Matthai Zik

1

Isu Krista Khanggui

1 Isu Krista hun suontute Abraham leh David suonte khanggui kizawt zie chuh: 2 Abraham in Isak a hing a, Isak in Jakob a hing a; Jakob in Juda leh a suohpihte a hing a. 3 Juda’n Tamar tawh Perez leh Jera a hing a; Perez chun Erom a hing a, Erom in Aram a hing a. 4 Aramin Aminadab a hing a; Aminadab in Nahson a hing a, Nahson in Salmon a hing a. 5 Salmon in Rahab tawh Boaz a hing a, Boaz in Ruth tawh Obed a hing a, Obed in Jessai a hing a. 6 Jessai in leng David a hing a; chuleh, David in Uria zi apat in Solomon a hing a. 7 Solomon in Rehoboam a hing a; Rehoboam in Abijah a hing a; Abijah chun Asa a hing a. 8 Asa’n Jehoshaphat a hing a; Jehoshaphat in Joram a hing a; Joram in Uzia a hing a. 9 Uzia’n Jotham a hing a; Jotham in Ahaz a hing a; Ahaz in Hezekia a hing a. 10 Hezekia’n Manasi a hing a; Manasi’n Amon a hing a; Amon in Josia a hing a. 11 Babulon lama sala puih a a um lai vel u khan Josia’n Jekonia leh a suohpihte a hing a. 12 Babulon sala puih a a um nung un Jekonia’n Salathiel a hing a; Salathiel in Jerubabel a hing a. 13 Jerubabel in Abiud a hing a; Abiud in Eliakim a hing a; Eliakim in Azor a hing a. 14 Azor in Sadok a hing a; Sadok in Akim a hing a, Akim in Eliud a hing a; Eliud in Eleazar a hing a. 15 Eleazar in Matthan a hing a; Matthan in Jakob a hing a, Jakob in Joseph, Mari pasal chuh a hing a. 16 Zie Mari sunga hin Isu Krista kiti hi a hung pieng tai. 17 Khutichun khang chengcheng chuh Abraham apat in David tieng in khang sawm leh khang li ahi a; David apat in Babulon lama sala puih a hih tiengun khang sawm leh khang li mah ahi a, Babulon lama sala puih a hih uh apat Krista tiengin khang sawm leh khang li mah a hi kit hi.

Isu Krista Pienna

18 Isu Krista hung pien zie chuh hiti hi ahi: A nu Mari chuh Joseph tawh kihuol ahiu a, himahlele a kichên mau in Thagau thiengtho in a gaihsak hi tih het a hung hi ta a. 19 Tichun a pasal Joseph chuh mi diktat ahi a; tângpi heta sukmuolpho a nuom puoh a, a gûka haihsan a guo ta a. 20 Himahlele zie thu haw chuh a ngaihtuoh lai in ngaitie, a mang in Lalpa Vânsâwlchâk a kawmah a hung kilak a, a kawmah, “Joseph, nang David chapa, na zi Mari chuh kichênpih lau kih, a nauvawp chuh Thagau thiengtho apat ahi. 21 Chapa hun hing in tin, a min dingin ISU sa’n la: amah chun a mite a thil hihkhelh nau apat hukdam ding ahi ngâl a,” a ti a. 22 Ziehaw chengcheng hi Lalpa’n a thiemgau manga a gen kha a hung guitun theihna dinga um ahi. 23 “Ngaitie, nungak thiengtho chuh gai intin, chapa hing intin, a min dingin Immanuel sa’n au,” ti a a gen kha. (Zie chuh “I kawmah Pathien a um” tihna ahi.) 24 Tichun, Joseph ipmu lai chuh a tho a, Lalpa Vânsâwlchâk in a kawma thu a piek guol chun a hih a, a zi chuh a kichênpih ta a. 25 Himahleh, chapa a hin ma cheng chuh a kuolpih puoi; tichun Joseph chun a min dingin ISU a sa ta a.

2

Miching te Vehna

1 Chun, leng Herod a lal laia, Juda gama Bethlehem khuo a Isu a hung pien in, ngaitie, suohlam apat in miching te Jerusalem khuo ah a hung u a, 2 “Khawi ah ahim Judate leng hung pieng chuh? Suohlam ah A aksi ka muu a, amah chibai dinga hung ka hiu hi,” a tiu a. 3 Leng Herod in zie chuh a zak phetin a lungzîng ta a, Jerusalem a mi chengcheng inle a lungzîn pih tau a. 4 Tichun, thiempu liente leh dân thuzikte chengcheng chuh a sam khawm a, Krista pienna ding thu chuh a dawng a. 5 Amau haw chun a kawmah, “Judai gama Bethlehem khuo ah, Thiemgau chun hiti hin a zik kha: 6 ‘Nang, Bethlehem, Judai gama um, Juda khawpi laka hin na neupen hiel puoi! Nang apat in vaipuo khat hung pawt ding ahi ngâl a; Ka mi Israel te ching ding pa chuh,’ tih hi” a tiu a. 7 Zie nung chun Herod in miching te chuh a gûkin a sama, chil takin aksi dawk lai chuh a dawng dawk a. 8 Amau haw chuh Bethlehem khuo a chun a sawl a, “Chieh un la, nausen thu chuh chil takin dawng dawk un la ken le amah chuh ka hung chibai theihna dingin na muh tieng u leh ei hung hilh kit un,” a ti a. 9 Tichun, leng thu chuh za’n a chieh tau a; chun, ngaitie, suohlam ah aksi a muh u kha nausen umna chung zawn a tun a a din masang sieh chuh a mau ah a chieh zel a. 10 Tichun, aksi chuh a muh un a kipâk mah mah tau a. 11 Chun, In sung ah a va lut u a, a nu Mari kawma nausen chuh a muu, a bawkkhup u a, a chibai tau a. Tichun, a go bawmteu a hawng u a, a kawm achun kipahna sanate, begaw leh Murra te a pieu a. 12 Herod kawma kîkkit lo dinga a mang u a hilha a um ziekun, lam chuom ah, amau haw khuo lam ah a chieh tau a.

Aigupta Gama Taihmang na

13 Chun, a chieh nung un ngaitie, Lalpa Vânsâwlchâk khat Joseph kawmah a mang in a hung kilak a, “Tho in la, nausen leh a nu pui in la, Aigupta gam ah taimang ah, ka hun hilh kit masang chuh taka chun um zing ah; Herod in nausen sukmangthai dinga hawl ding ahi,” a ti a. 14 Tichun, a tho a, a zan a zan in nausen leh a nu chuh a pui a, Aigupta gam ah a chieh ta a; tichun Herod thih masang cheng chuh taka chun a um zing ta a. 15 Lalpa’n thiemgau kama, “Ka chapa chuh Aigupta gam apat ka sam dawk a,” ti a a gen kha a hung guitun theih na’n.

Herod in Nausen a Thahna

16 Zielai chun Herod in mipilte dawha bawla um ahih a kihetdawk phet chun a lungna mah mah a, mi a sawl a, mipilte hun a dawt dawk khan a huop ngêi dingin Bethlehem leh a kimvela um naupang chengcheng, kum nih a thâk nuoi lam cheng chuh a that vek ta a. 17 Tichun, thiemgau Jeremia’n a na genlawk cheng chuh a hung guitung tai: 18 “Ramah khuo ah thawm a zau a, mithi ngaia mau vungvung gitte, Rachel in a chate a kah a, a um tâk loh ziekun a thepbih theih puoi,” tih hi.

Aigupta apat a Vaihkitna

19 Himahlele Herod a thih phetin, ngaitie, Lalpa Vânsâwlchâk Aigupta gama chun Joseph kawmah a mang in a kilak a; 20 “Tho in la, nausen leh a nu pui in la, Israel gam ah chieh in; nausen thah guote kha a thi ta ngâl u a,” a ti a. 21 Tichun a tho a, nausen leh a nu chuh a pui a, Israel gam ah a lut ta a. 22 Himahlele Arkelaus chuh a pa Herod thasang in Judia gam ah vaihawm in a pang hi tih a het in, zie taka chieh chuh a lau a; a mang lama hilha a um ziekin Galili lam ah a chieh zaw ta a. 23 Tichun, a chieh a, Nazareth kiti khuo khata chun a cheng ta a; amah chuh “Nazareth mi” tih hi’n a ti a thiemgaute gen kha a hung guitun theihna dingin.

3

Baptist Johan Thugenna

1 Zielai chun Baptist Johan chuh Judia gamthip ah thugen in a hung a, 2 “Lunghei un, vangam chuh a nai tai,” tin. 3 Amah chuh ahi, thiemgau Isai-in, “Gamthip a mi kiko khat chun, ‘Lalpa lamlien lai unla, A lampi hêi zang un,’ a tii,” ti a a gen kha. 4 Zie Johan chun sangawngsau mul puon a silh a, a kâwng savun kâwnggak in a gâk a, a an chuh khaupepi leh gam khuoizu ahi. 5 Zielai chun Jerusalem khuo a mihaw, Juda gama mi chengcheng leh Jordan luidung vela mi chengcheng chuh a kawmah a hung u a. 6 A gitlohnateu kiphuong in Jordan luia chun a khut ah baptistma a chang tau a. 7 Himahlele, Pharisaite leh Sadukaite tamtak baptistma chang dinga hung a muh phetin a kawm u ah, “Gûl suonte haw! lungnat hung tung ding hi taihsan dingin kuo hun hilh na hiu hi 8 Na gitlohnateu na haihsan ui tih het theihna ding thilte chuh hih un. 9 Abraham ei suonpau ahi tin kisuong kiu in; Pathien in zie suonghaw hile Abraham suon a suoh sak thei hi tih ka hun hilh na hiu hi. 10 Tu zieng hin le heicha thing bul tin ah a kawih tau hi; khutichun thing tin, gah pha suoh lo cheng chuh phuk in, mei ah a paih sek ui. 11 Ken chuh na lunghei ui tih suklatna’n tui in ka hun baptist sek a, ka nunga hung ding pa hin chuh Thagau thiengtho leh mei in hun baptist ding ahi. Kei sangin a lopi zaw a, a kengtawbek khau phel hâwi le ka hi puoi. 12 A khut in a leipuk a chawi a, a phuol zap thieng kei intin, buhpanga chun a buh khum in tin, a si vang chuh mei mittheilo in hâl tum ina,” a ti a.

Isu Baptistma Channa

13 Zielai chun Isu chuh Johan kawmah baptistma chang dingin Galili gam apat in Jordan lui ah a hung a. 14 Johan chun lah, “Nangin nei baptist ka kûl zaw ngâl a, kei kawma hung zaw na hi maw?” tin dal a guo a. 15 Himahleh Isu’n a kawmah, “Tu’n lemsa hâm ah, zie tawbang diktatna chengcheng hih muolsuoh hi ei u dingin thil kilawm ahi ngâl a,” ti’n a dâwng a. Khutichun lem a sa ta a. 16 Tichun, Isu chuh baptistma a chan zawh zawh chun tui apat in a pawtdawk zieng a, chun, ngaitie, amah dingin van a hung kihawng a, Pathien Thagau chuh vakhu banga hung kum in a chunga hung chuh a mu a. 17 Chun, ngaitie, van apat a aw khatin, “Ziehi ka chapa deihtak, ka lungkimna mah mah chuh ahi,” a ti a.

4

Isu Thepa a Umna

1 Zie zawh chun Isu chuh Diabol thepa um dingin gamthip ah thagau puih lut in a um ta a. 2 Tichun, ni sawmli leh zan sawmli an a ngawlh nung chun a gil a hung kiel ta a. 3 Chun, thempa chuh a hung a, a kawmah, “Pathien Chapa na hih leh zie suonghaw hi chângthâk suok dingin thu pie’n,” a ti a. 4 Himahlele Isu’n a dâwng a, “Mihiem hi chângthâk mai in hing puou untin, Pathien kama thu pawt in hing zaw’n au, tih zik ahi,” ti’n a dâwng a. 5 Zie zawh chun Diabol in khawpi thiengtho Jerusalem a chun a pui a, Pathien Ho-In sipzum ah a kawih a, a kawmah, 6 “Pathien chapa na hih leh ketha’n, ‘Na chungthu ah a vânsâwlchâkte thu pie’n tin; A khut un hun dawm un tin, Khutilochun na keng in suong suih kha kha’n la’ tih zik ahi ngâl a” a ti a. 7 Isu’n a kawmah, “Lalpa na Pathien zedap kih, tih zik ahi,” a ti a. 8 Chun, Diabol chun tâng sang tak ah a puikit a, khawvel gam chengcheng leh a lopina haw chuh a etsak a. 9 A kawmah, “Khupbawk in ei chibai in la, ziehaw chengcheng hi hun pie vek ing ka,” a ti a. 10 Ziephet chun Isu’n a kawmah, “Setan, chiehmang kêi ah! ‘Lalpa na Pathien ho inla, amah na chauh sem in’ tih zik ahi ngâl a,” a ti a. 11 Zie nung chun Diabol in a taihsan ta a; tichun Vânsâwlchâkte a hung u a, a na a hung sep sak tau a.

Galili Gama A Nasep Patna

12 Chun, Johan suongkul a khum ahi tih Isu’n a zak phetin Galili lam ah a chieh ta a. 13 Nazareth khuo nusieh in Kapernaum khuo a hung tunga, zie tak achun a um zing ta a; zie chuh Zebulun leh Naphtali huop sung dîl panga um ahi. 14 Zie chuh thiemgau Isai in a gen, 15 “Dîl lama Jordan gâl a, Zebulun gam leh Naphtali gam; Galili a Jentel te gam; 16 Thim nuoia chute chun vak lopitak a muu a; Thihna mun leh a lîma chute chunga chun vak a hung pawt tai!” ti a a gen kha a hung tun theihna dingin ahi. 17 Zie apat chun Isu’n, “Lunghei un, vangam a nai ta ngâl a,” tin a gen pan ta a.

Isu’n Ngaman mi Li a Sapna

18 Chun, Isu chuh Galili dîl panga a chieh lai in, unau nih, Simon, (Peter kiti) chuh a suohpihpa Andrew tawh dila lên sep a mu a nga man mi a, hi him u a. 19 Isu’n a kawm u ah, “Ei zui un, tichun mihiem man dingin hun siem ing ka,” a ti a. 20 Tichun a lên hawu nusieh in, amah a zui pai zieng tau a. 21Chun, zie apat chun a chieh zel a, unau dang nih, Zebedai chapa Jakob leh a suohpih Johan chuh, a pau Zebedai kawmah kuong a a lên hawu bawlpha’n a mu a, amau chuh a sam ta a. 22 Tichun, kuong leh a pau chuh taihsan in amah chuh a zui pai zieng tau a.

Isu Sinsakna leh Sukdamna

23 Chun, Isu’n a kikhawpna In hawu a sinsak in, Gam chanchin pha chuh gen in, mite laka natna tin chenga na leh hatlohna tin cheng hihdam in, Galili gam chengcheng ah a vak viel a. 24 Tichun, Suria gam chengcheng ah a chanchin a thang ta a; tichun mi damlo chengcheng, damlohna leh natna tin cheng thuokte, thitha mat haw, phungzawl vei haw, zeng haw a kawmah a hun pui u a, a na hihdam a. 25 Khutichun, Galili gam apatte, Dekapoli khuo apatte, Jerusalem khuo apatte, Judia gam apatte, Jordan gâl apatte chun mipi nasatak in amah a zui u a.

5

Tang chunga Thugen

1 Tichun, mipite chuh a muh phetin tângah a chieh to a, chun, a chu a. A sinsakte a kawmah a hung u a;

Hamphatna

2 Tichun, a sinsak pan ta a: 3 “Thagau lama tasam kisate chuh a hamphau hi; van gam amau a ahi ngâl a. 4 “Pûlthuokte chuh a hamphau hi; lungmuon a hung um ding ahi ngâl u a. 5 “Nuoilutchuhte chuh a hamphau hi; lei hun luoh ding ahi ngâl u a. 6 “A diktatna ziek a gilkiel a dangchâkte chuh a hamphau hi; hung tai ding ahi ngâl un. 7 “Mi lungsiet thei takte chuh a hamphau ui; lungsietna hun lawh ding ahi ngâl u a. 8 “Lunggil a thiengthote chuh a hamphau ui; Pathien hun mu ding ahi ngâl un. 9 “Chamna siemte chuh a hamphau ui; Pathien cha a vawh a hung um ding ahi ngâl u a. 10 “Diktatna zieka sukgimtheih thuok sate chuh a hamphau ui; vangam a mau a a hi ngâl a. 11 “Mi’n kei zieka a hun gaih u a, a hun bawl gimtheih u a, lepchieh a gitlohna tin chenga a hun hêk tieng u leh hung hampha’n lau. 12 Kipak unla nasatak in lawp un, van ah na kipahman uh a um tam ngâl a; khutibangmah chun na mau a thiemgau umte khale a na bawl gimthei sek uh ahi kha.

Chi leh Vak a Tehkalna

13 “Lei chi na hiu hi; himahlele chi hi tam ta leh, bang in a hih al kit ta die? Zie a kipat chun paih dawk a, mihiemte tawhphah maimai ding ngâllo chun bangmah in a mat theih puoi. 14 “Khawvel vak na hiu hi. Tang chunga khuo um chuh selguk theih ahi puoi. 15 Mi’n thaumei de’n dan nuoi ah a kawih ngei puou a, thaumei kawihna ah a kawih zaw sek ui; tichun, In sunga um chengcheng chuh a salhvak sek hi. 16 Zie tawbang chun na vak u chuh mi mitmuh in vak hen; khutichun, na nasep phat teu chuh muu untin, na Pau van a um chuh pakcha thei un au.

Dan Thua Sinsakna

17 “Dan thu ahim, thiemgaute thu ahim sumangthai dinga hung ka hih gingcha kiu; sumangthai dinga hung ka hi puoh a, subukim dinga hung ka hi zawi. 18 Tihtakzet a ka hilh na hiu hi, lei leh van a beihmang masang sieh, dân thu a sutvawm neucha ahim, thaihvawm neucha ahim hi a bawna a tunkim masang sieh khatcha hile beimang hiel puo’n a. 19 Zieziekchun kuole zie thupiek neupen te laka khat mai le bawhsie a, zie banga chuh hih dinga mi sinsak ta chuh, van gam achun mi neupen te hi’n a; amahvang chuh kuole zawpa, zie banga mi sinsak ta chuh van gam ah milien tih hi’n a. 20 Na diktatnau in Danthuzikte leh Pharisaite diktatna a khel loh chun van gam ah lut hiel puo’n lau, tih ka hilh na hiu hi.

Lungnatna Thua Sinsakna

21 “Malaia mite kawm, achun, ‘Tuol na thah ding ei puoi,’ tih leh, ‘Kuole tuolthat ta chuh vaihawmna a dingin lauhthawng-um takin um ding ahi,’ kiti na za tau hi! 22 Kei chun chuh, ‘Kuole a suohpih chunga lungna ta chuh vaihawmna a dingin lauhthawng-um takin um zing un tin;’ kuole a suohpih kawma, ‘Raka’ ti ta chuh vaihawmte thutan saka um in lauhthawng-um takin um zing untin; chun, kuole ‘More’ ti ta chuh Gehen meia paih lauhthawng-um takin um un au, tih ka hilh na hiu hi. 23 Zieziekchun maichâm bula na thilpiek ding na hun chawih a, zie muna chuh na suohpih in na chunga lungkim lohna a nei hi tih na het chun; 24 zie maichâm maa chun na thilpiek chuh nusieh in la, chieh in la, na suohpih kichampih masa’n la, zie tieng chuleh chieh in la, na thilpiek chuh pieh. 25 “Na kilanpih chuh lampi a na kitawn pet u chun kichampih vak ah; khutilochun na kilanpih chun vaihawmpa hun matsak in tin, vaihawmpa chun mi mante kawmah hun pie’n tin, suongkul a khum in um khan la. 26 Tihtakzet a ka hilh na hiu, paisa khat chana na dit zawh masieh chuh zie apat chuh pawt hiel puo’n la.

Zawlsaihna Thua Sinsakna

27 “Malaia mite kawmah, ‘Zawl na saih ding ei puoi,’ tih ahi tih na za tau hi. 28 Ken chuh, ‘Kuole numei zawl mit a en ta chuh, lunggil in zawl a sai tai,’ tih ka hun hilh na hiu hi. 29 Khutichun, na mit changlam in a hun sukpuk chun kheuhdawk in la, paih mang in; na sapum Gehen a paih a hih sangin na sapum ka khat beihmang chuh nang dingin a pha zawi. 30 Chun, na khut changlam in a hun sukpuk chun tan in la, paihmang in; na sapumpi Gehen a paih a hih sangin na sapum ka khat beih mang chuh nang dingin a pha zawi.

Kimakna Thua Sinsakna

31 “ ‘Kuole zi ma ta chun kimâkna lehkha amah chuh pie hen,’ tih ahi. 32 Ken chuh, Kuole zawlsaih ziek hilo a zi ma chun amah chuh zawl a saih sak ahi a; chun, kuole kimasa nu kichênpih chuh zawlsai ahi tih ka hun hilh na hiu.

Thutiem Chunga Sinsakna

33 “Malaia mite kawmah, ‘Zuou in kihâksiel ki’n la, himahleh, na kipautiemna chuh Lalpa kawmah hih muolsuoh zaw’n, tih ahi,’ tih na za tau hi. 34 Himahleh ken ka hun hilh na hiu hi: Kihâksiel himhim kiu in; van sam in kihâksiel kiu; zie chuh Pathien lalchutphah ahi ngâl a; 35 lei sâm in le kihâksiel diek kiu, zie chuh a keng ngakna ahi ngâl a; Jerusalem sâm in le kihâksiel kiu, zie chuh lal lopi tak khawpi ahi ngâl a. 36 Na luchang uh sâm in le kihâksiel kiu, sam zang khat le na hih vawm un, na hih vam thei puoh ngâl u a. 37 Na thugen u chuh ahi chuh hi, hi zieng hen la, a hilo chuh a hilo hi zieng hen; a vum a val chuh migilo apat a pawt ahi ngâl a.

Phuba Lâkna Thua Sinsakna

38 “Mit sika mit, ha thasanga ha, a kiti na za tau hi. 39 Ken chuh ka hilh na hiu hi: Na chung u a gilote chung achun phuba la kiu in. Kuon le, na bieng changlam u a bet u chun a lehlam le dawh un. 40 Chun, kuon le na chung u a thusie bawla, na puonâk uh lak a guot leh na puon u le lâksak ngâl u. 41 Kuon le, mel khat chieh dinga a hun ngek leh mel nih chieh un. 42 A hun ngên chuh pieu inla, thil hun palâk nuom chuh kiheimangsan kih.

Melmate Hehpih Ding

43 “Na vengte hehpih in la, na melma muhdah ah; a tih uh na za tau hi. 44 Ken chuh ka hun hilh ahi: Na melmateu hehpih un la, a hun samsie te chuh paucham sak un la, a hun mudahte chuh bawlphau un la, bangmah a hun ngailote leh a hun sugimtheite chuh paucham sak un, 45 ti a chuh na Pau van a um chate na hih theihna ding un. Amah chun mi gilote leh mi phate chunga le ni kibang in a suoh sak sek a; mi pha leh mi phalote chunga le guoh a zuk sak ngâl a. 46 Nanguh hun hehpihte mai na hehpih u hin bang kipahman a na muh ding uh? Siehdawlte nasan in zie bang chuh a hih sek uh hilo ahim? 47 Chun, na suohpihteu mai na chibai u hin mi dangte sanga banga na hih phat diek uh? Siehdawlte nasan in zie bang chuh a hih sek uh hilo maw? 48 Khutichun, na Pau van a um a phat bukim guolin na phat bukim dinguh ahi.

