oku pondo om barakatan ku nogindo iya' di barakat di kolimpupuson no do patahakon ku diya' dot a' oku po apatai,” ka dau. 5 Iri nopo boros di Isak dot id di Isau diri, nga' norongou i' di Robika. Om soira' di nakapamanau i Isau do minongoi pagasu, 6 om boro-boros no i Robika di Yakub do poingkaa, “Norongou ku di tiinu' i tapa' nu do minoro-boros di Isau do poingkaa, 7 'Ongoyo' oku no pogosuwai dot ongosonginan do nintorusan om onsokon no, om posurungon indo doho'. Om kaakan oku nopondoddi om barakatan tiya' nogindo dot id toguang do TUHAN dot a' oku po apatai,' ka,” ka dau. 8 Om boros ka kawagu di Robika, “Iyo nopoddi oi ondu', om pokinongou no doho', om wonsoyon no iti poboroson ku diya'. 9 Ongoi no pomili' do duwo o tinan do tanak do kambing dit olomu' do hilo'd baanan toko', om onsokon ku indo dot awasiu do miagal di korohian kopio di tapa' nu. 10 Om ngoyon nu nogindo paakanai dau, om abarakatan ko i' dau dot a' po iyau apatai,” ka dau. 11 Nga' boros ka di Yakub dot id tina' dau, “A' toi kihulu i' i Isau nga' iyoho' nopo om olunau i' o kulit. 12 Om kamaon oku nopondo di tapa', om oilaan indo dau do monipu' oku dau, om okon nogindo ko' barakat ot aanu ku, nga' kousungan nogi',” ka dau. 13 Nga' boros ka di tina' dau do suminimbar, “Kada' katangkabo, oi ondu', baya' id iyoho' piya o mamabo di kousungan nu, nga' tonudon po i pinoboros ku diya', pamanau nogi' do mongoi panganu di kambing,” ka dau. 14 Om pamanau noddi i Yakub do minongoi panganu di kambing om tahako' no dau di tina' dau. Om onsoko' noddi di Robika iri do miagal di korohian di Isak. 15 Om ngoyo' noddi di Robika i rasuk di Isau dit olumis, i pinoopi' dau do hiri'd duwalai, om porosukai no dau di Yakub. 16 Om onuo' no di Robika i kulit di tanak do kambing diri om powongkoso' no do hiri'd longon di Yakub, om hiri'd liou dau dit aiso' o hulu. 17 Om patahako' nogiddi di Robika di Yakub i nonsok dau dit awasiu'ddi, om i roti di winonsoi dau. 18 Om ongoi noddi i Yakub do hiri'd tapa' dau om boro-boros no iyau dot, “Apa'!” ka. Om simbar no i Isak do poingkaa, “Hoi! Isai ko'ndo, i Isau ko ko' i Yakub?” ka dau. 19 Om boros ka di Yakub do suminimbar, “Iyoho', i Isau i tanak nu dot id dotuo; nowonsoi ku no i pinonuhuan nu doho' di tiinu'ddi. Tungag no om akanon- i' iti tikanas do nigitan ku diya', om kaakan ko pondo om barakatan oku nogi',” ka dau. 20 Om boros ka di Isak, “Poingkuro kopio ko do nakaanu do nintorusan dot iyo kopio'ddi koruhai, oi ondu'?” ka dau. Om boros ka di Yakub do suminimbar, “TUHAN i' i Kinorohingan nu, oi apa' o minonguhup doho',” ka dau. 21 Om boros ka di Isak dot id di Yakub, “Insomok daa kopio doho' om kakama' oku i' diya'. Otopot no toi kopio dot i Isau ko?” ka dau. 22 Om insomok noddi i Yakub di tapa' dau. Om kamao' no di Isak i Yakub om boros ka dau, “Tuni nopo do boros nu om miagal i' do tuni do boros di Yakub, nga' longon nu nopo om miagal i' do longon di Isau,” ka dau. 23 A' no dau notutunan i Yakub, tu' kihulu no o longon dau do miagal do longon di Isau. Nga' tontok di potibarakatan no daa di Isak i Yakub, 24 om ponguhot po kawagu iyau do poingkaa, “Otopot no toi kopio dot i Isau ko?” ka dau. “Oo,” ka di Yakub do suminimbar. 25 Om boros kaddi di Isak, “Onuwai oku dot ongokuuri' dino tikanas. Om kaakan oku pondo om barakatan ku nogi' iya',” ka dau. Om patahako' no di Yakub di Isak i tikanas diri om patahako' dau i waig dot anggur do tinumon di Isak. 26 Om boros kaddi di Isak dot id dau, “Insomok-somok doho' om tunguban oku i' diya', oi ondu',” ka dau. 27 Om di nopo di mininsomok nogi' i Yakub do mongoi tungub di tapa' dau, om kosingud no di Isak o tawau di rasuk di Isau --- om barakatai noddi di Isak i Yakub. Boros ka dau, “Osonong no kopio o kosingudan diti tanak ku, tu' miagal po do tawau di tumo di nabarakatan do TUHAN. 28 Maha' daa om onuan ko do Kinorohingan do bolobou do mantad hilo'd tawan do popoluhub do tana' nu! Om maha' daa om onuan ko dau dot ogumu' o gandum om anggur! 29 Maha' daa om osiliu do turipon nu o piro-piro o bansa', om maha' daa om minsiriba' ngai' o payat do bansa' dot id diya'. Maha' daa om iya' o momorinta' do koinsanai di koobpinayan nu, om maha' daa om motud ngai' dot id diya' i sinakagon di tina' nu. Ousung po o koinsanai'd tulun di momopol diya'; nga' maha' daa om abarakatan o koinsanai'd tulun di mamarakat diya',” ka dau.

Mokibarakat daa i Isau di Isak

30 Om kopongo noddi i Isak do papatahak di barakat dau, nga' maha' di nokotongkiad nogi' kopio i Yakub, om korikot no i Isau, i tobpinai dau, do mantad id pogosuan. 31 Om i Isau nga' minogonsok nogi' dot awasiu do paakanan dau di tapa' dau. Boros ka dau, “Oi Apa', tungag, om akanon i' iti tikanas do nonsok ku diya', om abarakatan oku indo diya',” ka dau. 32 “Isai ko?” ka di Isak do minonguhot. “Iyoho', i Isau, i tanak nu dit id dotuo,” ka dau. 33 Nga' gagarai tomod noddi i Isak, om ponguhot no iyau, “Ondung iyo'dti om isai'ddi i minogkorot di nintorusan om i pinapatahak diri dot id doho' di tiinu'? Om naakan ku noddi iri dit a' ko po nokorikot, om nakatahak ku noddi dau i barakat ku di kolimpupuson no. Om dau no moti'ddi do gisom dot alaid,” ka dau. 34 Om soira' di norongou di Isau o miagal diri, om poronggungai nopo dau do minihad, do mikuwo'd araat tomod o ginawo dau. Om boros ka dau, “Iyoho' nga' mokibarakat i' diya', oi Apa',” ka dau. 35 Nga' boros ka di Isak, “Nokoongoi no'd hiti'd doho' i tadi' nu do minonipu' doho'. Om naanu noddi dau i barakat di patahakon mantad ku daa diya',” ka dau. 36 Om boros ka di Isau, “Koinduwo nondo'dti do monipu' iyau doho'. A' no minsala' do pinungaranan iyau dot i Yakub. Tu' onuo' po dau i gontok ku di don tanak do kotuahan, om baino' noddi om onuo' po dau i barakat di doho' daa. Aiso' no kopio o barakat nu'd suwai do patahakon nu doho', oi Apa'?” ka dau. 37 Om boros ka di Isak do suminimbar, “Nosiliu ku no iyau do tuan nu, om nosiliu ngai' ku i tobpinai dau do susuhuon dau. Om nakatahak ku no dau o gandum om anggur. Om aiso' noddi o milo ku'd wonsoyon dot id diya', oi ondu',” ka dau. 38 Om a' nopo tumingkod i Isau do mokianu di tapa' dau do barakat, boros ka dau, “Iri-iri no kopio o barakat nu, oi Apa'? Barakatai oku iyoho', oi Apa'!” ka dau. Om ihad no kawagu iyau. 39 Om boros ka di Isak dot id dau, “Aiso' no o diya' do bolobou di mantad hilo'd tawan, om aiso' no o diya'd tumo dit oluhub. 40 Ino pondo gayang nu o koposi-posion nu, nga' turipon ko i' ma kasai' di tobpinai nu. Nga' soira' nopondo do sumaap ko, om koidu' ko nondo do mantad id kuasa' dau,” ka dau. 41 Om araatan nopoddi i Isau di Yakub, tu' i Yakub i' i tadi' dau o nonuan di Isak do barakat. Om boros ka no dot id suang do ginawo di Isau, “Kada' po nanu', dot a' no bo alaid dot apatai i tapa', om mogihad toko' nondo dau; om katalib pori, om patayon ku nondo i Yakub,” ka dau.

Sinuhu' di Isak i Yakub do Mongoi Hilo'd di Laban

42 Nga' soira' di norongou di Robika i soro-sorohon di Isau do wonsoyon dau, om lohowo' noddi di Robika i Yakub. Boros ka dau, “Pokinongou no, i Isau nopo moti', i tobpinai nu'ddi, om nokopomusorou no do mamatai diya', do sumuli' diya'. 43 Oi ondu', tonudo' no iti poboroson ku. Ongoi nogi' kopio do hilo'd di Laban, i tobpinai ku do hilo'd Haran. 44 Om sumugku' nopo dau do piro-piro o koloido' do gisom po dot atanus o kototogod di tobpinai nu, 45 om gisom dot olihuan ngai' dau i nongowonsoi nu dot id dau. Om monuhu' oku indo do tulun do mongoi pouli' diya' do hiti. Tu' mada' oku i' dot atagakan oku goduwo diti tanak ku dot insan-insan kopio o tadau,” ka dau. 46 Om boros ka di Robika dot id di Isak, “Apaasan oku noddi om otukanaan oku do kokito dilo tongosawo di Isau do bansa'd suwai. Om ondung manansawo pondo i Yakub do sumandak do Hit, om osonong nogi' do matai oku,” ka dau.

Kinawansayan 28

1 Om lohowo' no di Isak i Yakub, om suwau no iyau dau, om boro-boros noddi do poingkaa, “Kada' nogi' kopio panansawo do tondu' do Kanaan. 2 Nga' mongoi nogi' do hilo'd Misopotamia do mongoi do hiri'd walai di Botuil, i taki nu. Om kowinon nogi' ot iso' di tanak di Laban, i tamanon nu. 3 Om maha' daa om barakatan do Kinorohingan dit Agayo Kopio o Kuasa', o pisasawaan dokoyu, om onuan ko dau do tanak dot ogumu', om osiliu ko i' do taki-aki dot ogumu' o bansa'. 4 Maha' daa om barakatan ko do Kinorohingan, om iri nogi' i sinakagon nu nga' barakatan i' dau do miagal di pinamarakat dau di Abraham. Om maha' daa om asanganu nu iti tana' do kinoiyonon nu, tu' iti no o pinatahak do Kinorohingan dot id di Abraham,” ka dau. 5 Om suhuo' noddi di Isak i Yakub do kuminaa do hilo'd Misopotamia do mongoi do hilo'd di Laban, i tanak di Botuil, i tulun dot Aram diri, i tobpinai di Robika, i tina' diyo Yakub di Isau.

Minanansawo Kawagu i Isau

6 Om koilaai noddi di Isau do nabarakatan no di Isak i Yakub, om nosuhu' nod minongoi do hilo'd Misopotamia do mongoi pogihum do tondu' do hilo', do kowinon dau. Om noilaan nogi' di Isau do tontok nopo di binarakatan di Isak i Yakub om noduhan di Isak i Yakub do manansawo do tulun do Kanaan. 7 Om koilaai noddi di Isau do tuminanud i Yakub di boros di tapa' om tina' dau, om nokoongoi noddi i Yakub do hilo'd Misopotamia. 8 Om koilaai nogiddi di Isau dot a' orohian i Isak do tongoondu' do Kanaan. 9 Om ongoi noddi i Isau do hilo'd di Ismail i tanak di Abraham, om kowino' no dau i tanak di Ismail, i roitan dot i Mahalat, i tadi' di Nibayot.

Nipi di Yakub do Hilo'd Baitol

10 Om tongkiad noddi i Yakub do mantad hilo'd Borsiba om pamanau no iyau do kuminaa do hilo'd Haran. 11 Om korikot no iyau dot id iso' o kinoiyonon di tumonob o tadau, om undorong no iyau do hiri. Om lii no iyau do minodop do poulunan dot iso' o watu. 12 Om pongipi no iyau do haro nogi' o tiso' o tukad do poinsungkad do hiti'd pomogunan om poirrikot do hilo'd tawan, om okito nogi' dau do haro o piro-piro moloikat do sumalakoi om lumintuhun di tukad diri. 13 Om hino nogi' o TUHAN do poingkakat do hiri'd toning dau. Om boros ka nogi' do TUHAN, “Iyoho' no o TUHAN, i Kinorohingan di tukuon di Abraham om i Isak. Patahakon ku indo dot id diya' om id sinakagon nu iti tana' do pasagalai diti nodopon nu. 14 Kogumuon nopondo do sinakagon nu om miagal pod pupuk do tana' do hiti'd pomogunan. Om paraladon nondo diyolo' i tana' diyolo' do poingkaa ponong id koulayon, om kotonobon, om utara om salatan. Om iya' nondo om i sinakagon nu o pawayaan ku do barakat do patahakon dot id koinsanai'd bansa' do hiti'd pomogunan. 15 Ilaai no do manud-tanud oku i' kasai' diya', om hinonggo nopo o tongoyon nu nga' intirungan kasai' ku i' iya' om pogulion tiya' i' kawagu do hiti'd pomogunan diti. A' oku i' tumongkiad diya' dot a' ku po ongowonsoi i pinabatos ku diya',” ka nogi' do TUHAN. 16 Om koposik no i Yakub om boros kaddi dau, “Haro pama o TUHAN do hiti'd kinoiyonon diti! A' ku i' daa noilaan do hiti iyau! Nga' noilaan ku nogiddi do hino iyau'd hiti,” ka dau. 17 Om ooris tomod diri iyau, om boros ka dau, “Kotompurolosi i' pama kopio o kinoiyonon diti, tu' walai i' pama do Kinorohingan o hiti, om iti no pama kopio i wayaan do kumaa do hilo'd surga,” ka dau. 18 Om tungag noddi i Yakub dit osuab po di kosuabon, om onuo' no dau i watu di nulunan dau, om poudongo' no dau do hiri do maan do kopomuhandaman. Om tuntugai noddi dau do tumau do saitun ot id timpak di watu'ddi, do koilaan do nokotobilang iri do patahakon dot id Kinorohingan. 19 Om pungaranai no dau o kinoiyonon diri do Baitol. (Ngaran nopo daa di kinoiyonon diri di gulu po om Lus.) 20 Om sumpa' nogiddi i Yakub dot id TUHAN, “Ondung manud-tanud ko doho' om mongintirung ko doho' do solinaid ku do manau-panau, om manahak ko doho' do takanon om pakayan, 21 om ondung osonong-sonong oku do koguli' kawagu do hilo'd walai di tapa' ku, om iya' no ot osiliu do Kinorohingan ku. 22 Om iti nopondo watu do pinoudong ku, om osiliu nondo do tiyonon do sumambayang dot id diya', om patahakon ku diya' o sompihopod do koinsanai di patahakon nu doho',” ka dau.

Kinawansayan 29

Nokorikot i Yakub do Hilo'd Walai di Laban

1 Om lombus no i Yakub do minamanau do kuminaa do hilo'd pomogunan di ponong id koulayon do mantad id Kanaan. 2 Om sigog id kobontol i Yakub dot iso' o torobong do hiri'd talun, om haro o tolu o kinoiyonon do dumba' do songinggupu' do posorili' di torobong di pongonuan kasai' do waig do poinum di dumba'. Iri nopo torobong diri om sinompon do watu dit agayo. 3 Om soira' dot ongotimung ngai' i kambing om i dumba' do hiri, om ongoyon nondo di gompomogompi' do dumba' iduwo' i watu di pinonompon, om poinumon nogindo diyolo' i kambing om i dumba'. Om kongoinum ngai' pondo i kambing om i dumba' om posomponon no kawagu diyolo' i watu. 4 Om uhoto' no di Yakub i piro-piro o gompomogompi' do dumba'ddi, “Oi kongoombolutan ku, hinonggo tadon dokoyu?” ka dau. “Mantad iyahai do hilo'd Haran,” ka diyolo'. 5 “Kotutun kou i' di Laban, i tanak di Nahur?” ka di Yakub do minonguhot diyolo'. “Oo, kotutun i' iyahai,” ka diyolo'. 6 “Osonong-sonong i' iyau?” ka di Yakub. “Osonong-sonong i' bo,” ka diyolo' do suminimbar. “Nga' hoodi i Rasil dilo', i tanak dau'd tondu' do mongoi papaatod dilo kambing om dumba' dau,” ka kawagu diyolo'. 7 Om boros ka di Yakub, “Aadau po'ti, om a' po norikot o kopokurungan dilo kambing om dumba', nga' nokuro tu' a' dokoyu poinumon do dinondo ino tayam-tayam om koongoi i' kawagu kapangakan-ngakan?” ka dau. 8 Om boros ka diyolo' do suminimbar, “A' po iyahai milo do mongoi popoinum dot a' po korikot ngai' i kambing om dumba' tu' kotimung ngai' po om iduwon nogi' ilo pinonompon; om poinumon ngai' nogindo dahai iti kambing om dumba',” ka di piro-piro o gompomogompi' do dumba'. 9 Om maso po di Yakub do monokiboro-boros diyolo' nga' korikot no i Rasil do mogiwoyo-woyo' di kambing om i dumba'. 10 Om soira' di nokito di Yakub i Rasil do mogiwoyo-woyo' di kambing om i dumba' di Laban, i tamanon di Yakub, om ongoi no i Yakub do hiri'd torobong, om iduwo' no dau i watu do pinonompon, om onuwai noddi dau do waig dot inumon i kambing om i dumba' diri. 11 Om tungubai noddi di Yakub i Rasil, om ihad no iyau dot atataadan. 12 Om sunudai no di Yakub i Rasil, boros ka dau, “Iyoho' nopodti om tanak di Robika, i tadi' di tapa' nu,” ka dau. Om panangkus noddi i Rasil do minuli' do hiri'd walai dau do mongoi popoilo di tapa' dau. 13 Om soira' di nokorongou i Laban, i tapa' di Rasil, do hino i Yakub i tanak di tobpinai dau, om panangkus nopo iyau do minongoi solowot di Yakub, mikuwo'd guminapus om tuminungub dau; om angatai noddi dau i Yakub do minuli' do hiri'd walai. Om soira' di nosunudan di Yakub i Laban do koinsanai di nongosiliu dot id dau, 14 om boros kaddi di Laban, “Otopot i' moti' kopio dot iso-iso' po o raha' om tonsi to,” ka dau. Om undorong no i Yakub do hiri'd walai'ddi do sombulan o koloido'.

Kuminaraja' i Yakub dot id di Laban

15 Om boros ka di Laban dot id di Yakub, “A' i' osonong do muhup ko doho' do kumaraja' dot aiso' kopio o nunu-nunu dot itahak ku diya'; do mulong piya do kamanakon tiya'. Nga' songkuro o pokionuon nu do pomogontok dino huyan nu?” ka dau. 16 I Laban nopoddi om kianak do duwo o sumandak. Iri nopo it id dotuo om roitan dot i Lia, om iri no i tadi' dau om roitan dot i Rasil. 17 I Lia nopo om oluot o mato, nga' i Rasil noo om olumis o tinan om olumis o rabas. 18 Om muhang diri i Yakub di Rasil. Om boros kaddi dau dot id di Laban, “Kumaraja' oku po do hiti'd diya' do solinaid do turu' o toun do pokowinan nu no daa doho' i Rasil,” ka dau. 19 Om boros ka di Laban do suminimbar, “Uhang ku nogi' bo kopio dot iya' o patahakan ku dilo tanak ku ko' mantad do tahakon ku do tulun do suwai; undorong nopod hiti,” ka dau. 20 Om karaja' noddi i Yakub dot id di Laban do solinaid do turu' o toun do panganu dau di Rasil, nga' opurimanan nopo di Yakub om iyo nori do piro-piro o tadau tu' muhang no kopio iyau di Rasil. 21 Om alaid noddi om boro-boros no i Yakub dot id di Laban, “Nopupusan no i maso'ddi om pabanaro' oku nondo do mangawin dilo tanak nu,” ka dau. 22 Om papaharo noddi i Laban do poginakanan do pikowinan, om alapo' ngai' nopo dau i tulun dit ongotutunan dau. 23 Nga' totuong noddi, om okon nogi' ko' i Rasil o pinatahak di Laban dot id di Yakub, suwai ko' i Lia nogi' o pinatahak dau. Om i Lia noddi o notoning di Yakub. 24 (Om patahako' no di Laban i Silpa, i turipon dau'd tondu' dot id di Lia, do maan dau do susuhuon.) 25 Kosuabon poddi om kotutunai nogi' di Yakub dot i Lia i' i nakawin dau. Om ongoi no i Yakub solowot di Laban, om boro-boros no iyau dau, “Nokuro tu' miagal diri o winonsoi nu dot id doho'? Kuminaraja' oku pogi' nga' panganu ku di Rasil. Nga' nokuro tu' nakalan oku diya'?” ka dau. 26 Om boros ka di Laban do suminimbar, “Tadat nopod tulun do hiti om a' i' koino-ino do pokowinon it id domulok dot a' po kakawin it id dotuo. 27 Nga' andadon po do katalib o turu' o tadau do mantad di kinopikowinan dokoyu, om tahakon ku nogi' diya' i Rasil, do kaakun ko no do kumaraja' kawagu dot id doho' do solinaid do turu' o toun,” ka dau. 28 Om kookunai no di Yakub o miagal diri. Om katalib poddi i turu' o tadau do moginakan om pokowinai nogiddi di Laban di Yakub i Rasil, i tanak dau'ddi. 29 (Om patahako' no di Laban i Bilha i turipon dau'd tondu' dot id di Rasil, do maan dau do susuhuon.) 30 Om i Rasil nga' nongoi nogi' di Yakub toningo'. Nga' osian-sianan po i Yakub di Rasil ko' i Lia. Om karaja' poddi i Yakub do hiri'd di Laban do turu' kawagu o toun.

I Tangaanak di Yakub

31 Soira' di nokito do TUHAN dot a' i Yakub osianan kopio di Lia, om onuwai noddi do Kinorohingan do tanak i Lia, nga' i Rasil nopo om a' poddi kianak. 32 Om ponontian no i Lia, om kosusu no iyau, om kusai o tanak dau. Om boros ka dau, “Nokito id TUHAN iti katangaban ku; om osianan no bondo doho' i sawo ku,” ka dau. Om pungaranai no dau i tanak diri dot i Rubin. 33 Om ponontian no kawagu i Lia, om kosusu noddi iyau om kusai i'. Om boros ka dau, “Nonuan oku po kawagu'd TUHAN do tanak tu' norongou i' dau dot a' oku kinosianan,” ka dau. Om pungaranai no dau i tanak diri dot i Simion. 34 Om ponontian po kawagu i Lia, om kosusu no iyau, om kusai i'. Om boros ka dau, “Mamadul nondo kopio doho' i sawo ku tu' tolu noddi iti tanak ku'd kusai,” ka dau. Om pungaranai no dau i tanak diri dot i Liwi. 35 Om ponontian po kawagu i Lia, om kosusu no iyau, om kusai i'. Om boros ka dau, “Baino' nopo, om TUHAN no o royohon ku,” ka dau. Om pungaranai no dau i tanak diri dot i Yohuda. Om kotingkod noddi iyau do maganak.

Kinawansayan 30

1 Nga' aiso' i' o tanak di Rasil, gowoi poddi om osolon i Rasil di Lia, i tobpinai dau dit id dotuo'ddi. Om boros kaddi dau dot id di Yakub, “Onuwai oku kama do tanak, dot a' nopo moti' om matai oku no,” ka dau. 2 Om kotogod no i Yakub di Rasil, om boros ka dau, “Kinorohingan oku toi'dti. Tu' a' nopo papaganak diya' om Kinorohingan i',” ka dau. 3 Om boros ka di Rasil, “Diya iloi' Bilha, i turipon ku'd tondu'. Ngoyo' nopo ilo' toningo' om kapaganak i' ilo' dot onuon ku do doho'd tanak, tu' miagal podti o koonuan ku'd tanak,” ka dau. 4 Om patahako' noddi di Rasil di Yakub i Bilha. Om toningo' no di Yakub i Bilha. 5 Om ponontian noddi i Bilha om kosusu no iyau, om kusai o tanak dau. 6 Om boros ka di Rasil, “Nobian oku iddi do Kinorohingan. Om norongou i' dau i sambayang ku, gisom do nonuan oku dau dot iso' o tanak do kusai,” ka dau. Om pungaranai noddi dau i tanak diri dot i Dan. 7 Om ponontian po kawagu i Bilha, om kosusu no iyau, om kusai i'. 8 Om boros ka di Rasil, “Osusa' oku no daa kopio do monokisaap di tobpinai ku, nga' nakamanang oku iddi,” ka dau. Om pungaranai noddi dau i tanak diri dot i Naptali. 9 Om soira' di nopurimanan di Lia do nopupusan iyau do maganak om patahako' noddi dau di Yakub i Silpa, i turipon dau'd tondu'. 10 Om ponontian no i Silpa, om kosusu no iyau, om kusai i' o tanak dau. 11 Om boros kaddi di Lia, “Nountung oku no,” ka dau. Om pungaranai noddi dau i tanak diri dot i Gad. 12 Om ponontian po kawagu i Silpa, om kosusu no iyau om kusai i'. 13 Om boros ka di Lia, “Olumaag oku noddi kopio! Baino' nopondo om mamarait ngai' nopo doho' o tongoondu' dot olumaag oku,” ka dau. Om pungaranai noddi dau i tanak diri dot i Asor. 14 Di nopoddi di dongmongomot, om ongoi no i Rubin do hiri'd dumo, om kokito no iyau dot iso' o bansa' do sakot di koubat. Om igitai no dau iri om patahako' no dau di Lia, i tina' dau. Om boros ka di Rasil, “Onuwai oku daa dot ongokuuri' dino sakot do koubat, i nanu di tanak nu,” ka dau. 15 Nga' boros ka di Lia do suminimbar, “A' nu po koumbagal i suminolod do sawo ku? Tu' baino' nga' solodon nu po iti sakot di koubat do tinahak di tanak ku,” ka dau. Om boros ka di Rasil, “Ondung onuan oku daa diya' dino sakot do koubat, i naanu di tanak nu, om pologoson tiya' no do tumoning di Yakub do totuong do baino',” ka dau. 16 Om soira' di nokorikot i Yakub do mantad id dumo di dongsosodopon, om labus no i Lia do minongoi solowot dau, om boro-boros no iyau dau, “Totuong nopod baino' om tumoning ko no doho' tu' noboli tiya' nod sakot di koubat do naanu di tanak ku,” ka dau. Om toningo' noddi di Yakub i Lia do totuong diri. 17 Om simbaro' nod Kinorohingan i sambayang di Lia, om ponontian noddi iyau. Om kosusu no i Lia, om kusai o tanak dau. Om iri no o kolimo do tanak dau. 18 Om boros ka di Lia, “Nosomulian oku noddi do Kinorohingan, tu' pinatahak ku i' i Silpa, i turipon ku dot id sawo ku,” ka dau. Om pungaranai no dau i tanak dau'ddi dot i Isakar. 19 Om ponontian po kawagu i Lia, om kosusu no iyau om kusai i'. Om iri no o koonom do tanak dau. 20 Om boros kaddi dau, “Pinuhawangan oku pod Kinorohingan dot isomuli' dit osonong. Baino' nopo om korohian oku nondo kopio di sawo ku tu' onom no o tangaanak ku'd kusai,” ka dau. Om pungaranai no dau i tanak dau'ddi dot i Sibulon. 21 Alaid noddi om paganak no iyau do tondu', om pungaranai no dau dot i Dina. 22 Om kahandamai noddi do Kinorohingan i Rasil, om simbaro' nod Kinorohingan i sambayang dau, om papaganako' noddi do Kinorohingan i Rasil. 23 Om ponontian noddi i Rasil, om kosusu no iyau do tanak do kusai. Om boros kaddi dau, “Noidu' noddi do Kinorohingan i kointingayaman ku, tu' noonuan oku no dau dot iso' o tanak do kusai. 24 Om maha' daa om onuan oku po kawagu'd TUHAN do tanak do kusai,” ka dau. Om pungaranai noddi dau i tanak dau'ddi dot i Yusup.

I Pinokianu di Yakub dot id di Laban

25 Om tontok di nosusu i Rasil di tanak dau di roitan dot i Yusup om boro-boros no i Yakub dot id di Laban. Boros ka dau, “Potumboyoo' oku nondo do muli' do hilo'd pomogunan ku. 26 Om patahako' no dot id doho' i duwo o sawo ku, om i tangaanak ku di naanu ku do daamot ku do pakaraja' do hiti'd diya', om pologoso' oku no do tumongkiad. Om iya' nga' koilo i' do tuminotos oku no kopio do kuminaraja' dot id diya',” ka dau. 27 Om boros ka di Laban do suminimbar, “Pokinongoho' po iti poboroson ku. Nosunudan oku no do songulun o mogogontong dot iya' o kinapamarakatan do Kinorohingan doho'. 28 Om poboroso' nopo o gadsi' do pokionuon nu om bayaran tiya' i',” ka dau. 29 Om boros ka di Yakub do suminimbar, “Koilo ko i' do tuminotos oku no kopio do kuminaraja' do hiti'd diya', om oilaan nu do nokoinggumu' no ilo tayam-tayam nu do gisom dit iyoho' o migompi'. 30 A' i' kosongkuro o dapu' nu dit okon oku po ko' hiti, nga' baino' noddi om nokoinggumu' tomod no, om iya' nga' nabarakatan noddi do TUHAN tu' iyoho' o kinapamarakatan. Nga' baino' nopoddi om norikot no o maso ku do mogihum do doho'd koinsanangan,” ka dau. 31 Om boros ka di Laban do minonguhot, “Om nunu nondo kopio o pamagadsi' ku diya'?” ka dau. Om boros ka di Yakub do suminimbar, “Mada' oku i' do gadsi'. Nga' tumilombus oku po do momogompi' dilo tayam-tayam nu, ondung ookunan nu no iti poboroson ku: 32 Pabanaron oku daa diya' do baino' do mongoi pogontong ngai' di kambing om dumba' nu, om onuon ngai' ku indo i tanak do dumba' dit oitom o hulu. om koinsanai di tanak do kambing nu dit ongokoro' po dit oworok ko' i garu-garut. Om iri noo ot onuon ku do gadsi' ku. 33 Koimbagu nopondo om osoonong ko do mongilo ondung otulid o winonsoi ku dot id diya' ko' amu'. Tu' tontok nopondo do mongoi ko pogontong di doho'd naanu, om haro nopo o kambing dit a' oworok om it okon ko' garu-garut, ko' haro o dumba' dot a' oitom do poirolot, om oilaan nu no do pinanakau ku i' iri,” ka dau. 34 Om boros ka di Laban do suminimbar, “Ookunan ku i' ino. Miagal no di pinoboros nu o wonsoyon to,” ka dau. 35 Nga' tontok i' do tadau'ddi, do nongoi ngai' di Laban posompipio' o koinsanai di kambing do tontoluhan di kiburi-buris, om it oworok, om koinsanai di kambing do tondu' di garu-garut, om it ongkipalang dot opurak o hulu; om nongoi nogi' ngai' dau posompipio' i dumba' dit ongoitom. Om suhuo' nogiddi dau i tangaanak dau'd kusai do minomogompi'ddi. 36 Om tongkiad no iyau di Yakub do miwoyo' di kambing om i dumba' diri do kuminaa dot id kinoiyonon di kosoduwo' nopo om tolu o tadau do mamanau do mantad hiri. Om iri nopo kambing, om i dumba' di Laban di noolu-olu', om i Yakub no o minomogompi'. 37 Om ongoi no i Yakub panganu di raan dot ongotomou di kayu do roitan do hawar, om i kayu do roitan do badam, om i kayu do roitan do berangan, om onito' no dau o wookon di kulit, om kiburis diri dot opurak i raan diri. 38 Om ngoyo' no dau poiliho' i raan diri do hiri'd doburuan di kambing dau'ddi, do pinosuang di poiinuman di kambing . Hiniri pogi' dau i raan diri nga' soira' nopo do mongoi inum i kambing om mogisasabu nondo iyolo'. 39 Om soira' nopo do mogisasabu i kambing do hiri'd dotimbabaan di raan nga' garut no ko' oworok ko' kiburis o hulu di tanak di kambing. 40 Om posompipio' no di Yakub i dumba' om potimbabao' no dau di kambing di garut, om it oworok om it oitom. Om iyo noddi o ralan di Yakub do pinopoinggumu' di kambing om dumba' dau, om pinosompipi' dau iri do mantad id baanan do dumba' om kambing di Laban. 41 Om soira' nopo do mogisasabu i dumba' om i kambing dit ongokilos om ngoyon no di Yakub poiliho' i raan di nungkonitan dau'ddi do hiri'd suang di ponginuman dit id dotimbabaan di dumba' om kambing diri. 42 Nga' a' i' dau nongoi poilihai di raan diri o hiri'd dotimbabaan di tayam-tayam dit ongokugui. Om a' iddi alaid do mantad diri, om kosompipi' no i kambing om i dumba' dit ongopurak dit ongokugui do di Laban, om iri no i di Yakub om nongosompipi' it ongokilos, it ongoitom, om ongoworok om i garut. 43 Om iyo noddi o kinosili-silihan di Yakub do tulun do kaya'. Om ogumu'ddi o baanan do kambing om dumba' dau, om unta, om kaladai dau, om ogumu' o susuhuon dau.

Kinawansayan 31

Minogidu' i Yakub do Mantad id di Laban

1 Om korongou noddi di Yakub i tangaanak di Laban do mimboros do poingkaa, “Nangaanu ngai' no di Yakub o koinsanai di dapu' di tapa' toko'. Tadon ngai' nopo di kakayaan di Yakub om iri i dapu' di tapa' toko',” ka diyolo'. 2 Om i Laban nogi' nga' okito i' di Yakub dot a' no miagal di gulu po o kosuahon dot id dau. 3 Om boro-boros noddi o Kinorohingan dot id di Yakub do poingkaa, “Poguliai no do hilo'd pomogunan nu, om hilo'd koobpinayan nu. Om moyo-woyo' oku indo diya',” ka. 4 Om bilinai noddi di Yakub i Rasil om i Lia do mongoi solowot dau do hiri'd kinoiyonon di kambing om i dumba' dau. 5 Om boros ka di Yakub dot id diyolo' goduwo, “Opurimanan ku'ddi dot a' no miagal di gulu po o kosuaho' di tapa' dokoyu dot id doho'; nga' iri nopo Kinorohingan di tukuon di tapa' ku om moyo-woyo' kasai' i' doho'. 6 Oilaan i' dokoyu' goduwo do tuminotos oku no, om naayi-ayi' ku no o goos ku do kuminaraja' dot id tapa' dokoyu. 7 Nga' mulong piya do miagal diri nga' nudutan oku i' dau, om ongoinghopod no dau posimbano' o gadsi' ku. Nga' a' i' iyau pinologos do Kinorohingan do minomonsoi'd araat dot id doho'. 8 Tu' soira' nopod poboroson di Laban dot, 'Iri no ngai' i kambing do garu-garut o pamagadsi' ku diya',' ka; om oinsanan nopo i kambing dau do maganak do garu-garut. Om soira' di pinoboros dau dot 'Ilo' ngai' no kambing do burisan o pamagadsi' ku diya',' ka, om oinsanan nopo i kambing do burisan ngai' o tanak. 9 Naanu nod Kinorohingan i tayam-tayam di tapa' dokoyu do pinatahak dau doho',” ka dau. 10 Om boros ka kawagu dau, “Tontok di ponobuhan o kambing, om pongipi oku no do nokokito oku nogi' do kambing do tontoluhan di burisan, om i garu-garut, om i borok do manabu di kambing do tondu'. 11 Om boro-boros nogiddi o moloikat do Kinorohingan dot id doho', dot id suang di nipi ku dot, 'Yakub!' ka. Om 'Hoi,' kangku nogi' do suminimbar. 12 'Antangai pogi',' ka dau kawagu do minoro-boros, 'Koinsanai dilo kambing do tontoluhan do mogiompanabu nga burisan ngai' nopo om borok. Om wonsoyon ku pogi' o miagal diti nga' nokito ngai' ku no i winonsoi di Laban dot id diya'. 13 Iyoho' no i Kinorohingan di minintalang dot id diya' di hilo' ko'd Baitol, i hilo'd pinonuntugan nu dit iso' o watu do tumau do saitun o pinonuntug nu, tu' pinotobilang nu iri do patahakon dot id doho', om hiri nogiddi do suminumpa' ko dot id doho'. Nga' pongopi-opi' no do dinondo om gumuli' i' do hilo'd pomogunan nu mantad,' ka nogi' di moloikat di nokito ku dot id nipi ku,” ka dau. 14 Om boros ka diyo' Rasil di Lia, “Aiso' no o nunu-nunu do tungkusan dahai do mantad id tapa' dahai. 15 Iyoon po iyahai dau do sompogunan. Pinadagang iyahai dau nga' baino' noddi om naayi' ngai' no dau i gatang dahai. 16 Om iti ngai' nopo kakayaan di nongoi'd Kinorohingan do mantad id tapa' dahai om iyahai no om iti tangaanak dahai o sanganu. Om wonsoyon nopo i pinoboros do TUHAN dot id diya',” ka diyolo'. 17-18 Om pongopi-opi' noddi i Yakub do gumuli' do hilo'd tapa' dau di hilo'd pomogunan do Kanaan. Om pasakayo' ngai' no dau dot unta i sawo om i tangaanak dau, om nigitan ngai' dau i baanan do dumba' om kambing di naanu dau do hilo'd Misopotamia. 19 Tontok nopoddi om minongoi i Laban pomugar do hulu di dumba' dau. Om tontok noddi dit okon ko' hiri'd duwalai i Laban do nongoi di Rasil panakaho' i tingolig do mongintirung do walai di Laban, i tapa' dau. 20 Om nakalan di Yakub i Laban, tu' a' i' dau sinunudan do mogidu' iyau do mantad hiri. 21 Om igitai ngai' no di Yakub i dau'd konunu-nunuan, om arau-arau no do minamanau do tuminongkiad do mantad hiri. Om soborong no i Yakub di Bawang dot Iprat, om pamanau no iyau do pinakayaan ponong id konuluhanan do Giliad.

Ginusa' di Laban i Yakub

22 Tolu poddi tadau do mantad diri, om kosunudai nogi' i Laban do nokopoggidu' i Yakub. 23 Om angatai no di Laban i tulun dau do minongoi pomogusa' di Yakub do turu' o tadau do koloido', om kokosupai nogiddi diyolo' i Yakub do hilo'd konuluhanan do Giliad. 24 Nga' pongipi no i Laban di dongotuong, do ruminikot nogi' o Kinorohingan dot id dau om boro-boros no do poingkaa, “Antaan-taan no, kada' nogi' kopio pomonsoi dot araat dot id di Yakub,” ka. 25 Om nokowonsoi no di Yakub i kiim dau do hiri'd timpak di nuluhon, om powonsoyo' noddi di Laban om i tulun dau o kiim diyolo' dot id iso' o nulu-nulu do suwai do hiri'd konuluhanan diri. 26 Om boros ka di Laban dot id di Yakub, “Nokuro tu' minagakal ko doho', om tinanggayan nu po do minogidu' ilo tangaanak ku'd tondu' do miagal di naanu do mantad id pisangadan? 27 Nokuro tu' nakalan oku diya', om tongkiad tomod ko nopo dot a' pinopoilo-ilo doho'? Ondung pinopoilo ko daa doho' om atantu' no do pologoson ku i' daa iya' do tumongkiad do mikuwo'd kaarapadan om minding-sinding do mambat do tuni do tamburin om kecapi. 28 Mogot po om pinotungub oku po diya' di manangaki doho', om i tangaanak ku'd tondu' do pongintod ku diyolo'. Dongkababasug no kopio di winonsoi nu! 29 Milo oku i' daa do pokoruol diya', nga' sigog i' do korikot o Kinorohingan di tapa' nu dot id nipi ku kosodop, do pinopoinsan doho' dot a' pokoruol diya'. 30 Oilaan ku i' o koulian nu do hilo'd diya' tu' langadon ko no kopio do hilo'd pomogunan nu, nga' nokuro'ddi tu' pinanakau nu i tingolig do walai ku?” ka dau. 31 Om boros ka di Yakub do suminimbar, “A' oku pogi' minomisunud do minamanau nga' ooris oku, tu' osorou ku nopo nga' ngoyon nu dotindo kawagu ilo tangaanak nu'd tondu' do mantad id doho'. 32 Nga' ondung haro o toilaan nu do hiti'd pogialatan dahai do minanakau dino tingolig nu, om hukuman nopo iyau do kapatayon. Diya, ihumo' nopo i diya'd songonuon, om hati ngai' iti tulun ku do sumiliu'd sasi'. Om onuon ngai' nopo i diya' do songonuon,” ka dau. Nga' a' i' di Yakub noilaan dot i Rasil o minanakau di tingolig di Laban diri. 33 Om ngoyo' noddi di Laban pinsukayo' o hiri'd kiim di Yakub, om ngoyo' dau o hiri'd kiim di Lia, om hiri'd kiim di duwo o turipon do tondu', nga' a' i' dau nokito i tingolig dau. Om ongoi noddi iyau pogihum do hiri'd kiim di Rasil. 34 Nga' noongoi no di Rasil kosuang i tingolig do walai'ddi do hiri'd kantung di pakol dit unta, om nirikahanan diri dau. Om notongkop no di Laban do mogihum o hiri'd kiim di Rasil, nga' aiso' i' o nokito dau. 35 Om boros kaddi di Rasil dot id tapa' dau, “Kada' kotogod doho', oi apa', nga' a' oku no milo do mingkakat dot id toguang nu, tu' maso ku'd pomulanan,” ka dau. Om nokototos no i Laban do mingihum, nga' a' no dau nokito i tingolig do walai dau. 36 Om kotogod noddi i Yakub, boros ka dau, “Nunu kopio o nowonsoi ku dot araat?” ka dau do minuhot do mikuwo'd otogod. Om boros ka kawagu dau, “Nunu kopio ot oturan do notolibambanan ku tu' opurimanan nu do kikuasa' kopio ko daa do momogusa' doho'? 37 Baino' nopoddi tu' nongosukai ngai' nu ilo konunu-nunuan ku, om nunu noddi o konunu-nunuan do nokito nu? Poiliho' daa iri do hiti om okito i' dilo tulun nu om ilo tulun ku, om pologoson nopo iyolo' do momutus ondung isai dato ot otopot. 38 Duwo noddi nohopod o toun ku do poinsugku' diya'; om a' i' tuminingkod do gumumu' i dumba' om i kambing nu, om a' oku nakapangakan dot ongoiso' piya di kambing nu di tontoluhan do mantad id baanan nu. 39 Om soira' nopod haro ot apatai di dumba' nu do mangan do nintorusan dot orongit, om iyoho' i' ot orugi' do moningolon diri. A' oku i' insan papaatod dot id diya' di dumba' di nangapatai do numaan do nintorusan dit orongit, do momisunud diya' dot okon ko' iyoho' o nakasala'. Om iyoho' nogi' o sinuhu' nu do moningolon di nangapanakau'd tulun di dangadau ko' di dongotuong. 40 Om asaru' tomod oku dot oinggorit dot olosuan di dangadau om osogitan do dongotuong, gisom dot a' oku no koodop. 41 Iyo noddi o kinoinggoritan ku do solinaid di duwo nohopod o toun ku do poinsugku' diya'. Hopod om apat o toun ku do kuminaraja' dot id diya' do tuminalad dilo duwo tanak nu'd tondu', om onom o toun ku do tuminalad dilo tayam-tayam nu. Nga' mulong piya do miagal diri nga' inghopod nu no simbanai o gadsi' ku. 42 Ondung a' daa moyo-woyo' doho' i Kinorohingan di tukuon di taki-aki ku, i Abraham om i Isak, om laid oku no daa diya' uyungo' do mantad hilo'd walai nu om aiso' i' ot aanu-anu ku. Nga' nokito i' do Kinorohingan i kosusaan ku, om i karaja' do winonsoi ku; om tontok no di kosodop do pinoboros do Kinorohingan it otopot,” ka dau.

Pinitoruan di Yakub om i Laban

43 Om boros ka di Laban do suminimbar di Yakub, “Iti nopo tongoondu' diti om tangaanak ku i', om ilo tangaanak diyolo' nga' doho' i', om iti kambing om iti dumba' nga' iyoho' i' o sanganu. Otopot nopo kopio om koinsanai dilo tokito nu'd hiti om iyoho' ngai' i' o sanganu. Nga' aiso' no o milo ku do wonsoyon do momusus diti tangaanak ku om ilo tangaanak diyolo', 44 om posodia' oku no do monokitaru' diya'. Om kaino, momonsoi to nogi' dot iso' o kotimungon do watu di pogitimpak-timpakon do maan to do kopomuhandaman diti taru' to,” ka dau. 45 Om ongoi noddi i Yakub pogihum dot iso' o watu om poudongo' no dau do maan do kopomuhandaman di pinitoruan diyolo'. 46 Om suhuo' no dau i tulun dau do minongoi ponimung do watu do pogitimpak-timpakon dot id iso' o koiyonon. Om akan nogiddi iyolo' do hiri'd toning di watu do pinogitimpak-timpak diri. 47 Om pungaranai no di Laban i watu di pinogitimpak-timpak diri do Yigar-Sahaduta, nga' pinomungaran nopo di Yakub diri om Galid. 48 Om boros ka di Laban dot id di Yakub, “Iti nopo watu do pinogitimpak-timpak diti om maan do poposorou dato goduwo,” ka dau. Om iri no o kinopomungaranan di kinoiyonon diri do Galid. 49 Om boros ka kawagu di Laban, “Maha' daa om piantangan goduwo to'd TUHAN do solinaid do kopitongkiad kito,” ka dau. Om pungaranai no kawagu i kinoiyonon diri do Mispa. 50 Om boro-boros po kawagu i Laban do poingkaa, “Ondung raraaton nu ilo tangaanak ku, ko' manansawo ko nod tongoondu' do suwai, do mulong piya dot a' oku koilo, nga' sorohon no do poingontong i' dato o Kinorohingan. 51 Diya noti watu di pinogitimpak-timpak ku dot id piolitan to, om diya iti watu do kopomuhandaman. 52 Iti no watu do pinogitimpak-timpak om iti watu do kopomuhandaman o maan do poposorou. A' oku indo tumolibamban diti watu do pinogitimpak-timpak diti do mongoi saap diya', om iyo ko nogiddi iya' tu' a' no tumolibamban diti watu do kopomuhandaman do mongoi saap doho'. 53 Iri indo i Kinorohingan di Abraham om i Kinorohingan di Nahur o momutus dato,” ka dau. Om kopongo poddi iri, om pamatos no i Yakub do mikuwo'd suminumpa' dot id suang do ngaran do Kinorohingan di tukuon di Isak i tapa' dau, do sulungon dau i batos dau'ddi. 54 Om ponumbali' noddi iyau dot iso' o tayam-tayam, om patahako' no dau iri do numaan do porsombahan di sorobon do hiri'd nuluhon diri, om alapo' nogiddi dau i tulun dau do minongoi pangakan-ngakan. Om kangaakan poddi iyolo', om odop no iyolo' do hiri'd nuluhon diri do totuong diri. 55 Osuab poddi di kosuabon, om tungubai ngai' no di Laban i manangaki dau, om boro-boros no do minongintod di tangaanak dau do tongoondu', om pamanau nogiddi iyau do minuli'.

Kinawansayan 32

Minongoi i Yakub Solowot di Isau

1 Om lombus noddi i Yakub do minamanau. Om korikot noddi o piro-piro o moloikat do minongoi solowot dau. 2 Om soira' di nokito di Yakub i moloikat diri, om boros ka dau, “Hiti no o pinomukiiman do Kinorohingan,” ka dau. Om pungaranai no dau i kinoiyonon diri do Mahanaim. 3 Om ponuhu' no i Yakub do piro-piro o tulun do mongoi poporomut do habar, do mamanau do mogulu dau do kumaa id pomogunan dot Idom, do mongoi solowot di Isau, i tobpinai dau. 4 Om bilinai no di Yakub iyolo' do poingkaa, “Poboroson no doho' di Isau, i Tuan ku, o poingkaa, 'Iyoho' nopo om i Yakub, i susuhuon nu dit otorodok. Popoilo oku diya', oi Tuan ku, do solinaid nopoddi om poingiyon oku do hilo'd di Laban, om nakalaid oku'ddi do minuli' om gisom diri do nokorikot do baino'. 5 Baino' nopoddi om haro no o sapi' om kaladai, om dumba', om kambing ku, om haro nogi' o susuhuon ku. Om popoilo mantad oku diya', oi Tuan, om mogondos oku nopo dot osonong o ginawo nu,' kanto dokoyu,” ka dau. 6 Om soira' di nokoguli' i susuhuon di Yakub diri, om boros ka diyolo', “Nokosolowot no iyahai di Isau, i tobpinai nu, om baino' nopo om hilo' no iyau id tanga'd ralan do kumaa'd hiti do mongoi solowot diya'. Om minangangat iyau dot apat nahatus o tulun,” ka diyolo'. 7 Om soira' di norongou di Yakub iri om moddosi tomod diri iyau om tumangkabo iyau. Om piduwoo' noddi di Yakub i tulun dau do duwo o bohogian, om piniduwo nogi' dau i baanan do dumba', om kambing, om sapi', om unta dau. 8 Tu' poingkaa ot osorou di Yakub, “Ondung korikot i Isau do mongoi pongumang di bohogian do koiso' om osimbayan po do mogidu' i bohogian do koduwo,” ka. 9 Om sambayang noddi i Yakub do poingkaa, “Oi Kinorohingan, i tukuon di Abraham, i taki-aki ku, om Kinorohingan di tukuon di Isak i tapa' ku, pokinongoho' oku no! Iya' i', oi TUHAN, o minonuhu' doho' do gumuli' kawagu do hilo'd pomogunan ku om hilo'd koobpinayan ku. Om nakabatos ko do mongilo-ilo kosonong-sonong do koinsanai'd nunu nopo do bagi' doho'. 10 A' oku no daa osorupai do rumamit do kosianan om kotorodoko' nu di pinointalang nu dot id doho', i susuhuon nu. Tu' tontok di suminoborong oku di Bawang do Yordan om aiso' i' o nunu-nunu do nigitan ku do suwai ko' iti no sukud ku. Om baino' noddi om nokoguli' oku no do miwoyo' diti duwo o pinuruan diti. 11 Om pokionuon ku no kopio do posion oku diya' do mantad id di Isau, i tobpinai ku. Moddosi oku --- om ooris oku do korikatan nopo dau'd hiti om mongoi i' doti' saap, om mongoi pamatai ngai' dahai om i tongoondu' om i tangaanak. 12 Hondomo' no do nakabatos ko i' dot id doho' do mongilo-ilo ko kosonong-sonong do koinsanai'd nunu nopo do bagi' doho' om manahak ko doho' do sinakagon dot ogumu'. Om aiso' nondo o songulun po do kointob diri tu' miagal pondo do togis do hilo'd tisan do rahat kogumu',” ka dau. 13-15 Om koodop poddi iyolo' dot insan o tuong do hiri, om pomili' no i Yakub di tayam-tayam dau do maan dau do pomuhawang di Isau, i tobpinai dau. Om iri nopo i popuhawangon diri om: duwo nahatus o tinan do kambing do tondu' om duwo nohopod o tinan do kambing do tontoluhan, om duwo nahatus o tinan do dumba' do tondu' om duwo nohopod o dumba' do tontoluhan, om duwo nohopod o tinan do kaladai do tondu' om hopod o tinan do kaladai do tontoluhan. 16 Om bohogio' nogiddi di Yakub i baanan diri do piro-piro o pinuruan. Om pointikid-tikid di pinuruan diri om iso' no o susuhuon dau do madtamong. Om boros ka di Yakub dot id diyolo', “Pamanau kou do mogulu doho', om kada' kou pogikosup-kosup. Mositi' no do miinsodu' o piolitan dit iso' o pinuruan om i pinuruan di sumusuhut,” ka dau. 17 Om sunudai no di Yakub i susuhuon dau di koiso' do poingkaa, “Soira' nopondo do koruba' diya' i Isau i tobpinai ku'ddi, om monguhot no iyau dot, 'Isai o tuan nu? Hinonggo o pakayaan nu? Isai o sanganu dilo tayam-tayam dot id gulu-gulu nu?' ka nopo dau, 18-20 om simbaron no do poingkaa: I Yakub i susuhuon nu o sanganu'dti. Om pootodon dau iti do patahakon dot id di Isau, i tuan dau. Nga' i Yakub nopo om hilo' pod tohuri do muhut-suhut dahai, kanto,” ka dau. Om iyo nogiddi o pinomisunud di Yakub di susuhuon dau di koduwo, om i kotolu, om koinsanai di tulun di sinuhu' dau do madtamong di tayam-tayam diri. Tu' poingkaa ot osorou di Yakub, “Oinsasamadan ku nondo o ginawo di Isau do kaanu iyau diti pomuhawang ku, om soira' nopondo do kosolowot iyau doho' om mangampun indo i Isau doho',” ka. 21 Om poguluono' noddi di Yakub i pomuhawang dau di Isau, nga' i Yakub nopo om minodop po do hiri'd pinomukiiman dau do totuong diri.

Minonokigomos i Yakub do hilo'd Poniol

22 Om tontok i' do totuong diri om tungag no i Yakub, om angatai no goduwo dau i sawo dau, om i duwo tondu' di panakasawo dau, om i tangaanak dau di hopod om iso', do suminoborong di Bawang do Yabok. 23 Om soira' di nokosoborong dau iyolo' do hiri'd soborong, om posoborongo' nogiddi dau o koinsanai di dapu' dau. 24 Nga' iyau nopo om minundorong i' do hiri'd pinomukiiman dau. Nga' bontol no dau o songulun o kusai om tabpaai no iyau di tulun diri, om gomoso' no iyau do gisom dot oruhai nod nosuaban. 25 Om kopurimanai nopoddi di tulun diri dot a' iyau kamanang dot id pigamasan diri, om bobogo' no dau o guas do poo di Yakub, om kokinsol nopoddi o langaban do poo di Yakub. 26 Om boros kaddi di tulun diri, “Poiduwo' oku tu' oruhai noddi dot anawau,” ka dau. Om boros ka di Yakub do suminimbar, “A' ku po iya' poiduwon dot a' oku po diya' abarakatan,” ka dau. 27 Om ponguhot no i tulun, “Isai o ngaran nu,” ka dau. “I Yakub,” ka di Yakub do suminimbar. 28 Om boros ka di tulun, “Okon nondo ko' i Yakub o ngaran nu. Tu' nokoponokigomos ko no do Kinorohingan om tulun, om nakamanang ko i'. Om iri noddi o kopomungaranan diya' dot i Israil,” ka dau. 29 Om boros ka di Yakub, “Sunudai oku daa do ngaran nu,” ka dau. Nga' boros ka di tulun diri do suminimbar, “A' i' minog do koilo ko do ngaran ku,” ka dau. Om barakatai noddi dau i Yakub. 30 Om boros kaddi di Yakub, “Nokotimbaba' oku no kopio do Kinorohingan. Nga' poimpasi kasai' oku i',” ka dau. Om pungaranai noddi dau i kinoiyonon diri do Poniol. 31 Tontok di nokoulai no o tadau om tongkiad noddi i Yakub do mantad hilo'd Poniol. Om kimpo' diri i Yakub tu' nokinsol no o langaban do poo dau. 32 Om gisom piya'ddi do baino' nga' a' no mangakan do tonsi do poo do nintorusan o sinakagon di Israil, tu' nobobog i' o puun do poo di Yakub.

Kinawansayan 33

Nokopisolowot i Yakub di Isau

1 Om kokito noddi di Yakub i Isau do hiri pod sodu' do miwoyo' di tulun dau dot apat nahatus o kogumuo', om pogitongkiad-kiado' noddi di Yakub i tangaanak dau, do suwai o hiri'd di Lia om suwai o hiri'd di Rasil om suwai o hiri'd duwo o tondu' di panakasawo dau. 2 Om poguluono' noddi dau i duwo o tondu' di panakasawo dau'ddi do mitanud di tangaanak diyolo', om posusuhutono' no dau i Lia om i tangaanak dau, om i Rasil nogiddi di Yusup o hiri'd tohuri kopio. 3 Om pogulu noddi i Yakub diyolo', om otud no iyau om tuku' no dot inturu' di mirrarapou iyau di Isau, i tobpinai dau. 4 Nga' panangkus nopo i Isau do minongoi rapou di Yakub, om gopuso' no di Isau i Yakub om tungubai no dau iyau. Om sopiihad-ihad nopoddi goduwo iyolo'. 5 Om soira' di minontong i Isau dot id posorili' dau, om kokito no dau i tongoondu' om i tangaanak, om ponguhot noddi iyau, “Isai ngai' iti tulun do tuminanud diya'dti?” ka dau. Om boros ka di Yakub do suminimbar, “Iyolo' nopo'llo' oi Tuan ku, om tangaanak ku. Tu' pinointalang i' do Kinorohingan o kosianan dau om nonuan oku'ddi dau diti tangaanak diti,” ka dau. 6 Om ongoi no rapou di Isau i duwo o tondu' di panakasawo di Yakub do miwoyo' di tangaanak diyolo' om otud no iyolo' do tuminuku'. 7 Om susuhut no i Lia do miwoyo' di tangaanak dau, om id tohuri noddi kopio do minongoi rapou di Isau om i Yusup om i Rasil, om otud no iyolo' do tuminuku'. 8 Om ponguhot noddi i Isau, boros ka dau, “Nunu o paantakan nu di piro-piro o pinuruan di mogiwoyo-woyo' di norubaan ku di tiinu'ddi?” ka dau. Om boros ka di Yakub do suminimbar, “Iri nopoddi om maan ku do poposonong do ginawo nu,” ka dau. 9 Om boros ka di Isau, “A' no minog do manahak doho', oi adi', tu' kabagal ku no i doho'ddi,” ka dau. 10 Om boros ka di Yakub, “A' id tiyo'ndo iyo. Ondung nokosonong o ginawo nu dot id doho' om romito' no iti pomuhawang ku diya'. Tu' iyoho' nopo do nokokito do rabas nu om miagal nopo do nokokito oku'd rabas do Kinorohingan tu' osuwau kopio ko i' doho'. 11 Om pokionuon ku no do romiton nu i popuhawangon ku diya' di nongoigitan ku do patahakon ku diya'. Opuhawang i' o Kinorohingan dot id doho' om minanahak iyau doho' do koinsanai di korohian ku,” ka dau. Om posonsogo' i' di Yakub do papatahak iri, om romito' iddi di Isau i pinopuhawang di Yakub diri. 12 Om boros kaddi di Isau, “Kainou sumodia' do mamanau, om iyoho' nondo o mogulu do mamanau,” ka dau. 13 Om boros ka di Yakub do suminimbar, “Osonong i' daa no, nga' oilaan nu i' dot a' i' ongokoris no iti tangaanak, om ongoyon ku po kanogi' antangai i tayam-tayam di sumusu po. Tu' ondung ara-rahon do mamanau, om sangadau nopo nga' oinsanan nod angapatai ilo baanan. 14 Nga' osonong nogi' do mogulu-gulu ko nopo do mamanau, om momilogo-logot oku i' do sumusuhut. Om tumotos oku i' daa iyo do mamanau do miwoyo' dilo tayam-tayam, om ilo tangaanak ku, om kokosup oku po daa'ndo diya' do hilo'd Idom,” ka dau. 15 Om boros ka di Isau, “Iyo nopondo om poundorongon ku o piro-piro dilo tulun ku do tumanud diya',” ka dau. Nga' boros ka di Yakub do suminimbar, “A' piya minog dino, tu' orohian oku no do pinoposonong do ginawo nu'ddi,” ka dau. 16 Om pamanau noddi i Isau do tontok do tadau'ddi do guminuli' do hilo'd Idom. 17 Nga' i Yakub nopo om kuminaa po do hilo'd Sukot. Om hilo' no o pinamansayan dau do walai do tiyonon dau, om minomonsoi nogi' iyau do polungungan di tayam-tayam dau. Om iri no o kinopomungaranan di kinoiyonon diri do Sukot. 18 Tontok di minamanau i Yakub do guminuli' do mantad hilo'd Misopotamia om aiso' i' o kinosusaan dau do gisom do nokorikot do hilo'd bandar do Sikim, i hilo'd pomogunan do Kanaan. Om powonsoyo' noddi dau o kiim dau do hiri'd ponguma-ngumaan dot id somok do bandar do Sikim. 19 Om bolio' noddi di Yakub i kinoiyonon di pinomukiiman dau do mantad id sinakagon di Hamor, i tapa' di Sikim. Om gatang nopoddi nga' hatus o kaping do pirok. 20 Om pomonsoi noddi i Yakub dot iso' o pananaraban do porsombahan do hilo', om pungaranai no dau do “Kinorohingan, i Kinorohingan dot Israil”.

Kinawansayan 34

Kinasou i Dina

1 Insan o tadau, om ongoi no i Dina, i tanak diyo' Yakub di Lia do tondu', ponongkoduwo do hiri'd tongoondu' do Kanaan. 2 Nga' tontok di nokokito i Sikim di Dina om ngoyo' no dau tanggayai i Dina, om kosoho' no dau. I Sikim nopoddi om tanak di Hamor, i tulun do Howi, i raja' dot id pomogunan diri. 3 Nga' kokito nopoddi dau dot olumis koondu' i Dina, om muhang diri iyau dau. Om monotos daa'ddi iyau do popouhang di Dina dau. 4 Om sunudai no di Sikim i tapa' dau do poingkaa, “Ngoyon daa doho' i sumandak diri do maan ku'd sawo ku,” ka dau. 5 Om koilaai no di Yakub do nongoi kosoho' i tanak dau do tondu'. Nga' tontok nopoddi om hiri pod dumo i tangaanak dau'd kusai do papaakan-akan di tayam-tayam dau, om aiso' poddi o nunu-nunu do winonsoi dau dit a' po iyolo' nokongorikot. 6 Om ongoi no i Hamor, i tapa' di Sikim, boro-boros di Yakub, 7 do tontok di mogionguli' no i tangaanak di Yakub do mantad id dumo. Om soira' di nokorongou iyolo' di nosiliu do miagal diri om nongkotigowo tomod diri iyolo', om ongotogod tomod iyolo' di Sikim, tu' minomonsoi i' iyau do miagal kopio'ddi. Om minongindaraat iyau di tulun dot Israil, tu' minongoi i' iyau pangasou di tanak di Yakub do tondu'. 8 Om boros ka di Hamor dot id di Yakub, “Naayi-ayi' no kopio o ginawo di tanak ku do muhang di tanak nu. Om pokionuon ku no daa diya' do pologoson nu i tanak ku do mangawin di tanak nu. 9 Kainou momonsoi do kopiokunan do koino-ino nondo do mikawin i bansa' nu om i bansa' ku. 10 Om iya' nga' koino-ino nondo do mundorong do hiti'd pomogunan dahai do poinsugku' dahai do hinonggo nopo o korohian dokoyu do mundorong. Om osimbayan ko nondo do dumagang-dagang om osimbayan do mongindapu',” ka dau. 11 Om boro-boros no i Sikim di tapa' di Dina om i tobpinai dau do tongokusai, “Patahakon no daa dokoyu doho' iti pokionuon ku. Om patahakon ku i' iyoho' o nunu nopo o dokoyu'd pokionuon. 12 Om poboroson nopo dokoyu doho' ondung nunu o korohian dokoyu do popuhawangon ku dokoyu. Om tontuon no ondung songkuro o pongopung di tondu', om patahakon ku i' o nunu nopo i pokionuon dokoyu, dot uhang po daa dokoyu do kowinon ku i tondu'ddi,” ka dau. 13 Om pongudut noddi i tangaanak di Yakub dot id di Sikim om id di Hamor i tapa' dau, tu' kinasou i' di Sikim i Dina, i tadi' diyolo'ddi. 14 Boros ka diyolo' dot id duwo o tulun diri, “Ondung pologoson dahai ilo tadi' dahai do kowinon do tulun dit a' nosunatan om ointingayam no iyahai. 15 Nga' uhang i' dahai ondung kaakun kou no do tumanud diti: Iri no tu' mositi' no do sunatan ngai' o kusai dot id pogialatan dokoyu do miagal dahai tu' sinunatan. 16 Om owonsoi po dokoyu o miagal diri om kaakun nogi' iyahai di pinoboros dokoyu'ddi do koino-ino o bansa' toko' do mogikakawin. Om mundorong nondo iyahai do hiti'd dokoyu. Om osiliu toko' nondo dot iso-iso' o bansa'. 17 Nga' ondung a' kou tumanud diri, om mada' kou no do sunatan, om ongoyon i' kawagu dahai i Dina om mundaliu nogindo iyahai,” ka diyolo'. 18 Om koinsanai di pinoboros diri om osonong i' dot osorou di Sikim om i Hamor. 19 Om olomus nopoddi i Sikim do minomonsoi do miagal di pinoboros diri, tu' aayi-ayi' no kopio o ginawo dau do muhang di Dina. Om i Sikim no i pusohon kopio dot id suang do sompiiyon dau. 20 Om ongoi no i Hamor om i Sikim do hiri'd tiiyonon do tulun do tumimung, i hiri'd wawayaan do bandar. Om boro-boros no iyolo' di tulun do hiri'd suang di bandar diyolo' do poingkaa, 21 “Iri nopo tulun dot Israil om ongosuwau kopio. Om pologoson nopo iyolo' do mundorong do hiti'd pomogunan toko', do sumugku' dati' do momogun-mogun om pologoson dot osimbayan do mimpanau do honggo nopo o ngoyon. Tu' agayo po iti tana' toko' do hiti piya iyolo'. Om kapanansawo toko' indo do tongoondu' diyolo', om iyolo' nga' pologoson nopo do manansawo do tongoondu' toko'. 22 Nga' osunatan ngai' po i tongokusai toko' do miagal diyolo', om kaakun nogi' iyolo' do mundorong do hiti'd dati', om sumagalai do bansa' toko'. 23 Om koimbagu nopondo om iri nopo i tayam-tayam diyolo' om koinsanai di dapu' diyolo' om asanganu toko' nondo. Iyo nopoddi om pogiokunai toko' no i pokionuon diyolo', om koundorong i' iyolo'd hiti do poinsugku' dati',” ka diyolo'. 24 Om koinsanai nopoddi o tulun do hiri'd bandar diri do tuminanud di pinoboros di Hamor om i Sikim, om sunatai ngai' nopoddi i tongokusai. 25 Tolu noddi o tadau do mantad diri, dit ongorualan po ngai' i tongokusai do sinunatan, om pamanau no o duwo di tangaanak di Yakub, i Simion om i Liwi, i tobpinai di Dina dot id dotuo, om abil no goduwo iyolo' do gayang, om pomolisok-lisok noddi iyolo' do suminuang di bandar. Om patayo' noddi diyolo' o koinsanai di tongokusai do hiri. 26 Om i Hamor om i Sikim nga' pinatai nogi' diyolo'. Om ngoyo' nogiddi diyolo' i Dina do mantad hiri'd walai di Sikim, om uli' noddi iyolo'. 27 Om katalib poddi i kinapamatayan diri, om ongoi no i tangaanak di Yakub do suwai do hiri'd bandar do minongoi pinganu di konunu-nunuan, tu' sumuli' iyolo' di kinointingayaman di tobpinai diyolo'. 28 Om onuo' ngai' nopo diyolo' i baanan do kambing, om dumba' om sapi', om kaladai, om koinsanai di nunu nopo do hiri'd bandar diri om i hiri'd koumaan. 29 Om nanu ngai' nogi' diyolo' it angagayo o gatang, om tinanggayan diyolo' o koinsanai di tongoondu' om i tangaanak, om nanu ngai' diyolo' o nunu nopo i hiri'd suang do walai dot id bandar diri. 30 Om boros kaddi di Yakub dot id di Simion om id di Liwi, “Iyokoyu no o poporikot do kosusaan dot id doho'. Tu' baino' nopondo om ongotogod ngai' nopo doho' o tulun do Kanaan, om tulun do Piris, om koinsanai di tulun do hiti. Om a' i' ogumu' no o tulun toko'. Om ondung mogiaamung iyolo' do sumaap om manangod doho', om oinsanan no o sompiiyon toko' dot angapatai,” ka dau. 31 Nga' boros ka di tangaanak dau, “A' no iyahai kotoron do popologos dilo tobpinai dahai do maan poiyoo' do tondu' do sundal di lumilung,” ka diyolo'.

Kinawansayan 35

Minongoi i Yakub do Hilo'd Baitol

1 Insan o tadau om boro-boros no o Kinorohingan dot id di Yakub do poingkaa, “Iyoho' no i Kinorohingan di minintalang dot id diya' do tontok di minogidu' ko do mantad id di Isau, i tobpinai nu. Ongoi no kopio'd oruhai do hilo'd Baitol, om mundorong i' do hilo'. Om momonsoi no dot iso' o pananaraban do porsombahan dot id doho',” ka. 2-3 Om boro-boros noddi i Yakub di sompiiyon dau om id koinsanai di tulun do manud-tanud dau. Boros ka dau, “Mamanau toko' nondo do mantad hiti om kumaa toko' do hilo'd Baitol. Om hilo' no o pamansayan ku do pananaraban do porsombahan di dong Kinorohingan, i minonguhup doho' do tontok dit id suang oku do kosusaan om i miniwoyo-woyo' doho' do hinonggo nopo o nongoi ku. Iyo nopoddi, om taamai ngai' no dokoyu i tininganak di nigitan dokoyu; om lidangan no o tinan dokoyu, om manampakai no do pakayan dot opulang,” ka. 4 Om patahako' ngai' noddi diyolo' di Yakub o koinsanai di tininganak di nigitan diyolo', om i tanting-anting di poinganting diyolo'. Om lobongo' noddi di Yakub iri do hiri'd tana', it id dolungungan di kayu dot agayo, i hiri'd somok di bandar do Sikim. 5 Om tontok di minamanau i Yakub om i tangaanak dau, om moddosi ngai' nopo i tulun do hiri'd kabandaran dit id posorili' do kinoiyonon diri, gisom dot a' noddi iyolo' minomogusa' di Yakub om i tangaanak dau. 6 Om korikot noddi i Yakub om i kinoruhangan dau do hilo'd tana' do Kanaan, do hiri'd bandar do Baitol, i roitan do Lus di gulu po. 7 Om pomonsoi no i Yakub do pananaraban do porsombahan do hiri, om pungaranai noddi dau i kinoiyonon diri do “Kinorohingan do hilo'd Baitol”, tu' hilo' no o Kinorohingan do minintalang dot id di Yakub do tontok di poggidu' iyau do mantad id tobpinai dau. 8 Om hilo' nogi' o kinapatayon di Dibora, i mitatamong di Robika, om lobongo' no iyau do hiri'd dolungungan di kayu dot agayo, i ponong id salatan do bandar diri. Om iri no o kinopomungaranan di kayu'ddi do “Kayu di Pogihadan”.

Binarakatan do Kinorohingan i Yakub

9 Om soira' di nokoguli' i Yakub do mantad hilo'd Misopotamia, om intalang po kawagu o Kinorohingan dot id dau, om barakatai no dau iyau. 10 Om boro-boros no o Kinorohingan dot id di Yakub do poingkaa, “Okon noddi ko' i Yakub o ngaran nu, nga' i Israil nondo o ngaran nu,” ka. Om iyo noddi o Kinorohingan do minomungaran di Yakub dot i Israil. 11 Om boro-boros noddi o Kinorohingan dot id di Yakub do poingkaa, “Iyoho' no o Kinorohingan dit Agayo Kopio o Kuasa'. Paganak no dot ogumu'! Om sinakagon nu nopondo om osiliu do mogisuayan o bansa' om osiliu ko do taki-aki do piro-piro o raja'. 12 Om i pomogunan di pinatahak ku di Abraham om i Isak, nga' patahakon ku nogindo diya' om i sinakagon nu,” ka. 13 Om tongkiad noddi o Kinorohingan do mantad hiri'd di Yakub. 14 Om hiri nopod kinoiyonon do Kinorohingan do minoro-boros dot id di Yakub om pinoudangan diri di Yakub dot iso' o watu do maan do kopomuhandaman. Om tuntugai noddi dau do waig dot anggur om tumau do saitun o hiri'd timpak di watu'ddi do potobilang diri do patahakon dot id Kinorohingan. 15 Om pungaranai no dau o kinoiyonon diri do “Baitol”.

Napatai i Rasil

16 Om tongkiad no i Yakub om i kinoruhangan dau do mantad hilo'd Baitol. Om tontok dit osodu' po iyolo' do hilo'd Iprata, om korikot no o kosusuan di Rasil, nga' osusa' kopio iyau do mogkosusu. 17 Om soira' di nokototos noddi kopio o koruolo' do tian dau, om boro-boros no i bidan dot id di Rasil, “Kada' kooris oi Rasil, tu' kusai po iti tanak nu,” ka dau. 18 Nga' tontok di motingkapatai no i Rasil, dit oruhai nod oputut o pinuhobo dau, om pungaranai no dau i tanak dau'ddi dot i Bin-Oni, nga' pinomungaran nopo di Yakub di tanak diri om i Binyamin. 19 Om di nopoddi napatai i Rasil, om lobongo' no iyau do hiri'd tisan di ralan do kumaa do hilo'd Iprata, i roitan do Baitlahim do baino'. 20 Om poudangai no di Yakub do watu o hiri'd pinamalabangan di Rasil do maan do kopomuhandaman. Om gisom piya'd baino' nga' poingudong kasai' po i watu do hiri. 21 Om lombus noddi i Yakub do minamanau, om powonsoyo' no dau i kiim dau do hiri'd dosompopingan di walai dot akawas do hilo'd Idir.

I Tangaanak di Yakub

22 Om hiri nod kinoiyonon diri do nongoi di Rubin duduno' i Bilha, i ponokasawo di tapa' dau, nga' koilaai noddi di Yakub i winonsoi di Rubin diri, om kotogod tomod no iyau. I Yakub nopoddi om kianak do hopod om duwo o tongokusai. 23 Tangaanak nopo di Lia do kusai om i Rubin (i tanak di Yakub dot id dotuo) om i Simion, i Liwi, i Yohuda, i Isakar, om i Sibulon. 24 Om tangaanak no di Rasil om i Yusup om i Binyamin. 25 Om tangaanak no di Bilha i turipon di Rasil, om i Dan om i Naptali. 26 Om tangaanak no di Silpa i turipon di Lia, om i Gad om i Asor. Om hilo' ngai' nopod Misopotamia o kinosusuon di tangaanak diri.

Napatai i Isak

27 Om ongoi noddi i Yakub do hiri'd di Isak i tapa' dau, i poundorong do hilo'd Mamri, it id somok do Hibron, i kinoiyonon di Abraham i tapa' di Isak, i taki di Yakub. 28-29 Om kapatai noddi i Isak di molohing kopio iyau, di hatus om walu' nohopod o toun dau. Om ngoyo' no diyo' Isau di Yakub, i tangaanak di Isak diri, lobongo' i Isak.

Kinawansayan 36

Sinakagon di Isau

1 Iti ngai' no o sinakagon di Isau, i rinoitan nogi' dot i Idom. 2 Om panansawo no i Isau do tongoondu' do Kanaan: i Ada i tanak di Ilon, i tulun do Hit; om i Oholibama, i tanak do tondu' di Ana, i tanak do kusai, di Sibion, i tulun do Howi; 3 om i Basmat, i tanak di Ismail, i tadi' di Nibayot. 4 Om paganak no i Ada om i Ilipas; om paganak no i Basmat om i Rohuil; 5 om paganak no i Oholibama om i Yous, i Yailam om i Kora. Om hilo' ngai' nopod pomogunan do Kanaan o kinosusuon di tangaanak diri. 6 Om angatai noddi di Isau o koinsanai di sawo dau om i tangaanak dau do kusai om tondu', om koinsanai di tulun do hiri'd walai dau, om igitai dau o koinsanai di tayam-tayam dau, om i dapu' di naanu dau do hilo'd pomogunan do Kanaan, om tongkiad noddi iyau di Yakub, i tadi' dau, om ongoi no iyau dot id pomogunan do suwai. 7 Kinotongkiadan nopo di Isau do mantad id di Yakub nga' a' koumbagal do pangakan-ngakanan di tayam-tayam diyolo', i pomogunan di kinoiyonon diyolo' tu' sopigumuan kopio iyolo' do tayam-tayam. 8 Om pomogun-mogun noddi i Isau do hilo'd konuluhanan dot Idom. 9 Iti no o sinakagon di Isau, i taki-aki do tulun dot Idom. 10-13 Om paganak no i sawo di Isau, i roitan dot i Ada dot iso' o tanak do kusai, dot i Ilipas o ngaran. I Ilipas nopo om kianak do limo o kusai: i Toman, i Omar, i Sipo, i Gaitam om i Kinas. Om hiro po o sawo di Ilipas do suwai dot i Timna o ngaran. Om paganak no iyau dot iso' o kusai, dot i Amalik o ngaran. Om iri no sawo di Isau di roitan dot i Basmat om kianak dot iso' o kusai, dot i Rohuil o ngaran. Om i Rohuil no om kianak dot apat o kusai: i Nahat, i Sira, i Saima om i Misa. 14 Iri nopo sawo di Isau, i roitan dot i Oholibama, i tanak do tondu' di Ana, i tanak do kusai, di Sibion. om kianak do tolu o kusai: i Yous, i Yailam om i Kora. 15 Iti ngai' no o sinakagon di Isau: I Ilipas, i tanak di Isau dot id dotuo, om iyau no o taki-aki do koinsanai do payat diti: Toman, Omar, Sipo, Kinas, 16 Kora, Gaitam, om Amalik. Iyolo' ngai' no o sinakagon di Ada, i sawo di Isau. 17 Om i Rohuil no, i tanak di Isau, o taki-aki do koinsanai do payat diti: Nahat, Sira, Saima, om Misa. Iyolo' ngai' no o sinakagon di Basmat, i sawo di Isau. 18 Iti ngai' nopo payat diti om sinakagon di Isau do mantad id sawo dau di roitan dot i Oholibama, i tanak di Ana: Yous, Yailam, om Kora. 19 Om oinsanan nopo i payat diri do sinakagon di Isau.

Sinakagon di Soir

20-21 Iri nopo tulun mantad do hilo'd pomogunan dot Idom om nabahagi' dot id piro-piro o payat do sinakagon di Soir, i tulun do Hori. Iti ngai' no i payat diri: Lotan, Siobal, Sibion, Ana, Dision, Isir om Disian. 22 I Lotan nopo om taki-aki di pinuruan do sompiiyon do Hori om Himan. (Om haro po o tobpinai di Lotan do tondu' dot I Timna o ngaran.) 23 I Sobal nopo om taki-aki di pinuruan do sompiiyon dot: Alwan, Manahat, Ibal, Sipo om Onam. 24 I Sibion nopo om kianak do duwo o kusai, i Aya om i ana. (I Ana no i nokobontol do piro-piro o tudan do waig dit alasu' do hilo'd tana' do kowotuan, do tontok di momogompi' iyau di kaladai di tapa' dau.) 25-26 I Ana nopo om tapa' di Dision. Om i Dision nopo om taki-aki do pinuruan do sompiiyon dot: Himdan, Isban, Yitran om Kiran. Om haro po o tanak di Ana do tondu' dot i Oholibama o ngaran. 27 I Isir nopo om taki-aki do pinuruan do sompiiyon dot: Bilhan, Saawan om Akan. 28 I Disian nopo om taki-aki do pinuruan do sompiiyon dot: Us om Aran. 29-30 Iti ngai' no o payat di Hori do hilo'd pomogunan dot Idom: Lotan, Siobal, Sibion, Ana, Dision, Isir om Disian.

I Piro-Piro Raja' dot Idom

31-39 Iti ngai' no o raja' do minogisowoli-woli do minomorinta' do pomogunan dot Idom, dit a' po nokoumbal do haro o raja' do momorinta' do hilo'd Israil: I Bila, i tanak di Bior, i mantad hilo'd Dinhaba. I Yobab, i tanak di Sira, i mantad hilo'd Bosra. I Husam, i mantad hilo'd watas do tulun do Toman. I Hadad, i tanak di Bidad, i mantad hilo'd Awit (iyau no i minangala' do tulun do Midian dit id pisangadan do hilo'd pomogunan do Muab). I Samla, i mantad hilo'd Masrika. I Saul, i mantad hilo'd Rihobot, it id tisan do bawang. I Baal-Hanan, i tanak di Akbor. I Hadar, i mantad hilo'd Pahu (sawo nopo dau nga' i Mihitabiil i tanak di Matrid, i manangaki di Misahab). 40-43 I Isau nopo om taki-aki diti piro-piro o payat dot Idom diti: Timna, Alwa, Yitit, Oholibama, Ila, Pinin, Kinas, Toman, Mibsar, Magdiol om Iram. Om oinsanan nopo i payat diri do minomungaran di watas do kinoiyonon diyolo' do pinasangai di ngaran do payat diyolo'.

Kinawansayan 37

I Yusup om i Tongotobpinai Dau

1 Om pomogun-mogun no i Yakub do hilo'd pomogunan do Kanaan, i pinomogunan di tapa' dau. 2 Om poingkaa no o kinowoyo-woyoo' do koposi-posion di sompiiyon di Yakub. I Yusup nopo i tanak di Yakub di tanakwagu no, om hopod no om turu' o toun dau. Om momogompi' iyau di baanan do kambing om dumba' do miwoyo' di piro-piro o tobpinai dau'd kusai, i tangaanak di Bilha om i Silpa, i duwo tondu' do ponokasawo di tapa' dau. Om pinosunud diri di Yusup di tapa' dau i pingwonsoyon di piro-piro o tobpinai dau dit angaraat. 3 Om poinggayo-gayo no o kosianan di Yakub di Yusup ko' mantad di tangaanak dau'd suwai, tu' i Yusup no i nosusu do tontok di molohing no kopio i Yakub. Om wansayai noddi di Yakub i Yusup do rasuk dit anaaru, dit olumis kopio. 4 Om soira'ddi di noilaan di piro-piro o tobpinai di Yusup, do poinggayo-gayo o kosianan di Yakub dot id di Yusup ko' mantad dot id diyolo', om karaatai noddi iyolo' di Yusup, i tobpinai diyolo'ddi, gisom dot a' no osonong-sonong o koboro-boroso' diyolo' dot id di Yusup. 5 Insan o totuong, om pongipi no i Yusup, nga' soira'ddi di pinosusui dau iri dot id piro-piro o tobpinai dau om okon nogiddi dot araatan kopio iyolo' dau. 6 Boros ka di Yusup dot id diyolo', “Pokinongou kou pogi' diti nipi ku! 7 Nokoipi oku do hilo' ngai' toko' nogid dumo do momongkos di gandum om ingkakat no nogi' i doho'd winongkos dot orindog tomod. Om iri no i dokoyu'd winongkos om tuminutuk nogi' di doho'd winongkos, om tuku' ngai' nogiddi do hiri'd doho'd winongkos,” ka dau. 8 Boros ka di piro-piro o tobpinai di Yusup, “Ondos nu no daa kopio om osiliu ko'd raja' do momorinta' dahai?” ka diyolo'. Om okon nogiddi dot araatan kopio iyolo' di Yusup, do nosubuanan di nipi di Yusup om i pinoboros dau. 9 Om pongipi po kawagu i Yusup. Om sunudai no di Yusup i piro-piro o tobpinai dau di nipi dau, boros ka dau, “Haro po kawagu o nipi ku, do nokito ku nogi' o tadau om tulan om hopod om iso' o rombituon do tuminuku' dot id doho',” ka dau. 10 Om sinusui i' di Yusup i nipi dau'ddi dot id tapa' dau, nga' togodo' nogi' iyau di Yakub, boros ka dau, “Nunu kopio konipi ino? Ondos nu daa kopio om rumikot oku om i tina' nu, om i ngai' i tobpinai nu, do mongoi tuku' dot id diya'?” ka dau. 11 Om osolon ngai' diri di Yusup i tobpinai dau, nga' iri nopo tapa' di Yusup om momusorou kasai' i' do pasal di nipi'ddi.

Dinagang i Yusup om Tinanggayan do Hilo'd Masir

12 Insan tadau, do tontok di nokoongoi ngai' no i tobpinai di Yusup do hilo'd Sikim do minongoi padtamong di kambing om i dumba' di tapa' diyolo', 13 om boro-boros no i Yakub di Yusup do poingkaa, “Suhuon tiya' do mongoi do hilo'd Sikim, i hilo'd kinoiyonon di tobpinai nu do madtamong di kambing om i dumba' toko',” ka dau. Om boros ka di Yusup do suminimbar, “Oo, mongoi oku i' oi apa',” ka dau. 14 Om boros ka di tapa' dau, “Ngoyon no kakapo' i tobpinai nu, ondung ongosonong-sonong iyolo', om antangan no ondung ongosonong-sonong i kambing om i dumba'; om gumuli' no kawagu'd hiti do mongoi pomisunud doho',” ka dau. Om suhuo' noddi di Yakub i Yusup do minamanau do mantad hilo'd Rantai do Hibron. Om a' i' alaid no om korikot no i Yusup do hilo'd Sikim, 15 om pinghombo no iyau do hiri'd talun. Om haro'ddi o songulun o kusai do nokokito dau, om boro-boros nod minonguhot dau do poingkaa, “Nunu ot ihumon nu?” ka dau. 16 “Mogihum oku di tobpinai ku di madtamong do kambing om dumba' diyolo',” ka dau do suminimbar. “Milo ko i' daa do momisunud doho' ondung hinonggo no iyolo'?” ka dau do minonguhot. 17 Om boros ka di kusai, “Nokotongkiad no moti' iyolo'd hiti. Nga' norongou ku iyolo' do minomoros do mongoi iyolo' do hilo'd Dotan,” ka dau. Om pamanau noddi i Yusup do minongoi suhut di tobpinai dau, om kabantalai no dau iyolo' do hilo'd Dotan. 18 Osodu' po i Yusup om kokito no iyau di piro-piro o tobpinai dau, om tontok dit a' po i Yusup nakarapou diyolo', om nokopogipapakat no iyolo' do sumaap om mamatai di Yusup. 19 Om boros ka diyolo' do mogiboro-boros, “Ontong pogi', nga' rumikot nod hiti ilo mongingipi. 20 Kainou maai toko' iyau patayo', om pataamon toko' nogindo o tinan dau dot id torobong di narasakan. Om poboroson toko' nopondo do numaan iyau patayo' do nintorusan dot orongit. Intangan toko' nogindo ondung nunu poo o kootuson di nipi dau,” ka diyolo'. 21 Nga' korongou no di Rubin i pakat diyolo'ddi, om umbal no daa'ddi iyau do mamasi di Yusup. Boros ka di Rubin, “Kada' toko' i' iyau patayo',” ka dau. 22 “Pataamon toko' nopo iyau do hiti'd torobong dit aiso' o waig do hiti'd tana' do kowotuan, nga' kada' toko' i' kopio pokorualai iyau,” ka dau. Kinapamarasan nopo di Rubin do miagal diri nga' osorou i' dau do ngoyon indo dau poiduwo' i Yusup, om suhuon nogindo dau do gumuli' do hilo'd tapa' dau. 23 Om tontok di nakarapou i Yusup di tobpinai dau, om gayato' nopo diyolo'd minongidu' i rasuk di Yusup dit anaru dit olumis kopio'ddi. 24 Om gayato' nogiddi diyolo' i Yusup do nongoi pataamo' do hiri'd torobong dit aiso' o waig. 25 Nga' tontok di maso no diyolo'd makan, om sigog id kokito diyolo' o tulun dot Ismail dit ogumu' santanud do mantad hilo'd Giliad om pakayaan do hilo'd Masir. Om iri nopo unta diyolo' nga' ginandaran do rampa om kismis. 26 Om boros kaddi di Yohuda dot id piro-piro o tobpinai dau, “Nunu no ot aanu-anu toko' do mamatai dilo tobpinai toko' om mogolim nondo do minamatai dau? 27 Osonong nogi' do padagangon toko' iyau dot id tulun dot Ismail. Om a' toko' i' minog do pokorualan i Yusup; tu' tobpinai toko' i' iyau, om iso-iso' i' o raha' om tonsi toko',” ka dau. Om kaakun ngai' nopo i tobpinai dau di pinoboros dau'ddi. 28 Om soira'ddi do tuminalib o piro-piro di tulun do Midian di mongingindapu' om ngoyo' no di piro-piro o tobpinai di Yusup gayato' i Yusup do pinoposoliwan do mantad hiri'd suang di torobong. Om padagango' no diyolo' i Yusup dot id tulun dot Ismail diri, om pokianu no iyolo' do duwo nohopod o kaping do pirok do gatang dau. Om tanggayai no di tulun dot Ismail i Yusup do kuminaa do hilo'd Masir. 29 Om soira'ddi di guminuli' i Rubin do hiri'd torobong diri, om a' no hino i Yusup do hiri'd suang. Om hurako' nopo dau i rasuk dau do natatangaban. 30 Om guli' noddi iyau do hiri'd piro-piro o tobpinai dau, om boro-boros nod, “A' no hino i tanak do hilo'! Nunu maddi o wonsoyon ku'dti?” ka dau. 31 Om sumbolio' noddi diyolo' o songinan di kambing, om potobungo' no i rasuk di Yusup do hiri'd raha' di kambing. 32 Om ngoyo' noddi diyolo' pointangai di Yakub i rasuk diri, om boros ka diyolo', “Diya iti nabantalan dahai. Iri tuu tanak nu o sanganu'dti, oi Apa'?” ka diyolo'. 33 Om kotutunai no di Yakub i rasuk diri, om boros ka dau, “Oo, rasuk nogi' kopio di tanak ku iti. Tinabpaan no pama iyau do nintorusan dot orongit diri. Nopogitobilang-bilang po doti' di nintorusan o tinan di Yusup, i tanak ku'ddi!” ka dau. 34 Om hurako' noddi di Yakub i rasuk dau do natatangaban om panampakai no iyau do pakayan di dong mogihad. Om alaid tomod diri i Yakub do minogihad di tanak dau. 35 Om oinsanan nopo daa'ddi i tangaanak di Yakub do kusai om tondu' do minongoi ponginsasamod dau, nga' mada' no iyau dot insasamadan. Om boros ka dau, “Gisom piya dot ikapatai ku nga' mogihad kasai' oku i' di tanak ku,” ka dau. Om a' nopoddi iyau otingkod do mogihad di Yusup, i tanak dau. 36 Nga' daamot nopoddi om nadagang no di tulun do Midian i Yusup do hilo'd Masir, dot id di Potipar, i pagawai do raja', om boyoon di madtatamong di walai do raja'.

Kinawansayan 38

I Yohuda om i Tamar

1 Om tontok i' do maso'ddi do tuminongkiad i Yohuda di piro-piro o tobpinai dau, om ongoi no iyau undorong do hiri'd di Hira, i kusai do mantad hilo'd bandar dot Adulam. 2 Om hilo' no o nokotutunan di Yohuda do songulun o sumandak do Kanaan; iri nopo sumandak diri om tanak di Sua. Om kowino' no di Yohuda i tondu' diri. 3 Om paganak noddi i tondu'ddi dot iso' o kusai, i pinungaranan di Yohuda dot i Or. 4 Om ponontian po kawagu i sawo di Yohuda diri, om kosusu no, om kusai i' o tanak dau. Om pungaranai no dau i tanak diri dot i Onan. 5 Om kianak po kawagu i sawo di Yohuda do kusai. Om pungaranai no dau i tanak diri dot i Sila. Om tontok nopo di nosusu i tanak diri nga' hilo'd Kosib i Yohuda. 6 Om pogihumai no di Yohuda do sawo i Or, i tanak dau dit id dotuo. Om ngaran nopo di sawo di Or diri nga' i Tamar. 7 Nga' araat kopio o kowoyo-woyoon di Or, om kotogod noddi o TUHAN dau, om patayo' no iyau do TUHAN. 8 Om boros kaddi di Yohuda dot id di Onan, i tobpinai di Or, “Ongoi dudun di sawo di tobpinai nu. Om wonsoyon no it apatut nu'd wonsoyon dot id dau, tu' tadi' ko i' di sawo dau; om haro indo o sinakagon di tobpinai nu,” ka dau. 9 Nga' oilaan i' di Onan do haro piya o tanak diyolo' nga' okon i' ko' iyau o kasanganu di tanak, om gowoi poddi do tontok nopo di ngoyon dau duduno' i sawo di tobpinai dau'ddi, om potobpuson i' dau i narot dau do hiri'd tana', om aiso' indo o tanak di tobpinai dau. 10 Nga' katagadan i' do TUHAN i winonsoi di Onan diri, om iyau'ddi nga' pinatai id TUHAN. 11 Om boros kaddi di Yohuda dot id di Tamar, i monongiwan dau'ddi, “Uli' nopo do hilo'd walai di tapa' nu om mundorong nopod hilo', nga' kada' no panansawo kawagu dot a' po kagayo i Sila, i tanak ku'd kusai,” ka dau. Kinapamarasan nopo di Yohuda do miagal diri nga' ooris iyau dot apatai i Sila do miagal di duwo o tobpinai di Sila dit id dotuo. Om uli' noddi i Tamar do hiri'd walai di tapa' dau. 12 Alaid-laid noddi om kapatai no i sawo di Yohuda. Om katalib poddi i maso di Yohuda do mogihad, om angatai no di Yohuda i Hira, i tambalut dau do mantad hilo'd Adulam diri do mongoi do hilo'd Timna, i pomugaran do hulu di dumba' dau. 13 Om haro'ddi o tulun do minomisunud di Tamar do mongoi do hilo'd Timna i tiwanon dau do mongoi pomugar do hulu di dumba' dau. 14 Om tingalanai noddi di Tamar i pakayan di papakayon do tondu' di nopuadan, om tirungo' no dau do kulu o rabas dau, om irikau no do hiri'd wawayaan di bandar dot Inaim, i kawayaon do kumaa do hilo'd Timna. Oilaan i' di Tamar do tontok nopoddi om agayo no i Sila, i tanak di Yohuda dot id domulok, nga' a' iddi iyau nongoi pokowinai di Sila. 15 Om tontok di nokito di Yohuda i Tamar, om ondos daa dau om tondu' iyau do sundal, tu' tinirung po o rabas dau. 16 Om ngoyo' no di Yohuda ropoho' i tondu' di hiri'd tisan do ralan diri, om boro-boros no iyau, “Songkuro o pokionuon nu?” ka dau. (A' i' di Yohuda oilaan dot i monongiwan dau i tondu'ddi.) Om boros ka di Tamar, “Nunu daa o tahakon nu doho',” ka dau. 17 Om boros ka di Yohuda do suminimbar, “Paatadan tiya' i' do songinan o tanak do kambing do mantad hilo'd baanan ku,” ka dau. Om boros ka di tondu', “Iyo noddi, dot ondung onuan oku no diya' do sanda' do gisom do kaatod nu doho' i kambing,” ka dau. 18 “Nunu o patahakon ku diya' do maan ku'd sanda'?” ka di Yohuda do minuhot. Om boros ka di tondu' do suminimbar, “Ino pondulung nu do kirantai, i pananaap nu om ino sukud do poingigit nu,” ka dau. Om patahako' ngai' no di Yohuda iri. Om pidudun noddi iyolo', om ponontian no i tondu'. 19 Om uli' noddi i tondu'ddi do hiri'd walai dau, om iduwo' no dau i kulu di pinonirung do rabas dau, om panampakai no kawagu iyau di pakayan do papakayon do tondu' do nopuadan. 20 Om suhuo' no di Yohuda i Hira, i tambalut dau'ddi, do minongoi paatod di kambing, om mongongoi kawagu di pinasanda' dau dot id tondu' diri, nga' a' no di Hira nokito i tondu'ddi. 21 Om pinguhot no i Hira di tongokusai do hilo'd Inaim, boros ka dau, “Hinonggo no i tondu' do sundal diri, i poundorong do hiti'd tisan do ralan?” ka dau. Om boros ka diyolo' do suminimbar, “Hiti nopo om a' i' insan do haro o tondu' do sundal,” ka diyolo'. 22 Om guli' no i Hira do hiri'd di Yohuda, om boros ka dau, “A' ku i' nokito i tondu'. Nga' boros ka di tongokusai'd hilo', om a' i' kaka insan do haro o tondu' do sundal do hilo',” ka dau. 23 Om boros ka di Yohuda, “Pologoson nopo i tondu' do popoopi' di sanda' diri. A' toko' i' orohian dot irak-irakan do tulun. Tu' umbalan ku i' daa do mambayar i tondu' nga' a' nu iddi nokito iyau,” ka dau. 24 Om haro no doti' o tolu o tulan do mantad diri, om haro'ddi o songulun do minomisunud di Yohuda do poingkaa, “I Tamar nopo, i monongiwan diya'ddi, om miningsundal-sundal, om monontian noddi iyau do dinondo,” ka. Om boros kaddi di Yohuda, “Ngoyo' iyau angatai do hiti om sorobon i' do gisom dot apatai,” ka dau. 25 Om tontok di nongoi i Tamar poropoho' di Yohuda, om poguluono' no di Tamar o boros dau do poingkaa, “Notianan oku di tulun di sanganu diti sanda': iti pondulung do kirantai, om iti sukud. Om intangan nogi' ondung disai diti,” ka dau. 26 Om kotutunai ngai' nopo di Yohuda iri, om boros kaddi dau, “A' i' i tondu'ddi kasala'. Iyoho' nogi' ot a' minomonsoi dit apatut ku'd wonsoyon dot id dau. Otopot nopo kopio om apatut daa do nopokowinan ku no iyau di Sila, i tanak ku,” ka dau. Om a' noddi di Yohuda nongoi kawagu duduno' i Tamar. 27 Om soira'ddi di norikot o kosusuan di Tamar, om koilaai no do miapid i tanak dau. 28 Om tontok di mogkosusu no iyau, om posoliwano' no di tiso' di ragang o tiso' do longon dau; om igitai no di bidan i longon di ragang diri om kagasai no dau do banang dot aragang; om boros ka di bidan, “Iti no ot id gulu kasawa',” ka dau. 29 Nga' pogogoko' no kawagu di ragang i longon dau, om kasawa' noddi iyolo' om iri iddi tiso' di ragang o gulu do suminawa'. Om boros kaddi di bidan, “Iyo pama'ddi o ralan nu'd suminiat do suminawa',” ka dau. Om iri nopoddi ragang dit id gulu kasawa' om pinungaranan dot i Piris. 30 Om kasawa' nogiddi i tobpinai dau, i kibanang dot aragang o hiri'd longon, om pungaranai no iyau dot i Sira.

Kinawansayan 39

I Yusup om i Sawo di Potipar

1 Om diri nopoddi, om natanggayan no di tulun dot Ismail i Yusup do kuminaa do hilo'd Masir, om nakadagang no do hiri'd di Potipar, i pagawai di raja', om boyoon do madtatamong di walai do raja'. 2 Moyo-woyo' i' o TUHAN di Yusup, om pinoundar i' dau iyau dot id suang do nunu nopo o wonsoyon dau. Om poingiyon diri i Yusup do hiri'd walai di tuan dau, i tulun do Masir. 3 Om nokito'ddi di tuan dau do moyo-woyo' i' o TUHAN di Yusup, om pinoundar i Yusup dot id suang do koinsanai di wonsoyon dau. 4 Om nasanangan tomod diri i Potipar di Yusup, om siliho' no dau i Yusup do susuhuon dau dit iyau noo o pogobi-obian; om siniliu nogi' dau iyau do mongilo-ilo do hiri'd walai dau, om mongilo-ilo do koinsanai di dapu' dau. 5 Om mantad noddi do binarakatan do TUHAN o sompiiyon di tulun do Masir diri, om koinsanai di dapu' dau do hiri'd suang do walai dau om i hiri'd tumo dau, dot i Yusup o kinapamarakatan do TUHAN. 6 Om patahako' ngai' nopo di Potipar dot id suang do palad di Yusup o koinsanai di dapu' dau, om a' noddi iyau gumangau do mongilo-ilo do nunu nopo, suwai ko' iri pondo i taakanon di potorungak dau. I Yusup nopoddi nga' okoris, om oligkang koulun. 7 Om a' poddi alaid do mantad diri om kagayat no ginawo di sawo di Potipar do rumohian di Yusup, om angatai no daa dau i Yusup do mongoi dudun dau. 8 Nga' a' i' i Yusup minangakun, om boros ka dau dot id tondu'ddi, “Antangai pogi', nga' a' no gumangau i Tuan ku do mongilo-ilo do nunu nopo do hiti'd walai dau tu' hiti oku no. Om iyoho' no o sinuhu' dau do mongilo-ilo do koinsanai di dapu' dau. 9 Kuasa' ku nopo do hiti'd walai do baino' om miagal no do kuasa' dau. Om nunu nopo nga' aiso' no ot a' dau pinatahak dot id suang do palad ku, suwai ko' iya' poo. Om poingkukuro oku daa'ndo do momonsoi do miagal dino karaat, om kowonsoi pod dusa dot id toguang do Kinorohingan?” ka dau. 10 Nga' mulong piya do monikid tadau i sawo di Potipar diri do momolugu-lugut di Yusup, nga' a' i' i Yusup minongoi dudun dau. 11 Nga' insan diri o tadau, do tontok di suminuang i Yusup do hiri'd walai do minongoi karaja', om aiso' no o tiso' di susuhuon do hiri'd walai. 12 Om ngoyo' no di sawo di Potipar gayato' o rasuk di Yusup om boro-boros nod poingkaa, “Kaino, ngoyo' oku duduno',” ka dau. Nga' idu' nopo i Yusup om poggidu' no iyau do hiri'd soliwan, om a' no dau noongoi i rasuk dau do poingigit di tondu'. 13 Nga' kokito nopoddi di tondu' dot a' di Yusup noigitan i rasuk dau, om nakatangkus noddi iyau do suminoliwan di walai, 14 om lohowo' no di tondu' i susuhuon dau do hiri'd walai, boros ka dau, “Ontong kou pogi'dti! Iri nopo tulun dot Ibrani di nangatan di sawo ku do hiti'd walai om mongintingayam dati'. Suminuang iyau do hilo'd bilik ku om numbalan oku daa'ddi dau do mangasou, nga' minomogiak oku iddi dot opuhod. 15 Om soira' nopoddi do mininggiak oku om iyadaai nopo dau iti rasuk dau do hiti'd toning ku om panangkus no do luminabus do hilo'd soliwan,” ka dau. 16 Om poopio' nopo di tondu' i rasuk di Yusup diri do gisom do nokoguli' i sawo dau do hiri'd walai. 17 Om iyo iddi o sinusui di tondu' dot id sawo dau, boros ka dau, “Ilo' nopo turipon do bansa' dot Ibrani do nigitan nu do hiti'd dati' om suminuang daa do hilo'd bilik ku do minongoi pongintingayam doho'. 18 Nga' soira' nopoddi do mininggiak oku, om tangkus no iyau do suminoliwan, om iyadaai nopo dau iti rasuk dau do hiti'd toning ku,” ka dau. 19 Om kotogod noddi kopio i tuan di Yusup, 20 om suhuo' no dau o tulun do manangkap di Yusup, om posuango' noddi iyau do hiri'd giil do poinsugku' di tulun do pinogiil di raja'. Om hiri-hiri noddid giil i Yusup. 21 Nga' moyo-woyo' i' o TUHAN di Yusup, om binarakatan iddi iyau do TUHAN, gisom dot asanangan di Yusup i boyoon di madtatamong di giil. 22 Om siliho' noddi di boyoon do madtatamong di giil i Yusup do boyoon do koinsanai di tulun do suwai di songinggiil, om i Yusup nogi' o mongilo-ilo do nunu nopo o wonsoyon do hiri'd suang di giil. 23 Om a' noddi minog i boyoon di madtatamong di giil do mongoi piontong do nunu nopo dit id suang do kuasaon di Yusup, tu' moyo-woyo' i' o TUHAN di Yusup, gisom do pinoundar dau i Yusup dot id suang do koinsanai di wonsoyon dau.

Kinawansayan 40

Pinosunud di Yusup o Komoyon do Nipi di Tulun do Poinggiil

1 Alaid-laid noddi om kowonsoi no do kasalaan dot id raja' do Masir i monunurung di raja' do waig dot anggur, om i monunurung di raja' do roti. 2 Om otogod tomod diri i raja' di monunurung dau do tinumon om i monunurung dau do roti. 3 Om pogiilo' noddi dau iyolo' do hiri'd walai di boyoon do madtatamong di songinggiil, i hiri'd giil di pinogiilan di Yusup. 4 Om alaid tomod diri iyolo' do poinggiil, om suhuo' no di boyoon di madtatamong do giil i Yusup do sumiliu do susuhuon diyolo'. 5 Insan diri o totuong do hiri'd giil, om pongipi no goduwo i monunurung di raja' do tinumon, om i monunurung do roti. Om misuwai-suwai o komoyon di nipi diyolo'ddi. 6 Om soira' di minongoi i Yusup solowot diyolo' di kosuabon om kokito no dau do tumongob goduwo iyolo'. 7 Om uhoto' no di Yusup iyolo', boros ka dau, “Nokuro kou tu' tumongob kopio dot okito ku'd baino'?” ka dau. 8 Om boros ka diyolo' do suminimbar, “Minongipi goduwo nopo iyahai, om iso' pod tulun do hiti nga' aiso' i' o koilo ondung nunu o komoyon di nipi dahai,” ka diyolo'. Om boros ka di Yusup, “Kinorohingan noo o milo do monuduk do tulun do popoilo do komoyon do nipi. Nga' sunudai oku daa di nipi dokoyu,” ka dau. 9 Om boros kaddi di monunurung do tinumon, “Nokoipi oku do haro nogi' o songguas ot anggur do hiri'd dotoguangan ku. 10 Om iri nopo guas dot anggur diri nga' tolu o raan. Om kopomiunduk nopori nga' susuhut no do minungkalad o tusak, om koonsok no nogi' i tua' dit anggur. 11 Om poingigit ku nogi' i sangkir di raja'; om ngoyo' ku nogiddi i tua' dit anggur om pagao' ku no i waig dit anggur do hiri'd sangkir, om patahako' ku nogiddi di raja',” ka di songulun. 12 Om boros ka di Yusup, “Poingkaa o komoyon dino: Iri nopo tolu o raan, om tolu o tadau. 13 Haro po tolu tadau om polobuson ko no di raja', tu' ompunan ko i' dau di kasalaan nu, om pogulion ko kawagu dau di karaja' nu di gulu. Potunui ko nondo di sangkir dot id raja', do miagal di wonsoyon kasai' nu di monunurung ko po dau do waig dot anggur di gulu po. 14 Nga' kada' oku no kopio diya' kolihuwai dot osonong-sonong ko iya'. Posunudon oku no diya' dot id raja' om tulungon oku no om kalabus oku i' do mantad hiti'd giil. 15 Kawagu po nga' pinanakau oku i' do mantad hilo'd pomogunan do tulun dot Ibrani, om hiti piya'd Masir nga' aiso' i' o nowonsoi ku do nunu-nunu dit araat do koposuangan doho' dot id giil,” ka dau. 16 Om soira'ddi di norongou di monunurung do roti dot osonong o komoyon di nipi di monunurung do tinumon, om boro-boros no iyau di Yusup do poingkaa, “Iyoho' nga' minongipi nogi', do kisinuun oku nogi' do tolu o bakul do kisuang do roti. 17 Om suang nopo di hiri'd soibau kopio, om mogisuayan nopo nogi' o taakanon di raja', nga' ngoyo' noddi tinduko' do tombolog,” ka dau. 18 Om boros ka di Yusup, “Poingkaa o komoyon dino: Iri nopo i tolu o bakul diri, om tolu o tadau. 19 Tu' tolu po tadau om polobuson ko no di raja', om maan nondo puloso' o tulu nu. Om pogiison nondo dau ino tinan nu dot id iso' o kayu di pinoudong, om ngoyon nondo pintinduko' do tombolog o tonsi nu,” ka dau. 20 Tolu po tadau do mantad diri om koulitai no i toun do kinosusuon di raja', om poginakan no i raja' do pinangalapan dau di pagawai dau; om polobuso' noddi dau do mantad hiri'd giil i monunurung do tinumon om i monunurung dau do roti, om potimbabao' no do koinsanai di pagawai dau. 21 Om pogulio' no di raja' i monunurung do tinumon dau di karaja' dau di gulu, 22 nga' iri nopoddi i monunurung do roti om numaan dau hukumai do kapatayon. Om poingkuro nopo i nokoboros di Yusup nga' iyo noddi o nosiliu. 23 Nga' a' iddi di monunurung do tinumon nosorou i Yusup. Om kotilombus noddi do nolihuan dau i Yusup.

Kinawansayan 41

Pinosunud di Yusup o Komoyon do Nipi di Raja'

1 Katalib poddi o duwo toun do mantad diri, om pongipi no i raja' do Masir, do poingkakat nogi' iyau dot id tisan di Bawang do Nil. 2 Om tindal no nogi' o turu' o tinan do sapi' dot ongolomu' om ongolunau do mantad hiri'd bawang om ongoi no pogkotop di sakot do hiri'd tisan di bawang. 3 Nga' tindal no kawagu o turu' o tinan do sapi' dit angagahui om i tulang po tomod. Om ongoi no ingkakat do hiri'd toning di sapi' dit ongolomu' do hiri'd tisan di bawang. 4 Om kano' noddi di sapi' dit angagahui i sapi' dit ongolomu'. Om koposik noddi i raja'. 5 Nga' koodop po kawagu i raja', om pongipi no kawagu iyau do haro nogi' o turu' o rawo do gandum dot oonsi tomod om noonsok no dot id iso' noo o guas. 6 Om imbulai po nogi' o turu' o rawo do gandum dit alampis om i nolonot po do nawayaan di ribut do mantad id tana' do kowotuan. 7 Om tolono' no di turu' o rawo do gandum do nolonot i rawo do gandum dit ongoonsi. Om koposik no kawagu i raja', om kopurimanai no dau do minongipi iyau. 8 Kosuabon noddi om atangkabo tomod diri i raja', om lohowo' no ngai' dau i bobolian om i tulun dot ongoilo do hilo'd Masir. Om sunudai no di raja' iyolo' di nipi dau, nga' iso' po diyolo' nga' aiso' i' o nokoilo do pinoposunud do komoyon di nipi di raja'ddi. 9 Om ongoi noddi boro-boros i monunurung do tinumon di raja' do poingkaa, “Okunon ku no kopio do baino' do nakasala' oku. 10 Tu' di nopo di notogod o raja' doho', om i monunurung do roti di gulu poddi, om pogiilo' nu no iyahai do hilo'd walai di boyoon do madtatamong do giil. 11 Insan totuong om pongipi no iyahai goduwo, om iri nopo i nipi dahai nga' sopisuwai o komoyon. 12 Tontok nopoddi om haro o tanakwagu do bansa'd Ibrani do poinsugku' dahai. Iyau nopo om susuhuon daa di boyoon do madtatamong. Om sunudai no dahai i tanakwagu'ddi di nipi dahai, om posunudo' noddi dau dahai o komoyon di nipi dahai'ddi. 13 Om nongosiliu kopio nopo o miagal di pinoboros dau: Tu' iyoho' nopo om pinoguli' nu diti karaja' ku mantad, nga' iri no i monunurung do roti, om hinukuman nu'd kapatayon,” ka dau. 14 Om ponuhu' no i raja' do mongongoi di Yusup, om tilombuso' nopoddi do nongoi iyau posoliwano' do mantad hiri'd giil. Om kopomugar poddi i Yusup do ganggut om koponingolon do pakayan, om ongoi nogi' iyau timbaba' di raja'. 15 Om boros ka di raja' dot id di Yusup, “Minongipi oku, nga' iso' pod tulun nga' aiso' i' o koilo do popoilo do komoyon diri. Om haro'ddi o tulun do minomisunud doho' do koilo ko do komoyon do nipi,” ka dau. 16 Om boros ka di Yusup do suminimbar, “A' oku i' iyoho' koilo, oi Tuan, suwai ko' Kinorohingan o milo do popoilo do komoyon dit osonong,” ka dau. 17 Om boros ka di raja', “Minongipi oku do poingkakat oku nogi' do hilo'd tisan do Bawang do Nil, 18 om tindal no o turu' o tinan do sapi' dot ongolomu' om ongolunau do mantad hiri'd bawang, om tilombus nopod minogkotop di sakot di hiri'd tisan di bawang. 19 Om tindal no kawagu o turu' o tinan do sapi' dot angagahui om i tulang po tomod. Om iri nogindo kopio o sapi' do nokito ku dot iyo kopio'ddi kagahui do hiti'd pointongkop do pomogunan do Masir. 20 Om tolono' no di sapi' dit angagahui, i sapi' dit ongolomu', 21 nga' kokitanan nopo di sapi' di minonolon diri om angagahui kasai' i' do miagal di gulu. Om koposik oku noddi. 22 Om pongipi oku po do nokokito oku nogi' do turu' o rawo do gandum dot oonsi om noonsok dot id iso' no o guas. 23 Om imbulai noddi o turu' o rawo do gandum dot alampis om nolonot po do nawayaan di ribut do mantad id tana' do kowotuan. 24 Om tolono' noddi di rawo do gandum dit alampis i rawo di gandum dit oonsi. Om nokosusui ku no iti dot id bobolian, nga' aiso' i' o tiso' diyolo' do milo do popoilo doho' do komoyon diri,” ka dau. 25 Om boros ka di Yusup dot id raja, “Iso-iso' i' o komoyon di nipi nu'ddi; nosunudan ko nod Kinorohingan di wonsoyon dau dot id dosunsudan diti. 26 Iri nopo i turu' o tinan do sapi' dit ongolomu' om turu' o toun do komoyon. Om iri turu' o rawo do gandum dit oonsi nga' turu' i' o toun do komoyon; miagal nopo o komoyon diri. 27 Om iri no turu' o tinan do sapi' dit angagahui dit id tohuri korikot, om iri turu' o rawo do gandum dit alampis om nolonot do nawayaan di ribut do mantad id tana' do kowotuan, om turu' o toun do mononglous. 28 Iyo noddi nokoboros ku diya' di tiinu' --- tu' pinokito ko'd Kinorohingan di wonsoyon dau dot id dosunsudan diti. 29 Turu' nondo o toun dot osimbayan om osima' do taakanon o hiti'd pointongkop do pomogunan do Masir. 30-31 Nga' katalib pondo iri, om sumowoli nondo o turu' o toun do mononglous om iri nopondo i piro-piro o toun di haro o kosimbayanan dit id gulu'ddi, om olihuan tomod nopod tulun, tu' adalaan no kopio i pononglous, om aiso' nopondo o sumuni do hiti'd pomogunan. 32 Duwo pogi' o nipi nu di miagal nopo o komoyon, nga' popoilo kopio do natantu' nod Kinorohingan iri, om oruhai no dau iri do wonsoyon. 33 Iyo nopoddi, om apatut no do momili' ko do songulun i kitoilaan om it aralom o toilaan do silihon do boyoon diti pomogunan. 34-35 Om apatut nogi' do momili' ko do piro-piro o pagawai'd suwai om onuan iyolo'd kuasa' do monimung do sompilimo di tomot do solinaid di turu' o toun dot osima' do taakanon. Om suhuon iyolo' do potimung diri do hiri'd kabandaran om suhuon iyolo' do madtamong diri. 36 Tu' iri nopo gandum do tinimung diri om pongumpai di turu' o toun do mononglous dit id dabantalan do hiti'd pomogunan do Masir. Iti no o wonsoyon om a' indo oinggorit do mononglous o tulun do hiti,” ka di Yusup.

Siniliu i Yusup do Gobunor do Masir

37 Om kosokodungai no di raja' om i piro-piro o pagawai dau i pinoboros di Yusup diri. 38 Om boros ka'ddi di raja' dot id diyolo', “Aiso' no ot ihumon toko' do suwai ko' i Yusup tu' iyau nopo om porintaon i' di Rusod do Kinorohingan,” ka dau. 39 Om boros ka di raja' dot id di Yusup, “Nokosunud ngai' nod Kinorohingan dot id diya' iti, om oilaan no kopio dot iya' o poinglobi o toilaan om aralom o toilaan ko' mantad dot isai nopo o tulun. 40 Iya' no o silihon ku do boyoon diti pomogunan ku, om koinsanai'd tulun ku nga' mumboyo' ngai' indo do boros nu. Om iyoho' poo ot agayo o kuasa' do mantad ko' iya'. 41 Om baino' no do pilion tiya' do sumiliu'd gobunor do pointongkop diti pomogunan do Masir,” ka dau. 42 Om oluso' noddi di raja' i pondulung dau di kinikiran do saap di don raja' om posulungo' no dau di tunturu' di Yusup. Om rinosukan nogi' dau i Yusup do rasuk dit anaru, i kain dot opurak dit aalus o winonsoi. Om karaai dau do karo do tamas i Yusup. 43 Om patahako' po di raja' di Yusup o tiso' di korita'-kuda' do don raja' do sakayon di Yusup, om pogulu-gulu no di Yusup i madtatamong do raja' do mikuwo'd mimboros dot opuhod do poingkaa, “Pawayao' dokoyu! Pawayao' dokoyu!” ka no. Om i Yusup noddi o nopili' do sumiliu'd gobunor do pointongkop di pomogunan do Masir. 44 Om boros ka di raja' dot id di Yusup, “Iyoho' no, i raja' --- om popoboros oku do songulun po do hiti'd Masir nga' a' i' koino-ino do momonsoi do nunu nopo dot a' po kouhot diya',” ka dau. 45 Om pungaranai no di raja' i Yusup do ngaran do don Masir dot i Sapinat Pania. Om pogihumai no di raja' i Yusup do sawo. Om ngaran nopo di tondu' nga' i Asnat, i tanak di Potipira, it imam do hilo'd bandar do Hiliopolis. 46 Tolu no nohopod o toun di Yusup di tuminimpuun iyau do kuminaraja' dot id raja' do Masir. Om tongkiad no i Yusup di walai do raja', om pamanau no iyau do tuminongkop di pomogunan do Masir. 47 Id suang nopo di turu' o toun dot osima' do taakanon diri, om asapou om osonong tomod o tua' do totonomon. 48 Om timungo' ngai' nopo di Yusup i gandum do solinaid di turu' o toun, om potimungo' no dau do hiri'd kabandaran. Id suang no do pointikid-tikid do bandar o potimungan dau di tomot do mantad id koumaan di potoropis di bandar. 49 Notimung nopo di Yusup do gandum om ogumu' no kopio --- miagal pod togis do rahat kogumu', om a' no dau oopudan do magadang ngai' iri. 50 A' poddi norikot i toun do mononglous, om duwo no tanak do kusai diyo' Yusup di Asnat. 51 Om boros ka di Yusup, “Pinolihu oku noddi do Kinorohingan di kinoinggoritan ku, om koinsanai di sompiiyon do tapa' ku,” ka dau. Om pungaranai noddi dau i tanak dau dot id gulu'ddi dot i Manasi. 52 Om boros ka kawagu dau, “Noonuan oku i' do Kinorohingan do tangaanak do hiti'd pomogunan di kinoinggoritan ku,” ka dau; om iri noddi o kinopomungaranan dau di tanak dau do kusai di koduwo, dot i Ipraim. 53 Om kopupusai noddi i turu' o toun dot osima' do taakanon o hilo'd pomogunan do Masir. 54 Om timpuun noddi i turu' o toun do mononglous, do miagal di nokoboros mantad di Yusup. Om mononglous ngai' nopoddi o pointongkop do pomogunan, nga' pointongkop nopo do pomogunan do Masir om haro i' o taakanon. 55 Soira'ddi dit oinggorit do louson i tulun do Masir, om ongoi no iyolo' pokianu di raja' do gandum. Om suhuo' noddi iyolo' di raja' do mongoi do hiri'd di Yusup, om tumanud do koinsanai di ponuhuan di Yusup. 56 Om tontok di nokotongkop noddi do hiri'd pomogunan o mononglous, om ukabai ngai' no di Yusup i walai do pinoopian di gandum om padagango' no dau dot id tulun do Masir i gandum diri. 57 Om rumikot ngai' nopoddi do hilo'd Masir o tulun do mantad id pointongkop do pomogunan do mongoi boli di gandum do mantad id di Yusup, tu' hinonggo-honggo nopo o kinoiyonon nga' nadalaan no kopio o pononglous.

Kinawansayan 42

Minongoi Pomoli'd Gandum i Tongotobpinai di Yusup

1 Om tontok di nokoilo i Yakub do haro o gandum do hilo'd Masir, om boro-boros no iyau dot id tangaanak dau do kusai, “Nokuro tu' mundorong toomod kou nopo om aiso' nopo o wonsoyon dokoyu? 2 Tu' nokorongou oku do hilo' nopod Masir om haro i' o gandum; om ongoi kou pogi' pomoli do gandum do hilo', om a' toko' i' apatai do louson,” ka dau. 3 Om ongoi noddi do hilo'd Masir i hopod o tobpinai di Yusup do mongoi pomoli do gandum. 4 Nga' a' i' di Yakub uhang do tuminanud diyolo' i Binyamin, i toput kopio'd pusod di Yusup, tu' moddosi i Yakub do haro o kosusaan do koontok di Binyamin. 5 Om ongoi noddi do hilo'd Masir i tangaanak di Yakub do mogiwoyo-woyo' di tulun do suwai do mongoi boli do gandum do hilo', tu' mononglous no o hilo'd pomogunan do Kanaan. 6 I Yusup nopo, i gobunor do pomogunan do Masir, nga' maso no do papadagang di gandum dot id tulun do mantad id pointongkop do pomogunan. Om ongoi no rapou di Yusup i piro-piro o tobpinai dau, om otud no iyolo' do tuminuku' dot id toguang di Yusup. 7 Om soira' di nokito di Yusup i piro-piro o tobpinai dau, om kotutunai no dau iyolo', nga' tinomod i' di Yusup dot a' mintutun-tutun diyolo', om uhoto' no di Yusup iyolo' dot apatog kopio. Boros ka dau, “Hinonggo tadon dokoyu?” ka dau. “Mantad iyahai do hilo'd Kanaan, om mongoi iyahai boli do gandum,” ka diyolo' do suminimbar. 8 I Yusup nopo om kotutun i' di tobpinai dau, nga' iyolo' nopo om a' i' kotutun di Yusup. 9 Om kahandamai noddi di Yusup i nipi dau do pasal diyolo'. Boros ka dau, “Iyokoyu nopo om gomponoluku' i'; mongoi kou daa ponoluku' ondung nunu o koluhayan diti pomogunan dahai,” ka dau. 10 “A' i', oi Tuan,” ka diyolo' do suminimbar. “Ruminikot iyahai'd hiti do miagal no do susuhuon nu do mongoi pomoli do gandum. 11 Iyahai nopodti, oi Tuan, om mogiobpinai i'. Om okon i' iyahai ko' gomponoluku' suwai ko' tulun i' iyahai dot osonong,” ka diyolo'. 12 Om boros ka di Yusup dot id diyolo', “Okon! Iyokoyu nopo om mongoi kou nogi' ponoluku' ondung nunu o koluhayan diti pomogunan dahai,” ka dau. 13 Om boros ka diyolo', “Iyahai nopodti, oi Tuan, om hopod om duwo songobpinai, om iso' no o tapa' dahai do hilo'd pomogunan do Kanaan. Nga' iri nopo songulun om napatai no, nga' iri nopo it id domulok dahai om hilo' id poinsugku' di tapa' dahai,” ka diyolo'. 14 Om boros ka di Yusup do suminimbar, “Iyokoyu nopodti om otopot nogi' kopio do gomponoluku' do miagal di nokoboros ku. 15 Om poingkaa nondo o ralan ku do monoinu' dokoyu. Sumumpa' oku dot id suang do ngaran do raja' dot a' ku po iyokoyu poulion dot a' po koongoi'd hiti i tobpinai dokoyu dit id domulok. 16 Mositi' no do haro o songulun do mantad id pogialatan dokoyu do mongongoi dau, om iri no suwai om giilon do gisom dot oilaan ondung ongotopot i nongkoboros dokoyu. Ondung a' otopot, om poboroson ku no kopio dot id suang do ngaran di raja', do gomponoluku' kou no kopio,” ka dau. 17 Om posuango' no di Yusup i piro-piro o tobpinai dau do hiri'd giil do solinaid do tolu o tadau. 18 Om tontok di kotolu'd tadau, om boro-boros noddi i Yusup diyolo', boros ka dau, “Iyoho' nopo om tulun i' dit ooris do Kinorohingan om iso' poo o ralan do kopomosian ku dokoyu. 19 Ondung tulun kou dot ongosonong, om tumimporon no o tiso' dokoyu do hilo'd giil, i hilo'd pinogiilan dokoyu, om iri no suwai om muli', om igitan i' ilo gandum do binoli dokoyu do maan do takanon di sompiiyon dokoyu di maso dot oinggorit do louson. 20 Om mositi' no dot angatan dokoyu do hiti'd doho' i tobpinai dokoyu dit id domulok. Om iri nondo o koilaan dot ongotopot i pinoboros dokoyu, om a' ku indo iyokoyu hukuman do kapatayon,” ka dau. Om kookunai noddi diyolo' iri, 21 om pogiboro-boros no iyolo', “Naa! Baino' noddi moti' do kababo toko' dot isuli' di kasalaan di winonsoi toko' dot id tobpinai toko' di gulu po. Tu' nokokito toko' i' do kawagato' di kinoinggoritan dau di maso dau do mokiinsian daa dati' nga' a' toko' i' pinadul iyau. Om iri noddi o kokuwaan do kopuriman toko' do koinggoritan diti,” ka diyolo'. 22 Om boros kaddi di Rubin, “A' ku toi iyokoyu sinunudan diri dot a' momonsoi'd araat dot id tanak diri? Nga' a' kou i' minokinongou. Om baino' noddi om boboon toko' no ot isuli' di kinapatayon dau,” ka dau. 23 Nga' ongosuhutan ngai' i' di Yusup i pogibara-barasan diyolo', nga' iyolo' nopo om a' i' koilo do kosuhut i Yusup tu' tontok nopo di monokiboro-boros iyolo' di Yusup om haro i' o tulun do popisuhut do boros. 24 Om tongkiad no i Yusup diyolo' om ihad no iyau. Om soira' di milo kawagu iyau do monokiboro-boros, om guli' no kawagu iyau dot id diyolo'; om pilio' noddi di Yusup i Simion do numaan kagasai dot id toguang diyolo'.

Minuli' i Tongotobpinai di Yusup

25 Om ponuhu' noddi i Yusup do tulun do poposuang di gandum do hiri'd karung di piro-piro o tobpinai dau om popoguli' kawagu do koinsanai di tusin di pinomoli diyolo' do poikidon do poposuang di karung diyolo'. Om kinokorihan po iyolo' do takanon diyolo' do hiri'd ralan. Om wonsoyo' noddi i pinonuhuan dau'ddi. 26 Om pagandaro' noddi di tobpinai di Yusup i gandum di binoli diyolo'ddi do hiri'd kaladai diyolo', om pamanau nogiddi iyolo' do minuli'. 27 Tontok di minodop iyolo' dot id iso' o kinoiyonon, om ukabai no do songulun dot id pogialatan diyolo' i karung dau do minanganu do gandum do ponumad di kaladai, nga' kokito nogi' dau i tusin dau do hiri'd soibau di gandum. 28 Om boros ka dau, “Diya iti tusin ku do pinoguli',” ka dau do pinapagarang dot id tobpinai dau. “Ontong kou pogi' nga' hiti id suang do karung ku iti tusin!” ka dau. Om tumongob tomod diri iyolo' om moddosi om mogiuhot-uhot poddi iyolo', “Nunu ma o winonsoi do Kinorohingan dot id dati'dti?” ka diyolo'. 29 Om soira' di nokorikot iyolo' do hilo'd Kanaan, om susuyo' no diyolo' dot id di Yakub, i tapa' diyolo', o koinsanai di nongosiliu dot id diyolo'. 30 Om boros ka diyolo', “Iri nopo gobunor do hilo'd Masir om apatog kopio o boros dot id dahai, om monondos po iyau do gomponoluku' iyahai di pomogunan diyolo'. 31 Nga' boros ka dahai do suminimbar, 'Okon i' ko' gomponoluku' iyahai, tu' iyahai nopo om tulun i' dot ongosonong. 32 Iyahai nopo om hopod om duwo songobpinai dot iso-iso' o tapa'. Nga' iri nopo songulun om napatai no, om iri no it id domulok om hilo'd Kanaan do poinsugku' di tapa' dahai,' ka dahai. 33 Om boros ka di gobunor do suminimbar, 'Poingkaa o wonsoyon ku om oilaan i' ondung tulun kou dot ongosonong: Mositi' no do poundorongon o songulun dokoyu do hiti'd doho'; om iri no suwai om mamanau do mongoi paatod dilo gandum do hilo'd sompiiyon dokoyu di maso dot oinggorit do louson. 34 Om pootodon no do hiti'd doho' i tobpinai dokoyu dot id domulok. Om iyo noddi o koilaan ku dot okon kou ko' tulun do gomponoluku', suwai ko' tulun i' dit ongosonong. Om pogulion ku nogindo kawagu i tobpinai dokoyu, om iyokoyu nga' pologoson ku indo do mundorong do hiti om osimbayan do dumagang-dagang,' ka di gobunor do minomisunud dahai,” ka diyolo'. 35 Om soira' di pinobubus ngai' diyolo' i karung diyolo', om kokito ngai' nopo diyolo' i poiyanan diyolo'd tusin do kisuang do tusin. Om ongooris tomod diri iyolo' om i Yakub nga' ooris nogi' do nokokito'ddi. 36 Om boros ka di Yakub dot id diyolo', “Orohian kou toi dot atagakan ngai' oku nopo di tangaanak ku? I Yusup nga' a' no hino, om i Simion nga' a' noddi hino, om baino' no om angatan po dokoyu i Binyamin. Om iyoho' indo ot oinggorit!” ka dau. 37 Om boro-boros no i Rubin di tapa' dau, “Ondung a' ku kaatod kawagu i Binyamin do hiti'd diya', om ngoyon nopo patayo' i tanak ku'd kusai. Powoyoo' nopo doho' i Binyamin, om angatan ku i' iyau do gumuli' kawagu,” ka dau. 38 Nga' boros ka di Yakub do suminimbar, “Amu'! A' ku no potonudon dokoyu i Binyamin; tu' napatai no kanogi' i tobpinai dau'd kusai, om iyau poddi o poundorong do hiti. Om a' i' oila-ilaan do sigog i' doti' do haro o kosusaan dau do hilo'd tanga'd ralan. Tu' molohing oku noddi kopio, om iri piya'ndo katangaban do porikoton dokoyu dot id doho' nga' kapatai i' doho',” ka dau.

Kinawansayan 43

Guminuli' i Tongotobpinai di Yusup do hilo'd Masir

1 Om hilo' nopod Kanaan nga' nadalaan no kopio o pononglous, 2 om soira' di naayi' di sompiiyon di Yakub do mangakan i gandum di binoli do mantad hilo'd Masir, om ponuhu' poddi kawagu i Yakub di tangaanak dau, boros ka dau, “Ongoi kou no kawagu do hilo' do mongoi pomoli'd gandum do kanon toko',” ka dau. 3 Om boros ka di Yohuda, “Pinopoinsan mantad i gobunor dahai om apatog kopio iyau do minomoros dot a' no iyahai posolowoton dau ondung a' no moyo-woyo' dahai i tobpinai dahai di komulakan. 4 Ondung uhang nu do tumanud dahai ilo tobpinai dahai om mongoi i' iyahai do hilo' do mongoi pomoli'd takanon. 5 Nga' a' nu nopo uhang do moyo' dahai i Binyamin om a' no iyahai mongoi, tu' nokopomisunud mantad no dahai i gobunor dot a' no iyahai posolowoton dau dot a' katanud dahai ilo tobpinai dahai,” ka dau. 6 Om boros ka di Yakub, “Nokuro tu' mamagangau kopio kou doho' tu' posunudo' no dokoyu di gobunor do haro o tobpinai dokoyu'd suwai,” ka dau. 7 Om boros ka diyolo' do suminimbar, “Iri nopo gobunor diri om minguhot nopo do pasal dahai om pasal do sompiiyon toko'. 'Poimpasi po o tapa' dokoyu? Haro po o tobpinai dokoyu'd kusai do suwai?' ka no dau. Om a' noddi dahai milo dot a' simbaron ngai' i ponguhatan dau. Om nunu daa o koilo-ilo dahai do monuhu' iyau do papatanud dilo tobpinai dahai?” ka diyolo'. 8 Om boros ka di Yohuda dot id tapa' dau, “Potonudo' nopo dahai ilo tanak nu om kapamanau i' iyahai dot oruhai, om aiso' indo ot apatai dati' do louson. 9 Om patahakon ku nopo o tinan ku do maan do pamajamin, om iyoho' no o papanganakon nu dau. A' ku nopo iyau koguli' dot id diya' om iyoho' no o kababo do kasalaan diri do gisom dot ikapatai ku. 10 Ondung a' toko' daa minandad do gisom dot iyo'ddi kalaid, om induwo toko' no daa piguli',” ka dau. 11 Om boros kaddi di tapa' diyolo', “Ondung a' kopio milo dot a' iyo'ddi om mongoi kou no posuang do hino'd karung dokoyu di tua' do totonomon dit ongosonong kopio do mantad hiti'd pomogunan diti do popuhawangon di gobunor. Migit kou no dot ongokuuri' di kismis, om ongokooro' di paha', om migit kou do rampa di mogisuayan, om tua' do kemiri, om i tua' do badam. 12 Om migit kou nod tusin dot induwo kogumu' ko' i gulu, tu' i tusin di pinoguli' dot id suang do karung dokoyu di gulu nga' mositi' no do pogulion kawagu dokoyu. Tu' nagaloi i' doti' iyolo' di guulu'ddi. 13 Om angatan nopo ilo tadi' dokoyu om gumuli' kou no kopio dot oruhai. 14 Om pokionuon ku no o Kinorohingan dit Agayo o Kuasa' do monuhu' di gobunor dot osianan dokoyu, om pogulion indo daa dau i Binyamin om i Simion dot id dokoyu. Iyoho' nodti om ondung a' no kopio milo dot a' oku atagakan do tangaanak ku, om atagakan oku no diyolo',” ka dau. 15 Om igitai noddi diyolo' i pomuhawang diri, om i tusin dot induwo kogumu' ko' mantad di nigitan diyolo' dit id gulu, om pamanau noddi iyolo' do minongoi'd hilo'd Masir do miniwoyo' di Binyamin. Om soira' di nokorikot iyolo'd hilo' om ongoi ngai' no iyolo' solowot di Yusup. 16 Om soira' di nokito di Yusup i Binyamin do manud-tanud diyolo', om boro-boros no i Yusup di susuhuon dau di mongilo-ilo do hiri'd walai dau, boros ka dau, “Angatai ngai' ilo tulun do mongoi do hilo'd walai ku. Tu' poilangon ku iyolo' doho'd makan do tangaadau diti. Om mongoi no ponumbali' dot ongoiso' di tayam-tayam om onsokon no,” ka dau. 17 Om tonudo' ngai' nopo di susuhuon diri i pinonuhuan di Yusup, om angatai ngai' no dau i tobpinai di Yusup do suminalakoi do hiri'd walai di gobunor. 18 Om tontok di posolokoyon no iyolo' do hiri'd walai om ongooris diri iyolo' om momusorou iyolo' do poingkaa, “Kinapangangatan nopo dati' diti do hiti om iri no moti' i tusin di pinoguli' dot id suang do karung toko' dit ongoi toko' i' do hiti'ddi. Om potigawaan toko' nogindo diyolo' do mumang om onuon nogindo diyolo' ilo kaladai toko', om iyati' no om silihon toko' do turipon diyolo',” ka diyolo'. 19 Om ongoi noddi iyolo' boro-boros di susuhuon di Yusup di mongilo-ilo do walai dau do hiri'd wawayaan di walai. 20 Boros ka diyolo', “Oi Tuan, nokoongoi no iyahai'd hiti di guulu do minongoi pomoli do gandum. 21-22 Om tontok di pinopowonsoi iyahai do kiim do hilo'd tanga'd ralan di minuli' iyahai, om ukabai no dahai i karung dahai om kosukai nogi' dahai i tusin do posoibau do pointikid-tikid di karung dahai, om i tusin dahai nga' hino ngai' i'. A' i' dahai noilaan ondung isai o pinoposuang di tusin diri do hiri'd suang di karung dahai. Om diya ngai' no i tusin diri do nigitan kawagu dahai do patahakon dahai diya', oi Tuan. Om nokopongigit po kawagu iyahai do tusin do suwai ko' iti do maan dahai do pomoli kawagu do gandum,” ka diyolo'. 23 Om boros ka di susuhuon, “Kada' kou katangkabo. Kada' kou kooris, tu' iri doti' i Kinorohingan dokoyu, i Kinorohingan di tukuon di tapa' dokoyu o pinoposuang di tusin diri do hiri'd karung dokoyu. Tu' naramit ku i' i pinomoli dokoyu di gandum diri,” ka dau. 24 Om ngoyo' noddi di susuhuon poropoho' diyolo' i Simion. Om posolokoyo' ngai' no dau iyolo' do hiri'd walai, om ngoyo' no dau iyolo' onuwai do waig do maan do pongoug do lapap. Om ngoyo' nogiddi dau paakano' i kaladai diyolo'. 25 Om posodiawo' no ngai' di tobpinai di Yusup i popuhawangon diyolo' di Yusup do koguli' iyau do hiri'd walai dau di tangaadau, tu' nosunudan no mantad iyolo' dot angatan iyolo' di Yusup do makan. 26 Om soira' di nokoguli' i Yusup do hiri'd walai om ngoyo' no diyolo' posolokoyo' i popuhawangon diyolo'ddi om patahako' no diyolo' di Yusup do mikuwo'd minotud dot id toguang dau. 27 Om ponguhot no i Yusup ondung ongosonong-sonong iyolo', boros ka dau, “Poingkuro-kuro no habar di tapa' dokoyu, i molohing noddi, i sinusui dokoyu dot id doho' di guulu'ddi? Poimpasi po kasai' iyau, om osonong-sonong i' iyau?” ka dau. 28 Om boros ka diyolo' do suminimbar, “Iri nopo tapa' dahai, i susuhuon nu, om poimpasi po om osonong-sonong i' iyau,” ka diyolo'. Om otud no iyolo' do tuminuku' dot id toguang di Yusup. 29 Om soira' di nokito di Yusup i Binyamin, i tadi' dau, i toput kopio dau'd pusod, om boro-boros no iyau, “Iti no i tobpinai dokoyu dot id domulok, i pinosunud dokoyu dot id doho'ddi? Kinorohingan i' o manahak diya' do barakat, oi tanak ku,” ka dau. 30 Om olisiu noddi kopio i Yusup di tadi' dau'ddi, om oruhai no dot a' dau opusus o tihad dau, om suang noddi iyau do hiri'd bilik dau, om ihad no iyau. 31 Om kopongillagup poddi i Yusup, om labus nogi' iyau om tumotos po iyau do momusus do ginawo dau do siihad, om ponuhu' noddi iyau do posurung do takanon. 32 I Yusup nopo om sinurungan dot id iso' o mija' do suwai tu' sorohon diyolo' dot aiso' nondo o ngaran-ngaran diyolo' do mongoi iyolo' torungak di tulun dot Ibrani do makan. 33 Om iruso' nopo do pinopoirikau i tobpinai di Yusup do potoguang di Yusup do pinoirus di tumur diyolo', do pinoimpuun do mantad id dotuo om gisom dot id komulakan. Om soira' di nokito diyolo' do nirus iyolo' do pinopoirikau om mogisosonsod poddi iyolo' do nosusuayan. 34 Om surungai noddi iyolo' do takanon do mantad hiri'd mija' di Yusup, nga' iri nopo i di Binyamin om inglimo kogumu' ko' mantad di pinatahak dot id piro-piro o tobpinai dau. Om akan noddi iyolo' om ponginum-nginum iyolo' do potorungak di Yusup do gisom do nangabagalan iyolo'.

