The New Testament of our Lord and Saviour Jesus Christ

মথি 1

1 যীশু খ্রীষ্ট দায়ূদনি মা·চংনি আরো দায়ূদ অব্রাহামনি মা·চংনি মান্দি। যীশু খ্রীষ্টনি মা·চংনি মান্দিরাং ইয়ান: 2 অব্রাহামনি দেফান্থি ইস্‌হাক; ইস্‌হাকনি দেফান্থি যাকোব; যাকোবনি দেফান্থি যিহূদা আরো বিনি জংগিবারাং; 3 যিহূদানি দেফান্থি পেরস আরো সেরহ-বিসংনি মা·গিবা হং·জক তামর; পেরসনি দেফান্থি হিষ্রোণ; হিষ্রোণনি দেফান্থি রাম; 4 রামনি দেফান্থি অম্মীনাদব; অম্মীনাদবনি দেফান্থি নহশোন; নহশোননি দেফান্থি সল্‌মোন; 5 সল্‌মোননি দেফান্থি বোয়স-বিনি মা·গিবা হং·জক রাহব; বোয়সনি দেফান্থি ওবেদ-বিনি মা·গিবা হং·জক রূত; ওবেদনি দেফান্থি যিশয়; 6 যিশয়নি দেফান্থি রাজা দায়ূদ। দায়ূদনি দেফান্থি শলোমন-বিনি মা·গিবা হং·জক ঊরিয়নি রান্দি জিকগিবা; 7 শলোমননি দেফান্থি রহবিয়াম; রহবিয়ামনি দেফান্থি অবিয়; অবিয়নি দেফান্থি আসা; 8 আসানি দেফান্থি যিহোশাফট; যিহোশাফটনি দেফান্থি যোরাম; যোরামনি দেফান্থি ঊষিয়; 9 ঊষিয়নি দেফান্থি যোথম; যোথমনি দেফান্থি আহস; আহসনি দেফান্থি হিষ্কিয়; 10 হিষ্কিয়নি দেফান্থি মনঃশি; মনঃশিনি দেফান্থি আমোন; আমোননি দেফান্থি যোশিয়; 11 যোশিয়নি দেফান্থি যিকনিয় আরো বিনি জংগিবারাং-বাবিল হা·সংচা ইস্রায়েল জাতরাংখো রি·ম্মে রা·আংমিত্তিংও ইয়ারাং দংআমিং। 12 যিকনিয়নি দেফান্থি শল্‌টিয়েল-ইস্রায়েল জাতরাংখো বাবিল সংজিলমাচা রি·ম্মে রা·আংআনি জা·মানো বিয়া আৎচিয়ামিং; শল্‌টিয়েলনি দেফান্থি সরু্ববাবিল; 13 সরু্ববাবিলনি দেফান্থি অবিহূদ; অবিহূদনি দেফান্থি ইলিয়াকিম; ইলিয়াকিমনি দেফান্থি আসোর; 14 আসোরনি দেফান্থি সাদোক; সাদোকনি দেফান্থি আখীম; আখীমনি দেফান্থি ইলিহূদ; 15 ইলিহূদনি দেফান্থি ইলিয়াসর; ইলিয়াসরনি দেফান্থি মত্তন; মত্তননি দেফান্থি যাকোব; যাকোবনি দেফান্থি যোষেফ- বিয়া মরিয়মনি সেগিবা। 16 ইয়া মরিয়মনি অক্কো যীশু আৎচিয়ামিং, জেখো খ্রীষ্ট মিংআ। 17 ইন্দাকে অব্রাহামওনি দায়ূদওনা দিপ্পাৎ চাসং চি·ব্রি; দায়ূদওনি বাবিলচা রি·ম্মে রা·আংআনি সময়ওনা দিপ্পাৎ চাসং চি·ব্রি; বাবিলো রি·য়াংআওনি খ্রীষ্টওনা দিপ্পাৎ চাসং চি·ব্রি। 18 যীশু খ্রীষ্ট ইন্দাকে আৎচিয়ামিং। যোষেফমুং যীশুনি মা·গিবা মরিয়মনি বিয়া থিক হং·আমিং, ইন্দিবা বিসং আপসান দংনা স্খাংআন গিসিক রংথালগিবানি বিলচা মরিয়ম হা·ন্নোগ্মাং হং·আমিং। 19 মরিয়মনি সেগিবা যোষেফ থরমি মান্দিমিং, ইন্দিবা বিয়া মরিয়মখো মান্দিরাংনি মিকখাংও খ্রাচা·এতনা হাম·জাজক; ইনি গিম্মিন বিয়া সিউল দাক্কে বিখো ওয়াতনা চানচিজক। 20 যোষেফ ইরাংখো চানচিমিত্তিংও গিত্তেলনি সা·গ্রে জুমাংচা বিনা মিকখাং ফা·এ আগানজক, ‘‘ও দায়ূদনি দেফান্থি যোষেফ, মরিয়মখো খিমনা দা·আ খেন্নাবো, মুয়ানা বিনি অক্কো খেগিবা, গিসিক রংথালগিবানি বিলচান হং·আ। বিনি সাকসা দেফান্থি হং·নুয়া। 21 না·আ বিনি বিমুংখো যীশু মিংবো, মুয়ানা বিয়া আন·থাংনি মান্দিরাংখো বিসংনি পাপরাংনিখো জক্কেৎনুয়া।’’ 22 ইরাং হং·আমিং জেদাক্কে আগানসোগিবানি আগানগিবা গিত্তেলনি ইয়া খাৎথা চু·সকা: 23 ‘‘মি·থ্রা সাকসা অক্কো খেনুয়া, বিয়া সাকসা দেফান্থিখো বা·নুয়া, বিনি বিমুংখো ইম্মানূয়েল মিংনুয়া।’’ জেখো ফি·ওদে, চিংমুং ইসল, হং·আ। 24 গিত্তেলনি সা·গ্রে যোষেফখো জেদাক্কে গি·য়েতামিং, থুয়ানি চাখাত্তে বিয়া উয়ানদাক্কেন দাকজক। 25 বিয়া মরিয়মখো খিমজক, ইন্দিবা দেফান্থি আৎচিখুজানা দিপ্পাৎ বিমুং আপসান হং·জাজক। জা·মানো যোষেফ দেফান্থিগিবানি বিমুংখো যীশু মিংজক।

মথি 2

1 হেরোদ রাজানি সময়ও যিহূদিয়া হা·দকনি বৈৎলেহম সংচা যীশু আৎচিয়ামিং। সালারামচানি মিত্তাম হা·আইগিবা মান্দিরাং যিরূশালেমচানা রি·বাএ আগানজক, 2 ‘‘যিহূদীরাংনি রাজা আৎচিগিবা বাও? চিংআ সালারামচা সিলগাও বিনি আস্কিখো নিক্কে বিখো অলাখিনা রি·বাজক।’’ 3 ইয়া খাৎথাখো খিন্নাএ রাজা হেরোদ আরো বিমুং যিরূশালেমনি গিম্মিকান জাজ্রেংজক। 4 হেরোদ গিম্মিক খামাল দাল·গিবারাংখো আরো শাস্ত্র স্খিগিবারাংখো রিংগামে খ্রীষ্ট বানো আৎচিনুয়া উখো সিং·জক। 5 বিসং বিনা আগানজক, ‘‘যিহূদিয়ানি বৈৎলেহম সংও বিয়া আৎচিনুয়া, মুয়ানা আগানসোগিবা ইয়া খাৎথাখো চক্কে দন্না: 6 যিহূদা হা·সংনি বৈৎলেহম, যিহূদানি গিসেপো না·আ মামুং দাক্কেবা চনবাতজা, মুয়ানা নাং·ওনিন ইন্দাকগিবা শাসন দাকগিবা সাকসা হং·খাতনুয়া জে আংনি মান্দি ইস্রায়েলরাংখো নিরক্ষিনুয়া।’’ 7 উনোন হেরোদ উয়া হা·আইগিবা মান্দিরাংখো সিউল দাক্কে রিক্কামজক আরো বাগিবা সময়ও আস্কিখো নিক্কামিং উখো নাম্মে দাক্কে হা·আইএ রা·জক। 8 উয়া হা·আইগিবা মান্দিরাংখো বিয়া বৈৎলেহমচা ইন্দাকে আগানে ওয়াত্তেতজক, ‘‘না·সং রি·য়াংএ নাম্মেদাক্কে উয়া বি·সাখো সান্দিবো। আরো বিখো নিকমানোদে আংনাবা আগানবো জেদাক্কে আংআবা রি·য়াংএ বিখো অলাখিনা মা·ন্না।’’ 9 রাজানি আগানাখো খিন্নাএ হা·আইগিবা মান্দিরাং রি·য়াংজক। সালারামচা বিসং জে আস্কিখো নিক্কামিং উয়া বিসংনা স্খাং স্খাং রি·জক। জেও বি·সা দংআমিং উয়া নকনি সাক্কাওনা সক্কাংএ দংদিপখুজানা দিপ্পাৎ উয়া আস্কি থম·থমগিজা রি·জলজলজক। 10 আস্কিখো নিক্কে বিসং নাম্মেন খুসি হং·এ নকনিং·আচা নাপজক আরো উয়া বি·সাখো বিনি মা·গিবা মরিয়মচা নিকনা মান·জক। উনোন বিসং হা·আও থুগোপে উয়া বি·সাখো অলাখিজক আরো আন·থাংথাংনি গাম দনচাকানিরাংখো এংএ বিনা সোনা, কুন্দুরু আরো সিম্মিলগিবা তেলখো হন·জক। 12 জা·মানো হেরোদচা ফি·ল্লাংজাখানা ইসল বিসংখো জুমাংচা বেং·জক। উনোন বিসং গিপ্পিন রামা গিত্তা সংথাংচানা রি·য়াংজক। 13 হা·আইগিবা মান্দিরাংনি রি·য়াংআনি জা·মানো গিত্তেলনি সাকসা সা·গ্রে যোষেফনা জুমাংচা মিকখাং ফা·এ আগানজক, ‘‘চাখাতবো, বি·সাখো আরো বিনি মা·গিবাখো রিম্মে মিসর হা·সংচা খাত্তাংবো আরো আংনি নাং·খো আগানজা দিপ্পাৎ উনোন দংবো; মুয়ানা বি·সাখো স·ওতে গালনা হেরোদ বিখো সান্দিনুয়া।’’ 14 উনি ওয়াল্লোন যোষেফ চাখাত্তে উয়া বি·সাখো আরো বিনি মা·গিবাখো রিম্মে মিসর হা·সংচানা রি·য়াংজক আরো হেরোদনি সিখুজানা দিপ্পাৎ উয়োন দংজক। ইরাং হং·আ জেদাক্কে আগানসোগিবাচা গিত্তেলনি আগানগিবা ইয়া খাৎথা চু·সকা: আংআ মিসরওনি আংনি দেফান্থিখো রিংগামে রা·বাজক। 16 হা·আইগিবা মান্দিরাং বিখো থগিজক ইন্নে হেরোদ নাম্মেন খা·আওনাংবিজক। উয়া হা·আইগিবা মান্দিরাংচা নাম্মেদাক্কে সিং·এ জে সালখো বিয়া হা·আইএ রা·আমিং উয়া সালনি হিসাব গিত্তা বৈৎলেহম আরো উনি সামবাজলরাংনি বিলসি গ্মি আরো উনা চনবাত্তা গিম্মিক বি·সারাংখো স·ওতে গালনা গি·য়েৎজক। 17 উনি গান্দা আগানসোগিবা যিরমিয়নি আগানা ইয়া খাৎথা চু·সকজক: 18 রামাও গ্রাপারাংখো খিন্নানা মা·ন্নিংআ; রাহেল দেথাংরাংনা গ্রাপিংআ, মামুংওবা থম·থমজা, মুয়ানা বিসং দংজাজক। 19 হেরোদনি সিয়ানি জা·মানো গিত্তেলনি সা·গ্রে সাকসা মিসর হা·সংচা যোষেফনা জুমাংচা মিকখাং ফা·এ আগানজক, 20 ‘‘চাখাতবো, বি·সাখো আরো বিনি মা·খো রিম্মে ইস্রায়েল হা·সংচা রি·য়াংবো। বি·সাখো জেরাং স·ওতনা হা·ম্মামিং বিসং সিথকজক।’’ 21 উনোন যোষেফ চাখাত্তে উয়া বি·সাখো আরো বিনি মা·খো রিম্মে ইস্রায়েল হা·সংচা রি·য়াংজক। 22 উয়া সময়ও যিহূদিয়া হা·সংও হেরোদনি জা·মানো বিনি দেগিবা আর্খিলায় রাজা হং·আমিং। ইখো খিন্নাএ যোষেফ উয়োনা রি·য়াংনা খেনজক। জা·মানো জুমাংচা ইসলনি গি·য়েতাখো মা·ন্নে বিয়া গালীল হা·দকচা রি·য়াংজক, 23 আরো নাসরত মিংগিবা সংচা রি·য়াংএ সংদংএজক। ইরাং হং·জক জেদাক্কে আগানসোগিবারাংনি আগানগিবা ইয়া খাৎথা চু·সকা: ‘‘বিখো নাসরতনি মান্দি ইন্নে মিংনুয়া।’’

মথি 3

1 জা·মানো রিপ্পলেতগিবা যোহন যিহূদিয়ানি হা·গিসি জওলোনা রি·বাএ ইন্দাকে আগানফ্রাকনা হা·বাচেংজক, 2 ‘‘পাপওনি গিসিক ফিল·বো, মুয়ানা সালগিনি সংনক সেফাংবাজক।’’ 3 ইয়া যোহননি গিম্মিনান যিশাইয় আগানসোগিবা আগানসোআমিং, হা·গিসি জওলো সাকসানি খু·রাং চ্রিকে আগানিংআ, ‘‘না·সং গিত্তেলনি রামাখো থারিসোবো, বিনি রি·য়ানি রামাখো স্রংএ থারিবো।’’ 4 যোহন উট খিম্মিলনি বা·রাখো গান্নুয়ামিং আরো মাত বিগিলচা খাংখারিখো খানুয়ামিং। বিয়া হাগুকরাংখো আরো ব্রিংনি বিজা বিৎচিখো চা·নুয়ামিং। 5 যিরূশালেম, যিহূদিয়া গিম্মিক আরো যর্দন চিবিমানি সামব্রিও দংগিবা মান্দিরাং উনো বিচা রি·বানা হা·বাচেংজক। 6 ইয়া মান্দিরাং আন·থাংথাংনি পাপখো খু·রাচাক্কানি জা·মানো যোহন বিসংখো যর্দন চিবিমাও রিপ্পলেতজক। 7 জা·মানো যোহন নিকনা মান·জক ফরীশী আরো সদ্দূকীরাং বাং·এন রিপ্পলনা বিচা রি·বাংজক। বিয়া বিসংখো আগানজক, ‘‘চিপ্পুনি দেদ্রাং! ইসলচানি রি·বাগিবা শাস্তিওনি খাত্তাংনা ইয়া বুদ্ধিখো সা না·সংনা হন·জক? 8 ইন্দিদে না·সং পাপওনি গিসিক ফিল·জক উনি খ্রাগিবা বিথিখো না·সংনি জাংগি থাংআও ফিন্নিকবো। 9 না·সং অব্রাহামনি মা·চংনি দেদ্রাং, ইখো আন·থাংথাংনি গিসিকো আগান্না মা·ন্নুয়া ইন্নে দা·আ চানচিয়া। আংআ না·সংখো আগানিংআ, ইসল ইয়া রং·থিরাংওনিখো অব্রাহামনি দেদ্রাংখো থারিনা মা·ন্না। 10 বলবিফাংনি জা·থিংও রুয়াখো দন্নান দংআ। জে বিফাংও নাম্মা বিথি নাংজা উখোদে দেন·ফাকেন ওয়া·আলো গাল্লেতনুয়া। 11 গিসিক ফিল·জক ইন্নে আংআ না·সংখো চিও রিপ্পলেতিংআ, ইন্দিবা আংনি জা·মানচা রি·বাগিবাদে আংনা বিল্লাকবাত্তা। আংআদে বিনি জা·খপখো রিপ্পিএ রা·নাবা খ্রাজা। বিয়া না·সংখো গিসিক রংথালগিবাও আরো ওয়া·আলো রিপ্পলেতনুয়া। 12 বিনি জাক্কোন রুয়ান দংআ আরো আন·থাংনি মি মাড়াইগিবা হা·দামখো বিয়া নাম্মেদাক্কেন রংথালেতনুয়া। বিয়া আন·থাংনি মিখো জামও চিম্মংনুয়া, ইন্দিবা বিবুখোদে খিম্মিতনা মান·গিজাগিবা ওয়া·আলো সো·এ গালনুয়া।’’ 13 উনোন রিপ্পলনা ইন্নে যীশু গালীলওনি যর্দন চিবিমানি রিক্কামো যোহনচা রি·বাজক। 14 ইন্দিবা যোহন বিখো ইন্দাকে আগানে বেং·আমিং, ‘‘আংআসা নাং·চানিখো রিপ্পলাখো মা·ন্না নাংআ; ইন্দিবা না·আ আংচানা রি·বাজক!’’ 15 উনো যীশু বিনা আগানচাকজক, ‘‘ইন্দিবা দা·আও ইন্দাকেন হং·খানা, মুয়ানা ইসলনি হা·সিকাখো ইন্দাকেন আনচিং চু·সকেতনা খ্রাআ।’’ উনোন যোহন বিখো রিপ্পলেতনা গং·জক। 16 রিপ্পলানি জা·মানো যীশু চিওনি গাখাতমিত্তিংওন বিনি মিকখাংও সিলগা ফ্রাকাংজক। বিয়া কইতর গিত্তা বিনি সাক্কাও ইসলনি গিসিকনি হং·ওনবাখো নিকনা মান·জক। 17 উনোন সালগিচানি ইয়া খাৎথাখো আগানজক, ‘‘ইয়ান আংনি খা·সাগিবা দেফান্থি, জেও আংআ খুসি হং·বিয়া।’’

মথি 4

1 উনি জা·মানো গিসিক রংথালগিবা যীশুখো হা·গিসি জওলোনা রিম্মাংজক জেদাক্কে শয়তান যীশুখো মাদ্দুয়েতে পাপও গালনা মা·ন্না। 2 যীশু উয়োনা সাল সৎব্রি আরো ওয়াল সৎব্রি অকগুমুন দংআনি জা·মানো অকখ্রিজক। 3 উনো শয়তান রি·বাএ বিনা আগানজক, ‘‘না·আ ইসলনি দেফান্থি হং·ওদে ইয়া রং·থিরাংখো রুটি ফিল·খানা আগানবো।’’ 4 যীশু আগানচাকজক, ‘‘রংথালগিবা শাস্ত্রও চক্কা দংআ, মান্দি রুটি চা·এসান থাংজা, ইন্দিবা ইসলনি খু·সুকনি গিম্মিক খাৎথানাসা থাংআ।’’ 5 উনোন শয়তান যীশুখো রংথালগিবা সংজিলমা যিরূশালেমচানা রিম্মাংজক আরো থরম নকনি চুবাত্তা হা·দামও বিখো চাদেংএতি আগানজক, 6 “না·আ ইসলনি দেফান্থি হং·ওদে খা·মাচানা চক্কনবো, মুয়ানা রংথালগিবা শাস্ত্রও চক্কা দংআ, ইসল নাং·নি গিম্মিন আন·থাংনি সা·গ্রেরাংখো গি·য়েৎনুয়া; রং·থিও নাংএ নাং·নি জা·চক মাতজাখানা বিসং নাং·খো জাকচা রিম·চাকনুয়া।” 7 যীশু শয়তাননা আগানজক, ‘‘আরোবা চক্কা দংআ, না·আ আন·থাংনি গিত্তেল ইসলখো দা·আ রুরাএ নিনা রি·য়াংআ।’’ 8 উনোন শয়তান দা·আবা বিখো নাম্মেন চুয়াকগিবা গি·সা হা·ব্রিচানা রিম্মাংজক আরো হা·গিলসাকনি গিম্মিক সংনকরাংখো আরো উরাংনি রাসংখো ফিন্নিকে আগানজক, 9 ‘‘না·আ আংখো হা·আও থুচিকপে অলাখিয়ে নাং·নি গিত্তেল ইন্নে খু·রাচাকোদে আংআ নাং·না ইয়া গিম্মিকখোন হ·ন্নুয়া।’’ 10 উনো যীশু বিনা আগানজক, ‘‘ইয়োনি খাত্তাংবো, শয়তান। রংথালগিবা শাস্ত্রও চক্কা দংআ, না·আ নাং·নি গিত্তেল ইসলখোন অলাখিবো, আরো বিনাসান দাকচাকে হন·বো।’’ 11 উনোন শয়তান বিখো ওয়াত্তাংজক, আরো সা·গ্রেরাং রি·বাএ বিনা দাকচাকে হ·ন্না হা·বাচেংজক। 12 জা·মানো যীশু যোহনখো ফাতোকো দন্নাখো খিন্নানা মান·জক। উনো বিয়া গালীলচানা রি·য়াংজক আরো নাসরত সংখো ওয়াত্তে সবূলূন আরো নপ্তালি জওলনি গিসেপো সাগাল রিক্কামো দংগিবা কফরনাহূম সংজিলমাচা রি·য়াংএ দংজক। 14 ইরাং হং·জক জেদাক্কে আগানসোগিবা যিশাইয়নি আগানা ইয়া খাৎথা চু·সকা: 15 সবূলূন আরো নপ্তালি জওলনি, সাগালচানি, যর্দননি নালসাচানি আরো গিপ্পিন জাতরাংনি গালীলনি 16 জে মান্দিরাং আন্দালাও দংআ, বিসং সেং·বিয়াখো নিকনা মা·ন্নুয়া। জেরাং নাম্মেন আন্দালানি হা·সংও দংআ, বিসংচা সেং·আ ফারাকনুয়া। 17 উয়া সময়ওনি যীশু ইন্দাকে আগানফ্রাকনা হা·বাচেংজক, ‘‘পাপওনি গিসিক ফিল·বো, মুয়ানা সালগিনি সংনক সেফাংও সকবাজক।’’ 18 যীশু গালীল সাগালনি রিক্কাম গিত্তা রি·য়াংমিত্তিংও শিমোন, জেখো পিতর মিংআ আরো বিনি জংগিবা আন্দ্রিয়খো নিকনা মান·জক। বিসং সাগালো জাল গোংআমিং, মুয়ানা বিসং না·থক রিম·গিবা হং·আমিং। 19 যীশু বিসংখো ইনজক, ‘‘আংমুং রি·বো, আংআ না·সংখো মান্দি রিম·গিবা দাক্কে থারিনুয়া। 20 উনোন বিসং জালখো দনগাল্লে যীশুমুং রি·য়াংফাজক। 21 উনোনি মিকখাংচাবাক্কা রি·য়াংএ বিয়া যাকোব আরো বিনি জংগিবা যোহন মিংগিবা গিপ্পিন আদাসা সাকগ্মিখো নিকনা মান·জক। বিসং সিবদিয়নি দেফান্থি হং·আমিং। বিসংনি ফাগিবা সিবদিয়মুং রিংও আসংএ বিসং জালখো থারিংআমিং। যীশু উয়া সাকগ্মি আদাসাখোবা রিক্কামজক। 22 উনোন বিসং বিসংনি রিংখো আরো ফাখো ওয়াত্তে যীশুমুং রি·য়াংফাজক। 23 গালীল হা·দকনি গিম্মিক হা·দামরাংচা রি·রোরোয়ে যিহূদীরাংনি দিংথাং দিংথাং থম·দাকরামচা যীশু স্খিনা নাংজক। আরো ইসলনি সংনকনি নাম্মা খাৎথাখো আগানফ্রাকনা আরো জম্মা-সা দংগিবা মান্দিরাংখো নাম্মেতনা হা·বাচেংজক। 24 সিরিয়া হা·সং গিম্মিকচানা বিনি খাৎথা গিপ্পাংজক। জে মান্দিরাং জম্মে-সাএ আরো সা·দিকে-সা·খামে দংআমিং, জেরাংখো গিসিক নামগিজাগিবা মা·ন্নামিং আরো দেকদেকে গিত্থিলগিবারাংখো আরো হা·আন জাদা সিগিবারাংখো মান্দিরাং যীশুচা রিমবাজক। বিয়া বিসংখো নাম্মেতজক। 25 গালীল, দিকাপলি, যিরূশালেম, যিহূদিয়া আরো যর্দননি নালসাচানি মান্দি বাং·আরাং যীশুমুং রি·য়াংফাজক।

মথি 5

1 যীশু মান্দি বাং·আখো নিক্কে হা·ব্রি সাক্কাওনা গাদোজক। বিনি আসংআনি জা·মানো বিনি জা·রিকগিবারাং বিচানা রি·বাজক। 2 উনো বিয়া জা·রিকগিবারাংনা ইন্দাকে আগানফ্রাকনা হা·বাচেংজক: 3 ‘‘গিসিকো আন·থাংথাংখো দিল্লা-চন্না ইন্নে চানচিগিবারাং ফাত্তিয়াখো মান·গিবা হং·আ, মুয়ানা সালগিনি সংনক বিসংনিন। 4 দুক চাকগিবারাং ফাত্তিয়াখো মান·গিবা হং·আ, মুয়ানা বিসং খা·নাম্মেতাখো মা·ন্নুয়া। 5 গিসিক রিন্নকগিবারাং ফাত্তিয়াখো মান·গিবা হং·আ, মুয়ানা হা·গিলসাক বিসংনিন হং·নুয়া। 6 ইসলনি হা·সিকা গিত্তা রি·গিবারাং ফাত্তিয়াখো মান·গিবা হং·আ, মুয়ানা বিসংনি উয়া হা·সিকারাং চু·সকনুয়া। 7 খা·সাচাকগিবারাং ফাত্তিয়াখো মান·গিবা হং·আ, মুয়ানা বিসং খা·সাচাক্কাখো মা·ন্নুয়া। 8 খা·থং রংথালগিবারাং ফাত্তিয়াখো মান·গিবা হং·আ, মুয়ানা বিসং ইসলখো নিকনা মা·ন্নুয়া। 9 মান্দিরাংনি জাংগিও থম·থমাখো রা·বানা কাম দাকগিবারাং ফাত্তিয়াখো মান·গিবা হং·আ, মুয়ানা ইসল বিসংখো আন·থাংনি দেফান্থি ইন্নুয়া। 10 ইসলনি হা·সিকা গিত্তা রি·না রি·য়াংএ জেরাং গিচ্চিয়াখো চাক্কা বিসং ফাত্তিয়াখো মান·গিবা হং·আ, মুয়ানা সালগিনি-সংনক বিসংনিন। 11 ‘‘না·সং ফাত্তিয়াখো মান·গিবা হং·আ, জেনসালো মান্দিরাং আংনি হা·সেল না·সংখো চন্নিকা আরো হা·রিকা আরো না·সংনি বিমুংও বু·এ মামান্থি নামগিজা খাৎথারাংখো আগানা। 12 না·সং হান·সেংবো আরো খুসি হং·বো, মুয়ানা সালগিও না·সংনি মা·ন্নানিরাং বাং·এ দংআ। না·সংনা স্খাং দংগিবা আগানসোগিবারাংখোবা মান্দিরাং ইন্দাকেন হা·রিকনুয়ামিং। 13 ‘‘না·সং হা·গিলসাকনি খাসিম, ইন্দিবা খাসিমনি থোয়া গ্রিওদে বাদিকে উখো থয়েতনুয়া? উয়া খাসিম মামুং কামনাবা নাংজা। উখো হা·ফালচা গালনা আরো মান্দিনি গা·বেলবেলনা খ্রাআ হং·আ। 14 ‘‘না·সং হা·গিলসাকনি সেং·আ। হা·ব্রি সাক্কানি সংজিলমাখো থুম্মুয়ে দন্না মান·জা। 15 দারাংবা চাক্কি সো·এ খকনি নিং·আও দনজা ইন্দিবা গাসানি সাক্কাওসা দন্না। ইনি গিম্মিন নকনি মান্দি গিম্মিকান সেং·আখো মা·ন্না। 16 উয়ানদাক্কে মান্দিরাংনি মিকখাংও না·সংনি সেং·আ থেং·সুখানা, জেদাক্কে বিসং না·সংনি নাম্মা কামখো নিক্কে না·সংনি সালগিও দংগিবা ফাখো রাসং চাএতনা মা·ন্না। 17 ‘‘আংআ মোশিনি নিয়ামরাংখো আরো আগানসোগিবারাংনি চক্কে দন্নাংগিবা খাৎথারাংখো গিম্মায়েতনা রি·বাজক ইন্নে দা·আ চানচিয়াবো। আংআ উরাংখো গিম্মায়েতনা রি·বাজা ইন্দিবা চু·সকেতনা রি·বাজক। 18 আংআ না·সংনা বিবিন আগানিংআ, সিলগা আরো হা·গিলসাক গিম্মাজা দিপ্পাৎ, গিম্মিকান চু·সকজা দিপ্পাৎ নিয়ামওনি অক্ষিমিন্থিবা গিম্মাজানুয়া। 19 উনা গান্দা সাবা গি·য়েতানিরাংনি গিসেপো চনবাৎগিবা মিংসা গি·য়েতাখো ফি·ওদে আরো মান্দিরাংনা ইন্দাকে ফি·আখো স্খিওদে বিখো সালগিনি সংনকচা চনবাৎগিবা ইন্নুয়া। ইন্দিবা জেরাং উয়া গি·য়েতানিরাংখো মানিয়া আরো স্খিয়ে হ·ন্না বিখো সালগিনি সংনকও দাল·বাত্তা ইন্নুয়া। 20 আংআ না·সংনা আগানিংআ, শাস্ত্র স্খিগিবারাংনি আরো ফরীশীরাংনি থরম দাক্কানা বাত্তে না·সংনিন বাং·বাতজাওদে না·সং মামুং দাক্কেবা সালগিনি সংনকো নাপনা মান·জানুয়া। 21 ‘‘না·সং খিন্নাজক, চেংওনি মান্দিরাংনা ইয়া খাৎথাখো আগানা হং·জক, ‘দা·আ স·ওতা, স·ওতগিবা বিচালো শাস্তি মা·ন্নুয়া।’ 22 ইন্দিবা আংআ না·সংনা আগানিংআ, আন·থাংনি জংআদাখো জেআন খা·আওনাংআ বিয়া বিচালো শাস্তি মা·ন্নুয়া। আন·থাংনি জংআদাখো ‘না·আ জাদাস্রাং,’ ইনগিবা দাল·বাৎগিবা খ্রিমানি বিচালো শাস্তি মা·ন্নুয়া। আরো আন·থাংনি জংআদাখো ‘না·আ দাকজা-সু·জা,’ ইন্দাকে ইনগিবা নরকনি ওয়া·আলো শাস্তি মা·ন্নুয়া। 23 ‘‘উনা গান্দা গানচি সাক্কাও ইসলনা মিকসংএ নাং·নি হ·ন্নানিখো রা·বানি সময়ও আরো উনো আন·থাংনি জংআদা নাং·নি নামগিজাখো আগান্নুয়া ইন্নে গিসিক রা·ওদে, 24 ইন্দাকোদে নাং·নি হ·ন্নানিখো উয়া গানচিনি মিকখাংও দন্নে রি·য়াংআরিবো। স্খাং আন·থাংনি জংআদামুং নাংরিমচেংবো জা·মানো রি·বাএ নাং·নি হ·ন্নানিখো হন·বো। 25 ‘‘সাবা নাং·খো নালিশ দাক্কোদে বিচাল দাকগিবাওনা বিনি রি·য়াংনা স্খাংআন বিমুং নাংরিমবো। ইন্দাকজাওদে বিয়া নাং·খো বিচাল দাকগিবানি জাক্কো রি·ম্মে হ·ন্নুয়া, আরো বিচাল দাকগিবা নাং·খো পেয়াদানি জাক্কো হ·ন্নুয়া, আরো পেয়াদা নাং·খো জেলো দন্নুয়া। 26 আংআ নাং·খো বিবিন আগানিংআ, বন·চতগিবা পয়সাখো চতস্রাংজাওদে না·আ মামুং দাক্কেবা উয়োনি হং·খাতবানা মান·জানুয়া। 27 ‘‘না·সং খিন্নাজক, ইয়া খাৎথাখো আগানা হং·জক, ‘দা·আ থি·ল্লেকা।’ 28 ইন্দিবা আংআ না·সংনা আগানিংআ, গিসিকো নামগিজা চানচিয়াখো রা·এ সাকসা মিচিকসাচা নিগিবাদে উনোন গিসিকথাংও বিমুং থি·ল্লেকজক। 29 ‘‘নাং·নি জাক্রানি মিক্রোন নাং·খো পাপনি রামাওনা সাল্লাংওদে উখো ওত্তে চে·ল্লাচা গালবো। বে·এন গিম্মিক নরকচা গা·আকানা বাত্তে উনি বাক গি·সা নাসিয়ান নাং·না নামবাত্তা। 30 নাং·নি জাক্রানি জাক নাং·খো পাপনি রামাওনা সাল্লাংওদে উখো দেন·থংএ গালবো। বে·এন গিম্মিক নরকচা রি·য়াংআনা বাত্তে উনি বাক গি·সা নাসিয়ান নাং·না নামবাত্তা। 31 ‘‘আরোবা চক্কা দংআ, ‘জে মান্দি জিকথাংখো গাল্লা বিয়া গাল্লানি লেকখাখো বিনা হন·খানা।’ 32 ইন্দিবা আংআ না·সংনা আগানিংআ, স·বাকানি গ্রোনা আগ্রে জে মান্দি জিকথাংখো গাল্লা বিয়া বিখো স·বাকগিবা দাক্কেতা। আরো উয়া গালগিবা মিচিকখো খিমগিপা মান্দিবা স·বাকগিবা হং·আ। 33 ‘‘দা·আবা না·সং খিন্নাজক, চেংওনি মান্দিরাংনা ইখো আগানা হং·জক, ‘বু·এ দা·আ মিকচেতাবো, বাত্তেসা গিত্তেলনা মিকসংএ নাং·নি গিম্মিক মিকচেতাখো চু·সকেতবো।’ 34 ইন্দিবা আংআ না·সংনা আগানিংআ, দা·আ মিকচেতস্রাংআবো। সালগিনি বিমুংও দা·আ দাক্কাবো, মুয়ানা উয়াদে সালগিনি সিংহাসন। 35 হা·গিলসাকনি বিমুংও দা·আ দাক্কাবো, মুয়ানা উয়া বিনি জা·চক দনগিবা হা·দামসা। যিরূশালেমনি বিমুংও দা·আ দাক্কাবো, মুয়ানা উয়া দাল·বাৎগিবা রাজানি সংজিলমা। 36 নাং·নি স্খুনি বিমুংও দা·আ দাক্কাবো, মুয়ানা উনি খিন্নি দিংসাখোবা না·আ গিব্বকেতনা বা গিসিমেতনা মান·জা। 37 না·সংনি খু·সুকনি ‘হো·এ’ জেদাক্কে ‘হো·এন’ হং·খানা আরো ‘হং·জা’ জেদাক্কে ‘হং·জা’ হং·খানা; ইরাংনা আগ্রে গিম্মিকান শয়তানচানি রি·বাআ। 38 ‘‘ ‘মিক্রোননি ফাল মিক্রোন আরো ওয়াগামনি ফাল ওয়াগাম’ ইন্নে আগানাখো, না·সং খিন্নাজক। 39 ইন্দিবা আংআ না·সংনা আগানিংআ, না·সংমুং নামগিজা বেওয়ালখো দাক্কোদে না·সং বিনি সাক্কাও দা·আ মামুং দাক্কাবো; বাত্তেসা সাবা নাং·নি জাক্রানি নাথেংখো দকথাপোদে নাথেং সামসাখোবা বিনা দকথাপনা হন·ফাবো। 40 সাবা নাং·নি চলাখো রা·না ইন্নে নালিশ দাকনা হা·ম্মোদে বিনা নাং·নি বা·রা চিনগিবাখোবা রা·আংনা হন·বো। 41 সাবা নাং·খো মাইলসানা বিনি বেগাল রি·ম্মোদে বিমুং মাইল গ্মিনা রি·য়াংবো। 42 জে মান্দি নাং·চা মামুংখো বি·আ বিনা হন·বো, আরো জে মান্দি নাং·চানিখো স্রনা হা·ম্মা বিনা হ·ন্না দা·আ জিচাকাবো। 43 ‘‘না·সং খিন্নাজক, ইন্দাকে আগানাখো, ‘নাং·নি সংসুল-নকসুলনা খা·সাবো আরো বোবিলনা মিৎচিবো।’ 44 ইন্দিবা আংআ না·সংনা আগানিংআ, না·সং না·সংনি বোবিলরাংনা খা·সাবো। না·সংখো হা·রিকগিবারাংনা বি·চাকবো, 45 জেদাক্কে মান্দিরাং বিবিন না·সংখো সালগিও দংগিবা ফানি বি·সা ইন্নে নিকনা মা·ন্না। বিয়া নামগিজা আরো নামগিবা গিম্মিকনি সাক্কাওন বিনি সালখো নায়েতা আরো থরমি আরো থরমি হং·গিজাগিবারাংনা মিকখা ওয়াএতা। 46 না·সংখো খা·সাগিবারাংনাসান না·সং খা·সাওদে না·সংনি মুয়া মা·ন্নানি দংআ? খাজিনা গিলগিবারাংবা ইন্দাকেন দাকজামা? 47 আরো না·সং আন·থাংথাংনি মান্দিরাংনাসান সালাম হ·ন্নোদে না·সং গিপ্পিনরাংনা বাত্তে বাং·এ আরোবা মুয়াখো দাক্কিংআ? গিপ্পিন জাতরাংবা ইন্দাকেন দাকজামা? 48 উনা গান্দা আগানিংআ, না·সংনি সালগিও দংগিবা ফাগিবা জেদাক্কে চু·সকগিবা হং·আ না·সংবা উয়ানদাক্কেন চু·সকগিবা হং·বো।

মথি 6

1 ‘‘সিমসাকবো, মান্দিরাং নিকখানা ইন্নে বিসংনি মিকখাংও দা·আ থরম দাক্কাবো; দাক্কোদে না·সংনি সালগিও দংগিবা ফাচানি না·সংনি মামুং মা·ন্নানি দংজানুয়া। 2 ‘‘উনি গান্দা না·আ দিল্লা-চন্নারাংনা মামুংখো হ·ন্নানি সালো বু·এ চা·গিবারাং গিত্তা দা·আ দাক্কাবো। বিসংদে মান্দিরাংচানিখো রাসংখো মা·ন্না ইন্নে থম·দাকরামচা আরো রামারাংও গিম্মিকনা হা·আইএতে হ·ন্নানিখো হ·ন্না। আংআ না·সংনা বিবিন আগানিংআ, বিসং আন·থাংথাংনি মা·ন্নানিখো মান·থকজক। 3 ইন্দিবা না·আ দিল্লা-চন্নারাংনা মামুংখো হন·মিত্তিংও নাং·নি জাক্রা জাক মুয়াখো দাক্কিংআ উখো নাং·নি জাক্কাসি জাকনা দা·আ হা·আইনা হ·ন্না, 4 জেদাক্কে নাং·নি হ·ন্নানিরাং মিৎথিনাও হ·ন্না গিত্তা হং·আ। ইন্দাকোদে মিৎথিনাও গিম্মিকখো নিকগিবা নাং·নি ফাগিবান নাং·নি মা·ন্নানিখো নাং·না হ·ন্নুয়া। 5 ‘‘না·সং বি·মিত্তিংও বু·এ চা·গিবারাং গিত্তা দা·আ দাক্কাবো, মুয়ানা বিসং মান্দিরাংনা আন·থাংথাংখো ফিন্নিকনা ইন্নে থম·দাকরামও আরো সরক মিকখাংও চাদেংএ বি·না নামনিকা। আংআ না·সংনা বিবিন আগানিংআ, বিসং আন·থাংথাংনি মা·ন্নানিখো মান·থকজক। 6 ইন্দিবা নাং·নি বি·মিত্তিংও নকনিং·আচা রি·য়াংএ দ·গা চিপচাংবো আরো মিৎথিনাও দংগিবাচা বি·বো। মিৎথিনাও নিকগিবা উয়া ফাগিবান নাং·নি মা·ন্নানিখো নাং·না হ·ন্নুয়া। 7 ‘‘বি·মিত্তিংও না·সং গিপ্পিন জাতরাং গিত্তা হং·গিজা নাংগিজা খাৎথারাংখো ফিল·নিফিল দা·আ আগানাবো। খু·সুক বাং·এ আগানজকোন ইসল বিসংনি বি·আখো খিন্নাচাকনুয়া ইন্নে বিসং চানচিয়া। 8 বিসং গিত্তা দা·আ দাক্কাবো, মুয়ানা না·সংনি মুয়া নাংআ উখো না·সংনি ফাচা বি·না স্খাংআন বিয়া হা·আইয়া। 9 উনি গান্দা না·সং ইন্দাকে বি·বো: ও সালগিও দংগিবা চিংনি ফাগিবা, নাং·নি বিমুংখো রংথালা ইন্নে ইনথকনা। 10 নাং·নি সংনক রি·বাখানা। সালগিও জেদাক্কে উয়ানদাক্কে হা·গিলসাকোবা নাং·নি নামনিকা চু·সকখানা। 11 চিংনি চা·না নাংআখো দা·আলো চিংনা হন·বো। 12 চিংনি সাক্কাও জেরাং অন্যায় দাক্কা, চিংআ জেদাক্কে বিসংখো ক্ষেমা দাকজক উগিত্তান না·আবা চিংখো ক্ষেমা দাকবো। 13 চিংখো রুরাওনা দা·আ গাল্লাবো, ইন্দিবা শয়তাননি জাকনিখো চিংখো জক্কেৎবো। 14 না·সং গিপ্পিনরাংনি নামগিজাখো ক্ষেমা দাক্কোদে সালগিও দংগিবা না·সংনি ফাগিবা না·সংখোবা ক্ষেমা দাকনুয়া। 15 ইন্দিবা গিপ্পিনরাংখো না·সং ক্ষেমা দাকজাওদে না·সংনি ফাআ না·সংখোবা ক্ষেমা দাকজানুয়া। 16 ‘‘না·সং অকগুমুন চাকমিত্তিংও বু·এ চা·গিবারাং গিত্তা মিকখাংখো দা·আ সিমফ্রাকেতে দন্না। বিসংদে মান্দিরাংনা ফিন্নিকনা ইন্নে স্খুও আরো মিকখাংও হা·দুবুখো সিত্তে রোরামা। আংআ না·সংনা বিবিন আগানিংআ, বিসং আন·থাংথাংনি মা·ন্নানিখো মান·থকজক। 17 ইন্দিবা নাং·নি অকগুমুন চাকমিত্তিংও না·আ স্খুও তেলখো সিতবো আরো মিকখাংখো মিকসুবো, 18 জেদাক্কে গিপ্পিনরাং নাং·নি অকগুমুন দংআখো হা·আইজা। ইন্দাকোদে মিৎথিনাও দংগিবা নাং·নি ফাগিবান নাং·খো নিকনুয়া। মিৎথিনাও গিম্মিকখো নিকগিবান নাং·নি মা·ন্নানিখো হ·ন্নুয়া। 19 ‘‘ইয়া হা·গিলসাকো না·সং আন·থাংথাংনা গামজিনরাংখো দা·আ চিম্মংআবো। ইনোদে মারাম চা·আ আরো জ·ওংরাং নাসিয়েতে গাল্লা আরো চা·খক চা·উয়া। 20 ইন্দিবা সালগিও মারাম চা·জা, জ·ওংরাং রাতজা আরো চা·খকবা চা·ওজা। উনি গান্দা সালগিও আন·থাংথাংনা গাম চিম্মংবো, 21 মুয়ানা জেও নাং·নি গামজিনরাং দংনুয়া নাং·নি গিসিকবা উয়োন দংনুয়া। 22 ‘‘মিক্রোন বে·এননি চাক্কি। উনি গান্দা নাং·নি মিক্রোন নাম্মোদে নাং·নি বে·এন গিম্মিকান থেং·সুনুয়া। 23 ইন্দিবা নাং·নি মিক্রোন নামজাওদে নাং·নি বে·এন গিম্মিকান আন্দালনুয়া। নাং·নি নিং·আও দংগিবা সেং·আ আন্দালান হং·ওদে উয়া বাদাকগিবা আন্দালা হং·নুয়া! 24 ‘‘দারাংবা নকগিবা সাকগ্মিনি নকখল হং·না মান·জা, মুয়ানা বিয়া সাকসাখো মিৎচিনুয়া আরো সাকগিপ্পিনখো খা·সানুয়া। বিয়া সাকসাখো নামনিকনুয়া আরো সাকগিপ্পিনখো চন্নিকনুয়া। না·সং ইসলনি আরো গামজিননি নকখল হং·না মান·জা। 25 ‘‘উনি গান্দা আংআ না·সংনা আগানিংআ, মুয়াখো চা·নুয়া-রিংনুয়া ইন্নে না·সংনি জাংগিনা বা মুয়াখো গান্নুয়া চিন্নুয়া ইন্নে না·সংনি বে·এননা দা·আ সিমব্রাবো। চা·না রিংনাসান জাংগি হং·জা আরো গান্না চিন্নাসান বে·এন হং·জা। 26 ‘‘সাক্কানি দো·দ্রাংখো নিবো, উরাং গামজা, রাতজা, জামওবা চিম্মংজা, ইন্দিবা না·সংনি সালগিনি ফাগিবা উরাংনা চা·আনিখো হ·ন্না। না·সং উরাংনা বাত্তে নাম্মেন গামচাৎজামা? 27 না·সংনি গিসেপো চানচিয়েমুং সা আন·থাংনি জাংগি থাংআনি বিলসিখো ঘণ্টাসানা বাত্তেতনা মা·ন্না? 28 ‘‘গান্না-চিন্না মুয়ানা চানচিয়া? হা·বানি বিবালরাং বাদিকে দাল·রোরোআ উখো চানচিবো। উরাং গামজা, খিলদিংবা সাকজা। 29 ইন্দিবা আংআ না·সংনা আগানিংআ, শলোমন রাজা বিনি রাসং গিম্মিকো দংএবা ইরাংনি গি·সা গিত্তাবা নিথুয়ে আন·থাংখো গান্নেতনা চিন্নেতনা মান·জাজক। 30 দা·আলো হা·বাও দংগিবা জে সামচেংরাংখো আম্বুনো চুদাপো গাল্লেতনুয়া, উখো ইসল ইন্দাকে থারিওদে ও বিবিরা·ব্রিগিজাগিবারাং, বিয়া না·সংখোবা উনা বাত্তে গান্নেত-চিন্নেতনুয়া। 31 উনি গান্দা ‘মুয়াখো চা·নুয়া’ বা ‘মুয়াখো গান্নুয়া’ ইন্নে দা·আ চানচিয়াবো। গিপ্পিন জাতরাংআন ইরাংখো রা·এ চানচিয়া; 32 ইয়া গিম্মিকখোন না·সংনা নাংআ ইন্নে না·সংনি সালগিনি ফাগিবা হা·আইয়া। 33 ইন্দিবা না·সং স্খাংআন ইসলনি সংনক আরো বিনি হা·সিকা গিত্তা রি·না হাম·চেংবো। ইন্দাকোদে উয়া বস্তুরাংখোবা না·সং মা·ন্নুয়া। আম্বুন সালনা দা·আ চানচিয়াবো; 34 আম্বুন সালনি চানচিয়াখো আম্বুননান দন্নারিবো। সালনি নেং·আ উয়া সালনান চু·য়োংআ।

মথি 7

1 “না·সং দা·আ গিপ্পিনরাংনি গ্রোখো রি·ম্মাবো জেদাক্কে না·সংনি গ্রোখোবা রি·ম্মা হং·জা, 2 মুয়ানা জেদাক্কে না·সং গিপ্পিনরাংনি গ্রোখো রি·ম্মা, উয়ানদাক্কে না·সংনি গ্রোখোবা রিম·নুয়া, আরো জেদাক্কে না·সং থয়ে হ·ন্না উয়ানদাক্কেন না·সংখোবা থনুয়া। 3 “নাং·নি জংআদানি মিক্রোনও দংগিবা বিসেমসেমখোন নিক্কিংআ, ইন্দিবা আন·থাংনি মিক্রোনও দংগিবা বলথংখো মুয়ানা নিকজাংআ? 4 আন·থাংনি মিক্রোনোন বলথং দংওদে বাদিকে নাং·নি জংআদাখো ইন্দাকে আগানজক, ‘রি·বাবো, নাং·নি মিক্রোননি বিগিনচিখো ওত্তে গাল্লেতনা? বু·এ চা·গিবা! 5 স্খাং নাং·নি মিক্রোননিখো বলথংখো ওত্তে গালবো, উনোদে নাং·নি জংআদানি মিক্রোননিখো বিগিনচিখো গালনা না·আ নিকসেংনুয়া। 6 “জেআন রংথালা উখো আচাকনা দা·আ হ·ন্না। না·সংনি মুক্তাখো ওয়াকনি মিকখাংও দা·আ গাল্লাবো। মুয়ানা উরাং আন·থাংনি জা·চকচা উরাংখো গা·ফিন্নেকনা আরো না·সংখো চিকফিলনাবা দংআ। 7 “বি·বো, উনোন না·সংনা হ·ন্নুয়া; সান্দিবো, উনোন না·সং নিকনুয়া; দ·গাও দকথাকবো, উনোন না·সংনা এংএ হ·ন্নুয়া। 8 বি·গিবা মা·ন্না; সান্দিগিবা নিক্কা; আরো দ·গাও দকথাকগিবানা দ·গা এংএ হ·ন্না। 9 না·সংনি গিসেপো আন·থাংনি দেফান্থি রুটিখো হা·ম্মোদে বিনা রং·থিখো হ·ন্না, ইন্দাকগিবা মান্দি দংআমা? 10 বা না·থকখো হা·ম্মোদে চিপ্পুখো হন·গিবা সা দংআ? 11 না·সং নামগিজা হং·এবা আন·থাংনি দেদ্রাংনা নাম্মাখো হ·ন্না হা·আইওদে, ইন্দাকোদে সালগিও দংগিবা না·সংনি ফাচা জেরাং বি·আ বিসংনা বিয়া নাম্মাখোন হ·ন্নুয়া, ইয়াদে খাকখেতান! 12 গিপ্পিন মান্দিরাংচানিখো নাম্মা বেওয়ালখো মা·ন্না হা·ম্মোদে না·সংবা বিসংমুং উয়ানদাক্কে দাকবো। ইয়ান মোশিনি নিয়াম আরো আগানসোগিবারাংনি স্খিয়ানি মিংসংগিবা খাৎথা। 13 “আপচনগিবা দ·গাচল গিত্তা নাপবো, মুয়ানা নামগিজাচানা রা·আংগিবা রামানি দ·গা দা·ল্লা আরো উনি রামাবা আপদালা। উগিত্তা বাং·আ মান্দিরাংআন নাপ্পা। 14 ইন্দিবা জাংগিচানা রা·আংগিবা দ·গা আপচনা, উনি রামাবা আপচনা। উখো বাং·গিজা মান্দিরাংআন সান্দিয়ে মা·ন্না। 15 “বু·এ চা·গিবা আগানসোগিবারাংনা সিমসাকবো। বিসং মেষনি বিমাংখো রা·এ না·সংচা রি·বাআ, ইন্দিবা নিং·আচাদে বিসং চা·মিন্নকগিবা মাৎচা গিত্তা দাক্কা। 16 বিসংনি জাংগিনি বিথিচান না·সং বিসংখো হা·আইনা মা·ন্নুয়া। বুসু চাগিপাও আঙ্গুর বিথি বা শিয়ালকাঁটাও ডুমুর বিথি নাংআমা? 17 উয়ানদাক্কেন গিম্মিক নামগিবা বিফাংও নামগিবা বিথিন নাংআ আরো নামগিজাগিবা বিফাংও নামগিজাগিবা বিথিন নাংআ। 18 নামগিবা বিফাংও নামগিজা বিথি আরো নামগিজা বিফাংও নামগিবা বিথি নাংনা মান·জাসা। 19 নামগিবা বিথি নাংগিজাগিবা বিফাংখো দে·ন্নে ওয়া·আলো গাল্লানি হং·আ। 20 উনি গান্দা আগানিংআ, বু·এ চা·গিবা আগানসোগিবারাংনি জাংগিনি বিথিখো নিক্কে না·সং বিসংখো হা·আইনা মা·ন্নুয়া। 21 “আংখো ‘গিত্তেল, গিত্তেল’ ইনগিবা গিম্মিকান সালগিনি সংনকো নাপনা মা·ন্নুয়া ইন্দাকে হং·জা, ইন্দিবা সালগিও দংগিবা আংনি ফানি নামনিকাখো দাকগিবাসা নাপনা মা·ন্নুয়া। 22 উনসালো বাং·আ মান্দিআন আংখো ইন্নুয়া, ‘গিত্তেল, গিত্তেল, চিংআ নাং·নি বিমুংচা আগানসোগিবা গিত্তা খাৎথা আগানজামিংমা? নাং·নি বিমুংচা গিসিক নামগিজাগিবারাংখো হা·রিকজামিংমা? নাং·নি বিমুংচা আইয়াও ইনমানগিবা কামরাংখো বাং·এন দাকজামিংমা?’ 23 উনসালো আংআ বিসংখো আগান্নুয়া, ‘আংআ না·সংখো হা·আইজা। নামগিজাখো দাকগিবারাং! আংনি মিকখাংওনি না·সং রি·য়াংবো।’ 24 “উনি গান্দা আগানিংআ, আংনি ইয়া খাৎথারাংখো খিন্নাএ উরাংখো মানিগিবাদে রং·থিনি সাক্কাও নক রিকগিবা বুদ্ধিগ্মাং সাকসা মান্দি গিত্তা দাক্কা। 25 জা·মানো মিকখা ওয়াজক, চিরাং দাল·বাজক, বালওয়া রাকজক আরো উয়া নক্কো নাংজক ইন্দিবা উয়া নক গা·আকজাজক মুয়ানা উখো রং·থি সাক্কাও রিক্কামিং। 26 আংনি ইয়া খাৎথারাংখো খিন্নাএ উরাংখো মানিজাগিবাদে হান·চেংনি সাক্কাও রিকগিবা সাকসা জাদা মান্দি গিত্তা দাক্কা। 27 জা·মানো মিকখা ওয়াজক, চিরাং দালবাজক, বালওয়া রাকজক আরো উয়া নক্কো নাংজক; উনোন উয়া নকবা গা·আকজক। নাম্মেদাক্কেন গা·আকাংজক!” 28 যীশুনি খাৎথা আগানা বন·খামও মান্দিরাং বিনি স্খিয়ানা আইয়াও ইনমানজক, 29 মুয়ানা বিয়া থরম স্খিগিবারাং গিত্তা স্খিগিজা ইন্দিবা বিল দংগিবা গিত্তা বিসংনা স্খিজক।

মথি 8

1 যীশু হা·ব্রিওনি হং·খাতানি জা·মানো মান্দি বাং·বিয়া বিমুং রি·য়াংফাজক। 2 উনো খনচিরিত্তামগিবা সাকসা রি·বাএ বিখো অলাখিয়ে আগানজক, ‘‘গিত্তেল, না·আ হা·সিকমানচাওদে আংখো নাম্মেতনা মা·ন্না।’’ 3 যীশু জাকথাংখো সিল্লে বিখো দাংথাপেতে আগানজক, ‘‘না·আ রংথালবো, ইখোন আংআ হা·ম্মা।’’ উনোন উয়া মান্দিনি খনচিরিত্তামা নাম্মাংজক। 4 যীশু বিনা আগানজক, ‘‘নিবো, দারাংনাবা ইয়া খাৎথাখো দা·আ আগানা, ইনাবাত্তে খামালরাংচা রি·য়াংএ আন·থাংখো ফিন্নিকবো, আরো মোশিনি গি·য়েতা গিত্তা হ·ন্নানিখো হন·বো। ইনি গিম্মিন নাং·নি নাম্মাংআখো মান্দিরাং হা·আইনা মা·ন্নুয়া।’’ 5 জা·মানো যীশু কফরনাহূম সংজিলমাও নাপজক। উনো রোমনি সুবিদার সাকসা বিচা রি·বাএ মল·মলে আগানজক, 6 ‘‘গিত্তেল, আংনি নকখল নক্কো গা·আকে দংআ। বিয়া হান·মা গক্কা হং·এ নাম্মেন সা·দিকখামে দংজক।’’ 7 যীশু বিনা আগানজক, ‘‘আংআ রি·য়াংএ বিখো নাম্মেতনুয়া।’’ 8 উয়া সুবিদার যীশুনা আগানচাকজক, ‘‘গিত্তেল, না·আ আংনি নক্কো নাপনা গিত্তা আংআ মান্দি হং·ফাজা। ইন্দিবা খু·সুকচাসান আগানবো, উনোন আংনি নকখল নাম্মাংআরিনুয়া। 9 আংআ ইখো হা·আইয়া মুয়ানা আংখোবা গিপ্পিননি আগানা গিত্তা রি·না নাংআ আরো সিপাইরাংবা আংনি আগানা গিত্তান রি·য়া। আংআ সাকসাখো ‘রি·য়াংবো’ ইন্নোদে বিয়া রি·য়াংআ, সাকগিপ্পিনখো ‘রি·বাবো’ ইন্নোদে বিয়া রি·বাআ। আংনি নকখলখো ‘ইখো দাকবো’ ইন্নোদে বিয়া উখো দাক্কা।’’ 10 ইয়া খাৎথাখো খিন্নাএ যীশু আইয়াও ইনমানজক আরো বিমুং রি·য়াংফাগিবারাংনা আগানজক, ‘‘আংআ না·সংনা বিবিন আগানিংআ, ইস্রায়েলরাংনি গিসেপোবা ইন্দিতা বিবিরা·আখো আংআ নিকখুজা। 11 আংআ না·সংনা আগানিংআ, সালারাম আরো সালিরামচানি বাং·এন রি·বানুয়া আরো অব্রাহাম, ইস্‌হাক আরো যাকোবমুং সালগিনি সংনকো চা·না আসংনুয়া। 12 ইন্দিবা সালগিনি সংনকো দংনাগিবারাংখো হা·ফালনি আন্দালাও গাল্লেতনুয়া। উয়োনা মান্দিরাং গ্রাপনুয়া আরো সা·দিকানা ওয়াগাম চিকক্রতনুয়া।’’ 13 জা·মানো যীশু উয়া সুবিদারনা আগানজক, ‘‘না·আ রি·য়াংবো। নাং·নি বিবিরা·আ গিত্তান হং·খানা।’’ উনোন বিনি নকখলবা নাম্মাংজক। 14 উনি জা·মানো যীশু পিতরনি নকচা রি·য়াংএ পিতরনি নিওগিবাখো জম্মে-সাএ থুয়ে দংআখো নিকনা মান·জক। 15 যীশু বিনি জাকখো দাংথাপেতজক আরো উনোন বিনি জম্মা সাল·জক। জা·মানো বিয়া চাখাত্তে যীশুনা চা·আ-রিংআনিরাংখো থারিয়ে হন·জক। 16 হান·থামানি জা·মানো মান্দিরাং গিসিক নামগিজাগিবা মান·গিবা বাং·আরাংখো যীশুচানা রিমবাজক। বিয়া খু·সুকচান গিসিক নামগিজাগিবারাংখো হা·রিকেতজক আরো গিম্মিক জম্মে-সাএ দংগিবারাংখো নাম্মেতজক। 17 ইয়া গিম্মিকান হং·জক জেদাক্কে আগানসোগিবা যিশাইয়নি আগানা ইয়া খাৎথা চু·সকা: বিয়া আনচিংনি গিম্মিক সাআরাংখো রা·চাকজক, আরো আনচিংনি সা·দিকা-সা·খামারাংখো হা·রিকজক। 18 যীশু আন·থাংনি সামব্রিও মান্দি বাং·আরাংখো নিক্কে জা·রিকগিবারাংখো সাগালনি নালসাচানা রি·য়াংখানা গি·য়েৎজক। 19 উনো শাস্ত্র স্খিগিবা সাকসা যীশুচা রি·বাএ আগানজক, ‘‘স্খিগিবা, না·আ জেওনা রি·য়াংনুয়া আংআবা নাং·মুং উয়োনা রি·ফানুয়া।’’ 20 যীশু বিনা আগানজক, ‘‘শি·ওলরাংনি হা·খল দংআ আরো সাক্কানি দো·দ্রাংনি বিথিপরাং দংআ, ইন্দিবা মান্দিনি দেফান্থিনি স্খু দন্নানি হা·দাম মামুংচাবা দংজা।’’ 21 জা·রিকগিবারাংওনি দা·আও সাকসা রি·বাএ বিনা আগানজক, ‘‘স্খিগিবা, আংনি ফাখো গপনা আংখো রি·য়াংনা ওয়াতচেংবো।’’ 22 যীশু বিনা আগানজক, ‘‘সিগিবারাংআন আন·থাংথাংখো গপখানা, ইন্দিবা না·আ আংমুং রি·বাফাবো।’’ 23 জা·মানো যীশু গি·সা রিংও গাখাতজক আরো বিনি জা·রিকগিবারাং বিমুং রি·য়াংফাজক। 24 উনো রাং·গিত্তিক সাগালও নাম্মেন মিকখা বালওয়া রাকজক, আরো উনি গান্দা সাগালনি চি ফকফেকে রিংও গাপবাজক। ইন্দিবা যীশু উনো থুয়ে দংআমিং। 25 জা·রিকগিবারাং উনো বিচা রি·য়াংএ বিখো চামিসায়ে আগানজক, ‘‘জক্কেৎবো, গিত্তেল; আনচিংদে সিনাজক!’’ 26 উনো বিয়া বিসংনা আগানজক, ‘‘বিবিরা·ব্রিগিজাগিবারাং, না·সং মুয়ানা খেন্নিংআ?’’ উনি জা·মানো বিয়া চাখাত্তে বালওয়া আরো সাগালখো ইন্দাতজক। উনো গিম্মিকান নাম্মেন থম·থম হং·জক। 27 উনি গান্দা জা·রিকগিবারাং আইয়াও ইনমানে আগানজক, ‘‘ইয়া বাদাকগিবা মানচা মান্দি, বালওয়া আরো সাগালবা বিনি খাৎথাখো মানিয়া!’’ 28 জা·মানো যীশু সাগালনি নালসাওনা গাদারীয়রাংনি জওলচা রি·য়াংজক। উনো গিসিক নামগিজাগিবা মান·গিবা সাকগ্মি মান্দি গোপরামওনি হং·খাতে বিচা রি·বাজক। 29 বিসং নাম্মেন জাজ্রেংএতগিবা হং·আমিং, উনি গান্দা দারাংবা উয়া রামা গিত্তা রি·না ফা·জানুয়ামিং। বিসং চ্রিকে আগানজক, ‘‘ও ইসলনি দেফান্থি, চিংমুং নাং·নি মুয়া নাংফাআ? সাল হং·খুজাওন না·আ চিংখো দুক হ·ন্না রি·বাজকমা?’’ 30 বিসংনি অকখিসা চে·ল্লাচা বাং·বিয়া ওয়াক জিলমা রওমে চা·আংআমিং। 31 গিসিক নামগিজাগিবারাং যীশুখো মল·মলে আগানজক, ‘‘না·আ চিংখো হা·রিকনান হা·ম্মোদে উয়া ওয়াক জিলমাও নাপনা চিংখো ওয়াত্তেতবো।’’ 32 যীশু বিসংনা আগানজক, ‘‘উয়োন রি·য়াংবো।’’ উনোন বিসং হং·খাতে উয়া ওয়াকরাংও নাপ্পেজক। উনি গান্দা ওয়াক জিলমা হা·সলসল্‌ রিক্কাম গিত্তা থারাকে খাত্তাংজক আরো সাগালনি চিও রিপ্পে সিথকজক। 33 উয়া ওয়াক জিলমারাংখো নিরিকগিবারাং উনো সংচানা খাত্তাংএ গিম্মিক খবলখো আগানেজক। মংসংদে বিসং গিম্মিকনান উয়া গিসিক নামগিজাগিবারাংনি গিম্মিন হং·গিবারাংখো আগানেজক। 34 উনো সংনি মান্দি গিম্মিকান যীশুমুং গ্রংনা হং·খাতজক। যীশুখো গ্রংআনি জা·মানো বিসং বিসংনি হা·সংওনি রি·য়াংখানা বিখো মল·মলজক।

মথি 9

1 জা·মানো যীশু রিংও গাখাতে সাগালখো বাতবায়ে আন·থাংনি সংজিলমাওনা রি·বাজক। 2 মান্দিরাং উনো থুচাকানিও গা·আকে দংগিবা সাকসা হা·আন জাদা সিগিবাখো বিচা রা·বাজক। উয়া মান্দিরাংনি বিবিরা·আখো নিক্কে যীশু উয়া হান·মা গক্কা হং·গিবাখো আগানজক, ‘‘খা·দংবো। নাং·নি পাপরাংখো ক্ষেমা দাকজক।’’ 3 উনি গান্দা মিত্তাম শাস্ত্র স্খিগিবারাং গিসিকথাংথাংও ইনজক, ‘‘ইয়া মান্দি ইসলখোসা চন্নিকিংআ।’’ 4 যীশু বিসংনি গিসিকনি চানচিয়াখো হা·আইনা মা·ন্নে আগানজক, ‘‘না·সং খা·থংথাংথাংও নামগিজাখো মুয়ানা চানচিংআ? 5 ‘নাং·নি পাপখো ক্ষেমা দাকজক,’ বা ‘না·আ চাখাত্তে রি·রুরাবো’ বাগিবাখো আগানা নামবাতা? 6 জেদাক্কে না·সং হা·আইনা মা·ন্না ইয়া হা·গিলসাকো পাপখো ক্ষেমা দাকনা মান্দিনি দেফান্থিনি বিল দংআ’’-ইখো আগানানি জা·মানো বিয়া উয়া হান·মা গক্কা সাগিবাখো আগানজক, ‘‘চাখাতবো, নাং·নি থুচাকানিখো দি·থমে নকচা রি·য়াংবো।’’ 7 উনো বিয়া চাখাত্তে বিনি নকচা রি·য়াংজক। 8 মান্দিরাং উখো নিক্কে খেনজক, আরো ইসল মান্দিনা ইন্দাকগিবা বিলখো হ·ন্না ইন্নে ইসলখো মিৎথেলজক। 9 যীশু উয়োনি রি·য়াংমিত্তিংও মথি মিংগিবা সাকসাখো খাজিনা গিলগিবা নক্কো আসংএ দংআখো নিকনা মান·জক। যীশু বিনা আগানজক, ‘‘রি·বাবো, আংখো জা·রিকফাবো।’’ মথি উনোন চাখাত্তে বিমুং রি·য়াংফাজক। 10 উনি জা·মানো যীশু মথিনি নক্কো চা·না রিংনা আসংজক। উনোন খাজিনা গিলগিবা আরো নামগিজা মান্দি বাং·বিয়া রি·বাএ যীশু আরো বিনি জা·রিকগিবারাংমুং চা·না আসংফাজক। 11 উখো নিক্কে ফরীশীরাং যীশুনি জা·রিকগিবারাংনা আগানজক, ‘‘না·সংনি স্খিগিবা, খাজিনা গিলগিবা আরো নামগিজা মান্দিরাংমুং মুয়ানা চা·ফাংআ রিংফাংআ?’’ 12 ইয়া খাৎথাখো খিন্নাএ যীশু আগানজক, ‘‘নামগিবা মান্দিরাংনা ডাক্তার নাংজা, ইন্দিবা সাগিবারাংনাসা নাংআ। 13 ‘আংআ খা·সাচাক্কাখো নিকনা হা·ম্মা, বলি হ·ন্নাখো হং·জা’-রংথালগিবা শাস্ত্রনি ইয়া খাৎথানি অর্থ মুয়া, উখো রি·য়াংএ সান্দিবো। আংআ থরমিরাংখো রিক্কামনা রি·বাজা ইন্দিবা পাপীরাংখোসা রিক্কামনা রি·বাআ।’’ 14 জা·মানো যোহননি জা·রিকগিবারাং যীশুচা রি·বাএ আগানজক, ‘‘চিংআ আরো ফরীশীরাং বাং·এন অকগুমুন চাক্কা ইন্দিবা নাং·নি জা·রিকগিবারাংদে মুয়ানা অকগুমুন চাকজা?’’ 15 যীশু বিসংনা আগানজক, ‘‘চাওয়ারি উনসান দংমিত্তিংও চাওয়ারিমুং দংগিবারাং দুক চাকনা মা·ন্নামা? ইন্দিবা সাল সকবাংজক জেনসালো চাওয়ারিখো বিসংচানিখো রিম্মাংনুয়া। উনসালোসা বিসং অকগুমুন চাকনুয়া। 16 ‘‘দারাংবা গিৎচাম বা·রাও গিত্তাল বা·রাখো সিকথাপজা, মুয়ানা জা·মানোদে উয়া গিৎচাম বা·রাওনি বা·রা গিত্তাল গিৎচিতে রি·য়াংনুয়া আরো উনি গান্দা গিৎচিতগিবা আরোসা দ্রাকা। 17 গিৎচাম বাসিংরাংও দারাংবা গিত্তাল আংগুর বিৎচিখো দনজা। দন্নোদে বাসিংরাং ব্রেতে গিম্মিক বিৎচিআন গা·আকে নাসিয়া আরো বাসিংরাংবা নাসিয়া। মান্দিরাং গিত্তাল বাসিংওন গিত্তাল আংগুর বিৎচিখো দন্না; উনো গি·গ্মিখোন রাক্ষিয়ানি হং·আ।’’ 18 যীশু মান্দিরাংনা ইয়া খাৎথারাংখো আগানমিত্তিংও সাকসা যিহূদীরাংনি দাল·গিবা বিচা রি·বাজক আরো বিখো অলাখিয়ে আগানজক, ‘‘আংনি দেমিচিক দা·আও মা·মাং সিজক। ইন্দিবা না·আ রি·বাএ বিনি সাক্কাও জাক দনদাপবো, উনোন বিয়া থাংনুয়া।’’ 19 উনো যীশু আরো বিনি জা·রিকগিবারাং চাখাত্তে বিমুং রি·য়াংফাজক। 20 উয়া সময়ও মিচিক সাকসা যীশুনি সেফাংও রি·বাএ বিনি বা·রানি রিক্কিংখো দাংথাপেতজক। উয়া মিচিক বিলসি চি·গ্মিনা দিপ্পাৎ হান·চি জক্কে সাআংআমিং। 21 বিনি বা·রাখো মা·মাং দাংথাপেতনা মা·ন্নোদে বিয়া নাম্মাংআরিনুয়া ইন্নে বিয়া গিসিকথাংও চানচিংআমিং। 22 যীশু হান·ফিলে বিখো নিকনা মা·ন্নে আগানজক, ‘‘খা·দংবো। নাং·নি বিবিরা·আনি গিম্মিন না·আ নামজক।’’ উয়োনিন উয়া মিচিক নামস্রাংজক। 23 উনি জা·মানো যীশু উয়া যিহূদী দাল·গিবানি নকচানা রি·য়াংজক। উয়োনা রি·য়াংএ বিয়া বাংসি সিকগিবারাংখো আরো মান্দিরাংনি জিকজাকাখো নিকনা মান·জক। 24 উনি গান্দা যীশু আগানজক, ‘‘না·সং হা·ফালচা রি·য়াংবো। মিচিক বি·সা সিখুজা, থুয়েসান দংআ।’’ ইখো খিন্নাএ বিসং খা·দিংথকজক। 25 মান্দিরাংখো হং·খাতেতানি জা·মানো বিয়া নকনিং·আচা রি·য়াংএ মিচিক বি·সানি জাকখো রিম·জক। উনোন বিয়া চাখাত্তে আসংজক। 26 উয়া জওলনি গিম্মিক হা·দামচান ইয়া খাৎথারাং গিপ্পাংজক। 27 যীশু উয়া হা·দামখো ওয়াত্তে রি·য়াংমিত্তিংও সাকগ্মি মিকগ্রি মান্দি বিখো জা·রিকফাজক। বিসং চ্রিকে আগানজক, ‘‘দায়ূদনি দেফান্থি, চিংনা খা·সাচাকবো।’’ 28 যীশু নক্কো নাপ্পানি জা·মানো উয়া মিকগ্রি মান্দিরাং বিচা রি·বাজক। উনো বিয়া বিসংনা আগানজক, ‘‘আংআ ইয়া কামখো দাকনা মা·ন্না ইন্নে না·সং বিবিরা·আমা?’’ বিসং আগানজক, “হো·এ গিত্তেল, বিবিরা·আ।’’ 29 বিয়া বিসংনি মিক্রোনরাংখো দাংথাপে আগানজক, ‘‘না·সংনি বিবিরা·আ গিত্তান না·সংনা হং·খানা।’’ 30 আরো উনোন বিসং নিকনা মান·জক। যীশু বিসংনা রাক্কে বেং·এ আগানজক, 31 ‘‘নিবো, দারাংবা ইখো হা·আইজাখানা।’’ ইন্দিবা বিসং হা·ফালচা রি·য়াংএ উয়া জওলনি গিম্মিক হা·দামচান বিনি খাৎথাখো আগানজক। 32 উয়া সাকগ্মি মান্দিরাংনি রি·য়াংমিত্তিংও মান্দিরাং গিসিক নামগিজাগিবা মান·গিবা সাকসা আব্রা মান্দিখো যীশুচা রা·বাজক। 33 যীশু উয়া গিসিক নামগিজাগিবাখো হা·রিকানি জা·মানো উয়া মান্দি খু·সুক আগানজক। উনি গান্দা গিম্মিকান আইয়াও ইনমানে আগানজক, ‘‘ইস্রায়েল হা·সংও ইন্দাকাখো মামুং সালোবা নিকখুজা।’’ 34 উনো ফরীশীরাং আগানজক, ‘‘গিসিক নামগিজাগিবারাংনি রাজাও ফাংচাকে বিয়া গিসিক নামগিজাগিবারাংখো হা·রিকা।’’ 35 যীশু সংজিলমারাংও আরো সংরাংও রি·ররোয়ে যিহূদীরাংনি থম·দাকরামও স্খিনা আরো সালগিনি সংনকনি নাম্মা খাৎথাখো আগানফ্রাকনা হা·বাচেংজক। আরো মান্দিরাংনি গিম্মিক সাআরাংখোবা বিয়া নাম্মেতজক। 36 মান্দি বাং·আখো নিক্কে বিয়া বিসংনা খা·সাচাকজক, মুয়ানা বিসং রাক্ষুয়ালগ্রি মেষ গিত্তা নেং·গিবা আরো দুক মান·গিবামিং। 37 যীশু উনো বিনি জা·রিকগিবারাংনা আগানজক, ‘‘মিরাং বাং·আ ইন্দিবা গামগিবাদে বাং·জা। 38 উনি গান্দা মিনি নকগিবাখো মল·মলবো জেদাক্কে বিয়া বিনি মিরাংখো রাত্তে রা·আংনা গামগিবারাংখো ওয়াত্তেতা।’’

মথি 10

1 যীশু বিনি সাকচিগ্মি জা·রিকগিবারাংখো রিক্কামজক আরো গিসিক নামগিজাগিবারাংখো হা·রিকনা আরো গিম্মিক সাআরাংখো নাম্মেতনা বিল হ·ন্নে বিসংখো ওয়াত্তেতজক। 2 উয়া সাকচিগ্মি ওয়াত্তেতারাংনি বিমুংরাং ইয়ান: শিমোন জেখো পিতর মিংআ, উনি জা·মানো বিনি জংগিবা আন্দ্রিয়; সিবদিয়নি দে যাকোব আরো বিনি জংগিবা যোহন; ফিলিপ আরো বর্‌থলময়; 3 থোমা আরো খাজিনা গিলগিবা মথি; আলফেয়নি দে যাকোব আরো থদ্দেয়; 4 হা·সংনা খা·ফাকগিবা শিমোন আরো যীশুখো বোবিলনি জাক্কো রি·ম্মে হন·গিবা ইষ্কারিয়োত যিহূদা। 5 যীশু উয়া সাকচিগ্মিনা ইরাংখো গি·য়েতে ওয়াত্তেতজক, না·সং গিপ্পিন জাতরাংচা বা শমরিয়রাংনি সংচা দা·আ রি·য়াংআ, 6 ইন্দিবা ইস্রায়েলনি মা·চংনি ব্রাংগিবা মেষরাংচা রি·য়াংবো। 7 রি·য়াংমিত্তিংও না·সং ইন্দাকে আগানফ্রাকে রি·য়াংবো, সালগিনি সংনক সেফাংও সকবাজক। 8 ইনা আগ্রে না·সং জমগিবারাংখো নাম্মেতবো, সিগিবারাংনা জাংগি হন·বো, খনচিরিত্তামগিবারাংখো নাম্মেতবো আরো গিসিক নামগিজাগিবারাংখো হা·রিকবো। না·সং ইন্দিনারি মা·ন্না, ইন্দিনারিন হন·বো। 9 না·সংনি খাংখারি খাআনিও না·সং সোনাখো, রূপাখো বা তামানি থাংখাখোবা দা·আ রা·আংআবো। 10 রি·য়াংনাগিবা রামানা দকরা, চলাবা·রা ফাৎগ্মি, জা·খপ বা গল·দিকখোবা দা·আ রা·আংআ, মুয়ানা কাম রিম·গিবাদে আন·থাংনা চা·আনিখো মা·ন্না খ্রাআ। 11 “না·সং জে সংজিলমাচা বা সংচা রি·য়াংনুয়া উয়ো খ্রাগিবা মান্দি সাকসাখো সান্দিয়ে রা·বো আরো গিপ্পিনচা রি·য়াংখুজানা দিপ্পাৎ বিনি নক্কোন দংবো। 12 উয়া নকনিং·আচা নাপমিত্তিংও বিসংখো সালাম হন·বো। 13 উয়া নক খ্রাআওদে ইন্দাকোদে না·সংনি থম·থমা উয়া নকনি সাক্কাও রি·বাখানা। ইন্দিবা খ্রাজাওদে না·সংনি থম·থমা না·সংনি সাক্কাওন ফিল·বাখানা। 14 দারাংবা না·সংখো রা·চাকসোজাওদে বা না·সংনি খাৎথাখো খিন্নাচাকজাওদে ইন্দাকোদে উয়া নকওনি বা সংওনি হং·খাতমিত্তিংও আন·থাংথাংনি জা·ফানি হা·দুলাখো দকফ্রংবো। 15 আংআ না·সংনা বিবিন আগানিংআ, বিচালনি সালো উয়া সংনা বাত্তে সদোম আরো ঘমোরা সংজিলমান বাং·খালে চাকথআনি হং·নুয়া। 16 “নিবো, মাৎচা হা·রেকনি গিসেপো মেষরাং গিত্তা আংআ না·সংখো ওয়াত্তেতিংআ। উনি গিম্মিন চিপ্পু গিত্তা সিমসাকবিগিবা আরো কইতর গিত্তা সনথলগিবা হং·বো। 17 সিমসাকবো, মান্দিরাং বিচাল দাকগিবারাংচা না·সংখো রি·ম্মে হ·ন্নুয়া আরো বিসংনি থম·দাকরামও না·সংখো বেতচা দকনুয়া। 18 হা·সংনি শাসন দাকগিবা আরো রাজারাংনি মিকখাংও আংনি হা·সেলান না·সংখো রিম্মাংনুয়া জেদাক্কে বিসংচা আরো গিপ্পিন জাতরাংচা না·সং সাক্ষি হ·ন্না মা·ন্না। 19 জেনসালো মান্দিরাং না·সংখো রি·ম্মে হ·ন্নুয়া উনসালো বাদিকে দাক্কে আরো মুয়াখো আগান্না নাংনুয়া উখো রা·এ দা·আ চানচিয়া। মুয়াখো আগান্নুয়া উখো উনসালোন না·সংনা আগানে হ·ন্নুয়া। 20 না·সংআন আগান্নুয়া ইন্দাকে হং·জা, ইন্দিবা না·সংনি ফা ইসলনি গিসিক না·সংনি গিসেপো খাৎথা আগান্নুয়া। 21 “জংআদা জংআদাখো আরো ফাআ দেখো স·ওতে গালনা রি·ম্মে হ·ন্নুয়া। দেদ্রাং মা·আ-ফানা চাখাত্তে বিসংখো স·ওতেতনুয়া। 22 আংনি হা·সেল গিম্মিকান না·সংখো মিৎচিনুয়া, ইন্দিবা বন·চতওনা দিপ্পাৎ চাকচিকগিবান জক্কাখো মা·ন্নুয়া। 23 বাগিবাবা সংনি মান্দিরাং না·সংখো হা·রিকোদে সংগিপ্পিনচা খাতবো। আংআ না·সংনা বিবিন আগানিংআ, ইস্রায়েলনি গিম্মিক সংজিলমা আরো সংচা না·সংনি কাম ব·ন্নানি স্খাংআন মান্দিনি দেফান্থি রি·বানুয়া। 24 “স্খিগিবানা বাত্তে স্নিংগিবা দাল·বাৎজা আরো নকগিবানা বাত্তে নকখল দাল·বাৎজা। 25 স্নিংগিবা আন·থাং স্খিগিবা গিত্তা আরো নকখল আন·থাং নকগিবা গিত্তা আপসান হং·আন চু·য়োংআ। বিসং নকনি নকগিবাখোন বেল্‌সবূল মিংওদে, ইন্দাকোদে বাদিকে উনা বাতখালে নকনি গিপ্পিন মান্দিরাংখোবা বেল্‌সবূল মিংনুয়া! 26 ‘‘ইন্দিবা না·সং বিসংনা দা·আ খেন্নাবো, মুয়ানা থুম্মুয়ে দনগিবা গিম্মিকখোন ফারাকানি হং·নুয়া আরো মিৎথিনাও দনগিবা গিম্মিকখোন হা·আইএতনুয়া। 27 আংআ জেখো না·সংনা আন্দালাও আগানিংআ উখো না·সং সেং·আও আগানবো। জেখো না·সং নাচিখলো খিন্নাংআ উখো নকরাংনি সাক্কাও আগানফ্রাকবো। 28 জেরাং বে·এনখোসান স·ওতনা মা·ন্না ইন্দিবা জাংগিখো স·ওতনা মান·জা বিসংনা দা·আ খেন্নাবো। ইন্দিবা বে·এন আরো জাংগি ইয়া গি·গ্মিখোন নরকচা ব·ন্নেতনা মান·গিবানাসা খেনবো। 29 দো·চক মাংগ্মিখো অকখিসা পয়সানা ফালজামা? ইন্দিবা না·সংনি ফাগিবা ইসলনি হ·ন্নানি আগ্রে উরাংনি মাংসাবা হা·আওনা গা·আকজা; 30 আরো না·সংনি স্খুনি খিন্নিরাংবা চান্না দংআ। 31 উনি গিম্মিন না·সং দা·আ খেন্না। দো·চকনাবা বাত্তে না·সং গামচাৎবাত্তা। 32 “মান্দিরাংনি মিকখাংও আংখো খু·রাচাকগিবাখো আংআবা সালগিও দংগিবা আংনি ফানি মিকখাংও খু·রাচাকনুয়া। 33 ইন্দিবা মান্দিরাংনি মিকখাংও আংখো জিচাকগিবাখো আংআবা সালগিও দংগিবা আংনি ফানি মিকখাংও জিচাকনুয়া। 34 “আংআ হা·গিলসাকো থম·থম হং·আনিখো হ·ন্না রি·বাজক ইন্নে দা·আ চানচিয়া। আংআ থম·থম হং·আনিখো হ·ন্না রি·বাজা ইন্দিবা মান্দিনি সাক্কাও মান্দিখো চাখাত্তেতনা রি·বাজক; 35 দেখো ফাথাংনি সাক্কাও, দেমিচিকখো মাথাংনি সাক্কাও, নামচিকখো নিওথাংনি সাক্কাও চাংফেংগ্রিকেতনা রি·বাজক। 36 আন·থাংনি নকনি মান্দিরাংআন আন·থাংথাংনি বোবিল হং·নুয়া। 37 “আংনা বাত্তে মা·আ-ফানা খা·সাবাৎগিবা আংনা খ্রাজা। আরো আংনা বাত্তে দেফান্থি দেমিচিকনা খা·সাবাৎগিবা আংনা খ্রাজা। 38 আন·থাংনি চিসলখো রা·এ আংনি রামাও রি·ফাগিজাগিবাবা আংনা খ্রাজা। 39 জাংগিথাংখো রাক্ষিনা হাম·গিবা বিনি চং·মত জাংগিখো গিম্মায়েতনুয়া; ইন্দিবা আংনি গিম্মিন জাংগিথাংখো গিম্মায়েতগিবা চং·মত জাংগিখো রাক্ষিনুয়া। 40 “জে মান্দি না·সংখো রা·চাকা বিয়া আংখোন রা·চাকা; আরো জে মান্দি আংখো রা·চাকা বিয়া আংখো ওয়াত্তেতগিবাখোন রা·চাকা। 41 আগানসোগিবা ইন্নে আগানসোগিবাখো রা·চাকগিবা আগানসোগিবানি মা·ন্নানিখো মা·ন্নুয়া। থরমি মান্দি ইন্নে থরমি মান্দিখো রা·চাকগিবা থরমি মান্দিনি মা·ন্নানিখো মা·ন্নুয়া। 42 জে মান্দি ইয়া চনগিবা মান্দিরাংনি গিসেপো সাকসাখো আংনি জা·রিকগিবা ইন্নে চি খা·সিনাখো দিকথেসা রিংনা হ·ন্না, বিবিন আংআ না·সংনা আগানিংআ, বিয়া মামুং দাক্কেবা আন·থাংনি মা·ন্নানিখো গিম্মায়েতজানুয়া।”

মথি 11

1 যীশু আন·থাংনি জা·রিকগিবা সাকচিগ্মিনা হন·গিবা গি·য়েতারাংখো ব·ন্নেতজক। উনি জা·মানো বিয়া সং গিপ্পিনরাংচা স্খিনা আরো আগানফ্রাকনা উয়োনি রি·য়াংজক। 2 যোহন ফাতোকো দংএ খ্রীষ্টনি খাৎথাখো খিন্নানা মা·ন্নে আন·থাংনি জা·রিকগিবারাংখো যীশুচা সিং·এ ওয়াত্তেতজক, 3 ‘‘না·আন উয়া রি·বানা আগানগিবামা, বা চিংআ সাকগিপ্পিনখো নিচাকসনোমা?’’ 4 যীশু আগানচাকে বিসংনা আগানজক, ‘‘না·সং জেখো খিন্নাংআ আরো নিক্কিংআ উখো রি·য়াংএ যোহননা আগানেবো। 5 বিনা আগানেবো, মিকগ্রিরাং নিকনা মা·ন্নিংজক, খোরারাং রামা রি·ইংজক, খনচিরিত্তামরাং রংথালিংজক, নাগকরাং খিন্নাংজক, সিগিবারাং থাংচাফিল্লিংজক আরো দিল্লা-চন্না মান্দিরাংচা নাম্মা খাৎথাখো আগানফ্রাক্কিংজক। 6 আরো আংখো রা·এ গিসিকো জাজাগিজাগিবান ফাত্তিয়া মান·গিবা হং·আ।’’ 7 যোহননি জা·রিকগিবারাং রি·য়াংমিত্তিংও যীশু মান্দিরাংচা যোহননি গিম্মিন আগান্না হা·বাচেংজক, ‘‘না·সং হা·গিসি জওলো মুয়াখো নিনা রি·য়াংআমিং? বালওয়ানা মজিমগিবা নলবিফাংখোমা? 8 হং·জাওদে মুয়াখো নিনা রি·য়াংআমিং? নিথুয়া বা·রাখো গানগিবা মান্দিখো নিনামা? আদতে নিথুয়া বা·রাখো গানগিবারাং রাজারাংনি নকরাংও দংআ। 9 হং·জাওদে মুয়াখো নিনা রি·য়াংআমিং? আগানসোগিবাখোমা? হো·এ, আংআ না·সংনা আগানিংআ, বিয়া আগানসোগিবানাবা দাল·বাত্তা। 10 যোহনআন উয়া মান্দি জেনি গিম্মিন শাস্ত্রও চক্কা দংআ: নিবো, আংআ নাং·না স্খাং আন·থাংনি সা·গ্রেখো ওয়াত্তেতিংআ। বিয়া নাং·না স্খাং রি·য়াংএ নাং·নি রামাখো থারিসনুয়া। 11 আংআ না·সংনা বিবিন আগানিংআ, মান্দিরাংনি গিসেপো রিপ্পলেতগিবা যোহননা বাতগিবা সাকসাবা দংজা। ইন্দিবা সালগিনি সংনকো গিম্মিকনা চনবাৎগিবান যোহননা দাল·বাত্তা। 12 রিপ্পলেতগিবা যোহননি সময়ওনি দা·আওনা দিপ্পাৎ সালগিনি সংনক বিলখো রা·এ রি·বাংআ, আরো বিলগ্মাংরাং উখো রি·ম্মে দংআ। 13 যোহননি সময়ওনা দিপ্পাৎ গিম্মিক আগানসোগিবারাং, ইনাআগ্রে মোশিনি নিয়ামরাংবা রি·বানাগিবা চাসংনি খাৎথাখো আগানসোজক। 14 না·সং ইয়া খাৎথাখো বিবিরা·আওদে, খিন্নাবো- ইয়া যোহনআন এলিয় জেখো রি·বানুয়া ইন্নে আগানসোআমিং। 15 খিন্নানা নাচিল দংগিবা খিন্নাখানা।’’ 16 ‘‘ইয়া চাসংনি মান্দিরাংখো আংআ সারাংমুং থসুসানুয়া? ইরাং ইন্দাকগিবা বি·সারাং গিত্তা দাক্কা জেরাং বাজালও আসংএ গিপ্পিন বি·সারাংখো রিংগামে আগানা, 17 ‘চিংআ না·সংনা বাংসি সিক্কামিং, না·সং মেসাজাজক; দুকনি গীতখো রিং·আমিং, না·সং খা·আখো দকজাজক।’ 18 যোহন রি·বাএ চা·জা রিংজাজক ইন্নে মান্দিরাং আগানিংআ, ‘বিখো গিসিক নামগিজাগিবা মান·জক।’ 19 আরো মান্দিনি দেফান্থি রি·বাএ চা·জক রিংজক ইন্নে মান্দিরাং আগানিংআ, ‘হাইওয়া নিবো, চা·ফেকগিবা আরো আংগুর বিৎচিখো রিংফেকগিবা, খাজিনা গিলগিবা আরো নামগিজা মান্দিরাংনি রিপ্পেং।’ ইন্দিবা হা·আইয়া আন·থাংনি কামরাংচান খাকখেৎ হং·আখো ফিন্নিকজক।’’ 20 যীশু জে সংরাংও আরো সংজিলমারাংও বাং·বাত্তে আইয়াও ইনমানগিবা কামরাংখো দাক্কামিং উয়া হা·দামরাংনি মান্দিরাং গিসিক ফিল·জাজক। উনি গিম্মিন উয়া হা·দামরাংখো মা·নেংএ বিয়া ইন্দাকে আগান্না হা·বাচেংজক, 21 ‘‘হং·সিখানা নাং·না কোরাসীন, হং·সিখানা নাং·না বৈৎসৈদা! না·সংও দাকগিবা বিল্লাকগিবা কামরাংখো সোর আরো সীদোন সংজিলমাও দাক্কোদে ইন্দাকোদে বাসোকোনিন বিসং ছালা গান্নে হা·দুবু সিত্তে পাপওনি গিসিক ফিল·নুয়ামিং। 22 আংআ না·সংনা বিবিন আগানিংআ, বিচালনি সালো না·সংনা বাত্তে সোর আরো সীদোননি অবস্থা চাকবাত্তানি হং·নুয়া। 23 আরো না·আ কফরনাহূম! সালগিওনা দিপ্পাৎ চুবাত্তাও না·আ গাদোয়াংনোমা? মামুং সালোবা মান·জানুয়া, নাং·খো সিগিবারাংনি হা·দামচা গাল্লেতনুয়া। নাং·ও দাকগিবা বিল্লাকগিবা কামরাংখো সদোম সংজিলমাও দাক্কোদে সদোম দা·আওবা দংনুয়ামিং। 24 আংআ না·সংনা বিবিন আগানিংআ, বিচালনি সালো না·সংনা বাত্তে সদোমনি অবস্থা চাকথবাত্তানি হং·নুয়া।’’ 25 জা·মানো যীশু আগানজক, ‘‘ও আপফা, না·আ সালগিসাক আরো হা·গিলসাকনি গিত্তেল। আংআ নাং·খো মিৎথেলা মুয়ানা না·আ হা·আইবাৎগিবা আরো বুদ্ধিগ্মাং মান্দিরাংওনি ইরাংখো থুম্মুয়ে দন্না, ইন্দিবা বি·সারাং গিত্তা মান্দিরাংচা ফারাকজক। 26 হো·এ আপফা, নাং·নি হা·ম্মা গিত্তান ইরাং হং·জক। 27 ‘‘দিমদাকখোন আংনি আপফা আংনি জাক্কো হন·জক। ফাগিবানা আগ্রে দেফান্থিখো দারাংবা হা·আইজা আরো দেফান্থিনা আগ্রে ফাগিবাখো সাকসাবা হা·আইজা, আরো দেফান্থি জেচা ফাগিবাখো ফারাকেতনা হা·ম্মা উয়ান বিখো হা·আইনা মা·ন্না। 28 ‘‘নেং·গিবা আরো বালজ্রিমগিবারাং না·সং গিম্মিকান আংচানা রি·বাবো; আংআ না·সংখো নেং·থাকেতনুয়া। 29 আংনি জোয়ালখো না·সংনি সাক্কাও গাত্তে রা·বো আরো আংচানিখো স্খিবো, মুয়ানা আংআ গিসিক নম·গিবা আরো রিন্নকগিবা হং·আ। 30 ইনি গিম্মিন না·সং খা·থংও নেং·থাকাখো মা·ন্নুয়া, মুয়ানা আংনি জোয়ালান রিপ্পিএ রা·না নাম্মা আরো আংনি বোজা চেং·আ।’’

মথি 12

1 সালসাও যীশু গমনি দামসা হা·বা গিত্তা রি·য়াংআমিং। উয়া সাল নেং·থাকানি সালমিং। বিনি জা·রিকগিবারাং অকখ্রিয়ানি গিম্মিন গম বিথিখো আক্কে চা·না হা·বাচেংজক। 2 উখো নিক্কে ফরীশীরাং যীশুনা আগানজক, ‘‘থরমনি নিয়াম গিত্তা নেং·থাকানি সালো জেখো দাকনা নাংজা, নিবো, নাং·নি জা·রিকগিবারাং উখোন দাক্কিংআ।’’ 3 যীশু বিসংনা আগানজক, ‘‘দায়ূদ আরো বিনি রিপ্পেংরাং জেনসালো অকখ্রিয়ামিং উনো বিয়া মুয়াখো দাক্কামিং উখো না·সং পড়িখুজামা? বিয়াদে ইসলনি নক্কো নাপ্পে বিনা চিন·গিবা রুটিখো চা·আমিং। 4 দায়ূদ আরো বিনি রিপ্পেংরাংনি উখো চা·না খ্রাজামিং, ইন্দিবা খামালরাংসান উখো চা·না মা·ন্নামিং। 5 ইনা আগ্রে না·সং মোশিনি নিয়ামরাংও ইখো পড়িখুজামা, নেং·থাকানি সালো থরম নকনি খামালরাং নেং·থাকানি সালনি নিয়ামখো ফি·ওবা বিসংনি গ্রো নাংজা? 6 আংআ না·সংনা আগানিংআ, থরম নকনা বাত্তেবা দাল·বাত্তা ইনো সাকসা দংআ। 7 ‘আংআ খা·সাচাক্কাখো নিনা হা·ম্মা, বলি হ·ন্নাখো হং·জা’-ইয়া খাৎথানি অর্থখো না·সং হা·আইওদে গ্রো নাংগিজাগিবারাংখো গ্রো নাংএতজানুয়ামিং। 8 হা·আইএ রা·রিকবো, মান্দিনি দেফান্থিন নেং·থাকানি সালনি নকগিবা হং·আ।’’ 9 জা·মানো উয়া হা·দামখো ওয়াত্তে যীশু উয়া ফরীশীরাংনি থম·দাকরামচানা রি·য়াংজক। 10 উনো জাক সিক্রেপগিবা সাকসা মান্দি দংআমিং। যীশুখো গ্র্রো নাংএতনা ইন্নে ফরীশীরাং বিনা আগানজক, ‘‘থরমনি নিয়াম গিত্তা নেং·থাকানি সালো সাগিবাখো নাম্মেতনা খ্রাআমা?’’ 11 যীশু বিসংনা আগানজক, ‘‘ইন্দাকে চানচিচিপবো, না·সংনি গিসেপো সাকসানি মাংসা মেষ দংআ। উয়া মেষ নেং·থাকানি সালো হা·খলো গা·আকোদে বিয়া উখো রি·ম্মে সালদোজানোমা? 12 আরো মেষনা বাত্তে মান্দিনি দাম নাম্মেন বাং·বাত্তা। ইন্দাকোদে ইখোন নিকনা মা·ন্নিংআ, নেং·থাকানি সালো নাম্মা কামখো দাক্কা খ্রাআ।’’ 13 জা·মানো বিয়া উয়া মান্দিনা আগানজক, ‘‘নাং·নি জাকখো সিল্লেতবো।’’ বিয়া আন·থাংনি জাকখো সিল্লেতোন উয়া জাক বিনি জাক সামসা গিত্তান নাম্মাংজক। 14 উনো ফরীশীরাং হা·ফালচা রি·য়াংজক আরো যীশুখো স·ওতে গালনা খু·মংজক। 15 বিসংনি খু·মংগ্রিকাখো হা·আইনা মা·ন্নে যীশু উয়োনি হং·খাতে রি·য়াংজক। উনো বাং·আ মান্দিরাং বিখো জা·রিকফাজক। 16 বিসংনি গিসেপো জম্মা-সা দংগিবারাংখো বিয়া নাম্মেতজক আরো বিনি খাৎথাখো আগানজাখানা বেং·জক। 17 ইরাং হং·জক জেদাক্কে আগানসোগিবা যিশাইয়নি আগানসোগিবা ইয়া খাৎথা চু·সকা: 18 নিবো, আংনি নকখল জেখো আংআ বাচ্ছিয়ে রা·জক। ইয়ান আংনি নামনিকগিবা জেনি সাক্কাও আংআ খুসি হং·বিয়া। আংআ বিনি সাক্কাও আংনি গিসিকখো হ·ন্নুয়া, আরো বিয়া গিপ্পিন জাতরাংচা খাকখেৎ বিচালখো আগানফ্রাকনুয়া। 19 বিয়া নিরিজানুয়া আরো চ্রিকজানুয়া; বিনি খু·রাংখো রামারাংও খিন্নাদিলজানুয়া। 20 খাকখেৎ বিচালখো হাম্মেতজা দিপ্পাৎ বিয়া বি·গপগিবা নলবিফাংখো ফি·জানুয়া আরো দিম্মিত দিম্মিত দাক্কে চিং·গিবা থচ্রিখো খিম্মিতজানুয়া। 21 বিনি সাক্কাওন গিপ্পিন জাতরাং খা·দংনুয়া। 22 মান্দিরাং জা·মানো গিসিক নামগিজাগিবা মান·গিবা সাকসা মান্দিখো যীশুচা রা·বাজক। উয়া মিকগ্রি আরো আব্রা মান্দিমিং। যীশু বিখো নাম্মেতজক। 23 উনি গিম্মিন উয়া মান্দি খাৎথা আগান্না আরো নিকনা মান·জক। উনো মান্দিরাং আইয়াও ইনমানে আগানজক, ‘‘ইয়ান দায়ূদনি উয়া দেফান্থিমা?’’ 24 ফরীশীরাং ইয়া খাৎথাখো খিন্নাএ আগানজক, ‘‘বিয়াদে গিসিক নামগিজাগিবানি রাজা বেল্‌সবূলো ফাংচাকে গিসিক নামগিজাগিবারাংখো হা·রিকা।’’ 25 ফরীশীরাংনি গিসিকথাংও চানচিয়াখো হা·আইনা মা·ন্নে যীশু বিসংনা আগানজক, ‘‘আন·থাংথাংনি গিসেপো বোবিল হং·এ দিংথাং হং·গ্রিকগিবা সংনকদে ব·ন্নাংনুয়া। আরো আন·থাংথাংনি গিসেপো বোবিল হং·এ দিংথাং হং·গ্রিকগিবা সংজিলমা বা নকসানি মান্দিবা আন·থাংথাংও থম·থম দংজা। 26 শয়তান শয়তানখোন হা·রিকজকোদে বিয়া আন·থাংনি গিসেপোন দিংথাং হং·আংআ। উনোদে বিনি সংনক বাদিকে থম·থম দংনুয়া? 27 আংআ বেল্‌সবূলো ফাংচাকে গিসিক নামগিজাগিবারাংখো হা·রিকোদে, ইন্দাকোদে না·সংনি মান্দিরাং সাখো ফাংচাকে উরাংখো হা·রিকা? না·সং খাকখেৎ খাৎথাখো আগানামা, উখো না·সংনি মান্দিরাংআন বিচাল দাকনুয়া। 28 ইন্দিবা আংআ ইসলনি গিসিকচা গিসিক নামগিজাগিবাখো হা·রিকোদে ইন্দাকোদে ইসলনি সংনক না·সংওনা সকজক। 29 ‘‘স্খাং বিলগ্মাং মান্দিখো খাজাওদে সা বিনি নক্কো নাপ্পে গামজিনরাংখো রা·সেকনা মা·ন্নুয়া? খাজকোদে বিয়া উখো দাকনা মা·ন্নুয়া। 30 ‘‘আংনা চাকগিজাগিবা আংখো চাংফেংগিবা হং·আ। সাবা আংমুং খল্লামজাওদে বিয়া বিলদিং বিলদাং দাক্কা। 31 ইনি গিম্মিন আংআ না·সংনা আগানিংআ, মান্দিনি গিম্মিক পাপরাং আরো ইসলখো রা·এ খাল·স্থাপারাংখো ক্ষেমা দাকনুয়া, ইন্দিবা গিসিক রংথালগিবাখো রা·এ খাল·স্থাপাখো ক্ষেমা দাকজানুয়া। 32 মান্দিনি দেফান্থিখো চাংফেংএ আগানগিবাখো ক্ষেমা দাকনুয়া, ইন্দিবা গিসিক রংথালগিবাখো চাংফেংএ আগানগিবাখো ক্ষেমা দাকজানুয়া-ইয়া চাসংও হং·জা, আম্বুন চাসংওবা হং·জা। 33 ‘‘ইয়া খাৎথাখো মানিয়ে রা·বো, বিফাং নাম্মোদে উনি বিথিবা নামনুয়া, দা·আবা বিফাং নামজাওদে উনি বিথিবা নামজানুয়া; মুয়ানা বিথিচান ফাংখো হা·আইনা মা·ন্না। 34 চিপ্পুনি দেদ্রাং! আন·থাংসং নামগিজা হং·এ বাদিকে না·সং নাম্মাখো আগান্না মা·ন্না? মান্দিনি খা·থং জেগিত্তা হং·আ খু·সুকদে উখোন আগানা। 35 নামগিবা মান্দি নামগিবা খা·থংওনি খাৎথা নাম্মাখো আগানা, আরো নামগিজা মান্দি নামগিজা খা·থংওনি খাৎথা নামগিজাখো আগানা। 36 ইন্দিবা আংআ না·সংনা আগানিংআ, মান্দিরাং জে নামগিজা খাৎথারাংখো আগানা, বিচালনি সালো বিসংনি মিংফ্রাকফ্রাক খাৎথানি গিম্মিন হিসাব হ·ন্না নাংনুয়া। 37 নাং·নি খাৎথারাংচান নাং·খো নাম্মা ইন্নুয়া আরো নাং·নি খাৎথারাংচান নাং·খো গ্রো নাংএতনুয়া।’’ 38 উনি জা·মানো মিত্তাম শাস্ত্র স্খিগিবা আরো ফরীশীরাং যীশুনা আগানজক, ‘‘স্খিগিবা, নাং·চানিখো চিংআ গি·সা চিনখো নিনা হা·ম্মিংআ।’’ 39 যীশু বিসংনা আগানজক, ‘‘ইয়া চাসংনি নামগিজাগিবা আরো বিবিরা·গিজাগিবা মান্দিরাং চিনখো হা·ম্মা, ইন্দিবা যোনা আগানসোগিবানি চিননা আগ্রে বিসংনা মামুং চিনখোন ফিন্নিকজানুয়া। 40 জেদাক্কে যোনা সাল গিত্থাম ওয়াল গিত্থাম না·থকনি বিকমাও দংআমিং মান্দিনি দেফান্থিবান উয়ানদাক্কে সাল গিত্থাম ওয়াল গিত্থাম হা·আনি নিং·আও দংনুয়া। 41 বিচালনি সালো নীনবী সংজিলমানি মান্দিরাং চাখাত্তে ইয়া চাসংনি মান্দিরাংনি গ্রোখো ফিন্নিকেতনুয়া, মুয়ানা নীনবীনি মান্দিরাং যোনানি আগানফ্রাকানি গিম্মিন পাপওনি গিসিক ফি·ল্লামিং। আরো নিবো, যোনানা বাতগিবা সাকসা ইনো দংআ। 42 বিচালনি সালো সালগিপেংচানি রানী চাখাত্তে ইয়া চাসংনি মান্দিরাংনি গ্রোখো ফিন্নিকেতনুয়া, মুয়ানা শলোমন রাজানি হা·আইয়ানিখো খিন্নাথিমনা বিয়া হা·গিলসাকনি বন·চতগিবা হা·দামওনি রি·বামিং। আরো নিবো, শলোমননা বাতগিবা সাকসা ইনো দংআ। 43 “জেনসালো গিসিক নামগিজাগিবা মান্দিওনি হং·খাতে রি·য়াংআ উনো বিয়া নেং·থাকনা ইন্নে রান·গিবা হা·দামরাংও রওমে দংনা হা·বাচেংআ। 44 ইন্দিবা উখো মান·জাএ বিয়া আগানা, ‘জেওনি হং·খাতবামিং আংনি উয়া নক্কোনান আংআ রি·য়াংফিলনুয়া।’ বিয়া রি·বাফিলে উয়া নকখো বাংবাং দাক্কে, চি·রংএ আরো থারিয়ে দন্নাখো নিকনা মা·ন্না। 45 জা·মানো উয়া গিসিক নামগিজাগিবা আন·থাংনা বাত্তে আরোবা নামবাৎগিজা গিপ্পিন গিসিক স্নিখো রি·ম্মে রা·বাআ আরো উয়ো নাপ্পে দংখামা। উনি গিম্মিন উয়া মান্দিনি স্খাংনা বাত্তে বন·চতগিবা অবস্থা নামজাবাত্তা।’’ ইয়া চাসংনি নামগিজা মান্দিরাংনি অবস্থাবা উগিত্তান হং·নুয়া।’’ 46 যীশু মান্দিরাংমুং খাৎথা আগানমিত্তিংও বিনি মা·গিবা আরো জংগিবারাং বিমুং খাৎথা আগানগ্রিকনা ইন্নে হা·ফালচা চাদেংএ দংআমিং। 47 সাকসা মান্দি বিনা আগানজক, ‘‘নিবো, নাং·নি মা·গিবা আরো জংগিবারাং নাং·মুং আগানগ্রিকনা হা·ফালও চাদেংএ দংআ।’’ 48 উনো যীশু বিনা আগানজক, ‘‘আংনি মা·গিবা আরো আংনি জংগিবাবা সারাং?’’ 49 জা·মানো বিয়া আন·থাংনি জা·রিকগিবারাংখো ফিন্নিকে আগানজক, ‘‘ইয়া নিবো, আংনি মা·গিবা আরো জংগিবারাং; 50 মুয়ানা সালগিও দংগিবা আংনি ফানি নামনিকাখো দাকগিবান আংনি জংগিবা, নগিবা আরো মা·গিবা হং·আ।’’

মথি 13

1 উনসালোন যীশু নকনি হং·খাতে সাগালনি রিক্কামও রি·য়াংএ আসংজক। 2 বিনি দংগিবানো মান্দি বাং·আ থম·দাকানি গিম্মিন বিয়া রিং গি·সাও গাখাতে আসংজক, আরো গিম্মিক মান্দি সাগালনি রিক্কামো চাদেংএ দংজক। 3 উনো বিয়া গল্পরাংচা বাং·এ স্খিয়ে হ·ন্না হা·বাচেংজক। 4 বিয়া আগানজক, ‘‘মি গোগিবা সাকসা মি গোনা রি·য়াংজক। গোমিত্তিংও মিত্তাম মি রামা রিক্কামো গা·আকজক আরো দো·দ্রাং বিলবায়ে উখো চা·এ গালজক। মিত্তাম মি রং·ব্রাক সাক্কাও গা·আকজক। 5 উয়ো হা·আ বাং·এ দংজামিং। হা·আ বাং·এ থিংনাপজানি গিম্মিন উরাং থেংরিন চাজক, 6 ইন্দিবা সাল দিং·এ নাবাওন উয়া খামজক আরো নাম্মেদাক্কে জা·দিল সু·না মান·জানি গিম্মিন সিক্রেপজক। 7 দা·আবা মিত্তাম বুসুগ্রিমো গা·আকজক। উনি গিম্মিন বুসুরাং চাবায়ে উনি সাক্কাও দিকফ্রিপজক। 8 আরো মিত্তাম মি নাম্মা হা·বাও গা·আকে মিত্তাম রিৎচাসা, মিত্তাম সৎদক আরো মিত্তাম খলাৎচি বাত্তে বিথি নাংজক।’’ 9 গল্প আগানা বন·চতও যীশু আগানজক, ‘‘খিন্নানা নাচিল দংগিবা খিন্নাখানা।’’ 10 জা·মানো জা·রিকগিবারাং যীশুচা রি·বাএ বিনা আগানজক, ‘‘না·আ গল্পরাংচা মান্দিরাংনা মুয়ানা স্খিয়ে হ·ন্নিংআ?’’ 11 বিয়া জা·রিকগিবারাংনা আগানচাকে ইনজক, ‘‘সালগিনি সংনকনি নিং·থুয়া খাৎথাখো না·সংনা হা·আইনা হন·জক ইন্দিবা বিসংনাদে হন·জা, 12 মুয়ানা জেনি দংআ বিনা আরোবা বাং·এ হ·ন্নুয়া, আরো উনি গিম্মিন বিনি বাং·বাতনুয়া। ইন্দিবা জেনি মামুং দংজা বিনি অকখিসা দংগিবাখোবা বিচানিখো রা·আংস্রাংনুয়া। 13 উনি গিম্মিন আংআ বিসংনা গল্পচা আগানে স্খিয়ে হ·ন্না, মুয়ানা বিসং নিক্কেবা নিকজা, খিন্নাএবা খিন্নাজা আরো হা·আইজা। 14 ইরাংও আগানসোগিবা যিশাইয়নি ইয়া খাৎথা চু·সকিংজক: না·সং খিন্নানুয়া ইন্দিবা মামুং দাক্কেবা হা·আইজানুয়া; নিকনুয়া ইন্দিবা মামুং দাক্কেবা মা·সিজানুয়া। 15 ইন্দাকগিবা মান্দিরাংনি খা·থং গক্কা হং·জক আরো নাচিল মিৎথিপজক, আরো বিসং আন·থাংথাংনি মিক্রোনখোবা মিকচিপে দনজক, জেদাক্কে বিসং মিক্রোনচা নিকনা মান·জা, নাচিলচা খিন্নাজা আরো খা·থংচা হা·আইজা, আরো নামনা ইন্নে আংচা রি·বাফিলনা মান·জা। 16 ‘‘ইন্দিবা না·সং ফাত্তিয়া মান·গিবা হং·আ, মুয়ানা না·সংনি মিক্রোন নিকনা মা·ন্না আরো না·সংনি নাচিল খিন্নানা মা·ন্না। 17 আংআ না·সংনা বিবিন আগানিংআ, না·সং জেখো জেখো নিক্কিংআ উখো বাং·আ আগানসোগিবারাং আরো ইসলনা খা·ফাকগিবা মান্দিরাং নিকনা হা·সিকেবা নিকনা মান·জাজক, আরো না·সং জেখো জেখো খিন্নাংআ উখো খিন্নানা হা·সিকেবা বিসং খিন্নাজাজক। 18 ‘‘দা·আও না·সং মি গোগিবানি গল্পনি অর্থখো খিন্নাবো। জেনসালো সাবা সালগিনি সংনকনি খাৎথাখো খিন্নাএবা হা·আইনা মান·জা উনো শয়তান রি·বাএ বিনি খা·থংও গোগিবা খাৎথাখো রা·সেকা। উয়া রামা রিক্কামো গা·আকগিবা বিৎচ্রিচা ইন্দাকগিবা মান্দিরাংনি গিম্মিন আগানজক। 20 আরো রং·ব্রাক সাক্কাও গা·আকগিবা বিৎচ্রিচা বিসংখোন আগানজক জেরাং সালগিনি সংনকনি খাৎথাখো খিন্নাএ উনোন উখো খুসি হং·এ রা·চাকা, 21 ইন্দিবা বিসংনি নিং·আও জা·দিল নাম্মেদাক্কে সু·জানি গিম্মিন বিসং দিকদিকসানা মা·মাং থম·থমে দংআ। জেনসালো উয়া খাৎথানা দুক আরো গিচ্চিয়াখো মা·ন্না উনোন বিসং খি·সাংচানা রি·য়াংফিল্লা। 22 বুসুগ্রিমো গা·আকগিবা বিৎচ্রিচা বিসংখোন আগানজক জেরাং উয়া খাৎথাখো খিন্না, ইন্দিবা নকদাংনা চানচিয়ারাং আরো গামজিননা খা·ফাকারাং উয়া খাৎথাখো দিকফ্রিপে দন্না। উনি গিম্মিন উনো মামুং বিথি নাংজা। 23 নাম্মা হা·বাও গা·আকগিবা বিৎচ্রিচা বিসংখোন আগানজক জেরাং উয়া খাৎথাখো খিন্নাএ হা·আইয়া আরো বিথি হ·ন্না। মিত্তাম রিৎচাসা, মিত্তাম সৎদক আরো মিত্তাম খলাৎচি দাক্কে হ·ন্না।’’ 24 জা·মানো বিয়া মান্দিরাংনা দা·আও গি·সা গল্পখো আগানজক। উয়া গল্প ইন্দাকা: ‘‘সালগিনি সংনক ইন্দাকগিবা মান্দি গিত্তা দাক্কা জে মান্দি আন·থাংনি হা·বাও নাম্মা বিৎচ্রিখো গি·জক। 25 জা·মানো দিমদাকনি থুমানো উয়া মান্দিনি বোবিল রি·বাএ গমনি নিং·আও সামবিথিনি বিৎচ্রিখো গোয়ে রি·য়াংজক। 26 ইন্দাকে জেনসালো গমনি বিৎচ্রি চাবায়ে বিথি নাজক উনো উয়ো সামবিথিখোবা নিকনা মান·জক। 27 উখো নিকবায়ে নকনি নকখলরাং রি·বাএ নকগিবানা আগানজক, ‘না·আ হা·বাও নাম্মা বিৎচ্রিখো গোজামা? ইন্দাকোদে সামবিথি বাচ্চানি রি·বাজক?’ 28 ‘‘বিয়া বিসংনা আগানজক, ‘বাগিবা বোবিল ইখো দাকজক।’ ‘‘নকখলরাং বিনা আগানজক, ‘ইন্দাকোদে চিংআ রি·য়াংএ উরাংখো ফিক্কে গালনুয়ামা?’ 29 ‘‘বিয়া আগানজক, ‘হং·জা, সামবিথিখো ফিক্কে গালনা রি·য়াংএ না·সং গমখোবা ফিক্কে গালমান্নুয়া। 30 মি রাত্তানি সময়ওনা দিপ্পাৎ উরাংখো উনসান চাবানা হন·চেংবো। জেরাং মি রাত্তা বিসংনা আংআ জা·মানো আগান্নুয়া জেদাক্কে বিসং স্খাং সামবিথিরাংখো চিম্মংএ সো·এ গালনা মিংএ খাএ দন্না, আরো উনি জা·মানো গমরাংখো আংনি জামও চিম্মংএ দন্না।’ ” 31 যীশু বিসংনা দা·আও গি·সা গল্পখো আগানজক। উয়া গল্প ইন্দাকা: ‘‘সালগিনি সংনক সুলসো বিৎচ্রি গিত্তা হং·আ জেখো সাকসা মান্দি রা·এ আন·থাংনি হা·বাও গোজক। 32 গিম্মিক বিৎচ্রিনা বাত্তে উয়া চনবাত্তা, ইন্দিবা চাএ দাল·বাওন উয়া গিম্মিক সামবিজাকরাংনা বাত্তে দাল·বাত্তানি হং·আ। উয়া ফাং ইন্দাকফিল্লে দা·ল্লানি গিম্মিন উয়ো দো·দ্রাং রি·বাএ উনি ডালারাংও বিথিপ সা·আ।’’ 33 বিয়া বিসংনা দা·আও গি·সা গল্পখো আগানজক। উয়া গল্প ইন্দাকা: “সালগিনি সংনক ওয়ানথি গিত্তা দাক্কা। মিচিক সাকসা উখো রা·এ কেজি চিচেৎ ময়দাও ব্রিনজক। উনি গিম্মিন ময়দা গিম্মিক ফিংজক।” 34 যীশু গল্পরাংচা মান্দিরাংনা ইরাংখো স্খিজক। বিয়া গল্পনি আগ্রে মামুংচান বিসংনা স্খিয়ে হন·জানুয়ামিং। 35 ইরাং হং·জক জেদাক্কে আগানসোগিবাও আগানা ইয়া খাৎথা চু·সকা: আংআ স্খিয়ে হ·ন্না গল্পরাংচা খু·সুক আগান্নুয়া; হা·গিলসাক হং·চেংওনি থুম্মুয়ে দনগিবারাংখো আগান্নুয়া। 36 জা·মানো যীশু মান্দিরাংখো ওয়াত্তে নক্কো নাপজক। উনো বিনি জা·রিকগিবারাং রি·বাএ বিনা আগানজক, ‘‘হা·বানি উয়া সামবিথিনি গল্পখো চিংনা ফি·এ আগানবো।’’ 37 যীশু আগানচাকে বিসংনা আগানজক, ‘‘নাম্মা বিৎচ্রিখো গোগিবাদে মান্দিনি দেফান্থি। 38 হা·বাদে ইয়া হা·গিলসাক, আরো সালগিনি মান্দিরাংদে নামগিবা বিৎচ্রি। সামবিথিদে শয়তাননি মান্দিরাং। 39 জে বোবিল উখো গোয়ামিং উয়াদে শয়তান, আরো মি রাত্তানি সময় হং·জক ইয়া চাসংনি বন·খামগিবা সময়। জেরাং মি রাতনুয়া উরাং হং·জক সা·গ্রেরাং। 40 জেদাক্কে সামবিথিখো চিম্মংএ ওয়া·আলো সো·আ, চাসংনি বন·খামগিবা সালোবা উয়ানদাক্কেন হং·নুয়া। মান্দিনি দেফান্থি আন·থাংনি সা·গ্রেরাংখো ওয়াত্তেতনুয়া। 41 গিপ্পিনরাংখো পাপ দাক্কেতগিবারাংখো আরো আন·থাংথাং পাপ দাকগিবা গিম্মিকখোন উয়া সা·গ্রেরাং মান্দিনি দেফান্থিনি সংনকনিখো চিম্মংনুয়া আরো ওয়া·আলনি হা·খলো গালনুয়া। 42 উনো মান্দিরাং গ্রাপনুয়া আরো সা·দিকানা ওয়াগাম চিকক্রতনুয়া। 43 উনসালো ইসলখো নামনিকগিবারাং বিসংনি ফাগিবানি সংনকো সাল গিত্তা থেং·সুনুয়া। খিন্নানা নাচিল দংগিবা খিন্নাখানা। 44 ‘‘সালগিনি সংনক হা·বাও ত্থুম্মুয়ে দনগিবা গাম গিত্তা হং·আ। জেখো মান্দি সাকসা নিক্কে দা·আবা থুম্মুয়ে দনজক। জা·মানো বিয়া খুসি হং·এ রি·য়াংজক আরো আন·থাংনি দংগিবা গিম্মিকখো ফাল্লে উয়া হা·বাখো ব্রিজক। 45 ‘‘দা·আবা সালগিনি সংনক নামগিবা মুক্তাখো হাম·গিবা সাকসা বাদিংগিবা গিত্তা হং·আ। 46 নামবাৎগিবা মুক্তা গি·সাখো নিক্কেমুং বিয়া রি·য়াংএ আন·থাংনি দংগিবা গিম্মিকখো ফাল্লে উয়া মুক্তাখো ব্রিজক। 47 ‘‘দা·আবা, সালগিনি সংনক গি·সা দা·ল্লা জাল গিত্তা হং·আ জেখো সাগালও গালজক আরো না·থক দিমদাক উনো গাদোজক। 48 জাল গাপমানো মান্দিরাং উখো রিক্কামওনা সালদোজক। জা·মানো বিসং আসংএ নামগিবা না·থকরাংখো বাচ্ছিয়ে খক্কো দনজক আরো নামগিজারাংখো গাল্লেতজক। 49 বন·খামানি সালো ইন্দাকেন হং·নুয়া। সা·গ্রেরাং রি·বাএ থরমি মান্দিরাংনি গিসেপোনি নামগিজারাংখো দিংথাং দাক্কেতনুয়া আরো ওয়া·আলনি হা·খলো বিসংখো গাল্লেতনুয়া। 50 উয়ানো মান্দিরাং গ্রাপনুয়া আরো সা·দিকানা ওয়াগাম চিকক্রতনুয়া।’’ 51 উনি জা·মানো যীশু আন·থাংনি জা·রিকগিবারাংখো সিং·জক, ‘‘না·সং ইরাংখো হা·আইনা মান·জকমা?’’ বিসং বিনা আগানজক, “হো·এ, হা·আইনা মান·জক।’’ 52 উনোন যীশু বিসংনা আগানজক, ‘‘সালগিনি সংনকনি গিম্মিন স্খিয়া মান·গিবা শাস্ত্র স্খিগিবা গিম্মিকান আন·থাংনি জামওনিখো গিত্তাল আরো গিৎচাম জিনিসখো রং·খাতগিবা নকনি নকগিবা গিত্তা হং·আ।’’ 53 স্খিয়ে হ·ন্না ইয়া গল্পরাংখো আগানা বন·মানো যীশু উয়োনি রি·য়াংজক। নাসর 54 জা·মানো সংথাংচা রি·য়াংএ বিয়া থম·দাকরামচা মান্দিরাংনা স্খিনা হা·বাচেংজক। বিনি খাৎথাখো খিন্নাএ মান্দিরাং আইয়াও ইনমানে আগানজক, ‘‘ইয়া হা·আইয়ানি আরো বিল্লাকগিবা কামখো দাক্কানি বিল বিয়া বাচ্চানিখো মান·জক? 55 বিয়ান উয়া বল মিস্ত্রিনি দেফান্থি হং·জামা? বিনি মা·গিবানি বিমুং মরিয়ম হং·জামা? আরো যাকোব, যোষেফ, শিমোন আরো যিহূদা বিনি জংগিবামা? 56 বিনি নগিবারাং আনচিংনি ইনো দংজামা? ইন্দাকোদে বাচ্চানিখো বিয়া ইরাংখো মান·জক?’’ 57 ইন্দাকে যীশুখো রা·এ মান্দিরাংনি গিসিকো জেগালনা হা·বাচেংজক। উনো যীশু বিসংনা আগানজক, ‘‘আন·থাংনি সং আরো আন·থাংনি নকনি আগ্রে গিম্মিকচান আগানসোগিবারাং মান্দিরা·আখো মা·ন্না।’’ 58 মান্দিরাংনি বিবিরা·গিজানি গিম্মিন বিয়া উয়োনা বিল্লাকানি কামখো বাং·এ দাকজাজক।

মথি 14

1 উয়া সময়ও যীশুনি খাৎথাখো খিন্নাএ গালীল হা·দকখো শাসন দাকগিবা হেরোদ আন·থাংনি নকখলরাংনা আগানজক, 2 ‘‘বিয়ান রিপ্পলেতগিবা যোহন; সিয়াওনি থাংচাফিলজক। উনি গিম্মিন বিয়া ইন্দাকা বিল্লাকানি কামরাংখো দাক্কিংআ।’’ 3 হেরোদ আদাথাং ফিলিপনি জিকগিবা হেরোদিয়ানি গিম্মিন যোহনখো খাএমুং ফাতোকো দন্নামিং, 4 মুয়ানা যোহন বিখো ইন্দাকে ইন্নুয়ামিং, ‘‘হেরোদিয়াখো খিমনা নাং·নি খ্রাজাজক।’’ 5 হেরোদ যোহনখো স·ওতে গালনা হা·ম্মামিং, ইন্দিবা বিয়া মান্দিরাংনা খেন্নুয়ামিং মুয়ানা মান্দিরাং যোহনখো আগানসোগিবা ইন্নে মানিয়ামিং। 6 হেরোদনি আৎচিয়ানি সালো হেরোদিয়ানি দেমিচিক মান্দিরাংনি মিকখাংও মেসাএ হেরোদখো খুসি হং·এতজক। 7 উনি গিম্মিন হেরোদ মিকচেত্তে আগানজক বিয়া জেখো হাম·নুয়া উখোন বিনা হ·ন্নুয়া। 8 মিচিক বি·সা আন·থাংনি মা·গিবানি খু·ফাত্তিয়াখো মা·ন্নে আগানজক, ‘‘রাংথালও দাক্কে রিপ্পলেতগিবা যোহননি স্খুখো আংনা রা·বাএ হন·বো।’’ 9 উনি গিম্মিন হেরোদ রাজা দুক মান·জক, ইন্দিবা বিমুং চা·না আসংগিবারাংনি মিকখাংও মিকচেৎজক ইন্নে বিয়া উখো হ·ন্না গি·য়েৎজক। 10 বিয়া মান্দি ওয়াত্তেতে ফাতোকোন যোহননি স্খুখো দেন·থংএতজক। 11 জা·মানো রাংথালও দাক্কে স্খুখো মিচিক বি·সানা রা·বাএ হ·ন্নোন বিয়া উখো মা·গিবানা রা·আংজক। 12 উনি জা·মানো যোহননি জা·রিকগিবারাং রি·বাএ বিনি বে·এনখো রা·আংএ গপজক আরো উখো যীশুনা রি·য়াংএ আগানেজক। 13 যোহননি সিয়াখো খিন্নাএ যীশু সাকসান উয়োনি রিংও দাক্কে মান্দিগ্রি হা·দামচা রি·য়াংজক। উখো খিন্নাএ মান্দিরাং গিপ্পিন গিপ্পিন সংওনি রামা রি·এ বিখো জা·রিকনা হা·বাচেংজক। 14 রিংওনি হং·খাতে বিয়া মান্দি বাং·বিয়াখো নিকনা মান·জক আরো খা·সাচাক্কে বিসংনি গিসেপো সাগিবারাংখো নাম্মেতজক। 15 সাল নাপ্পাংও জা·রিকগিবারাং বিচা রি·বাএ আগানজক, ‘‘ইয়া হা·দামদে মান্দিগ্রি মা·সুগ্রি হং·আ, সালবা রি·য়াংজক। মান্দিরাংখো ওয়াত্তেতবো জেদাক্কে বিসং সংরাংচা রি·য়াংএ আন·থাংথাংনা চা·আনিখো ব্রিনা মা·ন্না।’’ 16 যীশু বিসংনা আগানজক, ‘‘বিসংনি রি·য়াংনা নাংজানুয়া, না·সংআন বিসংনা চা·না হন·বো।’’ 17 জা·রিকগিবারাং বিনা আগানজক, ‘‘চিংনি ইনো গিলবংআ রুটি আরো মাংগ্মি না·থকনি আগ্রে মামুংবা দংজা।’’ 18 বিয়া আগানজক, ‘‘উরাংখো আংচা রা·বাবো।’’ জা·মানো বিয়া মান্দিরাংখো সামচেং সাক্কাও আসংনা গি·য়েৎজক, আরো উয়া গি·বংআ রুটি আরো মাংগ্মি না·থকখো রা·এ সালগিচানা নিগোদোয়ে ইসলখো মিৎথেলজক। উনি জা·মানো রুটিখো ফি·এ জা·রিকগিবারাংনি জাক্কো হন·জক আরো জা·রিকগিবারাং উখো মান্দিরাংনা হন·জক। বিসং দিমদাকান অক্ষায়ে চা·জক। 20 চা·আনি জা·মানো গা·আকে দংগিবা ফি·থংথংআরাংখো জা·রিকগিবারাং খল্লামজক, আরো উনি গিম্মিন খক চি·গ্মি গাপজক। 21 চা·গিবারাংনি গিসেপো মিচিক আরো বি·সারাংনি আগ্রে মি·আসারাংআন হাজাল বংআ দংআমিং। 22 উনি জা·মানো যীশু বিনি জা·রিকগিবারাংখো রিংও গাখাতে বিনা স্খাং নালসাচা রি·য়াংসোখানা দাগিলজক, আরো ইচা বিয়া মান্দিরাংখো ওয়াত্তেতজক। 23 মান্দিরাংখো ওয়াত্তেতমা·ন্নে বি·না মিংএ বিয়া হা·ব্রিচানা গাদোআংজক। হান·থামওবা বিয়া উয়ো সাকসানান দংজক। 24 জা·রিকগিবারাংনি রিং রিক্কামওনি চে·ল্লাচানা রি·য়াংজক আরো বালওয়া ফাংফিলে বালফাকানি গিম্মিন সাগালনি চি নাম্মেন ফকফেকিংআমিং। 25 ওয়াল ব·ন্নাংমিত্তিংও সাগালনি সাক্কা গিত্তা রামা রি·এ যীশু জা·রিকগিবারাংচা রি·বাংআমিং। 26 জা·রিকগিবারাং সাকসাখো সাগালনি সাক্কাও রামা রি·য়াখো নিক্কে নাম্মেন জাজ্রেংএ আগানজক, ‘‘মি·মাং, মি·মাং,’’ আরো উনি জা·মানোন চ্রিকজক। 27 যীশু উনোন বিসংনা আগানজক, ‘‘ইয়াদে আংআসা; দা·আ খেন্নাবো, খা·দংবো।’’ 28 পিতর বিনা আগানজক, ‘‘গিত্তেল, না·আন হং·ওদে ইন্দাকোদে চিনি সাক্কা গিত্তা নাং·চা রি·য়াংনা আংখো গি·য়েৎবো।’’ 29 যীশু আগানজক, ‘‘রি·বাবো।’’ উনো পিতর রিংনি হং·খাতে চি সাক্কা গিত্তা রামা রি·এ যীশুচা রি·য়াংজক। 30 ইন্দিবা বালওয়ানি থারাকাখো নিক্কে বিয়া খেন্নে চিও রিপনা নাংজক আরো চ্রিকে আগানজক, ‘‘গিত্তেল, আংখো জক্কেৎবো।’’ 31 উনোন যীশু জাকখো সিল্লে বিখো রিম·জক আরো আগানজক, ‘‘বিবিরা·ব্রিগিজাগিবা, মুয়ানা খেনচাকজক?’’ 32 যীশু আরো পিতর রিংও গাখাতানি জা·মানো বালওয়া থিপ্পাংজক। রিংও জেরাং দংআমিং বিসং যীশুখো অলাখিয়ে আগানজক, ‘‘বিবিন না·আ ইসলনি দেফান্থি।’’ 34 জা·মানো বিসং সাগালখো বাতবায়ে গিনেষরৎ জওলো রি·বাএ হং·খাতজক। 35 উনি মান্দিরাং যীশুখো হা·আইনা মা·ন্নে জওল গিম্মিকচান আগানেজক। 36 উনি গিম্মিন মান্দিরাং জমগিবারাংখো যীশুচা রা·বাজক আরো বিখো মল·মলজক জেদাক্কে জমগিবারাং বিনি বা·রাখো দাংথাপেতনা মা·ন্না; আরো জেরাং উখো দাংথাপেতজক বিসং গিম্মিকান নামজক।

মথি 15

1 যিরূশালেমচানি মিত্তাম ফরীশীরাং আরো শাস্ত্র স্খিগিবারাং যীশুচা রি·বাএ আগানজক, 2 ‘‘নাং·নি জা·রিকগিবারাং মুয়ানা চেংওনি শাস্ত্র স্খিগিবারাংনি হন·গিবা দাকবেওয়ালখো মানিজাংআ? চা·না স্খাং বিসং জাকসুজাংআ।’’ 3 যীশু আগানচাকে ইনজক, ‘‘জে দাকবেওয়ালরাংখো মানিয়ে রি·বাংআ উনি গিম্মিন না·সংবা মুয়ানা ইসলনি গি·য়েতারাংখো জেগাল্লিংআ? 4 ইসল আগানজক, ‘মা·আ-ফাখো মান্দিরা·বো’ আরো ‘মা·আ-ফাখো মান্দিরা·গিজা দাক্কে খাৎথা আগানগিবাখো স·ওতে গালনা নাংনুয়া।’ 5 ইন্দিবা না·সং আগানে দংআ, সাবা আন·থাংনি মা·খো বা ফাখো ইন্দাকে আগানোদে, ‘আংনি জেচা দাকচাকোদে নাং·নি নামনুয়ামিং, উখো ইসলনা হন·খামজক,’ 6 ইন্দাকোদে মা·আ-ফাখো বিনি মান্দিরা·না নাংজানুয়া। না·সংনি ইয়া দাকবেওয়ালরাংনি গিম্মিন না·সং ইসলনি খাৎথাখো জেগালজক। 7 দাক্কামব্রুগিবারাং! না·সংনি গিম্মিন আগানসোগিবা যিশাইয় খাকখেৎখোন আগানামিং, 8 ইয়া মান্দিরাং খু·সুকচাসান আংখো মান্দিরা·আ, ইন্দিবা বিসংনি খা·থং আংওনি চে·ল্লাচানা দংআ। 9 বিসং বু·এন আংখো অলাখিয়া; বিসংনি হন·গিবা স্খিয়ানিরাংদে মান্দিনি থারিগিবা দাকবেওয়ালসান হং·আ। 10 জা·মানো যীশু মান্দিরাংখো রিংগামে আগানজক, ‘‘আংনি খাৎথাখো খিন্নাবো আরো হা·আইএ রা·বো। 11 খু·সুকনি নিং·আচা নাপগিবা মান্দিখো মারাং নাংএতজা, ইন্দিবা খু·সুক নিং·আচানি হং·খাতগিবান মান্দিখো মারাং নাংএতা।’’ 12 উনো বিনি জা·রিকগিবারাং বিচা রি·বাএ আগানজক, ‘‘ফরীশীরাং নাং·নি ইন্দাকা খাৎথাখো খিন্নাএ আন·থাংখো চন্নিকজক, ইখো না·আ হা·আইয়ামা?’’ 13 বিয়া আগানচাকে ইনজক, ‘‘জে ফাংখো সালগিনি আংনি আপফা গি·জামিং উয়া গিম্মিকখোন ফিক্কে গালনুয়া। বিসংনি খাৎথাখো ওয়াতবো। 14 বিসংনিন মিকগ্রিরাংনা রামা ফিন্নিকনা নাংনুয়া, ইন্দিবা বিসং আন·থাংআন মিকগ্রি। মিকগ্রি মিকগ্রিনা রামা ফিন্নিকোদে সাকগ্মিআন হা·খলো গা·আকনুয়া।’’ 15 উনো পিতর যীশুনা আগানজক, ‘‘নাং·নি থয়ে আগানাখো চিংনা ফি·এ আগানবো।’’ 16 যীশু আগানজক, ‘‘না·সং দা·আওবা হা·আইখুজামা? খু·সুকচা নাপগিবা বিকমাচা নাপ্পা আরো হং·খাতে রি·য়াংআ, ইখো না·সং হা·আইনা মান·জামা? 18 ইন্দিবা খু·সুক নিং·আচানি হং·খাতগিবা খা·থংওনি হং·খাতা, আরো উরাংআন মান্দিখো মারাং নাংএতা। 19 খা·থংওনিন নামগিজা চানচিয়ারাং, মান্দি স·ওতারাং, থি·ল্লেকারাং, চা·উয়ারাং, বু·এ সাক্ষি হ·ন্নারাং আরো খাল·স্থাপারাং হং·খাতা। 20 ইরাং গিম্মিকান মান্দিখো মারাং নাংএতগিবা, ইন্দিবা জাকসুগিজা চা·আ মান্দিখো মারাং নাংএতজা।’’ 21 জা·মানো যীশু উয়া হা·দামখো ওয়াত্তে সোর আরো সীদোন জওলচা রি·য়াংজক। 22 উয়া হা·দামনি কনানীয় মিচিক সাকসা রি·বাএ চ্রিকে আগান্না হা·বাচেংজক, ‘‘ও গিত্তেল, দায়ূদনি দেফান্থি, আংনা খা·সাচাকবো। গিসিক নামগিজাগিবা রি·ম্মানি গিম্মিন আংনি দেমিচিক নাম্মেন সা·দিকাখো মা·ন্নিংআ।’’ 23 ইন্দিবা যীশু মিংসা খাৎথাখোবা আগানজাজক। উনো বিনি জা·রিকগিবারাং রি·বাএ বিখো মল·মলে আগানজক, ‘‘বিখো ওয়াত্তেতবো, মুয়ানা বিয়া আনচিংনি জা·মান জা·মান চ্রিক্কিংআ।’’ 24 যীশু আগানচাকে ইনজক, ‘‘আংখো ইস্রায়েলনি মা·চংনি গিম্মাগিবা মেষরাংচাসান ওয়াত্তেতা।’’ 25 ইন্দিবা উয়া মিচিক যীশুচা রি·বাএ বিখো অলাখিয়ে আগানজক, ‘‘গিত্তেল, আংনা ইখো দাকচাকবো।’’ 26 যীশু আগানজক, ‘‘বি·সারাংনি চা·আখো রা·এ আচাকরাংনি মিকখাংও গাল্লা নামজা।’’ 27 বিয়া আগানজক, ‘‘খাকখেৎখোন আগানজক, গিত্তেল; ইন্দাকোবা নকগিবানি টেবিলনি গা·আকগিবা চা·আনি বিগিনচিরাংখো আচাকরাংআন চা·আ।’’ 28 উনো যীশু বিনা আগানজক, ‘‘নাং·নি বিবিরা·আ নাম্মেন বাং·আ। নাং·নি হা·সিকা গিত্তান নাং·না হং·খানা।’’ আরো উনোন বিনি মিচিক বি·সা নামজক। 29 জা·মানো যীশু উয়া হা·দামখো ওয়াত্তে গালীল সাগালনি রিক্কাম গিত্তা রি·য়াংজক আরো হা·ব্রি গি·সাও গাদোএ উনো আসংজক। 30 মান্দিরাং উনো জা·চক খোরা, মিকগ্রি, জাক খোরা, আব্রা আরো বাং·আখো রিমবিত্তে বিচা রি·বাজক। বিসং উয়া মান্দিরাংখো বিনি জা·চক সেফাংও দনজক আরো বিয়া বিসংখো নাম্মেতজক। 31 মান্দিরাং আব্রানি খু·সুক আগানাখো, জাক খোরানি নাম্মাখো, জা·আ খোরানি রামা রি·য়াখো আরো মিকগ্রিনি নিক্কাখো নিক্কে আইয়াও ইনমানজক আরো ইস্রায়েলনি ইসলখো রাসং চাএতজক। 32 উনি জা·মানো যীশু আন·থাংনি জা·রিকগিবারাংখো রিংগামে আগানজক, ‘‘ইয়া মান্দিরাংনা আংআ খা·সাচাকজক, মুয়ানা ইরাং আংমুং দা·আল সাল গিত্থাম দংজক, আরো বিসংচা চা·আনি মামুংবা দংজা। ইন্দাকাও আংআ বিসংখো ওয়াত্তেতনা হা·সিকজা; বিসং রামাও নম·বকে গা·আকনাবা দংআ।’’ 33 জা·রিকগিবারাং বিনা আগানজক, ‘‘ইয়া মান্দিগ্রি মা·সুগ্রি হা·দামও চিংআ বানিখো ইন্দিতা মান্দিনা চা·না গিত্তা রুটি মা·ন্নুয়া?’’ 34 যীশু বিসংনা আগানজক, ‘‘না·সংচা বাসিক গি·সা রুটি দংআ?’’ জা·রিকগিবারাং আগানজক, ‘‘গি·স্নি রুটি আরো মিত্তাম চনচনা না·থকরাং দংআ।’’ 35 মান্দিরাংখো হা·আও আসংনা গি·য়েতে যীশু উয়া গি·স্নি রুটি আরো না·থকরাংখো রা·জক। জা·মানো ইসলখো মিৎথেলে উরাংখো ফি·জক, আরো জা·রিকগিবারাং উখো মান্দিরাংনা হন·জক। 37 মান্দি গিম্মিকান অকখায়ে চা·জক, আরো জা·রিকগিবারাং গা·আকে দংগিবা ফি·থংআ রুটিরাংখো গি·স্নি খক্কো গাপ্পে খল্লামজক। 38 চা·গিবারাংনি গিসেপো মিচিক আরো চনচনগিবা বি·সারাংনি আগ্রে হাজাল ব্রি মি·আসা দংআমিং। 39 উনি জা·মানো যীশু মান্দিরাংখো ওয়াত্তেতে রিংও গাখাতে মগদন জওলোনা রি·য়াংজক।

মথি 16

1 জা·মানো মিত্তাম ফরীশী আরো সদ্দূকীরাং যীশুখো রুরাএ নিনা ইন্নে বিচা রি·বাজক আরো সালগিনি চিনখো ফিন্নিকখানা আগানজক। 2 যীশু বিসংনা আগানচাকে ইনজক, ‘‘হান·থামজোকনো না·সং আগানে দংআ, ‘সাল নামনুয়া মুয়ানা সিলগা গিৎচাকা।’ 3 আরো ফ্রিংওদে ইন্না, ‘দা·আল মিকখা বালওয়া রাকনুয়া মুয়ানা সিলগা গিৎচাকা আরো মিকখা সিম্মা।’ না·সং সিলগানি অবস্থাখো নিএ নাম্মেদাক্কেন হা·আইনা মা·ন্না, ইন্দিবা সালরাংনি চিনরাংখো হা·আইনা মান·জা। 4 ইয়া চাসংনি নামগিজা আরো থি·ল্লেকগিবা মান্দিরাং চিনখো সান্দিয়া, ইন্দিবা যোনানি চিননি আগ্রে বিসংনা মামুং চিনখোন ফিন্নিকজানুয়া।’’ উনি জা·মানো যীশু বিসংখো ওয়াত্তে রি·য়াংজক। 5 সাগালনি নালসাচা রি·য়াংমিত্তিংও জা·রিকগিবারাং রুটিখো রা·আংফানা গুয়ালজক। 6 যীশু বিসংনা আগানজক, ‘‘না·সং সিমসাকে দংবো, ফরীশী আরো সদ্দূকীরাংনি ওয়ানথিনা সিমসাকবো।’’ 7 উনি গিম্মিন জা·রিকগিবারাং আন·থাংথাং আগানগ্রিকজক, ‘‘আনচিং রুটি রা·বাজানি গিম্মিন বিয়া ইয়া খাৎথাখো আগানিংআ।’’ 8 ইখো হা·আইনা মা·ন্নে যীশু আগানজক, ‘‘বিবিরা·ব্রিগিজাগিবারাং, না·সংচা রুটি দংগিজাখো রা·এ না·সং মুয়ানা আন·থাংথাংও আগানগ্রিক্কিংআ? 9 না·সং দা·আওবা হা·আইখুজামা বা গিসিকবা রা·জামা, উয়া হাজাল বংআ মান্দিনা রুটি গিলবংআখো, আরো উনি জা·মানো গিৎচাগিবারাংখো না·সং বাসিক গি·সা খক্কো খল্লামে রা·আমিং? 10 হং·জাওবা উয়া হাজাল ব্র্রি মান্দিনা রুটি গি·স্নিখো, আরো গিৎচাগিবারাংখো বাসিক গি·সা খক্কো খল্লামে রা·আমিং? 11 আংআ না·সংনা রুটিনি গিম্মিন আগানজা ইখো না·সং মুয়ানা হা·আইনা মান·জা? ফরীশী আরো সদ্দূকীরাংনি ওয়ানথিনা না·সং সিমসাকে দংবো।’’ 12 বিয়া রুটিনি ওয়ানথিনা সিমসাকে দংনা আগানজা, ইন্দিবা ফরীশীরাংনি আরো সদ্দূকীরাংনি স্খিয়ানা সিমসাকে দংনা আগানজক ইন্নে জা·রিকগিবারাং উনো হা·আইনা মান·জক। 13 জা·মানো যীশু কৈসরিয়া-ফিলিপি জওলোনা রি·য়াংমিত্তিংও জা·রিকগিবারাংচা সিং·জক, ‘‘মান্দিনি দেফান্থি সা, ইনি গিম্মিন মান্দিরাং মুয়াখো ইন্নিংআ?’’ 14 বিসং আগানজক, “সাবা সাবা ইন্নিংআ না·আ রিপ্পলেতগিবা যোহন; সাকগিপ্পিনরাং এলিয়; দা·আবা সাকগিপ্পিনরাং যিরমিয় বা আগানসোগিবারাংওনি সাকসা ইন্নে ইন্নিংআ।” 15 উনো বিয়া বিসংনা আগানজক, “ইন্দিবা আংআ সা, না·সং মুয়াখো ইন্নিংআ?” 16 শিমোন-পিতর আগানজক, “না·আ উয়া খ্রীষ্ট, থাংগিবা ইসলনি দেফান্থি।” 17 যীশু আগানচাকে বিনা ইনজক, “যোনানি দেফান্থি শিমোন, না·আ ফাত্তিয়া মান·গিবা হং·আ, মুয়ানা নাং·চা ইখো মান্দি সাকসাবা ফারাকজা; সালগিও দংগিবা আংনি ফাআন ইখো ফারাকজক। 18 আংআ নাং·না আগানিংআ, না·আ পিতর, আরো ইয়া রং·থিনি সাক্কাওন আংআ আংনি মন্ডলীখো রিকনুয়া। নরকনি মামুং বিলআন উনি সাক্কাও হামজানুয়া। 19 আংআ নাং·না সালগিনি সংনকনি চাবিরাংখো হ·ন্নুয়া, আরো না·আ ইয়া হা·গিলসাকো জেখো খানুয়া সালগিওবা উখো খাএ দন্নুয়া আরো জেখো এংনুয়া উখো সালগিওবা এংএ হ·ন্নুয়া।” 20 উনি জা·মানো বিয়ান খ্রীষ্ট ইখো দারাংনাবা আগানজাখানা বিয়া আন·থাংনি জা·রিকগিবারাংখো বেং·জক। 21 উয়া সময়ওনি যীশু আন·থাংনি জা·রিকগিবারাংনা আগান্না হা·বাচেংজক, বিখো যিরূশালেমচা রি·য়াংনা নাংনুয়া আরো মি·আফারাংনি, খামাল দাল·গিবারাংনি আরো শাস্ত্র স্খিগিবারাংনি জাক্কো বাং·এন দুক চাকনা নাংনুয়া। জা·মানো বিখো স·ওতে গালনুয়া আরো সাল গিত্থামনি সালো সিয়াওনি চাখাতফিলনা নাংনুয়া। 22 উনো পিতর বিখো রিম্মাংএ মা·নেংএ আগানজক, “গিত্তেল, ইন্দাকে হং·জাখানা। নাং·নি সাক্কাও ইন্দাকে মামুং সালোবা হং·জাখানা।” 23 যীশু ফি·ল্লে পিতরনা আগানজক, “আংচানি খাতবো, শয়তান। না·আ আংনি রামাও চাংফেংগিবা। না·আ ইসলনি বিদিংখো চানচিজা ইন্দিবা মান্দিনি বিদিংখোসা চানচিয়া।” 24 উনি জা·মানো যীশু আন·থাংনি জা·রিকগিবারাংনা আগানজক, “সাবা আংনি রামাও রি·বানা হা·সিকোদে বিয়া আন·থাংনি হা·সিকা গিত্তা রি·জাখানা; আন·থাংনি চিসলখো রা·এ বিয়া আংনি জা·মান রি·বাখানা। 25 আন·থাংনি গিম্মিন জে জাংগি থাংএতনা হা·ম্মা বিয়া জাংগিথাংখো গিম্মায়েতনুয়া; ইন্দিবা আংনি হা·সেল জে জাংগিথাংখো হন·খামনুয়া বিয়া বিনি জাংগিথাংখো জক্কেৎনুয়া। 26 সাবা হা·গিলসাক গিম্মিকখো মা·ন্নেবা আন·থাংনি জাংগিখো গিম্মায়েতোদে বিনি মুয়া মান·দাপানি দংআ? জাংগিথাংখো মান·ফিলনা ইন্নে বিনি হ·ন্নানি গিত্তা মুয়া দংআ? 27 মান্দিনি দেফান্থি আন·থাংনি সা·গ্রেরাংমুং বিনি ফাআনি রাসংও রি·বাংজক। উনসালো বিয়া মান্দি গিম্মিকনান আন·থাংথাংনি কামনি বিথিখো হ·ন্নুয়া। 28 আংআ না·সংনা বিবিন আগানিংআ, মান্দিনি দেফান্থিনি রাজা হং·এ রি·বাখো নিকখুজানা দিপ্পাৎ ইনো দংগিবারাংওনি মিত্তামরাং সিখুজানুয়া।”

মথি 17

1 উনি সালদকনি জা·মানো যীশু পিতর, যাকোব আরো যাকোবনি জংগিবা যোহনখোসান রিমবিত্তে চুয়াকগিবা হা·ব্রি গি·সাওনা রি·য়াংজক। 2 বিসংনি মিকখাংও যীশুনি মিকখাং বিমাং দিংথাং হং·জক। বিনি মিকখাং সাল গিত্তা থেং·সুজক আরো 3 বিনি বা·রারাংবা সেং·আ গিত্তা বকজক। বিসং এলিয় আরো মোশিখো যীশুমুং খাৎথা আগানাখো নিকনা মান·জক। 4 উনো পিতর যীশুনা আগানজক, “গিত্তেল, ইনো চিংআ দংআ, ইয়ান নামজক। না·আ হা·ম্মোদে ইনো আংআ নকথুপ গি·গিত্থাম রিকনুয়া- নাং·না গি·সা, মোশিনা গি·সা আরো এলিয়না গি·সা।” 5 পিতরনি খাৎথা আগানমিত্তিংও চিং·গিবা গাদিলা খানসা রি·বাএ বিসংখো সালাখিমদাপজক। উয়া গাদিলাওনি ইয়া খু·রাংখো খিন্নানা মান·জক, ‘‘ইয়ান আংনি খা·সাগিবা দেফান্থি, জেও আংআ খুসি হং·বিয়া। না·সং বিনি খাৎথাখো খিন্নাচাকবো।’’ 6 ইখো খিন্নাএ জা·রিকগিবারাং নাম্মেন খেনচাকে হা·আও থুগপজক। 7 যীশু উনো রি·বাএ বিসংখো দাংথাপেতে আগানজক, “চাখাতবো, দা·আ খেন্নাবো।” 8 উনো বিসং সাক্কাচানা নিগদোয়ে যীশুনি আগ্রে দারাংখোবা নিকজাজক। 9 বিসং হা·ব্রিওনি হং·খাতমিত্তিংও যীশু বিসংনা ইন্দাকে গি·য়েৎজক, “না·সং জেখো নিকজক, উখো মান্দিনি দেফান্থি সিয়াওনি চাখাতখুজানা দিপ্পাৎ দারাংনাবা দা·আ আগানাবো।” 10 জা·রিকগিবারাং বিচা সিং·জক, “ইন্দাকোদে স্খাং এলিয়নি রি·বানা নাংআ ইন্নে শাস্ত্র স্খিগিবারাং মুয়ানা আগানিংআ?” 11 যীশু বিসংনা আগানচাকজক, “এলিয় বিবিন রি·বানুয়া আরো গিম্মিকখোন স্খাংনি অবস্থাও রা·বাফিলনুয়া। 12 ইন্দিবা আংআ না·সংনা আগানিংআ, এলিয় রি·বামিং আরো মান্দিরাং বিখো হা·আইনা মান·জাজক। মান্দিরাং হা·সিকা গিত্তা বিনি সাক্কাও নামগিজাখো দাকজক। মান্দিনি দেফান্থিখোবা ইন্দাকেন মান্দিরাংনি জাক্কো দুক চাকনা নাংনুয়া।” 13 উনোন জা·রিকগিবারাং হা·আইনা মান·জক, বিয়া বিসংচা রিপ্পলেতগিবা যোহনখো আগানিংআ। 14 যীশু আরো বিনি জা·রিকগিবারাং মান্দিরাংচা রি·বাফিলো মান্দি সাকসা রি·বাএ যীশুনি মিকখাংও জা·স্খু দে·ম্মে আসংএ আগানজক, 15 “না·আ আংনি দেফান্থিনা খা·সাচাকবো। বিয়া মির্‌কা হং·এ নাম্মেন দুক মা·ন্নিংজক। ফিল·নিফিল বিয়া ওয়া·আলো আরো চিও গা·আকা। 16 আংআ বিখো নাং·নি জা·রিকগিবারাংচা রা·বামিং ইন্দিবা বিসং নাম্মেতনা মান·জাজক।” 17 যীশু আগানচাকে ইনজক, “বিবিরা·গিজাগিবা আরো দেংগু মান্দিরাং! আংআ বাসিক না·সংমুং দংনুয়া? বাসিক না·সংখো চাকচিকনুয়া? মি·আসা বি·সাখো ইনো আংচানা রিমবাবো।” 18 যীশু উয়া গিসিক নামগিজাগিবাখো ইন্দাতানি জা·মানো উয়া মি·আসা বি·সাওনি হং·খাতে রি·য়াংজক, আরো উনোন মি·আসা বি·সাবা নামজক। 19 উনি জা·মানো জা·রিকগিবারাং সিউল দাক্কে যীশুচা রি·বাএ আগানজক, “চিংআ মুয়ানা উয়া গিসিক নামগিজাগিবাখো হা·রিকনা মান·জাজক?” 20 যীশু বিসংনা আগানজক, “না·সংনি বিবিরা·ব্রিজানি গান্দা না·সং মান·জাজক। আংআ না·সংনা বিবিন আগানিংআ, সুলসো বিৎচ্রি রংসা গিত্তা না·সংনি বিবিরা·আ দংওদে ইন্দাকোদে না·সং ইয়া হা·ব্রিখো আগানবো, ‘ইনোনি হাইওয়াচা রি·য়াংবো,’ আরো উনোন উয়া রি·য়াংনুয়া। না·সংনি মান·গিজা মামুংবা দংজানুয়া। 21 বি·আনি আরো অকগুমুন দংআনি আগ্রে ইন্দাকা গিসিক নামগিজাগিবা মামুং দাক্কেবা হং·খাতজা। 22 জা·মানো গালীল হা·সং গিত্তা রি·য়াংমিত্তিংও যীশু আন·থাংনি জা·রিকগিবারাংনা আগানজক, “মান্দিনি দেফান্থিখো মান্দিরাংনি জাক্কো রি·ম্মে হ·ন্নুয়া। 23 মান্দিরাং বিখো স·ওতে গালনুয়া, আরো সাল গিত্থামনি সালো বিয়া সিয়াওনি থাংচাফিলনুয়া।” উনি গিম্মিন জা·রিকগিবারাং নাম্মেন দুক মান·থকজক। 24 জা·মানো যীশু আরো বিনি জা·রিকগিবারাং কফরনাহূমওনা রি·য়াংমান্নো থরম নকনি খাজিনা গিলগিবারাং পিতরচা রি·বাএ আগানজক, “না·সংনি স্খিগিবা থরম নকনি খাজিনাখো হন·জামা?” 25 পিতর আগানজক, “হো·এ, হ·ন্না।” উনি জা·মানো পিতর নক্কোনা রি·বাএ মামুংখো আগান্না স্খাংআন যীশু বিনা আগানজক, “শিমোন, না·আ বাদিকে চানচিয়া? ইয়া হা·গিলসাকনি রাজারাং সাচানিখো খাজিনা রা·আংআ? হা·সংথাংনি মান্দিরাংচানিখোমা, গিপ্পিন সংনি মান্দিরাংচানিখো?” 26 পিতর আগানজক, “সংগিপ্পিননি মান্দিরাংচানিখো।” উনো যীশু বিনা আগানজক, “ইন্দাকোদে সংথাংনি মান্দিরাং উয়োনি জকজক। 27 ইন্দিবা আনচিং খাজিনা গিলগিবারাংখো চন্নিকেতজানা গিত্তা, না·আ সাগালও রি·য়াংএ বড়শী গোবো, আরো স্খাং গাদুগিবা না·থকনি খু·সুকখো এংএ উনি নিং·আও রূপানি থাংখা গং·সাখো মা·ন্নুয়া। উখো রা·আংএ নাং·নি আরো আংনি খাজিনাখো হন·বো।”

মথি 18

1 উয়া সময়ও জা·রিকগিবারাং যীশুচা রি·বাএ আগানজক, “সালগিনি সংনকো গিম্মিকনা বাত্তে সা দাল·বাত্তা?” 2 উনো যীশু সাকসা বি·সাখো রিংগামে বিসংনি গিসেপো চাদেংএতে আগানজক, 3 “আংআ না·সংনা বিবিন আগানিংআ, না·সং গিসিক ফি·ল্লে বি·সা চনগিবারাং গিত্তা হং·জাওদে মামুং দাক্কেবা সালগিনি সংনকো নাপনা মান·জানুয়া। 4 জে মান্দি ইয়া বি·সা চনগিবারাং গিত্তা আন·থাংখো রিন্নকেতা বিয়ান সালগিনি সংনকো গিম্মিকনা দাল·বাত্তা। 5 আরো জে মান্দি ইন্দাকগিবা বি·সা চনগিবা সাকসাখো আংনি বিমুংও রা·চাকা বিয়া আংখোন রা·চাকা। 6 “আংখো বিবিরা·গিবা ইয়া চনগিবা বি·সারাংওনি সাকসাখো সাবা পাপনি রামাওনা রিম্মাংওদে উনোদে বিনি গিদ্দকো গি·সা দা·ল্লা রং·থিখো খাদিংদিয়ে বিখো সাগালনি চিও রিপ্পেতান বিনা নামবাত্তা। 7 আইয়াও হা·গিলসাক! পাপনি রামাও রিম্মাংনা বাসিক চলরাংআন নাং·চা দংআ! উয়া চলরাংদে রি·বানোন; ইন্দাকোবা হং·সিখানা উয়া মান্দিনা, জেচা উয়া চলরাং রি·বাআ! 8 “নাং·নি জাক হং·জাওবা জা·চক নাং·খো পাপনি রামাওনা সাল্লাংওদে উখো দেন·থংএ গাল্লেতবো। জাক সামগ্মি আরো জা·চক সামগ্মিখো রা·এ ফাংনাজলনি ওয়া·আলো গা·আকানা বাত্তে জাকখরা বা জা·খরা হং·এ জাংগিও নাপ্পান নাং·না নামবাত্তা। 9 নাং·নি মিক্রোন নাং·খো পাপনি রামাওনা সাল্লাংওদে উখো ওত্তে গাল্লেতবো। মিক্রোন সামগ্মিখো রা·এ নরকনি ওয়া·আলো গা·আকনা বাত্তে মিকগ্রি হং·এ জাংগিও নাপ্পান নাং·না নামবাত্তা। 10 “নিবো, ইয়া চনগিবারাংওনি সাকসাখোবা না·সং জেদাক্কে চন্নিকজা। আংআ না·সংনা আগানিংআ, সালগিও বিসংনি সা·গ্রেরাং ফাংনান সালগিও দংগিবা আংনি ফানি মিকখাংখো নিক্কিংআ। 11 “ব্রাংগিবাখো জক্কেৎনা মান্দিনি দেফান্থি রি·বাআ। না·সং বাদিকে চানচিয়া? 12 সাকসা মান্দিনি মাংরিৎচাসা মেষ দংআনা। উরাংনি গিসেপো মাংসা ব্রাংএ গিপ্পিন রামাচা রি·য়াংওদে বিয়া মাংসতস্খু স্খুখো হা·ব্রি রিক্কামো দন্নে উয়া গিম্মাগিবা মেষখো সান্দিনা রি·য়াংজামা? 13 আংআ না·সংনা বিবিন আগানিংআ, বিয়া উখো সান্দি মা·ন্নোদে উয়া ব্রাংগিজাগিবা মাংসতস্খু স্খুনা বাত্তে উয়া গিম্মাগিবানান বিয়া খুসি হং·বাত্তা। 14 উয়ানদাক্কেন, ইয়া চনগিবারাংওনি সাকসা গিম্মাখানা ইন্দাকে না·সংনি সালগিও দংগিবা ফানি হা·সিকা হং·জা। 15 “নাং·নি জংআদা নাং·নি সাক্কাও পাপখো দাক্কোদে, জে সময়ও বিনি সেফাংও দারাংবা দংজানুয়া উনো বিচা রি·য়াংএ বিনি পাপখো ফিন্নিকেতবো। বিয়া নাং·নি খাৎথাখো খিন্নাওদে না·আ নাং·নি জংআদাখো মানফিল·জক। 16 ইন্দিবা বিয়া খিন্নাচাকজাওদে সাকগিপ্পিনখো নাং·মুং রা·আংবো, জেদাক্কে সাকগ্মি বা সাকগিত্থাম সাক্ষিরাংনি খাৎথাচা ইয়া গিম্মিকান বিবি হং·আ ইন্নে ফিন্নিকনা মা·ন্না। 17 বিসংনি খাৎথাখো খিন্নাচাকজাওদে মন্ডলিনা আগানবো। মন্ডলিনি খাৎথাখোবা খিন্নাজাওদে উনোদে নাং·চা বিয়া গিপ্পিন জাত বা খাজিনা গিলগিবা গিত্তা হং·খানা। 18 “আংআ না·সংনা বিবিন আগানিংআ, না·সং হা·গিলসাকো জেখো খানুয়া সালগিওবা উখো খানুয়া, আরো জেখো এংনুয়া উখো সালগিওবা এংএ হ·ন্নুয়া। 19 “আংআ না·সংনা আরোবা আগানিংআ, না·সংনি গিসেপো সাকগ্মি মান্দি মামুংনা আপসান হং·গ্রিকে বি·ওদে সালগিও দংগিবা আংনি আপফা না·সংনি গিম্মিন উখো দাকচাকনুয়া, 20 মুয়ানা জেও সাকগ্মি বা সাকগিত্থাম আংনি বিমুংও থ·ম্মা উয়োন আংআ বিসংনি গিসেপো দংআ।” 21 উনোন পিতর রি·বাএ যীশুনা আগানজক, “গিত্তেল, আংনি জংআদা আংনি সাক্কাও পাপ দাক্কোদে আংআ বিখো বাসিক রাং·সা ক্ষেমা দাকনুয়া? চাংস্নিনা দিপ্পাৎমা?” 22 যীশু বিনা আগানজক, “চাংস্নিনাসান হং·জা, ইন্দিবা স্নি চাংসৎস্নিনা দিপ্পাৎ ক্ষেমা দাকনা আগানা। 23 “নিবো, সালগিনি সংনক ইন্দাকগিবা রাজা গিত্তা হং·আ জে আন·থাংনি নকখলরাংচা হিসাব হাম·জক। 24 বিয়া হিসাব রা·না হা·বাচেংও নকখলরাংনি গিসেপো ইন্দাকগিবা সাকসা নকখলখো রা·বাজক, জে নকখলনি রাজানা বাং·এ জিন্নাং চতনা দংআমিং। 25 জিন্নাং চত্‌না বিনি বিল দংজামিং। উনোন উয়া নকগিবা উয়া মান্দিখো আরো বিনি জিকগিবা আরো দেদ্রাংখো আরো বিচা দংগিবা গিম্মিকখো ফাল্লে জিন্নাংখো চত্‌না গি·য়েৎজক। 26 উনি গিম্মিন উয়া নকখল হা·আও গা·আকে নকগিবানি জা·চকখো রি·ম্মে আগানজক, ‘ও গিত্তেল, আংনা চাকচিকখুবো, নাং·না গিম্মিকখোন আংআ চতনুয়া।’ 27 উনো নকগিবা খা·সাচাক্কে উয়া নকখলখো ওয়াত্তেতজক আরো বিনি জিন্নাংখো ক্ষেমা দাকজক। 28 “জা·মানো উয়া নকখল হা·ফালচা রি·য়াংএ বিমুং রিম·ফাগিবা সাকসা নকখলখো নিকনা মান·জক। বিচা উয়া নকখল রিপ্পেংনি রিৎচাসা থাংখা জিন্নাং দংআমিং। উয়া নকখল বিনি রিপ্পেংনি গিত্তকখো রিম·সত্তে আগানজক, ‘নাং·নি জিন্নাংখো চতবো।’ 29 “নকখল উনো বিনি জা·চকো গা·আকে বিখো মল·মলে আগানজক, ‘আংনা চাকচিকখুবো, আংআ গিম্মিকখো চতনুয়া।’ 30 ইন্দিবা বিয়া গং·জাজক বাত্তেসা জিন্নাং চতখুজানা দিপ্পাৎ বিখো ফাতোকো দনজক। 31 “ইন্দাকারাংখো নিক্কে বিমুং রিম·ফাগিবা গিপ্পিন নকখলরাং নাম্মেন গিসিক সা·দিকজক। বিসং রি·য়াংএ বিসংনি নকগিবানা গিম্মিক খাৎথাখো হা·আইএতজক। 32 নকগিবা উনোন উয়া নকখলখো রিংগামে আগানজক, ‘নামগিজাগিবা নকখল! না·আ আংখো মল·মলে আগানানা আংআ নাং·নি জিন্নাং গিম্মিকখো ক্ষেমা দাকজকমিং। 33 জেদাক্কে আংআ নাং·না খা·সাচাক্কামিং উয়ানদাক্কেন না·আবা বিনা খা·সাচাকনা নাংজামিংমা?’ 34 জা·মানো নকগিবা খা·আওনাংএ বিনি জিন্নাং গিম্মিকখো চতখুজানা দিপ্পাৎ বিখো শাস্তি হ·ন্না ফাতকনি মান্দিরাংনি জাক্কো হন·জক। 35 “উয়ানদাক্কেন, না·সং গিম্মিকান না·সংনি জংআদাখো খা·থংও ক্ষেমা দাকজাওদে সালগিও দংগিবা আংনি ফাবা না·সংনি সাক্কাও ইন্দাকে দাকনুয়া।”

মথি 19

1 ইয়া খাৎথারাংখো আগানা বন·চত্তে যীশু গালীল হা·দকখো ওয়াত্তে যর্দন চিবিমানি নালসাচা যিহূদিয়া হা·দকচা রি·য়াংজক। 2 বাং·আ মান্দি বিখো জা·রিকফাজক আরো উয়োন বিয়া বিসংখো জম্মা-সানিখো নাম্মেতজক। 3 উনো মিত্তাম ফরীশীরাং যীশুখো রুরাএ নিনা ইন্নে বিচা রি·বাএ আগানজক, “মোশিনি নিয়াম গিত্তা মামুং হা·সেলনি গিম্মিন জিকথাংখো গাল্লা খ্রাআমা?” 4 যীশু আগানচাকে ইনজক, “না·সং পড়িখুজামা, চেংওন দাকগিবা বিসংখো মি·আ আরো মিচিক দাক্কে দাক্কামিং আরো আগানামিং, 5 ‘ইনি গিম্মিন মান্দি মা·খো-ফাখো ওয়াত্তে জিকথাংমুং আপসান হং·এ দংনুয়া আরো বিসং সাকগ্মি বে·এনসান হং·নুয়া’? 6 ইনি গিম্মিন বিসং সাকগ্মি হং·জা, ইন্দিবা বে·এনসান। উনি গিম্মিন ইসল জেখো নাংরিম্মেতজক মান্দি উখো দিংথাং দাক্কেতজাখানা।” 7 উনোন ফরীশীরাং বিনা আগানজক, “ইন্দাকোদে মোশি মুয়ানা গাল্লানি লেকখাখো হ·ন্নে জিকখো ওয়াতখানা গি·য়েৎজক?” 8 যীশু বিসংনা আগানজক, “না·সংনি খা·থং রাক্কানি গিম্মিন মোশি না·সংখো জিকথাংখো গালনা হন·জক। ইন্দিবা চেংওনিন ইন্দাকে হং·জামিং। 9 আংআ না·সংনা আগানিংআ, থি·ল্লেকানি আগ্রে জিকথাংখো গাল্লে গিপ্পিনখো খিমগিবাদে থি·ল্লেকা।” 10 উনো বিনি জা·রিকগিবারাং বিনা আগানজক, “সে-জিকনি গিসেপো ইন্দাকে হং·ওদে, ইন্দাকোদে খিমজাওন নাম্মা।” 11 যীশু বিসংনা আগানজক, “ইখো দিমদাকান মানিয়ে রা·না মান·জা; জেরাংনা উয়া বিলখো হ·ন্না বিসংসান উখো মানিয়ে রা·না মা·ন্না। 12 সাবা খাসী হং·এ আৎচিয়া, উনি গিম্মিন বিসং খিমজা। আরো মিত্তামখোদে মান্দিরাংআন খাসী দাক্কেতা, উনি গিম্মিন বিসং খিমজা। দা·আবা সাবা দংআ জেরাং সালগিনি সংনকনা সে-জিক খিমজানুয়া ইন্নে চানচিয়ে দন্না। ইয়া খাৎথাখো মানিয়ে রা·না মান·গিবা মানিয়ে রা·খানা।” 13 জা·মানো মান্দিরাং বি·সা চনগিবারাংখো যীশুচানা রিমবাজক জেদাক্কে বিয়া বিসংনি স্খু সাক্কাও জাক দনদাপে বি·আ। ইন্দিবা জা·রিকগিবারাং বিসংখো খা·চাজক। 14 উনো যীশু আগানজক, “বি·সারাংখো আংচা রি·বানা হন·বো, দা·আ বেং·আবো; মুয়ানা সালগিনি সংনক ইন্দাকগিবা মান্দিরাংনিন হং·আ।” 15 বি·সারাংনি স্খু সাক্কাও জাক দনদাপে বি·আনি জা·মানো যীশু উয়োনি রি·য়াংজক। 16 জা·মানো ফান্থি সাকসা যীশুচা রি·বাএ আগানজক, “স্খিগিবা, ফাংনাজলনি জাংগিখো মা·ন্না আংনি মুয়া নাম্মাখো দাকনা নাংনুয়া?” 17 বিয়া বিনা আগানজক, “নাম্মানি গিম্মিন মুয়ানা আংচা সিং·ইংআ? নামগিবা সাকসাসান দংআ। না·আ ফাংনাজলনি জাংগিখো মা·ন্না হা·ম্মোদে বিনি দিমদাক গি·য়েতাখো মানিবো।” 18 উয়া ফান্থি আগানজক, “বাগিবা গি·য়েতারাংখো?” যীশু আগানজক, “দা·আ স·ওতাবো, দা·আ থি·ল্লেকাবো, দা·আ চা·উয়াবো, দা·আ বু·এ সাক্ষি হ·ন্নাবো, 19 মা·খো-ফাখো মান্দিরা·বো আরো নাং·নি নকসুলখো আন·থাং গিত্তা খা·সাবো।” 20 উয়া ফান্থি যীশুনা আগানজক, “আংআ ইয়া দিমদাকখোন মানিয়ে রি·বাংজক, ইন্দাকোদে আংনি আরোবা মুয়াখো দাকনা নাংনুয়া?” 21 যীশু বিনা আগানজক, “খাকখেৎগিবা হং·না হা·সিকোদে রি·য়াংএ নাং·চা দংগিবা দিমদাকখো ফাল্লে দিল্লা-চন্নারাংনা হন·বো। উনি গিম্মিন না·আ সালগিও গাম মা·ন্নুয়া। জা·মানো রি·বাএ আংখো জা·রিকবো।” 22 ইয়া খাৎথাখো খিন্নাএ উয়া ফান্থি নাম্মেন গিসিকো সা·দিকে রি·য়াংজক, মুয়ানা বিনি গামজিন বাং·বিয়ামিং। 23 উনো যীশু আন·থাংনি জা·রিকগিবারাংনা আগানজক, “আংআ না·সংনা বিবিন আগানিংআ, মা·ন্নে চা·গিবা মান্দিনা সালগিনি সংনকো নাপ্পা নেং·আনি হং·নুয়া। 24 আংআ দা·আবা না·সংনা আগানিংআ, মা·ন্নে চা·গিবানি ইসলনি সংনকো নাপ্পানা বাত্তে সিল্লেংসিনি হা·খল গিত্তা উটনি নাপ্পান আলথুবাত্তা।” 25 ইয়া খাৎথাখো খিন্নাএ জা·রিকগিবারাং আইয়াও ইনমানে আগানজক, “ইন্দাকোদে সা পাপওনি জকনা মা·ন্না?” 26 যীশু জা·রিকগিবারাংচা নিএ আগানজক, “মান্দিরাংনা ইয়াদে হামগিজানি হং·আন, ইন্দিবা ইসলনাদে দিমদাকান হাম্মানি হং·আ।” 27 উনো পিতর বিনা আগানজক, “নিবো, চিংআ দিমদাকখো ওয়াত্তে নাং·নি জা·রিকগিবা হং·জক; চিংআ মুয়াখো মা·ন্নুয়া?” 28 যীশু বিসংনা আগানজক, “আংআ না·সংনা বিবিন আগানিংআ, না·সং জেরাং আংখো জা·রিকজক, গিত্তাল দাক্কে থারিয়ানি সময়ও মান্দিনি দেফান্থি রাসংথাংখো রা·এ জেনসালো সিংহাসনও আসংনুয়া উনসালো না·সংবা সিংহাসন চি·গ্মিও আসংনুয়া আরো ইস্রায়েলনি মা·চং চি·গ্মিখো বিচাল দাকনুয়া। 29 আরোবা আংনি গিম্মিন নকখো, জংআদা-নআবিখো, মা·খো-ফাখো, দেদ্রাংখো বা হা·বারাংখো জে ওয়াতস্রাংজক, বিয়া উনি রিৎচাসা বাং·বাত্তে মান·ফিলনুয়া আরো ফাংনাজলনি জাংগিখোবা মা·ন্নুয়া। 30 স্খাংগিবারাংনি গিসেপো বাং·এন জা·মান চাকনুয়া, আরো জা·মানগিবারাং স্খাংগিবা হং·নুয়া।

মথি 20

1 “সালগিনি সংনক সাকসা নকগিবা গিত্তা হং·আ। সালসাও ফ্রিংও বিয়া গামগিবারাংখো বাগানও কাম রি·ম্মেতনা হা·ফালচা রি·য়াংজক। 2 বিয়া গামগিবারাংনা সালসানা দীনার গং·সা দাক্কে হ·ন্না খু·রাচাকজক। উনি জা·মানো বিয়া আন·থাংনি আংগুর বাগানচা বিসংখো ওয়াত্তেতজক। 3 স্খু বাজিনা হা·ম্মিত্তিংও দা·আবা বিয়া হা·ফালচা রি·য়াংজক আরো বাজালও সাকগিপ্পিনরাংখো কামগ্রি চাদেংএ দংআখো নিকনা মান·জক। 4 বিয়া বিসংনা আগানজক, ‘না·সংবা আংনি আংগুর বাগানচা কাম রিম·না রি·য়াংবো। আংআ না·সংনা কামনি খ্রি থাংখাখো হ·ন্নুয়া।’ 5 উনোন উয়া মান্দিরাংবা কাম রিম·না রি·য়াংজক। “উয়া নকগিবা দা·আবা চি·গ্মি বাজিনা হা·ম্মিত্তিংও আরো গিত্থাম বাজিও হা·ফালচা রি·য়াংএ উয়ানদাক্কেন দাকফিলজক। 6 বংআ বাজিনা হা·ম্মিত্তিংও হা·ফালচা রি·য়াংএ সাকগিপ্পিনরাংনি চাদেংএ দংআখো নিক্কে বিয়া বিসংনা আগানজক, ‘না·সং কাম রিম·গিজা মুয়ানা ইনো চাদেংএ দংআ?’ 7 “বিসং বিনা আগানজক, ‘দারাংবা চিংনা কাম হন·জা।’ “বিয়া উয়া মান্দিরাংনা আগানজক, ‘না·সংবা আংনি আংগুর বাগানচা কাম রিম·না রি·য়াংবো।’ 8 “হান·থামানি জা·মানো আংগুর বাগাননি নকগিবা আন·থাংনি নকখলখো রিংগামে আগানজক, ‘গামগিবারাংখো রিংগামে জা·মানগিবাওনি স্খাংগিবাওনা দিপ্পাৎ দিমদাকনা মা·ন্নানিখো হন·বো।’ 9 “বংআ বাজিও জে গামগিবারাংখো কাম রি·ম্মেতামিং বিসং রি·বাএ দিমদাকান দীনার গং·সা দাক্কে রা·আংজক। 10 উনি গিম্মিন স্খাং কাম রিম·গিবারাং বাং·এ মা·ন্নুয়া ইন্নে চানচিজক, ইন্দিবা বিসং দিমদাকান দীনার গং·সা দাক্কে মান·থকজক। 11 উনোন বিসং উয়া নকগিবাখো খা·আওনাংএ আগান্না হা·বাচেংজক, 12 ‘চিংআ সালগিম্মিক সাল খামফ্রাকে কাম রিম·জক। ইন্দিবা জা·মানচা কাম রিম·না রি·বাগিবারাংদে ঘণ্টাসাসান কাম রি·ম্মা, না·আ বিসংনা চিংনি আপসান মা·ন্নানিখো হন·জক।’ 13 “উনো নকগিবা বিসংনি গিসেপো সাকসানা আগানজক, ‘ও রিপ্পেং, আংআ নাং·না অন্যায়খো দাকজা। না·আ দীনার গং·সানা কাম রিম·না গং·জামিংমা? 14 নাং·নি মা·ন্নানিখো রা·এ রি·য়াংবো। নাং·না হ·ন্না গিত্তা ইয়া জা·মানগিবানাবা আংআ হ·ন্না হা·সিকা। 15 আন·থাংনিখো আন·থাংনি হা·সিকা গিত্তা জাকখালানি বিল আংনি দংজামা? বা, আংনি খা·সাচাক্কানি গিম্মিন না·আ মিকনেংআমা?” 16 গল্পনি বন·চতাচাবাকা যীশু আগানজক, “ইন্দাকেন জা·মানগিবারাং স্খাং হং·নুয়া, আরো স্খাংগিবারাং জা·মানচাকনুয়া।” 17 জা·মানো যীশু যিরূশালেমচা রি·য়াংমিত্তিংও আন·থাংনি সাকচিগ্মি জা·রিকগিবারাংখো রিংগামে আগানজক, 18 “নিবো, আনচিংদে যিরূশালেমচা রি·য়াংআ। উয়োনা মান্দিনি দেফান্থিখো খামাল দাল·গিবা আরো শাস্ত্র স্খিগিবারাংনি জাক্কো রি·ম্মে হ·ন্নুয়া। 19 বিসং বিখো স·ওতনা বিচাল দাক্কে হ·ন্নুয়া। বিসং বিখো খাল·স্থাপনা আরো চাবুকচা দকনা আরো চিসলো দাৎখাপনা গিপ্পিন জাতরাংনি জাক্কো হ·ন্নুয়া; জা·মানো সালগিত্থামনি সালো বিয়া সিয়াওনি থাংচানুয়া।” 20 জা·মানো সিবদিয়নি সাকগ্মি দেফান্থিখো রা·এ বিসংনি মা·গিবা যীশুচা রি·বাজক আরো বিচা মামুংখো বি·না মিকসংএ বিখো অলাখিজক। 21 যীশু বিনা আগানজক, “না·আ মুয়াখো হা·ম্মিংআ?” বিয়া আগানজক, “নাং·নি সংনকো আংনি ইয়া সাকগ্মি দেফান্থিনি সাকসাখো নাং·নি জাক্রাচা আরো সাকসাখো নাং·নি জাক্কাসিচা আসংনা গি·য়েৎবো।” 22 যীশু আগানচাকজক, “না·সং মুয়াখো হা·ম্মিংআ উখো হা·আইজা। জে দুকনি রিংচাক্রাও আংআ রিংআ উয়ো না·সং রিংনা মা·ন্নামা?” বিসং বিনা আগানজক, “মা·ন্না।” 23 উনো যীশু বিসংনা আগানজক, “বিবিন না·সং আংনি রিংচাক্রাও রিংনা মা·ন্না, ইন্দিবা আংনি জাক্রাচা বা জাক্কাসিচা আসংনা হ·ন্না বিল আংনি দংজা। আপফা জেরাংনা উখো থারিসোয়া বিসংসান উখো মা·ন্নুয়া।” 24 ইখো খিন্নাএ সাকচিখুং জা·রিকগিবারাং উয়া সাকগ্মি আদাসাখো খা·আওনাংজক। 25 উনো যীশু জা·রিকগিবারাংখো রিংগামে আগানজক, “গিপ্পিন জাতরাংও শাসন দাকগিবারাং বিসংনি গিত্তেল হং·আ আরো দাল·গিবারাং বিসংনি সাক্কাও বিলখো জাকখালা, না·সং ইখো হা·আইয়া। 26 ইন্দিবা না·সংও ইন্দাকে হং·না খ্রাজা। না·সংও সাবা দাল·না হা·সিকোদে বিনি না·সংনা দাকচাকে হ·ন্না নাংনুয়া, 27 আরো সাবা স্খাংগিবা হং·না হা·সিকোদে বিখো না·সংনি নকখল হং·না নাংনুয়া। 28 গিসিক রা·বো, মান্দিনি দেফান্থি দাকচাকে হ·ন্নাখো মা·ন্না রি·বাজা ইন্দিবা দাকচাকে হ·ন্নাসা রি·বাআ আরো বাং·বিয়া মান্দিরাংখো পাপওনিখো জক্কেৎনা ইন্নে বিসংনি জাংগিনি ফাল আন·থাংনি জাংগিখো হন·চাকনা রি·বাজক, ইখো গিসিক রা·বো।” 29 যীশু আরো বিনি জা·রিকগিবারাং যিরীহো সংজিলমাখো ওয়াত্তে রি·য়াংমিত্তিংও মান্দি বাং·এ যীশুখো জা·রিকফাজক। 30 রামা হা·সামো মিকগ্রি সাকগ্মি আসংএ দংআমিং। উয়া রামা গিত্তা যীশুনি রি·য়াংআখো খিন্নাএ বিসং চ্রিকে আগানজক, “গিত্তেল, দায়ূদনি দেফান্থি, চিংনা খা·সাচাকবো।” 31 বিসংখো জ্রিপ দংখানা মান্দিরাং বিসংখো ইন্দাতজক। ইন্দিবা বিসং বাত্তেসা চ্রিকে আগানজক, “গিত্তেল, দায়ূদনি দেফান্থি, চিংনা খা·সাচাকবো।” 32 উনোন যীশু চাদেংজক আরো বিসংখো রিংগামে আগানজক, “না·সং মুয়াখো হা·ম্মিংআ? আংআ না·সংনা মুয়াখো দাকনুয়া?” 33 বিসং বিনা আগানজক, “গিত্তেল, চিংনা নিক্কানি বিলখো হন·বো।” 34 উনো যীশু খা·সাচাক্কে বিসংনি মিক্রোনখো দাংথাপেতজক, আরো উনোন বিসং নিকনা মান·জক আরো বিখো জা·রিকফাজক।