6

Phatna dân Thu Sinsakna

1 “Na thilpha hihteu mihiemte muh a hih lo dingin chingthei un; khutilochun na Pau van a um kawm apat kipahman nei puo’n lau. 2 “Khutichun, thilpiek mi kawma na piek tieng leh, mi, mi gukhah te’n pahchak ding deihna a, kikhawpna Inhaw leh khawlai dung le vaia a hih sek guol un, na mau ah pengkun mût kiu. Tihtakzet a ka hilh na hiu hi, a kipahman uh a mu zo tau hi. 3 Nangun vang thilpiek mi na piek tieng u leh, na khut changlam un a hih chuh na khut veilam in he kiheh 4 Na thilpiek u chuh a gûka hih a hihtheihna dingin, khutichun, na Pau, a gûka hun mu sek pa chun hun din ina.

Pauchamna Thua Sinsakna

5 “Chun, na paucham tieng u leh, mi, migukhahte banga na um dinguh ei puoi; ziete chuh mi’n a muh theihna dingun kikhawpna Inhaw leh khawlai lamthuom haw a dinsa a paucham a nuom sek ui. Tihtakzet a ka hilh na hiu hi, a kipahman uh a mu zo tau hi. 6 Himahlele, nang haw chuh na paucham tieng u leh, na indan sunggil u ah lut un la, na kawtkhak inla, na pau a gûka um pa kawm achun paucham un, tichun, na pau a gûka hun mu sek pa chun hun din ina. 7 “Chun, na paucham tieng u leh Jentel te guolin vêl gen maimai kiu; a gen tam ziek u a ngaihthaka um dingin a kigingchau hi. 8 Zieziekchun, amau haw guolin um kiu; amah kawma na nget mau in na Pau in na sinmawh thil teu chuh a he ngâla. 9 Khutichun, nang haw chuh hitibang hin paucham un: ‘Ka pau van a um, Na min zah in um henla, 10 Na gam hung tung henla. Na deih bang van a hih a hih bangin lei ah hih hi hen. 11 Tuni a ka nek khawp uh an ei pie’n. 12 Ka bat uh ei ngaidam in; Kei un le ka thil bateu ka ngaihdam tâk bang un. 13 Thepna ah ei puilut ki’n la, Gitloh apat in ei hukdam zaw’n; Gam leh, thilhih theihna leh, lopina chuh, Kumsawt in nanga ahi ngâl a. Amen.’ 14 “Mi a sukkhelhnau na ngaihdam u chun, na Pau van a um inle hun ngaidam ina. 15 Himahlele, mihaw a sukkhelhnateu na ngaihdam loh u chun na pau van a um inle na sukkhelhnau hun ngaidam diek puo’n a.

An ngawlhna Thua Sinsakna

16 “An na ngawlh tiengu lele mi, migukhahte guolin nguoi mel pu kiu; amau haw chun mite muh a anngawl a hih uh a kilat theihna ding in a mel uh a hih zatchuom sek ui. Tihtakzet a ka hilh na hiu hi, a kipahman u chuh a mu zo tau hi. 17 Himahleh, nang un vang an na ngawlh tieng u leh, na luchang uh thau nuh un la, na mai u phiet un. 18 Khutichun, mihiemte maa an ngawl a lang lo a, na Pau a gûka hun mu pa mit muh chauh a chuh na lat theihna dingun; tichun, na Pau a gûka hun mu sek pa chun hun din ina.

Vana Go Khawl Thu

19 “Leia leikha leh tui-êk in a nêk siet na leh, guchate’n a vihvan u a a gûk theihnau ah nang u dingin go khawlkhawm kiu. 20 Vana leikha leh tui-êk in a nêk siet lohna leh guchate’n a vihvan u a a gûk lohnau ah nang u dingin go khawlkhawm zawu in. 21 Na go uh umna chengah na lungthim u le um ina.

Sapum Vak

22 “Sapum thaumei chuh mit ahi a, zieziekchun na mit uh a chîm chun na sapumpiu le vak suok ina. 23 Amahvang chuh, na mit uh a siet le vang, na sapumpiu chuh thim suok ina. Khutichun, nangmau a vak chuh thim hi taleh thim chuh a nasa na ding e!

Pathien leh Neihlelam

24 “Kuoma’n to nih na a sem kawp thei puoi; khat chuh mudah in, khat chuh deihchuom in ahim, a hihloh leh khat chuh limbawl in khat chuh simmawh ding ahi ngâl a. Pathien leh sum na na sem kawp thei puou hi. 25 “Zieziekchun ka hilh na hiu hi, bang ne a bang dâwn ding ka hi ta die aw? ti’n na hinna thuu leh bang silh a cheng ding ka hi ta die aw? ti’n na sapum thuu lungkham pih kiu. Nek ding sangin hinna a lul zaw hilo maw? Silhlechen sang inle sapum a lul zaw hilo maw? 26 Chung leng vachate hi en tiem u! buh a tuh puou a, ât le a ât puou a, buh In ale a thak khawm puou hi; himahlele na Pau van a um chun a vâk ahi. Amau haw sangin nanguh nasatak in na lul zawu hilo maw? 27 Na lak u a lungkham zieka kuo a a dung tawng khata sân beh sak thei? 28 “Chun, silhlechen thu a bang dinga lungkham na hiu hi? Gam lili pak khuh phatak in ngaihtuoh tiem u; na a sem puou a, pat le a khêk puou hi; 29 himahlele ka hilh na hiu hi, Solomon nasan le a lopina chengchenga a kivan inle zie lili pak khat pha hinle zêpin a um puoi. 30 Khutichun, gam hampa, tunia hing a, a zinga thuk a tih kit zieng ding bawn Pathien in zie bang lawm a a zem chun, nanguh taksan tawmte haw silhlechen hun pie zaw khawp lo ding maw? 31“ ‘Khutichun, bang ne a, bang dâwn ding ka hiu hi? tih leh, bang silh a cheng ding ka hiu hi?’ tin lungkham pih kiu. 32 (Ziehaw chuh Jentel ten a hawl sek uh ahi.) Ziehaw chengcheng chuh na sinmawh uh ahi tih na Pau van a um in a he ngâla. 33 A gam leh a diktatna hawl masa zawu un; tichun, ziehaw chengcheng chuh piek behlap a um ding na hiu hi. 34 Khutichun, a zinga ding lungkhampih kiu; a zing chun amah ding kingaihtuoh ding ahi ngâla. Zie ni a ding a thil phalo ana umsa chuh a ni a ding chun ahun set hi.

7

Awihmawhna Thu ah

7 “Awimawh kiu, awihmawha na um lohna dingun. 2 Na awihmawh guol mah un hun awimawh ding ahiu a, na tehna mah u a hun teh sakkit ding ahiu hi. 3 Chun, bang zieka nang mita inkam um chuh ngaihtuoh sam lo a, na suohpih mita buok neucha lut chuh na muh a? 4 Ahihloh leh, bangti’n a na suohpih kawma, ‘Na mita buok thêm ei lâkdawk sak in,’ na tih theih ding, nang mita inkam um zing ngâl a? 5 Nang, migukhah! nang mita inkam chuh ladawk masah; zie tieng chuleh na suohpih mita buok them um lâkdawk ding chuh chientakin mu thei in la. 6 “Uicha thil thienglim pie kiu; vawk masanga le na tuikawk suong uh paih kiu in, khutilochun chil sie khau in tin, kihei in hun pîk tel kha’n au.

Ngên un, Hawl un, Kiu un

7 “Ngên un, tichun piek in um unlau; hawl un, tichun mu’n lau; kiu un, tichun hawn sak in um unlau; 8 kuole a ngên ta chuh piek in um untin, a hawl ta chun mun au, a kiu ta chule hawn sak in um un au. 9 Ahihloh leh, na lak u a kuole a chapa’n chângthâk ngên leh, kuo a suong pie ding? 10 Ahihloh leh, nga hun ngên taleh kuo a gûl pie ding? 11 Khutichun, nang haw migilote’n bawn na chateu thilpha piek na dân na het u chun, na Pau van a um chun a ngente chuh thilpha pie zaw khawp lo ding maw? 12 “Khutichun, thil bangakai mi’n na chung u a hih dinga na deih ding u chuh mi chunga le hih un; zie chuh Mosi dân thu leh thiemgaute thu ahi ngâl a. 13 “Kawt chîp a chun lut un, manthaina a chiehna kawt chuh a zan a lampi le a za ngâl a; zie lama lut chuh tam le a tam ui. 14 Hinna a chiehna kawt chuh a chîp a, a lampi le a tiek a, a mute le tawmcha ahiu hi.

Thing leh a Gah

15 “Thiemgau lêmte lak achun chingthei un, ziete chuh belam vun silh in na kawm u ah a hung sek u a, a sunggil lam u chulah ngei gawlham tak tawbang ahi ngâl u a. 16 Amau haw chuh a gah u ah he zieng un lau. Mi’n khaulingnei kung ah grep gah a lo ngei u a ahim? Lenling a le theipi a lo ngei u a ahim? 17 Zie guol mah chun thing pha ta chuh a gah pha sek a; himahleh, thing sie vang chuh agah sie sek hi. 18 Thing pha chuh a gah sie thei puoh a, thing sie le a gah pha thei diek puoi. 19 Thing tin gah phalo ta chuh a phuk u a, meia seh lut ahi sek hi. 20 Zieziekchun amau haw chuh a gah u ah he’n lau.

Ka Hun He Kha Puoi

21 “Lalpa, Lalpa, ei ti tacheng van gama lut zieng ding ahi puou a; ka pa van a um deih bang hihte vang lut un au. 22 Zie ni chuleh mi tamtak in, ‘Lalpa, Lalpa, na min in thu ka gen u a, na min in thithate ka nawhdawk un; na min in thilmak tamtak ka hih sek uh hilo ahim?’ hun ti’n au. 23 Zie tieng chuleh, ‘Nang haw thil gilo hihte, ka hun he kha puoi, ka kawm apat chieh mang un’ tin amau haw chuh hilh ing ka.

In Satu Nih te

24 “Khutichun, kuole zie ka thugente hi za a, zawp chuh mipil, suongpi chunga In sa tawbang chuh ahi. 25 Guoh a hung zu a, tui a hung lien a, huih a hung nung a, zie In chuh a hun mût ek ek a; himahleh a chim diek puoi, suongpi chunga kilem det ahih ziekin. 26 “Chuleh, kuole zie ka thugen haw hi za a, zawp lo chuh mi ngawl, pîlnel chunga in sa tawbang chuh ahi. 27 Guoh a hung zu a, tui a hung lien a, huih a hung nung a, zie in chuh a hun mût ek ek a; a chim ta a, a chim chuh a nasa mah mah hi,” a ti a. 28 Zie thu haw chuh Isu’n a gen zawh phet chun, mipite chun a thu sinsak dân chuh mak a sa mah mah u a. 29 Dan thu zik haw bang lo a, thuneihna nei guol taka mi a sinsak ziekin.

8

Isu’n Phâk a Sukdamna

1 Chun, Isu tâng apat a a hung suk lai in, mipi nasatak in amah a zui u a; 2 Chun, ngaitie, a kawmah phâk khat a hung a, “Lalpa, na nawp leh nei hih thiengtho thei hi,” tin a masang ah a khupdin a. 3 Ziephet chun, Isu’n a vak bân a, a na tham a, “Ka nuom hi, a na thiengtho tan,” a ti a, tichun thakhat in a phâk chuh a hung thieng ta a. 4 Tichun, Isu’n a kawmah, “Kuomah hilh lo dingin chingthei ah; amahvang chuh chieh in la, thiempu kawmah va ki-etsak in la; Mosi’n thilpiek ding a tih haw kha va pie’n, mipite’n a hetchetna dingun,” a ti a.

Sepaih Hotu Suok Sukdamna

5 Chun, Isu Kapernaum khuo a a lut phetin, a kawmah sepaih za lawiupa khat a hung a, 6 “Lalpa, ka suokpa zeng in In ah a kuol zing a, a na gim mah mah mai hi,” ti’n a vak ngên a. 7 Isu’n a kawmah, “Hung ing ka ting, hihdam ing ka,” a ti a. 8 Sepaih za lawiupa chun, “Lalpa, ka in sung na lutna tak ahi puoi, thu mai gen leh chinle ka suokpa chuh dam zieng ina. 9 Keile mi thunuoi a um ka hi a, ka nuoi ah sepaihte a um u a. Khat kawma chuh, ‘Chieh in,’ ka tih leh a chieh sek a; a dang kawma chuh, ‘Hung ah’ ka tih leh a hung sek hi; chuleh, ka suok kawma chuh, ‘Ziehi hih in’ ka tih leh a hih sek ngâla,” ti’n a dâwng a. 10 Chun, Isu’n zie thu haw chuh a zak in mak a sa a, amah zui haw kawm achun, “Tihtakzet a ka hun hilh na hiu hi, Israel te lak ale hitibang taka taksanna nasa hi ka mu kha puoi. 11 Ka hun hilh na hiu hi, suohlam leh tumlam apat in mi tamtak hung untin, van gama guolvakna achun Abraham te, Isak te leh Jakob te chu tawh chu khawm un au. 12 gam chate vang chuh pawlam thima paih dawk in um untin, zie tak achun kah leh hagiel um ina,” a ti a. 13 Chun, Isu’n sepaih za lawiupa kawm achun, “Chieh ta’n, na ginchak guol tak chun nanga dingin hihin um hen,” a ti a. Tichun. a suokpa chuh zielai tak chun a dam ta a.

Mi Tampi Sukdamna

14 Chun, Isu Peter ina a lut in, a zinu nu chuh khawsik a kuol a mu a. 15 Tichun, a khut chuh a tham sak a; a khawsik chuh a pha ta a, tichun a tho a, Isu zenviel chun a pang ta a. 16 Chun, nitâk lam a hung hih phetin, a kawmah thitha mat haw tamtak a hun pui u a; chun, a thu’n thitha haw chuh a nawhdawk a, damlo chengcheng a sudam a. 17 Ziehaw chuh thiemgau Isai in: Amah ngêi in I hatlohna teu a lamang a; I natnateu a puoi! ti a a gen chuh a hung guitun theihna dingin ahi.

Isu Nungzui Dingte

18 Isu’n mipi nasatak a kimvela um a muhin, a Sinsakte chuh dîl gâl leh lama kai ding chun thu a pie a. 19 Chun, dân sinsaktu khat a hung a, a kawmah, “Sinsakpa, na chiehna lam chengah hun zui ing ka,” a ti a. 20 Isu’n a kawmah, “Si-âlte’n kuo a nei u a; vachate’n bu a nei u a, himahleh, mihing chapa hin vang lungakna ding a nei puoi,” a ti a. 21 Chuleh, a sinsakte laka mi dangin a kawmah, “Lalpa, ka pa ei vuih sak tadih in,” a ti a. 22 Himahlele Isu’n a kawmah, “Nei zui ah; mithi’n amau mithi kivuih u heh,” a ti a.

Isu’n Huihpi a Vauthipna

23 Chun, Isu chuh lawng sung ah a lut a, tichun, a sinsakte’n a zui lut tau a. 24 Chun, ngaitie, dîl achun huihpi nasatak a hung nung ta a, tichun, tui kinawk in kuong chuh a khuh thulthul zieng a, Isu chulah lawng mei lam achun a ipmu a. 25 Sinsakte chuh a kawmah a chieh u a, a phawng u a, “Lalpa, ei hukbit ah, mangthai ding ka hiu hi uo,” a tiu a. 26 Isu’n a kawm u ah, “Taksan tawm te haw, bang dinga lau na hiu hi?” a ti a. Zie nung chun a tho a, huih leh dîl chuh a gai a; tichun a hai kêi zieng ta a. 27 Tichun, mihaw chun mak a sau a, “Zie pa hi bang tawbang mi a hi die! Huih leh dîl nasan inle a thu a ngaih u hi?” a tiu a.

Thitha mat Mi nih Sukdamna

28 Chun, gal khat lam Gedarin mite gam chuh a tun phetin, thitha mat nih, thân apat a hung pawt hin a kituokpih u a, a hâng mah mah u a, a lauh-um ziekun kuoma’n zie lampi chuh a hawh ngam puou hi. 29 Chun, ngai tie, amau chun, “Isu, nang Pathien chapa, nang leh kei u nih in banga kitihmatna I neih uh? a hun maa ei sugimthei dinga taka hi hung na him?” tin a kiko u a. 30 Chun, a umnau apat a gamla deuh ahin vawk hawn a tau a. 31 Thitha haw chun, “Nei nawhdawk leh vawk hawn sunga lut ei phalsak in,” tin Isu kawmah a ngên u a. 32 Isu’n a kawm u ah, “Chieh tau un la,” a ti a, tichun a hung pawt u a, vawk hawn sung achun a va lut tau a. Chun, ngaitie, vawk hawn chengcheng chuh kâwl lak ah a taitha suk u a, dîl ah a tailut u a, tui hapvah in a thi zo tau hi. 33 Tichun, a vulhte chuh a tai u a, khawpi achun a chieh u a, thil umzie chengcheng leh thitha mat te chunga thil tungte chuh a va hilh tau a. 34 Chun, ngaitie, a khawzang un Isu dâwn dingin a hung dawk u a; amah a muh phet un a gam u apat pawtdawk dingin a ngên uh a.

9

Isu’n Zeng a Sukdamna

1 Chun, Isu chuh lawng ah a chu a, dîl a galkai a, amah umna khawpi a achun a chieh ta a. 2 Chun, ngaitie, zeng khat, zâlkhun a kuol san a kawmah a hun zawn u a, Isu’n a taksan zieu a muh in zeng kawm achun, “Ka cha, lungmuong takin um ah, na gitlohna ngaihdam ahi tai,” a ti a. 3 Ziephet chun, Danthuzik kuote ahim in a lungthim un, “Zie pa hin Pathien a gensie ahi hi,” a tiu a. 4 Himahleh, Isu’n a ngaihtuoh hawu chuh a het in, “Bang dinga na lunggil u a gitloh ngaihtuoh na hiu hi? 5 ‘Na gitlohna haw ngaihdam ahi tai,’ tih leh ‘Tho in la, keng in chieh ta’n’ tih hi a khawi zaw a gen baihlam zaw? 6 Bang hitalele, lei chunga hin Mihiem Chapa’n gitloh ngaihdam theihna a nei hi tih na het theihna dingun,” a ti a. Khutichun, zeng kawm achun, “Tho inla, na puonphah la’n la, na In ah chieh ah,” a ti a. 7 Tichun, a tho a, a In ah a chieh ta a. 8 Chun, mipite chun zie chuh a muh un a lau tau a, mihiemte kawma khutibang thuneihna pie Pathien chuh a pakcha tau a.

Isu’n Matthai a Sapna

9 Chun, Isu zie apat chun a chieh zel a siehdawlna muna chu mi khat, a min Matthai kiti chuh a mu a; a kawmah, “Ei hun zui ah,” a ti a. Tichun, a kipan a, a zui ta a. 10 Chun, tihi ahi a, ina chuh ankuong a um lai in ngaitie, siehdawlte leh migilote tamtak a hung u a, Isu leh sinsakte chuh ankuong a ûmpih tau a. 11 Pharisaite chun zie chuh a muh un, Isu leh a sinsakte kawm achun, “Bangati a na sinsakpau in siehdawlte leh mi gilote laka a nek a?” a tiu a. 12 Himahlele Isu’n, zie chuh a zak phetin, “Mihatte’n daktor a ngai puou a, mi dammawhte’n a ngai zawu hi. 13 Khutichun, chieh un la, Pathien lehkhabu a, Kithawihna deihlo in, lungsietna ka deih hi tih umzie hi va mudawk un, mi diktatte sam dinga hung ka hi puoh a, mi gilote sam dinga hung ka hizaw a puo,” a ti a.

Anngawlh Thua Dawtna

14 Zielai chun Johan sinsakte a kawmah a hung u a, “Bangati a keihaw leh Pharisaite hin an ka ngawlh sek u a, na sinsakte hin a ngawlh loh uh a?” a tiu a. 15 Isu’n a kawm u ah, “Mo puite kawma a pasal ding a um lai cheng chuh mo puite chun a sun thei u a ahim? Himahlele a pasal ding chuh a kawm u apat puihmang ni hung tung intin, zie tieng chuleh an hun ngâwl un au. 16 Chun, kuoma’n puon lui puon khaih zung loh lai in a belh ngei puou; a belhbitna ding chun puon chuh kai ek zaw’n tin, hung ek lien zaw diek ding ahih ziekin. 17 Kuoma’n uain thak savun uain pêng luia le a khum ngei puou hi; khutilochun savun pêng haw chu puokcheh in, uain chu kibuo zo in tin, savun pêng haw chu sie’na. Zieziekchun uain thak chuh savun uain pêng thak haw achun a thun zaw sek ui, tichun, phatak in a um gêl gêl sek ui,” a ti a.

Sukdamna Thilmak Nih te

18 Zie thu haw chuh a kawm u a a gen lai takin, ngaitie, vaihawmtu khat a kawmah a hung a, a chibai a, “Ka chanu tu tak khan a thi a, himahlele hung in la, a chungah na khut hung nga leh chin hung hing kit ina,” a ti a. 19 Tichun, Isu chuh a kipan a a zui ta a, a sinsakte’n le a zui u a. 20 Chun, ngaitie, numei khat, kum sawm leh kum nih thiput a damlo a nung ah a hung a, a puonmawng a tham a; 21 “A puonmawng mai tham leng le hihdam in um ing ka” tih a lungvei ahi. 22 Tichun, Isu a kiheia, amah nu chuh a mu a, “Ka chanu, lungmuong takin um ah; na taksanna hi na dampih ahi,” a ti a. Tichun, numei chuh zie dâkkâl apat chun a hung dam ta a. 23 Chun, Isu chuh vaihawmpa ina a lut phet in, châmngai mût haw leh, mipi puok vengvung haw chu a va mu a, 24 “Pawtdawk un, chapangnu chuh a thi puoi, a ipmu ahi zawi,” a ti a. Ziephet chun, amau haw chun amah chuh a nuihsan mai tau a. 25 Himahlele, mipite chuh a nawhdawk zawh nung u chun a lut a, chapang chuh a khut in a tu a, tichun a hung tho dawk ta a. 26 Zie apat chun zie gamsung chengcheng achun a thu a kithang dawk ta a.

Isu’n Mitdûk Nih a Sukdamna

27 Chun, Isu chuh zie tak apat chu a chieh zel a, mitdûk nih in a zui u a. “David chapa, kei uh ei lungsiet ah,” tin a kiko u a. 28 Chun, In a a lut phetin, mitdûk haw chuh a kawmah a hung u a. Isu’n a kawm u ah, “Ziehi hih thei dingin nei gingchau hi?” a ti a. Amau haw chun, “Gingcha e, Lalpa” a tiu a. 29 Ziephet chun, Isu’n a mit uh a khawih sak a, “Na taksan bangun na chungu ah tung hen,” a ti a. Tichun, a mit uh a hun hak tau a. 30 Isu’n a kawm u ah, “Chingthei unla, kuomah hetsak kiu in,” ti’n a khap chakkêi a. 31 Himahlele, amau haw chuh a pawtdawk u a, zie gam chengcheng achun a chanchin a kithan sak tau a.