Kinawansayan 44

I Sangkir do Natagak

1 Om sunudai no di Yusup i susuhuon dau di mongilo-ilo dot id walai dau, boros ka dau, “Suangan nod gandum ilo karung di tulun, do songkuro nopo it ooyit diyolo', om posuangon no i tusin diyolo' dot id pointikid-tikid di karung diyolo' do posoibahon di gandum. 2 Om posuangon no i sangkir ku'd pirok dot id suang di karung di tobpinai diyolo' di komulakan, om potonggoyon no i tusin do pinomoli dau,” ka dau. Om wonsoyo' no di susuhuon o miagal di pinonuhuan dau. 3 Om osuab po di kosuabon kawagu om suhuo' noddi i piro-piro o tobpinai di Yusup diri do minamanau do miwoyo' di kaladai diyolo'. 4 Nga' tontok dit a' po osodu' kopio o kinapamanahon diyolo' do mantad hiri'd Masir, om boros ka di Yusup dot id susuhuon dau di mongilo-ilo do walai dau, “Ngoyo' kopio gusao' i tulun diri. Om soira' nopo dot okosupan nu iyolo' om uhoton no iyolo' do poingkaa, 'Nokuro tu' sulian dokoyu dot araat it osonong? 5 Nokuro tu' pinanakau dokoyu i sangkir do pirok di Tuan ku? Iri nopo i sangkir diri nga' ponginuman di Tuan ku, om iri nogi' o pogogontong dau. Araat no kopio o winonsoi dokoyu,' kanto,” ka dau. 6 Om soira' di nokosupan iyolo' di susuhuon di Yusup, om poboroso' no di susuhuon diri o miagal di pinobilin di Yusup dau. 7 Om boros ka diyolo' dot id dau, “Nunu kopio o komoyon do boros do Tuan do miagal dino? Sumumpa' no iyahai dot a' i' iyahai nokowonsoi do miagal diri. 8 Noilaan nu i' dot iri nopo tusin di nokito dahai dot id suang do karung dahai di guulu'ddi om nokoguli' no dahai dot id diya' do nigitan dahai do mantad hilo'd Kanaan. Nga' nokuro nogi' daa'ddi tu' manakau po iyahai'd pirok ko' tamas do mantad id walai di Tuan nu? 9 Nga' sokiro nopo do haro o tongosongulun dot id pogialatan dahai dot oilaan nu'd kiinigit diri, oi Tuan, om patayon nopo iyau, om iyahai no om sumiliu do susuhuon nu,” ka diyolo'. 10 Nga' boros ka di susuhuon diri, “Ookunan ku i' ino, nga' iri no tulun di minanganu di sangkir o sumiliu do turipon ku; nga' iri nopo suwai om lumombus nopod mamanau,” ka dau. 11 Om olomus nopoddi iyolo' do minanakas di gandar, om sompori-pori nopo do minonukai di karung diyolo'. 12 Om ngoyo' noddi di susuhuon di Yusup sorisido' do mogontong ngai' i karung diyolo', om impuuno' no dau o mantad hiri'd dotuo om gisom dot id komulakan. Om kokito no dau i sangkir do hiri'd suang do karung di Binyamin. 13 Om hurako' nopoddi di piro-piro o tobpinai di Binyamin o rasuk diyolo' dot atatangaban. Om pagandaro' no kawagu diyolo' i gandum om poguliai nogiddi kawagu diyolo' do hilo'd bandar do Masir. 14 Om di nopoddi nokorikot i Yohuda om i piro-piro o tobpinai dau do hiri'd walai di Yusup, om hiri pod walai i Yusup. Om otud no iyolo' do tuminuku' dot id toguang di Yusup. 15 Om boros ka di Yusup, “Nunu kopio i winonsoi dokoyu'ddi? A' kou toi koilo do tulun nopo do miagal doho' o pangkat om milo i' do mogihum dokoyu dot i toilaan do dong bobolian o pakayon do mogihum?” ka dau. 16 Om boros ka diyolo', “Nunu po o milo dahai'd poboroson dot id diya' oi Tuan? Poingkuro po iyahai'd sumongkiwal? Poingkukuro po iyahai do popotopot dahai? Tu' nokoimbulai nod Kinorohingan o kasalaan dahai. Nga' baino' nopo om oinsanan nopo iyahai do sumiliu'd susuhuon nu, om okon i' ko' iri no i tulun di minanganu di sangkir,” ka di Yohuda. 17 Om boros ka di Yusup, “A' i'! A' oku i' momonsoi do miagal diri! Suwai ko' iri no i tulun di minanganu di sangkir ku o sumiliu do susuhuon ku. Nga' iri nopo suwai om milo i' do gumuli' do hilo'd tapa' dokoyu,” ka dau.

Nobian di Yohuda i Binyamin

18 Om ongoi no i Yohuda rapou di Yusup, om boro-boros nod, “Mokiampun oku no diya', oi Tuan, tu' pokionuon ku daa do milo oku do monokiboro-boros do Tuan. Kada' kotogod doho', tu' iya' nga' miagal i' di raja'. 19 Boros ka nu do minonguhot dahai, oi Tuan, om 'Haro po o tapa' om tobpinai dokoyu?' ka nu. 20 Om boros ka dahai do suminimbar, 'Haro po bo o tapa' dahai'dti nga' molohing no, om songulun po tobpinai dahai dot id domulok, i nosusu do tontok di molohing no kopio i tapa' dahai. Om haro i' daa o tobpinai kopio dau do toput kopio dau'd pusod nga' napatai no, om iyau po o poimpasi di pinaganak di tina' kopio diyolo'; om iyau noddi o kosianan kopio di tapa' dau,' ka dahai. 21 Om minonuhu' ko, oi Tuan, do mangangat dau'd hiti, om kokito ko i' dau. 22 Om posimbaro' no dahai dot iri nopo tanak diri om a' i' milo do tumongkiad di tapa' dau tu' kotongkiad nopo iyau, nga' apatai no i tapa' dau. 23 Om boros ka nu, 'A' kou no milo do sumolowot kawagu doho' dot a' no dokoyu potonudon ino tobpinai dokoyu dot id domulok,' ka nu. 24 Om soira' di nokoguli' iyahai do hilo'd tapa' dahai, om sunudai no dahai iyau di boros nu. 25 Om suhuo' no iyahai dau do gumuli' kawagu'd hiti do mongoi boli do gandum. 26 Om boros ka dahai, 'A' no iyahai milo do mongoi solowot di gobunor dot a' nu no potonudon dahai ilo tobpinai dahai dot id domulok. Mongoi nopo iyahai'd hilo' om katanud dahai i tobpinai dahai,' ka dahai. 27 Nga' boros ka di tapa' dahai, 'Koilo kou i' do tanak nopo di Rasil, i sawo ku om duwo noo. 28 Nga' iri nopo it id gulu om nokotongkiad no doho'. Om atantu' no do nopogianat-anat po iyau do numaan do nintorusan dit orongit, tu' a' oku no nokosolowot dau do mantad diri. 29 Om ondung ngoyon pondo dokoyu ilo tanak ku'd koduwo, om haro nondo o kosusaan do koontok dau om atantu' no dot iti no katangaban di porikoton dokoyu dot id doho' o kapatai doho', tu' molohing oku no kopio,' ka di tapa' dahai,” ka di Yohuda. 30-31 Om boros ka kawagu di Yohuda, “Iyo nopoddi oi Tuan, om ondung muli' oku do hilo'd tapa' ku dot a' no manud-tanud doho' ilo tanak om atantu' no dot apatai i tapa' ku. Tu' ginawo nopo dau om poinsokot po dilo tanak, om iri nopondo i katangaban di porikoton dahai dot id dau om kapatai no dau, tu' molohing no kopio iyau. 32 Om kawagu po nga' nakatahak ku no o tinan ku dot id di tapa' do maan do pamajamin dilo tanak. Om nokosunud ku no dot ondung a' koguli' ilo tanak dot id dau om iyoho' ngai' no o mamabo do kasalaan diri do gisom dot ikapatai ku. 33 Nga' baino' nopodti, oi Tuan, om pologoso' oku no do mundorong do hiti do sumiliu do turipon nu do tumingolon dilo tadi' ku. Om pologoson no iyau do muli' do tumanud dilo piro-piro o tobpinai dau. 34 Tu' poingkukuro oku pondo do muli' do sumolowot di tapa' ku dot a' manud-tanud doho' ilo tanak? Tu' a' oku no kasaap do kokito do kosusaan diti do koontok di tapa' ku,” ka di Yohuda.

Kinawansayan 45

Pinointutun di Yusup Iyau dot id Tongotobpinai Dau

1 Om a' noddi di Yusup opusus o ginawo dau do hiri'd toguang di susuhuon dau. Om suhuo' ngai' no dau i susuhuon dau'ddi do sumoliwan do mantad hiri'd bilik. Om aiso' noddi o tongosongulun do tulun do suwai do hiri di pinopointutun i Yusup dot id piro-piro o tobpinai dau ondung isai kopio iyau. 2 Om ihad noddi i Yusup dot opuhod kopio gisom do nokorongou i tulun do Masir. Om haro'ddi o pinoporikot do habar diri do hiri'd walai di raja'. 3 Om boros kaddi di Yusup dot id piro-piro o tobpinai dau, “Iyoho' nogi' bo i Yusup diri! Poimpasi po i tapa' ku?” ka dau. Nga' ongooris nogi' i tobpinai di Yusup do nokorongou'ddi, gisom dot a' no iyolo' kosimbar. 4 Om boros kaddi di Yusup dot id tobpinai dau'ddi, “Insomok-somok kou doho',” ka dau. Om insomok noddi iyolo' di Yusup, om boros ka kawagu di Yusup, “Iyoho' nogi' bo i Yusup, i tobpinai dokoyu'ddi, i pinadagang dokoyu do hiti'd Masir. 5 Nga' baino' nopo om kada' kou no tongob om kada' kou ponosol do pinapadagang doho'd hiti. Otopot nopo kopio om Kinorohingan i' o pinapaatod doho'd hiti, do minogulu dokoyu om kapamasi oku i' do tulun dot ogumu'. 6 Om koduwo nogi' moti'd toun diti do mononglous o hiti'd pomogunan om haro po limo toun dot id dosunsudan dot aiso' o mongumo om aiso' o mongomot. 7 Pinaatod mantad oku'd Kinorohingan do pinogulu dokoyu do mamasi dokoyu dot iyo'dti o karalan-ralano' tu' kosuayan kopio, om apasi kou i' om i sinakagon dokoyu. 8 Okon i' ko' iyokoyu kopio o pinapaatod doho' do hiti, nga' Kinorohingan i'. Iyau no i pinoposiliu doho' do pagawai di raja' dit asawat kopio. Om iyoho' no o nonuan do kuasa' do mongilo-ilo do pointongkop diti pomogunan, om iyoho' o nosiliu'd pomorinta' do pointongkop do hiti'd Masir. 9 Uli' kou nogi' kopio do hilo'd tapa' ku do dinondo om sunudan no iyau dot iti no o boros di Yusup, i tanak dau, 'Siniliu oku'd Kinorohingan do pomorinta' do pointongkop do Masir, om rumikot no do hiti'd doho' dot oruhai. 10 Om miyon kou indo do hilo'd Gusin, tu' osomok doho', --- iya' om i tangaanak nu, om koinsanai di manangaki diya'; om koinsanai di baanan do dumba', om kambing, om sapi' om koinsanai di diya'd songonuon. 11 Ondung hilo' ko'd Gusin, om milo oku indo do momogompi' diya'. Tu' haro po moti' o limo toun do mononglous dot id dosunsudan diti, om mada' oku i' dot oinggorit kou do louson --- iya', om i sompiiyon nu, om i tayam-tayam nu,' kanto,” ka di Yusup. 12 Om boros ka kawagu di Yusup, “Koinsanai dokoyu, om iya' nogi', oi Binyamin, nga' nokokito no dot i Yusup kopio oku. 13 Sunudan no kopio i tapa' do kogoyoo' do kuasa' ku do hiti'd pomogunan do Masir, om sunudan no dokoyu iyau do koinsanai diti nongokito dokoyu. Om angatan nogindo dokoyu iyau do kumaa'd hiti, om kada' kou no pingkalaid,” ka dau. 14 Om gopuso' no di Yusup i Binyamin, i tobpinai dau, om ihad no i Yusup, om i Binyamin nogiddi nga' minihad i' do mikuwo'd guminapus di Yusup. 15 Om mihad-ihad po i Yusup do guminapus om tuminungub di koobpinayan dau'd suwai. Om boro-boros nogiddi i piro-piro o tobpinai di Yusup dot id di Yusup. 16 Om soira' di nokorikot do hiri'd walai di raja' i habar do nongkorikot i koobpinayan di Yusup, om asanangan tomod diri i raja', om i tongopagawai dau do nokorongou'ddi. 17 Om boros ka di raja' dot id di Yusup, “Sunudan ngai' no kopio i tobpinai nu do mamagandar di kaladai diyolo' do gumuli' do hilo'd Kanaan. 18 Om suhuon no iyolo' do mongoi pangangat di tapa' nu om koinsanai di sompiiyon diyolo' om mongoi indo kawagu do hiti. Om onuan ku indo iyolo' do tana' dit osonong do hiti'd Masir, om a' indo diyolo' aayi-ayi' i tua' do totonomon do hiri'd tana'ddi. 19 Om sunudan no iyolo' do mongigit do piro-piro guyudan do maan do sakayon di sawo diyolo' om i tangaanak diyolo' dit ongokoro' po. Om sunudan no iyolo' do mangangat di Yakub do tumanud diyolo' do kumaa'd hiti. 20 A' no minog dot orubatan iyolo' do tumongkiad di konunu-nunuan diyolo'd hilo', tu' koinsanai dit ongosonong do hiti'd pomogunan do Masir nga' asanganu ngai' no diyolo',” ka dau. 21 Om tonudo' ngai' nopo di tangaanak di Yakub i pinonuhuan diri. Om onuwai no di Yusup iyolo' do piro-piro o guyudan do tuminanud di pinonuhuan di raja', om kinokorihan po iyolo' do taakanon do maan do hilo'd ralan. 22 Om tikidai po dau iyolo' do sarampasangan do pakayan di wagu, nga' i Binyamin nopo om nonuan dau do tolu nahatus o kaping do pirok om limo pasang do pakayan do wagu. 23 Om onuwai no di Yusup i tapa' dau do hopod o tinan do kaladai do pinagandaran do hino ngai' o konunu-nunuan dit ongosonong do mantad hilo'd Masir, om hopod o tinan do kaladai do ginandaran do gandum om roti, om taakanon po di suwai ko' iri do maan di Yakub do kokoriu do mamanau do kumaa do hilo'd Masir. 24 Om pologoso' noddi di Yusup i piro-piro o tobpinai dau do mamanau do muli' do hilo'd Kanaan, om tontok di minamanau iyolo' om bilinai no di Yusup iyolo', boros ka dau, “Kada' kou pogisosongkiwal do hilo'd ralan,” ka dau. 25 Om pamanau no iyolo' do mantad hilo'd Masir, do minuli' do hilo'd di Yakub, i tapa' diyolo' do hilo'd Kanaan. 26 Om boros ka diyolo', “Poimpasi po moti' pama i Yusup! Om i Yusup no o pomorinta' do pointongkop do hilo'd Masir,” ka diyolo'. Nga' kapagag nopo tomod i Yakub dot iyo pod sinisian iyau, om a' daa'ddi iyau monongkuyaan kopio di boros diyolo'. 27 Nga' soira' di nosunudan diyolo' i Yakub di boros di Yusup dot id diyolo', om di nokokito i Yakub di guyudan do pinoigitan di Yusup do pasakayan di Yakub do kumaa do hilo'd Masir, om kopuriman nogiddi kawagu i Yakub. 28 Om boros kaddi dau, “Poimpasi po pama i Yusup, i tanak ku! Iri no kopio i pokionu-onuon ku! Mongoi oku no kopio solowot dau do daamot pod a' oku apatai,” ka dau.

Kinawansayan 46

Minongoi i Yakub om i Sompiiyon Dau do Hilo'd Masir

1 Om opi-opio' no di Yakub i konunu-nunuan dau om ongoi no iyau do hilo'd Borsiba do mongoi papatahak do porsombahan dot id Kinorohingan di tukuon di Isak, i tapa' dau. 2 Om boro-boros no o Kinorohingan dot id dau dot id suang dot iso' o pinointalang di nokito di Yakub di dongotuong, om lohowo' no dau i Yakub, “Yakub! Yakub!” ka. Om boros ka di Yakub do suminimbar, “Diya oku i' oi TUHAN,” ka dau. 3 Om boros kad Kinorohingan, “Iyoho' no o Kinorohingan, i Kinorohingan di tukuon di tapa' nu. Kada' kooris do kumaa do hilo'd Masir; tu' silihon ku o sinakagon nu dot iso' o bansa' dit agayo. 4 Om woyoon ku i' iya' do kumaa do hilo'd Masir, om pogulion ku indo kawagu do hiti'd pomogunan diti o sinakagon nu. Om hiri indod doros nu i Yusup do matai ko,” ka dau. 5 Om pamanau no i Yakub do mantad hilo'd Borsiba. Om pasakayo' no iyau di tangaanak dau do hiri'd guyudan, om i sawo diyolo', om i tangaanak dit ongokoro' po nga' pinasakai nogi' diyolo' do hiri'd guyudan di pinatahak di raja' do Masir dot id diyolo'. 6 Om tanggayai ngai' no diyolo' i tayam-tayam diyolo', om koinsanai di dapu' diyolo' di naanu diyolo' do hilo'd Kanaan, nga' nigitan ngai' nogi' diyolo' do kuminaa do hilo'd Masir. Om potonudo' ngai' nopo di Yakub i sinakagon dau: 7 i tangaanak dau'd kusai, om i manangaki dau'd tongoondu'. 8 Iti ngai' no it id suang do sompiiyon di Yakub di kuminaa do hilo'd Masir: i Rubin, i tanak di Yakub do kusai dit id dotuo, 9 om i tangaanak di Rubin do kusai: i Hinok, i Palu, i Hisron, om i Karmi. 10 I Simion om i tangaanak dau'd kusai: i Yomuil, i Yamin, i Ohad, i Yakin, i Sohar, om i Saul, i tanak di tondu' do bansa' do Kanaan. 11 I Liwi om i tangaanak dau'd kusai: i Girson, i Kohat, om i Morari. 12 I Yohuda om i tangaanak dau'd kusai: i Sila, i Piris, om i Sira. (Iri nopo tangaanak di Yohuda do suwai, iyo' Or di Onan, om napatai no do hilo'd Kanaan.) Tanak nopo di Piris do kusai, om i Hisron om i Hamul. 13 I Isakar om i tangaanak dau'd kusai: i Tola, i Pua, i Ayub om i Simron. 14 I Sibulon om i tangaanak dau'd kusai: i Sirid, i Ilon, om i Yaliil. 15 Iri ngai' no i tangaanak do pinaganak di Lia, i tangaanak diyolo' di Yakub, di hilo' pod Misopotamia, om tanak no diyolo' do tondu' om i Dina. Koinsanai nopo do sinakagon di Yakub do mantad id di Lia om tolu nohopod om tolu o tulun. 16 I Gad om i tangaanak dau'd kusai: i Sipion, i Hagi, i Suni, i Isbon, i Iri, i Arodi, om i Arili. 17 I Asor om i tangaanak dau'd kusai: i Yimna, i Yiswa, i Yiswi, i Boria, om i tobpinai diyolo'd tondu' dot i Sira o ngaran. Tangaanak no di Boria do kusai om i Hibir om i Malkiol. 18 Om iri nopo hopod om onom o tulun diri om sinakagon di Yakub do mantad id di Silpa, i turipon do tondu' do pinatahak di Laban dot id di Lia, i tanak dau'd tondu'ddi. 19 Om i Rasil no, i sawo di Yakub om duwo no tanak dau'd kusai: i Yusup no om i Binyamin. 20 Om tontok di hilo' i Yusup id Masir, om kianak diri iyau do duwo o kusai: i Manasi om i Ipraim, i tanak diyolo' di Asnat, i tanak di Potipira do tondu'. I Potipira nopo om imam do hilo'd Hiliopolis. 21 Tangaanak no di Binyamin do kusai om i Bila, i Bikir, i Asibol, i Gira, i Naaman, i Ihi, i Ros, i Mupim, i Hupim, om i Arod. 22 Iri nopo hopod om apat o tulun diri om sinakagon di Yakub do mantad id di Rasil. 23 I Dan om i tanak dau'd kusai dot i Husim o ngaran. 24 I Naptali om i tangaanak dau'd kusai: i Yahsiil, i Guni, i Yisir om i Silom. 25 Iri nopo turu' o tulun diri om sinakagon di Yakub do mantad id di Bilha, i turipon do tondu' do pinatahak di Laban dot id di Rasil, i tanak dau do tondu'ddi. 26 Kogumuon nopo do tulun di sinakagon kopio di Yakub, do kuminaa do hilo'd Masir om onom nohopod om onom o tulun, nga' a' i' nokointob i sawo di tangaanak di Yakub do kusai. 27 Om tanak nopo di Yusup di nosusu do hilo'd Masir om duwo o kusai, om koinsanai nopoddi do sompiiyon di Yakub di nokoongoi do hilo'd Masir om turu' nohopod o tulun.

I Yakub om i Sompiiyon Dau do Hilo'd Masir

28 Om suhuo' no di Yakub i Yohuda do minogulu do mongoi pomisunud di Yusup do mongoi ruba' diyolo' do hilo'd Gusin. Om soira' di nokorikot iyolo' di hilo'd Gusin, 29 om sakai no i Yusup di guyudan dau om ongoi no do hilo'd Gusin do minongoi ruba' di tapa' dau. Om soira' di nokopisolowot iyolo', om gopuso' nopo di Yusup i tapa' dau, om alaid diri i Yusup do minihad. 30 Om boros ka di Yakub dot id di Yusup, “Songkoino oku nod matai, tu' nokokito oku noddi diya', om noilaan ku do poimpasi ko po,” ka dau. 31 Om boro-boros noddi i Yusup dot id tobpinai dau om id koobpinayan dau di suwai do poingkaa, “Ngoyon ku po kopio sunudai i raja' do nokorikot ngai' no i tobpinai ku om koinsanai di koobpinayan ku'd suwai di songundorong do hilo'd Kanaan. 32 Om sunudan ku nogi' i raja' dot iyokoyu nopo om gompomogompi' do dumba' om sapi' om nigitan ngai' dokoyu i tayam-tayam dokoyu, om koinsanai di dokoyu'd songonuon. 33 Om soira' nopod lohowon kou di raja', om monguhot no iyau ondung nunu o karaja' di koubasanan dokoyu, 34 om sunudan no dokoyu i raja' dot iyokoyu nopo om noubas no do momogompi' do tayam-tayam do mantad poddi tongokoro' kou po, do miagal di taki-aki dokoyu. Ondung oilaan dau do miagal diri om pologoson kou indo dau do momogun-mogun do hilo'd Gusin,” ka dau. Pinoboros pogi' di Yusup o miagal diri nga' tulun nopod Masir om a' no kopio orohian do rumolot do gompomogompi' do tayam-tayam.

Kinawansayan 47

1 Om angatai noddi di Yusup o limo di tobpinai dau do minongoi solowot di raja'. Om sunudai no di Yusup i raja', boros ka dau, “Nokorikot no i tapa' ku do mantad hilo'd Kanaan, om i tobpinai ku nga' tuminanud ngai' nogi', om i baanan do kambing om dumba' om sapi', om koinsanai di diyolo'd songonuon nga' nigitan ngai' no diyolo'd hiti. Om dinondo nopodti om hilo' no iyolo'd Gusin,” ka di Yusup. 2 Om ngoyo' noddi di Yusup posolowoto' di raja' i limo o tobpinai dau. 3 Om uhoto' noddi di raja' iyolo', boros ka dau, “Nunu o karaja' dokoyu,” ka dau. Om boros ka diyolo' do suminimbar, “Iyahai nopo om gompomogompi' do dumba', oi Tuan Raja', do miagal di taki-aki dahai. 4 Om kinorikatan nopo dahai do hiti'd pomogunan diti om adalaan kopio do mononglous o hilo'd Kanaan om sakot piya'ddi nga' aiso' no do pangakan-ngakanan dilo kambing om dumba' dahai. Om pokionuon no daa dahai do popotumboyo' o raja' do hilo' iyahai'd Gusin do momogun-mogun,” ka diyolo'. 5 Om boros ka di raja' dot id di Yusup, “Iyo nopodti tu' nokorikot no ilo tapa' nu, om ilo tobpinai nu do hiti, 6 om iti nopo tana' do Masir, om iyolo' no o sumanganu. Pologoson nopo iyolo' do momogun-mogun do hilo'd Gusin, i kinoiyonon dit osonong kopio do hiti'd pomogunan diti. Om ondung haro ot id pogialatan diyolo' dit oilo kopio do momogompi' do tayam-tayam, om silihon no doho' iyolo' do gompomogompi' dilo doho'd tayam-tayam,” ka. 7 Om ngoyo' noddi di Yusup posolowoto' di raja' i Yakub, i tapa' dau, om barakatai no di Yakub i raja'. 8 Om uhoto' no di raja' i Yakub, boros ka dau, “Piro no o tumur nu?” ka. 9 Om boros ka di Yakub do suminimbar, “Hatus no om tolu nohopod o toun ku do mombo-hombo. Nga' oniba' i' iri om oinggorit po dot opudolian do kotoguyon di komolohingan ku,” ka dau. 10 Om barakatai noddi di Yakub i raja' do pinongintod dau om tongkiad noddi i Yakub. 11 Om tulungo' no di Yusup i tapa' dau om koinsanai di tobpinai dau do momogun-mogun do hilo'd Masir, om onuwai no dau iyolo' do tana' dit osonong kopio dot id pomogunan diri do maan do diyolo'd songonuon, i hilo'd potoropis di bandar do Ramisis, do tumanud di pinonuhuan di raja'. 12 Om onuwai no di Yusup do taakanon i tapa' dau, om i tobpinai dau, om koinsanai di koobpinayan dau'd suwai, om nokohompit ngai' nogi' it ongokoro' po.

Minononglous

13 Om adalaan noddi kopio o pononglous tu' hinonggo-honggo nopo nga' aiso' no taakanon. Om iri'ddi tulun do Masir om i tulun do Kanaan nga' ongoluhoi no dot ouru do louson. 14 Om pointikid-tikid do momoli o tulun di gandum om timungon no di Yusup i tusin di gatang di gandum diri, om ngoyon nondo dau pootodo' do hiri'd walai di raja'. 15 Soira' di nongooyian do tusin o tulun do hilo'd Masir om hilo'd Kanaan; om rikot noddi i tulun do Masir dot id di Yusup, om boros ka diyolo', “Onuwai iyahai'd takanon! Kada' iyahai pologoso' tomod dot apatai. Wonsoyon nopo o nunu nopo i toilaan nu'd momonsoi! Tu' nangaayi' no tusin dahai,” ka diyolo'. 16 Om boros ka di Yusup do suminimbar, “Ondung nooyian kou'd tusin, om igitan no i tayam-tayam dokoyu, om onuan ku indo iyokoyu do taakanon,” ka dau. 17 Om pootodo' ngai' no diyolo' i tayam-tayam diyolo' dot id di Yusup, om onuwai no di Yusup iyolo' do taakanon do pinongolon di kuda', om dumba', om kambing, om sapi', om i kaladai diyolo'. 18 Om toun no kawagu om rikot po iyolo' dot id di Yusup, om boros ka diyolo', “A' no dahai milo do lisok-lisokon, oi Tuan do naayi' no o tusin dahai om tayam-tayam dahai nga' diya' ngai' noddi. Om aiso' no o milo dahai'd patahakon diya' suwai nondo ko' tinan po dahai om i tana' dahai. 19 Kada' no kopio iyahai pologoso' dot angapatai. Wonsoyo' nopo o nunu nopo i toilaan nu'd momonsoi. Kada' pologoso' do gumouton tomod ilo tana' dahai. Bolion nogi' iyahai om ilo tana' dahai, do maan do tolon do taakanon. Sumiliu nopo iyahai do turipon di raja', om tana' dahai nga' iyau no o sumanganu. Nga' onuwai po iyahai do gandum om a' i' iyahai angapatai, om onuwai iyahai do tonomon do potonomon do hilo'd tumo dahai,” ka diyolo'. 20 Om bolio' ngai' noddi di Yusup i tana' do tulun do Masir do pinosongonuan dau di raja' do Masir. Om pointikid-tikid do tulun do Masir nga' a' no milo dot a' pinapadagang di tana' dau, tu' adalaan no kopio i pononglous. Om koinsanai nopoddi i tana' do tulun do Masir do nasanganu di raja'. 21 Om siliho' ngai' no di Yusup do turipon i tulun do pointongkop di pomogunan do Masir. 22 Iri po tana' do dong imam ot a' di Yusup noboli, tu' a' i' minog do padagang iyolo'd tana' tu' onuan i' iyolo' di raja' do gadsi' do pomoli diyolo'd taakanon. 23 Om boros ka di Yusup dot id tulun do Masir, “Baino' nopoddi om nongoboli ngai' ku no o tinan dokoyu om koinsanai do tana' dokoyu do pinosongonuan ku di raja'. Om ongoi kou nondo anu diti linsou do maan dokoyu'd tonomon do hilo'd tumo dokoyu. 24 Om koomot kou nopondo om patahakon no di raja' o sompihopod di tomot dokoyu. Om iri nopondo toolu' om maan dokoyu'd tonomon, om maan dokoyu di sompiiyon dokoyu dot akanon,” ka di Yusup. 25 Om boros ka diyolo' do suminimbar, “Osonong ko no dot id dahai, oi Tuan; iya' po o minamasi dahai, om iyahai nopodti om sumiliu nod turipon di raja',” ka. 26 Om wonsoyo' no di Yusup ot iso' o toturan do hilo'd pomogunan do Masir, do sompilimo nopo di tomot diyolo' om mositi' no do patahakon dot id raja'. Om gisom piya do baino' nga' iyo kasai' iddi o toturan do hilo'. Om iri po i tana' do dong imam ot a' kohompit do tana' di nasanganu do raja'.

Pinokianu di Yakub dit id Tohuri no Kopio

27 Iri nopo tulun dot Israil om minundorong do hilo'd Masir do hiri'd watas do Gusin; om nosiliu'ddi iyolo' do tulun do kaya' om tangaanak diyolo' nga' guminumu'. 28 Koloidon nopo di Yakub do poundorong do hilo'd Masir om hopod om turu' o toun, do gisom do nokorikot do hatus om apat nohopod om turu' o toun dau. 29 Tontok di motingkapatai no i Yakub om lohowo' no dau i Yusup, i tanak dau, om boro-boros nod, “Pakamao' ino palad nu do hiti'd piolitan diti poo ku om sumumpa' nogindo dot a' oku diya' lobongon do hiti'd Masir. 30 Nga' lobongon oku no diya' do hilo'd pinamalabangan di taki-aki nu; posoliwanon oku no do mantad hiti'd Masir om lobongon oku no do hilo'd pinamalabangan diyolo',” ka dau. Om boros ka di Yusup do suminimbar, “Wonsoyon ku i' o miagal dino pinoboros nu,” ka dau. 31 Om boros ka di Yakub, “Sumumpa' no dot id doho' do wonsoyon nu o miagal diri,” ka dau. Om sumpa' noddi i Yusup, om pongunsikou no i Yakub do hiri'd toodopon dau.

Kinawansayan 48

Binarakatan di Yakub i Ipraim om i Manasi

1 Alaid-laid noddi om korongou no di Yusup do sumakit i tapa' dau. Om angatai no di Yusup i duwo o tanak dau'd kusai, i Manasi om i Ipraim, om ongoi no iyolo' kakap di Yakub. 2 Om tontok di nosunudan i Yakub do nokorikot i Yusup, i tanak dau, do mongoi kakap dau om pomilogo-logot no i Yakub do tuminungag om irikau no do hiri'd toodopon dau. 3 Om boros ka di Yakub dot id di Yusup, “Minintalang o Kinorohingan, it Agayo Kuasa', dot id doho' di hilo'd Lus, i hilo'd tana' do Kanaan, om binarakatan oku dau. 4 Boros ka dau dot id doho', 'Onuan ku indo iya' do tangaanak dot ogumu' om sinakagon nu nopondo om osiliu dot ogumu' o bansa'; om patahakon ku nondo di sinakagon nu iti pomogunan diti do maan do diyolo'd songonuon do gisom dot alaid,' ka do Kinorohingan,” ka dau. 5 Om boro-boros po kawagu i Yakub, boros ka dau, “Oi Yusup, ilo' nopo duwo tanak nu'd kusai, i nosusu do hiti'd Masir dit okon oku po ko' hiti, om doho' no om iyoho' o sanganak diyolo'; iyo' Ipraim nopo di Manasi dilo' om poiyoon ku nopo di Rubin om i Simion. 6 Ondung kianak ko kawagu do kusai, om iyolo' nopo om a' no pohompiton do tangaanak ku; tungkusan nopondo diyolo' om mantad no dot id di Ipraim om i Manasi. 7 Kapamansayan ku nopo do miagal diti nga' pongobi' ku di Rasil, i tina' nu. Tu' tumongob oku no kopio do tontok di napatai iyau do hilo'd tana' do Kanaan, i hilo'd somok dot Iprata, do tontok di hilo' oku pod tanga'd ralan do muli' do mantad hilo'd Misopotamia. Om lobongo' ku noddi iyau do hilo'd tisan di ralan do kumaa do hilo'd Iprata,” ka dau. (Iprata nopod baino' om roitan do Baitlahim.) 8 Om soira' di nokito di Yakub i tangaanak di Yusup diri, om ponguhot no iyau, “Isai ilo tangaanak dilo'?” ka dau. 9 Om boros ka di Yusup do suminimbar, “Iyolo' no i tangaanak ku'd kusai, i tinahak do Kinorohingan doho' do hiti'd Masir,” ka dau. Om boros ka di Yakub, “Angatai iyolo'd hiti'd doros ku, om barakatan ku i' iyolo',” ka dau. 10 Om a' no kokito no i Yakub tu' molohing no kopio iyau, om a' no atalang no ot okito dau. Om ngoyo' no di Yusup poinsomoko' di Yakub i tangaanak dau, om gopuso' no di Yakub iyolo' om tungubai no dau. 11 Om boros ka di Yakub dot id di Yusup, “A' ku no daa piimanan do kosolowot oku po diya', nga' nogompi' oku poddi do Kinorohingan gisom dot iti piya tangaanak nu nga' nokokito oku po,” ka dau. 12 Om ngoyo' noddi di Yusup i tangaanak dau di poingkibit di Yakub, om otud no i Yusup do tuminuku' do hiri'd toguang di Yakub. 13 Om pohirio' no di Yusup id dogibangan di Yakub i Ipraim, om i Manasi no om hiniri dau id dawananan di Yakub. 14 Nga' pikorowoliso' no di Yakub i longon dau, om iri nopoddi longon dau'd wanan nga' pinakama' di tulu di Ipraim, do mulong piya dot iyau it id domulok, om iri no longon di Yakub do gibang om pinakama' dau do tulu di Manasi, it id dotuo. 15 Om barakatai noddi dau i Yusup do poingkaa: “Iri no i Kinorohingan, i tukuon di komolohingan ku, i Abraham om i Isak, o minomogompi' doho' do gisom do baino'. 16 Iyau no i moloikat, i pinopoidu' doho' do mantad id koinsanai'd kosusaan ku, om pokionuon ku no o Kinorohingan do mamarakat do tangaanak diti! Om maha' daa do poimpasi kasai' o ngaran ku, om i ngaran di komolohingan ku i Abraham om i Isak, dot iti tangaanak diti o manampasi! Maha' daa om gumumu' o tangaanak diyolo' om ogumu' o sinakagon diyolo'!” ka dau. 17 Om a' daa'ddi kopio orohian i Yusup do nokokito do poingkama' o longon do wanan di tapa' dau di tulu di Ipraim, om ngoyo' no daa di Yusup powoliho' i longon di tapa' dau, do mantad hiri'd tulu di Ipraim, om pakamaon daa'ddi dau di tulu di Manasi. 18 Nga' boros ka di Yusup dot id tapa' dau, “Okon i' ko' miagal dino, oi apa'. Diiya iti tanak dot id dotuo; pakamao' ino longon nu'd wanan do hiti'd tulu dau,” ka dau. 19 Nga' a' i' minumboyo' i tapa' dau, boros ka dau, “Koilo oku i', oi ondu', oilaan ku i'. Sinakagon nopondo di Manasi om sumiliu do bansa' dit abantug. Nga' okon-okon pondo o sinakagon dilo tobpinai dau dot id domulok, nga' osiliu kopio do bansa' dit abantug ko' mantad di sinakagon di tobpinai dau dit id dotuo,” ka dau. 20 Om barakatai no di Yakub i Ipraim om i Manasi do tontok do tadau'ddi do poingkaa, “Soira' nopondo do mamarakat do tulun o tulun dot Israil om oroitan no o ngaran dokoyu. Boros ka nondo diyolo' om, 'Maha' daa om poiyoon ko do Kinorohingan di Ipraim om i Manasi,' ka nondo diyolo',” ka dau. Om iyo noddi i Yakub do pinopogulu di Ipraim om okon nogiddi ko' i Manasi. 21 Om boros kaddi di Yakub dot id di Yusup, “Okito nu i' dot oruhai oku no dot apatai, nga' Kinorohingan nopo om manud-tanud i' diya' om popouli' kawagu diya' do hilo'd pomogunan di komolohingan nu. 22 Iya' no o poonuan ku di pomogunan do Sikim, om okon i' ko' i piro-piro o tobpinai nu, tu' tana' nopoddi om oluhub, i naanu ku do mantad id tulun dot Amori, dot i gayang om pana' ku o pinanganu ku,” ka di Yakub.

Kinawansayan 49

I Pinoboros di Yakub dit id Tohuri No

1 Om lohowo' ngai' no di Yakub i tangaanak dau'd kusai, om boro-boros no iyau do poingkaa, “Timung kou nod hiti'd doros ku, om sunudan ku i' iyokoyu ondung nunu ot osiliu dot id dokoyu do koimbagu: 2 Timung kou no, oi tangaanak di Yakub; om mokinongou kou no. Pokinongou kou no do poboroson di Israil, i tapa' dokoyu. 3 Oi Rubin, i tanak ku do kotuahan, iya' no i kokorisan ku, it abantug kopio om okoris kopio dot id pogialatan do koinsanai di tangaanak. 4 Iyo ko po do luyud di magampad, nga' okon indo ko' iya' it agayo kopio, tu' nampahu' nu i' i tondu' do panakasawo ku om sinosomu' nu i toodopon do tapa' nu. 5 Iyo' Simion nopo di Liwi om miobpinai. Om pomonsoi no diyolo'd karaaton i rapo-rapo diyolo'. 6 A' oku i' humompit di piburungan diyolo', a' oku i' monongkuro di pipakatan diyolo', tu' mamatai iyolo'd tulun do tontok dit otogod iyolo', om monipu' iyolo'd gakod do sapi' di tontoluhan do maan do karamayan. 7 Ousung no i kototogod diyolo', tu' adalaan no kopio o korongito', ousung no i koburonguso' diyolo', tu' pokoruol kopio. Pogitotongkiadon ku nondo iyolo' do pointongkop do pomogunan dot Israil. Potompiason ku nondo iyolo' dot id pogialatan di tulun do hilo'. 8 Oi Yohuda, iya' no o royohon di piro-piro o tobpinai nu. Om kotolon nu i pisangod nu. Om tobpinai nu nga' tumuku' ngai' nondo dot id toguang nu. 9 I Yohuda nopo om miagal do singa, kapanabpo po iyau do nintorusan om gumuli' no iyau dot id luang dau, om lumatan nondo om lumii. Aiso' no o tulun do kasaap do mongoi pomigangau dau. 10 I Yohuda no o koigit di sukud do pomorinta', om sinakagon no dau o momorinta' do gisom dot alaid. Om oinsanan nopondo o bansa' do rumikot do paatod do sukai om tumuku' do minsiriba' dot id toguang dau. 11 Pokogoson dau i tanak do kaladai dot id guas dot anggur do hiri'd guas dot anggur dit osonong kopio. Pupuan dau i pakayan dau do hiri'd waig dot anggur di miagal pod raha' karagang. 12 Aragang po o mato dau tu' nokoinum iyau do waig dot anggur, om nipon dau nga' opurak po tu' nokoinum iyau do susu. 13 I Sibulon nopo om momogun-mogun nondo do hilo'd tisan do rahat. Pododompiran nondo do kapal do rahat i koiyonon dau. Kogisomon nopondo di dau'd watas om korikot do hilo'd Sidon. 14 I Isakar nopo om iyo nod kaladai kokoris, i poinglii dot id piolitan do kantung do pakol. 15 Nga' noilaan i' dau dot osonong kopio i kinoiyonon diri om olumis kopio i pomogunan diri. Om tumongkud nondo iyau do mamabo di binabo dau om asansagan iyau do kumaraja' do miagal po di turipon. 16 I Dan nopo om sumiliu do pomorinta' do tulun dau. Om osiliu nondo iyolo' do miagal di payat dot Israil do suwai. 17 I Dan nopo om miagal dot iso' o tulanut do hiri'd tisan do talun-alun, i tulanut do hiri'd tisan do ralan, i tulanut dit opodos kopio o tindukon i moninduk do tatad do kuda', om gowoi pondo om kataam i poinsakai di kuda'. 18 Poingandad oku no di koposion do mantad id diya', oi TUHAN. 19 I Gad nopondo om saapon do mananakau, nga' gumuli' ko indo do mongoi pomogusa' diyolo'. 20 Tana' nopondo di Asor om poposuni do taakanon dit ongosonong. Iyau no o milo do manahak do taakanon di milo do posurungon do raja'. 21 I Naptali no om miagal do tambang dit osimbayan do mintangkus, om ongolumis kopio o tangaanak dau. 22 I Yusup nopo om miagal do guas dot anggur dit orombung, i poinsuni dot id toning do tudan do waig, om agayo o koroloyon do raan. 23 Ongorongit tomod i pisangod dau do sumaap dau, om haro o pawakasan diyolo'd pana' om haro o pana' diyolo' do momogusa' dau. 24 Nga' poirrindog kasai' i' i pana' di Yusup, om okoris kasai' o longon dau tu' pokorison i' di sinundu do Kinorohingan dit Okoris Kopio, i Kinorohingan di Yakub, i Gompomogompi', om i Mongintirung do tulun dot Israil. 25 Iri i Kinorohingan di tapa' nu o monguhup diya' i Kinorohingan dit Agayo Kuasa' o mamarakat diya' do rasam do mantad hilo'd tawan, om waig do mantad id saalom do tana', om tangaanak om tayam-tayam. 26 Om barakatan ko do Kinorohingan do gandum om bunga, om koinsanai dit ongosonong do mantad hilo'd konulu-nuluan dit id gulu po kopio. Maha' daa om potuntugon o koinsanai do barakat diti dot id tulu di Yusup, om hiri'd turos dau, iyau it agayo kopio dot id pogialatan do tobpinai dau. 27 I Binyamin nopo om miagal do toni dit orongit. Monikid kosuabon nopo om monikid sosodopon do mamatai om mangakan iyau dit aanu dau,” ka di Yakub. 28 Iti no i hopod om duwo o payat dot Israil, om iti no i pinoboros di tapa' diyolo' do tontok di minoro-boros iyau do minongintod do pointikid-tikid di tangaanak dau.

Napatai om Linobong i Yakub

29 Om bilinai noddi di Yakub i tangaanak dau do poingkaa, “A' no alaid om mongoi oku no sugku' di komolohingan ku di nangapatai. Om lobongon oku no di hilo'd pinamalabangan di taki-aki ku dot id suang di luang do nuluhon do hilo'd tana' di Ipron, i tulun do Hit, 30 i hilo'd Makpila, i ponong id koulayon do mantad id Mamri, i hilo'd tana' do Kanaan. Iri nopo luang do nuluhon diri om i tana'ddi om binoli di Abraham do mantad id di Ipron, i tulun do Hit, do maan do kalabangan. 31 Hilo' no o pinamalabangan diyolo' di Abraham om i Sara, i sawo dau; om hilo' nogi' o pinamalabangan di Isak om i Robika, i sawo dau; om hilo' nogi' o pinamalabangan ku di Lia. 32 Iri nopo tana'ddi om i luang do nuluhon do hiri, nga' binoli do mantad id tulun do Hit. Om lobongon oku no iyoho' do hilo',” ka dau. 33 Om kongoboros poddi di Yakub i bilin dau dot id tangaanak dau, om lii no kawagu i Yakub, om kapatai noddi iyau.

Kinawansayan 50

1 Om haba' nopo i Yusup do tuminabpo do tinan di tapa' dau, om ihad no do mikuwo'd tuminungub do rabas di tapa' dau. 2 Om ponuhu' noddi i Yusup do mangapur di rata' di tapa' dau. 3 Kosoruan nopo do koloidon do mangapur do rata' om apat nohopod o tadau. Om pogihadai no di tulun do Masir i Yakub do solinaid do turu' nohopod o tadau. 4 Om katalib poddi i kinopogihadan diri om boro-boros no i Yusup di pagawai di raja', boros ka dau, “Poboroson no doho' iti dot id raja': 5 'Tontok dit oruhai no dot apatai i tapa' ku, om sinuhu' oku dau do sumumpa' dot id dau do pamalabangan ku nopo dau dot apatai iyau om hiri'd lobong di nokosodia' no dau do hilo'd tana' do Kanaan. Iyo nopoddi, om pabanaron oku no do mongoi pomolobong dilo tapa' ku do hilo', om gumuli' oku indo kawagu do hiti dot olobong ku iyau, ka dau,' kanto dokoyu,” ka di Yusup. 6 Om boros ka di raja' do suminimbar, “Ngoyon nopo lobongo' ilo tapa' nu do miagal di nookunan nu,” ka dau. 7 Om ngoyo' noddi di Yusup lobongo' i tapa' dau. Om oinsanan nopoddi i pagawai di raja', om i molohing-lohingon do hiri'd walai di raja', om i tulun dit ongkipangkat do hilo'd Masir do tuminanud di Yusup. 8 Om i sompiiyon di Yusup, om i tobpinai dau, om i koobpinayan dau'd suwai nga' tuminanud ngai' nogi' di Yusup. Iri po i tangaanak diyolo' dit ongokoro' po, om i tayam-tayam diyolo' o noolu' do hilo'd Gusin. 9 Om i soudor do songinsakai'd korita'-kuda' om i songinsakai do kuda' nga' tuminanud nogi', om ogumu' tomod diri iyolo' do mogiwoyo-woyo'. 10 Om soira' di nokorikot iyolo' do hiri'd pamagamasan do gandum di hilo'd Atad, i ponong id koulayon do mantad id Bawang do Yordan, om hilo' no iyolo' dot alaid tomod do minglompud do mihad. Om papaharo noddi i Yusup do pagadatan do mogihad do turu' o tadau do koloido'. 11 Om soira' di nokito iyolo' di tulun do Kanaan do minogihad do hiri'd Atad, om boros ka diyolo', “Ohiyo no kopio ilo tulun do Masir do mogihad!” ka. Om iri noddi o kinopomungaranan diyolo' di kinoiyonon diri dot Abil- Misraim. 12 Om iyo noddi i tangaanak di Yakub do tuminanud di pinobilin di Yakub diyolo'. 13 Om igitai no diyolo' i rata' di Yakub do hilo'd Kanaan om lobongo' no do hiri'd luang do nuluhon di hilo'd Makpila, i ponong id koulayon do mantad id Mamri, i tana' di binoli di Abraham do mantad id di Ipron, i tulun do Hit, do maan do kalabangan. 14 Om kolobong poddi di Yusup i tapa' dau, om poguliai no dau do hilo'd Masir do miwoyo' di piro-piro o tobpinai dau om koinsanai di tulun do suwai di tuminanud do minongoi pomolobong di tapa' dau.

Minonginsasamod i Yusup di Tongotobpinai Dau

15 Om di nopoddi napatai i tapa' diyolo', om boros ka di tobpinai di Yusup, “Poingkukuro toko' nondo dot otogod kasai' no i Yusup dati' om momusorou no iyau do sumuli' dati' di nongowonsoi toko' dot araat dot id dau di gulu po?” ka diyolo'. 16 Om porikoto' noddi diyolo' o boros diti dot id di Yusup, boros ka diyolo', “Di nopo dit a' po napatai i tapa' toko' 17 om minonuhu' iyau dahai do popoboros dot id diya' do poingkaa, 'Ompunai no i nongowonsoi di tobpinai nu dit araat kopio dot id diya',' ka dau. Iyo nopoddi, om pokionuon no daa dahai do mangampun ko do koinsanai di kasalaan do nowonsoi dahai, iyahai i susuhuon do Kinorohingan di tukuon di tapa' nu,” ka. Om ihad nopo i Yusup do nokorongou di boros diyolo'ddi. 18 Om rikot ngai' noddi i tobpinai di Yusup dot id di Yusup, om tuku' no iyolo' dot id toguang dau, mikuwo'd minoro-boros do poingkaa, “Iyahai nopodti om turipon nu no,” ka. 19 Nga' boros ka di Yusup dot id diyolo', “Kada' kou kooris, tu' okon oku i' ko' Kinorohingan. 20 Tu' minogiupakat kou daa do momonsoi dot araat dot id doho', nga' siniliu i' do Kinorohingan iri dot osonong, tu' iri no i nongosiliu di gulu poddi o nakapasi do tulun dot ogumu', i poimpasi po do gisom do baino'. 21 Kada' kou katangkabo. Tu' gompion ku i' iyokoyu om i tangaanak dokoyu,” ka dau. Iyo noddi o boros di Yusup do pinoposimbayan do ginawo diyolo', tu' osonong i' o boros dau om nokoinsasamod do ginawo diyolo'.

Kinapatayon di Yusup

22 Om poingiyon poddi i Yusup do hilo'd Masir do poinsugku' di koobpinayan dau; om kapatai noddi i Yusup di hatus om hopod o toun dau. 23 Om nokokito po iyau di piro-piro o manangaki di Ipraim. Om naanu po dau i tangaanak di Makir, i manangaki di Manasi, do siniliu dau do dau'd tanak. 24 Om boro-boros no iyau dot id tobpinai dau, “Oruhai oku noddi do matai, nga' Kinorohingan i' o migompi' kasai' dokoyu om momoyo' dokoyu do sumoliwan do mantad hiti'd pomogunan diti do kumaa do hilo'd tana' di pinabatos dau do mikuwo'd sumpa' dot id di Abraham, om id di Isak, om id di Yakub,” ka dau. 25 Om suhuo' noddi di Yusup i tulun do bansa' dau do sumumpa'. Boros ka dau, “Pamatos kou no dot id doho'. Soira' nopondo do woyoon kou'd Kinorohingan do kumaa do hilo'd pomogunan diri, om igitan no dokoyu o rata' ku,” ka dau. 26 Om kapatai noddi i Yusup do hilo'd Masir di hatus om hopod o toun dau. Om kopuro' noddi diyolo' i rata' di Yusup, om posuango' no dot id lungun.

Kinosoliwanan 1

Ninggorit o Tulun dot Israil do hilo'd Masir

1 Tangaanak nopo di Yakub di tuminanud dau do minongoi do hilo'd pomogunan do Masir do mogitonggoi-tonggoi di sompiiyon diyolo' om: 2 i Rubin, i Simion, i Liwi, i Yohuda, 3 i Isakar, i Sibulon, i Binyamin, 4 i Dan, i Naptali, i Gad, om i Asor. 5 Kogumuon nopo do sinakagon di Yakub om turu' nohopod o tulun. I Yusup nopo om nokopogulu mantad no do hilo'd Masir. 6 Alaid noddi om kapatai no i Yusup om i tobpinai ngai' dau om koinsanai di tulun di rampam-rampam dau. 7 Nga' guminumu' tomod diri i sinakagon diyolo', i tulun dot Israil, om oruhai po om koponu' nod sinakagon diyolo' i pomogunan do Masir tu' muhang- ruhang nopo o kogumuo' do sinakagon diyolo'. 8 Alaid noddi om timpuun nod momorinta' do pomogunan do Masir o songulun o raja' di kawawagu, it a' i' nokoilo-ilo do pasal di Yusup. 9 Om boros ka di raja' dot id rayat dau, “Adalaan noddi kopio kogumu' iti tulun dot Israil om ongokoris po kanogi' iyolo', om sumiliu i' iyolo' do koligagaanan toko'. 10 Sokiro-kiro nopo do haro o pisangadan om mongoi i' doti'ndo iyolo' ponokiuhup di pisangod do sumaap dati', om mogidu' nondo iyolo' do mantad hiti'd pomogunan diti. Nga' mogihum toko' nogi' kopio'd ralan do mangantob diyolo' do sumapou,” ka dau. 11 Om iri noddi o nokopomilian di tulun do Masir do piro-piro o mandur do monginggorit di tulun dot Israil. Om sinansagan diri i tulun dot Israil do momonsoi di bandar do Pitom om Raamsis, i bandar do poopian do rapo-rapo di don sumasangod do don raja'. 12 Nga' maha' nogi' di pawagaton kopio di tulun do Masir o ponginggorit diyolo' di tulun dot Israil, om okon nogi' do muhang-ruhang o kogumuo' diyolo' om modu-sodu' o kotongkopon diyolo' do hiri'd pomogunan diri, gowoi poddi om moddosi i tulun do Masir di tulun dot Israil. 13 Om okon nogiddi do pinadalaan kopio di tulun do Masir do monginggorit i tulun dot Israil, 14 om nudipon tomod di tulun do Masir o koposi-posion diyolo'. Om sinansagan diyolo' i tulun dot Israil do kumaraja' dit angawagat kopio, tu' sinuhu' iyolo' do momonsoi'd bata' do maan do walai, om sinuhu' do momonsoi do mogisuayan o karaja' do hiri'd koumaan diyolo'. Om aiso' no o kosianan diyolo' dot id tulun dot Israil. 15 Om boro-boros noddi i raja' do Masir dot id di Sipra om id di Pua, i duwo bidan di moninikou di tongoondu' dot Ibrani do tontok do mogkosusu. 16 Boros ka di raja' do Masir dot id duwo o bidan diri, “Mongoi kou nopo ponikou di tongoondu' dot Ibrani di mogkosusu iyolo', om soro-sorohon no kopio dokoyu iti: kusai nopo i tanak om patayon no! Nga' tondu' nopo om pologoson id poimpasi,” ka dau. 17 Nga' moddosi i' do Kinorohingan i duwo o bidan diri om a' i' diyolo' tinanud i boros di raja'. Pinologos i' diyolo' do poimpasi i tangaanak do kusai. 18 Om lohowo' noddi di raja' i duwo o bidan diri om uhoto' no dau. Boros ka dau, “Nokuro tu' pologoson dokoyu do poimpasi i tangaanak do kusai?” ka dau. 19 Om boros ka diyolo' do suminimbar, “Iri nopo tongoondu' dot Ibrani om a' i' miagal di tongoondu' do Masir, tu' iyolo' nopo om osonong i' do mogkosusu; a' po iyolo' orikatan do bidan do papaanak om asawa' no i ragang,” ka diyolo'. 20-21 Om osonong iddi o winonsoi do Kinorohingan dot id duwo o bidan diri, om nonuan dau iyolo' do sinakagon, tu' nooris i' iyolo' do Kinorohingan. Om iri'ddi tulun dot Israil nga' mumu-gumu' nopo om muhang-ruhang o kokoriso'. 22 Om poboroso' po kawagu di raja' o ponuhuan do miagal diti dot id koinsanai di rayat dau, “Koinsanai di tangaanak do kusai di tulun dot Ibrani di wagu po kosusu om mositi' no do pataamon do hilo'd Bawang do Nil, nga' iri nopo tangaanak do tongoondu' om pologoson ngai' i' do poimpasi,” ka dau.

Kinosoliwanan 2

Kinosusuon di Musa

1 Tontok nopo do maso'ddi om haro o songulun o kusai do mantad id payat do Liwi do minangawin do tondu' di mantad i' dot id payat do Liwi. 2 Om paganak noddi i tondu'ddi dot iso' o kusai. Om soira' di nokito dau dot olumis kopio i tanak dau, om lisoko' no dau iyau do solinaid do tolu o tulan. 3 Nga' soira'ddi dit a' dau milo do lisokon i tanak, om panganu no iyau do balatak di bundusan do winonsoi, om sorokoto' no dau iri do tir om a' i' osuangan do waig. Om posuango' noddi dau i tanak diri do hiri'd balatak om igitai no do hiri'd bawang om poiliho' no do hiri'd rolot di bundusan do hiri'd tisan di bawang. 4 Om iri nopoddi i taka' di tanak diri om miningkakat do hiri'd sodu-odu' do miontong ondung poingkuro ot osiliu dot id tadi' dau'ddi. 5 Om sondot no i tanak do tondu' di raja' do hiri'd bawang diri do minongoi podsu', do daamot di piro-piro o susuhuon dau'd tongoondu' do mimpanau do hiri'd tisan di bawang. Nga' sigog id kokito di tanak do raja' i balatak do hiri'd rolot di bundusan. Om suhuo' no dau o tiso' di susuhuon dau'd tondu' do mongoi panganu di balatak. 6 Om ukabai noddi di tanak di raja' i balatak, om kokito no dau o tanak do kusai do hiri'd suang. Om mihad-ihad i tanak, om kosianai noddi iyau di tanak diri. Boros ka dau, “Iti nopo om tanak do tulun dot Ibrani,” ka dau. 7 Om uhoto' noddi di tobpinai di tanak diri i tanak do raja', boros ka dau, “Orohian i' tuu daa o tanak do Raja' do mongoi oku pogihum do tondu' dot Ibrani do posusu diti tanak?” ka dau. 8 Om boros ka di tanak do raja' do suminimbar, “Orohian oku i'. Ongoi nopo pogihum,” ka dau. Om pamanau no i sumandak diri do minongoi pomolohou di tina' di tanak. 9 Om boro-boros no i tanak do raja' dot id molohing diri, boros ka dau, “Ngoyo' ilo tanak om maan no doho' posusuo' om godsian ku indo iya',” ka dau. Om tanggayai noddi di molohing i tanak om posusuo' no dau. 10 Om maha' dit agayo-gayo noddi i tanak om ngoyo' no di molohing di tanak pootodo' i tanak diri do hiri'd tanak di raja'. Om siliho' noddi di tanak do raja' i tanak diri do tanak dau. Om boros ka dot id suang do ginawo di tanak do raja'ddi, “Pungaranan ku dot i Musa iti tanak tu' pinotindal ku i' do mantad id waig,” ka.

Minogidu' i Musa do Kuminaa Hilo'd Midian

11 Tontok di nosukod noddi i Musa, om ongoi no iyau kakap di bansa' dau, iri no i tulun dot Ibrani. Om kokito no dau do pinsansagan po tomod iyolo' do kumaraja' dit angawagat. Om nokito nogi' dau o songulun o bansa' do Masir do minamatai do songulun o bansa' dot Ibrani, i bansa' di Musa. 12 Om pikoroontong no i Musa dot id posorili' dau, om soira' di nokito dau dot aiso' o tulun do kokito, om patayo' no dau i tulun do Masir om lisoko' no dau i rata' do hiri'd pasir. 13 Tontok di minongoi iyau kakap kawagu di tadau kawagu om kokito no iyau do duwo o tulun dot Ibrani do miumang. Om boros ka dau dot id tulun di nakasala', “Nokuro tu' mumang ko do sompi' ko' tulun dot Ibrani?” ka dau. 14 Om boros ka di tulun do suminimbar, “Isai o pinoposiliu diya' do pomorinta' om gompomutus dahai? Maan oku po daa diya' patayo' do miagal di tulun do Masir tu' pinatai nu?” ka dau. Om moddosi diri i Musa tu', “Noilaan i' pama do tulun i winonsoi ku'ddi,” ka dot osorou dau. 15-16 Om soira' di nokorongou i raja' di nosiliu do miagal diri, om umbal no daa iyau do mogihum do ralan do mamatai di Musa. Nga' poggidu' no i Musa om ongoi no iyau iyon do hilo'd pomogunan do Midian. Iri nopo imam do hilo'd Midian, i roitan dot i Yitro om kianak do turu' o tongoondu'. Insan tadau, di poirikau i Musa dot id toning do torobong, om rikot no i turu' o tanak di Yitro do tongoondu' do minongoi panganu di waig do posuangon di poiinuman di dumba' om kambing di tapa' diyolo'. 17 Nga' haro'ddi o piro-piro do gompomogompi'd dumba' do suwai do minongoi ponguyung di tangaanak di Yitro. Om ngoyo' noddi di Musa uhupai i tongoondu'ddi om poinumo' ngai' no dau i tayam-tayam diyolo'. 18 Om soira' di nokoguli' iyolo' do hiri'd tapa' diyolo' om uhoto' no iyolo' di tapa' diyolo', “Nokuro tu' osopung kopio kou do nokouli' baino'?” ka dau. 19 Om boros ka diyolo' do suminimbar, “Haro o tulun do Masir do minongintirung dahai do mantad id gompomogompi' do dumba' di suwai. Om iyau i' o minonimbauk di waig om pinopoinum di tayam-tayam toko',” ka diyolo'. 20 “Hinonggo noddi ino tulun?” ka di Yitro do minonguhot di tangaanak dau. “Nokuro tu' tinongkiadan dokoyu'd hilo' ino tulun? Ngoyo' dokoyu lohowo' iyau om potorungakon i' dati'd makan,” ka dau. 21 Om korohiai noddi i Musa do mundorong do hiri, om pokowinai nod i Yitro di Musa i Sipora, i tanak dau'd tondu'. 22 Om paganak noddi i Sipora, om kusai o tanak dau. Om poingkaa diri ot osorou di Musa, “Iyoho' nopodti om sompogunan i' do hiti'd pomogunan diti,” ka. Om iri noddi o kinopomungaranan dau di tanak dau'ddi dot i Girsom. 23 Piro-piro noddi o toun do mantad diri, om kapatai no i raja' do Masir. Nga' maso po di tulun dot Israil do songodoi-odoi dot oinggoritan do siniliu'd turipon, om minggiak poddi iyolo' do mokitulung. Om korikot noddi dot id Kinorohingan i giniakan diyolo'. 24 Om pinokinongou i' do Kinorohingan i giak diyolo' om nosorou i' dau i batos dau dot id di Abraham, om id di Isak, om id di Yakub. 25 Om nokito i' dau i tulun dot Israil do siniliu'd turipon, om monongkoilo iddi iyau diyolo'.

Kinosoliwanan 3

Linohou do Kinorohingan i Musa

1 Insan o tadau, di maso di Musa do madtamong di dumba' om kambing di Yitro, i tiwanon dau, it imam do hilo'd Midian, om woyoo' no dau i tayam-tayam diri do duminarapas di tana' do kowotuan, om korikot no iyau do hilo'd Sinai, i nuluhon dot olidang. 2 Om hilo' no i moloikat do Tuhan do minintalang dot id di Musa do miagal do sinikit do tapui do hiri'd tanga' di bulungkut. Om okito no kopio di Musa do molob-ngolob o tapui do hiri'd bulungkut nga' a' indo sumorob i bulungkut. 3 “Suwai-suwai iddi kopio iti,” ka dot osorou dau. “Nokuro malo' tu' a' osorob ilo bulungkut? Nga' mongoi oku nogi' kopio ontong do hilo'd somok dilo',” ka dot osorou dau. 4 Om soira' di nokito'd Tuhan do minsomok i Musa di kinoiyonon diri, om pomolohou no o Tuhan do mantad hiri'd tanga' di bulungkut, “Musa! Musa!” ka dau. “Hooi, diiya oku i',” ka di Musa do suminimbar. 5 Om boros kad Kinorohingan, “Kada' no insomok. Iduwo' ino kasut nu tu' iti nopo tana' do kinoingkokoton nu om olidang. 6 Iyoho' no i Kinorohingan do tukuon di komolohingan nu, i Kinorohingan di Abraham, om i Isak, om i Yakub,” ka dau. Om sompono' nod Musa o rabas dau tu' ooris iyau do montong do Kinorohingan. 7 Om boro-boros noddi o Tuhan do poingkaa, “Nokito ku no i koinggoritan do tulun ku do hilo'd Masir. Norongou ku no iyolo' do minggiak do mokilabus do mantad id tulun di monginggorit diyolo'. Om oilaan ngai' ku i' i koinggoritan diyolo'. 8 Om iri noddi o kinolintuhunan ku tu' mongoi oku palabus diyolo' do mantad id longon do tulun do Masir, om momoyo' oku diyolo' do sumoliwan do mantad id pomogunan diri do kumaa dot id iso' o pomogunan dit agayo. Tana' nopo do pomogunan diri om oluhub om oruak, i pomogun-mogunan do tulun do Kanaan, Hit, om Amori, om Poris, om Howi, om Yobus do dinondo. 9 Norongou ku no i tihad do tulun ku om nokito ku nogi' i ponginggorit di tulun do Masir diyolo'. 10 Om suhuon ku'ddi iya' do mongoi solowot di raja' do Masir, om owoyo' nu i' i tulun ku do sumoliwan do mantad id pomogunan diri,” ka dau. 11 Nga' boros kad Musa dot id Kinorohingan, “Isai kopio oku daa giya diti tu' milo do mongoi solowot di raja' om momoyo' di tulun dot Israil do sumoliwan do mantad hilo'd Masir?” ka dau. 12 Om boros kad Kinorohingan do suminimbar, “Moyo-woyo' oku i' diya'. Om soira' nopondo do posoliwanon nu i tulun dot Israil do mantad hilo'd Masir, om sumambayang ko nondo dot id doho' do hiti'd nuluhon diti. Om iri no o koilaan kopio dot iyoho' o minonuhu' diya',” ka dau. 13 Nga' boros kad Musa do suminimbar, “Nga' mongoi oku nopondo solowot di tulun dot Israil om poboroson ku dot 'Sinuhu' oku di Kinorohingan do komolohingan dokoyu do mongoi solowot dokoyu,’ kangku nopo, om monguhot nondo iyolo' doho' dot, ‘Isai o ngaran dau?’ ka, om isai nondo o ngaran do posunudon ku?” ka dau. 14 Om boros kad Kinorohingan, “Iyoho' nopo om IYOHO' I HINO KASAI'. Om poboroson no o poingkaa dot id diyolo', ‘I roitan dot IYOHO' I HINO KASAI' o minonuhu' doho' do minongoi'd hiti'd dokoyu,’ kanto. 15 Om sunudan no i tulun dot Israil dot iyoho' no, i Tuhan i Kinorohingan di tukuon di komolohingan diyolo', i Kinorohingan di Abraham, om i Isak om i Yakub, o minonuhu' diya' do minongoi'd hilo'd diyolo'. Iri no o ngaran ku do gisom do poingompus; om iri nondo o pamarait doho' do koinsanai'd sinakagon di sumusuhut. 16 Ngoyo' ngai' no timungo' i boyoon do tulun dot Israil om sunudan no iyolo' dot iyoho', i Tuhan, i Kinorohingan di tukuon do komolohingan diyolo', i Kinorohingan di Abraham, om i Isak, om i Yakub, o minintalang dot id diya'. Sunudan no iyolo' do nokorikot oku no dot id diyolo', om nokito ku i pingwonsoyon do tulun do Masir dot id diyolo'. 17 Om natantu' ku no do posoliwanon ku iyolo' do mantad hilo'd Masir, i kinoiyonon do pinginggoriton iyolo'. Om angatan ku nondo iyolo' do kumaa do hilo'd pomogunan di kaya' om oluhub --- i pomogunan do tulun do Kanaan, om Hit, om Amori, om Poris, om Howi, om Yobus. 18 Mokinongou indo i tulun ku di poboroson nu dot id diyolo'. Om mongoi ngai' kou nogindo di boyoon do tulun dot Israil solowot di raja' do Masir om poboroson no o miagal diti dot id dau, ‘Nokointalang no dot id dahai o Tuhan, i Kinorohingan do tulun dot Ibrani. Om potumboyoo' no iyahai do mamanau do solinai'd do tolu tadau do kumaa do hilo'd tana' do kowotuan do mongoi patahak do porsombahan di sumbolion dot id Tuhan, i Kinorohingan dahai,’ kanto dokoyu,” ka dau. 19 Om boros ka kawagu do Kinorohingan, “Oilaan ku i' dot a' i' i raja' do Masir potumboyo' dokoyu do mamanau ondung a' iyau sansagan. 20 Nga' pakayon ku indo o kuasa' ku om hukuman ku nondo o pomogunan do Masir om mingwonsoi oku do piro-piro o kosusaan di korolosi kopio do hilo'. Om owonsoi ngai' pondo iri, om potumboyo' nogi' iyau dokoyu do mamanau. 21 Om binsuhuon ku indo i tulun do Masir do momusou dokoyu do gisom do tumongkiad nopondo i tulun ku, om a' indo iyolo' mamanau tomod nopo dot aiso' kopio ot atanggai-tanggayan diyolo'. 22 Pointikid-tikid do tondu' dot Israil om mongoi nondo songkoduwo do hiri'd tulun do Masir, om sumolowot dot isai nopo o tondu' do Masir di poingiyon do hiri'd walai dau, om mokianu nogindo iyolo' di tongoondu' do Masir diri do pakayan, om tamas, om pirok do pongillumis do tinan. Om papakayan nondo di tulun dot Israil iri di tangaanak diyolo'd kusai om tondu', om iyo noddi iyolo' do mononggoi do kakayaan do tulun do Masir,” ka dau.

Kinosoliwanan 4

Nonuan do Kinorohingan i Musa do Kuasa' do Momonsoi'd Koimayaan

1 Om boros kaddi di Musa do suminimbar do Tuhan, “Nga' ondung a' monongkuyaan doho' i tulun dot Israil om a' mokinongou di poboroson ku, om nunu nondo o wonsoyon ku do poboroson no diyolo' dot a' ko minintalang dot id doho'?” ka dau. 2 Om uhoto' noddi iyau do Tuhan, “Nunu ino poingigit nu?” ka dau. “Sukud,” kad Musa do suminimbar. 3 Om boros kad Tuhan, “Poloposo' ino do hilo'd tana',” ka dau. Om poloposo' noddi di Musa i sukud diri, om siliu nori do tulanut, om panangkus no i Musa do mininsodu' di tulanut. 4 Om boros kaddi do Tuhan dot id di Musa, “Ngoyo' igitai o hilo'd pongid tikiu,” ka dau. Om ngoyo' noddi di Musa tabpaai i tulanut, om kosiliu no kawagu do sukud di poingigit dau. 5 Om boros kad Tuhan, “Wonsoyon no o miagal diri do pointalang kopio dot id tulun dot Israil do Tuhan, i Kinorohingan di tukuon di komolohingan diyolo', i Kinorohingan di Abraham, om i Isak, om i Yakub, o minintalang dot id diya',” ka dau. 6 Om boro-boros po kawagu o Tuhan dot id di Musa, “Pokokogo' do hino'd rasuk nu ino palad nu,” ka dau. Om wonsoyo' nod Musa o miagal diri; om soira' di pinokodong di Musa i palad dau, om kitoruol noddi, tu' notongkop po do miagal di tinudu-tudu' dit iyo pod kapas kopurak o palad dau. 7 Om boros kaddi do Tuhan, “Pokokog-kokogo' po ino palad nu do hino'd rasuk nu,” ka dau. Om wonsoyo' noddi di Musa o miagal diri. Nga' soira' di pinokodong dau i palad dau, om notonduli' noddi do miagal di kulit do tinan dau. 8 Om boros kad Tuhan, “Ondung a' iyolo' monongkuyaan diya' ko' a' po oimayaan di koimayaan di koiso', om monongkuyaan nondo kopio iyolo' do kokito di koimayaan do koduwo. 9 Ondung a' po iyolo' monongkuyaan diya' do kokito piya di duwo o koimayaan diri, om ondung a' po kasai' iyolo' mokinongou do poboroson nu, om mongoi no anu do waig do mantad hiri'd Bawang do Nil, om potuntugon i' do hiri'd tana'. Om sumiliu indo do raha' i waig diri,” ka dau. 10 Om boros kad Musa, “A' oku i', oi Tuhan. Kada' oku suhuo'. Tu' a' oku i' oilo do mimboros, om mantad nopo di nokoboro-boros o Tuhan doho' om gisom do dinondo om a' kasai' oku i' koilo do mimboros. A' oku i' kopio iyoho' koilo do mimboros, tu' a' oku abalantas do mimboros om moo' oku po,” ka dau. 11 Om boros kad Tuhan dot id dau, “Isai o minanahak do tulun do kabang? Isai o popobosuk ko' popobobou do tulun? Isai o popoungkalat ko' momolou do tulun? Okon toi ko' iyoho' i' tu' Tuhan? 12 Ongoi nopo do dinondo! Om uhupan ku i' iya' do mimboros, om sunudan tiya' i' ondung nunu ot apatut nu'd poboroson,” ka dau. 13 Nga' boros kad Musa do suminimbar, “A' oku i' kopio, oi Tuhan. Ponuhu' nogi' do tulun do suwai,” ka dau. 14 Om kotogod noddi o Tuhan di Musa, om boro-boros nod, “Poingkuro no i Harun, i tobpinai nu, i tulun do Liwi diri? Oilaan ku i' dot oilo iyau do mimboros. Om dinondo nopodti om mongoi no iyau ruba' diya', om asanangan tomod iyau do kosolowot diya'. 15 Om moro-boros no dau om sunudan no iyau ondung nunu it apatut dau do poboroson. Om uhupan ku indo iyokoyu goduwo om tudukan ku iyokoyu ondung nunu it apatut dokoyu'd poboroson om it apatut dokoyu'd wonsoyon. 16 Iyau nondo o popilombus do boros nu om mogobi' diya' do moro-boros dot id toguang di tulun dot ogumu'. Om iya' nopondo om miagal-agal do Kinorohingan tu' misunud dau ondung nunu it apatut dau'd poboroson. 17 Igitan no iti sukud, tu' iti no o pomonsoi nu do piro-piro o koimayaan,” ka dau.

Guminuli' i Musa do Hilo'd Masir

18 Om guli' noddi i Musa do hiri'd walai di Yitro, i tiwanon dau, om boro-boros no iyau, “Potumboyoo' oku daa do gumuli' do hilo'd koobpinayan ku di hilo'd Masir do mongoi kakap ondung songimpasi po iyolo',” ka dau. Om potumboyoo' no di Yitro i Musa, om boros ka dau, “Sumonong-sonong do mamanau,” ka. 19 Tontok di hilo' pod Midian i Musa, om boros kad Tuhan dot id dau, “Guli' no do hilo'd Masir, tu' nangapatai ngai' no i mamatai daa diya',” ka. 20 Om angatai no di Musa i sawo dau om i tangaanak dau'd kusai, om pasakayo' no dau iyolo' do kaladai. Om pamanau ngai' no iyolo' do kumaa do hilo'd Masir, om nigitan di Musa i sukud di pinonuhuan do Kinorohingan dau do mongigit. 21 Om boro-boros po o Tuhan dot id di Musa, “Noonuan ku no iya' do kuasa' do momonsoi do piro-piro o koimayaan. Om koguli' ko nopondo do hilo'd Masir, om wonsoyon ngai' no iti koimayaan diti dot id toguang di raja' do Masir. Nga' pokodohon ku indo o ginawo di raja', om a' indo dau potumboyoon i tulun dot Israil do mamanau. 22 Om mositi' nod sunudan nu i raja' dot iyoho', i Tuhan, o minomoros do poingkaa, ‘Israil no o tanak ku'd kusai dit id dotuo. 23 Sinunudan ku iya' do potumboyo' di tanak ku do mamanau, om koongoi i' iyau kasambayang dot id doho', nga' a' ko i' pinopotumboyo'. Om patayon ku nondo i diya'd tanak do kusai dit id dotuo,’ kanto,” ka dau. 24 Nga' tontok di hilo' no iyolo'd tanga'd ralan do kumaa do hilo'd Masir, di hilo' no iyolo'd iso' o kinoiyonon di pawawansayan do kiim, om rikot no o Tuhan dot id di Musa, om umbalai no daa iyau do Tuhan do mamatai. 25-26 Om ongoi noddi i Sipora, i sawo di Musa, anu do watu dit atarom, om sinsibo' no dau i kulit di tanak dau, i kulit di sisinsibon do monunat. Om gihilai noddi dau di kulit di sininsib dau o lapap di Musa. Om iri no i minonunat o nakabara-barasan di Sipora do miagal diti dot id di Musa, “Poboroson ku do mikuwo'd raha' diti dot iya' no o sawo kopio ku,” ka dau. Om pinasi iddi do Tuhan i Musa. 27 Nga' daamot nopoddi om nosunudan nod Tuhan i Harun do poingkaa, “Ongoi no solowot di Musa do hilo'd tana' do kowotuan,” ka. Om pamanau noddi i Harun do minongoi solowot di Musa do hilo'd nuluhon dit olidang; om kosolowot poddi di Harun i Musa, om tungubai no dau iyau. 28 Om posunudo' ngai' noddi di Musa dot id di Harun i pinoboros do Tuhan, do tontok di sinuhu' iyau do Tuhan do gumuli' do hilo'd Masir; om sinusui ngai' dau i piro-piro o koimayaan do pinonuhuan do Tuhan do momonsoi. 29 Om pamanau noddi iyo Musa di Harun do minongoi do hilo'd Masir, om timungo' ngai' no diyolo' i boyoon do tulun dot Israil. 30 Om poboroso' ngai' noddi di Harun dot id diyolo' i pinoboros do Tuhan dot id di Musa, om wonsoyo' no di Musa o koinsanai di koimayaan do hiri'd toguang di tulun diri. 31 Om kongotumbayaai ngai' no iyolo'ddi, om soira' di norongou diyolo' do nokorikot o Tuhan dot id diyolo', om nokito ngai' dau i koinggoritan diyolo', om otud noddi iyolo' do suminambayang.

Kinosoliwanan 5

Suminolowot i Musa om i Harun di Raja'

1 Om ongoi noddi i Musa om i Harun solowot di raja' do Masir, om boro-boros no iyolo' do poingkaa, “Poingkaa no o boros do Tuhan, i Kinorohingan do tulun dot Israil, ‘Posoliwanon no i tulun ku, om koongoi i' iyolo' kasambayang dot id doho' do hilo'd tana' do kowotuan,’ ka dau,” ka diyolo'. 2 “Isai toi o Tuhan?” ka di raja' do Masir do minuhot, “Nokuro tu' suhuon oku do tumanud do boros dau om poposoliwan do tulun dot Israil? A' oku i' kotutun do Tuhan; om a' ku i' pabanaron o tulun dot Israil do sumoliwan,” ka dau. 3 Om boros ka diyo' Musa di Harun, “Minintalang o Kinorohingan do tulun dot Israil dot id dahai. Om mokibanar diri iyahai do mamanau do tolu o tadau do koloido' do kumaa do hilo'd tana' do kowotuan, tu' hilo' no o tiyonon dahai do papatahak do porsombahan di sumbolion dot id Tuhan, i Kinorohingan dahai. Ondung a' iyahai mongoi, nga' porikatan nondo iyahai dau do toruol ko' pisangadan po do pamatai dau dahai,” ka diyolo'. 4 Om boros ka di raja' dot id di Musa om id di Harun, “Nunu daa'ddi o tosorou-sorou dokoyu do papaada' dilo tulun dilo karaja' diyolo'? Suhuo' nogi' kawagu ilo piro-piro o turipon do mongoi karaja'! 5 Nintaban nopo do bansa' dokoyu om ogumu' po ko' bansa' do Masir. Om tumingkod kou nogi' daa'ddi do kumaraja' do baino'!” ka dau. 6 Om tadau iddi do sinunudan di raja' i tulun do Masir i boyoon do mandur, om i piro-piro o mandur do bansa' dot Israil do poingkaa, 7 “Kada' nondo dokoyu onuwai iyolo' do rahami do wonsoyon do bata'. Suhuon nopo iyolo' do mongoi pogihum do rahami. 8 Nga' suhuon i' mando kasai' iyolo' do momonsoi do bata' do miagal di gulu kogumu'; kada' nod haro o tongoiso' piya do kokuri' ko' mantad di gulu. A' i' diyolo' kabagal o buruon diyolo'; gowoi poddi om mokibanar nopo iyolo' doho' do mongoi papatahak do porsombahan di sumbolion dot id Kinorohingan diyolo'! 9 Ruhangan nogi' o kawagato' do karaja' diti tongoulun diti, do gisom id akagasan iyolo' di buruon diyolo', om aiso' indo o maso diyolo' do mokinongou do susuyon dit a' otopot,” ka dau. 10 Om pamanau ngai' noddi i boyoon do mandur di bansa' do Masir, om i mandur di bansa' dot Israil do minongoi pomisunud ngai' di tulun do poingkaa, “Nokoboros no moti' di raja' dot a' noddi iyau manahak dokoyu do rahami. 11 Boros ka dau, om iyokoyu no o mimpori-pori do mongoi pogihum do hinonggo nopo o haro o pongonuan dokoyu'd rahami. Nga' iri kasai' i' ma o ginumu' do bata' do wonsoyon dokoyu, dot irad di wonsoyon kasai' dokoyu di gulu,” ka diyolo'. 12 Gowoi poddi om pogitotongkiad nopo i tulun dot Israil do tuminongkop di pomogunan do Masir do mongoi pogihum do guas do gandum do maan do ponokorahami. 13 Om sansagan i' kasai' di boyoon do mandur i turipon do momonsoi'd bata' do pointikid-tikid do tadau dot irad do kogumuon do bata' dit onuan po iyolo' do rahami. 14 Om pimbabagan po di boyoon do mandur do bansa' do Masir i mandur do bansa' dot Israil, i siniliu diyolo' do mongilo-ilo di karaja' di turipon. Boros ka diyolo', “Nokuro tu' a' kou momonsoi'd bata' dot irad di gulu kogumu'?” ka. 15 Om ongoi ngai' noddi i mandur dot Israil solowot di raja' do minongoi posunud do poingkaa, “Nokuro tu' iyoon iyahai diya'dti, oi Tuan Raja'? 16 A' i' iyahai onuan do rahami, om sansagan kasai' iddi iyahai do momonsoi'd bata'. Om pimbabagan diri'ddi iyahai do baino'! Iya' no o monongkoilo diti,” ka diyolo'. 17 Om boros ka di raja' do suminimbar, “Gungkaul kou no om tukono' kou nopo do kumaraja', om iri no daa o kopokibanaran dokoyu doho' do poposoliwan dokoyu do mongoi papatahak do porsombahan di sumbolion dot id Tuhan dokoyu. 18 Guli' kou nogi' do mongoi karaja'! A' kou no onuan do rahami, nga' iri kasai' i' mando o kogumuon do bata' do wonsoyon dokoyu,” ka dau. 19 Om kopurimanai ngai' noddi di mandur dot id suang iyolo' do kosusaan di nosunudan iyolo' di raja' dot irad kasai' di gulu po o kogumuon do bata' do wonsoyon diyolo'. 20 Om soira' di tumongkiad no iyolo' di raja', om kosolowot no diyolo' iyo Musa di Harun do poingandad diyolo'. 21 Om boros ka diyolo' dot id di Musa om id di Harun, “Nokito nod Tuhan i nowonsoi dokoyu. Hukuman kou no tu' iyokoyu no o nokobungou di raja' om i piro-piro o pagawai dau dot ongotogod dahai. Noonuan no dokoyu iyolo' do ponguwaan do mamatai dahai,” ka diyolo'.

Minoguhang i Musa do Tuhan

22 Om rikot noddi kawagu i Musa dot id Tuhan, om boros ka dau, “Oi Tuhan, nokuro tu' pinorikatan nu'd kosusaan i tulun nu? Nokuro tu' sinuhu' oku diya' do mongoi'd hiti? 23 Tu' mantad poddi minongoi oku polombus do boros nu dot id raja', om diri no do nintonod dau do minonginggorit di tulun nu. Om aiso' iddi o wonsoyon nu do ponulung diyolo'!” ka dau.

Kinosoliwanan 6

Linohou do Kinorohingan i Musa

1 Om boros kaddi do Tuhan dot id di Musa, “Kokito ko indo bo ondung nunu o wonsoyon ku dot id raja' do Masir. Sansagan ku indo iyau do poposoliwan dilo tulun ku. Om sansagan ku iyau do monguyung diyolo' do mantad id pomogunan diti,” ka dau. 2 Om boro-boros no o Kinorohingan dot id di Musa do poingkaa, “Iyoho' no o Tuhan. 3 Nokointalang oku no dot id di Abraham, om id di Isak, om id di Yakub, dot iyoho' no o Kinorohingan dit Agayo Kopio o Kuasa'. Nga' a' oku i' pinopointutun diyolo' do ngaran ku dit olidang, iri no i Tuhan. 4 Om nokopongumpongo oku nogi' dot id diyolo', do papatahak dot id diyolo' di pomogunan do Kanaan, i kinoiyonon diyolo' do tuminindapou. 5 Norongou ku noddi o todoi do tulun dot Israil, i nuripon do tulun do Masir, om nosorou ku i tumpongo ku. 6 Iyo nopoddi, om sunudan no i tulun dot Israil, om poboroson no diyolo' do poingkaa o boros ku, ‘Iyoho' no o Tuhan; poiduwon ku i' iyokoyu om polobuson ku iyokoyu do mantad id tulun do Masir di monguripon dokoyu. Paakangon ku nondo iti longon ku'd okoris do poporikot do hukuman dit awagat kopio dot id tulun do Masir, nga' iyokoyu nopo om posion ku i'. 7 Silihon ku nondo iyokoyu do tulun ku om iyoho' nondo ot osiliu do Kinorohingan dokoyu. Oilaan indo dokoyu dot iyoho' i Tuhan o Kinorohingan dokoyu do kalabus ku iyokoyu do mantad id ponguripanan do hilo'd pomogunan do Masir. 8 Om angatan ku nondo iyokoyu do kumaa do hilo'd pomogunan di nakabatos ku do mikuwo'd sumpa' do patahakon ku di Abraham, om i Isak, om i Yakub, do maan do dokoyu kopio'd songonuon. Iyoho' no o Tuhan,’ ka dau, kanto dokoyu,” ka dau. 9 Om poboroso' no di Musa iri dot id tulun dot Israil nga' a' noddi iyolo' mokinongou dau tu' aiso' no o pokukurayan dot osorou diyolo' dot ouru di pongunguripon di koinggorit tomod diyolo'. 10 Om boro-boros noddi o Tuhan dot id di Musa do poingkaa, 11 “Ngoyo' sunudai i raja' do Masir dot a' no milo dot a' dau pabanaron i tulun dot Israil do sumoliwan do mantad id pomogunan dau,” ka dau. 12 Nga' boros kad Musa do suminimbar, “Iri piya i tulun dot Israil nga' a' i' mokinongou do boros ku, om mokinongou nogindo tuu kopio i raja' do Masir? Tu' a' oku i' koilo do mimboros,” ka dau. 13 Om suhuo' nod Tuhan iyo Musa di Harun, boros ka dau, “Sunudan no i tulun dot Israil om i raja' do Masir, do nosuhu' ku no iyokoyu do momoyo' dilo tulun dot Israil do sumoliwan do mantad id pomogunan do Masir,” ka dau.

I Sinolusukan do Sompiiyon di Musa om i Harun

14 I Rubin nopo, i tanak di Yakub dot id gulu, om kianak dot apat o kusai: i Hinok, i Palu, i Hisron om i Karmi; iyolo' no i taki-aki di pinuruan do sompiiyon dot id payat di Rubin, i pinungaranan do ngaran diyolo'. 15 I Simion no om kianak dot onom o kusai: i Yomuil, i Yamin, i Ohad, i Yakin, i Sohar om i Saul, i tanak do tondu' do bansa' do Kanaan; om iyolo' no i taki-aki di pinuruan do sompiiyon dit id payat di Simion, i pinungaranan do ngaran diyolo'. 16 I Liwi no om kianak do tolu o kusai: i Girson, i Kohat, om i Morari; iyolo' no i taki-aki di pinuruan do sompiiyon dot id suang do payat di Liwi, i pinungaranan do ngaran diyolo'. Om hatus om tolu nohopod om turu' o toun di Liwi do poimpasi. 17 I Girson no om kianak do duwo o kusai: i Libni om i Simoi; om ogumu' o sinakagon diyolo'. 18 I Kohat no om kianak dot apat o kusai: i Amram, i Yisar, i Hibron, om i Usiol. Om hatus om tolu nohopod om tolu o toun di Kohat do poimpasi. 19 I Morari no om kianak do duwo o kusai: i Mali om i Musi. Iri ngai' no o pinuruan do sompiiyon om i sinakagon ngai' diyolo' dot id payat di Liwi. 20 Om kowino' no di Amram i Yokubid, i tadi' di tapa' dau. Om paganak no iyolo' om i Harun, om i Musa. Om hatus om tolu nohopod om turu' o toun di Amram do poimpasi. 21 I Yisar no om kianak do tolu o kusai: i Kora, i Nipig, om i Sikri. 22 I Usiol nogi' nga' kianak i' do tolu o kusai: i Misail, i Ilsapan om i Sitri. 23 Om kowino' no di Harun i Ilisiba, i tanak di Aminadab. I Ilisiba nopo om tobpinai di Nason do tondu'. Om tangaanak nopo diyo Ilisiba di Harun om i Nadab, i Abihu, i Iliasar om i Itamar. 24 I Kora nopo om kianak do tolu o kusai: i Yasir, i Ilkana om i Abiasap; om iyolo' no i taki-aki di piro-piro o koisaan do sompiiyon do suminolusuk di pinuruan do sompiiyon di Kora. 25 Om kowino' no di Iliasar o tiso' di tanak di Putiol do tondu'. I Iliasar nopo om tanak di Harun do kusai. Om paganak no iyo Iliasar di sawo dau om i Pinihas. Iyolo' no ngai' i boyoon do sompiiyon om pinuruan do sompiiyon dot id payat di Liwi. 26 Om iyo Harun no di Musa o sinunudan do Tuhan do poingkaa, “Woyoon no iti tulun dot Israil do sumoliwan do mantad id pomogunan do Masir,” ka. 27 Om iyolo' no goduwo i minonuhu' di raja' do Masir do poposoliwan di tulun dot Israil.

Ponuhuan do Tuhan dot id di Musa om id di Harun

28 Tontok di minoro-boros o Tuhan dot id di Musa di hilo' pod pomogunan do Masir, 29 om boros ka dau, “Iyoho' no o Tuhan. Sunudan no i raja' do Masir do koinsanai di pinoboros ku diya',” ka. 30 Nga' boros kad Musa do suminimbar, “Oilaan nu i' dot a' kopio oku koilo do mimboros; om nokuro tuu daa i raja' tu' mokinongou kopio do boros ku?” ka dau.

Kinosoliwanan 7

1 Om boros kad Tuhan dot id di Musa, “Silihon ku indo iya' do miagal do Kinorohingan dot id toguang di raja', om i Harun i tobpinai nu o silihon ku do miagal do nabi nu, do popolombus di boros nu dot id raja'. 2 Posunudon ngai' no dot id di Harun iti ponuhuan ku diya', om i Harun nondo o monuhu' di raja' do papabanar di tulun dot Israil do sumoliwan do mantad id pomogunan dau. 3 Nga' pokodohon ku nondo o ginawo di raja', om a' indo iyau mokinongou do nunu nopo o poboroson nu do mulong piya dot ogumu' o porikoton ku do kosusaan dit awagat kopio do hilo'd Masir. 4 Om porikatan ku nondo do hukuman dit awagat kopio o hilo'd Masir, om posoliwanon ku nogindo o koinsanai'd tulun dot Israil, i tulun ku, do mantad id pomogunan do Masir. 5 Om koilo nogindo i tulun do Masir dot iyoho' o Tuhan, do tontok do hukuman ku iyolo' om posoliwanon ku o tulun dot Israil do mantad id pomogunan diyolo',” ka dau. 6 Om wonsoyo' noddi diyo Musa di Harun o koinsanai di pinonuhuan do Tuhan. 7 Tumur nopo di Musa om walu' no nohopod o toun, om di Harun no om walu' no nohopod om tolu o toun do tontok dit ongoi iyolo' boro-boros di raja' do Masir.

Sukud di Harun

8 Om boros kad Tuhan dot id di Musa om id di Harun, 9 “Ondung suhuon kou di raja' do momonsoi do koimayaan, om suhuon no i Harun do manganu di sukud dau om papataam diri do hiri'd dotoguangan di raja', om sumiliu indo do tulanut i sukud,” ka dau. 10 Om ongoi noddi iyo Musa di Harun solowot di raja' om wonsoyo' no diyolo' o miagal di pinonuhuan do Tuhan dot id diyolo'. 11 Om lohowo' noddi di raja' i tulun dau dit ongkitoilaan om i bobolian, om wonsoyo' no diyolo' o miagal di winonsoi di Harun tu' iyolo' nga' ongkitoilaan i'. 12 Poloposo' no diyolo' i sukud diyolo', om siliu ngai' nopo iri do tulanut. Nga' pintalanai noddi di sukud di Harun i diyolo'd sukud. 13 Nga' okodou kasai' i' o ginawo di raja' do miagal di nokoboros mantad do Tuhan, om a' i' i raja' mokinongou do boros diyo Musa di Harun.

Noontok do Kosusaan dot Agayo o Masir

Raha'

14 Om boro-boros noddi o Tuhan dot id di Musa do poingkaa, “Okodou po kasai' o ginawo di raja', om a' i' kasai' iyau papabanar di tulun dot Israil do sumoliwan. 15 Nga' mongoi-ongoi po solowot di raja' do kosuabon do suab, di sumondot iyau do hilo'd Bawang do Nil. Om igitan no i sukud nu di noumbalan do poposiliu do tulanut, om andadon no iyau do hiri'd tisan di bawang. 16 Om poboroson no di raja' o poingkaa, ‘Sinuhu' oku'd Tuhan, i Kinorohingan do tulun dot Ibrani, do momisunud diya' do papabanar di tulun dau do sumoliwan, om koongoi indo iyolo' kasambayang dot id dau do hilo'd tana' do kowotuan. Nga' gisom piya do baino' nga' a' ko i' minokinongou dau. 17 Gowoi poddi, om baino' nopondo, oi Tuan Raja', om nokoboros nod Tuhan dot oilaan nu indo ondung isai kopio iyau do kokito ko di wonsoyon dau. Intong pogi', bobogon ku nondo diti sukud ku iti waig do bawang om osiliu indo do raha' ilo waig. 18 Om angapatai ngai' nopondo i sada' do hilo'd bawang, om outong tomod nondo gisom dot a' no milo di tulun do Masir dot inumon iti waig,’ ka,” ka dau. 19 Om boros kad Tuhan dot id di Musa, “Suhuon no i Harun do popobilid di sukud dau do hiri'd soibau do koinsanai'd bawang, om liang om kulam do hilo'd Masir. Om osiliu ngai' nopondo do raha' i waig do pointongkop do pomogunan do Masir, om iri piya i waig do hiri'd tuung do kayu om i hiri'd luping nga' osiliu ngai' id raha',” ka. 20 Om wonsoyo' noddi diyo Musa di Harun o koinsanai di pinonuhuan do Tuhan. Om pobilido' no di Harun i sukud dau om bobogo' no dau i bawang, do songingontong ngai' i raja' om i pagawai dau. Om kosiliu nopoddi do raha' i waig di bawang. 21 Om kangapatai ngai' noddi i sada' do hiri'd bawang, om ongoutong tomod diri gisom dot a' no milo di tulun do Masir dot inumon i waig. Om raha' ngai' nopoddi o waig do hilo'd Masir. 22 Om pomonsoi no do miagal diri i bobolian di raja' do minamakai di toilaan diyolo' di dong bobolian. Om okodou iddi kasai' o ginawo di raja' do miagal di gulu. Om a' i' i raja' minokinongou di boros diyo Musa di Harun do miagal di nokoboros mantad do Tuhan. 23 Okon nogi' do toingud nopo i raja' om pouliai no dau do hiri'd walai dau, om a' i' iyau opusou do nokokito'ddi. 24 Om oinsanan nopoddi i tulun do Masir do minongukad do torobong do poingompus di tisan do bawang, do pongonuan diyolo' do waig do tinumon, tu' a' no milo dot inumon i waig do bawang. 25 Om turu' noddi o tadau do mantad di pinapalan do Tuhan i Bawang do Nil.

Kinosoliwanan 8

Bonong

1 Om boro-boros noddi o Tuhan dot id di Musa do poingkaa, “Mongoi no solowot di raja' om poboroson no do poingkaa o boros do Tuhan, ‘Pabanaro' no ilo tulun ku do sumoliwan, om koongoi i' iyolo' kasambayang dot id doho'. 2 Tu' ondung a' nu uhang om hukuman ku motindo iti pomogunan nu; om ponuon ku nopondo do bonong iti pomogunan nu tu' iri no o pomohukum ku. 3 Om adalaan nopondo koponu' do bonong ilo Bawang do Nil, om tumindal nondo i bonong do mongoi do hilo'd walai nu di dong raja', om sumuang di bilik nu, om mongoi do hiri'd kawalayan di tongomontiri' nu om i rayat nu, om hiri piya'd pagansakan nu'd roti om hiri'd poriuk nu nga' ngoyon ngai' i' iyono'. 4 Om sonsimbul-simbul nopo motindo i bonong diri dot id tinan nu, om id tinan do toinsanan di rayat nu, om id toinsanan di montiri' nu,’ kanto,” ka dau. 5 Om boros kad Tuhan dot id di Musa, “Suhuo' i Harun do popobilid dilo sukud dau dot id soibau do koinsanai'd bawang, om liang, om kulam, om mimbulai i' o bonong do momonu' diti pomogunan do Masir,” ka dau. 6 Om pobilido' noddi di Harun i sukud dau dot id soibau do koinsanai di kinoiyonon do waig, om songulai-ulai nopoddi o bonong do minomonu' do pointongkop do pomogunan diri. 7 Nga' pakayo' no di bobolian i diyolo'd toilaan, om iyolo'ddi nga' milo i' do pinopoimbulai do bonong do hiri'd pomogunan do Masir. 8 Om lohowo' no di raja' i Musa om i Harun om boro-boros no do poingkaa, “Sambayang no dot id Tuhan do mokiidu' dilo bonong, om pabanaron ku indo ilo tulun dokoyu do mamanau do mongoi papatahak do porsombahan di sumbolion dot id Tuhan,” ka dau. 9 Om boros ka di Musa do suminimbar, “Osonong i' o ginawo ku do sumambayang do bagi do Tuan ku. Tontuon nopo o maso do kapanambayangan ku diya', om sambayangan ku indo o Tuan ku, om iri ngai' i pagawai nu om i rayat nu. Om oidu' nondo do mantad id Tuan ku i bonong, om aiso' nondo ot oolu', do suwai nondo ko' i hiri'd Bawang do Nil,” ka dau. 10 Om boros ka di raja', “Sambayangan oku no do suab,” ka dau. Om boros ka di Musa, “Wonsoyon ku i' ino pokionuon nu, om koilo ko i' dot aiso' no o Kinorohingan do suwai do koiyo do Tuhan, i Kinorohingan dahai. 11 Om aiso' nondo o bonong do mamagangau diya', om i tongomontiri' nu, om i rayat nu. Om aiso' nondo o toolu' di bonong do suwai nondo ko' i hilo'd Bawang do Nil,” ka dau. 12 Om pamanau noddi i Musa om i Harun do tuminongkiad di raja', om sambayang no i Musa dot id Tuhan do minokiidu' di bonong di pinorikot do Tuhan dot id raja' diri. 13 Om pohubayaai nod Tuhan i pinokianu di Musa, om kangapatai ngai' noddi i bonong di hiri'd kawalayan, om i hiri'd natad, om i hiri'd koumaan. 14 Om untuno' noddi di tulun do Masir i bonong di nangapatai, om asawat tomod diri o nokountunon do gisom do noponu' po do nutong di bonong o hiri'd pomogunan diri. 15 Nga' soira' di nokito di raja' do nangapatai i bonong, om pokodoho' i' kawagu di raja' o ginawo dau, do miagal di nokoboros mantad do Tuhan; om a' iddi i raja' minokinongou di boros diyo Musa di Harun.

Togondui

16 Om boros kad Tuhan dot id di Musa, “Suhuo' i Harun do popobobog di sukud dau do hilo'd tana', om osiliu i' do togondui ilo pupuk do tana' do pointongkop diti pomogunan do Masir,” ka dau. 17 Om bobogo' noddi di Harun di sukud dau i tana', om koinsanai nopoddi i lisohu do tana' do suminiliu do togondui, om ongoi ngai' nori taun do tulun om tayam-tayam. 18 Om umbal no daa i bobolian do mamakai di toilaan diyolo', nga' aiso' i' o togondui do minimbulai. Om hinonggo-honggo nopoddi nga' haro ngai' nopo o togondui. 19 Om boros kaddi di bobolian dot id raja', “Kinorohingan no moti' kopio o pinopoimbulai diti togondui diti,” ka diyolo'. Nga' okodou kasai' i' o ginawo di raja' do miagal di nokoboros mantad do Tuhan, om a' i' i raja' minokinongou do boros diyo Musa di Harun.

Langau

20 Om boros kad Tuhan dot id di Musa, “Osuab pod suab, om mongoi no solowot di raja' do sumondot iyau do hilo'd bawang, om sunudan no iyau do boros do Tuhan do poingkaa, ‘Pabanaron no i tulun ku do sumoliwan, om koongoi i' iyolo' kasambayang dot id doho'! 21 Ondung a' ko pabanar, om poinsanon mantad ku iya', do hukuman tiya' no moti' tu' porikatan ku nondo iyokoyu do langau, iya' om i tongomontiri' nu om i rayat nu. Kawalayan nopondod tulun do Masir om ongoponu' po do langau, om tana' piya nga' olikupan nopondo do langau. 22 Nga' a' ku i' pohompiton o watas do Gusin, i kinoiyonon di tulun ku, om aiso' indo o langau do hilo'. Om koilo kou i' dot iyoho' i Tuhan, o miwonsoi'ddi do hiti'd pomogunan diti. 23 A' ku indo piiyoon i tulun ku om i rayat nu. Om iti nopo koimayaan diti om osiliu nod suab,’ kanto,” ka dau. 24 Om porikatai noddi do Tuhan do langau dot ogumu' kopio o hiri'd walai di raja', om hiri'd kawalayan di tongomontiri' dau. Om ongoinggorit ngai' nopoddi o pointongkop di pomogunan do Masir tu' nongourunan pod langau. 25 Om lohowo' noddi di raja' i Musa om i Harun, om boro-boros no do poingkaa, “Pamanau kou, om mongoi i' patahak do porsombahan di sumbolion, dot id Kinorohingan dokoyu do hiti'd pomogunan diti,” ka dau. 26 Om boros kad Musa do suminimbar, “A' i' osonong do momonsoi do miagal diri. Tu' iri nopo i porsombahan dahai dot id Tuhan, i Kinorohingan dahai, om karaatan i' do tulun do Masir. Tu' ondung monumbali' iyahai do tayam-tayam do maan do porsombahan do sumbolion do montong-ontong i tulun do Masir, om angaraatan nondo iyolo' dahai, om dumpahon no dotindo iyahai diyolo'd watu do gisom dot angapatai iyahai. 27 A' no milo dot a' iyahai mongoi do hilo'd tana' do kowotuan do tolu o tadau do mamanau do kosoduwo', om hilo' nondo iyahai do papatahak do porsombahan di sumbolion, dot id Tuhan, i Kinorohingan dahai, do miagal di pinonuhuan dau dahai,” ka dau. 28 Om boros ka di raja', “Pabanaron ku i' iyokoyu'd mongoi do hilo'd tana' do kowotuan do mongoi papatahak do porsombahan di sumbolion dot id Tuhan, i Kinorohingan dokoyu, nga' kada' po do minsodu' kopio kou. Om sambayangan oku no dokoyu,” ka dau. 29 Om boros kad Musa do suminimbar, “Kotongkiad oku po diya'dti om sumambayang oku no dot id Tuhan, om kopoggidu' ngai' indo ilo langau do tadau'd suab do mantad id diya', om mantad id tongomontiri' nu, om mantad id rayat nu. Nga' kada' nondo pagakal dahai om kada' antabai ilo tulun dot Israil do mongoi papatahak dot id Tuhan do porsombahan di sumbolion,” ka dau. 30 Om tongkiad noddi i Musa di raja' om sambayang no iyau dot id Tuhan. 31 Om pohubayaai nod Tuhan i pinokianu di Musa. Om poggidu' ngai' noddi i langau do mantad id raja', om mantad id tongomontiri' dau, om mantad id rayat dau; om aiso' no o minolu' dot ongoiso' piya di langau. 32 Nga' baino' nga' pinokodou po di raja' o ginawo dau, om a' i' dau pinabanar i tulun dot Israil do mamanau.

Kinosoliwanan 9

Nangapatai o Tayam-Tayam

1 Om boros kad Tuhan dot id di Musa, “Ongoi-ongoi po solowot di raja' om sunudan no iyau do boros do Tuhan, i Kinorohingan do tulun dot Ibrani, do poingkaa, ‘Pabanaron no i tulun ku do mamanau, om koongoi i' iyolo' kasambayang dot id doho'. 2 Ondung a' kasai' ko pabanar do mamanau iyolo', 3 om hukuman ku no moti' iya'. Porikatan ku motindo do toruol ilo tayam-tayam nu, --- i kuda', om i kaladai, om it unta, om i sapi', om i dumba', om i kambing nu. 4 A' ku indo piiyoon ilo tayam-tayam do tulun dot Israil om ilo tayam-tayam do tulun do Masir. Tu' ilo' nopondo tayam-tayam do tulun dot Israil om aiso' i' o tongoiso' piya dot apatai. 5 Tu' iyoho' no i Tuhan, o minanantu' do suab no do wonsoyon ku iti komoyon ku,’ kanto,” ka dau. 6 Tadau poddi kawagu, om wonsoyo' nod Tuhan o miagal di pinoboros dau, om koinsanai nopo i tayam-tayam di tulun do Masir do nangapatai. Nga' iri nopo i tayam-tayam di tulun dot Israil om aiso' i' o tongoiso' piya do napatai. 7 Om ponguhot noddi i raja' ondung nunu o nosiliu, om kosunudai no iyau dot iso' po di tayam-tayam di tulun dot Israil nga' aiso' i' o napatai. Nga' pinokodou po kawagu di raja' o ginawo dau, om mada' kasai' i' iyau do mamanau i tulun dot Israil.

Kupos

8 Om boros kad Tuhan dot id diyo Musa di Harun, “Ongoi kou anu do piro-piro tonggom do tauu do mantad hilo'd ropuhan; om potiason nondo di Musa i tauu diri do hiri'd sawat dot id toguang di raja'. 9 Om tumongkop nondo i tauu do miagal do soliohuk do hilo'd pomogunan do Masir. Om iri nondo o popokupos di gumandas dot id tinan do koinsanai'd tulun om tayam-tayam,” ka dau. 10 Om ongoi noddi iyo Musa di Harun panganu do tauu, om ingkakat no iyolo' do hiri'd toguang di raja'. Om potiaso' no di Musa i tauu diri do hilo'd sawat, om iri noddi o pinopokupos di gumandas dot id tinan di tulun om i tayam-tayam. 11 Om a' noddi i bobolian kosonsog do mongoi solowot di Musa, tu' nopuli po iyolo'd kupos do miagal di tulun do Masir do suwai. 12 Nga' pinokodou i' do Tuhan o ginawo di raja', gisom dot a' i' iyau minokinongou di boros diyo Musa di Harun, do miagal di nokoboros mantad do Tuhan.

Karambatu

13 Om boros kaddi do Tuhan dot id di Musa, “Mongoi no solowot di raja' dot osuab pod suab om sunudan no iyau diti boros do Tuhan, i Kinorohingan do tulun dot Ibrani, do poingkaa, ‘Pabanaro' no ilo tulun ku do mamanau, om koongoi i' iyolo' kasambayang dot id doho'. 14 Tu' baino' nopo moti', om okon no ko' iri no i tongomontiri' nu, om i rayat nu o hukuman ku, suwai ko' iya' nga' hukuman ku i'. Om koilo ko indo dot aiso' no o koiyo doho' do pointongkop do hiti'd pomogunan. 15 Tu' ondung hinukuman tiya' daa om i rayat nu do toruol, om noinsanan kou no daa do napatai. 16 Nga' pinologos ku i' iya' do poimpasi om kokito ko i' do kogoyoo' do sinundu ku. Om kotongkop i' do hiti'd pomogunan o kogoyoo' do ngaran ku. 17 Nga' iyo piya'ddi nga' asawat kasai' po o ginawo nu om a' ko pabanar di tulun ku do mamanau. 18 Nga' kosuabon nopondod suab, om porikoton ku motindo o karambatu di korolosi kopio, it a' po nokoumbal do nosiliu do hiti'd Masir do mantad di gulu. 19 Nga' ponuhu' no do poposusut di tayam-tayam nu, om koinsanai di diya' do songonuon di hilo'd soliwan. Tu' asandatan motindo do karambatu o koinsanai'd tulun om tayam-tayam di hilo'd liwan dit aiso' o kolungung, om angapatai nondo iyolo',’ kanto,” ka dau. 20 Om ongooris diri o wookon di montiri' di raja', om ngoyo' no diyolo' posuango' do hiri'd walai i turipon om i tayam-tayam diyolo'. 21 Nga' iri nopo i tulun do suwai om a' i' minomusou di boros do Tuhan, om pologoso' nopo i turipon om i tayam-tayam diyolo' do hiri'd labus dot aiso' o kolungung. 22 Om boros kaddi do Tuhan dot id di Musa, “Pobilido' ino longon nu do pointuduk do hilo'd tawan, om sumondot i' o karambatu do pointongkop do pomogunan do Masir do mongotung do tulun, om tayam-tayam, om koinsanai di tanom-tanom do hilo'd dumo,” ka dau. 23 Om pobilido' noddi di Musa i sukud dau do pointuduk do hilo'd tawan, om porikoto' noddi do Tuhan o tinggoron om karambatu, om kodumaat nga' mungkad-sungkad po do hiti'd tana'. Om posondoto' noddi do Tuhan 24 o rasam do karambatu dit asapou kopio, do mitonggoi'd kodumaat di malab-kalab poo. Om tontok nogiddi do haro o tongus dot araat kopio do nokorikot do hilo'd Masir, do diri nogindo do nosiliu do mantad di gulu. 25 Om karaag ngai' nopo di karambatu o nunu nopo i hiri'd labus do pointongkop di pomogunan do Masir; do kohompit ngai' no o tulun om nintorusan. Om nangaraag ngai' nogi' i tanom-tanom do hiri'd dumo om nangasakat ngai' o kayu. 26 Hilo' pod pomogunan do Gusin, i kinoiyonon do tulun dot Israil, ot aiso' o karambatu. 27 Om lohowo' noddi di raja' i Musa om i Harun, om boro-boros nod poingkaa, “Iti nopo baino' om nokowonsoi oku nod dusa; Tuhan no ot otopot, om iyahai nodti rayat ku o nakasala'. 28 Sambayang no dot id Tuhan! Tu' norikot no kopio o koinggorito' dahai dot ouru diti tinggoron om karambatu. Mamatos oku no kopio do papabanar dokoyu do mamanau, om a' kou no minog do mundorong do hiti,” ka dau. 29 Om boros ka di Musa dot id dau, “Kosoliwan oku podti bandar om poinsawaton ku no o longon ku do sumambayang dot id Tuhan. Om otingkod nondo ilo tinggoron om otodu' ilo karambatu, om koilo ko i' dot iti nopo pomogunan om Tuhan i' o sanganu. 30 Nga' oilaan ku i' dot a' ko po oronok, om ilo tongomontiri' nu nga' a' po oronok do Tuhan, i Kinorohingan,” ka dau. 31 Om karaag ngai' nopoddi i guas do gapas om i barli, tu' kumupang no daa i barli om momiunduk nogi' i gapas. 32 Nga' iri po i gandum ot a' naraag tu' a' po noonsok do tontok diri. 33 Om tongkiad noddi i Musa di raja' om soliwan no di bandar. Om poinsawato' no di Musa o longon dau do suminambayang dot id Tuhan, om tingkod nopoddi i tinggoron, om i karambatu, om i rasam. 34 Om soira' di nokito di raja' i nosiliu do miagal diri om pomonsoi po kawagu iyau do dusa. Om pinokodou i' di raja' o ginawo dau om i tongomontiri' dau nga' pinokodou i' diyolo' o ginawo diyolo' do miagal di gulu. 35 Om a' iddi di raja' pinabanar i tulun dot Israil do mamanau, do miagal di nokoboros mantad do Tuhan, do pinolombus di Musa.

Kinosoliwanan 10

Katat

1 Om boro-boros noddi o Tuhan dot id di Musa do poingkaa, “Mongoi no solowot di raja'. Om pinokodou ku po o ginawo di raja' om i tongomontiri' dau, om owonsoi ku i' iti piro-piro o koimayaan dot id pogialatan diyolo', 2 om osusui indo dokoyu dot id tangaanak om id tongomanangaki dokoyu ondung poingkukuro oku do minonguntotogod di tulun do Masir do tontok di wonsoyo' ku iti piro-piro o koimayaan. Om oinsanan kou indo do koilo dot iyoho' no o Tuhan,” ka dau. 3 Om ongoi noddi iyo Musa di Harun solowot di raja', om boros ka diyolo', “Poingkaa o boros do Tuhan, i Kinorohingan do tulun dot Ibrani, ‘Soira' ko toindo do minsiriba' dot id doho'? Pabanaro' no i tulun ku do mamanau om koongoi i' iyolo' kasambayang dot id doho'. 4 Ondung a' kasai' ko kaakun, om poporikot oku no moti' do katat do hiti'd pomogunan nu do suab. 5 Om adalaan nondo kopio kogumu' o katat, gisom dot a' no okito iti tana'. Om kanon ngai' nopondo di katat it a' naraag di karambatu, om iri piya i kayu di nongoolu-olu' nga' kanon ngai' i'. 6 Om ponuon nopondo di katat i walai nu, om i kawalayan di tongomontiri' nu, om i kawalayan di rayat nu. Om iti nopo katat diti nga' araat po ko' i nongokito di komolohingan nu,’ ka dau,” ka diyolo'. Om tolikud noddi i Musa om tongkiad no di raja'. 7 Om boro-boros noddi di raja' i tongomontiri' dau, boros ka diyolo', “Songkuro po o koloido' do tulun diti do mamagangau dati'? Pologoson nopo ilo tulun dot Israil do mamanau om koongoi i' iyolo' kasambayang dot id Tuhan, i Kinorohingan diyolo'. A' nu po okito do naraag noti pomogunan do Masir?” ka diyolo'. 8 Om lohowo' poddi kawagu iyo Musa di Harun do minongoi solowot di raja'. Om boros ka di raja' dot id diyolo', “Mongoi ngai' kou nopo katuu sambayang dot id Tuhan, i Kinorohingan dokoyu. Nga' isai ngai' kopio toi dokoyu o mongoi?” ka dau. 9 Om boros ka di Musa do suminimbar, “Mongoi ngai' nopo iyahai, om katanud ngai' o tangaanak om i tongomolohing no. Angatan ngai' nopo dahai o tangaanak dahai'd kusai om tangaanak dahai'd tondu', om koinsanai di dumba' om kambing, om sapi' dahai, tu' a' no milo dot a' iyahai papaharo do poginakanan do pomusou do Tuhan,” ka dau. 10 Om boros ka di raja', “Sumumpa' oku no dot id Tuhan dot a' pabanar dokoyu do patanud do tongoondu' om tangaanak dokoyu! Atalang no kopio do haro o pakat dokoyu'd sumaap. 11 A' oku i' kopio pabanar! Kokusayan no o pabanaron ku do mamanau do mongoi sambayang dot id Tuhan, dot iri kopio o pokionuon dokoyu!” ka dau. Om uyungo' noddi iyo Musa di Harun do mantad hiri'd walai di raja'. 12 Om boro-boros noddi o Tuhan dot id di Musa do poingkaa, “Pobilido' ino longon nu dot id sawat diti tana' do Masir do poporikot do katat. Om rumikot indo o katat do mongoi pangakan do koinsanai di songinsuni dit a' naraag di karambatu,” ka dau. 13 Om pobilido' noddi di Musa i sukud dau om porikoto' nod Tuhan i tongus do mantad id koulayon do tuminongus do tuminongkop di pomogunan do nosongodou do tadau'ddi om gisom do nosuaban. Om minnanawau nogiddi nga' korikot ngai' no i katat. 14 Om ogumu' tomod diri o katat do ruminikot om tuminokop do pointongkop do pomogunan diri. Om a' po insan o tulun do nokokito'd katat do miagal kopio'ddi kogumu' om aiso' no ot okito kawagu do miagal kopio'ddi dot id maso do tabantalan. 15 Om tokop nopo i katat do hiri'd tana' gisom dot oitom po o kokitanan; om kaakan ngai' nopo di katat it a' nangaraag di karambatu, om nangaakan ngai' i tua' do kayu. Om aiso' no ot otomou do noolu' do hiri'd guas do kayu, ko' id totonomon do pointongkop do pomogunan do Masir, tu' nangaayi' no di katat do mangakan. 16 Om olomus nopoddi i raja' do minomolohou di Musa om i Harun om boro-boros no iyau diyolo' do poingkaa, “Nokowonsoi oku nod dusa dot id Tuhan, i Kinorohingan nu om nokowonsoi oku do dusa dot id diya'. 17 Ompunai po kopio doho' iti dusa ku do baino', om sambayang no dot id Tuhan, i Kinorohingan nu do mongidu' diti hukuman do kapatai do mantad id doho',” ka dau. 18 Om tongkiad no i Musa do mantad hiri'd raja' om sambayang no iyau dot id Tuhan. 19 Om posimbano' noddi do Tuhan o kotonguson di tongus do mantad id koulayon om siliho' no do tongus di mantad id kotonobon dit opuhod tomod. Om kotonggoi noddi i katat di tongus do mantad id kotonobon. Om kotilib no do hiri'd Suok do Suis. Iso' po di katat nga' aiso' no o noolu' do hilo'd pomogunan do Masir. 20 Nga' pinokodou i' kawagu do Tuhan o ginawo di raja', gisom dot a' i' iyau papabanar di tulun dot Israil do mamanau.

Tuminuong

21 Om boros kad Tuhan dot id di Musa, “Poinsawato' ino longon nu do pointuduk do hilo'd tawan, om otuong indo o pointongkop do pomogunan do Masir,” ka dau. 22 Om potuduko' noddi di Musa do hilo'd tawan i longon dau, om tuong no dot odondom tomod o pointongkop do pomogunan do Masir do solinaid do tolu o tadau. 23 Om a' noddi i tulun do Masir kopogikikito, om iso' pod tulun nga' aiso' no o suminoliwan do mantad id walai diyolo' do solinaid diri. Nga' haro kasai' i' o tanawau do hiri'd kinoiyonon di tulun dot Israil. 24 Om lohowo' noddi di raja' i Musa om boro-boros no do poingkaa, “Pamanau kou nopo do mongoi sambayang dot id Tuhan, om potonudon ngai' nopo dokoyu i tongoondu' om i tangaanak dokoyu. Nga' poopungon ngai' po dokoyu do hiti i dumba', om kambing, om sapi' dokoyu,” ka dau. 25 Om boros ka di Musa do suminimbar, “Iyo nopoddi om onuan nu no iyahai'd tayam-tayam do maan do porsombahan om porsombahan di sorobon do patahakon dot id Tuhan, i Kinorohingan dahai. 26 Tanggayan ngai' i' dahai i tayam-tayam dahai; om iso' po nga' aiso' i o poopungon dahai. Om iyahai i' ot apatut do momili' di tayam-tayam do patahakon dahai dot id Tuhan, i Kinorohingan dahai. Om a' po dahai oilaan ondung honggo'ddi o tayam-tayam do patahakon dahai dot id Tuhan, dot a' po iyahai korikot do hilo',” ka dau. 27 Om pokodoho' pod Tuhan o ginawo di raja', gisom dot a' i' iyau pinapabanar diyolo' do mamanau. 28 Om boros ka di raja' dot id di Musa, “Poggidu' do mantad hiti! A' oku no siontong diya'! Ondung kopisolowot to kawagu, om apatai ko no,” ka dau. 29 Om boros ka di Musa, “Iyo nogiddi. A' ko no bo kokito kawagu doho',” ka dau.

Kinosoliwanan 11

Pinoboros di Musa dot Apatai o Tanak do Kusai dit id Gulu Kosusu

1 Om boros kaddi do Tuhan dot id di Musa, “Iso' po o hukuman do porikoton ku dot id raja' do Masir om id rayat dau. Katalib pondo iri om pabanaron kou nondo dau do mamanau. Om uyungon ngai' kou nopondo dau do mantad hiti. 2 Boro-boros nogi' dilo tulun dot Israil, om sunudan ngai' no iyolo' do mongoi pokianu do tamas om pirok do pongillumis do tinan do mantad id songkoduwo diyolo',” ka dau. 3 Om binsuhuo' nod Tuhan i tulun do Masir do rumonok di tulun dot Israil. Om agayo tomod diri o ngaran di Musa dot osorou di tongomontiri' om koinsanai di tulun. 4 Om boros kaddi di Musa dot id raja', “Poingkaa o boros do Tuhan, ‘Pitangatuong nopondo om tumongkop oku do pomogunan do Masir, 5 om apatai ngai' nopondo i tanak do kusai dit id gulu kosusu do hiti'd Masir, do mantad nopo di tanak do kusai di raja' dit id gulu kosusu, i sumowoli daa do momorinta', om gisom di tanak do kusai dit id gulu kosusu di turipon do tondu' di monnunutu do gandum. Om tanak do tayam-tayam dit id gulu kosusu nga' angapatai ngai' nogi'. 6 Om orongou nondo do pointongkop do pomogunan do Masir o giak do mogihad dot opuhod tomod, it a' po insan kosiliu om it a' nondo osiliu kawagu do koimbagu. 7 Nga' id pogialatan nopo do tulun om id pogialatan do tayam-tayam do tulun dot Israil om aiso' i' o mamagangau. Om oilaan nu nogindo do pisuwayon ku o tulun do Masir om tulun dot Israil,’ ka do Tuhan,” ka dau. 8 Om pupusai noddi di Musa i boros dau, boros ka dau, “Rumikot ngai' nopondo i montiri' nu om tumuku' iyolo' dot id toguang ku, om monuhu' nondo iyolo' doho' do mangangat do toinsanan do tulun ku do mogidu', om mamanau nogindo iyahai,” ka dau. Om tongkiad noddi i Musa do mantad hiri'd raja' do mikuwo'd otogod tomod. 9 Nokoboros no do Tuhan dot id di Musa o boros do poingkaa, “Sumurilog kasai' indo i raja' do boros nu, om kointalang ku indo o piro-piro o koimayaan do hiti'd pomogunan do Masir,” ka. 10 Om pointalango' ngai' no diyo Musa di Harun i kongoimayaan diri do hiri'd toguang di raja', nga' pinokodou i' do Tuhan o ginawo di raja', om a' iddi di raja' pinabanar i tulun dot Israil do tumongkiad di pomogunan dau.

Kinosoliwanan 12

I Tadau'd Agayo do Paska

1 Om boro-boros no o Tuhan dot id diyo Musa di Harun do hilo'd pomogunan do Masir. Boros ka dau, 2 “Tulan nodti o sumiliu do tulan do koiso' do koimpuunon do toun dokoyu. 3 Poboroson ngai' noti ponuhuan dot id toinsanan o tulun dot Israil. Tontok nopo do tadau do kohopod do tulan diti om mositi' no do momili' o pointikid-tikid do kusai do songinan o tanak do dumba' ko' songinan o tanak do kambing do maan di sompiiyon dau. 4 Ondung okuri' kopio iyolo' songilang-ilang om a' no kaayi' do mangakan do songinan o tanak do dumba' ko' tanak do kambing, om pokoino i' do piilangan diyolo' di songkoduwo diyolo' i songinan o tanak do dumba' ko' tanak do kambing, do miontok di kogumuon do tulun, om kogoyoo' do pangakan do tikanas do pointikid-tikid di tulun. 5 Nunu nopo o pilion dokoyu, dumba' tuu ko' kambing po nga' mositi' no do tontoluhan di sontoun nogi' o tumur, om it aiso' o bohiton do tinan. 6 Om totuong nopondo di tadau do kohopod om apat do tulan diti om mositi' no dot oinsanan nopo o tulun dot Israil do monumbali' do dumba' ko' kambing. 7 Om pogihilon nondo ot ongokooro' di raha' di sinumbali' do hiri'd miampaping di wawayaan, om hiri'd sawat di wawayaan do pointikid-tikid do walai di pangakanan di sinumbali'. 1|110|HK14F| Duwo torigi do miampaping do wawayaan om i boruti do hiri'd sawat|12.7 8 Om tontok i' do totuong diri do luguon i tonsi di sinumbali' om kanon nondo do mitonggoi di rapaon dit opoit om roti dit a' naralatan do pangambang. 9 Kada' matao' iri do mangakan om kada' losuo', suwai ko' luguon do mitonggoi di tulu om gakod om i suang do tian. 10 Kada' no do haro ot oolu' do gisom do kosuabon, ondung haro ot oolu' om sorobon ngai' nopo. 11 Om lomusan no do mangakan diri, tu' apatut do kapanampakai mantad kou no do maan do mamanau om kikasut kou no, om poingigit no dokoyu o sukud. Tu' tadau nopoddi om Tadau'd Agayo do Paska do maan do pomusou doho', i Tuhan. 12 Tontok nopondo do totuong diri om tumongkop oku nondo do pomogunan do Masir do mamatai do koinsanai di tanak do kusai dit id gulu, om koinsanai di tanak do tontoluhan do tayam-tayam dit id gulu kosusu. Om hukuman ngai' ku nondo i ponokokinorohingan do hilo'd Masir, tu' iyoho' no o Tuhan. 13 Iri nondo i raha' di pinogihil do hiri'd wawayaan di walai dokoyu o tanda' di walai do niyonon dokoyu. Om soira' nopondo dot okito ku i raha' diri, om toliban ku indo iyokoyu, om a' ku i' iyokoyu patayon do tontok do momohukum oku do pomogunan do Masir. 14 Ramayon no kopio dokoyu o tadau dot agayo diri do miagal do tadau dot agayo di don Tuhan, do kopomuhandaman di nowonsoi ku, iyoho' i Tuhan. Ramayon kasai' no dokoyu o tadau'ddi do gisom dot alaid,” ka dau.

I Tadau'd Agayo do Roti dit A' Kipangambang

15 Om boros ka do Tuhan, “Turu' o tadau do koloido' dot a' kou koino-ino do mangakan do roti di rinalatan do pangambang --- iri no i roti dit a' rinalatan do pangambang ot akanon dokoyu. Tontok nopo di tadau do koiso' om taamon ngai' no dokoyu i pangambang di songingopi' do hiri'd walai dokoyu, tu' ondung haro o tulun do kapangakan do roti di naralatan do pangambang do solinaid di turu' o tadau'ddi, om a' no iyau kohompit do tulun ku. 16 Tontok nopo di tadau do koiso' om di tadau do koturu', om mositi' no do tumimung kou do sumambayang. A' no koino-ino do haro o buruon dokoyu do suwai do tontok do tadau'ddi, nga' koino-ino kou indo do mogonsok do takanon. 17 Hondomon no kasai' dokoyu iti tadau dot agayo diti, tu' tontok no do tadau diti do posoliwanon ku o koinsanai'd bansa' dokoyu do mantad id pomogunan do Masir. Om poinggoyoon kasai' no dokoyu o tadau diti do miagal do tadau dot agayo do gisom dot alaid. 18 Om kada' kou no pangakan do roti di rinalatan do pangambang do mintonod di tadau do kohopod om apat do tulan do koiso' om gisom do tadau do koduwo nohopod om iso' do tulan diri. 19-20 Om turu' o tadau dot a' kou koino-ino do poopi' do pangambang do roti dot id walai dokoyu. Tu' ondung haro o tulun do mangakan do roti di naralatan do pangambang, do tulun tuu dot Israil ko' tulun pod bansa'd suwai, om a' no kohompit do tulun ku,” ka dau.

Paska di Koinsan i'

21 Om lohowo' no di Musa o koinsanai di boyoon do tulun dot Israil, om boro-boros no iyau dot id diyolo' do poingkaa, “Momili' kou no do tanak do dumba' ko' tanak do kambing do maan sumbolio', om aramai i' di sompiiyon dokoyu i tadau do Paska. 22 Mongoi kou no panganu do songwongkos o sakot do hisop om potobungon no do hiri'd raha' di tayam-tayam, i poinsuang di mangkuk, om pogihilon nogindo i raha' do hiri'd miampaping di wawayaan om hiri'd sawat di wawayaan di walai dokoyu. Om kada' nod haro o tongosongulun piya do sumoliwan do mantad hiri'd walai do gisom do kosuabon. 1|55|HK70E| I sakot do roitan do hisop|12.22 23 Soira' nopondo do tumongkop o Tuhan do pomogunan do Masir do mongoi pamatai di tulun do Masir, om okito nondo dau i raha' do hiri'd miampaping di wawayaan, om hiri'd sawat di wawayaan do walai dokoyu. Om a' indo do Tuhan pologoson i Moloikat di Mamatai do sumuang di walai do mongoi pamatai dokoyu. 24 Mositi' no do tonudon dokoyu om tonudon di tangaanak dokoyu o toturan diti do gisom dot alaid. 25 Soira' nopondo do sumuang kou di pomogunan di nakabatos do Tuhan do patahakon dot id dokoyu, om mositi' no do wonsoyon dokoyu iti natantu' mantad do wonsoyon do tontok do Paska. 26 Soira' nopod muhot i tangaanak dokoyu do poingkaa, ‘Nunu o komoyon diti wonsoyon do miagal diti?’ ka, 27 om sunudan no dokoyu do poingkaa, ‘Iti nopo om porsombahan di sorobon do dong Paska do maan do pomusou do Tuhan, tu' tinoliban i' dau i kawalayan do tulun dot Israil di hilo'd Masir. Om pinatai dau i tulun do Masir, nga' iyati' nopo om pinologos i' dau do poimpasi,’ kanto dokoyu,” ka dau. Om otud noddi i tulun dot Israil do tuminuku: 28 Om pamanau noddi iyolo' om wonsoyo' no diyolo' i pinonuhuan do Tuhan diyo' Musa di Harun.

Nangapatai i Tanak do Kusai dit id Gulu

29 Pitangatuong noddi om patayo' ngai' no do Tuhan o tanak do kusai dit id dotuo di tulun do Masir. Impuuno' nopo i tanak do kusai di raja' dot id gulu, i sumowoli mantad daa do sumiliu do raja', om gisom di tanak do kusai dit id gulu do tanak di tulun di songinggiil; om koinsanai di tanak do tayam-tayam dit id gulu kosusu nga' pinatai nogi'. 30 Tontok nopoddi do totuong diri om koposikai no i raja' om i tongomontiri' di raja' om koinsanai di tulun do Masir. Om lompud poddi do tihad o torongou do pointongkop do pomogunan do Masir, tu' aiso' no o tiso' pod walai dot a' napatayan do tanak do kusai. 31 Om totuong iddi do linohou di raja' iyo Musa di Harun, om boro-boros no iyau do poingkaa, “Poggidu' ngai' kou do mantad hiti, iyokoyu i tulun dot Israil! Tongkiad kou no diti pomogunan ku; ongoi kou nopo sambayang dot id Tuhan dokoyu do miagal di pinokianu dokoyu. 32 Igitan ngai' nopo dokoyu i dumba' om kambing, om sapi' dokoyu, om tumongkiad no do mantad hiti. Om pokionuan oku no iyoho' do barakat,” ka dau. 33 Om odsuuron tomod diri di tulun do Masir i tulun dot Israil do marau-arau do sumoliwan di pomogunan diyolo'. Boros ka no diyolo', “Apatai ngai' no iyahai dot a' kou no tumongkiad do mantad hiti,” ka no. 34 Om ponuo' noddi di tulun dot Israil do tapung dit a' naralatan do pangambang, om i nobulugu' mantad no, i pagansakan diyolo' do roti, om lopoto' no diyolo'd kain i pagansakan diri, om saano' nogiddi diyolo'. 35 Om nowonsoi ngai' no diyolo' i nokoboros di Musa, om nokopokianu no iyolo' do tamas om pirok do pongillumis do tinan om pakayan do mantad id tulun do Masir. 36 Om pinoronok diri do Tuhan i tulun do Masir dot id toguang di tulun dot Israil, om nunu nopoddi i pinokianu di tulun dot Israil nga' patahako' ngai' nopo di tulun do Masir dot id diyolo'. Om iyo noddi i tulun dot Israil do minononggoi do kakayaan do tulun do Masir, do suminoliwan do mantad id pomogunan diri.

Tuminongkiad o Tulun dot Israil do Pomogunan do Masir

37 Om pamanau nopod gakod i tulun dot Israil do mantad id bandar do Raamsis do kuminaa do hilo'd bandar do Sukot. Kogumuon nopo diyolo' nga' haro i' doti' ot onom nahatus noribu o tongokusai nogi' om a' po kohompit i tongoondu' om i tangaanak. 38 Om ogumu' po o tulun do bansa'd suwai do nakatanud diyolo', om ogumu' o dumba' om kambing, om sapi' do nigitan diyolo'. 39 Om onsoko' noddi diyolo' i tapung di nobulugu' mantad noddi, it a' rinalatan do pangambang, i nigitan diyolo' do mantad hilo'd Masir. A' no naralatan do pangambang i tapung diri om a' no diyolo' nosodia' i takanon diyolo', tu' narau-arau tomod no iyolo' do nuyung do mantad id pomogunan do Masir. 40 Koloidon nopo di tulun dot Israil do poundorong do hilo'd Masir om apat nahatus om tolu nohopod o toun. 41 Om tontok di norikot i tadau do kinopupuson dit apat nahatus om tolu nohopod o toun, om soliwan ngai' noddi i don Tuhan do tulun do mantad hilo'd Masir. 42 Tontok no do totuong diri do tinamangan do Tuhan iyolo' do pinoposoliwan diyolo' do mantad id pomogunan do Masir; om iri nogi' o totuong di pinotobilang do maan do don Tuhan do sumiliu do kopomuhandaman do gisom dot alaid. Om tontok no do totuong diri dot apatut do mumbangan-bangan i tulun dot Israil.

Oturan do Tadau'd Agayo do Paska

43 Om boros kad Tuhan dot id diyo Musa di Harun, “Iti no ot oturan do pasal do tadau dot agayo do Paska: Tulun nopo di bansa'd suwai, om a' i' koino-ino do mangakan di taakanon do don Paska. 44 Nga' iri nopo i turipon di noboli dokoyu om koino-ino i' do mangakan, do nosunatan no iyau. 45 Tulun nopo di nokoumbaya' no toomod om i tulun di pakaraja' do gumadsi' om a' i' koino-ino do mangakan diri. 46 Akanon ngai' no i taakanon diri do hiri'd suang di walai di pinagansakan; tu' a' i' koino-ino iri do tanggayan do sumoliwan. Om kada' nod haro ot otipu' do tulang di tayam-tayam di sumbolion diri. 47 Om mositi' no do ramayon do koinsanai'd tulun dot Israil o tadau dot agayo diti. 48 Nga' tulun nopo dit a' po nosunatan om a' i' koino-ino do mangakan diri. Ondung haro o tulun do bansa'd suwai do poingiyon dot id rolot dokoyu dit orohian do tumanud do mamaramai di tadau do Paska do maan do pomusou do Tuhan, om sunatan po dokoyu ngai' i tongokusai do hiri'd sompiiyon dau. Om poiyoon nogindo dokoyu iyolo' do miagal do tulun kopio dot Israil. Om koino-ino nondo iyolo' do tumanud do mamaramai di tadau'd Paska. 49 Iyo ngai' nopoddi ot oturan do tonudon do tulun dot Israil om i tulun do bansa'd suwai di poinsugku' dokoyu,” ka dau. 50 Om oinsanan nopo i tulun dot Israil do minumboyo' om minomonsoi do koinsanai di pinonuhuan do Tuhan dot id di Musa om id di Harun. 51 Om tontok nod tadau'ddi do pinosoliwan do Tuhan o koinsanai di tulun dot Israil do mantad id pomogunan do Masir.

Kinosoliwanan 13

Siniliu do Porsombahan i Tanak do Kusai dit id Gulu

1 Om boros ka do Tuhan dot id di Musa, 2 “Patahakon no dot id doho' o koinsanai di tanak do kusai dit id gulu kosusu do maan do porsombahan. Tu' koinsanai'd tanak do kusai do tulun dot Israil dit id gulu, om koinsanai'd tanak do tontoluhan di tayam-tayam dit id gulu kosusu nga' doho' ngai' no,” ka dau.

Tadau'd Agayo do Roti dit A' Kipangambang

3 Om boros ka di Musa dot id bansa' dot Israil, “Soro-sorohon no o tadau'dti --- tu' tadau do kinotongkiadan dokoyu di pomogunan do Masir, i pomogunan di nokoiyonon dokoyu do siniliu'd turipon. Tadau nodti do pinosoliwan kou do Tuhan, dot i kuasa' dau dot agayo o pinoposoliwan. Kada' kou pangakan do roti di rinalatan do pangambang. 4 Om tontok no do tadau'dti, i tadau do koiso' do tulan dot Abib, i tulan do koiso', do tuminongkiad kou do mantad id pomogunan do Masir. 5 Nokosumpa' no o Tuhan dot id taki-aki dokoyu do papatahak dot id dokoyu di pomogunan do tulun do Kanaan, om Hit, om Amori, om Howi, om Yobus. Om soira' nopondo do kaatod kou'd Tuhan do hilo'd pomogunan di kaya' om oluhub diri, om ramayon no dokoyu iti tadau dot agayo diti do pointikid-tikid do toun, do tontok di tulan do koiso'. 6 Kanon nopo dokoyu do solinaid do turu' o tadau om roti dit a' rinalatan do pangambang, om tontok nopondo di koturu' do tadau om papaharo kou nondo do karamayan do pomusou'd Tuhan. 7 Kada' kou pangakan do roti di naralatan do pangambang do solinaid do turu' o tadau. Om kada' nod haro o pangambang om roti di naralatan do pangambang dot id pointongkop do pomogunan dokoyu. 8 Tontok nopo do tumimpuun o karamayan diti om posuhuton no dokoyu i tangaanak dokoyu, do wonsoyon pogi' dokoyu o koinsanai'ddi nga' maan do kopomuhandaman di winonsoi'd Tuhan dot id dokoyu do tontok di suminoliwan kou do mantad id pomogunan do Masir. 9 Iti nopo karamayan diti nga' sumiliu do poposorou dokoyu, do miagal dot iso' o tanda' di poingkogos dot id longon ko' i poingkogos do ponong id turos dokoyu; iti no o poposorou dokoyu do mangapal om minsingilo do koinsanai di Tourat do Tuhan, tu' iri no i sinundu do Tuhan dit agayo kopio o pinoposoliwan dokoyu do mantad hilo'd Masir. 10 Ramayon no o tadau'ddi do tontok di maso do natantu' mantad do pointikid do toun,” ka dau.

I Tanak do Kusai dit id Gulu Kosusu

11 Om boros kad Musa dot id tulun dot Israil, “Pootodon kou nondo do Tuhan do hilo'd pomogunan do tulun do Kanaan, i nakabatos mantad dau do mikuwo'd sumpa' do patahakon dot id dokoyu om id taki-aki dokoyu. Patahakon nopondo dau iri dot id dokoyu, 12 om patahakon no dokoyu dot id Tuhan o koinsanai di tanak do kusai dit id gulu kosusu, om koinsanai di tontoluhan do tayam-tayam dokoyu dit id gulu kosusu, tu' koinsanai'ddi om don Tuhan ngai' no. 13 Nga' bolion i' dokoyu kawagu do mantad id Tuhan o koinsanai di tontoluhan do kaladai dit id gulu kosusu, do pomoli nopo om tanak do dumba' di patahakon dokoyu do maan do porsombahan di sumbolion. Ondung a' dokoyu bolion kawagu i kaladai'ddi om tipuon no o liou di kaladai. Bolion no kawagu dokoyu o koinsanai di tanak dokoyu'd kusai dit id gulu kosusu. 14 Koimbagu nopondo, do muhot i tangaanak dokoyu do komoyon diti toturan, om posimbaron nopondo dokoyu om poingkaa, ‘Pinosoliwan toko'd Tuhan dot i kuasa' dau dot agayo o pinoposoliwan dati' do mantad hilo'd Masir, i kinoiyonon toko' do siniliu do turipon. 15 Tontok di pinokodou di raja' do Masir o ginawo dau, om dit a' iyau pinapabanar dati' do mamanau, om patayo' noddi do Tuhan o koinsanai di tanak do kusai dit id gulu kosusu, om koinsanai di tanak do tontoluhan do tayam-tayam dit id gulu kosusu do pointongkop do pomogunan do Masir. Om iri noddi o kapatahakan toko' do pointikid-tikid di tontoluhan do tayam-tayam dit id gulu kosusu, do maan do porsombahan di sumbolion do patahakon dot id Tuhan, nga' bolion indo kawagu i tangaanak toko'd kusai dit id gulu kosusu. 16 Iti nopo karamayan diti om poposorou dati' do miagal dot iso' o tanda' do poingkogos do longon toko' ko' poingkogos do ponong id turos toko'; om iti no o poposorou dati' do pinosoliwan toko'd Tuhan do mantad hilo'd Masir dot i kuasa' dau dit agayo o pinoposoliwan,’ kanto dokoyu,” ka dau.

I Haun om i Tapui do Poorigi

17 Tontok di pinabanar di raja' do Masir i tulun dot Israil do mamanau, om a' id Kinorohingan pinosusui iyolo' di ralan di potoropis do tisan do rahat, i poingkaa do hilo'd pomogunan do Pilistin, do mulong piya dot iri daa o ralan dit opoting. Osorou nopod Kinorohingan om poingkaa, “Mada' oku i' dot opinduwaan ilo tongoulun, om gumuli' nondo kawagu iyolo' do hilo'd Masir dot okito diyolo' dot a' iyolo' milo dot a' monokisangod,” ka. 18 Om posorilio' noddi dau iyolo' do pinawaya' di tana' do kowotuan do poingkaa do hiri'd Rahat dot Aragang. Om ongkirapo-rapo nod don sumasangod i tulun dot Israil. 19 Om tanggayai noddi di Musa i tulang di Yusup do mantad hilo'd Masir, tu' tontok nopoddi poimpasi po i Yusup om sinuhu' dau i tulun dot Israil do suminumpa' do momonsoi do miagal diri. Poingkaa o bilin di Yusup, “Posoliwanon kou nopondo do Kinorohingan, om tanggayan no kopio dokoyu o tulang ku do mantad id kinoiyonon diti,” ka. 20 Om tongkiad noddi i tulun dot Israil do mantad hilo'd Sukot om powonsoyo' no diyolo' o kiim diyolo' do hilo'd bandar dot Itam, it id tisan di tana' do kowotuan. 21 Tontok nopo do dangadau om mogulu o Tuhan diyolo' do miagal-agal do haun do poorigi do popotunud diyolo' do ralan di susuyon diyolo', om dongotuong no om miagal-agal iyau'd tapui do poorigi do hiri'd gulu-gulu diyolo' do monitiu om popotunud diyolo', om milo iddi iyolo'd mamanau do dangadau om dongotuong. 22 Om iri nopo haun do poorigi diri nga' hiri kasai' nopod gulu-gulu di tulun dot Israil do dangadau, om dongotuong nondo om i tapui di poorigi ot id gulu-gulu diyolo'.

