Thu Taksa Hungsuok
1 A tûngin Thu a um a, Thu chuh Pathien kawmah a um, Thu chuh Pathien ahi. 2 Amah chuh a tûngin Pathien kawmah a um hi. Thil cheng cheng, a bawnin amah siem a hii; 3 thil kisiem chengcheng hi amah siem loh bangmah a um puoi. 4 Amah achun hinna a um, zie hinna chuh mihiemte vak ahi. 5 Vak chuh thim lak ah a hung vak a; thim in zie chuh a ngaihsak puoi. 6 Pathien sawl mi khat a hung um a, a min chuh Johan ahi. 7 Zie pa chuh vak thu hetsak dingin a hung a; amah vanga mi cheng cheng in a het u a, a ginchak theihna dingun. 8 Amah chuh vak chuh ei puoi, vak thu chuh hetsak dinga hung a hi zawi. 9 Zie chuh vak diktak khawvela hunga, mitin salh vak chuh ahi. 10 Amah chuh khawvel ah a um, khawvel chuh amah siem ahi, khawvel chun amah a he puou. 11 A mite kawmah a hung a, a mite’n amah a na he puou. 12 Himahlele, amah lawp ta chuh, a kawm u ah Pathien chate hih theihna ding thu a piei, a min gingchate chuh. 13 Ziete haw chuh thisan hin a hi puou a, phehlevo deihlam a hin ahi puou a pasal deihlam a hin le ahi diek puou a, Pathien hin ahi zawu hi. 14 Tichun, Thu chuh phehlevo a hung suok a, I laku ah a um ta a, lungsietna leh thutak in a dim hi. Pa Cha chang khat neih, lopi guolin, a lopi zie I muu hi. 15 Johan in amah thu a gen a. A kiko a, “Ka nunga ei zui ding ka tih khan, ei makhelh ahi tai, ka maa umsa him ahi, ti a a thu ka gen khah amah hi ahi,” a ti a. 16 A bukimna I chang chiet ui, lungsietna chunga lungsiet sawnna tawh. 17 Dan thu chuh Mosi’n a pie a, himahleh, lungsietna leh thutak, Isu Krista vangin a hung um hi. 18 Kuoma’n bangmah tikin Pathien a mu ngei puou, Chapa changkhat neih. Pa ângsung a um ngêi khan, a chanchin a gen ahi tai.
Baptist Johan Thugen
19 Chun, Judate’n, “Kuo na hi?” ti a dawng dinga, Jerusalem khuo apat a thiempute leh Levi chi laka mi a sawl lai u khan ziehaw hi Johan thu na hetsak chuh ahi: 20 Johan chun a na dâwn ding chuh niel lo in, tângphuong tak leh, kichien takin a na gen a, “Krista chuh ka hi puoi,” a ti a. 21 Amau haw chun a kawmah, “Kuo na hi leh? Elija na hi leh?” a tiu a. Johan chun, “Ka hi puoi,” a ti a. “A leh, thiemgau khah na him?” a tiu a. Amah chun, “Ka hi puoi,” ti’n a dâwng a. 22 “A hih leh, kuo na hi? Ei sawlte ka dâwn theihna dingun ei hilh ta’n la. Na chanchin himhim banga na gen ding?” a tiu a. 23 Johan chun, “Lalpa lampi hih tuok un, ti a gamthip a kikopa aw chuh ka hii, thiemgau Isai gen guol khan,” a ti a. 24 A misawlteu chuh Pharisaite kawma um ahiu a, 25 Chun, amau chun a kawmah, “Krista bêk, Elija bêk, thiemgau khat ahim bêk na hih loh chun, bang zieka baptist sek na hi?” ti’n a dawng kit u a. 26 Johan chun a kawm u ah, “Ken chuh tui in ka baptist sek, himahleh, na laku ah na het loh uh mi khat a um hi. 27 Amah chuh ka nunga hung ding pa chuh ahi, a kengtawbek khau phel hawi le kei puoi,” a ti a. 28 Zie thil haw chuh Jordan gala, Bethani khuo a Johan baptist na a khah a hih uh ahi.
Pathien Belamno
29 Chun, a zing chun, Johan in Isu a kawma hung dingin a mu a, a gen a, “En tiem u, Pathien Belamno, vannuoi gitloh la mang pa khuh! 30 Amah hi ahi: ‘Mi khat ka nunga hung dingin, ei makhelh tai, ka maa umsa him ahi,’ ka tih pa khah. 31 Amah chuh ka na he khel puoh a, himahlele, Israel te kawma hetsakna dingin, tuia baptist dinga hung ka hi,” a ti a. 32 Chun, Johan chun a thu a hetsak a, a gen a, “Thagau chuh vakhu banga van apat a hung kum ka mu a, a chungah a chu zing a. 33 Amah chuh ka he nai diek puoh a, himahlele, tuia baptist dinga ei sawlpa khan ka kawmah, ‘Kuo chung hita leh, Thagau zu chu a, a chunga um zing na muh ta, amah chuh Thagau Thiengtho a baptist ding chuh hi’n a,’ ei ti a. 34 Zie chuh ka mu ta ngêi a, tichun, zie pa hi Pathien Chapa a hii tih ka hetsak tai,” a ti a.
Isu Nungzui Masate
35 Chun, a zing kit chun, Johan a ding a, a sinsakte nih tawh: 36 Isu chieh viel lai a mu a, “En tiem u, Pathien Belamno khuh!” a ti a. 37 A sinsakte nih chun a thugen chuh a zau a, Isu a zui tau a. 38 Chun, Isu a kihei a, a hun zuih u chuh a mu a, a kawm u ah, “Banga na hawl uh?” a ti a. Amau chun, “Rabbi, (zie chuh Sinsakpa tihna ahi) hawia um na hi?” a tiu a. 39 Ama’n a kawm u ah, “Hung leu chin mu’n lau,” a ti a. (zie hun chuh, nitâk an huon phat vel ahi.) Tichun, amau chuh a chieh u a, a umna chuh a muu a, zie ni chun a kawmah a um zing tau a. 40 Johan thugen he a, Isu zuite nih chuh, a khatzaw chuh Andrew, Simon Peter suohpih ahi. 41 Amah chun, a masapen in amah suohpih Simon a mu a, a kawmah, “Messiah ka mu tau,” a ti a, (zie chuh Krista tihna ahi). 42 Tichun, Simon chuh Isu kawmah a hun pui a. Isu’n amah chuh a na en a, a kawmah, “Na min chuh Johan chapa Simon ahi, himahleh, Kipha hun ti’n au,” a ti a. (Zie chuh Peter tihna ahi a, a umzie chuh “suong” tihna ahi.)
Philip leh Nathanael Sapna
43 Chun, a zing chun, Isu chuh Galili gama chieh a guo a. Philip a mu a, a kawmah, “Nei zui ah,” a ti a. 44 (Philip chuh Bethsaida khuo a um a hi a, zie chuh Andrew leh Peter umna khuo mah ahi.) 45 Philip chun Nathanael a mu a, a kawmah, “A chanchin, Mosi’n Dan lehkhabu a a zik leh, Thiemgaute’n a zik u kha, amah chuh ka mu tau, Nazareth Isu, Joseph chapa chuh,” a ti a. 46 Nathanael chun a kawmah, “Nazareth apat thilpha a pawt theia a him?” a ti a a. Philip chun a kawmah, “Hung inla, en ah,” a ti a. 47 Isu’n, Nathanael a kawma hung a muh chun, a chanchin a gen a, “En tiem u, Israel diktak, amah a diklohna him um lo chuh!” a ti a. 48 Nathanael chun a kawmah, “Nangin bangtia nei het a?” a ti a. Isu’n a kawmah, “Philip in a hun sap maa, theipi bula na um lai khan ka hun mu a puo,” a ti a. 49 Nathanael in a kawmah, “Rabbi, Pathien Chapa na hi, Israel te Leng na hi hi!” a ti a. 50 Isu’n a kawmah, “Theipi bula na um lai khan ka hun mu a puo, ka tih ziekin na gingcha ahi maw? Ziehaw sanga thil lopi zaw hi hun mu’n la,” a ti a, a dâwng a. 51 Isu mah in a kawmah, “Tihtakzet, tihtakzet a ka hun hilh na hiu hi, van kihawng a, Pathien vânsâwlchâkte Mihiem Chapa chunga kum leh kal hun mu’n lau,” a ti a.
Kana Khuo a Kichênna
1 Chun, a ni thum ni chun, Galili gama Kana khuo ah kichênna a um a, tak achun Isu nu le a um a. 2 Isu leh a sinsakte le kichên na achun a chiel u a. 3 Tichun, uain a hung tâksap phet un Isu nu’n a kawmah “Uain a kitasam tau hi,” a ti a. 4 Isu’n a kawmah, “Numei, nang nei hilh ding banga um? Ka hun a tung nai puoi,” a ti a. 5 Ziephet chun, Isu nu chun tuonvaite kawmah, “Na kawm u a a gen tâk chuh hih zel un,” a ti a. 6 Chun, Judate kithiensak dân guolin, suong tuibel gup, buk sawmli mun nih ahim, mun thum ahim, dawl chiet tak achun a tung u a. 7 Isu’n tuonvaite kawmah, “Tui belhaw achun tui hih dim un,” a ti a. Tichun, a ngâwnggeng gei in a sung dim chiet u a, 8 Ziephet chun, a kawm u ah, “Tu’n thal unla, guolvak tuonvai lawiupa kawmah chieh pih un,” a ti a. Tichun, a chieh pih tau a. 9 Guolvak tuonvai lawiupa chun tui uain hung suok chuh a tep a, a pawtna chin la a he puoh a, (tui khaite chun la a heu a), khutichun, zi nei ding pa chuh a sama, 10 a kawmah, “Mitin in, a tûngin uain pha chuh a hawm masa sek u a, chun, tam deuh a dâwn nung u leh, a phalo zaw deuh chuh a hawm dawk sek ui, himahlele, nangin, tu tiengin uain pha chuh na kawih zing nalai a!” a ti a. 11 Isu’n, zie a thilmak hih kipatna hi, Galili gam Kana khuo achun a hih a, a lopi zie a latsak a; tichun, a sinsakte’n a gingcha tau hi. 12 Chun, zie nung chun Isu chuh, a nu tawh, a suohpihte tawh, a sinsakte tawh Kapernaum khuo ah a zu chieh u a, tak achun ni sawtlo cha a um u a.
Temple Sukthienna
13 Chun, Judate Chiehkân Kut a nai ta a, Isu Jerusalem khuo ah a va chieh a. 14 Tichun, Pathien Ho-In a bâwng bang, belam bang, vakhu bang, zuok haw leh, dangka theng haw, a na chu chuh a va mu a. 15 Khutichun, khau huol in zêpna a siem a, belam leh bâwng, a bawnin Pathien Ho-In apat chun a nawhdawk a; dangka thengte dawhkân chuh a sawtpaih sak a, a dangka hawu a thehzak sak a; 16 vakhu zuokte kawm a chun, “Zie thil haw hi tak apat hin chieh mang pih un, ka Pa In hi sumkawlveina In in siem kiu,” a ti a. 17 (“Na In a ka phatchuomngaih na’n ei ne zo ina,” tih kizik chuh a sinsakte’n a heu a.) 18 Khutichun, Juda, thuneitu te chun a kawmah, “Zie thil haw hihna ding hin thuneihna na nei hi tih ka het theihna ding un bang thilmak a na hih theih ding?” a tiu a. 19 Isu’n a kawm u ah, “Zie In hi hihsieu inla, ni thum sungin tung ding kit ing ka,” ti’n a dâwng a. 20 Judate chun, “Zie In hi kum sawmli leh kum gup kisa ahi a, nangin ni thum sunga maw na tun din kit ding?” a tiu a. 21 Himahlele, a sapum In thugen ahi. 22 Zieziekchun, mithi lak apat a thawh kitin, zie thu chuh a na gen tai tih, a sinsakte’n a he kit tau a; tichun, Pathien lehkha thu leh Isu thugen chuh a gingcha tau hi.
Mihing Nungchang Isu’n a Hêi
23 Chun, Chiehkân Kut mat laia Isu Jerusalem khuo a a um lai in, mi tamtakin, a thilmak hih a muh ziekun a gingcha tau a. 24 Himahleh, Isu’n amau haw chuh a muong zo puoh a. 25 A chanchinhawu chuh kuomah hilh a ngai puoi, amah ngêi in a lungthim u a um haw chuh a he ngâl a.
Isu leh Nikodem Kihona
1 Chun, Pharisaite laka mi khat, a min Nikodem, Judate lawiupa khat a um a. 2 Zie pa chuh zan in Isu kawmah a chieh a, a kawmah, “Rabbi, Pathien kawm apat a sinsakpa dinga hung na hi, tih ka heu a; Pathien a chung u a a um loh chun, zie thilmak na hih bang hi kuoma’n hih thei puo’n au,” a ti a. 3 Isu’n a dâwng a, a kawmah, “Tihtakzet, tihtakzet a ka hilh na hiu hi, mi kuole a pienthak loh chun, Pathien gam mu thei puo’n au,” a ti a. 4 Nikodem in a kawmah, “Mi, a têk nung in bangti’n a a pien theih ding? A nu gil a nih vei lut in a pieng thei dinga ahim?” a ti a. 5 Isu’n a dâwng a, “Tihtakzet, tihtakzet in ka hilh na hii, mi kuole, tui leh Thagau a a pien loh chun Pathien gam lut thei puo’n au. 6 Phehlevo a pieng ta, phehlevo a hi a, Thagau a pieng ta, thagau ahi. 7 Na pienthak ding ka hun tih hi maksa kih. 8 Huih, khawiale, a nawp nawp in a nung sek, a git na zai, himahlele, khawi apat a hung ahi, khawia chieh ding ahi tih na he ngâl puo’n; kuole, thagau a pieng ta, tawbang chun a um ui,” a ti a. 9 Nikodem in a dâwng a, “Zie thil haw chuh bangti’n a a um theih ding?” a ti a. 10 Isu’n a kawmah, “Israel te laka sinsakpa na hi ngâl a, ziehaw chuh na he puo maw? 11 Tihtakzet, tihtakzet a ka hilh na hii, kei un ka het u chuh ka gen sek ui, ka muh u chuh ka hetsak sek ui, himahlele, ka thu hetsak u chuh na awi sek puou hi. 12 Zie khawvel a thilte hi ka hun hilh a bawn gingcha lo, van a thil hun hilh leng bangti’n a na ginchak hawn dinguh? 13 Van apana hung suk Mihiem Chapa ngâllo kuomah van ah a kal ngei puou hi,” a ti a. 14 Chun, Mosi’n thaleka dâkgûl a khaih kâng guol khan, Mihiem Chapa hile khaihkang a um ding ahi: 15 Kuole, a gingcha ta chuh mangthai lo a, amah vanga kumkhuo hinna a neihna dingun. 16 Pathien in khawvel a hehpih mah mah ziekin, a Chapa changkhat neih sun a pie a, kuole, amah gingcha taphawt chuh mangthai puou un tin; himahleh, kumkhuo hinna nei zawn au. 17 Pathien in khawvel mawhchansak dingin a Chapa khawvel ah a hun sawl puoh a, amah zieka hukdama a um theihna dingun a sawl a hi zawi. 18 Kuole, amah gingcha chuh mawh changin um puo’n au, himahleh, a gingcha lo chuh, tu akipat zieng hin le mawhchang in a um ui; Pathien Chapa changkhat a ginchak loh ziekun. 19 Ziehi mawhna chuh a hii: Vak van nuoi ah a hung a, himahlele, mite’n vak sangin thim a deih zawu, a thilhih hawu a gitloh ziekin. 20 Kuole, thilhih gilo ta’n, vak a haw sek u a, vaka le a hung nuom puou, a thilhih hawu suklat a um ding chuh a ut loh ziek un. 21 Amahvang chuh, kuole, thil dik hih ta chun, a thilhih teu chuh Pathien thu zawp zieka hih a hih uh kilatna dingin, vak ah a hung sek ui, a ti a.
Isu leh Johan
22 Ziehaw nung chun, Isu chuh a sinsakte tawh Judai gam ah a chieh u a, tak achun a kawm u ah hun chawmkhat a um a, a baptist sek a. 23 Johan in le Ainon ah, Salim khuo kieng ah a baptist sek a, zie taka chuh tui a tam ziekin. Mipite chuh a kawmah a chieh u a, a na baptist sek a. 24 (Zie chuh Johan suongkul a khuma a um masang ahi.) 25 Johan sinsakte khenkhat leh Juda khat sakhuo dana silngim thu’n a na kiniel u a. 26 Khutichun, Johan kawmah a chieh u a, a kawmah, “Rabbi, Jordan gala na kawma um, a thu nei hetsak khan ngaitie, zie pa khan mi a baptist a, mi chengcheng a kawmah a hung ui,” a tiu a. 27 Johan in a dâwng a, “Mihiem in bangmah a nei thei puou, Pathien in a piek a hih loh ngâl chun. 28 ‘Kei Krista chuh ka hi puoi, a masang a ei sawl ka hii,’ ka tih kha, nangmau haw ngêi ei hetpihte na hiu. 29 Moneipa chuh a pasal chuh ahi a, himahlele, pasalpa guolpa, din sa a a thu ngaitha pa chuh, pasal aw a het phat leh, a kipâk mah mah sek hi. Zie chuh ahi, keimah kipahna ngêi le, sukbukim a a um dân sek chuh. 30 Amah chuh hung pawimawh deuh deuh intin, kei vang chuh hung pawimawh lo deuh deuh ding ka hi.” a ti a. 31 Chunglama kipata hung pa chuh, mi chengcheng sangin a lien zawi. Leisiet a kipan chuh, leisiet mi ahi a, lei thilte mai a gen sek, himahleh, van apat a hung vang chuh, thil chengcheng sanga chungnung pên ahi. 32 Amah chun, a muh leh a hette chuh a gen sek a, himahleh, kuoma’n a thugen chuh a pawm nuom puou hi. 33 Himahleh, kuole, a thugen pawm ta phawtte chun, “Pathien chuh Diktat ahi” ti’n a sudet sek hi. 34 Pathien sawl chun, Pathien thu mah a gen sek. Amau chuh Pathien in tehkhel khelin thagau a pie puoh ngala. 35 Pa’n chapa a hehpih a, a khut ah bangakai, a bawncha’n a pie a. 36 Kuole, Cha gingcha chun, kumkhuo a hinna a nei a; kuole Cha gingchalo chun hinna nei puou untin, Pathien lungnatna chuh a chungu ah um zing zaw’na, a ti a.