Isu’n Pautheilo a Sukdamna

32 Chun, a pawt lai tak un, ngaitie, mi khat thitha mat, pautheilo a kawmah a hun pui u a. 33 Thitha chuh a delhdawk phetin, pautheilo chuh a hung pau ta a, mitin chun mak a sa mah mah tau a. “Israel te lak ah zie tawbang hi I mu kha puou hi,” a tiu a. 34 Himahlele Pharisaite chun, “Thitha lengpa ziekin ahi, thithate a delhdawk sek hi,” a tiu a.

Isu’n Mipite a Hehpihna

35 Isu chuh khawpi leh khuo neu haw achun a chieh viel a. Kikhawpna Inhaw achu sinsak in, Gam chanchin pha thu gen in; natna tin cheng leh damlo tin cheng chuh a hihdam a. 36 Khutichun, mipite chuh a muh in, chingpa neilo, belamte guola gimthei leh dalh a a um ziekun a lungsiet ta mah mah a. 37 Tichun, a sinsakte kawm achun, “Buh ât ding a tam ten ngâl in, himahlele a sem ding mi atawm ui; 38 khutichun, a buh ât ding a sem ding haw chu sawl dingin buh neipa kawm achun ngên un,” a ti a.

10

Sinsak Sawm leh nih te

1 Chun, Isu’n a sinsak sawm le nih te chuh a kawmah a sama, amau haw chu thagau buok delhdawk theihna dingin thuneihna a pie a, chuleh, damlohna tincheng leh natna tin cheng sukdam theihna ding thuneihna le a pie a. 2 Sawlchak sawm le nih te min chuh ziehaw hi ahi: A masapen in Simon (Peter kiti) leh a suohpih Andrew; Jebedai chapa Jakob leh a suohpih Johan; 3 Philip leh Bartholomai; Thoma leh siehdawlpa Matthai; Alphai chapa Jakob leh Thaddai; 4 Kanaan a um Simon leh a matsakpa Juda Iskariot te ahiu hi.

Sawmlenihte Sawldawkna

5 Zie sawmlenih te chuh Isu’n a sawl dawk a, a kawm u ah tihin thu a pie a: “Jentel te lampi ah chieh kiu inla, Samari mite khuo himhim ale lut kiu in. 6 Amahvang chuh, Israel nam belam mangte kawm achun chieh zawu in. 7 Tichun, na chieh kawm un, ‘Van gam chuh a nai tai’ ti’n gen zel un. 8 Damlote sudam unla, mithite kaitho unla, phâkte suthieng unla, thitha haw delh dawk unla. Man beia na san u chuh man beiin pieu in. 9 Na dangka dip hawu achun sana ahim, dangka ahim, paisa ahim keng kiu in la, 10 zinna a dingin sakhau ahim, puonâk nih ahim, kengtawbek ahim, tiengkhut ahim le keng kiu in; nasem chun nek ding a muh ding him ahi ngâl a. 11 “Chun, khuo lien hileh, khuo neu hileh, na lutna taphawt u ah a hun tun sak thei ding hawl dawk unla, na pawt kit masang sieh u chu tak achun tung zing un. 12 Chuleh, In a chuh na lut ding tieng u leh chibai unla. 13 Zie In a mite chun a hun na lawp u chun na lungmuonna thuu chuh um zing hen la, a hun lawp loh u le vang chuh na lungmuonna thuu chuh zûk kit un. 14 Kuole, hun na lawp lo a, na thugen uh ngailo te chuh, zie In a kipat ahim, zie khuo a kipat ahim a chuh na pawt tieng u leh na kêngpêk u a leivui chuh thing thau in. 15 Tihtakzet a ka hilh na hiu hi, thutan ni leh zie khuote sang chun Sodom leh Gomorra gam thuok ding chuh a dân um zaw’n a!

Gimtheihna Hung tung Ding

16 “Ngaitiem u! ngeihawn laka belam um guola ka hun sawl na hiu hi, khutichun gûl guola ching a, vakhu guola mi zakdah ding khawih lo in um un. 17 Mihiemte lak achun chingthei un, hun man un tin, vaihawmna In a hun pui in, a kikhawpna In hawu a chun hun zêp ding ahi ngâl u a. 18 Kei ziekin gam vaihawmte leh lengte masanga thutan sak ding leh amau haw kawm leh Jentel te kawma Chanchin pha gen dingin hun pui un au. 19 Himahlele, a hun matsak tieng u chu leh, ‘Bangti’n a, bang thu a ka gen ding?’ ti’n lungkham kiu; na gen ding u chuh a hun taka hetsak a um ding na hi ngâl u a. 20 A gen chuh nanguh hi ding na hi puou a, na Pau Thagau in nangmau mang in gen ding ahi zaw ngâl a. 21 “Mi’n a suohpihpa thah dingin matsak intin, pa’n le a cha matsak in tin; chate’n le a nu leh a pa do un tin, thah le thah sak un au. 22 Ka min ziekin mi chengcheng muhdah in um un na tin uh, himahlele a tâwp tienga thuok ngâp ta chuh, zie ngêi chuh hukdam in um ina. 23 Khutichun, zie khuo a hi a hun bawl phatloh tieng u leh, khuo dangah taihsan un. Tihtakzet a ka hun hilh na hiu hi, Mihiem Chapa a hung ma’n Israel khuo haw chu tawh suok puo’n lau. 24 “Sinsak a sinsakpa chungah a um puoh a, suok le a pu chungah a um diek puoi. 25 Sinsak, a sinsakpa guola hung um leh, suok, a pu guola hung um chuh a hun set hi. In nei pên pa bawn ‘Beelzebul’ a tih u chun, a inkuonpihte chuh a hah tih na ding u e!

Lauh ding pên Chuh

26 “Khutichun, amau haw chuh lau kiu in, phuon loh dinga kisel bangmah a um puoh a, het loh dinga îm le bangmah a um diek puoi. 27 Thimlaka ka hun hilh hi vak ah gen un; nakhanga na zak u hi In chunga chu’n tângsap pih un. 28 Chuleh, sapum that a thagau that theilo haw chuh lau kiu in la; zie sang chun, Gehen a thagau leh sapum sumang thei vang chuh lau zawu in. 29 Vasie nih paisa khatin a kikhawng sek hilo ahim? Himahlele a lak u a khatchale na Pau thu lo in tuol ah ta puo’n a. 30 Himahleh, na luchang u a na sam zang khat cha nasan le sim suok a puo. 31 Zieziekchun, lau kiu in; vasie tamtak sangin na lul zaw ngâl u a.

Kiphuonna leh Krista Deihlohna

32 “Khutichun, mihiemte ma a ei uoh ta chuh, ken le ka Pa van a um ma ah amah le uoh ing ka. 33 Himahlele, kuole mihiemte ânga ei kizuksan ta chuh, ken le ka Pa van a um ma ah kizuksan ing ka.

Chamna hilo in, Chemzâm

34 “Lei chunga hin cham lên sak dinga hung hoh ahim nei ti kha’n lau: cham lên sak dinga hung ka hi puoh a, chemzâm lên sak dinga hung ka hi zawi. 35 Chapa’n a pa do ding leh, chanu’n nu do ding leh monu’n a talpinu do sak dinga hung ka hi zawi. 36 Mite dinga a melma lienpen chuh amah inkuonpihte ngêi hi’n a. 37 “Kuole a nu ahim, a pa ahim kei sanga hehpih zaw chuh ka mi hi hâwi ahi puoi; kuole a chanu ahim, a chapa ahim kei ei hehpih sanga hehpih chule ka mi hi hâwi ahi diek puoi. 38 Chun, kuole a kross pu a ei zui lo chuh ka mi hi hâwi ahi puoi. 39 Kuole, a hinna mu chun chan intin; chuleh, kei min zieka a hinna chân chun mu’n a.

Kipahman Chuh

40 “Kuole a hun lawp chuh kei ei lawp ahiu a, kuole kei ei lawp chuh ei sawlpa lawp ahi. 41 Kuole thiemgau chuh thiemgau ahih zieka lawp ta chun, thiemgau kipahman chu muntin; kuole mi diktat chuh mi diktat a hih zieka lawp chun diktat kipahman chu mu’n a. 42 Chun, kuole zie mi neucha haw laka khat kawma hin ka sinsak ahih zieka tui dap khawn khat mai na pie le, tihtakzet a ka hilh na hiu hi, a kipahman u chu chan hiel puo’n au,” a ti a.

11

Baptist Johan apat a Palai

1 Isu’n sinsak sawmlenih te chuh thu a piek zawh phetin, tak apat chun khuo haw ah mi hilh leh thugen dingin a chieh ta a. 2 Johan in Krista thilhih haw chuh suongkul apat a a na zak in, a kawmah, 3 “A hung ding chuh na him, mi dang ka na ngak nalai ding um?” ti’n sinsakte a palaih sak a. 4 Chun, Isu’n a kawm u ah, “Chieh kit unla, thil na muh u leh na het hawu hi Johan va hilh un: 5 mitdûkte a mit uh a vak ta a, kêngbâite le keng in a chieh tau in; phâkte a thieng tau, bengngawngten le khuo a za thei tau in; mithi haw le kaihthawh in a um tau a, chagahte kawma le Chanchin pha gen ahi tai. 6 Chun, kuole, ka chunga lungkim lohna mu lo chuh a hamphau ui,” ti’n a na dâwng a. 7 Chun, ziete chuh a chieh phet un Isu’n mipite kawm achun Johan thu a gen pan ta a, 8 “Bang en dinga gamthip a chieh na hiu hi? Luong huih mût lîng maw? Ahihloh leh, bang en ding pena chiehdawk na hiu hi? Puon nem silh maw? Ngaiun, puon nem silh te chuh leng In ah ahi a puo a um uh. 9 Ahihloh leh bang ziek pena chiehdawk na hiu hi? Thiemgau en dingin maw? Ahi, ka hun tih kha, thiemgau sanga lopi zaw na mu tau hi. 10 ‘Entie! ka sawlchak na ma ah ka sawl a, Amah chun na ma ah na lampi bawl ina,’ tih a chanchin a zik pau kha zie pa hi ahi. 11 Tihtakzet a ka hun hilh na hiu hi, Numei hin thâk lak achun Baptist Johan sanga lopi zaw a um kha puoi; himahlele van gama mi neupen le amah sang chun a lopi zawi. 12 Baptist Johan um apat tuni tieng hin van gam chun thagum suoh a dona a na thuok sek a, thagum suoh mangte chun a na lak guo sek ui. 13 Johan hung um tiengin thiemgaute leh Mosi dân chun van gam chanchin chuh a na genlawk uh ahi. 14 A thugen u chuh na zawp nawp u chun, a hung ding kigenlawk kha Elijah hi ahi. 15 Kuole zakna dinga bil nei chun zau hen! 16 “Himahlele, tulai khangthakte hi bang tawh ka tehkal ta die? Chapang, dawl muna chu tawbang ahi. 17 ‘Châm- ngai ka hun mût sak uh a, na lam ngâl puou a. Hah kah a ka kah uh lele na âwm uh na chûm ngâl puou,’ ti te bang hih ahiu hi. 18 Johan chuh a hung a, nelo dâwn lo ahi a, ‘Thitha guol nei ahi hi’ a tiu a. 19 Mihiem Chapa a hung a, a ne’n a dâwn a, ‘En tiem u, an nek hât, uain heh pa; siehdawlte leh mi gilote guolpa khuh!’ a ti ngâl u a. Bang hilele, Chitna chuh a gah in a dik hi tih a sulang nai,” a ti a.

A Gingchalo Khawpite

20 Chun, a lunghei loh ziekun, a thilmak hih tamna pên khawpite chuh Isu’n a gai ta a: 21 “Korazin, na chung a gik hi! Bethsaida, na chung a gik hi! nang haw chunga thilmak kihih haw kha Tura leh Sidon khuo a hih hileh, saidippuon silh a, vut laka chu’n a lung uh hêi ta khawp puo’n au. 22 Himahlele, ka hilh na hiu hi, thupi tan ni leh Tura leh Sidon khuo thuok ding chuh a dân um zaw’n a. 23 Chun, nang Kapernaum, van tienga kichawihsan ut na him? Mithi khuo tienga paihthak ding na hi a puo! nang haw chunga thilmak kihih haw kha Sodom khuo a hih hileh chuh, tu tiengin um zing nalai ina. 24 Himahlele, ka hilh na hiu hi, thupi tan ni leh nang thuok sang chun Sodom gam thuok ding chuh a dân um zaw’n a,” a ti a.

Ka kawmah Hung unla, Chawlin

25 Zielai chun Isu’n a gen a, “Aw hepa, lei leh van a Lal, nangin miching leh mi thiemte kawmah zie thu haw hi na îm a, nausente kawma na phuon ziek hin ka hun pakchai. 26 A hi, hepa, zie tawbang hih chuh nang ngaih in a phai. 27 “Ka pa’n thil chengcheng ei vawp sak tai; Pa tello in kuoma’n Chapa hi a he puoi; Chapa leh, a kawm u a Chapa’n a phuon nawpna te tihloh chun kuoma’n Pa chuh a he puoi. 28 “Nang haw, semgim leh puokgik puo chengcheng te haw, ka kawmah hung un la, kei man hun chawlh sak ing ka. 29 Ka namkawl puou unla, ka kawmah sin un; lungchuol leh lunggil a kingainiem tak ka hi hi; tichun na thagau u a dingin chawlhna mu’n lau. 30 Ka namkawl chuh a nuom a, ka puok le a zâng hi,” a ti a.

12

Sabbath thu a Dawtna

1 Zielai chun, Isu chuh Chawlhni’n buh lei haw achun a chiehpai a; a sinsakte chuh a gil-uh a kiel ta a, tichun, buhvui haw chuh a sik u a, a ne tau a. 2 Zie chuh Pharisaite’n a muh phet un, a kawmah, “Entie, na sinsakte’n Chawlhni’n hih ngeiloh a hih ui.” a tiu a. 3 Isu’n a dâwng a, a kawm u ah, “David a gilkiel laia, a guolte tawh a thilhih u kha na sim ngei puou maw? 4 Khati a Pathien In a a lut a, amah leh a guolte nek ngei loh, thiempute mai nek thieng, chângthâk zek a nek thuu kha? 5 Ahihloh leh, Chawlhni a Pathien Ho-In a thiempu umte chun Chawlhni a nit loh un le mawhchang in a um puou hi tih Dan thu ah na sim puou hi? 6 Bang hilele, Pathien Ho-In sanga lopi zaw taka hin a um hi, tih ka hun hilh na hiu hi. 7 ‘Chuleh, Kithawihna deih lo in, lungsietna ka deih zawi’ tih hi a na he hita leu chun, mi, a mawh lo chu mawh chansak lo ding hi veu chin, 8 Mihiem Chapa hi Chawlhni Lal ahi ngâl a,” a ti a.

Isu’n Khut zeng a Sukdamna

9 Isu’n zie mun chuh nusieh in a kikhawpnau In achun a va lut a. 10 Chun, ngaitie, mi khat khut zeng a na um a. Isu a heksiet theihna ding un, “Chawlhni’n hihdam a thieng em?” ti’n Isu a dawng u a. 11 Isu’n a kawm u ah, “Nang haw lak ah kuon le belam khat nei unla, zie chuh chawlhni’n kawkhuk sung ah kie ta hen la hi leh, kuo a tu a kaidawk lo a um ding? 12 Belam khat sang chun mihiem khat chuh a lul zaw na e! Zieziekchun, Chawlhni’n thilpha bawl a thieng hi,” a ti a. 13 Tichun, zie pa kawm achun, “Na khut tung ah,” a ti a. Chun, amah chun a khut a tung a, a langkhat guolin a dam kêi ta a. 14 Khutichun, Pharisaite chuh a pawt u a, amah suklup theihna ding dân ngaihtuoh in a kikhawm tau a.

Pathien tel ngêi Suok

15 Himahlele Isu’n zie chuh a het phetin zie apat chun a chieh mang ta a. Chun, mipi tamtak in amah chuh a zui u a, damlo chengcheng chuh a na hihdam suok ta a; 16 A chanchin phuon loh ding tin amau haw chuh a khap chak a. 17 Zie chuh Pathien in thiemgau Isai kawm a: 18 “Entie, keimah tel ngêi ka suok, Ka deih tak, a chunga ka lungkimna mah mah hi; A chungah ka thagau kawih ing ka ting, Tichun, Jentel te kawmah vaihawmna dik phuong ina. 19 Niel puo’n tin, ko le kiko ngei puo’n a, Khawlai a le kuoma’n a aw za kha puo’n a. 20 Zo dinga vaihawmna dik a sawl dawk masang sieh chuh Luong kihek gawp chuh hekbawng pai lo ding ahi, Phita chule sumit pai puo’n a. 21 Amah min chuh Jentel te’n kineppih un au,” ti a a gen kha a hung guitun theihna dingin.

Isu leh Beelzebul

22 Zielai chun, mitdûk, pautheilo, thitha mat khat a kawmah a hun pui u a. Isu’n a na sudam a, tichun, hung pau thei in, khuo le ahun mu thei ta a. 23 Ziephet chun, mipite cheng chun mak a sa tau a, “Zie pa hi David chapa kha hilo ahim?” a tiu a. 24 Himahlele, Pharisaite’n zie chuh a het phet un, “Zie pa hin thitha leng Beelzebul thilhih theihna ziek hilo in thitha haw chuh delh dawk puo’n a,” a tiu a. 25 Chun, Isu’n a ngaihtuoh u chuh a na he a, a kawm u ah, “Hawi gam hitaleh amau kido taphawt a mang sek ui; kuo hitaleh, inkuon khat le amau kido ta chuh ding dawk hiel puo’n au 26 Zieziekchun, Setan in Setan mah a delh dawk chun amah leh amah kido ahi a, a gam chuh bangti’n a a dindawk ding? 27 Chun, ken Beelzebul zieka thitha haw a na nawhdawk sek ka hih chun, na chateu in kuo ziekin a a na nawhdawk sek uh? Zieziekchun, nang haw diklo na hiu ui tih chuh a suchien tau hi. 28 Amahvang chuh. Ken Pathien Thagau zieka thithate delh dawk sek ka hih chun. Pathien gam chuh na kawm u a hung tung hi ta’n a. 29 “Mi’n mihat chuh a kân masak loh chun, bangti’n a mihat ina chuh lut in a sumlepai a lâksak theih ding? a kân zawh tieng le vang chuh a in chuh luh thei ina. 30 “Kuole, kei lama pang lo chuh ei do ahi a, kuole ei lakkhawm pin lo chun a thehzak ahi. 31 Zieziekchun, ka hilh na hiu hi: mi, a gitlohna tin cheng u leh, a Pathien gensietna tin cheng u ah ngaihdam hiu untin. Himahleh, Thagau thiengtho gensie vang chuh ngaihdam hi puo’n a. 32 Chun, kuole Mihiem Chapa awimawh ta chuh a awihmawhnau achun ngaihdam hiu intin; kuole Thagau thiengtho zet gensie vang chuh, a awihmawhnau chuh tu damsung hin le, hun hung tung kit ding achun le ngaihdam hi puo’n a.

Thing leh a Gah chuh

33 “Thing hi a phat chun, a gah le a pha a, thing a phatloh chun a gah le a pha puoi; thing chuh a gah in a kihe ngâl a 34 Gûl suonte haw! bangti’n a gilo zing puma thilpha na gen theih ding uh? Lungthima dimlet chuh kam in a gen dawk sek a puo! 35 Mi pha chun a gobawm apat in thilpha a ladawk sek in, migilo chun a gobawm phalo apat in thil phalo chuh a ladawk sek hi. 36 “Chun, ka hilh na hiu hi, Min, thumanloh a gen chun, ziete chanchin mah chuh thupi kitan ni leh gen un au. 37 Na thugen in thiem hun chansak intin, na thugen mah in thiemmawh hun chansak kit ding hilo ahim?” a ti a.

Thilmak Ngekna

38 Chun, dân thuzikte leh Pharisaite laka kuote ahim in a kawmah, “Sinsak pa, nang apat a melchikna muh ka nuom ui,” a tiu a. 39 Amah chun a kawm u ah, “Khangthak gilo tak leh zawlsaih hât te chun melchikna a hawl un, himahlele thiemgau Jona melchikna mai tihloh chuh a kawm u ah melchikna himhim piek hi puo’n a. 40 Jona chuh ni thum leh zan thum ngapi gil sunga a um guol khan, Mihiem Chapa hi ni thum leh zan thum leilung sung ah um ding ahi. 41 Chun, thupi kitan ni chuleh Ninevi khuo mite chuh hung ding dawk un tin, tulai khang thakte hi mawh hun chansak ding ahiu ui. Jona thugen ziekin a lung uh a hei ngâl u a; ngaitiem u, Jona sanga lopi zaw zie hin a um a puo! 42 Simlam lengnu kha thupi kitan ni achun kipan in tin, tulai khangthak te hih mawh hun chansak ding ahi. Solomon chitna ngaitha dingin kâwlmawng apat in a hung a, ngaitiem u, Solomon sanga lopi zaw taka hin a um a puo!

Thagau buok Vaihkitna

43 “Chun, thagau buok chuh mi sung apat a a hung pawt phetin, chawlh ngakna hawl in tui um lohna ah a vak a vak a, muh la a mu ngâl puoh a. 44 Ziephet chun, ‘Ka hung pawtna ka In akhan vaikit mai ing ka,’ a ti a. Tichun, a vaikit ta a, In chuh a âwng leh phiet ngim san a mu ta a. 45 Ziephet chun a va pawtdawk a, amah sanga gilo zaw thitha dang sagih a hun pui a; tak achun a cheng tau a. Zie mihiem umzie nunung chuh amasa sangin a hung phamawh zaw ta a. Tawbangmah hin tulai khangthak gilo takte chunga hin le hung um ding ahi,” ti’n a dâwng a.

Isu Nu leh a Suohpihte

46 Isu’n mipite kawma thu a gen lai tak chun, ngaitie, a nu leh a suohpihte chuh amah hopih guo’n pawlam ah a ding u a. 47 Chun, mi khatin a kawmah, “Ngaitie, na nu leh na suohpihte nang hun hopih guo’n pawlam ah a ding zing ui,” a ti a. 48 Himahleh, Isu chun a dâwng a, “Ka nu chuh kuo ahi? Ka suohpihte chule kuote ahiu hi?” ti’n a dâwng a. 49 Khutichun, a sinsakte lam ah a khut a zaka, “En tiem u, ka nu leh ka suohpihte hi! 50 Kuole ka Pa van a um deih bang hihte chuh ka suohpihpa, ka suohpihnu leh ka nute ahiu a puo,” a ti a.

13

Buhchi Thehpa Tehkalna

1 Zie ni mah chun Isu chuh In apat chun a chiehdawk a, dîl pang achun a chu a. 2 A kawm achun mipi nasatak a hung kikhawm u a, khutichun, kuong ah a lut a; a chu a, mipi chengcheng chuh sehpho ah a ding u a. 3 Chun, tehkal thu’n thu tamtak a kawm u ah a gen a: “Ngaitiem u, buhchi thehpa chuh buhchi theh in a kuon a; 4 chun, a theh lai in a bang lam sik ah a kie a, himahleh vachate a hung u a, a luok zo tau hi. 5 Khenkhat chuh, suongteu chung lei patna mun ah a kie a, lei a sah loh ziekin a kek dawk pai zieng a; 6 himahlele ni a hung sân deuh phetin a kâng nang a, zung a neih loh ziekin a gawp ta a. 7 Chun, abang hamlingnei lak ah a kie a, ham chuh a hung khang a, a dep mang ta a. 8 Chun, a bang lei phatna ah a kie a, a bang a leh za, a bang a leh sawmgup, a bang leh sawm thum in a hung gah ta a. 9 Kuole zakna dinga bil nei chun za hen,” a ti a.