Kinosoliwanan 14

Suminoborong di Rahat dot Aragang

1 Om boro-boros noddi o Tuhan dot id di Musa do poingkaa, 2 “Suhuon no ilo tulun dot Israil do gumuli' kawagu do gisom do korikot do hilo'd dotimbabaan di bandar do Pi-Hahirot, it id piolitan di bandar do Migdol om Rahat dot Aragang, it id somok do bandar do Baal-Sipon, om suhuon no iyolo' do popowonsoi do kiim diyolo' do hilo'. 3 Om momusorou nondo i raja' do Masir do maso diti tulun dot Israil do minghombo do hiti'd pomogunan diti, do nosorilian diti tana' do kowotuan. 4 Pokodohon ku nondo o ginawo dau gisom do mongoi nondo iyau pomogusa' dokoyu, om kamanang oku indo dot id sawat di raja' do Masir om i piro-piro o soudor dau. Om iri nondo i kamanangan ku'ddi o kopobontugan do tulun doho', om iri tulun do Masir nga' koilo nondo dot iyoho' o Tuhan,” ka dau. Om wonsoyo' noddi di tulun dot Israil o miagal di pinonuhuan do Tuhan dot id diyolo'. 5 Om soira' di nosunudan i raja' do Masir do nokopoggidu' i tulun dot Israil, om ponosol noddi iyau om i montiri' dau, om boros ka diyolo', “Nunu'ddi kopio iti winonsoi toko'dti? Tu' pinologos toko' i tulun dot Israil do minogidu', om aiso' noddi o turipon toko'!” ka diyolo'. 6 Om posodiawo' ngai' noddi di raja' i korita'-kuda' dau di don sumasangod om i soudor dau. 7 Om pamanau noddi iyau do miwoyo' do koinsanai di korita'-kuda' dau om kohompit nogi' it onom nahatus o korita'-kuda' dit ongosonong kopio do nigitan di piro-piro o gunsiou dau. 8 Om pokodoho' noddi do Tuhan o ginawo di raja', om ngoyo' no di raja' gusao' i tulun dot Israil, i maso no do manau-panau do mogidu' do mantad id pomogunan diri, do pointirung do Tuhan. 9 Om gusao' no iyolo' di soudor do Masir dit ongkikuda' om it ongkikorita'-kuda', om kokosupai no iyolo' do hiri'd pinawansayan diyolo' do kiim, it id toning di Rahat dot Aragang, it id somok do bandar do Pi-Hahirot om bandar do Baal Sipon. 10 Om tontok di nokito di tulun dot Israil i raja' do Masir om i piro-piro o soudor dau do momok-somok diyolo', om moddosi tomod diri iyolo' om pomolohou no iyolo'd Tuhan do mokitulung dau. 11 Om boros ka diyolo' dot id di Musa, “Aiso' toi o kalabangan do hilo'd Masir? Tu' minog kopio ko do minangangat dahai do hiti'd tana' do kowotuan do mongoi patai do hiti? Antangai pogiddi o kinootuson diti winonsoi nu tu' nongoi nu i' iyahai posoliwano' do mantad hilo'd Masir! 12 A' toi dahai iya' nosunudan no mantad dit a' toko' po nakapamanau dot osiliu o miagal diti? Nosunudan i' dahai iya' do monongkiad dahai om popologos dahai do turipon kasai' do tulun do Masir. Osonong-sonong nogi' do turipon kasai' do hilo' ko' apatai do hiti'd tana' do kowotuan,” ka no diyolo'. 13 Om boros kad Musa do suminimbar, “Kada' kou poddosi! Pogiroton nopo o ginawo, om kokito kou indo ondung nunu o wonsoyon do Tuhan do pamasi dau dokoyu do baino'; tu' a' kou nondo bo kokito kawagu diti tulun do Masir. 14 Tuhan i' o sumaap do mogobi' dokoyu, om iyokoyu nopo om a' i' minog do momonsoi do nunu nopo,” ka dau. 15 Om boros kad Tuhan dot id di Musa, “Nokuro tu' millohou ko do mokitulung? Suhuo' nogi' ilo tulun dot Israil do lumombus do mamanau. 16 Pobilido' ino sukud nu om potudukon i' dot id soibau dilo rahat. Om migirang indo ilo waig, om milo i' ilo tulun dot Israil do sumoborong dilo rahat, do maya' di tana' di narasakan do waig. 17 Om pokodohon ku nondo o ginawo dilo tulun do Masir gisom do mongoi po iyolo' pomogusa' do tulun dot Israil, om kamanang oku indo dot id sawat do raja' do Masir om i piro-piro o soudor dau, om i piro-piro o soudor dau dit ongkikorita'-kuda'. Om iri nondo i kamanangan ku o kopobontugan do tulun doho'; 18 om iri nondo o koilaan di tulun do Masir dot iyoho' no o Tuhan,” ka dau. 19 Om ongoi noddi i moloikat do Kinorohingan, i hiri daa id gulu-gulu di soudor dot Israil, do hiri'd ponong id tohuri. Om iri nogi' i haun di poorigi nga' minundaliu do kuminaa do hiri'd 20 piolitan di tulun do Masir om i tulun dot Israil. Om otuong diri i haun do ponong hiri'd tulun do Masir nga' mogulinau i' i haun do ponong hiri'd tulun dot Israil. Om a' iddi kopiinsomok i duwo o posukan do soudor do solinaid do totuong diri. 21 Om potuduko' no di Musa o longon dau do hiri'd soibau di rahat, om popuhodo' nod Tuhan i tongus do mantad id koulayon do gisom do noimpit i waig do rahat. Om mongus-tongus nopoddi i tongus do solinaid do totuong diri gisom do notuu i rahat. Om nopigirang diri i waig, 22 om darapas no i tulun dot Israil di rahat do minaya' di tana' di narasakan do waig; om iri nopo waig di rahat nga' poingolig do hiri'd miampaping diyolo'. 23 Om gusa' noddi di tulun dot Israil do hiri'd rahat i tulun do Masir do mogiwoyo-woyo' do koinsanai di kuda', om i soudor dit ongkikorita'-kuda'. 24 Om maha' di minnanawau no om ontong no o Tuhan do mantad hiri'd tapui om i haun di poorigi, do minontong di soudor do Masir, om gangaho' no dau iyolo'. 25 Om pasangato' ngai' nod Tuhan i ruda' di korita'-kuda' diyolo', gisom dot osusa' tomod diri iyolo' do mamanau. Om boros ka di tulun do Masir, “Obian i' pama do Tuhan o tulun dot Israil do sumaap dati'. Kainou, poggidu' toko' nogi' do mantad hiti!” ka. 26 Om boros kad Tuhan dot id di Musa, “Potuduko' ino longon nu do hilo'd soibau dilo rahat, om mikintup i' kawagu ilo waig do mangalit dilo tulun do Masir, om ilo soudor diyolo' dit ongkikorita'-kuda',” ka dau. 27 Om potuduko' no di Musa o longon dau do hiri'd soibau di rahat, om kotonduli' noddi kawagu i waig do miagal di timpuun i', di mingungulai o tadau. Om umbal no daa i tulun do Masir do mogidu' do mantad hiri'd rahat nga' pataamo' nogi' iyolo'd Tuhan do hiri'd rahat. 28 Om kopikintup noddi i waig om koolitai ngai' nopo i korita'-kuda', om i popotunud di korita'-kuda', om koinsanai di soudor do Masir di suminusuhut daa di tulun dot Israil do hiri'd rahat; om iso' po diyolo' nga' aiso' no o napasi. 29 Nga' iri nopo tulun dot Israil om otuu i' o tana' do winayaan do suminoborong di rahat, om poingolig i waig do rahat do miampaping diyolo'. 30 Om tontok no do tadau'ddi do pinasi do Tuhan i tulun dot Israil do mantad id tulun do Masir, om songingiliu poddi i rata' di tulun do Masir do hiri'd tisan di rahat do nokito di tulun dot Israil. 31 Om soira' di nokito di tulun dot Israil i kuasa' do Tuhan dit agayo kopio'ddi, om i pinangala' dau di tulun do Masir, om oimayaan tomod diri iyolo' om oronok iyolo' do Tuhan; om otumbayaan noddi iyolo' do Tuhan om monongkuyaan iyolo' di Musa, i susuhuon do Tuhan.

Kinosoliwanan 15

Sinding di Musa

1 Om sindingo' noddi di Musa om i tulun dot Israil iti sinding diti dot id Tuhan, “Modsinding oku dot id Tuhan, tu' agayo o kinamanangan dau. Pinataam ngai' dau i kuda' om i songinsakai di kuda' do hilo'd rahat. 2 Tuhan no it okoris do mongintirung doho'; iyau no i minamasi doho'. Iyau no o Kinorohingan ku, om royohon ku no iyau, iyau no o Kinorohingan di tapa' ku, om sindingon ku no o kogoyoo' dau. 3 Tuhan nopo om gunsiou; Tuhan no o ngaran dau. 4 Pinataam ngai' dau i soudor do Masir om i korita'-kuda' diyolo' do hilo'd rahat. Nongolondod do hilo'd Rahat dot Aragang i gunsiou diyolo' dit ongokilos. 5 Noolitan iyolo' di rahat dot aralom, om nolonsod iyolo' do gisom do nakananad do miagal do watu. 6 Agayo o kuasa' do longon nu'd wanan, oi Tuhan, komumuk do pisangod i longon nu. 7 Agayo no o kinamanangan nu pogitotongkiadon nu nopo o pisangod nu. Iyo pod tapui i kototogod nu do sumikit, do monorob diyolo' do miagal do rahami. 8 Sougio' nu no i rahat, om lingkum no i waig do mininsawat. Minolig i waig do miagal do tolig, om milo diri do winayaan i hiri'd nanad. 9 Boros ka di pisangod, ‘Gusaon ku nondo iyolo' om ingkosupan ku, bohogion ku nondo i dapu' diyolo', om onuon ngai' ku i korohian ku. Kodongon ku nondo o gayang ku, om ahawon ngai' ku o koinsanai di dapu' diyolo',’ ka. 10 Nga' insan ko no pomuhobo, oi Tuhan, om kongolondod ngai' no i tulun do Masir. Iyo po iyolo' do gundol do nolonsod do hiri'd waig di korolosi kopio. 11 Oi Tuhan, isai poo o ponokokinorohingan do koiyo diya'? Isai poo o koiyo diya' tu' kikagayaan om olidang? Isai poo o milo do momonsoi do koimayaan om momonsoi dit angagayo kopio do miagal di winonsoi nu? 12 Potuduko' nu no o longon nu'd wanan, om tolono' nopo do tana' i pisangod dahai. 13 Winoyo' nu i tulun di pinasi nu, tu' sumulung ko i' di batos nu. Nintirungan nu iyolo' di kokorisan nu dot agayo, om winoyo' nu iyolo' do gisom do nokorikot do hilo'd tana' nu dit olidang. 14 Nokorongou ngai' no i bansa' do suwai, om gagaran po iyolo' dot opopoddosian. Ongooris po tomod i tulun do Pilistin, 15 moddosi ngai' po i boyoon dot Idom. Gagaran ngai' po i gunsiou do Muab, a' no kotori' i tulun do Kanaan. 16 Noponu' po iyolo' do kopoddosian om koorisan, nokokito iyolo' di kokoriso' nu, oi Tuhan. Aiso' no o pokukurayan diyolo' dot opopoddosian, do gisom do nakatalib do minamanau i tulun nu --- i tulun di pinoidu' nu do mantad id ponguripanan. 17 Pootodo' nu no iyolo', om poundorongo' nu no do hilo'd nuluhon nu dit olidang, i kinoiyonon do nopili' nu dot iyonon nu, oi Tuhan, i Walai'd Sasambayangan dot Agayo di winaal nu. 18 Iya' no, oi Tuhan, o raja' do gisom dot alaid,” ka diyolo'.

Sinding di Miriam

19 Om darapas no i tulun dot Israil di rahat dot i tana' di nopigirangan di waig do rahat o winayaan. Nga' soira' di duminarapas di rahat i tulun do Masir do mogiwoyo-woyo' di korita'-kuda', om i popotunud di korita'-kuda', om poluyungo' no kawagu'd Tuhan i waig, om koolitai no iyolo'. 20 Om ngoyo' no di Miriam i tamburin dau. I Miriam nopo om nabi, i tobpinai di Harun do tondu'. Om tanud ngai' no dau i tongoondu' do monuntung di tamburin om santari-tari' iyolo'. 21 Om podsindingai no di Miriam iyolo' do sinding do poingkaa, “Kainou modsinding dot id Tuhan royoho' toko' no om pobontugo' toko' no iyau. Pinataam ngai' dau do hilo'd rahat i kuda' om i songinsakai di kuda',” ka dau.

I Waig dot Opoit

22 Om woyoo' no di Musa i tulun dot Israil do minundaliu do mantad hilo'd Rahat dot Aragang om pakayaai noddi diyolo' do hilo'd tana' do kowotuan do Sur. Om tolu no tadau diyolo' do manau-panau do hiri'd tana' do kowotuan nga' aiso' i' o waig do nabantalan diyolo'. 23 Om korikot noddi iyolo' dot id iso' o kinoiyonon di roitan do Mara, nga' iri nopo waig do hiri om adalaan tomod kopoit, om a' no diyolo' milo dot inumon. Om iri no o kinopomungaranan do kinoiyonon diri do Mara, tu' komoyon nopoddi om opoit. 24 Om sontogod-togod nopo di Musa i tulun, om ponguhot no iyolo', “Nunu no o tinumon toko'?” ka no diyolo'. 25 Om sambayang no i Musa dot id Tuhan do mikuwo'd iso-iso' no kopio o ginawo dau, om potuduko' noddi do Tuhan dot id di Musa o sallangod o kayu. Om pataamo' no di Musa i kayu'ddi do hiri'd waig, om osonong noddi dot inumon i waig. Om hilo' nod kinoiyonon diri do nonuan iyolo'd Tuhan do piro-piro o toturan om hilo' nogi' do pinogumbalan iyolo' do Tuhan. 26 Boros ka do Tuhan, “Umboyoon ngai' no dokoyu o boros ku om wonsoyon it osonong dot id pagantangan ku, om tonudon no o koinsanai di pinonuhuan ku. Ondung wonsoyon dokoyu o miagal diri, om a' kou no ohukuman di toruol di pinorikot ku dot id tulun do Masir. Iyoho' no o Tuhan, i momolingos dokoyu,” ka dau. 27 Om korikot no iyolo' dot id iso' o kinoiyonon di roitan dot Ilim. Om hiri nopo nga' haro o hopod om duwo o tudan do waig om haro turu' nohopod o guas do kurma. Om powonsoyo' no diyolo' o kiim diyolo' do hiri'd doros di waig.

Kinosoliwanan 16

Manna om I Burung Puyuh

1 Om pamanau ngai' noddi i tulun dot Israil do tuminongkiad dot Ilim, om tontok di kohopod om limo do tadau di tulan do koduwo, do mantad di kinosoliwanan diyolo' do hilo'd Masir, om korikot no iyolo' do hilo'd tana' do kowotuan do Sin, it id piolitan dot Ilim om i Nuluhon do Sinai. 2 Om di nopoddi hilo' iyolo'd tana' do kowotuan om sontogod-togod poddi iyolo' diyo Musa di Harun. 3 Boros ka diyolo', “Orohian nogi' daa iyahai do pinatai iyahai do Tuhan di hilo' po iyahai id Masir. Tu' hilo' nopo om koirikau-rikau po iyahai do mangakan do tikanas om kopimbangat do mangakan do taakanon do suwai. Nga' ngoyon nu no iyahai polikapai do hiti'd tana' do kowotuan do gisom dot angapatai ngai' iyahai,” ka diyolo'. 4 Om boros kad Tuhan dot id di Musa, “Porikoton ku no o taakanon dit a' aayi-ayi' do miagal pod rasam do mantad hilo'd tawan do patahakon ku dokoyu do baino'. Om sumoliwan ngai' nondo i tulun do pointikid-tikid do tadau do mongoi pomuhu'ddi do gisom do kabagal do tadau'ddi. Om iti no o ralan ku do mogumbal diyolo' do pongilo ku ondung tumanud kopio iyolo' do boros ku. 5 Tontok nopo do tadau do koonom om piluapon diyolo' ko' i puhuon kasai' ot onuon, om sodiaon i taakanon diri,” ka dau. 6 Om boros kaddi diyo Musa di Harun dot id toinsanan do tulun dot Israil, “Sosodopon nopod baino', om koilo kou nondo do Tuhan i' kopio o pinoposoliwan dokoyu do mantad hilo'd Masir. 7 Kosuabon nopondo om kokito kou di tulinau di kosorong kopio do mantad id koropohon do Tuhan. Norongou no dau i boros dokoyu do sontogod-togod dot id dau --- iyau i' o katagadan dokoyu, tu' iyahai nopo om momonsoi no di ponuhuan dau,” ka diyolo'. 8 Om boros kaddi di Musa, “Tuhan indo o manahak dokoyu'd tikanas do kanon do dongsosodopon, om manahak do roti do songkuro nopo o kogumuon do korohian dokoyu do dongkosuabon. Tu' norongou kou nod Tuhan do sontogod-togod dot id dau. Tontok nopo di mogod-togod kou dahai, om otopot nopo kopio om mogod-togod kou'd Tuhan diri,” ka dau. 9 Om boros kaddi di Musa dot id di Harun, “Sunudan ngai' no i tulun do mongoi timbaba' do Tuhan, tu' norongou no dau i boros diyolo'd mogod-togod,” ka. 10 Om daamot po di Harun do mimboros om ontong ngai' no i tulun do ponong hiri'd tana' do kowotuan, om sigog ka nopo dot intalang i tulinau do Tuhan di kosorong tomod do hiri'd haun. 11 Om boros kad Tuhan dot id di Musa, 12 “Norongou ku no i boros do tulun dot Israil do sontogod-togod. Om sunudan no iyolo' do dongsosodopon nopo om kaakan no iyolo'd tikanas, om dongkosuabon no om kaanu iyolo' do songkuro nopo kogumuon do roti do korohian diyolo'. Om koilo nogindo iyolo' dot iyoho' no i Tuhan, o Kinorohingan diyolo',” ka dau. 13 Sosodopon noddi om sondot no o tombolog dot ogumu' di roitan do burung puyuh do kotokop di pinomukiiman diyolo' o kogumuo', om kosuabon no om haro o bolobou do pointongkop di pinomukiiman. 1|40|HK5F| Burung puyuh|16.13 14 Om soira'ddi di notuu i bolobou, om haro'ddi ot oniipis do koiyo-iyo do sisi' do hiri'd soibau di tana' do kowotuan. Om kokitanan nopoddi nga' miagal do bolobou di nosiliu dot ais do mogibulugu-lugu' dot ongokooro'. 15 Om soira' di nokito di tulun dot Israil iri om a' i' iyolo' koilo ondung nunu o ngaran diri, om pogiuhot-uhot no iyolo', “Nunu malo'?” ka diyolo'. Om boros ka di Musa dot id diyolo', “Ilo' no i takano' do pinatahak do Tuhan dot id dokoyu, do maan dokoyu'd kanon. 16 Pinonuhuan nopo do Tuhan om momuhu ngai' kou nopo do songkuro nopo o kabagal dokoyu, do duwo o lito do puhuon do pointikid-tikid do tulun do mantad id iso' o sompiiyon,” ka dau. 17 Om tonudo' noddi di tulun dot Israil i pinonuhuan diri, om haro i' o lobi do duwo o lito do notimung om haro ot okuri' ko' iri. 18 Om tontok di nadang diyolo' i pinuhu diyolo'ddi, om i tulun dit ogumu' o nopuhu nga' a' i' adalaan kogumu' o naanu, om it okuri' o nopuhu nga' a' i' adalaan kokuri' o naanu. Miniumbagal-bagal no kopio o nopuhu do pointikid-tikid diyolo'. 19 Om boros ka di Musa dot id diyolo', “A' i' koino-ino do haro o tongosongulun piya do popoopi' diti do gisom do tadau'd suab,” ka dau. 20 Nga' haro i' o piro-piro diyolo' dot a' minokinongou di boros di Musa, om poopio' i' diyolo' o wookon di roti'ddi. Kosuabon noddi om noponu' pod giuk om outong o kosingudan di takanon diri. Om otogod diri i Musa diyolo'. 21 Pointikid-tikid do kosuabon om mongoi ngai' nopo i tulun pomuhu di takanon diri do gisom do kabagal diyolo'; om alasu' nopondo o tadau, om tumonu' nopo i noolu-olu' do hiri'd tana'. 22 Tontok nopo di tadau'd koonom, om induwo piluap o kogumuon do pinuhu diyolo'; apat o lito do puhuon dot iso' o tulun. Om rikot ngai' nopo i boyoon di tulun dot Israil do minongoi pomisunud di Musa do pasal diri. 23 Om boros ka dau dot id diyolo', “Nokoboros nod Tuhan do suab nopo om tadau do koundarangan om tadau dit olidang, i nokotobilang do maan do don Tuhan. Luguon nod baino' i luguon dokoyu, om losuon do baino' i losuon dokoyu. Om honggo nopondo it oolu', om poopion no do maan do suab,” ka dau. 24 Om poopio' no diyolo' i noolu' do maan do tadau kawagu, do miagal di pinonuhuan di Musa, om a' i' nounos i pinoopi' diri om a' giniukon. 25 Om boros kad Musa, “Iti no o takanon dokoyu'd baino', tu' baino' nopo om tadau'd Sabat, i tadau'd koundarangan do nokotobilang do maan do pomusou'd Tuhan, om aiso' no o taakanon dot okito dokoyu do hilo'd liwan diti kokiiman. 26 Momuhu kou nopo do taakanon do solinaid dot onom o tadau nga' tontok nopo di koturu' do tadau, i tadau do koundarangan, om aiso' no o ngoyon puhuo',” ka dau. 27 Tontok di koturu' do tadau, om haro po daa o piro-piro di tulun dot Israil do minongoi pomuhu do taakanon nga' aiso' no o nokito diyolo'. 28 Om boros kaddi do Tuhan dot id di Musa, “Soira' kou mando do mumboyo' do ponuhuan ku? 29 Soroho' no dokoyu, dot iyoho' i' i Tuhan, o minanahak dokoyu do tadau do koundarangan, om iri no o kapanahakan ku dokoyu do taakanon do tontok di tadau do koonom di kabagal do duwo o tadau. Tontok nopo di tadau do koturu', om mundorong ngai' nopo o tulun do hiri'd kiim diyolo', om a' no sumoliwan,” ka dau. 30 Om a' ngai' noddi kuminaraja' i tulun di tadau do koturu'. 31 Om roitai noddi di tulun dot Israil i taakanon diri do manna. Iri nopo nga' koiyo-iyo do linsou dit opurak dot okooro', om kaakanan nopo nga' koiyo-iyo di roti do rinalatan do paha'. 1|75|HK69B|Linsou nopo diti om miagal do manna|16.31 32 Om boros kad Musa, “Minonuhu' o Tuhan dati' do popoopi' dot ongokuuri' diti manna do maan di sinakagon toko', om kokito i' iyolo' di taakanon di pinatahak do Tuhan dot id dati' do kanon toko' do hiti'd tana' do kowotuan, do tontok di pinosoliwan toko' dau do mantad hilo'd Masir,” ka dau. 33 Om boros kad Musa dot id di Harun, “Ongoi anu do kakanan, om suangan i' do manna do duwo lito o kogumuo', om poilihon nori do hilo'd kinoiyonon do koropohon do Tuhan do poopion do maan di sinakagon toko',” ka dau. 34 Om poiliho' no di Harun i kakanan diri do hiri'd dotimbabaan di Kaban do Tumpongo do poopion do hiri do tumanud di pinonuhuan do Tuhan dot id di Musa. 35 Om manna poddi o kanon di tulun dot Israil do solinaid dit apat nohopod o toun di nosunsudan do gisom do nokorikot iyolo' do hilo'd pomogunan do Kanaan, i kinoundorongon kopio diyolo'. 36 (Iri nopo i pagagadang do nunu nopo it ongotuu do tontok do maso'ddi om orumpos o duwo nohopod o lito.)

Kinosoliwanan 17

Waig do Mantad id Tontolob

1 Om oinsanan nopoddi i tulun dot Israil do tuminongkiad di tana' do kowotuan do Sin, om miundaliu-daliu nopo iyolo' do mantad id iso' o kinoiyonon om kumaa no dot id kinoiyonon do suwai, do tumanud do ponuhuan do Tuhan. Om powonsoyo' no diyolo' o kiim diyolo' do hilo'd Rapidim, nga' aiso' i' o waig do tinumon do hilo'. 2 Om mogod-togod no iyolo' di Musa, boros ka diyolo', “Onuwai iyahai do waig dot inumon,” ka no. Om boros ka di Musa do sumimbar, “Nokuro tu' mogod-togod kou doho'? Nokuro tu' mogumbal kou'd Tuhan?” ka dau. 3 Nga' tuuhan no kopio i tulun om mogod-togod nopoddi kasai' iyolo' di Musa. Boros ka diyolo', “Nokuro tu' pinosoliwan nu iyahai do mantad hilo'd Masir? Mongoi ko no pomungou dahai om iti tangaanak dahai om iti tayam-tayam dahai, gisom dot apatai dot otutuuhanan!” ka. 4 Om sambayang no i Musa dot id Tuhan do mikuwo'd aayi'-ayi' no kopio o ginawo dau, boros ka dau, “Kukuroyon ku po'ti tulun diti? Tu' oruhai no iyolo' do momodumpau doho'd watu,” ka. 5 Om boros kad Tuhan dot id di Musa, “Angatai o piro-piro dilo boyoon do tulun dot Israil do moyo' diya', om mogulu kou i' diti tulun dot ogumu'. Om igitan no i sukud di pinobobog nu di Bawang do Nil. 6 Om mingkakat oku indo dot id dotimbabaan nu dot id sakai dot iso' o tontolob, do hilo'd Nuluhon do Sinai. Bobogon no i tontolob diri om kosoliwan i' o waig do mantad hiri do tinumon di tulun,” ka dau. Om wonsoyo' nod Musa o miagal diri dot id toguang ngai' di boyoon do tulun dot Israil. 7 Om pungaranai noddi i kinoiyonon diri do Masa, tu' hilo' no i tulun dot Israil do minogumbal do Tuhan, do tontok di minuhot iyolo' do poingkaa, “Moyo-woyo' tuu o Tuhan dati' diti ko' amu'?” ka. Om pinungaranan po kawagu do Moriba i kinoiyonon diri tu' hilo' no i tulun do sontogod-togod do minsosol.

Suminangod do Tulun dot Amalik

8 Om rikot noddi i tulun dot Amalik do minongoi panangod di tulun dot Israil do hilo'd Rapidim. 9 Om boros ka di Musa dot id di Yosua, “Momili' nod piro-piro o tulun do mongoi sangod di tulun dot Amalik do suab. Om mongoi oku indo ingkakat do hilo'd timpak do nulu-nulu om igitan ku i sukud di pinonuhuan doho'd Tuhan do migit,” ka dau. 10 Om tonudo' no di Yosua i pinonuhuan di Musa dau. Om ongoi no iyau sangod di tulun dot Amalik, om i Musa no om i Harun, om i Hur, o tuminakad di nulu- nulu do gisom do nokosigampot. 11 Solinaid nopo do poinsawat goduwo i longon di Musa, om kamanang no i tulun dot Israil nga' ondung poinsiribaon dau o longon dau, om kamanang no i tulun dot Amalik. 12 Om tontok di lopuhon goduwo o longon di Musa do poinsawat, om ongoi no iyo' Harun di Hur dot iso' o watu do poirikahanan di Musa; om ingkakat no iyolo' do miampaping di Musa do popoinsawat di longon dau do gisom do notonob o tadau. 13 Om iyo noddi i Yosua do minangala' di tulun dot Amalik. 14 Om boros kaddi do Tuhan dot id di Musa, “Tulison no dot id buuk o pasal do kinamanangan diti, om osorou kasai' i'. Sunudan no i Yosua do punsoon ku i' kopio i tulun dot Amalik,” ka dau. 15 Om pomonsoi no i Musa dot iso' o pananaraban do porsombahan om pungaranai no dau iri do, “Tuhan no o Bondira' ku”. 16 Om boros ka di Musa, “Poinsawaton no o pongingigit do bondira' do Tuhan! Songodon i' kasai'd Tuhan o tulun dot Amalik do gisom dot alaid!” ka dau.

Kinosoliwanan 18

Minongoi i Musa Solowot di Yitro

1 Om korongou noddi i Yitro, i tiwanon di Musa, do koinsanai di winonsoi'd Kinorohingan dot id di Musa om id tulun dot Israil, do tontok di pinosoliwan do Kinorohingan iyolo' do mantad hilo'd Masir. I Yitro nopoddi om imam do hilo'd Midian. 2 Om ongoi no i Yitro solowot di Musa, om pinowoyo' nogi' dau i Sipora, i sawo di Musa, i poundorong po do hilo'd Midian, 3 om i Girsom om i Iliosor, i tangaanak di Sipora do kusai. Pinungaranan pogi' dot i' Girsom it id dotuo nga' boros kad Musa om, “Sompogunan oku i' do hiti'd pomogunan do suwai,” ka dau; 4 om iri no tanak do koduwo om pinungaranan dot i Iliosor tu' boros kad Musa om, “Tinulung oku i' do Kinorohingan di tapa' ku, gisom dot a' oku iddi napatai di raja' do Masir,” ka dau. 5 Om rikot no i Yitro do hiri'd tana' do kowotuan di pinomukiiman di Musa, i hiri'd toning di nuluhon dot olidang, do miwoyo' di sawo di Musa om i duwo o tanak di Musa. 6 Om nokoponuhu' no i Yitro do tulun do momisunud di Musa do rumikot iyolo', 7 om soliwan noddi i Musa do minongoi solowot dau. Om otud no i Musa dot id toguang di Yitro, om tungubai no dau i Yitro. Om piuhot-uhot no iyolo' ondung osonong-sonong ngai' iyolo', om suang nogiddi iyolo' do hiri'd kiim di Musa. 8 Om posunudo' ngai' nopo di Musa di Yitro i winonsoi'd Tuhan dot id raja' om id tulun do Masir, do tontok di pinosoliwan dau o tulun dot Israil. Om sinunudan nogi' dau i Yitro di kinosusaan do tulun dot Israil do hiri'd tindalanon om i kinaralan-ralano' do Tuhan do minamasi diyolo'. 9 Om soira' di norongou ngai' di Yitro iri om osonong tomod diri o ginawo dau, 10 om boros ka dau, “Royohon no o Tuhan i pinopoidu' diya' do mantad id longon di raja' do Masir om mantad id tulun do Masir! Royohon no o Tuhan, i pinopoidu' do tulun dot Israil do mantad id kouripanan! 11 Oilaan ku noddi do baino' dot agayo no kopio o Tuhan ko' mantad do koinsanai di ponokokinorohingan do suwai, tu' winonsoi ngai' dau o miagal diri do tontok dit ulak-ulakan kopio di tulun do Masir i tulun dot Israil,” ka dau. 12 Om papatahak noddi i Yitro do piro-piro o porsombahan di sorobon om piro-piro o porsombahan di sumbolion do patahakon dot id Kinorohingan; om tanud no dau i Harun om koinsanai di boyoon dot Israil do minongoi pangakan di taakanon dot id poginakanan do maan do pomusou.

Minomili' do Piro-Piro o Gompomutus

13 Om tadau noddi kawagu om maso di Musa do manalasai do piro-piro ot a' kopogiuludan dot id pogialatan di tulun dot Israil, om agangau nopoddi iyau do mantad pod kosuabon om gisom do totuong. 14 Om soira' di nokito di Yitro o koinsanai dit apatut do wonsoyon di Musa, om uhot no iyau do poingkaa, “Nunu ngai' nopo iti wonsoyon nu dot id tulun dot ogumu'dti? Nokuro tu' iso-iso' ko do momonsoi'dti, om gisom dot ilo' piya mongoi no pokianu do nosihat nu nga' songingkakat nopod hiti?” ka dau. 15 Om boros ka di Musa do suminimbar, “A' ku no milo dot a' wonsoyon o miagal diti tu' rumikot ngai' nopo dot id doho' i tulun dot orohian do koilo do korohian do Kinorohingan. 16 Soira' nopod haro o pigulatan do duwo o tulun, om rumikot no iyolo' dot id doho', om iyoho' no o momutus ondung isai diyolo' it otopot. Om sunudan ku nondo iyolo' do koinsanai di ponuhuan om it oturan do Kinorohingan,” ka dau. 17 Om boros kaddi di Yitro, “A' i' koontok o karalan-ralano' do miagal diri. 18 Tu' iyo nopoddi om diya'd tinan nga' ouruan dot ohuyan, om iti tulun nga' ongohuyan. 19 Nga' tonudo' pogi' daa iti nosihat ku om woyoon ko i' do Kinorohingan. Osonong nogi' kopio do wokilon nu iti tulun do tumimbaba' do Kinorohingan om porikoton nu i pogigugulatan diyolo' dot id dau. 20 Apatut nogi' kopio do tudukan nu iyolo' do koinsanai di ponuhuan do Kinorohingan om posuhuton nu do kowoyo-woyoon dit osonong om it apatut diyolo'd wonsoyon. 21 Nga' suwai no ko' iri, om apatut nogi' do momili' ko do piro-piro o tongokusai dit ongoilo, om silihon iyolo' do boyoon di tulun: boyoon do sororibu-ribu tulun, om sorohatus-hatus, om sorolimo-limo nohopod, om sorohopod-hopod o tulun. Om iti nopo tulun do pilion nga' it ongoronok do Kinorohingan, om i milo do ponongkuyaanan, om it a' rumamit do ponisip. 22 Om suhuon no iyolo' do sumiliu do gompomutus diti tulun do tumikid di sinompuruan do tulun di diyolo'd ilo-iloon. Om mositi' no dot osonong o pomonsoi diyolo' di karaja' diyolo'ddi. Om iri nopo hal dit angagaan-gaan om iyolo' no o manalasai. Om iyo nopodti om oinggaan-gaanan ko no tu' kouhup noddi iyolo' diya'. 23 Ondung wonsoyon nu'ti ponuhuan do Kinorohingan diti, om a' ko no adalaan dot ohuyan, om iti tongoulun nga' ongkouli' no do mikuwo dot osimbayan o ginawo tu' angasalasai no i pogigugulatan diyolo',” ka dau. 24 Om tonudo' no di Musa i nosihat di Yitro, 25 om pomili' no iyau do tongokusai dit ongoilo dot id pogialatan di tulun dot Israil. Om siniliu dau iyolo' do boyoon do sororibu-ribu o tulun, om sorohatus-hatus, om sorolimo-limo nohopod, om sorohopod-hopod o tulun. 26 Om nosiliu'ddi iyolo' do gompomutus do tulun do solinaid diyolo' do poimpasi. Om iri nopo hal dot angawagat om porikoton i' diyolo' dot id di Musa, nga' iri nopo it agaan-gaan om iyolo' no o manalasai. 27 Om pologoso' noddi di Musa i Yitro do minamanau, om uli' no i Yitro do hilo'd pomogunan dau.

Kinosoliwanan 19

Hilo'd Nuluhon do Sinai i Tulun dot Israil

1-2 Om tongkiad noddi i tulun dot Israil do hilo'd Rapidim, om tontok di tadau do koiso' do tulan di kotolu, do mantad di kinotongkiadan diyolo' do hilo'd Masir, om korikot no iyolo' do hilo'd tana' do kowotuan do Sinai. Om powonsoyo' no diyolo' o kiim diyolo' do hiri'd guas di Nuluhon do Sinai. 3 Om takad no i Musa di Nuluhon do Sinai do mongoi solowot do Kinorohingan. Om lohowo' nod Tuhan i Musa do mantad hiri'd nuluhon diri, om suhuo' no iyau do popoboros dot id tulun dot Israil, i sinakagon di Yakub, diti boros do poingkaa, 4 “Nokokito kou i' di winonsoi ku, iyoho' i Tuhan, dot id tulun do Masir, om i kinowoyo-woyoo' ku do pinoporikot dokoyu dot id doho' dot id kinoiyonon diti do mikuwo'd kuasa' dit agayo, do miagal di kondiu do papasakai di tanak dau do hiri'd talad dau. 5 Baino' nopondo, om ondung mumboyo' kou doho' om otorodok kou dot id tumpongo ku, om osiliu kou no do tulun ku. Doho' ngai' idti pomogunan, nga' iyokoyu no o tulun di pinili' ku, 6 i tulun di nokotobilang do maan ku do doho'd tulun, om osiliu kou nondo dot imam do momonsoi do karaja' ku,” ka dau. 7 Om ruhuk noddi i Musa om lohowo' ngai' no dau i boyoon di tulun om sunudai no dau iyolo' do koinsanai di pinonuhuan do Tuhan dot id dau. 8 Om oinsanan nopoddi i tulun do suminimbar do poingkaa, “Wonsoyon ngai' i' dahai i nongkoboros do Tuhan,” ka diyolo'. Om posunudo' no di Musa dot id Tuhan i pinosimbar diyolo'ddi. 9 Om boros kad Tuhan dot id di Musa, “Rumikot oku nondo dot id diya' do pokuluput do haun dit akapal, om korongou ngai' i' ilo tulun doho' do monokiboro-boros diya', om mantad nopondoddi om monongkuyaan kasai' nondo iyolo' diya',” ka dau. Om sunudai no di Musa o Tuhan di pinosimbar ngai' di tulun, 10 om boros kad Tuhan dot id dau, “Ongoi solowot ngai' di tulun om sunudan no iyolo' do momolidang do tinan diyolo' do baino' om suab, tu' sumodia' do mongoi sambayang. Suhuon no iyolo' do momupu' do pakayan diyolo', 11 om mositi' no do kosodia' iyolo' do suabdiino. Tu' tadau nopoddi om lumintuhun oku do hilo'd Nuluhon do Sinai, om kokito ngai' i' doho' i tulun. 12 Wansayan nod tanda' o posorili' di nuluhon, om iri no o ponokowolit dot a' di tongoulun koino-ino do tolibambanan. Om sunudan no iyolo' dot a' tumakad di nuluhon om a' mongoi insomok diri. Ondung haro o tulun do kotolibamban di tanda' diri, om patayon nopo; 13 do dumpahon tuu do watu ko' panaon do mamatai i tulun, nga' kada' no do haro o koigit dau. Iyoon ngai' nopoddi o tulun om nintorusan; tu' koinsanai di tumolibamban di tanda' diri om mositi' no do hukuman do kapatayon. Nga' kouni nopondo i torumpit om mositi' no do tumakad ngai' i tulun,” ka dau. 14 Om ruhuk no i Musa di nuluhon om sunudai ngai' no dau i tulun do sumodia' do mongoi sambayang. Om pupuwai no diyolo' o pakayan diyolo', 15 om boros ka di Musa dot id diyolo', “Mositi' no do kosodia' kou dot orikot o suabdiino, om kada' kou ongoi dudun do tongoondu' do daamot podti,” ka dau. 16 Tontok di kosuabon do tadau'd kotolu om haro'ddi o tinggoron om kodumaat. Om imbulai no o haun dot akapal do hiri'd sakai di nuluhon, om haro o tuni do torumpit dot opuhod do norongou diyolo'. Om sanggagaran ngai' poddi do moddosi i tulun do hiri'd kokiiman. 17 Om woyoo' no iyolo' di Musa do sumoliwan do mantad hiri'd kokiiman do mongoi solowot do Kinorohingan. Om songingkakat diri iyolo' do hiri'd guas di nuluhon. 18 Om nolikupan pod lisun i nuluhon do Sinai, tu' luminintuhun o Tuhan do hiri dot id suang do sinikit do tapui. Om miagal pod lisun do modtutud i lisun do muntu-nguntu' do minsawat. Om oinsanan nopo i tulun do pananggagaran tomod do moddosi. 19 Om muhod-puhod diri i tuni di torumpit. Om moro-boros no i Musa om simbaron no iyau'd Kinorohingan do miwoyo' do tinggoron. 20 Om lintuhun no o Tuhan do hiri'd timpak di Nuluhon do Sinai om lohowo' no dau i Musa do mongoi do hiri'd timpak di nuluhon diri. Om sigampot noddi i Musa, 21 om boros kad Tuhan dot id dau, “Ruhuk po do mongoi popoinsan dilo tulun dot a' tumolibamban di tanda' do mongoi ontong doho'; tu' ondung tumolibamban iyolo' om ogumu' nondo ot apatai diyolo'. 22 Om iri piya tongoimam nga' apatut i' do momolidang pod tinan diyolo' do mongoi no iyolo' insomok doho', tu' a' nopo nga' hukuman ku no iyolo',” ka dau. 23 Om boros ka di Musa dot id Tuhan, “A' i' katakad ilo tongoulun tu' sinuhu' nu i' iyahai do pokolidang diti nuluhon om momonsoi do tanda' do posorili' diti,” ka dau. 24 Om boros kad Tuhan do suminimbar, “Ruhuk po, om powoyoon i' i Harun do kumaa'd hiti. Nga' iri nopo i tongoimam om i tulun dot ogumu' om a' i' koino-ino do tumolibamban diti tanda' do mongoi do hiti'd doho'. Tu' tumolibamban nopo iyolo' om hukuman ku no iyolo',” ka dau. 25 Om ruhuk noddi i Musa do hiri'd tulun dot ogumu' om sunudai no dau iyolo' di pinoboros do Tuhan.

Kinosoliwanan 20

Hopod ot Oturan

1 Om boro-boros noddi o Kinorohingan, om iti no ngai' i pinoboros dau, 2 “Iyoho' no o Tuhan, i Kinorohingan dokoyu, i pinoposoliwan dokoyu do mantad hilo'd Masir, i kinoiyonon do siniliu kou do turipon. 3 Kada' kou sambayang dot id kinorohingan do suwai, suwai ko' id doho' noo o sambayangan. 4 Kada' kou pomonsoi do tininganak do poiyoon do nunu nopo i hilo'd tawan, ko' i hiti'd pomogunan, ko' i hilo'd waig dot id saalom diti tana'. 5 Kada' kou otud do tumuku' dot id tingolig om kada' kou sambayang dot id tingolig diri, tu' iyoho' no o Tuhan, i Kinorohingan dokoyu, om mada' oku i' do haro o mongoi iyo-iyo doho'. Iri nopo tulun dit araatan doho' om hukuman ku no do gisom do sinakagon diyolo' di kointolu om koingapat. 6 Nga' pointalangan ku i' do kosianan ku i piro-piro noribu o sinakagon do tulun dit osianan doho' om i mumboyo' dot oturan ku. 7 Kada' dokoyu roito' o ngaran ku dot araat o kopomoroitan. Tu' iyoho' no i Tuhan, i Kinorohingan dokoyu, o momohukum dot isai nopo i kasala' o pamamakai do ngaran ku. 8 Poinggoyoon no o tadau'd Sabat om pokolidangon no o tadau'ddi. 9 Nonuan kou dot onom o tadau do kakarajaan dokoyu, 10 nga' iri nopo tadau'd koturu' om tadau do koundarangan, om i nokotobilang do doho'd tadau. Tontok nopo do tadau'ddi om kada' nod haro o tongoiso' piya do tulun do kumaraja', dot iyokoyu tuu ko' i tangaanak dokoyu, ko' i turipon dokoyu, ko' i tayam-tayam dokoyu, ko' i tulun do bansa'd suwai di poingiyon dot id pomogunan dokoyu. 11 Onom no tadau ku, iyoho' i Tuhan, do minomonsoi diti pomogunan, om tawan, om rahat, om koinsanai dit id suang ngai'ddi, om tontok di tadau do koturu' om undorong oku noddi. Om iri no o kinapamarakatan ku, iyoho' i Tuhan, di tadau'd Sabat om kinopotobilangan ku'ddi do doho'd tadau. 12 Pusohon no o tapa' om tina' dokoyu, om otogui kou i' do poingiyon do hilo'd pomogunan di patahakon ku dokoyu. 13 Kada' kou pamatai. 14 Kada' kou pagampahu'. 15 Kada' kou panakau. 16 Kada' kou popoboros dit a' otopot do papasala' do tulun do suwai do tontok dot onuon kou do sasi'. 17 Kada' nod haro o ginawo dokoyu do sianu di dombokon: dot iri tuu i walai diyolo', ko' i sawo diyolo', ko' i turipon diyolo', ko' i tayam-tayam diyolo', ko' i kaladai diyolo', ko' nunu nopo i haro dot id diyolo',” ka dau.

Minodosi i Tulun dot Israil

18 Tontok di norongou di tulun dot ogumu' i tinggoron om i tuni di torumpit, om di nokito diyolo' i kodumaat om i nuluhon do mogolisun, om pananggagaran poddi iyolo' dot opopoddosian, om hiri'ddi iyolo'd sodu' do songingkakat. 19 Om boros ka diyolo' dot id di Musa, “Ondung iya' o moro-boros dahai om mokinongou i' iyahai; nga' Tuhan nopo o moro-boros dahai om ooris i' iyahai dot apatai',” ka diyolo'. 20 Om boros ka di Musa do suminimbar, “Kada' kou kooris tu' kinorikatan nopo do Kinorohingan om mogumbal no dokoyu, om mumboyo' kasai' kou indo dau, om a' kou i' kopomonsoi do dusa,” ka dau. 21 Nga' hiri kasai' id sodu' o ningkakat di tulun dot ogumu', om i Musa noo o minongoi insomok di haun dot otuong, i kinoiyonon do Kinorohingan.

Oturan do Pasal di Pananaraban do Porsombahan

22 Om suhuo' no do Tuhan i Musa do popoboros dot id tulun dot Israil do boros do poingkaa, “Nokokito kou noddi ondung poingkuro oku, iyoho' i Tuhan, do minoro-boros dokoyu do mantad hilo'd surga. 23 Kada' kou pomonsoi do ponokokinorohingan do pirok ko' tamas o wonsoyon do maan dokoyu do sambayangan do suwai ko' iyoho'. 24 Momonsoi kou no do pananaraban do porsombahan dot id doho', dot ilo tana' o wonsoyon, om poilihon nogindo do hiri i dumba' om i sapi' dokoyu do maan do porsombahan di sorobon om porsombahan do piombolutan. Om honggo nopo o kinoiyonon di tontuon ku dot iyonon dokoyu do sumambayang dot id doho', om rumikot oku no dot id dokoyu do mongoi pamarakat dokoyu. 25 Ondung watu o wonsoyon dokoyu do pananaraban do porsombahan dot id doho', om kada' dokoyu sangkapo' i watu tu' ondung mamakai kou do sangkap do pamabak di watu, om a' nori milo do pakayon do maan do panaraban do porsombahan dot id doho'. 26 Kada' kou pomonsoi do pananaraban do porsombahan dot id doho' dit asawat, i minog om tukadan, om a' i' okito i bohogian do tinan dokoyu dit a' osorupai dot okito,” ka dau.

Kinosoliwanan 21

It Apatut do Wonsoyon dot id Turipon

1 Om boros kaddi do Tuhan dot id di Musa, “Patahakon no iti piro-piro o toturan dot id tulun dot Israil: 2 Soira' nopo do momoli kou do tulun di sompi' ko' bansa' dot Ibrani do silihon do turipon om onom no toun dau dot apatut do silihon dokoyu do turipon. Om koturu' nopondo do toun om mositi' no do polobuson dokoyu iyau om a' no iyau minog do mambayar do nunu-nunu dot id dokoyu. 3 Ondung aiso' po o sawo dau di nosiliu i' iyau do turipon dokoyu, om a' i' dau atanggayan i sawo dau di polobuson dokoyu iyau; nga' ondung nakasawo no iyau di nosiliu i' dokoyu iyau do turipon, om atanggayan no dau i sawo dau di polobuson dokoyu iyau. 4 Ondung nonuan iyau di tuan dau do sawo, om paganak noddi i sawo dau, om iri nopo sawo dau'ddi om i tangaanak dau om iri kasai' po tuan dau o sanganu, om iso' no i turipon o polobuson. 5 Nga' ondung poboroson di turipon diri dot osianan iyau di sawo dau om i tangaanak dau, om i tuan dau, om mada' no do polobuson, 6 om mositi' no do ngoyon iyau di tuan dau hirio'd tiyonon do sumambayang. Om hiri nondo do suhuon di tuan i turipon dau'ddi do mingkakat do poinsondiu di totobon ko' i tisan di wawayaan, om luangan nondo di tuan o tolingo di turipon dau. Om osiliu nondo iyau do turipon di tuan diri do solinaid dau do poimpasi. 7 Ondung haro o tulun do padagang di tanak dau'd tondu' do silihon do turipon, om a' no i tondu'ddi kalabus do katalib piya ot onom o toun; om miagal iddi o turipon do kusai. 8 Ondung padagangon i tondu' dot id kusai di haro o ginawo do mangawin dau, nga' a' indo orohian i kusai di tondu' diri, om mositi' no do padagangon kawagu di kusai i tondu'ddi dot id tapa' di tondu'. A' i' koino-ino do padagangon di kusai i tondu'ddi dot id tulun do bansa'd suwai tu' a' i' otulid o winonsoi dau dot id tondu'ddi. 9 Ondung haro o tulun do momoli do turipon do tondu' do silihon dau do sawo di tanak dau'd kusai, om mositi' no dot iyoon dau do dau'd tanak i tondu'ddi. 10 Ondung manansawo kawagu i kusai'ddi, om mositi' no dot onuan kasai' dau i sawo dau dit id gulu do taakanon om pakayan om it apatut dot aanu di sawo dau'ddi do miagal di timpuun i'. 11 Ondung a' dau wonsoyon o tonggungan dau do miagal diri, om mositi' no do polobuson dau i sawo dau dit id gulu diri, om a' i' kabayar i tondu'ddi do nunu-nunu dot id dau,” ka dau.

Pongoturan do Pasal do Tulun dit Orongit

12 Om boros ka kawagu do Tuhan dot id di Musa, “Isai nopo o momobog do tulun do gisom dot apatai i bobogon dau, om iyau nga' hukuman no do kapatayon. 13 Nga' ondung a' daa dau tinomod do momobog i tulun diri, om aiso' o ginawo dau do mamatai, om milo i' iyau do mogidu' dot id kinoiyonon di potudukon ku dokoyu, om hilo' nopondo om aiso' no o ligogon dau. 14 Nga' ondung haro o tulun do tumogod om tomodon dau do mamatai o tulun do suwai, om hukuman nod kapatayon i tulun di minamatai do mulong piya do koongoi daa iyau do hiri'd pananaraban do porsombahan dot id doho' do mongoi pokiintirung. 15 Isai nopo o momobog do tapa' ko' tina' dau, om mositi' no do hukuman do kapatayon. 16 Isai nopo o mongoi pononggoi do tulun do maan tuu pobolio' ko' maan po dau'd turipon, om mositi' no do hukuman do kapatayon. 17 Isai nopo o momopol do tapa' ko' tina' dau om mositi' no do hukuman do kapatayon. 18 Ondung haro o miuhod, om dumpahon no di songulun do watu i tiso' ko' tumbukan po dau, nga' a' indo apatai, om a' i' hukuman o tulun diri. Nga' ondung gisom dot a' koundaliu i tulun do binobog diri, 19 nga' alaid-laid nopondo om koingkakat indo om kapanau do mononsukud do mongoi'd hiri'd soliwan, om iri no tulun di minomobog dau o mambayar do korugian do solinaid dau dot a' nakakaraja', om iyau o momogompi' di tulun diri do gisom do kosonong kawagu iyau. 20 Isai nopo o momobog di turipon dau do tondu' ko' kusai, gisom dot apatai do diiri om diiri, om hukuman no o tulun diri. 21 Nga' ondung a' apatai i turipon diri do sangadau-ngadau poo ko' duwo-duwo po tadau, om a' i' hukuman i tuan diri. Ula' no do sumiliu do hukuman dau i natagakan iyau di turipon dau'ddi. 22 Ondung haro o piro-piro tongokusai do mogiuuhod om haro nondo o tiso' diyolo' do kopokoruol do tondu' di monontian, gisom dot oiduan i tondu'ddi, nga' aiso' i' o toruol do suwai di tondu'ddi, om apatut no do mambayar o tulun diri do danda' do songkuro nopo i pokionuon di sawo di tondu', om it ookunan do tongogompomutus. 23 Nga' ondung i tondu'ddi ot orualan, om pomohukum nopo om ginawo no o pomolokop do ginawo, 24 om mato o pomolokop do mato, om nipon o pomolokop do nipon, om longon o pomolokop do longon, om gakod o pomolokop do gakod, 25 om suhat o pomolokop do suhat, om sorobon o pomolokop di nosorob, om lonit o pomolokop do lonit. 26 Isai nopo o monodsok do mato di turipon dau'd kusai ko' i turipon dau'd tondu', gisom dot obolou i turipon diri, om mositi' no do polobuson i turipon diri do pomogontok di mato dau. 27 Ondung haro o momobog do turipon dau do gisom dot ouud o nipon di turipon diri, om mositi' no do polobuson i turipon diri do pomogontok di nipon dau di nouud,” ka dau.

Tonggungan di Sanganu

28 Om boros ka kawagu do Tuhan dot id di Musa, “Ondung haro o sapi' do tontoluhan do monungu do tulun, gisom dot apatai i tulun diri, om mositi' no do dumpahon do watu i sapi'ddi do gisom dot apatai, om a' no koino-ino dot akanon i tonsi di sapi'; nga' a' i' hukuman i sanganu di sapi'. 29 Ondung asaru' no do koponungu do tulun i sapi'ddi om nosunudan no i sanganu, nga' a' i' di sanganu pakandangon i sapi' --- om koponungu nopo kawagu i sapi'ddi do gisom dot apatai i sunguon, om turubukon nopod watu i sapi' do gisom dot apatai, om iri nogi' i sanganu nga' mositi' nod hukuman nopo do kapatayon. 30 Nga' ondung pabanaron i sanganu do mambayar do danda' do pamasi do tinan dau, om mositi' no do bayaran ngai' i danda' do songkuro nopo i pokionuon. 31 Ondung koponungu i sapi' do tanak do kusai ko' tanak do tondu' do gisom dot apatai i sinungu, om iyo iddi o pongoturan. 32 Ondung koponungu i sapi' do turipon do kusai ko' tondu', gisom dot apatai i sinungu, om mositi' nod bayaran di sanganu di sapi' i tulun do sanganu di turipon diri do tolu nohopod o kaping do pirok, om i sapi' nga' dumpahon do watu do gisom dot apatai. 33 Ondung haro o tulun do mongoi pongidu' do sompon do torobong, ko' ondung mongukad iyau do torobong om a' indo somponon, om aratu' nondod hiri o sapi' ko' kaladai, 34 om mositi' nod bayaran dau i sanganu di tayam-tayam diri. Nga' iri nopo tayam-tayam di napatai'ddi om iri i sanganu di tayam-tayam di napatai o kaanu. 35 Ondung haro o songulun do kisapi' do gonsukod, om kapamatai nod sapi' do gonsukod do tulun do suwai i sapi' dau'ddi, om mositi' nod padagangon di duwo o tulun i sapi' di poimpasi om piduwoon diyolo' i gatang; om iri tonsi di sapi' di napatai nga' piduwoon i' diyolo'. 36 Nga' ondung nopiila-ilaan no do monunungu do sapi' i sapi' do gonsukod diri, om a' iddi di sanganu pinakandang i sapi', om mositi' no do bayaran dau do songinan o sapi' do tontoluhan di miyau i sanganu di sapi' do napatai'ddi. Nga' iri no i minambayar o kaanu di sapi' di napatai,” ka dau.

Kinosoliwanan 22

Oturan do Pasal do Poningolon

1 Om boros ka kawagu'd Tuhan dot id di Musa, “Ondung haro o tulun do manakau do songinan o sapi' ko' songinan o dumba', om sumbolion nondo dau iri ko' maan padagango', om korugi' nopo dau om limo o sapi' do poningolon di songinan o sapi' di pinanakau, om apat o dumba' do poningolon di songinan o dumba' do pinanakau. 2-4 Mositi' no do tingalanan dau i pinanakau dau. Om ondung aiso' o nunu- nunu do poningolon dau, om dagangon no iyau do silihon do turipon do poningolon di nongoi dau panakaho'. Ondung poimiyau po i tayam-tayam do pinanakau dau, do sapi' tuu ko' kaladai, ko' dumba', dot abantalan do hiri'd dau, om mositi' no do duwo o tinan do patahakon dau do poningolon do songinan di pinanakau dau. Ondung haro o tulun do manakau om okosupan do monoruang do walai do dongotuong, om apatai nondo iyau, om a' i' kasala' i minamatai dau. Nga' dangadau nopo do haro o tiyo'ddi, om kasala' no i minamatai. 5 Ondung haro o tulun do papaakan-akan do tayam-tayam dot id dumo ko' id kabun dot anggur om minsodu' no i tayam-tayam diri om koongoi nondo kapangakan di tanom-tanom do hiri'd tumo do tulun do suwai, om mositi' no do bayaran dau i nangaakan, do pambayar nopo om i tua' di tanom-tanom do mantad hiri'd tumo dau ko' i hiri'd kabun dot anggur dau. 6 Ondung haro o tulun do modtutud do hiri'd tumo dau om rumalad nori dot id tumo do tulun do suwai, tu' opurokitan di sakot do hiri'd piolitan, om osorob nondo i gandum di piintangaan nogi' do sumuni ko' i koomot om it a' po narangkat, om iri no i minodtutud o mambayar do korugian di sanganu. 7 Ondung haro o tulun do kaakun do popoopi' do tusin ko' barang dit agayo o gatang do tulun do suwai, om apanakau nori do hiri'd walai dau, om ondung okito i minanakau, om induwo nondo koirad di pinanakau o bayaran di tulun di minanakau'ddi. 8 Nga' ondung a' okito i minanakau, om angatan no i tulun di pinopoopi' di barang dot agayo gatang diri do hiri'd tiyonon do sumambayang. Om hiri nondo iyau do sumumpa' dot a' iyau minanakau di barang diri. 9 Id suang nopo do nunu nopo o pigulatan do pasal do dapu', do sapi' tuu ko' kaladai, ko' dumba', ko' pakayan, ko' nunu nopo o barang di natagak, nga' nokito iddi kawagu, om iri nopo duwo o tulun di miahau do manansanganu'ddi om mositi' no dot angatan dot id tiyonon do sumambayang. Om iri nopondo i pointalangon do Kinorohingan do nakasala' om mositi' no do mambayar dot induwo kogumu' dot id tulun di ponokiahau dau. 10 Sokiro nopo do haro o tulun do mangakun do momogompi' do kaladai, ko' sapi', ko' dumba', ko' tayam-tayam di wokon o sanganu, om apatai nondo ko' orualan i tayam-tayam diri, ko' atanggayan do manakau, om ondung aiso' o sasi', 11 om mositi' no do mongoi i tulun diri do hiri'd tiyonon do sumambayang om sumumpa' dot a' iyau minanakau di tayam-tayam di pinokigompian do tulun do suwai dau'ddi. Ondung a' napanakau i tayam-tayam diri, om mositi' no do tonggungon di sanganu o korugian, om a' i' minog do mambayar dot id dau i tulun do minomogompi'ddi; 12 nga' ondung napanakau i tayam-tayam diri, om mositi' no do bayaran di minomogompi' i sanganu'ddi. 13 Ondung napatai i tayam-tayam diri do nintorusan dot orongit o minamatai, om mositi' no dot igitan di minomogompi' i noolu-olu' do tinan di tayam-tayam do maan do popointalang kopio; om a' i' iyau kabayar di tayam-tayam di napatai do nintorusan dot orongit diri. 14 Ondung haro o tulun do molos dot ongoiso' do tayam-tayam do tulun do suwai, om orualan nondo ko' apatai iri do tontok dit a' hino'd hiri i sanganu, om mositi' nod bayaran di minolos i tayam-tayam diri. 15 Nga' ondung osiliu o miagal diri do hino i sanganu, om a' i' minog do mambayar i minolos. Ondung posisiwaan i tayam-tayam diri, om id suang ngai' no di pinoniwa' o pambayar di korugian dau,” ka dau.

Oturan do Kowoyo-woyoon dot Osonong om Oturan di Don Tugama'

16 Om boros ka kawagu'd Tuhan dot id di Musa, “Ondung haro o kusai do mongoi pagampahu' do sumandak dit aiso' po o tunang, om mositi' no do bayaran dau i topungon om kowinon dau i tondu'ddi. 17 Nga' ondung mada' i tapa' di sumandak do kowinon di kusai i tanak dau'ddi om mositi' no do bayaran di kusai i tapa' di tondu'ddi do tusin dot irad do nopung do sumandak. 18 Mositi' no do patayon o koinsanai'd tongoondu' di bobolian. 19 Mositi' no do patayon o koinsanai'd tulun di mongoi pagampahu' do nintorusan. 20 Isai nopo o tulun di papatahak do porsombahan di sumbolion dot id kinorohingan do suwai ko' iyoho', i Tuhan, om mositi' no do hukuman do kapatayon. 21 Kada' dokoyu ulak-ulakai om kada' dokoyu inggorito' o tulun do bansa'd suwai; soroho' pogi' dokoyu nga' nokoumbal kou i' do sompogunan do hilo'd Masir di gulu po. 22 Kada' dokoyu ulak-ulakai ot isai nopo o tondu' do nopuadan ko' tanak dit aiso' o molohing. 23 Tu' ondung ulak-ulakan dokoyu iyolo' om iyoho' indo, i Tuhan, o sumimbar diyolo' do tontok do minggiak iyolo' do mokitulung. 24 Om otogod oku moti'ndo dokoyu om patayon ku iyokoyu dot id pisangadan. Om osiliu nondo do tongoondu' do nopuadan o sawo dokoyu om tangaanak dokoyu nga' aiso' nondo o tapa'. 25 Ondung poolos kou do tusin dot id isai nopo o tulun ku di mosikin, om kada' kou omit di tulun di miuhot do tutang tu' mokianu do bunga di tusin. 26 Ondung manganu kou do kurilib do tulun do maan do sanda' do bayaran kopio ko dau, om mositi' no do pogulion dokoyu kawagu i kurilib diri dot id dau dot a' po otonob o tadau, 27 tu' iri po i kurilibon dau do pongillasu-lasu' do tinan dau. Nunu po daa'ndo o kumuton dau do modop? Ondung lumohou iyau doho' do mokitulung, om simbaron ku i' iyau tu' obinsianan oku i'. 28 Kada' kou pomopol do Kinorohingan om kada' kou pongusung do boyoon do bansa' dokoyu. 29 Patahakon no dot id doho' do maan do porsombahan o wookon di gandum, om waig dot anggur, om tumau do saitun do tontok di maso do natantu' mantad. Patahakon no dokoyu dot id doho' i tangaanak dokoyu'd kusai dit id gulu kosusu. 30 Patahakon no dokoyu dot id doho' i tanak do sapi' om dumba' dokoyu dit id gulu kosusu. Pologoson po i tanak do tontoluhan dit id gulu kosusu do tumanud di molohing dau'd tondu' do solinaid do turu' o tadau, nga' kawalu' nopondod tadau om patahakon no doho' iri do maan do porsombahan di sumbolion. 31 Iyokoyu nopo om tulun ku, om kada' kou pangakan do tonsi do nunu nopo o nintorusan di pinatai do nintorusan dot orongit; patahakon nogi' iri do tasu,” ka dau.

Kinosoliwanan 23

It Otopot om It Otulid

1 Om boros ka kawagu'd Tuhan dot id di Musa, “Kada' kou popimboros do boros dit a' otopot, om kada' kou popoboros dit a' otopot do pogobi' di tulun di kisala'. 2 Kada' kou ponokitanud di tulun dot ogumu' do tontok do momonsoi iyolo' di kasala' ko' di sumiliu iyolo'd sasi' di goudut, gowoi pondo om a' owonsoi it otulid. 3 Kada' panampaping do tulun do mosikin do tontok do butusan iyau. 4 Ondung aampapan nu nod okito i sapi' ko' kaladai di pisangod nu do nokoidu', om ngoyon no pogulio' iri dot id dau. 5 Ondung kogupu' i kaladai di pisangod nu dot awagatan kopio do ginandar, om uhupan no i pisangod nu do popoingkakat kawagu di kaladai dau; kada' pamanau tomod do tumalib. 6 Kada' olimo' it otopot dot id tulun do mosikin do tontok do popoboros iyau di pokisalasayan dau dot id kut. 7 Kada' ponondos dot a' otopot, om kada' hukumai do kapatayon o tulun dit aiso' o sala', tu' usungon ku moti' o tulun di momonsoi dot iyo kopio'ddi karaat. 8 Kada' ramit do tusin di maan do ponisip, tu' iri nopo i ponisip diri nga' kosompon do mato do tulun, gisom dot a' nondo iyolo' kokito ondung honggo it otopot om aiso' nondo o kotutuk-tutukon di pokisalasayan do tulun dit aiso' o sala'. 9 Kada' ulak-ulakai o sompogunan; tu' koilo kou i' ondung okuro-kuro ot opurimanan do sompogunan, tu' nokoumbal kou i' do sompogunan di hilo'd Masir di gulu po,” ka dau.

I Toun do Koturu' om i Tadau'd Koturu'

10 Om boros ka kawagu'd Tuhan dot id di Musa, “Solinaid nopo dot onom o toun om momutanom-tanom kou no do hiri'd tana' dokoyu om omoton no i tua' di tinanom dokoyu. 11 Nga' koturu' nopo do toun om kada' no kopio dokoyu tanamai i tana', om kada' no dokoyu omoto' o tua' do nunu nopo i songinsuni'd hiri. Nga' iri nopo tulun do mosikin om koino-ino i' do mongoi panganu di songinsuni'd hiri, om pologoson nopo i nintorusan do mongoi pangakan di noolu-olu'. Om i kabun dot anggur om i kabun do saitun nga' iyoon nogiddi. 12 Id suang nopod sominggu om kumaraja' kou no do solinaid dot onom o tadau, nga' koturu' nopod tadau om kada' kou no karaja', om koundorong i' i turipon, om i tulun do bansa'd suwai di kumaraja' dot id dokoyu, om iri nogi' i tayam-tayam dokoyu. 13 Pokinongohon no o koinsanai di pinoboros ku dot id dokoyu, iyoho' i Tuhan dokoyu. Kada' kou sambayang dot id kinorohingan do suwai; om rumait piya do ngaran diyolo' nga' a' i' koino-ino,” ka dau.

Tolu o Tadau dot Agayo

14 Om boros ka kawagu'd Tuhan dot id di Musa, “Ramayon no dokoyu o tolu o Tadau dot Agayo dot id suang do sontoun do pomusou doho'. 15 Id suang nopo do tulan dot Abib, i tulan di kinosoliwanan dokoyu do mantad hilo'd Masir, om ramayon no i Tadau'd Agayo do Roti dit A' Kipangambang do tumanud di kowoyo-woyoon do mamaramai do pinonuhuan ku dokoyu. Kada' kou pangakan do nunu nopo o roti di naralatan do pangambang do solinaid di turu' o tadau do karamayan diti. Kada' kou nogi' kopio umbal do mongoi sambayang dot id doho' dot aiso' o porsombahan dot igitan dokoyu. 16 Ramayon no dokoyu i Tadau dot Agayo do Dongmongomot do tontok do tumimpuun kou do mongomot do tua' di tinanom dokoyu. Ramayon no dokoyu o Tadau dot Agayo do Kinuhub-Kuhub do kooyi-oiyon do toun, di mongupu' kou do tua' dot anggur om tua' di kouwaan dokoyu. 17 Pointikid-tikid do toun do koontok diti tolu o tadau dot agayo diti om mositi' no do mongoi ngai' i kokusayan dokoyu sambayang dot id doho', i Tuhan, i Kinorohingan dokoyu. 18 Kada' kou papatahak do roti di naralatan do pangambang do maan do porsombahan, do tontok do papatahak kou dot id doho' do tayam-tayam do maan do porsombahan di sumbolion. Iri nopo lunok di tayam-tayam di patahakon dot id doho' do maan do porsombahan do tontok do tadau dot agayo diti om a' no koino-ino do poingolu' do gisom do kosuabon. 19 Migit kou no di gandum dit id gulu dokoyu koomot do hilo'd walai do Tuhan, i Kinorohingan dokoyu, do pointikid-tikid do toun. Kada' kou pogonsok do dumba' ko' kambing dit okoro' po dot i gatas di molohing di dumba' ko' i kambing o pogonsok,” ka dau.

Batos om Ponuhuan

20 Om boros ka kawagu'd Tuhan dot id di Musa, “Monuhu' oku indo do moloikat do mogulu dokoyu do mongintirung dokoyu do tontok di manau-panau kou, om momoyo' dokoyu do kumaa dot id tiyonon di nokosodia' mantad ku. 21 Mokinongou kou no om mumboyo' kou no dau, om kada' kou saap dau, tu' iyau no i sinuhu' ku, om a' no iyau mangampun di sumaap dau. 22 Nga' ondung mumboyo' kou dau om wonsoyon ngai' dokoyu i ponuhuan ku, om iyoho' indo o sumaap do koinsanai di pisangod dokoyu. 23 Iri indo moloikat ku o mogulu dokoyu om paatod dokoyu do hilo'd pomogunan do tulun dot Amori, Hit, Poris, Kanaan, Howi, om Yobus. Om patayon ngai' ku nopondo iyolo'. 24 Kada' kou otud do tumuku' dot id ponokokinorohingan diyolo', om kada' kou omit di kowoyo-woyoon diyolo'd sumambayang. Raagon no dokoyu i ponokokinorohingan diyolo' om tipuon ngai' no i torigi di pakayon diyolo' do sumambayang. 25 Ondung sumambayang kou dot id doho', i Tuhan om Kinorohingan dokoyu, om barakatan ku indo iyokoyu do taakanon om waig do tinumon, om lingoson ku o koinsanai do toruo-ruol dokoyu. 26 Hilo' nopondod pomogunan dokoyu om aiso' no o tondu' dot oiduan di ponontianon dau om aiso' it a' maganak. Om potoguyon ku po iyokoyu. 27 Popoddosion ku nondo doho' i tulun di sumaap dokoyu; om porikatan ku nondo do kagangahan i tulun di ponokisangod dokoyu, om popoggiduon ngai' ku i pisangod do mantad id dokoyu gisom do santangkus-tangkus pondo iyolo' do muli' om mogidu'. 28 Gangahon ngai' ku nondo i pisangod dokoyu; om uyungon ku i tulun do Howi, om Kanaan, om Hit, om kolombus kou i' do mamanau. 29 Nga' a' ku i' iyolo' insan-insanan do monguyung dot id suang do sontoun; tu' ondung wonsoyon ku o miagal diri, om otongkiadan tomod nopondo i tana', om iri tomod indo i nintorusan ot ounsamangan. 30 Nga' borinuton ku iyolo' do monguyung, do gisom do kogumu' kou do sumanganu di tana'. 31 Om paraladon ku nondo i wolit do tana' dokoyu do mantad hilo'd Suok dot Akaba om gisom do korikot di Bawang dot Iprat, om mantad hilo'd Rahat do Tanga' om gisom do korikot do hilo'd tana' do kowotuan. Om onuan ku nondo iyokoyu do kuasa' dot id sawat di tulun mantad dot id pomogunan diri om ouyung indo dokoyu iyolo' do korikot kou. 32 Kada' kou pomonsoi do poingkuro nopo dot id diyolo' ko' id ponokokinorohingan diyolo'. 33 Kada' dokoyu pologoso' o tongoulun diri do mundorong dot id pomogunan dokoyu; tu' ondung pologoson dokoyu, om iyolo' no o kobinsuhu' dokoyu do momonsoi'd dusa dot id doho'. Ondung sumambayang kou dot id kinorohingan diyolo' om iri no o lawa' di kapatai dokoyu,” ka dau.

Kinosoliwanan 24

Pinogirot i Tumpongo

1 Om boros kad Tuhan dot id di Musa, “Takad dilo nuluhon do mongoi do hiti'd doho' om powoyoon no i Harun, om i Nadab, om i Abihu, om i turu' nohopod o boyoon do tulun dot Israil; om hiri kou pod sodu-odu' om motud kou no do tumuku'. 2 Iso' pod tulun nga' aiso' no o koino-ino do minsomok doho' suwai ko' iya' noo. Nga' iri nopo tulun do suwai om a' i' koino-ino do minsomok, om okon-okon pondo i rayat toomod nga' a' i' koino-ino do tumakad piya di nuluhon,” ka. 3 Om ngoyo' no di Musa sunudai i tulun dot ogumu' do koinsanai di pinonuhuan do Tuhan om it oturan do Tuhan. Om oinsanan nopo i tulun do suminimbar do poingkaa, “Wonsoyon ngai' i' dahai i pinoboros do Tuhan,” ka. 4 Om tuliso' ngai' no di Musa i pinonuhuan do Tuhan diri. Om osuab po di kosuabon kawagu om pomonsoi no iyau do pananaraban do porsombahan do hiri'd guas di nuluhon diri, do hopod om duwo o watu di pinogititimpak; om iri ngai' nopo watu'ddi nga' ponokowakil di hopod om duwo o payat dot Israil. 5 Om ponuhu' noddi i Musa do piro-piro o tangaanakwagu, om papatahak no iyolo' dot id Tuhan do porsombahan di sorobon om ponumbali' iyolo' do piro-piro o sapi' do maan do porsombahan do piombolutan. 6 Om onuo' no di Musa o songintanga' di raha' di sapi'ddi om posuango' no dau do mangkuk; om iri no songintanga' om pinotuntug dau do hiri'd sakai di pananaraban do porsombahan. 7 Om ngoyo' noddi dau i buuk do tumpongo, i pinotulisan do koinsanai di ponuhuan do Tuhan, om basao' no dau dot opuhod dot id bansa'ddi. Om boros ka diyolo', “Mumboyo' i' iyahai do Tuhan om wonsoyon i' dahai o koinsanai di pinonuhuan dau,” ka. 8 Om ngoyo' noddi di Musa i raha' di hiri'd mangkuk om poiyaso' no dau dot id tulun dot ogumu'ddi. Boros ka dau, “Iti no raha' diti o popogirot di tumpongo do winonsoi'd Tuhan dot id dokoyu do tontok di pinatahak dau o koinsanai'dti ponuhuan,” ka. 9 Om takad noddi di nuluhon i Musa, om i Harun, om i Nadab, om i Abihu, om i turu' nohopod o boyoon do tulun dot Israil, 10 om kokito no diyolo' i Kinorohingan do tulun dot Israil. Hiri nopod koulokon di lapap do Kinorohingan nga' koiyo-iyo do sirang di watu do roitan do nilam do winonsoi, i miagal pod tawan kotomou. 11 A' id Kinorohingan pinatai i boyoon do tulun dot Israil diri do nokokito piya iyolo' do Kinorohingan. Om akan noddi om ponginum-nginum ngai' iyolo'.

Hilo'd Nuluhon do Sinai i Musa

12 Om boro-boros noddi o Tuhan dot id di Musa do poingkaa, “Takad diti nuluhon do mongoi do hiti'd doho'. Om daamot nu nopondod hiti om onuan ku iya' do duwo o kaping do watu do poposorou diya', i pinotulisan ngai' ku dit oturan do ponuduk diti tulun dot ogumu',” ka. 13 Om sodia' noddi i Musa om i Yosua, i mongunguhup dau, om timpuun no i Musa do tuminakad di nuluhon dot olidang. 14 Om boros kad Musa dot id boyoon do tulun dot Israil, “Andad kou nopo do hiti'd pinomukiiman diti do gisom do koguli' iyahai. Om hiti iyo Harun di Hur do koruhang dokoyu, om isai nopo o haro o pigulatan do pokisalasayan om mongoi nopo solowot diyolo',” ka dau. 15 Om takad no i Musa di Nuluhon do Sinai, om kolikupai nod haun i nuluhon diri. 16-17 Om sondot no dot id nuluhon diri i tanawau do kosorong tomod do tanda' do nakarapou o Tuhan. Om kokitanan nopo di tulun dot Israil di tanawau'ddi om miagal do tapui di molob-ngolob do hiri'd timpak di nuluhon. Om iri nopo nuluhon diri nga' nolikupan di haun do solinaid dot onom o tadau. Om koturu' noddi do tadau om lohowo' nod Tuhan i Musa do mantad hiri'd haun. 18 Om takad po i Musa di nuluhon diri do gisom do nolikupan iyau di haun. Om hiri noddi iyau do minundorong do solinaid dot apat nohopod o tadau om apat nohopod o totuong.

Kinosoliwanan 25

I Porsombahan do Pomonsoi di Kinoiyonon dot Olidang

1 Om boros kad Tuhan dot id di Musa, 2 “Sunudan no i tulun dot Israil do papatahak do porsombahan dot id doho'. Romiton no o nunu nopo o porsombahan di korohian diyolo' do papatahak dot id doho'. 3 Iri nopo porsombahan do patahakon om: tamas, pirok, tambaga'; 4 om kain dit opurak dit aalus, om kain di kihulu-hulu dit otomou, om aragang doitom-itom, om aragang, om kain di hulu do kambing do winonsoi; 5 om i kulit do dumba' do tontoluhan di sinasakan dot aragang; om kulit dit osonong om kayu di roitan dot akasia; 6 om tumau do lampung, om rampa do poroloton di tumau do ponununtug, om i poroloton di kominyan dit owongi' 7 om piro-piro o watu dit agayo o gatang do podokoton do pongillumis dit ipod di Boyoon dot Agayo dot Imam, om podokoton di polokopon do kangkab dau. 8 Suhuon no iyolo' do momonsoi do kiim do maan ku'd doho', om koiyon oku i' dot id pogialatan diyolo'. 9 Om wonsoyon no i kiim diri om koinsanai di pakakas do suwai do tumanud di natantu' mantad ku do pokitanan ku diya',” ka.

I Kaban do Tumpongo

10 Om boros ka kawagu'd Tuhan dot id di Musa, “Momonsoi no dot iso' o kaban do kayu di roitan dot akasia o wonsoyon. Konoruo' nopo di kaban diri om hatus om hopod o sontimito; om kalaabo' no om onom nohopod om onom o sontimito, om kasawato' nga' onom i' nohopod om onom o sontimito. 11 Urogupan no do tamas dit osompipi' o hiri'd suang om hiri'd soibau di kaban, om oligon no do tamas o mitingisan. 12 Wansayan no dot apat o tontolingo do tamas do posulungan do pagantayang om podokoton no do hiri'd apat o sunduk di ponong id gakod di kaban do sopiduwo o tontolingo do miampaping di kaban. 13 Momonsoi no do pagantayang do kayu di roitan dot akasia o wonsoyon, om urogupan nod tamas. 14 Om posusukon nondo i kayu di pagantayang do hiri'd tontolingo di miampaping di kaban. 15 Om potimporonon nopo i kayu do pagantayang do poinsusuk di tontolingo; tu' a' nori koino-ino do kodongon kawagu. 16 Om posuangon nogindo di kaban diri i duwo o kaping do watu di patahakon ku diya', i pinotulisan do koinsanai dit oturan ku. 17 Wansayan nod sompon i kaban diri do tamas di nosompipi' o wonsoyon. Konoruo' nopo om hatus om hopod o sontimito om onom nohopod om onom o sontimito do kalaabo'. 18 Momonsoi nod duwo o kerub do tamas di tinantan o wonsoyon 19 do piomputulon di sompon di kaban. Torodokon no kopio do momonsoi i poiyo-iyoon do moloikat di roitan do kerub diri om kopisagalai i' di sompon. 20 Om mositi' nod potimbabaon i duwo o koiyo-iyo do moloikat di roitan do kerub diri do miomputul di sompon, om potokopon no di sompon i talad di koiyo- iyo'd moloikat di roitan do kerub. 21 Posuangon no i duwo o kaping do watu do hiri'd kaban om posomponon no i sompon di kaban. 22 Om hiri nondo do sumolowot oku diya', om hiri'd sakai di sompon, it id piolitan di duwo o koiyo-iyo'd moloikat di roitan do kerub o patahakan ku diya' do koinsanai dit oturan ku do patahakon nu diti tulun dot Israil,” ka.

Mija' do Pasakayan di Roti do Patahakon do Kinorohingan

23 Om boros ka kawagu'd Tuhan dot id di Musa, “Momonsoi no dot iso' o mija' do kayu di roitan dot akasia o wonsoyon. Konoruo' nopo om walu' nohopod om walu' o sontimito, om kalaabo' no om apat nohopod om apat o sontimito, om kasawato' no om onom nohopod om onom o sontimito. 24 Tongkopon nod monguragup do tamas di nosompipi' i mija'ddi, om oligon do tamas o hiri'd mitingisan. 25 Isanan nod tamas o pointutuk di mija'ddi do turu' nohopod om limo o milimito do kalaabo'. Om oligon no i pinongisan di mija' do tamas o pongolig. 26 Momonsoi nod apat o tontolingo do tamas o wonsoyon, do posusukan di pagantayang, om poikidon nori dit apat o sunduk di pinadakatan di gakod di mija'. 27 Iri nopo tontolingo di posusukan di kayu do pagantayang om podokoton do hiri'd toning di tolig di mitingisan. 28 Iri nopo pagantayang diri om mositi' no dot i kayu di roitan dot akasia o wonsoyon, om urogupan nori do tamas. 29 Momonsoi nod piring, om sangkir, om kakanan, om mangkuk, do pakayon do tontok do papatahak do porsombahan do waig dot anggur. Koinsanai'dti om mositi' nod tamas dit osompipi' o wonsoyon. 30 Iti nopo mija' diti om poiyonon do hiri'd dotimbabaan di Kaban do Tumpongo. Om mositi' nod haro kasai' o roti dit olidang do hiri'd sakai di mija' do maan do porsombahan dot id doho',” ka dau.

Potitimpakan do Lampung

31 Om boros ka kawagu'd Tuhan dot id di Musa, “Momonsoi nod iso' o potitimpakan do lampung do tamas di nosompipi' o wonsoyon. Wonsoyon nopod puun om guas di potitimpakan do lampung om tamas di tinantan om pasagalayon no di puun om i guas i koiyo-iyo do tusak di pomolumis, om kohompit ngai' no i koiyo-iyo do tusak dit a' po noungkalad om i koiyo-iyo do tusak di noungkalad no. 1|60|HK77C|Potitimpakan do lampung|25.31 32 Om wansayan dot onom o raan i guas do sopitolu o raan do miampaping. 33 Pointikid-tikid dit onom o raan diri om wansayan do tolu o koiyo-iyo'd tusak do maan do pongillumis, do poiyo-iyoon do tusak di kayu di roitan do badam; om wansayan do koiyo-iyo di tusak dit a' po noungkalad om koiyo-iyo di tusak di noungkalad no. 34 Om wansayan nod apat o koiyo-iyo'd tusak o hiri'd guas di potitimpakan do lampung do maan do pongillumis. Iri nopo tusak diri om poiyo-iyoon di tusak do kayu di roitan do badam dit a' po noungkalad om i noungkalad no. 35 Om hiri nopod puun do pointikid-tikid di tolu o raan do miampaping diri, om wansayan dot iso' o koiyo-iyo do tusak dit a' po noungkalad. 36 Iri nopo koiyo-iyo'd tusak dit a' po noungkalad diri om i raan di potitimpakan di lampung om songwatang noo o tamas dit osompipi' di tinantan o wonsoyon. 37 Momonsoi nod turu' o lampung do potimpakon do hiri'd potitimpakan do lampung, om oulinahan i' o hiri'd ponong id gulu. 38 Momonsoi nod piro-piro o pananggip di lampung om piro-piro o talam do tamas dit osompipi' o wonsoyon, 39 om kogumuon nopod tamas dit osompipi', do wonsoyon do potitimpakan do lampung om iri ngai' pakakas diri om tolu nohopod om limo o kilogram. 40 Torodokon no kopio do momonsoi iti do poiyoon di natantu' mantad ku di pinokitanan ku diya' di hilo'd nuluhon,” ka dau.

Kinosoliwanan 26

I Kiim do Tuhan

1 Om boros ka kawagu'd Tuhan dot id di Musa, “Iri nopo ponong id suang di Kiim dot Olidang, i Kiim ku, om hopod o bidang do kain linan dit aalus, i piniawol do kain di kihulu-hulu dit otomou, om aragang doitom-itom, om aragang o wonsoyon. Om rindaan nori do poiyo-iyoon di moloikat di roitan do kerub. 2|55|HK77B|Kiim do Tuhan|26.1 2 Om mositi' no dot iradon o kogoyo-goyoo' di bidang di kain; konoruo' nopod sombidang om hopod om duwo o mito om kalaabo' no om duwo o mito. 3 Om pogitombir-tombiron no i limo o bidang di kain om asangkayu i', om i limo o bidang do suwai nga' iyoon iddi. 4 Wansayan nod posuluhan i duwo o kinotombiran do kain diri. Om wonsoyon nopod posuluhan om kain dit otomou. Om padakatan nopo di posuluhan om hiri'd tisan di kain. 5 Padakatan nod limo nohopod o posuluhan o hiri'd tiso' di kinotombiran di kain, om limo kawagu nohopod o posuluhan do podokoton do hiri'd koduwo di kinotombiran di kain, om kopogiontok-ontok ngai' i' i posuluhan. 6 Momonsoi nod limo nohopod o pangait do tamas o wonsoyon do pokoiton di posuluhan di duwo o kinotombiran di kain, om kopiromut i' i duwo o kinotombiran do kain diri. 7 Wansayan nod tokop i kiim do hopod om iso' o bidang do kain di hulu do kambing do winonsoi, o wonsoyon. 8 Om mositi' no dot iradon o kogoyo-goyoo' di bidang di kain; konoruon nopo om hopod om tolu o mito om kalaabon no om duwo o mito. 9 Om pogitombir-tombiron no i limo o bidang do kain. Om iri nopo koonom di bidang do kain di pinotombir diri om pilikobon do maan do ponobon di ponong id wawayaan di Kiim. 10 Wansayan nod limo nohopod o posuluhan i tiso' di kinotombiran di kain do podokoton do hiri'd tisan, om limo kawagu nohopod o posuluhan do podokoton do hiri'd tisan di koduwo di kinotombiran di kain. 11 Momonsoi nod limo nohopod o pangait do tambaga' o wonsoyon, om pokoiton no di posuluhan om opiromut i' i duwo o kinotombiran do kain do ponokop di Kiim. 12 Iri nopo songintanga' di kain di poinghandui no om ponirung di ponong id tolikud di Kiim. 13 Om iri no kain di limo nohopod o sontimito do poinghandui do hiri'd miampaping di Kiim om pologoson nopo do poingiyo'ddi do ponirung di hiri'd tisan di Kiim. 14 Momonsoi pod duwo kawagu o ponokop di Kiim. Koiso' nopo om kulit do dumba' do tontoluhan di sinasakan dot aragang o wonsoyon, om iri no tiso' om kulit dit osonong o wonsoyon, do maan do ponokop dit id soibau. 15 Momonsoi nod papan di poturidongon do kayu di roitan dot akasia o wonsoyon. 16 Pointikid-tikid di papan om apat ngai' nopo o mito do konoruo' om onom nohopod om onom o sontimito do kalaabo'. 17 Kakalan ngai' no o hiri'd misingompok om milo i' do pitumaon i papan. 18 Powonsoyon no o duwo nohopod o papan do poturidongon do hiri'd tisan ponong id salatan di Kiim. 19 Momonsoi nod apat nohopod o posungkadan do pirok o wonsoyon, do posungkadan di papan. Iso' nopo o papan om posungkadon di posungkadan di misusun do duwo; om oinggiratan i' i papan di kinakalan. 20 Powonsoyon no o duwo nohopod o papan do hiri'd tisan ponong id utara di Kiim, 21 om apat nohopod o posungkadan do pirok o wonsoyon, om pisusunon do duwo o posungkadan dot iso' o torigi. 22 Hiri nopod ponong id tolikud di Kiim, it id dompok ponong id kotonobon, om poturidangan no dot onom o papan 23 om koduwoon o papan do hiri'd linsuk. 24 Iri nopo papan di ponong id linsuk, om mositi' no do piromuton o hiri'd siriba' do gisom do koompus do hiri'd sawat. Om iyoon goduwo nopoddi i papan di hiri'd duwo o linsuk di Kiim. 25 Om walu' diri o papan do posungkadon do hopod om onom o posungkadan di pirok do winonsoi tu' pisusunon nod duwo i posungkadan dot iso' o papan. 26 Momonsoi nod hopod om limo o tukod di potibabar do kayu di roitan dot akasia o wonsoyon; om podokoton no o limo di tukod diri do hiri'd limo o papan di pinoturidong, i ponong id rombu di Kiim dot id sampaping, 27 om limo kawagu o tukod do podokoton dot id ponong id rombu dit id sampaping, om limo o tukod do podokoton di papan di pinoturidong di ponong id tolikud; i ponong id kotonobon. 28 Iri nopo tukod di potibabar di hiri'd tanga-tanga', om podokoton do hiri'd piintangaan di papan di pinoturidong, om podopiton nopo di papan di ponong id rombu di Kiim. 29 Urogupan nod tamas i papan di pinoturidong di hiri'd Kiim om i tukod di potibabar. Om wansayan nod posusukan i papan di pinoturidong do posusukan di tukod do potibabar. Iri nopo posusukan diri om tamas o wonsoyon. 30 Wonsoyon no i kiim do tumanud di poiyaan di natantu' mantad ku, i pinokitanan ku diya' di hilo'd nuluhon. 31 Momonsoi nod tabir, do wonsoyon nopo om kain linan dit osonong do piowolon do kain di kihulu-hulu dit otomou, om aragang doitom-itom om aragang. Rindaan no i tabir diri do poiyo-iyoon di moloikat di roitan do kerub. 32 Potoidon no i tabir do hiri'd apat o torigi do kayu di roitan dot akasia, i nurogupan do tamas, om i pinadakatan do pangait di tamas do winonsoi, om i pinosungkad dot apat o posungkadan di pirok do winonsoi. 33 Podokoton no i tabir do hiri'd siriba-riba' di rinuludan do pangait, i hiri'd taap di Kiim. Om poilihon no i Kaban do Tumpongo, i kisuang di duwo o kaping do watu do hiri'd dotirung di tabir. Om iri no i tabir diri o pomiolitan di Bilik dit Olidang om i Bilik dit Olidang Kopio. 34 Om posomponon no i sompon di Kaban do Tumpongo. 35 Iri nopo mija' di pasakayan do porsombahan om hirion id soliwan di Bilik dit Olidang Kopio, do ponong id utara, om iri no potitimpakan do lampung om hirion id ponong id salatan, do hiri'd suang di Kiim dot Olidang. 36 Om potoidon no do hiri'd wawayaan di Kiim, om tabir di kain linan dit osonong, i piowolon do kain di kihulu-hulu dit otomou, om aragang doitom-itom, om aragang, om rindaan iri. 37 Om momonsoi nod limo o torigi, do kayu di roitan dot akasia o wonsoyon, do padakatan di tabir. Iri nopo torigi diri om urogupan do tamas om dakatan do limo o pangait do tamas; om wansayan do limo o posungkadan i torigi, do tambaga' o wonsoyon,” ka dau.

Kinosoliwanan 27

I Pananaraban do Porsombahan

1 Om boros ka kawagu'd Tuhan dot id di Musa, “Momonsoi nod iso' o pananaraban do porsombahan do kayu di roitan dot akasia o wonsoyon. Om posogion no o pomomonsoi, do 2.2 mito do konoruo' om 2.2 mito do kalaabo', om 1.3 mito do kasawato'. 2 Wansayan nod sinangau-sangau o pointikid-tikid dit apat o sunduk di ponong id sawat di pananaraban do porsombahan, om tongkopon nori do monguragup do tambaga'. 3 Momonsoi nod poriuk do poiyanan do tauu om momonsoi do sikup, om momonsoi do mangkuk om totodok, om momonsoi do poiyanan do tapui. Koinsanai'dti om mositi' nod tambaga' ngai' o wonsoyon. 4 Momonsoi nod pangabot di pananaraban do porsombahan do tambaga' o wonsoyon, om padakatan do tontolingo o hiri'd pointikid-tikid di sunduk di pangabot, do posusukan di pagantayang. 5 Kasawaton nopo do paabatan di pangabot do hiri'd pananaraban do porsombahan om songintanga' do kasawato' di pananaraban do porsombahan, it id siriba' di kabang di pananaraban do porsombahan. 6 Momonsoi nod pagantayang do kayu di roitan dot akasia o wonsoyon, om urogupan nori do tambaga', 7 om posusukon nori do hiri'd tontolingo di miampaping di pananaraban do porsombahan. 8 Wonsoyon no i pananaraban do porsombahan diri do papan o wonsoyon om pologoson nopo do kiguang o hiri'd tanga', do tumanud di poiyaan di natantu' mantad ku di pinokitanan ku diya' di hilo'd nuluhon,” ka dau.

Rinding di Kiim do Tuhan

9 Om boros ka kawagu'd Tuhan dot id di Musa, “Oluan nod natad i Kiim ku om rindingan nod tabir do kain linan dit osonong. Konoruo' nopod tabir do hiri'd disan ponong id salatan om apat nohopod om apat o mito, 10 om tukodon iri do duwo nohopod o torigi do tambaga' do posungkadon do duwo nohopod o posungkadan do tambaga', om dakatan do pangait do pirok o wonsoyon. 11 Om iyoon nogiddi it id disan ponong id utara di natad. 12 Id bombong ponong id kotonobon no, om rindingan do tabir di duwo nohopod om duwo o mito do konoruo' om tukodon do hopod o torigi do posungkadon do hopod o posungkadan. 13 Id bombong ponong id koulayon no, i winansayan do wawayaan, om duwo i' nohopod om duwo o mito do kalaabo' do panabir. 14-15 Miampaping nopo di wawayaan om rindingan do tabir dot 6.6 mito do konoruo', om tukodon do tolu o torigi do posungkadon do tolu o posungkadan. 16 Om iri no wawayaan om wansayan do tabir do 9 o mito do konoruon do kain linan dit osonong, i piniawol do kain di kihulu-hulu dit otomou, om aragang doitom-itom, om aragang, om rindaan. Om tukodon nori dot apat o torigi do posungkadon dot apat o posungkadan. 17 Om pogiromu-romuton ngai' no i torigi do pointutuk di natad dot i loting do pirok o popogiromu-romut; om iri nopo pokoiton di loting om pirok o wonsoyon, om iri no posungkadan om tambaga' o wonsoyon. 18 Konoruo' nopo do tansar do pointutuk di natad om 44 o mito, om 22 o mito do kalaabo', om 2.2 o mito do kasawato'. Wonsoyon nopod panabir om kain linan dit osonong, om iri no posungkadan om tambaga' o wonsoyon. 19 Koinsanai di pakakas do pakayon do hiri'd Kiim om koinsanai di gapit di Kiim om i torigi di ponukod nga' tambaga' ngai' nopo o wonsoyon,” ka dau.

Kowoyo-woyoo' do Momogompi' di Lampung

20 Om boros ka kawagu'd Tuhan dot id di Musa, “Suhuon no i tulun dot Israil do mongoi papaatod diya' do tumau do saitun dit osonong kopio do ponuang di lampung do hiri'd Kiim ku, om otutudan indo i lampung do pointikid do totuong. 21 Modtutud nopo di lampung om mositi' no dot i Harun om i tangaanak dau. Poiyanan nopo di lampung diri om hiri'd soliwan di tabir di ponirung di Kaban do Tumpongo. Om mositi' nod kitapui kasai' i lampung diri do hiri'd koropohon ku do mantad do sosodopon om gisom do kosuabon. Om mositi' nod wonsoyon kasai' do tulun dot Israil om i sinakagon diyolo' o ponuhuan diti do gisom dot alaid,” ka dau.

Kinosoliwanan 28

Pakayan di Dong Imam

1 Om boros ka kawagu'd Tuhan dot id di Musa, “Lohowo' i Harun, i tobpinai nu, om i Nadab, om i Abihu, om i Iliasar, om i Itamar, i tangaanak di Harun. Posuwai-suwayon no iyolo' do mantad id tulun dot Israil, do silihon do imam di momonsoi'd karaja' ku. 2 Wansayan no i Harun do pakayan di dong imam, om agayo i' o ngaran dau om olumis o kokitanan. 3 Lohowon ngai' no i mononombir di noonuan ku do toilaan. Om suhuon no iyolo' do momonsoi'd pakayan di Harun, om kotobilang i' iyau do sumiliu do doho'd songonuon, om sumiliu do imam di momonsoi'd karaja' ku. 4 Suhuon no iyolo' do momonsoi'd pomolokop do kangkab, om iso' ot ipod om iso' o rasuk dit anaru, om iso' o rasuk dit oniba' di rindaan, om iso' o sigar om iso' o tagkos. Om iyolo' no o momonsoi diti pakayan do dong imam do pakayon di Harun i tobpinai nu, om i tangaanak dau, om osiliu i' iyolo' do imam di momonsoi'd karaja' ku. 5-6 Iti nopo pakayan om mositi' no dot i kain di kihulu-hulu dit otomou, om aragang doitom-itom om aragang, om banang do tamas om kain linan dit osonong, o wonsoyon. Om it ipod nga' sagalai i' do kain diri o wonsoyon om rindaan iri piya. 7 Om wansayan nod togiis o hiri'd miampaping di ponong id lihawa dit ipod do maan do pikogoson. 8 Om wansayan pod tagkos it ipod, do sagalai i' dit ipod o kain dot owolon om kopisagalai indo dit ipod i tagkos. 9-12 Manganu nod duwo o watu dit agayo o gatang di roitan do delima. Om mogihum nod tulun dit oilo do mongikir do tamas do popokikir do ngaran di hopod om duwo o tanak di Yakub do hiri'd watu'ddi do poiruson di tumur diyolo', do sopionom o ngaran dot id iso' o watu. Om podokoton nogindo i duwo o watu'ddi do hiri'd padakatan di tamas do winonsoi, om podokoton nori di togiis dit ipod di hiri'd ponong id lihawa do maan do ponokowakil di hopod om duwo o payat dot Israil. Om opiigit-igitan nondo di Harun i ngaran diyolo' do hiri'd lihawa dau, om iyoho' i Tuhan nga' kosorou indo kasai' diyolo'. 13 Suwai nopo ko' i padadakatan di tamas do winonsoi, 14 om momonsoi pod duwo o rantai, do tamas dit osompipi' o wonsoyon do pitobidon do miagal do tali, om podokoton nogindo i rantai'ddi do hiri'd padadakatan di tamas do winonsoi,” ka dau.

I Lokop do Kangkab.15 Om boros ka kawagu'd Tuhan dot id di Musa, “Momonsoi nod lokop do kangkab di Boyoon dot Agayo dot Imam do maan dau do pakayon do tontok do mongilo iyau do korohian do Kinorohingan. Om iri nopo kain do wonsoyon om sagalai i' di kain di wonsoyon dot ipod, om i maan do pomorinda' nga' sagalai i' di pinomorinda' dit ipod.1|90|HK76E|Sigar om lokop do kangkab|28.15 16 Pomomonsoi nopoddi om posogion om pilopion. Konoruo' nopo om duwo nohopod om duwo sontimito om kalaabo' nga' duwo i' nohopod om duwo sontimito. 17 Padakatan no i lokop do kangkab diri dot apat o rulud do watu dit agayo o gatang; hiri nopod rulud do koiso' om dakatan do watu di roitan do delima, topas om baiduri sepah. 18 Hiri nod rulud do koduwo om dakatan do watu di roitan do samrud, nilam om intan. 19 Hiri nod rulud do kotolu om dakatan do watu di roitan do lasuardi, akik, om kecubung. 20 Hiri nod rulud do kaapat om dakatan do watu di roitan do pirus, yakut, om ratna cempaka. Om podokoton ngai' nopo iti hopod om duwo o watu dot angagayo o gatang diti di padadakatan, di tamas do winonsoi. 21 Om pointikid-tikid di hopod om duwo o watu dot angagayo o gatang diri om kikiran do ngaran di tangaanak di Yakub, do ponokowakil di hopod om duwo o payat dot Israil. 22 Wansayan nod rantai i lokop do kangkab diri, do tamas dit osompipi' o wonsoyon, om i pinitabid do miagal do tali. 23 Momonsoi nod duwo o pondulung do tamas om podokoton no do hiri'd sunduk ponong id sawat di lokop do kangkab 24 om posulungon nogindo i duwo o rantai do tamas do hiri'd duwo o pondulung do tamas diri. 25 Om pokogoson no i duwo kawagu o tompok di duwo o rantai'ddi di lokop do kangkab di togiis di lihawa dit ipod. 26 Momonsoi nod duwo kawagu o pondulung do tamas om podokoton no do hiri'd sunduk ponong id siriba' di lokop do kangkab, do hiri'd ponong id saalom, i kotopis dit ipod. 27 Momonsoi po kawagu do duwo o pondulung do tamas om podokoton do hiri'd siriba-riba' di ponong id soibau di duwo o togiis di ponong id lihawa dit ipod, it id topis di lupi di tinombir, it id sawat di tagkos dit atandai o pinangawol. 28 Ogiisanan no i pondulung di lokop do kangkab do tali dit otomou om pokogoson nondo i tali'ddi di pondulung di poindokot dit ipod, om id sawat kasai' i' di tagkos i lokop do kangkab, om a' indo tumatak. 29 Soira' nopod sumuang i Harun di Bilik dot Olidang, om mositi' nod pakayon dau i lokop do kangkab diri, i kinikiran do ngaran di hopod om duwo o payat dot Israil, om iyoho' i Tuhan nga' kosorou kasai' indo di tulun ku. 30 Posuangon no it Urim om i Tumim do hiri'd suang di lokop do kangkab, om oigitan i' di Harun iri do tontok di mongoi iyau timbaba' doho'. Om tontok nopo do maso'd miagal diri, om mositi' nod pakayon kasai' dau i lokop do kangkab, om oilaan i' dau o korohian ku do bagi di tulun dot Israil,” ka dau.

Pakayan do Dong Imam di Suwai

31 Om boros ka kawagu'd Tuhan dot id di Musa, “Iri nopo rasuk dit anaru dit osoibahan dit ipod om kain di kihulu-hulu dit otomou o wonsoyon. 32 Om wansayan nod liou i rasuk diri, om awalan nod mongisan i liou di rasuk om a' i' ohurak. 33-34 Pointutuk nopo di lupi dit id siriba' om dakatan di koiyo-iyo do tua' do kayu di roitan do delima do wonsoyon nopoddi om i kain do kihulu-hulu dit otomou, om aragang doitom-itom, om aragang, om piolot-oloton do giring do tamas. 35 Om mositi' nod pakayon di Harun i rasuk dot anaru diri do soira-ira' nopo do momonsoi iyau di karaja' di dong imam. Om soira' nopondo do mongoi iyau timbaba' doho' do hilo'd Bilik dit Olidang, ko' di tumongkiad iyau do bilik diri om orongou indo i tuni di giring diri, om a' indo iyau apatai. 36 Momonsoi nod iso' o pongillumis do tamas dit osompipi' o wonsoyon om pokikiron no o poingkaa, ‘Pinotobilang do maan do don Tuhan,’ ka. 37 Pokogoson nori do hiri'd sigar do hiri'd ponong id turos, do tali dit otomou o pongogos. 38 Om mositi' nod posigaron di Harun i tamas di pongillumis diri do hiri'd turos dau, om romiton ku indo, iyoho' i Tuhan, o koinsanai di porsombahan di patahakon di tulun dot Israil dot id doho', do mulong piya do haro ot owonsoi diyolo' do sala' dit ongokooro' do tontok do papatahak iyolo'ddi. 39 Owolon nopo do maan do rasuk di Harun om kain linan dit osonong, om i wonsoyon do sigar nga' kain linan i' dit osonong o wonsoyon, om sagalai nogi' do kain diri o wonsoyon do tagkos di rindaan. 40 Wansayan nod rasuk, om tagkos, om tupi' i tangaanak di Harun do kusai, om agayo i' o ngaran om olumis o kokitanan diyolo'. 41 Papakayan no di Harun, i tobpinai nu om i tangaanak dau'd kusai i pakayan diri. Om tuntugan no iyolo'd tumau do saitun; om iyo noddi o pomimili' diyolo' do potobilangon do silihon do imam di momonsoi'd karaja' ku. 42 Wansayan no iyolo'd soluar dit oniba' o gakod do kain linan dit osonong o wonsoyon, do konoruo' nopo om korikot dot id poo do mantad id tawak, om otirung i' i bohogian do tinan diyolo' dit a' osorupai dot okito. 43 Om mositi' nod pakayon kasai' di Harun om i tangaanak dau o pakayan diri do tontok do sumuang iyolo' do hiri'd Kiim ku ko' di mongoi iyolo' insomok di pananaraban do porsombahan do mongoi pomonsoi di karaja' di dong imam do hiri'd Bilik dit Olidang. Om a' indo iyolo' apatai tu' a' i' okito o bohogian do tinan diyolo' dit a' osorupai dot okito. Om iti kasai' no ot oturan dit apatut do tonudon di Harun om i sinakagon dau,” ka dau.

Kinosoliwanan 29

Ralan do Momili' di Harun om i Tangaanak Dau do Silihon dot Imam

1 Om boros ka kawagu'd Tuhan dot id di Musa, “Poingkaa no o kowoyo-woyoo' do momili' di Harun om i tangaanak dau do popotobilang diyolo' do silihon do imam di momonsoi do karaja' ku. Manganu no do songinan o sapi' do tontoluhan dit okoro' po om duwo o tinan do dumba' do tontoluhan dit aiso' o bohiton do tinan. 2 Momolomok nod tapung do gandum dit osonong kopio, nga' it a' naralatan do pangambang. Om iri nopo wookon di tapung diri om wonsoyon do roti do ralatan do tumau do saitun, om iri no wokon di tapung om a' ralatan do tumau, om iri nondo topod di tapung om wonsoyon do roti di gihilan do tumau. 3 Posuangon ngai' no i roti do hiri'd balatak om patahakon nogindo dot id doho' do mitonggoi di sapi' do tontoluhan om i duwo o dumba' do tontoluhan, i patahakon do maan do porsombahan di sumbolion. 4 Suhuon no i Harun om i tangaanak dau do mongoi'd hiri'd wawayaan di Kiim ku, om suhuon no iyolo' do modsu' do tumanud dit oturan di don tugama'. 5 Om pakayan nogindo i Harun di pakayan do dong imam --- i rasuk dit anaru o longon, om it ipod, om i rasuk dot anaru dit alakapan dit ipod, om i lokop do kangkab, om i tagkos. 6 Posigaron no dau i sigar om pokogoson nod hiri i tanda' dot olidang di kinikiran do poingkaa, ‘Pinotobilang do maan do don Tuhan,’ ka. 7 Om ngoyon nogindo i tumau di ponununtug om potuntugon no do hiri'd tulu dau, do tanda' do pilion iyau. 8 Om angatan no i tangaanak dau om porosukan no diyolo' i rasuk dit anganaru o longon 9 om paagkasan no diyolo' i tagkos om potupian i tupi'. Iyo noddi o kowoyo-woyoo' do momili' di Harun om i tangaanak dau. Om iyolo' nondo om i sinakagon diyolo' ot apatut do sumiliu'd imam di momonsoi do karaja' ku do gisom dot alaid. 10 Om ngoyon nondo i sapi' di tontoluhan diri om pohirion id dotimbabaan di Kiim ku. Om sunudan no i Harun om i tangaanak dau do pakabai do longon diyolo' do hiri'd tulu di sapi'ddi. 11 Om sumbolion no i sapi'ddi do hiri'd dotimbabaan ku; i hiri'd dotimbabaan di Kiim. 12 Om manu nod ongokuuri' do raha' di sapi'ddi om potuduwon no di raha' o tunturu' nu om pogihilon nogindo di sinangau-sangau di pananaraban do porsombahan. Om potuntugon nogindo i raha' di noolu' do hiri'd douwahan di pananaraban do porsombahan. 13 Om onuon ngai' nogindo i linuap di songinsokot di tinaii', om i bohogian dot osonong kopio di tundu-undu', om i duwo o lusou-lusou do mitonggoi di linuap di songinsokot. Om sorobon ngai' nori do hiri'd pananaraban do porsombahan do maan do porsombahan dot id doho'. 14 Nga' iri nopo tonsi, om i kulit, om i tinaii' di sapi'ddi om mositi' nod tutudan do hiri'd soliwan di kokiiman. Om iri no o porsombahan do pongidu' do dusa di imam. 15 Om ngoyon nondo o tiso' di dumba' do tontoluhan diri. Om suhuon no i Harun om i tangaanak dau do pakabai do longon diyolo' do hiri'd tulu di dumba'ddi. 16 Om sumbolion nondo i dumba'ddi om onuon i raha' do maan poiyaso' do hiri'd misingobik om hiri'd misingompok di pananaraban do porsombahan. 17 Om popoton no i dumba' do tontoluhan diri. Om mositi' no dot ougan i suang do tian om i gakod di dumba', om pasakayon nogindo iri di tulu om i popot do suwai di dumba'ddi. 18 Om insanan nopo do monorob i popot di dumba' do tontoluhan diri do hiri'd pananaraban do porsombahan do maan do porsombahan do taakanon. Om iri no i tawau di porsombahan do sinumbali'ddi o kasanangan ku. 19 Ngoyon no i tiso' di dumba' do tontoluhan diri, i dumba' do maan do porsombahan. Om suhuon no i Harun om i tangaanak dau do pakabai do longon diyolo' do hiri'd tulu di dumba'ddi. 20 Om sumbolion nondo i dumba' om manu no dot ongokooro' di raha' om pogihilon no do hiri'd tolingo'd wanan di Harun om i tangaanak dau, om pogihilon di posolon do tunturu' do longon diyolo'd wanan, om pogihilon di posolon do lapap diyolo'd wanan. Om poiyason nondo i noolu' di raha' do hiri'd misingobik om hiri'd misingompok di pananaraban do porsombahan. 21 Manu no dot ongokooro' di raha' di hiri'd sakai di pananaraban do porsombahan om manu dot ongokooro' di tumau di ponununtug, om powowoson nondo dot id di Harun om id pakayan dau om id pakayan di tangaanak dau. Om iyo noddi o ralan do popotobilang di Harun om i tangaanak dau, om i pakayan diyolo' do maan do doho'd songonuon. 22 Onuon no i lunok di dumba' do tontoluhan diri, om i tikiu di kilunok, om i linuap do poinsokot di suang do tian, om i bohogian dot osonong kopio di tundu-undu', om i duwo o lusou-lusou do mitonggoi di linuap di songinsokot, om i poo do wanan. 23 Om manu no di roti di hiri'd balatak di nakatahak no dot id doho', dot iso' ot onuon do pointikid-tikid di bansa' di roti: iso' ot onuon di roti di rinalatan do tumau do saitun, om iso' ot onuon di roti dit a' rinalatan do tumau, om iso' ot onuon di roti. 24 Pakahangan ngai' nopo iti di Harun om i tangaanak dau, om suhuon no iyolo' do papatahak diti dot id doho' do maan do porsombahan di potobilangon do buntuk doho'. 25 Om ngoyon nondo i roti di poingigit diyolo' om sorobon no do hiri'd pananaraban do porsombahan do maan do porsombahan do taakanon do patahakon dot id doho'. Om iri no i tawau do porsombahan diri o kasanangan ku. 26 Onuon no i kangkab di dumba' do tontoluhan diri om patahakon no dot id doho' do maan do porsombahan di potobilangon do buntuk doho'. Om iri nopo om diya' no. 27 Tontok nopo do momili' do imam, om iri nopo kangkab om i poo di dumba' do tontoluhan di maan do porsombahan do tontok diri om patahakon dot id doho' do maan do porsombahan di potobilangon do buntuk doho', om posuwai-suwayon nondo iri do patahakon di piro-piro o imam. 28 Iti no o natantu' ku dit a' milo do simbanan: Tontok nopo do mongoi papatahak i tulun ku do porsombahan do piombolutan, om iri nopo kangkab om i poo di tayam-tayam om iri no imam o kaanu. Tu' iri no o porsombahan di tulun ku dot id doho'. Iri no i natantu' ku dit a' milo do simbanan. Iyoho' no o Tuhan. 29 Apatai nopondo i Harun, om mositi' no do potungkusan dau i pakayan dau dot id tangaanak dau do maan diyolo' do pakayon dot opili' iyolo'. 30 Iri nopo tanak di Harun di sumowoli dau do sumiliu do imam, om i mongoi do hiri'd Kiim ku do momonsoi di karaja' do dong imam do hiri'd Bilik dit Olidang, om mositi' no do manampakai do pakayan diri do solinaid do turu' o tadau. 31 Onuon no i tonsi di dumba' do tontoluhan di pinatahak do numaan do porsombahan do tontok di pinili' i Harun om i tangaanak dau om losuon no i tonsi'ddi dot id kinoiyonon dit olidang. 32 Om mositi' no do kanon diyolo' i tonsi'ddi do hiri'd wawayaan di Kiim ku om kanon i topod di roti di hiri'd balatak. 33 Om mositi' no do kanon diyolo' i taakanon di pinatahak do numaan do porsombahan do tontok di pinapatahak do porsombahan do pongidu'd dusa do tontok di minomili'. Imam noo o koino-ino do mangakan di taakanon diri tu' nokotobilang nori do patahakon dot id doho'. 34 Ondung haro ot oolu' di tonsi ko' i roti'ddi do kosuabon kawagu, om mositi' nod sorobon ngai' i taakanon diri, om a' no koino-ino dot akanon, tu' olidang nori. 35 Koloidon nopo do maso do momili' di Harun om i tangaanak dau om turu' o tadau, do miagal di pinonuhuan ku diya'. 36 Pointikid-tikid do tadau om mositi' no do papatahak do porsombahan do songinan o sapi' do tontoluhan do maan do pongidu' do dusa. Om iri no i porsombahan diri o kolidang di pananaraban do porsombahan. Om tuntugan no i pananaraban do porsombahan do tumau do saitun om kotobilang i' iri do maan do doho'd songonuon. 37 Wonsoyon no o miagal diri do pointikid do tadau do solinaid do turu' o tadau. Om olidangan ngai' nondo o pointongkop di pananaraban do porsombahan. Om isai nopondo ko' nunu nopondo o kakama' diri, om orualan no tu' oontok di kuasa' do kolidango' di pananaraban do porsombahan,” ka dau.

I Porsombahan do Patahakon do Monikid Tadau

38 Om boros ka kawagu'd Tuhan dot id di Musa, “Pointikid-tikid do tadau do gisom dot alaid, om mositi' nod papatahak do porsombahan do duwo o tinan do dumba' di sontoun nogi' o tumur do maan do porsombahan di sumbolion. 39 Iri nopo songinan om maan do porsombahan do dongkosuabon om iri no tiso' om maan do porsombahan do dongsosodopon. 40 Iri nopo patahakon do maan do porsombahan do potonggoyon di dumba' di koiso', om songkilogram o tapung do gandum dit osonong kopio om piroloton do songlito o tumau do saitun dit osompipi'. Om papatahak po do songlito o waig dot anggur do maan do porsombahan. 41 Iri no tanak do dumba' di koduwo om patahakon do maan do porsombahan do dongsosodopon do mitonggoi di songkilogram o tapung, om songlito o tumau do saitun, om songlito o waig dot anggur. Iri no o porsombahan do taakanon do patahakon dot id doho'. Om iri no tawau di porsombahan diri o kasanangan ku. Iyoho' no o Tuhan. 42 Om iti nopo porsombahan do sorobon diti om mositi' nod patahakon dot id toguang ku do hiri'd wawayaan di Kiim ku. Om hilo' oku no do sumolowot di tulun ku om monokiboro-boros diya'. 43 Om hilo' oku nondo do sumolowot di tulun dot Israil, om iri indo i tanawau di karapou oku di kosorong kopio o momolidang do kinoiyonon diri. 44 Om lidangan ku nondo i Kiim om i pananaraban do porsombahan, om potobilangon ku i Harun om i tangaanak dau do sumiliu do imam di momonsoi do karaja' ku. 45 Miyon oku nondo dot id pogialatan di tulun dot Israil, om iyoho' nondo o Kinorohingan diyolo'. 46 Om oilaan nondo diyolo' dot iyoho' o Tuhan, i Kinorohingan diyolo', i pinoposoliwan diyolo' do mantad hilo'd Masir, om koiyon oku i' dot id pogialatan diyolo'. Iyoho' no o Tuhan, i Kinorohingan diyolo',” ka dau.

Kinosoliwanan 30

I Mija' di Podtutudan do Kominyan

1 Om boros ka kawagu'd Tuhan dot id di Musa, “Momonsoi no dot iso' o mija' do podtutudan do kominyan do kayu di roitan dot akasia o wonsoyon. 2 Posogion no o pomonsoi'ddi; apat nohopod om limo sontimito do konoruo' om kalaabo' nga' apat i' nohopod om limo sontimito, om kasawato' no om siam nohopod o sontimito. Om iri nopo sinangau-sangau do hiri'd apat o sunduk om pasagalayon no di mija'. 3 Urogupan nod tamas dit osompipi' o hiri'd sakai, om hiri'd misingobik om hiri'd misingompok, om hiri'd sinangau-sangau di mija'ddi, om oligon no o hiri'd mitingisan. 4 Momonsoi nod duwo o tontolingo do tamas o wonsoyon do maan do posusukan. Om podokoton no do hiri'd siriba-riba' di pinongolig di tisan do hiri'd miampaping di mija', do posusukan di kayu do pagantayang di mija'. 5 Iri nopo pagantayang diri om kayu di roitan dot akasia o wonsoyon, om urogupan nod tamas. 6 Poilihan nopo di mija' om hiri'd soliwan di tabir dit id dotimbabaan di Kaban do Tumpongo. Om hiri no o tiyonon ku do sumolowot diya'. 7 Pointikid do kosuabon, do tontok di mongoi i Harun posodia' di lampung, om mositi' no do modtutud iyau di kominyan dit osonong o kosingudan do hiri'd sakai di mija'ddi. 8 Om iyo iddi o wonsoyon dau di mongoi iyau podtutud do lampung di dongsosodopon. Om mositi' nod papatahak kasai' do porsombahan do kominyan do miagal diti do gisom dot alaid. 9 Kada' papatahak do kominyan di pogoduhan do maan do porsombahan dot id mija'ddi, om kada' papatahak do tayam-tayam do maan do porsombahan di sumbolion ko' porsombahan pod gandum, om kada' potungu do porsombahan do waig dot anggur do hiri. 10 Om mositi' nod lidangan di Harun i mija'ddi do tumanud dit oturan do don tugama', do kowoyo-woyoo' nopo do momolidang om tiyasan do raha' di tayam-tayam di pinatahak do numaan do porsombahan do maan do pongidu'd dusa it apat o sinangau-sangau, dot insan do sontoun, om mositi' nod wonsoyon o miagal diti do pointikid do toun do gisom dot alaid. Om mositi' nod olidang o pointongkop di mija'ddi om potobilangon iri do maan do doho'. Iyoho' no o Tuhan,” ka dau.

Sukai do Patahakon do Pomonsoi di Kiim do Tuhan

11 Om boros kad Tuhan dot id di Musa, 12 “Tontok nopo dot intobon i tulun dot Israil, om mositi' no do mambayar do tusin do pomogontok do tinan dau o pointikid-tikid do tongokusai, om a' i' iyau oontok do kosusaan do daamot di pongintaban. 13 Koinsanai'd tulun di kointob do tontok di pongintaban om mositi' nod papatahak do tusin do tumanud di natantu' mantad. Om mositi' no do pabayaron i tusin diri do maan do porsombahan dot id doho'. 14 Iri nopo tulun di pointobon dot id pongintaban diri, om i tongokusai di duwo no nohopod o toun, ko' it id sawat ko' iri o tumur, om mositi' nod papatahak do tusin dot irad diri dot id doho'. 15 A' i' poinggumu-gumu' o pabayaron di tulun do kaya', om a' poingkuri-kuri' o pabayaron di tulun do mosikin do tontok di mambayar iyolo' do pomogontok do tinan diyolo'. 16 Timungon no i tusin diri do mantad id tulun dot Israil om pakayon nori do pomogompi' di Kiim ku. Om iri no i sukai o pomogontok diyolo' do tinan diyolo', om osorou kasai' ku indo iyolo' do mongintirung,” ka dau.

I Mimpun do Tambaga'

17 Om boros kad Tuhan dot id di Musa, 18 “Momonsoi nod mimpun do tambaga' om wansayan nori do poimpahan do tambaga' i' o wonsoyon. Om poilihon nori do hiri'd piolitan di Kiim om i pananaraban do porsombahan, om suangan nod waig. 19 Iri nopo waig diri om pongougan di Harun om i tangaanak dau do palad om lapap diyolo' 20 do tintod diyolo' do sumuang di Kiim ko' tintod do mongoi insomok di pananaraban do porsombahan do mongoi papatahak do porsombahan do taakanon. Om ondung owonsoi o miagal diri, om a' no iyolo' apatai. 21 Mositi' no dot ougan diyolo' o palad om lapap diyolo', om a' i' iyolo' apatai. Iti no o toturan dit apatut diyolo'd tonudon om tonudon di sinakagon diyolo' do gisom dot alaid,” ka dau.

I Tumau do Ponununtug

22 Om boros kad Tuhan dot id di Musa, 23 “Manganu no do rampa dit ongosonong kopio --- onom o kilo do mur dit alanggou, om tolu o kilo do kayu manis, om tolu o kilo do tobu dit osonong o kosingudan, 24 om onom o kilo do kayu di roitan do tija (timbangon ngai' nopo iti do tumanud di poninimbang di natantu' mantad.) Om ruhangan nori dot apat o lito do tumau do saitun, 25 om momonsoi nondo do tumau di ponununtug, do pogirolo-roloton do miagal do tumau dit osonong o kosingudan. 26 Om iri no i pinogirolo-rolot diri o pongumau di Kiim ku, om i Kaban do Tumpongo, 27 om i mija' om koinsanai di pakakas do hiri, om i potitimpakan do lampung om koinsanai di pakakas do hiri, om i mija' do podtutudan do kominyan, 28 om i pananaraban do porsombahan di sorobon om koinsanai di pakakas do hiri, om i mimpun om i poimpahan di mimpun. 29 Potobilangon ngai' nori do maan do doho'd songonuon dot iyo'ddi o kowoyo-woyoo' do popotobilang, om olidang ngai' indo iri. Om isai nopo ko' nunu nopo o koigit diri om orualan no dot oontok do kuasa' di kolidango'ddi. 30 Om tuntugan nu nogindo do tumau i Harun om i tangaanak dau, om pilion no iyolo' do sumiliu do imam di momonsoi do karaja' ku. 31 Om poboroson no o poingkaa dot id tulun dot Israil, ‘Iti nopo tumau do ponununtug dot olidang diti om mositi' no do pakayon do tontok do sumambayang dot id doho' do gisom dot alaid. 32 Iti nopo om a' i' koino-ino do potuntugon dot id isai nopo o tulun. Om a' i' koino-ino dot iri kasai' o pogirolo-roloton do momonsoi'd tumau do miagal diri. Iti nopo tumau'dti om olidang, om mositi' no dot olidang o pamamakai nu'dti. 33 Isai nopo i momonsoi do tumau do miagal diri, ko' i popotuntug diri dot id isai nopo o tulun dit okon ko' imam, om a' no kohompit do tulun ku,’ kanto,” ka dau.

I Kominyan

34 Om boros kad Tuhan dot id di Musa, “Manganu no do rampa diti dot iradon nopo o kogumuon do panganganu --- pulut do damar, om i kulit do lukan, om i pulut do kayu di roitan do rasamala om i kominyan dot aiso' o rolot. 35 Iri ngai' no o pogirolo-roloton do wonsoyon do kominyan, do poiyoon di tumau dit osonong o kosingudan. Om ruhangan nori do silaon om osonong kasai' i' iri om olidang. 36-37 Iri nopo wookon di pinogirolo-rolot diri om tutuon do gisom dot outok. Om igitan nondo iri do hiri'd Kiim ku om pasasadon no do hiri'd dotimbabaan di Kaban do Tumpongo. Om sorohon no kopio dot iri nopo kominyan diri om olidang kopio, om i pinotobilang do maan do doho'. Kada' panganu di pinogirolo-rolot diri do pomonsoi'd kominyan do sagalai'ddi do maan do dokoyu. 38 Isai nopo o momonsoi do pomowongi-wongi' do sagalai'ddi o wonsoyon, om a' no kohompit do tulun ku,” ka dau.

Kinosoliwanan 31

Tukang do Momonsoi di Kiim do Tuhan

1 Om boros kad Tuhan dot id di Musa, 2 “Nopili' ku no i Bisaliil, i tanak di Uri, i manangaki di Hur, i mantad id payat di Yohuda, 3 om noponu' ku no iyau do kuasa' ku. Noonuan ku no iyau do pomusorou dit atarom, om toilaan, om komiloo' do momonsoi do nunu nopo o buburuon --- 4 do momolukis do maan do poiyaan, i mokimoilo kopio do momonsoi, om wonsoyon nogindo i linukis diri do tamas, om pirok om tambaga' o wonsoyon; 5 om momolunau do watu dit agayo o gatang do maan podokoto'; om mongikir do kayu; om nunu nopo o buburuon di mokimoilo kopio do momonsoi. 6 Om nopili' ku nogi' i Oholiab i tanak di Ahisamak, i mantad id payat di Dan, do monguhup dau do kumaraja'. Om noonuan ku nogi' do toilaan dit aralom o koinsanai di tulun do suwai di monunukang, om koilo i' iyolo' do momonsoi do koinsanai di ponuhuan ku do momonsoi: 7 i Kiim ku, om i Kaban do Tumpongo om i sompon di Kaban, om koinsanai di pakakas do hiri'd Kiim, 8 om i mija' om koinsanai di pakakas do hiri, om i potitimpakan do lampung di tamas dot osompipi' o wonsoyon om i piro-piro o pakakas di lampung, om i mija' do podtutudan do kominyan, 9 om i pananaraban do porsombahan di sorobon om koinsanai di pakakas do hiri, om i mimpun om i pinoimpahan di mimpun, 10 om i pakayan di dong imam dit ongolumis, i pakayon di Harun om i tangaanak dau do tontok dot osiliu iyolo' do imam di momonsoi do karaja' ku, 11 om i tumau do ponununtug, om i kominyan dit osonong o kosingudan, i hirion id Bilik dit Olidang. Om soira' nopod momonsoi iyolo'dti, om poiyoon no kopio di pinonuhuan ku diya',” ka dau.

Sabat, i Tadau do Koundarangan

12 Om suhuo' nod Tuhan i Musa do 13 popoboros dot id tulun dot Israil do boros do poingkaa, “Poinggoyoon no o tadau'd Sabat, i tadau do natantu' ku do tadau do koundarangan. Tu' iri no o tanda' di tumpongo dot id pialatan ku om iyokoyu do gisom do poingompus, do popointalang dot iyoho' no i Tuhan, o minoniliu dokoyu do tulun ku. 14-15 Pusohon no kopio dokoyu o tadau do koundarangan diti tu' tadau dot olidang. Noonuan kou no dot onom o tadau do kakarajaan, nga' iri nopo tadau do koturu' om tadau dot agayo di pinotobilang do maan do doho'. Om isai nopo it a' momusou do tadau'ddi, om i kumaraja' do tontok do tadau'ddi, om hukuman no do kapatayon. 16 Mositi' no do poinggoyoon do tulun dot Israil o tadau'ddi do maan do tanda' di tumpongo toko'. 17 Tadau nopoddi om tanda' dit ogirot dot id pialatan ku om i tulun dot Israil, tu' iyoho' i Tuhan, nga' onom no tadau do minomonsoi do tawan om pomogunan. Om tontok di tadau do koturu' om tingkod oku no do kumaraja' om undorong oku no,” ka dau. 18 Om soira' di nokopongo o Kinorohingan do moro-boros dot id di Musa do hiri'd Nuluhon do Sinai, om patahako' no do Kinorohingan dot id di Musa i duwo o kaping do watu di pinotulisan do Kinorohingan do koinsanai di toturan diri.

Kinosoliwanan 32

I Sapi' do Tamas

1 Om tontok di nopurimanan di tulun dot Israil dot alaid noddi kopio om a' po i Musa nokoruhuk do mantad hiri'd nuluhon, om timungai no diyolo' i Harun, om boro-boros no iyolo' dot id dau do poingkaa, “A' toko' no oilaan ondung nunu o nosiliu dot id di Musa, i minomoyo' dati' do suminoliwan do mantad hilo'd Masir; nga' kainou, momonsoi toko' nogi' dot iso' o ponokokinorohingan di milo do momoyo' dati',” ka diyolo'. 2 Om boros kaddi di Harun dot id diyolo', “Iduwo' ngai' dokoyu o tanting do tamas di songimpakai do sawo om tangaanak dokoyu'd kusai om tondu', om ngoyon i' patahako' doho',” ka dau. 3 Om iduwo' ngai' nopoddi di tulun o tanting-anting diyolo', om ngoyo' no patahako' di Harun. 4 Om romito' ngai' nod Harun i tanting-anting diri, om lanako' no dau. Om potunguho' nogiddi dau dot id pomorunan, om kowonsoi noddi i tamas diri do miagal-agal do sapi'. Om boros kaddi di tulun dot ogumu', “Oi Israil, iti no i kinorohingan toko', i pinoposoliwan dati' do mantad hilo'd Masir!” ka diyolo'. 5 Om pomonsoi noddi i Harun dot iso' o pananaraban do porsombahan do hiri'd dotoguangan di sapi' do tamas diri, om poboroso' no dau dot id tulun dot ogumu' o poingkaa, “Suab nopondo om haro o poginakanan do maan do pomusou do Tuhan,” ka dau. 6 Om osuab poddi di tadau kawagu, om paatod no iyolo' do piro-piro o tayam-tayam do maan do porsombahan di sorobon om iri no suwai om akanon do maan do porsombahan do piombolutan. Om poginakan noddi i tulun dot ogumu', om minoginum iyolo' do gisom do nangaawuk om minogiampahu' iyolo'. 7 Om boros kad Tuhan dot id di Musa, “Ruhuk nogi' kopio do dinondo, tu' iri nopo tulun nu, i winoyo' nu do suminoliwan do mantad hilo'd Masir, om nokopomonsoi nod dusa om minagada' doho'. 8 Notongkiadan no diyolo' i ralan di pinotuduk ku do susuyon diyolo'; om nokopomonsoi no iyolo'd sapi' do tamas do linanak do minomonsoi. Om nokotuku' no iyolo' om nakapatahak do porsombahan dot id winonsoi diyolo'ddi. Om somboro-boros no iyolo' dot iri no i kinorohingan di pinoposoliwan diyolo' do mantad hilo'd Masir. 9 Oilaan ku no kopio o kokodoho' do ginawo do tulun diti. 10 Baino' nopo, om kada' oku no diya' oduhai. Tu' otogod oku no kopio diyolo', om patayon ku no iyolo'. Om silihon ku nogindo iya' om i sinakagon nu do bansa' dit agayo,” ka dau. 11 Nga' lugu-lugutai noddi di Musa o Tuhan, i Kinorohingan dau. Boros ka dau, “Oi Tuhan, nokuro tu' otogod kopio ko diti tulun nu, i pinoidu' nu do mantad hilo'd Masir dot i kokoriso' om i kuasa' nu o pinopoidu' nu diyolo'? 12 Tu' ondung patayon ngai' nu iyolo', om mimboros nondo i tulun do Masir do kinopononudan nu nopo diti tulun dot ogumu' do suminoliwan do mantad hilo'd Masir nga' ngoyon no patayo' do hiti'd konuluhanan, om opunso i' kopio iyolo'. Kada' kotogod, oi Tuhan. Posimbano' no o pomusorou nu om kada' kopio porikatai do kosusaan iti tulun nu. 13 Soroho' no i susuhuon nu, i Abraham, om i Isak om i Yakub. Om soroho' no do nakapamatos ko no dot id diyolo' do mikuwo'd sumpa' dot onuan nu iyolo' do sinakagon do miagal di rombituon do hilo'd tawan kogumu', om patahakon nu dot id sinakagon diyolo' o koinsanai di tana' di pinabatos nu do sumiliu do diyolo'd songonuon do gisom dot alaid,” ka dau. 14 Om posimbano' iddi do Tuhan o pomusorou dau, om a' iddi dau pinorikot i kosusaan di nokoboros dau'ddi dot id tulun dau. 15 Om ruhuk noddi i Musa di nuluhon, do kiinigit di duwo o kaping do watu, i pinotulisan do koinsanai dit oturan do Kinorohingan o hiri'd miampaping. 16 Om Kinorohingan i' o minomonsoi di watu'ddi om iyau nogi' o pinopokikir dit oturan do hiri'd watu. 17 Om tontok di rumuhuk no iyo Musa di Yosua, om korongou no di Yosua i tulun dot Israil do songgiak-giak, om boro-boros no iyau di Musa, “Haro ot orongou ku do miagal do giniakan do maso'd sumangod do hilo'd kokiiman,” ka dau. 18 Om boros ka di Musa, “A' i' miagal do pinongkisan do nakamanang o karangahan dilo' om a' miagal do giniakan di naala'; ilo' nopo om tulun i' do modsinding,” ka dau. 19 Om tontok dit osomok noddi i Musa di kokiiman om kokito no dau i sapi' do tamas om i tulun do sontari-tari'. Om kotogod tomod noddi iyau. Om podumpaho' no dau i watu di poingigit dau do hiri'd guas di nuluhon om kababak no i watu'ddi. 20 Om ngoyo' noddi dau i sapi' di winonsoi di tulun dot Israil, om lanako' no dau. Om tutuo' nogiddi do gisom do naapu, om tunguho' no dau do waig. Om suhuo' nogiddi dau i tulun dot Israil do monginum diri. 21 Om boro-boros no iyau di Harun, “Nunu kopio o winonsoi diti tulun dot id diya' tu' pinologos nu iyolo' do minomonsoi do dusa dot iyo kopio'dti kagayo?” ka dau. 22 Om boros ka di Harun do suminimbar, “Kada' kotogod doho'; tu' iya' nga' koilo i' dot iso-iso' no kopio o ginawo diti tulun do momonsoi'd araat. 23 Boros ka diyolo' dot id doho', ‘A' toko' no oilaan ondung nunu o nosiliu dot id di Musa, i minomoyo' dati' do suminoliwan do mantad hilo'd Masir; nga' kainou, momonsoi toko' nogi' do ponokokinorohingan di milo do momoyo' dati’ ka diyolo'. 24 Om suhuo' ku noddi iyolo' do papatahak ngai' dot id doho' di tamas diyolo', om isai nopoddi i haro o tamas om oluso' ngai' nopo diyolo' om patahako' no doho', om posuboo' ngai' ku no i tamas diri do hiri'd tapui, om kosiliu nopod miagal do sapi'!” ka dau. 25 Om kopurimanai noddi di Musa do pinologos di Harun i tulun dot Israil do miagal di kuda' do nokoidu' do mantad id kandang tu' a' no opusus-pusus, om gisom do nosiliu poddi iyolo'd koirakan di pisangod diyolo'. 26 Om ongoi noddi i Musa ingkakat do hiri'd dotimbabaan di wawayaan di kokiiman om pomoros no dot opuhod do poingkaa, “Isai nopo i tumanud do Tuhan, om kumaa nod hiti!” ka. Om ongoi ngai' nopo timung i payat do Liwi do hiri'd posorili' di Musa. 27 Om boros ka di Musa dot id diyolo', “Suhuon ngai' kou nopod Tuhan, i Kinorohingan dot Israil, do mangabil do gayang om mongoi tongkop diti kokiiman do mantad id wawayaan diti om gisom do hilo'd wawayaan di suwai, om patayon ngai' no i tobpinai dokoyu om i kongoombolutan om i songkoduwo dokoyu,” ka dau. 28 Om wonsoyo' noddi di payat do Liwi i pinonuhuan diri. Om tontok nopod tadau'ddi om haro i' o tolu noribu o tulun do pinatai. 29 Om boros ka di Musa dot id tulun di mantad id payat do Liwi, “Tadau nod baino' do tuminobilang kou do sumiliu do imam di momonsoi do karaja' do don Tuhan tu' napatai no dokoyu i tangaanak om i tobpinai dokoyu. Om barakatan kou indo do Tuhan,” ka dau. 30 Tadau noddi kawagu om boro-boros no i Musa dot id tulun dot Israil do poingkaa, “Nokowonsoi kou nod dusa dit agayo kopio. Nga' baino' nopo om tumakad oku po kawagu dilo nuluhon do mongoi solowot do Tuhan; om maha' daa om kaanu oku do koompunan do dusa dokoyu,” ka dau. 31 Om guli' noddi i Musa do minongoi solowot do Tuhan, om boro-boros no iyau do poingkaa, “Agayo no kopio o dusa do nowonsoi di tulun dot Israil. Tu' minomonsoi iyolo' do ponokokinorohingan do tamas o winonsoi, om tuminuku' iyolo' dot id ponokokinorohingan diri. 32 Pokionuon ku no kopio dot ompunan nu i dusa diyolo'; nga' ondung amu', om tonuson nopo o ngaran ku di nokotulis nu do hiri'd buuk di pinotulisan nu do ngaran do tulun nu,” ka dau. 33 Om boros kad Tuhan, “Iri no ngaran do tulun di nokowonsoi'd dusa dot id doho' o tonuson ku o ngaran dot id buuk ku. 34 Nga' pamanau nogi', om woyoon i' ilo tulun dot ogumu' do kumaa do hilo'd kinoiyonon di pinosunud ku diya'. Sorohon no do woyoon ko i' di moloikat ku, nga' rumikot no o maso do kopomohukuman ku di tulun diri dot i dusa diyolo' o kopomohukuman ku,” ka dau. 35 Om porikatai noddi do Tuhan do toruol i tulun dot ogumu', tu' minononsog i' iyolo' di Harun do minomonsoi di sapi' do tamas.

Kinosoliwanan 33

Sinuhu' do Tuhan i Tulun dot Israil do Tumongkiad di Nuluhon do Sinai

1 Om boros kaddi do Tuhan dot id di Musa, “Mositi' no do tumongkiad ko om koinsanai di tulun di winoyo' nu do mantad hilo'd Masir, do kinoiyonon diti, om mongoi kou do hilo'd pomogunan di pinabatos ku dot id di Abraham, om id di Isak om id di Yakub, om id sinakagon diyolo'. 2 Om suhuon ku indo i moloikat ku do momoyo' dokoyu. Om uyungon ku indo i tulun do Kanaan, om Amori, om Hit, om Poris, om Howi om Yobus. 3 Om kumaa kou nondo dot id iso' o pomogunan di kaya' om oluhub. Nga' a' oku i' iyoho' moyo' dokoyu, tu' obinsurilog kopio kou i' koulun, om ooris oku dot araag ku iyokoyu do hilo'd tanga'd ralan,” ka dau. 4-6 Om tontok di nokorongou i tulun dot ogumu' di boros do Tuhan diri, om timpuun no iyolo' do minihad. Om sinuhu'd Tuhan i Musa do popoboros dot id diyolo' do poingkaa, “Iyokoyu no o tulun dit obinsurilog kopio. Ondung moyo' oku daa dokoyu dot ongoruhai piya, nga' aayi' ku no doti' iyokoyu do mamatai. Nga' iduwo' ngai' nogi' dokoyu ino pongillumis dokoyu'd tinan dokoyu om momusorou oku nogindo ondung nunu o wonsoyon ku dot id dokoyu,” ka dau. Om di nopoddi di nokotongkiad i tulun dot Israil do mantad hilo'd Nuluhon do Sinai, om a' noddi iyolo' manampakai di poingillumis do tinan.

I Kiim do Tuhan

7 Soira-ira' nopo do popowonsoi i tulun dot Israil do kiim diyolo', om ngoyon no di Musa i Kiim dit Olidang, om powonsoyon no dau do hiri'd sodu-odu' di kokiiman diyolo'. Iri nopo kiim diri nga' rinoitan do Kiim do Tuhan. Om isai nopo ot orohian do mokianu do nosihat do Tuhan om mongoi nod hiri. 8 Tontok nopo di mongoi i Musa dot id Kiim diri, om mingkakat ngai' nopo i tulun do hiri'd wawayaan di kiim diyolo' om sumonsod nopo di Musa do gisom do kosuang iyau di Kiim. 9 Kosuang pondo i Musa, om sumondot no i haun di poorigi om mundorong nod hiri'd wawayaan di Kiim. Om moro-boros nondo o Tuhan do mantad hiri'd haun dot id di Musa. 10 Om okito pondo di tulun dot ogumu' i haun do poorigi do hiri'd wawayaan di Kiim, om motud ngai' no iyolo' do tumuku'. 11 Om tumimbaba' nopo o Tuhan do moro-boros di Musa, do miagal po di tulun do monokiboro-boros do tambalut dau. Om gumuli' nondo i Musa do hiri'd kokiiman. Nga' i Yosua nopo, i tanak di Nun, i tanakwagu do mongunguhup di Musa, om tumimporon i' do hiri'd Kiim.