Isu leh Samari Numei
1 Chun, Isu’n Johan sanga sinsak tam zaw a siem leh, a baptist sek hi tih Pharisaite’n a heu hi tih Lalpa chun a he a. 2 (Himahlele, Isu mawng in a baptist puoi, a sinsakte’n a baptist zaw sek ui.) 3 Khutichun, zie thu kigen haw chuh a het phetin, Judai gam chuh a taihsan a, Galili gam ah a chieh kit ta a; 4 tichun, Samari gam a hawhpai ding ahi a. 5 Tichun, Samari gama khuo khat Sukar a tih uh mun chuh a hung tung a, zie chuh Jakob in a chapa Joseph kawma mun a piekna apat a gamla lo cha ahi. 6 Jakob tuisutdawk kha tak achun a um a, tichun, Isu chuh a chieh châwl ziekin tuisutdawk pang achun a chu a, sun an nek phat vel ahi. 7 Taka chun, Samari numei khat tui khâi dingin a hung a, Isu’n a kawmah, “Tui dâwn ding ei pieh,” a ti a. 8 (A sinsakte chuh khuo ah nek ding chaw’n a chieh ta ngâl u a.) 9 Numei chun a dâwng a, “Nang Juda mi na hi a, kei Samari numei ka hi ngâl a, bangti dana ka kawma dâwn ding nei nget a?” a ti a. (Judate’n Samari mite bangma’n a mang kha ngâl puou a.) 10 Isu’n a dâwng a, a kawmah, “Pathien thilpiek leh dâwn ding nei pie’n ti a na kawma ngên pa hi he leh chin, nangin a kawma ngên zaw ding na hi a, tichun, ama’n hin tui hun pie zaw ding hi a,” a ti a. 11 Chun, numei chun a kawmah, “Hepu, a khaih dawkna ding la bangmah na nei puoh a, tuisutdawk a thuk siet tawh, khawi apat in a hintui na muh? 12 Ka pau Jakob sangin na lopi zaw a mawh? Amah chun zie tuisutdawk hi ei pie a, ama’n le a dâwn a, a chapate leh a gancha te’n tawh,” a ti a. 13 Chun, Isu’n a dâwng a, a kawmah, “Kuole, zie tui dâwn ta hi, a dang châk kit ina, 14 kuole, a kawma tui ka piek ding dâwn ta chuh, kumkhuo’n a dang uh châk kit ta puo’n a, ken tui a kawm u a ka piek ding chuh a sung u ah tuinak hung um intin, kumkhuo tuonga hinna dingin kichik to ina,” a ti a. 15 Chun, numei chun a kawmah, “Hepu, zie tui chuh ei pieh, ka dangchâk lohna ding leh, zie chan gama tui khâi dinga ka hung lohna dingin,” a ti a. 16 Ziephet chun, Isu’n a kawmah, “Na pasal va sam inla, taka hin hungkit ah,” a ti a. 17 Numei chun a kawmah, “Pasal ka nei sama ahi,” a ti a, a dâwng a. Isu’n a kawmah, “Pasal ka nei sama ahi, na tih hi na gen dik hi; 18 Pasal nga na nei ta a, himahleh, tu a na chenpih pa hile na pasal tak a hilo him ahi.” a ti a; 19 Numei chun a kawmah, “Hepu, thiemgau na hi tih ka he tai.” 20 “Ka puteu, ka pateu in zie tâng ahin Pathien a chibai sek ui, himahlele, nanguh vangin, Mihing in Pathien a chibai na dinguh mun chuh Jerusalem ah a um, na ti sek ui,” a ti a. 21 Chun, Isu’n a kawmah, “Numei, ka thu ngai ah, zie tâng khello a hin le, Jerusalem khuo khello a le, Pa na chibai na ding hun uh hung tung a hi tai. 22 Nang un na het loh uh na chibai sek ui, kei hawn vang ka het u chuh ka chibai sek ui; hukdamna chuh Judate kawm apat hung tung ding a hi ngâl a. 23 Khutichun, a hun tung ding ei tai, tu zieng hin le a tung ei tai, zie tieng chuleh, Pathien ho tak tak te’n, Thagau leh thutak in Pathien ho un au; Pa’n zie tawbang mi chuh amah ho dingin a hawl sek ahi. 24 Pathien chuh Thagau ahi, amah hote chun Thagau leh thutaka a ho dinguh ahi,” a ti a. 25 Chun, numei chun a kawmah, “Messiah a tih uh chuh hung ding ahi tih ka hêi, amah chuh a hung tieng leh, thil bangakai ei hilh ina,” a ti a. 26 Isu’n a kawmah, “Kei, a hun hopih pa hi amah chuh ka hi a puo!” a ti a. 27 Zielai tak chun a sinsakte chuh a hung u a, numei a hopih chuh mak a sa ten u a. Himahleh, kuoma’n, “Banga na hawl?” ti le a um puou a, “Bang zieka numei hopih?” ti le a um diek puou ui. 28 Tichun, numei chun a tuibel a taihsan a, khuo ah a chieh a, mi haw kawmah, 29 “Ka thilhih tâk ei hilh zel, mi khat a um a, hung unla, hung en tiem u! Krista chuh hilo ahim?” a ti a. 30 Khutichun, khawpi chuh a taihsan u a, a kawm lam achun a chieh tau a. 31 Zie kal chun sinsakte chun a kawmah, “Sinsakpa, neh,” a tiu a. 32 Himahlele, amah chun, “An, na het loh uh nek ding ka nei hi,” a ti a. 33 Ziephet chun, sinsakte chuh a kiho u a, “A nek ding mi’n a hun chawih sak ahi die le aw?” a kitiu a. 34 Isu’n a kawm u ah, “Ei sawlpa deih dân hih leh, a nasep zawh ding hi ka an ahi. 35 Nang haw’n buh âtna ding tha li a um nalai hi, na tiu hilo maw? Ngaiun, ka hilh na hiu hi, khawdak unla, lo haw hi en un, tu apat hin lak dingin a âng ei tai. 36 Buh ât pa’n lawh a mu sek, kumkhuo a um dingin gah a la sek hi; a tuhpa leh a ât pa a kipâk gêl gêl nangun. 37 ‘Khatin a tuh sek a, mi dangin a ât sek hi,’ tih thu kigen hi zie a chun a dik ten hi. 38 Na sep lohnau lo a ât dinga ka hun sawl kha, mi dangin a sem u a, nang haw’n a sep sau chuh na sutzawp sek uh ahi,” a ti a. 39 Khutichun, “Ka thilhih tâk ei hilh zel,” ti a numei thugen ziek chun, zie khuo a um Samari mi tamtak chun Isu a gingcha tau hi. 40 Tichun, Samari mite chuh Isu kawma a hung phat u chun, a kawm u a um dingin a ngên u a, tichun, tak achun ni nih a nichuong ta a. 41 Mi dang tamtak inle amah thugen ziek chun a gingcha tau a; 42 Tichun, numei kawma chun, “Tuzet hin chuh, na thugen vanga gingcha ka hi ta puou; keimau ngêi in a thu ka heu a, zie pa hi khawvel hukdampa a hi tak zet hi, tih ka he tau hi,” a tiu a.
Milopi Khat Chapa Sukdamna
43 Chun, ni nih a um nung in, zie tak mun apat chuh a pawt a, Galili gam ah a chieh ta a. 44 Amah ngêi in, “Thiemgau chuh amah khuo lam achun limbawl in a um kha puoi,” ti’n a na gen ta him a. 45 Khutichun, Galili gam a hung tun chun, Galili gama mite chun a na lawp u a, Jerusalem a Kut laia va chieh a hih ziek u leh, zie Kut hun sunga a thilhih chengcheng a muh ziek u chun. 46 Tichun, Isu chuh Galili gama tui uain a suoh sakna kha a hung tung kit a. Zie tak achun mi pawimawh tak khat kuo ahim a um a, a chapa chuh Kapernaum khuo ah a dam puoh a. 47 Isu chuh Judai gam apat in Galili gam ah a hung hi tih a het phetin a kawmah a va chieh a, a chapa thi vang vanga um chuh hihdam sak dingin a va ngên a. 48 Isu’n a kawmah, “Melchikna haw leh thilmak haw na muh loh u chun, gingcha hiel puo’n lau,” a ti a. 49 Chun, zie mi lopi tak pa chun a kawmah, “Hepu, ka chapa thih ma’n hung suk ta!” a ti a. 50 Isu’n a kawmah, “Kîkkit mai tah, na chapa chuh a dam tai!” a ti a. 51 Tichun, a chieh suk lai in, a suok te’n a na muok u a, “Na chapa chuh a dam tai,” a na tiu a. 52 Amah chun a kawm u ah, a dam tûng lai a dawng a. Amau chun a kawmah, “Thangni’n, ni kihei phetin a khawsik a pha tai,” a tiu a. 53 Ziephet chun, a pa chun, Isu’n a kawma, “Na chapa chuh a dam tai,” a tih lai tak chuh a hii, tih a he ta a. Khutichun, amah leh, a inkawte chun a gingcha tau hi. 54 Zie chuh Isu’n, Judai gam apat a Galili gama a hung nunga a thilmak hih a nih vei na ahi.
Bethesda Dil a Damlo Sukdamna
1 Zie thil haw nung chun, Judate Kut khat a um a; Isu le Jerusalem khuo ah a va chieh a. 2 Jerusalem achun belam kawtkhak kieng ah dîl a um a; zie chuh Hebrai pau in, Bethesda a tiu a; hulliep nga le a nei a. 3 Zie tak achun damlo te, mitdûkte, kêngbâite, zengte tamtak a kuol u a. 4 A châng châng leh Lalpa vânsâwlchâkte dîl achun a hungsuk u a, tui chuh a hung chawk sek u a, tui kinawk tienga damlo chawmlut masapen chuh bang natna hilele a dam zel sek hi. 5 Chun, zie tak achun mi khat, kum sawmthum leh kum giet damlo mi khat a um a. 6 Isu’n a kuol chuh a mu a, tawbang chun sawttak a um tai tih a he a, a kawmah, “Hihdam na ut hi?” a ti a. 7 Damlo pa chun a dâwng a, “Hepu, tui a hung kinawk tieng leh dila ei kawih ding mi ka nei puoh a, ka chieh tieng leh, mi dangin ei taihkhelh sek ui,” a ti a. 8 Isu’n a kawmah, “Tho inla, na puonphah la’n la, keng in chieh ta’n,” a ti a. 9 Tichun, thakhat in, zie pa chuh a dam ta a, a puonphah a la a, a chieh ta a; zie ni chuh Chawlhni ahi. 10 Khutichun, Judate’n a dam pa kawma chun, “Chawlhni ahi hi, na puonphah lak a thieng puoi,” a tiu a. 11 Amah chun a kawm u ah, “Ei hihdam pa ngêi in, ka kawmah, ‘Na puonphah la’n la, keng in chieh ta’n,’ ei tih ahi,” a ti a, a dâwng a. 12 Chun, amau chun a kawmah, “Na puonphah la’n la, keng in chieh ta’n na kawma tipa chuh kuo ahi?” ti’n a dâwng u a. 13 Himahlele, a dam pa chun kuo a hih a he puoh a, taka chuh mipi a tam ziekin Isu a chieh mang ta a. 14 Zie nung chun, Isu’n amah chuh Pathien Ho-In ah a mu a, a kawmah, “Ngai ah, na dam ta hi! thilhih gilo kit ta kih, khutilochun, thil phalo zaw diek na chungah hungtung kha’na,” a ti a. 15 Tichun, zie pa chuh a va chieh a, a hihdampa chuh Isu a hi tih Judate chuh a va hilh ta a. 16 Khutichun, Chawlhni a zie sukdamna chuh a hih ziekin, Juda te chun Isu a bawlsie tau a. 17 Himahlele, Isu’n amau haw chuh a hopih a, a kawm u ah, “Ka Pa’n tu tieng inle na a sem sek, ken le ka sem sek,” a ti a. 18 Zie thu a gen ziek chun Judate chun suklup a guo zaw diek tau a; Chawlhni a bawhsiet ziek mai le hilo in, Pathien amah pa a a gen ziek leh, Pathien tuka a kisiem ziekin le ahi.
Chapa Thuneihna
19 Isu’n amau haw chuh a dâwng a, “Tihtakzet, tihtakzet a ka hilh na hiu hi, Chapa’n amah mai in bangmah a hih thei puoi; Pa thilhih a muh ngâl loh chuh; Pa’n a hih bang bang chuh Chapa’n le a hih sek ahi. 20 Pa’n Chapa a hehpih a, a thilhih tâk a kawmah a etsak sek; ziehaw sanga thil lopi zaw hi a kawmah hun etsak ina, mak na sak dingun. 21 Pa’n mi thite a kai tho a, a hih hin sek guolin, Chapa’n le a ut ta poh a hih hing sek. 22 Pa’n kuomah chungthu a tan sak ngei puoi; thu chengcheng Chapa a tan sak zawk ahi; 23 Tia chuh mi cheng chengin Pa a zah guol u a, Chapa le a zahna dingun. Kuole, Chapa zahlo chuh. Pa, a sawlpa chule zahlo ahi. 24 “Tihtakzet, tihtakzet a ka hilh na hiu hi, kuole, ka thu he a, ei sawlpa gingcha chun, kumkhuo tuonga hinna a nei hi. Thiemmawh changin a um puoh a, himahleh, thihna apat a pawt a, hinna ah a lut zaw tai. 25 Tihtakzet a ka hilh na hiu hi, a hun tung ding ei tai; tuhin le a tung ei tai, zie tieng chu leh, mithi te’n Pathien Chapa aw zau untin, a za tapoh hing un au. 26 Pa ngêi chuh hinna bulpi a hih mah bangin, Chapa le amah chuom a hinna bulpi nei in a siem: 27 Mihiem Chapa a hih ziekin, a kawmah vaihawm theihna thuneihna a piei. 28 Ziehaw hi maksa kiu, a hun tung ding ei tai; zie tieng chu leh, thana um cheng chengin a aw zau untin, 29 Thân apat in hung pawt vek un au: thilpha hihte chuh hinna changin tho kit un tin; thil gilo hihte vang chuh mawhchang in tho kit un au.
Isu a dinga Hetpihte
30 “Keimah chauh in bangmah ka hih thei puoi; bil a ka zak bang zelin vai ka hawm sek, ka vaihawm chuh diktak ahi, keimah thu thu’n hih ka guo puoh a, ei sawl pa thu thu a hih ka guot zawk sek ziekin. 31 “Keimah chanchin hetsak ta leng, ka thu hetsak dik puo’n a. 32 Himahleh, ka chanchin hetsakpa chuh mi chuom ahi; amah chun ka chanchin a hetsak chuh a dik hi tih ka hêi. 33 Nang haw’n Johan kawmah mi na sawl u a, amah chun thutak a na gen khum kha. 34 Mihiem thu hetsak vang chuh ka pawm puoi, himahlele, na bit theihna dingun ziehaw chuh ka gen zawk ahi. 35 Zie Johan chuh thaumei kuong leh vak tak tawbang ahi a, a vaka um takdih na nuom sek u kha. 36 Himahlele, hetsakna ka neih hi, Johan hetsakna sang khan a lopi zawi: Pa’n thilhih zawh dinga ei piek, ka thilhihte ngêi hin, Pa’n ei sawl a hi tih, ka chanchin a hetpih ahi. 37 Pa, ei sawlpa ngêi chun le, ka chanchin a hetsak tai. Nang haw’n bangmah tikin a aw na za kha puou a, a mel le na mu kha puou hi. 38 A sawlpa hi na ginchak loh ziekun, a thugen le na lungthim u ah na vawp zing puou hi. 39 Pathien Lehkha thu na sim gunchuh sek ui. A sung ah kumkhuo hinna um ina tih na ginchak ziekun. Zie lehkha thu haw chuh ka chanchin hetsak pên chuh a hi ngâl a. 40 Himahleh, hinna nei dingin ka kawmah na hung nuom puoh ngâl u a. 41 “Mihiem pahchakna hawl kei puoi. 42 Himahleh, nang haw hi bang tawbang mi na hih uh ka hun hêi, Pathien hehpihna na lungthim u ah na nei puou hi. 43 Ka pa thu a hung ka hi a, himahleh, nang haw’n nei lawp puou hi; mi dang amah thu’n hung leh, amah chuh na lawp unlau. 44 Nang haw, kilimbawl tuoh lawpte haw! Pathien tak a pawt, limbawlna chuh na hawl ngâl puou a; bangti’n nei gingcha thei ding u? 45 Ken, Pa kawma ka hun hêk ding kigingcha kiu, a chunga kinepna na kawih pên uh Mosi khan nang haw hun hêk ding ahi zaw ngâl a. 46 Mosi na ginchak tak zet u chun, keile ei gingcha ding na hiu a; amah chun keimah chanchin a zik ahi ngâl a. 47 Himahlele, a thu zikte na ginchak loh ngâl u chun, bangti’n ka thu gente na gingcha thei ding u?” a ti a.
Mipi Sangnga a Vakna
1 Zie thil haw nung chun Isu chuh Galili dîl, Tiberia dîl le kiti sek, gâl lehlam achun a chieh a. 2 Damlote chunga thilmak a hih haw a muh ziek u chun mipi nasatak in a zui u a. 3 Isu chuh tângah a chieh to a, tak achun a sinsakte tawh a chuu a. 4 Chun, Chiehkân Kut, Judate guolvakna chuh a nai ta a. 5 Tichun, Isu a khawdak a, mipi tamtak, a kawm lam hun zuonte chuh a mu a, Philip kawmah, “Ziehaw nek ding hi chângthâk hawia kichaw ding ahi ta?” a ti a. 6 (Zie thu chuh amah zedapna dinga a gen ahi; a hih ding chuh a ma’n a hezing ngâl a.) 7 Chun, Philip chun a kawmah, “Mitin in, tawmcha chieta a chan dingun le, makhai zanih man, chângthâk kiting puo’n a,” a ti a, a dâwng a. 8 Chun, sinsakte laka khat, Simon Peter suohpih, Andrew chun a kawmah, 9 “Buhman-chângthâk pêk nga leh, nga nih nei, pasal chapang khat tak ahin a um hi; himahlele, mi, zie zat zozai laka hin zie chuh bang kham a hi die?” a ti a. 10 Isu’n, “Mipite chuh chut sak un,” a ti a. (Zie tak achun hampa tamtak a um a.) Khutichun, mi chengcheng chuh a chuu a; pating chiet le, sangnga vel ahiu hi. 11 Tichun, Isu’n chângthâk chuh a la a, a vangsaka, kipahthu a gen a, sinsakte kawm achun pie, sinsakte chun mipi tuola chute kawma chun a hawmzak tau a. Khutibang mah chun ngahaw chule a hih a, a deih khawp set chiet un a hawm tau a. 12 Chun, a nek vah suok kêi phet u chun, a sinsakte kawmah, “Bangmah mang lo dingin, a val haw chuh luok un,” a ti a. 13 Khutichun, a luok u a, buhman-chângthâk pêk nga nete nekval nenhaw chuh, palbawm sawm le nih a luok dim u a. 14 Isu’n zie thilmak a hih chuh a muh phet un, mipite chun, “Zie pa hi, thiemgau, khawvel a hung ding pa khah a na hi na hi!” a tiu a. 15 Ziephet chun, lenga siem dinga mat hâm guo’n hung ding ahiu hi tih Isu’n a he a; tângah amah chauh in a chieh chuom kit ta a.
Isu Tui chunga a Chiehna
16 Chun, ni a hung tâk phetin, Isu sinsakte chuh dila chun a va chieh suk u a, 17 Kuong ah a chuu a, dîl chuh a kân u a, Kapernaum khuo lam ah a chieh kit tau a. Khuo a thim ta a, Isu chu la a kawmuh a tung nai puoh a. 18 Zie lai chun, huihpi nasatak in a hung nung ta a, tui chuh a hung kinawk sang tel tel ta a. 19 Chun, chîng sawmnih leh chîng nga ahim, chîng sawmthum ahim a kitawl u chun, Isu chuh dîl chunga kenga chieh a, kuong hun naih in a muu a, a lau tau a. 20 Ziephet chun, Isu’n a kawm u ah, “Kei ka hi a puo! lau kiu in,” a ti a. 21 Khutichun, kuong a chut sak chuh a nuom tau a; tichun, kintakin kuong chun a zawt uh lui pang chuh a tung pai zieng tau hi.
Mipite’n Isu a Hawlnau
22 Chun, a zing chun, dîl gâl langkhat a mipi umte chun kuong khat chauh tak achun a um hi tih a heu a. Isu chuh a sinsakte kawmah kuong achun a chu puoi tih leh, a sinsakte chuh amau haw mai in a chieh ui tih a he tau a. 23 Himahleh, Lalpa’n kipahthu gena, mipite’n chângthâk a nekna kieng uh lui pang achun, Teberius apat in kuong dang a hungtung ngâl a. 24 Khutichun, mipite chun, taka chun Isu a um ta puoh a, a sinsakte le a um diek ta puou ui tih a muh phet u chun, amau haw le kuonghaw achun a chuu a; Isu hawl dingin Kapernaum khuo ah a chieh tau a.