Tehkal Thu Thiltup

10 Chun, sinsakte chuh Isu kawmah a hung u a, a kawmah, “Bang dinga a kawm u a tehkal thu a gen na him?” a tiu a. 11 Isu’n kawm u ah, “Van gam thuguk chuh nang haw het vang phal a hi a, himahleh, amau haw het vang chuh phal ahi puoi. 12 Kuole a nei ta piek beh un tin, tamtak hun nei intin, himahleh kuole a neilo chuh a neihsun le lâksak un au. 13 Ziezieka chuh tehkal thu a a kawm u a ka gen ahi, en mah leu le a muh sek loh u a, ngaitha mah leu le a zak sek loh ziek u leh, a ngaihna le a het sek loh ziekun. 14 Tichun, thiemgau Isai thugen masak kha a chung u a hung tung ahi hi: ‘Bil in vang zau in na tin uh, a ngaihna chu vang he puo’n lau; Muh vang muu in na tin uh, het vang chuh he hiel puo’n lau; 15 Zie chite lunggil hi a na ngui zo ta a, A bil u le a na ngawng ta a, A mit uh a sing u a, Khutilochun, I mit un mui ting uh; I bil un zai ting un, I lunggil un he kit hi ting uh, Kihei kit hi ting un, Ama’n ei na sudam khan a ie!’ a tiu a, a tih kha. 16 “Himahleh, nang haw mit vang chuh a hampha ahi, a muh sek ziekin, na bil u le a hamphai, a zak sek ziekin, 17 Tihtakzet a ka hilh na hiu hi, thiemgau tamtak leh mi diktat tamtak ten le na thil muh hawu hi muh a ut u a, himahleh a mu ngâl puou a; na thil zak hawu hile zak a ut u a, himahleh, a za ngâl puou a.

Tehkal thu Hilhchetna

18 “Khutichun, ngaithau in la.buhchi thehpa tehkal thu umzie chuh heu in: 19 kuon le, gam thu chuh nakhanga za a, a ngaihna a het loh chun, buhchi lam sika kie tawbang chuh ahi. Migilo chuh a hunga a lunggil a thehsa chuh a chuhthâk sak sek hi. 20 Chun, suong teu lei patna muna kitheh chuh, thu a zak zaka kipâk taka pawm zieng; 21 himahlele amah a chuh zung a um loh ziekin, chawmcha chauh a um a, himahleh, thu ziek a chuh buoina ahim, sukgimtheihna ahim a hung tun tieng leh puk kit pai zieng sek hi ahi. 22 Hamlingnei laka kitheh chuh ziehi ahi: thu chuh he a, himahlele khawvel thil ngaihtuohna leh kithepna chun thu chuh a dep a, gah lo in a um sek hi. 23 Chun, lei pha chunga kitheh chuh ziehi ahi: thu chuh a bil a za a, a umzie hethiem zieng hi ahi; zie chuh a gahsuoh ngêi a, a bang a leh za, abang a leh sawmgup, abang a leh sawm thum in a pung sek hi,” a ti a.

Buhlem Tehkal thu

24 Isu’n tehkal thu dang a kawm u ah a gen kit a: “Van gam chuh mi khat a lo a buhchi pha theh chuh tawbang ahi. 25 Himahleh, zan kâl in melma chuh a hung a, buh laka chun buhlem chuh a theh a, a chieh mang kit ta a, 26 Tichun, buh chuh a hung keh a, a vui a hung um phatin, buhlem chule a hung lang ta a. 27 Chun, zie pa suokte chuh a hung u a, a kawmah, ‘Hepu, na lo ah chi pha na theh puoh a ahim? buhlem khu khawia pata hung um ahi leh?’ a tiu a. 28 Amah chun a kawm u ah, ‘Zie chuh melma’n a na hih ahi ta chu,’ a ti a. A suokte chun a kawmah, ‘Ahihleh, ziehaw chuh va lakhawm mai leng un na ki-awi die?’ a tiu a. 29 Amah chun, ‘Ki-awilo e; buhlem chuh bawt dawk leu chin, buh tak chuh bawttha khawm kha’n lau. 30 Buh ât hun tiengin kek khawm u heh; buh lak tieng chu leh buh âtte kawmah, Buhlem chuh lakhawm masa zet unla, hâltum dingin kankhawm un; buh tak vang chuh ka buh In ah thak lut un, na ti na’ng ka,’ tin” a ti a.

Ankam mu a Tehkal Thu

31 Chun, Isu’n tehkal thu dang a kawm u ah a gen kit a: “Van gam chuh ankam mu chang khat mi’n a lak a, a lo a theh tawbang chuh ahi. 32 Zie chuh, chi chengcheng laka neupen ahi a; himahlele, a hung khanlet tieng leh, thai kung dang sangin a lien zaw sek hi. Thing a hung hi sek a, khutichun, chung leng vachate a hung u a, a bâk lak haw a chun bu a sie sek uh ahi,” a ti a.

Chawl Tehkal Thu

33 Chun, Isu’n tehkal thu dang a kawm u ah a gen kit a: “Van gam chuh numei in chawl a lak a changbuong lawh thum laka a sawh a, a bawna a thawh masang cheng a bilh tawbang chuh ahi,” a ti a. 34 Ziehaw chengcheng chuh Isu’n tehkal thu’n mipite kawmah a gen a, tehkal thu lo in a kawm u ah bangmah a gen puoi, 35 Ziehaw chuh a hih a, thiemgau in: “Tehkal thu’n ka kam ka’ng ka ting, Lei kisiem tûng apat thil kisêl chuh gen dawk ing ka,” ti a a gen kha a hung guitun theihna dingin.

Buhlem Tehkal Thu Hilhchetna

36 Isu’n mipite chuh a nutsieh phetin, In ah a lut a; a sinsakte a kawmah a hung u a, “Lo a buhlem tehkal thu khah a umzie nei hilhchien in,” a tiu a. 37 Chun, Isu’n a dâwng a, “Chi pha thehpa chuh Mihiem Chapa hi ahi a; 38 lo chuh khawvel hi ahi a, chi pha haw chuh gam chate ahiu a; buh lêm haw chuh migilo chate ahiu a. 39 buhlem thehpa kha Diabol ahi; buh ât hun chuh khawvel beihna ding ahi a, buh-âthaw chuh vânsâwlchâkte ahiu ui. 40 Khutichun, buhlem haw chuh a lakkhawm u a meia a tih guol un; khawvel beih tieng leh zie tawbang chuh hung um ding ahi. 41 Mihiem Chapa hin a vânsâwlchâkte chuh sawl dawk intin, a gam apat mipi gitloh sakte leh, hih gilo chengcheng lakhawm un tin, 42 hâltuina mei achun paih lut un au; tak achun kah leh hagiel chuh um ina. 43 Zie tieng chuleh mi diktatte chuh a Pau gam achun ni guolin vak ta’n au. Kuole zakna dinga bil nei chun zau hen.

Go Phumgûk leh Tuikawkchang.

44 “Van gam chuh lo a go phum gûk tawbang chuh ahi; zie chuh mi khatin a mu a, a selgu a, a kipâk takin a chieh a, a neih chengcheng chuh a va khawng a, zie lo chuh a chaw ta a.

Tuikawkchang Thu a Tehkalna

45 “Chun, van gam chuh sumkawlvei mi khat tuikawk chang phatak hawlpa tawbang chuh ahi kit hi, 46 amah chun tuikawk chang man tamtak khat a mu a, tichun, a chieh a, a neih chengcheng a va khawng a, zie chuh a chaw ta a.

Lenkhang a Tehkalna

47 “Chun, van gam chuh lenkhang tuisuohgiet a seh a, chitin cheng chûn khawmna guol chuh ahi. 48 Zie chuh adim tieng leh a pang ah a kaidawk u a, a chuu a, a pha cheng chu bawm ah a khum u a, a sie vang chuh a paih dawk sek ui. 49 Khawvel beih tieng chu leh zie tawbang mah chun um in a: Vânsâwlchâkte chuh hung pawt untin, mi diktatte lak apat in mi gilote chuh la khawm untin, 50 hâltuina mei achun paih lut un au, zie tak achun kah leh hagiel chuh um ina,” a ti a.

Thil Thak leh Thil Lui

51 Isu mah in a kawm u ah, “Ziehaw chengcheng chuh na heu hi?” a ti a. Amau chun a kawmah, “He e,” a tiu a. 52 Chun, amah chun a kawm u ah, “Khuti ahih chun, dân thu zik van gam lampi sinsak a um ta chuh, In nei, a gobawm apat a thil thak leh thil lui suohdawk zing sek bang chuh ahi,” a ti a.

Nazareth a Isu Nawlha a Umna

53 Chun, hiti hi ahi a, Isu’n zie tehkal thu haw chuh a gen zawh phetin, tak apat chun a chieh ta a. 54 Chun, a umna khaw lam chu a tung a. A kikhawpna In hawu a chun amau haw a sinsak ta a, khutichun mak a sa ten tau a, “Zie pa hin zie chitna leh zie thilmak hih theihna haw hi hâwi apat a a muh ahi? 55 Zie pa hi thingkuong siempa chapa khah hilo ahim? a nu chuh Mari a tih u hi hilo ahim? A suohpihte le Jakob, Joseph, Simon leh Juda a tih hawu chuh hilo maw? 56 Zie pa hin khawi apat ale ziehaw cheng hi a muh ahi viel die?” a tiu a. 57 Tichun, a chung ah a lungkim ta puou a. Himahlele, Isu’n a kawm u ah, “Thiemgau chuh amah khuo lam leh amah In mai tih loh achun limbawl in a um sek hi,” a ti a. 58 Chun, a ginchak loh ziekun zie tak achun thilmak a hih tam puoi.

14

Baptist Johan Thihna

1 Zielai tak chun leng Herod chun Isu chanchin chuh a na za a, a sawntawlawite kawmah, 2 “Zie chuh Baptist Johan kha ahi chuh; a thisa hung tho kit ahi ta chu uo; zieziekchun zie thilhih theih na haw chun amah ah a sem ahi chu,” a ti a. 3 Herod chun a suohpihpa Philip zi Herodias ziekin Johan chuh a man a, a kan a, suongkul a a na khum ahi ta a. 4 Johan chun a kawmah, “Amah na kichênpih hi a thieng puoi,” a tih sak ziekin. 5 Herod in thah a nuom a, himahleh Juda mipite chuh a lau a, Johan chuh thiemgau a a seh ziekun. 6 Himahlele Herod pienni lawp ni chuh a hung tun phetin Herodias chanu. chuh a lai ah a lam a, Herod chuh a sukipak ta a. 7 Zieziekchun, a nget taphawt piek dingin kihâksiel in thu a tiem ta a. 8 Tichun amah chun a nu tîlguk in, “Taka hin kuong in Baptist Johan lu ei pie’n” a ti a. 9 Chun, leng chuh a lungkham ta a, himahlele a thutiem haw leh a ankuong umpih haw ziek chun piek ding thu a pie ta a. 10 Tichun, mi a sawl a, suongkul a Johan lu chuh a tan sak a. 11 Tichun, a luchang chuh kuong in a hun chawi u a, numei chapangnu kawm achun a pieu a, amah chun a nu kawma chun a chieh pih ta a. 12 Chun, Johan sinsakte chun a luong chuh a va lau a, a vui u a, chun, a chieh u a, Isu a va hilh tau a.

Mipi Sangnga Vakna

13 Chun, Isu’n zie chuh a zak phetin, tak apat chun kuong in gamgaw lam ah amah chauh in a chieh ta a. Himahlele, mipite chun a zak phet un, khawpihaw apat chun kenga chieh in a zui tau a. 14 Tichun, amah chuh lui pang a kaih phetin, mipi nasatak a mu a, a lungsiet ta mah mah a, a damloteu a sudam a. 15 Nitâk lam a hung hih phet chun a sinsakte a kawmah a hung u a, “Zie tak hi gamgaw mun ahi a, ni le a tâk ta ngâl in, mipi haw hi, khuo a nek ding a va kichâwk theihna dingun sawldawk in,” a tiu a. 16 Himahlele, Isu’n a kawm u ah, “A chieh dawk uh a ngai puoi, nang un nek ding pieu in,” a ti a. 17 Amau chun a kawmah, “ Zie hin chângthâk pêk nga leh nga nih chauh ka nei ui,” a tiu a. 18 Isu’n a kawm u ah, “Zie hin ka kawmah hun chawi u,” a ti a. 19 Tichun mipi haw chu hampa chunga chu dingin thu a pie a; chun, chângthâk pêk nga leh nga nih chu a la a, van lam en in, a vangsak a. A phelsuoh a, chângthâk haw chu sinsakte kawmah a pie a, chun, sinsakte chun mipi haw kawmah a pieu a. 20 Chun, a bawn un a neu a, a vah chiet tau a; a nekval u chule bawm sawm le nih a luok dim uh a. 21 A ne haw chuh, numei leh chapang simloh in, pating chiet le sangnga val ahiu hi.

Isu Tui chunga a Chiehna

22 Chun, mipi haw chuh a kikhen sak viel kâl in gâl khat lama na chieh masa dingin sinsakte chuh kuong in a sawl a. 23 Mipi cheng chuh a kikhen sak nung in, paucham dingin tângah amah mai in ava chieh chuom a. Nitâk lam a hung hih phetin, tak achun amah mai in a um ta a. 24 Zielai chun kuong chuh dîl lai lam ah chun gamla tak ah a um ta a, huih in a hilo lama a mût ziekin tui kinawk in a vawk viel viel ta a. 25 Chun, thingzangvak ding kuon in dîl chunga kenga chieh in a kawm lam uh a hun zuon a. 26 Sinsakte chun amah chuh dîl chunga kenga chieh a vak muh u chun, “Thadam ahi khu,” ti’n thavai a lau in a kiko zak tau a. 27 Himahlele, Isu’n amau haw chuh a na hopih zieng a, “Lungmuong takin um un; kei ka hi a puo, lau kiu in,” a ti a. 28 Chun, Peter in a dâwng a, “Lalpa nang na hih leh tui chunga na kawma hungna ding thu nei pieh,” a ti a. 29 Isu’n a dâwng a, “Hung ta leh,” a ti a. Khutichun, Peter chuh kuong apat chun a kum tha a, Isu kawm lam zuonin tui chunga chun keng in a chieh ta a. 30 Himahlele huih in tui a mut fawn a muh in a lau a; tum dingin a kisa ta a, “Lalpa, ei hukdam ah,” tin a kiko ta a. 31 Ziephet chun, Isu’n kintakin a bân zieng a, a tu a, a kawmah, “Aw mihiem taksanna tawm, bang dinga ginglah na hi?” a ti a. 32 Kuong a a chut gel phat u chun, huih chuh a hai ta a. 33 Tichun, kuong a umte chun, “Pathien Chapa na hi takzet na hi,” tin amah a chibai u a.

Genesaret a Damlo Sukdamna

34 Chun, dîl gâl langkhat a kaih phet u chun, Genesaret gam a tung tau a. 35 Zie muna umte chun Isu a het phet un, zie kiengvêla gam cheng achun mi a sawl viel u a, damlo chengcheng chuh Isu kawmah a hun pui u a. 36 A puon mawng bêk tham sak dingin a ngên u a; tichun, a tham taphawt chuh a hung dam zel tau a.

15

Pilepute Thuguichin

1 Zielai chun Jerusalem khuo apat in Pharisaite leh Danthuzikte Isu kawmah a hung u a, 2 “Bang zieka na sinsakte’n pilepute thuguichin a palthak sek uh a? Chângthâk a nek un a khut uh a sawp kha sek puou a,” a tiu a. 3 Isu’n a dâwng a a kawm u ah, “Nang haw’n le banga ti a na thuguichin ziek u a Pathien thupiek paltha sek? 4 Pathien in, ‘Na nu leh na pa limbawl ah, Kuole, a nu ahim, a pa ahim gensie chuh thi tei hen,’ a ti ngâl a. 5 Nang haw chun chuh, Kuole, a nu ahim a pa ahim kawmah, ‘Nei thanekna ding chuh Pathien kawma piek ahi tai,’ ti ta chun, 6 a nu leh a pa a limbawl dinguh ei puoi, na ti sek uh a. Tichun, na thuguichin ziek u chun Pathien thu chuh na pal mang tau ahi. 7 Nang haw, gukhah te haw, na chungchâng thuu Isai hin a na gen dik na hi. 8 ‘Ziete haw hin a mûk un ei limbawl un, A lunggil unla ei gamlat ngâl un. 9 Bang hitalele, a mi sinsaknau ah mihiem thupiek a a hilh ziekun, Ei ho sek u hi mawk mai ahi,’ ti’n,” a ti a, a dâwng a.

Mihiemte Subuok pên

10 Chun, Isu’n mipite chuh a sama, a kawm u ah. “Ngaiun la, a na hethiem un; 11 Kama lut chuh mihiem subuok ahi puoh a; kam apat a pawt chuh mihiem subuok ahi zawi,” a ti a. 12 Zie lai tak chun a sinsakte a hung u a a kawmah, “Pharisaite’n zie thu kha a het u a, a lungkim loh thuu kha na he?” a tiu a. 13 Amah chun, “Kung chengcheng ka Pa van a um phuh loh chuh bawh dawkin um ina. 14 Amau haw chuh limsak kiu in, mitdûk lamkai ahiu hi. Zieziekchun, mitdûk in mitdûk mah a puih chun kawkhûk ah kie khawm un au.” ti’n a dâwng a. 15 Chun. Peter in a kawmah, “Zie tehkal thu kigen chuh kei uh nei hilhchien ta,” ti’n a dâwng a. 16 Isu’n kawm u ah, “Nang haw’n le tuchan ahih hechien nailo na hiu maw? 17 Kama lut ta chuh gil ah a lut suk a, pawsuokna ah a pawt pai sek hi tih na he puou maw? 18 Kama pawt haw chu vang lunggil a hung pawt ahi a; zie mawng chun mihiem a subuok sek hi. 19 Lunggil a hin ngaihtuoh na gilo haw, tuolthahna haw, zawlsaihna haw, kideihchakna haw, gukchakna haw, kiheksietna haw, kigensietnahaw a hung pawt sek ngâl a. 20 Ziehaw chuh mihiemte subuok pên ahi; himahleh, khut sawp lo a an nêk hin chuh mi a subuok puoi,” a ti a.

Numeinu Ginna

21 Khutichun, Isu chuh tak apat chun a chiehdawk a, Tura leh Sidon biel ah a chieh ta a. 22 Chun, ngaitie, zie gama kipat chun Kanaan numei khat a hung a “Lalpa, David chapa, ei lungsiet in, ka chanu thitha’n a man chak kêi a,” tin a kiko a. 23 Isu chun la kam khat chan le a dâwng puoh a. Tichun, a sinsakte a kawmah a hung u a, “I nung u ah a kiko a kiko ngâl a, sawl mang mai ta’n la,” tin a hung ngên u a. 24 Isu chun la, “Israel nam laka belam mang kawm tihloh achun sawl, ka hi puoi,” ti’n a dâwng a. 25 Himahlele, numei chuh a hung a, “Lalpa, ei panpih tang uo,” ti’n a chibai a. 26 Isu’n a kawmah, “Chate chângthâk lâksak a, ui haw kawma piek a kilawm puoi,” a ti a, a dâwng a. 27 Amah chun, “Lalpa. hih vang chu ahi a, himahlele, uichate’n le a puu dawhkhâng nuoia chângthâk nên kie a ne sek uh hilo ahim?” a ti a. 28 Ziephet chun, Isu chun a kawmah, “Numei, na taksan a nasai; na ut guol takin na chungah um hen,” a ti a, a dâwng a. Tichun, a chanu chuh zie a kipat chun a na dam ta a.

Isu’n Mi Tampi a Sukdamna

29 Chun, Isu tak apat chuh a chieh a, Galili dîl kieng a hung tung a; chun. tânga chun a chieh to a, tak achun a chu ta a. 30 Chun, mipi nasatak a kawmah a hung u a, kêngbâite, mitdûkte, pautheilote, piengsuol haw a kawmah a hung u a, a keng bul ah a kawih u a, tichun, a na hihdam ta a. 31 Khutichun, mipite chun, pautheilote chuh hung pau a, piensuolte chuh hung pha a, kêngbâite chuh kenga chieh a, mitdûkte chuh khuo hun mu thei ta chuh a muh un, mak a sa ten u a; tichun, Israel te Pathien chuh a pakcha tau a.

Mipi Sangli Vakna

32 Chun, Isu’n a sinsakte chuh a sama, “Mipi haw hi tun ni thum ka kawmah a um tau a, nek ding bangmah a neih loh ziekun ka lungsiet mah mah mai hi; an ngawlin ka sawl kit nuom puoi, khutilochun, lamkal ah sawlsam vei kha’n au,” a ti a. 33 Ziephet chun, sinsakte chun a kawmah, “ Mipi hiti zozai vahna kham ding hi chângthâk zie gamgaw ahin khawia kimu ding ahim?” a tiu a. 34 Chun, Isu’n a kawm u ah, “Chângthâk bang zata na neih uh?” a ti a. Amau haw chun a kawmah, “Pêk sagih, ngasi tawmcha tawh,” a tiu a. 35 Isu chun mipite chuh tuola chu dingin thu a pie a. 36 Tichun chângthâk pêk sagih leh ngasi haw chu a la a, kipahthu a gen a; a phelsuoh a, sinsakte kawmah a pie a, chun, sinsakte chun mipite kawmah a pieu a. 37 Tichun, a bawn un a neu a, a vah suok kêi tau a: a nek mawk u chu le bawm sagih a luok dim u a. 38 A ne haw chu numei leh chapang simloh in pating chiet le sangli ahiu hi. 39 Chun, Isu’n mipite chuh a sawl dawk nung in, kuong ah a lut a, Magadan gam ah a chieh ta a.

16

Thilmak hih Ngêkna

1 Chun, Pharisaite leh Sadukaite a hung u a, amah zedapna’n van apat a melchikna amau haw etsak dingin a ngên u a. 2 Himahlele Isu chun a kawm u ah, “Nisa a tum ding phat a van a hung san tieng leh, ‘Khuo pha ding ahi, kâwlmawng a san hi’ na ti sek uh a. 3 Chuleh, zingkal a hih tieng leh, ‘Tuni’n khuo sie ding ahi, kâwlmawng a san a, a thim hi,’ na ti sek ui. Van umchan na hechien thiem ngâl u a, himahlele hun melchikna haw chuh na he chien thei puou. 4 Khangthak gilo tak leh zawlsaih hatte chun melchikna a hawl u a, himahlele Jona melchikna ngâllo chuh a kawm u ah melchikna himhim piek hi puo’n a,” a ti a, a dâwng a. Khutichun, amau haw chuh a taihsan a, a chieh ta a.

Pharisaite leh Sadukaite Chawl

5 Chun, sinsakte chuh dîl gâl langkhat a kaih phet u chun, chângthâk a na keng hengilh u a. 6 Isu’n a kawm u ah, “Pharisaite leh Sadukaite chawl laka chun kivêng unla, chingthei un,” a ti a. 7 Amau haw chu la, “Chângthâk I keng hiel puou hi,” tin a kingaihtuoh u a. 8 Isu’n zie chu a he a, “Nang haw taksan tawmte haw, bang zieka chângthâk na neih loh ziek uh a nangmau haw kingaihtuoh na hiu hi? Tuhin le na lungthim un na he nai diek puou maw? 9 Mi sangnga dinga chângthâk pêk nga ka hehphel leh, na palbawm luok dim zat u kha na hezing puou maw? 10 Mi sangli dinga chângthâk pêk sagih leh na bawm luok dim zat uh kha la? 11 Chângthâk thu na kawm u ah ka gen puoi tih bangti dana na het loh u a? Pharisaite leh Sadukaite chawl laka chun chingthei un,” a ti a. 12 Ziephet chun, chawl, chângthâk laka kithak sek apat a chingthei dingin a hilh puoh a; Pharisaite leh Sadukaite Sinsakna laka chingthei dingin hilh ahiu hi tih a he dawk tau a.