মথি 21

1 যীশু আরো বিনি জা·রিকগিবারাং যিরূশালেমনি সেফাংচানা সক্কাংএ জৈতুন হা·ব্রিনি সাক্কাও বৈৎফগী সংনি কেচ্চিচা রি·বাজক। উনোন যীশু সাকগ্মি জা·রিকগিবাখো ইন্দাকে আগানে ওয়াত্তেতজক, 2 “না·সং উয়া মিকখাংনি সংচানা রি·য়াংবো। উয়োনা রি·য়াংজকোন গাধা মাংসা খায় দন্নাখো নিকনা মা·ন্নুয়া আরো উমুং মাংসা বি·সাখোবা নিকনুয়া। উয়া মাংগ্মিখো এংএ আংচানা রা·বাবো। 3 সাবা মামুংখো ইন্নোদে আগানবো, ‘গিত্তেলনা নাংআ।’ উনোন বিয়া উরাংখো ওয়াত্তেতনুয়া।” 4 ইরাং হং·জক জেদাক্কে আগানসোগিবানি আগানসোগিবা ইয়া খাৎথা চু·সকা: 5 “না·সং সিয়োন দেমিচিকনা আগানবো, নাং·নি রাজা নাং·চা রি·বাংজক। বিয়া সনথল। বিয়া গাধানি সাক্কাও, গাধীনি বি·সানি সাক্কাও গাখাতে রি·বাংজক।” 6 উয়া জা·রিকগিবারাং রি·য়াংএ যীশুনি গি·য়েতা গিত্তান দাকজক। 7 বিসং উয়া গাধা আরো গাধীনি বি·সাখো রা·বাএ উরাংনি সাক্কাও আন·থাংথাংনি বা·রাখো আনদাপানি জা·মানো যীশু আসংজক। 8 বাং·বিয়া মান্দি রামা সাক্কাও আন·থাংথাংনি বে·এননি বা·রারাংখো আনদাপে হন·জক। সাকগিপ্পিনরাং বল বিফাংনি ডালারাংখো দে·ন্নে রামা সাক্কাও আনদাপজক। 9 যীশুনি মিকখাংও আরো জা·মানও রি·ফাগিবারাং চ্রিকে আগান্না হা·বাচেংজক, “হোশান্না, দায়ূদনি দেফান্থি! গিত্তেলনি বিমুংও রি·বাগিবানি রাসং হং·খানা। সালগিওবা হোশান্না!” 10 যীশু যিরূশালেমো নাপমানো সংজিলমা গিম্মিক জেকজাকফিলজক। গিম্মিকান সিং·না হা·বাচেংজক, “ইয়া সা?” 11 মান্দিরাং আগানজক, “বিয়া গালীলনি নাসরত সংনি আগানসোগিবা যীশু।” 12 জা·মানো যীশু থরম নক্কো নাপজক আরো উয়ো দিমদাক ব্রিগিবা আরো ফালগিবারাংখো হা·রিকেতজক। বিয়া থাংখা স্রিগিবারাংনি দনচাকানিরাংখো আরো কইতর ফালগিবারাংনি আসংচাকানিরাংখো ফাংফ্লেকেতে আগানজক, 13 “রংথালগিবা শাস্ত্রও ইসল আগানা, ‘আংনি নকখো বি·আনি নক মিংনুয়া,’ ইন্দিবা না·সং ইখো ডাকাতনি হা·খল দাক্কে রা·জক।” 14 উনি জা·মানো মিকগ্রি আরো খরা মান্দিরাং থরম নক্কো যীশুচা রি·বাজক, আরো বিয়া বিসংখো নাম্মেতজক। 15 খামাল দাল·গিবারাং আরো শাস্ত্র স্খিগিবারাং বিনি দাক্কা আইয়াও ইনমানগিবা কামরাংখো নিকজক। থরম নক্কো বি·সারাংনি ইন্দাকে চ্রিকে আগানাখো খিন্নানা মান·জক, “হোশান্না, দায়ূদনি দেফান্থি!” 16 ইয়ারাংখো নিক্কে বিসং খা·আওনাংএ যীশুনা আগানজক, “বিসং জেখো আগানিংআ না·আ উখো খিন্নাংআমা?” যীশু বিসংনা আগানজক, “হো·এ, খিন্নাংআ। শাস্ত্রও না·সং মামুং সালোবা পড়িখুজামা: বি·সারাং আরো সকচা·গিবারাংনি খু·সুকচা না·আ আন·থাংনি গিম্মিন রাসংখো চু·সকেতজক?” 17 উনি জা·মানো যীশু বিসংখো ওয়াত্তে সংজিলমানি হা·ফালচা বৈথনিয়া সংচা রি·য়াংজক আরো উয়োন ওয়ালথুজক। 18 ফ্রিংও সংজিলমাচা রি·বামিত্তিংও যীশু অকখ্রিয়ানা দাকজক। 19 রামা সামবাও গি·সা ডুমুর বিফাং নিক্কে বিয়া উয়া ফাংনি সেফাংও রি·য়াংজক, ইন্দিবা বিজাকনি আগ্রে উয়ো মামুংখোবা নিকনা মান·জাজক। উনোন বিয়া উয়া বিফাংখো আগানজক, “মামুং সালোবা নাং·ও বিথি নাংজাখানা।” আরো উনোন ডুমুর বিফাং সিক্রেপাংজক। 20 জা·রিকগিবারাং উখো নিক্কে আইয়াও ইনমানে আগানজক, “ডুমুর বিফাং বাদিকে দাক্কে থেংরিন সিক্রেপাংজক?” 21 যীশু বিসংনা আগানচাকে ইনজক, “আংআ না·সংনা বিবিন আগানিংআ, না·সং গিসিকো খেনচাকগিজা বিবিরা·আওদে ডুমুর বিফাংনি সাক্কাও আংআ জেখো দাকজক না·সংবা উখো দাকনা মা·ন্নুয়া। ইন্দাকেসান হং·জা, ইন্দিবা ইয়া হা·ব্রিখো আগানোদে, ‘চাখাত্তে সাগালচা রি·য়াংএ গা·আকেবো,’ ইন্দাকোদে উয়াবান হং·নুয়া। 22 না·সং বিবিরা·এ বি·ওদে জেখো না·সং হাম·নুয়া উখোন মা·ন্নুয়া।” 23 জা·মানো যীশু দা·আবা থরম নক্কোনা রি·য়াংজক। বিনি স্খিমিত্তিংও খামাল দাল·গিবারাং আরো যিহূদীরাংনি মি·আফারাং বিচা রি·বাএ আগানজক, “না·আ বাগিবা বিলচা ইয়ারাংখো দাক্কিংআ? ইয়া বিলখো নাং·না সা হ·ন্না?” 24 যীশু বিসংনা আগানজক, “আংআবা না·সংচা মিংসা খাৎথাখো সিং·নুয়া। না·সং আগানচাকনা মা·ন্নোদে আংআবা না·সংনা আগান্নুয়া আংআ বাগিবা বিলচা ইয়ারাংখো দাক্কিংআ। 25 আগানে নিবোদা, রিপ্পলেতানি বিলখো যোহন বানিখো মা·ন্নামিং? ইসলোনিখোমা মান্দিওনিখো?” উনো বিসং আন·থাংথাংও ইন্দাকে আগানগ্রিকজক, “আনচিং ‘ইসলোনিখো’ ইন্নে আগানোদে, বিয়া আনচিংনা আগান্নুয়া, ‘ইন্দাকোদে না·সং মুয়ানা যোহনখো বিবিরা·জাজক?’ 26 দা·আবা ‘মান্দিওনিখো’ ইন্নে আগানোদে, ইন্দাকোদে মান্দিরাংনা খেনচাকানি দংআ, মুয়ানা যোহনখো দিমদাকান আগানসোগিবা ইন্নে চানচিয়া।” 27 উনি গিম্মিন বিসং যীশুনা আগানচাকে ইনজক, “চিংআদে হা·আইজা।” উনো যীশু বিসংনা আগানজক, “ইন্দাকোদে আংআবা না·সংনা আগানজানুয়া আংআ বাগিবা বিলচা ইয়ারাংখো দাক্কিংআ।” 28 জা·মানো যীশু আগানজক, “না·সং বাদিকে চানচিয়া? ইন্দাকে চানচিচিপবো, সাকসা মান্দিনি দেফান্থি সাকগ্মি দংআমিং। উয়া মান্দি বিনি দাল·গিবা দেফান্থিচা রি·য়াংএ আগানজক, ‘দা·আল না·আ আংগুর বাগানচা রি·য়াংএ কাম রিম·বো।’ 29 দেফান্থি আগানচাকজক, ‘আংআ রি·য়াংজানুয়া।’ ইন্দিবা জা·মানো গিসিক ফি·ল্লে কাম রিম·না রি·য়াংজক। 30 উয়া মান্দি জা·মানো গিপ্পিন দেফান্থিচাবা রি·য়াংএ উয়া খাৎথাখোন আগানজক। বিয়াবা আগানচাকজক, ‘আংআ রি·য়াংইংজক,’ ইন্দিবা রি·য়াংজাজক। 31 ইয়া সাকগ্মিনি গিসেপো সা ফাগিবানি হা·সিকাখো দাকজক?” উনো থরমনি দাল·গিবারাং আগানচাকজক, “স্খাংগিবা।” যীশু বিসংনা আগানজক, “আংআ না·সংনা বিবিন আগানিংআ, না·সংনা স্খাং খাজিনা গিলগিবারাং আরো দারিরাং ইসলনি সংনক্কো নাপ্পিংজক, 32 মুয়ানা যোহন ইসলনি নামনিকা গিত্তা রি·য়ানি রামাখো ফিন্নিকনা না·সংচা রি·বামিং, আরো না·সং বিখো বিবিরা·জাজক। ইন্দিবা খাজিনা গিলগিবা আরো দারিরাং বিখো বিবিরা·আমিং। ইখো নিক্কেবা না·সং গিসিক ফি·ল্লে বিখো বিবিরা·জাজক। 33 “দা·আও গি·সা গল্পখো আগান্না, খিন্নাবো। সাকসা নকগিবা গি·সা আংগুর বাগান দাক্কে উনি দিমদাক গিত্তা বেড়া দিমফেংজক। জা·মানো উয়া বাগানও আংগুর বিৎচিখো চিম্মংএ রা·রিকনা হা·খল খিতজক আরো উখো রাক্ষিনা গি·সা চুগিবা নকখো রিকজক। উনি জা·মানো মিত্তাম গামগিবারাংচা উয়া বাগানখো নিরকখিনা দন্নে হা·সং গিপ্পিনচা রি·য়াংজক। 34 বিথি মিনখারিও বিয়া আন·থাংনি বাকখো মান·ফানা বিনি নকখলরাংখো উয়া গামগিবারাংচা ওয়াত্তেতজক। 35 গামগিবারাং বিনি নকখলরাংনি সাকসাখো রি·ম্মে দকজক, সাকসাখো স·ওতজক আরো সাকগিপ্পিনখো রং·থিচা গোথাতজক। 36 ইনি জা·মানো বিয়া স্খাংনা বাত্তে নকখলরাংখো বাং·এ ওয়াত্তেতজক, ইন্দিবা গামগিবারাং উয়া নকখলরাংমুং উয়ানদাক্কেন দাকজক। 37 আংগুর বাগাননি নকগিবা জা·মানচাবাকা আন·থাংনি দেফান্থিখোন বিসংচা ওয়াত্তেতজক। বিয়া ইন্দাকে চানচিজক, জে দাক্কেবা হং·খানা বিসং বিনি দেফান্থিখোদে মান্দিরা·নুয়া। 38 ইন্দিবা উয়া গামগিবারাং দেফান্থিখো নিক্কে আন·থাংথাংও আগানগ্রিকজক, ‘ইয়ান জা·মানো গামনি নকগিবা হং·নুয়া। হাই, আনচিং বিখো স·ওতে গালনা, 39 উনোদে আনচিংআন গামরাংনি নকগিবা হং·নুয়া।’ ইখো আগানে বিসং উয়া দেফান্থিখো রি·ম্মে আংগুর বাগাননি হা·ফালচানা রা·আংএ স·ওতে গালজক। 40 ইন্দাকোদে আগানবোদা, আংগুর বাগাননি নকগিবা জেনসালো আন·থাংআন রি·বানুয়া উনসালো গামগিবারাংখো রা·এ বিয়া মুয়াখো দাকনুয়া?” 41 থরমনি দাল·গিবারাং যীশুনা আগানজক, “বিয়া উয়া নামগিজা মান্দিরাংখো ব·ন্নেতনুয়া আরো জে গামগিবারাং বিথি মিনখারিও বিনি মানগ্মিখো হ·ন্নুয়া বিসংচান উয়া আংগুর বাগানখো নিরকখিনা হ·ন্নুয়া।” 42 উনো যীশু বিসংনা আগানজক, “না·সং রংথালগিবা শাস্ত্রও মামুং সালোবা পড়িখুজামা, ‘জে রং·থিখো নকরিকগিবারাং জেগালে গাল্লামিং, উয়ান দা·আও নাংগিবা রং·থি হং·জক; গিত্তেলান ইখো দাকজক, আরো ইয়া আনচিংনি মিক্রোনও নাম্মেন আইয়াও ইনমানানি হং·আ?’ 43 ইনি গিম্মিন না·সংনা আগানিংআ, না·সংচানিখো ইসলনি সংনকখো রা·আংনুয়া আরো জেরাংনি জাংগিও উয়া সংনকনি বিথিখো নিকনুয়া ইন্দাকগিবা মান্দিরাংনা ইসলনি সংনকখো হ·ন্নুয়া। 44 উয়া রং·থি সাক্কাও গা·আকগিবা বি·থংথাংনুয়া আরো উয়া রং·থি জে মান্দিনি সাক্কাও গা·আকনুয়া বিয়া গিজেম গিজেম বিন্নেকনুয়া।” 45 খামাল দাল·গিবারাং আরো ফরীশীরাং যীশুনি স্খিয়ানি গল্পরাংখো খিন্নাএ হা·আইনা মান·জক বিয়া বিসংখোন আগানিংআ। 46 উনো বিসং যীশুখো রিম·না হাম·জক, ইন্দিবা মান্দিরাংনা খেন্নে উখো দাকজাজক, মুয়ানা মান্দিরাং বিখো আগানসোগিবা ইন্নে চানচিনুয়ামিং।

মথি 22

1 স্খিনা মিংএ যীশু দা·আবা উয়া থরমনি দাল·গিবারাংনা ইয়া গল্পখো আগানজক, 2 “সালগিনি সংনক ইন্দাকগিবা রাজা গিত্তা হং·আ জে আন·থাংনি দেফান্থিনি বিয়ানা চা·আনিখো হ·ন্না থারিজক। 3 উয়া চা·আ রিংআরাংও আগানেতগিবা মান্দিরাংখো রিক্কামনা বিয়া আন·থাংনি নকখলরাংখো ওয়াত্তেতজক, ইন্দিবা বিসং রি·বানা গং·জাজক। 4 উনো দা·আবা বিয়া গিপ্পিন নকখলরাংখো ওয়াত্তেতি আগানেতগিবা মান্দিরাংনা আগানে ওয়াত্তেতজক, ‘নিবো, আংআ আংনি মাৎচু আরো মিল্লা-দা·ল্লা দমকরাংখো দে·ন্নে চা·আনিখো থারিজক। দা·আও দিমদাকান থারিয়া হং·জক, না·সং চা·না রি·বাবো।’ 5 “ইন্দিবা আগানেতগিবা মান্দিরাং উয়া নকখলরাংনি খাৎথাখো খিন্নাগিজা সাকসা বিনি হা·বাও আরো দা·আও সাকসা বিনি কামচা রি·য়াংজক। 6 আরো গিপ্পিনরাং রাজানি নকখলরাংখো রি·ম্মে চন্নিকজক আরো স·ওতে গালজক। 7 উনোন রাজা নাম্মেন খা·আওনাংবিজক আরো সিপাই ওয়াত্তেতি উয়া স·ওতগিবারাংখো ব·ন্নেতজক আরো বিসংনি সংজিলমাখো সো·এতজক। 8 জা·মানো বিয়া আন·থাংনি নকখলরাংনা আগানজক, ‘চা·আনিখো থারিয়া হং·জক, ইন্দিবা জেরাংখো রিক্কামসোআমিং বিসং ইনা খ্রাজা। 9 ইনা বাত্তে না·সং রামারাংচা রি·য়াংবো, আরো নিকগিবা গিম্মিকখো বিয়া চা·না রিংগামে রা·বাবো।’ 10 উনো উয়া নকখলরাং রামাচা রি·য়াংএ নাম্মা নামজা নিকগিবা খাকখেৎখো রিংগামে রা·বাজক। উনোন বিয়া হং·গিবা নক্কো সকগিবারাং গাপজক। 11 “উনি জা·মানো রাজা সকগিবারাংখো নিনা নিং·আচানা রি·বাএ নিজক, 12 সাকসা মান্দি বিয়ানি বা·রাখো গানগিজান উয়োনা রি·বাজক। রাজা বিখো সিং·জক, ‘রিপ্পেং, বিয়ানি বা·রাখো গানগিজা বাদিকে দাক্কে ইনো নাপজক?’ বিয়া মামুংখোন আগানচাকনা মান·জাজক। 13 রাজা উনোন নকখলরাংনা আগানজক, ‘বিনি জাক জা·চকখো খাএ হা·ফালনি আন্দালাও গাল্লেতবো। উয়া হা·দামচা মান্দিরাং গ্রাপনুয়া আরো সা·দিকানা ওয়াগাম চিকক্রতনুয়া।’ ” 14 গল্পনি বন·খামাও যীশু আগানজক, “ইনি গিম্মিন আগানিংআ, বাং·আ মান্দিরাংখো রিক্কামজক ইন্দিবা বাং·গিজাখো বাচ্ছিয়ে রা·জক।” 15 উনোন ফরীশীরাং রি·য়াংজক আরো বাদিকে দাক্কে যীশুখো বিনি খাৎথাচা জা·গাও গালনা মা·ন্না উখো রা·এ খু·মংগ্রিকনা হা·বাচেংজক। 16 বিসং হেরোদনি মিত্তাম মান্দিরাংমুং বিসংনি মিত্তাম জা·রিকগিবারাংখো যীশুচা ওয়াত্তেতজক। বিসং যীশুনা আগানজক, “স্খিগিবা, চিংআ হা·আইয়া না·আ সাকসা নামগিবা মান্দি। ইসলনি রামাখো না·আ বিবি দাক্কে স্খিয়ে হন·রংআ। মান্দিরাং মুয়াখো চানচিনুয়া বা চানচিজানুয়া উনা না·আ খেনজা, মুয়ানা না·আ দারাংনি মিকখাংখো নিএ মামুংখো দাকজা। 17 ইন্দাকোদে না·আ আগানবো, মোশিনি নিয়াম গিত্তা রোমনি রাজানা খাজিনাখো হ·ন্না খ্রাআমা? না·আ মুয়াখো চানচিয়া?” 18 বিসংনি নামগিজা মিকসংআখো হা·আইনা মা·ন্নে যীশু আগানজক, “দাক্কামব্রুগিবারাং, না·সং মুয়ানা আংখো পরীক্ষা দাক্কিংআ? 19 খাজিনা হ·ন্নাগিবা থাংখাখো রা·বাএ আংনা ফিন্নিকবো।” বিসং দীনার গং·সাখো যীশুচা রা·বাজক। 20 উনো যীশু বিসংনা আগানজক, “ইনি সাক্কাও ইয়া মিকখাং আরো বিমুং সানি?” 21 বিসং আগানজক, “রোম-রাজানি।” যীশু বিসংনা আগানজক, “ইন্দাকোদে রাজানিখো রাজানা হন·বো, আরো ইসলনিখো ইসলনা হন·বো।” 22 ইখো খিন্নাএ বিসং আইয়াও ইনমানজক আরো বিখো ওয়াত্তে রি·য়াংজক। 23 উয়া সালোন মিত্তাম সদ্দূকীরাং যীশুচা রি·বাজক। সদ্দূকীরাংনি চানচিয়া গিত্তা সিগিবারাংদে চাখাতফিলনুয়া ইন্নে মামুংবা দংজা। 24 উনি গিম্মিন বিসং যীশুখো সিং·জক, “স্খিগিবা, মোশি আগানজক, সাবা দেগ্রি হং·এ সিয়োদে, ইন্দাকোদে উনি জংগিবা উনি জিকখো খিম্মে আদাথাংনি বিৎচ্রিখো রা·রিকনুয়া। 25 চিংনি গিসেপো জংআদা সাকস্নি দংআমিং। স্খাংগিবা জিক খিম্মে সিজক আরো বি·সা দংজানি গিম্মিন বিয়া বিনি জংগিবানা জিকথাংখো দন্নাংজক। 26 ইন্দাকেন গ্মিগিবা, গিত্থামগিবা আরো সাকস্নিগিবাওনা দিপ্পাৎ উয়া মিচিকখো খিমজক। 27 জা·মানো উয়া মিচিকবা সিজক। 28 ইন্দাকোদে সিগিবারাং জেনসালো চাখাতফিলনুয়া উনসালো উয়া সাকস্নি জংআদানি গিসেপো ইয়া মিচিক সানি জিকগিবা হং·নুয়া? বিসং গিম্মিকান বিখো খিম্মামিং।” 29 যীশু বিসংনা আগানজক, “না·সং ব্রাংইংজক, মুয়ানা না·সং শাস্ত্রবা হা·আইজা, ইসলনি বিলখোবা হা·আইজা। 30 সিগিবারাং চাখাতফিল্লানি জা·মানো জিক-সে খিমজানুয়া আরো বিসংখো জিক-সে খিমনাবা হন·জানুয়া; বিসং সা·গ্রেরাং গিত্তা হং·নুয়া। 31 সিগিবারাংনি চাখাতফিল্লানি গিম্মিন ইসল না·সংনা জেখো আগানজক উখো না·সং শাস্ত্রও পড়িখুজামা? 32 উয়োন চক্কা দংআ, ‘আংআ অব্রাহামনি ইসল, ইস্‌হাকনি ইসল আরো যাকোবনি ইসল।’ ইন্দিবা ইসল সিগিবারাংনি ইসল হং·জা, বিয়া থাংগিবারাংনিন ইসল হং·আ।” 33 ইয়া খাৎথাখো খিন্নাএ মান্দিরাং বিনি স্খিয়ানা আইয়াও ইনমানজক। 34 সদ্দূকীরাংখো যীশু জ্রিপ দংএতজক ইখো খিন্নাএ ফরীশীরাং আপসান থম·দাকজক। 35 বিসংওনি শাস্ত্র স্খিগিবা সাকসা যীশুখো পরীক্ষা দাকনা ইন্নে সিং·জক, 36 “স্খিগিবা, মোশিনি নিয়াম গিত্তা বাগিবা গি·য়েতা দাল·বাৎগিবা হং·আ?” 37 যীশু বিনা আগানজক, “দাল·বাৎগিবা আরো নাংগিবা গি·য়েতা হং·জক, ‘না·সং গিম্মিকান না·সংনি গিম্মিক খা·থংচা, গিম্মিক জাংগিচা আরো গিম্মিক গিসিকচা না·সংনি গিত্তেল ইসলনা খা·সাবো।’ 39 উনি জা·মাননি নাংগিবা গি·য়েতা স্খাংগিবা গিত্তান হং·আ- ‘নাং·নি সংসুল-নকসুলখো আন·থাংনি গিত্তা নামনিকবো।’ 40 ইয়া গি·য়েতা মিংগ্মিওন মোশিনি গিম্মিক নিয়াম আরো আগানসোগিবারাংনি গিম্মিক স্খিয়া ফাংচাকে দংআ।” 41 ফরীশীরাংনি থ·ম্মে দংমিত্তিংও যীশু বিসংচা সিং·জক, 42 “না·সং খ্রীষ্টনি গিম্মিন মুয়াখো চানচিয়া? বিয়া সানি দেফান্থি?” বিসং যীশুনা আগানজক, “দায়ূদনি দেফান্থি।” 43 উনো যীশু বিসংনা আগানজক, “ইন্দাকোদে দায়ূদ বাদিকে দাক্কে খ্রীষ্টখো গিসিক রংথালগিবাচা গিত্তেল ইন্নে রিক্কামামিং? বিয়া আগানামিং, ॥য়1 44 ‘গিত্তেল আংনি গিত্তেলনা আগানা, জেওনা দিপ্পাৎ আংআ নাং·নি বোবিলরাংখো নাং·নি জা·চকনি খামাও দনজা, উনোনা দিপ্পাৎ না·আ আংনি জাক্রাচা আসংবো।’ 45 ইন্দাকোদে দায়ূদ খ্রীষ্টখো গিত্তেল ইন্নে রিক্কামোদে, খ্রীষ্ট বাদিকে দাক্কে দায়ূদনি দেফান্থি হং·না মা·ন্না?” 46 দারাংবা বিনা খাৎথা মিংসাবা আগানচাকনা মান·জাজক আরো উনসালোনি দারাংবা বিখো মামুংখো সিং·নাবা ফা·জাজক।

মথি 23

1 জা·মানো যীশু মান্দিরাংনা আরো আন·থাংনি জা·রিকগিবারাংনা আগানজক, 2 “নিয়ামরাংখো স্খিয়েতানিও শাস্ত্র স্খিগিবারাং আরো ফরীশীরাং মোশিনি হা·দামও দংআ। 3 উনি গিম্মিন বিসং জেখো দাকনা আগানা উখো দাকবো আরো জেখো মানিখানা গি·য়েতা উখো মানিবো। ইন্দিবা বিসং জেখো দাক্কা না·সং উখো দা·আ দাক্কাবো, মুয়ানা বিসং খু·সুকচা আগানা গিত্তা কাম রিম·জা। 4 বিসং জ্রিমা বোঝারাংখো খায় মান্দিরাংনি ফাকখ্রংও গাত্তা, ইন্দিবা উরাংখো জিত্তেতনা আন·থাংনি জাকসি গি·সাখোবা মজিমেতনা হাম·জা। 5 মান্দিরাংনা ফিন্নিকনান বিসং গিম্মিক কামখো দাক্কা। রংথালগিবা শাস্ত্রনি পদ চকগিবা তাবিসখো বিসং দা·ল্লে থারিয়া আরো আন·থাংথাংখো থরমি ইন্নে ফিন্নিকনা বা·রানি জা·থেরাংখো রো·এ খাআ। 6 চা·আনি সময়ও মান্দিরা·আনি নামবাতা হা·দামও আরো থম·দাকরামচা মংসংগিবা আসংচাকাও বিসং আসংনা নামনিকা। 7 বাজালরাংও বিসং সালাম খা·আখো আরো স্খিগিবা ইন্নে মান্দিরাংনি রিক্কামাখো মা·ন্না হা·ম্মা। 8 “সাবা না·সংখো স্খিগিবা ইন্নে রিক্কামখানা ইখো দা·আ হা·ম্মাবো, মুয়ানা না·সংনি স্খিগিবা সাকসাসান দংআ, আরো না·সং দিমদাকান জংআদা হং·আ। 9 ইয়া হা·গিলসাকো দারাংখোবা দা·আ আপফা ইন্নাবো, মুয়ানা না·সংনি ফাগিবা সাকসাসান আরো বিয়া সালগিও দংআ। 10 দারাংবা না·সংখো দাল·গিবা ইনখানা ইখো দা·আ হা·ম্মাবো, মুয়ানা না·সংনি দাল·গিবা ইনগিবা সাকসাসান দংআ, বিয়া খ্রীষ্ট। 11 না·সংনি গিসেপো দাল·বাৎগিবা না·সংনা দাকচাকে হন·খানা। 12 আন·থাংখো চুয়াকেতগিবাখো হং·ওন্নেতনুয়া আরো আন·থাংখো হং·ওন্নেতগিবাখো চুয়াকেতনুয়া। 13 “বু·এ চা·গিবা শাস্ত্র স্খিগিবা আরো ফরীশীরাং, হং·সিখানা না·সংনা! মান্দিরাংনি মিকখাংও না·সং সালগিনি সংনকনি দ·গাখো চিপচাংএ দন্না। উয়ো আন·থাংথাংবা নাপজা আরো নাপনা হা·সিকগিবারাংখোবা নাপনা হন·জা। 14 “বু·এ চা·গিবা শাস্ত্র স্খিগিবা আরো ফরীশীরাং, হং·সিখানা না·সংনা! না·সং মান্দিরাংনা ফিন্নিকনা ইন্নে রো·এ রো·এ বি·আ, আরো রান্দিরাংনি গামরাংখো সেক্কে রা·আ। ইনি গিম্মিন না·সং বাং·এ শাস্তি মা·ন্নুয়া। 15 “বু·এ চা·গিবা শাস্ত্র স্খিগিবা আরো ফরীশীরাং, হং·সিখানা না·সংনা! সাকসা মা·মাং মান্দিখো না·সংনি থরমনি মান্দি গিত্তা দাকনা না·সং হা·গিলসাক গিম্মিকচান রি·য়াংআ। আরো না·সংনি থরম গিত্তা হং·জোকনো না·সং আন·থাংথাংনা বাতখালে বিখো নরকনা খ্রাগিবা দাক্কে থারিয়া। 16 “হং·সিখানা না·সংনা! না·সং আন·থাংআন মিকগ্রি হং·আ ইন্দিবা গিপ্পিনরাংনা রামা ফিন্নিকা। না·সং আগানে দংআ, সাবা থরম নকনি বিমুংও মিকচেতোদে মামুংবা হং·জা, ইন্দিবা সাবা থরম নকনি সোনানি বিমুংও মিকচেতোদে বিয়া গামনা নাংআ। 17 জাদা আরো মিকগ্রিরাং, বাগিবা দাল·বাতা? সোনা, বা উয়া থরম নকমা, জে থরম নক উয়া সোনাখো ইসলনি গিম্মিন দিংথাং দাক্কে দন্না? 18 না·সং দা·আবা ইয়া খাৎথাখোবা আগানে দংআ, সাবা গানচিনি বিমুংও মিকচেতোদে মামুংবা হং·জা, ইন্দিবা সাবা গানচি সাক্কাও দংগিবা হ·ন্নানি বিমুংও মিকচেতোদে বিয়া গামনা নাংআ। 19 মিকগ্রিরাং, বাগিবা দাল·বাতা? উয়া হ·ন্নানিরাং, বা উয়া গানচিমা, জে গানচি উয়া হ·ন্নানিখো ইসলনি গিম্মিন দিংথাং দাক্কে দন্না? 20 উনি গিম্মিন গানচিনি বিমুংও মিকচেৎগিবা উয়া গানচিখো আরো উনি সাক্কাও দংগিবা গিম্মিকনি বিমুংওন মিকচেতা। 21 আরো থরম নকনি বিমুংও মিকচেৎগিবা থরম নক আরো উনি নিং·আও দংগিবানি বিমুংওন মিকচেতা। 22 সালগিনি বিমুংও মিকচেৎগিবা ইসলনি সিংহাসন আরো উনি সাক্কাও আসংগিবানি বিমুংওন মিকচেতা। 23 “হং·সিখানা না·সংনা, শাস্ত্র স্খিগিবারাং আরো ফরীশীরাং, বু·এ চা·গিবারাং! না·সং পুদিনা, গুয়ামুরি আরো জিরানি বাক চিখুংনি বাকসাখো ইসলনা হ·ন্না; ইন্দিবা বিচালখো, খা·সাচাক্কাখো আরো বিবিরা·আখো মোশিনি নিয়ামনি ইয়া নাংবাৎগিবারাংখো না·সং গালজক। স্খাংনিরাংমুং জা·মানরাংখোবা দাক্কান না·সংনা খ্রাআ। 24 না·সং আন·থাংথাংআন মিকগ্রি হং·আ ইন্দিবা গিপ্পিনরাংনা রামা ফিন্নিকা। গি·সা চন্না গাংগুয়াখোবা না·সং চাকখিয়ে গাল্লা ইন্দিবা উটখোদে মিন্নকা। 25 “হং·সিখানা না·সংনা, শাস্ত্র স্খিগিবা আরো ফরীশীরাং, বু·এ চা·গিবারাং! না·সং চা·আ দনচাকানিরাংনি হা·ফালচানিখো চি·রংএ দন্না, ইন্দিবা উয়ারাংদে নামগিজানি বস্তু আরো মিকবোকানি বিথিচা গাপ্পা। 26 মিকগ্রি ফরীশীরাং, স্খাং উয়ারাংনি নিং·আচানিখো থাল্লেতবো, উনোন উনি হা·ফালচানিবা থাল্লাংনুয়া। 27 “হং·সিখানা না·সংনা, শাস্ত্র স্খিগিবা আরো ফরীশীরাং, বু·এ চা·গিবারাং! না·সং চুন রেপফিদাপগিবা গোপরাম গিত্তা হং·আ, জেনি হা·ফালচা নিনা নিথুয়া ইন্দিবা নিং·আওদে সিগিবা মান্দিনি গ্রেংরাং আরো গিম্মিক সোআ ময়লান গাপ্পা। 28 উয়ানদাক্কেন, হা·ফালও মান্দিরাংনি মিক্রোনও না·সং থরমি হং·আ ইন্দিবা নিং·আওদে বু·এ চা·আ আরো নামগিজা দাক্কান গাপ্পা। 29 “হং·সিখানা না·সংনা, শাস্ত্র স্খিগিবারাং আরো ফরীশীরাং, বু·এ চা·গিবারাং! আগানসোগিবারাংনি গোপরামরাংখো না·সং গিত্তাল দাক্কে রিক্কা আরো থরমিরাংনি গোপরামরাংখো নিথয়েতা। 30 না·সং আগানা, ‘চিংনি ফাগিৎচামরাংনি চাসংও চিংআ থাংএ দংওদে আগানসোগিবারাংখো স·ওতনা বিসংমুং আপসান হং·ফাজানুয়ামিং।’ 31 ইনোন না·সং আগানসোগিবারাংখো স·ওতগিবারাংনি দেদ্রাং ইন্নে না·সং আন·থাংথাংআন আন·থাংথাংনি সাক্কাও সাক্ষি হ·ন্না। 32 ইন্দাকোদে না·সংনি ফাগিৎচামরাং জেখো দাকচেংজক উনি মিত্তামরাংখো না·সং ব·ন্নেতবো। 33 “চিপ্পুরাং আরো চিপ্পুনি দেদ্রাং! না·সং বাদিকে দাক্কে নরকনি শাস্তিওনি জকনুয়া? 34 উনি গিম্মিন আংআ না·সংচা আগানসোগিবা, হা·আইগিবা মান্দি আরো শাস্ত্র স্খিগিবারাংখো ওয়াত্তেতিংজক। না·সং বিসংনি গিসেপো মিত্তামরাংখো স·ওতনুয়া আরো মিত্তামরাংখো চিসলো দাৎখাপনুয়া। মিত্তামরাংখো না·সংনি থম·দাকরামও বেতচা দকনুয়া আরো সং দামসাচানিখো সং দামসাচানা হা·রিকেতনুয়া। 35 উনি গিম্মিন দোসগ্রি হেবলখো স·ওতচেংওনি না·সং বরখিয়নি দেফান্থি সখরিয়খো রংথালগিবা হা·দাম আরো গানচিনি গিসেপো স·ওতামিং, উয়া সখরিয়না দিপ্পাৎ হা·গিলসাকো জে দোসগ্রি মান্দিরাংখো স·ওতা উয়া গিম্মিক হান·চিনা না·সং গ্রো নাংগিবা হং·নুয়া। 36 আংআ না·সংনা বিবিন আগানিংআ, ইয়া চাসংনি মান্দিরাংআন উয়া হান·চি গিম্মিকনা দোসী হং·নুয়া। 37 “যিরূশালেম! ও যিরূশালেম! না·আ আগানসোগিবারাংখো স·ওতা আরো নাং·চা ওয়াত্তেতগিবারাংখো রং·থিচা গোথাত্তা। দো·ও বিমা জেদাক্কে আন·থাংনি বি·সারাংখো গ্রাংনি নিং·আও থ·ম্মা উয়ানদাক্কেন আংআ নাং·নি মান্দিরাংখো আংচানা বাসিক চিম্মংনা হা·সিকা, ইন্দিবা বিসং গং·জাজক। 38 ও যিরূশালেমনি মান্দিরাং, না·সংনি নক না·সংনি মিকখাংও মান্দিগ্রি বাংবাং হং·এ গা·আকে দংনুয়া। 39 আংআ না·সংনা আগানিংআ, ‘গিত্তেলনি বিমুংও রি·বাগিবানি রাসং হং·খানা,’ ইখো জেনা দিপ্পাৎ না·সং আগানজানুয়া, উয়োনা দিপ্পাৎ না·সং আংখো নিকজানুয়া।”

মথি 24

1 যীশু থরম নকনি হং·খাতে রি·য়াংআমিং, উনো বিনি জা·রিকগিবারাং থরম নকনি রিক্কারাংখো ফিন্নিকনা বিচা রি·বাজক। 2 উনো যীশু বিসংনা আগানজক, “না·সংদে ইরাংখো নিক্কিংআ, ইন্দিবা আংআ না·সংনা বিবিন আগানিংআ, ইনো রং·থি গি·সানি সাক্কাও গি·সা রং·থিবা দংজানুয়া; গিম্মিকখোন ফি·এ গালনুয়া।” 3 জা·মানো যীশু জৈতুন হা·ব্রিও আসংএ দংমিত্তিংও জা·রিকগিবারাং সিউল দাক্কে বিচা রি·বাএ আগানজক, “চিংনা আগানবো, বাসোকো ইয়ারাং হং·নুয়া আরো বাগিবা চিনখো নিক্কে হা·আইনা মা·ন্নুয়া নাং·নি রি·বানি আরো হা·গিলসাক ব·ন্নানি সাল সকবাজক?” 4 যীশু বিসংনা আগানচাকজক, “নিবো, জেদাক্কে দারাংবা না·সংখো ব্রাংএতজাখানা, 5 মুয়ানা বাং·এন আংনি বিমুংও রি·বাএ আগান্নুয়া, ‘আংআন খ্রীষ্ট,’ আরো বাং·আ মান্দিরাংখো ব্রাংএতনুয়া। 6 না·সংনি নাচিলো দাকগ্রিকানি খু·রাং রি·বানুয়া আরো দাকগ্রিকানি খাৎথারাংখোবা না·সং খিন্নানা মা·ন্নুয়া। ইন্দিবা সিমসাকবো! ইয়ারাংনা দা·আ খেন্নাবো, মুয়ানা ইয়ারাং হং·নোন; ইন্দিবা উনোবা বন·খামানি হং·খুজা। 7 জাতসা জাতগিপ্পিনমুং আরো হা·দকসা হা·দকগিপ্পিনমুং দাকগ্রিকনুয়া। বাং·আ সংহা·দামরাংও আকাল হং·নুয়া আরো বাংগুরিয়া হং·নুয়া। 8 ইন্দিবা ইয়ারাংদে দুক মা·ন্না হা·বাচেংআসান। 9 “উনসালো মান্দিরাং না·সংখো দুক হ·ন্না রি·ম্মে হ·ন্নুয়া আরো না·সংখো স·ওতনুয়া। আংনি গিম্মিন গিম্মিক মান্দি না·সংখো মিৎচিনুয়া। 10 উনসালো বাং·এন জা·মানচাকনুয়া আরো সাকসা সাকগিপ্পিনখো রি·ম্মে হ·ন্নুয়া আরো মিৎচিগ্রিকনুয়া। 11 বু·এ চা·গিবা আগানসোগিবা বাং·এন রি·বাএ বাং·আখো ব্রাংএতনুয়া। 12 নামগিজা বাং·আনি গিম্মিন বাং·আ মান্দিনিন খা·সা দংজানুয়া। 13 ইন্দিবা বন·খামাওনা দিপ্পাৎ চাকচিকগিবান জকনুয়া। 14 গিম্মিক জাতরাংনা সাক্ষি হ·ন্না ইন্নে সালগিনি সংনকনি নাম্মা খাৎথাখো হা·গিলসাক গিম্মিকও আগানফ্রাকনুয়া আরো উনি জা·মানোন বন·খামগিবা সাল সকবানুয়া। 15 “আগানসোগিবা দানিয়েল জে মিৎচিগিবা বস্তুরাংনি খাৎথাখো আগানসোআমিং উখো রংথালগিবা হা·দামও দন্নাখো নিকনা মা·ন্নুয়া। (পড়িগিবা হা·আইখানা।) 16 উনসালো যিহূদিয়াও দংগিবারাং হা·ব্রিরাংচা খাত্তাংখানা। 17 নকনি সাক্কাও দংগিবা নকনিং·আচানিখো জিনিসরাংখো রা·না খা·মাওনা হং·ওনবাজাখানা। 18 হা·বাও দংগিবা বিনি বে·এননি বা·রাখো রা·না ফি·ল্লাংজাখানা। 19 উনসালো হা·ন্নোগ্মাংগিবারাং আরো বি·সানা সক খানগিবারাংনি অবস্থা বাদাকফিল্লেন বিল্লংনুয়া! 20 বি·বো জেদাক্কে সিন·খারিও বা নেং·থাকানি সালো না·সংখো খাত্তাংনা নাংজা। 21 উনসালো ইন্দাকফিল্লে দুক হং·নুয়া হা·গিলসাক হং·চেংওনি দা·আওনা দিপ্পাৎ ইন্দাকে হং·খুজা আরো হং·জানুয়া। 22 ইসল উয়া সালরাংখো খান·দকেতজাওদে সাকসাবা থাংজানুয়ামিং। ইন্দিবা আন·থাংনি বাচ্ছিয়ে রা·গিবা মান্দিরাংনি গিম্মিন ইসল উয়া সালরাংখো খান·দকেতনুয়া। 23 “উনসালো সাবা না·সংখো, ‘নিবো, খ্রীষ্ট ইয়ানো’ বা ‘নিবো, খ্রীষ্ট হাইওয়ানো,’ ইন্নে আগানোদে উখো দা·আ বিবিরা·আবো; 24 মুয়ানা উনসালো বাং·এন বু·এ চা·গিবা খ্রীষ্ট আরো বু·এ চা·গিবা আগানসোগিবা রি·বানুয়া আরো দা·ল্লা আইয়াও ইনমানগিবা চিননি কামরাংখো দাকনুয়া জেদাক্কে মা·ন্নোদে ইসলনি বাচ্ছিয়ে দনগিবা মান্দিরাংখোবা বিসং ব্রাংএতনা মা·ন্না। 25 নিবো, আংআ স্খাংআন না·সংনা ইরাংখো আগানে দন্নিংজক। 26 “উনি গিম্মিন ‘বিয়া হা·গিসি জওলো দংআ’ ইন্নে মান্দিরাং না·সংখো ইন্নোদে, না·সং হা·ফালচা দা·আ রি·য়াংআবো। ‘বিয়া নকনিংওনা দংআ’ ইন্নোদে, দা·আ বিবিরা·আবো। 27 মিকখা রিপরাপাখো জেদাক্কে সালারামচানি সালিরামচানা নিক্কা উয়ানদাক্কেন মান্দিনি দেফান্থিনি রি·বা হং·নুয়া। 28 জেও মাংগিসি দংনুয়া উয়োন সোগিনরাং রি·বাএ থম·নুয়া। 29 “উয়া সালনি দুকরাংনি জা·মানোন সাল আন্দালাংনুয়া, জাজং থেং·সুজানুয়া, আস্কিরাং সিলগা সাক্কাচানি থাকওয়াতে গা·আকবানুয়া আরো জাজং, সাল আস্কি ইয়ারাং থম·থমে দংজানুয়া। 30 উনোন সিলগাও মান্দিনি দেফান্থিনি চিনখো নিকনা মা·ন্নুয়া। উনো হা·গিলসাকনি গিম্মিক মান্দি দুক হং·এ খা·আখো দকনুয়া। বিসং মান্দিনি দেফান্থিখো বিল আরো রাসংখো রা·এ গাদিলাও দাক্কে রি·বাখো নিকনুয়া। 31 সিংগা গামবিনুয়া আরো উনোন মান্দিনি দেফান্থি আন·থাংনি সা·গ্রেরাংখো ওয়াত্তেতনুয়া। উয়া সা·গ্রেরাং হা·গিলসাকনি খি·থিকোনা রি·য়াংএ হা·গিম্মিকচানিখো ইসলনি বাচ্ছিয়ে রা·গিবা মান্দিরাংখো চিম্মংনুয়া। 32 “ডুমুর বিফাংখো নিএ স্খিয়ে রা·বো। জেনসালো উনি ডালারাং ন·ম্মে গিত্তাল বিজাক হং·খাতা, উনোন দিং·খারি সকবাজক ইন্নে না·সং হা·আইনা মা·ন্না। 33 উয়ানদাক্কেন না·সং ইয়ারাংখো নিকজোকনোন হা·আইনা মা·ন্নুয়া, মান্দিনি দেফান্থি সেফাংও রি·বাজক, আরোবা, দ·গাচিলোনা সকবাজক। 34 আংআ না·সংনা বিবিন আগানিংআ, জেনসালো ইয়ারাং হং·নুয়া ইয়া চাসংনি মিত্তাম মান্দি উনোবা থাংএ দংখুনুয়া। 35 সিলগা আরো হা·গিলসাক ব·ন্নাংনুয়া, ইন্দিবা আংনি খাৎথারাং ফাংনাজলনা দংনুয়া। 36 “উয়া সাল আরো উয়া সময়নি খাৎথাখো দারাংবা হা·আইজা, সালগিনি সা·গ্রেরাংবা হা·আইজা, দেফান্থিবা হা·আইজা; ফাগিবাসান হা·আইয়া। 37 “নোহনি সালো জেদাক্কে হং·আমিং মান্দিনি দেফান্থিনি রি·বানি সালোবা উয়ানদাক্কেন হং·নুয়া। 38 চি দাল·না স্খাং সালরাংও নোহ রিংও নাপখুজানা দিপ্পাৎ মান্দিরাং চা·ফেক-রিংফেকজকমিং, জিক খিমথকজকমিং আরো খিম্মেতজকমিং। 39 চি দা·ল্লে বিসং গিম্মিকখো মা·ন্নাংজানা দিপ্পাৎদে বিসং মামুংখোন হা·আইনা মান·জাজক। মান্দিনি দেফান্থিনি রি·বাবা উয়ানদাক্কেন হং·নুয়া। 40 উনসালো মি·আসা সাকগ্মি হা·বাও দংনুয়া; সাকসাখো রিম্মাংনুয়া আরো সাকসাখো গাল্লে দন্নাংনুয়া। 41 মিচিক সাকগ্মি জাঁতা ঘুরাইনুয়া; সাকসাখো রিম্মাংনুয়া, সাকসাখো গাল্লে দন্নাংনুয়া। 42 “উনি গিম্মিন আগানা, না·সং সিমসাকে দংবো, মুয়ানা না·সংনি গিত্তেল বাগিবা সালো রি·বানুয়া উখো না·সং হা·আইজা। 43 ইন্দাকোবা না·সং ইয়া খাৎথাখো হা·আইএ রা·বো, বাসোকো চা·খক রি·বানুয়া উখো নকগিবা হা·আইওদে বিয়া মিকরাকেন দংনুয়ামিং, আন·থাংনি নক্কো বিয়া চা·খকখো নাপনা হন·জানুয়ামিং। 44 উনি গিম্মিন না·সংবা থারিয়ে দংবো, মুয়ানা না·সংনি চানচিসোগিজা সালোন মান্দিনি দেফান্থি রি·বানুয়া। 45 “উয়া বিবিগিবা আরো বুদ্ধিগ্মাং নকখল সা, জেখো বিনি নকগিবা আন·থাংনি গিপ্পিন নকখলরাংনা থিক সময়ও চা·আখো হ·ন্না আগানাংজক? 46 উয়া নকখলনি রাসং হং·খানা, জেখো বিনি নকগিবা রি·বাএ বিবিগিবা দাক্কে কাম রি·ম্মাখো নিকনুয়া। 47 আংআ না·সংনা বিবিন আগানিংআ, বিয়া উয়া নকখলচান বিনি গিম্মিক গামজিনখো নিরকখিনা হ·ন্নুয়া। 48 ইন্দিবা চানচিচিপবো, উয়া নকখল নামজাওদে, আরো বিয়া গিসিকথাংও ইন্দাকে আগানোদে ‘আংনি নকগিবা রি·বানা হারিমিংজক।’ 49 আরো উনোন বিয়া বিমুং রিম·ফাগিবা নকখলরাংখো দকনা হা·বাচেংজক আরো চু ফেকগিবারাংমুং চা·এ রিংএ চু রিংনা হা·বাচেংজক। 50 ইন্দিবা উয়া নকখলনি চানচিসোগিজা সালোন আরো হা·আইজামিত্তিংওন বিনি নকগিবা রি·বানুয়া। 51 উনসালো বিয়া বিখো দেন·গ্নি দাক্কে বু·এ চা·গিবারাংনি গিসেপো বিনা হা·দাম দন্নুয়া। উয়োন মান্দিরাং গ্রাপনুয়া আরো সা·দিকানা ওয়াগাম চিকক্রতনুয়া।

মথি 25

1 “উনসালো চাক্কিখো রা·এ চাওয়ারিনা নিচাকসোগিবা সাকচিখুং মি·থ্রা গিত্তা সালগিনি সংনক হং·নুয়া। 2 বিসংনি গিসেপো সাকবংআ বুদ্ধিগ্মাং দংআমিং। 3 বুদ্ধিগ্রি মি·থ্রারাং বিসংনি চাক্কিখো রা·জক ইন্দিবা আন·থাংমুং তেলখোদে রা·জাজক। 4 বুদ্ধিগ্মাং মি·থ্রারাং বিসংনি চাক্কিমুং রা·চাকানিরাংও তেলখোবা রা·জক। 5 চাওয়ারি হারিমে রি·বানি গিম্মিন বিসং দিমদাকান থুথকজক। 6 “জা·মানো ওয়ালজাৎচিও চ্রিকে আগানাখো খিন্নানা মান·জক, ‘হাইওয়া নিবো, চাওয়ারি রি·বাংজক! বিখো রি·চাকসোনা হং·খাতবো।’ 7 উনোন উয়া মি·থ্রারাং চাখাত্তে বিসংনি চাক্কিখো থারিথকজক। 8 বুদ্ধিগ্রিরাং বুদ্ধিগ্মাংরাংনা আগানজক, ‘না·সংনি তেলখো চিংনা অকখিসা হন·ফাবো, মুয়ানা চিংনি চাক্কি সিয়াংইংজক।’ 9 উনোন উয়া বুদ্ধিগ্মাং মি·থ্রারাং আগানচাকজক, ‘হং·জা, তেল দংগিবা চিংনা আরো না·সংনা চু·ওংজানুয়া। না·সং ইনাবাত্তে ফালগিবারাংচা রি·য়াংএ আন·থাংথাংনা তেলখো ব্রিএবো।’ 10 উয়া বুদ্ধিগ্রি মি·থ্রারাং তেলখো ব্রিনা রি·য়াংওন চাওয়ারি সকবাজক। উনোন থারিয়ে দংসোগিবা মি·থ্রারাং চাওয়ারিমুং বিয়া হং·গিবা নকচানা রি·য়াংজক। বিসং গিম্মিক নিং·আচা নাপ্পানি জা·মানো দ·গাখো চিপচাংএতজক। 11 “জা·মানো উয়া বুদ্ধিগ্রি মি·থ্রারাং রি·বাএ আগানজক, ‘নিবো, দ·গাখো এংএতবো।’ 12 চাওয়ারি আগানচাকজক, ‘বিবিন আগানিংআ, আংআ না·সংখো হা·আইজা।’ ” 13 গল্পনি বন·চতও যীশু আগানজক, “ইনি গিম্মিন মিকরাকে দংবো, মুয়ানা উয়া সালনি আরো উয়া সময়নি খাৎথাখো না·সং হা·আইজা। 14 “হা·সংগিপ্পিনচা রি·য়াংনা স্খাং আন·থাংনি নকখলরাংখো রিংগামে বিসংনি জাক্কো আন·থাংনি গিম্মিক গামখো নিরকখিনা হন·গিবা সাকসা মান্দি গিত্তা সালগিনি সংনক হং·আ। 15 বিয়া উয়া নকখলরাংনি বিলনি খ্রি সাকসানা হাজাল বংআ, সাকসানা হাজালগ্মি আরো সাকসানা হাজালসা থাংখাখো হন·জক। 16 হাজাল বংআখো মান·গিবা উয়া থাংখাচা বাদিংএ আরোবা হাজাল বংআ থাংখাখো মান·দাপজক। 17 হাজালগ্মি মান·গিবাবা উয়ানদাক্কে আরোবা হাজালগ্মি থাংখাখো মান·দাপজক। 18 ইন্দিবা হাজালসা মান·গিবাদে হা·আখো চো·এ বিনি নকগিবানি থাংখাখো থুম্মুয়ে দনজক। 19 “সাল বাং·এ রি·য়াংআনি জা·মানো উয়া নকগিবা রি·বাএ নকখলরাংচানিখো হিসাব হাম·জক। 20 হাজাল বংআখো মান·গিবা আরোবা হাজাল বংআ থাংখাখো রা·বাএ আগানজক, ‘না·আ আংনা হাজাল বংআ থাংখাখো হ·ন্নামিং। 21 নিবো, আংআ আরোবা হাজাল বংআ থাংখাখো মান·দাপজক।’ উনো বিনি নকগিবা বিনা আগানজক, ‘নাম্মাখো দাকজক। না·আ নামগিবা আরো বিবিগিবা নকখল। অকখিসানি গিম্মিন না·আ বিবি দাকজক ইন্নে আংআ নাং·না বাং·আরাংখো নিরকখিনা হ·ন্নুয়া। রি·বাবো, আংমুং হান·সেংফাবো।’ 22 “হাজাল গ্মিখো মান·গিবা রি·বাএ আগানজক, ‘না·আ আংনা হাজাল গ্মি থাংখাখো হ·ন্নামিং। নিবো, আংআ আরোবা হাজাল গ্মি থাংখাখো মান·দাপজক।’ 23 উনো বিনি নকগিবা বিনা আগানজক, ‘নাম্মাখো দাকজক। না·আ নামগিবা আরো বিবিগিবা নকখল। অকখিসানি গিম্মিন না·আ বিবি দাকজক ইন্নে আংআ নাং·না বাং·আরাংখো নিরকখিনা হ·ন্নুয়া। রি·বাবো, আংমুং হান·সেংফাবো।’ 24 “ইন্দিবা হাজালসাখো মান·গিবা রি·বাএ আগানজক, ‘নিবো, আংআ হা·আইয়ামিং না·আ নাম্মেন খা·গ্রাক মান্দি। না·আ জেও বিৎচ্রি গোজা উনোনিখো রাত্তা আরো জেও গালজা উনোনিখো চিম্মংআ। 25 ইনি গিম্মিন আংআ খেন্নে হা·ফালচা রি·য়াংএ হা·আও নাং·নি থাংখাখো থুম্মুয়ে দন্নামিং। ইয়া নিবো, নাং·নি গাম নাং·নিন দংআ।’ 26 বিনি নকগিবা বিনা আগানচাকজক, ‘নামগিজা আরো হারাতগিবা নকখল! না·আদে হা·আইয়ামিং জেও আংআ গোজা উনোনিখো রাত্তা আরো জেও গালজা উনোনিখো চিম্মংআ। 27 ইন্দাকোদে থাংখা বাদিংগিবারাংচা আংনি থাংখাখো মুয়ানা দনজা? উখো দাক্কোদে আংআ রি·বাএ আংনি থাংখাখোবা মা·ন্নুয়ামিং আরো উমুং সুদখোবা মা·ন্নুয়ামিং।’ 28 জা·মানো বিয়া গিপ্পিনরাংনা আগানজক, ‘না·সং বিচানিখো থাংখারাংখো রা·এ জেচা হাজাল চিখুং থাংখা দংআ বিনা হন·বো। 29 জেচা দংআ বিনা আরোবা বাং·এ হ·ন্নুয়া আরো উনোন বিনি বাং·নুয়া। ইন্দিবা জেচা দংজা বিনি অকখিসা দংআখোবা রা·আংনুয়া। 30 উয়া জাদাস্রাং নকখলখো না·সং হা·ফালনি আন্দালাও গাল্লেতবো; উয়ো মান্দিরাং গ্রাপনুয়া আরো সা·দিকানা ওয়াগাম চিকক্রতনুয়া।’ 31 “জেনসালো মান্দিনি দেফান্থি গিম্মিক সা·গ্রেরাংখো রা·এ আন·থাংনি রাসংও রি·বানুয়া উনসালো রাজা হং·এ আন·থাংনি রাসংনি সিংহাসনও আসংনুয়া। 32 উনসালো গিম্মিক জাতনি মান্দিরাংখো বিনি মিকখাংও উনসান চিম্মংনুয়া। রাক্ষুয়াল জেদাক্কে মেষ আরো দ·মকখো দিংথাং দাক্কা উয়ানদাক্কে বিয়া দিমদাক মান্দিরাংখো বাকগ্মি দাক্কে দিংথাং দাকনুয়া। 33 বিয়া আন·থাংনি জাক্রাচা মেষরাংখো আরো জাক্কাসিচা দ·মকরাংখো দন্নুয়া। 34 “উনি জা·মানো রাজা আন·থাংনি জাক্রাচা দংগিবা মান্দিরাংনা আগান্নুয়া, ‘না·সং জেরাং আংনি ফানি ফাত্তিয়াখো মান·জক, রি·বাবো। হা·গিলসাক হা·বাচেংওনি না·সংনা দাকসোগিবা সংনকখো মান·রিকবো। 35 আংনি অকখ্রিয়াও না·সং আংনা চা·না হ·ন্নামিং; রিংআসিও রিংনা হ·ন্নামিং; সকগিবা হং·ও নকচাকামিং; 36 বে·এনো বা·রা দংজাও বা·রা গান্নেতামিং; জম্মে-সাএ দংও আংখো নিরকখিয়ামিং; আরো আংআ ফাতোকো দংও আংখো নিনা রি·য়াংআমিং।’ 37 “উনোন ইসলনা খা·ফাকগিবা উয়া মান্দিরাং বিনা আগানচাকনুয়া, ‘গিত্তেল, বাসোকো নাং·নি অকখ্রিয়াখো নিক্কে নাং·না চা·না হ·ন্নামিং বা রিংনা হা·সিকাখো নিক্কে রিংনা হ·ন্নামিং? 38 নাং·নি সকগিবা হং·আখো নিক্কে বাসোকো নাং·খো নকচাকামিং, বা বা·রাগ্রি বে·এনখো নিক্কে বা·রা গান্নেতামিং? 39 আরো বাসোকো নাং·নি জম্মাখো বা ফাতোকো দংআখো হা·আইএ নাং·চা রি·য়াংআমিং?’ 40 “রাজা উনো বিসংনা আগানচাকনুয়া, ‘আংআ না·সংনা বিবিন আগানিংআ, আংনি ইয়া জংআদারাংওনি চনবাৎগিবা সাকসানা জেনসালো উখো দাক্কামিং উনো আংনান উখো দাক্কামিং।’ 41 “জা·মানো বিয়া জাক্কাসিচা দংগিবা মান্দিরাংনা আগান্নুয়া, ‘ও শাপ মান·গিবা মান্দিরাং, আংচানি না·সং রি·য়াংবো। শয়তান আরো উনি সা·গ্রেরাংনা দাকসোআ ফাংনাজলনি ওয়া·আলোনা রি·য়াংবো। 42 আংআ অকখ্রিয়ামিং না·সং আংনা চা·না হন·জাজক; রিংআসিয়ামিং রিংনা হন·জাজক; 43 চাচ্চি সক্কামিং নকচাকজাজক; বে·এনো বা·রা দংজামিং আংনা বা·রা গান্নেতজাজক; জম্মামিং আরো ফাতোকো দংআমিং আংখো নিনা রি·য়াংজাজক।’ 44 “উনোন বিসং বিনা আগান্নুয়া, ‘গিত্তেল, বাসোকো নাং·নি অকখ্রিয়াখো বা রিংনা হা·সিকাখো নিক্কে, বা চাচ্চি সক্কাখো নিক্কে, বা বা·রাগ্রি বে·এনখো নিক্কে, বা জম্মাখো বা ফাতোকো দংআখো হা·আইএ দাকচাকজাজক?’ 45 “বিয়া বিসংনা আগানচাকনুয়া, ‘আংআ না·সংনা বিবিন আগানিংআ, জেনসালো না·সং ইয়া চনগিবারাংওনি সাকসানা উখো দাকজাজক উনো আংনান উখো দাকজাজক।’ ” 46 জা·মানো যীশু আগানজক, “ইয়া মান্দিরাং ফাংনাজলনা শাস্তিখো মা·ন্না রি·য়াংনুয়া, ইন্দিবা ইসলনা খা·ফাকগিবা উয়া মান্দিরাং ফাংনাজলনি জাংগিখো মান·রিকনুয়া।”

মথি 26

1 ইয়া খাৎথারাংখো আগানমান্নোন যীশু আন·থাংনি জা·রিকগিবারাংনা আগানজক, 2 “না·সংদে হা·আইয়া দা·আও সালগ্মিনি জা·মানো ওয়াতচাংআনি সাল হং·নুয়া, আরো মান্দিনি দেফান্থিখো চিসলো দাৎখাপনা রি·ম্মে হ·ন্নুয়া।” 3 উনোন খামাল দাল·গিবারাং আরো যিহূদীরাংনি মি·আফারাং দাল·বাৎগিবা খামাল কাইয়াফানি নক্কো থম·জক আরো যীশুখো মিৎথিনাও রি·ম্মে স·ওতনা খু·মংগ্রিকজক। 5 ইন্দিবা বিসং আগানজক, “পর্বনি সালো হং·জা; ইনি গিম্মিন মান্দিরাংনি গিসেপো গোলমাল হং·নাবা দংআ।” 6 যীশু বৈথনিয়াচা খনচিরিত্তামগিবা শিমোননি নক্কো দংমিত্তিংও মিচিক সাকসা বিচা রি·বাজক। 7 উয়া মিচিক গি·সা গ্বিবক রং·থিনি দনচাক্রাও দাক্কে গামচাৎগিবা সিম্মিলগিবা তেলখো রা·বাজক। যীশুনি চা·না আসংমিত্তিংও বিয়া যীশুনি স্খুও উয়া সিম্মিলগিবা তেলখো রুদাপজক। 8 জা·রিকগিবারাং উখো নিক্কে মা·নেংএ আগানজক, “ইয়া গামচাৎগিবা জিনিসখো মুয়ানা নাসিয়েতিংজক? 9 ইখো থাংখা বাং·আনা ফাল্লোদে উয়া থাংখাখো দিল্লা-চন্নারাংনা হ·ন্না মা·ন্নুয়ামিং।” 10 যীশু ইয়া খাৎথাখো হা·আইনা মা·ন্নে জা·রিকগিবারাংনা আগানজক, “না·সং ইয়া মিচিকখো মুয়ানা দুক হ·ন্নিংআ? বিয়াদে আংনা নাম্মাখোন দাকজক। 11 দিলগিবারাং না·সংমুং ফাংনান দংআ, ইন্দিবা আংখো না·সং ফাংনান মান·জানুয়া। 12 বিয়া আংনি বে·এননি সাক্কাও ইয়া সিম্মিলগিবা তেলখো রুদাপে আংখো গোপনা থারিসোএ দনজক। 13 আংআ না·সংনা বিবিন আগানিংআ, হা·গিলসাকনি জেও জেও নাম্মা খাৎথাখো আগানফ্রাকনুয়া উয়োন ইয়া মিচিকনি খাৎথাখো গিসিক রা·এতনা গিত্তা বিনি ইয়া কামনি খাৎথাখোবা আগানা হং·নুয়া।” 14 উনোন উয়া সাকচিগ্মি জা·রিকগিবারাংনি গিসেপো ইষ্কারিয়োৎ মিংগিবা জা·রিকগিবা খামাল দাল·গিবারাংচা রি·য়াংএ আগানজক, 15 “যীশুখো না·সংনি জাক্কো রি·ম্মে হ·ন্নোদে না·সং আংনা মুয়াখো হ·ন্নুয়া?” খামাল দাল·গিবারাং রূপানি থাংখা খলাৎচিখো চান্নে বিনা হন·জক। 16 উনি জা·মানোন যিহূদা যীশুখো রি·ম্মে হ·ন্না চল সান্দিনা হা·বাচেংজক। 17 ওয়ানথিগ্রি রুটি চা·আনি স্খাংগিবা সালো জা·রিকগিবারাং যীশুচা রি·বাএ আগানজক, “নাং·না ওয়াতচাংআনি মিয়াথামখো বানো থারিনা চিংখো আগানা?” 18 যীশু আগানজক, “সংজিলমাওনা রি·য়াংএ উয়া মান্দিনা ইন্দাকে আগানবো, স্খিগিবা আগানা, ‘আংনি সাল সকবাজক। আংনি জা·রিকগিবারাংমুং আংআ নাং·নি নক্কোন ওয়াতচাংআনি সালখো মানিনুয়া।’ ” 19 যীশুনি গি·য়েতা গিত্তান জা·রিকগিবারাং ওয়াতচাংআনি মিয়াথামখো থারিজক। 20 হান·থামানি জা·মানো যীশু উয়া সাকচিগ্মি জা·রিকগিবারাংখো রা·এ চা·না আসংজক। 21 চা·মিত্তিংও বিয়া আগানজক, “আংআ না·সংনা বিবিন আগানিংআ, না·সংনি গিসেপো সাকসা আংখো বোবিলরাংনি জাক্কো রি·ম্মে হ·ন্নুয়া।” 22 উনি গিম্মিন জা·রিকগিবারাং নাম্মেন দুক মা·ন্নে সাকফ্রাক সাকফ্রাক যীশুচা সিং·না হা·বাচেংজক, “উয়া আংআনমা, গিত্তেল?” 23 বিয়া বিসংনা আগানচাকজক, “আংমুং চা·চাক্রাও জাক হন·গিবান আংখো রি·ম্মে হ·ন্নুয়া। 24 মান্দিনি দেফান্থিনি গিম্মিন রংথালগিবা শাস্ত্রও জেদাক্কে চক্কা দংআ উয়ানদাক্কেন বিয়া সিনুয়া, ইন্দিবা দা·নাং উয়া মান্দি, মান্দিনি দেফান্থিখো জে মান্দি বোবিলরাংনি জাক্কো রি·ম্মে হ·ন্না! ইনাবাত্তে উয়া মান্দি আৎচিজাওন বিনা নামনুয়ামিং।” 25 যীশুখো বোবিলরাংনি জাক্কো রি·ম্মে হ·ন্না রি·য়াংগিবা উয়া যিহূদা আগানজক, “স্খিগিবা, উয়া আংআমা?” যীশু বিনা আগানজক, “না·আ খাকখেৎখোন আগানজক।” 26 চা·মিত্তিংও যীশু রুটিখো রা·এ ইসলখো মিৎথেলজক। জা·মানো বিয়া উয়া রুটিখো ফি·থংজক আরো জা·রিকগিবারাংনা হ·ন্নে আগানজক, “রা·বো, চা·বো, ইয়ান আংনি বে·এন।” 27 উনি জা·মানো বিয়া রিংচাক্রাখো রা·এ ইসলখো মিৎথেলজক আরো উখো জা·রিকগিবারাংনা হ·ন্নে আগানজক, “রিংচাক্রানি ইয়া আঙ্গুরনি বিৎচিখো না·সং দিমদাকান রিংবো, 28 মুয়ানা ইয়ান আংনি হান·চি জেখো পাপনিখো ক্ষেমা মান·খানা ইন্নে বাং·আনা হ·ন্নুয়া। মান্দিনি গিম্মিন ইসলনি গিত্তাল খু·রাচাক্কানি আংনি ইয়া হান·চিওন দংনুয়া। 29 আংআ না·সংনা আগানিংআ, দা·আওনি আংনি ফানি সংনক্কো জেনসালোনা দিপ্পাৎ না·সংমুং গিত্তাল দাক্কে আংগুরনি বিৎচিখো রিংজানুয়া উনোনা দিপ্পাৎ আংআ উখো রিংজানুয়া।” 30 জা·মানো বিসং গীত মিংসাখো রিং·এমুং হং·খাতে জৈতুন হা·ব্রিওনা রি·য়াংজক। 31 জা·মানো যীশু আন·থাংনি জা·রিকগিবারাংনা আগানজক, “দা·আল ওয়ালো আংখো রা·এ না·সংনি গিম্মিকনি গিসিকো জাব্রাংনুয়া। রংথালগিবা শাস্ত্রও চক্কা দংআ, ‘আংআ রাক্ষুয়ালখো স·ওতে গালনুয়া, উনোন মেষরাং বিলদিংবিলদাং হং·নুয়া।’ 32 ইন্দিবা আংআ সিয়াওনি থাংচাফিল্লানি জা·মানো না·সংনা স্খাংআন আংআ গালীলচা রি·য়াংনুয়া।” 33 উনোন পিতর বিনা আগানজক, “নাং·খো রা·এ দিমদাকনি গিসিকো জাব্রাংওবা আংনি গিসিকো জাব্রাংজানুয়া।” 34 যীশু বিনা আগানজক, “ইন্দিবা আংআ নাং·না বিবিন আগানিংআ, দা·আল ফ্রিংওয়ালো দো·ও গিসিকনা স্খাংআন না·আ রাং·গিত্থাম আংখো হা·আইজা ইন্নে জিচাকনুয়া।” 35 পিতর যীশুনা আগানজক, “আংআ নাং·মুং সিফানা নাং·ওবা আংআ নাং·খো হা·আইজা ইন্নে মামুং সালোবা জিচাকজানুয়া।” গিম্মিক জা·রিকগিবারাংআন উয়া খাৎথাখো আগানজক। 36 জা·মানো যীশু জা·রিকগিবারাংমুং গেৎশিমানী মিংগিবা হা·দাম দামসাচা রি·য়াংজক আরো জা·রিকগিবারাংনা আগানজক, “আংআ উয়োনা রি·য়াংএ বি·মিত্তিংও না·সং ইনো আসংএ দংবো।” 37 ইখো আগানে বিয়া পিতর আরো সিবদিয়নি দেফান্থি সাকগ্মিখো রিম্মাংজক। বিয়া খা·থংও দুক মা·ন্না আরো সা·দিকাখো মা·ন্না হা·বাচেংজক। 38 বিয়া বিসংনা আগানজক, “দুকনি গিম্মিন আংনি জাংগি হং·খাতাংনা গিত্তিক দাক্কিংজক। না·সং ইয়োন দংবো আরো আংমুং মিকরাকে দংবো।” 39 জা·মানো বিয়া অকখিসা চে·ল্লাচানা রি·য়াংএ হা·আও থুচিকপজক আরো বি·এ আগানজক, “আপফা, মা·ন্নোদে দুকনি ইয়া রিংচাক্রা আংওনি চে·ল্লাংখানা। ইন্দিবা আংনি হা·সিকা গিত্তা হং·জা, নাং·নি হা·সিকা গিত্তান হং·খানা।” 40 উনি জা·মানো বিয়া জা·রিকগিবারাংচা রি·বাএ বিসংনি থুয়াখো নিকনা মান·জক। বিয়া পিতরনা আগানজক, “ইয়া বাদাকজক! আংমুং না·সং ঘণ্টাসা মামাংবা মিকরাকে দংনা মান·জাজকমা? 41 পরীক্ষাও গা·আকজানা গিত্তা মিকরাকে দংবো আরো বি·বো। গিসিকদে হা·সিকা, ইন্দিবা বে·এন বিলগ্রি।” 42 বিয়া রি·য়াংফিল্লে রাং·গ্মিগিবাও বি·এ আগানজক, “আপফা, আংনি রা·চাকজানা ইয়া দুকনি রিংচাক্রা চে·ল্লাংজাওদে ইন্দাকোদে নাং·নি হা·সিকা গিত্তান হং·খানা।” 43 বিয়া ফিল·বাএ বিসংনি থুয়াখো দা·আবা নিকনা মান·জক, মুয়ানা বিসংনি মিক্রোন থুনা হা·সিকে জ্রিমবিয়ামিং। 44 ফি·ল্লে বিয়া বিসংখো ওয়াত্তে রাং·গিত্থামগিবাও উয়া খাৎথাখোন আগানে বি·জক। 45 জা·মানো বিয়া জা·রিকগিবারাংচা রি·বাএ আগানজক, “দা·আওবা না·সং থুয়ে দংআ আরো নেং·থাকিংআ? নিবো, সাল সকবাজক, মান্দিনি দেফান্থিখো পাপীরাংনি জাক্কো রি·ম্মে হ·ন্নুয়া। 46 চাখাতবো, রি·বো, আনচিং রি·নাজক। নিবো, আংখো বোবিলরাংনি জাক্কো রি·ম্মে হন·গিবা সকবাজক।” 47 যীশু উনোবা খাৎথা আগানিংআমিং, উয়া সময়ও যিহূদা উয়োনা রি·বাজক। বিয়া উয়া সাকচিগ্মি জা·রিকগিবারাংওনি সাকসামিং। বিমুং বাং·আ মান্দি মি·ল্লাম আরো মাংগতখো রা·এ রি·বাজক। খামাল দাল·গিবা আরো মি·আফারাং ইয়ারাংখো ওয়াত্তেতামিং। 48 যীশুখো বোবিলরাংনি জাক্কো রি·ম্মে হন·গিবা উয়া যিহূদা উয়া মান্দিরাংনা গি·সা চিনখো হ·ন্নে আগানামিং, “জেখো আংআ খু·দিমনুয়া বিয়ান উয়া মান্দি; না·সং বিখো রিম·বো।” 49 উনি গিম্মিন যিহূদা বিক্‌বিক্‌ রি·য়াংএ যীশুচা আগানজক, “স্খিগিবা, সালাম।” ইয়া খাৎথাখো আগানে বিয়া যীশুখো খু·দিমজক। 50 যীশু বিনা আগানজক, “রিপ্পেং, জেখো দাকনা রি·বাজক, দাকবো।” উনোন মান্দিরাং রি·বাএ যীশুখো রিম·জক। 51 যীশুমুং দংগিবারাংওনি সাকসা বিনি মি·ল্লামখো রং·খাতজক আরো উচা খামাল দাল·বাৎগিবানি নকখলনি নাচিল সামসাখো দেন·ফাকে গালজক। 52 উনো যীশু বিনা আগানজক, “নাং·নি মি·ল্লামখো বিখপো দনবো। মি·ল্লামখো রিম·গিবারাং মি·ল্লামনান সিয়া। 53 আংআ আংনি ফাখো রিক্কামজোকনো বিয়া দা·আওন আংনা হাজাল হাজাল সা·গ্রেরাংখো ওয়াত্তেতজানুয়া ইন্নে না·আ চানচিয়ামা? ইন্দিবা ইন্দাকোদে রংথালগিবা শাস্ত্রনি খাৎথা বাদিকে দাক্কে চু·সকনুয়া? 54 শাস্ত্রওদে চক্কা দংআ ইয়ারাং ইন্দাকেন হং·নুয়া।” 55 জা·মানো যীশু মান্দিরাংনা আগানজক, “আংআ ডাকাতমা, না·সং মি·ল্লাম আরো মাংগতখো রা·এ আংখো রিম·না রি·বাজক? আংআ ফাংনান থরম নক্কো আসংএ স্খিনুয়ামিং, আরো উনোদে না·সং আংখো রিম·জাজক। 56 ইন্দিবা ইয়ারাং হং·জক জেদাক্কে রংথালগিবা শাস্ত্রও আগানসোগিবারাংনি চকগিবা খাৎথা চু·সকা।” গিম্মিক জা·রিকগিবারাং উনো যীশুখো ওয়াত্তে খাত্তাংজক। 57 যীশুখো রিম·গিবারাং যীশুখো দাল·বাৎগিবা খামাল কাইয়াফাচা রিম্মাংজক। উয়ো শাস্ত্র স্খিগিবারাং আরো মি·আফারাং উনসান থ·ম্মামিং। 58 পিতর চেল·গ্রিকে দংএ যীশুখো জা·রিকফাএ খামাল দাল·বাৎগিবানি হা·থিলাওনা রি·য়াংজক আরো বন·খামাও মুয়া হং·আ উখো নিনা নিং·আচা নাপ্পে নিথিমগিবারাংমুং আসংজক। 59 যীশুখো স·ওতে গালনা ইন্নে খামাল দাল·গিবারাং আরো দাল·বাৎগিবা খ্রিমানি গিম্মিক মান্দিরাং বু·এ সাক্ষি হ·ন্নাখো সান্দিংআমিং। 60 বু·এ সাক্ষি হন·গিবা বাং·আমিং, ইন্দাকোবা বিসং নাম্মেদাক্কে মামুং সাক্ষিখোন মান·জাজক। জা·মানো মান্দি সাকগ্মি রি·বাএ আগানজক, 61 “ইয়া মান্দি আগানামিং, বিয়া ইসলনি নকখো ফি·এ গাল্লে দা·আবা সালগিত্থামনি সালো থারিয়ে হ·ন্না মা·ন্না।” 62 উনোন খামাল দাল·বাৎগিবা চাখাত্তে যীশুনা আগানজক, “না·আ মামুংখো আগানচাকজানোমা? ইয়ারাং নাং·নি সাক্কাও বাদাকগিবা সাক্ষিখো হ·ন্নিংজক?” 63 যীশু ইন্দিবা জ্রিপ দংআরিজক। দাল·বাৎগিবা খামাল ফি·ল্লে বিনা আগানজক, “না·আ থাংগিবা ইসলনি বিমুংও মিকচেত্তে আগানবো, না·আন উয়া খ্রীষ্ট, ইসলনি দেফান্থি।” 64 উনো যীশু বিনা আগানজক, “হো·এ, না·আ খাকখেৎখোন আগানজক। ইন্দাকোবা আংআ না·সংনা ইখোবা আগানিংআ, ইনি জা·মানো না·সং মান্দিনি দেফান্থিখো বিল্লাকবাৎগিবা ইসলনি জাক্রাচা আসংআখো নিকনা মা·ন্নুয়া আরো গাদিলাও দাক্কে রি·বাখো নিকনুয়া।” 65 উনোন খামাল দাল·বাৎগিবা বা·রাথাংখো চিত্তে আগানজক, “বিয়া ইসলখো চন্নিকজক। আনচিংনা দা·আবা মুয়ানা সাক্ষি নাংনুয়া? বিয়া ইসলখো চন্নিকজক, ইখো দা·আওন না·সং খিন্নাজক। 66 না·সং বাদিকে চানচিয়া?” বিসং আগানচাকজক, “বিয়া সিনান খ্রাআ।” 67 উনো মান্দিরাং যীশুনি মিকখাংখো খু·চিদাপজক আরো জাকথমে দকজক। 68 বিসং আগানজক, “ও খ্রীষ্ট, আগানবোদা, সা নাং·খো দকজক?” 69 উনো পিতর হা·ফালচা আসংএ দংআমিং। সাকসা নকখল মিচিক বিচা রি·বাএ আগানজক, “গালীলনি যীশুমুং না·আবা দংআমিং।” 70 ইন্দিবা পিতর দিমদাকনি মিকখাংও জিচাকে আগানজক, “না·আ মুয়াখো আগানিংআ উখো আংআ হা·আইজা।” 71 উনি জা·মানো পিতর হা·ফালনি দ·গাচিলোনা রি·য়াংজক। বিখো নিক্কে দা·আও সাকসা নকখল মিচিক উয়ো দংগিবা মান্দিরাংনা আগানজক, “ইয়া মান্দিদে নাসরতনি যীশুমুং দংআমিং।” 72 উনোন পিতর ফি·ল্লে মিকচেত্তে জিচাকে আগানজক, “আংআ উয়া মান্দিখো হা·আইজা।” 73 উয়ো চাদেংএ দংগিবারাং দিকদিকসা জা·মানো রি·বাএ পিতরনা আগানজক, “বিবিন না·আ বিসংনি সাকসা; নাং·নি খুসি·কান নাং·খো রি·ম্মে হ·ন্নিংআ।” 74 উনোন পিতর আন·থাংখো শাপ হন·জক আরো মিকচেত্তে আগান্না হা·বাচেংজক, “আংআ উয়া মান্দিখো হা·আইজা।” উনোন দো·ও মাংসা গিসিকজক। 75 উনোন পিতর গিসিক রা·জক যীশু আগানামিং, “দো·ও গিসিকনা স্খাং না·আ রাং·গিত্থাম আংখো হা·আইজা ইন্নে জিচাকনুয়া।” আরো পিতর হা·ফালচা রি·য়াংএ গ্রাপনা হা·বাচেংজক।

মথি 27

1 ফ্রিংও খামাল দাল·গিবারাং আরো মি·আফারাং দিমদাকান যীশুখো স·ওতে গালনা খু·মংগ্রিকজক। 2 বিসং যীশুখো খাএমুং রোমনি দাল·বাৎগিবা শাসন দাকগিবা পীলাতনি জাক্কো হন·জক। 3 যীশুখো বোবিলরাংনি জাক্কো রি·ম্মে হন·গিবা উয়া যিহূদা বিচালও যীশুখো দোসী ইন্নে ফত্তাখো নিক্কে বিয়া গিসিকো দুক মান·জক। বিয়া খামাল দাল·গিবা আরো মি·আফারাংচা রি·য়াংএ রূপানি উয়া থাংখা খলাৎচিখো ফি·ল্লেতি আগানজক, 4 “আংআ দোসগ্রিখো স·ওতে গালনা রি·ম্মে হ·ন্নে পাপ দাকজক।” বিসং আগানজক, “ইনা চিংনি মুয়া হং·আ? না·আন উখো হা·আইজক।” 5 উনোন যিহূদা রূপানি উয়া থাংখা খলাৎচিখো রা·এ থরম নক্কোনা গাল্লে রি·য়াংজক আরো গিদ্দকো দুুরি খাএ সিজক। 6 খামাল দাল·গিবারাং রূপানি উয়া থাংখারাংখো রা·এ আগানজক, “ইয়া থাংখারাংখো থরম নকনি থাংখা দনচাক্রাও দন্না থিক হং·জা, মুয়ানা ইয়া হান·চিনি দাম হং·আ।” 7 জা·মানো বিসং উয়া থাংখাচা সংগিপ্পিননি মান্দিরাংনা গি·সা গোপরামনি গিম্মিন হা·বা ব্রিজক। 8 উনি গিম্মিন উয়া হা·বাখো দা·আওবা ‘হান·চিনি হা·বা’ মিংআ। 9 ইনি গিম্মিন আগানসোগিবা যিরমিয়নি আগানসোগিবা খাৎথা চু·সকজকঃ “বিসং রূপানি থাংখা খলাৎচিখো রা·জক। ইয়া থাংখা বিনি দাম। ইস্রায়েলীরাং বিনি গিম্মিন ইয়া দামখো থারিয়ামিং। 10 গিত্তেল আংনা জেদাক্কে গি·য়েতামিং উয়ানদাক্কেন বিসং কুমারনি হা·বানি গিম্মিন ইয়া থাংখারাংখো হন·জক।” 11 যীশু শাসন দাকগিবা পীলাতনি মিকখাংও চাদেংএ দংআমিং। শাসন দাকগিবা বিখো সিং·জক, “না·আ যিহূদীরাংনি রাজামা?” যীশু আগানচাকজক, “না·আ খাকখেৎখোন আগানজক।” 12 খামাল দাল·গিবারাং আরো মি·আফারাং যীশুখো বাং·এ গ্রোনাংএতজক ইন্দিবা যীশু মামুংখো আগানচাকজাজক। 13 উনো পীলাত বিনা আগানজক, “বিসং নাং·খো বাচ্ছিকিন গ্রোনাংএতইংজক উখো না·আ খিন্নানা মান·জাংআমা?” ইন্দিবা যীশু মিংসা খাৎথাখোবা আগানচাকজাজক। 14 উনি গিম্মিন উয়া শাসন দাকগিবা নাম্মেন আইয়াও ইনমানজক। 15 গিম্মিক ওয়াতচাংআনি সালরাংও দাল·বাৎগিবা শাসন দাকগিবা মান্দিরাংনি নামনিকগিবা সাকসা বন্দিখো ওয়াত্তেতনুয়ামিং। ইয়ান বিনি বেওয়ালমিং। 16 উয়া সময়ও বারা্ববা মিংগিবা সাকসা নামবাৎজাগিবা বন্দি দংআমিং। 17 মান্দিরাং আপসান থম·দাকানি জা·মানো পীলাত বিসংচা সিং·জক, “না·সং মুয়াখো হা·ম্মিংআ? না·সংচা আংআ সাখো ওয়াত্তেতনুয়া, বারা্ববাখোমা খ্রীষ্ট মিংগিবা উয়া যীশুখো?” 18 মান্দিরাং মিকনেংইন যীশুখো রি·ম্মে হন·জক, পীলাত ইখো হা·আইয়ামিং। 19 পীলাত বিচাল দাকনা আসংএ দংমিত্তিংও বিনি জিকগিবা বিনা ইন্দাকে আগানে ওয়াত্তেতজক, “উয়া গ্রোনাংগিজাগিবা মান্দিখো না·আ দা·আ মামুংখো দাক্কা, মুয়ানা দা·আল আংআ জুমাংচা বিনি গিম্মিন নাম্মেন দুক মান·জক।” 20 ইন্দিবা খামাল দাল·গিবারাং আরো মি·আফারাং মান্দিরাংখো ইন্দাকে স্খিয়েতজক জেদাক্কে বিসং বারাববাখো ওয়াতখানা আরো যীশুখো স·ওতে গালখানা আগানা। 21 জা·মানো দাল·বাৎগিবা শাসন দাকগিবা মান্দিরাংচা সিং·জক, “ইয়া সাকগ্মিনি গিসেপো আংআ সাখো না·সংচা ওয়াত্তেতনুয়া?” বিসং আগানজক, “বারাববাখো।” 22 উনো পীলাত বিসংনা আগানজক, “ইন্দাকোদে জেখো খ্রীষ্ট মিংআ উয়া যীশুখো আংআ মুয়াখো দাকনুয়া?” বিসং দিমদাকান আগানজক, “বিখো চিসলো দাৎখাপবো।” 23 পীলাত আগানজক, “মুয়ানা, বিয়া মুয়া নামগিজাখো দাকজক? ইনা বিসং আরোবা বাং·এ চ্রিকে আগান্না হা·বাচেংজক, বিখো চিসলো দাৎখাপবো।” 24 পীলাত নিকনা মান·জক বিয়া মামুংখোন দাকনা মান·জাংজক ইন্দিবা আরোবা বাং·এ গোলমাল হং·বাখো নিক্কে বিয়া মান্দিরাংনি মিকখাংও চি রা·এ জাকসুএ আগানজক, “ইয়া মান্দিনি হান·চিনি গিম্মিন আংআ গ্রো নাংজা; না·সংআন উখো হা·আইনুয়া।” 25 দিমদাক মান্দিরাং আগানচাকজক, “চিংআ আরো চিংনি বি·সারাং বিনি হান·চিনা গ্রো নাংনুয়া।” 26 উনোন পীলাত বারা্ববাখো মান্দিরাংনি জাক্কো ওয়াত্তেতজক, ইন্দিবা যীশুখো নাম্মেদাক্কে চাবুকচা দকখানা আগানে চিসলো দাৎখাপনা হন·জক। 27 উনো দাল·বাৎগিবা শাসন দাকগিবা পীলাতনি সিপাইরাং যীশুখো রা·এ বিনি নকনিংওনা রি·য়াংজক আরো যীশুখো উইলউইলে গিম্মিক সিপাইরাংখো থম·দাকেতজক। 28 বিসং যীশুনি বা·রাখো অক্কেমুং বিনা গিৎচাক ম্রাং বা·রাখো ফাতজক। 29 জা·মানো বিসং বুসুনি মুকুটখো থারিয়ে বিনি স্খুও স্থিকেতজক, আরো বিনি জাক্রা জাক্কো গি·সা গল·দিক হন·জক। উনি জা·মানো বিনি মিকখাংও জা·স্খু দে·ম্মে বিখো খাল·স্থাপে আগানজক, “যিহূদীরাংনি রাজা, নাং·খো দেমিৎথেলা!” 30 উনো বিনি বে·এনো বিসং খু·চিদাপজক আরো উয়া গল·দিকচা বিনি স্খুও রাং·নিরাং দকজক। 31 বিখো খাল·স্থাপানি জা·মানো বিসং উয়া বা·রাখো এংএ রা·জক আরো বিনি বা·রাথাংখো ফাত্তে বিখো চিসলো দাৎখাপনা রিম্মাংজক। 32 উয়োনি হং·খাতমিত্তিংও সিপাইরাং কুরীণী সংজিলমানি শিমোন মিংগিবা সাকসা মান্দিখো নিকনা মান·জক। সিপাইরাং বিখো যীশুনি চিসলখো রিপ্পিএ রা·আংনা হন·জক। 33 জা·মানো বিসং ‘গল্‌গথা’ জেখো ফি·ওদে ‘স্খু বিখ্রক’ মিংগিবা হা·দামওনা রি·বাএ যীশুনা খা·আ ব্রিনগিবা বিৎচিখো রিংখানা হন·জক। যীশু উখো থাপ্পে আরবা রিংনা হাম·জাজক। 35 যীশুখো চিসলো দাৎখাপানি জা·মানো সিপাইরাং বিনি বা·রাখো লটারি খা·ল্লে আন·থাংথাংনা সুআলে রা·জক। 36 জা·মানো বিসং উয়ো আসংএ বিখো নিথিমনা হা·বাচেংজক। 37 “ইয়ান যীশু, যিহূদীরাংনি রাজা” ইন্নে গ্রোনাংআনি খাৎথাখো চক্কে বিসং চিসলো যীশুনি স্খু সাক্কাও ফা·থাপজক। 38 বিসং সাকগ্মি ডাকাতখোবা যীশুমুং চিসলো দাৎখাপজক, সাকসাখো জাক্রাচা আরো সাকসাখো জাক্কাসিচা দাৎখাপজক। 39 উয়া রামা গিত্তা রি·য়াংগিবা মান্দিরাং স্খুখো রকরেকে যীশুখো খাল·স্থাপে আগানজক, 40 “না·আনা থরম নকখো ফি·এ দা·আবা সালগিত্থামনি সালো রিকফিলনা মা·ন্না! ইন্দাকোদে দা·আও আন·থাংখো জক্কেৎবো। না·আ ইসলনি দেফান্থি হং·ওদে চিসলনি হং·খাতে রি·বাবো।” 41 খামাল দাল·গিবারাং আরো শাস্ত্র স্খিগিবারাং আরো মি·আফারাংবা বিখো খাল·স্থাপে আগানজক, 42 “বিয়া গিপ্পিনরাংখো জক্কেৎনা মা·ন্না, আন·থাংখো জক্কেৎনা মান·জা। বিয়াদে ইস্রায়েলরাংনি রাজা হং·আ! দা·আও বিয়া চিসলোনি হং·খাতে রি·বাখানা। উনোদে বিখো চিংআ বিবিরা·নুয়া। 43 বিয়া ইসলনি সাক্কাও ফাংচাকা; দা·আও ইসল বিনি সাক্কাও খুসি হং·ওদে বিখো বিয়া জক্কেৎখানা। বিয়াদে আন·থাংখো ইসলনি দেফান্থি ইন্নে আগান্নুয়ামিং।” 44 বিমুং চিসলো দাৎখাপা মান·গিবা ডাকাতরাংবা উয়া খাৎথাখোন আগানে বিখো ইনথেকজক। 45 উনিসালো সালজাৎচিও চি·গ্মি বাজিওনি গিত্থাম বাজিওনা দিপ্পাৎ সংগিম্মিক আন্দালে দংজক। 46 গিত্থাম গিত্তা বাজিও যীশু গাম·বিয়ে আগানজক, “এলী, এলী, লামা শবক্তানী,” ফি·ওদে “আংনি ইসল, আংনি ইসল, মুয়ানা না·আ আংখো ওয়াতগালজক?” 47 উয়ো চাদেংএ দংগিবারাংনি গিসেপো মিত্তামরাং ইখো খিন্নাএ আগানজক, “বিয়া এলিয়খো রিক্কামিংআ।” 48 উনোন উরাংনি গিসেপো সাকসা রি·য়াংগাল্লে বিৎচিও সপন্‌জখো সিম·চিম্মে হন·জক আরো গি·সা গল·দিকো উখো সিকসেপে যীশুনা রিংখানা হন·জক। 49 সাকগিপ্পিনরাং আগানজক, “নিনা এলিয় বিখো জক্কেৎনা রি·বামা রি·বাজা।” 50 যীশু দা·আবা চ্রিকজক আরো উনি জা·মানো জাংগি গালজক। 51 উনো থরম নকনি দিমফেংগিবা পর্দা চিতগ্মি দাক্কে সাক্কাওনি খা·মাওনা দ্রাকারিজক; আরো বাংগুরিজক আরো দা·ল্লা দা·ল্লা রং·থিরাং ব্রেতজক। 52 মিত্তাম গোপরামরাং বাংবাং হং·জক আরো ইসলনি জে মান্দিরাং সিজকমিং বিসংনি গিসেপো বাং·এন থাংচাফিলজক। 53 বিসং গোপরামওনি হং·খাতে রি·বাজক আরো যীশু সিয়ানি থাংচাফিল্লানি জা·মানো বিসং রংথালগিবা সংজিলমাচা রি·য়াংজক। বিসং উয়ো বাং·আরাংনা মিকখাং ফা·জক। 54 সুবিদার আরো বিমুং দংফাএ জেরাং যীশুখো রাক্ষিংআমিং বিসং বাংগুরিয়া আরো ইন্দাকে হং·আরাংখো নিক্কে নাম্মেন খেন্নে আগানজক, “বিবিন ইয়া ইসলনি দেফান্থি হং·আমিং।” 55 বাং·আ মিচিকরাংবা উনি চে·ল্লাও চাদেংএ দিমদাকখোন নিংআমিং। যীশুনা দাকচাকে হ·ন্না বিসং যীশুমুং গালীলচানি রি·বামিং। 56 বিসংনি গিসেপো মগ্‌দলীনী মরিয়ম, যাকোব আরো যোষেফনি মা·গিবা মরিয়ম আরো সিবদিয়নি দেফান্থি যাকোব আরো যোহননি মা·গিবা দংআমিং। 57 হান·থামানি জা·মানো অরিমাথিয়া সংনি যোষেফ মিংগিবা মা·ন্নে চা·গিবা সাকসা মান্দি উয়োনা রি·বাজক। বিয়া যীশুনি জা·রিকগিবামিং। 58 পীলাতচা রি·য়াংএ বিয়া যীশুনি মাংগিসিখো হাম·জক। উনো পীলাত বিনা উয়া মাংগিসিখো হ·ন্না গি·য়েৎজক। 59 যোষেফ যীশুনি মাংগিসিখো রা·আংএ চি·রংগিবা বা·রাও ফিনগপজক, 60 আরো হা·ব্রিও আন·থাংনা জে গিত্তাল গোপরামখো খিত্তে দন্নামিং উয়োন উয়া বে·এনখো দনজক। জা·মানো উয়া গোপরামনি মিকখাংও গি·সা দা·ল্লা রং·থিখো রমথম্মে দন্নে রি·য়াংজক। 61 ইন্দিবা মগ্‌দলীনী মরিয়ম আরো উয়া সাকগিপ্পিন মরিয়ম উয়া গোপরামনি মিকখাংও আসংএ দংজক। 62 উনি সালসাও, আগানস্খাওদে থারিয়ানি সালনি সালসাও খামাল দাল·গিবারাং আরো ফরীশীরাং পীলাতচা থম·দাকে রি·য়াংএ আগানজক, 63 “গিত্তেল, চিংআ গিসিক রা·জক, উয়া বু·এ চা·গিবা থাংএ দংমিত্তিংও আগানামিং, ‘আংআ সালগিত্থামনি জা·মানো থাংচাফিলনুয়া।’ 64 উনি গিম্মিন সালগিত্থামনা দিপ্পাৎ গোপরামখো নিথিমে দংনা গি·য়েৎবো। ইন্দাকজাওদে বিনি জা·রিকগিবারাং রি·বাএ বিনি মাংগিসিখো চা·ওয়ে রা·আংএ মান্দিরাংনা আগান্নুয়া, ‘বিয়া সিয়াওনি থাংচাফিলজক।’ ইন্দাকোদে স্খাংনি বু·আনা বাত্তে জা·মাননি বু·আ নামবাৎজানুয়া।” 65 উনোন পীলাত বিসংনা আগানজক, “নিরকখিগিবারাংখো রিম্মাংএ না·সং জেদাক্কে মা·ন্না উয়ানদাক্কে নিরকখিয়েতবো।” 66 উনোন বিসং রি·য়াংএ রং·থিনি সাক্কাও সীলমোহর সু·জক আরো নিরকখিগিবারাংখো উয়ো দন্নে গোপরামখো নাম্মেদাক্কে নিরকখানা দনজক।

মথি 28

1 নেং·থাকানি সালনি জা·মানো আনথিনি স্খাংগিবা সালো ফ্রিংও মগ্‌দলীনী মরিয়ম আরো উয়া সাকগিপ্পিন মরিয়ম উয়া গোপরামখো নিনা রি·য়াংজক। 2 উনোন রাং·গিত্তিক বিল্লংএন বাংগুরিজক, মুয়ানা গিত্তেলনি সাকসা সা·গ্রে সালগিওনি হং·ওনবাজক আরো গোপরামনি মিকখাংনিখো রং·থিখো জিত্তেতি উনি সাক্কাও আসংজক। 3 বিনি মিকখাং মিক্‌খা রিপরাপা গিত্তা দাক্কামিং আরো বিনি বা·রাচলারাং নাম্মেন বকথলথলমিং। 4 বিনা খেনবিয়ে নিরকখিগিবারাংনি বে·এন থিল·থিলজক আরো সিবকে গা·আকে দংজক। 5 সা·গ্রে মিচিকরাংনা আগানজক, “না·সং দা·আ খেন্নাবো, মুয়ানা আংআ হা·আইয়া, জেখো চিসলো দাৎখাপামিং না·সং উয়া যীশুখো সান্দিংআ। 6 বিয়া ইনো দংজা। বিনি আগানা গিত্তা বিয়া থাংচাজক। রি·বা, বিয়া জেও থুয়ে দংআমিং উয়া হা·দামখো নিবো। 7 না·সং থেংরি দাক্কে রি·য়াংএ বিনি জা·রিকগিবারাংনা আগানেবো বিয়া সিয়াওনি থাংচাজক আরো বিসংনা স্খাং গালীলচা রি·য়াংইংজক। বিসং বিখো উয়োন নিকনুয়া। নিবো, ইয়া খাৎথাখো আংআ না·সংনা আগানজক।” 8 উয়া মিচিকরাং খেনজকমিং, ইন্দিবা বিসং নাম্মেন খুসি হং·এ বিকবিক দাক্কে গোপরামওনি রি·য়াংআরিজক আরো যীশুনি জা·রিকগিবারাংনা উখো আগান্না খাত্তাংজক। 9 উনো যীশু উয়া মিচিকরাংনি মিকখাংও রাং·গিত্তিক রি·বাএ আগানজক, “না·সংনি থম·থম হং·খানা।” উনো উয়া মিচিকরাং বিচা রি·য়াংএ বিনি জা·চকখো রি·ম্মে বিখো অলাখিজক। 10 যীশু বিসংনা আগানজক, “দা·আ খেন্নাবো; না·সং রি·য়াংএ জংআদারাংখো গালীলওনা রি·য়াংখানা আগানবো।” 11 উয়া মিচিকরাংনি রি·য়াংমিত্তিংও উয়া নিরকখিগিবারাংনি মিত্তামরাং সংজিলমাওনা রি·য়াংজক আরো হং·গিবা গিম্মিকখো খামাল দাল·গিবারাংনা আগানজক। 12 উনো খামালরাং আরো মি·আফারাং থম·দাকে খু·মংগ্রিকজক আরো উয়া সিপাইরাংনা থাংখা বাং·এ হ·ন্নে আগানজক, 13 “না·সং আগানবো, ‘ওয়াল্লো চিংনি থুয়ে দংমিত্তিংও বিনি জা·রিকগিবারাং রি·বাএ বিখো চা·ওয়ে রা·আংজক।’ 14 ইয়া খাৎথাখো দাল·বাৎগিবা শাসন দাকগিবা খিন্নানা মা·ন্নোদে চিংআ বিখো থম·থমেৎনুয়া আরো শাস্তিওনি না·সংখো জক্কেৎনুয়া।” 15 উনোন নিরকখিগিবারাং উয়া থাংখাখো রা·চাকজক আরো বিসংনা আগানা গিত্তান আগানজক। দা·আও রোরোনা দিপ্পাৎ উয়া খাৎথা যিহূদীরাংনি গিসেপো জাংএ দংআ। 16 যীশু গালীলনি জে হা·ব্রিও জা·রিকগিবারাংখো রি·য়াংখানা আগানামিং উয়া সাকচিসা জা·রিকগিবারাং উনো উয়া হা·ব্রিওনা রি·য়াংজক। 17 উয়ো যীশুখো নিক্কে বিসং বিখো অলাখিজক, ইন্দিবা মিত্তামরাংদে খেনচাকজক। 18 উনোন যীশু সেফাংও রি·বাএ বিসংনা ইয়া খাৎথাখো আগানজক, “সালগিনি আরো হা·গিলসাকনি গিম্মিক বিলখো আংনা হন·মানজক। 19 ইনি গিম্মিন না·সং রি·য়াংএ গিম্মিক জাতরাংনি মান্দিরাংখো আংনি জা·রিকগিবা থারিবো। ফাগিবানি, দেগিবানি আরো গিসিক রংথালগিবানি বিমুংও বিসংখো রিপ্পলেতবো। 20 আংআ জেখো জেখো না·সংনা গি·য়েৎজক উখো মানিখানা বিসংনা স্খিয়ে হন·বো। নিবো, চাসংনি বন·খামাওনা দিপ্পাৎ ফাংনান আংআ না·সংমুং দংআ।”

মার্ক 1

1 ইসলনি দেফান্থি যীশু খ্রীষ্টনি গিম্মিনো নাম্মা খাৎথাখো হা·বাচেংআ। 2 আগানসোগিবা যিশাইয়নি খি·তাপো ইসলনি আগানগিবা ইয়া খাৎথা চক্কা দংআ: নিবো, নাং·না স্খাং আংআ আন·থাংনি সাগ্রেখো ওয়াত্তেতিংআ। বিয়া নাং·না রামাখো থারিসোনুয়া। 3 হা·গিসি জওলো সাকসানি খু·রাং চ্রিকে আগানসোংআ, না·সং গিত্তেলনি রামাখো থারিসোবো, বিনি রি·য়ানি রামাখো স্রংএ থারিবো। 4 উয়া খাৎথা গিত্তান রিপ্পলেতগিবা যোহন হা·গিসি জওলোনা রি·য়াংএ মান্দিরাংখো রিপ্পলেতিংআমিং আরো আগানফ্রাকিংআমিং জেদাক্কে মান্দিরাং পাপওনি ক্ষেমা মা·ন্না ইন্নে গিসিক ফি·ল্লা আরো রিপ্পলা। 5 উনি গিম্মিন যিহূদিয়া হা·দকোনি আরো যিরূশালেম সংজিলমাওনি দিমদাকান যোহনচা খিন্নানা রি·বাথকজক। বিসং আন·থাংথাংনি পাপরাংখো খু·রাচাক্কানি জা·মানো যর্দন চিবিমাও যোহন বিসংখো রিপ্পলেতজক। 6 যোহন উট খিম্মিলনি বা·রাখো গান্নুয়ামিং আরো মাত বিগিলচা খাংখারিখো খানুয়ামিং। 7 বিয়া হাগুকরাংখো আরো ব্রিংনি বিজা বিৎচিখো চা·নুয়ামিং। বিয়া আগানফ্রাকমিত্তিংও ইন্দাকে আগান্নুয়ামিং, “আংনি জা·মানো সাকসা রি·বাংজক। বিয়া আংনা বাত্তে বিল্লাকবাৎগিবা হং·আ। আংআ বিনি জা·খপনি ফিতাখো বামগোপে এংনাবা খ্রাজা। 8 আংআ না·সংখো চিও রিপ্পলেতিংআ ইন্দিবা বিয়া না·সংখো রংথালগিবা গিসিকো রিপ্পলেতনুয়া।’’ 9 উয়া সময়ও যীশু গালীল হা·দকনি নাসরত সংচানি রি·বাজক, আরো যোহন বিখো যর্দন চিবিমাও রিপ্পলেতজক। 10 চিওনি গাখাতমিত্তিংও যীশু সিলগানি গ্রিনাখো আরো বিনি সাক্কাওনা কইতর গিত্তা গিসিকনি হং·ওনবাখো নিকনা মান·জক। 11 আরো উনোন সিলগাচানি ইয়া খাৎথাখো খিন্নানা মান·জক, “না·আন আংনি খা·সাগিবা দেফান্থি, নাং·ওন আংআ খুসি হং·বিয়া।’’ 12 ইনি জা·মানোন গিসিক রংথালগিবা হা·গিসি জওলোনা যীশুখো রিম্মাংজক। 13 উনো শয়তান সাল সৎব্র্রিনা দিপ্পাৎ যীশুখো বাং·এ মাদ্দুয়েতি বিখো পাপওনা গালনা হা·ম্মামিং। উনো বাং·আ মাৎবুরুংরাং দংআমিং, আরো সা·গ্রেরাং যীশুনা নিরক-নিসামে দাকচাকে হ·ন্নুয়ামিং। 14 যোহনখো জেলো দন্নানি জা·মানো যীশু গালীল হা·দকচা রি·য়াংজক। উয়োনা বিয়া ইসলনি হন·গিবা নাম্মা খাৎথাখো ইন্দাকে আগানফ্রাকনা হা·বাচেংজক, 15 “সাল সকবাজক, ইসলনি সংনক সেফাংও রি·বাজক। না·সং পাপওনি গিসিক ফিল·বো আরো ইয়া নাম্মা খাৎথাখো বিবিরা·বো।’’ 16 সালসাও যীশু গালীল সাগালনি রিক্কাম জলজল রি·য়াংআমিং। উয়া সময়ও বিয়া শিমোন আরো শিমোননি জংগিবা আন্দ্রিয়খো সাগালও জাল গোএ দংআখো নিকনা মান·জক। উয়া সাকগ্মি না·থক রিম·গিবামিং। 17 যীশু বিসংখো আগানজক, “আংমুং রি·বো। আংআ না·সংখো মান্দি রিম·গিবা দাক্কে থারিনুয়া।’’ 18 উনোন বিসং জালখো দনগাল্লে যীশুমুং রি·য়াংফাজক। 19 উনি অকখিসা চে·ল্লাচানা রি·য়াংআনি জা·মানো যীশু সিবদিয়নি সাকগ্মি দেফান্থি যাকোব আরো যোহনখো নিকনা মান·জক। বিসং আন·থাংথাংনি রিংও আসংএ জালখো থারিংআমিং। 20 যীশু বিসংখো নিক্কারিন রিক্কামজক, আরো উনোন বিসংবা ফাগিবা সিবদিয়খো গামগিবারাংমুং রিংওনা দন্নে যীশুমুং রি·য়াংফাজক। 21 যীশু আরো বিনি জা·রিকগিবারাং কফরনাহূম সংজিলমাচানা রি·য়াংজক। আরো নেং·থাকানি সালো যীশু থম·দাকরামো নাপ্পে জা·রিকগিবারাংনা স্খিনা হা·বাচেংজক। 22 মান্দিরাং বিনি স্খিয়ানা আইয়াও ইনমানজক, মুয়ানা বিয়া শাস্ত্র স্খিগিবারাং গিত্তা স্খিগিজা, বিল গ্মাংগিবা গিত্তান স্খিয়ামিং। 23 উয়া সময়ও গিসিক নামগিজাগিবা রিম·গিবা সাকসা মান্দি উয়া থম·দাকরামো দংআমিং। 24 বিয়া চ্রিকে আগানজক, “ও নাসরতনি যীশু চিংমুং নাং·নি মুয়া নাংফাআ? না·আ চিংখো ব·ন্নেতনা রি·বামা? আংআ হা·আইয়া না·আ সা, না·আন ইসলনি উয়া রংথালগিবা মান্দি।’’ 25 উনোন যীশু উখো ইন্দাতে আগানজক, ‘‘জ্রিপ দংবো, আরো উয়োনি হং·খাতবো।’’ 26 উনোন উয়া গিসিক নামগিজাগিবা উয়া মান্দিখো সাকসেলে রিম·জক আরো নাম্মেন চ্রিকদাত্তে বিনি নিং·আওনি হং·খাতে রি·য়াংজক। 27 ইখো নিক্কে মান্দিরাং আইয়াও ইনমানে আন·থাংথাংও সিং·গ্রিকে আগানজক, ‘‘ইরাং মুয়া মানচা? ইয়া বাদাকগিবা বিলগ্মাং গিত্তাল স্খিয়া? গিসিক নামগিজাগিবারাংখোবা বিয়া গি·য়েতা আরো উরাং বিনি খাৎথাখো মানিয়া।’’ 28 ইনি গিম্মিন গালীল হা·দকনি হা·দাম গিম্মিকচান যীশুনি খাৎথা গিপ্পাংজক। 29 জা·মানো থম·দাকরামনি হং·খাতে বিসং শিমোন আরো আন্দ্রিয়নি নক্কোনা নাপজক। যাকোব আরো যোহনবা বিসংমুং দংআমিং। 30 শিমোননি নিওগিবা উনো সাবিল্লাকে থুয়ে দংআমিং। যীশুনি রি·বাওন বিনি খাৎথাখো যীশুনা আগানজক। 31 উনোন যীশু বিনি সেফাংওনা রি·য়াংএ জাকখো রি·ম্মে বিখো চাখাত্তেতজক। উনি গিম্মিন বিনি জম্মা সাল·জক আরো বিয়া রি·বাগিবারাংনা চা·আনি রিংআনিরাংখো থারিয়ে হন·জক। 32 উনি সালো হান·থামও সাল নাপমানানি জা·মানো মান্দিরাং উয়া জওলনি গিম্মিক জমগিবা-সাগিবা আরো গিসিক নামগিজাগিবা রিম·গিবারাংখো যীশুচা রিমবাজক। 33 সংজিলমানি দিমদাক মান্দিন উনো উয়া নকনি দ·গাচিলোনা রি·বাএ থম·দাকজক। 34 বাং·আ জমগিবা-সাগিবা মান্দিরাংখো যীশু নাম্মেতজক আরো গিসিক নামগিজাগিবারাংখোবা হা·রিকেতজক। ইন্দিবা উয়া গিসিক নামগিজাগিবারাংখো খাৎথা আগান্না হন·জাজক, মুয়ানা যীশু সা উখো উরাং হা·আইয়ামিং। 35 সালগিপ্পিনো ওয়াল সেং·খুজাওন যীশু ফ্রিংও চাখাতজক আরো নকখো ওয়াত্তে মান্দিগ্রি মা·সুগ্রি হা·দামচা রি·য়াংএ বি·না হা·বাচেংজক। 36 শিমোন আরো বিমুং দংফাগিবারাং যীশুখো সান্দিংআমিং। 37 জা·মানো বিখো মা·ন্নে বিসং আগানজক, ‘‘গিম্মিকান নাং·খো সান্দিংআ।’’ 38 যীশু বিসংনা আগানজক, ‘‘রি·বো, আনচিং সেফাংও দংগিবা সংরাংচা রি·য়াংনা জেদাক্কে উচাবা আংআ আগানফ্রাকনা মা·ন্না, মুয়ানা উনি গিম্মিনান আংআ রি·বাজক।’’ 39 ইন্দাকে যীশু গালীল হা·দকনি দিমদাকচানা রি·য়াংএ যিহূদীরাংনি থম·দাকরামরাংও আগানফ্রাকজক আরো গিসিক নামগিজাগিবারাংখো হা·রিকেতজক। 40 জা·মানো খনচিরিত্তামগিবা সাকসা রি·বাএ জা·স্খু দে·ম্মে যীশুখো মল·মলে আগানজক, ‘‘হা·সিকমানচাওদে না·আ আংখো নাম্মেতনা মা·ন্না।’’ 41 যীশু উয়া মান্দিনা নাম্মেন খা·সাচাকজক। বিয়া জাকখো সিল্লে উয়া মান্দিখো দাংথাপেতে আগানজক, ‘‘আংআ ইখোন হা·ম্মিংআ, না·আ রংথালবো।’’ 42 আরো উনোন বিনি খনচিরিত্তামা নাম্মাংজক। 43 উনোন যীশু বিখো ওয়াত্তেতজক ইন্দিবা ইনাস্খাং বিখো রাক্কে বেং·এ আগানজক, 44 ‘‘নিবো, ইয়া খাৎথাখো দারাংনাবা দা·আ আগানাবো। ইনাবাত্তে না·আ খামালনা রি·য়াংএ আন·থাংখো ফিন্নিকবো, আরো রংথালানি গিম্মিন মোশিনি গি·য়েতা গিত্তা বলি হন·বো। উনোদে খামালরাং নাং·নি রংথালাখো হা·আইনা মা·ন্নুয়া।’’ 45 ইন্দিবা উয়া মান্দি দিমদাকচা রি·য়াংএ ইয়া খাৎথাখো আগানানি গিম্মিন যীশু মিকখাং ফা·এ দিংথাং সংরাংও নাপনা মান·জাজক। বিখো মান্দিগ্রি মা·সুগ্রি হা·দামও দংনা নাংজক; ইন্দাকোবা দিমদাকচানি মান্দিরাং বিচানা রি·বাথকজক।

মার্ক 2

1 বাং·গিজা সালনি জা·মানো যীশু দা·আবা কফরনাহূমচানা রি·য়াংফিলজক। মান্দিরাং বিখো নক্কোনা দংআখো খিন্নানা মান·জক। 2 উনোন ইন্দাকে মান্দি উনো থম·দাকজক, নক্কোনি দ·গাচিলোনা আরো দ·গাচিলোনি হা·ফালচানাবা হা·দাম চাকজাজক। যীশু মান্দিরাংচা ইসলনি খাৎথাখো আগানফ্রাকিংআমিং। 3 উনো মান্দিরাং সাকসা হা·আন জাদা সিগিবা মান্দিখো বিচানা রা·বাজক। সাকব্রি মান্দি বিখো রিপ্পিএ রা·বাংআমিং, 4 ইন্দিবা বিসং মান্দি বাং·বিয়ানি গিম্মিন যীশুনি জা·ফাংচানা বিখো রা·আংনা মান·জাজক। উনি গিম্মিন যীশুনি দংগিবাদিংদিং সাক্কানি নকখিংখো বিসং অক্কে গালজক। জা·মানো উয়া অক্কে গালগিবা বাংবাং হা·দাম গিত্তা উয়া হা·আন জাদা সিগিবানি থুচাকানিখো দিংওন্নেতজক। 5 যীশু বিসংনি বিবিরা·আখো নিক্কে উয়া হা·আন জাদা সিগিবা মান্দিখো আগানজক, ‘‘নাং·নি পাপরাংখো ক্ষেমা দাকজক।’’ 6 উনো মিত্তাম শাস্ত্র স্খিগিবারাং আসংএ দংআমিং। বিসং আন·থাংথাংনি খা·থংও চানচিংআমিং, 7 ‘‘ইয়া মান্দি মুয়ানা ইন্দাকে আগানিংআ? বিয়াদে ইসলখোসা চন্নিকিংআ। সাকসা মা·মাং ইসলনা আগ্রে, সা পাপখো ক্ষেমা দাকনা মা·ন্না?’’ 8 বিসংনি ইন্দাকে চানচিয়াখো যীশু খা·থংথাংও হা·আইনা মান·জক। উনি গিম্মিন বিসংনা আগানজক, ‘‘না·সং মুয়ানা গিসিকথাংও উরাংখো চানচিংআ? 9 ইয়া হা·আন জাদা সিগিবা মান্দিনা বাখো আগানা আলথুবাত্তা- ‘নাং·নি পাপরাংখো ক্ষেমা দাকজক’ ইন্নে আগানাখো বা ‘চাখাতবো নাং·নি থুচাকানিখো দি·থমে রি·রুরাবো’ ইন্নে আগানাখো। 10 ইন্দিবা না·সং জেদাক্কে হা·আইনা মা·ন্না হা·গিলসাকো পাপরাংখো ক্ষেমা দাকনা মান্দিনি দেফান্থিনি বিল দংআ’’- ইখো আগানানি জা·মানো বিয়া উয়া হা·আন জাদা সিগিবাখো আগানজক, 11 ‘‘আংআ নাং·না আগানিংআ, চাখাতবো, নাং·নি থুচাকানিখো দি·থমে রা·এ নকচা রি·য়াংবো।’’ 12 উনোন উয়া মান্দি চাখাত্তে বিনি থুচাকানিখো দি·থমে রা·জক আরো দিমদাকনি মিকখাংও হং·খাতে রি·য়াংজক। উনি গিম্মিন দিমদাকান আইয়াও ইনমানফিল্লে ইসলখো রাসং দাক্কে আগানজক, ‘‘ইন্দাকে দাক্কাখো আনচিং ফাংনাবা নিক্‌খুজা।’’ 13 জা·মানো যীশু দা·আবা গালীল সাগালনি রিক্কামও রি·য়াংজক। আরো বাং·আ মান্দি উনোনা রি·বাজক, আরো যীশু বিসংনা স্খিয়ে হ·ন্না হা·বাচেংজক। 14 উনি জা·মানো রামাও রি·য়াংমিত্তিংও আলফেয়েনি দেফান্থি লেবিখো খাজিনা রা·রামো আসংএ দংআখো নিকনা মান·জক। যীশু বিখো আগানজক, ‘‘রি·বাবো, আংখো জা·রিকফাবো।’’ উনো লেবি চাখাত্তে যীশুমুং রি·য়াংফাজক। 15 জা·মানো যীশু লেবিনি নক্কোনা চা·না রিংনা আসংজক। উনো বাং·আ খাজিনা গিলগিবা আরো পাপী মান্দিরাংবা যীশু আরো বিনি জা·রিকগিবারাংমুং চা·না আসংজক, মুয়ানা বাং·আ মান্দি যীশুমুং রি·য়াংফাংআমিং। 16 যীশুখো খাজিনা গিলগিবা আরো পাপী মান্দিরাংমুং চা·আখো নিক্কে ফরীশীরাংওনি শাস্ত্র স্খিগিবারাং যীশুনি জা·রিকগিবারাংনা আগানজক, ‘‘বিয়া খাজিনা গিলগিবা আরো পাপী মান্দিরাংমুং মুয়ানা চা·আংআ রিংআ?’’ 17 যীশু উখো খিন্নাএ উয়া শাস্ত্র স্খিগিবারাংনা আগানজক, ‘‘নামগিবা মান্দিরাংনা ডাক্তার নাংজা, সাগিবারাংনাসা নাংআ। আংআ থরমিরাংখো রিক্কামনা রি·বাজা, ইন্দিবা পাপীরাংখোসা রিক্কামনা রি·বা।’’ 18 সালসাও রিপ্পলেতগিবা যোহননি জা·রিকগিবারাং আরো ফরীশীরাং অকগুমুন চাক্কে দংআমিং। উখো নিক্কে মিত্তাম মান্দিরাং যীশুচা রি·বাএ আগানজক, ‘‘যোহননি জা·রিকগিবারাং আরো ফরীশীরাংনি জা·রিকগিবারাং অকগুমুন চাক্কে দংআ, ইন্দিবা নাং·নি জা·রিকগিবারাং মুয়ানা অকগুমুন চাক্কে দংজা?’’ 19 যীশু বিসংনা আগানজক, ‘‘চাওয়ারি উনসান দংআ দিপ্পাৎ চাওয়ারিনি রিপ্পেংরাং অকগুমুন চাকনা মা·ন্নামা? চাওয়ারি উনসান দংআ দিপ্পাৎদে বিসং অকগুমুন চাকনা মান·জা। 20 ইন্দিবা সাল রি·বাংজক জেনসালো বিসংচাখো চাওয়ারিখো রিম্মাংনুয়া, উনসালোন বিসং অকগুমুন চাকনুয়া।’’ 21 “দারাংবা গিৎচাম বা·রাও গিত্তাল বা·রাখো সিকথাপজা, ইন্দাকোদে উয়া গিৎচাম বা·রাওনি গিত্তাল বা·রা সালখ্রিংএ গিৎচিতাংআ, উনোদে উয়া গিৎচিতগিবা হা·দাম বাং·এ দ্রাকাংআ। 22 আরো দারাংবা গিত্তাল আংগুর বিৎচিখো গিৎচাম বিগিলনি বাসিংও দনজা। দন্নোদে গিত্তাল আংগুর বিৎচিনা বাসিংরাং বিকব্রেতে বিৎচি আরো বাসিং গি·গ্মিআন নাসিয়ানি হং·আ। ইন্দিবা গিত্তাল বিৎচিখোদে গিত্তাল বিগিলনি বাসিংওন দন্না নাংআ।’’ 23 রাং·সাও নেং·থাকানি সালো যীশু গমমি হা·বানি জাংচি গিত্তা রি·য়াংআমিং। বিনি জা·রিকগিবারাং রি·জলজলে গম বিথিখো আক্কে চা·না হা·বাচেংজক। 24 উনি গিম্মিন ফরীশীরাং যীশুখো আগানজক, ‘‘থরমনি নিয়াম গিত্তা নেং·থাকানি সালো জেখো দাকনা খ্রাজা বিসং উখো মুয়ানা দাক্কিংআ?’’ 25 যীশু বিসংনা আগানজক, ‘‘জেনসালো অবিয়াথর দাল·বাৎগিবা খামাল দংআমিং উনসালো সালসাও দায়ূদ আরো বিনি রিপ্পেংরাং নাম্মেন অকখ্রিয়ে দংআমিং, ইন্দিবা বিসংচা চা·আনি মামুং দংজামিং। উনো দায়ূদ মুয়াখো দাক্কামিং উখো না·সং বাসোকোবা পড়িখুজামা? বিয়াদে ইসলনি নক্কো নাপ্পে ইসলনা চিন·গিবা রুটিখো চা·আমিং আরো বিনি রিপ্পেংরাংনাবা উখো চা·না হ·ন্নামিং। ইন্দিবা মোশিনি নিয়াম গিত্তাদে ইয়া রুটিখো খামালরাংনা আগ্রে দারাংবা চা·না মান·জানুয়ামিং। 27 যীশু বিসংনা আরোবা আগানজক, “নেং·থাকানি সাল মান্দিনি গিম্মিন হং·আ, ইন্দিবা মান্দি নেং·থাকানি সালনি গিম্মিন হং·জা। 28 উনি গিম্মিন মান্দিনি দেফান্থি নেং·থাকানি সালনিবা নকগিবা হং·আ।”

মার্ক 3

1 উনি জা·মানো যীশু দা·আবা থম·দাকরামো রি·য়াংফিলজক। উনো জাক সিক্রেপগিবা সাকসা মান্দি দংআমিং। 2 ফরীশীরাংনি গিসেপো মিত্তামরাং যীশুখো গ্রো নাংএতনা ইন্নে চল সান্দিংআমিং। নেং·থাকানি সালো যীশু উয়া মান্দিখো নাম্মেতামা নাম্মেতজা উখো নিনা ইন্নে বিসং যীশুখো নাম্মে দাক্কে নিথিমনা হা·বাচেংজক। 3 যীশু উয়া জাক সিক্রেপগিবা মান্দিখো আগানজক, ‘‘গিম্মিকনি মিকখাংচানা রি·বাএ চাদেংবো।’’ 4 জা·মানো যীশু ফরীশীরাংচা সিং·জক, ‘‘মোশিনি নিয়াম গিত্তা নেং·থাকানি সালো নাম্মা কামখো দাকনা খ্রাআমা, নামগিজা কামখো দাকনা খ্রাআ? জাংগি জক্কেৎনা খ্রাআমা, জাংগি নাসিয়েতনা খ্রাআ?’’ ইন্দিবা ফরীশীরাং মামুংখো আগানচাকজাজক। 5 যীশু উনো খা·আওনাংএ বিসংচা নিএতজক আরো বিসংনি খা·থং রাক্কানা নাম্মেন দুক্‌ মা·ন্নে উয়া মান্দিখো আগানজক, ‘‘নাং·নি জাকখো সিল্লেতবো।’’ উয়া মান্দি জাকখো সিল্লে হ·ন্নানি জা·মানোন উনি জাকবা নামস্রাংজক। 6 উনো ফরীশীরাং হা·ফালচানা রি·য়াংজক আরো বাদিকে যীশুখো স·ওতে গালনা মা·ন্নুয়া উখো রা·এ রাজা হেরোদনি দলনি মান্দিরাংমুং খু·মংগ্রিকনা হা·বাচেংজক। 7 উনি জা·মানো যীশু বিনি জা·রিকগিবারাংমুং সাগালনি রিক্কামওনা রি·য়াংজক। গালীল হা·দকনি বাং·বিয়া মান্দিরাং বিমুং রি·য়াংফাজক। যীশুনি কাম দাক্কারাংখো খিন্নাএ যিহূদিয়া, যিরূশালেম, ইদোম, যর্দননি নালসাচানি আরো সোর আরো সীদোন সংজিলমানি গিম্মিকচানি বাং·বিয়া মান্দি বিচানা রি·বাজক। 9 যীশু বাং·বিয়া মান্দিনি গিম্মিন বিনি সাক্কাও সিকচেপচেপে গা·আকজানা গিত্তা জা·রিকগিবারাংখো আন·থাংনা গি·সা চনখালা রিংখো থারিয়ে দন্না আগানজক। 10 বিয়া বাং·আ মান্দিখো নামস্রাংএতজক ইন্নে সাগিবারাং বিখো দাংথাপেতনা সাকসা সাকসাখো সিকচেপ্‌চেপিংআমিং। 11 গিসিক নামগিজাগিবারাং জেনসালো বিখো নিকনুয়ামিং উনোন বিনি মিকখাংও হা·আও গা·আকে চ্রিকে আগান্নুয়ামিং, ‘‘না·আন ইসলনি দেফান্থি।’’ 12 ইন্দিবা যীশু বিসংখো বিয়া সা ইখো দারাংনাবা আগানজাখানা রাক্কেন বেং·নুয়ামিং। 13 উনি জা·মানো যীশু হা·ব্রিওনা গাদোয়াংজক আরো আন·থাংনি হা·সিকা গিত্তা মিত্তাম মান্দিখো বিচা রিংগামে রা·আংজক। বিসং রি·বানি জা·মানো যীশু বিসংখো আন·থাংমুং দংফানা আরো গিসিক নামগিজাগিবারাংখো হা·রিকানি বিলখো হ·ন্নে বিসংখো আগানফ্রাকনা ওয়াত্তেতনা মা·ন্না গিত্তা উয়া সাকচিগ্মিখো ওয়াত্তেতারাং দাক্কে থারিজক। 16 বিয়া ইয়া সাকচিগ্মিখো ওয়াত্তেতারাং দাক্কে থারিজক- শিমোন, জেখো বিয়া পিতর ইন্নে মিংদাপামিং; 17 সিবদিয়নি সাকগ্মি দেফান্থি যাকোব আরো যোহন জেরাংখো বোয়ানের্গিস ফি·স্খাওদে গয়রানি দেফান্থি ইন্নে মিংদাপামিং; 18 আন্দ্রিয়, ফিলিপ, বরথলময়, মথি, থোমা, আলফেয়েনি দেফান্থি যাকোব, থদ্দেয়, হা·সংনা খা·ফাকগিবা শিমোন; 19 আরো যীশুখো বোবিলনি জাক্কো রি·ম্মে হন·গিবা ইষ্কারিয়োত যিহূদা। 20 যীশু নকচানা রি·বানি জা·মানো বাং·বিয়া মান্দি বিচা থম·দাকানি গিম্মিন বিয়া আরো বিনি জা·রিকগিবারাং মামুংখোবা চা·না মান·ফিলজাজক। 21 উখো খিন্নাএ যীশুনি চাচ্চিরাং বিখো রিম্মাংনা রি·বাজক। বিসং আগানজক, ‘‘বিয়াদে খোরে চাজক।’’ 22 যিরূশালেমওনি রি·বাগিবা শাস্ত্র স্খিগিবারাং আগানজক, ‘‘বিখো বেল্‌সবূলসা মা·ন্না, গিসিক নামগিজাগিবারাংনি রাজাও ফাংচাকেন বিয়া গিসিক নামগিজাগিবারাংখো হা·রিকা।’’ 23 যীশু উয়া শাস্ত্র স্খিগিবারাংখো রিক্কামজক আরো স্খিয়ে হ·ন্না ইন্নে আগানজক, ‘‘শয়তান বাদিকে শয়তানখো হা·রিকনা মা·ন্না? 24 বাগিবাবা হা·সংও দিংথাং দাক্কে বাক হং·গ্রিকোদে উয়া হা·সং থম·থম দংনা মান·জা। 25 দা·আবা বাগিবাবা নকদাং দিংদাং দাক্কে বাক হং·গ্রিকোদে, উয়া নকদাংবা থম·থম দংনা মান·জা। 26 উগিত্তান শয়তানবা আন·থাংনি বোবিল হং·ওদে আরো দিংথাং হং·গ্রিকোদে, উয়াবা থম·থম দংনা মান·জা, আরো উনোন বিনি বন·খামানি হং·আ। 27 আরো বিল্লাক্‌গিবাখো স্খাং খাজাওদে, দারাংবা বিনি নক্কো নাপ্পে বিনি গামজিনরাংখো রা·সেকনা মান·জানুয়া। বিখো খাআনি জা·মানোসা নকনি গামজিনরাংখো রা·সেকনা মা·ন্নুয়া। 28 বিবিন আংআ না·সংনা আগানিংআ, ‘‘মান্দিরাংনি গিম্মিক পাপরাংখো আরো ইসলখো রা·এ খাল·স্থাপোবা উয়া খাল·স্থাপারাংখো ক্ষেমা দাকনুয়া, 29 ইন্দিবা গিসিক রংথালগিবাখো রা·এ খাল·স্থাপগিবা মামুং সালোবা ক্ষেমাখো মান·জানুয়া। উয়া পাপ ফাংনাজলনান দংনুয়া।’’ 30 শাস্ত্র স্খিগিবারাং ‘‘বিখো গিসিক নামগিজাগিবাসা মা·ন্না’’ ইন্নানি গিম্মিন যীশু ইরাংখো আগানজক। 31 উনি জা·মানো যীশুনি মা·গিবা আরো জংগিবারাং যীশুচা রি·বাজক আরো হা·ফালও চাদেংএ যীশুখো রিংগামেতজক । 32 উনো বিখো উইলউইলে বাং·আ মান্দি আসংএ দংআমিং। বিসং যীশুখো আগানজক, ‘‘নাং·নি মা·গিবা আরো নাং·নি জংগিবারাং হা·ফালও নাং·খো সান্দিংআ।’’ 33 যীশু আগানজক, ‘‘আংনি মা·গিবা আরো আংনি জংগিবা সারাং?’’ 34 উনো বিখো উইলউইলে আসংগিবারাংচাখো নিএ বিয়া আগানজক, ‘‘ইরাংআন আংনি মা·গিবা আরো আংনি জংগিবারাং! 35 মুয়ানা ইসলনি নামনিকাখো দাকগিবান আংনি জংগিবা আরো নগিবা আরো মা·গিবা হং·আ।’’

মার্ক 4

1 যীশু দা·আবা গালীল সাগালনি রিক্কামও মান্দিরাংনা স্খিনা হা·বাচেংজক। উনো মান্দি বাং·আ থম·দাকানি গিম্মিন বিয়া সাগালও গি·সা রিংও গাখাতে আসংজক আরো দিমদাক মান্দিরাং সাগালনি রিক্কামও চাদেংএ দংজক। 2 বিয়া গল্পরাংচা বিসংনা বাং·আ স্খিয়ানিখো স্খিয়ে হ·ন্না হা·বাচেংজক। স্খিয়ানিরাংও বিয়া আগানজক, 3 ‘‘খিন্নাবো, মি গোগিবা সাকসা মি বিৎচ্রি গোনা রি·য়াংজক। 4 গোমিত্তিংও মিত্তাম বিৎচ্রি রামা রিক্কামও গা·আকজক, উনোন দো·দ্রাং বিলবায়ে উখো চা·এ গালজক। 5 আরোবা মিত্তাম রং·ব্রাক সাক্কাও গা·আকজক, উনো হা·আ বাং·এ দংজামিং। আরো হা·আ বাং·এ থিং·নাপে দংজানি গিম্মিন উরাং থেংরিন চাজক। 6 ইন্দিবা সাল দিং·এ নাবাওন উরাং খাম্মাংজক আরো নাম্মে দাক্কে জা·দিল সু·না মান·জানি গিম্মিন উয়া সিক্রেপজক। 7 আরো মিত্তাম বিৎচ্রি বুসুগ্রিমো গা·আকজক, উনোন বুসুরাং চাবায়ে উনি সাক্কাও দিকফ্রিপজক, উনি হা·সেলো বিথি নাংজাজক। 8 ইন্দিবা মিত্তাম বিৎচ্রিরাং হা·বা নাম্মাওন গা·আকজক আরো চাএ দাল·রোরোএ মিত্তাম খলাৎচি, মিত্তাম সৎদক আরো মিত্তাম রিৎচাসা বাত্তে বিথি নাংজক।’’ 9 বন·চতাচাবাক্কা যীশু আগানজক, “জেনি খিন্নানা নাচিল দংআ বিয়া খিন্নাখানা।” 10 মান্দি জিলমা রি·য়াংআনি জা·মানো যীশুমুং দংখামগিবা মান্দিরাং আরো বিনি সাকচিগ্মি জা·রিকগিবারাং উয়া গল্পখো থাল্লে হা·আইনা ইন্নে বিচা সিং·জক। 11 যীশু বিসংনা আগানজক, ‘‘ইসলনি সংনকনি নিং·থুয়া খাৎথাখো না·সংনাসান হা·আইনা হ·ন্না, ইন্দিবা গিপ্পিনরাংনা গল্পচা আগান্না নাংআ, 12 জেদাক্কে রংথালগিবা শাস্ত্রনি খাৎথা গিত্তা - ‘বিসং নিক্কেবা নিকনা মান·জা আরো খিন্নাএবা হা·আইনা মান·জা। ইন্দাকজাওদে বিসং ইসলচানা ফিল·নাবা দংআ আরো ক্ষেমা মা·ন্নুয়া।’ ’’ 13 জা·মানো যীশু বিসংনা আগানজক, ‘‘না·সং ইয়া গল্পনি অর্থখো হা·আইজাংআমা? ইন্দাকোদে বাদিকে গিপ্পিন গল্পরাংনি অর্থখো হা·আইনুয়া? 14 মি গোগিবা ইসলনি খাৎথাখো গোওয়ামিং। 15 রামা সামবাও গা·আকগিবা বিৎচ্রিচা বিসংখোন আগানিংআ জেরাং উয়া খাৎথাখো খিন্নাংআ, ইন্দিবা শয়তান উনোন রি·বাএ বিসংনি নিং·আও গোগিবা খাৎথাখো রা·আংআ। 16 রং·ব্রাকো গা·আকগিবা বিৎচ্রিচা বিসংখোন আগানিংআ জেরাং উয়া খাৎথাখো খিন্নারিন খুসি হং·এ রা·চাকা, 17 ইন্দিবা বিসংনি খা·থং নিং·আও নাম্মে দাক্কে জা·দিল সু·জানি গিম্মিন বিসং অকখিসা সাল মা·মাং থম·থমে দংআ। জা·মানো খাৎথানি গিম্মিন জেনসালো দুক্‌ সকবাংআ উনোন বিসং খিসাংচানা রি·য়াংফিল্লিংআ। 18 আরোবা বুসুগ্রিমো গা·আকগিবা বিৎচ্রিচা বিসংখোন আগানিংআ জেরাং উয়া খাৎথাখো খিন্নাআ, 19 ইন্দিবা নকদাংনা চানচিয়ারাং, গামজিননা খা·ফাকা আরো গিপ্পিন গিপ্পিন বস্তুরাংনা মাদ্দুয়া ইরাং উয়া খাৎথাখো দিকফ্রিপা, 20 উনি গিম্মিন উনো মামুং বিথি নাংজা। আরো হা·বা নামগিবাও গা·আকগিবা বিৎচ্রিচা বিসংখো আগানিংআ জেরাং উয়া খাৎথাখো খিন্নাএ উখো রা·চাকিংআ আরো বিথি নাংইংআ। আরো মিত্তাম খলাৎচি, মিত্তাম সৎদক দা·আবা মিত্তাম রিৎচাসা বাত্তে বিথি নাংআ।’’ 21 যীশু আরোবা আগানজক, ‘‘সাবা চাক্কিখো রা·এ খক বা গানসাং নিং·আও দন্নামা? উখো গাসা সাক্কাও দনজামা? 22 থুম্মুয়ে দনগিবা বস্তুখোদে হা·আইখানা ইন্নেন থুম্মুয়ে দন্না। দা·আবা ফিনদাপে দনগিবা বস্তুখো খুলিখানা ইন্নেন ফিনদাপে দন্না। 23 জেনি খিন্নানা নাচিল দংআ বিয়া খিন্নাখানা।’’ 24 উনি জা·মানো যীশু আগানজক, “জেখো না·সং খিন্নাংআ উখো গিসিক রা·বো। না·সং জে থচাক্কানিচা থওয়া উচান না·সংখোবা থনুয়া। আরো উনা বাত্তেবা বাং·এ হন·দাপনুয়া। 25 জেনি দংআ বিনা আরোবা বাং·এ হ·ন্নুয়া, ইন্দিবা জেনি মামুংবা দংজা, বিনি অকখিসা দংগিবাখোবা রা·আংনুয়া।’’ 26 যীশু আরোবা আগানজক, ‘‘ইসলনি সংনক ইন্দাকে হং·আ- সাকসা মান্দি হা·বাও বিৎচ্রিখো গোজক। 27 জা·মানো বিয়া ওয়াল্লো থুয়ে আরো সাল্লো চাখাত্তে সালখো রি·য়াংএতজক। আরো উয়া বিৎচ্রি বিমিক নায়ে দাল·রোরোজক, ইন্দিবা উয়া বাদিকে হং·জক উখোদে হা·আইজাজক। 28 হা·বা আন·থাংথাংআন মি বিফাংখো দাল·রোরোএতজক আরো বিথি নাংএতজক। স্খাং বিজাক ওয়াত্তেতজক, জা·মানো বিবালেতজক, জা·মানো উনো মি বিথিখো গাপ্পেতজক। 29 আরো বিথি মিন্নানি জা·মানো খাৎচিখো রিম·জক, মুয়ানা মি রাত্তানি সময় হং·জক।’’ 30 উনি জা·মানো যীশু আগানজক, ‘‘ইসলনি সংনকখো আনচিং মুয়ামুং থনুয়া? বাদাকা গল্পচা উখো হা·আইএতনুয়া? 31 উয়া সংনকদে রংসা সুলসু বিৎচ্রি গিত্তা হং·আ। হা·বাও গোমিত্তিংও দিমদাক বিৎচ্রিরাংনা বাত্তে উখো চনবাত্তে নিক্কা। 32 ইন্দিবা গোওয়ানি জা·মানো ফাং চাএ দাল·বাওন গিম্মিক সামবিজাকরাংনা বাত্তে উয়ান দাল·বাত্তানি হং·আ। আরো উনি চেকসিরাং দাল·বাত্তানি গিম্মিন উনো দো·দ্রাং বিলবায়ে উনি সালখিমো বিথিপ সা·আ।’’ 33 ইন্দাকগিবা বাং·আ গল্পরাংচা যীশু ইসলনি খাৎথাখো মান্দিরাংনা আগান্নুয়ামিং। বিসং জেচিকিন হা·আইনুয়ামিং বিয়া উচিকিন বিসংনা আগান্নুয়ামিং। 34 গল্পচা আগানানি আগ্রে বিয়া মান্দিরাংনা স্খিয়ে হন·জানুয়ামিং, ইন্দিবা জা·রিকগিবারাং বিমুং দংজোকনোসান বিয়া গিম্মিকখো বিসংনা ফি·এ আগান্নুয়ামিং। 35 উনিসালো হান·থামও যীশু বিনি জা·রিকগিবারাংনা আগানজক, ‘‘রি·বো, আনচিং সাগালনি নালসাচা রি·য়াংনা।’’ 36 উনোন জা·রিকগিবারাং মান্দিরাংখো ওয়াত্তে যীশু জে রিংও দংআমিং উয়া রিংও বিখো রা·এ রি·য়াংজক। দিংথাং রিংরাংবা উনো দংআমিং। 37 উয়া সময়ও বিল্লংএন মিকখা বালওয়া রাকজক আরো সাগালনি চি ফক্‌ফেকি রিং সাক্কাও ইন্দাকফিল্লে গাদোয়ানি গিম্মিন রিংও চি গাপবাজক। 38 যীশু উনো রিংনি খিসাংচাবাকা খোদামো স্খু দন্নে থুয়ে দংআমিং। জা·রিকগিবারাং বিখো চামিসায়ে আগানজক, ‘‘ও স্খিগিবা, আনচিংদে সিনাজক না·আ মুয়ানা সিম্‌সাকজাংআ? 39 উনোন বিয়া চাখাত্তে বালওয়াখো ইন্দাতজক “জ্রিপ দংবো,” আরো সাগালখোবা ইনজক, ‘‘থম·থম হং·বো।’’ উনোন বালওয়া থিপ্পাংজক আরো দিমদাকান থম·থম হং·জক। 40 জা·মানো বিয়া জা·রিকগিবারাংনা ইনজক, ‘‘না·সং মুয়ানা খেন্নিংআ? দা·আওবা না·সং বিবিরা·না মান·খুজামা?’’ 41 ইনা বিসং নাম্মেন খেনবিজক আরো আন·থাংথাংরাংও আগানগ্রিকজক, ‘‘ইয়া সা মানচা, মুয়ানা বালওয়া আরো সাগালবা বিনি খাৎথাখো মানিয়া?’’

মার্ক 5

1 জা·মানো যীশু আরো বিনি জা·রিকগিবারাং গালীল সাগালনি নালসাচা গেরাসেনি জওলচানা রি·য়াংজক। 2 যীশু রিংওনি হং·খাতবাওন গিসিক নামগিজাগিবা রিম·গিবা মান্দি সাকসা গোপরামওনি হং·খাতে বিনি মিকখাংচানা রি·বাজক। 3 উয়া মান্দি গোপরামওন দংনুয়ামিং আরো দারাংবা বিখো জেংজুলচা খায়ে দন্না মান·জানুয়ামিং। 4 বিনি জাক জা·চকরাংখো ফিল·নিফিল জেংজুলচা খানুয়ামিং ইন্দিবা উরাংখো বিয়া থেত্তে গালনুয়ামিং আরো জা·চকো ফাতগিবা সিল্‌থিংখো ফাত্তারাংখো ফি·থংএ গালনুয়ামিং। দারাংবা বিখো নাম্মে দাক্কে রা·রিকনা মান·জানুয়ামিং। 5 আরো ওয়ালসাল ফাংনাজ্রিংআন বিয়া গোপরামচা দংএ আরো হা·ব্র্রিজলজল রি·রোরোয়ে চ্রিকনুয়ামিং আরো রং·থিচা আন·থাংনি বে·এনখো দে·ন্নুয়ামিং। 6 বিয়া চে·ল্লাচানি যীশুখো নিক্কে বিনি মিকখাংচানা খাতবায়ে জা·স্খু দে·ম্মে বিখো অলাখিয়ে চ্রিকে আগানজক, ‘‘চুবাৎগিবা ইসলনি দেফান্থি যীশু! আংমুং নাং·নি মুয়া নাংফাআ? আংআ ইসলনি বিমুংখো রা·এ মিক্‌চেতিংআ, আংখো দা·আ দুক হ·ন্নাবো।’’ 8 বিয়া ইন্দাকে আগানজক মুয়ানা যীশু বিখো আগানামিং, ‘‘গিসিক নামগিজাগিবা, ইয়া মান্দিওনি না·আ হং·খাতাংবো।’’ 9 যীশু উখো সিং·জক, ‘‘নাং·নি বিমুং মুয়া?’’ উনোন উয়া আগানচাকজক, ‘‘আংনি বিমুং ‘কথক,’ মুয়ানা চিংআ বাং·আ।’’ 10 আরো যীশু উরাংখো সংওনিখো চে·ল্লাচানা হা·রিকেতজাখানা ইন্নে উয়া যীশুখো নাম্মেন মল·মলা। 11 উনোন হা·ব্র্রি জা·রেক জলজল বাং·বিয়া ওয়াক জিলমা চা·আম্মিংআমিং। 12 গিসিক নামগিজাগিবারাং যীশুখো মল·মলে আগানজক, ‘‘উয়া ওয়াক জিলমাও নাপনা চিংখো ওয়াত্তেতবো।’’ 13 যীশু উরাংখো নাপনা হ·ন্নানি জা·মানো গিসিক নামগিজাগিবারাং ওয়াকরাংও নাপ্পেজক। উনোন দিমদাক ওয়াক জিলমা হা·সলসল্‌ রিক্কাম গিত্তা থারাকে খাত্তাংজক আরো সাগালও গা·আকে চিও রিপ্পে সিথকজক। উনো হাজাল গ্মি গিত্তা ওয়াক দংআমিং। 14 উনোন উয়ারাংখো নিরিকগিবারাং খাত্তাংএ সংচা আরো উনি সেফাংও দংগিবা হা·দামরাংচাবা উখো আগানেজক। উনো মান্দিরাং মুয়া হং·আ উখো নিনা রি·বাজক। 15 বিসং যীশুচা রি·বাএ উয়া গিসিক নামগিজাগিবা মান·গিবা মান্দিখো বা·রাচলা গান্নে গিসিক নাম্মে স্রকস্রক দাক্কে আসংএ দংআখো নিক্কেজক। ইখো নিক্কে মান্দিরাং খেনমানজক। 16 ইরাংখো নিকগিবারাং গিসিক নামগিজাগিবা মান·গিবানি খাৎথাখো আরো উয়া ওয়াকনি খাৎথাখো দিমদাকনা আগানজক। 17 উনি গিম্মিন মান্দিরাং যীশুখো উয়া হা·সংখো ওয়াত্তে রি·য়াংখানা মল·মলজক। 18 যীশু রিংও গাখাতমিত্তিংও স্খাংও জেখো গিসিক নামগিজাগিবা মা·ন্নামিং উয়া মান্দি যীশুমুং দংফানা মল·মলজক। 19 ইন্দিবা যীশু বিখো ইন্দাকে আগানে ওয়াত্তেতজক, ‘‘না·আ নাং·নি নকচানা রি·য়াংফিলবো আরো গিত্তেল নাং·না বাসিক দা·ল্লা কামখো দাকজক আরো নাং·না বাসিক খা·সাচাকজক উখো নকনি মান্দিরাংনা আগানেবো।’’ 20 উনোন উয়া মান্দি যীশুখো ওয়াত্তে রি·য়াংজক আরো যীশু বিনা বাসিক দা·ল্লা কামখো দাক্কা উখো দেকাপলি জওলো রওমে আগানজক। ইনা গিম্মিকান আইয়াও ইনমানজক। 21 যীশু রিংও দাক্কে দা·আবা সাগাল নালসাচানা বাত্তাংজক উনোন বিনি সেফাংও বাং·আ মান্দি রি·বাএ থম·দাকজক। উনোবা বিয়া সাগাল রিক্কামওন দংখুংআমিং। 22 উনো যায়ীর মিংগিবা যিহূদীরাংনি থম·দাকরামনি সাকসা দাল·গিবা রি·বাজক আরো যীশুখো নিক্কে বিয়া বিনি জা·আও গা·আকজক। 23 বিয়া যীশুখো নাম্মেন মল·মলে আগানজক, ‘‘আংনি দেমিচিক সিনা হা·ম্মিংজক। না·আ রি·বাএ বিনি সাক্কাও জাক দনদাপবো; উনোন বিয়া নাম্মাংনুয়া।’’ 24 উনোন যীশু বিমুং রি·য়াংফাজক। বাং·আ মান্দিরাং যীশুমুং রি·য়াংফাংআমিং আরো বিখো উইলউইলে সিকচেপচেপিংআমিং। 25 উয়া মান্দি জিলমানি গিসেপো সাকসা মিচিক দংআমিং, বিয়া বিলসি চি·গ্মিনা দিপ্পাৎ হান·চি জক্কে জম্মিংআমিং। 26 বাং·আ ডাক্তাররাংখো ফিন্নিকেবা বিয়া বাং·এন সা·দিকা-সা·খামাখো মা·ন্নামিং, আরো বিচা দংগিবা থাংখা-পয়সা গিম্মিকখোন বিয়া ব·ন্নেতজকমিং, ইন্দিবা নামগিজা আরোসা নামজাবাতিংআমিং। 27 যীশুনি খাৎথাখো খিন্নাএ মান্দি জিলমানি গিসেপোন বিয়া যীশুনি খিসাংও রি·বাএ বিনি বা·রাখো রি·ম্মেতজক, 28 মুয়ানা বিয়া চানচিয়ামিং যীশুনি বা·রাখো অকখিসা মা·মাং রি·ম্মেতনা মা·ন্নোন বিয়া নাম্মাংনুয়া। 29 ইন্দাকে যীশুনি বা·রাখো রি·ম্মেতোন বিনি হান·চি জক্কা থিপস্রাংজক আরো আন·থাংনি বে·এনো জম্মা নামস্রাংআখো বিয়া হা·আইনা মান·জক। 30 উনোন যীশু আন·থাংওনি বিল হং·খাতাখো হা·আইএ হান·ফিলে দিমদাকচানা নিএ সিং·জক, ‘‘সা আংনি বা·রাখো রি·ম্মেতা?’’ 31 বিনি জা·রিকগিবারাং আগানজক, ‘‘বাং·আ মান্দিন নাং·খো সিকচেপচেপিংআ ইখো নিক্কেবা না·আ সিং·আ, সা নাং·নি বা·রাখো রি·ম্মেতা?’’ 32 ইন্দিবা ইয়া কামখো সা দাকজক ইখো নিনা ইন্নেন যীশু দিমদাকচানা নিএতফিলজক। 33 উয়া মিচিক বিনি মুয়া হং·আ উখো হা·আইএ হান·স্রিস্রিমে রি·বাএ যীশুনি জা·চকোনা গা·আকজক আরো দিমদাক বিবিখোন বিনা আগানজক। 34 যীশু বিনা আগানজক, ‘‘নাং·নি বিবিরা·আনি গিম্মিন না·আ নামস্রাংজক। থম·থমে রি·য়াংবো, আরো ইয়া নামগিজারাং মামুং সালোবা নাং·নি হং·জাখানা।’’ 35 উনোবা যীশু খাৎথা আগানিংআমিং, উনো উয়া যায়ীর মিংগিবা দাল·গিবানি নকনি মান্দিরাং রি·বাএ যায়ীরখো আগানজক, ‘‘নাং·নি দেমিচিক সিজক; স্খিগিবাখো দা·আ নেং·এতাবো।’’ 36 উয়া মান্দিরাংনি আগানাও নাচিল সংগিজা যীশু যায়ীরখো আগানজক, ‘‘দা·আ খেন্নাবো; ইন্দিবা বিবিরা·আরিবো।’’ 37 যীশু পিতর, যাকোব আরো যাকোবনি জংগিবা যোহনখোসান বিমুং রিম্মাংফাজক। 38 জা·মানো বিয়া যায়ীরনি নকচানা রি·বাএ নাম্মেন গোলমাল হং·আখো নিকনা মান·জক। মান্দিরাং রাক্কে রাক্কে গ্রাপিংআমিং। 39 যীশু নিং·আচানা নাপ্পাংএ মান্দিরাংখো আগানজক, ‘‘না·সং মুয়ানা গোলমাল দাক্কিংআ আরো গ্রাপিংআ? বি·সা সিখুজাংআ, থুয়েসান দংআ।’’ 40 ইখো খিন্নাএ মান্দিরাং খা·দিংথকজক। উনোন যীশু বিসং গিম্মিকখো হা·ফালচা রি·য়াংখানা আগানজক। জা·মানো বিয়া মিচিক বি·সানি মা·গিবাখো আরো ফাগিবাখো আরো বিমুং দংফাগিবারাংখো রা·এ বি·সানি দংগিবা নকচানা নাপ্পাংজক। 41 মিচিক বি·সানি আৎচিয়ানি বিলসি চি·গ্মি হং·জকমিং। যীশু বি·সানি জাকখো রি·ম্মে আগানজক, ‘‘টালিথা কুম্‌’’, জেখো ফি·এ আগানোদে ইন্দাকে হং·আ, ‘‘ও মিচিক বি·সা, আংআ নাং·খো আগানিংআ, চাখাতবো।’’ উনোন উয়া মিচিক বি·সা চাখাত্তে রমজক। ইনা দিমদাকান আইয়াও ইনমানজক। 43 উখো দারাংবা হা·আইজাখানা ইন্নে বিয়া নাম্মেদাক্কে বাংখাংজক আরো উয়া দেমিচিকনা চা·না হন·খানা আগানজক।

মার্ক 6

1 উনি জা·মানো যীশু উয়া হা·দামখো ওয়াত্তে সংথাংওনা রি·য়াংজক, 2 বিনি জা·রিকগিবারাংবা বিমুং রি·য়াংফাজক। নেং·থাকানি সালো বিয়া থম·দাকরামো রি·য়াংএ স্খিনা হা·বাচেংজক। বাং·আ মান্দি বিনি খাৎথাখো খিন্নাএ আইয়াও ইনমানে আগানজক, ‘‘ইয়া মান্দি বাচ্চানিখো ইরাংখো মা·ন্না? ইয়া বাদাকগিবা মানচা হা·আইয়াখো বিনা হ·ন্না? দা·আবা আইয়াও ইনমানগিবা কামখোবা বিয়া দাক্কিংআ। 3 বিয়ান উয়া মিস্ত্রি হং·জামা? ইয়ান মরিয়মনি দেফান্থি হং·জামা? যাকোব, যোষী, যিহূদা আরো শিমোননি আদাগিবা হং·জামা? বিনি নগিবারাং ইনো আনচিংমুং দংজামা?’’ ইন্দাকে যীশুখো রা·এ মান্দিরাংনি গিসিকো জেগালনা হা·বাচেংজক। 4 উনো যীশু বিসংনা আগানজক, ‘‘সংথাং, চাচ্চিথাং আরো নকথাংনি আগ্রে দিমদাকচান আগানসোগিবাখো মান্দিরা·আ।’’ 5 উনি জা·মানো বিয়া জমগিবা-সাগিবা মিত্তাম মান্দিরাংনি সাক্কাও জাক দনদাপে বিসংখো নাম্মেতজক, ইন্দিবা উনো মামুং আইয়াও ইনমানানি কামখো দাক্কা হং·জাজক। 6 মান্দিরাং বিখো বিবিরা·জানি গিম্মিন বিয়া আইয়াও ইনমানজক। উনি জা·মানো যীশু গিপ্পিন গিপ্পিন সংরাংচা রি·য়াংএ মান্দিরাংনা স্খিনা হা·বাচেংজক। 7 জা·মানো বিয়া বিখো জা·রিকগিবা উয়া সাকচিগ্মিখো রিক্কামজক আরো আগানফ্রাকনা সাকগ্মি দাক্কে ওয়াত্তেতজক। বিয়া গিসিক নামগিজাগিবারাংনি সাক্কাও বিসংনা বিলখো হন·জক। 8 রি·য়াংনাগিবা রামানা গি·সা মাংগতনা আগ্রে মামুংখোবা জা·রিকগিবারাংখো রা·না হন·জাজক। রুটি, দকরা আরো জেপো থাংখারাংখোবা রা·আংনা হন·জাজক। 9 বিয়া বিসংনা জা·খপখো গান্না হ·ন্নোবা, ইন্দিবা গি·সানি আগ্রে বাং·এ চলাবা·রা গান্না বেং·জক। 10 বিয়া বিসংনা আরোবা আগানজক, ‘‘না·সং জে নক্কোনা নাপনুয়া উয়া সংখো ওয়াত্তে রি·য়াংখুজানা দিপ্পাৎ উয়া নক্কোন দংবো। 11 বাগিবাবা সংনি মান্দিরাং না·সংখো রা·চাকসোজাওদে আরো না·সংনি খাৎথাখো খিন্নাচাকজাওদে, উনোদে উয়া সংখো ওয়াত্তে রি·য়াংমিত্তিংওন বিসংনা সাক্ষি হং·না গিত্তা আন·থাংথাংনি জা·ফানি হা·দুলাখো দকফ্রংবো।’’ 12 উনোন জা·রিকগিবারাং রি·য়াংএ মান্দিরাং পাপওনি গিসিক ফিল·খানা ইন্নে আগানফ্রাকনা হা·বাচেংজক। 13 বিসং বাং·আ গিসিক নামগিজাগিবারাংখো হা·রিকেতজক আরো বাং·আ জমগিবা-সাগিবা মান্দিরাংনি স্খুও তেলখো সিত্তে বিসংখো নাম্মেতজক। 14 যীশুনি বিমুংখো গিম্মিকচান খিন্নাসেংজক। ইনি গিম্মিন রাজা হেরোদবা যীশুনি খাৎথাখো খিন্নানা মান·জক। মিত্তাম মান্দিরাং আগানিংআমিং, ‘‘বিয়ান উয়া রিপ্পলেতগিবা যোহন। বিয়া সিয়াওনি থাংচাফিল্লা ইন্নে আইয়াও ইনমানগিবা কামরাংখো দাক্কিংআ।’’ 15 সাবা আগানিংআমিং, ‘‘বিয়া এলিয়’’, দা·আবা সাবা আগানিংআমিং, ‘‘চেংওনি আগানসোগিবারাং গিত্তা বিয়াবা সাকসা আগানসোগিবা হং·আ।’’ 16 ইয়া খাৎথারাংখো খিন্নাএ হেরোদ আগানজক, ‘‘আংআ জেনি স্খুখো দেন·থংনা আগানামিং বিয়ান উয়া যোহন। দা·আবা বিয়া সিয়াওনি থাংচাফিলজক।’’ 17 ইনা স্খাং হেরোদ মান্দি ওয়াত্তেতি যোহনখো রি·ম্মামিং আরো জেলো বিখো খায় দন্নামিং। হেরোদ বিনি আদাগিবা ফিলিপনি জিকগিবা হেরোদিয়ানি গিম্মিনান ইখো দাক্কামিং। মুয়ানা হেরোদ হেরোদিয়াখো খিম্মানি গিম্মিন যোহন হেরোদখো ফিল·নিফিল আগান্নুয়ামিং, ‘‘আন·থাং আদাথাংনি জিকগিবাখো নাং·নি খিমনা খ্রাজাজক।’’ 19 ইনি গিম্মিন যোহনখো হেরোদিয়া নাম্মেন খা·আওনাংআমিং। বিয়া যোহনখো স·ওতে গালনা হা·ম্মামিং, 20 ইন্দিবা হেরোদ যোহননা খেন্নামিং ইন্নে বিয়া উখো দাকনা মান·জাংআমিং। মুয়ানা হেরোদ যোহনখো সাকসা থরমি আরো রংথালগিবা মান্দি ইন্নে হা·আইয়ামিং, ইনি গিম্মিন বিয়া নামগিজারাংওনিখো যোহনখো রাক্ষিয়ে দন্নুয়ামিং। যোহননি খাৎথাখো খিন্নাএ গিসিকো দংথজাওবা হেরোদ বিনি খাৎথাখো খিন্নানা নামনিকনুয়ামিং। 21 জা·মানো হেরোদিয়ানা নাম্মা চল সকবাজক। হেরোদ আন·থাংনি আৎচিয়ানি সালো আন·থাংনি মান্দি দাল·দালগিবারাংনা, সেনাপতিরাংনা আরো গালীল হা·দকনি দাল·বাৎগিবারাংনা চা·না হন·জক। 22 উনোন হেরোদিয়ানি দেমিচিক মেসায়ে ফিন্নিকে হেরোদ আরো উনো দংগিবা গিম্মিকখো খুসি হং·এতজক। উনোন রাজা উয়া মিচিক বি·সানা আগানজক, ‘‘না·আ জেখো হাম·নুয়া আংআ উখোন নাং·না হ·ন্নুয়া।’’ 23 হেরোদ মিচিক বি·সানা মিকচেতি আগানজক, “জেখো না·আ হাম·নুয়া উখোন আংআ নাং·না হ·ন্নুয়া। আরো আংনি সংনকনি ফাকসা দিপ্পাৎ আংআ নাং·না হ·ন্নুয়া।’’ 24 উনো মিচিক বি·সা বিনি মা·গিবানা আগানজক, ‘আংআ মুয়াখো হাম·নুয়া?’’ বিনি মা·গিবা আগানজক, ‘‘রিপ্পলেতগিবা যোহননি স্খুখো।’’ 25 মিচিক বি·সা উনোন রাজাচা রি·য়াংএ আগানজক, ‘‘আংনা রাংথালও দাক্কে দা·আওন রিপ্পলেতগিবা যোহননি স্খুখো হন·বো।’’ 26 ইখো খিন্নাএ রাজা হেরোদ নাম্মেন দুক্‌ মান·জক, ইন্দিবা গিম্মিকনি মিকখাংও মিকচেতজক ইন্নে মিচিক বি·সাখো ফি·ল্লেতনা হা·সিকজাজক। 27 রাজা উনোন যোহননি স্খুখো দেন·থংএ রা·বানা সাকসা সিপাইখো ওয়াত্তেতজক। উয়া সিপাই জেলচা রি·য়াংএ যোহননি স্খুখো দেন·থংএ রাংথালও দাক্কে রা·বাএ হন·জক। রাজা উখো মিচিক বি·সানা হ·ন্নানি জা·মানো বিয়া উখো মা·গিবানা হন·জক। 29 ইখো খিন্নাএ যোহননি জা·রিকগিবারাং রি·বাএ বিনি বে·এনখো রা·আংএ গোপরামচা দাপজক। 30 যীশুনি ওয়াত্তেতগিবা সাকচিগ্মি জা·রিকগিবারাং ফি·ল্লে রি·বাজক আরো বিসংনি দাকগিবারাংখো আরো স্খিয়ে হন·গিবারাংখো যীশুনা আগানেজক। 31 উয়া সময়ও উচা বাং·আ মান্দিরাং রি·য়াংআ-রি·বা দাক্কানি গিম্মিন জা·রিকগিবারাং মামুংখোবা চা·না মান·জাজক। উনি গিম্মিন যীশু বিসংনা আগানজক, ‘‘না·সং আংমুং মান্দিগ্রি মা·সুগ্র্রি হা·দামওনা রি·বাএ নেং·থাকবো।’’ 32 বিসং রিংও দাক্কে মান্দিগ্রি মা·সুগ্র্রি গি·সা হা·দামচানা রি·য়াংজক। 33 বিসংনি রি·য়াংআখো নিক্কে বাং·এন বিসংখো হা·আইনা মান·জক আরো সেফাংও দংগিবা সংরাংনি গিম্মিকান উচানা খাত্তাংএ বিসংনা স্খাং সক্কাংজক। 34 রিংওনি হং·খাতে যীশু মান্দি বাং·বিয়াখো নিকনা মান·জক। ইয়া মান্দিরাংনা যীশু নাম্মেন খা·সাচাকজক মুয়ানা ইরাংনি অবস্থা রাক্ষুয়ালগ্রি মেষরাং গিত্তা হং·আ। যীশু বিসংনা বাং·আ স্খিয়ানিখো স্খিয়ে হ·ন্না হা·বাচেংজক। 35 আরো সাল নাপ্পাংমিত্তিংও জা·রিকগিবারাং যীশুচা রি·বাএ আগানজক, ‘‘ইয়া হা·দামদে মান্দিগ্রি মা·সুগ্র্রি হং·আ, আরো সালবা রি·য়াংজক। 36 মান্দিরাংখো ওয়াত্তেতবো জেদাক্কে বিসং সেফাংনি গিত্থিম আরো সংরাংচা রি·য়াংএ আন·থাংথাংনা মামুং চা·আনিখো ব্রিনা মা·ন্না।’’ 37 যীশু আগানজক, ‘‘না·সংআন বিসংনা চা·না হন·বো।’’ জা·রিকগিবারাং বিনা আগানজক, ‘‘চিংআ রি·য়াংএ রিৎচাগ্মি দীনারনি রুটিখো ব্রিএ বিসংনা চা·না হ·ন্নুয়ামা?’’ 38 যীশু আগানজক, ‘‘না·সংচা বাসিক গি·সা রুটি দংআ রি·য়াংএ নিবো।’’ জা·রিকগিবারাং নিএ রি·বাএ আগানজক, ‘‘গিলবংআ রুটি আরো মাংগ্মি না·থক দংআ।’’ 39 উনোন যীশু মান্দিরাংখো সামচেং সাক্কাও আসংএতখানা জা·রিকগিবারাংখো আগানজক। 40 উনি জা·মানো মান্দিরাং রিৎচাসা রিৎচাসা, সৎবংআ সৎবংআ থম·দাক থম·দাক দাক্কে আসংজক। 41 উয়া গিলবংআ রুটি আরো মাংগ্মি না·থকখো রা·এ যীশু সালগিচাখো নিগিদোয়ে ইসলখো মিৎথেলজক আরো মান্দিরাংনা হন·খানা ইন্নে রুটিখো ফি·এ জা·রিকগিবারাংনি জাক্কো হন·জক। ইন্দাকে বিয়া না·থকখোবা দিমদাকনান সুআলে হন·জক। 42 বিসং গিম্মিকান অক্ষায়ে চা·জক। 43 উনি জা·মানো জা·রিকগিবারাং রুটি আরো না·থকরাংখো খল্লামে খক চি·গ্মিও গাপ্পেতজক। 44 উনো চা·গিবারাংনি গিসেপো মি·আসারাংআন হাজাল বংআ দংআমিং। 45 উনি জা·মানো যীশু বিনি জা·রিকগিবারাংখো রিংও গাখাতে সাগালনি নালসাচা বৈৎসৈদা সংচানা রি·য়াংসোখানা দাগিলজক, আরো বিয়া ইচা মান্দিরাংখো ওয়াত্তেতনা হা·বাচেংজক। 46 মান্দিরাংখো ওয়াত্তেতানি জা·মানো বিয়া বি·না ইন্নে হা·ব্রিচানা গাদোআংজক। 47 আরো হান·থাম ওয়াল্লো জা·রিকগিবারাংনি রিং সাগাল জাংচিচান দংআমিং আরো যীশু সাকসান হা·গাও দংআমিং। 48 যীশু জা·রিকগিবারাংনি রিং চনা নাম্মেন মান·দিকাখো নিকনা মান·জক, মুয়ানা বালওয়া উনো বিসংখো ফাংফিলে বালফাকিংআমিং। ওয়াল ব·ন্নাংমিত্তিংও যীশু সাগালনি সাক্কা গিত্তা রামা রি·এ জা·রিকগিবারাংনি সেফাংচানা রি·বাজক আরো বিসংখো গাল্লে মিকখাংচানা রি·য়াংআমিং। 49 ইন্দিবা জা·রিকগিবারাং বিখো সাগালনি সাক্কাও রামা রি·য়াখো নিক্কে মি·মাং ইন্নে চানচিচিপে চ্রিকজক, 50 মুয়ানা বিখো নিক্কে বিসং দিমদাকান খেনবিয়ামিং। উনোন যীশু জা·রিকগিবারাংমুং খু·সুক আগানজক। বিয়া বিসংখো আগানা, ‘‘ইয়াদে আংআসা, দা·আ খেন্নাবো, খা·দংবো।’’ 51 যীশু রিংও গাখাতানি জা·মানো বালওয়া থিপ্পাংজক। ইনা জা·রিকগিবারাং নাম্মেন আইয়াও ইনমানজক, 52 মুয়ানা ইনা স্খাং রুটি চা·না হন·গিবাখোন বিসং হা·আইনা মান·খুজামিং, বিসংনি খা·থং রাক্কে দংআমিং। 53 যীশু আরো বিনি জা·রিকগিবারাং সাগালখো বাত্তাংএ গিনেষরৎ জওলচানা রি·বাএ রিংখো খাজক। 54 বিসং রিংওনি হং·খাতবাওন মান্দিরাং যীশুখো হা·আইনা মা·ন্নে উয়া জওলনি দিমদাকচান খাতরুরুনা হা·বাচেংজক। উনি জা·মানো বিয়া বানো দংআ উখো হা·আইএ রা·এ উনোনা বিসং জমগিবা-সাগিবারাংখো থুচাকানিরাংও দি·থমে রা·আংজক। 56 যীশু জে গিত্থিম, সং, সংজিলমাচা রি·য়াংনুয়ামিং উচান মান্দিরাং জমগিবা-সাগিবারাংখো বাজালো রা·বাএ থ·ম্মে দন্নুয়ামিং। জমগিবারাং বিনি বা·রাখো অকখিসা মা·মাং রি·ম্মেতখানা ইন্নে বিসং যীশুখো মল·মলবিজক। আরো জেরাং বিখো রি·ম্মেতনা মা·ন্নুয়ামিং বিসং নাম্মাংনুয়ামিং।

মার্ক 7

1 যিরূশালেমচানি রি·বাগিবা মিত্তাম ফরীশীরাং আরো শাস্ত্র স্খিগিবারাং যীশুনি সেফাংওনা থম·দাকজক। 2 বিসং যীশুনি মিত্তাম জা·রিকগিবারাংখো জাকখো জাকসুগিজা চা·আখো নিকনা মান·জক। 3 ফরীশীরাং আরো গিম্মিক যিহূদীরাং বিসংনি ফাগিৎচামরাংনি দাকবেওয়াল গিত্তা জাকখো জাকসুগিজাদে চা·জানুয়ামিং। 4 বাজালওনি রি·বাএ বিসং জাকসুগিজা-জা·সুগিজাদে মামুংখোবা চা·জানুয়ামিং। ইনা আগ্রে বিসং আরোবা বাং·আ নিয়ামরাংখো মানিরংআমিং; মি·দিক, সাম·দিক, রাংথাল, দিক্‌থি আরো গিপ্পিনরাংখো নতনুয়ামিং সু·গালনুয়ামিং। 5 উনি গিম্মিন ফরীশী আরো শাস্ত্র স্খিগিবারাং যীশুখো সিং·জক, ‘‘নাং·নি জা·রিকগিবারাং মুয়ানা আনচিংনি ফাগিৎচামরাংনি হন·গিবা দাকবেওয়ালরাংখো মানিজাংআ? বিসংদে জাকখো জাকসুগিজান চা·আংআ।’’ 6 যীশু উনো আগানচাকজক, ‘‘না·সংদে বু·এ চা·গিবা! না·সংনি গিম্মিন আগানসোগিবা যিশাইয় বিবিখোন আগানামিং। বিনি খি·তাপো চক্কা দংআ- ইয়া মান্দিরাং আংখো খু·সুকোসান মান্দিরা·আংআ, ইন্দিবা বিসংনি খা·থংদে আংওনি চে·ল্লাচানা দংআ। 7 বিসং বু·এন আংখো অলাখিয়া, বিসংনি হন·গিবা স্খিয়ানিরাংদে মান্দিনি থারিগিবা দাকবেওয়ালসান হং·আ। 8 না·সংদে ইসলনি গি·য়েতাখো গাল্লে মান্দিরাংনি থারিগিবা দাকবেওয়ালখোসা মানিয়া। 9 যীশু বিসংনা আরোবা আগানজক, ‘‘না·সং আন·থাংথাংনি থারিগিবা দাকবেওয়ালখোসা নাম্মেদাক্কে রাক্ষিনা ইন্নে ইসলনি গি·য়েতাখো জিচাকা। 10 জেগিত্তা মোশি আগানা, ‘মা·খো-ফাখো মান্দিরা·বো’ আরো ‘আন·থাংনি মা·খো-ফাখো নামগিজা দাক্কে চন্নিকে আগানগিবান সিনা নাংআ।’ 11 ইন্দিবা না·সং আগানে দংআ, সাবা বিনি মা·খো বা ফাখো আগানোদে, ‘আংনি জেখো হ·ন্নে নাং·না দাকচাকোদে নাং·নি নামনুয়ামিং উয়াদে ক্বর্বান,’ ফি·স্খাওদে উখো ইসলনা হন·খামজক, 12 ইন্দিদে মা·না ফানা বিনি মামুংখোবা দাকনা নাংজা। 13 ইন্দাকে না·সং না·সংনি ফাগিৎচামরাংনি দন্নাংগিবা দাকবেওয়ালরাংখো জাকখালে ইসলনি খাৎথাখো জেগালজক। আরো ইন্দাকা বাং·আ কামরাংখোন না·সং দাক্কিংআ।’’ 14 উনি জা·মানো যীশু দা·আবা মান্দিরাংখো বিচা রিংগামে আগানজক, ‘‘না·সং গিম্মিকান আংনি খাৎথাখো খিন্নাবো আরো হা·আইবো। 15 হা·ফালওনি মান্দিনি নিং·আচানা নাপ্পাংগিবা মামুংবা মান্দিখো মারাং নাংএতনা মান·জা, ইন্দিবা মান্দিনি নিং·আচানি হং·খাতগিবারাংসান মান্দিখো মারাং নাংএতানি হং·আ।’’ 17 উনি জা·মানো যীশু মান্দিরাংখো ওয়াত্তে নকনিং·আচা নাপ্পাংজক, উনোন জা·রিকগিবারাং উয়া থয়ে আগানা খাৎথানি অর্থখো বিচা সিং·জক। 18 যীশু বিসংনা আগানজক, ‘‘না·সংবা মামুংখোন হা·আইগিজাগিবা হং·আমা? হা·ফালওনি মামুংবা মান্দিনি নিং·আচা নাপ্পে মান্দিখো মারাং নাংএতনা মান·জা, ইখো না·সং হা·আইজামা? 19 মুয়ানা, উয়াদে বিনি খা·থংও নাপজা ইন্দিবা বিকমা নিং·আওসা নাপ্পা আরো জা·মানো উয়া বে·এনোনি হং·খাতে রি·য়াংআরিয়া।’’ ইয়া খাৎথাচান যীশু দিমদাক চা·আনিরাংখো রংথালা ইন্নে হা·আইএতনা হাম·জক। 20 যীশু আরোবা আগানজক, ‘‘মান্দিনি নিং·আচানি হং·খাতগিবান মান্দিখো মারাং নাংএতা, 21 মুয়ানা মান্দিনি নিং·আচানি আগানস্খাওদে খা·থংওনি নামগিজা চানচিয়া, দিমদাক স·বাকা, চা·উয়া, স·ওতা, 22 মাদ্দুয়া, গিপ্পিননা নামগিজাখো দাকনা হা·ম্মা, দাক্কামব্রুআ, হা·সিগিজা দাক্কা, মিক্‌নেংআ, সাউইয়া, রাসং দাক্কা আরো চন্নিকা, সেল·গিজা দাক্কা হং·খাতবাআ। 23 ইয়া দিমদাক নামগিজারাং নিং·আচানিন হং·খাতবাআ আরো মান্দিখো মারাং নাংএতা।’’ 24 উনি জা·মানো যীশু উয়া হা·দামখো ওয়াত্তে সোর মিংগিবা জওলচানা রি·য়াংজক। বিয়া গি·সা নকচানা নাপ্পেজক আরো উখো দারাংনাবা হা·আইএতনা হা·সিকজামিং, ইন্দিবা বিয়া থুম্মুয়ে দংনা মান·জাজক। 25 উনো ইন্দাকগিবা মিচিক সাকসা দংআমিং জেনি দেমিচিকখো গিসিক নামগিজাগিবা রি·ম্মামিং। উয়া মিচিক যীশুনি খাৎথাখো খিন্নানা মা·ন্নে উনোন রি·বাএ যীশুনি জা·চকো গা·আকেজক। 26 উয়া মিচিক যিহূদী হং·জামিং আরো বিয়া সুর-ফৈনীকীও আৎচিয়ামিং। বিয়া বিনি দেমিচিকোনি গিসিক নামগিজাগিবাখো হা·রিকেতখানা যীশুখো মল·মলজক। 27 যীশু বিনা আগানজক, ‘‘স্খাং দেদ্রাং অক্ষায়ে চা·খুনা, মুয়ানা দেদ্রাংনি চা·আনিখো রা·এ আচাকরাংনা গাল্লা নামজা।’’ 28 উনোন উয়া মিচিক আগানচাকজক, ‘‘গিত্তেল, না·আ খাকখেৎখোন আগানা, ইন্দিবা আচাকরাংবা টেবিলনি কক্ষুমাও গা·আকগিবা বি·সারাংনি চা·আনি বিগিনচিরাংখো চা·আ।’’ 29 যীশু বিনা আগানজক, ‘‘নাং·নি ইয়া খাৎথা আগানা নাম্মান। দা·আও রি·য়াংবো, রি·য়াংএ নিবো, গিসিক নামগিজাগিবা নাং·নি দেমিচিকখো ওয়াত্তাংজক।’’ 30 উয়া মিচিক উনোন নকচানা রি·য়াংফিল্লে বিনি দেমিচিকখো থুরামো থুয়ে দংআখো আরো বিনি নিং·আওনি গিসিক নামগিজাগিবাখো হং·খাতাখো নিক্কেজক। 31 উনি জা·মানো যীশু সোর জলখো ওয়াত্তে সীদোন সংজিলমা গিত্তা গালীল সাগালনি সেফাংও দেকাপলি জওলনি সংরাংচা রি·য়াংজক। 32 উনো মান্দিরাং সাকসা নাগক আরো আব্রা খু·গ্রি মান্দিখো যীশুচানা রা·বাজক আরো উয়া মান্দিনি সাক্কাও জাক দনদাপখানা বিখো মল·মলজক। 33 উনোন যীশু উয়া মান্দিখো মান্দি জিলমাওনিখো রিম্মাংএ বিনি নাচিল সামগ্মিও আন·থাংনি জাকসিখো দনজক। জা·মানো খু·চি দাপ্পে বিনি স্রিবাকখো দাংথাপজক। 34 আরো সালগিচানা নিগিদোয়ে বিয়া রাং·স্ফিতে উয়া মান্দিখো আগানজক, ‘‘এপ্‌ফাথা,’’ ফি·এ আগানোদে ‘‘খুলিয়াংবো।’’ 35 উনি গিম্মিন উয়া মান্দিনি নাচিল খুলিজক, স্রিবাকবা এংআংজক আরো উয়া থাল্লে স্রাং স্রাং দাক্কে খাৎথা আগান্না মান·জক। 36 ইরাংখো দারাংনাবা আগানজাখানা ইন্নে যীশু মান্দিরাংখো বাংখাংজক। ইন্দিবা বিনি বাংখাংওবা বিসং বাং·বাতেন উরাংখো আগানফ্রাকজক। 37 ইরাংনা মান্দিরাং নাম্মেন আইয়াও ইনমানে আগানজক, ‘‘বিয়া গিম্মিক কামখোন নাম্মেদাক্কে দাক্কা। বিয়া নাগকরাংনা খিন্নানা আরো আব্রা খু·গ্রিরাংনা খাৎথা আগান্নানি বিলখো হ·ন্না।’’

মার্ক 8

1 জা·মানো দা·আও সালসাও বাং·বিয়া মান্দি রি·বাএ থম·দাকজক। ইয়া মান্দিরাংচা চা·আনি মামুংবা দংজা ইন্নে যীশু বিনি জা·রিকগিবারাংখো রিংগামে আগানজক, 2 ‘‘ইয়া মান্দিরাংনা আংআ খা·সাচাক্কা, মুয়ানা সালগিত্থাম হং·জক ইরাং আংমুং দংআ, আরো ইরাংচা চা·আনি মামুংবা দংজা। 3 আরো আংআ বিসংখো অকগুমুন দন্নে নকথাংচানা ওয়াত্তেতোদে রামাওন বিসং নম·বকে গা·আকনুয়া, মুয়ানা বিসংনি গিসেপো মিত্তামরাংদে নাম্মেন চে·ল্লাচানি রি·বাআ।’’ 4 জা·রিকগিবারাং আগানচাকজক, ‘‘ইন্দিবা ইয়া মান্দিগ্রি মা·সুগ্র্রি হা·দামও ইয়া মান্দিরাংনা সা বানিখো ইন্দিসিক রুটিখো মা·ন্নুয়া?’’ 5 যীশু সিং·জক, ‘‘না·সংচা বাসিক গি·সা রুটি দংআ?’’ বিসং আগানজক, ‘‘গি·স্নি।’’ 6 বিয়া মান্দিরাংখো হা·আও আসংনা গি·য়েৎজক। জা·মানো বিয়া উয়া রুটি গিলস্নিখো রা·এ ইসলখো মিৎথেলে ফি·জক আরো মান্দিরাংনা হন·খানা ইন্নে জা·রিকগিবারাংনি জাক্কো হন·জক আরো জা·রিকগিবারাং উখো মান্দিরাংনা সুআলে হন·জক। 7 জা·রিকগিবারাংচা মিত্তাম চনচনগিবা না·থকরাংবা দংআমিং। যীশু উয়া না·থকরাংনাবা মিৎথেলজক আরো উরাংখো মান্দিরাংনা সুআলে হ·ন্না জা·রিকগিবারাংখো আগানজক। 8 মান্দিরাং উখো অক্ষায়ে চা·জক। জা·মানো জা·রিকগিবারাং গিৎচাগিবা ফি·থংথংআ রুটিরাংখো গি·স্নি খক্কো গাপ্পে খল্লামজক। 9 উনো মি·আসান হাজাল ব্রিরাং দংআমিং। উনি জা·মানো বিয়া মান্দিরাংখো ওয়াত্তেতজক আরো জা·রিকগিবারাংমুং গি·সা রিংও গাখাতে দল্‌মনুথা জওলোনা রি·য়াংজক। 11 উনো ফরীশীরাং রি·বাএ যীশুমুং জিগ্রিকনা হা·বাচেংজক আরো বিখো পরীক্ষা দাক্কে নিনা ইন্নে সালগিচানি মিংসা চিনখো ফিন্নিকখানা আগানজক। 12 ইনি গিম্মিন যীশু রাং·স্ফিতে আগানা, ‘‘ইয়া চাসংনি মান্দিরাং মুয়ানা চিনখো হা·ম্মিংআ? আংআ না·সংনা বিবিন আগানিংআ, মামুং চিনখোন ইয়া মান্দিরাংনা ফিন্নিকজানুয়া।’’ 13 জা·মানো বিয়া বিসংখো ওয়াত্তে দা·আবা রিংও গাখাতে সাগালনি নালসাচানা রি·য়াংজক। 14 জা·রিকগিবারাং রুটিখো রা·আংফানা গুয়ালামিং। রিংও বিসংমুং রুটি গি·সাসান দংআমিং। 15 যীশু উনো আগানজক, ‘‘না·সং সিমসাকবো, ফরীশীরাংনি আরো হেরোদনি ওয়ানথিনা সিমসাকে দংবো।’’ 16 ইনি গিম্মিন জা·রিকগিবারাং আন·থাংথাং আগানগ্রিকজক, ‘‘আনচিংচা রুটি দংজানি গিম্মিন বিয়া ইখো আগানিংআ।’’ 17 জা·রিকগিবারাংনি আগানাখো হা·আইএ যীশু বিসংনা আগানজক, ‘‘না·সংচা রুটি দংজা, ইখো না·সং মুয়ানা আগানিংআ? না·সং দা·আওবা হা·আইনা মান·খুজামা? না·সংনি খা·থংরাং রাক্কিংআমা? 18 না·সংনি মিক্রোন দংএবা নিকজামা? নাচিল দংএবা খিন্নাজামা? গিসিকবা রা·জামা? 19 জেনসালো আংআ হাজাল বংআ মান্দিনা গি·বংআ রুটিখো ফি·আমিং উনসালো না·সং ফি·থংথংআরাংখো বাসিক গি·সা খক্কো খল্লামামিং?’’ জা·রিকগিবারাং আগানজক, ‘‘খক চি·গ্মি।’’ 20 যীশু দা·আবা আগানজক, “জেনসালো আংআ হাজাল ব্রি মান্দিনা গিলস্নি রুটিখো ফি·য়ামিং উনসালো ফি·থংথংআরাংখো না·সং বাসিক খক গি·সাও খল্লামামিং?’’ বিসং আগানজক, ‘‘খক স্নি।’’ 21 উনোন বিয়া বিসংনা আগানজক, ‘‘ইন্দাকোদে না·সং দা·আওবা হা·আইখুজামা?’’ 22 জা·মানো যীশু আরো বিনি জা·রিকগিবারাং বৈৎসৈদা সংচানা রি·য়াংজক। উচানি মান্দিরাং মিক্‌গ্রি সাকসাখো যীশুচা রিমবাজক আরো বিনি বে·এনো জাক দনদাপনা বিখো মল·মলজক। 23 যীশু উয়া মিক্‌গ্রি মান্দিনি জাকখো রি·ম্মে সংনি হা·ফালচানা রিম্মাংজক। উনি জা·মানো উয়া মান্দিনি মিক্রোনও খু·চি দাপ্পেতজক আরো বিনি বে·এনো জাক দনদাপে সিং·জক, ‘‘না·আ মামুংখো নিকনা মা·ন্নিংআমা?’’ 24 উনোন উয়া মান্দি নিগিদোয়ে আগানজক, ‘আংআ মান্দিরাংখো নিকনা মা·ন্নিংআ, বিসং বলবিফাং গিত্তা দাক্কা, দা·আবা রি·রুরাখোবা নিকনা মা·ন্নিংআ।’’ 25 যীশু দা·আও রাং·সা বিনি মিক্রোনও জাক দনদাপজক। উনোন বিনি মিক্রোন গা·আওজক আরো বিয়া মিক্রোন নিকনা বিল মান·জক। বিয়া গিম্মিকখোন থাল্লে নিকনা মান·জক। 26 যীশু বিখো বিনি নকচানা ওয়াত্তেতোন আগানজক, ‘‘বৈৎসৈদা সংচা দা·আ রি·য়াংআবো।’’ 27 জা·মানো যীশু আরো বিনি জা·রিকগিবারাং কৈসরিয়া-ফিলিপি সংজিলমানি সেফাংরাংনি সংরাংচা রি·য়াংজক। রামাও রি·য়াংমিত্তিংও বিয়া জা·রিকগিবারাংচা সিং·জক, ‘আংআ সা, ইখো মান্দিরাং বাদিকে ইন্নিংআ?’’ 28 জা·রিকগিবারাং আগানজক, ‘‘মিত্তামরাং ইন্নিংআ না·আ রিপ্পলেতগিবা যোহন; মিত্তামরাং ইন্নিংআ না·আ এলিয়; দা·আবা মিত্তামরাং ইন্নিংআ না·আ আগানসোগিবারাংওনি সাকসা।’’ 29 উনো যীশু আগানজক, ‘‘ইন্দিবা না·সং বাদিকে ইন্নিংআ, আংআ সা? পিতর আগানচাকজক, ‘‘না·আন উয়া খ্রীষ্ট।’’ 30 উনোন যীশু আন·থাংনি গিম্মিন দারাংনাবা আগানজাখানা বিসংখো নাম্মেদাক্কে বাংখাংজক। 31 জা·মানো যীশু বিনি জা·রিকগিবারাংনা, মান্দিনি দেফান্থিখো বাং·এন দুক চাকনা নাংনুয়া ইন্নে স্খিনা হা·বাচেংজক। মি·আফারাং, খামাল দাল·গিবারাং আরো শাস্ত্র স্খিগিবারাং বিখো জেগালনুয়া। বিখো স·ওতে গালনুয়া আরো সালগিত্থামনি জা·মানো বিখো সিয়াওনি চাখাতফিলনা নাংনুয়া। 32 ইয়া খাৎথারাংখো বিয়া নাম্মে থাল্লেন আগানজক। উনো পিতর যীশুখো উয়োনি সামসাচাবাকা রিম্মাংএ বিখো খা·চানা হা·বাচেংজক। 33 যীশু হান·ফিলে জা·রিকগিবারাংচা নিএতজক আরো পিতরখো খা·চাএ আগানজক, ‘‘শয়তান, আংওনি খাতবো। ইসলনিখো না·আ চানচিগিজা, ইন্দিবা মান্দিনিখোসা চানচিয়া।’’ 34 ইনি জা·মানো বিয়া জা·রিকগিবারাংখো আরো গিপ্পিন মান্দিরাংখো আন·থাংচানা রিংগামে আগানজক, ‘‘সাবা আংনি রামাওনা রি·বাফানা হা·সিকোদে আন·থাংনি হা·সিকা গিত্তা রি·জাখানা; আন·থাংনি চিসলখো রিপ্পিএ বিয়া আংখো জা·রিকখানা। 35 আন·থাংনি গিম্মিন জেআন জাংগি থাংএতনা হা·ম্মা, বিয়া বিনি জাংগিখো গিম্মায়েতনুয়া, ইন্দিবা আংনি আরো ইসলনি হন·গিবা নাম্মা খাৎথানি গিম্মিন আন·থাংনি জাংগিখো জে হন·খামনা হা·ম্মা বিয়া চং·মতান বিনি জাংগিখো জক্কেৎনুয়া। 36 সাবা হা·গিলসাক দিমদাকখো মা·ন্নেবা আন·থাংনি জাংগিখো গিম্মায়েতোদে বিনি মামুং লাভ দংজা, 37 মুয়ানা চং·মত জাংগিখো মান·ফিলনা বিনি হ·ন্নানি গিত্তা মুয়া দংআ? 38 ইয়া চাসংনি বিবিরা·গিজাগিবা আরো পাপী মান্দিরাংনি গিসেপো সাবা আংনি গিম্মিন আরো আংনি খাৎথারাংনি গিম্মিন খ্রাচা·আওদে ইন্দিদে মান্দিনি দেফান্থিবা জেনসালো রংথালগিবা সা·গ্রেরাংমুং বিনি ফানি রাসংও রি·বানুয়া, উনো বিয়াবা উয়া মান্দিনা খ্রাচা·নুয়া।’’