Hinna Chângthâk
25 Tichun, mipite chun Isu dîl gâl langkhat a a muh phet u chun, a kawmah, “Sinsakpa, bang tika lam hi hung tung?” a tiu a. 26 Isu’n a dâwng a, “Tihtakzet a ka hilh na hiu hi, thilmak haw hi na muh ziek u a ei hawl na hi puou a, chângthâk pek na nek vah ziek u a ei hawl na hi zawu ui. 27 An khadang a mang mai ding delh in phe phe kiu in, himahleh kumkhuo a hin chana um ding an, Mihiem Chapa’n a hun piek ding chuh delh in phe zawu un: Pa Pathien chun amah chuh a melchik ta ngâl a,” a ti a. 28 Amau chun a kawmah, “Pathien na ka sep theihna dingun banga ka hih dinguh?” a tiu a. 29 Isu’n a kawm u ah, “Pathien nasep chuh ziehi ahi: a mi sawl hi gingchau in,” a ti a. 30 Amau chun a kawmah, “Ka muh u a, ka ginchak theihna dingun, bang thilmak a na hih ding? 31 Ka puteu, ka pateu in thaleka khan manna a ne sek ui; ‘Van apat chun a kawm u ah chângthâk nek ding a piei’ tih Pathien lehkha thu’n a gen guol khan,” a tiu a. 32 Isu’n a kawm u ah, “Tihtakzet a, tihtakzet a ka hilh na hiu, van apana chângthâk na muh u kha Mosi hun piek ei puoi, ka Pa chun chuh, van apat in chângthâk tak a hun piek na hiu hi. 33 Pathien chângthâk piek chuh, van apana hung suk, vannuoi leisiet kawma hinna piepa hi ahi,” a ti a. 34 Chun, amau chun a kawmah, “Lalpa, zie chângthâk chuh kei uh ei pie zingin,” a tiu a. 35 Isu’n a kawm u ah, “Kei hi hinna chângthâk chuh ka hi, kuole, ka kawma hung chuh a gil kiel puo’n a, kuole, ei gingcha chuh, bangtik inle a dangchâk puo’n a. 36 Himahlele, nang haw’n nei muh un le, nei gingcha puou hi tih ka hun hilh ta kha. 37 Pa’n ei piek chengcheng chuh ka kawmah hung vek un au; kuole, ka kawma hung chuh nawhdawk hiel puo’ng ka. 38 Kei deih bang hih dinga van apat a hung suk ka hi puoh a, ei sawl pa deih bang hih dinga hung suk ka hi zawi. 39 Ei sawl pa deih bang chuh, Ama’n ei piek chengcheng khat chale mansak lo a, ni tâwp ni a a bawn u a hinna changa kaih thawh vek chuh ahi. 40 Chun, ziehi ka Pa deih bang ahi: kuole, Cha mu a gingcha ta’n kumsawt hinna nei a, chun, ken ni tawp ni leh hinna a ka kaih thawh ding chuh,” a ti a. 41 Chun, “Van apat a chângthâk hung suk chuh ka hi,” a tih ziekin, Judate chuh a chungah a phunchiek u a. 42 “Zie pa hi Joseph chapa Isu hilo ahim? A nu leh a pa le I heu hi, van apana hung suk ka hi, bangti tih a a tih a hi die leh?” a tiu a. 43 Ziephet chun, Isu’n a kawm u ah, “Phunchiek chiek kiu, 44 Pa, ei sawl pa’n a hîp loh chun, kuomah ka kawmah hung thei puo’n au; chun, ken ni tâwp ni chuleh a hung chuh kaitho ing ka. 45 Thiemgaute’n, ‘Mi tin chuh, Pathien sinsak in um vek un au,’ ti’n a zikuh ahi. Kuole, Pa thu he a, sin ta chuh, ka kawmah a hung sek ui. 46 Mi kuoma’n Pa a mu ngei puou hi, Pathien kawm apat a hung pa ngâllo chun, amah chauh chuh Pa mu ahi. 47 Tihtakzet a ka hilh na hiu, kuole, a gingcha chun, kumsawt a hinna a nei hi. 48 Kei hi hinna chângthâk chuh ka hi. 49 Na pu leh na pateu in thalek ah manna khah a ne nau a, himahleh a thi sek ui. 50 Himahlele, van apat a chângthâk hung suk chuh zie tawbang hi ahi, mi’n a nek a, a thih loh nau hi. 51 Kei hi, van apana chângthâk hing hung suk chuh ka hi, kuo’n le zie chângthâk hi a nek chun, kumsawt in hing zing in a, khawvel hinna dinga chângthâk ka piek ding chuh, ka phehlevo hih ahi.” a ti a. 52 Khutichun, Judate a kiniel u a, “Zie pa hin, bangtia a pheh nek dinga ei pie ding ahi die?” a kitiu a. 53 Ziephet chun, Isu’n a kawm u ah, “Tihtakzet, tihtakzet a ka hilh na hiu hi, Mihiem Chapa phehlevo na nek u a, a thisan na dâwn loh u chun, nangmau in hinna nei hawn lo chuh. 54 Kuole, ka phehlevo ne a, ka thisan dâwn chun, kumkhuo a hinna a nei tai; chun, ni tâwp ni chuleh amah chuh kaitho ing ka. 55 Ka phehlevo hi an tak ahi a, ka thisan hi dâwn ding tak ahi ngâl a. 56 Kuole, ka phehlevo ne a, ka thisan dâwn chun kei ei kipapvaipih zing sek a, ken le amah ka kipapvaipih zing sek hi. 57 Pa hing chun ei sawl a, Pa vanga hing ka hih guol mah hin. Zieziekchun, kuole, kei ei ne chuh keimah vangin amah le hing ina. 58 Ziehi van apana chângthâk hung suk chuh ahi, na puteu na pateu in chângthâk a nek u a, a thih sek guol u khah ei puoi; kuole, zie chângthâk ne hi chuh kumkhuo’n hing zing ina,” a ti a. 59 Zie thu haw hi Isu’n Kapernaum khuo a kikhawpna ina a sinsak laia a gen ahi.
Kumsawt a Hinna Thu
60 Khutichun, a nungzuite tamtak chun, zie chuh a het phet un, “Zie hi thu sinsakna haksa tak ahi, kuo a ching sawn thei ding?” a tiu a. 61 Kuomah hilh loh in, zie thu a chun a phunchiek ui tih Isu’n a he a, a kawm u ah, “Zie thu hin a hun sulungkim lo ahi maw? 62 Mihiem Chapa hi, tuma a a umna ngeia kal to na muh u chun bang na lawh ta ding u leh? 63 Hinna pietu chuh Thagau ahi a, mihiem thilhih theihna chuh bangmah a kân puoi. Na kawm u a ka thugen hi Thagau ahi a, chun, hinna le ahi. 64 Himahlele, na laku ah abang gingcha lo na um nalai ui.” a ti a. (Isu’n a gingchalo leh a matsak ding pa chuh, atûng apat a hezing ngâl a.) 65 Amah mah chun, “Zieziekchun ahi, na kawm u a, ‘Pa’n a piek a hih loh chun, kuomah ka kawmah hung thei puo’n au,’ ka tih khah,” a ti a. 66 Ziephet chun, a nungzuite tamtak a chieh mang tau a, amah a kivawppih kit ta puou hi. 67 Khutichun, Isu’n sawm le nih te kawm achun, “Nang haw le chieh mang na nuom um?” a ti a. 68 Simon Peter in a kawmah, “Lalpa, kuo kawma e ka chieh dinguh? Nangin kumsawt hinna na nei a puo! 69 Nang, Krista, Pathien hing Chapa chuh na hii tih ka gingcha tau a, het le ka heu hi,” a ti a. 70 Chun, Isu’n a kawmah, “Nanguh sawm le nih te hi, keimah tel hilo na hiu hi? Na lak u a khat Diabol a hih kit kit tawh!” a ti a. 71 Iskariot Simon chapa Juda, sawm le nih te laka tel pa thu khah a gen ahi, amah chuh a matsak ding ahi ngâl a.
Isu leh a Suohpihte
1 Zie thil haw nung chun, Isu’n Galili gam a tawh viel a; Judate’n amah thah a guot ziekun Judai gam chuh a tawh nuom ta puoh a. 2 Chun, Judate Bawkcha Kut chuh a nai ta a. 3 khutichun, Isu suohpihte’n a kawmah, “Zie tak mun hi taihsan inla, Judai gam ah va chieh ah, na nungzuite’n le na thilhih hi a muh theihna dingun. 4 Kuoma’n, amah minthan nuom ngâl in, a thilhih teu a îm sek puou hi. Zie thil hawpi hi na hih ta ngâl a, zieziekchun, khawvel pumpi’n hun he suok kêi u he’n!” a tiu a. 5 (A suohpihte nasan chun le amah a gingcha ngâl puou a.) 6 Isu’n a kawm u ah, “Ka hun a tung nai puoi, nang haw hun vang chuh a tung zing ahi. 7 Khawvel in nanguh a hun haw thei puou hi, kei vang chuh ei haw sek ui, a thilhih hawu a gilo ahi tih ka hilhchet sek ziekin. 8 Nanguh Kut na achun va chieh un, kei vang chuh tuchung Kut a hin chieh lo ding ka hi, ka hun a tun nai loh ziekin,” a ti a. 9 Zie thu chuh a kawm u a gen in, Galili gam achun a um zing zaw ta a.
Bawkcha Kut
10 A suohpihte Kut na a dinga a va chieh nung u chun, Isu chule Kut na achun a va chieh a, himahlele, tângphuong taka chieh lo in, a gûkin a chieh a. 11 Judate’n amah chuh Kut na achun a hawl u a, “Khawitak ah a um hi?” a tiu a. 12 Amah chungchâng thu achun, mipite chuh a kiho gu sausau u a, a bangin, “Mi pha ahi,” a tiu a, abang in, “Naisai lo e! mi a pui mang zaw sek ahi,” a tiu a. 13 Himahlele, Judate a lauh ziekun kuoma’n a chungchâng thu tâng-phuong takin a gen ngam puou hi. 14 Chun, Kut vanglai takin, Isu chuh Pathien Ho-In ah a va chieh a, a sinsak a. 15 Judate chun, “Zie pa hin zil khalo a, bangtia zie bangpi a hi thiem ahi die?” ti’n, mak a sa ten u a. 16 Isu’n amau haw chuh a dâwng a, “Ka thu sinsak hi keia a hi puoh a, ei sawlpa a ahi zawi. 17 Kuole, Pathien deih bang hih nuom ta chun, ka thu sinsak hi Pathien apat ahim, keimah thu a gen ka him, tih he’nau. 18 Kuole, amah phuok kawm thugen chuh, amah lopina ding kihawl ahiu hi. Himahlele, a sawl pa lopina ding hawlte vang chuh mi diktak ahi a; amah achun diklohna him a um puoi. 19 Mosi’n Dan chuh. na kawm u ah a hun pie hilo maw? Himahlele, na lak uh a kuoma’n Dan chuh na hawh ngâl puou a. Nangun, bangati a ei thah guo?” a ti a. 20 Mipite chun, “Thitha vawp na hi hi! kuo a nang hun thah guo?” a tiu a. 21 Isu’n a dâwng a, “Thilmak khat ka hih kha, nang haw cheng chengin mak na sau a. 22 Mosi’n, na chateu zektan ding thu a hun piek kha (Mosi pat hilo in, nang haw hun suonte’n a na pat uh himahleh), Chawlhni’n pasal naupang zek na tan sek uh ahi. 23 Mosi dân bawhsiet lohna dinga, Chawlhni a pasal naupang zek na tan sak ngâl u chun, bang zieka Chawlhni a mi ka sukdam zieka, ka chunga lungna na hiu hi? 24 Pawlam latdan mai in thutanna siem kiu inla, diktat takin hih zawu un,” a ti a.
Amah chuh Krista ahim?
25 Khutichun, Jerusalem khuo a mi khenkhat in, “Zie pa hi thah a guotpau chuh hilo ahim? 26 En tiem u! tângphuong takin thu a gen a, a kawmah bangmah a gen diek puou hi. Amah hi Krista a hii, tih thuneitu te’n a he tak tak ta ding u aw? 27 Krista chuh a hung tieng leh, kuoma’n a hung kipatna he lo ding hi a. Himahlele, I bawn un zie mi hung kipatna hi I he vek ngâl u a,” a tiu a. 28 Isu’n, Pathien Ho-In a a sinsak lai in, aw ngeih tak in a kiko a, “Nangun kei nei heu a, ka hung kipatna le na heu hi. Keimah thu a hung ka hi puoi. Bang hitaleh, ei sawl pa hi a dik ahi. Amah chuh na he ngâl puou hi, 29 Himahleh, ken ka hêi, amah apat a hung leh, amah ei sawl ka hih ziekin,” a ti a. 30 Ziephet chun, amah chuh mat a guo tau a, himahlele, a hun a tun nai loh ziekin, kuoma’n a chungah a khut uh a tha puou hi. 31 Mipi, abang, tamtak vang chun amah a gingchau a, “Krista chuh a hung tun tieng leh, zie pa hih sanga tam zaw hi thilmak hun hih ding a hi a a hi?” a tiu a.
Isu Man dinga Mivengte Sawlna
32 Chun, Pharisaite chun, Isu chung thu a mipite phun gukna thu haw chuh a heu a: tichun, thiempu liente leh Pharisaite chun a man dingin, mivengte a sawl tau a. 33 Chun, Isu’n, “Na kawm u ah chawmkhat um tadih zet ing ka ting, ei sawl pa kawmah chieh ing ka. 34 Nangun ei hawl un na tin uh, ei mu ngâl puo’n lau; ka umna a le hung thei puo’n lau,” a ti a. 35 Ziephet chun, Judate chuh a kiho u a, “I muh loh dingun zie pa hi hawia chieh ding a hi? Grik khawpite a I miteu chênna a chuh chieh in, Grikte chuh a va sinsak ding a hi die? 36 ‘Nangun ei hawl un na tin uh, ei mu ngâl puo’n lau, ka umna ale hung thei puo’n lau,’ a ti a, bang tihna a hi die?” a tiu a.
Hinna Tuinak
37 Chun, Kut kichaihna ding ni lopi pên achun Isu a ding a, aw ngeih tak in a kiko a, “Kuole, a dang a châk chun, ka kawmah hung hen la, dâwn heh. 38 Kuole, ei gingcha chuh, Pathien lehkhabu gen guolin, hintui lui haw chuh a lunggil apat hung luong dawk ina,” a ti a. 39 Isu’n, zie thu haw chuh, a gingchate’n Thagau a muhna ding thuu a genna ahi. Thagau chuh piek a hi tadih puou, Isu chuh lopina a kaihthawh a a um nai loh ziekin.
Mipite laka Kibungkhenna
40 Khutichun, mipite laka khenkhatte chun zie thu kigen chuh a het phet un, “Zie pa hi, thiemgau a hi tak zet hi,” a tiu a. 41 A dang chun, “Krista chuh a hii,” a tiu a. Himahleh, khenkhatte chun, “Khawilak ah, Krista chuh Galili gam ah hung pawt ding a hi a ahi? a tiu a. 42 Krista chuh, David suonte lak ah, David umna khawpi, Bethlehem ah hung pieng ding ahi, tih ahi ngâl a.” a tiu a. 43 Khutichun, Isu ziek chun mipite lak achun kibungkhenna a hung um ta a. 44 Khenkhatte chun mat a nuom u a, himahlele, kuoma’n a chungah khut a tha puou hi.
A Gingchalo Juda Lawiupate
45 Mi mante chuh thiempu liente leh Pharisaite kawma a hungkit phet u chun, thiempu liente.leh Pharisaite chun, “Bang zieka hun pui lo?” ti’n a na dawng u a. 46 Mi mante chun, “Tawbang himhim khun kuoma’n thu a gen kha puou!” ti’n a dâwng u a. 47 Chun, Pharisaite chun a kawm u ah, “Nang haw le a hun sukngawl na hi tau maw? 48 Lawiupate leh Pharisaite laka mi himhim, amah gingcha a um kha tau hi? 49 Zie mipite hin Mosi dân chuh a he puou a, Pathien hansie nuoia um ahiu a puo!” ti’n a dâwng u a. 50 Ma a Isu kawma hung Nikodem khah, a laku ah a tel a, amah chun a kawm u ah, 51 “Mi, amah kama thu kiza leh, a thilhih het ma’n, I dân un mi thiemmawh I chansak thei puou hi,” a ti a. 52 Amau chun a kawmah, “Nang chule, Galili mi na hi a a hi? Pathien lehkha thu sim in, tichun, Galili gam apat in thiemgau kuomah a pawt ngei puoi tih he ta’n la,” a tiu a, a dâwng u a. 53 Tichun, mi chengcheng chuh In lam ah a kikhen zak tau hi.
Numei Zawlsai Matna
1 Isu chula olive tângah a chieh ta a. 2 A zingkal kit matak chun, Pathien Ho-In ah a chieh kit a. Mipi chengcheng chuh a kawmah a hung u a, chun, a chu a, amau haw chuh a sinsak ta a. 3 Tichun, dân thuzikte leh Pharisaite’n numei khat, a zawlsaih peta a mat uh a hun pui u a; a lai tak ah a din sak u a, 4 Isu kawmah, “Sinsakpa, zie numei hi, a zawlsaih peta a mat uh ahi. 5 Dan lehkhabu ah Mosi’n, zie tawbang mi hi suong a sehlup thu ei pie a; nangin bangti’n na ngai a?” ti’n a dawng u a. 6 Zie thu chuh amah mat theihna dingin a gen uh ahi, a hêkna ding a muh theihna dingun. Khutichun, Isu a khun a, a khutzung in leituol a zik a. 7 Zie taka chuh dinsa a a dawt ngek ngek ziekun, amah chuh a kipan a, a kawm u ah, “Na lak u a gitloh nei lo chengin amah chuh suongin sep masa heh,” a ti a. 8 Tichun, a khun kit a, a khutzung in leituol a zik kit a. 9 Amau haw chun a thugen chuh a het un, a sielepha hetnau in thiemloh chansak in, a upapen in a pan a, a tâwp tiengin, khat cha cha’n a kigelhdawk zel u a; tichun, Isu leh numei a laia a dinsak u kha tawh nusieh tau hi. 10 Tichun, Isu a kipan a, a kawmah, “Numei, hawi ah a um tau hi? Kuomah mawh hun chansak ding a um ta puou maw?” a ti a. 11 Amah chun a kawmah, “Lalpa, kuoma’n ei chan sak puou hi,” a ti a. Ziephet chun, Isu’n, “Ken le mawh ka hun chan sak puoi; chieh inla, tunung leh, hih gilo kit ta kih,” a ti a.