Peter in Isu hihna a Phuonna

13 Chun, Isu chuh Philippi, Kaisari biel chuh a hung tun in, a sinsakte kawmah, “Mi haw’n Mihiem Chapa hi kuo ahi a tiu hi?” ti’n a dâwng a. 14 Amau chun, “A bangin, Baptist Johan ahi,” a tiu a, “Abang in, Elijah ahi,” a tiu a; “Abang in, Jeremia ahim thiemgau kuo ahim khat ahi, a tiu hi,” a tiu a. 15 Amah chun a kawm u ah, “A hih leh, nangun kuo ahi nei tiu hi?” a ti a. 16 Ziephet chun, Simon Peter in a dâwng a, “Krista, Pathien Hing Chapa chuh na hi,” a ti a. 17 Chun, Isu’n a kawmah, “Simon Bar Jonah, na hampha ahi; phehlevo leh thisan in a hun hetsak ahi puoh a, ka Pa van a um in a hun hetsak ahi zawi. 18 Chun, nang Peter, Peter na hi tih ka hun hilh na hi; zie suongpi chunga hin ka sapchuomte sa dawk ing ka ting, mithi khuo kulh kawtkhakhaw chun zie chuh nek zo puo’n au 19 Van gam chabi haw chuh hun pie’ng ka ting, lei chungah bang hitaleh na kân ta chuh van a kân hi’n tin, lei chungah bang hitaleh na phel ta chuh van a le phel hi’n a,” a ti a, a dâwng a. 20 Zie zawh chun Isu chun a sinsakte chuh Krista ahi tih kuomah hetsak lo dingin a kham chakkêi a.

Isu’n a Thihna ding a Genna

21 Zie a kipat chun Isu’n Jerusalem khuo a a chieh dân ding haw, upate, Thiempuliente leh Danthuzikte laka thil tamtak a thuok zie ding haw, thah a a umzie ding haw, ni thum ni a kaihthawha a um zie ding haw chuh a sinsakte a hetsak pan ta a. 22 Chun, Peter chun amah chuh a puichuom a, “Lalpa, Pathien in hun lungsiet hen; ziehaw chu na chungah tung hiel puo’n a,” tin a hilh ta a. 23 Isu chuh a kiheia, Peter kawm achun, “Setan, ka nung ah hung ah, keia dingin pukna na hi. Pathien thil haw ngaihtuoh lo in, mihiem thil haw na ngaihtuoh zaw ahi hi,” a ti a 24 Chun, Isu’n a sinsakte kawmah, “Kuon le ei zuih a nawp leh, amah gimtheih khawksa lo in, a kross pu’n ei zui hen. 25 Kuole a hinna hukbit nuom ta chun chan intin; kuole, kei zieka hinna chan tan, hukhing ina. 26 Mi’n khawvel pumpi hi nei hen la, a hinna chan ngâl henla hileh, amah dingin banga phachuom ding? Ahihloh leh, mi’n a hinna sika banga a piek ding? 27 Mihiem Chapa hi a vânsâwlchâkte tawh, a pa lopina a kivan a hung ding ahi ngâl a. Zie tieng chuleh vang, mitin a thilhih bang zel un din chiet ina. 28 Tihtakzet a ka hilh na hiu hi, taka ding khenkhat haw hi, mihiem Chapa lenga hung a muh masangsieh uh thihna tep lo ding a um ui,” a ti a.

17

Mel Lamdanna Tâng

1 Chun, ni gup zawh chun Isu’n Peter te, Jakob te leh a suohpih Johan te chuh a pui a, a chuom in tâng sang tak ah a chieh toh pih ta a. 2 A et zing lai u chun, a mel put zie chuh a hung lamdang ta a; a mai chuh ni guolin a hung vak a, a silhlechente chuh êng guolin a hung vam ta a. 3 Chun, ngaitie, Mosi leh Elijah chuh amah tawh kiho in a kawm u ah a kilâk u a. 4 Ziephet chun, Peter in Isu kawmah, “Lalpa, ei u dingin taka um hi a phai; na ut leh bâwkcha thum khawh ka ting; nang dingin khat, Mosi dingin khat, Elijah dingin khat,” a ti a. 5 A gen lai takin, ngaitie, meitang vam takin amau haw chuh a hun lieh ta a, chun, ngaitie, meitang apat chun aw gi khatin, “Ziehi ka chapa deih tak, ka lungkimna mah mah chuh ahi; amah thu ngai un,” a ti a. 6 Chun, sinsakte chun zie chuh a het un, maia tuol si’n a khupbawk u a, a lau mah mah tau a. 7 Chun, Isu’n amau chuh a hun tham a, “Tho unla, lau kiu,” a ti a. 8 Tichun, a dâk dawk uh a, Isu tihloh chuh kuomah a mu ta puou a. 9 Chun, tâng apat chuh a hung suk lai un, Isu’n a kawm u ah, “Mihiem chapa hi mithi lak apat a thawhkit masang sieh na thil muh u kha kuomah hilh kiu,” tin thu a pie a. 10 Ziephet chun, a sinsakte chun a kawmah, “Danthuzikte’n, Elijah a hung masa ding ahi, a tih u hi bangti dana a tih uh ahi die aw?” ti’n a dawng uh a. 11 Chun. amah chun, “Elijah chuh a hung ding him ahii, bangakai le siem pha’n a. 12 Himahlele, ka hilh na hiu hi, Elijah chuh a hungsa him ahi tai, a hin, amah chuh a na he puou a, a nawp nawp un a na bawl tau hi. Khutibang mah chun Mihiem Chapa hin le a laku ah hun thuok ding ahi,” ti’n a dâwng a. 13 Ziephet chun, sinsakte chun, Baptist Johan thu a kawm u ah a gen ahi tih a hun he tau a.

Naupang Thitha mat Sukdamna

14 Chun, mipite kawm a hung tun kit phet in, mi khat a kawmah a hung a, a ângah khupdin in, 15 “Lalpa, ka chapa khu lungsiet in, Phungzawlvei ahi a, a gim mah mah a, tamtak vei mei ah a puk lut sek a, tui ale tamtak vei a puk lut tai. 16 Na sinsakte kawmah ka hun pui a, a hihdam thei ngâl puou a,” a ti a. 17 Chun, Isu’n, “Aw, khangthak, taksan nei lo a genhakte haw, bang chana na kawm u a ka um a, bang chana ka hun hungaih ding? Naupang chuh taka hin ka kawmah hun pui un,” a ti a. 18 Tichun, Isu’n thitha chuh a gai a, a sung apat chuh a pawt ta a; zie dâkkâl akipat chun naupang chuh a na dam ta a. 19 Zie nung chun sinsakte chuh Isu kawmah a chuom in a hung u a, “Bangati a kei un delh dawk thei lo ka hiu hi?” a tiu a. 20 Isu’n a dâwng a, “Zie tawbang hi pauchamna leh anngawlhna ngâllo in a hih thei puoi.” 21 “Tihtakzet a ka hilh na hiu hi, ankam mu chang khat tieh taksanna na neih u chun, zie tâng kawma hin, ‘Zie tak apat hih zie khun va kichawn ah,’ tiu in na tin uh, kichawn zieng ina; tichun, nang u dingin hihtheihloh bangmah um puo’n a,” a ti a.

Isu’n a Thihna ding Thu a Genna

22 Chun, sinsakte chuh Galili gama a hung kikhawp lai un, Isu’n a kawm u ah, “Mihiem Chapa hi mihiemte khuta matsak a hung um ding ahi; tichun 23 that untin, a ni thum ni chu leh kaihthawh in um ina,” a ti a. Ziephet chun, sinsakte chuh a lungkham mah mah tau a.

Pathien Ho-In Sieh Piekna

24 Chun, Isu leh a sinsakte chuh Kapernaum a hung tun un. Pathien Ho-In a dangka dawlte chuh Peter kawmah a hung u a, “Na sinsakpau inle Ho-In dangka chu a pie sek puo maw?” a tiu a. 25 Peter chun, “Pie sek e,” a ti a. Peter chuh In sunga a va lut phetin Isu’n a kawmah, “Simon, bangti’n na ngai a? Lei a lengte’n sieh ahim, sum neih man ahim chu kuo kawmah a la sek u? a chateu kawm ahi, mi dang kawmah?” ti’n a na dâwng masa a. 26 Peter chun a dâwng a, “Mi dang apat in,” a tih phetin Isu’n a kawmah, “Khuti a hih chun chate chuh a awl hi ding ahiu chu. 27 Himahleh, zie mipi haw hi suklungkim loh I nuom puou hi. Tichun, nang dîl ah va chieh inla, ngakuoi khâi in la, nga hung pawt masapen chuh man in, chun, a kha na keu tieng leh dangka nih mu zieng in la; zie chuh la’n la, kei leh nanga dingin a kawm u ah pie’n,” a ti a.

18

Kuo a Lopi pên die?

1 Zielai tak chun sinsakte chuh Isu kawmah a hung u a, “Van gam ah kuo a lopipen die le?” a tiu a. 2 Chun, Isu’n chapang neucha khat a kawmah a sama, a laku ah a din sak a, 3 Tihtakzet a ka hilh na hiu hi, Na kihei u a, chapang neucha bang na hung hih loh u chun, van gam ah lut hiel puo’n lau. 4 Khutichun, kuole zie chapang neucha guola kingainiem ta chuh zie ngêi chuh van gama chun lopipen ina. 5 Chun, kuole ka min zieka zie tawbang chapang neucha lawp ta chuh kei ei lawp hi’n a.

Gitloh Bawl dinga Thepna

6 “Amahvang chuh kuole, zie ka thu gingcha mi neucha cha haw laka khat le supuk ta chuh, a ngâwng u ah suong sumhei lien tak awh sak in tuisuohgiet thuk tak sung ah kikhe lut leh amah dingin phazaw khawp puo’n a. 7 Pûkna haw ziekin khawvel chung a gik hi! pûkna haw chuh hung um ding vang a hin; himahlele pûkna umsaktu chung chuh a gik hi! 8 “Chun, na khut in ahim, na keng in ahim a hun sukpûk chun, tan inla, paihmang kei ah; khut nih nei ahim, keng nih nei ahim a kumkhuo meia paih sang chun, piensuol in ahim, kêngbâi ahim a hinna a lut chuh nang dingin a pha zawi. 9 Chuleh, na mitin a hun sukpuk chun kheuhdawk inla paihmang kei ah; mit langnih nei a Gehen meia paih sang chun, mit langkhat nei a hinna a lut chuh nang dingin a pha zawi,

Belam Mang Tehkalthu

10 “Zie mi neucha haw laka khat hile musit lo dingin chingthei un; 11 A vânsâwlchâkteu in van ah ka Pa van a um mel chuh a mu zing sek ui tih ka hilh na hiu hi. 12 “Bangti’n na ngai u? Mi kuon le belam za nei hen la, a lak uh a khat vakmang hen la hi leh, sawmkuo leh kuote chuh nusieh in tângah va chieh in, a mang chuh hawl lo ding ahim? 13 Tihtakzet a ka hilh na hiu hi. a va muh kit khâk chun, sawmkuo leh kuo vak mang lo haw sang chun a chungah kipâk zaw’n a. 14 Zie tawbang mah chun zie mi neucha cha haw laka khat manthai hile na pau van a um deihlam ahi puoi.

Thilhihkhelh Thu

15 “Chun, na suohpih in na chungah thil hihkhiel hen la hileh, chieh inla, amah leh nang mai het ah a gitlohna achun hilh in; na thu a ngaih leh na suohpih chuh na zawh hi’n a. 16 Himahleh, na thu a ngaihnawp loh le vang chuh mi dang khat ahim nih ahim, pui in la, khutia chuh thil cheng chuh hetpih nih ahim. thum ahim kama hih det a hih theih na’n. 17 Chun, amau haw thu le a ngaih loh zel leh, sapchuomte kawmah tun ah; chun sapchuom thu le a ngaih loh chun, amah chuh nang dingin Jentel leh siehdawl bang hi hen.

Phalna leh Khapna Thu

18 “Lei chungah bang hitaleh na kân tâk u chuh van ah kân hi’n tin, lei chungah bang hitaleh na phel tâk u chuh van a le phel hi’n a. 19 “Tihtakzet a ka hilh na hiu hi, lei chunga hin na laku a mi nih a thil ngetna thuu a a kithuguol u chun. ka Pa van a um in amau dingin hih sak ina. 20 Mi nih ahim, thum ahim ka min a a kikhawpna tak u achun a laku ah ka tel sek hi.” a ti a.

Ngaihdamna Thu a Tehkalna

21 Zie chun, Peter a hunga a kawmah, “Lalpa, ka suohpih in ka chungah bang zat vei thil hihkhiel leh ka ngaihdam ding ahi die? sagih vei tiengin ahi die?” a ti a. 22 Isu’n kawmah, “Sagih vei tiengin,” ka ti puo’n “Sagih vei mun sawmsagih tiengin, ka hung ti zaw ahi. 23 Zieziekchun, van gam chuh leng kuo ahim, a suokte kawma sum chanchin hih dik guo chu tawh tehkal ahi. 24 Tichun. a hun hih dik guot phet chun mi khat talent singkhat ba, a kawmah a hun pui u a. 25 Chun, piek ding a neih loh ziekin a pu chun amah tawh, a zi tawh a chate cheng tawh a neih chengcheng tawh khawt a, dit ding thu a pie a. 26 Khutichun. suok chun, ‘Hepu, ka chung ah zahngai tadih inla, a bawnin hun din vek ing ka,’ ti’n a masang ah a khupbawk a. 27 Tichun, zie suokpa pu chun a lungsiet mah mah ta a, a suokpa chuh a thahdawk a, a bat chuh a ngaidam ta a. 28 Himahlele, zie suokpa chuh a chiehdawk a; a suok chanpihte laka khat a makhai zakhat ba a mu a, a kawmah, ‘Na bat kha nei pieh,’ tin a gawl in a man a. 29 Khutichun, a suok chanpih pa chuh khupbawk in ‘Ei hungaih tadih inla hun pie nang ka,’ ti’n hah nget in a ngên a. 30 Himahlele, a nuom puoh a, tichun, a pui a, a bat a chaih masang sieh chu suongkul ah a khum ta a. 31 Khutichun, a suok chanpihte chun a thilhih chu a muh un, a lung-awilo mah mah u a, a thilhih cheng chu a puu a va hilh tau a. 32 Ziephet chun a puu chun, amah chuh a sama, a kawmah, ‘Suok gilo, na hah tau ziekin na bat chengcheng kha ka hun ngaihdam na hi a; 33 nang ka hun lungsiet guol a kha nang inle na suok chanpihte na lungsiet ding hilo maw?’ a ti a. 34 Khutichun a pu chuh a lungna ta a, a bat chengcheng a chaih masang sieh chuh mi sugimtheite kawmah a pie ta a. 35 Mitin in na lunggil tak u a na suohpihteu na ngaihdam loh u chun, ka pa van a um inle khutibang tak chun na chungu ah hih ina,” a ti a.

19

Kimâkna Thu a Sinsakna

19 Chun, tihi ahi a, Isu’n zie thu haw chuh a gen zawh phetin, Galili gam apat a pawt a, Jordan luigal a Judia gam achun a va chieh ta a. 2 Mipi nasatak in amah chuh a zui u a, tichun amau haw chuh a na sudam ta a. 3 Chun, Pharisaite khenkhat a kawmah a hung u a, a mah zedap na’n “Bang ziek hita leh mi’n a zi mâk a thieng dem?” a tiu a. 4 Isu chun, “Atûng apat a amau haw siempa khan numei leh pasal a siem a, 5 ‘Zieziek tak hin pasal in a nu leh a pa nusieh in a zi pawm intin; tichun, a nih u chun sakhat hung hi ta’n au,’ a tii tih na sim puou hi? 6 Khutichun, nih ahi ta puou a, pumkhat ahi zaw tau hi. Zieziekchun, Pathien in a gawp sa chuh mihiem in khen kiheh,” a ti a, a dâwng a. 7 Amau chun a kawmah, “Bang zieka Mosi’n kimâkna lehkha a piek a, mâk ding thu a piek a?” a tiu a. 8 Isu’n a kawm u ah, “Mosi’n na lung khauh ziekuh ahi na ziteu mâk ding ahun tih sak; himahlele a tûngin khutichu a na hi puoi. Ken chuh ka hilh na hiu hi, 9 ‘Kuole zawlsaih ziek hilo a, a zi maa midang kichênpih ta chuh, zawlsai ahii; mâksa kichênpih chule zawlsai ahi tih ka hun hilh na hiu hi,” a ti a. 10 A sinsakte chun a kawmah, “Zi chungchanga pasal thu khutichu a hih chun kichên hi a pha puoi,” a tiu a. 11 Amah chun la a kawm u ah, “Zie thu chuh mi tapoh in a pawm thei puou hi, a piekte mai tih loh chun. 12 Mikiget, a nu sung apat a zi nei theilo dinga pieng him le a um u a, mihiem khuta kiget le a um u a; van gam zieka mikiget a kibawl kawm le a um ui. Kuole, a pawm thei ta’n kipawm u hen,” a ti a.

Isu’n Naupangte a Vangsakna

13 Zie lai chun, a chung u a a khut nga a, a paucham sak dingin chapang neucha cha ahun pui u a; chun sinsakte chun a na gai u a. 14 Isu chun la, “Chapang neucha cha chuh ka kawmah hun sawl unla, haw kiu in; van gam chuh ziehaw tawbanga ding hi ahii,” a ti a. 15 Chun, a chungu ah a khut a nga a, tak apat chuh a chieh mang ta a.

Mi Hausa Tangval

16 Chun, mi khat a kawmah a hung a, “Sinsakpa, kumsawt hinna ka neih theihna dingin thilpha bang ka hih die?” a ti a. 17 Isu’n a kawmah, “Thilpha thu bang dinga ei dawng? Mi pha chuh khat mai a um; a bang hita leh, hinna a lut na nawp chun thupiek haw chuh zawp ah,” a ti a. 18 Amah chun a kawmah, “A hawipen hi em?” a ti a. Chun Isu’n, “Tuol na thah ding ei puoi; Zawl na saih ding ei puoi; Na gucha ding ei puoi, Zuou thu’n mi na hêk ding ei puoi; 19 Na nu leh na pa limbawl in, tih haw leh, Nangmah na kihehpih guolin na vengte le na hehpih ding ahi, tih hi,” a ti a. 20 Tangval chun a kawmah, “Zie thu haw chengcheng chuh ka neu apat ka zawp sek hi; a dang bang ka hih nalai die?” a ti a. 21 Isu’n a kawmah, “Pha bukima um na nawp leh chieh in la, na neih chuh khawng inla, neilahte kawmah pie’n khutichun, van ah go nei in la; chun, hung inla, ei zui ah,” a ti a. 22 Tangval chun zie thu chuh a het phetin, lungkham takin a chieh mang ta a, sum tamtak nei mi a hih ziekin. 23 Ziephet chun, Isu’n sinsakte kawm achun, “Tihtakzet a ka hilh na hiu hi, mi neizo a dingin van gama lut chuh haksa tak ahi. 24 Ka hilh kit na hiu hi, mi neizo Pathien gama a lut sangin, sangawngsau pin bil a a lut pai a baihlam zawi,” a ti a. 25 Chun, sinsakte chun zie chuh a zak u chun mak a sa mah mah u a, “kuo a hukdam hi thei ding?” a tiu a. 26 Chun, Isu’n amau haw chuh a en a, a kawm u ah, “Zie chuh mihiem dingin hih guol ahi puoi; Pathien dingin chuh bangakai hih theih ahii” a ti a. 27 Chun, Peter in a kawmah, “Ngaitie, kei un bangakai nusieh in ka hun zui tau hi; banga ka muh ding u leh?” ti’n a dâwng a. 28 Isu’n a kawmah, “Tihtakzet a ka hilh na hiu hi, Siemthakna achun Mihiem Chapa hi a lopina chutphah a chut tieng leh nanguh ei zui haw hi, Israel nam sawm leh nam nih te vaihawm sak in, Lalchutphah sawm le nih ah hung chuh ding na hiu hi. 29 Kuole, suohpihte ahim, suohpihnute ahim, nu ahim, chate ahim, gam ahim, ka min zieka taihsan ta chun aleh za muu untin, kumsawt a hinna hung chang un au. 30 Himahlele, mi tamtak, a masapen a umte chuh nunung pên in hung um untin; nunung pên a umte chule masapen in hung um un au, a ti a.

20

Grep Huon a Nasemte

1 “Van gam chuh mi khat, a grep huon a nasemte guoi dinga zingpi a pawtdawk pa bang chuh ahi. 2 Chun, amah chun, nasemhaw chu tawh ni khata makhai lawh dinga a kiho zawh phat u chun, a grep huon achun a sawl ta a. 3 Chun, vaihamsang velin a va pawt kit a, mi dang dawl muna ding maimai haw chuh a mu a; a kawm u ah, 4 ‘Nang haw le grep huon ah va chieh tau u, a kilawm dân dân hun pie nang ka,’ a ti a. 5 Tichun, a chieh tau a. Chun, sun an nek phat vel leh, vaimim huon phat velin a va pawtdawk kit a, khutibang mah chun a hih kit a. 6 Chun, changkhat nitâk an huon phat velin a va pawt kit a, mi dang le a mu a, a kawm u ah, ‘Bangati a ti a hi ni changtuma ding maimai na hiu hi?’ a ti a. 7 Amau haw chun a kawmah, ‘Kuoma’n ei gawih loh ziekin ahi,’ a tiu a. Amah chun a kawm u ah, ‘Nang haw le grep huon ah va chieh tau u,’ a ti a. 8 “Tichun, nitâk a hung hih phetin, grep huon neipa chun a sum vawp pa kawmah, ‘Nasemte kha sam inla, amasapen a pat in a nunung pên gei in a lawh uh pie’n,’ a ti a. 9 Khutichun, changkhat nitâk an huon phat vela a gawih te a hung phet u chun makhai a mu chiet u a. 10 Chun, a masapente chuh a hung phet u chun, muh tam deuh a kigingchau a; himahlele, amau haw chun le makhai mah a mu chiet u a. 11 Tichun, a kilak phet un, a in neipa chunga chun a phunchiek tau a, 12 ‘Zie a nunga te hin dâkkâl khat mai a sem u a, nangin keihaw, nisa satlai cheng thuok a semte hi tawh nei kibat sak mai hih,’ a tiu a. 13 Amah chun la, a laku a mi khat kawmah, ‘Guolpa, na chungah bangmah ka hihkhiel dang e! makhai lawh dinga kiho I hi puo? 14 Nangmah a kha la’n la, chieh mai ah, nang ka hun piek zat chuh a nunung pên te kawma hin le ka pie nuom hi. 15 Keia chuh ka nawp nawp ka lawh theih hilo ahim, a hih loh leh, kei ka phat ziekin nangin na mitthîp ahim?’ a ti a, a dâwng a. 16 Khutibang chun, anunung pên te le amasapen hung hi’nau, amasapente chu le anunung pên hung hi’nau,” a ti a.