Minamatos o Tuhan do Momoyo' di Tulun Dau

12 Insan o tadau om boro-boros no i Musa dot id Tuhan do poingkaa, “Otopot nogi' do sinuhu' oku diya' do momoyo' diti tulun do kumaa dot id pomogunan di pinabatos nu'ddi, nga' a' ko i' minomisunud ondung isai o suhuon nu do momoyo' doho'. Om nokoboros nu no do kotutun kopio ko doho' om kohubayaan oku diya'. 13 Iyo nopoddi, om sunudai oku daa di natantu' mantad nu do wonsoyon nu, om kopomonsoi oku i' di karaja' nu, om koposonong kasai' oku do ginawo nu. Om sorohon no do nopili' nu no o bansa' diti do sumiliu do diya'd songonuon,” ka dau. 14 Om boros kad Tuhan, “Woyoon ku i' iyokoyu, om onuan ku iyokoyu do kamanangan,” ka. 15 Om boros ka di Musa do suminimbar, “Ondung a' ko tumanud dahai, om kada' no iyahai pologoso' do tumongkiad do kinoiyonon diti. 16 Poingkuro daa'ndo o tulun do koilo dot ohubayaan ko diti tulun nu om ohubayaan ko doho', dot a' ko moyo-woyo' dahai? Tu' iri no i hino ko dot id pogialatan dahai o kopisuayan dahai di bansa'd suwai do hiti'd pomogunan,” ka dau. 17 Om boros kad Tuhan dot id di Musa, “Wonsoyon ku i' ino pokionuon nu tu' otutunan tiya' i' kopio om kohubayaan ku iya',” ka. 18 Om boros kaddi di Musa do minokianu, “Pokitono' oku po daa di tulinau do koropohon nu di kosorong kopio,” ka. 19 Om boros kad Tuhan do suminimbar, “Tumalib oku indo dot id toguang nu do mikuwo'd toinsanan di kagayaan ku, om poboroson ku nondo i ngaran ku dit olidang. Iyoho' no o Tuhan, om popointalang oku i' do kosianan om kolisihan dot id tulun di pilion ku. 20 A' ku indo pokitanan diya' o rabas ku, tu' aiso' no ot apasi di kokito do rabas ku. 21 Nga' haro i' iti tontolob do hiti'd toning ku dot ingkokoton nu. 22 Om soira' nopo do tumalib i tulinau ku di kosorong kopio, i tanda' do nakarapou oku, om posuangon ku nondo iya' dot id piolitan dilo tontolob om tirungon ku iya' do palad ku do gisom do katalib oku. 23 Om iduwon ku nogindo o palad ku om kokito ko indo do tinolikudon ku nga' a' ko no kokito do rabas ku,” ka dau.

Kinosoliwanan 34

Duwo o Kaping do Watu do Wagu

1 Om boros kad Tuhan dot id di Musa, “Manganu nod duwo o kaping do watu om sangkapon no do poiyoon dit id gulu, om tulisan ku i' iri di boros di pinotulis do hiri'd watu dit id gulu, i binabak nu'ddi. 2 Kosuabon nopod suab om mositi' nod kosodia' ko no, om tumakad no do hilo'd Nuluhon do Sinai do mongoi solowot doho' do hilo'd dimpak. 3 Om iso' pod tulun nga' aiso' i' o koino-ino do moyo' diya' do tumakad; om kada' nod haro o tulun do mongoi do hinonggo nopo do hiri'd nuluhon diri; om a' koino-ino do haro o dumba' ko' sapi' do mangakan-ngakan do hiri'd guas di nuluhon,” ka. 4 Om panganu noddi i Musa do duwo o kaping do watu om sangkapo' no dau. Om osuab po di tadau kawagu om igitai no dau i watu'ddi do tuminakad di Nuluhon do Sinai, do tumanud di pinonuhuan do Tuhan. 5 Om rikot no o Tuhan dot id rolot do haun, om ingkakat no do tuminalad di Musa, om poboroso' no dau i ngaran dau dit olidang, iri no i Tuhan. 6 Om talib noddi o Tuhan do hiri'd dotoguangan di Musa om boro-boros no dot opuhod do poingkaa, “Iyoho' no o Tuhan, i Kinorohingan do poimponu' do kosianan om kolisihan, it a' obintogod, om i pointalang do kosianan om kotorodoko'. 7 Bayaanon ku i' i batos ku dot id piro-piro noribu o sinakagon om mangampun oku do karaaton om dusa; nga' a' oku i' kolihu do momohukum di tangaanak om i manangaki diyolo' do gisom do korikot di sinakagon di kointolu om koingapat dot i dusa di molohing diyolo' o kopomohukuman ku,” ka dau. 8 Om olomus nopo i Musa do minotud do tuminuku'. 9 Om boros ka dau, “Oi Tuhan, ondung ohubayaan kopio ko doho' om pokionuon ku no daa iya' do momoyo' dahai. Obinsurilog no daa kopio iti tulun, nga' ompunai no o kararaat om dusa dahai, om romito' no iyahai do sumiliu'd tulun nu,” ka.

Ninwoguan i Tumpongo

10 Om boros kad Tuhan dot id di Musa, “Baino' nopodti, om momonsoi oku do tumpongo dot id tulun dot Israil. Om momonsoi oku nondo do piro-piro koimayaan dit a' po nowonsoi do honggo nopo do hiti'd pomogunan dot id pogialatan do nunu nopo o bansa' do tulun. Om oinsanan nopondo o tulun do kokito do kogoyoo' di koimayaan di wonsoyon ku, iyoho' i Tuhan, o momonsoi di koronob kopio dot id dokoyu. 11 Tonudon no it oturan do patahakon ku dokoyu do tadau'd baino'. Uyungon ku indo i tulun dot Amori, om Kanaan, om Hit, om Poris, om Howi, om tulun do Yobus, do rumikot kou do mongoi sangod diyolo'. 12 Kada' kou pomonsoi do pitoruan dot id tulun do hilo'd pomogunan di ngoyon dokoyu, tu' osiliu i' moti'ndo iri do lawa' di kapatai dokoyu. 13 Om kada' kou no kopio pomonsoi do miagal diri, suwai ko' raagon nogi' dokoyu i poiyanan diyolo' do porsombahan, om habaon ngai' i torigi di ponokotingolig diyolo' om tagadon ngai' i torigi dot Asira, i ponokokinorohingan diyolo'. 14 Kada' kou tuku' dot id kinorohingan do suwai, tu' iyoho' nopo, i Tuhan, om a' i' orohian do haro o mongoi ponokiiyo-iyo doho'. 15 Kada' kou pomonsoi do pitoruan dot id tulun do pomogunan diri. Tu' soira' nopo do mongoi iyolo' tuku' di ponokokinorohingan diyolo' om di papatahak iyolo' do porsombahan di sumbolion, om alapon kou nondo diyolo' do mongoi amung diyolo', om abayayat kou nondo do mangakan di taakanon di nokosubak diyolo' dot id tingolig diyolo'. 16 Om mangawin doti'ndo i tangaanak dokoyu'd kusai di kosumandakan do bansa'd suwai, i mamayayat diyolo' dot a' tumorodok dot id doho' om tumuku' dot id ponokokinorohingan diyolo'. 17 Kada' kou pomonsoi om kada' kou tuku' do tingolig di basi' do winonsoi. 18 Poinggoyoon no dokoyu i Tadau'd Agayo do Roti dit A' Kipangambang. Mangakan kou no do roti dit aiso' o pangambang do solinaid do turu' o tadau do tontok di tulan dot Abib, do miagal di pinonuhuan ku. Tu' tulan noddi do tuminongkiad kou do mantad hilo'd Masir. 19 Pointikid-tikid do tanak do kusai dit id gulu kosusu, om i tontoluhan do tayam-tayam dokoyu dit id gulu kosusu, om doho' ngai' no. 20 Nga' bolion i' kawagu dokoyu o pointikid-tikid di tontoluhan do kaladai dit id gulu kosusu, do pomoli nopo om tanak do dumba' do patahakon do maan do porsombahan. Ondung a' dokoyu bolion kawagu i kaladai, om tipuon no o liou'ddi. Bolion no dokoyu kawagu o koinsanai di tanak dokoyu'd kusai dit id gulu kosusu. Iso' pod tulun nga' aiso' i' o koino-ino do mongoi rapou doho' dot aiso' no o porsombahan dot igitan. 21 Noonuan kou no dot onom o tadau do kakarajaan dokoyu, om kada' kou no karaja' do tontok di tadau'd koturu', do dongmamaradu piya daa ko' dongmongomot nga' kada' kou no kopio karaja'. 22 Poinggoyoon no dokoyu i Tadau dot Agayo do Dongmongomot do tumimpuun kou do mongomot di tua' do gandum dokoyu dit id gulu koonsok. Om ramayon no dokoyu i Tadau dot Agayo do Kinuhub-Kuhub do motingkaayi' o toun, di mongupu' kou do tua-ua'. 23 Intolu do sontoun do mositi' nod rumikot ngai' i kokusayan dokoyu do mongoi sambayang dot id doho', i Tuhan, i Kinorohingan dot Israil. 24 Ouyung ngai' ku nopondo i bansa'd suwai, it id doburuan dokoyu, om koinggayo ku o pomogunan dokoyu, om aiso' nondo o mumbal do mongoi panangod do pomogunan dokoyu do tontok do mamaramai kou di tolu o poginakanan diri. 25 Kada' kou papatahak do roti di rinalatan do pangambang do tontok do papatahak kou di tayam-tayam do maan do porsombahan dot id doho'. Kada' kou no poolu' do nunu nopo o popot di tayam-tayam di sinumbali' do tontok do Tadau'd Agayo do Paska do gisom do kosuabon. 26 Paatod kou no di gandum di gulu dokoyu koomot do hilo'd Walai'd Sasambayangan dot Agayo, do pointikid do toun. Kada' kou pogonsok do dumba' ko' kambing dit okoro' po, dot i gatas di molohing dau o pongonsok,” ka. 27 Om boros kad Tuhan dot id di Musa, “Tulison no i boros diri, tu' iri no i boros diri o poimpahan ku do tumpongo di wonsoyon ku dot id diya' om id tulun dot Israil,” ka. 28 Om undorong noddi i Musa do hiri do poinsugku'd Tuhan do solinaid dot apat nohopod o tadau om apat nohopod o totuong. Om solinaid nopoddi om a' i' iyau minakan om a' mininum. Om tuliso' no dau do hiri'd watu di ponunulisan i boros di tumpongo, iri no i Hopod o Toturan do Kinorohingan.

Ruminuhuk i Musa di Nuluhon do Sinai

29 Tontok di ruminuhuk i Musa di Nuluhon do Sinai do kiinigit di Hopod o Toturan, om mogulinau nopo o rabas dau tu' nokoponokiboro-boros no iyau'd Tuhan; nga' a' i' dau oilaan do mogulinau o rabas dau. 30 Om ontong no di Musa i Harun om koinsanai di tulun, om kokito no diyolo' do mogulinau o rabas di Musa. Om ooris diri iyolo' do mongoi insomok dau. 31 Nga' lohowo' nod Musa iyolo', om ongoi noddi i Harun om i piro-piro o boyoon dot Israil insomok di Musa. Om boro-boros no i Musa diyolo'. 32 Om timung ngai' nogiddi i tulun dot Israil do posorili' di Musa. Om poboroso' ngai' no di Musa diyolo' it oturan di pinatahak do Tuhan dot id dau di hilo'd Nuluhon do Sinai. 33 Om kopongo poddi i Musa do moro-boros diyolo', om tirungo' no dau do kulu o rabas dau. 34 Om soira' nopo do sumuang i Musa di Kiim do Tuhan do mongoi boro-boros do Tuhan, om iduwon no dau i kulu do pointirung do rabas dau. Om sumoliwan nopondo iyau, om posunudon ngai' no dau i boros do Tuhan dot id tulun dot Israil, 35 om okito no diyolo' do mogulinau i rabas dau. Om potirungon no kawagu di Musa i kulu dot id rabas dau do gisom dot orikot kawagu i kaangayan dau kabara-barasai do Tuhan.

Kinosoliwanan 35

Oturan do Pasal do Tadau'd Sabat

1 Om lohowo' no di Musa o koinsanai di tulun dot Israil, om boro-boros no iyau diyolo' do poingkaa, “Iti no o ponuhuan do Tuhan do wonsoyon dokoyu! 2 Koino-ino kou i' do kumaraja' do solinaid dot onom o tadau, nga' iri nopo tadau'd koturu' om tadau dit olidang, i tadau do koundarangan, om i tadau do nokotobilang do don Tuhan. Isai nopo o kumaraja' do tontok do tadau di koturu' om hukuman no do kapatayon. 3 Magapui piya do hiri'd walai dokoyu nga' a' i' koino-ino do tontok do tadau'd Sabat,” ka dau.

Porsombahan do Pomonsoi di Kiim dot Olidang

4 Om boros kad i Musa dot id toinsanan di tulun dot Israil, “Iti no o ponuhuan do Tuhan. 5 Papatahak kou nod porsombahan dot id Tuhan. Om isai nopo it orohian do manahak do porsombahan, om patahak nod tamas, om pirok, ko' tambaga', 6 ko' kain linan dit osonong, ko' i kain do kihulu-hulu dit otomou, om aragang doitom-itom, om aragang ko' i kain do hulu do kambing o winonsoi; 7 om i kulit do dumba' do tontoluhan di sinasakan dot aragang om i kulit dot osonong om i kayu di roitan dot akasia, 8 om tumau do ponuang do lampung; om rampa do pomorolot di tumau di ponununtug om i pomorolot di kominyan dit osonong o kosingudan; 9 om i watu dot agayo o gatang di roitan do delima, om i watu'd suwai dot angagayo o gatang do podokoton do hiri'd ipod, om hiri'd lokop do kangkab di Boyoon dot Agayo dot Imam,” ka dau.

Pakakas di Kiim do Tuhan

10 Om boros ka kawagu'd Tuhan dot id di Musa, “Mositi' no do rumikot ngai' i tulun dit ongoilo do monukang dit id pogialatan dokoyu, do mongoi pomonsoi do koinsanai di pinonuhuan do Tuhan, iri no: 11 i Kiim, om i taap di Kiim om i ponokop do ponong id soibau, i piro-piro o pangait, om i papan di poturidongon, om i tukod di potibabaron, om i pongorigi di wawayaan, om i posungkadan do torigi; 12 om i Kaban do Tumpongo, om i kayu do pagantayang di Kaban, om i ponompon di Kaban, om i tabir di ponirung di Kaban; 13 om i mija', om i kayu do pagantayang di mija', om koinsanai di pakakas di mija', om i roti di patahakon do maan do porsombahan dot id Kinorohingan; 14 om i potitimpakan do lampung do maan do ponitiu om koinsanai di pakakas do hiri; om koinsanai di lampung do mitonggoi di tumau di lampung; 15 om i mija' do podtutudan do kominyan om i kayu do pagantayang di mija'; om i tumau do ponununtug; om i kominyan dit osonong o kosingudan; om i tabir di wawayaan di Kiim; 16 om i pananaraban do porsombahan di sorobon do mitonggoi di pinangabot di tambaga' do winonsoi, om i kayu do pagantayang di pananaraban do porsombahan, om koinsanai di pakakas do suwai, om i mimpun di pongougan, om i pinoimpahan di mimpun; 17 om i tabir do pomorinding di natad, om i torigi om i posungkadan di torigi, om i tabir di wawayaan do hiri'd natad; 18 om i pamagapit om i tali di Kiim om i pomorinding di natad; 19 om i pakayan dit ongolumis di piro-piro o imam, i pakayon diyolo' do tontok do momonsoi'd karaja' ku do hiri'd Bilik dit Olidang, om i pakayon di dong imam do pakayon di Harun om i tangaanak dau,” ka dau.

Pinaatod di Tulun dot Israil i Porsombahan Diyolo'

20 Om pamanau ngai' no i tulun dot Israil do tuminongkiad di niyonon diyolo' do tuminimung. 21 Om isai nopoddi i notingkau o ginawo do papatahak do porsombahan, om minongoi no paatod do porsombahan dot id Tuhan do pomonsoi di Kiim do Tuhan. Om igit ngai' nopo iyolo' do koinsanai di pakayon do sumambayang om i wonsoyon do pakayan do imam. 22 Om isai nopoddi it orohian do manahak, do tongokusai om tongoondu', nga' minigit ngai' nopo do piin di maan do pomolumis, om tanting-anting, om pondulung, om karo, om mogisuayan nopo o bansa' do tamas di maan do pomolumis, om patahako' no diyolo' iri dot id Tuhan. 23 Pointikid-tikid do tulun di haro o kain linan dit osonong, om kain di kihulu-hulu dot otomou, om aragang doitom-itom om aragang, om kain di hulu do kambing do winonsoi, om kulit do dumba' do tontoluhan di sinasakan dot aragang, ko' kulit dit osonong, nga' pinapatahak ngai' nopoddi. 24 Om koinsanai'd tulun di haro o pirok ko' tambaga' nga' minigit ngai' nopo do pinatahak dot id Tuhan. Om koinsanai'd tulun di haro o kayu di roitan dot akasia, di milo'd powonsoyon nga' pinapatahak nogi'. 25 Om oinsanan nopo i tongoondu' dit ongoilo do mangawol do minigit do banang di tiningkor diyolo' dot it opurak dit atandai om i banang dot asalau dit otomou, om aragang doitom-itom, om it aragang. 26 Om minomonsoi nogi' iyolo' do banang do hulu do kambing o winonsoi. 27 Om iri no i piro-piro o boyoon om pinapatahak do watu dit agayo o gatang di roitan do delima om piro-piro o watu dot agayo o gatang do suwai ko' iri do podokoton do hiri'd ipod om hiri'd lokop do kangkab. 28 Om minigit nogi' iyolo' do rampa om tumau do ponuang di lampung, om tumau di ponununtug, om kominyan dit osonong o kosingudan. 29 Om oinsanan nopo i tulun dot Israil dot angagaan ngai' o ginawo do pinapatahak di porsombahan diyolo' dot id Tuhan do pomonsoi di pinonuhuan do Tuhan do pinolombus di Musa.

Piro-Piro Tukang do Momonsoi di Kiim do Tuhan

30 Om boros kad Musa dot id tulun dot Israil, “Nopili' nod Tuhan i Bisaliil, i tanak di Uri, i manangaki di Hur, i mantad id payat do Yohuda. 31 Noponu' no iyau'd Kinorohingan do kuasa' dau, om noonuan dau iyau do toilaan, om komiloo' do kumaraja', om pomusorou dit obinsuhut do momonsoi'd nunu nopo o buruon, 32 om momolukis do maan do poiyaan di mokimoilo kopio do momonsoi, om powonsoyon nogindo i linukis diri dot id pirok om id tambaga'; 33 om momolunau di watu dit agayo o gatang do maan podokoto', om mongikir do kayu, om nunu nopo o buburuon di mokimoilo kopio do momonsoi. 34 Om noonuan nogi' do Tuhan i Bisaliil om i Oholiab, i tanak di Ahisamak, i mantad id payat di Dan, do toilaan do monuduk do tulun do suwai di komilaan diyolo'd momonsoi. 35 Om noonuan no iyolo'd Tuhan do toilaan do momonsoi do nunu nopo o buburuon do tulun dit oilo do manangkap do watu, om i mongingikir, om i mangangawol do kain linan dit osonong, om i kain do kihulu-hulu dit otomou, om aragang doitom-itom, om it aragang, om piro-piro o bansa'd kain do suwai. Milo ngai' nopo iyolo' do momonsoi do nunu nopo o buburuon di mogisuayan om ongoilo iyolo' do momolukis do maan do poiyaan.

Kinosoliwanan 36

1 I Bisaliil no, om i Oholiab, om koinsanai di tukang di nongoonuan do Tuhan do toilaan om pomusorou dit obinsuhut, it ongkoilo do momonsoi do koinsanai di gunaon do pomonsoi di Kiim do Tuhan. Om iyolo' no o momonsoi do koinsanai'ddi do tumanud di pinonuhuan do Tuhan,” ka.

Pinapatahak o Tulun dot Israil dot Ogumu' o Porsombahan

2 Om lohowo' no di Musa i Bisaliil, om i Oholiab, om koinsanai di tukang do suwai, i noonuan do Tuhan do komilaan om it ongorohian do muhup, om suhuo' nod Musa iyolo' do tumimpuun do kumaraja'. 3 Om karamit no diyolo' do mantad id di Musa o koinsanai di pinatahak di tulun dot Israil do pomonsoi di Kiim dot Olidang. Nga' monikid kosuabon kasai' po i tulun dot Israil do mongoi papatahak di patahakon diyolo' dot id di Musa. 4 Om ongoi ngai' no i tukang di maso do kumaraja', 5 solowot di Musa om posunudo' no diyolo' di Musa o poingkaa, “Ogumu' no ko' mantad di gunaon o nakatahak diti tulun, do pomonsoi di pinonuhuan do Tuhan do momonsoi,” ka. 6 Om poboroso' noddi di Musa dot id pointongkop di kokiiman dot a' no minog do haro o papatahak kawagu do pomonsoi di Kiim dot Olidang; om a' noddi pinapaatod do porsombahan i tulun dot Israil. 7 Iri nopo nangkaatod om talib no do kabagal do pomongo do koinsanai di wonsoyon.

Minomonsoi di Kiim do Tuhan

8 Id pogialatan nopo di tukang diri, om iri no tukang dit ongoilo kopio o minomonsoi di Kiim do Tuhan. Winonsoi nopo diyolo'd Kiim om hopod o bidang do kain linan dit osonong, i piniawol do kain di kihulu-hulu dot otomou, om it aragang doitom-itom, om it aragang. Om rinindaan iri do pinoiyo- iyo do moloikat di roitan do kerub. 9 Oirad nopo i bidang do kain: hopod om duwo mito do konoruo' om duwo mito do kalaabo'. 10 Om pogitombir-tombiro' no diyolo' i limo o bidang di kain, om iso' poddi o kinotombiran, om i limo kawagu bidang nga' niyo iddi. 11 Om wansayai no diyolo' do posuluhan do kain dit otomou o winonsoi, o hiri'd tompok di ponong id soibau di duwo o kinotombiran do kain diri. 12 Om padakatai no diyolo' do limo nohopod o posuluhan i kinotombiran do kain di koiso', 13 om limo i' nohopod o posuluhan do pinodokot di kinotombiran do kain di koduwo, mipasang diri i duwo o kinotombiran di kain. 14 Om pomonsoi nogiddi iyolo' do tokop di Kiim diri do hopod om iso' o bidang do kain di hulu do kambing o winonsoi. 15 Om oirad nopo o pinomonsoi diyolo'ddi: hopod om tolu o mito do konoruo' om duwo o mito do kalaabo'. 16 Om pogitombir-tombiro' no diyolo' i limo o bidang diri, om iri nogi' it onom o bidang do noolu' nga' pinogitombir-tombir i'. 17 Om wansayai no diyolo' do limo nohopod o posuluhan o hiri'd tompok di kinotombiran di kain di koiso', om limo nohopod o posuluhan do pinodokot do hiri'd tompok di kinotombiran di kain di koduwo. 18 Om pomonsoi no iyolo' do limo nohopod o pangait do tambaga' o winonsoi do popiromut di duwo o kinotombiran di kain diri om kopisangkayu i' do maan do tokop. 19 Om duwo po o tokop do suwai do winonsoi diyolo'. Iso' nopo om kulit do dumba' do tontoluhan di sinasakan dot aragang o winonsoi, om iri no tiso' om kulit dit osonong o winonsoi do maan do tokop di posoibahon. 20 Om wonsoyo' no diyolo' i padakatan di Kiim do papan do kayu di roitan dot akasia o winonsoi, om pinoturidong diyolo' iri do pinopowonsoi. 21 Kasawato' nopo do pointikid-tikid di papan diri om apat o mito, om kalaabo' no om onom nohopod om onom o sontimito. 22 Om kinakalan ngai' do duwo o kokol di mituma' i papan, om milo indo do piromuton i papan. Om kinakalan ngai' nopo do miagal diri o koinsanai di papan. 23 Duwo nohopod o papan do pinowonsoi diyolo' do pinoturidong dot id disan ponong id salatan di Kiim, 24 om apat nohopod o posungkadan, do pirok do winonsoi, do posungkadan di papan, om iso' nopo o papan om pinosungkad do duwo o posungkadan di misusun, om oinggiratan i' i piniromutan di kokol. 25 Om duwo nohopod o papan do pinowonsoi diyolo' do pinoturidong dot id disan ponong id utara di Kiim, 26 om apat nohopod o posungkadan, do pirok do winonsoi; om iso' nopo o torigi om pinosungkad do duwo o posungkadan di misusun. 27 Om ponong id tolikud no di Kiim diri, it id somputul ponong id kotonobon, om pinawansayan diyolo' dot onom o papan di pinoturidong, 28 om duwo o papan do pinowonsoi do pointikid di linsuk. 29 Iri nopo papan di ponong id linsuk om piniromut o hiri'd siriba' om gisom do koompus do hiri'd sawat. Om niyo goduwo nopoddi i duwo o linsuk di pinawansayan di duwo o papan. 30 Om walu'ddi o papan om hopod om onom o posungkadan do pirok do winonsoi; om iso' nopo o torigi om pinosungkad do duwo o posungkadan di misusun. 31 Om pomonsoi po iyolo' do hopod om limo o tukod di potibabar do kayu di roitan dot akasia o winonsoi, om limo o pinodokot di papan di pinoturidong do hiri'd sampaping di Kiim, 32 om limo o pinodokot di papan di pinoturidong di hiri'd dosompopingan kawagu, om limo o pinodokot di papan di hiri'd somputul ponong id kotonobon, i hiri'd dolikudan di Kiim. 33 Iri nopo tukod di potibabar di hiri'd tanga-tanga', i pinodokot do hiri'd piintangaan di papan, om poindapit nopo di papan di ponong id rombu di Kiim. 34 Om urogupai no diyolo' do tamas i papan di songinturidong om winansayan do posusukan do tamas o winonsoi, do maan do posusukan di tukod di songintibabar, i nurogupan i' do tamas. 35 Om pomonsoi no iyolo' do tabir do kain linan dit osonong, i piniawol do kain di kihulu-hulu dot otomou, om aragang doitom-itom, om it aragang do winonsoi, om rindaai no do pinoiyo-iyo do moloikat di roitan do kerub. 36 Om pomonsoi no iyolo' dot apat o torigi do kayu di roitan dot akasia o winonsoi, do potoidan di tabir. Om urogupai no diyolo' iri do tamas, om padakatai nod pangait do tamas do winonsoi. Om pomonsoi no iyolo' dot apat o posungkadan di torigi do pirok o winonsoi, do ponginggirot di torigi. 37 Om wansayai no diyolo' do tabir i wawayaan di Kiim do kain linan dit osonong o winonsoi, i piniawol do kain di kihulu-hulu dot otomou, om aragang doitom-itom, om it aragang, om rinindaan do minomolumis. 38 Om pomonsoi no iyolo' do limo o torigi di pinadakatan do pokoitan do tabir, i dinakatan do pangait om nurogupan do tamas o hiri'd dompok ponong id sawat di torigi om i pinomoloting. Om iri no limo o posungkadan di torigi om tambaga' do winonsoi.

Kinosoliwanan 37

Winonsoi i Kaban do Tumpongo

1 Om wonsoyo' no di Bisaliil i Kaban do Tumpongo do kayu di roitan dot akasia o winonsoi. Konoruo' nopo di Kaban diri om hatus om hopod o sontimito, om kalaabo' no om onom nohopod om onom o sontimito, om kasawato' no om onom nohopod om onom o sontimito. 2 Om urogupai no dau do tamas di nosompipi' ot id suang om id soibau di Kaban diri, om nisanan dau do tamas o posorili'. 3 Om minomonsoi nogi' iyau dot apat o tontolingo do tamas o winonsoi, do posusukan di pagantayang. Om podokoto' no dau iri do hiri'd apat o gakod di Kaban, do sopiduwo o tontolingo do hiri'd miampaping di Kaban. 4 Om pomonsoi no iyau do kayu do pagantayang do kayu di roitan dot akasia o winonsoi, om urogupai no dau do tamas iri. 5 Om posusuko' no dau di tontolingo di hiri'd miampaping di Kaban i pagantayang. 6 Om pomonsoi no iyau do sompon do tamas dit osompipi' o winonsoi. Konoruo' nopo di sompon om hatus om hopod o sontimito, om kalaabo' no om onom nohopod om onom o sontimito. 7 Om pomonsoi po iyau do duwo o koiyo-iyo do moloikat di roitan do kerub, do tamas di tinantan o winonsoi, 8 do piniomputul di sompon di Kaban. Om pinomonsoi nopo dau'ddi nga' pinasagalai di sompon. 9 Om mitimbaba' i duwo o koiyo-iyo do moloikat di roitan do kerub do hiri'd miomputul di sompon, om poungkalad do pointokop di sompon i talad di koiyo-iyo do moloikat di roitan do kerub.

Winonsoi i Mija' do Poiyanan di Roti do Patahakon do Kinorohingan

10 Om pomonsoi no i Bisaliil do mija' do kayu di roitan dot akasia o winonsoi. Konoruo' nopo di mija'ddi om walu' nohopod om walu' o sontimito, om kalaabo' no om apat nohopod om apat o sontimito, om kasawato' no om onom nohopod om onom o sontimito.1|75|HK76F| Mija' do pasakayan di roti do porsombahan|37.10 11 Om urogupai no dau i mija'ddi do tamas dit osompipi' om oligo' no do tamas o hiri'd mitingisan. 12 Om isanai no dau o pointutuk di mija'ddi do turu' nohopod om limo o milimito do kalaabo'. Om oligo' no dau do tamas o pointutuk di pinongisan di mija'ddi. 13 Om pomonsoi no iyau dot apat o tontolingo do tamas do maan do posusukan di pagantayang om podokoto' no do hiri'd apat o sunduk, it id sawa-sawat di gakod di mija'. 14 Om iri nopo tontolingo di posusukan di kayu do pagantayang di mija'ddi om pinodokot do hiri'd toning di pinongolig di pinongisan. 15 Om iri nopo kayu di pagantayang om kayu di roitan dot akasia o winonsoi om nurogupan iri do tamas. 16 Om winonsoi nogi' dau i pakakas di mija'ddi, do tamas dit osompipi' o winonsoi: piring, om sangkir, om kakanan, om mangkuk di pakayon do papatahak do waig dot anggur do maan do porsombahan.

Winonsoi i Potitimpakan do Lampung

17 Om wonsoyo' no di Bisaliil i potitimpakan do lampung do tamas dit osompipi' o winonsoi. Iri nopo puun om i guas di lampung diri om tamas di tinantan o winonsoi. Iri nopo bunga di pinongillumis, do pinoiyo-iyo do tusak dit a' po noungkalad om i tusak di noungkalad nga' pasagalai nopo di guas di potitimpakan di lampung. 18 Om haro ot onom o raan do hiri'd guas di potitimpakan do lampung, do sopitolu o miampaping. 19 Om pointikid-tikid dit onom o raan diri om winansayan ngai' nopo do tolu o koiyo-iyo do tusak do maan do pongillumis, do pinoiyo-iyo do tusak di kayu do roitan do badam, dot it a' po noungkalad om i noungkalad no. 20 Om iri nopo guas di potitimpakan do lampung diri om winansayan dot apat o bunga di pongillumis do pinoiyo-iyo do tusak do kayu di roitan do badam dit a' po noungkalad om i noungkalad no. 21 Om hiri nopod puun do pointikid-tikid di tolu o raan do miampaping diri om haro ot iso' o koiyo-iyo do tusak dit a' po noungkalad. 22 Iri ngai' nopo i tusak dit a' po noungkalad om i raan, om i potitimpakan do lampung diri om iso' no o watang do tamas di tinantan do winonsoi. 23 Om minomonsoi iyau do turu' o lampung do potimpakon di potitimpakan do lampung, om minomonsoi po iyau do sanggip om talam, do tamas dit osompipi' o winonsoi. 24 Om naayi' nopo dau do pinomonsoi di potitimpakan do lampung diri om koinsanai di pakakas do hiri, om tolu nohopod om limo kilogram do tamas dit osompipi'.

Winonsoi i Mija' do Podtutudan do Kominyan

25 Om pomonsoi no i Bisaliil do mija' do maan do podtutudan do kominyan, do kayu di roitan dot akasia o winonsoi. Om apasagi' o pinomonsoi di mija' do podtutudan diri; do konoruo' nopo om apat nohopod om limo o sontimito, om apat i' nohopod om limo o sontimito do kalaabo', om kasawato' no om siam nohopod o sontimito. Om pasagalai nopo di mija' i sinangau-sangau di hiri'd apat o sunduk di mija'ddi.1|75|HK78B| I pananaraban do porsombahan|37.25 26 Om urogupai no dau do tamas dit osompipi' i hiri'd sakai, om hiri'd misingobik om hiri'd misingompok, om i sinangau-sangau di mija'. Om oligo' po dau do tamas o mitingisan di mija'ddi. 27 Om pomonsoi no iyau do duwo o tontolingo do tamas, om podokoto' no do hiri'd siriba-riba' di pinongolig di mitingisan, do hiri'd miampaping di mija', do maan do posusukan di kayu do pagantayang di mija'. 28 Iri nopo kayu di pagantayang om kayu di roitan dot akasia o winonsoi, om nurogupan po dau iri do tamas.

Winonsoi i Tumau do Ponununtug om i Kominyan

29 Om minomonsoi po i Bisaliil do tumau di ponununtug om i kominyan dit osonong o kosingudan, i pinogirolo-rolot do miagal di tumau dit osonong o kosingudan.

Kinosoliwanan 38

Winonsoi i Pananaraban do Porsombahan di Sorobon

1 Om pomonsoi no i Bisaliil do pananaraban do porsombahan di sorobon do kayu di roitan dot akasia o winonsoi. Om apasagi' o pinomonsoi'ddi, do 2.2 mito do konoruo' om 2.2 mito do kalaabo', om 1.3 mito do kasawato'. 2 Om pinasagalai dau di pananaraban do porsombahan o pinomonsoi di sinangau-sangau di hiri'd apat o sunduk dit id sakai di pananaraban do porsombahan. Om nurogupan ngai' dau iri do tambaga'. 3 Om winonsoi nogi' dau o koinsanai di pakakas di pananaraban do porsombahan: piro-piro poriuk, om sikup, om piro-piro mangkuk, om piro-piro totodok, om poiiyanan do tapui. Koinsanai'dti om tambaga' ngai' nopo do winonsoi. 4 Om pomonsoi no iyau do pangabot do tambaga' o winonsoi, om pooboto' no do hiri'd kopiintangaan do kasawato' di pananaraban do porsombahan, dot id siriba' di kabang di pananaraban do porsombahan. 5 Om pomonsoi no iyau dot apat o tontolingo om podokoto' no do hiri'd apat o sunduk di pananaraban do porsombahan. 6 Om iri nopo kayu di pagantayang om kayu di roitan dot akasia o winonsoi, om nurogupan dau iri do tambaga'. 7 Om posusuko' nogiddi dau di tontolingo do hiri'd miampaping di pananaraban do porsombahan i kayu do pagantayang. Iri nopo pananaraban do porsombahan diri om papan do winonsoi, om kiguang o hiri'd tanga'.

Winonsoi i Mimpun do Tambaga'

8 Om wonsoyo' no di Bisaliil i mimpun do tambaga', om i pinoimpahan di mimpun nga' tambaga' i' do winonsoi. Iri nopo tambaga' do pinomonsoi'ddi om i pogotulan i' daa di tongoondu' di maganu-anu do hiri'd wawayaan di Kiim do Tuhan.

Rinding di Kiim do Tuhan

9 Om rindingo' no di Bisaliil o posorili' di natad di Kiim do Tuhan. Pinomorinding nopo dau om kain linan dit osonong do winonsoi'd tabir. Konoruo' nopo di tabir dit id disan ponong id salatan om apat nohopod om apat o mito, 10 do tinukod do duwo nohopod o torigi do tambaga' di poinsungkad do duwo nohopod o posungkadan di tambaga' do winonsoi, do mitonggoi di pangait om i loting di pirok do winonsoi. 11 Om iyo iddi o winonsoi do hiri'd disan ponong id utara. 12 Id bombong ponong id kotonobon no, om tinobiran do duwo nohopod om duwo mito do konoruo', om pinawansayan do hopod o papan di pinoturidong do poinsungkad do hopod o posungkadan, om mitonggoi di pangait om i loting, i pirok do winonsoi. 13 Om i hiri'd bombong ponong id koulayon, i kiwawayaan, nga' duwo i' nohopod om duwo o mito do kalaabo' di pinomorinding. 14-15 Hiri nopod miampaping di wawayaan om tinobiran do tabir dit 6.6 o mito do konoruo', om norigianan do tolu o torigi do poinsungkad do tolu o posungkadan. 16 Koinsanai di tabir di pinomorinding di natad om kain ngai' nopod linan dit osonong o winonsoi. 17 Iri nopo pinosungkadan di torigi om tambaga' do winonsoi, om iri no pangait om i loting om i ponulob di tompok di torigi om pirok ngai' nopo do winonsoi. Om pinogiromu-romut i torigi di pointutuk di natad dot i loting do pirok o pinopogiromu-romut. 18 Iri nopo tabir di wawayaan di pinomorinding di natad om kain linan dit osonong o winonsoi, i piniawol do kain di kihulu-hulu dot otomou, om it aragang doitom-itom, om it aragang; om rinindaan iri. Konoruo' nopo di tabir diri om siam o mito, om kasawato' no om duwo o mito; do pinoiyo di pinomorinding di natad. 19 Iri nopo tabir diri om tinukod dot apat o torigi do poinsungkad dot apat o posungkadan. Iri nopo pangait, om i pinonulob di torigi, om i pinomoloting om pirok ngai' nopo do winonsoi. 20 Nga' iri nopo gapit di Kiim om gapit di pinomorinding om tambaga' i' do winonsoi.

I Pakakas dit Ongokodou o Winonsoi do Pinakai do Hiri'd Kiim do Tuhan

21 Iti no o dopitar do kogumuo' di pakakas dit ongokodou o winonsoi do pinakai do hiri'd Kiim do Tuhan, i pinoiyanan di duwo o kaping do watu di pinotulisan di Hopod ot Oturan do Kinorohingan. Minonuhu' nopo do momonsoi di dopitar diri om i Musa, om minomonsoi nopoddi om i tulun do Liwi. Om woyoon nopo di tulun do Liwi do minomonsoi'ddi om i Itamar, i tanak di Harun. 22 Om wonsoyo' ngai' nopo di Bisaliil, (i tanak di Uri, i manangaki di Hur, i mantad id payat di Yohuda), o koinsanai di pinonuhuan do Tuhan. 23 I Oholiab nopo, i monguhup di Bisaliil, i tanak di Ahisamak, i mantad id payat di Dan, om mongingikir, om momolukis do maan do poiyaan, om mangangawol do kain linan dit osonong, om kain di kihulu-hulu dot otomou om aragang doitom-itom om it aragang. 24 Koinsanai nopo di tamas di pinatahak dot id Tuhan do pomonsoi di Kiim dot Olidang om soribu o kilogram do kawagato', do tinimbang do tumanud di poninimbang di natantu' mantad. 25 Iri nopo pirok do naanu do mantad id pinongintaban di tulun dot Israil om tolu noribu om apat nahatus om tolu nohopod o kilogram do kawagato', do tinimbang do tumanud di poninimbang di natantu' mantad. 26 Kogumuon nopo di naanu'ddi om irad di kogumuo' do pinabayar do koinsanai di tulun di nokointob dot id pinongintaban. Iso' nopo o tulun om mambayar dot irad di pambayar di natantu' mantad, om timbangon di poninimbang di natantu' mantad. Nokohompit nopo dot id pinongintaban diri om onom nahatus om tolu noribu, om limo nahatus om limo nohopod o tongokusai di duwo nohopod o toun ko' it id sawat ko' iri o tumur. 27 Iri nopo pirok diri, om tolu noribu om apat nahatus o kilogram do pinakai do pinomonsoi di hatus o posungkadan do torigi di Kiim dit Olidang om i tabir, do tolu nohopod om apat o kilogram do pinomonsoi do pointikid-tikid di posungkadan. 28 Om iri nopoddi tolu po nohopod o kilogram do pirok do noolu', om winonsoi di Bisaliil do panakong, om pangait do podokoton di torigi, om i pinosulob do hiri'd dompok di torigi. 29 Kogumuon nopo di tambaga' do pinatahak dot id Tuhan om duwo noribu om apat nahatus om duwo nohopod om limo kilogram. 30 Om iri no tambaga'ddi o pinakai do pinomonsoi di pinosungkadan do hiri'd wawayaan di Kiim do Tuhan, om i pananaraban do porsombahan om i pangabot di pananaraban diri, om koinsanai di pakakas do hiri'd pananaraban do porsombahan, 31 om i pinosungkadan di pinangansar di natad, om i wawayaan di natad, om koinsanai di gapit di Kiim om i tabir di pinomorinding do pointutuk di Kiim.

Kinosoliwanan 39

Winonsoi i Pakayan do dong Imam

1 Om wonsoyo' no diyo Bisaliil di Oholiab i pakayan do dong imam dit ongolumis, i papakayon di imam do tontok do maganu-anu iyolo' do hiri'd Bilik dit Olidang. Om wonsoyo' no diyolo' i pakayan di Harun di dong imam do tumanud di pinonuhuan do Tuhan dot id di Musa. Winonsoi nopo diyolo' do pakayan di dong imam diri om i kain do kihulu-hulu dit otomou, om aragang doitom-itom om aragang. 2 Om wonsoyo' no diyolo' it ipod do kain linan dit osonong, om i kihulu- hulu dit otomou, om it aragang doitom-itom, om it aragang, om banang do tamas, o winonsoi. 3 Om tantano' no diyolo' o piro-piro kaping do tamas om pogiridi-ridiso' no do soronipi-nipis do winonsoi do banang dit atandai. Om poowolo' nogiddi iri di kain linan dot osonong, om i kain do kihulu-hulu dit otomou, om aragang doitom-itom om it aragang. 4 Om winansayan diyolo'd duwo o togiis o hiri'd miampaping di ponong id lihawa dit ipod, do pinodokot do hiri'd ponong id disan, om milo i' do pikogoson. 5 Om iri nogi' i tagkos dit atandai o pinangawol nga' sagalai i' di kain do winonsoi dot ipod o kain do winonsoi, om podokoto' no do hiri'd ipod i tagkos om misagalai nopoddi, do miagal di pinonuhuan do Tuhan dot id di Musa. 6 Om lunaho' noddi diyolo' i watu dot agayo o gatang, i watu do roitan do delima, om podokoto' no di padadakatan di tamas do winonsoi. Om pokikiro' noddi diyolo', dot osonong kopio o pinopokikir i ngaran di hopod om duwo o tangaanak di Yakub do hiri'd piro-piro o watu dit angagayo o gatang diri. 7 Om podokoto' nogiddi i piro-piro o watu dit angagayo o gatang diri do hiri'd togiis do lihawa dit ipod do ponokowakil di hopod om duwo o payat dot Israil, do miagal di pinonuhuan do Tuhan dot id di Musa.

Winonsoi i Lokop do Kangkab

8 Om wonsoyo' no diyo Bisaliil di Oholiab i lokop do kangkab. Om kain nopo do winonsoi diyolo'ddi om sagalai i' di winonsoi dot ipod, om pinomorinda' nga' piagalo' nopo. 9 Pinomonsoi nopo di lokop do kangkab om apasagi' om pinilapis. Konoruo' nopo om duwo nohopod om duwo o sontimito, om kalaabo' nga' duwo i' nohopod om duwo o sontimito. 10 Om dakatai no diyolo' i lokop do kangkab diri dot apat o rulud do watu dit angagayo o gatang. Hiri nopod rulud do koiso' om dinakatan do watu di roitan do delima, om topas, om garnit. 11 Hiri nod rulud do koduwo om dinakatan do watu di roitan do samrud, om nilam om mutiara'. 12 Hiri nod rulud do kotolu om dinakatan do watu di roitan do lasuardi, akik, om kecubung. 13 Hiri nod rulud do kaapat om dinakatan do watu di roitan do pirus, yakut, om ratna cempaka. Om pinodokot ngai' nopori dot id padadakatan, di tamas do winonsoi. 14 Om pointikid-tikid di hopod om duwo o watu'ddi nga' kinikiran ngai' nopo do ngaran di tangaanak di Yakub --- iso' nopo o watu om iso' no o ngaran do pinokikir --- do ponokowakil di hopod om duwo o payat dot Israil. 15 Om minomonsoi pod rantai do tamas dit osompipi' o winonsoi, om pinitabid diri do miagal do tali. 16 Om pomonsoi po iyolo' do duwo o pondulung do tamas do pinodokot do hiri'd sunduk ponong id sawat di lokop do kangkab. 17 Om iri nopo duwo o tompok di rantai'ddi om pinosulung do hiri'd duwo o pondulung, 18 om iri no duwo kawagu o tompok di suwai om pinokogos di padadakatan do watu dit agayo o gatang, om poingkogos di togiis do lihawa dit ipod. 19 Om pomonsoi po kawagu iyolo' do duwo o pondulung do tamas do pinodokot do hiri'd sunduk ponong id siriba' di lokop do kangkab, do hiri'd lupi di ponong id saalom, i pointopis dit ipod. 20 Om pomonsoi po kawagu iyolo' do duwo o pondulung do tamas do pinodokot do ponong id siriba' di duwo o togiis di posoibau, i ponong id lihawa dit ipod, do hiri'd topis di lupi o pinadakatan, i hiri'd sawa-sawat di tagkos dit atandai o pinangawol. 21 Om pitokongo' noddi diyolo' i pondulung di lokop do kangkab om i pondulung dit ipod, do tali dit otomou o pinanakong, om id sawat kasai' indo di tagkos i lokop do kangkab, om a' i' iri tumatak.

Winonsoi i Pakayan do Dong Imam di Suwai

22 Om iri nopo rasuk dot anaru dit osoibahan dit ipod om kain ngai' nopo di kihulu-hulu dit otomou o winonsoi. 23 Om hiri nopod tisan di liou di rasuk om nawol do minongisan do pinomogirot, om a' no oruhai dot ohurak. 24-26 Om pointutuk nopo do tompok di rasuk om pinadakatan do pongillumis di pinoiyo-iyo do tua' do kayu di roitan do delima do kain linan dit osonong o winonsoi, om i kain do kihulu-hulu dit otomou, om aragang doitom-itom, om aragang; om piniolot-olot do giring do tamas do pinopodokot do tumanud di pinonuhuan do Tuhan do pinolombus di Musa. 27 Om pomonsoi no iyolo'd rasuk do pakayon di Harun om i tangaanak dau, 28 om minomonsoi nogi' iyolo' do sigar, om tupi', om soluar dot oniba' do kain linan o winonsoi, 29 om tagkos do kain linan dit osonong, om kain di kihulu-hulu dot otomou, om aragang doitom-itom, om it aragang o winonsoi. Om rinindaan po diyolo' iri do miagal di pinonuhuan do Tuhan dot id di Musa. 30 Om pomonsoi po iyolo' do pongillumis do tamas dit osompipi' o winonsoi, do tanda' do nokotobilang no iyolo' do sumiliu do don Tuhan do songonuon. Om kikirai no diyolo' i pongillumis diri do boros do poingkaa, “Pinotobilang do maan do don Tuhan,” ka. 31 Om pokogoso' no diyolo' iri do hiri'd sigar do hiri'd ponong id duros, do tali dit otomou o pinongogos, do miagal di pinonuhuan do Tuhan dot id di Musa.

Nopongo i Buruon

32 Om kopongo ngai' noddi i buruon do hiri'd Kiim do Tuhan. Om nowonsoi no di tulun dot Israil iri do tumanud di pinonuhuan do Tuhan dot id di Musa. 33 Om ngoyo' noddi diyolo' pootodo' dot id di Musa i Kiim om koinsanai di pakakas di Kiim; i pangait, om i tukod di potibabaron, om i papan di poturidongon, om i posungkadan di papan; 34 om i ponokop, i kulit do dumba' do tontoluhan do winonsoi, i sinasakan dot aragang, om i tokop, i kulit dit osonong do winonsoi; om i tabir do pinomorinding di Bilik dit Olidang Kopio; 35 om i Kaban do Tumpongo, i pinoiyanan di duwo o kaping do watu om i sukud do pagantayang om i sompon di Kaban, 36 om i mija' om koinsanai di pakakas do hiri, om i roti di patahakon do maan do porsombahan dot id Kinorohingan; 37 om i potitimpakan do lampung di tamas dot osompipi' do winonsoi, om i piro-piro o lampung, om koinsanai di pakakas di lampung, om i tumau do ponuang di lampung; 38 om i poiyanan do porsombahan di tamas do winonsoi, om i tumau do ponununtug, om i kominyan dit osonong o kosingudan, om i tabir di wawayaan di Kiim, 39 om i pananaraban do porsombahan do mitonggoi di pinangabot, i tambaga' do winonsoi, om i kayu do pagantayang, om koinsanai di pakakas di pananaraban do porsombahan; om i mimpun do pongougan om i poimpahan di mimpun, 40 om i tabir do pomorinding di natad, om i torigi om i posungkadan di torigi, om i tabir di wawayaan di natad om i tali, om i gapit di Kiim, om koinsanai di pakakas do pakayon do hiri'd Kiim; 41 om i pakayan do dong imam dit ongolumis, i pakayon diyolo' do hiri'd Bilik dot Olidang, om i pakayan di Harun di dong imam om i pakayan di tangaanak dau. 42 Om nowonsoi ngai' no di tulun dot Israil i buruon diri do tumanud di pinonuhuan do Tuhan dot id di Musa. 43 Om sorisido' no di Musa do minogontong o koinsanai'ddi, om kokito no dau dot iyo ngai' nopo di pinonuhuan do Tuhan o pinomonsoi diyolo'ddi. Om barakatai noddi di Musa iyolo'.

Kinosoliwanan 40

Pinopowonsoi om Sinambayangan i Kiim do Tuhan

1 Om boros kad Tuhan dot id di Musa, 2 “Powonsoyon no i Kiim ku do tontok do tadau do koiso' do tulan di koiso'. 3 Posuangon nod hiri'd Kiim i Kaban do Tumpongo, i kisuang di Hopod ot Oturan, om porindingon no i tabir do hiri'd dotimbabaan di Kaban. 4 Posuangon no i mija' om pasakayon ngai' nod hiri i pakakas do pointonggoi'ddi. Om posuangon nondo i potitimpakan do lampung om potimpakon ngai' i lampung do hiri. 5 Poiyonon no i mija' do tamas di podtutudan do kominyan do hiri'd dotimbabaan di Kaban do Tumpongo. Om porindingon no i tabir do hiri'd wawayaan di Kiim. 6 Iri nopo pananaraban do porsombahan di sorobon om hirion id dotimbabaan di Kiim. 7 Iri nopo mimpun do pongougan om hirion id piolitan di Kiim om i pananaraban do porsombahan. Om suangan nod waig i mimpun. 8 Powonsoyon no i pomorinding di natad om porindingon no i tabir do hiri'd wawayaan di natad. 9 Om patahakon no do maan do porsombahan dot id doho' o koinsanai di pakakas di Kiim. Om ralan nopo do papatahak diri om tuntugan di tumau di ponununtug, om kotobilang indo ngai' iri do maan do doho'. 10 Om patahakon no dot id doho' i pananaraban do porsombahan om koinsanai di pakakas do pointonggoi'ddi. Ralan nopo do papatahak diri om tuntugan do tumau, om kotobilang indo ngai' iri do maan do doho'. 11 Om iyo iddi o papatahak di mimpun do pongougan om i poimpahan di mimpun. 12 Om suhuon nondo i Harun om i tangaanak dau do mongoi do hiri'd wawayaan di Kiim, om suhuon iyolo' do modsu' do tumanud dit oturan do don tugama'. 13 Om rosukan nondo i Harun di pakayan do dong imam, om tuntugan no iyau do tumau. Iyo noddi o wonsoyon nu om kotobilang i' iyau do sumiliu do imam do momonsoi'd karaja' ku. 14 Angatan no i tangaanak di Harun om porosukan no diyolo' i rasuk. 15 Om tuntugan nondo iyolo' di tumau do miagal di pinonuntug nu di tapa' diyolo', om osiliu i' iyolo' do imam di momonsoi do karaja' ku. Om iri no i tinuntugan iyolo' do tumau o poposiliu diyolo' do imam do gisom dot alaid,” ka dau. 16 Om wonsoyo' ngai' nopo di Musa o miagal diri do tumanud di pinonuhuan do Tuhan. 17 Om tontok di tadau do koiso' di toun do koduwo do mantad di suminoliwan iyolo' do mantad hilo'd Masir, om powonsoyo' noddi i Kiim do Tuhan. 18 Om poiliho' no di Musa i posungkadan, om poturidongo' no i papan di poturidongon, om posusuko' no i ponukod di potibabaron. 19 Om potokopo' no dau di Kiim i ponokop di Kiim, om takapai no kawagu dau i tokop di posoibahon. 20 Om ngoyo' nogiddi dau i duwo o kaping do watu om posuango' no di Kaban do Tumpongo. Om posusuko' no dau i kayu do pagantayang do hiri'd tontolingo di Kaban, om posompono' no dau i sompon di Kaban. 21 Om posuango' noddi dau i Kaban do Tumpongo do hiri'd Kiim, om porindingo' no dau i tabir. Om iyo noddi o ralan do monirung di Kaban do Tumpongo do tumanud di pinonuhuan do Tuhan dau. 22 Om posuango' no dau i mija' do hiri'd Kiim, do hiniri'd ponong id utara, dot id soliwan di tabir. 23 Om pasakayo' no dau di mija' i roti di patahakon do maan do porsombahan dot id Tuhan. 24 Om posuango' no dau di Kiim i potitimpakan do lampung, om poiliho' no do hiri'd ponong id salatan, do pinahapak di mija'. 25 Om tutudai no dau i lampung do hiri'd kinoiyonon di Koropohon do Tuhan. 26 Om posuango' no dau do hiri'd Kiim i mija' do tamas, do pinohiri'd dotimbabaan di tabir, 27 om tutudai no dau i kominyan dit osonong o kosingudan do miagal di pinonuhuan do Tuhan dot id di Musa. 28 Om porindingo' no dau i tabir do hiri'd wawayaan di Kiim, 29 om poiliho' no dau i pananaraban do porsombahan di sorobon do hiri'd dotimbabaan di tabir. Om patahako' noddi i porsombahan do sorobon om i porsombahan do gandum do hiri'd sakai di pananaraban do porsombahan. 30 Om poiliho' no dau i mimpun do pongougan do hiri'd piolitan di Kiim om i pananaraban do porsombahan, om suangai no dau do waig i mimpun. 31 Om ougan kasai' nopo di Musa, om i Harun, om i tangaanak di Harun o palad om lapap diyolo' do hiri, 32 do soira' nopo do sumuang iyolo' di Kiim dot Olidang, ko' mongoi insomok di pananaraban do porsombahan. 33 Om hiri nopod posorili' di Kiim om i pananaraban do porsombahan om rininding dau, om tinobiran dau o hiri'd wawayaan di natad. Om kopongo ngai' noddi i buruon.

Luminikup i Haun di Kiim do Tuhan

34 Om sondot noddi o haun do minomolikup di Kiim dot Olidang om koponu' nopo i Kiim do tulinau di kosorong tomod, i tanda' do nakarapou o Tuhan. 35 Om gowoi poddi om a' i Musa milo do sumuang di Kiim. 36 Om soira' nopod minsawat i haun di hiri'd Kiim dot Olidang, om hiyason no di tulun dot Israil i kokiiman diyolo', om kumaa nondo iyolo' dot id kinoiyonon do suwai. 37 Ondung hiri kasai'd sawa-sawat di Kiim dot Olidang i haun diri om hiri kasai' po iyolo'd pinomukiiman diyolo'. 38 Om solinaid nopo di tulun dot Israil do mombo-hombo, om okito kasai' nopo i tanda' do nakarapou o Tuhan do hiri'd sawa-sawat di Kiim diri, do kokitanan nopo do dangadau om miagal do haun, om kokitanan no do dongotuong om miagal do tapui di molob-ngolob.

Oturan 1

Porsombahan di Sorobon

1 Om lohowo' nod Tuhan i Musa do suminuang di Kiim do Tuhan om onuwai no dau i Musa do piro-piro ot oturan 2 di mositi' nod tonudon di tulun dot Israil do tontok do papatahak iyolo' do porsombahan di sumbolion. Tontok nopo do papatahak o tulun do tayam-tayam do maan do porsombahan di sorobon, om koino-ino i' iyau do patahak do sapi', ko' dumba', ko' kambing dau. 3 Ondung sapi' o patahakon dau do maan do porsombahan, om mositi' no dot i sapi' do tontoluhan, om it aiso' o bohiton do tinan. Om mositi' no do hiri'd wawayaan di Kiim do Tuhan o paatadan dau'ddi, om kohubayaan i' iyau do Tuhan. 4 Om mositi' no do pakabayon di tulun o longon dau do hiri'd sakai di tulu di tayam-tayam diri, om romiton indo do Tuhan i porsombahan diri do maan do porsombahan do pangampun do dusa do tulun diri. 5 Om mositi' no do sumbolion di tulun i sapi'ddi do hiri'd dotimbabaan di wawayaan di Kiim dot Olidang. Om iri nopondo raha' di sapi' om patahakon dit imam di suminolusuk di Harun, dot id Tuhan, om potiyason nogindo do hiri'd misingobik om hiri'd misingompok di pananaraban do porsombahan, do hiri'd toning di wawayaan di Kiim dot Olidang. 6 Om mositi' no dot iduwon di tulun o kulit di tayam-tayam diri om popoton. 7 Om mositi' no do pouludon dit imam i siduwon do hiri'd sakai di pananaraban do porsombahan om opuyan nogindo diyolo'.1|60|HK78A| Imam|1.7 8 Om mositi' no do posuboon diyolo' do hiri'd tapui i popot di tayam-tayam di sinumbali'ddi, om potonggoyon nogi' i tulu om i lunok di tayam-tayam. 9 Om mositi' no dot ougan di sanganu i suang do tian om i gakod di tayam-tayam diri, om sorobon nogindo dit imam di maso do maganu-anu o koinsanai di porsombahan di sinumbali'ddi do hiri'd pananaraban do porsombahan. Om iri no tawau di porsombahan do taakanon diri o kasanangan do Tuhan. 10 Ondung dumba' ko' kambing o patahakon do maan do porsombahan, om mositi' nod tontoluhan, om it aiso' o bohiton do tinan. 11 Om mositi' nod sumbolion di sanganu i tayam-tayam diri do hiri'd toning di tisan di pananaraban do porsombahan do ponong id utara. Om poiyason nogindo dit imam i raha' di tayam-tayam diri do hiri'd misingobik om hiri'd misingompok di pananaraban do porsombahan. 12 Om aayi' nopondo di tulun do momopot i tayam-tayam diri, om posuboon ngai' nondo dit imam di maganu-anu i popot diri, do mogitonggoi-tonggoi di tulu om i lunok, do hiri'd tapui. 13 Om mositi' no dot ougan di sanganu i suang do tian om i gakod di tayam-tayam diri, om patahakon nogindo dit imam iri dot id Tuhan, om sorobon ngai' nopondo do hiri'd sakai di pananaraban do porsombahan. Om iri no tawau di porsombahan do taakanon diri o kasanangan do Tuhan. 14 Ondung tombolog o patahakon di tulun do maan do porsombahan di sorobon, om mositi' no do sikukur ko' punai. 15 Om mositi' no dot igitan dit imam i tombolog diri do hiri'd pananaraban do porsombahan, om uritoson nondo o liou di tombolog, om sorobon nogindo i tulu do hiri'd pananaraban do porsombahan. Om mositi' no do poiyason dau i raha' di tombolog diri do hiri'd misingobik om hiri'd misingompok di pananaraban do porsombahan. 16 Om mositi' no dot iduwon dau i ludukan om i suang di ludukan di tombolog diri, om pataamon nogindo do hiri'd tisan di pananaraban do porsombahan do ponong id koulayon, i hiri'd patataaman do tauu. 17 Om mositi' no dot igitan dau o hiri'd guas di palapa' di tombolog diri do momohukata' di tinan, nga' kada' pondo do kotobilang i palapa'. Om mositi' no do songkoyuon i tombolog do monorob do hiri'd pananaraban do porsombahan. Om iri no tawau di porsombahan do taakanon diri o kasanangan do Tuhan.

Oturan 2

Porsombahan do Gandum

1 Ondung haro o tulun do papatahak do gandum do maan do porsombahan dot id Tuhan, om mositi' no do tutuon po dau i gandum diri do gisom dot aapung. Om tunguhon nogindo do tumau'd saitun i tapung om sakayan do kominyan o hiri'd soibau. 2 Om igitan nondo iri do hiri'd imam di suminolusuk di Harun. Om manu nondo it imam do maso do maganu-anu do songonggom di tapung do mitonggoi di tumau do saitun om insanan nopo i kominyan, om sorobon nondo iri do hiri'd sakai di pananaraban do porsombahan. Om iri no o tanda' do nakatahak ngai' no i porsombahan diri dot id Tuhan. Om iri no tawau di porsombahan do taakanon diri o kasanangan do Tuhan. 3 Iri nopondo i noolu' di porsombahan do gandum diri om iri no it imam o kaanu. Iri nopo gandum diri om olidang no kopio, tu' nanu i' do mantad id taakanon di nakatahak dot id Tuhan. 4 Ondung roti di nonsok dot id pagagansakan o maan do porsombahan, om mositi' no dot i roti dit a' naralatan do pangambang. Om songkoino id akapal piya o pomomonsoi di roti, dot i tapung di rinalatan do tumau do saitun o wonsoyon; om songkoino nogi' dot onipis piya o pomomonsoi di roti, i gihilan nod tumau'd saitun. 5 Ondung roti di linugu do hiri'd pomoluguan o maan do porsombahan, om mositi' no dot i tapung di rinalatan do tumau do saitun o wonsoyon, it a' rinalatan do pangambang. 6 Om tontok nopo do patahakon i roti'ddi do maan do porsombahan om mositi' no do mumukon po om tuntugan nogindo do tumau'd saitun. 7 Ondung i roti do nonsok dot id poriuk o maan do porsombahan, om mositi' no do tapung om tumau do saitun o wonsoyon do roti'ddi. 8 Om igitan no i roti'ddi do maan do porsombahan dot id Tuhan, om patahakon no dit imam. Om iri nondo it imam o mongigit di roti'ddi do hiri'd pananaraban do porsombahan. 9 Om onuon nondo dit imam o wookon di roti'ddi do maan do tanda' do nakatahak ngai' iri dot id Tuhan. Om sorobon nondo dau i roti'ddi do hiri'd pananaraban do porsombahan. Om iri no tawau di porsombahan do taakanon diri o kasanangan do Tuhan. 10 Om iri nopondo i noolu' di porsombahan diri om iri no it imam o kaanu. Iri nopo roti'ddi om olidang no kopio, tu' nanu i' do mantad id taakanon di nakatahak do maan do porsombahan dot id Tuhan. 11 Kada' no kopio ralatai do pangambang ko' paha' o nunu nopo i taakanon do patahakon dokoyu dot id Tuhan. 12 Om mositi' no do manu kou do wookon di gandum dit id gulu koomot do pointikid do toun, om igitan nori do maan do porsombahan dot id Tuhan. Nga' iri nopo gandum om a' i' sorobon do hiri'd pananaraban do porsombahan. 13 Pointikid-tikid di porsombahan do gandum om mositi' no do ralatan dokoyu do silaon, tu' iri no silaon o tanda' di tumpongo dot id pialatan dokoyu om Kinorohingan. (Mositi' no do ralatan dokoyu do silaon o koinsanai di porsombahan dokoyu.) 14 Soira' nopo do papatahak kou do porsombahan dot id Tuhan dot i gandum dit id gulu koomot o patahakon, om igitan no i gandum di nolugu no ko' i nowonsoi nod tapung. 15 Om mositi' nod tuntugan do tumau do saitun i gandum om sakayan do kominyan o hiri'd soibau. 16 Om sorobon nondo dit imam o wookon di gandum om i tumau'ddi, om insanan nopo i kominyan, do sumiliu do tanda' do nakatahak ngai' iri dot id Tuhan do maan do porsombahan do taakanon.

Oturan 3

Porsombahan do Piombolutan

1 Tontok nopo do papatahak do sapi' ot isai nopo o tulun, do maan dau do porsombahan do piombolutan, do tontoluhan ko' tondu' i sapi'ddi om mositi' no dot it aiso' o bohiton do tinan. 2 Om mositi' no do pakabayon di sanganu o longon dau do hiri'd sakai di tulu di sapi'ddi. Om sumbolion nogindo dau i sapi'ddi do hiri'd wawayaan di Kiim do Tuhan. Om potiyason nondo dit imam di suminolusuk di Harun i raha' di sapi' do hiri'd misingobik om hiri'd misingompok di pananaraban do porsombahan. 3 Om mositi' no do patahakon dot id Tuhan iti piro-piro o bohogian di sapi'ddi do maan do porsombahan do taakanon: i linuap di songinsokot di suang do tian, 4 om i lusou-lusou do pitonggoyon di linuap, om i bohogian di tundu-undu' dit osonong kopio. 5 Om tutudan ngai' nopondo dit imam iri do hiri'd pananaraban do porsombahan do mitonggoi di porsombahan do sorobon di suwai. Om iri no tawau di porsombahan do taakanon diri o kasanangan do Tuhan. 6 Ondung dumba' ko' kambing o maan do porsombahan do piombolutan, om koino-ino i' do tontoluhan ko' tondu' i tayam-tayam diri, nga' mositi' no dot aiso' o bohiton do tinan. 7 Tontok nopo do haro o tulun do papatahak do dumba' do maan do porsombahan, 8 om mositi' no do pakabayon dau o longon dau do hiri'd sakai'd tulu di dumba', om sumbolion nogindo iri do hiri'd dotimbabaan di Kiim dot Olidang. Om poiyason nondo dit imam i raha' di dumba'ddi do hiri'd misingobik om hiri'd misingompok di pananaraban do porsombahan. 9 Om mositi' no do patahakon dit imam dot id Tuhan iti piro-piro o bohogian di dumba' do maan do porsombahan do taakanon: i lunok di dumba', om oinsanan i tikiu di kilunok, do pamatod nopo di tikiu om porotopon nopo, om i linuap di songinsokot di suang do tian, 10 om i lusou-lusou om pitonggoyon di linuap, om i bohogian di tundu-undu' dit osonong kopio. 11 Om mositi' no do sorobon dit imam di maso do maganu-anu o koinsanai'ddi do hiri'd sakai di pananaraban do porsombahan, do maan do porsombahan do taakanon dot id Tuhan. 12 Ondung kambing o patahakon do maan do porsombahan, 13 om mositi' no do pakabayon di sanganu o longon dau do hiri'd sakai'd tulu di kambing. Om sumbolion nondo dau i kambing diri do hiri'd dotimbabaan di Kiim do Tuhan. Om mositi' no do poiyason dit imam i raha' di kambing do hiri'd misingobik om hiri'd misingompok di pananaraban do porsombahan. 14 Om iti ngai' no o bohogian do tinan di kambing do patahakon dit imam do maan do porsombahan do taakanon dot id Tuhan: oinsanan i linuap di songinsokot di suang do tian, 15 om i lusou-lusou do mitonggoi di linuap, om i bohogian di tundu-undu' dit osonong kopio. 16 Om sorobon ngai' nopondo dit imam iri dot id sakai di pananaraban do porsombahan, do maan do porsombahan do taakanon di kasanangan do Tuhan. Iri ngai' nopo lunok di kambing diri om don Tuhan ngai' no. 17 A' i' koino-ino do haro ot ongoiso' piya do tulun dot Israil do mangakan do lunok ko' raha'. Om iti nopo toturan diti om iyo no kasai'dti do gisom dot alaid om mositi' no do tonudon do koinsanai'd tulun dot Israil do hinonggo nopo iyolo' do poingiyon.

Oturan 4

Porsombahan do Pangampun do Dusa dit A' Tinomod

1 Om suhuo' nod Tuhan i Musa 2 do popoilo di tulun dot Israil, dot isai nopo i kowonsoi do dusa om i kotolibamban do nunu nopo di pinonuhuan do Tuhan, dot a' dau tomodon, om mositi' no do tumanud dot oturan diti: 3 Ondung i Boyoon dot Agayo dot Imam o kowonsoi do dusa, om kohompit nondo i tulun dot Israil do pasalaon, om mositi' no do papatahak iyau do songinan o sapi' do tontoluhan dit aiso' o bohiton do tinan om it okoro' po, do maan do porsombahan di sumbolion dot id Tuhan, om oompunan id Tuhan i dusa dau. 4 Om mositi' no dot igitan dau i sapi'ddi do hiri'd wawayaan di Kiim do Tuhan. Om pakabayon nondo di Boyoon dot Agayo dot Imam o longon dau dot id sakai'd tulu di sapi', om sumbolion nondo iri do hiri'd Kiim dit Olidang. 5 Om mositi' nod igitan dau o wookon di raha' do sumuang di Kiim. 6 Om mositi' nod potobungon dau o tunturu' dau do hiri'd raha' di sapi' om powowoson dot inturu' do hiri'd tabir dit id dotimbabaan di Kaban do Tumpongo. 7 Om pogihilon dau o tongokooro' di raha' do hiri'd sinangau-sangau dit id pointikid-tikid di sunduk di mija' do podtutudan do kominyan dit osonong o kosingudan; i hiri'd suang di Kiim dot Olidang. Iri nopondo i topod di raha', om poiyason do hiri'd poimpahan di pananaraban do porsombahan di hiri'd soliwan, i hiri'd dotimbabaan di wawayaan di Kiim. 8 Om mositi' no dot onuon ngai' dau i lunok di sapi' do tontoluhan diri, om i linuap di songinsokot di suang do tian, 9 om i lusou-lusou do mitonggoi di linuap, om i bohogian di tundu-undu' dit osonong kopio. 10 Om mositi' no do sorobon ngai' dit imam i lunok diri do hiri'd sakai di pananaraban do porsombahan di sorobon, do miagal di wonsoyon dau do tontok do papatahak do porsombahan do pogiombolutan. 11 Nga' mositi' no dot onuon ngai' dau i kulit, om i tonsi, om i tulu, om i gakod, om it id suang do tian, om kotonggoi ngai' no i tinaii'. 12 Om mositi' no dot igitan ngai' dau iri do sumoliwan di kokiiman, om sorobon do hiri'd sakai di siduwon do hiri'd patataaman do tauu, i hiri'd kinoiyonon di nolidangan no do tumanud dot oturan do don tugama'. 13 Ondung koinsanai di tulun dot Israil do kowonsoi'd dusa, om kasala' iyolo' tu' nokotolibamban dot iso' di ponuhuan do Tuhan, nga' a' i' diyolo' tinomod, 14 om oilaan nopondo i dusa'ddi, om mositi' no do lomusan di tulun dot ogumu' do mongoi paatod do sapi' do tontoluhan dit okoro' po do hiri'd Kiim do Tuhan. Om mositi' no do patahakon i sapi'ddi do maan do porsombahan do pangampun do dusa. 15 Om mositi' no do pakabayon di tongoboyoon di bansa' o longon diyolo' do hiri'd sakai di tulu di sapi', om sumbolion nogindo i sapi'ddi dot id kinoiyonon diri. 16 Om mositi' no do manu i Boyoon dot Agayo dot Imam dot ongokooro' di raha' di sapi'ddi dot igitan do sumuang di Kiim dot Olidang. 17 Om mositi' no do potobungon dau di raha' o tunturu' dau om powowoson dot inturu' do hiri'd tabir dit id dotimbabaan di Kaban do Tumpongo. 18 Om mositi' no do pogihilon dau o tongokooro' di raha' do hiri'd sinangau-sangau dot id pointikid-tikid di sunduk di mija' do podtutudan do kominyan, i hiri'd suang di Kiim. Om iri nopondo noolu' om poiyason do hiri'd poimpahan di pananaraban do porsombahan di sorobon, it id soliwan di Kiim, do potimbaba' di wawayaan di Kiim. 19 Om mositi' no dot iduwon ngai' i lunok di sapi' om sorobon nogindo do hiri'd sakai di pananaraban do porsombahan. 20 Om poingkuro nopo i wonsoyon dau dot id sapi' do tontoluhan di maan do porsombahan do pangampun do dusa om iyo noddi o wonsoyon dau dot id sapi'ddi. Om iyo noddi i Boyoon dot Agayo dot Imam do papatahak do porsombahan do pangampun do dusa di tulun dot Israil, om ompunan indo do Tuhan i dusa diyolo'. 21 Om igitan nogindo dit imam i sapi'ddi do sumoliwan, om sorobon nondo dau iri do hiri'd soliwan di kokiiman, do miagal di pononorob dau di sapi' do tontoluhan di maan do porsombahan do pangampun do dusa dau. Om iyo noddi o papatahak di porsombahan do pangampun do dusa di tulun dot ogumu'. 22 Ondung songulun o pomorinta' do kowonsoi'd dusa, om kasala' iyau tu' nokotolibamban dot iso' di pinonuhuan do Tuhan, nga' a' i' dau tinomod, 23-24 om osunudan pondo iyau do pasal di dusa dau'ddi, om mositi' no do manganu iyau do songinan o kambing do tontoluhan dit aiso' o bohiton do tinan, do maan dau do porsombahan do pangampun do dusa dau'ddi. Om mositi' no do pakabayon dau o longon dau do hiri'd sakai di tulu di kambing om sumbolion do hiri'd tisan ponong id utara di pananaraban do porsombahan, i hiri'd ponunumbolian do tayam-tayam di maan do porsombahan di sorobon. 25 Om potobungon nondo dit imam o tunturu' dau do hiri'd raha' di kambing om pogihilon do hiri'd sinangau-sangau do pointikid-tikid di sunduk di pananaraban do porsombahan. Om iri nopo noolu' di raha' om poiyason do hiri'd poimpahan di pananaraban do porsombahan. 26 Om mositi' no do sorobon ngai' dau i lunok di kambing do hiri'd sakai di pananaraban do porsombahan, do miagal di pononorob dau do lunok do tayam-tayam di sumbolion do maan do porsombahan do pogiombolutan. Om iyo noddi o papatahak dit imam di porsombahan do pangampun do dusa di songulun o pomorinta'ddi, om oompunan indo do Tuhan i pomorinta'. 27 Ondung id pogialatan di tulun toomod o kopomonsoi'd dusa, om kasala' no iyau tu' kotolibamban no di ponuhuan do Tuhan, nga' a' i' dau tinomod, 28 om osunudan po iyau do pasal di dusa dau'ddi, om mositi' no do lumomus iyau do mongoi panganu do songinan o kambing do tondu' dit aiso' o bohiton do tinan do maan do porsombahan di sumbolion. 29 Om mositi' no do pakabayon dau o longon dau do hiri'd sakai di tulu di kambing diri om sumbolion nogindo i kambing do hiri'd tisan ponong id utara di pananaraban do porsombahan, i ponunumbolian do tayam-tayam di maan do porsombahan di sorobon. 30 Om mositi' no do potobungon dit imam o tunturu' dau do hiri'd raha' di kambing, om pogihilon nogindo di sinangau-sangau dot id pointikid-tikid di sunduk di pananaraban do porsombahan. Om iri nopondo noolu' om mositi' no do poiyason do hiri'd poimpahan di pananaraban do porsombahan. 31 Om mositi' no dot iduwon ngai' dau i lunok do miagal di lunok di tayam-tayam di sinumbali' do maan do porsombahan do pogiombolutan tu' iduwon ngai'. Om mositi' no do sorobon dau iri do hiri'd pananaraban do porsombahan, om kasanangan indo do Tuhan i tawau di sinorob dau'ddi. Om iyo noddi o papatahak dit imam di porsombahan do pangampun do dusa di tulun, om oompunan indo do Tuhan i tulun diri. 32 Ondung dumba' ot igitan do tulun do maan do porsombahan do pangampun do dusa, om mositi' nod tondu' i dumba' om aiso' o bohiton do tinan. 33 Om mositi' no do pakabayon di sanganu o longon dau do hiri'd tulu di dumba', om sumbolion i dumba'ddi do hiri'd tisan ponong id utara di pananaraban do porsombahan, i ponunumbolian di tayam-tayam do maan do porsombahan di sorobon. 34 Om mositi' no do potobungon dit imam o tunturu' dau do hiri'd raha' di dumba' om pogihilon di sinangau-sangau dot id pointikid-tikid di sunduk di pananaraban do porsombahan. Om iri nopondo noolu' di raha' om potuntugon do hiri'd poimpahan di pananaraban do porsombahan. 35 Om mositi' no dot iduwon ngai' dau i lunok do miagal di pongingidu' dau do lunok di dumba' do sumbolion do maan do porsombahan do pogiombolutan. Om sorobon nogindo dau iri do hiri'd sakai di pananaraban do porsombahan do mitonggoi di porsombahan do taakanon di patahakon dot id Tuhan. Om iyo noddi o papatahak dit imam di porsombahan do pangampun do dusa di tulun, om oompunan indo do Tuhan i tulun diri.

Oturan 5

Hal dit Apatut dot Ontokon do Porsombahan do Pangampun do Dusa

1 Tulun nopo di pasalaon om mositi' no do mamabo do kootuson di winonsoi dau: Ondung haro o tulun di lohowon do sumiliu do sasi' dot id kut, nga' a' indo dau poboroson i nokito om i norongou dau. 2 Ondung haro o tulun do kakama' do nunu nopo i sosomu' dot id pagantangan do tugama', nga' a' i' dau tomodon, do kakama' do tinan do nintorusan di napatai, om opurimanan nopondo dau i nowonsoi dau'ddi om diri no do sosomu' iyau dot id pagantangan do tugama' om kasala' iyau. 3 Ondung haro o tulun do kakama' do nunu nopo i sosomu' do mantad id tulun, dot a' tomodon, om opurimanan nopondo dau i nowonsoi dau'ddi, om diri no do kasala' iyau. 4 Ondung haro o tulun do sumumpa' dot a' puro-puroon o pomomoros do sumumpa' do pasal do nunu nopo, om opurimanan nopondo dau i nowonsoi dau'ddi om diri no do kasala' iyau. 5 Soira' nopo do kasala' o tulun do miagal diri o kasalaan, om mositi' no dot okunon dau i kasalaan dau'ddi. 6 Om pomohukum nopo di dusa dau'ddi om songinan o dumba' do tondu' ko' kambing do tondu' do patahakon dau dot id Tuhan do maan do porsombahan. Om mositi' no do patahakon dit imam i porsombahan diri, om oompunan indo i dusa di tulun diri. 7 Ondung aiso' o dumba' ko' kambing do patahakon di tulun do nakasala'ddi do maan do porsombahan do pangampun di dusa dau, om mositi' no do papatahak iyau dot id Tuhan do duwo o tinan do sikukur ko' duwo o tinan do punai do maan do porsombahan di sumbolion do pangampun do dusa dau. Iri nopo songinan di tombolog om maan do porsombahan do pangampun do dusa, om iri no tiso' om maan do porsombahan di sorobon. 8 Om mositi' no do ngoyon dau patahako' dit imam i duwo o tombolog diri. Om poguluonon pondo dit imam do papatahak i tombolog do maan do pangampun do dusa. Om mositi' no dot uritoson dau i liou di tombolog diri, nga' a' i' iduwon i tulu. 9 Om poturuon o wookon di raha' di tombolog diri do hiri'd misingobik di pananaraban do porsombahan. Om iri nopondo raha' di noolu' om potuntugon do hiri'd poimpahan di pananaraban do porsombahan. Iri no o porsombahan do patahakon om kaanu i' do koompunan do dusa. 10 Om patahakon nogindo dit imam i tombolog di koduwo do maan do porsombahan di sorobon, do tumanud dit oturan. Om iyo noddi o papatahak dit imam di porsombahan do pangampun do dusa di tulun, om oompunan i' do Tuhan i tulun diri. 11 Ondung aiso' o pongonuan di tulun di nakasala'ddi do duwo o tinan do sikukur ko' duwo o tinan do punai, om mositi' no do papatahak iyau do songkilogram o tapung do maan do porsombahan do pangampun do dusa. Nga' a' i' koino-ino do ralatan i tapung do tumau do saitun ko' kominyan, tu' iri nopo om porsombahan do pangampun do dusa, om okon i' ko' porsombahan do gandum. 12 Om mositi' no do ngoyon dau patahako' dit imam i tapung diri. Om manu nondo it imam do songonggom di tapung, do maan do tanda' do nakatahak ngai' no i tapung diri dot id Tuhan. Om mositi' no do sorobon i tapung di songonggom diri do hiri'd sakai di pananaraban do porsombahan do maan do porsombahan do taakanon. Om iri no o porsombahan do maan do pangampun do dusa. 13 Om iyo noddi o papatahak dit imam di porsombahan do pangampun do dusa di tulun, om oompunan i' do Tuhan i tulun diri. Om i nopondo noolu' di tapung om iri no it imam o kaanu do miagal dit oolu' di porsombahan do gandum tu' iri no imam o kaanu.

Porsombahan do Poningolon

14 Om patahako' nod Tuhan dot id di Musa iti piro-piro ot oturan. 15 Ondung haro o tulun dit a' tumomod do kolihu do papatahak di porsombahan di nokotobilang dau do patahakon dot id Tuhan, om mositi' no do papatahak iyau do porsombahan do poningolon. Patahakon nopo om mositi' no do songinan o dumba' do tontoluhan ko' songinan o kambing do tontoluhan, nga' mositi' no dot aiso' o bohiton do tinan. Om tontuon nondo o pomohorogo'ddi do tumanud di pomohorogo di natantu' mantad. 16 Mositi' no do tingalanan dau it a' dau nakatahak om ruhangan po dot induwo i sompihopod. Om mositi' no do patahakon dau i tayam-tayam diri dot id imam. Om patahakon nondo dit imam i tayam-tayam diri do maan do porsombahan do pangampun do dusa di tulun, om oompunan indo do Tuhan i tulun diri. 17 Ondung haro o tulun do kowonsoi'd dusa, om kasala' no tu' kotolibamban dot iso' di pinonuhuan do Tuhan, nga' a' i' daa dau tinomod, om kasala' no iyau'ddi, om mositi' no do bayaran dau i nokoontok dau. 18 Mositi' no do paatod iyau dot id imam do songinan o dumba' do tontoluhan ko' songinan o kambing do tontoluhan dit aiso' o bohiton do tinan. Om iri no o maan do porsombahan do poningolon. Om tontuon nondo o horogo'ddi do tumanud di pomohorogo di natantu' mantad. Om patahakon nondo dit imam i porsombahan diri do pangampun do dusa di tulun, om oompunan indo do Tuhan i tulun diri. 19 Om iri no o porsombahan do poningolon do pangampun di dusa dau dot id Tuhan.

Oturan 6

1 Om patahako' nod Tuhan dot id di Musa iti piro-piro ot oturan. 2-3 Ondung a' no iyau poguli' do konunu-nunuan di pinokiopian dot id dau di sompi' ko' tulun dot Israil, ko' manakau no iyau di konunu-nunuan do tulun diri, ko' akalan no dau i tulun diri, ko' a' no iyau mangakun do nokokito di konunu-nunuan di natagak, do gisom do sumumpa' iyau dot a' nokokito'ddi, om kowonsoi no iyau do dusa dot id Tuhan. Om ondung kowonsoi iyau do miagal diri om mositi' no do papatahak iyau do porsombahan do poningolon. 4-5 Om mositi' no do tingalanan dau o nunu nopo i naanu dau dit a' otulid o ralan dau do minanganu. Om soira' nopo dot oilaan iyau do nakasala', om tontok noddi do bayaran ngai' dau i sanganu di nangaanu dau'ddi, om ruhangan po dot induwo i sompihopod. 6 Om mositi' no do paatod iyau dot id imam do songinan o dumba' do tontoluhan ko' songinan o kambing do tontoluhan dit aiso' o bohiton do tinan, do maan do porsombahan do poningolon dot id Tuhan. Om tontuon nondo o horogo'ddi do tumanud di pomohorogo di natantu' mantad. 7 Om mositi' no do patahakon dit imam i porsombahan diri do pangampun do dusa di tulun, om oompunan indo do Tuhan i tulun diri.

Porsombahan dit Insanan do Monorob

8 Om suhuo' nod Tuhan i Musa do 9 papatahak dot id di Harun om id tangaanak di Harun diti piro-piro ot oturan do pasal do porsombahan di sorobon. Porsombahan nopo di sorobon om potimporonon nopo do hiri'd pananaraban do porsombahan do gisom dot osuaban, om mositi' no dot osikit kasai' i tapui. 10 Om iri nondo it imam di kirasuk do kain linan om kisoluar do kain linan dit oniiba', o mongidu' di tauu di kilunok, i noolu' do hiri'd pananaraban do porsombahan, om hirion nondo dau id toning di pananaraban do porsombahan i tauu'ddi. 11 Om mositi' no do tingalanan dau o pakayan dau om igitan nondo dau i tauu do sumoliwan di kokiiman, om hirion nondo dau id kinoiyonon dit olidang dot id pagantangan do tugama' i tauu'ddi. 12 Om mositi' no do piantangan kasai' i tapui do hiri'd pananaraban do porsombahan om kitapui kasai' i'; kada' no kopio pologoso' dot opisok i tapui'ddi. Pointikid-tikid do kosuabon om mositi' no dot udungan dit imam i tapui di hiri'd pananaraban do porsombahan, om pouludon i maan do porsombahan do sorobon do hiri'd sakai di pananaraban do porsombahan. Om sorobon i lunok do hiri do maan do porsombahan do pogiombolutan. 13 Om mositi' no do kisinikit kasai' i tapui do hiri'd pananaraban do porsombahan, om kada' no pologoso' dot opisok.

Porsombahan do Gandum

14 Iti ngai' no ot oturan do pasal di porsombahan do gandum. Mositi' no do ngoyon dit imam di suminolusuk di Harun patahako' o porsombahan do gandum dot id Tuhan do hiri'd dotimbabaan di pananaraban do porsombahan. 15 Om manu nondo iyau do songonggom di tapung om manu di tumau, om insanan nopo do manganu i kominyan di pinosoibau di tapung. Om sorobon nondo dau iri do hiri'd pananaraban do porsombahan do maan do tanda' do nakatahak ngai' nori dot id Tuhan. Om iri no tawau di porsombahan diri o kasanangan do Tuhan. 16-17 Om wonsoyon nondo i tapung di noolu'ddi do roti dit a' ralatan do pangambang, om akanon nondo dit imam iri dot id kinoiyonon dit olidang, i hiri'd natad di Kiim do Tuhan. Iri no o pinatahak do Tuhan dot id imam do maan do diyolo'd gontok di porsombahan do taakanon. Iri nopo taakanon diri om olidang kopio, do miagal di porsombahan do pangampun do dusa om i porsombahan di poningolon. 18 Om pointikid-tikid di tangaanak di Harun do kusai nga' koino-ino nod mangakan do roti'ddi do gisom dot alaid; iri no kasai' o diyolo'd gontok dit aanu diyolo' do mantad id taakanon di nakatahak dot id Tuhan. Nga' tulun nopod suwai di kakama' di taakanon di nakatahak diri, om orualan no dot oontok do kuasa' do kolidango' di porsombahan diri. 19 Om patahako' nod Tuhan dot id di Musa o piro-piro ot oturan diti, 20 do pasal do pomimili' dot imam di sumolusuk di Harun. Tontok nopod tadau do pilion it imam diri, om mositi' no do papatahak iyau dot id Tuhan do songkilogram o tapung do gandum. (Irad do kogumuon di porsombahan do gandum do patahakon do monikid tadau.) Iri nopo songintanga' di tapung diri om patahakon di dongkosuabon, om iri no songintanga' kawagu om patahakon do dongsosodopon. 21 Om mositi' no do ralatan do tumau i tapung diri, om luguon nogindo do hiri'd pomoluguan. Om mumukon nondo iri om patahakon do maan do porsombahan do gandum. Om iri no tawau di porsombahan diri o kasanangan do Tuhan. 22 Papatahak nopo do porsombahan diri do gisom dot alaid om i sinakagon di Harun di nosiliu do Boyoon dot Agayo dot Imam. Om sorobon ngai' nopori do maan do porsombahan dot id Tuhan. 23 Iri nopo porsombahan do gandum di patahakon dit imam diri om mositi' no dot insanan do monorob; om kada' nod haro o tongokooro' piya dot akanon.

Porsombahan do Pangampun do Dusa

24 Om suhuo' nod Tuhan i Musa do 25 papatahak dot id di Harun om id tangaanak di Harun diti piro-piro ot oturan do pasal do porsombahan do pangampun do dusa. Iri nopo tayam-tayam do maan do porsombahan do pangampun do dusa om mositi' no do sumbolion do hiri'd tisan ponong id utara di pananaraban do porsombahan, i ponunumbolian di tayam-tayam do maan do porsombahan di sorobon. Porsombahan nopodti om olidang no kopio. 26 Iri nopo imam di papatahak di tayam-tayam diri om mositi' no do hiri'd kinoiyonon dit olidang do mangakan di porsombahan diri, i hiri'd natad di Kiim do Tuhan. 27 Isai nopo ko' nunu nopo o kakama' di tonsi do tayam-tayam di nakatahak diri om orualan no dot oontok di kuasa' do kolidango'ddi. Ondung haro o kain dot otiasan do raha' di tayam-tayam diri, om mositi' no do pupuan i kain diri dot id kinoiyonon dit olidang. 28 Iri nopo kuron di pinomolosuan di tonsi di tayam-tayam do numaan do porsombahan diri om mositi' no do babakon. Om ondung poriuk do basi' o pinagansakan, om mositi' no do kisasan i poriuk om lihungan do waig. 29 Isai nopo o tongokusai do mantad id sompiiyon dot imam om koino-ino nod mangakan do porsombahan diri, it olidang kopio'ddi. 30 Nga' ondung haro o naanu di raha' di tayam-tayam diri do tinanggayan do sumuang di Kiim do pinakai do tontok di mokianu'd koompunan do dusa do tumanud dit oturan do tugama', om a' no koino-ino'd kanon i tayam-tayam diri, om mositi' no dot insanan iri do monorob.

Oturan 7

Porsombahan do Poningolon

1 Iti no ngai' ot oturan do pasal di porsombahan do poningolon, i porsombahan dit olidang kopio. 2 Iri nopo tayam-tayam do maan do porsombahan diti om mositi' nod sumbolion do hiri'd tisan ponong id utara di pananaraban do porsombahan, i ponunumbolian di tayam-tayam do maan do porsombahan di sorobon. Om iri nopondo raha' om mositi' no do poiyason do hiri'd misingobik om hiri'd misingompok di pananaraban do porsombahan. 3 Mositi' nod iduwon ngai' i lunok di tayam-tayam om patahakon ngai' do maan do porsombahan do hiri'd sakai di pananaraban do porsombahan: i tikiu di kilunok, om i linuap do songinsokot do hiri'd suang do tian, 4 i lusou-lusou om pitonggoyon di linuap, om i bohogian di tundu-undu' dit osonong kopio. 5 Om mositi' nod sorobon ngai' dit imam i lunok diri do hiri'd pananaraban do porsombahan do maan do porsombahan do taakanon dot id Tuhan. Iri nopo om porsombahan do poningolon. 6 Isai nopo tongokusai do mantad id sompiiyon dot imam om koino-ino no do mangakan diri, nga' mositi' no dot akanon dot id kinoiyonon dit olidang tu' iri nopo porsombahan diri om olidang kopio. 7 Haro o tiso' o toturan do pasal di porsombahan do pangampun do dusa, om i porsombahan do poningolon do kopiagal: iri no tu' iri nopo tonsi di tayam-tayam di pinatahak do maan do porsombahan om iri no imam di pinapatahak diri o kaanu. 8 Iri nopo kulit di tayam-tayam di pinatahak do maan do porsombahan di sorobon om iri no imam di pinapatahak diri o kaanu. 9 Om koinsanai di porsombahan do gandum di nuhub do minogonsok do hiri'd ponguhuban, ko' i nonsok dot id poriuk, ko' i linugu, om iri no imam di pinapatahak diri dot id Kinorohingan o kaanu'ddi. 10 Nga' koinsanai di porsombahan do gandum dit a' nonsok, dot iri tuu rinalatan do tumau, ko' iri po it a' rinalatan om kasanganu ngai' no it imam di suminolusuk di Harun, om mositi' no dot iradon o pamahagi'ddi dot id pogialatan diyolo'.

Porsombahan do Piombolutan

11 Iti no o piro-piro toturan do pasal di porsombahan do piombolutan di patahakon do maan do porsombahan dot id Tuhan. 12 Soira' nopo do papatahak do porsombahan diti do maan do pongunsikou do Kinorohingan, om tanggayan no i tayam-tayam di pinatahak diri do roti dit a' rinalatan do pangambang. Iri nopo roti di potonggoyon om koino-ino i' dot akapal o pomomonsoi, dot i tapung di rinalatan do tumau do saitun o wonsoyon. Om songkoino nogi' do roti dit onipis do rinalatan do tumau do saitun. 13 Om patahak po do roti di nonsok dot a' rinalatan do pangambang do maan do pomoruhang diri. 14 Om mositi' no do patahakon o wookon do pointikid-tikid do bansa' di roti'ddi do maan do porsombahan di potobilangon do maan do don Tuhan; om kaanu nopoddi om iri no it imam di minanganu di raha' di tayam-tayam om i pinopoiyas diri do hiri'd pananaraban do porsombahan. 15 Om iri nopo tonsi di tayam-tayam diri om mositi' no do kanon do tontok do tadau di kinapatahakan diri; kada' nod haro o toolu'ddi dot ongokooro' piya do gisom do kosuabon kawagu. 16 Ondung paatod o tulun do porsombahan do piombolutan do pamayaan di nakabatos dau, ko' maan dau do porsombahan do kagaanan do ginawo dau, om a' i' minog dot oiyon iri do mangakan do tontok do tadau di pinatahak iri. Nunu nopo it oolu' om koino-ino i' do kanon do tadau kawagu. 17 Nga' haro nopo o topod di tonsi'ddi do kotolu'd tadau om mositi' no do tutudan. 18 Ondung kanon i topod di tonsi'ddi di kotolu'd tadau, om a' nod Kinorohingan romiton i porsombahan. Tu' a' no osiliu do barakat di tulun di pinapatahak i porsombahan diri, nga' osiliu nogi' do porsombahan di sosomu'. Om isai nopo o mangakan di porsombahan di nososomu'ddi om mositi' no do mamabo do kootuson diri. 19 Ondung kotopis i tonsi'ddi do nunu nopo i sosomu' dot id pagantangan do tugama', om a' nori koino-ino dot akanon, suwai ko' mositi' nod sorobon. Isai nopo it olidang dot id pagantangan do tugama' om koino-ino no do mangakan di tonsi di porsombahan di piombolutan diri, 20 nga' ondung haro o tulun dit a' olidang dot id pagantangan do tugama' do mangakan diri, om a' no kohompit di tulun do songonuon do Kinorohingan. 21 Om ondung haro o tulun do mangakan di tonsi di nakatahak diri do numaan do porsombahan, nga' nokoigit i' iyau di sosomu' dot id pagantangan do tugama', do mantad tuu dot id tulun ko' mantad po dot id nintorusan, om a' no iyau kohompit do tulun di songonuon do Kinorohingan. 22 Om patahako' nod Tuhan dot id di Musa iti piro-piro ot oturan 23 do patahakon dot id tulun dot Israil. Lunok nopod sapi', om dumba', om kambing om a' no koino-ino dot akanon. 24 Iri nopo lunok do nintorusan di napatai toomod ko' i pinatai do nintorusan dot orongit om a' no koino-ino do kanon, nga' koino-ino i' do maan do nunu nopo o kogunaan do suwai. 25 Isai nopo i mangakan do lunok do nintorusan di milo daa do patahakon do maan do porsombahan do taakanon dot id Tuhan, om a' no kohompit do tulun di songonuon do Kinorohingan. 26 Hinonggo nopo o koiyonon do tulun dot Israil, nga' a' no kopio iyolo' koino-ino do mangakan do raha' do tombolog ko' raha' do nintorusan. 27 Isai nopo o tumolibamban dot oturan diti om a' no kohompit do tulun di songonuon do Kinorohingan. 28 Om patahako' nod Tuhan dot id di Musa iti piro-piro ot oturan 29 do patahakon dot id tulun dot Israil. Isai nopo o papatahak do porsombahan do piombolutan, om mositi' nod potobilang do wookon diri do maan do porsombahan di potobilangon do maan do don Tuhan, 30 dot iyau kopio o papatahak diri do maan do porsombahan do taakanon. Om mositi' nod igitan dau i lunok om i kangkab di tayam-tayam diri do maan do porsombahan di potobilangon do maan do don Tuhan. 31 Om mositi' nod sorobon dit imam i lunok diri do hiri'd pananaraban do porsombahan nga' iri nopo kangkab diri om aanu i' dit imam. 32 Om iri nopo gakod do wanan di tayam-tayam diri om mositi' nod potobilangon do patahakon 33 dit imam di papatahak di raha' om i lunok di porsombahan do piombolutan. 34 Iri nopo kangkab om i gakod do wanan di tayam-tayam diri om porsombahan no di pinotobilang, it onuon do Tuhan do mantad id tulun dot Israil do patahakon diyolo' dot id imam do gisom dot alaid. 35 Iri no i bohogian do mantad id porsombahan do taakanon di pinatahak do Tuhan dot id di Harun om id tangaanak dau do tontok do tadau di pinili' iyolo' do sumiliu'd imam. 36 Tontok no do tadau'ddi do sinuhu'd Tuhan i bansa' dot Israil do papatahak do bohogian diti do mantad id porsombahan dit igitan diyolo' dot id imam. Om mositi' no do tonudon kasai' di tulun dot Israil ot oturan diti do gisom dot alaid. 37 Om iri no o piro-piro ot oturan do pasal do porsombahan di sorobon, om porsombahan do gandum, om porsombahan do pangampun do dusa, om porsombahan do poningolon, om porsombahan do piombolutan. 38 Om tontok no di hilo'd Nuluhon do Sinai, i hilo'd tana' do kowotuan, do pinatahak do Tuhan dot id di Musa o piro-piro o ponuhuan diri, do tontok di minonuhu' iyau do tulun dot Israil do papatahak do porsombahan diyolo'.

Oturan 8

Pinili' i Harun om i Tangaanak dau do Sumiliu'd Imam

1 Om boros kad Tuhan dot id di Musa, 2 “Angatan no i Harun om i tangaanak dau do mongoi do hilo'd wawayaan di Kiim ku, om igitan no i pakayan do dong imam, om i tumau do ponununtug, om i sapi' do tontoluhan dit okoro' po do maan do porsombahan do pangampun do dusa, om duwo o dumba' do tontoluhan om sambalatak o roti dit a' rinalatan do pangambang. 3 Om lohowon ngai' nogindo i tulun dot Israil do tumimung do hiti,” ka dau. 4 Om wonsoyo' no di Musa o miagal di pinonuhuan do Tuhan. Om kotimung ngai' poddi i tulun dot ogumu', 5 om boro-boros no i Musa diyolo' do poingkaa, “Iti nopo wonsoyon ku do dinondo'dti om pinonuhuan i' do Tuhan,” ka dau. 6 Om angatai no di Musa i Harun om i tangaanak di Harun do mongoi do hiri'd gulu om suhuo' no dau iyolo' do modsu' do tumanud dit oturan do tugama'. 7 Om porosukai no dau di Harun i rasuk om i rasuk dit anaru, om poogkoso' dau di Harun i tagkos. Om papakayai no dau it ipod om paagkasai dau di Harun i tagkos dit atandai o pinangawol. 8 Om papakayai nod Musa di Harun i lokop do kangkab om posuango' no dau it Urim om Tumim do hiri'd lokop do kangkab. 9 Om posigarai no dau i sigar, om podokoto' dau i tamas do pongillumis do hiri'd ponong id turos di sigar, i tanda' do nosiliu i Harun do songonuon do Kinorohingan. Om wonsoyo' ngai' nopo di Musa iri do tumanud di pinonuhuan do Tuhan dot id dau. 10 Om ngoyo' nod i Musa i tumau do ponununtug om gihilai no dau di tumau'ddi i Kiim do Tuhan, om koinsanai di konunu-nunuan do hiri'd suang di Kiim. Om iyo noddi o ralan dau do pinapatahak ngai'ddi dot id Tuhan. 11 Om anu noddi i Musa dot okooro' di tumau di ponununtug diri om wawasai no dau dot inturu' o hiri'd sakai di pananaraban do porsombahan om koinsanai di pakakas do hiri, om hiri'd mimpun om hiri'd poimpahan di mimpun. Om iyo noddi o ralan dau do pinapatahak ngai'ddi dot id Tuhan. 12 Om pilio' noddi dau i Harun; om ralan nopo di Musa do minomili' di Harun om tinuntugan dau o tulu di Harun dot okooro' di tumau di ponununtug. 13 Om angatai nod i Musa i tangaanak di Harun do mongoi do hiri'd gulu, om porosukai no dau diyolo' i rasuk, om paagkasai dau diyolo' i tagkos, om potupiyai no dau diyolo' i tupi' do dong imam do tumanud di pinonuhuan do Tuhan dot id dau. 14 Om ngoyo' noddi di Musa i songinan o sapi' do tontoluhan dit okoro' po do maan do porsombahan do pangampun do dusa, om pakabayo' no di Harun om i tangaanak dau o longon diyolo' do hiri'd sakai'd tulu di sapi'ddi. 15 Om sumbolio' nod i Musa i sapi'ddi om onuo' no dau o wookon di raha'. Om potobungo' no dau o tunturu' dau do hiri'd raha' om pogihilo' no i raha' do hiri'd sinangau-sangau dot id pointikid-tikid di sunduk di pananaraban do porsombahan. Om poiyaso' nogiddi dau i topod di raha' do hiri'd poimpahan di pananaraban do porsombahan. Om iyo noddi o ralan dau do minomolidang di pananaraban do porsombahan do tumanud dot oturan do tugama', om iyo noddi o ralan do pinapatahak diri dot id Tuhan. 16 Om onuo' ngai' noddi di Musa i linuap di songinsokot di suang do tian di sapi' di sinumbali'ddi. Om nanu nogi' dau i bohogian di tundu-undu' om i lusou-lusou do mitonggoi di lunok di sapi'. Om sorobo' ngai' no dau iri do hiri'd pananaraban do porsombahan. 17 Om ngoyo' no dau i noolu-olu' di tonsi, om i kulit, om i tinaii' di sapi'. Om sorobo' ngai' no dau do hiri'd soliwan di kokiiman do miagal di pinonuhuan do Tuhan. 18 Om ngoyo' nogiddi di Musa i dumba' do tontoluhan do maan do porsombahan do sorobon. Om pakabayo' no di Harun om i tangaanak dau o longon diyolo' do hiri'd sakai di tulu di dumba'ddi. 19 Om sumbolio' no di Musa i dumba' om poiyaso' no dau i raha' do hiri'd misingobik om hiri'd misingompok di pananaraban do porsombahan. 20-21 Om popoto' noddi di Musa i dumba' do tontoluhan diri, om ougai no dau do waig i suang do tian om i gakod di dumba'ddi. Om iri nopo i tulu, om i lunok, om i noolu-olu' do tinan di dumba' do tontoluhan diri, om tinutudan dau do hiri'd sakai di pananaraban do porsombahan do tumanud di pinonuhuan do Tuhan. Iti no o porsombahan do taakanon, om iri no tawau do porsombahan diri o kasanangan do Tuhan. 22 Om ngoyo' nod i Musa i dumba' do tontoluhan di koduwo do maan do kopomilian dot imam. Om pakabayo' nod i Harun om i tangaanak dau o longon diyolo' do hiri'd sakai do tulu di dumba', 23 om sumbolio' nod i Musa i dumba'ddi. Om onuo' noddi di Musa o wookon di raha' di dumba'ddi om pogihilo' no dau do hiri'd tolingo'd wanan di Harun, om hiri'd posolon do longon dau'd wanan, om hiri'd posolon do lapap dau'd wanan. 24 Om suhuo' nod Musa i tangaanak di Harun do minsomok-somok dau, om gihilai nogiddi dau do raha' dot okooro' o hiri'd tolingo diyolo'd wanan, om hiri'd posolon do lapap diyolo'd wanan. Om iri nopo noolu' di raha' om pinoiyas di Musa do hiri'd misingobik om hiri'd misingompok di pananaraban do porsombahan. 25 Om onuo' nod i Musa i lunok di dumba'ddi, om i tikiu di kilunok, om koinsanai di linuap do songinsokot di suang do tian, om i bohogian di tundu-undu' dit osonong kopio, om i lusou-lusou do mitonggoi di linuap, om i gakod do wanan di dumba'ddi. 26 Om anu nogiddi i Musa di roti dit a' rinalatan do pangambang do mantad hiri'd balatak. Om patahako' no dau dot id Tuhan: iso' o roti dit akapal, i rinalatan do tumau do minomonsoi, om iso' o roti dit oniipis. Om pasakayo' no dau i roti'ddi do hiri'd lunok om hiri'd gakod do wanan di dumba'. 27 Om pakahangai ngai' no dau di Harun om i tangaanak di Harun i taakanon diri om patahako' no diyolo' iri dot id Tuhan do maan do porsombahan di pinotobilang do maan do don Tuhan. 28 Om ngoyo' noddi di Musa i taakanon do poingkahang diyolo', om sorobo' no dau do hiri'd pananaraban do porsombahan. Iri nopo om pinosoibau dau di porsombahan di sorobon, do maan do porsombahan do kopomilian. Iri no o porsombahan do taakanon, om iri no tawau'ddi o kasanangan do Tuhan. 29 Om ngoyo' nod i Musa i kangkab di dumba'ddi om patahako' no dot id Tuhan do numaan do porsombahan di pinotobilang do maan do don Tuhan. Om iri no o di Musa do gontok, do mantad id dumba' do tontoluhan di sinumbali'ddi do numaan do porsombahan do kinopomilian dot imam. Om wonsoyo' ngai' nopod i Musa iri do tumanud di pinonuhuan do Tuhan dot id dau. 30 Om anu no i Musa dot okooro' di tumau do ponununtug om minanu iyau dot okooro' di raha' do hiri'd pananaraban do porsombahan, om powowoso' no dau dot id di Harun om id pakayan diyolo'. Om iyo noddi o ralan dau do pinapatahak diyolo' om i pakayan diyolo' dot id Tuhan. 31 Om boros kad i Musa dot id di Harun om id tangaanak di Harun, “Igitai dokoyu ilo tonsi di sinumbali'ddi do hilo'd wawayaan diti Kiim do Tuhan, om losuon id hilo'. Om kanon nogindo do mikuwo'd di roti di hiri'd balatak di sinuangan do porsombahan do kopomilian, do miagal di pinonuhuan do Tuhan. 32 Mositi' nod sorobon ngai' o tonsi ko' roti dit oolu'. 33 Kada' kou no kopio tongkiad do mantad hilo'd wawayaan di Kiim do Tuhan do solinaid do turu' o tadau, dot a' po owonsoi ngai' it apatut do wonsoyon do kopomilian dokoyu. 34 Tuhan i' o minonuhu' dati' do momonsoi diti winonsoi toko' baino', om oompunan indo o dusa dokoyu. 35 Om mositi' nod mundorong kou do hilo'd toning di wawayaan di Kiim do Tuhan do solinaid do turu' o tadau om turu' o totuong, om atanud i' i pinonuhuan do Tuhan. Ondung a' dokoyu wonsoyon o miagal diri, om apatai kou no moti'. Tu' iri no o pinonuhuan do Tuhan dot id doho',” ka dau. 36 Om wonsoyo' ngai' nopoddi di Harun om i tangaanak dau i pinonuhuan do Tuhan do pinolombus di Musa.

Oturan 9

Pinapatahak i Harun do Porsombahan

1 Tadau poddi kawagu di nopongo i pagadatan do kopomilian, om lohowo' nod i Musa i Harun, om i tangaanak di Harun, om i boyoon dot Israil. 2 Om boros ka dau dot id di Harun, “Ongoi panganu'd songinan o sapi' do tontoluhan dit omulok po, om songinan o dumba' do tontoluhan dit aiso' o bohiton do tinan. Om patahakon nori do maan do porsombahan dot id Tuhan. Iri nopo sapi' om maan do porsombahan do pangampun do dusa om iri no dumba' om maan do porsombahan do sorobon. 3 Om sunudan nondo i tulun dot Israil do manganu do kambing do tontoluhan do maan do porsombahan do pangampun do dusa, om songinan o sapi' di sontoun nogi' o tumur, om songinan o tanak do dumba' di sontoun o tumur, om it aiso' o bohiton do tinan do maan do porsombahan do sorobon. 4 Om suhuon no iyolo' do mongigit do songinan o sapi' do tontoluhan om songinan o kambing do tontoluhan do maan do porsombahan do piombolutan. Om mositi' nod patahakon diyolo' dot id Tuhan i tayam-tayam diri do mitonggoi di porsombahan do gandum di rinalatan do tumau. Om mositi' nod wonsoyon diyolo' o miagal diri tu' tadau nod baino' do mintalang o Tuhan dot id diyolo',” ka. 5 Om igitai ngai' nopo diyolo' do hiri'd dotimbabaan di Kiim i pinonuhuan di Musa diri. Om timung ngai' no i tulun dot Israil do hiri do suminambayang dot id Tuhan. 6 Om boros ka di Musa, “Sinuhu' kou'd Tuhan do momonsoi do miagal diti om kokito kou indo di tulinau di kosorong kopio do tanda' do koropohon do Tuhan,” ka dau. 7 Om boros ka di Musa dot id di Harun, “Ongoi do hilo'd pananaraban do porsombahan, om papatahak nod porsombahan do pangampun do dusa om porsombahan di sorobon do hilo', om oompunan i' do Tuhan o dusa nu om dusa do koinsanai'd tulun do diti. Om wonsoyon no o miagal diri, do tumanud di pinonuhuan do Tuhan,” ka dau. 8 Om ongoi no i Harun do hiri'd pananaraban do porsombahan om sumbolio' no dau i sapi'd tontoluhan dit okoro' po do numaan do porsombahan di sinumbali' do pangampun di dusa dau. 9 Om ngoyo' noddi di tangaanak di Harun i raha' di sapi'ddi om patahako' no diyolo' dot id di Harun. Om potobungo' nod Harun o tunturu' dau do hiri'd raha' om pogihilo' no do hiri'd sinangau-sangau dot id pointikid-tikid di sunduk di pananaraban do porsombahan. Om iri nopoddi i noolu' di raha' om poiyaso' no dau do hiri'd poimpahan di pananaraban do porsombahan. 10 Om iri nopo lunok, om i lusou-lusou, om i bohogian di tundu-undu' di sapi' dit osonong kopio, om sinorob dau do hiri'd pananaraban do porsombahan do miagal di pinonuhuan do Tuhan dot id di Musa. 11 Nga' iri nopo tonsi om i kulit di sapi'ddi om hiri'd soliwan di kokiiman o pinanaraban dau. 12 Om ngoyo' noddi di Harun i tayam-tayam di maan dau do porsombahan di sorobon do maan do dau, om sumbolio' no dau. Om ngoyo' noddi di tangaanak di Harun i raha' om patahako' no dot id di Harun. Om poiyaso' no di Harun i raha'ddi do hiri'd misingobik om hiri'd misingompok di pananaraban do porsombahan. 13 Om patahako' nogiddi diyolo' di Harun i tulu om i popot do suwai di tayam-tayam diri, om sorobo' no di Harun iri do hiri'd pananaraban do porsombahan. 14 Om ougai no dau i suang do tian om i gakod di tayam-tayam. Om sorobo' no dau do hiri'd pananaraban do porsombahan, do pinotimpak di noolu-olu' di porsombahan di sorobon. 15 Om kopongo poddi ngai' iri, om patahako' nogi' di Harun i porsombahan do nigitan di tulun dot ogumu'. Om ngoyo' no dau i kambing di patahakon do maan do porsombahan do pangampun do dusa di tulun dot ogumu'. Om sumbolio' no dau i kambing diri om patahako' no dau do miagal di pinapatahak dau di porsombahan do maan do pangampun do dusa dau. 16 Om ngoyo' nogiddi dau i tayam-tayam di natantu' mantad do maan do porsombahan di sorobon, om patahako' no dau do tumanud dit oturan. 17 Om pinatahak nogi' dau i porsombahan do gandum. Om anu no iyau do songonggom di tapung om sorobo' no dau do hiri'd pananaraban do porsombahan. (Iti nopo nga' pomoruhang di porsombahan di sorobon do monikid tadau.) 18 Om sumbolio' no dau i sapi' do tontoluhan om i dumba' do tontoluhan do maan do porsombahan do piombolutan do maan di tulun dot Israil. Om ngoyo' no di tangaanak di Harun i raha' om patahako' no diyolo' dot id di Harun, om poiyaso' no di Harun i raha'ddi do hiri'd misingobik om hiri'd misingompok di pananaraban do porsombahan. 19 Om iri nopo popot di sapi' om i dumba' dit ongkilunok, 20 om pinasakai dau di kangkab di duwo o tayam-tayam diri, om igitai nogiddi dau do minongoi do hiri'd pananaraban do porsombahan. Om sorobo' no dau i lunok diri do hiri'd pananaraban do porsombahan, 21 om patahako' no dau i kangkab om i gakod di tayam-tayam diri do maan do porsombahan di pinotobilang do maan do don Tuhan, i bohogian dit onuon dit imam do miagal di pinonuhuan di Musa. 22 Om kopongo ngai' poddi di Harun do papatahak i porsombahan diri, om poinsawato' no dau o longon dau do kasahau di tulun dot ogumu', om barakatai no dau iyolo'. Om lintuhun nogiddi iyau. 23 Om suang no i Musa om i Harun do hiri'd Kiim do Tuhan, om kosoliwan poddi iyolo' om barakatai no diyolo' i tulun dot ogumu'. Om intalang no i tulinau di kosorong kopio do tanda' do nakarapou o Tuhan, dot id tulun dit ogumu' om kokito no diyolo' iri. 24 Om sigog iddi do porikoto' do Tuhan o tapui, do minonorob di pananaraban do porsombahan. Om soira' di nokito di tulun dot ogumu' o miagal diri, om pomogiak ngai' nopo iyolo' om otud no do tuminuku'.

Oturan 10

Dusa di Nadab om i Abihu

1 Insan tadau om ngoyo' no di Nadab om i Abihu i talam di poiiyanan diyolo'd tapui. Iyolo' nopoddi om tangaanak di Harun. Om suangai no diyolo'd popou i talam diri, om ruhangai no diyolo'd kominyan; om patahako' nogiddi diyolo' dot id Tuhan. Nga' iri nopo tapui'ddi om a' i' olidang, tu' a' i' iyolo'd Tuhan sinuhu' do papatahak diri. 2 Om sigog nopoddi do polintuhuno' nod Tuhan o tapui do minonorob diyolo', gisom do napatai iyolo' do hiri'd Kiim do Tuhan. 3 Om boros kaddi di Musa dot id di Harun, “Iti no o komoyon do Tuhan di boros dau do poingkaa, ‘Koinsanai di tulun di momonsoi'd karaja' ku om mositi' no do momusou doho', tu' iyoho' noo o Kinorohingan, om pointalangon ku indo o kagayaan ku dot id tulun ku,’ ka,” ka dau. Nga' aiso' id komi di Harun. 4 Om lohowo' no di Musa i Misail om i Ilsapan. Iyolo' nopo om tangaanak di Usiol, i tamanon di Harun. Om boros ka di Musa dot id diyolo', “Kainou'd hiti, om ngoyon ngai' i' dokoyu antayango' ilo rata' di kamanakon dokoyu do sumoliwan diti Kiim dot Olidang; om posoliwanon i' diti kokiiman,” ka dau. 5 Om rikot noddi iyolo' om antayango' no diyolo' i rata, nga' hiri nod pakayan o nigitan diyolo' do tontok di minangantayang di rata'. Om posoliwano' no diyolo' di kokiiman i rata'ddi, do miagal di pinonuhuan di Musa. 6 Om boro-boros noddi i Musa dot id di Harun om id di Iliasar om id di Itamar, i tangaanak di Harun. Boros ka dau, “Kada' dokoyu pologoso' dot a' sudayon ino tobuk dokoyu, om kada' dokoyu hurako' ino pakayan dokoyu do pointalang do mogihad kou. Tu' ondung wonsoyon dokoyu o miagal diri om apatai kou no moti'. Om otogod nondo o Tuhan do koinsanai'd tulun dot Israil. Nga' koino-ino i' o koinsanai di tulun dot Israil di suwai do mogihad do kinapatayon di duwo o tulun diri, i pinatai di tapui do mantad id Tuhan. 7 Kada' kou soliwan diti wawayaan do Kiim, om a' kou i' apatai. Tu' nokotobilang kou no do momonsoi do karaja di don Tuhan, do tontok di tinuntugan kou di tumau,” ka dau. Om wonsoyo' no diyolo' o miagal di pinoboros di Musa.

Oturan do Tonudon dot Imam

8 Om boros ka do Tuhan dot id di Harun, 9 “A' kou no koino-ino do sumuang di Kiim dot Olidang, iya' om i tangaanak nu, ondung koponginum kou nod waig dot anggur ko' tiinumon di kaawuk. Om ondung sumuang kou, om apatai kou no moti'. Om iti no ot oturan dot apatut do tonudon do koinsanai'd sinakagon nu. 10 Pisuwai-suwayon no kopio dokoyu i dong Kinorohingan om i dong kogumuan, om it a' sosomu' om i sosomu' dot id pagantangan do tugama'. 11 Potudukon no kopio dot id tulun dot Israil o koinsanai dit oturan do nakatahak ku diya', di pinolombus di Musa,” ka. 12 Om boros kad Musa dot id di Harun, om id di Iliasar om id di Itamar, i tangaanak di Harun, “Ngoyo' dokoyu onuo' i porsombahan do gandum, i noolu' di porsombahan do taakanon di pinatahak dot id Tuhan. Om wonsoyon nori do roti dit a' ralatan do pangambang, om akanon i' do hilo'd toning di pananaraban do porsombahan, tu' iri nopo porsombahan diri om olidang no kopio. 13 Kanon no dokoyu i roti'ddi dot id kinoiyonon dit olidang; tu' iri no o dokoyu'd gontok, diya' om don tangaanak nu di tongokusai, do mantad id taakanon di pinatahak dot id Tuhan. Iri no o pinonuhuan do Tuhan doho'. 14 Nga' koino-ino kou i' om i tangaanak dokoyu'd kusai om tondu' do mangakan di kangkab om i gakod di tayam-tayam di numaan do porsombahan om i porsombahan do pinotobilang do maan do don Tuhan, it aanu dit imam. Honggo nopo o kinoiyonon dit olidang dot id pagantangan do tugama' om koino-ino no dokoyu'd iyonon do mangakan diri. 15 Om igitan nondo diyolo' i gakod om i kangkab di tayam-tayam diri do tontok di patahakon i lunok do maan do porsombahan do taakanon dot id Tuhan. Iri nopo popot do tayam-tayam diri om gontok no dokoyu om gontok di tangaanak dokoyu do gisom dot alaid, do miagal di pinonuhuan do Tuhan,” ka dau. 16 Om uhoto' no di Musa ondung hinonggo i kambing do maan do porsombahan do pangampun do dusa. Om koilaai no dau do nosorob no i kambing diri. Om kotogod noddi iyau di Iliasar om i Itamar. Om boros ka dau, 17 “Nokuro tu' okon ko' id kinoiyonon dit olidang o pinangakanan dokoyu di porsombahan do pangampun do dusa'ddi? Olidang tomod moti' iri, om pinatahak pogi' do Tuhan iri dot id dokoyu nga' maan do pangampun do dusa diti tulun dot ogumu'. 18 Om mositi' no daa do hilo'd Kiim dot Olidang o pinangakanan dokoyu di porsombahan diri do miagal di pinonuhuan ku dokoyu, tu' a' i' noigitan i raha' di kambing diri do hilo'd Kiim dot Olidang,” ka dau. 19 Om boros ka di Harun do suminimbar, “Poingkuro no daa do nakan ku i porsombahan do pangampun do dusa'ddi di tadau baino'? Nokoinsonong i' tuu daa do ginawo'd Tuhan iri? Nakatahak no di tulun dot ogumu' i porsombahan do pangampun do dusa om i porsombahan di sorobon dot id Tuhan di tadau baino', nga' nosiliu kasai' i' iti kosusaan dot id doho',” ka dau. 20 Om natapatan iddi i Musa do nokorongou di pinosimbar di Harun do miagal diri.

Oturan 11

Nintorusan di Koino-ino do Kanon om it A' Koino-ino do Kanon

1 Om patahako' nod Tuhan dot id di Musa om id di Harun iti piro-piro ot oturan, 2-3 do patahakon dot id tulun dot Israil. Nunu nopo o nintorusan di poingiyon do hiti'd tindal, i manapa' di kanon dau, om i nopilapak o sondulu om koino-ino no dokoyu'd kanon. 4-6 Nga' iri nopo unta, om i palanuk, om i tikus balanda' om a' i' koino-ino do kanon. Mositi' nod pokososomuon ngai' o nintorusan diri tu' mulong piya do sapaon diyolo' i kanon diyolo', nga' a' i' nopilapak o sondulu diyolo'. 7 Wogok nga' a' i' koino-ino do kanon. Om mositi' nod pokososomuon i wogok tu' nopilapak piya daa o sondulu nga' a' i' i wogok manapa' di kanon dau. 8 Kada' kou no kopio pangakan do nintorusan diri om kada' kou ongoi igit do nintorusan diri di nangapatai piya, tu' nintorusan nopoddi om sosomu' i'. 9 Koino-ino kou i' do mangakan do nunu nopo kasada' di kisorod om kisisi'. 10 Nga' nunu nopo o nintorusan di poingiyon do hilo'd waig dit aiso' o sorod om aiso' o sisi', om amu' no koino-ino'd kanon. 11 Nintorusan nopo do miagal diri om pokososomuon no. Amu' nori koino-ino do kanon, om amu' koino-ino do mongoi kama'.2|60|HK7C|Wogok, unta, tikus talun, tikus belanda|11.11 12 Kada' kou no kopio pangakan do nunu nopo i poingiyon dot id suang do waig dit aiso' o sorod om aiso' o sisi'. 13-19 Kada' kou no kopio pangakan dot ongoiso' piya do tombolog diti: kondiu, puok, simpupulu, kondiu baras, bangkahak, tombolog di roitan do burung unta, putik rahat, luungon, montis, luing, tubou, om gair. 20 Om koinsanai di sontulud-tulud dit ongokooro' om i sangkamang-kamang, nga' pokososomuon ngai' no; 21 suwai nondo ko' i mimpod-simpod do mamanau. 22 Om koino-ino kou i' do mangakan do katat, om ngatit, om godu. 23 Nga' koinsanai dit ongkitalad dit ongokooro' om i sangkamang-kamang om mositi' no do pokososomuon. 24-28 Om isai nopo o koigit do tinan do nintorusan di nangarait diti di nangapatai om sosomu' no do gisom do sosodopon: koinsanai di nintorusan di kisondulu (suwai nondo ko' i nopilapak o sondulu om i manapa' di kanon dau) om i kigakod dot apat dit atarom o sondulu. Isai nopo o koigit do tinan do nintorusan diri di nangapatai om mositi' nod pupuan i pakayan dau, nga' sosomu' po ma kasai' iyau do gisom do sosodopon. 29-30 Iri nopo tikus do gouton, om i tikus dot angagayo om i tikus dot ongokoro', om tugarang, om pokososomuon ngai' nopo. 31 Om isai nopo o koigit di nintorusan diri di nangapatai om sosomu' no iyau do gisom do sosodopon. 32 Om ondung aratu' i tinan do nintorusan diri di napatai no dot id nunu nopo o koburu-buruon, dot iri tuu kayu, ko' kain, ko' kulit, ko' karung do winonsoi, om ososomu' nori, om mositi' no do poobugon dot id waig. Nga' poingkuro piya nga' sosomu' kasai' nori do gisom do sosodopon. 33 Om ondung aratu' i tinan di nintorusan diri di napatai no dot id kuron, om kotonggoi ngai' no i poinsuang di kuron dot ososomu', om iri kuron nga' mositi' no do babakon. 34 Iri nopo taakanon di koubasanan i' daa do mangakan, om ososomu' ngai' no dot ondung notungu nori do waig do mantad id kuron di nososomu'. Om iri i milo i' daa dot inumon dot id suang do kuron di nososomu' nga' kotonggoi no dot ososomu'. 35 Nunu nopo o korotuon di tinan di nintorusan diri di napatai no om ososomu' no; ondung i ropuhan do tana' ko' i pagagansakan di tana' do winonsoi o korotuon diri om mositi' no do babakon. 36 Nunu nopo ot otopisan di tinan di nintorusan di napatai'ddi om sosomu' no; nga' iri nopondo tudan do waig om i torobong om a' i' ososomu', tu' iti nopo om a' i' ososomu'. 37 Ondung haro ot ongoiso' do nintorusan di napatai dot aratu' dot id sakai di linsou di maan do tonomon, om a' i' ososomu' i linsou. 38 Nga' ondung poirandam do waig i linsou, om orotuan nondo di tinan di nintorusan di napatai'ddi, om ososomu' no i linsou. 39 Ondung haro o tulun do koigit do nintorusan di napatai, i koino-ino piya daa do kanon, om sosomu' no o tulun diri do gisom do sosodopon. 40 Om ondung haro o tulun do kapangakan do tonsi di nintorusan di napatai'ddi --- i naanu do mantad id honggo nopo o bohogian do tinan di nintorusan diri --- om mositi' no do pupuan dau o pakayan dau, nga' sosomu' kasai' po mando iyau do gisom do sosodopon. Om isai nopo o mongigit do nintorusan di napatai'ddi om mositi' no do pupuan dau o pakayan dau, nga' sosomu' kasai' po mando iyau do gisom do sosodopon. 41 Kada' kou nogi' kopio pangakan do nunu nopo o bansa' do nintorusan dit ongokooro' do sampanau-panau do hilo'd tana', 42 dot iri tuu i kumamang ko' iri po i kigakod dot apat, ko' it ogumu' o gakod, tu' sosomu' ngai' nori. 43 Kada' dokoyu sosomuo' o tinan dokoyu do mangakan do nintorusan diri o ponosomu'. 44 Iyoho' no o Tuhan, i Kinorohingan dokoyu, iyo nopoddi om antaan-taan no dokoyu om olidang kasai' kou i' tu' olidang oku i' iyoho'. 45 Iyoho' no i Tuhan, i pinoposoliwan dokoyu do mantad hilo'd Masir, om osiliu oku indo do Kinorohingan dokoyu. Kumolidang kou no, tu' olidang oku i'. 46 Om iri no ot oturan do pasal do koinsanai do nintorusan om tombolog, om pasal do koinsanai di poingiyon dot id suang do waig, om koinsanai di nintorusan di mimpanau do hiti'd tana'. 47 Om ilaan no kopio dokoyu i kopisuayan dit a' sosomu' om i sosomu', om i nintorusan di koino-ino do kanon om it a' koino-ino do kanon do tumanud dot oturan do tugama'.

Oturan 12

Pomolidang do Tongoondu' dit Osusu

1 Om patahako' nod Tuhan dot id di Musa iti piro-piro ot oturan 2 do patahakon dot id tulun dot Israil. Soira' nopod haro o tondu' dot osusu, om kusai no o tanak dau, om sosomu' no i tondu'ddi dot id pagantangan do tugama' do solinaid do turu' o tadau; do miagal nopo di kososomuo' dau do tontok di haro o pomulanan dau. 3 Om orikot nopondo o tadau'd kawalu' om mositi' no do sunatan i tanak di kosususu'ddi. 4 Om katalib nopo i turu' o tadau, om tolu po nohopod om tolu o tadau di tondu' do pokososomuon, tu' ogumu' i' o raha' do nokosoliwan. Om katalib pondo iri om a' nogi' iyau sosomu'. Om tontok nopo dit a' po katalib i maso do kopomolidangan om a' po iyau koino-ino'd kumama' do nunu nopo it olidang ko' mongoi po suang di Kiim dot Olidang. 5 Soira' nopod haro o tondu' dot osusu, om tondu' no o tanak dau, om sosomu' no i tondu'ddi do solinaid do hopod om apat o tadau, do miagal do kososomuo' dau do tontok di haro o pomulanan dau. Om mantad nopoddi om onom po nohopod om onom o tadau di tondu' do pokososomuon tu' ogumu' i' o raha' do nokosoliwan. 6 Om atalib nopondo i maso'd kopomolidangan, do kusai tuu i tanak di pinogkosusu ko' tondu' po, om mositi' nod mongoi i tondu'ddi papatahak do porsombahan dot id imam do hiri'd wawayaan di Kiim do Tuhan. Porsombahan nopo do patahakon om songinan o tanak do dumba' di sontoun nogi' o tumur, do maan do porsombahan di sorobon, om songinan o punai ko' songinan o sikukur do maan do porsombahan do pangampun do dusa. 7 Om mositi' nod patahakon dit imam i porsombahan diri dot id Tuhan om wonsoyon i natantu' mantad do wonsoyon do pongidu' do kososomuo' di tondu', om olidang indo i tondu' dot id pagantangan do tugama'. Iri no ot apatut do wonsoyon di tondu', om oidu' indo i kososomuo' dau. 8 Ondung aiso' o panganu di tondu'ddi do tanak do dumba', om mositi' no do papatahak iyau do duwo o tinan do punai ko' duwo o tinan do sikukur. Iri nopo songinan om maan do porsombahan di sorobon om iri no tiso' om maan do porsombahan do pangampun do dusa. Om mositi' no do wonsoyon dit imam i natantu' mantad do wonsoyon do pongidu' di kososomuo' di tondu', om olidang indo i tondu'ddi dot id pagantangan do tugama'.

Oturan 13

Oturan do Pasal do Toruol do Kulit

1 Om patahako' nod Tuhan dot id di Musa om id di Harun iti piro-piro ot oturan: 2 Ondung haro o tulun di kitoruol o kulit, it oguruk ko' i kikupos ko' i haro o miagal di tinudu-tudu' dot ongopurak, i koiyo-iyo do sumiliu'd toruol dit araat do hiri'd kulit dau, om mositi' nod ngoyon i tulun diri posolowoto' dit imam di suminolusuk di Harun. 3 Om porisaon nondo dit imam o kulit di tulun di kitoruol diri. Ondung opurak i hulu do hiri'd kulit di kitoruol, om poillosod no i kulit, om iri no kopio toruol do kulit dot araat o nokoontok di tulun diri. Om poboroson nondo dit imam di suminolusuk di Harun do sosomu' i tulun diri. 4 Nga' ondung opurak no toomod i kulit, om a' poillosod i kulit, om a' opurak i hulu, om posuwai-suwayon nopondo dit imam i tulun diri do solinaid do turu' o tadau. 5 Om ngoyon nondo kawagu dit imam porisao' i tulun diri di koturu' do tadau, om ondung a' nokosimban om a' nakaralad i toruol dot okito dau, om posuwai-suwayon po dau i tulun diri do solinaid do turu' kawagu o tadau. 6 Om ngoyon nondo kawagu dit imam porisao' i tulun diri di koturu' do tadau. Om ondung natanus i toruol, om a' no nakaralad, om poboroson nondo dit imam dot olidang i tulun diri, om okon ko' toruol dot araat i toruol dau. Om pupuan nondo di tulun i pakayan dau om olidang i' iyau dot id pagantangan do tugama'. 7 Nga' ondung rumalad i toruol dot id tohuri ko' i nokoboros dit imam dot olidang i tulun diri, om mositi' no do mongoi kawagu i tulun diri solowot dit imam. 8 Om porisaon nondo kawagu dit imam i toruol di tulun diri, om ondung nakaralad, om poboroson no dit imam do sosomu' i tulun, tu' iri nopo om toruol nod kulit dit araat. 9 Iri nopo tulun di kitoruol do kulit dit araat, om mositi' nod ngoyon posolowoto' dit imam. 10 Om porisaon nondo dit imam o tulun diri. Ondung opurak i kulit di kitoruol, om i hulu nga' opurak om haro po o gandas, 11 om kitoruol no kopio dot araat i kulit di tulun diri. Om mositi' nod poboroson dit imam do sosomu' i tulun diri. Okon no ko' posuwai-suwayon po toomod, tu' atalang no do sosomu' i tulun diri. 12 Ondung rumalad i miagal di tinudu-tudu' dit opurak, gisom dot otongkop o tinan di tulun do mantad id gakod om gisom dot id tulu dau, 13 om mositi' nod ngoyon kawagu iyau porisao' dit imam. Ondung okito dit imam do nokotongkop nod tinan di tulun i miagal di tinudu-tudu' dot opurak diri, om i kulit di tulun nga' opurak ngai' noddi, om mositi' nod poboroson dit imam dot olidang i tulun diri. 14-15 Nga' ondung gumandas, om mositi' nod ngoyon kawagu iyau porisao' dit imam. Om ondung gandas kopio iri, om mositi' nod poboroson do sosomu' i tulun diri. Tu' iri no i gandas o tanda' do toruol do kulit dit araat i toruol dau. 16 Nga' ondung lumingos i gandas, om mumang kawagu purak, om mositi' nod mongoi i tulun solowot dit imam, 17 om oporisa' i' iyau kawagu. Om ondung nokopurak i guminandas, om poboroson no dit imam dot olidang i tulun diri. 18 Ondung haro o tulun do kuposon, om olingos no i kupos dau 19 nga' alaid-laid no om haro po o lumonit dot opurak ko' opurak daragang- ragang o kokitanan do hiri'd kinolingasan di kupos, om mositi' nod mongoi i tulun diri solowot dit imam 20 om oporisa' i' iyau. Om ondung nokolosod i kulit di minumang purak, om nokopurak i hulu do hiri, om mositi' nod poboroson dit imam do sosomu' i tulun diri. Iri nopo kupos om koimpuunon nod toruol do kusta. 21 Nga' ondung a' opurak i hulu do hiri'd kinolingasan di kupos, om a' poillosod i kulit, suwai ko' opurak nogi' ko' i kulit do suwai, om mositi' nod posuwai-suwayon dit imam i tulun diri do solinaid do turu' o tadau. 22 Ondung rumalad it opurak diri, om mositi' nod poboroson dit imam do sosomu' i tulun diri tu' toruol nod kulit dit araat o nokoontok dau. 23 Nga' ondung a' nokosimban om a' ruminalad it opurak, om iri i kinolingasan di kupos iri, om poboroson no dot olidang i tulun diri. 24 Ondung haro o tulun dot olonuk do tapui, om mumang nondo purak ko' opurak daragang-ragang i kulit do hiri'd nolonuk, 25 om mositi' nod porisaon po dit imam i tulun diri. Ondung mumang purak i hulu do hiri'd nolonuk diri, om poillosod no i kulit om norolihan nod toruol do kulit dit araat i nolonuk do tapui'ddi. Om mositi' nod poboroson dit imam do sosomu' i tulun diri. 26 Nga' ondung a' mumang purak i hulu do hiri'd nolonuk, om a' nokolosod i kulit, suwai ko' opurak nogi' o kokitanan, om mositi' nod posuwai-suwayon dit imam o tulun diri do solinaid do turu' o tadau. 27 Om ngoyon nondo kawagu dit imam porisao' i toruol di tulun diri do koturu'd tadau. Om ondung nakaralad i toruol, om iri no o tanda' dot i toruol do kusta o nokoontok di tulun diri. Om mositi' nod poboroson do sosomu' i tulun diri. 28 Nga' ondung a' sumimban om a' rumalad it opurak diri, suwai ko' opurak nogi' o kokitanan, om okon i' ko' toruol do kusta iri. Om mositi' nod poboroson dit imam dot olidang i tulun diri, tu' iri nopo om kinolingasan i' di nolonuk do tapui. 29 Ondung haro o kusai ko' tondu' di kitoruol o kulit do tulu, ko' kitoruol o hiri'd roo, 30 om mositi' nod ngoyon kopio dit imam porisao' iri. Ondung poillosod i kulit, om osilou om otigas i tobuk do hiri, om iri no o tanda' do toruol do kusta o nokoontok do tulun diri. Om mositi' nod poboroson do sosomu' i tulun diri. 31 Ondung a' poillosod i kulit di kitoruol, nga' aiso' no ma o tobuk dit osonong do hiri, do tontok di porisao' i' dit imam, om mositi' nod posuwai-suwayon i tulun diri do solinaid do turu' o tadau. 32 Om koturu' pondod tadau, om mositi' nod porisaon kawagu dit imam i kulit di kitoruol. Om ondung a' nakaralad i toruol diri om aiso' o tobuk dit ongosilou, om a' poillosod o kokitanan di kulit, 33 om mositi' nod bugaran di tulun o posorili' di kulit di kitoruol. Om posuwai-suwayon po kawagu dit imam i tulun diri do solinaid do turu' o tadau. 34 Om koturu' pondod tadau, om ngoyon no kawagu dit imam porisao' i toruol di tulun diri. Om ondung a' nakaralad i toruol, om a' poillosod i kulit, om poboroson nod olidang i tulun diri; om mositi' nod pupuan di tulun o pakayan dau. 35 Nga' ondung rumalad i toruol dot id tohuri ko' i pinoboros dot olidang i tulun diri, 36 om mositi' nod ngoyon dit imam porisao' kawagu i toruol di tulun diri. Ondung nakaralad kopio i toruol, om a' no minog dot antangan dit imam ondung haro ot osilou di tobuk, tu' atalang no do sosomu' i tulun diri. 37 Nga' ondung okito dit imam dot a' rumalad i toruol, om nokosuni no o tobuk dit ongosonong do hiri, om nolingos no i toruol diri. Om mositi' nod poboroson dit imam do nolingos i toruol om olidang i tulun diri. 38 Ondung haro o kusai ko' tondu' di haro o miagal do tinudu-tudu' dot opurak do hiri'd kulit, 39 om mositi' nod porisaon kopio dit imam o tulun diri. Ondung a' opurak no i kulit, om gurap i' toomod iri do nokoroliu do hiri'd kulit di tulun, om a' i' sosomu' i tulun diri. 40-41 Ondung alagasan o ponong id tipus ko' ponong id turos do tulu do tongokusai, om a' i' sosomu' i tulun diri, ondung nalagasan no toomod. 42 Nga' ondung haro o mimbulai dot opurak daragang-ragang do hiri'd nalagasan, om toruol nod kulit dit araat o nokoontok di tulun diri. 43 Om mositi' nod ngoyon kopio dit imam porisao' o tulun diri. Om ondung haro kopio it ongopurak daragang-ragang do hiri'd nalagasan, 44 om mositi' nod poboroson dit imam do sosomu' i tulun diri tu' noontok no do toruol do kusta o hiri'd tulu di tulun diri. 45 Om tulun nopo di noontok do toruol do kulit dit araat, om mositi' nod manampakai iyau do pakayan di nongohurak-hurak no, om a' sudayon o tobuk. Om mositi' nod tirungon dau o ponong id siriba' do rabas dau, om minggiak nogindo do poingkaa, “Sosomu'! Sosomu'!” ka. 46 Solinaid nopo di tulun do kitoruol do miagal diri, om sosomu' no iyau. Om mositi' no do hiri'd soliwan di kokiiman o tiyonon dau, it id sodu' do tulun do suwai.

Oturan do Pasal do Gorum

47 Soira' nopod haro o gorum dot id kain ko' id pakayan di kihulu-hulu ko' i kain linan 48 ko' id kulit ko' id nunu nopo i kulit do winonsoi, 49 om ondung otomou-tomou ko' aragang-ragang o kokitanan diri, om iri no kopio i gorum di rumalad iri, om mositi' nod ngoyon pokitanai dit imam iri. 50 Om antangan nondo dit imam i gorumon diri om posuwai-suwayon no i gorumon do solinaid do turu' o tadau. 51 Om ngoyon no dau kawagu antangai iri di koturu'd tadau. Om nakaralad nopo i gorum, om sosomu' no i ginorumon diri. 52 Om mositi' nod tutudan dit imam i gorumon, tu' iri nopo om gorum di rumalad; om mositi' no do tapui o pamaraag diri. 53 Nga' ondung a' nakaralad i gorum do hiri'd nokodokoton di gorum dot okito dit imam, 54 om monuhu' nondo iyau'd tulun do momupu' di ginorumon diri om posuwai-suwayon o poiyanan diri do solinaid do turu' o tadau. 55 Om ngoyon nondo kawagu dit imam antangai i gorumon diri, om ondung iyo kasai'ddi o kokitanan di gorum, dot a' piya daa nakaralad, om sosomu' no i ginorumon diri; om mositi' nod tutudan, do hiri tuu'd soibau ko' hiri pod saalom i gorumon. 56 Nga' ondung natanus i gorum di ngoyon kawagu dit imam antangai i ginorumon, om hurakon nondo dau i ginorumon do mantad hiri'd kain ko' mantad hiri'd kulit. 57 Nga' ondung mimbulai kawagu i gorum, om rumalad no kawagu, om mositi' nod tutudan di sanganu i ginorumon diri. 58 Ondung pupuan dau i ginorumon om a' nondo mimbulai kawagu i gorum, om mositi' nod pupuan kawagu dau iri, om olidang i' iri dot id pagantangan do tugama'. 59 Om iri no o toturan do pasal do gorum dot id pakayan, dot iri tuu i kain do kihulu-hulu ko' iri po kain linan, ko' nunu nopo i kulit do winonsoi.