Isu Khawvel Vak
12 Chun, Isu’n Pharisaite kawmah thu a gen kit a, “Kei khawvel salh vak chuh ka hii; kuole, ei zui chuh thim lak ah leng puo’n tin, hinna vak nei zaw’na,” a ti a. 13 Khutichun, Pharisaite’n a kawmah, “Nangmah thu hetsak na hii, na thu hetsak a dik puoi,” a tiu a. 14 Isu’n a kawm u ah, “Keimah thu hetsak hi leng le, ka thu hetsak a dik ahi; ken ka hung kipatna leh, ka chiehna ding chin le ka hêi. Nang haw vangin, ka hung kipatna leh, khawia chieh ding ka hih na he ngâl puou a. 15 Nang haw’n mihiem dân guol takin na awimawh sek ui, kei vangin kuomah ka awimawh puoi. 16 Himahleh, a na awimawh hita leng chuh, ka awihmawhna thu chuh dik ina, kei mai ka hi puoh a; Pa, ei sawl pa chun ei umpih ziekin. 17 Na Dan Lehkhabu ale. ‘Mi nih thu a dik hi,’ tih zik a hi ngâl a. 18 Kei hi ka thu hetpihtu ka hi a. Pa, ei sawlpa chun le ka thu ei hetpih kit hi,” a ti a. 19 Amau chun a kawmah, “Na pa hawitak a um a?” ti’n a dawng u a. Isu’n a dâwng a, “Nang un kei nei he puou a, ka Pa le na he diek puou; Kei nei het u chun, ka Pa le he’n lau,” a ti a. 20 Isu’n zie thu haw chuh, Pathien Ho-In a, tuoklawm khiekna thingkuong kawihna pindan a a sinsak laia a gen ahi. A hun a tun nai loh ziekin, kuoma’n a man puoh ngâl u a.
Ka Chiehna ah Hung thei Puo’n lau
21 Chun, Isu’n a kawm u ah a gen kit a, “Chieh mang ding ka hi; ei hawl un na tin, himahleh, na gitlohnau nei zingin thi’n lau. Ka chiehna ding ah hung thei puo’n lau,” a ti a. 22 Chun, Judate chun, “Ka chiehna ding ah hung thei puo’n lau, a tih hi amah kithat ding a hi die?” a tiu a. 23 Isu’n a dâwng a, “Nang haw zie khawvel a mi hi na hiu a, Kei vang chunglam apat a hung ka hi. Nanguh zie khawvel a pawt na hiu a, Kei vang, zie khawvel a pawt hi kei puoi. 24 Zieziekchun ahi, na gitloh uh nei zingin thi’n lau ka hun tih khah. ‘Amah chuh Kei ka hi’ tih na ginchak loh u chun, na gitloh uh nei zingin thi tei un lau,” a ti a. 25 Amau chun a kawmah, “Kuo hile ba na hi a ahim?” a tiu a. Isu’n a kawm u ah, “Atûng apat na kawm u a ka gen sek khah. 26 Nang haw chungchâng thu ahin gen ding thil tamtak leh, hun thiemmawhna ding tamtak ka nei hi. Bang hitaleh, ei sawl pa chuh mi diktat ahi; a kawm apat thu ka zâk tâk, khawvel mite kawmah ka gen sek hi,” a ti a. 27 Himahlele, Isu’n a kawm u ah Pa thu a gen hi tih a he puou hi. 28 Khutichun, Isu mah in a kawm u ah, “Nang un Mihiem Chapa hi na khaih kâng nung u leh, amah chuh ka hii, tih leh. Ken, keimah thu’n thil bangmah ka hih puoi, Pa’n ei hilh guol zel in zie thu haw hi ka gen zawk sek a hi tih hun he ding na hiu. 29 Ei sawlpa chuh ka kawmah a um a, ei thahtham puoi; a thil kipahlam tak ka hih zing sek ziekin,” a ti a. 30 Isu’n zie thu a gen zate mi tamtak chun amah a gingcha tau hi.
Suok leh Suoklo
31 Khutichun, Isu’n a gingcha Judate kawm achun, “Ka thu sinsakte na zuih tak tak u chun, ka sinsakte hi’n lau; 32 tichun, thutak hun heu in na tin uh, Thutak chun suok hun haihsak ina,” a ti a. 33 Amau haw chun a kawmah “Abraham suonte ka hiu a puo! tu tiengin kuomah suok in ka um ngei puou hi, ‘Suok hun haihsak un au’ bangti tih a na tih ahi?” a tiu a. 34 Isu’n a kawm u ah, “Tihtakzet, tihtakzet a ka hilh na hiu hi, kuole, thil hihgilo ta gitloh suok ahi. 35 Suok chuh kumlekhuo’n In ah a um zing puoi, chapa vang chuh kumkhuo’n a um zing sek hi. 36 Zieziekchun, Chapa’n ahun suohchak sak chun, suokcha tak tak un lau. 37 Abraham suonte na hiu hi tih ka hun hêi. Himahleh, thah nei guo tei tei ui, ka thu sinsakte na pawm loh ziekun. 38 Ken, ka Pa kawma thil ka muh te chuh ka gen sek a, nangun. le na pau kawma thil na zak u chuh na hih sek ui,” a ti a. 39 Amau chun. “Ka pau chuh Abraham ahi,” ti’n a dâwng u a. Isu’n a dâwng a, “Abraham chate na hih tak tak u chun, Abraham thil hihte chuh na hih puoh ding u! 40 Pathien kawm apat a thudik ka zak chengcheng ka hun hilh a, himahleh, thah nei guo ngâl u a. Abraham in tawbang hin thil a hih ngei dang e! 41 Nang haw vangin, na pau thilhihte chuh na hih sek uh ahi,” a ti a. Chun, amau chun a kawmah, “Zawlcha a pieng ka hi puou a, Pa khat mai ka nei ui, Pathien ngêi chuh,” a tiu a. 42 Isu’n a kawm u ah, “Pathien na pau a hih chun, nangun ei hehpih ta’n lau; Pathien kawma pawt leh, a kawm apat hung ka hi ngâl a. Keimah thu a hung ka hi puoh a, ama’n ei sawl zawk ka hi. 43 Bangti dana ka thugente hethiem lo? Ka thugente na ngaihthak nawp loh ziekuh ahi. 44 Nang u chuh na pau Diabol chate na hiu a, na pau deih guol zuih na nuom uh ahi. A tunga kipatin tuolthat a hi a, thudik lam ah a pang ngei puoi, thudik amah a a um loh ziekin. Lepchieh thu a gen tieng leh, amah ngeina mawng hih a hi a, amah chuh lepchieh a hi a, lepchieh pa le ahi. 45 Thudik ka gen ziekin, nang haw’n nei gingcha lo uh ahi. 46 Na lak u a kuoa, gitlohna lama mawh ei chan sak thei ding um? Thutak ka gen nasan a le, bang zieka ei gingcha lo na hiu hi? 47 Pathien kawma pawt chun, Pathien thu a ngaitha sek hi. Zieziek taka chuh na ngaihnawp loh uh ahi, Pathien kawma pawt na hih loh ziekun,” a ti a.
Isu leh Abraham
48 Judate chun a kawmah, “Samari mi, thitha vawp na hi, ka hun tih u khah, ka gen dik zet uh hi na lo maw?” a tiu a, a dâwng u a. 49 Isu’n. “Thitha vawp ka hi puoi, ka Pa ka limbawl ahi zawi, nang haw’n nei limbawl loh zawk uh ahi. 50 Keimah kilimbawlna ding hawl ka hi puoh a, a hawl leh a ngaihtuoh chuh mi khat a um hi. 51 Thudik tak ka hun hilh na hiu hi, kuo’nle, ka thu a zawp chun, thih ni mel mu puo’n a,” a ti a. 52 Chun, amau chun a kawmah, “Thitha vawp na hi tih tu’n ka he tau hi! Abraham a thi ta a, thiemgaute le a thi tau a, himahleh, nangin, kuo’nle, ka thu a zawp chun thihna mel mu puo’n au na ti nalai a. 53 Ei suonpau Abraham chuh a thi ta a; Abraham sangin ka lopi zawi ti na hi maw? Thiemgaute le a thi tau a, kuo a kisiem na hi?” a tiu a. 54 Isu’n a dâwng a, “Keimah kilimbawl hi leng, zie limbawlna chuh bangmah hi puo’n a. Ka Pathien uh, na tih uh, ka Pa ngêi chuh ei limbawl pa ahi. 55 Nangun amah na he kha puou a, himahleh, ken ka hêi. Amah chuh ka he kha puoi, ti leng, nang haw guol mah a lepchieh hi ding ka hi. Himahleh, amah chuh ka he a, a thu le ka zawp ahi. 56 Na puu Abraham kha, ka ni hung mu ding a hih ziekin a lawp mah mah a, a mu ta ngêi a, a kipâk ahi.” a ti a. 57 Amau chun a kawmah, “Nang, kum sawmnga bêk le hilo in, Abraham na mu ngei a ahim?” a tiu a. 58 Isu’n a kawm u ah, “Tihtakzet, tihtakzet a ka hilh na hiu, Abraham pien ma’n le ka um hi,” a ti a. 59 Ziephet chun, a sehna dingin suong a luok u a, himahleh, Isu a kisel a, Pathien Ho-In apat chun a pawt a; a lak u chuh a hawh phei a, a chiehdawk ta a.
A Pientûng apat Mitdûk Sukdamna
1 Chun, Isu’n a chieh kawmin, a pien tûng apat mitdûk khat a mu a. 2 A sinsakte’n a kawmah, “Rabbi, mitdûksa a a pien hi, kuo’n thil a hih gilo a ahim, zie pa hin ahim, a nu leh a pa’n?” ti’n a dawng u a. 3 Isu’n a dâwng a, “Zie pa hin la a hih gilo puo’n, a nu leh a pa’n la a hih gilo diek puou hi; Pathien thilhih-theihna’n amah chunga a sep ngêi kilatna ding a hi zawi. 4 Sun a hih pet in ei sawlpa na I sep ding ahi; zan hi ding ei tai, zie tieng chuleh kuoma’n na sem thei ta puo’n au. 5 Van nuoia ka um sung hin, vannuoi salhvak pa ka hi,” a ti a. 6 Isu’n zie thu a gen zawh chun, tuol ah chil a siet a, chil chun tung a siem a, tung chuh a mit ah a nuh a, chun a kawmah, 7 “Siloam Dil ah va sil ah,” a ti a. (Siloam chuh “Sawl” tihna ahi.) Tichun, a va chieh a, a sil a, mit vakin a hungkit ta a. 8 Ziephet chun, a vengte leh, masanga a khutdawh mu sekte chun, “Zie pa hih chutsa a khutdawh sek khah hilo ahim?” a tiu a. 9 Khenkhat chun, “Amah kha ahi,” a tiu a. Himahleh, a dangin, “A hi puoi, a kibatpih a hi zawi,” a tiu a. Amah chun, “Amah kha ka hii,” a ti a. 10 Chun, amau haw chun a kawmah, “Na mit bangtia hung vak ahi leh?” a tiu a. 11 Amah chun, “Isu a tih u khan tung a siem a, ka mit ah a nuh a, ‘Siloam Dil ah va chieh inla, va sil ah,’ ei ti a, khutichun, ka va chieh a, ka sil a, mit vakna ka muh ahi ta hi,” a ti a, a dâwng a. 12 Amau chun a kawmah, “Amah chuh hawitak a um ahi?” a tiu a. Amah chun “Ka he puoi,” a ti a.
Pharisaite leh Sukdam a Umpa
13 Amau chun masanga a mit ana dûk pa chuh Pharisaite kawmah a pui u a, 14 Isu’n tung a siem a, mitdûk a sukdam ni chuh chawlhni ahi a. 15 Tichun, Pharisaite’n a mit a hung vak dân chuh a dawng kit u a. Amah chun a kawm u ah, “Ka mit ah tung a nuh a, ka sil a, ti a chuh ka hun muh theih mai ahi,” a ti a. 16 Chun, Pharisaite abang in, “Zie pa hi Pathien kawma pawt hi puo’n a a ziek chuh, Chawlhni a nit puoi,” a tiu a. Khenkhatte’n vang chuh, “Migilo in bangti’n a, zie tawbang thilmak hi a hih theih ding?” a tiu a. Khutichun, a laku ah kibungkhenna a hung um ta a. 17 Khutichun, Pharisaite’n mitdûkpa chuh a vel dawt kit u a, “Na mit a hih vak khah nangin bangti’n na ngai hi?” a tiu a. Amah chun, “Thiemgau ahi,” a ti a. 18 Himahlele, Judate’n mitdûk nu leh pa chuh a sap macheng u chun, mitdûksa leh, tu a hun mu thei ei tai tih thu chuh a gingcha nuom puou hi. 19 Tichun, a nu leh a pa kawmah, “Zie pa hi, na chapau, mitdûksa a pieng na tihpau kha hilo ahim? Bangtia, tu a hun mu thei ahi ta leh?” ti’n a dawng u a. 20 A nu leh pa chun, “Ziehi ka chapau ahi tih ka heu hi, chuleh, mitdûksa a pieng hi tih le ka heu hi. 21 Himahlele, bangtia tu a hi hun mu thei ahi tam tih ka he puou a, a mit hihvak pa le ka he diek puou hi. Amah dawng un, amah le pating ahi a puo, amah chungchâng chuh ama’n kigen heh!” ti’n a dâwng u a. 22 Judate a lauh ziekun a nu leh a pa’n zie thu haw chuh a gen uh ahi; ziehaw chun, “Kuo’n le, Amah chuh Krista a hii, ti a gingcha ta chuh, kikhawpna In apat nawhdawk ngêi ngêi ding ahi,” ti’n a kithuguol suok kêi ta ngâl u a. 23 Zieziek tak chun ahi, a nu leh a pa’n, “Amah dawng un, pating a puo!” a tih u chuh. 24 Khutichun, mitdûkpa chuh a vel sap kit u a, a kawmah, “Pathien pakchah! keihaw’n vang zie pa kha migilo a hi tih ka heu hi!” a tiu a. 25 Amah chun, “Migilo a hih leh hih loh ka he puoi, thil khat ka hêi! tuma khan mitdûk ka hi a, tuhin ka mu thei tai,” a ti a. 26 Amau chun, “Na chungah bangti’n a hih a? Na mit bangti’n a hih vak a?” a tiu a. 27 Amah chun a kawm u ah, “Dan khan ka hun hilh ta kha la, na he nuom puou a. Bang dinga he kit nuom ta? Nang haw le a sinsakte hih nuom na hi tau maw?” ti’n a dâwng a. 28 Amau chun hansie buokkhum tawh thuoh in, “Nang hi amah sinsak na hi a, keihaw vang Mosi sinsakte ka hiu a puo. 29 Pathien in Mosi a hopih hi tih ka heu a; zie pa hi hâwi apat a hung pawt a hih het le ka he dang u!” a tiu a. 30 Zie pa chun a kawm u ah, “Zie tak chuh ahi, a mâkna chuh, hâwi apat a hung pawt a hih na het loh u a, ka mit a hih vak ngâl hi! 31 Pathien in migilo thu a ngaitha sek puoi tih ka heu; himahlele, kuon le, Pathien a limbawl a, a deih bang thilte a hih chun, amah chuh a ngaitha sek hi. 32 Khawvel kisiem tûng apat, kuoma’n mitdûksa a pieng a hih vak kit hi tih, a kihe kha puoi. 33 Zie pa hile, Pathien kawma pawt a hih loh chun, bangmah hih thei puo’n a,” ti’n a dâwng a. 34 Chun, amau chun a kawmah, “Nang na pum changsana gitloh a pieng na hi a puo, nangin nei hun hilh vangvei hih!” ti’n a dawng u a. Khutichun, kikhawpna In apat chun a nawhdawk tau hi.
Thagau lama Mitdûk
35 Chun, a nawhdawk ui tih Isu’n a na het phetin, amah chuh a hawl dawk a, a kawmah, “Pathien Chapa na gingcha?” ti’n a dawng a. 36 Amah chun, “Hepu, amah chuh kuo ahi? Ka ginchak theihna dingin ei hilh in,” a ti a. 37 Isu’n a kawmah, “Amah chuh na mu ta a puo, tu a hun hopih pa hi a hi a puo!” a ti a. 38 Ziephet chun, amah chun, “Lalpa, ka gingchai!” ti’n Isu masanga chun a khupdin ta a. 39 Isu’n “Zie vannuoi leisiet a hin, vaihawm dinga hung suk ka hi, mitdûkte chuh a mit uh a hung vakna ding leh, mit vakte chuh a mit uh a hung dûkna dingin,” a ti a. 40 Zie taka Pharisai khenkhat umte chun, zie a thugen chuh a zau a, a kawmah, “Keihaw hile, mitdûk ka hiu hi leh?” ti’n a dawng u a. 41 Isu’n a kawm u ah, “Mitdûk na hih u chun, gitloh nei puo’n lau, himahlele, tun ka mu thei ui na ti ngâl u a, zieziekchun, na gitloh uh a um zing a hii,” a ti a.
Belam Chingpa apat Tehkalna
1 Chun, Isu’n, “Tihtakzet, tihtakzet in ka hilh na hiu hi, kuole, belam huong a kawtkhaka lut lo a, mun chuom khata kal dawka lut chuh, zie chuh gucha leh suommang ahi. 2 Kuole, kawtkhaka lut vang chuh, belam chingpa a hii. 3 Kawtkhak ngakpa’n amah chuh a na hawn sak sek a; a belamte chun a aw a zau a; chuleh, a belamte chuh amin un a sama, a puidawk sek hi. 4 Amah a cheng a thahdawk tieng leh, a masang u ah a chieh sek a, belamte chun amah a zui sek, a aw a zak sek ziekun. 5 Mi dang vang chuh zui puou untin; taih mang san zaw’nau, mi dang aw chuh a het loh ziekun,” a ti a. 6 Zie tehkal thu chuh Isu’n a kawm u ah a gen a, himahlele, a kawm u a bang thugen a hih a he dawk thei ngâl puou hi.
Isu Belam Chingpa Pha
7 Khutichun, Isu’n a kawm u ah a gen kit a, “Tihtakzet, tihtakzet in ka hilh na hiu hi: Kei hi belam kawtkhak chuh ka hii. 8 Ka masanga hungte chengcheng kha gucha leh suommang ahiu a, belamte chun a thuu a ngaitha puou hi. 9 Kei kawtkhak chuh ka hi. Kuole, keimah a lut ta chuh, humbit in um intin, lut in pawt intin, nek ding le kimuh ina. 10 Gucha chuh, gu ding leh, that ding leh susie ding ngâllo chun a hung sek puoi. Kei vang, hin na neihna ding u leh, tamtak a na neih na ding u a hung ka hi zawi. 11 “Kei belam chingpa pha ka hi, belam chingpa pha’n belamte dingin a hinna a pie sek hi. 12 Kithalak, belam chingpa tak hilo a, belamte le amah a hilo te chun, ngêi hung a muh tieng leh, belamte a taihsan sek a; tichun, ngêi chun belam haw chuh a pet a, a sudalh sek hi. 13 Kithalak mai a hi a, belamte a limsak loh ziekin, a taimang sek a hii. 14 Kei belam chingpa pha ka hi a, ka belamte ka he a, chun, ka belamte’n le ei heu hi. 15 Pa’n kei ei het leh, ken Pa ka het guol hin, keia te chuh ka he a, amau inle ei heu hi. Belamte dingin ka hin ka pie sek hi. 16 Chun, zie belam huong a um tih loh hi, belam dang le ka nei hi; amau chule hun pui ding ka hi; ka aw le he’nau; khutichun, lawikhat in um un tin, a chingpa khat tawh. 17 “Zieziek hin Pa’n ei hehpih ahi, lak kit dinga ka hinna ka piek ding ziekin. 18 Kuoma’n ei lâksak thei puo’n a. Keimah thu thu a pie ding ka hi zawi. Pie thei ka hi a, la kit thei le ka hi. Ziehi, ka Pa’n thu ei piek chuh ahi,” a ti a. 19 Zie thu haw ziek chun, mipite lak achun kibungkhenna a hung um kit ta a. 20 A lak u a mi tamtakin, “Thitha a vawp a, ngawl a hi hi; bang zieka a thu ngaitha?” a tiu a. 21 Himahleh, abang in vang, “Zie thu haw hi, thitha vawp thugen ei puoi. Thitha’n mitdûk mit a suvak theia ahim?” a tiu a.