A Thihna ding a Gen Thumveina

17 Chun, Isu Jerusalem a a va chieh toh lai in, sinsak sawmlenihte chu a puichuom a, lampi achun a kawm u ah, 18 “Ngaitiem u, Jerusalem a chieh to ding I hiu ui, Mihiem Chapa hi Thiempuliente leh Danthuzikte khuta matsak a um ding ahi; tichun, amau chun a chungah thi dingin thu hihpuk untin, 19 nuihsan a mat ding leh, zêp ding leh kross a khetdên ding in Jentel te kawmah pie’n au; chun, ni thum ni, leh kaihthawh in um ina,” a ti a.

Nu Ngetna Chuh

20 Zie lai chun Zebedai zi chuh a chapate hun pui in Isu kawmah a hung u a, a masang ah a khupdin a, thil banga him a ngên a. 21 Isu chun a kawmah, “Bang ahim na deih?” a ti a. Amah chun a kawmah, “Zie ka chapate nih hi na gam ah, na changlama khat, na veilam a khat a chut theihna dingun thu pie’n,” a ti a. 22 Isu chun la, “Na nget u chuh na he puou hi, ka khawn dâwn ding hi na dâwn thei ding um?” ti’n a dâwng a. Amau chun, “Thei e” a tiu a. 23 Amah chun a kawm u ah, “Ka khawn dâwn ding chuh dâwn thei un lau, himahleh, ka changlam leh ka veilam a chut ding thu chuh kei piek ding ahi puoh a, ka pa guot sakte ding hi zaw’n a,” a ti a. 24 Khutichun, sawm dangte chun zie chuh a na het phet un, unau nih te chung achun a lungkim ta puou a. 25 Isu chun amau haw chuh a sama, “Jentel te chunga vaihawmte chuh a chungu ah a lal mah mah sek u a, a milien teu chun a chungu ah thu a nei mah mah ui tih na heu hi. 26 Himahlele, nang haw laka vang khutichu hi puo’n a, kuole, na laku a milien hih nuom ta chuh, nanguh hun zen a pang zaw ding ahi: 27 kuole na lak u a masapen hih nuom te chuh na sawntawlawi u a a um ding ahi. 28 Mihiem Chapa hi zen a um dinga hung ahi puoh a, mi zen ding leh, mi tamtak tatna dinga a hinna pie dinga hung a hih guol hin,” a ti a.

Mitdûk Nih a Sukdamna

29 Chun, Isu leh a sinsakte Jerikoh khuo a pata a pawt lai un, mipi nasatak in a zui u a. 30 Chun, mitdûk nih lam panga chu chun Isu a hung hi tih a het phet un, “Lalpa, David chapa, kei uh ei lungsiet ah,” ti’n a kiko u a. 31 Chun, mipite chun, Thip un, ti’n a gai u a; himahlele, amau chun, “Lalpa, David chapa, kei uh ei lungsiet ah,” ti’n a kiko ngeih zaw deuh u a. 32 Chun, Isu a dinga amau chuh a sama, “Na chungu ah bangtia ka hih a na deih uh?” a ti a. 33 Amau chun a kawmah, “Lalpa, mit vak ka deih ui,” a tiu a. 34 Ziephet chun, Isu’n a lungsiet mah mah a, a mit uh a khawih a, tichun, a hun mu thei tau a, amah chuh a zui tau a.

21

Zotu a Jerusalem a Lutna

1 Chun, Isu leh a sinsakte chuh Jerusalem khuo a tun ding kuon un, Bethphage khuo, olive tâng chuh a tung uh a. Taka chun Isu’n a sinsakte nih a sawl a a kawm u ah, 2 “Na ma zawn uh a khuo a khun va chieh unla, sabiltung kihên, a kienga a no um tawh mu zieng un na tin; phel unla, ka kawmah hun kai un. 3 Chun, kuon le na kawm u ah bang gen leu le, ‘Lalpa’n a deih ahi.’ tiu in na tin uh; tichun, amah chun hun sawl zieng ina,” a ti a. 4 Zie chuh thiemgau in: “Entie, na leng chuh, nunnem takin, sabiltung chungah sabiltungno chung ngeia chu’n; 5 Na kawma hung ding ahi, ti’n, Zion chanu chuh hilh ah.” ti a thiemgau kama a gen khah a hung guitun theihna dinga hung um ahi tai. 6 Tichun, sinsakte chuh a va chieh u a, Isu’n a kawm u a thu a piek bang chun a bawl u a, 7 sabiltung leh a no chuh a hun kai u a; a chung achun a puon uh a phah u a, amah chuh a chut sak tau a. 8 Tichun, mipi laka a tamzaw chun lampi achun a puon uh a phah u a, a dangin thing theubawk a sat u a, lampi ah a phah u a. 9 Chun, mipi, a malam a chiehte leh a nunga zuite chun: “David chapa kawmah, Hosanna! Lalpa min a hung chuh a hamphai! Chungnung pên a khun Hosanna!” ti’n a kiko u a. 10 Chun, Isu chuh Jerusalem khuo a hung lut phetin, a khuozâng un: “Zie pa hi kuo ahim?” ti’n a phu mul mul zieng tau a. 11 Mipite chun, “Zie pa hi thiemgau Isu, Galili gama Nazareth khuo a um chuh ahi.” a tiu a.

Pathien Ho-In Sukthienna

12 Chun, Isu Pathien Ho-In achun a va lut a, Ho-In a thil zuokte leh chawte chengcheng chuh a delh dawk a, dangka thengte dawhkhâng leh, vakhu zuokte chutphah haw chule a sawtpaih sak a, a kawm u ah, 13 “Ka In chuh, pauchamna In ti’n au tih zik ahi ngâla; himahleh, nanghaw’n la suommangte kisêlna In in na siem zawu in,” a ti a. 14 Chun, Ho-In achun mitdûkte leh kêngbâite a kawmah a hung u a, amau haw chuh a na sudam a. 15 Himahlele, Thiempuliente leh Danthuzikte chun a thilmak hih haw leh, Ho-In a, “David chapa, Hosanna!” ti a chapang kikote chuh a muh un a lungkim lo mah mah tau a, a kawmah, 16 “Ziehaw thugen hi na za?” a tiu a. Isu’n a kawm u ah, “Za e, ‘Nausente leh nawichep laite kama pawt chun pahchakna na hih bukim tai,’ tih hi na sim kha puou hi?” a ti a. 17 Tichun, amau haw chuh a taihsan a, khawpi apat chuh a pawt a, Bethani ah a chieh a, tak achun a giek ta a.

Isu’n Theipi kung a Gâusapna

18 Chun, zingkala khawpi lam a zawt kit phetin, a gil a hung kiel ta a. 19 Lam panga chun theipi kung khat a mu a, a va zuon a, a nah ngâllo chuh bangmah a mu puoh a. Khutichun, thing kawm achun, “Kumkhuo’n gah ta kih,” a ti a. Tichun, theipi kung chuh a nâng zieng ta a. 20 Chun, sinsakte chun zie chuh a. muh phet un, “Bangtia zie theipi hi nâng zieng ahi ta?” tin mak a sa ten tau a. 21 Isu’n a kawm u ah, “Tihtakzet a ka hilh na hiu hi, taksanna na neih u a, na ginlah loh u chun, theipi chunga ka hih bang mai cha hi hih puou un na tin uh, zie tâng kawma hin le, ‘Na kichawn inla, tuisuohgiet ah na kipaih lut ah,’ na tih u chun na tih guol u chun hung um ina. 22 Chuleh, bangakai, gingcha kawma na nget tâk phawt u chuh mu’n lau,” ti’n a dâwng a.

Isu Thuneihna chunga Dawtna

23 Chun, Isu Pathien Ho-In a a lut kit nunga, a sinsak lai chun, thiempu liente leh vantâng upate chuh a kawmah a hung u a, a kawmah, “Kuo thu’n a zie thil haw hi na hih? Kuo a thu hun pie?” a tiu a. 24 Chun, Isu’n a kawm u ah, “Ken le nang haw thu kam khat hun dawng ing ka, zie chuh nei hilh u chun, kuo thu’n a zie thil haw hi ka hih hun hilh ing ka: 25 Johan baptistma kha kuo thu ahim? Van a um thu ahim, mihiem thu?” ti’n a dawng a. Tichun, a kingaihtuoh u a, “Vana um thu, ti leng la, ‘Bang dinga a thu awilo na hiu hi leh?’ ei ti’n tin. 26 ‘Mihiem thu’ ti leuhing la, mipi chuh I lau ngâl u a; mi chengcheng in Johan chuh thiemgau in a ngai ngâl u a,” a kitiu a. 27 Tichun, Isu a dâwng u a, “Ka he puou hi,” a tiu a. Ziephet chun, amah chun le, “Ken le, kuo thu a zie thil haw hi ka hih ahim tih nang haw hun hilh diek puo’ng ka.

Chapa Nih apat a Tehkal Thu

28 “Nang haw’n bangti’n na ngai u? mi kuo ahim in chapa nih a nei a. A chapa upa zaw kawm achun a chieh a, ‘Ka chapa, tuni’n grep huon ah na va sem ah,’ a ti a. 29 Amah chun, ‘Ka nuom puoi’ ti’n, a dâwng a, Himahleh, vainung chun a lung ahun hei a, a chieh ta a. 30 Chun, khat kawm achun le a va chieh a, khutibangmah chun a va ti a. Amah chun, ‘Hi, hepu, chieh ing ka’ ti’n a dâwng a, himahlele a chieh ngâl puoh a. 31 Ziete nih chun a kuo zaw hin a pau deih bang chuh a hih zawu hi leh?” a ti a. Amau chun, “A upa zaw chun,” a tiu a. Ziephet chun, Isu’n a kawm u ah, “Tihtakzet a ka hilh na hiu hi. siehdawlte leh nawhchizuokte chun Pathien gam a hun lut khelh ding ahiu hi. 32 Johan chuh lampi dik hun kâwkmuh dingin a hung a, himahlele, na gingcha ngâl puou a; siehdawlte leh nawhchizuokte chun a mah chuh a gingchau a, nang haw’n zie chuh na muh nung un le, na ginchak theihna dingun na lung uh na hei nuom diek puou a.

Grep Huon Enkawlte Tehkalna

33 “Tehkal thu dang ngai un, mi kuo ahim, gam nei khat a um a, zie pa chun grep huon a bawl a pal in a ûmkimvel a; grep thâwkna khûk a lai a, in sang a sa a, tichun a ngakte kawmah thawh lawh dingin a pie a, gam chuom ah a chieh ta a. 34 Chun, a gah lawh phat a hung hih phetin, a chanvo la dingin a ngakte kawm achun a suokte a sawl a. 35 Chun, a ngakte chun a suokte chuh a na man u a, khat a zêp u a, khat a that u a; khat suongin a sep u a. 36 Chun, suok dang amasa lawi sanga tam zaw a sawl kit a, amau haw chunga chun le amasate chunga a hih bang u chuh a na hih kit u a. 37 Chun, zie nung chun, ‘Ka chapa hi sawl leng a na zah un au,’ ti’n a chapa chuh a kawm u ah a sawl ta a. 38 Himahlele a ngakte chun a chapa chuh a muh muh un, ‘Amah hi go luoh ding chuh ahi, that hitiu khai! tichun, a go luoh ding hi eihaw chang hi tiu,’ a kitiu a. 39 Tichun, amah chuh a man u a, grep huon apat chun a puidawk u a, a that tau a. 40 “Khutichun, grep huon neipa chuh a hung tieng leh zie huon ngakte chuh bang a hun lawh ta dem?” a ti a. 41 Amau haw chun a kawmah, “Zie mi gilote chuh dahum takin sumang intin, grep huon chuh, huonngak dangte, a gah lawh phat chenga a gah haw chuh amah kawma pie thei dingte khut ah thawh lawh dingin pie’n a,” a tiu a. 42 Ziephet chun, Isu’n a kawm u ah, “Pathien lehkha a: ‘In sate suong deih loh khah; Zie ngêi chuh a ning a suong phachuom pên a na hi tai. Zie chuh Lalpa hih ahi a, I mitmuh un amak ahi,’ tih hi sim khalo na hiu hi? 43 “Zie ziek tak chun, ‘Pathien gam chuh na kawm u apat a lâksak hi’n tin, a hung gah dawk ding nam khat kawma piek hi’n a,’ tih ka hun hilh na hiu hi. 44 Chun, zie suong chunga puk chuh kek gawp intin; a delh khâk vang chuh gawt nêl ina,” a ti a. 45 Tichun, thiempu liente leh Pharisaite chun a tehkal thugen chuh a het phet un amau haw chungchâng gen ahi tih a hung kihe tau a. 46 Tichun, amah chuh mat a guou a; himahlele mipite chuh a lau ngâl u a, thiemgau a sak ziekun.

22

Kichênna Guolvak Tehkalna

1 Chun, Isu’n amau haw a hopih a, tehkal thu’n a kawm u ah a gen kit a, 2 “Van gam chuh leng kuo ahim a chapa zi neih ni a guolvakna siem chuh tawh tehkal ahi. 3 Tichun, guolvakna an a siem chuh ne dingin a mi chielte sam ding chun a suokte a sawl a, himahlele a hung nuom puou a. 4 Chun, amah chun, ‘Ka mi chielte kawma khan,’ Ngaitiem u, ankuong chuh ka siem tai, ka bâwngchal haw leh ka gan vak thau te ka that a, bangakai zawh ahi tai; guolvakna an ne dingin hung tau in, ti dingin a suok dangte a sawl kit a. 5 Himahlele, a na bengkhawn puou a, amau kawn chietah a chieh tau a, khat chuh a lo ah a chieh a, khat chuh a sumkawlveina ah, 6 mi dangte chun a suokte chuh a man u a, zahhuoi takin a bawl u a, a that tau a. 7 Khutichun, leng chuh a lungna ta a; a sepaih hawn a sawl a, zie tuolthat haw chuh a sumang a, a khuou le a hâl sak ta a. 8 Chun, a suokte kawm achun, ‘Guolvakna an kuong chuh siem zawh ahi tai, ka chielte vang kha chuh ne hâwi ahi puou hi. 9 Khutichun, lamkathuom haw a chun chieh unla, mi na muh tâk u chuh guolvakna an ne dingin chiel un,’ a ti a. 10 Tichun, zie suokte chuh a pawt u a, lampi haw achun a va chieh u a, a muh tâk phawt u chuh, migilo hileh, mi pha hileh, a hun puikhawm tau a, tichun, guolvakna indan chuh a mi chielteu chu a hung dim ta a. 11 “Himahlele, leng chuh a mi chielteu en dinga a hung lut phet in, kichênna puon silh lo mi khat tak achun a mu a, tichun a kawmah: 12 ‘Zawl, bangati a, kichênna puon silh lo a taka hi hung lut na hi?’ a ti a. Himahleh, amah chuh a thip kêi a. 13 Tichun, leng chun a suokte kawmah, ‘A khut leh a keng kân unla, pawlam thim lak ah paih dawk un; tak achun kah leh hagiel chuh um ina,’” a ti a. 14 “Tamtak sap ahiu a, himahleh, tel te vang chuh tawmcha ahiu ui,” a ti a.

Sieh piek Thu a Dawtna

15 Zie lai chun Pharisaite a pawtdawk u a, a thugena a mat theihna dingun a va kiho u a. 16 Tichun, a sinsakteu, Herod lawi a mite tawh a kawmah a sawl u a, ziete chun, “Sinsakpa, mi diktat na hi a, hilh tak zetin Pathien lampi thu na hilh sek a; kuomah hugin chuom le na nei puoi tih ka heu hi, kuomah maizah chuom le na nei diek puoi. 17 Zieziekchun, bangti’n na ngai a? Kei uh ei hilh tie khai! Kaisar kawma sieh piek hi a dân ahi, hilo?” a tiu a. 18 Himahlele, Isu’n a thiltup gûk uh phatloh dân chuh a na he a, “Nang haw, mi gukhahte haw, bang dinga ei zedap? Sieh dangka chuh ei etsak u,” a ti a. Tichun, a kawmah makhai khat a hun lau a 19 Chun, amah chun a kawm u ah, “Ziehi kuo lim leh kuo min a leh?” a ti a. Amau haw chun a kawmah, “Kaisar,” a tiu a. 20 Ziephet chun Isu’n a kawm u ah, “A hih tak nung, Kaisar thil haw chuh Kaisar kawmah pieu inla, 21 Pathien thil haw chuh Pathien kawmah pie tau inla.” a ti a. 22 Zie thu haw chuh a het phet un, mak a sa ten u a; amah chuh a taihsan u a, a chieh mang kêi tau a.

Thawhkitna Thu a Dawtna

23 Zie ni mah chun, Saddukai lawi, thawhkitna a um puoi tite chuh a kawmah a hung u a; a kawmah, 24 “Mi cha nei lo in thi hen la hileh, a suohpihpa’n a zi chuh luoh in, a suohpihpa ding chun suon a neih sak ding ahii, Mosi’n a ti a. 25 Awle, tuhin ka laku ah, pasal sagih a um u a, a upapen in zi a nei a, a thi a, chun suon a neih loh ziekin a zi chuh a suohpihpa luoh dingin a nusieh a; 26 Khutibangmah chun a nihna chule a um a, thumna chule a um kit zel a, sagihna tiengin a um chiet u a. 27 Chun a bawn u a a thih nung u chun numei chule a thi ta a. 28 Khutichun, thawhkitna achun sagihte lak achun kuo pên zi ahi ta die? A bawn un a kichênpih chiet ngâl u a?” ti’n a dawng u a. 29 Isu’n a kawm u ah, “Pathien lehkha thu leh Pathien thilhih theihna na hetloh ziekun na ngai khiel sek uh ahi. 30 Thawhkitna achun kichênna um ta puo’n tin, van a vânsâwlchâkte guol khuh hi zaw tan au. 31 Chuleh, mithi thawhkitna thu a Pathien in na kawm u a a gen kha na sim puou maw? 32 ‘Kei Abraham Pathien, Isak Pathien, Jakob Pathien chuh ka hi,’ Pathien chuh mithi Pathien ahi puoh a, mihing Pathien ahi zawi” a ti a, a dâwng a. 33 Chun, mipite chun zie chuh a zak un, a thugen chuh mak a sa ten uh a.

Thupiek Lienpên

34 Pharisaite chun, Isu’n Sadukaite chuh a niel dawng kei hi tih a het un, a kikhawm tau a. 35 Tichun, amau haw laka mi danhe khatin amah zedapna dingin, 36 “Sinsak pa, Dan thu a chun bang thupiek hi a a lien pên?” tin a, dawng a. 37 Isu’n a kawmah, “Lalpa na Pathien chuh na lunggil chengcheng, na thagau chengcheng leh na lungthim chengcheng in na hehpih ding ahi. 38 Zie chuh thupiek lienpen leh khawkpen ahi. 39 Chun, a bana a kibatpih chuh ziehi ahi, ‘Nangmah na kihehpih guolin, na vengte le na hehpih ding ahi,’ tih hi. 40 Zie thupiek nih te ahin dân thu leh thiemgaute thu cheng a kikhaikhawm vek hi,” a ti a.

Krista chungchanga dawtna

41 Chun, Pharisaite a kikhawp lai u chun, Isu’n amau haw chuh thu a dawng a, 42 “Krista chuh bang tawbang hi dingin na gingchau hi? Kuo cha ahim?” a ti a. 43 Amau chun a kawmah, “David chapa,” a tiu a. 44 Ziephet chun, Isu’n a kawm u ah, “David in: ‘Lalpa chun ka Lalpa kawmah, Na melmate na kêngpêk nuoia ka kawih masang sieh, Ka chang lam ah chu zingin,’ a ti a. 45 Khutia David in Krista chuh ‘Lalpa’ a tih chun, bangti’n a, a chapa a hih theih ding?” a ti a. 46 Ziephet chun, kuoma’n kam khat chan le a dâwng thei ta puou a, zie ni a kipat chun kuoma’n thu dang himhim a dawng ngam ta puou hi.

23

Pharisaite leh Danthuzikte a gaihna

1 Chun Isu’n mipite leh a sinsakte kawmah thu a gen a, 2 “Danthuzikte leh Pharisaite chuh Mosi dante lehdawk dinga guot ahiu a. 3 Zieziekchun, a hun hilh tâk u chuh hih unla, zawp zel un; himahleh, a thilhih guol vang u chuh hih kiu in, gen vang chuh a gen sek u a, a zawp sek puoh ngâl u a. 4 Puokgik dahum tak a siem u a, mi liengko ah a nga sek u a; amauhawn la, zie puokgik dâwn ding chun a khutzung khat u le a tawih sak nuom puoh ngâl u a. 5 A thilhih chengcheng u chuh mihiemte muh dinga a hih sek uh ahi. A thilbuhteu leh kawpteu chuh a pêk a hih lien sek u a, a puonmawng uh a hih bawk lien u a, 6 guolvakna a mun phapen leh, kikhawpna In a chutphah phapen leh, 7 dawlmun a chibai leh, mi’n ‘Rabbi’ a tih hawu chuh a deihchuom sek ngâl u a. 8 Nang haw vang chuh ‘Rabbi’ tih dingin um kiu in, na sinsakpau chuh khat chauh ahi ngâla, zie chuh Krista ahi. Chuleh, nang haw chengcheng le unau na hi ngâl u a. 9 Chun, lei chunga hin kuomah, ‘Hepa’ ti kiu in, na Pau chuh khat chauh ahii van a um khuh. 10 ‘Lamkaite’ tih dingin le um kiu in, na lamkai u chuh khat chauh ahi, 11 Na lak uh a lienpen chuh nang haw hun zen viela pang zaw ding ahi. 12 Kuole, amah kingailul ta chuh niem intin, kuole amah kingainiem ta chuh chawihsân in um ina.

Isu’n Migukhahte a Demna

13 “Himahlele, nang haw, Danthuzikte leh Pharisai gukhahte haw, na chunguh a gik hi! van gam chuh mi dingin na khâk u a, 14 Nang haw la na lut ngâl puou a, mi lut ding le na zanuom kit puou a. 15 “Na chung uh a gik hi! Nang haw, Danthuzik leh Pharisai, mi gukhahte haw, gingtu khat siemna dingin, tuisuohgiet leh lei chung na chieh kimvel u a, chun, tawbanga chuh a hung um tieng leh, amah chuh nangmau haw sangin a lehnih in Gehen chapa’n na siem kit ngâl u a. 16 “Nang haw, lamkai mitdûk, ‘Kuole, Pathien Ho-In sama kihâksiel ta, zie chuh bangmah ahi puoi; himahlele, kuole Pathien Ho-In a sana sama kihâksiel ta chun, zie chuh a muolsuoh tei ding ahi,’ tite haw, na chunguh a gik hi! 17 Nang haw, mingawl, mitdûk haw, sana suthiengtho pên Ho-In leh, sana chuh a hâwi hi a lopi zaw? 18 ‘Kuole, Maichâm sama kihâksiel ta, zie chuh bangmah a ti puoi; a chunga thilpiek um sama kihâksiel vang chun chuh a muolsuoh tei ding ahi,’ na tiu hi. 19 Nang haw mitdûkte haw, thilpiek hih thiengtho pên maichâm leh, thilpiek chuh a hâwi hi a lopi zaw? 20 Khutichun, kuole, maichâm sama kihâksiel chuh, maichâm leh a chunga thil um chengcheng sâm in a kihâksiel ahi. 21 Kuole Pathien Ho-In sama kihâksiel ta chun, Pathien Ho-In leh a sunga thil um chengcheng sam chun a kihâksiel ahi. 22 Kuole, van sama kihâksiel ta chun le, Pathien lalchutphah leh a chunga chuh pa sâm in a kihâksiel ahi. 23 “Na chunguh a gik hi! Nang haw, Danthuzik leh Pharisai gukhahte haw! Pudina leh pathikhawm, chuleh zira cheng hi sawma-khat na tuok sek u a, himahleh, dân thu khawk zaw diktatna, lungsietna, ginumna haw chuh na ngaitam ngâl sek un; ziehaw chuh a puo na hih dinguh chuh, a dangte chuh haihsan diek lo in. 24 Nang haw lamkai mitdûk, thosi thit ngim a, sangawngsau valh zawte haw! 25 “Na chunguh a gik hi! Nanguh Danthuzik leh Pharisai gukhahte haw! khawn leh kuong pawlam na sawp ngim u a, a sunglam chuh la nekgûkna leh kidêklohna’n a dim ngâl in. 26 Nang Pharisai mitdûk, khawn leh kuong sunglam chuh sawp ngim masa’n ti a chuh a pawlam le a hung thien theihna dingin. 27 “Na chunguh a gik hi!” Danthuzikte leh Pharisai gukhahte haw, Thân nuh vam, pawlam hawih taka lang, a sunglam chula, mithi guh leh thil thanghuoi tin chenga dim guol chuh na hiu a puo! 28 Nang haw le ziehaw guola chuh, pawlama mihiem muh a diktata kilang, na sunglam u chuh la, gukhah na leh gitlohna’n na dim ngâl u a.