Oturan 14

Pomolidang do Tulun di Kolilingasai do Toruol do Kusta

1 Om patahako' nod Tuhan dot id di Musa 2 iti piro-piro ot oturan do pasal do kowoyo-woyoo' do momolidang do tulun di nolingasan do mantad id toruol do kusta. Tontok nopo di tadau do poboroson dot olidang i tulun diri, om mositi' no do ngoyon iyau posolowoto' dit imam. 3 Om angatan nondo iyau dit imam do sumoliwan di kokiiman om porisaon nogindo iyau. Ondung nolingos no kopio i toruol dau, 4 om suhuon nondo dit imam i tulun diri do papatahak do duwo o tombolog dit a' sosomu', om sallangod o kayu sedar do Libanon, om sampatod o tali dit aragang, om sompuun o sakot di roitan do hisop. 5 Om iri nopondo tiso' di tombolog om mositi' no do kokoron om sahawon di kuron di kisuang do waig do mantad id tudan do waig. 6 Om iri no tombolog di tiso', om i kayu sedar, om i tali dot aragang om i sakot di roitan do hisop, om potobungon di raha' di tombolog di kinokor. 7 Om powowoson nondo dit imam dot inturu' i raha' di tombolog diri do hiri'd tulun di nolingasan. Om poboroson nogindo dit imam dot olidang i tulun diri. Om iri nopondo i tombolog di poimiyau om mositi' no do poiduwon do hilo'd talun. 8 Om pupuan nondo di tulun o pakayan dau, om bugaron ngai' o tobuk dau, om mongoi podsu'; om olidang nogindo iyau dot id pagantangan do tugama'. Om koino-ino nondo iyau do sumuang do hiri'd kokiiman nga' hiri po mando kasai' iyau'd soliwan di kiim dau do solinaid do turu' o tadau. 9 Om koturu' nopondod tadau, om bugaron po kawagu dau o tulu dau, om bugaron o ganggut, om bugaron ngai' o hulu do tinan dau; om pupuan nogindo dau o pakayan dau om mongoi podsu', om olidang nogindo iyau dot id pagantangan do tugama'. 10 Kawalu' nopondod tadau om mositi' nod paatod iyau do duwo o tanak do dumba' di tontoluhan, om songinan o dumba' do tondu' di sontoun nogi' o tumur om it aiso' o bohiton do tinan, om tolu kilogram do tapung di rinalatan do tumau do saitun, om sompitolu di songlito o tumau do saitun. 11 Om mositi' no dot angatan dit imam i tulun diri om igitan ngai' i porsombahan dau'ddi do hiri'd wawayaan di Kiim do Tuhan. 12 Om ngoyon nondo dit imam o tiso' di tanak do dumba' do tontoluhan diri om i tumau do saitun di sompitolu di sonlito. Om patahakon nondo dau iri do maan do porsombahan di poningolon. Om iri nopo nga' porsombahan di pinotobilang do maan do don Tuhan, om iri no it imam o kaanu'ddi. 13 Om mositi' no do sumbolion dau i tanak do dumba'ddi dot id kinoiyonon dit olidang, i hiri'd ponunumbolian do tayam-tayam di maan do porsombahan do pangampun do dusa om i porsombahan di sorobon. Om mositi' no do hiri o ponumbolian di dumba'ddi tu' iri nopo porsombahan do poningolon, om iyo i' di porsombahan do pangampun do dusa tu' olidang kopio om iri no imam o kaanu. 14 Om manu nondo it imam dot ongokooro' di raha' di tanak do dumba'ddi om pogihilon no do hiri'd tolingo'd wanan, om hiri'd posolon do longon do wanan om hiri'd posolon do lapap do wanan di tulun di poboroson dot olidang dot id pagantangan do tugama'. 15 Om manu it imam dot ongokooro' di tumau do saitun om poihibon no do hiri'd palad dau'd gibang. 16 Om potuduwon nogindo dit imam o tiso' di tunturu' do longon dau'd wanan di tumau do saitun diri, om powowoson dot inturu' ot ongokooro'ddi do hiri'd Kiim do Tuhan. 17 Om manu nogindo iyau dot ongokooro' di tumau di hiri'd palad dau, om ongokooro' di raha' di dumba', om pogihilon nogindo do hiri'd tolingo'd wanan, om hiri'd posolon do longon do wanan, om hiri'd posolon do lapap do wanan di tulun di poboroson dot olidang dot id pagantangan do tugama'. 18 Om iri nopondo tumau di noolu' do hiri'd palad dau, om poumahon do tulu di tulun diri. Om iyo noddi o wonsoyon do maan do pomolidang do tumanud dit oturan do tugama'. 19 Om patahakon nogindo dit imam i porsombahan do pangampun do dusa om wonsoyon ngai' i maan do pomolidang do tumanud dot oturan do tugama'. Om owonsoi ngai' po dau iri om sumbolion nogindo dau i tayam-tayam do maan do porsombahan di sorobon. 20 Om patahakon nondo dau iri do mitonggoi di porsombahan do gandum do hiri'd pananaraban do porsombahan. Om iyo noddi o wonsoyon dit imam do maan do pomolidang do tinan do tumanud dot oturan do tugama'. Om olidang nondo i tulun diri dot id pagantangan do tugama'. 21 Ondung mosikin i tulun diri, om aiso' no o panganu dau di tolu o tayam-tayam di natantu' mantad do maan do porsombahan, om migit nopo iyau do songinan o dumba' do tontoluhan di tanak po do maan do porsombahan do poningolon, om maan do porsombahan di potobilangon do maan do don Tuhan, it aanu dit imam. Om songkilogram nopo o tapung di rinalatan do tumau do saitun o patahakon dau do maan do porsombahan do gandum om sompitolu di songlito o tumau do saitun. 22 Om papatahak nogi' iyau do duwo o tinan do punai ko' duwo o tinan do sikukur. Songinan o maan do porsombahan do pangampun do dusa om songinan o maan do porsombahan di sorobon. 23 Om kawalu' nopondod tadau di kopomolidangan do tinan dau, om mositi' nod ngoyon ngai' dau patahako' dot id imam i porsombahan diri do hiri'd wawayaan di Kiim dot Olidang. 24 Om ngoyon nondo dit imam i dumba' om i tumau do saitun diri om patahakon no do maan do porsombahan di potobilangon do maan do don Tuhan, om iri nopo om aanu no dit imam. 25 Om sumbolion nondo dit imam i dumba'ddi om manu dot ongokooro' di raha' om pogihilon nogindo do hiri'd tolingo'd wanan, om hiri'd posolon do longon do wanan, om hiri'd posolon do lapap do wanan di tulun di poboroson dot olidang. 26 Om poihibon nondo dit imam ot ongokooro' di tumau do hiri'd palad dau'd gibang. 27 Om potuduwon o tiso' di tunturu' do longon dau'd wanan om powowoson nogindo dau dot inturu' do hiri'd Kiim do Tuhan. 28 Om gihilan nondo dau di tumau o hiri'd ginihilan dau di raha': hiri'd tolingo'd wanan, om hiri'd posolon do longon do wanan, om hiri'd posolon do lapap do wanan di tulun di poboroson dot olidang. 29 Om iri nopondo noolu' di tumau om poumahon do hiri'd tulu di tulun diri. Om iyo noddi o kowoyo-woyoo' do momolidang do tinan do tumanud dot oturan do tugama'. 30 Om patahakon nogindo dau o tiso' di punai ko' sikukur 31 do maan do porsombahan do pangampun do dusa, om iri no tiso' om maan do porsombahan di sorobon do mitonggoi di porsombahan do gandum. Om iyo noddi o wonsoyon dit imam do momolidang do tinan do tulun do tumanud dot oturan do tugama'. 32 Iri no ot oturan do tonudon do tulun di kitoruol do kusta nga' it aiso' o panganu di natantu' mantad do maan do porsombahan do pomolidang do tinan dau.

Gorum dot id Walai

33 Om patahako' nod Tuhan dot id di Musa om id di Harun 34 iti piro-piro o toturan do pasal di walai dot adakatan do gorum di rumalad. (Iti nopo toturan diti om tonudon nopo om kosuang i tulun dot Israil di pomogunan do Kanaan, i patahakon do Tuhan dot id diyolo' do maan do diyolo'd songonuon.) 35 Isai nopo o kokito do gorum do hiri'd walai dau, om mositi' no do mongoi pomisunud dit imam do pasal diri. 36 Om monuhu' nondo it imam do posoliwan do koinsanai di poinsuang di walai do tintod dau do mongoi pogontong kopio di gorum; tu' a' nopo posoliwanon nga' oinsanan nopo i poinsuang di walai'ddi do pokososomuon. Om mongoi nogindo it imam do hiri'd walai'ddi 37 do mongoi pogontong di gorumon. Ondung haro ot otomou-tomou ko' aragang- ragang do potomborok do pasarabak di limput, 38 om tongkiadan no dau i walai om ontiilan do solinaid do turu' o tadau. 39 Om koturu' pondod tadau om gumuli' no kawagu iyau do mongoi pogontong di gorum. Ondung nakaralad i gorum, 40-41 om monuhu' no iyau do tulun do mongidu' di watu di nadakatan do gorum, om iduwon ngai' i limput di ponong id suang. Om iri nopondo pinonorokot om i watu di nidu'ddi om pataamon do hiri'd kinoiyonon di sosomu' do hiri'd soliwan di bandar. 42 Om tingalanan nogindo do watu do wagu i watu di nidu'ddi. Om lopisan do ponorokot do wagu i limput di walai. 43 Ondung mimbulai kawagu i gorum do hiri'd walai dot id tohuri ko' i noidu' i watu di nadakatan do gorum, om nokisasan om nolopisan di ponorokot i walai, 44 om mositi' nod ngoyon kawagu dit imam antangai i walai'ddi. Ondung nakaralad i gorum om sosomu' ngai' no i walai'ddi. 45 Om mositi' nod huyason i walai, om iri nopondo watu om i kayu, om i pinonorokot do pinomonsoi di walai om mositi' nod posoliwanon di bandar om pataamon do hiri'd kinoiyonon di sosomu'. 46 Isai nopo o sumuang di walai di maso pod poontiil, om sosomu' no do gisom do sosodopon. 47 Isai nopo o kolii ko' kaakan do hiri'd walai'ddi om mositi' no do pupuan i pakayan dau. 48 Ondung a' mimbulai i gorum do hiri'd walai di nolopisan di pinonorokot do wagu di ngoyon dit imam antangai, om poboroson no dot olidang i walai, tu' aiso' noddi o gorum do hiri. 49 Om manganu nondo it imam do duwo o tombolog, om piro-piro o langod do kayu sedar, om sampatod o tali dit aragang, om sompuun o sakot di roitan do hisop. 50 Om mositi' nod kokoron dau i tiso' di tombolog diri do sahawon do kuron di kisuang do waig di kaanu do mantad id tudan do waig. 51 Om mositi' nod ngoyon dau poobugo' di raha' di tombolog di kinokor i kayu sedar, om i hisop, om i tali dot aragang diri, om i tombolog di miyau. Om poobugon ngai' dau iri do hiri'd waig di kaanu'ddi. Om wawasan nogindo dau di raha' i walai'ddi dot inturu' kowowos. 52-53 Om iri nopo tombolog di poimiyau om mositi' nod poiduwon dit imam do hiri'd talun, i hiri'd soliwan di bandar. Om iyo noddi o wonsoyon dit imam do pomolidang di walai do tumanud dot oturan do tugama', om olidang indo i walai'ddi dot id pagantangan do tugama'. 54 Om iyo noddi ot oturan do pasal do toruol do kusta, 55-56 om pasal dit oguruk, om i kupos, om i miagal di tinudu-tudu' dot ongopurak ko' iri po lumonit, om pasal do gorum dot id pakayan ko' id walai. 57 Om iti nopo piro-piro o toturan diti nga' pongilo ondung sosomu' tuu ko' amu' o nunu nopo dot id pagantangan do tugama'.

Oturan 15

I Sosomu' do Mantad id Tulun

1 Om patahako' nod Tuhan dot id di Musa om id di Harun iti piro-piro o toturan 2 do patahakon dot id tulun dot Israil. Iri nopo miagal-agal do waig di sumoliwan do mantad id wayaan do sobu do tongokusai om sosomu' i'; 3 dot iri tuu i kotobpus kopio ko' iri po it opusus, om a' indo kotobpus. 4 Om iri toodopon dot oirikahanan ko' oodop do kusai'ddi nga' kotonggoi nod sosomu'. 5-8 Om isai nopo o tulun di kakama' do tulun di nokopoulai di miagal-agal do waig diri, ko' kakabai di toodopon dau, ko' koirikau do hiri'd nirikohonon dau, ko' it odulaan do tulun diri, om mositi' nod pupuan dau i pakayan dau om modsu'; nga' sosomu' no i tulun diri do gisom do sosodopon. 9 Iri nopo pakol ko' timpohon dot oirikahanan do tulun di nokopoulai di miagal-agal do waig diri, om sosomu' no. 10-11 Isai nopo i kakama' ko' kagantai do nunu nopo i noirikahanan ko' i noigitan do tulun do miagal diri, dot a' po iyau kopongoug do palad dot id gulu, om sosomu' no o tulun diri do gisom do sosodopon. 12 Iri nopo kuron dot igitan do tulun do miagal diri om mositi' nod babakon, om lihungan i tompurung di kayu do winonsoi, dit oigitan dau. 13 Olingasan nopondo o tulun di haro o miagal-agal do waig do sumoliwan do mantad id wayaan do sobu dau, iri no i toruol dau'ddi, om mositi' nod mandad iyau do solinaid do turu' o tadau. Om katalib pondo iri om pupuan nogi' dau i pakayan dau om mongoi podsu' dot id tudan do waig, om olidang nogindo iyau dot id pagantangan do tugama'. 14 Om kawalu' pondod tadau om mositi' nod paatod iyau do duwo o tinan do punai ko' sikukur do hiri'd wawayaan di Kiim do Tuhan do ngoyon patahako' dit imam. 15 Om patahakon nondo dit imam o tiso' di tombolog diri do maan do porsombahan do pangampun do dusa om iri no tiso' om maan do porsombahan di sorobon. Om iyo noddi o wonsoyon dit imam do pomolidang do tulun diri do tumanud dit oturan do tugama'. 16 Soira' nopo do kasabput do kusai o narot dau, om mositi' nod modsu' iyau, nga' sosomu' po ma kasai' iyau do gisom do sosodopon. 17 Nunu nopo i kain ko' kulit do winonsoi dot osobputan di narot om mositi' nod pupuan, om sosomu' nori do gisom do sosodopon. 18 Kopidudun nopo o kusai om tondu', om mositi' nod modsu' goduwo iyolo', om sosomu' no iyolo' do gisom do sosodopon. 19 Tontok nopod pomulanan do tondu', om sosomu' no i tondu'ddi do solinaid do turu' o tadau. Om isai nopo i koigit dau om sosomu' no do gisom do sosodopon. 20 Nunu nopo it oirikahanan dau ko' it oliiyan dau do maso'd haro o pomulanan dau om sosomu' no. 21-23 Isai nopo o koigit do toodopon ko' koigit di noirikahanan di tondu'ddi nga' mositi' nod pupuan di tulun i pakayan dau om modsu'. Om sosomu' no i tulun diri do gisom do sosodopon. 24 Ondung haro o kusai do mongoi dudun do tondu' di maso'd haro o pomulanan, om orolihan no i kusai di kososomuo' di tondu'ddi om sosomu' no iyau do solinaid do turu' o tadau. Om honggo nopo o toodopon dot oodop dau nga' sosomu' no. 25 Ondung haro o tondu' do haro kasai' o raha' do sumoliwan do solinaid do piro-piro o tadau do suwai ko' i pomulanan dau ko' ondung alaid ko' mantad di koubasanan do tumingkod o pomulanan dau, om sosomu' no iyau do solinaid pod haro o raha' do sumoliwan, do miagal di kososomuo' dau di maso'd haro o pomulanan dau. 26 Om honggo nopo o toodopon di koliiyon dau ko' nunu nopo it oirikahanan dau do tontok do miagal iyau'ddi, om sosomu' no. 27 Isai nopo i koigit diri om kotonggoi nod sosomu'; om mositi' nod pupuan dau i kain dau om modsu'; om sosomu' kasai' no iyau do gisom do sosodopon. 28 Otingkod nopondo i raha' do sumoliwan, om mositi' nod mandad i tondu'ddi do solinaid do turu' o tadau, om olidang nogindo iyau dot id pagantangan do tugama'. 29 Om kawalu' pondod tadau om migit nondo iyau do duwo o tinan do punai ko' duwo o tinan do sikukur do ngoyon patahako' dit imam do hiri'd wawayaan di Kiim do Tuhan. 30 Om patahakon nondo dit imam o tiso' di tombolog diri do maan do porsombahan do pangampun do dusa om iri no tiso' om maan do porsombahan do sorobon. Om iyo noddi o wonsoyon dit imam do momolidang do tondu'ddi do tumanud dot oturan do tugama'. 31 Om sinuhu' do Tuhan i Musa do poposorou di tulun dot Israil do mongilo kopio ondung soira' iyolo'd ososomu' om soira' dot a' sosomu', om a' i' diyolo' ososomu' i Kiim do Tuhan, i hiri'd tanga' di kokiiman diyolo'. Tu' ondung koponosomu' iyolo' di Kiim dot Olidang, om patayon no iyolo'. 32 Om iri ngai' no ot oturan do tonudon di tongokusai di haro o miagal-agal do waig do sumoliwan do mantad id wayaan do sobu ko' i kopoulai do narot, 33 om i tonudon do tongoondu' do haro o pomulanan, om tonudon di tongokusai di kodudun di tongoondu' di haro o pomulanan.

Oturan 16

I Tadau do Kopongompunan do Dusa

1 Om boro-boros no o Tuhan dot id di Musa di napatai i duwo o tanak do kusai di Harun, dot i pinapatahak do tapui dit okon ko' korohian do Tuhan o nakapatayan. 2 Boros ka dau, “Sunudan no i Harun, i tobpinai nu, do tontok no di maso'd natantu' mantad do koino-ino iyau do mongoi do hiri'd dotirung di tabir, do sumuang di Bilik dit Olidang Kopio. Tu' hilo' oku nod mintalang do poirolot do haun, do hiri'd sawa-sawat di sompon di Kaban do Tumpongo. Ondung tumolibamban i Harun dot oturan diri, om apatai no iyau. 3 Kapatahak po iyau'd sapi' do tontoluhan dit okoro' po do maan do porsombahan do pangampun do dusa om kapatahak do songinan o dumba' do tontoluhan do maan do porsombahan di sorobon, om koino-ino nogi' iyau do sumuang di Bilik dit Olidang Kopio,” ka dau. 4 Om patahako' noddi do Tuhan iti piro-piro ot oturan. Tintod nopo di Harun do mongoi do hiri'd Bilik dit Olidang Kopio, om mositi' nod modsu' iyau om manampakai di pakayan do dong imam, i rasuk, om i soluar dot oniiba', om i tagkos, om i sigar di kain linan ngai' nopo do winonsoi. 5 Om mositi' nod onuan di tulun dot Israil i Harun do duwo o kambing do tontoluhan do maan do porsombahan do pangampun do dusa om songinan o dumba' do tontoluhan do maan do porsombahan di sorobon. 6 Om mositi' nod papatahak i Harun do songinan o sapi' do tontoluhan do maan do porsombahan do pananus do dusa dau om i dusa di sompiiyon dau. 7 Om igitan nogindo dau i duwo o kambing diri do hiri'd wawayaan di Kiim do Tuhan. 8 Hiri nopondo om undion nondo dau, do mamakai do duwo o watu do maan do pongilo. Iri nopo tiso' di watu om natandaan do “don Tuhan,” ka, om iri no tiso' om natandaan dot “di Asasil,” ka. 9 Om patahakon nondo di Harun i kambing di nopili' do don Tuhan do maan do porsombahan do pangampun do dusa. 10 Om iri no i kambing di nopili' do patahakon di Asasil, om miyahon nopo do papatahak dot id Tuhan om uyungon nogindo do kumaa do hiri'd tana' do kowotuan do pokoyoon dot id di Asasil, om oidu' i' i dusa di tulun dot Israil. 11 Soira' nopo do papatahak i Harun di sapi' do tontoluhan do maan do porsombahan do pangampun do dusa dau om i sompiiyon dau, 12 om mositi' no do mongoi iyau do talam di poiiyanan kasai' do tapui, om ponuon iri do popou di kisinikit po do mantad hiri'd pananaraban do porsombahan, om manu do duwo tonggom do kominyan dit atandai, om igitan nogindo iri do hiri'd suang di Bilik dit Olidang Kopio. 13 Om mositi' nod posuboon dau i kominyan diri do hiri'd tapui, i hiri'd dotoguangan do Tuhan. Om otirung indo di lisun i sompon di Kaban do Tumpongo, om a' i' dau okito i sompon, om a' indo iyau apatai. 14 Om mositi' nod manu iyau dot ongokooro' di raha' di sapi' om potuduwon nondo dau'd hiri o tunturu' dau, om powowoson do hiri'd dotimbabaan di Kaban do Tumpongo dot inturu' powowoso'. 15 Om owonsoi pondo o miagal diri, om sumbolion nogindo di Harun i kambing do maan do pangampun do dusa di tulun dot ogumu', om igitan i raha' di kambing diri do hiri'd Bilik dit Olidang Kopio. Om powowoson nogindo dau i raha'ddi do hiri'd sompon om hiri'd dotimbabaan di Kaban do Tumpongo, do miagal di pinopowowos iyau di raha' di sapi'. 16 Om iyo noddi o wonsoyon dau do pomolidang di Bilik dit Olidang Kopio do mantad id kososomuo' di tulun dot Israil om mantad id koinsanai'd dusa diyolo'. Om mositi' nod wonsoyon dau o miagal diri do pomolidang di Kiim dit Olidang, tu' hiri id tanga' di kokiiman o pinawansayan di Kiim dit Olidang, om iri nopo kokiiman nga' sosomu' i' dot id pagantangan do tugama'. 17 Mantad nopo di sumuang i' i Harun di Bilik dit Olidang Kopio do mongoi pomonsoi di natantu' mantad do wonsoyon do maan do pomolidang, om gisom do kosoliwan iyau, om kada' nod haro o tongoiso' piya'd tulun do poundorong do hiri'd suang di Kiim diri. Om owonsoi pondo di Harun iri do bagi'd tinan dau, om i sompiiyon dau, om bagi'd koinsanai di tulun, 18 om mositi' nod sumoliwan iyau do mongoi'd hiri'd pananaraban do porsombahan diri. Om mositi' nod manu iyau dot ongokooro' di raha' di sapi' om raha' di kambing om pogihilon nondo do hiri'd sinangau-sangau dot id pointikid di sunduk di pananaraban do porsombahan. 19 Om potobungon nondo dau o tunturu' dau do hiri'd raha' om powowoson nogindo dau o tongokooro' di raha'ddi do hiri'd pananaraban do porsombahan dot inturu' wawasai. Om iyo noddi o kowoyo-woyoo' do momolidang di pananaraban do porsombahan do mantad id dusa di tulun dot Israil, om olidang indo i pananaraban do porsombahan diri.

I Kambing dot Oitom

20 Om boros ka kawagu'd Tuhan dot id di Musa, “Opongo pondo di Harun do momonsoi i natantu' mantad do wonsoyon do momolidang di Bilik dit Olidang Kopio, om i kinoiyonon do suwai di hiri'd Kiim do Tuhan, om i pananaraban do porsombahan do tumanud dit oturan do tugama', om mositi' no do patahakon dau dot id Tuhan i kambing di miyau po di nopili' do di Asasil. 21 Om mositi' nod pakabayon goduwo di Harun o longon dau do hiri'd sakai do tulu di kambing diri, om mikuwo'd mangakun do koinsanai di karaaton, om dusa, om kososongkiwal di tulun dot Israil, om kakaa i' dot id tulu di kambing o koinsanai di karaaton di tulun dot Israil. Om uyungon nondo i kambing diri do pokoyoon do hiri'd tana' do kowotuan. Moguyung nopoddi om songulun i nopili' do momonsoi do karaja'ddi. 22 Om tanggayan nondo di kambing diri o koinsanai di dusa do tulun dot Israil do hiri'd tana' do kowotuan dit aiso' o tulun do momogun. 23 Om sumuang nondo i Harun di Kiim dot Olidang, om iduwon dau i pakayan do dong imam; i rinasuk dau di tintod do suminuang di Bilik dit Olidang Kopio. Om poilihon nondo dau i pakayan diri do hiri'd Kiim dit Olidang. 24 Om mositi' nod modsu' iyau dot id bilik dit olidang om manampakai nogindo di dau'd pakayan. Om sumoliwan nogindo iyau do mongoi papatahak do porsombahan di sorobon do pananus di dusa dau om i dusa di tulun dot Israil. 25 Om sorobon nondo dau do hiri'd pananaraban do porsombahan i lunok di tayam-tayam di maan do porsombahan do pangampun do dusa. 26 Om iri nopo tulun di minongoi ponguyung di kambing do tontoluhan do hiri'd tana' do kowotuan do pokoyoon dot id di Asasil, om suhuon kopio do momupu' di pakayan dau om modsu' do tintod do gumuli' do hiri'd kokiiman. 27 Om iri nopondo i sapi' do tontoluhan om i dumba' do tontoluhan di numaan do porsombahan do pangampun do dusa, i songraha' di nigitan do hiri'd Bilik dit Olidang Kopio do maan do pananus do dusa, om mositi' no do posoliwanon di kokiiman, om sorobon nogindo. Om mositi' no do sorobon ngai' nopo i kulit, om i tonsi', om i suang do tian di duwo o tayam-tayam diri. 28 Om iri nopo tulun di modtutud ngai'ddi om mositi' nod momupu' di pakayan dau om modsu' do tintod do gumuli' do hiri'd kokiiman,” ka dau.

Kowoyo-woyoo' do Popoinggayo di Tadau do Kopongiduan do Dusa

29-31 Om boros ka kawagu'd Tuhan dot id di Musa, “Iti no ngai' ot oturan dit apatut do tonudon do gisom dot alaid. Tontok nopod tadau'd kohopod do tulan do koturu', om mositi' nod puasa om a' koino-ino'd momonsoi'd karaja' do nunu nopo, o koinsanai'd tulun dot Israil, om i bansa'd suwai di poirolot diyolo'. Tu' tadau nopoddi om tadau dit olidang kopio. Mositi' nod wonsoyon i natantu' mantad do wonsoyon do momolidang do bansa'd Israil do mantad id koinsanai di dusa diyolo' do tontok do tadau'ddi. Om olidang indo iyolo' do tumanud dit oturan do tugama'. 32 Om iri no i Boyoon dot Agayo dot Imam o nopili' kopio, om i nokotobilang do Kinorohingan do sumowoli di tapa' di Boyoon dot Agayo dot Imam diri o momonsoi di wonsoyon di natantu' mantad do wonsoyon do maan do pomolidang. Om mositi' nod manampakai iyau di pakayan do dong imam, 33 om wonsoyon nogindo i natantu' mantad do wonsoyon do pomolidang di Bilik dit Olidang Kopio, om i kinoiyonon do suwai do hiri'd Kiim do Tuhan, om i pananaraban do porsombahan, om it imam, om koinsanai di tulun dot Israil. 34 Om mositi' nod tonudon kasai iti toturan diti do gisom dot alaid. Om wonsoyon kasai' dot insan do sontoun i wonsoyon di natantu' mantad do wonsoyon do pomolidang di tulun dot Israil do mantad id koinsanai di dusa diyolo',” ka dau. Om wonsoyo' nod i Musa iri do tumanud di pinonuhuan do Tuhan dot id dau.

Oturan 17

Kolidango' do Raha'

1 Om suhuo' nod Tuhan i Musa 2 do papatahak dot id di Harun om id tangaanak di Harun, om id koinsanai di tulun dot Israil diti piro-piro ot oturan do poingkaa, 3-4 “Soira' nopo do koponumbali' o tulun dot Israil do sapi' ko' dumba' ko' kambing do maan do porsombahan dot id Tuhan dot id kinoiyonon do suwai ko' mantad do hiri'd wawayaan di Kiim do Tuhan, om kotolibamban no dit oturan, tu' nakapaawas nod raha'. Om a' no o tulun diri kohompit di tulun do songonuon do Kinorohingan. 5 Komoyon nopo dot oturan diti nga' baino' nopondo om ngoyon ngai' nopo di tulun dot Israil pootodo' do hiri'd Kiim do Tuhan i tayam-tayam di koubasan daa diyolo' do monumbali' do hilo'd talun. Baino' nopondo om mositi' no do ngoyon diyolo' pootodo' iri dot id imam do hilo'd wawayaan di Kiim do Tuhan, om sumbolion nogindo do hiri do maan do porsombahan do piombolutan. 6 Om mositi' nod powowoson dit imam i raha' di sinumbali'ddi do hiri'd misingobik om hiri'd misingompok di pananaraban do porsombahan, i hiri'd wawayaan di Kiim dit Olidang. Om sorobon dau i lunok om kasanangan indo do Tuhan i tawau di porsombahan diri. 7 Om mositi' no do tumorodok i tulun dot Israil dot id Tuhan om a' kopio koino-ino do monumbali' do tayam-tayam diyolo' do hilo'd talun do maan do porsombahan dot id rusod dit araat, di monongkoiyo-iyo'd kambing. Om mositi' nod tonudon kasai' iti toturan diti do gisom dot alaid. 8 Soira' nopod haro o tulun dot Israil ko' bansa'd suwai di poingiyon dot id rolot diyolo' do papatahak do porsombahan di sorobon ko' nunu nopo o porsombahan 9 do maan do porsombahan dot id Tuhan, dot id kinoiyonon do suwai ko' mantad do hilo'd wawayaan di Kiim dot Olidang, om a' no kohompit do tulun di songonuon do Kinorohingan. 10 Ondung haro o tulun dot Israil ko' bansa'd suwai di poirolot diyolo' do mangakan do tonsi do tayam-tayam dit a' nakaawas o raha', om saapon nod Tuhan o tulun diri, om a' no iyau kohompit do tulun di songonuon do Tuhan. 11 Tu' ginawo nopo do koinsanai di songimpasi om hiri nod raha'. Om iri no o nokoponuhuan do Tuhan do popotuntug do koinsanai di raha' do hiri'd pananaraban do porsombahan, om oidu' indo o dusa'd tulun. Iri no i raha', tu' ginawo, o koidu' do dusa. 12 Om iri no o nokopogoduhan do Tuhan di tulun dot Israil om i bansa'd suwai di poirolot diyolo' do mangakan do tonsi dit a' nakaawas o raha'. 13 Soira' nopod haro o tulun dot Israil ko' bansa'd suwai di poirolot diyolo' do mongoi pongintorus do nintorusan ko' tombolog di koino-ino'd kanon, om mositi' nod paawason dau i raha' do hiri'd tana' om olitan nogindo do tana' i raha'ddi. 14 Tu' ginawo nopod koinsanai di songimpasi om hiri nod raha'. Om iri no o nokopogoduhan do Tuhan di tulun dot Israil do mangakan do tonsi dit a' nakaawas o raha'. Om isai nopo o mangakan di pogoduhan om a' no kohompit do tulun di songonuon do Kinorohingan. 15 Pointikid-tikid do tulun dot Israil ko' bansa'd suwai di poirolot diyolo', do kapangakan do tonsi do nintorusan di napatai toomod ko' i pinatai do nintorusan dit orongit, om mositi' nod pupuan i pakayan dau, om modsu', om mandad do gisom do sosodopon, om olidang nogindo iyau dot id pagantangan do tugama'. 16 Ondung a' dau wonsoyon o miagal diri om mositi' nod boboon dau o kootuson diri,” ka dau.

Oturan 18

Pidudunan di Pogoduhan

1 Om suhuo' nod Tuhan i Musa 2 do popoboros dot id tulun dot Israil diti boros do poingkaa, “Iyoho' no o Tuhan, i Kinorohingan dokoyu. 3 Kada' kou omit di kowoyo-woyoon di tulun do Masir, i hilo'd pinomogunan dokoyu di gulu po, om kada' kou omit do kowoyo-woyoon di tulun do hilo'd pomogunan do Kanaan, i paatadan ku dokoyu. 4 Mumboyo' kou nod oturan ku om tonudon no dokoyu i ponuhuan ku. Tu' iyoho' no o Tuhan, i Kinorohingan dokoyu. 5 Tonudon ngai' no dokoyu it oturan om i ponuhuan ku di pinatahak ku dot id dokoyu. Tu' ondung owonsoi dokoyu o miagal diri om apasi kou no. Iyoho' no o Tuhan, i Kinorohingan dokoyu,” ka dau. 6 Om iti ngai' no ot oturan do pinatahak do Tuhan, “Kada' kou ongoi dudun dot isai nopo di koobpinayan dokoyu. 7 Kada' dokoyu ngoyo' duduno' o tina' dokoyu, om a' i' ointingayam o tapa' om tina' dokoyu. 8 Kada' dokoyu intingayamo' o tapa' dokoyu, dot i mongoi kou dudun di sawo dau'd suwai o pongintingayam. 9 Kada' dokoyu duduno' i tobpinai dokoyu'd tondu' di toput dokoyu'd pusod ko' iri po tobpinai dokoyu'd tondu' di tanak mantad di tapa' dokoyu ko' i tanak mantad di tina' dokoyu, dot i poinsugku' dokoyu'd guminayo ko' it amu'. 10 Kada' dokoyu duduno' i manangaki dokoyu; tu' iri no moti' o mongintingayam dokoyu. 11 Kada' dokoyu duduno' i tobpinai dokoyu'd tondu' di tanak mantad di tapa' dokoyu ko' tanak mantad di tina' dokoyu; tu' iyau nga' tobpinai i' dokoyu. 12-13 Kada' dokoyu duduno' i tinanon dokoyu, do tobpinai tuu iyau di tapa' dokoyu, ko' tobpinai po di tina' dokoyu. 14 Kada' dokoyu duduno' o sawo di tamanon dokoyu; tu' iyau nga' tinanon i' dokoyu. 15 Kada' dokoyu duduno' i tondu' do monongiwan dokoyu 16 ko' iri po sawo di tobpinai dokoyu. 17 Kada' dokoyu duduno' i tanak ko' i monongodu' di tondu' di noumbalan dokoyu'd momodudun do gulu; tu' a' i' oila-ilaan nga' iso-iso' po doti' o raha' dokoyu, om kotolibamban i' dot oturan o miagal diri. 18 Kada' dokoyu kowino' i tobpinai di sawo dokoyu, do poimpasi po i sawo dokoyu. 19 Kada' kou ongoi dudun do tondu' di maso'd haro o pomulanan, tu' tondu' nopoddi om sosomu' i' dot id pagantangan do tugama'. 20 Kada' kou ongoi dudun do sawo'd tulun do suwai; tu' iri no o kososomu' dokoyu. 21 Kada' kou papatahak dot ongoiso' piya do tanak dokoyu do maan pakayo' do tumuku' dot id Molok, i ponokokinorohingan diri. Tu' iri nopo wonsoyon do miagal diri om mongindaraat i' do ngaran do Kinorohingan, i Tuhan. 22 A' no kopio koino-ino do miampahu' o kusai om kusai; tu' iri nopo om katagadan i' do Kinorohingan. 23 A' no kopio koino-ino do mongoi pagampahu' do nintorusan ot isai nopo o kusai ko' tondu'; tu' iri nopo wonsoyon do miagal diri om araat i' om sosomu' kopio. 24 Kada' dokoyu sosomuo' o tinan dokoyu do wowonsoyon do miagal diri, tu' iyo noddi i tulun do kapir do minonosomu' do tinan diyolo', i tulun do kapir di poingiyon mantad no do hilo'd pomogunan do Kanaan dot id gulu ko' iyokoyu, om iri noddi o koponguyungan do Tuhan diyolo', om koiyon kou i' iyokoyu'd hilo'. 25-27 Om iri no i kowoyo-woyoon diyolo' dit araat kopio o minonosomu' di tana'ddi. Om hukumai noddi iyolo'd Tuhan, om a' noddi iyolo' pologoson do mundorong do hilo'. Nga' iyokoyu nopo, om kada' kou nogi' kopio pomonsoi do wowonsoyon do miagal diri. Iyokoyu ngai' nopo om koinsanai di bansa'd suwai di poirolot dokoyu, om mositi' nod mumboyo' dit oturan om i ponuhuan do Tuhan. 28 Om a' kou indo ohukuman do Tuhan om a' ouyung do mantad id tana'ddi do miagal di nosiliu dot id tulun do kapir di poingiyon do hilo' dit id gulu ko' iyokoyu. 29 Om koilo ngai' kou i' dot isai nopo i momonsoi'd kowoyo-woyoon do miagal diri karaat om a' no kohompit do tulun di songonuon do Kinorohingan,” ka dau. 30 Om boros kad Tuhan, “Tonudon no dokoyu i boros ku om kada' kou tanud di kowoyo-woyoon di tulun di poingiyon do hilo'd pomogunan do Kanaan dit id gulu ko' iyokoyu. Kada' dokoyu sosomuo' o tinan dokoyu do mingwonsoi'd miagal diri o ponosomu'. Tu' iyoho' no o Tuhan, i Kinorohingan dokoyu,” ka dau.

Oturan 19

Oturan do Pasal do Kolidango' om Kotulido'

1 Om suhuo' nod Tuhan i Musa 2 do popoboros dot id tulun dot Israil do boros do poingkaa, “Kolidang kou no, tu' iyoho' nopo, i Tuhan, i Kinorohingan dokoyu, om olidang i'. 3 Mositi' nod momusou do tina' om tapa' o pointikid-tikid do tulun, om momusou di tadau'd Sabat, do miagal di pinonuhuan ku. Tu' iyoho' no o Tuhan, i Kinorohingan dokoyu. 4 Kada' kou tongkiad doho', om kada' kou tuku' dot id tingolig; kada' kou pomonsoi do ponokokinorohingan dot i miagal do basi' o wonsoyon, do maan dokoyu'd tukuon. Tu' iyoho' no o Tuhan, i Kinorohingan dokoyu. 5 Soira' nopo do monumbali' kou do tayam-tayam do maan do porsombahan di piombolutan, om mositi' nod tonudon dokoyu it oturan do nakatahak ku dokoyu, om romiton ku i' i porsombahan dokoyu. 6 Om mositi' nod kanon i tonsi do tontok do tadau di sinumbali' i tayam-tayam diri ko' di tadau kawagu. Haro nopo ot oolu' di tonsi'ddi di kotolu'd tadau, om mositi' nod sorobon, 7 tu' sosomu' nori dot id pagantangan do tugama'. Om isai nopo i mangakan diri nga' a' ku no romiton i porsombahan dau. 8 Om isai nopo i mangakan diri nga' kasala' no tu' poiyoon i' dau di koubasanan no kasai' i nokotobilang do maan do doho'. Om a' no iyau kohompit di tulun do songonuon ku. 9 Soira' nopod mongomot kou, om kada' dokoyu omoto' i hiri'd tisan di tumo, om i nongotoliban do mongomot nga' a' no minog do ngoyon gulio' do mongomot. 10 Kada' kou guli' do hiri'd kabun dot anggur dokoyu do mongoi pongupu' di tua' di noolu' ko' mongoi po pomuhu di tua' di nongoloho. Pologoson nopori do maan di tulun do mosikin om i tulun do bansa'd suwai. Tu' iyoho' no o Tuhan, i Kinorohingan dokoyu. 11 Kada' kou panakau, om kada' kou ponipu', om kada' kou pongudut. 12 Kada' kou pamatos dot id suang do ngaran ku ondung a' no dokoyu bayaanon kopio iri; tu' mongindaraat nori do ngaran ku. Tu' iyoho' no o Tuhan, i Kinorohingan dokoyu. 13 Kada' kou pakaanak-anak dot isai nopo o tulun om kada' kou pagahau do konunu-nunuan do tulun diri. Kada' dokoyu poloido' do papatahak do sontuong- tuong piya i gadsi' do tulun di pakaraja' dot id dokoyu. 14 Kada' kou pomopol do tulun di bosukon, om kada' kou ongoi poiliu do nunu nopo dot id doburuan do tulun di bolou do maan dokoyu'd kosoduwon dau. Koronok kou no doho'; tu' iyoho' no o Tuhan, i Kinorohingan dokoyu. 15 Mositi' no dot otopot om otulid o wonsoyon dokoyu do tontok do momutus kou dot id kut, kada' kou panampaping di tulun do mosikin om kada' kou kooris di tulun do kaya'. 16 Kada' kou popimboros do boboroson dit a' otopot do pasal dot isai nopo o tulun. Ondung manantu' do kosunsudon di tulun i kopomisaraan dau, do posion tuu ko' patayon po iyau, om mungkomi kou no, ondung kotulung no dau i dokoyu'd poboroson. Tu' iyoho' no o Tuhan. 17 Kada' kou poopi' do katagadan dokoyu dot id isai nopo o tulun. Salasayon nogi' dokoyu di tulun diri i katagadan dokoyu'ddi, om a' kou i' kowonsoi'd dusa dot i tulun diri o kobungou. 18 Kada' kou suli' dot isai nopo o tulun, om kada' kou popoopi' do karaatan dokoyu dot id tulun diri, suwai ko' kosianai kou nod tulun do suwai do miagal dot osianan kou do dokoyu'd tinan. Tu' iyoho' no o Tuhan. 19 Tonudon ngai' no dokoyu i ponuhuan ku. Kada' dokoyu pisobuho' o nintorusan di misuwai o bansa'. Kada' kou pananom do duwo o bansa' do totonomon dot iso-iso' o tumo do pananaman. Kada' kou panampakai do pakayan di nawol, do duwo o bansa'd banang do piniawol. 20 Ondung haro o kusai do nakabatos do papadagang di turipon dau'd tondu' dot id kusai'd suwai do maan do ponokosawo di kusai'ddi, nga' a' po di kusai di momoli nabayaran i tondu'ddi, om a' i' hukuman do kapatayon i kusai do sanganu di tondu' dot aampahu' piya dau i tondu'ddi, nga' hukuman goduwo nopo iyolo'. Tu' turipon kasai' po dau i tondu'ddi. 21 Om mositi' nod paatod i kusai, i sanganu di tondu'ddi, do dumba' do tontoluhan do hiri'd wawayaan di Kiim do Tuhan do maan dau'd porsombahan do poningolon. 22 Om patahakon nondo dit imam i dumba' do maan do pomolidang, om oidu' i' o dusa di tulun diri, om oompunan indo iyau'd Kinorohingan. 23 Korikot kou nopondo do hilo'd pomogunan do Kanaan, om tontok nopo do momutanom kou do nunu nopo o bansa'd tua-ua', om pokososomuon no dokoyu i tua' di tua-ua' dokoyu'ddi do tolu-tolu po toun. Kada' dokoyu akano' o tua' di tinanom dokoyu do solinaid poddi. 24 Om kaapat nopondod toun om mositi' nod patahakon ngai' dokoyu i tua'ddi dot id doho' do maan do porsombahan do popointalang do kounsikahan dokoyu dot id doho', i Tuhan. 25 Nga' kolimo nopondod toun om koino-ino no dokoyu'd kanon i tua' di tinanom dokoyu'ddi. Ondung wonsoyon dokoyu o miagal diri, om sumapou no o tua' di tua-ua' dokoyu. Tu' iyoho' no o Tuhan, i Kinorohingan dokoyu. 26 Kada' kou pangakan do tonsi dit a' nakaawas o raha'. Kada' kou pinsingilo do nunu nopo o kowoyoon do toilaan di don rogon. 27 Kada' dokoyu pampadai o tobuk dot id poriling do tulu dokoyu om kada' kou pomugar do ganggut, 28 om kada' kou pamapak do tinan dokoyu, om kada' kou pinsuhat do tinan dokoyu do tontok do mogihad di tulun do napatai. Tu' iyoho' no o Tuhan. 29 Kada' dokoyu intingayamo' i tangaanak dokoyu'd tondu', dot i silihon do sundal dot id walai do tingolig o pongintingayam; tu' ondung momonsoi kou do miagal diri om tumuku' kou nod tingolig om oponu' pondod wowonsoyon dit a' osonong i pomogunan diri. 30 Poinggoyoon no dokoyu o tadau'd Sabat om pusohon no dokoyu i tiyonon do sumambayang dot id doho'. Tu' iyoho' no o Tuhan. 31 Kada' kou ongoi pokinosihat do tulun di momolohou do rusod do tulun di napatai. Tu' ondung mongoi kou, om atantu' nod ososomu' kou. Tu' iyoho' no o Tuhan, i Kinorohingan dokoyu. 32 Podulon no dokoyu om pusohon no i tongomolohing no. Koronok kou no doho'; om pusohon oku no dokoyu, tu' iyoho' no o Tuhan. 33 Kada' dokoyu raraato' o tulun do bansa'd suwai di poingiyon dot id pomogunan dokoyu. 34 Poiyoon nopo dokoyu iyolo' di sompi' ko' tulun dot Israil om kosianai kou no diyolo' do miagal dot osianan kou do dokoyu'd tinan. Hondomo' no dokoyu dot iyokoyu nga' nokoumbal i' do nokosugku' do bansa'd suwai do momogun-mogun di hilo' kou pod pomogunan do Masir. Tu' iyoho' no o Tuhan, i Kinorohingan dokoyu. 35 Kada' kou pamakai do ponipong dit a' koontok do ponipu' do tulun do suwai, dot iri tuu i ponipong do konoruo', ko' iri po ponimbang do kawagato' ko' iri po i pagagadang. 36 Mositi' no do koontok i poninimbang, om i poninipong om i pagagadang dokoyu. Tu' iyoho' no o Tuhan, i Kinorohingan dokoyu, om iyoho' i pinoposoliwan dokoyu do mantad hilo'd Masir. 37 Tonudon ngai' no dokoyu it oturan om i boros ku. Tu' iyoho' no o Tuhan,” ka dau.

Oturan 20

Hukuman do Tulun dit A' Mumboyo'

1 Om suhuo' nod Tuhan i Musa 2 do popoboros dot id tulun dot Israil do boros do poingkaa, “Isai nopo dokoyu ko' isai nopo di bansa'd suwai di poingiyon dot id rolot dokoyu, o papatahak do tanak do maan pakayo' do tumuku' di tingolig do Molok om mositi' nod dumpahon do watu, dot oinsanan nopo i tulun do momodumpau, do gisom i' dot apatai i tulun diri. 3 Ondung haro o tulun do papatahak di tanak dau dot id di Molok om i monosomu' di Kiim ku dit Olidang, om i mongindaraat do ngaran ku dit olidang, om saapon ku no o tulun diri, om a' ku pohompiton di tulun do songonuon ku. 4 Nga' ondung pologoson tomod di tulun dot ogumu' i nowonsoi di tulun diri, om a' diyolo' iyau hukuman do kapatayon, 5 om iyoho' nondo o sumaap di tulun diri, om koinsanai di sompiiyon dau om koinsanai di tulun di minoyo' dau do tuminongkiad do mantad id doho', om tuminuku' nogiddi di tingolig do Molok. Om a' ku no iyau pohompiton do tulun di songonuon ku. 6 Ondung haro o tulun do mongoi pokinosihat do tulun di momolohou do rusod di tulun do napatai, om saapon ku no o tulun diri, om a' ku pohompiton do tulun di songonuon ku. 7 Kumolidang kou no, tu' iyoho' no o Tuhan, i Kinorohingan dokoyu. 8 Tonudon no dokoyu it oturan ku, tu' iyoho' no o Tuhan, om iyoho' i popotobilang dokoyu do silihon ku do doho'd songonuon,” ka dau. 9 Om patahako' nod Tuhan iti piro-piro ot oturan do poingkaa, “Isai nopo i momopol do tina' ko' tapa' dau, om mositi' nod hukuman do kapatayon. Iri nopo kinapatayon dau om iri i kasalaan dau o nokobungou. 10 Ondung haro o kusai do bansa'd Israil do magampahu' do sawo do tulun di bansa' dau, om hukuman goduwo nopod kapatayon i kusai om i tondu' di nampahu' dau'ddi. 11 Iri nopo kusai di mongoi dudun dot iso' di sawo di tapa' dau, om mongintingayam no di tapa' dau. Om mositi' nod hukuman goduwo nopod kapatayon i kusai om i tondu'ddi. Iri nopo kinapatayon diyolo'ddi om iri i kasalaan diyolo' o nokobungou. 12 Ondung haro o kusai do mongoi dudun di tondu' di monongiwan dau, om mositi' nod hukuman goduwo nopo iyolo'd kapatayon. Tu' nokotolibamban no iyolo' dit oturan. Om iri nopo kinapatayon diyolo'ddi om iri i kasalaan diyolo' o nokobungou. 13 Soira' nopod miampahu' o kusai om kusai, om kowonsoi goduwo no iyolo' dit araat kopio, om mositi' nod hukuman goduwo nopo iyolo'd kapatayon. Om iri nopo kinapatayon diyolo'ddi om iri i kasalaan diyolo' o nokobungou. 14 Ondung kowinon do songulun o kusai ot iso' o tondu' om kowinon po kawagu dau i tina' di tondu'ddi, om mositi' nod tutudan ngai' nopo iyolo'd tolu do gisom dot apatai, tu' minomonsoi i' iyolo' dit araat kopio. Kada' no kopio do haro ot osiliu do miagal diri dot id pogialatan dokoyu. 15 Ondung haro o kusai do monokiampahu' do nintorusan, om mositi' nod hukuman do kapatayon i kusai'ddi om i nintorusan. 16 Ondung haro o tondu' do monokiampahu' do nintorusan om mositi' nod hukuman do kapatayon i tondu'ddi om i nintorusan. Om iri nopo kinapatayon diyolo'ddi om iri i kasalaan diyolo' o nokobungou. 17 Ondung haro o kusai do mangawin di tobpinai dau'd tondu' di toput do pusod dau ko' i tobpinai dau'd tondu' di tanak mantad di tapa' ko' tanak mantad di tina' dau, om mositi' nod intingayamon iyolo' dot id toguang do tulun dot ogumu', om uyungon nogindo do mantad id kinoiyonon di tulun dot ogumu'. Tu' minagampahu' i' i kusai'ddi di tobpinai dau'd tondu', om mositi' nod boboon dau i kootuson diri. 18 Ondung dumudun o kusai do tondu' di maso'd haro o pomulanan, om mositi' nod uyungon iyolo' do mantad id kinoiyonon do tulun dot ogumu', tu' notolibambanan no diyolo' it oturan do pasal do kolidangan do tumanud dot oturan do tugama'. 19 Ondung haro o kusai do magampahu' di tinanon dau, om mositi' nod tonggungon diyolo' o kootuson di winonsoi diyolo' dit a' tuminanud dot oturan. 20 Ondung dudunon do songulun o kusai i sawo di tamanon dau, om mongintingayam no iyau di tamanon dau. Om mositi' nod boboon di kusai om i tondu' o pomohukum di winonsoi diyolo'ddi: tu' pomohukum nopo om a' goduwo nopondo iyolo' maganak. 21 Ondung haro o kusai do mangawin di sawo do tobpinai dau, om a' no iyolo' maganak do gisom dot ikapatai diyolo'. Tu' sosomu' no kopio om araat i winonsoi dau, om minongintingayam iyau di tobpinai dau,” ka dau. 22 Om boros kad Tuhan, “Tonudon ngai' no dokoyu it oturan om i ponuhuan ku. Om a' kou i' ouyung do mantad id pomogunan do Kanaan, i kinoiyonon do paatadan ku dokoyu. 23 Kada' kou omit do kowoyo-woyoon om i kaadat-adato' di tulun mantad do hilo'. Pinaparaat no kopio i tulun do kapir do ginawo ku, tu' angaraat i' kopio o kowoyo-woyoon diyolo'. Om iri no o koponguyungan ku diyolo' do baino'dti, om kosuang kou i' di pomogunan diri. 24 Nakapamatos oku no dot iyokoyu o kasanganu di pomogunan di kaya' om it oluhub diri, om patahakon ku i' kopio iri dot id dokoyu. Iyoho' no i Tuhan, i Kinorohingan dokoyu. Om nokosuwai-suwai ku no iyokoyu do mantad id bansa'd suwai. 25 Iyo nopoddi om mositi' nod milo kou do mongintutun di nintorusan om i tombolog di sosomu', om it a' sosomu'. Kada' kou pangakan do nintorusan ko' tombolog di sosomu'. Tu' nokoboros ku no do sosomu' o nintorusan diri, om ondung kanon pondo dokoyu iri, om ososomu' kou no. 26 Nokosuwai-suwai ku no iyokoyu do mantad id bansa'd suwai, om osiliu kou i' do tulun dit iyoho' noo o sanganu. Om mositi' no dot olidang kou tu' iyoho' no o Tuhan, om olidang oku. 27 Pointikid-tikid do tongokusai om tongoondu' di mongoi pomolohou do rusod do tulun do napatai om mositi' nod dumpahon do watu do gisom dot apatai; om iri nopo kinapatayon do tulun di momonsoi do miagal diri om iri i kasalaan dau o nokobungou,” ka dau.

Oturan 21

Kolidango' dot Imam

1 Om suhuo' nod Tuhan i Musa do poposunud diti piro-piro ot oturan dot id tongoimam di sinakagon di Harun, “Iso' po dit imam nga' a' no koino-ino do monosomu' do tinan dau dot i mongoi tanud do momolobong do tanak do tobpinai dau o kososomu', 2 nga' suwai indo dot iri no i tina' dau ot apatai ko' iri tapa' dau, ko' tanak dau'd kusai ko' tanak dau'd tondu', ko' tobpinai dau'd kusai, 3 ko' tobpinai dau'd tondu' dit a' po nakakawin, it iso-iso' po o walai diyolo'. 4 Om a' i' iyau koino-ino do popologos dot ososomu' o tinan dau do kososomu' nopo om i kapatayon do tulun di kawaris dau tu' nokopogitotokin no. 5 Imam nopo om a' i' koino-ino do momugar do tobuk do ponong honggo nopo do tulu dau, ko' momompod pod ganggut dau ko' minsuhat do tinan, do popointalang do mogihad iyau di tulun do napatai. 6 Tu' iri nopo imam om nokotobilang no do sumiliu'd songonuon ku, om iri no ot a' diyolo' koina-inaan do mongindaraat do ngaran ku. Tu' iyolo' no i papatahak dot id doho' di porsombahan do taakanon, om mositi' no dot olidang iyolo'. 7 Imam nopo om a' i' koino-ino do mangawin do tondu' di nokoumbal do sumiliu'd sundal ko' i tondu' di nodudun do kusai'd gulu, ko' i tondu' di nakaada' do sawo, tu' imam nopo om nokotobilang no do sumiliu'd songonuon ku. 8 Om mositi' nod okunon do koinsanai'd tulun dot iri nopo imam om nokotobilang no do sumiliu'd songonuon ku, tu' iri no it imam o papatahak dot id doho' di porsombahan do taakanon. Iyoho' no o Tuhan, om olidang oku, om lidangan ku o tulun ku. 9 Ondung sumiliu'd sundal o tanak do tondu' dit imam, om mositi' nod tutudan i tondu'ddi do gisom dot apatai, tu' minongintingayam i' iyau di tapa' dau. 10 Iri nopo Boyoon dot Agayo dot Imam, om nokotobilang no do sumiliu'd songonuon do Kinorohingan do momonsoi do karaja' di dong imam. Om pinopogirot nopo di pinomilian dau'ddi om iri no i tinuntugan di tumau dot olidang o hiri'd tulu dau, om pinakayan iyau do pakayan di dong imam. Om iri no ot a' dau koina-inaan do popologos di tobuk dau dot a' osudai, ko' momohurak pod pakayan dau do popointalang do mogihad iyau do tulun di napatai. 11-12 Nakatahak no iyau dot id doho' do pinotobilang do sumiliu'd songonuon ku, om iri no ot a' dau koina-inaan do monosomu' do tinan dau. Om a' nogi' iyau koino-ino do monosomu' di Kiim ku dit Olidang do ponosomu' nopo om i mongoi salakoi'd walai di haro o rata', do mulong piya do rata' iri di tapa' ko' tina' dau. 13-14 Tondu' nopo di koino-ino dau'd kowinon om iri no i mantad id payat di tadon dau iyau. Om a' no iyau koino-ino do mangawin do tondu' di nopuadan ko' tondu' po di naadaan do sawo, ko' tondu' di nokoumbal do suminiliu'd sundal. 15 Ondung wonsoyon dau i pogoduhan diri, om iri nopondo i tangaanak dau, it apatut daa dot olidang, om sosomu' no. Tu' iyoho' no o Tuhan, om nokotobilang ku no iyau do sumiliu do Boyoon dot Agayo dot Imam,” ka dau. 16 Om suhuo' nod Tuhan i Musa 17 do popoboros diti dot id di Harun, “Tulun nopo di haro o bohiton do tinan dot id pogialatan di sinakagon nu, om a' no iyau koino-ino do papatahak do porsombahan do taakanon dot id doho'. Om iyo noddi ot oturan do gisom dot alaid. 18 Iri nopo tulun di papatahak do porsombahan, om a' no koino-ino do tulun di haro o bohiton do tinan: a' koino-ino'd tulun di bolou, ko' i kimpo', ko' it a' iyo'd dombokon o rabas, ko' it a' iyo'd dombokon o tinan; 19 om a' koino-ino i tulun di notipu' o longon, ko' i notipu' o gakod; 20 om a' koino-ino i tulun di notongkud ko' i miningkarakata' o kinosuni-sunio'; om a' koino-ino i tulun di noinggolian. 21 Iri nopo tulun di haro o bohiton do tinan dot id pogialatan di sinakagon di Harun om a' no koino-ino do papatahak do porsombahan do taakanon dot id doho'. 22 Nga' koino-ino i' iyau do mangakan di taakanon do nakatahak dot id doho', i porsombahan do taakanon dit olidang om i porsombahan do taakanon dit olidang kopio. 23 Nga' a' no o tulun diri koino-ino do mongoi insomok di tabir dot olidang om i pananaraban do porsombahan tu' haro i' o bohiton do tinan dau. Om a' no kopio iyau koino-ino do monosomu' di konunu-nunuan di nokotobilang do maan do doho', tu' iyoho' no o Tuhan, om iyoho' i pinopotobilang di konunu-nunuan diri,” ka dau. 24 Om iri ngai' no i pinoboros di Musa dot id di Harun, om id tangaanak di Harun, om id koinsanai di tulun dot Israil.

Oturan 22

Kolidango' di Porsombahan dot id Tuhan

1 Om suhuo' nod Tuhan i Musa 2 do popolombus do boros diti dot id di Harun om id tangaanak di Harun, “Kada' dokoyu indaraato' o ngaran ku dit olidang. Iyo nopoddi om mositi' nod pusohon kopio i piro-piro porsombahan di pinotobilang di tulun dot Israil do patahakon doho'. Tu' iyoho' no o Tuhan. 3 Ondung haro o tiso' di sinakagon nu di maso do sosomu' do mongoi insomok di porsombahan di pinatahak di tulun dot Israil dot id doho', om a' no kopio iyau pologoson kawagu do maganu-anu do hiri'd pananaraban do porsombahan. Om iti no ot oturan do gisom dot alaid. Tu' iyoho' no o Tuhan. 4 Kada' nod haro o tongoiso' di sinakagon di Harun di kitoruol o kulit dit araat kopio, ko' i maso'd haro o sumoliwan do miagal-agal do waig do mantad id wayaan do sobu, do mongoi pangakan di porsombahan dot olidang, dot a' po iyau nolidangan do tumanud dit oturan do tugama'. Ondung koigit it imam do nunu nopo i sosomu' do notopisan do rata' om sosomu' no iyau; om sosomu' no iyau ondung koposoliwan iyau'd narot, 5 ko' koigit iyau'd nintorusan ko' tulun di sosomu'. 6 Isai nopo ot imam dit ososomu' om sosomu' kasai' no iyau'ddi do gisom do sosodopon. Om atalib piya o sosodopon nga' sosomu' kasai' po iyau om a' po koino-ino do mangakan di porsombahan dot olidang dot a' po iyau kopodsu'. 7 Otonob po o tadau, om olidang nogi' iyau, om koino-ino nogindo iyau do mangakan di porsombahan dot olidang, tu' iri no o ponokotaakanon dau. 8 Imam nopo om a' i' koino-ino do mangakan do tonsi do nintorusan di napatai toomod ko' iri po i pinatai do nintorusan dot orongit. Ondung mangakan iyau'ddi, om ososomu' no iyau. Tu' iyoho' no o Tuhan. 9 Om mositi' nod tumanud o koinsanai dit imam di piro-piro ot oturan di pinatahak ku. Tu' ondung amu', om kasala' no iyolo', om apatai, tu' tuminolibamban i' iyolo' di piro-piro ot oturan dit olidang diri. Tu' iyoho' no o Tuhan, om iyoho' no i pinopotobilang diyolo' do sumiliu'd songonuon ku. 10 Iri nopo porsombahan di pinotobilang do maan do doho', om iri no i tulun dit id sompiiyon dit imam o koino-ino do mangakan, tulun nopod suwai om a' i' koino-ino do mangakan diri do mulong piya dot i tulun di poinsugku'd walai dit imam, ko' i tulun di pakaraja' dot id imam. 11 Nga' iri nopo turipon dit imam, i binoli dit imam do tusin dau, ko' i turipon di nosusu do hiri'd walai dit imam, om koino-ino id mangakan di taakanon dot aanu dit imam. 12 Iri nopo tanak do tondu' dit imam dit akawin do kusai dit okon ko' imam, om a' no koino-ino do mangakan di porsombahan di pinotobilang do maan do doho'. 13 Nga' iri nopo tanak do tondu' dit imam di nopuadan ko' i naadaan do sawo om aiso' po o tanak, i guminuli' do hiri'd walai di tapa' dau, om iri poddi molohing dau o kosondi-sondihon, om koino-ino i' do mangakan dit aramit di tapa' dau, i nosiliu dot imam. Iri no sompiiyon kopio dit imam o koino-ino do mangakan do porsombahan diri. 14 Ondung haro o tulun dit okon ko' sompiiyon dit imam do kapangakan di porsombahan dit olidang diri, nga' a' i' daa dau tinomod, om mositi' nod bayaran kawagu dau it imam do gatang do koinsanai di porsombahan diri, om ruhangan po dot induwo i sompihopod. 15 A' no kopio koino-ino it imam do monosomu' di porsombahan do pinotobilang do maan do doho', 16 dot i popologos do tulun dit a' koino-ino'd mangakan, do mangakan di porsombahan, o ponosomu'. Tu' iyoho' no o Tuhan, om iyoho' no i momolidang do porsombahan diri,” ka dau. 17 Om suhuo' nod Tuhan i Musa, 18-19 do papatahak dot id di Harun om id tangaanak di Harun, om id koinsanai di tulun dot Israil, diti piro-piro ot oturan do poingkaa, “Soira' nopod papatahak o tulun dot Israil ko' i bansa'd suwai do poingiyon do hilo'd Israil, do porsombahan di sorobon, do pamayaan tuu dau iri di nakabatos dau ko' porsombahan po dau do tumanud do kagaanan do ginawo dau, om mositi' nod aiso' o bohiton do tinan di tayam-tayam diri. Om mositi' nod tontoluhan i tayam-tayam, om it aiso' o bohiton do tinan, om aramit indo iri. 20 Ondung papatahak kou do tayam-tayam di haro o bohiton do tinan do maan do porsombahan, om a' nod Tuhan romiton iri. 21 Soira' nopod haro o tulun do papatahak dot id Tuhan do porsombahan di piombolutan, do pamayaan tuu dau iri do batos dau ko' porsombahan po dau do tumanud do kagaanan do ginawo dau, om mositi' nod it aiso' o bohiton do tinan di tayam-tayam diri, om aramit indo iri. 22 Kada' kou papatahak dot id Tuhan do tayam-tayam di bolou, ko' i kimpo' ko' i notipuan ko' i notogu', ko' i kikupos di kinanaon, ko' i kitoruol o kulit, ko' i kigandas. Kada' papatahak do tayam-tayam do miagal diri do hiri'd pananaraban do porsombahan do maan do porsombahan do taakanon. 23 Koino-ino i' do papatahak do tayam-tayam dit a' iyo di koubasanan o kinosuni-sunio' ko' it a' osonong o kinoinan-inano' do maan do porsombahan di tumanud do kagaanan do ginawo, nga' tayam-tayam nopo do miagal diri om a' i' romiton do maan do pamayaan di pinabatos. 24 Kada' kou papatahak dot id Tuhan do tayam-tayam di nababak o tontolu, ko' i nosinsib o tontolu, ko' i nosuhat ko' i noidu' o tontolu. A' no kopio koino-ino do haro ot osiliu do miagal diri do hiti'd pomogunan dokoyu. 25 Kada' kou papatahak do nunu nopo o tayam-tayam di naanu dokoyu do mantad id tulun di bansa'd suwai do maan do porsombahan do taakanon. Tu' tayam-tayam nopod miagal diri om miagal nopo di tayam-tayam di haro o bohiton do tinan, om a' i' romiton do maan do porsombahan. 26-27 Soira' nopod haro o tanak do sapi' dot osusu, ko' tanak pod dumba', ko' tanak do kambing, om kada' no kopio potongkiado' iri do mantad id molohing dau do turu-turu' po tadau do mantad di kinosusuon. Nga' katalib pondo iri om romiton nori do maan do porsombahan do taakanon. 28 Kada' dokoyu piandado' do papatahak do maan do porsombahan i sapi' om i tanak di sapi', ko' i dumba' om i tanak di dumba', ko' i kambing om i tanak di kambing dot insan-insan kopio o tadau do patahakon. 29 Soira' nopod papatahak kou do porsombahan do kounsikahan dot id Tuhan, om mositi' nod tonudon it oturan om aramit i' i porsombahan dokoyu, 30 om akanon ngai' nopori do tontok do tadau'ddi om kada' kou no poolu' dot ongokooro' piya do maan do tadau kawagu,” ka dau. 31 Om boros kad Tuhan, “Tonudon ngai' no dokoyu i ponuhuan diri; tu' iyoho' no o Tuhan. 32 Kada' dokoyu indaraato' o ngaran ku dit olidang; om mositi' nod ongotumbayaan ngai' i tulun dot Israil dot olidang oku. Tu' iyoho' no o Tuhan, om iyoho' i popolidang dokoyu. 33 Om iri no o kinoposoliwanan ku dokoyu do mantad hilo'd Masir, tu' sumiliu oku nondo do Kinorohingan dokoyu. Tu' iyoho' no o Tuhan,” ka dau.

Oturan 23

Tadau dot Agayo dot Ugama'

1 Om patahako' nod Tuhan dot id di Musa 2 iti piro-piro ot oturan do pasal do tadau dot agayo do tugama', “Tontok nopo di piro-piro o tadau'ddi om mositi' nod tumimung i bansa' dot Israil do sumambayang. 3 Om mositi' nod potobilangon dokoyu o tadau'd Sabat do maan do don Tuhan do hinonggo kou nopod poingiyon. Onom o tadau dokoyu do koino-ino do kumaraja', nga' sorohon no dokoyu, do koturu' nopod tadau, i tadau'd Sabat, om tadau nod koundarangan. Kada' kou no karaja' do tadau'ddi, suwai ko' tumimung kou no do sumambayang. 4 Om posunudon noti piro-piro o tadau dot agayo diti do tontok di maso do natantu' mantad,” kad Tuhan.

Tadau'd Agayo do Paska om Tadau'd Agayo do Roti dit A' Kipangambang

5 Om boros ka kawagu'd Tuhan, “Iri nopo Tadau'd Agayo do Paska, i ramayon do maan do pomusou'd Tuhan, om tumimpuun do tontok dit otonob o tadau do koontok di tadau'd kohopod om apat do tulan do koiso'. 6 Om tadau nondo kawagu, di tadau'd kohopod om limo, om tumimpuun no i Tadau'd Agayo do Roti dit A' Kipangambang. Om kada' kou no pangakan do roti di rinalatan do pangambang do solinaid do turu' o tadau. 7-8 Solinaid nopo di turu' o tadau'ddi om mositi' nod papatahak kou do porsombahan do taakanon dot id Tuhan. Om tontok nopo di tadau'd koiso' om tadau'd koturu' do karamayan diri, om mositi' nod tumimung kou do sumambayang om a' kou koino-ino do kumaraja' do nunu nopo. 9-10 Korikot kou nopondo do hilo'd pomogunan di patahakon do Tuhan dot id dokoyu, om tontok nopondo di mongomot kou'd barli do hilo', om iri nopo barli dit id gulu kopio dokoyu omoto', om mositi' nod ngoyon dokoyu patahako' dit imam. 11 Tontok nopo di sinuabon di tadau'd Sabat om mositi' nod patahakon dit imam i porsombahan do barli diri do maan do porsombahan di pinotobilang do maan do don Tuhan, om asanangan indo o Tuhan dokoyu. 12 Om tontok nopod papatahak kou do porsombahan do barli diri, om mositi' nod papatahak kou po do songinan o tanak do dumba' di sontoun nogi' o tumur, om it aiso' o bohiton do tinan do maan do porsombahan di sorobon. 13 Om potonggoyon nopo dokoyu'ddi do maan do porsombahan do taakanon, om duwo o kilogram do tapung di rinalatan do tumau'd saitun. Om iri no i tawau di porsombahan diri o kasanangan do Tuhan. Om papatahak kou nogi' do songlito o waig dot anggur do potonggoyon diri. 14 Ondung a' po dokoyu katahak o porsombahan diri dot id Tuhan, om kada' kou no kopio pangakan dot ongokuuri' piya di barli di koomot diri, dot iri tuu it a' po noonsok, ko' iri po i nalasu' no, ko' i nogoyiu no. Om mositi' nod tonudon do koinsanai di sinakagon nu iti toturan diti do gisom dot alaid,” ka dau.

Tadau dot Agayo do Dongmongomot

15 Om boros ka kawagu'd Tuhan, “Mantad nopo di sinuabon di tadau'd Sabat, do tontok di papatahak kou dot id Tuhan do tua' do barli dit id gulu omoto', om intobon no dokoyu o turu' kopio o minggu'. 16 Om tadau nopondod kolimo nohopod, dit atalib o tadau'd Sabat di kointuru', om mositi' nod papatahak kou kawagu do porsombahan do gandum dot id Tuhan. 17 Pointikid-tikid do sompiiyon om mositi' nod papatahak do duwo o binuluguan do roti om patahakon nondo do maan do porsombahan di potobilangon do maan do don Tuhan. Om sombulugu' nopo di roti, nga' duwo o kilogram do tapung di rinalatan do pangambang o wonsoyon. Om mositi' nod patahakon iri dot id Tuhan do maan do porsombahan do gandum dit id gulu omoto'. 18 Om mositi' nod papatahak i tulun dot Israil do turu' o dumba' di sontoun nogi' o tumur, om songinan o sapi' do tontoluhan, om duwo tinan do kambing, dit aiso' ngai' o bohiton do tinan do potonggoyon di roti'ddi. Om patahakon ngai' nondo iri do maan do porsombahan di sorobon dot id Tuhan, do mitonggoi di porsombahan do gandum om porsombahan do waig dot anggur. Om iri no tawau do porsombahan diri o kasanangan do Tuhan. 19 Om papatahak nogi' iyolo' do songinan o kambing do tontoluhan do maan do porsombahan do pangampun do dusa, om duwo o tanak do dumba' do tontoluhan di sontoun nogi' o tumur, do maan do porsombahan do piombolutan. 20 Om mositi' nod patahakon dit imam i roti om i duwo o tanak do dumba'ddi do maan do porsombahan di potobilangon do maan do don Tuhan, om iri no it aanu dit imam. Om iri ngai' nopo porsombahan diri om ongolidang ngai' nopo. 21 Tontok nopod tadau'ddi om a' kou no koino-ino do kumaraja' do nunu nopo, om mositi' nod tumimung kou do sumambayang. Om mositi nod wonsoyon di sinakagon nu o miagal diti do gisom dot alaid, do honggo nopo iyolo'd poingiyon. 22 Soira' nopod mongomot kou, om kada' dokoyu omoto' i gandum do hiri'd tisan di tumo, om kada' dokoyu ngoyo' gulio' do mongomot i gandum di nongotoliban. Pologoson nopori do maan di tulun do mosikin om i tulun do bansa'd suwai. Tu' Tuhan no o Kinorohingan dokoyu,” ka dau.

Tadau dot Agayo do Toun do Wagu

23-24 Om boros ka kawagu'd Tuhan, “Tadau nopod koiso' do tulan do koturu' om mositi' nod ramayon tu' nokotobilang nori do tadau'd koundarangan. Tontok nopod tadau'ddi, dit orongou i tuni do torumpit, om mositi' nod tumimung kou do sumambayang. 25 Om papatahak kou nod porsombahan do taakanon dot id Tuhan, om kada' kou karaja' do nunu nopo,” ka dau.

Tadau do Kopongompunan do Dusa

26-27 Om boros ka kawagu'd Tuhan, “Tontok nopo di tadau do kohopod do tulan do koturu' om Tadau di Kopongompunan do Dusa do tulun dot ogumu' do pointikid-tikid do toun. Tontok nopod tadau'ddi om mositi' nod puasa kou om tumimung kou do sumambayang, om papatahak kou dot id Tuhan do porsombahan di taakanon. 28 Kada' kou no karaja' do tontok do tadau'ddi, tu' tadau noddi do kapamansayan di wonsoyon di natantu' mantad do maan do pangampun do dusa. 29 Isai nopo i mangakan do nunu nopo do tontok do tadau'ddi, om a' no kohompit do tulun di songonuon do Kinorohingan. 30 Om isai nopo i kumaraja' do tontok do tadau'ddi, om Tuhan no o momohukum do tulun diri do kapatayon o pomohukum. 31 Om iyo no kasai'dti ot oturan do tonudon do koinsanai di manangaki diya' om i sinakagon diyolo', do honggo nopo iyolo'd poingiyon. 32 Iri nopo maso dot id piolitan di motingkotonob no o tadau do tadau'd kosiam do tulan diri om gisom dit otonob o tadau di tadau'd kohopod, om mositi' nod pusohon kopio dokoyu, tu' iri no o tadau'd koundarangan di nokotobilang. Om osongodou nopo do tadau'ddi do puasa kou, om a' no koino-ino do mangakan do nunu nopo, do sokoro-koro' piya,” ka dau.

Tadau dot Agayo do Kinuhub-Kuhub

33-34 Om boros ka kawagu'd Tuhan, “Iri nopo Tadau dot Agayo do Kinuhub-Kuhub, om tumimpuun do tontok di tadau'd kohopod om limo do tulan di koturu', om koloido' nopoddi om turu' o tadau. 35-36 Om solinaid nopo di turu' o tadau, om mositi' nod papatahak kou do porsombahan do taakanon do pointikid do tadau. Om tadau nopondod kawalu' do karamayan diri om mositi' no do tumimung kou do sumambayang, om papatahak do porsombahan do taakanon om a' kou koino-ino do kumaraja'. 37 (Om iri no ngai' i tadau dot agayo do tugama' dit apatut do ramayon dokoyu. Tontok nopod tadau dot agayo'ddi, om mositi' nod tumimung kou do sumambayang om papatahak do porsombahan do taakanon, om porsombahan di sorobon, om porsombahan do gandum, om porsombahan do tayam-tayam, om porsombahan do waig dot anggur, do miontok di gunaon do pointikid do tadau. 38 Iti nopo karamayan diti om pomoruhang di tadau'd Sabat di koubasanan, om i piro-piro porsombahan nga' pomoruhang nogi' di porsombahan dokoyu di koubasanan, om pomoruhang di porsombahan dokoyu di pamayaan di pinabatos, om pomoruhang di porsombahan di tumanud do kagaanan do ginawo, do patahakon dot id Tuhan.) 39 Om koomot kou nopondo, om mositi' nod papaharo kou do karamayan do solinaid do turu' o tadau, do tumimpuun di tadau'd kohopod om limo do tulan do koturu'. Om iri nopo tadau'd koiso' om tadau'd potobilangon do maan do koundarangan. 40 Om tontok nopod tadau'ddi, om mongoi kou no pongupu' do piro-piro o tua-ua' dit ongosonong do mantad id kouwaan dokoyu. Om manganu nogi' do roun di guas do roitan do palma, om i raan do kayu dit ongokohob o tuntu. Om tumimpuun nogindo do mamaramai di karamayan do tugama' do pomusou'd Tuhan, i Kinorohingan dokoyu. 41 Om ramayon no dokoyu o karamayan diri do solinaid do turu' o tadau. Om mositi' nod tonudon di sinakagon dokoyu ot oturan diti do gisom dot alaid. 42 Om mositi' nod miyon ngai' i tulun dot Israil dot id kinuhub-kuhub do solinaid di turu' o tadau'ddi, 43 om koilo indo i sinakagon dokoyu do sinuhu' do Tuhan i bansa' dot Israil do miyon dot id kinuhub-kuhub dit angara-raat do tontok di pinosoliwan dau iyolo' do mantad hilo'd Masir. Tu' iyau no i Tuhan, i Kinorohingan dokoyu,” ka dau. 44 Om iyo noddi i Musa do pinopoboros dot id tulun dot Israil do koinsanai dit oturan diri do papaharo do karamayan do tugama' do pomusou'd Tuhan.

Oturan 24

Kowoyo-woyoo' do Momogompi' di Lampung

1 Om suhuo' nod Tuhan i Musa 2 do papatahak dot id tulun dot Israil diti piro-piro ot oturan do poingkaa, “Paatod kou no do tumau do saitun dit osompipi' om it osonong kopio do ponuang di lampung di hiri'd Kiim dot Olidang, om otutudan indo kasai' i lampung. 3 Om mositi' nod ngoyon di Harun tutudai i lampung diri do pointikid do sosodopon, om pologoson nopod kitapui do gisom do kosuabon o hiri'd kinoiyonon di koropohon do Tuhan, i hiri'd soliwan di tabir, it id dotimbabaan di Kaban do Tumpongo, i hiri'd Bilik dit Olidang Kopio. Om mositi' nod tonudon kasai' iti toturan diti do gisom dot alaid. 4 Om mositi' nod gompion kasai' di Harun i lampung di hiri'd potitimpakan do lampung di tamas dit osompipi' o winonsoi. Om mositi' nod ngoyon dau piantangai iri, om otutudan kasai' i' iri do tontok di kopodtutudan kasai' do hiri'd Kiim do Tuhan,” ka dau.

I Roti di Patahakon dot id Kinorohingan

5 Om boros ka kawagu'd Tuhan, “Manu no do hopod om duwo kilogram do tapung om wonsoyon nori do hopod om duwo o binuluguan do roti. 6 Om poiiliu nopo di roti'ddi om ruludon do duwo o rulud, do sopionom o sonrulud, do hiri'd mija' di nurogupan do tamas dit osompipi', i hiri'd suang di Kiim do Tuhan. 7 Om timpakan nod kominyan dit osompipi' o hiri'd duwo o rulud di roti'ddi. Tu' iri nopo kominyan diri om poningolon di roti do maan do tanda' do nakatahak nori dot id Tuhan do maan do porsombahan do taakanon. 8 Pointikid-tikid do tadau'd Sabat, om mositi' nod haro o roti do hiri'd suang di Kiim do Tuhan, do gisom do mompus-ompus. Tu' iti no it apatut do wonsoyon do tulun dot Israil do gisom dot alaid. 9 Iri nopo roti'ddi om maan di Harun om i sinakagon dau. Om mositi' nod id kinoiyonon dit olidang o pangakanan diyolo'ddi, tu' iri nopo roti'ddi om nanu do mantad id taakanon dit olidang kopio di nakatahak dot id Tuhan, om iri no it aanu dit imam,” ka dau.

I Momopol do Kinorohingan om it Oturan do Ponuli'

10-11 Hiri nopod kokiiman di tulun dot Israil om haro o songulun o kusai. Tapa' nopo dau om tulun do Masir om tina' no dau om tulun dot Israil, dot i Silomit o ngaran i tanak di Dibri do mantad id payat di Dan. Insan tadau om ponokisongkiwal no i kusai'ddi dot iso' o tulun dot Israil. Om tontok di misongkiwal iyolo', om pomopol no i kusai'ddi do Kinorohingan. Om ngoyo' noddi iyau di tulun dot Israil posolowoto' di Musa. 12 Om tamangai nopoddi diyolo' i tulun diri do daamot do magandad do boros do Tuhan, ondung poingkuro o wonsoyon diyolo' dot id tulun diri. 13 Om boros kad Tuhan dot id di Musa, 14 “Ngoyo' posoliwano' diti kokiiman i tulun diri. Om pointikid-tikid do tulun di nokorongou do tulun diri do minomopol, om mositi' nod pakabai do longon diyolo' dot id tulu do tulun diri do popointalang do nakasala' i tulun. Om oinsanan nopondo i tulun do momodumpau di tulun diri do watu do gisom dot apatai. 15 Om poboroson nogindo dot id toinsanan o tulun dot Israil dot isai nopo i momopol do Kinorohingan om mositi' nod mamabo do kootuson diri, 16 om hukuman nogindod kapatayon i tulun diri. Isai nopo o tulun, do tulun tuu dot Israil ko' bansa'd suwai di poingiyon do hilo'd Israil, do kopomopol do Tuhan om mositi' nod dumpahon do watu, do koinsanai di tulun o momodumpau do gisom dot apatai i tulun diri. 17 Isai nopo i mamatai'd tulun do suwai om hukuman nod kapatayon. 18 Isai nopo o tulun di mamatai'd tayam-tayam do tulun do suwai om mositi' nod tingalanan dau iri. Oturan nopo om ‘ginawo o pomolokop do ginawo’. 19 Ondung haro o tulun do pokoruol do tulun do suwai, om poingkuro nopo i winonsoi dau do pinopokoruol, om mositi' nod wonsoyon o miagal diri dot id dau. 20 Ondung koponipu' iyau'd tulang, om mositi' nod tipuon o dau'd tulang. Ondung kopomolou iyau dot iso' do mato do tulun do suwai, om i tiso' di dau'd mato nga' bolohon no. Ondung kopomobog iyau'd tulun do suwai, gisom dot otipu' o nipon di tulun diri, om mositi' nod tipuon o dau'd nipon. Nunu nopo i winonsoi dau dot id tulun do suwai, gisom dot a' diri osonong o tinan do tulun do suwai, om mositi' nod wonsoyon o miagal diri dot id dau'd tinan do ponuli' di winonsoi dau. 21 Isai nopo o kapamatai do tayam-tayam, om mositi' nod tingalanan dau iri. Nga' isai nopo o kapamatai do tulun, om mositi' nod patayon. 22 Om mositi' nod tonudon ngai' dokoyu i toturan diri om tonudon nogi' di tulun do bansa'd suwai di poingiyon dot id rolot dokoyu, tu' iyoho' no i Tuhan, i Kinorohingan dokoyu,” ka dau. 23 Om koboros poddi di Musa iri dot id tulun dot Israil, om posoliwano' no diyolo' di kokiiman i tulun di minomopol do Kinorohingan, om dumpaho' no diyolo' iyau'd watu do gisom do napatai. Om iri no o nokoodsuur di tulun dot Israil do momonsoi di pinonuhuan do Tuhan dot id di Musa.

Oturan 25

I Toun do Koturu'

1 Om hilo' nod Nuluhon do Sinai o Tuhan do minoro-boros di Musa, om minonuhu' dau 2 do patahak diti piro-piro ot oturan dot id bansa'd Israil: Soira' nopondod korikot kou do hilo'd pomogunan di patahakon do Tuhan dot id dokoyu om a' kou no koino-ino'd mananom-tanom di tana' do pointikid-tikid di toun do koturu'. Om opusou i' dokoyu o Tuhan. 3 Mositi' nod tanaman dokoyu i tumo dokoyu om tutuan i guas dot anggur, om onuon i tua' di tanom-tanom dokoyu do solinaid dot onom o toun. 4 Nga' iri nopo koturu'd toun om potobilangon no dokoyu do maan do don Tuhan. Om solinaid nopod toun diri om pologoson nopo i tana' dot a' buatan om a' tanaman. A' no tanaman i tumo dokoyu om a' tutuan i guas dot anggur. 5 Iri piya gandum di suminuni toomod, it a' tinanom, nga' kada' no dokoyu ngoyo' omoto'. Tu' toun nopoddi om maso do koundarangan di tana' do buatan. 6 Om iyo piya'ddi nga' haro kasai' i' o suang di tana' do maan dokoyu'd takanon om akanon di turipon dokoyu, om i songingkaraja' dot id dokoyu, om i bansa'd suwai di poinsugku' dokoyu; 7 om akanon nogi' di tayam-tayam dokoyu, om i nintorusan di songhombo-hombo do hilo'd koomulakan dokoyu. Nunu nopo i sumuni do hilo'd tana' om aakan ngai' i'.

Toun di Kopogulian

8 Intobon no o toun dot inturu' i turu', om kogumuo' nopoddi om apat nohopod om siam o toun. 9 Om tontok nopondo do tadau'd kohopod do tulan di koturu', i Tadau do Kopongompunan do Dusa om monuhu' nod tulun do mongoi pouni do torumpit do pointongkop di pomogunan. 10 Om iyo kou noddi do potobilang di toun do kolimo nohopod diri, om poposunud do haro o kosimbayanan do kumaa dot id toinsanan o tulun di hiri'd pomogunan. Solinaid nopod toun diri om koinsanai di dapu' di nakadagang om mositi' nod pogulion kawagu dot id sanganu mantad di dapu' ko' id sinakagon di sanganu mantad di dapu'ddi. Om isai nopo i nadagang do siniliu do turipon om mositi' nod pogulion do hiri'd sompiiyon dau. 11 Kada' dokoyu tanamai o tumo dokoyu, om kada' dokoyu omoto' i gandum di suminuni toomod, om kada' dokoyu ngoyo' upuo' i tua' dot anggur dokoyu dit a' notutuan. 12 Toun nopoddi om toun dit olidang dot id dokoyu. Iri nopo i koino-ino dokoyu'd kanon om iri po i tua' di suminuni toomod do hiri'd tumo dokoyu. 13 Id suang nopod toun diri om koinsanai di dapu' di nakadagang om mositi' nod pogulion dot id sanganu mantad di dapu'ddi. 14 Om soira' nopondo do papadagang kou'd tana' dot id tulun di bansa' dokoyu, ko' momoli kou'd tana' do mantad id tulun diri, om kada' no kopio dot a' otulid o ralan do papadagang diri ko' momoli'ddi. 15 Iri nopo gatang di tana' om mositi' no do tontuon mantad do tumanud do kogumuon di toun di haro ot aanu do mantad id tana'ddi om gisom dot orikot i Toun do Kopogulian dit id dosunsudan. 16 Ondung ogumu' po o nintaban do toun dot a' po orikot iri, om amahal no o gatang di tana'. Nga' ondung okuri' no o nintaban do toun dot a' po orikot iri, om mositi' nod omura-mura no o gatang, tu' iri nopo dagangon om iri no i kogumuon do tua' do tanom do hiri'd tana'. 17 Kada' kou ponipu' dot iyokoyu ngai' it iso-iso' o bansa'. Suwai ko' koronok kou nod Tuhan, i Kinorohingan dokoyu.

Tuhoton do Pasal di Toun do Koturu'

18 Tonudon ngai' no it oturan om i ponuhuan do Tuhan, om osimbayan kou id mongiyon-ngiyon dot id pomogunan diri. 19 Om kouwa' indo i tinanom dokoyu do hiri'd tana' om kabagal kasai' dokoyu o taakanon om osimbayan kou do mongiyon-ngiyon do hilo'. 20 Nga' haro dotindo o muhot ondung nunu no ot akanon do tontok di koturu'd toun, tu' a' i' tanaman i tana' om a' ongoyon onuo' i tua' di songintanom. 21 Tontok nopo di toun do koonom om barakatan indo do Tuhan i tana' gisom dot iri nopo tua' dot aanu do toun diri om kabagal i' do duwo o toun. 22 Om mananom kou nopondo di tumo dokoyu di kawalu'd toun, om haro kasai' po i tomot dokoyu di toun do koonom dot akanon dokoyu. Om haro kasai' po ot akanon dokoyu do gisom dot oomot i tua' di tinanom dokoyu di toun do kawalu'ddi.

Kopogulian do Tana' om Walai

23 Kada' kopio dokoyu dagango' do gisom dot otilombus i tana' dokoyu, tu' okon i' ko' iyokoyu o sanganu'ddi. Sanganu nopo kopio di tana'ddi om Kinorohingan i', om iyokoyu nopo nga' miagal nod sompogunan di pinologos do mananom-tanom di tana'. 24 Ondung haro o songkoiyonon do tana' do padagangon, om mositi' nod tumboyoon i sanganu mantad di tana', do tontok dot onuon kawagu dau i tana'ddi. Tu' iyau no it apatut do kasanganu'ddi. 25 Ondung haro o tulun dot Israil di rumutum kopio, gisom dot a' no milo dot a' dau padagangon i tana' dau, om mositi' nod bolion kawagu di tobpinai dau dit id somok po, i tana'ddi. 26 Om tulun nopo dit aiso' o tobpinai do momoli kawagu di tana' dau, om kakaya' i' doti' iyau do koimbagu om kabagal indo o tusin dau do pomoli kawagu di tana'ddi. 27 Om ondung iyo'ddi nga' mositi' nod bayaran dau do tusin i tulun di minomoli di tana'ddi dot irad di gatang do suang di tana' do solinaid di piro-piro o toun dot a' po orikot i Toun do Kopogulian dit id dosunsudan. Tu' orikot nopo o toun diri, om poingkuro piya nga' koguli' kasai' no i tana' dot id dau tu' sanganu mantad di tana'ddi. 28 Nga' ondung a' kabagal o tusin dau do pomoli kawagu di tana' dau'ddi, om iri kasai' po i minomoli o kikuasa' di tana'ddi do gisom dot orikot i Toun do Kopogulian. Nga' orikot nopondo i toun diri om pogulion no i tana' dot id sanganu mantad di tana'. 29 Soira' nopod papadagang o tulun do walai dit id suang do bandar di kitolig o posorili', om kikuasa' no iyau do momoli kawagu di walai'ddi dot osontounan do mantad di tadau'd kinapadagangan. 30 Nga' ondung a' dau bolion kawagu i walai'ddi dot osontounan, om asanganu no kasai' di minomoli i walai, om otungkusan di sinakagon dau; om a' no koguli' kawagu i walai'ddi do tontok piya di Toun do Kopogulian. 31 Nga' walai nopod hiri'd kawalayan dit aiso' o tolig do posorili', om paagalon nopod tumo; tu' haro i' o kuasa' di sanganu mantad do momoli'ddi, om mositi' do pogulion kawagu iri do tontok di Toun do Kopogulian. 32 Nga' iri nopo tulun do Liwi om kikuasa' i' do momoli kawagu di dapu' diyolo' do hiri'd bandar di natantu' mantad do diyolo' do soira-ira' nopo. 33 Ondung haro o tulun do Liwi do padagang do walai dit id suang dot ongoiso' di kabandaran di natantu' do diyolo'ddi, om ondung a' dau oboli kawagu iri, om mositi' nod pogulion kawagu dot id dau i walai'ddi dot orikot i Toun do Kopogulian, tu' iri nopo walai di tulun do Liwi do hiri'd bandar diyolo', om iyolo' kasai' no o kasanganu do gisom dot alaid dot id pogialatan di tulun dot Israil. 34 Nga' iri nopo kobuturan do hiri'd posorili' di kabandaran do tulun do Liwi, om a' no kopio koino-ino do padagangon; tu' iyolo' kasai' no o kasanganu'ddi do gisom dot alaid.

I Paalasan dot id Tulun do Mosikin

35 Ondung haro o tulun dot Israil di poingiyon dot id somok dokoyu di rumutum kopio, om gisom dot aiso' no o kanon dau om mositi' nod onuan dokoyu iyau dot irad di patahakon dokoyu dot id tulun di gumadsi'. Om poingiyon kasai' indo iyau do hiri'd somok dokoyu. 36-37 Kada' dokoyu pokionuwai'd bunga i tusin di pinaalasan dokoyu dot id tulun diri. Suwai ko' koronok kou nod Kinorohingan, om pologoson no o tulun diri do poingiyon do hiri'd somok dokoyu. Om kada' kou panganu'd tuntung do mantad id taakanon di padagangon dokoyu dot id dau. 38 Iri no o ponuhuan do Tuhan, i Kinorohingan dokoyu, i pinoposoliwan dokoyu do mantad hilo'd Masir, do papatahak dokoyu diti tana' do Kanaan; om osiliu indo iyau do Kinorohingan dokoyu.

Kopolobusan do Turipon

39 Ondung haro o sompi' ko' tulun dot Israil di poingiyon dot id somok dokoyu do rumutum kopio, om gisom do dumagang nopo iyau dot id dokoyu do sumiliu'd turipon, om kada' dokoyu iyau suhuo' do momonsoi'd karaja' di dong turipon. 40 Mositi' nod miyon nopo iyau do hiri'd dokoyu do miagal do tulun di gumadsi'; om kumaraja' dot id dokoyu do gisom dot orikot i Toun do Kopogulian. 41 Tontok nopoddi om mositi' nod tumongkiad iyau om i tangaanak dau di walai dokoyu, om gumuli' do hiri'd sompiiyon dau om hiri'd tana' di komolohingan dau. 42 Iri nopo tulun dot Israil om turipon i' do Tuhan, tu' iyau i' o pinoposoliwan diyolo' do mantad hilo'd Masir; om a' no iyolo' koino-ino do padagangon do maan do turipon. 43 Kada' dokoyu iyolo' raraato', nga' koronok kou nod Kinorohingan dokoyu. 44 Ondung orohian kou do haro o turipon, om mongoi kou nopo boli do mantad id bansa'd suwai di hiri'd posorili' dokoyu. 45 Om koino-ino kou i' do momoli di tangaanak do tulun do bansa'd suwai di poingiyon dot id rolot dokoyu. Iri nopo tangaanak do bansa'd suwai dit osusu dot id pomogunan dokoyu, om koino-ino i' do silihon do dokoyu'd songonuon. 46 Om koino-ino i' iyolo' do potungkusan dokoyu di tangaanak dokoyu do maan diyolo'd turipon do solinaid po diyolo'd poimpasi. Nga' kada' nogi' kopio dokoyu raraato' o sompi' ko' tulun dot Israil. 47 Ondung haro o bansa'd suwai di poingiyon dot id rolot dokoyu do kumaya', om rumutum nogindo i sompi' ko' tulun dot Israil, om dumagang nondo iyau do sumiliu'd turipon di bansa'd suwai'ddi, ko' id sompiiyon di bansa'd suwai. 48 Om kadagang nopondo iyau, om koino-ino kasai' i' i tulun dot Israil diri do bolion kawagu do tongoiso' di tobpinai dau'd kusai, 49 ko' i tamanon dau, ko' i tikid dau'd molohing, ko' i koobpinayan dau'd suwai dit id somok po o koobpinayan; ko' iyau piya, di kaanu iyau'd tusin do kabagal do pambayar, nga' milo i' do momoli do kopolobusan do tinan dau. 50 Om mositi' nod monokirunding iyau di tulun di minomoli dau. Om intobon diyolo' i toun do mantad di duminagang i tulun diri do sumiliu'd turipon om gisom dot orikot i Toun do Kopogulian dit id dosunsudan. Om tontuon nogindo diyolo' o gatang di kopolobusan dau. Om iri nopo pamagatang om poiyoon di pamagadsi' do tulun di gumadsi'. 51-52 Om mositi' nod pogulion kawagu di turipon o wookon di gatang do pinomoli do tumanud do kogumuon do toun di noolu', 53 do miagal-agal ko' tulun iyau di guminadsi' do monikid toun nod godsian. Om a' no kopio koino-ino do raraaton iyau di tuan dau. 54 Ondung a' iyau kalabus do tumanud di duwo o ralan do kolobusan diri, om mositi' nod polobuson iyau om i tangaanak dau do tontok do Toun di Kopogulian dit id dosunsudan. 55 Tulun nopo dot Israil om a' i' koino-ino do sumiliu'd turipon do gisom dot ikapatai, tu' tulun nopod Israil om turipon nod Tuhan. Iyau i' o pinoposoliwan diyolo' do mantad hilo'd Masir. Om iyau no o Tuhan, i Kinorohingan diyolo'.

Oturan 26

Barakat dot id Tulun dit Obingumboyo'

1 Om boros kad Tuhan, “Kada' kou pomonsoi'd tingolig, om kada' kou popoingkakat do tininganak om torigi'd watu di kinikiran do maan do tukuon. Tu' iyoho' no o Tuhan, i Kinorohingan dokoyu. 2 Ramayon no dokoyu i piro-piro o tadau dot agayo do tugama', om pusohon no i tiyonon do sumambayang dot id doho'. Tu' iyoho' no o Tuhan. 3 Ondung miontok dit oturan o kowoyo-woyoon dokoyu om mumboyo' kou di ponuhuan ku, 4 om porikoton ku indo kasai' o rasam di dongkararasaman kasai', om kosuni i' i songintanom do hiri'd tana', om mongua' i kouwaan dokoyu. 5 Om a' indo aayi-ayi' o tua' di tanom-tanom di hiri'd tana' dokoyu, gisom dot orikot nopo i kopongupuan dokoyu'd tua' dot anggur, om maso po dokoyu do mongomot do gandum. Om tontok nopo dit orikot no o kapananaman do gandum, om maso po dokoyu do mongupu' do tua' dot anggur. Om kabagal kasai' indo dokoyu o taakanon dokoyu, om osimbayan kou do mongiyon-ngiyon dot id pomogunan dokoyu. 6 Om onuan ku indo iyokoyu do kosimbayanan do hilo'd pomogunan dokoyu, gisom dot osimbayan kou nopod modop, tu' aiso' no o poddosi dokoyu. Punsoon ngai' ku nopondo i nintorusan dit ongorongit do hilo'd pomogunan dokoyu, om pisangadan do hilo' nga' aiso' nondo. 7 Angaala' indo dokoyu i pisangod dokoyu, 8 om limo nopo dokoyu nga' kaala' no do hatus o tulun, om hatus no om kaala' i' do hopod noribu o tulun. 9 Barakatan ngai' ku indo iyokoyu, om onuan ku iyokoyu do tanak dot ogumu'. Om nunu nopo i nakabatos ku dot id dokoyu nga' bayaanon ngai' ku i'. 10 Om ogumu' tomod nondo o tomot dokoyu gisom do koromut do sontoun. Om gisom do taamon pondo dokoyu i noolu' di nomot dit id gulu om haro i' o poiyanan di wagu koomot. 11 Om mundorong oku indo dot id pogialatan dokoyu do hiri'd Kiim ku dit Olidang, om a' ku indo kopio iyokoyu tongkiadan. 12 Moyo-woyo' oku indo kasai' dokoyu; om osiliu oku do Kinorohingan dokoyu, om iyokoyu nga' osiliu nondo do tulun ku. 13 Iyoho' no i Tuhan, i Kinorohingan dokoyu, o pinoposoliwan dokoyu do mantad hilo'd Masir om a' kou noddi osiliu'd turipon. Noidu' ku no i kuasa' di monginggorit dokoyu om nosiliu ku no iyokoyu'd tulun dit a' porintaon do bansa'd suwai,” ka dau.

Hukuman dot id Tulun dit A' Obingumboyo'

14 Om boros kad Tuhan, “Ondung a' kou tumanud do ponuhuan ku, om ohukuman kou no. 15 Ondung a' kou tumanud dit oturan ku om i boros ku, om mamaraag kou no di tumpongo di winonsoi ku dot id dokoyu, 16 om hukuman ku no iyokoyu. Porikatan ku nondo iyokoyu do kosusaan --- toruol om sogiton dit a' milo'd lingoson, gisom dot obolou o mato dokoyu, om oinggorit o koposi-posion dokoyu. Momutanom kou piya nga' a' kou i' kaakan di tua' di tinanom dokoyu, tu' rumikot nondo i pisangod do mongoi pangala' dokoyu om mangayi' di natanom-tanom dokoyu. 17 Om saapon ku nondo iyokoyu gisom dot aala' kou. Om iri nondo tulun dit araatan dokoyu o momorinta' dokoyu. Om adalaan kou nondo kopio'd moddosi gisom do manangkus kou'd mogidu' dot aiso' piya o momogusa' dokoyu. 18 Ondung a' kou mumboyo' doho' do kopuriman kou piya ngai'ddi, om ruhangan ku pondo o hukuman dokoyu dot inturu' kopiluap ko' i gulu. 19 Adalaan no daa kopio kasawat o ginawo dokoyu, nga' poinsiribaon ku indo iyokoyu. Aiso' nondo o rasam do sumondot, om tumuu pondo om kumodou do miagal do watu o tana' dokoyu. 20 Aiso' nopondo o kootuk-otukon do huyan dokoyu, tu' a' i' haro o sumuni do hiri'd tana' dokoyu, om a' mongua' o kouwaan dokoyu. 21 Ondung sumurilog kasai' kou om a' kou mumboyo' doho', om ruhangan ku pondo o hukuman dokoyu do gisom dot inturu' kopiluap ko' i gulu. 22 Porikoton ku nondo i nintorusan dit ongorongit dot id pogialatan dokoyu. Om iri nondo nintorusan diri o mimpatai di tangaanak dokoyu, om i tayam-tayam dokoyu, om mangayi' dokoyu gisom dot okuri' kou nondo, om ongoingou pondo i karalan-ralanan dot id pomogunan dokoyu. 23 Ondung a' kasai' kou mumboyo' doho', do kopuriman kou piya ngai' di pomohukum diri, suwai ko' sumaap kou nogi', 24 om saapon ku no iyokoyu om hukuman ku dot inturu' kopiluap o kawagato' ko' mantad dit id gulu. 25 Om porikot oku nondod pisangadan dot id dokoyu do pomohukum ku dokoyu tu' nokotolibamban kou no di tumpongo toko'. Om tontok nopondo di tumimung kou dot id bandar dokoyu do mongoi daa intirung, om porikatan ku po iyokoyu'd toruol dit a' milo'd lingoson, gisom dot a' nondo milo dot a' kou tumahak dot id pisangod dokoyu. 26 Om ooiyan kou nondo do taakanon gisom dot iso' poo o pagansakan do roti do pakayon do hopod o tongoondu', tu' iri po o haro dot id diyolo'. Om toini-inion nondo i taakanon. Om aayi' piya dokoyu i taakanon nga' louson kasai' kou po. 27 Ondung sumaap kasai' kou om a' kou mumboyo' doho' do kopuriman kou piya do koinsanai'ddi, 28 om tumogod oku nondo kopio om saapon ku iyokoyu. Om hukuman ku iyokoyu dot inturu' kopiluap o kawagato' ko' mantad dit id gulu. 29 Om adalaan kou nondo kopio'd louson gisom dot iri piya tangaanak dokoyu nga' kanon i' dokoyu. 30 Om raagon ku nondo i tiyonon dokoyu'd modsubak di hilo'd timpak do konulu-nuluan, om habaon ngai' ku i mija' do podtutudan dokoyu'd kominyan, om pataamon ku nondo o rata' dokoyu dot id tingolig dokoyu di nangahaba'ddi. Om araatan oku nondo kopio, 31 gisom do silihon ku'd pogun i kabandaran dokoyu, om raagon ku i tiyonon dokoyu'd modsubak, om a' ku romiton i porsombahan dokoyu. 32 Om raagon ku nopondo kopio i pomogunan dokoyu, gisom dot ongkotigowo i pisangod di sumowoli'd miyon do hiri do kokito di kinaraagan. 33 Porikatan ku nondod pisangadan o hiri'd pomogunan dokoyu, om potompiason ku iyokoyu dot id piro-piro o pomogunan do bansa'd suwai. Om kologos tomod nopondo i tumo dokoyu, om ongosiliu'd pogun i kabandaran dokoyu. 34-35 Om tontok nondoddi do koundorong kopio i tana' dokoyu dit a' daa dokoyu uhang do poundorong-dorongon do buaton. Om daamot nopondo dokoyu do hilo'd dombokon, i hilo'd pomogunan do pisangod dokoyu, om poillogos tomod nopondo i tana' dokoyu. Om tontok nondo'ddi do koundorong do buaton i tana' dokoyu. 36 Om padalaan ku nondo iyokoyu do momorolosi, iyokoyu it atanggayan dot id pomogunan do bansa'd suwai, gisom dot iri piya kohus do roun dit awayaan do ribut nga' papatangkus i' dokoyu do mogidu'. Om manangkus kou nondod mogidu' do miagal pod gusa-gusaon kou dot id suang do pisangadan. Om ohunduk kou indo do tontok piya dit aiso' o pisangod dot id sorili' dokoyu. 37 Om kopogitatahub kou nopondo dot ouru'd manangkus do mogidu', dot aiso' piya o momogusa'. Om a' kou no kogoos do sumaap dot isai nopo o pisangod. 38 Om apatai kou nondo do hilo'd pomogunan di pinananggayan di pisangod dokoyu, om aakan kou di tana' di pisangod dokoyu. 39 Om iri nopondo it okuri' no dokoyu, i noolu-olu' do poingiyon do hilo'd pomogunan do pisangod dokoyu, om monorimo-rimo pod tumongob dot i dusa dokoyu om i dusa di komolohingan dokoyu o kobungou. 40 Nga' okunon indo di sinakagon dokoyu i dusa diyolo' om i dusa di komolohingan diyolo', i nokowonsoi'd dusa tu' suminaap i' doho'. Suminurilog iyolo' doho', 41 gisom dot a' oku noddi milo dot a' sumaap diyolo' om moguyung diyolo', om gowoi poddi om natanggayan iyolo' di pisangod diyolo' do hilo'd pomogunan di pisangod diyolo'. Om id tohuri nopondo, di koinsiriba' om kopuriman do hukuman di dusa om i kosurilogo' diyolo' i sinakagon diyolo', 42 om sorohon ku indo i tumpongo ku dot id di Yakub, om id di Isak, om id di Abraham. Om inwoguan ku indo i batos ku do papatahak di tana'ddi dot id tulun ku. 43 Nga' id gulu po kopio om mositi' nod ongkopoggidu' ngai' po i tulun do mantad id pomogunan diri, om koundorong i' kopio'd buaton i tana'. Om mositi' nod opurimanan ngai' di tulun ku o koinsanai di hukuman do porikoton ku dot id diyolo', tu' a' i' iyolo' tuminanud dit oturan om i ponuhuan ku. 44 Nga' tontok nopo di poundorong iyolo' do hilo'd pomogunan do pisangod diyolo', om a' ku i' iyolo' tongkiadan kopio, om a' ku iyolo' punsoon. Tu' ondung punsoon ku iyolo' nga' iyoho' no o kapamaraag di tumpongo ku dit ogirot dot id diyolo', om Tuhan oku i' om Kinorohingan oku diyolo'. 45 Om inwoguan ku nondo i tumpongo ku dot id komolohingan diyolo' do tontok di pinopointalang oku do kuasa' ku dot id koinsanai'd bansa' dot i pinoposoliwan oku di tulun ku do mantad hilo'd Masir o kinopointalangan ku; om osiliu oku indo, iyoho' i Tuhan, do Kinorohingan diyolo',” ka dau. 46 Om iri no ngai' ot oturan om ponuhuan di pinatahak do Tuhan dot id di Musa, di hilo'd Nuluhon do Sinai, do patahakon dot id tulun dot Israil.

Oturan 27

Oturan do Pasal do Porsombahan dot id Tuhan

1 Om patahako' nod Tuhan dot id di Musa 2 iti piro-piro ot oturan do patahakon dot id tulun dot Israil, “Soira' nopod katahak dot id Tuhan ot iso' o tulun do maan do pamayaan do batos, om milo i' do polobuson o tulun diri ondung mambayar nod tusin dot irad diti, 3-7 do tumanud di gatang di natantu' mantad: --- Kusai nopo dit id piolitan do duwo nohopod o toun om onom nohopod o toun, om limo nohopod o tusin do pirok do pambayar. --- tondu' nopo di nosukod no om tolu nohopod o tusin do pirok do pambayar. --- tanak nopod kusai dit id piolitan do limo o toun om duwo nohopod o toun, om duwo nohopod o tusin do pirok o pambayar. --- tanak nopod tondu' om hopod o tusin do pirok do pambayar. --- tanak nopod kusai dit id siriba' do limo o toun do tumur om limo o tusin do pirok do pambayar. --- tanak nopod tondu' dit okoro' po om tolu o tusin do pirok do pambayar. --- kusai nopo dit id sawat ko' onom nohopod o toun do tumur om hopod om limo o tusin do pambayar. --- tondu' nopo dit id sawat ko' onom nohopod o toun do tumur om hopod o tusin do pirok do pambayar. 8 Ondung adalaan kopio komosikin i tulun di minamatos diri gisom dot a' iyau kabayar di gatang di natantu' mantad, om mositi' nod ngoyon dau pootodo' i tulun di pinatahak dot id Tuhan diri dot id imam. Om tontuon nondo dit imam o gatang dit omura, do tumanud dit asaapan do tulun diri. 9-10 Ondung pasal do nintorusan dit a' sosomu', i koino-ino'd maan do porsombahan dot id Tuhan i pinabatos, om a' no di tulun di minamatos koino-ino do tingalanan iri do nintorusan do suwai. Tu' koinsanai di porsombahan do patahakon dot id Tuhan om olidang no. Nga' ondung tingalanan daa dau iri, om don Tuhan goduwo no di nintorusan diri. 11 Nga' ondung pasal do nintorusan di sosomu' i pinabatos, i nintorusan dit a' milo'd romiton do maan do porsombahan dot id Tuhan, om mositi' nod pootodon di tulun di minamatos o nintorusan diri dot id imam. 12 Om tontuon nondo dit imam o gatang di nintorusan diri do tumanud do koinan-inano' di nintorusan. Om a' no koino-ino do pingkurangan i gatang di pinatantu'. 13 Ondung bolion kawagu di tulun i nintorusan diri, om mositi' nod bayaran dau i gatang om ruhangan pod induwo i sompihopod. 14 Ondung haro o tulun do papatahak do walai dau dot id Tuhan, om tontuon nondo dit imam o gatang di walai do tumanud do kosonong-sonongo' di walai. Om a' no milo do pingkurangan i gatang di pinatantu'. 15 Ondung bolion kawagu di tulun di pinapatahak di walai, i walai'ddi, om mositi' nod bayaran dau i gatang om ruhangan po dot induwo i sompihopod. 16 Ondung haro o tulun do papatahak do songkoiyonon di tana' dau dot id Tuhan, om mositi' nod tontuon i gatang do tumanud do kogumuon do tonomon di pananom do tana'ddi. Om gatang nopod pointikid-tikid do 20 kilogram do barli do tonomon om hopod o tusin do pirok. 17 Ondung patahakon dau i tana' do dongkolimponusan do Toun di Kopogulian, om mositi' nod bayaran ngai' i gatang. 18 Ondung patahakon i tana' do piro-piro toun dot id tohuri ko' iri, om mositi' nod tontuon dit imam o gatang diri do tumanud do kogumuo'd toun di noolu' do gisom dot orikot i Toun do Kopogulian dit id dosunsudan, om tontuon nondo dau o gatang di poimura-mura. 19 Ondung bolion kawagu di tulun di pinapatahak di tumo, i tumo'ddi, om mositi' nod bayaran dau i gatang om ruhangan pod induwo i sompihopod. 20 Om ondung pobolion dau i tumo'ddi dot a' po dau abayaran dot id Tuhan, om a' no iyau koino-ino do momoli kawagu di tana'ddi. 21 Om Toun nopondod Kopogulian dit id dabantalan, om asanganu kasai' nondod Tuhan i tumo'ddi do gisom dot alaid, om patahakon nondo iri dot id tongoimam. 22 Ondung haro o tulun do papatahak dot id Tuhan do songkoiyonon o tumo di binoli dau, 23 om tontuon nondo dit imam o gatang diri do tumanud do kogumuo'd toun di noolu' do gisom dot orikot i Toun do Kopogulian dit id dosunsudan. Om mositi' nod bayaran di tulun o gatang di natantu'ddi do tontok do tadau'ddi. Om Tuhan no o kasanganu di tusin diri. 24 Om tontok nopondo di Toun do Kopogulian om mositi' nod pogulion i tumo'ddi dot id tulun di sanganu mantad ko' id sinakagon po dau. 25 Om mositi' nod tontuon i gatang do tumanud di pamagatang di natantu' mantad. 26 Iri nopo tayam-tayam dit id gulu kosusu om don Tuhan no, om iso' pod tulun nga' aiso' no o koino-ino do papatahak diri dot id Tuhan do maan do porsombahan do tumanud do kagaanan do ginawo. Iri nopo tanak do sapi', om i tanak do dumba', ko' i tanak do kambing dit id gulu kosusu om don Tuhan ngai' no. 27 Om iri nopo nintorusan do sosomu' dit id gulu kosusu om milo i' do bolion kawagu do tumanud di pamagatang di natantu' mantad, nga' ruhangan po dot induwo i sompihopod. Ondung a' bolion kawagu, om koino-ino i' do pobolion dot id tulun do suwai do tumanud di gatang di natantu' mantad. 28 Iso' pod tulun nga' aiso' i' o koino-ino do padagang ko' momoli kawagu do nunu nopo i pinatahak dau dot id Tuhan dit aiso' o pinaantakan, do tulun tuu iri ko' nintorusan ko' tana'. Tu' Tuhan no o sanganu'ddi do gisom dot alaid. 29 Tulun piya di pinatahak dot id Tuhan do maan patayo' nga' a' no koino-ino do bolion kawagu, suwai ko' mositi' nod patayon. 30 Sompihopod nopod nunu nopo o tua' do totonomon, do gandum tuu ko' tua-ua', nga' don Tuhan ngai' no. 31 Ondung haro o tulun dot orohian do momoli kawagu'd wookon diri, om mositi' nod bayaran dau i gatang di natantu' mantad, om ruhangan pod induwo i sompihopod. 32 Iso' nopod mantad do hopod o tayam-tayam om don Tuhan no. Ondung intobon i tayam-tayam, om pointikid-tikid di kohopod, om mositi' nod don Tuhan noddi. 33 Nga' a' i' koino-ino do maan di sanganu sompipio' i tayam-tayam gisom dot iri ngai' pondo it angara-raat no ot opili'. Om a' nogi' koino-ino do poolonon dau i tayam-tayam di nopili'ddi. Ondung poolonon dau i tayam-tayam diri do tayam-tayam do suwai om mositi' nod patahakon goduwo nopo i tayam-tayam diri dot id Tuhan, om a' no koino-ino'd bolion kawagu,” ka dau. 34 Om iri no ngai' o boros do Tuhan do pinoboros dau dot id di Musa di hilo'd Nuluhon do Sinai do polombuson dot id tulun dot Israil.

Pongintaban 1

Pinongintaban do Tulun dot Israil di Koinsan Nogi'

1 Tontok di tadau do koiso' di tulan do koduwo di toun do koduwo do mantad di kinosoliwanan di tulun dot Israil do mantad id pomogunan do Masir, om boro-boros no o Tuhan dot id di Musa do tontok di hiri iyau id suang di Kiim do Tuhan di hilo'd tana' do kowotuan do Sinai. Om boros ka dau, 2 “Mositi' no do papaharo kou di Harun do pongintaban dilo tulun dot Israil, om pogisuwai-suwayon iyolo' do mongintob do tumanud do pinuruan do sompiiyon diyolo'. Om tulison ngai' no o ngaran di tongokusai 3 di duwo nohopod o toun do tumur ko' it otuo ko' iri, it ongokoris po do sumiliu'd soudor. 4 Om suhuon no o tiso' di boyoon do pinuruan do sompiiyon do mantad id pointikid-tikid di payat do monulung dokoyu,” ka dau. 5-16 Om iti ngai' no i tongokusai, i boyoon do mantad id pointikid-tikid do payat do nongopili' do momonsoi do karaja'ddi. - Payat - Boyoon do Pinuruan do Sompiiyon - Rubin - I Ilisur, i tanak di Sidour - Simion - I Solumiol, i tanak di Surisiadai - Yohuda - I Nahason, i tanak di Aminadab - Isakar - I Nitaniil, i tanak di Suar - Sibulon - I Iliab, i tanak di Hilon - Ipraim - I Ilisama, i tanak di Amihud - Manasi - I Gamaliol, i tanak di Pidasur - Binyamin - I Abidan, i tanak di Gidioni - Dan - I Ahiosor, i tanak di Amisadai - Asor - I Pagiol, i tanak di Okran - Gad - I Iliasap, i tanak di Rohuil - Naptali - I Ahira, i tanak di Inan 17 Om iri ngai' no i hopod om duwo o tongokusai'ddi o minonguhup di Musa om i Harun 18 do minonimung ngai' di tulun do tontok di tadau do koiso' di tulan do koduwo. Om tuliso' ngai' no diyolo' o ngaran di tulun do pinogisosompipi' do tumanud di pinuruan do sompiiyon diyolo'. Om ngaran nopo do koinsanai di tongokusai di nokorikot do duwo nohopod o toun do tumur ko' it otuo ko' iri om tinulis ngai' nopo om pinointob 19 do tumanud di pinonuhuan do Tuhan. Om tuliso' ngai' no di Musa o ngaran di tongokusai'ddi di hilo' iyolo'd tana' do kowotuan do Sinai. 20-46 Om iri nopo tongokusai di nokorikot do duwo nohopod o toun do tumur ko' it id dotuo ko' iri, it ongokoris po do sumiliu'd soudor, om tinulis ngai' nopo o ngaran do sinompipi' do tumanud di pinuruan do sompiiyon om sompiiyon diyolo'. Nimpuun nopo do monulis om i payat di Rubin, i tanak di Yakub dot id dotuo. Om poingkaa no o kogumuon diyolo': - Payat - Kogumuon - Rubin - 46,500 - Simion - 59,300 - Gad - 45,650 - Yohuda - 74,600 - Isakar - 54,400 - Sibulon - 57,400 - Ipraim - 40,500 - Manasi - 32,200 - Binyamin - 35,400 - Dan - 62,700 - Asor - 41,500 - Naptali - 53,400 - Kogumuon do toinsanan: - 603,550 47 Iri nopo tulun do Liwi om a' i' tinulis o ngaran do pinosugku' do ngaran di payat do suwai, 48 tu' nosunudan nod Tuhan i Musa do 49 poingkaa, “Papaharo ko nopod pongintaban do tulun dit ongokoris po do sumiliu'd soudor, om kada' pohompito' i payat di Liwi. 50 Nga' suhuon nogi' i tulun do Liwi do momogompi' di Kiim ku om koinsanai di pakakas do hiri. Om karaja' nopo diyolo' om: sumaan di Kiim ku do mitonggoi ngai' di pakakas do hiri'd Kiim, om popowonsoi do kiim diyolo' do posorili' di Kiim ku. 51 Om soira' nopod mundaliu kou, om iri no i tulun do Liwi o momohuyas di Kiim ku, om popowonsoi kawagu'ddi dot id pomukiiman kawagu dokoyu. Om isai nopo o tulun do suwai ko' i tulun do Liwi, do mongoi insomok di Kiim om mositi' nod hukuman do kapatayon. 52 Om iri no tulun dot Israil di suwai om mositi' nod popowonsoi do kiim diyolo' do tumanud di sinompuruan diyolo', om sorompori-pori do tumanud di bondira' diyolo'. 53 Nga' iri nopo tulun do Liwi om mositi' nod popowonsoi di kiim diyolo' do posorili' di Kiim ku. Om mositi' nod tamangan diyolo' i Kiim diri om aiso' indo o tulun do koinsomok dot i kopotogod doho', gisom do hukuman ku nondo o tulun dot Israil,” ka dau. 54 Om wonsoyo' ngai' no di tulun dot Israil o koinsanai di pinonuhuan do Tuhan dot id di Musa.

Pongintaban 2

Koiyonon do Pointikid-tikid di Payat do Hiri'd Kokiiman

1 Om patahako' nod Tuhan dot id di Musa om id di Harun iti piro-piro o toturan. 2 Soira' nopod powonsoi i tulun dot Israil do Kiim diyolo', om mositi' nod powonsoyon do pointikid-tikid do tulun o kiim diyolo' dot id sahau do bondira' di sinompuruan diyolo', mikuwo'd dakatan do tanda' di pinuruan do sompiiyon diyolo' i kiim diyolo'. Om mositi' nod posorili' di Kiim ku o pawansayan ngai' di kiim diri. 2|30|HK8|Kokiiman dot ongkibondira' do tumanud di sinompuruan|2.2 3-9 Ponong id koulayon nopo, om i tulun dit id sahau do bondira' do sinompuruan di Yohuda o popowonsoi di kiim diyolo' do tumanud di pinuruan diyolo', om sorompori-pori do moyo' di boyoon diyolo' do miagal diti: - Payat - Boyoon - Kogumuon - Yohuda - I Nahason i tanak di Aminadab - 74,600 - Isakar - I Nitaniil i tanak di Suar - 54,400 - Sibulon - I Iliab i tanak di Hilon - 57,400 - Kogumuon do toinsanan: - 186,400 Om mositi' no dot i sinompuruan di Yohuda o mogulu do mamanau. 10-16 Ponong id salatan nopo om i tulun dit id sahau do bondira' di sinompuruan di Rubin o popowonsoi do kiim diyolo' do tumanud di pinuruan diyolo', om sorompori-pori do tumanud di boyoon diyolo', do miagal diti: - Payat - Boyoon - Kogumuon - Rubin - I Ilisur i tanak di Sidour - 46,500 - Simion - I Solumiol i tanak di Surisiadai - 59,300 - Gad - I Iliasap i tanak di Rohuil - 45,650 - Kogumuon do toinsanan: - 151,450 Om mositi' no dot i sinompuruan di Rubin o mamanau do sumusuhut di sinompuruan di Yohuda. 17 Om kapamanau po i duwo o sinompuruan diri om mamanau nogindo i payat di Liwi, it ongkisinaan di Kiim do Tuhan. Om mositi' nod mamanau o pointikid-tikid di sinompuruan diri do tumanud dit oturan do mamanau do miagal di maso'd powonsoi di kiim, tu' sorompori-pori nopod mundorong do hiri'd kinoiyonon diyolo', dot id sahau di bondira' do sinompuruan diyolo'. 18-24 Ponong id kotonobon nopo om i tulun dit id sahau do bondira' di sinompuruan di Ipraim o popowonsoi do kiim do tumanud di pinuruan diyolo', om sorompori-pori do tumanud di boyoon diyolo' do miagal diti: - Payat - Boyoon - Kogumuon - Ipraim - I Ilisama i tanak di Amihud - 40,500 - Manasi - I Gamaliol i tanak di Pidasur - 32,200 - Binyamin - I Abidan i tanak di Gidioni - 35,400 - Kogumuon do toinsanan: - 108,100 Om iti no sinompuruan di Ipraim om mositi' nod mamanau do sumusuhut di payat di Liwi. 25-31 Ponong id utara nopo om i tulun dit id sahau do bondira' di sinompuruan di Dan o popowonsoi'd kiim diyolo' do tumanud di pinuruan diyolo', om sorompori-pori do tumanud di boyoon diyolo' do miagal diti: - Payat - Boyoon - Kogumuon - Dan - I Ahiosor i tanak di Amisadai - 62,700 - Asor - I Pagiol i tanak di Okran - 41,500 - Naptali - I Ahira i tanak di Inan - 53,400 - Kogumuon do toinsanan: - 157,600 Om iti nopo sinompuruan do payat di Dan om mamanau do hiri'd ponong id tohuri kopio. 32 Om kogumuon nopo di tulun dot Israil di nongkotulis o ngaran om 603,550 o tulun. 33 Om iri nopo payat di Liwi om a' i' pinotulis o ngaran do poinghompit di tulun dot Israil do suwai, tu' iyo noddi o pinonuhuan do Tuhan dot id di Musa. 34 Om wonsoyo' ngai' nopo di tulun dot Israil i pinonuhuan do Tuhan dot id di Musa. Sompori-pori nopo iyolo'd pinopowonsoi do kiim diyolo' dot id sahau do bondira' diyolo', om minamanau do mogiwoyo-woyo' di pinuruan do sompiiiyon diyolo'.

Pongintaban 3

I Tangaanak di Harun do Tongokusai

1 Om iti no o sompiiyon di Harun om i Musa do tontok di minoro-boros o Tuhan dot id di Musa di hilo'd timpak di Nuluhon do Sinai. 2 I Harun nopo om kianak dot apat o kusai: i Nadab it id dotuo, om i Abihu, om i Iliasar, om i Itamar. 3 Om pinili' ngai' nopo iyolo' do sumiliu dot imam dot i tinuntugan do tumau o tulu o ralan do minomili'. 4 Nga' i Nadab nopo di Abihu om napatai iddi do tontok di pinapatahak iyolo'd tapui dit okon ko' korohian do Tuhan di maso diyolo' do hilo'd tana' do kowotuan do Sinai. Om aiso' i' goduwo o tanak diyolo', om iyo Iliasar poddi di Itamar o maganu-anu di toonuon dot imam di poimpasi po i Harun.

Pinili' i Tulun do Liwi do Maganu-Anu do Muhup dit Imam

5 Om boros kad Tuhan dot id di Musa, 6 “Suhuon no i payat do Liwi do mongoi'd hiti'd gulu, om pilion i' iyolo' do sumiliu'd susuhuon di Harun, it Imam diri. 7 Om mositi' nod momonsoi iyolo' di karaja' dit apatut diyolo'd wonsoyon do hiri'd Kiim ku om mogobi-obi' dit imam om i tulun dot ogumu'. 8 Om mositi' nod iyolo' o mongilo-ilo do koinsanai di pakakas di Kiim om mogobi-obi' di tulun dot Israil do suwai. 9 Iso' noo o tonggungan di tulun do Liwi, iri no tu' sumiliu'd susuhuon di Harun om i tangaanak dau. 10 Om mositi' nod pilion nu i Harun om i tangaanak dau do momonsoi'd karaja' di dong imam; om isai nopo o tulun do suwai di mumbal daa do momonsoi'd karaja'ddi nga' mositi' nod hukuman do kapatayon,” ka dau. 11 Om boros kad Tuhan dot id di Musa, 12-13 “Baino' nopondo om iyoho' no o sanganu di tulun do Liwi. Tontok di pinatai ku o koinsanai di tanak do kusai do tulun do Masir dit id gulu kosusu, om diri nod pinotobilang ku do maan ku'd doho' i tangaanak do kusai dit id gulu kosusu, dot id suang do pointikid-tikid do sompiiyon do tulun dot Israil, om iri nogi' i tanak do tontoluhan do tayam-tayam diyolo' dit id gulu kosusu. Om poningolon nopo di tangaanak do kusai do tulun dot Israil dit id gulu kosusu om iri no i tulun do Liwi, om iyolo' no ot osiliu do songonuon ku. Tu' iyoho' no o Tuhan,” ka dau.

Pinongintaban di Tulun do Liwi

14 Om tontok no di hilo'd tana' do kowotuan do Sinai do sinuhu'd Tuhan i Musa 15 do monulis do ngaran do koinsanai di tulun do Liwi do tumanud di pinuruan do sompiiyon om sompiiyon diyolo'; om tinulis ngai' nopo o ngaran do pointikid-tikid do tanak do kusai di sombulan nogi' ko' otuo ko' iri o tumur. 16 Om wonsoyo' nod Musa i pinonuhuan do Tuhan diri. 17-20 I Liwi nopo om kianak do tolu o kusai: i Girson, i Kohat om i Morari. Om iyolo' no o komolohingan di piro-piro pinuruan do sompiiyon di pinungaranan do ngaran diyolo'. I Girson no om kianak do duwo o kusai: i Libni om i Simoi. I Kohat no om kianak dot apat o kusai: I Amram, i Yisar, i Hibron om i Usiol. Om i Morari no om kianak do duwo o kusai: i Mali om i Musi. Om iyolo' no o komolohingan di piro-piro o sompiiyon di pinungaranan do ngaran diyolo'. 21 Poinsuang nopo di pinuruan do sompiiyon di Girson om i sompiiyon di Libni om i sompiiyon di Simoi. 22 Kogumuon nopod tongokusai di sombulan nogi' ko' otuo ko' iri o tumur di nokointob om 7,500 o tulun. 23-24 Boyoon nopod pinuruan do sompiiyon diti om i Iliasap i tanak di Lail. Om pawansayan nopod pinuruan do sompiiyon diti do kiim diyolo' om mositi' no do hiri'd ponong id kotonobon, it id dotolikudan di Kiim do Tuhan. 25 Om iyolo' no o mongilo-ilo di Kiim, om i tokop di Kiim do ponong id suang, om i tokop di Kiim do ponong id soibau, om i tabir di wawayaan, 26 om i tabir di pomorinding di natad do posorili' di Kiim om i pananaraban do porsombahan, om i tabir di wawayaan di natad. Om iyolo' no o mongilo-ilo do nunu nopo o buruon di kagait do pakakas diri. 27 Om poinsuang nopo di pinuruan do sompiiyon di Kohat om i sompiiyon di Amram, om i Isar, om i Hibron, om i Usiol. 28 Om kogumuon nopod tongokusai di sombulan nogi' ko' otuo ko' iri o tumur di nokotulis o ngaran om 8,600 o tulun. 29 Om pawansayan nopod pinuruan do sompiiyon diti do kiim diyolo' om mositi' nod hiri'd ponong id salatan di Kiim do Tuhan. 30 Om boyoon nopo di pinuruan do sompiiyon diyolo' om i Ilisapan i tanak di Usiol. 31 Om iyolo' no o mongilo-ilo di Kaban do Tumpongo, om i mija', om i potitimpakan do lampung, om i pananaraban do porsombahan, om i mija' do podtutudan do kominyan, om i piro-piro pakakas do pakayon dit imam do hiri'd Bilik dit Olidang, om i tabir do wawayaan di Bilik dit Olidang Kopio. Om iyolo' no o mongilo-ilo do koinsanai di buruon do kagait do pakakas diri. 32 Boyoon nopo do toinsanan di tulun do Liwi om i Iliasar i tanak di Harun. Om iyau no o mongilo-ilo do koinsanai'd tulun di maganu-anu do hiri'd Bilik dit Olidang. 33 Poinsuang nopo di pinuruan do sompiiyon di Morari, om i sompiiyon di Mali om i Musi. 34 Kogumuon nopod tangaanak do tongokusai di sombulan nogi' ko' otuo ko' iri o tumur di nokotulis o ngaran om 6,200 o tulun. 35 Om pawansayan nopod pinuruan do sompiiyon diti do kiim diyolo' om mositi' nod hiri'd ponong id utara di Kiim do Tuhan. Om boyoon nopod pinuruan do sompiiyon diti om i Suriol i tanak di Abihail. 36 Iyolo' nopo om sinuhu' do mongilo-ilo di papan di Kiim di poturidongon, om i ponukod di potibabaron, om iri ngai' i torigi, om i posungkadan di torigi om koinsanai di pakakas do hiri. Om iyolo' no o mongilo-ilo do nunu nopo o buruon do kagait do pakakas diri. 37 Om iyolo' nogi' o mongilo-ilo ngai' di torigi, om i posungkadan om i tali di pakayon do momorinding di natad. 38 Om i Musa nopod i Harun om koinsanai di tangaanak di Harun, om mositi' nod popowonsoi do kiim diyolo' do hiri'd dotimbabaan di Kiim do Tuhan, i ponong id koulayon. Om iyolo' no i momonsoi di wonsoyon di natantu' mantad do tontok do sumambayang, do bagi' di tulun dot Israil do hiri'd Bilik dit Olidang. Om isai nopo o tulun do suwai di mumbal do momonsoi'd miagal diri om mositi' nod hukuman do kapatayon. 39 Om kogumuon nopo do koinsanai di tangaanak do kusai di payat di Liwi di sombulan nogi' ko' otuo ko' iri o tumur di tinulis di Musa o ngaran, do sinompipi' do tumanud di pinuruan do sompiiyon diyolo', do tumanud di pinonuhuan do Tuhan om 22,000 o tulun.

I Tulun do Liwi o Pinoningolon di Tangaanak do Kusai dit id Gulu Kosusu

40-41 Om boros kad Tuhan dot id di Musa, “Koinsanai di tangaanak do kusai di tulun dot Israil dit id gulu kosusu om doho' ngai' no. Om tulison no o ngaran do pointikid-tikid do tangaanak do kusai di tulun dot Israil dit id gulu kosusu, di sombulan no ko' otuo ko' iri o tumur. Nga' maan nopod poningolon diyolo' om oinsanan nopo i tulun do Liwi do silihon ku do doho'd songonuon. Tu' iyoho' no o Tuhan! Om iri tayam-tayam di tulun do Liwi nga' onuon ku no do poningolon do koinsanai di tayam-tayam di tulun dot Israil dit id gulu kosusu,” ka. 42 Om wonsoyo' nod Musa o koinsanai di pinonuhuan do Tuhan; tinulis ngai' nopo dau o ngaran do koinsanai di tangaanak do kusai dit id gulu kosusu 43 di sombulan no ko' it otuo ko' iri o tumur. Om kogumuon nopod toinsanan diyolo' om 22,273 o tulun. 44 Om boro-boros no o Tuhan dot id di Musa do poingkaa, 45 “Dinondo nopodti om patahakon no dot id doho' i tulun do Liwi do sumiliu do doho'd songonuon do maan do poningolon do koinsanai di tangaanak do kusai di tulun dot Israil dit id gulu kosusu, om patahakon ngai' i tayam-tayam di tulun do Liwi do maan do poningolon di tayam-tayam di tulun dot Israil dit id gulu kosusu. 46 Om iri nopo tangaanak do kusai do tulun dot Israil dit id gulu kosusu om 273 o tulun do poinggumu' mantad ko' i tulun do Liwi, om mositi' nod lopusan dokoyu i nokolobi'ddi. 47 Iso' nopo di tanak diri om mositi' nod lopusan dokoyu do limo o tusin do pirok do tumanud di pamagatang di natantu' mantad; 48 om patahakon no i tusin diri dot id di Harun om id tangaanak di Harun,” ka dau. 49 Om wonsoyo' nod i Musa i pinonuhuan do Tuhan diri. Om ngoyo' no dau 50 i tusin do pirok do 1,365 o kogumuo'. 51 Om patahako' no dau i tusin diri dot id di Harun om id tangaanak di Harun.

Pongintaban 4

Karaja' di Tulun do Liwi, I Mantad id Pinuruan do Sompiiyon di Kohat

1 Om suhuo' nod Tuhan i Musa 2 do mongintob di tulun do Liwi, i mantad id pinuruan do sompiiyon di Kohat do pogisompipi-pipion do tumanud di pinuruan do sompiiyon di sorokuri-kuri' om tumanud di sompiiyon diyolo'. 3 Om sinuhu' nogi' iyau do monulis do ngaran do koinsanai di tongokusai di kiumur dot id piolitan do tolu nohopod om limo nohopod o toun, it ongosorupai do maganu-anu do hiri'd Kiim do Tuhan. 4 Om karaja' nopo diyolo' nga' momogompi' di piro-piro pakakas dit ongolidang kopio. 5 Om patahako' nod Tuhan dot id di Musa iti piro-piro o ponuhuan do poingkaa: Orikot nopo o maso'd kopomohuyasan di kokiiman, om mositi' nod mongoi i Harun om i tangaanak dau do hilo'd suang di Kiim ku. Om iduwon nondo diyolo' i tabir dit id dotimbabaan di Kaban do Tumpongo, om potokopon di Kaban i tabir diri. 6 Om mositi' nod takapan kawagu diyolo' i Kaban diri do kulit dit osonong, om soibahan kawagu'd monokop do kain dit otomou. Om posusukon nogindo i kayu do pangantayang di Kaban. 7 Om mositi' nod takapan kawagu diyolo'd kain dot otomou i mija' di poiyanan do roti do patahakon dot id Tuhan. Om pasakayon nogindo di mija' i piring om i mangkuk di poiyanan do kominyan, om i mangkuk di poiyanan do porsombahan, om i kakanan di poiyanan do porsombahan do waig dot anggur. Om mositi' nod haro kasai' o roti do hiri'd sakai di mija'ddi. 8 Om mositi' nod takapan ngai' diyolo' iri do kain dot aragang. Om takapan no kawagu'd kulit dot osonong. Om posusukon nogindo diyolo' i kayu do pangantayang di mija'. 9 Om mositi' nod mongoi iyolo' anu do kain dot otomou, do ponokop di potitimpakan do lampung, om i lampung, om i sanggip om i talam, om koinsanai di poiyanan do tumau do saitun. 10 Iri nopo potitimpakan do lampung om koinsanai di pakakas di lampung nga' mositi' nod lopoton diyolo' do kulit dit osonong om pasakayon nogindo do hiri'd pangantayang. 11 Om owonsoi pondo o miagal diri, om mositi' nod takapan diyolo' do kain dit otomou i mija' do podtutudan do kominyan di tamas do winonsoi. Om takapan nogi' kawagu iri do kulit dit osonong. Om posusukon nogindo i kayu do pangantayang di mija' di podtutudan do kominyan diri. 12 Om mositi' nod ngoyon ngai' diyolo' i pakakas di pakayon do hiri'd Bilik dit Olidang, om mositi' nod lopoton iri do kain dit otomou. Om mositi' nod takapan diyolo' kawagu iri do kulit dit osonong. Om pasakayon nogindo do hiri'd pangantayangan. 13 Om mositi' nod iduan diyolo'd tauu di kilunok i pananaraban do porsombahan om takapan nogindo do kain dit aragang doitom-itom. 14 Om mositi' nod pasakayon diyolo' do hiri'd pananaraban do porsombahan o koinsanai di pakakas di pakayon do sumambayang: i poiyanan do tapui, om i totodok, om i pononduk, om i mimpun. Om mositi' nod takapan diyolo' iri do kulit dit osonong om posusukon nogindod hiri i kayu do pangantayang. 15 Om soira' nopo dot orikot o maso do kopomohuyasan di kokiiman, om mositi' nod rumikot i tulun di mantad id pinuruan do sompiiyon di Kohat do mongoi panaan di piro-piro pakakas dot ongolidang diri; nga' ngoyon nopo om it atakapan ngai' di Harun om i tangaanak dau i pakakas diri. A' i' koino-ino do koigit di pakakas dot ongolidang i tulun do mantad id pinuruan do sompiiyon di Kohat tu' ondung mongoi iyolo' igit diri om apatai no moti' iyolo'. Om iyo noddi o karaja' di tulun do mantad id pinuruan do sompiiyon di Kohat do tontok do powolihon i Kiim diri. 16 I Iliasar no, i tanak di Harun diri, om mongilo-ilo do koinsanai di hiri'd Kiim om i tumau di lampung, om i kominyan, om i porsombahan do gandum, om i tumau di ponununtug, om koinsanai dit id suang di Kiim di nokotobilang do maan do don Tuhan. 17 Om boros kad Tuhan dot id di Musa om id di Harun, 18-19 “Iti nopo piro-piro pakakas diti om nokotobilang no do maan do doho'. Om antaan-taan no kopio dokoyu, om a' i' koinsomok dilo pakakas i tulun do Kohat. Tu' apatai no moti' iyolo' do kowonsoi no iyolo'd miagal diri. Om mositi' nod sumuang di Kiim i Harun om i tangaanak dau, om tudukan nogindo diyolo' i tulun dit id payat di Kohat di karaja' diyolo' om it apatut diyolo'd igitan, om aiso' indo ot osiliu do miagal diri. 20 Nga' ondung sumuang i tulun do Kohat di Kiim diri om kokito nondo dit imam do momodoropi' di piro-piro pakakas dit ongolidang do tintod do powolihon, om apatai no i tulun do Kohat,” ka dau.

Karaja' di Tulun do Liwi, i Mantad id Pinuruan do Sompiiyon di Girson

21 Om suhuo' nod Tuhan i Musa 22 do mongintob di tulun do Liwi, i mantad id pinuruan do sompiiyon di Girson do tumanud di pinuruan do sompiiyon di sorokuri-kuri' om i sompiiyon diyolo'. 23 Om mositi' nod tulison di Musa o koinsanai'd ngaran do tongokusai dit id piolitan do tolu nohopod om limo nohopod o toun, it osorupai do maganu-anu do hiri'd Kiim do Tuhan. 24 Om nonuan iyolo'd karaja' do mongigit diti piro-piro o pakakas: 25 I Kiim om i piro-piro o pakakas do suwai: i tokop di Kiim do ponong id suang, om i tokop dit id soibau, i tokop di posoibahon kawagu, i kulit dit osonong do winonsoi, om i tabir do hiri'd wawayaan di Kiim, 26 om i tabir om i tali di pakayon do momorinding do natad di Kiim, om i pananaraban do porsombahan, om i tabir di hiri'd wawayaan di natad, om koinsanai di pakakas do pakayon do popowonsoi ngai'ddi. Om iyolo' no o mongilo-ilo do nunu nopo o buruon di kagait do pakakas diri. 27 Om mositi' nod ngoyon di Musa om i Harun piantangai iyolo' om ongowonsoi ngai' i' i karaja' di pinatahak di Harun om i tangaanak dau dot id tulun do Girson, om ongoigitan ngai' i' i pakakas dit apatut dot igitan. 28 Om iri no o karaja' di tulun do Girson do hiri'd suang di Kiim. Om mositi' nod wonsoyon diyolo' i karaja'ddi do moyo' dit ituduk di Itamar i tanak di Harun.

Karaja' di Tulun do Liwi, i Mantad id Pinuruan do Sompiiyon di Morari

29 Om suhuo' nod Tuhan i Musa do mongintob di tulun do Liwi, i mantad id pinuruan do sompiiyon di Morari do sompipion do tumanud do pinuruan do sompiiyon di sorokuri-kuri', om i sompiiyon diyolo'. 30 Om mositi' nod tulison di Musa o ngaran do koinsanai'd tongokusai di kiumur dot id piolitan do tolu nohopod om limo nohopod o toun, it ongosorupai do maganu-anu do hiri'd Kiim do Tuhan. 31 Om nonuan iyolo'd karaja' do manaan ngai' di papan di poturidongon do powonsoyon di Kiim, om iri ngai' i ponukod di potibabaron, om i torigi, om i posungkadan di torigi. 32 Om iri nogi' i torigi di pongorigi di pomorinding di natad do pointutuk di Kiim, om i piro-piro posungkadan di torigi, om i gapit, om i tali, om koinsanai di pakakas di gunaon do maan do popowonsoi di Kiim. Om tinantu' ngai' nopo o pakakas dit igitan do pointikid-tikid do tulun. 33 Om iyo noddi o karaja' dot apatut do wonsoyon di tulun di mantad id pinuruan do sompiiyon di Morari do hiri'd suang di Kiim, om mositi' nod wonsoyon o karaja'ddi do tumanud dit ituduk di Itamar i tanak di Harun.