মার্ক 9

1 জা·মানো যীশু জা·রিকগিবারাংনা আগানজক, ‘‘বিবিন আংআ না·সংনা আগানিংআ, ইসলনি সংনকনি বিল্লাকে রি·বাখো নিকখুজানা দিপ্পাৎ ইনো দংগিবারাংওনি মিত্তামরাং মামুং দাক্কেবা সিজানুয়া।’’ 2 উনি সাল দকনি জা·মানো যীশু পিতর, যাকোব আরো যোহন মা·মাংখো রিমবিতে চুয়াকগিবা গি·সা হা·ব্র্রিচানা রি·য়াংজক। ইয়া জা·রিকগিবারাংনি মিকখাংওন বিনি মিকখাং দিংথাং হং·ফিলজক। 3 বিনি বা·রারাং ইন্দাকফিল্লে চিং·ব্রাপে বকবিজক, হা·গিলসাকনি দারাং মান্দিবা ইন্দাকে বা·রাখো সু·গালে বক্কেতনা মান·জানুয়া। 4 জা·রিকগিবারাং উনো এলিয় আরো মোশিখো নিকনা মান·জক। বিসং যীশুমুং আগানগ্রিকিংআমিং। 5 উনোন পিতর যীশুখো আগানজক, ‘‘স্খিগিবা, ইনো চিংআ দংআ, ইয়ান নামজক। চিংআ ইনো নকথুপ গি·গিত্থাম রিকনাজক- গি·সা নাং·না, গি·সা মোশিনা আরো গি·সা এলিয়না।’’ 6 মুয়াখো আগান্না নাংনুয়া উখো পিতর হা·আইজাজক, মুয়ানা বিসং নাম্মেন খেনবিজকমিং। 7 উনো গাদিলা রি·বাএ বিসংখো সালাখিমদাপজক, আরো উয়া গাদিলাওনি ইয়া খু·রাংখো খিন্নানা মান·জক, ‘‘ইয়ান আংনি খা·সাগিবা দেফান্থি, না·সং বিনি খাৎথাখো খিন্নাচাকবো।’’ 8 জা·রিকগিবারাং উনোন গিম্মিকচানা নিউইলউইলে নিএতজক ইন্দিবা যীশুনা আগ্রে দারাংখোবা নিকজাজক। 9 জা·মানো হা·ব্র্রিওনি হং·খাতমিত্তিংও যীশু বিসংখো নাম্মেদাক্কে বেং·জক, ‘‘না·সং জেখো নিকজক উখো মান্দিনি দেফান্থি সিয়াওনি চাখাতখুজানা দিপ্পাৎ দারাংনাবা দা·আ আগানাবো।’’ 10 জা·রিকগিবারাং যীশুনি আগানাখো মানিজক, ইন্দিবা সিয়াওনি চাখাতানি অর্থ মুয়া হং·আ ইখো রা·এ আন·থাংথাংও আগানগ্রিকজক। 11 বিসং যীশুখো সিং·জক, ‘‘এলিয় স্খাং রি·বানা নাংবিবিয়া ইন্নে শাস্ত্র স্খিগিবারাং মুয়ানা আগানা?’’ 12 যীশু বিসংনা আগানচাকজক, ‘‘ইয়া খাৎথাদে বিবিন, এলিয় স্খাং রি·বাএ গিম্মিকখোন স্খাং গিত্তা থারিয়ে দনফিলনুয়া। ইন্দাকোবা মান্দিনি দেফান্থিখো বাং·এন দুক চাকনা আরো জেগালাখো মা·ন্না নাংনুয়া ইন্নে রংথালগিবা শাস্ত্রও বাদিকে দাক্কে চক্কা দংআ? 13 ইন্দিবা আংআ না·সংখো আগানিংআ, রংথালগিবা শাস্ত্রও এলিয়নি গিম্মিন জে গিত্তা চক্কা দংআ উগিত্তান বিয়া রি·বামিং, আরো মান্দিরাং আন·থাংথাংনি হা·সিকা গিত্তা বিনি সাক্কাও নামগিজাখো দাকজক।’’ 14 যীশু আরো উয়া সাকগিত্থাম জা·রিকগিবারাং গিপ্পিন জা·রিকগিবারাংচানা রি·বাফিলে বিসংনি সামব্রিও মান্দি বাং·আ থম·দাকাখো আরো বিসংমুং মিত্তাম শাস্ত্র স্খিগিবারাংনি জিগ্রিকাখো নিকনা মান·জক। 15 মান্দিরাং যীশুখো নিক্কারিন আইয়াও ইনমানজক আরো খাত্তাংএ বিখো সালাম হন·জক। 16 যীশু শাস্ত্র স্খিগিবারাংখো সিং·জক, ‘‘না·সং বিসংমুং মুয়াখো রা·এ জিগ্রিকিংআ?’’ 17 মান্দি জিলমাওনি সাকসা বিনা আগানজক, ‘‘ও স্খিগিবা, আংনি দেফান্থিখো নাং·চানা রা·বামিং। বিখো আব্রা গিসিক নামগিজাগিবা মা·ন্না। 18 উয়া গিসিক নামগিজাগিবা বিখো রিম·জোকনোন হা·আও গোস্থাপে গাল্লা। বিনি খু·সুকচানি খু·চি বকবাকে হং·খাতা আরো বিয়া ওয়াগাম চিকক্রতে রাক্‌দাক্‌দাক্‌ সিয়াংআ। উয়া গিসিক নামগিজাগিবাখো হা·রিকেতখানা আংআ নাং·নি জা·রিকগিবারাংখো আগানামিং, ইন্দিবা বিসং মান·জাজক।’’ 19 যীশু উনো আগানজক, ‘‘বিবিরা·গিজাগিবা মান্দিরাং! আংআ বাসিক সালসা না·সংমুং দংনুয়া? বাসিক না·সংনা চাকচিকনুয়া? বি·সাখো আংচানা রা·বাবো।’’ 20 উনোন মান্দিরাং বি·সাখো যীশুচানা রা·বাজক। যীশুখো নিক্কারিন উয়া গিসিক বি·সাখো সাকসেসেলজক। আরো উয়া বি·সা খু·সুকচানি খু·চি বকবাকে গাল্লে হা·আও রুমরুমনা নাংজক। 21 যীশু বিনি ফাগিবাখো সিং·জক, ‘‘বিনি ইন্দাকা বাসিক সালসা হং·জক?’’ উয়া মান্দি আগানজক, ‘‘চন্নোনিন। 22 ইয়া গিসিক নামগিজাগিবা বিখো সিখানা ইন্নে ফিল·নিফিল ওয়া·আলো আরো চিও গাল্লেতা। ইন্দিবা না·আ চিংনা মামুংখো দাকনা মা·ন্নোদে খা·সাচাক্কে চিংনা দাকচাকবো।’’ 23 যীশু বিনা আগানজক, ‘‘ ‘না·আ মা·ন্নোদে’ ইয়া মুয়াখো আগানজক? বিবিরা·গিবানা গিম্মিকখোন দাকনা মা·ন্না।’’ 24 উনোন উয়া বি·সানি ফাগিবা চ্রিকে আগানজক, “আংআ বিবিরা·আংজক, আংওনি বিবিরা·গিজাখো হা·রিকেতবো।’’ 25 মান্দি বাং·বিয়াওনি খাত্তে রি·বাখো নিক্কে যীশু উয়া গিসিক নামগিজাগিবাখো ইন্দাতে আগানজক, ‘‘ও নাগক আরো খু·গ্রি গিসিক, আংআ নাং·খো গি·য়েতিংআ, বিনি ইনোনি হং·খাতবো, আরো ইনো দা·আ নাপ্পাবো।’’ 26 উনোন উয়া গিসিক নামগিজাগিবা চ্রিকে উয়া বি·সাখো নাম্মেন সাকসেসেলজক আরো বিওনি হং·খাতাংজক। ইনি গিম্মিন উয়া বি·সা সিয়া গিত্তা গা·আকে দংজক ইখো নিক্কে বাং·বিয়া মান্দিন আগানজক, ‘‘বিয়া সিজক।’’ 27 ইন্দিবা যীশু বিনি জাকখো রি·ম্মে সালচাওন বিয়া চাখাতজক। 28 উনি জা·মানো যীশু নকনিংওনা নাপ্পাংজক। উনো জা·রিকগিবারাং মিৎথিনাও বিখো সিং·জক, ‘‘চিংআ উখো মুয়ানা হা·রিকনা মান·জাজক?’’ 29 যীশু আগানজক, ‘‘বি·আনি আগ্রে মামুং দাক্কেন ইন্দাকা গিসিক নামগিজাগিবাখো হা·রিকনা মান·জা।’’ 30 জা·মানো বিসং উয়া হা·দামখো ওয়াত্তে গালীল হা·দকনি জাংচি গিত্তা রি·য়াংজক। বিয়া বাচ্চা রি·য়াংআ, ইখো দারাংনাবা হা·আইএতনা হাম·জামিং। 31 মুয়ানা উনো বিয়া বিনি জা·রিকগিবারাংনা স্খিংআমিং। বিয়া বিসংনা আগানিংআমিং, ‘‘মান্দিনি দেফান্থিখো বোবিলরাংনি জাক্কো রি·ম্মে হ·ন্নুয়া। বিসং বিখো স·ওতে গালনুয়া আরো সালগিত্থামনি সালো বিয়া চাখাতফিলনুয়া।’’ 32 ইন্দিবা জা·রিকগিবারাং যীশুনি খাৎথাখো হা·আইনা মান·জাজক আরো বিখো সিং·নাবা বিসং খেনজক। 33 উনি জা·মানো যীশু আরো বিনি জা·রিকগিবারাং কফরনাহূমচানা রি·য়াংজক। যীশু নকনিংওনা রি·য়াংএ জা·রিকগিবারাংখো সিং·জক, ‘‘রামাও না·সং মুয়াখো রা·এ জিগ্রিকামিং?’’ 34 জা·রিকগিবারাং স্রক দাক্কে দংজক, মুয়ানা সা দাল·বাত্তা ইখো রা·এ রামাও বিসং জিগ্রিকিংআমিং। 35 যীশু আসংজক আরো উয়া সাকচিগ্মি জা·রিকগিবারাংখো রিংগামে আগানজক, ‘‘সাবা দাল·বাৎগিবা হং·না হা·ম্মোদে বিখো দিমদাকনি জা·মানো দংনা নাংনুয়া আরো দিমদাকনা দাকচাকে হ·ন্না নাংনুয়া।’’ 36 জা·মানো বিয়া সাকসা চনগিবা বি·সাখো রিমবায়ে জা·রিকগিবারাংনি মিকখাংও চাদেংএতজক। বিখো গিপ্পাকে বিয়া বিসংনা আগানজক, 37 “জে আংনি বিমুংও ইন্দাকগিবা বি·সাখো রা·চাকা বিয়া আংখোন রা·চাকা, আরো জে আংখো রা·চাকা বিয়া আংখোসান রা·চাকজা, ইন্দিবা আংখো ওয়াত্তেতগিবাখোন রা·চাকা।’’ 38 যোহন যীশুখো আগানজক, ‘‘স্খিগিবা, চিংআ সাকসাখো নাং·নি বিমুংচা গিসিক নামগিজাগিবারাংখো হা·রিকেতাখো নিক্কে বিখো বেং·জক, মুয়ানা বিয়া আনচিংনি মান্দি হং·জা।’’ 39 যীশু আগানজক, ‘‘বিখো দা·আ বেং·আবো। আংনি বিমুংখো মিংএ সাবা বিল্লাকানি কামখো দাক্কানি জা·মানো বিয়া ফি·ল্লে আংখো নামগিজাখো আগান্না মান·জা, 40 মুয়ানা আনচিংখো চাংফেংগিজাগিবা আনচিংনা চাকগিবা হং·আ। 41 বিবিন আংআ না·সংখো আগানিংআ, জে মান্দি না·সংনা খ্রীষ্টনি মান্দি ইন্নে দিকখিসা চিখো রিংনা হ·ন্না বিয়া বিনি মা·ন্নানিখো জাকওয়াত্তে গিম্মায়েতজানুয়া। 42 “আংখো বিবিরা·গিবা ইয়া চনচনগিবা বি·সারাংওনি সাকসাখো পাপনি রামাওনা সাবা রিম্মাংওদে, উনোদে বিনি গিত্তকো গি·সা দা·ল্লা রং·থিখো খায়ে বিখো সাগালচা গাল্লেতান বিনা নামবাত্তা। 43 নাং·নি জাক নাং·খো পাপনি রামাচানা সাল্লে রিম্মাংওদে 44 উখো দেন·থংএ গালবো। জাক সামগ্মিখো রা·এ নরকচা রি·য়াংআনা বাত্তে জাকখন্থা হং·এ জাংগিও নাপ্পান নাং·না নামবাত্তা। 45 উয়া নরকনি ওয়া·আলদে ফাংনাবা খিম্মিতজা। নাং·নি জা·আ নাং·খো পাপনি রামাচানা সাল্লাংওদে উখো দেন·থংএ গালবো। জা·আ সামগ্মিখো রা·এ নরকচা গা·আকানা বাত্তে জা·খরা হং·এ জাংগিও নাপ্পান নাং·না নামবাত্তা। 47 নাং·নি মিক্রোন নাং·খো পাপনি রামাওনা সাল্লাংওদে উখো ওত্তে গালবো। মিক্রোন সামগ্মিখো রা·এ নরকচা গা·আকানা বাত্তে কানা হং·এ ইসলনি সংনক্কোনা নাপ্পান নাং·না নামবাত্তা। 48 উয়া নরকচা মান্দি সিগিবানি বে·এনখো চা·গিবা জ·ওংরাং ফাংনাবা সিজা, আরো উনি ওয়া·আলদে ফাংনাবা খিম্মিতজা। 49 “খাসিম ফুয়া গিত্তা গিম্মিকনি সাক্কাওন ওয়া·আলখো ফুনুয়া। 50 ‘‘খাসিম নাম্মা, ইন্দিবা উনি থোয়া দংজাওদে বাদিকে উখো থোয়েতনুয়া? না·সংনি খা·থংও খাসিমখো দনবো আরো সাকসা সাকগিপ্পিনমুং থম·থমে দংরিমবো।’’

মার্ক 10

1 জা·মানো যীশু উয়া হা·দামখো ওয়াত্তে যিহূদিয়া হা·দকচা আরো যর্দন চিবিমানি নালসাচা রি·য়াংজক। উনোন ফি·ল্লে মান্দি বাং·বিয়া বিচা রি·বাএ থম·দাকজক। উনো বিয়া আন·থাং দাকবেওয়াল গিত্তা মান্দিরাংনা স্খিনা হা·বাচেংজক। 2 ইন্দাকমিত্তিংও মিত্তাম ফরীশীরাং রি·বাএ যীশুখো পরীক্ষা দাক্কে নিনা আগানজক, “মোশিনি নিয়াম গিত্তা জিকখো গালনা খ্রাআমা?’’ 3 যীশু বিসংনা আগানজক, ‘‘মোশি না·সংনা মুয়াখো গি·য়েৎজক?’’ 4 বিসং আগানজক, ‘‘বিয়া গাল্লানি লেকখাখো চক্কে জিকখো ওয়াতখানা আগানজক।’’ 5 যীশু আগানজক, ‘‘না·সংনি খা·থং রাক্কানি গিম্মিন মোশি ইখো গি·য়েতি চক্কামিং। 6 ইন্দিবা ইয়াবান চক্কা দংআ, দাকচেংওনিন ইসল বিসংখো মি·আ আরো মিচিক দাক্কে থারিয়ামিং। 7 ইনি গিম্মিনান মান্দি মা-ফাখো ওয়াত্তে জিকথাংমুং আপসান হং·এ দংনুয়া, 8 আরো বিসং সাকগ্মি বে·এন গি·সান হং·নুয়া। উনি গিম্মিন বিসং সাকগ্মি হং·জা, ইন্দিবা বে·এনসান হং·আ। 9 ইন্দাকোদে ইসল জেখো নাংরিমেতজক মান্দি উখো দিংথাংগ্রিক্কেতজাখানা।’’ 10 উনি জা·মানো বিসং নকচা নাপজক আরো জা·রিকগিবারাং ফি·ল্লে যীশুখো উনি গিম্মিন সিং·জক। 11 উনো বিয়া বিসংনা আগানজক, ‘‘সাবা জিকথাংখো গাল্লে গিপ্পিন মিচিকখো খিম্মোদে বিয়া বিনি জিকথাংনি সাক্কাও থি·ল্লেকা। 12 আরো জিকবা সেথাংখো গাল্লে গিপ্পিন মি·আসাখো খিম্মোদে বিয়াবান থি·ল্লেকা।’’ 13 জা·মানো চনচনগিবা বি·সারাংনি সাক্কাও জাক দনদাপখানা ইন্নে মান্দিরাং বিসংখো যীশুচা রিমবাজক। ইন্দিবা জা·রিকগিবারাং উয়া মান্দিরাংখো খা·চাজক। 14 যীশু উখো নিক্কে নাম্মেন নামনিকজায়ে জা·রিকগিবারাংখো আগানজক, ‘‘চনচনগিবা বি·সারাংখো আংচানা রি·বানা হন·বো, দা·আ বেং·আ, মুয়ানা ইসলনি সংনক ইন্দাকগিবা মান্দিরাংনান হং·আ। 15 বিবিন আংআ না·সংনা আগানিংআ, বি·সা চনগিবারাং গিত্তা ইসলনি শাসনখো মানিজাওদে মামুং দাক্কেবা ইসলনি সংনকচা নাপনা মান·জানুয়া।’’ 16 জা·মানো যীশু উয়া বি·সারাংখো গিপ্পাকজক আরো বিসংনি স্খুও জাক দন্নে ফাত্তিজক। 17 যীশু দা·আবা রামাচানা হং·খাতবাও সাকসা মান্দি খাতবায়ে বিচা রি·বাজক আরো বিনি মিকখাংও জা·স্খু দে·ম্মে আগানজক, ‘‘ও স্খিগিবা, না·আ সাকসা নাম্মা মান্দি। আংনা আগানবো, ফাংনাজলনি জাংগিখো মান·রিকনা আংআ মুয়াখো দাকনুয়া?’’ 18 যীশু বিনা আগানজক, ‘‘আংখো মুয়ানা নামগিবা ইন্নিংআ? ইসলনি আগ্রে দারাংবা নামজা। 19 না·আদে গি·য়েতারাংখো হা·আইয়া -‘মান্দিখো দা·আ স·ওতাবো, দা·আ থি·ল্লেকাবো, দা·আ চা·উয়াবো, দা·আ বু·এ সাক্ষি হ·ন্নাবো, দা·আ থকাই চা·আবো, মা·খো-ফাখো মান্দিরা·বো।’ ” 20 উয়া মান্দি যীশুখো আগানজক, ‘‘স্খিগিবা, চন্নোনিন আংআ ইয়া গিম্মিকখোন মানিয়ে রি·বাংজক।’’ 21 ইনি গান্দা যীশু বিচাখো নিএতজক আরো খা·সাফিল্লে বিনা আগানজক, ‘‘নাং·নি মিংসা দাকনা দংখুংআ। রি·য়াংবো, নাং·নি দংগিবারাংখো ফাল্লে দিল্লা-চন্নারাংনা হন·বো। ইন্দাকোদে না·আ সালগিও গামখো মা·ন্নুয়া। উনি জা·মানো রি·বাএ আংখো জা·রিকফাবো।’’ 22 ইয়া খাৎথাখো খিন্নাএ উয়া মান্দিনি মিকখাং সিমফ্রাকজক। বিনি গামজিন বাং·বিয়ামিং ইন্নে বিয়া দুক মা·ন্নে রি·য়াংজক। 23 উনোন যীশু গিম্মিকচানা নিউইলউইলে বিনি জা·রিকগিবারাংনা আগানজক, ‘‘মা·ন্নে চা·গিবা মান্দিরাংনা ইসলনি সংনক্কো নাপনা বাসিক নেং·গ্রিকা!’’ 24 জা·রিকগিবারাং যীশুনি খাৎথানা আইয়াও ইনমানজক। যীশু ফি·ল্লে আগানজক, ‘‘দেদ্রাং, গামরাংও জেরাং ফাংচাকা ইসলনি সংনক্কো নাপনা বিসংনা বাসিক নেং·গ্রিকা। 25 মা·ন্নে চা·গিবানি ইসলনি সংনক্কো নাপ্পানা বাত্তে সিল্লেংসিনি হা·খল গিত্তা উটনি রি·য়াংআন আলথুবাত্তা।’’ 26 ইনি গিম্মিন জা·রিকগিবারাং নাম্মেন আইয়াও ইনমানফিল্লে আগানগ্রিকজক, ‘‘ইন্দিদে সা পাপওনি জকনা মা·ন্নুয়া?’’ 27 যীশু বিসংচাখো নিএ আগানজক, ‘‘মান্দিরাংনা ইয়াদে হামগিজানি হং·আ ইন্দিবা ইসলনাদে ইন্দাকে হং·জা, বিনা গিম্মিকান হাম্মানি হং·আ।’’ 28 পিতর বিনা আগানজক, ‘‘নিবো, চিংআদে গিম্মিকখো ওয়াত্তে নাং·খো জা·রিকজক।’’ 29 যীশু আগানচাকজক, ‘‘বিবিন আংআ না·সংনা আগানিংআ, জেরাং আংনি গিম্মিন আরো ইসলনি হন·গিবা নাম্মা খাৎথানি গিম্মিন নকখো, জংআদা-নআবিরাংখো, মা-ফাখো, দেদ্রাংখো আরো হা·বারাংখো ওয়াতজক, 30 ইয়া চাসংওন বিয়া উনি রিৎচাসা বাং·বাত্তে নকরাংখো, জংআদা-নআবিরাংখো, মা·খো, দেদ্রাংখো আরো হা·বারাংখো মা·ন্নুয়া আরো উমুং দুকবা মা·ন্নুয়া আরো জা·মানো রি·বাগিবা চাসংও ফাংনাজলনি জাংগিখো মা·ন্নুয়া। 31 ইন্দিবা স্খাংগিবারাংওনি বাং·এন জা·মান চাকনুয়া, আরো জা·মানগিবারাং স্খাংগিবা হং·নুয়া।’’ 32 উনি জা·মানো যীশু আরো বিনি জা·রিকগিবারাং যিরূশালেমনি রামাওনা রি·য়াংজক। যীশু বিসংনা স্খাং স্খাং রি·য়াংআমিং, জা·রিকগিবারাং আইয়াও ইনমানে বিমুং রি·য়াংআমিং আরো জা·রিকফাগিবা মান্দিরাংবা খেন্নে খেন্নে রামা রি·য়াংআমিং। যীশু ফি·ল্লে বিনি সাকচিগ্মি জা·রিকগিবারাংখো রিংগামে আন·থাংনি সাক্কাও হং·নাগিবারাংখো বিসংনা আগান্না হা·বাচেংজক। 33 বিয়া আগানজক, ‘‘নিবো, আনচিং যিরূশালেমচানা রি·য়াংআ। উনো মান্দিনি দেফান্থিখো খামাল দাল·গিবারাং আরো শাস্ত্র স্খিগিবারাংনি জাক্কো রি·ম্মে হ·ন্নুয়া। বিসং বিনি বিচাল দাক্কে বিখো স·ওতনা হ·ন্নুয়া আরো গিপ্পিন জাতরাংনি জাক্কো হ·ন্নুয়া। 34 গিপ্পিন জাতরাং বিখো খাল·স্থাপনুয়া, বিনি বে·এনো খু·চি দাপনুয়া, বিখো চাবুকচা নাম্মেন দকনুয়া আরো স·ওতনুয়া। সালগিত্থামনি সালো বিয়া দা·আবা চাখাতফিলনুয়া।’’ 35 জা·মানো সিবদিয়নি দেফান্থি যাকোব আরো যোহন যীশুচা রি·বাএ আগানজক, ‘‘স্খিগিবা, চিংনি হা·সিকা ইয়ান, চিংআ জেখো হাম·নুয়া না·আ উখোন চিংনা দাকবো।’’ 36 যীশু আগানজক, ‘‘না·সংনা আংআ মুয়াখো দাকনুয়া? না·সং মুয়াখো হা·ম্মিংআ?’’ 37 বিসং আগানজক, “জেনসালো না·আ নাং·নি রাসংখো রা·এ শাসন দাকনুয়া উনসালো চিংখো সাকসাখো নাং·নি জাক্রাচা আরো সাকসাখো জাক্কাসিচা আসংনা হন·বো।’’ 38 যীশু আগানজক, ‘‘না·সং মুয়াখো হা·ম্মিংআ উখো হা·আইজা। জে দুকনি রিংচাকানিও আংআ রিংনা রি·য়াংইংজক উয়ো না·সং রিংনা মা·ন্নামা? বা আংআ জে রিপ্পলাখো মা·ন্না রি·য়াংইংজক উখো না·সং মা·ন্নুয়ামা?’’ 39 বিসং আগানজক, “হো·এ, মা·ন্না।’’ উনো যীশু বিসংনা আগানজক, ‘‘জে দুকনি রিংচাকানিও আংআ রিংনুয়া উনোন না·সং রিংনুয়া, আরো আংআ জে রিপ্পলাখো রা·নুয়া উখো না·সংবা রা·নুয়া, 40 ইন্দিবা আংনি জাক্রাচা আরো জাক্কাসিচা আসংনা হ·ন্না আংনি বিল দংজা। জেরাংনা উয়া হা·দামরাংখো দাকসোজক বিসংসান উখো মা·ন্নুয়া।’’ 41 ইখো খিন্নাএ সাকচিখুং জা·রিকগিবা যাকোব আরো যোহনখো খা·আওনাংজক। 42 উনোন যীশু দিমদাকখো রিংগামে আগানজক, ‘‘গিপ্পিন জাতরাংনি শাসন দাকগিবারাং বিসং জাতস্খানি গিত্তেল হং·আ আরো বিসংনি দাল·গিবারাং বিসংনি সাক্কাও বিলখো ফিন্নিকিংআ, ইখো না·সং হা·আইয়া। 43 ইন্দিবা না·সংও ইন্দাকে হং·না খ্রাজা, বাত্তেসা না·সংনি গিসেপো সাবা দাল·বাৎনা হা·সিকোদে বিনি না·সংনা দাকচাকে হ·ন্না নাংনুয়া, 44 আরো সাবা স্খাংগিবা হং·না হা·সিকোদে বিখো গিম্মিকনি নকখল হং·না নাংনুয়া। 45 ইখো গিসিক রা·বো, মান্দিনি দেফান্থি দাকচাকে হ·ন্নাখো মা·ন্না রি·বাজা ইন্দিবা দাকচাকে হ·ন্না রি·বাআ আরো বাং·আ মান্দিরাংনি জক্কানি গামচাতানি খ্রি বিসংনি জাংগিনি ফাল জাংগিথাংখো হন·চাকনা রি·বাআ।’’ 46 জা·মানো যীশু আরো বিনি জা·রিকগিবারাং যিরীহো সংজিলমাচানা রি·য়াংজক। বিয়া জা·রিকগিবা আরো বাং·আ মান্দিরাংমুং উয়া সংজিলমাচানি রি·য়াংমিত্তিংও তীময়নি দেফান্থি বরতীময় মিংগিবা সাকসা মিকগ্রি রামা হা·সামো আসংএ দংআমিং। ‘‘বিয়া নাসরত সংনি যীশু,’’ 47 ইখো খিন্নাএ বিয়া চ্রিকে ইনজক, ‘‘দায়ূদনি দেফান্থি যীশু, আংনা খা·সাচাকবো।’’ 48 ইনি গিম্মিন দিমদাকান বিখো ইন্দাত্তে জ্রিপ দংখানা আগানজক, ইন্দিবা বিয়া আরোসা চ্রিকে আগানজক, ‘‘দায়ূদনি দেফান্থি, আংনা খা·সাচাকবো।’’ 49 যীশু চাদেংদিপে আগানজক, ‘‘বিখো রিক্কামবো।’’ মান্দিরাং মিকগ্রিখো রিংগামে আগানজক, ‘‘দা·আ খেন্না, চাখাতবো। বিয়া নাং·খো রিক্কামিংআ।’’ 50 উনোন বিয়া আন·থাংনি বা·রা চিন্নাখো গাল্লে চাচ্রকে চাখাতজক আরো যীশুচা রি·য়াংজক। 51 যীশু বিখো সিং·জক, ‘‘আংআ নাং·না মুয়াখো দাকনুয়া? না·আ মুয়াখো হা·ম্মিংআ?’’ মিকগ্রি উনো আগানজক, ‘‘স্খিগিবা, আংআ নিকনা হা·ম্মিংআ।’’ 52 যীশু আগানজক, ‘‘রি·য়াংবো, নাং·নি বিবিরা·আ নাং·খো নাম্মেতজক।’’ উনোন বিয়া নিকনা মান·জক আরো যীশুমুং রামাখো রি·য়াংফাজক।

মার্ক 11

1 বিসং যিরূশালেমনি সেফাংওনা সক্কাংএ জৈতুন হা·ব্রিনি জা·রেকো দংগিবা বৈৎফগী আরো বৈথনিয়া সংচানা রি·বাজক। উনো সক্কে যীশু বিনি সাকগ্মি জা·রিকগিবারাংখো ইন্দাকে আগানে ওয়াত্তেতজক, 2 ‘‘না·সং উয়া মিকখাংনি সংচানা রি·য়াংবো। সংও নাপমিত্তিংও উনো খায় দনগিবা মাংসা গাধা বি·সাখো নিকনা মা·ন্নুয়া। উনি সাক্কাও দারাংবা মামুং সাল্লোবা গাখাতখুজা। 3 না·সং উখো এংএ ইয়োনা রা·বাবো। সাবা না·সংখো ‘না·সং মুয়াখো দাক্কিংআ?’ ইন্নে সিং·ওদে ‘গিত্তেলনা নাংআ, আরোবা বিয়া থেংরিন ইখো ইয়োনা ওয়াত্তেতফিলনুয়া’ ইন্নে আগানবো।” 4 উনোন বিসং রি·য়াংএ রামা সাক্কাও নকনি দ·গাচিলও গাধা বি·সাখো খায়ে দন্নাখো নিক্কেজক। বিসং উখো এংমিত্তিংও, 5 উনো চাদেংএ দংগিবারাং সিং·জক, ‘‘না·সং মুয়াখো দাক্কিংআ? গাধা বি·সাখো মুয়ানা এংআ?’’ 6 বিসং যীশুনি আগানেতা গিত্তান আগানচাকজক। উনোন মান্দিরাং বিসংখো উখো রা·আংখানা হন·জক। 7 বিসং উয়া গাধা বি·সাখো যীশুচা রা·বাএ উনি সাক্কাও আন·থাংথাংনি চিন্নানি বা·রারাংখো আনদাপজক। আরো যীশু উনি সাক্কাও আসংজক। 8 বাং·বিয়া মান্দিরাং আন·থাংথাংনি চিন্নানি বা·রারাংখো রামা সাক্কাও আনদাপে হন·জক, আরো গিপ্পিনরাং হা·বাও দংগিবা বিফাংরাংনি ডালারাংখো বিজাক গ্মাং দে·ন্নে রা·বাএ রামা সাক্কাও আনদাপজক। 9 যীশুনা স্খাং রি·গিবারাং আরো জা·মান রি·গিবারাং চ্রিকে আগান্না হা·বাচেংজক, ‘‘হোশান্না! গিত্তেলনি বিমুংও রি·বাগিবানি রাসং হং·খানা। 10 আনচিংনি ফাগিবা দায়ূদনি রি·বাগিবা সংনকনি রাসং হং·খানা। সালগিওবা হোশান্না!’’ 11 যিরূশালেমচা রি·য়াংএ যীশু থরম নক্কো নাপ্পেজক আরো গিম্মিকখোন নিউইল উইলে নিজক, ইন্দিবা সাল নাপজক ইন্নে বিনি সাকচিগ্মি জা·রিকগিবারাংখো রা·এ বিয়া বৈথনিয়াচা রি·য়াংআরিজক। 12 উনি সালসা জা·মানো বিসং বৈথনিয়াখো ওয়াত্তে রি·য়াংমিত্তিংও যীশু অকখ্রিয়ানা দাকজক। 13 উনো ডুমুর বিথি মিন্‌খারি হং·খুজামিং, ইন্দিবা বিয়া চে·ল্লাচানি বিজাক গাপচিপগিবা ডুমুর বিফাং ফাংসাখো নিক্কে উনো বিথি নাংআমা নাংজা উখো নিনা রি·য়াংজক। সেফাংও রি·য়াংএ বিজাকরারানা আগ্রে মামুংখোবা নিকজাজক। 14 উনি গিম্মিন বিয়া উয়া বিফাংখো আগানজক, ‘‘নাং·নি বিথিখো দারাংবা মামুং সালোবা চা·জাখানা।’’ জা·রিকগিবারাং যীশুনি ইয়া খাৎথাখো খিন্নানা মান·জক। 15 যিরূশালেমচা সক্কে যীশু থরম নকচানা নাপজক আরো উনো ফালগিবা আরো ব্রিগিবারাংখো হা·রিকেতজক। বিয়া থাংখা স্রিগিবারাংনি দনচাকানিরাংখো আরো কইতর ফালগিবারাংনি আসংচাকানিরাংখো ফাংফিল্লেতজক। 16 থরম নকনি হা·থিলা গিত্তা ফাল্লানি-ব্রিয়ানি মামুংখোবা রা·এ রি·য়াংনা হন·জাজক। 17 জা·মানো স্খিনা হা·বাচেংও বিয়া মান্দিরাংনা আগানজক, ‘‘শাস্ত্রও ইন্দাকে চক্কা দংজামা, ‘আংনি নকখো গিম্মিক জাতরাংনি বি·আনি নক ইন্নে মিংনুয়া’? ইন্দিবা না·সং ইখো রা·সেকগিবারাংনি হা·খল দাক্কে রা·জক!’’ 18 ইখো খিন্নাএ খামাল দাল·গিবারাং আরো শাস্ত্র স্খিগিবারাং যীশুখো স·ওতে গালনা ইন্নে চল সান্দিনা হা·বাচেংজক। বিসং যীশুনা খেন্নুয়ামিং, মুয়ানা যীশুনি স্খিয়ানা মান্দিরাং আইয়াও ইনমানামিং। 19 হান·থামানি জা·মানো বিয়া জা·রিকগিবারাংখো রা·এ সংজিলমাখো ওয়াত্তে রি·য়াংজক। 20 ফ্রিংও উয়া রামা গিত্তা রি·বামিত্তিংও জা·রিকগিবারাং নিকনা মান·জক, উয়া ডুমুর বিফাং জা·দিলমাংগ্মাং সিক্রেপাংজক। 21 যীশুনি খাৎথাখো গিসিক রা·এ পিতর যীশুনা আগানজক, ‘‘স্খিগিবা, নিবো, না·আ জে ডুমুর বিফাংখো শাপ হ·ন্নামিং উয়া সিক্রেপাংজক।’’ 22 উনো যীশু আগানজক, ‘‘ইসলো বিবিরা·বো। 23 বিবিন আংআ না·সংনা আগানিংআ, জে মান্দি খা·থংও মামুংনা খেনচাকগিজা ইয়া হা·ব্রিখো আগানা, ‘চাখাত্তে সাগালচা রি·য়াংএ গা·আকবো,’ আরো বিয়া জেখো আগানা উয়ান হং·নুয়া ইন্নে বিবিরা·ওদে বিনা উখোন দাক্কানি হং·নুয়া। 24 উনি গিম্মিন আংআ না·সংনা আগানিংআ, বি·আও না·সং জেখো হাম·নুয়া, না·সং উখো মান·জক ইন্নে বিবিরা·বো, আরো না·সংনা উয়ান হং·নুয়া। 25 না·সং জেনসালো বি·আ উয়া সময়ও সানিবা সাক্কাও না·সংনি খা·আওনাংআনি দংওদে, বিখো ক্ষেমা দাকবো, জেদাক্কে না·সংবা না·সংনি সালগিও দংগিবা ফানি ক্ষেমা দাক্কাখো মা·ন্না।’’ 27 জা·মানো যীশু আরো বিনি জা·রিকগিবারাং ফি·ল্লে যিরূশালেমচানা রি·য়াংজক। বিয়া থরম নক্কো রি·রুরাএ দংমিত্তিংও খামাল দাল·গিবারাং, শাস্ত্র স্খিগিবারাং আরো মি·আফারাং বিচা রি·বাএ সিং·জক, 28 ‘‘না·আ বাগিবা বিলচা ইরাংখো দাক্কিংআ? সা নাং·না ইয়া বিলখো হন·জক?’’ 29 যীশু উনো আগানচাকজক, ‘আংআ না·সংচা মিংসা খাৎথাখো সিং·নুয়া। না·সং আংনা আগানচাকনা মা·ন্নোদে আংআবা না·সংনা আগান্নুয়া, আংআ বাগিবা বিলচা ইরাংখো দাক্কিংআ। 30 দে আগানে নি, রিপ্পলেতানি বিলখো যোহন ইসলোনি মা·ন্নামিংমা, মান্দিওনি মা·ন্নামিং?’’ 31 উনো আন·থাংথাংও বিসং ইন্দাকে চানচিগ্রিকজক, ‘‘আনচিং ‘ইসলোনি’ ইন্নে আগানোদে, বিয়া আগান্নুয়া, ‘ইন্দাকোদে না·সং বিখো মুয়ানা বিবিরা·জাজক?’ 32 দা·আবা ‘মান্দিওনি,’ ইন্নে আগানোদে, ইন্দাকোদে?’’ বিসং মান্দিরাংনা খেন্নুয়ামিং, মুয়ানা গিম্মিকান যোহনখো আগানসোগিবা বিবিন ইন্নে চানচিনুয়ামিং। 33 উনি গিম্মিন বিসং আগানজক, ‘‘চিংআদে হা·আইজা।’’ উনোন যীশু আগানজক, ‘‘ইন্দাকোদে আংআবা না·সংনা আগানজানুয়া, আংআ বাগিবা বিলচা ইরাংখো দাক্কিংআ।’’

মার্ক 12

1 উনি জা·মানো যীশু গল্পচা থয়ে স্খিনা হা·বাচেংজক। বিয়া আগানজক, ‘‘সাকসা মান্দি আংগুর বাগানখো দাক্কে উনি দিমদাক গিত্তা বেড়া দিম·জক। জা·মানো আংগুর বিৎচিখো চিম্মংএ রা·রিকনা হা·খল খলসা খিতজক আরো উখো রাক্ষিনা গি·সা চুয়াকগিবা বরাং নকখো রিকজক। জা·মানো বিয়া মিত্তাম গামগিবাচা উয়া বাগানখো নিরকখিনা দন্নে হা·সং গিপ্পিনচা রি·য়াংজক। 2 বিথি মিন্‌খারিও বিয়া আন·থাংনি ফালনি বিথিরাংখো মান·ফানা নকখল সাকসাখো উয়া গামগিবারাংচা ওয়াত্তেতজক। 3 ইন্দিবা উয়া গামগিবারাং উয়া নকখলখো রি·ম্মে দকজক আরো জাকরারা ওয়াত্তেতজক। 4 উনো নকগিবা দা·আও সাকসা নকখলখো বিসংচা ওয়াত্তেতজক। গামগিবারাং বিনি স্খুখো দক্কে মাত্তেতজক আরো চন্নিকে মান্দি রা·গিজা দাকজক। 5 ইন্দাকোবা বিয়া দা·আও সাকসাখো ওয়াত্তেতজক। গামগিবারাং বিখো স·ওতে গালজক। জা·মানো বিয়া আরোবা বাং·আরাংখোন ওয়াত্তেতজক, ইন্দিবা বিসংনি গিসেপো মিত্তামরাংখো দকজক আরো মিত্তামরাংখোদে স·ওতেন গালজক। 6 ‘‘উচা ওয়াত্তেতনা গিত্তা নকগিবানি দা·আও সাকসাসান দংআমিং। উয়াদে বিনি খা·সাগিবা দেফান্থিমিং। জা·মানচাবাক্কা বিয়া বিনি দেফান্থিখোন ওয়াত্তেতজক, বিয়া ইন্দাকে চানচিজক, ‘জেদাক্কেবা হং·খানা, বিসং আংনি দেফান্থিখোদে মান্দিরা·নুয়া।’ 7 ইন্দিবা উয়া গামগিবারাং আন·থাংথাং আগানগ্রিকজক, ‘ইয়ান জা·মানো গামজিনরাংনি নকগিবা হং·নুয়া। হাই, আনচিং বিখো স·ওতে গালনা, উনোদে আনচিংআন গামজিনরাংনি নকগিবা হং·না মা·ন্নুয়া।’ 8 বিসং দেফান্থিখো রি·ম্মে স·ওতে গালজক আরো আংগুর বাগাননি হা·ফালচা গাল্লেতজক। 9 ‘‘ইন্দাকোদে দে আগানে নি, আংগুর বাগাননি নকগিবা মুয়াখো দাকনুয়া? বিয়া রি·বাএ উয়া গামগিবারাংখো স·ওতে গালনুয়া আরো আংগুর বাগানখো গিপ্পিনরাংচা হ·ন্নুয়া। 10 না·সং রংথালগিবা শাস্ত্রও পড়িখুজামা, ‘জে রং·থিখো রিকগিবারাং জেগালে গাল্লামিং উয়ান দা·আও নাংবাৎগিবা রং·থি হং·জক; 11 গিত্তেলান ইখো দাকজক, আরো ইয়া আনচিংনা বাদাকফিল্লে আইয়াও ইনমানানি হং·আ?’ ’’ 12 উনো থরমনি উয়া দাল·গিবারং যীশুখো রিম·না হাম·জক, মুয়ানা যীশু বিসংনি গিম্মিনান ইখো আগানজক ইন্নে বিসং হা·আইনা মান·জকমিং। ইন্দিবা বিসং মান্দিরাংনা খেন্নি যীশুখো ওয়াত্তে রি·য়াংআরিজক। 13 জা·মানো থরমনি উয়া দাল·গিবারাং যীশুখো বিনি খাৎথাচা রিম·না ইন্নে মিত্তাম ফরীশী আরো হেরোদনি মান্দিরাংখো ওয়াত্তেতজক। 14 বিসং যীশুচা রি·বাএ আগানজক, ‘‘স্খিগিবা, চিংআ হা·আইয়া না·আ সাকসা বিবিগিবা মান্দি হং·আ, নাং·ও মামুং দাকমিকানি দংজা। মান্দিরাং মুয়াখো চানচিনুয়া বা চানচিজানুয়া উনা না·আ খেনজা, মুয়ানা না·আ দারাংনি মিকখাংখো নিএ মামুং দাকজাংআ। ইন্দিবা না·আ বিবি দাক্কে ইসলনি রামাখো স্খিয়ে হ·ন্না। দা·আও না·আ আগানবো, মোশিনি নিয়াম গিত্তা রোমনি রাজানা খাজিনাখো হ·ন্না খ্রাআমা? 15 বিনা আনচিং খাজিনা হ·ন্না নাংনুয়ামা নাংজানুয়া?’’ বিসংনি বু·এ চা·আখো হা·আইনা মা·ন্নে যীশু আগানজক, ‘‘না·সং মুয়ানা আংখো পরীক্ষা দাক্কিংআ? আংনা দীনার গং·সাখো রা·বাএ ফিন্নিকবো।’’ 16 বিসং দীনার গং·সাখো রা·বাএ হ·ন্নানি জা·মানো যীশু বিসংখো সিং·জক, ‘‘ইনি সাক্কাও দংগিবা মিকখাং আরো বিমুং সানি?’’ বিসং আগানজক, ‘‘রোম রাজানি।’’ 17 যীশু বিসংনা আগানজক, ‘‘বাগিবা রাজানি উখো রাজানা হন·বো, আরো বাগিবা ইসলনি উখো ইসলনা হন·বো।’’ যীশুনি ইয়া খাৎথানা বিসং আইয়াও ইনমানজক। 18 মিত্তাম সদ্দূকীরাং যীশুচা রি·বাজক। সদ্দূকীরাংনি চানচিয়া গিত্তা সিগিবারাংদে চাখাতফিলজানুয়া। ইনি গিম্মিন বিসং যীশুচা সিং·জক, 19 ‘‘স্খিগিবা, মোশি চিংনা ইয়া খাৎথাখো চক্কে দন্নাংজক, ‘সানিবা আদাথাং বি·সাগ্রি দাক্কে বিনি জিকখো দন্নে সিয়াংওদে বিনি জংগিবা বিনি জিকখো দংনুয়া আরো আদাথাংনি হং·এ বিৎচ্রিখো রা·রিকনা নাংনুয়া।’ 20 নাম্মেন নাম্মা, বিসং আদাসা সাকস্নি দংআমিং। দাল·বাৎগিবা জিক খিম্মে দেগ্রি দাক্কেন সিজক। 21 উনো গ্মিগিবা জংগিবা আদাথাংনি উয়া রান্দি জিকখো খিমজক, ইন্দিবা বিয়াবা দেগ্রি দাক্কেন সিজক। গিত্থামগিবানি অবস'াবা উয়ানদাক্কেন হং·জক। 22 ইন্দাকে সাকস্নিনি গিসেপো সাকসানিবা বি·সা-আংদি হং·জাজক। দিমদাকনি জা·মানো উয়া মিচিকবা সিজক। 23 ইন্দাকোদে সিগিবারাং জেনসালো চাখাতফিলনুয়া উনসালো উয়া মিচিক সানি জিকগিবা হং·নুয়া? মুয়ানা সাকস্নিনি দিমদাকান বিখো খিম্মামিং।’’ 24 যীশু আগানচাকজক, ‘‘না·সং ব্রাংইংজক, মুয়ানা না·সং শাস্ত্রখোবা হা·আইজা আরো ইসলনি বিলখোবা হা·আইজা। 25 সিগিবারাং জেনসালো চাখাতফিলনুয়া উনো বিসং জিক-সে খিমজানুয়া আরো বিসংখো জিক-সে খিমনাবা হন·জানুয়া; উনো বিসং সালগিও দংগিবা সা·গ্রেরাং গিত্তা হং·নুয়া। 26 সিগিবারাংনি চাখাতফিল্লানি গিম্মিনো মোশিনি খি·তাপো ওয়া·আল চিং·গিবা বলনি খাৎথাখো না·সং পড়িখুজামা, ইসল মোশিখো ইন্না, ‘আংআ অব্রাহামনি ইসল, 27 ইস্‌হাকনি ইসল আরো যাকোবনি ইসল’? ইসলদে সিগিবারাংনি ইসল হং·জা, বিয়া থাংগিবারাংনিন ইসল হং·আ। না·সং নাম্মেন ব্রাংইংজক।’’ 28 শাস্ত্র স্খিগিবা সাকসা উনো রি·বাএ বিসংনি জিগ্রিকাখো খিন্নানা মান·জক। যীশু বিসংনা নাম্মেদাক্কেন আগানচাকজক ইখো নিক্কে বিয়া যীশুচা সিং·জক, ‘‘মোশিনি হন·গিবা দিমদাক গি·য়েতারাংনি গিসেপো বাগিবা গি·য়েতা দাল·বাত্তা?’’ 29 যীশু আগানচাকজক, ‘‘দাল·বাৎগিবা গি·য়েতা ইয়ান, ‘ইস্রায়েলনি মান্দিরাং খিন্নাবো, আনচিংনি গিত্তেল ইসল সাকসাসান। 30 না·আ নাং·নি গিম্মিক খা·থংচা, নাং·নি গিম্মিক জাংগিচা, নাং·নি গিম্মিক গিসিকচা আরো নাং·নি গিম্মিক বিলচা নাং·নি ইসলনা খা·সাবো।’ 31 উনি জা·মাননি গি·য়েতা ইয়ান, ‘নাং·নি সংসুল-নকসুলখো আন·থাংনি গিত্তান খা·সাবো।’ ইয়া গি·গ্মি গি·য়েতারাংনি আগ্রে দাল·বাৎগিবা গি·য়েতা মামুংবা দংজা।’’ 32 উনোন উয়া শাস্ত্র স্খিগিবা আগানজক, ‘‘স্খিগিবা, ইয়া খাৎথাদে নাম্মান। নাং·নি আগানা বিবিন হং·আ ইসল সাকসান আরো বিনা আগ্রে গিপ্পিন ইসল দংজা। 33 আরো খা·থং গিম্মিক, বুদ্ধি গিম্মিক আরো বিল গিম্মিকচা বিখো খা·সাচাক্কা আরো সংসুল-নকসুলখো আন·থাংনি গিত্তা খা·সাচাক্কা মাৎবুরুংরাং আরো গিপ্পিন বলি হ·ন্নারাংনা বাত্তে দাল·বাত্তা।’’ 34 যীশু উয়া শাস্ত্র স্খিগিবানি বুদ্ধিগ্মাং গিত্তা আগানচাক্কাখো নিক্কে বিনা আগানজক, ‘‘ইসলনি সংনকনি না·আ বাং·এ চে·ল্লাও দংজা।’’ উনোনি যীশুচা মামুংখোবা সিং·না দারাংবা ফা·জাজক। 35 থরম নক্কো স্খিমিত্তিংও যীশু সিং·জক, ‘‘খ্রীষ্ট দায়ূদনি দেফান্থি ইখো শাস্ত্র স্খিগিবারাং বাদিকে দাক্কে আগানা? 36 দায়ূদ আন·থাংআন গিসিক রংথালগিবাও আগানা, ‘গিত্তেল আংনি গিত্তেলনা আগানা, জেওনা দিপ্পাৎ আংআ নাং·নি বোবিলরাংখো নাং·নি জা·চক খা·মাও দনজা, উনোনা দিপ্পাৎ না·আ আংনি জাক্রাচা আসংবো।’ 37 দায়ূদ আন·থাংআন বিখো গিত্তেল ইন্নে ইনজক, ইন্দাকোদে খ্রীষ্ট বাদিকে বিনি দেফান্থি হং·না মা·ন্না?’’ বাং·বিয়া মান্দিরাং খুসি হং·এ যীশুনি খাৎথাখো খিন্নাংআমিং। 38 স্খিয়ানিরাংও যীশু আগানজক, ‘‘শাস্ত্র স্খিগিবারাংনা সিমসাকবো। বিসংদে চলা রো·আ রো·আরাংখো গান্নে রোমনা আরো বাজালরাংচা মান্দিরা·আখো মা·ন্না হা·ম্মা। 39 বিসং থম·দাকরামো নামবাৎগিবা আসংচাকানিরাংও আরো চা·আ হ·ন্নানি সালো মান্দিরা·আনি নামবাত্তা হা·দামরাংও আসংনা হা·ম্মা। 40 বিসং মান্দিনা ফিন্নিকনা ইন্নে রো·এ রো·এ বি·আ, আরো রান্দিরাংনি গামজিনরাংখো রা·সেক্কে রা·আ। ইন্দাকগিবা মান্দিরাং বাং·বাত্তে শাস্তিখো মা·ন্নুয়া।’’ 41 উনি জা·মানো যীশু থরম নক্কো থাংখা দনচাক্রানি সেফাংও আসংএ মান্দিরাংনি পয়সা দন্নাখো নিএ দংআমিং। বাং·বিয়া মা·ন্নে চা·গিবারাং উনো বাং·এন থাংখা দনজক। 42 জা·মানো সাকসা দিলগিবা রান্দি মিচিক রি·বাএ উনো গি·গ্মি পয়সাখোসান দনজক। 43 উনো যীশু বিনি জা·রিকগিবারাংখো রিংগামে আগানজক, ‘‘আংআ না·সংনা বিবিন আগানিংআ, ইয়া দিলগিবা রান্দি থাংখা দনচাকানিও দিমদাকনা বাত্তে বাং·বাত্তে দনজক। 44 উয়া মান্দিরাং বিসংনি বাং·আ গামজিনরাংনি অকখিসা হন·জক, ইন্দিবা ইয়া মিচিকসা দিল্লোবা বিনি জাংগি থাংনা গিত্তা দংগিবা গিম্মিকখোন হন·জক।’’

মার্ক 13

1 যীশু থরম নকনি হং·খাতে রি·য়াংমিত্তিংও বিনি সাকসা জা·রিকগিবা বিচা রি·বাএ আগানজক, ‘‘স্খিগিবা, নিবো, বাসিক দা·ল্লা দা·ল্লা রং·থি, আরো নকরাং বাদাকফিল্লে নিথুয়া!’’ 2 যীশু বিনা আগানজক, ‘‘না·আদে ইন্দাকা দাল·দালগিবা নকরাংখো নিক্কিংআ, ইন্দিবা ইনি রং·থি গি·সানি সাক্কাও রং·থি গি·সাবা দংজানুয়া, গিম্মিকখোন ফি·এ গালনুয়া।’’ 3 জা·মানো যীশু থরম নকনি মিকখাংচা জৈতুন হা·ব্রিনি সাক্কাও আসংএ দংমিত্তিংও পিতর, যাকোব, যোহন আরো আন্দ্রিয় বিখো সিউল দাক্কে সিং·জক, 4 ‘‘না·আ চিংনা আগানবো, ইরাং বাসোকো হং·নুয়া? বাগিবা চিনখো নিক্কে চিংআ হা·আইনা মা·ন্নুয়া ইরাং চু·সকনা সাল সকবাজক?’’ 5 যীশু বিসংনা আগানজক, ‘‘নিবো, জেদাক্কে না·সংখো দারাংবা ব্রাংএতনা মান·জা । 6 বাং·আন আংনি বিমুংও রি·বাএ আগান্নুয়া, ‘আংআন উয়া’ আরো বাং·আ মান্দিখোন ব্রাংএতনুয়া। 7 জেনসালো না·সং দাকগ্রিকানি খু·রাংখো আরো দাকগ্রিকানি খাৎথারাংখো খিন্নানুয়া উনসালো দা·আ জাজ্রেংআবো। ইরাং হং·নুয়ান, ইন্দিবা উনোবা বন·খামানি হং·খুজা। 8 জাতসা জাতগিপ্পিনমুং, হা·সংসা হা·সং গিপ্পিনমুং দাকগ্রিকনুয়া। বাং·আ হা·দামরাংচান বাংগুরিনুয়া আরো আকাল হং·নুয়া। ইন্দিবা ইরাংদে দুক মা·ন্না হা·বাচেংআসান। 9 ‘‘না·সং আন·থাংথাংনি গিম্মিনো সিমসাকবো। মান্দিরাং না·সংখো বিচাল দাকগিবারাংনি জাক্কো রি·ম্মে হ·ন্নুয়া আরো থম·দাকরামো দকনুয়া। আংনি গিম্মিন না·সংখো হা·সংনি শাসন দাকগিবা আরো রাজারাংনি মিকখাংও চাদেংনা নাংনুয়া। বিসংনি মিকখাংও আংনি গিম্মিনো না·সংনি সাক্ষি হ·ন্না নাংনুয়া। 10 গিম্মিক জাতরাংচা স্খাং ইসলনি হন·গিবা নাম্মা খাৎথাখো আগানফ্রাকনা নাংনুয়া। 11 জেনসালো না·সংখো বিচাল দাকনা রি·ম্মে রা·আংনুয়া উনসালো মুয়াখো আগান্না নাংনুয়া উখো স্খাংখাংআরি দা·আ চানচিয়াবো। উনসালো জেখো না·সংনা আগানে হ·ন্নুয়া উখোন না·সং আগানবো, মুয়ানা না·সংসান আগান্নুয়া ইয়াদে হং·জা ইন্দিবা গিসিক রংথালগিবান খাৎথা আগান্নুয়া। 12 ‘‘জংআদা জংআদাখো, ফাগিবা দেগিবাখো স·ওতে গালখানা রি·ম্মে হ·ন্নুয়া। দেদ্রাং আন·থাংথাংনি মা·আ-ফানি সাক্কাও চাখাত্তে বিসংখো স·ওতেতনুয়া। 13 আংনি গিম্মিন দিমদাকান না·সংখো মিৎচিনুয়া, ইন্দিবা জে বন·খামাওনা দিপ্পাৎ চাকচিকনুয়া বিয়ান জকনুয়া। 14 ‘‘বন·গিম্মিকেতগিবা মিৎচিয়ানি বস্তু জেও দংনা খ্রাজা, না·সং জেনসালো উয়ো উখো নিকনুয়া-পড়িগিবা হা·আইখানা-উনোন যিহূদিয়াও দংগিবারাং হা·ব্রিরাংওনা খাত্তাংখানা। 15 নকনি সাক্কাও দংগিবা মামুংখো রা·না খা·মাচা হং·ওনে নকনিংওনা নাপজাখানা। 16 হা·বাও দংগিবা আন·থাংনি বে·এননি বা·রাখো রা·না ফি·ল্লাংজাখানা। 17 উনো হা·ন্নোগ্মাংগিবারাং আরো বি·সানা সক খানগিবারাংনি অবস্থা বাদাকফিল্লেন বিল্লংনুয়া! 18 বি·বো জেদাক্কে ইন্দাকারাং সিন·খারিও হং·জাখানা, 19 মুয়ানা উয়া সালরাংও ইন্দাকফিল্লে দুক হং·নুয়া, হা·গিলসাকখো দাকচেংওনি দা·আওনা দিপ্পাৎ ইন্দাকে হং·খুজা আরো উনি জা·মানোবা হং·জানুয়া। 20 গিত্তেল উয়া সালরাংখো খান·দকেতজাওদে সাকসাবা থাংজানুয়ামিং। ইন্দিবা ইসল বিনি বাচ্ছিগিবা মান্দিরাংনা উয়া সালরাংখো খান·দকেতজক। 21 উনো সাবা না·সংখো, ‘নিবো, খ্রীষ্ট ইনো,’ বা ‘নিবো, খ্রীষ্ট হাইওয়ানো,’ ইন্নে আগানোদে না·সং দা·আ বিবিরা·বো; 22 মুয়ানা খ্রীষ্ট দাক্কে বু·এ চা·গিবারাং আরো আগানসোগিবা দাক্কে বু·এ চা·গিবারাং রি·বানুয়া আরো বাং·এ আইয়াও ইনমানানি কামরাংখো দাকনুয়া, জেদাক্কে ইসলনি বাচ্ছিগিবা মান্দিরাংখো মা·ন্নোদে ব্রাংএতনা মা·ন্না। 23 ইন্দিবা না·সং সিমসাকে দংবো। আংআ না·সংনা দিমদাকখোন স্খাংখাংআরি আগানে দন্নিংজক। 24 ‘‘উয়া সালনি দুক মা·ন্নানি জা·মানোন সাল আন্দালনুয়া, জাজংবা থেং·সুজানুয়া, 25 আস্কিরাংবা সিলগা সাক্কাচানি থাকওয়াতে গা·আকবানুয়া আরো জাজং-সাল-আস্কি ইরাং থম·থমে দংজানুয়া। 26 উনোন মান্দিরাং মান্দিনি দেফান্থিখো বাং·আ বিল আরো রাসংখো রা·এ গাদিলাও দাক্কে হা·গিলসাকোনা রি·বাখো নিকনা মা·ন্নুয়া। 27 বিয়া আন·থাংনি সা·গ্রেরাংখো হা·গিলসাকনি খি·থিকোনা ওয়াত্তেতি হা·গিম্মিকচানিখো ইসলনি গিম্মিক বাচ্ছিগিবা মান্দিরাংখো থম·চিম্মংনুয়া। 28 ‘‘ডুমুর বিফাংওনিখো স্খিয়ে রা·বো। জেনসালো উনি ডালারাং বিজাক সকসলে ওয়াতবাআ উনোন দিং·খারি সকবাজক ইন্নে না·সং হা·আইনা মা·ন্না। 29 উয়ানদাক্কে জেনসালো না·সং ইরাং হং·আখো নিকনুয়া উনোন হা·আইনা মা·ন্নুয়া, মান্দিনি দেফান্থি সেফাংও রি·বাজক, আরোবা দ·গাচিলোনা সকবাজক। 30 আংআ বিবিন না·সংনা আগানিংআ, জেনসালো ইরাং হং·নুয়া ইয়া চাসংনি মিত্তাম মান্দিরাং উনোবা থাংএ দংখুনুয়া। 31 সিলগা আরো হা·গিলসাক ব·ন্নাংনুয়া ইন্দিবা আংনি খাৎথারাং ফাংনাজলনা দংনুয়া। 32 ‘‘উয়া সাল আরো উয়া সময়নি খাৎথাখো দারাংবা হা·আইজা-সালগিনি সা·গ্রেরাংবা হা·আইজা, দেফান্থিবা হা·আইজা, ফাগিবাসান হা·আইয়া। 33 না·সং সিমসাকবো, মিকরাকবো আরো বি·বো, মুয়ানা উয়া সাল বাসোকো রি·বানুয়া উখো না·সং হা·আইজা।’’ 34 উয়া সাল সকবানুয়া ইন্দাকগিবা মান্দি গিত্তা জে মান্দি আন·থাংনি নকখো দন্নে হা·সং গিপ্পিনচা রি·য়াংজক। নকখো ওয়াত্তে রি·য়াংনা স্খাং নকখলরাংচা বিয়া নকখো রাক্ষিনা দন্নাংজক। নকখল সাকফ্রাক ফ্রাকনা বিয়া কামরাংখো দন্নাংজক আরো দ·গাচিলো দংখামগিবাখো মিকরাকে দংখানা আগানাংজক। 35 ‘‘না·সংবা ইন্দাকে মিকরাকে দংবো, মুয়ানা নকগিবা হান·থামও, বা ওয়ালজাৎচিও, বা ওয়াল সেং·না হা·ম্মো, বা ফ্রিংওন রি·বানুয়ামা উখো না·সং হা·আইজা। 36 জেদাক্কে বিয়া রাং·গিত্তিক রি·বাএ না·সংনি থুয়ে দংআখো নিকনা মান·জা। 37 আরো আংআ জেখো না·সংনা আগানিংআ উখো গিম্মিকনান আগানিংআ, মিকরাকে দংবো।’’

মার্ক 14

1 ওয়াতচাংআনি আরো ওয়ানথিগ্রি রুটি চা·আনি সালনা উনো সালগ্মিসান দংখুআমিং। খামাল দাল·গিবারাং আরো শাস্ত্র স্খিগিবারাং সিউল সিউল যীশুখো রি·ম্মে স·ওতে গালনা চল সান্দিংআমিং। 2 বিসং আগানজক, ‘‘ওয়াতচাংআনি সালো হং·জা, মান্দিরাংও গোলমাল হং·নাবা দংআ।’’ 3 যীশু উনো বৈথনিয়াচা খনচিরিত্তামগিবা শিমোননি নক্কো দংআমিং। যীশুনি চা·মিত্তিংও মিচিক সাকসা গামচাৎগিবা সিম্মিলগিবা তেলখো গি·সা গ্বিবক রং·থিনি দনচাক্রাও দন্নে রা·বাজক। দনচাক্রাখো ফি·এ বিয়া যীশুনি স্খুও উয়া তেলখো রুদাপজক। 4 উনো জেরাং দংআমিং বিসংনি গিসেপো মিত্তামরাং নাম্মেন নামনিকজায়ে সাকসা সাকগিপ্পিননা আগানজক, “তেলখো ইন্দাকে মুয়ানা নাসিয়েতজক? 5 ইখো ফাল্লোদে দীনার রিৎচাগিত্থামনিবা বাং·এ হং·নুয়ামিং আরো উখো দিলগিবারাংনা হ·ন্না মা·ন্নুয়ামিং।’’ ইখো আগানে বিসং উয়া মিচিকসাখো খা·চাজক। 6 উনো যীশু আগানজক, ‘‘স্রক দংবো, মুয়ানা না·সং বিনি গিসিকখো সা·দিকেতিংআ? বিয়াদে আংনা নাম্মা কামখোন দাকজক। 7 দিলগিবারাং না·সংমুং ফাংনানান দংখামা, আরো জেনসালো না·সং বিসংনা দাকচাকনা হা·সিকনুয়া উনোন দাকচাকনা মা·ন্নুয়া, ইন্দিবা আংখো না·সং ফাংনানান মান·জানুয়া। 8 বিয়া জেখো দাকনা মান·জক উখো দাকজক। আংখো গোপরামচা দন্না বিয়া স্খাংখাংআরি আংনি বে·এনো তেলখো রুদাপজক। 9 বিবিন আংআ না·সংনা আগানিংআ, হা·গিলসাকনি জেও জেও ইসলনি হন·গিবা নাম্মা খাৎথাখো আগানফ্রাকনুয়া, উনো ইয়া মিচিকনি খাৎথাখো গিসিক রা·এতনা ইন্নে বিনি ইয়া কামনি খাৎথাখোবা আগানা হং·নুয়া।’’ 10 উনি জা·মানো ইষ্কারিয়োত যিহূদা মিংগিবা উয়া সাকচিগ্মি জা·রিকগিবারাংওনি সাকসা যীশুখো রি·ম্মে হ·ন্না খামাল দাল·গিবারাংচা রি·য়াংজক। 11 যিহূদানি খাৎথাখো খিন্নাএ খামাল দাল·গিবারাং খুসি হং·জক আরো বিনা থাংখা হ·ন্না খু·রাচাকজক। উনোন যিহূদা যীশুখো রি·ম্মে হ·ন্না চল সান্দিনা হা·বাচেংজক। 12 ওয়ানথিগ্রি রুটি চা·আনি স্খাংগিবা সালো ওয়াতচাংআনি চা·না মেষ বি·সাখো দে·ন্নুয়ামিং। উনি গিম্মিন জা·রিকগিবারাং যীশুখো সিং·জক, ‘‘নাং·না ওয়াতচাংআনি চা·আনিখো বানো রি·য়াংএ থারিনা চিংখো আগানিংআ?’’ 13 উনো যীশু বিনি সাকগ্মি জা·রিকগিবাখো ইন্দাকে আগানে ওয়াত্তেতজক, ‘‘না·সং সংজিলমাওনা রি·য়াংবো। উনো মি·আসা সাকসাখো গিম্বিও দাক্কে চি রা·আংআখো নিকনা মা·ন্নুয়া। না·সং বিনি জা·মান জা·মান রি·য়াংবো। 14 বিয়া জে নক্কো নাপনুয়া উয়া নকনি নকগিবানা আগানবো, ‘স্খিগিবা আগানিংআ, জা·রিকগিবারাংমুং জেও আংআ ওয়াতচাংআনি চা·আনিখো চা·না মা·ন্না আংনি উয়া নকদ্রিং বানো?’ 15 বিয়া উনো না·সংনা গাদাং সাক্কানি থারিয়ে দনগিবা দা·ল্লা নকদ্রিংখো ফিন্নিকেতনুয়া। উনোন দিমদাকখো থারিসোবো।’’ 16 উনোন জা·রিকগিবারাং রি·য়াংএ সংজিলমাওনা নাপজক, আরো যীশুনি আগানেতা গিত্তা দিমদাকখো নিকনা মান·জক আরো ওয়াতচাংআনি চা·আনিখো থারিসোজক। 17 হান·থামানি জা·মানো যীশু উয়া সাকচিগ্মি জা·রিকগিবারাংখো রা·এ উয়োনা রি·য়াংজক। 18 বিসং আসংএ চা·মিত্তিংও যীশু আগানজক, ‘‘বিবিন আংআ না·সংনা আগানিংআ, না·সংনি গিসেপো সাকসা আংখো বোবিলনি জাক্কো রি·ম্মে হ·ন্নুয়া, আরো বিয়া আংমুং দা·আও চা·ফাংআ।’’ 19 জা·রিকগিবারাং উনি হা·সেলো গিসিকো দুক মান·জক আরো সাকফ্রাক সাকফ্রাক বিচা সিং·না হা·বাচেংজক, ‘‘উয়া আংআনমা, গিত্তেল?’’ 20 যীশু বিসংনা আগানজক, ‘‘বিয়া ইয়া সাকচিগ্মিওনি সাকসা, আংমুং চা·চাকানিও রুটিখো সিম·বলগিবা। 21 মান্দিনি দেফান্থিনি সিয়ানি গিম্মিনো রংথালগিবা শাস্ত্রও জেদাক্কে চক্কা দংআ উয়ানদাক্কে বিয়া সিনুয়া, ইন্দিবা দা·নাং, উয়া মান্দি, জে মান্দি বিখো বোবিলনা রি·ম্মে হ·ন্না! বিয়া আৎচিজাওন বাত্তেসা বিনা নামবাতনুয়ামিং।’’ 22 চা·মিত্তিংও যীশু রুটিখো রা·এ ইসলখো মিৎথেলজক আরো উখো ফি·এ জা·রিকগিবারাংনি জাক্কো হ·ন্নে আগানজক, ‘‘ইয়া রা·বো, ইয়া আংনি বে·এন।’’ 23 উনি জা·মানো বিয়া রিংচাকানিখো রা·এ ইসলখো মিৎথেলজক আরো জা·রিকগিবারাংনা হন·জক। বিসং দিমদাকান উয়া রিংচাকানিখো রিংজক। 24 উনো যীশু বিসংনা আগানজক, ‘‘ইয়া আংনি হান·চি জেখো বাং·আরাংনা হ·ন্নুয়া। আংনি ইয়া হান·চিচান মান্দিনা হন·গিবা ইসলনি গিত্তাল খু·রাচাক্কাখো রা·রিকনুয়া। 25 বিবিন না·সংনা আগানিংআ, ইসলনি সংনক্কো আংগুর বিৎচিখো গিত্তাল দাক্কে দা·আবা রিংখুজানা দিপ্পাৎ আংআ উখো রিংজানুয়া। 26 উনি জা·মানো মিংসা গীতখো রিং·এমুং জৈতুন হা·ব্রিওনা রি·য়াংজক। 27 যীশু বিনি জা·রিকগিবারাংনা আগানজক, ‘‘আংখো রা·এ না·সংনি দিমদাকনি গিসিকো জাব্রাংনুয়া। রংথালগিবা শাস্ত্রও চক্কা দংআ, ‘আংআ রাক্ষুয়ালখো স·ওতে গালনুয়া, উনোন মেষরাং বিলদিং বিলদাং হং·নুয়া।’ 28 ইন্দাকোবা আংআ সিয়াওনি থাংচাফিল্লানি জা·মানো না·সংনা স্খাংআন গালীলচানা রি·য়াংনুয়া।’’ 29 উনো পিতর আগানজক, “গিম্মিকনি গিসিকো জাব্রাংওবা আংনি গিসিকো জাব্রাংজানুয়া।’’ 30 যীশু বিনা আগানজক, ‘‘আংআ নাং·না বিবিন আগানিংআ, দা·আল ফ্রিংওয়াল্লো দো·ও রাং·গ্মি গিসিকনা স্খাংআন না·আ রাং·গিত্থাম আংখো হা·আইজা ইন্নে জিচাকনুয়া।’’ 31 ইন্দিবা পিতর আরোসা রাক্কেন আগানজক, ‘‘আংখো নাং·মুং সিফানা নাংওবা আংআ নাং·খো হা·আইজা, ইন্নে মামুং সালোবা জিচাকজানুয়া।’’ জা·রিকগিবারাং গিম্মিকান উয়ানদাক্কে আগানজক। 32 উনি জা·মানো যীশু আরো বিনি জা·রিকগিবারাং গেৎশিমানী মিংগিবা হা·দামওনা রি·য়াংজক। উয়োনা যীশু বিনি জা·রিকগিবারাংনা আগানজক, ‘‘আংনি বি·মিত্তিংও না·সং ইনো আসংএ দংবো।’’ 33 ইখো আগানে বিয়া পিতর, যাকোব আরো যোহনখো আন·থাংমুং রিম্মাংজক আরো গিসিকো নাম্মেন সা·দিকা আরো দুক মা·ন্না হা·বাচেংজক। 34 বিয়া বিসংনা আগানজক, ‘‘দুকনি গিম্মিন আংনি জাংগি হং·খাতাংনা গিত্তিক দাক্কিংজক। না·সং ইনো মিকরাকে দংবো।’’ 35 উনি জা·মানো বিয়া অকখিসা চে·ল্লাওনা রি·য়াংএ হা·আও থুগপে বি·জক জেদাক্কে মা·ন্নোদে ইয়া দুকনি সাল বিচানি চে·ল্লাংআ। 36 বিয়া আগানজক, ‘‘আ্ববা, আপফা, না·আ গিম্মিকখোন হাম্মা। আংচানিখো দুকনি ইয়া রিংচাকানিখো রা·আংবো। ইন্দাকোবা আংনি হা·সিকা গিত্তা হং·জা, ইন্দিবা নাং·নি হা·সিকা গিত্তা হং·খানা।’’ 37 উনি জা·মানো বিয়া জা·রিকগিবারাংচা রি·বাফিল্লে বিসংনি থুয়ে দংআখো নিকজক। পিতরনা বিয়া আগানজক, ‘‘শিমোন, না·আ থুংআমা? ঘণ্টাসা মা·মাংবা না·আ মিকরাকে দংনা মান·জাজকমা? 38 মিকরাকে দংবো আরো বি·বো জেদাক্কে না·সং রুরাও গা·আকজা। গিসিকোদে হা·সিকবিবিয়া, ইন্দিবা বে·এন বিলগ্রি।” 39 জা·মানো যীশু রি·য়াংফিল্লে উয়া আপসান খাৎথাখোন আগানে বি·জক। 40 ফিল·বায়ে বিয়া দা·আবা বিসংনি থুয়ে দংআখো নিকনা মান·জক, মুয়ানা বিসংনি মিক্রোন জ্রিমবিয়ামিং। জা·রিকগিবারাং যীশুনা বাদিকে আগানচাকনুয়া উখো হা·আইজাজক। 41 রাং·গিত্থামগিবাও রি·বাএ বিয়া বিসংনা আগানজক, ‘‘দা·আওবা না·সং থুয়ে দংআ আরো নেং·থাকিংআ? বাং·এন হং·জক। সাল সকবাজক। নিবো, মান্দিনি দেফান্থিখো দা·আও পাপীরাংনি জাক্কো রি·ম্মে হ·ন্নিংজক। 42 চাখাতবো, আনচিং রি·নাজক। আংখো বোবিলনি জাক্কো রি·ম্মে হন·গিবা সেফাংও রি·বাজক।’’ 43 যীশু উনোবা খাৎথা আগানিংআমিং, উয়া সময়ও যিহূদা উয়োনা রি·বাজক। বিয়া উয়া সাকচিগ্মি জা·রিকগিবারাংওনি গিসেপো সাকসামিং। বিমুং বাং·এ মান্দিন মি·ল্লাম আরো মাংগতখো রা·এ রি·বাজক। খামাল দাল·গিবারাং, শাস্ত্র স্খিগিবারাং আরো মি·আফারাং ইয়া মান্দিরাংখো ওয়াত্তেতামিং। 44 যীশুখো জে বোবিলনি জাক্কো রি·ম্মে হ·ন্নামিং বিয়া উয়া মান্দিরাংনা গি·সা চিনখো হ·ন্নে দন্নামিং। বিয়া আগানামিং, “জেখো আংআ খু·দিমনুয়া, বিয়ান উয়া মান্দি। না·সং বিখোন রিম·বো আরো নাম্মেদাক্কে নিথিমে রিম্মাংবো।’’ 45 উনি গিম্মিন যিহুদা বিক্‌বিক্‌ রি·বারিন যীশুখো, ‘‘স্খিগিবা!’’ ইখো আগানে খু·দিমজক। 46 উনোন উয়া মান্দিরাং যীশুখো রিম·জক। 47 জেরাং যীশুনি সেফাংও চাদেংএ দংআমিং বিসংনি গিসেপো সাকসা বিনি মি·ল্লামখো রং·খাতজক আরো খামাল দাল·বাৎগিবানি নকখলখো দিংএ বিনি নাচিলখো দেন·ফাকজক। 48 যীশু উয়া মান্দিরাংনা আগানজক, ‘‘মি·ল্লাম আরো মাংগতখো রা·এ না·সং আংখো রিম·না রি·বাজক, আংআ ডাকাতমা? 49 আংআদে ফাংনাজ্রিংআন না·সংমুং দংএ থরম নক্কো না·সংনা স্খিয়ামিং, ইন্দিবা উনোদে না·সং আংখো রিম·জাজক। ইন্দিবা শাস্ত্রনি খাৎথারাং চু·সকনা নাংনুয়া।’’ 50 উনোন গিম্মিক জা·রিকগিবারাং বিখো ওয়াতগাল্লে খাত্তাংথকজক। 51 ফান্থি সাকসা বা·রা চাদলখোসান চিনগোপে যীশুনি জা·মান জা·মান রি·য়াংআমিং। 52 মান্দিরাং বিখো রি·ম্মোন বিয়া চিনগিবা বা·রা চাদলখো গোগাল্লে খমলং দাক্কে খাত্তাংজক। 53 উয়া মান্দিরাং যীশুখো রা·এ খামাল দাল·বাৎগিবাচা রি·য়াংজক। উয়োনা খামাল দাল·গিবারাং, মি·আফারাং আরো শাস্ত্র স্খিগিবারাং উনসান থম·দাকজক। 54 পিতর চেল·গ্রিকে দংএ যীশুখো জা·রিকফায়ে খামাল দাল·বাৎগিবানি হা·থিলাচা রি·য়াংএ নাপজক। উয়োনা বিয়া নিথিমগিবারাংমুং আসংএ ওয়া·আল চাকনা হা·বাচেংজক। 55 খামাল দাল·গিবারাং আরো দাল·বাৎগিবা খ্রিমানি গিম্মিক মান্দিরাং যীশুখো স·ওতে গালনা ইন্নে বিনা চাকগিজা বিনি সাক্কাও সাক্ষি হ·ন্না সান্দিংআমিং, ইন্দিবা বিসং মামুং সাক্ষিখোন মান·জাজক। 56 যীশুনি সাক্কাও বাং·এন বু·এ সাক্ষি হ·ন্নামিং ইন্দিবা বিসংনি সাক্ষিরাং আপসান হং·গ্রিকজাজক। 57 উনোন মিত্তামরাং চাখাত্তে বিনি সাক্কাও বু·এ ইয়া সাক্ষিখো হন·জক, 58 ‘‘চিংআ বিনি ইন্দাকে আগানাখো খিন্নানা মা·ন্না, ‘মান্দিনি রিকগিবা ইয়া থরম নকখো আংআ ফি·রুরুয়ে গালনুয়া আরো সালগিত্থামনি গিসেপো ইন্দাকগিবা গি·সা থরম নকখো রিকফিলনুয়া জেআন মান্দিনি রিকগিবা হং·জা।’ ’’ 59 ইন্দিবা বিসংনি সাক্ষি আপসান হং·গ্রিকজাজক। 60 উনোন খামাল দাল·বাৎগিবা দিমদাকনি মিকখাংও চাদেংএ যীশুখো সিং·জক, ‘‘না·আ মামুংখোবা আগানচাকজানুয়ামা? নাং·নি সাক্কাও ইয়া মান্দিরাং বাদাকগিবা সাক্ষিখো হ·ন্নিংজক?’’ 61 ইন্দিবা যীশু মামুংখো আগানচাকগিজা জ্রিপ্‌জ্রিপ্‌ দংজক। খামাল দাল·বাৎগিবা দা·আবা বিখো সিং·ফিলজক, ‘‘না·আন মিৎথেলা মান·গিবা ইসলনি দেফান্থি খ্রীষ্টমা?’’ 62 যীশু আগানজক, ‘‘আংআন উয়া। না·সং বিল্লাকবাৎগিবা ইসলনি জাক্রাচা মান্দিনি দেফান্থিখো আসংএ দংআখো নিকনুয়া আরো সিলগানি গাদিলাও দাক্কে রি·বাখো নিকনা মা·ন্নুয়া।’’ 63 উনি গিম্মিন খামাল দাল·বাৎগিবা বা·রাথাংখো চিত্তে আগানজক, ‘‘আনচিংনা ইনা আগ্রে আরোবা মুয়া সাক্ষিখো নাংখুনুয়া? 64 না·সংদে খিন্নাজকান, বিয়া ইসলখো চন্নিকজক। না·সং বাদিকে চানচিংআ?’’ বিসং গিম্মিকান যীশুনা সিয়ানি শাস্তিখো হ·ন্নান খ্রাআ ইন্নে ইনথকজক। 65 উনো মিত্তামরাং বিনি বে·এনো খু·চিদাপজক আরো বিনি মিকখাংখো খাতিপ্পে জাকথমে দক্কে আগানজক, ‘‘না·আন আগানসোগিবামা? মামুংখো আগানবো!’’ উনি জা·মানো নিথিমগিবারাং বিখো রা·আংএ দকনা হা·বাচেংজক। 66 পিতর খা·মানি হা·থিলাও দংমিত্তিংও দাল·বাৎগিবা খামালনি সাকসা নকখল মিচিক উয়োনা রি·বাজক। 67 বিয়া পিতরনি ওয়া·আল চাক্কে দংআখো নিকজক আরো নাম্মেদাক্কে বিচা নিএ আগানজক, ‘‘না·আবা উয়া নাসরতনি যীশুমুং দংআমিং।’’ 68 ইন্দিবা পিতর জিচাকে আগানজক, ‘‘নাং·নি আগানাখো আংআ হা·আইজা, মা·সিজা।’’ ইখো আগানে পিতর হা·ফালনি দ·গাচিলোনা রি·য়াংজক, আরো উনোন দো·ও গিসিকজক। 69 উয়া নকখল মিচিক পিতরখো উয়োনা নিক্কে উনো চাদেংএ দংগিবারাংনা আগানজক, ‘‘ইয়া মান্দিবা বিসংনি সাকসা।’’ 70 পিতর দা·আবা জিচাকজক। সেফাংও চাদেংএ দংগিবারাংবা অকখিসা জা·মানো পিতরখো আগানজক, ‘‘না·আবা বিসংনি সাকসা হং·বিবিআন, মুয়ানা না·আদে গালীলনি মান্দি হং·আ।’’ 71 পিতর উনো আন·থাংখো শাপ হন·জক আরো মিকচেতি আগানজক, ‘‘না·সং জেখো আগানিংআ আংআ বিখো হা·আইজা।’’ 72 উনোন রাং·গ্মিনা দো·ও গিসিকজক। যীশু আগানামিং, ‘‘দো·ও রাং·গ্মি গিসিকনা স্খাংআন না·আ আংখো রাং·গিত্থাম জিচাকনুয়া,’’ উয়া খাৎথাখো পিতর উনো গিসিক রা·জক। উনি গিম্মিন বিয়া খা·থং বি·এ গ্রাপজক।

মার্ক 15

1 ফ্রিংও খামাল দাল·গিবারাং মি·আফারাংমুং, শাস্ত্র স্খিগিবারাংমুং আরো দাল·বাৎগিবা খ্রিমানি মান্দি গিম্মিকমুং খু·মংগ্রিকজক। উনি জা·মানো বিসং যীশুখো খায়ে রোমখো শাসন দাকগিবা পীলাতনি জাক্কো হন·জক। 2 উনো পীলাত যীশুখো সিং·জক, ‘‘না·আ যিহূদীরাংনি রাজামা?’’ যীশু আগানচাকজক, ‘‘না·আ বিবিখোন আগানা।’’ 3 খামাল দাল·গিবারাং যীশুখো বাং·এন গ্রো নাংএতি খাৎথা আগানজক। 4 উনি গিম্মিন পীলাত দা·আবা যীশুখো সিং·ফিলজক, ‘‘না·আ আগানচাকজানুয়ামা? নিবো, বিসং নাং·খো বাসিক গ্রো নাংএতজক।’’ 5 ইন্দিবা যীশু মামুংখোবা আগানচাকজাজক। উনি গিম্মিন পীলাত আইয়াও ইনমানজক। 6 ওয়াতচাংআনি সালো মান্দিরাং যে বন্দিখো হাম·নুয়ামিং পীলাত বিখো ওয়াত্তেতনুয়ামিং। 7 উনসালো বারা্ববা মিংগিবা সাকসা জেলো দংআমিং। বোবিল দাক্কে চাখাত্তানি সালো বিয়া চাখাতগিবারাংমুং দংফাএ স·ওতামিং। 8 মান্দিরাং পীলাতচা রি·বাএ আগানজক, ‘‘না·আ ফাংনাজ্রিং জেখো দাকরংআ দা·আও উখোন দাকবো।’’ 9 পীলাত বিসংনা আগানজক, ‘‘আংআ যিহূদীরাংনি রাজাখো ওয়াত্তেতনা, না·সং ইখো হা·ম্মিংআমা?’’ 10 খামাল দাল·গিবারাং মিকনেংএন যীশুখো পীলাতনি জাক্কো হন·জক পীলাত উখো হা·আইয়ামিং। 11 ইন্দিবা যীশুখো দন্নে বারা্ববাখো ওয়াত্তেতখানা ইন্নে মান্দিরাংখো খামাল দাল·গিবারাং শলা হন·জক। 12 পীলাত দা·আবা মান্দিরাংখো সিং·ফিলজক, ‘‘ইন্দাকোদে না·সং জেখো যিহূদীরাংনি রাজা ইন্না বিখো রা·এ আংআ মুয়া দাকনুয়া?’’ 13 মান্দিরাং উনো চ্রিকে আগানজক, ‘‘বিখো চিসলো দাৎখাপবো।’’ 14 পীলাত আগানজক, ‘‘মুয়ানা, বিয়া মুয়া নামগিজাখো দাকজক?’’ ইন্দিবা মান্দিরাং বাত্তেসা চ্রিকে আগান্না হা·বাচেংজক, ‘‘বিখো চিসলো দাৎখাপবো।’’ 15 উনো পীলাত মান্দিরাংখো খুসি দাকনা ইন্নে বারা্ববাখো ওয়াত্তেতজক, আরো যীশুখো চাবুকচা দক্কে চিসলো দাৎখাপনা গি·য়েৎজক। 16 জা·মানো সিপাইরাং যীশুখো দাল·বাৎগিবা শাসন দাকগিবানি নকনিং·আওনা রিম্মাংজক। বিসং উয়োনা গিপ্পিন সিপাইরাংখো রা·এ থম·দাকজক। 17 বিসং যীশুখো গিৎচাকম্রাং বা·রাখো চিন্নেতজক, আরো বুসুনি মুকুটখো থারিয়ে বিনি স্খুও স্থিকেতজক। 18 উনি জা·মানো বিসং যীশুখো ইনস্থেকনা হা·বাচেংজক, ‘‘যিহূদীরাংনি রাজা, বাং·এ থাংএ দংখানা!’’ 19 বিসং গি·সা গল·চা যীশুনি স্খুখো রাং·নিরাং দকনা হা·বাচেংজক আরো বিনি বে·এনো খু·চিদাপজক, আরো জা·স্খু দে·ম্মে বিখো দাকমিকে মান্দিরা·জক। 20 ইন্দাকে বিখো খাল·স্থাপানি জা·মানো বিসং উয়া গিৎচাকম্রাং বা·রাখো অক্কে বিনি বা·রাথাংখো চিন্নেতজক আরো চিসলো দাৎখাপনা রা·আংজক। 21 উয়া সময়ও কুরীণী সংজিলমানি শিমোন মিংগিবা সাকসা মান্দি সংচানি রি·বাএ উয়া রামা গিত্তা রি·য়াংআমিং। বিয়া আলেকসান্দর আরো রূফনি ফাগিবামিং। সিপাইরাং বিখো যীশুনি চিসলখো রিপ্পিএ রা·আংনা রিম·জক। 22 বিসং যীশুখো গল্‌গথা, ফি·স্খাওদে স্খু বিখ্রক মিংগিবা হা·দামওনা রিম্মাংজক, 23 জা·মানো বিসং যীশুনা সিম্মিলা বিৎচিখো ব্রিনগিবা চু বিৎচিখো রিংনা হন·জক, ইন্দিবা বিয়া উখো রিংজাজক। 24 উনি জা·মানো বিসং যীশুখো চিসলো দাৎখাপজক। সিপাইরাং যীশুনি বা·রারাংখো সুয়ালে রা·না ইন্নে বা·রারাংখো লটারি খা·ল্লে সা বাদাকাখো মান·জক ইখো হা·আইনা নিনা হাম·জক। 25 ফ্রিংও স্খু বাজিও যীশুখো বিসং চিসলো দাৎখাপামিং। 26 ‘‘যিহূদীরাংনি রাজা’’ ইন্নে গ্রো নাংআনি খাৎথাখো বিসং যীশুনি সাক্কাও চকজক। 27 বিসং সাকগ্মি ডাকাতখোবা যীশুমুং চিসলো দাৎখাপজক, জাক্রাচা সাকসা আরো জাক্কাসিচা সাকসাখো দাৎখাপজক। 28 উনি গিম্মিন রংথালগিবা শাস্ত্রনি ইয়া খাৎথা চু·সকজক: ‘‘পাপীরাংমুং বিখো চানফাজক।’’ 29 আরো উয়া রামা গিত্তা রি·য়াংগিবারাং স্খু রকরেকে বিখো খাল·স্থাপে আগানজক, ‘‘আহা, না·আনা থরম নকখো ফি·এ দা·আবা সালগিত্থামোন উখো রিকফিলনা মান·গিবা! 30 চিসলনি দা·আও হং·খাতবায়ে আন·থাংখো জক্কেৎবো!’’ 31 খামাল দাল·গিবারাং আরো শাস্ত্র স্খিগিবারাংবা যীশুখো খাল·স্থাপনা ইন্নে আন·থাংথাংও আগানগ্রিকজক, ‘‘বিয়া গিপ্পিনরাংখো জক্কেৎনুয়ামিং, আন·থাংখোদে জক্কেৎনা মান·জা। 32 হাইওয়া খ্রীষ্ট, ইস্রায়েলরাংনি রাজা! চিসলোনি বিয়া হং·খাতবাখানা জেদাক্কে আনচিং বিখো বিবিরা·না মা·ন্না।’’ যীশুমুং চিসলো দাৎখাপা মান·গিবারাংবা বিখো ইনস্থেকজক। 33 জা·মানো সালজাৎচিও চি·গ্মি বাজিওনি গিত্থাম বাজিওনা দিপ্পাৎ হা·সং গিম্মিক আন্দালে দংজক। 34 গিত্থাম বাজিও যীশু রাক্কে চ্রিকে আগানজক, ‘‘এলোই, এলোই, লামা শবক্তানী,’’ জেখো ফি·স্খাওদে ‘‘আংনি ইসল, আংনি ইসল, মুয়ানা না·আ আংখো ওয়াতগালজক?’’ 35 সেফাংও চাদেংএ দংগিবারাংওনি মিত্তামরাং ইখো খিন্নাএ আগানজক, ‘‘খিন্নাবো, খিন্নাবো, বিয়া এলিয়খো রিক্কামিংআ।’’ 36 উনো মান্দি সাকসা খাত্তাংএ মেসেং বিৎচিও সপন্‌জ গি·সাখো সিম·জক আরো উখো গি·সা গ·ল্লারেংনি স্খুও সিকসেপে যীশুনা রিংনা হন·জক। বিয়া আগানজক, ‘‘নিনা দা·আও এলিয় বিখো হং·খাতেতনা রি·বামা রি·বাজা।’’ 37 উনি জা·মানো যীশু রাক্কে চ্রিকে জাংগি গালজক। 38 উনোন থরম নকনি দিমফেংগিবা পর্দা চিৎগ্মি দাক্কে সাক্কাওনি খা·মাওনা দিপ্পাৎ দ্রাকারিজক। 39 যীশুনি মিকখাংও চাদেংএ দংগিবা সিপাই দাল·গিবা যীশুনি ইন্দাকে সিয়াখো নিক্কে আগানজক, ‘‘বিবিন বিয়া ইসলনি দেফান্থি হং·আমিং।’’ 40 মিচিক মিত্তামরাং চে·ল্লাও চাদেংএ ইরাংখো নিএ দংআমিং। বিসংনি গিসেপো মগ্‌দলীনী মরিয়ম, চনগিবা যাকোব আরো যোষেফনি মা·গিবা মরিয়ম আরো শালোমী দংআমিং। 41 যীশুনি গালীলও দংমিত্তিংও ইয়া মিচিকরাং যীশুমুং দিমদাক হা·দকচা রি·য়াংফানুয়ামিং আরো বিনা দাকচাকে হ·ন্নুয়ামিং। আরো যীশুমুং যিরূশালেমো রি·বাগিবা বাং·বিয়া মিচিকরাংবা উয়োনা দংআমিং। 42 উয়া সাল থারিয়ানি সাল হং·আমিং আগানস্খাওদে নেং·থাকানি সালনি স্খাংগিবা সালমিং। 43 উনসালো হান·থামাংওন অরিমাথিয়া সংনি যোষেফ পীলাতচা রি·য়াংএ খেনমানগিজা যীশুনি বে·এনখো হাম·জক। বিয়া দাল·বাৎগিবা খ্রিমানি মান্দিরা·খো মান·গিবা সাকসামিং আরো বিয়া আন·থাংবা ইসলনি সংনকনা নিচাকসোয়ে দংআমিং। 44 যীশু থেংরিন সিজক ইখো খিন্নাএ পীলাত আইয়াও ইনমানজক। বিবিন যীশু সিয়ামা সিখুজা ইখো হা·আইনা বিয়া সিপাইরাংনি দাল·গিবাখো রিংগামে সিং·জক। 45 বিবিন বিয়া সিজক ইন্নে সিপাইরাংনি দাল·গিবাচানিখো হা·আইনা মা·ন্নে পীলাত বে·এনখো যোষেফনা হন·জক। 46 যোষেফ রি·য়াংএ বা·রা ফাৎসা ব্রিএ রা·বাজক আরো যীশুনি মাংগিসিখো খা·মাও অন্নে উয়া বা·রাচা বিল·রিরিমে দনজক, আরো রং·থিখো খিত্তে থারিগিবা গোপরামও উয়া বে·এনখো দনজক। জা·মানো বিয়া গোপরামনি মিকখাংও রং·থি গি·সাখো রমথম্মে দনফেংজক। 47 যীশুনি মাংগিসিখো বানো দনজক উখো মগ্‌দলীনী মরিয়ম আরো যোষেফনি মা·গিবা মরিয়ম নিকজক।

মার্ক 16

1 নেং·থাকানি সাল বাত্তাংআনি জা·মানো মগ্‌দলীনী মরিয়ম, যাকোবনি মা·গিবা মরিয়ম আরো শালোমী যীশুনি বে·এনো সিতনা সিম্মিলগিবা তেলখো ব্রিএ রা·বাজক। 2 আনথিনি স্খাংগিবা সালনি ফ্রিংওয়ালনি, সাল নাবাওন বিসং গোপরামনি সেফাংওনা রি·য়াংজক। 3 উনো বিসং সাকসা সাকগিপ্পনখো সিং·আমিং, ‘‘গোপরামনি মিকখাংনি উয়া রং·থিখো সা জিত্তেতনুয়া?’’ 4 ইন্দিবা বিসং গোপরামচানা নিএতোন রং·থিখো জিত্তেতাখো নিকনা মান·জক। উয়া রং·থি নাম্মেন দাল·বিয়ামিং। 5 গোপরামনি নিং·আও নাপ্পে বিসং গ্বিবক বা·রা চিনগিবা সাকসা ফান্থিখো জাক্রাচা আসংএ দংআখো নিকজক। উনি গিম্মিন বিসং আইয়াও ইনমানজক। 6 উয়া ফান্থি আগানজক, ‘‘দা·আ আইয়াও ইনমানাবো। নাসরত সংনি যীশুখো, জেখো চিসলো দাৎখাপামিং, বিখোন না·সং সান্দিংআমা? বিয়া ইনো দংজা, বিয়া থাংচাফিল্লে চাখাতজক। জেও বিখো দন্নামিং উয়া হা·দামখো নিবো। 7 না·সং দা·আও রি·য়াংএ বিনি জা·রিকগিবারাংনা আরো পিতরনা ইয়া খাৎথাখো আগানেবো, বিয়া বিসংনা স্খাংআন গালীলওনা রি·য়াংইংজক। বিনি আগানা গিত্তান বিসং উয়োনা বিখো নিকনা মা·ন্নুয়া।’’ 8 উয়া মিচিকরাং মামুংখো হা·আইনা মান·জাএ খেন্নে থিল·থিলে গোপরামনি হং·খাতবাজক আরো উয়োনি খাত্তাংএ রি·য়াংজক। বিসং ইন্দাকফিল্লে খেনবিজক ইনি গিম্মিন দারাংনাবা মামুংখো আগানজাজক। 9 আনথিনি স্খাংগিবা সালনি ফ্রিংওয়ালো যীশু সিয়াওনি থাংচাফিল্লে চাখাতজক। জা·মানো বিয়া মগ্‌দলীনী মরিয়মনা স্খাং মিকখাং ফা·চেংজক। ইয়া মরিয়মনি নিং·আনিখো বিয়া সাকস্নি গিসিক নামগিজাগিবারাংখো হা·রিকেতামিং। 10 যীশুখো নিক্কানি জা·মানো মরিয়ম ইখো রি·য়াংএ জেরাং যীশুমুং দংফানুয়ামিং বিসংনা আগানজক। উনো বিসং গিসিকো দুক মা·ন্নে গ্রাপে দংআমিং। 11 যীশু থাংচাফিলজক আরো মরিয়ম বিখো নিকনা মান·জক, ইখো খিন্নাএ বিসং বিবিরা·জাজক। 12 উনি জা·মানো বিনি সাকগ্মি জা·রিকগিবারাং রামা রি·এ সংচানা রি·য়াংমিত্তিংও যীশু দিংথাংমানচা বিমাং দাক্কে বিসংনা মিকখাং ফা·জক। 13 বিসং ফিলবায়ে সাকগিপ্পিনরাংনা ইখো আগানজক, ইন্দিবা বিসংনি আগানাখোবা গিপ্পিন জা·রিকগিবারাং বিবিরা·জাজক। 14 উনি জা·মানো যীশু বিনি সাকচিসা জা·রিকগিবারাংনা মিকখাং ফা·জক। উনো বিসং চা·আংআমিং। বিবিরা·গিজানা আরো খা·থং রাক্কানা বিয়া বিসংখো খা·চাজক, মুয়ানা বিয়া সিয়াওনি থাংচাএ চাখাত্তানি জা·মানো জেরাং বিখো নিক্কামিং উরাংনি আগানাখো বিসং বিবিরা·জা। 15 যীশু উয়া জা·রিকগিবারাংনা আগানজক, ‘‘না·সং হা·গিলসাকনি গিম্মিকচান রি·য়াংবো আরো গিম্মিক মান্দিরাংচা ইসলনি হন·গিবা নাম্মা খাৎথাখো আগানফ্রাকবো। 16 জে মান্দি বিবিরা·আ আরো রিপ্পলা বিয়ান পাপওনি জকনা মা·ন্নুয়া, ইন্দিবা জে মান্দি বিবিরা·জা ইসল বিখো গ্রোনাংগিবা ইন্নে শাস্তিখো হ·ন্নুয়া। 17 বিবিরা·গিবারাংনি গিসেপো ইয়া চিনরাংখো নিকনা মা·ন্নুয়া-আংনি বিমুংও বিসং গিসিক নামগিজাগিবারাংখো হা·রিকেতনুয়া, বিসং গিত্তাল গিত্তাল খু·সুকচা খাৎথা আগান্নুয়া, 18 বিসং জাকচা চিপ্পুরাংখো খল্লামনুয়া, বিসং জাংগি সিয়ানি বিসিখো রিংওবা বিসংনি নামগিজানি মামুংবা হং·জানুয়া, আরো বিসং সাগিবারাংনি বে·এনো জাক দনদাপজকোন সাগিবারাং নাম্মাংনুয়া।’’ 19 জা·রিকগিবারাংনা ইয়া খাৎথারাংখো আগানানি জা·মানো গিত্তেল যীশুখো সালগিচা দি·দোয়ে রা·আংজক। উচা বিয়া ইসলনি জাক্রাচা আসংজক। 20 জা·মানো জা·রিকগিবারাং গিম্মিকচা রি·য়াংএ আগানফ্রাকনা হা·বাচেংজক। গিত্তেল বিসংমুং দংএ কাম দাকফানা নাংজক আরো বিসংনা বি·ল্লাকগিবা কাম দাকনা বিল হ·ন্নে বিসংনি আগানফ্রাকারাং বিবিরা·আনি হং·আ ইখোন ফিন্নিকজক।

লূক 1

1 ফামং থিয়ফিল, আনচিংনি গিসেপো জেরাং চেংওনি মিক্রোনথাংও হং·গিবারাংখো নিকজক আরো ইসলনি নাম্মা খাৎথাখো আগানফ্রাকজক বিসং আনচিংনা গিম্মিকখো আগানজক, আরো বিসংনি আগানা গিত্তান বাং·আরাং উয়ারাংখো চকজক। 3 উয়া গিম্মিকখো স্খাংওনিন নাম্মেদাক্কে সান্দিয়ে নিয়ামে নাং·না মিংসা মিংসা দাক্কে চক্কাখো আংআবা নাম্মা ইন্নে চানচিজক। 4 ইনি গিম্মিন না·আ জেখো হা·আইজক উয়া বিবি হং·আমা হং·জা উখো হা·আইস্রাংনা মা·ন্নুয়া। 5 হেরোদ যিহূদিয়া হা·দকনি রাজা দংমিত্তিংও খামাল অবিয়নি দলও সখরিয় মিংআ যিহূদীরাংনি সাকসা খামাল দংআমিং। বিনি জিকখো ইলীশাবেত মিংআমিং। বিয়াবা খামাল হারোণনি মা·চংনি সাকসা হং·আমিং। 6 বিসং সাকগ্মিআন ইসলনি মিক্রোনও থরমিমিং। গিত্তেলনি গিম্মিক গি·য়েতা আরো নিয়ামরাংখো বিসং খাকখেৎ দাক্কে মানিনুয়ামিং। 7 বিসংনি বি·সা-আংদি দংজামিং মুয়ানা ইলীশাবেত সা·গ্রিমিং। ইনাআগ্রে বিসংনি বিলসিবা নাম্মেন বাং·খালজকমিং। 8 সালসাও সখরিয় আন·থাংনি দলনি পালা সক্কো খামাল হং·এ ইসলনা দাকচাকে হ·ন্নিংআমিং। 9 খামালনি কামনি দাকবেওয়াল গিত্তা লটারি খা·ল্লে বিখোন বাচ্ছিয়ে রা·আমিং, জেদাক্কে গিত্তেলনি থরম নকনি রংথালগিবা নকদ্রিংচা রি·য়াংএ বিয়া ধূপখো সো·না মা·ন্না। 10 ধূপ সো·মিত্তিংও হা·ফালও বাং·আ মান্দি বি·থকিংআমিং। 11 উনোন ধূপ দনগিবা গানচিনি জাক্রাচানা গিত্তেলনি সা·গ্রে সাকসা রি·বাএ সখরিয়না মিকখাং ফা·জক। 12 সা·গ্রেখো নিক্কে বিনি গিসিক জাজ্রেংজক আরো বিয়া খেনবিজক। 13 সা·গ্রে বিনা আগানজক, “সখরিয়, দা·আ খেন্নাবো, মুয়ানা ইসল নাং·নি বি·আখো খিন্নাচাকজক। নাং·নি জিক ইলীশাবেতনি দেফান্থি সাকসা হং·নুয়া। না·আ বিনি বিমুংখো যোহন মিংবো। 14 বিয়া নাং·নি জাংগিও নাম্মেন খুসি হং·আনি হা·সেল হং·নুয়া আরো বিনি আৎচিয়ানা আরোবা বাং·আরাংআন খুসি হং·বিনুয়া, 15 মুয়ানা গিত্তেলনি মিক্রোনও বিয়া দাল·গিবা হং·নুয়া। বিয়া মামুং সালোবা আংগুর বিৎচিখো বা চুখো রিংজানুয়া আরো মা·আনি অক্কো দংওন বিয়া গিসিক রংথালগিবাও গাপনুয়া। 16 ইস্রায়েলরাংনি বাং·আখোন বিয়া বিসংনি গিত্তেল ইসলওনা ফি·ল্লে রা·বানুয়া। 17 আগানসোগিবা এলিয় গিত্তা গিসিক আরো বিলখো রা·এ বিয়া গিত্তেলনা স্খাং রি·বানুয়া। বিয়া ফাআনি গিসিকখো দেদ্রাংচানা ফি·ল্লে রা·বানুয়া আরো বামগিজাগিবা মান্দিরাংনি গিসিকনি চানচিয়াখো থরমি মান্দিরাংনি চানচিয়া গিত্তা দাক্কেতনুয়া। ইন্দাকে বিয়া গিত্তেলনা উয়া মান্দিরাংখো চু·গিম্মিক দাক্কে থারিসোনুয়া।” 18 উনোন সখরিয় সা·গ্রেনা আগানজক, “বাদিকে আংআ উখো হা·আইনুয়া? আংআদে বুদেফা হং·জক আরো আংনি জিকনি বিলসিবা নাম্মেন বাং·খালজক।” 19 সা·গ্রে বিনা আগানজক, “আংনি বিমুং গাব্রিয়েল; আংআ ইসলনি মিকখাংও চাদেংএ দংগিবা। নাং·মুং খাৎথা আগান্না আরো নাং·না ইয়া নাম্মা খাৎথাখো হ·ন্না ইসল আংখো ওয়াত্তেতজক। 20 নিবো, সাল সক্কোন আংনি খাৎথা চু·সকনুয়া, ইন্দিবা না·আ আংনি খাৎথাখো বিবিরা·জানি গিম্মিন আব্রা হং·এ দংনুয়া। ইয়ারাং হং·খুজানা দিপ্পাৎ না·আ খু·সুক আগান্না মান·জানুয়া।” 21 মান্দিরাং সখরিয়না সেংএ দংআমিং। থরম নকনি রংথালগিবা হা·দামও বিনি হারিমানি গান্দা বিসং চানচিনা হা·বাচেংজক। 22 জা·মানো সখরিয় জে সময়ও হং·খাতে রি·বাজক উনো মান্দিরাংমুং খু·সুক আগান্না মান·জাজক। উনি গিম্মিন বিয়া রংথালগিবা নকদ্রিংচা মামুং মিকজুমাংখো নিকজক ইন্নে মান্দিরাং হা·আইনা মান·জক। মান্দিরাংমুং বিয়া জাকজিপারি খাৎথা আগান্না হা·বাচেংজক আরো আব্রা হং·এ দংজক। 23 খামালনি কাম ব·ন্নানি জা·মানো সখরিয় নকচা রি·য়াংজক। 24 উনি জা·মানো বিনি জিকগিবা অকগ্মাং হং·জক আরো জা বংআ দিপ্পাৎ নকখো ওয়াত্তে হা·ফালচানা রি·য়াংজাজক। বিয়া আগানজক, 25 “ইয়া গিত্তেলনিন কাম। মান্দিরাংচা আংখো খ্র্রাচা·এতজাখানা দা·আও বিয়া আংচানা মিক্রোন দি·চাজক।” 26 ইলীশাবেতনি জা দক হং·ও ইসল গালীল হা·দকনি নাসরত সংনি মরিয়ম মিংগিবা মি·থ্রা সাকসাচা গাব্রিয়েল সা·গ্রেখো ওয়াত্তেতজক। রাজা দায়ূদনি মা·চংনি যোষেফ মিংআ সাকসা মান্দিমুং বিনি বিয়ানি খাৎথা থিক হং·জকমিং। 28 সা·গ্রে মরিয়মচা রি·বাএ বিখো সালাম হ·ন্নে আগানজক, “গিত্তেল নাং·মুং দংআ আরো নাং·না বাং·এ ফাত্তিজক।” 29 ইয়া খাৎথাখো খিন্নাএ মরিয়মনি গিসিক নাম্মেন জাজ্রেংজক। ইন্দাকা সালামনি অর্থ মুয়া হং·আ ইখো বিয়া চানচিনা হা·বাচেংজক। 30 সা·গ্রে বিনা আগানজক, “মরিয়ম, দা·আ খেন্নাবো, মুয়ানা ইসল নাং·না নাম্মেন খা·সাচাকজক। 31 খিন্নাবো, না·আ হা·ন্নোগ্মাং হং·নুয়া আরো নাং·নি দেফান্থি সাকসা হং·নুয়া। না·আ বিনি বিমুংখো যীশু মিংবো। 32 বিয়া চুবাৎগিবা হং·নুয়া। বিখো চুবাৎগিবা ইসলনি দেফান্থি ইন্নুয়া। গিত্তেল ইসল বিনি ফাগিৎচাম রাজা দায়ূদনি সিংহাসনখো বিনা হ·ন্নুয়া। 33 বিয়া যাকোবনি মা·চংনি মান্দিরাংনি সাক্কাও ফাংনাজলনা রাজা হং·নুয়া। বিনি সং-নক মামুং সালোবা বন·জানুয়া।” 34 উনোন মরিয়ম সা·গ্রেনা আগানজক, “ইয়া বাদিকে দাক্কে হং·নুয়া? আংআদে সে দংখুজা।” 35 সা·গ্রে আগানজক, “গিসিক রংথালগিবা নাং·নি সাক্কাও রি·বানুয়া আরো দাল·গিবা ইসলনি বিল নাং·নি সাক্কাও সালাখিমদাপনুয়া। ইনি গিম্মিন জে রংথালগিবা বি·সা আৎচিনুয়া বিখো ইসলনি দেফান্থি মিংনুয়া। 36 নিবো, ইন্দাকে বুৎচুমা হং·এবা নাং·নি চাচ্চি ইলীশাবেত দেফান্থিখো অক্কো খেজক। মান্দিরাং বিনি বি·সা হং·জানুয়া ইন্নে ইন্নুয়ামিং, ইন্দিবা বিনি দা·আও জা দক হং·জক। 37 ইসলনি হামগিজানি মামুংবা দংজা।” 38 মরিয়ম আগানজক, “আংআ গিত্তেলনি নকখল, নাং·নি আগানা গিত্তান আংনি সাক্কাও গিম্মিক হং·খানা।” উনি জা·মানো সা·গ্রে মরিয়মখো ওয়াত্তে রি·য়াংজক। 39 জা·মানো মরিয়ম থেংরি দাক্কে যিহূদিয়া হা·দকনি সং দামসাওনা রি·য়াংজক। উয়া সং হা·ব্রি জওলোমিং। 40 মরিয়ম সখরিয়নি নক্কো নাপ্পে ইলীশাবেতখো সালাম হন·জক। 41 ইলীশাবেত মরিয়মনি খাৎথাখো খিন্নাওন বিনি অকনিংও দংগিবা বি·সা চাচ্রকজক। ইলীশাবেত গিসিক রংথালগিবাও চু·সকে রাক্কে রাক্কে আগানজক, “গিম্মিক মিচিকরাংনি গিসেপো না·আন মিৎথেলাখো মান·গিবা আরো না·আ জে বি·সাখো বা·নুয়া উয়া বি·সাবান মিৎথেলাখো মান·গিবা। 43 আংনি গিত্তেলনি মা·গিবা আংচানা রি·বাজক, ইয়া বাদাক মানচাএ হং·জক? 44 নাং·নি খু·সুকখো খিন্নারিন আংনি অকনিংওনি বি·সা খুসি হং·বিএ চ্রকজক। 45 না·আ ফাত্তিয়াখো মান·গিবা, মুয়ানা গিত্তেলনি নাং·না আগানগিবাখো চু·সকনুয়া ইন্নে না·আ বিবিরা·জক।” 46 উনোন মরিয়ম আগানজক, “আংনি খা·থং গিত্তেলখো রাসং চাএতিংআ; 47 আংখো জক্কেৎগিবা ইসলখো রা·এ আংনি খা·থং হান·সেংবিংজক, 48 মুয়ানা বিনি ইয়া নকখলচানা বিয়া গিসিক হন·জক। দা·আলোনি গিম্মিক মান্দিরাং আংখো ফাত্তিয়াখো মান·গিবা ইনথকনুয়া, 49 মুয়ানা বিল্লাকবাৎগিবা ইসল আংনি গিম্মিন বাচ্ছিকিন দা·ল্লা কামখো দাকজক। বিয়া রংথালগিবা হং·আ। 50 জেরাং বিখো মানিয়া বিসংনা বিয়া খা·সাচাক্কা, চাসংওনি চাসংনা দাক্কা। 51 বিয়া জাকখো সিল্লে বিল্লাকবাৎগিবা কামখো দাকজক; গাং·বিংগিবারাংখো বিয়া বিলদিং বিলদাংএতজক। 52 সিংহাসনওনি রাজারাংখো বিয়া হং·ওনেতজক, ইন্দিবা মান্দি স্রংগিবারাংখো বিয়া দি·দোজক। 53 দিলগিবা-চনগিবারাংনা নাম্মা নাম্মা জিনিসরাংখো হন·চাকে বিয়া বিসংনা নাংগিবারাংখো হন·জক, ইন্দিবা মা·ন্নে চা·গিবারাংখো জাকরারা ওয়াত্তেতজক। 54 বিয়া আনচিংনি ফাগিৎচামরাংচা জেখো খু·রাচাক্কামিং, উয়ানদাক্কেন বিয়া বিনি নকখল ইস্রায়েলনা দাকচাকজক। অব্রাহাম আরো বিনি মা·চংনি মান্দিরাংনি সাক্কাও ফাংনাজলনা খা·সাচাক্কানি খাৎথাখো বিয়া গিসিক রা·এ দনজক।” 56 জা গিত্থাম গিত্তা ইলীশাবেতচা দংআনি জা·মানো মরিয়ম নকথাংচা রি·য়াংফিলজক। 57 সাল চু·সকো ইলীশাবেত সাকসা দেফান্থিখো বা·জক। 58 বিনি সাক্কাও গিত্তেলনি খা·সাচাকবিয়াখো খিন্নাএ নকসুলরাং আরো চাচ্চিরাং বিমুং খুসি হং·ফানা হা·বাচেংজক। 59 যিহূদীরাংনি নিয়াম গিত্তা সাল চেতনি সালো বিসং বি·সাখো বিগিল রাতনা রি·বাজক। বিসং দেফান্থিনি বিমুংখো বিনি ফাগিবানি বিমুং গিত্তা সখরিয় মিংনা হাম·জক, 60 ইন্দিবা বিনি মা·গিবা আগানজক, “হং·জা, ইনি বিমুংখো যোহন মিংনুয়া।” 61 বিসং ইলীশাবেতনা আগানজক, “নাং·নি চাচ্চিরাংনি গিসেপো দারাংনিবা ইন্দাকা বিমুং দংজা।” 62 বিসং জাকজিপে দেফান্থিনি ফাগিবাচানিখো বিয়া মুয়া বিমুংখো রা·রিকনা হা·ম্মা উখো হা·আইনা হাম·জক। 63 সখরিয় চকনা জিনিস হা·ম্মে রা·এ চকজক, “ইনি বিমুং যোহন।” উনি গিম্মিন বিসং দিমদাকান আইয়াও ইনমানজক, 64 আরো উনোন সখরিয়নি খু·সুক আরো স্রিবাক স্রাংজক আরো বিয়া খু·সুক আগান্না আরো ইসলখো মিৎথেলনা হা·বাচেংজক। 65 ইখো নিক্কে গিম্মিক নকসুলরাং খেনথকজক, আরো যিহূুদিয়ানি হা·ব্রি জওল গিম্মিকনি মান্দিরাং ইয়ারাংখো আগানরোরোনা হা·বাচেংজক। 66 ইয়া খাৎথারাংখো খিন্নাগিবা দিমদাকান গিসিকথাংও উখো চানচিনা হা·বাচেংজক আরো আগানজক, “দা·ল্লেমুং ইয়া বি·সা ইন্দাকোদে মুয়া হং·নুয়া!” গিত্তেলনি বিলখো ইয়া বি·সানি সাক্কাও নিক্কেমুং বিসং ইয়া খাৎথাখো আগানজক। 67 জা·মানো দেফান্থিনি ফাগিবা সখরিয় গিসিক রংথালগিবাও গাপ্পে আগানসোগিবা গিত্তা ইয়া খাৎথাখো আগান্না হা·বাচেংজক, 68 “ইস্রায়েলনি গিত্তেল ইসলখো মিৎথেলা, মুয়ানা বিয়া আন·থাংনি মান্দিরাংনা গিসিক নাংজক আরো বিসংখো জক্কেৎজক। 69 বিয়া আনচিংনি গিম্মিন বিনি নকখল দায়ূদনি মা·চংওনিখো সাকসা বিল্লাকগিবা জক্কেৎগিবাখো দি·দোজক। 70 স্খাংওন ইয়া খাৎথাখো বিয়া আন·থাংনি রংথালগিবা আগানসোগিবারাংনি খু·সুকচা আগানামিং। 71 বিয়া বোবিলরাংনি জাকনিখো আরো জেরাং মিৎচিয়া বিসং দিমদাকনি জাকনিখো আনচিংখো জক্কেৎজক। 72 বিয়া আনচিংনি ফাগিৎচামরাংনা খা·সাচাকনা আরো বিনি রংথালগিবা খু·রাচাক্কাখো আগানস্খাওদে বিনি খু·মিচেতাখো চু·সকেতনা ইন্নে আনচিংখো জক্কেৎজক। 73 উয়া খু·মিচেতাখো বিয়া আনচিংনি ফাগিৎচাম অব্রাহামচা দাক্কামিং। বিয়া বোবিলরাংনি জাকনিখো আনচিংখো জক্কেৎজক জেদাক্কে থাংআ দিপ্পাৎ রংথালে আরো খাকখেৎ দাক্কে খেনমানগিজা বিনি মিকখাংও চাদেংএ বিনা দাকচাকে হ·ন্না মা·ন্না। 76 আংনি বি·সা, নাং·খো চুবাৎগিবা ইসলনি আগানসোগিবা ইন্নুয়া, মুয়ানা বিনি রামাখো থারিসোনা না·আ বিনা স্খাং স্খাং রি·সনুয়া। 77 না·আ বিনি মান্দিরাংনা আগানবো, বাদিকে দাক্কে আনচিংনি ইসলনি খা·সাচাক্কানি গিম্মিন পাপওনি ক্ষেমা মা·ন্নে পাপওনি জকনা মা·ন্না। বিনি খা·সাচাকবিয়ানি গিম্মিন সালগিওনি গি·সা নাগিবা সাল আনচিংনি সাক্কাও হং·ওনবানুয়া, 79 জেদাক্কে আন্দালাও আরো সিয়ানি সালাখিমও জেরাং আসংএ দংআ বিসংনা সেং·আখো হ·ন্না মা·ন্না, আরো থম·থমানি রামাও আনচিংখো রি·দিলনা মা·ন্না।” 80 জা·মানো যোহন দাল·রোরোবানা আরো গিসিকো বিল্লাকবানা হা·বাচেংজক। ইস্রায়েলরাংনি মিকখাংও ফারাকখুজানা দিপ্পাৎ বিয়া হা·গিসি জওলোন দংআমিং।

লূক 2

1 উয়া সময়ও সম্রাট আগস্ত কৈসর আন·থাংনি সং-নকনি দিমদাক মান্দিরাংখো বিমুং চকনা গি·য়েৎজক। 2 সিরিয়াখো শাসন দাকগিবা কুরীণিয়নি সময়ও মান্দি চান্না ইন্নে ইয়ান স্খাংগিবা বিমুং চক্কানি হং·আমিং। 3 বিমুং চকনা ইন্নে দিমদাকান আন·থাংথাংনি সংচানা রি·য়াংথকনা হা·বাচেংজক। 4 যোষেফ রাজা দায়ূদনি মা·চংনি মান্দিমিং। রাজা দায়ূদ যিহূদিয়া হা·দকনি বৈৎলেহম সংও আৎচিয়ামিং। উনি গিম্মিন যোষেফ বিমুং চকনা ইন্নে গালীল হা·দকনি নাসরত সংওনি বৈৎলেহম সংওনা রি·য়াংজক। মরিয়মবা বিমুং উয়োনা রি·য়াংফাজক। বিমুংআন যোষেফনি খিম্মানি খাৎথা থিক হং·আমিং। উনসালো মরিয়ম হা·ন্নোগ্মাংমিং আরো বৈৎলেহমও দংমিত্তিংওন বিনি বি·সা বা·আনি সাল সকজক। 7 উয়োন বিনি দেজাক্রা দেফান্থি আৎচিজক, আরো বিয়া দেফান্থিখো বা·রাচা বিল·রিমরিমে চারিও থুয়েতজক, মুয়ানা বিসংনা দংচাকেনা হা·দাম চাকজামিং। 8 বৈৎলেহমনি সেফাংও নিরিকগিবারাং হা·বাও দংএ ওয়াল্লো বিসংনি মেষরাংখো নিথিমিংআমিং। 9 উনোন রাং·গিত্তিক গিত্তেলনি সা·গ্রে সাকসা বিসংনি মিকখাংও রি·বাজক। উনো গিত্তেলনি রাসংখো বিসংনি সামব্রিও থেং·সুএ নিকজক। উনি গিম্মিন নিরিকগিবারাং নাম্মেন খেনবিজক। 10 সা·গ্রে বিসংনা আগানজক, “দা·আ খেন্নাবো, মুয়ানা আংআ না·সংনা নাম্মেন খুসি হং·আনি খাৎথাখো রা·বাজক। ইয়া খুসি দিমদাক মান্দিনান হং·আ। 11 দা·আল দায়ূদনি সংও না·সংখো জক্কেৎগিবা আৎচিজক। বিয়ান খ্রীষ্ট, বিয়ান গিত্তেল। 12 ইয়া খাৎথা বিবি হং·আমা ইখো হা·আইনানি না·সংনা ইনি চিন হং·জক- না·সং বা·রাচা বিল·রিমরিমে চারিও থুয়েতি দনগিবা সাকসা বি·সাখো নিকনুয়া।” 13 উনোন রাং·গিত্তিক উয়া সা·গ্রেমুং বাং·আ সা·গ্রেরাংখো উনো নিকনা মান·জক। বিসং ইসলখো মিৎথেলে আগান্না হা·বাচেংজক, 14 “সালগিও ইসলনি রাসং হং·খানা, হা·গিলসাকও জেরাংখো বিয়া নামনিকবিয়া বিসংনি থম·থম হং·খানা।” 15 সা·গ্রেরাং বিসংওনি সালগিওনা রি·য়াংআনি জা·মানো নিরিকগিবারাং সাকসা সাকগিপ্পিননা আগানজক, “রি·বো, আনচিং বৈৎলেহমচা রি·য়াংনা আরো গিত্তেল আনচিংনা জেখো আগানামিং উখো রি·য়াংএ নিনা।” 16 বিসং গং·রাকে রি·য়াংএ মরিয়ম, যোষেফ আরো চারিও থুয়েতগিবা উয়া বি·সাখো সান্দিয়ে নিকনা মান·জক। 17 বি·সাখো নিক্কানি জা·মানো উয়া বি·সানি গিম্মিন বিসংনা আগানগিবাখো বিসং আগানজক। 18 নিরিকগিবারাংনি খাৎথাখো খিন্নাএ দিমদাকান আইয়াও ইনমানজক; 19 ইন্দিবা মরিয়ম দিমদাকখো গিসিকথাংও রা·চিপে দনজক, দারাংনাবা আগানজাজক; আরো উরাংনি বিদিংও বিয়া চানচিয়ে দংজক। 20 সা·গ্রেরাং রাক্ষুয়ালরাংনা জেদাক্কে আগানামিং উয়ানদাক্কেন দিমদাকখো নিক্কে আরো খিন্নাএ বিসং ইসলখো মিৎথেলে আরো রাসং চাএতে ফি·ল্লাংজক। 21 যিহূদীরাংনি দাকবেওয়াল গিত্তা বি·সাখো বিগিল রাতনা আৎচিয়ানি সাল চেত চু·সকানি জা·মানো উনি বিমুংখো যীশু মিংজক। মা·নি অক্কো খে·না স্খাং সা·গ্রে বিনা ইয়া বিমুংখোন হ·ন্নামিং। 22 জা·মানো মোশিনি নিয়াম গিত্তা বিসংনি রংথালানি সাল চু·সকজক। উনোন যোষেফ আরো মরিয়ম যীশুখো গিত্তেলনি মিকখাংচা রা·আংনা যিরূশালেম সংজিলমাচানা রিম্মাংজক, 23 মুয়ানা গিত্তেলনি নিয়ামও চক্কা দংআ, “স্খাং আৎচিগিবা দিমদাক মি·আসা বি·সাখো গিত্তেলনি ইন্নে চান্নুয়া।” 24 ইনাআগ্রে গিত্তেলনি নিয়ামও জেদাক্কে “দো·খ্রু জোরাসা বা কইতর বি·সা মাংগ্মিখো” বলি হ·ন্না চক্কা দংআ উয়ানদাক্কেন বিসং উরাংখো বলি হ·ন্না রি·য়াংজক। 25 উনসালো যিরূশালেমো শিমিয়োন মিংগিবা সাকসা থরমি আরো ইসলখো অলাখিগিবা মান্দি দংআমিং। ইসল বাসোকো ইস্রায়েলরাংনি দুকখো হা·রিকনুয়া উনি গিম্মিন বিয়া নিচাকসোংআমিং। গিসিক রংথালগিবা বিনি সাক্কাও দংআমিং আরো সিনা স্খাং বিয়া গিত্তেলনি উয়া খ্রীষ্টখো নিকনা মা·ন্নুয়া ইন্নে বিনা ফারাকামিং। 27 উনসালো শিমিয়োন গিসিক রংথালগিবাচা যিহূদীরাংনি থরম নক্কো রি·বাজক। মোশিনি নিয়াম গিত্তা জেখো দাকনা নাংআ উখো দাকনা ইন্নে যীশুনি মা·গিবা ফাগিবা বি·সা যীশুখো রা·এ উয়োনা রি·বাজক। 28 উনোন শিমিয়োন বিখো গিপ্পাকজক আরো ইসলখো রাসং চাএতে আগানজক, 29 “গিত্তেল, না·আ নাং·নি আগানা গিত্তা নকখলথাংখো দা·আও থম·থমে ওয়াত্তেতিংজক, 30 মুয়ানা মান্দিখো পাপওনি জক্কেৎনা ইন্নে দিমদাক মান্দিনি মিক্রোনরাংও না·আ জেখো দাকসোজক, আংআ উখো নিকনা মান·জক। 32 গিপ্পিন জাতরাংনা ইয়াদে রামা ফিন্নিকানি সেং·আ হং·আ, আরো নাং·নি ইস্রায়েল জাতরাংনা ইয়াদে রাসংনি হং·আ।” 33 বি·সানি গিম্মিন শিমিয়োন জেখো আগানজক উনা বি·সানি মা·গিবা ফাগিবা আইয়াও ইনমানজক। 34 উনি জা·মানো শিমিয়োন বিসংনা ফাত্তিজক আরো যীশুনি মা·গিবা মরিয়মনা আগানজক, “ইসল ইখোন বাচ্ছিজক, ইয়া বি·সানি গিম্মিন ইস্রায়েলনি গিসেপো বাং·আন গা·আকনুয়া, দা·আবা বাং·আন জক্কাখো মা·ন্নুয়া। বিয়া ইন্দাকগিবা গি·সা চিন গিত্তা হং·নুয়া জেনি সাক্কাও বাং·এন খাৎথা আগান্নুয়া, 35 আরো উনি গিম্মিন বিসংনি গিসিকনি চানচিয়ারাং ফারাকনুয়া। আরো মি·ল্লামচা সু·য়া গিত্তা দুক নাং·নি খা·থংখো সু·নুয়া।” 36 উয়া সময়ও হান্না মিংআ সাকসা মিচিক আগানসোগিবা দংআমিং। বিয়া আশের মা·চংনি পনূয়েলনি দেমিচিক। বিয়া নাম্মেন বুৎচুমা হং·বিজকমিং। বিলসি স্নিনা দিপ্পাৎ সেগিবামুং দংআনি জা·মানো বিলসি সৎচেতব্রিওনা দিপ্পাৎ বিয়া রান্দি হং·এ দংআমিং। থরম নকখো ওয়াত্তে বিয়া মামুংচান রি·য়াংজানুয়ামিং বাত্তেসা অকগুমিন দংএ আরো বি·এ ওয়াল সাল ইসলখো অলাখিনুয়ামিং। 38 বিয়াবা উয়া সময়ও মিকখাংচানা রি·বাএ ইসলখো মিৎথেলজক, আরো ইসল যিরূশালেমখো জক্কেতনুয়া ইন্নে জেরাং নিচাকসোংআমিং বিসংনা উয়া বি·সানি খাৎথাখো আগান্না হা·বাচেংজক। 39 গিত্তেলনি নিয়াম গিত্তা দিমদাক কামখো ব·ন্নেতি মরিয়ম আরো যোষেফ গালীলনি নাসরত সংথাংচানা রি·য়াংফিলজক। 40 বি·সা যীশু দাল·রোরোএ বিল্লাকবানা আরো হা·আইয়াও চু·সকনা হা·বাচেংজক। বিনি সাক্কাও ইসলনি ফাত্তিয়া দংআমিং। 41 ওয়াতচাংআনি সালো যীশুনি মা·গিবা ফাগিবা বিলসি রিক্ষিত যিরূশালেমচানা রি·য়াংনুয়ামিং। 42 যীশুনি বিলসি চি·গ্মি হং·ও দাকবেওয়াল গিত্তান বিসং উয়া পর্বচানা রি·য়াংজক। 43 পর্বনি বন·খামও বিসংনি নকথাংচা ফি·ল্লাংমিত্তিংও যীশু যিরূশালেমোন দংরিকজক। ইন্দিবা বিনি মা·গিবা ফাগিবা উখো হা·আইজামিং। 44 বিসংমুং রি·ফাগিবা মান্দিরাংমুং বিয়া দংআ ইখো চানচিয়ে বিসং সালসানি রামাখো রি·য়াংজক। জা·মানো বিসং বিসংনি চাচ্চি আরো হা·আইগিবা মান্দিরাংনি গিসেপো যীশুখো সান্দিনা হা·বাচেংজক। 45 ইন্দিবা সান্দিয়ে মান·জাএ বিখো সান্দিনা রি·য়াংএ বিসং দা·আবা যিরূশালেমচানা ফি·ল্লাংজক। 46 জা·মানো সালগিত্থামনি জা·মানো বিসং বিখো থরম নক্কো মান·জক। বিয়া স্খিগিবারাংনি জাংচিও আসংএ বিসংনি খাৎথাখো খিন্নাংআমিং আরো বিসংখো সিং·আমিং। 47 যীশুনি খাৎথাখো খিন্নাগিবারাং দিমদাকান বিনি বুদ্ধিখো নিক্কে আরো বিনি আগানচাক্কাখো খিন্নাএ আইয়াও ইনমানথকজক। 48 বিনি মা·গিবা ফাগিবা বিখো নিক্কে আইয়াও ইনমানজক। বিনি মা·গিবা বিনা আগানজক, “আংদে, না·আ মুয়ানা চিংমুং ইন্দাকে দাকজক? নাং·ফা আরো আংআ বাসকিন খাসুয়াংমিকসুয়াং দাক্কে নাং·খো সান্দিংআমিং।” 49 যীশু বিসংনা আগানজক, “না·সং মুয়ানা আংখো সান্দিংআ? আংনি ফানি নক্কো আংনি দংনা নাংনুয়া না·সং ইখো হা·আইজামিংমা?” 50 যীশুনি আগানাখো বিনি মা·গিবা ফাগিবা হা·আইজাজক। 51 উনি জা·মানো বিয়া বিসংমুং নাসরতচানা ফি·ল্লাংজক আরো বিসংনা বাম্মে দংজক। বিনি মা·গিবা ইয়ারাংখো গিসিকো রা·চিপে দনজক। 52 যীশু হা·আইয়ানিও, বিলসিও আরো ইসল আরো মান্দিনি খা·সাআও দাল·রোরোবাজক।

লূক 3

1 তিবিরিয় কৈসর রোমনি সম্রাট হং·আনি চি·বংআগিবা বিলসিও পন্তীয় পীলাত যিহূদিয়া হা·দকনি দাল·গিবা শাসন দাকগিবা হং·আমিং। হেরোদ উনো গালীল হা·দকখো আরো বিনি জংগিবা ফিলিপ যিতুরিয়া হা·দকখো আরো ত্রাখোনীতিয়াখো শাসন দাক্কিংআমিং। লুষানিয়া অবিলীনীনি শাসন দাকগিবা হং·আমিং, 2 আরো হানন আরো কাইয়াফা যিহূদীরাংনি খামাল দাল·বাৎগিবা দংআমিং। উয়া সময়ওন হা·গিসি জওলো সখরিয়নি দেফান্থি যোহনচা ইসল আন·থাংনি খাৎথাখো ফারাকজক। 3 উনোন যোহন যর্দন চিবিমানি সামবারাংনি হা·দাম গিম্মিকচা রি·য়াংএ আগানফ্রাকনা হা·বাচেংজক জেদাক্কে মান্দিরাং পাপওনি ক্ষেমা মা·ন্না পাপওনি গিসিক ফি·ল্লা আরো উনি চিন গিত্তা রিপ্পলা। 4 আগানসোগিবা যিশাইয়নি খি·তাপও জেদাক্কে চক্কা দংআ উয়ানদাক্কেন ইয়ারাং হং·জক। চক্কা দংআ, “হা·গিসি জওলো সাকসানি খু·রাং চ্রিকে আগানসোংআ, ‘না·সং গিত্তেলনি রামাখো থারিসোবো, বিনি রি·য়ানি রামাখো স্রংএ থারিবো। 5 গিম্মিক হা·খংখো গাপ্পেতনুয়া, হা·ব্রি-হা·দিংখো থা·দিংদিং দাক্কেতনুয়া। গংগিয়া রামাখো স্রংএতনুয়া, গা·নাংগিজা রামাখো গা·নাংএতনুয়া। 6 মান্দিখো পাপওনি জক্কেৎনা ইন্নে ইসল জেখো দাকজক, গিম্মিক মান্দিরাংআন উখো নিকনা মা·ন্নুয়া।’ ” 7 উনোন বাং·আ মান্দি রিপ্পলনা ইন্নে যোহনচা রি·বানা হা·বাচেংজক। যোহন বিসংনা আগানজক, “চিপ্পুনি দেদ্রাং! ইসলচানি রি·বাগিবা শাস্তিওনি খাত্তে জকনা ইয়া বুদ্ধিখো সা না·সংনা হন·জক? 8 না·সংনি পাপওনি গিসিক ফি·ল্লানি খ্রাখ্রা বিথিখো না·সংনি জাংগি থাংআনিও ফিন্নিকবো। না·সং অব্রাহামনি মা·চংনি মান্দি ইখো গিসিকথাংও দা·আ চানচিয়াবো। আংআ না·সংনা আগানিংআ, ইয়া রং·থিরাংনিখো ইসল অব্রাহামনি দেদ্রাংখো আৎচিয়েতনা মা·ন্না। 9 ফাংনি জা·থিংও রুয়াখো দন্নান দংআ। জে বিফাংও নাম্মা বিথি নাংজা উখো দেন·ফাকেন ওয়া·আলো গাল্লেতনুয়া।” 10 উনোন মান্দিরাং যোহনচা সিং·জক, “ইন্দাকোদে চিংআ মুয়াখো দাকনুয়া?” 11 যোহন বিসংনা আগানচাকজক, “সানিবা চলা ফাৎগ্মি দংওদে বিয়া চলাগ্রি দংগিবানা চলা ফাৎসা হন·খানা। চা·আ দংগিবাবা উয়ানদাক্কেন দাকখানা।” 12 মিত্তাম খাজিনা গিলগিবারাং রিপ্পলনা রি·বাএ যোহননা আগানজক, “স্খিগিবা, চিংআ মুয়াখো দাকনুয়া?” 13 বিয়া বিসংনা আগানজক, “নিয়ামও দংগিবানা বাত্তে দা·আ বাং·এ রা·আবো।” 14 মিত্তাম সিপাইরাংবা বিখো সিং·জক, “চিংআ আরবা মুয়াখো দাকনুয়া?” বিয়া উয়া সিপাইরাংনা আগানজক, “দ্রাএ বা অন্যায় দাক্কে সাকসানিখোবা দা·আ মামুংখো সেক্কি রা·আবো আরো না·সংনি বেতনচান খুসি হং·এ দংবো।” 15 মান্দিরাং গিসিকথাংও নাম্মেন খা·দংএ চানচিংআমিং যোহনআন খ্রীষ্টখোন। 16 উনোন যোহন বিসং দিমদাকনান আগানজক, “আংআ না·সংখো চিও রিপ্পলেতিংআ, ইন্দিবা আংনা বাত্তে বিল্লাকবাৎগিবা রি·বাংজক। আংআ বিনি জা·খপনি ফিতাখো এংনাবা খ্রাজা। বিয়া গিসিক রংথালগিবাও আরো ওয়া·আলো না·সংখো রিপ্পলেতনুয়া। 17 বিনি জাক্কোন রুয়ান দংআ; উচা বিয়া আন·থাংনি মি মাড়াইগিবা হা·দামখো রংথালেতি মিখো জামও চিম্মংনুয়া, ইন্দিবা বিবুখোদে খিম্মিতনা মান·গিজাগিবা ওয়া·আলো সো·এ গালনুয়া।” 18 যোহন আরোবা বাং·আ খাৎথারাংচা মান্দিরাংখো খা·দংএতে ইসলনি হন·গিবা নাম্মা খাৎথাখো আগানফ্রাকজক। 19 শাসন দাকগিবা হেরোদ আদাথাংনি জিকগিবা হেরোদিয়াখো খিম্মানি গিম্মিন আরো বিনি বাং·আ নামগিজা কামরাংনি গিম্মিন যোহন বিনি গ্রোখো ফিন্নিকে হ·ন্নামিং। 20 উয়ারাংনি গিম্মিন যোহনখো বিয়া জেলো দনজক। ইন্দাকেসা বিনি গিপ্পিন নামগিজা কামরাংমুং ইয়া নামগিজা কামবা আপসান হং·রিমজক। 21 যোহনচা রি·বাগিবা মান্দিরাংনি রিপ্পলমিত্তিংও যীশুবা রিপ্পলজক। রিপ্পলানি জা·মানো যীশুনি বি·মিত্তিংও সিলগা ফ্রাকাংজক। 22 উনোন গিসিক রংথালগিবা কইতর গিত্তা বিনি সাক্কাও হং·ওনবাজক, আরো সালগিনি ইয়া খাৎথাখো খিন্নানা মান·জক, “না·আন আংনি খা·সাগিবা দেফান্থি, নাং·খোন আংআ নামনিকবিয়া।” 23 খলাৎচিমাং বিলসিও যীশু বিনি কামরাংখো দাকনা হা·বাচেংজক। বিয়া যোষেফনি দেফান্থি ইন্নে মান্দিরাং চানচিনুয়ামিং। যোষেফ এলিনি দেফান্থি; 24 এলি মত্ততনি দেফান্থি, মত্তত লেবিনি দেফান্থি, লেবি মল্কিনি দেফান্থি, মল্কি যান্নায়নি দেফান্থি, যান্নায় যোষেফনি দেফান্থি; 25 যোষেফ মত্তথিয়নি দেফান্থি, মত্তথিয় আমোসনি দেফান্থি, আমোস নহূমনি দেফান্থি, নহূম ইষ্‌লিনি দেফান্থি, ইষ্‌লি নগিনি দেফান্থি; 26 নগি মাটনি দেফান্থি, মাট মত্তথিয়নি দেফান্থি, মত্তথিয় শিমিয়িনি দেফান্থি, শিমিয়ি যোষেখনি দেফান্থি, যোষেখ যুদানি দেফান্থি; 27 যুদা যোহানানি দেফান্থি, যোহানা রীষানি দেফান্থি, রীষা সরু্ববাবিলনি দেফান্থি, সরু্ববাবিল শল্টীয়েলনি দেফান্থি, শল্টীয়েল নেরিনি দেফান্থি; 28 নেরি মল্কিনি দেফান্থি, মল্কি অদ্দীনি দেফান্থি, অদ্দী কোষমনি দেফান্থি, কোষম ইল্‌মাদমনি দেফান্থি, ইল্‌মাদম এরনি দেফান্থি; 29 এর যীশুনি দেফান্থি, যীশু ইলীয়েষরনি দেফান্থি, ইলীয়েষর যোরীমনি দেফান্থি, যোরীম মত্ততনি দেফান্থি, মত্তত লেবিনি দেফান্থি; 30 লেবি শিমিয়োননি দেফান্থি, শিমিয়োন যুদানি দেফান্থি, যুদা যোষেফনি দেফান্থি, যোষেফ যোনমনি দেফান্থি, যোনম ইলিয়াকীমনি দেফান্থি; 31 ইলিয়াকীম মিলেয়ানি দেফান্থি, মিলেয়া মিন্নানি দেফান্থি, মিন্না মত্তথনি দেফান্থি, মত্তথ নাথননি দেফান্থি, নাথন দায়ূদনি দেফান্থি; 32 দায়ূদ যিশয়নি দেফান্থি, যিশয় ওবেদনি দেফান্থি, ওবেদ বোয়সনি দেফান্থি, বোয়স সল্‌মোননি দেফান্থি, সল্‌মোন নহশোননি দেফান্থি; 33 নহশোন অম্মীনাদবনি দেফান্থি, অম্মীনাদব অদমাননি দেফান্থি, অদমান অর্ণিনি দেফান্থি, অর্ণি হিষ্রোণনি দেফান্থি, হিষ্রোণ পেরসনি দেফান্থি, পেরস যিহূদানি দেফান্থি; 34 যিহূদা যাকোবনি দেফান্থি, যাকোব ইস্‌হাকনি দেফান্থি, ইস্‌হাক অব্রাহামনি দেফান্থি, অব্রাহাম তেরহনি দেফান্থি, তেরহ নাহোরনি দেফান্থি; 35 নাহোর সরূগনি দেফান্থি, সরূগ রিয়ুনি দেফান্থি, রিয়ু পেলগনি দেফান্থি, পেলগ এবরনি দেফান্থি, এবর শেলহনি দেফান্থি; 36 শেলহ কৈনননি দেফান্থি, কৈনন অর্ফক্‌ষদনি দেফান্থি, অর্ফক্‌ষদ শেমনি দেফান্থি, শেম নোহনি দেফান্থি, নোহ লেমকনি দেফান্থি; 37 লেমক মথুশেলহনি দেফান্থি, মথুশেলহ হনোকনি দেফান্থি, হনোক যেরদনি দেফান্থি, যেরদ মহললেলনি দেফান্থি, মহললেল কৈনননি দেফান্থি; 38 কৈনন ইনোশনি দেফান্থি, ইনোশ শেথনি দেফান্থি, শেথ আদমনি দেফান্থি, আদম ইসলনি দেফান্থি।

লূক 4

1 যীশু গিসিক রংথালগিবাও গাপ্পে যর্দন চিবিমাওনি রি·য়াংজক। গিসিক রংথালগিবানি রিম্মাংআনা বিয়া সাল সৎব্রিনা দিপ্পাৎ হা·গিসি জওলো রওমে দংজক। উয়া সালরাংও শয়তান মাদ্দুয়ারাংখো ফিন্নিকে বিখো পাপও গালনা হা·ম্মামিং। উয়া সাল সৎব্রিও যীশু মামুংখোবা চা·জামিং; উনি গিম্মিন উয়া সালরাং বাত্তাংওন বিয়া অকখ্রিআনা দাকজক। 3 উনোন শয়তান যীশুনা আগানজক, “না·আ ইসলনি দেফান্থি হং·ওদে ইয়া রং·থিখো রুটি ফিল·খানা আগানবো।” 4 যীশু শয়তাননা আগানজক, “রংথালগিবা শাস্ত্রও চক্কা দংআ, ‘মান্দি রুটিখো চা·এসান থাংজা।’ ” 5 উনি জা·মানো শয়তান বিখো চুবাত্তা হা·দাম দামসাওনা রিম্মাংজক আরো দিকদিকসানোন হা·গিলসাকনি গিম্মিক হা·খিংখো ফিন্নিকে আগানজক, “ইয়া হা·খিং গিম্মিকনি বিলখো আরো উয়ারাংনি রাসংখো আংআ নাং·না হন·থকনুয়া, মুয়ানা ইয়ারাংখো আংনা হন·মানজক। আংআ জেনা হা·সিকা উনান উখো হ·ন্না মা·ন্না। 7 দা·আও না·আ আংখো অলাখিয়ে নাং·নি গিত্তেল ইন্নে খু·রাচাকোদে ইয়া দিমদাকান নাং·নি হং·নুয়া।” 8 যীশু বিনা আগানচাকজক, “রংথালগিবা শাস্ত্রও চক্কা দংআ, ‘না·আ আন·থাংনি গিত্তেল ইসলখো অলাখিবো, বিনাসান দাকচাকে হন·বো।’ ” 9 উনোন শয়তান যীশুখো যিরূশালেমচানা রিম্মাংজক আরো থরম নকনি চুয়াকগিবা হা·দামও বিখো চাদেংএতে আগানজক, “না·আ ইসলনি দেফান্থি হং·ওদে ইয়োনি খা·মাচানা চক্কনবো, 10 মুয়ানা রংথালগিবা শাস্ত্রও চক্কা দংআ, বিয়া আন·থাংনি সা·গ্রেরাংখো নাং·নি গিম্মিন গি·য়েৎনুয়া জেদাক্কে বিসং নাং·খো জক্কেৎনা মা·ন্না। 11 রং·থিও নাংএ নাং·নি জা·চক মাতজানা গিত্তা বিসং নাং·খো জাকচা রিম·চাকনুয়া।” 12 যীশু বিনা আগানজক, “রংথালগিবা শাস্ত্রও আগানা দংআ, ‘নাং·নি গিত্তেল ইসলখো না·আ দা·আ রুরাবো।’ ” 13 গিম্মিক মাদ্দুয়ানিরাংখো ফিন্নিকানি জা·মানো শয়তান দিকদিকসানা গান্দা যীশুচানি রি·য়াংজক। 14 জা·মানো যীশু গিসিক রংথালগিবানি বিলও গাপ্পে গালীল হা·দকোনা ফি·ল্লাংজক। যীশুনি খাৎথা উয়া জওল গিম্মিকচানা গিপ্পাংজক। 15 উয়ারাংনি দিংথাং দিংথাং থম·দাকরামও যীশু স্খিনা হা·বাচেংজক। উনোন দিমদাকান বিখো রাসং দাকজক। 16 উনি জা·মানো যীশু নাসরতচা রি·য়াংজক। ইনোন বিয়া দাল·বামিং। বিয়া আন·থাংনি বেওয়াল গিত্তা নেং·থাকানি সালো থম·দাকরামচা রি·য়াংজক, উনি জা·মানো শাস্ত্রখো পড়িনা চাদেংজক। 17 বিনি জাক্কো আগানসোগিবা যিশাইয়নি খি·তাপখো হন·জক। বি·ল্লে দনগিবা উয়া খি·তাপখো এংআরিন বিয়া ইন্দাকে চক্কে দনগিবা হা·দামখো মান·জক, 18 “গিত্তেলনি গিসিক আংনি সাক্কাও দংআ, মুয়ানা বিয়ান আংখো বাচ্ছিয়ে রা·জক জেদাক্কে আংআ দিল্লা-চন্নারাংচা নাম্মা খাৎথাখো আগানফ্রাকনা মা·ন্না। বিয়া আংখো জেলো চিপ্পে দনগিবারাংচা জক্কানি খাৎথাখো, মিকগ্রিরাংচা নিকনা মা·ন্নানি খাৎথাখো আগান্না ওয়াত্তেতজক। দক্কা চা·গিবারাংখো, জক্কেৎনা আংখো ওয়াত্তেতজক। 19 ইনাআগ্রে গিত্তেল আংখো আগানফ্রাকনা ওয়াত্তেতজক, দা·আও বিনি খা·সাচাক্কাখো ফিন্নিকানি সাল চু·সকজক।” 20 জা·মানো বিয়া খি·তাপখো দা·আবা বি·ল্লে দাকচাকগিবানি জাক্কো হ·ন্নে আসংজক। থম·দাকরামনি গিম্মিক মান্দিরাংনি মিক্রোন বিনি সাক্কাও গা·আকজক। 21 উনোন যীশু মান্দিরাংনা আগানজক, “রংথালগিবা শাস্ত্রনি ইয়া খাৎথাখো দা·আল না·সংনি খিন্নাথারিমওন উয়া চু·সকজক।” 22 মান্দিরাং দিমদাকান বিখো রাসং দাকজক আরো বিনি খু·সুকও ইন্দাকা খিন্নাথোয়া খাৎথারাংখো খিন্নানা মা·ন্নে আইয়াও ইনমানথকজক। বিসং আগানজক, “ইয়া যোষেফনি দেফান্থি হং·জামা?” 23 যীশু বিসংনা আগানজক, “না·সং আংখো ইয়া আগানরোংআ খাৎথাখো আগানবিবিনুয়া, ‘ডাক্তার আন·থাংখো নাম্মেতবো।’ আরোবা আগান্নুয়া, ‘কফরনাহূমও দাকগিবা চিংনি খিন্নাগিবা কামরাংখো দা·আও সংথাংওবা দাক্কে ফিন্নিকবো।’ ” 24 বিয়া আরোবা আগানজক, “আংআ না·সংনা বিবিন আগানিংআ, সাকসা আগানসোগিবাখোবা সংথাংনি মান্দিরাং মান্দিরা·জা। 25 ইয়া খাৎথাদে বিবিন, এলিয়নি চাসংও বিলসি গিত্থাম জা দকনা দিপ্পাৎ মিকখা ওয়াজামিং আরো সংগিম্মিকো আক্কাল হং·বিয়ামিং উনো ইস্রায়েল হা·সংও রান্দি বাং·আমিং। 26 ইন্দিবা সীদোন জওলনি সারিফত সংনি রান্দি মিচিকওনা আগ্রে এলিয়খো সাকসাচাবা ওয়াত্তেতজামিং। 27 আগানসোগিবা ইলীশায়নি চাসংও ইস্রায়েল হা·সংও বাং·বিয়া খনচিরিত্তামারাং দং·আমিং, ইন্দিবা বিসংনি গিসেপো সাকসাখোবা নাম্মেতজা, সিরিয়া হা·সংনি নামানখোসান নাম্মেতামিং।” 28 ইয়া খাৎথাখো খিন্নাএ থম·দাকরামনি মান্দি গিম্মিক খা·আওনাংবিজক। 29 বিসং চাখাত্তে যীশুখো সংনি হা·ফালচানা রিকরুয়ে রা·আংজক, আরো বিসংনি সং জে হা·ব্রিওমিং উয়া হা·ব্রিনি হা·চুড়াওনি বিখো গাল্লেতনা ইন্নে রিম্মাংজক। 30 ইন্দিবা বিয়া উয়া মান্দিরাংনি জাংচি গিত্তান রি·য়াংআরিজক। 31 জা·মানো যীশু গালীল হা·দকনি কফরনাহূম সংজিলমাচানা রি·য়াংজক আরো নেং·থাকানি সালো মান্দিরাংনা স্খিয়ে হন·জক। 32 বিনি স্খিয়ানা মান্দিরাং আইয়াও ইনমানজক, মুয়ানা বিয়া বিল দংগিবা মান্দিরাং গিত্তা খাৎথা আগানিংআমিং। 33 উয়া থম·দাকরামও ইন্দাকগিবা সাকসা মান্দি দংআমিং জেখো গিসিক নামগিজাগিবা মা·ন্নামিং। বিয়া চ্রিকে আগানজক, 34 “ও নাসরত সংনি যীশু, চিংমুং নাং·নি মুয়া নাংফা? না·আ চিংখো ব·ন্নেতনা রি·বামা? না·আ সা আংআ হা·আইয়া; না·আন ইসলনি উয়া রংথালগিবা মান্দি।” 35 যীশু উয়া গিসিক নামগিজাগিবাখো ইন্দাতে আগানজক, “জ্রিপ দংবো, বিওনি হং·খাতে রি·য়াংবো।” উয়া গিসিক নামগিজাগিবা উনো উয়া মান্দিখো দিমদাকনি জাংচিও গোস্থাপে গালজক আরো বিখো দুক হন·গিজা বিনি নিং·আওনি হং·খাতজক। 36 উনি গিম্মিন দিমদাকান আইয়াও ইনমানে আন·থাংথাংও আগানগ্রিকনা হা·বাচেংজক, “ইয়া বাদাকগিবা খাৎথা! বিলখো রা·এ বিয়া গিসিক নামগিজাগিবারাংখো গি·য়েতা আরো বিসং হং·খাতাংআ!” 37 উয়া জওল গিম্মিকচা যীশুনি খাৎথা গিপ্পাংজক। 38 উনি জা·মানো যীশু থম·দাকরামখো ওয়াত্তে শিমোননি নকচানা রি·য়াংজক। শিমোননি নিওগিবা উনো বিল্লংএ জম্মামিং। বিখো নাম্মেতখানা যীশুখো মল·মলজক। 39 উনোন যীশু শিমোননি নিওগিবানি সেফাংও চাদেংএ জম্মাখো ইন্দাতজক। উনি গিম্মিন বিনি জম্মা সাল·জক, আরো বিয়া উনোন চাখাত্তে বিসংনি চা·আ রিংআনিখো থারিনা হা·বাচেংজক। 40 সাল নাপমিত্তিংও মান্দিরাং গিম্মিক জম্মা-সা দংগিবারাংখো যীশুচানা রিম·বাথকজক। বিসং বাং·আ সারাংখো চাক্কিংআমিং। যীশু বিসংনি দিমদাকনি বে·এনো জাক হ·ন্নে বিসংখো নাম্মেতজক। 41 বাং·আ মান্দিরাংওনি গিসিক নামগিজাগিবাবা হং·খাতে রি·য়াংজক। উয়া গিসিক নামগিজাগিবারাং চ্রিকে আগানজক, “না·আ ইসলনি দেফান্থি।” বিয়ান খ্রীষ্ট হং·আ উখো বিসং হা·আইয়ামিং। উনি গিম্মিন বিয়া ইন্দাতে বিসংনি খু·সুকখো জ্রিপেতজক। 42 ফ্রিংও যীশু উয়া হা·দামখো ওয়াত্তে মান্দিগ্রি হা·দামচানা রি·য়াংজক। মান্দিরাং বিখো সান্দিয়েমুং বিচানা রি·য়াংজক আরো বিয়া বিসংওনি রি·য়াংজাখানা ইন্নে বিসং বিখো রি·ম্মে রা·রিকনা হাম·জক। 43 উনোন যীশু বিসংনা আগানজক, “বাং·আ হা·দামরাংচা ইসলনি সংনকনি নাম্মা খাৎথাখো আগানফ্রাকনা নাংনুয়া, মুয়ানা ইনি গিম্মিনান ইসল আংখো ওয়াত্তেতজক।” 44 উনি জা·মানো বিয়া যিহূদীরাংনি সংনি দিংথাং দিংথাং থম·দাকরামও আগানফ্রাকনা হা·বাচেংজক।

লূক 5

1 সালসাও যীশু গিনেষরৎ সাগালনি রিক্কামও চাদেংএ দংআমিং। মান্দিরাং ইসলনি খাৎথাখো খিন্নানা ইন্নে বিখো উইলউইলে সিকচেপচেপিংআমিং। 2 ইন্দাকমিত্তিংও বিয়া সাগালনি রিক্কামও রিং গি·গ্মিখো নিকনা মান·জক। না·থক রিম·গিবারাং উয়া রিং গি·গ্মিওনি হং·খাতে বিসংনি জালখো সু·গালিংআমিং। 3 উনো যীশু শিমোননি রিংও গাখাতজক আরো বিখো রিক্কামওনি অকখিসা চেল·খালে রিংখো রা·আংখানা আগানজক। জা·মানো রিংও আসংএ বিয়া মান্দিরাংনা স্খিনা হা·বাচেংজক। 4 খাৎথা আগানা বন·মানো যীশু শিমোননা আগানজক, “চি থিং·নাপাচা রি·য়াংএ না·থক রিম·না না·সংনি জালখো গোবো।” 5 শিমোন আগানজক, “গিত্তেল, ওয়ালগিম্মিক গাম্মেবা মামুংখোন রিম·না মান·জাজক; ইন্দিবা নাং·নি আগানানা আংআ জালখো গোনুয়া।” 6 জাল গোআনি জা·মানো উয়ো বাং·আ না·থক গাদোয়ানি গিম্মিন বিসংনি জাল গিৎচিতনা হাম·ফিলজক। 7 উনো বিসং রিম·ফাখানা ইন্নে রিং গিপ্পিননি রিপ্পেংরাংখো জাকজিপে রিক্কামজক। বিসং রি·বাএ রিং গি·গ্মিও ইন্দাকফিল্লে না·থক দন্নানি গিম্মিন উয়া রিংরাং রিপনা গিত্তিক দাকজক। 8 ইখো নিক্কে শিমোন-পিতর যীশুনি মিকখাংও থুচিকপে আগানজক, “গিত্তেল, আংআ পাপী মান্দি; আংওনি রি·য়াংবো।” 9 না·থক বাং·এ গাদোয়াখো নিক্কে শিমোন-পিতর আরো বিনি রিপ্পেংরাং গিম্মিকান আইয়াও ইনমানজক। 10 শিমোনমুং বাদিংগিবা যাকোব আরো যোহন মিংগিবা সিবদিয়নি সাকগ্মি দেফান্থিবা আইয়াও ইনমানজক। উনো যীশু শিমোননা আগানজক, “দা·আ খেন্নাবো; দা·আওনি দিপ্পাৎ না·আ ইসলনা মান্দি রিম·নুয়া।” 11 জা·মানো বিসং রিংরাংখো রিক্কামচানা রা·বাজক আরো গিম্মিকখো গাল্লে যীশুমুং রি·য়াংফাজক। 12 সালসাও যীশু সং দামসাচা রি·য়াংজক। বে·এন গিম্মিকো খনচিরিত্তামা গাপগিবা সাকসা মান্দি উয়ো দংআমিং। যীশুখো নিক্কে বিয়া থুচিকপে মল·মলে আগানজক, “গিত্তেল, না·আ হা·সিকমানচাওদে আংখো নাম্মেতনা মা·ন্না।” 13 যীশু জাকখো সিল্লে বিখো দাংথাপেতে আগানজক, “আংআ উখোন হা·ম্মা, না·আ রংথালবো।” আরো উনোন বিয়া নামজক। 14 যীশু বিনা ইন্দাকে গি·য়েৎজক, “ইয়া খাৎথাখো দারাংনাবা দা·আ আগানাবো ইন্দিবা রি·য়াংএ খামালনা আন·থাংখো ফিন্নিকবো। জা·মানো রংথালানি গিম্মিন মোশি জেখো বলি হ·ন্না গি·য়েৎজক উখো বলি হন·বো। উনোসা মান্দিরাং নাং·নি রংথালাখো হা·আইনুয়া।” 15 ইন্দাকোবা যীশুনি খাৎথা আরোবা গিম্মিকচা গিপ্পাংজক। বিনি খাৎথাখো খিন্নানা আরো সাবিসিরাংওনি নামনা ইন্নে মান্দি বাং·আরাং বিচা রি·বানা হা·বাচেংজক। 16 সময়ফ্রাকরাংও যীশু মান্দিগ্রি মা·সুগ্রি হা·দামচা রি·য়াংএ বি·নুয়ামিং। 17 সালসাও যীশুনি স্খিমিত্তিংও ফরীশীরাং আরো শাস্ত্র স্খিগিবারাং উয়োনা আসংএ দংআমিং। গালীল হা·দকনি গিপ্পিন গিপ্পিন সংরাংওনি আরো যিহূদিয়া হা·দক আরো যিরূশালেম সংজিলমাওনি ইয়ারাং রি·বামিং। জমগিবারাংখো নাম্মেতনা গিত্তেলনি বিল যীশুও দংআমিং। 18 উনোন মিত্তাম মান্দিরাং সাকসা হা·আন জাদা সিগিবাখো থুচাকানিও রিপ্পিয়ে রা·বাজক। বিসং বিখো নিং·আচা রা·আংএ যীশুনি মিকখাংও দন্না হাম·জক, 19 ইন্দিবা মান্দি বাং·আনি গিম্মিন নকনিং·আচা রি·য়াংআনি রামাখো মান·জাজক। উনোন বিসং নকখিংওনা গাখাতজক আরো নকখিংনি টালিখো অক্কে থুচাক্রাও দাক্কে বিখো মান্দিরাংনি জাংচিও যীশুনি মিকখাংও অন্নেতজক। 20 যীশু বিসংনি বিবিরা·খো নিক্কে আগানজক, “রিপ্পেং, নাং·নি পাপরাংখো ক্ষেমা দাকজক।” 21 উনি গিম্মিন শাস্ত্র স্খিগিবা আরো ফরীশীরাং গিসিকথাংথাংও ইন্দাকে চানচিনা হা·বাচেংজক, “ইসলখো চন্নিকে আগানগিবা ইয়া মান্দি সাজক? ইসলনা আগ্রে সা পাপখো ক্ষেমা দাকনা মা·ন্না?” 22 বিসংনি গিসিকথাংথাংনি চানচিয়াখো হা·আইনা মা·ন্নে যীশু আগানজক, “না·সং গিসিকথাংথাংও মুয়ানা উয়া খাৎথাখো চানচিংআ? 23 বাগিবাখো আগানা নামবাতনুয়া, ‘নাং·নি পাপরাংখো ক্ষেমা দাকজক,’ ইন্নে আগানাখো বা ‘না·আ চাখাত্তে রামা রি·বো’ ইন্নে আগানাখো? 24 ইন্দিবা না·সং জেদাক্কে হা·আইনা মা·ন্না হা·গিলসাকো পাপরাংখো ক্ষেমা দাক্কানি বিল মান্দিনি দেফান্থিনি দংআ” -ইখো আগানে বিয়া উয়া হা·আন জাদা সিগিবাখো আগানজক, “আংআ নাং·না আগানিংআ, চাখাতবো, নাং·নি থুচাক্রাখো দি·থমে নকচা রি·য়াংবো।” 25 উয়া মান্দি উনোন দিমদাকনি মিকখাংও চাখাতজক আরো বিনি থুচাক্রাখো দি·থমে রা·এ ইসলখো রাসং চাএতে নকথাংচানা রি·য়াংজক। 26 উনি গিম্মিন দিমদাকান আইয়াও ইনমানফিলজক আরো খেনচাকে ইসলখো রাসং চাএতে আগানজক, “দা·আল আনচিং ইয়া বাদাকগিবা আইয়াও ইনমানগিবা কামখো নিকজক!” 27 উনি জা·মানো যীশু হা·ফালচানা রি·য়াংজক আরো খাজিনা গিলগিবা হা·দামও লেবি মিংগিবা সাকসা খাজিনা গিলগিবাখো আসংএ দংআখো নিকনা মান·জক। যীশু লেবিনা আগানজক, “রি·বাবো, আংখো জা·রিকফাবো।” 28 উনি গিম্মিন লেবি চাখাতজক আরো বিনি গিম্মিকখো গাল্লে যীশুমুং রি·য়াংফাজক। 29 জা·মানো লেবি নকথাংও যীশুনা চা·নিখো হন·জক। বিসংমুং বাং·আ খাজিনা গিলগিবা আরো গিপ্পিন মান্দিরাং চা·না আসংজক। 30 উনো ফরীশীরাং আরো বিসংনি শাস্ত্র স্খিগিবারাং খা·আওনাংএ যীশুনি জা·রিকগিবারাংনা আগানজক, “না·সং খাজিনা গিলগিবা আরো নামগিজা মান্দিরাংমুং মুয়ানা চা·আংআ রিংআ?” 31 যীশু বিসংনা আগানজক, “নামগিবারাংনা ডাক্তার নাংজা ইন্দিবা জমগিবারাংনাসা নাংআ। 32 পাপওনি গিসিক ফি·ল্লেতনা আংআ থরমিরাংখো রিক্কামনা রি·বাজা ইন্দিবা পাপীরাংখোসা রিক্কামনা রি·বাআ।” 33 জা·মানো উয়া শাস্ত্র স্খিগিবারাং যীশুনা আগানজক, “যোহননি জা·রিকগিবারাং সময়ফ্রাকওন অকগুমিন চাক্কে আরো বি·এ দংআ আরো ফরীশীরাংনি জা·রিকগিবারাংবা উখো দাক্কা, ইন্দিবা নাং·নি জা·রিকগিবারাং মামুং সালোবা চা·আ রিংআখো ওয়াতজা।” 34 যীশু বিসংনা আগানজক, “চাওয়ারি আপসান দংমিত্তিংও চাওয়ারিমুং দংফাগিবা মান্দিরাংখো অকগুমিন চাক্কেতনা মা·ন্নামা? 35 ইন্দিবা সাল রি·বানুয়া জেনসালো বিসংচাখো চাওয়ারিখো রিম্মাংনুয়া, আরো উনসালো বিসং অকগুমিন চাকনুয়া।” 36 জা·মানো যীশু স্খিনা ইন্নে বিসংচা ইখো আগানজকঃ “চলা গিত্তালখো চিত্তে দারাংবা চলা গিৎচামও উখো সিকথাপজা, মুয়ানা ইন্দাকোদে উয়া চলা গিত্তালখোদে বিয়া গিৎচিত্তেতা; আরো উয়া বা·রা গিত্তালবা বা·রা গিৎচামও মা·গাপজা। 37 গিত্তাল আংগুর বিৎচিখো দারাংবা গিৎচাম বিগিলনি দনচাক্রাও দনজা, দন্নোদে গিত্তাল বিৎচিনা দনচাক্রারাং বিকব্রেতারিয়া। উনোদে বিৎচিবা গা·আকা, দনচাক্রারাংবা নাসিয়া। 38 গিত্তাল আংগুর বিৎচিখো গিত্তাল বিগিলনি দনচাক্রাওন দন্না নাংআ। 39 গিৎচাম আংগুর বিৎচিখো রিংআনি জা·মানো দারাংবা গিত্তাল বিৎচিখো রিংনা হাম·জা, মুয়ানা বিয়া আগানা, ‘গিৎচামান নাম্মা।’ ”

লূক 6

1 রাং·সাও নেং·থাকানি সালো যীশু গম হা·বানি জাংচি গিত্তা রি·য়াংআমিং। বিনি জা·রিকগিবারাং গম বিথিখো আক্কে জাকফাও সসেত্তে চা·না হা·বাচেংজক। 2 উনোন মিত্তাম ফরীশীরাং আগানজক, “থরমনি নিয়াম গিত্তা নেং·থাকানি সালো জেখো দাকনা খ্রাজা, না·সং উখো মুয়ানা দাক্কিংআ?” 3 যীশু আগানজক, “দায়ূদ আরো বিনি রিপ্পেংরাং জেনসালো অকখ্রিয়ামিং উনসালো বিয়া মুয়াখো দাক্কামিং উখো না·সং পড়িখুজামা? 4 বিয়াদে ইসলনি নক্কো নাপ্পে ইসলনা চিন·গিবা রুটিখো রা·এ চা·আমিং আরো বিনি রিপ্পেংরাংনাবা হ·ন্নামিং। ইন্দিবা খামালরাংনা আগ্রে দারাংবা উখো চা·না মান·জানুয়ামিং।” 5 জা·মানো যীশু উয়া ফরীশীরাংনা আগানজক, “মান্দিনি দেফান্থিন নেং·থাকানি সালনি গিত্তেল হং·আ।” 6 দা·আও সালসা নেং·থাকানি সালো যীশু থম·দাকরামচা রি·য়াংএ স্খিংআমিং। উয়ো ইন্দাকগিবা সাকসা মান্দি দংআমিং জেনি জাক সিক্রেপামিং। 7 শাস্ত্র স্খিগিবা আরো ফরীশীরাং যীশুখো গ্রো নাংএতানি চল সান্দিংআমিং। উনি গিম্মিন বিয়া নেং·থাকানি সালো সাকসাখোবা নাম্মেতামা নাম্মেতজা উখো নিনা ইন্নে বিসং যীশুনি সাক্কাও নাম্মেদাক্কে নিরকখিনা হা·বাচেংজক। 8 ইন্দিবা যীশু বিসংনি গিসিকনি চানচিয়াখো হা·আইয়ামিং। উনি গিম্মিন জাক সিক্রেপগিবানা বিয়া আগানজক, “চাখাত্তে গিম্মিকনি মিকখাংও রি·বাএ চাদেংবো।” উনি গিম্মিন বিয়া চাদেংজক। 9 যীশু শাস্ত্র স্খিগিবা আরো ফরীশীরাংনা আগানজক, “আংআ না·সংচা মিংসা খাৎথাখো সিং·না, নেং·থাকানি সালো নাম্মা কামখো দাকনা খ্রাআমা, নামগিজা কামখো দাকনা খ্রাআ? জাংগি জক্কেৎনা খ্রাআ, বা নাসিয়েতনা খ্রাআমা?” 10 জা·মানো যীশু কেচ্চিরাংনি সাকগিম্মিকচাখো নিএ উয়া মান্দিনা আগানজক, “নাং·নি জাকখো সিল্লেতবো।” বিয়া উখো দাক্কোন বিনি জাক নামস্রাংজক। 11 উনো উয়া থরমনি দাল·গিবারাং নাম্মেন খা·আওনাংজক আরো যীশুখো রা·এ মুয়াখো দাকনা মা·ন্না উখো আন·থাংথাংও আগানগ্রিকনা হা·বাচেংজক। 12 উনি জা·মানো যীশু বি·না মিংএ হা·ব্রি গি·সাওনা রি·য়াংজক আরো ওয়াল গিম্মিক ইসলচা বি·জক। 13 ওয়াল সেং·আনি জা·মানো বিয়া আন·থাংনি জা·রিকগিবারাংখো রিক্কামজক আরো উরাংনি গিসেপো সাকচিগ্মিখো বাচ্ছিয়ে রা·এ ওয়াত্তেতা দাক্কে থারিজক। 14 বিসং হং·জক শিমোন, জেখো বিয়া পিতর ইন্নে মিংদাপজক; শিমোননি জংগিবা আন্দ্রিয়; যাকোব আরো যোহন; ফিলিপ আরো বর্থলময়; 15 মথি আরো থোমা; আলফেয়েনি দেফান্থি যাকোব; শিমোন, জেখো হা·সংনা খা·ফাকগিবা ইন্না; 16 যাকোবনি দেফান্থি যিহূদা আরো যিহূদা ইস্করিয়োৎ, জে যীশুখো বোবিলরাংনি জাক্কো রি·ম্মে হ·ন্নামিং। 17 যীশু বিনি জা·রিকগিবারাংখো রা·এ হা·ব্রিওনি হং·খাতে স্রংআ হা·দামও চাদেংজক। উয়ো বিনি বাং·আ জা·রিকগিবারাং থম·দাকজকমিং। ইনা আগ্রে যিহূদিয়া, যিরূশালেম আরো সোর আরো সীদোন মিংগিবা সাগাল রিক্কামনি সংগি·গ্মিওনিবা বাং·বিয়া মান্দিরাং উয়োনা দংআমিং। 18 বিসং বিনি খাৎথাখো খিন্নাথিমনা আরো জম্মাসানিখো নামনা ইন্নে উয়ো রি·বামিং। গিসিক নামগিজাগিবানা দুক মান·গিবারাং নাম্মাংজকমিং। 19 উনো মান্দি গিম্মিকান বিখো দাংথাপেতনা হাম·জক, মুয়ানা বিনি নিং·আওনি বিল হং·খাতে গিম্মিকখোন নাম্মেতিংআমিং। 20 জা·মানো যীশু জা·রিকগিবারাংচা নিএ আগান্না হা·বাচেংজক, “দিলগিবারাং, না·সং ফাত্তিয়াখো মান·গিবা, মুয়ানা ইসলনি সংনক না·সংনিন। 21 না·সং ফাত্তিয়াখো মান·গিবা, দা·আও জেরাংনি অকখ্রিয়া দংআ, মুয়ানা না·সং অক্‌খানুয়া। গ্রাপগিবারাং, না·সং ফাত্তিয়াখো মান·গিবা, মুয়ানা না·সং খা·দিংনুয়া। 22 “জেনসালো মান্দিনি দেফান্থিনি গিম্মিন মান্দিরাং না·সংখো মিৎচিয়া, সমাজওনি রিকগাল্লা আরো ইনস্থেকা আরো না·সংনি বিমুংখো খিন্নাজোকনো খু·চি গাল্লা, উনোন না·সং ফাত্তিয়া মান·গিবা হং·আ। 23 উনসালো না·সং খুসি হং·বো আরো হান·সেংবো, মুয়ানা সালগিও না·সংনি মা·ন্নানিরাং দংআ। উয়া মান্দিরাংনি ফাগিৎচামরাং আগানসোগিবারাংনি সাক্কাওবা ইন্দাকেন দাক্কামিং। 24 “ইন্দিবা হং·সিখানা মা·ন্নে চা·গিবা মান্দিরাং! না·সং নাম্মেদাক্কেন আরাম দাক্কিংজক। 25 হং·সিখানা না·সংনা, অকখাগিবা মান্দিরাং! না·সংদে অকখ্রিনুয়া। হং·সিখানা না·সংনা, খা·দিংগিবারাং! না·সং দুক দাকনুয়া আরো গ্রাপনুয়া। 26 হং·সিখানা না·সংনা, গিম্মিক মান্দিরাং জেনসালো না·সংখো রাসং দাক্কা। ইয়া মান্দিরাংনি ফাগিৎচামরাং বু·এ চা·গিবা আগানসোগিবারাংখোবা রাসং দাকনুয়ামিং। 27 “না·সং খিন্নাগিবারাংনা আংআ আগানিংআ, না·সংনি বোবিলরাংনা খা·সাবো। না·সংখো মিৎচিগিবারাংনা নাম্মাখো দাকবো। 28 জেরাং না·সংনি নামগিজাখো হা·ম্মা বিসংনা নাম্মাখো হাম·বো। না·সংমুং নামগিজা বেওয়ালখো দাকগিবারাংনা বি·চাকবো। 29 নাং·নি নাথেং সামসাখো দকগিবানা নাথেং সামগিপ্পিনখোবা দকনা হন·বো। নাং·নি চিন্নানি বা·রাখো রা·আংগিবানা চলাখোবা রা·আংনা হন·বো। 30 নাং·চা হাম·গিবারাংনা হন·বো। সাবা নাং·নি মামুং জিনিসখো রা·আংওদে উখোদে দা·আ হাম·ফিলাবো। 31 মান্দিরাংচানিখো না·সং জে বেওয়ালখো মা·ন্না হা·ম্মা না·সংবা বিসংমুং উয়ানদাক্কা বেওয়ালখো দাকবো। 32 “না·সংনা খা·সাগিবারাংখোসান না·সং খা·সাচাক্কোদে উনোদে রাসং চাআনি মুয়া দংআ? নামগিজা মান্দিরাংবা ইন্দাকেন খা·সাচাক্কে দংআ। 33 না·সংনা নামগিবাখো দাকগিবারাংনাসান না·সং নাম্মাখো দাক্কোদে উনোদে রাসং চাআনি মুয়া দংআ? নামগিজা মান্দিরাংবা উখো দাক্কা। 34 জেরাংচানিখো না·সং ফি·ল্লে মা·ন্না খা·দংআ, আরো বিসংনাসান থাংখা হ·ন্নোদে উনোদে রাসং চাআনি মুয়া দংআ? মা·ন্নুয়া ইন্নেন নামগিজা মান্দিরাং নামগিজা মান্দিরাংনা থাংখা স্রোএ দংআ। 35 ইন্দিবা না·সং আন·থাংথাংনি বোবিলরাংনা খা·সাবো আরো বিসংনা নাম্মাখো দাকবো। মামুংখো ফি·ল্লে মা·ন্নানিখো চানচিগিজা থাংখা স্রোনা হন·বো। ইন্দাকোদে না·সংনি মা·ন্নানি দংআ, আরো না·সং চুবাৎগিবা ইসলনি দেদ্রাং হং·নুয়া, মুয়ানা বিয়া নামগিজারাংনাবা খা·সাচাক্কা। 36 না·সংনি ফাআ জেদাক্কে খা·সাচাক্কা না·সংবা উয়ানদাক্কেন খা·সাচাকবো। 37 “গিপ্পিনরাংনি গ্রোখো দা·আ রি·ম্মাবো, উনি গিম্মিন না·সংনি গ্রোখোবা রিম·জানুয়া। গিপ্পিনরাংনা শাস্তি হ·ন্না দা·আ চানচিয়াবো, উনি গিম্মিন না·সংনাবা শাস্তি হন·জানুয়া। গিপ্পিনরাংখো ক্ষেমা দাকবো, উনি গিম্মিন না·সংখোবা ক্ষেমা দাকনুয়া। 38 হন·বো, উনি গিম্মিন না·সংনাবা হ·ন্নুয়া; বাং·বাত্তে, সিকজেজেত্তে, মজেকজেকে, গাপসুওয়াকে না·সংনা হ·ন্নুয়া, মুয়ানা জেদাক্কে না·সং থয়ে হ·ন্না উয়ানদাক্কেন না·সংনা থয়ে হ·ন্নুয়া।” 39 জা·মানো যীশু আন·থাংনি জা·রিকগিবারাংনা স্খিনা ইন্নে ইয়া গল্পখো আগানজকঃ “সাকসা মিকগ্রি দা·আও সাকসা মিকগ্রিনা রামা ফিন্নিকনা মা·ন্নামা? ইন্দাকোদে বিসং সাকগ্মিআন হা·খলো গা·আকজানুয়ামা? 40 স্নিংগিবা বিনি স্খিগিবানা বাতজা, ইন্দিবা চু·সকগিবা স্খিয়াখো মা·ন্নে স্নিংগিবা গিম্মিকান বিনি স্খিগিবা গিত্তান হং·আ। 41 “নাং·নি জংআদানি মিক্রোনও দংগিবা বি·সেমসেমখোন নিক্কিংআ, ইন্দিবা নাং·নি মিক্রোনথাংও দংগিবা বি·সেমসেমখোদে মুয়ানা নিকজাংআ? 42 নাং·নি মিক্রোনথাংও দংগিবা বি·সেমসেমখো নিকজাওদে বাদিকে দাক্কে নাং·নি জংআদাখো আগান্না মা·ন্না, ‘ও জং, রি·বা নাং·নি মিক্রোনও দংগিবা বি·সেমসেমখো আংআ ওত্তে গালনা’? বু·এ চা·গিবা, স্খাং নাং·নি মিক্রোনও দংগিবা বি·সেমসেমখো ওত্তে গালচেংবো, ইন্দাকোদে নাং·নি জংআদানি মিক্রোনও দংগিবা বি·সেমসেমখো ওত্তে গালনা নিকসেংনুয়া। 43 “নাম্মা বিফাংও নামগিজা বিথি নাংজা, দা·আবা নামগিজা বিফাংওবা নাম্মা বিথি নাংজা। 44 বিথিচান বিফাংখো হা·আইনা মা·ন্না। মান্দিরাংদে বুসুগ্রিমওনি ডুমুর আরো আংগুরখো আকজা। 45 নামগিবা মান্দি বিনি নাম্মা খা·থংওনি খাৎথা নাম্মাখোন হং·খাত্তেতা, আরো নামগিজা মান্দি নামগিজা খা·থংওনি খাৎথা নামগিজাখোন হং·খাত্তেতা। মান্দিনি খা·থং জেদাক্কে চু·সকা খু·সুকদে উয়ানদাক্কেন আগানা। 46 “না·সং মুয়ানা আংখো ‘গিত্তেল, গিত্তেল’ ইন্নে রিক্কামা, ইন্দিবা আংআ জেখো আগানা উখোদে দাকজা? 47 আংচা রি·বাএ আংনি খাৎথাখো খিন্নাগিবা আরো উয়ানদাক্কেন কাম রিম·গিবা সা গিত্তা দাক্কা আংআ উখো না·সংনা আগান্না। 48 বিয়া ইন্দাকগিবা সাকসা মান্দি গিত্তা হং·আ, জে মান্দি নক রিকনা ইন্নে হা·আখো থিং·নাপে চো·এ রং·থিনি সাক্কাও রিকজক। জা·মানো চি দাল·বাজক আরো চি বালজকবাএ উয়া নকখো রিপ্পেতজক, ইন্দিবা উয়া নকখো গা·আকেতনা মান·জাজক, মুয়ানা উখো নাম্মেদাক্কেন রিক্কামিং। 49 জে আংনি খাৎথাখো খিন্না ইন্দিবা উয়ানদাক্কে কাম রিম·জা বিয়া ইন্দাকগিবা সাকসা মান্দি গিত্তা হং·আ, জে মান্দি হা·আও নকখো ফাংচাকগিজা রিকজক। জা·মানো চি দাল·বায়ে থা·রাকে উয়া নকনি সাক্কাও রি·বাওন উয়া নক বি·গ্রপে ব·ন্নাংজক।”

লূক 7

1 যীশু মান্দিরাংনা ইয়া খাৎথারাংখো আগানমা·ন্নে কফরনাহূম সংজিলমাচানা রি·য়াংজক। 2 উয়ো রোম সুবিদারনি নকখল সাকসা সাএমিংনা সিয়া গিত্তা হং·জকমিং। ইয়া নকখলখো উয়া সুবিদার নাম্মেন খা·সানুয়ামিং। 3 বিয়া যীশুনি খাৎথাখো খিন্নাএ যিহূদীরাংনি মিত্তাম মি·আফারাংখো যীশুচা মল·মলখানা ওয়াত্তেতজক জেদাক্কে বিয়া রি·বাএ বিনি নকখলখো নাম্মেতা। 4 উয়া মি·আফারাং যীশুচা রি·বাএ বিনা মল·মলে আগানজক, “না·আ জেনা মিংএ ইয়া কামখো দাকনুয়া বিয়া ইনা খ্রাবিয়া, 5 মুয়ানা বিয়া আনচিংনি মান্দিরাংখো নামনিকা আরো আনচিংনি থম·দাকরামখো বিয়ান রিক্কে হ·ন্না।” 6 উনো যীশু বিসংমুং রি·য়াংফাজক। বিয়া উয়া নক সেফাংওনা সকবানি জা·মানো উয়া সুবিদার বিনি রিপ্পেংরাংখো আগানে ওয়াত্তেতজক, “গিত্তেল, আন·থাংখো আরবা দা·আ নেং·এতাবো, মুয়ানা না·আ আংনি নক্কো নাপনা গিত্তা আংআ খ্রাজা। 7 উনি গিম্মিন নাং·চা রি·য়াংনা আংআ আন·থাংখো খ্রাএবা নিকজাজক। না·আ খু·সুকচাসান আগানবো, উনোন আংনি নকখল নাম্মাংনুয়া। 8 আংআ ইখো হা·আইয়া, মুয়ানা আংখোবা গিপ্পিননি আগানা গিত্তা রি·না নাংআ আরো সিপাইরাংবা আংনি আগানা গিত্তা রি·য়া। আংআ সাকসাখো ‘রি·য়াংবো’ ইন্নোদে বিয়া রি·য়াংআ, সাকগিপ্পিনখো ‘রি·বাবো’ ইন্নোদে বিয়া রি·বাআ, আরো আংনি নকখলখো ‘ইখো দাকবো’ ইন্নোদে বিয়া উখো দাক্কা।” 9 ইয়া খাৎথাখো খিন্নাএ যীশু আইয়াও ইনমানজক আরো বিখো জা·রিকফাগিবা মান্দিরাংচানিখো নিএ বিয়া আগানজক, “আংআ না·সংনা আগানিংআ, ইস্রায়েলরাংনি গিসেপোবা ইন্দাকফিল্লে বিবিরা·খো আংআ মামুং সালোবা নিকখুজা।” 10 সুবিদার জেরাংখো ওয়াত্তেতামিং বিসং নক্কোনা ফিল·বাএ উয়া নকখলনি নাম্মাখো নিকনা মান·জক। 11 ইনি অকখিসা জা·মানো যীশু নায়িন্‌ মিংআ সং গি·সাওনা রি·য়াংজক। বিনি জা·রিকগিবারাং আরো বাং·বিয়া মান্দিরাং বিমুং রি·য়াংফাংআমিং। 12 বিয়া জে সময়ও উয়া সংনি দ·গাওনা সকজক উনো মান্দিরাং সাকসা সিগিবা মান্দিখো হা·ফালচানা রা·আংআমিং। উয়া সিগিবা মান্দি বিনি মা·গিবানি সাকসা খাম·খাম দেফান্থিমিং, আরো উয়া মা·গিবাবান রান্দি হং·জকমিং। সংনি বাং·বিয়া মান্দি উয়া রান্দিমুং দংফামিং। 13 গিত্তেল উয়া রান্দিখো নিক্কে খা·সাচাকবিএ আগানজক, “দা·আ গ্রাপাবো।” 14 জা·মানো যীশু সেফাংও রি·য়াংএ থুচাকানিখো দাংথাপেতজক। ইনি গিম্মিন মাংগিসিখো রিপ্পিএ রা·আংগিবারাং চাদেংজক। যীশু আগানজক, “ফান্থি, আংআ নাং·খো আগানিংআ, চাখাতবো।” 15 উনি গিম্মিন সিগিবা মান্দি চাখাত্তে আসংজক আরো খু·সুক আগান্না হা·বাচেংজক। যীশু বিখো বিনি মা·গিবাচা হ·ন্নেতজক। 16 ইনি গিম্মিন গিম্মিকনি খা·থং খা·ফাকাও আরো খেন্নাও গাপজক। বিসং ইসলখো রাসং চাএতে আগান্না হা·বাচেংজক, “আনচিংনি গিসেপো সাকসা দাল·গিবা আগানসোগিবা দংআ। ইসল খা·সাচাক্কে বিনি মান্দিরাংচাখো নিএতজক।” 17 যীশুনি গিম্মিন ইয়া খাৎথা যিহূদিয়া হা·দক আরো উনি সামবাজলরাংনি গিম্মিকোন গিপ্পাংজক। 18 রিপ্পলেতগিবা যোহননি জা·রিকগিবারাং ইয়ারাংখো যোহনচা আগানজক। উনো যোহন বিনি সাকগ্মি জা·রিকগিবারাংখো রিংগামে যীশুচা ইয়া খাৎথাখো সিং·এ ওয়াত্তেতজক, “না·আন উয়া রি·বানা আগানগিবামা, বা চিংআ সাকগিপ্পিননা নিচাকসনুয়ামা?” 20 উয়া মান্দিরাং যীশুচা রি·বাএ আগানজক, “রিপ্পলেতগিবা যোহন চিংখো নাং·চা সিং·না ওয়াত্তেতা, ‘না·আন উয়া রি·বানা আগানগিবামা, বা চিংআ সাকগিপ্পিননা নিচাকসনুয়ামা?’ ” 21 উনো যীশু বাং·আ মান্দিখো জম্মাসানিখো আরো সা·দিকা-সা·খামানিখো নাম্মেতজক আরো গিসিক নামগিজাগিবা মান·গিবারাংখো নাম্মেতজক আরো বাং·আ মিকগ্রি মান্দিরাংখোবা নিনা বিল হন·জক। 22 ইয়ারাংখো দাক্কানি জা·মানো যীশু যোহননি জা·রিকগিবারাংনা আগানচাকজক, “না·সং জেখো নিকজক আরো খিন্নাজক উখো রি·য়াংএ যোহননা আগানবো। বিনা আগানবো, মিকগ্রিরাং নিক্কিংজক, খোরারাং রামা রি·ইংজক, খনচিরিত্তামগিবারাং রংথালিংজক, নাগকরাং খিন্নাংজক, সিগিবারাং থাংচাফিল্লিংজক আরো দিল্লা-চন্নারাংচা নাম্মা খাৎথাখো আগানফ্রাক্কিংজক। 23 আরো উয়ান রাসং মান·গিবা হং·আ, আংখো রা·এ গিসিকো জেআন চাংফেংআখো মান·জা।” 24 যোহননি ওয়াত্তেতগিবা মান্দিরাংনি রি·য়াংআনি জা·মানো যীশু মান্দিরাংচা যোহননি গিম্মিন আগান্না হা·বাচেংজক, “না·সং হা·গিসি জওলো মুয়াখো নিনা রি·য়াংআমিং? বালওয়ানা মজিমগিবা নলবিফাংখোমা? 25 হং·জাওদে মুয়াখো নিনা রি·য়াংআমিং? নিথুয়া বা·রাখো গানগিবা সাকসা মান্দিখোমা? জেরাং গামচাৎগিবা বা·রাখো গান্না আরো নাম্মেদাক্কে দংথিমা বিসংদে রাজানি নকরাংওসা দংআ। 26 হং·জাওদে মুয়াখো নিনা রি·য়াংআমিং? আগানসোগিবাখোমা? হো·এ, আংআ না·সংনা আগানিংআ, বিয়া আগানসোগিবানাবা দাল·বাত্তা। 27 যোহনান উয়া মান্দি জেনি গিম্মিন রংথালগিবা শাস্ত্রও চক্কা দংআ, ‘নিবো, আংআ নাং·না স্খাং আন·থাংনি সা·গ্রেখো ওয়াত্তেতিংআ। বিয়া নাং·না স্খাং রি·য়াংএ নাং·না রামাখো থারিসনুয়া।’ 28 আংআ না·সংনা আগানিংআ, মান্দিরাংনি গিসেপো যোহননা বাৎগিবা সাকসাবা দংজা; ইন্দাকোবা ইসলনি সংনকো চনবাৎগিবাবা যোহননা দাল·বাত্তা।” 29 (গিম্মিক মান্দিরাং আরো খাজিনা গিলগিবারাং যোহননি আগানফ্রাকাখো খিন্নামিং আরো বিচা রিপ্পলে ইসলখো খাকখেৎগিবা ইন্নে খু·রাচাক্কামিং। 30 ইন্দিবা ফরীশীরাং আরো শাস্ত্র স্খিগিবারাং যোহনচা রিপ্পলাখো রা·জাএ আন·থাংনি গিম্মিন ইসলনি মিকসংআখো বিসং জেগালামিং)। 31 যীশু আরোবা আগানজক, “ইন্দাকোদে ইয়া চাসংনি মান্দিরাংখো আংআ সারাংমুং থনুয়া? বিসং বাদাকগিবা হং·আ? 32 বিসং ইন্দাকগিবা বি·সারাং গিত্তা হং·আ জেরাং বাজালো আসংএ সাকসা সাকগিপ্পিনখো রিংগামে আগানা, ‘চিংআ না·সংনা বাংসি সিক্কামিং ইন্দিবা না·সং মেসাজাজক; চিংআ দুকনি গীতখো রিং·আমিং ইন্দিবা না·সং গ্রাপজাজক।’ 33 রিপ্পলেতগিবা যোহন রি·বাএ রুটি বা আংগুর বিৎচিখো চা·জা রিংজা ইন্নে না·সং আগানিংআ, ‘বিখো গিসিক নামগিজাগিবা মান·জক।’ 34 আরো মান্দিনি দেফান্থি রি·বাএ চা·জক রিংজক ইন্নে না·সং আগানিংআ, ‘নিবো, ইয়া মান্দি চা·ফেকগিবা আরো রিংফেকগিবা, খাজিনা গিলগিবা আরো নামগিজা মান্দিরাংনি রিপ্পেং হং·আ।’ 35 ইন্দিবা হা·আইয়ানি বিদিংও রি·গিবারাংনি জাংগি থাংআওন নিকনা মা·ন্না, হা·আইয়ান খাকখেৎ। 36 সাকসা ফরীশী যীশুখো বিমুং চা·ফানা আগানজক। উনো যীশু বিনি নকচা চা·না রি·য়াংজক। 37 উয়া সংও নামগিজা মিচিক সাকসা দংআমিং। উয়া ফরীশীনি নক্কো যীশুনি চা·না রি·বাখো খিন্নাএ বিয়া গি·সা গ্বিবক রং·থিনি দনচাক্রাও দাক্কে সিম্মিলগিবা তেলখো রা·বাজক। 38 জা·মানো বিয়া যীশুনি জাংগিলচাবাক্কা বিনি জা·চকনি সেফাংও রি·য়াংএ চাদেংজক আরো গ্রাপ্পে মিকচিচা যীশুনি জা·চকখো সুসিয়েতজক। জা·মানো বিয়া বিনি স্খুনি খিন্নিচা যীশুনি জা·চকখো রিপ্পাকজক আরো বিনি জা·চকখো খু·দিমে উয়া সিম্মিলগিবা তেলখো রুদাপজক। 39 যীশুখো চা·না আগানগিবা উয়া ফরীশী ইখো নিক্কে গিসিকথাংও ইনজক, “ইয়া মান্দি আগানসোগিবা হং·বিবিওদে হা·আইনা মা·ন্নুয়ামিং, সা আরো বাদাকগিবা মিচিকসা বিনি জা·চকখো দাংথাপেতিংজক; মিচিকসাদে নামজা।” 40 যীশু উয়া ফরীশীনা আগানজক, “শিমোন, নাং·না আংনি আগানানি দংআ।” শিমোন আগানজক, “স্খিগিবা, আগানবো।” 41 যীশু আগানজক, “সাকসা মহাজনচা সাকগ্মি মান্দি থাংখা চতনা নাংআমিং। সাকসা রিৎচাবংআ আরো সাকগিপ্পিন সৎবংআ দীনারখো চতনা নাংআমিং। 42 বিসংনি সাকসানিবা জিন্নাং চত্তানি বিল দংজামিং ইন্নে বিয়া খা·সাচাক্কে সাকগ্মিখোন ক্ষেমা দাকজক। ইন্দাকোদে আগানবোদা, উয়া সাকগ্মিনি গিসেপো সা মহাজনখো নামনিকবাতনুয়া?” 43 শিমোন আগানজক, “আংনি চানচিয়া গিত্তাদে, জে বাং·বিয়া জিন্নাংওনিখো ক্ষেমা মান·জক, উয়ান।” যীশু বিনা আগানজক, “না·আ খাকখেৎখোন আগানজক।” 44 জা·মানো যীশু উয়া মিচিকচানা নিএ শিমোননা আগানজক, “না·আ ইয়া মিচিকখোদে নিক্কিংজক। আংআ নাং·নি নক্কো রি·বানি জা·মানো না·আ আংনা জা·সুনা চি হন·জাজক, ইন্দিবা বিয়া মিকচিথাংচা আংনি জা·চকখো সুসিয়েতি খিন্নিথাংচা রিপ্পাকে হন·জক। 45 না·আ আংখো খু·দিমজাজক, ইন্দিবা আংআ নক্কো রি·বানি জা·মানোনিন বিয়া আংনি জা·চকও খু·দিমিংজক। 46 না·আ আংনি স্খুও তেলখো রুজাজক, ইন্দিবা বিয়া আংনি জা·চকনি সাক্কাও সিম্মিলগিবা তেলখো রুদাপজক। 47 ইনি গিম্মিন আংআ নাং·না আগানিংআ, বিয়া বাং·বিয়ে খা·সাখো ফিন্নিকানি গিম্মিন ইখোন হা·আইনা মা·ন্না, বিনি পাপরাং বাং·ওবা ইসল বিখো ক্ষেমা দাকজক। পাপরাংখো অকখিসা ক্ষেমা দাকগিবানি খা·সাদে বাং·জা।” 48 জা·মানো যীশু উয়া মিচিকনা আগানজক, “নাং·নি পাপরাংখো ক্ষেমা দাকজক।” 49 যীশুমুং চা·না আসংগিবারাং গিসিকথাংথাংও আগান্না হা·বাচেংজক, “ইয়া সাজক, জে পাপরাংখোবা ক্ষেমা দাক্কা?” 50 যীশু উনো উয়া মিচিকনা আগানজক, “নাং·নি বিবিরা·নি গিম্মিন না·আ পাপওনি জকজক। থম·থমে রি·য়াংবো।”