Gawt na ding Genlawkna

29 “Na chunguh a gik hi! Nang haw Danthuzikte leh Pharisai, gukhahte haw, 30 Thiemgau haw dingin thân na bawl u a, mi diktatte thân le na zem hawih u a, ‘I pileputeu damlai khan na um, hi leuhing le, thiemgau te thahna achun na tel puoi tiu,’ na ti sek ui. 31 Khutichun, nangmau ngêi chuh, thiemgau haw thatte cha na hih uh na kihetsak uh ahi. 32 Na pileputeu tehna chu hih dim ngâl mai un. 33 Nang haw gulte haw, gûl suonte haw, Gehen a vaihawmna chu bangti’n a na pelhthâk theih dinguh? 34 Ngaitiem u, ziebang tak chun na kawm u ah thiemgaute, miching te, danthuzikte hun sawl ding ka hi; abang chuh that un na tin uh, kross ah khên den unlau, a bang chuh na kikhawpna In hawu ah savun khau in zêp un na tin uh, khaw tin ah bawl gimthei zui zel unlau. 35 Khutichun, mi diktat Abel thisan apat in, Pathien Ho-In leh maichâm kikala Berekiah chapa Zakaria na thah pau thisan ngêi khan, lei chunga mi diktat thisan a suoh teu chengcheng phuba chuh na chungu ah hung tung thei ina. 36 Tihtakzet a ka hilh na hiu hi, ziehaw chengcheng chuh tulai khang thakte chunga hin hung tung ina

Isu’n Jerusalem A Kahchamna

37 “Aw Jerusalem, Jerusalem, thiemgau haw that, na kawma Pathien in thupuo a hun sawlte that a, suong a sep lum! Akpi’n a note a tha nuoia a awp khawm guolin, na chate bang zat vei a awp khawm ka guot khah! Himahlele, na ut ngâl puou a. 38 En tiem u, na Ho-In chuh taihsan leh a hawm a um ding ahi. 39 Ka hilh na hiu hi, ‘Lalpa min a hung chuh a hamphai,’ na tih masangsieh uh, tu apat hin nei mu kit ta lo ding na hiu hi,” a ti a.

24

Pathien Ho-In Siet ding a Genna

1 Chun, Isu Pathien Ho-In apat a pawt a, a chiehdawk lai in, a sinsakte chuh Pathien Ho-In kisak dante chuh etsak dingin a kawmah a hung u a. 2 Amah chun a kawm u ah, “Zie chengcheng hi na muu maw? tihtakzet in ka hilh na hiu hi, zie a suong kitieng haw hi sukchip loh himhim um puo’n a, a bawn hin sukchip vek hi’n a,” ti’n a dâwng a.

Buoina leh Sukgimtheihna

3 Chun, Isu olive tânga a chut lai chun, sinsakte chuh a mau mai in a gûkin a kawmah a chieh u a. “Ziehaw chuh bangtik leh e, a hung um ding? Na hung kitna ding leh khawvel beihna ding melchikna chuh bang a hi die? ei hilh in,” a tiu a. 4 Chun Isu’n a dâwng a, a kawm u ah, “Kuoma’n a hun dawha bawl lohna dingin chingthei un, 5 Mi tamtakin, ‘Krista chuh ka hii,’ tin ka min in hung untin, mi tamtakin hun dawha bawl ding a hi ngâl uh a. 6 Chun, kido thu leh kido thuthang hun zan lau, na lungzîn lohna dingun chingthei un; ziehaw chuh a hungtung ding him ahi; himahlele, a tawpna chuh hi tadih puo’n a. 7 Nam chuom leh nam chuom kido un tin, gam chuom leh gam chuom kido un tin; mun chuom chuom ah kiel tung intin, leilîng le um ina. 8 Ziehaw chengcheng chuh nauhanat kipatna ahi. 9 “Zie tieng chu leh gawtna thuok dingin hun matsak untin; hun that un tin uh ka min ziekin nam chengcheng muhdah hi’n lau. 10 Zie tieng chu leh mi tamtak puk un tin, kimatsak tuoh un tin; kimudah tuoh un au! 11 Chun, thiemgau lêm tamtak hung pawt un tin, mi tamtak hun thêm un au. 12 Chun, gitlohna a hung pun ding ziekin, mi tamzaw hehpihna chuh hung dai in a. 13 Himahlele, a tâwp tienga thuok ngâp ta chuh hukdam in um in a. 14 Chun, zie gam chanchin Pha hi nam chengcheng hetsakna dingin khawvel pumpi ah gen in um intin; zie zawh chu leh tawpna chuh hungtung in a.

Thil Luoksuok-um Tak

15 “Khutichun, thil kihdak-um luoksuok-um tak, thiemgau Daniel in a gen khah, mun thiengtho a ding na muh tieng u leh.” (a sim tan a umzie he hen) 16 “Juda gama umte chu tânghaw achun tai mang u hen! 17 In chunga um chu, a In sunga thil chuh la dingin kum ki heh. 18 Chuleh, lo a umte chule a puon la dingin kîkkit diek kiheh! 19 Zie ni chu leh gaite leh chasen neite chung chuh gik in a. 20 Na taihmang phat ding u chuh phalbi ahim, chawlhni a hima a hungtun lohna dingin paucham un. 21 Zie tieng chu leh gimtheihna nasatak um ding a hi ngâl a; khutibanga nasa himhim chu, lei kisiem tûng apat, tu tieng hin a na um kha puoi, bangmah tikin um le hung um diek ta puo’n a. 22 Zie nihaw chuh Pathien in a hih chawm ta a, hih chawm lo hileh, mihiem himhim dam in suokcha puo’n au, himahlele, a mi telte ziekin a hih chawm ta a. 23 “Chun, mi kuo’n le zie tieng chu leh na kawmuh a, ‘Entie, Krista chuh tak ahin a um,’ ahim, ‘taka khun a um’ ahim a hun tih uh chun, amah chuh gingcha kiu. 24 Krista lêmte leh thiemgau lêmte hung pawt ding ahi ngâl uh a. Ziete chun melchikna nasatak leh, thilmak lopitak hun etsak un au, a hihtheih diek chun, telte nasan le hun dawha bawl ding ahiu hi. 25 Ngaitiem u, ka hun hilh masak diem na hiu hi, khutichun, na kawmuh a, 26 “Ngaitiem u, gamthip ah a um hi, a hun tih u chun, chiehdawk kiu; chuleh, ‘Indan sungnung ah a um hi’ a hun tih u chun amau chuh gingcha kiu; 27 Kawlphe suohlam a hung kipan a, tumlam a a kimuh guolin, Mihiem Chapa hung kitna ding chule zie tawbang chuh hi ding ahi. 28 “Hawi ale saluong umna tâkah mulukawlhte le um khawm un au.

Mihiem Chapa hungna ding

29 “Himahlele, zie tawbang ni dahum tak zawh chuleh ni chuh hung thim intin, tha vak ta puo’n tin, van apat in aksite hung kie’n tin, van thilhih theihna haw chuh suklîng a um ding ahi. 30 Tichun, Mihiem Chapa melchikna chuh van ah kilang in tin. Zie tieng chuleh leia chitin in a âwm kichup untin, Mihiem Chapa hi thilhih theihna leh lopina nasatak tawh a van mei chunga hung mu’n au. 31 Pêngkun gi nasatak tawh, chun, a van sawlchakte chuh lei ning li achun sawldawk in tin, tichun, a mi telte chuh kâwlmawng apat kâwlmawng tâwp tiengin lakhawm un au.

Theipi kung a Zil ding

32 “Tichun, theipi kung a hin a tehkal thu zil un: A bâk a hung sel a, a nah a hung palh tieng leh nipi hi ding ahi, tih na he sek ui. 33 Khutibangmah chun nanghaw’n le zie chengcheng chuh na muh tiengu leh, amah chuh a hung nai ta a, kawtpi bul ngêi ah a um tai tih heu in. 34 Tihtakzet a ka hilh na hiu hi, ziehaw chengcheng chuh a tun kim masang sieh tulai khang thakte hi bei puo’n a. 35 Lei leh van bei in tin, ka thu vang chuh bei puo’n a.

Ani leh a Dâkkâl Hetloh

36 “Himahlele, zie ni leh a phat chuh Pa ngâllo chun, van a vânsâwlchâkte’n le, Chapa’n le a he puou hi. 37 Chun, Noah dam lai guol mah kha Mihiem Chapa hung kitna ding chuh hi’n a. 38 Tui let ma chun, Noah kuong a a lut ni gei khan a ne’n a chau a, zi leh pasal in a kinei u a; 39 himahlele, tui a hung let a, a bawn uh a a tawh mang masieh chun bangmah a he puou. Mihiem Chapa hung kitna ding chule khutibangmah chuh hi’n a. 40 Zie phat chu leh lo ah mi nih um untin, khat chu lâk in um in tin. khat chu nutsieh in um ina. 41 Numei nih buh gawihnelna achun buh gawi nêl in um untin, khat chu lâk in um in tin, khat chu nutsieh in um ina. 42 Khutichun, khawthengai un, na Lalpau chuh bang ni a hung ding ahi tih na he puou hi. 43 Himahlele ziehi heu in, gucha a hung phat ding a Inneipa’n he hen la hileh, veng in tin, a In sukvan sak puo’n a. 44 Zieziekchun, nang haw le kiging zingin um un, na ginchak loh phat tak un Mihiem Chapa chuh hung ding ahi ngâl a.

Suok Ginum leh Suok Ginumlo

45 “Kuo pên ahi ding u leh, suok taksanum leh ching, a pu’n a phat chenga a an chanvo dinguh hawp sak dinga a inkawte chunga lawiupa a a kawih chuh? 46 A pu a hung phat a suok, khutibang hih a a muh te chuh mi hampha hi’nau. 47 Tihtakzet a ka hilh na hiu hi, a neih chengcheng chungah lawiupa’n kawih ina. 48 Amahvang chuh, suok gilo chun, a lungthim in,” Ka pu hung vak ding ei puoi, ti’n 49 a suok chanpihte na vel ta hen la, zukhamte kawma ne’n cha taleh, 50 zie suokpa pu chuh a ginchak loh ni’n, a het loh kâl in hung in tin. 51 a pu chun tum nih hung suoh in tin, mi gukhahte chan bang chuh chan sak ina. Taka chun kah leh hagiel chuh um ina.

25

Nungak Sawm Tehkalna

1 “Zie phat chu leh, van gam chuh nungak sawm, a thaumei uh chawia moneipa muok dinga pawtte chu tawh tehkal hi’n a. 2 A lak uh a mi nga a ngawl uh a, nga a ching ui. 3 A ngawlte chun a thaumei hawu a chawi u a, a tui a chawi tel puou a; 4 himahleh, a chingte chun a thaumei hawu a chawi u a, a ûm haw a chun a tui le a chawi tel u a. 5 Chun, moneipa chuh a hung hak ziekin a bawnu chun a na vuong u a, a na ipmu tau ahi. 6 “Chun, zan khangkim tak chun, aw khat a hung gi a, ‘Ngaitiem u, moneipa chuh a hung hi! a muok dingin hung pawt u uo!’ a hung kiti a. 7 Ziephet chun, nungak thiengte haw chuh a tho u a, a thaumei chiet u chuh a kiguot u a. 8 Tichun, a ngawlte chun a chingte kawmah, ‘Na thautui u kha kei u le ei pieu; ka thaumei hawu mit ding ahi,’ a tiu a. 9 Himahlele, a chingte chun, ‘Kei u ding leh nang u ding kiting puo’n a; a zuokte kawma chieh unla, va chaw zawu in,’ ti’n a dâwng u a. 10 Chun, chaw dinga a chieh mang kal u chun moneipa chuh a hung ta a; tichun, a kisazosa haw chuh a mah tawh lawih-an ne’n a lut uh a; chun kawt chuh a khâk tau a. 11 “Zie nung chun nungak thieng dangte chule a hung tung u a, ‘Hepu, kawt ei hung hawn sak in kei u le!’ a tiu a. 12 Amah chun la, ‘Tihtakzet a ka hilh na hiu hi, nang haw ka hun he puoi,’” ti’n a dâwng a. 13 “Khutichun, kiging zingin um un, a ni leh a phat na he ngâl puou in.

Talent Vawp Tehkal Thu

14 “Van gam chuh mi khat, gam danga chieh ding, a suokte sama, amau haw kawma a sum vawp sakpa chuh tawbang ahi. 15 Suok khat kawmah talent nga a pie a, a dang kawmah talent nih a pie a, a dang kawmah talent khat a pie a; a hih theih bang chiet un a pie a, tichun, a chieh ta a. 16 Tichun, talent nga vawppa chuh zie chun a kivei pai zieng a; talent nga mah a vei dawk a. 17 Khutibangmah chun talent nih vawppa chule a kivei a, talent nih mah a hun vei dawk ta a. 18 Talent khat vawppa chuh a va chieh a, lei a lai a, a pu dangka chuh a selgu zaw ta a. 19 “Chun, hun sawttak nung in a puu chuh a kawm u ah a hungkit a, a kawm u ah sum thu chuh a su tuok u a. 20 Tichun, talent nga vawppa chuh a hung a, talent nga mah a hun chawih beh a, ‘Hepu, nangin talent nga nei vawp sak khan, en tie, talent nga mah ka hun vei dawk hi,’ a ti a. 21 A pu chun a kawmah, ‘Suok pha leh taksanum, na hih pha ie; tawmchah chungah taksan na um in, tamtak chungah hun um sak ing ka, na pu kipahna ah lut ah,’ a ti a. 22 Chun, talent nih vawppa chule a hung a, ‘Hepu, nangin talent nih nei vawp sak khah; entie, talent nih mah ka vei dawk hi,’ a ti a. 23 A pu chun a kawmah, ‘Suok pha leh taksanum, na hih pha ie; tawmchah chungah taksan na uma, tamtak chungah hun um sak ing ka; na pu kipahna ah lut ah,’ a ti a. 24 Chuleh, talent khat vawppa khale a hung a, ‘Hepu, mi ningkhel na hih ka hun he a; na tuh lohna ale na ât sek a, na thehzak lohna ale na lakhawm sek hi, tih ka he a. 25 Zieziekchun, ka lau a, ka va chieh a, na talent kha lei ah ka vui gu a, entie, nanga mah kha na muh kit ahii,’ a ti a. 26 A pu chun a kawmah, ‘Suok gilo leh zawmthaw pa, ka tuh lohna a le ka ât a, ka thehzak lohna ale ka lakhawm sek hi tih na he maw? 27 Khuti a hih chun, ka dangka chuh sumkawlveite kawma na kawih ding na hi ta a, khutichun, ka hung hin keia hi a lawk tawh ka muh kit ding a hi a. 28 Tichun, talent khat kha lâksak unla, talent sawm neipa kawmah pieu. 29 Kuole, a nei ta piek beh un tin, hung hau ina. Kuole a neilo chuh a neihsun le lâksak un au. 30 Suok phachuom lo kha pawlam thim ah paih dawk un; tak achun kah leh hagiel chuh um in,’ a ti a, a dâwng a.

Vaihawmna Ni

31 “Mihiem Chapa hi leng guola a vânsâwlchâkte tawh a lopina a kithuoma a hung tieng leh, a lopina chutphah chungah chu’n tin, a ma achun namtin kikhawm un au. 32 Belam chingpa’n kel apat a belam a khen guolin amau haw chuh khen in tin; 33 belam haw chuh a changlam ah kawih in tin, kelhaw vang chuh a veilam ah kawih in a. 34 Zie phat chu leh Lalpen chun a changlama mite kawm achun, ‘Ka pa vangsakte haw, hung un la, khawvel kisiem tûng apat nang u dinga guotsa chuh luoh un. 35 Ka gil a kiel in nangun nek ding nei pieu a, ka dang a châkin nangun dâwn ding nei pieu a; malzin ka hih in nei tun sak uh a. 36 Sangawn a ka um in, puon nei silh sak u a, ka damloh in nei veh u a, suongkul a ka um in, ka kawmah na hung ngâl u a,’ hun tina. 37 Zie phat chu leh, mi diktatte chun, ‘Lalpa, bang tikin e, gilkiel a ka hun muh uh a nek ding ka hun piek uh? Dangchâk a ka hun muh uh a dâwn ding ka hun piek uh? 38 Bangtik in e malzin a ka hun muh uh a ka hun tun sak uh? Sangawn a ka hun muh uh a, ka hun silh sak uh? 39 Bangtik in a damlo in ahim, suongkul ah ahim ka hun muh uh a, na kawma ka hung uh?’ ti’n a na dawng un au. 40 Zie tieng chuleh Lalpen chun a kawm u ah, ‘Tihtakzet a ka hilh na hiu hi, Zie ka suohpih neupen te laka khat chunga na hih u chuh, kei chunga hih na hiu hi,’ ti’n hun dâwng ina. 41 “Zie zawh chu leh, a veilam a mite kawm achun, ‘Hansie dawlte haw, kumkhuo mei, Diabol leh a sawlchakte dinga a guot sak uh achun nei chieh mangsan un. 42 Ka gil a kiel in, nangun nek ding nei pie puou a; ka dang a châkin nangun dâwn ding nei pie puou hi; 43 Malzin ka hihin, nei tun sak puou a; sangawn a ka um in, puon nei silh sak puou a; damlo leh suongkul a ka um in, nei veh puou hi,’ hun tina. 44 Zie phat chu leh, amau inle, ‘Lalpa, bangtik in e gilkiel in ahim, dangchâk in ahim, malzin in ahim, sangawn in ahim, damlo in ahim; suongkul ah ahim, ka hun muh uh a, ka hun zen loh uh?’ tin a na dâwng un au. 45 Tichun, Lalpen chun a kawm u ah, ‘Tihtakzet a ka hilh na hiu hi, zie mi neupen te laka khat chunga na hih loh u chuh kei chunga hih lo na hiu hi,’ ti’n a na dâwng ina. 46 Tichun ziehaw chuh kumkhuo gawtna ah chieh un tin, mi diktatte vang chuh kumkhuo hinna ah chieh un au,” a ti a.

26

Isu thah dinga phielgukna

1 Chun, Isu’n zie thu chengcheng chuh a gen zawhin, a sinsakte kawmah, 2 “Ni nih hal leh Chiehkân Kut hung um ding ahi tih heu un, Mihiem Chapa hi khetdên dingin matsak ding ahiu hi,” a ti a. 3 Zie lai chun Thiempu lienpen Kaiapha a tih pau in huongsung achun thiempu liente leh vantâng upahaw chuh a kikhawm u a, 4 Isu chuh a gûk a mata thah theihna dân ngaihtuoh in a kiho u a. 5 “Kut sungin vang I hih loh ding uh ahi, khutilochun vantâng lak ah buoina hung um khâna,” a tiu a.

Bethani a Isu Thaunuhna

6 Chun, Isu chuh Bethani khuo a Simon, mi phâkpa In a a um lai in, 7 numei khat alabasta bawma thau gimlim tak chawi in a kawmah a hung a, ankuong um dinga a chut lai takin a luchang ah a sung a. 8 Himahlele, sinsakte chun zie chuh a muh phet un a lungnau a, “Bang dinga ti a hi sumang maimai na him? 9 Zie thau hi man tamtak a khawt a, mi gimtheite kawma piek theih a hi ngâl a,” a tiu a. 10 Isu chun zie chuh a het phet in, a kawm u ah, 11 “Numei hi bang dinga subuoi na hiu hi? Ka chunga hin thil phatak a hih ahi. Mi gimtheite chuh kumkhuo a na kawm u a um zing ahiu hi; kei vang chuh kumkhuo a na kawmuh a um ding ka hi puoi. 12 Zie thau gimlim ka sapum a a sun hi vuih dinga kiguotlawk ding etsakna a a hih ahi. 13 Tihtakzet a ka hilh na hiu hi, khawvel pumpi ah, hâwi ale zie Chanchin pha hi a gen na cheng u ah, zie numei thilhih hile amah hetzingna dingin gen zel un au,” a ti a.

Juda’n Isu a Matsak hi

14 Zie nung chun sawm le nih te laka mi khat, Juda Iskariot a tih pau chuh, thiempu liente lak ah a chieh a, 15 “Amah chuh hun matsak ing ka ting, bang nei pie ding u?” a ti a. Tichun. dangka sawmthum chuh a sim u a, a pie tau a. 16 Zie apat chun a matsak theihna ding dân âwng hawl in a um ta a.

Chiehkân Kut Ankuong

17 Chun, chângthâk chawl tello Kut ni, ni khat ni chun sinsakte chuh Isu kawmah a hung u a, “Chiehkân Kut an nek na dingin hawi ah hun guot sak leng na nuom hi?” a tiu a. 18 Amah chun a kawm u ah, “Khawpi ah kuo ahim kawmah chieh un la, a kawmah; ‘Sinsakpa chun, Ka hun a nai ta a, ka sinsakte tawh Chiehkân Kut na In ah mang ung kau a tii,’ va tiu,” a ti a. 19 Isu’n a kawm u a a tih guol chun sinsakte chun a hih u a, Chiehkân Kut ankuong chuh a va guonggalh zo tau a. 20 Chun, nitâk lam a hung hih phet in, sinsak sawm le nih te chu tawh ankuong a um uh a. 21 Ankuong a um lai un Isu’n, “Na lak uh a khat hin ei matsak in a,” a ti a. 22 Sinsakte chuh a lungkham ta mah mah uh a, a kawmah, “Lalpa, kei hi ka him?” a ti ta chiet u a. 23 Amah chun, “Kuong ei sawkpihpa ngêi chun ei matsak ina. 24 Mihiem Chapa hi, a chanchin a zik guol tak uh khan chieh ding ahii, himahlele, Mihiem Chapa matsak ding pa mihiem chung chuh a gik hi! zie mihiem chuh pieng kihen la hileh amah dingin phazaw’n a,” ti’n a dâwng a. 25 A matsak ding pa Juda chun a dâwng a, “Rabbi, kei ka him,” a ti a. Isu chun, a kawmah, “Nangin na ti ta chula” a ti a.