Isu a Deihloh nau
22 Chun, phalbi lai ahi a, chuleh, Pathien Ho-In latna Kut le Jerusalem a mat lai tak ahi. 23 Isu chuh Pathien Ho-In a Solomon bithaliep achun a vak viel a, 24 mipite chuh a kawmah a hung khawm u a, a kawmah, “Bang chana ginleduop a nei kawih dinguh? Krista na hih chun, chientakin kei uh nei hilh ah,” a tiu a. 25 Isu’n a kawm u ah, “Ka hun hilh ta kha la, na gingcha nuom puou a. Ka Pa min a thil ka hih hin, ka chanchin a hetsak ahi. 26 Himahlele, na gingcha ngâl puou a, ka belamte laka na hih loh ziekun. 27 Ka belamte’n ka aw a ngaitha sek ui; ken le amau haw chuh ka he a, amau chun ei zui sek ui. 28 Amau haw chuh kumkhuo a hinna ka pie a, thi ngei ta puo’n au. Kuoma’n ka khut apat ei chuhthâk sak ta puo’n au. 29 Amau haw ei pie pa, ka Pa chuh, mi chengcheng sanga lopi zaw ahi; kuoma’n Pa khut apat chun chuhthâk sak thei puo’n au. 30 Kei leh ka Pa chuh pumkhat ka hi ngâl u a,” ti’n a dâwng a. 31 Ziephet chun, mipite chun a sehna dingin suong a luok kit u a. 32 Isu’n amau chuh a hopih a, “Pa’n hih dinga ei piek, thilpha tamtak, nang haw ka hun etsak a, ziehaw laka khan, a bang pên ziek khan em, suong a nei seh dinguh?” a ti a. 33 Amau chun a dâwng u a, “Nasep pha ziekin, suongin hun sep puo’ng kau; Pathien na gensiet ziek leh, nang mihiem hi ngâl a, Pathien a na kisiem ziek hin ahi zaw’i,” a tiu a. 34 Isu’n a kawm u ah, “Na Dan Lehkhabuu ah, ‘pathien haw na hiu ka tii,’ tih zik hilo ahim? 35 Pathien thu tunnate bawn, pathiente a tih u chun, Pathien lehkha thu’n a gen chu la a kitheng ngei puoh ngâl a. 36 Kei ka hih leh, Pa’n ei tel a, khawvel a hin ei sawl ka hi ngâl a. Khutichun, ‘Pathien Chapa ka hi,’ ka tih ziekin bangtia Pathien na gensiei, nei tih uh ahi? 37 Ka Pa nasem ka hih loh chun, ei gingcha kiu. 38 Amahvang chuh, sem ka hih chun, kei ei gingcha kileu chin le, nasephaw bêk hi gingchau in; Pa, keimah ah a um hi tih leh, Kei, Pa ah ka um hi tih na het u a, na ginchak theih na dingun,” ti’n a dâwng a. 39 Khutichun, Isu chuh mat a guo kit tau a, himahlele, a khut u apat a pawt a. 40 Tichun, Isu chuh, Jordan lui gala, Johan in mi a baptist na a khan a chieh kit a, taka chun a um zing ta a. 41 Chun, mi tamtak a kawmah a hung u a, “Johan in thilmak bangmah a hih puoh a; himahlele, Johan in zie pa chungchâng thu a gen khah a na dik ten hi,” a tiu a. 42 Chun, zie tak mun achun, mi tamtakin amah a gingcha tau hi.
Lazarus Kaihthawhna
1 Chun, Bethani khuo a mi khat, Lazarus kiti chuh a dam puoh a. Bethani chuh, Mari leh, a suohpih nu Martha chênna khuo ahi. 2 (Mari chuh, thau gimlim Lalpa nuh a, a sama thiek nu khah a hi a, zie nu suohpihpa Lazarus chuh ahi, damlo chuh.) 3 Tichun, a suohpih numeihaw chun Isu kawmah, “Lalpa, ngaitie, na hehpih khah a dam puoi,” ti’n mi a sawl u a. 4 Isu’n zie chuh a zak in, “Zie natna hi thihna ding ei puoi, Pathien lopina ding a hi zawi; Pathien Chapa chuh zieziek taka chuh a hung lopi na dingin,” a ti a. 5 Isu’n, Martha te, a suohpihnute leh Lazarus chuh a hehpih a. 6 Himahleh, Lazarus chuh a dam puoi, tih a het nung in le, a umna ngêi mah achun, ni nih a um beh nalai a. 7 Zie nung chun, a sinsakte kawmah, “Judia gam ah chieh kit hitiu,” a ti a. 8 Chun, a sinsakte chun, “Rabbi, madeuhcha khan, mipite’n suong a hun seh a guot u khah; khutisa chun, taka chuh chieh kit guo hâm hâm na hi maw?” a tiu a. 9 Isu’n a kawm u a, “Sun in dâkkâl sawm le nih a um hilo ahim? Mi, suna a vak chun a kipal ngei puoi, zie khawvel vak hi a muh ziekin. 10 Himahleh, mi zan a a vak chun, a kipal sek, vak a neih loh ziekin,” ti’n a dâwng a. 11 Isu’n zie thu haw chuh a gen zawhin, a kawm u ah, “I guolpau Lazarus chuh a ipmu ta a; a ipmu phawng dingin chieh ding ka hi,” a ti a. 12 Sinsakte chun, “Lalpa, a ipmu a hih chun, dam kit na’na,” ti’n a dâwng u a. 13 Isu’n Lazarus thih thu gen a hi a, himahleh, amau chun, a ipmu mawng mawng kha a sau a. 14 Ziephet chun, Isu’n chientakin a kawm u ah a gen a, “Lazarus a thi ahi, 15 himahleh, nang haw ziekin a kawma ka um loh hi ka kipâk hi, ti a chuh, na ginchak theihna dingun. A kawmah chieh hitiu,” a ti a. 16 Chun, Thoma, Didumas a tih u chun a nungzuihpihte kawm achun, “A thihna a thi khawm dingin, Sinsakpa chuh I bawn un zui hitiu!” a ti a.
Thawhkitna leh Hinna
17 Khutichun, Isu a tun phetin, Lazarus chuh thân ah ni li a um tai tih a he a. 18 Bethani chuh Jerusalem kieng a hi a, chîng sawm leh chîng nga vaia gamla ahi; 19 tak achun, a suohpihpau thihna chunga thamuon dingin, Judia gam mi tamtak, Martha leh Mari kawm achun a hung u a. 20 Chun, Martha chun, Isu hung ding a hi tih a het phetin, a muok dingin a va chieh a, himahleh, Mari vang chuh In ah a na um zing a. 21 Martha chun Isu kawmah, “Lalpa, taka hih um hi leh chin, ka suohpihpa thi lo ding hi ven! 22 Tuhin le, Pathien kawma na nget takphawt chuh hun pie’n a tih ka hêi,” a ti a. 23 Isu’n a kawmah, “Na suohpihpa thokit ina,” a ti a. 24 Martha chun a kawmah, “Ni beih ni a thawhkitna ni a chun thokit ina tih ka hêi,” ti’n a dâwng a. 25 Chun, Isu’n a kawmah, “Kei hi thawh kitna leh hinna chuh ka hii. Kuole, ei gingcha chuh, thi mahlele hing ina; 26 kuole, ei gingcha a hing ta chuh, kumkhuo’n thi ta puo’n a, zie thu chuh na gingcha?” a ti a. 27 Amahnu chun a kawmah, “Gingcha e! Lalpa. Krista, Pathien Chapa, khawvel a hung ding pa chuh na hii tih ka gingchai,” a ti a. 28 Martha’n zie thu a gen zawh phet chun, a chieh kit a, a suohpihnu Mari chuh a gûkin a sama, “Sinsakpa taka hin a um a, a hun sam hi,” a ti a. 29 Mari’n zie chuh a zak phetin, kintakin a kipan a, a kawmah a va chieh ta a. 30 (Isu chuh khuo sung a lut nai puoh a, Martha’n a va muok laia a umna mun mah ah a na um a.) 31 In sunga a thamuon dinga Mari kawma um haw chun, a kipan a, kin taka a pawtdawk a muh u chun, thana kap dinga chieh ding ahi khuh, ti’n a zui u a. 32 Tichun, Mari chuh Isu kawm chuh a va tung a, a muh phetin a keng bul ah a khupbawk a, a kawmah, “Lalpa, taka hi um hileh chin, ka suohpihpa thi lo ding hi ven!” a ti a. 33 Isu’n, Mari kap leh a hun zui mipite kap chuh a muhin, a lungthim a in a thum a, a lungkham a, “Amah chuh khawitak ah na siel u?” a ti a. 34 Amau chun a kawmah, “Lalpa, hung inla, en tie!” a tiu a. 35 Isu a kap ta a. 36 Mipite chun, “En tiem u, Lazarus hi a hehpih na zen e!” a tiu a. 37 Himahlele, abang chun, “Zie pa, mitdûk mit suvak theipa hin, zie pa hile a thih loh sak thei puoh a ahim?” a tiu a
Lazarus Kaihthawhna
38 Isu chuh a lungthim in a thum kit a, thân chuh a tung ta a. Zie thân chuh suonghâwm ahi a, a kawt bula chun suong a kikawih a. 39 Isu’n, “Suong hi la chawn un,” a ti a. A thi pa suohpihnu Martha chun a kawmah, “Lalpa, tuhin chuh uih ta’n a, a thih nung ni li ahi ta ngâl in,” a ti a. 40 Isu’n a kawmah, “Na ginchak chun, Pathien lopi zie mu’n la ka hun ti hilo ahim?” a ti a. 41 Khutichun, suong chuh a lik chawn u a. Tichun, Isu chuh a van dâk a, “Hepa, ka thu nei zakpih sek ziekin na chungah ka kipâk hi. 42 Kumkhuo’n ka thu nei zakpih hi tih ka he zing a; himahlele, zie a mipi ding haw ziek hin ka tih a hii, nang nei sawl ngêi a hii tih, ei ginchak theihna dingun,” a ti a. 43 Khutia a gen zawh phet chun, ngeih tak in, “Lazarus, hung pawt ah,” ti’n a kiko a. 44 Tichun, mithi chuh, a khut a keng thân puona tuomsa’n a hung pawt ta a, a mai le kithiekna puona kituom ahi. Isu’n a kawm u ah, “Phel unla, chieh sak un,” a ti a.
Isu Thahna dinga Phielgukna
45 Zieziekchun, Mari veh dinga hung, mipi tamtak chun Isu thilhih chuh a muu a, a gingcha tau a. 46 Himahlele, khenkhatte chuh Pharisaite kawmah a va chieh u a, a kawm u ah Isu thilhih haw chuh a va gen u a. 47 Khutichun, thiempu liente leh Pharisaite chun, vaihawm haw chuh a sam khawm u a, “Bang I lawh ta ding u leh? Zie pa hin thilmak tamtak a hih ta ngâl a! 48 Tawbang a I thahthak u chun, mi cheng chengin amah hun gingchau untin, Rome mite hung untin, I Ho-In u leh, I namteu hi ei hung sukmangthai sak un au!” a tiu a. 49 Chun, a laku a mi khat, Kaiapha chun, zie kum chun thiempu lienpen a hi a, a kawm u ah, “Na hah ngawl na mai zên u e! 50 I chiteu chengcheng sukmangthai a a um sangin, mi khat thih chuh nang haw a dinga phazaw khawp lo ahi, tih helo na hiu maw?” a ti a. 51 Zie thu chuh amah phuok kawma a gen ei puoi, zie kum chun thiempu lienpen a hi a; Juda mipite sika Isu hung thih ding thu a gen khawl a hi zawi, 52 Amau haw a ding mai a hi puoh a, Pathien mite, van nuoia dalh zakte cheng cheng, sapum khata a puih khawm theihna dingin le ahi. 53 Khutichun, zie ni a kipat chun, Judate chun Isu thah theihna dingin thil a guonggalh tau a. 54 Zieziekchun, Isu chuh Judate lak ah tângphuong takin a leng kit ta puoh a; zie tak a pan chun thalek dawh lama, khuo khat, Ephraim kiti mun achun a chieh zaw ta a, tak achun sinsakte chu tawh a um tau hi. 55 Chun, Judate Chiehkân Kut chuh a nai ta a, tichun, mi tamtak, gamsung apat, Chiehkân Kut ma’n, kithiensak dingin Jerusalem khuo ah a va chieh u a. 56 Zie tak achun Isu a hawl u a, Pathien Ho-In a kikhawpnau achun, “Bangti’n na ngai a? Kut na ahin hung tello ding a hi maw?” ti’n a kiho u a. 57 Thiempu liente leh Pharisaite chun, Isu a mat theihna dingun, kuole, a umna he taphawt in amau chuh a hilh dinguh ahi ti’n thu a pie tau a.
Mari’n Isu Thau gimlim a nuh na
1 Chun, Chiehkân Kut masang ni gup chun, Isûn thihna apat a a kaihthawh, Lazarus umna khuo Bethani khah a hung tung a. 2 Zie tak achun amah a dingin guolvakna a siem u a, zie chun, Martha chuh a tawiviel in a pang a, Lazarus chu la Isu ankuong ûmpih in a pang a. 3 Tichun, Mari’n, khaih kimkhat, spiknard thau gimlim man tamtak a hun chawi a, Isu kênghaw chuh a nuh a, a sam in a kênghaw chuh a thiek a; tichun, zie thau gim chun In sung chuh a zel suok chai chai zieng a. 4 Himahlele, Isu sinsakte laka mi khat, Juda Iskariot a matsak ding pa chun, 5 “Zie thau gimlim hi bangati a, makhai zathum a khawng a, mi gimtheite kawma pie zaw lo?” a ti a. 6 Mi gimtheite a khawksak zieka zie thu hi a gen ahi puoi, gucha ahi a, dangkadip a vawp a, a sunga kikawih haw chuh a lak sek ziekin ahi zawi. 7 Chun, Isu’n, “Khutichun um sak un! A thil neih chuh ka kivuih ni a dingin sit heh. 8 Mi gimtheite chuh kumkhuo a na kawm u a um zing ahiu a; kei vang chuh, kumkhuo a na kawm u a um ding ka hi puoi,” a ti a. Lazarus Thah dinga Phielgukna 9 Chun, Isu chuh Bethani khuo achun a um hi tih Juda mipite chun a he tau a, tak achun a hung u a, Isu ziek chauh a hung ahi puou a, Isu’n thihna apat a a kaihthawh Lazarus khale muh nuom kawm ahiu hi. 10 Khutichun, thiempu liente chun, Lazarus chule thah dingin a kidawp tau a, 11 Amah zieka Judate tamtakin, a taihsan u a, Isu a ginchak ziekun.
Isu Jerusalem a Lopitak a a Lutna
12 Chun, a zing chun, Kut na a hung mipi tamtakin, Isu Jerusalem khuo a hung ding a hi tih a he tau a. 13 Khutichun, tûmbâk haw chuh chawiin, a muok dingin a chieh u a, “Hosanna, Lalpa min a Israel Leng hung chuh a hamphai,” ti’n a kiko u a. 14 Chun, Isu’n sabiltung no a mu a, a chungah a chu a, 15 “Lau kih, Zion chanu; Entie, na Leng chuh! Sabiltung no chunga chu’n, Hung ding a hii,” ti a Pathien lehkhabu a zik guol khan. 16 Ziehaw chuh, a tûngin a sinsakte’n a he puou a; himahlele, Isu limbawla a um nung leh, a chanchin ah zie thu haw chuh zik a hii tih leh, a chungah ziehaw chuh a na hih nau hi tih a na he tau hi. 17 Chun, Lazarus thân apat a sap dawk a, mithi lak apat a kaih thawh laia, a kawma mipi umte khan a thu chuh a hetsak zel tau a. 18 Zieziekchun ahi, mipite chun a mah a va muok uh, zie thilmak chuh a hih hi tih a he ngâl u a. 19 Khutichun, Pharisaite chun, “He tau in, bangmah na lawh thei puou hi! en un, khawvel in amah a zui tau hi!” a tiu a. Grik mi khenkhat in Isu a Hawlnau 20 Chun, Kut hun sunga Pathien va chibai dinga Jerusalem a va chiehte lak achun, Grik mi khenkhat a tel u a. 21 Ziete chuh, Galili gama Bethsaida khuo a um, Philip kawmah a va chieh u a, a kawmah, “Hepu, Isu muh ka nuom ui,” a tiu a. 22 Philip chun Andrew a va hilh a, chun, Andrew leh Philip chun Isu a va hilh tau a. 23 Isu’n a dâwng a, a kawm u ah, “Mihiem Chapa limbawla a um phat chuh a hungtung tai. 24 Tihtakzet, tihtakzet a ka hilh na hiu hi, buh chang leia a kiek a, a thih loh chun, amah mai in a um zing sek; a thih le chuh tamtakin a gah sek hi. 25 Kuole, a hinna thalah chun a chan sek a; kuole, zie khawvel a hi, a hinna ngaitam chun, kumsawt a hinna ding vawp zing ina. 26 Kuo’n le, keia ding a sep nawp chun, ei zui heh, ka umna ah kei dinga sempa le um ina; kuo’nle, kei ding a sep chun, amah chuh Pa’n limbawl ina.
Isu’n a Thihna ding Thu a Genna
27 “Tu’n ka lung a dawng hi; bang ka gen ta die aw? ‘Hepa, zie hun apat hin ei hukdam in,’ ka ti die leh aw? Bang hilele, zie gimtheihna thuok hi ka hung lawh ahi ngâl a. 28 Hepa, na min limbawl ah,” a ti a. Ziephet chun, van apat in aw a hung pawt a, “Ka limbawl tai, limbawl kit zel ing ka,” a hun ti a. 29 Zie taka mipi dingte chun aw chuh a zau a, khenkhat in, Van gi ahi, a tiu a; a dangin, “Vânsâwlchâk in amah a hopih a hii,” a tiu a; 30 Isu’n a kawm u ah, “Zie aw chuh keia dinga hung kigen ahi puoh a, nangmau haw a ding ahi zawi. 31 Tu’n zie khawvel hi a chung thu ngaihtuoh hun a hi ta a; zie khawvel vaihawmtu hi paihthak a um ding ahi. 32 Chun, kei lei apat a khaihkang a ka um chun, mi chengcheng ka kawmah hîp vek ing ka,” a ti a. 33 (Zie thu chuh a thih ding dante gen a na hi.) 34 Mipite chun a dâwng u a, “Ka Dan Lehkhabuu chun, Krista chuh kumlekhuo’n hing zing ina, ti’n ei hilh a puo! Aleh, bangti dana, nangin Mihiem Chapa hi khaihkang a um ding ahi na tih a? Zie Mihiem Chapa chuh kuo a hi?” a tiu a. 35 Chun, Isu’n a kawm u ah, “Vak hi chawmkhat na kawm u ah um tadih ina. Vak na neih sung u hin na thilhih teu hih zawm zel un, thim in a hun dal lohna dingin; kuole thima leng chun a chiehna chin a he sek puoi. 36 Vak na neih sung u hin, vak hi gingchau in, tichun, vak chate na hung hih theihna dingun” a ti a.