লূক 8

1 উনি জা·মানো যীশু সংরাংও আরো সংজিলমারাংও রি·রোরোএ ইসলনি সংনকনি নাম্মা খাৎথাখো আগানফ্রাকনা হা·বাচেংজক। বিমুং বিনি সাকচিগ্মি জা·রিকগিবা আরো মিত্তাম মিচিকরাংবা দংআমিং। ইয়া মিচিকরাং গিসিক নামগিজারাংওনি জক্কামিং আরো সাআরাংনি নাম্মামিং। ইয়ারাং হং·জক মরিয়ম, জেখো মগ্‌দলীনী মিংআমিং আরো জেওনি সাকস্নি গিসিক নামগিজাগিবারাং হং·খাতামিং; 3 রাজা হেরোদনি নকখল কূষনি জিকগিবা যোহানা; শোশন্না আরো গিপ্পিন মিচিক বাং·আ। ইয়ারাং দিমদাকান যীশু আরো বিনি জা·রিকগিবারাংনা দাকচাকে হ·ন্না আন·থাংথাংনি থাংখা-পয়সারাংখো ব·ন্নেতনুয়ামিং। 4 উয়া সময়ও গিপ্পিন গিপ্পিন সংরাংওনি বাং·আ মান্দিরাং যীশুচা রি·বাএ থম·দাকজক। উনো বিয়া বিসংনা স্খিয়ে হ·ন্না ইয়া গল্পখো আগানজকঃ 5 “মি গোগিবা সাকসা মি গোনা রি·য়াংজক। গোমিত্তিংও মিত্তাম মি রামা রিক্কামও গা·আকজক। মান্দিরাং উখো জা·চকচা গা·ফেন্নেকজক আরো সাক্কানি দো·দ্রাং বিলবায়ে চা·এ গালজক। 6 মিত্তাম মি রং·ব্রাকও গা·আকে চাবাজক, ইন্দিবা চিজিমাখো মান·জানি গিম্মিন সিক্রেপজক। 7 দা·আবা মিত্তাম মি বুসুগ্রিমো গা·আকজক। জা·মানো বুসুরাং উয়া মিরাংমুং দাল·বায়ে উয়ারাংখো দিকফ্রিপজক। 8 দা·আবা মিত্তাম মি নাম্মা হা·বাও গা·আকজক আরো দাল·বায়ে রিৎচাসা বাত্তে বিথি নাংজক।” ইখো আগানানি জা·মানো যীশু রাক্কে আগানজক, “খিন্নানা নাচিল দংগিবা খিন্নাখানা।” 9 উনি জা·মানো বিনি জা·রিকগিবারাং বিচা উয়া গল্পনি অর্থখো সিং·জক। 10 উনো যীশু আগানজক, “ইসলনি সংনকনি নিং·থুয়া খাৎথাখো না·সংনান হা·আইনা হন·জক, ইন্দিবা সাকগিপ্পিনরাংচা আংআ উখো গল্পচা আগানা, জেদাক্কে বিসং নিক্কেবা নিকজা আরো খিন্নাএবা হা·আইজা। 11 “গল্পনি অর্থ ইন্দাকে হং·আ: বিৎচ্রি হং·জক ইসলনি খাৎথা। 12 রামা রিক্কামও গা·আকগিবা বিৎচ্রিচা বিসংখোন আগানজক জেরাং উয়া খাৎথাখো খিন্না, ইন্দিবা শয়তান রি·বাএ বিসংনি খা·থংওনিখো উখো রা·আংআ। উনি গিম্মিন বিসং উখো বিবিরা·না মান·জাএ পাপওনি জকনা মান·জা। 13 রং·ব্রাকও গা·আকগিবা বিৎচ্রিচা বিসংখোন আগানজক জেরাং উয়া খাৎথাখো খিন্নাএ খুসি হং·এ রা·চাকা, ইন্দিবা বিসংনি গিসেপো উয়া নাম্মেদাক্কে জা·দিল সু·জা। ইন্দাকেসা বিসং বাং·গিজা সালনা বিবিরা·আ, ইন্দিবা রুরাও গা·আকানি সালোদে ফি·ল্লে রি·য়াংআ। 14 বুসুগ্রিমো গা·আকগিবা বিৎচ্রিচা বিসংখোন আগানজক জেরাং উখো খিন্না, ইন্দিবা জাংগি থাংআনি চানচিয়ারাং, গামজিন আরো সুকরাং উয়ারাংখো দিকফ্রিপা। উনি গিম্মিন বিসংনি জাংগিও মামুং বিথি মিন্নাখো নিকজা। 15 নাম্মা হা·বাও গা·আকগিবা বিৎচ্রিচা বিসংখোন আগানজক জেরাং খাকখেৎ আরো সনথল গিসিকো উয়া খাৎথাখো খিন্নাএ নাম্মেদাক্কে রাক্ষিয়া আরো উয়ো থম·থমে দংএ জাংগিও বিথি মিন্নাখো ফিন্নিকা। 16 “দারাংবা চাক্কিখো সো·এ মামুং দনচাক্রাচা উখো ফিনদাপে দনজা বা থুচাক্রানি কক্ষুমাও দনজা। বিয়া উখো গাসা সাক্কাওন দন্না জেদাক্কে নিং·আও রি·বাগিবারাং সেং·আখো নিকনা মা·ন্না। 17 থুম্মুয়ে দন্না ইন্দাকগিবা মামুংবা দংজা জেখো ফারাকজানুয়া, বা সিউল দাক্কে দন্না ইন্দাকগিবা মামুংবা দংজা জেখো হা·আইনা মান·জানুয়া বা ফারাকজানুয়া। 18 ইনি গিম্মিন বাদিকে দাক্কে খিন্নাংআ উয়ো গিসিক হন·বো, মুয়ানা জেনি দংআ বিনা আরোবা বাং·এ হ·ন্নুয়া, ইন্দিবা জেনি দংজা বিনি অকখিসা দংগিবাখোবা বিচানিখো রা·আংনুয়া।” 19 জা·মানো যীশুনি মা·গিবা আরো জংগিবারাং বিচা রি·বাজক ইন্দিবা মান্দি বাং·আনি গিম্মিন বিমুং গ্রংনা মান·জাজক। 20 উনো সাকসা মান্দি বিনা আগানজক, “নাং·নি মা·গিবা আরো জংগিবারাং নাং·মুং গ্রংনা ইন্নে হা·ফালচা চাদেংএ দংআ।” 21 উনি গিম্মিন যীশু মান্দিরাংনা আগানজক, “জেরাং ইসলনি খাৎথাখো খিন্নাএ উগিত্তা কাম দাক্কা বিসংআন আংনি মা·গিবা আরো আংনি জংগিবারাং হং·আ।” 22 সালসাও যীশু আরো বিনি জা·রিকগিবারাং রিং গি·সাও গাখাতজক। বিয়া জা·রিকগিবারাংনা আগানজক, “রি·বো, আনচিং সাগালনি নালসাচা রি·য়াংনা।” জা·রিকগিবারাং রিংখো ওয়াতজক। 23 রিং চোমিত্তিংও যীশু থুজক। উনো রাং·গিত্তিক সাগালও মিকখা বালওয়া রাকজক আরো রিংও চি গাপনা হা·বাচেংজক। উনি গিম্মিন বিসং নাম্মেন জাজ্রেংজক। 24 বিসং যীশুচা রি·য়াংএ বিখো চামিসায়ে আগানজক, “গিত্তেল, গিত্তেল, আনচিংদে সিনাজক!” উনো যীশু চাখাত্তে বালওয়া আরো চি ফকফেক্কাখো ইন্দাতজক। উনি গিম্মিন বালওয়া আরো চি ফকফেক্কারাং থিপ্পাংজক আরো গিম্মিকান থম·থমাংজক। 25 বিয়া জা·রিকগিবারাংনা আগানজক, “না·সংনি বিবিরা·আ বাও?” জা·রিকগিবারাং খেনচাকবিএ আইয়াও ইনমানে আন·থাংথাংও আগানগ্রিকনা হা·বাচেংজক, “ইয়াদে সাজক, বিয়া বালওয়া আরো চিখো গি·য়েৎওন উয়ারাংবা বিনি খাৎথাখো মানিয়া?” 26 উনি জা·মানো যীশু আরো বিনি জা·রিকগিবারাং সাগালখো বাত্তাংএ গালীল হা·দকনি মিকখাংগ্রিকে দংগিবা গাদারীয়রাংনি জওলোনা রি·য়াংজক। 27 বিয়া রিংওনি হং·খাতমিত্তিংও উয়া সংনি সাকসা মান্দি বিচা রি·বাজক। উয়া মান্দিখো বাং·বিয়া গিসিক নামগিজারাং মা·ন্নামিং ইন্নে বিয়া বা·রাচলা গানজানুয়ামিং আরো নক্কো দংগিজা গোপরামও দংনুয়ামিং। 28 যীশুখো নিক্কে বিয়া চ্রিকজক আরো বিনি মিকখাংও হা·আও গা·আকে রাক্কে রাক্কে আগানজক, “চুবাৎগিবা ইসলনি দেফান্থি যীশু, আংমুং নাং·নি মুয়া নাংফাআ? খা·সাফাএ না·আ আংখো দা·আ দুক হ·ন্নাবো।” 29 উয়া মান্দি ইন্দাকে আগানজক মুয়ানা যীশু উয়া গিসিক নামগিজাগিবাখো বিওনি হং·খাতাংনা গি·য়েতামিং। উয়া গিসিক নামগিজাগিবা ফিল·নিফিল উয়া মান্দিখো রিম·নুয়ামিং। বিনি জাক-জা·চকখো জেংজুলচা খাএ দন্নোবা আরো বিখো রাক্ষিয়ে দন্নোবা বিয়া উয়া জেংজুলখো থেত্তে গালনুয়ামিং, আরো উয়া গিসিক নামগিজাগিবা বিখো মান্দিগ্রি মা·সুগ্রি হা·দামচানা সাল্লাংনুয়ামিং। 30 যীশু বিখো সিং·জক, “নাং·নি বিমুং মুয়া?” বিয়া আগানজক, “বাহিনী,” মুয়ানা বাং·বিয়া গিসিক নামগিজারাং বিনি নিং·আও নাপ্পামিং। 31 উনোন উয়া গিসিকরাং যীশুখো মল·মলনা হা·বাচেংজক জেদাক্কে বিয়া বিসংখো হা·নিংআচা ওয়াত্তেতজাখানা। 32 উয়োনা হা·ব্রি জা·রেক জলজল বাং·বিয়া ওয়াক জিলমা রওমে চা·আংআমিং। গিসিক নামগিজাগিবারাং উয়া ওয়াক জিলমাও নাপনা মিংএ যীশুখো মল·মলজক। বিয়া বিসংখো নাপনা হ·ন্নানি জা·মানো বিসং উয়া মান্দিওনি হং·খাতে ওয়াকরাংও নাপজক। উনি গিম্মিন উয়া ওয়াক জিলমা সাগাল আসল্‌সল্‌ রিক্কাম গিত্তা থারাকে খাত্তাংএমুং চিও রিপ্পে সিথকজক। 34 জেরাং ওয়াকখো নিরিক্কিংআমিং বিসং ইয়ারাংখো নিক্কে খাত্তাংএ উয়া সংও আরো উনি সেফাংও দংগিবা হা·দামরাংচা ইয়ারাংখো আগানজক। 35 মুয়া হং·জক ইখো নিনা ইন্নে মান্দিরাং উনো হং·খাতে রি·বাজক। বিসং যীশুচা রি·বাএ জেওনি গিসিক নামগিজাগিবা হং·খাতজক বিখো বা·রাচলা গান্নে গিসিক নাম্মে যীশুনি জা·চকনি সেফাংও আসংএ দংআখো নিকজক। ইখো নিক্কে বিসং খেনমানজক। 36 উয়ারাংখো নিকগিবারাং উয়া মান্দিখো বাদিকে দাক্কে নাম্মেতজক উখো উয়া মান্দিরাংনা আগানজক। 37 উনোন গাদারীয় জওলনি গিম্মিক মান্দিরাং বিসংখো ওয়াত্তে রি·য়াংখানা যীশুখো মল·মলজক, মুয়ানা বিসং নাম্মেন খেনজকমিং। উনো যীশু ফি·ল্লাংনা মিংএ রিংও গাখাতজক। 38 জে মান্দিওনি গিসিক নামগিজাগিবারাং হং·খাতামিং উয়া মান্দি যীশুমুং রি·য়াংফানা মল·মলজক। ইন্দিবা যীশু বিনা ইয়া খাৎথাখো আগানে নকচানা ওয়াত্তেতজক, 39 “না·আ নকচানা রি·য়াংফিলবো আরো ইসল নাং·না বাসিক দা·ল্লা কামখো দাকজক উখো আগানফ্রাকবো।” উয়া মান্দি উনো সংচানা রি·য়াংজক আরো যীশু বিনা বাসিক দা·ল্লা কামখো দাকজক উখো হা·গিম্মিকচা রওমে আগানজক। 40 যীশু নালসাচা রি·য়াংফিল্লানি জা·মানো উনি মান্দিরাং খুসি হং·এ বিখো রা·চাকজক, মুয়ানা বিসং বিখো নিচাকসোংআমিং। 41 জা·মানো যায়ীর মিংগিবা থম·দাকরামনি দাল·গিবা সাকসা রি·বাএ যীশুনি জা·চক সাক্কাও গা·আকজক। 42 বিয়া যীশুখো বিনি নকচা রি·বাখানা মল·মলজক, মুয়ানা বিনি বিলসি চি·গ্মি হং·গিবা সাকসা খাম·খাম দেমিচিক সিয়া গিত্তা হং·জকমিং। যীশুনি রি·য়াংমিত্তিংও মান্দিরাং বিখো উইলউইলে সিকচেপচেপিংআমিং। 43 বিসংনি গিসেপো সাকসা মিচিক বিলসি চি·গ্মিনা দিপ্পাৎ হান·চি জক্কে জম্মিংআমিং। ডাক্তাররাংনা বিয়া বিনি গিম্মিক থাংখারাংখোন ব·ন্নেতামিং, ইন্দিবা সাকসাবা বিখো নাম্মেতনা মান·জাজক। 44 বিয়া জাংগিলচানি যীশুনি সেফাংও রি·বাএ বিনি বা·রানি রিক্কিংখো দাংথাপেতজক, আরো উনোন বিনি হান·চি জক্কা থিপ্পাংজক। 45 উনো যীশু আগানজক, “সা আংখো দাংথাপেতজক?” গিম্মিকনি জিচাকানি জা·মানো পিতর আরো বিনি রিপ্পেংরাং যীশুনা আগানজক, “স্খিগিবা, মান্দিরাং নাং·খো উইলউইলে সিকচেপচেপে নাং·নি সাক্কাও গা·আকিংজক।” 46 ইন্দিবা যীশু আগানজক, “আংআ হা·আইয়া সাবা আংখো দাংথাপেতজক, মুয়ানা আংওনি বিল হং·খাতাখো আংআ হা·আইনা মান·জক।” 47 উয়া মিচিক উনো বে·এনখো থিল·থিলে খেনফিলে যীশুনি মিকখাংও থুচিকপজক। জা·মানো দিমদাকনি মিকখাংওন বিয়া মুয়ানা বিখো দাংথাপামিং আরো বাদিকে দাক্কে বিয়া উনোন নামজক উখো যীশুনা আগানজক। 48 উনি গিম্মিন যীশু উয়া মিচিকনা আগানজক, “দেমিচিক, নাং·নি বিবিরা·নি গিম্মিন না·আ নামজক। থম·থমে রি·য়াংবো।” 49 যীশু উনোবা খাৎথা আগানিংআমিং উনো উয়া থম·দাকরামনি দাল·গিবানি নকনি মান্দি সাকসা রি·বাএ আগানজক, “নাং·নি দেমিচিক সিজক; স্খিগিবাখো দা·আ নেং·এতাবো। 50 ইয়া খাৎথাখো খিন্নাএ যীশু যায়ীরনা আগানজক, “দা·আ খেন্নাবো; ইন্দিবা বিবিরা·বো, উনোন বিয়া থাংনুয়া।” 51 যীশু যায়ীরনি নক্কো সক্কে পিতর, যোহন আরো যাকোব আরো মিচিক বি·সানি মা·গিবা ফাগিবানি আগ্রে সাকসাখোবা নকনিং·আওনা রি·বানা হন·জাজক। 52 দিমদাকান মিচিক বি·সানা গ্রাপ্পিংআমিং। উনো যীশু আগানজক, “আরবা দা·আ গ্রাপাবো। বি·সা সিজা, থুয়েসান দংআ।” 53 মান্দিরাং খা·দিংস্থেকনা হা·বাচেংজক, মুয়ানা বিসং মিচিক বি·সা সিজক ইন্নে হা·আইয়ামিং। 54 জা·মানো যীশু মিচিক বি·সানি জাকখো রি·ম্মে রিংগামে আগানজক, “বি·সা, চাখাতবো।” 55 উনি গিম্মিন মিচিক বি·সানি জাংগি রি·বাফিলজক, আরো উনোন বিয়া চাখাতজক। উনো যীশু বি·সানা চা·না হন·খানা গি·য়েৎজক। 56 মিচিক বি·সানি মা·গিবা ফাগিবা নাম্মেন আইয়াও ইনমানজকমিং, ইন্দিবা ইয়ারাংখো দারাংনাবা আগানজাখানা যীশু বিসংখো বাংখাংজক।

লূক 9

1 উনি জা·মানো যীশু উয়া সাকচিগ্মি জা·রিকগিবারাংখো রিংগামে চিম্মংজক আরো গিম্মিক গিসিক নামগিজাগিবারাংনি সাক্কাও বিলখো হন·জক। বিয়া বিসংনা সাআরাংনিখো নাম্মেতনাবা বিল হন·জক। 2 জা·মানো বিয়া বিসংখো ইসলনি সংনকনি গিম্মিন আগানফ্রাকখানা আরো সাগিবারাংখো নাম্মেতখানা ওয়াত্তেতজক। 3 বিয়া বিসংনা আগানজক, “না·সং রামানা গল·দিক, দকরা, রুটি বা থাংখা মামুংখোবা দা·আ রা·আবো, আরো ফাৎগ্মি দাক্কে চলাবা দা·আ রা·আংআবো। 4 না·সং জে নক্কো নাপনুয়া উয়া সংখো ওয়াত্তে রি·য়াংজা দিপ্পাৎ উয়া নক্কোন দংবো। 5 মান্দিরাং না·সংখো রা·চাকসোজাওদে বিসংনি সংখো ওয়াত্তে রি·য়াংমিত্তিংও না·সংনি জা·চকনি হা·দুলাখো দকফ্রংবো, জেদাক্কে উয়ান বিসংনি সাক্কাও সাক্ষি হং·না মা·ন্না।” 6 উনো জা·রিকগিবারাং সংগিপ্পিনচানা রি·য়াংএ ইসলনি সংনকনি নাম্মা খাৎথাখো আগানফ্রাকনা আরো জমগিবা-সাগিবারাংখো নাম্মেতনা হা·বাচেংজক। 7 যীশু জেরাংখো দাক্কামিং উরাংখো খিন্নাএ শাসন দাকগিবা হেরোদ মামুংখোন হা·আইচাকনা মান·জাজক। মুয়ানা, সাবা সাবা আগানিংআমিং রিপ্পলেতগিবা যোহন সিয়াওনি থাংচাফিলজক; 8 সাবা সাবা আগানিংআমিং এলিয় মিকখাং ফা·জক; দা·আবা সাবা সাবা আগানিংআমিং চেংওনি আগানসোগিবা সাকসা থাংচাফিলজক। 9 হেরোদ আগানজক, “আংআ যোহননি স্খুখো দেন·থংএ গালজক। ইন্দাকোদে জেনি গিম্মিনো আংআ ইরাংখো খিন্নাংআ, বিয়া সাজক?” হেরোদ যীশুখো নিনা হাম·জক। 10 যীশুনি ওয়াত্তেতগিবা জা·রিকগিবারাং ফিল·বাজক আরো মুয়াখো মুয়াখো দাকজক উয়া গিম্মিকখোন বিসং যীশুনা আগানজক। উনোন যীশু বিসংখো রা·এ বৈৎসৈদা সংনি সেফাংও গি·সা মান্দিগ্রি হা·দামচানা রি·য়াংজক। 11 উখো হা·আইনা মা·ন্নে বাং·আ মান্দিরাং যীশুখো জা·রিকফাজক। বিয়া উয়া মান্দিরাংখো রা·চাকজক আরো বিসংচা ইসলনি সংনকনি খাৎথাখো আগানফ্রাকজক। ইনাআগ্রে বিয়া জমগিবা-সাগিবা নামনা নাংগিবারাংখো নাম্মেতজক। 12 সাল নাপ্পাংমিত্তিংও উয়া সাকচিগ্মি জা·রিকগিবারাং রি·বাএ যীশুনা আগানজক, “আনচিংনি দংগিবাদে মান্দিগ্রি হা·দাম হং·আ। উনি গিম্মিন ইয়া মান্দিরাংখো ওয়াত্তেতবো জেদাক্কে বিসং সেফাংনি গিত্থিমরাংচা আরো সংরাংচা রি·য়াংএ চা·আনিখো আরো দংআনি হা·দামখো সান্দিয়ে রা·না মা·ন্না।” 13 যীশু বিসংনা আগানজক, “না·সংআন বিসংনা চা·না হন·বো।” বিসং আগানজক, “ইন্দিবা চিংচা গি·বংআ রুটি আরো মাংগ্মি না·থকনা আগ্রে মামুংবা দংজা। চিংআ রি·য়াংএ ইয়া মান্দিরাংনা চা·আনিখো ব্রিএন রা·বানা মা·ন্নোদে বিসংনা চা·না হ·ন্না মা·ন্নুয়ামিং।” 14 উয়ো হাজাল বংআ মি·আসা দংআমিং। যীশু আন·থাংনি জা·রিকগিবারাংনা আগানজক, “থম·ফ্রাকফ্রাকও সৎবংআ সৎবংআ দাক্কে মান্দিরাংখো আসংএতবো।” 15 জা·রিকগিবারাং উয়ানদাক্কেন গিম্মিক মান্দিরাংখো আসংএতজক। 16 উনোন যীশু উয়া গি·বংআ রুটি আরো না·থক মাংগ্মিখো রা·এ সালগিচাখো নিগোদজক আরো উয়ারাংনা ইসলখো মিৎথেলানি জা·মানো ফি·থংজক। জা·মানো মান্দিরাংনা সুআলে হ·ন্না উয়ারাংখো জা·রিকগিবারাংনি জাক্কো হন·জক। 17 গিম্মিক মান্দিরাংআন অক্ষায়ে চা·থকজক। জা·মানো গা·আকে দংগিবা ফি·থংআরাংখো চি·গ্মি খকও খল্লামজক। 18 রাং·সাও যীশু মান্দিগ্রি হা·দাম দামসাও বি·ইংআমিং। বিমুং বিনি জা·রিকগিবারাংসান দংআমিং। বিয়া বিসংচা সিং·জক, “আংআ সা, ইনি গিম্মিনো মান্দিরাং মুয়াখো আগানা?” 19 জা·রিকগিবারাং আগানজক, “সাবা সাবা আগানা না·আ রিপ্পলেতগিবা যোহন; সাবা সাবা আগানা এলিয়; দা·আবা সাবা সাবা আগানা চেংওনি সাকসা আগানসোগিবা থাংচাফিলজক।” 20 যীশু বিসংনা আগানজক, “ইন্দিবা না·সং মুয়াখো আগানা, আংআ সা?” পিতর আগানজক, “না·আ ইসলনি উয়া খ্রীষ্ট।” 21 উনোন যীশু বিসংখো সিমসাকেতজক আরো দারাংনাবা আগানজাখানা গি·য়েৎজক। 22 বিয়া বিসংনা আরোবা আগানজক, মান্দিনি দেফান্থিখো বাং·এ দুক চাকনা নাংনুয়া। মি·আফারাং, খামাল দাল·গিবারাং আরো শাস্ত্র স্খিগিবারাং বিখো জেগালনুয়া। বিখো স·ওতে গালনুয়া আরো সাল গিত্থামনি সালো বিখো সিয়াওনি থাংচাফিলনা নাংনুয়া। 23 জা·মানো বিয়া গিম্মিকনা আগানজক, “সাবা আংনি রামাও রি·বানা হা·সিকোদে, বিয়া আন·থাংনি হা·সিকা গিত্তা রি·জাখানা; সালাজ্রিং আন·থাংনি চিসলখো রিপ্পিএ বিয়া আংখো জা·রিকখানা। 24 আন·থাংনি গিম্মিন জে জাংগি থাংএতনা হা·ম্মা বিয়া বিনি জাংগিখো গিম্মায়েতনুয়া; ইন্দিবা আংনি গিম্মিন জে জাংগিথাংখো গিম্মায়েতা বিয়া বিনি জাংগিখো জক্কেৎনুয়া। 25 সাবা হা·গিলসাক গিম্মিকখো মা·ন্নেবা আন·থাংনি জাংগিখো গিম্মায়েতোদে বিনি মুয়া লাভ দংআ? 26 সাবা আংনি গিম্মিন আরো আংনি খাৎথানি গিম্মিন খ্রাচা·সিকোদে, মান্দিনি দেফান্থি জেনসালো আন·থাংনি রাসং আরো ফাগিবা আরো রংথালগিবা সা·গ্রেরাংনি রাসংও রি·বানুয়া উনসালো বিয়াবা উয়া মান্দিনা খ্রাচা·নুয়া। 27 আংআ না·সংনা বিবিন আগানিংআ, ইয়ানো ইন্দাকগিবা মান্দিরাং দংআ জেরাংচা ইসলনি সংনকখো ফিন্নিকখুজানা দিপ্পাৎ বিসং মামুং দাক্কেবা সিজানুয়া।” 28 ইয়া খাৎথারাংখো আগানানি সালস্নি জা·মানো যীশু বি·না ইন্নে পিতর, যোহন আরো যাকোবখো রা·এ হা·ব্রি থিম·সাওনা রি·য়াংজক। 29 বি·মিত্তিংও যীশুনি মিকখাং দিংথাং হং·জক আরো বিনি বা·রাচলারাং চিং·ব্রাপে বকবিজক, 30 আরো বিমুং সাকগ্মি মান্দিখো খাৎথা আগানাখো নিকনা মান·জক। উয়া সাকগ্মি হং·জক মোশি আরো এলিয়। 31 বিসং রাসংখো রা·এ মিকখাং ফা·জক। যিরূশালেমো যীশুনি জাংগি গাল্লানি গিম্মিনো বিসং খাৎথা আগানিংআমিং। 32 পিতর আরো বিনি রিপ্পেংরাং উয়া সময়ও থুসিফেক্কে দংআমিং। থুয়ানি চাখাত্তে বিসং যীশুনি রাসংখো নিকনা মান·জক আরো বিমুং চাদেংগিবা উয়া সাকগ্মি মান্দিখোবা নিকজক। 33 উয়া সাকগ্মি যীশুওনি রি·য়াংমিত্তিংও পিতর যীশুনা আগানজক, “স্খিগিবা, ইনো চিংআ দংআ, ইয়ান নামজক। চিংআ ইনো নকথিপ গি·গিত্থাম রিকনা- গি·সা নাং·না, গি·সা মোশিনা আরো গি·সা এলিয়না।” বিয়া মুয়াখো আগানিংআমিং উখো আন·থাংআন হা·আইচাকজাজক। 34 পিতরনি খাৎথা আগানমিত্তিংও গাদিলা খানসা রি·বাএ বিসংখো সালাখিমদাপজক। উনো জা·রিকগিবারাং খেনবিজক। 35 উয়া গাদিলাওনি ইয়া খাৎথাখো খিন্নানা মান·জক, “ইয়ান আংনি দেফান্থি জেখো আংআ বাচ্ছিয়ে রা·জক; না·সং ইনি খাৎথাখো খিন্নাবো।” 36 জে সময়ও খাৎথা আগানা জ্রিপজক উয়া সময়ও যীশুনি সাকসান দংআখো নিকজক। জা·রিকগিবারাং জেখো নিক্কামিং উয়ারাংনি গিম্মিনো দারাংনাবা মামুংখো আগানগিজা বিসং জ্রিপজ্রিপ দংআরিজক। 37 সালগিপ্পিনো যীশু আরো উয়া সাকগিত্থাম জা·রিকগিবারাং হা·ব্রিওনি হং·খাতে রি·বানি জা·মানো বাং·আ মান্দি যীশুমুং গ্রংনা রি·বাজক। 38 উনোন মান্দি বাং·আনি গিসেপোনি মান্দি সাকসা চ্রিকে যীশুনা আগানজক, “স্খিগিবা, খা·সাফাএ আংনি দেফান্থিখো নিবো। বিয়া আংনি সাকসা খাম·খাম দে হং·আ। 39 বিখো গিসিক নামগিজাগিবা রি·ম্মিংআ আরো উনোন বিয়া রাং·গিত্তিক চ্রিক্কিংআ। উয়া গিসিক নামগিজাগিবা বিখো সাকসেলে রিম·জোকনো বিনি খু·সুকওনি খু·চি বকবাকে হং·খাতা; জা·মানো বিখো নাম্মেন সা·দিকেতি মাত্তেতি বুয়েতি ওয়াত্তাংআ। 40 উয়া গিসিক নামগিজাগিবাখো হা·রিকেতখানা আংআ নাং·নি জা·রিকগিবারাংখো মল·মলামিং, ইন্দিবা বিসং মান·জাজক।” 41 উনো যীশু আগানজক, “বিবিরা·গিজাগিবা আরো নামগিজা মান্দিরাং! আরো বাসিক সালসা আংআ না·সংমুং দংনুয়া আরো না·সংখো চাকচিকনুয়া? নাং·নি দেফান্থিখো ইনোনা রিমবাবো।” 42 উয়া দেফান্থিনি রি·বামিত্তিংওন উয়া গিসিক নামগিজাগিবা বিখো গোস্থাপে সাকসেসেলজক। উনি গিম্মিন যীশু উয়া গিসিক নামগিজাগিবাখো ইন্দাতজক আরো বি·সাখো নাম্মেতি বিনি ফাগিবাচা হ·ন্নেতফিলজক। 43 ইসলনি বিল্লাকবাত্তাখো নিক্কে গিম্মিকান আইয়াও ইনমানজক। গিম্মিকান যীশুনি দাক্কারাংখো আইয়াও ইনমানে চানচিমিত্তিংও যীশু বিনি জা·রিকগিবারাংনা আগানজক, 44 “আংনি ইয়া খাৎথাখো গিসিক নাংএ খিন্নাবো, মান্দিনি দেফান্থিখো মান্দিরাংনি জাক্কো রি·ম্মে হ·ন্নুয়া।” 45 ইন্দিবা জা·রিকগিবারাং উয়া খাৎথাখো হা·আইচাকজাজক। বিসং উখো হা·আইজাখানা গিত্তা ইসল বিসংওনি উয়া খাৎথাখো নিং·থুয়ে দন্নামিং। ইখো রা·এ যীশুখো মামুংখো সিং·নাবা জা·রিকগিবারাং খেনজক। 46 জা·রিকগিবারাংও সা দাল·বাত্তা উখো রা·এ বিসং জিগ্রিক্কিংআমিং। 47 যীশু বিসংনি গিসিকো চানচিগ্রিক্কাখো হা·আইনা মা·ন্নে বি·সা সাকসাখো রিমবাএ আন·থাংনি কেচ্চিও চাদেংএতজক। 48 জা·মানো বিয়া বিসংনা আগানজক, “জে আংনি বিমুংও ইন্দাকগিবা বি·সাখো রা·চাকা বিয়া আংখোন রা·চাকা। জে আংখো রা·চাকা, বিয়া আংখো ওয়াত্তেতগিবাখোন রা·চাকা। না·সংনি গিসেপো গিম্মিকনা চনবাৎগিবান দাল·বাৎগিবা হং·আ।” 49 যোহন আগানজক, “স্খিগিবা, নাং·নি বিমুংচা গিসিক নামগিজাগিবারাংখো হা·রিকগিবা সাকসাখো চিংআ নিকজক। বিয়া চিংমুং নাং·খো জা·রিকগিবা হং·জানি গিম্মিন বিখো চিংআ বেং·জক।” 50 যীশু বিনা আগানজক, “দা·আ বেং·আবো, মুয়ানা না·সংখো চাংফেংগিজাগিবা না·সংনা চাকগিবা হং·আ।” 51 যীশুনি সালগিচা রি·য়াংনা সাল সেফাংবাওন বিয়া যিরূশালেমচা রি·য়াংনা হাম·জক। 52 বিয়া স্খাংআন উয়োনা মান্দিরাংখো ওয়াত্তেতসোজক। বিসং যীশুনা গিম্মিকখো থারিসোনা শমরীয়রাংনি সং দামসাও নাপজক, 53 ইন্দিবা যীশু যিরূশালেমচা রি·য়াংনুয়া ইন্নে উয়া সংনি মান্দিরাং বিখো রা·চাকজাজক। 54 উখো নিক্কে বিনি জা·রিকগিবা যাকোব আরো যোহন আগানজক, “গিত্তেল, এলিয় গিত্তা ইয়ারাংখো ব·ন্নেতনা ইন্নে সালগিওনি ওয়া·আলখো গা·আকদাপখানা চিংআ আগান্না, ইখো না·আ হা·ম্মিংআমা?” 55 যীশু বিসংচাখো নিএতে বিসংখো ইন্দাতজক। 56 জা·মানো বিসং সংগিপ্পিনচা রি·য়াংজক। 57 বিসংনি রামা গিত্তা রি·য়াংমিত্তিংও সাকসা মান্দি যীশুনা আগানজক, “না·আ জেওনা রি·য়াংনুয়া উয়োনা আংআবা নাং·মুং রি·য়াংফানুয়া।” 58 যীশু বিনা আগানজক, “সি·ওলরাংনি হা·খল দংআ আরো সাক্কানি দো·দ্রাংনি বিথিপ দংআ, ইন্দিবা মান্দিনি দেফান্থিনি স্খু দনচাকানি হা·দাম মামুংচাবা দংজা।” 59 জা·মানো বিয়া সাকগিপ্পিননা আগানজক, “আংমুং রি·বাফাবো।” ইন্দিবা উয়া মান্দি আগানজক, “স্খিগিবা, স্খাং আংনি ফাগিবাখো গোপনা রি·য়াংনা হন·চেংবো।” 60 যীশু বিনা আগানজক, “সিগিবারাংআন বিসংখো গোপখানা, ইন্দিবা না·আ রি·বাএ ইসলনি সংনকনি গিম্মিনো আগানফ্রাকবো।” 61 দা·আও সাকগিপ্পিন আগানজক, “স্খিগিবা, আংআ নাং·মুং রি·য়াংফানুয়া, ইন্দিবা স্খাং আংখো নকনি মান্দিরাংখো মিকখাং ফা·এ রি·বানা হন·চেংবো।” 62 যীশু বিনা আগানজক, “নাঙ্গলও জাক হ·ন্নে জাংগিলচাখো নিফিলগিবা ইসলনি সংনকনা খ্রাজা।”

লূক 10

1 উনি জা·মানো গিত্তেল যীশু আরোবা সাকসৎস্নি জা·রিকগিবারাংখো বাচ্ছিয়ে রা·এ আগানফ্রাকনা ওয়াত্তেতজক। বিয়া আন·থাং জে সংরাংচা আরো হা·দামরাংচা রি·য়াংনা মিকসংআমিং উয়া হা·দামরাংচা রি·য়াংনা স্খাং জা·রিকগিবারাংখো সাকগ্মি গ্মি দাক্কে ওয়াত্তেতসোজক। 2 বিয়া জা·রিকগিবারাংনা আগানজক, “মিরাংদে বাং·বিবিআন, ইন্দিবা কাম দাকগিবাদে বাং·জা। ইনি গিম্মিন মি রাতনা কাম দাকগিবারাংখো ওয়াত্তেতখানা নকগিবাচা মল·মলবো। 3 না·সং রি·য়াংবো; মাৎচা হা·রেকনি গিসেপো মেষ গিত্তান আংআ না·সংখো ওয়াত্তেতিংআ। 4 দকরা বা জা·খপরাংখো দা·আ রা·আংআবো আরো রামাও সাকসাখোবা দা·আ সালাম দাক্কাবো। 5 না·সং জে নকচা রি·য়াংনুয়া উয়োনা স্খাং আগানবো, ‘ইয়া নক্কো থম·থম হং·খানা।’ 6 থম·থমাখো নামনিকগিবা উয়োনা দংওদে না·সংনি থম·থমা বিনি উয়োন দংনুয়া, ইন্দিবা উয়ানদাকগিবা দংজাওদে না·সংনি থম·থমা না·সংচান ফিল·বানুয়া। 7 উয়া নক্কোন দংবো আরো বিসংনি চা·না হন·গিবাখোন চা·বো, মুয়ানা কাম দাকগিবাদে বিনি মা·ন্নানিখো মা·ন্না খ্রাআ। নক গি·সাখো ওয়াত্তে নক গি·সাওনা দা·আ রি·য়াংআবো। 8 “বাদিআবা সংচা রি·য়াংওদে আরো উনি মান্দিরাং না·সংখো রা·চাকোদে না·সংনা চা·না হন·গিবাখোন চা·বো। 9 উয়া সংনি সাগিবারাংখো নাম্মেতবো আরো বিসংনা আগানবো, ‘ইসলনি সংনক না·সংনা সেফাংজক।’ 10 ইন্দিবা বাগিবাবা সংও রি·য়াংওদে আরো উনি মান্দিরাং না·সংখো রা·চাকজাওদে উয়া সংনি রামারাংও রি·য়াংএ ইন্দাকে আগানবো, 11 ‘চিংনি জা·চকরাংও মা·বাকগিবা না·সংনি সংনি হা·দুলাখোবা না·সংনি সাক্কাও দকফ্রংজক। ইন্দিবা না·সং হা·আইএ দনবো, ইসলনি সংনক সেফাংজক।’ 12 আংআ না·সংনা আগানিংআ, বিচালনি সালো উয়া সংনা বাত্তে সদোম সংজিলমানি মান্দিরাংনি অবস্থা চাকথোবাত্তানি হং·নুয়া। 13 “হং·সিখানা নাং·না কোরাসীন! হং·সিখানা নাং·না বৈৎসৈদা! না·সংও দাকগিবা বিল্লাকগিবা কামরাংখো সোর আরো সীদোন সংজিলমাও দাক্কোদে বাসোকোনিন বিসং ছালা গান্নে হা·দুবুও আসংএ পাপওনি গিসিকখো ফি·ল্লেতনুয়ামিং। 14 বিবিন, বিচালনি সালো সোর আরো সীদোননি অবস্থা না·সংনা বাত্তে চাকথোবাত্তানি হং·নুয়া। 15 আরো না·আ, কফরনাহূম, না·আ সালগিওনা সক্কে চুবাত্তাও গাদোয়াংনুয়ামা? মামুং সালোবা মান·জানুয়া, নাং·খো খা·মাচা সিগিবারাংনি হা·দামও গাল্লেতনুয়া।” 16 যীশু দা·আবা আন·থাংনি জা·রিকগিবারাংনা আগানজক, “না·সংনি খাৎথাখো খিন্নাচাকগিবা আংনি খাৎথাখোন খিন্নাচাক্কা। না·সংখো জিচাকগিবা আংখোন জিচাকা। আংখো জিচাকগিবা আংখো ওয়াত্তেতগিবাখোন জিচাক্কা।” 17 উয়া সাকসৎস্নি জা·রিকগিবারাং রি·বাফিলে খুসি হং·এ আগানজক, “গিত্তেল, নাং·নি বিমুংখো রা·এ আগানজোকনো গিসিক নামগিজাগিবারাংবা চিংনি খাৎথাখো খিন্নাচাক্কা।” 18 যীশু বিসংনা আগানজক, “আংআ সালগিওনি মিকখা রিপরাপা গিত্তা শয়তাননি গা·আকাখো নিকজক। 19 নিবো, আংআ না·সংনা চিপ্পু আরো মাংখ্রাংরাংনি সাক্কা গিত্তা রামা রি·না বিল হন·জক আরো না·সংনি বোবিল হং·গিবা শয়তাননি বিল গিম্মিকনি সাক্কাওবা বিল হন·জক। মামুংবা না·সংনি নামগিজাখো দাকজানুয়া। 20 ইন্দিবা গিসিক নামগিজাগিবারাং না·সংনি খাৎথাখো খিন্নাচাক্কা ইন্নে দা·আ খুসি হং·আবো ইন্দিবা সালগিও না·সংনি বিমুংখো চক্কানি গিম্মিনসা খুসি হং·বো।” 21 উনোন যীশু গিসিক রংথালগিবাও খা·স্রকে আগানজক, “ও আপফা, না·আ সালগিসাক আরো হা·গিলসাকনি গিত্তেল। আংআ নাং·খো মিৎথেলা, মুয়ানা না·আ ইরাংখো হা·আইগিবা আরো বুদ্ধি দংগিবারাংওনি থুম্মুয়ে দনজক ইন্দিবা বি·সা গিত্তা দাকগিবা মান্দিরাংনা ফারাকজক। হো·এ আপফা, নাং·নি নামনিকা গিত্তান ইরাং হং·জক। 22 “আপফা আংনি জাক্কো গিম্মিকখোন হন·জক। ফানা আগ্রে দারাংবা হা·আইজা দেফান্থি সা, দা·আবা দেফান্থিনা আগ্রে দারাংবা হা·আইজা ফা সা। ইনাআগ্রে দেফান্থি জেচা ফাখো ফারাকনা হা·সিকা বিয়াসান হা·আইয়া। 23 জা·মানো বিয়া জা·রিকগিবারাংচা নিফিলে বিসংনা সিউল দাক্কে আগানজক, “না·সং জেখো নিক্কিংআ, উখো জেরাং নিকনা মা·ন্নিংআ বিসং ফাত্তিয়াখো মান·গিবা হং·আ। 24 আংআ না·সংনা আগানিংআ, না·সং জেখো নিক্কিংআ, বাং·আ আগানসোগিবা আরো রাজারাং উখো নিকনা হা·সিকেবা নিকনা মান·জাজক; আরো না·সং জেখো খিন্নাংআ, উখো খিন্নানা হা·সিকেবা খিন্নানা মান·জাজক।” 25 রাং·সাও শাস্ত্র স্খিগিবা সাকসা যীশুচা রি·বাজক। যীশুখো রুরাএ নিনা উয়া স্খিগিবা আগানজক, “স্খিগিবা, মুয়াখো দাকজোকনো আংআ ফাংনাজলনি জাংগিখো মা·ন্নুয়া?” 26 যীশু বিনা আগানজক, “মোশিনি নিয়ামও মুয়া চক্কা দংআ? উয়ো মুয়াখো পড়িজক?” 27 উয়া শাস্ত্র স্খিগিবা যীশুনা আগানচাকজক, “না·সং গিম্মিকান না·সংনি গিম্মিক খা·থংচা, গিম্মিক জাংগিচা, গিম্মিক বিলচা আরো গিম্মিক গিসিকচা না·সংনি গিত্তেল ইসলনা খা·সাবো; আরো নাং·নি নকসুলরাংখো আন·থাংনি গিত্তা খা·সাবো।” 28 যীশু বিনা আগানজক, “না·আ খাকখেৎখো আগানচাকজক। না·আ ইন্দাকে দাক্কোদে জাংগি মা·ন্নুয়া।” 29 উয়া স্খিগিবা আন·থাংখো নাম্মাখো ফিন্নিকনা ইন্নে যীশুনা আগানজক, “সা আংনি নকসুল হং·আ?” 30 যীশু আগানচাকজক, “সাকসা মান্দি যিরূশালেমোনি যিরীহো সংজিলমাচা রি·য়াংমিত্তিংও রা·সেকগিবারাংনি জাক্কো গা·আকজক। বিসং উয়া মান্দিনি বা·রারাংখো এংজক আরো বিখো সিনা দাকফিলে দক্কে দন্নাংজক। 31 জা·মানো খামাল সাকসা উয়া রামা গিত্তা রি·য়াংআমিং। বিয়া উয়া মান্দিখো নিক্কে গেল্লারি রি·য়াংজক। 32 উগিত্তান সাকসা লেবীয় উয়া হা·দামচানা রি·বাজক আরো বিখো নিক্কে বিয়াবা গেল্লারি রি·য়াংজক। 33 জা·মানো শমরিয়া হা·দকনি সাকসা মান্দিবা উয়া রামা গিত্তা রি·য়াংমিত্তিংও উয়া মান্দিনি সেফাংও সকবাজক। বিখো নিক্কে বিয়া খা·সাচাকবিজক। 34 উয়া মান্দিনি সেফাংও রি·য়াংএ বিয়া বিনি মাতগিবারাংও তেলখো আরো আংগুরনি বিৎচিখো রুদাপে খাগপজক। জা·মানো আন·থাংনি গাধানি সাক্কাও বিখো গাত্তেতি গি·সা হোটেলচা রিম্মাংএ বিনা দাকচাকে হন·জক। 35 উনি সাল সাও উয়া শমরিয়ানি মান্দি দীনার গি·গ্মিখো হোটেলনি নকগিবানা হ·ন্নে আগানজক, ‘ইয়া মান্দিনা দাকচাকে হন·বো। ইনা বাত্তে থাংখা বাং·এ নাংদাপোদে আংআ ফিল·বাএ উখো হন·স্খানুয়া।’ ” 36 বন·খামাচাবাক্কা যীশু আগানজক, “দা·আও না·আ বাদিকে চানচিয়া? ইয়া সাকগিত্থামনি গিসেপো বাগিবা উয়া রা·সেকগিবারাংনি জাক্কো গা·আকগিবা মান্দিনি নকসুল হং·আ?” 37 উয়া শাস্ত্র স্খিগিবা আগানজক, “বিনা খা·সাচাকগিবা উয়া মান্দি।” উনো যীশু বিনা আগানজক, “ইন্দাকোদে না·আবা রি·য়াংএ উগিত্তান দাকবো।” 38 উনি জা·মানো যীশু আরো বিনি জা·রিকগিবারাং রামা রি·য়াংমিত্তিংও সং দামসাও নাপজক। উয়ো মার্থা মিংগিবা সাকসা মিচিক খুসি হং·এ আন·থাংনি নক্কো যীশুখো রা·চাকজক। 39 মরিয়ম মিংগিবা মার্থানি সাকসা নগিবা দংআমিং। বিয়া গিত্তেলনি জা·চকনি কেচ্চিও আসংএ বিনি খাৎথাখো খিন্নাংআমিং। 40 মার্থা ইন্দিবা চা·আ রিংআনিখো থারিনা ফিলসি ফিলথাপ দাক্কিংআমিং। উনি গিম্মিন বিয়া রি·বাএ আগানজক, “গিত্তেল, না·আ ইখো নিকজাংআমা, আংনি নগিবা আংখো সাকসান কাম দাকনা গিম্মিকখো গালচিপ্পাংজক? না·আ বিখো আগানবো জেদাক্কে বিয়া আংনা দাকচাকে হ·ন্না।” 41 উনো যীশু মার্থানা আগানজক, “মার্থা, মার্থা, না·আ বাং·আনি গিম্মিন জাজ্রেংআ আরো ফিলসি ফিলথাপ দাক্কা, 42 ইন্দিবা মিংসাখোসান নাংআনি দংআ। মরিয়ম উয়া নামগিবা বাকখোন বাচ্ছিয়ে রা·জক। উখো বিচানিখো রা·আংজানুয়া।”

লূক 11

1 রাং·সাও যীশু বাগিবাবা হা·দামচা বি·ইংআমিং। বি·আনি জা·মানো বিনি জা·রিকগিবা সাকসা রি·বাএ বিনা আগানজক, “গিত্তেল, রিপ্পলেতগিবা যোহন জেদাক্কে আন·থাংনি জা·রিকগিবারাংনা বি·না স্খিয়ামিং উগিত্তা না·আবা চিংনা বি·না স্খিবো।” 2 যীশু বিসংনা আগানজক, “না·সংনি বি·মিত্তিংও আগানবো, ‘ও সালগিনি আপফা, নাং·নি বিমুংখো রংথালা ইন্নে ইনথকনা। নাং·নি সংনক হং·বাখানা। 3 সালাজ্রিংনি চা·আনিখো না·আ চিংনা ফাংনান হন·বো। 4 চিংনি পাপরাংখো ক্ষেমা দাকবো, মুয়ানা জেরাং চিংনি সাক্কাও পাপ দাক্কা চিংআ বিসংখো ক্ষেমা দাক্কা। চিংখো না·আ রুরাও দা·আ গাল্লাবো।’ ” 5 জা·মানো যীশু আন·থাংনি জা·রিকগিবারাংনা আগানজক, “ইন্দাকে চানচিচিপবো, ওয়ালজাৎচিও না·সংওনি সাকসা বিনি রিপ্পেংচা রি·য়াংএ ইন্দাকে আগানোদে, ‘রিপ্পেং, আংনা রুটি গিলগিত্থাম হন·খুবো। 6 আংনি রিপ্পেং সাকসা রামা রি·য়াংমিত্তিংও আংচানা রি·বাজক। বিনা চা·না হ·ন্না গিত্তা আংচা মামুংবা দংজা।’ 7 উনো নকনিংওনি বিনি রিপ্পেং আগানচাকজক, ‘আংখো দা·আ মাংমেংএতাবো। দা·আও দ·গা চিপজক আরো আংনি বি·সারাং থুরামো আংমুং থুয়ে দংআ। আংআ চাখাত্তে নাং·না মামুংখোন হ·ন্না মান·জানুয়া।’ 8 আংআ না·সংনা আগানিংআ, বিয়া রিপ্পেংথাং হং·আনি গিম্মিন চাখাত্তে বিনা মামুংখো হন·জাওবা, ইন্দিদে উয়া মান্দিনি রাং·নিরাং মল·মলানি গিম্মিন বিয়া চাখাতনুয়া আরো বিনি নাংগিবাখো বিনা হ·ন্নুয়া। 9 “ইনি গিম্মিন আংআ না·সংনা আগানিংআ, হাম·বো, না·সংনা হ·ন্নুয়া; সান্দিবো, মা·ন্নুয়া; দ·গাও দকথিকবো, না·সংনা এংএ হ·ন্নুয়া। 10 হাম·গিবা গিম্মিকান মা·ন্না; সান্দিগিবা মা·ন্না; আরো দ·গাও দকথিকগিবানা দ·গাখো এং·এ হ·ন্না। 11 না·সংনি গিসেপো ইন্দাকগিবা ফা সা দংআ, জে বিনি দেফান্থি রুটি হা·ম্মোদে বিনা রং·থিখো হ·ন্নুয়া, বা না·থক হা·ম্মোদে চিপ্পুখো হ·ন্নুয়া, 12 বা দো·চিখো হা·ম্মোদে মাংখ্রামখো হ·ন্নুয়া? 13 ইন্দাকোদে না·সং নামগিজা হং·এবা আন·থাংথাংনি দেদ্রাংনা নামনামা জিনিসরাংখো হ·ন্না হা·আইওদে, ইন্দিদে সালগিও দংগিবা ফাচা জেরাং হা·ম্মা, বিসংনা বিয়া গিসিক রংথালগিবাখো হ·ন্নুয়া ইয়াদে খাকখেতান হং·আ!” 14 সালগিপ্পিনো যীশু আব্রা গিসিক নামগিজাগিবাখো হা·রিকিংআমিং। গিসিক নামগিজাগিবা ওয়াত্তাংআনি জা·মানো উয়া আব্রা মান্দি খু·সুক আগান্না মান·জক। উনি গিম্মিন মান্দিরাং আইয়াও ইনমানজক, 15 ইন্দিবা মিত্তামরাং আগানজক, “বিয়া গিসিক নামগিজাগিবারাংনি রাজা বেল্‌সবূলও ফাংচাকে গিসিক নামগিজাগিবারাংখো হা·রিকা। 16 সাকগিপ্পিনরাং যীশুখো রুরাএ নিনা সালগিওনি গি·সা চিনখো ফিন্নিকখানা আগানজক। 17 বিসংনি চানচিয়াখো হা·আইনা মা·ন্নে যীশু আগানজক, “জে সংনক আন·থাংনি গিসেপো দিংথাং হং·আ উয়া সংনক ব·ন্নাংআ, আরো উনি গিম্মিন উয়া সংনকনি নকরাংবা দিংথাং হং·আ। 18 শয়তানবা আন·থাংনি সাক্কাও বোবিল দাক্কে চাদেংওদে বাদিকে দাক্কে বিনি সংনক দংখুনুয়া? না·সং আগানিংআ আংআ বেল্‌সবূলচা ফাংচাকে গিসিক নামগিজাগিবারাংখো হা·রিকা। 19 নাম্মান, আংআ বেল্‌সবূলচা ফাংচাকে বিসংখো ওয়াত্তেতোদে না·সংনি মান্দিরাং সাখো ফাংচাকে গিসিক নামগিজাগিবাখো হা·রিকা? না·সং খাকখেৎখোন আগানামা আগানজা উখো না·সংনি মান্দিরাংআন বিচাল দাকনুয়া। 20 ইন্দিবা আংআ ইসলনি বিলচা গিসিক নামগিজাগিবারাংখো হা·রিকোদে ইসলনি সংনক না·সংচা সকবাজক। 21 “সাকসা বিলগ্মাং মান্দি জেনসালো জাকরিমরারাংখো রা·এ আন·থাংনি জিনিসরাংখো রাক্ষিয়া উনো বিনি জিনিসরাং নাম্মেন দংআ। 22 ইন্দিবা বিনা বাত্তে বিলগ্মাং সাবা রি·বাএ বিখো রি·ম্মোদে, ইন্দিদে বিনি ফাংচাকগিবা জাকরিমরারাংখো উয়া সাকগিপ্পিন মান্দি রা·সেক্কে রা·আ আরো রা·সেকগিবা জিনিসরাংখো সুয়ালে রা·আ। 23 “আংনা চাকগিজাগিবা আংখো চাংফেংগিবা হং·আ। আংমুং খল্লামগিজাগিবাদে গোচ্রাকগিবা হং·আ। 24 “জেনসালো গিসিক নামগিজাগিবা সাকসা মান্দিওনি হং·খাতে রি·য়াংআ উনো বিয়া নেং·থাকনা ইন্নে রান·গিবা হা·দামরাংও রওমে দংইংআ। জা·মানো উখো মান·জাএ বিয়া আগানা, ‘আংআ জে নকনি হং·খাতবামিং দা·আবা উয়া নক্কোন আংআ রি·য়াংফিলনুয়া।’ 25 রি·বাফিলে উয়া নকখো বিয়া বাংবাং দাক্কে, চি·রংএ আরো থারিয়ে দন্নাখো নিকনা মা·ন্না। 26 উনোন বিয়া রি·য়াংএ আন·থাংনা বাত্তে নামবাৎগিজা সাকস্নি গিপ্পিন গিসিক নামগিজাগিবাখো রি·ম্মে রা·বাআ আরো উয়ো নাপ্পে দংখামা। উনি গিম্মিন উয়া মান্দিনি স্খাংনা বাত্তে বন·চতগিবা অবস্থা আরোবা নামজাবাত্তা।” 27 যীশুনি খাৎথা আগানমিত্তিংও মান্দি বাং·আনি গিসেপো মিচিক সাকসা চ্রিকে আগানজক, “উয়া মিচিক ফাত্তিয়াখো মান·গিবা হং·আ, জে নাং·খো অক্কো খিজক আরো সক খানজক।” 28 ইন্দিবা যীশু আগানজক, “ইনাবাত্তে ইসলনি খাৎথাখো খিন্নাগিবা আরো উগিত্তা কাম দাকগিবারাংআন ফাত্তিয়াখো মান·গিবা হং·আ।” 29 বাং·বিয়া মান্দিরাং যীশুখো উইলউইলে থম·দাকনা হা·বাচেংজক। উনোন যীশু আগানজক, “ইয়া চাসংনি মান্দিরাং নামজা। বিসং চিনখো সান্দিয়া ইন্দিবা আগানসোগিবা যোনানি চিননা আগ্রে মামুং চিনখো বিসংনা ফিন্নিকজানুয়া। 30 নীনবী সংজিলমানি মান্দিরাংনা জেদাক্কে যোনা আন·থাংআন চিন হং·আমিং উয়ানদাক্কেন মান্দিনি দেফান্থি ইয়া চাসংনি মান্দিরাংনা চিন হং·নুয়া। 31 বিচালনি সালো সালগিপেংচানি রাণী চাখাত্তে ইয়া চাসংনি মান্দিরাংনি গ্রোখো ফিন্নিকনুয়া, মুয়ানা শলোমন রাজানি হা·আইয়ানিখো খিন্নাথিমনা বিয়া হা·গিলসাকনি বন·চতগিবা হা·সামওনি রি·বামিং; আরো নিবো, ইনো শলোমননা বাৎগিবা সাকসা দংআ। 32 বিচালনি সালো নীনবী সংজিলমানি মান্দিরাং চাখাত্তে ইয়া চাসংনি মান্দিরাংনি গ্রোখো ফিন্নিকনুয়া, মুয়ানা যোনানি আগানফ্রাকানি গিম্মিন নীনবীনি মান্দিরাং পাপওনি গিসিক ফি·ল্লামিং; আরো নিবো, ইনো যোনানা বাৎগিবা দা·আও সাকসা দংআ। 33 “সাবা চাক্কি সো·এ মিৎথিনাও বা খক নিং·আও দনজা বাত্তেসা গাসা সাক্কাওন দন্না, জেদাক্কোদে নিং·আও নাপবাগিবারাং সেং·আখো নিকনা মা·ন্না। 34 নাং·নি মিক্রোন নাং·নি বে·এননি চাক্কি হং·আ। নাং·নি মিক্রোন নাম্মোদে নাং·নি বে·এন গিম্মিক সেং·নুয়া, ইন্দিবা মিক্রোন নামজাওন নাং·নি বে·এনবা আন্দালনুয়া। 35 নাং·ও দংগিবা সেং·আ আন্দালানি হং·আমা উনি বিদিংও সিমসাকবো। 36 নাং·নি বে·এন গিম্মিক সেং·চিপোদে আরো অকখিসাবা আন্দালজাওদে উয়া চু·গিম্মিক থেং·সুনুয়া, জেদাক্কে চাক্কিনি সেং·আ নাং·নি সাক্কাও গা·আকজোকনো নাং·নি বে·এন সেং·আনি হং·আ।” 37 যীশুনি খাৎথা আগানানি জা·মানো সাকসা ফরীশী যীশুখো চা·না আগানজক। উনোন যীশু নিং·আচা নাপ্পে চা·না আসংজক। 38 উয়া ফরীশী চা·না স্খাং থরমনি নিয়াম গিত্তা যীশুনি জাকসুয়াখো নিকজায়ে আইয়াও ইনমানজক। 39 গিত্তেল বিনা আগানজক, “ইন্দাকোদে খিন্নাবো, না·সং আগানস্খাওদে ফরীশীরাং, রাংথাল আরো দিকথেনি হা·ফালচানিখো চি·রংএ দন্নিংআ, ইন্দিবা না·সংনি নিং·আওদে মাদ্দুয়া আরো নামগিজা গাপ্পা। 40 না·সং জাদাস্রাং! হা·ফালনিখো থারিগিবা নিং·আনিখোবা থারিজামা? 41 ইন্দিবা না·সংনি দনচাক্রাও দংগিবাখোন কাঙ্গালরাংনা হ·ন্না গিত্তা হন·বো; নিবো, দিমদাকান না·সংনা রংথালনুয়া। 42 “হং·সিখানা না·সংনা ফরীশীরাং! না·সং পুদিনা, তেজপাতা আরো বাং·আ সামবিজাকরাংনি বাকচিখুংনি বাকসাখো ইসলনা হ·ন্নিংআ, ইন্দিবা খাকখেৎ বিচাল আরো ইসলনা খা·সানাদে গিসিক নাংজা। স্খাংনিরাংখো মানিয়েমুং জা·মাননিরাংখোবা মানিয়ান না·সংনা খ্রাআ। 43 “হং·সিখানা না·সংনা ফরীশীরাং! থম·দাকরামনি দাল·গিবা আসংচাক্কানিও আসংনা আরো বাজালরাংও মান্দিরা·আখো মা·ন্না না·সং নামনিকা। 44 হং·সিখানা না·সংনা! না·সংদে চিন হন·গিজা গোপরাম গিত্তা হং·আ। মান্দিরাং হা·আইমানজায়ে উনি সাক্কা গিত্তা রামা রি·য়াংআ।” 45 উনোন শাস্ত্র স্খিগিবারাংনি গিসেপো সাকসা যীশুনা আগানজক, “স্খিগিবা, ইখো আগানে না·আ চিংখোবা চন্নিকিংজক।” 46 যীশু আগানজক, “হং·সিখানা না·সংনা শাস্ত্র স্খিগিবারাং! না·সং মান্দিরাংনি সাক্কাও জ্রিমবিয়া বোঝারাংখো গাত্তেতা, ইন্দিবা বিসংনা দাকচাকনা ইন্নে আন·থাংথাংনি জাকসি খানসাখোবা মজিমেতজা। 47 “হং·সিখানা না·সংনা! আগানসোগিবারাংনি গোপরামখো না·সং গিত্তাল দাক্কে রিক্কে দংআ, ইন্দিবা না·সংনি ফাগিৎচামরাংআন বিসংখো স·ওতে গাল্লামিং। 48 উনি গিম্মিন না·সংআন না·সংনি ফাগিৎচামরাংনি কামনি সাক্ষি হং·আ আরো বিসংনি উয়া কামরাংখো না·সং মানিয়েবা রা·আংআ। বিসং আগানসোগিবারাংখো স·ওতে গালজক, দা·আবা না·সং উয়া আগানসোগিবারাংনি গোপরামখো রিক্কিংজক। 49 ইনি গিম্মিন ইসল বিনি মিকসংআ গিত্তা ইয়া খাৎথাখো আগানজক, ‘আংআ বিসংচা আগানসোগিবারাংখো আরো ওয়াত্তেতগিবারাংখো ওয়াত্তেতনুয়া। বিসংনি গিসেপো মিত্তামরাংখো বিসং স·ওতে গালনুয়া আরো গিপ্পিনরাংখো হা·রিকনুয়া।’ 50 হা·গিলসাক হং·চেংওনি জে আগানসোগিবারাংখো স·ওতজকমিং, উরাংনি হান·চিনা ইয়া চাসংনি মান্দিরাং গ্রো নাংনুয়া। 51 হো·এ, আংআ না·সংনা আগানিংআ, হেবলখো স·ওতচেংওনি জে সখরিয়খো গানচি আরো রংথালগিবা নকদ্রিংচা স·ওতে গাল্লামিং উয়া সখরিয়নি সিয়াওনা দিপ্পাৎ গিম্মিক হান·চিনি হা·সেলো ইয়া চাসংনি মান্দিরাং গ্রো নাংনুয়া। 52 “হং·সিখানা না·সংনা শাস্ত্র স্খিগিবারাং! না·সং হা·আইয়ানি চাবিখো রা·আংজক। আন·থাংথাংবা নিং·আও নাপজাজক আরো নিং·আও নাপনা হাম·গিবারাংখোবা নাপনা হন·জাজক।” 53 বিয়া উয়া হা·দামখো ওয়াত্তে রি·য়াংমিত্তিংও শাস্ত্র স্খিগিবারাং আরো ফরীশীরাং বিনি সাক্কাও বোবিল দাকনা হা·বাচেংজক। বাং·আ খাৎথারাংখো সিং·রোকে বিনি খু·ফাও বিখো রিম·না ইন্নে বিসং নিচাকসোএ দংজক।

লূক 12

1 ইন্দাকমিত্তিংও হাজাল হাজাল মান্দি ইন্দাকফিল্লে থম·দাকানি গিম্মিন বিসং সিকচেপচেপি সাকসা সাকগিপ্পিননি সাক্কাও গা·আকনা নাংজক। উনো যীশু বিনি জা·রিকগিবারাংনা আগানচেংজক, “ফরীশীরাংনি ওয়ানথিনা সিমসাকবো। উয়া ওয়ানথিদে বিসংনি বু·এ চা·আনি হং·আ। 2 থুম্মুয়ে দনগিবা গিম্মিকখোন ফারাকনুয়া আরো মিৎথিনাও দনগিবা গিম্মিকখোন হা·আইএতনুয়া। 3 না·সং জেখো আন্দালাও আগানজক উখো মান্দিরাং জাসেংআও খিন্নানুয়া। নক নিং·আচা নাচিখলো জেখো আগানজক উখো নকখিং সাক্কাওনি আগানফ্রাকেতনুয়া। 4 “আংনি রিপ্পেংরাং, আংআ না·সংনা আগানিংআ, বে·এনখো স·ওতানি আগ্রে জেরাং মামুংখোবা দাকনা মান·জা বিসংনা দা·আ খেন্নাবো। 5 সানা খেন্না নাংআ আংআ উখো আগানিংজক। না·সংখো স·ওতানি জা·মানো নরকচা গাল্লেতানি বিল দংগিবানাসান খেনবো। হো·এ, আংআ না·সংনা আগানিংআ, বিনান খেনবো। 6 “দো·চক মাংবংআখো পয়সা অকখিসানা ফালজামা? ইন্দাকোবা ইসল উরাংনি মাংসাখোবা গুয়ালজা। 7 আরো না·সংনি স্খুনি খিন্নিরাংখোবা বিয়া চান্নে দন্নিংআ। দা·আ খেন্নাবো, বাং·আ দো·চকরাংনা বাত্তেবা না·সং গামচাৎবাত্তা। 8 “আংআ না·সংনা আগানিংআ, সাবা মান্দিরাংনি মিকখাংও আংখো খু·রাচাক্কোদে মান্দিনি দেফান্থিবা ইসলনি সা·গ্রেরাংনি মিকখাংও বিখো খু·রাচাকনুয়া। 9 ইন্দিবা মান্দিরাংনি মিকখাংও আংখো জিচাকগিবাখো আংআবা ইসলনি সা·গ্রেরাংনি মিকখাংও জিচাকনুয়া। 10 মান্দিনি দেফান্থিনি সাক্কাও সাবা মামুংখো ইন্নোদে বিখো ক্ষেমা দাকনুয়া, ইন্দিবা সাবা গিসিক রংথালগিবানি সাক্কাও চন্নিকানি খাৎথাখো আগানোদে বিখো ক্ষেমা দাকজানুয়া। 11 মান্দিরাং জেনসালো না·সংখো থম·দাকরামচা আরো শাসন দাকগিবাচা আরো বিলগ্মাং মান্দিরাংনি মিকখাংচা রিম্মাংনুয়া, উনো বাদিকে দাক্কে আন·থাংথাংনা চাক্কে আগান্নুয়া বা মুয়াখো আগানচাকনুয়া উনি গিম্মিন দা·আ জাজ্রেংআবো। 12 মুয়াখো আগান্না নাংনুয়া গিসিক রংথালগিবান উয়া সময়ও উখো না·সংনা স্খিয়ে হ·ন্নুয়া।” 13 মান্দি বাং·আনি গিসেপোনি সাকসা মান্দি যীশুনা আগানজক, “স্খিগিবা, চিংনি ফা চিংনা জে গামরাংখো দন্নাংজক, আংনি আদাথাংখো আগানবো আংমুং উখো সুয়ালে রা·খানা।” 14 যীশু বিনা আগানজক, “বিচাল দাকনা বা না·সংনা গামরাংখো সুয়ালে হ·ন্না সা আংনা বিল হন·জক?” 15 জা·মানো যীশু মান্দিরাংনা আগানজক, “সিমসাকবো! গিম্মিক মিকবোকাওনি আন·থাংথাংখো রাক্ষিবো, মুয়ানা বাং·আ গামজিন দংআন মান্দিনি জাংগিনা গিম্মিকনা বাত্তে নাংবাৎগিবা হং·জা।” 16 উনি জা·মানো যীশু মান্দিরাংনা স্খিয়ে হ·ন্না ইন্নে ইখো আগানজকঃ “বাগিবাবা সাকসা মা·ন্নে চা·গিবা মান্দিনি হা·বাও বাং·আ মি হং·জকমিং। 17 ইনি গিম্মিন বিয়া গিসিকথাংও চানচিয়ে আগানজক, ‘ইন্দাকফিল্লে মি বাং·আখো চিম্মংনা জামনকদে আংনি দংজা; আংআ দা·আও মুয়াখো দাকনুয়া? 18 দে, আংআ মিংসা কামখো দাকনুয়া। আংনি জামনকরাংখো ফি·এ দাল·বাত্তে জামনক রিকনুয়া আরো আংনি গিম্মিক মিখো আরো গামখো উয়ো চিম্মংনুয়া। 19 জা·মানো আংআ আন·থাংখো আগান্নুয়া, বাং·আ বিলসিরাংনা নামনামা জিনিসরাংখো চিম্মংজক। নেং·থাকবো, চা·বো-রিংবো, হান·সেংএ সালখো রি·য়াংএতবো।’ 20 ইন্দিবা ইসল বিনা আগানজক, ‘ও জাদা, দা·আল ওয়াল্লোন নাং·নি সিনা নাংনুয়া। ইন্দাকোদে নাং·নি চিম্মংগিবা জিনিসরাং সানি হং·নুয়া?’ ” 21 বন·খামাচাবাক্কা যীশু আগানজক, “জে মান্দি আন·থাংনি গিম্মিন গামজিনরাংখো চিম্মংএনবা ইসলনি মিক্রোনও মা·ন্নে চা·গিবা হং·জা, বিনি অবস্থা উগিত্তান হং·আ।” 22 উনি জা·মানো যীশু বিনি জা·রিকগিবারাংনা আগানজক, “ইনি গিম্মিন আংআ না·সংনা আগানিংআ, মুয়াখো চা·নুয়া ইন্নে জাংগি থাংআনিনা বা মুয়াখো গান্নুয়া-চিন্নুয়া ইন্নে বে·এননা দা·আ জাজ্রেংআবো। 23 চা·না রিংনাসান জাংগি হং·জা, আরো গান্নাচিন্নাসান বে·এন হং·জা। 24 দো·কারাংচাখো নিএতবো, বিসং বিৎচ্রিবা গোজা মিখোবা রাতজা। বিসংনি চিম্মংগিবা নক বা জামনকবা দংজা, ইন্দাকোবা ইসল বিসংনা চা·আখো হ·ন্না। না·সং ইয়া দো·দ্রাংনা বাত্তেবা গামচাত্তা। 25 না·সংনি গিসেপো চানচিয়েমিংনা সা আন·থাংনি জাংগি থাংআনি সালখো ঘণ্টাসানা বাত্তেতনা মা·ন্না? 26 ইন্দাকোদে ইয়া চনবাত্তা কামখোবা না·সং দাকনা মান·জাওদে ইন্দিদে গিপ্পিনরাংনি গিম্মিনো মুয়ানা চানচিংআ? 27 “চানচিয়ে নিবো, হা·বাও দংগিবা বিবালরাং বাদিকে দাল·রোরোআ। উরাং গামজা আরো খিলদিংবা রাতজা। ইন্দিবা আংআ না·সংনা আগানিংআ, শলোমন রাজা বিনি রাসং গিম্মিকো দংএবা ইরাংনি গি·সা গিত্তাবা নিথয়ে আন·থাংখো গান্নেতনা চিন্নেতনা মান·জাজক। 28 দা·আলো হা·বাও জে সামচেংরাং দংআ আরো আম্বুনো উখো চুদাপও গাল্লেতনুয়া, ইসল উরাংখো ইন্দাকে থারিওদে বিবিরা·ব্রিগিজাগিবা মান্দিরাং, বিয়া না·সংখো থারিনুয়া ইয়া বাসিক বিবিন! 29 মুয়াখো চা·নুয়া রিংনুয়া ইন্নে দা·আ চানচিয়াবো বা জাজ্রেংআবো। 30 ইয়া হা·গিলসাকনি গিপ্পিন জাতরাং উয়ারাংনি গিম্মিনো চানচিয়া; ইনাআগ্রে না·সংনি ফাগিবা ইরাং না·সংনা নাংআ ইন্নেন হা·আইয়া। 31 ইনাবাত্তে ইসলনি সংনকনা চানচিবো, উনোদে ইরাংখোবা না·সং মা·ন্নুয়া। 32 “ও আংনি বাং·গিজা মেষনি দল, দা·আ খেন্নাবো, মুয়ানা না·সংনি ফানি হা·সিকা ইয়ান, বিয়া আন·থাংনি সংনকখো না·সংনা হ·ন্নুয়া। 33 না·সংনি গামজিনরাংখো ফাল্লে খা·সাএ হ·ন্নানিরাং গিত্তা হন·বো। গিৎচাম হং·গিজাগিবা থাংখানি জেপখোন আন·থাংথাংনা থারিবো, আগানস্খাওদে, জে গাম ফাংনাজলনা দংআ উখোন সালগিও চিম্মংবো। উয়ো চা·খকবা রি·বাজা আরো জ·ওংরাংবা নাসিয়েতজা। 34 না·সংনি গাম জেও দংনুয়া না·সংনি গিসিকবা উয়োন দংনুয়া। 35 “খাংখারিও বা·রাখো খাএ আরো না·সংনি চাক্কিখো সো·এ থারিসোএ দংবো। 36 না·সং ইন্দাকগিবা মান্দিরাং গিত্তা হং·বো জেরাং বিসংনি নকগিবানি গিম্মিন নিচাকসোএ দংআ, জেদাক্কে বিয়া খা·গিবা নকওনি বিয়া রি·বাফিলে দ·গাখো দকথিপজোকনো বিসং দ·গাখো এংএতনা মা·ন্না। 37 নকগিবা জে নকখলরাংখো মিকরাকে দংআখো নিকনুয়া, বিসংআন মিৎথেলগিবা হং·আ। আংআ না·সংনা বিবিন আগানিংআ, উয়া নকগিবা খাংখারেও বা·রাখো খাএ বিসংখো আসংএতনুয়া আরো আন·থাংআন রি·বাএ বিসংনা চা·আখো হ·ন্নুয়া। 38 উয়া নকখলরাং ফাত্তিয়াখো মান·গিবা হং·আ, জেরাংখো বিয়া রি·বাএ মিকরাকে দংআখো নিকনুয়া, উয়া ওয়ালজাৎচিওবা হং·খানা বা ফ্রিংওবা হং·খানা। 39 ইয়া খাৎথাখো না·সং হা·আইবো, চা·খক বাসকো রি·বানুয়া উখো নকনি নকগিবা হা·আইওদে মিকরাকে দংনুয়ামিং আরো উয়া চা·খকখো নক্কো নাপনা হন·জানুয়ামিং। 40 উয়ানদাক্কেন না·সংবা থারিয়ে দংসোবো, মুয়ানা না·সং জে সালখো চানচিসোজানুয়া উয়া সালোন মান্দিনি দেফান্থি রি·বানুয়া।” 41 উনোন পিতর আগানজক, “গিত্তেল, না·আ ইয়া স্খিয়ানিখো চিংনা আগানিংআমা গিম্মিকনান আগানিংআ?” 42 গিত্তেল আগানচাকজক, “উয়া বিবিগিবা আরো হা·আইগিবা নকখল সা হং·আ, জেখো বিনি নকগিবা আন·থাংনি নকখলরাংনা নাংআ গিত্তা চা·নিখো সুয়ালে হন·খানা দন্নাংনুয়া? 43 উয়া নকখল ফাত্তিয়াখো মান·গিবা হং·আ, জেখো বিনি নকগিবা রি·বাএ বিবিগিবা হং·এ কাম দাক্কাখো নিকনুয়া। 44 আংআ না·সংনা বিবিন আগানিংআ, উয়া নকগিবা বিনা বিনি গিম্মিক গামজিনরাংখো নিরক্ষিনা দন্নাংনুয়া। 45 ইন্দিবা ইন্দাকে চানচিবো, উয়া নকখল গিসিকথাংও আগানোদে, ‘আংনি নকগিবা রি·বানা হারিমিংজক।’ উনি গিম্মিন বিয়া নকখলরাংখো দকনা হা·বাচেংজক আরো চা·আ রিংআনি জা·মানো চু রিংফেকজক। 46 ইন্দাকোদে জে সালখো আরো জে সময়খো বিয়া চানচিজানুয়া, উয়া সালো আরো উয়া সময়ওন বিনি নকগিবা সকবানুয়া। বিয়া বিখো দেন·থংএ বিবিরা·গিজাগিবারাংনি গিসেপো বিনা হা·দামখো থারিনুয়া। 47 “নকগিবানি হা·সিকাখো হা·আইএবা উগিত্তা থারিয়ে দংসোগিজাগিবা বা নকগিবানি হা·ম্মা গিত্তা দাকসোগিজাগিবা নকখলখোদে নাম্মেন দক্কা চা·না নাংনুয়া। 48 ইন্দিবা হা·আইগিজা শাস্তি মা·ন্নানি কামখো দাকগিবা বাং·গিজা শাস্তিখো মা·ন্নুয়া। জেনা বাং·এ হ·ন্না বিচানিখো বাং·এন রা·নুয়া; আরো মান্দিরাং জেচা বাং·এ দনজক বিচানিখো বিসং বাং·এন হাম·নুয়া। 49 “আংআ হা·গিলসাকো ওয়া·আলখো গালনা রি·বাজক; উয়া স্খাংআন চিং·ওদে বাসিকান নামনুয়ামিং! 50 আংনি রিপ্পলনা নাংনুয়া, আরো রিপ্পলজা দিপ্পাৎ আংনি দুকদে বন·জানুয়া। 51 আংআ হা·গিলসাকো থম·থমাখো হ·ন্না রি·বাজক ইন্নে না·সং চানচিয়ামা? হং·জা, ইন্দাকে হং·জা। আংআ থম·থমাখো হ·ন্না রি·বাজা ইন্দিবা মান্দিখো মান্দিনি সাক্কাও চাখাত্তেতনা রি·বাজক। 52 দা·আলোনি দিপ্পাৎ নক গি·সানি সাকবংআ দিংথাং দিংথাং হং·নুয়া, সাকগিত্থাম সাকগ্মিনি সাক্কাও আরো সাকগ্মি সাকগিত্থামনি সাক্কাও চাখাতনুয়া। 53 বিসং ইন্দাকে দিংথাং হং·নুয়া- ফাগিবা দেফান্থিনি সাক্কাও আরো দেগিবা ফাগিবানি সাক্কাও, মা·গিবা দেমিচিকনি সাক্কাও আরো দেমিচিক মা·গিবানি সাক্কাও, নিওথাং নামচিকথাংনি সাক্কাও আরো নামচিকথাং নিওথাংনি সাক্কাও চাখাতনুয়া।” 54 জা·মানো যীশু মান্দিরাংনা আগানজক, “না·সং সালিরামচানা গাদিলা নাবাখো নিক্কোন আগানা, ‘মিকখা ওয়ানুয়া,’ আরো উয়ান হং·আ। 55 দা·আবা সালগিপেংচানি বালওয়া বাল্লাখো নিক্কে আগানা, ‘সাল দিং·বানুয়া,’ আরো উয়ান হং·আ। 56 না·সংদে বু·এ চা·গিবারাং! না·সং হা·গিলসাক আরো সিলগানি মিকখাংখো নিএ হা·আইনা মা·ন্না, ইন্দিবা না·সং দা·আওরোরোনি সময়খো হা·আইনা মান·জাংআ, ইয়াদে বাদাকজক? 57 “জেআন থিক হং·আ উখো না·সং আন·থাংথাং চানচিয়ে মুয়ানা থিক দাকজাংআ? 58 না·সংনি বোবিলরাংমুং বিচাল দাকগিবাচা রি·য়াংমিত্তিংও রামাওন বিমুং নামগ্রিকনা হাম·বো। হং·জাওদে বিয়া নাং·খো বিচাল দাকগিবাচা সাল্লে রা·আংনুয়া। উনোন বিচাল দাকগিবা নাং·খো পেয়াদানি জাক্কো হ·ন্নুয়া আরো পেয়াদা নাং·খো জেলো দন্নুয়া। 59 আংআ নাং·না আগানিংআ, বন·চতগিবা পয়সাখো চৎখুজানা দিপ্পাৎ না·আ মামুং দাক্কেবা জেলোনি হং·খাতবানা মান·জানুয়া।”

লূক 13

1 উয়া সময়ও উনো দংগিবা মিত্তাম মান্দিরাং গালীল হা·দকনি মিত্তাম মান্দিরাংনি গিম্মিন যীশুনা আগানজক। বিসং ইন্দাকে আগানজক, রোমখো শাসন দাকগিবা পীলাত ইয়া গালীলীরাংখো দেন·থংএ বিসংনি বলিরাংনি হান·চিমুং বিসংনি হান·চিখোবা ব্রিনামিং। 2 ইয়া খাৎথাখো খিন্নাএ যীশু আগানজক, “উয়া গালীলীরাং উয়ানদাক্কে দুক মা·ন্নানি গিম্মিন বিসং গিপ্পিন গালীলীরাংনা বাত্তে পাপীবাৎগিবারাং হং·আ ইন্নে না·সং চানচিয়ামা? 3 আংআ না·সংনা আগানিংআ, ইন্দাকে হং·জা, ইন্দিবা পাপওনি গিসিক ফিল·জাওদে না·সংবা বন·গিম্মিকনুয়া। 4 শীলোহনি চুবাৎগিবা নক গা·আকদাপে সাকচিচেৎ মান্দিরাং সিয়ামিং, ইনি গিম্মিন যিরূশালেমনি মিত্তাম মান্দিরাংনা বাত্তে বিসংনি দোস বাং·আমিং ইন্নে না·সং চানচিয়ামা? 5 আংআ না·সংনা আগানিংআ, ইন্দাকে হং·জা, ইন্দিবা পাপওনি গিসিক ফিল·জাওদে না·সংবা বন·গিম্মিকনুয়া।” 6 জা·মানো স্খিয়েতনা ইন্নে যীশু ইয়া খাৎথাখো আগানজকঃ “সাকসা মান্দিনি বাগানও ডুমুর বিফাং ফাংসা গি·আ দংআমিং। রাং·সাও বিয়া রি·বাএ বিথিখো সান্দিজক ইন্দিবা মান·জাজক। 7 উনো বিয়া বাগানখো নিরক্ষিগিবানা আগানজক, ‘নিবো, বিলসি গিত্থাম হং·ইংজক ইয়া ডুমুর বিফাংও আংআ বিথিখো সান্দিংজক ইন্দিবা মামুংখোন মান·জাংজক। ইনি গিম্মিন না·আ ফাংখো দেন·ফিএ গালবো। মুয়ানা ইগিবা ইন্দাকারি হা·বাখো নাসিয়েতনুয়া?’ 8 বাগানখো নিরক্ষিগিবা আগানচাকজক, ‘গিত্তেল, ইয়া বিলসিওবা উয়া দংখুখানা। আংআ উখো উইলউইলে বাকবিবিতে উয়ো হা·সাল হ·ন্নুয়া। 9 উনি জা·মানো বিথি নাংওদে নামজোকান হং·জাওদে না·আ উখো দে·ন্নে গালবো।’ ” 10 সালসাও যীশু নেং·থাকানি সালো থম·দাকরাম গি·সাও স্খিয়ে হ·ন্নিংআমিং। 11 উয়ো ইন্দাকগিবা সাকসা মান্দি দংআমিং জেখো গিসিক নামগিজাগিবা সাকসা রি·ম্মানি গিম্মিন বিয়া বিলসি চি·চেৎ সাএ দংআমিং। বিয়া খম·সিকগিবামিং আরো অকখিসাবা স্রংএ দংনা মান·জানুয়ামিং। 12 যীশু বিচাখো নিএতজক আরো বিখো সেফাংচা রিংগামে আগানজক, “মা·আ, নাং·নি সাআনিখো না·আ জকজক।” 13 ইখো আগানে যীশু বিনি সাক্কাও জাক দনদাপজক, আরো উনোন বিয়া স্রংএ চাদেংজক আরো ইসলনি রাসং দাকনা হা·বাচেংজক। 14 যীশু নেং·থাকানি সালো নাম্মেতজক ইন্নে থম·দাকরামনি দাল·গিবা খা·আওনাংএ মান্দিরাংনা আগানজক, “কাম দাকনাদে সালদক দংআন। উনি গিম্মিন নেং·থাকানি সালো রি·বাগিজা উয়া সালদকরাংও রি·বাএ নামস্রাংবো।” 15 উনো গিত্তেল উয়া দাল·গিবানা আগানজক, “না·সং বু·এ চা·গিবারাং! নেং·থাকানি সালো না·সং দিমদাকান না·সংনি মা·সু আরো গাধাখো চি খান্না গোয়ালি নকনিখো এংএ রা·আংজামা? 16 ইন্দাকোবা অব্রাহামনি মা·চংনি ইয়া মিচিকখো শয়তান বিলসি চি·চেৎ খাএ দন্নামিং, উয়া খাআনিখো নেং·থাকানি সালো বিখো জক্কেৎনা খ্রাজামা?” 17 বিনি ইন্দাকে আগানানি গিম্মিন বিখো জিচাকগিবারাং গিম্মিকান খ্রাচা·আ মান·জক। ইন্দিবা গিপ্পিন মান্দিরাং বিনি ইন্দাকা বিল্লাকা কামরাংখো নিক্কে খুসি হং·বিজক। 18 উনি জা·মানো যীশু আগানজক, “ইসলনি সংনক মুয়া গিত্তা হং·আ? মুয়ামুং আংআ ইখো থনুয়া? 19 ইসলনি সংনক ইন্দাকগিবা রংসা সুলসু বিৎচ্রি গিত্তা হং·আ জেখো সাকসা মান্দি রা·এ আন·থাংনি বাগানও গোজক। জা·মানো বিৎচ্রি দাল·বাএ ফাংসা বিফাং হং·জক। উনো সাক্কানি দো·দ্রাং রি·বাএ উনি ডালারাংও বিথিপ সা·জক।” 20 যীশু দা·আবা আগানজক, “মুয়ামুং আংআ ইসলনি সংনকখো থনুয়া? 21 ইসলনি সংনক ওয়ানথি গিত্তা হং·আ। মিচিক সাকসা উখো রা·এ পায়লা গিত্থাম ফুরাও ব্রিনজক, উনি গিম্মিন ফুরা গিম্মিক ফিংজক।” 22 গিত্থিমসাওনি গিত্থিমসাওনা আরো সংজিলমা দামসাওনি দামসাওনা স্খিফ্রাক্কে যীশু যিরূশালেমচানা রি·য়াংজক। 23 সাকসা মান্দি বিখো সিং·জক, “স্খিগিবা, পাপওনি জক্কাখো মিত্তাম মান্দিরাংসান মা·ন্নুয়ামা?” উনোন যীশু মান্দিরাংনা আগানজক, 24 “আপচনা দ·গা গিত্তা নাপনা জাংগি গাল্লে খ্রেংবো। আংআ না·সংনা আগানিংআ, বাং·এন নাপনা খ্রেংনুয়া ইন্দিবা মান·জানুয়া। 25 জেনসালো নকগিবা চাখাত্তে দ·গাখো চিপ্পেতনুয়া উনো না·সং হা·ফালও চাদেংএ দ·গাখো দকথিকথিকে আগান্নুয়া, ‘গিত্তেল, চিংনা দ·গাখো এংএতবো।’ ইন্দিবা বিয়া না·সংনা ইন্দাকে আগানচাকনুয়া, ‘না·সং বাওনি রি·বাআ আংআদে হা·আইজা।’ 26 উনোন না·সং আগান্নুয়া, ‘চিংআ নাং·মুং চা·জক রিংজক, আরো না·আ চিংনা রামারাংও স্খিয়ে হন·জক।’ 27 উনোন বিয়া আগান্নুয়া, ‘না·সং বাচ্চানি রি·বাআ আংআ হা·আইজা। নামগিজা মান্দিরাং, না·সং গিম্মিকান আংওনি রি·য়াংবো।’ 28 “জেনসালো না·সং অব্রাহাম, ইস্‌হাক, যাকোব আরো গিম্মিক আগানসোগিবারাংখো ইসলনি সংনক্কো দংআখো আরো না·সংখো হা·ফালচা গাল্লেতাখো নিকনুয়া, উনসালো না·সং গ্রাপনুয়া আরো সা·দিকানা ওয়াগাম চিকক্রতনুয়া। 29 সালারাম, সালিরাম, সালগ্রো আরো সালগিপেংচানি মান্দিরাং রি·বাএ ইসলনি সংনক্কো চা·না আসংনুয়া। 30 জা·মানচাকগিবারাংনি গিসেপো সাবা সাবা স্খাং হং·নুয়া, আরো স্খাংচাকগিবারাংনি গিসেপো সাবা সাবা জা·মানচাকনুয়া।” 31 উয়া সময়ও মিত্তাম ফরীশীরাং যীশুচা রি·বাএ আগানজক, “না·আ ইয়োনি রি·য়াংবো, মুয়ানা হেরোদ নাং·খো স·ওতে গালনা হা·ম্মিংজক।” 32 যীশু বিসংনা আগানজক, “না·সং রি·য়াংএ উয়া সি·ওলনা আগানেবো, ‘বাং·গিজা সালরাংনা আংআ গিসিক নামগিজাগিবারাংখো হা·রিকনুয়া আরো সাগিবারাংখো নাম্মেতনুয়া আরো উনি জা·মানো আংনি কামরাংখো ব·ন্নেতনুয়া। 33 ইন্দাকোবা বাং·গিজা সালরাংনি জা·মানোন আংনি রি·য়াংনা নাংনুয়া, মুয়ানা যিরূশালেমনি আগ্রে মামুংচাবা আগানসোগিবা সিনা মা·ন্নামা? 34 “যিরূশালেম, আইয়াও যিরূশালেম! আগানসোগিবারাংখো না·আ স·ওতে গাল্লা আরো নাং·চা ওয়াত্তেতগিবারাংখো রং·থিচা গোথাত্তে গাল্লা। দো·বিমা জেদাক্কে আন·থাংনি বি·সারাংখো গ্রাংনিং·আও থ·ম্মে দন্না উয়ানদাক্কে আংআবা বাসিক নাং·নি মান্দিরাংখো আংচা থম·না হাম·জক, ইন্দিবা না·সং গং·জাজক। 35 নিবো, না·সংনি নক না·সংনি মিকখাংও বাংবাং দাক্কে গা·আকে দংনুয়া। আংআ না·সংনা আগানিংআ, ‘গিত্তেলনি বিমুংও রি·বাগিবানি রাসং হং·খানা,’ ইন্দাকে না·সংনি ইনখুজানা দিপ্পাৎ না·সং আংখো নিকজানুয়া।”

লূক 14

1 রাং·সাও যীশু নেং·থাকানি সালো সাকসা ফরীশী দাল·গিবানি নক্কো চা·না রি·য়াংজক। ফরীশীরাং নাম্মেদাক্কেন যীশুখো নিংআমিং। 2 যীশুনি মিকখাংও বে·এন বোএ সাগিবা সাকসা মান্দি দংআমিং। 3 যীশু থরম স্খিগিবা আরো ফরীশীরাংখো সিং·জক, “মোশিনি নিয়াম গিত্তা নেং·থাকানি সালো সাকসাখোবা নাম্মেতনা খ্রামা?” 4 থরম স্খিগিবারাং জ্রিপ দংজক। উনোন যীশু উয়া মান্দিনি বে·এনো জাকখো দনদাপে বিখো নাম্মেতে ওয়াত্তেতজক। 5 জা·মানো বিয়া উয়া থরম স্খিগিবারাংনা আগানজক, “নেং·থাকানি সালো না·সংনি সানিবা দেফান্থি বা মা·সু চি হা·খলো গা·আকোদে না·সং বিখো উনোন দি·দোবাজানুয়ামা?” 6 ইন্দিবা থরমনি উয়া দাল·গিবারাং উখো আগানচাকনা মান·জাজক। 7 চা·না রিক্কামাখো মান·গিবা মান্দিরাং বাদিকে দাক্কে নামবাৎগিবা হা·দামরাংখো বাচ্ছিয়ে রা·আংজক উখো নিক্কে যীশু বিসংনা স্খিয়ে হ·ন্না ইয়া খাৎথাখো আগানজক, 8 “সাবা নাং·খো বিয়া খা·আও চা·না রিক্কামোদে না·আ নামবাৎগিবা হা·দামচা রি·য়াংএ দা·আ আসংআবো, মুয়ানা নাং·না বাত্তে মান্দিরা·খো মান·গিবা মান্দিখো চা·না রিক্কামনাবা দংআ। 9 ইন্দাকোদে নাং·খো আরো উয়া মান্দিখো চা·না রিক্কামগিবা রি·বাএ নাং·না আগান্নুয়া, ‘ইয়া হা·দামখো বিনা ওয়াতবো।’ উনোদে না·আ খ্রাচা·এ গিম্মিকনা বাত্তে হন·দিমা হা·দামও আসংনা রি·য়াংনুয়া। 10 জেনসালো নাং·খো চা·না রিক্কামনুয়া উনো হন·দিমগিবা হা·দামও রি·য়াংএ আসংবো। উনোদে চা·না রিক্কামগিবা রি·বাএ নাং·না আগান্নুয়া, ‘রিপ্পেং, নামবাৎগিবা হা·দামচা রি·য়াংএ আসংবো।’ উনো সাকগিপ্পিনরাংনি মিকখাংও না·আ মান্দিরা·খো মা·ন্নুয়া। 11 আন·থাংখো চুবাত্তেতগিবাখো অন্নেতনুয়া, আরো আন·থাংখো অন্নেতগিবাখো চুবাত্তেতাও দন্নুয়া।” 12 জা·মানো যীশু বিখো চা·না আগানগিবানা ইনজক, “জেনসালো না·আ চা·না রিংনা রিক্কামনুয়া উনসালো নাং·নি রিপ্পেংরাংখো বা জংআদারাংখো বা চাচ্চিবাকদিলরাংখো বা মা·ন্নে চা·গিবা সংসুল-নকসুলরাংখো দা·আ চা·না রিক্কামাবো। রিক্কামোদে বিসংবা নাং·খো চা·খানা আগান্নুয়া আরো ইন্দাকে নাং·খো চা·না আগানস্খানুয়া। 13 ইন্দিবা না·আ চা·না হন·জোকনোন দিল্লা-চন্না, জা·খরা, খরা আরো মিকগ্রিরাংখো রিক্কামবো। 14 উনি গিম্মিন না·আ ইসলনি ফাত্তিয়াখো মা·ন্নুয়া, মুয়ানা বিসং চতনা মান·জানুয়া। জেনসালো সিয়াওনি মান্দিরাংখো থাংচাফিল্লেতনুয়া উনসালো না·আ হন·স্খাখো মান·ফিলনুয়া।” 15 চা·না আসংগিবারাংনি গিসেপো সাকসা ইয়া খাৎথাখো খিন্নাএ যীশুনা আগানজক, “ইসলনি সংনকো চা·না আসংগিবান ফাত্তিয়াখো মান·গিবা হং·আ।” 16 যীশু আগানজক, “সাকসা মান্দি গি·সা দা·ল্লা চা·নিখো হন·জক আরো বাং·আরাংখোন চা·না আগানজক। 17 চা·আনি সময় হং·বাওন বিয়া বিনি নকখলথাংচা চা·না আগানগিবা মান্দিরাংখো আগানে ওয়াত্তেতজক, ‘রি·বাবো, দা·আও গিম্মিকখোন থারিমানজক।’ 18 ইন্দিবা বিসং গিম্মিকান ফা·সিকনা হা·বাচেংজক। স্খাংগিবা উয়া নকখলনা আগানজক, ‘আংআ অকখিসা হা·বাখো ব্রিজক, আংখো রি·য়াংএ উখো নিনা নাংনুয়া। খা·সাফাএ আংখো ক্ষেমা দাকবো।’ 19 সাকগিপ্পিন আগানজক, ‘আংআ মা·সু জোড়া বংআখো ব্রিজক, উরাংখো পরীক্ষা দাকনা রি·য়াংআ। খা·সাফাএ আংখো ক্ষেমা দাকবো।’ 20 সাকগিপ্পিন আগানজক, ‘আংআ জিক খিমজক, ইনি গিম্মিন রি·য়াংনা মান·জাংজক।’ 21 “উয়া নকখল রি·য়াংফিলে বিনি নকগিবানা ইয়া খাৎথারাংখো আগানজক। উনি গিম্মিন নকগিবা খা·আওনাংএ বিনি নকখলথাংনা আগানজক, ‘না·আ বিকবিক দাক্কে সংজিলমানি রামাদিলরাংও আরো রামারাংচা রি·য়াংবো আরো দিল্লা-চন্না, জাকখরা, মিকগ্রি আরো জা·খরারাংখো ইয়োনা রিমবাবো।’ 22 ইরাংখো দাক্কানি জা·মানো উয়া নকখল আগানজক, ‘গিত্তেল, নাং·নি গি·য়েতা গিত্তান গিম্মিকখো দাকজক, ইন্দিবা দা·আওবা হা·দাম দংখুংআ।’ 23 উনি গিম্মিন নকগিবা নকখলনা আগানজক, ‘সংজিলমানি হা·ফালচা রামারাংও রি·য়াংবো আরো ইয়োনা রি·বাখানা মান্দিরাংখো আগানবো, জেদাক্কোদে আংনি নক্কো মান্দি গাপ্পা। 24 আংআ না·সংনা আগানিংআ, জেরাংখো চা·না রিক্কামামিং বিসং সাকসাবা আংনি ইয়া চা·আ হ·ন্নাখো চা·মানজানুয়া।’ ” 25 যীশুমুং বাং·আ মান্দিরাং রি·য়াংআমিং। যীশু উয়া মান্দিরাংচাখো নিএতে আগানজক, 26 “জে আংচা রি·বানুয়া বিয়া আন·থাংনি ফাখো-মা·খো, জিকখো আরো দেদ্রাংখো, নআবিগিবা-জংআদাগিবা আরো আন·থাংখোবা আংনা বাত্তে অকখিসা নামনিকখানা। ইন্দাকজাওদে বিয়া আংনি জা·রিকগিবা হং·না মান·জানুয়া। 27 আন·থাংনি চিসলখো রা·বিত্তে আংনি জা·মান জা·মান রি·বাগিজাগিবা আংনি জা·রিকগিবা হং·না মান·জা। 28 “না·সংনি গিসেপো সাবা চুয়াকে গি·সা নক রিকনা হা·সিকোদে স্খাং বিয়া আসংএ খরসখো চান্নে নিয়া। উখো বন·চত্তেতনা বিনি থাংখা চু·ওংআমা চু·ওংজা বিয়া উখো নিনা হা·ম্মা। 29 হং·জাওদে ফাংচাকানিখো দাক্কানি জা·মানো উয়া চুয়াকগিবা নকখো বন·চত্তেতনা মান·জাওদে উখো নিকগিবা গিম্মিকান বিখো খা·দিংস্থেকনুয়া। 30 বিসং আগান্নুয়া, ‘উয়া মান্দি রিকনা হা·বাচেংআমিং ইন্দিবা বিয়া উখো বন·চত্তেতনা মান·জাজক।’ 31 “সাকসা রাজা সাকগিপ্পিন রাজানি সাক্কাও দাকগ্রিকনা রি·য়াংওদে বিয়া স্খাং আসংএ ইখো চানচিনুয়া, ‘সাক হাজালখলগ্রিক সিপাইরাংখো রিম্মে জে আংমুং দাকগ্রিকনা রি·বাংজক, সাক হাজালচিখুং সিপাই রা·এ আংআ বিখো চাংফেংনা মা·ন্নুয়ামা?’ 32 হামজানা গিত্তা নিক্কোদে উয়া গিপ্পিন রাজা চে·ল্লাচা দংমিত্তিংওন বিয়া মান্দি ওয়াত্তেতি বিমুং আপসান নাংরিমানি খাৎথাখো আগান্নুয়া।” 33 বন·খামাচাবাক্কা যীশু আগানজক, “উয়ানদাক্কেন না·সংনি গিসেপো সাবা চানচিয়েমিংনা বিনি গিম্মিকখো ওয়াত্তে রি·বাজাওদে বিয়া আংনি জা·রিকগিবা হং·না মান·জা। 34 “খাসিম নাম্মা, ইন্দিবা উনি থোয়া গ্রিওদে উখো দা·আবা বাদিকে দাক্কে থোয়েতনা মা·ন্না? 35 উনোন উয়া হা·বানাবা খ্রাজা, হা·সালনাবা খ্রাজা; মান্দিরাং উখো গাল্লেতারিয়া। খিন্নানা নাচিল দংগিবা খিন্নাখানা।”

লূক 15

1 উনোন বাং·আ খাজিনা গিলগিবা আরো নামগিজা মান্দিরাং যীশুনি খাৎথাখো খিন্নানা ইন্নে বিচা রি·বাজক। 2 উনি গিম্মিন ফরীশীরাং আরো শাস্ত্র স্খিগিবারাং ইখো আগানে খা·আওনাংনা হা·বাচেংজক, “ইয়া মান্দিদে নামগিজা মান্দিরাংমুং দংরিমা আরো চা·রিমা।” 3 উনোন যীশু বিসংনা স্খিনা ইন্নে ইয়া খাৎথাখো আগানজকঃ 4 “চানচিচিপবো, না·সংনি গিসেপো সানিবা মাংরিৎচাসা মেষ দংআ। উয়া মেষরাংওনি মাংসা গিম্মাওদে, বিয়া মাংসৎস্খুস্খুখো হা·বাও ওয়াত্তেতি উয়া মাংসাখো সান্দিয়ে মান·খুজানা দিপ্পাৎ উখো সান্দিজানুয়ামা? 5 উখো সান্দিয়ে মান·জোকনো বিয়া খুসি হং·এ উখো ফাকখ্রংও গাত্তে রা·আ। 6 জা·মানো নক্কোনা রি·য়াংএ বিনি রিপ্পেংরাংখো আরো সংসুল-নকসুলরাংখো রিংগামে আগানা, ‘আংমুং খুসি হং·ফাবো, মুয়ানা আংআ আংনি গিম্মাগিবা মেষখো সান্দিয়ে মান·জক।’ 7 আংআ না·সংনা আগানিংআ, উগিত্তান পাপওনি গিসিক ফিল·না নাংজানুয়া ইন্নে চানচিগিবা সাক সৎস্খুস্খু থরমি মান্দিরাংনা বাত্তে পাপী সাকসা গিসিক ফিল·গিবানি গিম্মিন সালগিও হান·সেংবাত্তানি হং·আ। 8 “দা·আবা চানচিচিপবো, সাকসা মিচিকনি রূপানি থাংখা দংআ। বিয়া উনিখো গং·সাখো গিম্মায়েতে গাল্লোদে, চাক্কিখো সো·এ নকখো ওত্তে মান·খুজানা দিপ্পাৎদে উখো নাম্মেদাক্কে সান্দিজাংআমা? 9 বিয়া উখো সান্দিয়ে মান·জোকনো বিনি রিপ্পেংরাংখো আরো সংসুল-নকসুলরাংখো রিংগামে আগানা, ‘আংমুং খুসি হং·ফাবো, মুয়ানা গিম্মাগিবা থাংখাখো সান্দিয়ে মান·ফিলজক।’ 10 আংআ না·সংনা আগানিংআ, উগিত্তান সাকসা পাপী মান্দি পাপওনি গিসিক ফিল·জোকনো ইসলনি সা·গ্রেরাংনি হান·সেংআনি হং·আ।” 11 উনি জা·মানো যীশু আগানজক, “সাকসা মান্দিনি সাকগ্মি দেফান্থি দংআমিং। 12 চনগিবা দেফান্থি বিনি ফাগিবানা আগানজক, ‘আপফা, আংনি বাকনি গামখো আংনা হন·বো।’ উনি গিম্মিন উয়া মান্দি আন·থাংনি দেফান্থি সাকগ্মিনা গামজিনখো সুয়ালে হন·জক। 13 বাং·গিজা সালরাংনি জা·মানো চনগিবা দেফান্থি বিনি গামজিনখো ফাল্লে থাংখা-পয়সাখো রা·এ হা·সং চে·ল্লাওনা রি·য়াংজক। উয়োনা বিয়া নামগিজা দাক্কে সালখো রি·য়াংএতি বিনি থাংখা-পয়সা গিম্মিকখো ব·ন্নেতজক। 14 জেনসালো বিয়া বিনি থাংখা-পয়সা গিম্মিকখো ব·ন্নেতজক উয়া সময়ও উয়া হা·সংনি হা·দাম গিম্মিকচা বিল্লংএন আকাল হং·না হা·বাচেংজক। উনি হা·সেলো বিয়া দিলজক। 15 উনো বিয়া রি·য়াংএ উয়া হা·সংনি সাকসা মান্দিচাখো গাম্মে চা·না কাম হাম·জক। উয়া মান্দি বিখো বিনি ওয়াকরাংখো নিরকখানা হা·বাও ওয়াত্তেতজক। 16 বিয়া ওয়াকরাংনি চা·গিবারাংখো অকখায়ে চা·না হাম·নুয়ামিং, ইন্দিবা সাকসাবা বিনা উখো হ·ন্না হাম·জানুয়ামিং। 17 “জা·মানো সালসাও বিয়া গিসিক ফিল·জক। উনোন বিয়া আগানজক, ‘আংনি ফানি গামগিবারাং বাসিক চা·না মা·ন্নিংআ, ইন্দিবা আংআ ইনো অকখ্রিয়ানা সিনা হা·ম্মিংজক। 18 আংআ রি·য়াংএ আংনি ফাচা আগান্নুয়া, আপফা, ইসল আরো নাং·নি সাক্কাও আংআ পাপখো দাকজক। 19 সাবা আংখো নাং·নি দেফান্থি ইন্নে মিংনা আংআ খ্র্রাজাজক। নাং·নি গামগিবারাংনি সাকসা গিত্তা আংখো রা·রিকবো।’ 20 “ইখো আগানে বিয়া চাখাত্তে বিনি ফাগিবাচা রি·য়াংজক। বিখো চে·ল্লাওনি নিক্কেন বিনি ফাগিবা বিনা খা·সাচাকবিজক। বিয়া খাত্তাংএ রি·য়াংএ বিখো গিপ্পাকে খু·দিমজক। 21 উনোন দেফান্থি আগানজক, ‘আপফা, আংআ ইসল আরো নাং·নি সাক্কাও পাপখো দাকজক। সাবা আংখো নাং·নি দেফান্থি ইন্নে মিংনা আংআ খ্রাজাজক।’ 22 “ইন্দিবা বিনি ফাগিবা আন·থাংনি নকখলরাংনা আগানজক, ‘থেংরি দাক্কে বিনা নামবাৎগিবা বা·রাখো রা·বাএ গান্নেতবো। বিনি জাক্কো জাকস্থেম আরো জা·আও জা·খপখো ফাৎবো, 23 আরো মিলগিবা দামবি মা·সুখো রা·বাএ দেন·বো। হাই, আনচিং চা·এ রিংএ হান·সেংনাজক, 24 মুয়ানা আংনি ইয়া দেফান্থি সিজকমিং ইন্দিবা থাংচাফিলজক; গিম্মাজকমিং মান·ফিলজক।’ জা·মানো বিসং হান·সেংনা হা·বাচেংজক। 25 “উয়া সময়ও বিনি দেফান্থি দাল·গিবা হা·বাও দংআমিং। নক সেফাংওনা সকবায়ে বিয়া মেসাখো আরো গীত রিং·আখো খিন্নানা মান·জক। 26 উনোন বিয়া সাকসা নকখলখো রিংগামে ‘ইরাং মুয়া হং·আ,’ ইন্নে সিং·জক। 27 “নকখল বিনা আগানচাকজক, ‘নাং·নি জং রি·বাজক। নাং·ফা বিখো নাম্মা অবস্থাও মান·ফিলানি গান্দা মিলগিবা দামবি মা·সুুখো দেন·জক।’ 28 “উনোন দেফান্থি দাল·গিবা খা·আওনাংএ নিং·আচা নাপনা হাম·জাজক। ইনি গিম্মিন বিনি ফাগিবা হং·খাতবায়ে বিখো নিং·আচা নাপখানা মল·মলনা হা·বাচেংজক। 29 বিয়া বিনি ফাগিবানা আগানজক, ‘নিবো, ইন্দিতা বিলসি আংআ নাং·না দাকচাকে রি·বাংজক; রাং·সাবা আংআ নাং·নি গি·য়েতাখো মানিগিজানি হং·খুজা। ইন্দিবা আংনি রিপ্পেংরাংমুং হান·সেংনা মা·ন্না গিত্তা না·আ সালসাবা দো·মক বি·সা মাংসাখোবা হন·জাজক। 30 ইন্দিবা নাং·নি ইয়া দেফান্থি, জে দারিরাংনা থাংখা-পয়সারাংখো ব·ন্নেতজক, বিনি রি·বাওন না·আ বিনা মিলগিবা দামবি মা·সুুখো দেন·জক।’ 31 “বিনি ফাগিবা বিনা আগানজক, ‘না·আদে ফাংনানান আংমুং দংফাআ। আংনি দংগিবা গিম্মিকান নাং·নি হং·আ। 32 আনচিংনি খুসি হং·না নাংআ, মুয়ানা নাং·নি ইয়া জং সিজকমিং দা·আবা থাংচাজক; গিম্মাজকমিং দা·আবা বিখো মান·ফিলজক।’ ”

লূক 16

1 যীশু আন·থাংনি জা·রিকগিবারাংনা আগানজক, “বাদিআবা নকমা সাকসা মান্দিনি নকখল দাল·গিবাখো বিনি নকগিবানি গামজিনখো নাসিয়েতিংজক ইন্নে গ্রো নাংএতজক। 2 উনোন নকমা মান্দি বিখো রিংগামে সিং·জক, ‘নাং·নি গিম্মিনো আংআ ইয়া মুয়াখো খিন্নাংআ? নাং·নি কামনি হিসাবখো হন·বো, মুয়ানা না·আদে দা·আও নকখল দাল·গিবা হং·না মান·জানুয়া।’ 3 “উনোন উয়া নকখল গিসিকথাংও ইনজক, ‘আংআ দা·আও মুয়াখো দাকনুয়া? আংনি নকগিবাদে কামনিখো আংখো ওয়াত্তেতিংজক। হা·আ বাকনা চো·না আংনি বিল দংজা, দা·আবা বি·এ চা·নাবা খ্রাচা·আ। 4 কামনিখো ওয়াতজোকনো মান্দিরাং জেদাক্কে আংখো বিসংনি নক্কো দংনা হ·ন্না উনি গিম্মিনো আংআ মুয়াখো দাকনা নাংনুয়া উখো আংআ হা·আইয়া।’ 5 “ইখো আগানে বিনি নকগিবাচাখো স্রোএ রা·গিবা গিম্মিকখো বিয়া রিক্কামজক। জা·মানো বিয়া স্খাংগিবাচা সিং·জক, ‘আংনি নকগিবাচা না·আ বাসিক স্রোআ?’ 6 বিয়া আগানজক, ‘থো পিপা রিৎচাসা।’ উয়া নকখল বিনা আগানজক, ‘নাং·নি গ্রোখো চক্কে দনগিবা লেক্ষাখো রা·বো আরো থেংরি আসংএ পিপা সৎবংআ চকবো।’ 7 উয়া নকখল জা·মানো সাকগিপ্পিননা আগানজক, ‘নাং·নি বাসিক?’ বিয়া আগানজক, ‘গম রংদিক রিৎচাসা।’ উয়া নকখল আগানজক, ‘নাং·নি লেক্ষাও সৎচেত চকবো।’ 8 উয়া নকখল বিবিগিজাগিবা হং·ওবা বুদ্ধি দাক্কে কাম দাক্কানি হা·সেলো নকগিবা বিখো মিৎথেলজক। ইয়োন হা·আইনা মা·ন্না, ইয়া হা·গিলাসাকনি মান্দিরাং আন·থাং গিত্তা দাকগিবা মান্দিরাংমুং দাকবেওয়ালরাংও সেং·আনি মান্দিরাংনা বাত্তে বুদ্ধিগ্মাং হং·আ। 9 আংআ না·সংনা আগানিংআ, ইয়া নামগিজা হা·গিলসাকনি গামচা মান্দিরাংমুং নাংরিমবো, জেদাক্কে উয়া গাম ব·ন্নানি জা·মানো ফাংনাজলনি হা·দামও না·সংখো দংনা রা·চাকা। 10 অকখিসানি গিম্মিন বিবিগিবা হং·গিবা বাং·আনি গিম্মিনবা বিবিগিবা হং·আ। অকখিসানি গিম্মিন জেখো বিবিরা·না মান·জা বিখো বাং·আনি গিম্মিনবা বিবিরা·না মান·জা। 11 ইয়া হা·গিলসাকনি গামজিননি গিম্মিন না·সংখো বিবিরা·না মান·জাওদে সা না·সংখো বিবিরা·এ চং·মত গামখো হ·ন্নুয়া? 12 গিপ্পিননি বস্তুখো জাকখালানি গিম্মিন না·সংখো বিবিরা·না মান·জাওদে না·সংনি জাকখালনা সাবা না·সংনা মামুংখো হ·ন্নুয়ামা? 13 “সাকসা নকখলবা গিত্তেল সাকগ্মিনা দাকচাকে হ·ন্না মান·জা, মুয়ানা বিয়া সাকসাখো মিৎচিনুয়া আরো সাকসাখো খা·সানুয়া, হং·জাওবা সাকসাখো নামনিকে সাকগিপ্পিনখো চন্নিকনুয়া। না·সং ইসল আরো গামজিন ইয়া গি·গ্মিনি নকখল হং·না মান·জা।” 14 ইয়া খাৎথারাংখো খিন্নাএ ফরীশীরাং যীশুখো খা·দিংস্থেকনা হা·বাচেংজক, মুয়ানা বিসং থাংখাখো নামনিকবাতনুয়ামিং। 15 উনোন যীশু বিসংনা আগানজক, “না·সং মান্দিরাংনি মিকখাংও আন·থাংথাংখো থরমি দাক্কে ফিন্নিকিংআ, ইন্দিবা ইসল না·সংনি খা·থংরাংখো হা·আইয়া। মান্দিরাং জেখো নাম্মা ইন্নে চানচিয়া ইসলনি মিক্রোনও উয়া মিৎচিয়ানি হং·আ। 16 “রিপ্পলেতগিবা যোহননি সময়ওনা দিপ্পাৎ মোশিনি নিয়ামরাং আরো আগানসোগিবারাংনি চক্কারাং চলিনুয়ামিং। উনি জা·মানোনি ইসলনি সংনকনি নাম্মা খাৎথাখো আগানফ্রাক্কিংজক আরো গিম্মিকান দিংচিকে উয়া সংনক্কো নাপ্পিংজক। 17 ইন্দিবা নিয়ামরাংওনি অকখিসামাং থাংগাক্কানা বাত্তেদে সালগি আরো হা·গিলসাকনি ব·ন্নাংআ আলথুবাত্তা। 18 “সাবা জিকথাংখো গাল্লে সাকগিপ্পিনখো খিম্মোদে বিয়া থি·ল্লেকা। সেগিবা জেখো গালজক ইন্দাকগিবা মিচিকখো খিমগিবাবা থি·ল্লেকা। 19 “সাকসা নকমা মান্দি দংআমিং। বিয়া গিৎচাকম্রাং বা·রা আরো গামচাৎগিবা বা·রাখো গান্নুয়ামিং। সালাজ্রিং বিয়া মাহামাহা দাক্কে হান·সেংনুয়ামিং। 20 উয়া নকমা মান্দিনি নক দ·গাচিল জা·ফাংও লাসার মিংগিবা সাকসা বি·এ চা·গিবাখো ফাংনান রা·বাএ দন্নুয়ামিং। লাসারনি বে·এন গিম্মিকো হান·খিসা দংআমিং। 21 উয়া নকমা মান্দিনি টেবিল কক্ষুমাও গা·আকগিবা চা·আরাংখো চা·এ বিয়া অকখানা হাম·নুয়ামিং, আরো আচাকরাং বিনি হান·খিসারাংখো স্রাকনুয়ামিং। 22 “সালসাও উয়া বি·আম্মে চা·গিবা সিজক। উনোন সা·গ্রেরাং রি·বাএ বিখো অব্রাহামচা রিম্মাংজক। জা·মানো সালসাও উয়া নকমা মান্দিবা সিজক আরো বিখো গপজক। 23 সিগিবারাংনি হা·দামও নাম্মেন দুক চাক্কে বিয়া সাক্কাচানা নিএতজক আরো চে·ল্লাওনি অব্রাহাম আরো বিনি কেচ্চিও লাসারখো নিকজক। 24 উনোন বিয়া চ্রিকে আগানজক, ‘আপফা অব্রাহাম, আংনা খা·সাচাকবো। লাসারখো ওয়াত্তেতবো জেদাক্কে বিয়া বিনি জাকসি খু·চতখো চিও সি·ম্মে আংনি স্রিবাকখো খা·সিনেতনা মা·ন্না। ইয়া ওয়া·আলো দংএ আংআ দুক মানবিংজক।’ 25 “ইন্দিবা অব্রাহাম আগানজক, ‘গিসিক রা·এ নিবো, নাং·নি থাংএ দংমিত্তিংও না·আ বাসিক মাহামাহা দাক্কে সালখো রি·য়াংএতজক আরো লাসার বাসিক দুক মান·জক। ইন্দিবা দা·আও ইনো বিয়া থম·থমাখো মা·ন্নিংজক আরো না·আ দুক মা·ন্নিংজক। 26 ইনাআগ্রেবা না·সংনি আরো চিংনি গিসেপো ইন্দাকফিল্লে দাল·বিয়া হা·খুয়াং দংআ হা·সিকোবা সাকসাবা ইনোনি না·সংচানা রি·য়াংনা মান·জা আরো উনোনি বাতবাএ চিংচানা রি·বানা মান·জা।’ 27 “উনোন উয়া মা·ন্নে চা·গিবা মান্দি আগানজক, ‘ইন্দাকোদে আপফা, খা·সাফাএ লাসারখো আংনি ফাগিবানি নকচানা ওয়াত্তেতবো, 28 জেদাক্কে বিয়া আংনি সাকবংআ জংগিবারাংখো সিমসাকেতনা মা·ন্না; ইন্দাকজাওদে বিসংবা ইয়া দুকনি হা·দামওনা রি·বানুয়া।’ 29 “ইন্দিবা অব্রাহাম আগানজক, ‘মোশি আরো আগানসোগিবারাংনি চকগিবা খি·তাপদে বিসংচান দংআ। বিসং বিসংনি খাৎথাখো খিন্নাচাকখানা। 30 “উয়া নকমা মান্দি আগানজক, ‘হং·জা আপফা অব্রাহাম, সিগিবারাংওনি সাবা চাখাত্তে বিসংচা রি·য়াংওদে বিসং পাপওনি গিসিক ফিল·নুয়া।’ 31 “উনোন অব্রাহাম আগানজক, ‘মোশি আরো আগানসোগিবারাংনি খাৎথাখো বিসং খিন্নাচাকজাওদে সিগিবারাংওনি সাবা চাখাত্তোবা বিসং বিবিরা·জানুয়া।’ ”

লূক 17

1 যীশু আন·থাংনি জা·রিকগিবারাংনা আগানজক, “পাপনি রামাচানা রিম্মাংনা চলরাং সকবানোন, ইন্দিবা হং·সিখানা উয়া মান্দিনা, জে গিত্তা উয়া চলরাং সকবাআ! 2 ইয়া বি·সা চনগিবারাংওনি সাকসাখো সাবা পাপনি রামাওনা রিম্মাংওদে, উনোদে বিনি গিদ্দকো দাল·গিবা গি·সা রং·থিখো খাদিংদিয়ে বিখো সাগালো গাল্লেতান বিনা নামবাত্তা। 3 “না·সং সিমসাকবো। নাং·নি জংগিবা নাং·নি সাক্কাও পাপ দাক্কোদে বিখো খা·চাবো। উয়া পাপওনি বিয়া গিসিক ফি·ল্লোদে বিখো ক্ষেমা দাকবো। 4 সালসানো নাং·নি সাক্কাও চাংস্নি পাপ দাক্কোদে আরো চাংস্নিআন রি·বাএ ‘আংআ পাপওনি গিসিক ফিল·জক,’ ইন্নে আগানোদে বিখো ক্ষেমা দাকনা নাংনুয়া।” 5 উয়া সাকচিগ্মি ওয়াত্তেতারাং গিত্তেলনা আগানজক, “চিংনি বিবিরা·আখো বাং·এতবো।” 6 গিত্তেল আগানজক, “সুলসু বিৎচ্রি রংসা গিত্তা না·সংনি বিবিরা·আ দংওদে না·সং ইয়া ফাংখো ইন্দাকে আগান্না মা·ন্নুয়া, ‘জা·দিলগ্মাং চাখাত্তে রি·য়াংএ আন·থাংখো সাগালো দাপ্পে দনবো;’ উনি গিম্মিন উয়া ফাং না·সংনি খাৎথাখো খিন্নানুয়া। 7 “চানচিচিপবো, না·সংনি সানিবা নকখল হা·বা উইংআ বা মেষখো নিরিক্কিংআ। উয়া নকখল হা·বাওনি রি·বাওন বিনি নকগিবা বিখো ‘বিকবিক রি·য়াংএ চা·না আসংবো’ ইন্দাকে আগান্নুয়ামা? 8 হং·জা, উখো আগানজানুয়া, ইন্দিবা ইখো আগান্নুয়া, ‘আংনা চা·আনিখো থারিবো, আরো আংনি চা·মান রিংমানোনা দিপ্পাৎ খাংখারিও বা·রাখো খায়ে আংনা দাকচাকে হন·বো। জা·মানো না·আ চা·বো রিংবো।’ 9 উয়া নকখল বিনি গি·য়েতা গিত্তা কাম দাক্কানি গিম্মিন বিয়া বিখো মিৎথেলনুয়ামা? 10 উয়ানদাক্কে ইসলনি গি·য়েতা গিত্তা গিম্মিকখো দাক্কানি জা·মানো রি·বাএ আগানবো, ‘চিংআ চলিগিজাগিবা নকখল; জেখো দাকনা নাংআ চিংআ উখোসান দাকজক।’ ” 11 যিরূশালেমচানা রি·য়াংমিত্তিংও যীশু শমরিয়া আরো গালীল গিত্তা রি·য়াংআমিং। 12 উনোন সং দামসাচা নাপমিত্তিংও বিয়া সাকচিখুং খনচিরিত্তামগিবারাংখো গ্রংজক। বিসং চে·ল্লাও চাদেংএ চ্রিকে আগানজক, “যীশু, গিত্তেল, চিংনা খা·সাচাকবো।” 14 উয়া সাগিবারাংখো নিক্কে যীশু আগানজক, “খামালরাংচা রি·য়াংএ আন·থাংথাংখো ফিন্নিকবো।” বিসং রি·য়াংমিত্তিংওন নাম্মারিজক। 15 বিসংওনি সাকসা আন·থাংনি নাম্মাখো নিক্কে চ্রিকে ইসলখো রাসং চাএতে ফিল·বাজক আরো যীশুনি জা·চকো থুচিকোপে বিখো মিৎথেলজক। বিয়া শমরিয়া হা·দকনি মান্দিমিং। 17 উনোন যীশু আগানজক, “সাকচিখুংখো নাম্মেতজামিংমা? ইন্দাকোদে সাকস্খুদে বাও? 18 ইসলখো রাসং দাকনা ইয়া গিপ্পিন জাতনি মান্দিনা আগ্রে সাকসাবা ফিল·বাজাজকমা?” 19 জা·মানো যীশু উয়া মান্দিনা আগানজক, “চাখাত্তে রি·য়াংবো। বিবিরা·আনি গিম্মিন না·আ নামজক।” 20 বাসোকো ইসলনি সংনক রি·বানুয়া ইন্নে মিত্তাম ফরীশীরাং যীশুচা সিং·জক। যীশু আগানচাকজক, “ইসলনি সংনক রি·বানি সালো মামুং চিনখো নিকজানুয়া। 21 দারাংবা আগানজানুয়া, “নিবো, ইসলনি সংনক ইনো,’ বা ‘নিবো, ইসলনি সংনক উয়ানো,’ মুয়ানা না·সংওন ইসলনি সংনক দংআ।” 22 উনি জা·মানো বিয়া বিনি জা·রিকগিবারাংনা আগানজক, “ইন্দাকগিবা সাল রি·বাংজক জেনসালো না·সং মান্দিনি দেফান্থিনি সালরাংওনি সালসাখো নিনা হা·সিকনুয়া, ইন্দিবা উখো নিকনা মান·জানুয়া। 23 মান্দিরাং না·সংখো আগান্নুয়া, ‘উনো নিবো,’ বা ‘ইনো নিবো।’ হা·ফালচা দা·আ রি·য়াংআবো বা বিসংনি জা·মান জা·মান দা·আ খাত্তাবো। 24 মিকখা রিপরাপজোকনো জেদাক্কে সিলগানি ফাকসাওনি ফাকসাওনা থেং·সুয়াংআ, মান্দিনি দেফান্থিনি রি·বা উয়ানদাক্কেন হং·নুয়া। 25 ইন্দিবা স্খাং বিখো বাং·এন দুক চাকনা নাংনুয়া। ইনাআগ্রেবা ইয়া চাসংনি মান্দিরাং বিখো জিচাকনুয়া। 26 “নোহনি সালো জেদাক্কে হং·আমিং মান্দিনি দেফান্থিনি সালোবা উগিত্তান হং·নুয়া। 27 নোহনি জাহাসও নাপখুজানা দিপ্পাৎ আরো চি দাল·বাএ মান্দি গিম্মিকখো ব·ন্নেতখুজানা দিপ্পাৎ মান্দিরাং চা·আ-রিংআমিং, জিক খিম্মামিং আরো খিম্মেতামিং। 28 দা·আবা লোটনি সালো জেদাক্কে হং·আমিং উগিত্তান হং·নুয়া। উয়া সালরাংও মান্দিরাং চা·আ রিংআমিং, ফাল্লা ব্রিয়ামিং, গি·আ বাক্কামিং আরো নকরাংখো রিক্কামিং। 29 ইন্দিবা জেনসালো লোট সদোমখো ওয়াত্তে রি·য়াংজক উনসালো সালগিওনি ওয়া·আল আরো গন্দকনি মিকখা গা·আকদাপ্পে মান্দি গিম্মিকখো ব·ন্নেতজক। 30 জেনসালো মান্দিনি দেফান্থি ফারাকনুয়া উনসালো ইন্দাকেন হং·নুয়া। 31 “উনসালো নক সাক্কাও দংগিবা জিনিসরাংখো রা·না খা·মাচা হং·ওনবাজাখানা। উয়ানদাক্কেন হা·বাও দংগিবা ফিল·বাজাখানা। 32 লোটনি জিকগিবানি খাৎথাখো গিসিক রা·এ নিবো। 33 সাবা জাংগিথাংখো রাক্ষিনা হা·ম্মোদে বিয়া বিনি চং·মত জাংগিখো গিম্মায়েতনুয়া, আরো সাবা জাংগিথাংখো গিম্মায়েতা বিয়া বিনি চং·মত জাংগিখো রাক্ষিনুয়া। 34 আংআ না·সংনা আগানিংআ, উনওয়াল্লো থুচাকানি গি·সাও সাকগ্মি দংনুয়া; সাকসাখো রিম্মাংনুয়া আরো সাকগিপ্পিনখো গাল্লে দন্নাংনুয়া। 35 উনোন সাকগ্মি মিচিক জাতা নংরিমনুয়া; সাকসাখো রিম্মাংনুয়া আরো সাকগিপ্পিনখো গাল্লে দন্নাংনুয়া।” 37 জা·রিকগিবারাং আগানজক, “গিত্তেল, বানো?” যীশু আগানচাকজক, “মাংগিসি জেও দংআ উনোন সোগিনরাং রি·বাএ থম·নুয়া।”

লূক 18

1 জা·রিকগিবারাং ফাংনাজ্রিং বি·খানা আরো খা·দংআ গ্রি হং·জাখানা ইন্নে যীশু বিসংনা ইয়া স্খিয়ানিখো আগানজকঃ “বাগিবাবা সংজিলমা দামসাও সাকসা বিচাল দাকগিবা দংআমিং। বিয়া ইসলনা খেনজানুয়ামিং আরো মান্দিখোবা মান্দি মিংজানুয়ামিং। 3 উয়া সংজিলমাও সাকসা রান্দি মিচিকসা দংআমিং। বিয়া ফিল·নিফিল রি·বাএ বিনা আগান্নুয়ামিং, ‘আংখো চাংফেংগিবানি সাক্কাও খাকখেৎ বিচাল দাক্কে হন·বো।’ 4 উয়া বিচাল দাকগিবা বাং·গিজা সালওনা দিপ্পাৎ মামুংখোন দাকজাজক। ইন্দিবা জা·মানো বিয়া গিসিকথাংও ইনজক, ‘আংআ ইসলনা খেনজাওবা আরো মান্দিখো মান্দি মিংজাওবা, 5 ইন্দিবা ইয়া মিচিক আংখো নেং·দিকেতানি গিম্মিন আংআ বিনা খাকখেৎ বিচালখো দাকনুয়া। হং·জাওদে বিয়া রাং·নিরাং রি·বানুয়া আরো উনোদে আংআ নেং·চিপ্পারিনুয়া।’ ” 6 উনি জা·মানো গিত্তেল আরোবা আগানজক, “খাকখেৎ বিচালখো দাকগিবা হং·জাওবা বিয়া মুয়াখো আগানজক উখো চানচিয়ে নিবো। 7 ইন্দাকোদে জেরাং ইসলখো সালওয়াল রিক্কামা, ইসল বিনি উয়া বাচ্ছিয়ে রা·গিবা মান্দিরাংনা খাকখেৎ বিচালখো দাক্কে হন·জানুয়ামা? বিয়া উখো দাকনা হারিমনুয়ামা? 8 আংআ না·সংনা আগানিংআ, বিয়া বিসংনা খাকখেৎ বিচালখো দাকনা হারিমজানুয়া। ইন্দিবা মান্দিনি দেফান্থি জেনসালো রি·বানুয়া উনসালো বিয়া হা·গিলসাকো বিবিরা·আখো নিকনা মা·ন্নুয়ামা?” 9 আন·থাংথাংখো থরমি চানচিয়ে গিপ্পিনরাংখো চন্নিকগিবারাংনা স্খিনা ইন্নে যীশু ইয়া খাৎথাখো আগানজকঃ 10 “মান্দি সাকগ্মি থরম নক্কো বি·না রি·য়াংজক। বিসংওনি সাকসা ফরীশী আরো সাকগিপ্পিন খাজিনা গিলগিবা হং·আমিং। 11 উয়া ফরীশী চাদেংএ আন·থাংনি গিম্মিনো ইন্দাকে বি·জক, ‘ও ইসল, আংআ নাং·খো মিৎথেলা, মুয়ানা আংআ গিপ্পিন মান্দিরাং গিত্তা থকাই চা·গিবা, নামগিজাগিবা আরো থি·ল্লেকগিবা হং·জা, আরোবা, উয়া খাজিনা গিলগিবা গিত্তাবা হং·জা। 12 আংআ আনথিও রাং·গ্মি অকগুমিন চাক্কা আরো আংনি গিম্মিক মা·ন্নাওনি বাকচিখুংনি বাকসাখো নাং·না হ·ন্না।’ 13 উয়া সময়ও উয়া খাজিনা গিলগিবা অকখিসা চে·ল্লাচানা চাদেংএ দংআমিং। সালগিচাখো নিএতনাবা বিয়া ফা·জাজক; বিয়া খা·আখো দক্কে দক্কে ইনজক, ‘ও ইসল! আংআ পাপী মান্দি; আংনা খা·সাচাকবো।’ 14 “আংআ না·সংনা আগানিংআ, উয়া খাজিনা গিলগিবাখো ইসল গ্রো নাংগিজা ইন্নে রা·চাকজক আরো বিয়া নকচানা রি·য়াংফিলজক। ইন্দিবা উয়া ফরীশীখো বিয়া গ্রো নাংগিজা ইন্নে রা·চাকজাজক। আন·থাংখো চুয়াকেতগিবাখো অন্নেতনুয়া আরো আন·থাংখো অন্নেতগিবাখো চুয়াকেতনুয়া।” 15 মান্দিরাং বি·সা চনগিবারাংখো যীশুচা রিমবাজক জেদাক্কে বিয়া বিসংনি সাক্কাও জাক দনদাপা। জা·রিকগিবারাং ইখো নিক্কে উয়া মান্দিরাংখো খা·চানা হা·বাচেংজক। 16 ইন্দিবা যীশু উয়া বি·সারাংখো রিক্কামজক। জা·মানো বিয়া জা·রিকগিবারাংনা আগানজক, “বি·সারাংখো আংচানা রি·বানা হন·বো, দা·আ বেং·আবো; মুয়ানা ইসলনি সংনক ইন্দাকগিবা মান্দিরাংনিন। 17 আংআ না·সংনা বিবিন আগানিংআ, বি·সা চনগিবারাং গিত্তা ইসলনি শাসনখো মানিজাওদে মামুং দাক্কেবা ইসলনি সংনক্কো নাপনা মান·জানুয়া।” 18 সাকসা দাল·গিবা যীশুচা সিং·জক, “ও স্খিগিবা, না·আ সাকসা নামগিবা মান্দি হং·আ। আংনা আগানবো, মুয়াখো দাক্কোদে আংআ ফাংনাজলনি জাংগিখো মা·ন্নুয়া?” 19 যীশু বিনা আগানজক, “আংখো মুয়ানা নামগিবা ইন্নিংআ? ইসলনা আগ্রে সাকসাবা নামজা। 20 না·আদে গি·য়েতারাংখো হা·আইয়া, ‘দা·আ থি·ল্লেকাবো, দা·আ স·ওতাবো, দা·আ চা·ওয়াবো, দা·আ বু·এ সাক্ষি হ·ন্নাবো, নাং·নি মা·খো-ফাখো মান্দিরা·বো।’ ” 21 উয়া দাল·গিবা আগানজক, “চন্নোনিন আংআ ইরাংখো মানিয়ে রি·বাংজক।” 22 ইয়া খাৎথাখো খিন্নাএ যীশু বিনা আগানজক, “দা·আওবা নাং·নি মিংসাখো দাকনা দংখুংআ। নাং·চা দংগিবা গিম্মিকখো ফাল্লে দিল্লা-চন্নারাংনা হন·বো, ইন্দাকোদে না·আ সালগিও গামখো মা·ন্নুয়া। জা·মানো রি·বাএ আংখো জা·রিকফাবো।” 23 ইয়া খাৎথাখো খিন্নাএ উয়া দাল·গিবা বাং·এন দুক মান·জক, মুয়ানা বিয়া মা·ন্নে চা·বেগিবা হং·আমিং। 24 উয়া দাল·গিবাচাখো নিএতে যীশু আগানজক, “ইসলনি সংনক্কো মা·ন্নে চা·গিবারাংনি নাপ্পা বাসিক নেং·আনি হং·আ! 25 ইসলনি সংনক্কো মা·ন্নে চা·গিবানি নাপ্পানা বাত্তে সিল্লেংসিনি হা·খল গিত্তা উটনি নাপ্পান আলথুবাত্তা।” 26 যীশুনি ইয়া খাৎথাখো খিন্নাগিবারাং আগানজক, “ইন্দাকোদে পাপওনি সা জকনা মা·ন্না?” 27 যীশু আগানজক, “মান্দি জেখো হামজা ইসলনা উয়াদে হাম্মানি হং·আ।” 28 উনোন পিতর আগানজক, “চিংআদে গিম্মিকখো ওয়াত্তে নাং·খো জা·রিক্কিংজক।” 29 যীশু বিনি জা·রিকগিবারাংনা আগানজক, “আংআ না·সংনা বিবিন আগানিংআ, ইসলনি সংনকনি গিম্মিন জেরাং নকখো, জিকগিবাখো, জংআদা-নআবিখো, মা·খো-ফাখো বা দেদ্রাংখো ওয়াতজক, 30 বিসং গিম্মিকান ইয়া চাসংওন বাং·এ মা·ন্নুয়া আরো রি·বাগিবা চাসংও ফাংনাজলনি জাংগিখো মা·ন্নুয়া।” 31 যীশু বিনি সাকচিগ্মি জা·রিকগিবারাংখো হা·দাম সামসাচা রিংগামে আগানজক, “নিবো, চিংআ যিরূশালেমচানা রি·য়াংআ। মান্দিনি দেফান্থিনি গিম্মিনো আগানসোগিবারাং জেখো চক্কে দন্নাংজক উয়া গিম্মিকান চু·সকনুয়া। 32 বিখো গিপ্পিন জাতরাংনি জাক্কো হ·ন্নুয়া। মান্দিরাং বিখো খা·দিংস্থেকনুয়া আরো চন্নিকনুয়া আরো বিনি বে·এনো খু·চি দাপনুয়া। 33 চাবুকচা দক্কানি জা·মানো বিসং বিখো স·ওতে গালনুয়া, আরো সালগিত্থামনি সালো বিয়া থাংচাফিলনুয়া।” 34 ইন্দিবা জা·রিকগিবারাং ইরাংখো মামুংখোন হা·আইনা মান·জাজক। উয়া খাৎথানি অর্থখো বিসংচা থুম্মুয়ে রা·রিকানি হা·সেলো যীশু মুয়াখো আগানিংআমিং বিসং উখো হা·আইজাজক। 35 যীশু যিরীহো সংজিলমানি সেফাংও রি·বাজক উনোন সাকসা মিকগ্রি মান্দি রামা হা·সামো আসংএ বি·আম্মিংআমিং। 36 বাং·আ মান্দিনি খু·রাংখো খিন্নাএ বিয়া মুয়া হং·আ উখো সিং·জক। 37 নাসরতনি যীশু উয়া রামা গিত্তা রি·য়াংআ ইন্নে মান্দিরাং বিনা আগানজক। 38 উনোন বিয়া চ্রিকে আগানজক, “দায়ূদনি দেফান্থি যীশু, আংনা খা·সাচাকবো!” 39 মান্দি জিলমানি মিকখাংও দংগিবা মান্দিরাং বিখো জ্রিপ দংখানা ইন্দাতজক। ইন্দিবা বিয়া চ্রিকবাত্তে আগানজক, “দায়ূদনি দেফান্থি, আংনা খা·সাচাকবো।” 40 যীশু চাদেংদিপজক আরো উয়া মিকগ্রিখো বিচানা রিমবাখানা আগানজক। বিনি সেফাংও রি·বানি জা·মানো বিয়া আগানজক, 41 “না·আ মুয়াখো হা·ম্মা? নাং·না আংআ মুয়াখো দাকনুয়া?” বিয়া আগানজক, “গিত্তেল, জেদাক্কে আংআ নিকনা মা·ন্না।” 42 যীশু বিনা আগানজক, “দে, উয়ান হং·খানা। নাং·নি বিবিরা·আনি গিম্মিন না·আ নামজক।” 43 উয়া মান্দি উনোন নিকনা মান·জক আরো ইসলখো রাসং চাএতে যীশুনি জা·মান জা·মান রি·য়াংফাজক। উখো নিক্কে গিম্মিক মান্দিরাং ইসলখো মিৎথেলথকজক।

লূক 19

1 যীশু যিরীহো সংজিলমা গিত্তা রি·য়াংআমিং। 2 উনো সক্কেয় মিংগিবা সাকসা মান্দি দংআমিং। বিয়া খাজিনা গিলগিবারাংনি দাল·বাৎগিবা আরো মা·ন্নে চা·বাৎগিবা হং·আমিং। 3 যীশু সা, উখো বিয়া নিনা হা·ম্মিংআমিং, ইন্দিবা খামবি খান·দামা ইন্নে মান্দি বাং·আনি গিম্মিন বিখো নিকনা মান·জাংআমিং। 4 উনি গিম্মিন বিয়া যীশুখো নিনা ইন্নে মিকখাংচা খাত্তাংএ ডুমুর বিফাং ফাংসাও গাদোজক, মুয়ানা যীশু উয়া রামা গিত্তান রি·য়াংআমিং। 5 যীশু উয়া ডুমুর বিফাংনি কেচ্চিও রি·বাএ সাক্কাচানা নিগোদোজক আরো সক্কেয়খো আগানজক, “সক্কেয়, হং·খাতগালবো, মুয়ানা দা·আলো আংআ নাং·নি নক্কো দংনা নাংনুয়া।” 6 সক্কেয় বাকবাক হং·খাতবাজক আরো খুসি হং·এ যীশুখো রা·চাকজক। 7 উখো নিক্কে গিম্মিকান খা·চাএ খা·চাএ ইনজক, “বিয়া সাকসা পাপী মান্দিনি চাচ্চি হং·না রি·য়াংজক।” 8 সক্কেয় উনো চাদেংএ গিত্তেলনা আগানজক, “গিত্তেল, আংআ আংনি গামজিননি ফাকসামসাখো দিল্লা-চন্নারাংনা হ·ন্নেতিংজক আরো সাচাখোবা থগিয়ে রা·মানোদে উনি চাংব্রি বাত্তে হন·ফিল্লিংজক।” 9 উনোন যীশু আগানজক, “ইয়া নক্কো দা·আলো পাপওনি জক্কা সকজক, মুয়ানা ইয়াবা অব্রাহামনি দেফান্থি হং·আ। 10 গিম্মাগিবারাংখো সান্দিনা আরো পাপনিখো জক্কেৎনান মান্দিনি দেফান্থি রি·বাজক।” 11 যীশু জেও দংআমিং উনোনি যিরূশালেম বাং·এ চেল·জামিং, আরো জেরাং বিনি খাৎথাখো খিন্নাংআমিং বিসং, ইসলনি সংনক থেংরিন ফারাকনুয়া ইন্নে চানচিয়ামিং। উনি গিম্মিন যীশু বিসংনা স্খিনা ইন্নে ইয়া খাৎথাখো আগানজকঃ 12 “দাল·গিবা মা·চংনি সাকসা মান্দি রাজা হং·আনি বিলখো রা·এ রি·বাফিলনা হা·সং চে·ল্লাচা রি·য়াংজক। 13 রি·য়াংনা স্খাং বিয়া বিনি সাকচিখুং নকখলরাংখো রিক্কামজক আরো সাকফ্রাকফ্রাকনা রিৎচাসা দীনার হ·ন্নে আগানজক, ‘আংনি ফিল·বাখুজানা দিপ্পাৎ ইখো রা·এ বাদিংবো।’ 14 “ইন্দিবা বিনি হা·সংনি মান্দিরাং বিখো মিৎচিনুয়ামিং। ইনি গিম্মিন বিসং বিনি জা·মানো মান্দি ওয়াত্তেতি আগানেতজক, ‘চিংনি সাক্কাও ইয়া মান্দিনি রাজা হং·আখো চিংআ হাম·জা।’ 15 “ইন্দাকোবা বিয়া রাজা হং·আনি বিলখো মা·ন্নে রি·বাফিলজক আরো জেরাংনা থাংখা হ·ন্নামিং উয়া সাকচিখুং নকখলরাংখো রিংগামে রা·বাখানা গি·য়েৎজক। বিসং বাদিংএমিংনা সা বাসিক মান·দাপজক উখো বিয়া হা·আইনা হাম·জক। 16 স্খাংগিবা রি·বাএ ইনজক, ‘গিত্তেল, নাং·নি থাংখাচা আংআ চাংচিখুং মান·দাপজক।’ 17 “রাজা বিনা আগানজক, ‘নাম্মেন দাকজক। না·আ নামগিবা নকখল। না·আ বাং·গিজানি গিম্মিন বিবিগিবা হং·জক ইন্নে আংআ নাং·না সং দামচিখুংখো নিরকখিনা হন·জক।’ 18 “গ্মিগিবা নকখল রি·বাএ আগানজক, ‘গিত্তেল, নাং·নি থাংখাচা আংআ চাংবংআ মান·দাপজক।’ 19 “বিয়া উয়া নকখলনা আগানজক, ‘না·আ সং দামবংআখো নিরকখিনা মা·ন্নুয়া।’ 20 “উনি জা·মানো সাকগিপ্পিন নকখল রি·বাএ আগানজক, ‘গিত্তেল, আংআ নাং·নি থাংখাখো রুমালো খাথমে দন্নামিং। 21 নাং·নি গিম্মিনো আংআ খেনবিয়ামিং মুয়ানা না·আ খা·গ্রাক মান্দি; না·আ জেখো চিম্মংজা উখো রা·এ দংআ আরো জেখো গি·জা উখো রাত্তা।’ 22 “উনোন রাজা আগানজক, ‘ও দেংগু নকখল! নাং·নি খু·সুকচান আংআ নাং·খো বিচাল দাকনুয়া। না·আদে হা·আইয়ান, আংআ খা·গ্রাক মান্দি; জেখো চিম্মংজা উখো রা·এ দংআ আরো জেখো গি·জা উখো রাত্তা। 23 ইন্দিদে আংনি থাংখাখো না·আ মুয়ানা বাদিংগিবাচা দনজাজক? ইন্দাকোদে আংআ রি·বাএ থাংখাখোবা মা·ন্নুয়ামিং আরো উমুং অকখিসা সুদবা মা·ন্নুয়ামিং।’ 24 “জেরাং রাজানি সেফাংও চাদেংএ দংআমিং রাজা বিসংখো আগানজক, ‘বিচাখো উয়া রিৎচাসা দীনারখো রা·রিকবো আরো হাজালসা দীনার দংগিবানা উখো হন·বো।’ 25 “উনোন উয়া মান্দিরাং রাজানা আগানজক, ‘গিত্তেল, বিচাদে হাজালসা দীনার দংআন।’ 26 “রাজা আগানজক, ‘আংআ না·সংনা আগানিংআ, দংগিবানা আরোবা হন·দাপনুয়া, ইন্দিবা জেচা দংজা বিচা দংগিবাখোবা রা·আংস্রাংনুয়া। 27 আংনি বোবিলরাং জেরাং আংনি রাজা হং·আখো হাম·জা, বিসংখো ইনোনা রিমবাবো আরো আংনি মিকখাংও স·ওতে গালবো।’ ” 28 ইয়া খাৎথারাংখো আগানানি জা·মানো যীশু বিসংনা স্খাং স্খাং যিরূশালেমচানা রি·য়াংজক। 29 বিয়া জৈতুন হা·ব্রিনি জা·রেকো দংগিবা বৈৎফগী আরো বৈথনিয়া সংওনা সকবাওন বিনি সাকগ্মি জা·রিকগিবাখো ইন্দাকে আগানে ওয়াত্তেতজক, 30 “না·সং মিকখাংনি উয়া সংচা রি·য়াংবো। উনো নাপমিত্তিংও মাংসা গাধা বি·সাখো খায় দন্নাখো নিকনা মা·ন্নুয়া। উনি সাক্কাও দারাংবা মামুং সালোবা গাখাতখুজা। উখো এংএ ইনোনা রা·বাবো। 31 ‘মুয়ানা উখো এংআ’ ইন্নে সাবা সিং·ওদে, উনোদে আগানবো, ‘গিত্তেলনা নাংআ।’ ” 32 জা·রিকগিবারাং রি·য়াংএ যীশুনি আগানা গিত্তান গিম্মিকখো নিকনা মান·জক। 33 বিসং উয়া গাধা বি·সাখো এংমিত্তিংওন বিসংখো নকগিবা সিং·জক, “না·সং বি·সাখো মুয়ানা এংইংআ?” 34 বিসং আগানজক, “গিত্তেলনা নাংআ।” 35 জা·মানো জা·রিকগিবারাং উয়া গাধা বি·সাখো যীশুচা রা·বাজক আরো উনি সাক্কাও বিসংনি বে·এননি বা·রারাংখো আন্নে যীশুখো আসংএতজক। 36 বিনি রি·য়াংমিত্তিংও মান্দিরাং আন·থাংথাংনি বে·এননি বা·রারাংখো রামাও আনদাপনা হা·বাচেংজক। 37 ইন্দাকে যীশু যিরূশালেমনি সেফাংও রি·বাএ জৈতুন হা·ব্রিওনি হং·ওনবাগিবা রামাওনা রি·বাজক। যীশুমুং বিনি বাং·আ জা·রিকগিবারাং দংআমিং। উয়া জা·রিকগিবারাং বিনি বিল্লাকগিবা কামরাংখো নিক্কানি গিম্মিন খুসি হং·এ চ্রিকে ইসলখো রাসং দাক্কে ইন্না হা·বাচেংজক, 38 “গিত্তেলনি বিমুংও রি·বাগিবা রাজানি রাসং হং·খানা! সালগিওন থম·থমা, আরো উয়ো ইসলনি রাসং ফারাকা।” 39 মান্দি বাং·আওনি মিত্তাম ফরীশীরাং যীশুনা আগানজক, “স্খিগিবা, নাং·নি জা·রিকগিবারাংখো জ্রিপ দংখানা আগানবো।” 40 যীশু বিসংনা আগানজক, “আংআ না·সংনা আগানিংআ, ইরাং জ্রিপ দাক্কে দংওদে রং·থিরাং চ্রিকনুয়া।” 41 বিসং যিরূশালেমনি সেফাংও রি·বাওন যীশু উয়া সংজিলমাখো নিএ গ্রাপজক। 42 বিসং আগানজক, “আইয়াও, থম·থমাখো মা·ন্না জেখো দাকনা নাংআ, হো·এ দা·আল না·আ উখো হা·আইচাক্কোদে! ইন্দিবা উয়া দা·আও নাং·নি মিক্রোননি মিৎথিনাও দংআ। 43 নাং·না ইন্দাকগিবা সাল সকবানুয়া জেনসালো বোবিলরাং নাং·নি সাক্কাও চাংফেংনুয়া আরো নাং·খো উইলউইলে দংনুয়া আরো গিম্মিক গিত্তা নাং·খো সিকচেচেপনুয়া। 44 বিসং নাং·খো আরো নাং·নি নিং·আও দংগিবা মান্দি গিম্মিকখো রি·ম্মে হা·আও গোস্থাপনুয়া আরো রং·থি গি·সানি সাক্কাও রং·থি গি·সাখো দনজানুয়া, মুয়ানা ইসল জেনসালো নাং·ও গিসিক হ·ন্নামিং উয়া সালখো না·আ হা·আইএ রা·জাজক।” 45 উনি জা·মানো যীশু থরম নক্কো নাপ্পে বাদিংগিবারাংখো হা·রিকেতজক। 46 বিয়া উয়া বাদিংগিবারাংনা আগানজক, “রংথালগিবা শাস্ত্রও চক্কা দংআ, ‘আংনি নক বি·আনি নক হং·নুয়া,’ ইন্দিবা না·সং উখো রা·সেকগিবারাংনি হা·খল দাক্কে রা·জক।” 47 যীশু সালাজ্রিংআন থরম নকচা রি·য়াংএ স্খিনা হা·বাচেংজক। খামাল দাল·গিবারাং, শাস্ত্র স্খিগিবারাং আরো মান্দিরাংনি দাল·গিবারাং বিখো স·ওতে গালনা হাম·জক, 48 ইন্দিবা বাদিকে দাক্কে উখো দাকনুয়া উনি গিম্মিনো মামুং চলখো বিসং সান্দিয়ে মান·জাজক, মুয়ানা মান্দিরাং গিসিক নাংএ বিনি খাৎথা গিম্মিকখো খিন্নানুয়ামিং।

লূক 20

1 সালসাও যীশু থরম নক্কো মান্দিরাংনা স্খিয়ে হ·ন্নিংআমিং আরো আগানফ্রাক্কিংআমিং। উনো খামাল দাল·গিবারাং আরো শাস্ত্র স্খিগিবারাং মি·আফারাংমুং রি·বাএ যীশুখো ইনজক, “বাগিবা বিলচা না·আ ইরাংখো দাক্কিংআ আরো সা নাং·না ইয়া বিলখো হন·জক, উখো চিংনা আগানবো।” 3 যীশু বিসংনা আগানচাকজক, “আংআবা না·সংচা মিংসা খাৎথাখো সিং·নুয়া। দে আগানে নি, 4 রিপ্পলেতানি বিলখো যোহন ইসলোনিখো মা·ন্নামিংমা মান্দিওনিখো মা·ন্নামিং?” 5 উনোন বিসং আন·থাংথাংও ইন্দাকে আগানগ্রিকনা হা·বাচেংজক, “চিংআ ‘ইসলোনিখো’ ইন্নোদে, বিয়া ইন্নুয়া, ‘ইন্দাকোদে বিখো মুয়ানা বিবিরা·জাজক?’ 6 ইন্দিবা ‘মান্দিওনিখো’ ইন্নোদে, উনোদে মান্দিরাং আনচিংখো রং·থিচা গোথাতনুয়া, মুয়ানা বিসং যোহনখো আগানসোগিবা ইন্নে বিবিরা·আ।” 7 উনি গিম্মিন বিসং আগানজক, “উয়া বিল বাওনি রি·বামিং উখো চিংআ হা·আইজা।” 8 যীশু বিসংনা আগানজক, “ইন্দিদে আংআবা আগানজানুয়া বাগিবা বিলচা আংআ ইরাংখো দাক্কিংআ।” 9 উনি জা·মানো যীশু মান্দিরাংনা স্খিয়ে হ·ন্না ইন্নে ইয়া খাৎথাখো আগানজকঃ “সাকসা মান্দি আংগুর বাগান দাকজক আরো গামগিবারাংচা উখো নিরকখিনা দন্নাংএ হা·সং গিপ্পিনচা রি·য়াংজক। 10 জা·মানো বিয়া বিথি মিনখারিও উয়া বাগাননিখো আন·থাংনি বাকখো মান·রিকনা নকখল সাকসাখো গামগিবারাংচা ওয়াত্তেতজক। ইন্দিবা গামগিবারাং বিখো দক্কে জাকরারা ফি·ল্লেতজক। 11 উনোন বিয়া সাকগিপ্পিন নকখলখো ওয়াত্তেতজক, ইন্দিবা গামগিবারাং বিখোবা দকজক আরো চন্নিকজক আরো জাকরারা ওয়াত্তেতজক। 12 জা·মানো বিয়া গিত্থামগিবা নকখলখো ওয়াত্তেতজক, ইন্দিবা গামগিবারাং বিখোবা দক্কে হা·রিকেতজক। 13 “উনোন আংগুর বাগাননি নকগিবা আগানজক, ‘মুয়াখো দাকনাজক? দে, আংআ আংনি দেফান্থিখো ওয়াত্তেতনুয়া। বিসং বিখো মান্দিরা·নাবা দংআ।’ 14 “ইন্দিবা গামগিবারাং বিখো নিক্কে সাকসা সাকগিপ্পিননা আগানজক, ‘ইয়ান জা·মানদে গামজিনখো মান·রিকগিবা হং·নুয়া। জেদাক্কোদে গামজিনরাং আনচিংনিন হং·খানা উনি গিম্মিন হাই, আনচিং বিখো স·ওতে গালনা।’ 15 ইখো আগানে বিসং বিখো বাগাননি হা·ফালচানা রিম্মাংএ স·ওতে গালজক। “দা·আও বাগাননি নকগিবা উয়া গামগিবারাংখো মুয়া দাকনুয়া? 16 বিয়া রি·বাএ বিসংখো স·ওতনুয়া আরো বাগানখো গিপ্পিনরাংচা নিরকখিনা হন·স্খানুয়া।” মান্দিরাং যীশুনি খাৎথাখো খিন্নাএ আগানজক, “ইন্দাকে হং·জাখানা।” 17 উনোন যীশু বিসংচাখো নিএতে আগানজক, “ইন্দিদে রংথালগিবা শাস্ত্রও ইন্দাকে চকগিবা, ‘রিকগিবারাং জে রং·থিখো জেগালামিং উয়ান নাংবাৎগিবা রং·থি হং·জক’- ইনি অর্থ মুয়া হং·আ? 18 সাবা উয়া রং·থিনি সাক্কাও গা·আকোদে বিয়া বি·খেনেকনুয়া আরো জেনি সাক্কাও উয়া রং·থি গা·আকদাপনুয়া বিয়াদে গিজেম গিজেম বিন্নেকনুয়া।” 19 উয়া সময়ও শাস্ত্র স্খিগিবারাং আরো খামাল দাল·গিবারাং যীশুখো রিম·না হাম·জক, মুয়ানা যীশু বিসংনি গিম্মিনান উয়া খাৎথাখো আগানা উখো বিসং হা·আইনা মা·ন্নামিং; ইন্দিবা বিসং মান্দিরাংনা খেনজক। 20 শাস্ত্র স্খিগিবা আরো খামাল দাল·গিবারাং যীশুখো নাম্মেদাক্কে নিরকখিজক আরো সিউল দাক্কে নিগিবারাংখো ওয়াত্তেতজক। যীশুখো বিনি খু·সুকচা রিম·না ইন্নে উয়া সিউল নিগিবারাং মান্দি নাম্মা গিত্তা দাক্কামব্রুজক, জেদাক্কে বিসং বিখো দাল·গিবা শাসন দাকগিবানি জাক্কো হ·ন্না মা·ন্না। 21 উনি গিম্মিন বিসং বিনা আগানজক, “স্খিগিবা, চিংআ হা·আইয়া, না·আ জেখো আগানা আরো স্খিয়ে হ·ন্না উয়াদে খাকখেৎআন হং·আ। না·আ গিম্মিকখোন আপসান দাক্কে নিয়া আরো বিবিদাক্কেন ইসলনি রামানি বিদিংও স্খিয়ে হ·ন্না। 22 মোশিনি নিয়াম গিত্তা রোমনি সম্রাটনা খাজিনা হ·ন্না খ্রাআমা খ্রাজা?” 23 যীশু বিসংনি চালাকি দাক্কাখো হা·আইনা মা·ন্নে আগানজক, 24 “আংনা দীনার গং·সাখো ফিন্নিকবো। ইনি সাক্কাও সানি বিমুং আরো সানি মিকখাং দংআ?” বিসং আগানজক, “রোমনি সম্রাটনি।” 25 যীশু বিসংনা আগানজক, “ইন্দাকোদে সম্রাটনিখো সম্রাটনা হন·বো আরো ইসলনিখো ইসলনা হন·বো।” 26 মান্দিরাংনি মিকখাংও যীশু জেখো আগানামিং উনি গিম্মিনো উয়া সিউল নিগিবারাং বিখো বিনি খু·সুকচা রিম·না মান·জাজক। বিনি আগানচাক্কানা বিসং আইয়াও ইনমানে জ্রিপ দংজক। 27 সদ্দূকীরাংওনি মিত্তামরাং যীশুচা রি·বাজক। সদ্দূকীরাংনি চানচিয়া গিত্তা সিগিবারাং থাংচাফিল্লা ইন্নে মামুংবা দংজা। বিসং যীশুখো সিং·জক, 28 “স্খিগিবা, মোশি আনচিংনা ইয়া খাৎথাখো চক্কে দন্নাংজক, সাকসা মান্দি দেগ্রি জিকথাংখো দন্নে সিওদে, উনোদে বিনি জংগিবা বিনি জিকগিবাখো খিম্মে আদাগিবানা বিৎচ্রিখো রাক্ষিনুয়া। 29 ইয়াদে নাম্মান, ইন্দাকে চানচিচিপবো, আদাসা সাকস্নি দংআমিং। স্খাংগিবা জিক খিম্মে দেগ্রি সিজক। 30 জা·মানো গ্মিগিবা আরো উনি জা·মানো গিত্থামগিবা উয়া রান্দি মিচিকখো খিমজক আরো উয়ানদাক্কে সাকস্নিবা দে দন্নাংগিজা সিথকজক। 32 বন·খামও উয়া মিচিকবা সিজক। 33 ইন্দাকোদে সিগিবারাং জেনসালো থাংচাফিলনুয়া উনসালো বিয়া সানি জিকগিবা হং·নুয়া? সাকস্নিআন বিখো খিম্মামিং।” 34 যীশু বিসংনা আগানজক, “ইয়া চাসংনি মান্দিরাং জিক খিম্মা আরো বিসংখো জিক খিমনা হ·ন্না। 35 ইন্দিবা সিয়াওনি থাংচাফিলে রি·বাগিবা চাসংখো বাতস্রাংনা খ্রাগিবা ইন্নে চানগিবারাংদে জিক খিমজানুয়া আরো বিসংখো খিমনাবা হন·জানুয়া। 36 বিসংদে সিনা মান·জা, মুয়ানা বিসং সা·গ্রেরাং গিত্তা হং·আ। বিসং ইসলনি দেদ্রাং হং·আ মুয়ানা সিয়াওনি বিসংখো থাংচাফিল্লেতজক। 37 ওয়া·আল চিং·গিবা বলনি বিদিংও জেও চক্কা দংআ উনো মোশি ফিন্নিকজক, সিগিবারাং বিবিন থাংচাফিল্লা। উনো মোশি গিত্তেলখো ‘অব্রাহামনি ইসল, ইস্‌হাকনি ইসল আরো যাকোবনি ইসল,’ ইন্নে রিক্কামা। 38 ইন্দিবা ইসলদে সিগিবারাংনি ইসল হং·জা, বিয়া থাংগিবারাংনিসা ইসল হং·আ। বিনাসান গিম্মিক মান্দি থাংএ দংআ।” 39 উনোন মিত্তাম শাস্ত্র স্খিগিবারাং আগানজক, “স্খিগিবা, না·আ নাম্মাখোন আগানজক।” 40 বিসং মামুংখোবা যীশুচা সিং·না ফা·জাজক। 41 যীশু উয়া শাস্ত্র স্খিগিবারাংনা আগানজক, “খ্রীষ্ট দায়ূদনি দেফান্থি হং·আ, ইখো মান্দিরাং বাদিকে দাক্কে ইন্না? 42 রংথালগিবা শাস্ত্রনি গীতরাং মিংগিবা খি·তাপো দায়ূদ আন·থাংআন ইয়া খাৎথাখো আগানা, ‘গিত্তেল আংনি গিত্তেলনা আগানা, জেওনা দিপ্পাৎ আংআ নাং·নি বোবিলরাংখো নাং·নি জা·চকনি খা·মাও দনজা, উয়োনা দিপ্পাৎ না·আ আংনি জাক্রাচা আসংবো।’ 44 দায়ূদদে খ্রীষ্টখো গিত্তেল ইন্নে রিক্কামামিং; ইন্দাকোদে খ্রীষ্ট বাদিকে দাক্কে দায়ূদনি দেফান্থি হং·না মা·ন্না?” 45 মান্দিরাং যীশুনি খাৎথাখো খিন্নামিত্তিংও যীশু বিনি জা·রিকগিবারাংনা আগানজক, 46 “শাস্ত্র স্খিগিবারাংনি গিম্মিনো সিমসাকবো। বিসং রো·আ রো·আ বা·রাখো চিন্নে রওমনা হা·ম্মা আরো বাজালরাংও সালাম খা·আখো মা·ন্না নামনিকা। বিসং থম·দাকরামচা দাল·গিবা আসংচাক্কানিরাংও আসংনা আরো চা·আনি সময়রাংও নামবাৎগিবা হা·দামরাংও আসংনা নামনিকা। 47 বিসং মান্দিরাংনা ফিন্নিকনা ইন্নে রো·এ রো·এ বি·আ, দা·আবা রান্দিরাংনি গামজিনরাংখো রা·সেক্কে রা·আ। ইয়া মান্দিরাং বাং·বাত্তে শাস্তিখো মা·ন্নুয়া।”

লূক 21

1 উনি জা·মানো যীশুনি নিএতোন, থরম নকনি থাংখা দনচাক্রাও মা·ন্নে চা·গিবারাংনি থাংখা দন্নাখো নিকজক। 2 আরোবা বিয়া নিকজক, সাকসা দিলগিবা মিচিক রি·বাএ পয়সা ফিলগ্মিখো দনজক। 3 উনোন যীশু বিনি জা·রিকগিবারাংনা আগানজক, “আংআ না·সংনা বিবিন আগানিংআ, ইয়া দিলগিবা রান্দি মিচিক গিম্মিকনা বাত্তে বাং·এ দনজক, 4 মুয়ানা গিপ্পিনরাং বিসংনি বাং·আ গামওনি গিৎচাগিবাখো হ·ন্না, ইন্দিবা ইয়া মিচিক দিল্লোবা বিনি জাংগি থাংআনি গিম্মিকখোন হন·জক।” 5 জা·রিকগিবারাংওনি মিত্তামরাং থরম নকনি গিম্মিনো আগানগ্রিক্কিংআমিং। নিথুয়া রং·থিরাংচা আরো হ·ন্নানিরাংচা ইয়া নকখো বাদাকফিলে নিথোএ থারিজক, ইখো বিসং আগানিংআমিং। উনোন যীশু আগানজক, 6 “না·সংদে ইরাংখো নিক্কিংআ, ইন্দিবা ইন্দাকগিবা সাল রি·বানুয়া জেনসালো রং·থি গি·সানি সাক্কাও রং·থি গি·সাবা দংজানুয়া; গিম্মিকখোন ফি·এ গালনুয়া।” 7 জা·রিকগিবারাং যীশুখো সিং·জক, “স্খিগিবা, বাসোকো ইরাং হং·নুয়া আরো বাগিবা চিনখো নিক্কে চিংআ হা·আইনা মা·ন্নুয়া ইরাং হং·আনি সাল সকবাজক?” 8 যীশু আগানচাকজক, “নিবো, জেদাক্কে দারাংবা না·সংখো ব্রাংএতনা মান·জা, মুয়ানা বাং·এন আংনি বিমুংও রি·বাএ আগান্নুয়া, ‘আংআন খ্রীষ্ট’ আরো ‘সাল সেফাংজক।’ বিসংখো দা·আ জা·রিকাবো। 9 জেনসালো না·সং দাকগ্রিক্কানি আরো থম·থমগিজারাংনি খাৎথাখো খিন্নানুয়া উনো দা·আ জাজ্রেংআবো, মুয়ানা স্খাং ইরাং হং·চেংনোন; ইন্দিবা উনোন বন·খামানি সাল সকবানুয়া ইন্দাকে হং·জা।” 10 জা·মানো যীশু বিসংনা আগানজক, “জাতসা জাতগিপ্পিননি সাক্কাও আরো হা·সংসা হা·সং গিপ্পিননি সাক্কাও দাকগ্রিকনুয়া। 11 বিল্লংএন বাংগুরিনুয়া আরো গিপ্পিন গিপ্পিন হা·দামরাংচা আকাল আরো সাবিসিরাং হং·নুয়া। ইনাআগ্রে সিলগা সাক্কাও ইন্দাকগিবা আইয়াও ইনমানানিরাং হং·নুয়া আরো চিনরাংখো নিকনুয়া জেরাং নাম্মেন বিল্লংআনি আরো খেনচাকবিয়ানি হং·আ। 12 “ইয়া গিম্মিক হা·সেলরাং হং·না স্খাং মান্দিরাং না·সংখো রিম·নুয়া আরো না·সংখো দুক হ·ন্নুয়া। বিচাল দাকনা ইন্নে মান্দিরাং না·সংখো থম·দাকরামচা রা·আংনুয়া আরো জেলো দন্নুয়া। আংনি গিম্মিন রাজারাংনি আরো শাসন দাকগিবারাংনি মিকখাংচানা না·সংখো রিম্মাংনুয়া, 13 আরো উনোদে আংনি গিম্মিন সাক্ষি হ·ন্না না·সংনা চল হং·নুয়া। 14 না·সং দা·আওন গিসিকথাংথাংও চানচিসোবো, উনো আন·থাংনা চাক্কে খাৎথা আগান্না না·সং স্খাংখাংআরি দা·আ থারিয়ে দংসোআবো, 15 মুয়ানা আংআ না·সংনা ইন্দাকগিবা খাৎথা আরো হা·আইয়ানিখো হ·ন্নুয়া জেদাক্কে নাং·নি আগানচাক্কানা বোবিলরাং মামুংখো ইন্না মান·জানুয়া আরো উখো জিচাকনাবা মান·জানুয়া। 16 না·সংনি মা·আ ফাআ, জংআদা, রিপ্পেংস্খা আরো সংসুল-নকসুলরাং না·সংখো রি·ম্মে হ·ন্নুয়া। বিসং না·সংওনি সাখো সাখোবা স·ওতে গালনুয়া। 17 আংনি গিম্মিন গিম্মিকান না·সংখো মিৎচিনুয়া, 18 ইন্দিবা মামুং দাক্কেন না·সংনি খিন্নি দিংসাবা গিম্মাজানুয়া। 19 না·সং থম·থমে দংওদে না·সংনি খাকখেৎ জাংগি চু·সকনুয়া। 20 “যিরূশালেমখো সিপাইরাংনি উইলউইলে দংআখো জেনসালো না·সং নিকনুয়া উনসালো হা·আইবো, যিরূশালেম ব·ন্না সাল সেফাংজক। 21 উনসালো যিহূদিয়াও দংগিবারাং হা·ব্রিরাংচানা খাত্তাংখানা। সংজিলমাও দংগিবারাং সংজিলমানি হা·ফালচানা রি·য়াংখানা। সংরাংও দংগিবারাং মামুং দাক্কেবা সংজিলমাও রি·বাজাখানা, 22 মুয়ানা ইয়া সালরাং শাস্তি মা·ন্নানি সাল হং·নুয়া, আরো উনি গিম্মিন রংথালগিবা শাস্ত্রও জেগিত্তা চক্কা দংআ উয়া চু·সকনুয়া। 23 উনো হা·ন্নোগ্মাংগিবারাং আরো বি·সানা সক খানগিবারাংনি অবস্থা বাদাকফিলেন বিল্লংনুয়া! হা·সংও বিল্লংএন দুক সকবানুয়া আরো যিহূদীরাংনি সাক্কাও ইসলনি খা·আওনাংআ সকবানুয়া। 24 মি·ল্লামচা বিসংখো স·ওতে গালনুয়া আরো গিম্মিক জাতরাংও বিসং বন্দি হং·এ দংনুয়া। জেওনা দিপ্পাৎ গিপ্পিন জাতরাংনি সাল চু·সকজানুয়া উয়োনা দিপ্পাৎ গিপ্পিন জাতরাং যিরূশালেমখো জা·ফা নিং·আও গা·বেবেকনুয়া। 25 “উনোন সাল, জাজং আরো আস্কিরাংও বাং·আ চিনরাংখো নিকনা মা·ন্নুয়া। হা·গিলসাকো গিম্মিক জাতরাং দুক মা·ন্নুয়া আরো সাগালনি গা·ম্মানা আরো চিনি ফকফেকারাংনা বিসং নাম্মেন জাজ্রেংনুয়া। 26 হা·গিলসাকো মুয়া হং·বাংজক ইখো চানচিয়ে খেনচাকে মান্দিরাং সিবকনুয়া, মুয়ানা জাজং-সাল-আস্কি ইরাং থম·থমে দংজানুয়া। 27 উয়া সময়ও মান্দিনি দেফান্থিখো বাং·আ বিল আরো রাসংখো রা·এ গাদিলাও দাক্কে রি·বাখো নিকনুয়া। 28 ইরাং হং·বামিত্তিংও না·সং চাখাতবো আরো মিকখাং দি·চাবো, মুয়ানা না·সংনি জক্কানি সাল সেফাংজক।” 29 উনি জা·মানো যীশু বিনি জা·রিকগিবারাংনা স্খিনা ইন্নে ইয়া খাৎথাখো আগানজক, “ডুমুর বিফাং আরো গিপ্পিন বিফাংরাংখো নিবো। 30 বিজাক ওয়াতবাজকোনো দিং·খারি সকবাজক ইন্নে না·সং হা·আইনা মা·ন্না। 31 উয়ানদাক্কে জেনসালো না·সং ইরাং হং·আখো নিকনুয়া উনোন হা·আইনা মা·ন্নুয়া ইসলনি সংনক সেফাংজক। 32 আংআ না·সংনা বিবিন আগানিংআ, জেনসালো ইরাং হং·নুয়া উনোবা ইয়া চাসংনি মিত্তাম মান্দিরাং থাংএ দংখুনুয়া। 33 সিলগা আরো হা·গিলসাক ব·ন্নাংনুয়া, ইন্দিবা আংনি খাৎথা ফাংনাজলনা দংনুয়া। 34 “না·সং সিমসাকে দংবো জেদাক্কে চা·ফেক্কানা রিংফেক্কানা আরো নকদাংনি চানচিয়ারাংনা না·সংনি খা·থং জ্রিমবিয়ে গা·আকজা। ইন্দাকজাওদে জা·গা জেদাক্কে রাং·গিত্তিক চিপচাংআ উয়ানদাক্কে উয়া সালবা রাং·গিত্তিক না·সংনি সাক্কাও, আরোবা হা·গিলসাকনি গিম্মিক মান্দিনি সাক্কাও রি·বানুয়া। 36 মিকরাকে দংবো আরো সালাজ্রিং বি·বো জেদাক্কে হং·গিবারাংখো বাত্তাংনা আরো মান্দিনি দেফান্থিনি মিকখাংওনা রি·য়াংএ চাদেংনা বিলখো না·সং মা·ন্না।” 37 উয়া সময়রাংও সালাজ্রিংআন যীশু থরম নক্কো স্খিয়ে হ·ন্নুয়ামিং, ইন্দিবা ওয়াল্লোদে হা·ফালচা রি·য়াংএ জৈতুন হা·ব্রিওনা দংনুয়ামিং। 38 গিম্মিক মান্দিরাং বিনি খাৎথাখো খিন্নাথিমনা থরম নক্কো ফ্রিংওয়ালনি রি·বানুয়ামিং।