Lalpa Nitâk Ankuong

26 Chun, a nek lai un Isu’n chângthâk a la a, vang a pie a, a hekphel a, sinsakte kawmah a pie a, “Lau inla, neu in; ziehi ka sapum ahii,” a ti a. 27 Chun, khawn a la a, kipahthu a gen a, a kawm u ah a pie a, “Na bawn un dâwn un, 28 Ziehi ka thisana thugawlh thak, mi tamtak gitloh ngaihdamna dinga pawt chuh ahi. 29 Himahlele, ka hilh na hiu hi, ka Pa gama nangmau haw tawh a thak ka dâwn ni a tun kit masangsieh, tu apat hin grep guia gah hi dâwn kit ta puo’ng ka,” a ti a. 30 Chun, la a sau a, olive tâng achun a chieh tau a.

Peter in a Kilepsanna

31 Chun, Isu’n a kawm u ah, “Tu zan hin na bawn un ka chung thu ah lungkim lo in um vek un lau; ‘Belam chingpa chuh zêp ing ka ting, belam hawn chuh zak un au,’ tih zik guol khan. 32 Himahlele, ka thawh kit nung leh, Galili gam ah na mau ah chieh ing ka,” a ti a. 33 Peter chun a kawmah, “A bawn un na chungah lungkim lo in um mah leu le, kei vang lungkim lo in um hiel puo’ng ka,” ti’n a dâwng a. 34 Isu’n a dâwng a, “Tihtakzet a ka hilh na hii, tuzan hin âk a khuon man nangin thum vei ei kizuksan in la,” a ti a. 35 Peter in a kawmah, “Na thihna achun thi ding hi lengle hun kizuksan puo’ng ka,” a ti a. Sinsakte cheng chun khutibang chun a ti ta chiet u a.

Gethsemani Huon a Isu Pauchamna

36 Chun, zie zawh chun Isu chuh a sinsakte tawh mun khat Gethsemani kiti chuh a tung uh a, amah chun a sinsakte kawmah, “Taka khu ka va paucham sung cheng taka hin na chuu in,” a ti a. 37 Peter leh Zebedai chapate nih chuh a kawmah a pui a. Lungkhamna leh thaphanna te’n a hun bawm ta a; 38 tichun, a kawm u ah, “Ka lungthim a lungkham mah mah ta a, thihna kham hiel ahii; taka hin um unla, nei ven pih un,” a ti a. 39 Chun, a malam ah kal bang zah ahim a suona, a khupbawk a, “Aw he pa, a hih theih ding chun, zie khawn hi ka kawm apat kichawn mang heh; himahlele, kei thu hilo in nangmah thu thu hi zaw hen,” tin a paucham a. 40 Chun, sinsak te kawm lam achun a hung a, amau chuh ipmu’n a mu a, tichun, Peter kawmah, “E khai! nangun dâkkâl khat le ei venpih thei lo na hiu maw? 41 Thepna a na lut lohna dingun kiging zingin paucham un; thagau vangin a ngâp a, sapum vang chuh a hatlo ahi,” a ti a. 42 Tichun, Isu chuh a nihvei na ah a chieh kit a, a paucham kit a, “Aw hepa, ka dâwn loh a zie khawn hi kichawn mang theilo a hih chun, nang thu thu hi heh,” a ti a. 43 A hung kita, amau haw chuh ipmu’n a mu kit a, a ihmut uh a suok ten ngâl a. 44 Tichun, a taihsan kit a, a thumveina ah, a thugen ngei mah chuh gen in a paucham kit a. 45 Zie zawh chun sinsakte kawm achun a hungkit a, a kawm u ah, “Tuhin chuh ipmuu inla, kichawl tau in! ngaitiem u! a phat a hung tung ta a, Mihiem Chapa hi mi gilote khuta matsak ding ahiu hi. 46 Tho unla, chieh hitiu; entiem u! ei matsak ding pa chuh a hung nai tai,” a ti a.

Isu Mata A Umna

47 Chun, a gen lai tak in Juda, sawm le nih te laka khat chuh a hung tung ta a, mipi tamtak tawh, Thiempuliente leh Danthuzikte leh upahaw kawm apat mipi nasatak, chemzâm leh khetbuk chawiin a hung tung kit zel tau a. 48 A matsak ding pa chun mipite chuh a melchikna ding a na gen masak sa diem ahi a, “Ka châwp pên pên chuh hi’n a, amah chuh man un,” ti’n. 49 Tichun, Isu chuh a va zuon pai zieng a, “Chibai, Rabbi,” ti’n, a châwp tuntun a. 50 Isu’n a dâwng a, “Zawlpa, na hung lawh pên chuh hih kin in,” a ti a. Ziephet chun, Isu chuh a zuon u a, a man u a, a kân tau a. 51 Ziephet chun, Isu kawma umte laka khat chun a chemzâm a satdawk a, thiempu lienpen suokpa chuh a sat a, a bil a satthâk sak ta a. 52 Isu’n a kawmah, “Na chemzâm kha a pai ah thun kit ah; chemzâm mangte chuh chemzâm mah in thi ding ahi ngâl un. 53 Tuhin le, vânsâwlchâk sanggup mun sawm le mun nih sanga tamzaw ei hun sawl sak dingin ka Pa kawma ngên thei lo dingin nei gingchau a ahi leh? 54 Himahlele, ngên ta leng, bangti’n a, Pathien lehkha thu hiti banga hung um ding hi a tun theih ding?” a ti a. 55 Zie lai tak chun, Isu’n mipite kawm achun, “Chemzâm haw, khetbuk haw chawi in suommangte man ding guolin ei man dinga hung pawt na hiu maw? Pathien Ho-In ah ni chengin mi sinsak in ka chu sek a, nei man ngâl puou a. 56 Himahlele, thiemgaute lehkha thu haw chuh a hung tun kim theihna dingin ziehaw chengcheng hi hung um ahi ta hi,” a ti a. Ziephet chun, sinsakte cheng chun amah chuh a taihsan u a, a tai mang tau a.

Isu Vaihawmte Masanga A Dinna

57 Isu mante chun Thiempu lienpen Kaiapha In a, danthuzikte leh upa te umkhawmna achun Isu chuh a pui a. 58 Himahlele, Peter in gamla taka kihal in amah chuh a zuia. Thiempu lienpen In umna huongsung Inmai tiengin a va zui a, a tawpna muh guo’n mivengte lak achun a va chu a. 59 Thiempu lienpen leh vaihawmte chun Isu a thah theihna dingun hêknadinga hawl u a, 60 zuou thu a hetpihtu tamtak hung mah leu le a mu thei puou hi. 61 A tâwp chun mi nih a hung u a, “Zie pa hin Pathien Ho-In hi phel a, ni thum sunga sakit thei ka hi, a tii,” a tiu a. 62 Tichun, thiempu lienpen chuh a ding dawka, a kawmah, “Bangmah in na dawng paw maw? ziete hun hêkna hi bangti dân ahim?” a ti a. 63 Isu chuh la a thip kêi a. Ziephet chun, thiempu lienpen chun a kawmah, “Pathien Hing min a ka hun vau na hi, Krista, Pathien Chapa chuh na him? Kei uh nei hilh in,” a ti a. 64 Isu’n a kawmah, “Hi e, himahlele, ka hun hilh na hi, tunung leh, Mihiem Chapa hi Bangakai hihtheipa khut changlama chu a, van meipi chunga hung hun mu ding na hiu hi,” a ti a. 65 Zie chun, thiempu lienpen chun a silhlechen haw chuh a bawtthêk a, “Pathien a gensie tai, hetpih dang bang zieka ngaih beh ding I hiu hi? Ngaitiem u, Pathien a gensiet dân chuh tuhin na he tau hi. 66 Bangti’n na ngai u?” a ti a. Amau haw chun, “Thi tâk ahi,” ti’n a dâwng u a. 67 Tichun, a maichang chuh chil a sietkhum u a, a zêp u a, chun, midang te chun a khut un a bêng u a. 68 a bangin, “Nang Krista, kuo a hun bêng chuh? Kei uh nei hilh ah,” ti’n a bêng u a.

Peter in Isu a Kizuksanna

69 Chun, Peter chuh pawlama huongsung achun a chu a, thiempu lienpen suok laka nungak khat a kawmah a hung a, a kawmah, “Nang le, Galili gama Isu kawma um khah na hi hi,” a ti a. 70 Amah Chun, “Na thugen chuh ka he hiel puoi,” ti’n amau achun a kizuk a. 71 Huongsung apat a a hung pawt phet in nungak dang khatin amah chuh a na mu kit a, zie a umte kawm achun, “Zie pa hile Isu, Nazareth mi kawma um kha ahi hi,” a ti a. 72 Peter chun, “Zie mihiempa chuh ka he puoi,” ti a kihâksiel in a kizuk kit a. 73 Hun chawmkhat hal in a kawma dingte chun Peter kawmah, “Nang hile, amau haw laka tel na hi chien kêi hi, na pau in a kihêi,” a tiu a. 74 Chun, amah chun, “Zie Mihiempa chuh ka he puoi,” ti’n amah kisam sie’n a kihâksiel a. chun, âk a khuong pai zieng ta a. 75 Tichun, Isu’n Peter kawmah, “Ak a khuon ma’n nangin thumvei nei kizuksan inla,” a tih kha a hun he dawk ta a. Chun, a pawtdawk a, hah kah in a kap ta a.

27

Isu Pilate Masang ah

1 Chun, zingkal a hung hih phetin, thiempu liente leh vantâng upa chengcheng chuh Isu thahna ding chungchâng thu ah a kiho u a. 2 Khutichun, Amah chuh a kân u a, a puidawk uh a, gamsung vaihawmpa Pilate kawmah a pie tau a.

Juda Thihna Chuh

3 Chun, a matsakpa Juda khan, Isu chuh mawh a chan sak ui tih a het phetin a kisik a, dangka sawmthum kha thiempu liente leh upate kawm achun a hun chawi kit a, 4 “Mi diktat thisan ka matsak kha thil ka hihkhiel ahi,” a ti a. Amau chun la, “Zie chuh kei uh dingin banga khawk? Nangin na lawh lawh kilawh ah,” a tih san u a. 5 Tichun, Juda chun dangka chuh mun thiengtho achun a seplut a, a taihsana, tichun, a chieh mang a; a va kikhailum ta a. 6 Khutichun, thiempu liente chun dangka chuh a lau a, “Ziehi tuoklawm bawma kawih a thieng puoi, thisan man ahi ngâl a,” a tiu a. 7 Tichun, a kiho u a, malzinte vuihna dingin Beldengte mun chuh chawkna’n a mang tau a. 8 Zieziekchun ahi, zie mun chuh tu tienga, “Thisan Mun,” a tih tâk u hih. 9 Zie chuh, thiemgau Jeremia’n: “Chun, dangka sawmthum Israel suon kuote ahim in aman ana sak uh chuh 10 A lau a, Lalpa’n a tiem guolin, Beldengte mun man dingin a pieu a,” ti a a gen kha a hung tung tai.

Pilate in Isu Thu a Dawtna

11 Chun, Isu chuh Rome gam vaipawpa ma achun a ding a, amah chun a kawmah, “Judate leng na him?” a ti a. Isu’n a kawmah, “Hi e,” a ti a. 12 Himahleh, thiempu liente leh upate’n a heknau thu achun bangma’n a dâwng puoi. 13 Khutichun, Pilate in a kawmah, “A hun hêkna zozai u hi he lo na him?” a ti a. 14 Himahleh, kam khatcha’n le a dâwng puoh a, gam vaipawpa chun mak a sa ten ta a.

Isu Thi dinga Thutanna

15 Rome gam vaipawpa chun, Chiehkân Kut guolvak ni a hih tieng leh, suongkul tângte laka, mipite’n a nget pên uh khat chuh a thahdawk sek ahi a. 16 Zie lai chun. suongkultâng minthang tak khat, Barabbas, a tih uh chuh a nei u a. 17 Khutichun, a hung kikhawp u chun, Pilate in a kawm u ah, “Kuo pên hun thahdawk sak leng na nuom u? Barabbas ahi die, Isu Krista a tih u hih?” a ti a. 18 Mitthîpna ziekin amah chuh a matsak ui tih amah chun a he ngâl a. 19 Zie ban achun, Pilate chuh vaihawmna chutphah a a chut lai in, a zi’n, “Zie mawhna nei lo hiel chunga khan chuh bangmah hih kih; tuzan khan amah ziekin mang lam in thil tamtak ka thuok hi,” ti’n a vaithak behlap a. 20 Thiempu liente leh upate chun, Barabbas thahdawk a, Isu chuh thah ding ti’n mipite chuh a thêm u a. 21 Himahleh, Pilate chun mipite kawm achun, “A mau nih hi a kuo zaw hi hun thahdawk sak leng na nuom u?” a ti kit a. 22 Chun, amau haw chun, “Barabbas” a tiu a. Pilate in a kawm u ah, “Isu Krista a tih u hi bang ka lawh ta die leh?” a ti a. Amau haw chun. “Amah chuh kross ah khêndên ah.” a tiu a. 23 Chun, Pilate chun a kawm u ah, “Bang dingin em? bang ahih khiel hi?” a ti a. Himahlele, amau haw chun, “Kross ah khên den ah,” ti’n a kihah ko zaw diek u a. 24 Ziephet chun, Pilate in bangmah ahih thei ta puoh a, hung buoi zaw deuh deuh ding ahi tih a het in, tui a la a. mipite ma achun a khut a sawp a, “Zie mi diktat thisan ahin ka thieng hi, nangun na lawh lawh uh kilawh un,” a ti a. 25 Tichun, mipi chengcheng chun, “A thisan mawh chuh keihaw leh ka chateu chungah um hen,” ti’n a dâwng uh a. 26 Zie zawh chun Barabbas chuh a thahdawk a; Isu chuh a zêp a, kross a khetdên dingin a piedawk ta a.

Isu Chiemnuih Bawlna’n a Mang ui

27 Zie zawh chun Pilate sepaihte chun Isu chuh gam vaipawpa In, praitoriam ah a puilut u a, a lawi lak uh a mi chengcheng chuh a kawmah a sam khawm uh a. 28 Tichun, a puonhaw chuh a suohthak sak u a, puon sandup a silh sak uh a. 29 Chun, linglukhuk a phêk u a, a khuk sak tau a; a khut changlama luong mawlh a chawih sak u a; a masangah a bawkkhup uh a, “Chibai, Judate leng!” tin chiemnuih bawlna’n a mang tau a. 30 Chil a sietkhum u a, a mawlh chuh a lâksak uh a, a luchang a khet sak u a. 31 Chun, chiemnuih bawlna a a mat zawh un, puon chuh a suoh sak uh a, amah puon mah kha a silh sak uh a, kross a khetdên dingin a pui tau a.

Isu Khetdêna A Umna

32 Chun, a hung pawtdawk lai u chun mi khat, Kurini khuo a um Simon kiti chuh a muu a, zepa chuh Isu Kross pu ding chun a man tau a. 33 Tichun, Golgotha a tih uh mun chuh a hung tun un, (zie chuh Luguh mun tihna ahi), 34 Isu chuh uain thuk, thil kha tawh kihel a dâwn dingin a pieu a; himahlele, a tep phetin, a dâwn nuom ta puoh a. 35 Chun, kross a a khetdên zawh un, phunsân in a silhlechen haw chuh a kihawm u a. 36 Chun, tak achun a chuu a, a veng u a, 37 Tichun, amah a heknau “Zie pa hi Isu Judate Leng ahii,” ti a kizik a lu chung ah a tâk u a. 38 Chun, Isu tawh, suommang nih, a changlam ah khat, a veilam ah khat a khêndên u a. 39 Tichun, mi chieh viel-vak vielte chun a luchang uh thing in, “Nang, Pathien Ho-In phel a, ni thum sunga sakit ding pa, nang leh nang kihihdam ah: 40 Pathien Chapa na hih chun kross apat khan hung kum ta,” ti’n a êngho uh a. 41 Khutibangmah chun, thiempu liente chun, danthuzikte tawh êngho in. 42 “Mi dang bawn hihdam sek a, amah la a kihihdam thei ngâl puo’n. Israel leng hilo maw tuhin, kross apat chun hung kum ta he, tichun amah chuh gingchai tiu. 43 Pathien a taksang hilo maw, a nawp chun, tuhin hukdam hen; Pathien Chapa ka hi, a ti ngâl a,” a tiu a. 44 Chun, suommang a khetdên u chun le khutibang mah chun a êngho a.

Isu Thihna Chuh

45 Chun, sun an nêk phat apat vaimim huonphat gei in gam pumpi chungah thim a hung zing ta a, 46 Vaimim huonphat vel chun Isu chuh, “Eli, Eli, lama sabakthani,” ti’n ngeih tak in a hung kiko a, zie chuh, “Ka Pathien, ka Pathien bang dinga ei taihsan na hi?” tihna ahi. 47 Tichun, a kawmuh a dingte abang chun, zie chuh a zak phet un, “Zie pa hin Elija a sap ahii,” a tiu a. 48 Chun, a lak uh a mi khat a tai vak a, sponj a la a, uain thuk in a dieh chek a; luong mawlh lêk ah a tâk a, a vak dâwn sak a. 49 Himahleh, midang chun, “Tichun um hen, amah latha dingin Elija a hung ei mawh, en hitiu,” a kitiu a. 50 Chun, Isu chuh ngeih tak in a hung kiko kit a, tichun, a thagau a thah ta a. 51 Chun, ngaitie, Pathien Ho-In puonzak chuh a chung lam apat in a nuoi lam gei in a hung kithek ta a. Lei a hung kilîng a, suongpi haw chuh a hung khiphel a; 52 thân haw chuh a hung kihawng a, mi thiengtho tamtak thisa te chule kaihthawh in a um tau a. 53 Ziehaw chun thân chuh a taihsan u a, Isu thana a thawhkit nung chun, Khawpi Thiengtho a chun a lut u a, tichun, mi tamtak kawmah a kilak u a. 54 Chun, sepaih za lawiupa leh a kawma Isu venga umte chun leiling leh thil umzie haw chuh a muh un, a lau mah mah tau a, “Zie pa hi, Pathien Chapa ahi takzet nai,” a tiu a. 55 Zie tak a chun numei tamtak, Isu hun panpih kawm zela, Galili gam apat a hun zuite chuh a um u a, gamla tak apat in thil u a. 56 Ziehaw lak achun, Mari Magdalin, Mari Jakob leh Joses nute, Zebedai chapate nute a tel u a.

Isu Vuih a A Umna

57 Chun, nitâk lam a hung hih phet chun, mi neizo khat, a min Joseph, Arimathai khuo a um a hung a, amah chule Isu nungzui a na hi a. 58 Zie pa chuh Pilate kawmah a va chieh a, Isu luong chuh a ngên a. Tichun, Pilate chun Isu luong chuh Joseph kawma pie dingin thu a pie a. 59 Tichun, Joseph chun Isu luong chuh a la a, patngat puon ngim takin a tuom a; 60 amah thân dinga suong a vih hawm zawh tûng cha achun a siel ta a. Chun, thân kawta chun suong lien tak khat a kawih a, a chieh mang ta a. 61 Chun, zie tak achun Mari Magdalin leh Mari dang chuh thân lam nga’n a chuu a.

Thân Kawt Vengte Chuh

62 Chun, a zing chun, (zie chuh Kiginni zawh zing ahi) thiempu liente leh, Pharisaite chuh Pilate kawmah a kikhawm u a, 63 a kawmah, “Hepu, zie mi lepchiehpa chun a damlai khan, ‘Ni thum zawh leh thokit ing ka,’ a tih kha ka hezing ngâl u a. 64 Zieziekchun, thân chuh ni thum ni tienga vengpha dingin thupie tie; khutilochun, a sinsakte chun amah chuh va guu intin, vantâng kawmah, ‘Mithi lak apat thokit ahi tai,’ ti kha’n au. Tichun, zie dawha nunung zaw chuh a masa sang khan pha mawh zaw khâna,” a tiu a. 65 Ziephet chun, Pilate in a kawm u ah, “A veng ding sepaih na nei u khala, chieh unla, a bitthei tawpin va ngak phat sak un,” a ti a. 66 Khutichun, a chieh u a, suong chuh a melchik u a, thân chuh a ven sak tau hi.

28

Isu Thawhkitna

1 Chun, chawlhni zawh a, chawlhkal khat dinga ni masapen a, khuo a vak ding kuon in, Mari Magdalin leh Mari dang chuh thân en dingin a chieh u a. 2 Chun, ngaitie, inling nasatak in a hung kilîng a, Lalpa vânsâwlchâk, van apat in a hung kum a, suong chuh a hun lik chawn a, a chungah a chu ta a. 3 A mel latdan chuh kawlphe bang ahi a, a silhlechen chuh vuk guolin a vam a. 4 Chun, amah a lauh ziekun a ngakte chuh a kithing u a, mithi guolin a um tau a. 5 Chun, vânsâwlchâk chun numeite chuh a hopih a, a kawm u ah, “Nangun chuh lau kiu in! Isu a khetdên u kha hawl na hiu hi tih ka hêi! 6 Zie tak ahin a um ta puoi; a gen guol ngêi in a tho kit ta kha. A kuolna mun hi hung en mah tiem u. 7 Khutichun, chieh vak unla, a sinsakte kawmah, ‘Mithi lak apat a thokit tai; ngaitiem u, Galili gam ah na mau ah a chieh hi; zie tak achun amah chuh mu’n lau,’ ti’n hilh un. Ka hun hilh sa kha hezing un,” a ti a. 8 Tichun, lau leh kipâk mah mah kawmin thân apan chun a chieh mengmeng u a, sinsakte hilh dingin a tai tau a. 9 Chun, ngaitie, Isu’n amau chuh a kituokpih a, “Chibai le,” a ti a. Tichun, amau chun a kêngpêk chuh a tuu a, a chibai u a. 10 Chun, Isu’n a kawm u ah, “Lau kiu in, chieh tau in la, Galili gama chieh dingin ka suohpihte va hilh un, zie tak achun, ei mu ding na hiu,” a ti a.

Thân Veng Sepaihte

11 Chun, numeite chuh lampi a a chieh lai u chun, thân veng sepaihte chuh khawpi lam zuon chun a chieh u a, thil umzie chengcheng chuh thiempu liente chuh a va hilh tau a. 12 Tichun, thiempu liente chuh upate chu tawh a kihokhawm uh a, sepaihte kawma chun dangka tamtak a pieu a, 13 A kawm u ah “Zan a ka ihmut kal un, a sinsakte chuh a hung uh a, amah chuh a hung gûk uh ahi, mipite kawma na tih dinguh ahi, a tiu a. 14 Tichun, gam vaipawpa’n zie chuh a na het tieng leh, amah chuh thêm lungdam ing ka ting un; tichun, hun hukdawk thei ding ka hiu hi,” a tiu a. 15 Khutichun, dangka chuh a lau a, a hilh guol u chun a hih tau a; tichun, zie chuh tu tieng hin Judate lak achun a gen vengvung u a.

Nungzuite kawma Isu kilâkna

16 Himahlele, sinsak sawmlekhatte chuh, Isu’n tâng a guot sak na muna chun a chieh u a. 17 Chun, amah a muh phet u chun, a chibai u a; kimkhat chun chuh a ginglah u a. 18 Tichun, Isu chuh a kawm u ah a hung a, a kawm u ah, “Lei leh van a thuneihna chengcheng ka kawma piek ahi tai. 19 Khutichun, chieh un la, namtina mi sinsak in siem un la, Pa leh Chapa leh Thagau thiengtho min chun baptist un la; 20 Chun, thu ka hun piek chengcheng hi pawm dingin hilh un. Chun, ngaitiem u; Kei, kumkhuo’n, khawvel beih tiengin le na kawm u ah um zing ing ka,” a ti a. Amen.