Gingchalo Mipite
Chun, Isu’n zie thu haw chuh a gen zawhin, a chieh manga, amau haw apat in a kisel mang ta a. 37 Zie thilmak chengcheng chuh amau haw umna ngêi ah hih mah lele, a gingcha diek puou hi, 38 Thiemgau Isai in a chungthuu a gen hi a hung guitun theihna dingin: “Lalpa, ka thugen uh kuo a gingcha? Lalpa thilhih theihna chule kuo chungah ahi suklata a um?” a tih hi. 39 Zieziek hin ahi a ginchak theih loh uh, Thiemgau Isai in: 40 “Pathien in a mit uh a hih dûk a, a lungthimteu a khâk sak a, Khutilochun a mit un mu khau un tin uh, A lunggil un he kha’n au, Tichun, hung kihei kit khau untin, Ken amau haw a na hihdam khang ka,” ti a a na gen ziek hin. 41 Isai in a lopi zie a muh leh a chanchin a gen ziekin ziehaw chuh a gen ahi. 42 Zie hun tieng chun, Juda lawiupa tamtakin Isu chuh a gingcha tau a; himahlele, Pharisaite ziekin tângphuong takin a gen dawk puou, Kikhawpna In apat a nawhdawk a hih lohna dingun. 43 Pathien kipahpih a um sangin mihingte pahchak a um a ut zaw ngâl u a.
Isu Thugen ngeia Thutanna
44 Chun, Isu chun aw ngeih tak in, “Kuole, ei gingcha chuh, kei ei gingcha ei puoh a, ei sawlpa gingcha ahi zawi. 45 Kuole, ei mu chuh ei sawlpa mu ahi. 46 Kei hi khawvel salhvak dinga hung ka hi, kuole ei gingcha ta chuh thima a um zing lohna dingun. 47 Mi’n ka thugente a zak a, a zawp diek loh chun, a chung thu ken ka tan puoi; khawvel thutan dinga hung ka hi puoh a, a hukdam dinga hung ka hi zawi. 48 Kuole, ei deih lo a, ka thugente pawm nuom lo chuh, a chungthuu tan sak ding khat a nei ui. Ni tawp ni chu leh, ka thugente ngêi hin ahi, amau haw chungthu a hun tan ding chuh! 49 Ka phuok kawma ka gen ei puoi, Pa ei sawlpa chun ka gen ding leh ka hilh ding chuh thu ei piek zawk ahi. 50 Amah thupiek chuh kumkhuo hinna a hi tih ka hêi; zieziekchun, thu ka gen hi, Pa ei hilh bang zel a ka gen a hi,” a ti a.
Isu’n Sinsakte Keng a Silna
1 Chun, Isu’n, Chiehkân Kut maa zie khawvel hi pawtsan a, Pa kawma chieh phat a tung tai tih a he a. Amah mi, khawvel a um, a hehpih sekte chuh, a tâwp tiengin le a hehpih zing a. 2 Isu leh a sinsakte’n nitâk Ankuong a um u a. Diabol in Simon chapa, Iskariot Juda lungthim achun, Isu matsakna dingin na a na sem zo kêi ta ngâl a. 3 Isu’n, Pa’n thilhih theihna bukim a piek dân te. Pa kawm apat a hung pawt leh, a kawma chieh kit ding ahih dante chuh a hezing a. 4 Khutichun, dawhkân apat chun a kipan a, a puon silh chungnung te chuh a kawih a, kithiekna puon a la a, a cheng a. 5 Tichun, kuong ah tui a sung a, a sinsakte keng chuh a sil sak a, kithiekna puon a chen chun a thiek hul sak zel a. 6 Khutichun, Simon Peter kawmah a hung a, amah chun a kawmah, “Lalpa, nang lâwm lâwm in ka keng sil ding na hi a a hi?” a ti a. 7 Isu’n a dâwng a, “Ka thilhih hi tu’n na he puoi, himahlele, tu nung leh hun he ding na hi,” a ti a. 8 Peter in a kawmah, “Ka keng sil hiel puo’n la,” a ti a. Isu’n a kawmah, “Ka hun sil loh leh, ka kawmah bangmah chan nei puo’n la,” a ti a. 9 Simon Peter in a kawmah, “Lalpa, khuti chuh a hih leh, ka keng mai hilo in, ka khut leh ka luchang le la,” a ti a. 10 Isu’n a kawmah, “Kisil sa chuh a keng tih loh sil a ngai puoi, a ngim kei hilo maw; nanguh na ngim ui, na bawn un vang ahi puoi,” a ti a. 11 (A matsak ding pa chuh a he ngâl a; zieziekchun, na bawn un vang na ngim puou, a tih ahi.) 12 Khutia, a kenghawu a sil a, a puon a lak a, a chut kit phet chun a kawm u ah, 13 Na chung u a ka thilhih hi bang tihna a hih na heu hi? Nang haw’n, “Sinsakpa leh Lalpa nei ti sek ui; na ti dik ui, ka hi him hi. 14 Kei Sinsakpa leh Lalpa bawnin na keng uh ka sil chun, nangmau haw le na keng uh na kisil sak dinguh ahi. 15 Na chung u a ka hih guola hi, nang haw’n le na hih na dingun ka hun lam pat sak ahi. 16 Tihtakzet, tihtakzet a ka hun hilh na hiu hi; suok, a pu sangin a lopi puoi; sawlchak le, a sawlpa sangin a lopi diek puoi. 17 Zie tawbang thudik na het u chuh hih leu chin, bang tienga kipâkin na um ta phet ding um maw! 18 “Na bawn u a chung thu gen kei puoi, ka telte chuh ka hêi. Himahlele, ‘Ka chângthâk nekpihpa’n a khawtalzum ka chungah a lek tai,’ tih Pathien lehkha Thu kha a hung guitun theihna ding a hi. 19 Tu akipat a hungtun ma’n ka hilh na hiu hi, a hung tun tieng leh, ‘amah kha ka’ hi tih na het theihna dingun. 20 Tihtakzet, tihtakzet a ka hilh na hiu hi, kuole, ka sawl ta poh lawp ta chuh keimah ei lawp ahi a, kei ei lawp chu le, ei sawlpa lawp a hii,” a ti a.
Isu’n a Matsak ding a Genlawkna
21 Isu’n tawbanga chuh a gen zawhin, a lungthim in a lungkham a, “Tihtakzet, tihtakzet a ka hun hilh na hiu hi, na lak u a khat hin ei matsak unlau,” ti’n a gendawk ta a. 22 Ziephet chun, Sinsakte chun, kuo a tih chuom a he puou a, a ki-entuoh u a. 23 A sinsakte laka mi khat, Isu’n a hehpih chuh, dawhkân sika Isu kawm achun a chu a. 24 Simon Peter in zie pa kawm achun, “Kuo thu pên a hi a gen, vak dawng tie,” a ti a. 25 Khutichun, amah chuh Isu sik achun a kichawn naih deuh a, a kawmah, “Lalpa, kuo pên a hi?” a ti a. 26 Isu’n, “Chângthâk thêm ka dieh saka, ka piek pên chuh hi’n a,” a ti a, a dâwng a. Khutichun, chângthâk thêm a dieh nung chun, a la a, Iskariot, Simon chapa Juda kawm achun a pie ta a. 27 Khutichun, Juda’n chângthâk a lak lak chun, Setan chuh a sung ah a lut ngâl ta a. Ziephet chun, Isu’n a kawmah, “Na hih ding ding chuh hih meng ah,” a ti a. 28 Dawhkân sika chuh haw kuomah chun, Isu’n bang zieka zie tawbang thu chuh a kawma gen ahim tih a he puou hi. 29 Sinsakte khenkhat chun, Juda chun dangka a vawp zieka, Kut na a dinga thil sinmawh cheng va chaw’n ti hoh ahim, Mi gimtheite kawma bang ahim khat piek ding gen hoh ahim, a tiu a.
Thupiek Thak chuh
30 Tichun, Juda chun chângthâk thêm chuh a la a, a pawt ngâl ta a. Zie chuh zan lai ahi. 31 Chun, Juda’n a pawt san nung chun Isu’n, “Tuhin, Mihiem Chapa limbawl in a um tai, amah ziekin Pathien le limbawl in a um tai. 32 Amah zieka Pathien lopina suklata a um tâk ziekin, Pathien ngêi in, Mihiem Chapa lopina le sulang ina, zie chuh hih zieng ding ahi. 33 Naute haw, na kawm u a um sawt lo ding kei tai. Nang un nei hawl un na tin uh, himahlele, Judate kawma, ‘Ka chiehna ding ah hung thei puo’n lau’ ka tih guol khan, tu’n khuti mah chun, na kawm u ah ka gen a hi. 34 “Thutiem Thak ka nun piek na hiu hi, kihehpih unla; ken nanguh ka hun hehpih guol hin, nang haw le kihehpih tuoh chiet un. 35 Na kihehpih u chun, mi cheng chengin ka sinsakte na hiu hi tih, zie tak achun hun he’n au,” a ti a.
Peter in a Kizuksan ding Thu
36 Simon Peter in a kawmah, “Lalpa, hawi ah e na chieh ding?” a ti a. Isu’n, “Ka chiehna ding ah nangin tu’n nei zui thei puo’n la, tunung le vang chuh nei zui inla,” a ti a, a dâwng a. 37 Peter in a kawmah, “Lalpa, bangati a e tu a le ka hun zuih theih loh ding? Nangmah ziekin ka hinna chan ing ka,” a ti a. 38 Isu’n a kawmah “Keimah ziekin na hinna chan ding maw? Tihtakzet, tihtakzet a ka hun hilh na hii; âk khuo’n masang in, nangin thum vei ei kizuksan inla” a ti a.
Pa kawm Zawtna Lampi
1 “Na lunggil uh lunggim kiheh; Pathien na gingchau hi, Kei le ei gingchau in. 2 Ka Pa In ah umna tamtak a um a, a um loh chun, nanguh hun hilh ta’ng ka; nang u ding mun siem a chieh ding ka hi. 3 Chun, nang u dinga mun ka va siem zawh tieng chu leh, hungkit ing ka ting, ka kawmah nanguh hun lang ka, ka umna a nang u le na um theihna dingun. 4 Ka chiehna ding lampi chin na heu hi,” a ti a. 5 Thoma’n a kawmah, “Lalpa, na chiehna ding chin ka he dang u! a lampi bangti’n a ka het dinguh?” a ti a. 6 Isu’n a kawmah, “Keimah hi lampi leh Thutak leh Hinna ka hii; keimah a chieh lo chuh, kuomah Pa kawm a tung ngei puou. 7 Kei nei he leu chin, ka Pa le he ding na hi tau a; tu’n amah na he tau a, amah na mu ta ngâl u a,” a ti a. 8 Philip in a kawmah, “Lalpa, Pa chuh kei uh nei muh sak ta! tichun, kei u dingin hun set ina,” a ti a. 9 Isu’n a kawmah, “Philip, chanpi hi na kawmah ka um a, khutisa chun le nei he puo maw? Kuole, ei mu chuh Pa mu a hii. ‘Pa chuh kei u le nei muh sak ah’ bangti tih a na tih ahi? 10 Kei Pa a ka um leh, Pa keimah a um hi tih gingcha lo na hi maw? Na kawm u a ka thugen hi, keimah phuok kawma ka gen ei puoi; Pa chuh keimah ah a um zing a, zie chun thil a hih zawk sek a hii. 11 Kei Pa a ka um hi tih leh, Pa, keimah a um hi tih gingchau in. 12 Tihtakzet, tihtakzet a ka hilh na hiu hi, kuole, ei gingcha chun, thil ka hih haw hi, ama’n le hih ina; ziehaw sanga thil lopi zaw hile hun hih ina, Pa kawma chieh ding ka hih ziekin. 13 Chun, ka min a thil bang hitaleh na nget u chun, hih zel ing ka, ti a chuh Chapa zieka Pa limbawla a um theihna dingin. 14 Nangun ka min a thil bang hitaleh na nget u chun, zie chuh hih zel ing ka.
Thagau Thiengtho Piek Tiemna
15 “Nangun nei hehpih u chun, ka thupiek haw chuh zawp unlau. 16 Tichun, Pa kawmah ngên ing ka ting, ama’n Lungmuonpa dang nanguh hun pie’n a, kumkhuo a na kawm u a um dingin. 17 Zie chuh Pathien chanchin diktak phuongdawk sek Thagau chuh ahi. Vannuoi in zie chuh a nei thei puou hi, amah a muh loh u a, het le a het loh ziekun. Nang haw’n vang, na kawm u a a um zing ziek leh, nangmau a a um ziekin, amah chuh na heu hi. 18 “Thawmhau in nanguh hun nusieh puo’ng ka; na kawm u ah hungkit ing ka. 19 Chawmkhat hal leh, khawvel in ei mu kit ta puo’n au; himahlele, nang u vang in chuh ei mu’n lau; keimah ka hin ziekin, nang haw le hing un lau. 20 Zie ni tieng chu leh, Kei pa a ka um leh, Kei nangmau a ka um guolin, keimah ah na um ui tih hun he’n lau. 21 “Kuole, ka thupiek haw pawm a, zawp ta chuh, ei hehpih ahii. Kuole, ei hehpih chuh Pa’n, amah le hehpih ina; ken le amah chuh hehpih ing ka ting, a kawmah kilak ing ka,” a ti a. 22 Chun, Juda (Juda Iskariot lo zaw chun) a kawmah, “Lalpa, keihaw kawma na kilak a, vannuoi kawma na kilak loh ding chuh bangti a hi?” a ti a. 23 Isu’n a dâwng a, “Mi’n ei hehpih chun, ka thu zawp intin, ka Pa’n amah chuh hehpih ina, tichun, a kawmah hung ing ka ting un, a kawmah um zing ung kau. 24 Kuole, ei hehpih lo chun, ka thu a zawp puoi; thu na het hawu hi keia ahi puoi; Pa, ei sawlpa a ahi zawi. 25 “Na kawm u a ka um pêt hin, zie thu haw hi ka hun hilh na hiu hi. 26 Chun, Lungmuonpa Thagau Thiengtho, Pa’n, ka min a a hun sawl ding khan, zie chun bangakai nanguh hun sinsak intin, na kawm u a ka gen chengcheng kha hun het dawk sak kit ina. 27 “Lungmuonna ka hun nutsieh na hiu hi; keimah lungmuonna ka hun piek na hiu hi; khawvel in a hun piek guolin ka hun piek na hi puou hi. 28 Na lunggil uh lunggim kiheh, lauh le lau kiheh. ‘Chieh mang ding ka hi a, na kawm u ah hungkit ing ka,’ ka hun tih khah na he tau kha. Nangun nei hehpih hi leu chin. Pa kawma ka chieh ding ziekin kipâk ding na hiu a, Pa chuh keimah sangin a lopi zaw ngâl a. 29 Tu’n, a hungtun ma hin ka hilh sa na hi tau hi, a hung tun tienga na ginchak theihna dingun. 30 Na kawm u ah thu gen kit man ta puo’ng ka, zie khawvel vaihawmpa hi hung ding ahi ta ngâl a; amah chun ka chungah bangmah hih theih him a nei puoi, 31 himahleh, ken Pa ka hehpih leh, Pa’n thu ei piek bang zela thil ka hih hi, khawvel in a hetna ding ahi zawi. Kipan un, tak apat hin pawt hitiu.
Isu Grep gui Taktak chuh
1 “Kei Grep gui taktak chuh ka hii, ka Pa a huon ngakpa ahi. 2 Ka kizawppih bâk gah lo ta cheng a paih sek a, a gah pha ta chuh a hih thiengtho sek hi, a gah tam zawk diek na’n. 3 Na kawm u a ka thugen ziek chun, tu’nle na thiengtho pai zieng tau hi. 4 Keimah ah um zingun, keile, nangmau ah um zing ing ka. Bâk chuh grep guia a um zing loh a amah maia a gah theih loh guolin, nang u le keimah a na um zing loh u chun, gah thei puo’n lau. 5 “Kei grep gui chuh ka hi a, nang haw a bâk na hiu hi; kuole, keimah a um zinga, keile amah a ka um zing na chuh, zie mah chuh tamtakin a gah sek hi; keimah lo in bangmah na hih thei ngâl puou a. 6 Mi, keimah a a um zing loh chun, bâk guola paih dawkin a um a, a vuoi sek; tichun, a chawm u a, mei ah a paih u a, a kâng sek. 7 Nanguh keimah a na um zing u a, ka thu le nangmau a a um zing chun, na deih chenguh ngên un, nang u dingin hihin um ina. 8 Zie vanga hi ka Pa le limbawla um ahi, tamtak a na gah u hin; khutichun, ka sinsakte hin lau. 9 Pa’n ei hehpih guolin ken le ka hun hehpih na hiu hi; ka hehpih in um zingun. 10 Nangun ka thupiekte na zawp u chun, ka hehpih in um zing unlau, ken le ka Pa thupiekte ka zawpa, a hehpih a ka um zing guol mah hin. 11 “Ka kipahna nangmau a a um zing na’n leh, na kipah uh a bukimna’n zie thu haw hi na kawm u a ka gen ahi. 12 Ziehi ka thupiek ahi: Ken ka hun hehpih guol mah hin, nanguh kihehpih un. 13 Mihiem in a guol sika a hinna a piek khela hehpihna nasa zaw kuoma’n a nei puoi. 14 Thu ka hun piek cheng na hih u chun, ka guolte hi’n lau. 15 Suok hun tikit ta puo’ng ka; a pu thilhih suok in a he puoh ngâl a; guolte hun ti zaw ta’ng ka; Pa apat a thil ka het cheng na kawm u ah ka phuong ta ngâl a. 16 Nangun nei tel puou a, ken ka hun tel zawk na hiu ui; chieh a, sawttak a um zing dinga tamtak a va gah dingin ka hun guot na hi ngâl u a. Khutichun, ka min a Pa kawma na nget tak uh hun pie zel ina. 17 Zie hi ka hun thupiek chuh a hi: Kihehpih tuoh chiet un.
Khawvel in a Hawtnau chuh
18 “Khawvel in a hun hawt u leh, a hun hawt mau in kei ei haw tau hi tih na he tau hi. 19 Nang haw khawvel mi hi leu chin, khawvel in amah mite a hehpih ding a hii; khawvel a mi na hi ngâl puou a, khawvel a um, ka teldawk na hih zawk ziekun, khawvel in a hun hawt na hiu hi. 20 ‘Suok, a pu sangin a lopi puoi’ tih ka hun hilh na hi tau kha, hezing un. Amau in kei ei bawlsiet tâk u chun, nang haw le hun bawlsie’n au; ka thu a zawp tak u chun nang haw thu le zawp un au. 21 Himahleh, keia na hih ziekun ziehaw cheng hi na chungu ah hih un au, ei sawlpa a het loh ziekun. 22 Kei a kawm u a hunga thu gen lo hi leng, gitloh nei lo ding ahiu a; tu’n vang chuh a gitlohnau ah paulap ding a nei ta puou hi. 23 Kuole, kei ei haw chun, ka Pa le a hawt a hii. 24 Thil kuomah hih khâk loh cheng a kawm u ah hih kileng, gilo a thiemmawh kichanna nei lo ding ahiu a, tu’n vang chuh, amau in kei leh Pa chuh ka nih un ei mu tau a, hawt le ei haw a hi tau hi. 25 Bang hitaleh, Dan Lehkhabu ah, ‘Amau haw’n bangmah a ziek dukdak um lo in ei hawu ahi,’ tih zik kha a hung guitun theihna dingin ti ahiu hi. 26 “Chun, Pa kawm apat Lungmuonpa na kawm u a ka hun sawl ding chuh, Pathien chanchin diktak phuongdawk sek, Thagau chuh a hii. Amah chuh Pa kawm apat ka hun sawl ahi a, amah chun ka chanchin hun hetsak ina. 27 Chun, nangun le ka chanchin gen unlau, atûng apat ka kawma um na hih tâk ziekun.
1 “Na ginnau a na nungtawlh lohna dingun, ziehaw hi na kawm u a ka gen ahi. 2 Kikhawpna In apat a nawhdawkin um un na tin uh, chuleh, Pathien chunga thilpha bawla kingai a, nang haw a hun thah hun uh hung tung ding a hi. 3 Zie thil haw chuh hih un au, Kei leh Pa ei het loh ziekun. 4 Zie thu haw hi na kawm u a ka gen sa ei tai, a hun chuh a hung tun tieng leh, ka hun na hilh sa ahi tih na het dawk kitna dingun.