লূক 22

1 উয়া সময়ও যিহূদীরাংনি ওয়ানথি গ্রি রুটি চা·আনি সাল সেফাংজকমিং। উয়া সালখো ওয়াতচাংআনি সাল ইন্নেবা মিংআ। 2 খামাল দাল·গিবারাং আরো শাস্ত্র স্খিগিবারাং যীশুখো সিউল দাক্কে স·ওতে গালনা চলখো সান্দিংআমিং, মুয়ানা বিসং মান্দিরাংনা খেন্নুয়ামিং। 3 উনোন যিহূদা, জেখো ইষ্করিয়োৎ মিংআমিং, বিনি নিং·আও শয়তান নাপজক। ইয়া যিহূদা যীশুনি সাকচিগ্মি জা·রিকগিবারাংওনি সাকসামিং। 4 বাদিকে দাক্কে যীশুখো খামাল দাল·গিবারাংনি আরো থরম নক্কো কাম দাকগিবারাংনি জাক্কো রি·ম্মে হ·ন্নুয়া ইনি গিম্মিনো বিয়া রি·য়াংএ বিসংমুং আগানগ্রিকজক। 5 ইনি গিম্মিন বিসং খুসি হং·বিয়ে যিহূদানা থাংখা হ·ন্না খু·রাচাকজক। 6 উনোন যিহূদা গং·এ নাম্মা চলখো সান্দিনা হা·বাচেংজক জেদাক্কে মান্দিরাংনি মিৎথিনাও যীশুখো রি·ম্মে হ·ন্না মা·ন্না। 7 ওয়ানথি গ্রি রুটি চা·আনি সালো ওয়াতচাংআনি চা·আনি গিম্মিন মেষ বি·সাখো দে·ন্নুয়ামিং। উয়া সাল সকবানি জা·মানো যীশু পিতর আরো যোহনখো ইখো আগানে ওয়াত্তেতজক, “না·সং রি·য়াংএ আনচিংনা ওয়াতচাংআনি চা·আখো থারিসোবো জেদাক্কে আনচিং উখো চা·না মা·ন্না।” 9 বিসং যীশুখো সিং·জক, “না·আ চিংখো বানো ইয়া চা·আনিখো থারিখানা আগানিংআ?” 10 যীশু আগানজক, “নিবো, না·সং সংজিলমাও নাপমিত্তিংও সাকসা মি·আসাখো গিম্বিও দাক্কে চি রা·আংআখো নিকনুয়া। বিখো জা·রিকে বিয়া জে নক্কোনা নাপনুয়া উয়া নকনি নকগিবানা আগানবো, ‘স্খিগিবা হা·আইনা হা·ম্মিংআ, বিয়া জা·রিকগিবারাংমুং জেও ওয়াতচাংআনি চা·আনিখো চা·না মা·ন্না উয়া নক বানো?” 12 উনোন বিয়া না·সংনা গাদাং সাক্কানি থারিয়ে দনগিবা নকদ্রিং গি·সাখো ফিন্নিকেতনুয়া; উয়োন গিম্মিকখো থারিসোবো।” 13 বিসং রি·য়াংএ যীশুনি আগানা গিত্তান গিম্মিকখো নিকনা মান·জক আরো ওয়াতচাংআনি চা·আনিখো থারিজক। 14 জা·মানো যীশু জা·রিকগিবারাংমুং চা·না আসংজক। 15 বিয়া বিসংনা আগানজক, “আংনি দুক চাকনা স্খাং না·সংমুং ওয়াতচাংআনি ইয়া চা·আখো চা·না আংআ হা·সিকবিয়ামিং। 16 আংআ না·সংনা আগানিংআ, ইসলনি সংনকো ইয়া চু·সকজানা দিপ্পাৎ আংআ মামুং সালোবা ইখো চা·ফিলজানুয়া।” 17 ইনি জা·মানো যীশু রিংচাক্রাখো রা·জক আরো ইসলখো মিৎথেলে ইনজক, “না·সংনি গিসেপো ইখো সুআলে রা·বো, 18 মুয়ানা আংআ না·সংনা আগানিংআ, দা·আলোনি ইসলনি সংনক রি·বাখুজানা দিপ্পাৎ আংআ মামুং সালোবা আংগুরনি বিৎচিখো রিংখুজানুয়া।” 19 জা·মানো বিয়া রুটিখো রা·এ ইসলখো মিৎথেলজক। জা·মানো উয়া রুটিখো ফি·থংথাংএ জা·রিকগিবারাংনা হ·ন্নে আগানজক, “ইয়া আংনি বে·এন জেখো না·সংনা হ·ন্নুয়া। আংখো গিসিক রা·না ইন্দাকে দাকবো।” 20 চা·আনি জা·মানো উয়ানদাক্কে বিয়া রিংচাক্রাখো বিসংনা হ·ন্নে আগানজক, “আংনি হান·চিচা ইসলনি হন·গিবা জে গিত্তাল খু·রাচাক্কাখো রা·রিকনুয়া ইয়া রিংচাক্রা উয়া খু·রাচাক্কানি চিন হং·আ। আংনি ইয়া হান·চিখো না·সংনা হ·ন্নুয়া। 21 নিবো, আংখো রি·ম্মে হন·গিবানি জাক আংনি জাকমুং ইয়া টেবিলনি সাক্কাওন দংআ। 22 বিবিন ইসল জেখো থারিয়ে দনসোজক উয়ানদাক্কেন মান্দিনি দেফান্থি সিবিবিনুয়া; ইন্দিবা দা·নাং উয়া মান্দিনা, জে মান্দি বিখো রি·ম্মে হ·ন্না!” 23 জা·রিকগিবারাং সাকসা সাকগিপ্পিনখো সিং·না হা·বাচেংজক, বিসংনি গিসেপো সা ইন্দাকগিবা কামখো দাকনুয়া। 24 সাখো গিম্মিকনা বাত্তে দাল·বাৎগিবা ইন্নুয়া ইখো রা·এ জা·রিকগিবারাং ইনগ্রিকজক। 25 যীশু বিসংনা আগানজক, “গিপ্পিন জাতরাংনি সাক্কাওন রাজারাং গিত্তেল দাক্কা আরো বিসংনি শাসন দাকগিবারাংখো নাম্মাখো দাকগিবা ইন্না, 26 ইন্দিবা না·সংও ইন্দাকে হং·না খ্রাজা। না·সংনি গিসেপো দাল·বাৎগিবা চনবাৎগিবা গিত্তা হং·খানা, আরো জেআন দাল·গিবা হং·আ, বিয়া দাকচাকে হন·গিবা গিত্তা হং·খানা। 27 সা দালবাৎগিবা হং·আ, চা·না আসংগিবামা, দাকচাকে হন·গিবা? চা·না আসংগিবা হং·জামা? ইন্দিবা আংআ না·সংও দাকচাকে হন·গিবা গিত্তা হং·জক। 28 “আংনি দুকনি সালো না·সং আংখো ওয়াত্তে রি·য়াংজা। 29 আংনি ফাগিবা জেদাক্কে আংনা শাসন দাকনা বিলখো হন·জক উগিত্তা আংআবা না·সংনা বিলখো হ·ন্নিংজক। 30 ইনি গিম্মিন আংনি সংনক্কো না·সং আংমুং চা·নুয়া রিংনুয়া আরো সিংহাসনও আসংএ ইস্রায়েলনি মা·চং সাকচিগ্মিখো বিচাল দাকনুয়া। 31 “শিমোন, শিমোন, নিবো, শয়তান না·সংখো গমখো চালুনিও চালিয়া গিত্তা চালি নিনা ইন্নে বি·জক। 32 ইন্দিবা নাং·নি বিবিরা·আ গিম্মাজাখানা ইন্নে আংআ নাং·না বি·চাকজক । জেনসালো না·আ আংচানা ফিল·বানুয়া উনসালো নাং·নি ইয়া জংআদারাংখো বিলগ্মাং দাক্কেতবো।” 33 পিতর যীশুনা আগানজক, “গিত্তেল, নাং·মুং আংআ জেলোনা রি·য়াংনা আরো সিনাবা মা·ন্না।” 34 যীশু আগানচাকজক, “পিতর, আংআ নাং·না আগানিংআ, দা·আল দো·ও গিসিকনা স্খাং না·আ আংখো হা·আইজা ইন্নে রাং·গিত্থাম জিচাকনুয়া।” 35 জা·মানো যীশু বিনি জা·রিকগিবারাংনা আগানজক, “জেনসালো না·সংখো আংআ থাংখানি জেপ, দকরা আরো জা·খপ গ্রি ওয়াত্তেতামিং উনো না·সং মামুংনা দিল্লামিংমা?” জা·রিকগিবারাং আগানজক, “হং·জা, মামুংনাবা দিলজামিং।” 36 যীশু আগানজক, “ইন্দিবা দা·আও আংআ আগানিংআ, জেনি থাংখানি জেপ বা দকরা দংআ বিয়া উখো রা·আংখানা। জেনি মি·ল্লাম দংজা বিয়া বিনি বে·এননি বা·রাখো ফাল্লে গি·সা মি·ল্লাম ব্রিখানা। 37 রংথালগিবা শাস্ত্রও চক্কা দংআ, ‘বিখো পাপীরাংমুং চানজক।’ আংআ না·সংনা আগানিংআ, ইয়া খাৎথা আংওন চু·সকনা নাংনুয়া, মুয়ানা আংনি গিম্মিনো চক্কা দংগিবা চু·সকনা রি·য়াংইংজক।” 38 উনোন জা·রিকগিবারাং আগানজক, “গিত্তেল, নিবো, ইনো গি·গ্মি মি·ল্লাম দংআ।” যীশু আগানচাকজক, “দে, চু·ওংআ।” 39 যীশু উয়া হা·দামখো ওয়াত্তে আন·থাংনি বেওয়াল গিত্তা জৈতুন হা·ব্রিওনা রি·য়াংজক। বিনি জা·রিকগিবারাং বিখো জা·রিকাংজক। 40 উয়া হা·দামওনা সক্কানি জা·মানো যীশু বিসংনা আগানজক, “বি·বো জেদাক্কে রুরাও গা·আকজা।” 41 জা·মানো যীশু জা·রিকগিবারাংওনি দাং·দাংচা রি·য়াংএ জা·স্খু দে·ম্মে বি·না হা·বাচেংজক, 42 “আপফা, না·আ হা·সিকোদে দুকনি ইয়া রিংচাক্রাখো আংওনি রা·আংবো। ইন্দাকোবা আংনি হা·সিকা গিত্তা হং·জা, নাং·নি হা·সিকা গিত্তান হং·খানা।” 43 উনোন সালগিওনি সা·গ্রে সাকসা রি·বাএ যীশুখো বিল্লাকেতজক। 44 গিসিকো দুক মা·ন্নে যীশু আরোবা মল·মলে বি·চাকজক। বিনি বে·এননি খ্রামচি হান·চি গিত্তা হা·আও গা·আকনা নাংজক। 45 বি·আনি জা·মানো চাখাত্তে বিয়া বিনি জা·রিকগিবারাংচা রি·বাজক। গিসিকো দুক মা·ন্নে নেং·বকে জা·রিকগিবারাংনি থুয়াখো নিক্কে যীশু বিসংখো আগানজক, “মুয়ানা থুয়ে দংআ? চাখাত্তে বি·বো জেদাক্কে রুরাও গা·আকজা।” 47 যীশু উনোবা খাৎথা আগানিংআমিং উনোন বাং·আ মান্দি রি·বাজক। বিনি সাকচিগ্মি জা·রিকগিবারাংওনি সাকসা যিহূদা মিংগিবা উয়া মান্দিরাংনা স্খাং স্খাং রি·বাংআমিং। যীশুখো খু·দিমনা ইন্নে যিহূদা বিনি সেফাংওনা রি·বাজক। 48 উনোন যীশু বিনা আগানজক, “যিহূদা, মান্দিনি দেফান্থিখো খু·দিমে রি·ম্মে হ·ন্নিংজকমা?” 49 মুয়া হং·না হা·ম্মিংজক উখো যীশুনি সামব্রিও দংগিবারাং হা·আইনা মান·জক। ইনি গিম্মিন বিসং যীশুনা আগানজক, “গিত্তেল, চিংআ মি·ল্লামচা স·ওতনুয়ামা?” 50 জা·রিকগিবারাংওনি সাকসা খামাল দাল·বাৎগিবানি নকখলনি জাক্রানি নাচিলখো মি·ল্লামচা দেন·ফাকেতজক। 51 যীশু আগানজক, “দে আগ্রেফিলে হং·জা।” ইখো আগানে বিয়া উয়া মান্দিনি নাচিলখো দাংথাপেতে বিখো নাম্মেতজক। 52 যীশুখো রিম·না রি·বাগিবা খামাল দাল·গিবারাং, থরম নক্কো কাম দাকগিবারাং আরো মি·আফারাংনা যীশু আগানজক, “আংআ রা·সেকগিবামা, না·সং মি·ল্লাম আরো মাংগতখো রা·এ রি·বাজক? 53 সালাজ্রিং আংআ থরম নক্কো না·সংনি মিকখাংও দংআমিং, ইন্দিবা উনোদে না·সং আংখো রিম·জাজক। ইন্দিদে দা·আও না·সংনিন সাল হং·আ; আন্দালানি বিলখো দা·আও নিকনা মা·ন্নিংজক।” 54 উনোন বিসং যীশুখো খামাল দাল·বাৎগিবানি নক্কোনা রি·ম্মে রা·আংজক। পিতর চেল·গ্রিক্কে দংএ জা·মান জা·মান রি·য়াংআমিং। 55 পিতর রি·বাএ হা·থিলা জাংচিও ওয়া·আল সো·এ আসংএ দংগিবারাংনি গিসেপো আসংজক। 56 সাকসা নকখল মিচিক উয়া ওয়া·আলনি সেং·আও পিতরখো নিকজক আরো নাম্মেদাক্কে নিএ আগানজক, “ইয়া মান্দিবা বিমুং দংফামিং।” 57 পিতর জিচাকে আগানজক, “আংআ বিখো হা·আইজা।” 58 উনি জা·মানো সাকগিপ্পিন বিখো নিক্কে আগানজক, “না·আবা বিসংওনি সাকসা হং·আ।” পিতর আগানজক, “হং·জা, আংআদে হং·জা।” 59 ঘণ্টাসা জা·মানো দা·আও সাকসা রাক্কেন আগানজক, “বিবিন ইয়া মান্দি বিমুং দংফামিং, মুয়ানা বিয়াদে গালীল হা·দকনি মান্দি।” 60 পিতর আগানজক, “নিবো, না·আ মুয়াখো আগানিংআ আংআ হা·আইজাংজক।” পিতরনি খাৎথা আগানা বন·স্রাপগিজান মাংসা দো·ও গিসিকজক। 61 উনোন গিত্তেল পিতরচানা ফি·ল্লে নিএতজক। ইনি গিম্মিন গিত্তেলনি আগানগিবা উয়া খাৎথাখো পিতর গিসিক রা·জক, “দা·আল দো·ও গিসিকনা স্খাং রাং·গিত্থাম না·আ আংখো হা·আইজা ইন্নে জিচাকনুয়া।” 62 উনোন পিতর হা·ফালচানা রি·য়াংএ নাম্মেন গ্রাপবিজক। 63 যীশুখো রাক্ষিগিবারাং বিখো খা·দিংস্থেকনা আরো দকনা হা·বাচেংজক। 64 বিসং যীশুনি মিক্রোনখো খাথিপে আগানজক, “দে আগানে নি, সা নাং·খো দকজক?” 65 ইন্দাকে বিসং খাৎথা বাং·আরাংখো আগানে বিখো চন্নিকজক। 66 ফ্রিংও যিহূদীরাংনি মি·আফারাং, খামাল দাল·গিবারাং আরো শাস্ত্র স্খিগিবারাং আপসান নাংরিমজক আরো যীশুখো বিসংনি দাল·বাৎগিবা খ্রিমানি মিকখাংওনা রিম্মাংএ আগানজক, 67 “না·আ খ্রীষ্ট হং·ওদে চিংনা আগানবো।” যীশু আগানজক, “আংআ আগানোবা না·সং মামুং দাক্কেন বিবিরা·জানুয়া আরো না·সংচা মামুংখো সিং·ওবা আগানচাকজানুয়া। 69 ইন্দিবা মান্দিনি দেফান্থি দা·আলোনি বিল্লাকগিবা ইসলনি জাক্রাচা আসংএ দংনুয়া।” 70 উনোন গিম্মিকান সিং·জক, “ইন্দাকোদে না·আ ইসলনি দেফান্থি হং·আমা?” বিয়া বিসংনা আগানজক, “না·সং খাকখেৎখোন আগানা, আংআন উয়া।” 71 উনোন দাল·গিবারাং আগানজক, “আনচিংনা মুয়া সাক্ষিখো নাংখুনুয়া? আনচিং আন·থাংথাংআন বিনি খু·সুকো খিন্নানা মান·জক।”

লূক 23

1 উনোন উয়া খ্রিমানি মান্দি গিম্মিক চাখাত্তে যীশুখো রোমনি দাল·বাৎগিবা শাসন দাকগিবা পীলাতচা রিম্মাংজক। 2 বিসং ইখো ইন্নে যীশুখো দোস হন·জক, “ইয়া মান্দি চিংনি জাতখো ব্রাংএতা, ইখো চিংআ নিকনা মা·ন্না। বিয়া দাল·বাৎগিবা রাজানা খাজিনা হ·ন্না বেং·আ আরো বিয়া আন·থাংখো খ্রীষ্ট, সাকসা রাজা ইন্নে আগানা।” 3 পীলাত যীশুখো সিং·জক, “না·আ যিহূদীরাংনি রাজা হং·আমা?” যীশু আগানজক, “না·আ খাকখেৎখোন আগানজক।” 4 উনোন পীলাত খামাল দাল·গিবারাংনা আরো মান্দি গিম্মিকনা আগানজক, “আংআদে ইয়া মান্দিনি মামুং দোসখোন নিকজাংআ।” 5 ইন্দিবা বিসং জেৎজেতারি ইন্না হা·বাচেংজক, “যিহূদিয়া হা·দক গিম্মিকো স্খিয়ে হ·ন্নে ইয়া মান্দিরাংখো খা·আওনাংএতিংজক। গালীল হা·দকোনি দা·আও ইয়োনা দিপ্পাৎ সকবাজক।” 6 ইয়া খাৎথাখো খিন্নাএ পীলাত সিং·জক যীশু গালীল হা·দকনি মান্দি হং·আমা হং·জা। 7 যীশু শাসন দাকগিবা হেরোদনি হা·খিংওনি হং·আ, ইখো হা·আইনা মা·ন্নে পীলাত বিখো হেরোদচা ওয়াত্তেতজক। উনো হেরোদবা যিরূশালেমো দংআমিং। 8 যীশুখো নিক্কে হেরোদ খুসি হং·বিজক। বিয়া যীশুনি গিম্মিন বাং·এন আগানারাংখো খিন্নামিং, উনি গিম্মিন স্খাংওনিন বিয়া বিখো নিনা হা·সিকামিং। যীশু আইয়াও ইনমানগিবা কামখো দাক্কে ফিন্নিকনুয়া ইন্নে হেরোদ চানচিয়ামিং। 9 বিয়া যীশুখো বাং·এন সিং·জক, ইন্দিবা যীশু মামুংখোন আগানচাকজাজক। 10 খামাল দাল·গিবারাং আরো শাস্ত্র স্খিগিবারাং উয়ো চাদেংএ চ্রিকে যীশুখো দোস হ·ন্না হা·বাচেংজক। 11 উনোন হেরোদ যীশুখো চন্নিকজক আরো খা·দিংস্থেকজক, আরো বিনি সিপাইরাংবা উগিত্তান দাকজক। উনি জা·মানো যীশুনা নামগিবা বা·রাখো গান্নেতে বিয়া বিখো পীলাতওনা ওয়াত্তেতফিলজক। 12 ইনা স্খাং হেরোদ আরো পীলাতমুং বোবিল হং·গ্রিক্কামিং, ইন্দিবা উনিসালোনি বিসং রিপ্পেং হং·গ্রিকজক। 13 পীলাত উনোন দাল·গিবা খামালরাংখো, দাল·গিবারাংখো আরো মান্দিরাংখো রিক্কামচিম্মংএ আগানজক, 14 “না·সং ইয়া মান্দিখো, মান্দিরাংখো ব্রাংএতিংআ ইন্নে দোস হ·ন্নে আংচানা রা·বাজক। ইন্দিবা আংআ বিখো না·সংনি মিকখাংওন নাম্মেদাক্কে সিং·এ নিজক। না·সংনি দোস হ·ন্না গিত্তা বিনি মামুং নামগিজাখোন আংআ নিকজাজক। 15 হেরোদবা বিনি মামুং নামগিজাখো মান·জা, মুয়ানা বিয়া বিখো চিংচানা ওয়াত্তেতফিলজক। না·সং নিকনা মা·ন্নিংজকান স·ওতে গালনা গিত্তা মামুং নামগিজা কামখোবা বিয়া দাকজা। 16 উনি গিম্মিন আংআ বিখো শাস্তি হ·ন্নে ওয়াত্তেতনাজক।” 17 বিয়া ইখো আগানজক মুয়ানা ওয়াতচাংআনি সালো রাং·ফ্রাকোন সাকসা বন্দিখো ওয়াত্তেতনা নাংনুয়ামিং। 18 ইন্দিবা মান্দিরাং আপসান চ্রিকে আগান্না হা·বাচেংজক, “বিখো হা·রিকেতবো, বারা্ববাখো চিংচা ওয়াত্তেতবো।” 19 ইয়া বারা্ববাখো সংজিলমাও বামগিজা দংআনা আরো স·ওতারাংনি গিম্মিন জেলো দন্নামিং। 20 ইন্দিবা পীলাত যীশুখো ওয়াত্তেতনা হা·সিকামিং, উনি গিম্মিন বিয়া মান্দিরাংনা দা·আবা উয়া খাৎথাখোন আগানজক। 21 ইন্দিবা মান্দিরাং চ্রিকে চ্রিকে ইনথকজক, “বিখো চিসলো দাৎখাপবো, চিসলো দাৎখাপবো।” 22 পীলাত রাং·গিত্থাম মান্দিরাংখো ইনজক, “মুয়ানা, ইয়া মান্দি মুয়া নামগিজাখো দাকজক? আংআদে বিনি মামুং দোসখোন নিকজাংআ জেদাক্কে বিনা সিয়ানি শাস্তিখো হ·ন্না মা·ন্না। উনি গিম্মিন আংআ বিনা দিংথাং শাস্তিখো হ·ন্নানি জা·মানো বিখো ওয়াত্তেতনাজক।” 23 ইন্দিবা মান্দিরাং যীশুখো চিসলো দাৎখাপনা চ্রিকজক আরো বিসং চ্রিকেন হামজক। পীলাত মান্দিরাংনি খাৎথাখো মানিয়ে রা·না চানচিজক। 24 বামগিজা দংআনা আরো স·ওতানি গিম্মিন জেখো জেলো দন্নামিং মান্দিরাং বিখোন হা·ম্মামিং; উনি গিম্মিন পীলাত উয়া মান্দিখো ওয়াত্তেতজক আরো মান্দিরাংনি হা·সিকা গিত্তা যীশুখো স·ওতে গালখানা বিসংনি জাক্কো হন·জক। 26 সিপাইরাং যীশুখো রিম্মাংমিত্তিংও শিমোন মিংগিবা কুরীণী সংজিলমানি সাকসা মান্দি সংচাবাক্কানি রি·বাংআমিং। সিপাইরাং বিখো রি·ম্মে চিসলখো বিনি ফাকখ্রংও গাত্তেতজক জেদাক্কে বিয়া যীশুনি জা·মান জা·মান চিসলখো রিপ্পিএ রা·আংনা মা·ন্না। 27 মান্দি বাং·আ যীশুখো জারিকিংআমিং। বিসংনি গিসেপো বাং·আ মিচিকরাংবা দংআমিং। বিসং খা·আখো দক্কে গ্রাপিংআমিং। 28 যীশু বিসংচা নিএতে আগানজক, “যিরূশালেমনি মিচিকরাং, আংনা দা·আ গ্রাপাবো। না·সং আন·থাংথাংনা আরো না·সংনি দেদ্র্রাংনা গ্রাপবো, 29 মুয়ানা ইন্দাকগিবা সাল রি·বাংজক জেনসালো মান্দিরাং আগান্নুয়া, ‘জেরাংনি বি·সা-আংদি দংজা আরো জেরাং বি·সানা সক খানজা উয়া সা·গ্রি মিচিকরাং ফাত্তিয়াখো মান·গিবা হং·আ।’ 30 উনসালো মান্দিরাং দালদাল·গিবা হা·ব্রিখো ইন্নুয়া, ‘চিংনি সাক্কাও গা·আকদাপবো,’ আরো চনচনগিবা হা·ব্রিখো ইন্নুয়া, ‘চিংখো ফিনদাপে দনবো।’ 31 বিফাং গিত্থাংমিত্তিংওন মান্দিরাং ইন্দাকে দাক্কোদে ইন্দিদে বিফাং রা·ন্নানি জা·মানো বাদাকস্রাংনুয়া!” 32 সিপাইরাং স·ওতে গালনা সাকগ্মি গ্রো নাংগিবা মান্দিখোবা যীশুমুং রিম্মাংজক। 33 স্খু বিখ্রক মিংগিবা হা·দামওনা সক্কে বিসং যীশুখো আরো উয়া সাকগ্মি গ্রো নাংগিবা মান্দিখো চিসলো দাৎখাপজক- সাকসাখো যীশুনি জাক্রাচা আরো সাকগিপ্পিনখো জাক্কাসিচা। 34 উনোন যীশু আগানজক, “আপফা, ইরাংখো ক্ষেমা দাকবো, মুয়ানা ইরাং মুয়াখো দাক্কিংআ উখো হা·আইজা।” বিসং লটারি খা·ল্লে যীশুনি বা·রারাংখো আন·থাংথাংও সুআলে রা·জক। 35 মান্দিরাং চাদেংএ নিংআমিং। থরমনি দাল·গিবারাং যীশুখো খা·দিংস্থেকে ইনজক, “বিয়াদে গিপ্পিনরাংখো জক্কেৎনুয়ামিং। বিয়া খ্রীষ্ট হং·ওদে, ইসলনি বাচ্ছিয়ে রা·গিবা মান্দি হং·ওদে আন·থাংখো জক্কেৎখানা।” 36 সিপাইরাংবা বিখো খা·দিংস্থেকনা হা·বাচেংজক। বিসং যীশুখো চা·খানা ইন্নে মেসেং বিৎচিখো বিচা রা·আংএ আগানজক, 37 “না·আ যিহূদীরাংনি রাজা হং·ওদে আন·থাংখো জক্কেৎবো।” 38 চিসলো বিনি স্খু সাক্কাও ইন্দাকে চক্কে দন্নামিং, “ইয়া মান্দি যিহূদীরাংনি রাজা হং·আ।” 39 চিসলো দাৎখাপা মান·গিবা সাকগ্মিওনি সাকসা যীশুখো খা·দিংস্থেকে ইনজক, “না·আ খ্রীষ্ট হং·আমা? ইন্দাকোদে আন·থাংখো আরো চিংখো জক্কেৎবো।” 40 উনোন সাকগিপ্পিন মান্দি বিখো খা·চাএ আগানজক, “না·আ ইসলনা খেনজামা? না·আবা আপসান শাস্তিখোন মা·ন্নিংজক। 41 আনচিংদে খ্রাগিবা শাস্তিখোন মা·ন্নিংজক। আনচিংনি মা·ন্নানিখো আনচিং মা·ন্নিংজক, ইন্দিবা ইয়া মান্দিদে মামুং নামগিজাখো দাকখুজা।” 42 জা·মানো বিয়া আগানজক, “যীশু, জেনসালো না·আ সংনকখো রা·এ ফিল·বানুয়া উনো আংখো গিসিক রা·বো।” 43 যীশু বিনা আগানচাকজক, “আংআ নাং·না বিবিন আগানিংআ, না·আ দা·আলোন আংমুং সংনক্কো দংফানুয়া।” 44 উনোন সালজাৎচি হং·জক। সাল থেং·সুজাজক আরো হা·গিম্মিক আন্দালে দংজক। গিত্থাম বাজিয়াওনা দিপ্পাৎ উয়ানদাক্কেন দংজক। যিরূশালেমনি থরম নকনি গিমফেংগিবা পর্দা চিৎগ্মি দাক্কে দ্রাকজক। 46 যীশু চ্রিকে ইনজক, “আপফা, আংআ নাং·নি জাক্কো আংনি জাংগিখো হন·জক।” ইখো আগানে বিয়া জাংগি গালজক। 47 ইরাংখো নিক্কে সুবিদার ইসলখো মিৎথেলে ইনজক, “বিবিন ইয়া মান্দি গ্রো নাংগিজাগিবামিং।” 48 উনো থম·দাকগিবা মান্দিরাং ইয়া হং·গিবারাংখো নিক্কে খা·আখো দক্কে দক্কে উয়োনি রি·য়াংজক। 49 যীশুখো হা·আইগিবারাং আরো গালীলওনি যীশুমুং রি·বাগিবা মিচিকরাং বিসং গিম্মিকান চে·ল্লাও চাদেংএ গিম্মিকখো নিংআমিং। 50 যোষেফ মিংআ নামগিবা আরো থরমি মান্দি সাকসা দাল·বাৎগিবা খ্রিমানি মান্দি দংআমিং। বিয়া অরিমাথিয়া মিংআ যিহূদীরাংনি সং দামসানি মান্দি হং·আ। 51 যীশুনি গিম্মিনো খ্রিমানি মান্দিরাংমুং বিয়া খু·মংফানা মান·জাজক। বিয়া ইসলনি সংনকনা নিচাকসোএ দংআমিং। 52 পীলাতচা রি·য়াংএ বিয়া যীশুনি মাংগিসিখো হা·ম্মে রা·জক। 53 জা·মানো মাংগিসিখো চিসলোনি রা·ওন্নে বা·রাচা বিল·রিমরিমজক আরো রং·থিখো খিত্তে থারিয়ে দনগিবা গি·সা গোপরামও দনজক। উয়া গোপরামও দারাংখো মামুং সালোবা দনখুজা। 54 উয়া সাল নেং·থাকানি সালনা থারিসোআনি সালমিং। নেং·থাকানি সাল হং·বাচেংআমিং। 55 গালীলওনি যীশুমুং রি·বাগিবা মিচিকরাং যাষেফখো জা·রিকাংএ গোপরামখো নিজক আরো যীশুনি মাংগিসিখো বাদিকে দন্না উখোবা নিজক। 56 জা·মানো বিসং রি·য়াংফিলে বিনা সিম্মিলগিবা তেলখো আরো মলমখো থারিজক। উনি জা·মানো বিসং মোশিনি গি·য়েতা গিত্তা নেং·থাকানি সালো নেং·থাকজক।

লূক 24

1 আনথিনি স্খাংগিবা সালো ফ্রিংওয়ালনি উয়া মিচিকরাং উয়া সিম্মিলগিবা তেলখো রা·এ গোপরামওনা রি·য়াংজক। 2 বিসং গোপরামনি মিকখাংনিখো রং·থিখো জিত্তেতাখো নিকজক, 3 ইন্দিবা গোপরামনি নিং·আওনা নাপ্পে বিসং গিত্তেল যীশুনি বে·এনখো নিকজাজক। 4 উনি গিম্মিন বিসংনি আইয়াও ইনমানে চানচিমিত্তিংওন মিকখা রিপরাপা গিত্তা চিং·চেতা বা·রাখো গানগিবা মান্দি সাকগ্মি বিসংনি কেচ্চিও রি·বাএ চাদেংজক। 5 ইনি গিম্মিন মিচিকরাং খেন্নে স্খুখো বামগোপজক। মি·আসা সাকগ্মি বিসংনা আগানজক, “থাংগিবাখো সিগিবারাংনি গিসেপো মুয়ানা সান্দিংআ? 6 বিয়া ইনো দংজা; বিয়া থাংচাফিলজক। বিনি গালীলও দংমিত্তিংও বিয়া না·সংনা জেখো আগানামিং উখো গিসিক রা·এ নিবো। 7 বিয়া আগানামিং, মান্দিনি দেফান্থিখো পাপী মান্দিরাংনি জাক্কো রি·ম্মে হ·ন্নুয়া। উনি জা·মানো বিখো চিসলো দাৎখাপনুয়া আরো সাল গিত্থামনি সালো দা·আবা বিয়া থাংচাফিলনা নাংনুয়া।” 8 উনোন বিসং উয়া খাৎথাখো গিসিক রা·জক। 9 বিসং গোপরামওনি ফি·ল্লাংএ উয়া সাকচিসা জা·রিকগিবারাংনা আরো গিপ্পিনরাংনা ইয়া খাৎথারাংখো আগানজক। 10 উয়া মিচিকরাংনি গিসেপো মগ্‌দলীনী মরিয়ম, যোহানা আরো যাকোবনি মা·গিবা মরিয়ম দংআমিং। বিসংমুং দংগিবা গিপ্পিন মিচিকরাংবা ইয়া গিম্মিক খাৎথারাংখো ওয়াত্তেতারাংনা আগানজক। 11 ইন্দিবা উয়া খাৎথারাংখো বিসং হং·গিজা-নাংগিজা খাৎথারাং গিত্তা দাকনিকজক। উনি গিম্মিন উয়া মিচিকরাংনি খাৎথাখো বিসং বিবিরা·জাজক। 12 ইন্দিবা পিতর চাখাত্তে গোপরামচানা খাত্তাংজক আরো বামগোপে বা·রারাংখোসান নিকজক। ইন্দাকে হং·আরাংনি গিম্মিন বিয়া আইয়াও ইনমানে ফিল·বাজক। 13 উয়া সালোন সাকগ্মি জা·রিকগিবা ইম্মায়ু মিংগিবা সং দামসাওনা রি·য়াংআমিং। উয়া সং যিরূশালেমোনি মাইল স্নিসা চে·ল্লাও দংআমিং। 14 হং·গিবারাংখো রা·এ বিসং আগানগ্রিকিংআমিং। 15 উয়া সময়ও যীশু আন·থাংআন উনো রি·বাএ বিসংমুং রি·য়াংফানা হা·বাচেংজক। 16 বিসংনি মিক্রোন মিকচিপা গিত্তা দাক্কামিং, উনি গিম্মিন বিসং যীশুখো হা·আইনা মান·জাজক। 17 উনোন যীশু বিসংনা আগানজক, “না·সং মুয়াখো আগানে রি·য়াংইংআ?” উয়া সাকগ্মি জা·রিকগিবা মিকখাং সিমফ্রাকে চাদেংএ দংজক। 18 উনোন ক্লিয়পা মিংগিবা বিসংওনি সাকসা যীশুখো সিং·জক, “না·আন যিরূশালেমনি সাকসা খাম·খাম মান্দিমা জেআন দা·আওরোরো উচা মুয়া হং·ইংজক উখো হা·আইজা?” 19 যীশু বিসংনা আগানজক, “মুয়া হং·ইংজক?” বিসং আগানজক, “নাসরত সংনি যীশুনি গিম্মিন জেরাং হং·জক। বিয়া আগানসোগিবা হং·আমিং। বিয়া কামও আরো খু·সুকও ইসল আরো গিম্মিক মান্দিনি মিক্রোনও বিল্লাকগিবা হং·আমিং। 20 আনচিংনি খামাল দাল·গিবারাং আরো থরমনি দাল·গিবারাং বিখো রোমানরাংনি জাক্কো রি·ম্মে হ·ন্নামিং জেদাক্কে বিসং বিচাল দাক্কে বিনা সিয়ানি শাস্তিখো হ·ন্না। জা·মানো উয়া যিহূদীরাংনি দাল·গিবারাং বিখো চিসলো দাৎখাপামিং। 21 বিয়ান ইস্রায়েলখো ফি·ওকনুয়া ইন্নে চিংআ খা·দংআমিং। ইয়াসান হং·জা, ইরাং হং·আনি দা·আল সালগিত্থাম হং·আংফিলজক। 22 দা·আবা চিংনি দলওনি মিত্তাম মিচিকরাং চিংখো আইয়াও ইনমানেতজক। বিসং ফ্রিংওয়ালনি যীশুনি গোপরামওনা রি·য়াংআমিং, 23 ইন্দিবা উনো বিনি বে·এনখো নিকজাজক। বিসং রি·বাফিলে আগানজক, বিসং সা·গ্রেরাংখো নিক্কা আরো উয়া সা·গ্রেরাং বিসংনা ইখো আগানা যীশু থাংএ দংআ। 24 উনোন চিংমুং দংরিমগিবারাংওনি মিত্তামরাং গোপরামওনা রি·য়াংএ মিচিকরাংনি আগানা গিত্তা নিকজক, ইন্দিবা যীশুখো নিকজাজক।” 25 উনোন যীশু বিসংনা আগানজক, “না·সং মামুংখোন হা·আইজা। না·সংনি গিসিক ইন্দাকফিল্লে গক্কানি গিম্মিন আগানসোগিবারাংনি আগানাখোবা না·সং বিবিরা·জা। 26 ইয়া দুকরাংখো চাক্কে খ্রীষ্টনি রাসংখো মান·দাপানি খাৎথা দংজামিংমা?” 27 উনি জা·মানো বিয়া মোশিনি আরো গিম্মিক আগানসোগিবারাংনি চক্কারাংওনি হা·বাচেংএ রংথালগিবা শাস্ত্রও বিনি আন·থাংনি গিম্মিনো চকগিবা গিম্মিকখোন বিসংনা থাল্লে আগানজক। 28 বিসংনি রি·য়াংগিবা সংনি সেফাংওনা সকবাওন যীশু বাং·এ চে·ল্লাচানা জিত্তাংনা হা·ম্মা গিত্তা দাকজক। 29 উনোন বিসং বিখো মল·মলবিএ আগানজক, দা·আও সাল রি·য়াংজক, হান·থামিংজক। না·আ চিংমুং দংফাবো।” উনি গিম্মিন বিয়া বিসংমুং দংফানা নক্কোনা নাপজক। 30 বিয়া বিসংমুং চা·না আসংওন রুটিখো রা·এ ইসলখো মিৎথেলজক আরো উখো ফি·এ বিসংনা হন·জক। 31 উনোন বিসংনি মিক্রোন এংআংজক; বিসং যীশুখো হা·আইনা মান·জক, ইন্দিবা উনি জা·মানোন বিখো নিকজাজক। 32 উনোন বিসং সাকসা সাকগিপ্পিননা আগানজক, “রামাও বিয়া আনচিংমুং খাৎথা আগানমিত্তিংও আরো রংথালগিবা শাস্ত্রনি অর্থখো আগানমিত্তিংও আনচিংনি খা·থং খামদোজামিংমা?” 33 উনোন উয়া সাকগ্মি চাখাত্তে যিরূশালেমোনা রি·য়াংজক আরো উয়া সাকচিসা জা·রিকগিবারাংমুং গিপ্পিনরাংখোবা হা·দাম দামসানো নিকজক। 34 গিত্তেলনি চাখাতফিল্লানি গিম্মিন আরো শিমোননি মিকখাং ফা·আনি গিম্মিন বিসং উনো আগানিংআমিং। 35 উয়া সাকগ্মি জা·রিকগিবারাং রামাও হং·গিবারাংখো বিসংনা আগানজক। বিনি রুটি ফি·মিত্তিংও বাদিকে দাক্কে বিসং বিখো হা·আইনা মা·ন্নামিং উখোবা বিসং আগানজক। 36 উয়া জা·রিকগিবারাং ইন্দাকে খাৎথা আগানমিত্তিংও যীশু আন·থাংআন বিসংনি গিসেপো রি·বাএ চাদেংএ বিসং গিম্মিকনা আগানজক, “না·সংনি থম·থম হং·খানা।” 37 বিসং মি·মাং নিক্কিংজক ইন্নে চানচিমান্নে নাম্মেন খেনজক। 38 যীশু বিসংনা আগানজক, “মুয়ানা না·সং জাজ্রেংআ আরো মুয়ানা না·সংনি গিসিকও খেনচাকিংআ? 39 আংনি জাক আরো জা·চকখো নিবো। নিবো, ইয়ান আংআ। আংখো রি·ম্মে নিবো, মুয়ানা আংও দংআ গিত্তা মি·মাংনি বে·এন গ্রেংরাং দংজা।” 40 ইয়া খাৎথাখো আগানে যীশু বিনি জাক আরো জা·চকখো বিসংনা ফিন্নিকজক। 41 ইন্দিবা বিসং ইন্দাকফিল্লে আইয়াও ইনমানানি আরো খুসি হং·বিয়ানি গিম্মিন বিবিরা·না মান·জাজক। উনোন যীশু বিসংনা আগানজক, “না·সংনি ইয়ো চা·আনি মামুং দংআমা?” 42 বিসং বিনা না·থক জো·আ মাংসাখো হন·জক। 43 বিয়া উখো রা·এ বিসংনি মিকখাংওন চা·জক। 44 জা·মানো বিয়া বিসংনা আগানজক, “আংআ না·সংমুং দংমিত্তিংও আগানামিং, মোশিনি নিয়ামও, আগানসোগিবারাংনি চকগিবা আরো গীতরাংও আংনি গিম্মিনো চকগিবা গিম্মিকান চু·সকনা নাংনুয়া।” 45 রংথালগিবা শাস্ত্রখো হা·আইখানা গিত্তা বিয়া জা·রিকগিবারাংনি বুদ্ধিখো খুলিয়েতজক আরো বিসংনা আগানজক, “চক্কা দংআ, খ্রীষ্টখো দুক চাকনা নাংনুয়া আরো সালগিত্থামনি সালো সিয়াওনি চাখাতনা নাংনুয়া। 47 আরোবা চক্কা দংআ, যিরূশালেমোনি হা·বাচেংএ গিম্মিক জাতনা খ্রীষ্টনি বিমুংও ইয়া খাৎথাখো আগানফ্রাকনুয়া, পাপওনি গিসিক ফি·ল্লোদে পাপওনি ক্ষেমা মা·ন্না। 48 না·সংআন ইরাংনি সাক্ষি হং·আ। 49 নিবো, আংনি আপফা জেখো হ·ন্না খু·রাচাক্কামিং উখো আংআ না·সংনা ওয়াত্তেতনুয়া। সালগিওনি বিলখো মান·খুজানা দিপ্পাৎ না·সং ইয়া সংজিলমাওন দংসোবো।” 50 জা·মানো যীশু বিনি জা·রিকগিবারাংখো রা·এ বৈথনিয়াওনা সক্কে রি·য়াংজক। উনো বিয়া জাকখো দি·দোএ বিসংনা ফাত্তিজক। 51 ফাত্তিমিত্তিংওন বিয়া বিসংখো ওয়াত্তে রি·য়াংজক আরো বিখো সালগিওনা দি·দোএ রা·আংজক। 52 উনোন বিসং হা·আও থুগোপে অলাখিয়ে বিখো ইসল গিত্তা মান্দিরা·জক আরো খুসি হং·বিএ যিরূশালেমচানা ফি·ল্লাংজক। 53 বিসং ফাংনান থরম নক্কো দংথিমে ইসলখো মিৎথেলনা হা·বাচেংজক।

যোহন 1

1 চেংওন খাৎথা দংআমিং, খাৎথা ইসলমুং দংআমিং আরো খাৎথা আন·থাংআন ইসলমিং। 2 আরো চেংওনিন বিয়া ইসলমুং দংআমিং। 3 উয়া খাৎথাচা গিম্মিকখো দাক্কা হং·আমিং, আরো দাকগিবারাংনি গিসেপো মিংসাবা বিনি আগ্রে হং·জা। 4 বিচা জাংগি দংআমিং আরো উয়া জাংগিন মান্দিরাংনা সেং·আ হং·আমিং। 5 উয়া সেং·আ আন্দালাও থেং·সুয়া ইন্দিবা আন্দালা সেং·আখো হামজাজক। 6 ইসল যোহন মিংগিবা সাকসা মান্দিখো ওয়াত্তেতামিং। 7 বিয়া সেং·আনি গিম্মিন সাক্ষি হ·ন্না রি·বামিং জেদাক্কে বিনি সাক্ষি হ·ন্নাখো খিন্নাএ দিমদাকান বিবিরা·না মা·ন্না। 8 যোহন আন·থাংদে উয়া সেং·আ হং·জামিং ইন্দিবা উয়া সেং·আনি গিম্মিন সাক্ষি হ·ন্নাসা রি·বামিং। 9 জেআন মান্দি দিমদাকনা সেং·আখো হ·ন্না, উয়ান চং·মতগিবা সেং·আ, বিয়া হা·গিলসাকো রি·বামিং। 10 বিয়া হা·গিলসাকোন দংআমিং আরো হা·গিলসাক বিচান হং·আমিং, ইন্দিবা হা·গিলসাকনি মান্দিরাং বিখো হা·আইজাজক। 11 বিয়া সংথাংও রি·বাজক, ইন্দিবা বিনি আন·থাংনি মান্দিরাংআন বিখো রা·চাকজাজক। 12 ইন্দিবা বিখো বিবিরা·এ রা·চাকগিবা সাকফ্রাকফ্রাকখোন বিয়া ইসলনি দে হং·খানা বিলখো হন·জক। 13 ইয়া মান্দিরাং হান·চিওনি আৎচিজা, বে·এননি বা মি·আসা মান্দিনি হা·সিকাওনিবা হং·জা, ইন্দিবা ইসলোনিসা হং·আ। 14 উয়া খাৎথান মান্দি ফি·ল্লে আৎচিজক আরো আনচিংনি গিসেপো দংফাজক। ফাগিবা ইসলনি সাকসা খাম·খাম দেফান্থি গিত্তা বিনি রাসংখো আনচিং নিকজক। বিয়া খা·সাচাক্কাও আরো বিবিও গাপগিবা হং·আ। 15 যোহন বিনি গিম্মিনো চ্রিকে সাক্ষি হ·ন্নে আগানজক, “বিয়ান উয়া মান্দি জেনি গিম্মিন আংআ আগানামিং, আংনি জা·মানো রি·বাগিবা আংনা দাল·বাৎগিবা হং·আ, মুয়ানা বিয়া আংনা স্খাংওনিন দংআ।” 16 আনচিং দিমদাকান বিনি উয়া গাপসুয়াকাওনিখো খা·সাচাক্কানি সাক্কাও দা·আবা খা·সাচাক্কাখো মান·জক। 17 মোশিচা নিয়ামরাংখো হ·ন্নামিং, ইন্দিবা যীশু খ্রীষ্টচা খা·সাচাক্কা আরো বিবি রি·বাজক। 18 দারাংবা ইসলখো মামুং সালোবা নিকখুজা। বিমুং দংফাগিবা উয়া সাকসা খাম·খাম দেফান্থি, জে আন·থাংআন ইসল হং·আ, বিয়ান বিখো ফারাকজক। 19 যিহূদীরাংনি দাল·বাৎগিবারাং জেনসালো যিরূশালেম সংজিলমাওনি মিত্তাম খামালরাংখো আরো লেবীয়রাংখো যোহনচা ওয়াত্তেতজক উনসালো যোহন বিসংচা সাক্ষি হন·জক। বিসং সিং·জক, “না·আ সা?” 20 যোহন জিচাকজাজক ইন্দিবা খু·রাচাক্কে ইনজক, “আংআ খ্রীষ্ট হং·জা।” 21 উনোন বিসং যোহনচা সিং·জক, “ইন্দিদে সা? না·আ এলিয়মা?” বিয়া আগানজক, “হং·জা, আংআ এলিয় হং·জা।” বিসং আগানজক, “ইন্দিদে না·আ উয়া আগানসোগিবামা?” বিয়া আগানচাকজক, “হং·জা।” 22 উনোন বিসং বিনা আগানজক, “ইন্দিদে না·আ সা? চিংখো ওয়াত্তেতগিবারাংনা চিংআ ফি·ল্লাংএ মামুংখো আগানচাকনা নাংনুয়া। না·আ আন·থাংনি গিম্মিনো মুয়াখো আগানিংআ?” 23 যোহন আগানজক, “আংআন উয়া খু·রাং, জেনি গিম্মিনো আগানসোগিবা যিশাইয় আগানসোআমিং, হা·গিসি জওলো সাকসানি খু·রাং চ্রিকে আগানিংজক, নাং·নি গিত্তেলনি রামাখো স্রংএতবো।” 24 যোহনচা ওয়াত্তেতগিবারাং ফরীশী হং·আমিং। বিসং যোহনখো সিং·জক, 25 “না·আ খ্রীষ্ট হং·জাওদে, এলিয় হং·জাওদে বা উয়া আগানসোগিবাবা হং·জাওদে, ইন্দিদে মুয়ানা না·আ রিপ্পলেতিংআ?” 26 যোহন উয়া ফরীশীরাংনা আগানচাকজক, “আংআ চিও রিপ্পলেতিংআ, ইন্দিবা না·সংনি গিসেপো ইন্দাকগিবা সাকসা দংআ জেখো না·সং হা·আইজা। 27 বিয়ান উয়া মান্দি আংনি জা·মানো জেনি রি·বানি খাৎথা দংআমিং। আংআ বিনি জা·খপনি ফিতাখো এংনাবা খ্রাজা।” 28 যর্দন চিবিমানি নালসাচা বৈথনিয়া সংও জেও যোহন রিপ্পলেতিংআমিং উনো ইরাং হং·আমিং। 29 উনি সাল সাও যোহন যীশুখো আন·থাংচানা রি·বাখো নিক্কে আগানজক, “হাইওয়া নিবো ইসলনি মেষ বি·সা, জেআন মান্দিনি গিম্মিক পাপখো হা·রিকা। 30 বিয়ান উয়া মান্দি জেনি গিম্মিনো আংআ আগানামিং, আংনি জা·মানো সাকসা রি·বাংজক জে আংনা বাত্তে দাল·বাৎগিবা হং·আ, মুয়ানা বিয়া আংনা স্খাংওনিন দংআ। 31 আংআ বিখো হা·আইজামিং, ইন্দিবা ইস্রায়েলরাংচা বিখো ফারাকেতনা আংআ রি·বাএ চিও রিপ্পলেতিংজক।” 32 উনি জা·মানো যোহন ইখো সাক্ষি হন·জক, “আংআ গিসিক রংথালগিবাখো কইতর গিত্তা সালগিওনি হং·ওনবাএ বিনি সাক্কাও দংআখো নিকজক। 33 আংআ বিখো হা·আইজামিং, ইন্দিবা আংখো চিও রিপ্পলেতনা ওয়াত্তেতগিবান আংনা আগানেতজক, ‘জেনি সাক্কাও গিসিক রংথালগিবাখো হং·ওনবাখো নিকনুয়া, বিয়ান উয়া জেআন গিসিক রংথালগিবাও রিপ্পলেতনুয়া।’ 34 আংআ উখো নিকজক আরো সাক্ষি হ·ন্নিংজক, ইয়ান ইসলনি দেফান্থি হং·আ।” 35 উনি সাল সাও ফি·ল্লে উয়া হা·দামও যোহন আরো বিনি জা·রিকগিবা সাকগ্মি দংআমিং। 36 উনো যীশুখো রামা রি·য়াংআখো নিক্কে যোহন আগানজক, “হাইওয়া নিবো, ইসলনি মেষ বি·সাখো।” 37 যোহননি ইন্দাকে আগানাখো খিন্নাএ উয়া জা·রিকগিবা সাকগ্মি যীশুখো জা·রিকফানা হা·বাচেংজক। 38 যীশু হান·ফিলে বিসংনি জা·রিকবাখো নিক্কে আগানজক, “না·সং মুয়াখো সান্দিংআ?” যোহননি জা·রিকগিবারাং সিং·জক, “রব্বি (ফি·ওদে স্খিগিবা), না·আ বানো দংআ?” 39 যীশু বিসংনা আগানজক, “রি·বাএ নিবো।” উনোন বিসং রি·য়াংএ যীশুনি দংগিবা হা·দামখো নিজক আরো উনসালো বিমুংআন দংজক। উনো ঘণ্টা ব্রি হং·না হা·ম্মিংজকমিং। 40 যোহননি আগানাখো খিন্নাএ জে সাকগ্মিগিবা যীশুখো জা·রিকামিং বিসংনি সাকসানি বিমুং আন্দ্রিয়মিং। বিয়া শিমোন-পিতরনি জংগিবা হং·আমিং। 41 আন্দ্রিয় স্খাং বিনি আদাথাং শিমোনখো সান্দিয়ে রা·জক আরো আগানজক, “চিংআ মশীহখো (ফি·স্খাওদে খ্রীষ্টখো) নিকজক।” 42 আন্দ্রিয় শিমোনখো যীশুচা রিমবাজক। যীশু শিমোনচাখো নিএতি আগানজক, “না·আ যোহননি দেফান্থি শিমোন, ইন্দিবা নাং·খো কৈফা মিংনুয়া।” ইনি অর্থ পিতর, ফি·স্খাওদে রং·থি হং·আ। 43 উনি সাল সাও যীশু গালীল হা·দকচা রি·য়াংনা চানচিজক। উনো যীশু ফিলিপখো মা·ন্নে বিনা আগানজক, “রি·বাবো, আংখো জা·রিকফাবো।” 44 ফিলিপ বৈৎসৈদা সংনি মান্দিমিং। আন্দ্রিয় আরো পিতরবা উয়া সং আপসাননি মান্দি হং·আমিং। 45 ফিলিপ নথনেলখো সান্দিয়ে রা·এ আগানজক, “মোশি জেনি খাৎথাখো নিয়ামরাংও চক্কে দন্নাংজক আরো জেনি গিম্মিন আগানসোগিবারাংবা চকসোজক বিখো চিংআ নিকজক। বিয়া যোষেফনি দেফান্থি যীশু, নাসরত সংনি মান্দি হং·আ।” 46 নথনেল ফিলিপনা আগানজক, “নাসরতওনি নাম্মা মামুংবা রি·বানা মা·ন্নামা?” ফিলিপ বিনা আগানজক, “রি·বাএ নিবো।” 47 যীশু নথনেলখো আন·থাংচানা রি·বাখো নিক্কে বিনি গিম্মিনো আগানজক, “হাইওয়া নিবো, ইস্রায়েলনি সাকসা খাকখেৎগিবা মান্দি। বিনি গিসিকো বু·আ দংজা।” 48 নথনেল যীশুখো সিং·জক, “না·আ বাদিকে দাক্কে আংখো হা·আইজক?” যীশু বিনা আগানচাকজক, “ফিলিপ নাং·খো রিক্কামনা স্খাং নাং·নি ডুমুর বিফাংনি কক্ষুমাও দংমিত্তিংওন আংআ নাং·খো নিক্কামিং।” 49 উনি গিম্মিন নথনেল যীশুনা আগানজক, “স্খিগিবা, না·আন ইসলনি দেফান্থি, না·আন ইস্রায়েলনি রাজা হং·আ।” 50 যীশু বিনা আগানজক, “নাং·খো উয়া ডুমুর বিফাংনি কক্ষুমাও নিক্কামিং, ইখো আগানানি গিম্মিন বিবিরা·আমা? ইনাবাত্তেবা দাল·বাৎগিবা হং·গিবারাংখোন না·আ নিকনা মা·ন্নুয়া।” 51 জা·মানো যীশু আগানজক, “আংআ না·সংনা বিবিন আগানিংআ, না·সং সালগিখো ফ্রাকাখো নিকনুয়া, আরো ইসলনি সা·গ্রেরাংখো মান্দিনি দেফান্থিওনি চাখাতাখো আরো বিচানা হং·ওনবাখো নিকনুয়া।”

যোহন 2

1 উনি সালগ্মিনি জা·মানো গালীলনি কান্না সংও গি·সা বিয়া হং·আমিং। যীশুনি মা·গিবা উনো দংআমিং। 2 উয়া বিয়া খা·আও যীশু আরো বিনি জা·রিকগিবারাংবা চা·না আগানাখো মা·ন্নামিং। 3 জা·মানো আংগুর বিৎচি গিম্মিক বন·চাংওন যীশুনি মা·গিবা যীশুনা আগানজক, “ইরাংনি আংগুর বিৎচি বন·চাংজক।” 4 যীশু বিনি মা·গিবানা আগানজক, “ইনি গিম্মিন নাং·মুং আংনি মুয়া নাংফা? আংনি সাল দা·আওবা সকখুজা।” 5 বিনি মা·গিবা উনো নকখলরাংনা আগানজক, “বিয়া না·সংনা জেখো আগানা উখোন দাকবো।” 6 যিহূদী থরমনি দাকবেওয়াল গিত্তা রংথালখানা ইন্নে উয়া হা·দামও রং·থিনি বাসিং থি·দক দংআমিং। উয়া গিম্মিকওন মুয়ান গ্মি মুয়ান গিত্থাম চি চাকনুয়ামিং। 7 যীশু উয়া নকখলরাংনা আগানজক, “ইয়া বাসিংরাংও চি গাপ্পেতবো। নকখলরাং উনো বাসিংরাংও রিক্কিংওনা সক্কে চি গাপ্পেতজক। 8 জা·মানো যীশু বিসংনা আগানজক, “দা·আও উনিখো অকখিসা রা·এ চা·দিলগিবাচা রা·আংবো।” নকখলরাং উগিত্তান দাকজক। 9 চিওনি হং·গিবা উয়া আংগুর বিৎচিখো চা·দিলগিবা রিংএ নিজক। ইন্দিবা উয়া বিৎচি বাওনি রি·বাজক উখো বিয়া হা·আইজামিং; ইন্দিবা চিখো গাপ্পেতগিবা নকখলরাংদে হা·আইয়ামিং। উনি গিম্মিন চা·দিলগিবা চাওয়ারিখো রিক্কামে আগানজক, 10 “স্খাং দিমদাকান নামগিবা আংগুর বিৎচিখো রিংনা হন·চেংআ। জা·মানো ফেকজোকনো জে বিৎচিখো হ·ন্নিংআ উয়াদে স্খাংনা বাত্তে নামগিজা হং·আ। ইন্দিবা না·আ দা·আওনাবা নামগিবা বিৎচিখো রা·রিকজক।” 11 যীশু গালীল হা·দকনি কান্না সংও স্খাংগিবা চিন গিত্তা ইয়া আইয়াও ইনমানগিবা কামখো দাক্কে আন·থাংনি রাসংখো ফারাকজক। উনি গিম্মিন বিনি জা·রিকগিবারাং বিখো বিবিরা·জক। 12 জা·মানো যীশু, বিনি মা·গিবা, বিনি জংগিবারাং আরো বিনি জা·রিকগিবারাং কফরনাহূম সংজিলমাওনা রি·য়াংজক, ইন্দিবা বিসং উনো সাল বাং·এ দংজাজক। 13 যিহূদীরাংনি ওয়াতচাংআনি সাল সেফাংওন যীশু যিরূশালেমচানা রি·য়াংজক। 14 বিয়া উনোনা রি·য়াংএ থরম নকনি নিং·আও মান্দিরাংখো মা·সু, মেষ আরো কইতররাংখো ফাল্লাখো আরো থাংখা স্রিগিবা মান্দিরাংখোবা আসংএ দংআখো নিকজক। 15 ইরাংখো নিক্কে বিয়া বিদুরাংচা গি·সা চাবুক থারিয়ে রা·জক, আরো উচা গিম্মিক মা·সু, মেষ আরো মান্দিরাংখোবা উনোনিখো রিক্কেৎজক। থাংখা স্রিগিবারাংনি থাংখারাংখো গোচ্রাকে বিয়া বিসংনি টেবিলরাংখো ফাংফিলেতজক। 16 কইতর ফালগিবারাংনা যীশু আগানজক, “ইয়া হা·দামনিখো ইরাংখো রা·আংবো। আংনি ফানি নকখো দা·আ বাদিংআনি নক দাক্কে রা·আবো।” 17 উনি গিম্মিন রংথালগিবা শাস্ত্রও চকগিবা ইয়া খাৎথাখো জা·রিকগিবারাং গিসিক রা·জক: নাং·নি নকনা আংনি জে খা·ফাক্কা দংআ, উয়া খা·ফাক্কান আংনি খা·থংখো খামচাএতনুয়া। 18 উনোন যিহূদীরাংনি দাল·বাৎগিবারাং যীশুখো সিং·জক, “ইন্দিবা ইরাংখো দাক্কানি নাং·নি বিল দংবিবিআন ইখো হা·আইনা গিত্তা না·আ চিংনা আইয়াও ইনমানগিবা কামখো দাক্কে ফিন্নিকনা মা·ন্নুয়ামা?” 19 যীশু বিসংনা আগানচাকজক, “ইসলনি নকখো না·সং ফি·এ গালবো, সালগিত্থামনি সালো আংআ দা·আবা উখো রিকফিলনুয়া।” 20 ইখো খিন্নাএ যিহূদীনি দাল·বাৎগিবারাং বিনা আগানজক, “ইয়া থরম নকখো রিকনা বিলসি সৎব্রিদক নাংআমিং, আরো না·আ ইখো সালগিত্থামোন রিকফিলনা মা·ন্নুয়ামা?” 21 ইন্দিবা যীশু আন·থাংনি বে·এনখোসা ইসলনি নক ইন্নে ইন্নামিং। 22 উনি গিম্মিন যীশুনি সিয়াওনি থাংচাফিল্লানি জা·মানো জা·রিকগিবারাং ইখো গিসিক রা·জক, বিয়া উয়া খাৎথাখোন আগানামিং। উনোন জা·রিকগিবারাং রংথালগিবা শাস্ত্রনি আগানাখো আরো যীশুনি আগানাখো বিবিরা·জক। 23 ওয়াতচাংআনি সালো যিরূশালেমো দংএ যীশুনি দাক্কা আইয়াও ইনমানগিবা কামরাংখো নিক্কে বাং·আরাংএন বিখো বিবিরা·জক। 24 ইন্দিবা যীশু বিসংনি সাক্কাও আন·থাংনি গিম্মিন খা·দংজাজক, মুয়ানা বিয়া দিমদাক মান্দিখো হা·আইয়ামিং। 25 মান্দিনি গিম্মিন দারাংনিবা সাক্ষি বিনা নাংজামিং, মুয়ানা মান্দিরাংনি গিসিকো মুয়া দংআ উখো বিয়া হা·আইয়ামিং।

যোহন 3

1 নীকদীম মিংগিবা ফরীশী সাকসা যিহূদীরাংনি দাল·বাৎগিবা দংআমিং। 2 সালসা ওয়াল্লো বিয়া যীশুচা রি·বাএ আগানজক, “স্খিগিবা, চিংআ হা·আইয়া না·আ সাকসা স্খিগিবা গিত্তা ইসলোনি রি·বাজক, মুয়ানা নাং·মুং ইসল দংজাওদে দারাংবা নাং·নি দাকগিবা আইয়াও ইনমানগিবা কামখো দাকনা মান·জা।” 3 যীশু নীকদীমনা আগানজক, “আংআ নাং·না বিবিন আগানিংআ, গিত্তাল দাক্কে আৎচিজাওদে দারাংবা ইসলনি সংনকখো নিকনা মান·জা।” 4 উনোন নীকদীম বিনা আগানজক, “মান্দি বুদেফা হং·আনি জা·মানো বাদিকে দাক্কে দা·আবা আৎচিনা মা·ন্না? মা·আনি অক্কো চাংগ্মি নাপ্পে দা·আবা বিয়া আৎচিফিলনা মা·ন্নামা?” 5 যীশু আগানচাকজক, “আংআ নাং·না বিবিন আগানিংআ, চি আরো রংথালগিবা গিসিকোনি আৎচিজাওদে দারাংবা ইসলনি সংনক্কো নাপনা মান·জা। 6 মান্দিওনি আৎচিগিবা মান্দি হং·আ, আরো রংথালগিবা গিসিকোনি আৎচিগিবা গিসিক হং·আ। 7 না·সংনি গিত্তাল দাক্কে আৎচিনা নাংনুয়া ইন্নে নাং·না আংনি আগানানি গিম্মিন দা·আ আইয়াও ইনমানাবো। 8 বালওয়া জেচা হা·সিকা উচা বাল্লা আরো না·আ উনি গা·ম্মাখো খিন্নাআ, ইন্দিবা বাওনি রি·বাআ আরো বাওনা রি·য়াংআ উখো না·আ হা·আইজা। রংথালগিবা গিসিকোনি আৎচিগিবারাংবা উগিত্তান হং·আ।” 9 নীকদীম যীশুচা সিং·জক, “ইয়া বাদিকে দাক্কে হং·না মা·ন্না?” 10 উনোন যীশু বিনা আগানজক, “না·আ ইস্রায়েলনি স্খিগিবা হং·এবা ইরাংখো হা·আইজামা? 11 নাং·না বিবিন আগানিংআ, চিংআ জেখো হা·আইয়া উখোন আগানা আরো জেখো নিক্কা উনি গিম্মিন সাক্ষি হ·ন্না, ইন্দিবা না·সং চিংনি সাক্ষিখো রা·চাকজা। 12 আংআ না·সংচা হা·গিলসাকনি গিম্মিনো খাৎথা আগানো বিবিরা·জাওদে ইন্দিদে সালগিনি গিম্মিন খাৎথা আগানোদে বাদিকে দাক্কে বিবিরা·নুয়া? 13 “সালগিও দংগিবা আরো সালগিওনি হং·ওনবাগিবা উয়া মান্দিনি দেফান্থিনা আগ্রে দারাংবা সালগিও গাদোখুজা। 14 মোশি জেদাক্কে হা·গিসি জওলো উয়া চিপ্পুখো চু·য়াকাও দি·দোআমিং উগিত্তান মান্দিনি দেফান্থিখোবা চু·য়াকাও দি·দোনা নাংনুয়া, 15 জেদাক্কে বিখো বিবিরা·গিবা দিমদাকান ফাংনাজলনি জাংগিখো মা·ন্না। 16 “ইসল মান্দিখো ইন্দাকফিল্লে খা·সানি গিম্মিন বিনি সাকসা খাম·খাম দেফান্থিখো হন·জক, জেদাক্কে উয়া দেফান্থিও বিবিরা·গিবা দিমদাকান নামগিজাও গা·আকজা ইন্দিবা ফাংনাজলনি জাংগিখো মা·ন্না। 17 ইসল মান্দিখো গ্রো নাংগিবা ইন্নে ফিন্নিকনা বিনি দেফান্থিখো হা·গিলসাকোনা ওয়াত্তেতজা, ইন্দিবা মান্দিরাং জেদাক্কে দেফান্থিচা পাপওনি জকনা মা·ন্না উনি গিম্মিন বিয়া বিখো ওয়াত্তেতজক। 18 উয়া দেফান্থিখো বিবিরা·গিবাখো বিচাল দাকজা, ইন্দিবা বিবিরা·গিজাগিবাখো গ্র্রো নাংগিবা ইন্নে স্খাংআন বাচ্ছিয়ে রা·জক, মুয়ানা ইসলনি সাকসা খাম·খাম দেফান্থিখো বিয়া বিবিরা·জা। 19 বিখো গ্রো নাংগিবা ইন্নে চানজক মুয়ানা হা·গিলসাকো সেং·আ রি·বাজক, ইন্দিবা মান্দিরাংনি কামরাং নামজানি হা·সেলো মান্দিরাং সেং·আনা বাত্তে আন্দালাখো নামনিকবাত্তা। 20 নামগিজা কামখো দাকগিবা সেং·আখো মিৎচিয়া। বিনি নামগিজা কামরাং ফারাকনুয়া ইন্নে বিয়া সেং·আওনা রি·বাজা। 21 ইন্দিবা বিবিনি রামাও রি·গিবা সেং·আওনা রি·বা জেদাক্কোদে বিনি কামরাং ইসলনি হা·সিকা গিত্তা হং·আ, ইখো ফারাকানি হং·আ।” 22 ইনি জা·মানো যীশু আরো বিনি জা·রিকগিবারাং যিহূদিয়া হা·দকচা রি·য়াংজক। উনো বিয়া বিনি জা·রিকগিবারাংমুং বাং·গিজা সালরাংনা দংজক আরো মান্দিরাংখো রিপ্পলেতনা হা·বাচেংজক। 23 শালীম মিংগিবা সং দামসানি সেফাংও ঐনোন মিংআ হা·দামওনা যোহনবা রিপ্পলেতিংআমিং, মুয়ানা উয়া হা·দামও চি বাং·আমিং আরো মান্দিরাংবা রি·বাএ রিপ্পলিংআমিং। 24 উনোবা যোহনখো জেলো দনখুজামিং। 25 উয়া সময়ও থরমনি নিয়াম গিত্তা রংথালানি গিম্মিন যোহননি জা·রিকগিবারাং সাকসা যিহূদীমুং জিগ্রিকনা হা·বাচেংজক। 26 জা·মানো বিসং যোহনচানা রি·বাএ আগানজক, “স্খিগিবা, যর্দননি নালসাচা নাং·মুং দংগিবা আরো জেনি গিম্মিন না·আ সাক্ষি হ·ন্নামিং, নিবো, বিয়া রিপ্পলেতিংজক আরো গিম্মিকান বিচা রি·য়াংইংজক।” 27 উনি গিম্মিন যোহন আগানচাকজক, “সালগিওনি হন·চাকজাওদে দারাংবা মামুংখোন মা·ন্না হামজা। 28 না·সংআন আংখো খ্রীষ্ট হং·জা ইন্নে আগানাখো খিন্নাজক, ইন্দিবা আংখো বিনা স্খাং ওয়াত্তেতসোজক। 29 জেনি জাক্কো নামচিকখো হন·জক, উয়ান চাওয়ারি হং·আ। চাওয়ারিনি রিপ্পেং চাদেংএ চাওয়ারিনি খাৎথাখো খিন্নাআ আরো বিনি খু·রাংখো খিন্নাএ খুসি হং·বিয়া। উয়ানদাক্কেন আংনি হান·সেংআবা দা·আল চু·সকজক। 30 বিখো দাল·রোরোআংনা নাংনুয়া আরো আংনি জিত্তাংনা নাংনুয়া।” 31 সাক্কাওনি রি·বাগিবা গিম্মিকনি সাক্কাও হং·আ। হা·গিলসাকওনি রি·বাগিবা হা·গিলসাকনি, আরো বিয়া হা·গিলসাকনি খাৎথাখোন আগানা। ইন্দিবা সালগিওনি রি·বাগিবাদে গিম্মিকনি সাক্কাও হং·আ। 32 বিয়া জেখো নিকজক আরো খিন্নাজক উখোন সাক্ষি হ·ন্না, ইন্দিবা দারাংবা বিনি সাক্ষিখো রা·চাকজা। 33 বিনি সাক্ষিখো রা·চাকগিবা ইখোন ফিন্ন্নিকজক, ইসল জেখো আগানা উয়ান বিবি হং·আ। 34 ইসল জেখো ওয়াত্তেতজক বিয়া ইসলনি খাৎথাখোন আগানা, মুয়ানা ইসল বিনা গিসিক রংথালগিবাখো থয়ে হন·জা। 35 ফাগিবা দেফান্থিখো খা·সাআ আরো বিনি জাক্কো গিম্মিকখোন হন·থকজক। 36 জেআন দেফান্থিখো বিবিরা·আ বিয়া উনোন ফাংনাজলনি জাংগিখো মা·ন্না, ইন্দিবা দেফান্থিখো মানিগিজাগিবা উয়া জাংগিখো মামুং সালোবা মান·জানুয়া, ইন্দিবা ইসলনি খা·আওনাংআ বিনি সাক্কাও দংখামনুয়া।

যোহন 4

1 যীশু যোহননা বাত্তে বাং·আরাংখো জা·রিকগিবা দাক্কিংজক আরো রিপ্পলেতিংজক উখো ফরীশীরাং খিন্নামিং। 2 ইন্দিবা যীশু আন·থাংদে রিপ্পলেতজাংআমিং, বিনি জা·রিকগিবারাংসা রিপ্পলেতিংআমিং। 3 যীশু উখো হা·আইনা মা·ন্নে যিহূদিয়া হা·দকখো ওয়াত্তে দা·আবা গালীলচানা রি·য়াংজক। 4 গালীলচানা রি·য়াংমিত্তিংও বিখো শমরিয়া হা·দক গিত্তা রি·য়াংনা নাংজক। 5 বিয়া শুখর মিংগিবা শমরিয়ানি সং দামসাওনা রি·বাজক। যাকোব বিনি দেফান্থি যোষেফনা জে হা·বাখো হ·ন্নামিং ইয়া সং উনি সেফাংওনমিং। 6 উয়া হা·দামও যাকোবনি চিহা·খল দংআমিং। রামা রি·এ নেং·বকানি গিম্মিন যীশু উয়া চিহা·খলনি কেচ্চিও আসংজক। উনো সালজাৎচিমাং হং·আমিং। 7 যীশুনি জা·রিকগিবারাং চা·আনিখো ব্রিনা সংচানা রি·য়াংজক; উয়া সময়ও শমরিয়ানি মিচিক সাকসা চি খো·না রি·বাজক। যীশু বিনা আগানজক, “আংনা অকখিসা চি রিংনা হন·বো।” 9 শমরিয়ানি উয়া মিচিক বিনা আগানজক, “আংআদে শমরিয়ানি মিচিক হং·আ। না·আ যিহূদী মান্দি হং·এবা বাদিকে দাক্কে আংচানিখো চি রিংনা হা·ম্মিংআ?” উয়া মিচিক ইন্দাকে আগানজক মুয়ানা যিহূদীরাং আরো শমরিয়ারাং আপসান চা·রিম রিংরিমজামিং। 10 যীশু উয়া মিচিকনা আগানচাকজক, “না·আ ইসলনি হ·ন্নাখো আরো সা নাং·চানিখো চি রিংনা হা·ম্মিংআ ইখো হা·আইওদে ইন্দিদে না·আন বিচানিখো চি রিংনা হাম·নুয়ামিং আরো বিয়া নাং·না চিজাংগিখো হ·ন্নুয়ামিং।” 11 উয়া মিচিক আগানজক, “ইন্দিবা নাং·চা চি খো·চাকানি মামুংবা দংজা আরো চিহা·খলবা নাম্মেন থিং·নাপ্পা। ইন্দিদে উয়া চিজাংগিখো বানিখো মান·জক? 12 না·আ চিংনি ফাগিৎচাম যাকোবনা দাল·বাৎজা। ইয়া চিহা·খলখো বিয়ান চিংনা হ·ন্না। বিয়া আন·থাং আরো বিনি দেফান্থিরাং ইয়া চিহা·খলনি চিখোন রিংনুয়ামিং আরো বিনি জিল্লানিরাংবা রিংনুয়ামিং।” 13 উনোন যীশু আগানজক, “সাবা ইয়া চিখো রিংওদে দা·আবা রিংনা হা·সিকফিলনুয়া। 14 ইন্দিবা আংআ জে চিখো হ·ন্নুয়া উখো রিংগিবানিদে মামুং সালোবা রিংনা হা·সিকফিলজানুয়া। উয়া চি বিনি খা·থংও চিমিক হং·এ ফাংনাজলনি জাংগিখো হ·ন্নুয়া।” 15 উনি গিম্মিন উয়া মিচিক যীশুনা আগানজক, “ইন্দিদে আংনা উয়া চিখো হন·বো জেখো রিং·ওদে আংআ রিংনা হা·সিকফিলজানুয়া আরো ইয়োনা রি·বাএ চি খো·না নাংজানুয়া।” 16 যীশু বিনা আগানজক, “ইন্দিদে রি·য়াংবো, নাং·নি সেখো ইয়োনা রিক্কামে রা·বাবো।” 17 মিচিক আগানজক, “আংনিদে সে দংজা।” যীশু বিনা আগানজক, “না·আ খাকখেৎখোন আগানা নাং·নি সে দংজা, 18 মুয়ানা নাং·নি সে সাকবংআ হং·জক, আরো দা·আও নাং·মুং দংগিবা নাং·নি সে হং·জা। না·আ বিবিখোন আগানা।” 19 নোন উয়া মিচিক যীশুনা আগানজক, “দা·আও আংআ হা·আইনা মান·জক না·আ সাকসা আগানসোগিবা হং·আ। 20 ফাগিৎচামরাং ইয়া হা·ব্র্রিও অলাখিনুয়ামিং, ইন্দিবা না·সং আগানে দংআ যিরূশালেমোন মান্দিরাংনি অলাখিনা নাংআ।” 21 যীশু বিনা আগানজক, “খিন্নাবো, আংনি আগানাখো বিবিরা·বো, ইন্দাকগিবা সাল রি·বাংজক জেনসালো না·সং আপফা ইসলখো ইয়া হা·ব্র্রিওবা অলাখিজানুয়া, যিরূশালেমোবা অলাখিজানুয়া। 22 না·সং জেখো হা·আইজা উখো অলাখিয়া, ইন্দিবা চিংআ জেখো হা·আইয়া উখোসা অলাখিয়া, মুয়ানা পাপওনি জক্কানি রামা যিহূদীরাং গিত্তান রি·বাআ। 23 ইন্দিবা ইন্দাকগিবা সাল রি·বাংজক, আরো দা·আওন উয়া সাল হং·আ জেনসালো অলাখিচং·মতগিবারাং গিসিকো আরো বিবিও ফাগিবা ইসলখো অলাখিনুয়া। ফাগিবাবা ইন্দাকগিবা অলাখিগিবারাংখোন সান্দিয়া। 24 ইসল গিসিক হং·আ; জেরাং বিখো অলাখিয়া, গিসিকো আরো বিবিও বিসং অলাখিনা নাংনুয়া।” 25 উনোন উয়া মিচিক আগানজক, “আংআ হা·আইয়া মশীহ, জেখো খ্রীষ্ট মিংআ, বিয়া রি·বাংজক। জেনসালো বিয়া রি·বানুয়া উনসালো চিংনা গিম্মিকখোন আগানে হ·ন্নুয়া।” 26 যীশু বিনা আগানজক, “আংআন উয়া, নাং·মুং খাৎথা আগানগিবা।” 27 উনো যীশুনি জা·রিকগিবারাং রি·বাএ মিচিক সাকসামুং যীশুনি খাৎথা আগানগ্রিকাখো নিক্কে আইয়াও ইনমানজক। ইন্দিবা বিসং সাকসাবা আগানজাজক, “না·আ মুয়াখো হা·ম্মিংআ?” বা “মুয়ানা না·আ বিমুং খাৎথা আগানগ্রিকিংআ?” 28 উয়া মিচিক উনো বিনি গুম্বিখো গাল্লে দন্নাংএ সংচানা রি·য়াংজক আরো মান্দিরাংনা আগানজক, 29 “না·সং সাকসা মান্দিখো রি·বাএ নিবো। জাংগিথাংও আংনি দাকগিবা দিমদাকখোন বিয়া আংনা আগানে হন·জক। ইন্দিদে বিয়ান উয়া খ্রীষ্ট হং·আমা?” 30 উনি গিম্মিন মান্দিরাং সংওনি হং·খাতে যীশুচানা রি·বানা হা·বাচেংজক। 31 ইন্দাকমিত্তিংও বিনি জা·রিকগিবারাং বিখো মল·মলে আগানজক, “স্খিগিবা, চা·বো।” 32 যীশু বিসংনা আগানজক, “আংচা ইন্দাকগিবা চা·আনি দংআ জেখো না·সং হা·আইজা।” 33 উনি গিম্মিন জা·রিকগিবারাং আগানগ্রিকনা হা·বাচেংজক, “ইন্দিদে সাবা বিনা চা·আনি মামুংখো রা·বাএ হ·ন্নামা?” 34 উনোন যীশু বিসংনা আগানজক, “আংখো ওয়াত্তেতগিবানি হা·সিকাখো মানিয়া আরো বিনি কামখো চু·সকেতান আংনি চা·আনি হং·আ। 35 ‘জাব্রি দংখুংআ, উনি জা·মানোন মি রাত্তানি সময় হং·নুয়া’ ইন্নে না·সং আগানজামা? ইন্দিবা আংআ না·সংনা আগানিংআ, মিক্রোন দি·চাএ রাং·সা হা·বাচানা নিএতবো, মি রাতনা গিত্তা হং·জক। 36 মি রাতগিবা বিনি মজুরিখো দা·আওন মা·ন্নিংআ আরো ফাংনাজলনি জাংগিনা মিখো চিম্মংএ দন্নিংআ। উনি গিম্মিন বিৎচ্রি গোগিবা আরো মি রাতগিবা সাকগ্মিআন আপসান খুসি হং·রিমা। 37 উনি গিম্মিন ইয়ান বিবি হং·আ, ‘সাকসা গোআ আরো সাকসা রাত্তা।’ 38 আংআ না·সংখো ইন্দাকগিবা মিখো রাতনা ওয়াত্তেতজক জেনি গিম্মিন না·সং গামজা। গিপ্পিনরাং গামজক আরো না·সং উয়া গাম্মানি মিখো রাতজক।” 39 বিনি দাকগিবা গিম্মিকখোন বিয়া আগানে হন·জক, উয়া মিচিকনি ইন্দাকে সাক্ষি হ·ন্নাখো খিন্নাএ উয়া সংনি বাং·বিয়া শমরিয়ারাং যীশুখো বিবিরা·জক। 40 বিসং যীশুচা রি·য়াংএ বিখো বিসংমুং দংখানা মল·মলজক। উনি গিম্মিন যীশু উয়ো সালগ্মি দংজক। 41 উনোন বিনি খাৎথাখো খিন্নাএ বাং·আ মান্দিরাংআন বিবিরা·জক। 42 উয়া মিচিকনা বিসং আগানজক, “দা·আও চিংআ নাং·নি আগানানি গিম্মিন বিবিরা·জা, ইন্দিবা চিংআ আন·থাংথাংআন বিনি আগানাখো খিন্নাএ ইখো হা·আইনা মান·জক, বিয়া বিবিন মান্দিরাংখো জক্কেৎগিবা হং·আ।” 43 যীশু আগানামিং, সংথাংও আগানসোগিবা মান্দিরা·আখো মান·জা; উয়া খাৎথা চু·সকখানা ইন্নে শমরিয়াও সালগ্মি দংআনি জা·মানো বিয়া গালীল হা·দকচানা রি·য়াংজক। 45 পর্বনি সালো যীশু জেখো জেখো দাক্কামিং, গালীলনি মান্দিরাং উয়া পর্বনি সালো রি·য়াংআমিং ইন্নে বিসং গিম্মিকখোন নিকনা মা·ন্নামিং। ইনি গিম্মিন যীশুনি গালীলচানা রি·য়াংওন উনি মান্দিরাং বিখো রা·চাকজক। 46 জা·মানো যীশু দা·আবা গালীলনি উয়া কান্না সংওনা রি·য়াংজক। ইয়োন বিয়া চিখো আংগুরনি বিৎচি থারিয়ামিং। গালীলনি কফরনাহূম সংজিলমাও রাজানি সুবিদার সাকসানি দেফান্থি সাবিল্লাকে দংআমিং। 47 যীশুখো যিহূদিয়াওনি গালীলওনা রি·বাখো খিন্নাএ উয়া সুবিদার বিচা রি·য়াংজক আরো কফরনাহূমচা রি·য়াংএ বিনি দেফান্থিখো নাম্মেতখানা ইন্নে বিখো মল·মলজক। বিনি দেফান্থি উনো সিনা গিত্তিক দাকজকমিং। 48 যীশু উয়া সুবিদারনা আগানজক, “মামুং চিনখো বা মামুং আইয়াও ইনমানানি কামরাংখো নিকজাওদে না·সং মামুং দাক্কেবা বিবিরা·জানুয়া।” 49 উনোন উয়া সুবিদার আগানজক, “খা·সাফাএ আংনি দেফান্থি সিনা স্খাংআন রি·বাবো।” 50 যীশু বিনা আগানজক, “না·আ রি·য়াংবো, নাং·নি দেফান্থি থাংচাজক।” ইনি গিম্মিন বিয়া যীশুনি আগানাখো বিবিরা·এ রি·য়াংআরিজক। 51 উয়া সুবিদার নকচানা রি·য়াংমিত্তিংও রামাওন বিনি নকখলরাং বিচা রি·য়াংএ আগানজক, “নাং·নি দেফান্থি নাম্মাংজক।” 52 বিয়া উয়া নকখলরাংচা সিং·জক, “বিয়া বাসোকো নামজক?” বিসং আগানজক, “মিজাও সাল একটা বাজিও বিনি জম্মা সা·আলজক।” 53 উনি গিম্মিন দেফান্থিনি ফাগিবা হা·আইনা মান·জক, উয়া সময়ওন যীশু বিনা আগানামিং, “নাং·নি দেফান্থি থাংচাজক।” উনোন উয়া সুবিদার আরো বিনি নকগিম্মিকবা যীশুখো বিবিরা·জক। 54 যিহূদিয়াওনি গালীলওনা রি·বানি জা·মানো যীশু ইয়া গ্মিগিবা আইয়াও ইনমানানি কামখো দাকজক।

যোহন 5

1 ইয়ারাংনি জা·মানো যীশু যিরূশালেমচানা রি·য়াংজক, মুয়ানা উয়া সময়ও যিহূদীরাংনি গি·সা পর্ব দংআমিং। 2 যিরূশালেমো মেষ দ·গাচিলনি সেফাংও চিবল গি·সা দংআ; উনো নকখিমগ্মাং চিগাত দামবংআ দংআ। ইব্রীয় খু·সুকচা উখো বৈথেস্‌দা মিংআ। 3 উয়া হা·দামরাংও বাং·বিয়া সাগিবা মান্দিরাং গা·আকে দংনুয়ামিং। কানা, জা·খোরা, আরো বে·এন সিক্রেপগিবারাংবা উরাংও দংআমিং। 4 সাকসা সা·গ্রে মিত্তাম সময়ও রি·বাএ উয়া চিবলো হং·খাতে চিখো মজিমেতনুয়ামিং, আরো উনি জা·মানোন জে সাগিবা মান্দি চিও স্খাং হং·খাতনুয়ামিং বিনি সাবিসিরাং নাম্মাংনুয়ামিং। উয়া সাগিবারাং উয়ো চি মজিমানা নিচাকসোএ দংনুয়ামিং। 5 বিলসি খলাৎচিচেৎনা সাএ দংগিবা সাকসা মান্দিবা উনো দংআমিং। 6 বাং·বিয়া সালোনি বিনি ইন্দাকে গা·আকে দংআখো হা·আইএ যীশু বিখো সিং·জক, “না·আ নামনা হা·সিকামা?” 7 সাগিবা মান্দি আগানচাকজক, “চি মজিমমিত্তিংও আংখো চিবলও হং·খাতেতনা গিত্তা আংনি মান্দি সাকসাবা দংজা। আংনি রি·য়াংনা স্খাংআন সাকগিপ্পিন চিও হং·খাতারিংআ।” 8 যীশু বিখো আগানজক, “চাখাতবো, নাং·নি থুচাকানিখো দি·থমে রামা রি·বো।” 9 উনোন উয়া মান্দি নামজক আরো বিনি থুচাকানিখো দি·থমে রামা রি·না হা·বাচেংজক। উয়া সাল নেং·থাকানি সালমিং। 10 ইনি গিম্মিন যিহূদীনি দাল·বাৎগিবারাং উয়া নাম্মেতগিবা মান্দিখো আগানজক, “দা·আল নেং·থাকানি সাল; থরমনি নিয়াম গিত্তা থুচাকানিখো দি·থমে রা·না খ্রাজা।” 11 উনোন বিয়া উয়া দাল·গিবারাংনা আগানজক, “ইন্দিবা আংখো নাম্মেতগিবান আংনা আগানজক, ‘নাং·নি থুচাকানিখো দি·থমে রামা রি·বো।’ ” 12 বিসং উয়া মান্দিখো সিং·জক, “ ‘নাং·নি থুচাকানিখো দি·থমে রামা রি·বো,’ ইন্নে আগানগিবা উয়া মান্দি সা?” 13 ইন্দিবা উয়া মান্দি বিয়া সা উখো হা·আইজামিং, মুয়ানা উয়া হা·দামও বাং·বিয়া মান্দি দংআনি গিম্মিন যীশু উয়োনি রি·য়াংজকমিং। 14 উনি জা·মানো যীশু উয়া মান্দিখো থরম নক্কো গ্রংএ আগানজক, “নিবো, না·আ নামজক। দা·আ পাপ দাক্কাবো, জেদাক্কে নাং·নি নামগিজানি হং·জা।” 15 উনোন উয়া মান্দি যিহূদীনি দাল·বাৎগিবারাংচা রি·য়াংএ বিখো নাম্মেতগিবা যীশু ইন্নে আগানজক। 16 নেং·থাকানি সালো যীশু ইয়া কামরাংখো দাক্কিংআমিং ইন্নে যিহূদী দাল·গিবারাং বিখো স·ওতে গালনা হাম·জকমিং। 17 উনোন বিয়া উয়া দাল·গিবারাংনা আগানজক, “আংনি ফা ফাংনান কাম দাক্কিংআ আরো আংআবা দাক্কিংআ।” 18 যীশুনি ইন্দাকে আগানানি গিম্মিন যিহূদীরাংনি দাল·গিবারাং বিখো স·ওতে গালনা হাম·জক, মুয়ানা বিয়া নেং·থাকানি সালনি নিয়ামখো ফি·ইংআমিং ইয়াসান হং·জা, ইসলখো আন·থাংনি ফাগিবা ইন্নে রিক্কামে আন·থাংখো ইসল গিত্তা দাল·নিকজকমিং। 19 উনি গিম্মিন যীশু উয়া দাল·গিবারাংনা আগানজক, “আংআ বিবিন না·সংনা আগানিংআ, দেফান্থি আন·থাংওনি মামুংখোন দাকনা মান·জা। ফাগিবাখো জেখো দাক্কাখো নিক্কা উখোসান দাকনা মা·ন্না, মুয়ানা ফাগিবা জেখো দাক্কা দেফান্থিবা উখোন দাক্কা। 20 ফাগিবা দেফান্থিনা খা·সাআ আরো বিয়া আন·থাং জেখো দাক্কা উখো দেফান্থিনা ফিন্নিকা। বিয়া ইরাংনাবা দাল·বাৎগিবা কামরাংখো দেফান্থিনা ফিন্নিকনুয়া, জেদাক্কে দেফান্থিনি উয়া কামরাংখো দাক্কাখো নিক্কে না·সং আইয়াও ইনমানা। 21 ফাগিবা জেদাক্কে সিগিবারাংনা জাংগিখো হ·ন্নে চাখাত্তেতা উয়ানদাক্কেন দেফান্থিবা জেনা হা·সিকা বিনা জাংগিখো হ·ন্না। 22 ফাগিবা দারাংখোবা বিচাল দাকজা, ইন্দিবা গিম্মিক বিচাল দাক্কানিখো দেফান্থিনা হন·জক, 23 ফাগিবাখো জেদাক্কে দিমদাকান মান্দিরা·আ উয়ানদাক্কে দেফান্থিখোবা মান্দিরা·আ। দেফান্থিখো জে মান্দিরা·জা, বিখো ওয়াত্তেতগিবা উয়া ফাগিবাখোবা বিয়া মান্দিরা·জা। 24 “আংআ না·সংনা বিবিন আগানিংআ, আংনি আগানাখো জে খিন্নাচাকা আরো জে আংখো ওয়াত্তেতগিবাখো বিবিরা·আ বিয়া ফাংনাজলনি জাংগিখো মান·জক। বিখো গ্রো নাংগিবা ইন্নে ফতজানুয়া; বিয়াদে সিয়াওনি জাংগিওনা গা·বাতজক। 25 আংআ না·সংনা বিবিন আগানিংআ, ইন্দাকগিবা সাল রি·বাংজক, ইন্দিবা দা·আওন সকজক, জে সময়ও সিগিবারাং ইসলনি দেফান্থিনি খু·রাংখো খিন্নানুয়া আরো খিন্নাগিবারাং থাংচানুয়া। 26 মুয়ানা জেদাক্কে ফাগিবা আন·থাংআন জাংগি মান·রিকগিবা হং·আ উয়ানদাক্কেন বিয়া দেফান্থিখোবা জাংগি মান·রিকগিবা হং·খানা হন·জক। 27 ফাগিবা দেফান্থিনা মান্দিরাংখো বিচাল দাকনা বিল হন·জক, মুয়ানা বিয়া মান্দিনি দেফান্থি হং·আ। 28 ইখো খিন্নাএ দা·আ আইয়াও ইনমানাবো, মুয়ানা ইন্দাকগিবা সাল রি·বাংজক, জেরাং গোপরামও দংআ বিসং দিমদাকান মান্দিনি দেফান্থিনি খু·রাংখো খিন্নাএ হং·খাতে রি·বানুয়া। 29 নামগিবা কামখো দাকগিবারাং জাংগিখো মা·ন্না চাখাতনুয়া, আরো নামগিজা কামখো দাকগিবারাং শাস্তিখো মা·ন্না চাখাতনুয়া। 30 আংআ আন·থাংওনি মামুংখোবা দাকনা মান·জা; জেদাক্কে খিন্না উগিত্তান বিচাল দাক্কা। আংআ খাকখেৎ দাক্কে বিচাল দাক্কা, মুয়ানা আংআ আংনি হা·সিকা গিত্তা কাম দাকনা হাম·জা ইন্দিবা আংখো ওয়াত্তেতগিবানি হা·সিকা গিত্তান কাম দাকনা হা·ম্মা। 31 “আংআ আন·থাংনি গিম্মিন সাক্ষি হ·ন্নোদে আংনি উয়া সাক্ষি হ·ন্না বিবি হং·জা। 32 আংনি গিম্মিন সাক্ষি হন·গিবা সাকগিপ্পিন দংআ, আরো আংআ হা·আইয়া আংনি গিম্মিন বিনি সাক্ষি হ·ন্না বিবি হং·আ। 33 না·সং যোহনচা সিং·না ওয়াত্তেতামিং, আরো বিয়া বিবিনি হং·এ সাক্ষি হন·জক। 34 আংআ মান্দিনি সাক্ষি হ·ন্নাও ফাংচাকজা, ইন্দিবা না·সং জেদাক্কে পাপওনি জকনা মা·ন্না উনি গিম্মিন ইয়া খাৎথারাংখো আগানিংআ। 35 যোহনআন থেং·সুয়াখো হন·গিবা উয়া চিং·গিবা চাক্কি হং·আমিং; না·সং বাং·গিজা সালনা উয়া থেং·সুয়াও হান·সেংনা হা·ম্মামিং। 36 ইন্দিবা যোহননি সাক্ষিনা বাত্তে দাল·বাৎগিবা সাক্ষি আংচা দংআ, মুয়ানা ফাগিবা আংনা জে কামরাংখো দাকনা হ·ন্না উরাংখোন আংআ দাক্কিংআ। আরো ফাগিবান আংখো ওয়াত্তেতজক ইন্নে উরাং আংনি গিম্মিন সাক্ষি হ·ন্না। 37 আংখো ওয়াত্তেতগিবা, উয়া আপফা, বিয়া আন·থাংআন আংনি গিম্মিন সাক্ষি হন·জক। না·সং মামুং সালোবা বিনি খু·রাংখো খিন্নাখুজা, মিকখাং বিমাংখোবা নিকখুজা। 38 ইনাআগ্রেবা বিনি খাৎথা না·সংনি খা·থংও দংখামজা, মুয়ানা বিয়া জেখো ওয়াত্তেতজক বিখো না·সং বিবিরা·জা। 39 না·সং রংথালগিবা শাস্ত্রখো গিসিক নাংএ পড়িয়া, মুয়ানা উয়োন না·সং ফাংনাজলনি জাংগিখো মা·ন্নুয়া ইন্নে চানচিয়া। ইন্দিবা উয়া শাস্ত্রদে আংনি বিদিংওন সাক্ষি হ·ন্না; 40 ইন্দাকোবা জাংগি মা·ন্না গিত্তা না·সং আংচানা রি·বানা হা·সিকজা। 41 “আংআ মান্দিনি রাসংখো মা·ন্না হাম·জা, 42 ইন্দিবা আংআ না·সংখো হা·আইয়া। আংআ হা·আইয়া না·সংনি খা·থংও ইসলনা খা·ফাক্কা দংজা। 43 আংআ আংনি ফাগিবানি বিমুংও রি·বাজক আরো না·সং আংখো রা·চাকজাংআ; ইন্দিবা সাকগিপ্পিন আন·থাংনি বিমুংও রি·বাওদে বিখো না·সং রা·চাকনুয়া। 44 না·সং সাকসা সাকগিপ্পিনচাখো রাসংখো মা·ন্না হা·ম্মা, ইন্দিবা সাকসানগিবা ইসলোনিখো মান·গিবা রাসংখো হাম·জা। ইনি জা·মানো না·সং বাদিকে দাক্কে বিবিরা·না মা·ন্না? 45 আপফাচা আংআ না·সংখো গ্রো নাংগিবা ইন্নে ফতনুয়া ইন্দাকে দা·আ চানচিয়াবো; ইন্দিবা জে মোশিনা না·সং খা·দংএ দংআ উয়া মোশিন না·সংখো গ্রো নাংগিবা ইন্নে ফতজক। 46 না·সং মোশিখো বিবিরা·ওদে আংখোবা বিবিরা·নুয়ামিং, মুয়ানা মোশিদে আংনি বিদিংওন চকজক। 47 ইন্দিবা না·সং বিনি চক্কাখোন বিবিরা·জাওদে বাদিকে দাক্কে আংনি আগানাখো বিবিরা·নুয়া?”

যোহন 6

1 উনি জা·মানো যীশু গালীল সাগালনি নালসাচানা রি·য়াংজক। ইয়া সাগালখো তিবিরিয়া সাগাল ইন্নেবা মিংআ। 2 বাং·বিয়া মান্দি যীশুখো জা·রিকনা হা·বাচেংজক, মুয়ানা সাগিবারাংনি সাক্কাও বিনি দাক্কা আইয়াও ইনমানগিবা কামরাংখো বিসং নিক্কামিং। 3 যীশু বিনি জা·রিকগিবারাংখো রা·এ হা·ব্রি থিম·সাও গাখাতে আসংজক। 4 উয়া সময়ও যিহূদীরাংনি ওয়াতচাংআনি সাল সেফাংবাজকমিং। 5 যীশু নিএতোন নিকজক বাং·আ মান্দিরাং বিচানা রি·বাংজক। বিয়া ফিলিপনা আগানজক, “ইয়া মান্দিরাংনা চা·না হ·ন্না আনচিং বাচ্চানিখো রুটিখো ব্রিনুয়া?” 6 ফিলিপখো সিং·মিকে নিনা গিত্তাসা বিয়া উয়া খাৎথাখো আগানজক, মুয়ানা মুয়াখো দাকনুয়া উখো বিয়া হা·আইয়ামিং। 7 ফিলিপ যীশুনা আগানজক, “বিসং সাকফ্রাকফ্রাক অকখিসা দাক্কে মা·ন্নোবা দিনার রিৎচাগ্মিনি রুটিবা হং·মানজানুয়া।” 8 যীশুনি জা·রিকগিবারাংও আন্দ্রিয় মিংআ সাকসা দংআমিং। বিয়া শিমোন-পিতরনি জংগিবা হং·আমিং। 9 আন্দ্রিয় যীশুনা আগানজক, “ইনো বি·সা সাকসাচা যব মিনি রুটি গিলবংআ আরো না·থক মাংগ্মি দংআ, ইন্দিবা মান্দি বাং·বিয়ানা উয়া হং·নুয়ামা?” 10 যীশু আগানজক, “মান্দিরাংখো আসংএতবো।” উয়া হা·দামও সামচেং বাং·আ দংআমিং। মান্দিরাং উনি সাক্কাওন আসংজক। উনো মি·আসান হাজাল বংআমাং দংআমিং। 11 ইনি জা·মানো যীশু উয়া রুটিখো রা·এ ইসলখো মিৎথেলজক আরো আসংগিবারাংনা সুয়ালে হন·জক। উয়ানদাক্কেন বিয়া না·থকখোবা হন·জক। হা·সিকা দিপ্পাৎ গিম্মিকান মান·জক। 12 মান্দিরাংনি অক্ষায়ে চা·আনি জা·মানো যীশু বিনি জা·রিকগিবারাংনা আগানজক, “গিৎচাগিবারাংখো চিম্মংবো জেদাক্কে মামুংআন নাসিজা।” 13 মান্দিরাংনি চা·আনি জা·মানো জা·রিকগিবারাং উয়া গিলবংআ রুটিনি গিৎচাগিবাখো চিম্মংএ চি·গ্মি খকো গাপ্পেতজক। 14 যীশুনি ইন্দাকগিবা আইয়াও ইনমানগিবা কামখো নিক্কে মান্দিরাং আগান্না হা·বাচেংজক, “ইয়া বিবিন হা·গিলসাকো রি·বানা আগানগিবা উয়া আগানসোগিবা হং·আ।” 15 ইনি হা·সেলো যীশু হা·আইনা মান·জক, মান্দিরাং বিখো রাজা থারিনা ইন্নে রিম·না রি·বাংজক। উনি গিম্মিন বিয়া সাকসান দা·আবা উয়া হা·ব্র্রিচানা রি·য়াংজক। 16 হান·থামানি জা·মানো যীশুনি জা·রিকগিবারাং সাগালনি রিক্কামওনা রি·য়াংজক, 17 আরো রিংও গাখাতে কফরনাহূম সংজিলমাচানা রি·য়াংনা সাগালখো বাত্তাংনা হা·বাচেংজক। উনো আন্দালজকমিং, আরো উনোবা যীশু বিসংচা রি·বাখুজামিং। 18 বালওয়া থা·রাক্কানি গিম্মিন সাগালোবা চি ফকফেকবিজক। 19 মাইল গিত্থাম মাইল ব্রি রিং চোএ বাত্তাংআনি জা·মানো বিসং যীশুখো সাগাল সাক্কা গিত্তা রামা রি·এ বিসংনি রিংচাবাকা রি·বাখো নিকনা মান·জক। ইখো নিক্কে জা·রিকগিবারাং খেনবিজক। 20 উনোন যীশু বিসংনা আগানজক, “দা·আ খেন্নাবো; ইয়াদে আংআসা।” 21 জা·রিকগিবারাং বিখো রিংও গাত্তে রা·না হাম·জক, আরো বিসং জে হা·দামওনা রি·য়াংআমিং উনোন উচা সক্কাংআরিজক। 22 সাগালনি নালসাচা চাদেংএ দংগিবা মান্দিরাং সালগিপ্পিনো হা·আইনা মান·জক, রিং গি·সানি আগ্রে উনো গিপ্পিন রিংরাং দংজামিং। বিসং আরোবা হা·আইনা মান·জক, যীশু বিনি জা·রিকগিবারাংমুং উয়া রিংও গাদোজা ইন্দিবা জা·রিকগিবারাংসান রি·য়াংআমিং। 23 ইন্দাকোবা গিত্তেল জেও মিৎথেলে মান্দিরাংনা চা·আখো হ·ন্নামিং উয়া হা·দামনি সেফাংও উনো তিবিরিয়া সংজিলমাওনি মিত্তাম রিংরাংবা রি·বাজক। 24 ইনি গিম্মিন যীশু আরো বিনি জা·রিকগিবারাংনি সাকসাখোবা উয়োনা নিকজাএ বিসং উয়া রিংরাংও গাখাত্তে যীশুখো সান্দিনা কফরনাহূমচানা রি·য়াংজক। 25 উয়ো সক্কে বিসং যীশুখো সান্দিয়ে মা·ন্নে আগানজক, “স্খিগিবা, না·আ বাসোকো ইয়োনা রি·বাজক?” 26 যীশু আগানচাকজক, “আংআ না·সংনা বিবিন আগানিংআ, না·সং আইয়াও ইনমানগিবা কামখো নিক্কেন আংখো সান্দিংআ ইয়াদে হং·জা, ইন্দিবা অক্ষায়ে রুটি চা·না মা·ন্নানি গিম্মিনান সান্দিংআ। 27 ইন্দিবা নাসিনাগিবা চা·আনা গাম্মে মুয়া হং·নুয়া? জে চা·আ নাসিজা বাত্তেসা ফাংনাজলনি জাংগিখো হ·ন্না উনি গিম্মিন গামবো। উয়া চা·আখোন মান্দিনি দেফান্থি না·সংনা হ·ন্নুয়া, মুয়ানা ফাগিবা ইসল বিখোন ইয়া কামনা খ্রাগিবা ইন্নে ফিন্নিকজক। 28 ইনি গিম্মিন মান্দিরাং যীশুখো সিং·জক, “ইন্দাকোদে ইসলনি কামখো দাকনা আনচিংনি মুয়াখো দাকনা নাংনুয়া?” 29 যীশু বিসংনা আগানজক, “ইসল জেখো ওয়াত্তেতজক বিখো বিবিরা·আন ইসলনি কাম হং·আ।” 30 উনোন বিসং বিখো সিং·জক, “ইন্দাকোদে বাদাকগিবা আইয়াও ইনমানগিবা কামখো না·আ দাকনুয়া জেখো নিক্কে চিংআ নাং·খো বিবিরা·না মা·ন্না? না·আ মুয়াখো দাকনুয়া? 31 আনচিংনি ফাগিৎচামরাংদে হা·গিসি জওলো মান্না চা·আমিং। রংথালগিবা শাস্ত্রও চক্কা দংআ, ‘ইসল সালগিওনি বিসংনা রুটি চা·না হন·জক।’ ” 32 যীশু বিসংনা আগানজক, “আংআ না·সংনা বিবিন আগানিংআ, সালগিওনি জে রুটিখো না·সং মা·ন্নামিং উখো মোশি না·সংনা হন·জা, ইন্দিবা আংনি ফাগিবা চং·মতগিবা রুটিখো না·সংনা হ·ন্নিংআ। 33 সালগিওনি হং·ওনবাএ মান্দিনা জাংগি হন·গিবান ইসলনি হন·গিবা রুটি হং·আ।” 34 মান্দিরাং বিনা আগানজক, “স্খিগিবা, ইন্দাকোদে উয়া রুটিখোন চিংনা ফাংনাজ্রিং হন·বো।” 35 যীশু বিসংনা আগানজক, “আংআন উয়া জাংগিনি রুটি। আংচানা রি·বাগিবা মামুং দাক্কেবা অকখ্রিজানুয়া। আংখো বিবিরা·গিবাদে মামুং দাক্কেবা রিংনা হা·সিকজানুয়া। 36 আংআদে না·সংনা আগানজকান, না·সং আংখো নিকজক ইন্দাকোবা বিবিরা·জা। 37 ফাগিবা জেরাংখো আংনা হ·ন্নুয়া বিসং দিমদাকান আংচানা রি·বানুয়া। আংচা রি·বাগিবাখো আংআ মামুং দাক্কেবা হা·ফালওনা গালজানুয়া, 38 মুয়ানা আংআ আংনি হা·সিকা গিত্তা কাম দাকনা রি·বাজা, ইন্দিবা আংখো ওয়াত্তেতগিবানি হা·সিকা গিত্তা কাম দাকনা সালগিওনি রি·বাজক। 39 আংখো ওয়াত্তেতগিবানি হা·সিকা ইয়ান, জেরাংখো বিয়া আংনা হন·জক উয়া সাকসাখোবা জেদাক্কে আংআ গিম্মায়েতজা বাত্তেসা বন·খামানি সালো থাংচাএতনা মা·ন্না। 40 আংনি ফাগিবানি হা·সিকা ইয়ান- না·সংনি গিসেপো দেফান্থিখো নিক্কে বিবিরা·গিবারাং জেদাক্কে ফাংনাজলনি জাংগিখো মা·ন্না। আরো আংআন বিসংখো বন·খামানি সালো থাংচাএতনুয়া।” 41 উনোন যিহূদীরাংনি দাল·বাৎগিবারাং যীশুখো খা·চাএ খা·চাএ ইন্না হা·বাচেংজক, মুয়ানা যীশু আগানামিং, “আংআন সালগিওনি হং·ওনবাগিবা উয়া রুটি।” 42 উয়া দাল·গিবারাং ইন্না হা·বাচেংজক, “ইয়া যোষেফনি দেফান্থি যীশু হং·জামা? আনচিং ইনি মা·আ ফাআখোদে হা·আইয়া। ইন্দিদে বিয়া বাদিকে দাক্কে ইন্না, ‘আংআ সালগিওনি হং·ওনবাজক?” 43 যীশু বিসংনা আগানজক, “না·সং আন·থাংথাংও দা·আ ইনগ্রিক্কা। 44 আংনি ফাগিবা, আংখো জে ওয়াত্তেতজক বিয়া সাল্লে রা·বাজাওদে সাকসাবা আংচা রি·বানা মান·জা। আরো আংআন বিখো বন·খামানি সালো থাংচাএতনুয়া। 45 আগানসোগিবারাংনি খি·তাপও চক্কা দংআ, ‘বিসং গিম্মিকান ইসলচানিখো স্খিয়াখো মা·ন্নুয়া।’ ফাগিবাচাখো খিন্নাচাকে স্খিয়াখো মান·গিবান আংচানা রি·বাআ। 46 ফাগিবাখো সাকসাবা নিকখুজা, ইসলওনি রি·বাগিবাসান বিখো নিক্কা। 47 আংআ না·সংনা বিবিন আগানিংআ, জে আংখো বিবিরা·আ বিয়ান ফাংনাজলনি জাংগিখো মা·ন্না।” 48 “আংআন জাংগিনি রুটি। 49 না·সংনি ফাগিৎচামরাং হা·গিসি জওলো মান্না চা·আমিং, ইন্দাকোবা বিসং সিজক। 50 ইন্দিবা ইয়া রুটি সালগিওনি হং·ওনবাগিবা রুটি, জেদাক্কে মান্দি উখো চা·এ সিয়াওনি জকনা মা·ন্না। 51 আংআন উয়া জাংগিনি রুটি সালগিওনি হং·ওনবাগিবা। ইয়া রুটিখো চা·গিবা ফাংনাজলনা জাংগিখো মা·ন্নুয়া। আংনি বে·এনআন উয়া রুটি। মান্দি জেদাক্কে জাংগি মা·ন্না উনি গিম্মিন আংআ আংনি ইয়া বে·এনখো হ·ন্নুয়া।” 52 ইয়া খাৎথাখো খিন্নাএ যিহূদী দাল·গিবারাংও জিগ্রিকনা হা·বাচেংজক। বিসং ইনজক, “বাদিকে দাক্কে ইয়া মান্দি বিনি বে·এনখো আনচিংনা চা·না হ·ন্না মা·ন্না?” 53 যীশু বিসংনা আগানজক, “আংআ বিবিন না·সংনা আগানিংআ, মান্দিনি দেফান্থিনি বে·এনখো আরো হান·চিখো না·সং চা·জাওদে না·সংও জাংগি দংজা। 54 সাবা আংনি বে·এনখো আরো হান·চিখো চা·আওদে বিয়া ফাংনাজলনি জাংগিখো মা·ন্না, আরো আংআ বন·খামানি সালো বিখো থাংচাএতনুয়া। 55 আংনি বে·এনআন চং·মতগিবা চা·আনি আরো আংনি হান·চিআন চং·মতগিবা রিংআনি হং·আ। 56 আংনি বে·এনখো আরো হান·চিখো চা·গিবা আংওন দংআ আরো আংআবা বিও দংআ। 57 থাংগিবা আপফা আংখো ওয়াত্তেতজক আরো বিনি গিম্মিনান আংআ থাংএ দংআ। উয়ানদাক্কেন আংখো চা·গিবাবা আংনি গিম্মিন থাংএ দংনুয়া। 58 ইয়ান সালগিওনি হং·ওনবাগিবা উয়া রুটি। ইয়া রুটি না·সংনি ফাগিৎচামরাংনি চা·এ সিগিবা রুটি গিত্তা হং·জা। ইয়া রুটিখো চা·গিবা ফাংনাজলনা জাংগিখো মা·ন্নুয়া।” 59 কফরনাহূমনি থম·দাকরামচা স্খিমিত্তিংও যীশু ইয়া খাৎথাখো আগানামিং। 60 বিনি জা·রিকগিবারাংনি গিসেপো বাং·এন ইখো খিন্নাএ আগানজক, “ইয়া স্খিয়াদে নাম্মেন রাকবাত্তা। সা ইখো রা·চাকনা মা·ন্না?” 61 ইনি গিম্মিন বিনি জা·রিকগিবারাংনি আগানগ্রিক্কাখো যীশু গিসিকথাংও হা·আইনা মান·জক। উনি গিম্মিন বিয়া বিসংনা আগানজক, “ইনি হা·সেলো না·সং গিসিকো জাজ্রেংআমা? 62 ইন্দিদে মান্দিনি দেফান্থি জেও দংআমিং উয়োনা বিখো গাদোয়াংআখো নিক্কোদে না·সং মুয়াখো আগান্নুয়া? 63 মান্দিনি বে·এন মামুং কামনা হং·জা; গিসিক রংথালগিবান জাংগিখো হ·ন্না। আংআ না·সংনা জেখো আগানজক উয়াদে গিসিক আরো জাংগি হং·আ, 64 ইন্দিবা না·সংনি গিসেপো ইন্দাকগিবা মিত্তাম দংআ জেরাং আংখো বিবিরা·জা।” সারাং যীশুখো বিবিরা·জা আরো সাআন বিখো বোবিলরাংনি জাক্কো রি·ম্মে হ·ন্নুয়া, যীশু উখো স্খাংওনিন হা·আইয়ামিং। 65 উনি গিম্মিন বিয়া আগানজক, “ইনি গিম্মিন আংআ না·সংনা ইখো আগানজক, ফাগিবা বিলখো হন·জাওদে দারাংবা আংচানা রি·বানা মান·জা।” 66 যীশুনি ইয়া খাৎথানি গিম্মিন জা·রিকগিবারাংনি গিসেপো বাং·এন ফি·ল্লাংজক আরো বিমুং রি·ফাজাজক। 67 ইনি গিম্মিন যীশু উয়া সাকচিগ্মি জা·রিকগিবারাংনা আগানজক, “না·সংবা রি·য়াংনা হা·ম্মামা?” 68 শিমোন-পিতর যীশুনা আগানজক, “গিত্তেল, চিংআ সাচা রি·য়াংনুয়া? ফাংনাজলনি জাংগিনি খাৎথাদে নাং·চান দংআ। 69 চিংআ বিবিরা·জক আরো হা·আইনাবা মান·জক, না·আন ইসলনি উয়া রংথালগিবা মান্দি হং·আ।” 70 উনোন যীশু বিসংনা আগানজক, “আংআ না·সং সাকচিগ্মিখো বাচ্ছিয়ে রা·জামা? ইন্দিবা না·সংনিন গিসেপো সাকসা বোবিল দংআ।” 71 ইনো যীশু শিমোন ইষ্কারিয়োতনি দেফান্থি যিহূদানি খাৎথাখো আগানিংআমিং, মুয়ানা বিয়ান জা·মানো যীশুখো রি·ম্মে হ·ন্নুয়া। বিয়া উয়া সাকচিগ্মিওনি সাকসা হং·আমিং।

যোহন 7

1 ইনি জা·মানো যীশু গালীল হা·দকোন রি·রুরানা হা·বাচেংজক। যিহূদীরাংনি দাল·বাৎগিবারাং বিখো স·ওতনা হা·ম্মানি গিম্মিন বিয়া যিহূদিয়া হা·দকো রি·জাজক। 2 উনোন যিহূদিরাংনি নকথুপ রিক্কানি পর্ব হং·বাজকমিং। 3 ইনি গিম্মিন যীশুনি জংগিবারাং বিনা আগানজক, “ইয়া হা·দামখো ওয়াত্তে যিহূদিয়াওনা রি·য়াংবো, জেদাক্কে নাং·নি দাকগিবা কামরাংখো নাং·নি জা·রিকগিবারাং নিকনা মা·ন্না। 4 সাবা আন·থাংখো মান্দিরাংচা হা·আইএতনা হা·সিকোদে ইন্দিদে বিয়া মিৎথিনাও মামুংখোবা দাকজা। না·আ ইরাংখো দাক্কোদে মান্দিরাংনি মিকখাংও আন·থাংখো ফিন্নিকবো।” 5 চং·মতান যীশুনি জংগিবারাংবা যীশুখো বিবিরা·জানুয়ামিং। 6 ইনি গিম্মিন যীশু বিসংনা আগানজক, “আংনি সাল দা·আওবা সকখুজা, ইন্দিবা না·সংনি সাল ইন্ন্নে মামুংবা দংজা। 7 হা·গিলসাকনি মান্দিরাং না·সংখো মিৎচিনা মান·জা ইন্দিবা আংখোন মিৎচিয়া, মুয়ানা বিসংনি গিম্মিক কামআন নামজা ইন্নে আংআ বিসংনি গিম্মিন সাক্ষি হ·ন্না। 8 না·সংআন উয়া পর্বওনা রি·য়াংবো। আংনি সাল দা·আওবা সকখুজা ইন্নে আংআ দা·আও রি·য়াংখুজানুয়া।” 9 ইরাংখো আগানে যীশু গালীলওন দংরিকজক। 10 ইন্দিবা বিনি জংগিবারাং উয়া পর্বওনা রি·য়াংআনি জা·মানো বিয়াবা উয়োনা রি·য়াংজক, ইন্দিবা ফারাকে রি·য়াংজাজক, স্রক দাক্কে রি·য়াংজক। 11 মানিয়ানি সালো যিহূদীনি দাল·বাৎগিবারাং যীশুখো সান্দিনা হা·বাচেংজক আরো ইনজক, “উয়া মান্দি বাও?” 12 মান্দি জিলমাও যীশুখো রা·এ আন·থাংথাংনি গিসেপো বাং·এন ইন্না হা·বাচেংজক। সাবা ইনজক, “বিয়া নাম্মা মান্দি।” দা·আবা সাবা ইনজক, “হং·জা, বিয়া মান্দিরাংখো ব্রাংএতিংজক।” 13 ইন্দিবা যিহূদীরাংনি দাল·বাৎগিবারাংনা খেন্নানি গিম্মিন সাকসাবা বিনি গিম্মিনো ফারাকেদে মামুংখোবা আগানজাজক। 14 উয়া পর্বনি জাংচিমিত্তিংও যীশু থরম নক্কোনা রি·য়াংএ স্খিনা হা·বাচেংজক। ইনি গিম্মিন যিহূদীনি দাল·বাৎগিবারাং আইয়াও ইনমানে আগানজক, 15 “ইয়া মান্দি মামুং স্খিয়াখো মান·গিজা বাদিকে দাক্কে ইরাংখো হা·আইয়া?” 16 যীশু বিসংনা আগানচাকজক, “আংআ জেখো স্খিয়া উয়া আংনি আন·থাংনি হং·জা, ইন্দিবা আংখো ওয়াত্তেতগিবানিন হং·আ। 17 সাবা বিনি হা·সিকাখো মানিনা হা·ম্মোদে ইন্দিদে ইয়া স্খিয়া ইসলোনি রি·বামা বা আংওনি আগানিংআ, ইখো বিয়া হা·আইনা মা·ন্নুয়া। 18 আন·থাংওনি খাৎথা আগানগিবা আন·থাংখোন রাসং দাকনা হা·ম্মা, ইন্দিবা জে ওয়াত্তেতজক, সাবা বিখোন রাসং দাকনা হা·ম্মোদে ইন্দিদে বিয়া বিবিগিবা আরো বিনি গিসিকো বু·আনি দংজা। 19 মোশি না·সংনা নিয়ামরাংখো হন·জামা? ইন্দিবা না·সংও উয়া নিয়ামরাংখো সাকসাবা মানিজা। ইন্দিদে মুয়ানা না·সং আংখো স·ওতে গালনা হা·ম্মিংআ?” 20 মান্দিরাং আগানচাকজক, “নাং·খো মি·মাং মান·জক; সা নাং·খো স·ওতনা হা·ম্মিংআ?” 21 যীশু বিসংনা আগানজক, “আংআ মিংসা কাম দাকজক ইন্নে না·সং দিমদাকান আইয়াও ইনমানিংআ। 22 মোশি না·সংনা বিগিল রাত্তানি বেওয়ালখো হন·জক, আরো উখো না·সং নেং·থাকানি সালোবা দাক্কা। ইয়া নিয়াম মোশিওনি রি·বাজা, ফাগিৎচামরাংওনিন রি·বাআ। 23 ইয়াদে নাম্মান, মোশিনি নিয়ামখো ফি·জানা গিত্তা নেং·থাকানি সালোবা বি·সারাংনি বিগিল রাতনা মা·ন্নোদে, ইন্দিদে আংআ নেং·থাকানি সালো সাকসা মান্দিনি সাআখো চু·গিম্মিক দাক্কে নাম্মেতজক ইন্নে না·সং আংখো মুয়ানা খা·আওনাংআ? 24 হা·ফালনি মিকখাং বিমাংখো নিক্কে বিচাল দাকগিজা বাত্তেসা খাকখেৎ দাক্কে বিচাল দাকবো।” 25 উনোন যিরূশালেমনি মিত্তাম মান্দি আগানজক, “জেখো দাল·গিবারাং স·ওতনা হা·ম্মা, ইয়ান উয়া মান্দি হং·জামা? 26 ইন্দিবা বিয়াদে ফারাকেন গিম্মিকখো আগানিংআ ইন্দিবা দাল·গিবারাং সাকসাবা বিখো মামুংখোন ইনজাংজক। ইন্দাকোদে ইয়া মান্দিন খ্রীষ্ট হং·আ ইন্নে বিসং বিবিন হা·আইনা মান·জকমা? 27 ইন্দাকোবা ইয়া মান্দি বাওনি রি·বাআ উখো চিংআ হা·আইয়া। ইন্দিবা খ্রীষ্ট জেনসালো রি·বানুয়া উনসালো বিয়া বাওনি রি·বাজক উখো দারাংবা হা·আইজানুয়া।” 28 জা·মানো যীশু থরম নক্কো স্খিমিত্তিংও রাক্কে রাক্কেন আগানজক, “না·সং আংখোবা হা·আইয়া আরো আংআ বাওনি রি·বাআ উখোবা হা·আইয়া। ইন্দাকোবা আংআ আন·থাংওনি রি·বাজা, ইন্দিবা বিবিগিবা ইসল আংখো ওয়াত্তেতা। 29 বিখো না·সং হা·আইজা ইন্দিবা আংআ হা·আইয়া, মুয়ানা আংআ বিওনিন রি·বাআ আরো বিয়ান আংখো ওয়াত্তেতা।” 30 ইনি গিম্মিন উয়া মান্দিরাং যীশুখো রিম·না হাম·জক, ইন্দিবা উনোবা বিনি সাল সকখুজানি গিম্মিন দারাংবা বিনি বে·এনো জাক হন·জাজক। 31 ইন্দাকোবা মান্দিরাংনি গিসেপো বাং·এন যীশুখো বিবিরা·এ আগানজক, “বিয়া বাং·এন আইয়াও ইনমানানি কামখো দাকজক। খ্রীষ্ট রি·বাএ বিনা বাত্তেবা আইয়াও ইনমানগিবা কামখো দাকনুয়ামা?” 32 যীশুনি গিম্মিনো মান্দিরাংনি ইন্দাকে আগানগ্রিক্কাখো ফরীশীরাং খিন্নানা মান·জক। উনোন খামাল দাল·গিবারাং আরো ফরীশীরাং যীশুখো রিম·না মিত্তাম নিথিমগিবারাংখো ওয়াত্তেতজক। 33 যীশু আগানজক, “আংআ না·সংমুং সাল বাং·গিজানাসান দংনুয়া। জা·মানো আংখো ওয়াত্তেতগিবাওনা আংআ রি·য়াংনুয়া। 34 না·সং আংখো সান্দিনুয়া ইন্দিবা মান·জানুয়া, আরো আংআ জেও দংনুয়া উয়োনা না·সং রি·বানাবা মান·জানুয়া।” 35 যীশুনি ইন্দাকে আগানানি গিম্মিন যিহূদীরাংনি দাল·বাৎগিবারাং আন·থাংথাংও আগানগ্রিকনা হা·বাচেংজকক, “ইয়া মান্দি বাওনা রি·য়াংনুয়া জেনি গিম্মিন চিংআ বিখো সান্দিয়ে মান·জানুয়া? গিপ্পিন জাতরাংও বিলদিং বিলদাং দাক্কে দংগিবা যিহূদীরাংও রি·য়াংএ বিয়া বিসংনা স্খিয়ে হ·ন্নুয়ামা? 36 ‘না·সং আংখো সান্দিনুয়া ইন্দিবা মান·জানুয়া, আরো আংআ জেও দংনুয়া না·সং উয়োনা রি·বানাবা মান·জানুয়া,’ বিনি ইন্দাকে আগানানি অর্থ মুয়া হং·আ?” 37 মানিয়ানি বন·খামগিবা সালান দাল·বাৎগিবা সাল হং·আমিং। উয়া সালো যীশু চাদেংএ রাক্কে রাক্কে আগানজক, “সাবা চি রিংনা হা·সিকোদে বিয়া আংচা রি·বাএ চি রিংখানা। 38 আংও জে বিবিরা·আ, রংথালগিবা শাস্ত্রনি খাৎথা গিত্তা বিনি খা·থংওনি থাংগিবা চিনি চিবিমা জকনুয়া।” 39 যীশুখো বিবিরা·এ জেরাং গিসিক রংথালগিবাখো মা·ন্নুয়া উয়া গিসিক রংথালগিবানি গিম্মিন যীশু ইখো আগানজক। গিসিক রংথালগিবাখো উনোবা হন·খুজা মুয়ানা উনোবা যীশু বিনি রাসংখো মান·খুজামিং। 40 ইরাংখো খিন্নাএ মান্দিরাংওনি মিত্তামরাং আগানজক, “বিবিন ইয়ান উয়া আগানসোগিবা।” 41 সাকগিপ্পিনরাং আগানজক, “ইয়ান খ্রীষ্ট। ” ইন্দিবা সাবা সাবা আগানজক, “খ্রীষ্ট গালীল হা·দকোনি রি·বানুয়ামা? 42 রংথালগিবা শাস্ত্র ইখো আগানজামা, দায়ূদনি দংগিবা বৈৎলেহম সংও আরো বিনি মা·চংওন খ্রীষ্ট আৎচিনুয়া?” 43 ইন্দাকে যীশুখো রা·এ মান্দিরাংনি গিসেপো চানচিয়ারাং দিংথাং দিংথাং হং·গ্রিকনা হা·বাচেংজক। 44 মিত্তামরাং যীশুখো রিম·না হাম·জক ইন্দিবা দারাংবা বিনি বে·এনো জাক হন·জাজক। 45 জে নিথিমগিবারাংখো ওয়াত্তেতামিং বিসং খামাল দাল·গিবারাংচা আরো ফরীশীরাংচানা রি·বাফিলজক। উনোন বিসং বিসংখো সিং·জক, “বিখো মুয়ানা রা·বাজাজক?” 46 উয়া নিথিমগিবারাং আগানজক, “উয়া মান্দি জেদাক্কে খাৎথা আগানা উয়ানদাক্কে সাকসাবা আগানখুজা।” 47 ইনি গিম্মিন ফরীশীরাং উয়া নিথিমগিবারাংনা আগানজক, “না·সংবা ব্রাংজকমা? 48 দাল·গিবারাংনি আরো ফরীশীরাংনি গিসেপো সাকসাবা বিখো বিবিরা·জাজক। 49 ইন্দিবা ইয়া মান্দিরাংদে মোশিনি নিয়ামরাংখো হা·আইজা; ইরাংনি সাক্কাও শাপ দংআ।” 50 নীকদীম, জেআন স্খাংও যীশুচা রি·য়াংআমিং, বিয়া ইয়া ফরীশীরাংওনি সাকসা হং·আমিং। 51 বিয়া আগানজক, “মান্দিনি খু·সুকখো খিন্নাচেংগিজা আরো বিনি দাক্কাখো হা·আইগিজা দারাংখোবা শাস্তি হ·ন্নানি গিত্তা নিয়াম আনচিংনি দংআমা?” 52 ফরীশীরাং নীকদীমনা আগানচাকজক, “না·আবা গালীলনি মান্দি হং·আমা? রংথালগিবা শাস্ত্রও সান্দিয়ে নিবো, গালীল হা·দকো আগানসোগিবা সাকসানিবা আৎচিয়ানি খাৎথা দংজা।”

যোহন 8

1 ইনি জা·মানো দিমদাক মান্দিন আন·থাংথাংনি নকচানা রি·য়াংজক, ইন্দিবা যীশু জৈতুন হা·ব্রিওনা রি·য়াংজক। 2 উনি সালসা জা·মানো ফ্রিংও যীশু দা·আবা থরম নক্কোনা রি·য়াংআনি জা·মানো দিমদাক মান্দি বিচা রি·বাজক। উনো যীশু আসংএ বিসংনা স্খিনা হা·বাচেংজক। 3 উনোন শাস্ত্র স্খিগিবা আরো ফরীশীরাং সাকসা মিচিকখো যীশুচা রিমবাজক। উয়া মিচিকখো থি·ল্লেকানি গিম্মিন রি·ম্মামিং। শাস্ত্র স্খিগিবারাং আরো ফরীশীরাং উয়া মিচিকখো জাংচিও চাদেংএতে যীশুনা আগানজক, “স্খিগিবা, ইয়া মিচিকখো থি·ল্লেকানা রিম·জক। 5 নিয়ামও দংআ গিত্তা মোশি ইন্দাকগিবা মিচিকরাংখো রং·থিচা গোথাত্তে স·ওতনা গি·য়েৎজক। ইন্দিবা না·আ মুয়াখো ইন্না?” 6 বিসং যীশুখো সিং·ব্রুএ নিনা ইন্নেন ইখো আগানজক, জেদাক্কে বিসং বিখো দোস হ·ন্না গি·সা চল সান্দিয়ে মা·ন্না। উনোন যীশু বামবক্কে জাকসিচা হা·আও চকনা হা·বাচেংজক। 7 ইন্দিবা বিসংনি দাপ্পেৎ দাপ্পেৎ সিং·ফিলানা বিয়া চাখাত্তে বিসংনা আগানজক, “না·সংনি গিসেপো মামুং পাপ দাকগিজাগিবান বিখো স্খাং রং·থিচা গোথাতখানা।” 8 ইনি জা·মানো দা·আবা বিয়া বামগপ্পে হা·আও চকনা হা·বাচেংজক। 9 ইয়া খাৎথাখো খিন্নাএ উয়া দাল·গিবারাংনি গিসেপো বুদেফাওনি হা·বাচেংএ সাকসা সাকসা দাক্কে গিম্মিক মান্দিন রি·য়াংথকজক। যীশু সাকসানান উয়ো দংজক আরো উয়া মিচিক বিনি মিকখাংও চাদেংএ দংআমিং। 10 যীশু চাখাত্তে উয়া মিচিকনা আগানজক, “বিসং বাও? নাং·খো সাকসাবা শাস্তি মা·ন্না খ্রাআ ইন্নে চানচিজামা?” 11 উয়া মিচিক আগানচাকজক, “হং·জা স্খিগিবা, সাকসাবা চানচিজা।” উনোন যীশু আগানজক, “আংআবা চানচিজা। দে রি·য়াংবো; দা·আ পাপ দাক্কাবো।” 12 জা·মানো যীশু দা·আবা মান্দিরাংনা আগানফিলজক, “আংআন হা·গিলসাকনি সেং·আ। আংনি রামাওনা রি·গিবাদে মামুং দাক্কেবা আন্দালাও রি·জানুয়া, ইন্দিবা জাংগিনি সেং·আখো মা·ন্নুয়া।” 13 ইনি গিম্মিন ফরীশীরাং যীশুনা আগানজক, “নাং·নি সাক্ষি হ·ন্না বিবি হং·জা, মুয়ানা না·আ আন·থাংআন আন·থাংনি গিম্মিন সাক্ষি হ·ন্নিংজক।” 14 যীশু বিসংনা আগানচাকজক, “আংআ আন·থাংআন আন·থাংনি গিম্মিন সাক্ষি হ·ন্নোবা ইন্দাকোবা আংনি সাক্ষি হ·ন্না বিবিন হং·আ, মুয়ানা আংআ বাওনি রি·বাজক আরো বাওনা রি·য়াংইংজক উখো আংআ হা·আইয়া। ইন্দিবা আংআ বাওনি রি·বাজক আরো বাওনা রি·য়াংইংজক উখো না·সং হা·আইজা। 15 মান্দিনি বিচাল দাক্কা গিত্তা না·সংবা বিচাল দাক্কা, ইন্দিবা আংআ দারাংখোবা বিচাল দাকজা। 16 ইন্দিবা আংআ মামুং সালো বিচাল দাক্কোদে ইন্দিদে আংনি উয়া বিচাল দাক্কা বিবি হং·আ, মুয়ানা আংআ সাকসান হং·জা। আংআদে দংআন আরো আংখো ওয়াত্তেতগিবা ফাগিবাবান আংমুং দংআ। 17 না·সংনি নিয়ামরাংও চক্কা দংআ, সাকগ্মিনি সাক্ষি আপসান হং·ওদে উয়া বিবি হং·আ। 18 আংআন আন·থাংনি গিম্মিন সাক্ষি হ·ন্না, আরো আংখো ওয়াত্তেতগিবাবা আংনি গিম্মিন সাক্ষি হ·ন্না।” 19 ফরীশীরাং বিনা আগানজক, “নাং·নি ফাগিবা বাও?” যীশু আগানচাকজক, “না·সং আংখোবা হা·আইজা আরো আংনি ফাগিবাখোবা হা·আইজা। আংখো হা·আইওদে আংনি ফাগিবাখোবা হা·আইনুয়ামিং।” 20 থরম নক্কো স্খিমিত্তিংও থাংখা হন·গিবা হা·দামও যীশু ইয়া খাৎথারাংখো আগানজক। ইন্দিবা উনোবা বিনি সাল সকখুজা ইন্নে দারাংবা বিখো রিম·জাজক। 21 ফি·ল্লে যীশু ফরীশীরাংনা আগানজক, “আংআ রি·য়াংইংজক। না·সং আংখো সান্দিনুয়া, ইন্দিবা না·সং না·সংনি পাপনি হা·সেলো সিনুয়া। আংআ জেও রি·য়াংআ না·সং উয়ো রি·বানা মান·জানুয়া।” 22 উনোন যিহূদীনি দাল·গিবারাং আগানজক, “বিয়া আন·থাংখোন স·ওতনুয়ামা? মুয়ানা, ‘আংআ জেও রি·য়াংআ না·সং উয়োনা রি·বানা মান·জানুয়া’ ইন্নে বিয়া আগানা।’ ” 23 যীশু বিসংনা আগানজক, “আংআ সাক্কাওনি রি·বাআ আরো না·সং খা·মাওনি রি·বাজক। না·সং ইয়া হা·গিলসাকনি হং·আ, ইন্দিবা আংআ ইয়া হা·গিলসাকনি হং·জা। 24 ইনি গিম্মিন আংআ না·সংনা আগানিংআ, না·সং না·সংনি পাপনি হা·সেলো সিনুয়া। আংআন উয়া, ইখো না·সং বিবিরা·জাওদে, ইন্দিদে না·সংনি পাপনি হা·সেলোন না·সং সিনুয়া।” 25 ইনি গিম্মিন দাল·গিবারাং যীশুখো সিং·জক, “না·আ সা?” যীশু বিসংনা আগানজক, “হা·বাচেংওনি আংআ না·সংনা জেখো আগানা আংআ উয়ান হং·আ। 26 না·সংনি গিম্মিন আগান্না আরো বিচাল দাক্কে নিনা গিত্তা আংও বাং·এন দংআ। ইন্দিবা আংখো ওয়াত্তেতগিবাও বু·আনি দংজা; আংআ বিচানিখো জেখো খিন্নাংআ উখোন মান্দিনা আগানা।” 27 যীশু ফাগিবানি গিম্মিনান বিসংনা আগানিংআমিং ইখো বিসং হা·আইজাজক। 28 ইনি গিম্মিন যীশু আগানজক, “জেনসালো না·সং মান্দিনি দেফান্থিখো চু·য়াকাও দি·দনুয়া উনসালো আংআন উয়া ইন্নে হা·আইনা মা·ন্নুয়া। আরো ইখোবা হা·আইনা মা·ন্নুয়া, আংআ আন·থাংওনি মামুংখোন দাকনা মান·জা, ইন্দাকোবা ফাগিবা আংনা জেখো স্খিয়েতজক আংআ উয়ারাংখোন আগানা। 29 আংখো ওয়াত্তেতগিবান আংমুং দংআ। বিয়া আংখো সাকসানখো ওয়াত্তেতজা, মুয়ানা বিনি নামনিকগিবা কামখোন আংআ ফাংনান দাক্কা।” 30 যীশুনি ইরাংখো আগানমিত্তিংও বাং·এন বিখো বিবিরা·জক। 31 বিখো বিবিরা·গিবা যিহূদীরাংনা যীশু আগানজক, “না·সং আংনি আগানা গিত্তা রি·ওদে না·সং বিবিন আংখো জা·রিকগিবা হং·আ। 32 ইনাআগ্রে না·সং বিবিখো হা·আইনা মা·ন্নুয়া, আরো উয়া বিবিন না·সংখো জক্কেৎনুয়া।” 33 যিহূদীনি দাল·গিবারাং উনো যীশুনা আগানজক, “চিংআ অব্রাহামনি মা·চংনি মান্দি হং·আ; চিংআ মামুং সালোবা দারাংনিবা নকখল হং·খুজা। না·আ বাদিকে দাক্কে চিংখো জক্কেৎনুয়া ইন্নে ইন্না?” 34 যীশু বিসংনা ইখো আগানচাকজক, “আংআ বিবিন না·সংনা আগানিংআ, পাপ দাকগিবা গিম্মিকান পাপনি নকখল হং·আ। 35 নকখল ফাংনানান নক্কো দংজা ইন্দিবা দেফান্থিদে দংআ। 36 উনি গিম্মিন ইসলনি দেফান্থি না·সংখো জক্কেতোদে বিবিন না·সং জকনুয়া। 37 আংআ হা·আইয়া না·সং অব্রাহামনি মা·চংনি মান্দি, ইন্দিবা না·সং আংখো স·ওতে গালনা হা·ম্মিংজক, মুয়ানা আংনি আগানাদে না·সংনি খা·থংও মামুং দাক্কেবা হা·দাম মান·জা। 38 আংআ আংনি ফাগিবাওনা জেখো নিকজক উখোন আগানা, আরো না·সং না·সংনি ফাচা জেখো খিন্নাজক উখোন দাক্কা।” 39 ইনি গিম্মিন যিহূদীনি দাল·গিবারাং যীশুনা আগানজক, “অব্রাহামআন চিংনি ফাগিবা হং·আ।” যীশু বিসংনা আগানজক, “না·সং অব্রাহামনি দেদ্রাং হং·ওদে অব্রাহাম গিত্তান কাম দাকনুয়ামিং। 40 আংআ ইসলোনিখো জে বিবিখো হা·আইজক উখোন না·সংনা আগানজক, ইন্দাকোবা না·সং আংখো স·ওতে গালনা হা·ম্মিংজক; ইন্দিবা অব্রাহাম ইন্দাকে দাকজা। 41 না·সংনি ফাগিবা জেখো দাক্কা না·সংবা উখোন দাক্কিংআ।” বিসং যীশুনা আগানজক, “চিংআদে দেব্রিং হং·জা। চিংনি সাকসাসান ফাগিবা দংআ, উয়া ফাগিবান ইসল হং·আ।” 42 যীশু বিসংনা আগানজক, “না·সংনি ফাগিবা ইসল হং·বিবিওদে না·সং আংনা খা·সানুয়ামিং, মুয়ানা আংআ ইসলোনি রি·বাআ আরো দা·আও না·সংমুং দংআ। আংআ আন·থাংওনি রি·বাজা, ইন্দিবা বিয়ান আংখো ওয়াত্তেতজক। 43 মুয়ানা না·সং আংনি আগানাখো হা·আইজাংআ? মুয়ানা, না·সং আংনি আগানাখো চাকনা মান·জা। 44 শয়তানআন না·সংনি ফাগিবা হং·আ আরো না·সং বিনিআন দেদ্রাং হং·আ; উনি গিম্মিন না·সং বিনি হা·সিকাখো চু·সকেতনা হা·ম্মা। শয়তান হা·বাচেংওনিন মান্দি স·ওতগিবা হং·আ। বিয়া মামুং সালোবা বিবিও দংখামজামিং, মুয়ানা বিও বিবি দংজা। বিয়া বু·এ আগানজোকনো আন·থাংওনিন আগানা, মুয়ানা বিয়া বু·এ চা·গিবা আরো গিম্মিক বু·আ বিওনিন আৎচিয়া। 45 ইন্দিবা আংআ বিবিখোন আগানা, আরো উনি গিম্মিন না·সং আংখো বিবিরা·জা। 46 না·সংনি গিসেপো সা আংখো পাপ দাকগিবা ইন্নে ফিন্নিকনা মা·ন্না? আংআ বিবিখোন আগানোদে না·সং আংখো মুয়ানা বিবিরা·জা? 47 সাবা ইসলনি মান্দি হং·ওদে বিয়া ইসলনি আগানাখো খিন্নাচাক্কা। না·সং ইসলনি হং·জা ইন্নে ইসলনি আগানাখো খিন্নাচাকজা।” 48 উনোন যিহূদীনি দাল·গিবারাং যীশুনা আগানজক, “চিংআ খাকখেৎখো আগানজামা, না·আ সাকসা শমরিয়ানি মান্দি আরো নাং·খো মি·মাং মান·জক?” 49 যীশু আগানচাকজক, “আংখো মি·মাং মান·জা। আংআ আংনি ফাগিবাখো মান্দিরা·আ, ইন্দিবা না·সং আংখো মান্দিরা·জা। 50 আংআ আন·থাংনি গিম্মিন রাসং মা·ন্না দাকজা, ইন্দিবা আংখো মান্দিরা·গিবা সাকসা দংআ, আরো বিয়ান বিচাল দাকগিবা হং·আ। 51 আংআ না·সংনা বিবিন আগানিংআ, সাবা আংনি আগানাখো মানিওদে বিয়া মামুং দাক্কেবা সিজানুয়া।” 52 যিহূদীনি দাল·গিবারাং বিনা আগানজক, “দা·আও চিংআ থাল্লেন হা·আইজক, নাং·খো মি·মাংআন মান·জক। অব্রাহাম আরো আগানসোগিবারাং সিজক, আরো না·আ আগানিংআ, ‘সাবা আংনি আগানাখো খিন্নাওদে বিয়া মামুং দাক্কেবা সিজানুয়া।’ না·আ ফাগিবা অব্রাহামনাবা দাল·বাতামা? 53 বিয়াদে সিজক আরো আগানসোগিবারাংবা সিজক। না·আ আন·থাংখো মুয়াখো চানচিয়া?” 54 যীশু আগানচাকজক, “আংআ আন·থাংআন আন·থাংখো রাসং দাক্কোদে ইন্দিদে উনি মামুং দাম দংজা। আংনি ফাগিবা, জেখো না·সং না·সংনি ইসল ইন্নে আগানা বিয়ান আংখো মান্দিরা·আ। 55 না·সং মামুং সালোবা বিখো হা·আইজা, ইন্দিবা আংআ বিখো হা·আইয়া। আংআ বিখো হা·আইজা ইন্নে আগানোদে না·সং গিত্তান আংআ বু·এ চা·গিবা হং·নুয়া। ইন্দিবা আংআ বিখো হা·আইয়া আরো বিনি আগানাখো মানিয়া। 56 না·সংনি ফাগিবা অব্রাহাম আংনি সালখো নিনা খা·দংএন হান·সেংআমিং। বিয়া উখো নিক্কামিং আরো খুসিবা হং·আমিং।” 57 যিহূদীনি দাল·গিবারাং যীশুনা আগানজক, “না·আ দা·আওবা বিলসি সৎবংআন হং·খুজা, আরো না·আ অব্রাহামখো নিকজকমা?” 58 যীশু বিসংনা আগানজক, “আংআ না·সংনা বিবিন আগানিংআ, অব্রাহাম আৎচিনা স্খাংওনিন আংআ দংআ।” 59 ইখো খিন্নাএ উয়া দাল·গিবারাং যীশুখো স·ওতনা রং·থিখো খল্লামে রা·জক। ইন্দিবা যীশু আন·থাংখো থুম্মুয়ে থরম নকনি হং·খাতে রি·য়াংজক।

যোহন 9

1 রামা গিত্তা রি·য়াংমিত্তিংও যীশু সাকসা মিকগ্রি মান্দিখো নিকনা মা·ন্না। বিয়া আৎচিয়াওনিন মিকগ্রিমিং। 2 উনোন জা·রিকগিবারাং যীশুখো সিং·জক, “স্খিগিবা, সানি পাপ দাক্কানি হা·সেলো ইয়া মান্দি আৎচিয়াওনি মিকগ্রি হং·আ? বিনি আন·থাংওনি বা বিনি মা·আ ফাআনি হা·সেলোমা?” 3 যীশু আগানচাকজক, “বিয়া আন·থাংবা পাপ দাকখুজা, বিনি মা·আ ফাআবা দাকখুজা। ইসলনি কাম বিও ফারাকখানা গিত্তাসা ইন্দাকে হং·আ। 4 আংখো জে ওয়াত্তেতজক, বিনি কামখো সাল দংমিত্তিংওন আনচিংনি দাকনা নাংআ। ওয়াল রি·বাংজক, উনো সাকসাবা কাম দাকনা মান·জানুয়া। 5 আংনি হা·গিলসাকো দংআ দিপ্পাৎ আংআ হা·গিলসাকনি সেং·আ হং·আ।” 6 ইখো আগানানি জা·মানো বিয়া হা·আও খু·চি গাল্লে হা·আখো হা·দুবেক দাকজক। জা·মানো উয়া হা·দুবেকখো বিয়া উয়া মান্দিনি মিক্রোনরাংও রিপ্পাকেতে আগানজক, 7 “রি·য়াংবো, শীলোহনি চিবলচা রি·য়াংএ মিক্‌সুএবো।” শীলোহনি অর্থ হং·জক ওয়াত্তেতা। উয়া মান্দি রি·য়াংএ মিক্রোনরাংখো মিক্‌সুএ গালজক আরো মিক্রোনও নিকনা মা·ন্নে ফিল·বাজক। ইখো নিক্কে বিনি সংসুল-নকসুলরাং আরো বিখো বি·আম্মে চা·আখো নিকগিবা গিম্মিকান ইন্না হা·বাচেংজক, 8 “ইয়াদে উয়া মান্দি হং·জামা, আসংএ জে বি·আম্মে চা·নুয়ামিং?” 9 সাবা সাবা ইনজক, “হো·এ, ইয়ান উয়া মান্দি।” দা·আবা সাবা সাবা ইনজক, “বিগিত্তান দাক্কোবা বিয়াদে হং·জা।” ইন্দিবা উয়া মান্দি আন·থাংআন আগানজক, “হো·এ, আংআন উয়া মান্দি।” 10 বিসং বিনা আগানজক, “ইন্দিবা বাদিকে দাক্কে না·আ মিক্রোন নিকজক?” 11 বিয়া আগানচাকজক, “যীশু মিংগিবা উয়া মান্দি হা·দুবেক দাক্কে আংনি মিক্রোনরাংও রিপ্পাকেতে আগানজক, ‘শীলোহনি চিবলচা রি·য়াংএ মিক্‌সুএবো।’ আংআ রি·য়াংএ মিক্‌সুজক আরো নিকনা মান·জক।” 12 বিসং বিখো ইনজক, “উয়া মান্দি বাও?” বিয়া আগানজক, “আংআদে হা·আইজা।” 13 জে মান্দি মিকগ্রিমিং মান্দিরাং বিখো ফরীশীরাংচা রিম্মাংজক। 14 জেনসালো যীশু হা·দুবেক দাক্কে বিনি মিক্রোনরাংখো নিক্কেতামিং উয়া সাল নেং·থাকগিবা সাল হং·আমিং। 15 ইনি গিম্মিন বিখো ফরীশীরাংবা দা·আবা সিং·ফিলজক, “না·আ বাদিকে দাক্কে নিকনা মান·জক?” বিয়া ফরীশীরাংনা আগানজক, “বিয়া আংনি মিক্রোনরাংও হা·দুবেকখো রিপ্পাকেতামিং, আরো আংআ মিক্‌সুএ গাল্লোন নিকনা মান·জক।” 16 ইনি গিম্মিন ফরীশীরাংওনি মিত্তামরাং আগানজক, “উয়া মান্দি ইসলোনি রি·বাজা, মুয়ানা বিয়া নেং·থাকানি সালখো মানিজা।” সাকগিপ্পিন ফরীশীরাং আগানজক, “পাপী মান্দি হং·ওদে বাদিকে দাক্কে ইন্দাকা বিল্লাকগিবা কামখো দাকনা মা·ন্না?” ইন্দাকেন বিসংনি গিসেপো দিংথাংগ্রিক্কানি হং·জক। 17 উনোন বিসং উয়া মান্দিখো দা·আবা সিং·জক, “না·আ বিনি গিম্মিন মুয়াখো আগানিংআ? মুয়ানা বিয়াদে নাং·নি মিক্রোনরাংখো নিক্কেতজক।” উয়া মান্দি ইনজক, “বিয়া সাকসা আগানসোগিবা হং·আ।” 18 ইন্দিবা উয়া মান্দি স্খাংও মিকগ্রিমিং আরো দা·আও নিকফিলনা মা·ন্নিংজক, ইখো উয়া মান্দিনি মা·আ ফাআখো রিক্কামে সিং·খুজানা দিপ্পাৎ যিহূদীরাংনি দাল·বাৎগিবারাং বিবিরা·জাজক। 19 বিসং উয়া মান্দিনি মা·আ ফাআখো সিং·জক, “ইয়ান না·সংনি উয়া দেফান্থিমা জেখো না·সং মিকগ্রি আৎচিয়ামিং ইন্না? ইন্দিদে দা·আও বিয়া বাদিকে দাক্কে নিকনা মা·ন্নিংজক?” 20 বিনি মা·আ ফাআ আগানচাকজক, “চিংআ হা·আইয়া ইয়া চিংনিন দেফান্থি হং·আ, আরো ইয়া মিকগ্রি হং·এন আৎচিয়ামিং। 21 ইন্দিবা বাদিকে দাক্কে দা·আও বিয়া নিকনা মা·ন্নিংজক ইখো চিংআ হা·আইজা; আরো সাবা বিনি মিক্রোনখো নিক্কেতজক উখোবা হা·আইজা। বিয়া দাল·জক, বিখোন সিং·এবো। বিয়া আন·থাংআন আন·থাংনি গিম্মিন আগানখানা।” 22 বিনি মা·আ ফাআ যিহূদীরাংনি দাল·বাৎগিবারাংনা খেন্নানি গিম্মিন ইয়া খাৎথারাংখো আগানজক, মুয়ানা সাবা যীশুখো খ্রীষ্ট ইন্নে খু·রাচাক্কোদে বিখো হা·ফাল গাল্লেতনুয়া ইন্নে যিহূদীরাংনি দাল·বাৎগিবারাং থারিয়ে দংসোআমিং। 23 উনি গিম্মিনান বিনি মা·আ ফাআ আগানামিং, “বিয়া দাল·জক, বিখোন সিং·এবো।” 24 জে মান্দি মিকগ্রিমিং দাল·গিবারাং বিখো চাংগ্নিগিবাও রিক্কামে আগানজক, “না·আ বিবিখো আগানে ইসলখো রাসং দাকবো। চিংআদে হা·আইয়া উয়া মান্দি পাপী হং·আ।” 25 বিয়া আগানচাকজক, “বিয়া পাপী হং·আমা হং·জা ইখো আংআ হা·আইজা; ইন্দাকোবা মিংসাখো হা·আইয়া, আংআ মিকগ্রিমিং আরো দা·আও আংআ নিকনা মা·ন্নিংজক।” 26 দাল·গিবারাং আগানজক, “বিয়া নাং·খো মুয়াখো দাকজক? বাদিকে দাক্কে বিয়া নাং·নি মিক্রোনরাংখো নিক্কেতজক?” 27 উয়া মান্দি আগানচাকজক, “আংআদে স্খাংআন না·সংনা আগানজক, ইন্দিবা না·সং খিন্নাচাকজা। মুয়ানা না·সং দা·আবা খিন্নানা হা·ম্মিংআ? না·সংবা বিনি জা·রিকগিবা হং·না হা·ম্মিংআমা?” 28 ইনি গিম্মিন দাল·গিবারাং উয়া মান্দিখো নাম্মেন খা·চাএ আগানজক, “না·আন উয়া মান্দিনি জা·রিকগিবা হং·আ, ইন্দিবা চিংআদে মোশিনি জা·রিকগিবারাংসা। 29 চিংআ হা·আইয়া ইসল মোশিমুং খাৎথা আগানামিং, ইন্দিবা উয়া মান্দি বাওনি রি·বাজক উখো চিংআ হা·আইজা।” 30 উনোন উয়া মান্দি বিসংনা আগানচাকজক, “আইয়াও মানচা! বিয়া বাওনি রি·বাজক ইখো না·সং হা·আইজা ইন্দিবা বিয়ান আংনি মিক্রোনরাংখো নিক্কেতজক। 31 আনচিং হা·আইয়া ইসল পাপীরাংনি খাৎথাখো খিন্নাচাকজা। ইন্দিবা সাবা ইসলখো অলাখিগিবা হং·ওদে আরো বিনি নামনিকা গিত্তা কাম দাক্কোদে ইন্দিদে ইসল বিনি খাৎথাখো খিন্নাচাক্কা। 32 মিকগ্রি হং·এ আৎচিগিবা মান্দিনি মিক্রোনরাংখো সাবা নিক্কেতজক ইন্নে হা·গিলসাক হং·চেংওনি মামুং সালোবা খিন্নাখুজা। 33 বিয়া ইসলোনি রি·বাজাওদে ইন্দিদে মামুংখোবা দাকনা মান·জানুয়ামিং।” 34 দাল·গিবারাং আগানচাকজক, “না·আ চু·গিম্মিকান পাপওনি আৎচিয়া, আরো না·আ চিংনা স্খিফিলিংআমা?” ইখো আগানে বিসং বিখো হা·ফাল গাল্লেতজক। 35 দাল·গিবারাং উয়া মান্দিখো হা·ফাল গাল্লেতজক, ইখো যীশু খিন্নাজক। জা·মানো বিয়া উয়া মান্দিখো সান্দিয়ে মা·ন্নে আগানজক, “না·আ মান্দিনি দেফান্থিখো বিবিরা·আমা?” 36 বিয়া আগানচাকজক, “গিত্তেল, বিয়া সাজক, আংনা আগানবো জেদাক্কে আংআ বিখো বিবিরা·না মা·ন্না।” 37 যীশু বিনা আগানজক, “না·আ বিখো নিকজক, আরো বিয়ান নাং·মুং খাৎথা আগানিংআ।” 38 উনোন উয়া মান্দি আগানজক, “গিত্তেল, আংআ বিবিরা·আ।” ইখো আগানে বিয়া যীশুখো সেলামে ইসল গিত্তা দাল·নিকজক। 39 যীশু আগানজক, “আংআ ইয়া হা·গিলসাকো বিচাল দাকনা রি·বাজক, জেদাক্কে নিকনা মান·গিজারাং নিকনা মা·ন্না আরো নিকনা মান·গিবারাং মিকগ্রি হং·আ।” 40 মিত্তাম ফরীশীরাংবা যীশুমুং দংআমিং। বিসং ইয়া খাৎথাখো খিন্নাএ যীশুনা আগানজক, “ইন্দিদে না·আ চিংখো মিকগ্রি ইন্নে আগান্না হা·ম্মিংআমা?” 41 যীশু বিসংনা আগানজক, “না·সং মিকগ্রি হং·ওদে না·সংনি মামুং দোস দংজানুয়ামিং। ইন্দিবা না·সং নিক্কা ইন্নে আগানানি গিম্মিনান না·সংনি দোস দংআ।”

যোহন 10

1 “আংআ না·সংনা বিবিন আগানিংআ, সাবা দ·গা গিত্তা নাপগিজা গিপ্পিন গিত্তা মেষরাংনি নলো নাপ্পোদে বিয়া চা·উগিবা আরো রা·সেকগিবা হং·আ। 2 ইন্দিবা সাবা দ·গা গিত্তা নাপ্পোদে বিয়ান উয়া মেষরাংনি রাক্ষুয়াল হং·আ। 3 মেষনি নলো দংথিমগিবা উয়া রাক্ষুয়ালনান দ·গাখো এংএ হ·ন্না। মেষরাং বিনি খু·রাংখো খিন্নাচাক্কা, আরো উয়া রাক্ষুয়াল আন·থাংনি মেষরাংনি বিমুংখো রিক্কামে হা·ফালচানা রা·আংআ। 4 আন·থাংনি দিমদাক মেষরাংখো হং·খাত্তেতানি জা·মানো বিয়া উরাংনা স্খাং স্খাং রি·য়া, আরো মেষরাং বিখো জা·রিকা মুয়ানা উরাং বিনি খু·রাংখো হা·আইয়া। 5 উরাং হা·আইগিজা মান্দিরাংখো জা·রিকজানুয়া বাত্তেসা বিওনি খাতফিলনুয়া, মুয়ানা উরাং হা·আইগিজা মান্দিরাংনি খু·রাংখো হা·আইজা।” 6 উয়া ফরীশীরাংনা স্খিনা ইন্নে যীশু ইয়া খাৎথাখো আগানজক ইন্দিবা বিয়া মুয়াখো আগানিংআমিং উখো বিসং হা·আইজাজক। 7 উনি গিম্মিন যীশু দা·আবা আগানফিলজক, “আংআ না·সংনা বিবিন আগানিংআ, আংআন মেষরাংনি দ·গা হং·আ। 8 আংনা স্খাং রি·বাগিবা দিমদাকান চা·উগিবা আরো রা·সেকগিবা হং·আ, ইন্দিবা মেষরাং বিসংনি খাৎথাখো খিন্নাচাকজা। 9 আংআন দ·গা। সাবা আং গিত্তা নিং·আচানা নাপবাওদে বিয়া জকনুয়া। বিয়া নিং·আচা রি·বানুয়া আরো হা·ফালচা রি·য়াংনুয়া আরো চা·আম্মানি হা·দামখো মা·ন্নুয়া। 10 চা·উগিবাদে চা·উনা, স·ওতনা আরো নাসিয়েতনান রি·বাআ। আংআ রি·বাজক জেদাক্কে বিসং জাংগিখো মা·ন্না, আরো উয়া জাংগি জেদাক্কে চু·সকানি হং·আ। 11 “আংআন নামগিবা রাক্ষুয়াল। নামগিবা রাক্ষুয়াল বিনি মেষরাংনা জাংগিথাংখো হন·চাক্কা। 12 থাংখানাসান রাক্ষুয়ালনি কামখো দাকগিবাদে রাক্ষুয়াল হং·জা আরো মেষরাংবা বিনি আন·থাংনি হং·জা। মাৎচানি রি·বাখো নিক্কোদে বিয়া মেষরাংখো ওয়াতগাল্লে খাত্তা, মুয়ানা বিয়া থাংখানাসান ইয়া কামখো দাক্কা আরো মেষরাংনি গিম্মিনবা সিমসাকজা। মাৎচা উরাংখো বাল্লাংআ আরো মেষরাংখো বিলদিং বিলদাং দাক্কেতা। 14 “আংআন নামগিবা রাক্ষুয়াল। ফাগিবা জেদাক্কে আংখো হা·আইয়া আরো আংআ ফাগিবাখো হা·আইয়া উয়ানদাক্কেন আংআবা আংনি মেষরাংখো হা·আইয়া আরো উরাংবা আংখো হা·আইয়া। আংআ আংনি মেষরাংনা জাংগিথাংখো হন·চাকিংজক। 16 ইয়া নলোনি হং·গিজাগিবা আংনি আরোবা মেষরাং দংআ; উরাংখোবা আংনি রা·বানা নাংনুয়া। উরাং আংনি খু·রাংখো খিন্নাচাকনুয়া, আরো উনোদে মেষ থম·দাকসা আরো রাক্ষুয়াল সাকসা হং·নুয়া। 17 ফাগিবা আংখো ইনি গিম্মিনান খা·সাআ, মুয়ানা আংআ জাংগিথাংখো হন·চাকনুয়া জেদাক্কোদে উখো দা·আবা রা·ফিলনা মা·ন্না। 18 দারাংবা আংনি জাংগিখো আংচানিখো রা·আংজানুয়া, ইন্দিবা আংআ আন·থাংআন উখো হন·চাকনুয়া। জাংগিখো হন·চাকনাবা আংনি বিল দংআ, দা·আবা জাংগি রা·ফিলনাবা আংনি বিল দংআ। ইখো আংআ আংনি ফাচানিখো মান·জক।” 19 যীশুনি ইয়া খাৎথানি গিম্মিন ফি·ল্লে যিহূদীরাংনি গিসেপো দিংথাংগ্রিক্কানি হং·জক। 20 বিসংনি গিসেপো বাং·এন আগানজক, “বিখো মি·মাং মান·জক, বিয়াদে খোরেসা; মুয়ানা না·সং বিনি খাৎথাখো খিন্নাংআ?” 21 সাকগিপ্পিনরাং আগানজক, “ইন্দিবা ইয়াদে মি·মাং মান·গিবা মান্দিনি খাৎথা হং·জা। মি·মাংদে মিকগ্রিনি মিক্রোনরাংখো নিক্কেতনা মা·ন্নামা?” 22 ইনি জা·মানো যিরূশালেমো থরম নক রিক্কাখো মানিয়ানি সাল সকজক। উনো সিন·খারিমিং। 23 যীশু থরম নক্কো শলোমননি বারান্দাও রি·রুরুএ দংআমিং। 24 উয়া সময়ও যিহূদীরাংনি দাল·বাৎগিবারাং যীশুনি সামব্রিও থম·দাক্কে আগানজক, “আরো বাসিক সালসা না·আ চিংখো জাজ্রেংএতে দনখুনুয়া? না·আ খ্রীষ্ট হং·ওদে চিংনা থাল্লে আগানবো।” 25 যীশু আগানচাকজক, “আংআদে না·সংনা আগানজক, ইন্দিবা না·সং বিবিরা·জাংআ। আংনি ফাগিবানি বিমুংও আংআ জে কামরাংখো দাক্কা উরাংবা আংনি গিম্মিন সাক্ষি হ·ন্না। 26 ইন্দিবা না·সং বিবিরা·জা, মুয়ানা না·সং আংনি মেষরাং হং·জা। 27 আংনি মেষরাং আংনি খু·রাংখো খিন্নাচাক্কা। আংআ উরাংখো হা·আইয়া আরো উরাং আংখো জা·রিকা। 28 আংআ উরাংনা ফাংনাজলনি জাংগিখো হ·ন্না। উরাং মামুং দাক্কেবা নাসিজানুয়া আরো দারাংবা আংনি জাকনিখো উরাংখো রা·সেকে রা·জানুয়া। 29 আংনি ফাগিবা, জে আংনা উরাংখো হন·জক, বিয়া গিম্মিকনা বাত্তে দাল·বাত্তা। দারাংবা ফাগিবানি জাকনিখো মামুংখো রা·সেকনা মান·জা। 30 আংআ আরো আপফা সাকসান হং·আ।” 31 উনোন যিহূদীরাংনি দাল·বাৎগিবারাং বিখো স·ওতনা ইন্নে দা·আবা রং·থিখো খল্লামে রা·জক। 32 যীশু বিসংনা আগানজক, “ফাগিবানি গি·য়েতা গিত্তা নামগিবা কামরাংখো বাং·বাত্তেন আংআ না·সংনা দাক্কে ফিন্নিকজক। উরাংনি গিসেপো বাগিবা কামনি হা·সেলো না·সং আংখো রং·থিচা গোথাতনা হা·ম্মা?” 33 দাল·গিবারাং আগানচাকজক, “নাম্মা কামরাংনি গিম্মিন চিংআ নাং·খো রং·থিচা গোথাতজা, ইন্দিবা না·আ ইসলখো খাল·স্থাপানি গিম্মিনান গোথাত্তা। মান্দি হং·এবা না·আ আন·থাংখো ইসল ইন্নে আগানিংআ।” 34 যীশু আগানজক, “না·সংনি নিয়ামরাংও ইন্দাকে চক্কা দংজামা, ‘আংআ আগানজক, না·সং ইসল গিত্তা হং·আ’? 35 ইসলনি খাৎথা জেরাংচা রি·বামিং বিসংখোদে বিয়া ইসল গিত্তা হং·আ ইন্নে আগানামিং। রংথালগিবা শাস্ত্রনি খাৎথাখো গালনা মা·ন্নামা? মান·জা। 36 ইন্দাকোদে ফাগিবা জেখো আন·থাংনি গিম্মিন দিংথাং দাকজক আরো হা·গিলসাকো ওয়াত্তেতজক উয়া আংআন ‘আংআ ইসলনি দেফান্থি,’ ইন্দাকে আগানানা না·সং বাদিকে দাক্কে ইন্না ‘না·আ ইসলখো খাল·স্থাপিংআ’? 37 আংনি ফাগিবানি কামখো আংআ দাকজাওদে ইন্দিদে না·সং আংখো দা·আ বিবিরা·আবো। 38 ইন্দিবা দাক্কোদে আংখো বিবিরা·জাওবা আংনি কামরাংখোদে বিবিরা·আবো। উনি গিম্মিন না·সং ইখো হা·আইনা মা·ন্নুয়া, ফাগিবা আংও দংআ আরো আংআ ফাগিবাও দংআ।” 39 উনোন যিহূদীরাংনি দাল·বাৎগিবারাং ফি·ল্লে যীশুখো রিম·না হাম·জক, ইন্দিবা বিয়া বিসংনি জাক্কোনি জক্কে রি·য়াংজক। 40 ইনি জা·মানো বিয়া দা·আবা যর্দন চিবিমানি নালসাওনা রি·য়াংএ দংজক। যোহন উয়োন স্খাংও রিপ্পলেতনুয়ামিং। 41 মান্দি বাং·এন যীশুচা রি·য়াংজক আরো ইন্দাকে আগানগ্রিকজক, “যোহন আইয়াও ইনমানানি মামুং কামখো দাকজাওবা ইন্দিবা বিয়া ইয়া মান্দিনি গিম্মিন জেখো আগানামিং, উয়া গিম্মিকান খাকখেৎ হং·আ।” 42 আরো উয়োনা বাং·আ মান্দিন যীশুখো বিবিরা·জক।

যোহন 11

1 লাসার মিংগিবা বৈথনিয়া সংওনি সাকসা মান্দি সাআমিং। মরিয়ম আরো বিনি আবিথাং মার্থা উয়া সংও দংনুয়ামিং। 2 ইয়ান উয়া মরিয়ম জে গিত্তেলনি জা·চকও সিম্মিলগিবা তেলখো রুদাপে আন·থাংনি খিন্নিচা বিনি জা·চকখো রিপ্পাকে হ·ন্নামিং। উয়া সাগিবা লাসার ইয়া মরিয়মনি জংগিবামিং। 3 ইনি গিম্মিন বিনি আবিরাং যীশুনা ইখো আগানে ওয়াত্তেতজক, “গিত্তেল, না·আ জেখো খা·সাআ বিয়া সাএংআ।” 4 ইখো খিন্নাএ যীশু আগানজক, “বিনি ইয়া সাআ সিনা হা·সেল হং·জা ইন্দাকোবা ইসলনি রাসংখো ফারাকনাসা হং·আ, জেদাক্কোদে উচা ইসলনি দেফান্থিনি রাসংখো ফারাকনা মা·ন্না।” 5 মার্থা, বিনি নগিবা আরো লাসারখো যীশু খা·সানুয়ামিং। 6 জেনসালো যীশু লাসারনি সাআখো খিন্নাজক উনসালো বিনি দংগিবা হা·দামওন বিয়া আরোবা সালগ্মি দংজক। 7 জা·মানো বিয়া জা·রিকগিবারাংনা আগানজক, “রি·বো, আনচিং দা·আবা যিহূদিয়াওনা রি·য়াংনাজক।” 8 জা·রিকগিবারাং বিনা আগানজক, “স্খিগিবা, ইয়া সাল বাং·গিজা স্খাংবা দাল·গিবারাং নাং·খো রং·থিচা গোথাতনা হা·ম্মামিং, আরো না·আ দা·আবা উয়োনা রি·য়াংইংজক?” 9 যীশু আগানচাকজক, “সালো ঘণ্টা চি·গ্মি দংজামা? সাবা সালো রি·ওদে বিয়া জা·গিদৎজা, মুয়ানা বিয়া ইয়া হা·গিলসাকনি সেং·আখো নিক্কা। 10 ইন্দিবা সাবা ওয়াল্লো রি·ওদে বিয়া জাগিদৎনুয়া, মুয়ানা বিও সেং·আ দংজা।” 11 ইরাংখো আগানানি জা·মানো যীশু জা·রিকগিবারাংনা আগানজক, “আনচিংনি রিপ্পেং লাসার থুজক, ইন্দিবা আংআ বিখো চামিসানা রি·য়াংইংজক।” 12 ইনি গিম্মিন জা·রিকগিবারাং বিনা আগানজক, “গিত্তেল, বিয়া থুএন দংওদে বিয়া নামনুয়া।” 13 যীশু লাসারনি সিয়ানি গিম্মিন আগানিংআমিং, ইন্দিবা বিনি জা·রিকগিবারাং থুএ দংআখোসা আগানা ইন্নে চানচিজক। 14 যীশু উনো থাল্লেন আগানজক, “লাসার সিজক, 15 ইন্দিবা আংআ না·সংখো চানচিয়ে ইনি গিম্মিনান খুসি হং·জক, আংআ উয়োনা দংজামিং জেদাক্কে না·সং বিবিরা·না মা·ন্না। রি·বো, আনচিং লাসারচা রি·য়াংনাজক।” 16 উনোন থোমা, জেখো সা·চাপ মিংআ, বিমুং জা·রিকগিবা রিপ্পেংরাংনা বিয়া আগানজক, “রি·বো, আনচিংবা রি·য়াংনা, জেদাক্কে বিমুং সিফানা মা·ন্না।” 17 যীশু উয়োনা সক্কাংএ হা·আইনা মান·জক, সালব্রিনা স্খাংআন লাসারখো গোপরামও গোপজক। 18 বৈথনিয়া যিরূশালেমোনি মাইল গিত্থাম চে·ল্লামিং। 19 যিহূদীরাংওনি বাং·এন মার্থা আরো মরিয়মখো জংগিবানি সিয়ানা গিসিকখো খা·নাম্মেতনা রি·বামিং। 20 যীশুনি রি·বাখো খিন্নাএ মার্থা বিমুং গ্রংনা রি·য়াংজক, ইন্দিবা মরিয়ম নক্কো আসংএ দংজক। 21 মার্থা যীশুনা আগানজক, “গিত্তেল, না·আ ইনো দংওদে আংনি জংগিবা সিজানুয়ামিং। 22 ইন্দিবা আংআ হা·আইয়া, দা·আওবা না·আ ইসলচাখো জেখো হাম·নুয়া ইসল উখো নাং·না হ·ন্নুয়া।” 23 যীশু বিনা আগানজক, “নাং·নি জংগিবা দা·আবা থাংচানুয়া।” 24 উনোন মার্থা বিনা আগানজক, “আংআ হা·আইয়া, বন·খামানি সালো সিগিবা মান্দিরাংনি থাংচাওন বিয়াবা থাংচানুয়া।” 25 যীশু মার্থানা আগানজক, “আংআন চাখাতফিল্লা আরো জাংগি। আংখো বিবিরা·গিবা সিওমাংবা থাংচানুয়া। 26 আরো থাংএ দংগিবা আরো আংখো বিবিরা·গিবা মামুং দাক্কেবা সিজানুয়া। না·আ ইখো বিবিরা·আমা?” 27 মার্থা বিনা আগানজক, “হো·এ, গিত্তেল, আংআ ইখো বিবিরা·আ, না·আন ইসলনি দেফান্থি, হা·গিলসাকো রি·বানা আগানগিবা উয়া খ্রীষ্ট।” 28 ইখো আগানে মার্থা রি·য়াংএ বিনি নগিবা মরিয়মখো সিউল দাক্কে রিক্কামে আগানজক, “স্খিগিবা ইনো দংআ আরো নাং·খো রিক্কামিংআ।” 29 মরিয়ম ইখো খিন্নাএ বিক্‌বিক্‌ চাখাত্তে যীশুচানা রি·য়াংজক। যীশু উনোবা সংওনা রি·বাএ সকখুজামিং; 30 মার্থা জেও বিমুং গ্রংআমিং বিয়া উয়োন দংআমিং। 31 নক্কো দংএ মরিয়মখো খা·নাম্মেতগিবা যিহূদীরাং মরিয়মখো বাক্‌বাক্‌ হা·ফালচানা রি·য়াংআখো নিক্কে বিখো জা·রিকফাজক। বিসং মরিয়মখো গোপরামচানা গ্রাপনা রি·য়াংইংজক ইন্নে চানচিজক । 32 যীশু জেও দংআমিং মরিয়ম উয়োনা রি·য়াংজক আরো বিখো নিক্কে বিনি জা·চক সাক্কাও গা·আকে আগানজক, “গিত্তেল, না·আ ইনো দংওদে আংনি জংগিবা সিজানুয়ামিং।” 33 যীশু মরিয়মনি আরো বিমুং রি·বাগিবা যিহূদীরাংনি গ্রাপ্পাখো নিক্কে খা·থংও নাম্মেন জাজ্রেংজক। 34 বিয়া বিসংখো ইনজক, “লাসারখো বাও দন্না?” বিসং আগানজক, “গিত্তেল, রি·বাএ নিবো।” 35 উনোন যীশু গ্রাপজক। 36 উনি গিম্মিন যিহূদীরাং আগানজক, “নিবো, বিয়া লাসারনা বাসিক খা·সাআমিং।” 37 ইন্দিবা যিহূদীরাংওনি সাবা সাবা ইনজক, “মিকগ্রিনি মিক্রোনখো এংগিবা মান্দিআ উয়া মান্দিনি সিজানা গিত্তা কামখো দাকনা মান·জামিংমা?” 38 ইনি গিম্মিন যীশু খা·থংও দা·আবা জাজ্রেংজক আরো গোপরামওনা রি·য়াংজক। উয়া গোপরাম রং·থিখলমিং। উয়া রং·থিখলনি মিকখাংও রং·থি গি·সাখো ফেং·এ দন্নামিং। 39 যীশু আগানজক, “রং·থিখো জিত্তেৎবো।” সিগিবানি আবিগিবা মার্থা যীশুনা আগানজক, “গিত্তেল, দা·আও সোআ সেংনাজক, মুয়ানা বিনি সিয়ানি সালব্রি হং·জক।” 40 যীশু মার্থানা আগানজক, “আংআ নাং·না আগানজামা, না·আ বিবিরা·ওদে ইসলনি রাসংখো নিকনা মা·ন্নুয়া?” 41 উনোন মান্দিরাং রং·থিখো জিত্তেৎজক। যীশু সাক্কাচাখো নিএ আগানজক, “আপফা, না·আ আংনি আগানাখো খিন্নাচাকজক ইন্নে আংআ নাং·খো মিৎথেলা। 42 আংআ হা·আইয়া না·আ ফাংনাজ্রিংআন আংনি খাৎথাখো খিন্নাচাক্কা। ইন্দিবা না·আ আংখো ওয়াত্তেতা ইন্নে আংনি সামবাও চাদেংএ দংগিবা মান্দিরাং জেদাক্কে বিবিরা·না মা·ন্না, উনি গিম্মিন ইয়া খাৎথাখো আগানজক।” 43 ইখো আগানে যীশু রাক্কে রিক্কামে ইনজক, “লাসার, হং·খাতে রি·বাবো।” 44 উয়া সিগিবা উনো গোপরামওনি হং·খাতে রি·বাজক। বিনি জাক জা·চক গোপরামনি বা·রাচা ওয়েনওয়েনামিং আরো বিনি মিকখাং রুমালচা খাআ দংআমিং। যীশু মান্দিরাংনা আগানজক, “বিনি খাআখো এংএতবো আরো বিখো রি·য়াংনা হন·বো। 45 মরিয়মচা রি·বাগিবা যিহূদীরাংওনি বাং·এন যীশুনি ইয়া কামরাংখো নিক্কে বিখো বিবিরা·জক। 46 ইন্দিবা বিসংওনি সাবা সাবা ফরীশীরাংচা রি·য়াংএ যীশুনি দাকগিবারাংখো আগানজক। 47 উনোন খামাল দাল·গিবারাং আরো ফরীশীরাং দাল·বাৎগিবা খ্রিমানি মান্দিরাংখো থম·দাক্কেতে আগানজক, “আনচিং দা·আও মুয়াখো দাকনুয়া? ইয়া মান্দিদে বাং·এন আইয়াও ইনমানানি কামরাংখো দাক্কিংজক। 48 আনচিং বিখো ইন্দাকে দাকনা হ·ন্নোদে গিম্মিকান বিখো বিবিরা·নুয়া, আরো রোমনি মান্দিরাং রি·বাএ আনচিংনি থরম নকখো আরো আনচিং জাতখো ব·ন্নেতনুয়া।” 49 বিসংনি গিসেপো কাইয়াফা মিংগিবা সাকসা উয়া বিলসিও দাল·বাৎগিবা খামাল দংআমিং। 50 বিয়া বিসংনা আগানজক, “না·সং মামুংখোন হা·আইজা, আরো চানচিয়েবা নিজা, জাত গিম্মিক ব·ন্নানা বাত্তে গিম্মিক মান্দিরাংনি ফাল সাকসা মান্দি সিওবা নামবাত্তা।” 51 কাইয়াফা আন·থাংওনি ইয়া খাৎথাখো আগানামিং ইয়াদে হং·জা ইন্দিবা উয়া বিলসিও বিয়া খামাল দাল·বাৎগিবা হং·আমিং। উনি গিম্মিন বিয়া আগানসোআমিং, যিহূদী জাতনি গিম্মিন যীশুন সিনুয়া। 52 যিহূদী জাতনি গিম্মিনসান হং·জা, ইন্দিবা বিলদিং বিলদাং দাক্কে দংগিবা ইসলনি দেদ্রাংখো চিম্মংএ আপসান দাক্কেতনাবা বিয়া সিনুয়া। 53 উয়া সালোনি যিহূদীরাংনি দাল·বাৎগিবারাং যীশুখো স·ওতনা ইন্নে খু·মংগ্রিকনা হা·বাচেংজক। 54 উনি গিম্মিন যীশু যিহূদীরাংনি গিসেপো ফারাকে রি·জাজক, আরো উয়া হা·দামখো ওয়াত্তে হা·গিসি জওলনি সেফাংও ইফ্রয়িম মিংগিবা সং দামসাওনা রি·য়াংজক। উয়োনা বিয়া বিনি জা·রিকগিবারাংখো রা·এ দংনা হা·বাচেংজক। 55 উনোন যিহূদীরাংনি ওয়াতচাংআনি সাল সেফাংজকমিং। উয়া সালনা স্খাং আন·থাংথাংখো রংথালেতনা বাং·এ মান্দিন সংওনি যিরূশালেমোনা রি·য়াংআমিং। 56 ইয়া মান্দিরাং যীশুখো সান্দিনা হা·বাচেংজক। বিসং থরম নক্কো চাদেংএ সাকসা সাকগিপ্পিনচা সিং·জক, “বিয়া ইয়া ওয়াতচাংআনি সালোনা রি·বাস্রাংজানুয়ামা? না·সং মুয়াখো চানচিমা·ন্না?” 57 খামাল দাল·গিবারাং আরো ফরীশীরাং ইন্দাকে গি·য়েৎজক, যীশু বাও দংআ ইখো সাবা হা·আইওদে বিয়া আগানখানা জেদাক্কে বিসং যীশুখো রিম·না মা·ন্না।

যোহন 12

1 ওয়াতচাংআনি সালনা সালদক স্খাংও যীশু বৈথনিয়াওনা রি·য়াংজক। জেখো বিয়া সিয়াওনি থাংচাফিল্লেতামিং উয়া লাসার বৈথনিয়াও দংনুয়ামিং। 2 বিসং উয়ো যীশুনা চা·আনিখো হ·ন্না থারিজক। মার্থা দাকচাকে হ·ন্নিংআমিং। যীশুমুং চা·না আসংগিবারাংমুং লাসারবা দংআমিং। 3 ইন্দাকমিত্তিংও মরিয়ম গামচাৎগিবা, সিম্মিলগিবা তেলখো রা·বাজক আরো যীশুনি জা·চকও উখো রুদাপে আন·থাংনি খিন্নিচা বিনি জা·চকখো রিপ্পাকেতজক। উয়া তেলনি সিম্মিলা নক গিম্মিকো গাপজক। 4 যীশুনি জা·রিকগিবারাংওনি সাকসা, জে বিখো বোবিলরাংনি জাক্কো রি·ম্মে হ·ন্নুয়া, উয়া যিহূদা ইষ্কারিয়োৎ আগানজক, 5 “ইয়া সিম্মিলগিবা তেলখো থাংখা রিৎচা গিত্থামনা ফাল্লে দিল্লা-চন্নারাংনা হ·ন্না মা·ন্নুয়ামিং। মুয়ানা উখো দাকজাজক?” 6 যিহূদা দিল্লা-চন্নারাংনা চানচিয়ে ইখো আগানামিং ইয়াদে হং·জা। বিয়াদে চা·উগিবা হং·আমিং। থাংখা দনচাকগিবা বিচা দংনুয়ামিং ইন্নে উয়ো চিম্মংগিবানিখো বিয়া চা·উনুয়ামিং। 7 যীশু আগানজক, “না·সং বিনি গিসিকখো দা·আ সা·দিকেতাবো। আংখো গোপ্পানি সালো থারিসোনা ইন্নেন বিয়া ইখো দন্নামিং। 8 দিলগিবারাংদে ফাংনান না·সংমুং দংআ, ইন্দিবা আংখো না·সং ফাংনানান মান·জানুয়া।” 9 যীশুনি বৈথনিয়াও দংআখো হা·আইনা মা·ন্নে যিহূদীরাংওনি বাং·আ মান্দিন উয়োনা রি·বাজক। বিসং যীশুনাসান উয়োনা রি·বামিং ইয়াদে হং·জা, ইন্দিবা জেখো যীশু সিয়াওনি থাংচাফিল্লেতামিং উয়া লাসারখোবা নিনা রি·বাজক। 10 উনোন খামাল দাল·গিবারাং লাসারখোবা স·ওতে গালনা থিক দাকজক, 11 মুয়ানা লাসারনি গিম্মিন যিহূদীরাংনি গিসেপো বাং·এন দাল·গিবারাংখো ওয়াত্তে যীশুখো বিবিরা·আমিং। 12 পর্বওনা রি·য়াংগিবা মান্দিরাং সালগিপ্পিনো যীশু যিরূশালেমচানা রি·বাংজক ইন্নে খিন্নাসোজক। 13 উনোন বিসং খেজুর বিজাকরাংখো রা·এ বিখো রা·চাকসোনা রি·য়াংজক আরো চ্রিকে ইন্না হা·বাচেংজক, “হোশান্না, গিত্তেলনি বিমুংও রি·বাগিবানি রাসং হং·খানা। বিয়ান ইস্রায়েলনি রাজা হং·আ।” 14 রংথালগিবা শাস্ত্রনি খাৎথা গিত্তা যীশু গাধা মাংসাখো নিক্কে উনি সাক্কাও আসংজক। শাস্ত্রও চক্কা দংআ, 15 “ও সিয়োননি দেমিচিক, দা·আ খেন্নাবো। নিবো, নাং·নি রাজা গাধা বি·সানি সাক্কাও গাখাত্তে রি·বাংজক।” 16 স্খাংদে যীশুনি জা·রিকগিবারাং ইরাংখো হা·আইনা মান·জাজক। জা·মানো যীশুনি রাসং ফারাকোসা রংথালগিবা শাস্ত্রনি উয়া খাৎথা যীশুনি গিম্মিনান চক্কামিং ইন্নে বিসং গিসিক রা·জক। আরোবা মান্দিরাং যীশুনি গিম্মিনান উরাংখো দাক্কামিং ইখোবা বিসং গিসিক রা·জক। 17 লাসারখো গোপরামওনি থাংচাএতানি সালো যীশুনি সেফাংও দংগিবা মান্দিরাংআন লাসারনি থাংচাফিল্লানি গিম্মিন সাক্ষি হ·ন্না হা·বাচেংজক। 18 উনি গিম্মিনান মান্দিরাং যীশুখো রা·চাকসোনা রি·য়াংআমিং, মুয়ানা যীশুন উয়া আইয়াও ইনমানানি কামখো দাকজক ইন্নে বিসং খিন্নামিং। 19 ইখো নিক্কে ফরীশীরাং সাকসা সাকগিপ্পিননা আগানজক, “আনচিং মামুং দাক্কেবা মান·জাজক। নিবো, হা·গিলসাক গিম্মিক বিনি দলচা রি·য়াংজক।” 20 উয়া পর্বও থরম দাকনা রি·বাগিবারাংনি গিসেপো মিত্তাম গ্রীকরাংবা দংআমিং। 21 বিসং ফিলিপচা রি·বাএ বিখো মল·মলে আগানজক, “খিন্নাবো, চিংআ যীশুখো নিনা হা·ম্মিংআ।” ফিলিপ গালীল হা·দকনি বৈৎসৈদা সংনি মান্দিমিং। 22 ফিলিপ রি·য়াংএ খাৎথাখো আন্দ্রিয়না আগানজক। জা·মানো আন্দ্রিয় আরো ফিলিপ রি·য়াংএ যীশুনা আগানজক। 23 যীশু উনো আন্দ্রিয় আরো ফিলিপনা আগানজক, “মান্দিনি দেফান্থিনি রাসংখো ফারাকানি সাল সকজক। 24 আংআ না·সংনা বিবিন আগানিংআ, গমনি বিৎচ্রি হা·আও গা·আকে সিজাওদে রংসা বিৎচ্রিসান দংআ, ইন্দিবা সিওদে বাং·এন বিথি হং·আ। 25 জাংগিথাংখো খা·সাগিবা বিনি চং·মত জাংগিখো গিম্মায়েতা, ইন্দিবা সাবা ইয়া হা·গিলসাকো উখো দাকজাওদে বিনি চং·মত জাংগিখো ফাংনাজলনি জাংগিনি গিম্মিন রাক্ষিনুয়া। 26 সাবা আংনা দাকচাকে হ·ন্না হা·ম্মোদে বিয়া আংনি রামাও রি·খানা। আংআ জেও দংআ আংনা দাকচাকে হন·গিবাবা উয়োন দংনুয়া। সাবা আংনা দাকচাকে হ·ন্নোদে আপফা বিখো মান্দিরা·নুয়া। 27 “আংনি গিসিক দা·আও জাজ্রেংআ। আংআ ইয়া খাৎথাখোন আগান্নুয়ামা, ‘আপফা, জে সাল সকজক উয়া সালোনিখো না·আ আংখো জক্কেৎবো?’ ইন্দিবা ইনি গিম্মিনান আংআ ইয়া সালওনা সক্কে রি·বাজক। 28 আপফা, নাং·নি রাসংখো ফারাকবো।” সালগিওনি উনোন ইয়া খাৎথাখো খিন্নানা মান·জক, “আংআ আংনি রাসংখো ফারাকজক আরো ফি·ল্লে উখো ফারাকনুয়া।” 29 উয়ো চাদেংএ দংগিবা মান্দিরাং উখো খিন্নাএ আগানজক, “উয়াদে মিক্‌খা খিম্‌প্রেতা।” সাবা আগানজক, “সা·গ্রে বিমুং খাৎথা আগানা।” 30 ইনি গিম্মিন যীশু আগানজক, “ইয়া খাৎথাখো আংনি গিম্মিন আগানজা, ইন্দিবা না·সংনি গিম্মিনান আগানজক। 31 ইয়া হা·গিলসাকনি মান্দিরাংখো বিচাল দাক্কানি সাল দা·আও সকবাজক, আরো হা·গিলসাকখো শাসন দাকগিবাখো দা·আও হা·রিকেতনুয়া। 32 আংখো জেনসালো হা·আওনিখো চু·য়াকাওনা দি·দোনুয়া উনসালো আংআ দিমদাকখো আন·থাংচানা সাল্লে রা·বানুয়া।” 33 বিয়া বাদিকে দাক্কে সিনুয়া উখো হা·আইএতনান বিয়া ইখো আগানজক। 34 উনোন মান্দিরাং যীশুনা আগানজক, “ খ্রীষ্ট ফাংনাজলনান দংনুয়া ইখো চিংআ রংথালগিবা শাস্ত্রনিখো খিন্নাজক। ইন্দিদে না·আ বাদিকে দাক্কে মান্দিনি দেফান্থিখো চু·য়াকাও দি·দোনা নাংনুয়া ইন্নে আগানিংআ? ইন্দাকোদে ইয়া মান্দিনি দেফান্থি সাজক?” 35 যীশু বিসংনা আগানজক, “অকখিসা মাংমাংনা সেং·আ না·সংমুং দংআ। সেং·আ না·সংমুং দংমিত্তিংওন রি·সোবো জেদাক্কে আন্দালা না·সংমুং হামজা। আন্দালাও রি·গিবা বাওনা রি·য়াংআ উখো হা·আইজা। 36 সেং·আ না·সংমুং দংমিত্তিংওন সেং·আনি সাক্কাও বিবিরা·বো জেদাক্কে না·সং উয়া সেং·আনি মান্দি হং·না মা·ন্না।” ইয়া খাৎথারাংখো আগানানি জা·মানো যীশু মান্দিরাংচানি রি·য়াংএ আন·থাংখো থুম্মুজক। 37 বিয়া বিসংনি মিকখাংও চিন গিত্তা আইয়াও ইনমানগিবা কামখো বাং·এ দাক্কোবা মান্দিরাং বিখো বিবিরা·জাজক। 38 ইরাং ইনি গিম্মিনান হং·জক জেদাক্কে আগানসোগিবা যিশাইয়নি আগানসোগিবা ইয়া খাৎথা চু·সকা: গিত্তেল, চিংনি আগানগিবা খাৎথাখো সা বিবিরা·জক? গিত্তেলনি বিল্লাকগিবা জাক সানা ফারাকজক? 39 উয়া মান্দিরাং ইনি গিম্মিনান বিবিরা·না মান·জাজক, মুয়ানা যিশাইয়নি আগানা গিত্তাদে 40 “ইসল বিসংনি মিক্রোনরাংখো মিকগ্রি দাক্কেতজক আরো খা·থংরাংখো গক্কা দাক্কেতজক, জেদাক্কে বিসং মিক্রোনচা নিকজা আরো খা·থংচা হা·আইজা, আরো নামনা ইন্নে বিচানা রি·বাফিলজা।” 41 যিশাইয় যীশুনি রাসংখো নিক্কামিং ইন্নে বিনি গিম্মিন ইয়া খাৎথাখো আগানামিং। 42 ইন্দাকোবা দাল·গিবারাংওনি বাং·এন বিখো বিবিরা·জক, ইন্দিবা ফরীশীরাং বিসংখো হা·ফাল গাল্লেতনা খেন্নে বিসং উখো জিচাকজক। 43 বিসং ইসলোনি রাসংখো মা·ন্না বাত্তে মান্দিরাংনি রাসংখো মা·ন্না নামনিকবাতনুয়ামিং। 44 জা·মানো যীশু রাক্কে রাক্কে আগানজক, “আংখো বিবিরা·গিবা আংখোসান বিবিরা·আ ইন্দাকে হং·জা, ইন্দিবা আংখো ওয়াত্তেতগিবাখোবা বিবিরা·আ। 45 আংখো নিকগিবা, আংখো ওয়াত্তেতগিবাখোন নিক্কা। 46 আংআ ইয়া হা·গিলসাকো সেং·আ হং·এ রি·বাজক জেদাক্কে আংখো বিবিরা·গিবা আন্দালাও দংজা। 47 আংনি খাৎথাখো খিন্নাএ উগিত্তা রি·জাওদে আংআ আন·থাং বিখো বিচাল দাকজা, মুয়ানা আংআ মান্দিখো দোস গ্মাং ইন্নে ফিন্নিকনা রি·বাজা ইন্দাকোবা মান্দিখো পাপনিখো জক্কেৎনাসা রি·বাআ। 48 আংখো জেগালগিবা আরো আংনি খাৎথাখো খিন্নাচাকগিজাগিবানা বিচাল দাকগিবা দংআ। জে খাৎথাখো আংআ আগানজক উয়া খাৎথান বন·চতানি সালো বিখো দোসগ্মাং ইন্নে ফিন্নিকনুয়া; 49 মুয়ানা আংআদে আন·থাংওনি মামুংখো আগানজা, ইন্দিবা আংখো ওয়াত্তেতগিবা উয়া আপফান আংখো মুয়াখো আগান্না নাংনুয়া উখো গি·য়েৎজক। 50 আংআ হা·আইয়া বিনি গি·য়েতান ফাংনাজলনি জাংগি হং·আ। ইনি গিম্মিন আংআ জেখো আগানা উখো আপফানি গি·য়েতা গিত্তান আগানা।”