Pinongintaban di Tulun do Liwi

34-48 Om papaharo no i Musa om i Harun om i piro-piro boyoon di tulun dot Israil do pongintaban di tolu o pinuruan do sompiiyon di Liwi: i pinuruan do sompiiyon di Kohat, om i Girson, om i Morari. Tu' iyo noddi o pinonuhuan do Tuhan. Om sinompipi' diyolo' do mongintob do tumanud di pinuruan do sompiiyon di sorokuri-kuri', om tumanud do pointikid-tikid di sompiiyon. Om tuliso' ngai' nopo diyolo' o ngaran di tongokusai dit id piolitan do tolu nohopod o toun om limo nohopod o toun do tumur, it ongosorupai do maganu-anu do hiri'd Kiim do Tuhan. Om poingkaa o kogumuon di nointob diyolo': - Pinuruan do Sompiiyon - Kogumuon - Kohat - 2,750 - Girson - 2,630 - Morari - 3,200 - Kogumuon do toinsanan: - 8,580 49 Om tinulis ngai' nopo o ngaran di tulun diri, om nonuan ngai' iyolo' do karaja' dit apatut diyolo'd wonsoyon om notudukan iyolo' dit apatut do saanon diyolo', do tuminanud di pinonuhuan do Tuhan do pinolombus di Musa.

Pongintaban 5

Oturan do Pasal do Tulun do Sosomu'

1 Om boros kad Tuhan dot id di Musa, 2 “Patahakon no iti piro-piro o ponuhuan dot id tulun dot Israil: Iri nopo tulun di kitoruol do kusta, om i tulun di haro o miagal-agal do waig dit a' osonong do sumoliwan do mantad id tinan, om i tulun di nokoigit do rata', om mositi' nod posoliwanon di kokiiman di tulun dot Israil. 3 Om mositi' nod suhuon iyolo'd tumongkiad, om a' i' diyolo' ososomu' i kokiiman, i tiyonon ku do poinsugku' di tulun ku,” ka dau. 4 Om wonsoyo' no di tulun dot Israil i pinonuhuan diri. Om posoliwano' ngai' nopo diyolo' do mantad hiri'd kokiiman diyolo' o tulun di miagal diri.

Pamalapus do Pogontok do Kasalaan

5 Om patahako' nod Tuhan dot id di Musa 6 iti piro-piro o toturan do patahakon dot id tulun dot Israil: Soira' nopod haro o tulun dit a' otorodok dot id Tuhan om i kowonsoi do sala' dot id tulun do suwai, 7 om mositi' nod okunon di tulun o dusa dau om lopusan ngai' dau i nokoontok di kasalaan dau'ddi, om ruhangan po dot induwo i sompihopod om patahakon dau iri di tulun di napamansayan dau'd sala'. 8 Nga' ondung napatai no i tulun di napamansayan dau'd sala', om aiso' o tobpinai dau dit osomok o kopiobpinayan, om mositi' nod patahakon dau dot id Tuhan i pamalapus dau'ddi, om iri nondo it imam o kaanu'ddi. Iti nopo pamalapus om poruhangon di dumba' do tontoluhan di maan do patahakon do tontok do momonsoi dit apatut do wonsoyon do maan do pongidu'd dusa do tulun di kisala'ddi. 9 Om pointikid-tikid di popuhawangon di pinotobilang, i patahakon do tulun dot Israil dot id Tuhan nga' asanganu ngai' no dit imam di karamit do porsombahan diri. 10 Iri nopo porsombahan di patahakon dot id songulun ot imam, om mositi' nod onuon dit imam iri do maan do dau.

Pasal do Kusai di Kipomusarahan dot Araat dot id Sawo Dau

11 Om suhuo' nod Tuhan i Musa 12-14 do papatahak diti piro-piro o toturan dot id tulun dot Israil. Haro i' doti' o tongokusai do koumbal do kopuriman dot a' otorodok i sawo dau tu' minongoi doti' ponokidudun do kusai'd suwai. Nga' a' i' doti' di kusai oilaan kopio tu' minomolisok-lisok i' i sawo dau do minomonsoi do miagal diri. Om sasi' nga' aiso', om a' i' nokosupan i sawo dau do minomonsoi do miagal diri; ko' haro i' doti' o kusai di kipomusarahan dot araat dot id sawo dau, nga' a' i' kopio nokowonsoi dot araat i sawo dau. 15 Om haro nopo ot osiliu do miagal di duwo o hal diri om mositi' nod angatan di kusai i sawo dau do mongoi solowot dit imam. Om mositi' nod migit iyau do porsombahan dit apatut do patahakon; iri no tu' songkilogram o tapung do barli. A' i' koino-ino'd tunguhon do tumau do saitun i tapung om a' kuwaan do kominyan tu' iri nopo om porsombahan do mantad id kusai di kisangka' dot araat; om iri no o pongilo ondung otopot ko' amu' i sangka' dau'ddi. 16 Om angatan nondo dit imam i tondu'ddi do mongoi'd hiri'd gulu, om suhuon do mingkakat do hiri'd dotimbabaan di pananaraban do porsombahan. 17 Om manu nogindo it imam dot iso' o mangkuk di tana' do winonsoi, om suangan iri do waig dit olidang dot ongokooro'. Om manu nogindo iyau'd tana' dot ongokooro' do mantad hiri'd sirang di Kiim do Tuhan, om posuangon iri do hiri'd mangkuk di kiwaig, om osiliu indo i waig diri do waig di poporikot do kousungan. 18 Om poroboyon nondo o tobuk di tondu', om pakahangan dau i tapung di maan do porsombahan. Om mositi' nod it imam o mongigit di mangkuk di kisuang do waig dit opoit di poporikot do kousungan. 19 Om suhuon nogindo dit imam i tondu' do tumumboyo' diti sumpa' do poboroson dit imam do poingkaa, “Ondung a' ko nakapagampahu' om a' ko i' oontok do kousungan do porikoton diti waig. 20 Nga' ondung nakapagampahu' ko, 21 om Tuhan no o posiliu'd ngaran nu do ngaran di pongungusung dot id pogialatan do bansa' nu. Om iyau no o popokukus di pawayaan nu'd sobu om papagayo do tian nu. 22 Kosuang nopondo iti waig dot id tian nu, om iti no o papagayo'd tian nu om popokukus di pawayaan nu'd sobu,” ka. Om mositi' nod sumimbar i tondu'ddi do poingkaa, “Kotumboyo' oku i'; wonsoyon nopod Tuhan o miagal diri,” ka. 23 Om tulison nondo dit imam i boros do pomopol, om pisokon no kawagu i tulis dot i waig dit opoit di hiri'd mangkuk o pomisok. 24 Iri nopo waig diri om pokoruol di tondu' do gisom dot orualan no kopio. Nga' tontok dit a' po dit imam osuhu' i tondu' do monginum di waig diri, 25 om mositi' nod ngoyon po dit imam i porsombahan do tapung, om poinsawaton dau o longon dau do papatahak di tapung diri dot id Tuhan. Om pasakayon nogindo dau i tapung do hiri'd pananaraban do porsombahan. 26 Om mongoi nondo it imam anu do songonggom di tapung do maan do tanda' do nakatahak no i tapung diri. Om sorobon nogindo iri do hiri'd pananaraban do porsombahan. Om kolimpupuson nopondo om poinuman nondo di tondu' i waig diri. 27 Om ondung nakapagampahu' kopio i tondu'ddi, nga' kopuriman no iyau do toruol dot adalaan kopio dot obungou di waig diri; gumayo nondo o tian dau om kumukus o pawayaan dau'd sobu. Om osiliu nondo do ngaran di pongungusung o ngaran dau dot id pogialatan do bansa' dau. 28 Nga' ondung aiso' o sala' dau, om a' i' iyau oontok di pinongusung diri. Om maganak i' iyau. 29-30 Om iyo noddi o toturan do pasal do kusai di momiogu om i kipomusarahan do nakapagampahu' i sawo dau. Om mositi' nod suhuon i tondu' do mingkakat do hiri'd dotimbabaan di pananaraban do porsombahan, om wonsoyon dit imam i natantu' mantad do wonsoyon. 31 Iri nopo kusai om a' i' kohompit di kasalaan, nga' iri nopo sawo dau om mositi' nod mamabo do kootuson di winonsoi dau do nakasala' no kopio iyau.

Pongintaban 6

Oturan do Pasal do Tulun di Sumiliu'd Nasir

1 Om suhuo' nod Tuhan i Musa 2 do papatahak diti piro-piro o toturan do kumaa dot id tulun dot Israil. Pointikid-tikid do kusai ko' tondu' di mamatos do sumiliu'd tulun do nasir om i tumobilang do sumiliu'd songonuon do Tuhan, 3 om mositi' nod a' monginum do waig dot anggur om tiinumon di kaawuk. Om a' no iyau koino-ino do monginum do nunu nopo i winonsoi do mantad id tua' dot anggur, om a' koino-ino do mangakan do tua' dot anggur di kouupu' ko' i tua' dot anggur di kinoring. 4 Om solinaid nopo dau do sumiliu'd tulun do nasir, om a' no iyau koino-ino do mangakan do nunu nopo i mantad id guas dot anggur; dot iri tuu i linsou ko' iri po kulit dit anggur. 5 Solinaid nopo do poinggirot i batos dau do sumiliu'd tulun do nasir, om a' no iyau koino-ino do momompod do tobuk dau ko' momugar po do ganggut. Tu' akagasan no iyau di batos dau do gisom pod aayi' i maso do tuminobilang iyau do suminiliu'd tulun di songonuon kopio'd Tuhan. Om solinaid nopo do maso'ddi om mositi' nod pologoson dau o tobuk om ganggut dau do numaru. 6-7 Om iri no i tobuk dau o sumiliu'd tanda' do tuminobilang iyau do sumiliu'd songonuon kopio do Kinorohingan. Om iri no ot a' dau koina-inaan do monosomu' do tinan dau: a' no iyau koino-ino do minsomok do rata' do mulong piya do rata' di tapa' ko' tina' dau, ko' rata' po di tobpinai dau. 8 Om solinaid nopo dau do tulun do nasir om potobilang no iyau do sumiliu'd tulun di songonuon kopio'd Tuhan. 9 Ondung ososomu' o tobuk do tulun do nasir, i tobuk di nokotobilang dau'ddi, tu' pointoning iyau do tulun di monigowo do matai, om mositi' nod andadon dau do solinaid do turu' o tadau; om katalib pondo iri om bugaron nogindo dau o tobuk om ganggut dau, om olidang nogindo iyau. 10 Om tontok nopondo di kawalu'd tadau, om mositi' nod mongoi iyau papatahak do duwo tinan do punai ko' duwo tinan do sikukur dot id imam do hiri'd wawayaan di Kiim do Tuhan. 11 Om iri nopo tiso' di tombolog om mositi' nod maan do porsombahan do pangampun do dusa, om iri no tiso' om maan do porsombahan di sorobon do pongidu' do kososomuo' di tulun di nokoigit do rata'ddi. Om tontok i' do tadau'ddi do mositi' no do posongonuan kawagu di tulun diri i tobuk dau 12 om inwoguan kawagu i kinapatahakan dau do tinan dau do sumiliu'd tulun do nasir do solinaid di maso do natantu' mantad. Om iri nopo maso di notoliban om a' no pointobon tu' nososomu' no i tobuk dau di pinosongonuan dau'ddi. Om mositi' nod papatahak iyau do tanak do dumba' do sontoun nogi' o tumur do maan do porsombahan do poningolon. 13 Opupusan nopondo i maso di pinabatos di tulun do sumiliu iyau'd nasir, om mositi' nod momonsoi iyau dot iso' o wonsoyon di natantu' mantad. Mositi' nod mongoi iyau do hiri'd wawayaan di Kiim do Tuhan 14 do mongoi papatahak dot id Tuhan do tolu o tinan do tayam-tayam dit aiso' o bohiton do tinan: songinan o tanak do dumba' do tontoluhan di sontoun nogi' o tumur do maan do porsombahan di sorobon, om songinan o tanak do dumba' do tondu' di sontoun nogi' o tumur do maan do porsombahan do pangampun do dusa, om songinan o dumba' do tontoluhan do maan do porsombahan do piombolutan. 15 Om mositi' nogi' do papatahak iyau do sambalatak o roti dit a' rinalatan do pangambang: i roti dit obulugu', i tapung di rinalatan do tumau do saitun o winonsoi, om i roti dit onipis, i ginihilan do tumau do saitun. Om suwai no ko' iri om mositi' nod papatahak po iyau do gandum om waig dot anggur. 16 Om mositi' nod patahakon ngai' dit imam iri dot id Tuhan; om mositi' nod patahakon dau i porsombahan do pangampun do dusa om i porsombahan di sorobon. 17 Om potonggoyon nopo di roti do sambalatak diri om songinan o dumba' do tontoluhan do patahakon dot id Tuhan do maan do porsombahan do piombolutan, om iri nogi' i gandum om i waig dot anggur nga' mositi' nod patahakon dot id Tuhan. 18 Om mositi' nod bugaron di tulun do nasir o tobuk dau do hiri'd wawayaan di Kiim do Tuhan. Om posuboon nogindo i tobuk dau do hiri'd tapui di maso do panaraban di porsombahan do piombolutan diri. 19 Om owonsoi pondo o miagal diri, dit oonsok i toliip di dumba' do tontoluhan, om mositi' nod ngoyon dit imam i toliip diri do pitonggoyon dot iso' di roti dit obulugu' om iso' di roti dit onipis, om pakahangan nogindo di tulun do nasir. 20 Om mositi' nod patahakon dit imam i porsombahan do taakanon diri do maan do porsombahan di potobilangon do patahakon dot id Tuhan; om iti no i porsombahan dit olidang dot aanu dit imam, do maan do pomoruhang di kangkab om gakod di dumba' do tontoluhan, i natantu' mantad no dot aanu dit imam. Om owonsoi pondo o miagal diri om koino-ino nogindo i tulun di nasir diri do monginum do waig dot anggur. 21 Om iri no o toturan do tonudon di tulun di sumiliu'd nasir; nga' ondung nokopoboros o songulun di suminiliu'd nasir do papatahak do porsombahan di lobi ko' i miontok-ontok di batos dau, om mositi' nod wonsoyon dau o miontok di pinoboros dau.

Poboroson dit Imam do Tontok do Mamarakat

22 Om suhuo' nod Tuhan i Musa 23 do popoboros dot id di Harun om id tangaanak di Harun do mositi' nod miagal diti o boros do poboroson diyolo' do soira' nopo do mamarakat iyolo'd tulun dot Israil: 24 Maha' daa om barakatan om gompion kou'd Tuhan. 25 Maha' daa om osonong om opuhawang o Tuhan dot id dokoyu. 26 Maha' daa om osianan o Tuhan dokoyu om manahak dokoyu do kosimbayanan. 27 Om boros kad Tuhan, “Ondung roiton diyolo' o ngaran ku do maan do pamarakat di tulun dot Israil, om barakatan ku no kopio iyolo',” ka dau.

Pongintaban 7

Porsombahan di Piro-piro Boyoon

1 Tontok di tadau di nopongo di Musa do pinopowonsoi i Kiim do Tuhan, om patahako' no dau dot id Tuhan i Kiim om koinsanai di pakakas do hiri, do tinuntugan do tumau o ralan do pinapatahak. Om niyo nogiddi dau i pananaraban do porsombahan om koinsanai di pakakas do hiri. 2 Om ngoyo' noddi di piro-piro boyoon do pinuruan do sompiiyon patahako' i porsombahan diyolo' dot id Tuhan. Iyolo' nopodti om i boyoon do payat dot Israil, om i nonuan do karaja' do mongintob di maso'd pongintaban do tulun. 3 Om patahak no iyolo' dot onom o guyudan om hopod om duwo tinan do sapi': iso' o guyudan do pinatahak do duwo o tulun do boyoon, om soronginanan do sapi' o pointikid-tikid di boyoon. Om katahak poddi diyolo' iri, 4 om boro-boros no o Tuhan dot id di Musa do poingkaa, 5 “Romiton ngai' no i pinatahak diri do pakayon do momonsoi'd karaja' dit apatut do wonsoyon do maan di Kiim ku; patahakon ngai' nopori dot id tulun do Liwi do tumanud di karaja' do wonsoyon diyolo',” ka dau. 6 Om patahako' ngai' no di Musa i guyudan om i sapi'ddi dot id tulun do Liwi. 7 Tinahak nopo dau di tulun do Girson om duwo o guyudan om apat o tinan do sapi', 8 om apat o guyudan om walu' o tinan do sapi' do tinahak dau di tulun do Morari. Om mositi' nod wonsoyon diyolo' o koinsanai di karaja' diyolo' do tumanud dit ituduk di Itamar, i tanak di Harun. 9 Nga' iri nopo tulun do Kohat om a' i' nakaanu di guyudan ko' i sapi' di mantad id di Musa tu' iri nopo pakakas dit ongolidang di diyolo'd gompion om a' i' milo dot a' saanon. 10 Om minongigit po i piro-piro boyoon do porsombahan do maan do pamaramai do kapatahakan di pananaraban do porsombahan. Om tontok di nokosodia' iyolo' do papatahak di porsombahan diyolo'ddi do hiri'd pananaraban do porsombahan, 11 om boro-boros no o Tuhan dot id di Musa do poingkaa, “Sunudan no iyolo' dot insan nopo o tadau om iso' no di boyoon o rumikot do mongoi papatahak di dau'd patahakon do maan do pamaramai di kapatahakan di pananaraban do porsombahan. Om iyo kasai' nopoddi do solinaid do hopod om duwo o tadau,” ka dau. 12-83 Om ngoyo' no diyolo' patahako' i porsombahan diyolo' do minogisuhu-suhut do miagal diti: - Tadau - Payat - Boyoon - Ko-1 - Yohuda - I Nahason i tanak di Aminadab - Ko-2 - Isakar - I Nitaniil i tanak di Suar - Ko-3 - Sibulon - I Iliab i tanak di Hilon - Ko-4 - Rubin - I Ilisur i tanak di Sidour - Ko-5 - Simion - I Solumiol i tanak di Surisiadai - Ko-6 - Gad - I Iliasap i tanak di Rohuil - Ko-7 - Ipraim - I Ilisama i tanak di Amihud - Ko-8 - Manasi - I Gamaliol i tanak di Pidasur - Ko-9 - Binyamin - I Abidan i tanak di Gidioni - Ko-10 - Dan - I Ahiosor i tanak di Amisadai - Ko-11 - Asor - I Pagiol i tanak di Okran - Ko-12 - Naptali - I Ahira i tanak di Inan. Oiyo nopo i porsombahan do nigitan diyolo': iso' o piring do pirok, do 1.5 kilogram do kawagato', om iso' o mimpun do pirok do 800 gram do kawagato', do tumanud di poninimbang di natantu' mantad. Om sinuangan goduwo nopo i piring om i mimpun diri do tapung di rinalatan do tumau do maan do porsombahan do gandum. Om iri no suwai om iso' o piring do tamas do 110 o gram do kawagato', do noponu' do kominyan; om songinan o sapi' do tontoluhan, om songinan o dumba' do tontoluhan, om songinan o tanak do dumba' do sontoun nogi' o tumur, do maan do porsombahan di sorobon; iso' o kambing do maan do porsombahan do pangampun do dusa; om duwo o sapi' do tontoluhan, om limo o dumba' do tontoluhan, om limo o kambing, om limo o tanak do dumba' di sontoun nogi' o tumur do maan do porsombahan do piombolutan. 84-88 Om kogumuon nopo di porsombahan do nigitan di hopod om duwo o boyoon diri dot oinsanan, do maan do tontok di kapatahakan di pananaraban do porsombahan om: --- hopod om duwo o piring do pirok om hopod om duwo o mimpun do pirok do 27.6 kilogram o kawagato' do toinsanan. --- hopod om duwo o piring do tamas do 1.32 kilogram o kawagato' do poimponu' do kominyan. --- hopod om duwo tinan do sapi' do tontoluhan, om hopod om duwo o dumba' do tontoluhan, om hopod om duwo o tanak do dumba' di sontoun nogi' o tumur, do pitonggoyon di porsombahan do gandum do maan do pomoruhang di porsombahan di sorobon. --- hopod om duwo o kambing do maan do porsombahan do pangampun do dusa. --- duwo nohopod om apat o sapi' do tontoluhan, om onom nohopod o dumba' do tontoluhan, om onom nohopod o kambing, om onom nohopod o tanak do dumba' di sontoun nogi' o tumur, do maan do porsombahan do piombolutan. 89 Tontok di suminuang i Musa do hiri'd Kiim dot Olidang do mongoi boro-boros do Tuhan, om korongou no dau o Tuhan do minoro-boros dau do mantad hiri'd sawa-sawat di sompon do Kaban do Tumpongo, i hiri'd piolitan di duwo o pinoiyo-iyo'd moloikat di roitan do kerub.

Pongintaban 8

Kowoyo-Woyoo' do Popotimpak di Lampung

1 Om boros kad Tuhan dot id di Musa, 2 “Sunudan no i Harun do tontok nopod popotimpak iyau di turu' o lampung do hiri'd potitimpakan di lampung, om mositi' nod poundaron kopio dau o potitimpak, om kotitiu i' do ponong id gulu i tinitiu di lampung,” ka dau. 3 Om wonsoyo' no di Harun o miagal di pinonuhuan do Tuhan. Om potimpako' no dau i lampung do hiri'd potitimpakan di lampung do pinotoguang ponong id gulu. 4 Om iri nopo potitimpakan do lampung diri nga' tamas ngai' nopod tinantan o winonsoi do mantad hiri'd siriba' om gisom do hiri'd sawat, do tumanud di poiyaan do pinokitanan do Tuhan dot id di Musa.

Linidangan om Sinambayangan i Tulun do Liwi

5 Om boros kad Tuhan dot id di Musa, 6 “Potongkiadon no i tulun do Liwi do mantad id tulun dot Israil do suwai, om wonsoyon no i wonsoyon di natantu' mantad do pomolidang diyolo' 7 do poingkaa o kowoyo-woyoo' do momolidang: Wawasan no iyolo' do waig di pinotobilang do maan do pomolidang, om suhuon iyolo' do momugar do tobuk om hulu do pointongkop do tinan diyolo', om suhuon iyolo' do momupu' do pakayan diyolo'. Om olidang indo iyolo' dot id pagantangan do tugama'. 8 Om suhuon nondo iyolo' do manganu do songinan o sapi' do tontoluhan dit okoro' po om porsombahan do gandum di gunaon, iri no i tapung di rinalatan do tumau do saitun. Om iya', oi Musa, nga' mositi' nod mongoi panganu dot iso' kawagu o sapi' do tontoluhan do maan do porsombahan do pangampun do dusa. 9 Om timungon ngai' nogindo i tulun dot Israil om suhuon i tulun do Liwi do mingkakat do hiri'd dotimbabaan di Kiim ku. 10 Om pakabayon nondo di tulun dot Israil o longon diyolo' do hiri'd sakai'd tulu di tulun do Liwi. 11 Om patahakon nogindo di Harun i tulun do Liwi diri do maan do porsombahan di pinotobilang do mantad id tulun dot Israil do patahakon dot id doho', om milo i' iyolo'd momonsoi do karaja' ku. 12 Om pakabayon nogindo di tulun do Liwi o longon diyolo' do hiri'd sakai do tulu di duwo o sapi' do tontoluhan diri; om iri nopondo i songinan om maan do porsombahan di sorobon. Om owonsoi nopo o miagal diri om koidu' no i tulun do Liwi do mantad id dusa diyolo'. 13 Patahakon no i tulun do Liwi do maan do ponokoporsombahan di pinotobilang do patahakon dot id doho', om suhuon no i Harun om i tangaanak dau do sumiliu'd boyoon diyolo'. 14 Om mositi' nod posuwai-suwayon dokoyu i tulun do Liwi do mantad id tulun dot Israil di suwai, dot iyo'ddi o kowoyo-woyoo' do posuwai-suwai; om osiliu i' iyolo' do doho'd songonuon. 15 Om owonsoi nopondo dokoyu i wonsoyon di natantu' mantad do kapatahakan di tulun do Liwi, om haro no o kosorupayan diyolo' do momonsoi'd karaja' do hiri'd Kiim ku. 16 Nosiliu ku no iyolo' do sumowoli di tangaanak do tongokusai dit id gulu kosusu do mantad id pointikid-tikid do sompiiyon do tulun dot Israil; om iyolo' nopoddi om nokotobilang no do maan ku'd doho'. 17 Tontok di pinatai ku o toinsanan di tangaanak do kusai dit id gulu kosusu do hilo'd Masir, om maso noddi do nosiliu'd songonuon ku di pinotobilang i tangaanak do tongokusai dit id gulu kosusu do mantad id pointikid-tikid do sompiiyon dot Israil, om pointikid-tikid di tayam-tayam dit id gulu kosusu nga' nosiliu nogi' do doho'd songonuon. 18 Om dinondo nodti, om ilo' no tulun do Liwi ot onuon ku do poningolon do koinsanai di tangaanak do kusai dit id gulu kosusu do tulun dot Israil, 19 do miagal ko' porsombahan do mantad id tulun dot Israil. Om patahakon ngai' ku iti dot id tulun do Liwi om id di Harun om id tangaanak dau, om kapaganu-anu i' i tulun do Liwi di toonuon do dong imam do hiri'd suang di Kiim ku. Om iri nondo i tulun do Liwi o mokianu'd koompunan do mantad id doho' do bagi' di tulun dot Israil, om a' i' iyolo' oontok do kosusaan do mulong piya do koinsomok kopio iyolo' di Bilik dot Olidang diri,” ka dau. 20 Om iri noddi o kinapatahakan di Musa om i Harun om koinsanai di tulun dot Israil di tulun do Liwi dot id Tuhan, do tumanud di pinonuhuan do Tuhan. 21 Om lidangai noddi di tulun do Liwi o tinan diyolo' do tumanud dit oturan do tugama', om pinupuan diyolo' o pakayan diyolo'. Om patahako' noddi di Harun iyolo' do maan do porsombahan di pinotobilang do maan do don Tuhan. Om winonsoi nogi' dau i wonsoyon di natantu' mantad do pongidu'd dusa diyolo'. 22 Om wonsoyo' ngai' nopoddi di tulun dot Israil i pinonuhuan do Tuhan dot id di Musa do wonsoyon dot id tulun do Liwi. Om haro noddi o kosorupayan di tulun do Liwi do kumaraja' do hiri'd Kiim do Tuhan do tumanud dot ituduk di Harun om i tangaanak dau. 23 Om boros kad Tuhan dot id di Musa, 24 “Mositi' nod tumimpuun o pointikid-tikid do tulun do Liwi do momonsoi do karaja' dau do hiri'd Kiim ku, dot orikot o duwo nohopod om limo o toun do tumur dau. 25 Om kotingkod nopondo iyau do momonsoi di karaja' dau'ddi om orikot o limo nohopod o toun do tumur dau. 26 Om katalib nopondo iri, om koino-ino i' iyau do monguhup di tulun do Liwi do suwai di kumaraja' do hiri'd suang di Kiim ku. Nga' a' no iyau koino-ino dot iso-iso' kopio do momonsoi do nunu nopo o karaja'. Om iyo noddi o kowoyo-woyoo' nu do mangatur do karaja' di tulun do Liwi,” ka dau.

Pongintaban 9

Tadau'd Agayo do Paska di Koinduwo

1 Tontok di tulan do koiso', di toun do koduwo, do mantad di kinosoliwanan do tulun dot Israil do mantad hilo'd Masir, om boro-boros no o Tuhan dot id di Musa do hilo'd tana' do kowotuan do Sinai. Om boros kad Tuhan, 2-3 “Tontok nopod tadau'd kohopod om apat do tulan diti, do tumimpuun do mantad dit otonob o tadau, om mositi' nod ramayon do tulun dot Israil o Tadau'd Agayo do Paska do tumanud dit oturan do natantu' mantad,” ka dau. 4 Om suhuo' no di Musa i tulun dot Israil do mamaramai do Paska. 5 Om ramayo' noddi diyolo' iri di sosodopon do tadau'd kohopod om apat do tulan diri, do hilo'd tana' do kowotuan do Sinai. Om wonsoyo' ngai' nopo diyolo' o miagal di pinonuhuan do Tuhan dot id di Musa. 6 Nga' haro o piro-piro o tulun do sosomu' dot id pagantangan do tugama', tu' nokoigit iyolo'd rata'. Om a' noddi iyolo' milo do mamaramai do Paska do tontok do tadau'ddi. Om ongoi no iyolo' solowot di Musa om i Harun, 7 om boro-boros no iyolo'd poingkaa, “Iyahai nopodti om sosomu', tu' nokoigit iyahai'd rata'. Nga' nokuro'ddi tu' posuwai-suwayon iyahai do gisom dot a' iyahai kapatahak do porsombahan dot id Tuhan do poingandad dilo tongotobpinai dahai dit oiyo o bansa'?” ka diyolo'. 8 Om boros kad i Musa do suminimbar, “Andadon po do gisom pod otudukan oku'd Tuhan,” ka dau. 9 Om suhuo' nod Tuhan i Musa 10 do popoboros dot id tulun dot Israil do poingkaa, “Ondung haro ot id pogialatan dokoyu ko' id pogialatan di sinakagon dokoyu do sosomu' tu' nokoigit do rata', ko' haro o tulun dot id tindalanon do kumaa dot id kinoiyonon dit osodu', om it orohian i' daa do mamaramai do Paska. 11 Om koino-ino i' iyolo' do mamaramai'ddi. Nga' iri nopondo i karamayan diri om pohoroon nopo diyolo' om sombulan do gisom diri, i totuong di kohopod om apat do tulan di koduwo. Om ramayon nondo diyolo' o tadau'ddi do mikuwo'd mangakan do roti dit a' rinalatan do pangambang om rinapa' dit opoit. 12 Kada' nod haro o pooluon do taakanon diri do gisom do kosuabon kawagu, om a' nogi' koino-ino do haro o tongoiso' pod tulang dot otipu' di tayam-tayam do patahakon dot id Tuhan. Om mositi' nod ramayon o tadau'd Paska do tumanud do koinsanai dit oturan. 13 Nga' iri nopo tulun dit olidang i' daa dot id pagantangan do tugama' om okon ko' id tindalanon, nga' a' indo mamaramai di Paska, om a' no kohompit do tulun di songonuon ku o tulun diri, tu' a' i' iyau pinapatahak do porsombahan dot id doho' do tontok di maso di natantu' mantad. Om mositi' nod boboon di tulun diri o kootuson di dusa dau. 14 Ondung haro o tulun do bansa'd suwai dot id rolot dokoyu dit orohian do mamaramai do Paska, om mositi' nod tumanud iyau do koinsanai dit oturan om kowoyo-woyoo' do mamaramai'ddi. Iso-iso' i' o toturan do tonudon do koinsanai'd tulun, dot iri tuu tulun dot Israil ko' iri po tulun do bansa'd suwai,” ka dau.

Haun di Kitapui

15-16 Om tontok di tadau di pinowonsoi i Kiim do Tuhan, om tontok noddi do ruminikot o haun do luminikup di Kiim. Om dongotuong nopo nga' miagal do tapui o kokitanan di haun diri. 17 Om soira' nopod minsawat i haun, om huyason no di tulun dot Israil i kokiiman diyolo', om mamanau nondo. Om honggo nopo o sondoton di haun om hiri no o pawansayan kawagu diyolo' do kiim diyolo'. 18 Monuhu' po o Tuhan di tulun dot Israil do momohuyas di kiim diyolo', om huyason nogi' diyolo', om monuhu' po o Tuhan do popowonsoi kawagu'ddi om powonsoyon nogi' diyolo'. Om solinaid nopo di haun do hiri'd sawa-sawat di Kiim do Tuhan, om hiri kasai' no iyolo'd kinoiyonon diri. 19 Ondung alaid i haun do hiri'd sawa-sawat di Kiim, om a' no iyolo' mamanau tu' mumboyo' i' iyolo'd Tuhan. 20 Nga' nokoumbal i' do piro-piro no tadau di haun do hiri'd sawa-sawat di Kiim. Nga' poingkuro piya nga' Tuhan i' o popoilo ondung hiri kasai' iyolo'd kinoiyonon diri do mundorong ko' mundaliu iyolo'. 21 Om koumbal i' do mundorong i haun do hiri do mantad nod sosodopon om gisom do kosuabon kawagu, om minsawat nopo i haun nga' mamanau no iyolo'. Om soira-ira' nopod minsawat i haun om mundaliu no iyolo'. 22 Om duwo tuu o tadau ko' sombulan, ko' sontoun, ko' alaid ko' iri nga' solinaid nopo di haun do hiri'd sawa-sawat di Kiim do Tuhan, om a' no iyolo' mundaliu. Nga' ondung minsawat i haun, om mundaliu no iyolo'. 23 Om boros kasai' nopod Tuhan o tonudon di tulun dot Israil do tontok do mundorong iyolo' dot id iso' o kinoiyonon om tontok do mundaliu iyolo' dot id kinoiyonon do suwai, do tumanud di poboroson do Tuhan dot id di Musa.

Pongintaban 10

Torumpit do Pirok

1 Om boros kad Tuhan dot id di Musa, 2 “Momonsoi nod duwo o torumpit do pirok di tinantan o wonsoyon. Om iri no o pounion do pomolohou di tulun dot ogumu' do tumimung om iri nogi' o pounion do pomisunud diyolo' do mamanau. 3 Ondung pounion goduwo i torumpit dot oloyong o pouuni, om komoyon nopoddi nga' mositi' nod tumimung ngai' i tulun dot ogumu' do hiri'd posorili' diya' do hilo'd wawayaan di Kiim ku. 4 Nga' ondung iso' noo o torumpit do pounion, om iri no i boyoon do payat o tumimung do hiri'd posorili' diya'. 5 Ondung mutut-putut o pouuni, om komoyon nopoddi nga' mositi' nod mamanau ngai' i payat di hiri'd ponong id koulayon o pinomukiiman. 6 Ondung pounion do koinduwo i torumpit diri do mutut-putut o pouuni, om komoyon nopoddi nga' mositi' nod mamanau ngai' i payat di hiri'd ponong id salatan. Ondung mutut-putut o pouuni om ponuhu' nori di tulun do mamanau. 7 Nga' momolohou nopo di tulun dot ogumu' do tumimung, om oloyong o pouuni. 8 Om pouni nopo di torumpit diri nga' mositi' nod it imam, i tangaanak di Harun. Om mositi' nod tonudon iti piro-piro o toturan diti do gisom dot alaid. 9 Soira' nopod sumangod kou dot id pomogunan dokoyu, do sumaap di pisangod do mongoi panangod dokoyu, om pounion no i torumpit do tanda' do sumangod kou. Om ngoyon ku indo iyokoyu uhupai, iyoho' i Tuhan i Kinorohingan dokoyu, om posion ku iyokoyu do mantad id koinsanai di pisangod dokoyu. 10 Om tontok di tadau do rumamai kou, di Tadau dot Agayo do Tulan do Wagu om i karamayan di suwai do don tugama', om pounion no i torumpit diri do tontok di papatahak kou dot id doho' do porsombahan di sorobon om porsombahan do piombolutan. Om uhupan ku indo iyokoyu. Tu' iyoho' no o Tuhan i Kinorohingan dokoyu,” ka dau.

Minamanau i Tulun dot Israil

11 Om tontok di koduwo nod toun do mantad di tuminongkiad i tulun dot Israil do pomogunan do Masir, do koontok di tadau'd koduwo do tulan do koduwo, om insawat no i haun do mantad hiri'd sawa-sawat di Kiim do Tuhan. 12 Om timpuun no i tulun dot Israil do mamanau do tuminongkiad di tana' do kowotuan do Sinai. Om tontok di nokorikot iyolo' do hilo'd tana' do kowotuan do Paran, om undorong no i haun. 13 Om timpuun no i tulun dot Israil do minamanau do tumanud di ponuhuan do Tuhan do pinolombus di Musa. 14 Om soira-ira' nopod mamanau iyolo' nga' iyo kasai' nopoddi o toturan do mamanau do tonudon diyolo'. Om iri no tulun dit id sahau do bondira' di sinompuruan di winoyo' di payat di Yohuda o minogulu'd mamanau, do mogisuhu-suhut nopo i sinompuruan. Om boyoon nopo diyolo' nga' i Nahason i tanak di Aminadab. 15 Om minomoyo' nopo di payat di Isakar om i Nitaniil i tanak di Suar. 16 Om i Iliab i tanak di Hilon o minomoyo' di payat di Sibulon. 17 Om huyaso' noddi i Kiim do Tuhan, om timpuun nod minamanau i pinuruan do sompiiyon di Girson om i Morari dot ongkisinaan di Kiim. 18 Om hiri nopod tohuri-huri diyolo' nga' i tulun dit id sahau do bondira' di sinompuruan di winoyo' di payat di Rubin, do mogisuhu-suhut nopo i sinompuruan. Om boyoon nopo diyolo' nga' i Ilisur i tanak di Sidour. 19 Minomoyo' nopo di payat di Simion, om i Solumiol i tanak di Surisiadai, 20 om minomoyo' no di payat di Gad om i Iliasap i tanak di Rohuil. 21 Om pamanau nogiddi i tulun do Liwi, i mantad id pinuruan do sompiiyon di Kohat dot ongkiinigit di piro-piro pakakas dit ongolidang. Om tontok di nokorikot iyolo' do hiri'd pawansayan do kiim dit id dosunsudan, om nokowonsoi no kawagu i Kiim do Tuhan. 22 Om pamanau no i tulun dit id sahau do bondira' di sinompuruan di winoyo' di payat dot Ipraim do mogisuhu-suhut nopo i sinompuruan. Om boyoon nopo diyolo' nga' i Ilisama i tanak di Amihud. 23 Om boyoon nopo di payat di Manasi om i Gamaliol i tanak di Pidasur. 24 Om boyoon no di payat di Binyamin om i Abidan i tanak di Gidioni. 25 Om id tohuri noddi om pamanau no i tulun dit id sahau do bondira' di sinompuruan di winoyo' di payat do Dan. Om iyolo' no i madtatamong do ponong id tohuri do koinsanai di sinompuruan. Om mogisuhu-suhut nopo i sinompuruan do minamanau. Om boyoon nopo diyolo' nga' i Ahiosor i tanak di Amisadai. 26 Boyoon nopo di payat di Asor om i Pagiol i tanak di Okran, 27 om boyoon no di payat di Naptali om i Ahira i tanak di Inan. 28 Om iyo noddi o toturan di tulun dot Israil do mamanau do mogisuhu-suhut i sinompuruan do soira-ira' nopo iyolo'd mamanau do kumaa dot id kinoiyonon do suwai. 29 Om boro-boros no i Musa dot id di Hobab i tanak di Rohuil, i tulun do Midian diri, i tipagon di Musa. Boros ka dau, “Mamanau noddi iyahai do kumaa do hilo'd kinoiyonon di nokoboros do Tuhan do patahakon dau dot id dahai. Om nakabatos no o Tuhan do posiliu'd tulun dot Israil do bansa' di kaya'. Om tanud pogi' dahai om bohogian i' dahai iya' do kakayaan dahai,” ka dau. 30 Nga' boros ka di Hobab, “Pounsikou nopo, nga' gumuli' oku i' do hilo'd pomogunan di kinosusuon ku,” ka dau. 31 Om boros kad Musa, “A, kada' iyahai tongkiadai. Iya' nopo om milo i' do popotunud dahai'd ralan, tu' kotunud ko i' ondung honggo o tuundorongon do pawansayan toko'd kiim do hilo'd tana' do kowotuan. 32 Tumanud ko nopo daa dahai om bohogian indo dahai iya' do koinsanai di barakat do patahakon do Tuhan dot id dahai,” ka dau.

Minamanau i Tulun dot Israil

33 Om tontok di nokotongkiad i bansa' dot Israil do mantad hilo'd Sinai, i nuluhon dot olidang diri, om pamanau no iyolo' do solinaid do tolu o tadau. Om iri kasai' nopo i Kaban do Tumpongo'd Tuhan o hiri'd gulu diyolo', do mogihum do kinoiyonon di pawansayan diyolo'd kiim. 34 Om solinaid nopo diyolo' do mingundaliu do mantad id pointikid-tikid do kinoiyonon di pinawansayan diyolo'd kiim, om hiri kasai' nopod sawa-sawat diyolo' i haun do Tuhan do tontok do dangadau. 35 Om soira-ira' nopo dot igitan i Kaban do Tumpongo om moro-boros no i Musa do poingkaa, “Ingkakat no, oi Tuhan, om pogitotongkiado' no i pisangod nu do gisom do manangkus ngai' do mogidu' i tulun dit araatan diya',” ka dau. 36 Om soira-ira' nopod poundorongon i Kaban do Tumpongo om moro-boros no i Musa do poingkaa, “Guli' no, oi Tuhan, dot id piro-piro noribu do sompiiyon dot Israil,” ka dau.

Pongintaban 11

Kinoiyonon di Roitan do Tabira

1 Om timpuun no i tulun do sontogod-togod do Tuhan dot ouudipanan di kosusaan diyolo'. Om soira' di norongou'd Tuhan i boros diyolo' do sontogod-togod, om kotogod no iyau, om porikatai no dau iyolo'd tapui. Om tapui poddi o poirolot diyolo' gisom do nosorob o somputul di kokiiman. 2 Om pinggiak no i tulun do mokitulung di Musa. Om sambayang noddi i Musa dot id Tuhan, om kopisok no i tapui. 3 Om iri noddi o kinopomungaranan do kinoiyonon diri do Tabira tu' hilo' no do suminikit i tapui do Tuhan dot id pogialatan diyolo'.

Minomili' i Musa do Turu' Nohopod o Boyoon

4 Om haro i' o piro-piro o tulun do bansa'd suwai do manud-tanud di tulun dot Israil do mamanau. Om iyolo' nopodti nga' siakan no tomod do tikanas, om iri poddi i tulun dot Israil nga' tuminimpuun diri do sontogod-togod. Boros ka diyolo', “Haro po bo daa giya o tikanas toko'dti! 5 Di nopo di hilo' toko' pod Masir om kaakan toko' id sada' do gisom dot abangat toko', om a' i' minog do momoli. Osorou no daa'ddi i sangop, om i sadur, om i losun, om i bawang dit aragang, om i bawang dit opurak, i koubasan toko' do mangakan di hilo' po. 6 Nga' baino' noddi om ongolomok toko' no. Aiso' no nunu-nunu dot akanon --- aiso' no suwai, ilo' po manna do pointikid-tikid do tadau,” ka no diyolo'. 7 (Iri nopo manna om miagal do linsou dit ongokooro' dot ongopurak dosilou- silou. 8-9 Iri nopo manna'ddi om kotonggoi di bolobou do rumatu' do hiri'd kokiiman di dongotuong. Om kosuabon nopondo om minsorili' poo i tulun do mongoi ponimung di manna. Om kisaron nondo diyolo' iri ko' tutuon do gisom dot aapung. Om onsokon nondo diyolo' do maan do roti dit ourug dit alampis. Om kaakanan nopo nga' miagal do roti di nonsok do tumau do saitun.) 10 Om korongou nod i Musa i tulun dot Israil do sontogod-togod, dot ongotimung-timung do songingkakat do hiri'd wawayaan di kiim diyolo'. Om kotogod noddi o Tuhan gisom do tuminongob i Musa. 11 Om boros kaddi di Musa dot id Tuhan, “Nokuro tu' raraaton kopio oku iyoho' diya'? Nokuro tu' a' ko orohian doho'? Nokuro tu' onuan oku diya'd tonggungan do mongilo-ilo ngai'dti tulun? 12 Okon toi ko' okon i' ko' iyoho' o minomonsoi diyolo' om okon ko' iyoho' o minaganak diyolo'? Om nokuro tu' suhuon oku diya' do sumiliu'd miagal do mitatamong do mamabo'd tanak, gisom dot iyoho' noo o momogompi' kasai' diyolo' do solinaid do hiti'd tindalanon do kumaa do hilo'd pomogunan di pinabatos nu dot id komolohingan diyolo'? 13 Antangai pogi' nga' a' nopo moti' iyolo' otingkod-tingkod do mokianu do tikanas. Om honggo daa o ngayan ku do tikanas do kabagal do tulun dot irad diti kogumu'? 14 A' oku no kooyit dot iso-iso' kopio oku do mongilo-ilo ngai'dti tulun; adalaan no kopio kawagat iti dot id doho'! 15 Ondung iyoon kasai' oku diya'dti oi Tuhan, om kosianai no doho', om patayon oku no om a' oku i' kopuriman do koinggoritan diti pinorikot nu dot id doho',” ka dau. 16 Om boros kad Tuhan dot id di Musa, “Monimung nod turu' nohopod o tulun di pusohon om i nongookunan do sumiliu'd boyoon do tulun. Om pootodon no iyolo' dot id doho' do hilo'd suang do Kiim ku, om suhuon no iyolo' do mingkakat do hilo' dot id talad nu. 17 Om lumintuhun oku nondo om moro-boros oku diya' do hiri'd kinoiyonon diri. Om onuon ku nondo o tongokooro' di rusod di nakatahak ku diya' om patahakon ku nondo iri dot id diyolo'. Om milo indo iyolo'd monguhup diya' do mongilo-ilo do koinsanai'd tulun diti, om a' ko nondo iso-iso' do mongilo-ilo diyolo'. 18 Om poboroson no dot id tulun diti do dinondo o poingkaa, ‘Lidangan no dokoyu o tinan dokoyu do bagi'd tadau'd suab; om kaakan kou indo do tikanas. Norongou nod Tuhan i tihad om todoi dokoyu dot osisiakanan do tikanas, om i boros dokoyu do pakamaha-maha' dokoyu di hilo' kou pod Masir. Baino' nopo om onuan kou nod Tuhan do tikanas, om mositi' nod kanon dokoyu iri. 19 Om mositi' nod kanon dokoyu iri dot okon nopo ko' sangadau no ko' duwo o tadau, ko' limo ko' hopod o tadau ko' duwo nohopod o tadau, 20 suwai ko' mositi' nod kanon dokoyu iri do solinaid do sombulan, do gisom id sumakit kou om mingilob dot ouru do mingakan di tikanas. Om osiliu nondo o miagal diri tu' niada' i' dokoyu o Tuhan dot id pogialatan dokoyu. Om minimboros kou do sontogod-togod dau dot osonong nogi' daa dot a' kou minumbal do tumongkiad do mantad hilo'd Masir,’ ka,” kad Tuhan. 21 Om boros ka di Musa dot id Tuhan, “Diya oku'd momoyo' dot onom nahatus noribu o tulun, om poboroson nu i' do manahak ko do tikanas do kabagal diyolo' ngai' do solinaid do sombulan? 22 Kabagal i' tuu o sapi' om dumba' do sumbolion do pamangat diyolo'? Kabagal i' tuu diyolo' dot oinsanan piya i sada' do hilo'd rahat?” ka dau. 23 Om boros kad Tuhan do suminimbar, “Haro toi o kogisomon do sinundu ku? A' ko no alaid do kokito ondung abayaan kopio tuu ko' amu' i pinoboros ku'ddi,” ka dau. 24 Om soliwan no i Musa, om polombuso' no dau dot id tulun dot ogumu' i pinoboros do Tuhan. Om ponimung no i Musa do turu' nohopod o boyoon om suhuo' no dau iyolo' do mingkakat do hiri'd posorili' di Kiim do Tuhan. 25 Om lintuhun noddi o Tuhan do hiri'd haun om boro-boros no iyau di Musa. Om ngoyo' no dau ot okooro' di Rusod di pinatahak dau di Musa om patahako' no dau dot id turu' nohopod o boyoon diri. Om soira' di luminintuhun i Rusod dot id diyolo', om timpuun no iyolo' do mimboros dot opuhod do miagal do nabi, nga' a' i' alaid no dot iyo iyolo'ddi. 26 Nga' iri nopo duwo boyoon do mantad id pogialatan di turu' nohopod o boyoon diri, i Ildad om i Midad, nga' minundorong do hiri'd kokiiman om a' i' minongoi tanud di suwai do minongoi do hiri'd Kiim do Tuhan. Om hiri noddid kokiiman i Rusod do luminintuhun dot id diyolo'. Om timpuun no iyolo' goduwo do mimboros dot opuhod do miagal do nabi. 27 Om panangkus noddi do suminoliwan o songulun o tanakwagu do minongoi pomisunud di Musa di nosiliu dot id di Ildad om id di Midad. 28 Om boro-boros noddi i Yosua i tanak di Nun, i mongunguhup di Musa do mantad dit omulok po iyau. Boros ka dau dot id di Musa, “Ngoyo' iyolo' oduhai oi Tuan!” ka dau. 29 Om boros kad i Musa do suminimbar, “Nokuro tu' mogobi' ko doho'd osolon? Orohian oku nogi' daa kopio do patahakon do Tuhan o Rusod dau dot id toinsanan diti tulun dau, om gisom do mimboros ngai' iyolo' dot opuhod do miagal do nabi!” ka dau. 30 Om guli' noddi i Musa om i turu' nohopod o boyoon do hiri'd kokiiman.

Pinorikot do Tuhan i Burung Puyuh

31 Om sigog id potonguso' do Tuhan i tongus do mantad id rahat do pinoporikot do burung puyuh dit ogumu' kopio, dot ongosiriba' no o ponunulud. Om kotongkop nopo di tombolog i kokiiman gisom do piro-piro o kilomito do kosoduwo' do posorili' di kokiiman do sinondot di tombolog, om honggo nopo nga' sokoon no di tombolog diri. 32 Om nosongodou nopoddi do tadau'ddi, om nosuaban do totuong diri, om nosongodou di tadau kawagu, do minggamit i tulun di burung puyuh. 33 Om tontok dit osima' po iyolo'd tikanas, om kotogod no o Tuhan di tulun om porikatai no dau iyolo'd toruol di mogkoroliu. 34 Om pungaranai noddi o kinoiyonon diri do “Lobong di Godoot” tu' hilo' no o pinamalabangan diyolo' di tulun dit ongodoot do tikanas. 35 Om undaliu no i tulun do mantad hiri om pakayaai no do hilo'd bandar do Hasirot; om powonsoyo' no diyolo' o kiim diyolo'd hilo'.

Pongintaban 12

Hinukuman i Miriam

1 I Musa nopo nga' minanansawo do tondu' do bansa'd Kus, om iri noddi o kopongindaraatan di Miriam om i Harun di Musa. 2 Boros ka diyolo', “I Musa no tuu o pawayaan do Tuhan do boros dau? Okon toi ko' iyato nga' pawayaan i' dau'd boros dau?” ka diyolo'. Om norongou id Tuhan i boros diyolo'. 3 (I Musa nopo nga' tulun dit osiriba' kopio o ginawo it osiriba' no kopio o ginawo ko' mantad dot isai nopo o tulun di poimpasi do hiti'd pomogunan.) 4 Om sigog nopoddi do boro-boros o Tuhan dot id di Harun om id di Miriam do poingkaa, “Pokionuon ku iyokoyu'd tolu do mongoi do hilo'd Kiim ku,” ka dau. Om ongoi no iyolo', 5 om lintuhun no o Tuhan dot id rolot do haun di poinaru do miagal do torigi. Om ingkakat noddi o Tuhan do hiri'd wawayaan di Kiim, om pomolohou nod, “Harun! Miriam!” ka. Om laang goduwo no iyolo' do minamanau. 6 Om boros kad Tuhan, “Pokinongou kou no diti poboroson ku! Soira' nopod haro o nabi dot id pogialatan dokoyu om mintalang oku dot id diyolo' dot id suang do pinointalang om moro-boros oku diyolo' dot id suang do nipi. 7 Nga' a' i' iyo'ddi do tontok do moro-boros oku di Musa, i susuhuon ku, tu' noonuan ku no iyau'd karaja' do momoyo' do koinsanai diti tulun dot Israil, i tulun ku. 8 Om timbabaon ku nopo iyau do tontok do moro-boros oku, om poinsondot o pomomoros ku, om okon no ko' posiriban-ribanon ku. Tinan ku piya nga' nokokito i' iyau! Om nokuro tu' katama' kou po daa kopio do sumaap dau?” ka dau. 9 Om kotogod no o Tuhan diyolo' goduwo; om tontok di tuminongkiad o Tuhan, 10 om di minidu' i haun do mantad hiri'd Kiim do Tuhan, om sigog id koontok i Miriam do toruol do kusta. Om miagal poddi do gapas kopurak o kulit dau. Om soira' di kuminoili i Harun di Miriam om kokito dau do noontok i Miriam do toruol do miagal diri. 11 Om boro-boros no iyau di Musa, “Tulungo' iyahai oi Tuan, kada' iyahai pologoso' dot oinggorit dot obungou di dusa do nowonsoi dahai do gama' di kababasug dahai. 12 Kada' i Miriam pologoso' do miagal di tanak do napatai mantad do nosusu, om i nopiintanga' nod napasa' o tonsi,” ka dau. 13 Om pomolohou no i Musa do Tuhan, “Oi Kinorohingan, lingasai no iyau!” ka. 14 Om boros kad Tuhan do suminimbar, “Ondung dinulaan daa iyau di tapa' dau, om turu' no tadau do boboon dau o kointingayaman dau. Iyo nopoddi om poinsoduwon no iyau diti kokiiman do solinaid do turu' o tadau, om atalib pondo iri om koino-ino nogi' iyau do sumuang kawagu,” ka dau. 15 Om posoliwano' noddi i Miriam di kokiiman do solinaid do turu' o tadau. Om solinaid nopo dit a' po iyau nokoguli', om a' po minundaliu i bansa'ddi do mantad id kinoiyonon diri. 16 Om tongkiad nogiddi iyolo' do mantad hilo'd Hasirot om powonsoyo' no diyolo' o kiim diyolo' do hilo'd tana' do kowotuan do Paran.

Pongintaban 13

I Hopod om Duwo o Gomponoluku'

1 Om boros kad Tuhan dot id di Musa, 2 “Momili' nod songulun dot id pialatan di piro-piro boyoon do pointikid-tikid di hopod om duwo o payat do bansa'dti; do songulun o mantad id pointikid-tikid do payat. Om suhuon no iyolo' do sumiliu'd gomponoluku' do mongoi ponorisid do mogontong di pomogunan do Kanaan, i patahakon ku dot id tulun dot Israil,” ka dau. 3-15 Om wonsoyo' nod Musa i pinonuhuan do Kinorohingan diri. Om suhuo' no dau do minamanau do mantad hilo'd tana' do kowotuan do Paran iti piro-piro o boyoon diti: - Payat - Boyoon - Rubin - I Siamua i tanak di Sakur - Simion - I Sapat i tanak di Hori - Yohuda - I Kalib i tanak di Yopuni - Isakar - I Yigal i tanak di Yusup - Ipraim - I Hosia i tanak di Nun - Binyamin - I Palti i tanak di Rapu - Sibulon - I Gadiol i tanak di Sodi - Manasi - I Gadi i tanak di Susi - Dan - I Amiol i tanak di Gomali - Asor - I Situr i tanak di Mikail - Naptali - I Nabi i tanak di Wopsi - Gad - I Guil i tanak di Maki 16 Om iri ngai' no o gomponoluku' di sinuhu' di Musa do mongoi ponoluku' do pomogunan diri. I Hosia nopo i tanak di Nun diri, om pinawaliu di Musa o ngaran; om i Yosua diri o pinomungaran. 17 Om tontok di sinuhu' di Musa iyolo' do mamanau, om bilinai no dau iyolo' do poingkaa, “Mamanau kou no do pakayaan ponong id utara do mantad hiti, do kumaa ponong hilo'd salatan do pomogunan do Kanaan, om lumombus nogindo do hiri'd konulu-nuluan. 18 Ilaan no kopio dokoyu ondung okuro-kuro o pomogunan diri, om ondung piro kogumuo'd tulun do hilo', om ondung songkuro o kinoris diyolo'. 19 Om antangan no kopio dokoyu ondung osonong ko' amu' i pomogunan diri, om ondung id kawalayan dit aiso' o tolig do posorili' o tiyonon di tulun do hilo' ko' id bandar po dit ongkitolig o posorili' o tiyonon diyolo'. 20 Om antangan no ondung oluhub i tana', om ondung ogumu' o kayu do hilo'. Om kada' kou no kopio kolihu do mongigit dot ongokuuri' di tua' do totonomon do hilo' do gumuli' kou,” ka dau. (Om tontok nopoddi nga' tumimpuun nogi' do monsok i tua' dot anggur.) 21 Om pamanau no i tulun diri do kuminaa ponong id utara om sorisido' no diyolo' do mingontong o pomogunan diri do tuminimpuun do mantad hiri'd tana' do kowotuan do Sin, i ponong id salatan, om luminombus do hiri'd bandar do Ribo, it id toning do Ralan do Hamat di ponong id utara. 22 Om id gulu nopo kopio om kuminaa iyolo' do ponong id salatan do pomogunan diri om ruminikot do hilo'd bandar do Hibron, i kinoiyonon do tulun dot Ahiman, om Sisai om Talmai. Iyolo' nopo nga' sinakagon dot iso' o bansa'd tulun dit angagayo koulun, i roitan do tulun dot Inak. (Iri nopo bandar do Hibron om turu' no toun do poingwonsoi dot id gulu ko' i bandar do Soan di hilo'd Masir.) 23 Om korikot no iyolo' do hilo'd Rantai dot Iskol. Om hilo' no o pinanatasan diyolo' do raan dot anggur do mitonggoi do sompuru o tua' dot anggur. Nga' awagat tomod iri gisom dot a' no milo dot a' pasansangon do kayu do pangantayang, om piniantayangan diri do duwo o tulun. Om minigit nogi' iyolo' do piro-piro o tua' do kayu di roitan do delima om tua' dot ara do patahakon do maan do ponuwau-suwau. 24 Om pungaranai noddi o kinoiyonon diri do Rantai dot Iskol tu' hilo' no o pinongonuan di tulun dot Israil di sompuru o tua' dot anggur. 25 Om kosorisid poddi di piro-piro gomponoluku' o pomogunan diri do solinaid dot apat nohopod o tadau, om poguliai nogi' diyolo' 26 dot id di Musa, om id di Harun, om id toinsanan di tulun dot Israil, i maso do pointimung do hilo'd Kadis, it id tana' do kowotuan do Paran. Om susuyo' ngai' no diyolo' i nongokito diyolo'. Om pokitanai diyolo' di tulun dot Israil i tua-ua' di nigitan diyolo'. 27 Om boros ka diyolo' dot id di Musa, “Nosorisid no dahai do mogontong i pomogunan diri om nokito dahai do kaya' i pomogunan om oluhub i tana'd hilo'; om diya iti tua-ua' dot okuri' do mantad hilo'. 28 Nga' iri nopo tulun do hilo' om ongokoris koulun, om bandar diyolo' nga' angagayo om ongogirot po o tolig do posorili'. Om haro po ot araat tu' hilo' nogi' o nokokitanan dahai di sinakagon do tulun dit angagayo koulun. 29 Momogun-mogun nopod hiri'd ponong id salatan do pomogunan diri om i tulun dot Amalik; om hiri nod konulu-nuluan om i tulun do Hit, om Yobus, om Amori o mongiyon-ngiyon; om hiri nod potoropis di Rahat do Tanga' om hiri'd poinsusui di Bawang do Yordan om i tulun do Kanaan o momogun-mogun,” ka. 30 Nga' tingkodo' nod Kalib i tulun do somboro-boros do tumogod di Musa, boros ka dau, “Ngoyon toko' nogi' songodo' i pomogunan diri om aahau toko' i' o pomogunan diri do dinondo, tu' okoris toko' i' do mangala'ddi,” ka. 31 Nga' boros ka di tulun di songwoyo' di Kalib do guminuli', “A' toko' i' moti' okoris do sumaap diyolo'. Tu' iri nopo tulun do hilo' om ongokoris i' ko' iyati',” ka diyolo'. 32 Om popimboroso' noddi diyolo' o boros dit a' otopot dot id tulun dot Israil do pasal di pomogunan di nongoi diyolo' antangai. Boros ka diyolo', “A' i' kabagal di tulun di hilo' mantad id pomogunan o hasil di tana'd hilo', tu' okuri' i' kopio o hasil. Om iri nopo tulun do hilo' do nongokito dahai om angaranggou kopio koulun. 33 Om nokokito po iyahai do tulun dit angagayo kopio koulun, i sinakagon do tulun dot Inak. Om miagal pod godu-godu kokoro' o kopurimanan dahai do tinan dahai, om iyo no doti'ddi kopio o kokitanan diyolo' dahai,” ka.

Pongintaban 14

Sontogod-togod i Tulun dot Israil

1 Om monuaban nopoddi i tulun dot Israil do mihad dot atatangkabaan. 2 Om sontogod-togod diri iyolo' di Musa om i Harun. Boros ka no diyolo', “Osonong-sonong nogi' daa do napatai toko' di hilo'd Masir ko' hiti pod tana' do kowotuan! 3 Nunu kopio o kapangangatan do Tuhan dati' do hilo'd pomogunan do Kanaan? Tu' apatai toko' nopo dot id pisangadan om angatanggayan do pisangod iti sawo om iti tangaanak toko'. Osonong nogi' do gumuli' toko' do hilo'd Masir!” ka. 4 Om pogiboro-boros noddi iyolo' do poingkaa, “Osonong nogi' do momili' toko'd boyoon om gumuli' toko' i' kawagu do hilo'd Masir,” ka. 5 Om otud no i Musa om i Harun do hiri'd dotimbabaan do koinsanai di tulun. 6 Om hurako' nopo di Yosua i tanak di Nun, om i Kalib i tanak di Yopuni, o pakayan diyolo' do popointalang do tumongob iyolo'. Iyolo' goduwo nopoddi nga' mantad id pialatan di piro-piro o tulun di minongoi ponoluku'. 7 Om boros ka diyolo' dot id toinsanan di tulun, “Iri nopo pomogunan di nongoi dahai antangai om aiso' no o koiyo do kosonongo'. 8 Ondung ohubayaan o Tuhan dati', om pootodon toko' i' dau do hilo', om patahakon dau dati' i pomogunan di kaya' om it oluhub o tana'. 9 Kada' kou saap do Tuhan om kada' kou kooris di tulun do poingiyon do hilo'. Osoonong toko' do mangala' diyolo'. Tu' moyo-woyo' i' o Tuhan dati' om naala' no dau i ponokokinorohingan di mongintirung do tulun do hilo', om kada' kou no kooris,” ka. 10 Om songima-ima' ngai' no daa'ddi i tulun do momodumpau ngai' diyolo'd apat do watu do gisom dot apatai iyolo'. Nga' sigog id kokito di tulun i tulinau di kosorong kopio do mantad id koropohon do Tuhan, do minimbulai do hiri'd sawa-sawat di Kiim do Tuhan.

Sinambayangan di Musa i Tulun dot Ogumu'

11 Om boros kad Tuhan dot id di Musa, “Gisom tuu do songgira' iti tulun do sumaap kasai' doho'? Songkuro po o koloido' diyolo'd mada' do mogondos doho', dot irad piya'ddi kogumu' o koimayaan do nowonsoi ku dot id pogialatan diyolo'? 12 Punsoon ku nondo iyolo', do toruol di mogkoroliu o pomunso ku. Om iya' nondo o silihon ku do molohing dot iso' o bansa' dit agayo om it okoris ko' mantad diyolo',” ka. 13 Nga' boros kad Musa dot id Tuhan, “Nga' Tuhan, nokoilo no i tulun do Masir dot i sinundu nu o pinoposoliwan nu dahai do mantad hilo'd Masir. 14 Om nosusui no diyolo' iri dot id tulun di poingiyon dot id pomogunan diti. Om nongkoilo no o tulun do moyo-woyo' ko dahai. Om nongkorongou nogi' iyolo' dot okito ko i' kopio do tontok do mundorong i haun nu dot id sawa-sawat dahai; om mogulu-gulu ko dahai dot id rolot do haun di poorigi do dangadau om id rolot ko do tapui di poorigi do dongotuong. 15 Om ondung patayon ngai' nu iti tulun nu, om mimboros ngai' nondo i bansa' di nongkorongou do pasal do kobontugo' nu, do 16 pinatai nu i tulun nu do hiti'd tana' do kowotuan tu' a' ko no kogoos do papaatod diyolo' do hilo'd pomogunan di pinabatos nu. 17 Om iri no o kokuwaan oi Tuhan, do pokionuon ku do pointalangon nu i kuasa' nu dot id dahai om wonsoyon nu i pinabatos nu. Tu' nokoboros ko i' do poingkaa, 18 ‘Iyoho' nopo i Tuhan, om a' i' obintogod, om pointalangon ku i' o kosianan ku, om kotorodoko' ku dit a' opupus-pupusan. Om ompunan ku i' i tulun di kidusa om i sumaap doho'. Nga' iyo piya'ddi nga' posulion ku i' dot id tangaanak om id manangaki o kasalaan di komolohingan do gisom id korikot di sinakagon do kointolu om koingapat,’ ka nu. 19 Om dinondo nopodti oi Tuhan, om pokionuon ku no kopio dot ompunan nu o dusa diti tulun do miagal di minangampun ko diyolo' do mantad di tuminongkiad i' iyolo' do pomogunan do Masir, tu' agayo i' kopio o kosianan nu,” ka dau. 20 Om boros kaddi do Tuhan do suminimbar, “Ompunan ku i' iyolo', do miagal di pinokianu nu. 21 Nga' mamatos oku no dot id suang do ngaran ku om id suang do kuasa' ku di koponu' diti pomogunan, 22 dot id pogialatan nopodti tulun om iso' po nga' aiso' no ot otogui do gisom do kosuang do pomogunan di pinabatos ku dot id komolohingan diyolo'. Tu' a' i' iyolo' mumboyo' doho', om managalai-galai nogi' iyolo' do mogumbal doho'. Om nongkokito i' daa iyolo' di tulinau do tanda' do karapahan ku di kosorong tomod, om nokokito iyolo' di piro-piro o koimayaan do winonsoi ku do hilo'd Masir om hiti'd tana' do kowotuan. 23 A' no, a' no kopio iyolo' kosuang do pomogunan diri. Id pogialatan nopo diyolo' di minagada' doho', om iso' po nga' aiso' no o koulok do pomogunan diri. 24-25 Nga' i Kalib nopo, i susuhuon ku om a' i' iyo'ddi. Tu' iyau nopo om tuminorodok i' dot id doho'. Om iri no o kapaatadan ku dau do hilo'd tana' di nohombo dau. Om iri nopondo i tana' dit arantai, i pomogun-mogunan do tulun dot Amalik om tulun do Kanaan do dinondo, om aanu indo di sinakagon di Kalib, i susuhuon ku'ddi. Om suab nopondo, oi Musa, om gumuli' no om kumaa no do hilo'd tana' do kowotuan, i ponong id Suok dot Akaba,” ka dau.

Hinukuman do Tuhan i Tulun dot Israil di Sontogod-togod

26 Om boros kad Tuhan dot id di Musa om id di Harun, 27 “Gisom po tuu do songgira' do sontogod-togod kasai' do sumaap doho' iti tulun dot angaraat? Apaasan oku nod korongou do boros diyolo' do sontogod-togod! 28 Simbaron no dokoyu iyolo' do poingkaa: Boros kad Tuhan om, ‘Sumumpa' oku no dot id suang do ngaran ku do wonsoyon ku nondo dot id dokoyu o miagal di pinokianu dokoyu. Iyoho' no, i Tuhan o minomoros diti. 29-30 Apatai kou nondo om mogiuriasan nopondo do hiti'd tana' do kowotuan o rata' dokoyu. Tu' sontogod-togod ngai' kou i' do sumaap doho'. Om iri no o kokuwaan do suwai nopo ko' iyo Kalib di Yosua, om aiso' no o tiso' piya dokoyu dit id sawat ko' duwo nohopod o toun do tumur do kosuang di pomogunan di pinabatos ku dokoyu. 31 Boros ka dokoyu om tanggayan nondo do pisangod i tangaanak dokoyu! Nga' pootodon ku indo iyolo' dot id pomogunan di niada' dokoyu, om iri nondo o pomogunan dot osiliu do pomogunan kopio diyolo'. 32 Nga' iyokoyu nopo om hiti nod tana' do kowotuan o kapatayon. 33 Om minghombo nopondo i tangaanak dokoyu do hiti'd tana' do kowotuan do solinaid dot apat nohopod o toun. Om oinggorit nondo i tangaanak dokoyu, do gisom po dot apatai ngai' i tulun di rampam dokoyu, tu' a' kou i' tuminorodok. 34 Om boboon no dokoyu i kootuson di dusa dokoyu do solinaid dot apat nohopod o toun; sontoun o pomogontok do sangadau do mantad dit apat nohopod o tadau dokoyu do minongoi hombo dot id pomogunan diri. Om oilaan nogindo dokoyu ondung okuro-kuro no o kopurimanan do saapon kopio ku iyokoyu! 35 Om sumumpa' oku no do wonsoyon ku iti dot id dokoyu, iyokoyu i tulun dot angaraat om i mogisosokodung nopo do sumaap doho'. Om hiti nod tana' do kowotuan diti o kapatayon ngai' dokoyu. Iyoho' no i Tuhan o minomoros diti,’ ka dau,” kanto dokoyu. 36-37 Iri no piro-piro o tulun di sinuhu' di Musa do minongoi pogontong di pomogunan diri om it a' otopot o pinosunud di guminuli' iyolo' o nokobungou di tulun dot Israil do sontogod-togod do sumaap do Tuhan. Om iri no o nokopomohukuman do Tuhan diyolo' do toruol, do gisom do nangapatai iyolo'. 38 Id pialatan nopo di hopod om duwo o gomponoluku' om iyo Yosua po di Kalib o poimpasi.

Di Koinsan I' Umbal do Manangod di Pomogunan

39 Om soira' di sinunudan di Musa i tulun dot Israil di pinoboros do Tuhan diri, om songihad-ihad poddi iyolo' dot atatangaban. 40 Om tadau noddi kawagu, dit osuab po, om sodia' no iyolo' do mongoi panangod do hiri'd konulu-nuluan do pomogunan diri. Om boros ka diyolo', “Okunon i' dahai do nokowonsoi iyahai'd dusa. Nga' baino' nopo om ngoyon no dahai songodo' do magahau i pomogunan di pinoboros do Tuhan dot id dahai,” ka diyolo'. 41 Nga' boros kad Musa, “Nokuro'ddi tu' sumurilog kou pod Tuhan do dinondo? Aiso' i' bo ot aanu-anu dokoyu! 42 Kada' kou nogi' ongoi. Tu' a' i' moyo-woyo' dokoyu o Tuhan, om aala' kou indo di pisangod dokoyu. 43 Kotimbaba' kou nopondo di tulun dot Amalik om i tulun do Kanaan, om angapatai kou indo dot id pisangadan. Om a' no o Tuhan momoyo' dokoyu tu' a' kou i' minumboyo' dau,” ka dau. 44 Nga' nokobulun kasai' po i tulun dot Israil do minongoi do hiri'd konulu-nuluan do mulong piya dot a' i Musa om i Kaban do Tumpongo tuminongkiad di kokiiman. 45 Om songodo' no di tulun dot Amalik om i tulun do Kanaan di poingiyon do hilo' i tulun dot Israil. Om kaala' no diyolo' i tulun dot Israil om gusao' no do gisom do nokorikot do hilo'd Horma.

Pongintaban 15

Oturan do Pasal do Porsombahan di Sumbolion

1 Om patahako' nod Tuhan dot id di Musa 2 iti piro-piro o toturan dit apatut do tonudon di tulun dot Israil do hilo'd pomogunan di patahakon do Tuhan dot id diyolo'. 3 Maan nopod porsombahan di sorobon, om porsombahan do pamayaan do batos ko' porsombahan di patahakon do tumanud do kagaanan do ginawo ko' porsombahan do patahakon do tontok do nunu nopo o karamayan do don tugama' di koubasanan, om honggo nopod tayam-tayam diti nga' koino-ino id patahakon dot id Tuhan: songinan o sapi' do tontoluhan, ko' songinan o dumba' do tontoluhan, ko' songinan o dumba' ko' songinan o kambing. Om iri no o tawau do porsombahan do taakanon diti o kasanangan do Tuhan. 4-5 Isai nopo o papatahak dot id Tuhan do dumba' ko' kambing do maan do porsombahan di sorobon, om mositi' nod tanggayan o pointikid-tikid do tayam-tayam diri do songkilogram o tapung di rinalatan do songlito o tumau do saitun do maan do porsombahan do gandum, om songlito o waig dot anggur. 6 Ondung songinan o dumba' do tontoluhan do patahakon, om mositi' nod papatahak po do duwo kilogram do tapung, do ralatan do tumau'd saitun do songlito om satanga' do maan do porsombahan do gandum, 7 om mitonggoi do songlito om satanga' o waig dot anggur. Om iri no tawau do piro-piro o porsombahan diti o kasanangan do Tuhan. 8 Ondung songinan o sapi' do tontoluhan o maan do porsombahan di sorobon ko' porsombahan do pamayaan do batos ko' porsombahan do piombolutan, 9 om mositi' nod papatahak po do tolu kilogram do tapung di rinalatan do duwo lito do tumau'd saitun do maan do porsombahan do gandum, 10 om duwo po o lito do waig dot anggur. Om iri no tawau do porsombahan diti o kasanangan do Tuhan. 11 Om iri no it apatut do patahakon do maan do porsombahan do potonggoyon do pointikid-tikid do sapi' do tontoluhan, ko' dumba' do tontoluhan, ko' dumba' ko' kambing. 12 Ondung lobi ko' iso' o tayam-tayam do patahakon do maan do porsombahan, om iri nogi' i porsombahan do tapung, om tumau, om waig dot anggur nga' ruhangan no do tumanud di kogumuo' di tayam-tayam. 13 Om mositi' nod wonsoyon do pointikid-tikid do tulun dot Israil o miagal diri do soira-ira' nopo iyolo' do papatahak do porsombahan do taakanon. Om iri no tawau do porsombahan diti o kasanangan do Tuhan. 14 Om i tulun do bansa'd suwai di poirolot dokoyu do daamot noo ko' i tumimporon nga' mositi' nod tumanud do koinsanai dot oturan diri do soira' nopo iyolo' do papatahak do porsombahan do taakanon dot id Tuhan, dot i kasanangan do Tuhan o tawau. 15-16 Om oiyo nopo o toturan om kowoyo-woyoo' dot apatut do tonudon dokoyu om i tulun do bansa'd suwai di poirolot dokoyu, tu' iyokoyu nopo diyolo' om oiyo i' dot id pagantangan do Tuhan. Om iyo no kasai'ddi o tonudon do gisom dot alaid. 17 Om patahako' nod Tuhan dot id di Musa 18 iti piro-piro o toturan do tonudon di tulun dot Israil do korikot iyolo' do hilo'd pomogunan di patahakon do Tuhan dot id diyolo'. 19 Om soira' nopo do mangakan kou do nunu nopo o tua' do totonomon do hiri'd pomogunan diri, om mositi' nod potobilang kou do wookon do maan do porsombahan di potobilangon do maan do don Tuhan. 20 Om soira' nopo do mogonsok kou do roti dot i gandum di gulu koomot o wonsoyon, om mositi' nod patahakon dot id Tuhan i roti dit id gulu koonsok, do maan do porsombahan di potobilangon do maan do don Tuhan do karalan-ralano' nopo do papatahak om iyo iddi papatahak dokoyu di gandum dit id gulu dokoyu kotutu. 21 Om mositi' nod patahakon dokoyu i roti dit id gulu koonsok do maan do porsombahan di potobilangon do maan do don Tuhan do gisom do mompus-ompus. 22 Om haro i' dotindo o tulun dit a' tumomod do momolihu do momonsoi do piro-piro dit oturan di pinatahak do Tuhan dot id di Musa. 23 Om koumbal i' doti' do koimbagu do kolihu iti tulun do momonsoi do koinsanai di pinonuhuan do Tuhan do pinolombus di Musa. 24 Ondung owonsoi di tulun o kasalaan do miagal diri tu' a' i' iyolo' nokoilo dot oturan, om mositi' no do papatahak iyolo' do songinan o sapi' do tontoluhan do maan do porsombahan di sorobon, i porsombahan di kasanangan do Tuhan o tawau. Om mositi' nod papatahak po iyolo' do porsombahan do gandum om porsombahan do waig dot anggur do miagal dit apatut, do potonggoyon di porsombahan do sorobon diri. Om suwai no ko' iri, om mositi' no do papatahak po iyolo' do songinan o kambing do tontoluhan do maan do porsombahan do pangampun do dusa. 25 Om wonsoyon nogindo dit imam i natantu' mantad do wonsoyon do pongidu' do dusa di tulun dot ogumu'. Om ompunan indo iyolo'd Kinorohingan tu' a' i' diyolo' tinomod do momonsoi i kasalaan diyolo', om kawagu po nga' nakapatahak no iyolo' do porsombahan do pangampun do dusa do maan do porsombahan do taakanon do maan do don Tuhan. 26 Om oinsanan nopondo i tulun dot Israil om i tulun do bansa'd suwai di poirolot diyolo' dot oompunan, tu' oinsanan i' iyolo' do nokohompit do kasalaan diri. 27 Ondung haro o tulun do kowonsoi'd dusa dot a' dau tomodon, om mositi' nod papatahak iyau do songinan o kambing do tondu' di sontoun nogi' o tumur do maan do porsombahan do pangampun do dusa. 28 Om mositi' nod wonsoyon dit imam i natantu' mantad do wonsoyon do pongidu' di dusa, do hiri'd pananaraban do porsombahan om oidu' i' i dusa di tulun, om oompunan indo do Tuhan o tulun diri. 29 Om iyo nogiddi o toturan do tonudon dot isai nopo o kowonsoi'd dusa dit a' tomodon, do tulun tuu iri dot Israil ko' tulun po do bansa'd suwai di poingiyon do hilo'. 30 Nga' ondung haro o tulun dot Israil ko' tulun do bansa'd suwai di tumomod do momonsoi'd dusa, om pakaiso-aiso' no kopio iyau'd Tuhan. Om mositi' nod hukuman iyau do kapatayon 31 tu' suminaap i' iyau'd Tuhan om tuminomod do tuminolibamban di pinonuhuan do Tuhan. Om iri i sala' di tulun o nokobungou di kinapatayon dau.

Tulun dit A' Momusou do Tadau'd Sabat

32 Insan o maso, do tontok di hilo' pod tana' do kowotuan i tulun dot Israil, om haro o kusai do nabantalan do maso do mintimung do siduwon do tontok do tadau'd Sabat. 33 Om ngoyo' no i tulun diri potimbabao' di Musa, om i Harun om koinsanai di tulun, 34 om pinoundorong poddi iyau tu' a' po oilaan ondung kukuroyon iyau. 35 Om boros kad Tuhan dot id di Musa, “Mositi' nod hukuman do kapatayon iti tulun diti; om mositi' nod posoliwanon iyau diti kokiiman. Om oinsanan nopondo iti tulun do momodumpau dau'd watu do gisom dot apatai do hilo'd soliwan diti kokiiman,” ka dau. 36 Om oinsanan nopoddi i tulun do pinoposoliwan di tulun diri do mantad hiri'd kokiiman, om dumpaho' no diyolo' iyau'd watu do gisom do napatai, do tumanud di pinonuhuan do Tuhan.

Oturan do Pasal do Rinaboi-Raboi

37 Om suhuo' nod Tuhan i Musa 38 do poposunud diti ponuhuan dot id tulun dot Israil do poingkaa, “Wansayan nod rinaboi-raboi o hiri'd tompok do pakayan dokoyu om kagasan nod tali dot otomou o pointikid-tikid di rinaboi-raboi. Om mositi' nod wonsoyon kasai' dokoyu o miagal diti do gisom dot alaid. 39 Om guna' nopo di rinaboi-raboi'ddi nga' maan do kopomuhandaman. Om soira-ira' nopondo dot okito dokoyu i rinaboi-raboi'ddi, om osorou ngai' no dokoyu i ponuhuan ku om umboyoon indo dokoyu iri. Om iri nondo o kaantob dokoyu do monolikud doho' do tumanud di dokoyu'd korohian om i dokoyu dot osorou. 40 Om iri no i rinaboi-raboi o poposorou dokoyu do mumboyo' do koinsanai di ponuhuan ku, gisom dot asangkayu kou nondo kopio dot asanganu ku. 41 Iyoho' no i Tuhan i Kinorohingan dokoyu; om iyoho' no i pinoposoliwan dokoyu do mantad hilo'd Masir, om osiliu oku i' do Kinorohingan dokoyu. Iyoho' no o Tuhan,” ka.

Pongintaban 16

Suminaap i Kora, om i Datan, om i Abiram

1-2 I Kora nopo, i tanak di Yisar, i mantad id pinuruan do sompiiyon di Kohat, i payat di Liwi, om nakasaap kopio do suminurilog di Musa. Om sinokodung nogi' iyau do tolu o tulun do mantad id payat di Rubin --- i Datan om i Abiram i tangaanak di Iliab, om i On i tanak di Pilit --- om haro po 250 o tulun dot Israil do suwai dot iri ngai' i boyoon dit angabantug do nopili' di rayat do suminokodung dau. 3 Om ongoi ngai' nopo iyolo' solowot di Musa om i Harun, om boro-boros nod poingkaa, “Pokinongou pogi' oi Musa! Pointikid-tikid do tulun dot Israil om nokotobilang ngai' i' do sumiliu'd songonuon do Tuhan. Om hiti id pogialatan toko' o Tuhan. Nga' nokuro tu' momusorou ko iya' do poinsawa-sawat ko ko' mantad diti tulun do suwai di songonuon do Tuhan? Adalaan no kopio ko' i natantu' mantad iti wonsoyon nu!” ka diyolo'. 4 Om soira' di norongou di Musa iri, om tungub nopo iyau do hiri'd tana' om sambayang no dot id Tuhan. 5 Om boros kaddi dau dot id di Kora om id toinsanan di tulun do tuminanud di Kora, “Kosuabon nopod suab om potudukon indo do Tuhan dot id dati' ondung isai noo i tulun di nokotobilang do sumiliu'd songonuon do Tuhan. Om Tuhan indo o momili' di tulun di nokotobilang do sumiliu'd songonuon dau, om pologoson do Tuhan o tulun diri do minsomok dau do hiri'd pananaraban do porsombahan. 6-7 Kosuabon nopondod suab om migit kou no, iya' om koinsanai di tuminanud diya' do talam di poiyanan do tapui, om suangan nod popou, om kuwaan do kominyan, om igitan nogindo iri do hiri'd pananaraban do porsombahan. Om okito toko' nogindo ondung isai i nopili' do Tuhan dot id pogialatan toko'. Iyokoyu nogi', i tulun do Liwi o nokowonsoi dit adalaan kopio ko' i natantu' mantad,” ka dau. 8 Om boros ka kawagu di Musa dot id di Kora, “Pokinongou kou pogi', oi tulun do Liwi! 9 Ondos daa dokoyu om agaan-gaan iti kinopomilian do Kinorohingan dot Israil dokoyu do mantad id pogialatan di tulun dot Israil do suwai, om gisom do koino-ino kou do minsomok dau, om kapaganu-anu do hiri'd Kiim dau, om kakaraja' om kopogobi-obi' di tulun dot Israil? 10 Pinusou ko nogi' kopio'd Tuhan diti oi Kora, om koinsanai di tulun do Liwi di suwai --- om pokionuon po daa'ddi dokoyu dot osiliu kou dot imam! 11 Soira' nopod mogod-togod kou do sumaap di Harun, om otopot nopo kopio, oi Kora, om Tuhan i' o saapon nu, om saapon di tulun di tuminanud diya',” ka. 12 Om ponuhu' no i Musa do mongoi pomolohou di Datan om i Abiram, nga' boros ka diyolo', “A' i' iyahai mongoi! 13 A' po tuu ula' do pinosoliwan nu iyahai do mantad hilo'd tana' do Masir dit oluhub, do ngoyon no patayo' do hiti'd tana' do kowotuan? Om baino' nodti om pakaanak-anakon nu po daa iyahai? 14 Atalang no kopio dot a' ko i' pinoporikot dahai dot id tana' dit oluhub, om aiso' o tumo om kabun dot anggur dot asanganu dahai, om akalan nu po daa'ddi iyahai do baino'. A' i' iyahai mongoi!” ka diyolo'. 15 Om kotogod noddi kopio i Musa, om boros ka dau dot id Tuhan, “Oi Tuhan, kada' romito' i porsombahan dot igitan do tulun diti. A' oku i' nokowonsoi'd sala' dot id tongoiso' piya diyolo'; songinan-nginan piya o kaladai nga' aiso' i' o naanu ku do mantad id diyolo',” ka. 16 Om boros kaddi di Musa dot id di Kora, “Rumikot nod suab do hilo'd Kiim do Tuhan do miwoyo' di 250 o tulun do sumokodung diya'. Om i Harun nga' hilo' nogi'. 17 Om mositi' nod sorompori-pori kou'd migit do talam di poiyanan do tapui, om suangan nod kominyan om patahakon nogindo iri do hiri'd sakai di pananaraban do porsombahan,” ka dau. 18 Om sompori-pori nopoddi i tulun do minongoi panganu di talam di poiyanan do tapui, om suangai no diyolo'd popou, om kinuwaan do kominyan. Om ingkakat noddi iyolo' do hiri'd wawayaan di Kiim dot id talad di Musa om i Harun. 19 Om timungo' ngai' no di Kora o koinsanai di tulun, om ingkakat no iyolo' do potimbaba' di Musa om i Harun do hiri'd wawayaan di Kiim do Tuhan. Om sigog iddi do kokito di tulun i tulinau do koropohon do Tuhan di kosorong tomod. 20 Om boros kaddi do Tuhan dot id di Musa om id di Harun, 21 “Insodu' kou do mantad diti tulun, tu' dinondo nod raagon ku iyolo',” ka dau. 22 Nga' otud no iyo Musa di Harun do tuminuku' om boro-boros nod poingkaa, “Oi Kinorohingan, iya' no i manahak do koposion do koinsanai di songimpasi. Ondung kowonsoi'd dusa o tiso' o tulun, om otogod ko no tuu'ndo dot oinsanan o tulun?” ka diyolo'. 23 Om boros kad Tuhan dot id di Musa, 24 “Suhuo' ilo tulun dot ogumu' do minsodu' dilo kiim di Kora, om i Datan om i Abiram,” ka. 25 Om ongoi noddi i Musa do mogiwoyo-woyo' di piro-piro boyoon dot Israil do hiri'd kinoiyonon di Datan om i Abiram. 26 Om boros kad Musa dot id tulun dot Israil, “Insodu' kou no do mantad id kiim diti tulun dot angaraat, om kada' kou ongoi kama' do nunu nopo i diyolo'd songonuon. Om ondung a' kou mumboyo', om apatai kou no do kotonggoi diyolo', dot obungou di dusa diyolo',” ka. 27 Om insodu' no i tulun dot Israil di kiim di Kora, om i Datan om i Abiram. Om nokosoliwan no i Datan om i Abiram di kiim diyolo' om poingkakat no iyolo', dot iyolo' ngai' di sawo om i tangaanak diyolo' do hiri'd wawayaan di kiim diyolo'. 28 Om boros kaddi di Musa dot id tulun dit ogumu', “Iti no o koilaan dokoyu do Tuhan o minonuhu' doho' do momonsoi'd koinsanai'ddi, om okon i' ko' mantad id doho'd korohian. 29 Ondung kapatai-patayo' toomod diti tulun, om aiso' no o nunu-nunu do hukuman do mantad id Kinorohingan, om a' oku nod Tuhan sinuhu'. 30 Nga' ondung wonsoyon do Tuhan it a' po dokoyu norongou-rongou do mantad di gulu, om opitas no iti tana' do monolon diyolo' om koinsanai di diyolo'd songonuon, om gisom do miyau iyolo' do kolintuhun do hilo'd kinoiyonon do tulun di napatai, om oilaan no dokoyu do suminaap do Tuhan o tulun diti,” ka dau. 31 Om maha' di nopupusan no kopio di Musa i boros dau, om pigirang no i tana' do hiri'd ningkokoton diyo Datan di Abiram, do gisom do nopipitas, 32 om korudsu' nopoddi iyolo' do mogitonggoi-tonggoi di sompiiyon diyolo' om koinsanai di tulun di suminokodung di Kora om iri ngai' i dapu' diyolo'. 33 Om karatu' noddi iyolo' di poimiyau po iyolo' do hiri'd kinoiyonon do tulun do napatai do mitonggoi do koinsanai di dapu' diyolo'. Om pilontop no kawagu i tana' om a' noddi iyolo' hino. 34 Om oinsanan nopo i tulun dot Israil di hino'd hiri do minogidu' do tontok di norongou diyolo' i giniakan di tulun diri. Om songgiak-giak po i tulun dot Israil do poingkaa, “Panangkus toko'd mogidu'! Tu' nunu koilo-ilo nga' tolonon toko' nopo iyati' diti tana'!” ka. 35 Om porikoto' pod Tuhan o tapui do molob-ngolob do minonorob di 250 o tulun di minongoi papatahak di kominyan.

Talam do Poiyanan do Tapui

36 Om boros kaddi do Tuhan dot id di Musa, 37 “Suhuon no i Iliasar i tanak di Harun diri, do posuwai-suwai di talam do tambaga' di poiyanan do tapui, do mantad id kinasaraban di tulun diri. Om potiason no i tohun di mantad id talam do poiyanan do tapui'ddi dot id kinoiyonon do suwai, tu' iri nopo pinoiyanan do tapui'ddi om olidang. 38 Tu' nongolidangan no iri do tontok di nongoi patahako' do hiri'd sakai di pananaraban do porsombahan di don Tuhan. Om ngoyon no i talam do poiyanan do tapui'ddi do mantad id tulun di nohukuman do nobungou di dusa diyolo'. Om tantanon no dokoyu iri do gisom id onipis, om wonsoyon indo do ponompon di pananaraban do porsombahan. Om iri no ot osiliu do popoinsan di tulun dot Israil,” ka dau. 39 Om ngoyo' ngai' no di Iliasar i talam do poiyanan do tapui'ddi om ponuhu' no iyau'd tulun do manantan diri do gisom dot ongonipis no, om wonsoyon nogindo do ponompon di pananaraban do porsombahan. 40 Om iri nondo o popoinsan di tulun dot Israil, do suwai nopo ko' i sinakagon di Harun, om iso' pod tulun nga' aiso' no o koino-ino do mongoi podtutud do kominyan dot id Tuhan, do hiri'd pananaraban do porsombahan. Om isai nopo o tulun do tumolibamban dot oturan diri om apatai no do miagal di Kora om i tulun di suminokodung dau. Om wonsoyo' ngai' nopoddi o miagal diri do tumanud di pinonuhuan do Tuhan dot id di Iliasar do pinolombus di Musa.

Pinasi di Harun i Tulun dot Israil

41 Om tadau noddi kawagu om oinsanan nopo i tulun dot otogod diyo Musa di Harun. Boros ka diyolo', “Pinatai dokoyu o piro-piro o tulun di songonuon do Tuhan,” ka. 42 Om maha' di nokotimung ngai' no iyolo' do sumaap daa di Musa om i Harun, om koili no iyolo' do hiri'd Kiim do Tuhan. Om kokito no diyolo' o haun do luminikup di Kiim, om imbulai no i tulinau do mantad hiri'd Kiim do Koropohon do Tuhan di kosorong tomod. 43 Om ongoi no iyo Musa di Harun ingkakat do hiri'd dotimbabaan di Kiim, 44 om boro-boros no o Tuhan dot id di Musa do poingkaa, 45 “Insodu' kou do mantad id tulun diti. Tu' hilo' nod kinoiyonon diyolo' o pamatayan ku diyolo'!” ka dau. Om otud goduwo nopo iyolo' do tuminuku'. 46 Om boros kaddi di Musa dot id di Harun, “Ngoyo' kopio i talam do poiyanan nu'd tapui, om suangan nod popou do mantad hilo'd pananaraban do porsombahan, om kuwaan nod kominyan dot ongokooro' o hiri'd sakai di popou. Om lomusan nod mongigit iri do mongoi'd hilo'd tulun dot ogumu' om wonsoyon no i natantu' mantad do wonsoyon do pongidu' di dusa diyolo'. Lomusan no! Tu' nokourabus no o kototogod do Tuhan om nokotimpuun nod mogkoroliu o toruol di rumoliu,” ka dau. 47 Om wonsoyo' nod i Harun o miagal di pinoboros di Musa. Ngoyo' no dau i talam do poiyanan dau'd tapui, om panangkus no do minongoi'd hiri'd tanga' di tulun dot ogumu' di pointimung. Om soira' di nokito dau do nokotimpuun no i kosusaan, om pasakayo' no dau di popou'd tapui i kominyan, om wonsoyo' no dau i natantu' mantad do wonsoyon do pongidu' do dusa di tulun dot ogumu'. 48 Om kotingkod noddi i kosusaan diri, gisom do poingkakat diri i Harun do hiri'd tanga' di tulun di poimpasi om i tulun di nangapatai. 49 Om iri nopo napatai do maso'ddi om 14,700 o tulun, om a' po kohompit i tulun di napatai do tontok di suminaap i Kora. 50 Om kotingkod poddi i kosusaan diri, om guli' nogi' i Harun do hiri'd di Musa do hiri'd wawayaan di Kiim do Tuhan.

Pongintaban 17

I Sukud di Harun

1 Om boros kad Tuhan dot id di Musa, 2 “Suhuon no i tulun dot Israil do papatahak dot id diya' do hopod om duwo o sukud; dot iso' o sukud do mantad id pointikid-tikid di boyoon do payat. Om tulison no o ngaran di piro-piro boyoon do hiri'd sukud diyolo'. 3 Om tulison nogindo o ngaran di Harun do hiri'd sukud di mamawakil do payat di Liwi. Om mositi' nod iso' o sukud do mantad id pointikid-tikid di boyoon do payat. 4 Om igitan ngai' no i sukud diri do hiri'd Kiim ku om poilihon no do hiri'd dotimbabaan di Kaban do Tumpongo. Om hiri no o koiyonon ku do sumolowot diya'. 5 Om iri nopondo i sukud do tulun di pilion ku om momutolid. Om iti no o ralan ku do moningkod di boros do tulun dot a' otingkod-tingkod do sontogod-togod do sumaap diya',” ka dau. 6 Om poboroso' no di Musa iri dot id tulun dot Israil. Om sompori-pori nopoddi i boyoon diyolo' do pinapatahak dot iso' o sukud dot id di Musa; dot iso' o sukud do mantad id pointikid-tikid do payat. Om oinsanan nopo nga' hopod om duwo o sukud, om poirolot noddi i di Harun do sukud. 7 Om igitai ngai' nod Musa i sukud diri do suminuang di Kiim do Tuhan, om poiliho' no dau do hiri'd dotimbabaan di Kaban do Tumpongo. 8 Om tadau noddi kawagu, di suminuang i Musa di Kiim, om kokito no dau do nokopomutolid no i sukud di Harun, i mamawakil do payat do Liwi. Om nokopongusak no i sukud om noungkaya' i tusak, om kitua' do tua' do kayu ketapang di noonsok no! 9 Om ngoyo' ngai' no di Musa i sukud om pokitanai no dau di tulun dot Israil. Om kokito ngai' no iyolo' di nosiliu'ddi, om ngoyo' noddi di piro-piro boyoon i sukud diyolo'. 10 Om boro-boros noddi o Tuhan dot id di Musa do poingkaa, “Ngoyo' kawagu poiliho' ino sukud di Harun do hilo'd dotimbabaan di Kaban do Tumpongo. Om poopion nopo i sukud diri do maan do popoinsan di tulun dot Israil dit obinsaap, om ondung a' iyolo' tumingkod do sontogod-togod om apatai no moti' iyolo',” ka dau. 11 Om wonsoyo' nod Musa i pinonuhuan do Tuhan diri. 12 Om boros ka di tulun dot Israil dot id di Musa, “Iyo nopoddi om obungou no iyahai! 13 Ondung a' milo dot a' apatai o tulun di koinsomok dilo Kiim do Tuhan, om komoyon nopoddi nga' aiso' no o pokukurayan dahai!” ka diyolo'.

Pongintaban 18

Karaja' dit Imam om i Tulun do Liwi

1 Om boros kad Tuhan dot id di Harun, “Iya' nopo oi Harun, om i tangaanak nu, om i tulun do Liwi, om mositi' nod mamabo do kootuson di kasalaan do nunu nopo o paganu-anu do hilo'd Kiim ku, nga' iya' noo om i tangaanak nu o mamabo do kootuson do kasalaan di karaja' di dong imam. 2 Ngoyo' no angatai'd hiti i koobpinayan nu, i payat ngai' do Liwi, do kumoruhang diya'd kumaraja' om monguhup diya' do daamot nu om i tangaanak nu do kumaraja' do hiri'd Kiim ku. 3 Om mositi' nod wonsoyon di payat do Liwi it apatut diyolo'd wonsoyon dot id dokoyu om wonsoyon diyolo' i karaja' diyolo' do hiri'd Kiim, nga' a' i' iyolo' koino-ino do mongoi igit di konunu-nunuan dit ongolidang do hiri'd Bilik dit Olidang ko' iri po hiri'd pananaraban do porsombahan. Tu' soira' nopo do koigit iyolo'ddi, om apatai no iyolo' om iya' nga' kotonggoi nod apatai. 4 Om mositi' nod kumoruhang iyolo' diya' do kumaraja' om momonsoi di karaja' diyolo' do maganu-anu do hiri'd Kiim ku, nga' isai nopo it a' noonuan do kosorupayan do momonsoi do karaja'ddi om a' no koino-ino do kumoruhang diya' do kumaraja'. 5 Iya' noo, oi Harun, om i tangaanak nu, ot apatut do momonsoi di karaja' do hiri'd Bilik dit Olidang om hiri'd pananaraban do porsombahan, om a' oku indo otogod di tulun dot Israil. 6 Iyoho' no i minomili' di tulun do Liwi, i koobpinayan nu'ddi do mantad id pogialatan do tulun dot Israil do maan ku do pomuhawang diya'. Om nokotobilang no iyolo' do sumiliu'd songonuon ku, om milo no iyolo' do momonsoi'd karaja' diyolo' do hiti'd suang do Kiim ku. 7 Nga' iya' noo om i tangaanak nu o koino-ino do momonsoi do karaja' di dong imam, do nunu nopo i kagait di pananaraban do porsombahan om i hiri'd Bilik dit Olidang Kopio. Om iri no ot apatut nu do wonsoyon, tu' nopuhawangan ku no iyokoyu do karaja' do dong imam. Om pointikid-tikid do tulun dit aiso' o kosorupayan do miagal diri do koinsomok di konunu-nunuan dit olidang diri om hukuman nod kapatayon,” ka dau.

It Aanu dot Imam

8 Om boros kad Tuhan dot id di Harun, “Soro-sorohon no, do koinsanai di porsombahan di pinotobilang do maan do doho', om it a' sorobon do maan do porsombahan, om iya' no o kaanu. Om iri no o diya'd aanu kasai' do gisom dot alaid. Om iri no o patahakon ku diya' om i sinakagon nu. 9 Om mantad nopo di piro-piro porsombahan dit olidang kopio dit a' sorobon do hiri'd pananaraban do porsombahan, om iti ngai' no o diya' dot aanu: i porsombahan do gandum, om i porsombahan do pangampun do dusa, om i porsombahan do poningolon. Om nunu nopo i pinatahak dot id doho' do maan do porsombahan dit olidang, om iya' no om i tangaanak nu o kaanu. 10 Om pokolidangon no iri, om akanon no dot id kinoiyonon dit olidang. Om tongokusai noo o koino-ino do mangakan diri. 11 Om suwai no ko' iri, om koinsanai di porsombahan do suwai di pinotobilang, i porsombahan do tulun dot Israil dot id doho', om iya' no o kaanu'ddi. Om iri no o patahakon ku diya' om i tangaanak nu'd tongokusai om i tangaanak nu'd tongoondu'. Om iyo noddi o toturan do gisom dot alaid. Om isai nopo it id suang do sompiiyon nu dit olidang dot id pagantangan do tugama' om koino-ino nod mangakan diri. 12 Om iya' no ot onuan ngai' ku di hasil do tana' dit id gulu dit ongosonong kopio, i ngoyon di tulun dot Israil patahako' dot id doho' do monikid toun: i tumau do saitun, om i waig dot anggur, om i gandum. 13 Koinsanai'ddi om diya' ngai' no. Om isai nopo it id suang do sompiiyon nu dit olidang dot id pagantangan do tugama' om koino-ino nod mangakan diri. 14 Om nunu nopo i hilo'd tana' dot Israil di pinotobilang do maan do doho' dot aiso' o pinaantakan, om iyokoyu no o kaanu. 15 Om pointikid-tikid do tanak ko' tayam-tayam dit id gulu kosusu, do patahakon di tulun dot Israil dot id doho', om iyokoyu no o kaanu. Nga' mositi' nod romiton dokoyu o tusin di pamalapus do pointikid-tikid do tanak dit id gulu kosusu om i pamalapus do pointikid-tikid do tayam-tayam di sosomu' dit id gulu kosusu. 16 Om tangaanak nopo nga' mositi' nod lopusan do tontok di sombulan nogi' o tumur diyolo'. Om gatang nopo di natantu' do maan do pamalapus om limo o tusin do pirok, do tumanud di gatang do natantu' mantad. 17 Nga' sapi' nopo ko' dumba' ko' kambing dit id gulu kosusu om a' no koino-ino do lopusan. Iri nopo tayam-tayam diri om doho' no kopio om mositi' nod patahakon. Poiyason no i raha' di tayam-tayam diri do hiri'd pananaraban do porsombahan om sorobon no i lunok do maan do porsombahan do taakanon. Om iri no tawau di porsombahan diri o kasanangan ku. 18 Iyokoyu no o kaanu do tonsi di tayam-tayam do miagal di porsombahan di pinotobilang do maan do doho' tu' iyokoyu o kaanu di kangkab om i gakod do wanan di tayam-tayam diri. 19 Om iya' no om i tangaanak nu'd tongokusai om tongoondu' ot onuan ku do koinsanai di porsombahan di pinotobilang, i patahakon di tulun dot Israil dot id doho', do gisom dot alaid. Om iti no o tiso' o popogirot do batos, om it a' no milo do pututon dot id pialatan to om i sinakagon nu,” ka dau. 20 Om boros ka kawagu'd Tuhan dot id di Harun, “Iyokoyu nopo om a' no kaanu do nunu-nunu do maan do tungkusan. Om aiso' i' o tongosongkoiyonon piya do tana' do hilo'd pomogunan di pinabatos ku'ddi dot asanganu dokoyu. Tu' iyoho' no, i Tuhan, ot osiliu do tungkusan dokoyu,” ka dau.

It Aanu di Tulun do Liwi

21 Om boros kad Tuhan dot id di Harun, “Koinsanai di sompihopod do patahakon do tulun dot Israil dot id doho' om patahakon ngai' ku no dot id tulun do Liwi. Om iti no o ponokogadsi' diyolo' do maganu-anu do hiri'd Kiim ku. 22 Om iri nopo tulun dot Israil di suwai om a' no koino-ino do mongoi insomok di Kiim, om a' i' iyolo' koporikot do hukuman do kapatayon dot id tinan diyolo'. 23 Mantad nopod baino' om iri no tulun do Liwi o koino-ino do maganu-anu do hilo'd Kiim ku om i mongilo-ilo do karaja'd hilo'. Om iti nogi' o toturan do tonudon di sinakagon nu do gisom dot alaid. Om aiso' no ot aanu di tulun do Liwi do maan do tungkusan do hilo'd Israil, 24 tu' iri nopo sumiliu do tungkusan diyolo' om koinsanai di sompihopod di patahakon do tulun dot Israil dot id doho' do maan do porsombahan di pinotobilang do maan do doho'. Om iri no o kapabarasan ku dot id tulun do Liwi, dot iyolo' nopo om a' i' kaanu do maan do tungkusan do hilo'd Israil,” ka dau.

Porsombahan di Sompihopod do Mantad id Tulun do Liwi

25 Om suhuo' nod Tuhan i Musa 26 do popolombus diti ponuhuan dot id tulun do Liwi do poingkaa, “Soira' nopo do karamit kou di porsombahan do sompihopod do patahakon di tulun dot Israil dot id dokoyu, tu' iri no i patahakon do Tuhan dot id dokoyu do dokoyu'd songonuon, om mositi' nod patahakon kawagu dokoyu dot id Tuhan o sompihopod do mantad diri do maan do porsombahan di potobilangon. 27 Om iti nopo porsombahan di potobilangon diti nga' paagalon nopo di porsombahan do gandum do wagu, om i porsombahan do waig dot anggur do wagu do mantad id songulun o gompongumo. 28 Om iyo nodti o ralan dokoyu do papatahak do porsombahan di potobilangon do maan do don Tuhan, do mantad id toinsanan di porsombahan do sompihopod dit aramit dokoyu do mantad id tulun dot Israil. Om iti nopo porsombahan do pinotobilang diti do maan do dong Kinorohingan nga' mositi' nod patahakon dokoyu di Harun. 29 Patahakon no it osonong kopio do mantad id koinsanai dit aramit dokoyu. 30 Om katahak pondo dokoyu it osonong kopio'ddi, om koino-ino kou nogindo do manganu di noolu', do miagal di gompongumo tu' iri it oolu' di patahakon dau ot onuon dau. 31 Om iri nopo i noolu', om koino-ino i' dokoyu om i sompiiyon dokoyu dot akanon do hinonggo nopo o pangakanan. Tu' iri no o ponokogadsi' dokoyu do maganu-anu do hiri'd Kiim ku. 32 A' kou i' kasala' do mangakan piya'ddi, ondung nakatahak dokoyu it osonong kopio dot id Tuhan. Nga' kada' nogi' kopio dokoyu sosomuo' i porsombahan do tulun dot Israil dit ongolidang diri do ponosomu' nopo om i sangkaakan-akan nopo do mantad id porsombahan diri om a' po nakatahak dot id doho' it osonong kopio. Ondung tolibambanan dokoyu o toturan diti, om hukuman kou nod kapatayon,” ka dau.

Pongintaban 19

Tauu do Mantad id Kinasaraban di Sapi' dot Aragang

1 Om suhuo' nod Tuhan i Musa om i Harun 2 do papatahak diti piro-piro o toturan dot id tulun dot Israil: Manganu nod songinan o sapi' dot aragang dit aiso' o bohiton do tinan om it a' po noumbalan do nasakayan do ginandar. 3 Patahakon no o sapi'ddi dot id di Iliasar, it Imam diri. Om mositi' nod posoliwanon di kokiiman i sapi' om sumbolion nogindo dot id toguang di Iliasar. 4 Om mositi' nod manu i Iliasar dot ongokooro' do raha' di sapi' om powowoson nogindo dot inturu' do potimbaba' ponong id Kiim ku. 5 Om mositi' nod insanan do monorob i sapi'ddi, do potonggoyon i kulit, om i tonsi, om i raha', om i suang do tian, do hiri'd toguang dit imam. 6 Om mongoi nogindo panganu it imam dot ongokooro' di kayu sedar, om songguas o sakot do roitan do hisop, om sampatod o tali dot aragang, om posuboon ngai' nogindo iri do hiri'd tapui. 7 Om owonsoi ngai' pondo iri om pupuan nogi' dit imam o pakayan dau om tuntugan do waig o tinan dau. Om koino-ino nogindo iyau do sumuang di kokiiman; nga' gisom nopod sosodopon om poinghompit po iyau do tulun di sosomu'. 8 Om i tulun di minonorob di sapi' nga' mositi' no do pupuan dau i pakayan dau om tuntugan do waig o tinan dau; om iyau nga' sosomu' po kasai' do gisom do sosodopon. 9 Om ngoyon nogindo do songulun dit olidang dot id pagantangan do tugama' timungo' i tauu di sapi'ddi om poilihon dot id kinoiyonon dit olidang dot id pagantangan do tugama' do hiri'd soliwan di kokiiman. Om hiri no o poilihan di tauu om oongoi i' di tulun dot Israil do tontok do posodia'd waig do maan do pomolidang. Om iri nopo wonsoyon di natantu' mantad diri nga' maan do pongidu'd dusa. 10 Om iri nopo tulun di minonimung do tauu di sapi'ddi nga' mositi' nod pupuan dau o pakayan dau, nga' tulun po kasai' iyau'd sosomu' do gisom dot orikot o sosodopon. Om iyo no kasai'ddi o toturan do gisom dot alaid, do tonudon di tulun dot Israil om i tulun do bansa'd suwai di poingiyon dot id rolot diyolo'.

I Koigit do Rata'

11 Isai nopo o koigit do rata' om sosomu' no do solinaid do turu' o tadau. 12 Om tontok nopo di tadau'd kotolu om tadau'd koturu' om mositi' nod papaharo o tulun diri do kopomolidangan do tinan dot i waig do pomolidang kasai' o pakayon; om olidang nogindo iyau dot id pagatangan do tugama'. Nga' ondung a' iyau momolidang do tinan dau di tadau'd kotolu om tadau'd koturu', om ososomu' kasai' po iyau. 13 Isai nopo o koigit do rata' om a' no momolidang do tinan, om tulun no iyau do sosomu', tu' a' po iyau notuntugan di waig do pomolidang. Om koponosomu' iyau di Kiim do Tuhan, om iri no ot a' dau kohompit- hompit di tulun do songonuon do Kinorohingan. 14 Ondung haro o tulun dot apatai dot id suang do kiim, om isai nopo o tulun dot id suang di kiim do tontok di minatai i tulun diri, ko' i kosuang di kiim diri, om ososomu' no do solinaid do turu' o tadau. 15 Om koinsanai di kakanan om poriuk dit aiso' o sompon do hiri'd suang di kiim diri nga' kohompit nod sosomu'. 16 Ondung haro o tulun do koigit do rata'd tulun di pinatai'd tulun ko' i kinapatai-patayo' toomod do hilo'd dumo, ko' ondung haro o tulun do koigit do lobong ko' tulang do tulun do napatai, om sosomu' no o tulun diri do solinaid do turu' o tadau. 17 Om pomolidang nopod tinan do mantad id kososomu'ddi om mositi' nod mongoi panganu dot ongokuuri' di tauu di sapi' dot aragang di sinorob do maan do pangampun do dusa om posuangon nogindo i tauu'ddi dot id iso' o poriuk, om tunguhon nogindo iri do waig di wagu kaanu. 18 Pasal nopo di hal do koiso'ddi, iri no tu' tontok nopo do haro o tulun dot apatai dot id suang do kiim, om mositi' nod mongoi panganu o songulun dit olidang dot id pagantangan do tugama' do songguas o sakot di roitan do hisop, om poobugon iri do hiri'd waig, om wawasan nogindo i kiim om koinsanai dit id suang di kiim, om iri nogi' i tulun di hiri'd kiim. Om pasal no di hal do koduwo, iri no tu' soira' nopo do haro o tulun do koigit do rata', ko' lobong ko' tulang do tulun do napatai, om mositi' nod i tulun dit olidang dot id pagantangan do tugama' o momowowos di tulun di sosomu'ddi. 19 Om tontok nopondo do tadau'd kotolu om tadau'd koturu', om mositi' nod wawasan do tulun dit olidang dot id pagantangan do tugama' i tulun di maso pod sosomu'ddi. Om koturu' pondod tadau om opongo nogi' o kopomolidangan do tulun diri. Om pupuan nogindo di tulun o pakayan dau om modsu', om olidang nondo iyau dot otonob o tadau. 20 Isai nopo it ososomu' nga' a' indo papaharo do kopomolidangan do tinan, om sosomu' kasai' no iyau tu' a' po notuntugan di waig do pomolidang. Om koponosomu' po iyau di Kiim do Tuhan, om a' no iyau kohompit do tulun di songonuon do Kinorohingan. 21 Om mositi' nod tonudon kasai' dokoyu o toturan diti do gisom dot alaid. Om iri tulun di popowowos di waig do pomolidang diri nga' mositi' nod pupuan dau o pakayan dau. Om isai nopo o koigit do waig diri om sosomu' no do gisom do sosodopon. 22 Om nunu nopo o konunu-nunuan dot oigitan do tulun di sosomu' om kotonggoi nod sosomu', om i tulun do suwai di kakabai di tulun diri nga' sosomu' no do gisom do sosodopon.

Pongintaban 20

I Nongosiliu do Hilo'd Kadis

1 Tontok di tulan do koiso' om korikot ngai' no i tulun dot Israil do hilo'd tana' do Sin om powonsoyo' no diyolo' o kiim diyolo' do hilo'd Kadis. Om hilo' no o kinapatayon di Miriam om hilo' o pinamalabangan dau.2|60|HK59C| Tana' do kowotuan|20.1 2 Om hiri nopod kinoiyonon di pinawansayan diyolo'd kiim nga' aiso' o waig. Om rikot ngai' no i tulun do minongoi gurumung diyo Musa di Harun do 3 mikuwo'd sontogod-togod om mimboros do poingkaa, “Songkuro daa o kosonongo' do napatai iyahai do hilo'd dotimbabaan dilo Kiim do Tuhan do nokotonggoi di tobpinai dahai dit iso-iso' o bansa'. 4 Nokuro tu' nangatan nu iyahai do minongoi'd hiti'd tana' do kowotuan? Mongoi no daa patai do hiti do mogitonggoi-tonggoi diti tayam-tayam dahai. 5 Nunu kopio o kinoposoliwanan nu dahai do mantad hilo'd Masir dot id kinoiyonon dot oinggorit o pinangangatan, om it a' i' milo do tanaman do nunu- nunu? Aiso' i' o gandum do hiti, om aiso' o tua' dot ara toi ko' tua' dot anggur, om tua' do delima. Om waig piya dot inumon nga' aiso' i'!” ka diyolo'. 6 Om insodu' noddi i Musa om i Harun do mantad id tulun dot ogumu'ddi om ongoi no iyolo' ingkakat do hiri'd wawayaan di Kiim do Tuhan. Om tuku' no iyolo' do gisom do nokotungub do hiri'd tana' o rabas diyolo', om intalang noddi i tulinau do koropohon do Tuhan di kosorong tomod dot id diyolo'. 7 Om boros kad Tuhan dot id di Musa, 8 “Ngoyo' i sukud di hilo'd dotimbabaan di Kaban do Tumpongo om timungon nogindo dokoyu di Harun i tulun dot ogumu'. Om hiri nondod dotoguangan ngai' diyolo' do moro-boros ko dot id tontolob dilo hoodi', om sumoliwan nondo o waig do mantad id tontolob dilo' do tinumon di tulun dot ogumu' om tinumon di tayam-tayam diyolo',” ka. 9 Om ngoyo' no di Musa i sukud diri, do tuminanud di pinonuhuan do Tuhan. 10 Om timungo' no diyo Musa di Harun o koinsanai di tulun do hiri'd dotimbabaan di tontolob. Om boros kad Musa, “Pokinongou ngai' kou no, iyokoyu it obinsaap! Minog no tuu kopio do posoliwan iyahai'd waig do mantad id tontolob diti do maan dokoyu?” ka. 11 Om pobilido' nod i Musa i sukud om pobobogo' no dau di tontolob dot induwo pobobogo'. Om luyung nopo o waig dot agayo tomod om ologod do mantad hiri'd tontolob, gisom do nongkoinum ngai' i tulun om i tayam-tayam diyolo'. 12 Nga' togodo' nod Tuhan i Musa om i Harun. Om boros kad Tuhan, “A' kou minonongkuyaan kopio doho' do popoimbulai do sinundu ku dit olidang dot id toguang diti tulun dot Israil, om iri no ot a' dokoyu koina-inaan do momoyo' diyolo' do sumuang di pomogunan di pinabatos ku dot id diyolo',” ka dau. 13 Om iyo noddi o nosiliu do hilo'd Moriba. Tu' hilo' no i tulun dot Israil do minimboros do tumogod do Tuhan, om hilo' no o Tuhan do pinopointalang do kolidango' dau dot id bansa'ddi.

A' Pinatalib di Raja' dot Idom i Tulun dot Israil

14 Om ponuhu' no i Musa do piro-piro o tulun do minongoi solowot di raja' dot Idom do tontok di hilo' iyolo'd Kadis. Om boros ka diyolo', “Iti no o habar do mantad id payat dot Israil, i kowori-worisan nu. Om nokoilo ko i' di kosusaan do nokoontok dahai. 15 Iri nopo komolohingan dahai om minongoi do hilo'd Masir om hilo-hilo' noddi iyolo' do minomogun-mogun do solinaid do piro-piro o toun. Nga' ninggorit di tulun do Masir i komolohingan dahai om iyahai nogi' nga' ninggorit i' diyolo', 16 om pomolohou noddi iyahai'd Tuhan do mokitulung dau. Om norongou i' dau i lolohou dahai om porikot noddi iyau dot iso' o moloikat. Om iri no i moloikat diri o minomoyo' dahai do suminoliwan do mantad hilo'd pomogunan do Masir. Om dinondo nopodti om hilo' no iyahai'd Kadis, it iso' o kampung do hilo'd wolit diti pomogunan nu. 17 Om pokionuon daa dahai do pawayaon nu iyahai diti pomogunan nu. Om a' i' iyahai di tayam-tayam dahai sumala' do ralan ko' mongoi pod hiri'd koumaan ko' hiri'd kokobunan dot anggur nu. Om a' iyahai mongoi inum do hiri'd torobong nu. Mamanau nopo iyahai do sumusui di ralan magayo do gisom id kosoliwan iyahai diti pomogunan nu,” ka diyolo'. 18 Nga' boros ka di tulun dot Idom do suminimbar, “A' i' dahai uhang do maya' kou diti pomogunan dahai. Om ondung osonsog kou, om sumoliwan no iyahai do mongoi panangod dokoyu,” ka diyolo'. 19 Om boros ka di tulun dot Israil, “A' i' iyahai tumongkiad di ralan magayo. Om ondung mongoi iyahai inum do waig dokoyu, ko' mongoi inum i tayam-tayam dahai, om bayaran i' dahai. Maya' no toomod iyahai do hiti,” ka diyolo'. 20 Om boros ka kawagu di tulun dot Idom, “A' i' dahai uhang!” ka diyolo'. Om soliwan noddi iyolo' do miwoyo' do soudor dit ongokoris do mongoi panangod di tulun dot Israil. 21 Om poguliai noddi di tulun dot Israil do mongoi pogihum do ralan do suwai tu' mada' i' i tulun dot Idom do pawaya' di tulun dot Israil di pomogunan diyolo'.

Napatai i Harun

22 Om oinsanan nopoddi i tulun dot Israil do tuminongkiad do mantad hilo'd Kadis om korikot no iyolo' do hilo'd Nuluhon do Hor, 23 it id wolit dot Idom. Om hilo' no do minoro-boros o Tuhan dot id di Musa om id di Harun do poingkaa, 24 “A' i' kosuang i Harun di pomogunan di pinabatos ku dot id tulun dot Israil; matai no iyau tu' tuminolibamban kou i' di pinonuhuan ku di hilo'd Moriba. 25 Angatan no i Harun om i Iliasar, i tanak dau do tumakad di Nuluhon do Hor. 26 Om hilo' nopondo om iduwon no i pakayan do dong imam di poimpakai di Harun, om papakayan no iri di Iliasar. Om hilo' no o kapatayon di Harun,” ka dau. 27 Om wonsoyo' nod Musa i pinonuhuan do Tuhan diri. Om takad no i Musa om i Harun om i Iliasar di Nuluhon do Hor dot antang-antangan do koinsanai di tulun. 28 Om iduwo' noddi di Musa i pakayan di Harun di dong imam om papakayai no dau di Iliasar. Om kapatai noddi i Harun do hiri'd timpak di nuluhon diri, om ruhuk no kawagu iyo Musa di Iliasar. 29 Om korongou ngai' noddi i tulun do napatai no i Harun, om pogihadai no diyolo' i Harun do solinaid do tolu nohopod o tadau.

Pongintaban 21

Kamanangan do Suminaap di Tulun do Kanaan

1 Arad nopo nga' ngaran dot iso' o bandar di ponong id salatan do pomogunan do Kanaan. Om soira' di norongou di raja' do bandar diri do maya' i tulun dot Israil di ralan do kawaya' do hilo'd Atarim, om ngoyo' no dau iyolo' songodo' om natanggayan dau'ddi o piro-piro di tulun dot Israil. 2 Om pamatos noddi i tulun dot Israil do mikuwo'd suminumpa'; om boros ka diyolo' dot id Tuhan, “Ondung onuan nu iyahai do kamanangan do sumaap dilo tulun, om patahakon no dahai iyolo' dot id diya' dot aiso' o paantakan do kapatahakan, om potonggoyon ngai' nogi' dahai do patahak ilo bandar diyolo', om patayon nopo kopio dahai iyolo',” ka diyolo'. 3 Om pokinongoho' id Tuhan i pinokianu di tulun dot Israil diri, om tinulung iddi dau iyolo' do mangala' di tulun do Kanaan. Om patayo' no di tulun dot Israil i tulun do Kanaan om raago' ngai' diyolo' i kabandaran diyolo'. Om pungaranai no diyolo' o kinoiyonon diri do Horma.

I Tulanut di Tambaga' do Winonsoi

4 Om tongkiad noddi i tulun dot Israil di Nuluhon do Hor, om susui no iyolo' di ralan do poingkaa do hilo'd Suok dot Akaba, om kaalai i' iyolo' di pomogunan dot Idom. Nga' di nopo di hiri no iyolo'd tanga'd ralan om a' no di tulun dot ogumu' milo'd pususon o ginawo diyolo' do tumogod, 5 gisom do sontogod-togod po iyolo' do Kinorohingan om i Musa. Boros ka diyolo', “Nokuro tu' pinosoliwan nu iyahai do mantad hilo'd Masir do ngoyon no patayo' do hiti'd tana' do kowotuan; hiti nopo om aiso' o takano' om aiso' o waig. Apaasan noddi iyahai diti taakanon dot aiso' o maro-maro!” ka. 6 Om porikatai noddi do Tuhan do tulanut di kapatai o tindukon i tulun dot ogumu'. Om ogumu' tomod diri o tulun dot Israil do notinduk di tulanut. 7 Om ongoi noddi i tulun dot Israil solowot di Musa om boro-boros nod poingkaa, “Nokowonsoi no iyahai'd dusa tu' mogod-togod iyahai'd Tuhan om mogod-togod iyahai diya'. Nga' pokionuo' no kopio'd Tuhan do dinondo do popoggidu' diti tulanut do mantad id dahai,” ka diyolo'. Om sambayangai noddi di Musa i tulun dot ogumu'ddi. 8 Om suhuo' noddi do Tuhan i Musa do momonsoi dot iso' o tulanut do tambaga' o wonsoyon, om poriliton i' iri dot id iso' o kayu di poodsukon. Om pointikid-tikid do tulun dit otinduk do tulanut om montong nopondo di tulanut do tambaga'ddi om olingasan i'! 9 Om pomonsoi no i Musa do tulanut, do tambaga' o winonsoi, om podokoto' no dot id iso' o kayu di pinoodsuk. Om isai nopo o tulun dit otinduk do tulanut om olingasan no do kokito di tulanut do tambaga'ddi.

Mantad Hilo'd Nuluhon do Hor om Gisom do Hilo'd Rantai do Muab

10 Om tilombus nopo i tulun dot Israil do minamanau om powonsoyo' noddi diyolo' o kiim diyolo' do hilo'd bandar dot Obot. 11 Om di nopoddi nokotongkiad iyolo' do kinoiyonon diri, om powonsoyo' no diyolo' o kiim diyolo' do hilo'd kinaraagan dot Abarim, i hilo'd tana' do kowotuan, i ponong id koulayon do mantad id pomogunan do Muab. 12 Om powonsoyo' no diyolo' o kiim diyolo' do hilo'd Rantai do Sirid. 13 Om undaliu po kawagu iyolo' do mantad hilo' om powonsoyo' no diyolo' o kiim diyolo' do ponong id utara di Bawang dot Arnon, i tana' do kowotuan do kogoyoo' nopo om korikot do hilo'd pomogunan do tulun dot Amori. (Iri nopo Bawang dot Arnon om ponokowolit di pomogunan do tulun do Muab om pomogunan di tulun dot Amori.) 14 Om iri no o kinoponulisan do hiri'd “Buuk do Pisangadan di don Tuhan” do poingkaa, “...Kampung Wahib, it id watas do Supa, om i rantai do hilo', om i Bawang dot Arnon, 15 om i songintidong-tidong do hiri'd rantai, i korikot do hilo'd kampung Ar o kogoyoo', om poingkaa do hilo'd wolit di pomogunan do tulun do Muab,” ka. 16 Om mantad nod hilo' om pakayaai po diyolo' do hilo'd Biir, i kinoiyonon di roitan dot Ogumu' o Torobong. Om hilo' no o Tuhan do minoro-boros di Musa do poingkaa, “Suhuo' ilo tulun do tumimung, om onuan ku i' iyolo'd waig,” ka. 17 Om tontok noddi do minodsinding i tulun dot Israil do sinding diti, “Oi torobong dot ogumu', posimpulako' no o waig nu, om romiton i' dahai do mikuwo'd sinding --- 18 I torobong do nukad di tangaanak do raja' om i piro-piro boyoon do bansa', nukad di sukud do pomorinta' om nukad di sukud diyolo',” ka. Om mantad nod hilo'd tana' do kowotuan om pakayaai po diyolo' do hilo'd Matana, 19 om pakayaai po kawagu diyolo' do hilo'd Nahaliol, om pakayaai nogiddi diyolo' do hilo'd Bamot; 20 om pakayaai noddi diyolo' do hilo'd rantai di pomogunan do tulun do Muab, it id dosibaan di Nuluhon do Pisga, i potimbaba' ponong id tana' do kowotuan.

Kamanangan do Suminaap di Raja' Sihon om i Raja' Og

21 Om ponuhu' no i tulun dot Israil do piro-piro o tulun do minongoi solowot di Sihon i raja' do tulun dot Amori, do mongoi popoboros do poingkaa, 22 “Pokionuon daa dahai do pologoson nu iyahai do maya' do pomogunan nu. Om a' i' iyahai di tayam-tayam dahai sumala' di ralan do mongoi do hiri'd koumaan ko' hiri'd kokobunan dot anggur nu, om a' i' iyahai minum do hiri'd torobong nu. Sumusui nopo iyahai di ralan magayo do gisom do kosoliwan iyahai di pomogunan nu,” ka diyolo'. 23 Nga' a' i' di Sihon uhang do maya' i tulun dot Israil di pomogunan dau. Om timungo' no dau i soudor dau om ongoi no do hilo'd Yahas, i hilo'd tana' do kowotuan, om songodo' no diyolo' i tulun dot Israil do hilo'. 24 Nga' id suang nopod pinisangadan diri om ogumu' tomod o soudor dot Amori do napatai di tulun dot Israil. Om kaanu noddi di tulun dot Israil i pomogunan do pisangod, do mintonod di Bawang dot Arnon om gisom do korikot do hilo'd Bawang do Yabok, i ponong id utara, it id wolit do pomogunan do tulun dot Amon, tu' iri nopo pomogunan dot Amon om intirungan i' do tulun dit ongokoris kopio. 25 Om iyo noddi o kinowoyo-woyoo' di tulun dot Israil do minagahau do koinsanai di bandar do tulun dot Amori, om kohompit no o Hisbon om koinsanai di bandar dot ongokooro' di hiri'd posorili', om undorong noddi iyolo' do hilo'. 26 Hisbon nopo nga' bandar dot agayo di Raja' Sihon. Om nokoumbal i' iyau do suminangod di raja' do Muab di gulu po om naahau dau i pomogunan di raja' do Muab do gisom do hilo'd Bawang dot Arnon. 27 Om iri no o kopodsindingan di tulun dit ongoilo do modsinding do poingkaa, “Rikot no do hilo'd Hisbon, i bandar di Raja' Sihon! Siontong iyahai do bandar diri dot owonsoi om otonduli' kawagu. 28 Di nopo di gulu po om haro o nosiliu dot id bandar do Hisbon dot iyo pod tapui i soudor di Sihon do minamanau; om rinaag diyolo' i bandar dot Ar di hilo'd Muab om tinolon diyolo' i konulu-nuluan do poingompus dit Arnon do ponong id sarayo. 29 Oi tulun do Muab, obungou kou no! Iyokoyu i tumuku' dot id tingolig do Kamos, angapatai kou no! Pinologos kou di ponokokinorohingan dokoyu dot osiliu'd tulun dit ouyung do pisangod, nangatanggayan di raja' dot Amori i kongoonduan dokoyu. 30 Nga' baino' nopoddi om nangapatai no i sinakagon diyolo', do poinsusui nopo di ralan do mantad hilo'd Hisbon om korikot do hilo'd Dibon, do mantad pod hilo'd Nasim om gisom do hilo'd Nopa, it id somok do Modiba,” ka. 31 Om undorong no i tulun dot Israil do hiri'd pomogunan di tulun dot Amori. 32 Om ponuhu' nogiddi i Musa do piro-piro tulun do mongoi pogihum do ralan dit osonong do mongoi panangod di bandar do Yasir. Om kaahau no di tulun dot Israil o bandar diri om iri nogi' i kabandaran dit ongokooro' do hiri'd posorili', om uyungo' no diyolo' i tulun dot Amori di poingiyon do hilo'. 33 Om pahamadai nogiddi di tulun dot Israil, om susui no iyolo' di ralan do poingkaa do hilo'd Basan. Om pamanau no i Raja' Og do mantad hilo'd Basan do miwoyo' di soudor dau do mongoi panangod di tulun dot Israil do hilo'd bandar dot Idroi. 34 Om boros kad Tuhan dot id di Musa, “Kada' kooris dau. Tu' onuan ku i' iya' do kamanangan. Om aala' nu i' iyau, om koinsanai di rayat dau om i pomogunan dau. Om wonsoyon no dot id dau o miagal di winonsoi nu dot id di Raja' Sihon, i minomorinta' do hilo'd Hisbon,” ka dau. 35 Om patayo' no di tulun dot Israil i Og, om i tangaanak dau om koinsanai di rayat dau; om aiso' no o pinoolu-olu' diyolo'. Om iyono' noddi diyolo' o pomogunan diri.

Pongintaban 22

Minokitulung i Biliam di Raja' do Muab

1 Om mombus-lombus po kasai' i tulun dot Israil do mamanau om powonsoyo' no diyolo' o kiim diyolo' do hiri'd rantai do Muab, i ponong id koulayon do mantad di Bawang do Yordan, it id hapak do bandar do Yorikou. 2 Om tontok di nokorongou i raja' do Muab, i roitan dot i Balak i tanak di Sipor, do winonsoi di tulun dot Israil dot id tulun dot Amori, om i kogumuo' di tulun dot Israil, 3 om ooris tomod diri iyau om ongooris ngai' i rayat dau. 4 Om boro-boros noddi i tulun do Muab dot id piro-piro boyoon do tulun do Midian do poingkaa, “A' no alaid om araag ngai' nodti tulun dot ogumu' o nunu nopo i hiti'd posorili' toko'; do miagal no di sapi' do mangaii' di butur,” ka. Om ponuhu' noddi i Raja' Balak 5 do tulun do mongoi pomolohou di Biliam i tanak di Bior, i poingiyon do hilo'd bandar do Pitor, it id toning di Bawang dot Iprat, it id watas dot Amau. Om poingkaa o boros di pinobilin di Balak do poboroson di tulun di sinuhu' dau dot id di Biliam, “Nokoilo ko no, do haro moti' o tiso' o bansa'd tulun do nokorikot do mantad hilo'd Masir, om iri nopo tulun diri do baino' nga' nokotongkop no do pomogunan dahai om motiponolod no do pomogunan dahai. 6 Iyolo' nopo om ogumu' i' ko' iyahai. Iyo nopoddi, om uhupan no iyahai do momopol diyolo', om ulan toi' daa om aala' dahai iyolo', om ouyung indo iyolo' do mantad id pomogunan dahai. Tu' oilaan ku i' dot isai nopo o tulun do barakatan nu nga' kaanu no kopio'd barakat. Om iyo nogiddi tu' isai nopo i papalan nu nga' apapalan no kopio o tulun diri,” ka. 7 Om pamanau no i piro-piro boyoon do tulun do Muab om i boyoon do tulun do Midian om minigit iyolo' do pamagadsi' di Biliam om momopol indo iyau di tulun dot Israil. Om pinoboros nogi' diyolo' dot id di Biliam i pinobilin di Raja' Balak. 8 Nga' boros ka di Biliam do suminimbar, “Modop kou po dot insan o tuong do hiti. Suab pondo om poboroson ku nogi' dot id dokoyu ondung nunu ka do poboroson do Tuhan dot id doho',” ka dau. Om undorong ngai' noddi i boyoon do tulun do Muab diri do hiri'd di Biliam. 9 Om rikot noddi o Kinorohingan dot id di Biliam om ponguhot no dau do poingkaa, “Isai ngai' iti tulun do minundorong do hiti'd diya' oi Biliam?” ka. 10 Om boros ka di Biliam do suminimbar, “Iti ngai' nopo tulun diti om mantad hilo'd pomogunan do Muab. Om sinuhu' iyolo' di Raja' Balak do mongoi popoilo doho' 11 do haro o tiso' o bansa'd tulun do nokorikot do mantad hilo'd Masir, om bansa' nopoddi nga' nokotongkop no do pomogunan diyolo'. Om suhuon oku'ddi di Raja' Balak do momopol do bansa'ddi do mogobi' dau. Om aala' indo dau om ouyung dau iyolo' do mantad id pomogunan dau,” ka dau. 12 Nga' boros kad Kinorohingan dot id di Biliam, “Kada' nogi' kopio ongoi tanud dilo tulun, om kada' papalai i tulun dot Israil, tu' iyolo' nopo moti' om nabarakatan ku no,” ka dau. 13 Om kosuabon noddi, om ongoi no boro-boros i Biliam di tulun di sinuhu' di Raja' Balak, boros ka dau, “Uli' kou nogi', tu' mada' i' o Tuhan do mongoi oku tanud dokoyu,” ka dau. 14 Om guli' noddi iyolo' dot id di Balak om posunudo' no diyolo' dot id dau dot a' i' nakasaga' i Biliam do tuminanud diyolo'. 15 Om ponuhu' po kawagu i Balak do piro-piro o boyoon dot ogumu-gumu' om angasawa-sawat o pangkat ko' it id gulu. 16 Om ongoi noddi iyolo' do hiri'd di Biliam do pinoposunud diti boros di Balak do poingkaa, “Pokionuon ku no daa kopio do mongoi ko do hiti'd doho'! 17 Gumuon ku i' o pamagadsi' ku diya', om nunu nopo o ponuhuan nu doho' nga' wonsoyon ku i'. Rumikot no kopio om papalan i' doho' i bansa'd tulun diri,” ka. 18 Nga' boros kad i Biliam do suminimbar, “Mulong piya do patahakon di Balak doho' o koinsanai do pirok om tamas di hilo'd walai dau, nga' a' oku i' milo do tumolibamban do boros do Tuhan i Kinorohingan di tukuon ku, do mulong piya do hal dit ongokooro'. 19 Nga' odop kou pod hiti do miagal di winonsoi di tulun di sinuhu' dit id gulu, om oilaan ku i' ondung haro o suwai do poboroson do Tuhan dot id doho',” ka dau. 20 Om rikot noddi o Kinorohingan dot id di Biliam do totuong diri, om boro-boros nod poingkaa, “Ondung mongoi pangangat diya' o nokorikatan diti tulun do hiti, om mogopi-opi' nogi' om tumanud i' diyolo'. Nga' iri po tu' nunu nopo i ponuhuan ku diya' om iri no o wonsoyon nu,” ka dau. 21 Om kosuabon noddi om pakalai nod i Biliam i kaladai dau, om ongoi no iyau tanud di boyoon do tulun do Muab.

I Biliam om i Kaladai Dau

22 Om otogod diri o Tuhan tu' minongoi i' i Biliam tanud diyolo'. Om tontok di poinsakai no i Biliam di kaladai dau, do minitanud di duwo o susuhuon dau, om ongoi no ingkakat o moloikat do Tuhan do hiri'd tanga' di ralan do mangantob di Biliam. 23 Om kokito nopo di kaladai i moloikat do poingkakat do hiri do kiinigit do gayang, om lisang no i kaladai om pakayaai no do hiri'd koumaan. Om bobogo' no di Biliam i kaladai dau, om gayato' no kawagu dau do tumorunung di ralan. 24 Nga' ongoi no kawagu i moloikat do Tuhan ingkakat do hiri'd ralan dit okikip, i hiri'd piolitan do duwo o kabun dot anggur, i nolig do watu o miampaping. 25 Om kokito nopo di kaladai i moloikat do Tuhan, nga' impit nopo i kaladai do hiri'd tolig do watu, om kokisas noddi di watu o gakod di Biliam. Om bobogo' noddi kawagu di Biliam i kaladai dau. 26 Om sogulu po kawagu i moloikat do Tuhan, om ongoi no ingkakat do hiri'd ralan dit okikip no kopio, it aiso' noo o wayaan do magalai dot id wanan ko' id gibang. 27 Tontok nopoddi, om kokito nopo di kaladai i moloikat do Tuhan, nga' gupu' nopo i kaladai. Nga' a' noddi di Biliam nopusus o ginawo dau dot otogod tu' bobogo' nopo dau di sukud dau i kaladai dau. 28 Om pomiloo' noddi do Tuhan do moro-boros i kaladai, om boros kaddi di kaladai dot id di Biliam, “Nunu toi kopio o nowonsoi ku dot id diya'? Tu' intolu ko noddi pomobog doho'?” ka. 29 Om boros kad i Biliam do suminimbar, “Kababagan ku nopo diya' nga' i ponguntotogod nu doho'! Ondung kidangol oku daa om napatai ku no daa iya',” ka dau. 30 Nga' boros ka di kaladai do suminimbar, “Okon toi ko' iyoho' kasai' i' i sasakayon nu do mantad di gulu po? Om nokoumbal oku no toi do minongiyo diya'dti di gulu, oi Tuan?” ka. Om boros kad i Biliam, “Amu',” ka dau. 31 Om pokitono' noddi do Tuhan i Biliam di moloikat do poingkakat do hiri, i kiinigit do gayang, om tungub nopoddi i Biliam do hiri'd tana' do tuminuku'! 32 Om boro-boros noddi i moloikat do poingkaa, “Nokuro tu' intolu nu nopo bobogo' ilo kaladai nu? Kinorikatan ku nopo om mongoi pangantob diya' tu' a' i' daa apatut do mongoi ko. 33 Nga' osonong po tu' nokokito doho' ilo kaladai nu, om intolu nopoddi lisang ilo kaladai nu. Ondung a' daa nokolisang ilo kaladai, om napatai ku no daa iya', om ilo' pondo daa kaladai nu o posion ku,” ka dau. 34 Om boros kaddi di Biliam, “Nokowonsoi oku nod dusa. A' ku i' oilaan do poingkakat ko do hilo'd tanga'd ralan do mangantob doho'. Nga' baino' nopo, om ondung kasala' oku do mongoi dot osorou nu, om muli' oku no,” ka dau. 35 Nga' boros ka di moloikat do Tuhan, “Ongoi nopo katuu tanud dilo tulun, nga' iri no i ponuhuan ku diya' do poboros ot apatut nu'd poboroson,” ka dau. Om tilombus nogiddi i Biliam do mamanau do tuminanud di tulun di Balak.

Rinuba' di Raja' Balak i Biliam

36 Om korongou nopoddi di Balak do rumikot i Biliam, nga' ongoi no iyau ruba' dau do hilo'd Ar, i bandar do hilo'd tisan do Bawang dot Arnon, i hilo'd wolit do pomogunan do Muab. 37 Om boro-boros noddi i Balak dot id di Biliam do poingkaa, “Nokuro tu' a' ko ruminikot dit insan tiya' i' lohowo'? Ondos nu daa om a' oku kasaap do mamagadsi' diya'?” ka dau. 38 Om boros kad i Biliam do suminimbar, “Nga' nokorikot oku i' maddi koii? Nga' baino' nopo, om aiso' no o kuasa' ku do popoboros do nunu nopo, tu' iri no i ponuhuan do Kinorohingan doho' o milo ku'd poboroson,” ka dau. 39 Om tanud noddi di Balak i Biliam do minongoi do hilo'd bandar do Husot. 40 Om hilo' no o pinonumbolian di Balak do sapi' om dumba' dau. Om patahako' nod i Balak o wookon di tonsi di sinumbali'ddi dot id di Biliam om id piro-piro boyoon di manud-tanud dau.

I Koinsan i'do Pinoboros di Biliam it Osiliu dot id Dabantalan

41 Tadau noddi kawagu om angatai no di Balak i Biliam do minongoi do hiri'd nulu-nulu do Bamot Baal. Om hiri nopoddi nga' okito no di Biliam o wookon di tulun dot Israil.