Thagau Thiengtho Nasep
“Zie thil haw hi atûng apat ka hun na hilh loh him a hii, na kawm u a ka na um tâkdih ziekin. 5 Himahleh, tun vang chuh, ei sawlpa kawma chieh ding ka hii, na lak u a kuoma’n ka chiehna ding nei dawng puoh ngâl u a. 6 Mahleh, tu a ka hun hilh phet hin, na lunggil u chuh lungkham na’n a dim hiel ta ahi. 7 Himahlele, thudik tak ka hun hilh na hiu hi, ka chieh nang u dingin a phai; ka chieh loh chun Lungmuonpa chuh na kawm u a hung lo ding ahi ngâl a. Himahlele, ka chieh chun, nang haw kawma hun sawl ding ka hi. 8 Tichun, amah chuh a hung tieng leh, khawvel a mite kawm achun, gitloh thu te, diktatna thu te leh vaihawmna thu te ah a dikloh zieu hun hetsak ina. 9 Gitlohna thu ale thiemmawh chang un au, kei ei ginchak loh ziekun; 10 Diktatna thu ale thiemmawh chang un au; Pa kawma chieh ding ka hi a, nangun nei muh kit tâk loh ding ziekun; 11 Pathien thutanna ale thiemmawh changin um un au, zie khawvel vaihawmpa chuh thiemmawh changa thutan khum a hih tâk ziekin. 12 “Na kawm u a gen ding thu tamtak ka nei nalai hi; himahleh, tuhin, na tin tadih puou hi. 13 Amahvang chuh, Pathien chanchin diktak phuongdawkpa Thagau chuh a hung tieng leh, thudik cheng chengah hun puilut ina. Amah phuok kawmin thu gen ding a hi puoh a, a thu zakte chauh gen intin; thil hungtung dingte le hun hetsak in a. 14 Amah chun lopina kei ei pie’n a; ka thugente la’n tin, nang haw kawma gen ding a hih ziekin. 15 Ka Pa thil neih chengcheng chuh keia a hi a, zieziekchun ahi, ‘Thagau chun kei kawm apat la’n tin, na kawm u ah gensawn ina,’ ka hun tih chuh.
Lungkhamna leh Kipahna
16 “Chawmlo kalin nangun kei ei mu puo’n na tin uh; chawmlo kal mah in nangun kei ei mu kit unlau, Pa kawma ka chieh ding ziekin” a ti a. 17 Ziephet chun, sinsakte laka khenkhat chun, “I kawm u a a thugen hi bang a tihna a hi? Chawmlo kalin nangun kei ei mu puo’n na tin uh; chawmlo kal mah in nangun kei ei mu kit unlau a tih leh, ‘Pa kawma ka chieh ding ziekin,’ a tih hi, a kitiu a. 18 Amau haw mah chun, ‘Zie chawmlo kal,’ a tih hi a umzie banga? A thugen hi a ngaihna ka he puou hi,” a tiu a. 19 Chun, amah dawt a nuom ui tih Isu’n a he a, a kawm u ah, “Chawmlo kalin nangun kei ei mu puou un na tin uh, chawmlo kal mah in nangun kei ei mu kit unlau, ka hun tih hi na kidawng tuoh uh ahi maw? 20 Tihtakzet, tihtakzet a ka hun hilh na hiu hi, nang haw hi kap in lungkham un na tin un, himahleh, khawvel hi kipâk ding ahi; lungkham un na tin uh, himahleh, na lungkhamnau chuh lawpna hung suok ding ahi. 21 Numei a nauhanat tieng leh a lungkham sek, a hun a tun tâk ziekin, himahlele, nau a hun hin tieng leh, a lungkhamna chuh a he kit ta sek puoi; khawvel a mihiem hung pieng chuh a kipâk ziekin. 22 Zie chuh, tu a nanguh dinmun tawbang hi ahi: tuhin na lungkham u a, himahleh, nanguh hun mu kit ing ka, tichun, na lunggil u chuh kipahna kuoma’n a hun lâksak theih loh ding chun dim ina. 23 “Zie ni chuh a hungtun tieng leh, nangun kei bangmah ei dawng puo’n lau. tihtakzet in ka hun hilh na hiu hi. Pa kawma bang hitaleh, na nget u chun, keimah min in nanguh hun pie’n a. 24 Tuchan hin, ka min in bangmah na ngên ngâl puou a; ngên un, tichun, hun pie’n a, na kipâk uh a bukim na dingin.
Khawvel Zawhna chuh
25 “Zie thu haw chuh a thawitham in na kawm u ah ka gen a; himahlele, a hun tun tieng chu leh, a thawitham in gen ta puo’ng ka ting, kichien takin Pa chanchin na kawm u ah gen zaw ta’ng ka. 26 Zie ni tieng chu leh, ka min in thil ngên unlau; chun, ‘Pa kawmah ken hun nget sak ing ka’ ti ka hi puoh a; 27 Pa ngêi in nanguh a hun lungsiet ngâl a. Nangun kei nei hehpih u a. Pa apat a hung ngêi ka hi tih nei ginchak ziekun. 28 Kei Pa kawm apat a hung a, van nuoia hung ka hii; vannuoi taihsan a. Pa kawma chieh kit ding ka hii,” a ti a. 29 Chun, a sinsakte’n, “Ngaitie! tuhin chuh chientak in thu na gen a, a thawitham himhim in na gen ta puoi. 30 Nangin bangakai na he a, kuomah hun dawt na ngek puoi, tih chientakin ka he tau hi. Zie ngêi chun. Pa apat a hung na hii tih ka gingcha tau hi,” a tiu a. 31 Isu’n a dâwng a a kawm u ah, “Tu’n chuh, na gingcha tau maw? 32 A hun tung ding ahii, a tung le ahi zieng tai, zie tieng chu leh nangmau In lam chietah dalh vek un na tin uh, keimah chauh in nei thahtha’n lau; himahlele, Pa ka kawma a um ziekin, keimah chauh in ka um diek puoi. 33 Zie thu haw hi na kawm u ah ka gen ta hi, keimah a na um ziek u a lungmuonna na neih theihna dingun. Khawvela hin dahum thuok in na um sek ui. Himahlele, kipâk takin um un, ken khawvel ka zo tai,” a ti a.
A Sinsakte dinga Isu Pauchamna
1 Zie thu haw chuh Isu’n a gen zawhin, van lam en in, “Hepa, a hun a tung tai. Na Chapa limbawl ah, Chapa’n le a hun limbawl na ding in. 2 Mi chengcheng chunga thunei in na siem a, ti a chuh, na piekte kawma hinna a piek theihna dingin. 3 Ziehi kumkhuo hinna a hii, Nang Pathien tak tak leh, na sawl Isu Krista het hi. 4 Nangin thilhih dinga nei piek kha ka hih zo a, lei chungah ka hun limbawl tai. 5 Aw he Pa, khawvel kisiem ma pek a na kawma lopina ka chan kha, zie tawbang mah khan tuhin ei limbawl kit in. 6 “Nangin khawvel apat a mi nei piek dawkte kawm achun na min ka sulang tai. Amau haw chuh nanga ahiu a, nangin kei nei piekte ahi ngâl u a. Amau chun na thu a zawp tau hi. 7 Nangin ka kawma thil nei piekte chuh, nangmah ngêi apat a hi tih tu’n a he tau hi. 8 Nangin thu nei piek kha a kawm u ah ka pie ta a, ziehaw chuh a ching u a, nangmah kawm ngêi apat ka hii tih dik takin a he tau a, nei sawl ngêi ka hii tih le a gingcha tau hi. 9 “Amau haw dinga ngetsak ka hi. Khawvela dinga ngetsak ka hi puoh a, nangin nei piek haw dinga nget sak ka hi zawi; nanga ahi ngâl u a. 10 Thil chengcheng keia tapoh nanga a hi a, nanga chule keia a hi ngâl a; amau haw ziekin limbawl in ka um sek. 11 Tu’n, kei na kawma hung ding ka hi a, khawvel ah um ta puo’ng ka; amau haw vang hi khawvel ah um un au. He Pa, Thiengtho, nangin kei nei piekte hi na min in hum ah; pumkhat a hih theihna dingun, nang leh kei pumkhat I hih guol mah bang hin. 12 A kawm u a ka um sungin, nangin kei nei piekte haw hi na min in ka hum sek; amau haw ka veng a, a lak u a khatchale a mangthai puou, mangthai chapa ngâllo chuh; Pathien Lehkha thu kha a hung guitunna dingin. 13 Himahlele, tuhin, na kawma hung ding kei tai; ka kipahna amau a a bukim theihna dingin, zie thu te hi khawvel kawma ka gen ahi. 14 Na thu a kawm u ah ka pie tai; khawvel in amau haw chuh a hawu a, khawvel a a hih loh ziekun leh, kei khawvel a ka hih loh guol mah hin. 15 Nangin, amau haw chuh khawvel apat a na lak dawk dinga ngên ka hi puoh a, migilo laka chuh na hum ding ti ka hi zawi. 16 Khawvela ka hih loh mah bang hin, amau haw chule khawvel a ahi puou hi. 17 Amau haw chuh thutak in hih thiengtho ah, na thu chuh thutak ahi ngâl a. 18 Nangin khawvel a kei nei sawl guolin, ken le amau haw chuh khawvel a ka sawl a hii. 19 Amau haw ziekin keimah ngêi nang kawmah ka kilân thiengtho ahi, ti a chuh, amau haw le nangmah kawma dik taka a kilân thiengtho theihna dingun. 20 “Ziete hawa ding maia hi ngetsak ka hi puoh a, a thugen teu zieka kei ei hun gingcha dingte ding ale ngetsak ka hi kawm hi. 21 A bawn u a pumkhat a hih theihna dingun ka ngetsak ahi. He Pa, nang keimah a na um leh, kei nangmah a ka um mah bang hin, amau haw le eimah a a umna dingun. Pumkhat a hih u a, ti a chuh khawvel in kei nei sawl ngêi ahi tih a ginchak theihna dingun. 22 Nangin lopina kei nei piek kha a kawm u ah ka pie tai, nang leh kei pumkhat I hih guola, amau haw le pumkhat a hih theihna dingun: 23 Khawvel in, kei nei sawl a hii tih leh, kei nei lungsiet guolin amau haw na lungsiet hi tih a hetna ding u a, kei a mau a ka um a, nang keimah a na um a, pumkhat a hih bukim theihna dingun. 24 “Hepa! nangin kei nei piekte hi, ka umna a ka kawma um dingin ka deih hi; nangin nei piek, ka lopina khah a muhna dingun, lei kisiem masang apat in nei hehpih ta ngâl a. 25 Aw he Pa diktat! khawvel in vang a hun he puou a, ken vang ka hun hêi; te haw hin le, nangin kei nei sawl a hii tih a heu hi. 26 A kawm u ah na min ka hetsak ta a, hetsak kit zel ing ka, ti a chuh, nangin kei nei hehpihna kha amau ah a um a, keile amau a ka um theihna dingin,” a ti a.
Isu Matsak a a Umna
1 Chun, Isu’n zie thu haw chuh a gen zawhin, a sinsakte tawh a pawtdawk u a, Kidron lui a kân u a. Zie mun achun huon khat a um a, tak achun Isu leh a sinsakte chuh a lut u a. 2 Chun, a matsak ding pa Juda chun le zie mun chuh a he a; taka chuh Isu, a sinsakte kawma a va chieh zing sek ziekin. 3 Khutichun, Juda chun sepaih lawi tawh, thiempu liente leh, Pharisaite kawma um, mi mante tawh a pui a, thaumei le, meisel le, hiem lethal keng in tak achun a chieh tau a. 4 Isu’n, a chunga thil tung dingte cheng chuh a he vek a, masang lam zuonin a va chieh a, a kawm u ah, “Kuo a na hawl uh?” a ti a. 5 Amau chun a kawmah, “Nazareth Isu,” ti’n a dâwng u a.Isu’n a kawm u ah, “Keimah hi ka hi a puo,” a ti a. A matsakpa Juda chule a lak uh achun a ding a. 6 Chun, Isu’n, “Keimah hi ka hi a puo,” a tih phetin, a kinungchawn u a, tuol ah a puk u a. 7 Chun, Isu’n a kawm u ah, “Kuo a na hawl uh?” ti’n a dawng kit a. Amau chun a kawmah, “Nazareth Isu,” a tiu a. 8 Chun, Isu’n a kawm u ah, “Keimah hi ka hi, tih ka hun hilh ta kha,” a ti a. “Kei nei hawl uh a hih chun ziete haw hi chieh sak tadih un,” a ti a. 9 (“He Pa! nangin kei nei piekte kha khatchale ka mansak puoi,” ti a, a thugen te haw kha a guitun theihna dingin zie thu chuh a gen a hii.) 10 Chun, Simon Peter in chemzâm a vawp a, a zuk a, thiempu lienpen suok a sat a, a bil changlam a satthâk sak ta a. Zie suokpa min chuh Malkas ahi. 11 Ziephet chun, Isu’n Peter kawmah, “Chemzâm kha a pai ah thun ah; Pa’n khawn ei piek hi dâwn lo ding ka him?” a ti a.
Annas Masanga a Dinna
12 Khutichun, sepaih lawi tawh, a lawiupa lienteu tawh, Juda mi mante chu tawh, Isu a man u a, a kân u a, 13 Tichun, Annas kawmah a pui masau a. Amah chuh Kaiapha talpu ahi a, zie kum chun Kaiapha chuh Thiempu Lienpen ahi. 14 Mi chengcheng thih sik in mi khat thih a phazaw khawp puoi, ti a Judate thupie pa kha ahi.
Peter in Isu a Kilepsanna
15 Tichun, Simon Peter chun, sinsak dang khat tawh Isu a zui u a. Zie sinsak dang khat chuh, Thiempu lienpen melhet ahi a, tichun, thiempu Lienpen in umna huongsung a Isu kawm achun a va lut a, 16 Peter chuh, Pawlam a kawtkhak bul achun a ding a. Khutichun, sinsak dang, Thiempu lienpen melhet pa chuh a va pawtdawk a, kawtkhak ngaknu nungak chuh a hopih a, tichun, Peter chuh a sung ah a puilut ta a. 17 Kawtkhak ngaknu nungak chun Peter kawmah, “Nang le, zie pa sinsakte laka tel hilo na him?” a ti a. Peter chun, “Ka hi puoi,” ti’n a dâwng a. 18 A dap ziekin, suokhaw leh mimante chun meihawl in mei a tik u a, a kimvela chun din sân a kihailum u a. Peter le a kawm u achun a va chieh a, a lak u a chun dinsân a va kihai lum a.
Isu Thiempu lien Masang ah
19 Tichun, Thiempu Lienpen chun Isu chuh, a sinsakte chanchin leh, a sinsak dante a dawng a. 20 Isu’n a dâwng a, “Mitin kawmah, tângphuong takin thu ka gen sek; kikhawpna in leh Pathien Ho-In a, Judate chengcheng um khawmna munte achun thu ka gen sek hi. A gûkin thu bangmah ka gen kha puoi. 21 Bang zieka kei nei dawt ahim? A kawm u a ka thugen dân chuh, ka thugen ngaithate dawng ta! Ka thugen chuh a heu a puo!” a ti a. 22 Isu’n zie chuh a gen phetin, a kienga ding mimante khat chun a bêng a, “Thiempu lienpen tihin na dâwng ngam maw?” a ti a. 23 Isu’n a kawmah, “Thil diklo gen kha ka hih chun, zie tak a um chengcheng te kawma hin gen ah. Himahleh, thu pha ka gena le, bang dinga ei bêng na hi?” a ti a. 24 Chun, Annas chun, kansa’n Thiempu Lienpen Kaiapha kawm achun a sawl ta a.
Peter in Isu a Kilepsan kitna
25 Chun, Simon Peter chuh mei lum awi in a ding zing a. Tichun, mi dang khatin, “Nang le zie mipa sinsakte laka tel hilo na him?” a ti a. Amah chun, “Ka hi puoi,” ti’n a kilep a. 26 Chun, Peter in a bil a satthâk sakpa inkawte laka thiempu lien suok khat chun, “Nang hile, huon a khan a kawmah ka hun mu hilo ahim?” a ti a. 27 Zie chun, “Peter a kilep kit a,” tichun, âk a khuong ngâl ta a.
Isu Pilate Masang ah
28 Chun, zingkal matak in Isu chuh Kaiapha In apat chun, gamvaipuo pa In achun a pui u a. Juda lawiupa haw chuh vang leng in achun a lut puou hi, khutilochun, kisubuok un tin uh, Chiehkân Kut an ne theilo ding a hih ziekun. 29 Khutichun, Pilate chuh a kawm u ah a va pawt dawka, a kawm u ah, “Zie pa na heknau hi bang thu ahim?” a ti a. 30 Amau chun a kawmah, “Zie pa hi thil gilo hih hi kileh, na kawmah hun pui puo’ng kau,” ti’n a dâwng u a. 31 Ziephet chun, Pilate chun, “Nangun pui unla, na dân guol un a chungthu tan un,” a ti a. Amau chun a kawmah, “Kei u thu’n kuomah thah zieng chuh dân a hi puoi,” a tiu a. 32 (Isu’n a thih dân ding thu a gen banga kha a hung tunna dingin ziehaw huh hung um ahi.) 33 Tichun, Pilate chuh In sung ah a lut kit a, Isu a sama, a kawmah, “Judate leng na him?” ti’n a dawng a. 34 Isu’n a dâwng a, “Zie thu chuh nangmah lungthim apat a hung pawt dawka nei dawt ahim, a hihloh leh, ka chanchin mi dangin a hun hilh uh ahim?” ti’n a dawng a. 35 Pilate in, “Kei Juda mi hi dingin nei ngaihtuoh em? Nangmah mite ngêi leh, Thiempu Liente’n ka kawma a hun puih uh na hi hi; thil banga na hih?” ti’n a dâwng a. 36 Isu’n a kawmah, “Ka lalgam chuh zie khawvel hih a hi puoi; ka lalgam chuh zie khawvel hih a na hi leh, kei ei zuite chun, Juda thuneitu te kawma pieka ka um ding chuh a na do ta’n au. Himahlele, ka lalgam chuh zie khawvel a hih ahi puoi!” ti’n a dâwng a. 37 Chun, Pilate in a kawmah, “A leh, leng hilo na hi?” a ti a. Isu’n, “Hi e, leng ka hi a puo! Thutak hetsak hi ka pien lawh leh, khawvel a ka hung lawh ahi. Kuole, thutaka um ta poh in ka thu a pawm sek ui,” a ti a.
Isu Thi dinga Thutanna
38 Pilate in a kawmah, “Thutak chuh bang ahi?” a ti a. Zie thu chuh a gen zawh phetin Pilate chuh Judate kawma chun a va pawt kit a, a kawm u ah, “Mawhchansakna ding bangmah a gitlohna ka mu puoi. 39 Himahleh, dân khat na neih uh a um hi, Chiehkân Kut hun sunga suongkultâng khat ka hun thahdawk sak sek na hiu hi. Zieziekchun, Judate leng hi hun pawt sak leng na nuom um?” a ti a. 40 Amau haw chun kiko kawmin a dâwng u a, “Zie pa hi chuh hi kiheh! Barabbas khah hi zaw hen,” a tiu a. (Barabbas chuh suommang gucha ahi.)