যোহন 13

1 ইরাং ওয়াতচাংআনি সালনা স্খাং হং·আমিং। ইয়া হা·গিলসাকখো ওয়াত্তে ফাগিবাওনা রি·য়াংনা বিনি সাল সকজক ইন্নে যীশু হা·আইনা মান·জকমিং। ইয়া হা·গিলসাকো বিনি আন·থাংনি মান্দিরাংনা বিয়া খা·সামিং আরো বন·খামওনা দিপ্পাৎআন খা·সামিং। 2 উনো চা·মিত্তিংমিং। শয়তান ইনা স্খাংআন যীশুখো বোবিলরাংনি জাক্কো রি·ম্মে হ·ন্না শিমোননি দেগিবা যিহূদা ইষ্কারিয়োতনি গিসিকো হা·সিকেতজক। 3 যীশু হা·আইয়ামিং, ফাগিবা ইসল বিনি জাক্কো গিম্মিকখোন হন·জক। বিয়া আরোবা হা·আইয়ামিং, বিয়া বিচানিন রি·বাআ আরো বিচান ফি·ল্লাংইংজক। 4 ইনি গিম্মিন বিয়া চা·আওনি চাখাত্তে সাক্কাও চিনদাপগিবা বা·রাখো এংএ বা·রা গামছা ফাৎসাখো খাংখারিও খাজক। 5 জা·মানো বিয়া গামলাও চি রুএ জা·রিকগিবারাংনি জা·চকখো জা·সুয়েতনা হা·বাচেংজক আরো খাংখারিও খাগিবা বা·রাচা রিপ্পাকেতজক। 6 ইন্দাকে যীশু শিমোন-পিতরচানা রি·বাওন পিতর বিনা আগানজক, “গিত্তেল, না·আ আংনি জা·চকখো জা·সুয়েতনুয়ামা?” 7 যীশু আগানচাকজক, “আংআ জেখো দাক্কিংজক উখো না·আ দা·আও হা·আইনা মান·জাংজক ইন্দিবা জা·মানো হা·আইনা মা·ন্নুয়া।” 8 পিতর বিনা আগানজক, “না·আ আংনি জা·চকখো মামুং সালোবা জা·সুয়েতনা নাংজা।” যীশু পিতরনা আগানজক, “আংআ নাং·খো জা·সুয়েতজাওদে ইন্দিদে আংমুং নাং·নি মামুং বাক দংজা।” 9 উনোন শিমোন-পিতর আগানজক, “গিত্তেল, ইন্দাকোদে আংনি জা·চকখোসান হং·জা, আংনি জাকখো আরো স্খুখোবা সু·গালে হন·বো।” 10 যীশু বিনা আগানজক, “হাবুগিবানি জা·চকনা আগ্রে মামুংখোবা সু·গালনা নাংজা, মুয়ানা বিনি বে·এন গিম্মিকান রংথালা। 11 না·সংদে রংথালান, ইন্দিবা গিম্মিকদে হং·জা।” সা বিখো রি·ম্মে হ·ন্নুয়া উখো বিয়া হা·আইয়ামিং। উনি গিম্মিনান বিয়া আগানজক, “না·সং গিম্মিকদে রংথালজা।” 12 জা·রিকগিবা গিম্মিকনি জা·চকখো জা·সুয়েতানি জা·মানো যীশু বিনি চিনদাপগিবা বা·রাখো চিন্নে দা·আবা আসংজক আরো বিসংনা আগানজক, “আংআ মুয়াখো দাকজক উখো না·সং হা·আইনা মান·জকমা? 13 না·সং আংখো স্খিগিবা আরো গিত্তেল ইন্না, আরো খাকখেৎখোন আগানা মুয়ানা আংআ ইন্দাকেন হং·আ। 14 ইন্দিবা আংআ গিত্তেল আরো স্খিগিবা হং·এবা না·সংনি জা·চকখো জা·সুয়েতোদে না·সংবা সাকসা সাকগিপ্পিননি জা·চকখো জা·সুয়েতনা নাংআ। 15 আংআ ইখো না·সংনা দাক্কে ফিন্নিকজক, জেদাক্কে আংআ না·সংনি গিম্মিন জেখো দাকজক না·সংবা উয়ানদাক্কেন দাক্কা। 16 আংআ না·সংনা বিবিন আগানিংআ, নকখল বিনি নকগিবানা বাত্তে দাল·বাৎজা। জেখো ওয়াত্তেতজক বিখো ওয়াত্তেতগিবানা বাত্তে বিয়া দাল·বাৎজা। 17 ইরাংখো হা·আইএ উগিত্তা দাক্কোদে না·সং মিৎথেলাখো মান·গিবা হং·আ। 18 “আংআ না·সং গিম্মিকখোদে আগানজা। আংআ জেরাংখো বাচ্ছিয়ে রা·জক বিসংখোদে আংআ হা·আইয়া। ইন্দিবা রংথালগিবা শাস্ত্রনি ইয়া খাৎথা চু·সকনান নাংনুয়া, ‘আংমুং চা·রিম-রিংরিমগিবাবা আংনি সাক্কাও জা·ফা দি·জক।’ 19 ইরাং হং·না স্খাংআন আংআ না·সংনা আগানিংআ, জেদাক্কে হং·আনি জা·মানো আংআন উয়া হং·আ, ইন্নে না·সং বিবিরা·না মা·ন্না। 20 আংআ না·সংনা বিবিন আগানিংআ, আংআ জেখো ওয়াত্তেতা, বিখো রা·চাকগিবা আংখোন রা·চাকা, আরো আংখো রা·চাকগিবা, আংখো ওয়াত্তেতগিবাখোন রা·চাকা।” 21 ইরাংখো আগানানি জা·মানো যীশু খা·থংও জাজ্রেংজক। বিয়া ফারাকেন আগানজক, “আংআ না·সংনা বিবিন আগানিংআ, না·সংওনি সাকসা আংখো বোবিলরাংনি জাক্কো রি·ম্মে হ·ন্নুয়া।” 22 যীশু সাখো আগানজক উখো হা·আইনা মান·জাএ জা·রিকগিবারাং সাকসা সাকগিপ্পিনচাখো নিনা হা·বাচেংজক। 23 বিসংওনি জেনা যীশু খা·সানুয়ামিং বিয়া যীশুনি খা·বাকোন দংআমিং। 24 শিমোন-পিতর বিখো মিক্‌জাপে আগানজক, “বিয়া সাখো আগানিংআ সিং·বো।” 25 উয়া জা·রিকগিবা উনো যীশুচাখো নিএ আগানজক, “গিত্তেল, বিয়া সা?” 26 যীশু আগানচাকজক, “ইয়া রুটিখো সিম·বলে জেনা হ·ন্নুয়া বিয়ান উয়া মান্দি হং·আ।” আরো বিয়া রুটিখো সিম·বলে শিমোন ইষ্কারিয়োতনি দেগিবা যিহূদানা হন·জক। 27 রুটিখো রা·আনি জা·মানোন শয়তান যিহূদানি নিং·আও নাপজক। যীশু বিনা আগানজক, “জেখো দাকনা হা·ম্মা উখো বিকবিক দাকবো।” 28 যীশুমুং চা·গিবারাংনি সাকসাবা হা·আইনা মান·জাজক যীশু মুয়ানা যিহূদানা ইয়া খাৎথাখো আগানজক। 29 সাবা চানচিজক, পর্বনা জেখো নাংআ যীশু যিহূদাখো উখো ব্রিএ রা·বানা আগানজক বা দিল্লা-চন্নারাংনা মামুংখো হন·খানা আগানজক, মুয়ানা বিসংনি থাংখানি জেপ যিহূদাচান দংনুয়ামিং। 30 রুটিখো রা·আনি জা·মানোন যিহূদা হা·ফালচানা রি·য়াংজক। উনো ওয়ালজক। 31 যিহূদা হা·ফালচানা রি·য়াংআনি জা·মানো যীশু আগানজক, “মান্দিনি দেফান্থিনি রাসংখো ফারাকানি সাল সকবাজক আরো বিও ইসলনি রাসং ফারাকনুয়া। 32 ইসলনি রাসং বিও ফারাকোন ইসলবা মান্দিনি দেফান্থিনি রাসংখো আন·থাংও ফারাকেতনুয়া আরো উখো বিয়া থেংরিন দাকনুয়া। 33 “বি·সারাং, দিকদিকসানাসান আংআ না·সংমুং দংখুংআ। না·সং আংখো সান্দিনুয়া, ইন্দিবা আংআ যিহূদীনি দাল·গিবারাংনা জেদাক্কে আগানামিং, ‘আংআ জেও রি·য়াংইংজক না·সং উয়ো রি·বানা মান·জানুয়া,’ উয়ানদাক্কেন না·সংনাবা দা·আও উখোন আগানিংআ। 34 মিংসা গিত্তাল গি·য়েতাখো আংআ না·সংনা হ·ন্নিংজক- না·সং সাকসা সাকগিপ্পিননা খা·সাগ্রিকবো। আংআ জেদাক্কে না·সংনা খা·সামিং উয়ানদাক্কেন না·সংবা সাকসা সাকগিপ্পিননা খা·সাগ্রিকবো। 35 না·সং সাকসা সাকগিপ্পিননা খা·সাগ্রিকোদে ইন্দিদে গিম্মিকান হা·আইনা মা·ন্নুয়া না·সং আংনি জা·রিকগিবা হং·আ।” 36 শিমোন-পিতর যীশুনা আগানজক, “গিত্তেল, না·আ বাওনা রি·য়াংআ?” যীশু আগানচাকজক, “আংআ জেওনা রি·য়াংআ না·সং দা·আও আংমুং উয়োনা রি·বানা মান·জানুয়া, ইন্দিবা জা·মানো না·সং রি·বানুয়া।” 37 পিতর বিনা আগানজক, “গিত্তেল, মুয়ানা দা·আও নাং·মুং রি·য়াংনা মান·জানুয়া? নাং·নি গিম্মিন আংআ জাংগিথাংখোবা হন·চাকনুয়া।” 38 উনোন যীশু আগানজক, “বিবিন না·আ আংনি গিম্মিন জাংগিথাংখো হন·চাকনুয়ামা? আংআ নাং·না বিবিন আগানিংআ, দো·ও গিসিকনা স্খাংআন না·আ রাং·গিত্থাম আংখো হা·আইজা ইন্নে জিচাকনুয়া।

যোহন 14

1 “না·সংনি গিসিক জেদাক্কে জাজ্রেংজা। ইসলও বিবিরা·বো, আংওবা বিবিরা·বো। 2 আপফানি নক্কো দংআনি হা·দাম বাং·এ দংআ। দংজাওদে আংআ না·সংনা আগান্নুয়ামিং, মুয়ানা আংআ না·সংনা হা·দাম থারিনা রি·য়াংইংজক। 3 আংআ রি·য়াংএ না·সংনা হা·দাম থারিয়ে দা·আবা রি·বাফিলনুয়া আরো না·সংখো আংচানা রিম্মাংনুয়া, জেদাক্কে আংআ জেও দংআ না·সংবা উয়োন দংনা মা·ন্না। 4 আংআ বাওনা রি·য়াংইংআ উনি রামাখোদে না·সং হা·আইয়া।” 5 থোমা যীশুনা আগানজক, “গিত্তেল, না·আ বাওনা রি·য়াংআ উখোন চিংআ হা·আইজা, ইন্দিদে রামাখো বাদিকে দাক্কে হা·আইনুয়া?” 6 যীশু থোমানা আগানজক, “আংআন রামা, বিবি আরো জাংগি। আংগিত্তা রি·য়াংজাওদে দারাংবা আপফাওনা রি·য়াংনা মান·জা। 7 না·সং আংখো হা·আইওদে আপফাখোবা হা·আইনুয়ামিং। দা·আও না·সং বিখো হা·আইজক আরো বিখো নিকনাবা মান·জক।” 8 ফিলিপ যীশুনা আগানজক, “গিত্তেল, আপফাখো চিংনা ফিন্নিকবো, উনোদে চিংআ খুসি হং·নুয়া।” 9 যীশু বিনা আগানজক, “ফিলিপ, আংআ সাল বাং·এ না·সংমুং দংজক, ইন্দাকোবা না·আ আংখো হা·আইখুজামা? আংখো নিকগিবাদে আপফাখোবা নিকজক। না·আ বাদিকে দাক্কে আগানিংআ, ‘আপফাখো চিংনা ফিন্নিকবো?’ 10 আংআ আপফাও দংআ আরো আপফা আংও দংআ ইন্নে না·আ বিবিরা·জামা? আংনি আগানগিবা খাৎথারাংখো আংআ আন·থাংওনি আগানজা, ইন্দিবা আপফা, জে আংও দংআ, বিয়ান বিনি কামখো দাক্কিংআ। 11 আংআ আপফাও দংআ আরো আপফা আংও দংআ, ইন্নে আংনি আগানাখো বিবিরা·বো। হং·জাওদে আংনি ইয়া কামরাংনি গিম্মিন আংখো বিবিরা·বো। 12 “আংআ না·সংনা বিবিন আগানিংআ, সাবা আংখো বিবিরা·ওদে আংআ জে কামরাংখো দাক্কা বিয়াবা উরাংখোন দাকনুয়া। আরো আংআ আপফাচা রি·য়াংআ ইন্নে বিয়া ইরাংনা বাত্তেবা দাল·বাতা কামরাংখো দাকনুয়া। 13 না·সং আংনি বিমুংচা জেখো হাম·নুয়া উখো আংআ দাকনুয়া, জেদাক্কে দেফান্থিচা আপফানি রাসং ফারাকানি হং·আ। 14 আংনি বিমুংও আংচা মামুংখো হা·ম্মোদে আংআ উখো দাকনুয়া। 15 “না·সং আংনা খা·সাওদে আংনি গি·য়েতা গিম্মিকখো মানিবো। 16 আংআ আপফাচা হাম·নুয়া, আরো বিয়া না·সংমুং ফাংনাজলনি গিম্মিন দংনা দা·আও সাকসা দাকচাকগিবাখো ওয়াত্তেতনুয়া। 17 উয়া দাকচাকগিবান বিবিনি গিসিক হং·আ। হা·গিলসাকনি মান্দিরাং বিখো রা·চাকনা মান·জা, মুয়ানা বিসং বিখো নিকজা আরো বিখো হা·আইয়াবা হা·আইজা। ইন্দিবা না·সং বিখো হা·আইয়া, মুয়ানা বিয়া না·সংমুং দংআ আরো না·সংনি খা·থংও দংনুয়া। 18 “আংআ না·সংখো ফাগ্রি-মাগ্রি দাক্কে দন্নাংজানুয়া; আংআ না·সংচা রি·বানুয়া। 19 বাং·গিজা সালনি জা·মানো হা·গিলসাকনি মান্দিরাং আংখো নিকজানাজক, ইন্দিবা না·সং নিকনা মা·ন্নুয়া। আংনি থাংএ দংআনা না·সংবা থাংএ দংনুয়া। 20 উনসালো না·সং হা·আইনা মা·ন্নুয়া, আংআ আপফাও দংআ আরো না·সং আংমুং দংআ আরো আংআ না·সংমুং দংআ। 21 আংনি গি·য়েতারাংখো হা·আইগিবা আরো মানিগিবান আংনা খা·সাআ। জে আংনা খা·সাআ আপফাবান বিনা খা·সানুয়া। আংআবা বিনা খা·সানুয়া আরো বিচা আন·থাংখো ফারাকনুয়া।” 22 উনোন যিহূদা (ইষ্কারিয়োৎ হং·জা) বিনা আগানজক, “গিত্তেল, মুয়ানা না·আ চিংচাসান আন·থাংখো ফারাকনুয়া, হা·গিলসাকনি মান্দিরাংচা ফারাকজানুয়ামা?” 23 যীশু বিনা আগানচাকজক, “সাবা আংনা খা·সাওদে বিয়া আংনি খাৎথাখো মানিনুয়া। আপফা বিনা খা·সানুয়া আরো চিংআ বিচা রি·বানুয়া আরো বিমুং দংনুয়া। 24 আংনা খা·সাগিজাগিবাদে আংনি খাৎথাখো মানিজা। জে খাৎথাখো না·সং খিন্নাংআ উয়াদে আংনি খাৎথা হং·জা ইন্দিবা আংখো ওয়াত্তেতগিবা উয়া আপফানিসা। 25 না·সংমুং দংমিত্তিংওন আংআ ইয়া খাৎথারাংখো না·সংনা আগানজক। 26 উয়া দাকচাকগিবা, আগানস্খাওদে গিসিক রংথালগিবাখো জেখো আপফা আংনি বিমুংও ওয়াত্তেতনুয়া, বিয়ান না·সংনা গিম্মিকখো স্খিয়ে হ·ন্নুয়া, আরো না·সংনা আংনি আগানগিবারাংখো গিসিক রা·এতনুয়া। 27 “আংআ না·সংনা থম·থমাখো দন্নাংইংজক, আংনি থম·থমাখোন আংআ না·সংনা হ·ন্নিংজক; হা·গিলসাকনি হ·ন্না গিত্তা আংআ হন·জা। জেদাক্কে না·সংনি খা·থং জাজ্রেংজা আরো গিসিকো খেনজা। 28 ‘আংআ রি·য়াংইংজক আরো দা·আবা না·সংচা রি·বাফিলনুয়া,’ ইন্নে আংনি না·সংনা আগানাখো খিন্নাজক। না·সং আংনা খা·সাওদে আপফাচা রি·য়াংআনা না·সং খুসি হং·নুয়ামিং, মুয়ানা আপফা আংনা বাত্তেবা দাল·বাতা। 29 ইরাং হং·না স্খাংআন আংআ না·সংনা আগানসোএ দন্নিংজক জেদাক্কে হং·জোকনো না·সং বিবিরা·না মা·ন্না। 30 আংআ না·সংমুং বাং·এ আগানগ্রিকজানাজক, মুয়ানা হা·গিলসাকনি নকগিবা রি·বাংজক। আংনি সাক্কাও বিনি বিল দংজা। 31 ইন্দিবা আংআ আপফানা খা·সা আরো আপফানি গি·য়েতা গিত্তা আংআ গিম্মিকখো দাক্কা ইন্নে মান্দিরাং হা·আইখানা ইরাং হং·ইংজক। দা·আওদে চাখাতবো, আনচিং ইয়োনি রি·য়াংনাজক।

যোহন 15

1 “আংআন আংগুর বিফাং চং·মত আরো আংনি ফাগিবা গি·গিবা হং·আ। 2 আংনি বিথি নাংগিজাগিবা ডালারাংখো বিয়া দে·ন্নে গাল্লা, আরো বিথি নাংগিবা ডালারাংখো বিয়া রংথালেতা জেদাক্কোদে উনো বাং·বাত্তে বিথি নাংনা মা·ন্না। 3 আংনি না·সংনা আগানগিবা খাৎথানা না·সং স্খাংআন রংথালজক। 4 আংও দংখামবো আরো আংআবা না·সংনি খা·থংও দংখামনুয়া। আংগুর বিফাংও দংখামজাওদে জেদাক্কে ডালা আন·থাংথাংআন বিথি নাংএতনা মান·জা উয়ানদাক্কে আংও দংখামজাওদে না·সংবা আন·থাংথাংআন বিথি নাংএতনা মান·জা। 5 “আংআন আংগুর বিফাং, আরো না·সং উনি ডালারাং হং·আ। সাবা আংও দংখামোদে আরো আংআ বিও দংখামোদে ইন্দিদে বিনি জাংগিও বিথি বাং·বাত্তে নাংআ, মুয়ানা আংনা আগ্রে না·সং মামুংখোবা দাকনা মান·জা। 6 সাবা আংও দংখামজাওদে দেন·গিবা ডালারাং গিত্তান বিখো হা·ফালচা গাল্লেতা আরো উয়া সিক্রেপাংআ। উনোন উয়া ডালারাংখো চিম্মংএ ওয়া·আলো গাল্লা আরো উরাং খাম্মাংআ। 7 না·সং আংও দংখামোদে আরো আংনি খাৎথারাং না·সংনি খা·থংও দংখামোদে না·সংনি হা·সিকা গিত্তান বি·বো; না·সংনি গিম্মিন উখো দাকনুয়া। 8 না·সংনি জাংগিও বাং·বাত্তে বিথি নাংওদে আরো ইন্দাকে না·সং আন·থাংথাংখো আংনি জা·রিকগিবা ইন্নে ফিন্নিকোদে আংনি ফাগিবানি রাসং হং·নুয়া। 9 ফাগিবা জেদাক্কে আংনা খা·সাজক আংআবা উগিত্তান না·সংনা খা·সাজক। আংনি খা·সাওন দংখামবো। 10 আংআ আংনি ফাগিবানি গি·য়েতা গিম্মিকখো মানিয়ে জেদাক্কে বিনি খা·সাওন দংখামা, উয়ানদাক্কে না·সংবা আংনি গি·য়েতাখো মানিওদে না·সংবা আংনি খা·সাওন দংখামনুয়া। 11 “ইয়া খাৎথারাংখো আংআ না·সংনা আগানজক জেদাক্কে আংনি হান·সেংআ না·সংনি খা·থংও দংখামা আরো না·সংনি হান·সেংআ চু·সকা। 12 আংনি গি·য়েতা ইয়ান, আংআ জেদাক্কে না·সংনা খা·সাজক উয়ানদাক্কে না·সংবা সাকসা সাকগিপ্পিননা খা·সাগ্রিকবো। 13 সাবা রিপ্পেংথাংনি গিম্মিন আন·থাংনি জাংগিখো হন·চাকোদে বিনা বাত্তে বাং·এ খা·সাগিবা সাকসাবা দংজা। 14 না·সংনা আংনি হন·গিবা গি·য়েতারাংখো না·সং মানিওদে না·সং আংনি রিপ্পেংরাং হং·আ। 15 আংআ না·সংখো নকখল ইনজানাজক, মুয়ানা নকগিবানি দাক্কাখো নকখল হা·আইজা; ইন্দিবা আংআ না·সংখো রিপ্পেংরাং ইনজক, মুয়ানা আংআ আপফাচাখো খিন্নাগিবারাংখো না·সংনা হা·আইএতজক। 16 না·সং আংখো বাচ্ছিয়ে রা·জা, ইন্দিবা আংআন না·সংখো বাচ্ছিয়ে রা·এ কাম দাক্কেতজক জেদাক্কে না·সংনি জাংগিও বিথি নাংআ আরো না·সংনি উয়া বিথি দংখামা। ইন্দাকোদে আংনি বিমুংও আপফাচা জেখো বি·নুয়া উখো বিয়া না·সংনা হ·ন্নুয়া। 17 ইয়া গি·য়েতাখো আংআ না·সংনা হ·ন্নিংজক, না·সং সাকসা সাকগিপ্পিননা খা·সাগ্রিকবো। 18 “হা·গিলসাকনি মান্দিরাং না·সংনা মিৎচিয়া, ইন্দিবা গিসিক রা·বো, না·সংনা স্খাং বিসং আংখোন মিৎচিজক। 19 না·সং ইয়া হা·গিলসাকনি হং·ওদে মান্দিরাং বিসংনি আন·থাংনি মান্দি ইন্নে না·সংনা খা·সানুয়ামিং। ইন্দিবা না·সং ইয়া হা·গিলসাকনি হং·জা, বাত্তেসা আংআ হা·গিলসাকনিখো না·সংখো বাচ্ছিয়ে রা·জক ইন্নে হা·গিলসাকনি মান্দিরাং না·সংনা মিৎচিয়া। 20 নকখল বিনি নকগিবানা বাত্তে দাল·বাৎজা, ইন্নে আংনি ইয়া গি·য়েতাখো না·সং দা·আ গুয়ালাবো। উনি গিম্মিন মান্দিরাং আংখো স·ওতে গালনা হা·ম্মোদে না·সংখোবা উগিত্তান দাকনুয়া; বিসং আংনি খাৎথাখো খিন্নাওদে না·সংনি খাৎথাখোবা খিন্নানুয়া। 21 বিসং আংনি গিম্মিন না·সংমুং ইন্দাকে দাকনুয়া, মুয়ানা আংখো ওয়াত্তেতগিবাখো বিসং হা·আইজা। 22 “আংআ রি·বাজাওদে আরো বিসংচা খাৎথা আগানজাওদে বিসংনি পাপ দংজানুয়ামিং; ইন্দিবা দা·আও পাপনা গান্দা ফলসিকনা বিসংনি মামুংবা দংজা। 23 আংখো মিৎচিগিবাদে আংনি ফাগিবাখোবা মিৎচিয়া। 24 জে কামরাংখো দারাংবা দাকখুজা উয়া কামরাংখো বিসংনি গিসেপো আংআ দাকজাওদে বিসংনি দোস হং·জানুয়ামিং। ইন্দিবা দা·আও বিসং আংখো আরো আপফাখো নিকজক আরো মিৎচিবা মিৎচিজক। 25 ‘বিসং ইন্দাকারিন আংখো মিৎচিজক,’ ইন্নে বিসংনি নিয়ামও চকগিবা ইয়া খাৎথা চু·সকনা গিত্তা ইরাং হং·জক। 26 “জে দাকচাকগিবাখো আংআ আপফাওনি না·সংনা ওয়াত্তেতনুয়া, বিয়া জেনসালো রি·বানুয়া উনসালো বিয়ান আংনি গিম্মিন সাক্ষি হ·ন্নুয়া। বিয়ান আপফাওনি রি·বাগিবা বিবিনি গিসিক হং·আ। 27 আরো না·সংবা আংনি গিম্মিন সাক্ষি হ·ন্নুয়া, মুয়ানা হা·বাচেংওনিন না·সং আংমুং দংআ।

যোহন 16

1 “আংআ না·সংনা ইয়া খাৎথারাংখো আগানজক জেদাক্কে না·সং গিসিকো চাংফেংআখো মান·জা। 2 মান্দিরাং থম·দাকরামওনিখো না·সংখো রং·খাত্তেতনুয়া; আরোবা সাল রি·বাংজক, জেনসালো না·সংখো স·ওতগিবারাং চানচিনুয়া, বিসং ইসলনান দাকচাকে হ·ন্নিংআ। 3 বিসং ইন্দাকে দাকনুয়া মুয়ানা বিসং ফাগিবাখোবা হা·আইখুজা, আংখোবা হা·আইখুজা। 4 আংআ না·সংনা ইরাংখো আগানসোজক জেদাক্কে উয়া সাল সকজোকনো আংআ না·সংনা ইরাংখো আগানামিং, ইন্নে না·সং গিসিক রা·আ। “হা·বাচেংওনি আংআ না·সংনা ইরাংখো আগানজা, মুয়ানা আংআ না·সংমুং দংফামিং। 5 আংখো জে ওয়াত্তেতজক আংআ দা·আও বিচা রি·য়াংআ, আরো না·সংনি গিসেপো সাকসাবা আংখো সিং·খুজাংআ, ‘না·আ বাওনা রি·য়াংআ?’ 6 আংআ ইরাংখো না·সংনা আগানানি গিম্মিন বাত্তেসা না·সংনি খা·থংরাংও দুক গাপজক। 7 ইন্দিবা আংআ না·সংনা বিবিন আগানিংআ, আংনি রি·য়াংআন না·সংনা নামবাত্তা, মুয়ানা আংআ রি·য়াংজাওদে উয়া দাকচাকগিবা না·সংচা রি·বাজানুয়া। ইন্দিবা আংআ রি·য়াংওদে বিখো না·সংচা ওয়াত্তেতনুয়া। 8 বিয়া রি·বাএ পাপনি গিম্মিন, ইসলনি হা·সিকা গিত্তা রি·য়ানি গিম্মিন আরো ইসলনি বিচালনি গিম্মিন মান্দিরাংখো সিমসাকেতনুয়া। 9 বিয়া পাপনি গিম্মিন সিমসাকেতনুয়া, মুয়ানা মান্দিরাং আংখো বিবিরা·জা; 10 ইসলনি হা·সিকা গিত্তা রি·য়ানি গিম্মিন সিমসাকেতনুয়া, মুয়ানা আংআ ফাগিবাওনা রি·য়াংআ আরো না·সং আংখো নিকনা মান·জানুয়া; 11 বিচালনি গিম্মিন সিমসাকেতনুয়া, মুয়ানা হা·গিলসাকনি নকগিবানি বিচাল হং·জক। 12 “না·সংচা আংনি আরোবা বাং·আ খাৎথা আগানানি দংআ, ইন্দিবা দা·আও না·সং উরাংখো চাকনা মান·জানুয়া। 13 ইন্দিবা উয়া বিবিনি গিসিক জেনসালো রি·বানুয়া উনসালো বিয়া না·সংখো রামা ফিন্নিকে চু·সকগিবা বিবিওনা রা·আংনুয়া। বিয়া আন·থাংওনি খাৎথা আগানজানুয়া, ইন্দিবা খিন্নাগিবাখোন আগান্নুয়া, আরো জেরাং হং·নুয়া উরাংখোবা বিয়া না·সংনা আগান্নুয়া। 14 উয়া বিবিনি গিসিক আংনি রাসংখোন ফারাকনুয়া, মুয়ানা আংআ জেখো দাক্কা আরো আগানা উখোন বিয়া না·সংচা ফারাকনুয়া। 15 ফাগিবাও দংগিবা গিম্মিকান আংনি। উনি গিম্মিনান আংআ আগানজক, আংআ জেখো দাক্কা আরো আগানা উখোন বিয়া না·সংচা ফারাকনুয়া। 16 “দিকদিকসানি জা·মানোন না·সং আংখো নিকজানাজক, দা·আবা বাং·গিজা সালনি জা·মানোন না·সং আংখো নিকনা মা·ন্নুয়া।” 17 ইরাংখো খিন্নাএ যীশুনি জা·রিকগিবারাংওনি মিত্তামরাং আগানগ্রিকনা হা·বাচেংজক, “বিয়া চিংনা মুয়াখো আগানিংআ, ‘বাং·গিজা সালনি জা·মানোন না·সং আংখো নিকজানুয়া, দা·আবা বাং·গিজা সালনি জা·মানোন না·সং আংখো নিকনা মা·ন্নুয়া?’ বিয়ান দা·আবা আগানিংআ, ‘আংআ ফাগিবাওনা রি·য়াংইংজক।’ 18 দিকদিকসানি জা·মানোন ইন্নে আগানগিবা মুয়াজক? চিংআ হা·আইনা মান·জাংজক বিয়া মুয়াখো আগানিংআ।” 19 ইনি গিম্মিন জা·রিকগিবারাংনি মামুংখো সিং·না হা·ম্মাখো হা·আইনা মা·ন্নে যীশু বিসংনা আগানজক, “আংনি ইন্দাকে আগানাখো, ‘বাং·গিজা সালনি জা·মানোন না·সং আংখো নিকজানুয়া, দা·আবা বাং·গিজা সালনি জা·মানোন না·সং আংখো নিকনা মা·ন্নুয়া,’ ইরাংনি গিম্মিনান না·সং আন·থাংথাংও আগানগ্রিক্কিংআমা? 20 আংআ না·সংনা বিবিন আগানিংআ, না·সং গ্রাপনুয়া আরো দুক মান·বিনুয়া ইন্দিবা হা·গিলসাকনি মান্দিরাং হান·সেংনুয়া। না·সং দুক মা·ন্নুয়া, ইন্দিবা জা·মানো না·সংনি উয়া দুক দংজানুয়া; বাত্তেসা না·সং হান·সেংনুয়া। 21 বি·সা হং·মিত্তিংও মিচিক মান্দি দুক মা·ন্না, মুয়ানা বিনি সাল সকবাজক। ইন্দিবা বি·সা হং·আনি জা·মানো হা·গিলসাকো গিত্তাল সাকসা মান্দি রি·বানি হা·সেল খুসি হং·আনা বিয়া উয়া দুকখো গিসিকো নাজা। 22 উয়ানদাক্কে না·সংবা দা·আও দুক মা·ন্নিংজক; ইন্দিবা দা·আবা না·সংমুং আংআ গ্রংনুয়া, আরো উনোন না·সংনি খা·থং খুসি হং·আও গাপনুয়া আরো উয়া খুসি হং·আখো না·সংচাখো দারাংবা রা·সেকজানুয়া। 23 উনসালো না·সং আংচা মামুংখোন সিং·জানুয়া। আংআ না·সংনা বিবিন আগানিংআ, না·সং আংনি বিমুংও আপফাচা জেখো বি·নুয়া উখো বিয়া না·সংনা হ·ন্নুয়া। 24 দা·আওনা দিপ্পাৎ না·সং আংচা মামুংখোবা বি·খুজা। বি·বো, না·সং মা·ন্নুয়া জেদাক্কোদে না·সংনি হান·সেংআ চু·সকা। 25 “ইয়া স্খিয়ানি খাৎথারাংখো আংআ না·সংনা গল্পরাংচা আগানজক। ইন্দিবা ইন্দাকগিবা সাল রি·বাংজক জেনসালো গল্পরাংচা আংআ খাৎথা আগানজানুয়া, ইন্দিবা ফারাকেন ফাগিবানি গিম্মিন আগান্নুয়া। 26 উনসালো না·সং আন·থাংথাংআন আংনি বিমুংও বি·নুয়া, আরো আংআন না·সংনি ফাল ফাগিবাও মল·মলনুয়া, ইন্নে আংআ আগানজা। 27 ফাগিবা আন·থাংআন না·সংনা খা·সাআ মুয়ানা না·সং আংনা খা·সাজক আরো আংআ ফাগিবা ইসলোনি রি·বাজক, ইন্নে বিবিরা·জক। 28 বিবিন আংআ ফাগিবাওনি ইয়া হা·গিলসাকো রি·বাজক, দা·আবা আংআ ইয়া হা·গিলসাকখো ওয়াত্তে ফাগিবাচান রি·য়াংইংজক।” 29 উনোন বিনি জা·রিকগিবারাং বিনা আগানজক, “নিবো, দা·আওদে না·আ ফারাকেন খাৎথা আগানিংজক, গল্পচা আগানজা। 30 নাং·নি হা·আইগিজা মামুংবা দংজা, ইখো দা·আও চিংআ হা·আইনা মা·ন্নিংজক, সাবা নাং·চা মামুংখো সিং·খানা উয়াবা নাং·না নাংজানুয়া। ইনি গিম্মিনান না·আ ইসলোনি রি·বাজক ইন্নে চিংআ বিবিরা·জক।” 31 যীশু বিনি জা·রিকগিবারাংনা আগানজক, “দা·আওদে না·সং বিবিরা·আমা? 32 নিবো, উয়া সাল রি·বাংজক, আরোবা দা·আওন সকজক, জেনসালো না·সং দলখো ওয়াত্তে আংখো সাকসান গাল্লে হা·দামথাংচা রি·য়াংনুয়া। ইন্দিবা আংআ সাকসান হং·জা, মুয়ানা ফাগিবা আংমুং দংখামা। 33 আংআ না·সংনা ইরাংখো আগানজক জেদাক্কে না·সং আংমুং দংখামানি গিম্মিন গিসিকো থম·থমাখো মা·ন্না। ইয়া হা·গিলসাকো না·সং দুক আরো সিনজেতাখো মান·বিএ দংআ, ইন্দিবা খা·দংবো; আংআন হা·গিলসাকখো হামজক।”

যোহন 17

1 ইয়া খাৎথারাংখো আগানানি জা·মানো যীশু সালগিচাখো নিগোদোএ আগানজক, “আপফা, সাল সকজক। নাং·নি দেফান্থিখো রাসং চাএতবো জেদাক্কে দেফান্থিবা নাং·খো রাসং চাএতনা মা·ন্না। 2 না·আ বিনা মান্দি গিম্মিকনি সাক্কাও বিলখো হন·জক, জেদাক্কোদে না·আ জেরাংখো বিনি জাক্কো হন·জক উয়া গিম্মিকনান বিয়া ফাংনাজলনি জাংগিখো হ·ন্না মা·ন্না। 3 নাং·খো, আগানস্খাওদে সাকসা মাংমাং বিবিগিবা ইসলখো আরো নাং·নি ওয়াত্তেতগিবা উয়া যীশু খ্রীষ্টখো হা·আইনা মা·ন্নান ফাংনাজলনি জাংগি হং·আ। 4 নাং·নি আংনা দাকনা হন·গিবা কামখো ব·ন্নেতে ইয়া হা·গিলসাকো আংআ নাং·নি রাসংখো ফারাকজক। 5 আপফা, হা·গিলসাক হং·বানা স্খাং নাং·মুং আংআ জে রাসংও দংআমিং উয়া রাসংখো না·আ দা·আবা আংনা হন·বো। 6 “হা·গিলসাকোনিখো জেরাংখো না·আ আংনা হন·জক আংআ বিসংচা নাং·খো ফারাকজক। বিসং নাং·নিনমুং, আরো না·আ বিসংখো আংনা হন·জক। বিসং নাং·নি খাৎথাখো মানিজক। 7 জেরাংখো না·আ আংনা হন·জক উয়া নাং·চানিন রি·বাজক, ইন্নে বিসং দা·আওদে হা·আইনা মান·জক। 8 মুয়ানা, নাং·নি ইনখানা আগানগিবাখো আংআ বিসংনা আগানজক। বিসং উখো রা·চাকে বিবিন হা·আইনা মান·জক, আংআ নাং·ওনি রি·বাজক, আরো না·আন আংখো ওয়াত্তেতজক ইন্নে বিবিবারা·জক। 9 “আংআ গিম্মিকনা মল·মলজা, ইন্দিবা জেরাংখো না·আ আংনি জাক্কো হন·জক বিসংনা মল·মলইংজক, মুয়ানা বিসংদে নাং·নিন হং·আ। 10 আংও দংগিবা গিম্মিকান নাং·নি আরো নাং·ও দংগিবা গিম্মিকান আংনি হং·আ। বিসংনি গিসেপো আংনি রাসং ফারাকজক। 11 আংআদে ইয়া হা·গিলসাকো দংজাজক, ইন্দিবা বিসংদে ইয়া হা·গিলসাকোন দংআ; আরো আংআ নাং·চানা রি·বাংজক। রংথালগিবা আপফা, জে বিমুংখো না·আ আংনা হন·জক উয়া বিমুংও বিসংখো রাক্ষিবো, জেদাক্কে আনচিংনি আপসান হং·আ গিত্তা বিসংবা আপসান হং·না মা·ন্না। 12 আংআ জেওনা দিপ্পাৎ বিসংমুং দংআমিং উয়োনা দিপ্পাৎ নাং·নি হন·গিবা বিমুংও আংআ বিসংখো রাক্ষিয়ে রি·বাজক। আংআ বিসংখো নিরক্ষিজক, বিসংওনি সাকসাবা নাসিজা। ইন্দাকোবা নাসিনাগিবাসান নাসিজক, জেদাক্কোদে রংথালগিবা শাস্ত্রনি খাৎথা চু·সকা। 13 “দা·আও আংআ নাং·চা রি·বাংজক, আরো জেদাক্কে আংনি খুসি হং·আও বিসংনি খা·থং গাপ্পা উনি গিম্মিন হা·গিলসাকো দংমিত্তিংওন ইয়া খাৎথারাংখো আগানিংআ। 14 নাং·নি আগানগিবাখোন আংআ বিসংনা আগানজক। হা·গিলসাকনি মান্দিরাং বিসংনা মিৎচিজক, মুয়ানা আংআ জেদাক্কে হা·গিলসাকনি হং·জা উয়ানদাক্কে বিসংবা ইয়া হা·গিলসাকনি হং·জা। 15 না·আ ইয়া হা·গিলসাকনিখো বিসংখো রা·আংবো, ইন্নে আংআ নাং·খো মল·মলজা, ইন্দাকোবা শয়তাননি জাকনিখো বিসংখো রাক্ষিবো। 16 আংআ জেদাক্কে ইয়া হা·গিলসাকনি হং·জা বিসংবা উয়ানদাক্কে ইয়া হা·গিলসাকনি হং·জা। 17 “বিবিচা নাং·নি গিম্মিনান না·আ বিসংখো দিংথাং দাক্কে দনবো। নাং·নি খাৎথান উয়া বিবি হং·আ। 18 না·আ জেদাক্কে আংখো হা·গিলসাকো ওয়াত্তেতামিং উয়ানদাক্কে আংআবা বিসংখো হা·গিলসাকো ওয়াত্তেতজক। 19 বিসংনি হা·সেল নাং·না আংআ আন·থাংখো দিংথাং দাকজক জেদাক্কে বিসংখোবা বিবিচা দিংথাং দাক্কা। 20 “আংআ বিসংনাসান মল·মলা ইন্দাকে হং·জা, ইন্দিবা বিসংনি খাৎথাচা জেরাং আংখো বিবিরা·নুয়া বিসংনাবা মল·মলিংআ, জেদাক্কে বিসং গিম্মিকান আপসান হং·আ। 21 আপফা, না·আ জেদাক্কে আংমুং দংফা আরো আংআ নাং·মুং দংফা উয়ানদাক্কেন বিসংবা আনচিংমুং দংফাখানা। উনোদে না·আন আংখো ওয়াত্তেতজক, ইন্নে হা·গিলসাকনি মান্দিরাং বিবিরা·না মা·ন্নুয়া। 22 নাং·নি হন·গিবা রাসংখো আংআ বিসংনা হন·জক জেদাক্কে আনচিংনি আপসানগ্রিকা গিত্তা বিসংবা আপসান হং·না মা·ন্না, 23 আগানস্খাওদে আংআ বিসংমুং দংফা আরো না·আ আংমুং দংফা, আরো ইন্দাকে চু·সকে বিসং আপসানগ্রিকখানা। উনোদে না·আন আংখো ওয়াত্তেতজক ইন্নে হা·গিলসাকনি মান্দিরাং হা·আইখানা, আরো আংনা খা·সা গিত্তা বিসংনাবা খা·সাবো। 24 “আপফা, জেরাংখো না·আ আংনা হন·জক, আংনি রাসংখো নিকনা মান·খানা গিত্তা বিসংবা আংআ জেও দংআ উয়ো আংমুং দংখানা, ইখো আংআ হা·ম্মা। উয়া রাসংখো না·আন আংনা হন·জক, মুয়ানা হা·গিলসাক হং·বানা স্খাংওনিন না·আ আংনা খা·সাজক। 25 খাকখেৎস্রাংগিবা আপফা, হা·গিলসাকনি মান্দিরাং নাং·খো হা·আইজা ইন্দিবা আংআ নাং·খো হা·আইয়া। আরো না·আন আংখো ওয়াত্তেতজক ইন্নে ইরাং হা·আইনা মান·জক। 26 আংআ বিসংচা নাং·খো ফারাকজক আরোবা ফারাকনুয়া, জেদাক্কোদে না·আ আংনা জেগিত্তা খা·সা উগিত্তা খা·সা বিসংনি খা·থংও দংআ, আরো জেদাক্কে আংআ বিসংমুং দংখামনা মা·ন্না।”

যোহন 18

1 ইয়া খাৎথারাংখো আগানানি জা·মানো যীশু বিনি জা·রিকগিবারাংমুং কিদ্রোণ চিরিংনি নালসাচা রি·য়াংজক। উয়ো বাগান দামসা দংআমিং। যীশু আরো বিনি জা·রিকগিবারাং উয়া বাগানচা রি·য়াংজক। 2 যীশুখো জা·মানো বোবিলরাংনি জাক্কো রি·ম্মে হন·গিবা উয়া যিহূদাবা ইয়া হা·দামখো হা·আইয়ামিং, মুয়ানা যীশু সময়ফ্রাকরাংওন জা·রিকগিবারাংমুং উয়া হা·দামও থম·দাকনুয়ামিং। 3 খামাল দাল·গিবারাং আরো ফরীশীরাং যিহূদামুং সিপাই মিত্তাম আরো পেয়াদা মিত্তামখো হন·জক। উনোন যিহূদা বিসংমুং চাক্কি আরো মি·ল্লামরাংখো রা·এ উয়ো রি·বাজক। 4 বিনি সাক্কাও মুয়া হং·নুয়া উয়া দিমদাকখোন যীশু হা·আইয়ামিং। ইনি গিম্মিন বিয়া হং·খাতে রি·বাএ উয়া মান্দিরাংনা আগানজক, “না·সং সাখো সান্দিংআ?” 5 বিসং আগানজক, “নাসরতনি যীশুখো।” যীশু বিসংনা আগানজক, “আংআন উয়া।” যীশুখো বোবিলরাংনি জাক্কো রি·ম্মে হন·গিবা উয়া যিহূদাবা বিসংমুং চাদেংএ দংআমিং। 6 “আংআন উয়া,” ইন্নে যীশুনি আগানোন বিসং থাং·ফিলে হা·আও গা·আকজক। 7 যীশু দা·আবা বিসংখো সিং·ফিলজক, “না·সং সাখো সান্দিংআ?” বিসং আগানজক, “নাসরতনি যীশুখো।” 8 উনোন যীশু আগানজক, “আংআদে না·সংনা আগানজকান, আংআন উয়া। না·সং আংখোন সান্দিনা রি·বাওদে ইরাংখো রি·য়াংনা আগানবো।” 9 ইয়া হং·জক জেদাক্কে যীশুনি আগানগিবা ইয়া খাৎথা চু·সকা, “নাং·নি আংনা হন·গিবারাংওনি সাকসাখোবা আংআ গিম্মায়েতজা।” 10 শিমোন-পিতরচা মি·ল্লাম গি·সা দংআমিং। পিতর উয়া মি·ল্লামখো সাল্লোকে খামাল দাল·বাৎগিবানি নকখলনি জাক্রা নাচিলখো দেন·ফাকেতজক। উয়া নকখলনি বিমুংখো মল্ক মিংআমিং। 11 ইনি গিম্মিন যীশু পিতরনা আগানজক, “নাং·নি মি·ল্লামখো বিখপো দনবো। আপফা আংনা দুকনি জে রিংচাকানিখো হন·জক উখো আংআ রিংজানুয়ামা?” 12 উনোন উয়া সিপাইরাং আরো বিসংনি সুবিদার আরো যিহূদী দাল·বাৎগিবারাংনি পেয়াদারাং যীশুখো রি·ম্মে খাজক। 13 বিসং যীশুখো হাননচা রা·আংচেংজক, মুয়ানা উয়া বিলসিও জে কাইয়াফা খামাল দাল·বাৎগিবা হং·আমিং হানন বিনি হ·গিবামিং। 14 ইয়া কাইয়াফান যিহূদীরাংনি দাল·গিবারাংনা ইন্দাকে খু·ফাত্থিয়ামিং, গিম্মিক জাতনা বাত্তে সাকসানি সিয়ান নামবাত্তা। 15 শিমোন-পিতর আরো সাকগিপ্পিন জা·রিকগিবা যীশুখো জা·রিকফাজক। খামাল দাল·বাৎগিবা উয়া সাকগিপ্পিন জা·রিকগিবাখো হা·আইয়ামিং। উয়া জা·রিকগিবা যীশুমুং খামাল দাল·বাৎগিবানি হা·থিলাও নাপজক, 16 ইন্দিবা পিতর হা·ফালচা দ·গাচিল সেফাংও চাদেংএ দংজক। উনোন খামাল দাল·বাৎগিবানি হা·আইগিবা উয়া জা·রিকগিবা হা·ফালচা রি·য়াংএ দ·গাচিলও নিথিমগিবা মিচিকখো আগানে পিতরখো নিং·আচানা রিমবাজক। 17 উয়া মিচিক পিতরনা আগানজক, “না·আবা ইয়া মান্দিনি জা·রিকগিবারাংওনি সাকসা হং·আমা?” পিতর আগানজক, “হং·জা, আংআদে হং·জা।” 18 উনো বাং·এন সি·ন্না গা·আকামিং। ইনি গিম্মিন নকখলরাং আরো পেয়াদারাং ওয়া·আলখো সো·এ উয়া হা·দামও চাদেংএ ওয়া·আল চাক্কিংআমিং। পিতরবা বিসংমুং চাদেংএ ওয়া·আল চাক্কিংআমিং। 19 খামাল দাল·বাৎগিবা উনোন যীশুখো বিনি জা·রিকগিবারাংনি গিম্মিন আরো বিনি স্খিয়ানি গিম্মিন সিং·জক। 20 যীশু আগানচাকজক, “আংআ মান্দিরাংচা ফারাকেন খাৎথা আগানজক। আংআ ফাংনান থম·দাকরামও আরো থরম নক্কো জেও দিমদাক যিহূদীরাং থ·ম্মা উয়ো স্খিজক। আংআদে মিৎথিনাও মামুংখোবা আগানজা; 21 ইন্দিবা মুয়ানা আংখো সিং·আ? আংনি আগানাখো খিন্নাগিবারাংচা সিং·বো আংআ বিসংনা মুয়াখো আগানজক। আংনি আগানগিবাও বিসংনি হা·আইগিজা দংজা। 22 যীশুনি ইন্দাকে আগানমিত্তিংও বিনি সেফাংও চাদেংগিবা পেয়াদারাংওনি সাকসা বিনি নাথেংখো দকথাপে আগানজক, “না·আ খামাল দাল·বাৎগিবানা ইন্দাকে আগানচাক্কিংজক?” 23 যীশু বিনা আগানজক, “আংআ নামগিজাখো আগানোদে উখো ফিন্নিকবো। ইন্দিবা নাম্মাখো আগানোদে মুয়ানা আংখো দক্কিংআ?” 24 উনোন হানন যীশুখো খাআ গ্মাংআন খামাল দাল·বাৎগিবা কাইয়াফাচা ওয়াত্তেতজক। 25 শিমোন-পিতরনি চাদেংএ ওয়া·আল চাকমিত্তিংও মান্দিরাং বিখো ইনজক, “না·আবা বিনি জা·রিকগিবারাংওনি সাকসামা?” পিতর জিচাকে আগানজক, “হং·জা, আংআদে হং·জা।” 26 পিতর জেনি নাচিলখো দেন·ফাকামিং বিনি সাকসা চাচ্চি খামাল দাল·বাৎগিবানি নকখলমিং। বিয়া আগানজক, “আংআ নাং·খো বাগানচা বিমুং নিকজামিংমা?” 27 পিতর দা·আবা জিচাকজক, আরো উনোন দো·ও মাংসা গিসিকজক। 28 যিহূদী দাল·বাৎগিবারাং ফ্রিংও যীশুখো কাইয়াফাওনি রোমনি দাল·বাৎগিবা শাসন দাকগিবা পীলাতনি নকচা রিম্মাংজক। ইন্দিবা বিসং উয়া নকনি নিং·আও নাপজাজক জেদাক্কোদে রংথালে দংএ ওয়াতচাংআনি চা·আখো চা·না মা·ন্না। 29 উনোন পীলাত হা·ফালও বিসংচা রি·বাএ আগানজক, “ইয়া মান্দিখো না·সং মুয়া দোসখো হ·ন্নে দোসগ্মাং দাক্কিংজক?” 30 যিহূদী দাল·বাৎগিবারাং আগানজক, “বিয়া নামগিজা কামখো দাকজাওদে চিংআ নাং·চা বিখো রিমবাজানুয়ামিং।” 31 পীলাত বিসংনা আগানজক, “ইখো না·সং রিম্মাংএ না·সংনি বেওয়াল গিত্তা বিচাল দাকবো।” ইনি গিম্মিন যিহূদী দাল·বাৎগিবারাং পীলাতনা আগানজক, “ইন্দিবা মান্দিনা সিয়ানি শাস্তিখো হ·ন্নানি বিলদে চিংনি জাক্কো দংজা।” 32 বাদিকে দাক্কে আন·থাং সিনুয়া যীশু স্খাংআন আগানামিং। ইরাং হং·জক জেদাক্কে বিনি উয়া খাৎথা চু·সকা। 33 উনোন পীলাত দা·আবা নক নিং·আওনা নাপজক আরো যীশুখো রিক্কামে আগানজক, “না·আন যিহূদীরাংনি রাজামা?” 34 যীশু আগানজক, “না·আ আন·থাংওনিন ইয়া খাৎথাখো আগানিংআমা, বা সাকগিপ্পিনরাং আংনি গিম্মিন নাং·না আগানে হ·ন্না?” 35 পীলাত আগানচাকজক, “আংআ যিহূদীমা? নাং·নি জাতস্খারাং আরো খামাল দাল·গিবারাং নাং·খো আংনি জাক্কো হন·জক। না·আ মুয়াখো দাক্কা?” 36 যীশু আগানজক, “আংনি সংনক ইয়া হা·গিলসাকনি হং·জা। আংনি সংনক ইয়া হা·গিলসাকো হং·ওদে আংআ যিহূদী দাল·বাৎগিবারাংনি জাক্কো জেদাক্কে গা·আকজা উনি গিম্মিন আংনি মান্দিরাং দাকগ্রিকনুয়ামিং; ইন্দিবা আংনি সংনকদে ইয়া হা·গিলসাকনি হং·জা।” 37 পীলাত যীশুনা আগানজক, “ইন্দাকোদে না·আ রাজামা?” যীশু আগানজক, “আংআন রাজা ইন্নে না·আ খাকখেৎখোন আগানজক। বিবিনা চাক্কে সাক্ষি হ·ন্না আংআ আৎচিজক আরো উনি গিম্মিন আংআ হা·গিলসাকো রি·বাজক। সাবা বিবিও দংওদে আংনি খাৎথাখো খিন্নাচাক্কা।” 38 পীলাত বিনা আগানজক, “বিবি মুয়া?” ইয়া খাৎথাখো আগানে বিয়া হা·ফালচা যিহূদী দাল·বাৎগিবারাংচা রি·য়াংফিলে আগানজক, “আংআ বিনি মামুং দোসখোন নিকজাংআ। 39 ইন্দিবা না·সংনি বেওয়াল মিংসা দংআ, ওয়াতচাংআনি সালো আংআ না·সংনা সাকসা বন্দিখো ওয়াত্তেতিংআ। যিহূদীরাংনি রাজাখো আংআ ওয়াত্তেতনা, ইখো না·সং হা·ম্মামা?” 40 ইনি গিম্মিন দিমদাকান চ্রিকে ইনজক, “বিখো হং·জা, বারা্ববাখোসা।” উয়া বারা্ববা সাকসা রা·সেকগিবা হং·আমিং।

যোহন 19

1 উনোন পীলাত যীশুখো রা·আংএ চাবুকচা দকখানা গি·য়েৎজক। 2 সিপাইরাং বুসুনি গি·সা মুকুটখো থারিয়ে যীশুনি স্খুও স্থিকেতজক। 3 জা·মানো বিখো গিৎচাকম্রাং বা·রাখো গান্নেতজক আরো বিচা রি·য়াংএ আগানজক, “ও যিহূদীরাংনি রাজা, রাসং হং·খানা!” ইখো আগানে সিপাইরাং বিনি নাথেংখো দকথাপনা হা·বাচেংজক। 4 পীলাত হা·ফালও রি·বাফিলে মান্দিরাংনা আগানজক, “নিবো, আংআ বিখো হং·খাত্তেতি না·সংচা রা·বাজক জেদাক্কে আংআ বিনি মামুং দোসখোন নিকজাংআ ইন্নে না·সং হা·আইনা মা·ন্না।” 5 যীশু উয়া বুসুনি মুকুটখো আরো গিৎচাকম্রাং বা·রাখো চিন্নে হা·ফালও রি·বাজক। উনোন পীলাত মান্দিরাংনা আগানজক, “ইয়া নিবো, উয়া মান্দি।” 6 যীশুখো নিক্কে খামাল দাল·গিবারাং আরো পেয়াদারাং চ্রিকে আগানজক, “চিসলো দাৎখাপবো, বিখো চিসলো দাৎখাপবো।” পীলাত মান্দিরাংনা আগানজক, “না·সংআন বিখো রা·আংএ চিসলো দাৎখাপবো, মুয়ানা আংআ বিনি মামুং দোসখোন নিকজাংআ।” 7 যিহূদীরাংনি দাল·গিবারাং পীলাতনা আগানজক, “চিংনি গি·সা নিয়াম দংআ, উয়া নিয়াম গিত্তা বিয়া সিনা খ্রাআ, মুয়ানা বিয়া আন·থাংখো ইসলনি দেফান্থি ইনজক।” 8 পীলাত ইয়া খাৎথাখো খিন্নাএ খেনবিজক। 9 বিয়া নক নিং·আচা রি·য়াংফিলে যীশুখো সিং·জক, “না·আ বাওনি রি·বাজক?” ইন্দিবা যীশু পীলাতনা মামুংখো আগানচাকজাজক। 10 ইনি গিম্মিন পীলাত যীশুনা আগানজক, “না·আ আংমুং খু·সুক আগানজানুয়ামা? নাং·খো ওয়াতনা বা চিসলো হ·ন্না আংনি বিল দংআ ইখো না·আ হা·আইয়ামা?” 11 যীশু আগানচাকজক, “সাক্কাওনি নাং·না বিল হন·জাওদে আংনি সাক্কাও নাং·নি মামুং বিলআন দংজানুয়ামিং। উনি গিম্মিন আংখো নাং·নি জাক্কো হন·গিবানিন পাপ বাং·বাত্তা।” 12 ইয়া খাৎথাখো খিন্নাএ পীলাত যীশুখো ওয়াতনা হাম·জক, ইন্দিবা যিহূদীরাংনি দাল·গিবারাং চ্রিকে আগানজক, “না·আ ইয়া মান্দিখো ওয়াত্তোদে না·আ সম্রাট কৈসরনি রিপ্পেং হং·জা। সাবা আন·থাংখো রাজা ইন্নোদে বিয়া সম্রাট কৈসরনি বোবিল হং·আ।” 13 ইখো খিন্নাএ পীলাত যীশুখো হা·ফালও রা·বাজক আরো রং·থিচা রিক্কা মিংগিবা বিচাল দাকরামো আসংজক। ইব্রীয় খু·সুকচা উয়া হা·দামখো গা্ববাথা মিংনুয়ামিং। 14 উয়া সাল ওয়াতচাংআনি সালনা থারিসোআনি সালমিং। উনো সালজাচ্চিমাং হং·আমিং। পীলাত যিহূদীরাংনি দাল·গিবারাংনা আগানজক, “ইয়া নিবো, না·সংনি রাজা।” 15 ইনি গিম্মিন বিসং চ্রিকে আগানজক, “হা·রিকেতবো, হা·রিকেতবো! বিখো চিসলো দাৎখাপবো।” পীলাত বিসংনা আগানজক, “না·সংনি রাজাখো আংআ চিসলো দাৎখাপনুয়ামা?” খামাল দাল·গিবারাং আগানচাকজক, “সম্রাট কৈসরনি আগ্রে চিংনি সাকসাবা রাজা দংজা।” 16 উনোন পীলাত যীশুখো চিসলো দাৎখাপনা বিসংনি জাক্কো হ·ন্নেতজক। উনোন সিপাইরাং যীশুখো রা·আংজক। 17 যীশু আন·থাংআন আন·থাংনি চিসলখো রিপ্পিএ স্খু বিখ্রক মিংগিবা হা·দাম দামসাওনা রি·য়াংজক। উয়া হা·দামখো ইব্রীয় খু·সুকচা গল্‌গথা মিংআমিং। 18 উয়ো বিসং যীশুখো চিসলো দাৎখাপজক- যীশুখো জাংচিও আরো বিনি সামগ্মিও গিপ্পিন সাকগ্মিখো দাৎখাপজক। 19 পীলাত দোসনি খাৎথাখো চক্কে যীশুনি চিসল সাক্কাও ফা·থাপজক। “নাসরতনি যীশু, যিহূদীরাংনি রাজা” ইন্নে উনো চক্কা দংআমিং। 20 যীশুখো চিসলো দাৎখাপগিবা হা·দাম সংজিলমানি সেফাংওমিং ইনি গিম্মিন যিহূদীরাংওনি বাং·এন উয়া চক্কাখো পড়িজক। উখো ইব্রীয়, রোম আরো গ্রীক খু·সুকচা চক্কামিং। 21 উনোন যিহূদীরাংনি খামাল দাল·গিবারাং পীলাতনা আগানজক, “ ‘যিহূদীরাংনি রাজা,’ ইখো চকগিজা উনাবাত্তে ইন্দাকে চকবো, ‘বিয়া আগান্নুয়ামিং, আংআ যিহূদীরাংনি রাজা।’ ” 22 পীলাত আগানজক, “আংআ জেখো চকজক উখোন চকজক।” 23 যীশুখো চিসলো দাৎখাপানি জা·মানো সিপাইরাং বিনি বা·রারাংখো রা·এ আন·থাংথাংও বাক ব্রি দাক্কে সুয়ালজক। জা·মানো বিসং যীশুনি চলাখোবা রা·জক। উয়া চলাও সিক্কা দংজামিং, সাক্কাওনি খা·মাওনা দিপ্পাৎ গিম্মিকখোন জাকচা খয়ে থারিয়ামিং। 24 উখো নিক্কে সিপাইরাং সাকসা সাকগিপ্পিননা আগানজক, “ইখো চিৎগিজা ইন্দিবা লটারি খা·ল্লে নিখুনা ইয়া সানি হং·নুয়া।” ইরাং হং·জক জেদাক্কে রংথালগিবা শাস্ত্রনি ইয়া খাৎথা চু·সকা, বিসং আন·থাংথাংনি গিসেপো আংনি বা·রারাংখো সুয়ালা, আরো আংনি বা·রানা বিসং লটারি খা·ল্লা। আরো বিবিন সিপাইরাং ইরাংখো দাক্কামিং। 25 যীশুনি মা·গিবা, বিনি মা·গিবানি নগিবা, ক্লোপানি জিকগিবা মরিয়ম আরো মগদলীনী মরিয়ম যীশুনি চিসল কেচ্চিও চাদেংএ দংআমিং। 26 যীশু বিনি মা·গিবাখো আরো বিনি খা·সাগিবা জা·রিকগিবাখো চাদেংএ দংআখো নিকজক। বিনি মা·গিবানা বিয়া আগানচেংজক, “হাইওয়া নিবো, নাং·নি দেফান্থি।” 27 উনি জা·মানো উয়া জা·রিকগিবানা আগানজক, “হাইওয়া নিবো, নাং·নি মা·গিবা।” উয়োনিন উয়া জা·রিকগিবা যীশুনি মা·গিবাখো বিনি আন·থাংনি নকচা রিম্মাংজক। 28 ইনি জা·মানো গিম্মিকান বন·খামজক ইখো হা·আইএ রংথালগিবা শাস্ত্রনি খাৎথা চু·সকখানা ইন্নে যীশু আগানজক, “আংআ চি রিংনা হা·সিকা।” 29 মেসেং বিৎচি গাপ্পা গি·সা দনচাক্রা উয়া হা·দামও দংআমিং। উনো বিসং গি·সা সপন্‌জখো সিম·চিম্মে আরো এসোব বিফাংনি ডালাও সিকসেপে উখো যীশুনি খু·সুকচা রিম·জক। 30 যীশু উয়া মেসেং বিৎচিখো রিংআনি জা·মানো আগানজক, “বন·জক।” জা·মানো বিয়া স্খু দেংগকে জাংগি গালজক। 31 উয়া সাল মানিয়ানি সালখো থারিয়ানি সাল হং·আমিং। উনি সালসাও নেং·থাকানি সালমিং, আরো উয়া নেং·থাকানি সাল মংসংগিবা সাল হং·আমিং ইন্নে যিহূদীরাংনি দাল·গিবারাং হা·ম্মামিং জেদাক্কে উয়া সালো বে·এনরাংখো চিসল সাক্কাও দনজা। ইনি গিম্মিন চিসলো দাৎখাপগিবারাংনি জা·আখো ফি·এ চিসলোনি বিসংখো রা·আংএতখানা বিসং পীলাতচা মল·মলজক। 32 উনোন সিপাইরাং রি·বাএ যীশুমুং চিসলো দাৎখাপগিবা সাকগ্মিনি জা·চকখো ফি·এ গালজক। 33 জা·মানো সিপাইরাং যীশুনি সেফাংও রি·বাএ বিখো সিয়াখো নিক্কে বিনি জা·আখো ফি·জাজক। 34 ইন্দিবা সিপাই সাকসা বিনি অকসামবেংখো সু·জক, আরো উনোন উয়োনি হান·চি আরো চি হং·খাতবাজক। 35 আন·থাংনি মিক্রোনও ইন্দাকারাংখো নিকগিবান সাক্ষি হ·ন্নে আগানজক, আরো বিনি সাক্ষি হ·ন্না বিবিন হং·আ। বিয়া হা·আইয়া, বিনি আগানারাং বিবি হং·আ জেদাক্কে না·সংবা বিবিরা·না মা·ন্না। 36 ইরাং হং·আমিং জেদাক্কে রংথালগিবা শাস্ত্রনি ইয়া খাৎথা চু·সকা, “বিনি গ্রেং গি·সাখোবা ফি·আ হং·জানুয়া।” 37 দা·আবা শাস্ত্রনি দা·আও মিংসা খাৎথা ইয়ান- “জেখো বিসং সু·জক বিচাখো বিসং নিএতনুয়া।” 38 ইরাং হং·আনি জা·মানো অরিমাথিয়া সংনি যোষেফ যীশুনি বে·এনখো রা·আংনা পীলাতচা মল·মলজক। যোষেফ যীশুনি সিউল দাক্কে জা·রিকগিবা হং·আমিং, মুয়ানা বিয়া যিহূদীরাংনি দাল·গিবারাংনা খেন্নুয়ামিং। পীলাতনি আগানানি জা·মানো বিয়া রি·বাএ যীশুনি বে·এনখো রা·আংজক। 39 স্খাংও ওয়াল্লো যীশুচা রি·বাগিবা নীকদীমবা সৎবংআমাং সিম্মিলগিবা তেলখো আরো আগরখো ব্রিনে রা·বাজক। 40 জা·মানো বিসং যীশুনি বে·এনখো রা·এ যিহূদীরাংনি গোপ্পানি নিয়াম গিত্তা উয়া গিম্মিক সিম্মিলাখো হ·ন্নে বে·এনখো বা·রাচা বিল·রিমরিমজক। 41 যীশুখো দাৎখাপগিবা হা·দামও বাগান দামসা দংআমিং আরো উয়ো গিত্তাল গি·সা গোপরাম দংআমিং। উয়া গোপরামও দারাংখোবা গোপখুজামিং। 42 উয়া সাল যিহূদীরাংনি পর্বনা থারিসোআনি সালমিং, আরো উয়া গোপরামবা সেফাংওন দংআনি গিম্মিন বিসং যীশুখো উয়া গোপরামওন দনজক।

যোহন 20

1 আনথিনি স্খাংগিবা সালো ফ্রিংওয়ালনি, আন্দালমিত্তিংওন মগ্‌দলীনী মরিয়ম উয়া গোপরামনি সেফাংওনা রি·য়াংজক। বিয়া গোপরামনি মিকখাংওনি রং·থিখো জিত্তেতাখো নিকজক। 2 উনি গিম্মিন বিয়া শিমোন-পিতর আরো যীশুনি খা·সাগিবা জা·রিকগিবাচা খাত্তাংএ রি·য়াংএ আগানজক, “মান্দিরাং গোপরামওনিখো গিত্তেলখো রা·আংজক। বিখো বাও দনজক উখো চিংআ হা·আইজা।” 3 পিতর আরো উয়া সাকগিপ্পিন জা·রিকগিবা উনোন হং·খাতে গোপরামচানা রি·য়াংজক। 4 সাকগ্মি দামসান খাত্তাংআমিং। সাকগিপ্পিন জা·রিকগিবা পিতরনা বাত্তে থারাকে খাত্তাংএ স্খাং গোপরামচানা রি·বাচেংজক, ইন্দিবা বিয়া গোপরামনি নিং·আচানা নাপজাজক। 5 বিয়া বামগপ্পে যীশুনি বে·এনো বিল·রিমরিমে দনগিবা বা·রারাংখো গা·আকে দংআখো নিকজক। 6 শিমোন-পিতরবা বিনি জা·মানো রি·বাএ গোপরাম নিং·আওনা নাপজক আরো বা·রারাংখো গা·আকে দংআখো নিকজক। 7 বিয়া আরোবা নিকজক, বিনি স্খুও খাথিপগিবা রুমাল গিপ্পিন বা·রারাংমুং দংজা, ইন্দিবা দিংথাং দাক্কে হা·দাম গি·সাও বি·ল্লে দন্নাখো নিকজক। 8 স্খাং গোপরামচানা সকবাগিবা জা·রিকগিবাবা উনো নিং·আচা নাপজক আরো নিক্কে বিবিরা·জক। 9 সিয়াওনি যীশুনি চাখাতফিলনা নাংনুয়া, ইন্নে রংথালগিবা শাস্ত্রনি উয়া খাৎথাখো বিসং স্খাংওদে হা·আইনা মান·জামিং। 10 ইনি জা·মানো জা·রিকগিবারাং নকচানা রি·য়াংফিলজক, 11 ইন্দিবা মরিয়ম গোপরামনি হা·ফালও চাদেংএ গ্রাপনা হা·বাচেংজক। বিয়া গ্রাপারিন বামগোপে গোপরাম নিং·আচানা নিয়েতজক, 12 যীশুনি বে·এনখো জেও দন্নামিং উয়ো গ্বিবক বা·রা গানগিবা সা·গ্রে সাকগ্মি আসংএ দংআ- স্খুফাংচাবাক্কা সাকসা আরো সাকগিপ্পিন জা·চকচাবাক্কা আসংআ। 13 বিসং মরিয়মখো ইনজক, “মুয়ানা গ্রাপিংআ?” মরিয়ম বিসংনা আগানজক, “মান্দিরাং আংনি গিত্তেলখো রা·আংজক আরো বিখো বাওনা দন্না উখো হা·আইজা।” 14 ইয়া খাৎথাখো আগানে মরিয়ম খিসাংফিলে নিএতো যীশুনি চাদেংএ দংআখো নিকজক, ইন্দিবা বিয়ান যীশু উখো হা·আইনা মান·জাজক। 15 যীশু বিখো ইনজক, “মুয়ানা গ্রাপিংআ? সাখো সান্দিংআ?” যীশুখো বাগান নিরকখিগিবা চানচিয়ে মরিয়ম আগানজক, “নিবো, না·আ বিখো রা·আংএ দংওদে বাচ্চা দন্না উখো আগানবো। আংআন বিখো রা·আংনুয়া।” 16 যীশু বিখো ইনজক, “মরিয়ম।” উনি গিম্মিন মরিয়ম চাদেংফিলে অরাম খু·সুকচা যীশুখো ইনজক, “র্ববুনি।” ইখো ফি·ওদে ইনি অর্থ হং·আ স্খিগিবা। 17 যীশু মরিয়মনা আগানজক, “আংখো দা·আ রি·ম্মে রা·রিকাবো, মুয়ানা আংআ দা·আওবা সাক্কাচা আপফাওনা রি·য়াংখুজা। না·আ জংআদারাংনা রি·য়াংএ আগানবো, আংনি আরো না·সংনি ফাগিবা, জে আংনি আরো না·সংনি ইসল হং·আ, আংআ সাক্কাওনা বিচা রি·য়াংআ।” 18 উনোন মগ্‌দলীনী মরিয়ম জা·রিকগিবারাংচা রি·য়াংএ আগানজক, বিয়া গিত্তেলখো নিকজক আরো গিত্তেলান বিনা ইয়া খাৎথারাংখো আগানজক। 19 উনসালোন, আনথিনি স্খাংগিবা সালো হান·থামও জা·রিকগিবারাং যিহূদীরাংনি দাল·গিবারাংনা খেন্নে নকনি গিম্মিক দ·গারাংখো চিপচাংএ হা·দাম দামসানো থম·দাকামিং। উনোন যীশু রি·বাএ বিসংনি জাংচিও চাদেংএ আগানজক, “না·সংও থম·থমখানা।” 20 ইখো আগানে বিয়া বিনি জাক সামগ্মিখো আরো অক্‌সিচাবাক্কাখো বিনি জা·রিকগিবারাংনা ফিন্নিকজক। গিত্তেলখো নিক্কে জা·রিকগিবারাং নাম্মেন খুসি হং·বিজক। 21 জা·মানো যীশু দা·আবা বিসংনা আগানফিলজক, “না·সংও থম·থমখানা। ফাগিবা জেদাক্কে আংখো ওয়াত্তেতজক উয়ানদাক্কে আংআবা না·সংখো ওয়াত্তেতিংআ।” 22 ইয়া খাৎথাখো আগানে বিয়া জা·রিকগিবারাংনি সাক্কাও স্ফুদাপে আগানজক, “গিসিক রংথালগিবাখো রা·চাকবো। 23 না·সং সানিবা পাপখো ক্ষেমা দাক্কোদে বিনি পাপখো ক্ষেমা দাকনুয়া, আরো সানিবা পাপখো ক্ষেমা দাকজাওদে বিনি পাপখো ক্ষেমা দাকজানুয়া।” 24 যীশুনি রি·বামিত্তিংও থোমা মিংগিবা উয়া সাকচিগ্মি জা·রিকগিবারাংওনি সাকসা বিসংমুং দংজামিং। ইয়া থোমাখো সা·চাপ মিংআমিং। 25 গিপ্পিন জা·রিকগিবারাং জা·মানো থোমানা আগানজক, “চিংআ গিত্তেলখো নিকজক।” থোমা বিসংনা আগানজক, “আংআ বিনি জাক সামগ্মিও গজালনি চিনখো নিকজাওদে, উয়া চিনো জাকসিখো হ·ন্নে নিজাওদে আরো বিনি অক্‌সিও জাকখো হন·জাওদে, ইন্দিদে আংআ মামুং দাক্কেবা বিবিরা·জানুয়া।” 26 ইনি সাল চেৎনি জা·মানো জা·রিকগিবারাং ফি·ল্লে নক্কোনা থম·জক, আরো থোমাবা বিসংমুং দংআমিং। দ·গা গিম্মিক চিপচাংআ দংওবা যীশু রি·বাএ বিসংনি জাংচিও চাদেংএ আগানজক, “না·সংও থম·থমখানা।” 27 জা·মানো বিয়া থোমানা আগানজক, “নাং·নি জাকসিখো ইনো হ·ন্নে আংনি জাক সামগ্মিখো নিবো আরো নাং·নি জাকখো সিল্লে আংনি অক্‌সামবেংও দনবো। বিবিরা·গিজাগিবা হং·গিজা ইন্দিবা বিবিরা·গিবা হং·বো।” 28 উনোন থোমা আগানজক, “গিত্তেল আংনি, ইসল আংনি।” 29 যীশু বিনা আগানজক, “থোমা, না·আ আংখো নিক্কানি গিম্মিন বিবিরা·আংআমা? জেরাং নিকগিজান আংখো বিবিরা·আ বিসংখো মিৎথেলা।” 30 যীশু জা·রিকগিবারাংনি মিকখাংও বাং·বিয়া চিননি কামরাংখো দাক্কামিং; উরাংখো ইয়া খি·তাপও চকখুজা। 31 ইন্দিবা ইরাংখো চকজক জেদাক্কে না·সং বিবিরা·আ, যীশুন খ্রীষ্ট, ইসলনি দেফান্থি হং·আ, আরো বিবিরা·এ বিগিত্তা জাংগিখো মা·ন্না।

যোহন 21

1 উনি জা·মানো যীশু দা·আবা তিবিরিয়া সাগালনি রিক্কামো জা·রিকগিবারাংনা মিকখাং ফা·জক। হং·আনিরাং ইন্দাকে হং·আমিং: 2 শিমোন-পিতর, থোমা (জেখো সা·চাপ মিংআ), গালীল হা·দকনি কান্না সংনি নথনেল, সিবদিয়নি দেফান্থিরাং আরো যীশুনি গিপ্পিন সাকগ্মি জা·রিকগিবারাং আপসান দংরিমামিং। 3 শিমোন-পিতর বিসংনা আগানজক, “আংআ না·থক রিম·না রি·য়াংআ।” বিসং আগানজক, “চিংআবা নাং·মুং রি·য়াংনুয়া।” উনোন বিসং হং·খাতে রিংও গাদোজক, ইন্দিবা উনি ওয়াল্লোদে মামুংখোবা রিম·না মান·জাজক। 4 ওয়াল সেং·বামিত্তিংও যীশু সাগালনি রিক্কামো রি·বাএ চাদেংজক। ইন্দিবা বিয়ান যীশু, ইখো জা·রিকগিবারাং হা·আইনা মান·জাজক। 5 বিয়া জা·রিকগিবারাংনা আগানজক, “বি·সারাং, মামুংখোবা মান·জাজকমা?” বিসং আগানজক, “হং·জা, মান·জাজক।” 6 যীশু বিসংনা আগানজক, “রিংনি জাক্রাচাবাক জালখো গোবো, মা·ন্নুয়া।” উনোন বিসং জালখো গোজক, আরো না·থক বাং·এ গাদোআনি গিম্মিন বিসং উখো সালদোবানা মান·জাজক। 7 যীশু জে জা·রিকগিবাখো খা·সানুয়ামিং বিয়া পিতরনা আগানজক, “বিয়ান গিত্তেল।” উনো শিমোন-পিতর বে·এনো মামুং বা·রাখো চিনগোপজামিং। উনি গিম্মিন “বিয়ান গিত্তেল” ইন্নে খিন্নাওন বিয়া বে·এনো বা·রাখো চিনগোপে সাগালও চক্কোনজক। 8 বিসং রিক্কামোনি বাং·এ চে·ল্লাও দংজামিং, মিটার রিৎচাসা গিত্তা চেল·গ্রিকে দংআমিং। ইনি গিম্মিন গিপ্পিন জা·রিকগিবারাং না·থক গাপগিবা জালখো সালদোদোএ রিংও দাক্কে রিক্কামোনা রি·বাজক। 9 রিক্কামো হং·খাতে রি·বাএ বিসং হাংগালনি ওয়া·আলখো আরো ওয়া·আলনি সাক্কাও না·থক দন্নাখো নিকনা মান·জক; উয়ো রুটিবা দংআমিং। 10 উনোন যীশু বিসংনা আগানজক, “দা·আও না·থক রিম·গিবানিখো মিত্তাম রা·বাবো।” 11 শিমোন-পিতর রিংচা রি·য়াংএ জালখো রিক্কামো সাল্লে রা·বাজক। মাংরিৎচাসা সৎবংআ গিত্থাম দাল·বিয়া না·থকরাংচা জাল গাপ্পামিং। না·থক বাং·বিওবা জাল গিৎচিতজাজক। 12 যীশু বিসংনা আগানজক, “রি·বাবো, চা·বো।” জা·রিকগিবারাংনি গিসেপো সাকসাবা “না·আ সা?” ইন্নে সিং·না ফা·জাজক, মুয়ানা বিয়ান গিত্তেল ইন্নে বিসং হা·আইয়ামিং। 13 জা·মানো যীশু রি·বাএ রুটিখো রা·এ বিসংনা হন·জক, আরো উয়ানদাক্কে না·থকখোবা হন·জক। 14 সিয়াওনি চাখাতানি জা·মানো যীশু রাং·গিত্থাম জা·রিকগিবারাংনা মিকখাং ফা·জক। 15 বিসংনি চা·মানো যীশু শিমোন-পিতরনা আগানজক, “যোহননি দেফান্থি শিমোন, বিসংনা বাত্তে না·আ আংনা খা·সাবাত্তামা?” শিমোন-পিতর বিনা আগানজক, “হো·এ, গিত্তেল, না·আ হা·আইয়া না·আ আংনি বাসিক খা·সাগিবা হং·আ।” যীশু বিনা আগানজক, “আংনি মেষ বি·সারাংখো নিরিকবো।” 16 যীশু রাং·গ্মিও বিনা আগানজক, “যোহননি দেফান্থি শিমোন, না·আ আংনা খা·সামা?” শিমোন-পিতর বিনা আগানজক, “হো·এ, গিত্তেল, না·আদে হা·আইয়ান না·আ আংনি বাসিক খা·সাগিবা মান্দি।” যীশু বিনা আগানজক, “আংনি মেষরাংখো নিরকবো।” 17 জা·মানো বিয়া রাং·গিত্থামগিবাও শিমোন পিতরনা আগানজক, “যোহননি দেফান্থি শিমোন, বিবিন আংনা না·আ খা·সামা?” ইনি গিম্মিন পিতর দুক মান·জক, মুয়ানা যীশু বিখো রাং·গিত্থাম সিং·জক, “আংনা বিবিন না·আ খা·সামা?” ইনি গিম্মিন পিতর যীশুনা আগানজক, “গিত্তেল, না·আ দিমদাকখোন হা·আইয়া; না·আদে হা·আইয়ান নাং·না আংআ খা·সাবিয়া।” যীশু বিনা আগানজক, “আংনি মেষরাংখো নিরিকবো। 18 আংআ নাং·না বিবিন আগানিংআ, না·আ ফান্থি দংমিত্তিংও আন·থাংআন নাং·নি খাংখারিখো খানুয়ামিং আরো জেচা হা·সিকা উচান রি·য়াংনুয়ামিং। ইন্দিবা জেনসালো না·আ বুদেফা হং·নুয়া উনো না·আ জাকখো সিল্লেতনুয়া আরো সাকগিপ্পিন নাং·খো খানুয়া আরো না·আ জেচা রি·য়াংনা হা·সিকজানুয়া উচান রিম্মাংনুয়া।” 19 ইসলনি রাসংখো ফারাকনা পিতর বাদিকে দাক্কে সিনুয়া উখো হা·আইএতনা রি·য়াংএ যীশু ইয়া খাৎথাখো আগানজক। ইয়া খাৎথাখো আগানানি জা·মানো যীশু পিতরনা আগানজক, “আংমুং রি·বাবো।” 20 পিতর হান·ফিলে নিএতো যীশুনি খা·সাগিবা জা·রিকগিবানি জা·মান জা·মান রি·বাখো নিকজক। ইয়ান উয়া জা·রিকগিবা চা·মিত্তিংও জে যীশুচা বামগপ্পে আগানামিং, “গিত্তেল, নাং·খো বোবিলরাংনি জাক্কো জে রি·ম্মে হ·ন্নুয়া, বিয়া সা?” 21 পিতর বিখো নিক্কে যীশুনা আগানজক, “গিত্তেল, বিনি মুয়া হং·নুয়া?” 22 যীশু পিতরনা আগানজক, “আংনি রি·বাফিলখুজানা দিপ্পাৎ বিয়া দংখানা ইখো আংআ হা·ম্মোদে, নাং·নি মুয়া হং·আ? না·আ আংমুং রি·বাফাবো।” 23 ইনি গিম্মিন জংআদারাংও ইয়া খাৎথা গিপ্পাংজক, উয়া জা·রিকগিবা সিজানুয়া। যীশু ইন্দিবা পিতরনা উয়া জা·রিকগিবা সিজানুয়া ইন্নে আগানজা। ইন্দিবা বিয়া আগানামিং, “আংনি রি·বাফিলখুজানা দিপ্পাৎ বিয়া দংখানা ইখো আংআ হা·ম্মোদে, নাং·নি মুয়া হং·আ?” 24 উয়া জা·রিকগিবান ইরাংনি গিম্মিন সাক্ষি হ·ন্নিংআ আরো ইরাংখো চকজক। চিংআ হা·আইয়া বিনি সাক্ষি বিবি হং·আ। 25 যীশু আরো বাং·এন কাম দাক্কামিং। উরাংখো মিংসা মিংসা দাক্কে চক্কোদে ইন্দিতা খি·তাপ হং·নুয়ামিং, আংনি চানচিয়া গিত্তাদে উরাং ইয়া হা·গিলসাকো চাকজানুয়ামিং।

ওয়াত্তেতারাং 1

1 মান্দিরা·আখো মা·ন্না খ্রাগিবা থিয়ফিল, যীশুখো সালগিচা রা·দোআংনা স্খাং বিয়া জেখো দাক্কামিং আরো স্খিয়ামিং উয়া দিমদাকখোন আংআ আংনি স্খাংনি খি·তাপও চকজক। বিখো রা·দোআংনা স্খাং বিনি বাচ্ছিগিবা জা·রিকগিবারাংনা বিয়া গিসিক রংথালগিবাচা গি·য়েতামিং। 3 বিনি দুক চাক্কানি জা·মানো ইয়া মান্দিরাংনা বিয়া মিকখাং ফা·আমিং আরো বিনি থাংএ দংআনি গিম্মিন বিবিরা·আনিখো বাং·এন ফিন্নিকামিং। বিয়া সাল সৎব্রিনা দিপ্পাৎ জা·রিকগিবারাংনা মিকখাং ফা·এ ইসলনি সংনকনি গিম্মিন আগানামিং। 4 উনো যীশু জা·রিকগিবারাংমুং দংমিত্তিংও বিসংনা ইন্দাকে গি·য়েতামিং, “না·সং যিরূশালেমখো ওয়াত্তে দা·আ রি·য়াংআবো, ইন্দিবা আপফানি খু·রাচাক্কে হ·ন্না গিম্মিন জে খাৎথাখো না·সং আংচা খিন্নাজক উনি হা·সেল নিচাকসোবো। 5 যোহন চিও রিপ্পলেতনুয়ামিং, ইন্দিবা সাল বাং·গিজানি গিসেপো আপফানি উয়া খু·রাচাক্কা গিত্তা গিসিক রংথালগিবাও না·সং রিপ্পলনুয়া।” 6 জা·মানো জা·রিকগিবারাং থম·দাকে যীশুচা সিং·জক, “গিত্তেল, ইয়া সালো না·আ ইস্রায়েলরাংনি জাক্কো হা·খিংখো ফি·ল্লেতনুয়ামা?” 7 যীশু বিসংনা আগানজক, “জে সালখো বা সময়খো আপফা আন·থাংনি বিলও দন্না উখো না·সংনা হা·আইনা হন·জা। 8 ইন্দাকোবা গিসিক রংথালগিবা না·সংনি সাক্কাও রি·বানি জা·মানো না·সং বিলখো মা·ন্নুয়া, আরো যিরূশালেম, যিহূদিয়া গিম্মিকও আরো শমরিয়া হা·দকো আরো হা·গিলসাকনি বন·খামগিবা খি·থিকোনা দিপ্পাৎ না·সং আংনি সাক্ষি হং·নুয়া।” 9 ইয়া খাৎথাখো আগানানি জা·মানো জা·রিকগিবারাংনি মিকখাংওন যীশুখো রা·দোআংজক আরো বিয়া গাদিলা ফিলসানি মিৎথিনাও রি·য়াংজক। 10 যীশুনি সাক্কাচানা দো·আংমিত্তিংও জা·রিকগিবারাং সিলগাচানা মিকজাপগিজা নিএ দংআমিং। উনোন বা·রা গ্বিবক গানগিবা মান্দি সাকগ্মি জা·রিকগিবারাংনি সেফাংও চাদেংএ আগানজক, 11 “গালীলনি মান্দিরাং, ইনো চাদেংএ সিলগাচানা মুয়ানা নিএ দংআ? না·সংওনি জেখো রা·দোআংজক উয়া যীশুখো জেদাক্কে না·সং সালগিচানা রি·য়াংআখো নিকজক উয়ানদাক্কেন বিয়া রি·বাফিলনুয়া।” 12 উনোন জা·রিকগিবারাং জৈতুন হা·ব্রিওনি যিরূশালেমচানা রি·বাফিলজক। যিরূশালেম সংজিলমাওনি ইয়া হা·ব্রি কিলোমিটারসা চে·ল্লাও দংআমিং। 13 সংজিলমাওনা সক্কাংএ বিসং আন·থাংথাংনি দংগিবা গাদাং সাক্কানি নকদ্রিংওনা রি·য়াংজক। ইয়া জা·রিকগিবারাং হং·জক পিতর, যোহন, যাকোব আরো আন্দ্রিয়, ফিলিপ আরো থোমা, বর্‌থলময় আরো মথি, আলফেয়নি দেফান্থি যাকোব আরো হা·সংনা খা·ফাকগিবা শিমোন আরো যাকোবনি দেফান্থি যিহূদা। 14 বিসং দিমদাকান বিবিরা·গিবা মিচিকরাংমুং আরো যীশুনি মা·গিবা মরিয়ম আরো যীশুনি জংগিবারাংমুং সালাজ্রিং গিসিক আপসান হং·এ বি·নুয়ামিং। 15 উয়া সময়ও পিতর সালসাও খ্রীষ্টখো বিবিরা·গিবা সাক রিৎচাসা খলগ্রিকমাং মান্দিরাংনি গিসেপো চাদেংএ আগানজক, 16 “জংআদারাং, গিসিক রংথালগিবা স্খাংও রাজা দায়ূদনি খু·সুকচা যিহূদানি গিম্মিন জেখো আগানসোআমিং রংথালগিবা শাস্ত্রনি উয়া খাৎথা চু·সকনা নাংআমিং। জেরাং যীশুখো রি·ম্মামিং, বিসংনা ইয়া যিহূদান রামা ফিন্নিকে রা·আংআমিং। 17 বিয়া আনচিংওনিন সাকসা হং·আমিং আরো আনচিংমুং কাম দাকনা বিখো বাচ্ছিয়ে রা·আমিং।” 18 নামগিজা কামরাংচা যিহূদা জে থাংখাখো মা·ন্নামিং উচা বিয়া হা·বা দামসাখো ব্রিজক, আরো উয়ো গা·আকে বিনি বিক্‌মা ব্রেতজক আরো বিবিকরাং হং·খাতথকজক। 19 যিরূশালেমনি দিমদাকান উয়া খাৎথাখো খিন্নামিং। ইনি গিম্মিন বিসংনি খু·সুকচা ইয়া হা·বাখো বিসং আকেল্‌দামা বা হান·চিনি হা·বা ইন্নে মিংআ। 20 জা·মানো পিতর আগানজক, “রংথালগিবা শাস্ত্রনি গীতরাং মিংগিবা খি·তাপও চক্কা দংআ, বিনি নক বাংবাং দংখানা; উয়ো সাকসাবা দংজাখানা। আরোবা চক্কা দংআ, বিনি দাল·গিবা কামখো সাকগিপ্পিন রা·আংখানা। 21 “ইনি গিম্মিন যীশুনি সিয়াওনি থাংচাফিল্লানিখো সাক্ষি হ·ন্না গিত্তা সাকগিপ্পিনখো আনচিংও আগানস্খাওদে ওয়াত্তেতারাংনি দলও রা·না নাংনুয়া। যোহননি রিপ্পলেতাওনি হা·বাচেংএ যীশুখো আনচিংওনিখো রা·দোআংজানা দিপ্পাৎ গিত্তেল যীশু আনচিংমুং রি·য়া-দো·আ দিপ্পাৎ জে মান্দিরাং আনচিংমুং দংআমিং, উয়া মান্দি বিসংওনি সাকসা হং·খানা।” 23 উনোন জা·রিকগিবারাং যোষেফ, জেখো বর্‌শাববা আরো যুষ্ট মিংআমিং, বিখো আরো মত্তথিয়খো, ইয়া সাকগ্মিনি বিমুংখো আগানজক। 24 জা·মানো বিসং ইন্দাকে আগানে বি·জক, “গিত্তেল, না·আ দিমদাকনি খা·থংখোন হা·আইয়া। যিহূদা বিনি মান·গ্মি শাস্তিখো মা·ন্না ইন্নে ওয়াত্তেতানি কামখো ওয়াতজক। দা·আও ইয়া সাকগ্মিওনি জেখো না·আ বাচ্ছিজক বিখো না·আ চিংনা ফিন্নিকবো।” 26 বিসং চিঠি খা·ল্লানি জা·মানো মত্তথিয়নি বিমুং গাদোজক। ইনি গিম্মিন মত্তথিয় উয়া সাকচিসা ওয়াত্তেতারাংমুং দংফাজক।

ওয়াত্তেতারাং 2

1 বাং·গিজা সালনি জা·মানো সৎবংআগিবা সালো জা·রিকগিবারাং হা·দামসানো থম·থকজক। 2 উনোন সিলগাচানি রাং·গিত্তিক বালওয়া থারাকা গিত্তা গাম·বাজক আরো বিসংনি দংগিবা নকগিম্মিকো উয়া গা·ম্মা গিপজক। 3 জা·রিকগিবারাং ওয়াল·সারে গিত্তা মুয়াখোবা বিলদিং বিলদাংআখো নিকজক আরো বিসং দিমদাকনি সাক্কাও উরাং রি·বাএ আসংজক। 4 ইনি গিম্মিন বিসং দিমদাকান গিসিক রংথালগিবাও চু·সকজক আরো উয়া গিসিক জেখো জেগিত্তা খু·সুক আগান্না বিল হ·ন্না উগিত্তান বিসং দিংথাং দিংথাং খু·সুকচা খাৎথা আগান্না হা·বাচেংজক। 5 উয়া সময়ও হা·গিলসাকনি গিপ্পিন গিপ্পিন হা·সংরাংওনি ইসলনা খা·ফাকগিবা যিহূদী মান্দিরাং রি·বাএ যিরূশালেমো দংথকিংআমিং। 6 বিসং উয়া গা·ম্মাখো খিন্নাজক আরো বাং·এন উনো থম·দাকজক। হা·সংথাংরাংনি খু·সুকরাংচা জা·রিকগিবারাংনি খাৎথা আগানাখো খিন্নাএ উয়া মান্দিরাং নাওয়াং চাজক। 7 বিসং নাম্মেন আইয়াও ইনমানে আগানজক, “ইয়া খাৎথা আগানগিবা মান্দি দিমদাকান গালীলনি মান্দি হং·জামা? 8 ইন্দাকোদে আনচিং দিমদাকান বাদিকে দাক্কে আন·থাংথাংনি খু·সুকখো বিসংখো আগানাখো খিন্নাংআ? 9 পার্থীয়, মাদীয়, এলমীয় মান্দি আরো মেসোপতেমিয়াও সংদংগিবা মান্দিরাং, যিহূদিয়া আরো কাপ্পাদকিয়া, পন্ত আরো এশিয়া হা·দক, 10 ফরুগিয়া আরো পাম্‌ফুলিয়া, মিসর আরো কুরীণীনি সেফাংগ্রিক লিবিয়ানি মিত্তাম হা·দামনি মান্দিরাং, রোম সংজিলমাওনি রি·বাগিবা যিহূদীরাং আরো যিহূদী থরমও বিবিরা·গিবা গিপ্পিন জাতরাং, 11 ক্রীট চিচাংনি মান্দিরাং আরো আরবনি মান্দিরাং- আনচিং দিমদাকান খু·সুকথাংথাংচা ইসলনি দাল·বাৎগিবা কামনি খাৎথাখো বিসংখো আগানাখো খিন্নাংআ।” 12 বিসং আইয়াও ইনমানে আরো নাওয়াং চাএ সাকসা সাকগিপ্পিনখো সিং·না হা·বাচেংজক, “ইনি অর্থ মুয়া?” 13 দা·আবা সাকগিপ্পিনরাং জা·রিকগিবারাংখো খা·দিংস্থেকে আগানজক, “বিসং চু রিংএ ফেকজক।” 14 উনোন পিতর উয়া সাকচিসা জা·রিকগিবারাংমুং চাদেংএ রাক্কে গা·ম্মে উয়া মান্দি দিমদাকনা আগানজক, “যিহূদী মান্দিরাং আরো যিরূশালেমো দংগিবারাং, না·সং হা·আইএ রা·রিকবো আরো গিসিক নাংএ আংনি খাৎথাখো খিন্নাবো। 15 বিসং চু ফেকজক ইন্নে না·সং চানচিংআ, ইন্দিবা ইন্দাকে হং·জা; মুয়ানা দা·আওদে স্খুসান বাজিমিত্তিং। 16 ইয়া উগিত্তা দাক্কা জেখো আগানসোগিবা যোয়েল আগানসোআমিং, ইসল আগানা, 17 ‘বন·খামগিবা সালো মান্দি দিমদাকনি সাক্কাও আংআ আংনি গিসিকখো রুদাপনুয়া; উনি গিম্মিন না·সংনি দেফান্থি আরো দেমিচিকরাং আগানসোগিবা গিত্তা ইসলনি খাৎথাখো আগান্নুয়া, না·সংনি ফান্থিরাং নিক্কানিরাংখো নিকনুয়া, না·সংনি বুদেফারাং জুমাংরাংখো নিকনুয়া। 18 আরোবা উয়া সালরাংও নকখলথাংনি সাক্কাও আংআ আংনি গিসিকখো রুদাপনুয়া, আরো বিসং আগানসোগিবা গিত্তা ইসলনি খাৎথাখো আগান্নুয়া। 19 আংআ সিলগা সাক্কাচা আইয়াও ইনমানগিবা কামরাংখো ফিন্নিকনুয়া, আরো খা·মাও হা·গিলসাকো বাং·আ চিনরাংখো ফিন্নিকনুয়া, আগানস্খাওদে হান·চি, ওয়া·আল আরো ওয়াল·খুয়াখো ফিন্নিকনুয়া। 20 গিত্তেলনি উয়া দাল·গিবা আরো রাসং গাপগিবা সাল রি·বানা স্খাং সাল আন্দালনুয়া আরো জাজং হান·চি গিত্তা হং·ফিলনুয়া। 21 জকনা ইন্নে গিত্তেলখো রিক্কামগিবান জক্কেতাখো মা·ন্নুয়া।’ 22 “ইস্রায়েল মান্দিরাং, ইয়া খাৎথাখো খিন্নাবো। নাসরতনি যীশুও ইসল না·সংনি গিসেপো আইয়াও ইনমানগিবা কামরাংখো দাক্কে না·সংচা ইখোন ফিন্নিকামিং, বিয়া যীশুখো ওয়াত্তেতামিং; আরো ইয়া খাৎথাখোদে না·সং হা·আইয়ান। 23 ইসল, জেআন স্খাংআন গিম্মিকখো হা·আইয়া, বিয়া স্খাংআন থারিয়ে দন্নামিং, যীশুখো না·সংনি জাক্কো হ·ন্নুয়া। আরো না·সংবা নামগিজা মান্দিরাংচা বিখো চিসলো দাৎখাপে স·ওতে গাল্লামিং। 24 ইন্দিবা ইসল সিয়ানি সা·খামাওনিখো জক্কেতি বিখো থাংচাফিল্লেতজক, মুয়ানা বিখো রি·ম্মে রা·রিকনা গিত্তা বিল সিয়ানি দংজামিং। 25 দায়ূদ বিনি গিম্মিন আগানজক, ‘আংনি মিক্রোন ফাংনান গিত্তেলচানা দংআ; বিয়া আংনি জাক্রাচা দংআনি হা·সেল আংআ থম·থমে দংনুয়া। 26 ইনি গিম্মিন আংনি গিসিকো হান·সেংআ গাপ্পা, আংনি স্রিবাক হান·সেংআনি খাৎথাখো আগানা, আংনি বে·এনবা খা·দংআখো রা·এ থাংনুয়া; 27 মুয়ানা না·আ আংখো সিগিবারাংনি হা·দামও গাল্লে দনজানুয়া, নাং·না খা·ফাকগিবানি বে·এনখো না·আ সোনা হন·জানুয়া। 28 জাংগিনি রামাখো না·আ আংনা হা·আইএতজক; নাং·নি সেফাংও দংআনি গিম্মিন হান·সেংআ চু·ওংআ।’ 29 “জংআদারাং, আংআ ইয়া খাৎথাখো খাকখেৎ দাক্কে আগান্না মা·ন্না, রাজা মা·চংনি ফাগিবা দায়ূদ সিজক, বিখো গোপজক আরো বিনি গোপরাম দা·আলোনাবা ইনো দংআ। 30 বিয়া সাকসা আগানসোগিবা হং·আমিং আরো বিয়া হা·আইয়ামিং ইসল ইন্দাকে খু·মিকচেতা, বিনি সিংহাসনও বিনিন সাকসা দেরিচ্ছুখো আসংএতনুয়া। 31 জা·মানো মুয়া হং·নুয়া দায়ূদ উখো নিকনা মা·ন্নামিং ইন্নে সিয়াওনি খ্রীষ্টনি চাখাতফিল্লানি গিম্মিন আগানামিং, সিগিবারাংনি হা·দামও খ্রীষ্টখো গাল্লে দনজা আরো বিনি বে·এনবা সোখুজা। 32 ইসল উয়া যীশুখোন থাংচাএতজক, আরো আনচিং দিমদাকান বিনি সাক্ষি হং·আ। 33 ইসলনি জাক্রাচা আসংআনি রাসংখো বিনাসান হ·ন্না আরো খু·রাচাকগিবা গিসিক রংথালগিবাখো বিয়ান ফাগিবা ইসলচানিখো মা·ন্না; আরো দা·আও না·সং জেখো নিক্কিংআ আরো খিন্নানা মা·ন্নিংআ উখো যীশুন হ·ন্না। 34 দায়ূদ আন·থাংদে সালগিচা রি·য়াংজা, ইন্দিবা বিয়া আগানজক, ‘গিত্তেল আংনি গিত্তেলনা আগানা, জেনা দিপ্পাৎ আংআ নাং·নি বোবিলরাংখো নাং·নি জা·চক খা·মাও দনজানুয়া উয়োনা দিপ্পাৎ না·আ আংনি জাক্রাচা আসংবো।’ 36 “ইনি গিম্মিন গিম্মিক ইস্রায়েল জাতরাং ইয়া খাৎথাখো খাকখেৎ দাক্কে হা·আইবো, জেখো না·সং চিসলো দাৎখাপামিং ইসল উয়া যীশুখোন গিত্তেল আরো খ্রীষ্ট দাক্কে থারিজক।” 37 ইয়া খাৎথাখো খিন্নাএ মান্দিরাং গিসিক সা·দিকজক। বিসং পিতর আরো সাকগিপ্পিন ওয়াত্তেতারাংচা সিং·জক, “জংআদারাং, চিংআ মুয়াখো দাকনুয়া?” 38 পিতর আগানচাকজক, “না·সং দিমদাকান পাপওনি ক্ষেমা মা·ন্না ইন্নে পাপনিখো গিসিক ফিল·বো আরো যীশু খ্রীষ্টনি বিমুংও রিপ্পলবো। না·সং মান·গ্মি গিত্তা গিসিক রংথালগিবাখো মা·ন্নুয়া। 39 না·সংনা, না·সংনি দেদ্রাংনা আরো চে·ল্লাও দংগিবারাংনা, আনচিংনি গিত্তেল ইসল বিনি আন·থাংনি মান্দি হং·খানা জেরাংখো রিক্কামনুয়া, বিসং দিমদাকনা ইখো খু·রাচাকজক।” 40 ইনাআগ্রেবা বাং·আ খাৎথারাংখো আগানে পিতর সাক্ষি হ·ন্না হা·বাচেংজক। বিয়া বিসংনা ইন্দাকে আগানে হা·আইএতনা হাম·জক, “ইয়া চাসংনি গিসিকগ্রি মান্দিরাংওনিখো আন·থাংথাংখো জক্কেৎবো।” 41 বিনি খাৎথাখো বিবিরা·গিবারাং রিপ্পলজক আরো উনসালো জা·রিকগিবারাংনি দলও ইসল হাজাল গিত্থাম মান্দিখো নাংরিমেতজক। 42 উয়া মান্দিরাং ওয়াত্তেতারাংনি স্খিয়াখো খিন্নানুয়ামিং, বিসংমুং আপসান হং·এ গিত্তেলনি মিয়াথামখো চা·নুয়ামিং আরো বি·এ সালখো রি·য়াংএতনুয়ামিং। 43 গিম্মিকান খেনজক, আরো ওয়াত্তেতারাং বাং·এন আইয়াও ইনমানগিবা কামরাংখো আরো চিননি কামরাংখো দাকনা হা·বাচেংজক। 44 বিবিরা·গিবা গিম্মিকান আপসান দংনুয়ামিং আরো গিম্মিকখো আন·থাংথাংনি নাংআ গিত্তা জাকখালনুয়ামিং। 45 বিসং আন·থাংথাংনি গামজিনরাংখো ফাল্লে জেনা জেচিকিন নাংআ উয়ানদাক্কে বিনা হ·ন্নুয়ামিং। 46 বিসং ফাংনাজ্রিং থরম নক্কো খ্রিমখ্রো থম·দাকনুয়ামিং, আরো গিপ্পিন গিপ্পিন নকরাংও হান·সেংএ আরো সনথল গিসিকো আপসান চা·রিমনুয়ামিং। 47 বিসং ফাংনানান ইসলখো মিৎথেলনুয়ামিং আরো দিমদাক মান্দি বিসংখো মান্দিরা·নুয়ামিং। জেরাং পাপওনি জক্কেতাখো মা·ন্নিংআমিং গিত্তেল বিসংখো বিবিরা·গিবারাংনি দলমুং ফাংনানান নাংরিমেতনা হা·বাচেংজক।

ওয়াত্তেতারাং 3

1 সালসাও গিত্থাম বাজিও বি·মিত্তিংও পিতর আরো যোহন থরম নকচানা রি·য়াংআমিং। 2 মান্দিরাং ফাংনাজ্রিং সাকসা মান্দিখো রিপ্পিএ রা·বাএ থরম নকনি নিথুয়া মিংগিবা দ·গাচিল কেচ্চিও দন্নুয়ামিং। বিয়া আৎচিয়াওনিন জা·খোরামিং। থরম নকচা রি·য়াংগিবারাংচানিখো বি·আমখানা ইন্নে বিখো উয়োনা দন্নুয়ামিং। 3 পিতর আরো যোহনখো থরম নকচা নাপ্পাখো নিক্কে বিয়া বিসংচা বি·আমজক। 4 পিতর আরো যোহন বিচাখো স্রংএ নিএতজক। উনি জা·মানো পিতর আগানজক, “চিংচানা নিএতবো।” 5 উনোন উয়া মান্দি বিসংচাখো মামুংখো মা·ন্না খা·দংএ বিসংচা নিয়েতজক। 6 উনোন পিতর আগানজক, “আংচা সোনা রূপা মামুংআন দংজা, ইন্দিবা দংগিবাখোন নাং·না হ·ন্নিংজক। নাসরতনি যীশু খ্রীষ্টনি বিমুংও চাখাতবো আরো রামা রি·বো।” 7 জা·মানো বিয়া উয়া মান্দিনি জাক্রা জাকখো রি·ম্মে বিখো দি·চাজক আরো উনোন বিনি জা·চক আরো জা·মিক রাকজক। 8 বিয়া চাচ্রকে চাদেংজক আরো রি·রোরোনা হা·বাচেংজক। জা·মানো বিয়া রি·রোরোএ, চাচ্রকে আরো ইসলখো মিৎথেলে বিসংমুং থরম নকচানা রি·য়াংজক। 9 মান্দিরাং বিখো রি·রোরোআখো আরো ইসলখো মিৎথেলাখো নিক্কে হা·আইনা মান·জক, ইয়ান উয়া মান্দি জে থরম নক্কো নিথুয়া মিংগিবা দ·গাচিল কেচ্চিও আসংএ বি·এ চা·নুয়ামিং। বিনি ইন্দাকে হং·আনা মান্দিরাং নাম্মেন আইয়াও ইনমানজক। 11 ইন্দিবা উয়া বি·আমগিবা মান্দি পিতর আরো যোহনখো ওয়াতজাজক। মান্দিরাং পিতরনি উয়া কামনা আইয়াও ইনমানে বিসংচা খাত্তে রি·বাজক। 12 বিসং উনো শলোমননি বিমুংও দংগিবা বালিমো দংআমিং। ইখো নিক্কে পিতর মান্দিরাংনা আগানজক, “ইস্রায়েলনি মান্দিরাং, ইনা না·সং মুয়ানা আইয়াও ইনমানিংআ? চিংনি আন·থাংথাংনি বিলচা বা ইসলনা খা·ফাকানি হা·সেল বিনা রি·রোরোআনি বিলখো হ·ন্না ইন্নে চানচিয়ে মুয়ানাবা না·সং চিংচানিখো নিএ দংআ? 13 অব্রাহাম, ইস্‌হাক আরো যাকোবনি ইসল, আগানস্খাওদে আনচিংনি ফাগিৎচামরাংনি ইসল ইয়া কামচা আন·থাংনি নকখল যীশুনি রাসংখো ফারাকজক। না·সংদে যীশুখো স·ওতে গালনা রি·ম্মে হ·ন্নামিং। পীলাত বিখো ওয়াত্তেতনা হা·ম্মামিং, ইন্দিবা না·সং পীলাতনি মিকখাংও বিখো জেগালামিং। 14 না·সং উয়া রংথালগিবা আরো খাকখেৎগিবা মান্দিখো জেগালে সাকসা মান্দি স·ওতগিবাখো না·সংচা ওয়াত্তেতখানা আগানামিং। 15 জাংগি জক্কেৎগিবাখোন না·সং স·ওতে গাল্লামিং, ইন্দিবা ইসল সিয়াওনি বিখো থাংচাএতজক; আরো চিংআ বিনি সাক্ষি হং·আ। 16 না·সংনি নিকগিবা ইয়া মান্দি জেখো না·সং নিক্কিংআ আরো জেখো না·সং হা·আইয়া, যীশুখো বিবিরা·নি গিম্মিন যীশুনি বিমুংও বিয়া বিলখো মান·দাপজক। যীশুও জে বিবিরা·আ রি·বাআ উয়া বিবিরা·আন না·সং দিমদাকনি মিকখাংও বিখো নামস্রাংএতজক। 17 “দা·আও জংআদারাং, না·সংনি দাল·গিবারাং গিত্তা না·সংবা হা·আইগিজান যীশুখো চিসলো দাৎখাপামিং। 18 ইন্দিবা ইসল গিম্মিক আগানসোগিবারাংচা স্খাংওন আগানসোআমিং বিনি খ্রীষ্টখো দুক চাকনা নাংনুয়া; আরো উয়া খাৎথাখো ইসল ইন্দাকেন চু·সকেতজক। 19 ইনি গিম্মিন না·সং পাপওনি গিসিকখো ফি·ল্লেতি ইসলচানা ফিল·বো জেদাক্কে না·সংনি পাপরাংখো রিপ্পাকে গাল্লা; 20 আরো ইনি গিম্মিন ইসল উয়া খ্রীষ্ট যীশুখো ওয়াত্তেতা জেদাক্কে না·সংখো থাংচাএতনা মা·ন্না। না·সংনা বিখোন বাচ্ছিয়ে রা·জক। 21 গিম্মিকখোন ইসল স্খাংনি অবস্থাওনা রা·বাফিলনুয়া ইখো স্খাংওনিন রংথালগিবা আগানসোগিবারাংচা আগানসোআমিং। বিয়া জেওনা দিপ্পাৎ বিনি উয়া খাৎথাখো চু·সকজানুয়া উয়োনা দিপ্পাৎ যীশুখো সালগিও দংনা নাংনুয়া। 22 মোশি আগানামিং, ‘না·সংনি গিত্তেল ইসল না·সংনি ইস্রায়েল জংআদারাংনি গিসেপোনিখো না·সংনা আং গিত্তা দাক্কা আগানসোগিবা সাকসাখো চাদেংএতনুয়া। বিনি খাৎথা গিত্তা না·সং রি·না নাংনুয়া। 23 বিনি খাৎথাখো জে খিন্নাজানুয়া বিখো বিনি মান্দিরাংনি গিসেপোনি বন·স্রাংএতনুয়া।’ 24 “ইনাআগ্রেবা শমুয়েলওনি হা·বাচেংএ মামুংখো আগানে রি·য়াংগিবা আগানসোগিবারাংবা ইয়া সালনি খাৎথাখো স্খাংওন আগানসোজক, 25 আরো না·সংদে উয়া আগানসোগিবারাংনিন দেরিচ্ছু-সু·রিচ্ছুরাং হং·আ। না·সংনি ফাগিৎচামরাংনা ইসল জে খু·রাচাক্কাখো থারিয়ামিং, না·সংদে উয়া খু·রাচাক্কাখো মান·রিকগিবা হং·আ। ইসল অব্রাহামনা ইয়া খাৎথাখো আগানে উয়া খু·রাচাক্কাখো থারিয়ামিং, ‘নাং·নি মা·চংচা হা·গিলসাকনি গিম্মিক জাতরাংআন ফাত্তিয়াখো মা·ন্নুয়া।’ 26 না·সং গিম্মিকখো নামগিজা রামানিখো রা·বাএ ফাত্তিনা গিম্মিনান ইসল বিনি নকখল যীশুখো থারিয়ে স্খাং না·সংচা ওয়াত্তেতামিং।”

ওয়াত্তেতারাং 4

1 পিতর আরো যোহন মান্দিরাংমুং খাৎথা আগানমিত্তিংও খামালরাং, থরম নকনি দাল·গিবা কাম দাকগিবা আরো সদ্দূকীরাং বিসংচা রি·বাজক। 2 বিসং নাম্মেন খা·আওনাংআমিং, মুয়ানা পিতর আরো যোহন মান্দিরাংনা স্খিংআমিং আরো যীশু গিত্তা সিগিবারাংনি থাংচাফিল্লানি গিম্মিন আগানফ্রাকিংআমিং। 3 বিসং পিতর আরো যোহনখো রিম·জক আরো হান·থামাংজক ইন্নে সালগিপ্পিনোনা দিপ্পাৎ জেলো দনজক। 4 ইন্দিবা পিতরনি খাৎথাখো খিন্নাগিবারাংনি গিসেপো বাং·এন বিবিরা·জক; উনি গিম্মিন খ্রীষ্টখো বিবিরা·গিবারাং হাজাল বংআমাং গিত্তা হং·জক। 5 সালগিপ্পিনো যিহূদীরাংনি দাল·গিবা খামালরাং, মি·আফারাং আরো শাস্ত্র স্খিগিবারাং যিরূশালেমো আপসান থম·দাকজক। 6 উয়ো খামাল দাল·বাৎগিবা হানন দংআমিং। ইনাআগ্রেবা কাইয়াফা, যোহন, আলেক্‌সান্দর আরো খামাল দাল·বাৎগিবানি নকনি গিপ্পিন মান্দিরাংবা দংআমিং। 7 বিসং পিতর আরো যোহনখো বিসংনি জাংচি গিত্তা চাদেংএতি সিং·জক, “না·সং বাগিবা বিলচা বা সানি বিমুংচা ইয়া কামখো দাকজক?” 8 উনোন পিতর গিসিক রংথালগিবাও গাপ্পে বিসংনা আগানজক, “খামাল দাল·গিবারাং আরো মি·আফারাং, 9 না·সং দা·আলো সাকসা জা·খোরা মান্দিনা নাম্মাখো দাক্কানি গিম্মিন উয়া মান্দি বাদিকে দাক্কে নামজক ইন্নে চিংখো সিং·ইংআ। 10 ইন্দাকোদে না·সং আরো ইস্রায়েলনি দিমদাক মান্দিরাং ইয়া খাৎথাখো হা·আইএ রা·রিকবো, নাসরতনি উয়া যীশু খ্রীষ্ট, জেখো না·সং চিসলো দাৎখাপামিং আরো জেখো ইসল সিয়াওনি থাংচাএতজক, বিনি বিলচান ইয়া মান্দি নামস্রাংএ না·সংনি মিকখাংও চাদেংএ দংআ। 11 রংথালগিবা শাস্ত্রনি খাৎথা গিত্তা যীশু খ্রীষ্টন ‘উয়া রং·থি হং·আ, জেখো না·সং নক রিকগিবারাং জেগালামিং; আরো উয়ান নাংবাৎগিবা রং·থি হং·জক।’ 12 পাপওনি জক্কেতাখো দারাংওনিবা মান·জা, মুয়ানা হা·গিলসাক গিম্মিকো ইন্দাকগিবা সাকসাবা দংজা জেনি বিমুংচা আনচিং পাপওনি জক্কেতাখো মা·ন্নুয়া।” 13 পিতর আরো যোহননি খেনমানগিজাখো নিক্কে আরো বিসংখো লেক্ষা-পরা দংগিজাগিবা মান্দি ইন্নে হা·আইনা মা·ন্নে উয়া দাল·গিবারাং আইয়াও ইনমানজক, আরো বিসং যীশুমুং দংআমিং ইখোবা হা·আইনা মান·জক। 14 জে মান্দি নামজকমিং বিখো পিতর আরো যোহনমুং চাদেংএ দংআখো নিক্কে বিসংনি সাক্কাও আগানানি মামুংবা দংজাজক। 15 ইনি গিম্মিন বিসং দাল·বাৎগিবা খ্রিমাওনি বিসংখো হা·ফালচা রি·য়াংখানা গি·য়েৎজক। জা·মানো বিসং আপসান হং·এ চানচিগ্রিকনা হা·বাচেংজক। 16 বিসং আগানজক, “ইয়া মান্দিরাংখো রা·এ আনচিং মুয়া দাকনুয়া? যিরূশালেমো দংগিবা দিমদাকান ইখো হা·আইয়া বিসং আইয়াও ইনমানগিবা মিংসা কামখো দাক্কা, আরো আনচিং উখো জিচাকনাবা মান·জা। 17 ইন্দিবা মান্দিরাংও ইয়া খাৎথা বাং·এ গিপ্পাংজানা গিত্তা ইয়া মান্দিরাংখো খেন্নেতনা নাংনুয়া, জেদাক্কে বিসং দারাংনাবা যীশুনি গিম্মিন মামুংখো আগানজা।” 18 উনি জা·মানো বিসং পিতর আরো যোহনখো দা·আবা নিং·আওনা রিংগামে রা·বাজক আরো গি·য়েৎজক জেদাক্কে বিসং যীশুনি গিম্মিন মামুংখোবা আগানজা বা স্খিজা। 19 পিতর আরো যোহন আগানচাকজক, “না·সংনি গি·য়েতাখো মানিনুয়ামা, ইসলনি গি·য়েতাখো মানিনুয়া? ইসলনি মিক্রোনও বাগিবা খাকখেৎ হং·আ, না·সংআন উখো বিচাল দাক্কে নিবো। 20 চিংআ জেখো নিকজক আরো খিন্নাজক উখো আগানগিজাদে দংনা মান·জা।” 21 উনোন বিসং পিতর আরো যোহনখো বাং·এ খেন্নেতে ওয়াত্তেতজক। মান্দিরাংনা খেন্নে বিসং থিক দাকনা মান·জাংআমিং বাদিকে দাক্কে বিসংনা শাস্তি হ·ন্না মা·ন্না, মুয়ানা হং·গিবারাংনি গিম্মিন মান্দি দিমদাক ইসলখো রাসং দাক্কিংআমিং। 22 জে মান্দি আইয়াও ইনমানে নামজকমিং বিনি বিলসি সৎব্রি বাত্তামিং। 23 উয়োনি জক্কে পিতর আরো যোহন বিসংনি আন·থাংথাংনি মান্দিরাংচা রি·য়াংজক আরো খামাল দাল·গিবারাং আরো মি·আফারাং বিসংনা জেরাংখো আগানামিং উয়া গিম্মিকখোন বিসংনা আগানজক। 24 ইয়া খাৎথাখো খিন্নাএ বিসং গিম্মিক হং·এ গিসিক আপসান দাক্কে ইসলচা বি·এ আগানজক, “ও গিত্তেল, না·আ সিলগা, হা·গিলসাক, সাগাল আরো উরাংনি গিসেপো দংগিবা গিম্মিকখোন আৎচিয়েতজক। 25 না·আ গিসিক রংথালগিবাচা নাং·নি নকখল চিংনি ফাগিৎচাম দায়ূদনি খু·সুকো আগানা, ‘মুয়ানা জাজ্রেংএ গিম্মিক জাতনি মান্দিরাং চ্রিকিংআ? মুয়ানা মান্দিরাং বু·আরি খু·মংগ্রিকিংআ? 26 গিত্তেল আরো বিনি খ্রীষ্টনি সাক্কাও হা·গিলসাকনি রাজারাং আপসান চাদেংইংজক, আরো শাসন দাকগিবারাং মিৎথিনাও থম·দাকিংজক।’ 27 “নাং·নি রংথালগিবা নকখল যীশু, জেখো না·আ খ্রীষ্ট ইন্নে বাচ্ছিয়ে রা·আমিং, রাজা হেরোদ আরো পন্তীয় পীলাত ইয়া সংজিলমাওন বিনি সাক্কাও গিপ্পিন জাতরাংমুং আরো ইস্রায়েলনি মান্দিরাংমুং বিবিন নাংরিমামিং। 28 নাং·নি বিল আরো হা·সিকাচা জেখো হং·নুয়া ইন্নে না·আ স্খাংওন থারিয়ে দন্নামিং বিসং উখোন দাক্কামিং। 29 আরো দা·আও, ও গিত্তেল, বিসং চিংখো বাদিকে খেন্নেতিংআ ইখো না·আ নিবো। নাং·নি নকখলরাংনা ইন্দাকগিবা বিলখো হন·বো জেদাক্কে খেনমানগিজা বিসং নাং·নি খাৎথাখো আগান্না মা·ন্না। 30 নাং·নি জাকখো সিল্লেতবো জেদাক্কে নাং·নি রংথালগিবা নকখল যীশুনি বিমুংচা বিসং মান্দিরাংখো নাম্মেতনা মা·ন্না আরো আইয়াও ইনমানগিবা কাম আরো চিননি কামখো দাকনা মা·ন্না।” 31 জে হা·দামও বিসং থম·দাকামিং, বি·আনি জা·মানো উয়া হা·দাম মজিমজক। আরো বিসং গিম্মিকান গিসিক রংথালগিবাও গাপ্পে খেনমানগিজা ইসলনি খাৎথাখো আগান্না হা·বাচেংজক। 32 খ্রীষ্টও বিবিরা·গিবারাং গিম্মিকান গিসিক আরো খা·থংচা আপসান হং·আমিং। মামুংখোন বিসং আন·থাংনি ইন্নে ইনজানুয়ামিং ইন্দিবা গিম্মিকখোন আন·থাংথাংনি নাংআ গিত্তা জাকখালনুয়ামিং। 33 ওয়াত্তেতারাং বিল্লাকে গিত্তেল যীশুনি থাংচাফিল্লানি গিম্মিন সাক্ষি হ·ন্না হা·বাচেংজক, আরো বিসংনি গিম্মিকনি সাক্কাও ইসলনি চৎচাংগিজা খা·সাচাক্কা দংআমিং। 34 বিসংনি গিসেপো দিলগিবা মান্দি সাকসাবা দংজামিং, মুয়ানা জেরাংনি হা·বারাং বা নকরাং দংআমিং বিসং উরাংখো ফাল্লে থাংখারাংখো রা·বাএ ওয়াত্তেতারাংনি জা·চকনি কেচ্চিও দন্নুয়ামিং। জা·মানো জেনা জেচিকিন নাংআ বিনা উচিকিন হ·ন্নুয়ামিং। 36 লেবিনি মা·চংও যোষেফ মিংগিবা মান্দি সাকসা দংআমিং। সাইপ্রাস চিচাংও বিনি নক দংআমিং। ওয়াত্তেতারাং বিখো বার্ণবা, আগানস্খাওদে খা·দংএতগিবা ইন্নে রিক্কামনুয়ামিং। 37 বিনি হা·বা দামসা দংআমিং; বিয়া উখো ফাল্লে থাংখা রা·বাএ ওয়াত্তেতারাংনি জা·চকো দনজক।

ওয়াত্তেতারাং 5

1 উনোন অননিয় মিংগিবা সাকসা মান্দি আরো বিনি জিকগিবা সাফীরা বিসংনি গামফালথাংখো ফালজক। 2 ফাল্লে মা·ন্নানি মিত্তাম থাংখাখো বিয়া আন·থাংনা দন্নে মিত্তামখো ওয়াত্তেতারাংনা হন·জক, ইখো বিনি জিকগিবা হা·আইয়ামিং। 3 উনোন পিতর আগানজক, “অননিয়, বাদিকে দাক্কে শয়তান নাং·নি গিসিকখো মান·জক, না·আ গিসিক রংথালগিবানা বু·এ আগানজক আরো হা·বা ফাল্লানি থাংখানিখো মিত্তাম থাংখা আন·থাংনা রা·রিকজক? 4 ফালনা স্খাং উয়া হা·বা নাং·নিন দংজামিংমা? আরো ফাল্লানি জা·মানোবা থাংখারাং নাং·নি জাক্কোন দংজামিংমা? ইন্দাকোদে মুয়ানা না·আ ইন্দাকগিবা কামখো দাকনা থিক দাকজক? না·আ মান্দিনা বু·জা, ইন্দিবা ইসলনাসা বু·এ আগানজক।” 5 ইয়া খাৎথাখো খিন্নারিন অননিয় হা·আও গা·আকে সিজক। ইখো জেরাং খিন্নাজক বিসং গিম্মিকান খেনবিজক। 6 জা·মানো ফান্থিরাং চাখাত্তে বিনি বেএ·নো বা·রাখো বিল·রিমরিমজক আরো বিখো হা·ফালচা রা·আংএ গোপজক। 7 উনি ঘণ্টা গিত্থাম হং·নামিত্তিং জা·মানো অননিয়নি জিকগিবা উয়োনা রি·বাজক, ইন্দিবা মুয়া হং·জক উখো বিয়া হা·আইজামিং। 8 উনোন পিতর বিখো সিং·জক, “দে আগানে নি, না·আ আরো অননিয় উয়া হা·বাখো ইন্দিসিক থাংখানা ফাল্লামিংমা?” বিয়া আগানজক, “হো·এ, ইন্দিসিকনান।” 9 উনোন পিতর বিনা আগানজক, “গিত্তেলনি গিসিকখো রুরাএ নিনা মুয়ানা না·সং ইন্দাকে চানচিরিমজক? নিবো, নাং·নি সেখো গোপনা রি·য়াংগিবা মান্দিরাং দ·গাচিলো রি·বাএ সকজক, আরো বিসং নাং·খোবা হা·ফালচা রা·আংনুয়া।” 10 সাফীরা উনোন পিতরনি জা·চকো গা·আকে সিজক। আরো উয়া ফান্থিরাং নিং·আচা রি·বাএ বিখো সিয়াখো নিকজক আরো বিখো হা·ফালচা রা·আংএ বিনি সেগিবানি সেফাংও বিখো গোপজক। 11 উনোন মন্ডলীনি গিম্মিক মান্দি আরো সাকগিপ্পিন খিন্নাগিবারাং খেনবিজক। 12 ওয়াত্তেতারাং মান্দিরাংনি গিসেপো বাং·এন আইয়াও ইনমানানি আরো চিননি কামরাংখো দাকনুয়ামিং; আরো বিবিরা·গিবারাং গিম্মিকান থরম নকনি শলোমননি বারান্দাও আপসান থম·দাকনুয়ামিং। 13 মান্দিরাং বিসংখো মান্দিরা·বিওবা দারাংবা বিসংমুং আপসান হং·রিমনা ফা·জাজক। 14 ইন্দাকোবা বাং·আ মি·আ আরো মিচিকরাং গিত্তেলখো বিবিরা·জক আরো বিবিরা·গিবারাংমুং আপসান হং·রিমজক। 15 ওয়াত্তেতারাংনি কামরাংখো নিক্কে মান্দিরাং সাগিবারাংখো থুচাকানিরাংও আরো আমও দাক্কে রামারাংও রা·বাএ দন্না হা·বাচেংজক, জেদাক্কে রামা গিত্তা রি·য়াংমিত্তিংও পিতরনি জাগ্রিং বিসংনি সানিবা সানিবা সাক্কাও সালাখিমদাপা। 16 যিরূশালেমনি সেফাংরাংও দংগিবা সংরাংওনি বাং·আ মান্দিরাং আন·থাংথাংনি সাগিবারাংখো আরো গিসিক নামগিজাগিবারাংনি জাক্কো দুক মান·গিবা মান্দিরাংখো রা·এ রি·বাথকনা হা·বাচেংজক, আরো বিসং গিম্মিকান নামস্রাংজক। 17 উনোন খামাল দাল·বাৎগিবা আরো বিমুং দংগিবা সদ্দূকীরাং নাম্মেন মিকনেংজক। 18 বিসং ওয়াত্তেতারাংখো রি·ম্মে জেলো দনজক। 19 ইন্দিবা ওয়াল্লো গিত্তেলনি সা·গ্রে সাকসা জেলনি দ·গারাংখো এংএ বিসংখো হা·ফালচা রিমবাএ আগানজক, 20 “রি·য়াংবো, থরম নক্কো চাদেংএ মান্দিরাংনা ফাংনাজলনি জাংগিনি গিম্মিন খাৎথা গিম্মিকখো আগানবো।” 21 বিসং উয়া খাৎথা গিত্তা ফ্রিংওয়ালনি থরম নক্কো নাপ্পে মান্দিরাংনা স্খিনা হা·বাচেংজক। খামাল দাল·বাৎগিবা আরো বিমুং দংফাগিবা সদ্দূকীরাং দাল·বাৎগিবা খ্রিমাও আসংনা ইস্রায়েলনি গিম্মিক মি·আফারাংখো রিক্কামজক। জা·মানো বিসং ওয়াত্তেতারাংখো রিমবাখানা মিত্তাম সিপাইরাংখো ওয়াত্তেতজক, 22 ইন্দিবা উয়া সিপাইরাং জেলোনা রি·য়াংএ উয়ো বিসংখো মান·জাজক। 23 উনোন বিসং রি·য়াংফিল্লে ইখো আগানজক, “চিংআ জেলনি দ·গারাংখো রাক্কেন থেক্কাখো নিকজক আরো দ·গারাংও নিথিমগিবারাংনি চাদেংএ দংআখো নিকজক, ইন্দিবা দ·গারাংখো এংএ সাকসাখোবা নিং·আওনা নিকজাজক।” 24 ইয়া খাৎথাখো খিন্নাএ থরম নকনি সুবিদার আরো খামাল দাল·গিবারাং নাওয়াং চাএ চানচিনা হা·বাচেংজক ইনি গিম্মিন মুয়া হং·নুয়া। 25 উনোন মান্দি সাকসা রি·বাএ আগানজক, “নিবো, না·সং জে মান্দিরাংখো জেলো দন্নামিং বিসং থরম নক্কো চাদেংএ মান্দিরাংনা স্খিইংজক।” 26 উনোন সুবিদার বিনি সিপাইরাংখো রিম্মাংএ ওয়াত্তেতারাংখো রি·ম্মে রা·বাজক। ইন্দিবা মান্দিরাং উয়া সিপাইরাংখো রং·থিচা গোথাতনাবা দংআ উনি গিম্মিন খেন্নি বিসং ওয়াত্তেতারাংনি সাক্কাও বিলখো জাকখালজাজক। 27 ওয়াত্তেতারাংখো রিমবাএ বিসং দাল·বাৎগিবা খ্রিমানি মিকখাংও চাদেংএতজক। উনোন খামাল দাল·বাৎগিবা ওয়াত্তেতারাংনা আগানজক, 28 “উয়া মান্দিনি গিম্মিন স্খিজাখানা চিংআ না·সংখো রাক্কেন গি·য়েতামিং, ইন্দিবা না·সং না·সংনি স্খিয়াখো যিরূশালেমো গিপ্পাংএতজক আরো উয়া মান্দিনি সিয়ানি গিম্মিন চিংখো দোস হ·ন্না হা·ম্মিংজক।” 29 উনোন পিতর আরো গিপ্পিন ওয়াত্তেতারাং আগানচাকজক, “মান্দিনি গি·য়েতাখো মানিয়ানা বাত্তে চিংআ ইসলনি গি·য়েতাখোন মানিনা নাংআ। 30 জেখো না·সং চিসলো দাৎখাপে স·ওতামিং আনচিংনি ফাগিৎচামরাংনি ইসল উয়া যীশুখোন সিয়াওনি থাংচাফিল্লেতজক। 31 ইসল বিখোন রাজা আরো জক্কেৎগিবা দাক্কে আন·থাংনি জাক্রাচা আসংআনি রাসংখো হন·জক, জেদাক্কে বিয়া ইস্রায়েলনি মান্দিরাংনা পাপওনি গিসিক ফিল·না চলখো হ·ন্নে পাপনিখো ক্ষেমা দাকনা মা·ন্না। 32 চিংআ ইরাংনি সাক্ষি হং·আ আরো জেরাং ইসলখো মানিয়া, ইসল বিসংনা জে গিসিক রংথালগিবাখো হ·ন্না উয়া গিসিক রংথালগিবাবা উনি সাক্ষি হং·আ।” 33 ইয়া খাৎথাখো খিন্নাএ উয়া দাল·গিবারাং খা·আওনাংবিজক আরো ওয়াত্তেতারাংখো স·ওতনা হাম·জক, 34 ইন্দিবা গমলীয়েল মিংগিবা ফরীশীরাংনি মান্দি সাকসা দাল·বাৎগিবা খ্রিমাও চাদেংজক। বিয়া সাকসা শাস্ত্র স্খিগিবামিং আরো মান্দি গিম্মিকান বিখো মান্দিরা·নুয়ামিং। বিয়া ওয়াত্তেতারাংখো দিক্‌দিক্‌সানা হা·ফালচা রা·আংখানা গি·য়েৎজক। 35 উনি জা·মানো বিয়া দাল·বাৎগিবা খ্রিমানি মান্দিরাংনা আগানজক, “ইস্রায়েলনি মান্দিরাং, ইয়া মান্দিরাংনি সাক্কাও না·সং জেখো দাকনা রি·য়াংইংজক উনি গিম্মিন না·সং সিমসাকবো। 36 বাং·গিজা সালনা স্খাংও থুদা মিংগিবা মান্দি সাকসা রি·বাএ আন·থাংখো দাল·গিবা সাকসা ইন্নে ইন্নামিং, আরো রিৎচাব্রিমাং মান্দিরাং বিখো জা·রিকামিং। বিখো স·ওতে গালজক আরো বিখো জা·রিকগিবা গিম্মিকান বিলদিং বিলদাং হং·থকজক। ইনি গিম্মিন বিনি গিম্মিকান গিম্মাজক। 37 জা·মানো বিমুং চক্কানি সালো গালীলনি যিহূদা রি·বাএ দলসা মান্দিখো বোবিল দাক্কে চাখাতগিবা দাক্কে থারিয়ামিং। বিয়াবা সিজক, আরো বিখো জা·রিকগিবারাংবা গিম্মিকান বিলদিং বিলদাং হং·থকজক। 38 উনি গিম্মিন ইন্দাকমিত্তিংও আংআ না·সংনা আগানিংআ, না·সং ইয়া মান্দিরাংনি সাক্কাও দা·আ মামুংখোবা দাক্কাবো। বিসংখো ওয়াত্তেতবো, মুয়ানা বিসংনি হা·সিকারাং আরো কামরাং মান্দিওনি হং·ওদে উয়া বন·গিম্মিকনুয়া। 39 ইন্দিবা ইসলওনি হং·ওদে না·সং বিসংখো বাংখাংনা মান·জানুয়া। না·সং ইসলনি সাক্কাওন দাকগ্রিকিংআ ইখো নিকনাবা দংআ।” 40 উনোন গমলীয়েলনি খাৎথানি গিম্মিন দাল·গিবারাং আপসান হং·জক। বিসং ওয়াত্তেতারাংখো নিং·আচানা রিংগামে রা·বাএ বেতচা দকনা গি·য়েৎজক। জা·মানো বিসং বিসংখো ওয়াত্তেতজক আরো বিসংখো যীশুনি গিম্মিন মামুংখোবা আগানজাখানা গি·য়েৎজক। 41 যীশুনি বিমুংনা ওয়াত্তেতারাং চন্নিকাখো মা·ন্না খ্রাগিবা হং·আনি গিম্মিন বিসং হান·সেংবিএ দাল·বাৎগিবা খ্রিমাওনি রি·য়াংজক। 42 বিসং ফাংনাজ্রিং থরম নক্কো আরো নকরাংচা রি·য়াংএ স্খিনা হা·বাচেংজক আরো যীশুন খ্রীষ্ট হং·আ ইন্নে আগানফ্রাকনা হা·বাচেংজক।

ওয়াত্তেতারাং 6

1 উয়া সময়ও জা·রিকগিবারাং বাং·রোরোংআমিং। উনো জা·রিকগিবারাংনি গিসেপো গ্রীক খু·সুকখো আগানগিবা যিহূদীরাং ইব্রীয় খু·সুকখো আগানগিবা যিহূদীরাংখো ইন্দাকে দোস হ·ন্না হা·বাচেংজক, ফাংনানান চা·আ হন·মিত্তিংও বিসংনি রান্দি মিচিকরাং মামুংখোন মান·জাংআ। 2 ইনি গিম্মিন উয়া সাকচিগ্মি ওয়াত্তেতা গিম্মিক জা·রিকগিবারাংখো হা·দামসানো রিংগামে আগানজক, “ইসলনি খাৎথাখো আগানফ্রাকগিজা চা·আনিখো সুয়ালান আনচিংনা থিক হং·জা। 3 জংআদারাং, না·সংওনি ইন্দাকগিবা সাকস্নি মান্দিরাংখো না·সং বাচ্ছিয়ে রা·বো জেরাংখো গিম্মিকান মান্দিরা·আ আরো জেরাং গিসিক রংথালগিবাও আরো হা·আইয়ানিও গাপ্পা। আনচিং বিসংনান ইয়া দাকচাকানি কামখো হ·ন্নে আন·থাংথাং বি·না আরো ইসলনি খাৎথাখো আগানফ্রাকনা গিসিক হ·ন্নুয়া।” 5 ইয়া খাৎথাখো গিম্মিকান নামনিকজক। বিবিও আরো গিসিক রংথালগিবাও গাপ্পা স্তিফানখো বিসং বাচ্ছিয়ে রা·জক। ইনাআগ্রেবা বিসং ফিলিপ, প্রখর, নীকানর, তীমোন, পার্মিনা আরো আন্তিয়খিয়া সংজিলমাওনি নিকলায়খোবা বাচ্ছিয়ে রা·জক। ইয়া নিকলায় যিহূদী জাত হং·জাওবা যিহূদী থরমখো মানিনুয়ামিং। 6 জা·মানো বিসং ইয়া মান্দিরাংখো ওয়াত্তেতারাংচা রিম্মাংজক। উনোন ওয়াত্তেতারাং বি·জক আরো কামরাংখো দাক্কেতনা বিসংনি সাক্কাও জাক দনদাপজক। 7 ইন্দাকে ইসলনি খাৎথা গিপরোরোআংজক, আরো যিরূশালেমো জা·রিকগিবারাং বাং·বারোরোজক আরো খামালরাংনি গিসেপো বাং·এন খ্রীষ্ট থরমও বিবিরা·নিখো মানিয়ে রা·জক। 8 স্তিফান ইসলনি খা·সাচাক্কাও আরো বিলও গাপ্পে মান্দিরাংনি গিসেপো বাং·আ আইয়াও ইনমানানি আরো চিননি কামরাংখো দাকনা হা·বাচেংজক। 9 জে থম·দাকরামখো জক্কেৎগিবা মান্দিরাংনি থম·দাকরাম ইন্নুয়ামিং উয়া থম·দাকরামনি মিত্তাম মান্দিরাং স্তিফানমুং বোবিল দাকজক। বিসং কুরীণী আরো আলেক্‌জান্দ্রিয়া সংজিলমাওনি আরো কিলিকিয়া আরো এশিয়া হা·দকনি মিত্তাম যিহূদীরাং হং·আমিং। 10 বিসং স্তিফানমুং জিগ্রিকজক, ইন্দিবা স্তিফান গিসিক রংথালগিবাও হা·আইমানচাএ খাৎথা আগানিংআমিং। উনি গিম্মিন বিসং বিনি সাক্কাও চাদেংনা মান·জাজক। 11 উনোন উয়া যিহূদীরাং সিউল দাক্কে মিত্তাম মান্দিরাংখো ইয়া খাৎথাখো আগানখানা দাগিলজক, “মোশিনি আরো ইসলনি সাক্কাও স্তিফাননি চন্নিকে আগানাখো চিংআ খিন্নাজক।” 12 ইন্দাকে বিসং মান্দিরাংখো, মি·আফারাংখো আরো শাস্ত্র স্খিগিবারাংখো খা·আওনাংএতজক আরো স্তিফানখো রি·ম্মে দাল·বাৎগিবা খ্রিমাওনা রা·বাজক। 13 বিসং বু·এ সাক্ষি হন·গিবা মিত্তামরাংখো চাদেংএতজক। ইয়া বু·এ সাক্ষি হন·গিবারাং আগানজক, “ইয়া মান্দি ফাংনানান থরম নকনি আরো মোশিনি নিয়ামরাংনি সাক্কাও খাৎথা আগানা। 14 চিংআ বিনি ইন্দাকে আগানাখো খিন্নাজক, উয়া নাসরত সংনি যীশু ইয়া থরম নকখো ফি·এ গালনুয়া আরো মোশিনি চিংনা হ·ন্নাংগিবা নিয়ামরাংখো দিংথাংএতনুয়া।” 15 উয়া দাল·বাৎগিবা খ্রিমাও আসংএ দংগিবারাং গিম্মিকান উনো স্তিফানচাখো নিএতোন বিনি মিকখাংখো সা·গ্রেরাং গিত্তা হং·আংআখো নিকজক।

ওয়াত্তেতারাং 7

1 উনোন খামাল দাল·বাৎগিবা স্তিফানখো সিং·জক, “ইয়া খাৎথারাং বিবি হং·আমা?” 2 স্তিফান আগানচাকজক, “ও আংনি জংআদারাং আরো ফাগিবারাং, আংনি খাৎথাখো খিন্নাবো। আনচিংনি ফাগিৎচাম অব্রাহাম হারণ সংজিলমাও দংনা স্খাং মেসোপতেমিয়া হা·সংও দংমিত্তিংও রাসংনি ইসল বিনা মিকখাং ফা·এ আগানামিং, 3 ‘নাং·নি হা·সংথাংখো আরো চাচ্চি-আংবাকরাংখো ওয়াত্তে আংনি ফিন্নিকগিবা উয়া হা·সংচা রি·য়াংবো।’ 4 “উনি গিম্মিন বিয়া কল্‌দীয়রাংনি হা·সংখো ওয়াত্তে হারণ সংচানা রি·য়াংএ সংদংনা হা·বাচেংজক। না·সং দা·আও জে হা·সংও দংখামিংজক ইসল অব্রাহামখো বিনি ফাগিবানি সিয়ানি জা·মানো উয়োনা ওয়াত্তেতামিং। 5 আন·থাংনি বিলনা ইসল উয়ো অব্রাহামনা মামুংখোবা হন·জাজক, জা·চক সামসাখো দন্না হা·আ মামাংখোবা হন·জাজক। ইন্দিবা ইসল বিচা ইন্দাকে খু·রাচাক্কামিং, বিনা আরো বিনি জা·মানো বিনি দেরিচ্ছু-সু·রিচ্ছুরাংনা মান·রিকানি বিল গিত্তা বিয়া উয়া হা·সংখো হ·ন্নুয়া। উনো অব্রাহামনি দেদ্রাং দংখুজামিং। 6 ইসল বিনা আগানজক, ‘নাং·নি দেরিচ্ছু-সু·রিচ্ছুরাং সংগিপ্পিনো দংনুয়া। মান্দিরাং বিসংখো নকখল দাক্কে দন্নুয়া আরো রিৎচাব্রি বিলসিওনা দিপ্পাৎ বিসংনি সাক্কাও নামগিজা দাক্কে জাকখালনুয়া।’ 7 ইসল আরোবা আগানজক, ‘বিসংখো নকখল দাক্কে দনগিবা জাতরাংখো আংআ শাস্তি হ·ন্নুয়া। জা·মানো বিসং উয়া হা·সংওনি হং·খাতবাএ ইয়া হা·দামও আংখো অলাখিনুয়া।’ 8 জা·মানো ইসল বিনি খু·রাচাক্কানি গিম্মিন চিন গিত্তা বিগিল রাতনা নিয়াম হন·জক। উনি জা·মানো অব্রাহামনি দেফান্থি ইসহাক আৎচিজক আরো আৎচিয়ানি সাল চেৎনি সালো বিয়া বিনি বিগিল রাতজক। জা·মানো ইসহাক যাকোবনি বিগিল রাতজক আরো যাকোব উয়া সাকচিগ্মি ফাগিৎচামরাংনি বিগিল রাতজক। 9 “উয়া ফাগিৎচামরাং মিকনেংএ যোষেফখো নকখল দাক্কে মিসর হা·সংচা ফাল্লামিং। ইন্দিবা ইসল যোষেফমুং দংএ গিম্মিক দুক মা·ন্নানিখো আরো নামগিজাওনিখো বিখো জক্কেৎজক। ইনাআগ্রেবা ইসল যোষেফনা হা·আইয়াখো হন·জক আরো মিসরনি রাজা ফরৌণনি খা·সাখো মা·ন্নেতজক। উনি গিম্মিন ফরৌণ বিখো মিসরনি শাসন দাকগিবা আরো আন·থাংনি নকনি দাল·গিবা দাকজক। 11 “উনি জা·মানো মিসর গিম্মিকো আরো কনান হা·সংও আকাল হং·জক। উনো দুক মান·বিও আনচিংনি ফাগিৎচামরাং চা·আখো মান·জাজক। 12 ইন্দিবা মিসরও চা·আ দংআখো খিন্নাএ যাকোব আনচিংনি ফাগিৎচামরাংখো স্খাং উয়োনা ওয়াত্তেতজক। 13 চাংগ্মিগিবাও যোষেফ জংআদারাংনা বিয়া সা ইখো আগানজক। উনো ফরৌণ যোষেফনি নকথাংনি গিম্মিন হা·আইনা মান·জক। 14 ইনি জা·মানো যোষেফ বিনি ফাগিবা যাকোব আরো নকথাংনি গিম্মিকখো রিক্কামজক। বিসং সাক সৎস্নিবংআ দংআমিং। 15 যাকোব মিসরচানা রি·য়াংজক, আরো উয়োনা বিয়া আরো আনচিংনি ফাগিৎচামরাং সিজক। 16 বিসংনি বে·এনখো শিখিমওনা রা·বাএ গোপজক। ইয়া গোপরামখো অব্রাহাম শিখিম সংজিলমানি হামরনি দেফান্থিরাংচানিখো রূপাচা ব্রিয়ামিং। 17 “অব্রাহামচা ইসল জেখো খু·রাচাক্কামিং উখো চু·সকানি সাল সেফাংও সকবাও মিসরও আনচিংনি মান্দিরাং বাং·বিজক। 18 ইনি জা·মানো মিসরও দা·আও সাকসা রাজা হং·জক। বিয়া যোষেফনি গিম্মিনো মামুংখোন হা·আইজামিং। 19 উয়া রাজা আনচিংনি মান্দিরাংখো থগিনুয়ামিং আরো আনচিংনি ফাগিৎচামরাংনি সাক্কাও নামগিজা দাক্কে জাকখালনুয়ামিং। বিসংনি গিসেপো আৎচিগিবা বি·সারাংখো সিখানা ইন্নে হা·ফালচা গাল্লে দনখানা বিসংখো গি·য়েৎনুয়ামিং। 20 “উয়া সময়ও মোশি আৎচিজক। বিয়া নিনা নিথোবিয়ামিং। জাগিত্থাম বিয়া বিনি ফাগিবানি নক্কোন দংজক। 21 জা·মানো বিখো হা·ফালচা গাল্লে দন্নো ফরৌণনি দেমিচিক বিখো রা·আংএ আন·থাংনি দে গিত্তান মান্দি দাকজক। 22 মোশি মিসরনি গিম্মিক স্খিয়ানিখো স্খিজক, আরো বিয়া খাৎথারাংও আরো কামরাংও বিল্লাকামিং। 23 “মোশিনি বিলসি সৎব্রি হং·মিত্তিংও বিয়া বিনি ইস্রায়েল জংআদারাংমুং গ্রংনা হাম·জক। 24 মিসরনি সাকসা মান্দিখো সাকসা ইস্রায়েল মান্দিমুং নামগিজা দাক্কে জাকখালাখো নিক্কে বিয়া উয়া ইস্রায়েল মান্দিনা দাকচাকনা রি·য়াংজক আরো উয়া মিসরনি মান্দিখো স·ওতজক। 25 মোশি চানচিয়ামিং, বিনি আন·থাংনি মান্দিরাং ইখো হা·আইনা মা·ন্নুয়া ইসল বিচান বিসংখো জক্কেৎনুয়া, ইন্দিবা বিসং উখো হা·আইজাজক। 26 সালগিপ্পিনো মোশি সাকগ্মি ইস্রায়েল মান্দিরাংনি দকগ্রিকাখো নিকজক। উনো বিয়া বিসংখো নাংরিমেতনা আগানজক, ‘ও মান্দিরাং, না·সংদে জংআদাথাং হং·আ; ইন্দাকোদে মুয়ানা সাকসা সাকগিপ্পিনমুং নামগিজাখো দাক্কিংআ?’ 27 “ইন্দিবা নামগিজাখো দাকগিবা মান্দি মোশিখো জিত্‌ফাকেতি আগানজক, ‘নাং·খো চিংনি সাক্কাও সা শাসন দাকগিবা আরো বিচাল দাকগিবা দাকজক? 28 মিজাও মিসরনি উয়া মান্দিখো স·ওতা গিত্তা আংখোবা স·ওতনা হা·ম্মামা?’ 29 ইয়া খাৎথাখো খিন্নাএ মোশি খাত্তাংএ মিদিয়ন হা·সংচা সংদংনা হা·বাচেংজক। উয়োন বিনি দেফান্থি সাকগ্মি আৎচিজক। 30 “জা·মানো বিলসি সৎব্রি বাত্তাংজক। সিনাই হা·ব্রিনি সেফাংও হা·গিসি জওলো গি·সা খামচাগিবা ব্রিংনি ওয়া·আলো সা·গ্রে সাকসা মোশিনা মিকখাং ফা·জক। 31 ইখো নিক্কে মোশি আইয়াও ইনমানজক। নাম্মেদাক্কে নিনা ইন্নে সেফাংচা রি·য়াংআনি জা·মানো বিয়া গিত্তেলনি ইয়া খাৎথাখো খিন্নানা মান·জক, 32 ‘আংআ নাং·নি ফাগিৎচামরাংনি ইসল- অব্রাহাম, ইস্‌হাক আরো যাকোবনি ইসল।’ উনো মোশি খেন্নানি হা·সেল হান·স্রিমজক; মিক্রোন দি·চাএ নিনা বিয়া ফা·জাজক। 33 “উনোন গিত্তেল বিনা আগানজক, ‘নাং·নি জা·খপখো এংএ গালবো, মুয়ানা নাং·নি চাদেংএ দংগিবা হা·দাম রংথালা। 34 “মিসর হা·সংও আংনি মান্দিরাংনি সাক্কাও নামগিজা দাক্কে জাকখালাখো আংআ নিকজক। আংআ বিসংনি মা·আমাখো খিন্নাজক আরো বিসংখো জক্কেৎনা হং·ওনে রি·বাজক। দা·আও আংআ নাং·খো মিসর হা·সংওনা ওয়াত্তেতফিলনুয়া।’ 35 “ইয়ান উয়া মোশি জেখো ইস্রায়েলনি মান্দিরাং ইন্দাকে আগানে ফি·ল্লেতামিং, ‘নাং·খো সা শাসন দাকগিবা আরো বিচাল দাকগিবা দাকজক?’ খামচাগিবা ব্রিংও মোশিনা জে সা·গ্রে মিকখাং ফা·আমিং উয়া সা·গ্রেচা ইসল আন·থাং ইয়া মোশিখোন ইস্রায়েল মান্দিরাংনি শাসন দাকগিবা আরো জক্কেৎগিবা দাক্কে মিসরও ওয়াত্তেতামিং। 36 ইয়া মোশিন মিসর হা·সংওনি ইস্রায়েল মান্দিরাংখো হং·খাতে রা·বামিং আরো মিসর হা·সংও, লোহিত সাগালো আরো বিলসি সৎব্রি দিপ্পাৎ হা·গিসি জওলো বাং·আ আইয়াও ইনমানগিবা আরো চিননি কামরাংখো দাক্কামিং। 37 ইয়ান উয়া মোশি জে ইস্রায়েল মান্দিরাংখো আগানামিং, ‘না·সংনি ইসল না·সংনি ইস্রায়েল জংআদারাংনি গিসেপোনিন না·সংনি গিম্মিন আং গিত্তা দাক্কা আগানসোগিবা সাকসাখো চাদেংএতনুয়া।’ 38 ইয়া মোশিন হা·গিসি জওলো ইস্রায়েলরাংনি উয়া দলরাংনি গিসেপো আনচিংনি ফাগিৎচামরাংমুং দংআমিং। সিনাই হা·ব্রিও জে সা·গ্রে খাৎথা আগানামিং উয়া সা·গ্রেমুং ইয়া মোশিন উয়োনা দংআমিং। আনচিংনা হ·ন্না গিম্মিন থাংগিবা খাৎথাখো ইয়া মোশিন উয়োনা মা·ন্নামিং। 39 “ইন্দিবা আনচিংনি ফাগিৎচামরাং মোশিখো মানিনা হাম·জাজক। বিসং মোশিখো জেগালে মিসর সংচানা গিসিক ফি·ল্লে হারোণনা আগানজক, ‘চিংখো রামা ফিন্নিকে রা·আংখানা মিত্তেরাংখো থারিবো, মুয়ানা চিংখো মিসর সংওনি হং·খাতে রা·বাগিবা মোশিনি মুয়া হং·জক চিংআ উখো হা·আইজা।’ 41 ইয়া সময়ওন বিসং মা·সু বি·সা গিত্তা বিমাং গি·সা থারিয়ামিং। বিসং উয়া বিমাংনা বলি হ·ন্নামিং আরো আন·থাংথাংনি জাক্কো জেখো থারিয়ামিং উখো রা·এ বিসং খুসি হং·বিয়ামিং। 42 ইন্দিবা ইসল মিকখাং হান·ফিলজক আরো সালগিনি জাজং-সাল-আস্কিরাংখো অলাখিনান বিসংখো গাল্লে দনজক। ইয়া খাৎথান আগানসোগিবারাংনি খি·তাপো চক্কা দংআ: ও ইস্রায়েলনি মান্দিরাং, হা·গিসি জওলো উয়া বিলসি সৎব্রি না·সং আংনি গিম্মিন নক্কো জিল্লারাংখো বা গিপ্পিন জিনিসরাংখো বলি হ·ন্নামিংমা? 43 হং·জা, অলাখিনা না·সং জে মিত্তে বিমাংখো থারিয়ামিং উয়া মোলক মিত্তেনি বিমাংখো আরো না·সংনি রিফণ মিত্তেনি আস্কিখো না·সং রিপ্পিএ রা·আংআমিং। উনি গিম্মিন আংআ বাবিল হা·সংনি নালসাচা বন্দি দাক্কে না·সংখো ওয়াত্তেতনুয়া। 44 “সাক্ষিনি তাম্বু হা·গিসি জওলো আনচিংনি ফাগিৎচামরাংমুং দংআমিং। ইসল মোশিখো জেদাক্কে গি·য়েতামিং আরো মোশি জে নমুনাখো নিক্কামিং উয়ানদাক্কে ইয়া তাম্বুখো রিক্কামিং। 45 আনচিংনি ফাগিৎচামরাং উয়া তাম্বুখো মা·ন্নে বিসংনি দাল·গিবা যিহোশুয়নি উখো আন·থাংথাংমুং আনচিংনি ইয়া হা·সংওনা রা·বামিং। ইসল উনসালো বিসংনি মিকখাংওনিখো গিপ্পিন জাতরাংখো রিক্কেতামিং আরো বিসং ইয়া হা·সংখো মান·রিকামিং। দায়ূদনি সালনা দিপ্পাৎ উয়া তাম্বু ইয়া হা·সংওন দংআমিং। 46 দায়ূদ ইসলনি খা·সাচাক্কাখো মা·ন্নে যাকোবনি ইসলনা দংআনি নকখো রিকনা হন·খানা সিং·জক; 47 ইন্দিবা শলোমনান বিনা নকখো থারিয়ামিং। 48 “ইন্দিবা চুবাৎগিবা ইসল মান্দিনি রিকগিবা নকরাংও দংজা। আগানসোগিবা আগানজক, 49 গিত্তেল আগানা, ‘সালগি আংনি সিংহাসন হং·আ, হা·গিলসাক আংনি জা·চক দন্নানি হা·দাম হং·আ; আংনা না·আ বাদাকগিবা নকখো রিকনুয়া? আংনি নেং·থাকানি হা·দাম বানো হং·নুয়া? 50 ইরাংখো আংআ আন·থাংনি জাক্কো থারিজামা?’ 51 “ও গিত্তকগ্রেং রাকগিবা জাতরাং! না·সংনি নাচিল আরো খা·থংরাং গিপ্পিন জাতরাং গিত্তান হং·আ, আরো না·সংবা না·সংনি ফাগিৎচামরাং গিত্তান হং·আ। না·সং ফাংনান গিসিক রংথালগিবাখো চাংফেংআ। 52 ইন্দাকগিবা আগানসোগিবা সাকসামাংবা দংআমা, জেমুং না·সংনি ফাগিৎচামরাং নামগিজা বেওয়ালখো দাকজা? জেরাং উয়া খাকখেৎগিবা মান্দি খ্রীষ্টনি রি·বানি খাৎথাখো স্খাংওন আগানসোআমিং বিসংখোবা বিসং স·ওতে গালজক। আরো দা·আও না·সং যীশুখোন বোবিলরাংনি জাক্কো হ·ন্নে বিখো স·ওত্তেতজক। 53 সা·গ্রেরাংচা না·সংনান নিয়ামরাংখো হ·ন্নামিং, ইন্দিবা না·সং উখো মানিজাজক।” 54 ইয়া খাৎথারাংখো খিন্নাএ উয়া দাল·গিবারাং খা·আওনাংবিজক আরো স্তিফাননি সাক্কাও ওয়াগাম চিকক্রতজক। 55 ইন্দিবা স্তিফান গিসিক রংথালগিবাও গাপ্পে সালগিচাখো নিএ ইসলনি রাসংখো নিকনা মান·জক। বিয়া যীশুখো ইসলনি জাক্রাচা চাদেংএ দংআখো নিক্কে আগানজক, 56 “নিবো, আংআ সালগি এংআখো আরো মান্দিনি দেফান্থি ইসলনি জাক্রাচা চাদেংএ দংআখো নিক্কিংআ।” 57 ইনি গিম্মিন বিসং নাচিলখো রিম·থিপজক আরো রাক্কে চ্রিকে আপসান হং·এ স্তিফাননি সাক্কাও চাগিব্রাকজক। 58 জা·মানো বিসং বিখো রং·থিচা গোথাতনা সালদোএ সংজিলমাওনি হা·ফালচানা রিম্মাংজক, আরো সাক্ষিরাং বিসংনি সাক্কাও গানগিবা বা·রারাংখো এংএ শৌল মিংগিবা ফান্থিনি জা·চকও দনজক। 59 স্তিফানখো সাক্ষিরাং রং·থিচা গোথাতমিত্তিংও বিয়া বি·এ আগানজক, “গিত্তেল যীশু, আংনি গিসিকখো রা·চাকবো।” 60 জা·মানো বিয়া জা·স্খু দে·ম্মে চ্রিকে আগানজক, “গিত্তেল বিসংনি ইয়া পাপখো দা·আ রি·ম্মাবো।” ইখো আগানে বিয়া সিজক।

ওয়াত্তেতারাং 8

1 শৌল উনো স্তিফানখো স·ওতনা দিদিয়েতিংআমিং। উনসালো যিরূশালেমনি খ্রীষ্টান মন্ডলীনি মান্দিরাংখো গিচ্চিয়েতনা হা·বাচেংজক। উনি গিম্মিন ওয়াত্তেতারাংনি আগ্রে গিম্মিক বিবিরা·গিবারাং যিহূদিয়া আরো শমরিয়া হা·দকনি হা·দাম গিম্মিকচা বিলদিং বিলদাং হং·জক। 2 ইসলনা খা·ফাকগিবা মিত্তাম মান্দিরাং স্তিফানখো গোপজক আরো বিনা গ্রাপবিজক। 3 ইন্দিবা শৌল উয়া মন্ডলীখো ব·ন্নেতনা নকরাংচা রি·য়াংএ উয়া মন্ডলীনি মি·আসা আরো মিচিকরাংখো সাল্লে রা·বাএ জেলো দনজক। 4 বিলদিং বিলদাং দাক্কে দংগিবা বিবিরা·গিবারাং গিম্মিকচা রি·য়াংএ খ্রীষ্টনি নাম্মা খাৎথাখো আগানফ্রাকনা হা·বাচেংজক। 5 উয়া সময়ও ফিলিপ শমরিয়া হা·দকনি সংজিলমা দামসাওনা রি·য়াংএ খ্রীষ্টনি গিম্মিন আগানফ্রাকজক। 6 মান্দিরাং বিনি খাৎথাখো খিন্নাএ আরো বিয়া জে আইয়াও ইনমানগিবা কামরাংখো দাক্কিংআমিং উখো নিক্কে বিনি আগানাখো গিসিক নাএ খিন্নাজক। 7 বাং·আওনি গিসিক নামগিজাগিবারাং চ্রিকে হং·খাতাংজক আরো বাং·আ হান·মা গক্কা আরো জা·খরারাং নামজক। 8 উনি গিম্মিন উয়া সংজিলমানি মান্দিরাং খুসি হং·বিজক। 9 উয়া সংজিলমাও শিমোন মিংগিবা মান্দি সাকসা সাল বাং·আওনিন যাদু মন্ত্র দাক্কে ফিন্নিকিংআমিং। উনি গিম্মিন শমরিয়ানি মান্দি গিম্মিক আইয়াও ইনমানামিং। 10 বিয়া আন·থাংখো মংসংবাৎগিবা সাকসা মান্দি ইন্নে দাবি দাকনুয়ামিং, আরো দিল্লা-নকমা গিম্মিকান বিনি খাৎথাখো খিন্নানুয়ামিং। মান্দিরাং আগান্নুয়ামিং, “ইয়া মান্দিন ইসলনি।” 11 মান্দিরাং বিনি খাৎথা গিত্তা রি·নুয়ামিং, মুয়ানা সাল বাং·আওনিন বিয়া বিনি যাদু মন্ত্রখো ফিন্নিকে বিসংখো আইয়াও ইনমানেতামিং। 12 ইন্দিবা ফিলিপ ইসলনি সংনক আরো যীশু খ্রীষ্টনি গিম্মিন নাম্মা খাৎথাখো আগানফ্রাকজক উনো মান্দিরাং বিনি খাৎথাখো বিবিরা·জক আরো মি·আ-মিচিকরাং রিপ্পলনা হা·বাচেংজক। 13 উয়া শিমোনবা বিবিরা·এ রিপ্পলজক, আরো বিয়া ফিলিপখো জা·রিকে হা·দাম গিম্মিকচা রি·য়াংজক আরো চিননি কাম আরো দাল·দালবাতা আইয়াও ইনমানানি কামরাংখো নিক্কে আইয়াও ইনমানজক। 14 শমরিয়ানি মান্দিরাং ইসলনি খাৎথাখো বিবিরা·জক ইন্নে যিরূশালেমনি ওয়াত্তেতারাং জেনসালো খিন্নাজক উনসালো বিসং পিতর আরো যোহনখো উয়া মান্দিরাংচা ওয়াত্তেতজক। 15 পিতর আরো যোহন রি·বাএ বিসংনা বি·জক জেদাক্কে বিসং গিসিক রংথালগিবাখো মা·ন্না, 16 মুয়ানা উনোবা বিসংনি সাক্কাও গিসিক রংথালগিবা রি·বাখুজা; গিত্তেল যীশুনি বিমুংওসান বিসং রিপ্পলামিং। 17 উনোন পিতর আরো যোহন বিসংনি সাক্কাও জাক দনদাপজক, আরো বিসং গিসিক রংথালগিবাখো মান·জক। 18 জে সময়ও শিমোন নিকজক, ওয়াত্তেতারাংনি জাক দনদাপাচা গিসিক রংথালগিবাখো হন·জক উনো বিয়া বিসংচা থাংখা রা·বাএ আগানজক, 19 “আংনাবা ইন্দাকগিবা বিলখো হন·বো জেদাক্কে আংআ সানিবা সাক্কাও জাক দনদাপজোকনো বিয়া গিসিক রংথালগিবাখো মা·ন্না।” 20 উনোন পিতর বিনা আগানজক, “নাং·নি থাংখা নাং·মুংআন বন·খানা, মুয়ানা ইসলনি হ·ন্নাখো থাংখাচা ব্রিনা মা·ন্না ইন্নে না·আ চানচিয়া। 21 চিংনি ইয়া কামও নাং·নি মামুং বাক বা বিল দংজা, মুয়ানা ইসলনি মিক্রোনও নাং·নি খা·থং খাকখেৎ হং·জা। 22 ইয়া নামগিজাওনিখো না·আ নাং·নি গিসিকখো ফি·ল্লেতবো আরো গিত্তেলচা বি·বো; ইন্দাকোদে নাং·নি গিসিকনি ইয়া নামগিজা চানচিয়াখো বিয়া ক্ষেমা দাকনাবা দংআ। 23 আংআ নিকনা মা·ন্নিংআ, নাং·নি গিসিক মাদ্দুুয়াও গাপ্পা আরো না·আ পাপনি নকখল হং·এ দংআ।” 24 উনোন শিমোন আগানজক, “না·সংআন গিত্তেলচা আংনা বি·বো জেদাক্কে না·সং জেখো আগানজক উয়া আংনি সাক্কাও হং·জা।” 25 ইনি জা·মানো পিতর আরো যোহন গিত্তেলনি গিম্মিন সাক্ষি হ·ন্নে আরো বিনি খাৎথাখো আগানফ্রাকে যিরূশালেমচানা রি·য়াংফিলজক। রি·য়াংমিত্তিংও বিসং শমরীয়রাংনি বাং·আ সংরাংও নাম্মা খাৎথাখো আগানফ্রাকজক। 26 সালসাও গিত্তেলনি সা·গ্রে সাকসা ফিলিপনা আগানজক, “চাখাতবো, সালগিপেংচানি জে রামা যিরূশালেমোনি গাজা সংজিলমাওনা রি·য়াংজক উয়া রামাচানা রি·য়াংবো।” উয়া রামা হা·গিসি জওলোমিং। 27 উনোন ফিলিপ উচানা রি·য়াংজক। রামাও ইথিয়পিয়া হা·সংনি সাকসা মংসংবাত্তা কাম রিম·গিবামুং বিয়া গ্রংজক। উয়া কাম রিম·গিবা খোজামিং। ইথিয়পিয়ানি কান্দাকী রাণীনি গামজিনরাংখো নিরিকানি কামখো ইয়া মান্দিন দাকনুয়ামিং। ইসলখো অলাখিনা উয়া কাম রিম·গিবা যিরূশালেমচানা রি·য়াংআমিং। 28 নকচা ফি·ল্লাংমিত্তিংও বিয়া আসংএ আগানসোগিবা যিশাইয়নি খি·তাপখো পড়িংআমিং। 29 উনোন গিসিক রংথালগিবা ফিলিপনা আগানজক, “উয়া ঘোড়ানি গাড়িনি সেফাংচা রি·য়াংবো আরো উমুং আপসান রি·ফাবো।” 30 উনি গিম্মিন ফিলিপ খাত্তাংএ উয়া ঘোড়ানি গাড়িচানা রি·য়াংজক আরো উয়া মান্দি আগানসোগিবা যিশাইয়নি খি·তাপখো পড়িংআ ইখো খিন্নানা মান·জক। ফিলিপ বিখো সিং·জক, “না·আ জেখো পড়িংআ উখো হা·আইনা মা·ন্নিংআমা?” 31 উয়া কাম রিম·গিবা আগানজক, “সাবা আগানে হন·জাওদে বাদিকে দাক্কে হা·আইনা মা·ন্নুয়া?” বিয়া ফিলিপখো ঘোড়ানি গাড়িও গাখাতে বিনি কেচ্চিয়ো আসংখানা মল·মলজক। 32 উয়া কাম রিম·গিবা রংথালগিবা শাস্ত্রনি জেওনি পড়িংআমিং উয়া ইয়ান: রাসতনা জেদাক্কে মেষখো রা·আংআ, উয়ানদাক্কে বিখো রা·আংআ হং·জক। খিম্মিল রাতগিবানি মিকখাংও মেষ বি·সা জেগিত্তা স্রক দাক্কে দংআ, উয়ানদাক্কে বিয়া খু·সুক আগানজাজক। 33 বিয়া চন্নিকাখো মান·জক, বিনি সাক্কাও খাকখেৎ বিচালখো দাকজাজক। বিনি দেরিচ্ছু-সু·রিচ্ছুরাংনি খাৎথাখো আগানানি হং·জা, মুয়ানা বিনি জাংগিখো ইয়া হা·গিলসাকোনিখো রা·আংজকমিং। 34 উয়া কাম রিম·গিবা ফিলিপনা আগানজক, “আগানবোদা, আগানসোগিবা সানি গিম্মিন ইয়া খাৎথাখো আগানজক? আন·থাংনি গিম্মিনোমা সাকগিপ্পিননি গিম্মিন?” 35 উনোন ফিলিপ রংথালগিবা শাস্ত্রনি উয়া বাকওনি হা·বাচেংএ বিচা যীশুনি গিম্মিনো নাম্মা খাৎথাখো আগানফ্রাকজক। 36 রামাও রি·য়াংমিত্তিংও বিসং ইন্দাকগিবা হা·দাম দামসাওনা রি·বাজক জেও চি দংআমিং। উনোন উয়া কাম রিম·গিবা আগানজক, “ইয়া নিবো, ইনো চি দংআ; আংনি রিপ্পলনা চাংফেংআনি দংআমা?” 38 বিয়া ঘোড়ানি গাড়িখো দংদিপেতনা আগানজক। উনি জা·মানো ফিলিপ আরো উয়া কাম রিম·গিবা চিও হং·খাতজক আরো ফিলিপ বিখো রিপ্পলেতজক। 39 বিসং চিওনি গাখাতমিত্তিংও গিত্তেলনি গিসিক রাং·গিত্তিক ফিলিপখো রা·আংজক। উয়া কাম রিম·গিবা বিখো নিকজাজক। উনোন বিয়া খুসি হং·এ নকচানা রি·য়াংজক। 40 ইন্দিবা ফিলিপখো অস্‌দোদ সংজিলমাও নিকনা মান·জক। বিয়া সংরাংও আগানফ্রাকে কৈসরিয়াওনা রি·য়াংজক।

ওয়াত্তেতারাং 9

1 উয়া সময়ও শৌল গিত্তেলনি জা·রিকগিবারাংখো স·ওতে গালনুয়া ইন্নে খেন্নেতিংআমিং। দামেস্ক সংজিলমানি থম·দাকরামরাংও হ·ন্না ইন্নে বিয়া খামাল দাল·বাৎগিবারাংচা রি·য়াংএ চিঠি হাম·জক। যীশুনি রামাও রি·গিবা মান্দি গিম্মিকখো মি·আসাবা হং·খানা মিচিকসাবা হং·খানা, বিসংখো মান·জোকনো জেদাক্কে বিসংখো খায় যিরূশালেমচা রা·বানা মা·ন্না উয়া বিলনান বিয়া উয়া চিঠিখো হা·ম্মামিং। 3 রামাও রি·য়াংমিত্তিংও বিয়া দামেস্কনি সেফাংও রি·বাওন সালগিওনি রাং·গিত্তিক বিনি সামব্রিও সেং·চিপজক। 4 বিয়া হা·আও গা·আকজক আরো খিন্নাজক সাবা বিখো আগানিংআ, “শৌল, শৌল, মুয়ানা না·আ আংখো গিচ্চিয়েতিংজক?” 5 শৌল সিং·জক, “গিত্তেল, না·আ সা?” 6 বিয়া আগানজক, “আংআ যীশু, জেখো না·আ গিচ্চিয়েতিংজক। দা·আও না·আ চাখাত্তে সংজিলমাওনা রি·য়াংবো। মুয়াখো দাকনা নাংনুয়া উখো নাং·না আগানে হ·ন্নুয়া।” 7 শৌলমুং রি·য়াংফাগিবা মান্দিরাং আইয়াও ইনমানে চাদেংএ দংজক। বিসং খাৎথা আগানাখো খিন্নামিং ইন্দিবা সাকসাখোবা নিকজাজক। 8 জা·মানো শৌল হা·আওনি চাখাতজক, ইন্দিবা মিকগ্লাকানি জা·মানো মামুংখোবা নিকজাজক। উনোন বিনি রিপ্পেংরাং বিনি জাকখো রি·ম্মে বিখো দামেস্কচানা রিম্মাংজক। 9 সাল গিত্থামওনা দিপ্পাৎ শৌল মিক্রোনও নিকনা মান·জাজক আরো মামুংখোন চা·জাজক। 10 দামেস্ক সংজিলমাও অননিয় মিংগিবা সাকসা জা·রিকগিবা দংআমিং। গিত্তেল বিনা মিকখাং ফা·এ আগানজক, “অননিয়।” বিয়া আগানচাকজক, “গিত্তেল, আংআ ইনো।” 11 গিত্তেল বিনা আগানজক, “স্রংআ মিংগিবা রামাচা না·আ রি·য়াংবো। উয়ো যিহূদানি নক্কো শৌল মিংগিবা তার্ষ সংজিলমাওনি মান্দি সাকসাখো সান্দিবো। বিয়া বি·ইংআ আরো মিকজুমাংচা ইখো নিকজক, অননিয় মিংগিবা মান্দি সাকসা রি·বাএ বিনি বে·এনো জাক দন্না জেদাক্কে বিয়া দা·আবা নিকনা মা·ন্না।” 13 অননিয় আগানজক, “গিত্তেল, আংআ বাং·আ মান্দিরাংচা ইয়া মান্দিনি গিম্মিন ইন্দাকে খিন্নাজক, যিরূশালেমো বিয়া নাং·নি মান্দিরাংখো বাসিক গিচ্চিয়েতজক। 14 ইনাআগ্রেবা নাং·নি বিমুংও বি·গিবারাংখো রিম·না ইন্নে খামাল দাল·গিবারাংচাখো বিল রা·এ বিয়া ইয়োনা রি·বাজক।” 15 ইন্দিবা গিত্তেল অননিয়না আগানজক, “না·আ রি·য়াংবো, মুয়ানা গিপ্পিন জাতরাংচা আরো বিসংনি রাজারাংচা আরো ইস্রায়েলনি মান্দিরাংচা আংনি গিম্মিন আগানফ্রাকনা আংআ ইয়া মান্দিখোন বাচ্ছিয়ে রা·জক। 16 আংনি গিম্মিন বিখো বাসিক দুক মা·ন্না নাংনুয়া উখো আংআ বিনা ফিন্নিকনুয়া।” 17 উনোন অননিয় রি·য়াংএ উয়া নক নিং·আচা নাপজক আরো শৌলনি বে·এনো জাক দনদাপে আগানজক, “জং শৌল, ইনো রি·বামিত্তিংও নাং·না মিকখাং ফা·গিবান গিত্তেল যীশু। বিয়ান আংখো ওয়াত্তেতজক জেদাক্কে না·আ নিকফিলনা মা·ন্না আরো গিসিক রংথালগিবাও গাপ্পা।” 18 উনোন শৌলনি মিক্রোনওনি বিস্রিং গিত্তা দাক্কা মামুং গা·আকাংজক আরো বিয়া দা·আবা নিকনা মান·জক। উনি জা·মানো বিয়া চাখাত্তে চিও রিপ্পলজক আরো চা·এ-রিংএ বিলখো মান·ফিলজক। শৌল দামেস্কনি জা·রিকগিবারাংমুং সালসা সালগ্মি দংফাজক। 20 উনি জা·মানো সময়খো নাসিয়েতগিজা বিয়া গিপ্পিন গিপ্পিন থম·দাকরামরাংও যীশুন ইসলনি দেফান্থি ইন্নে আগানফ্রাকনা হা·বাচেংজক। 21 বিনি খাৎথাখো খিন্নাচাকগিবারাং আইয়াও ইনমানে সিং·নুয়ামিং, “ইয়ান যিরূশালেমো যীশুনি বিমুংও বি·গিবারাংখো গিচ্চিয়েতগিবা উয়া মান্দি হং·জামা? ইনোবা উখো দাকগিবারাংখো খায় খামাল দাল·গিবারাংচা রিম্মাংনা ইন্নেন বিয়া ইয়ো রি·বাজামা?” 22 ইন্দিবা শৌল আরোসা বিল্লাকবাৎরোরোজক আরো যীশুন খ্রীষ্ট হং·আ ইন্নে ফিন্নিকজক। ইনি গিম্মিন দামেস্কনি যিহূদীরাং নাওয়াং চাআরিজক। 23 ইনি বাং·এ সাল রি·য়াংআনি জা·মানো যিহূদীরাং বিখো স·ওতনা খু·মংগ্রিকনা হা·বাচেংজক, 24 ইন্দিবা শৌল বিসংনি খু·মংগ্রিকাখো হা·আইনা মান·জক। বিখো স·ওতনা যিহূদীরাং সংজিলমানি দ·গারাংখো সালওয়াল নিথিমনা হা·বাচেংজক। 25 ইন্দিবা সালসাও ওয়াল্লো শৌলনি জা·রিকগিবারাং গি·সা খকো দাক্কে দেয়ালনি গি·সা জানলা গিত্তা বিখো খা·মাচানা হং·ওনেতজক। 26 শৌল যিরূশালেমো রি·বাএ জা·রিকগিবারাংমুং নাংরিমনা হাম·জক, ইন্দিবা বিসং গিম্মিকান বিনা খেনবিজক। শৌল বিবিন সাকসা জা·রিকগিবা হং·জক ইন্নে বিসং বিবিরা·না মান·জাজক। 27 ইন্দিবা বার্ণবা বিখো ওয়াত্তেতারাংচা রিম্মাংএ বিসংনা আগানজক, দামেস্কনি রামাও শৌল বাদিকে দাক্কে গিত্তেল যীশুখো নিকনা মা·ন্নামিং আরো গিত্তেল বিমুং বাদিকে খাৎথা আগানামিং আরো দামেস্কচা যীশুনি গিম্মিন বিয়া বাদিকে দাক্কে খেনমানগিজা আগানফ্রাকামিং। 28 উনি জা·মানো শৌল যিরূশালেমো জা·রিকগিবারাংমুং দংফাজক আরো বিসংমুং রি·ফানুয়ামিং আরো গিত্তেলনি গিম্মিন খেনমানগিজা আগানফ্রাকনুয়ামিং। 29 গ্রীক খু·সুকখো আগানগিবা যিহূদীরাংমুং বিয়া খাৎথা আগান্নুয়ামিং আরো জিগ্রিকনুয়ামিং, ইন্দিবা ইয়া যিহূদীরাং বিখো স·ওতনা হাম·জক। 30 বিবিরা·গিবা জংআদারাং ইখো খিন্নাএ বিখো কৈসরিয়া সংজিলমাও রিম্মাংজক আরো জা·মানো বিখো তার্ষ সংজিলমাও ওয়াত্তেতজক। 31 উয়া সময়ও যিহূদিয়া, গালীল আরো শমরিয়া হা·দকনি মন্ডলীরাংও থম·থমা দংআমিং, আরো উয়া মন্ডলীরাং হং·বাংআমিং। উনি গিম্মিন গিত্তেলনা খা·ফাকাও আরো গিসিক রংথালগিবানি খা·দংএতাও বিসংবা জালরোরোজক। 32 পিতর হা·দাম গিম্মিকচা রি·রোরোএ লুদ্দা সংও ইসলনি মান্দিরাংচা রি·বাজক। 33 উয়া সংও ঐনিয় মিংগিবা মান্দি সাকসা দংআমিং। বিয়া হান·মা গক্কা হং·এ বিলসি চেতনা থুচাকানিও গা·আকে দংআমিং। 34 পিতর বিখো নিক্কে আগানজক, “ঐনিয়, যীশু খ্রীষ্ট নাং·খো নাম্মেতজক। চাখাতবো, নাং·নি থুচাকানিখো দি·থমে রা·বো।” আরো উনোন ঐনিয় চাদেংজক। 35 উনোন লুদ্দা আরো শারোণ সংনি মান্দি গিম্মিক ঐনিয়খো নিক্কে গিত্তেলচানা ফিল·জক। 36 যাফো সংজিলমাও টাবিথা মিংগিবা জা·রিকগিবা মিচিক সাকসা দংআমিং। গ্রীকচা ইয়া বিমুংনি অর্থ হং·আ দর্কা। বিয়া ফাংনানান গিপ্পিনরাংনা নাম্মাখো দাকচাকনুয়ামিং আরো দিল্লা-চন্নারাংনা হন·চাকনুয়ামিং। 37 বিয়া জম্মে সিজকমিং আরো মান্দিরাং বিখো হাবুএতে নকদ্রিং সাক্কাও দন্নামিং। 38 যাফো লুদ্দানি সেফাংওমিং; ইনি গিম্মিন জা·রিকগিবারাং পিতরনি লুদ্দাও দংআখো খিন্নাএ বিসং মান্দি সাকগ্মিখো বিচা ওয়াত্তেতি মল·মলজক, “না·আ বাকবাক চিংচানা রি·বাবো।” 39 উনোন পিতর বিসংমুং রি·য়াংফাজক। বিয়া উয়ো সক্কানি জা·মানো উয়া নকদ্রিং সাক্কাওনা বিখো রিম্মাংজক। গিম্মিক রান্দি মিচিকরাং উনো পিতরখো উল্লোলে চাদেংএ গ্রাপনা হা·বাচেংজক আরো দর্কা থাংএ দংও জে চলা-বা·রারাংখো থারিয়ামিং উরাংখো পিতরনা ফিন্নিকনা হা·বাচেংজক। 40 উনোন পিতর বিসং গিম্মিকখো নকনিখো হং·খাত্তেতি জা·স্খু দে·ম্মে বি·জক। জা·মানো উয়া সিগিবা মিচিকচানিখো নিএ আগানজক, “টাবিথা, চাখাতবো।” উনোন দর্কা মিকরাকজক আরো পিতরখো নিক্কে চাখাত্তে আসংজক। 41 পিতর উনো বিনি জাকখো রি·ম্মে চাখাত্তেতনা দাকচাকজক। জা·মানো বিয়া ইসলনি মান্দিরাংখো আরো রান্দি মিচিকরাংখো রিংগামে দর্কানি থাংচাখো বিসংনা ফিন্নিকজক। 42 ইখো যাফো সংজিলমানি গিম্মিকান হা·আইনা মান·জক আরো বাং·আরাংআন গিত্তেলখো বিবিরা·জক। 43 পিতর যাফোওনা শিমোন মিংগিবা মান্দি সাকসানি নক্কো বাং·গিজা সালরাংনা দংজক। ইয়া শিমোন বিগিল থারিয়ানি কামখো দাকনুয়ামিং।

ওয়াত্তেতারাং 10

1 কৈসরিয়া সংজিলমাও কর্ণীলিয় মিংগিবা মান্দি সাকসা ইটালী সিপাইরাংনি সুবিদার দংআমিং। 2 যিহূদী জাত হং·জাওবা বিয়া ইসলনা খা·ফাকগিবামিং আরো বিয়া আরো বিনি নকগিম্মিকান ইসলখো অলাখিনুয়ামিং। বিয়া দিল্লা-চন্নারাংনা থাংখা-পয়সারাংখো বাং·এন হ·ন্নুয়ামিং আরো ইসলচা সালাজ্রিং বি·নুয়ামিং। 3 সালসাও গিত্থাম বাজিও বিয়া মিকজুমাংখো নিকজক। বিয়া নাম্মেদাক্কেন নিকনা মা·ন্না ইসলনি সাকসা সা·গ্রে রি·বাএ বিখো “কর্ণীলিয়,” ইন্নে রিক্কামিংআ। 4 কর্ণীলিয় খেন্নে উয়া সা·গ্রেচাখো নিএ আগানজক, “আগানবো, গিত্তেল।” সা·গ্রে আগানজক, “নাং·নি বি·আ আরো দিল্লা-চন্নারাংনা নাং·নি হন·চাকারাংনি খাৎথা সালগিওনা সকবাজক আরো ইসল উখো গিসিকো রা·রিকজক। 5 দা·আও না·আ যাফো সংজিলমাও মান্দি ওয়াত্তেতবো, আরো শিমোন, জেনি দা·আও মিংসা বিমুং পিতর, বিখো রিংগামে রা·বাবো। সাগালনি রিক্কামো সাকগিপ্পিন শিমোন মিংগিবা দংআ। 6 বিয়া বিগিলনি কামখো দাক্কা। পিতর উয়া শিমোননি নক্কো দংআ।” 7 কর্ণীলিয়মুং খাৎথা আগানগিবা সা·গ্রে রি·য়াংআনি জা·মানো কর্ণীলিয় নকখল সাকগ্মি আরো দাকচাকগিবা সাকসা সিপাইখো রিক্কামজক। ইয়া সিপাই ইসলনা খা·ফাকগিবা হং·আমিং। 8 গিম্মিক খাৎথাখো আগানে হ·ন্নানি জা·মানো কর্ণীলিয় বিসংখো যাফোচানা ওয়াত্তেতজক। 9 সালগিপ্পিনো উয়া মান্দিরাং যাফো সংজিলমাচা রি·বামিত্তিংও সালজাচ্চি হং·না হা·ম্মিংজকমিং। পিতর বি·না ইন্নে উয়া সময়ও নকখিং সাক্কাও গাদোজক। 10 উনোন পিতর অকখ্রিজকমিং আরো বিয়া মামুংখো চা·না হা·ম্মিংআমিং। চা·আখো থারিমিত্তিংও পিতর থুস্থিম্মা গিত্তা দাকজক। 11 উনোন বিয়া সিলগানি ফ্রাকাংআখো আরো দা·ল্লা চাদর গিত্তা দাকগিবাখো খি·থিকব্রিও রি·ম্মে হা·গিলসাকো হং·ওনেতাখো নিকজক। 12 উয়া চাদরও গিম্মিক জাংগিগ্মাংগিবা মাৎবুরুংরাং, খা·বাকো মালগিবারাং আরো সাক্কানি দো·দ্রাং দংআ। 13 উনি জা·মানো সানিবা ইন্দাকে রিক্কামাখো বিয়া খিন্নাজক, “পিতর, চাখাতবো, দক্কে চা·বো।” 14 পিতর আগানজক, “হং·জা, হং·জা, গিত্তেল, মামুং দাক্কেন হং·জা। রংথালগিজাগিবাখো বা মারাং নাংগিবাখো আংআ মামুং সালোবা চা·খুজা।” 15 উনোন বিয়া দা·আবা খিন্নাজক, “ইসল জেখো রংথালেতজক উখো না·আ রংথালগিজাগিবা ইন্নে দা·আ আগানাবো।” 16 রাং·গিত্থাম ইন্দাকে হং·আনি জা·মানো উয়া চাদরখো সিলগাচানা দি·দোআংজক। 17 পিতর ইয়া মিকজুমাংনি অর্থ মুয়া হং·না মা·ন্না উখো বিয়া উনোবা চানচিংআমিং; উনো কর্ণীলিয়নি ওয়াত্তেতগিবা মান্দিরাং শিমোননি নকখো সান্দিয়ে মা·ন্নে দ·গা মিকখাংও রি·বাএ চাদেংজক। 18 জা·মানো বিসং রিংগামে সিং·জক, “শিমোন, জেখো পিতরবা মিংআ, বিয়া ইনো দংআমা?” 19 পিতর উনোবা মিকজুমাংখো রা·এ চানচিংআমিং, উনোন গিসিক রংথালগিবা বিনা আগানজক, “নিবো, মান্দি সাকগিত্থাম নাং·খো সান্দিংআ। 20 চাখাত্তে খা·মাচা রি·য়াংবো। মামুংনাবা খেনচাকগিজা বিসংমুং রি·য়াংবো, মুয়ানা আংআন বিসংখো ওয়াত্তেতজক।” 21 উনোন পিতর হং·খাতবাএ উয়া মান্দিরাংনা আগানজক, “না·সং জেখো সান্দিংআ আংআন উয়া মান্দি। না·সং মুয়ানা রি·বাআ?” 22 উয়া মান্দিরাং আগানজক, “সুবিদার কর্ণীলিয় চিংখো ওয়াত্তেতজক। বিয়া সাকসা থরমি মান্দি আরো বিয়া ইসলখো অলাখিয়া। গিম্মিক যিহূদীরাং বিখো নাম্মা ইন্না। ইসলনি সা·গ্রে সাকসা বিনা গি·য়েৎজক জেদাক্কে বিয়া নাং·খো বিনি নকচা রিম্মাংএ নাং·নি খাৎথাখো খিন্নাআ।” 23 উনোন পিতর নক নিং·আচা উয়া মান্দিরাংখো রিংগামে রা·বাজক আরো বিসংনা দংআনিখো আরো চা·আনি-রিংআনিখো থারিয়ে হন·জক। সালগিপ্পিনো পিতর উয়া মান্দিরাংমুং রি·য়াংফাজক। যাফো সংজিলমাওনি বিবিরা·গিবা মিত্তাম জংআদারাংবা বিমুং রি·য়াংফাজক। 24 সালগিপ্পিনো বিসং কৈসরিয়াওনা সকজক। উনো কর্ণীলিয় বিনি চাচ্চিরাংখো আরো মংসংগিবা রিপ্পেংরাংখো রা·এ বিসংখো নিচাকসোংআমিং। 25 পিতর নক্কো নাপ্পোন কর্ণীলিয় বিচা রি·য়াংএ বিনি জা·চক সাক্কাও থুচিকোপে বিখো ইসলচাচা অলাখিজক। 26 ইন্দিবা পিতর বিখো দি·চাএ আগানজক, “চাখাতবো, আংআ আন·থাংবা সাকসা মান্দিসান হং·আ।” 27 কর্ণীলিয়মুং খাৎথা আগানে পিতর নিং·আচানা রি·য়াংএ মান্দি বাং·আখো থম·দাকাখো নিকজক। 28 উনোন বিয়া বিসংনা আগানজক, “না·সংদে ইখো হা·আইয়ান, সাকসা যিহূদী মান্দিনা গিপ্পিন জাতনি মান্দিমুং আপসান হং·রিমা বা বিমুং গ্রংআরাং চিংনি থরমনি নিয়াম হং·জা। ইন্দিবা ইসল আংনা ফিন্নিকজক সাকসাখোবা রংথালগিজাগিবা বা মারাং নাংগিবা ইন্না আংনি খ্রাজা। 29 উনি গিম্মিন না·সং আংখো রিংগামেত্তোন আংআ মামুংনা জিচাকগিজান রি·বাজক। দা·আও আংআ সিং·ইংআ, না·সং মুয়ানা আংখো রিক্কামজক?” 30 উনোন কর্ণীলিয় আগানজক, “সালব্রি স্খাংও ইয়া সময়ও গিত্থাম বাজিও আংআ আংনি নক্কো বি·ইংআমিং। উনো রাং·গিত্তিক চিং·ব্রাপা বা·রাখো গানগিবা মান্দি সাকসা আংনি মিকখাংও রি·বাএ চাদেংএ আগানজক, 31 ‘কর্ণীলিয়, ইসল নাং·নি বি·আখো খিন্নাজক আরো দিল্লা-চন্নারাংনা নাং·নি হন·চাকারাংখো বিয়া গিসিকো রা·রিকজক। 32 দা·আও না·আ যাফোচানা মান্দি ওয়াত্তেতবো, আরো শিমোন, জেখো পিতরবা মিংআ, বিখো রিংগামে রা·বাবো। সাগালনি রিক্কামো দংগিবা আরো বিগিলনি কামখো দাকগিবা শিমোননি নক্কোন পিতর চাচ্চি হং·এ দংইংআ।’ 33 উনি গিম্মিন আংআ উনোন নাং·খো রিংগামে রা·বানা মান্দি ওয়াত্তেতজক, আরো না·আ রি·বাএ নামজক। ইনো দা·আও চিংআ গিম্মিকান ইসলনি মিকখাংও দংআ। গিত্তেল নাং·খো চিংচা জেখো আগান্না গি·য়েৎজক চিংআ উয়া গিম্মিকখোন খিন্নানুয়া।” 34 উনোন পিতর ইন্না হা·বাচেংজক, “আংআ দা·আও বিবিন হা·আইনা মান·জক ইসলনি মিক্রোনও গিম্মিকান আপসান হং·আ। 35 জাত গিম্মিকওনি জেরাং বিখো অলাখিয়া আরো বিনি মিক্রোনও খাকখেৎখো দাকগিবারাংখোন বিয়া রা·চাকা। 36 ইসল ইস্রায়েলরাংনা ইয়া নাম্মা খাৎথাখো ওয়াত্তেতামিং, যীশু খ্রীষ্ট, জেআন গিম্মিকনি গিত্তেল, বিচান থম·থমাখো মা·ন্না। 37 মান্দিরাংনি রিপ্পলনা নাংআ ইখো যোহননি আগানফ্রাকানি জা·মানো গালীলওনি হা·বাচেংএ যিহূদিয়া গিম্মিকও হং·গিবারাংখো না·সং আন·থাংআন হা·আইয়া। 38 না·সং ইখোবা হা·আইয়া, ইসল নাসরতনি যীশুখো গিসিক রংথালগিবাচা আরো বিলচা সংআমিং। ইসল বিমুং দংআনি গিম্মিন বিয়া নাম্মা কামখো দাকনুয়ামিং আরো শয়তাননি জাক্কো দুক মান·গিবারাংখো গিম্মিকখোন নাম্মেতনুয়ামিং। 39 “যিহূদীরাংনি হা·সংও আরো যিরূশালেমো বিয়া জেরাংখো দাক্কামিং চিংআ উনি সাক্ষি হং·আ। মান্দিরাং বিখো চিসলো দাৎখাপে স·ওতামিং। 40 ইন্দিবা ইসল সালগিত্থামনি সালো বিখো সিয়াওনি থাংচাফিল্লেতজক আরো ইন্দাকে দাকজক জেদাক্কে মান্দিরাং বিখো নিকনা মা·ন্না। 41 বিখো গিম্মিকদে নিকনা মান·জা, ইন্দিবা ইসল জে সাক্ষিরাংখো স্খাংও বাচ্ছিয়ে দন্নামিং বিসংসান বিখো নিকনা মা·ন্নামিং, আগানস্খাওদে বিয়া সিয়াওনি চাখাতফিল্লানি জা·মানো চিংআ জেরাং বিমুং চা·রিমা-রিংরিমা চিংআসান বিখো নিকনা মান·জক। 42 বিয়া চিংনা গি·য়েৎজক জেদাক্কে চিংআ যিহূদী মান্দিরাংচা আগানফ্রাকা আরো ইন্দাকে সাক্ষি হ·ন্না, ইসল বিখোন থাংগিবা আরো সিগিবারাংনি বিচাল দাকগিবা দাকজক। 43 গিম্মিক আগানসোগিবারাংআন বিনি গিম্মিন ইন্দাকে সাক্ষি হ·ন্নিংআ, বিখো বিবিরা·গিবারাং গিম্মিকান বিনি গুণনি হা·সেল পাপওনি ক্ষেমাখো মা·ন্না।” 44 পিতর উনোবা খাৎথা আগানিংআ, উনো উয়া খাৎথাখো খিন্নাগিবারাংনি সাক্কাও গিসিক রংথালগিবা রি·বাজক। 45 জে যিহূদী বিবিরা·গিবারাং পিতরমুং রি·বামিং বিসং গিপ্পিন জাতরাংনি সাক্কাওবা গিসিক রংথালগিবাখো হ·ন্না গিত্তা রুএ হ·ন্নাখো নিক্কে আইয়াও ইনমানজক। 46 বিসং উখো হা·আইনা মান·জক মুয়ানা ইয়া গিপ্পিন জাতরাংখো বিসং গিপ্পিন গিপ্পিন খু·সুকচা আগানাখো আরো ইসলখো রাসং দাক্কাখো খিন্নানা মান·জক। উনোন পিতর আগানজক, 47 “চিও রিপ্পলনা ইয়া মান্দিরাংখো সাবা চাংফেংনা মা·ন্নামা? বিসংদে আনচিং গিত্তান গিসিক রংথালগিবাখো মান·জক।” 48 উনোন বিয়া উয়া মান্দিরাংখো যীশু খ্রীষ্টনি বিমুংও রিপ্পলেতনা গি·য়েৎজক। জা·মানো বিসং পিতরখো বিসংমুং সালসা সালগ্মি দংখানা মল·মলজক।