Pongintaban 23

1 Om boros kad i Biliam dot id di Balak, “Pamansayai oku do turu' o pananaraban do porsombahan do hiti, om onuan oku do turu' o sapi' do tontoluhan om turu' o dumba' do tontoluhan,” ka dau. 2 Om wonsoyo' no di Balak i pinoboros di Biliam diri. Om tanud noddi iyolo' do pinapatahak do maan do porsombahan dot iso' o sapi' om iso' o dumba' do tontoluhan goduwo, do hiri'd pointikid-tikid di pananaraban do porsombahan. 3 Om boro-boros noddi i Biliam dot id di Balak do poingkaa, “Ingkakat nondo do hiti'd toning diti porsombahan nu di sinorob. Om daamot nopodti om mongoi oku pogontong ondung sumolowot doho' o Tuhan ko' amu' po. Om sunudan ku indo iya' do koinsanai di poboroson dau doho',” ka dau. Om iso-iso'ddi i Biliam do tuminakad dot iso' o nulu-nulu. 4 Om ongoi noddi o Tuhan solowot di Biliam. Om boro-boros no i Biliam do Tuhan, “Oi Tuhan, nokopomonsoi oku nod turu' o pananaraban do porsombahan, om nakapatahak oku nod maan do porsombahan do songinan o sapi' om songinan o dumba' do tontoluhan goduwo dot id pointikid-tikid di pananaraban do porsombahan,” ka dau. 5 Om sunudai nod Tuhan i Biliam ondung nunu o poboroson dau, om sinuhu' dau iyau do mongoi poboros dot id di Balak di boros dau'ddi. 6 Om guli' noddi i Biliam, nga' hiri po kasai' i Balak om i piro-piro boyoon do tulun do Muab do songingkakat do hiri'd toning di porsombahan di sinorob. 7 Om poboroso' noddi di Biliam it ongosiliu dot id dabantalan do poingkaa, “Nangatan oku di Balak i raja' do Muab do mantad hilo'd Aram, i hilo'd konuluhanan do ponong id koulayon. Boros ka dau, ‘Rikot no, om tulungon oku i' do moro-boros, patayon no doho' ilo tulun dot Israil!’ ka. 8 Poingkuro oku daa do momopol dit a' papalan do Kinorohingan? Ko' mimboros do momohukum dit a' hukuman do Tuhan? 9 Okito ku iyolo' do mantad hiti'd timpak do nuluhon dit angakawas; piantangan ku iyolo' do mantad hiti'd timpak do konulu-nuluan. Iyolo' no o bansa' di poimpori-pori do momogun-mogun; oilaan i' diyolo' do nabarakatan iyolo' do lobi ko' i bansa'd suwai. 10 Sinakagon nopo dot Israil om miagal pod pupuk kogumu', a' no ointob o kogumuo'. Maha' daa om aayi' o surupu ku do miagal dilo tulun di songonuon do Kinorohingan. It otorodok dot id Kinorohingan dot id suang do nunu nopo; matai oku nondo dot id suang do kosimbayanan,” ka dau. 11 Om boros kaddi di Balak dot id di Biliam, “Nunu iti winonsoi nu dot id doho'? Kinapangangatan ku nopo diya'd hiti om mongoi pomopol dilo pisangod ku. Nga' minamarakat ko nogi' diyolo',” ka. 12 Om boros ka di Biliam do suminimbar, “Iri no ponuhuan do Tuhan doho' o milo ku'd poboroson,” ka dau.

Koinduwo do Pinoboros di Biliam it Osiliu dot id Dabantalan

13 Om boro-boros noddi i Balak di Biliam do poingkaa, “Kaino mitanud do mongoi'd hilo'd kinoiyonon do suwai; om hilo' nopondo om iri no wookon di tulun dot Israil ot okito nu. Om papalan nondo iyolo'd hilo',” ka dau. 14 Om angatai no di Balak i Biliam do minongoi do hilo'd kobuturan do Sopim om ongoi no do hiri'd timpak di Nuluhon do Pisga. Om hilo' nga' minomonsoi i' iyau do turu' o pananaraban do porsombahan om pinapatahak do maan do porsombahan do songinan o sapi' do tontoluhan om songinan o dumba' do tontoluhan do hiri'd pointikid-tikid di pananaraban do porsombahan. 15 Om boros ka di Biliam dot id di Balak, “Undorong pod hiti, dot id toning diti porsombahan nu di sinorob, do daamot ku do mongoi solowot do Tuhan do hilo',” ka dau. 16 Om ongoi no o Tuhan solowot di Biliam om sunudai no dau iyau ondung nunu it apatut do poboroson dau. Om suhuo' nogiddi do Tuhan iyau do gumuli' dot id di Balak do mongoi polombus di pinoboros dau. 17 Om poguliai no di Biliam, om kabantalai no dau do poingkakat kasai' i' i Balak do hiri'd toning di porsombahan dau di sinorob, om hiri ngai' i' i boyoon do tulun do Muab. Om uhot no i Balak ondung nunu i pinoboros do Tuhan. 18 Om poboroso' noddi di Biliam iti tongosiliu dot id dabantalan do poingkaa, “Oi Balak i tanak di Sipor, kaino no, tu' haro o poboroson ku, om pokinongohon no. 19 Kinorohingan nopo om a' i' miagal do tulun tu' mongudut, om it oruuhai om kosimban no o ginawo. Nunu nopo o pobotoson dau, om wonsoyon no dau; moro-boros nopo iyau, om atantu' nod owonsoi iri. 20 Nosuhu' oku nod mamarakat, om soira' nopod mamarakat o Kinorohingan, om a' ku no milo do pakaisoon iri. 21 Aiso' ot araat dot okito ku dot id di Yakub; aiso' ot osusa' dot okito ku dot id Israil. Moyo-woyo' i' diyolo' o Tuhan i Kinorohingan diyolo'; popimboroson no diyolo' dot iyau o raja' diyolo'. 22 Pinosoliwan iyolo'd Kinorohingan do mantad hilo'd Masir; miagal po iyau'd sapi' di lalang do mogobi' diyolo'd sumaap. 23 Aiso' no o limu', om aiso' o toilaan do dong rogon, do milo'd pakayon do sumaap di tulun dot Israil. Om popimboroson nopondod tulun do pasal di tulun dot Israil om poingkaa, ‘Antangai pogi' ilo winonsoi'd Kinorohingan dot Israil di koimayaan kopio!’ ka. 24 Iri nopo tulun dot Israil om miagal do singa dit okoris: A' po iyau mundorong dot a' po atabpaan om a' po oinum o raha' di pisangod dau,” ka dau. 25 Om boros kaddi di Balak dot id di Biliam, “Ula' no. Ondung a' ko momopol dilo tulun dot Israil, om kada' po daa'ndo kopio iyolo' barakatai!” ka dau. 26 Nga' boros ka di Biliam do suminimbar, “A' ku toi diya' nokoboros no do mositi' nod wonsoyon ku i ponuhuan do Tuhan doho'?” ka dau.

Kointolu do Pinoboros di Biliam it Osiliu dot id Dabantalan

27 Om boros ka di Balak, “Kaino mongoi'd hilo'd kinoiyonon do suwai. Tu' nunu koilo-ilo nga' pologoson ko nopod Kinorohingan do momopol di tulun dot Israil do mogobi' doho' do hilo',” ka dau. 28 Om angatai no dau i Biliam do minongoi do hiri'd timpak di Nuluhon do Pior, i koimpa' di tana' do kowotuan. 29 Om boros ka di Biliam dot id di Balak, “Momonsoi nod turu' o pananaraban do porsombahan do hiti, om mongigit nod turu' o tinan do sapi' do tontoluhan om turu' o tinan do dumba' do tontoluhan,” ka dau. 30 Om wonsoyo' nod i Balak i pinonuhuan di Biliam. Om papatahak no iyau do songinan o sapi' do tontoluhan om songinan o dumba' do tontoluhan dot id pointikid-tikid di pananaraban do porsombahan.

Pongintaban 24

1 Om oilaan noddi di Biliam do monuhu' o Kinorohingan dau do mamarakat di tulun dot Israil. Om a' noddi iyau minongoi pogontong do maan do pogintutunan do miagal di winonsoi dau dit id gulu ko' iri. Om ontong no i Biliam do ponong hiri'd tana' do kowotuan 2 om kokito no dau i tulun dot Israil do mogitumpuk-tumpuk o pinopowonsoi diyolo' di kiim diyolo' do sorompori-pori do tumanud di payat diyolo'. Om porintao' noddi do Rusod do Kinorohingan i Biliam, 3 om poboroso' no dau it ongosiliu dot id dabantalan do poingkaa, “Iti no o bilin di Biliam i tanak di Bior, moro-boros o tulun di kokito kopio 4 I korongou do poboroson do Kinorohingan, poinsonsod oku do montong dit okito ku dot id soroyoon i pinointalang do mantad id Kinorohingan dit Agayo o Sinundu. 5 Olumis i kokiiman nu oi Yakub, om i kinoiyonon nu oi Israil! 6 Miagal do rulud di koguasan do kayu kurma miagal do kabun dit id toning do bawang, miagal do kayu gaharu di tinanom do Tuhan, miagal do kayu sedar dit id toning do waig. 7 Osima' indo iyolo'd rasam om a' ooiyan do waig o tumo di pananaman diyolo'd totonomon. Abantug indo ko' i Agag i raja' diyolo', om karalad o pomorintaan dau do hilo'd sodu'. 8 Pinosoliwan iyolo'd Kinorohingan do mantad hilo'd Masir, miagal po iyau'd sapi' di lalang do sumaap do mogobi' diyolo'. Tolon-tolonon nopo diyolo' i pisangod diyolo', om mumukon o tulang, om pintipuon i pana'. 9 Miagal pod singa dit okoris o bansa'ddi; isai po daa o kobulun do mamagangau dau do tontok di koodop iyau? Isai nopo o mamarakat dot Israil om abarakatan no, isai nopo o momopol dot Israil om ousung no,” ka dau. 10 Om otogod tomod diri i Balak mikuwo'd pinoonggom dau o tonggom dau. Om boro-boros no iyau dot id di Biliam do poingkaa, “Linohou ku iya' do mongoi pomopol do pisangod ku nga' binarakatan nu nogi' iyolo' dot ongointotolu. 11 Nga' pamanau nogi' kopio'd muli' do dinondo! Nakabatos oku no daa do mamagadsi' diya', nga' mada' i' o Tuhan do rumamit ko di gadsi',” ka dau. 12 Om boros kad Biliam do suminimbar, “A' oku toi nokoboros no di tulun di sinuhu' nu do minongoi solowot doho' 13 do patahakon nu piya daa doho' o koinsanai'd pirok om tamas di hilo'd walai nu, nga' a' oku i' milo do tumolibamban di ponuhuan do Tuhan doho', om a' oku milo do mingwonsoi do nunu nopo i doho'd korohian? Iri no ponuhuan do Tuhan doho'd poboros o milo ku'd poboroson,” ka dau.

I Tohuri nod Pinoboros di Biliam dot Osiliu dot id Dabantalan

14 Om boros kad Biliam dot id di Balak, “Muli' oku no do hilo'd bansa' ku do dinondo. Nga' a' oku po kapamanau om poinsanon mantad tiya' po ondung nunu o wonsoyon di tulun dot Israil dot id bansa' nu do koimbagu,” ka dau. 15 Om poboroso' no di Biliam it ongosiliu dot id dabantalan do poingkaa, “Iti no o bilin di Biliam i tanak di Bior; iti no o boros do tulun di kokito kopio. 16 I korongou do boros do Kinorohingan om kaanu do toilaan do mantad id dau it Asawat Kopio. Poinsonsod oku do montong dot id soroyoon i pinointalang do mantad id Kinorohingan dit Agayo o Sinundu. 17 Okito ku ot id dabantalan, it id dosunsudan do bansa'd Israil. Haro o raja' do miagal do rombituon dit agayo, it atalang o tulinau, do mimbulai do mantad id bansa'ddi. Miagal po iyau do rombituon dit agayo o tulinau do mantad id Israil. Bobogon nondo dau i boyoon do Muab om alaon ngai' dau i tulun do Sit. 18 Alaon ngai' nondo dau i pisangod dau do hilo'd Idom om asanganu dau i tana' diyolo', om kamanang i' kasai' ot Israil. 19 Ulakan di tulun dot Israil i pisangod diyolo' om iso' po nga' aiso' no ot oolu',” ka dau. 20 Om kokito no di Biliam i tulun dot Amalik dot id suang di pinointalang diri, om poboroso' no dau it ongosiliu dot id dabantalan do poingkaa, “Id pialatan nopo do koinsanai'd bansa' om Amalik no it okoris kopio do hiti'd pomogunan. Nga' haro i' o kopupuson diti bansa', om poimpunso no do gisom dot alaid,” ka. 21 Om kokito po dau i sinakagon di Kain dot id suang di pinointalang diri. Om poboroso' no dau it ongosiliu dot id dabantalan do poingkaa, “Osimbayan no kopio ino kinoiyonon dokoyu, miagal pod rumun di hiri'd sakai do pampang dit asawat. 22 Nga' iyokoyu nopo, i tulun do Kini om apatai indo do tanggayan kou di tulun dot Asur,” ka. 23 Om poboroso' pod i Biliam it ongosiliu dot id dabantalan do poingkaa, “Isai ilo tulun do tumimung do hilo'd utara? 24 Rumikot i mononolod do mantad hilo'd Siprus; alaon nondo diyolo' ot Asur om Ibir, nga' iyolo' piya'ndo nga' apatai i',” ka dau. 25 Om pogopi-opi' noddi i Biliam om pamanau nod minuli' do hiri'd walai dau, om i Balak nogi' nga' minamanau no.

Pongintaban 25

Hilo'd Nuluhon do Pior i Tulun dot Israil

1 Om tontok di hilo'd Rantai do Sitim i tulun dot Israil do pinopowonsoi do kiim diyolo', om timpuun no i kokusayan diyolo' do minongoi pagampahu' di tongoondu' do Muab di hilo'. 2 Om angatai no iyolo' di tongoondu' do Muab di mongoi rapou di poginakanan do papatahak do porsombahan, do pomusou di tingolig do Muab. Om pangakan no i tulun dot Israil do taakanon diri om tuku' no iyolo' dot id Baal, i tingolig 3 do hilo'd Nuluhon do Pior. Om kotogod no o Tuhan diyolo', 4 om boro-boros no iyau dot id di Musa do poingkaa, “Timungon ngai' no o koinsanai di boyoon do tulun dot Israil om patayon no iyolo' di dongadau om owonsoi i' iti ponuhuan ku, om a' oku indo tumogod diti tulun,” ka dau. 5 Om boros kaddi di Musa dot id koinsanai di boyoon do tulun dot Israil, “Mositi' nod sompori-pori kou nopod mamatai do koinsanai'd tulun dit id payat dokoyu di tumuku' dot id Baal di hilo'd Pior,” ka dau. 6 Om tontok di maso di Musa om i tulun dot Israil do mihad do hiri'd wawayaan di Kiim do Tuhan, om kokito no diyolo' o songulun o bansa'd Israil do minangangat do tondu' do Midian do suminuang di kiim dau. 7 Om soira' di nokito di Pinihas iri om ingkakat no iyau do tuminongkiad do mantad hiri'd pitimungan diri. I Pinihas nopoddi nga' tanak di Iliasar, i manangaki di Harun. Om ongoi no iyau dot iso' o tandus, 8 om susuhut no iyau di kusai om i tondu'ddi do suminuang di kiim. Om potokono' no dau i tandus do gisom do nolopuson goduwo i tulun diri. Om kotingkod noddi i toruol do mogkoroliu do hilo'd Israil. 9 Nga' daamot nopoddi om napatai no o 24,000 o tulun. 10 Om boros kaddi do Tuhan dot id di Musa, 11 “I Pinihas nopo i tanak di Iliasar, i manangaki di Harun it Imam, om a' no nokotoron do kokito'd tulun do tumuku' do kinorohingan do suwai ko' iyoho'. Om a' oku nondo tumogod diti tulun dot Israil, om tumingkod oku no do mamatai diyolo'. 12 Om sunudan no i Pinihas do momonsoi oku dot iso' o pibatasan dot id dau, i poinggirot do gisom dot alaid. 13 Potontuon no iyau om i sinakagon dau do sumiliu dot imam do gisom dot alaid tu' iyau nopo om a' no nokotoron do kokito do tulun do tumuku' dot id kinorohingan di suwai ko' iyoho'. Om iri no o kopongompunan ku do dusa do tulun dot Israil!” ka dau. 14 Ngaran nopo di tulun dot Israil di pinatai do mitonggoi di tondu' do Midian diri nga' i Simri i tanak di Salu, i boyoon dot iso' o sompiiyon dot id suang do payat di Simion. 15 Ngaran no di tondu' om i Kosbi i tanak di Sur; om i Sur nopo, i tapa' dau'ddi nga' boyoon dot iso' o pinuruan do sompiiyon do tulun do Midian. 16 Om poboroso' nod Tuhan iti ponuhuan dot id di Musa do poingkaa, 17 “Ngoyon no songodo' i tulun do Midian, 18 tu' kapamatayan nopo om i kararaat diyolo' di minagakal dokoyu do tontok di hilo' kou id Pior, om i Kosbi, i tanak do songulun o boyoon dot iso' o sompiiyon do tulun do Midian, i pinatai do tontok di haro o toruol di mogkoroliu di hilo'd Pior o kapamatayan dau,” ka dau.

Pongintaban 26

Pinongintaban di Koinduwo

1 Om katalib poddi i toruol do mogkoroliu, om boro-boros no o Tuhan dot id di Musa om id di Iliasar, i tanak di Harun it Imam do poingkaa, 2 “Papaharo kou nod pongintaban do koinsanai'dti tulun dot Israil do tumanud di sompiiyon diyolo'. Om mositi' nod tulison ngai' o ngaran di tongokusai di kiumur do duwo nohopod o toun ko' it id sawat ko' iri, i tongokusai di milo nod sumiliu do soudor,” ka. 3-4 Om wonsoyo' no diyo Musa di Iliasar i pinonuhuan diri. Om lohowo' ngai' no diyolo' o koinsanai di tongokusai di kiumur dot irad diri, om timungo' no do hilo'd rantai do Muab, it id soborong di Bawang do Yordan, it id somok do bandar do Yorikou. Om iti no ngai' o tulun dot Israil di suminoliwan do mantad hilo'd Masir: 5 Id suang nopo do payat di Rubin (I Rubin nopo om tanak di Yakub dit id dotuo) om: i pinuruan do sompiiyon di Hinok, om i Palu, 6 om i Hisron, om i Karmi. 7 Kogumuon nopo do tongokusai dot id suang do piro-piro o pinuruan do sompiiyon diti om 43,730 o tulun. 8 Sinakagon no di Palu, om i Iliab, 9 om tangaanak no di Iliab om i Nomuil, i Datan om i Abiram. Om iyo Datan no di Abiram i pinili' di tulun dot ogumu'. Om iyolo' no i suminaap di Musa om i Harun, om i suminokodung di tulun di tuminanud di Kora do suminaap do Tuhan. 10 Om pipitas no i tana' do gisom dot agayo o nopipitas om kotolon noddi iyolo' di tana' om kapatai no do mogitonggoi-tonggoi di Kora om i tulun di tuminanud dau do daamot di tapui do minimpatai do 250 o tongokusai. Om iri no o nosiliu do popoinsan di tulun dot Israil. 11 Nga' a' i' nokotonggoi do napatai i tangaanak di Kora. 12 Id suang nod payat di Simion om: i pinuruan do sompiiyon di Nomuil, om i Yamin, om i Yakin, 13 om i Sira om i Saul. 14 Kogumuon nopod tongokusai dot id suang do piro-piro o pinuruan do sompiiyon diti om 22,200 o tulun. 15 Id suang nod payat di Gad om: i pinuruan do sompiiyon di Sipon, om i Hagi, om i Suni, 16 om i Osni, om i Iri, 17 om i Arod, om i Arili. 18 Kogumuon nopod tongokusai dot id suang do piro-piro o pinuruan do sompiiyon diti om 40,500 o tulun. 19-21 Id suang nod payat di Yohuda om: i pinuruan do sompiiyon di Sila, om i Piris, om i Sira, om i Hisron om i Hamul. (Iri nopo duwo di tanak di Yohuda do kusai, iyo Or di Onan, om hilo' pod Kanaan o kinapatayon.) 22 Kogumuon nopod tongokusai dot id piro-piro o pinuruan do sompiiyon diti om 76,500 o tulun. 23 Id suang nod payat di Isakar om: i pinuruan do sompiiyon di Tola, om i Pua, 24 om i Yasub om i Simron. 25 Kogumuon nopod tongokusai dot id suang do piro-piro o pinuruan do sompiiyon diti om 64,300 o tulun. 26 Id suang nopod payat di Sibulon om: i pinuruan do sompiiyon di Sirid, om i Ilon om i Yaliil. 27 Kogumuon nopod tongokusai dot id piro-piro o pinuruan do sompiiyon diti om 60,500 o tulun. 28 Mantad no dot id di Yusup, i tapa' do duwo o kusai om: i payat di Manasi om i payat di Ipraim. 29 Id suang nopod payat di Manasi om: i Makir i tanak di Manasi. Iyau no i tapa' di Giliad; om iti ngai' no i pinuruan do sompiiyon do suminolusuk di Giliad: 30 i pinuruan do sompiiyon di Isir, om i Hilik, 31 om i Asriol, om i Sikim, 32 om i Somida om i Hipir. 33 I Silapihad nopo i tanak di Hipir om aiso' i' o tanak do kusai; tongoondu' ngai' nopo o tanak dau. Ngaran nopo diyolo' om i Mala, i Noa, i Hogla, i Milka om i Tirsa. 34 Kogumuon nopod tongokusai dot id suang do piro-piro o pinuruan do sompiiyon diti om 52,700 o tulun. 35 Id suang nod payat di Ipraim om: i pinuruan do sompiiyon di Sutila, om i Bikir om i Tahan. 36 Iri nopo pinuruan do sompiiyon di Iran om sinakagon i' di Sutila. 37 Kogumuon nopod tongokusai dot id suang do piro-piro o pinuruan do sompiiyon diti om 32,500 o tulun. Om iri ngai' no i pinuruan do sompiiyon di sinakagon di Yusup. 38 Om id suang nopod payat di Binyamin om: i pinuruan do sompiiyon di Bila, om i Asbil, om i Ahiram, 39 om i Sopupam om i Hupam. 40 Iri nopo pinuruan do sompiiyon di Arod om i Naaman om sinakagon i' di Bila. 41 Kogumuon nopod tongokusai dot id suang do piro-piro o pinuruan do sompiiyon diti om 45,600 o tulun. 42 Om id suang nod payat di Dan om: i pinuruan do sompiiyon di Suham. 43 Kogumuon nopod tongokusai dot id suang do pinuruan do sompiiyon diti om 64,400 o tulun. 44 Id suang nopod payat di Asor om: i pinuruan do sompiiyon di Yimna, om i Yiswi om i Boria. 45 Iri nopo pinuruan do sompiiyon di Hibir om i Malkiol om sinakagon i' di Boria. 46 I Asor nopo om kianak dot iso' o tondu' dot i Sira o ngaran. 47 Kogumuon nopod tongokusai dot id suang do piro-piro o pinuruan do sompiiyon diti om 53,400 o tulun. 48 Id suang nopod payat di Naptali om: i pinuruan do sompiiyon di Yasiil, om i Guni, 49 om i Yisir om i Silom. 50 Kogumuon nopod tongokusai dot id suang do piro-piro o pinuruan do sompiiyon diti om 45,400 o tulun. 51 Kogumuon nopod tongokusai do tulun dot Israil dot oinsanan om 601,730 o tulun. 52 Om boros kad Tuhan dot id di Musa, 53 “Pogiongkib-ongkibon no i tana' dot id pogialatan di payat dot Israil do tumanud do kogumuo' do pointikid-tikid di payat. 54-56 Ralan nopod mangangkib di tana' om maan undio'. Iri nopo payat dot ogumu' om agayo no o pangangkib, om iri no payat dot okuri' om okoro' no o pangangkib,” ka dau. 57 Iri nopo payat di Liwi nga' kosuang ngai' no i pinuruan do sompiiyon di Girson, om i Kohat om i Morari. 58 Om id suang nopod sinakagon diyolo' nga' kohompit ngai' no i pinuruan do sompiiyon dit ongokooro', iri no i pinuruan do sompiiyon di Libni, om i Hibron, om i Mali, om i Musi om i Kora. I Kohat nopo nga' tapa' di Amram, 59 i minanansawo do tanak do tondu' do songulun i mantad id payat di Liwi. Ngaran nopo di tanak do tondu'ddi nga' i Yokibid; om nokosusuon nopo dau nga' hilo'd Masir. Om paganak no iyolo' di Amram do duwo o tanak do kusai, iyo Harun di Musa, om iso' o tanak diyolo'd tondu', dot i Miriam o ngaran. 60 I Harun nopo om kianak dot apat o kusai: i Nadab, om i Abihu, om i Iliasar om i Itamar. 61 Iyo Nadab nopo di Abihu om napatai do tontok di pinapatahak iyolo' do tapui dit okon ko' korohian do Kinorohingan. 62 Kogumuon nopo do tongokusai dot id suang do payat di Liwi di sombulan nogi' ko' asawat ko' iri o tumur om 23,000 o tulun. Iyolo' nopo om pinosuwai-suwai o pinotulisan do ngaran do mantad di tulun dot Israil do suwai; tu' a' i' iyolo' nongkiban do tana' di maan diyolo'd songonuon do hilo'd Israil. 63 Om iyo noddi o pinopotulis do ngaran di piro-piro o pinuruan do sompiiyon dot Israil do tinulis diyo Musa di Iliasar di pinapaharo iyolo' do pinongintaban do tulun do hilo'd rantai do Muab, it id soborong di Bawang do Yordan, it id somok no do bandar do Yorikou. 64 Om id pialatan nopo di tulun do tinulis diyo Musa di Harun o ngaran di hilo'd tana' do kowotuan do Sinai om iso' po nga' aiso' no o poimpasi. 65 Nokoboros mantad nod Tuhan dot angapatai ngai' iyolo' do hilo'd tana' do kowotuan. Om nangapatai ngai' no kopio iyolo'; nga' i Kalib poo i tanak di Yopuni, om i Yosua i tanak di Nun ot a' napatai.

Pongintaban 27

I Tangaanak di Silapihad do Tongoondu'

1 I Silapihad nopo om kianak do limo o tondu', i Mala, i Noa, i Hogla, i Milka, om i Tirsa. I Silapihad nopo om tanak di Hipir, om i Hipir no om tanak di Giliad, om i Giliad no om tanak di Makir, om i Makir no om tanak di Manasi, om i Manasi no om tanak di Yusup. 2 Om ongoi no i limo tanak di Silapihad do tondu'ddi solowot di Musa om i Iliasar, it Imam diri, om i piro-piro boyoon om koinsanai di tulun do pointimung do hiri'd toning di Kiim do Tuhan. Om boro-boros no iyolo' do poingkaa, 3 “Napatai no i tapa' dahai do hilo'd tana' do kowotuan om aiso' i' o tanak dau'd kusai. Iyau nopo om okon i' ko' id pialatan di tulun di suminokodung di Kora, tu' suminaap do Tuhan; iri i dau'd dusa o nakapatai-patai dau. 4 Nga' nokuro tuu tu' iri no it aiso' o tanak dau'd kusai o katanus-tanus do ngaran do tapa' dahai do mantad hiti'd bansa' dot Israil? Onuwai no iyahai do tana' do tungkusan dot id pogialatan di koobpinayan do tapa' dahai,” ka. 5 Om posunudo' nod Musa i boros diyolo'ddi dot id Tuhan, 6 om boros kad Tuhan dot id di Musa, 7 “Koontok i' ilo pokionuon di tangaanak di Silapihad do tongoondu'; onuan nopo iyolo'd tana' do tungkusan dot id pogialatan dilo koobpinayan di tapa' diyolo'. Om pologoson nopo dot otungkusan diyolo' it apatut dot aanu di tapa' diyolo'. 8 Om sunudan no ilo tulun dot Israil dot ondung haro o kusai dot apatai om aiso' i' o tanak dau'd kusai om iri no i tanak dau'd tondu' o tumungkus do nunu nopo i dau'd songonuon. 9 Ondung aiso' o tanak dau'd tondu', om iri no i koobpinayan dau'd tongokusai o kotungkus diri. 10 Ondung aiso' o tobpinai dau'd kusai om iri no tobpinai di tapa' dau do kusai o kotungkus diri. 11 Ondung aiso' o tobpinai dau'd kusai om aiso' o tamanon dau, om iri no i waris dau dit id somok po o kopiobpinayan o kotungkus diri om kaanu'ddi dot osiliu do dau'd songonuon. Om mositi' nod tonudon di tulun dot Israil iti do silihon dot oturan dit ogirot, do miagal di pinonuhuan ku, iyoho' i Tuhan, dot id diya',” ka dau.

Nopili' i Yosua do Sumowoli di Musa

12 Om boros kad Tuhan dot id di Musa, “Ongoi takad dilo Nuluhon dot Abarim om mimpa' i' di tana' do patahakon ku dot id tulun dot Israil. 13 Om kokito ko pondo'ddi, om matai ko no do miagal di Harun, i tobpinai nu, 14 tu' suminurilog goduwo kou i' di pinonuhuan ku di hilo' kou id tana' do kowotuan do Sin. Tontok di sontogod-togod ngai' doho' i tulun di hilo'd Moriba, om minada' ko i' do pinopointalang di sinundu ku dit olidang dot id diyolo',” ka dau. (Moriba nopo nga' ngaran di tudan do waig do hilo'd Kadis, i hilo'd tana' do kowotuan do Sin.) 15 Om sambayang no i Musa do poingkaa, 16 “Oi Tuhan i Kinorohingan, i tadon do koposion do koinsanai di songimpasi, pokionuon ku no kopio do momili' ko'd tulun di milo do momoyo' diti tulun dot ogumu', 17 om i milo do momoyo' diyolo' do mongoi sangod, om a' i' iyolo' osiliu'd tulun do miagal di baanan do dumba' dit aiso' o gompomogompi',” ka. 18 Om boros kaddi do Tuhan dot id di Musa, “Lohowon no i Yosua i tanak di Nun, i tulun dit oilo kopio'ddi, om pakabayon no o longon nu dot id tulu dau. 19 Poingkokoton no iyau dot id toguang di Iliasar it Imam diri om id toguang do toinsanan di tulun dot Israil, om poboroson nondo dot id toguang ngai' diyolo' dot iyau no i sumowoli diya'. 20 Onuan no iyau do wookon di kuasa' nu om mumboyo' ngai' i' dau i tulun dot Israil. 21 Om mokituduk indo iyau di Iliasar it Imam diri, tu' koilo do korohian ku do mamakai dit Urim om i Tumim. Om iyo noddi o ralan di Iliasar do monuduk di Yosua om koinsanai di tulun dot Israil dit apatut diyolo'd wonsoyon,” ka dau. 22 Om wonsoyo' nod Musa o miagal di pinonuhuan do Tuhan dot id dau. Om poingkakato' no dau i Yosua do hiri'd toguang di Iliasar, it Imam diri, om id toguang do koinsanai di tulun. 23 Om pakabayo' nod Musa o longon dau dot id tulu di Yosua, om poboroso' no dau dot id tulun dot ogumu' dot i Yosua no o sumowoli dau; tu' iyo noddi o pinonuhuan do Tuhan.

Pongintaban 28

I Porsombahan di Natantu' do Patahakon Kasai'

1 Om suhuo' nod Tuhan i Musa 2 do monuhu' di tulun dot Israil do papatahak dot id Kinorohingan do tontok di maso di natantu' mantad diti piro-piro o porsombahan do taakanon di kasanangan do Tuhan. 3 Om iti ngai' no i porsombahan do taakanon do patahakon dot id Tuhan: Patahakon nopod maan do porsombahan di sorobon do pointikid do tadau, om duwo o tanak do dumba' do tontoluhan di sopisontoun nogi' o tumur, om it aiso' o bohiton do tinan. 4 Iri nopo tiso' di tanak do dumba'ddi om patahakon do dongkosuabon, om iri no tiso' om patahakon do dongsosodopon. 5 Om tanggayan goduwo nopo i tanak do dumba'ddi do porsombahan do gandum do songkilogram o tapung, om ralatan do songlito o tumau do saitun dit osonong kopio. 6 Om iri no i porsombahan do patahakon do pointikid do tadau dit insanan do monorob, om it id gulu i' kopio do pinatahak do hilo'd Nuluhon do Sinai do maan do porsombahan do taakanon. Om iri no i tawau do porsombahan diri o kasanangan do Tuhan. 7 Om iri nopo porsombahan do waig dot anggur do potonggoyon di tanak do dumba' di koiso'ddi, om mositi' nod potuntugon do hiri'd pananaraban do porsombahan o songlito di waig dot anggur diri. 8 Om dongsosodopon nondo om patahakon no i tanak do dumba' di koduwo'ddi dot iyo iddi porsombahan do dongkosuabon o papatahak. Om potonggoyon i porsombahan do waig dot anggur. Om iri nga' porsombahan i' do taakanon, om iri no tawau do porsombahan diri o kasanangan do Tuhan.

I Porsombahan do Tadau'd Sabat

9 Tontok nopod tadau'd Sabat om mositi' nod papatahak do duwo o tanak do dumba' do tontoluhan di sopisontoun nogi' o tumur, it aiso' goduwo nopo o bohiton do tinan, om papatahak do duwo kilogram do tapung di rinalatan do tumau do saitun do maan do porsombahan do gandum, om porsombahan do waig dot anggur. 10 Om mositi' nod patahakon iti porsombahan di sorobon do pointikid do tadau'd Sabat, do poruhangon di porsombahan do monikid tadau om i porsombahan do waig dot anggur di potonggoyon kasai' di porsombahan.

Porsombahan do Tadau'd Koiso' do Pointikid do Tulan

11 Papatahak no dot id Tuhan do porsombahan di sorobon do pointikid do koimpuunon do tulan: patahakon nopo om duwo o tinan do sapi' do tontoluhan dit okoro' po, om songinan o dumba' do tontoluhan, om turu' o tanak do dumba' do tontoluhan di sorontoun-toun ngai' nogi' o tumur, om it aiso' ngai' nopo o bohiton do tinan. 12 Om maan nopo do porsombahan do gandum om i tapung di rinalatan do tumau do saitun: Potonggoyon nopod pointikid-tikid do songinan o sapi' om tolu o kilogram do tapung; 13 om potonggoyon nod pointikid-tikid do songinan o tanak do dumba' om songkilogram o tapung. Iti nopo porsombahan do sinorob diti om porsombahan do taakanon dot id Tuhan. Om iri no tawau diti porsombahan o kasanangan do Tuhan. 14 Iri nopo porsombahan do waig dot anggur dit apatut do patahakon do potonggoyon di porsombahan do sinorob, om duwo o lito do waig dot anggur do potonggoyon di dumba' do tontoluhan, om songlito o potonggoyon do pointikid-tikid do songinan o tanak do dumba'. Om iri no o toturan do maan do porsombahan di sorobon do tontok do tadau'd koiso' do pointikid-tikid do koimpuunon do tulan do poingompus do toun. 15 Om poruhangon nopo di porsombahan do sorobon do pointikid do tadau do mitonggoi di porsombahan do waig dot anggur, om songinan o kambing do tontoluhan do maan do porsombahan do pangampun do dusa.

Porsombahan do Tadau'd Agayo do Roti dit A' Kipangambang

16 Iri nopo Tadau'd Agayo do Paska om mositi' nod ramayon do tontok di tadau do kohopod om apat do tulan di koiso' do maan do pomusou'd Tuhan. 17 Om tadau nopondod kohopod om limo om tumimpuun no o karamayan do don tugama' di ramayon do solinaid do turu' o tadau. Om solinaid nopoddi om roti no dit a' rinalatan do pangambang o koino-ino do kanon. 18 Tontok nopo di tadau do koiso' do karamayan diri, om tumimung kou nod sumambayang, om kada' kou no karaja' do nunu nopo. 19 Om papatahak kou no dot id Tuhan do porsombahan di sorobon do maan do porsombahan do taakanon. Patahakon nopo om duwo o sapi' do tontoluhan dit okoro' po, om songinan o dumba' do tontoluhan, om turu' o tanak do dumba' do tontoluhan di sorontoun-toun ngai' nogi' o tumur, om it aiso' ngai' nopo o bohiton do tinan. 20 Papatahak nod porsombahan do gandum di natantu' mantad om i ralatan do tumau'd saitun. Patahakon nopo om tolu o kilogram do tapung do potonggoyon do pointikid-tikid do songinan o sapi', om duwo kilogram do potonggoyon di dumba' do tontoluhan, 21 om songkilogram o potonggoyon do pointikid-tikid dot iso' di tanak do dumba'. 22 Om patahak nogi' do songinan o kambing do tontoluhan do maan do porsombahan do pangampun do dusa, om owonsoi i' i wonsoyon di natantu' mantad do pongidu' do dusa di tulun dot ogumu'. 23 Om patahakon ngai' no iri do poruhangon di porsombahan do sorobon di natantu' mantad do patahakon do monikid kosuabon. 24 Om iyo nogiddi o papatahak do porsombahan do taakanon dot id Tuhan do solinaid do turu' o tadau. Om iri no tawau di porsombahan diri o kasanangan do Tuhan. Om patahakon ngai' no iri do poruhangon di porsombahan di sorobon om i porsombahan do waig dot anggur di patahakon do pointikid do tadau. 25 Tumimung kou nod sumambayang di tadau'd koturu' om kada' kou no karaja' do nunu nopo.

Porsombahan do Tadau'd Agayo do Dongmongomot

26 Tontok nopo di tadau do koiso' di Tadau dot Agayo do Dongmongomot, tontok di papatahak kou dot id Tuhan do wookon di gandum dit id gulu koomot, om mositi' nod tumimung kou do sumambayang, om kada' kou no karaja' do nunu nopo. 27 Papatahak kou nod porsombahan di sorobon tu' iri no tawau do porsombahan diri o kasanangan do Tuhan. Patahakon nopo om duwo o tinan do sapi' do tontoluhan dit okoro' po, om songinan o dumba' do tontoluhan, om turu' o tanak do dumba' do tontoluhan di sorontoun-toun nogi' o tumur, om it aiso' ngai' nopo o bohiton do tinan. 28 Om papatahak nod porsombahan do gandum di natantu' mantad, i tapung di rinalatan do tumau do saitun. Patahakon nopo om tolu o kilogram do tapung do potonggoyon do pointikid-tikid do songinan o sapi' do tontoluhan, om duwo kilogram do tapung do potonggoyon di dumba' do tontoluhan. 29 Om songkilogram o tapung do potonggoyon do pointikid-tikid do songinan o tanak do dumba'. 30 Om papatahak nogi' do songinan o kambing do tontoluhan do maan do porsombahan do pangampun do dusa, om owonsoi i' i wonsoyon di natantu' mantad do pongidu'd dusa di tulun dot ogumu'. 31 Patahakon ngai' no iri, om patahakon nogi' i porsombahan do waig dot anggur do poruhangon di porsombahan do sorobon om i porsombahan do gandum di patahakon do pointikid do tadau.

Pongintaban 29

Porsombahan do Tontok do Toun do Wagu

1 Tontok nopo di tadau do koiso' di tulan do koturu', om tumimung kou nod sumambayang, om kada' kou karaja' do nunu nopo. Om mositi' nod pounion ngai' i torumpit do tontok do tadau'ddi. 2 Om papatahak kou no dot id Tuhan do porsombahan di sorobon, tu' iri no tawau do porsombahan diri o kasanangan do Tuhan. Patahakon nopo om songinan o sapi' do tontoluhan dit okoro' po, om turu' o tinan do tanak do dumba' di tontoluhan do sorontoun-toun nogi' o tumur, om it aiso' ngai' nopo o bohiton do tinan. 3 Om patahak kou nod porsombahan do gandum di natantu' mantad, i rinalatan do tumau do saitun. Patahakon nopo om tolu o kilogram do tapung do potonggoyon di sapi', om duwo o kilogram do tapung do potonggoyon di dumba' do tontoluhan, 4 om songkilogram o tapung do potonggoyon do pointikid-tikid do songinan o dumba'. 5 Om patahak nogi' do songinan o kambing do tontoluhan do maan do pangampun do dusa, om owonsoi i' i natantu' mantad do wonsoyon do pongidu'd dusa di tulun dot ogumu'. 6 Om patahakon ngai' no iri do poruhangon di porsombahan do sorobon di natantu' mantad do patahakon do monikid tadau do tontok di tadau'd koiso' do pointikid do koimpuunon do tulan, do mitonggoi di porsombahan do gandum, om i porsombahan do waig dot anggur. Om iri no tawau do porsombahan do taakanon diri o kasanangan do Tuhan.

Porsombahan do Tadau do Kopongompunan do Dusa

7 Tumimung kou nod sumambayang do tontok di tadau'd kohopod do tontok di tulan do koturu'. Om tontok nopo do tadau'ddi, om mositi' nod puasa kou om a' koino-ino do kumaraja' do nunu nopo o karaja'. 8 Om patahak kou no dot id Tuhan do porsombahan di sorobon. Patahakon nopo om songinan o sapi' do tontoluhan dit okoro' po, om songinan o dumba' do tontoluhan, om turu' o tinan do tanak do dumba' di tontoluhan di sorontoun-toun nogi' o tumur, om it aiso' ngai' nopo o bohiton do tinan. Om iri no tawau do porsombahan diri o kasanangan do Tuhan. 9 Patahak nod porsombahan do gandum di natantu' mantad, i tapung di rinalatan do tumau do saitun: Patahakon nopo om tolu o kilogram do tapung do potonggoyon di sapi', om duwo o kilogram do tapung do potonggoyon di dumba' do tontoluhan, 10 om songkilogram o tapung do potonggoyon do pointikid-tikid do songinan o tanak do dumba'. 11 Om patahak nogi' do songinan o kambing do tontoluhan do maan do porsombahan do pangampun do dusa. Iti nopo nga' poruhangon di kambing do patahakon do tontok di momonsoi di natantu' mantad do wonsoyon do maan do pangampun do dusa di tulun dot ogumu', om poruhangon di porsombahan di sorobon do pointikid do tadau do mitonggoi di porsombahan do gandum om i porsombahan do waig dot anggur.

Porsombahan do Tadau dot Agayo do Kinuhub-Kuhub

12 Tumimung kou nod sumambayang do tontok do tadau do kohopod om limo di tulan do koturu'. Om ramayon no dokoyu o tadau dot agayo diti do maan do pomusou'd Tuhan, do solinaid do turu' o tadau. Om kada' kou no karaja' do nunu nopo do solinaid diri. 13 Om tontok nopo di tadau'd koiso', om papatahak kou no dot id Tuhan do porsombahan do taakanon. Patahak nod hopod om tolu o sapi' do tontoluhan dit ongokoro' po, om duwo o tinan do dumba' do tontoluhan, om hopod om apat o tanak do dumba' do tontoluhan di sorontoun-toun nogi' o tumur, om it aiso' ngai' nopo o bohiton do tinan. Om iri no tawau do porsombahan diri o kasanangan do Tuhan. 14 Om patahakon no i porsombahan do gandum di natantu' mantad, i tapung di rinalatan do tumau'd saitun. Potonggoyon nopo do pointikid-tikid do songinan o sapi' om tolu o kilogram do tapung, om duwo o kilogram do tapung do potonggoyon do pointikid-tikid do songinan o dumba' do tontoluhan, 15 om songkilogram o tapung do potonggoyon do pointikid-tikid do songinan o tanak do dumba'. Om potonggoyon nopo kawagu di porsombahan do gandum, om i porsombahan do waig dot anggur di natantu' mantad. 16 Om suwai no ko' iri, om patahak kou nod songinan o kambing do tontoluhan do maan do porsombahan do pangampun do dusa. Om porsombahan nopodti nga' poruhangon di porsombahan do sorobon do pointikid do tadau, om i porsombahan do gandum i porsombahan do waig dot anggur di potonggoyon kasai'. 17 Om tontok nopo di tadau'd koduwo om patahak kou nod hopod om duwo o sapi' do tontoluhan dit ongokoro' po, om duwo o tinan do dumba' do tontoluhan, om hopod om apat o tanak do dumba' do tontoluhan di sorontoun-toun nogi' o tumur, om it aiso' ngai' nopo o bohiton do tinan. 18-19 Om patahakon nod pointonggoi do porsombahan diri o koinsanai di porsombahan do suwai di pinatahak do tontok di tadau'd koiso'. 20 Om tontok nopo di tadau'd kotolu om patahak kou nod hopod om iso' o sapi' do tontoluhan dit ongokoro' po, om duwo o tinan do dumba' do tontoluhan, om hopod om apat o tanak do dumba' di tontoluhan di sorontoun-toun nogi' o tumur, om it aiso' ngai' nopo o bohiton do tinan. 21-22 Om patahakon nod pointonggoi do porsombahan diri o koinsanai di porsombahan do suwai di pinatahak do tontok di tadau do koiso'. 23 Om tontok nopo di tadau'd kaapat om patahak kou nod hopod o tinan do sapi' do tontoluhan dit ongokoro' po, om duwo o tinan do dumba' do tontoluhan, om hopod om apat o tanak do dumba' di tontoluhan di sorontoun-toun nogi' o tumur, om it aiso' ngai' nopo o bohiton do tinan. 24-25 Om patahakon nogi' do pointonggoi'ddi o koinsanai di porsombahan do suwai di pinatahak do tontok di tadau do koiso'. 26 Om tontok nopo di tadau do kolimo om patahak kou nod siam o sapi' do tontoluhan dit ongokoro' po, om duwo o tinan do dumba' do tontoluhan, om hopod om apat o tanak do dumba' di tontoluhan di sorontoun-toun nogi' o tumur om it aiso' ngai' nopo o bohiton do tinan. 27-28 Om patahakon nogi' do pointonggoi'ddi o koinsanai di porsombahan do suwai di pinatahak do tontok di tadau do koiso'. 29 Om tontok nopo di tadau do koonom om patahak kou nod walu' o tinan do sapi' do tontoluhan dit ongokoro' po, om duwo o tinan do dumba' di tontoluhan, om hopod om apat o tanak do dumba' do tontoluhan di sorontoun-toun nogi' o tumur, om it aiso' ngai' nopo o bohiton do tinan. 30-31 Om patahakon nogi' do pointonggoi di porsombahan diri o koinsanai di porsombahan do sorobon di suwai do miagal di pinatahak do tontok di tadau'd koiso'. 32 Om tontok nopo di tadau do koturu', om patahak kou nod turu' o sapi' do tontoluhan dit ongokoro' po, om duwo o tinan do dumba' do tontoluhan, om hopod om apat o tanak do dumba' do tontoluhan di sorontoun-toun nogi' o tumur, om it aiso' ngai' nopo o bohiton do tinan. 33-34 Om patahakon nogi' do pointonggoi'ddi o koinsanai di porsombahan do suwai di pinatahak do tontok di tadau'd koiso'. 35 Om tontok nopo di tadau do kawalu' om tumimung kou no do sumambayang om kada' kou no karaja' do nunu nopo. 36 Om patahak kou nod porsombahan di sorobon dot id Tuhan do maan do porsombahan do taakanon. Patahakon nopo om songinan o sapi' do tontoluhan dit okoro' po, om songinan o dumba' do tontoluhan, om turu' o tinan do tanak do dumba' di tontoluhan di sorontoun-toun nogi' o tumur, om it aiso' ngai' nopo o bohiton do tinan. Om iri no tawau do porsombahan diri o kasanangan do Tuhan. 37-38 Om patahakon nogi' do pointonggoi'ddi o koinsanai di porsombahan di pinatahak do tontok di tadau do koiso'. 39 Om iyo noddi o toturan do pasal di porsombahan di sorobon, om porsombahan do gandum, om porsombahan do waig dot anggur, om i porsombahan do piombolutan dit apatut dokoyu'd patahakon dot id Tuhan do tontok do mamaramai di piro-piro o tadau dot agayo di natantu' mantad. Om iri ngai' nopo porsombahan diri om poruhangon di porsombahan di patahakon dokoyu do pamayaan do batos di mikuwo'd sumpa' ko' i porsombahan do tumanud do kagaanan do ginawo. 40 Om polombuso' ngai' nod i Musa dot id tulun dot Israil o koinsanai di pinonuhuan do Tuhan dot id dau.

Pongintaban 30

Oturan do Pasal do Batos di Mikuwo'd Sumpa'

1 Om patahako' nod Musa iti piro-piro o toturan dot id koinsanai di boyoon do payat dot Israil, do poingkaa: 2 Soira' nopod haro o kusai do mamatos do mikuwo'd sumpa' do papatahak do nunu nopo dot id Tuhan, ko' mamatos do mikuwo'd sumpa' do mamantang do nunu nopo om mositi' nod wonsoyon ngai' di tulun i pinabatos dau'ddi, om a' no iyau koino-ino dot a' mamayaan di batos dau di mikuwo'd sumpa' diri. 3-4 Soira' nopod haro o sumandak di poingiyon po do hiri'd walai do tapa' dau do mamatos do mikuwo'd sumpa' do papatahak do nunu nopo dot id Tuhan, ko' mamatos do mikuwo'd sumpa' do mamantang do nunu nopo, om mositi' nod wonsoyon dau o koinsanai di batos dau di mikuwo'd sumpa' ko' batos dau'ddi, ondung a' no awagat o ginawo di tapa' dau do koilo do pasal diri. 5 Nga' ondung awagat o ginawo di tapa' dau do bayaanon di tanak dau i pinabatos diri, om a' i' akagasan di batos i sumandak diri. Om oompunan i' iyau'd Tuhan tu' iri i tapa' dau o mogodu dau do mamayaan di batos dau di mikuwo'd sumpa'. 6-7 Ondung haro o tondu' dit a' po nakasawo do momonsoi'd batos do mikuwo'd sumpa', do minomusorou kopio tuu iyau do tintod do minomonsoi di batos diri ko' amu' po, ko' ondung minamatos iyau do mikuwo'd sumpa' do mamantang do nunu nopo, om akagasan no iyau di batos dau di mikuwo'd sumpa' ko' i batos dau'ddi. Om soira' nopod kakawin iyau, om akagasan kasai' po iyau di batos dau'ddi, ondung a' no awagat o ginawo di sawo dau do korongou do pasal diri. 8 Nga' ondung mogodu i sawo dau do bayaanon dau i batos dau di mikuwo'd sumpa'ddi do korongou i sawo dau, om a' no iyau akagasan di batos diri. Om ompunan i' iyau'd Tuhan. 9 Tondu' nopo di nopuadan ko' i nadaan do sawo om mositi' nod mamayaan do koinsanai di batos dau di mikuwo'd sumpa' ko' i batos dau do mamantang do nunu nopo. 10 Ondung haro o tondu' di nakakawin no do mamatos do mikuwo'd sumpa' ko' mamatos do mamantang do nunu nopo, 11 om mositi' nod wonsoyon dau o koinsanai di nokoboros dau'ddi, ondung a' no awagat o ginawo di sawo dau do korongou do pasal diri. 12 Nga' ondung mogodu i sawo dau do bayaanon dau i batos dau'ddi do korongou i sawo dau do pasal diri, om a' no i tondu' akagasan di batos dau. Om ompunan i' iyau'd Tuhan tu' iri i sawo dau o minogodu dau do mamayaan di batos dau do mikuwo'd sumpa'. 13 Haro i' o kuasa' do kusai do popogirot ko' papaiso' do nunu nopo o batos do mikuwo'd sumpa' ko' batos di pinoboros di sawo dau. 14 Nga' ondung a' awagat o ginawo di kusai do tontok di tadau do korongou iyau do pasal di batos di sawo dau di mikuwo'd sumpa', om mositi' nod wonsoyon ngai' di tondu' i batos dau di mikuwo'd sumpa' ko' i batos dau. Nokogirot no di sawo dau i batos dau'ddi tu' a' i' pinopoboros dot awagat o ginawo dau do tontok di tadau do nokorongou iyau do pasal di batos diri. 15 Nga' ondung pakaisoon di kusai i batos di sawo dau di mikuwo'd sumpa' do tadau'd suwai, om iri no i kusai o mamabo do kootuson di winonsoi dau do pinapakaiso'ddi. 16 Om iri no o piro-piro o toturan do pinatahak do Tuhan dot id di Musa do pasal do batos di mikuwo'd sumpa' do wonsoyon do sumandak di poinsugku' po do tapa' dau, om i tondu' di nakasawo no.

Pongintaban 31

Pisangadan do Sumuli' do Tulun do Midian

1 Boros kad Tuhan dot id di Musa, 2 “Hukuman ngai' no o tulun do Midian do ponuli' di kangaraaton diyolo' dot id tulun dot Israil. Om katalib pondo iri om apatai ko nondo, oi Musa,” ka. 3 Om boro-boros noddi i Musa dot id tulun dot Israil, “Sumodia' kou no do mongoi sangod. Om ongoyon no dokoyu songodo' i tulun do Midian om hukuman no iyolo' do ponuli' di kangaraato' diyolo' dot id toguang do Tuhan. 4 Om momili' kou nod sororibu-ribu o soudor do mantad id pointikid-tikid do payat dot Israil, do mongoi sangod,” ka dau. 5 Om pilio' noddi o sororibu-ribu o tulun do mantad id pointikid-tikid do payat dot Israil. Om ginumu' nopo diyolo'ddi nga' hopod om duwo noribu o tulun di nokosodia' no do mongoi sangod. 6 Om suhuo' noddi di Musa iyolo' do mongoi sangod. Om i Pinihas i tanak di Iliasar it Imam, o boyoon diyolo'. Om i Pinihas no i mongilo-ilo do koinsanai di pakakas dit ongolidang, om i torumpit di pouunion do maan do popoilo. 7 Om ngoyo' noddi di tulun dot Israil songodo' i tulun do Midian, om patayo' ngai' nopo diyolo' i tongokusai'd hiri do tumanud di pinonuhuan do Tuhan dot id di Musa. 8 Om kohompit nogi' i limo o raja' do tulun do Midian. Iri ngai' nopo raja'ddi nga': i Iwi om i Rikim, om i Sur, om i Hur, om i Riba. Om pinatai po diyolo' i Biliam i tanak di Bior. 9 Om tanggayai no di tulun dot Israil i tongoondu' om i tangaanak di tulun do Midian, om onuo' ngai' diyolo' i sapi' om i tayam-tayam diyolo'd suwai om i dapu' diyolo'. 10 Om tutudai no di tulun dot Israil i kabandaran om i kokiiman di tulun do Midian. 11 Om timungo' ngai' nogiddi di tulun dot Israil i nangaanu diyolo' do mantad id pisangod, dot i tulun om i tayam-tayam di natangggayan diyolo'ddi, 12 om igitai ngai' no diyolo' do hiri'd di Musa om hiri'd di Iliasar om hiri'd toinsanan di tulun dot Israil. Tontok nopoddi om hilo' iyolo'd rantai do Muab do minomukiim, i hilo'd somok do Bawang do Yordan, it id hapak do bandar do Yorikou.

Minuli' i Soudor dot Israil

13 Om soliwan ngai' noddi i Musa om i Iliasar, om i piro-piro boyoon do suwai, om i tulun dot Israil do minongoi ruba' di soudor dot Israil. 14 Om kotogod noddi i Musa di soudor om i boyoon di soudor om i sinompuruan do soudor di koguguli' do mantad id pisangadan. 15 Om ponguhot no i Musa diyolo', “Nokuro tu' pinologos dokoyu'd poimpasi iti tongoondu'? 16 Okon toi ko' ilo' no tongoondu' i tuminanud di nosihat di Biliam, i nokobungou ngai'd tulun dot Israil dot a' tuminorodok dot id Tuhan di hilo'd Pior! Om iri noddi o pinoporikot do kousungan dot id tulun di songonuon do Tuhan. 17 Baino' nopo om patayon ngai' no dokoyu o tangaanak do tongokusai om i tongoondu' di nodudun do kusai. 18 Nga' iri nopo i tongoondu' di minsusukod nogi' om i tongoondu' dit a' po nodudun do kusai, om koino-ino i' dokoyu dot onuon. 19 Om dinondo nodti, om koinsanai dokoyu i nakapamatai'd tulun, ko' i nakakama' do rata'd tulun om mositi' nod mundorong do hilo'd soliwan dilo kokiiman do solinaid do turu' o tadau. Om tontok nopo di kotolu om di koturu'd tadau, om mositi' nod wonsoyon dokoyu om i tongoondu' di tinanggayan dokoyu, i wonsoyon di natantu' mantad do pomolidang do tinan do tumanud do toturan do tugama'. 20 Koinsanai di pakayan om nunu nopo i kulit do winonsoi, ko' hulu'd kambing ko' kayu do winonsoi, om mositi' nod lidangan do tumanud dit oturan do tugama',” ka dau. 21 Om boro-boros noddi i Iliasar di tulun dot ogumu' di koguguli' do mantad id pisangadan, “Iti ngai' no o toturan di pinatahak do Tuhan dot id di Musa. 22-23 Koinsanai dit a' sumorob, do miagal do tamas, om pirok, om tambaga', om basi', om gundol dit opurak om gundol dit oitom, om mositi' nod posuboon ngai' iri dot id tapui do pomolidang diri. Om nunu nopo i konunu-nunuan dit osorob do tapui om ougan no di waig di pongongoug do tontok do momolidang. 24 Om koturu' nopod tadau om mositi' nod pupuan dokoyu o pakayan dokoyu, om olidang kou indo dot id pagantangan do tugama', om koino-ino kou nondo do sumuang do hiri'd kokiiman,” ka dau.

Binahagi' i Konunu-Nunuan di Naanu Mantad id Pisangod

25 Om boro-boros noddi o Tuhan dot id di Musa, 26 “Iya' no om i Iliasar, om koinsanai di boyoon do suwai di tulun dot Israil, ot apatut do mongintob di konunu-nunuan di naahau do mantad id pisangod, om kohompit ngai' nogi' i tulun om i tayam-tayam di nangatanggayan. 27 Om iri nopo i konunu-nunuan diri nga' piduwoon om piintangaon nopo. Songintanga' nopo om patahakon di soudor, om songintanga' no om patahakon di tulun dot Israil di suwai. 28 Mantad nopo di tintanga' di naanu di soudor om mositi' nod manganu dot iso' do mantad id pointikid-tikid do limo nahatus --- do mantad id pogialatan do tulun di natanggayan om mantad nogi' dot id pogialatan do sapi' om kaladai, om dumba' om kambing, do maan do sukai do patahakon dot id Tuhan. 29 Om patahakon nondo iri dot id di Iliasar it Imam, do maan do porsombahan di potobilangon do maan do don Tuhan. 30 Om mantad no di tintanga' di tulun dot Israil do suwai, om mositi' nod manganu dot iso' do mantad id pointikid-tikid do limo nohopod dot id pogialatan di tulun di natanggayan om mantad id pogialatan do sapi' om kaladai, om dumba' om kambing. Om patahakon ngai' nondo iri di tulun do Liwi, i mongilo-ilo do hiri'd Kiim di Koropohon do Tuhan,” ka dau. 31 Om wonsoyo' ngai' nopo di Musa om i Iliasar iri do tumanud di pinonuhuan do Tuhan. 32-35 Iti ngai' no i nangaanu di soudor do tinanggayan diyolo' do mantad id pisangod, do suwai mantad ko' i nangaanu diyolo' do maan diyolo'. Kogumuon nopo om 675,000 o dumba' om kambing, om 72,000 o sapi', om 61,000 o kaladai, om 32,000 o tongoondu' dit a' po nodudun do kusai. 36-40 Om kogumuon nopo di nakatahak dot id soudor diri om 337,500 o dumba' om kambing. Om 675 o tinan do mantad diri do numaan do sukai do pinatahak dot id Tuhan; om 36,000 o tinan do sapi', om 72 o tinan do mantad diri do numaan do sukai do pinatahak dot id Tuhan; om 30,500 o kaladai, om 61 o tinan do mantad diri do numaan do sukai do pinatahak dot id Tuhan; om 16,000 o tongoondu' di minsusukod nogi', om 32 o tulun do mantad diri do numaan do sukai do pinatahak dot id Tuhan. 41 Om patahako' ngai' nod Musa i numaan do sukai'ddi dot id di Iliasar do numaan do porsombahan do potobilangon do maan do don Tuhan, do tumanud di pinonuhuan do Tuhan. 42-46 Om iri no i tintanga' di pinatahak dot id tulun dot Israil di suwai, i songintanga' di pinatahak di soudor, om 337,500 o dumba' om kambing. Om 36,000 o sapi', om 30,500 o kaladai, om 16,000 o tongoondu' dit a' po nodudun do kusai. 47 Om mantad nodti om minanganu i Musa dot iso' do mantad id pointikid-tikid do limo nohopod o tulun di tinanggayan di soudor dot Israil, om mantad id pogialatan di tayam-tayam. Om patahako' nogiddi di Musa iri dot id tulun do Liwi, i maganu-anu dot id Kiim do Tuhan, do tumanud di pinonuhuan do Tuhan dot id dau. 48 Om rikot noddi dot id di Musa i boyoon do soudor, i minomoyo' di soudor dot Israil, 49 do minongoi popoilo di Musa do poingkaa, “Tuan, nointob ngai' no dahai i soudor dit id siriba' do kuasa' dahai, om aiso' i' o natagak. Hino ngai' i' iyolo'. 50 Om baino' nopodti om paatod no iyahai diti nangaanu dahai: Iti tamas, om saring, om lungkaki', om pondulung, om simbong, om karo, do patahakon ngai' dahai dot id Tuhan do pambayar dahai do ginawo dahai, om intirungan indo kasai' iyahai'd Tuhan,” ka diyolo'. 51 Om romito' ngai' noddi di Musa om i Iliasar i tamas diri, i nowonsoi mantad no do maan do pongillumis. 52 Om iri nopo pinatahak di piro-piro boyoon do soudor diri nga' osomok nod duwo nahatus o kilogram do kawagato'. 53 Om onuo' noddi di soudor dit okon ko' boyoon i nangaanu do mantad id pisangod do maan do diyolo'. 54 Om igitai ngai' noddi di Musa om i Iliasar i tamas diri do hiri'd Kiim do Tuhan. Om ointirungan i' do Tuhan i bansa' dot Israil.

Pongintaban 32

Payat di Hiri'd Ponong Id Koulayon do Mantad id Bawang do Yordan

1 Iri nopo payat di Rubin om i Gad nga' sorogumuan tomod do tayam-tayam. Om kokito nopoddi diyolo' dot osonong kopio i tana' do hilo'd Yaisor om i tana' do hilo'd Giliad do pomogompian do tayam-tayam, 2 om ongoi noddi iyolo' solowot di Musa, om i Iliasar, om i piro-piro boyoon do suwai dit id pogiolitan do tulun dot Israil, om boro-boros no iyolo' do poingkaa, 3-4 “Iri nopo tana' do hilo'd bandar dot Atarot, om Dibon, om Yaisor, om Nimra, om Hisbon, om Iliali, om Sibam, om Nibo, om Bion, i naanu no do tulun dot Israil, do tinulung do Tuhan do minanganu, nga' ongoluhub kopio om osonong do pomogompian do tayam-tayam. Iyahai nopo om sorogumuan tomod do tayam-tayam, 5 om pokionuon no dahai do patahakon nu dahai o tana'dti do dahai'd songonuon. Om kada' iyahai suhuo' do mundaliu do kumaa do hilo'd soborong dilo Bawang do Yordan,” ka diyolo'. 6 Om boros kad Musa do suminimbar, “Nunu hoi? Mundorong kou no daa'ddi iyokoyu do hiti om inda' ka di tongotobpinai dokoyu dot oiyo ko' bansa' dot Israil tu' maso pod mongoi sangod. 7 Nokuro tu' kasaap kopio kou do monompurolosi do tulun dot Israil do sumoborong dilo Bawang do Yordan do kumaa do hilo'd pomogunan di pinatahak mantad do Tuhan dot id diyolo'? 8 Om iyo no motindo i winonsoi di komolohingan dokoyu di gulu po, do tontok di sinuhu' ku iyolo' do mongoi hombo di pomogunan diri do mantad hilo'd Kadis Barnia. 9 Om pamanau no iyolo' do gisom do nokorikot do hilo'd Rantai dot Iskol, om nokokito no iyolo' di pomogunan diri. Nga' tontok di guminuli' iyolo' om tompurolosio' no diyolo' i tulun dot Israil, gisom dot a' noddi iyolo' minongoi do hiri'd pomogunan di pinatahak mantad do Tuhan dot id diyolo'. 10-11 Om tontok nod tadau'ddi do notogod tomod o Tuhan, boros ka dau, ‘Iti nopo tulun diti om a' noddi tumorodok dot id doho'. Om sumumpa' oku no dot isai nopo o tulun dot Israil di nokorikot nod duwo nohopod o toun do tumur ko' it otuo mantad ko' iri do mantad di kinosoliwanan diyolo' do mantad hilo'd Masir, om aiso' no o kosuang do hilo'd pomogunan di nakabatos ku di Abraham om i Isak om i Yakub,’ ka dau. 12 Om koontok ngai' nopo i tulun dot Israil di sumpa' diri, om i Kalib po i tanak di Yopuni, i tulun do Kinas diri, om i Yosua i tanak di Nun ot a' noontok. Tu' iyolo' poo it otorodok dot id Tuhan. 13 Om otogod diri o Tuhan dot id tulun dot Israil, gisom do pinologos do Tuhan iyolo' do mombo-hombo do hilo'd tana' do kowotuan do solinaid dot apat nohopod o toun, om gisom do nangapatai ngai' i tulun di suminaap do Tuhan. 14 Baino' nodti om momonsoi kou po iyokoyu do miagal di winonsoi di komolohingan dokoyu. Kidusa kou no kopio, iyokoyu i sukodwagu. Tu' ondung momonsoi kou do miagal diri om poporikot kou no kopio do kototogod do Tuhan dit a' ogina-gina' dot id tulun dot Israil! 15 Ondung a' kou mumboyo' do tisuhu' do Tuhan do dinondo, om tongkiadan pondo do Tuhan dot alaid-laid o koinsanai do bansa'dti do hiti'd tana' do kowotuan. Om iyokoyu no o kobungou do kapatayon diyolo',” ka dau. 16 Om ongoi noddi i payat do Rubin om i payat do Gad solowot di Musa, om boro-boros nod poingkaa, “Potumboyoo' po iyahai do momonsoi'd kandang di kitolig do poiyanan dahai di dumba' dahai, om momonsoi do bandar dit ongkitolig o posorili' do poiyanan dahai dilo tangaanak om sawo dahai. 17 Om opongo pondo dahai iri, om mongoi nogindo iyahai uhup di koobpinayan dahai dit iso-iso' o bansa' do sumaap di pisangod do gisom dot aanu diyolo' i pomogunan diri om osiliu do diyolo'd songonuon. Om daamot nopondoddi om miyon nondo do hiri'd bandar do kitolig i tangaanak om sawo dahai do daamot dahai do mongoi sangod. Om ointirungan nondo iyolo' do mantad id tulun di poingiyon mantad do hiti'd pomogunan diti di mongoi sangod. 18 Om a' po iyahai gumuli' do hiri'd walai dahai dot a' po aanu di tulun dot Israil i pomogunan di nakatahak mantad do maan do diyolo'd songonuon. 19 Om a' no iyahai manganu dot ongokooro' piya do tana' di hilo'd soborong do Bawang do Yordan, tu' nakaanu no iyahai do dahai'd gontok do tana' do hiti'd ponong id koulayon do mantad id Bawang do Yordan,” ka diyolo'. 20 Om boros kad i Musa do suminimbar, “Ondung otopot no kopio ino pinoboros dokoyu, om hiti nod kinoiyonon do Koropohon do Tuhan do sumodia' kou do mongoi sangod. 21 Om koinsanai dilo soudor dokoyu om mositi' nod sumoborong dilo Bawang do Yordan do mongoi sangod dilo pisangod toko'. Om woyoon kou id Tuhan do gisom dot aala' do Tuhan iyolo', 22 om gisom dot osolod dokoyu i pomogunan diri. Om koino-ino kou nogindo do muli', tu' nowonsoi no dokoyu it apatut dokoyu'd wonsoyon dot id Tuhan, om id tongotobpinai dokoyu dit oiyo ko' bansa' dot Israil. Om kotumboyo' nogindo o Tuhan do iyokoyu o kasanganu di tana' di ponong id koulayon. 23 Nga' a' nopo dokoyu owonsoi o miagal di nakabatos dokoyu, om sorohon no dokoyu do kowonsoi kou nod dusa dot id toguang do Tuhan. Nga' kada' kou no kopio pomonsoi'd dusa tu' iri no moti' dusa o kopomohukuman dokoyu. 24 Om ongoi kou no popoingkakat do bandar om kandang do poiyanan di dumba' dokoyu. Nga' wonsoyon no kopio dokoyu i nangkabatos dokoyu!” ka dau. 25 Om boro-boros noddi i payat do Gad om i payat do Rubin do poingkaa, “Oi Tuan, tonudon ngai' i' dahai o nunu nopo i ponuhuan do Tuan. 26 Poundorongon ngai' dahai o tangaanak om sawo om i dumba' dahai do hiti'd bandar do Giliad. 27 Nga' iyahai nopo om sumodia' i' do mongoi sangod, om Tuhan i' o momoyo' dahai. Om sumoborong nondo iyahai di Bawang do Yordan do mongoi sangod do tumanud di pinoboros do Tuan,” ka diyolo'. 28 Om poboroso' noddi di Musa iti ponuhuan dot id di Iliasar om id di Yosua, om id koinsanai di boyoon dot Israil, 29 “Ondung tumanud no kopio do ponuhuan i payat do Gad om i payat do Rubin do sumoborong do Bawang do Yordan, do mongoi uhup dokoyu do mongoi sangod, om kamanang kou no, om patahakon nopo diyolo' i tana' do Giliad do maan do diyolo'd songonuon. 30 Nga' a' nopo iyolo' moyo' dokoyu do sumoborong do Bawang do Yordan do mongoi sangod, om mositi' nod iri no i tana' di diyolo'd bahagi' ot aanu diyolo' do miagal dokoyu tu' kaanu do bahagi'd tana' do hilo'd pomogunan do Kanaan,” ka. 31 Om boros ka di payat do Gad om i payat do Rubin do suminimbar, “Oi Tuan, wonsoyon ngai' i' dahai o nunu nopo i pinonuhuan do Tuhan dot id dahai. 32 Om sumoborong i' iyahai do kumaa do hilo'd pomogunan do Kanaan do mongoi sangod do moyo' do Tuhan i boyoon dahai. Om aanu i' dahai iti tana' do dahai'd songonuon do hiti'd ponong id koulayon do mantad id Bawang do Yordan,” ka diyolo'. 33 Om patahako' nod Musa dot id payat do Gad om id payat do Rubin om id songintanga' do payat do Manasi o koinsanai di watas di Sihon i raja' do tulun dot Amori, om i watas di Raja' Og, i mantad id pomogunan do Basan, om kohompit nogi' i kabandaran om i tana' do hiri'd posorili'. 34 Om wonsoyo' no kawagu di payat di Gad i bandar do Dibon, Atarot, Aroir, 35 Atarot Sapan, Yaisir, Yogbiha, 36 Bait-Nimra, om Bait-Haran do winonsoi'd kabandaran di kitolig om pamansayan do kandang do dumba'. 37 Om winonsoi kawagu di payat di Rubin i kabandaran do Hisbon, Iliali, Kiriataim, 38 Nibo, Baal-Mion (ngaran nopo do bandar diti om nakawaliu no) om Sibam. Iri nopo bandar di winonsoi kawagu diyolo'ddi nga' pinungaranan ngai' diyolo' do ngaran do wagu. 39 Om ngoyo' no di pinuruan do sompiiyon di Makir i tanak di Manasi, solodo' i tana' do Giliad, om iyon noddi iyolo' do hiri. Om uyungo' no diyolo' i tulun dot Amori, i poingiyon do hiri'd bandar diri. 40 Om patahako' noddi di Musa dot id pinuruan do sompiiyon di Makir i tana' do Giliad, om hiri noddi iyolo' do minomogun-mogun. 41 Om i Yair no i mantad id payat do Manasi, om minanangod om minonolod do piro-piro o kampung, om pungaranai noddi dau i kokompungan diri do “Kokompungan do Yair”. 42 Om i Noba no, om minongoi panangod om minonolod di bandar do Kinat om koinsanai di kokompungan do hiri. Om pungaranai noddi dau iri do Noba do pinasangai di ngaran dau.

Pongintaban 33

Pinamanahan do Mantad Hilo'd Masir om Gisom do Hilo'd Muab

1 Tontok di nokotongkiad i tulun dot Israil do mantad hilo'd Masir, do minulud do minamanau do tumanud di payat diyolo', do winoyo' di Musa om i Harun, om minumbaya' iyolo' dot id piro-piro o kinoiyonon. 2 Om tinulis ngai' di Musa o ngaran do pointikid-tikid di kinoiyonon di pinomukiiman diyolo', do tumanud di pinonuhuan do Tuhan. 3 Om di nopo suminoliwan o tulun dot Israil do mantad id Masir, do winoyo' do Tuhan, om tontok di tadau'd kohopod om limo do tulan di koiso', i sangadau nogi' o kinotoliban do mantad di tadau do Paska di koinsan nogi'. Om tongkiad no iyolo' di bandar do Ramisis, dot antang-antangan di tulun do Masir, 4 di maso do momolobong di tangaanak diyolo' dit id gulu kosusu, i pinatai do Tuhan. Om iri no i kinapatayan di tangaanak diyolo'ddi do pinointalang do Tuhan dot iyau no ot okoris ko' mantad di tongotingolig di tulun do Masir. 5 Om pamanau noddi i tulun dot Israil do mantad hilo'd Ramisis om pomukiim no iyolo' do hilo'd Sukot. 6 Om mantad nod hilo'd Sukot om pomukiim no iyolo' do hilo'd Itam, i hiri'd tisan do tana' do kowotuan. 7 Om mantad nod hilo', om poguliai no diyolo' do hilo'd Pi-Hahirot, i ponong id koulayon do mantad id Baal Sipon, om pomukiim noddi iyolo' do hilo'd somok do Migdol. 8 Om tongkiad noddi iyolo' do mantad hilo'd Pi-Hahirot om soborong no iyolo' di Rahat dot Aragang, om pamanau no do kuminaa do hiri'd tana' do kowotuan dot Itam; om maha' di tolu noddi o tadau diyolo' do manau-panau om pomukiim no iyolo' do hilo'd Mara. 9 Om mantad nod hilo' om lombus no iyolo' do hilo'd Ilim, om pomukiim no iyolo'd hilo'. Hilo' nopod Ilim om haro o hopod om duwo o tudan do waig, om turu' nohopod o guas do kurma. 10 Om pamanau no iyolo' do tuminongkiad dot Ilim om pomukiim no iyolo' do hiri'd somok do Suok do Suis. 11 Om pomukiim no kawagu iyolo' do hilo'd tana' do kowotuan do Sin. 12 Om koimbagu noddi om pomukiim no iyolo' do hilo'd somok do Dopka, 13 om pakayaai no diyolo' do hilo'd Alus. 14 Om pomukiim noddi iyolo' do hilo'd Rapidim, nga' aiso' i' o waig dot inumon do hiri. 15-37 Om mantad no do hilo'd Rapidim om lombus no iyolo' do kuminaa do hilo'd Nuluhon do Hor. Om iti no ngai' o nokoiyonon diyolo' do minomukiim: Hilo'd tana' do kowotuan do Sinai, hilo'd Kibrot Taawa, ko' “Kalabangan di Godoot”, hilo'd Hasirot, hilo'd Ritma, hilo'd Rimon Piris, hilo'd Libna, hilo'd Risa, hilo'd Kihilata, hilo'd Nuluhon do Siapir, hilo'd Harada, hilo'd Makilot, hilo'd Tahat, hilo'd Tara, hilo'd Mitka, hilo'd Hasmona, hilo'd Mosirot, hilo'd Bini Yaakan, hilo'd Hor Gidgad, hilo'd Yodbata, hilo'd Abrona, hilo'd Ision-Gibir, hilo'd tana' do kowotuan do Sin (i hilo'd Kadis) om hilo'd Nuluhon do Hor, it id wolit do tana' dot Idom. 38-39 Om takad no i Harun, it Imam diri, do hilo'd Nuluhon do Hor, do tumanud di pinonuhuan do Tuhan. Om kapatai noddi i Harun do hilo' do tontok di tadau do koiso' do tulan di kolimo, di kaapat nohopod do toun do mantad di kinosoliwanan do tulun dot Israil do mantad hilo'd Masir. Tumur nopo di Harun do tontok di napatai iyau om hatus om duwo nohopod om tolu o toun. 40 Om korongou noddi di raja' do pomogunan dot Arad, i hilo'd tana' do Nigib, i ponong id salatan do Kanaan, do mamanau no do kumaa'd hiri'd pomogunan diri i tulun dot Israil. 41-49 Iti no ngai' i kinoiyonon do pinawansayan di tulun dot Israil do kiim diyolo' di mantad iyolo' do hilo'd Nuluhon do Hor om gisom do nokorikot iyolo' do hilo'd rantai do pomogunan do Muab, i hilo'd Salmuna, hilo'd Punon, hilo'd Obot, hilo'd kinaraagan dot Abarim, hilo'd watas do Muab, hilo'd Dibon Gad, hilo'd Almon Diblataim, hilo'd Nuluhon do Abarim, it id somok do Nuluhon do Nibo, om hilo'd rantai do Muab, it id somok di Bawang do Yordan, id hapak di bandar do Yorikou, it id pialatan do Bait-Yosimot, om Rantai dot Akasia.

Ponuhuan do Tintod do Sumoborong di Bawang do Yordan

50 Hilo' nod rantai do Muab, i hiri'd somok do Bawang do Yordan, it id hapak do bandar do Yorikou do nonuan do Tuhan i Musa do 51 piro-piro o ponuhuan diti do patahakon dot id tulun dot Israil, “Kosoborong kou nopondo di Bawang do Yordan do kumaa'd hilo'd pomogunan do Kanaan, 52 om mositi' nod uyungon ngai' dokoyu i tulun mantad do hilo'd pomogunan diri. Om raagon ngai' no dokoyu o koinsanai di tingolig diyolo' di watu ko' tambaga' do winonsoi, i tiiyonon diyolo' do sumambayang. 53 Om mositi' no do solodon dokoyu i tana'ddi om miyon kou nod hiri, tu' iri no o patahakon ku dokoyu. 54 Om mositi' nod pogiongkib-ongkibon dokoyu i tana'ddi dot id pogialatan do pointikid-tikid di payat om i pinuruan do sompiiyon do tulun dot Israil, dot undion o ralan do mangangkib. Iri nopo i pinuruan do sompiiyon dit asapou om agayo no o tana' do poongkibon, om iri no i pinuruan do sompiiyon dit okuri' om okoro' no o tana' do poongkibon dot id diyolo' do maan do diyolo'd songonuon. 55 Nga' ondung a' dokoyu uyungon i tulun mantad do hiri'd pomogunan diri, om iyolo' no motindo i poundorong do hilo' o monusa' dokoyu, do miagal pod togis di nokoliwata' dokoyu ko' miagal do rugi di nokosulu do lapap dokoyu. Om saapon kou motindo diyolo'. 56 Om ondung a' dokoyu uyungon iyolo', om iyokoyu motindo o raagon ku do pamaraag ku nopo om i natantu' mantad ku do pamaraag ku diyolo',” kad Tuhan.

Pongintaban 34

Wolit di Tana'

1 Om poboroso' noddi do Tuhan dot id di Musa 2 i ponuhuan do kumaa dot id tulun dot Israil do poingkaa, “Korikot kou nopondo do hilo'd Kanaan om wansayan no dokoyu'd wolit i tana'ddi do poingkaa: 3 Wolit nopo do ponong id salatan, om potilombus nopo do mantad hiri'd tana' do kowotuan do Sin do poinsusui di wolit do pomogunan dot Idom. Wolit nod ponong id koulayon om poimpuunon do hilo'd tompok ponong id salatan di Rahat do Napatai. 4 Om pahamadon nondo do ponong id salatan do kumaa id Ralan dot Akrabim, om potilombus nopo do hilo'd Sin gisom do korikot do hilo'd Kadis Barnia, i ponong id salatan. Om mantad nondod hilo' om pahamadon po do kumaa do ponong id kotonobon, do gisom do korikot do hilo'd Hasar-Adar, om potilombuson do hilo'd Asmon. 5 Om hilo' no do pahamadon i wolit do kumaa'd hilo'd rantai do piwolitan do pomogunan do Masir, om koompok nondo do hilo'd Rahat do Tanga'. 6 Iri no i Rahat do Tanga' o wolit di pomogunan dokoyu do ponong id kotonobon. 7 Wolit no do ponong id utara om poimpuunon di Rahat do Tanga' do pokoyoon do hilo'd Nuluhon do Hor 8 om mantad nod hilo' om pokoyoon do hilo'd ralan di roitan do Ralan do Hamat, om potilombuson do hilo'd Sidad 9 om hilo'd Sipron om koompok do hilo'd Hasar-Inan. 10 Wolit no do ponong id koulayon, om poimpuunon do hilo'd Hasar-Inan om gisom do korikot do hilo'd Sipam. 11 Om mantad nod hilo' om poruhukon do hilo'd Ribla, i ponong id koulayon do mantad id Ain, om potilombuson do hilo'd konulu-nuluan, it id tisan di Tasik Galilia do ponong id koulayon, 12 om pokoyoon do ponong id salatan do posusuyon di Bawang do Yordan, om gisom do korikot do hilo'd Rahat do Napatai. Om iyo noddi it apat o wolit di pomogunan dokoyu,” ka dau. 13 Om boro-boros noddi i Musa di tulun dot Israil do poingkaa, “Iti no ngai' o tana' dot aanu dokoyu, dot undion o ralan dokoyu'd manganu, i tana' dot ongkibon dot id pogialatan di siam om satanga' o payat dot Israil, do tumanud di pinonuhuan do Tuhan. 14-15 Iri nopo payat do Rubin om Gad om i songintanga' do payat do Manasi nga' nakaanu no do diyolo'd gontok, om iri nopo tana' diyolo'ddi om naangkib no dot id pogialatan di piro-piro o sompiiyon diyolo'. Tana' nopo di naanu diyolo' nga' ponong id koulayon do mantad di Bawang do Yordan, it id hapak do Bandar do Yorikou i ponong id soborong,” ka dau.

Piro-piro Boyoon do Nopili' do Mangangkib di Tana'

16 Om boros kad Tuhan dot id di Musa, 17 “Iri nopo it apatut do mangangkib di tana' om i Iliasar it Imam, om i Yosua, i tanak di Nun. 18 Om momili' no do songulun o boyoon do mantad id pointikid-tikid do payat do monguhup diyo Iliasar om i Yosua do mangangkib di tana',” ka dau. 19-28 Om iti ngai' no o ngaran di tulun di nopili' do Tuhan. - Payat - Boyoon - Yohuda - I Kalib, i tanak di Yopuni - Simion - I Samuil, i tanak di Amihud - Binyamin - I Ilidad, i tanak di Kislon - Dan - I Buki, i tanak di Yogli - Manasi - I Haniol, i tanak di Ipod - Ipraim - I Komuil, i tanak di Siptan - Sibulon - I Ilisapan, i tanak di Parna - Isakar - I Paltiol, i tanak di Asan - Asor - I Ahihud, i tanak di Silomi - Naptali - I Pidail, i tanak di Amihud 29 Iri ngai' no o tulun di sinuhu'd Tuhan do mangangkib di tana' di hilo'd Kanaan do patahakon dot id tulun dot Israil.

Pongintaban 35

Piro-Piro Bandar do Patahakon dot id Payat do Liwi

1 Tontok di hilo'd rantai do Muab, i hilo'd somok do Bawang do Yordan, it id hapak do bandar do Yorikou, om boro-boros no o Tuhan dot id di Musa do poingkaa, 2 “Sunudan ngai' no o tulun dot Israil do mantad nopo di tana' do naanu diyolo'ddi om mositi' no do patahakon diyolo' dot id tulun do Liwi om kopomogun-mogun i' do hilo' i tulun do Liwi. 3 Om asanganu nondo diyolo' i kabandaran diri do pomogun-mogunan diyolo'. Om iri no i tana' di kobuturan do hiri'd posorili' di kabandaran om poiyanan di sapi' om i tayam-tayam diyolo'd suwai. 4 Kogoyoo' nopo di kobuturan diri om apat nahatus om limo nohopod o mito do sukaton do mantad id tolig di bandar do pabasagi'. 5 Iri nopondo tana' do kinoiyonon di tulun do Liwi om apasagi'. Sopisiam nahatus o mito do konoruo' om kalaabo'. Om iri nopondo i bandar om hiri'd tanga' di kinoiyonon diyolo'. 6 Om onuan nogi' dokoyu i tulun do Liwi dot onom o bandar di maan do pogintirungan do tulun di kapamatai do tulun do suwai dit a' tomodon do mamatai, om hiri nondo o tongoyon diyolo' intirungo'. Om suwai no ko' iri om onuan po dokoyu iyolo' dot apat nohopod om duwo o bandar 7 do mitonggoi di kobuturan. Om oinsanan nopondo om apat nohopod om walu' o bandar dot aanu di tulun do Liwi. 8 Kogumuo' nopo do bandar do tulun do Liwi dot id suang do watas do pointikid-tikid dot iso' o payat dot Israil om mositi' nod tontuon do tumanud do kogoyo-goyoo' di watas,” ka dau.

Bandar do Pogintirungan

9 Om suhuo' nod Tuhan i Musa 10 do popolombus dot id tulun dot Israil diti boros do poingkaa, “Kosoborong kou nopondo di Bawang do Yordan do kumaa do hilo'd pomogunan do Kanaan, 11 om momili' kou nod piro-piro o bandar do maan do pogintirungan dot isai nopo o tulun di kapamatai do tulun dot a' tomodon do mamatai, om hiri nondo o ngoyon di tulun diri. 12 Om hiri nod bandar diri dot aiso' o ligogon di tulun diri do mantad id koobpinayan di tulun di napatai dau'ddi, i kosorou daa do momolokop. Tu' isai nopo it atandasan do mamatai'd tulun, om a' i' milo do hukuman do kapatayon dot a' po oilaan kopio dot id bisara'. 13 Om momili' kou no dot onom o bandar: 14 tolu o hilo'd ponong id koulayon do mantad id Bawang do Yordan om tolu o hilo'd tana' do Kanaan. 15 Om iri nopo piro-piro o bandar diri om silihon do bandar do pogintirungan do tulun dot Israil, om i tulun do bansa'd suwai di poirolot dokoyu di koumbaya' no toomod ko' i poingiyon do hiri. Om isai nopo o tulun do kapamatai do tulun dit okon ko' tomodon do mamatai, om hiri nod bandar diri o poggiduon. 16-18 Nga' ondung haro o tulun do kapamatai do sompi' ko' tulun do basi' ko' watu ko' kayu o pinakai dau do minamatai di tulun, om kasala' no iyau. Om mositi' no do hukuman do kapatayon. 19 Om mositi' no dot i koobpinayan dit osomok po di tulun di napatai o mamatai do tulun diri. Ondung osolowot dau i tulun diri om mositi' no do patayon dau. 20 Ondung haro o tulun dot otogod do tulun do suwai, om patayon nondo dau iyau do maan potungubo' ko' dumpahon po dau, 21 ko' tumbukan po dau i tulun, om kasala' no i tulun di minamatai'ddi. Om mositi' no do hukuman do kapatayon. Om mositi' no dot i koobpinayan dit osomok po di tulun di napatai o mamatai di tulun di minamatai'ddi. Ondung osolowot dau i tulun diri om mositi' no do patayon dau. 22 Nga' iri nopo tulun di kapamatai do tulun dit aiso' i' o katagad-tagadan dau, do nokotungub tuu ko' nodumpau po dau do watu o nakapatai di tulun diri, nga' a' i' daa dau tinomod do mamatai. 23 Ko' ondung haro o songulun do pinaparatu' do watu om haro'ddi o tulun do nootungan di watu om napatai'ddi, nga' okon i' ko' haro ot osorou dau do mamatai ko' okon ko' pisangod dau i tulun diri. 24 Hal nopo do miagal diri, om mositi' nod obian di tulun dot ogumu' i tulun di nakapatai'ddi, om okon i' ko' i tobpinai di tulun di napatai ot obian. 25-28 Mositi' nod intirungan di tulun dot ogumu' i tulun di nakapamatai'ddi do mantad id kototogod di koobpinayan di tulun di napatai. Om angatan nondo iyau do gumuli' do hiri'd bandar di pogintirungan, i pinogiduwon dau di gulu. Om mundorong nopo iyau do hiri do gisom dot apatai i Boyoon dot Agayo dot Imam do maso'ddi. Om katalib pondo iri om koino-ino nogindo iyau do muli'. Ondung tumongkiad iyau do mantad hiri'd bandar di pogintirungan, i pinogiduwon dau'ddi, om osolowot nondo iyau di koobpinayan di tulun di napatai om patayon nondo iyau, om iyo nopoddi om a' i' komoyon do minamatai. 29 Iti nopo toturan diti om mositi' nod tonudon dokoyu om i sinakagon dokoyu do hinonggo kou nopo do poingiyon. 30 Ondung haro o tulun do tondoson do minamatai do tulun do suwai, om milo nopo kopio do poboroson do nakasala' ko' hukuman do kapatayon do kointalang kopio i winonsoi dau do poboroson do duwo ko' lobi ko' iri o tulun do sasi'. Nga' iso-iso' nopo o tulun do sasi' om a' i' ogirot do popotopot di pinonondos diri. 31 Tulun nopo di minamatai do tulun om mositi' nod hukuman do kapatayon. Om a' i' dau milo do bayaran do tusin i hukuman do nokoontok dau'ddi. 32 Ondung haro o tulun do mogidu' do kumaa dot id honggo nopo di bandar do pogintirungan, om kada' no dokoyu potumboyoo' i tulun diri do mambayar do tusin do koulian dau dot id walai dau dot a' po apatai i Boyoon dot Agayo dot Imam. 33 Ondung poulion dokoyu iyau om ososomu' no dokoyu i pomogunan dit iyonon dokoyu. Om aiso' no o ralan do suwai do momolidang di pomogunan diri, suwai nondo ko' patayon i tulun di minamatai. 34 Kada' no kopio dokoyu sosomuo' o pomogunan di koiyonon dokoyu tu' iyoho' no o Tuhan, om poundorong oku do hiti'd pogiolitan do tulun dot Israil,” kad Tuhan.

Pongintaban 36

Tungkusan di Tongoondu' di Nakasawo

1 Om ongoi no solowot di Musa om i piro-piro boyoon do suwai i komolohingan do sompiiyon dit id suang do pinuruan do sompiiyon di Giliad. I Giliad nopo om tanak di Makir, i manangaki di Manasi. I Manasi nopo om tanak di Yusup. 2 Om boros ka diyolo', “Sinuhu' kou'd Tuhan do mangangkib di tana' dot id pogiolitan diti tulun dot Israil dot undion o ralan do mangangkib. Om sinuhu' kou nogi' dau do manahak do tana' do potungkusan di Silapihad i tobpinai dahai'ddi, dot id tangaanak dau di tongoondu'. 3 Nga' apatut id sorohon dot ondung akawin iyolo' do tongokusai di mantad id payat do suwai, om i tana' nga' aanu no di tulun do mantad id payat do suwai'ddi. Om oingkarayan nondo i tana' di pinaangkib do maan do dahai. 4 Om tontok piya di Toun do Kopogulian, i maso do kopogulian ngai' do nunu nopo o dapu' di nadagang dot id sanganu mantad di dapu', nga' iri nopo tana' di tangaanak di Silapihad do tongoondu', om asanganu kasai' no di payat do sawo diyolo', om okon nondo ko' payat dahai o kasanganu di tana',” ka diyolo'. 5 Om poboroso' nod Musa dot id tulun dot Israil iti boros do mantad id Tuhan do poingkaa, “Otopot i' i pinoboros di tulun do mantad id payat di Yusup, 6 om iri no o kapabarasan do Tuhan dot aiso' i' o kokogos di tangaanak di Silapihad do tongoondu' do mokikawin dot isai nopo i korohian diyolo', nga' mositi' no ma do tulun dit id suang do payat diyolo'. 7 Iri nopo tana' dot otungkusan do pointikid-tikid do tulun dot Israil om asanganu kasai' no di payat dau do gisom dot alaid. 8 Om pointikid-tikid do tongoondu' di kaanu do tungkusan do tana' dot id pogiolitan do payat do hiti'd Israil, om mositi' nod mokikawin do tulun dit id suang do payat dau. Om kotungkus indo o koinsanai di tulun dot Israil di tana' do komolohingan diyolo', 9 om a' i' kopingwaliu dot id payat do suwai o sanganu di tana'. Om pointikid-tikid do payat nga' kasanganu kasai' no di tana' do notungkusan diyolo' do gisom dot alaid,” ka dau. 10-11 Om pokikawin ngai' noddi i limo o tanak di Silapihad do tondu': i Mala, i Tirsa, i Hogla, i Milka, om i Noa di koobpinayan diyolo' di pinsan koinsan nogi', do tumanud di pinonuhuan do Tuhan dot id di Musa. 12 Minokikawin iyolo' di tulun do mantad id pinuruan do sompiiyon dit id suang do payat di Manasi i tanak di Yusup diri. Om asanganu kasai' iddi di payat do tapa' diyolo' i tana' do notungkusan diyolo'. 13 Om iri no ngai' o pongoturan om ponuhuan do pinatahak do Tuhan dot id bansa' dot Israil do pinolombus di Musa, do tontok di hilo'd rantai do Muab i tulun dot Israil, i hilo'd toning do Bawang do Yordan, it id hapak do bandar do Yorikou.

Ponugutan 1

Koimpuunon

1 Id suang nod buuk diti o pinotulisan do koinsanai di pinosunud di Musa dot id bansa' dot Israil di hilo' iyolo' id tana' do kowotuan, i ponong id koulayon do mantad di Bawang do Yordan. Tontok nopoddi om hilo' iyolo' id Rantai do Yordan it id somok do bandar do Sup, it id piolitan do bandar do Paran, i bandar di ponong id sampaping di nundorong diyolo', om i bandar do Topil, om bandar do Laban, om bandar do Hasirot om bandar do Disahab, o ponong id sampaping diyolo'. 2 (Hopod om iso' o tadau do koloidon do mamanau do mantad hilo'd Nuluhon do Sinai do kumaa do hilo'd Kadis Barnia do maya' di konuluhanan do pomogunan dot Idom.) 3 Tontok di tadau do koiso' di tulan do kohopod om iso' do toun di kaapat nohopod do mantad di kinosoliwanan di tulun dot Israil do mantad id pomogunan do Masir, om posunudo' no di Musa dot id diyolo' o koinsanai di pinonuhuan do Kinorohingan di Musa do poposunud dot id tulun dot Israil. 4 Tontok nopoddi om naala' nod Tuhan i Raja' Sihon, i bansa' dot Amori, i minomorinta' do bandar do Hisbon, om naala' nogi' dau i Raja' Og, i mantad hilo'd Basan, i minomorinta' do bandar dot Astarot, om Idroi. 5 Om timpuun no i Musa do poposuhut do komoyon dit oturan om i ponuhuan do Tuhan di hilo' po i tulun dot Israil id ponong id koulayon do mantad id Yordan, it id watas do Muab. Boros ka di Musa, 6 “Tontok di hilo' toko' pod Nuluhon do Sinai, om minomisunud o Tuhan i Kinorohingan toko' do poingkaa, ‘Laid kou noddi do poundorong do hiti'd nuluhon diti. 7 Om iduwon ngai' no dokoyu i kiim dokoyu om lumombus kou do mamanau do kumaa do hilo'd konulu-nuluan do pomogunan do tulun dot Amori, om hilo'd kinoiyonon dit id posorili' do kinoiyonon diri, i hilo'd Rantai do Yordan, om hilo'd konulu-nuluan, om hilo'd rantai, om hilo'd kinoiyonon di ponong id salatan, om hilo'd tisan di Rahat do Tanga'. Ongoi kou no iyon do hilo'd tana' do Kanaan do gisom do katalib di konuluhanan do Libanon om gisom do korikot di bawang dot agayo, i bawang dot Iprat. 8 Iri ngai' no i pomogunan di nakabatos ku do patahakon ku, iyoho' i Tuhan o papatahak, dot id komolohingan dokoyu: i Abraham, i Isak, om i Yakub, om potungkusan ku di sinakagon diyolo'. Ongoi kou no pomogun do hilo'd pomogunan diri,’ ka dau,” ka di Musa.

Minomili' i Musa do Piro-piro Tulun do Gompomutus

9 Boros kaddi di Musa dot id tulun dot ogumu'ddi, “Tontok di hilo' toko' pod Nuluhon do Sinai, om minoro-boros oku dokoyu do poingkaa, ‘Awagat kopio o tonggungan ku do momoyo' dokoyu dot opurimanan ku. Om a' oku no kooyit dot iso-iso' kopio oku. 10 Tu' siniliu kou do Tuhan, i Kinorohingan dokoyu do miagal dilo rombituon do hilo'd tawan kogumu'. 11 Om maha' daa om poinggumuon kou do Kinorohingan di komolohingan dokoyu, do kopiluap do piro-piro kawagu noribu o kogumuon dokoyu, om posimbayanon kou do miagal di pinabatos dau! 12 Nga' poingkukuro oku po do kooyit do tonggungan dot iyo kopio'ddi kawagat do manalasai di pogisosongkiwalan dokoyu? 13 Nga' osonong do momili' kou do piro-piro o tongokusai di kitoilaan om it obinsuhut, om it ogumu' o nopinsingilaan, do mantad id pointikid-tikid do payat, om silihon ku nogindo iyolo' do boyoon dokoyu,’ kangku. 14 Om nokotumboyo' kou i' dot osonong do wonsoyon o miagal diri. 15 Om siliho' ku noddi i tongokusai dit ongkitoilan om it ogumu' no o nopinsingilaan diri, i nongopili' dokoyu do mantad id pointikid-tikid do payat do sumiliu'd boyoon dokoyu. Om haro o boyoon do soribu o tulun, om haro o boyoon do hatus o tulun, om haro o boyoon do limo nohopod o tulun, om haro o boyoon do hopod o tulun. Om minomili' oku po do piro-piro o tulun do siniliu ku do boyoon do mongilo-ilo dot id pointikid-tikid di payat. 16 Tontok nopoddi om sinunudan ku iyolo' do poingkaa, ‘Pokinongohon no kopio dokoyu i pogisosongkiwalan dot id pogiolitan do tulun dokoyu. Om salasayon no do tumanud di pomumutus dot otulid o pointikid-tikid di haro o pogisosongkiwalan dot id pogialatan tuu dokoyu ngai' ko' id pogialatan po di bansa'd suwai di poundorong dot id rolot dokoyu. 17 Nga' kada' kou no kopio panampaping do momutus; iyoon no kopio dokoyu o pomumutus dot isai nopo o tulun. Kada' kou poddosi dot isai nopo o tulun, tu' nunu nopo it ibutus dokoyu om mantad nori dot id Kinorohingan. Ondung haro ot apangkal kopio do manalasai, om porikoton nopo dokoyu iri dot id doho', om iyoho' indo o manalasai,’ kangku. 18 Om sinunudan ku nogi' iyokoyu do koinsanai dit apatut do wonsoyon dokoyu,” ka di Musa.

Sinuhu' i Piro-Piro Gomponoluku' do Minamanau do Hilo'd Kadis-Barnia

19 Om boros ka kawagu di Musa, “Nowonsoi toko' no i pinonuhuan do Tuhan toko'. Tuminongkiad toko' di Nuluhon do Sinai om minaya' toko' di tana' do kowotuan dit agayo om i korolosi kopio di pinakayaan toko' do hilo'd konuluhanan do pomogunan do tulun dot Amori. Om soira' di nokorikot toko' do hilo'd Kadis Barnia, 20-21 om boros kangku, ‘Baino' noddi, om nokorikot kou no do hiti'd konuluhanan do pomogunan dot Amori, i patahakon do Tuhan, i Kinorohingan di komolohingan toko' dot id dati'. Ontong kou pogi' nga' hoodi' no moti', okito no dokoyu. Ongoi kou no pomogun do hilo' do tumanud di pinonuhuan do Tuhan. Kada' kou no poddosi ko' mikoduwo po o ginawo,’ kangku. 22 Nga' rikot kou po dot id doho' om boro-boros kou no do poingkaa, ‘Osonong do monuhu' toko' po do piro-piro o tulun do mongoi ponoluku' dilo pomogunan, om milo i' iyolo' do momisunud dati' ondung honggo o ralan dot osonong do wayaan toko' do kumaa'd hilo' om koilo toko' do kowoyo-woyoo' di kabandaran do hilo',’ ka dokoyu. 23 Om osonong i' do wonsoyon o miagal diri dot osorou ku iyoho', om pomili' oku noddi do hopod om duwo o tulun, do songulun o mantad id pointikid-tikid do payat. 24 Om ongoi no iyolo' do hilo'd konuluhanan do gisom do nokorikot do hilo'd Rantai dot Iskol do mongoi ponoluku' di pomogunan diri. 25 Om igit no iyolo' do tua-ua' di nanu diyolo' do mantad hilo' do pinatahak diyolo' dati' di guminuli' iyolo', om posunudo' no diyolo' dot iri nopo pomogunan do patahakon do Tuhan, i Kinorohingan toko' om oluhub kopio o tana'. 26 Nga' suminaap kou i' di pinonuhuan do Tuhan, i Kinorohingan dokoyu om minada' kou do mongoi do hiri'd pomogunan diri. 27 Om sontogod-togod kou tu' boros ka dokoyu om ‘Otogod o Tuhan dati'. Kinopolobusan nopo dau dati' do mantad id pomogunan do Masir, om maan no do tahakon dot id tulun dot Amori, om apatai toko' indo diyolo'. 28 Nokuro daa tu' mongoi toko'd hilo'? Moddosi i' iyahai, tu' iri nopo i gomponoluku' di sinuhu' dahai om minomisunud do tulun nopod hilo' om okoris om osiou ko' iyahai. Om poingiyon iyolo' dot id bandar di kitolig do korikot do hilo'd tawan kasawato'. Om haro o nokito diyolo' do tulun do hilo' dit angagayo kopio koulun,’ ka no dokoyu. 29 Nga' boros kangku do minomisunud dokoyu, ‘Kada' kou poddosi di tulun do hilo'. 30 Tu' woyoon kou i' do Tuhan i Kinorohingan dokoyu. Muhup i' iyau dokoyu do sumaap do miagal di nokito dokoyu di hilo'd Masir, 31 om di hilo'd tana' do kowotuan. Nokopuriman kou no do kinowoyo-woyoo' do Kinorohingan do minomoyo' dokoyu do kuminaa'd hiti, om ginompi' kou dau do hilo' do miagal pod songulun o tapa' do mamabo di tanak dau,’ kangku. 32 Nga' mulong pod nokoboros ku no o miagal diri dot id dokoyu nga' a' kou i' otumbayaan do Tuhan, 33 mulong piya do minogulu kasai' iyau dokoyu do mogihum do tiyonon dokoyu do momukiim. Om minogulu iyau dokoyu do potunud do ralan dokoyu, do miagal do tapui di poorigi do dongotuong, om miagal do haun di poorigi do dangadau,” ka dau.

Hinukuman do Tuhan o Tulun dot Israil

34 Om boros ka kawagu di Musa, “Norongou i' do Tuhan i boros dokoyu do sontogod-togod om kotogod noddi iyau. Om boros kaddi dau, 35 ‘Aiso' no o songulun piya dot id pogialatan dokoyu do mantad id sinakagon diti tangaraat do maso'd baino' do kosuang do hilo'd pomogunan dot oluhub o tana', i nakabatos mantad ku di taki-aki dokoyu. 36 I Kalib noo i tanak di Yopuni o koongoi do hilo'. Iyau nopo om otorodok i' dot id doho' om patahakon ku indo dot id dau om id sinakagon dau i tana' di nongoi dau homboo',’ ka dau. 37 Om otogod iddi o Tuhan dot id doho' dot iyokoyu o nokobungou, om boros ka dau, ‘Iya' piya oi Musa, nga' a' i' kosuang do hilo'd pomogunan diri. 38 Nga' pogiroton no o ginawo di Yosua i tanak di Nun, i mongunguhup diya'ddi. Tu' iyau no o boyoon do tulun dot Israil do mongoi ponolod do pomogunan diri,’ ka dau. 39 Om boros kaddi do Tuhan dot id koinsanai dati', ‘Ilo' nopo tangaanak dokoyu dit ongokoro' po, it a' po koilo dit otopot om it araat om kosuang i' do hilo'd pomogunan diri, i tangaanak di komoyon dokoyu dot angatanggayan do pisangod dokoyu. Iyolo' no ot onuan ku do pomogunan diri, om iyolo' no o kopomogun do hilo'. 40 Nga' iyokoyu nopo, om poguliai no dokoyu kawagu do hilo'd tana' do kowotuan do maya' di ralan do kumaa do hilo'd Suok dot Akaba,’ ka dau. 41 Om boros ka dokoyu do suminimbar do tontok diri, ‘Oi Musa, nokowonsoi no iyahai do dusa dot id toguang do Tuhan. Nga' baino' nopo om mongoi no iyahai sangod do tumanud di pinonuhuan do Tuhan, i Kinorohingan dot id dahai,’ ka dokoyu. Om sorompori-pori kou nopoddi do suminodia' do mongoi sangod, om minomusorou kou dot a' i' osusa' do mongoi panangod do pomogunan dit id konuluhanan. 42 Nga' boros kad Tuhan dot id doho', ‘Oduhan no iyolo' do mongoi sangod, tu' a' oku no momoyo' diyolo', om aala' indo iyolo' do pisangod,’ ka dau. 43 Om nosunudan ku i' iyokoyu di boros do Tuhan, nga' a' kou i' minamadul diri. Suminaap kou i' dau. Om oondos tomod kou do tuminakad do hilo'd konuluhanan. 44 Om soliwan noddi i tulun dot Amori di poundorong do hilo'd konuluhanan diri, do miagal pod sangkawad o moningot do ruminuba' dokoyu. Om gusao' kou nopo diyolo' do gisom do nokorikot do hilo'd Horma, om kaala' kou no do hilo'd konuluhanan do tana' dot Idom. 45 Om songihad-ihad kou poddi do mokiuhup daa do Tuhan, nga' a' no iyau minokinongou om a' minamadul dokoyu,” ka.

Piro-Piro Toun do Hilo'd Tana' do Kowotuan

46 “Om gowoi poddi om a' no milo dot a' toko' minundorong do hilo'd

Ponugutan 2

1 Om boro-boros po kawagu i Musa, “Alaid noddi om guli' toko' no om ongoi toko' no do hilo'd tana' do kowotuan, it id doindalanan do kumaa do hilo'd Suok dot Akaba, do tumanud di pinonuhuan do Tuhan. Om alaid toko' i' do minghombo do hilo'd konuluhanan do pomogunan dot Idom. 2 Om sunudai oku noddi do Tuhan do 3 laid toko' no kopio'ddi do minghombo dot id konuluhanan diri om mongoi toko' nondo do ponong id utara. 4 Om sinuhu' oku dau do momisunud dokoyu diti tituduk do poingkaa, ‘Oruhai kou no do kawaya' diti konuluhanan di pinomogunan do tulun dot Idom, i kinoiyonon di kowori-worisan dokoyu, i sinakagon di Isau. Om moddosi indo iyolo' dokoyu, 5 nga' kada' kou nogi' sangod diyolo', tu' a' oku i' manahak dokoyu do bahagi' dot ongosarangau piya di tana' diyolo'. Tu' nakatahak ku no o pomogunan dot Idom dot id sinakagon di Isau. 6 Nga' taakanon nopo om waig om koino-ino i' do bolion dokoyu do mantad id diyolo',’ ka dau. 7 Soroho' no dokoyu ondung poingkuro o Tuhan i Kinorohingan dokoyu do minamarakat dot id suang do nunu nopo i winonsoi dokoyu. Ginompi' kou i' do solinaid dokoyu do mimpanau do hilo'd tana' do kowotuan dit agayo. Om nintirungan kou dau do solinaid dit apat nohopod o toun, om nangaanu ngai' i' dokoyu o nunu nopo it apatut dokoyu'd aanu. 8 Om pamanau toko' noddi do luminombus om tongkiad toko' no di ralan di mantad id kabandaran dot Ilat om Ision-Gibir, i poingkaa do hilo'd Rahat do Napatai, om pahamadai toko' noddi do ponong id koulayon do pongid utara, do kuminaa do hilo'd tana' do kowotuan do Muab. 9 Om boros ka do Tuhan dot id doho', ‘Kada' kou pamagangau di tulun do Muab, i sinakagon di Lut, om kada' kou sangod diyolo'. Tu' nakatahak ku no diyolo' iti bandar dot Ar, om a' oku no mamahagi' dokoyu dot ongokooro' piya diti tana' diyolo',’ ka dau,” ka di Musa. 10 (Di nopo di gulu po om bansa' do tulun dit angagayo koulun, i roitan dot Imim o minomogun do hilo'd Ar. Iyolo' nopo om angaranggou, dot iyo po di tulun dot Inakim, it iso' kawagu o bansa' do tulun dit angagayo koulun. 11 Tulun nopo dot Inak om tulun dot Imim om roitan do Ropaim, nga' pomungaran nopo do tulun do Muab diyolo' om Imim. 12 Iri daa i tulun do Hori nga' hilo' nogid Idom do minomogun di gulu po, nga' nuyung iyolo' di sinakagon di Isau om pinunso diyolo' o bansa'ddi. Om sowolio' noddi di sinakagon di Isau do minomogun i pinomogunan diyolo' do miagal di tulun dot Israil di koimbagu tu' minonguyung di piro-piro pisangod diyolo' do mantad hiri'd pomogunan di pinatahak do Tuhan dot id diyolo'.) 13 Om boros ka kawagu di Musa, “Om soborong toko' noddi di Bawang do Sirid do tuminanud di pinonuhuan do Tuhan dot id dati'. 14 Tontok nopoddi om tolu no nohopod om walu' o toun do mantad di tongkiad toko' i' do hilo'd Kadis Barnia. Om oinsanan nopo i soudor do mantad id sinakagon diri do nangapatai do miontok di nokoboros mantad do Tuhan. 15 Om saapo' kasai' nopod Tuhan iyolo' do gisom do nangapatai ngai' dau iyolo'. 16 Soira' poddi di nangapatai ngai' iyolo', 17 om boro-boros no o Tuhan dot id dati' do poingkaa, 18 ‘Tadau nod baino' do mamanau kou do tumalib di watas do Muab do maya' do hilo'd bandar dot Ar. 19 Om koinsomok kou nondo do hilo'd tana' dot Amon, i pinomogunan di sinakagon di Lut. Kada' dokoyu iyolo' gangaho' om kada' kou sangod diyolo', tu' a' ku no iyokoyu bohogian dot ongokooro' piya di tana' do pinatahak ku dot id diyolo',’ ka dau,” ka di Musa. 20 (Iri nopo watas diri om nabantug nogi' do pinomogunan di tulun do Ropaim, i ngaran do bansa' di poingiyon do hilo' di gulu po. Nga' pomungaran nopod tulun dot Amon do bansa'ddi om Samsumim. 21 Iyolo' nopo om angaranggou koulun do miagal di tulun dot Inak, om ongokoris om asapou daa. Nga' patayo' no iyolo'd Tuhan om sowoli noddi i bansa' dot Amon do minomogun do hiri'd pomogunan diyolo'. 22 Om iyo nogiddi o winonsoi'd Tuhan dot id tulun dot Idom, i sinakagon di Isau, i minomogun do hilo'd konuluhanan dot Idom. Tu' pinatai'd Tuhan i tulun do Hori, om kopomogun-mogun indo i tulun dot Idom do hiri'd pomogunan diri do gisom do baino'. 23 Di nopo di gulu po om iri nopo tana' do poingompus do tisan di Rahat do Tanga' om nongoi iyono' di tulun do mantad hilo'd pulou do Krita. Om pinatai diyolo' i tulun dot Awi, i tulun mantad do hilo', om iyono' noddi diyolo' i pomogunan diri do gisom do korikot do hilo'd bandar do Gasa, i ponong id salatan.) 24 “Om boros kaddi do Tuhan di notoliban toko' o watas do Muab, ‘Baino' nopo om pamanau kou no om sumoborong i' di Bawang dot Arnon. Om paalaan ku nondo dokoyu i Sihon i raja' dot Amori, i momorinta' do hilo'd Hisbon, om potonggoyon ku i pomogunan dau. Songodon no dokoyu iyau, om iyonon no dokoyu i pomogunan dau. 25 Om mantad pod tadau baino' om popoddosion ku no ngai' dokoyu o tulun do hinonggo-honggo nopo. Gagaran ngai' nopondo do moddosi o koinsanai'd tulun do hinonggo nopo do soira' nopo do korongou iyolo' dot oroitan o ngaran dokoyu,’ ka dau,” ka di Musa.

Naala' dot Israil i Raja' Sihon

26 Om boros ka kawagu di Musa, “Om ponuhu' oku noddi do piro-piro di tulun ku do mantad hilo'd tana' do kowotuan do Kidimot do kuminaa do hilo'd di Sihon, i raja' do Hisbon, do poporomut do boros do monokiulud do poingkaa, 27 ‘Potumboyoo' no iyahai do maya' diti pomogunan nu oi Tuan. Om tumilombus nopo iyahai do mamanau om a' i' iyahai sumala' di ralan. 28 Om bolion i' dahai o nunu nopo i taakanon dot aakan dahai, om i waig dot oinum dahai. Maya' no toomod iyahai diti pomogunan nu, 29 do gisom do kosoborong iyahai di Bawang do Yordan do pakayaan do hilo'd pomogunan di patahakon do Tuhan i Kinorohingan dahai dot id dahai. Tu' iri nopo sinakagon di Isau di momogun do hilo'd Idom, om i tulun do Muab i poingiyon do hilo'd Ar om pinopotumboyo' i' dahai do minaya' di watas diyolo',’ ka. 30 Nga' a' i' pinopotumboyo' dati' i Raja' Sihon do maya' di pomogunan dau, tu' pinokodou do Tuhan i Kinorohingan dokoyu, o ginawo di Raja' Sihon, om pinologos dau i raja' do suminaap dati', gisom do naala' toko' iyau om nosolod toko' iddi i pinomogunan dau om iyon-iyonon toko' po do gisom do baino'. 31 Om boros kaddi do Tuhan dot id doho', ‘Intong pogi' nga' nakatahak ku no diya' i Raja' Sihon om i tana' do pinomogunan dau. Solodo' no ilo tana' do pinomogunan dau om momogun nod hilo'!’ ka dau. 32 Om pamanau no daa'ddi i Raja' Sihon do miwoyo' di soudor dau do minongoi sangod dati' do hilo'd somok do bandar do Yahas. 33 Nga' diri noddi do pinatahak do Tuhan i Kinorohingan toko' i raja'ddi dot id dati'. Om patayo' toko' noddi iyau, om i tangaanak dau om koinsanai di soudor dau. 34 Tontok nogiddi do sinolod om rinaag toko' o pointikid-tikid di bandar, om pinatai toko' nogi' o pointikid-tikid do tulun --- do kusai om tongoondu' do mitonggoi di tangaanak. Aiso' no o songulun piya do pinasi toko'. 35 Tayam-tayam diyolo' nga' nanu ngai' toko', om i hiri'd bandar diyolo' nga' pininganu ngai' toko' i konunu-nunuan do hiri. 36 Tuhan no, i Kinorohingan toko' o pinopokoris dati' do gisom do naanu ngai' toko' i bandar do mantad pod hilo'd Aroir, it id dompok do Rantai dot Arnon, om i bandar dit id tanga' di rantai do gisom do nokorikot do hilo'd Giliad. Om aiso' no tiso' di bandar dit ongkitolig dot a' toko' nosolod. 37 Nga' a' toko' i' minongoi insomok di watas do tulun dot Amon, ko' hiri'd tisan do Bawang do Yabok ko' hiri'd kabandaran di hilo'd konuluhanan, om i kinoiyonon do suwai di pinogoduhan do Tuhan i Kinorohingan toko' do mongoi,” ka di Musa.

Ponugutan 3

Naala' dot Israil i Raja' Og

1 Om boros ka kawagu di Musa, “Katalib nori om pamanau toko' no do kuminaa ponong id utara do poingkaa ponong id watas do Basan, om rikot no i Raja' Og i raja' do miwoyo' do koinsanai di soudor dau do minongoi panangod dati' do hilo'd somok di bandar dot Idroi. 2 Nga' boros kad Tuhan dot id doho', ‘Kada' poddosi dau, oi Musa, tu' patahakon ku i' iyau om i soudor dau, om koinsanai di tana' di pinomogunan dau dot id diya'. Wonsoyo' no dot id dau o miagal di winonsoi nu dot id di Sihon i raja' dot Amori, i minomorinta' do hilo'd Hisbon,’ ka dau. 3 Om iyo noddi o Tuhan do pinapatahak di Raja' Og om koinsanai di tulun dau dot id dati', gisom do nangapatai ngai' toko' iyolo'. 4 Om tontok iddi do nosolod ngai' toko' i kabandaran dau dot onom nohopod o bandar do koinsanai dot id watas dot Argob, i porintaon daa di Raja' Og. Aiso' no tiso' piya di bandar diri dot a' toko' nosolod. 5 Oinsanan nopo i kabandaran diri do kitolig dot akawas, om ongkiwawayaan om kisalampad do basi' do pongontiil di totobon. Nga' hiri nopod kokompungan om ogumu' i' it aiso' o tolig. 6 Insanai toko' nopo i kabandaran do minamaraag om koinsanai nopo o tongokusai om tongoondu' om tangaanak diyolo' do pinatai toko' do miagal di winonsoi toko' dot id kabandaran di porintaon daa di Raja' Sihon, i hilo'd Hisbon. 7 Om onuo' ngai' toko' nopo i tayam-tayam diyolo', om pininganu toko' i konunu-nunuan di hiri'd kabandaran diyolo'. 8 Tontok noddi do sinolod toko' i pomogunan do porintaon daa di duwo o raja' do tulun dot Amori, i hilo'd ponong id koulayon do mantad id Bawang do Yordan, do mantad hilo'd Bawang dot Arnon om gisom do korikot do hilo'd Nuluhon do Hormon. 9 (Pomungaran nopo di tulun do Sidon di Nuluhon do Hormon om Sirion, om pomungaran nod tulun dot Amori di nuluhon diri om Sonir.) 10 Om solodo' toko' no o koinsanai di tana' do pinomogunan di Og, i raja' do Basan; i kabandaran do hiri'd tana' dit apatau, om pointongkop di watas do Giliad om Basan, om gisom do nokorikot do hilo'd kabandaran do Salka om Idroi, i ponong id koulayon,” ka di Musa. 11 (I Raja' Og nopo om tulun do Ropaim dit id tohuri no kopio. Iri nopo lungun dau om watu do winonsoi, om kalaabon nopo om oruhai nod duwo o mito, om konoruo' no om apat o mito do tumanud do poninipong di koubasanan. Okito po iti do gisom piya'd baino' do hilo'd bandar do Raba, it id pinomogunan do tulun dot Amon.)

Piro-Piro Payat do Minomogun do Ponong id Koulayon do Mantad id Bawang do Yordan

12 Om boros ka kawagu di Musa, “Tontok di nasanganu toko' i pomogunan diri, om patahako' ku no di payat do Rubin om payat do Gad i watas do ponong id utara do bandar dot Aroir, it id somok do Bawang dot Arnon, om pinatahak ku diyolo' o sombohogian di konuluhanan do Giliad, om kohompit nogi' i kabandaran do hilo'. 13 Om iri no i tana' do Giliad di noolu', om koinsanai do watas do Basan, i nokoiyonon di Raja' Og do momorinta' di gulu po, om koinsanai do watas dot Argob, om patahakon ku dot id songintanga' di payat di Manasi,” ka dau. (Basan nopo om rinoitan do pomogunan do tulun do Ropaim. 14 I Yair no, i songulun do mantad id payat do Manasi o nakasanganu do koinsanai dit id watas dot Argob, i hilo'd Basan, do gisom do korikot dot id piwolitan do Gosur om Maaka. Om pungaranai no dau i kokompungan diri do pinasangai do ngaran dau, om gisom piya do baino' nga' roitan kasai' po iri do kokompungan do Yair.) 15 “Om iri nopo watas do Giliad om pinatahak ku di sinompuruan do sompiiyon di Makir, i mantad id payat do Manasi. 16 Om iri no watas do mantad hilo'd Giliad om gisom do korikot do hilo'd Bawang dot Arnon, om pinatahak ku dot id payat do Rubin om payat do Gad. Piwolitan nopo diyolo' do ponong id salatan om i piintangaan di Bawang dot Arnon, om wolit no diyolo' do ponong id utara om i Bawang do Yabok, i wolit do watas do tana' do tulun dot Amon o somputul. 17 Om ponong id kotonobon noo, om poiralad po i tana' diyolo' do gisom do korikot do hilo'd Bawang do Yordan. Iri nopo Bawang do Yordan om poingudan di Tasik Galilia do ponong id utara om lumuyung do poingkaa do hilo'd Rahat do Napatai di ponong id salatan, om poingkaa dot id guas do Nuluhon do Pisga o ponong id koulayon. 18 Tontok nogiddi do minomisunud oku diyolo' diti ponuhuan do poingkaa, ‘Nakatahak nod Tuhan i Kinorohingan toko', iti tana' do ponong id koulayon do mantad id Bawang do Yordan do maan dokoyu do pomogun-mogunan. Baino' nondo om onuwai no dokoyu do rapo-rapo do sumangod ilo soudor dokoyu, om suhuon nogindo iyolo' do sumoborong dilo Bawang do Yordan, do mogulu-gulu dilo piro-piro payat do suwai, do mongoi ponguhup diyolo' do monolod di pomogunan do maan do diyolo'd pomogun-mogunan. 19 Ilo' nopo sawo, om tangaanak om tayam-tayam dokoyu dit ogumu' om poundorongon nopo dot id kabandaran di pinatahak ku dot id dokoyu. 20 Uhupan no dokoyu i bansa' dot oiyo ko' tulun dot Israil do gisom do koundorong iyolo' do hilo'd tana' di patahakon do Tuhan dot id diyolo', i ponong id kotonobon do mantad id Bawang do Yordan, om gisom dot oonuan iyolo'd Tuhan do kosimbayanan do poingiyon do hilo' do miagal di winonsoi dau dot id dokoyu do hiti. Ongowonsoi ngai' pondo iri om sorompori-pori kou nogindo do gumuli' do hilo'd tana' di pinatahak ku dot id dokoyu,’ kangku. 21 Om boros kangku'ddi dot id di Yosua, ‘Nongokito ngai' nu no i winonsoi do Tuhan i Kinorohingan nu dot id di Sihon om id di Og, i duwo o raja'ddi. Om iyo iddi o wonsoyon do Tuhan dot id piro-piro o raja' do suwai di singolodon dokoyu o pomogunan. 22 Kada' poddosi diyolo' tu' Tuhan i' i Kinorohingan nu o mogobi' diya' do sumangod,’ kangku,” ka.

A' i Musa Porikoton do Hilo'd Kanaan

23 Om boros ka kawagu di Musa, “Tontok nopoddi om nokototos oku no kopio do suminambayang dot id Tuhan 24 do poingkaa, ‘Oi Tuhan it Agayo Kuasa', oilaan ku dot iri nopo pinokitanan nu doho' om timpuunon nogi' di wonsoyon nu dot angagayo kopio om i kongopusahan kopio. Aiso' no o ponokokinorohingan do hilo'd tawan om hiti'd tana' do milo do momonsoi do koinsanai di kopusahan di winonsoi nu. 25 Om potumboyoo' oku no do sumoborong dilo Bawang do Yordan, oi Tuhan, do mongoi intong di tana' dot oluhub do hilo'd soborong, i watas do konulu-nuluan dit olumis kopio om i Konuluhanan do Libanon,’ kangku. 26 Nga' iyokoyu i' o nokobungou gisom do kinatagadan oku'ddi do Tuhan, om a' iddi iyau suminimbar di pinokianu ku. Tu' boros kad Tuhan, ‘Ula' no! Kada' no pingroitai ino, oi Musa. 27 Ongoi nogi' do hilo'd timpak do Nuluhon do Pisga om mintong i' do ponong id utara, om ponong id salatan, om ponong id koulayon, om ponong id kotonobon. Om sonsodon no kopio it ongokito nu'd hilo', tu' a' ko no koongoi do hilo'd soborong do Yordan. 28 Tudukai no i Yosua, om pogiroton no o ginawo dau tu' iyau no o sumiliu do boyoon dilo bansa' do sumoborong dilo bawang do mongoi ponolod dilo pomogunan dit okito nu,’ ka dau. 29 Om iri noddi o kinoundarangan toko' do hiti'd rantai dit id hapak do bandar do Bait-Pior,” ka di Musa.

Ponugutan 4

Nodsuur di Musa i Tulun dot Israil do Mumboyo'

1 Boros kaddi di Musa dot id tulun dot Israil, “Tonudon ngai' no dokoyu iti toturan do potudukon ku, om angapasi kou i' om kopomogun kou do hilo'd pomogunan di patahakon do Tuhan i Kinorohingan di komolohingan dokoyu, dot id dokoyu. 2 Om kada' dokoyu ruhangai do nunu nopo iti ponuhuan ku'dti, om kada' dokoyu poingkurio' iti. Tonudon ngai' no dokoyu i ponuhuan do Tuhan i Kinorohingan, di pinatahak ku dot id dokoyu. 3 Nokokito kou i' iyokoyu di winonsoi'd Tuhan di hilo'd Nuluhon do Pior. Pinatai ngai' dau o koinsanai di tulun di tuminuku' dot id tingolig do Baal do hilo'. 4 Nga' iyokoyu nopo it otorodok dot id Tuhan i Kinorohingan dokoyu om poimpasi po kasai' do gisom do baino'. 5 Nokotuduk ku no ngai' dokoyu it oturan do miagal di pinonuhuan do Tuhan i Kinorohingan ku do wonsoyon ku. Om tonudon ngai' no dokoyu iri do hilo' kou id pomogunan di ngoyon dokoyu solodo'. 6 Tumorodok kou no kopio do tumanud diri. Om iri nondo o popointalang dot id bansa'd suwai dot ongoilo kou, om momoros nondo iyolo' do poingkaa, ‘Aralom no kopio o toilaan om ogumu' ot osuhutan do bansa' dot agayo diti,’ ka nondo diyolo'. 7 Aiso' no tiso'd bansa', do mulong piya do bansa' dot angagayo di haro o ponokokinorohingan dit id somok kopio do lohowon do tontok do mokiuhup iyolo' do koiyo do Tuhan i Kinorohingan toko'. Tu' iyau nopo om sumimbar i' dati' do tontok do mokiuhup toko' dau. 8 Aiso' no o tiso' do bansa', do mulong piya do bansa' dit agayo, do haro ot oturan do miagal diti toturan di nokotuduk ku dokoyu baino' tu' otulid. 9 Insan-insanon no om soro-sorohon no, do solinaid nopo dokoyu do poimpasi om kada' no kopio dokoyu lihuwai i nongokito dokoyu. Susuyan no dokoyu i tangaanak om i tongomanangaki dokoyu do pasal 10 di tadau do nokotimbaba' kou do Tuhan i Kinorohingan dokoyu di hilo' kou id Nuluhon do Sinai, do tontok di minoro-boros o Tuhan dot id doho' do poingkaa, ‘Timungo' ngai' no iti tulun. Tu' orohian oku do korongou iyolo' diti poboroson ku om kopinsingilo i' iyolo' do mumboyo' doho' do solinaid diyolo' do poimpasi, om tudukan indo diyolo' i tangaanak diyolo' do tumorodok do mumboyo' doho',’ ka dau. 11 Om susuyon no dot id diyolo' ondung poingkuro-kuro kou do minongoi ingkakat do hiri'd guas do nuluhon di nokulumutan do lisun dit oitom do miagal do haun dot akapal, om tontok di molob-ngolob o tapui do gisom do korikot do hilo'd tawan. 12 Om sunudan no iyolo' ondung poingkuro o Tuhan do minoro-boros dokoyu do mantad hiri'd tapui, om ondung poingkuro kou do nokorongou di boros dau do mulong piya dot a' dokoyu nokito kopio o tinan dau. 13 Sinunudan kou do Tuhan ondung nunu o wonsoyon dokoyu do pomogompi' di tumpongo do Tuhan dot id dokoyu'ddi --- iri no tu' sinuhu' dau do tumanud di Hopod ot Oturan di tinulis dau dot id duwo o kaping do watu. 14 Sinuhu' oku do Tuhan do popotuduk dot id dokoyu do koinsanai dit oturan dit apatut dokoyu do tonudon do hilo' kou id pomogunan di ngoyon dokoyu solodo' do maan dokoyu do pomogun-mogunan,” ka di Musa.

Mogodu do Tumuku' dot id Tingolig

15 Om boros ka kawagu di Musa, “Sorohon no dokoyu, do tontok di minoro-boros o Tuhan dot id dokoyu do mantad hiri'd tapui di hilo'd Nuluhon do Sinai, om aiso' i' o nokito dokoyu ondung okuro-kuro o koinan-inano' dau. 16 Iyo nopoddi, om antaan-taan no kopio do kopomonsoi kou do dusa dot i momonsoi'd tininganak do tukuon dokoyu do poingkuro nopo o kokitanan, do kusai tuu ko' tondu' po o poiyaan. 17 Ko' miagal pod nintorusan ko' tombolog, 18 ko' miagal pod nintorusan di monungkamang ko' sada' po. 19 Kada' kou kabayayat do tumuku' om modsubak dit ongokito dokoyu do hilo'd tawan, dot ilo tuu tadau ko' ilo tulan om i rombituon. Tu' momonsoi kou nopo do miagal diri om kowonsoi kou nod dusa. Tu' iri nopo om pinatahak ngai' do Tuhan i Kinorohingan dokoyu do maan do pagandasan om tukuon do bansa'd suwai. 20 Nga' iyokoyu nopo om bansa' i' di pinosoliwan do Tuhan do mantad hilo'd Masir, i kinoiyonon do noinggorit kopio kou. Tuhan no o pinoposoliwan dokoyu do mantad id pomogunan diri do silihon kou dau do tulun di songonuon dau do miagal diti baino'. 21 Om kotogod noddi doho' i Tuhan i Kinorohingan dokoyu, do nobungou dokoyu, om gisom do suminumpa' iyau dot id doho' dot a' oku no posoborongon di Bawang do Yordan do kumaa do hilo'd tana' dot oluhub, i tana' do patahakon dau dot id dokoyu. 22 Hiti nod pomogunan diti o kapatayon ku om a' oku no kosoborong dilo bawang. Nga' iyokoyu nopo om oruhai nod sumoborong do mongoi pomogun do hilo'd tana' dit oluhub. 23 Nga' antaan-taan no kopio dokoyu dot olihuan i tumpongo, om podulon no i pinogoduhan dau dokoyu, dot a' momonsoi do tingolig do poingkuro nopo o koinan-inano'. 24 Tu' Tuhan nopo, i Kinorohingan dokoyu om miagal pod tapui do monorob, om a' i' iyau orohian do haro o mongoi iyo-iyo dau. 25 Tontok piya dit alaid kou no do poundorong dot id pomogunan diri, gisom dot ongkiangaanak kou no om haro o manangaki dokoyu nga' kada' kou no kopio pomonsoi'd dusa do momonsoi'd tingolig do poingkuro nopo o koinan-inano'. Araat no kopio o miagal diri dot okito'd Tuhan, tu' iri no o popotogod kopio dau. 26 Ondung sumongkiwal kou doho', om lohowon ku no o tawan om tana' do baino' do sumiliu'd sasi' do papasala' dokoyu, om a' indo alaid om a' kou no hino dot id pomogunan diri. Om a' kou indo alaid do poingiyon dot id pomogunan dit id soborong do Bawang do Yordan. Tu' patayon ngai' kou nopondo. 27 Potompiason kou motindo do Tuhan dot id pomogunan do suwai. Om okuri' nondo ot id pogialatan dokoyu dot apasi. 28 Modsubak kou motindo do tingolig di winonsoi'd tulun, i kayu om watu do winonsoi, i tingolig dit a' kokito om a' korongou, om a' milo'd makan om a' kosingud. 29 Hilo' no motindo do mogihum kou do Tuhan i Kinorohingan dokoyu, om ondung mogihum kou dau dot aayi-ayi' kopio o ginawo dokoyu om okito i' dokoyu iyau. 30 Soira' nopo dot agangau kou, om ongosiliu ngai' i kosusaan diri dot id dokoyu om diri nondo do gumuli' kou dot id Tuhan om mumboyo' kou dau. 31 Iyau nopo om Kinorohingan dit obinsianan kopio. Om a' kou i' dau tongkiadan om a' kou patayon. Om a' i' dau olihuan i tumpongo di winonsoi dau dot id taki-aki dokoyu. 32 Ponguho-nguhot kou no do pasal di gulu-gulu po, tontok dit a' kou po nopogkosusu, di winonsoi nogi' do Kinorohingan o tulun do hiti'd pomogunan. Sorisido' no o pointongkop diti pomogunan. Haro toi o nosiliu do miagal diti kagayo do mantad di gulu po? Haro toi o nokorongou do miagal diti do mantad di gulu po? 33 Haro toi o bansa'd tulun do napasi do tontok do nokorongou do boros do Kinorohingan do moro-boros do mantad id tapui do miagal di noumbalan dokoyu? 34 Haro toi o ponokokinorohingan do nakasaap do mangangat do bansa'd tulun do lumabus do mantad id pomogunan do suwai, do siniliu'ddi dau do tulun di songonuon dau do miagal di winonsoi do Tuhan i Kinorohingan dokoyu, dot id dokoyu di hilo' kou id Masir? Nokito no kopio do mato dokoyu do pinopoimbulai iyau do sinundu om kinoris dau dit agayo kopio; om pinorikot dau o toruol om pisangadan, om minomonsoi po iyau do kongopusahan om i kongoimayaan kopio, om minomonsoi di korolosi kopio. 35 Kinapamansayan nopo do Kinorohingan do miagal diri om popointalang kopio dot iyau no o Kinorohingan om aiso' no o suwai ko' iyau. 36 Pinologos kou i' do Kinorohingan do korongou do boros dau do mantad hilo'd tawan, om milo indo iyau do monuduk dokoyu; om hiti nod pomogunan diti do pinologos kou dau do kokito di tapui dau dit olidang om minoro-boros iyau dokoyu do mantad hiri'd tapui'ddi. 37 Tu' osianan i' kopio iyau di komolohingan dokoyu, om pilio' kou noddi dau. Om iri kuasa' dau dit agayo o pinoposoliwan dau dokoyu do mantad hilo'd Masir. 38 Om tontok di minongoi kou sangod, om iyau i' o minonguyung di piro-piro bansa' dot angagayo om ongokoris ko' iyokoyu, om kaatod kou indo dau do hiri'd pomogunan diyolo', i patahakon dau dot id dokoyu. Om gisom piya'd baino' nga' iyokoyu kasai' po o sanganu do pomogunan diri. 39 Iyo nopoddi, om soro-soroho' no dokoyu, om kada' no kopio dokoyu lihuwai: Do Tuhan noo o Kinorohingan do hilo'd tawan om hiti'd pomogunan, om aiso' no o suwai. 40 Tonudon ngai' no dokoyu o koinsanai dit oturan dau di nokotuduk ku dokoyu baino', om ongosonong-sonong kou indo om ongosonong-sonong i sinakagon dokoyu. Om kotilombus kou i' do momogun-mogun do hilo'd tana' di patahakon do Tuhan dot id dokoyu, do maan do potungkusan dokoyu do gisom dot alaid,” ka di Musa.

Kabandaran do Pogintirungan do Hilo'd Ponong id Koulayon do Mantad di Bawang do Yordan

41 Om potobilango' no di Musa o tolu o bandar do hiri'd ponong id koulayon do mantad di Bawang do Yordan, 42 i pogintirungan do tulun di nakapamatai do tulun do suwai dot a' dau tinomod do minamatai, it okon ko' pisangod dau. Milo indo i tulun diri do mongoi dot id iso' di bandar diri om a' indo iyau apatai. 43 Poobion nopo di payat do Rubin om i bandar do Bisir i hilo'd kapatahan do tana' do kowotuan. Om poobion no di payat do Gad om i bandar do Ramot it id watas do Giliad, om poobion no di payat do Manasi om i bandar do Golan it id watas do Basan.

Nonuan i Tulun dot Israil dot Oturan do Kinorohingan

44 Om patahako' noddi di Musa dot id tulun dot Israil it oturan om ponudukan do Kinorohingan. 45-46 Pinatahak nopo dau diyolo' o toturan diti om di nokosoliwan no i tulun dot Israil do mantad hilo'd Masir, di hilo' no iyolo'd rantai dit id hapak do bandar do Bait-Pior; i ponong id koulayon do mantad di Bawang do Yordan. Iri nopo om id suang do watas di songonuon daa di Raja' Sihon, i bansa' dot Amori di minomorinta' do hilo'd bandar do Hisbon di gulu po. Om naala' di Musa om i tulun dot Israil i raja'ddi di nokosoliwan iyolo' do mantad hilo'd Masir. 47 Om solodo' no diyolo' i pinomogunan di Raja' Sihon om i pinomogunan di Raja' Og, i mantad hilo'd Basan, i tiso' di raja' dot Amori do poingiyon do hiri'd ponong id koulayon do mantad di Bawang do Yordan. 48 Kogoyoo' nopo do tana'ddi om mantad di bandar dot Aroir, it id disan di Bawang dot Arnon, om poingkaa ponong id utara do gisom do korikot do hilo'd Nuluhon do Sirion, i roitan do Nuluhon do Hormon. 49 Nokosuang nogi' o koinsanai do watas di ponong id koulayon do mantad di Bawang do Yordan do gisom do korikot do hilo'd Rahat do Napatai do ponong id salatan om korikot di guas do Nuluhon do Pisga.

Ponugutan 5

I Hopod o Toturan

1 Om timungo' ngai' nod Musa i tulun dot Israil om boro-boros no iyau diyolo' do poingkaa, “Oi tulun dot Israil, pokinongou ngai' kou no diti toturan do patahakon ku dokoyu do tadau'd baino'. Pinsingilaan ngai' no dokoyu iti om torodokon no kopio dokoyu do tumanud. 2 Minomonsoi o Tuhan i Kinorohingan toko' do tumpongo do hilo'd Nuluhon do Sinai, 3 dot okon nopo ko' id komolohingan toko' noo di gulu po, suwai ko' id dati' nogi' i songimpasi do dinondo. 4 Mantad nod hiri'd tapui di hilo'd timpak di nuluhon do minoro-boros o Tuhan dot id dokoyu do potimbaba' kopio. 5 Tontok nopoddi om iyoho' no o poingkakat dot id piolitan dokoyu om Tuhan, do popolombus dot id dokoyu di boros dau. Tu' minodosi kou i' di tapui gisom dot a' kou kasaap do tumakad do hiri'd timpak di nuluhon. Boros kad Tuhan, 6 ‘Iyoho' no o Tuhan i Kinorohingan dokoyu, i pinoposoliwan dokoyu do mantad hilo'd Masir, i pomogunan di kinosilihan dokoyu'd turipon di gulu po. 7 Kada' kou tuku' dot id ponokokinorohingan do suwai, suwai ko' iyoho' noo o tukuon. 8 Kada' kou pomonsoi do nunu nopo o tininganak do poiyo-iyoon di hilo'd tawan ko' i hiti'd tana', ko' i hilo'd saalom do waig dit id saalom do tana'. 9 Kada' kou podsubak do nunu nopo i rait ko' tingolig, om kada' kou tuku' dot id tingolig diri tu' iyoho' no o Tuhan i Kinorohingan dokoyu, om a' oku i' orohian do haro o mongoi iyo-iyo doho'. Tulun nopo dit araatan doho' om hukuman ku no, om hukuman ku i manangaki dau do gisom dot intolu om ingapat kopilombus o sinakagon dau. 10 Nga' pointalangon ku indo o kosianan ku dot id tulun dit osianan doho' om it otorodok do tumanud ngai' di ponuhuan ku, do gisom dot impiro-piro noribu pilombus o sinakagon dau. 11 Kada' kou pamarait do ngaran ku dot araat o kopomoroitan, tu' iyoho' nopo, i Tuhan i Kinorohingan dokoyu, om momohukum i' dot isai nopo i mamarait do ngaran ku dot araat o kopomoroitan. 12 Poinggoyoon no om pusohon no i tadau'd Sabat, om silihon nori do tadau dit olidang do tumanud di pinonuhuan do Tuhan i Kinorohingan dokoyu, dot id dokoyu. 13 Onuan ku iyokoyu dot onom o tadau do kakarajaan. 14 Nga' iri nopondo tadau di koturu' om tadau no do koundarangan di nokotobilang do maan do doho'. Tontok nopo do tadau'ddi om aiso' no o songulun piya do koino-ino do kumaraja' --- dot iyokoyu tuu ko' i tangaanak dokoyu ko' i turipon dokoyu, ko' i tayam-tayam dokoyu, ko' i bansa'd suwai di momogun-mogun dot id pomogunan dokoyu. Turipon piya dokoyu nga' poundorongon i' do miagal dokoyu. 15 Hondomo' no dokoyu do nosiliu kou i' do turipon do hilo'd pomogunan do Masir di gulu po, om iyoho' no i Tuhan i Kinorohingan dokoyu o pinoposoliwan dokoyu dot i kuasa' om i kokorisan ku dit agayo kopio o pinoposoliwan ku dokoyu. Om iri no o koponuhuan ku dokoyu do momusou kopio di tadau'd Sabat. 16 Pusohon no dokoyu i tapa' om tina' dokoyu, do tumanud di ponuhuan ku dokoyu, om osonong-sonong kou indo om alaid kou do poingiyon dot id pomogunan di patahakon ku dot id dokoyu. 17 Kada' kou pamatai. 18 Kada' kou pagampahu'. 19 Kada' kou panakau. 20 Kada' kou pasala' do tulun do suwai dot a' otopot o kapasalaan. 21 Kada' kou korohiai di sawo do kusai'd suwai. Om kada' kou korohiai di walai dau, ko' i tana' dau, ko' i turipon dau, ko' i sapi' dau ko' i kaladai dau, ko' nunu nopo i dau'd songonuon,’ kad Tuhan. 22 Iri ngai' no o toturan do Tuhan do pinatahak dau dot id dokoyu do tontok di songintimung kou do hiri'd nuluhon. Iti ngai' no o toturan do pinatahak dau, om aiso' no o suwai do tontok di minoro-boros iyau dot opuhod do mantad hiri'd tapui di mantad id haun dit akapal. Om pokikiro' nogiddi dau it oturan diri dot id duwo o kaping do watu om patahako' noddi dot id doho',” ka di Musa.