1 Ziephet chun, Pilate in Isu chuh a pui a, a zêp ta a. 2 Sepaihte chun linglukhuk a phêk u a, a luchang ah a khuk sak u a; puon sandup le a silh sak u a, 3 tichun, a kawmah a hung u a, “Chibai, Judate leng!” ti’n a bêng u a. 4 Pilate chuh a pawt kit a, mipite kawm achun, “Entiem u, bangmah a gitlohna ka mu puoi tih na hetna dingun, na kawm u a ka hun puih dawk ahi!” a ti a. 5 Khutichun, Isu chuh linglukhuk leh puon sandup chuh silh kawmin a hung pawt a. Pilate chun a kawm u ah, “Entiem u, Mihiempa hi!” a ti a. 6 Chun, Thiempu liente leh mimante chun amah a muh phet un, a kiko u a, “Kross ah khêndên ah, kross ah khêndên ah!” a tiu a. Pilate in a kawm u ah, “Nangun pui unla, kross ah khêndên un, kei vangin bangmah a gitlohna ka mu puoi,” a ti a. 7 Judate chun a kawmah, “Ka dân uh lampi khat a um, zie dân guola chuh, Pathien Chapa a a kisiem ziekin a thih ding ahi,” a tiu a. 8 Pilate in zie thu chuh a zak phetin a lau zaw diek a, 9 In sung ah a lut kit a, Isu kawmah, “Khawia kipata hung na him?” ti’n a dawng a. Himahleh, Isu’n a dâwng puoi. 10 Chun, Pilate in a kawmah, “Nangin kei nei ho lo vang vei maw! Hun thahdawk thei ka hi a, kross a hun khêndên thei le ka hi tih na he puo maw?” a ti a. 11 Isu’n a, dâwng a, “Pathien apat a thuneihna piek na hih loh chun, ka chungah hih theih himhim nei puo’n la, zieziekchun, na khuta ei piepa khan gitloh a puo zaw diek hi,” a ti a. 12 Zie a kipat chun, Isu a pawt sak theih dân ding lampi a hawl ta a. Himahleh, Judate chuh a kiko u a, “Zie pa hi na thahdawk chun, Kaisar guolpa hi puo’n la! Kuole, lenga kisiem ta chuh Kaisar do ahiu hi!” a tiu a. 13 Pilate in zie thu haw chuh a zak phetin, Isu a puidawk a, a min suong kilem, (Hebrai pau in Gabbatha a tiu a) zie mun achun, vaihawmna chutphah ah a chu a. 14 Zie ni chuh Chiehkân Kut kiginni ahi a, nisa a sun vang vang ta a. Pilate chun Judate kawmah, “Entiem u, na leng u hi!” a ti a. 15 Amau haw chuh a kiko u a, “Sumangthai ah, sumangthai ah; kross ah khêndên ah!” a tiu a. Pilate in a kawm u ah, “Na leng u hi kross a ka khetdên ding maw?” a ti a. Thiempu Liente’n, “Kaisar tih loh leng dang ka nei puou,” ti’n a dâwng u a. 16 Ziephet chun, Pilate chun, Isu chuh kross a khetdên dingin a kawm u ah a pie dawk ta a.
Isu Khetdênna
Tichun, Isu chuh a pui tau a. 17 Amah chun a kross chuh kiput in, “Luguh mun,” a tih uh, (Hebrai pau a Golgotha) kiti mun tieng chun a chieh ta a. 18 Taka chun, kross ah a khêndên u a, mi dang nih tawh, a sik tuok ah khat gel in, a lai ah Isu. 19 Pilate in lehkha a zik a, kross chunga chun a tâk a, “NAZARETH ISU JUDATE LENG,” ti a zik ahi. 20 Zie lehkha chuh Judate, a bang tamtakin a sim u a, Isu kross a a khetdên na mun u chuh khawpi apat a gamla lo cha a hih ziekin. Zie lehkha chuh Hebrai pau, Latin pau leh Grik pau te a kizik ahi. 21 Thiempu liente chun Pilate kawmah, “‘Judate Leng,’ ti’n zik kih; ‘Judate Leng ka hi a tii,’ ti’n zik zawh,” a tiu a. 22 Pilate in, “Ka zik khah ka zik zo tai,” ti’n a dâwng a. 23 Chun, sepaihte’n Isu a khetdên zawh u chun, a silhlechen haw chuh a lau a, phel li a suoh u a, sepaihte’n phel khat chietin a chang u a. A puonâk le a lau a; zie chuh khuih loh puonâk a hi a, a ngâwng apat a puma gat vek ahi. 24 Tichun, sepaihte chun, “Bawtthek puoi tiu, a chang ding pên hetna dingin phunsân zawi tiu,” a kitiu a. (Zie chuh, Pathien Lehkha thu: “Ka silhlechen haw a kihawm u a, Ka puonâk dingin phun a san u a,” tih thu a tunkimna dingin um ahi.) Zie thil haw chuh sepaihte chun a hih u a. 25 Isu kross kieng achun, a nu leh a suohpihnu, Mari, Klopas zi leh Mari Magdalin te a ding u a. 26 Isu’n a nu leh, sinsak a hehpih kha a kienga ding a mu a, a nu kawmah, “Numei, entie, na chapa khah!” a ti a. 27 Chun, sinsak kawm achun, “Entie, na nu khah!” a ti a. Tichun, zie a kipat chun, sinsakpa chun amah In a cheng dingin a pui ta a.
Isu Thihna chuh
28 Zie nung chun, Isu’n bangakai tu’n a kim tai tih a he a, chun, Pathien Lehkha Thu khah a tunkimna’n, “Ka dang a châk hi,” a ti a. 29 Zie tak achun bel khat uain thuk a dim a um a, zie chun spanj khat chuh uain lak achun a dieh u a; husop tieng ah a tâk u a, a mûk a vak nuh u a. 30 Chun, Isu’n uain thuk a na dâwn zawh chun, “Zawh ahi tai,” a ti a. Chun a lu a khun a, a thagau a thah ta a.
Isu Nak a Thisan leh Tui
31 Chun, Kiginni a hih ziekin, luong chuh Chawlhni a kross lêk a a um den lohna dingin, Judate’n Pilate kawmah a kênghaw sukbawt a, luong chuh kross lêk apat a latha dingin a ngên u a. Chawlhni hung tung ding chuh ni pawimawh diek a hih ziekin. 32 Tichun, sepaihte chuh a chieh u a, Isu tawh khetdên a um khatna pa leh a dang khat chuh a kenghawu a subawng u a, 33 Himahleh, Isu kawm a tun phet un, a thisa ahi tai tih a heu a, a kênghaw chuh a sukbawt sak puou hi. 34 Himahlele, sepaihte laka khat chun, a tiengcha chun Isu nak lak a sun a, tichun, thisan leh tui a pawt pai zieng a. 35 Zie thil mu pa chun a gen tai; nangun le na ginchak theihna dingun. A thugen chuh a dik a, chuleh, thudik a gen hi tih le a kihei. 36 Pathien Lehkha Thu a: “A guh khat chale sukbawt hi puo’n a,” tih tunna dingin zie thil haw chuh hung um ahi. 37 Chun, Pathien Lehkha Thu dang khat: “A sutpau chuh hun en un au,” tih le a um hi.
Isu Vuihna
38 Zie thil haw nung chun, Joseph, Arimathai khuo a um chun, Isu luong chuh la dingin Pilate kawmah a ngên a. (Joseph chuh Isu nungzuite laka tel ahi a, himahleh, Judate a lauh zieka, a gûka na um ahi.) Pilate in a phalsak a, tichun, a chieh a, Isu luong chuh a la ta a. 39 Chun, Nikodem, a tunga zan a Isu kawma hung pa chun, thil gimlim, murra leh aloe kihel, buk sawmnga vel chawiin Joseph kawmah a hung a. 40 Isu luong chuh a lau a, Judate kivuih dân guolin, thil gimlimhaw chu tawh, patngatpuon in a tuom u a. 41 Chun, Isu kross a a khetdênna mun u achun huon khat a um a, huon achun, kuomah na kisiel khâk loh na thân thak khat a um a. 42 Judate Kiginni a hih tawh, thân chuh a kawm chaua um mah a hih ziekin, tak achun Isu luong chuh a siel tau hi.
Isu Thawhkitna
1 Chun, ni sagih ni masapen ah, zingpi’n khuo a thim nalai a, Mari Magdalin chuh thân achun a va chieh a, tichun, thân kawta suong chuh lak chawnin a um tai tih a mu ta a. 2 Khutichun, a tai a, Simon Peter leh, sinsak dang Isu’n a hehpih kawm achun a hung a, a kawm u ah, “Thân apat khah Lalpa chuh a chiehmangpih tau a, a kawihna chin uh ka he ta puou hi,” a ti a. 3 Tichun, Peter leh sinsak dang chuh thân lam achun a chieh tau a. 4 Chun, kiguol takin a tai u a, himahleh, sinsak dang chun Peter a taih khelh a, thân chuh a tung masa ta a. 5 Tichun, a khun suka, patngat puonhaw chuh um zingin a mu a; himahlele, a sung ah a lut puoi. 6 Chun, Simon Peter inle a nung ah a hun delh tung a, thân sung ah a lut a; 7 Patngatpuon haw chuh um zing leh, a luchang lama kithiekna puon um chuh, patngat puonhaw laka um lo a, ziel sa a mun chuom a na um chuh a mu ta a. 8 Ziephet chun, sinsak dang thân tung masa chule a lut a, a mu a, a gingcha ta a. 9 Thâna kipat tho kit tei ding a hi tih, Pathien Lehkha Thu kha, a he thiem nai diek puou hi. 10 Khutichun, sinsakte chuh In lam ah a chieh kit tau hi.
Mari Magdalin kawma Kilâkna
11 Himahlele, Mari chuh kap kawm in thân pawlam achun a ding zing a; a kah kawm chun a khun a, thân sung lam a et lai chun, 12 Lalpa vânsâwlchâk nih, puon vam silh in, Isu luong kisielna mun achun, khat a lu lam ah, khat a keng lama chu a mu a. 13 Amau chun a kawmah, “Numei, bang dinga kap na hi?” a tiu a. Amah chun a kawm u ah, “Ka Lalpa a chiehmangpih u a, a kawihna chin uh ka het loh ziekin,” a ti a. 14 Chun, khutia a gen lai chun, nung lam a vak ngat leh, Isu ding a mu a, himahleh, Isu ahi tih a he puoi. 15 Isu chun a kawmah, “Numei, bang dinga kap na hi? Kuo a na hawl?” a ti a. Amah chun huon ngakpa kha a sa a, a kawmah, “Hepu, amah taka pat hi na lak chawn a hih chun, na kawihna ei hilh in, tichun, chieh ka ting, la’ng ka,” a ti a. 16 Isu’n a kawmah, “Mari!” a ti a. Amah chuh a kihei a, a kawmah Hebrai pau in, “Rabboni,” a ti a; (zie chuh “Sinsakpa,” tihna ahi.) 17 Isu’n a kawmah, “Ei tu kih, tu tieng hin le ka Pa kawma kal to nailo ka hi. Himahlele, ka suohpihte kawmah va chieh inla, a kawm u ah, ‘Ka Pa, na Pau, ka Pathien leh na Pathien uh kawma kal to ding ka hi,’ a tii, va tih,” a ti a. 18 Khutichun, Mari Magdalin chuh a va chieh a, sinsakte kawma chun, “Lalpa chuh ka mu tai,” ti’n, a kawma thu a gen danhaw chule a hilh ta a.
Sinsakte kawma a Kilâkna
19 Chun, zie ni, ni sagih ni masapen a nitâk lam a hung hih phet chun, Sinsakte chuh Judate a lauh ziekun, kawt kisungkam khum in a um khawm u a. Zie chun Isu a hung a, a laku ah a hung ding ta a, a kawm u ah, “Na chungu ah lungmuonna um hen,” a ti a. 20 Zie chuh a gen zawhin, a khut leh a nak a kawm u ah a etsak a. Sinsakte chun Lalpa a muh phet u chun kipakna’n a dim tau a. 21 Isu’n a kawm u ah, “Na chungu ah lungmuonna um hen. Pa’n ei sawl guolin ka sawl na hiu hi,” a ti kit a. 22 Zie thu haw chuh a gen zawhin, a chungu ah a hatkhum a, a kawm u ah, “Thagau Thiengtho nei un. 23 Kuo gitloh hita leh, na ngaihdam u chuh, ngaihdam hiu un tin; kuo gitloh hita leh, na ngaihdam loh u chuh, ngaihdam loh hi’nau,” a ti a.
Isu leh Thoma
24 Chun, Isu a hung lai khan, sawm le nih te laka tel, Thoma, Didumas a tih u chuh, a kawm u ah a um puoh a. 25 Khutichun, sinsak dangte chun a kawmah, “Lalpa chuh ka mu tau!” a tiu a. Himahlele, amah chun a kawm u ah, “A khuta thik kikhetna pawn haw ka muh a, thik kikhetna ma haw a chuh ka khutzung ka thun lut a, a nak ka mai zet loh chun, gingcha puo’ng ka,” a ti a. 26 Chun, ni giet nung in, Sinsakte chuh In sung ah a umkhawm kit u a, Thoma le a laku ah a um ta a. Kawthaw chuh khaksa ahi a, himahleh, Isu a hung a, a laku ah a hung ding a, a kawm u ah, “Na chungu ah lungmuonna um hen,” a ti a. 27 Chun, Thoma kawma chun, “Na khutzung in vak khawih in la, ka khuthaw hi en ah; na khut hun thadawk inla, ka nak lak mai ah; taksang lo in um ki’n la, gingcha mai ah!” a ti a. 28 Thoma’n a kawmah, “Ka Lalpa leh ka Pathien na hi,” ti’n a dâwng a. 29 Isu’n a kawmah, “Nang chun chuh nei muh ziekin na ginchak ahi, mu lo a gingcha te chuh, mi hampha ahiu ui,” a ti a.
Chanchin Pha Thiltup pên
30 Isu’n a Sinsakte ma achun thilmak dang tamtak a hih a, ziehaw chuh zie lehkhabu a hin zik ahi puoi. 31 Himahlele, ziehaw hi, Isu chuh Krista, Pathien Chapa a hii tih na ginchakna dingu leh, na ginchak u a, a min a hinna na neih na dinguh a zik ahi.
A Nungzuite Kawma Kilâkna
1 Zie nung chun Isu, Tiberia Dil ah, a Sinsakte kawmah a kilak kit a. 2 Zie tak achun, Simon Peter te, Thoma Didumas a tih teu, (Galili gama Kana khuo a um) Nathanael te, Zebedai chapa nih te leh Isu sinsakte dang nih tawh a um u a. 3 Simon Peter chun a kawm u ah, “Nga mana chieh ding ka hi,” a ti a. Sinsak dangte chun a kawmah, “Kei u le na kawmah hung ung kau,” a tiu a. Tichun, a chiehdawk u a, kuong ah a chuu a, himahleh, zie zan chun bangmah a man puou hi. 4 Chun, thingzang vakin Isu chuh sehpho ah a ding a, himahlele, sinsakte chun Isu ahi tih a he puou hi. 5 Chun, Isu’n a kawm u ah, “Naute haw, bangmah man lo na hiu hi?” a ti a. Amau chun a kawmah, “Bangmah cha ka man puou!” a tiu a. 6 Amah chun a kawm u ah, “Kuong sik changlam panga khan lên sep leu chin, nga man un lau,” a ti a. Tichun a sep u a, nga a mat tam ziekun a luoi dawk zo ta puou hi. 7 Ziephet chun, sinsak Isu’n a hehpih khan Peter kawmah, “Lalpa a hi khu!” a ti a. Khutichun, Simon Peter in Lalpa ahii tih a het phetin, a puonâk a cheng a, (sangawn a um ahi ngâl a), dîl ah a chawm tha ta a. 8 Sinsak dangte chun vang, kuong neu a len a nga puma kai kawmin a hun zuon u a, (sehpho apat a gamla ngâl puou a, tawng zanih ahim phet ahi.) 9 Chun, sehpho a kaih dawk phet un, tak achun meihawl a mei kitik, a chunga nga leh chângthâk pêk kiha chuh a muu a. 10 Isu’n a kawm u ah, “Tu’n na nga mat u khah, khenkhat hun chawi un,” a ti a. 11 Khutichun, Simon Peter a va chieh a, lên chuh nga lien tak taka dim in sehpho ah a kaidawk a, za leh sawmnga le thum ahi; khuti zozai chuh um mahleh, lên chuh a ek sam puoi. 12 Chun, Isu’n a kawm u ah, “Hung un la, zing an neu in,” a ti a. Sinsakte laka khat cha’n le, “Kuo na hi?” ti’n a dawng ngam puou hi, Lalpa a hi tih a het ziekun. 13 Khutichun, Isu chuh a hung a, chângthâk pêk chuh a la a, a kawm u ah a pie a, ngahaw chule khutibang mah chun a pie a. 14 Zie chuh, Isu mithi lak apat a thawh kit nunga, a sinsakte kawma a kilak a thum vei na ahi.
Isu leh Simon Peter Kihona
15 Chun, zing an a nek zawh un, Isu’n Simon Peter kawmah, “Simon, Johan chapa, ziehaw sang hin nangin kei nei hehpih em?” a ti a. Amah chun a kawmah, “Hi, Lalpa ka hun hehpih hi tih na hêi,” a ti a. Isu’n a kawmah, “Ka belamno te vak ah,” a ti a. 16 Chun, a nih veina ah. a kawmah, “Simon, Johan chapa, nangin kei nei hehpih em?” a ti kit a. Amah chun a kawmah, “Hi, Lalpa, ka hun hehpih hi tih na hêi,” a ti a. Isu’n a kawmah, “Ka belamte enkawl ah,” a ti a. 17 Chun, a thumveina chun Isu’n, “Simon, Johan chapa, nangin kei nei hehpih em?” ti’n a dawng kit a. Isu’n a thumveina a “Nangin kei nei hehpih em?” a kawma a tih ziek chun Peter chuh a lungkham a, a kawmah, “Lalpa, bangakai na he a, ka hun hehpih hi tih na hêi!” a ti a. Isu’n a kawmah, “Ka belamte enkawl ah. 18 Tihtakzet, tihtakzet a ka hilh na hii, na chapan lai khan na tai ah na kigak a, na utna chengah na chieh sek a; himahlele, na upat tieng leh, na khuthaw zak in na tin, mi dangin hun gâk sak intin, na ut lohna lam ah hun kai un au,” a ti a. 19 (Zie thu haw chuh Peter a thih a, Pathien a suklopi dân ding genna’n a tii.) Chun, zie chuh a gen zawhin, “Nei zui ah!” a ti a.
Isu leh Sinsak Dangte
20 Chun, Peter chuh a kihei a, Isu’n a sinsak a hehpih, nitâk an nek laia Isu âng zawna hung daphei pa, “A matsak ding pa chuh kuo pên ahim?” tipa khan a hun zuih a mu a. 21 Peter in amah chuh a muh phetin Isu kawmah, “Lalpa, zie pa hin bang a hih die?” a ti a. 22 Isu’n a dâwng a, “Ka hung masang sieh hing zing heh ti leng le, zie chuh nangin banga na mat ding ahi? Nangin nei zui ah!” a ti a. 23 Khutichun, zie sinsak chuh, Isu nungzuite lak achun thi lo dingin a kithang ta a. Himahleh, Isu’n thi puo’n a tin a kawm u ah a gen puoh a; “Ka hung masang sieh hing zing heh ti leng le, zie chuh banga na mat ding ahim?” tii zaw ngâl a. 24 Zie sinsakpa chuh, zie thu haw hetsakpa leh zikpa hi ahi; a thu hetsak hi a dik hi tih I heu ui. 25 Chun, ziehaw lo hile, Isu thilhih tamtak a um nalai a, ziehaw chuh zik kim vek ding hi leh, lehkhabu zik ding cheng chuh, khawvel hin le dawl dingin ka gingcha puoi.