ওয়াত্তেতারাং 11

1 গিপ্পিন জাতরাংবা ইসলনি খাৎথাখো বিবিরা·জক উখো ওয়াত্তেতারাং আরো গিম্মিক যিহূদিয়ানি বিবিরা·গিবা জংআদারাং খিন্নাজক। 2 ইনি গিম্মিন পিতর যিরূশালেমচানা রি·বাও উয়া বিবিরা·গিবারাংনি গিসেপো বিগিল রাতগিবারাং বিখো গ্রো নাংএতে আগানজক, 3 “না·আ বিগিল রাতগিজা মান্দিরাংনি নকচা রি·য়াংএ বিসংমুং চা·জক রিংজক।” 4 পিতর উনোন স্খাংওনি হা·বাচেংএ হং·গিবারাংখো মিংসা মিংসা দাক্কে আগানে হন·জক, 5 “আংআ যাফো সংজিলমাও বি·ইংআমিং, উনো থুস্থিম্মা গিত্তা দাক্কে দংএ গি·সা মিকজুমাংখো নিকজক। দা·ল্লা চাদর গিত্তা দাকগিবাখো খি·থিকব্রিও রি·ম্মে সিলগাওনি আংচানা হং·ওনেতাখো আংআ নিকজক। 6 আংআ নাম্মেদাক্কে নিএ উয়ো বাং·আ জাংগিগ্মাংগিবা মাৎবুরুংরাং, খা·বাকো মালগিবারাং আরো দো·দ্রাং দংআখো নিকজক। 7 জা·মানো আংআ সানিবা আগানাখো খিন্নাজক, ‘পিতর, চাখাতবো, দক্কে চা·বো।’ 8 “আংআ ইনজক, ‘হং·জা, হং·জা, গিত্তেল মামুং দাক্কেবা হং·জা। রংথালগিজাগিবাখো আরো মারাং নাংগিবারাংখো আংআ মামুং সালোবা খু·সুকও সিকখুজা।’ 9 “উনি জা·মানো সালগিওনি রাং·গ্মিগিবাও আগানজক, ‘ইসল জেখো রংথালেতজক উখো না·আ রংথালগিজাগিবা ইন্নে দা·আ ইন্নাবো।’ 10 ইন্দাকে রাং·গিত্থাম হং·জক, জা·মানো গিম্মিকখো দা·আবা সিলগাওনা দি·দোআংজক। 11 “উনি জা·মানোন আংনি দংগিবা নক্কো মান্দি সাকগিত্থাম রি·বাএ চাদেংজক। কৈসরিয়াওনি বিসংখো ওয়াত্তেতামিং। 12 উনোন গিসিক রংথালগিবা আংখো খেনচাকগিজা বিসংমুং রি·য়াংখানা আগানজক। ইয়া সাকদক জংআদাবা আংমুং রি·য়াংআমিং। জা·মানো চিংআ আংখো রিক্কামগিবা উয়া মান্দিনি নক্কো নাপজক। 13 বিয়া সাকসা সা·গ্রেখো বাদিকে দাক্কে বিনি নক্কো নিক্কামিং উখো চিংনা আগানজক। উয়া সা·গ্রে বিনা আগানামিং, ‘শিমোন, জেখো পিতর ইন্নেবা মিংআ, বিখো রিংগামে রা·বানা না·আ যাফো সংজিলমাও মান্দি ওয়াত্তেতবো। 14 বিয়া নাং·চা জে খাৎথাখো আগান্নুয়া উয়া খাৎথাচা না·আ আরো নাং·নি নকগিম্মিকান পাপওনি জকনুয়া।’ 15 “গিসিক রংথালগিবা জেদাক্কে স্খাং আনচিংনি সাক্কাও রি·বামিং আংআ খাৎথা আগান্না হা·বাচেংও উয়ানদাক্কেন বিসংনি সাক্কাওবা রি·বাজক। 16 উনোন গিত্তেল জেখো আগানামিং উখো আংআ গিসিক রা·জক, ‘যোহন চিও রিপ্পলেতনুয়ামিং, ইন্দিবা না·সংনি রিপ্পলা গিসিক রংথালগিবাও হং·নুয়া।’ 17 ইন্দাকোদে গিত্তেল যীশু খ্রীষ্টখো বিবিরা·নি জা·মানো ইসল আনচিংনা জেখো হন·চাকামিং উখোন বিয়া বিসংনাবা হ·ন্নোদে আংআ সা, জে ইসলখো ফেং·না মা·ন্নুয়া?” 18 ইয়া খাৎথাখো খিন্নাএ যিহূদিয়ানি বিবিরা·গিবারাং জিচাকগিজা ইসলখো রাসং চাএতে আগানজক, “ইন্দাকোদে ইসল গিপ্পিন জাতরাংখোবা জাংগি মান·খানা পাপওনি গিসিক ফিল·না চল হন·জক।” 19 স্তিফানখো রা·এ বিবিরা·গিবারাংখো গিচ্চিয়েতানি গিম্মিন জেরাং বিলদিং বিলদাং হং·আংআমিং বিসং ফৈনীকিয়া, সাইপ্রাস আরো সিরিয়া হা·সংনি আন্তিয়খিয়াওনা দিপ্পাৎ রি·য়াংএ যিহূদীরাংচাসান ইসলনি খাৎথাখো আগানজক। 20 ইন্দিবা বিসংওনি মিত্তামরাং আন্তিয়খিয়াওনা রি·য়াংএ গ্রীক খু·সুকখো আগানগিবা মান্দিরাংচাবা গিত্তেল যীশুনি গিম্মিন নাম্মা খাৎথাখো আগানফ্রাকনা হা·বাচেংজক। বিসং সাইপ্রাস চিচাং আরো কুরীণী সংজিলমানি মান্দি হং·আমিং। 21 ইসলনি বিল বিসংনি সাক্কাও দংআনি গিম্মিন বাং·আ মান্দিরাং গিত্তেলখো বিবিরা·এ বিচা ফিল·জক। 22 ইয়া খাৎথা যিরূশালেম মন্ডলীনি মান্দিরাংনি নাচিলো রি·য়াংআনি জা·মানো বিসং বার্ণবাখো আন্তিয়খিয়াওনা ওয়াত্তেতজক। 23 ইসল আন্তিয়খিয়ানি মান্দিরাংনা বাদিকে খা·সাচাকজক বার্ণবা রি·বাএ উখো নিক্কে খুসি হং·বিজক। বিসং জেদাক্কে খা·থং গিম্মিকচা গিত্তেলো বিবিগিবা হং·এ দংনা মা·ন্না উনি গিম্মিন বিয়া বিসং গিম্মিকখো খা·দংএতনা হা·বাচেংজক। 24 বার্ণবা সাকসা নাম্মা মান্দি হং·আমিং আরো বিয়া গিসিক রংথালগিবাও আরো বিবিরা·আও চু·সকামিং। উনোন গিত্তেল বাং·আরাংখোন আন·থাংওনা রা·বামিং। 25 উনি জা·মানো বার্ণবা শৌলখো সান্দিয়ে তার্ষ সংজিলমাওনা রি·য়াংজক, 26 আরো বিখো সান্দিয়ে মা·ন্নে আন্তিয়খিয়াওনা রিমবাজক। বার্ণবা আরো শৌল বিলসিসা দিপ্পাৎ মন্ডলীনি মান্দিরাংমুং আপসান হং·রিমে মান্দি বাং·আরাংনা স্খিজক। আন্তিয়খিয়াওন খ্রীষ্টনি জা·রিকগিবারাংখো খ্রীষ্টান ইন্নে দিমদাকনা স্খাং মিংচেংজক। 27 উনি গিসেপো মিত্তাম আগানসোগিবা যিরূশালেমোনি আন্তিয়খিয়াওনা রি·বাজক। 28 বিসংওনি আগাব মিংগিবা সাকসা চাদেংএ গিসিক রংথালগিবাও রি·য়াখো মা·ন্নে আগানজক, রোম গিম্মিকো আকাল হং·নুয়া। (সম্রাট ক্লৌদিয়নি শাসন দাক্কানি সালো উয়া খাৎথা চু·সকামিং।) 29 উনোন জা·রিকগিবারাং থিক দাকজক, যিহূদিয়া হা·দকনি বিবিরা·গিবা জংআদারাংনা দাকচাকনা বিসং গিম্মিকান আন·থাংথাংনি মা·ন্না গিত্তা থাংখা ওয়াত্তেতনুয়া। বিসং উখো দাক্কামিং। 30 বিসং বার্ণবা আরো শৌলনি জাক্কো যিহূদিয়ানি মন্ডলীরাংনি মি·আফারাংচা উয়া দাকচাকাখো ওয়াত্তেতামিং।

ওয়াত্তেতারাং 12

1 উয়া সময়ও রাজা হেরোদ খ্রীষ্টান মন্ডলীনি মিত্তাম মান্দিরাংখো গিচ্চিয়েতনা রি·ম্মে রা·বামিং। 2 বিয়া যোহননি আদাগিবা যাকোবখো মি·ল্লামচা স·ওতেতামিং। 3 উখো নিক্কে যিহূদীরাংনি খুসি হং·আখো নিক্কে বিয়া পিতরখোবা রিম·না রি·য়াংজক। ইরাং ওয়ানথিগ্রি রুটিখো মানিয়ানি সালো হং·আমিং। 4 বিয়া পিতরখো রি·ম্মে জেলো দনজক। সাকব্রি সাকব্রি দাক্কে দলব্রি সিপাইরাংখো পিতরখো রাক্ষিনা দনজক। ওয়াতচাংআনি সালনি জা·মানো পিতরখো বিচাল দাকনা মান্দিরাংনি মিকখাংও রা·বানুয়া ইন্নে হেরোদ থিক দাকজক। 5 ইনি গিম্মিনান পিতরখো জেলো চিপচাংএ দনজক। ইন্দিবা মন্ডলীনি মান্দিরাং ইসলচা গিসিক নাংবিএ পিতরনি গিম্মিন বি·ইংআমিং। 6 জেনসালো হেরোদ পিতরখো বিচাল দাকনা হং·খাত্তেতনুয়া উনি ওয়াল্লো সিপাই সাকগ্মিনি জাংচিও পিতর থুংআমিং। বিখো গি·গ্মি জেংজুলচা খায় দন্নামিং আরো রাক্ষিগিবারাং দ·গাও রাক্ষিংআমিং। 7 উনো রাং·গিত্তিক গিত্তেলনি সা·গ্রে সাকসা উয়ো রি·বাএ চাদেংজক। উনি গিম্মিন জেলনি উয়া নক সেং·আও থেং·সুজক। সা·গ্রে পিতরনি বে·এনো রাক্কে সুদ্দকে বিখো চামিসাএ আগানজক, “থেংরি চাখাতবো।” উনি হা·সেল পিতরনি জাক সামগ্মিওনি জেংজুল গো·ওকাংজক। 8 উনোন সা·গ্রে পিতরখো ইনজক, “নাং·নি খাংখারিখো খাবো, জুতাখো গানবো।” পিতর উখোন দাকজক। সা·গ্রে বিনা আগানজক, “নাং·নি চাদরখো চিন্নে আংনি জা·মান জা·মান রি·বাফাবো।” 9 পিতর বিখো জা·রিকে জেলোনি হা·ফালওনা হং·খাতবাজক, ইন্দিবা সা·গ্রেনি দাকগিবারাং বিবিন হং·ইংজক উখো বিয়া মামুংখোন হা·আইনা মান·জাজক। বিয়া মিকজুমাং নিক্কিংআ ইন্নে চানচিজক। 10 বিসং স্খাংগিবা আরো গ্মিগিবা নিথিমগিবারাংনি দলখো বাৎবাএ সংজিলমাও নাপগিবা সিলনি দ·গাওনা রি·বাজক। উয়া সিলনি দ·গা বিসংনা আন·থাংথাংআন এংআংজক আরো বিসং উগিত্তা হং·খাতাংজক। বিসং গি·সা রামা গিত্তা রি·ইংআমিং উনো রাং·গিত্তিক উয়া সা·গ্রে পিতরখো ওয়াত্তে রি·য়াংজক। 11 উনোন পিতর সিম্মাকা গিত্তা দাকজক আরো আগানজক, “দা·আও আংআ বিবিন ইখো হা·আইনা মান·জক, গিত্তেল বিনি সা·গ্রেখো ওয়াত্তেতি হেরোদনি জাকনিখো আরো যিহূদীরাং জেখো দাকনা খু·মংগ্রিকামিং উনিখো আংখো জক্কেৎজক।” 12 ইয়া খাৎথাখো হা·আইনা মা·ন্নে বিয়া যোহননি মা·গিবা মরিয়মনি নকচা রি·য়াংজক। ইয়া যোহনখো মার্ক ইন্নেবা রিক্কামনুয়ামিং। উয়া নক্কো বাং·আ মান্দিরাংআন থম·দাকে বি·ইংআমিং। 13 পিতর হা·ফালনি দ·গাখো দকথিপো রোদা মিংগিবা সাকসা নকখল মিচিক দ·গাখো এংনা রি·বাজক। 14 পিতরনি খু·রাংখো হা·আইনা মা·ন্নে বিয়া খুসি হং·বিএ দ·গাখো এংগিজান নিং·আচানা খাত্তাংএ রি·য়াংএ আগানজক, “পিতর দ·গাচিলো চাদেংএ দংআ।” 15 উনোন জা·রিকগিবারাং উয়া মিচিকনা আগানজক, “নাং·নি স্খু থিক দংজা।” ইন্দিবা বিনি দাপ্পেৎ দাপ্পেৎ আগানানি গিম্মিন বিসং ইনজক, “ইন্দিদে বিয়া পিতরখো জক্কেৎগিবা সা·গ্রে হং·আ।” 16 পিতর দ·গাখো দকথিপেন দংজক। উনোন জা·রিকগিবারাং দ·গাখো এংএ পিতরখো নিক্কে আইয়াও ইনমানজক। 17 পিতর বিসংখো স্রক দংখানা জাকজিপেতজক আরো জেলোনি গিত্তেল বাদিকে বিখো হং·খাত্তেতি রা·বাজক উখো আগানজক। বন·চতাও বিয়া আগানজক, “ইখো যাকোব আরো সাকগিপ্পিন জংআদারাংনাবা আগানবো।” ইখো আগানে বিয়া হং·খাতে গিপ্পিন হা·দামচানা রি·য়াংজক। 18 ওয়াল সেং·আনি জা·মানো পিতর বাওনা রি·য়াংজক উখো রা·এ সিপাইরাংও নাম্মেন জাজ্রেংআনি হং·জক। 19 হেরোদ নাম্মেদাক্কেন বিখো সান্দিজক, ইন্দিবা বিখো মান·জাএ নিথিমগিবারাংখো সিং·থেকজক আরো জা·মানো উয়া নিথিমগিবারাংখো স·ওতনা গি·য়েৎজক। উনি জা·মানো হেরোদ যিহূদিয়াওনি কৈসরিয়াওনা রি·য়াংজক আরো উয়ো বাং·গিজা সালনা দংজক। 20 উয়া সময়ও হেরোদ সোর আরো সীদোন সংজিলমানি মান্দিরাংখো খা·আওনাংবিজক। উনো উয়া হা·দামনি মান্দিরাং আপসান হং·এ হেরোদমুং গ্রংনা রি·য়াংজক। রাজানি থুগিবা নকনি বিবিগিবা নকখল ব্লাস্ত মিংগিবাখো আন·থাংথাংওনা রা·বাএ বিসং রাজামুং নাংরিমনা হাম·জক, মুয়ানা রাজা হেরোদনি হা·সংওনিন বিসংনি হা·সংওনা চা·আরাং সকবানুয়ামিং। 21 উনোন হেরোদ সালসাখো থিক দাকজক। উনসালো বিয়া রাজানি বা·রাখো গান্নে সিংহাসনও আসংএ উয়া মান্দিরাংচা খাৎথা আগান্না হা·বাচেংজক। 22 বিনি খাৎথাখো খিন্নাএ বিসং চ্রিকে আগানজক, “ইয়া মিত্তেনি খু·রাং, মান্দিনি খু·রাং হং·জা।” 23 হেরোদ ইসলনি রাসং দাকজা ইন্নে উনোন গিত্তেলনি সা·গ্রে সাকসা বিখো দকজক, আরো বিখো জ·ওং চা·নি গান্দা বিয়া সিজক। 24 ইন্দিবা ইসলনি খাৎথা গিপরোরোআংজক আরো বাং·আ মান্দিরাংআন উখো বিবিরা·না হা·বাচেংজক। 25 বার্ণবা আরো শৌলনি কাম ব·ন্নানি গিম্মিন বিসং যোহনখো রা·এ যিরূশালেমচানা রি·য়াংফিলজক। ইয়া যোহনখো মার্ক ইন্নেবা রিক্কামনুয়ামিং।

ওয়াত্তেতারাং 13

1 আন্তিয়খিয়ানি মন্ডলীরাংও মিত্তাম আগানসোগিবা আরো স্খিগিবা দংআমিং। বিসংনি বিমুং হং·আ বার্ণবা, নীগের মিংগিবা শিমোন, কুরীণী সংজিলমাওনি লুকিয়, শাসন দাকগিবা হেরোদমুং দংগিবা মনহেম আরো শৌল। 2 বিসং অকগুমিন দংএ গিত্তেলখো অলাখিমিত্তিংও গিসিক রংথালগিবা বিসংনা আগানজক, “বার্ণবা আরো শৌলখো আংআ জে কামনা রিক্কামা আংনি উয়া কামনি গিম্মিন দা·আও বিসংখো দিংথাং দাকবো।” 3 উনোন বিসং অকগুমিন দংএ আরো বি·এ উয়া সাকগ্মিনি সাক্কাও জাক দনদাপজক আরো বিসংখো ওয়াত্তেতজক। 4 গিসিক রংথালগিবা বার্ণবা আরো শৌলখো ইন্দাকে ওয়াত্তেতানি জা·মানো উয়া সাকগ্মি সিলুকিয়াওনা রি·য়াংজক। জা·মানো উয়োনি বিসং জাহাসও দাক্কে সাইপ্রাস চিচাংওনা রি·য়াংজক। 5 সালামীওনা সক্কে বিসং যিহূদীরাংনি থম·দাকরামচা ইসলনি খাৎথাখো আগানফ্রাকজক। উনো দাকচাকগিবা হং·এ যোহন বিসংমুং দংআমিং। 6 গিম্মিক চিচাংখো রওমে বিসং পাফোচানা রি·বাজক আরো উয়োনা বর-যীশু মিংগিবা সাকসা যিহূদী যাদু মনতল দাকগিবা আরো বু·এ চা·গিবা আগানসোগিবাখো গ্রংজক। 7 উয়া বু·এ চা·গিবা আগানসোগিবাখো ইলুমা, আগানস্খাওদে যাদু মনতল দাকগিবা ইন্নুয়ামিং। বিয়া শাসন দাকগিবা সের্গিয় পৌলনি সাকসা রিপ্পেংমিং, আরো উয়া শাসন দাকগিবা সাকসা বুদ্ধিগ্মাং মান্দিমিং। সের্গিয় পৌল ইসলনি খাৎথাখো খিন্নানা ইন্নে বার্ণবা আরো শৌলখো রিংগামেতজক। ইন্দিবা বার্ণবা আরো শৌলখো ইলুমা চাংফেংনা হা·বাচেংজক আরো খ্রীষ্টও বিবিরা·আনিখো শাসন দাকগিবাখো ফি·ল্লেতনা হাম·জক। 9 উনোন গিসিক রংথালগিবাও গাপ্পে শৌল, জেখো পৌল ইন্নেবা রিক্কামনুয়ামিং, ইলুমাচানা নিএ আগানজক, 10 “না·আ শয়তাননি দে আরো নামগিবারাংনি বোবিল হং·আ। নাং·ও দাক্কামব্রুআনি আরো থগিয়ানি দংআ। গিত্তেলনি স্রংগিবা রামাখো গংগিয়েতাখো না·আ মামুং সালোবা দনজানাজকমা? 11 নিবো, গিত্তেলনি জাক নাং·নি সাক্কাও গা·আকজক। না·আ মিকগ্রি হং·নুয়া আরো সালসা সালগ্মিনা সালনি সেং·আখো নিকনা মান·জানুয়া।” উনোন গুরি আরো আন্দালা বিখো ফিনদাপজক আরো সাবা বিনি জাকখো রি·ম্মে রা·আংনা মান·খানা গিত্তা বিয়া জাকচা রি·ম্মামে রি·না হা·বাচেংজক। 12 ইরাংখো নিক্কে উয়া শাসন দাকগিবা গিত্তেলখো বিবিরা·জক, মুয়ানা গিত্তেলনি গিম্মিন বিয়া জে স্খিয়াখো মা·ন্নামিং উনি হা·সেল বিয়া আইয়াও ইনমানামিং। 13 উনি জা·মানো পৌল আরো বিনি রিপ্পেংরাং পাফোখো ওয়াত্তে জাহাসও দাক্কে পাম্‌ফুলিয়া হা·দকনি পর্গা সংজিলমাওনা রি·য়াংজক। যোহন উনো বিসংখো ওয়াত্তে যিরূশালেমচানা ফি·ল্লাংজক। 14 জা·মানো বিসং পর্গাওনি পিষিদিয়া হা·দকনি আন্তিয়খিয়া সংজিলমাওনা রি·য়াংজক আরো নেং·থাকানি সালো থম·দাকরামও রি·য়াংএ আসংজক। 15 রংথালগিবা শাস্ত্রনি নিয়ামরাংখো আরো আগানসোগিবারাংনি খি·তাপখো পড়িয়া বন·মানো থম·দাকরামনি দাল·গিবারাং বিসংখো আগানে ওয়াত্তেতজক, “জংআদারাং, মান্দিরাংনা খা·দংএতানি মামুং খাৎথা দংওদে আগানবো।” 16 উনোন পৌল চাদেংজক আরো জাকখো দি·চাএ আগানজক, “ইস্রায়েলনি মান্দিরাং আরো ইসলনা খা·ফাকগিবা গিপ্পিন জাতরাং, না·সং খিন্নাবো। 17 ইস্রায়েল জাতনি ইসল আনচিংনি ফাগিৎচামরাংখো বাচ্ছিয়ে রা·আমিং আরো বিসং মিসর হা·সংও দংমিত্তিংও বিসংখো দাল·বাত্তেতামিং। জা·মানো ইসল আইয়াও ইনমানগিবা বিলও উয়া হা·সংওনি বিসংখো রং·খাত্তি রা·বামিং আরো বিলসি সৎব্রিনা দিপ্পাৎ হা·গিসি জওলো বিসংনি নামগিজা বেওয়ালখো চাকচিকামিং। 19 উনি জা·মানো বিয়া কনান হা·সংনি জাতস্নিখো ব·ন্নেতি বিনি আন·থাংনি মান্দিরাংখো উয়া হা·সংনি সাক্কাও বিল হ·ন্নামিং। 20 ইয়া গিম্মিক হং·না বিলসি রিৎচাব্রি সৎবংআমাং নাংআমিং। “উনি জা·মানো আগানসোগিবা শমুয়েলনি সালোনা দিপ্পাৎ ইসল মিত্তাম শাসন দাকগিবারাংখো হ·ন্নামিং। 21 উনি জা·মানো মান্দিরাং রাজা হাম·জক। উনো বিয়া বিন্যামীন মা·চংনি কীশনি দেফান্থি শৌলখো বিসংনা হ·ন্নামিং। শৌল বিলসি সৎব্রিনা শাসন দাক্কামিং। 22 জা·মানো ইসল শৌলখো জিত্তেতি দায়ূদখো রাজা দাক্কামিং। বিয়া দায়ূদনি গিম্মিন আগানামিং, ‘আংআ যিশয়নি দেফান্থি দায়ূদনি গিসেপো আংনি নামনিকা গিত্তা মান্দিখো সান্দিয়ে মান·জক। আংনি হা·সিকা গিত্তান বিয়া দাকনুয়া।’ 23 ইসল বিনি খু·রাচাক্কা গিত্তা ইয়া মান্দিনি দেরিচ্ছু-সু·রিচ্ছুরাংওনি জক্কেৎগিবা যীশুখো ইস্রায়েল মান্দিরাংনা রিমবামিং। 24 যীশুনি রি·বানা স্খাং ইস্রায়েলনি গিম্মিক মান্দিরাংচা যোহন ইয়া খাৎথাখো আগানফ্রাকামিং, পাপওনি গিসিক ফি·ল্লে মান্দিরাংনি রিপ্পলনা নাংআ। 25 কামখো বন·মানো যোহন আগানামিং, ‘আংআ সা, ইখো না·সং বাদিকে চানচিয়া? আংআ উয়া খ্রীষ্ট হং·জা। বিয়া আংনি জা·মান রি·বানুয়া, আরো আংআ বিনি জা·খপখো এংনাবা খ্রাগিবা হং·জা।’ 26 “জংআদারাং, অব্রাহামনি দেরিচ্ছু-সু·রিচ্ছুরাং আরো ইসলনা খা·ফাকগিবা গিপ্পিন জাতরাং, পাপওনি জক্কেতানি ইয়া খাৎথাখো আনচিংচান ওয়াত্তেতজক। 27 যিরূশালেমনি মান্দিরাং আরো বিসংনি দাল·গিবারাং যীশুখো হা·আইজাজক। ইনাআগ্রেবা আগানসোগিবারাংনি জে খাৎথাখো নেং·থাকানি সালরাংও পড়িয়া উখো বিসং হা·আইজাজক; উনি গিম্মিন বিসং যীশুখো গ্রো নাংএতি উয়া খাৎথাখো চু·সকেতজক। 28 বিসং যীশুখো সিয়ানি শাস্তিখো হ·ন্না গিত্তা মামুং হা·সেলখো মান·জাওবা বিখো স·ওতনা পীলাতখো আগানজক। 29 বিনি গিম্মিন রংথালগিবা শাস্ত্রও জেরাংখো চক্কা দংআমিং উয়া গিম্মিক চু·সকানি জা·মানো বিসং বিখো চিসলোনি রং·খাত্তি গোপ্পামিং। 30 ইন্দিবা ইসল বিখো সিয়ানিখো থাংচাএতজক। 31 গালীলওনি বিমুং যিরূশালেমচানা রি·বাগিবারাং বাং·আ সালোনা দিপ্পাৎ বিখো নিকনা মা·ন্নামিং। আনচিংনি মান্দিরাংচা বিসংআন দা·আও বিনি গিম্মিন সাক্ষি হ·ন্নিংজক। 32 “চিংআ না·সংনা ইয়া নাম্মা খাৎথাখো আগানিংআ, আনচিংনি ফাগিৎচামরাংচা ইসল জেখো খু·রাচাক্কামিং, 33 উখো বিয়া বিসংনি দেরিচ্ছু-সু·রিচ্ছুরাংনা, আগানস্খাওদে আনচিংনি গিম্মিন যীশুখো সিয়াওনি থাংচাএতি চু·সকেতজক। ইনি বিদিংও গীতরাংনি গ্মিগিবা গীতও ইয়া খাৎথা চক্কা দংআ: না·আ আংনি দেফান্থি, দা·আলান আংআ নাং·নি ফাগিবা হং·জক। 34 ইসল বিখো সিয়াওনি থাংচাএতজক আরো বিনি বে·এন মামুং সালোবা নাসিজানুয়া ইখো ইয়া খাৎথারাংও ইসল আগানজক, ‘রংথালা আরো ফাত্তিয়ানি গিম্মিন দায়ূদচা আংআ জেখো খু·রাচাকজক উখো আংআ নাং·না হ·ন্নুয়া।’ 35 উনি গিম্মিন দা·আও গি·সা হা·দামও চক্কা দংআ: নাং·না খা·ফাকগিবানি বে·এনখো না·আ নাসিনা হন·জানুয়া। 36 “দায়ূদ বিনি চাসংনি মান্দিরাংনি গিসেপো ইসলনি মিকসংআখো চু·সকানি জা·মানো সিজক। বিনি ফাগিৎচামরাংমুং বিখো গোপ্পানি জা·মানো বিনি বে·এন নাসিজক। 37 “ইন্দিবা ইসল জেখো সিয়াওনি থাংচাএতজক বিনি বে·এন নাসিজাজক। 38 ইনি গিম্মিন আংনি জংআদারাং, না·সংনি ইখো হা·আইনা নাংআ, যীশুচান না·সংনা পাপওনি ক্ষেমা মা·ন্নানি গিম্মিন আগানফ্রাকিংজক। 39 না·সং মোশিনি নিয়ামরাংচা পাপনি শাস্তিওনি জকনা মান·জাজক, ইন্দিবা যীশুখো বিবিরা·গিবা পাপনি শাস্তিওনি জকনা মা·ন্না। 40 ইনি গিম্মিন না·সং সিমসাকবো, জেদাক্কে আগানসোগিবারাংনি আগানসোগিবা ইয়া খাৎথারাং না·সংনি সাক্কাও হং·জা: 41 না·সং ইসলখো চন্নিকগিবারাং, না·সং খিন্নাবো- না·সং আইয়াও ইনমানবো আরো সিবো; মুয়ানা না·সংনি চাসংওন আংআ ইন্দাকগিবাখো দাকনা রি·য়াংইংজক জেনি খাৎথাখো না·সং মামুং দাক্কেবা বিবিরা·জানুয়া, দারাং আগানোবা বিবিরা·জানুয়া।” 42 পৌল আরো বার্ণবা থম·দাকরামখো ওয়াত্তে রি·য়াংমিত্তিংও মান্দিরাং বিসংখো মল·মলজক জেদাক্কে বিসং সালগিপ্পিন নেং·থাকগিবা সালো ইনি গিম্মিন আরোবা আগানা। 43 মান্দিরাং থম·দাকরামওনি রি·য়াংআনি জা·মানো বাং·আ যিহূদীরাং আরো যিহূদী থরমও বিবিরা·গিবা ইসলনা খা·ফাকগিবা জাত গিপ্পিনরাং পৌল আরো বার্ণবামুং রি·য়াংফাজক। উনোন উয়া মান্দিরাংমুং পৌল আরো বার্ণবা খাৎথা আগানজক আরো বিসংখো ইসলনি খা·সাচাক্কাও খেম·খেম দংনা খা·দংএতজক। 44 জা·মান সকবাগিবা নেং·থাকানি সালো সংজিলমানি মান্দি গিম্মিক ইসলনি খাৎথাখো খিন্নানা থম·থকজক। 45 মান্দি জিলমাখো নিক্কে যিহূদীরাং মিকনেংবিজক আরো পৌলনি আগানগিবারাংখো জিজক। 46 উনোন পৌল আরো বার্ণবা খেনমানগিজা বিসংনা ইন্দাকে আগানচাকজক, “ইসলনি খাৎথাখো না·সংচা স্খাং আগান্না নাংআমিং, ইন্দিবা না·সং উখো জেগালজক আরো ফাংনাজলনি জাংগিখো মা·ন্না খ্রাগিবা ইন্নে আন·থাংথাংখো চানচিজা উনা গিপ্পিন জাতরাংচা চিংআ ফি·ল্লিংজক। 47 ইনি হা·সেল ইরাং হং·জক, গিত্তেল আনচিংনা ইয়া খাৎথাখো আগানজক, ‘আংআ গিপ্পিন জাতরাংচা নাং·খো সেং·আ গিত্তা দাকজক, জেদাক্কে নাং· গিত্তা হা·গিলসাক গিম্মিকনি মান্দিরাং পাপওনি জক্কাখো মা·ন্না।’ ” 48 গিপ্পিন জাতরাং ইখো খিন্নাএ খুসি হং·জক আরো গিত্তেলনি খাৎথানি গিম্মিন রাসং দাকজক; আরো ফাংনাজলনি জাংগিখো মা·ন্না ইসল জেরাংখো বাচ্ছিয়ামিং বিসং বিবিরা·জক। 49 গিত্তেলনি খাৎথা উয়া জওলনি গিম্মিক হা·দামচা গিপ্পাংজক। 50 ইন্দিবা যিহূদীরাং ইসলখো অলাখিগিবা মিচিকরাংখো আরো সংজিলমানি দাল·গিবা মান্দিরাংখো খা·আওনাংএতজক। ইন্দাকে বিসং পৌল আরো বার্ণবাখো গিচ্চিয়েতি উয়া জওলনিখো বিসংখো হং·খাত্তেতজক। 51 উনোন পৌল আরো বার্ণবা উয়া মান্দিরাংনি সাক্কাও বিসংনি জা·চকনি হা·দুলাখো দকফ্রংএ ইকনিয় সংজিলমাওনা রি·য়াংজক। 52 ইন্দিবা উনি জা·রিকগিবারাং খুসি হং·আও আরো গিসিক রংথালাও গাপজক।

ওয়াত্তেতারাং 14

1 ইকনিয় সংজিলমাও পৌল আরো বার্ণবা বিসংনি দাকবেওয়াল গিত্তান যিহূদীরাংনি থম·দাকরামচা রি·য়াংজক। উয়ো বিসং ইন্দাকফিল্লে খাৎথা আগানানি গিম্মিন যিহূদী আরো ইসলখো অলাখিগিবা বাং·বিয়া গিপ্পিন জাতরাংআন বিবিরা·জক। 2 ইন্দিবা বিবিরা·গিজাগিবা যিহূদীরাং গিপ্পিন জাতরাংখো খা·আওনাংএতে বিসংনি গিসিকখো বিবিরা·গিবা জংআদারাংনি সাক্কাও মিকনেংএতজক। 3 পৌল আরো বার্ণবা উয়া সংজিলমাও বাং·গিজা সালনা দংজক আরো খেনমানগিজা গিত্তেলনি খাৎথাখো আগানফ্রাকনা হা·বাচেংজক। গিত্তেলনি খা·সাচাক্কানি গিম্মিন বিসংনি আগানফ্রাকগিবারাং বিবি হং·আ ইখো ফিন্নিকনা পৌল আরো বার্ণবাখো আইয়াও ইনমানগিবা কামরাংখো দাকনা বিল হন·জক। 4 উনি গিম্মিন সংজিলমানি মান্দিরাং দিংথাং হং·আংজক; সাবা সাবা যিহূদীরাংনা চাকজক, দা·আবা সাবা সাবা ওয়াত্তেতারাংনা চাকজক। 5 উনোন যিহূদী হং·গিজাগিবারাং আরো যিহূদীরাং বিসংনি দাল·গিবারাংমুং আপসান হং·এ পৌল আরো বার্ণবাখো গিচ্চিয়েতনা আরো রং·থিচা গোথাতনা খু·চিংজক। 6 ইন্দিবা পৌল আরো বার্ণবা উখো হা·আইনা মা·ন্নে লুকায়নিয়া হা·দকনি গিসেপো লুস্ত্রা আরো দর্বী সংজিলমাও আরো উনি কেচ্চিরাংনি হা·দামও খাত্তে দংনা হা·বাচেংজক। 7 উয়া হা·দামরাংচা বিসং খ্রীষ্টনি নাম্মা খাৎথাখো আগানফ্রাকনা হা·বাচেংজক। 8 লুস্ত্রা সংজিলমাও জা·খোরা মান্দি সাকসা আসংএ দংনুয়ামিং। বিয়া আৎচিয়াওনিন জা·খোরামিং আরো মামুং সালোবা রামা রি·খুজামিং। 9 বিয়া পৌলনি আগানাখো খিন্নাংআমিং। উনো পৌল বিচাখো স্রংএ নিএতজক আরো নামনা বিনি বিবিরা·আ দংআখো নিক্কে বিখো রাক্কে রিংগামে আগানজক, “নাং·নি জা·চকও বিল হ·ন্নে চাদেংবো।” উনোন উয়া মান্দি চাচ্রকে চাখাত্তে রামা রি·না হা·বাচেংজক। 11 পৌলনি ইন্দাকাখো নিক্কে মান্দিরাং লুকায়নীয় খু·সুকচা চ্রিকে আগানজক, “মিত্তেরাং মান্দি হং·ফিলে আনচিংচা হং·ওনবাজক।” 12 উনি গিম্মিন মান্দিরাং বার্ণবানি বিমুংখো জেউস আরো পৌলনি খাৎথা আগানানি গিম্মিন বিনি বিমুংখো দনজক হের্মেস। 13 জেউস মিত্তেনি নক সংজিলমানি হা·ফালচা দংআমিং। সংজিলমানি দ·গা কেচ্চিও জেউস মিত্তেনি খামাল মা·সুখো আরো মালাখো রা·এ রি·বাজক, মুয়ানা উয়া খামাল আরো মান্দি গিম্মিকান পৌল আরো বার্ণবানা উখো বলি হ·ন্না হাম·জক। 14 বার্ণবা আরো পৌল উখো খিন্নাএ বা·রাথাংখো চিত্তে খাত্তাংএ মান্দিরাংচা রি·য়াংজক আরো চ্রিকে আগানজক, 15 “রিপ্পেংরাং, না·সং মুয়ানা ইন্দাকে দাক্কিংআ? চিংআদে মান্দি মা·মাংসা, না·সং গিত্তান চিংনি গিসিক দাক্কা। চিংআ না·সংচা নাম্মা খাৎথাখো আগানফ্রাকিংআ জেদাক্কে না·সং ইন্দাকা নামগিজারাংখো ওয়াত্তে থাংগিবা ইসলওনা ফি·ল্লা। বিয়ান সিলগা, হা·গিলসাক, সাগাল আরো উরাংনি গিসেপো দংগিবা গিম্মিকখোন থারিজক। 16 স্খাংও গিম্মিক জাতখোন বিয়া বিসংনি হা·সিকা গিত্তা রি·না হন·জক, 17 ইন্দিবা বিয়া ফাংনান আন·থাংনি গিম্মিন সাক্ষি হন·জক। বিয়া সিলগাওনি মিকখা ওয়াএতে আরো নাংআ গিত্তা মিবিথিরাংখো হ·ন্নে বিনি খা·সাচাক্কাখো না·সংনা ফিন্নিকজক। বিয়া চা·আনিরাংখো বাং·এ হ·ন্নে না·সংনি গিসিকখো হান·সেংএতজক।” 18 ইরাংখো আগানেবা বিসংচা বলি হ·ন্নানিখো মান্দিরাংখো দনচাংএতনা নাম্মেন নেং·জক। 19 জা·মানো আন্তিয়খিয়া আরো ইকনিয়নি মিত্তাম যিহূদীরাং রি·বাএ পৌল আরো বার্ণবানি সাক্কাও মান্দিরাংখো খা·আওনাংএতজক। উনোন মান্দিরাং পৌলখো রং·থিচা গোথাতজক আরো বিয়া সিজক চানচিয়ে সংজিলমানি হা·ফালচা বিখো সালরুরুয়ে রা·আংজক। 20 ইন্দিবা জা·মানো খ্রীষ্টও বিবিরা·গিবারাং বিনি কেচ্চিরাংও থম·দাকানি জা·মানো বিয়া চাখাত্তে সংজিলমাচানা রি·য়াংফিলজক। সালগিপ্পিনও বিয়া আরো বার্ণবা দর্বী সংজিলমাও রি·য়াংজক। 21 দর্বী সংজিলমাও নাম্মা খাৎথাখো আগানফ্রাকে পৌল আরো বার্ণবা বাং·আখোন জা·রিকগিবা থারিজক। উনি জা·মানো বিসং লুস্ত্রা, ইকনিয় আরো পিষিদিয়া হা·দকনি আন্তিয়খিয়াওনা ফি·ল্লাংএ উনি জা·রিকগিবারাংনি বিবিরা·আখো বাং·এতি বিসংখো বিল্লাকেতজক আরো বিবিরা·আও খেম·খেম দংখামনা খা·দংএতজক। বিসং আগানজক, “ইসলনি সংনকো নাপনা স্খাং আনচিংনি বাং·এ গিচ্চিয়েতাখো চাকনা নাংআ।” 23 বিসং গিম্মিক মন্ডলীও দাল·গিবারাংনা কাম হন·জক আরো জে গিত্তেলখো বিসং বিবিরা·আমিং, বি·এ আরো অকগুমিন দংএ উয়া গিত্তেলনি জাক্কোন মন্ডলীনি মান্দিরাংখো ফাকওয়াকেতজক। 24 জা·মানো পৌল আরো বার্ণবা পিষিদিয়া হা·দক গিত্তা পাম্‌ফুলিয়া হা·দকচানা সকজক। 25 বিসং পর্গা সংজিলমাও ইসলনি খাৎথাখো আগানফ্রাকে অত্তালিয়াওনা রি·য়াংজক। 26 জা·মানো অত্তালিয়াওনি জাহাসও দাক্কে সিরিয়া হা·সংনি আন্তিয়খিয়াওনা ফিল·বাজক। জে কামখো বিসং দা·আও ব·ন্নেতজক উয়া কামনা ইয়া আন্তিয়খিয়াওন ইসলনি খা·সাচাক্কাও বিসংখো ফাকওয়াত্তেতামিং। 27 আন্তিয়খিয়াওনা সক্কে মন্ডলীনি গিম্মিকখো বিসং হা·দামসাও থম·দাকেতজক আরো ইসল বিসং গিত্তা জেখো দাকজক উয়া গিম্মিকখোন আগানজক। ইসল বাদিকে দাক্কে গিপ্পিন জাতরাংনা চলখো দাক্কে হ·ন্নামিং জেদাক্কে বিসং খ্রীষ্টখো বিবিরা·না মা·ন্না উখোবা আগানজক। 28 উনি জা·মানো পৌল আরো বার্ণবা জা·রিকগিবারাংমুং উয়ো সাল বাং·এ দংফাজক।

ওয়াত্তেতারাং 15

1 যিহূদিয়া হা·দকোনি মিত্তাম মান্দিরাং সিরিয়া হা·সংনি আন্তিয়খিয়াওনা রি·বাজক আরো বিবিরা·গিবা জংআদারাংনা ইন্দাকে স্খিনা হা·বাচেংজক, “মোশিনি নিয়াম গিত্তা না·সংখো বিগিল রাতজাওদে না·সং মামুং দাক্কেবা পাপওনি জকনা মান·জানুয়া।” 2 উনি গিম্মিন পৌল আরো বার্ণবামুং ইয়া মান্দিরাং নাম্মেন ইনগ্রিকজক। জা·মানো ইন্দাকে থিক হং·জক, পৌল আরো বার্ণবা আন্তিয়খিয়ানি মিত্তাম বিবিরা·গিবারাংখো রা·এ যিরূশালেমচানা রি·য়াংনুয়া আরো ওয়াত্তেতারাংমুং আরো মন্ডলীনি দাল·গিবারাংমুং ইনি গিম্মিন খাৎথা আগান্নুয়া। 3 আন্তিয়খিয়ানি মন্ডলী বিসংনি রি·য়াংআনিখো দাকচাকে হন·জক। ফৈনিকিয়া আরো শমরিয়া হা·দক গিত্তা রি·য়াংমিত্তিংও পৌল আরো বার্ণবা মান্দিরাংনা আগানজক, গিপ্পিন জাতরাং বাদিকে দাক্কে ইসলচানা ফিল·জক। ইখো খিন্নাএ বিবিরা·গিবা জংআদারাং গিম্মিকান খুসি হং·বিজক। 4 পৌল আরো বার্ণবা যিরূশালেমচানা রি·বাও মন্ডলীনি মান্দিরাং, দাল·গিবারাং আরো ওয়াত্তেতারাং বিসংখো রা·চাকজক। বিসংচা ইসল জেখো দাক্কামিং উয়া গিম্মিকখোন বিসং গিম্মিকনা আগানজক। 5 ফরীশীনি মিত্তাম মান্দিরাং বিবিরা·আমিং। উয়া বিবিরা·গিবারাং চাদেংএ আগানজক, “গিপ্পিন জাতরাংনি বিগিল রাতনা নাংআ আরো বিসং মোশিনি নিয়ামরাংখো মানিখানা ইন্নে বিসংখো গি·য়েৎনা নাংআ।” 6 উনোন ওয়াত্তেতারাং আরো মন্ডলীনি দাল·গিবারাং ইখো রা·এ চানচিনা হা·দাম দামসানো থম·দাকজক। 7 বাং·এ খাৎথা আগানানি জা·মানো পিতর চাখাত্তে বিসংনা আগানজক, “জংআদারাং, না·সংদে ইখো হা·আইয়ান, স্খাংও না·সংওনি ইসল আংখো বাচ্ছিয়ে রা·আমিং জেদাক্কে গিপ্পিন জাতরাং আংনি খু·সুকনিখো নাম্মা খাৎথাখো খিন্নাএ বিবিরা·আ। 8 ইসল গিম্মিকনি খা·থংখো হা·আইয়া। বিয়া আনচিংনা জেদাক্কে গিসিক রংথালগিবাখো হ·ন্নামিং, গিপ্পিন জাতরাংনাবা উয়ানদাক্কে গিসিক রংথালগিবাখো হ·ন্নে ইন্দাকে সাক্ষি হ·ন্নামিং, বিসংবা পাপওনি জকজক। 9 বিয়া আনচিংনি আরো বিসংনি গিসেপো দিংথাংগ্রিকানি মামুংখো দনজাজক, মুয়ানা বিসংনি বিবিরা·আনি গিম্মিন বিয়া বিসংনি খা·থংখোবা থাল্লেতজক। 10 ইন্দাকোদে আনচিংনি ফাগিৎচামরাং বা আনচিং জেখো রিপ্পিএ রা·না মান·জাজক উখো বিবিরা·গিবা গিপ্পিন জাতরাংনি ফাক্রংও দি·এ মুয়ানা না·সং ইসলখো রুরাএ নিনা হা·ম্মিংআ? 11 গিত্তেল যীশুনি খা·সাচাক্কাও বিবিরা·গিবা গিপ্পিন জাতরাং জেদাক্কে পাপওনি জক্কাখো মা·ন্না উয়ানদাক্কে চিংআবা জক্কাখো মান·জক ইন্নে চিংআ বিবিরা·আ।” 12 উনোন খ্রিমানি গিম্মিকান স্রক দংজক আরো পৌল আরো বার্ণবা গিত্তা ইসল গিপ্পিন জাতরাংও জে আইয়াও ইনমানগিবা কামরাংখো দাক্কামিং উখো বিসংনি খু·সুকচান খিন্নানা হা·বাচেংজক। 13 বিসংনি খাৎথা আগানা বন·মানো যাকোব আগানজক, “জংআদারাং, খিন্নাবো। 14 ইসল বিনি আন·থাংনি মান্দি হং·খানা গিপ্পিন জাতরাংওনি মিত্তাম মান্দিখো বাচ্ছিয়ে রা·এ ফিন্নিকজক, গিপ্পিন জাতরাংনাবা বিনি চানচিয়ানি দংআ। ইয়া খাৎথাখোন শিমোন-পিতর আনচিংনা আগানজক। 15 ইয়া খাৎথামুং আগানসোগিবারাংনি খাৎথাবা আপসান হং·আ, মুয়ানা শাস্ত্রও চক্কা দংআ: 16 ‘ইনি জা·মানো আংআ রি·বাএ দায়ূদনি গা·আকগিবা নকখো দা·আবা রিকফিলনুয়া। ব·ন্নাংগিবাখো দা·আবা থারিনুয়া, দা·আবা উখো থিক দাকনুয়া; 17 জেদাক্কে সাকগিপ্পিন মান্দিরাং, আগানস্খাওদে জে গিপ্পিন জাতরাংখো আংনি ইন্নে রিক্কামজক বিসং আংখো সান্দিনা মা·ন্না।’ গিত্তেল, জে ইন্দাকগিবা কামখো দাক্কিংআ বিয়া ইয়া খাৎথাখো আগানিংআ। 18 স্খাংওনি ইরাং বিনি গিসিকো দংআমিং।” 19 যাকোব আরোবা আগানজক, “ইনি গিম্মিন আংনি চানচিয়া গিত্তাদে ইসলচানা ফিল·বাগিবা গিপ্পিন জাতরাংখো আনচিংনি দুক হ·ন্না নাংজা। 20 উনাবাত্তে আনচিং বিসংচা ইন্দাকে চকনা, জেদাক্কে বিসং মিত্তে বিমাংমুং দাকগিবা গিম্মিকওনিখো আরো থি·ল্লেকাওনি চে·ল্লে দংআ, আরো গিত্তক রিম·সতে মারিগিবানি বে·এনখো আরো হান·চিখো জেদাক্কে বিসং রিংজা। 21 ইয়া গি·য়েতারাংখো বিসংনা হ·ন্না নাম্মা, মুয়ানা মোশি জেখো আগানজক উখো স্খাংওনিন আগানফ্রাকিংজক আরো বিনি চকগিবাখো নেং·থাকানি সালরিক্ষিত থম·দাকরামরাংও পড়িয়া হং·ইংজক।” 22 উনোন ওয়াত্তেতারাং, মন্ডলীনি দাল·গিবারাং আরো মন্ডলীনি সাকগিপ্পিন মান্দিরাং ইন্দাকে থিক দাকজক, বিসং আন·থাংথাংনি মিত্তাম মান্দিখো বাচ্ছিয়ে রা·এ পৌল আরো বার্ণবামুং আন্তিয়খিয়াওনা ওয়াত্তেতনুয়া। বিসং যিহূদা আরো সীলখো বাচ্ছিয়ে রা·জক। ইয়া যিহূদাখো বর্‌শাববা রিক্কামনুয়ামিং। বিবিরা·গিবা জংআদারাংনি গিসেপো ইয়া সাকগ্মিআন দাল·গিবামিং। 23 বিসংমুং ইয়া চিঠিখো ওয়াত্তেতজক: আন্তিয়খিয়া, সিরিয়া আরো কিলিকিয়ানি বিবিরা·গিবা গিপ্পিন জাতনি জংআদারাংচা চিংআ ওয়াত্তেতারাং আরো মন্ডলীনি দাল·গিবারাং, আগানস্খাওদে না·সংনি জংআদারাং ইয়া চিঠিখো চক্কিংজক। না·সংনি নামখানা। 24 “চিংআ ইখো খিন্নানা মান·জক, চিংনি গিসেপোনি মিত্তামরাং রি·য়াংএ বাং·আখো আগানে না·সংনি গিসিকখো জাব্রাংএতে সা·দিকেতজক, ইন্দিবা চিংআ বিসংখো ইন্দাকে কাম দাকনা আগানজা। 25 ইনি গান্দা চিংআ গিম্মিকান আপসান হং·এ মিত্তামখো বাচ্ছিয়ে রা·এ চিংনি নামনিকগিবা রিপ্পেং বার্ণবা আরো পৌলমুং না·সংচা বিসংখো ওয়াত্তেতজক। 26 বার্ণবা আরো পৌল আনচিংনি গিত্তেল যীশু খ্রীষ্টনি গিম্মিন সিনা হা·ম্মামিং। 27 চিংআ যিহূদা আরো সীলখো ওয়াত্তেতজক জেদাক্কে চিংনি চকগিবাখো বিসং খু·সুকচাবা না·সংনা আগানা। 28 গিসিক রংথালগিবা আরো চিংআ ইখোন নাম্মা ইন্নে চানচিজক, ইয়া নাংগিবারাংনি আগ্রে মামুংখো না·সংনি সাক্কাও বোজা দি·গাতজাখানা। 29 উয়া নাংগিবারাং হং·জক- না·সং মিত্তে বিমাংনা চিন·গিবা চা·আখো দা·আ চা·আবো, হান·চিখো দা·আ রিংআবো, গিত্তক রিম·সত্তে দকথাৎগিবাখো দা·আ চা·আবো আরো দা·আ থি·ল্লেকাবো। ইরাংখো দাকজাওদে না·সং নাম্মাখোন দাকনুয়া। সালাম।” 30 পৌল, বার্ণবা আরো উয়া মান্দিরাংখো ওয়াত্তেতানি জা·মানো বিসং আন্তিয়খিয়াওনা রি·য়াংজক। উয়ো বিসং মন্ডলীনি মান্দিরাংখো আপসান থম·দাকে উয়া চিঠিখো বিসংনা হন·জক। 31 মান্দিরাং চিঠিখো পড়িজক আরো উয়ো জে থম·থমানি খাৎথা দংআমিং উনি গিম্মিন খুসি হং·জক। 32 যিহূদা আরো সীল আন·থাংথাংবা আগানসোগিবা হং·আমিং; উনি গিম্মিন বিসং বাং·আ খাৎথাখো আগানে উনি জংআদারাংখো খা·দংএতজক আরো বিসংনি বিবিরা·আখো বাং·এতে বিসংখো বিল্লাকেতজক। 33 আন্তিয়খিয়াও বিসং সালসা সালগ্মি দংজক। যিরূশালেমনি জেরাং যিহূদা আরো সীলখো আন্তিয়খিয়াচা ওয়াত্তেতামিং, অন্তিয়খিয়ানি জংআদারাং বিসংখো সালাম হ·ন্নে যিহূদা আরো সীলখো দা·আবা বিসংচা ওয়াত্তেতফিলজক, 35 ইন্দিবা পৌল আরো বার্ণবা আন্তিয়খিয়াওন দংজক। উয়ো বিসং বাং·আরাংমুং গিত্তেলনি খাৎথাখো স্খিনা আরো আগানফ্রাকনা হা·বাচেংজক। 36 সালসা সালগ্মি রি·য়াংআনি জা·মানো পৌল বার্ণবাখো ইনজক, “জে হা·দামরাংচা আনচিং গিত্তেলনি খাৎথাখো আগানফ্রাকজক, রি·বো, দা·আওন উয়া হা·দামরাংচা রি·য়াংএ বিবিরা·গিবা জংআদারাংমুং গ্রংনাজক আরো বিসং বাদিকে দাক্কে দংআ উখো নিনা।” 37 উনোন বার্ণবা যোহনখো রিম্মাংফানা হাম·জক। ইয়া যোহনখো মার্ক ইন্নেবা রিক্কামনুয়ামিং। 38 ইন্দিবা পৌল বিখো রিম্মাংআখো নামজা চানচিজক, মুয়ানা মার্ক পাম্‌ফুলিয়াও বিসংখো ওয়াত্তে রি·য়াংআমিং আরো বিসংমুং কাম রিম·জাজক। 39 উনোন পৌল আরো বার্ণবামুং আপসান হং·জাজক, বিসং সাকসা সাকগিপ্পিনচানি দিংথাং হং·গ্রিকজক। বার্ণবা মার্কখো রা·এ জাহাসও দাক্কে সাইপ্রাসওনা রি·য়াংজক, আরো পৌল সীলখো বাচ্ছিয়ে রা·জক। 40 উনোন আন্তিয়খিয়ানি জংআদারাং পৌল আরো সীলখো গিত্তেলনি খা·সাচাক্কাও হ·ন্নানি জা·মানো বিসং রি·য়াংজক। 41 পৌল সিরিয়া আরো কিলিকিয়া গিত্তা রি·য়াংএ গিম্মিক মন্ডলীরাংনি বিবিরা·আখো বাং·এতে বিসংখো বিল্লাকেতজক।

ওয়াত্তেতারাং 16

1 জা·মানো পৌল দর্বী আরো লুস্ত্রা সংজিলমাচানা রি·য়াংজক। উয়ো তীমথিয় মিংগিবা জা·রিকগিবা সাকসা দংনুয়ামিং। বিনি মা·গিবা খ্রীষ্টখো বিবিরা·গিবা সাকসা যিহূদী মিচিকমিং, ইন্দিবা বিনি ফাগিবাদে গ্রীকমিং। 2 লুস্ত্রা আরো ইকনিয় সংজিলমানি বিবিরা·গিবা জংআদারাং তীমথিয়খো নাম্মেন রাসং দাকনুয়ামিং। 3 পৌল তীমথিয়খো রিম্মাংফানা হা·ম্মামিং ইন্নে বিখো বিগিল রাতজক, মুয়ানা উয়া হা·দামরাংও দংগিবা যিহূদীরাং তীমথিয়নি ফাগিবাখো সাকসা গ্রীক ইন্নে হা·আইয়ামিং। 4 জা·মানো বিসং উয়া সংজিলমারাং গিত্তা রি·য়াংজক আরো যিরূশালেমনি ওয়াত্তেতারাং আরো মন্ডলীনি দাল·গিবারাংনি থিক দাকগিবা নিয়ামরাংখো মান্দিরাংনা আগানজক আরো উয়া নিয়ামরাংখো মানিখানা আগানজক। 5 ইন্দাকে মন্ডলীরাংনি মান্দিরাং খ্রীষ্টখো বিবিরা·আও বিল্লাকনা হা·বাচেংজক আরো বিসং বাৎরোরোজক। 6 গিসিক রংথালগিবা পৌল আরো বিনি রিপ্পেংরাংখো এশিয়া হা·দকো আগানফ্রাকনা হন·জাজক। উনোন বিসং ফরুগিয়া আরো গালাতিয়া হা·দকনি হা·দাম গিম্মিকচা রি·য়াংজক। 7 জা·মানো মুশিয়াওনা রি·বাএ বিসং বিথুনিয়া হা·দকচা রি·য়াংনা হাম·জক, ইন্দিবা যীশুনি গিসিক বিসংখো রি·য়াংনা হন·জাজক। 8 ইনি গিম্মিন বিসং মুশিয়া গিত্তা ত্রোয়া সংজিলমাচা রি·য়াংজক। 9 ওয়াল্লো পৌল ইন্দাকে মিকজুমাংখো নিকজক, ম্যাসিডোনিয়া হা·দকনি মান্দি সাকসা চাদেংএ বিখো মল·মলে আগানিংআ, “ম্যাসিডোনিয়াও রি·বাএ চিংনা দাকচাকবো।” 10 পৌল ইয়া মিকজুমাংখো নিক্কানি জা·মানো চিংআ উনোন ম্যাসিডোনিয়াচা রি·য়াংনা থারিজক, মুয়ানা চিংআ ইখো হা·আইনা মান·জক ম্যাসিডোনিয়ানি মান্দিরাংচা খ্রীষ্টনি গিম্মিন আগানফ্রাকনা ইন্নেন ইসল চিংখো রিক্কামজক। 11 জা·মানো চিংআ ত্রোয়াখো ওয়াত্তে জাহাসও দাক্কে সামথ্রাকীচানা রি·য়াংজক আরো সালগিপ্পিনো নিয়াপলি সংজিলমাও রি·বাজক। 12 উয়োনি চিংআ ফিলিপী সংজিলমাও রি·য়াংজক। ইয়া ফিলিপীন ম্যাসিডোনিয়ানি উয়া জওলনি দাল·বাৎগিবা সংজিলমা। উনি মান্দিরাং রোম হা·খিংনি মান্দি হং·আমিং। চিংআ সালসা সালগ্মি উয়া সংজিলমাও দংজক। 13 নেং·থাকানি সালো চিংআ সংজিলমানি দ·গাচিলনি হা·ফালও চিবিমানি সেফাংচা রি·য়াংজক; উয়ো যিহূদীরাংনি বি·আনি হা·দাম দংআ ইন্নে চানচিয়ামিং। উয়ো থম·দাকগিবা মিচিকরাংনি কেচ্চিও আসংএ চিংআ খাৎথা আগান্না হা·বাচেংজক। 14 খিন্নাগিবারাংনি গিসেপো থুয়াতীরা সংজিলমানি লুদিয়া মিংগিবা মিচিক সাকসা দংআমিং। বিয়া বা·রা গিচ্চাকম্রাংখো ফালনুয়ামিং। যিহূদী হং·জাওবা বিয়া ইসলখো অলাখিনুয়ামিং। গিত্তেল লুদিয়ানি খা·থংখো ইন্দাকে এংফ্রাকেতজক জেদাক্কে বিয়া পৌলনি খাৎথাখো গিসিক নাংএ খিন্নাএ বিবিরা·আ। 15 ইনি গিম্মিন বিয়া আরো বিনি নক গিম্মিকান রিপ্পলজক। ইনি জা·মানো বিয়া ইন্দাকে চিংনা আগানজক, “আংখো না·সং গিত্তেলখো বিবিরা·গিবা ইন্নে চানচিওদে আংনি নক্কো রি·বাএ দংবো।” ইন্দাকে আগানে বিয়া চিংখো মল·মলে বিনি নকথাংচা রিম্মাংজক। 16 সালসাও চিংআ উয়া বি·আনি হা·দামচা রি·য়াংমিত্তিংও নকখল মিচিক সাকসাখো চিংআ গ্রংজক। বিখো গিসিক নামগিজাগিবা মা·ন্নানি গিম্মিন বিয়া চাসং জা·মাননি খাৎথারাংখো আগান্না মা·ন্নুয়ামিং। উনি গিম্মিন বিনি নকগিবারাংনি লাভ হং·নুয়ামিং। 17 উয়া মি·চিক পৌল আরো চিংখো জা·রিকে চ্রিকে ইন্নুয়ামিং, “ইয়া মান্দিরাং চুবাৎগিবা ইসলনি নকখল হং·আ। বাদিকে দাক্কে পাপওনি জকনা মা·ন্না উখোন বিসং না·সংনা আগানিংআ।” 18 বিয়া বাং·আ সালনা দিপ্পাৎ ইন্দাকে দাকজক। জা·মানো পৌল ইন্দাকফিল্লে খা·আওনাংআনি গিম্মিন হান·ফিলে বিয়া উয়া গিসিক নামগিজাগিবাখো আগানজক, “যীশু খ্রীষ্টনি বিমুংও আংআ নাং·খো গি·য়েতিংআ, ইয়া মিচিকনি নিং·আওনি হং·খাতাংবো।” আরো উনোন উয়া গিসিক হং·খাতাংজক। 19 মান·দাপজানাজক ইন্নে উয়া মিচিকনি নকগিবারাং পৌল আরো সীলখো রি·ম্মে সংজিলমানি দাল·গিবারাংচা সাল্লে রিম্মাংজক। 20 উনি জা·মানো বিসং শাসন দাকগিবারাংচা বিসংখো রিম্মাংএ আগানজক, “ইয়া মান্দিরাং আনচিংনি সংজিলমাও গোলমাল দাক্কিংজক। বিসং যিহূদী হং·আ। 21 ইরাং ইন্দাকগিবা দাকবেওয়ালরাংখো স্খিংআ জেখো রোমান হং·এ আনচিংনি রা·চাকনা বা মানিয়াদে নিয়ামখো চাংফেংগিবা কাম হং·আ।” 22 সাকগিপ্পিন মান্দিরাংবা পৌল আরো সীলখো চাংফেংএ বিসংমুং নাংরিমজক। উনোন শাসন দাকগিবারাং বিসংনি বা·রাচলাখো চিত্তে বেতচা দকখানা গি·য়েৎজক। 23 বেতচা বাং·এ দক্কানি জা·মানো বিসংখো জেলো দনজক, আরো নাম্মেদাক্কে নিথিমখানা জেলনি নিথিমগিবাখো গি·য়েৎজক। 24 জেলখো নিথিমগিবা উয়া গি·য়েতাখো মা·ন্নে পৌল আরো সীলখো জেলনি নিং·আচানা রিম্মাংজক আরো বিসংনি জা·চকরাংখো বলথংও থেক্কে দনজক। 25 উনো ওয়ালজাচ্চিমাং হং·জকমিং। পৌল আরো সীল বি·ইংআমিং আরো ইসলখো মিৎথেলে গীতখো রিং·আমিং। সাকগিপ্পিন বন্দিরাং উখো খিন্নাংআমিং। 26 রাং·গিত্তিক বাংগুরিজক আরো উনি গিম্মিন জেলনক দিল·দিলজক। উনোন জেলনি গিম্মিক দ·গারাং আরো বন্দিরাংখো খাগিবা জেংজুলরাং গো·ওকথকজক। 27 জেলখো নিথিমগিবা মিকরাকজক আরো জেলনি দ·গারাংখো এংআখো নিক্কে মি·ল্লামখো রং·খাতে আন·থাং সিনা হাম·জক। গিম্মিক বন্দিরাং খাত্তাংজক ইন্নে বিয়া চানচিজক। 28 উনোন পৌল চ্রিকে আগানজক, “দা·মো, আন·থাংনি নামগিজাখো দা·আ দাক্কাবো; চিংআ গিম্মিকান ইনো দংআ।” 29 উনোন উয়া নিথিমগিবা সাকসাখো চাক্কি রা·বাখানা আগানে আন·থাং খাত্তাংএ নিং·আচা রি·য়াংজক আরো খেন্নানা থিল·থিলে পৌল আরো সীলনি জা·চকো গা·আকজক। 30 উনি জা·মানো বিয়া পৌল আরো সীলখো হা·ফালচা রিমবাএ সিং·জক, “আগানবো, পাপওনি জকনা আংনি মুয়াখো দাকনা নাংনুয়া?” 31 বিসং আগানজক, “না·আ আরো নাং·নি নকগিম্মিকান গিত্তেল যীশুখো বিবিরা·বো, ইন্দাকোদে পাপওনি জকনা মা·ন্নুয়া।” 32 পৌল আরো সীল উনোন জেলখো নিথিমগিবা আরো বিনি নকনি গিম্মিকচা গিত্তেলনি খাৎথাখো আগানজক। 33 জেলখো নিথিমগিবা উনি ওয়াল্লোন পৌল আরো সীলখো রিম্মাংএ বিসংনি বে·এননি মাতগিবা হা·দামরাংখো সু·গালজক আরো বিয়া আরো বিনি নকগিম্মিকান উনোন রিপ্পলজক। 34 উনি জা·মানো বিয়া পৌল আরো সীলখো আন·থাংনি নকচা রিম্মাংএ চা·না হন·জক। ইসলখো বিবিরা·এ বিনি নকনি গিম্মিকান খুসি হং·বিজক। 35 সালগিপ্পিনো ফ্রিংও শাসন দাকগিবারাং বিসংনি সিপাইরাংচা আগানে ওয়াত্তেতজক, “উয়া মান্দিরাংখো ওয়াতবো।” 36 উনোন জেলখো নিথিমগিবা পৌলনা আগানজক, “নাং·খো আরো সীলখো ওয়াতখানা শাসন দাকগিবারাং আগানেতজক। না·সং দা·আও হং·খাতবাবো আরো থম·থমে রি·য়াংবো।” 37 উনোন পৌল উয়া সিপাইরাংনা আগানজক, “চিংআ রোমান, চিংখো বিচাল দাকগিজান গিম্মিকনি মিকখাংও বেতচা দকজক আরো জেলো দনজক। দা·আও শাসন দাকগিবারাং চিংখো সিউল দাক্কে ওয়াতনা হা·ম্মিংআমা? উয়াদে হং·জানুয়া; বিসং আন·থাংথাং রি·বাএ চিংখো হা·ফালচা রা·আংখানা।” 38 উয়া সিপাইরাং উনো ইয়া খাৎথাখো শাসন দাকগিবারাংনা আগানজক। শাসন দাকগিবারাং পৌল আরো সীলখো রোমনি মান্দি ইন্নে খিন্নাওন বিসং খেনজক। 39 বিসং পৌল আরো সীলচা রি·য়াংএ ক্ষেমা হাম·জক আরো বিসংখো জেলোনি হা·ফালচা রিমবাএ সংজিলমাখো ওয়াত্তে রি·য়াংখানা মল·মলজক। 40 পৌল আরো সীল জেলনি হং·খাতে হা·ফালচা রি·বাএ লুদিয়ানি নক্কো রি·য়াংজক। উয়ো বিবিরা·গিবা জংআদারাংমুং বিসং গ্রংজক। জংআদারাংখো খা·দংএতানি জা·মানো বিসং উয়োনি রি·য়াংজক।

ওয়াত্তেতারাং 17

1 পৌল আরো সীল আম্‌ফিপলি আরো আপল্লোনিয়া সংজিলমা গিত্তা থিষলনীকী সংজিলমাওনা রি·য়াংজক। উনো যিহূদীরাংনি থম·দাকরাম দামসা দংআমিং। 2 পৌল বিনি দাকবেওয়াল গিত্তান উয়া থম·দাকরামচা রি·য়াংজক আরো উনি রিত্তাপ রিত্তাপ চাংগিত্থাম নেং·থাকানি সালো মান্দিরাংমুং রংথালগিবা শাস্ত্রনিখো আগানজক। 3 মোশিহনি দুক চাকনা আরো সিয়ানি চাখাতনা নাংআমিং ইন্নে বিয়া মান্দিরাংনা আগানজক আরো ফিন্নিকজক। বিয়া আগানজক, “জে যীশুনি খাৎথাখো আংআ না·সংচা আগানফ্রাকিংআ উয়া যীশুন হং·জক খ্রীষ্ট।” 4 ইয়া খাৎথাখো খিন্নাএ বিবিরা·এ মিত্তাম যিহূদীরাং পৌল আরো সীলমুং নাংরিমজক। ইনাআগ্রেবা ইসলখো অলাখিগিবা বাং·বিয়া গ্রীকরাং আরো মংসংবাৎগিবা মিচিকরাংবা বাং·আন বিসংমুং নাংরিমজক। 5 ইন্দিবা যিহূদীরাং মিকনেংএ বাজালওনি নামগিজা মান্দিরাংখো থ·ম্মে রা·বাজক আরো সংজিলমাও গোলমাল দাকনা হা·বাচেংজক। জা·মানো পৌল আরো সীলখো সান্দিয়ে হা·ফালও মান্দিরাংচা বিসংখো রিমবানা বিসং যাসোননি নকচানা চাগ্রিমজক, 6 ইন্দিবা বিসং উয়ো বিসংখো মান·জাজক। উনোন বিসং যাসোন আরো বিবিরা·গিবা মিত্তাম জংআদারাংখো সাল্লাংএ সংজিলমাখো শাসন দাকগিবারাংচা রি·য়াংজক আরো চ্রিকে আগানজক, “হা·গিলসাক গিম্মিকখো বিলদিং বিলদাংএতগিবা মান্দিরাং দা·আও ইনোবা দংআ; 7 আরো যাসোন বিনি আন·থাংনি নক্কো বিসংখো নকচাকজক। বিসং গিম্মিকান সম্রাট কৈসরনি গি·য়েতাখো মানিগিজা ইন্দাকে আগানিংআ, বিনা আগ্রেবা যীশু মিংগিবা সাকগিপ্পিন রাজা দংআ।” 8 ইরাংখো আগানে উয়া যিহূদীরাং শাসন দাকগিবারাংখো আরো মান্দিরাংখো জাজ্রেংএতজক। 9 ইন্দিবা যাসোন আরো সাকগিপ্পিনরাং জকনা থাংখা হ·ন্নানি জা·মানো বিসং বিসংখো ওয়াতজক। 10 ওয়াল্লানি জা·মানো বিবিরা·গিবা জংআদারাং পৌল আরো সীলখো বিরয়াও ওয়াত্তেতজক। উয়ো সক্কে বিসং যিহূদীরাংনি থম·দাকরামচা রি·য়াংজক। 11 থিষলনীকীনি যিহূদীরাংনা বাত্তে বিরয়া সংজিলমানি যিহূদীরাংনি গিসিক দাল·বিয়ামিং। বিসং ইসলনি খাৎথাখো গিসিক নাংবিএ খিন্নাএ উখো রা·চাকজক। পৌলনি আগানগিবা বিবি হং·আমা উখো নিনা ফাংনাজ্রিং বিসং শাস্ত্রও সান্দিনুয়ামিং। 12 বাং·বিয়া যিহূদীরাং যীশুখো বিবিরা·জক; ইনাআগ্রেবা মংসংবাৎগিবা বাং·বিয়া গ্রীক মিচিকরাং আরো মি·আসারাংবা বিবিরা·জক। 13 থিষলনীকীনি যিহূদীরাং জেনসালো খিন্নানা মান·জক পৌল বিরয়াও ইসলনি খাৎথাখো আগানফ্রাকিংজক উনো বিসং উয়োনাবা রি·য়াংজক আরো মান্দিরাংখো খা·আওনাংএতে গোলমাল দাক্কেতজক। 14 বিবিরা·গিবা জংআদারাং উনোন পৌলখো সাগালনি রিক্কামো ওয়াত্তেতজক, ইন্দিবা সীল আরো তীমথিয় বিরয়াওন দংজক। 15 পৌলখো রিম্মাংফাগিবা মান্দিরাং বিখো এথেন্স সংজিলমাওনা রিমবাজক। জা·মানো উয়া মান্দিরাং সীল আরো তীমথিয়খো ইন্দাকে গি·য়েৎনা বিরয়াচা ফি·ল্লাংজক, জেদাক্কে সীল আরো তীমথিয় থেংরি রি·য়াংএ পৌলমুং নাংরিমা। 16 পৌল এথেন্স সংজিলমাও সীল আরো তীমথিয়না সেংসোমিত্তিংও উয়া সংজিলমাও মিত্তে বিমাং দাক্কানিরাং গাপ্পাখো নিকজক। উনি গিম্মিন বিনি গিসিক জাজ্রেংজক। 17 বিয়া থম·দাকরামও যিহূদীরাংমুং আরো ইসলখো অলাখিগিবা গ্রীকরাংমুং খাৎথা আগান্না হা·বাচেংজক। ইনাআগ্রে বাজালও রি·বাগিবারাংমিংবা বিয়া ফাংনাজ্রিং খাৎথা আগান্না হা·বাচেংজক। 18 উনোন ইপীকুরীয় আরো স্তোয়িকীয় দলনি মিত্তাম স্খিগিবারাং পৌলমুং জিগ্রিকনা হা·বাজক। বিসংনি গিসেপো মিত্তামরাং আগানজক, “ইয়া আগানবেল·বেলগিবা মান্দি মুয়াখো ইন্না হা·ম্মিংআ?” দা·আবা সাকগিপ্পিনরাং আগানজক, “বিয়া সংগিপ্পিননি মিত্তে দাক্কানি খাৎথারাংখো আগানফ্রাকিংআ।” পৌল যীশুনি গিম্মিন আরো সিয়ানি চাখাতফিল্লানি গিম্মিন আগানফ্রাকিংআমিং ইন্নে বিসং ইয়া খাৎথাখো আগানজক। 19 উনোন উয়া স্খিগিবারাং পৌলখো আরেয়পাগনি খ্রিমাওনা রিমবাজক। উয়ো বিসং পৌলখো সিং·জক, “জে গিত্তাল স্খিয়াখো না·আ হ·ন্নিংজক উয়া মুয়া, উখো চিংআ হা·আইনা মা·ন্নুয়ামা? 20 মুয়ানা নাং·নি আগানগিবাখো চিংনি নাচিলো আইয়াও ইনমানগিবা গিত্তা খিন্নাংআ। উনি গিম্মিন ইয়া খাৎথারাংনি অর্থ মুয়া হং·আ উখো চিংআ হা·আইনা হা·ম্মা।” 21 বিসং ইখো আগানজক মুয়ানা এথেন্সনি মান্দি গিম্মিকান আরো উয়া সংজিলমাও দংগিবা সংগিপ্পিননি মান্দিরাং গিত্তাল বিদিংখো রা·এ আগানে আরো খিন্নাএ সালখো রি·য়াংএতনুয়ামিং। 22 উনোন পৌল আরেয়পাগনি খ্রিমাও চাদেংএ আগানজক, “এথেন্স সংজিলমানি মান্দিরাং, খিন্নাবো। আংআ নিকনা মা·ন্নিংজক, না·সং গিম্মিক গিত্তান ইসলখো অলাখিগিবা হং·আ, 23 মুয়ানা আংআ রওমে না·সংনি অলাখিয়ানি বস্তুরাংখো নিমিত্তিংও ইন্দাকগিবা গি·সা গানচিখো নিকজক জেনি সাক্কাও চক্কা দংআ, ‘হা·আইগিজা মিত্তেনা মিকসংএ।’ না·সং হা·আইগিজা জেখো অলাখিয়া বিনি গিম্মিন আংআ না·সংচা আগানফ্রাকিংআ। 24 “ইসল, জে ইয়া হা·গিলসাকখো আরো উনি গিসেপো দংগিবা গিম্মিকখো থারিজক, বিয়ান সালগি আরো হা·গিলসাকনি গিত্তেল হং·আ। বিয়া জাকচা রিকগিবা মিত্তে নকরাংও দংজা। 25 বিয়া মামুংনান দিলজা, উনি গিম্মিন মান্দিনি জাকনিখো চি·ন্নে হ·ন্নাখোবা বিনি রা·চাকনা নাংজা, মুয়ানা বিয়ান মান্দি গিম্মিকনা জাংগিখো, বালজাংগিখো আরো মা·মান্থিখো হ·ন্না। 26 বিয়া মান্দি সাকসানিখো গিম্মিক জাতনি মান্দিখো থারিজক জেদাক্কে বিসং হা·গিলসাক গিম্মিকো সংদংনা মা·ন্না। বিসং বাসোকো বাও দংনুয়া উখোবা বিয়া থারিয়ে হন·জক। 27 ইসল ইয়া কামখো দাকজক জেদাক্কে মান্দি বিখো মা·ন্না খা·দংএ সান্দিয়া। ইন্দিবা বিয়া আনচিং সাকসাচানিবা চেল·জা, 28 মুয়ানা বিনি বিলচান আনচিং জাংগি থাংএ দংআ আরো রি·য়া-দোআ আরো থাংএবা দংআ। না·সংনি মিত্তাম কবিরাংবা আগানা, ‘চিংআবা বিনি দেদ্রাং।’ 29 “ইন্দাকোদে আনচিং ইসলনি দেদ্রাং হং·ওদে ইসলখো মান্দিনি জাকচা আরো চানচিয়াচা থারিগিবা সোনা, রূপা বা রং·থিনি মিত্তে বিমাং দাক্কাখো চানচিয়া আনচিংনা খ্রাজা। 30 চেংও মান্দিরাং হা·আইজামিং ইন্নে ইসল ইরাংখো নিক্কেবা নিকজা। ইন্দিবা দা·আওদে বিয়া গিম্মিক হা·দামচা মান্দি গিম্মিকখো পাপওনি গিসিক ফিল·খানা গি·য়েতিংজক, 31 মুয়ানা বিয়া ইন্দাকগিবা সালসাখো থিক দাকজক জেনসালো বিনি বাচ্ছিগিবা মান্দিচা বিয়া খাকখেৎ দাক্কে মান্দিরাংখো বিচাল দাকনুয়া। বিয়া উয়া মান্দিখো সিয়াওনি চাখাত্তেতি গিম্মিক মান্দিচা ইখো ফিন্নিকজক।” 32 সিগিবারাংনি দা·আবা থাংচাফিল্লানি খাৎথাখো খিন্নাএ মান্দিরাংওনি মিত্তামরাং খা·দিংস্থেকজক, ইন্দিবা সাকগিপ্পিনরাং আগানজক, “ইনি গিম্মিন নাং·নি আগানাখো চিংআ দা·আবা খিন্নানুয়া।” 33 উনোন পৌল উয়া খ্রিমাখো ওয়াত্তে রি·য়াংজক।। 34 মিত্তাম মান্দিরাং পৌলমুং নাংরিমজক আরো বিবিরা·জক। উয়া বিবিরা·গিবারাংনি গিসেপো দিয়নুষিয় মিংগিবা আরেয়পাগনি খ্রিমানি সাকসা মান্দি, দামারিস্‌ মিংগিবা মিচিক সাকসা আরো বিসংমুং সাকগিপ্পিনরাংবা দংআমিং।

ওয়াত্তেতারাং 18

1 উনি জা·মানো পৌল এথেন্সখো ওয়াত্তে করিন্থ সংজিলমাও রি·য়াংজক। 2 উয়ো বিয়া আকিলা মিংগিবা যিহূদী সাকসাখো গ্রংজক। আকিলা পন্ত হা·দকো আৎচিয়ামিং। সম্রাট ক্লৌদিয় গিম্মিক যিহূদীরাংখো রোমখো ওয়াত্তে রি·য়াংখানা গি·য়েতামিং। উনি গিম্মিন বাং·গিজা সালনা স্খাংও আকিলা বিনি জিকগিবা প্রিষ্কিল্লাখো রা·এ ইটালীওনি করিন্থওনা রি·বামিং। পৌল বিসংচা রি·য়াংজক। 3 বিসং গিত্তা বিয়াবা তাম্বু থারিয়ানি কামখো দাকনুয়ামিং ইন্নে বিসংমুং দংফাএ কাম দাকনা হা·বাচেংজক। 4 নেং·থাকানি সালরিক্ষিতান পৌল থম·দাকরামচা রি·য়াংএ যীশুনি গিম্মিন আগান্নুয়ামিং আরো গ্রীক আরো যিহূদীরাংখো যীশুনি রামাও রিমবানা হাম·নুয়ামিং। 5 সীল আরো তীমথিয় ম্যাসিডোনিয়াওনি রি·বানি জা·মানো পৌল ইসলনি খাৎথাখো আগানফ্রাকেন সালখো রি·য়াংএতনা হা·বাচেংজক। যীশুন খ্রীষ্ট ইন্নে বিয়া যিহূদীরাংচা সাক্ষি হ·ন্নুয়ামিং। 6 ইন্দিবা যিহূদীরাং পৌলনা চাকগিজা খাল·স্থাপে খাৎথা আগানোন পৌল বা·রাথাংখো চিংচ্রিএ আগানজক, “না·সংনি হান·চি না·সং আন·থাংথাংনি স্খুওন দংখানা। ইনি গিম্মিন আংনি মামুং গ্রো দংজা। দা·আলোনি আংআ গিপ্পিন জাতরাংচা রি·য়াংনুয়া।” 7 উনি জা·মানো পৌল থম·দাকরামখো ওয়াত্তে তিতিয়-যুষ্ট মিংগিবা মান্দি সাকসানি নকচা রি·য়াংজক। ইয়া মান্দিনি নক থম·দাকরামনি সেফাংওন দংআমিং আরো বিয়া গিপ্পিন জাত হং·এবা ইসলখো অলাখিনুয়ামিং। 8 থম·দাকরামনি নকগিবা ক্রীষপ আরো বিনি নকনি গিম্মিকান গিত্তেলো বিবিরা·জক। ইনাআগ্রেবা করিন্থীয়রাংনি গিসেপো বাং·আরাংআন পৌলনি খাৎথাখো খিন্নাএ বিবিরা·জক আরো রিপ্পলজক। 9 সালসা ওয়াল্লো গিত্তেল মিকজুমাংচা পৌলনা ইন্দাকে আগানজক, “দা·আ খেন্নাবো, খু·সুক আগানবো, দা·আ স্রক দংআবো; 10 মুয়ানা আংআ নাং·মুং দংআ। সাকসাবা নাং·নি নামগিজাখো দাকজানুয়া, মুয়ানা ইয়া সংজিলমাও আংনি বাং·বিয়া মান্দি দংআ।” 11 ইনি গিম্মিন পৌল বিলসিসা জাদক উয়া সংজিলমাও দংএ মান্দিরাংনা ইসলনি খাৎথাখো স্খিজক। 12 গাল্লিয়ো আখায়া হা·দকনি শাসন দাকগিবা দংমিত্তিংও যিহূদী গিম্মিকান পৌলখো রি·ম্মে বিচাল দাকনা ইন্নে বিচাল দাকরামো রা·বাজক। 13 বিসং আগানজক, “ইয়া মান্দি ইন্দাকফিল্লে ইসলখো অলাখিনা আগানিংজক জেআন নিয়ামরাংও গা·আকজা।” 14 পৌল খাৎথা আগান্না রি·য়াংনুয়া উনোন গাল্লিয়ো যিহূদীরাংনা আগানজক, “যিহূদীরাং, ইয়া কাম খাকখেৎ হং·জাওদে বা বিল্লংআ গ্রোনাংআনি হং·ওদে না·সংনি খাৎথাখো খিন্নাআ আংনা খ্রানুয়ামিং। 15 ইন্দিবা ইয়া মংসংগিবা খাৎথা হং·আনি গিম্মিন, সানিবা বিমুং আরো না·সংনি নিয়ামওনি হং·আ ইন্নে উনো না·সংআন ইখো দাকবো। আংআ উরাংখো বিচাল দাকজানুয়া।” 16 ইখো আগানে বিয়া বিচাল দাকরামোনি বিসংখো হং·খাত্তেতনা গি·য়েৎজক। 17 উনোন উয়া যিহূদীরাং গিম্মিকান নাংরিমে থম·দাকরামনি নকগিবা সোস্থিনীখো রি·ম্মে বিচাল দাকরামনি মিকখাংও দকজক; ইন্দিবা গাল্লিয়ো উখো নিয়াবা নিজাজক। 18 সালসা সালগ্মি করিন্থওনা দংআনি জা·মানো পৌল বিবিরা·গিবা জংআদারাংখো ওয়াত্তে রি·য়াংজক আরো আকিলা আরো প্রিষ্কিল্লামুং চি রামা গিত্তা সিরিয়া হা·সংও রি·বাজক। পৌলনি খু·মিচেতা দংআমিং ইন্নে রি·য়াংনা স্খাং কিংক্রিয়াও বিনি স্খুনি খিন্নিখো রাত্তে গাল্লামিং। 19 ইফিষ সংজিলমাও সক্কে বিয়া প্রিষ্কিল্লা আরো আকিলামুং রি·রিম্মাখো ওয়াতজক। জা·মানো বিয়া আন·থাংআন থম·দাকরামচা রি·য়াংএ যিহূদীরাংমুং যীশুনি গিম্মিন আগান্না হা·বাচেংজক। 20 যিহূদীরাং বিখো বিসংমুং সালসা সালগ্মি দংখানা আগানজক, ইন্দিবা বিয়া গং·জাজক। 21 ইন্দাকোবা উয়োনি রি·য়াংমিত্তিংও বিয়া আগানজক, “ইসলনি হা·সিকা দংওদে আংআ দা·আবা রি·বাফিলনুয়া।” জা·মানো বিয়া ইফিষওনি জাহাসও দাক্কে রি·য়াংজক। 22 বিয়া কৈসরিয়া সংজিলমাও সক্কে জাহাসওনি হং·খাতে যিরূশালেমচানা রি·য়াংজক। উয়ো মন্ডলীনি মান্দিরাংখো সালাম হ·ন্নানি জা·মানো বিয়া আন্তিয়খিয়াওনা রি·য়াংজক। 23 আন্তিয়খিয়াও বাং·গিজা সালখো রি·য়াংএতানি জা·মানো বিয়া উয়োনি রি·য়াংজক আরো গালাতিয়া আরো ফরুগিয়া হা·দকনি হা·দাম দামসানি হা·দাম দামসাওনা রি·রোরোএ জা·রিকগিবারাংনি বিবিরা·আখো বাং·এতি বিসংখো বিল্লাকেতজক। 24 উয়া সময়ও আপল্লো মিংগিবা যিহূদী সাকসা ইফিষওনা রি·বাজক। বিনি নক আলেক্‌জান্দ্রিয়া সংজিলমাওমিং। বিয়া সাকসা আগান্না সাপগিবা হং·আমিং আরো রংথালগিবা শাস্ত্রখো নাম্মেদাক্কে হা·আইয়ামিং। 25 গিত্তেলনি রামানি গিম্মিন বিয়া স্খিয়াখো মা·ন্নামিং। বিয়া হা·সিকফিল্লে খাৎথা আগান্নুয়ামিং আরো যীশুনি গিম্মিন খাকখেৎ দাক্কে স্খিনুয়ামিং, ইন্দিবা যোহননি রিপ্পলানি আগ্রে মামুং রিপ্পলাখো বিয়া হা·আইজামিং। 26 বিয়া খেনমানগিজা থম·দাকরামো খাৎথা আগান্না হা·বাচেংজক। উনোন প্রিষ্কিল্লা আরো আকিলা আপল্লোনি খাৎথাখো খিন্নাএ বিখো বিসংনি নকচা রি·য়াংখানা আগানজক আরো ইসলনি রামানি গিম্মিন নাম্মেদাক্কে বিনা হা·আইএতজক। 27 জা·মানো আপল্লো আখায়াওনা রি·য়াংনা হা·ম্মো ইফিষনি বিবিরা·গিবা জংআদারাং বিখো খা·দংএতজক। আখায়ানি জা·রিকগিবারাং আপল্লোখো রা·চাকখানা ইন্নে ইফিষনি জংআদারাং আখায়াওনা চিঠি চকজক। ইসলনি খা·সাচাক্কাও আখায়াও জেরাং বিবিরা·আমিং আপল্লো বিসংনা নাম্মেন দাকচাকজক। 28 যীশুন খ্রীষ্ট উখো বিয়া রংথালগিবা শাস্ত্রনিখো ফিন্নিকজক আরো গিম্মিকনি মিকখাংওন রাকবিয়া জিথোয়া খাৎথাচা জিগ্রিকাও যিহূদীরাংখো হামজক।

ওয়াত্তেতারাং 19

1 আপল্লো করিন্থ সংজিলমাও দংমিত্তিংও পৌল এশিয়া হা·দক গিত্তা ইফিষওনা রি·বাজক। 2 উয়ো বিয়া জা·রিকগিবা মিত্তামরাংখো গ্রংএ বিসংখো সিং·জক, “না·সং জেনসালো গিত্তেল যীশুখো বিবিরা·আমিং উনো গিসিক রংথালগিবাখো মা·ন্নামিংমা?” বিসং বিনা আগানজক, “গিসিক রংথালগিবানি দংআখো চিংআ খিন্নান খিন্নাখুজা।” 3 উনোন পৌল আগানজক, “ইন্দিদে না·সং বাগিবা রিপ্পলাখো মা·ন্নামিং?” বিসং আগানজক, “যোহননি রিপ্পলাখো।” 4 পৌল আগানজক, “পাপওনি গিসিক ফি·ল্লে রিপ্পলগিবান যোহননি রিপ্পলা হং·আ। যোহন মান্দিরাংনা আগানামিং, বিনি জা·মানো জেআন রি·বাংজক বিখো আগানস্খাওদে যীশুখো বিবিরা·না নাংনুয়া।” 5 ইখো খিন্নাএ উয়া জা·রিকগিবারাং গিত্তেল যীশুনি বিমুংও রিপ্পলজক। 6 উনোন পৌল বিসংনি সাক্কাও জাকখো দনদাপানি জা·মানো বিসংনি সাক্কাও গিসিক রংথালগিবা রি·বাজক, আরো বিসং দিংথাং দিংথাং খু·সুকচা খাৎথা আগান্না আরো আগানসোগিবা গিত্তা ইসলনি খাৎথাখো আগান্না হা·বাচেংজক। 7 উয়া জা·রিকগিবারাং সাকচিগ্মি গিত্তা দংআমিং। 8 উনি জা·মানো পৌল থম·দাকরামচা রি·য়াংজক আরো জাগিত্থাম দিপ্পাৎ খেনগিজা খাৎথা আগানজক। ইসলনি সংনকনি গিম্মিন বিয়া জিথোয়া খু·ফাচা মান্দিরাংখো বিবিরা·এতনা হাম·জক। 9 ইন্দিবা বিসংওনি মিত্তামরাংনি খা·থং রাক্কানি গিম্মিন বিসং বিবিরা·না হাম·জাজক আরো গিম্মিকনি মিকখাংও যীশুনি রামানি গিম্মিন বাং·এ জিনা হা·বাচেংজক। উনোন পৌল বিসংখো ওয়াত্তে রি·য়াংজক। বিয়া জা·রিকগিবারাংখো রা·এ তুরান্ন মিংগিবা স্খিগিবা সাকসানি নকচা সালারিক্ষিত রি·য়াংএ খু·ফা-জিগ্রিকাচা খাৎথা আগান্না হা·বাচেংজক। 10 বিলসিগ্মি ইন্দাকেন হং·জক। উনি গিম্মিন এশিয়া হা·দকো দংগিবা যিহূদী আরো গ্রীকরাং গিম্মিকান গিত্তেলনি খাৎথাখো খিন্নানা মান·জক। 11 ইসল পৌলও বাং·আ আইয়াও ইনমানগিবা কামরাংখো দাকনা হা·বাচেংজক। 12 বিনি জাকখালগিবা রুমাল আরো বে·এনো চিনগিবা বা·রাখো সাগিবারাংচা রা·আংওন বিসংনি জম্মা-সাআ নাম্মাংনুয়ামিং আরো গিসিক নামগিজাগিবারাংবা ওয়াত্তে রি·য়াংনুয়ামিং। 13 মিত্তাম যিহূদীরাং রি·রোরোএ গিসিক নামগিজাগিবারাংখো হা·রিকনুয়ামিং। গিত্তেল যীশুনি বিমুংও বিসং গিসিক নামগিজাগিবা মান·গিবা মান্দিরাংখো নাম্মেতনা হা·বাচেংজক। বিসং ইন্নুয়ামিং, “পৌল জেনি গিম্মিন আগানফ্রাকা উয়া যীশুনি বিমুংও আংআ না·সংখো হং·খাতখানা গি·য়েতিংজক।” 14 বিসংওনি স্কিবা মিংগিবা সাকসা যিহূদী খামাল দাল·গিবানি সাকস্নি দেফান্থিরাং উয়ানদাক্কে দাকনুয়ামিং। 15 সালসাও বিসংনি উয়ানদাক্কে দাকমিত্তিংও গিসিক নামগিজাগিবা বিসংনা আগানজক, “আংআ যীশুখোবা হা·আইয়া, পৌলখোবা হা·আইয়া, ইন্দিবা না·সং সারাং?” 16 গিসিক নামগিজাগিবা মান·গিবা উয়া মান্দি উনোন উয়া সাকস্নিনি সাক্কাও চাচ্রকদাপজক আরো বিসং গিম্মিকখো ইন্দাকফিল্লে দক্কানি গিম্মিন বিসং বে·এনো মাত্তা-বুয়া মা·ন্নে বা·রাগ্রি খমলং হং·এ উয়া নকনি খাত্তাংজক। 17 ইখো ইফিষওনা দংগিবা যিহূদী আরো গ্রীকরাং হা·আইনা মা·ন্নে বিসং গিম্মিকান খেনবিজক, আরো গিত্তেল যীশুনি বিমুংনি নাম্মেন রাসং হং·জক। 18 জেরাং গিত্তেল যীশুখো বিবিরা·আমিং বিসংওনি বাং·এন রি·বাএ উনো ফারাকেন বিসংনি নামগিজা কামরাংনি গিম্মিন খু·রাচাকজক। 19 যাদু মনতল দাক্কে ফিন্নিকগিবারাংওনি বাং·এন বিসংনি খি·তাপরাংখো চিম্মংএ গিম্মিকনি মিকখাংওন উরাংখো সো·জক। খি·তাপরাংনি দাম হিসাপে নিওদে হাজাল সৎবংআমাং দীনার হং·আ। 20 গিত্তেলনি খাৎথা ইন্দাকে গিপ্পাংজক আরো বিনি বিল মান্দিরাংনি গিসিকো আরোবা বাং·এ কাম দাকনা হা·বাচেংজক। 21 ইরাং হং·আনি জা·মানো পৌল ম্যাসিডোনিয়া আরো আখায়া হং·এ যিরূশালেমচানা রি·য়াংনুয়া ইন্নে থিক দাকজক। বিয়া আগানজক, “যিরূশালেমচা রি·য়াংআনি জা·মানো রোমচাবা আংআ রি·য়াংনা নাংনুয়া।” 22 জা·মানো বিয়া তীমথিয় আরো ইরাস্ত মিংগিবা বিনি সাকগ্মি দাকচাকগিবাখো ম্যাসিডোনিয়াও ওয়াত্তেতজক, আরো বিয়া বাং·গিজা সালনা এশিয়া হা·দকো দংজক। 23 উয়া সময়ও যীশুনি রামানি গিম্মিন নাম্মেন গোলমাল হং·না হা·বাচেংজক। 24 দীমীত্রিয় মিংগিবা সাকসা সোনা দকগিবা আর্তেমিস মিত্তে মিচিকনি অলাখিগিবা নক গিত্তা চনচনগিবা রূপানি অলাখিগিবা নকখো থারিনুয়ামিং। ইনি গিম্মিন মিস্ত্রিরাংনি নাম্মেন লাভ হং·নুয়ামিং। 25 দীমীত্রিয় উয়া মিস্ত্রিরাংখো আরো বিসং গিত্তা দাক্কা গিপ্পিন মিস্ত্রিরাংখোবা হা·দামসানো রিংগামে আগানজক, “জংআদারাং, না·সংদে ইখো হা·আইয়ান, ইন্দাকে বাদিংআচা আনচিংনি নাম্মেন মান·দাপানি হং·আ। 26 ইন্দিবা না·সং নিকনা আরো খিন্নানা মা·ন্নিংআ, পৌল মিংগিবা উয়া মান্দি আনচিংনি ইয়া ইফিষও আরো আগান্না রি·য়াংওদে গিম্মিক এশিয়া হা·দকনি বাং·বিয়া মান্দিরাংখো বিবিরা·এতি বিসংখো ব্রাংগিবা রামাচা রা·আংজক। বিয়া আগানিংআ, জাকচা থারিগিবা মিত্তে বিমাংরাং মামুংআন হং·জা। 27 ইনি হা·সেল আনচিংনি বাদিংআনি রাসং দংজানুয়া ইয়াসান হং·জা, ইন্দিবা দাল·বাৎগিবা মিত্তে মিচিক আর্তেমিসখো অলাখিগিবা নকবা বু·আনি হং·নুয়া। আরো এশিয়া হা·দকনি মান্দি গিম্মিকরাং, আরো হা·গিলসাকনি গিম্মিকান জে মিত্তে মিচিকখো অলাখিয়া বিয়া আন·থাংবা দাল·বাৎজানুয়া।” 28 ইখো খিন্নাএ উয়া মান্দিরাং খা·আওনাংবিজক আরো চ্রিকে ইন্না হা·বাচেংজক, “ইফিষীয়রাংনি আর্তেমিস মিত্তে মিচিকান দাল·বাতা।” 29 আরো উয়া সংজিলমা গিম্মিকোন গোলমাল হং·জক। গাইয় আরো আরিষ্টার্খ মিংগিবা ম্যাসিডোনিয়ানি জে মান্দি সাকগ্মি উনো পৌলমুং রি·য়াংআমিং মান্দিরাং বিসংখো রিম·জক আরো গিম্মিকান আপসান হং·রিমে খ্রিমা আসংগিবা হা·দামচা খাত্তে রি·য়াংজক। 30 পৌল মান্দি জিলমানি মিকখাংও রি·য়াংনা হাম·জক ইন্দিবা জা·রিকগিবারাং বিখো রি·য়াংনা হন·জাজক। 31 উয়া হা·দকনি মিত্তাম কাম রিম·গিবারাং পৌলনি রিপ্পেং হং·আমিং। বিসংবা পৌলখো মল·মলে আগানেতজক জেদাক্কে বিয়া উয়া খ্রিমাওনা রি·য়াংজা। 32 উনো খ্রিমাও গোলমাল হং·থেন দংজক। মান্দি মিত্তামরাং মিংসাখো ইন্নে চ্রিকিংআমিং, দা·আবা মিত্তামরাং গিপ্পিন খাৎথারাংখো ইন্নে চ্রিকিংআমিং। মান্দি বাং·আরাংএন উয়া খ্রিমাও মুয়ানা সকবাজক ইখো হা·আইজামিং। 33 যিহূদীরাং আলেক্‌সান্দরখো মিকখাংচা সুকদুয়ে ওয়াত্তেতানি জা·মানো মান্দি মিত্তামরাং বিনা মুয়াখো আগান্না নাংনুয়া উখো আগানেতজক। উনোন আলেক্‌সান্দর মান্দিরাংনি মিকখাংও আন·থাংনা চাক্কে খাৎথা আগান্না ইন্নে জাকজিপে মান্দিরাংখো স্রক দংনা আগানজক। 34 ইন্দিবা মান্দিরাং আলেক্‌সান্দরখো যিহূদী ইন্নে হা·আইনা মা·ন্নানি জা·মানো গিম্মিকান ঘণ্টাগ্মি ইন্দাকে আগানে চ্রিকজক, “ইফিষীয়রাংনি আর্তেমিস মিত্তে মিচিকান দাল·বাৎগিবা হং·আ।” 35 বন·খামও সংজিলমানি কাম রিম·গিবা সাকসা মান্দিরাংখো স্রক দাক্কেতি আগানজক, “ইফিষীয় মান্দিরাং, ইখো গিম্মিকান হা·আইয়া, দাল·গিবা আর্তেমিস মিত্তে মিচিকখো অলাখিগিবা নকখো আরো সিলগাওনি বিনি গা·আকগিবা মিত্তে বিমাংখো রাক্ষিগিবা হং·জক ইফিষ সংজিলমা। 36 ইয়া বিবি খাৎথাখো জিচাকনা মান·জাওদে জাদা গিত্তা কাম দাকগিজা না·সংনি স্রক দংআন খ্রাআ। 37 ইয়া মান্দিরাং আনচিংনি অলাখিগিবা নকনিখো চা·উবা চা·উজা আরো আনচিংনি মিত্তেখো জিয়াবা জিজা, ইন্দাকোবা ইয়া মান্দিরাংখো না·সং ইনো রিমবাজক। 38 দীমীত্রিয় আরো বিমুং দংফাগিবা মিস্ত্রিরাং সানিবা সাক্কাও খাৎথা আগান্না হা·ম্মোদে বিচাল দাকরামদে দংআন আরো শাসন দাকগিবারাংবা উয়ো দংআ। বিসং উ·চা বিচালনা রি·য়াংনা মা·ন্না। 39 ইন্দিবা না·সং আরোবা বাং·এ ইন্না হা·ম্মোদে খ্রিমাও বিচাল দাকনা নাংনুয়া। 40 দা·আলনি গোলমাল হং·আনা আনচিংনি সাক্কাওন গ্রো নাংআনি খেন্না দংআ। ইন্দাকেন হং·ওদে আনচিং ইয়া গোলমালনি হা·সেলখো ফিন্নিকনা মান·জানুয়া, মুয়ানা ইয়া গোলমালনি মামুং হা·সেলান দংজা।” 41 ইখো আগানে বিয়া খ্রিমাখো ব·ন্নেতজক।

ওয়াত্তেতারাং 20

1 গোলমাল ব·ন্নানি জা·মানো পৌল জা·রিকগিবারাংখো রিংগামেতজক। বিসংখো খা·দংএতানি জা·মানো বিয়া ম্যাসিডোনিয়াচানা রি·য়াংজক। 2 ম্যাসিডোনিয়া গিত্তা রি·য়াংমিত্তিংও বিয়া বাং·এ খাৎথা আগানে মান্দিরাংখো খা·দংএতজক। জা·মানো বিয়া গ্রীস, আগানস্খাওদে আখায়া হা·দকচা রি·য়াংএ উয়ো জা গিত্থাম দংজক। উনি জা·মানো বিয়া জাহাসও দাক্কে সিরিয়া হা·সংচা রি·য়াংনা স্খাং হা·আইনা মান·জক যিহূদীরাং বিখো খু·চিংজক। উনোন বিয়া দা·আবা ম্যাসিডোনিয়া গিত্তা ফি·ল্লে রি·য়াংনা থিক দাকজক। 4 বিরয়াওনি পুর্হনি দেফান্থি সোপাত্র, থিষলনীকীওনি আরিষ্টার্খ আরো সিকুন্দ, দর্বীওনি গাইয়, তীমথিয় আরো এশিয়াওনি তুখিক আরো ত্রফিম পৌলমুং রি·য়াংফাজক। 5 ইয়া মান্দিরাং ত্রোয়া সংজিলমাচা রি·য়াংসোএ চিংনা সেং·সোজক। 6 ওয়ানথিগ্রিগিবা রুটি চা·আনি সাল জা·মানো চিংআ চিরামা গিত্তা ফিলিপীওনি রি·য়াংজক আরো সাল বংআনি জা·মানো ত্রোয়াও বিসংমুং আপসান হং·রিমজক। ত্রোয়াও চিংআ সাল স্নি দংআমিং। 7 হানথিনি স্খাংগিবা সালো গিত্তেলনি মিয়াথামখো রা·না চিংআ আপসান হং·রিমজক। উনোন পৌল মান্দিরাংচা আগানফ্রাকনা হা·বাচেংজক। সালগিপ্পিনো রি·য়াংনাজক ইন্নে বিয়া ওয়ালজাচ্চি দিপ্পাৎ খাৎথা আগানারি দংজক। 8 চিংআ জে নকদ্রিং সাক্কাও থম·দাকামিং উয়ো চাক্কি বাং·আ দংআমিং। 9 উতুখ্‌ মিংগিবা ফান্থি সাকসা উয়া নকনি জানলা সাক্কাও আসংএ দংআমিং। পৌলনি হারিমে খাৎথা আগানানি গিম্মিন বিয়া থুজক। থুসিফেক্কানি জা·মানো বিয়া গিত্থামগিবা নকদ্রিং সাক্কাচানি খা·মাওনা গা·আকজক আরো বিখো সিয়াখো দি·থম্মে রা·জক। 10 উনোন পৌল খা·মাচা হং·খাতজক আরো উয়া ফান্থিনি সাক্কাও বামবকে বিখো গিপ্পাকে আগানজক, “না·সং দা·আ খেন্নাবো, বিয়া থাংএ দংআ।” 11 উনি জা·মানো পৌল দা·আবা নকদ্রিং সাক্কাচা রি·য়াংএ গিত্তেলনি মিয়াথামখো চা·জক আরো হারিমে ফ্রিংওনা দিপ্পাৎ খাৎথা আগানানি জা·মানো বিয়া রি·য়াংজক। 12 মান্দিরাং উয়া ফান্থিখো থাংচাএ দংআখো নকচা রা·আংজক আরো খা·নাম্মেতাখো মান·জক। 13 চিংআ রি·য়াংসোএ জাহাসও গাখাতে আঃসচানা রি·য়াংজক। উনিখো পৌলখো রিম্মাংআনি খাৎথা দংআমিং। বিখো রিম্মাংআনি খাৎথাখো বিয়া চিংনা আগানামিং মুয়ানা বিয়া রামা রি·এ উয়োনা রি·য়াংনা হা·ম্মামিং। 14 আঃসচা চিংখো গ্রংআনি জা·মানো চিংআ বিখো জাহাসও দি·জক আরো মিতুলীনীওনা রি·বাজক। 15 সালগিপ্পিনো চিংআ উয়োনি রি·য়াংএ খীয় চিচাংনি সেফাংও সকজক। উনি সালগিপ্পিনো চিংআ সাগালখো বাত্তে সামঃ চিচাংওনা রি·য়াংজক। উনি সালগিপ্পিনো চিংআ মিলীত্‌ চিগাওনা সকজক। 16 এশিয়া হা·দকো জেদাক্কে পৌলখো হারিমে দংনা নাংজা উনি গান্দা বিয়া থিক দাক্কামিং, বিয়া ইফিষও দংদিপগিজা উনি সেফাং গিত্তা রি·য়াংনুয়া। যিরূশালেমচানা সকনা বিয়া থেংরি দাক্কিংআমিং জেদাক্কে মা·ন্নোদে সাল সৎবংআনি সালো উয়োনা দংনা মা·ন্না। 17 পৌল মিলীত্‌ওনি ইফিষও মান্দি ওয়াত্তেতি উনি মন্ডলীনি দাল·গিবারাংখো রিংগামেতজক। 18 বিসং উয়ো সক্কানি জা·মানো পৌল বিসংনা আগানজক, “এশিয়া হা·দকো রি·বানি জা·মানো স্খাংগিবা সালোনি ফাংনাজ্রিং আংআ না·সংমুং বাদিকে দংজক উখোদে না·সং হা·আইয়ান। 19 যিহূদীরাংনি বাং·এ খু·চিংআনি গিম্মিন আংখো রুরাআও গা·আকনা নাংআমিং, ইন্দিবা আংআ নাম্মেন সনথল দাক্কে মিক্‌চি গাল্লে গিত্তেলনি নকখল হং·এ বিনা দাকচাকে হন·জক। 20 না·সংনা দাকচাকানি হং·না গিত্তা দাকগিবা মামুংখোন আংআ না·সংনা আগানগিজা স্রক দাক্কে দংজা, বাত্তেসা ফারাকে আরো না·সংনি নকরাংও স্খিজক আরো আগানফ্রাকজক। 21 যিহূদী আরো গ্রীকরাংচা আংআ মংসংবাত্তে আগানজক, পাপওনি গিসিকখো ফি·ল্লেতি ইসলচানা বিসংনি ফিল·না নাংনুয়া আরো আনচিংনি গিত্তেল যীশুখো বিবিরা·না নাংনুয়া। 22 “দা·আও আংআ গিসিক রংথালগিবানা বাম্মে যিরূশালেমচানা রি·য়াংইংজক। উয়ো আংনি সাক্কাও মুয়া হং·নুয়া উখো আংআ হা·আইজা। 23 আংআ ইখোসান হা·আইয়া, গিসিক রংথালগিবা সংজিলমা গিম্মিকো আংনা ইয়া খাৎথাখো হা·আইএতিংজক, আংখো জেলো দংনা আরো দুক মা·ন্না নাংনুয়া। 24 ইন্দিবা আংচা আংনি জাংগিনি মামুং দাম দংজা। আংনি গি·সামাংমাং হা·সিকা ইয়ান, জেদাক্কে আংআ বন·খামওনা দিপ্পাৎ খাতনা মা·ন্না, ফি·এ ইন্নোদে গিত্তেল যীশু জে কামখো আংনা হন·জক উখো ব·ন্নেতনা মা·ন্না। উয়া কাম হং·জক ইসলনি খা·সাচাক্কানি নাম্মা খাৎথানি গিম্মিনো সাক্ষি হ·ন্না। 25 “দা·আও আংআ ইখো হা·আইয়া, না·সং জেরাংচা রি·য়াংএ আংআ ইসলনি সংনকনি গিম্মিনো আগানফ্রাকজক বিসংওনি সাকসাবা আংখো আরবা নিকজানুয়া। 26 উনি গান্দা দা·আলো আংআ না·সংচা থাল্লে আগানিংআ, দারাংনিবা হান·চিনা আংআ গ্রো নাংজা, 27 মুয়ানা ইসল মুয়াখো হা·ম্মা উখো না·সংনা হা·আইএতনা আংআ মামুং সালোবা ওয়ালফিল্লাংজাজক। 28 না·সং আন·থাংথাংনি গিম্মিন সিমসাকে দংবো, আরো গিসিক রংথালগিবা বিবিরা·গিবা দলরাংখো নিরক্ষিনা জে কামখো না·সংনা হন·জক বিসংনি গিম্মিনবা সিমসাকে দংবো। রাক্ষুয়াল জেদাক্কে বিনি মেষরাংখো নিরক্ষিয়া উয়ানদাক্কে না·সংবা ফামং গিত্তা ইসলনি মন্ডলীখো নিরক্ষিবো। ইসল উয়া মন্ডলীখো হান·চিথাংচা ব্রিজক। 29 আংআ হা·আইয়া, আংনি রি·য়াংআনি জা·মানো মান্দিরাং মাৎচা হা·রেক গিত্তা না·সংচা রি·বানুয়া আরো মেষরাংনা নামগিজাখো দাকনুয়া। 30 আরো, না·সং আন·থাংথাংনি গিসেপোনি মান্দিরাং চাখাত্তে ইসলনি বিবিখো বু·না হাম·নুয়া জেদাক্কোদে বিবিরা·গিবারাংখো আন·থাংথাংচানা সাল্লাংনা মা·ন্না। 31 ইনি গিম্মিন না·সং সিমসাকে দংবো। গিসিক রা·রিকবো, বিলসি গিত্থাম দিপ্পাৎ সালওয়াল মিকচিমুং আংআ না·সং গিম্মিকখো সিমসাকেতামিং, মামুং সালোবা স্রক দাক্কে দংজা। 32 “ইসল আরো বিনি খাৎথানি জাক্কো দা·আও আংআ না·সংখো ফাকওয়াতিংজক। ইসলনি খাৎথা বিনি খা·সাচাক্কাখো আগানা, আরো না·সংখো থারিয়ে রা·আনি বিল উয়া খাৎথানি দংআ। ইনাআগ্রেবা ইসল বিনি আন·থাংনি মান্দিরাংনা জেখো দনজক উয়া খাৎথা না·সংনা উখোবা হ·ন্না মা·ন্নুয়া। 33 দারাং মান্দিনি সোনা, রূপা বা বা·রা-চলারাংনা আংআ মাদ্দুজা। 34 না·সং আন·থাংথাংআন হা·আইয়া, আংনি ইয়া জাক সামগ্মি আংনি আরো আংনি রিপ্পেংরাংনি গিম্মিক নাংআরাংখো হন·জক। 35 আংনি দাকগিবা গিম্মিকোন না·সংনা ফিন্নিকজক, ইন্দাকগিবা কামরাংচা বিলগ্রিরাংনা দাকচাকনা নাংআ আরো গিত্তেল যীশুনি ইয়া খাৎথাখো আনচিংনি গিসিক রা·না নাংআ, ‘মা·ন্নানা বাত্তে হ·ন্নাওন আরোবা বাং·এ ফাত্তিয়া দংআ।’ ” 36 ইয়া খাৎথাখো আগানানি জা·মানো পৌল গিম্মিকমুং জা·স্খু দে·ম্মে বি·জক। 37 জা·মানো মন্ডলীনি দাল·গিবা গিম্মিকান পৌলখো গিপ্পাকে খু·দিমজক আরো গ্রাপনা হা·বাচেংজক। 38 পৌলনি মিকখাংখো বিসং নিকনা মান·জানাজক, মংসংদে ইয়া খাৎথানা বিসং নাম্মেন দুক মান·জক। উনি জা·মানো বিসং বিমুং জাহাসওনা সক্কে রি·য়াংফাজক।

ওয়াত্তেতারাং 21

1 ইফিষনি মন্ডলীনি দাল·গিবারাংওনি রি·য়াংএ চিংআ জাহাসও দাক্কে কো চিচাংচানা রি·য়াংজক। সালগিপ্পিনো চিংআ রোদঃ চিচাংওনা রি·বাজক। জা·মানো উয়োনি পাতারা সংজিলমাচানা রি·য়াংজক। উয়ো চিংআ ফৈনীকিয়াচা রি·য়াংনা জাহাস গি·সা মান·জক। 2 উনোন চিংআ উয়া জাহাসও গাদোএ রি·য়াংজক। 3 জা·মানো সাইপ্রাস চিচাংখো নিক্কে চিংআ সিরিয়া হা·সংনি সোর সংজিলমাচা রি·য়াংএ জাহাসওনি হং·খাতজক। উয়ো জাহাসনিখো চিংনি মালরাংখো রং·খাতনা খাৎথা দংআমিং। 4 উনি জা·রিকগিবারাংখো সান্দিয়ে মা·ন্নে চিংআ বিসংমুং সাল স্নি দংজক। উয়া জা·রিকগিবারাং গিসিক রংথালগিবাচা পৌলখো যিরূশালেমচা রি·য়াংজাখানা মল·মলজক। 5 ইন্দিবা উয়া সালরাং রি·য়াংআনি জা·মানো চিংআ বিসংখো ওয়াত্তে চিংনি রামাও রি·জক। গিম্মিক জা·রিকগিবারাং আরো বিসংনি জিকগিবারাং আরো বি·সারাং চিংমুং সংজিলমানি হা·ফালচা রি·বাজক। জা·মানো সাগাল রিক্কামো চিংআ জা·স্খু দে·ম্মে বি·জক। 6 জা·মানো সাকসা সাকগিপ্পিনখো ওয়াতগ্রিকে চিংআ জাহাসও গাদোজক আরো বিসং নকচা ফি·ল্লাংজক। 7 সোরওনি চিংআ তলিমায়িওনা সকজক। উয়ো বিবিরা·গিবা জংআদারাংখো সালাম হ·ন্নে বিসংমুং সালসা দংফাজক। 8 সালগিপ্পিনো চিংআ কৈসরিয়াওনা সকজক আরো নাম্মা খাৎথাখো আগানফ্রাকগিবা ফিলিপনি নক্কো দংজক। বিয়া যিরূশালেম মন্ডলীনি উয়া সাকস্নি দাকচাকে হন·গিবারাংওনি সাকসা হং·আমিং। 9 বিনি সেখিমগিজাগিবা সাকব্রি দেমিচিক দংআমিং। বিসং মান্দিরাংচা আগানসোগিবা গিত্তা ইসলনি খাৎথাখো আগান্নুয়ামিং। 10 চিংআ উয়ো বাং·গিজা সাল দংআনি জা·মানো যিহূদিয়াওনি আগাব মিংগিবা সাকসা আগানসোগিবা রি·বাজক। 11 বিয়া চিংচা রি·বাএ পৌলনি খাংখারি খাগিবাখো এংজক আরো উচা আন·থাংনি জাক-জা·চকখো খাএ আগানজক, “গিসিক রংথালগিবা আগানা, ‘যিরূশালেমনি যিহূদীরাং ইয়া খাংখারি খাগিবানি নকগিবাখো ইন্দাকে খানুয়া আরো গিপ্পিন জাতরাংনি জাক্কো হ·ন্নুয়া।’ ” 12 ইয়া খাৎথাখো খিন্নাএ উনি মান্দিরাং আরো চিংআ পৌলখো যিরূশালেমচা রি·য়াংজাখানা মল·মলজক। 13 উনোন পৌল আগানজক, “না·সং গ্রাপে আংনি গিসিকো মুয়ানা দুক হ·ন্নিংআ? গিত্তেল যীশুনি গিম্মিন আংআ যিরূশালেমো বন্দি দংনাসান হং·জা, সিনাবা থারিয়ে দংআ।” 14 বিখো স্রক দংএতনা মান·জাএ চিংআ স্রক দংজক আরো জা·মানো আগানজক, “গিত্তেলনি হা·সিকা গিত্তা হং·খানা।” 15 উনি জা·মানো চিংআ জিনিসরাংখো থারিয়ে যিরূশালেমচানা রি·য়াংজক। 16 কৈসরিয়ানি মিত্তাম জা·রিকগিবারাং চিংমুং রি·য়াংফাজক আরো ম্নাসোন মিংগিবা সাইপ্রাসনি সাকসা মান্দিনি নকচানা রিম্মাংজক। বিনি নক্কোন চিংনি দংআনি খাৎথা দংআমিং। বিয়া স্খাংগিবা জা·রিকগিবারাংওনি সাকসামিং। 17 যিরূশালেমচা সক্কানি জা·মানো বিবিরা·গিবা জংআদারাং খুসি হং·বিএ চিংখো রা·চাকজক। 18 সালগিপ্পিনো পৌল চিংমুং যাকোবখো নিনা রি·য়াংজক। উয়ো মন্ডলীনি গিম্মিক দাল·গিবারাং দংআমিং। 19 পৌল বিসংখো সালাম হন·জক আরো বিনি আগানফ্রাকাও ইসল বাদিকে দাক্কে গিপ্পিন জাতরাংও কাম দাকজক উখো মিংসা মিংসা দাক্কে আগানজক। 20 ইয়া খাৎথাখো খিন্নাএ উয়া দাল·গিবারাং ইসলখো রাসং দাকজক আরো পৌলনা আগানজক, “জং, বাসিক হাজাল হাজাল যিহূদীরাং যীশুখো বিবিরা·জক আরো বিসং গিম্মিকান মোশিনি নিয়ামরাংখো মানিনা নাম্মেন হা·সিকা, ইখোদে না·আ নিক্কিংআন। 21 গিপ্পিন জাতরাংনি গিসেপো দংগিবা যিহূদীরাংখো না·আ মোশিনি বেওয়ালরাংখো ওয়াত্তে রি·না স্খিংআ ইন্নে বিসং হা·আইজক, না·আ বিসংনি দেদ্রাংখো বিগিল রাতনা আরো যিহূদীরাংনি বেওয়ালখো মানিনা বেং·আ। দা·আও চিংআ মুয়াখো দাকনুয়া? 22 না·আ রি·বাজক ইন্নে বিসংদে খিন্নানুয়ান। 23 চিংআ দা·আও নাং·না জেখো আগানা না·আ উখোন দাকবো। চিংনি গিসেপো ইন্দাকগিবা সাকব্রি মান্দি দংআ জেরাং খু·মিচেৎজক। 24 ইয়া মান্দিরাংখো না·আ নাং·মুং রিম্মাংবো আরো বিসংমুং না·আ আন·থাংবা রংথালবো আরো বিসংনি স্খুনি খিন্নিখো রক্কে গালনা থাংখা হন·বো। নাং·নি গিম্মিন বিসংনি খিন্নাগিবাদে বু·আ আরো না·আ বেওয়ালরাংখো মানিয়া ইন্নে উনোন গিম্মিকান হা·আইনুয়া। 25 ইন্দিবা গিপ্পিন জাতরাংও জেরাং বিবিরা·জক বিসংনা চিংআ জেখো থিক দাকজক উনি গিম্মিন বিসংনা ইয়া খাৎথাখো চক্কেতজক, মিত্তে বিমাংনা চিন·গিবা চা·আখো বিসং চা·জানুয়া, হান·চিখো রিংজানুয়া, গিত্তকখো রিম·সৎগিবারাংনি বে·এনখো চা·জানুয়া আরো থি·ল্লেকজানুয়া।” 26 উনোন পৌল উয়া মান্দিরাংখো রিম্মাংএ বিসংমুং আন·থাংখোবা রংথালেতজক। সালগিপ্পিনো বিয়া থরম নকচা রি·য়াংজক, আরো বিসংনি রংথালানি কাম বাসোকো ব·ন্নুয়া আরো গিম্মিকনা বাসোকো বলি হ·ন্নুয়া উখো হা·আইএতজক। 27 রংথালানি উয়া সাল স্নিনি জা·মানো এশিয়া হা·দকনি মিত্তাম যিহূদী পৌলখো থরম নক্কো নিকজক। বিসং উনি গিম্মিক মান্দিরাংখো খা·আওনাংএতজক আরো পৌলখো রিম·জক। 28 জা·মানো বিসং চ্রিকে ইন্না হা·বাচেংজক, “ইস্রায়েল মান্দিরাং, মিকখাংচা রি·বাবো। হা·দাম গিম্মিকনি মান্দিরাংচা আনচিংনি জাত আরো আনচিংনি নিয়ামরাংখো আরো থরম নকনি সাক্কাও জে মান্দি স্খিয়া, ইয়ান উয়া মান্দি। ইনাআগ্রেবা বিয়া থরম নক্কো গ্রীকরাংখো রিমবাএ ইয়া রংথালগিবা হা·দামখো মারাং নাংএতজক।” 29 বিসং ইয়া খাৎথাখো আগানজক মুয়ানা বিসং স্খাংও ইফিষনি ত্রফিমখো পৌলমুং সংজিলমাও নিক্কামিং। উনি গিম্মিন বিসং চানচিয়ামিং, পৌল ত্রফিমখো থরম নক্কোবা রিমবাজক। 30 উনোন সংজিলমা গিম্মিকো গোলমাল হং·বাজক। মান্দিরাং আপসান খাতবাএ পৌলখো রি·ম্মে থরম নকনিখো সাল্লে রা·বাজক আরো উনোন থরম নকনি দ·গারাংখো চিপ্পেতজক। 31 মান্দিরাং পৌলখো স·ওতনা হা·ম্মামিং, উনো রোমনি সুবিদার যিরূশালেম সংজিলমা গিম্মিকো গোলমালখো খিন্নাজক। 32 উয়া দাল·গিবা সুবিদার উনোন মিত্তাম সুবিদাররাংখো আরো সিপাইরাংখো রিমবিতে জিলমানি সেফাংও রি·য়াংজক। মান্দিরাং দাল·গিবা সুবিদারখো আরো সিপাইরাংখো নিক্কে পৌলখো দক্কাখো দনজক। 33 উনোন সুবিদার রি·বাএ পৌলখো রিম·জক আরো গি·গ্মি জেংজুলচা বিখো খানা গি·য়েৎজক। উনি জা·মানো বিয়া সিং·জক, “ইয়া মান্দি সা? বিয়া মুয়াখো দাক্কা?” 34 উনোন মান্দিরাংনি গিসেপো সাবা সাবা চ্রিকে আপসান খাৎথাখো আগানজক, দা·আবা সাবা সাবা দিংথাং খু·সুকখো ইনজক। উনি গিম্মিন সুবিদার গোলমালনি মামুং হা·সেলখো হা·আইনা মান·জাএ পৌলখো সিপাইরাংনি দংরামোনা রিম্মাংখানা গি·য়েৎজক। 35 পৌলখো মান্দিরাংনি জাকনিখো জক্কেৎনা সিপাইরাং বিখো দি·থমে রা·আংজক। 36 মান্দিরাং বিনি জা·মান জা·মান চ্রিকে ইন্না হা·বাচেংজক, “বিখো স·ওতে গালবো।” 37 সিপাইরাং পৌলখো রা·এ বিসংনি দংরামো নাপমিত্তিংও পৌল সুবিদারখো ইনজক, “নাং·না মামুংখো আগান্না মা·ন্নুয়ামা?” সুবিদার আগানজক, “না·আ গ্রীক খু·সুকখো হা·আইয়ামা! 38 মিসর হা·সংনি জে মান্দি বাং·গিজা সালনা স্খাংও বোবিল দাক্কে হাজাল ব্রি মান্দি স·ওতগিবারাংখো হা·গিসি জওলচা রিম্মাংআমিং, ইন্দাকোদে না·আ উয়া মান্দি হং·জামা?” 39 উনোন পৌল আগানচাকজক, “আংআ যিহূদী, কিলিকিয়া হা·দকনি তার্ষ সংজিলমানি মান্দি হং·আ। আংআ হং·আ-হং·গিজা সংজিলমানি মান্দি হং·জা। খা·সাফাএ আংখো মান্দিরাংচা খাৎথা আগান্না হন·বো।” 40 সুবিদারনি আগান্না হ·ন্নানি জা·মানো পৌল জাং·খি সাক্কাও চাদেংজক আরো জাকখো দি·এ মান্দিরাংখো স্রক দংখানা আগানজক। মান্দিরাং স্রক দংআনি জা·মানো পৌল ইব্রীয় খু·সুকচা বিসংখো ইনজক,

ওয়াত্তেতারাং 22

1 “জংআদারাং আরো আপফারাং, দা·আও আংআ আন·থাংনি গিম্মিন আগানচাকনুয়া, খিন্নাবো।” 2 মান্দিরাং বিখো ইব্রীয় খু·সুকচা খাৎথা আগানাখো খিন্নাএ স্রক দংজক। উনোন পৌল আগানজক, 3 “আংআ সাকসা যিহূদী মান্দি হং·আ। কিলিকিয়ানি তার্ষ সংজিলমাও আংআ আৎচিয়া, ইন্দাকোবা ইয়া সংজিলমাওন আংআ দাল·জক। গমলীয়েলনি জা·চক কেচ্চিও আসংএ আংআ আনচিংনি ফাগিৎচামরাংনি নিয়ামরাংখো চু·গিম্মিক দাক্কে স্খিজক। ইসলনি গিম্মিন দা·আলো না·সং জেদাক্কে বিমচিপিংআ আংআবা উয়ানদাক্কেন হং·আমিং। 4 যীশুনি রামাও জেরাং রি·নুয়ামিং বিসংখো আংআ গিচ্চিয়েতি বাং·আরাংখোন স·ওতে গালনুয়ামিং আরো মি·আসা আরো মিচিকরাংখো রি·ম্মে জেলো দন্নুয়ামিং। 5 ইয়া খাৎথা বিবি হং·আ, ইনি সাক্ষি দাল·বাৎগিবা খামাল আরো দাল·বাৎগিবা খ্রিমানি গিম্মিকান হং·আ। আংআ বিসংচানিখো দামেস্ক সংজিলমানি থরমনি দাল·গিবারাংনা চিঠি রা·আমিং আরো উয়ানদাকগিবা মান্দিরাংখো বন্দি দাক্কে যিরূশালেমোনা রিমবাএ শাস্তি হ·ন্না উয়োনা রি·য়াংআমিং। 6 “উনো সালজাচ্চি হং·জক। আংআ দামেস্কনি সেফাংগ্রিক রি·বানি জা·মানো রাং·গিত্তিক আংনি সামব্রিও সালগিওনি চিং·ব্রাপা সেং·আ থেং·সুজক। 7 আংআ হা·আও গা·আকজক আরো সানিবা আংনা ইন্দাকে আগানাখো খিন্নাজক, ‘শৌল, শৌল, মুয়ানা না·আ আংখো গিচ্চিয়েতিংজক?’ 8 “আংআ সিং·জক, ‘গিত্তেল, না·আ সা?’ “বিয়া আগানজক, ‘আংআ নাসরতনি যীশু, জেখো না·আ গিচ্চিয়েতিংআ।’ 9 আংমুং দংগিবারাং উয়া সেং·আখো নিকজক, ইন্দিবা আংমুং খাৎথা আগানগিবানি খাৎথাখো বিসং হা·আইজাজক। 10 “উনোন আংআ আগানজক, ‘গিত্তেল, আংআ মুয়াখো দাকনুয়া?’ “গিত্তেল আগানজক, ‘চাখাতবো, দামেস্কওনা রি·য়াংবো। নাং·না জেখো থারিয়ে দনসোজক উখো উয়োন নাং·না আগান্নুয়া।’ 11 আংনি রিপ্পেংরাং জাকখো রি·ম্মে আংখো দামেস্কচানা রিম্মাংজক, মুয়ানা উয়া চিং·ব্রাপা সেং·আও আংআ মিকগ্রি হং·জকমিং। 12 “জা·মানো অননিয় মিংগিবা মান্দি সাকসা আংচা রি·বাজক। বিয়া মোশিনি নিয়ামরাংখো খা·ফাকে মানিনুয়ামিং, আরো উনি গিম্মিক যিহূদীরাং বিখো নাম্মেন মান্দিরা·নুয়ামিং। 13 বিয়া আংনি কেচ্চিও রি·বাএ চাদেংএ আগানজক, ‘জং শৌল, নাং·নি নিক্কানি বিল রি·বাফিলখানা।’ আরো উনোন আংআ বিখো নিকনা মান·জক। 14 “উনোন অননিয় আগানজক, ‘আনচিংনি ফাগিৎচামরাংনি ইসল নাং·খো বাচ্ছিয়ে রা·জক জেদাক্কে না·আ বিনি হা·সিকাখো হা·আইনা মা·ন্না, আরো উয়া খাকখেৎগিবা মান্দি, আগানস্খাওদে যীশু খ্রীষ্টখো নিকনা মা·ন্না আরো বিনি খু·সুকখো খিন্নানা মা·ন্না। 15 না·আ বিনিন সাক্ষি হং·নুয়া আরো নাং·নি নিকগিবাখো আরো খিন্নাগিবাখো মান্দিরাংনা আগানবো। 16 দা·আও না·আ মুয়ানা হারিমিংআ? চাখাত্তে রিপ্পলবো আরো পাপওনি জক্কাখো মা·ন্না যীশুখো রিংগামে নাং·নি গিম্মিক পাপরাংখো সু·গালবো।’ 17 “জা·মানো আংআ যিরূশালেমচা রি·বাফিল্লে সালসাও থরম নক্কো বি·মিত্তিংও আংআ থুনা হা·সিকা গিত্তা দাকজক। 18 উনো গিত্তেল আংমুং খাৎথা আগানাখো আংআ নিকজক। বিয়া আংনা আগানজক, ‘থেংরি দাকবো, দা·আওন যিরূশালেমখো ওয়াত্তে রি·য়াংবো, মুয়ানা আংনি গিম্মিন নাং·নি সাক্ষি হ·ন্নাখো মান্দিরাং রা·চাকজানুয়া।’ 19 “আংআ আগানজক, ‘গিত্তেল, নাং·খো বিবিরা·গিবারাংখো দক্কে জেলো দন্না আংআ থম·দাকরাম দামসাওনি দামসাওনা রি·য়াংনুয়ামিং ইন্নে ইয়া মান্দিরাং হা·আইয়া। 20 নাং·নি সাক্ষি স্তিফানখো স·ওতমিত্তিংও আংআ উয়ো চাদেংএ স·ওতনা আগানফাআমিং, আরো বিখো স·ওতগিবারাংনি বা·রাচলারাংখো নিরক্ষিংআমিং।’ 21 “উনোন গিত্তেল আংনা আগানজক, ‘না·আ রি·য়াংবো, আংআ নাং·খো চে·ল্লাচানা গিপ্পিন জাতরাংচা ওয়াত্তেতনুয়া।’ ” 22 মান্দিরাং পৌলনি খাৎথাখো খিন্নাংআমিং, ইন্দিবা বিয়া গিপ্পিন জাতরাংখো আগানোন মান্দিরাং চ্রিকে ইন্না হা·বাচেংজক, “বিখো হা·গিলসাকনিখো হা·রিকেতবো; বিয়া থাংএ দংনা খ্রাজা।” 23 মান্দিরাংনি চ্রিকো আরো বা·রারাংখো গোএ সিলগাও হা·দুলাখো গোচ্রাকো, 24 উনো কমান্ডার পৌলখো সিপাইরাংনি দংরামচা রা·আংখানা গি·য়েৎজক। মান্দিরাং মুয়ানা পৌলনি সাক্কাও ইন্দাকে চ্রিকিংআ উখো হা·আইনা বিয়া বিখো চাবুকচা দক্কে সিং·থেকখানা গি·য়েৎজক। 25 পৌলখো চাবুকচা দকনা খাআও উয়ো চাদেংএ দংগিবা সুবিদারনা পৌল আগানজক, “জেখো দোস দংআ ইন্নে থিক দাকখুজা ইন্দাকগিবা রোমনি মান্দি সাকসাখো দক্কা না·সংনি নিয়াম গিত্তা কাম হং·আমা?” 26 ইখো খিন্নাএ উয়া সুবিদার কমান্ডারনা আগানজক, “না·আ মুয়াখো দাকনা রি·য়াংইংজক? বিয়াদে রোমনি মান্দি হং·আ।” 27 উনো কমান্ডার পৌলচা রি·য়াংএ সিং·জক, “আংনা আগানবো, না·আ রোমনি মান্দি হং·আমা?” পৌল আগানজক, “হো·এ।” 28 কমান্ডার আগানজক, “থাংখা বাং·এ হ·ন্নে রোমনি মান্দি হং·আনি বিলখো আংআ ব্রিএ রা·জক।” পৌল ইনজক, “ইন্দিবা আংআদে রোমনি মান্দি হং·এন আৎচিয়া।” 29 ইখো খিন্নাএ বিখো সিং·থেকনা হাম·গিবারাং উনোন রি·য়াংআরিজক। কমান্ডার রোমনি মান্দি সাকসাখো খাআমিং ইন্নে হা·আইনা মা·ন্নে বিয়া খেনজক। 30 যিহূদীরাং মুয়ানা পৌলখো দোস হ·ন্নিংআ উখো নাম্মেদাক্কে হা·আইনা সালগিপ্পিনো কমান্ডার পৌলখো খাআনিখো এংএতজক আরো দাল·গিবা খামালরাংখো আরো দাল·বাৎগিবা খ্রিমানি মান্দিরাংখো আপসান হং·খানা গি·য়েৎজক। জা·মানো বিয়া পৌলখো রিমবাএ বিসংনি মিকখাংও চাদেংএতজক।

ওয়াত্তেতারাং 23

1 পৌল দাল·বাৎগিবা খ্রিমানি মান্দিরাংচাখো নিথাতে আগানজক, “আংনি জংআদারাং, দা·আওনা দিপ্পাৎ আংআ ইসলনি গিম্মিন আংনি দাক্কানিখো দাক্কিংজক।” 2 ইখো খিন্নাএ দাল·বাৎগিবা খামাল অননিয় পৌলনি কেচ্চিও চাদেংগিবারাংখো বিনি খু·সুকখো দকফাকেতখানা গি·য়েৎজক। 3 উনোন পৌল অননিয়না আগানজক, “বু·এ চা·গিবা, ইসল নাং·খোবা দকফাকনুয়া। নিয়াম গিত্তা আংখো বিচাল দাকনা না·আ উয়ো আসংজক, ইন্দিবা আংখো দকখানা গি·য়েতি না·আ আন·থাংআন নিয়ামখো ফি·ইংজক।” 4 পৌলনি কেচ্চিও চাদেংগিবারাং বিনা আগানজক, “না·আ ইসলনি দাল·বাৎগিবা খামালখো চন্নিকিংজক!” 5 উনোন পৌল আগানজক, “জংআদারাং, বিয়া দাল·বাৎগিবা খামাল হং·আ ইন্নে আংআ হা·আইজামিং। হা·আইওদে উয়া খাৎথাখো আগানজানুয়ামিং, মুয়ানা রংথালগিবা শাস্ত্রও চক্কা দংআ, ‘নাং·নি জাতরাংনি দাল·বাৎগিবাখো দা·আ চন্নিকাবো।’ ” 6 উয়া দাল·বাৎগিবা খ্রিমাও দংগিবারাংওনি মিত্তাম সদ্দূকী আরো মিত্তাম ফরীশী ইন্নে হা·আইএ পৌল দাল·বাৎগিবা খ্রিমাও রাক্কে আগানজক, “আংনি জংআদারাং, আংআ সাকসা ফরীশী আরো ফরীশীনি দেফান্থি। সিগিবারাং থাংচাফিলনুয়া ইখো বিবিরা·আনি গিম্মিন আংখো বিচাল দাক্কিংআ।” 7 বিনি ইন্দাকে আগানানা ফরীশী আরো সদ্দূকীরাংও নিরিনা হা·বাচেংজক। ইনি গিম্মিন দাল·বাৎগিবা খ্রিমাও মান্দিরাং বাক হং·আংজক, 8 মুয়ানা সদ্দূকীরাং আগানা, “সিগিবারাং থাংচাফিলজানুয়া।” ইনাআগ্রেবা বিসং ইন্দাকে আগানা, সা·গ্রেরাংবা দংজা, গিসিকবা দংজা; ইন্দিবা ফরীশীরাংদে ইয়া গিম্মিকখোন বিবিরা·আ। 9 উনো নাম্মেন গোলমাল হং·জক আরো ফরীশীরাংওনি মিত্তাম শাস্ত্র স্খিগিবারাং চাখাত্তে রাক্কে ইনগ্রিকনা হা·বাচেংজক। বিসং আগানজক, “চিংআ ইয়া মান্দিনি মামুং দোসখো নিকজাংআ। গিসিক বা সা·গ্রে বিমুং খাৎথা আগান্নাবা দংআ।” 10 উয়া নিরিয়া ইন্দাকে বিল্লংএ হং·আনি গিম্মিন বিসং পৌলখো থং·থাং থং·থাং দাকনাবা গ্মাং ইন্নে কমান্ডার খেনজক। বিয়া সিপাইরাংখো রি·য়াংএ মান্দিরাংনি জাকনিখো পৌলখো রা·এ বিসংনি দংরামো রিম্মাংখানা গি·য়েৎজক। 11 সালগিপ্পিনো ওয়াল্লো গিত্তেল পৌলনি কেচ্চিও চাদেংএ ইনজক, “দা·আ খেন্নাবো, যিরূশালেমো আংনি গিম্মিন নাং·নি সাক্ষি হ·ন্না গিত্তা রোমচাবা নাং·নি সাক্ষি হ·ন্না নাংনুয়া।” 12 সালগিপ্পিনো ফ্রিংও যিহূদীরাং খু·মংজক আরো পৌলখো স·ওতখুজানা দিপ্পাৎ মামুংখোন চা·জানুয়া ইন্নে খু·মিকচেতজক। 13 সাক সৎব্রিমাংনাবা বাত্তা মান্দিরাং ইন্দাকে খু·চিংজক। 14 বিসং দাল·গিবা খামালরাংচা আরো যিহূদী মি·আফারাংচা রি·য়াংএ আগানজক, “পৌলখো স·ওতখুজানা দিপ্পাৎ মামুংখোন চা·জানুয়া ইন্নে চিংআ খু·মিকচেতজক। 15 দা·আও না·সং আরো দাল·বাৎগিবা খ্রিমানি মান্দিরাং ইনি গিম্মিন নাম্মেদাক্কে হা·আইনা ফা·সিকে পৌলখো না·সংনি মিকখাংও রিমবানা কমান্ডারচা আগানেতবো। বিয়া ইনো সকনা স্খাংআন চিংআ বিখো বন·স্রাংএতনা থারিয়ে দংসোজক।” 16 ইন্দিবা পৌলনি গ্রিগিবা ইন্দাকে খু·চিংআখো খিন্নাএ সিপাইরাংনি দংরামোনা রি·য়াংজক আরো পৌলনা উখো আগানজক। 17 উনোন পৌল সুবিদার সাকসাখো রিংগামে আগানজক, “ইয়া ফান্থিখো কমান্ডারচা রিম্মাংবো। বিচা বিনি আগানানি দংআ।” 18 উনোন উয়া সুবিদার উয়া ফান্থিখো কমান্ডারচা রিম্মাংএ আগানজক, “বন্দি পৌল আংখো রিংগামে ইয়া ফান্থিখো নাং·চা রিমবাখানা আগানা, মুয়ানা নাং·চা বিনি আগানানি দংআনা।” 19 কমান্ডার উনো উয়া ফান্থিনি জাকখো রি·ম্মে হা·দাম সামসাচা রিম্মাংএ আগানজক, “আংনা না·আ মুয়াখো আগান্না হা·ম্মিংআ?” 20 উয়া ফান্থি আগানজক, “যিহূদীরাং ইন্দাকে থিক দাকজক, পৌলনি গিম্মিন আরোবা নাম্মেদাক্কে হা·আইনা ফা·সিকে আম্বুনো বিখো দাল·বাৎগিবা খ্রিমাও রিম্মাংখানা নাং·চা মল·মলনুয়া। 21 না·আ বিসংনি খাৎথাখো দা·আ খিন্নাচাক্কাবো, মুয়ানা সৎব্রিনা বাত্তেবা বাং·আ মান্দি থুম্মুয়ে দংএ পৌলনা সেংসোংজক। পৌলখো স·ওতখুজানা দিপ্পাৎদে ইয়া মান্দিরাং মামুংখো চা·জানুয়া ইন্নে খু·মিকচেতজক। বিসং থারিসোএ দা·আও নাং·নি গং·আনাসান সেং·এ দংআ।” 22 কমান্ডার উয়া ফান্থিখো ওয়াত্তেতমিত্তিংও ইন্দাকে গি·য়েৎজক, “ইয়া খাৎথাখো না·আ আংনা আগানজক ইখো দারাংনাবা দা·আ আগানাবো।” 23 জা·মানো কমান্ডার বিনি সাকগ্মি সুবিদারখো রিংগামে আগানজক, “সাক রিৎচাগ্মি সিপাইরাং, সাক সৎস্নি ঘোড়াও গাখাতগিবা সিপাইরাং আরো রিৎচাগ্মি জাত্থা গোগিবা সিপাইরাংখো দা·আল ওয়াল্লো স্খু বাজিও কৈসরিয়াচা রি·য়াংনা থারিসোবো। 24 আরো পৌলনাবা ঘোড়াখো থারিবো জেদাক্কে বিখো দাল·গিবা শাসন দাকগিবা ফীলিক্সচা নাম্মেদাক্কে রিম্মাংনা মা·ন্না।” 25 কমান্ডার ইয়া চিঠিখো চকজক: 26 “আংআ, ক্লৌদিয় লুসিয়, দাল·বাৎগিবা শাসন দাকগিবা ফীলিক্সনা ইয়া চিঠিখো চক্কিংজক। আংনি সালামখো রা·বো। 27 “যিহূদীরাং ইয়া মান্দিখো রি·ম্মে স·ওতেন গাল্লিংজকমিং, ইন্দিবা আংআ আংনি সিপাইরাংমুং রি·য়াংএ বিখো জক্কেতি রা·বাজক, মুয়ানা বিয়া রোমনি সাকসা মান্দি হং·আ ইন্নে আংআ হা·আইনা মান·জক। 28 জা·মানো আংআ হা·আইনা হাম·জক মান্দিরাং মুয়ানা বিখো দোস হ·ন্নিংআ। উনি গিম্মিন আংআ বিখো বিসংনি দাল·বাৎগিবা খ্রিমাওনা রা·আংজক। 29 আংআ ইখো হা·আইনা মান·জক বিসং বিসংনি থরমনি নিয়ামরাংখো রা·এ বিখো দোস হ·ন্নিংআ, ইন্দিবা স·ওতনা গিত্তা বা জেলো দন্না গিত্তাদে বিনি মামুং দোস দংজা। 30 ইয়া মান্দিখো রা·এ মান্দিরাংনি খু·চিংআখো হা·আইনা মা·ন্নে বিখো আংআ নাং·চা ওয়াত্তেতজক। বিখো দোস হন·গিবারাংখোবা আংআ ইন্দাকে গি·য়েৎজক জেদাক্কে বিসং বিনি দোসনি গিম্মিন নাং·চা আগানা।” 31 উনোন সিপাইরাং কমান্ডারনি গি·য়েতা গিত্তা পৌলখো ওয়াল্লো বিসংমুং আন্তিপাত্রি সংজিলমাওনা সক্কে রিম্মাংজক। 32 সালগিপ্পিনো বিসং ঘোড়াও গাখাতগিবা সিপাইরাংমুং পৌলখো ওয়াত্তেতি বিসংনি দংরামোনা রি·য়াংফিলজক। 33 ঘোড়াও গাখাতগিবা সিপাইরাং কৈসরিয়াও সক্কে চিঠিখো আরো পৌলখো দাল·গিবা শাসন দাকগিবানি জাক্কো হন·জক। 34 দাল·গিবা শাসন দাকগিবা চিঠিখো পড়িয়ে পৌল বাগিবা হা·দামনি মান্দি উখো সিং·জক। পৌল কিলিকিয়া হা·দকনি মান্দি ইখো হা·আইনা মা·ন্নে বিয়া আগানজক, 35 “নাং·না দোস হন·গিবারাং ইনো সকজোকনো আংআ নাং·নি আগানাখো খিন্নানুয়া।” জা·মানো বিয়া রাজা হেরোদনি নকনি জেলো পৌলখো নিরক্ষিয়ে দন্না আগানজক।

ওয়াত্তেতারাং 24

1 সালবংআনি জা·মানো খামাল দাল·বাৎগিবা অননিয় মিত্তাম যিহূদী মি·আফারাংখো আরো তর্তুল্ল মিংগিবা উকিল সাকসাখো রিম্মে কৈসরিয়াওনা রি·য়াংজক আরো পৌলখো দাল·গিবা শাসন দাকগিবাচা নালিশ দাকজক। 2 পৌলখো রিংগামে রা·বানি জা·মানো তর্তুল্ল ইখো ইন্নে পৌলনি দোসখো ফিন্নিকনা হা·বাচেংজক, “ফামং ফীলিক্স, নাং·নি শাসনও চিংআ সাল বাং·এ নাম্মেন থম·থমাও দংআ। না·আ নাং·নি হা·আইয়াচা ইয়া জাতরাংনা বাং·এন নাম্মাখো দাকজক। ইনি গিম্মিন চিংআ ফাংনানান হা·দাম গিম্মিকো নাং·না চিংনি মিৎথেলাখো হ·ন্নে দংআ। 4 ইন্দিবা নাং·নি সময় নাসিজাখানা ইন্নে আংআ ইন্দাকে মল·মলা, না·আ খা·সাফাএ চিংনি আগানাখো খিন্নাচাকবো। চিংআ অকখিসা খাৎথাচা গিম্মিকখো আগান্নুয়া। 5 “চিংআ নিকজক ইয়া মান্দি বামগিজাগিবা হং·আ; ফাংনানান বিয়া গোলমালখো দাক্কেতা। হা·গিলসাক গিম্মিকো যিহূদীরাংও বিয়া গোলমাল দাক্কেতা। বিয়া নাসরীয় মিংগিবা থরমনা চাংফেংগিবা দলনি দাল·গিবা হং·আ। 6 থরম নক্কোনা দিপ্পাৎ বিয়া মারাং নাংএতনা হা·ম্মা ইন্নে চিংআ বিখো রিম·জক। 8 চিংআ বিখো জেগিত্তা দোস হ·ন্নিংআ, না·আ আন·থাং বিখো সিং·রোকে নিও গিম্মিকখোন হা·আইনা মা·ন্নুয়া।” 9 ইয়া খাৎথারাং বিবি হং·আ ইন্নে যিহূদীরাংবা আগানজক। 10 উনোন দাল·গিবা শাসন দাকগিবা পৌলখো জাকচা জাকজিপানি জা·মানো পৌল ইন্না হা·বাচেংজক, “আংআ হা·আইয়া, বাং·আ বিলসি দিপ্পাৎ না·আ ইয়া যিহূদী জাতরাংখো বিচাল দাকবাংজক; উনি হা·সেল আংআ খুসি হং·বিএ আন·থাংনি গিম্মিন খাৎথা আগানিংআ। 11 যিরূশালেমচা আংনি অলাখিনা রি·য়াংআ সাল চি·গ্মিনা বাং·এ হং·খুজামিং। সান্দিয়ে নিওদে না·আ উখো হা·আইনা মা·ন্নুয়া। 12 আংখো দোস হন·গিবারাং থরম নক্কো আংখো সাকসামিংবা জিগ্রিকাখো নিকখুজা বা থম·দাকরামো বা সংজিলমানি গিপ্পিন হা·দামওবা মান্দিরাংখো বোবিল দাকনা দিদিয়াখো নিকখুজা। 13 আংখো বিসং দা·আও জেদাক্কে দোস হ·ন্নিংআ উখো বিসং নাং·চা ফিন্নিকনা মান·জানুয়া। 14 জেবা হং·খানা, ইয়া খাৎথাখো আংআ নাং·চা খু·রাচাকিংজক, যীশু খ্রীষ্টনি রামা, জেখো বিসং থরমখো চাংফেংগিবা রামা ইন্না, আংআ উয়া রামাওন আংনি ফাগিৎচামরাংনি ইসলখো অলাখিয়া। মোশিনি নিয়ামরাংমুং আপসান হং·গিবারাংও আরো আগানসোগিবারাংনি চক্কাও আংআ বিবিরা·আ। 15 বিসংনি খা·দংআ গিত্তা আংআবা ইসলনি সাক্কাও ইন্দাকে খা·দংআ, থরমি বা থরমি হং·গিজাগিবা গিম্মিকখোন থাংচাফিল্লেতনুয়া। 16 উনি গিম্মিন আংআ ইসল আরো মান্দিরাংচা ফাংনানান আংনি গিসিকখো রংথালে দন্না হা·ম্মা। 17 “বিলসি বাং·এ রি·য়াংআনি জা·মানো আংআ যিরূশালেমচা রি·য়াংআমিং জেদাক্কে আংনি জাতনি দিল্লা-চন্না মান্দিরাংনা অকখিসা থাংখা হ·ন্না মা·ন্না আরো মাৎবুরুংখো বলি হ·ন্না মা·ন্না। 18 আন·থাংখো রংথালেতানি জা·মানো আংনি উয়া কামখো দাকমিত্তিংওন বিসং আংখো থরম নক্কো নিক্কামিং। আংনি কেচ্চিও মান্দি জিলমাবা দংজা বা আংখো রা·এ গোলমালবা হং·জা। 19 ইন্দিবা এশিয়া হা·দকনি মিত্তাম যিহূদী উয়ো দংআমিং। নাং·চা উয়া যিহূদীরাংনিন রি·বানা নাংআমিং আরো আংখো দোস হ·ন্না গিত্তা মামুং দংওদে উখো বিসংআন হ·ন্না নাংআমিং। 20 হং·জাওবা ইনো দংগিবারাংআন আগানবো, আংআ দাল·বাৎগিবা খ্রিমাও চাদেংএ দংমিত্তিংও বিসং আংনি মুয়া দোসখো মা·ন্নামিং। 21 ইয়া মিংসাওসান বিসং আংখো দোস হ·ন্না মা·ন্না, আংআ বিসংনি মিকখাংও চাদেংএ রাক্কে আগানামিং, ‘সিগিবারাংনি থাংচাফিল্লানি গিম্মিন দা·আল না·সংনি মিকখাংও আংখো বিচাল দাক্কিংআ।’ ” 22 যীশুনি রামানি গিম্মিন ফীলিক্স নাম্মেদাক্কেন হা·আইয়ামিং। বিয়া বিচাল দাক্কাখো দন্নে আগানজক, “কমান্ডার লুসিয় রি·বানি জা·মানো আংআ না·সংনি বিচাল দাক্কাখো ব·ন্নেতনুয়া।” 23 বিয়া পৌলখো রাক্ষিখানা সুবিদার সাকসাখো গি·য়েৎজক, ইন্দিবা বিখো অকখিসা ওয়াত্তে দনখানা আগানজক। বিয়া ইন্দাকে হন·জক জেদাক্কে পৌলনি রিপ্পেংরাং রি·বাএ নাংআ গিত্তা বিনা দাকচাকে হ·ন্না মা·ন্না। 24 সালসা সালগ্মি জা·মানচা ফীলিক্স বিনি যিহূদী জিকগিবা দ্রুষিল্লাখো রিম্মে রি·বাজক। বিয়া পৌলখো রিংগামে বিচা খ্রীষ্ট যীশুনি সাক্কাও বিবিরা·আনি খাৎথাখো খিন্নাজক। 25 খাকখেৎ হং·আনি, আন·থাংখো বাম্মেতানি আরো রি·বাগিবা বিচালনি গিম্মিনো পৌলনি আগানোন ফীলিক্স খেনজাগোকে আগানজক, “না·আ দা·আও রি·য়াংবো; চলজকা গিত্তা আংআ নাং·খো রিক্কামনুয়া।” 26 পৌল বিনা মামুংখো হ·ন্নুয়া ইন্নে খা·দংআমিং। উনি গিম্মিন দা·আন দা·আন পৌলখো রিংগামে রা·বাএ বিয়া বিমুং খাৎথা আগান্নুয়ামিং। 27 বিলসি গ্মি বাত্তাংআনি জা·মানো ফীলিক্সনি হা·দামও পর্কীয় ফীষ্ট রি·বাজক। ফীলিক্স যিহূদীরাংখো খুসি দাকনা পৌলখো জেলোন দন্নাংজক।

ওয়াত্তেতারাং 25

1 উয়া হা·দকো রি·বানি সালগিত্থামনি জা·মানো ফীষ্ট কৈসরিয়াওনি যিরূশালেমচানা রি·য়াংজক। 2 উনোন দাল·গিবা খামালরাং আরো যিহূদীরাংনি দাল·গিবারাং বিচা রি·য়াংএ পৌলখো নালিশ দাকজক। 3 বিসং ফীষ্টখো মল·মলজক জেদাক্কে বিয়া বিসংনা খা·সাচাক্কে পৌলখো যিরূশালেমো রি·বাখানা আগানেতা। মুয়ানা বিসং রামাও থুম্মুয়ে দংএ পৌলখো স·ওতনা খু·চিংআমিং। 4 উনোন ফীষ্ট আগানজক, “পৌলখো কৈসরিয়াও চিপ্পে দন্না হং·জক আরো আংআ আন·থাংআন উয়োনা থেংরি রি·য়াংইংজক। 5 না·সংওনি বিলগ্মাং মিত্তাম মান্দিরাং আংমুং রি·খানা আরো উয়া মান্দি মামুং দোসখো দাক্কে দংওদে উখো ফিন্নিকখানা।” 6 ফীষ্ট বিসংমুং সালচেৎ-সালচিখুং দংআনি জা·মানো কৈসরিয়াচানা ফি·ল্লাংজক। সালগিপ্পিনো বিচাল দাকরামো আসংএ বিয়া পৌলখো বিনি মিকখাংও রিমবাখানা গি·য়েৎজক। 7 পৌলনি উয়োনা রি·বানি জা·মানো যিরূশালেমচানি রি·বাগিবা যিহূদীরাং বিখো উইলউইলে চাদেংএ বিখো বাং·এ দোস হন·জক, ইন্দিবা উরাংখো ফিন্নিকনা মান·জাজক। 8 উনোন পৌল আন·থাংনা চাক্কে ইয়া খাৎথাখো আগানজক, “আংআ যিহূদীরাংনি নিয়ামরাংখো বা থরম নক বা রোম সম্রাটনি সাক্কাও মামুং অন্যায়খো দাকজা।” 9 ফীষ্ট যিহূদীরাংখো খুসি দাক্কেতনা পৌলখো ইনজক, “জেদাক্কে আংআ ইয়া দোসরাংনি বিচালখো যিরূশালেমচা দাকনা মা·ন্না উনি গিম্মিন না·আ উচা রি·য়াংনা হা·ম্মামা?” 10 উনোন পৌল আগানজক, “আংআ দা·আও রোমনি বিচাল দাকরামো চাদেংএ দংআ আরো ইয়োন আংনি বিচাল হং·না নাংআ। আংআ যিহূদীরাংনি সাক্কাও নামগিজাখো দাকজা, ইখো না·আ আন·থাংআন নাম্মেদাক্কে হা·আইয়া। 11 জেবা হং·বো, আংআ সিনা খ্রাআ গিত্তা দোস দাক্কোদে আংআ সিনা হা·ম্মা। ইন্দিবা ইয়া যিহূদীরাং আংখো জেগিত্তা দোস হ·ন্নিংজক উয়া বিবি হং·জাওদে বিসংনি জাক্কো আংখো ওয়াত্তেতানি বিল সাকসানিবা দংজা। আংআ সম্রাটচা আপিল দাক্কিংআ।” 12 ফীষ্ট বিনা খু·ফাত্তিগিবারাংমুং খু·মংএ আগানজক, “না·আ সম্রাটচা আপিল দাক্কোদে সম্রাটচান রি·য়াংবো।” 13 উনি বাং·গিজা সালনি জা·মানো যিহূদীরাংনি রাজা আগ্রিপ্প আরো বিনি জিকগিবা বর্ণীকী ফীষ্টখো সালাম হ·ন্না ইন্নে কৈসরিয়াওনা রি·বাজক। 14 বিসং উয়ো সাল বাং·এ দংআনি গিম্মিন ফীষ্ট পৌলনি গিম্মিন রাজানা আগানজক। বিয়া আগানজক, “ফীলিক্স মান্দি সাকসাখো ইনো চিপ্পে দন্নাংজক। 15 জেনসালো আংআ যিরূশালেমচা রি·য়াংআমিং উনো দাল·গিবা খামালরাং আরো যিহূদীরাংনি মি·আফারাং ইয়া মান্দিনি সাক্কাও বাং·এন নালিশ দাক্কামিং আরো দোস দাকগিবা ইন্নে বিনা শাস্তি হন·খানা আগানামিং। 16 “আংআ বিসংনা আগানজক, ‘সাখোবা নালিশ দাক্কোদে নালিশ দাকগিবারাংনি মিকখাংও আন·থাংখো দোসগ্রি দাক্কে ফিন্নিকনা মান·খুজানা দিপ্পাৎ বিখো শাস্তি হ·ন্নানি বেওয়াল রোমানরাংনি দংজা।’ 17 “উয়া যিহূদীরাং আংমুং রি·বানি জা·মানো আংআ হারিমগিজা সালগিপ্পিনোন বিচাল দাকনা আসংজক আরো উয়া মান্দিখো রিমবাখানা গি·য়েৎজক। 18 বিখো দোস হন·গিবা মান্দিরাং খাৎথা আগান্না চাদেংওন আংআ জেগিত্তা চানচিয়ামিং উগিত্তা মামুং নালিশখো বিসং দাকজাজক, 19 বাত্তেসা বিসংনি থরম গিত্তা আরো যীশু মিংগিবা সিগিবা মান্দি সাকসানি গিম্মিন বিখো দোস হন·জক। পৌল মিংগিবা উয়া মান্দি যীশুখো থাংএ দংখুংআ ইন্নে আগানা। 20 ইরাংনি গিম্মিন বাদিকে দাক্কে হা·আইনা মা·ন্নুয়া উখো হা·আইজাএ আংআ সিং·জক, ইয়া দোসরাংখো জেদাক্কে বিচাল দাকনা মা·ন্না উনি হা·সেল উয়া মান্দি যিরূশালেমচা রি·য়াংনা গং·আমা গং·জা। 21 ইন্দিবা বিয়া সম্রাটনি বিচালনি গিম্মিন সেংসোনা আংচা আপিল দাক্কো সম্রাটচা ওয়াত্তেতখুজানা দিপ্পাৎ বিখো রাক্ষিয়ে দনখানা আংআ গি·য়েৎজক।” 22 উনোন আগ্রিপ্প ফীষ্টনা আগানজক, “আংআ আন·থাংআন ইয়া মান্দিনি আগানাখো খিন্নানা হা·সিকা।” ফীষ্ট আগানজক, “আম্বুনো খিন্নানা মা·ন্নুয়া।” 23 সালগিপ্পিনো রাজা আগ্রিপ্প আরো বর্ণীকী কমান্ডাররাংখো আরো সংজিলমানি দাল·দাল·গিবা মান্দিরাংখো রা·এ খ্রিমাও নাপজক। ফীষ্টনি গি·য়েতা গিত্তা পৌলখো উয়োনা রিমবাজক। 24 উনোন ফীষ্ট আগানজক, “রাজা আগ্রিপ্প আরো ইনো দংগিবারাং, না·সং ইয়া মান্দিখো নিক্কিংজক। যিহূদী গিম্মিকান যিরূশালেমো আরো কৈসরিয়াও আংচা আপিল দাকজক আরো চ্রিকে আগানা, ইয়া মান্দি থাংএ দংনা খ্রাজা। 25 ইন্দিবা আংআ নিকজক, সিয়ানি শাস্তিখো হ·ন্না গিত্তা মামুং দোস বিয়া দাকজা। ইন্দিবা বিয়া আন·থাংআন সম্রাটচা আপিল দাকজক ইন্নে আংআ বিখো সম্রাটচা ওয়াত্তেতনা থিক দাকস্রাংজক, 26 ইন্দিবা দাল·বাৎগিবা সম্রাটচা চকনা গিত্তা মামুংখোন মান·জাজক। উনি গিম্মিন আংআ না·সংনি গিম্মিকনি মিকখাংও, মংসংবাত্তে রাজা আগ্রিপ্প নাং·নি মিকখাংও বিখো রিমবাজক জেদাক্কে বিখো সিং·থাএ আংআ মামুংখো চকনা মা·ন্না; 27 মুয়ানা আংনি চানচিয়া গিত্তাদে বন্দিখো ওয়াত্তেতো বিনি দোসরাংখোবা হা·আইএতনা নাংআ।”

ওয়াত্তেতারাং 26

1 উনোন আগ্রিপ্প পৌলখো ইনজক, “নাং·খো আন·থাংনি গিম্মিন খাৎথা আগান্না হন·জক।” উনোন পৌল জাকখো সিল্লে আন·থাংনি গিম্মিন ইন্দাকে আগানজক, 2 “ও রাজা আগ্রিপ্প, যিহূদীরাং আংখো জেগিত্তা দোস হন·জক উখো চাংফেংএ দা·আলো নাং·নি মিকখাংও আন·থাংনি গিম্মিন আগানানি চলখো মা·ন্নে আংআ আন·থাংখো রাসং গ্মাংগিবা ইন্নে চানচিংআ, 3 মংসংদে যিহূদীরাংনি দাকবেওয়াল আরো জিগ্রিকানি গিম্মিন না·আ নাম্মেদাক্কেন হা·আইয়া। ইনি গিম্মিন আংনি খাৎথাখো চাকচিকে খিন্নাচাকখানা আংআ নাং·খো মল·মলা। 4 “চনমিত্তিংওনি, আগানস্খাওদে আংনি চাসংনি হা·বাচেংওনি আংনি আন·থাংনি হা·সংও আরো জা·মানো যিরূশালেমনি মান্দিরাংনি গিসেপো আংআ বাদিকে জাংগি থাংজক উখো যিহূদীরাং গিম্মিকান হা·আইয়া। 5 বিসং স্খাংওনিন আংখো হা·আইয়া আরো হা·সিকোদে ইন্দাকে সাক্ষি হ·ন্না মা·ন্না, চিংনি থরমও ফরীশী মিংগিবা দল দংআ আংআ উয়া ফরীশী হং·এন দংআমিং। 6 ইসল আংনি ফাগিৎচামরাংচা জেখো খু·রাচাক্কামিং উয়ো আংনি খা·দংআনি গিম্মিন দা·আও আংখো বিচাল দাক্কিংআ। 7 চিংনি চি·গ্মি জাতনি মান্দিরাং সালওয়াল গিসিক নাংএ ইসলনা দাকচাকে হ·ন্নে উয়া খু·রাচাক্কানি চু·সকাখো নিকনা খা·দংএ দংআ। দাল·বাৎগিবা রাজা, উয়া খা·দংআনি গিম্মিনান যিহূদীরাং আংখো দোস হ·ন্নিংআ। 8 ইসল সিগিবারাংখো থাংএতা ইয়া খাৎথা বিবিরা·নি গিত্তা হং·জা ইন্নে না·সং মুয়ানা চানচিংআ? 9 “নাসরতনি যীশুনি সাক্কাও জেখো দাকনা মা·ন্না উয়া গিম্মিকখোন আংনি দাকনা খ্রাআ ইন্নে আংআ আন·থাংআন বিবিরা·নুয়ামিং, 10 আরো উখোন আংআ যিরূশালেমচা দাক্কিংআমিং। খামাল দাল·গিবারাংচাখো বিল মা·ন্নে আংআ খ্র্রীষ্টখো বিবিরা·গিবা বাং·আ মান্দিরাংখো জেলো দন্নুয়ামিং আরো বিসংখো স·ওতানি সালো বিসংখো স·ওতখানা জাক দি·ফানুয়ামিং। 11 বিসংখো শাস্তি হ·ন্না সময়ফ্রাকওন আংআ থম·দাকরাম দামসাওনি থম·দাকরাম দামসাওনা রি·য়াংনুয়ামিং আরো যীশুনি সাক্কাও খাৎথা আগানখানা আংআ বিসংখো দাগিলনুয়ামিং। বিসংখো আংআ ইন্দাকফিল্লে খা·আওনাংআনি গিম্মিন বিসংখো গিচ্চিয়েতনা আংআ হা·সং গিপ্পিননি সংজিলমারাংচাবা রি·য়াংনুয়ামিং। 12 “ইন্দাকেন রাং·সাও খামাল দাল·গিবারাংচাখো বিলখো আরো গি·য়েতাখো মা·ন্নে আংআ দামেস্কচা রি·য়াংআমিং। 13 ও দাল·বাৎগিবা রাজা, উনো সালজাচ্চি হং·না হা·ম্মিংজকমিং। রামা রি·মিত্তিংও সালনা বাত্তে চিং·গিবা সেং·আ সালগিওনি আংনি আরো আংনি রিপ্পেংরাংনি সামব্রিও চিং·চিপজক। 14 চিংআ গিম্মিকান হা·আও গা·আকজক আরো ইব্রীয় খু·সুকচা আংনা ইন্দাকে সানিবা আগানাখো খিন্নাজক, ‘শৌল, শৌল, মুয়ানা না·আ আংখো গিচ্চিয়েতিংজক? বুসুচা থারিগিবা গল·স্রিখো গা·ফ্রতে না·আ আন·থাংনি নামগিজাখোন দাকজাংআমা?’ 15 “উনোন আংআ আগানজক, ‘গিত্তেল, না·আ সা?’ 16 “গিত্তেল আগানজক, ‘আংআ যীশু, জেখো না·আ গিচ্চিয়েতিংজক। দা·আও চাখাতবো, নাং·নি জা·চকো গা·চাক্কে চাখাতবো। দাকচাকে হন·গিবা আরো সাক্ষি গিত্তা নাং·খো বাচ্ছিয়ে রা·না আংআ নাং·না মিকখাং ফা·জক। না·আ আংখো জেগিত্তা নিকজক আরো আংআ নাং·না জেখো ফিন্নিকনুয়া উখো না·আ গিপ্পিনরাংনা আগানবো। 17 নাং·নি আন·থাংনি মান্দিরাংনি আরো গিপ্পিন জাতরাংনি জাকনিখো আংআ নাং·খো জক্কেৎনুয়া। বিসংনি মিক্রোনখো মিকরাক্কেতনা আরো আন্দালাওনি সেং·আওনা আরো শয়তাননি বিলওনি ইসলচা ফি·ল্লে রা·বানা আংআ নাং·খো বিসংচা ওয়াত্তেতিংজক, জেদাক্কে আংখো বিবিরা·নি গিম্মিন বিসং পাপওনি ক্ষেমাখো মা·ন্না আরো ইসলনা মিকসংএ জেরাংখো দিংথাং দাক্কে দনজক বিসংনি গিসেপো হা·দাম মা·ন্না।’ 19 “রাজা আগ্রিপ্প, ইনি গিম্মিন সালগিওনি ইয়া মিকজুমাংচা আংখো জেখো আগানা আংআ উখো মানিগিজাগিবা হং·জা। 20 স্খাং দামেস্কও দংগিবারাংচা, উনি জা·মানো যিরূশালেমো দংগিবারাংচা আরো গিম্মিক যিহূদিয়া হা·দকো দংগিবারাংচা আরো গিপ্পিন জাতরাংচাবা আংআ ইন্দাকে আগানফ্রাকজক, পাপওনি গিসিক ফি·ল্লে ইসলচা বিসংনি ফিল·না খ্রাআ, আরো ইন্দাকগিবা কামখো দাকনা খ্রাআ জেচা বিসংনি গিসিক ফিল্লাখো হা·আইনা মা·ন্না। 21 ইনি গিম্মিনান যিহূদীরাং আংখো থরম নক্কো রি·ম্মে স·ওতে গালনা হা·ম্মামিং। 22 ইন্দিবা ইসল দা·আওনা দিপ্পাৎ আংনা দাকচাকে রি·বাংজক আরো উনি গিম্মিনান আংআ ইনো চাদেংএ দা·ল্লা চন্না গিম্মিকচান সাক্ষি হ·ন্নিংজক। আগানসোগিবারাং আরো মোশি জেরাং হং·আনি খাৎথাখো আগানে রি·য়াংজক উরাংনি আগ্রে আংআ মামুংখোন আগানজা। 23 ইয়ান উয়া খাৎথা হং·আ, খ্রীষ্টখো দুক চাকনা নাংনুয়া আরো বিখোন স্খাং সিয়াওনি থাংচাএ বিনি আন·থাংনি জাতনি মান্দিরাংচা আরো গিপ্পিন জাতরাংচা সেং·আনি সংনকনি গিম্মিন আগানফ্রাকনা নাংনুয়া।” 24 পৌলনি ইন্দাকে আন·থাংনা চাক্কে খাৎথা আগানমিত্তিংও ফীষ্ট বিখো ফেং·এ চ্রিকে আগানজক, “পৌল, না·আ খোরে চাজক। না·আ বাং·এ পড়িজক আরো উয়া পড়িয়ান নাং·খো খোরে চাএতজক।” 25 উনোন পৌল আগানজক, “ফামং ফীষ্ট, আংআ খোরে হং·জা। আংনি আগানা বিবি আরো খু·ফা নাম্মা। 26 রাজাদে ইরাংখো হা·আইয়ান আরো আংআ বিমুং গিম্মিকখোন ফারাকে আগান্না মা·ন্না। আরো ইখো আংআ নাম্মেদাক্কেন হা·আইয়া, ইনি মামুংআন বিনি মিৎথিনাও হং·জা, মুয়ানা ইরাংদে সিউল দাক্কে হং·জা। 27 রাজা আগ্রিপ্প, না·আ আগানসোগিবারাংনি আগানাখো বিবিরা·আমা? আংআ হা·আইয়া না·আ বিবিরা·আ।” 28 উনোন আগ্রিপ্প পৌলনা আগানজক, “না·আ দিকদিকসাওন আংখো খ্রীষ্টান থারিনা হা·ম্মিংআমা?” 29 পৌল আগানজক, “সাল বাং·জাখানা বা বাং·খানা, আংআ ইসলচা ইন্দাকে বি·আ, না·আসান হং·জা, ইন্দিবা ইয়া জেংজুলনি আগ্রে, দা·আলো আংনি খাৎথাখো খিন্নাগিবা গিম্মিকান আং গিত্তা হং·খানা।” 30 উনোন রাজা চাখাতজক আরো উমুং দাল·গিবা শাসন দাকগিবা ফীষ্ট আরো বর্ণীকী আরো বিসংমুং আসংএ দংগিবা গিম্মিকান চাখাতজক। 31 জা·মানো বিসং উয়া নকখো ওয়াত্তে রি·য়াংজক আরো সাকসা সাকগিপ্পিনখো ইন্না হা·বাচেংজক, “ইয়া মান্দি সিয়ানি শাস্তিখো মা·ন্না বা জেলো দংনা গিত্তা মামুংখোন দাকজা।” 32 আগ্রিপ্প ফীষ্টনা আগানজক, “ইয়া মান্দি সম্রাটচা আপিল দাকজাওদে বিখো ওয়াতনা মা·ন্নুয়ামিং।”

ওয়াত্তেতারাং 27

1 জাহাসও দাক্কে চিংখো ইটালীচা রিম্মাংনা থিক হং·আনি জা·মানো পৌলখো আরো মিত্তাম বন্দিরাংখো যুলিয় মিংগিবা সুবিদার সাকসানি জাক্কো হন·জক। যুলিয় সম্রাটনি আন·থাংনি সিপাইরাংওনি সাকসা সুবিদার হং·আমিং। 2 চিংআ আদ্রামুত্তীয়নি জাহাসও গাখাতে রি·না হা·বাচেংজক। এশিয়ানি গিপ্পিন গিপ্পিন সাগাল চিবাতরামচা রি·য়াংনা ইন্নে জাহাস থারিয়ান দংআমিং। ম্যাসিডোনিয়া হা·দকনি থিষলনীকী সংজিলমানি আরিষ্টার্খ চিংমুং দংআমিং। 3 সালগিপ্পিনো চিংনি জাহাস সীদোনচা দংদিপজক। যুলিয় পৌলমুং নাম্মা বেওয়ালখো দাকজক আরো বিখো বিনি রিপ্পেংরাংচা রি·য়াংনা হন·জক জেদাক্কে বিনি রিপ্পেংরাং বিনি নাংআনি বস্তুরাংখো হ·ন্না মা·ন্না। 4 জা·মানো উয়োনি দা·আবা চিংনি জাহাস ওয়াতজক। বালওয়া থারাকানি গিম্মিন সাইপ্রাসনি জেগিত্তা বালওয়া দংজামিং চিংআ উগিত্তা রি·য়াংজক। 5 জা·মানো চিংআ কিলিকিয়া আরো পাম্‌ফুলিয়ানি মিকখাংও দংগিবা সাগালখো বাত্তে লুকিয়া হা·দকনি মুরা সংজিলমাওনা রি·বাজক। 6 সুবিদার উয়ো আলেক্‌জান্দ্রিয়ানি জাহাস গি·সাখো মান·জক। উয়া জাহাস ইটালী হা·সংচানা রি·য়াংআমিং ইন্নে বিয়া চিংখো রা·এ উয়া জাহাসও গাদোজক। 7 চিংনি জাহাস বাং·আ সাল খা·সিনসিন রি·এ নেং·এদিক্কে ক্লীদোন সংজিলমানি সেফাংচা রি·বাজক, ইন্দিবা বালওয়ানা চিংআ মিকখাংচা রি·য়াংনা মান·জাজক। উনোন চিংআ ক্রীটনি জেগিত্তা বালওয়া দংজামিং উগিত্তা রি·য়াংএ সল্‌মোনীনি সেফাং গিত্তা রি·জক। 8 সাগালনি রিক্কাম গিত্তা নেং·এদিক্কে রি·এ চিংআ নিথুয়া বন্দর মিংগিবা হা·দামচা রি·বাজক। লাসেয়া সংজিলমা উনি সেফাংওনমিং। 9 ইন্দাকে বাং·আ সাল রি·য়াংজক। উনো অকগুমিন চাক্কানি সাল ব·ন্নাংএ সিন·খারি সকবাজক। উনি হা·সেল জাহাসও দাক্কে রি·য়া খেন্নানি হং·জক। ইনি গিম্মিন পৌল জাহাসনি মান্দিরাংখো সিমসাকেতনা আগানজক, 10 “নিবো, আংআ নিকনা মা·ন্নিংআ আনচিংনি রি·য়াও নামগিজানি দংআ। উয়া নামগিজা আনচিংনি জাহাস আরো মালনিসান হং·নুয়া ইন্দাকে হং·জা, আনচিংনি জাংগিনিবা নামগিজা হং·নুয়া।” 11 ইন্দিবা সুবিদার পৌলনি আগানাখো খিন্নাচাকগিজা জাহাসনি কেপ্তিন আরো জাহাসনি নকগিবানি খাৎথাখো খিন্নাচাকজক। 12 সিন·খারিও বন্দলও দংনা খ্রাজা ইন্নে বাং·আ মান্দিরাংআন ইন্দাকে থিক দাকজক, উয়োনি মা·ন্নোদে ফৈণীকচা রি·য়াংএ সিন·খারিও দংআ হং·নুয়া। ফৈণীক ক্রীট চিচাংনি জাহাস দনখামানি হা·দামমিং। ইয়া হা·দামনি সালগিপেং-সালিরাম আরো সালগ্রো-সালিরামচাবাক্কা বাংবাং হং·আমিং। 13 জা·মানো সালগিপেংনি বালওয়া খা·সিনসিন বাল্লোন বিসংনি হা·ম্মা গিত্তান হং·জক ইন্নে বিসং চানচিজক। ইনি গিম্মিন বিসং জাহাসনি সিলথিনখো দি·এ ক্রীটনি রিক্কাম গিত্তা রি·জক। 14 ইন্দিবা দিকদিকসা জা·মানোন উয়া চিচাংওনি উরাকুলো মিংগিবা থারাকগিবা মিকখা বালওয়া রাকজক আরো জাহাস উয়া মিকখা বালওয়াও গা·আকজক। 15 চিংআ বালওয়ানা মিকখাংচানা রি·য়াংনা মান·জাজক; উনি গিম্মিন মিকখাংচা রি·য়াংনাখো দন্নে জাহাসখো বালওয়াও বালফাকাংনা হন·জক। 16 জা·মানো কৌদা মিংগিবা মিংসা চন্না চিচাংনি জেগিত্তা বালওয়া দংজামিং চিংআ উগিত্তা রি·জক আরো জাহাসও রিং দংগিবাখো চিংআ নেং·এদিক্কে ব·ন্নাংআনিখো জক্কেতি রা·রিকজক। 17 মান্দিরাং রিংখো জাহাসও সালদোজক আরো জা·মানো দড়িচা জাহাসনি গানসাংখো খাজক জেদাক্কে উনি তক্তারাং থাকওয়াতাংজা। সুর্তী মিংগিবা সাগালনি হান·চেং চরও জাহাস নাংদাতনা খেন্নে পালরাংখো রা·ওনে জাহাসখো বালওয়াও রি·এতজক। 18 মিকখা বালওয়ানি থারাকানা চিংনি জাহাস ইন্দাকফিল্লে মজিমজক জেনি হা·সেল সালগিপ্পিনো মান্দিরাং জাহাসনি মালরাংখো চিও গাল্লেতনা হা·বাচেংজক। 19 সালগিত্থামনি সালো বিসং জাকথাংচা জাহাসনি বস্তুরাংখোবা গাল্লেতজক। 20 বাং·আ সালরাংওনিন সালখো বা আস্কিখো নিকজাজক আরো বালওয়া থারাকেন বালরোরোজক। বন·চতাও চিংআ জক্কানি গিম্মিক খা·দংআখোন ওয়াতগালারিজক। 21 বাং·আ সালরাংওনি মান্দিরাং মামুংখো চা·জানি গিম্মিন পৌল বিসংনি মিকখাংও চাদেংএ আগানজক, “নিবো, আংনি আগানাখো খিন্নাচাকে ক্রীটওনি জাহাসখো ওয়াতজান না·সংনা খ্রামিং। ইন্দাকোদে ইয়া নামগিজানিখো না·সং জকনা মা·ন্নুয়ামিং। 22 ইন্দিবা দা·আও আংআ না·সংচা মল·মলিংআ, না·সং গিসিকো খেনমানগিজা হং·বো, মুয়ানা না·সংওনি সাকসাবা সিজানুয়া; ইয়া জাহাসসান নাসিয়ানি হং·নুয়া। 23 আংআ জেনি মান্দি হং·আ আরো আংআ জেনা দাকচাকে হ·ন্না উয়া ইসলনি সা·গ্রে সাকসা মিজাও ওয়াল্লো আংনি সেফাংও চাদেংএ আগানজক, 24 ‘পৌল, দা·আ খেন্নাবো। নাং·খো সম্রাট কৈসরনি মিকখাংও চাদেংনা নাংনুয়া। ইয়া জাহাসও নাং·মুং রি·য়াংগিবা গিম্মিকনি জাংগিখো ইসল খা·সাচাক্কে নাং·না হন·জক।’ 25 ইনি গিম্মিন না·সং গিসিকো খেনমানগিজা হং·বো। আংনা জেগিত্তা আগানা উগিত্তান হং·নুয়া ইন্নে ইসলনি সাক্কাও আংনি বিবিরা·আনি দংআ। 26 ইন্দিদে আনচিং বাগিবা চিচাংও রি·য়াংএ গা·আকনুয়া।” 27 চিংআ আদ্রিয়া সাগালনি সাক্কা গিত্তা ইন্দাকে রি·জক। মিকখা বালওয়া রাক্কানি সাল চি·ব্রিনি ওয়ালজাচ্চিও জাহাসখো চালাইগিবারাং হা·গানি সেফাংচানা সকবাজক ইন্নে চানচিজক। 28 বিসং উনি চিখো থোএ নিজক উনি চি মিকসৎচেৎ থিং·আ। উনি দিকদিকসা জা·মানোন বিসং দা·আবা থোএ নিজক উনি চি মিকসৎদক জাক হং·আ। 29 রং·থিব্রাকও নাংদাতনা খেন্নে জাহাসনি ফিল·সাচানি বিসং সিলথিন গি·ব্রিখো গাল্লেতজক আরো সাল নাবাখানা ইন্নে বি·না হা·বাচেংজক। 30 জা·মানো কেপ্তিনরাং খাত্তাংনা হা·ম্মে জাহাসনি মিকখাংচানি সিলথিন গালনা দাকমিকে জাহাসওনি রিংখো সাগালো রং·খাত্তেতজক। 31 উনোন পৌল সুবিদার আরো সিপাইরাংনা আগানজক, “ইয়া কেপ্তিনরাং জাহাসও দংজাওদে না·সং জকজানুয়া।” 32 উনোন সিপাইরাং রিংনি দড়িখো রাত্তেতজক জেদাক্কোদে রিং চিও গা·আকা। 33 সাল নাবানা স্খাং পৌল গিম্মিকখো চা·খানা মল·মলে আগানজক, “দা·আল সাল চি·ব্রি হং·জক, মুয়া হং·নুয়া হং·জানুয়া উখো চানচিয়ে না·সং চা·গিজা দংইংজক-মামুংখোন চা·জাজক। 34 দা·আও আংআ না·সংখো মামুংখো চা·না মল·মলিংজক। থাংএ দংনা না·সংনি মামুংখোদে চা·না নাংনুয়া। নিনাদে, না·সংনি স্খুনি খিন্নি দিংসাবা নাসিজানুয়া।” 35 ইখো আগানে পৌল রুটিখো রা·এ বিসংনি গিম্মিকনি মিকখাংওন ইসলখো মিৎথেলজক আরো উখো ফি·এ চা·না হা·বাচেংজক। 36 উনোন বিসং খেনমানগিজা চা·না হা·বাচেংজক। 37 চিংআ জাহাসও সাক রিৎচাগ্মি সৎস্নি দক দংআমিং। 38 গিম্মিকনি অকখাএ চা·আনি জা·মানো জাহাসখো চেং·এতনা গম গিম্মিকখো সাগালো গাল্লেতজক। 39 ওয়ালনিও বিসং হা·দামখো হা·আইনা মান·জাজক, ইন্দিবা গি·সা চন্না সাগালখো নিকজক জেনি রিক্কাম গিত্তা হান·চেং গাপ্পামিং। উনোন বিসং মা·ন্নোদে জাহাসখো উয়া রিক্কামো দন্না ইন্নে থিক দাকজক। 40 ইনি গিম্মিন বিসং জাহাসনি সিলথিনরাংখো রাত্তে সাগালোন গাল্লেতজক আরো দড়িরাংখো এংএতজক। ইনি জা·মানো বিসং বালওয়াও মিকখাংনি পালখো ওয়াতজক আরো রিক্কাম গিত্তা রি·য়াংএ হান·চেং চরও গা·আকচাংএজক। 41 মিকখাংনি বাক সু·থেকে নাংথিংআনি গিম্মিন জাহাস রি·জাজক আরো সাগালনি চি ফকফেকানা জাহাসনি ফিল·সাচানি বাকরাং বি·থংথাংনা হা·বাচেংজক। 42 উনোন সিপাইরাং বন্দিরাংখো স·ওতে গালনা থিক দাকজক, জেদাক্কে বিসংওনি সাকসাবা চি জ্রোএ খাত্তাংনা মান·জা। 43 ইন্দিবা সুবিদার পৌলখো থাংএতনা হা·ম্মামিং ইন্নে সিপাইরাংনি হা·সিকা গিত্তা দাকনা হন·জাজক। বিয়া চি জ্রোনা হা·আইগিবারাংখো জাহাসওনি চ্রকে রিক্কামো রি·য়াংএ গাখাতখানা গি·য়েৎজক, 44 আরো মিত্তামরাং জাহাসনি তক্তা হং·জাওবা বি·গিবা বাকরাংখো রি·ম্মে উচা রি·য়াংখানা। ইন্দাকে গিম্মিকান হা·গাওনা নাম্মেদাক্কে সকজক।