Minodosi i Tulun dot Israil

23 Om boros ka kawagu di Musa, “Tontok di notongkop do tapui i nuluhon om di nokorongou kou do boros do mantad hiri'd dotuong, om rikot ngai' no dot id doho' i molohing-lohingon om i boyoon do payat dokoyu. 24 Om boro-boros no iyolo' do poingkaa, ‘Pinopointalang dot id dahai i Tuhan i Kinorohingan do kuasa' om kagayaan dau do tontok di norongou dahai iyau do minoro-boros do mantad hiri'd tapui! Om koilo noddi iyahai do baino' do mulong piya do koponokiboro-boros o Kinorohingan do tulun nga' a' i' o tulun apatai. 25 Nga' nokuro tu' minsomok po kawagu iyahai do kapatayon? Apatai indo doti' iyahai di tapui di korolosi kopio'ddi. Om atantu' no dot angapatai toko' no do korongou toko' kawagu'd Tuhan i Kinorohingan toko' do moro-boros. 26 Haro toi o tulun do nokoumbal dot a' napatai do korongou do Kinorohingan di poimpasi do moro-boros do mantad id tapui? 27 Poguliai no kawagu, oi Musa, om pokinongohon ngai' no i poboroson do Tuhan i Kinorohingan toko'. Om pogulian nogindo do hiti'd dahai, om sunudan no iyahai do nunu nopo i pinoboros dau dot id diya', om mokinongou i' iyahai om tonudon dahai iri,’ ka diyolo'. 28 Tontok di norongou do Tuhan iri om boro-boros no iyau dot id doho' do poingkaa, ‘Nongorongou ku no i pinoboros diti tulun. Om otopot i' iri. 29 Oondos oku no do kopuriman kasai' daa iyolo' do miagal diri! Om oondos oku do momusou kasai' daa iyolo' doho' om otorodok do mumboyo' do koinsanai di pinonuhuan ku, om osonong-sonong ngai' i' daa'ndo iyolo' om i sinakagon diyolo' do gisom dot alaid. 30 Pamanau no, om suhuon no iyolo' do muli' do hilo'd kokiiman diyolo'. 31 Nga' iya' nopo, oi Musa, om mundorong nopo do hiti'd sugku' ku. Om patahakon ngai' ku indo diya' it oturan om i ponuhuan ku. Om potudukon nori dot id diyolo' om tumorodok i' iyolo' do tumanud diri do hilo' iyolo'd pomogunan di patahakon ku dot id diyolo',’ kad Tuhan. 32 Oi tulun dot Israil, tonudon no kopio dokoyu o koinsanai di pinonuhuan do Tuhan i Kinorohingan dokoyu, dot id dokoyu. Kada' dokoyu songkiwalo' o tongoiso' piya dit oturan dau. 33 Tonudon ngai' no dokoyu iri om osonong-sonong kou i' om kopomogun kasai' kou do hilo'd pomogunan di ngoyon dokoyu pomogun-mogunai,” ka di Musa.

Ponugutan 6

Ponuhuan dit Agayo Kopio

1 Om boros ka kawagu di Musa, “Iti ngai' no o toturan do pinonuhuan do Tuhan i Kinorohingan dokoyu do potudukon ku dot id dokoyu. Tumorodok kou no do tumanud do koinsanai'dti do hilo' kou id pomogunan dit oruhai no dokoyu'd aanu do maan dokoyu do pomogun-mogunan. 2 Solinaid nopo dokoyu do poimpasi om mositi' no do momusou kou'd Tuhan i Kinorohingan dokoyu, om tumorodok do tumanud do koinsanai dit oturan dau di pinotuduk ku dokoyu, om alaid kou i' do poingiyon do hilo'd pomogunan diri. Om i sinakagon dokoyu nga' apatut nogi' do momonsoi do miagal diri. 3 Soro-sorohon ngai' no kopio dokoyu i ponudukan diri om tumorodok kou no do tumanud diri! Om ongosonong-sonong kou i', om osiliu kou dot iso' o bansa' dit okoris, om kopomogun kou indo do hilo'd pomogunan di kaya' om it oluhub o tana', do miagal di pinabatos do Tuhan i Kinorohingan di komolohingan toko'. 4 Soro-sorohon no dokoyu, oi tulun dot Israil! Tuhan no, om Tuhan noo, o Kinorohingan toko'! 5 Kosianai kou nod Tuhan i Kinorohingan dokoyu do mikuwo'd aayi-ayi' o ginawo om pointalangon no dokoyu iri dot id suang do kowoyo-woyoon dokoyu, om pointalangon dot id suang do wonsoyon dokoyu. 6 Kada' no kopio dokoyu kolihuwai iti ponuhuan di pinatahak ku dot id dokoyu di tadau baino'. 7 Potudukon noti dot id tangaanak dokoyu. Piguli-gulian noti do popotuduk dot id diyolo' do hilo' kou id walai, ko' hilo'd kinoiyonon do suwai, ko' di poundorong kou, ko' di maso dokoyu do kumaraja'. 8 Poogkoson no it oturan diri dot id longon dokoyu, om poogkoson do ponong id turos dokoyu do maan do poposorou dokoyu. |HK079D.pcx|col||| I Oturan do Tuhan do pinaagkos dot id turos|6.8 9 Potulison no it oturan diri do hiri'd torigi do wawayaan do walai dokoyu om id torigi di wawayaan do tansar di walai dokoyu,” ka dau.

Mogodu do Sumongkiwal

10 Om boros ka kawagu di Musa, “Poingkuro nopo o Tuhan i Kinorohingan dokoyu do minamatos dot id komolohingan dokoyu, dot id di Abraham, om id di Isak, om id di Yakub, om bayaanon no dau do papatahak dot id dokoyu i pomogunan di kibandar dot angagayo om ongosonong diri, it okon ko' iyokoyu o minomonsoi. 11 Iri piya'ndo i kawalayan do hiri nga' nongoponu' pod dapu' dit ongosonong nga' okon i' ko' iyokoyu o pinoposuang do hiri. Om ogumu' o torobong dit okon ko' iyokoyu o minongukad om ongkitanom dot anggur om saitun dit okon ko' iyokoyu o minananom. Om soira' nopondo do kaatod kou'd Tuhan do hilo'd pomogunan diri, om haro ngai' nopondo dot id dokoyu o nunu nopo i korohian dokoyu'd mangakan. 12 Om soro-sorohon no kopio dokoyu om a' i' dokoyu olihuan o Tuhan, i pinoposoliwan dokoyu do mantad hilo'd Masir, i pomogunan di minonguripon dokoyu di gulu po. 13 Koronok kou nod Tuhan i Kinorohingan dokoyu, om sumambayang kou no dot id dau, om id dau noo, om soira' nopod mamatos kou do mikuwo'd sumpa', om mamatos kou no dot id suang nod ngaran dau. 14 Kada' kou tuku' dot id ponokokinorohingan di tukuon do tulun di hiti'd posorili' dokoyu. 15 Ondung tumuku' kou dot id ponokokinorohingan do suwai om rumikot no o kototogod do Tuhan dot id dokoyu do miagal do tapui di monorob ngai' dokoyu, tu' Tuhan nopo i Kinorohingan dokoyu om a' i' orohian do haro o mongoi iyo-iyo dau. 16 Kada' dokoyu pogumbalai o Tuhan i Kinorohingan dokoyu, do miagal di winonsoi dokoyu di hilo'd Masa. 17 Soro-sorohon no kopio dokoyu do tumorodok do tumanud do koinsanai di toturan do pinatahak do Tuhan dot id dokoyu. 18 Wonsoyo' ngai' no dokoyu i pinoboros do Tuhan dit ongotulid om ongosonong, om ongosonong-sonong kou i'. Om iyokoyu indo o kasanganu di tana' dot oluhub di pinabatos do Tuhan dot id komolohingan dokoyu. 19 Om ouyung ngai' indo dokoyu i pisangod dokoyu do miagal di pinabatos mantad do Tuhan. 20 Koimbagu nopondo, om muhot nondo i tangaanak dokoyu do poingkaa, ‘Nokuro o Tuhan i Kinorohingan toko' tu' monuhu' dati' do tumorodok do tumanud ngai' diti toturan?’ ka. 21 Om simbaron no dokoyu iyolo' do poingkaa, ‘Iyahai nopo di gulu po om nosiliu do turipon di raja' do Masir, nga' pinosoliwan i' iyahai do Tuhan do mantad hilo' dot i sinundu dau dit agayo kopio o pinoposoliwan. 22 Iyahai no kopio o nokokito do Tuhan do minomonsoi do kopusahan om i kotompurolosi kopio dot id tulun do Masir, om id raja' diyolo' om id koinsanai di pagawai di raja'. 23 Om posoliwano' no iyahai do Tuhan do mantad hilo'd Masir om angatai no iyahai dau do kuminaa'd hiti om patahako' no dau dot id dahai iti tana' do miagal di nakabatos mantad dau dot id taki-aki toko'. 24 Om suhuo' noddi iyahai do Tuhan i Kinorohingan toko' do tumorodok kopio do tumanud ngai' diti toturan dau, om momusou dau, om ondung wonsoyon toko' o miagal diri om gompion indo kasai' dau iti bansa' toko' om osimbayan toko' do momogun-mogun. 25 Om asanangan nondo dati' o Tuhan i Kinorohingan ondung otorodok toko' no do tumanud do koinsanai di pinonuhuan dau,’ kanto dokoyu,” ka di Musa.

Ponugutan 7

Tulun di Songonuon do Tuhan

1 Om boros ka kawagu di Musa, “Tuhan indo i Kinorohingan dokoyu o momoyo' dokoyu do sumuang di pomogunan dot ongoyon dokoyu pomogun-mogunai, om iyau nogi' o monguyung di piro-piro o bansa' di momogun mantad do hilo'. Om soira' nopo do mongoi kou sangod, om uyungon indo dau o turu' o bansa' dit angagayo om ongokoris do mantad ko' iyokoyu dot antang-antangan dokoyu; iri no i tulun do Hit, om Girgasi, om Amori, om Kanaan, om Poris, om Howi, om Yobus. 2 Om soira' nopondo do patahakon do Tuhan i Kinorohingan dokoyu, dot id dokoyu i piro-piro o bansa'ddi om aala' ngai' dokoyu iyolo', om oiyon no kopio dokoyu iyolo'd mamatai. Kada' kou no kopio ponokitaru' diyolo' om kada' dokoyu insianai iyolo'. 3 Om kada' kou kawin diyolo', om kada' dokoyu pologoso' o tangaanak dokoyu do mangawin dot isai nopo dot id pogiolitan diyolo'. 4 Tu' iyolo' no moti' o kabayayat do tangaanak dokoyu do tumuku' dot id ponokokinorohingan do suwai, om tumongkiad do mantad id Tuhan. Om tumogod nondo o Tuhan dot id dokoyu, om ondung wonsoyon dokoyu o miagal diri om diiri indo om diiri do patayon kou dau. 5 Iyo nopoddi, om raagon no dokoyu o koinsanai di pananaraban diyolo' do podsubak do tingolig, om mumukon nopo i torigi do watu di pokolidangon diyolo', om tagadon i tanda' di tingolig dot Asira, om tutudan ngai' i tingolig di tukuon diyolo'. 6 Wonsoyon ngai' no dokoyu o miagal diri, tu' iyokoyu nopo om Tuhan no i Kinorohingan o sanganu. Id pialatan nopo do koinsanai'd bansa'd tulun do hiti'd pomogunan, om iyokoyu no o pinili'd Tuhan do sumiliu'd tulun dau di dau kopio do songonuon. 7 Okon i' ko' kosopoho' dokoyu ko' mantad do bansa'd suwai o kinosianan om kinopomilian do Tuhan dokoyu, tu' iyokoyu no it okuri' kopio do hiti'd pomogunan. 8 Nga' nosianan i' o Tuhan dokoyu om pilio' kou noddi dau tu' orohian iyau do mamayaan di batos dau dot id taki-aki dokoyu. Om iri no o kinopomosian dau dokoyu dot i sinundu dau dit agayo kopio o pinamasi, om pinoidu' kou nogi' dau do mantad id turiponon di raja' do Masir. 9 Soro-sorohon no dokoyu, do Tuhan nopo i Kinorohingan dokoyu om iso' noo, om iyau noo o Kinorohingan, om otorodok kopio iyau. Om sulungon i' kopio dau i batos dau om pointalang iyau do kosianan dau dit aiso' o kopupuson dot id rinibuan o sinakagon do tulun dit osianan dau om it otorodok do tumanud ngai' di ponuhuan dau. 10 Nga' a' no iyau opogong do momohukum do tulun dit araatan dau. 11 Iyo nopoddi, om tonudo' no kopio dokoyu o nunu nopo i nokotuduk dot id dokoyu, om torodok kou no kopio do tumanud do koinsanai dit oturan om i ponudukan di nakatahak ku dokoyu di tadau baino',” ka di Musa.

Barakat dot id Tulun di Mumboyo'

12 Om boros ka kawagu di Musa, “Ondung mokinongou kopio kou diti ponuhuan om otorodok kou do tumanud do koinsanai'dti, om Tuhan i Kinorohingan dokoyu nga' otorodok no do mongigit di tumpongo do winonsoi dau dot id dokoyu, om pointalangan kou dau do kosianan dau do miagal di pinabatos ku dot id taki-aki dokoyu. 13 Osianan indo iyau dokoyu om barakatan kou dau, om sumapou kou indo om ogumu' o tangaanak dokoyu. Om barakatan indo dau o tumo dokoyu om kaanu kou i' do gandum om anggur, om tumau do saitun. Om barakatan kou dau gisom dot onuan kou dau do sapi' om dumba' dot ogumu'. Om patahakon ngai' nopondo dau dokoyu o koinsanai'dti barakat do hilo' kou'd pomogunan di pinabatos do Tuhan di komolohingan dokoyu do patahakon dot id dokoyu. 14 Aiso' no o bansa'd tulun do suwai do hiti'd pomogunan dot onuan dau do barakat dot ogumu' dot iyo di patahakon dau dot id dokoyu. Aiso' i' o songulun piya dot id pogialatan dokoyu ko' id pogialatan po di tayam-tayam dokoyu dot a' maganak. 15 Intirungan kou i' dau do mantad id toruol dot araat om mantad id koinsanai'd kosusaan do miagal di noumbalan dokoyu di hilo'd Masir. Nga' iri nopo pisangod dokoyu om pologoson i' dau dot oontok do koinsanai di kosusaan diri. 16 Patayon ngai' no dokoyu i bansa' di patahakon do Tuhan i Kinorohingan dokoyu dot id longon dokoyu, om kada' dokoyu iyolo' insianai. Om kada' kou tuku' dot id ponokokinorohingan diyolo' tu' iri no moti' o kapatai dokoyu. 17 Kada' dokoyu soroho' dot ogumu' o nintaban diyolo' do mantad ko' iyokoyu, om a' kou kotori' do monguyung diyolo'. 18 Kada' kou poddosi diyolo'. Sorohon nopo i winonsoi'd Tuhan i Kinorohingan dokoyu dot id raja' do Masir diri om id koinsanai di tulun dau. 19 Sorohon ngai' nopo i kosusaan dit angawagat kopio di nokito dokoyu, om i kongopusahan om i kongoimayaan di winonsoi'd Tuhan i Kinorohingan dokoyu do mikuwo'd sinundu om kokorisan dau dit agayo kopio do pinoposoliwan dokoyu. Om iyo nogiddi o wonsoyon dau dot id koinsanai di bansa' di poddosi dokoyu do baino' tu' patayon ngai' indo dau iyolo' do miagal di tulun do Masir. 20 Om gangahon nondo dau iyolo' gisom dot iri piya tulun di mogidu' do mongoi lisok nga' patayon i' do Tuhan i Kinorohingan dokoyu. 21 Kada' kou poddosi di piro-piro o bansa'ddi. Tu' Tuhan i' i Kinorohingan dokoyu o mongintirung dokoyu; iyau no o Kinorohingan dit agayo, om it apatut dokoyu'd poddosi. 22 Borinuton indo do Tuhan do monguyung i piro-piro o bansa'ddi do tontok do mongoi kou sangod. Tu' a' kou i' kopunso diyolo' dot insan-insan kopio o maso, tu' ondung iyo'dion daa om gumumu' nondo o nintorusan dot angaraat, om iri indo o sumiliu do koligagaanan dokoyu. 23 Posuangon indo do Tuhan dot id longon dokoyu i piro-piro pisangod dokoyu om tompurolosion dau iyolo' do gisom dot angapatai iyolo'. 24 Om iri ngai' i raja' diyolo' nga' patahakon i' do Tuhan dot id dokoyu. Om patayon nondo dokoyu iyolo' om olihuan nondo o ngaran diyolo'. Om aiso' no o songulun piya do kasaap dokoyu tu' patayon ngai' nopondo dokoyu o pointikid-tikid do tulun. 25 Sorobon ngai' no dokoyu i tingolig di tukuon diyolo'. Om kada' kou korohiai di tamas om i pirok di poinsokot di tingolig, om kada' dokoyu onuo' iri, tu' ondung onuon dokoyu om iri no o kapatai dokoyu, do Tuhan nopo om araatan i' kopio do tingolig. 26 Om kada' kou pongigit dot ongoiso' piya di tingolig do hiri'd walai dokoyu. Ondung mongigit kou om poingkuro nopo i nokousung diyolo' om iri no o kousung dokoyu. Karaatai kou no di tingolig diri om pakaraaton no dokoyu, tu' iri nopo om napapalan nod Tuhan,” ka di Musa.

Ponugutan 8

Tana' dot Osonong do Pomogun-Mogunan

1 Boros ka kawagu di Musa, “Tumorodok kou no do tumanud do koinsanai dit oturan do pinatahak ku dokoyu di tadau baino', om apasi kou i', om muhang- ruhang o kosopoho' dokoyu, om kopomogun kou indo do hilo'd tana' di pinabatos mantad do Tuhan dot id komolohingan dokoyu. 2 Sorohon no i kinowoyo-woyoo' do Tuhan, i Kinorohingan dokoyu do minomoyo' dokoyu dot id tindalanon dit osodu' do minaya' di tana' do kowotuan do solinaid dot apat nohopod o toun di nakatalib; om i kinowoyo-woyoo' dau do pinoporikot do kosusaan do pogumbal dau dokoyu, om oilaan i' ot id suang do ginawo dokoyu ondung tumorodok kopio kou do tumanud di ponuhuan dau. 3 Pinologos kou dau do louson, om onuwai kou nogiddi dau do manna do maan dot akanon, it a' po dokoyu om i komolohingan dokoyu noumbalan do mangakan do gulu. Kinapamansayan nopod Tuhan do miagal diri om monuduk dokoyu dot okon i' ko' taakanon noo o kapasi do tulun, suwai ko' koinsanai di boros do poboroson do Tuhan. 4 Solinaid nopo dit apat nohopod o toun om a' i' nohurak o pakayan dokoyu, om a' luminonit o lapap dokoyu. 5 Soro-sorohon no dokoyu, do Tuhan i Kinorohingan dokoyu nga' mamalapos i' do monuduk dokoyu do miagal di songulun o tapa' do mamalapos do monuduk di tangaanak dau. 6 Iyo nopoddi, om wonsoyon no dokoyu o nunu nopo i pinonuhuan do Tuhan. Tonudon ngai' no dokoyu it oturan dau, om koronok kou no dau om pusohon no dokoyu iyau. 7 Maso no do Tuhan, i Kinorohingan dokoyu do momoyo' dokoyu do kumaa do hilo'd tana' dit oluhub, i tana' dot ogumu' o bawang om palu, om tudan do waig do mantad hilo'd saalom do tana' di lumuyung do hiri'd rantai om hiri'd konulu-nuluan. 8 Om iri no o tana' di sunian do gandum om barli om anggur, om haro o tua' dot ara om tua' do delima, om guas do saitun, om ogumu' po o paha'. 9 Hilo' nopo om a' kou no koumbal do louson ko' ooyian pod nunu nopo. Watu nopod hilo' om kirolot do basi', om haro o tambaga' dot aanu dokoyu do mantad hiri'd konuluhanan. 10 Nunu nopo i kosiakanan dokoyu om haro ngai' nopo. Om mongunsikou kou nondo do Tuhan, i Kinorohingan dokoyu di tana' dit oluhub do pinatahak dau dot id dokoyu,” ka di Musa.

Mogodu do Kolihu do Tuhan

11 Boros ka kawagu di Musa, “Antaan-taan no kopio dokoyu, om a' kou i' kolihu do Tuhan, i Kinorohingan dokoyu. Kada' nod haro o tiso' dit oturan dau dot a' dokoyu tonudon, it oturan di pinatahak ku dokoyu di tadau baino'. 12 Om soira' nopondo dot angaanu ngai' dokoyu i korohian dokoyu do mangakan, om ongkoingkakat dokoyu o walai dokoyu dit olumis dot iyonon dokoyu, 13 om di koinggumu' o sapi', om dumba' dokoyu, om tamas om pirok dokoyu, om koinsanai do dapu' dokoyu'd suwai, 14 om soro-sorohon no kopio dokoyu om a' kou i' osiliu do tulun dit oondos, gisom dot olihuan dokoyu o Tuhan, i Kinorohingan dokoyu, i pinoposoliwan dokoyu do mantad hilo'd pomogunan do Masir, i pomogunan di minonguripon dokoyu di gulu po. 15 Tuhan no o minangahak dokoyu do tuminalib do hilo'd tana' do kowotuan dot agayo, i kinoiyonon do kotompurolosi kopio tu' ogumu' o tulanut di kapatai o tindukon, om ogumu' o tompoluluhu. Tontok di hilo' kou id tana' dit otuu om it aiso' o waig, om pinoimbulai i' do Tuhan o waig do mantad hiri'd tontolob do pinoinuman dokoyu do gisom do nongourudtuu kou. 16 Om tontok di hilo' kou id tana' do kowotuan om nonuan kou i' dau do manna, i taakanon dit a' insan koumbalai di taki-aki dokoyu do mangakan. Hilo' no do pinorikot dau o kosusaan dot id dokoyu do pogumbal dokoyu, om popoinsiriba' do ginawo dokoyu, om owonsoi indo dau it osonong dot id dokoyu dot atalib iri. 17 Iyo nopoddi om kada' no kopio dokoyu soroho' dot iri nopo kakayaan dokoyu om mantad i' do koporuo' om kokoriso' dokoyu. 18 Sorohon no do Tuhan i', i Kinorohingan dokoyu o minanahak dokoyu di kakayaan diri. Winonsoi pogi' dau o miagal diri nga' otorodok kasai' i' iyau dot id tumpongo di winonsoi dau dot id taki-aki dokoyu do gisom piya do baino'. 19 Kada' no kopio dokoyu kolihuwai o Tuhan, i Kinorohingan dokoyu, om kada' kou guli' do tumuku' om modsubak do ponokokinorohingan do suwai. Ondung momonsoi kou do miagal diri, om poinsanon mantad ku no iyokoyu do tadau do baino' dot atantu' no do patayon kou do Tuhan. 20 Tu' ondung a' kou otorodok do tumanud do boros do Tuhan, om patayon kou no dau do miagal di piro-piro o bansa' di pinatai dau dot antang-antangan dokoyu,” ka di Musa.

Ponugutan 9

A' Minumboyo' i Tulun dot Israil

1 Om boros ka kawagu di Musa, “Pokinongou kou no, oi tulun dot Israil! Baino' nopodti om oruhai kou no do sumoborong dilo Bawang do Yordan do mongoi pomogun do hilo'd tana' di piro-piro o bansa'd suwai dit angasapou om ongokoris ko' iyokoyu. Om bandar diyolo' nga' angagayo om kitolig di korikot do hilo'd tawan o kasawato'. 2 Om iri piya i tongoulun do hilo' nga' angaranggou om ongokoris; iyolo' nopo om angagayo koulun, om nokorongou kou nogi' dot aiso' no o songulun piya do kasaap diyolo'. 3 Nga' oilaan indo dokoyu do baino', do mogulu dokoyu o Tuhan, i Kinorohingan dokoyu, do miagal po di tapui do monorob. Alaon indo do Tuhan iyolo' dot antang-antangan dokoyu, om ouyung indo dokoyu iyolo' om oruhai dokoyu iyolo' dot apatai do miagal di nakabatos do Tuhan. 4-5 Om ouyung nopondo iyolo' do Tuhan, i Kinorohingan dokoyu, do mantad id dokoyu, om kada' kou pomusorou do kinapaatadan nopod Tuhan dokoyu do hilo' do mongoi panganu di tana'ddi om i kosonongo' dokoyu om i kosorupayan dokoyu do kaanu'ddi. Tu' a' i' kopio iyo'ddi, nga' nuyung pogi' do Tuhan i tongobansa'ddi do mogobi' dokoyu nga' i karaato' diyolo' o kinoponguyungan. Kapalagasan nopod Tuhan dokoyu do mongoi panganu di tana' do pinomogunan diyolo' nga' mamayaan o Tuhan di pinabatos dau dot id taki-aki dokoyu, i Abraham, om i Isak om i Yakub. 6 Kotumbayaai kou no kopio do kapatahakan nopod Tuhan dot id dokoyu di tana' dot oluhub diri om okon i' ko' i kosorupayan dokoyu do kaanu'ddi. Tu' iyokoyu nopo om bansa' i' dit ongokodou o ginawo. 7 Kada' dokoyu kolihuwai i winonsoi dokoyu di pinopotogod do Tuhan, i Kinorohingan dokoyu, di hilo'd tana' do kowotuan. Tu' mantad nopo di tadau do suminoliwan kou do mantad hilo'd Masir om gisom do nokorikot do tadau di kinorikatan dokoyu'd hiti, om a' kou no impiro-piro saap do Tuhan. 8 Tontok piya di hilo'd Nuluhon do Sinai nga' minomonsoi kou i' di katagadan do Tuhan, gisom do patayon kou daa'ddi do Tuhan. 9 Tontok nopoddi om tuminakad oku do hiri'd timpak do nuluhon diri do minongoi ramit di duwo o kaping do watu do pinotulisan di tumpongo do Tuhan dot id dokoyu. Om minundorong oku do hiri do solinaid dot apat nohopod o tadau om apat nohopod o totuong dot a' minakan om a' mininum. 10 Om patahako' noddi do Tuhan dot id doho' i duwo o kaping do watu, i tinulisan do longon kopio dau o minonulis, do koinsanai di pinoboros dau dot id dokoyu do mantad hiri'd tapui do tontok di songintimung kou do hiri'd guas di nuluhon. 11 Om katalib poddi ot apat nohopod o tadau om apat nohopod o totuong om patahako' nogiddi do Tuhan dot id doho' i duwo o kaping do watu, i pinotulisan dau di tumpongo'ddi. 12 Katalib poddi iri om boro-boros no o Tuhan dot id doho' do poingkaa, ‘Ruhuk nogi' kopio do hilo'd siba', tu' ilo nopo tulun dot ogumu' di winoyo' nu do suminoliwan do mantad hilo'd Masir om nokowonsoi no dot araat. Nakasansala' no iyolo' do mantad di pinonuhuan ku diyolo', om pomonsoi nogiddi iyolo' do tingolig do tukuon diyolo',’ ka dau. 13 Om minoro-boros po o Tuhan dot id doho' do poingkaa, ‘Oilaan ku no o kokodoho' do ginawo do tongoulun diti. 14 Om kada' no umbal do mogodu doho'. Tu' nokopomusorou oku no do mamatai diyolo', om aiso' nondo o tongosongulun piya do kohondom diyolo'. Om iya' nondo o silihon ku do tapa' dot iso' o bansa' dit agayo om ongokoris ko' mantad diyolo',’ ka dau. 15 Om ruhuk oku noddi di nuluhon do poingigit ku i duwo o kaping do watu do pinotulisan di tumpongo. Om molob-ngolob poo o tapui do hiri'd nuluhon. 16 Om kokito ku no do notolibambanan no dokoyu i ponuhuan di pinatahak do Tuhan, i Kinorohingan dokoyu, dot id dokoyu om nokowonsoi kou'd dusa dot id Tuhan, tu' minomonsoi kou i' do tingolig di tamas do winonsoi di pinoiyo-iyo do sapi'. 17 Om tontok noddi do pinodumpau ku i duwo o kaping do watu'ddi dot id toguang dokoyu do gisom do nomumuk. 18 Om ongoi oku poddi kawagu otud dot id toguang do Tuhan do hiri'd timpak di nuluhon diri dot apat nohopod o tadau om apat nohopod o totuong do koloido' dot a' minakan om a' mininum. Winonsoi ku pogi' o miagal diri nga' minomonsoi kou i' do dusa dot id toguang do Tuhan om pinopotogod kou dau. 19 Moddosi oku no kopio di kototogod do Tuhan dit a' ogina-gina' tu' gisom do patayon kou daa'ddi dau. Nga' pinokinongou oku po kawagu do Tuhan. 20 A' no daa ogina-gina' o kotogodo' do Tuhan di Harun do gisom do patayon no daa do Tuhan i Harun. Om iri no o kinasambayangan ku do bagi' di Harun do tontok diri. 21 Om ngoyo' ku no i winonsoi dokoyu di miagal-agal do sapi'ddi, i tamas do winonsoi, om pataamo' ku no iri do hiri'd tapui. Om mumuko' ku noddi om tutuo' ku no do gisom do noutok dot iyo po di pupuk, om pataamo' ku nogiddi do hiri'd palu di lumuyung do mantad hiri'd nuluhon. 22 Tontok di hilo' kou id Tabira, om hilo'd Masa om hilo'd Kibrot Taawa, om pinotogod i' dokoyu o Tuhan, i Kinorohingan dokoyu. 23 Om tontok di sinuhu' kou dau do mamanau do mantad hilo'd Kadis Barnia do mongoi panganu di tana' do patahakon dau dot id dokoyu, om diri nga' suminongkiwal kou i' di pinonuhuan dau. A' kou minogondos dau om a' kou minumboyo' di pinoboros dau. 24 Mantad poddi nokotutun oku i' dokoyu om a' kou no impiro-piro saap do Tuhan. 25 Om otud oku noddi dot id toguang do Tuhan do solinaid dot apat nohopod o tadau om apat nohopod o totuong, tu' oilaan ku no kopio dot iso-iso' no o ginawo dau do mamatai daa dokoyu. 26 Om sambayang oku noddi dot id dau do poingkaa, ‘Oi Tuhan it Asawat Kopio, kada' patayo' iti tulun nu, i tulun nu di pinasi nu om i pinosoliwan nu do mantad hilo'd Masir, dot i kinoris om i sinundu nu dot agayo o pinoposoliwan. 27 Hondomo' no i susuhuon nu, i Abraham, om i Isak, om i Yakub, om kada' ontong dilo kokodoho' do ginawo, om kangaraato' om dusa do tulun diti. 28 Tu' ondung patayon nu iti tongoulun diti om haro nondo o pounayan di tulun do Masir do mimboros dot a' ko nokogoos do pinoporikot dilo tulun nu do hilo'd tana' di pinabatos nu dot id diyolo'. Momoros nondo iyolo' do kinoposoliwanan nu nopo di tulun nu om pokoyoon nu do hilo'd tana' do kowotuan, om apatai nu indo iyolo' tu' araatan ko i' diyolo'. 29 Nga' soroho' no, dot okon toi ko' iti nogi' i tulun di pinili' nu do silihon nu do tulun nu om i pinosoliwan nu do mantad hilo'd Masir, dot i sinundu nu om i kinoris nu dot agayo o pinoposoliwan?’ kangku,” ka di Musa.

Ponugutan 10

Rinamit Kawagu di Musa i Hopod ot Oturan

1 Om boros ka kawagu di Musa, “Om boros kaddi do Tuhan dot id doho', ‘Ongoi no pomonsoi do duwo o kaping do watu do sangkapon do manganu om wonsoyon i' do miagal dit id gulu, om momonsoi nod kaban do poiyanan diri. Om mongoi nogindo rapou doho' do hilo'd timpak dilo nuluhon. 2 Om tulisan ku nogindo o hiri'd duwo o kaping do watu'ddi do miagal di pinotulis ku dot id watu di binabak nu. Om otulisan pondo om mositi' no do poopion dot id suang di kaban,’ ka dau. 3 Om pomonsoi oku noddi dot iso' o kaban, do kayu di roitan dot akasia o winonsoi ku, om pomonsoi oku do duwo o kaping do watu do miagal dit id gulu, om igitai ku nori do hiri'd timpak di nuluhon. 4 Om tulisai noddi do Tuhan i duwo o kaping do watu'ddi do miagal di boros do pinotulis dau di tinsan i', iri no i Hopod ot Oturan di pinatahak dau dot id dokoyu do tontok di norongou dokoyu iyau do minoro-boros do mantad hiri'd tapui do tontok di songintimung kou do hiri'd guas di nuluhon. Om patahako' no do Tuhan dot id doho' i watu'ddi. 5 Om ruhuk oku noddi di nuluhon. Om iri no duwo o kaping do watu om pinoopi' ku do hiri'd suang di kaban di winonsoi ku do miagal di pinonuhuan do Tuhan dot id doho', om hiri noddi kasai' i watu'ddi do gisom do baino',” ka di Musa. 6 (Om pamanau no i tulun dot Israil do mantad hiri'd torobong do tulun do Yaakan om pakayaai no diyolo' do hilo'd Mosira. Om hilo' nod Mosira o kinapatayon om pinamalabangan di Harun. Om iri noddi i tanak dau, i Iliasar, o suminowoli dau do suminiliu dot imam. 7 Om mantad nod hilo' om pakayaai no diyolo' do hilo'd Gudgod om hilo'd Yotbata, i tana' dot osima' do waig. 8 Om hiri nod timpak di nuluhon diri do pinotobilang do Tuhan o piro-piro o tongokusai do mantad id payat do Liwi do momogompi' di Kaban do Tumpongo, om sumiliu dot imam do momonsoi'd karaja dau, om popoboros do barakat dot id suang do ngaran do Tuhan. Gisom piya do baino' nga' iri kasai' po o karaja' di tulun do Liwi. 9 Iri no ot a' kinoonuan di payat do Liwi do bahagi' do tana' do maan do tungkusan do miagal di payat do suwai, tu' naanu nopo diyolo' do ponokotungkusan om i kinosilihan diyolo' dot imam do mogobi-obi'd Tuhan, i kaanu do bahagi' di porsombahan do patahakon dot id Tuhan, do miagal di pinabatos do Tuhan, i Kinorohingan dokoyu.) 10 “Minundorong oku do hiri'd timpak di nuluhon do solinaid dot apat nohopod o tadau om apat nohopod o totuong do miagal di winonsoi ku di koinsan i'. Om pinokinongou oku i' kawagu do Tuhan om nakaakun iyau dot a' mamatai dokoyu. 11 Om suhuo' oku noddi dau do mongoi pomoyo' dokoyu, om aanu i' dokoyu i pomogunan do nakabatos dau do patahakon dot id komolohingan dokoyu,” ka di Musa.

I Pokionuon do Kinorohingan

12 Om boros ka kawagu di Musa, “Om dinondo no, oi tulun dot Israil, om pokinongou kou no diti pokionuon do Tuhan, i Kinorohingan dokoyu, do mantad id dokoyu: Sambayang kou no dot id Tuhan, i Kinorohingan dokoyu, om wonsoyon ngai' no dokoyu i ponuhuan dau. Kosianai kou no dau, om sumambayang kou no dot id dau do mikuwo'd aayi-ayi' o ginawo om pomusorou dokoyu. 13 Om tumorodok kou no do tumanud do koinsanai di ponuhuan dau. Om patahakon ku dokoyu iti do tadau baino' do maan do koinsanangan dokoyu. 14 Ilo' piya tawan dit asawat kopio nga' Tuhan i' o sanganu. Om iti tana', om koinsanai di hiti nga' iyau nogi' o sanganu. 15 Nga' agayo i' kopio o kosianan do Tuhan di komolohingan dokoyu gisom do pinili' kou dau do mantad id pogialatan do koinsanai'd bansa'. Om iyokoyu kasai' po o tulun di nopili' dau. 16 Iyo nopoddi, om mantad do baino', om mositi' no do tumorodok kou dot id Tuhan, om kada' kou nondo kokodou o ginawo. 17 Tu' Tuhan nopo, i Kinorohingan dokoyu om id sawat i' ko' mantad do toinsanan o ponokokinorohingan om agayo o kuasa' dau ko' mantad do koinsanai'd kuasa'd suwai. Iyau nopo om Kinorohingan dit agayo om okoris, om apatut no do mumboyo' ngai' dau. Iyau nopo om a' i' manampaping om a' rumamit do ponisip. 18 Om antaan-taan i' kopio dau, om otulid indo o wonsoyon dot id tangaanak dit aiso' o molohing om id tongoondu' di nopuadan. Om osianan i' iyau di tulun do bansa'd suwai di poinsugku' do tulun toko' do momogun-mogun, tu' onuan i' dau iyolo' do taakanon om pakayan. 19 Iyo nopoddi om pointalango' no dokoyu o kosianan dokoyu dot id tulun do sompogunan diri tu' iyokoyu nga' sompogunan i' do hilo'd Masir di gulu po. 20 Umboyo' kou nod boros do Tuhan, i Kinorohingan dokoyu, om sumambayang kou no dot id dau, om id dau noo. Kotorodok kou no dot id dau. Om mamatos kou nopo do mikuwo'd sumpa' om mositi' no dot id suang no do ngaran dau. 21 Royohon no iyau, tu' iyau noo o Kinorohingan dokoyu, om nokito no dokoyu o koinsanai di nongowonsoi dau dot id dokoyu di kongopusahan kopio. 22 Tontok di minongoi do hilo'd Masir i taki-aki dokoyu di gulu po om turu' no iyolo' nohopod o tulun do koinsanai. Nga' baino' noddi om pinoinggumu' kou do Tuhan, i Kinorohingan dokoyu do miagal dilo rombituon do hilo'd tawan kogumu',” ka di Musa.

Ponugutan 11

Kogoyoo' do Tuhan

1 Om boros ka kawagu di Musa, “Kosianai kou nod Tuhan, i Kinorohingan dokoyu, om tumorodok kasai' kou no do tumanud do koinsanai dit oturan dau. 2 Sorohon no dokoyu do tadau'd baino' i nongoilaan dokoyu do pasal do Tuhan do mantad id nongopurimanan dokoyu. Tu' iyokoyu no kopio i nokopuriman diri om okon i' ko' i tangaanak dokoyu. Nokito no dokoyu i kogoyoo' do Tuhan om i kokoriso' dau om i sinundu dau, 3 om i kongopusahan do winonsoi dau. Om nokito dokoyu i winonsoi dau dot id raja' do Masir om id pointongkop do pomogunan do raja'ddi. 4 Nokito nogi' dokoyu ondung poingkuro o Tuhan do minomunso di soudor do Masir do mogitonggoi-tonggoi di kuda' om i korita'-kuda' diyolo', tu' linondod dau iyolo' do hilo'd Rahat dot Aragang do tontok di minomogusa' daa iyolo' dokoyu. 5 Om noilaan dokoyu i winonsoi do Tuhan dot id dokoyu di hilo' kou pod tana' do kowotuan, dit a' kou po nokorikot do hiti. 6 Om ahandaman i' dokoyu i winonsoi do Tuhan dot id di Datan om id di Abiram, i tangaanak di Iliab, i mantad id payat do Rubin. Tu' iyolo' nopo sanganak-anak om tinolon do tana' di minipitas, do mogitonggoi-tonggoi di kiim diyolo' om i susuhuon diyolo' om i tayam-tayam diyolo'. 7 Iyokoyu no kopio o nokokito do koinsanai di nongosiliu di koimayaan kopio do winonsoi'd Tuhan,” ka di Musa.

Barakat do Tulun di Mumboyo' om Kousungan do Tulun dit Amu' Mumboyo'

8 Om boros ka kawagu di Musa, “Tumorodok kou no do mumboyo' do koinsanai di ponuhuan di pinoboros ku dokoyu di tadau baino'. Om kosoborong kou indo di bawang om kosuang kou di pomogunan dit oruhai no dokoyu'd oiyon. 9 Om alaid kou indo do momogun-mogun do hilo'd pomogunan di kaya' om it oluhub o tana', i pinabatos mantad do Tuhan do patahakon dot id komolohingan dokoyu om id sinakagon diyolo'. 10 Ilo' nopo tana' di rikoton dokoyu do maan dokoyu'd pomogun-mogunan om a' i' miagal di pomogunan do Masir, i hilo'd kinoundorongon dokoyu di gulu po. Hilo' nopod Masir om soira' nopo do mananom kou do gandum om ohuyan kou po do momuwaig di tana'. 11 Nga' ilo' nopo tana' dot ongoyon dokoyu pomogun-mogunai om tana' do konuluhanan om rantai, i tana' dit opiyopos kasai' do rasam. 12 Tuhan i', i Kinorohingan dokoyu o migompi' do tana'ddi do tikoompus do toun. 13 Iyo nopoddi, om tumorodok kou no do tumanud di ponuhuan di pinoboros ku dokoyu di tadau baino'. Kosianai kou no do Tuhan, i Kinorohingan dokoyu om sumambayang kou no dot id dau do mikuwo'd aayi-ayi' o ginawo om pomusorou dokoyu. 14 Ondung momonsoi kou do miagal diri om pasandatan indo do Tuhan do rasam i tana' dokoyu do tontok di kararasaman, do tontok di dongkaamatan dokoyu, om tontok di tumimpuun kou'd mananom. Om haro indo o gandum, om waig dot anggur, om tumau do saitun dokoyu. 15 Om haro o sakot do kanon di tayam-tayam dokoyu. Om haro ngai' nopo dot id dokoyu i taakanon di korohian dokoyu. 16 Kada' kou nogi' kapalid do gisom do tumolikud kou'd Tuhan, om tumuku' kou nondo om modsubak kou do ponokokinorohingan do suwai. 17 Ondung momonsoi kou do miagal diri om otogod nondo o Tuhan dokoyu. Om a' nondo dau parasamon, om tana' nopondo dokoyu om adalaan no kotuu gisom dot a' no sumuni o totonomon. Om a' pondo alaid om angapatai kou nod hilo' do mulong piya daa do tana' iri dot osonong, i tana' do patahakon do Tuhan dot id dokoyu. 18 Soro-sorohon no kasai' dokoyu iti ponuhuan diti, om podulon no kopio dokoyu. Om pokogoson noti dot id longon dokoyu om pokogoson do ponong id turos dokoyu om ahandaman indo dokoyu. 19 Om potudukon noti ponuhuan diti dot id tangaanak dokoyu. Piguli-gulian no dokoyu do monusui o ponuhuan diti do tontok do poundorong kou do hilo'd walai, om di maso dokoyu dot id kinoiyonon do suwai, om di maso dokoyu do poundorong om di maso dokoyu do kumaraja'. 20 Potulison noti ponuhuan diti do hiri'd torigi di wawayaan do walai om id torigi di wawayaan do tansar do walai dokoyu. 21 Om alaid kou indo di tangaanak dokoyu do momogun-mogun do hilo'd tana' di pinabatos do Tuhan, i Kinorohingan dokoyu dot id komolohingan dokoyu. Om hilo' kou nondo do momogun-mogun do solinaid po do hino ilo tawan dot id sawat diti tana'. 22 Tumorodok kou no do tumanud do koinsanai dit oturan di pinatahak ku dokoyu: Kosianai no do Tuhan, i Kinorohingan dokoyu, om wonsoyon ngai' no dokoyu i pinonuhuan dau, om tumorodok kou no dot id dau. 23 Om uyungon indo dau o koinsanai di bansa'd suwai do tontok do ngoyon dokoyu iyolo' songodo', om kopomogun kou i' do hilo'd tana' di piro-piro o bansa'd tulun dit angagayo om ongokoris ko' iyokoyu. 24 Om oinsanan nopondo i tana' dit oulakan dokoyu dot asanganu dokoyu. Kogisomon nopondo do tana' dot aanu dokoyu om mantad hilo'd tana' do kowotuan di ponong id salatan om gisom do korikot do hilo'd Konuluhanan do Libanon do ponong id utara, om mantad hilo'd Bawang dot Iprat do ponong id koulayon om gisom do korikot do hilo'd Rahat do Tanga' do ponong id kotonobon. 25 Aiso' nondo o songulun piya do kasaap dokoyu. Tu' hinonggo nopo o ngoyon dokoyu dot id pomogunan diri, om Tuhan no, i Kinorohingan dokoyu o momorolosi ngai' di tulun do gisom do moddosi iyolo' dokoyu do miagal di pinabatos mantad do Tuhan. 26 Tadau nopod baino' om pologoson ku nopo iyokoyu do momili' ondung barakat o pilion dokoyu ko' iri po i kousungan --- 27 barakat nopo o pilion dokoyu om tumorodok kou no do tumanud di ponuhuan do Tuhan, i Kinorohingan dokoyu, i pinoboros ku dokoyu di tadau baino'. 28 Nga' kousungan no ot aanu dokoyu ondung a' kou no otorodok do tumanud di ponuhuan diri, om sumansala' kou no di ponuhuan, om tumolikud kou nogindo doho' do mongoi sambayang dot id ponokokinorohingan do suwai dit a' dokoyu insan tukuo' do sumambayang. 29 Soira' nopondo do porikoton kou do Tuhan do hilo'd pomogunan di ngoyon dokoyu pomogun-mogunai, om poboroson no i barakat do mantad hiri'd timpak di Nuluhon do Gorisim om iri no i kousungan om poboroson do mantad hiri'd timpak di Nuluhon dot Ibal. 30 (Iti nopo duwo o nuluhon diti om hilo' goduwo id sampaping ponong id kotonobon do mantad id Bawang do Yordan, i hilo'd watas do tulun do Kanaan di poingiyon do hilo'd Rantai do Yordan. Niyonon nopo diyolo' om ponong id kotonobon om a' i' osodu' no do mantad di koguasan do kayu di tiiyonon do sumambayang do hilo'd Mori, it id somok di bandar do Gilgal.) 31 Oruhai kou no do sumoborong di Bawang do Yordan do mongoi pomogun-mogun do hilo'd tana' di patahakon do Tuhan, i Kinorohingan dokoyu, dot id dokoyu. Om soira' nopondo dot osolod dokoyu i tana'ddi om di kopomogun kou'd hilo', 32 om tonudon no kopio dokoyu o koinsanai dit oturan di pinatahak ku dokoyu di tadau baino',” ka di Musa.

Ponugutan 12

Iso' Noo o Tiyonon do Sumambayang

1 Om boros ka kawagu di Musa, “Pokinongoho' ngai' no dokoyu o koinsanai diti toturan dit apatut dokoyu do tonudon do solinaid dokoyu do momogun-mogun do hilo'd tana' di patahakon do Tuhan, i Kinorohingan di tukuon di komolohingan dokoyu, dot id dokoyu. 2 Korikot kou nopondo do hilo'd pomogunan diri om raagon ngai' no dokoyu i tiyonon do tulun do modsubak di ponokokinorohingan diyolo' di hilo'd konuluhanan dot akawas, om hiri'd konulu-nuluan, om it id sahau do koguasan do kayu dit ongokohob o tuntu. 3 Huyason ngai' no dokoyu i pananaraban do podsubak do tingolig diyolo', om babakon no i torigi'd watu di pokolidangon diyolo' di pinoodsuk diyolo'. Om sorobon ngai' no dokoyu i ponokokinorohingan diyolo', i roitan dot Asira, om mumukon ngai' no i tininganak diyolo', om a' indo osubak kawagu i ponokokinorohingan diri dot id kinoiyonon diri. 4 Kada' kou sambayang dot id Tuhan, i Kinorohingan dokoyu do miagal do kowoyo-woyoo' do tulun diri do sumambayang dot id ponokokinorohingan diyolo'. 5 Mantad nopo do koinsanai di watas do pomogunan di payat dot Israil om pilion indo do Tuhan o tiso' o koiyonon do tulun toko' do sumambayang dot id Tuhan. 6 Om hilo' kou nondo do papatahak do porsombahan di sorobon om i porsombahan do suwai di sumbolion, om i porsombahan dokoyu di sompihopod, om i porsombahan dokoyu do suwai om i porsombahan dokoyu do pamayaan di batos dokoyu do mikuwo'd sumpa' dot id Tuhan, om i porsombahan do patahakon do tumanud do kagaanan do ginawo, om i tanak do sapi' om dumba' om kambing dokoyu dit id gulu kosusu. 7 Hilo' nod toguang do Tuhan, i Kinorohingan dokoyu do kanon dokoyu om i sompiiyon dokoyu o koinsanai di hasil do karaja' dokoyu do mikuwo'd otood o ginawo tu' binarakatan i' iri do Tuhan. 8 Om soira' nopondo dot orikot o maso'ddi om kada' kou no pomonsoi do miagal diti wonsoyon dokoyu do dinondo. Tu' gisom piya do baino' nga' maso po dokoyu do sumambayang do tumanud do kowoyo-woyoo' di korohian dokoyu. 9 Tu' a' kou po nokorikot do hilo'd tana' di patahakon do Tuhan, i Kinorohingan dokoyu, dot id dokoyu, i kinoiyonon dot aiso' o koligagaanan do momogun-mogun. 10 Om soira' nopondo do kosoborong kou di Bawang do Yordan, om pologoson kou indo do Tuhan do kasanganu om kopomogun-mogun do hiri'd pomogunan diri. Om iyau no o mongintirung dokoyu do mantad id koinsanai do pisangod dokoyu om osimbayan kou indo do momogun-mogun do hiri om aiso' o koligagaanan dokoyu. 11 Momili' indo o Tuhan do tiso' o tiyonon do sumambayang dot id dau. Om mositi' no do pootodon dokoyu do hilo' o koinsanai di pinonuhuan ku dokoyu: i porsombahan dokoyu di sorobon, om i porsombahan do suwai di sumbolion, om porsombahan dokoyu do sompihopod om i porsombahan dokoyu'd suwai, om i porsombahan di pinotobilang dokoyu, i nakabatos dokoyu do patahakon dot id Tuhan. 12 Kumotood kou no dot id toguang dau do hiri'd kinoiyonon diri do mogiwoyo-woyo' di tangaanak dokoyu, om i susuhuon dokoyu, om i tulun do Liwi di poingiyon dot id kabandaran dokoyu; hondomon no dokoyu dot iri nopo tulun do Liwi om aiso' i' o tana' do diyolo' kopio'd songonuon. 13 Kada' dokoyu patahako' i porsombahan dokoyu do hinonggo nopo o kinoiyonon di pilion dokoyu. 14 Mositi' no do patahakon dokoyu iri dot id kinoiyonon di tontuon do Tuhan, dot id watas do tiso' di payat dokoyu. Hilo' noo o patahakan dokoyu di porsombahan di sorobon om hilo' o tiyonon dokoyu do momonsoi do koinsanai di pinonuhuan ku dokoyu. 15 Nga' koino-ino kou i' do monumbali' om mangakan di tayam-tayam dokoyu do hinonggo nopo o kinoiyonon dokoyu. Om mangakan kou nopo do songkuro nopo o kogumuon do tumanud di patahakon do Tuhan dot id dokoyu. Oinsanan kou nopo, dot it olidang ko' it a' olidang dot id pagantangan do tugama' do koino-ino do mangakan diri do miagal nod mangakan kou do tonsi do paus om tambang. 16 Nga' kada' no kopio dokoyu kano' i raha' di tayam-tayam diri. Paawason no dokoyu iri do hiri'd tana' do miagal do waig. 17 Kada' dokoyu kano' o nunu nopo di patahakon dokoyu dot id Tuhan, dot id kinoiyonon dokoyu: dot iri po tuu i porsombahan do sompihopod di gandum dokoyu ko' i waig dot anggur, ko' i tumau do saitun, ko' iri po tanak do sapi' om dumba' dokoyu dit id gulu kosusu, ko' i porsombahan do pamayaan di nakabatos dokoyu do mikuwo'd sumpa' dot id Tuhan, ko' i porsombahan dokoyu do tumanud do kagaanan do ginawo --- om nunu nopo o porsombahan do suwai. 18 Pangakanan nopo dokoyu'ddi om hiri nod kinoiyonon do sumambayang di tontuon do Tuhan, i Kinorohingan dokoyu. Mangakan nopoddi om iyokoyu om i tangaanak dokoyu, om i susuhuon dokoyu om i tulun do Liwi di poingiyon dot id kabandaran dokoyu. Om kumotood ngai' kou no do hiri kou id kinoiyonon diri dot i nongowonsoi dokoyu o kataadan. 19 Om soro-sorohon dokoyu dot a' mangada-ada' di tulun do Liwi do solinaid dokoyu do poingiyon dot id pomogunan diri. 20 Soira' nopondo do poinggoyoon do Tuhan, i Kinorohingan dokoyu i watas dokoyu, do miagal di nakabatos mantad dau om koino-ino kou no do mangakan do daging do soira-ira' nopo do tumanud do korohian dokoyu. 21 Ondung adalaan kosodu' i kinoiyonon di tinantu' do tiyonon do sumambayang, om koino-ino kou i' do monumbali' do sapi' om dumba' ko' kambing di nakatahak do Tuhan dot id dokoyu do honggo nopo o kinoiyonon do soira-ira' nopo dot orohian kou. Om koino-ino kou i' do mangakan di daging diri dot id walai dokoyu do miagal di nokosunud ku dokoyu. 22 Isai nopo o tulun, dot olidang tuu ko' amu' dot id pagantangan do tugama' nga' koino-ino i' do mangakan do daging diri do miagal di mangakan iyau do daging do paus om tambang. 23 Nga' kada' kou po pangakan do tonsi dit a' nakaawas o raha' tu' tiyonon nopod ginawo om hiri'd raha', om a' kou i' koino-ino do mangakan do ginawo do mitonggoi di tonsi. 24 Kada' dokoyu kano' i raha'; suwai ko' paawason no dokoyu iri do hilo'd tana' do miagal di waig. 25 Ondung tonudon dokoyu o ponuhuan diti, om asanangan indo o Tuhan om ongosonong-sonong ngai' kou om osimbayan kou om i sinakagon dokoyu. 26 Igitan ngai' no dokoyu do hiri'd kinoiyonon di tinantu' dot iyonon do sumambayang i porsombahan dokoyu om i porsombahan di nakabatos dokoyu do patahakon dot id Tuhan. 27 Iri nopo porsombahan di sorobon om i porsombahan di kanon o tonsi om mositi' no do patahakon do maan do porsombahan do hiri'd sakai di pananaraban do porsombahan dot id Tuhan, om potuntugon i raha' di maan do porsombahan diri do hiri'd sakai di pananaraban do porsombahan. 28 Umboyoon no kopio dokoyu o koinsanai di pinonuhuan ku dokoyu om kopomonsoi kou i' dit osonong om i korohian do Tuhan i Kinorohingan dokoyu, om osonong-sonong kou indo di sinakagon dokoyu, om osimbayan kou do gisom do poingompus,” ka di Musa.

Mogodu do Tumuku' dot id Tingolig

29 Om boros ka kawagu di Musa, “Rumikot kou nopondo dot id pomogunan diri, om patayon indo do Tuhan i Kinorohingan dokoyu i piro-piro o bansa'd tulun di poingiyon do hilo', gisom dot osolod nondo dokoyu om opomogun-mogunan dokoyu i pomogunan diri. 30 Om angapatai ngai' nopondo i bansa' do tulun diri, om antaan-taan no kopio dokoyu. Kada' kou nogi' kopio omit diyolo' do tumuku' dot id ponokokinorohingan do suwai tu' iri nopo wonsoyon do miagal diri om porikot nod kosusaan. 31 Kada' kou sambayang dot id Tuhan, i Kinorohingan dokoyu, dot iyo di kowoyo-woyoo' diyolo' do tumuku' dot id ponokokinorohingan diyolo' o kowoyo-woyoo'. Tu' tontok nopo di tumuku' iyolo' dot id ponokokinorohingan diyolo' om mingwonsoi iyolo' dit angaraat kopio, i karaatan do Tuhan. Om iri piya tangaanak diyolo' nga' sorobon i' diyolo' do hiri'd pananaraban do porsombahan diyolo' do maan do porsombahan di sinumbali' dot id ponokokinorohingan diyolo'. 32 Wonsoyon ngai' no dokoyu i pinonuhuan ku dokoyu; om kada' dokoyu ruhangai i pinonuhuan diri, om kada' dokoyu ingkuriai,” ka di Musa.

Ponugutan 13

1 Om boros ka kawagu di Musa, “Haro i' doti'ndo o nabi ko' i tulun di popoilo do komoyon do nipi do mamatos do haro o kopusahan om koimayaan 2 do maan do pamalid dokoyu, gisom do tumuku' kou nondo om modsubak kou do ponokokinorohingan dit a' dokoyu notutunan do mantad di gulu. Om mulong piya dot abayaan i pinabatos di tulun diri, 3 nga' kada' kou pokinongou dau. Tu' pakayon i' do Tuhan, i Kinorohingan dokoyu i tulun diri do pogumbal dokoyu, do pongilo ondung osianan kou'd Tuhan do mikuwo'd aayi-ayi' kopio o ginawo dokoyu ko' amu'. 4-5 Patayon no dokoyu o tulun di poposunud do komoyon do nipi om i nabi di monuhu' dokoyu do sumaap do Tuhan, i pinoposoliwan dokoyu do mantad hilo'd Masir, i pomogunan di minonguripon dokoyu di gulu po. Tulun nopo do miagal diri om araat no kopio tu' mumbal do potongkiad dokoyu do mantad id kowoyo-woyoo' di pinonuhuan do Tuhan dokoyu do tumanud. Om mositi' no do patayon o tulun diri, om oidu' i' do mantad id dokoyu o karaaton diri. Nga' iyokoyu nopo om tumanud kou nod Tuhan om pusohon no dokoyu iyau; umboyo' kou no do boros dau om tonudon no i ponuhuan dau; sumambayang kou no dot id dau om tumorodok dot id dau. 6-7 Om iri piya doti' i tobpinai dokoyu'd kusai ko' i tanak dokoyu'd kusai ko' i tanak dokoyu'd tondu' ko' i sawo dokoyu di kosianan dokoyu ko' i tambalut kopio dokoyu nga' momolisok-lisok i' do mongodsuur dokoyu do tumuku' dot id ponokokinorohingan do suwai, it a' dokoyu om a' di taki-aki dokoyu notutunan do mantad di gulu po, om i ponokokinorohingan do tulun di poingiyon dot id somok dokoyu ko' iri po i ponokokinorohingan do tulun di poingiyon do hilo'd sodu'. 8 Nga' kada' iyau pologoso' do mononsog dokoyu; kada' kou pokinongou dau. Kada' dokoyu iyau insianai om kada' kou kolisiu dau, om kada' dokoyu intirungai iyau. 9 Patayon nopo kopio dokoyu iyau! Om mogulu kou no do momodumpau dau'd watu om pologoson nogindo ngai' o tulun do suwai do momodumpau dau'd watu do gisom dot apatai iyau. 10 Dumpahon no iyau do watu do gisom dot apatai! Tu' mumbal daa iyau do popotongkiad dokoyu do mantad id Tuhan, i Kinorohingan dokoyu, i pinoposoliwan dokoyu do mantad hilo'd Masir, i pomogunan di minonguripon dokoyu di gulu po. 11 Om korongou ngai' indo o tulun dot Israil di nosiliu do miagal diri; om moddosi nondo iyolo' om aiso' nondo o tiso'd tulun do momonsoi dot iyo kopio'ddi karaat. 12 Soira' nopondo do poingiyon kou dot id kabandaran di patahakon do Tuhan, i Kinorohingan dokoyu, dot id dokoyu, om korongou kou dotindo 13 do haro o piro-piro o tulun dot araat do mantad id bansa' dokoyu do minamalid di tulun do hiri'd bandar diyolo' gisom do tumuku' diri iyolo' dot id kinorohingan dit a' dokoyu notutunan do gulu. 14 Ondung korongou kou do habar do miagal diri, om sorisidon no kopio dokoyu do mongilo iri; om ondung otopot do nosiliu o miagal kopio'ddi karaat 15 om patayon ngai' nopo dokoyu i tulun dot id bandar diri, om patayon ngai' nogi' i tayam-tayam diyolo'. Om raagon nopo kopio i bandar. 16 Timungon ngai' nopo i dapu' di tulun di poingiyon do hiri om potimungon do hiri'd padang dit id suang di bandar do maan do porsombahan dot id Tuhan, i Kinorohingan dokoyu. Om pologoson nopo do poingraag i bandar diri do gisom dot alaid om a' no koino-ino do wonsoyon kawagu. 17 Kada' kou panganu do nunu nopo i natantu' do raagon, om a' indo o Tuhan otogod dokoyu om insianan kou dau. Insianan kou indo dau om silihon kou do tulun dit asapou do miagal di pinabatos dau dot id taki-aki dokoyu, 18 ondung tonudon ngai' no dokoyu i ponuhuan dau di pinosunud ku dot id dokoyu di tadau baino', om wonsoyon ngai' no dokoyu i ponuhuan dau'ddi,” ka di Musa.

Ponugutan 14

Pogihad dit Okon ko' Korohian do Tuhan

1 Om boros ka kawagu di Musa, “Iyokoyu no o tulun di songonuon do Tuhan, i Kinorohingan dokoyu. Om soira' nopo do mogihad kou di tulun do napatai, om kada' dokoyu pinsuhato' o tinan dokoyu om kada' dokoyu bugaro' o tobuk dit id bangku' do tulu dokoyu, do miagal di wonsoyon do tulun di bansa'd suwai. 2 Iyokoyu nopo om songonuon do Tuhan, i Kinorohingan dokoyu, om nopili' kou no dau do silihon do tulun dau dot id pogialatan do koinsanai'd bansa' do hiti'd pomogunan,” ka dau.

Nintorusan di Sosomu' om it Amu' Sosomu'

3 Om boros ka kawagu di Musa, “Kada' kou pangakan do nunu nopo o nintorusan di nokoboros do Tuhan do sosomu'. 4 Koino-ino kou i' do mangakan do nintorusan diti: sapi', dumba', kambing, 5 paus, dumba' di hilo'd gouton, kambing di hilo'd gouton, om tambang --- 6 nunu nopo o nintorusan di nopilapak o sondulu om manapa' di kanon dau. 7 Nga' kada' kou pangakan do nunu nopo o nintorusan dit a' nopilapak o sondulu om it a' manapa' di kanon dau. Kada' kou pangakan dot unta, om i tikus balanda' om i landak. Iti nopo om nintorusan di sosomu'; tu' manapa' piya daa iri di kanon diyolo' nga' a' i' nopilapak o sondulu. 8 Kada' kou pangakan do wogok. Tu' iti nopo om nintorusan di sosomu'; tu' nopilapak i' daa o sondulu nga' a' i' manapa' dit akanon dau. Kada' kou pangakan do tonsi do wogok om kada' kou ongoi kama' do wogok di napatai. 9 Koino-ino kou i' do mangakan do nunu nopo o sada' di kisorod om kisisi', 10 nga' nunu nopo i poingiyon do hilo'd waig dit aiso' o sorod om aiso' o sisi' om a' no koino-ino do kanon. Tu' iri nopo om mositi' no do pokososomuon. 11 Koino-ino kou i' do mangakan do nunu nopo o tombolog dot a' sosomu'. 12-18 Nga' iti no ngai' o bansa' do tombolog dot a' dokoyu koino-ino do kanon: kondiu, puok, simpupulu, kondiu baras om i suwai-suwai kokondiu, bangkahak, i tombolog di roitan do tombolog dot unta, putik rahat, luungon, montis om i tongotombolog do suwai di miagal do montis, tombolog di roitan dot undan om kasa, om gair. 19 Om koinsanai di sontulud-tulud dit ongokooro'; om sosomu' ngai' no, kada' dokoyu kano' iri. 20 Nga' koino-ino kou i' do mangakan do nunu nopo i sontulud-tulud dit ongokooro' dit a' sosomu'. 21 Kada' kou pangakan do nunu nopo o nintorusan dit apatai toomod dot aiso' o minumang. Pologoson nopo i sompogunan di poirolot dokoyu do mangakan diri, ko' pobolion dokoyu iri dot id sompogunan. Nga' iyokoyu nopo om Tuhan i' i Kinorohingan dokoyu o manansanganu; iyokoyu no o tulun di songonuon dau. Kada' dokoyu onsoko' o tanak do dumba' ko' tanak do sapi' dot i gatas di molohing do tayam-tayam diri o pogonsok,” ka dau.

Oturan di Porsombahan do Sompihopod

22 Om boros ka kawagu di Musa, “Potobilang kou no do porsombahan do sompihopod do mantad id toinsanan do hasil di tumo dokoyu do pointikid do toun. 23 Om mongoi kou nogindo do hiri'd tiyonon do sumambayang di tinantu' do Tuhan, i Kinorohingan dokoyu, do tiyonon do sumambayang dot id dau. Om hilo' nondo, dot id toguang do Tuhan, do kanon dokoyu i porsombahan do sompihopod do mantad id gandum om waig dot anggur, om tumau do saitun, om i tanak do sapi' om tanak do dumba' dokoyu dit id gulu kosusu. Om wonsoyon no dokoyu o miagal diri om kopinsingilo kou i' do momusou kasai' do Tuhan, i Kinorohingan dokoyu. 24 Ondung adalaan kosodu' i tiyonon do sumambayang diri do mantad id walai dokoyu do paatadan dokoyu di sompihopod do mantad id hasil di pinabarakat do Tuhan dot id dokoyu, om wonsoyon no dokoyu o miagal diti. 25 Pobolion no i hasil di naanu dokoyu'ddi om igitan no i tusin do hiri'd tiyonon do sumambayang di tinantu'ddi. 26 Om pakayon nopo i tusin diri do pomoli do nunu nopo o korohian dokoyu --- do tonsi tuu do sapi', ko' tanak do dumba', ko' waig dot anggur ko' tiinumon di kaawuk --- om hilo' nondod kinoiyonon diri dot id toguang do Tuhan, i Kinorohingan dokoyu, o pangakanan dokoyu om i sompiiyon dokoyu do taakanon diri. Om rumamai kou nogindo do hiri. 27 Kada' dokoyu kada-kadaai i tulun do Liwi di poingiyon do hiri'd bandar dokoyu; tu' aiso' i' o tana' diyolo' di diyolo' kopio. 28 Pointikid-tikid do kooyion do kotolu'd toun om mositi' nod igitan ngai' dokoyu i sompihopod do mantad id koinsanai di tua' di totonomon dokoyu om poopion no do hiri'd kabandaran dokoyu. 29 Iti nopo taakanon diti om patahakon dot id tulun do Liwi tu' aiso' i' o tana' diyolo', om patahakon di sompogunan om i tangaanak dot aiso' o molohing om i tongoondu' do nopuadan di poingiyon dot id bandar dokoyu. Om koino-ino i' iyolo' do mongoi anu'ddi do gisom do kabagal diyolo'. Wonsoyon no dokoyu o miagal diti om barakatan kou indo do Tuhan, i Kinorohingan dokoyu do nunu nopo o wonsoyon dokoyu,” ka dau.

Ponugutan 15

I Toun do Koturu'

1 Om boros ka kawagu di Musa, “Pointikid-tikid do kooyion do toun do koturu', om mositi' nod tonuson dokoyu i tutang do tulun di kiutang dot id dokoyu. 2 Poingkaa o kowoyo-woyoo' do mananus diri. Pointikid-tikid do tulun dot Israil di nokopoolos do tusin dot id sompi' ko' bansa' dau om mositi' no do tonuson nopo dau i tutang diri, om a' no iyau koino-ino do mongoi pokibayar di tusin; tu' tumanud nopo di nokoboros do Tuhan om natanus no i tutang diri. 3 Nga' koino-ino kou i' do mokibayar di tutang do tulun di bansa'd suwai dot id dokoyu, nga' kada' kou no kopio pokibayar do nunu nopo di noutang do bansa' dokoyu dot id dokoyu. 4 Om barakatan kou indo do Tuhan, i Kinorohingan dokoyu do hilo'd pomogunan di patahakon dau dot id dokoyu. Aiso' indo o tiso'd tulun di bansa' dokoyu do mosikin 5 ondung wonsoyon ngai' no dokoyu i pinonuhuan do Tuhan di pinoboros ku dokoyu di tadau baino'. 6 Om barakatan kou indo do Tuhan do miagal di nakabatos dau. Om kopoolos kou indo do tusin dot id ogumu' o bansa'd tulun nga' a' kou indo iyokoyu minog do molos do mantad id isai nopo; om iyokoyu nondo o momorinta' dot ogumu' o bansa'd tulun, nga' aiso' indo o bansa'd tulun do momorinta' dokoyu. 7 Ondung haro o tulun di sompi' ko' bansa' dot Israil di haro o kosusaan do poingiyon do hinonggo nopo o bandar dot id pomogunan di patahakon do Tuhan, i Kinorohingan dokoyu, dot id dokoyu, om kada' kou katamaha' om kada' kou kopogong do monulung dau. 8 Suwai ko' kumopuhawang kou no om pooloson no iyau do gisom di kabagal dau. 9 Kada' kou nogi' dot a' poolos dau do nunu nopo, do muhai-ruhai piya i toun do kopononusan do tutang. Kada' pologoso' do kosuang dot id pomusarahan dokoyu o pomusorou dot iyo kopio'ddi karaat. Ondung a' kou poolos om momolohou indo do Tuhan o tulun diri do papasala' dokoyu, om iyokoyu indo o pasalaon. 10 Momuhawang no do tulun diri do mikuwo'd osonong om osinggawa' o ginawo, om barakatan kou i' do Tuhan do nunu nopo o wonsoyon dokoyu. 11 Haro kasai' i' o piro-piro o tulun dot Israil do mosikin om i haro o kokurangan, om iri no o koponuhuan ku dokoyu do kumopuhawang dot id diyolo',” ka dau.

I Wonsoyon dot id Turipon

12 Om boros ka kawagu di Musa, “Ondung haro o tulun do sompi' ko' bansa' dot Israil, do kusai tuu ko' tondu', di papadagang do tinan dau dot id dokoyu do sumiliu do turipon dokoyu, om mositi' no do poiduwon dokoyu iyau do kakaraja' iyau dot id dokoyu do solinaid dot onom o toun. Om orikot nopondo i toun do koturu', om poiduwon no kopio dokoyu iyau. 13 Soira' nopo do poiduwon dokoyu i turipon diri, om kada' nogi' dokoyu suhuo' do mamanau dot aiso' kopio o tonggoi. 14 Kumopuhawang kou no do manahak dau do mantad id nunu nopo i nakabarakat do Tuhan dot id dokoyu, dot i dumba' om i gandum om i waig dot anggur. 15 Sorohon no dokoyu dot iyokoyu nga' turipon i' do hilo'd Masir di gulu po om Tuhan i', i Kinorohingan dokoyu o pinoposoliwan dokoyu; om iri no o kopomisunudan ku dokoyu diti ponuhuan diti. 16 Nga' a' i' dotindo sitongkiad i turipon dokoyu'ddi, tu' osianan i' doti' iyau dokoyu om i sompiiyon dokoyu, om orohian do mundorong do poinsugku' dokoyu. 17 Iyo nopoddi om angatan no iyau do mongoi do hiri'd wawayaan do walai dokoyu om luangan no o tolingo dau. Om osiliu nondo iyau do turipon dokoyu do solinaid dau do poimpasi. Om iri turipon dokoyu do tondu' nga' iyoon iddi. 18 Kada' kou kotogod do tontok do papalabus kou do turipon dokoyu, tu' onom no o toun dau do pakaraja' dot id dokoyu om songintanga' noo do gadsi' do susuhuon o pinamagadsi' dokoyu dau. Wonsoyon no o miagal diri om barakatan kou i' do Tuhan, i Kinorohingan dokoyu do nunu nopo o wonsoyon dokoyu,” ka dau.

Tanak do Sapi' om Tanak do Dumba' dit id Gulu Kosusu

19 Om boros ka kawagu di Musa, “Potobilangon no do maan do don Tuhan, i Kinorohingan dokoyu, o koinsanai'd tanak do sapi' do tontoluhan om tanak do dumba' do tontoluhan dit id gulu kosusu; kada' dokoyu porobuato' o sapi' om kada' dokoyu bugarai o dumba'ddi. 20 Pointikid-tikid do toun om mositi' no do kanon dokoyu om i sompiiyon dokoyu i tayam-tayam diri dot id toguang do Tuhan do hilo'd tiyonon do sumambayang di natantu' mantad. 21 Nga' ondung haro o bohiton do tinan di tayam-tayam diri, do kimpo' tuu ko' bolou ko' haro o bohiton do suwai dit araat kopio, om kada' no dokoyu patahako' iri dot id Tuhan, i Kinorohingan dokoyu. 22 Koino-ino kou i' do mangakan do tayam-tayam diri dot id walai dokoyu. Om koino-ino ngai' o tulun dit olidang om i sosomu' dot id pagantangan do tugama' do mangakan do tayam-tayam diri, do miagal do mangakan kou do paus om tambang. 23 Nga' kada' dokoyu kano' i raha' di tayam-tayam diri, suwai ko' paawason no dokoyu i raha' do hilo'd tana' do miagal do waig,” ka dau.

Ponugutan 16

Tadau'd Agayo do Paska

1 Om boros ka kawagu di Musa, “Pusohon no dokoyu o Tuhan, i Kinorohingan dokoyu, do ralan nopod momusou dau om mamaramai di tadau dot agayo do Paska do tontok di tulan dot Abib tu' tontok nod tulan diri di dongotuong do pinosoliwan kou dau do mantad hilo'd Masir. 2 Mongoi kou no do hiri'd natantu' mantad do tiyonon do sumambayang om sumbolion nod hiri ot ongoiso' di dumba' ko' i sapi' dokoyu do maan do porsombahan do Paska do pomusou'd Tuhan, i Kinorohingan dokoyu. 3 Mangakan kou nopod porsombahan do Paska diri om kada' kou pangakan do roti di naralatan do pangambang. Turu' o tadau dokoyu do mangakan do roti dit a' rinalatan do pangambang do miagal di nakan dokoyu do tontok di naarau-arau kou do tuminongkiad do pomogunan do Masir. Om mangakan kou no do roti do miagal diri --- i roitan do roti do koinggoritan --- om osorou kasai' indo dokoyu i tadau di kinosoliwanan dokoyu do mantad hilo'd Masir, i kinoiyonon dokoyu do noinggorit do solinaid dokoyu'd poimpasi. 4 Om turu' nondo o tadau dot a' koino-ino do haro o tulun do kipangambang do roti do hiri'd walai dau; om iri nopondo tonsi di tayam-tayam di sinumbali' do tontok do sosodopon di tadau do koiso' om mositi' no dot oiyon do mangakan do totuong diri. 5-6 Ngoyon no dokoyu sumbolio' i tayam-tayam di maan do tontok do Tadau'd Agayo do Paska do hiri'd tiyonon do sumambayang di natantu' mantad --- om a' no koino-ino do sumbolion iri dot id kinoiyonon do suwai dot id pomogunan di nakatahak do Tuhan, i Kinorohingan dot id dokoyu. Sumbolion no dokoyu iri do tontok di tumonob o tadau do miagal di maso di tuminongkiad kou i' do pomogunan do Masir. 7 Losuon no dokoyu i tonsi do tayam-tayam diri om kanon no dokoyu do hiri'd tiyonon do sumambayang di natantu' mantad, om kosuabon pondo om muli' kou no dot id walai dokoyu. 8 Om a' kou no koino-ino do mangakan do roti di rinalatan do pangambang do solinaid dot onom o tadau. Om koturu' nopondod tadau om tumimung kou no do sumambayang dot id Tuhan, i Kinorohingan dokoyu, om kada' kou karaja' do nunu nopo do tontok do tadau'ddi,” ka dau.

Tadau dot Agayo do Dongmongomot

9 Om boros ka kawagu di Musa, “Intobon no o turu' o minggu' do mantad di timpuun kou do mongomot do gandum, 10 om ramayon nogindo dokoyu i Tadau dot Agayo do Dongmongomot, do maan do pomusou'd Tuhan. Om papatahak kou no do porsombahan do tumanud do kagaanan do ginawo dokoyu do tontok do tadau'd agayo diri, do miontok di barakat do nakatahak do Tuhan dot id dokoyu. 11 Kotood kou no dot id toguang do Tuhan, dot iyokoyu ngai' di tangaanak dokoyu, om i susuhuon dokoyu, om i tulun do Liwi, om i tulun do bansa'd suwai, om i tangaanak dot aiso' o molohing, om i tongoondu' do nopuadan di songingiyon do hiri'd kabandaran dokoyu. Om wonsoyon no dokoyu o miagal diri do hilo'd tiyonon do sumambayang di natantu'ddi. 12 Tumorodok kou no kopio do tumanud do koinsanai di ponuhuan diri; om kada' dokoyu kolihuwai do turipon kou i' iyokoyu do hilo'd Masir di gulu po,” ka dau.

Tadau dot Agayo do Kinuhub-Kuhub

13 Om boros ka kawagu di Musa, “Ogomos ngai' nopondo dokoyu i gandum dokoyu om apaga' ngai' i tua' dot anggur, om ramayon no kopio dokoyu i Tadau dot Agayo do Kinuhub-Kuhub do solinaid do turu' o tadau. 14 Ramayon no dokoyu iri dot iyokoyu ngai' di tangaanak dokoyu, om i susuhuon dokoyu, om i tulun do Liwi, om i tulun do bansa'd suwai, om i tangaanak dot aiso' o molohing, om i tongoondu' do nopuadan di poingiyon dot id kabandaran dokoyu. 15 Pusohon no dokoyu o Tuhan, i Kinorohingan dokoyu; do ralan nopod momusou om mamaramai do tadau dot agayo diti do solinaid do turu' o tadau do hilo'd tiyonon do sumambayang di natantu' mantad. Om kotood kou no tu' nabarakatan nod Tuhan i tinanom dokoyu om i karaja' dokoyu. 16 Oinsanan nopo i tongokusai do bansa' dokoyu dot apatut do mongoi sambayang dot id Tuhan dot intolu do sontoun do hilo'd tiyonon do sumambayang di natantu' mantad do tontok di Tadau'd Agayo do Paska, om di Tadau dot Agayo do Dongmongomot, om di Tadau dot Agayo do Kinuhub-Kuhub. Om mositi' no do migit ngai' do porsombahan o pointikid-tikid di tongokusai, 17 do songkuro nopo i milo dau do patahakon do miontok di barakat do nakatahak do Tuhan, i Kinorohingan dokoyu dot id dau,” ka dau.

Ralan do Momonsoi dit Otulid

18 Om boros ka kawagu di Musa, “Momili' kou no do gompomutus om piro-piro o pagawai'd suwai dot id pointikid-tikid do bandar di patahakon do Tuhan, i Kinorohingan dokoyu, dot id dokoyu. Iti nopo tulun diti om manalasai do hal di rayat dot otulid o pananalasai. 19 A' i' iyolo' koino-ino dot a' otulid o pomumutus ko' manampaping po do tontok do momutus; a' i' iyolo' koino-ino do rumamit do tusin di ponisip. Tu' tulun piya daa dit oilo om it otulid o ginawo, nga' osompon indo di ponisip o mato diyolo' gisom dot a' nondo otulid o pomumutus diyolo'. 20 Mositi' no dot otulid kasai' o pomumutus dokoyu om a' manampaping, om kopomogun-mogun kou indo do hilo'd pomogunan di patahakon do Tuhan, i Kinorohingan dokoyu, dot id dokoyu, om hilo' kasai' kou nondo do momogun-mogun dot id suang do kosimbayanan. 21 Soira' nopo do momonsoi kou do pananaraban do porsombahan dot id Tuhan, i Kinorohingan dokoyu, om kada' dokoyu patalado'ddi i kayu do panakatanda' di Asira, i ponokokinorohingan diri. 22 Om kada' kou poudong do nunu nopo o torigi do watu do pakayon do tontok do tumuku' dot id ponokokinorohingan do suwai. Tu' iri nopo om karaatan kopio do Tuhan.

Ponugutan 17

1 Kada' kou papatahak dot id Tuhan, i Kinorohingan dokoyu do sapi' ko' dumba' di haro o bohiton do tinan; tu' iri nopo om karaatan kopio'd Tuhan. 2 Ondung korongou kou do haro o piro-piro o tongokusai ko' tongoondu' di poingiyon dot id tongoiso' di bandar dokoyu do nokowonsoi'd dusa dot id Tuhan, om tuminolibamban di tumpongo do Tuhan, 3 tu' tuminuku' iyau om minodsubak do ponokokinorohingan do suwai ko' tuminuku' do tadau ko' tulan ko' rombituon, it a' miontok di pinonuhuan do Tuhan. 4 Ondung korongou kou do habar do miagal diri, om sorisidon no kopio dokoyu do mongilo iri. Om ondung otopot kopio do nosiliu o miagal diri karaat do hiti'd Israil, 5 om ngoyon nopo i tulun diri om posoliwanon no di bandar, om dumpahon nondo do watu do gisom dot apatai. 6 Nga' haro po o duwo o tulun do sasi' do papasala' di tulun diri om patayon nogi' i tulun diri; iso-iso' nopo o tulun do sasi' do papasala' di tulun diri om a' i' iyau koino-ino do patayon. 7 Om iri no tulun di sasi'ddi o mogulu do momodumpau dau do watu, om momodumpau ngai' nogindo di tulun diri i tulun do suwai. Om iti no o ralan dokoyu do mongidu' do karaaton diri. 8 Haro i' dotindo o piro-piro hal dit apagon do manalasai dot i gompomutus toomod o manalasai. Miagal ko' i pigulatan do sanganu do tana' ko' i kopokoruol do tulun do suwai, ko' i hal do popisuwai di monomod do mamatai om it a' tomodon do mamatai. Haro nopo ot osiliu do miagal diri, om mositi' nod mongoi kou do hiri'd tiyonon do sumambayang di natantu' mantad do Tuhan, i Kinorohingan dokoyu. 9 Om poboroson no i hal diri dot id tongoimam di mantad id payat do Liwi om id tulun di nopili' do siniliu'd gompomutus do tontok do maso'ddi, om pologoson no iyolo' do manalasai do hal diri. 10 Om iyolo' nondo o momutus diri, om mositi' no do wonsoyon dokoyu o miontok di pinomutus diyolo'. 11 Romiton nopo i pomutus diyolo' om tonudon ngai' no i ponudukan diyolo' do sorisidon kopio'd tumanud. 12 Isai nopo o tulun di katama' daa do sumongkiwal di gompomutus ko' it imam di maso do pakaraja' do tontok diri om mositi' no do hukuman do kapatayon; om iti no o ralan do mongidu' do karaaton diri do mantad id Israil. 13 Om korongou ngai' nondo o tulun do pasal diri om ongooris nondo iyolo', om aiso' nondo o tulun do katama' do momonsoi do miagal diri,” ka dau.

Pongoturan do Pasal do Raja'

14 Om boros ka kawagu di Musa, “Aanu nopondo dokoyu i pomogunan di patahakon do Tuhan, i Kinorohingan dokoyu dot id dokoyu, om kopomogun-mogun kou'd hilo' om orohian kou dotindo do haro o raja' dokoyu do miagal di tulun do bansa'd suwai dit id posorili' dokoyu. 15 Om ilaan no kopio dokoyu do mositi' no dot i pilion do Tuhan i tulun di pilion dokoyu do sumiliu'd raja'. Om mositi' no do bansa' dokoyu o tulun diri; om kada' kou pomili' do bansa'd suwai do silihon do raja' dokoyu. 16 A' i' koino-ino dot ogumu' o kuda' di raja' do patahakon dot id tongosoudor dau, om a' iyau koino-ino do monuhu' do tulun do mongoi boli do kuda' do hilo'd Masir, tu' nokoboros nod Tuhan dot a' no kopio koino-ino do gumuli' kawagu i tulun dau do hilo'd Masir. 17 Om a' i' koino-ino dot ogumu' o sawo di raja' tu' iri no motindo o popotongkiad dau do mantad id Tuhan, om a' iyau koino-ino do momogumu' do pirok om tamas do maan do papakaya' dau. 18 Osiliu nopondo do raja' o tulun diri, om mositi' no do haro o solinan dau di buuk do pinotulisan dit oturan do Kinorohingan om i ponudukan do Kinorohingan, i sinalin do mantad id pinotulisan mantad, i pinoopi' di tongoimam do mantad id payat do Liwi. 19 Om mositi' no dot id toning kasai' dau i buuk diri om mambasa' iyau do buuk diri do solinaid dau do poimpasi. Om koilo indo iyau do momusou do Tuhan, om tumorodok do tumanud do koinsanai di pinonuhuan di pinotulis do hiri. 20 Ondung tumorodok iyau do mambasa'ddi, om a' indo iyau momusorou do poimogo-mogot iyau ko' i sompi' ko' tulun dot Israil do suwai om a' iyau sumurilog di ponuhuan do Tuhan do pasal do nunu nopo. Om momorinta' indo iyau dot Israil, i bansa' dau, do piro-piro o toun do koloido', om kopomorinta' nogi' dot Israil i sinakagon dau do solinaid do piro-piro o sinakagon do mogilombu-lombus,” ka dau.

Ponugutan 18

It Aanu dit Imam

1 Om boros ka kawagu di Musa, “Iri nopo payat do Liwi, i nongosiliu ngai' dot imam diri, om a' i' kaanu do bahagi' di tana' do hilo'd Israil; tu' kaakan-akanan nopo diyolo' om mantad no di porsombahan om i piro-piro o porsombahan di sumbolion di patahakon dot id Tuhan. 2 A' i' iyolo' kaanu do bahagi' do tana' do miagal di naanu di payat do suwai; bahagi' nopo dot aanu diyolo' om iri no i kinosilihan diyolo' dot imam do mogobi-obi'd Tuhan, i kaanu do bahagi' di porsombahan do patahakon dot id Tuhan, do miagal di nakabatos mantad do Tuhan. 3 Soira' nopo do papatahak kou do sapi' ko' dumba', om mositi' no do patahakon dot id tongoimam i toliip, om i roo, om i tian di tayam-tayam diri. 4 Om mositi' no do patahakon dot id diyolo' i gandum dit id gulu koomot, om i waig dot anggur om i tumau do saitun, om i hulu do dumba' dit id gulu kaanu. 5 Mantad nopo dot id pogialatan di payat dokoyu om iri no payat do Liwi o pinili' do Tuhan do sumiliu'd imam di mogobi-obi' dau do gisom dot alaid. 6 Isai nopo o tulun do Liwi do mantad id honggo nopo o bandar dot Israil, it orohian do mongoi do hiri'd tiyonon do sumambayang di natantu' mantad do Tuhan om koino-ino no 7 do maganu-anu do hiri do sumiliu'd imam di mogobi-obi' do Tuhan, i Kinorohingan dau, do miagal di tulun do Liwi do suwai di maganu-anu'd hiri. 8 Om mositi' no do kaanu iyau do taakanon dot irad dit aanu di tongoimam do suwai, om koino-ino i' iyau do popoopi' do nunu nopo i pootodon di sompiiyon dau dot id dau,” ka dau.

I Pogoduhan do Momonsoi

9 Om boros ka kawagu di Musa, “Kopomogun-mogun kou nopondo do hilo'd pomogunan di patahakon do Tuhan, i Kinorohingan dokoyu, dot id dokoyu, om kada' kou omit di pingwonsoyon di piro-piro o bansa'd tulun di poingiyon do hilo' dit angaraat kopio. 10 Kada' dokoyu patahako' i tangaanak dokoyu do maan do porsombahan di sorobon do hiri'd pananaraban do porsombahan; om kada' dokoyu pologoso' o tongoiso' piya di tulun dokoyu do minsingilo do toilaan di tulun do mogogontong ko' mogihum po do pogintutunan ko' mamakai po do toilaan di dong bobolian, 11 ko' mamakai do gimat, om kada' iyolo' pologoso' do momolohou di rusod do tulun do napatai. 12 Araatan i' o Tuhan, i Kinorohingan dokoyu, do wowonsoyon dit araat kopio do miagal diri. Om iri no o koponguyungan dau di piro-piro o bansa'ddi do mantad id pomogunan diri do tontok do rumikot kou do mongoi panangod diyolo'. 13 Tumorodok kou no kopio do tumanud do Tuhan, i Kinorohingan dokoyu do mikuwo'd aayi-ayi' o ginawo dokoyu,” ka dau.

Batos do Kinorohingan do Poporikot dot Iso' o Nabi

14 Om boros ka kawagu di Musa, “Hilo' nopod pomogunan di potiongoyon no dokoyu pomogun-mogunai, om iri nopo tulun do hilo' nga' tumanud do nosihat do tongobobolian om mogihum iyolo' do pogintutunan, nga' mada' i' o Tuhan, i Kinorohingan dokoyu do momonsoi kou iyokoyu do miagal diri. 15 Suwai ko' porikot nondo iyau do songulun o nabi do miagal doho' do mantad id pogialatan do bansa' dokoyu, om mositi' no do mumboyo' kou do boros dau. 16 Tontok di tadau di pointimung kou do hilo'd Nuluhon do Sinai, om pinokianu kopio dokoyu dot a' kou korongou kawagu do Tuhan do moro-boros om a' kou kokito di tapui do tanda' do nakarapou iyau, tu' ooris kou dot apatai kou. 17 Om boros kaddi do Tuhan dot id doho', ‘Kopunong no kopio i pinokianu diyolo'ddi. 18 Porikatan ku indo iyolo' do songulun o nabi di miagal diya' do mantad id pogialatan do bansa' diyolo', om sunudan ku indo iyau dit apatut do poboroson dau dot id diyolo', om sunudan dau iyolo' do koinsanai di ponuhuan ku. 19 Om moro-boros indo iyau dot id suang do ngaran ku, om hukuman ku ot isai nopo o tulun dit a' mumboyo' do boros dau. 20 Nga' ondung haro o nabi di katama' do mimboros dot id suang do ngaran ku om a' oku i' nokoponuhu' dau, om mositi' no do hukuman iyau do kapatayon, om iyoon nogiddi ot isai nopo o nabi di mimboros dot id suang do ngaran do ponokokinorohingan do suwai. 21 Muhot kou doti' ondung poingkuro kou do mongilo ondung mantad kopio dot id Tuhan i poboroson do songulun o nabi ko' okon,’ ka. 22 Ondung haro o nabi do moro-boros dot id suang do ngaran do Tuhan om a' indo abayaan i pinoboros dau, om okon no ko' mantad id Tuhan i boros dau'ddi. Tu' mantad i' do toilaan di nabi diri i boros di pinoboros dau, om a' kou i' minog do moddosi dau,” ka dau.

Ponugutan 19

I Kabandaran do Pogintirungan

1 Om boros ka kawagu di Musa, “Angapatai pondo do Tuhan, i Kinorohingan dokoyu i piro-piro o bansa'd tulun di sanganu daa di pomogunan do patahakon do Tuhan dot id dokoyu, om osolod nopondo dokoyu i kabandaran diyolo' om i kawalayan diyolo', om koundorong kou nopondo kopio do hilo', 2-3 om bohogion no dokoyu o pomogunan diri do tolu o bohogian, om otikid nopo dot iso' o bandar do pogintirungan dit id somok. 4 Om haro nopondo o tulun di kapamatai do tulun do suwai dot a' tinomod do minamatai, it okon ko' pisangod dau, om milo i' i tulun diri do mogidu' om mongoi dot id iso' di bandar do pogintirungan diri do mongoi intirung do hiri. 5-6 Miagal ko', haro nopo o duwo o tulun do mongoi panagad do kayu do hilo'd gouton, om maha' di managad nod kayu o tiso' diyolo', om sigog pondo dot otongos o tulu di kapak dau om oontok nondo i tiso' dau, gisom dot apatai i tulun diri, om milo i' i tulun di nakapamatai nga' it a' i' tinomod do mamatai do mongoi dot id iso' di tolu o bandar diri tu' aiso' i' o sala' dau, om aiso' indo o koligagaanan dau. Ondung iso-iso' o bandar do pogintirungan, om adalaan i' dotindo kosodu' iri, om okosupan nondo i tulun diri di koobpinayan di tulun do napatai, i koobpinayan dit apatut do momolokop do kinapatayan di tobpinai dau, om kapamatai nondo o tulun diri do tulun dit aiso' o sala' dot atatagadan iyau. 7 Om iri no o koponuhuan ku dokoyu do potobilang do tolu o bandar. 8 Soira' nopondo do poinggoyoon do Tuhan, i Kinorohingan dokoyu o pomogunan dokoyu, do miagal di nakabatos dau dot id komolohingan dokoyu do wonsoyon dau, om katahak ngai' dau dot id dokoyu i tana' do nakabatos dau, 9 om momili-mili' kou po do tolu kawagu o bandar. (Om patahakon i' dau i tana'ddi ondung wonsoyon ngai' no dokoyu i ponuhuan ku dokoyu di tadau baino', om ondung osianan kou no do Tuhan i Kinorohingan dokoyu, om miontok no di ponudukan dau o kowoyo-woyoon dokoyu.) 10 Wonsoyon no dokoyu o miagal diri om a' i' apatai o tulun dit aiso' o sala'. Om a' kou indo iyokoyu kasala' do kapamatai diyolo' dot id pomogunan di patahakon do Tuhan dot id dokoyu. 11 Nga' ondung haro o tulun do tumomod do mamatai di pisangod dau di karaatan dau om mogidu' no daa'ndo dot id tiso' di bandar do pogintirungan diri do mongoi pokiintirung, 12 om mositi' no dot i tongoboyoon do hiri'd bandar dau o monuhu' do poposoliwan dau om patahakon indo dot id koobpinayan di tulun di pinatai it apatut do momolokop do kinapatayan di tobpinai diyolo', om apatai indo diyolo' i tulun do minamatai'ddi. 13 Kada' no kopio dokoyu insianai o tulun do miagal diri. Poiduwon no kopio ot Israil do mantad id pinamatayan diri om osimbayan kou indo,” ka dau.

Wolit do Tana' do Mantad di Gulu po.14 Om boros ka kawagu di Musa, “Kada' dokoyu poundoliho' i wolit do tana' di songkoduwo dokoyu, i wolit di natantu' mantad di gulu po do hilo'd pomogunan di patahakon do Tuhan, i Kinorohingan dokoyu, dot id dokoyu,” ka dau.

Pongoturan do Pasal do Sasi'

15 Om boros ka kawagu di Musa, “A' i' kabagal o songulun-ngulun do monondos dot iso' o tulun do nakasala' o tulun diri; mositi' no do duwo o tulun do sasi' do popointalang kopio do kasala' o tulun diri. 16 Ondung haro o songulun do mumbal do pokoruol do ginawo do tulun do suwai tu' tondoson dau i tulun diri do nakasala' nga' a' i' ma otopot kopio i ponondos dau'ddi, 17 om mositi' no do mongoi goduwo i tulun diri do hiri'd tiyonon do sumambayang di natantu' mantad do Tuhan, om butusan nogindo iyolo' dit imam om i gompomutus di pakaraja' do maso'ddi. 18 Mositi' no do sorisidon kopio dit imam do mongilo o hal diri; om ondung haro o tulun do minongudut do pinapasala' di songulun di sompi' ko' tulun dot Israil, 19 om mositi' no do porotuan iyau do hukuman di porotuon mantad daa dot id tulun di pinasala'. Om iyo noddi o ralan do mongidu' do karaaton diri. 20 Om korongou ngai' indo o tulun do suwai di nosiliu do miagal diri; om ooris nondo iyolo', om aiso' nondo o tongosongulun piya do kasaap do momonsoi do miagal kopio'ddi karaat. 21 Kada' kou no kopio ponginsian do tulun do miagal diri; tu' pomohukum nopo om ginawo o pomolokop do ginawo, om mato o pomolokop do mato, om nipon o pomolokop do nipon, om longon o pomolokop do longon, om gakod o pomolokop do gakod,” ka dau.

Ponugutan 20

Pongoturan do Pasal do Pisangadan

1 Om boros ka kawagu di Musa, “Soira' nopo do mamanau kou do mongoi sangod do pisangod dokoyu om kokito kou do korita'-kuda', om kuda', om soudor dit ogumu' ko' i dokoyu, om kada' kou poddosi'ddi. Tu' moyo-woyo' i' dokoyu o Tuhan, i Kinorohingan dokoyu, om monguhup iyau dokoyu, iyau i pinoposoliwan dokoyu do mantad hilo'd Masir. 2 Tontok dit a' kou po koongoi kasangod, om mositi' no do haro ot imam do mongoi pomoros dot id tongosoudor do poingkaa, 3 ‘Oi tulun dot Israil, pokinongou kou no. Tadau nod baino' do mongoi kou sangod. Om kada' kou kooris di pisangod dokoyu, om kada' dokoyu poluhoyo' o ginawo, om kada' kou kagangau. 4 Tu' woyoon kou i' do Tuhan, i Kinorohingan dokoyu, om monguhup iyau dokoyu, om onuan kou i' dau do kamanangan,’ ka. 5 Om sunudan nondo di pagawai i soudor do poingkaa, ‘Haro o tulun do hiti di wagu po kowonsoi'd walai, om a' po dau noiyon i walai dau'ddi? Ondung haro, om mositi' no do muli' o tulun diri. Tu' ondung amu', om apatai nopondo iyau dot id pisangadan om tulun nod suwai o koiyon di walai dau. 6 Haro o tulun do hiti di wagu po kapananom do kabun dot anggur, om a' poddi nokoumbal do mongupu' do tua' dit anggur dau? Ondung haro, om mositi' nod muli' o tulun diri. Tu' a' nopo, om apatai nopondo iyau dot id pisangadan, om tulun nod suwai o mimbangat di waig dot anggur dau. 7 Haro o tulun do hiti di nokotunang nogi'? Ondung haro om mositi' no do muli' iyau. Tu' a' nopo, om apatai nopondo iyau dot id pisangadan, om tulun nod suwai o mangawin di tondu' di notunangan dau,’ ka. 8 Om mositi' no do poboroson po di pagawai dot id soudor diri o boros do poingkaa, ‘Haro o tulun do hiti dit oluhoi no o ginawo om i moddosi? Ondung haro, om mositi' no do muli' o tulun diri. Tu' a' nopo, om kotonggoi nondo dau do moddosi i tulun do suwai,’ ka. 9 Kopongo pondo i pagawai do moro-boros dot id soudor diri, om momili' nogindo do boyoon do pointikid-tikid do posukan. 10 Soira' nopo do mongoi kou panangod dot iso' o bandar, om umbalan po do monuhu' i tulun do hiri do tumahak dot id dokoyu. 11 Ondung iwangan diyolo' i wawayaan di bandar om tumahak no iyolo' dot id dokoyu, om osiliu ngai' nopondo iyolo' do turipon dokoyu om sansagan do kumaraja' dot id dokoyu. 12 Nga' ondung a' tumahak dot id dokoyu i tulun do hiri'd bandar diri, tu' uhang nogi' diyolo' do sumaap, om turungkuon no dokoyu do soudor dokoyu o bandar diri. 13 Om katahak nopondo do Tuhan i Kinorohingan dokoyu i bandar diri dot id dokoyu, om mositi' nod patayon ngai' dokoyu i tongokusai do hiri'd bandar diri. 14 Nga' koino-ino kou i' do mononggoi di tongoondu', om i tangaanak, om i tayam-tayam, om nunu nopo it id suang do bandar diri. Om pakayon nopo o nunu nopo o dapu' di pisangod dokoyu. 15 Om iyoon no dokoyu'ddi i kabandaran dit id sodu' di pomogunan do koundorongon dokoyu. 16 Nga' ondung koponolod kou do bandar do hiri'd pomogunan di patahakon do Tuhan, i Kinorohingan dokoyu, dot id dokoyu, om mositi' nod patayon ngai' nopo o tulun do hiri. 17 Punsoon nopo do mamatai o koinsanai di bansa'd tulun do hiri: i tulun do Hit, Amori, Kanaan, Poris, Howi, om Yobus, do miagal di pinonuhuan do Tuhan dot id dokoyu. 18 Patayon no dokoyu iyolo', om a' i' iyolo' kopominsuhu' dokoyu do momonsoi'd dusa dot id Tuhan, tu' monuduk moti'ndo iyolo' dokoyu do momonsoi do koinsanai di sosomu', i wonsoyon diyolo' do tontok do tumuku' dot id ponokokinorohingan diyolo'. 19 Soira' nopo do mumbal kou do monolod do bandar, om kada' dokoyu tagado' i tongotua-ua' do hiri, do mulong piya dot alaid kou do monurungku' do bandar diri. Kanon nopo dokoyu i tua' nga' kada' dokoyu umpadano' i guas; tu' okon i' ko' i guas do kouwaan o pisangod dokoyu. 20 Nga' koino-ino kou i' do managad di kayu do suwai om pakayon nopo do maan do ponurungku' di bandar do gisom dot osolod dokoyu o bandar diri,” ka dau.

Ponugutan 21

Hal do Tulun di Nakapamatai'd Tulun dit A' Milo'd Salasayon

1 Om boros ka kawagu di Musa, “Ondung haro o tulun dot abantalan do pinatai dot id tumo do hilo'd pomogunan di patahakon do Tuhan, i Kinorohingan dokoyu, dot id dokoyu, om a' i' dokoyu oilaan ondung isai o minamatai do tulun diri, 2 om mositi' no do ngoyon di boyoon om i gompomutus tipongo' o kosoduwo' do mantad hiri'd kinoilihon di tinan di tulun diri om gisom do korikot dot id pointikid-tikid di bandar dit id somok. 3 Om momili' nondo i boyoon di hiri'd bandar dit id somok kopio di kinoilihon di tinan do tulun diri do songinan o sapi' dit okoro' po, it a' po insan porobuato'. 4 Om gayaton nondo diyolo' iri dot id iso' o kinoiyonon dit id toning do bawang dit a' insan karasak, om it a' insan karadu om a' insan kopomutanamai i tana'd hiri. Om hiri nondo do tipuon diyolo' o liou di sapi'ddi. 5 Om mositi' no do mongoi ngai'd hiri it imam do mantad id payat do Liwi, tu' iyolo' no o momutus do nunu nopo o hal di kagait do kororongit. Om iyolo' o nopili'd Tuhan, i Kinorohingan dokoyu do momonsoi'd karaja' do Tuhan om popoboros do barakat dot id suang do ngaran do Tuhan. 6 Om oinsanan nopondo i boyoon do mantad hiri'd bandar dit id somok kopio di kinoiyonon do kinabantalan di tulun do pinatai, do mongoug do palad diyolo' do pasahawon di sapi'ddi, 7 om momoros do poingkaa, ‘A' i' iyahai minamatai dilo tulun om a' iyahai koilo ondung isai kopio o tulun do minamatai. 8 Oi Tuhan, ompunai no i tulun dot Israil i tulun nu, i pinosoliwan nu do mantad hilo'd Masir. Ompunai no iyahai om kada' iyahai poboboo' diti pinamatayan do tulun dit aiso' o sala',’ ka. 9 Om owonsoi pondo i ponuhuan do Tuhan diri, om a' kou nogindo apababaan di pinamatayan do tulun diri,” ka dau.

Pongoturan do Tongoondu' di Natanggayan do Mantad id Pisangadan

10 Om boros ka kawagu di Musa, “Soira' nopo dot onuan kou do Tuhan, i Kinorohingan dokoyu do kamanangan dot id pisangadan om mononggoi kou nondo do tulun do mantad id pisangadan diri. 11 Om haro i' dotindo o tokito dokoyu do tondu' dit olumis dot id pogialatan diyolo' om i korohian dokoyu do mangawin. 12 Om angatan nopo i tondu'ddi do hiri'd walai dokoyu. Om pampadan nondo dau o tobuk dau om pampadan o sondulu, 13 om tingalanan dau o pakayan dau. Om mundorong nondo iyau do hiri'd walai dokoyu om mogihad iyau di molohing dau do solinaid do sombulan; om atalib pondo iri om kowinon nogindo dokoyu i tondu'ddi. 14 Koimbagu nopondo, om ondung a' kou orohian di tondu'ddi, om pologoson nopo iyau do tumongkiad. A' kou i' koino-ino do moniliu dau do turipon ko' papadagang po dau tu' sinansagan i' dokoyu i tondu'ddi do dumudun dokoyu,” ka dau.

Pongoturan do Tungkusan di Tanak do Kusai dit id Gulu Kosusu

15 Om boros ka kawagu di Musa, “Ondung haro o kusai do duwo o sawo om kianak goduwo nopod kusai i sawo dau'ddi nga' okon i' ko' i sawo di kosianan kopio dau o sanganak di tanak do kusai dot id gulu kosusu. 16 Om soira' nopondo do momusorou i tapa' do ralan dau do mamahagi' di dapu' dau dot id tangaanak dau, om a' i' iyau koino-ino do mogobi' di tanak do kusai di sawo di kosianan dau, gisom do patahakon dau dot id tanak do kusai di sawo do kosianan dau i tungkusan dit apatut daa dot aanu di tanak do kusai dit id gulu kosusu. 17 Mositi' no do patahakon dau o duwo tintanga' di dapu' dau dot id tanak do kusai dit id gulu kosusu, do mulong piya dot okon iyau ko' tanak di sawo di kosianan dau. Mositi' no do pusohon di tapa' i tanak dau'd kusai dit id gulu kosusu, om patahakon dot id dau i tungkusan dit apatut dot aanu do tanak diri,” ka dau.

Pongoturan do Tanak dit Amu' Mumboyo'

18 Om boros ka kawagu di Musa, “Ondung haro o molohing di kianak do kusai dit obinsongkiwal om it a' milo'd sunudan, i tanak dit a' nopo tumanud do boros di molohing dau, do pikoton piya daa diyolo' iyau do monuduk. 19 Om mositi' no do pootodon di molohing i tanak diri dot id tongoboyoon di bandar di kinoiyonon diyolo' om bisaraon nogindo. 20 Om poboroson nondo di molohing dot id tongoboyoon diri o boros do poingkaa, ‘A' nopo milo'd sunudan iti tanak dahai, om obinsongkiwal om a' tumanud do boros dahai; momirubat no ilo' do tusin om mogiginum,’ ka. 21 Om iri nondo i tongoboyoon do bandar diri o momodumpau di tanak diri do watu o pomodumpau, do gisom dot apatai i tanak, om oidu' indo dokoyu o karaaton diri. Om korongou ngai' nopondo i hilo'd Israil di nosiliu do miagal diri, om ooris nondo iyolo',” ka dau.

Piro-Piro ot Oturan

22 Om boros ka kawagu di Musa, “Ondung haro o tulun do hinukuman do kapatayon tu' nokowonsoi i' iyau'd sala', om pinogiis i tinan dau dot id kayu di pinoodsuk, 23 om kada' nogi' dokoyu pologoso' do poingiyo'ddi i tinan diri do gisom dot osuaban. Mositi' no do lobongon iri do tontok do tadau'ddi, tu' rata' nopod tulun do poinggiis dot id kayu om poporikot do popol do Kinorohingan dot id pomogunan diri. Ngoyon no dokoyu lobongo' i rata', om a' i' dokoyu ososomu' i tana' di pinatahak do Tuhan, i Kinorohingan dokoyu, dot id dokoyu.

Ponugutan 22

1 Ondung kokito kou do sapi' ko' dumba' do tulun di sompi' ko' bansa'd Israil do nokoidu', om kada' dokoyu pologoso' tomod iri; ngoyon no dokoyu iri pogulio' dot id sanganu. 2 Nga' ondung osodu' o walai di sanganu ko' ondung a' kou koilo do sanganu'ddi, om igitan nopori do muli'. Om korikot nopondo i sanganu do mongoi pogihum diri, om patahakon no dokoyu iri dot id dau. 3 Om iyo nogiddi o wonsoyon dokoyu ondung kobontol kou no do kaladai, ko' kain, ko' nunu nopo i natagak do sompi' ko' bansa' dot Israil. 4 Ondung haro o kaladai ko' sapi' di sompi' ko' bansa' dot Israil do kogupu' do hilo'd ralan, om kada' dokoyu pologoso' tomod iri, suwai ko' uhupan no dokoyu i sanganu do potungag kawagu'ddi. 5 Tongoondu' nopo om a' i' koino-ino do manampakai do pakayan do tongokusai, om tongokusai nga' a' i' koino-ino do manampakai do pakayan do tongoondu'; tu' araatan i' o Tuhan, i Kinorohingan dokoyu, do tulun di momonsoi do miagal diri. 6 Ondung kobontol kou do rumun do tombolog dot id kayu ko' hilo'd tana' do maso di molohing di tombolog do momut, ko' poinsugku' i molohing di tombolog di tangaanak dau, om kada' dokoyu ngoyo' i molohing di tombolog. 7 Koino-ino kou i' do manganu di tanak do tombolog, nga' poiduwon no dokoyu i molohing, om otogui kou i' om osimbayan kou do momogun-mogun. 8 Soira' nopo do momonsoi kou do walai'd wagu, om wansayan no kopio dokoyu do tolig o pointutuk di tisan di taap. Om a' kou indo pasalaon do haro piya o tulun dot aratu' do mantad hiri om gisom dot apatai. 9 Kada' kou pananom do totonomon do suwai do poirolot di pinatanaman dokoyu dot anggur; ondung wonsoyon dokoyu o miagal diri, om a' kou no koino-ino do manganu do tua' dit anggur om i tua' di totonomon do suwai di tinanom dokoyu'd hiri. 10 Kada' dokoyu pokuwai dot iso-iso' o poku' do sapi' om kaladai do maan do pamaradu. 11 Kada' kou panampakai do kain di piniawol do hulu'd dumba' om banang do linan. 12 Tombiran no dokoyu do raboi-raboi o hiri'd apat o sunduk do pakayan dokoyu,” ka dau.

Oturan do Kolidango' do Pisasawaan

13 Om boros ka kawagu di Musa, “Ondung haro o kusai di mangawin dot iso' o tondu', om alaid nondo om a' indo i kusai orohian di tondu', 14 om mongudut nondo i kusai do papasala' di tondu', tu' tondoson dau do nodudun do kusai dot id gulu i tondu' dit a' po iyolo' nokopikawin. 15 Ondung haro ot osiliu do miagal diri, om mositi' no do ngoyon di molohing di tondu' i lapik do toodopon di noturuan do raha' di tadau do kinopikowinan, do popointalang dot a' i tondu' nodudun do kusai dot id gulu. Om mositi' no do pointalangon diyolo' i kain diri dot id tongoboyoon di bandar do hiri'd bisara'. 16 Om poboroson nondo di tapa' di tondu' dot id diyolo' o poingkaa, ‘Pinatahak ku i' iti tanak ku'd tondu' do kowinon diti kusai nga' baino' noddi om niada' i' dau iti tondu'. 17 Om minongudut iyau do papasala' diti tondu', tu' minomoros iyau do nodudun do kusai iti tondu' dit a' po iyolo' nokopikawin. Nga' diya iti kointalangan kopio dot a' ilo tanak ku nodudun do kusai dot id gulu; ontong kou pogi' dilo noturuan do raha' do hiti'd lapik do toodopon do tontok di minikawin iyolo'!’ ka nondo dau. 18 Om ngoyon nondo di tongoboyoon do bandar i kusai om bobogon nondo diyolo' iyau. 19 Om rugion nondo i kusai'ddi do hatus o tusin do pirok om patahakon iri dot id tapa' di tondu', tu' nintingayam i' di kusai o songulun o tondu' dot Israil. Om sawo indo kasai' di kusai i tondu'ddi, om a' i' koino-ino dot adaan di kusai do solinaid di kusai do poimpasi. 20 Nga' ondung otopot i boros do pinonondos om aiso' o kointalangan kopio dot a' nodudun do kusai i tondu' dot id gulu, 21 om mositi' no dot angatan diyolo' i tondu' do hiri'd wawayaan do walai di tapa' dau, om dumpahon nondo di tongokusai do hiri'd bandar i tondu'ddi, do watu o pomodumpau, do gisom dot apatai i tondu'. Minomonsoi i tondu'ddi di kointingayam kopio dot id pogialatan do bansa' toko' tu' nodudun no iyau'd kusai dit a' po iyau nakakawin, om di maso po dau do poingiyon dot id walai di tapa' dau. Om iyo nodti o ralan do mongidu' do karaaton diri. 22 Ondung haro o kusai dot okosupan do maso do poindudun do sawo do kusai'd suwai, om mositi' no do hukuman goduwo nopo iyolo' do kapatayon. Om iyo nodti o ralan do mongidu' do karaaton diri. 23 Ondung haro o kusai dot okosupan do poindudun do tondu' di notunangan nod tulun do suwai dot id iso' o bandar, 24 om posoliwanon nopo dokoyu iyolo' goduwo om dumpahon nod watu do gisom dot apatai. Om patayon no i tondu' tu' a' i' iyau mininggiak do minokitulung om hiri i' daa iyau id bandar, om norongou i' daa iyau do tulun do suwai. Om iri kusai nga' patayon no tu' minongoi i' dudun do tondu' di kitunang no. Om iyo nodti o ralan do mongidu' do karaaton diri. 25 Ondung haro o kusai do mongoi pangasou do tondu' do hilo'd talun, dot i tondu' di notunangan no do kusai'd suwai, om iri no i kusai o patayon. 26 Om a' indo kuroi-kuroyon i tondu' tu' a' i' iyau nokowonsoi do dusa dit apatut do hukuman do kapatayon. Iti nopo om miagal nopo di ngoyon do songulun o kusai saapo' o tiso' o kusai om patayon nondo dau i kusai'ddi. 27 Tu' hiri id talun o pinangasahan di kusai di tondu'ddi, om mininggiak piya daa i tondu' do mokitulung nga' aiso' i' o tulun do milo do mongoi ponulung dau. 28 Ondung haro o kusai dot okosupan do poindudun do tondu' dit aiso' o tunang, 29 om mositi' no do bayaran di kusai i tapa' di tondu'ddi do limo nohopod o tusin do pirok, it irad di topungon kasai'. Om mositi' no do kowinon kopio di kusai i tondu'ddi tu' sinansagan i' dau do dumudun dau. Om a' no i kusai koino-ino do magada' di tondu'ddi do solinaid dau do poimpasi. 30 A' i' kopio koino-ino ot isai nopo o kusai do mongindaraat di tapa' dau do mongoi dudun dot isai nopo di sawo di tapa' dau, o pongindaraat,” ka dau.

Ponugutan 23

Tulun dit Amu' Kohompit do Tulun di Songonuon do Tuhan

1 Om boros ka kawagu di Musa, “Kusai nopo di noidu' o tontolu ko' napampadan o wayaan do sobu, om a' no pohompiton do tulun di songonuon do Tuhan. 2 Tulun nopo di nosusu dot a' po nokopikawin i molohing dau, om a' no pohompiton do tulun di songonuon do Tuhan. Om iri piya sinakagon dau do gisom do korikot di linombusan do sinakagon di koinghopod nga' a' i' pohompiton. 3 Tulun nopo dot Amon om Muab om i sinakagon diyolo', dot iri piya i linombusan do sinakagon di koinghopod nga' a' i' pohompiton do tulun di songonuon do Tuhan. 4 Tu' a' i' iyolo' minanahak dokoyu do taakanon om waig do tontok di hilo' kou id tindalanon di kososoliwan dokoyu do mantad hilo'd Masir. Om minamagadsi' po iyolo' di Biliam i tanak di Bior, i mantad hilo'd bandar do Pitor, i hilo'd Misopotamia, do momopol dokoyu. 5 Nga' a' i' do Tuhan, i Kinorohingan dokoyu pinokinongou i Biliam, suwai ko' siniliu nogi' dau do barakat i popol, tu' osianan i' iyau dokoyu. 6 Kada' kou nogi' kopio pomonsoi do nunu nopo do ponguhup om poposimbayan do bansa'ddi do solinaid diyolo' do poimpasi. 7 Kada' dokoyu poinsiriba-ribao' i tulun dot Idom tu' waris i' dokoyu iyolo'. Om kada' dokoyu poinsiriba-ribao' i tulun do Masir, tu' nokoumbal kou i' do nokoiyon do hilo'd pomogunan diyolo' di gulu po. 8 Om pohompiton nopo do tulun di songonuon do Tuhan o sinakagon diyolo' do mantad di linombusan do sinakagon di kointolu om gisom dot impiro-piro kawagu pilombus o sinakagon diyolo',” ka dau.

Momolidang di Kokiiman do Soudor

9 Om boros ka kawagu di Musa, “Soira' nopo dot id suang kou do kiim do tontok do haro o pisangadan, om ilagon no kopio dokoyu o nunu nopo i monosomu' dokoyu dot id pagantangan do tugama'. 10 Ondung haro o songulun o kusai dot id pogialatan dokoyu dot ososomu' dot id pagantangan do tugama' tu' nokoposoliwan iyau do narot di dongotuong, om mositi' no do sumoliwan iyau di kiim om mundorong nondo do hiri'd soliwan. 11 Osodop pondo om mositi' nod modsu' iyau, om otonob pondo o tadau om koino-ino nogi' iyau do gumuli' do hiri'd kokiiman. 12 Mositi' no do haro ot iso' o kinoiyonon do ngoyon dokoyu pagawasai do hiri'd soliwan di kokiiman. 13 Migit kou no do kayu-kayu do ponokopakakas dokoyu, om mongoi kou nopondo taii' om milo i' dokoyu do maan do pongukad do luang i kayu-kayu'ddi, om olitan nogindo kawagu i luang. 14 Gompion no i kokiiman dokoyu om olidang i' dot id pagantangan do tugama', tu' moyo-woyo' i' dokoyu o Tuhan, i Kinorohingan dokoyu, do hiri'd kokiiman do mongintirung dokoyu om manahak dokoyu do kamanangan do sumaap ngai' di pisangod dokoyu. Kada' kou pomonsoi do nunu nopo it a' osonong, dot i popotongkiad do Tuhan do mantad id dokoyu,” ka dau.

Piro-Piro ot Oturan do Suwai

15 Om boros ka kawagu di Musa, “Ondung haro o turipon do mogidu' do mantad id tuan dau om rumikot nondo dot id dokoyu do mongoi pokiintirung, om kada' dokoyu iyau pogulio' dot id tuan dau. 16 Om koino-ino i' iyau do miyon do hinonggo nopo o bandar di korohian dau, om kada' kou korongit dot id dau. 17 A' no kopio koino-ino do haro o tulun dot Israil do kusai ko' tondu' po do sumiliu'd sundal dot id walai do tingolig. 18 Om a' kou koino-ino do papatahak do tusin dot i suminiliu'd sundal o ralan do kinoonuan di tusin, do hiri'd Walai'd Sasambayangan do Tuhan, i Kinorohingan dokoyu, do maan do pamayaan do batos di mikuwo'd sumpa'. Tu' araatan i' kopio o Tuhan do sundal dot id walai'd tingolig. 19 Soira' nopo do popoolos kou do tusin ko' taakanon ko' nunu nopo dot id sompi' ko' tulun dot Israil, om kada' dokoyu iyau suhuo' do mambayar do bunga di nolos dau. 20 Koino-ino kou i' do mokibunga di paalasan dokoyu dot id tulun do bansa'd suwai, nga' a' kou i' koino-ino do mokibunga di paalasan dokoyu dot id sompi' ko' tulun dot Israil. Tonudo' no dokoyu ot oturan diti, om barakatan indo do Tuhan, i Kinorohingan dokoyu, o nunu nopo o wonsoyon dokoyu do hilo' kou id pomogunan di ngoyon dokoyu pomogun-mogunai. 21 Soira' nopo do mamatos kou dot id Tuhan, i Kinorohingan dokoyu, om kada' dokoyu popiloid-loido' do momonsoi i nakabatos dokoyu; tu' uhoton kou indo do Tuhan di batos dokoyu, om dusa no dokoyu ondung a' no dokoyu bayaanon i batos dokoyu'ddi. 22 Okon i' ko' dusa dot a' kou piya mamatos dot id Tuhan. 23 Nga' mamatos kou nopo do mantad id kosinggawaan do ginawo dokoyu, om bayaanon no kopio dokoyu iri. 24 Soira' nopo do sumusui kou do ralan di kawaya' do kabun dot anggur do tulun do suwai, om koino-ino kou i' do mangakan di tua' dot anggur do gisom dot ayahan kou nga' kada' kou posuang di tua' dot anggur dot id balatak dokoyu dot igitan do mamanau. 25 Soira' nopo do sumusui kou do ralan di kawaya' do tumo do tinanaman do gandum do tulun do suwai, om koino-ino kou i' do mangakan di gandum di kotuon dokoyu nga' kada' kou po panganu di gandum do goribon do manganu,” ka dau.

Ponugutan 24

Oturan di Miada' om i Kumawin Kawagu

1 Om boros ka kawagu di Musa, “Ondung haro o kusai di mangawin dot iso' o tondu', om alaid nondo om mada' indo iyau di tondu'ddi tu' haro no ot a' dau korohian, om monulis nondo iyau do surat do kopiadaan om patahakon no dot id tondu'ddi, om uyungon nondo dau i tondu' do mantad id walai dau. 2 Om ondung akawin kawagu do kusai'd suwai i tondu' do nadaan diri, 3 om iri piyando i kusai'ddi nga' a' i' orohian di tondu' dot alaid-laid. Om monulis nondo i kusai do surat do kopiadaan om patahakon no dot id tondu'ddi, om uyungon nondo dau i tondu' do mantad id walai dau. Ko' amu' no iyo'ddi, om apatai doti' i sawo di tondu' di koduwo. 4 Nga' poingkuro nopo ot osiliu, nga' a' no koino-ino i sawo di tondu' dot id gulu do mangawin kawagu di tondu'ddi; tu' mositi' no do sorohon di kusai do nososomu' i tondu'ddi. Ondung kowinon kawagu di sawo di tondu' dot id gulu i tondu'ddi, om iti no o karaatan kopio do Tuhan. Kada' kou nogi' kopio pomonsoi do dusa dot iyo kopio'ddi karaat do hilo'd pomogunan di patahakon do Tuhan, i Kinorohingan dokoyu, dot id dokoyu,” ka dau.

Piro-Piro ot Oturan do Suwai

5 Om boros ka kawagu di Musa, “Kusai nopo di wagu po kakawin, om a' i' koino-ino dot onuon do sumiliu'd soudor ko' posuangon do nunu nopo o karaja' di pogiuhupan do kumaraja'; a' i' iyau koino-ino do lohowon do momonsoi do karaja'ddi do solinaid do sontoun, om koundorong i' iyau do hiri'd walai dau om milo indo do popotood di sawo dau. 6 Soira' nopo do popoolos kou do nunu nopo dot id isai nopo o tulun, om kada' dokoyu ngoyo' i watu di pongisar dau di gandum dau do maan do pasandaon. Tu' aahawan nondo i sompiiyon dau di koburu-buruon diyolo' do poposodia' do taakanon, i koposi-posion diyolo'. 7 Isai nopo o mongoi panangkap do sompi' ko' tulun dot Israil do silihon do turipon dau ko' padagangon po dau dot id ponguripanan om mositi' no do hukuman do kapatayon o tulun diri. Om iyo nodti o ralan do mongidu' do karaaton diri. 8 Soira' nopo do haro o toruol dit araat kopio dot id kulit dokoyu, om wonsoyon no kopio o miontok di ponuhuan di tongoimam do mantad id payat do Liwi; wonsoyon no dokoyu it apatut do wonsoyon do miontok di pinosunud ku dot id diyolo'. 9 Soroho' no dokoyu i winonsoi do Tuhan, i Kinorohingan dokoyu, dot id di Miriam do tontok di nokosoliwan kou no do mantad hilo'd Masir. 10 Soira' nopo do poolos kou do nunu nopo dot id iso' o tulun, om kada' kou ongoi suang di walai dau do mongoi panganu di rasuk dau di pasandaon mantad dau; 11 mandad kou nopo do hiri'd soliwan om pologoson nopo i tulun diri do mongoi papatahak di rasuk dau dot id dokoyu. 12 Ondung tulun iyau do mosikin, om kada' dokoyu poopio' i rasuk dau'ddi do gisom dot osuaban; 13 popiguli-gulion no dokoyu i rasuk diri do monikid sosodopon, om haro i' o rasuk dau do modop. Om ounsikou indo iyau om asanangan o Tuhan, i Kinorohingan dokoyu, dokoyu. 14 Kada' kou ponipu' do susuhuon di mosikin om it aiso' o pokukurayan, do tulun tuu dot Israil ko' bansa'd suwai di poingiyon dot id bandar dokoyu. 15 Godsian kasai' no dokoyu iyau do monikid tadau do gontok di karaja' dau do tadau'ddi, dot a' po otonob o tadau; tu' momoguna' i' kopio iyau di tusin, om piimanan no dau dot aanu dau iri. Ondung a' dokoyu iyau godsian, om momolohou nondo iyau do Tuhan do papasala' dokoyu, om iyokoyu nondo o pasalaon tu' nokowonsoi kou i' do dusa. 16 A' i' koino-ino do hukuman do kapatayon i molohing dot i kasalaan do nowonsoi di tangaanak dau o kapamatayan; om tangaanak nga' a' i' koino-ino do hukuman do kapatayon dot i kasalaan di molohing diyolo' o kapamatayan; pointikid-tikid do tulun om milo nopod hukuman do kapatayon om iri dau'd kasalaan o kopomohukuman. 17 Kada' dokoyu ahawai dit apatut dot aanu diyolo' i tulun do bansa'd suwai om i tangaanak dot aiso' o molohing; kada' dokoyu onuo' i rasuk do tondu' do nopuadan do maan do pasandaon do nokoutang piya iyau dot id dokoyu. 18 Hondomo' no dokoyu dot iyokoyu nga' turipon i' do hilo'd Masir di gulu po om Tuhan i', i Kinorohingan dokoyu o pinoposoliwan dokoyu do mantad hilo'; om iri no o kinapatahakan ku dokoyu dot oturan diti. 19 Tontok nopo do timungon dokoyu i tomot dokoyu, om haro nondo o wookon di gandum di naanu dokoyu dot a' dokoyu oigitan, om kada' no dokoyu ngoyo' gulio' iri. Pologoson nopori do maan di tulun di bansa'd suwai, om i tangaanak dot aiso' o molohing, om i tongoondu' do nopuadan, om barakatan kou indo do Tuhan, i Kinorohingan dokoyu, do nunu nopo o wonsoyon dokoyu. 20 Noongoi nopo dokoyu koupu' i tua' do saitun, om kada' kou no guli' do mongoi pongupu' di nongoolu'; tu' iri nopo om maan po di tulun do bansa'd suwai, om i tangaanak dot aiso' o molohing, om i tongoondu' do nopuadan. 21 Noongoi nopo dokoyu koupu' i tua' dot anggur dokoyu, om kada' kou no guli' kawagu do mongoi pogontong do tua' do hiri'd guas dit anggur, tu' iri nopo tua' dot anggur di noolu' om maan po di tulun do bansa'd suwai om i tangaanak dot aiso' o molohing, om i tongoondu' di nopuadan. 22 Kada' kopio dokoyu kolihuwai do turipon kou do hilo'd Masir di gulu po; om iri no o kinapatahakan ku dot oturan diti dot id dokoyu.

Ponugutan 25

1 Ondung haro o duwo o tulun dot Israil do mongoi dot id kut do mongoi pisalasai do hal, om oilaan nondo dot iri nopo tiso' om aiso' o sala' om iri no tiso' om kisala'. 2 Ondung loposon o pomohukum di tulun di kisala', om mositi' no do suhuon di gompomutus i tulun diri do tuminggoub om loposon nogindo. Om songkuro nopo o kawagato' do kasalaan do nowonsoi dau, om irad noddi o kosoruo' do pamalapos. 3 Nga' a' i' koino-ino dot lobi' ko' ingapat nohopod loposo'. Tu' asaru' nopo ko' iri, om iyo pod intingayamon kopio o tulun diri dot id toguang do tulun dot ogumu'. 4 Kada' dokoyu kakangai o kabang do sapi' di maso do mongulok do gandum do potobilang di tua' do mantad id rawo,” ka dau.

Tonggungan dot id Tobpinai di Napatai

5 Om boros ka kawagu di Musa, “Ondung haro o duwo o kusai do miobpinai do poingiyon dot id iso' o kinoiyonon, om apatai nondo ot iso' diyolo'. Om aiso' po o tanak dau'd kusai, om iri nopondo sawo dau om a' i' koino-ino do kowinon do tulun dit okon ko' id suang do sompiiyon di sawo mantad dau. Apatut nopo do mangawin di tondu'ddi om i tobpinai di sawo di tondu'. 6 Om iri nopondo tanak diyolo' do kusai dit id gulu kosusu om sorohon i' do tanak di tulun di napatai, om haro i' o sinakagon do tulun diri dot id pogialatan do tulun dot Israil. 7 Nga' ondung a' i' tulun diri mangawin di sawo daa di tobpinai dau di napatai, om mositi' no do mongoi i tondu' solowot di tongoboyoon do bandar om moro-boros nondo do poingkaa, ‘A' i tobpinai di sawo ku momonsoi di tonggungan dau do manahak do sinakagon di tobpinai dau dot id pogialatan do tulun dot Israil,’ ka. 8 Om mositi' nod lohowon di tongoboyoon do bandar i kusai'ddi om moro-boros iyolo' dot id dau. Ondung mada' kasai' i kusai'ddi do momonsoi di tonggungan dau, 9 om mositi' no do ngoyon di sawo di tobpinai dau insamakai i kusai'ddi dot id toguang di tongoboyoon di bandar, om ngoyon dau iduwo' o kasut di kusai, om dulaan nogindo o rabas di kusai, om moro-boros do poingkaa, ‘Iyo nodti o wonsoyon dot id tulun dit a' manahak do sinakagon dot id tobpinai dau,’ ka. 10 Om sompiiyon nopondo di kusai'ddi om roitan do ‘sompiiyon do tulun di nongoi iduwo' o kasut' do hilo'd Israil,” ka dau.

Piro-piro o Toturan do Suwai

11 Om boros ka kawagu di Musa, “Ondung haro o duwo kusai do miumang, om mumbal nondo i sawo di tiso' do kusai'ddi do mongoi ponguhup di sawo dau tu' ngoyon dau songgolo' o wayaan do sobu di ponokiumang di sawo dau, 12 om potodon nopo o longon di tondu'ddi, om kada' no iyau insianai. 13-14 Kada' ponipu', do mamakai do ponimbang om pagadang dit a' koontok o ralan do monipu'. 15 Mamakai no di ponimbang om pagadang di koontok om otogui kou i' do poingiyon do hiri'd pomogunan di patahakon do Tuhan i Kinorohingan dokoyu dot id dokoyu. 16 Araatan i' kopio o Tuhan i Kinorohingan dokoyu, do tulun di monipu',” ka dau.

Monuhu' do Mamatai di Tulun dot Amalik

17 Om boros ka kawagu di Musa, “Sorohon no dokoyu i winonsoi do tulun dot Amalik do tontok di hilo' kou id tanga'd ralan di kososoliwan dokoyu do mantad hilo'd Masir. 18 A' i' iyolo' oronok do Kinorohingan, om hiri iyolo'd tohuri do minongoi panangod dokoyu do tontok dit ohuyan kou no om a' kou no kogoos. Om patayo' ngai' noddi diyolo' i tulun dokoyu di hiri'd tohuri, i tulun dit a' no angkapanau. 19 Iyo nopoddi, om katahak nopondo do Tuhan, i Kinorohingan dokoyu, o pomogunan diri dot id dokoyu, om aiso' o ligogon dokoyu do mantad id pisangod di poingiyon dot id posorili' dokoyu, om mositi' no do patayon ngai' dokoyu i tulun dot Amalik om gisom dot a' nondo iyolo' ahandaman. Soro-sorohon no kopio dokoyu iti!” ka dau.

Ponugutan 26

Porsombahan do Mantad id Tomot

1 Om boros ka kawagu di Musa, “Soira' nopondo do korikot kou do hilo'd pomogunan di patahakon do Tuhan, i Kinorohingan dokoyu, dot id dokoyu, om kopomogun-mogun kou'd hilo', 2 om mositi' no do sompori-pori kou nopo do posuang dot id balatak do bahagi' di koiso' do mantad id pointikid-tikid do tua' di totonomon di nomot dokoyu, om pootodon nondo dot id tiyonon do sumambayang di natantu' mantad. 3 Mongoi kou no solowot dit imam di maso do maganu-anu do tontok diri om poboroson no dot id dau o poingkaa, ‘Dinondo no do pointalangon ku dot id Tuhan, i Kinorohingan ku do nokosuang oku no di pomogunan di pinabatos dau dot id komolohingan toko' do patahakon dot id dati',’ ka. 4 Om romiton nondo dit imam i balatak di poingigit dokoyu om poilihon nondo dau do hiri'd dotimbabaan di pananaraban do porsombahan dot id Tuhan, i Kinorohingan dokoyu. 5 Om poboroson nondo dokoyu o boros do miagal diti dot id toguang do Tuhan, ‘Oi Tuhan, taki ku nopo om bansa' dot Aram di mombo-hombo. Om angatai no dau i sompiiyon dau do mongoi do hilo'd Masir do mongoi iyon-iyon do hilo'. Tontok di minongoi i' iyolo'd hilo', om okuuri' iyolo', nga' kosiliu noddi iyolo' do bansa' dit agayo om okoris. 6 Om orongit tomod i tulun do Masir dot id dahai om sinansagan iyahai diyolo' do kumaraja' do miagal do turipon. 7 Om pillohou noddi iyahai do mokitulung diya', oi Tuhan, i Kinorohingan di taki-aki dahai. Om norongou nu i' i lolohou dahai om nokito nu i koinggoritan, om kosusaan, om koudipono' dahai. 8 Om pinosoliwan nu i' iyahai do mantad hilo'd Masir dot i sinundu om kokorisan nu dit agayo kopio o pinoposoliwan nu dahai. Om minomonsoi ko do piro-piro o koimayaan om kosuayan, om minomonsoi ko do piro-piro i minomorolosi kopio do pisangod. 9 Om pootodo' nu noddi iyahai do hiti, om patahako' nu no dahai iti pomogunan di kaya' om it oluhub o tana'. 10 Om iri noddi o kapatahakan ku diti bahagi' do koiso' do mantad id tomot di pinatahak nu dot id doho', oi Tuhan,’ ka. Om iyo noddi o papatahak dokoyu di balatak diri dot id Tuhan. Om owonsoi pondo dokoyu o miagal diri om sumambayang kou nogindo dot id dau do hiri. 11 Om mongunsikou kou no do koinsanai dit ongosonong do nakatahak do Tuhan, i Kinorohingan dokoyu, dot id dokoyu om id sompiiyon dokoyu. Om angatan no i tulun do Liwi om i tulun di bansa'd suwai di poingiyon dot id pogialatan dokoyu do mamung dokoyu dot id karamayan diri. 12 Pointikid-tikid do kotolu'd toun, om mositi' no do patahakon dokoyu i porsombahan dokoyu di sompihopod, iri no i sompihopod di tomot dokoyu. Onuan nopo dokoyu'ddi om it imam di mantad id payat do Liwi, om i tulun di bansa'd suwai, om i tangaanak dit aiso' o molohing om i tongoondu' di nopuadan, om haro indo o taakanon dot aanu diyolo' do mantad id pointikid-tikid do bandar. Om owonsoi nopondo dokoyu o miagal diri, 13 om moro-boros kou no dot id Tuhan do poingkaa, ‘Aiso' no ot ongokuri' piya di sompihopod do tua' do totonomon do nokoolu' do hilo'd walai ku, it apatut do patahakon dot id diya', oi Tuhan; nakatahak ngai' ku nori dot id tulun do Liwi, om id tulun di bansa'd suwai, om id tangaanak dit aiso' o molohing om id tongoondu' di nopuadan, do miagal di pinonuhuan do Tuhan dot id doho'. Om iso' po di ponuhuan do Tuhan do pasal di porsombahan di sompihopod nga' aiso' i' o notolibambanan ku. 14 Om aiso' i' ot ongokooro' piya di porsombahan do sompihopod diri do nakan ku do tontok di mogihad oku do tulun do napatai; ko' pinosoliwan ku po di walai ku do tontok di maso ku do sosomu' dot id pagantangan do tugama', ko' numaan ku do podsurung di tulun do napatai. Otorodok oku i' do minumboyo' diya', oi Tuhan, tu' nowonsoi ngai' ku i' i pinonuhuan nu do pasal do porsombahan di sompihopod. 15 Om ontong no om barakatan no ot Israil, i tulun nu, do mantad hino'd kinoiyonon nu dit olidang, do hino'd surga; om barakatai noti pomogunan di kaya' om it oluhub di pinatahak nu dot id dahai, do tumanud di batos nu dot id taki-aki dahai,’ kantondo dau,” kad i Musa.

Tulun di Pinili' do Tuhan

16 Om boros ka kawagu di Musa, “Tadau nod baino' do suhuon kou'd Tuhan, i Kinorohingan dokoyu do mumboyo' do koinsanai dit oturan dau; om tumorodok kou no do tumanud diri do mikuwo'd aayi-ayi' o ginawo dokoyu. 17 Tadau nod baino' do nakun dokoyu o Tuhan do sumiliu'd Kinorohingan dokoyu. Om minamatos kou do mumboyo' do boros dau om momonsoi do koinsanai dit oturan om ponuhuan dau. 18 Om tadau nod baino' do rinamit kou do Tuhan do sumiliu'd tulun dau do miagal di pinabatos dau dot id dokoyu, om sinuhu' kou dau do tumanud do koinsanai dit oturan dau. 19 Om silihon kou nondo dau do bansa' dit agayo ko' mantad do bansa' do suwai di winonsoi dau, om royohon kou nondo om pusohon Om osiliu kou nondo do tulun do songonuon do Tuhan, do miagal di nakabatos dau,” ka dau.

Ponugutan 27

Pinotulis dot id Watu it Oturan do Kinorohingan

1 Om polombuso' noddi di Musa om i piro-piro o boyoon dot Israil dot id bansa'ddi o boros do poingkaa, “Tonudon no dokoyu o koinsanai diti ponuhuan di pinoboros ku di tadau baino'. 2 Tontok nopondo do tadau di sumoborong kou di Bawang do Yordan do rumikot do hilo'd pomogunan di patahakon do Tuhan, i Kinorohingan dokoyu, dot id dokoyu, om poudong kou no do piro-piro o watu dit angagayo om saaton nori dot opurak. 3 Om potulison no dot id watu'ddi o pointikid-tikid di boros dot oturan diri. Om korikot kou nopondo do hilo'd pomogunan di kaya' om it oluhub o tana', i pinabatos do Tuhan, i Kinorohingan di tukuon di taki-aki dokoyu, 4 om di kosoborong kou di Bawang do Yordan, om mositi' nod mongoi kou do hiri'd Nuluhon dot Ibal. Om id timpak nod nuluhon diri o poudangan dokoyu di watu, om panaatan di watu'ddi do miagal di pinonuhuan ku dokoyu di tadau baino'. 5 Om hiri nod kinoiyonon diri o pamansayan dokoyu dot iso' o pananaraban do porsombahan, do wonsoyon nopo om i watu dit a' i' noumbalan do mamabak do pakakas do basi' o pinamabak. 6 Tu' pointikid-tikid do pananaraban do porsombahan di wonsoyon do maan do don Tuhan, i Kinorohingan dokoyu, om mositi' nod watu dit a' binabak o maan do wonsoyon. Om id sakai no di pananaraban do porsombahan diri o patahakan dokoyu di porsombahan do sorobon. 7 Om patahakon nogi' i porsombahan do piuludan om makan kou no dot id kinoiyonon diri om kumotood kou no dot id toguang do Tuhan, i Kinorohingan dokoyu. 8 Om tarangon no dokoyu o ponunulis do pointikid-tikid di boros dot oturan do Kinorohingan do hiri'd piro-piro o watu di sinaat dot opurak diri,” kad i Musa. 9 Om boros kaddi di Musa om i piro-piro ot imam do mantad id payat do Liwi dot id koinsanai di tulun dot Israil, “Kada' kou kohiyo, oi tulun dot Israil, pokinongou kou no kopio! Tadau nod baino' do nosiliu kou do tulun do songonuon do Tuhan, i Kinorohingan dokoyu. 10 Iyo nopoddi om umboyo' kou nod boros do Tuhan om tonudon no o koinsanai dit oturan dau, i pinoboros ku dot id dokoyu di tadau baino',” ka diyolo'.

Kousungan do Tulun dit Amu' Mumboyo'

11 Om boros kaddi di Musa dot id bansa' dot Israil, 12 “Kosoborong kou nopondo di Bawang do Yordan, om mositi' no do mingkakat ot id timpak di Nuluhon do Gorisim i payat di Simion, om Liwi, om Yohuda, om Isakar, Yusup, om Binyamin, do tontok do poboroson i boros do pamarakat do bansa' diti. 13 Om tontok nopondo do poboroson i boros do pomopol om mositi' no do mingkakat do hilo'd timpak do Nuluhon dot Ibal i payat do Rubin, om Gad, om Asor, om Sibulon, om Naptali. 14 Om poboroson nondo di tulun do Liwi dot opuhod o boros diti, om sumimbar nondo i tulun dot Israil dot, ‘Amin,’ ka