ওয়াত্তেতারাং 28

1 চিংআ নাম্মেদাক্কে রিক্কামো সক্কে উয়া চিচাংখো মাল্টা মিংআ ইন্নে হা·আইনা মান·জক। 2 উয়া চিচাংনি মান্দিরাং চিংমুং নাম্মা বেওয়ালখো দাকজক। উনো মিকখা গা·আকিংআমিং আরো সি·ন্নামিং ইন্নে বিসং ওয়া·আলখো সো·এ চিংখো গিম্মিকখো রিক্কামজক। 3 পৌল বল ডালারাংখো চিম্মংএ ওয়া·আলো হন·মিত্তিংও মাংসা বিসিগ্মাং চিপ্পু দিং·আনি গিম্মিন উয়োনি হং·খাতে পৌলনি জাকখো চিকজক। 4 পৌলনি জাক্কো চিপ্পুখো দিংদিএ দংআখো নিক্কে উয়া চিচাংনি মান্দিরাং ইন্না হা·বাচেংজক, “ইয়া মান্দি স·ওতগিবা হং·বিবিআন, মুয়ানা সাগালোনি জক্কোবা বিচাল দাকগিবান বিখো থাংনা হন·জাজক।” 5 ইন্দিবা পৌল জাকখো চিচিএ চিপ্পুখো ওয়া·আলো গাল্লেতোন বিনি মামুংবা হং·জাজক। 6 মান্দিরাং বিনি বে·এন রিপ্পমনুয়া বা বিয়া সিনুয়া ইন্নে চানচিয়ামিং। ইন্দিবা হারিমে নিচাকোবা বিনি মামুং হং·গিজাখো নিক্কে বিসং গিসিকো দিংথাংএ আগানজক, “বিয়া মিত্তে হং·আ।” 7 উয়া হা·দামনি সেফাংওন পুব্লিয় মিংগিবা উয়া চিচাংনি দাল·গিবা মান্দিনি হা·বা দংআমিং। পুব্লিয় বিনি নক্কো চিংখো রিক্কামজক আরো সালগিত্থামনা দিপ্পাৎ চিংনি নাম্মেন যতন রা·জক। 8 উনো পুব্লিয়নি ফাগিবা জম্মে আরো অক্‌গিৎচাক সাএ থুচাকানিও গা·আকে দংআমিং। পৌল নিং·আচা বিচা রি·য়াংএ বি·চাকজক আরো বিনি বে·এনো জাকখো দনদাপে বিখো নাম্মেতজক। 9 ইনি জা·মানো উয়া চিচাংনি গিপ্পিন সাগিবারাং রি·বাএ নামজক। 10 বিসং চিংখো বাং·এন মান্দিরা·জক আরো জা·মানো জাহাসখো ওয়াতমিত্তিংও চিংনা নাংগিবা বস্তুরাংখো জাহাসও গাত্তেতজক। 11 উনি জাগিত্থামনি জা·মানো চিংআ গি·সা জাহাসও দাক্কে রি·য়াংজক। সিন·খারিও উয়া জাহাস উয়া চিচাংওন দংআমিং। উয়া আলেকজান্দ্রিয়া সংজিলমানি জাহাসমিং আরো উনি স্খুও সা·চাপ মিত্তেনি বিমাং খিত্তা দংআমিং। 12 চিংআ সুরাকুষও জাহাসখো খাএ উয়োনা সালগিত্থাম দংজক। 13 উয়োনি রি·য়াংএ চিংআ রীগিয়না সকজক। সালগিপ্পিনো সালগিপেংনি বালওয়া বালজক আরো উনি সালসাও চিংআ পুতিয়লীওনা সকজক। 14 উনো চিংআ বিবিরা·গিবা মিত্তাম জংআদারাংখো গ্রংজক। বিসংমুং সাল স্নিনা দংনা বিসং চিংখো মল·মলজক। ইন্দাকে চিংআ রোমচানা রি·বাজক। 15 উনি বিবিরা·গিবা জংআদারাং চিংনি রি·বাখো খিন্নামিং। রামাও চিংমুং রি·ফানা বিসংওনি সাবা সাবা আপ্পিয়হাট, সাবা সাবা আলদা গিত্থামওনা দিপ্পাৎ রি·বামিং। ইয়া মান্দিরাংখো নিক্কে পৌল ইসলখো মিৎথেলজক আরো বিয়া আন·থাংআন খা·দংআখো মান·জক। 16 চিংআ রোমচা সক্কানি জা·মানো পৌল দিংথাং নক্কো দংনা মান·জক। সিপাই সাকসা বিখো রাক্ষিনুয়ামিং। 17 সাল গিত্থামনি জা·মানো পৌল উনি যিহূদীরাংনি দাল·গিবারাংখো রিংগামে আপসান হং·এতজক। বিসংনি আপসান হং·আনি জা·মানো পৌল বিসংনা আগানজক, “আংনি জংআদারাং, আংআ আনচিংনি জাতস্খানি সাক্কাও বা ফাগিৎচামরাংনি দাকবেওয়ালরাংনি সাক্কাও মামুংখোবা দাকজা, ইন্দিবা যিরূশালেমচা আংখো বন্দি দাক্কে রিম·জক আরো রোমানরাংনি জাক্কো হন·জক। 18 রোমানরাং আংখো সিং·থেকে ওয়াতনা হা·ম্মামিং, মুয়ানা সিনা খ্রাগিবা মামুং দোসখো আংআ দাকজা। 19 ইন্দিবা যিহূদীরাং ইনা চাংফেংআনি গিম্মিন আংআ সম্রাটচা আপিল দাকজক। আংআ আন·থাংনি মান্দিরাংখো দোস হ·ন্নাদে রি·বাজা। 20 ইনি গিম্মিনান আংআ না·সংমুং গ্রংনা আরো খাৎথা আগান্না হা·ম্মা। ইস্রায়েল জাতনি জে খা·দংআ দংআ উয়া খা·দংআনান আংখো ইয়া জেংজুলচা খাজক।” 21 উনোন যিহূদীরাংনি দাল·গিবারাং আগানজক, “নাং·নি গিম্মিন যিহূদিয়াওনি চিংআ মামুং চিঠিখো মান·জা। উয়োনি রি·বাগিবা জংআদারাংবা নাং·নি গিম্মিন মামুংখো আগানজা বা মামুং নামগিজা খাৎথাখো আগানজা। 22 ইন্দাকোবা চিংআ নাং·নি আগানাখো খিন্নানা হা·ম্মা, মুয়ানা হা·দাম গিম্মিকচান মান্দিরাং উয়া দলনি সাক্কাও খাৎথা আগানিংআ ইন্নে চিংআ হা·আইয়া ।” 23 পৌলমুং আপসান হং·না বিসং সালসাখো থিক দাকজক। পৌলনি দংগিবাও বিসংনি আগ্রেবা বাং·এন রি·বাজক। উনোন পৌল ওয়ালনিওনি হান·থামওনা দিপ্পাৎ ইসলনি সংনকনি গিম্মিন বিসংনা আগানজক আরো হা·আইএতজক। মোশিনি নিয়ামরাংও আরো আগানসোগিবারাংনি খি·তাপওনিখো যীশুনি গিম্মিন আগানে বিসংখো বিবিরা·এতনা হাম·জক। 24 বিনি আগানাখো মিত্তামরাং বিবিরা·জক, দা·আবা সাবা সাবা বিবিরা·জাজক। 25 পৌলমুং বিসংনি চানচিয়া আপসান হং·জাজক আরো বিসং উয়োনি রি·য়াংজক। বিসংনি রি·য়াংনা স্খাং পৌল আগানজক, “গিসিক রংথালগিবা আগানসোগিবা যিশাইয়চা না·সংনি ফাগিৎচামরাংনা বিবি খাৎথাখোন আগানামিং, 26 ইয়া মান্দিরাংচা রি·য়াংএ আগানবো, ‘না·সং খিন্নারোরোনুয়া ইন্দিবা মামুং দাক্কেন হা·আইজানুয়া; নিকনুয়া ইন্দিবা মামুং দাক্কেন হা·আইজানুয়া। 27 ইয়া মান্দিরাংনি খা·থং গক্কা হং·জক আরো নাচিল মিৎথিপজক, আরো বিসং বিসংনি মিক্রোনখোবা মিকচিপে দনজক, জেদাক্কে বিসং মিক্রোনচা নিকজা, নাচিলচা খিন্নাজা আরো খা·থংচা হা·আইজা আরো নামনা ইন্নে আংচা রি·বাফিলজা।’ 28 “ইনি গিম্মিন না·সং হা·আইএ রা·রিকবো, ইসল মান্দিখো বাদিকে দাক্কে পাপওনি জক্কেতা উয়া খাৎথাখো গিপ্পিন জাতরাংনা হা·আইএতজক, আরো বিসংআন উয়া খাৎথাখো খিন্নানুয়া।” 30 বিলসিগ্মি দিপ্পাৎ পৌল নকখো ভারা রা·এ দংআমিং আরো বিমুং গ্রংনা রি·বাগিবা গিম্মিকখোন বিয়া রা·চাকনুয়ামিং। 31 বিয়া খেনমানগিজা চাংফেংআখো মান·জাএ ইসলনি সংনকনি গিম্মিন আগানফ্রাকনুয়ামিং আরো গিত্তেল যীশু খ্রীষ্টনি গিম্মিন স্খিনুয়ামিং।

রোমানরাংনা 1

1 আংআ খ্রীষ্ট যীশুনি নকখল পৌল রোম সংজিলমানি বিবিরা·গিবারাংচা ইয়া চিঠিখো চক্কিংআ। ইসল আংখো বিনি ওয়াত্তেতা হং·না রিক্কামজক আরো বিনি হন·গিবা নাম্মা খাৎথাখো আগানফ্রাকনা বাচ্ছিয়ে রা·জক। 2 ইসল বিনি আগানসোগিবারাংচা রংথালগিবা শাস্ত্রও স্খাংআন ইয়া নাম্মা খাৎথানা খু·রাচাকসোআমিং। 3 উয়া নাম্মা খাৎথা বিনি দেফান্থিনি গিম্মিন হং·আ। উয়া দেফান্থিন যীশু খ্রীষ্ট, আনচিংনি গিত্তেল। বে·এন গিত্তাদে বিয়া রাজা দায়ূদনি দেরিচ্ছু হং·আমিং, আরো বিনি পাপগ্রি গিসিক গিত্তাদে বিয়া বিলচা সিয়াওনি থাংচাফিল্লে ইসলনি দেফান্থি হং·এ ফারাকামিং। 5 বিগিত্তান বিনি বিমুংনান চিংআ খা·সাচাক্কাখো আরো ওয়াত্তেতা হং·আখো মান·জক, জেদাক্কে গিম্মিক জাতনি মান্দিরাং বিবিরা·এ ইসলখো মানিয়া। 6 উয়া মান্দিরাংনি গিসেপো না·সংবা দংআ। যীশু খ্রীষ্টনি মান্দি হং·খানা ইসলান না·সংখো রিক্কামজক। 7 রোম সংজিলমাও জে মান্দিরাংখো ইসল খা·সাজক আরো বিনি আন·থাংনি মান্দি হং·না রিক্কামজক বিসং গিম্মিকচান, আগানস্খাওদে না·সংচান আংআ ইয়া চিঠিখো চক্কিংজক। আনচিংনি ফা ইসল আরো গিত্তেল যীশু খ্রীষ্ট না·সংনা খা·সাচাকখানা আরো থম·থমাখো হন·খানা। 8 স্খাংআন আংআ যীশু খ্রীষ্টও না·সং গিম্মিকনি গিম্মিন আংনি ইসলখো মিৎথেলিংজক, মুয়ানা না·সংনি বিবিরা·আনি খাৎথা হা·গিলসাক গিম্মিকো গিপ্পাংইংজক। 9 ইসলনি দেফান্থিনি গিম্মিন নাম্মা খাৎথাখো আগানফ্রাকে আংনি গিম্মিক খা·থংচা আংআ ইসলনা দাকচাকে হ·ন্নিংজক। আংনি বি·আ রিক্ষিতান আংআ ফাংনান না·সংখো গিসিক রা·আ আরো বিয়ান উনি সাক্ষি হং·আ। 10 আংনি বি·আ ইয়ান, ইসলনি হা·সিকাও আংআ জেদাক্কে না·সংচা দা·আও রি·য়াংনা মা·ন্না। 11 না·সংখো বিল্লাকেতনা গিসিক রংথালগিবানি হ·ন্নানিরাংখো জেদাক্কে না·সং আং গিত্তা মা·ন্না উনি গিম্মিনান আংআ না·সংমুং গ্রংনা হা·ম্মা। 12 আগানস্খাওদে, জেদাক্কে আনচিং গিম্মিকান সাকসা সাকগিপ্পিননি বিবিরা·ওনিখো খা·দংআখো মা·ন্না। 13 জংআদারাং, ইখো হা·আইএ রা·বো, আংআ না·সংচা বাং·এন রি·য়াংনা হা·সিকেবা দা·আওনা দিপ্পাৎ চাংফেংআখো মা·ন্নে রি·বাংজক। গিপ্পিন হা·দামরাংচা গিপ্পিন জাতরাংও আগানফ্রাকে জেদাক্কে নাম্মা বিথিখো মান·জক, উয়ানদাক্কেন না·সংওবা অকখিসা নাম্মা বিথিখো নিকনা খা·দংএ আংআ না·সংচা রি·য়াংনা হা·ম্মা। 14 হা·সিগিবা-হা·সিগিজাগিবা, স্খিয়া মান·গিবা-স্খিয়া মান·গিজাগিবা, গিম্মিকনান আংআ গ্রো নাংআ। 15 উনি গিম্মিন না·সং জেরাং রোমও দংআ না·সংচাবা আংআ যীশু খ্রীষ্টনি গিম্মিনো নাম্মা খাৎথাখো আগানফ্রাকনা হা·সিকা। 16 যীশু খ্রীষ্টনি গিম্মিন ইয়া নাম্মা খাৎথানা আংনি মামুং খ্রাচা·আনি দংজা, মুয়ানা ইয়া নাম্মা খাৎথান হং·জক ইসলনি বিল জেচা বিয়া গিম্মিক বিবিরা·গিবারাংখো পাপনিখো জক্কেতিংআ-স্খাং যিহূদীরাংখো, জা·মানো গিপ্পিন জাতরাংখো। 17 বাদিকে দাক্কে ইসল মান্দিখো দোসগ্রি ইন্নে রা·চাকা উখো ইয়া নাম্মা খাৎথাও ফারাকজক। স্খাংওনি বন·খামওনা দিপ্পাৎ বিবিরা·আচাসান মান্দিখো দোসগ্রি ইন্নে রা·চাকা। রংথালগিবা শাস্ত্রও চক্কা দংআ, “জেখো দোসগ্রি ইন্নে রা·চাকা বিয়া বিবিরা·আচান জাংগিখো মা·ন্নুয়া।” 18 মান্দি ইসলনি বিবিখো অন্যায়চা দনদাপে দন্না, আরো উনি গিম্মিন বিখো অলাখিজানা আরো গিম্মিক অন্যায় কামনা সালগিওনি মান্দিনি সাক্কাও ইসলনি খা·আওনাংআ ফারাকা। 19 ইসলনি গিম্মিন জেখো হা·আইনা মা·ন্না উখো মান্দিরাং থাল্লেন হা·আইয়া, মুয়ানা ইসল আন·থাংআন বিসংচা উখো ফারাকেতজক। 20 ইসলনি জে গুণরাংখো মিক্রোনো নিকজাংআ, আগানস্খাওদে বিনি ফাংনাজলনি বিলখো আরো বিনি ইসলনি গিসিক-বেওয়ালখো হা·গিলসাক হং·বাচেংওনিন থাল্লে ফারাকজক। বিনি থারিচেংওনিন মান্দি উখো হা·আইনা মা·ন্না। ইনি জা·মানো মান্দিনি মামুং ফলসিকানি দংজাজক। 21 মান্দি বিখো হা·আইনা মা·ন্নেবা ইসল ইন্নে বিনি রাসংখোবা দাকজা, বিনা মিৎথেলাখোবা হন·জা। বিসংনি চানচিয়ানি বিল সকজাজক আরো বিসংনি বুদ্ধিগ্রি খা·থং আন্দালাও গাপজক। 22 বিসং আন·থাংথাংখো হা·আইগিবা ইন্নে দাবি দাক্কোবা বিসং আদতে জাদান হং·জক। 23 ফাংনাজলনি, রাসং গাপগিবা ইসলখো অলাখিগিজা বিসং ফাংনাজল হং·গিজা মান্দিখো, সাক্কাও বিলগিবা দো·দ্রাংখো, মাৎবুরুংরাংখো আরো বুকমাচা মালগিবারাংনি বিমাংখোসা অলাখিয়া। 24 ইনি গিম্মিন ইসল মান্দিখো বিনি খা·থংনি হা·সিকা গিত্তা মাংনামগিজা কামখো দাকনা হন·জক। ইনি হা·সেল বিসং সাকসা সাকগিপ্পিনমুং মাংনামগিজা কামখো দাক্কে আন·থাংনি বে·এনথাংথাংখো চন্নিকজক। 25 ইসলনি বিবিখো গাল্লে বিসং বু·আখো রা·চাকজক। থারিগিবাখো দনগাল্লে বিসং বিনি থারিয়া বস্তুখোসা অলাখিজক, ইন্দিবা গিম্মিক রাসংদে ফাংনাজলনা উয়া থারিগিবানিন হং·আ। আমেন। 26 মান্দি ইরাংখো দাকজক ইন্নে ইসল খ্র্রাচা·আগ্মাং হা·সিকারাংও বিসংখো ওয়াত্তেতজক। মিচিকসারাংবা মি·আসারাংমুং বিসংনি দাকনা নাংআ গিত্তা বেওয়ালরাংখো দন্নে সাকগিপ্পিন মিচিকসারাংমুং দাকনাংগিজা গিত্তা খ্রাগিজা কামখো দাকজক। 27 উয়ানদাক্কেন মি·আসারাংবা মিচিকসারাংমুং বিসংনি দাকনাংগিবা বেওয়ালরাংখো ওয়াত্তে মি·আসারাংমুং নামগিজা কামখো দাকনা হা·সিকা; মি·আসা মি·আসামুং খ্রাচা·আগ্মাং খ্রাগিজা কামখো দাকজক। ইনি হা·সেল বিসং গিম্মিকান বিসংনি নামগিজা কামনা মা·ন্না খ্রাগিবা শাস্তিখো আন·থাংথাংও মান·জক। 28 ইন্দাকে মান্দি ইসলখো মানিনা হাম·জানি গিম্মিন ইসলবা পাপও গাপ্পা গিসিকনি জাক্কো বিসংখো ওয়াত্তেতজক, আরো উনি হা·সেলান মান্দি খ্রাগিজা কামখো দাক্কিংআ। 29 বিসং গিম্মিক নামগিজা, মাদ্দুয়া, মিকনেংআ, স·ওতা, দাকগ্রিকা, বু·আ আরো গিপ্পিননা নামগিজাখো দাকনা হা·সিকাও গাপ্পা। বিসং গিপ্পিনরাংখো জাচাংআ, 30 গিপ্পিনরাংখো জিআ আরো ইসলখো মিৎচিয়া। বিসং খা·আওনাংগিবা, গাং·বিংগিবা আরো রাসং চাগিবা হং·আ। নামগিজা কামখো দাকনা বিসং গিত্তাল গিত্তাল চলখো রং·খাত্তেতা। বিসং মা-ফাখো মানিগিজাগিবা হং·আ, 31 নাম্মা-নামগিজাখো হা·আইয়া বিসংনি দংজা, আরো বিসং বিবিরা·গিজাগিবা হং·আ। নকনি মান্দিরাংনা বিসংনি খা·সা দংজা আরো বিসংনি খা·থংও খা·সাচাক্কানি দংজা। 32 ইন্দাকগিবা কামখো দাকগিবারাং সিয়ানি শাস্তিখো মা·ন্না খ্রা ইন্নে ইসলনি ইয়া বিচালনি খাৎথাখো বিসং নাম্মেদাক্কেন হা·আইয়া। ইখো হা·আইএবা বিসং ইন্দাকগিবা কামখোসান দাক্কা ইন্দাকে হং·জা, ইন্দিবা ইন্দাকে দাকনা সাকগিপ্পিনখোবা দি·দিআ।

রোমানরাংনা 2

1 ইনি হা·সেল সাবা গিপ্পিনরাংখো দোস হ·ন্নোদে আংআ বিনা ইন্দাকে আগান্নুয়া, নাং·নি আন·থাংনি ফা·সিকা বাও দংআ? গিপ্পিনরাংখো দোস হন·মিত্তিংও না·আ আন·থাংখোন দোসগ্মাং দাক্কে ফিন্নিকজামা? না·আ গিপ্পিনরাংখো দোস হ·ন্না ইন্দিবা না·আ উয়া আপসান কামখোন দাক্কিংআ। 2 আনচিং হা·আইয়া ইন্দাকে কাম দাকগিবারাংনা ইসল খাকখেৎ বিচালখোন দাক্কা। 3 জে কামনি গিম্মিন না·আ গিপ্পিনরাংখো দোস হ·ন্নিংআ না·আ আন·থাংবা উয়া আপসান কামখো দাকজোকনো ইসলনি শাস্তিওনি জকনা মা·ন্নুয়া ইন্নে চানচিয়ামা? 4 না·আদে ইসলনি বন·চাংগিজা খা·সাচাক্কাখো আরো চাকচিকাখো চন্নিকিংআ। পাপওনি নাং·খো গিসিক ফি·ল্লেতনা মিকসংএ ইসল খা·সাচাক্কা, ইখো না·আ গুয়ালজক। 5 ইন্দিবা নাং·নি খা·থং রাক্কা; না·আদে পাপওনি গিসিক ফিল·না হাম·জা। উনি গিম্মিন ইসলনি খা·আওনাংআ জেনসালো ফারাকনুয়া উয়া সালনা না·আ নাং·নি মা·ন্নাগিবা শাস্তিখো চিম্মংএ দন্নিংজক। উনি সালোন ইসলনি খাকখেৎ বিচাল ফারাকনুয়া। 6 বিয়া গিম্মিকনান বিনি কামনি খ্রি বিথিখো হ·ন্নুয়া। 7 জেরাং চাকচিকে নাম্মা কামখো দাক্কে ইসলচাখো রাসং, মান্দিরা·আ আরো বন·গিজাগিবা জাংগিখো মা·ন্না হা·ম্মা, ইসল বিসংনান ফাংনাজলনি জাংগিখো হ·ন্নুয়া। 8 ইন্দিবা জেরাং আন·থাংনি হা·সিকা গিত্তা রি·য়া আরো বিবিখো মানিগিজা খ্রাগিজাখো মানিয়া ইসল বিসংনা বিল্লংএন শাস্তি হ·ন্নুয়া। 9 জেরাং পাপ দাক্কে রমিংআ বিসং গিম্মিকনি দুক হং·নুয়া-স্খাং যিহূদীরাংনি, জা·মানো গিপ্পিন জাতরাংনি। 10 ইন্দিবা জেরাং নাম্মা কামখো দাক্কা বিসং রাসংখো, মান্দিরা·আখো আরো থম·থমাখো মান্নুয়া-স্খাং যিহূদীরাং, জা·মানো গিপ্পিন জাতরাং। 11 ইনি হা·সেল ইখোন নিকনা মা·ন্না, ইসলনি মিক্রোনও গিম্মিকান আপসান হং·আ। 12 মোশিনি নিয়ামনি নিং·আও দংগিজা জেরাং পাপ দাক্কা বিসং নিয়ামগ্রিন ব·ন্নাংনুয়া। ইন্দিবা জেরাং নিয়ামনি নিং·আও দংএ পাপ দাক্কা বিসংনি বিচাল নিয়ামচান হং·নুয়া। 13 নিয়ামনি খাৎথাখো খিন্নাগিবারাং ইসলনি মিক্রোনও দোসগ্রি হং·জা, ইন্দিবা নিয়ামখো জেরাং মানিয়া ইসল বিসংখোন দোসগ্রি দাক্কে রা·চাকনুয়া। 14 গিপ্পিন জাতরাং মোশিনি নিয়ামখো মান·জা, ইন্দাকোবা বিসং আন·থাংথাংআন নিয়াম গিত্তা কাম দাক্কোদে নিয়ামখো মান·জাওবা বিসং আন·থাংআন আন·থাংনি নিয়াম হং·আ। 15 ইনি হা·সেল নিকনা মা·ন্না, নিয়াম গিত্তা জেখো দাকনা খ্রাআ উয়া বিসংনি খা·থংওন চক্কা দংআ। বিসংনি গিসিকবা উখোন সাক্ষি হ·ন্না। বিসংনি চানচিয়ারাং মিত্তাম সময়ও বিসংখো দোস হ·ন্না, দা·আবা মিত্তাম সময়ও বিসংনা চাক্কা। 16 ইসল জেনসালো যীশু খ্রীষ্টচা মান্দিরাংনি সিউল দংগিবা গিম্মিকখো বিচাল দাকনুয়া উনসালোন উয়া ফারাকনুয়া। আংনি আগানফ্রাকগিবা নাম্মা খাৎথা গিত্তান ইয়া বিচাল হং·নুয়া। 17 না·আ আন·থাংখো যিহূদী ইন্নে আগানা, হং·জামা? না·আ মোশিনি নিয়ামরাংও ফাংচাকা আরো আন·থাংখো ইসলনি মান্দি ইন্নে রাসং দাক্কা। 18 ইসল মুয়াখো হা·ম্মা উখো না·আ হা·আইয়া আরো নাম্মাখো মানিয়া, মুয়ানা নিয়ামওনি না·আ উয়া স্খিয়াখোন মা·ন্না। 19 না·আ মিকগ্রিরাংনা রামা ফিন্নিকিংজক ইন্নে না·আ চানচিয়া। জেরাং আন্দালাও দংআ বিসংচা না·আ সেং·আ গিত্তা হং·আ ইন্নে না·আ চানচিয়া। 20 নাং·নি চানচিয়া গিত্তাদে, জেরাং চানচিসকগিজা হং·আ বিসংখো না·আ থারিয়া আরো জেরাং নিয়ামনি গিম্মিন স্খিয়াখো মান·জা বিসংনা না·আ স্খিয়ে হ·ন্না। নিয়ামনি গিসেপো হা·আইয়া আরো বিবি দংআনি গিম্মিনান নাং·নি ইন্দাকে চানচিয়ারাং দংআ। 21 দে নাম্মান, না·আ গিপ্পিনরাংনা স্খিয়ে হ·ন্নোদে মুয়ানা আন·থাংনাবা স্খিজাংআ? “দা·আ চা·উয়াবো” ইন্নে না·আ আগানফ্রাকিংআ, ইন্দিবা না·আ আন·থাংআন চা·উজাংআমা? 22 “দা·আ থি·ল্লেকাবো” ইন্নে না·আ আগানা, ইন্দিবা না·আ আন·থাংআন থি·ল্লেকজাংআমা? না·আদে মিত্তে বিমাংখো মিৎচিয়া, ইন্দিবা না·আ আন·থাংআন মিত্তে বিমাংখো অলাখিগিবা নকচা রি·য়াংএ চা·উজাংআমা? 23 নিয়ামরাংখো রা·এ না·আ রাসং দাক্কিংআ, ইন্দিবা না·আ আন·থাংআন নিয়ামখো মানিগিজা ইসলখো মান্দিরা·গিজাখো দাকজাংআমা? 24 রংথালগিবা শাস্ত্রও ইয়া খাৎথা চক্কা দংআ, “না·সংনি গিম্মিনান গিপ্পিন জাতরাং ইসলনি বিমুংখো খাল·স্থাপা।” 25 না·আ নিয়ামখো মানিওদে বিগিল রাত্তা গামচাতানি হং·আ, ইন্দিবা নিয়ামখো মানিজাওদে বিগিল রাত্তোবা ইসলচা না·আ বিগিল রাতগিজা মান্দি গিত্তান হং·আ। 26 ইনি গিম্মিন বিগিল রাতগিজা সাকসা মান্দি নিয়ামনি দাবিখো মানিওদে ইসল বিখো বিগিল রাতগিবা মান্দি ইন্নেন রা·চাকজানুয়ামা? 27 নাং·চাদে চকগিবা নিয়ামরাং দংআ আরো নাং·নি বিগিলখোবা রাতজক। ইন্দিবা না·আ নিয়ামখো মানিজাওদে জেনি বিগিল রাতখুজা ইন্দাকোবা নিয়ামখোদে মানিংআ, নিয়ামখো মানিজানা বিয়া নাং·খো দোসি দাকজানুয়ামা? 28 হা·ফালওসান যিহূদী হং·গিবা খাকখেৎ যিহূদী হং·জা। বে·এননি সাক্কানি বিগিল রাতজোকনোন খাকখেৎ বিগিল রাত্তানি হং·নুয়া উয়াবা হং·জা। 29 ইন্দিবা খা·থংও যিহূদী হং·গিবান খাকখেৎ যিহূদী হং·আ। খাকখেৎ বিগিল রাত্তানি কাম খা·থংওন হং·আ। উয়াদে গিসিকনি গিম্মিন হং·আ, চকগিবা নিয়াম মানিয়ানি হং·জা। ইন্দাকগিবা মান্দি মান্দিরাংচাখো মিৎথেলাখো মান·জা, ইন্দিবা ইসলচাখো মিৎথেলাখো মা·ন্না।

রোমানরাংনা 3

1 ইন্দাকেন হং·ওদে যিহূদীরাং মুয়াখো মান·দাপজক? বিগিল রাত্তানিবা গামচাতানি মুয়া দংআ? 2 গিম্মিক গিত্তান চু·ওংএ মান·দাপজক। স্খাং: ইসল বিনি খাৎথাখো যিহূদীরাংনান হ·ন্নামিং। 3 বিসংনি গিসেপো মিত্তাম মান্দিরাং বিবিরা·গিজাগিবা হং·জক, ইন্দিবা উনাদে মুয়া হং·আ? বিসং বিবিরা·গিজাগিবা হং·জক ইন্নে ইসলবা বিবিরা·গিজাগিবা হং·নুয়ামা? 4 হং·জানুয়া। মান্দি গিম্মিক বু·এ আগানগিবা হং·ওবা ইসল ফাংনানান বিবিগিবা হং·আ। রংথালগিবা শাস্ত্রও চক্কা দংআ, “নাং·নি খাৎথান থিক, নাং·নি বিচাল দাক্কান খাকখেৎ।” 5 ইন্দিবা আনচিংনি খ্রাগিজা কামরাংনিখো ইখো আরোসা থাল্লে হা·আইনা মা·ন্না, ইসল ফাংনানান খাকখেৎ কামখো দাক্কা। ইন্দাকোদে আনচিং ইন্দাকে আগান্নুয়ামা, জেনসালো বিয়া আনচিংখো শাস্তি হ·ন্না উনো বিয়া খ্রাগিজাখো দাক্কা? ইয়া খাৎথাখোদে আংআ মান্দি গিত্তাসা আগানিংআ, চং·মতান বিয়া মামুং সালোবা খ্রাগিজাখো দাকজা। 6 ইসল নামগিজাখো দাক্কোদে বিয়া বাদিকে দাক্কে মান্দিখো বিচাল দাকনুয়া? 7 সাবা আগান্নাবা দংআ, “আংনি বু·এ আগানানি গান্দা আরোসা ইয়া নাম্মেদাক্কে ফারাকা ইসল বিবিখো আগানগিবা হং·আ। ইনি গিম্মিন ইসল রাসং চাআখো মা·ন্নোদে পাপী ইন্নে আংখো মুয়ানা দোস হ·ন্নিংআ?” 8 দে নাম্মান, ইন্দাকোদে আনচিং ইন্দাকে আগান্নুয়ামা, “হাই, আনচিং নামগিজা কামখো দাক্কে দংনাজক জেগিত্তা দাক্কোদে উয়া নামগিজাচান নাম্মা রি·বানা মা·ন্না”? আনচিং ইন্দাকেন আগানে দংআ ইন্নে মিত্তাম মান্দিরাং আনচিংখো জিএ আগানিংআ। বিসংনি মা·ন্নাগিবা শাস্তিখো বিসং মা·ন্নুয়া। 9 দা·আও আনচিং মুয়াখো আগান্নুয়া? যিহূদী হং·এ আনচিংনি অবস্থা যিহূদী হং·গিজারাংনা বাত্তে নাম্মামা? হং·জাস্রাং। চিংআদে স্খাংআন ইখো আগানজক, যিহূদী-যিহূদী হং·গিজাগিবা গিম্মিকান পাপনি নিং·আও দংআ। 10 রংথালগিবা শাস্ত্রও চক্কা দংআ: দোসগ্রি দারাংবা দংজা, সাকসাবা দংজা; 11 সাকসাবা হা·আইএ রি·জা, সাকসাবা ইসলনি হা·সিকা গিত্তা কাম দাকজা। 12 গিম্মিকান খাকখেৎ রামাওনি জিত্তাংজক, গিম্মিকান আপসান হা·মিকব্রাং হং·জক। নাম্মা কামখো দাকগিবা দারাংবা দংজা, সাকসাবা দংজা। 13 বিসংনি খু·সুক বাংবাং দাকগিবা গোপরাম গিত্তা দাক্কা, স্রিবাকচা বিসং রাসং দাকব্রুএ আগানা। বিসংনি খু·চিলনি নিং·আও চিপ্পুনি বিসি দংআ। 14 বিসংনি খু·সুক শাপ আরো খা·আ খাৎথাও গাপ্পা। 15 স·ওতনা বিসংনি জা·চক গং·রাক্কা, 16 বিসংনি রামাও বন·খিমা আরো নাসিয়া দংআ। 17 থম·থমানি রামাখো বিসং হা·আইজা, 18 বিসং ইসলনাবা খেনজা। 19 আনচিং হা·আইয়া মোশিনি নিয়াম বিসংনান জেরাং উয়া নিয়ামনি নিং·আও দংআ। উনি গিম্মিন যিহূদী-যিহূদী হং·গিজা সাকসানিবা মামুংখো আগানানি দংজা, গিম্মিক মান্দিন ইসলচা দোসগ্মাং হং·এ দংআ। 20 নিয়ামখো মানিজোকনোন ইসল মান্দিখো দোসগ্রি ইন্নে রা·চাকনুয়া ইন্দাকে হং·জা, ইন্দিবা নিয়ামচান মান্দি আন·থাংথাংনি পাপরাংখো হা·আইনা মা·ন্না। 21 ইসল মান্দিখো নিয়ামগ্রি বাদিকে দাক্কে দোসগ্রি ইন্নে রা·চাকা উয়া ফারাকজক। মোশিনি নিয়াম আরো আগানসোগিবারাং উনি গিম্মিন সাক্ষি হ·ন্নাংজক। 22 যীশু খ্রীষ্টখো বিবিরা·গিবারাংনি উয়া বিবিরা·আচান ইসল বিসংখো দোসগ্রি ইন্নে রা·চাকা। যিহূদী আরো যিহূদী হং·গিজা গিম্মিকান আপসান হং·আ, 23 মুয়ানা গিম্মিকান পাপ দাকজক আরো ইসলোনি মিৎথেলাখো মা·ন্না খ্রাজাজক। 24 ইন্দিবা খ্রীষ্ট যীশু পাপনিখো মান্দিখো জক্কেৎনা দাকচাকজক আরো উয়া জক্কেতাচান খা·সাচাক্কানি হ·ন্না গিত্তা বিবিরা·গিবারাংখো দোসগ্রি ইন্নে রা·চাকা। 25 ইসল ইন্দাকে ফারাকামিং, জেরাং বিবিরা·আ বিসংনা যীশু খ্রীষ্ট বিনি হান·চিচা, ফি·এ ইন্নোদে বিনি জাংগিথাংখো হন·চাকে বিখো খা·নাম্মেতজক। ইন্দাকেন ইসল ফিন্নিকজক, বিয়া বিনি চাকচিকানি গিম্মিন মান্দিরাংনি স্খাংনি পাপনি শাস্তিখো হন·জাওবা বিয়া দোসগ্রি হং·আ। 26 বিয়া দোসগ্রি হং·আ উখো বিয়া দা·আও ফিন্নিকজক জেদাক্কে ইখো হা·আইনা মা·ন্না, বিয়া আন·থাং দোসগ্রি আরো যীশুখো বিবিরা·গিবাখোন বিয়া দোসগ্রি ইন্নে রা·চাকা। 27 ইনি জা·মানো মান্দিনি রাসং দাক্কানি মুয়া দংআ? মামুংবা দংজা। ইন্দিবা মুয়ানা দংজা? মান্দি নিয়ামখো মানিয়া ইন্নে বিনি রাসং দাক্কানি মামুং দংজামা? ইন্দাকেদে হং·জা। চং·মত খাৎথা হং·জক, বিবিরা·আও রাসং দাক্কানি হা·দাম দংজা, 28 মুয়ানা আনচিং হা·আইয়া, ইসল মান্দিখো বিনি বিবিরা·আনি হা·সেলো দোসগ্রি ইন্নে রা·চাকা, নিয়ামখো মানিয়ানাদে হং·জা। 29 ইসল যিহূদীরাংনিসান হং·আমা, গিপ্পিন জাতরাংনিদে হং·জামা? হো·এ বিয়া গিপ্পিন জাতরাংনিবা ইসল হং·বিবিয়ান, 30 মুয়ানা ইসলদে সাকসাসান। বিয়া যিহূদীরাংখো জেদাক্কে বিবিরা·আচা দোসগ্রি ইন্নে রা·চাকনুয়া উয়ানদাক্কে গিপ্পিন জাতরাংখোবা রা·চাকনুয়া। 31 ইয়া বিবিরা·আনি গিম্মিন আনচিং নিয়ামখো গাল্লিংজকমা? মামুং দাক্কেবা গালজা, বাত্তেসা নিয়ামনি খাৎথারাং বিবি হং·আ উখোন আনচিং ফিন্নিকিংআ।

রোমানরাংনা 4

1 ইন্দাকোদে আনচিংনি ফাগিৎচাম অব্রাহামনি গিম্মিন আনচিং মুয়াখো আগান্নুয়া? ইনি গিম্মিন বিয়া মুয়াখো নিক্কামিং? 2 কামনাসান অব্রাহামখো দোসগ্রি ইন্নে রা·চাকোদে বিনি রাসং দাক্কানি মামুং দংআন। ইন্দিবা ইসলনি মিকখাংও বিনি রাসং দাক্কানি মামুংআন দংজা। 3 রংথালগিবা শাস্ত্রও চক্কা দংআ, “অব্রাহাম ইসলনি খাৎথাখো বিবিরা·জক আরো উনি গিম্মিন ইসল বিখো দোসগ্রি ইন্নে রা·চাকজক।” 4 কাম দাক্কে মজুরি মান·গিবাদে হ·ন্নানি হং·জা, উয়াদে মা·ন্নাগিবাসা। 5 ইন্দিবা জে আন·থাংনি সাক্কাও ফাংচাকগিজা ইসলোসান ফাংচাকা ইসল বিনি উয়া বিবিরা·আনি গিম্মিন বিখো দোসগ্রি ইন্নে রা·চাকা, মুয়ানা বিয়ান পাপীখো দোসগ্রি দাক্কে রা·চাকনা মা·ন্না। 6 কামগ্রিন জেখো ইসল দোসগ্রি দাক্কে রা·চাকা দায়ূদবা উয়া মান্দিখো ফাত্তিয়া মান·গিবা ইন্নে আগানা। দায়ূদ আগানা, 7 উয়া মান্দিরাং ফাত্তিয়া মান·গিবা, জেরাংনি ইসলমুং বোবিল দাক্কাখো ক্ষেমা দাকজক, জেরাংনি পাপখো ফিনদাপা হং·জক। 8 উয়া মান্দি ফাত্তিয়া মান·গিবা, জেনি অন্যায় দাক্কাখো গিত্তেল ক্ষেমা দাকজক। 9 জেরাংনি বিগিলখো রাতজক ইনো বিসংখোসান ফাত্তিয়া মান·গিবা ইন্নে আগানামা? বিগিল রাতগিজা মান্দিরাংখোবা আগানজামা? হো·এ, বিসংখোবা ফাত্তিয়া মান·গিবা ইন্নে আগানা, মুয়ানা আনচিং আগানিংআ, “অব্রাহামনি বিবিরা·আনি গিম্মিন বিখো দোসগ্রি ইন্নে রা·চাকামিং।” 10 বাসোকো রা·চাকামিং? বিগিল রাতনা স্খাংমা উনি জা·মানো? বিগিল রাতনা স্খাংআন রা·চাকামিং, জা·মানোদে হং·জা। 11 বিগিল রাতগিজা বিবিরা·আনি গিম্মিনান ইসল বিখো দোসগ্রি ইন্নে রা·চাকামিং বিনি বিগিল রাত্তা উনিন সাক্ষি আরো উয়া উনি চিন হং·আ। ইন্দাকোদে নিকনা মা·ন্না, বিগিল রাতজাওবা বিবিরা·আনাসান জেরাংখো দোসগ্রি ইন্নে রা·চাকা, অব্রাহাম বিসং গিম্মিকনি ফাগিবা হং·আ। 12 ইনাআগ্রেবা বিগিল রাতনা স্খাং অব্রাহাম জেদাক্কে বিবিরা·আনি রামাও রি·নুয়ামিং, বিগিল রাতগিবা জে মান্দিরাং উগিত্তা রি·য়া অব্রাহাম বিসংনিবা ফাগিবা হং·আ। 13 ইয়া হা·গিলসাক অব্রাহামনিন হং·নুয়া ইন্নে অব্রাহাম আরো বিনি দেরিচ্ছু-সু·রিচ্ছুরাংচা ইসল খু·রাচাক্কামিং। নিয়ামরাংখো মানিয়ানি গিম্মিন বিচা ইন্দাকে খু·রাচাকজা, ইন্দিবা বিনি বিবিরা·আচান বিখো দোসগ্রি ইন্নে রা·চাকামিং আরো উনি গিম্মিনান উয়ানদাক্কে খু·রাচাক্কামিং। 14 নিয়ামখো মানিয়ে সাবা হা·গিলসাকনি বিলখো মা·ন্নোদে বিবিরা·আ চলিগিজা হং·আরিয়া আরো ইসলনি উয়া খু·রাচাক্কানিবা গামচাতানি দংজা, 15 মুয়ানা নিয়ামদে ইসলনি শাস্তিখো রিংগামে রা·বাআ। আরো বিবিখো আগান্না রি·য়াংওদে, জেও নিয়াম দংজা উয়ো নিয়াম মানিগিজানি মামুংআন দংজা। 16 উনি গিম্মিন মান্দিনি বিবিরা·আ গিত্তা ইয়া খু·রাচাক্কাখো চু·সকেতা, জেদাক্কে ইয়া ইসলনি খা·সাচাক্কানি হ·ন্না গিত্তা হং·না মা·ন্না। আরো উনি গিম্মিন অব্রাহামনি দেরিচ্ছু-সু·রিচ্ছু গিম্মিকনান ইয়া খু·রাচাক্কা বিবিন চু·সকনুয়া। নিয়ামনি নিং·আও দংগিবা মান্দিরাংনাসান ইয়া খু·রাচাক্কা চু·সকনুয়া ইন্দাকেদে হং·জা, জে মান্দিরাং অব্রাহামনি বিবিরা·আ গিত্তান বিবিরা·আ বিসংনাবা ইয়া খু·রাচাক্কা বিবিন চু·সকনুয়া। 17 রংথালগিবা শাস্ত্রও জেগিত্তা চক্কা দংআ, “আংআ নাং·খো বাং·আ জাতরাংনি ফাগিবা দাক্কে দনজক,” উয়া গিত্তাদে ইসলনি মিক্রোনও অব্রাহাম আনচিংনি গিম্মিকনিন ফাগিবা। সিগিবাখো জে থাংচাএতা আরো দংগিজাখো জে দংআ ইন্নে আগানা উয়া ইসলখো অব্রাহাম বিবিরা·আমিং। 18 জেনসালো ফাআ হং·না গিত্তা খা·দংআ দংজামিং উনসালোবা অব্রাহাম ইসলনি সাক্কাও খা·দংএ বিবিরা·আমিং। ইসল বিনা আগানামিং, “নাং·নি দেরিচ্ছু-সু·রিচ্ছুরাং সিলগানি আস্কিরাং গিত্তা চান্না মান·গিজা দাক্কে বাং·নুয়া।” আরো উয়া খাৎথা গিত্তান অব্রাহাম বাং·আ জাতরাংনি ফাগিবা হং·আমিং। 19 বিলসি রিৎচাসামাংনি বুদেফা অব্রাহাম ইখো হা·আইনা মা·ন্নামিং, বিনি বে·এন বিলগ্রি হং·আংজক আরো সারানিবা বি·সা হং·না গিত্তা বিলসি দংজাজক, ইন্দাকোবা অব্রাহামনি বিবিরা·আ নম·জামিং। 20 ইসলনি খু·রাচাক্কানি গিম্মিন বিনি গিসিকো মামুং সালোবা খেনচাকা রি·বাজা, বাত্তেসা বিয়া বিবিরা·আও আরোসা বিল্লাকে ইসলখো রাসং দাকনুয়ামিং। 21 ইসল জেখো খু·রাচাকজক উখো দাক্কানি বিলবা বিনি দংআ ইন্নে অব্রাহাম চু·সকে বিবিরা·নুয়ামিং। 22 ইনি গিম্মিনান অব্রাহামনি বিবিরা·আনি হা·সেল বিখো দোসগ্রি ইন্নে চান্নামিং। 23 “দোসগ্রি ইন্নে চান্নামিং,” ইয়া খাৎথাখো অব্রাহামনাসান চকজা, 24 আনচিংনি গিম্মিনবা চক্কা। আনচিংনি বিবিরা·আনি গিম্মিন ইসল আনচিংখোবা দোসগ্রি ইন্নে চান্নুয়া, মুয়ানা আনচিংনি গিত্তেল যীশুখো জে সিয়াওনি থাংচাএতামিং আনচিং বিনি সাক্কাওন বিবিরা·আ। 25 আনচিংনি পাপনি হা·সেল যীশুখো সিয়ানি জাক্কো হ·ন্নামিং আরো আনচিংখো দোসগ্রি ইন্নে রা·চাকনা বিখো সিয়াওনি থাংচাএতামিং।

রোমানরাংনা 5

1 বিবিরা·আচান আনচিংখো দোসগ্রি ইন্নে রা·চাকজক আরো উনি গিম্মিনান গিত্তেল যীশু খ্রীষ্ট গিত্তা ইসল আরো আনচিংনি গিসেপো থম·থমানি হং·জক। 2 ইসলনি ইন্দাকা জে খা·সাচাক্কানি রামাও আনচিং দা·আও রি·ইংজক আনচিং খ্রীষ্টও বিবিরা·এ উয়ো সকজক। ইসলনি রাসংখো মা·ন্না খা·দংএ আনচিং খুসি হং·ইংআ। 3 ইয়াসান হং·জা, দুকরাংও দংএবা আনচিং খুসি হং·ইংআ, মুয়ানা চাকচিকা দুকনি বিথি হং·আ ইন্নে আনচিং হা·আইয়া, 4 চাকচিকানি বিথি খাকখেৎ গিসিক-বেওয়াল আরো খাকখেৎ গিসিক-বেওয়ালনি বিথি খা·দংআ। 5 ইয়া খা·দংআ আনচিংখো খ্রাচা·এতজা, মুয়ানা ইসল বিনি হন·গিবা গিসিক রংথালগিবাচা আনচিংনি খা·থংখো বিনি খা·সাচাক্কাচা গাপ্পেতজক। 6 জেনসালো আনচিং বিলগ্রিমিং উনসালো খ্রীষ্ট ইসলনা খা·ফাকগিজা মান্দিনা, আগানস্খাওদে আনচিংনা সিচাকজক। খাকখেৎগিবা মান্দিনা সাকসাবা সিচাকজা ইন্নে আগানোন চলিয়া। 7 গিপ্পিননা দাকচাকগিবা মান্দিনা সাবা খেনচাকগিজা সিচাকনাবা দংআ। 8 ইন্দিবা ইসল আনচিংনা খা·সাআ, উখো খ্রীষ্ট আনচিংনি পাপী দংমিত্তিংওন সিচাকে ফিন্নিকজক। 9 ইন্দিদে খ্রীষ্টনি হান·চিচা আনচিংখো দোসগ্রি ইন্নে রা·চাকোদে আনচিং খ্রীষ্টওন ইসলনি শাস্তিওনি জক্কাখো মান·বিবিনুয়া। 10 আনচিং ইসলনি বোবিল দংমিত্তিংও বিনি দেফান্থিনি সিয়াওন বিমুং আনচিং নাংরিমজক। ইন্দাকে নাংরিমজক ইন্নে খ্রীষ্টনি সিচাকানা আনচিং পাপওনি জক্কাখো মান·বিবিনুয়া। 11 ইয়াসান হং·জা, জেনি গিম্মিন ইসলমুং আনচিং নাংরিমজক উয়া গিত্তেল যীশু খ্রীষ্টও ইসলখো রা·এ আনচিং খুসি হং·ইংআ। 12 সাকসা মান্দি গিত্তা হা·গিলসাকো পাপ রি·বামিং আরো উয়া পাপ গিত্তা সিয়াবা রি·বামিং। মান্দি গিম্মিক পাপ দাকজক ইন্নে ইন্দাকে গিম্মিকচান সিয়া সকবাজক। 13 মোশিনি নিয়ামখো হ·ন্না স্খাংআন হা·গিলসাকো পাপ দংআমিং, ইন্দিবা নিয়াম দংজাওদে পাপখো পাপ ইন্নে চানজা। 14 ইন্দাকোবা আদমওনি মোশিনি সময়ওনা দিপ্পাৎ গিম্মিকনি সাক্কাওন সিয়া শাসন দাক্কামিং। ইসলনি গি·য়েতাখো মানিগিজা জেরাং আদম গিত্তা পাপ দাকজা বিসংনি সাক্কাওবা সিয়া শাসন দাক্কিংআমিং। আদম উয়া রি·বানা আগানগিবা যীশু খ্রীষ্টনি মিকখাং বিমাং হং·আমিং। 15 ইন্দিবা ইসলনি ইন্দিনারি হ·ন্না আদমনি পাপ গিত্তা হং·জা। সাকসা মান্দিনি পাপনি হা·সেল বাং·এন সিজক উনোন ইসলনি খা·সাচাক্কা আরো দা·আও সাকসা মান্দিনি খা·সাচাক্কা গিত্তা জে হ·ন্নানি রি·বাজক, উয়াদে গিপ্পিনরাংনা বাদিকে বাং·বাৎজক! উয়া দা·আও সাকসা মান্দি হং·জক যীশু খ্রীষ্ট। 16 ইসলনি হ·ন্না আদমনি পাপনি বিথি গিত্তা হং·জা, মুয়ানা মিংসা পাপখো বিচাল দাক্কানি গিম্মিন গিম্মিক মান্দিন শাস্তি মা·ন্না খ্রাগিবা হং·জক, ইন্দিবা দোসগ্রি দাক্কে ইসলনি রা·চাকাখো মা·ন্না খ্রাগিবা হং·না খা·সাচাক্কানি ইয়া হ·ন্না, ইয়াদে বাং·আ পাপনি হা·সেলো রি·বাজক। 17 সাকসা মান্দিনি পাপ দাক্কানি গিম্মিন সিয়া উয়া সাকসাওন শাসন দাকনা হা·বাচেংআমিং। ইন্দিবা জেরাং বাং·এ ইসলনি খা·সাখো আরো দোসগ্রি দাক্কে বিনি রা·চাকাখো মা·ন্না খ্রাআখো মা·ন্না, বিসং উয়া সাকসা মান্দিনি, আগানস্খাওদে যীশু খ্রীষ্টও জাংগিনি চু·সকাচা শাসন দাকবিবিনুয়া। 18 ইন্দাকোদে মিংসা পাপচা জেদাক্কে গিম্মিক মান্দিখোন শাস্তি মা·ন্না খ্রা ইন্নে চানজক, উয়ানদাক্কে মিংসা খাকখেৎ কামচা গিম্মিক মান্দিখোন দোসগ্রি ইন্নে রা·চাকনাবা থারিজক আরো ফাংনাজলনি জাংগি উনি বিথি হং·আ। 19 জেদাক্কে সাকসা মান্দিনি মানিগিজানি গিম্মিন বাং·আখোন পাপী ইন্নে চান্নামিং, উয়ানদাক্কে সাকসা মান্দিনি মানিয়াচা বাং·আখোন দোসগ্রি দাক্কে রা·চাকনুয়া। 20 খ্র্রাগিজা কাম বাং·খানা ইন্নে নিয়ামখো হন·জক, ইন্দিবা খ্রাগিজা কাম জেও বাং·জক উয়ো ইসলনি খা·সাচাক্কা বাং·জক। 21 ইনি গিম্মিনান উয়া খা·সাচাক্কা বাং·জক জেগিত্তা সিয়াও পাপ শাসন দাক্কামিং, উগিত্তা মান্দিখো দোসগ্রি ইন্নে রা·চাকে দা·আও বিনি খা·সাচাক্কা শাসন দাকনা মা·ন্না; আরো আনচিংনি গিত্তেল যীশুও ফাংনাজলনি জাংগিখো মা·ন্না উনি বিথি হং·আ।

রোমানরাংনা 6

1 ইন্দাকোদে আনচিং ইখো আগান্নুয়ামা, ইসলনি খা·সাচাক্কা বাৎখানা ইন্নে আনচিং পাপ দাকখুনুয়া? 2 হং·জা। পাপনি দাবিচা আনচিংদে সিজকান; ইন্দিদে বাদিকে দাক্কে আনচিং পাপনি রামাওনা রি·নুয়া? 3 আনচিং জেরাং খ্র্রীষ্ট যীশুও রিপ্পলজক আনচিং বিনি সিয়াও দংফাএন উখো দাকজক ইন্নে ইয়া খাৎথাখো না·সং হা·আইজামা? 4 আরো উনি গিম্মিন উয়া রিপ্পলাচা খ্রীষ্টমুং সিফাএ আনচিংনিবা গোপরাম হং·জক, ফাগিবা ইসল বিনি রাসংচা জেগিত্তা খ্রীষ্টখো সিয়াওনি থাংচাএতামিং উগিত্তা আনচিংবা জেদাক্কে গিত্তাল জাংগিনি রামাও রি·না মা·ন্না। 5 খ্রীষ্টমুং সিফাএ বিমুং আনচিং নাংরিমজক ইন্নে বিয়া জেদাক্কে সিয়াওনি থাংচাজক, উয়ানদাক্কেন আনচিংবা বিমুং থাংচানুয়া। 6 আনচিং ইখো হা·আইয়া, আনচিংনি পাপ-বেওয়ালখো গিম্মায়েতনান আনচিংনি গিৎচাম ‘আংআ’খো খ্রীষ্টমুং চিসলো দাৎখাপজক জেদাক্কে আনচিংখো পাপনি নকখল হং·এ দংনা নাংজা; 7 মুয়ানা সিগিবাদে পাপওনি জকজক। 8 আনচিং খ্রীষ্টমুং সিজক ইন্নে বিমুং থাংচানুয়া ইখো বিবিরা·আ। 9 আনচিং হা·আইয়া খ্রীষ্টখো সিয়াওনি থাংচাএতামিং ইনি গিম্মিন বিয়া মামুং দাক্কেবা সিজানুয়া, আগানস্খাওদে বিনি সাক্কাও সিয়ানি মামুং বিল দংজাজক। 10 বিয়া পাপনি গিম্মিনান সিজক; বিনি সাক্কাও পাপনি মামুং দাক্কানি দংজাজক। আরো দা·আও বিয়া থাংচাএ ইসলনা থাংএ দংআ। 11 উয়ানদাক্কেন ইয়া খাৎথাও ফাংচাকবো, খ্রীষ্ট যীশুমুং নাংরিমজক ইন্নে পাপনি দাবিচা না·সংবা সিজক, আরো দা·আও ইসলনি গিম্মিন না·সংবা থাংএ দংআ। 12 ইনি গিম্মিন সিয়ানি নিং·আও দংগিবা না·সংনি ইয়া বে·এননি সাক্কাও পাপখো দা·আ শাসন দাকনা হ·ন্নাবো। হ·ন্নোদে না·সংনি বে·এননি নামগিজা হা·সিকানি নিং·আওন না·সং রি·নুয়া। 13 বে·এননি মামুং বাকখোন নামগিজা কামখো দাক্কানি জাকরিমরা গিত্তা পাপনি জাক্কো দা·আ হ·ন্নাবো। ইন্দিবা সিয়াওনি থাংচাগিবা মান্দি গিত্তা না·সং ইসলনি জাক্কো আন·থাংথাংখো হন·খামবো আরো খাকখেৎ কামখো দাক্কানি জাকরিমরা গিত্তা না·সংনি বে·এন গিম্মিকখোন ইসলনা হন·খামবো। 14 না·সংদে পাপনি নকখল হং·জা, মুয়ানা না·সং ইসলনি খা·সাচাক্কানি নিং·আওসা দংআ, নিয়ামনি নিং·আওদে হং·জা। 15 ইন্দিবা নিয়ামনি নিং·আও দংগিজা খা·সাচাক্কানি নিং·আও দংজক ইন্নে আনচিং পাপ দাকনুয়ামা? হং·জাস্রাং। 16 না·সং ইখো হা·আইজামা, জেনসালো না·সং নকখল গিত্তা আন·থাংথাংখো সানিবা জাক্কো হ·ন্না আরো বিনি গি·য়েতাখো মানিয়ে দংআ উনসালো না·সং বিনি নকখল হং·আরিয়া? উয়ানদাক্কে না·সং পাপনি নকখল হং·এ সিনুয়া, হং·জাওদে ইসলনি নকখল হং·এ খাকখেৎ কামখো দাকনুয়া। 17 ইন্দিবা ইসলখো মিৎথেলনা, মুয়ানা না·সং পাপনি নকখল হং·আমিং ইন্দাকোবা জেখো না·সংনা স্খিজক খা·থং গিম্মিকচা না·সং উখো মানিজক। 18 পাপওনি জক্কে না·সংদে খ্রাগিবানি নকখল হং·জক। 19 মান্দিরাংনি বিলগ্রিনা আংআ খাৎথারাংখো মান্দিরাং জেগিত্তা হা·আইনুয়া উগিত্তা আগানিংজক। স্খাংও না·সং জেদাক্কে বাং·এ খ্রাগিজা কামরাংখো দাকনা ইন্নে আন·থাংথাংনি বে·এনখো রংথালগিজা আরো খ্রাগিজানি নকখল দাক্কামিং, উয়ানদাক্কেন দা·আও রংথালাও দাল·রোরোনা না·সংনি বে·এনখো খ্রাগিবা কামনি নকখল দাক্কে থারিবো। 20 জেনসালো না·সং পাপনি নকখল হং·আমিং উনসালো না·সং খাকখেৎনি নকখল হং·জামিং। 21 স্খাংনি জে কামরাংনি খাৎথাখো চানচিএ দা·আও না·সং খ্রাচা·আংআ উয়া কামরাংওনি না·সংনি মুয়া লাভ হং·নুয়ামিং? উনি বন·খামগিবা বিথি হং·জক সিয়া। 22 ইন্দিবা দা·আও না·সং পাপওনি জক্কাখো মা·ন্নে ইসলনি নকখল হং·জক। ইনি গিম্মিন ইয়ান লাভ হং·জক, না·সং রংথালাও দাল·রোরোংজক, আরো উনি বন·খামগিবা বিথি হং·জক ফাংনাজলনি জাংগি। 23 পাপ জেখো মজুরী হ·ন্না উয়াদে সিয়া হং·আ, ইন্দিবা ইসল জেখো হ·ন্না উয়া আনচিংনি গিত্তেল খ্রীষ্ট যীশুও ফাংনাজলনি জাংগি।

রোমানরাংনা 7

1 জংআদারাং, না·সংদে নিয়ামখো হা·আইয়ান। মান্দিনি থাংএ দংআ দিপ্পাৎসান মান্দিনি সাক্কাও নিয়ামনি বিল দংআ ইন্নে না·সং হা·আইজামা? 2 সেগিবা থাংএ দংআ দিপ্পাৎসান জিকগিবা বিমুং নিয়ামচা খাআ দংআ। ইন্দিবা সেগিবানি সিয়ানি জা·মানো উয়া নিয়ামওনি জিকগিবা জক্কাখো মা·ন্না। 3 উনি গিম্মিন সে থাংএ দংমিত্তিংও জিকগিবা সাকগিপ্পিনখো বিয়াওদে বিখো থি·ল্লেকগিবা ইন্নে আগানা। ইন্দিবা বিনি সেগিবা সিয়োদে বিয়া উয়া নিয়ামওনি জক্কাখো মা·ন্না। আরো উনো বিয়া সাকগিপ্পিনখো বিয়াওদে বিয়া থি·ল্লেকগিবা হং·জা। 4 উয়ানদাক্কেন আংনি জংআদারাং, খ্রীষ্টনি বে·এনো মোশিনি নিয়ামরাংচা না·সংবা সিজক। উনি গিম্মিন সিয়াওনি জেখো থাংচাএতজক না·সং উয়া যীশু খ্রীষ্টনিন হং·আ, জেগিত্তা ইসলনি গিম্মিন না·সংনি জাংগি বিথিগ্মাং হং·আ। 5 জেনসালো আনচিং পাপ-বেওয়ালনি নিং·আও দংআমিং উনসালো নিয়াম আনচিংনি গিসেপো পাপ দাকনা হা·সিকেতনুয়ামিং আরো উয়া হা·সিকারাং আনচিংনি বে·এনো কাম দাকনুয়ামিং; উনি গিম্মিন আনচিংনি জাংগি সিনা বিথি নাংনুয়ামিং। 6 উনো আনচিংখো জে খায় রা·রিকনুয়ামিং উনি দাবিচা আনচিংদে সিজক। উনি গিম্মিন দা·আও আনচিং নিয়ামওনি জকজক। উনি গিম্মিন আনচিং দা·আও চকগিবা নিয়ামনি উয়া গিৎচাম রামানি নকখল হং·জা, ইন্দিবা গিসিক রংথালগিবানি হন·গিবা গিত্তাল রামানি নকখল হং·জক। 7 ইন্দিদে নিয়াম নামজা ইন্নে আনচিং আগান্নুয়ামা? হং·জাস্রাং; ইন্দিবা ইয়া খাৎথাদে থিক, নিয়াম দংজাওদে পাপখো আংআ হা·আইজানুয়ামিং। “দা·আ মাদ্দুয়া,” ইয়া খাৎথাখো নিয়াম আগানজাওদে মাদ্দুয়া মুয়া হং·আ উখো আংআ হা·আইজানুয়ামিং। 8 ইন্দিবা পাপ উয়া গি·য়েতানি হা·সেল আংনি গিসেপো মাদ্দুয়াখো মিকরাকেতজক, মুয়ানা নিয়াম দংজাওদে পাপ সিয়া গিত্তা গা·আকে দংআ। 9 আংনি জাংগিও নিয়াম রি·বানা স্খাং আংআ থাংএন দংআমিং, ইন্দিবা উয়া গি·য়েতা রি·বাওন পাপবা থাংচাজক, 10 আরো আংআবা সিজক। জে গি·য়েতানি গিম্মিন জাংগিখো মা·ন্নুয়ামিং উয়া আংনা সিয়াখো রা·বাজক, 11 মুয়ানা উয়া গি·য়েতানি চলখো রা·এ পাপ আংখো থকাইজক, আরো উয়া গি·য়েতাচান পাপ আংখো সিয়েতজক। 12 ইন্দাকোবা ইয়া খাৎথাদে থিক হং·আ, নিয়াম রংথালা আরো উনি গি·য়েতাবা রংথালা, খ্রাগিবা আরো নাম্মেতগিবা হং·আ। 13 ইন্দিদে দাকচাকানি হং·গিবাচান আংআ সিজকমা? মামুং দাক্কেবা হং·জা, ইন্দিবা নাম্মেতগিবাচান পাপ আংখো সিয়েতজক, জেগিত্তা পাপ হং·বিবিয়াখো হা·আইনা মা·ন্না। পাপ বাসিকিন নামজাস্রাং উখো গি·য়েতাচান হা·আইনা মা·ন্না। 14 আনচিং হা·আইয়া নিয়াম গিসিকনি, ইন্দিবা আংআ পাপ-বেওয়ালনি নিং·আও দংআ ইন্নে পাপনি নকখল হং·জক। 15 আংআ মুয়াখো দাক্কিংআ উখো আংআ আন·থাংআন হা·আইজা, মুয়ানা আংআ জেখো দাকনা হা·সিকা উখোদে দাকজা বাত্তেসা জেখো মিৎচিয়া উখোন দাক্কা। 16 দাকনা হা·সিকগিজাখো আংআ দাক্কোন নিয়াম নাম্মা ইন্নে আংআ খু·রাচাক্কা। 17 ইন্দাকোদে নিকনা মা·ন্না, আংআ আন·থাংআন ইখো দাকজাংআ, ইন্দিবা আংও জে পাপ দংআ, উয়ান আংখো ইখো দাক্কেতিংআ। 18 আংআ হা·আইয়া, আংনি পাপ-বেওয়ালও নাম্মানি মামুংবা দংজা। নামবিবিয়াখো দাকনা আংআ হা·সিকা ইন্দিবা বিল দংজা। 19 জে নাম্মা কামরাংখো আংআ দাকনা হা·সিকা উখোদে দাকজা, ইন্দিবা দাকনা হা·সিকজা উয়া নামগিজা কামরাংখোন আংআ দাক্কিংআ। 20 দাকনা হা·সিকগিজাখো আংআ দাক্কোদে উখো আংআ আন·থাংদে দাকজা, ইন্দিবা আংও দংগিবা পাপআন আংখো উখো দাক্কেতা। 21 ইন্দাকোদে আংআ আন·থাংও নিয়াম মিংসাখো কাম দাক্কাখো নিক্কিংআ। ইয়ান উয়া নিয়াম- আংআ নাম্মাখো দাকনা হা·সিকজোকনোন নামগিজা আংও দংফাংআ। 22 আংনি খা·থং ইসলনি নিয়ামনা হান·সেংআ; 23 ইন্দাকোবা আংআ নিকনা মা·ন্না, মিংসা দিংথাং দাকগিবা নিয়াম আংনি বে·এনো কাম দাক্কিংআ। নামগিবাখো নাম্মা ইন্নেন আংনি গিসিক রা·চাকা, ইন্দিবা দিংথাং দাকগিবা ইয়া নিয়াম আংনি গিসিকনি সাক্কাও দাকগ্রিকিংআ আরো আংখো বন্দি দাক্কে দন্নিংআ। আংও দংগিবা পাপ ইয়া নিয়ামনিন হং·আ। 24 বাদাকগিবা রাসংগ্রি মান্দি আংআ! আংও দংগিবা ইয়া সিয়েতগিবা পাপ-বেওয়ালনি জাক্কোনি সা আংখো জক্কেৎনুয়া? 25 ইসল আংখো জক্কেৎজক ইন্নে আনচিংনি গিত্তেল যীশু খ্রীষ্টও আংআ ইসলখো মিৎথেলা। ইন্দাকোদে নিকনা মা·ন্না, গিসিকওনি আংআ ইসলনি নিয়ামনি নকখল, ইন্দিবা পাপ গিসিকওনি আংআ পাপনি নিয়ামনি নকখল।

রোমানরাংনা 8

1 জেরাং খ্রীষ্ট যীশুমুং নাংরিমজক বিসংখো ইসল শাস্তি মা·ন্না খ্রা ইন্নে চানচিজানুয়া। 2 জাংগি হন·গিবা গিসিক রংথালগিবানি নিয়ামান আংখো খ্রীষ্ট যীশুও পাপ আরো সিয়ানি নিয়ামওনি জক্কেৎজক। 3 মান্দিনি পাপ-বেওয়ালনি হা·সেল নিয়াম বিলগ্রি হং·জকমিং, আরো উনি গিম্মিন নিয়াম জেখো দাকনা মান·জাজক ইসল আন·থাং উখো দাকজক। পাপখো হা·রিকেতনা বিয়া আন·থাংনি দোসগ্রি দেফান্থিখো মান্দিনি গিসিকখো হ·ন্নে ওয়াত্তেতজক আরো বিনি দেফান্থিনি সিয়াও পাপখো বিচাল দাক্কে উনি বিলখো হা·রিকজক। 4 বিয়া ইনি গিম্মিনান ইন্দাকে দাকজক জেদাক্কে পাপ-বেওয়ালনি নিং·আও রি·গিজা গিসিক রংথালগিবানি নিং·আও রি·য়ানি গিম্মিন আনচিংও নিয়াম চু·সকনা মা·ন্না। 5 জেরাং পাপ-বেওয়ালনি নিং·আও দংআ বিসংনি গিসিক পাপ-বেওয়াল জেখো হা·ম্মা উখোন দাকনা হা·সিকা; আরো জেরাং গিসিক রংথালগিবানি নিং·আও দংআ বিসংনি গিসিক রংথালগিবা গিসিক জেখো হা·ম্মা উখোন দাকনা হা·সিকা। 6 পাপ-বেওয়ালনি হা·ম্মা গিত্তা দাকগিবানি বিথি হং·জক সিয়া, আরো গিসিক রংথালগিবানি হা·ম্মা গিত্তা দাকগিবানি বিথি হং·জক জাংগি আরো থম·থমা। 7 জে গিসিক পাপ-বেওয়ালনি হা·ম্মা গিত্তা দাকনা হা·সিকা, উয়া গিসিকদে ইসলনা চাকজা, মুয়ানা উয়াদে ইসলনি নিয়ামখো মানিনা হাম·জা মানিনাবা মান·জা। 8 উনি গিম্মিন পাপ-বেওয়ালনি নিং·আও দংগিবারাং ইসলখো খুসি দাকনা মান·জা। 9 ইন্দিবা ইসলনি গিসিক না·সংনি খা·থংও দংওদে না·সং পাপ-বেওয়ালনি নিং·আও হং·জা ইন্দিবা গিসিক রংথালগিবানি নিং·আওসা হং·আ। জেনি খা·থংও খ্রীষ্টনি গিসিক দংজা বিয়া খ্রীষ্টনি হং·জা। 10 ইন্দিবা খ্রীষ্ট না·সংনি খা·থংও দংওদে পাপনি হা·সেল না·সংনি বে·এন সিয়ানি নিং·আও দংওবা না·সংনি গিসিকদে থাংআ, মুয়ানা ইসল না·সংখো দোসগ্রি ইন্নে রা·চাকজক। 11 যীশুখো সিয়াওনি থাংচাএতগিবা উয়া ইসলনি গিসিক না·সংনি খা·থংও দংওদে ইসল উয়া গিসিকচা সিয়ানি নিং·আও দংগিবা না·সংনি বে·এনখোবা থাংচাএতনুয়া। 12 উনি গিম্মিন জংআদারাং, আনচিং গ্রো নাংগিবা, ইন্দিবা পাপ-বেওয়ালচাদে হং·জা। পাপ-বেওয়ালনি নিং·আও দংএ আনচিংনি রি·না নাংজানুয়া। 13 না·সং পাপ-বেওয়ালনি নিং·আও রি·ওদে না·সং ফাংনাজলনা সিনুয়া। ইন্দিবা গিসিক রংথালগিবাচা বে·এননি গিম্মিক খ্রাগিজা কামখো ব·ন্নেতোদে ফাংনাজলনা থাংএ দংনুয়া, 14 মুয়ানা জেরাং ইসলনি গিসিকনি রি·দিলাচা রি·য়া বিসংআন ইসলনি দেদ্রাং হং·আ। 15 না·সংদে নকখলনি গিসিকখো মান·জা জেনি হা·সেল খেন্নুয়া; জে না·সংখো দেদ্রাং হং·খানা বিল হন·জক না·সং উয়া ইসলনি গিসিকখো মান·জক। উনি গিম্মিনান ইসলখো আনচিং আপফা ইন্নে রিক্কামা। 16 আনচিং ইসলনি দেদ্রাং ইন্নে গিসিক রংথালগিবা আন·থাংবা আনচিংনি খা·থংও সাক্ষি হ·ন্নিংজক। 17 আনচিং দেদ্রাং হং·এ দংওদে ইসল বিনি দেদ্রাংনা জেখো হ·ন্না খু·রাচাকজক আনচিং উখো মা·ন্নুয়া। খ্রীষ্টন ইসলচাখো উখো মা·ন্নুয়া আরো আনচিংবা বিমুং উখো মা·ন্নুয়া, মুয়ানা আনচিং খ্রীষ্টমুং দুক চাক্কোদে বিমুং রাসংখোবা মা·ন্নুয়া। 18 আংআ হা·আইয়া, আনচিং জা·মানো জে রাসংখো মা·ন্নুয়া উখো থসুসাওদে আনচিংনি দা·আওনি দুক চাক্কা মামুংবা হং·জা। 19 ইসলনি দেদ্রাং বাসোকো উয়া রাসংও ফারাকনুয়া উনি গিম্মিন থারিগিবা গিম্মিক খা·দংআখো রা·এ নিচাকসোএ দংআ, 20 মুয়ানা থারিয়ানি মিকসংআন নাসিনাদা হং·আরিজক। আন·থাংনি হা·সিকাও ইয়া হং·জা, ইসলান বিখো বিথিগ্রি হং·আনি জাক্কো ওয়াত্তেতজক। উমুং ইখোবা খা·দংএতজক, 21 গিম্মাওনি জক্কে ইয়া থারিগিবারাং সালসাদে ইসলনি দেদ্রাংনি রাসংনি জাকগিত্তেলখো মা·ন্নুয়া। 22 আনচিং হা·আইয়ান থারিগিবা গিম্মিকান দা·আওবা বিল্লংএ হান·ফাকানি সা·দিকানা দাক্কিংজক। 23 ইয়াসান হং·জা, ইন্দিবা জে রাসংখো জা·মানো মা·ন্নুয়া উনি স্খাংগিবা বিথি গিত্তা গিসিক রংথালগিবাখো মা·ন্নে আনচিং আন·থাংবা খা·থংও মা·আমিংআ। আরো উয়া সালনা সেংএ দংআ জেনসালো আনচিংখো ইসলনি দেদ্রাং গিত্তা ফারাকনুয়া, আগানস্খাওদে ব·ন্নাংআনি জাকওনিখো আনচিংখো জক্কেৎনুয়া। 24 পাপওনি জক্কে আনচিং ইয়া খা·দংআখোন মান·জক। জেনা আনচিং খা·দংএ দংআ উখো মা·ন্নোদে খা·দংআনি মুয়াবা দংআ। জেখো মান·জক, উনা সা খা·দংএ দংআ? 25 ইন্দিবা মান·গিজাগিবানা আনচিংনি খা·দংআ দংওদে উনা আনচিং চাকচিকে সেং·এ দংআ। 26 ইনা আগ্রেবা আনচিংনি বিলগ্রিও গিসিক রংথালগিবা আনচিংনা দাকচাকা। মুয়াখো আগানে বি·নুয়া আনচিং উখো হা·আইজা, ইন্দিবা খু·সুকচা জেখো আগান্না মান·জা গিসিক রংথালগিবা আন·থাংআন আনচিংনি হং·এ মল·মলা। 27 মান্দিনি খা·থংখো সান্দিয়ে নিগিবা গিসিক রংথালগিবানি খাৎথাখোবা হা·আইয়া, মুয়ানা গিসিক রংথালগিবা ইসলনি হা·সিকা গিত্তান ইসলনি মান্দিরাংনা মল·মলচাকা। 28 আনচিং হা·আইয়া ইসলনা জেরাং খা·ফাকা, আগানস্খাওদে ইসল আন·থাংনি মিকসংআ গিত্তা জেরাংখো রিক্কামজক বিসংনি নাম্মানা গিম্মিকান আপসান দাক্কে কাম দাক্কিংজক। 29 ইসল জেরাংখো স্খাংআন বাচ্ছিয়ে রা·আমিং বিসংখো বিয়া বিনি দেফান্থি গিত্তা হং·খানা স্খাংআন থারিসোএ দন্নামিং, জেদাক্কে উয়া দেফান্থি বাং·আ জংআদারাংনি গিসেপো দেজাক্রা হং·না মা·ন্না। 30 জেরাংখো বিয়া স্খাংআন থারিসোজক বিসংখো বিয়া রিক্কামজক; রিক্কামগিবারাংখো দোসগ্রি ইন্নেবা রা·চাকজক; জেরাংখো দোসগ্রি ইন্নে রা·চাকজক বিসংনা বিয়া রাসংখোবা হন·জক। 31 ইন্দাকোদে ইরাংনি গিম্মিন আনচিং মুয়াখো আগান্নুয়া? ইসল আনচিংনা চাক্কোদে আনচিংনা নামগিজাখো দাকনা সাবা দংআ? 32 ইসল আন·থাংনি দেফান্থিখোবা ওয়াতজাজক ইন্দিবা আনচিং গিম্মিকনা বিখো সিয়ানি জাক্কো হন·চাকজক। ইন্দাকোদে বিয়া দেফান্থিমুং আরোবা গিম্মিকখোবা হন·চাকজানুয়ামা? 33 ইসল জেরাংখো বাচ্ছিয়ে রা·জক বিসংখো সা নালিশ দাকনুয়া? ইসল আন·থাংআন বিসংখো দোসগ্রি ইন্নে রা·চাকজক। 34 সা বিসংখো দোসি দাকনুয়া? জে সিজকমিং আরো জেখো সিয়াওনি থাংচাএতজক উয়া খ্রীষ্ট যীশু দা·আও ইসলনি জাক্রাচাবাক্কা দংআ আরো আনচিংনা মল·মলিংজক। 35 ইন্দাকোদে খ্রীষ্টনি খা·সাওনি আনচিংখো চে·ল্লেতনা গিত্তা মুয়া দংআ? গিসিকনি সা·দিকা? গিচ্চিয়েতা? অকখ্রিয়া? বা·রাচলানা দিল্লা? হং·সিয়া? সিয়া? 36 রংথালগিবা শাস্ত্রও চক্কা দংআ, নাং·নি হা·সেল ফাংনান চিংখো স·ওতে গাল্লিংজক; মান্দিরাং চিংখো রাসতে গালগিবা মেষ গিত্তান চানচিয়া। 37 ইন্দিবা না·সংনা জে খা·সাআ বিচা আনচিং চু·গিম্মিক দাক্কে হামজক। 38 আংআ ইখো নাম্মেদাক্কেন হা·আইয়া, সিয়া বা জাংগি, সালগিনি সা·গ্রে বা শয়তাননি সা·গ্রে, দা·আওরোরোনি বা জা·মানোনি মামুং বা দিংথাং দাকগিবা বিল, 39 বা সিলগা সাক্কানি বা হা·গিলসাক হা·নিংআনি মামুং, আরোবা থারিয়া গিম্মিকোনি মামুংআন আনচিংখো ইসলনি খা·সাওনি জিত্তেতনা মান·জানুয়া। ইসলনি ইয়া খা·সা আনচিংনি গিত্তেল খ্রীষ্ট যীশুও দংআ।

রোমানরাংনা 9

1 খ্রীষ্টমুং নাংরিমে আংআ আগানিংজক, খা·থংথাংও আংআ নাম্মেন দুক আরো সা·দিকাখো মান·বিংজক, আরো ইয়া খাৎথাদে বিবি, বু·আ হং·জা। আংনি গিসিকবা গিসিক রংথালগিবামুং আপসান হং·এ উয়া আপসানখোন সাক্ষি হন·ফাংজক। 3 আংনি জংআদারাংখো দন্নে, আগানস্খাওদে জেরাং আংনি জাতস্খানি মান্দি বিসংখো দন্নে মা·ন্নোদে আংআ আন·থাংআন খ্রীষ্টওনি চে·ল্লাংআনি শাপখো রা·চাকনুয়ামিং। 4 বিসংদে ইস্রায়েল জাতনি মান্দি। ইসল বিসংখো দেফান্থি হং·আনি বিলখো হন·জক, আন·থাংনি রাসংখো ফিন্নিকজক, বিসংনা খু·রাচাক্কাখো থারিজক, নিয়ামরাংখো হন·জক, বিনা দাকচাকে হ·ন্নানি আরো অলাখিয়ানি চলখো থারিজক আরো বাং·এ মানচান খু·রাচাকজক। 5 ইসলনা খা·ফাকগিবারাং বিসংনিন ফাগিৎচামরাং হং·আমিং আরো খ্রীষ্ট মান্দি হং·এ বিসংনিন মা·চংও আৎচিয়ামিং। বিয়ান ইসল, জেআন গিম্মিকনি সাক্কাও; রাসং গিম্মিক ফাংনাজলনা বিনিন হং·আ। আমেন। 6 ইসলনি খাৎথা বু·আ হং·জক ইন্দাকে হং·জা, মুয়ানা ইস্রায়েল জাতও আৎচিগিবা গিম্মিকান চং·মত ইস্রায়েল হং·বিবিজা। 7 অব্রাহামনি মা·চংনি ইন্নেন বিসং বিনি চং·মত দেদ্রাং হং·আ ইয়াদে হং·জা, বাত্তেসা রংথালগিবা শাস্ত্রনি খাৎথা গিত্তা, “ইস্‌হাকনি মা·চংখোন নাং·নি মা·চং ইন্নে চান্নুয়া।” 8 ইনি অর্থ হং·জক, ইস্রায়েল জাতনি গিসেপো আৎচিয়ানা সাবা ইসলনি দে হং·আ ইয়াদে হং·জা, ইন্দিবা ইসলনি খু·রাচাক্কা গিত্তা জেরাং আৎচিজক বিসংখোন অব্রাহামনি দেরিচ্ছুনি ইন্নে চান্নুয়া। 9 ইয়ান উয়া খু·রাচাক্কা- “থিক সময়ও আংআ রি·বাফিলনুয়া আরো সারানি সাকসা মি·আসা বি·সা হং·নুয়া।” 10 ইয়াসান হং·জা, রিবিকানি সা·চাপ দেদ্রাং মি·আসা সাকসানিন বি·সামিং। 11 আনচিংনি ফাগিৎচাম ইস্‌হাকান উয়া মি·আসা। উয়া বি·সা সাকগ্মিনি আৎচিয়ানি স্খাং জেনসালো বিসং নাম্মা নামজা মামুংখোন দাকখুজা ইসল উনোন রিবিকাখো আগানামিং, “দাল·গিবা চনগিবানি নকখল হং·নুয়া।” ইচা ইসল ফিন্নিকামিং, আন·থাংনি মিকসংআখো চু·সকেৎনা বিয়ান বাচ্ছিয়ে রা·আ; মামুং কামনি হা·সেল বিয়া উখো দাকজা বাত্তেসা বিনি হা·সিকা গিত্তান বিয়া মান্দিখো রিক্কামা। 13 আরো উনি গিম্মিন রংথালগিবা শাস্ত্রও চক্কা দংআ, “যাকোবখো আংআ খা·সাজক, ইন্দিবা এষৌখো জেগালজক।” 14 ইন্দাকোদে ইসল অন্যায় দাক্কিংআ ইন্নে আনচিং ইন্নুয়ামা? হং·জাস্রাং। বিয়া মোশিনা আগানামিং, 15 “আংআ জেনা হা·সিকা বিনা খা·সানুয়া, জেনা হা·সিকা বিনা খা·সাচাকনুয়া।” 16 ইন্দাকোদে ইয়া দারাংনি হা·সিকানি সাক্কাও ফাংচাকজা, ইসলনি খা·সাচাক্কাওন ফাংচাকা। 17 রংথালগিবা শাস্ত্রও ইসল ফরৌণনা ইয়া খাৎথাখো আগানামিং, “আংআ নাং·খো রাজা দাকজক জেদাক্কে নাং·মুং আংনি বেওয়ালচা আংনি বিলখো ফিন্নিকনা মা·ন্না আরো হা·গিলসাক গিম্মিকো জেদাক্কে আংনি বিমুংখো আগানফ্রাকা হং·আ।” 18 ইন্দাকোদে নিকনা মা·ন্না, ইসল আন·থাংনি হা·সিকা গিত্তা সানাবা খা·সাচাক্কা আরো সানিবা খা·থংখো রাক্কেতা। 19 না·সংওনি সাবা আংখো সিং·নাবা দংআ, “ইন্দিদে ইসল মান্দিনি দোসখো মুয়ানা রি·ম্মা? সাবা ইসলনি মিকসংআখো ফেং·না মা·ন্নামা?” 20 উনা আংআ ইন্দাকে আগানচাকনুয়া, না·আদে মান্দি; ইসলনি খু·সুকনি সাক্কাও খু·সুক আগান্না না·আ সা? সাকসা মান্দি মামুংখো থারিওদে উয়া থারিগিবা বস্তু বিখো সিং·না মা·ন্নামা, “মুয়ানা আংখো ইন্দাকে থারিজক?” 21 হা·আ থম·সানোনিখো দিংথাং দিংথাং দনচাকানিখো থারিনা কুমারনি বিল দংজামা- বাগিবা মান্দিরা·আনি কামনা বা বাগিবা মান্দিরা·গিজানি কামনা? 22 উয়ানদাক্কেন ইসল বিনি খা·আওনাংআ আরো বিলখো ফিন্নিকনা হা·ম্মামিং; ইন্দাকোবা জে মান্দিরাংনি সাক্কাও বিনি খা·আওনাংআখো ফারাকনুয়া, বিসংখো বিয়া নাম্মেন চাকচিকজক। ব·ন্নাংআন ইয়া মান্দিরাংনি মিংসা মা·মাং মা·ন্নানি হং·আমিং। 23 দা·আবা বিয়া বিনি বন·চাংগিজা রাসংনি খাৎথাখোবা হা·আইএতনা হা·ম্মামিং। জেরাংনা বিয়া খা·সাচাক্কা বিসংনা বিয়া বিনি রাসংখো মান·খানা স্খাংআন থারিসোএ দন্নামিং। 24 আনচিংআন উয়া খা·সাচাক্কানি মান্দি হং·আ। বিয়া আনচিংখো যিহূদীরাংওনিখোসান রিক্কামজা, গিপ্পিন জাতরাংওনিখোবা রিক্কামা। 25 আগানসোগিবা হোশেয়নি খি·তাপো ইসল আগানজক, “জেরাং আংনি হং·জা বিসংখো আংআ আংনি মান্দি ইন্নে রিক্কামনুয়া, আরো জেখো আংআ খা·সাজাজক বিখো আংআ আংনি খা·সাগিবা মিচিক ইন্নে রিক্কামনুয়া। 26 জে হা·দামও বিসংখো আগানামিং, ‘না·সং আংনি মান্দি হং·জা,’ উয়ো বিসংখো থাংগিবা ইসলনি দেদ্রাং ইন্নে ইন্নুয়া।” 27 আগানসোগিবা যিশাইয় ইস্রায়েল জাতনি গিম্মিন আগানামিং, “ইস্রায়েলনি মান্দিরাং সাগাল রিক্কামনি হান·চেং গিত্তা বাং·বিওবা বিসংওনি মংসংগিবা বাকসান জক্কাখো মা·ন্নুয়া। 28 গিত্তেল থেংরিন হা·গিলসাকনি মা·ন্না খ্রাগিবা শাস্তিখো চু·গিম্মিক দাক্কে হ·ন্নুয়া।” 29 যিশাইয় আরোবা আগানামিং, “দাল·বাৎস্রাংগিবা গিত্তেল মিত্তাম বিৎচ্রিখো আনচিংনা দন্নাংজাওদে আনচিংনি অবস্থা সদোম আরো ঘমোরা সংজিলমা গিত্তা হং·নুয়ামিং।” 30 ইন্দাকোদে আনচিং ইয়া খাৎথাখোন আগান্নুয়া, গিপ্পিন জাতরাং ইসলনি রা·চাকনা খ্রাগিবা হং·না দাক্কেবা নিজা ইন্দাকোবা বিসংনি বিবিরা·আচান বিসং ইসলনি রা·চাকনা খ্রাগিবা হং·জক। 31 ইন্দিবা ইস্রায়েলনি মান্দিরাং নিয়ামরাংখো মানিয়াচা ইসলনি রা·চাকনা খ্রাগিবা হং·না দাক্কামিং, ইন্দিবা বিসং হং·না মান·জাজক। 32 মুয়ানা মান·জাজক? মুয়ানা বিসং বিবিরা·আও ফাংচাকগিজা কামনি সাক্কাও ফাংচাকামিং। জে রং·থিও মান্দিরাং জা·গিদত্তাখো চা·আ উনোন বিসং জা·গিদত্তা চা·আমিং। 33 ইনি গিম্মিন রংথালগিবা শাস্ত্রও চক্কা দংআ, নিবো, আংআ সিয়োনও ইন্দাকগিবা গি·সা রং·থিখো দন্নিংজক জেও মান্দিরাং জা·গিদত্তাখো চা·নুয়া আরো জেআন মান্দিনি জা·গিদত্তা চা·আনি হা·সেল হং·নুয়া। ইন্দিবা জে বিখো বিবিরা·আ বিয়া খা·দংআগ্রি হং·জানুয়া।

রোমানরাংনা 10

1 জংআদারাং, ইস্রায়েলনি মান্দিরাংনা আংনি খা·থংও হা·সিকবিয়া আরো ইসলচা আংনি বি·আনি ইয়ান হং·আ, জেদাক্কে বিসং পাপওনি জকনা মা·ন্না। 2 বিসংনি গিম্মিন আংআ ইন্দাকে সাক্ষি হ·ন্নিংজক, ইসলনা বিসং খা·দংবিয়া, ইন্দিবা বাদিকে দাক্কে ইসলনি রা·চাকাখো মা·ন্নুয়া উখো বিসং হা·আইজা। 3 ইসল বাদিকে দাক্কে মান্দিখো দোসগ্রি ইন্নে রা·চাকা উয়া খাৎথাও গিসিক হন·গিজা বিসং আন·থাংথাংআন বিনি রা·চাকাখো মা·ন্না হা·ম্মিংআমিং। উনি গিম্মিনান ইসল জেদাক্কে মান্দিখো দোসগ্রি ইন্নে রা·চাকা উখো বিসং মানিয়ে রা·জাজক। 4 খ্রীষ্টআন নিয়ামরাংখো চু·সকেতি উনি বিলখো দি·গালজক, জেদাক্কে বিখো বিবিরা·গিবারাং ইসলনি রা·চাকাখো মা·ন্না। 5 নিয়ামরাংখো মানিয়ে ইসলনি রা·চাকাখো মা·ন্নানি গিম্মিন মোশি চকজক, “জে মান্দি নিয়াম গিত্তা রি·য়া বিয়া উচান জাংগি মা·ন্নুয়া।” 6 ইন্দিবা বিবিরা·আচা বাদিকে দাক্কে মান্দি ইসলনি রা·চাকাখো মা·ন্না উনি গিম্মিন রংথালগিবা শাস্ত্রও আগানা দংআ, “গিসিকথাংও ইয়া খাৎথাখো দা·আ ইন্নাবো, ‘সালগিচা সা রি·য়াংনুয়া?’ ” বা সালগিওনি খ্রীষ্টখো হং·ওনেতে রা·বানা সালগিচা সা রি·য়াংনুয়া? 7 “হং·জাওবা দা·আ ইন্দাকে আগানাবো, ‘সা খা·মাচানা সিগিবারাংনি হা·দামচা রি·য়াংনুয়া?’ ” আগানস্খাওদে সিয়াওনি খ্রীষ্টখো চাখাত্তেতি রা·বানা সিগিবারাংনি হা·দামচা সা রি·য়াংনুয়া? 8 ইসলনি রা·চাকনা খ্রাগিবা হং·আনি বিদিংও শাস্ত্র আরোবা আগানা, “ইসল জেখো আগানজক উয়া নাং·মুংআন দংআ, আগানস্খাওদে নাং·নি খু·সুকো আরো নাং·নি খা·থংও দংআ।” জে বিবিরা·আনি খাৎথাখো চিংআ আগানফ্রাকিংআ উয়াদে ইসলনি উয়া খাৎথা হং·আ। 9 উয়া খাৎথা হং·জক, না·আ যীশুখো গিত্তেল ইন্নে খু·সুকচা খু·রাচাকোদে আরো খা·থংও ইসল বিখো সিয়াওনি থাংচাএতজক ইন্নে বিবিরা·আওদে উনোন না·আ পাপওনি জক্কেতাখো মা·ন্নুয়া; 10 মুয়ানা খা·থংও বিবিরা·আনি গিম্মিন ইসল মান্দিখো দোসগ্রি ইন্নে রা·চাকা আরো খু·সুকচা খু·রাচাক্কানি গিম্মিন পাপওনি জক্কেতা। 11 রংথালগিবা শাস্ত্র আগানা, “জেআন বিখো বিবিরা·আ বিয়া খা·দংআগ্রি হং·জানুয়া।” 12 যিহূদী আরো যিহূদী হং·গিজারাংনি গিসেপো দিংথাংগ্রিকানি দংজা, মুয়ানা গিম্মিকনি গিত্তেল আপসান। জেরাং বিখো রিক্কামা বিসংনা বিয়া বাং·এন ফাত্তিয়াখো হ·ন্না। 13 রংথালগিবা শাস্ত্রও দংআ, “জক্কেতাখো মা·ন্না গিত্তেলখো জেআন রিক্কামা বিয়া জক্কেতাখো মা·ন্নুয়া।” 14 ইন্দিবা জেখো বিসং বিবিরা·জাজক বিখো বাদিকে দাক্কে রিক্কামনুয়া? জেনি গিম্মিন বিসং খিন্নাখুজা বিখো বিসং বাদিকে দাক্কে বিবিরা·নুয়া? আগানফ্রাকগিবা দংজাওদে বিসং বাদিকে দাক্কেবা খিন্নানুয়া? 15 ইনাআগ্রেবা সাবা ওয়াত্তেতজাওদে বাদিকে দাক্কে আগানফ্রাকগিবারাং আগানফ্রাকনুয়া? রংথালগিবা শাস্ত্রও চক্কা দংআ, “রাসং দাকনা বিসংনি জা·চকনা জেরাং নাম্মা খাৎথাখো আগানফ্রাকনা রি·বাআ।” 16 ইন্দিবা গিম্মিকান উয়া নাম্মা খাৎথাখো খিন্নাচাকজা। আগানসোগিবা যিশাইয় আগানজক, “গিত্তেল, চিংনি হন·গিবা নাম্মা খাৎথাখো সা বিবিরা·জক?” 17 ইন্দাকোদে নিকনা মা·ন্না, ইসলনি খাৎথাখো খিন্নাচাক্কানি গিম্মিনান বিবিরা·আ রি·বাআ, আরো খ্রীষ্টনি গিম্মিন আগানফ্রাকাচা উয়া খাৎথাখো খিন্নানা মা·ন্না। 18 ইন্দিবা আংআ আগানা, ইস্রায়েলনি মান্দিরাং উয়া খাৎথাখো খিন্নাখুজামা? বিবিন খিন্নাজক। রংথালগিবা শাস্ত্র আগানা, বিসংনি খু·রাং হা·গিলসাক গিম্মিকো গিপ্পাংজক, বিসংনি খাৎথা গিপ্পাংজক হা·গিলসাকনি খি·থিকোনা দিপ্পাৎ। 19 আংআ দা·আবা আগানিংআ, ইস্রায়েলনি মান্দিরাং উয়া খাৎথাখো হা·আইনা মান·জামা? স্খাং মোশিচা ইসল আগানজক, জে জাত মামুং জাতআন হং·জা, উয়া জাতচান আংআ নাং·নি গিসিক নাংআখো মিকরাকেতনুয়া; গিসিকগ্রি জাত মা·সাচা নাং·খো খা·আওনাংএতনুয়া। 20 উনি জা·মানো যিশাইয়চা ইসল আরোবা রাক্কে আগানজক, “আংআ বিসংচান দংআমিং, ইন্দিবা বিসং আংচা মামুং দাকচাকাখো মা·ন্না রি·বাজাজক। আংআ ইয়া মান্দিরাংখো আংচা মল·মলখানা চল হন·জক, ইন্দিবা বিসং আংচা মামুংখো মল·মলজাজক।” 21 ইন্দিবা ইস্রায়েলনি মান্দিরাংনি গিম্মিন বিয়া আগানজক, “বামগিজাগিবা আরো গিত্তক গ্রেং রাকগিবা মান্দিরাংচাবাক্কা সালগিম্মিকো আংআ আংনি জাকখো বাওয়াংএন দংআ।”

রোমানরাংনা 11

1 ইন্দিদে আংআ সিং·না, ইসল বিনি মান্দিরাংখো জেগালজকমা? মামুং সালোবা জেগালজা। আংআ আন·থাংআন সাকসা ইস্রায়েলনি মান্দি, অব্রাহামনি বিৎচ্রিনি আরো বিন্যামীননি মা·চংনি মান্দি হং·আ। 2 ইসল বিনি জে মান্দিরাংখো স্খাংআন বাচ্ছিয়ে রা·আমিং বিসংখো জেগালজা। আগানসোগিবা এলিয়নি গিম্মিন রংথালগিবা শাস্ত্র মুয়াখো আগানা উখো না·সং হা·আইজামা? বিয়া ইস্রায়েল মান্দিরাংনি সাক্কাও ইসলনা আগানামিং, 3 “গিত্তেল, ইরাং নাং·নি আগানসোগিবারাংখো স·ওতজক আরো নাং·নি গানচিরাংখো ফি·এ গালজক। আংআসান দংখুংআ, আরো আংখোবা বিসং স·ওতে গালনা হা·ম্মামিং।” 4 ইন্দিবা ইসল এলিয়না মুয়াখো আগানচাকামিং? বিয়া আগানামিং, “বাল মিত্তেনা জা·স্খু দেম·গিজাগিবা হাজাল স্নি মান্দিখো আংআ আন·থাংনি গিম্মিন রা·রিকে দনজক।” 5 উয়ানদাক্কেন ইসল খা·সাচাক্কে দা·আওনা দিপ্পাৎ ইস্রায়েলরাংনি মংসংগিবা বাকখো বাচ্ছিয়ে দনজক। 6 ইসল খা·সাচাক্কেন বাচ্ছিয়ে দন্নোদে উয়া মামুং কামনি বিথি হং·জাসা। ইন্দাকেন হং·ওদে খা·সাচাক্কা চং·মত খা·সাচাক্কা হং·জানুয়ামিং। 7 ইন্দাকোদে হা·আইনা মা·ন্না, ইস্রায়েলনি মান্দিরাং জেখো মা·ন্না হা·ম্মামিং উখো বিসং মান·জাজক, ইন্দিবা ইসল জেরাংখো বাচ্ছিয়ে দন্নামিং বিসংআন উখো মান·জক, আরো সাকগিপ্পিনরাংনি খা·থংদে রং·থি গিত্তা রাকজক। 8 রংথালগিবা শাস্ত্রও চক্কা দংআ, “ইসল বিসংনি খা·থংখো ইন্দাকফিল্লে গক্কা দাক্কেতজক, জেনি হা·সেল বিসং দা·আলোনা দিপ্পাৎ বিসংনি মিক্রোনথাংচা নিক্কেবা নিকজাংআ আরো নাচিলো খিন্নাএবা খিন্নাজাংআ।” 9 রাজা দায়ূদবা আগানামিং, বিসংনি চা·আনি পর্বরাং জা·গা গিত্তা আরো জাল গিত্তা হং·খানা; জেদাক্কে উরাং বিসংনি জা·গিদত্তানি হা·সেল হং·আ, আরো বিসংনি মা·ন্নাগিবাখোন বিসং মান·খানা। 10 বিসংনি মিক্রোন কানা হং·খানা জেদাক্কে বিসং নিকনা মান·জা, আরো ফাংনান বিসংনি খাংখারি খম·সিকখানা। 11 ইন্দাকোদে যিহূদীরাং জা·গিদত্তে ফাংনাজলনা গা·আকজকমা? গা·আকজাস্রাং, বাত্তেসা বিসংনি পাপনি হা·সেলান গিপ্পিন জাতরাং জক্কেতাখো মা·ন্নানি চলখো মান·জক জেদাক্কে যিহূদীরাং উখো মা·ন্না হা·সিকে মিকরাকা। 12 ইন্দাকোদে নিকনা মা·ন্না, যিহূদীরাংনি পাপনি হা·সেল হা·গিলসাকনি মান্দিরাংনি বাং·এন লাভ হং·জক, হো·এ, বিসংনি নামগিজানি হা·সেল গিপ্পিন জাতরাংনি বাং·এন লাভ হং·জক। উনি গিম্মিন জেনসালো যিহূদীরাংনা ইসলনি চু·সকে ফাত্তিয়া রি·বানুয়া উনসালো উমুং গিপ্পিন জাতরাংনা আরো বাসিক বাং·এ ফাত্তিয়া রি·বানুয়া! 13 গিপ্পিন জাতরাং, আংআ না·সংনা আগানিংজক, গিপ্পিন জাতরাংনা ওয়াত্তেতা হং·এ আংআ আন·থাংনি কামনা নাম্মেন রাসং দাকনিকিংজক। 14 ইনি গিম্মিন জেদাক্কে আংআ আন·থাংনি জাতস্খানি মান্দিরাংনি হা·সিকাখো মিকরাকেতি বিসংওনি মিত্তাম মান্দিরাংখো জক্কেৎনা মা·ন্না। 15 ইসল যিহূদীরাংখো জেগালজক ইন্নে ইসলমুং হা·গিলসাকনি সাকগিপ্পিনরাং নাংরিমজক ইন্দিদে জেনসালো বিয়া যিহূদীরাংখো রা·চাকনুয়া উনো মুয়া অবস্থা হং·নুয়া? উয়াদে সিয়াওনি জাংগি থাংচাফিল্লা গিত্তা হং·জানুয়ামা? 16 রুটিনি ময়দা থ·ম্মাওনি স্খাং থারিগিবা রুটি রংথালোদে থম·গিম্মিকান রংথালা। জলপই ফাংনি জা·দিল রংথালোদে উনি ডালারাংবা রংথালা। 17 উয়া জলপই ফাংনি মিত্তাম ডালারাংখো দেন·ফাকে উয়ো নাং· গিত্তা দাক্কা ব্রিংনি জলপই ফাংনি ডালাখো জুরাওদে আরো না·আ খাকখেৎ জলপই ফাংনি জা·দিলওনি বিৎচিখো সাল্লে রা·আওদে, 18 ইন্দিদে দেন·ফাকে গালগিবা ডালারাংনা বাত্তে আন·থাংখো দা·আ দাল·নিকাবো। চানচিওদে ইখো গিসিক রা·রিকবো, না·আ জা·দিলখো রি·ম্মে রা·রিকজাংআ বাত্তেসা জা·দিলান নাং·খো রি·ম্মে রা·রিকিংআ। 19 “আংখো জুরানান ডালারাংখো দেন·ফাকে গাল্লামিং,” ইন্নে না·আ আগান্নাবা দংআ। 20 দে নাম্মান। ইন্দিবা উরাংনি বিবিরা·জানি গিম্মিন উরাংখো দে·ন্নে গাল্লামিং আরো নাং·নি বিবিরা·আনি গিম্মিন না·আ উয়ো দংআ। ইনি হা·সেল দা·আ গাং·বিংআবো বাত্তেসা অলাখিয়ে খেনবো, 21 মুয়ানা ইসল খাকখেৎ ডালারাংখো ওয়াতজাজক ইনি হা·সেল নাং·খোবা ওয়াতজানুয়া। 22 উনি গিম্মিন ইসল বাসিক খা·সাচাকগিবা আরো রাকগিবা হং·আ উখো রাং·সা চানচিবো। গা·আকগিবারাংনা বিয়া রাক্কা, ইন্দিবা না·আ বিনি খা·সাচাক্কাও দংওদে নাং·না বিয়া খা·সাচাক্কা। হং·জাওদে নাং·খোবা দে·ন্নে গালনুয়া। 23 আরো বিসং বিবিরা·গিজাওনি ফি·ল্লোদে বিসংখো আন·থাংথাংনি ফাংমুং দা·আবা জুরাফিলনুয়া, মুয়ানা ইয়া জুরানি কামখো ইসলান দাকনা মা·ন্না। 24 না·আদে ব্রিংনি জলপই ফাংনি ডালামিং, আরো উয়া ফাংনিখো নাং·খো দে·ন্নে ফাংফিলে বাগাননি জলপই ফাংও মা·গাপগিজা দাক্কে জুরাজক। ইন্দাকোদে জেরাং উয়া ফাংনি খাকখেৎ ডালামুং, বিসংখো বাসিক আলথুয়েন আন·থাংথাংনি ফাংমুং দা·আবা জুরানুয়া! 25 জংআদারাং, না·সং আন·থাংথাংখো হা·আইগিবা ইন্নে চানচিজাখানা আংআ না·সংনা মিংসা সিউল দনগিবা বিবিখো হা·আইএতি দন্না হা·ম্মিংআ। উয়াদে ইয়ান- গিপ্পিন জাতরাংনি চু·সকগিজানা দিপ্পাৎ ইস্রায়েলনি বাং·আ মান্দিরাংনি খা·থং রাক্কেন দংনুয়া। 26 আরো ইন্দাকেন গিম্মিক ইস্রায়েল জাতি জক্কাখো মা·ন্নুয়া। রংথালগিবা শাস্ত্রও চক্কা দংআ, সিয়োনওনি জক্কেৎগিবা রি·বানুয়া; বিয়া যাকোবনি মা·চংনি মান্দিরাংওনি আংখো অলাখিজাখো হা·রিকেতনুয়া। 27 জেনসালো আংআ বিসংনি পাপরাংখো হা·রিকনুয়া উনো ইয়ান বিসংনা আংনি ফাত্তিয়াগ্মাং খু·রাচাক্কা হং·নুয়া। 28 নাম্মা খাৎথাচাবাকওনি না·সংনি নাম্মানান দা·আও বিসং ইসলনি বোবিল হং·আ। ইন্দিবা ইসলনি বাচ্ছিয়াচাবাকওনি ফাগিৎচামরাংনা বিসং ইসলনি খা·সাখো মান·গিবা হং·আ। 29 ইসল জেখো হন·খামা আরো জেখো রিক্কামা উনি গিম্মিন বিয়া বিনি গিসিকখো দিংথাং দাকফিলজা। 30 না·সং স্খাংও ইসলখো মানিজামিং ইন্দিবা যিহূদীরাংনি মানিজানি গিম্মিন দা·আও ইসলনি খা·সাচাক্কাখো মান·জক, 31 উয়ানদাক্কেন না·সং খা·সাচাক্কাখো মান·জক ইন্নে বিসংবা দা·আও মানিগিজাগিবা হং·জক জেদাক্কে বিসংবা দা·আও খা·সাচাক্কাখো মা·ন্না। 32 জেদাক্কে ইসল গিম্মিকনা খা·সাচাক্কাখো ফিন্নিকনা মা·ন্না উনি গিম্মিন বিয়া গিম্মিকখো মানিগিজাগিবাও চিপচাংএ দনজক। 33 ইসলনি গাম বাং·বিয়া। বিনি হা·আইয়া আরো বুদ্ধি বাসিক নিং·থুয়া! বিনি বিচাল দাক্কাখো আরো বিনি গিম্মিক কামখো হা·আইনা হামসকজা। 34 গিত্তেলনি গিসিকখো সা হা·আইনা মান·জক? আরো সাবা বিনি খু·ফাত্তিগিবা হং·জক? 35 সা স্খাং ইসলনা মামুংখো হন·জক জেদাক্কে বিয়া বিচানিখো বিনি হন·স্খাখো মা·ন্না? 36 বিচানিন আরো বিগিত্তান গিম্মিক রি·বাআ আরো গিম্মিক বিনা মিংএন হং·আ। ফাংনাজলনা বিনিন রাসং হং·খানা। আমেন।

রোমানরাংনা 12

1 ইন্দাকোদে জংআদারাং, ইসলনি ইন্দাকে খা·সারাংনান আংআ না·সংচা মংসংবাত্তে মল·মলিংআ, না·সং না·সংনি বে·এনখো থাংগিবা, রংথালগিবা আরো ইসলনি রা·চাকনা খ্রাগিবা বলি গিত্তা ইসলনি জাক্কো হন·বো। উয়ান না·সংনি খ্রাগিবা দাকচাকে হ·ন্না হং·নুয়া। 2 ইয়া নামগিজা হা·গিলসাকনি রি·য়া-দোআরাংও না·সং আন·থাংথাংখো দা·আ রিপ্পেতাবো, বাত্তেসা ইসলচা না·সংনি গিসিকখো গিত্তাল দাক্কে থারিনা হ·ন্নে চু·গিম্মিক দাক্কে গিত্তাল হং·বো, জেদাক্কে না·সং ইসলনি হা·সিকাখো হা·আইনা মা·ন্না। ইসলনি হা·সিকা নাম্মা, চু·সকগিবা আরো উয়া বিনা খুসি হং·বিয়ানি হং·আ। 3 আংআ ইসলচাখো জে মংসংগিবা খা·সাচাক্কাখো মান·জক উচা আংআ না·সং গিম্মিকনা আগানিংজক, আন·থাংখো জেচিকিন দাল·নিকনা নাংআ উনা বাত্তে না·সং আন·থাংথাংখো দা·আ দাল·নিকাবো, বাত্তেসা জেচিকিন খ্রাআ উচিকিনান দাল·নিকবো। ইসল জেনা জেচিকিন বিবিরা·আনি বিলখো হ·ন্না উনা বাত্তে বাং·এ সাকসাবা আন·থাংখো চানচিজাখানা। 4 আনচিংনি গিম্মিকনি বে·এননি বাং·আ বাকরাং দংআ, ইন্দিবা গিম্মিক বাক আপসান কামখো দাকজা; 5 থিক উয়ানদাক্কে আনচিং বাং·ওবা খ্রীষ্টমুং নাংরিমে বে·এন গি·সান হং·জক। আনচিং গিম্মিকান সাকসা সাকগিপ্পিনমুং দংফাআ। 6 ইসলনি খা·সাচাক্কা গিত্তাদে আনচিং দিংথাং দিংথাং মা·ন্নানিখো মান·জক। উয়া মা·ন্না আগানসোগিবা হং·এ ইসলনি খাৎথাখো আগানানি বিল হং·ওদে বিবিরা·আচা বিয়া ইসলনি খাৎথাখো আগানখানা। 7 উয়া দাকচাকে হ·ন্নানি বিল হং·ওদে বিয়া দাকচাকে হন·খানা। জেআন স্খিয়েতনা বিলখো মান·জক বিয়া স্খিয়েতখানা; 8 খা·দংএতানি বিলখো জে মান·জক বিয়া খা·দংএতখানা; গিপ্পিননা হ·ন্নানি বিলখো জে মান·জক বিয়া সনথল গিসিকো হন·খানা; দাল·গিবা হং·আনি বিলখো জে মান·জক বিয়া খা·দংএ নিরিকখানা; গিপ্পিননা দাকচাকানি বিলখো জে মান·জক বিয়া গিসিকো খুসি হং·এ দাকখানা। 9 খা·সাও বু·এ চা·আ দংজাখানা। নামগিজাখো মিৎচিবো; নামগিবাখো রাক্কে রি·ম্মে রা·রিকবো। 10 সাকসা সাকগিপ্পিননা জংআদা গিত্তা নাম্মেন খা·সাগ্রিকবো। আন·থাংনা বাত্তে সাকগিপ্পিনখো বাং·এ মান্দিরা·বো। 11 ইসলনা ফাংনান না·সংনি হা·সিকবিয়া দংখানা। না·সংনি খা·থং খা·ফাকাও গাপখানা। না·সং গিত্তেলনি কামও বিমচিপে দংবো। 12 না·সংনি মিকখাংও জে খা·দংআ দংআ উনা হান·সেংবো। দুকরাংও চাকচিকে দংবো। ফাংনান বি·বো। 13 ইসলনি মান্দিরাংনা নাংআনিরাংও দাকচাকবো। সকবাগিবারাংখো যতন রা·না খা·দংবো। 14 জেরাং না·সংখো গিচ্চিয়েতা বিসংনি নামগিজাখো দা·আ হা·ম্মাবো বাত্তেসা নাম্মাখো হাম·বো। 15 হান·সেংগিবারাংমুং হান·সেংফাবো; গ্রাপগিবারাংমুং গ্রাপফাবো। 16 সাকগিপ্পিননা আপসানখো চানচিগ্রিকবো। দাল·নিকে ফিন্নিকগিজা বাত্তেসা চনগিবারাংমুং নাংরিমে রি·বো। আন·থাংথাংখো দা·আ হা·আইগিবা দাকনিকাবো। 17 দা·আ নামগিজানি ফাল নামগিজাখো দাক্কাবো। গিম্মিক মান্দিনি মিক্রোনও জেআন নাম্মা উনি গিম্মিনো গিসিক হন·বো। 18 না·সংনি মা·ন্না দিপ্পাৎ গিম্মিক মান্দিরাংমুং থম·থমাও দংবো। 19 খা·সানি জংআদারাং, না·সং আন·থাংথাং দা·আ নামগিজাখো দাকস্খাবো, বাত্তেসা ইসলখোন শাস্তি হ·ন্নেতনা হন·বো। রংথালগিবা শাস্ত্রও গিত্তেল আগানা, “নামগিজানা শাস্তি হ·ন্নানি বিল আংনিসান দংআ; জে জেখো মা·ন্নুয়া আংআ বিনা উখোন হ·ন্নুয়া।” 20 বাত্তেসা শাস্ত্রনি খাৎথা গিত্তা “নাং·নি বোবিল অকখ্রিওদে বিনা চা·না হন·বো; বিয়া চি রিংনা হা·সিকোদে চি রিংনা হন·বো। ইন্দাকে দাক্কোদে না·আ বিনি স্খু সাক্কাও ওয়া·আলখিখো গাতরিমরিমে দনবো।” 21 নামগিজাচা দা·আ হামগিজা হং·আবো বাত্তেসা নাম্মাচা নামগিজাখো হামবো।

রোমানরাংনা 13

1 গিম্মিকান শাসন দাকগিবারাংখো মানিখানা, মুয়ানা জেখো ইসল শাসন দাকগিবা দাক্কে সংআ বিনা আগ্রেদে সাকসাবা শাসন দাকগিবা হং·না মান·জা। ইসলান শাসন দাকগিবারাংখো বাচ্ছিজক; 2 ইনি গিম্মিন শাসন দাকগিবাখো জে মানিজা বিয়া ইসলনি শাসনখোন মানিজা। ইন্দাকে দাকগিবারাং আন·থাংথাংনি সাক্কাও শাস্তিখো রা·বাআ। 3 নাম্মা কামখো দাকগিবারাংদে শাসন দাকগিবারাংনা খেন্নানি মামুং হা·সেল দংজা, ইন্দিবা জেরাং অন্যায়খো দাক্কা বিসংআন খেন্না। শাসন দাকগিবানা খেনগিজা না·সং রি·না হা·ম্মিংআমা? ইন্দাকোদে নামগিবাখোন দাকসোবো। উনি হা·সেল না·সং বিচানিখো মিৎথেলাখো মা·ন্নুয়া। 4 না·সংনি নাম্মানান বিয়া ইসলনা দাকচাকে হন·গিবা গিত্তা কাম দাক্কিংআ। না·সং অন্যায় দাক্কোদে খেনবো, মুয়ানা অন্যায় দাকগিবারাংনা শাস্তি হ·ন্নানি বিল বিনি দংআ। বিয়াদে ইসলনা দাকচাকে হন·গিবা হং·আ; জেরাং অন্যায় কামখো দাক্কা বিসংনা বিয়া ইসলনি হং·এ শাস্তিখো হ·ন্না। 5 ইনি গিম্মিন না·সং শাসন দাকগিবারাংনি নিং·আও বাম্মে দংনা নাংআ। ইসলনি শাস্তিনা খেন্নেন বিসংনি নিং·আও বাম্মে দংনুয়া ইন্দাকেদে হং·জা, না·সংনি গিসিকখো রংথালে রা·রিকনাবা ইন্দাকে দাকবো। 6 আরো উনি গিম্মিনান না·সং খাজিনা হ·ন্নিংআ, মুয়ানা খাজিনা গিলগিবারাং বিসংনি কামচা ইসলনা দাকচাকে হ·ন্নিংজক। 7 জে জেখো মা·ন্নুয়া বিনা উখো হন·বো। খাজিনা গিলগিবানা খাজিনাখো হন·বো; রা·নাপানি খাজিনাখো গিলগিবানা উখো হন·বো; জেনা খেন্না নাংআ বিনা খেনবো; জেখো মান্দিরা·না নাংআ বিখো মান্দিরা·বো। 8 খা·সানি আগ্রে সাকগিপ্পিনচা না·সংনি মামুং গ্রো দংজাখানা। জেরাং সাকগিপ্পিননা খা·সা বিসং মোশিনি নিয়ামখো মানিয়ে রি·ইংজক। 9 ইন্দাকে গি·য়েতা দংআ, “দা·আ থি·ল্লেকাবো, দা·আ স·ওতাবো, দা·আ চা·উয়াবো, দা·আ মাদ্দুয়াবো।” ইন্দাকারাং আরো ইন্দাকগিবা দিংথাং দিংথাং গি·য়েতারাংখো আপসান দাক্কে মিংসা খাৎথাওন আগানা হং·জক, “নাং·নি সংসুল-নকসুলরাংখো আন·থাং গিত্তা খা·সাবো।” 10 খা·সাওদে দারাংবা দারাংনি নামগিজাখো দাকজা। ইন্দাকোদে নিকনা মা·ন্না, খা·সাচান গিম্মিক নিয়ামখো মানিয়ানি হং·আ। 11 দা·আনোনি জেখো আগানজক, দা·আওনি সালখো হা·আইএ উগিত্তান রি·বো। থুয়াওনি চাখাতানি সময় হং·জক, মুয়ানা জেনসালো আনচিং বিবিরা·আমিং উয়া সালনা বাত্তে দা·আওন জক্কানি সাল সেফাংও সকবাজক। 12 ওয়াল ব·ন্না হা·ম্মিংজক, সেং·না হাম·বাংজক; ইনি গান্দা হাই, আনচিং আন্দালানি কামখো গাল্লে সেং·আনি জাকরিমরারাংখো রা·না। 13 চ্রকে-মেসায়ে চু রিংএ আরো চু ফেক্কে হং·জা, থি·ল্লেকে আরো বিংবাং হা·সিকা গিত্তা হং·জা, নিরিয়া-গিসিয়া আরো মিকনেংআও হং·জা, ইন্দিবা জেরাং সেং·আও রি·য়া, হাই, আনচিং বিসং গিত্তা খ্রাএ রি·না। 14 না·সং বা·রা গিত্তা দাক্কে গিত্তেল যীশু খ্রীষ্টচা আন·থাংথাংখো ফিনদাপবো; পাপ-বেওয়ালনি হা·সিকাখো চু·সকেৎনা দা·আ গিসিক হ·ন্নাবো।

রোমানরাংনা 14

1 বিবিরা·আও বিলগ্রিগিবাখো আন·থাংনি দাক্কে রা·বো; বিনি চানচিয়ারাংখো রা·এ দা·আ জিগ্রিকাবো। 2 সাবা চানচিয়া বিয়া গিম্মিকখোন চা·না মা·ন্না, ইন্দিবা বিবিরা·আও বিলগ্রিগিবাদে সামবিজাকরাংখোসান চা·আ। 3 বে·এন চা·গিবা চা·গিজাগিবাখো চন্নিকজাখানা আরো বে·এন চা·গিজাগিবা চা·গিবানি দোসখো রিম·জাখানা, মুয়ানা ইসল উয়া সাকগ্মিখোন আন·থাংনি দাক্কে রা·জক। 4 গিপ্পিননি নকখলখো বিচাল দাকনা না·আ সা? বিয়া চাদেংএ দংআমা গা·আকাংআ উখো বিনি নকগিবান হা·আইনুয়া। ইন্দিবা বিয়া চাদেংএন দংনুয়া, মুয়ানা গিত্তেলান বিখো চাদেংএতি দন্না মা·ন্না। 5 সাবা সালসাখো গিপ্পিন সালনা বাত্তে দাল·নিকা। দা·আবা সাবা গিম্মিক সালখোন আপসান দাক্কে চানচিয়া। ইনি গিম্মিনো সা মুয়াখো দাকনুয়া বা দাকজানুয়া উয়োন বিনি গিসিক চু·গিম্মিক দাক্কে মানিখানা। 6 মংসংগিবা সালখো মানিগিবাদে গিত্তেলখো খুসি দাকনান উখো দাক্কা। গিম্মিকখো চা·গিবা গিত্তেলখো খুসি দাকনান চা·আ, মুয়ানা ইসলখো বিয়া মিৎথেলা। মামুংখো চা·গিজাগিবা ইসলখো খুসি দাকনান চা·জা, আরো বিয়াবা ইসলখো মিৎথেলা। 7 আনচিংওনি দারাংবা আন·থাংনা থাংজা আরো দারাংবা আন·থাংনা সিজা। 8 আনচিং থাংওদে গিত্তেলনান থাংআ, আরো সিয়োদে গিত্তেলনান সিয়া। ইন্দাকোদে আনচিং থাংওবা সিয়োবা আনচিং গিত্তেলনিন হং·আ। 9 খ্রীষ্ট সিয়ামিং আরো দা·আবা থাংচামিং জেদাক্কে বিয়া থাংআনি আরো সিয়ানি ইয়া মিংগ্মিনিন গিত্তেল হং·না মা·ন্না। 10 ইন্দাকোদে মুয়ানা না·আ নাং·নি জংআদানি দোসখো রি·ম্মিংজক? আরো মুয়ানি হা·সেল নাং·নি জংআদাখো চন্নিকিংজক? বিচালনা আনচিং গিম্মিকান ইসলনি মিকখাংও চাদেংনুয়া। 11 রংথালগিবা শাস্ত্রও চক্কা দংআ, “গিত্তেল আগানা, ‘আংআ আন·থাংনি বিমুংচা আগানিংজক, আংনি মিকখাংও গিম্মিকান জা·স্খু দেম·নুয়া আরো আংখো ইসল ইন্নে খু·রাচাকনুয়া।’ ” 12 ইন্দাকোদে নিকনা মা·ন্না, আনচিং গিম্মিকখোন আন·থাংনি গিম্মিন ইসলচা হিসাব হ·ন্না নাংনুয়া। 13 ইনি গিম্মিন আনচিং জেদাক্কে সাকসা সাকগিপ্পিননি দোসখো রিম·জা, বাত্তেসা ইন্দাকগিবা কামখো দাকজানুয়া ইন্নে থিক দাকনা, জেখো নিক্কে জংআদা গিসিকো চাংফেংআখো মান·জা বা পাপও গা·আকনা মান·জা। 14 গিত্তেল যীশুমুং আপসান হং·জক ইন্নে আংআ নাম্মেদাক্কেন হা·আইয়া, মামুং চা·আন মারাং নাংআনি হং·জা, ইন্দিবা সাবা চা·আনি মামুংখো মারাং নাংআ ইন্নে চানচিওদে বিনান উয়া মারাং নাংআনি হং·আ। 15 মামুং চা·আনি গিম্মিন না·আ নাং·নি জংআদানি গিসিকখো সা·দিকেতোদে না·আ খা·সাখো রা·এ রি·জাংজক। জে জংআদানা খ্রীষ্ট সিয়ামিং, চা·আনি গিম্মিন বিনি নামগিজাখো দা·আ দাক্কাবো। 16 না·সংচা জেআন নাম্মা, দারাংবা উখো জিজাখানা। 17 ইসলনি সংনকো চা·আ-রিংআদে দাল·জা; গিসিক রংথালগিবাচা খাকখেৎ রামাও রি·য়া আরো থম·থমা আরো হান·সেংআ ইয়ান দা·ল্লা হং·আ। 18 জেআন ইন্দাকে খ্রীষ্টনা দাকচাকে হ·ন্না বিনি সাক্কাও ইসল খুসি হং·আ আরো মান্দিরাংবা বিখো নাম্মা ইন্নে চানচিয়া। 19 ইনি গিম্মিন জেখো দাক্কোদে থম·থমানি হং·আ আরো জেচা আনচিং সাকসা সাকগিপ্পিনখো থারিনা মা·ন্না, হাই, আনচিং উখোন দাকনা খ্রেংনা। 20 চা·আনি হা·সেল ইসলনি কামখো দা·আ নাসিয়েতাবো। গিম্মিক চা·আন রংথালা, ইন্দিবা সাবা মামুংখো চা·এ গিপ্পিননি গিসিকো চাংফেংএতোদে উখো চা·আ বিনা খ্রাগিজা হং·আ। 21 বে·এনখো চা·আ, আংগুর বিৎচিখো রিংআ বা ইন্দাকগিবা মামুংখো দাকনা নাংজা জেনি হা·সেল নাং·নি জংআদা গিসিকো চাংফেংআখো মা·ন্না। 22 ইনি গিম্মিন না·আ জেখো নাম্মা চানচিয়ে বিবিরা·আ উখো ইসল আরো নাং·ওন রা·রিকবো। নাম্মা চানচিয়ে মামুং দাকমিত্তিংও সানিবা গিসিক বিখো দোস হন·জাওদে বিয়া রাসং মান·গিবা হং·আ। 23 ইন্দিবা সাবা গিসিকো জাজাএ মামুংখো চা·ওদে বিয়া দোসি হং·আ, মুয়ানা বিয়া বিনি বিবিরা·আ গিত্তা কাম দাকজাংআ। বিবিরা·আনি সাক্কাও মামুং দাক্কান পাপ হং·আ।

রোমানরাংনা 15

1 আনচিং বিবিরা·আও বিল্লাকগিবারাং আনচিং আন·থাংথাংনি নামনিকাখো দাকগিজা বিবিরা·আও বিলগ্রিরাংখো চাকচিকনা নাংআ। 2 বিবিরা·গিবা জংআদারাংখো থারিনা মিংএ আনচিং গিম্মিকান জেদাক্কে বিনি নাম্মানা বিখো খুসি দাক্কা। 3 খ্রীষ্টবা আন·থাংখো খুসি দাকজা। রংথালগিবা শাস্ত্রও চক্কা দংআ, “নাং·খো ইনথেকগিবারাংনি ইনথেকারাং আংনি সাক্কাওন গা·আকজক।” 4 স্খাংও রংথালগিবা শাস্ত্রও জেরাংখো চক্কামিং উরাংখো আনচিংনা স্খিনান চক্কামিং, জেদাক্কে উয়া শাস্ত্রনিখো আনচিং চাকচিকাখো আরো খা·নাম্মেতাখো মা·ন্না আরো উনি হা·সেল খা·দংআখো মা·ন্না। 5 খ্রীষ্ট যীশুমুং রি·ফাও চাকচিকাখো হন·গিবা আরো খা·দংএতগিবা ইসল না·সংনি গিম্মিকনি গিসিকখো আপসান দাকখানা। 6 ইন্দাকোদে না·সং গিসিকসান আরো খু·চলসান হং·এ আনচিংনি গিত্তেল যীশু খ্রীষ্টনি ইসল আরো ফাখো রাসং দাকনা মা·ন্নুয়া। 7 ইসলনি রাসং ফারাকখানা ইন্নে খ্রীষ্ট জেদাক্কে না·সংখো আন·থাংনি দাক্কে রা·জক উয়ানদাক্কে না·সংবা সাকসা সাকগিপ্পিনখো আন·থাংনি দাক্কে রা·বো। 8 গিসিক রা·রিকবো, ইসলনি খাৎথা বিবিন হং·আ ইখো ফিন্নিকনা খ্রীষ্ট যিহূদীরাংনা দাকচাকে হন·গিবা হং·আমিং। ইরাংখো মিকসংএন ইন্দাকে হং·আমিং, জেদাক্কে ফাগিৎচামরাংচা ইসলনি দাকগিবা খু·রাচাক্কারাং চু·সকা আরো বিনি খা·সাচাক্কানি গিম্মিন গিপ্পিন জাতরাং বিখো রাসং দাক্কা। ইনি গিম্মিন রংথালগিবা শাস্ত্রও চক্কা দংআ, ইনি গিম্মিন গিপ্পিন জাতরাংনি গিসেপো আংআ নাং·নি রাসংখো ফারাকনুয়া আরো নাং·নি বিমুংনা রিং·নুয়া। 10 দা·আবা ইখোবা আগানজক, ও গিম্মিক জাতনি মান্দিরাং, না·সং ইসলনি মান্দিরাংমুং বিখো মিৎথেলবো। 11 দা·আবা ইয়াবা দংআ, ও গিম্মিক জাতরাং, গিত্তেলনি রাসং দাকবো; গিম্মিক মান্দিরাং বিখো মিৎথেলখানা। 12 দা·আবা যিশাইয় ইন্দাকে আগানজক, জেআন যিশয়নি জা·দিল বিয়া রি·বানুয়া, গিম্মিক জাতরাংখো শাসন দাকনা বিয়া চাদেংনুয়া। গিম্মিক জাতনি মান্দিরাং বিনি সাক্কাওন খা·দংনুয়া। 13 খা·দংএতগিবা উয়া ইসল না·সংনি বিবিরা·আও চানসকগিজা হান·সেংআচা আরো থম·থমাচা না·সংখো চু·সকেৎখানা। ইন্দাকোদে গিসিক রংথালগিবানি বিলচা না·সংনি খা·থংও খা·দংআ বাৎরোরোনুয়া। 14 আংনি জংআদারাং, আংআ না·সংনি গিম্মিন ইখো বিবিরা·আ, না·সংনি খা·থং নাম্মা হা·সিকাও গাপ্পা, না·সংও গিম্মিক গিত্তা দাক্কা হা·আইয়ানি দংআ, আরো না·সং সাকসা সাকগিপ্পিননা নাম্মাখো আগান্না মা·ন্না। 15 ইন্দাকোবা না·সংখো মিংসা মিংগ্মি বিদিংরাংনি গিম্মিন গিসিক রা·এতনা আংআ খা·সকে না·সংনা ইয়া খাৎথারাংখো চকজক, মুয়ানা ইসল আংখো গিপ্পিন জাতরাংচা খ্রীষ্ট যীশুনা দাকচাকে হ·ন্নানি ফাত্তিয়াখো হন·জক। গিসিক রংথালগিবাচা দিংথাং দাক্কে দনগিবা গিপ্পিন জাতরাং জেদাক্কে ইসলনা রা·চাকনা গিত্তা বলি হং·না মা·ন্না উনি হা·সেল বিনিন হন·গিবা নাম্মা খাৎথাখো আগানফ্রাকে আংআ খামালনি কামখো দাক্কিংজক। 17 আংআ ইসলনা জে কামখো দাক্কিংজক উনা খ্রীষ্ট যীশুও আংনি রাসং দাক্কানি বিল দংআ। 18 খ্রীষ্ট আংও জেখো দাকজক উনাআগ্রে মামুং খাৎথা আগান্না আংআ খা·সকজানুয়া। বিয়ান আংনি খাৎথা আরো কামচা, আইয়াও ইনমানগিবা কাম আরো চিননি কামচা আরো গিসিক রংথালগিবানি বিলচা গিপ্পিন জাতরাংখো ইসলও বাম্মেতজক। উনি হা·সেল আংআ যিরূশালেমোনি হা·বাচেংএ ইল্লুরিকাওনা দিপ্পাৎ হা·দাম গিম্মিকচা খ্রীষ্টনি গিম্মিন নাম্মা খাৎথাখো চু·গিম্মিক দাক্কে আগানফ্রাকজক। 20 জেও খ্রীষ্টনি বিমুংখো মামুং সালোবা আগানখুজা উয়ো নাম্মা খাৎথাখো আগানফ্রাকান আংনি হা·সিকা, জেদাক্কে গিপ্পিননি রিক্কানি সাক্কাও আংনি রিকনা নাংজা। 21 রংথালগিবা শাস্ত্রও চক্কা দংআ, “জেরাংচা বিনি গিম্মিন আগানখুজা বিসং উখো নিকনুয়া, আরো জেরাং খিন্নাস্রাংখুজা বিসং হা·আইনা মা·ন্নুয়া।” 22 ইনি গিম্মিনান আংআ না·সংচা ফিল·নিফিল রি·য়াংনা হা·ম্মেবা চাংফেংআখো মান·জক। 23 ইন্দিবা দা·আও ইয়া জওলরাংও আংনি কাম দাক্কানি হা·দাম দংজাজক। বাং·আ বিলসিরাংওনিন না·সংচা আংআ রি·য়াংনা হা·সিকামিং, 24 ইনি গিম্মিন দা·আও সেপন হা·সংচা রি·য়াংমিত্তিংও আংআ না·সংচা রি·য়াংনা হা·ম্মিংআ। আংআ ইন্দাকে খা·দংআ, উয়া রামা গিত্তা রি·য়াংমিত্তিংও না·সংচা আংআ রি·য়াংনা মা·ন্নুয়া আরো না·সংমুং বাং·গিজা সময়না হান·সেংএ দংআনি জা·মানো না·সংআন আংখো সেপন হা·সংচা রি·য়াংনা দাকচাকে হ·ন্নুয়া। 25 ইন্দিবা দা·আও আংআ ইসলনি মান্দিরাংনা দাকচাকনা যিরূশালেমচা রি·য়াংইংজক, 26 মুয়ানা যিরূশালেমো দংগিবা ইসলনি মান্দিরাংনি গিসেপো জে দিল্লা-চন্না মান্দিরাং দংআ বিসংনা ম্যাসিডোনিয়া আরো আখায়ানি মন্ডলীরাংনি মান্দিরাং অকখিসা থাংখা গিলজক। 27 ইয়া থাংখাখো বিসং খুসি হং·এন গিলজক। ইনাআগ্রেবা ইয়া মন্ডলীরাং যিরূশালেমনি ইসলনি মান্দিরাংচা গ্রোনাংগিবা হং·আ, মুয়ানা যিহূদীরাং বিসংনি গিসিকনি ফাত্তিয়ানি বাকখো গিপ্পিন জাতরাংনা হন·জক ইন্নে গিপ্পিন জাতরাংবা হা·গিলসাকনি নাংআরাংনি বিদিংও যিহূদীরাংনা দাকচাকনা নাংআ। 28 আংনি ইয়া কাম ব·ন্নানি জা·মানো জেনসালো আংআ হা·আইনুয়া উয়া থাংখা নাম্মেদাক্কে সকজক উনো না·সং গিত্তা রি·য়াংএ আংআ সেপনচানা রি·য়াংনুয়া। 29 আংআ হা·আইয়া জে সময়ও আংআ না·সংচা রি·য়াংনুয়া উনো খ্রীষ্টনি ফাত্তিয়াখো চু·গিম্মিক দাক্কে রা·এন রি·য়াংনুয়া। 30 জংআদারাং, আনচিংনি গিত্তেল যীশু খ্রীষ্টচা আরো গিসিক রংথালগিবানি হন·গিবা খা·সাচা আংআ না·সংখো মংসংবাত্তে মল·মলিংজক, না·সং ইসলচা আংমুং আংনি গিম্মিন বি·আনি দাকগ্রিকাখো দাকবো। 31 না·সং বি·বো, জেদাক্কে যিহূদিয়াও ইসলখো মানিগিজাগিবারাংওনি আংআ জকনা মা·ন্না, আরো যিরূশালেমনি ইসলনি মান্দিরাং জেদাক্কে আংনি ইয়া দাকচাকে হ·ন্নানিখো রা·চাকা। 32 উনোদে ইসলনি হা·সিকাও আংআ খুসি হং·এন না·সংচা রি·য়াংনা মা·ন্নুয়া আরো না·সংমুং দংএ খা·নামনুয়া। 33 থম·থমেৎগিবা ইসল না·সং গিম্মিকমুং দংফাখানা। আমেন।

রোমানরাংনা 16

1 দা·আও আংআ আনচিংনি নগিবা ফৈবীনি গিম্মিন না·সংচা মল·মলচাক্কিংজক। বিয়া কিংক্রিয়া সংজিলমানি মন্ডলীনি দাকচাকে হন·গিবা হং·আ। 2 ইসলনি মান্দিরাংখো জেদাক্কে আন·থাংনি দাক্কে রা·না নাংআ বিখো না·সং গিত্তেলনি বিমুংও উয়ানদাক্কেন আন·থাংনি দাক্কে রা·বো। মামুং হা·সেলনা বিয়া না·সংচা দাকচাকাখো হা·ম্মোদে বিনা দাকচাকবো, মুয়ানা বিয়া বাং·আ মান্দিরাংনা, আরো আংনাবা দাকচাকজক। 3 প্রিষ্কিল্লা আরো আকিলানা আংনি সালাম হন·বো। বিসং খ্রীষ্ট যীশুনি কামও আংমুং কাম দাকফাজক। 4 আংনি জাংগিখো জক্কেৎনা বিসং আন·থাংথাংখো সিনা হন·চাকামিং। আংআসান হং·জা, ইন্দিবা গিম্মিক গিপ্পিন জাতনি মন্ডলীরাংবা বিসংখো মিৎথেলা। 5 বিসংনি নক্কো মন্ডলী হং·এ জেরাং আপসান হং·আ বিসংখোবা সালাম হন·বো। এশিয়া হা·দকো খ্রীষ্টখো স্খাং জে রা·চাকামিং আংনি উয়া খা·সাগিবা রিপ্পেং ইপেনিতখো সালাম হন·বো। 6 মরিয়ম, না·সংনা জে বাং·এ কাম দাকজক, বিখো সালাম হন·বো। আন্দ্রনীক্‌ আরো যুনিয়খো সালাম হন·বো। 7 বিসং আংগিত্তান যিহূদী আরো আংমুং বিসংবা জেলো বন্দি হং·এ দংআমিং। ওয়াত্তেতারাংনি গিসেপো বিসং নাম্মেন মান্দিরা·আখো মান·গিবা মান্দি হং·আমিং। বিসং আংনা স্খাংআন খ্রীষ্টখো বিবিরা·আমিং। 8 গিত্তেলমুং নাংরিমগিবা আংনি খা·সাগিবা রিপ্পেং আম্‌প্লিয়াতখো সালাম হন·বো। 9 উর্বাণ, আনচিংমুং খ্রীষ্টনা জে কাম দাক্কা, বিখো আরো আংনি খা·সাগিবা রিপ্পেং স্তাখিস্‌খো সালাম হন·বো। আপিল্লিস্‌খো সালাম হন·বো। 10 খ্রীষ্টনি মান্দি গিত্তা বিখো থিকখেলে নিয়া হং·জক। আরিষ্টবুলনি নকনি মান্দিরাংখো সালাম হন·বো। 11 হেরোদিয়োন, আংগিত্তা দাক্কেন জে যিহূদী হং·আ, বিখো সালাম হন·বো। নার্কিসনি নক্কো জেরাং গিত্তেলনি মান্দি হং·আ বিসংখো সালাম হন·বো। 12 ত্রুফেণা আরো ত্রুফোষাখো সালাম হন·বো। ইয়া মিচিকরাং গিত্তেলনা কাম দাক্কা। খা·সাগিবা ননো পর্ষিসখোবা সালাম হন·বো। ইয়া মিচিকবা গিত্তেলনা বাং·এ কাম দাকজক। 13 খ্রীষ্টখো নাম্মেন বিবিরা·গিবা ইন্নে জেখো মিংসিংআ উয়া রূফখো আরো বিনি মা·গিবাখো সালাম হন·বো। বিনি মা·গিবা আংচাদে আংনি মা·আ গিত্তান হং·আ। 14 অসুংক্রিত, ফ্লিগোন, হের্মেস, পাত্রোবাস, হের্মাস্‌ আরো বিসংমুং খ্রীষ্টখো বিবিরা·গিবা গিপ্পিন জংআদারাংখোবা সালাম হন·বো। 15 ফিললগ আরো যুলিয়া, নিরীয় আরো বিনি নগিবা, ওলুমপ আরো বিসংমুং দংগিবা ইসলনি মান্দি গিম্মিকখো সালাম হন·বো। 16 খা·সানি গিসিকখো রা·এ না·সং সাকসা সাকগিপ্পিনখো সালাম হন·বো। খ্রীষ্টনি গিম্মিক মন্ডলীরাং না·সংখো সালাম হ·ন্নিংআ। 17 জংআদারাং, না·সং জে স্খিয়াখো মান·জক উনি ফাংফিল্লে স্খিয়াখো হ·ন্নে জেরাং দল থারিয়া আরো চাংফেংআখো থারিয়া, বিসংখো নিরকনা আংআ না·সংখো মংসংবাত্তে মল·মলিংজক। না·সং বিসংচানি চে·ল্লে দংবো, 18 মুয়ানা ইয়া মান্দিরাং আনচিংনি গিত্তেল খ্রীষ্টনা দাকচাকে হন·গিজা বাত্তেসা আন·থাংথাংনি বিকমানাসা দাকচাকে হ·ন্নিংআ। চি·আ আরো রাসং দাকব্রুআনি খাৎথাখো আগানে বিসং সনথলগিবা মান্দিরাংখো থকাইংজক। 19 না·সংনি মানিয়ানি খাৎথাখো গিম্মিকান খিন্নাজক, আরো উনি গিম্মিন আংআ না·সংনি সাক্কাও খুসি হং·জক। জেদাক্কে না·সং নাম্মাখো হা·আইএ রা·চাকা আরো নামগিজাওনি চে·ল্লে দংআ আংআ ইখো হা·ম্মা। 20 থম·থমেতগিবা ইসল থেংরিন শয়তানখো না·সংনি জা·চকনি নিং·আও গাল্লে বিন্নেকেতনুয়া। আনচিংনি গিত্তেল যীশুনি খা·সাচাক্কা না·সংনি সাক্কাও দংখানা। 21 আংমুং কাম দাকফাগিবা উয়া তীমথিয় না·সংখো সালাম হ·ন্নিংআ; লুকিয়, যাসোন আরো সোষিপাত্রবা না·সংখো সালাম হ·ন্নিংজক। বিসংবা আংগিত্তান যিহূদী জাতনি মান্দি হং·আ। 22 আংআ তর্তিয়, পৌলনি ইয়া চিঠিখো চক্কিংজক। গিত্তেলনি মান্দি গিত্তা আংআবা না·সংখো সালাম হ·ন্নিংজক। 23 আংআ জেনি নক্কো দংআ আরো মন্ডলীনি মান্দিরাং জেনি নক্কো আপসান হং·রিমা উয়া গাইয় না·সংখো সালাম হ·ন্নিংজক। ইয়া সংজিলমানি থাংখা-পয়সারাংখো হিসাব রা·রিকানি কাম জেনি সাক্কাও দংআ উয়া ইরাস্ত আরো আনচিংনি জং কার্ত না·সংখো সালাম হ·ন্নিংজক। 25 যীশু খ্রীষ্টনি গিম্মিন জে নাম্মা খাৎথাখো আংআ আগানফ্রাকা না·সংখো উয়া নাম্মা খাৎথাও খেম·খেম দন্নানি বিল ইসলনি দংআ। বাং·আ চাসংনা দিপ্পাৎ ইসল বিনি সিউল দনগিবা মিকসংআনিখো দারাংনাবা আগানখুজা, 26 ইন্দিবা নাম্মা খাৎথাচা উখো দা·আও ফারাকজক আরো উগিত্তান আংআ আগানফ্রাকিংজক। ফাংনাজলগিবা ইসলনি গি·য়েতা গিত্তা আগানসোগিবারাংনি চক্কাও গিম্মিক জাতনি মান্দিরাংচা উখো হা·আইএতজক, জেদাক্কে বিসং খ্রীষ্টখো বিবিরা·এ ইসলখো মানিনা মা·ন্না। 27 বিয়া সাকসাসান ইসল, বিয়ান হা·আইগিবা হং·আ। যীশু খ্রীষ্টচা ফাংনাজলনা বিনিন রাসং হং·খানা। আমেন।

১ করিন্থীয়রাংনা 1

1 ইসলনি হা·সিকাচা বিনিন রিক্কামানা আংআ পৌল খ্রীষ্ট যীশুনি সাকসা ওয়াত্তেতা হং·জক। আংআ আরো জং সোস্থিনি করিন্থ সংজিলমানি ইসলনি মন্ডলীনি মান্দিরাংচা, আগানস্খাওদে না·সংচা চক্কিংজক। খ্রীষ্ট যীশুমুং নাংরিমাচা ইসল বিনা আন·থাংনা মিকসংএ না·সংখো দিংথাং দাক্কে দনজক আরো বিনি আন·থাংনি মান্দি হং·না রিক্কামজক। না·সংচা আরো গিপ্পিন হা·দামরাংচা জেরাং আনচিংনি গিত্তেল যীশু খ্রীষ্টখো গিত্তেল ইন্নে খু·রাচাক্কা বিসংনা চিংআ ইয়া চিঠিখো চক্কিংআ। বিয়া বিসংনিবা গিত্তেল, আনচিংনিবা গিত্তেল। 3 আনচিংনি আপফা ইসল আরো গিত্তেল যীশু খ্রীষ্ট না·সংনা খা·সাচাকখানা আরো থম·থমাখো হন·খানা। 4 আংআ ফাংনান না·সংনি গিম্মিন আংনি ইসলখো মিৎথেলা, মুয়ানা খ্রীষ্ট যীশুমুং নাংরিমে না·সং ইসলনি খা·সাচাক্কাখো মান·জক। 5 উয়া খা·সাচাক্কা ইয়ান, না·সং খ্রীষ্টমুং নাংরিমে গিম্মিক গিত্তান, আগানস্খাওদে গিম্মিকখো আগানানি বিলও আরো হা·আইয়াও দাল·রোরোজক, 6 মুয়ানা খ্রীষ্টনি গিম্মিন চিংনি সাক্ষি হ·ন্না না·সংনি খা·থংও দংআ। 7 উনি গিম্মিনান না·সং আনচিংনি গিত্তেল যীশু খ্রীষ্টনি ফারাকানা খা·দংএ নিচাকসোংআ ইন্নে ইসলনি হ·ন্না না·সংনা চু·ওংগিজা দংজা। 8 আনচিংনি গিত্তেল যীশু খ্রীষ্টআন বন·খামওনা দিপ্পাৎ না·সংখো খেম·খেম দন্নুয়া, জেনি হা·সেল বিনি রি·বানি সালো না·সং দোসগ্রি দাক্কে দংনুয়া। 9 ইসল বিবিরা·না খ্রাগিবা হং·আ; বিয়ান না·সংখো রিক্কামজক জেদাক্কে বিনি দেফান্থি আনচিংনি গিত্তেল যীশু খ্রীষ্টমুং না·সং নাংরিমে দংআ। 10 জংআদারাং, আনচিংনি গিত্তেল যীশু খ্রীষ্টনি হং·এ আংআ না·সংখো নাম্মেন মল·মলিংজক, না·সং গিম্মিকান আপসান হং·রিমবো। না·সংনি গিসেপো মা·আৎগ্রিকানি দংজাখানা, বাত্তেসা না·সং গিসিকসান আরো চানচিয়াসান হং·বো। 11 আংনি জংআদারাং, না·সংনি গিসেপো নিরিয়া-গিসিয়া দংআ ইন্নে ক্লোয়ীনি নকনি মান্দিরাংচা খিন্নাজক। 12 আংআ ইয়া খাৎথাখো আগান্না হা·ম্মিংআ, না·সংনি গিসেপো সাবা আগানা, “আংআ পৌলনি দলনি”; সাবা আগানা, “আংআ আপল্লোনি দলনি”; সাবা আগানা, “আংআ পিতরনি দলনি”; দা·আবা সাবা আগানা, “আংআ খ্রীষ্টনি দলনি।” 13 ইন্দিবা খ্রীষ্টখো বাক দাকজকমা? পৌলখো না·সংনি গিম্মিন চিসলো দাৎখাপামিংমা? না·সং পৌলনি বিমুংও রিপ্পলজকমা? 14 আংআ ইসলখো মিৎথেলা, ক্রীষপ আরো গাইয়না আগ্রে না·সং দারাংখোবা আংআ রিপ্পলেতজা, 15 জেদাক্কে দারাংবা ইন্দাকে আগান্না মান·জা, না·সং আংনি বিমুংও রিপ্পলজক। 16 স্তিফাননি নকনি মান্দিরাংখোবা আংআ রিপ্পলেতজক ইন্দিবা ইনাআগ্রে দারাংখোবা রিপ্পলেতনা ইন্নে আংনি গিসিকও নাজাংআ। 17 খ্রীষ্ট আংখো রিপ্পলেতনা ওয়াত্তেতজা বাত্তেসা নাম্মা খাৎথাখো আগানফ্রাকনান ওয়াত্তেতজক। উয়া নাম্মা খাৎথাখো বিয়া আংখো হা·আইগিবারাংনি খু·সুকচা আগানফ্রাকনা ওয়াত্তেতজা, জেদাক্কে খ্রীষ্টনি চিসলো সিয়া বিলগ্রি হং·আরিজা। 18 জেরাং ব·ন্নানি রামাও রি·ইংজক বিসংচা খ্রীষ্টনি উয়া চিসলো সিয়ানি খাৎথাদে জাদানি আগ্রে মামুংবা হং·জা; ইন্দিবা আনচিং জেরাং পাপওনি জক্কেতানি রামাও রি·ইংজক আনচিংনাদে উয়া ইসলনি বিল হং·আ। 19 রংথালগিবা শাস্ত্রও চক্কা দংআ, “আংআ হা·আইগিবারাংনি হা·আইয়াখো নাসিয়েতনুয়া, বুদ্ধি দংগিবারাংনি বুদ্ধিখো বিথিগ্রি দাক্কেতনুয়া।” 20 ইন্দিবা হা·আইগিবা মান্দি বাও? স্খিয়াখো মান·গিবা মান্দিবা বাও? আরো জিগ্রিকানি বিল দংআ ইয়া চাসংনি ইন্দাকগিবা মান্দিবা বাও? ইয়া হা·গিলসাকনি হা·আইয়া জাদানিসান হং·আ ইসল উখো ফিন্নিকখুজামা? 21 ইসল বিনি আন·থাংনি হা·আইয়াও থিক দাকজক ইন্নেন হা·গিলসাক বিনি আন·থাংনি হা·আইয়াচা ইসলখো হা·আইনা মান·জা। ইনি গিম্মিন নাম্মা খাৎথানি গক্কাচা পাপওনি বিবিরা·গিবারাংখো জক্কেতাখো ইসল নাম্মা ইন্নে চানচিজক। 22 যিহূদীরাং চিন গিত্তা আইয়াও ইনমানগিবা কামখো নিনা হা·ম্মা, গ্রীকরাং হা·আইয়াখো সান্দিয়া, 23 ইন্দিবা আনচিং চিসলো দাৎখাপা মান·গিবা খ্রীষ্টনি খাৎথাখো আগানফ্রাকা। উয়া খাৎথা যিহূদীরাংনা চাংফেংআনি আরো গিপ্পিন জাতরাংনা গক্কানি হং·আ, 24 ইন্দিবা যিহূদী হং·খানা আরো গ্রীকবা হং·খানা, ইসল জেরাংখো রিক্কামজক বিসংচা উয়া খ্রীষ্টন ইসলনি বিল আরো ইসলনি হা·আইয়া। 25 ইসলও জেখো গক্কা ইন্নে চানচিমা·ন্না উয়াদে মান্দিনি হা·আইয়ানা বাত্তে বাং·এন হা·আইয়ানি হং·আ, আরো জেখো বিলগ্রি ইন্নে চানচিমা·ন্না উয়াদে মান্দিনি বিলনা বাত্তে বাং·এন বিলগ্মাং হং·আ। 26 জংআদারাং, না·সংখো জেনসালো রিক্কামামিং উনসালো না·সং বাদাকগিবা মান্দি হং·আমিং উখো চানচিয়ে নিবো। মান্দিনি বিচালো না·সংনি গিসেপো বাং·এন হা·আইগিবা বা বিল্লাকগিবা বা দাল·বাৎগিবা মা·চংওনি হং·আ ইন্দাকেদে হং·জা। 27 ইন্দিবা হা·গিলসাক জেখো গক্কা ইন্নে চানচিয়া ইসল উখোন বাচ্ছিয়ে রা·জক জেদাক্কে হা·আইগিবারাং খ্রাচা·আখো মা·ন্না। হা·গিলসাক জেখো বিলগ্রি ইন্নে চানচিচিপা ইসল উখো বাচ্ছিয়ে রা·জক জেদাক্কে বিল্লাকগিবা বিলগ্রি হং·আ। 28 হা·গিলসাক জেখো চন্নিকানি আরো মান্দিরা·গিজানি ইন্নে চানচিয়া, আরোবা হা·গিলসাকনি মিক্রোনও জেআন মামুংআন হং·জা উখোন ইসল বাচ্ছিয়ে রা·জক জেদাক্কে হা·গিলসাকনি মিক্রোনও গামচাৎগিবারাং গামচাতাগ্রি হং·আ। 29 বিয়া উরাংখো বাচ্ছিয়ে রা·জক জেদাক্কে বিনি মিকখাংও মান্দি সাকসাবা রাসং দাকনা মান·জা। 30 খ্রীষ্ট যীশুমুং না·সং নাংরিমজক ইয়াদে ইসলওনিন হং·জক। যীশু খ্রীষ্টন আনচিংনা ইসলনি হন·গিবা হা·আইয়া; বিয়ান আনচিংনি খাকখেৎগিবা, রংথালানি আরো জক্কেতানি হং·আ। 31 ইনি গিম্মিন রংথালগিবা শাস্ত্রনি খাৎথা গিত্তা, “রাসং দাকগিবা গিত্তেলখো রা·এন রাসং দাকখানা।”

১ করিন্থীয়রাংনা 2

1 জংআদারাং, না·সংচা রি·য়াংএ ইসলনি হন·গিবা নাম্মা খাৎথাখো আগানফ্রাকমিত্তিংও আংআ খিন্নাথোরিরি খু·সুকখো জাকখালজা বা হা·আইবাৎগিবা মান্দি গিত্তা খাৎথা আগানজা। 2 না·সংমুং দংমিত্তিংও আংআ যীশু খ্রীষ্টখো, আগানস্খাওদে চিসলো দাৎখাপগিবা যীশু খ্রীষ্টখো হা·আইয়ানি আগ্রে মামুংখোবা হা·আইজানুয়া ইন্নে আংআ থিক দাক্কামিং। 3 না·সংমুং দংমিত্তিংও আন·থাংখো আংআ বিলগ্রি চানচিনুয়ামিং আরো খেন্নে নাম্মেন থিল·থিলনুয়ামিং। 4 আংনি আগানফ্রাকাও আরো আংনি আগানা খাৎথাও মান্দিরাংখো সাল্লে রা·আংনা গিত্তা হা·আইয়াও গাপগিবা জিথোআ খাৎথা দংজামিং উনাবাত্তে উয়ো গিসিক রংথালগিবানি বিলখোন নিক্কামিং, 5 জেদাক্কে না·সংনি বিবিরা·আ মান্দিনি হা·আইয়াও ফাংচাকগিজা ইসলনি বিলও ফাংচাকা। 6 খ্রীষ্টান জাংগি থাংআও চু·সকগিবারাংচা আনচিং হা·আইয়ানি খাৎথাখো আগানা; ইন্দিবা উয়া হা·আইয়াদে ইয়া হা·গিলসাকনি হং·জা, বা ইয়া হা·গিলসাকনি দাল·গিবারাংনিবা হং·জা জেরাং বিলগ্রি হং·ইংজক। 7 চং·মতদে আনচিং ইসলনি হা·আইয়াও গাপগিবা নিং·থুগিবা মিকসংআনি খাৎথাখোন আগানা। উয়া মিকসংআখো থুম্মুয়ে দন্নামিং আরো হা·গিলসাক হং·চেংনা স্খাংআন ইসল উখো থারিসোএ দন্নামিং জেদাক্কে আনচিং বিনি রাসংখো মান·ফাগিবা হং·না মা·ন্না। 8 ইয়া চাসংনি দাল·গিবারাংও সাকসাবা উখো হা·আইজাজক; হা·আইওদে উয়া রাসং গাপগিবা গিত্তেলখো চিসলো দাৎখাপজানুয়ামিং। 9 ইন্দিবা রংথালগিবা শাস্ত্রনি খাৎথা গিত্তাদে, “ইসলনা জেরাং খা·সাআ বিসংনা বিয়া জেরাংখো থারিয়ে দনসোজক, উরাংখো দারাংবা মিক্রোনওবা নিকখুজা, নাচিলোবা খিন্নাখুজা আরো গিসিকোবা চানচিখুজা।” 10 ইন্দিবা ইসল বিনি গিসিকচা উরাংখো আনচিংনা ফারাকজক, মুয়ানা গিসিক রংথালগিবানি হা·আইগিজানি মামুংবা দংজা; আরোবা বিয়া ইসলনি নিং·থুয়া বিদিংরাংখোবা হা·আইয়া। 11 মান্দিনি গিসেপো ইন্দাকগিবা সা দংআ, জেআন সাকগিপ্পিন মান্দিনি চানচিয়াখো হা·আইনা মা·ন্না? মান্দিও দংগিবা গিসিকসান বিনি আন·থাংনি চানচিয়াখো হা·আইয়া। উয়ানদাক্কেন ইসলনি গিসিকনি আগ্রে ইসলনি চানচিয়াখো দারাংবা হা·আইনা মান·জা। 12 আনচিং হা·গিলসাকনি গিসিকখো মান·জা, বাত্তেসা ইসলওনি বিনি গিসিকখো মান·জক, জেদাক্কে ইসল আনচিংনা জেখো হন·জক উখো হা·আইনা মা·ন্না; 13 আরো উয়া হ·ন্নানিরাংখোন আনচিং আগানা। উখো আগান্না আনচিং জে খাৎথারাংখো জাকখালা উরাংখো মান্দিনি হা·আইয়াওনিখো স্খিয়ে আগানজা, ইন্দিবা গিসিক রংথালগিবাওনিখো স্খিয়েন আগানা। 14 গিসিকওনি হং·গিজাগিবা মান্দি ইসলনি গিসিকওনি রি·বাগিবাখো রা·চাকজা, মুয়ানা উরাংদে বিচা গক্কানিসা হং·আ। উরাংখো বিয়া হা·আইনা মান·জা, মুয়ানা গিসিক রংথালগিবা স্খিয়েতজাওদে উরাংখো পরীক্ষা দাক্কে নিনা মান·জা। 15 জে মান্দি গিসিকনি বিয়া গিম্মিকখোন পরীক্ষা দাক্কে নিআ, ইন্দিবা বিখোদে দারাংবা পরীক্ষা দাক্কে নিনা মান·জা। 16 রংথালগিবা শাস্ত্রও চক্কা দংআ, বিখো স্খিনা মা·ন্না গিত্তা সা গিত্তেলনি গিসিকখো হা·আইয়া? ইন্দিবা খ্রীষ্টনি গিসিক আনচিংনি খা·থংও দংআ।

১ করিন্থীয়রাংনা 3

1 জংআদারাং, গিসিকওনি হং·গিবা মান্দিরাংচা জেগিত্তা খাৎথা আগান্না নাংআ, আংআ না·সংচা উগিত্তা খাৎথা আগানজাজক, বাত্তেসা পাপ-বেওয়ালনি নিং·আও দংগিবারাংচা জেগিত্তা খাৎথা আগান্না নাংআ, উগিত্তান না·সংচা খাৎথা আগানামিং। খ্রীষ্টান জাংগি থাংআও না·সংদে আওয়া বি·সা গিত্তা দাক্কা, উনি গিম্মিন না·সংচা উগিত্তান খাৎথা আগানামিং। 2 রাক্কা চা·আনিখো হন·গিজা আংআ না·সংনা সকচিখো রিংনা হ·ন্নামিং, মুয়ানা উয়া সময়ও না·সং রাক্কাখো চা·না গিত্তা হং·খুজামিং। আরো দা·আওবা না·সং উয়া অবস্থাও দংজা, 3 মুয়ানা দা·আওবা না·সং পাপ-বেওয়ালনি নিং·আও দংআ। না·সংও মিকনেংআ আরো নিরিয়া-গিসিয়া হং·আরি দংওদে না·সং পাপ-বেওয়ালনি নিং·আও দংজামা? আরো না·সংনি রি·য়ারাংবা ইন্দাকারি মান্দিরাং গিত্তান দাকজামা? 4 না·সংনি গিসেপো সাকসা পৌলনি দলনি আরো সাকগিপ্পিন আপল্লোনি দলনি ইন্নে আগানোদে না·সং ইন্দাকারিস্রাং মান্দিরাং গিত্তা দাকজামা? 5 আপল্লো সা? আরো পৌলবা সা? চিংআদে দাকচাকে হন·গিবাসান হং·আ জেরাং গিত্তা না·সং বিবিরা·আনি রামাওনা রি·বাজক। গিত্তেলান আনচিং সাকফ্রাকনা কাম হন·জক। 6 আংআ বিৎচ্রিখো গি·আমিং, আপল্লো উয়ো চি রুআমিং, ইন্দিবা ইসলান উখো দা·ল্লেতামিং। 7 উনি গিম্মিন বিৎচ্রিখো জে গি·আ বা চিখো জে রুআ বিয়াদে মামুংবা হং·জা; ইন্দিবা ইসল, জেআন দা·ল্লেতা, বিয়ান চু·গিম্মিক হং·আ। 8 বিৎচ্রি গি·গিবা আরো চি রুগিবা বিসংনি মিকসংআ আপসানান হং·আ, ইন্দিবা গিম্মিকান আন·থাংথাংনি কামনা খ্রি বকসিসখো মা·ন্নুয়া, 9 মুয়ানা চিংআ সাকগ্মিআন ইসলমুং কাম দাক্কিংআ। না·সং ইসলনিন হা·বা, ইসলনিন রিকগিবা দালান হং·আ। 10 ইসলচাখো আংআ মংসংগিবা খা·সাচাক্কাখো মা·ন্নে উচান দাল·গিবা মিস্ত্রি গিত্তা আংআ ফাংচাকানিখো রিকজক, আরো সাকগিপ্পিনরাং উনি সাক্কাও দালান রিক্কিংজক। ইন্দিবা সা বাদিকে রিক্কা উনি গিম্মিন বিয়া সিমসাকখানা। 11 জেখো স্খাংআন রিকজক উনা আগ্রে দারাংবা রিকনা মান·জা। যীশু খ্রীষ্টআন উয়া ফাংচাকানি হং·আ। 12 উনি সাক্কাও মান্দিরাং সোনা, রূপা, গামচাৎগিবা রং·থি, বল, খের বা নাড়াচা রিক্কোদে, 13 ইন্দিদে সা বাদিকে কাম দাকজক উখো নাম্মে থাল্লে নিনা মা·ন্নুয়া। বিচালনি সালোন উয়া ফারাকনুয়া, মুয়ানা উয়া সালনি ফারাকা ওয়া·আলচান হং·নুয়া। সানি কাম বাদাকা উখো ওয়া·আলান পরীক্ষা দাক্কে নিনুয়া। 14 জেখো জে রিকজক উয়া দংআরিওদে বিয়া বকসিসখো মা·ন্নুয়া; 15 আরো উয়া খাম্মোদে বিনা নামজানুয়া। বিয়া আন·থাংদে জকনুয়া, ইন্দিবা বিনি অবস্থা ওয়া·আলখো গা·বাত্তে রি·বাগিবা মান্দি গিত্তা হং·নুয়া। 16 না·সং হা·আইজামা, না·সং ইসলনি দংআনি নক হং·আ আরো ইসলনি গিসিক না·সংও দংখামা? 17 সাবা ইসলনি দংআনি নকখো নাসিয়েতোদে ইসলবা বিখো নাসিয়েতনুয়া, মুয়ানা বিনি দংআনি নক রংথালা, আরো না·সংআন উয়া নক হং·আ। 18 না·সং দারাংবা আন·থাংখো দা·আ থকাইয়াবো। না·সংনি গিসেপো সাবা ইয়া চাসংনি চানচিয়া গিত্তা আন·থাংখো হা·আইগিবা চানচিওদে বিয়া গক্কা হং·খানা জেদাক্কে বিয়া চং·মত হা·আইগিবা হং·না মা·ন্না, 19 মুয়ানা ইসলনি মিক্রোনও ইয়া হা·গিলসাকনি হা·আইয়াদে জাদানি হং·আ। রংথালগিবা শাস্ত্রও চক্কা দংআ, “ইসল হা·আইগিবারাংখো বিসংনি বু·এ চা·আচা রি·ম্মা।” 20 দা·আবা ইন্দাকেবা চক্কা দংআ, “হা·আইগিবারাংনি চানচিয়া গিম্মিকান বিথিগ্রি হং·আ গিত্তেল উখো হা·আইয়া।” 21 উনি গিম্মিন না·সং দারাংবা সাকসা মান্দিখো রা·এ দা·আ রাসং দাক্কাবো, মুয়ানা গিম্মিকান না·সংনি হং·আ। 22 পৌল, আপল্লো, পিতর, ইয়া হা·গিলসাক, জাংগি, সিয়া, দা·আওনি চাসং আরো রি·বাগিবা চাসং গিম্মিকান না·সংনি হং·আ; 23 না·সং খ্রীষ্টনি আরো খ্রীষ্ট ইসলনি হং·আ।

১ করিন্থীয়রাংনা 4

1 চিংআ খ্রীষ্টনা দাকচাকে হন·গিবা আরো ইসলনি নিং·থুগিবা খাৎথাখো হা·আইএতনা চিংখো দন্না ইন্নে মান্দিরাং চিংখো চানচিখানা। 2 জেরাংনা ইয়া কামখো হন·জক বিসংখো বিবিরা·না খ্রাগিবা দাক্কে ফিন্নিকনা নাংনুয়া । 3 আংনি বিচালখো না·সংআন দাকবো বা বিচাল দাকরামান দাকখানা, উনি হা·সেল আংনি মামুংবা হং·জা; আরো আংআ আন·থাংবা আংনি বিচালখো দাকজা। 4 আংনি গিসিক রংথালা, ইন্দিবা ইচা আংনি দোসগ্রি হং·আখো ফিন্নিকনা মান·জা। গিত্তেলান আংখো বিচাল দাক্কা। 5 উনি গিম্মিন গিত্তেলনি রি·বানা স্খাং, আগানস্খাওদে উয়া থিক দাকগিবা সময়না স্খাং না·সং দা·আ মামুংনি দোসখো রিম·না রি·য়াংআবো। আন্দালাও থুম্মুয়ে দনগিবাখো বিয়ান সেং·আওনা রা·বানুয়া আরো মান্দিনি খা·থংনি থুম্মুয়ে দনগিবা মিকসংআরাংখোবা ফারাকনুয়া। উনিসালো ইসলচাখোন জে জেনি মা·ন্নাগিবা মিৎথেলাখো মা·ন্নুয়া। 6 জংআদারাং, না·সংনি নাম্মানা আংআ আন·থাংখো আরো আপল্লোখো থসুসাএ ইয়া খাৎথারাংখো আগানজক, জেদাক্কোদে না·সং চিংচানিখো ইখো স্নিংনা মা·ন্না, রংথালগিবা শাস্ত্রও চক্কা দংআনি আগ্রেফিল্লে রি·য়াংনা নাংজা। ইন্দাকোদে না·সং সাকসাখো দনগাল্লে দা·আও সাকসাখো রা·এ গাং·বিংজানুয়া। 7 গিপ্পিনরাংনা বাত্তে নাং·খো মংসংগিবা দাক্কে দারাংবা চানচিজা। নাং·নি ইন্দাকগিবা মুয়া দংআ জেখো না·আ হ·ন্নানি গিত্তা মান·জা? আরো না·আ মা·ন্নেন দংওদে মান·খুজা ইন্নে মুয়ানা রাসং দাক্কিংআ? 8 না·সংখো নিক্কে ইন্দাকে চানচিমা·ন্নিংআ না·সং স্খাংআন গিম্মিকখো মান·জক, স্খাংআন নকমা হং·জক, আরো চিংখো দন্নেন রাজা হং·এ আসংএ দংইংজক। না·সং রাজা হং·ওদে নামনুয়ানমিং, ইন্দাকোদে চিংআবা না·সংমুং রাজা হং·ফানা মা·ন্নুয়ামিং। 9 স·ওতে গালনুয়া ইন্নে জেরাংখো মান্দি জিলমানি বন·খামাচাবাক্কা দন্না, আংনি চানচিয়া গিত্তাদে ইসল চিংখো, আগানস্খাওদে ওয়াত্তেতারাংখো উয়ানদাক্কেন গিম্মিকনি জা·মানচা দনজক। চিংআ হা·গিলসাক গিম্মিকচা, আগানস্খাওদে সা·গ্রে আরো মান্দিরাংচা খা·দিংস্থেকানি মান্দি গিত্তা হং·জক। 10 চিংআ খ্রীষ্টনি গিম্মিন জাদা হং·জক, আরো না·সং খ্রীষ্টমুং দংএ বুদ্ধিগ্মাং হং·জক। চিংআ বিলগ্রি আরো না·সংদে বিলগ্মাং হং·আ। না·সং মান্দিরা·বিয়াখো মান·জক আরো চিংআ মান্দিরা·গিজাখো মান·জক। 11 দা·আওনা দিপ্পাৎবা চিংআ অকখ্রিয়ানা আরো চি রিংআসিয়ানা দুক মা·ন্নিংজক। চিংআ বা·রা-চলানা দিল্লা, চিংমুং নামবাৎগিজা বেওয়ালখো দাক্কিংজক, চিংনি নক-জাম দংজা। 12 চিংআ জাকথাংথাংও গাম্মিংজক। মান্দিরাং চিংখো খা·চাজোকনো চিংআ বিসংনা নাম্মাখো হা·ম্মা; বিসং চিংখো দুক হন·জোকনো চিংআ উখো চাকচিকা; 13 বিসং চিংখো জাচাজকোন চিংআ রিন্নকে বিসংনা আগানচাকা। দা·আওনা দিপ্পাৎ চিংআ হা·গিলসাকনি ময়লা গিত্তা হং·আ, হা·গিলসাকনি চামবাল হং·এন দংআ। 14 আংআ না·সংখো খ্রাচা·এতনা ইরাংখো চকজা, বাত্তেসা আংনি খা·সাগিবা দে গিত্তা সিমসাকেতনান চক্কিংজক। 15 খ্রীষ্টনি গিম্মিন স্খিয়েতনা গিত্তা মান্দি না·সংনি বাং·নাবা দংআ, ইন্দিবা ফাদে না·সংনি বাং·এ দংজা; আংআন নাম্মা খাৎথাচা খ্রীষ্টান থরমও না·সংনি ফা হং·জক। 16 উনি গিম্মিনান আংআ না·সংচা মংসংএ মল·মলিংজক, আংআ জেখো দাক্কা না·সংবা উখোন দাকবো; 17 আরো ইনি গিম্মিনান আংআ তীমথিয়খো না·সংচা ওয়াত্তেতিংজক। বিবিরা·গিবা গিত্তা বিয়া আংনি খা·সাগিবা আরো বিবিগিবা দে হং·আ। যীশুমুং নাংরিমে আংনি স্খিয়া আরো কাম বাদিকে দাক্কা, বিয়া উখো না·সংনা গিসিক রা·এতনুয়া। গিম্মিক হা·দামনি গিম্মিক মন্ডলীনা আংআ ইরাংনি বিদিংও আপসানখোন স্খিয়ে হ·ন্না। 18 আংআ না·সংচা রি·বাজানুয়া চানচিয়ে না·সংও সাবা সাবা গাং·বিংএ দংআ। 19 ইন্দিবা গিত্তেল হা·সিকোদে আংআ থেংরিন না·সংচা রি·বানুয়া। গাং·বিংগিবারাংনি খাৎথারাংখো খিন্নানা রি·বাজানুয়া, ইন্দিবা বিসংনি বিলখো নিনা রি·বানুয়া। 20 ইসলনি সংনকদে খাৎথানাসান হং·জা, উয়াদে বিলনিসা হং·আ। না·সংনি হা·সিকা মুয়া? 21 আংআ না·সংনা মুয়াখো রা·বানুয়া-গল·দিকখোমা খা·সাখো আরো সনথল গিসিকখো?

১ করিন্থীয়রাংনা 5

1 খিন্নানা মা·ন্নিংআ, না·সংনি গিসেপো থি·ল্লেকানি পাপ দংআ, আরো উয়া থি·ল্লেকা ইন্দাকে নামজাস্রাং হং·আ জেখো গিপ্পিন জাতরাংবা দাকজা। আরোবা সাকসা বিনি ফাগিবানি জিকখো আন·থাংনি জিক গিত্তা দাক্কে দনজক। 2 আরো উনি জা·মানবা না·সং গাং·বিংআ! ইনাবাত্তে না·সংনি দুক দাক্কা আরো জে ইন্দাকা কামখো দাকজক বিখো না·সংওনি হং·খাত্তেতনা নাংজামিংমা? 3 আংআ বে·এনো দংজাওবা না·সংমুং গিসিকচা দংফাআ। জে ইন্দাকা কামখো দাকজক বিনি বিচালখো আংআ উনো দংফাগিবা মান্দি গিত্তা স্খাংআন দাক্কে দনজক। 4 আংনি বিচাল ইয়ান হং·আ, আনচিংনি গিত্তেল যীশুনি বিমুংও জেনসালো না·সং হা·দামসানো থম·দাকনুয়া আরো আংআবা গিসিকচা না·সংমুং দংফানুয়া আরো গিত্তেল যীশুনি বিল আনচিংনি সাক্কাও দংনুয়া, 5 উনসালো উয়া মান্দিখো শয়তাননি জাক্কো হ·ন্না নাংনুয়া, জেদাক্কে বিনি বে·এন ব·ন্না ইন্দিবা গিসিকদে গিত্তেল যীশুনি রি·বানি সালো জক্কাখো মা·ন্না। 6 রাসং দাক্কা না·সংনা নাম্মানি হং·জা। না·সং ইখো হা·আইজামা, অকখিসা মা·মাং ওয়ানথি থম·গিম্মিক রুটিখো ফিং·এতা? না·সংওনি উয়া গিৎচাম ওয়ানথিখো গালস্রাংবো, 7 জেদাক্কে না·সং ওয়ানথিগ্রি গিত্তাল হং·না মা·ন্না; আরো না·সং উগিত্তান দাক্কা। আনচিংনি ওয়াতচাংআনি সালনি মেষ বি·সা খ্রীষ্টখো বলি হন·জক। 8 উনি গিম্মিন গিৎচাম ওয়ানথিখো আগানস্খাওদে মিকনেংআচা আরো নামগিজাচা হং·জা, বাত্তেসা হাই, আনচিং ওয়ানথিগ্রি রুটি, আগানস্খাওদে সনথল আরো বিবিচা উয়া সালখো মানিনা। 9 না·সংখো নামগিজা মান্দিরাংমুং রি·জাখানা আংআ আংনি চিঠিও না·সংনা চক্কামিং। 10 ইয়া হা·গিলসাকনি নামগিজা মান্দি, মাদ্দুগিবা, বু·এ চা·গিবা বা জেরাং মিত্তে বিমাংখো হামুয়া বিসংখোদে আংআ আগানজা, মুয়ানা উনোদে না·সং ইয়া হা·গিলসাকনি হা·ফালও রি·য়াংনা নাংনুয়া। 11 আংআ জেখো চক্কামিং উনি অর্থ ইয়ান-সাবা আন·থাংখো বিবিরা·গিবা ইন্নেবা বিয়া নামগিজা মান্দি বা মাদ্দুগিবা হং·ওদে, মিত্তে বিমাংখো হামুওদে, গিপ্পিনখো জাচাওদে, চু রিংফেকগিবা বা বু·এ চা·গিবা হং·ওদে, বিমুং দা·আ রি·য়াবো। আরো বিমুং দা·আ চা·না-রিংনাবা রি·য়াংআবো। 12 মন্ডলীনি হা·ফালচা দংগিবা মান্দিরাংখো আংআ মুয়ানাবা বিচাল দাকনুয়া? ইন্দিবা মন্ডলীনি নিং·আও দংগিবা মান্দিরাংখো না·সংনিন বিচাল দাকনা নাংজামা? 13 জেরাং হা·ফালনি হং·আ বিসংনি বিচালখো ইসলান দাকনুয়া। রংথালগিবা শাস্ত্রনি খাৎথা গিত্তা, “না·সংওনি উয়া নামগিজা মান্দিখো রং·খাত্তেতবো।”

১ করিন্থীয়রাংনা 6

1 না·সংনি গিসেপো সানিবা সাকসা বিবিরা·গিবা জংআদানি সাক্কাও নালিশ দাকনা মামুং হা·সেল দংওদে বিয়া বাদিকে দাক্কে খেনমানগিজা ইসলনি মান্দিরাংচা রি·য়াংগিজা জেরাং ইসলনি হং·জা বিসংচা রি·য়াংএ বিচালখো হা·ম্মা? 2 ইসলনি মান্দিরাংআন হা·গিলসাকখো বিচাল দাকনুয়া ইন্নে না·সং হা·আইজামা? না·সং হা·গিলসাকখো বিচাল দাক্কোদে না·সং চন্না বিদিংনি গিম্মিনো বিচাল দাকনা মান·জামা? 3 আনচিং সা·গ্রেরাংখোবা বিচাল দাকনুয়া ইন্নে না·সং হা·আইজামা? ইন্দাকেন হং·ওদে ইয়া হা·গিলসাকদে মামুংআন হং·জা! 4 না·সংনি ইন্দাকগিবা নালিশ দংওদে মন্ডলীনি মান্দি হং·গিজারাংখোন না·সং বিচাল দাকগিবা দাক্কে থিক দাক্কামা? 5 না·সংখো খ্রাচা·এতনা আংআ ইয়া খাৎথাখো আগানিংজক। না·সংনি গিসেপো ইন্দাকগিবা হা·আইগিবা মান্দি সাকসাবা দংজামা, জেআন জংআদারাংনি গিসেপো গোলমালরাংখো বিচাল দাক্কে হ·ন্না মা·ন্না? 6 উখো দাকগিজা জংআদা জংআদানি সাক্কাও বিচাল দাকনা বিচাল দাকরামচা রি·য়াংআ, আরো উয়াবা দা·আবা বিবিরা·গিজারাংনি মিকখাংওসা! 7 না·সং সাকসা দা·আও সাকসানি সাক্কাও মকর্দমা দাক্কানি গিম্মিন ইখোন নিকনা মা·ন্না, না·সং হামজাজক। ইনাবাত্তে অন্যায়খো মুয়ানা চাকচিকজা? থগিয়াখো মুয়ানা মান·জা? 8 উখো দাকগিজা না·সংআন অন্যায় দাক্কিংজক, না·সংআন থকাই চা·আংজক, আরো উখো না·সংনি জংআদামুংআন দাক্কিংজক! 9 অন্যায় দাকগিবারাং ইসলনি সংনকখো মান·রিকজানুয়া, ইখো না·সং হা·আইজামা? না·সং দা·আ ব্রাংআবো। জেরাং নামজা, জেরাং মিত্তে বিমাংখো হামুয়া, জেরাং থি·ল্লেকা, জেরাং মি·আসা দারা, মি·আসা মি·আসামুং নামজাস্রাং কামখো দাকগিবারাং, 10 চা·উগিবারাং, মাদ্দুগিবারাং, চু রিংফেকগিবারাং, জাচাগিবারাং আরো থকাই চা·গিবারাং ইসলনি সংনকখো মান·রিকজানুয়া। 11 না·সংও সাবা সাবা উয়ানদাকগিবান হং·আমিং, ইন্দিবা গিত্তেল যীশু খ্রীষ্টও আরো আনচিংনি ইসলনি গিসিকও না·সংখো সু·গালে থাল্লেতজক, ইসলনা মিংএ দিংথাং দাক্কেতজক আরো দোসগ্রি ইন্নে রা·চাকজক। 12 সাবা সাবা আগানা, “গিম্মিকখো দাক্কা আংনা খ্রাগিজানি হং·জা।” ইয়াদে খাকখেতান হং·আ, ইন্দাকোবা গিম্মিকান মান্দিনা নাম্মা, ইন্দাকেদে হং·জা। গিম্মিকখো দাক্কা আংনা খ্রাগিজানি হং·জাওবা ইন্দিবা আংআ মামুংনিন নকখল হং·জানুয়া। 13 দা·আবা সাবা সাবা ইয়া খাৎথাখোবা আগানা, “চা·আ বিকমানা হং·আ আরো বিকমা চা·না হং·আ।” ইয়াদে নাম্মান, ইন্দিবা ইয়া মিংগ্মিখোন ইসল সালসাদে গিম্মায়েতনুয়া। বে·এন থি·ল্লেকনা হং·জা বাত্তেসা উয়া গিত্তেলনান হং·আ, আরো গিত্তেল বে·এননি গিম্মিন হং·আ। 14 ইসল বিনি বিলচা গিত্তেলখো সিয়াওনি থাংচাএতজক আরো বিয়া আনচিংখোবা থাংচাএতনুয়া। 15 না·সং ইখো হা·আইজামা, না·সংনি বে·এন খ্রীষ্টনি বে·এননি বাক হং·আ? ইন্দাকোদে আংআ খ্রীষ্টনি বে·এননি বাকখো রা·এ দারিনি বে·এনমুং নাংরিমেতনুয়ামা? মামুং সালোবা হং·জা। 16 দারিনি বে·এনমুং জেআন নাংরিমা বিয়া বিমুং বে·এনসান হং·আ ইখো না·সং হা·আইজামা? মুয়ানা শাস্ত্রও চক্কা দংআ, “বিসং সাকগ্মি বে·এনসান হং·নুয়া।” 17 ইন্দিবা জেআন গিত্তেলমুং নাংরিমা বিয়া বিমুং গিসিকসান হং·আ। 18 গিম্মিক থি·ল্লেকাওনি খাত্তাংবো। মান্দি জে দিংথাং পাপখো দাক্কা উখো বিয়া বিনি বে·এননি হা·ফালও দাক্কা, ইন্দিবা জে থি·ল্লেকা বিয়া আন·থাংনি বে·এননি সাক্কাওন পাপ দাক্কা। 19 না·সং ইখো হা·আইজামা, না·সংনি খা·থংও জেআন দংখামা আরো জেখো না·সং ইসলচাখো মান·জক, উয়া গিসিক রংথালগিবানি দংগিবা নকান হং·জক না·সংনি বে·এন? না·সং না·সংনি আন·থাংনি হং·জা; 20 বাং·আ দামচা না·সংখো ব্রিজক। উনি গিম্মিন ইসলনি রাসংনা না·সংনি বে·এনখো জাকখালবো।

১ করিন্থীয়রাংনা 7

1 না·সং আংচা জেরাংনি গিম্মিনো চকজক দা·আও উরাংখো আগানচাকিংজক। সাবা বিয়াজাওদে বিয়া নাম্মাখোন দাক্কা; 2 ইন্দিবা গিম্মিকচান থি·ল্লেকারাং বাং·ইংজক, উনি গিম্মিন মি·আসা গিম্মিকনিন জিকথাং আরো মিচিক গিম্মিকনিন সেথাং দংখানা। 3 সেগিবা জিকগিবানা বে·এনোনি মা·ন্নাগিবাখো বিনা হন·খানা; উয়ানদাক্কে জিকগিবাবা সেগিবানা হন·খানা। 4 জিকনি বে·এন বিনি আন·থাংনি হং·জা, বিনি সেগিবানিসা হং·আ। উগিত্তান সেনি বে·এন বিনি আন·থাংনি হং·জা, বিনি জিকগিবানিসা হং·আ। 5 সাকসা সাকগিপ্পিনমুং বে·এনচা আপসান হং·না দা·আ জিচাকাবো; ইন্দাকোবা বি·না চল্‌জকে আপসান গং·গ্রিকে বাং·গিজা সালনা দিংথাং দংনা মা·ন্না। উনি জা·মানো দা·আবা আপসান হং·বো জেদাক্কোদে আন·থাংথাংখো চাকচিকেতনা মান·জানি হা·সেল শয়তান না·সংখো পাপচানা সালনা মান·জা। 6 ইয়া খাৎথাখো আংআ না·সংনা গি·য়েতি আগানিংআ ইন্দাকেদে হং·জা বাত্তেসা দাকনা মা·ন্না ইন্নেন আগানিংআ। 7 গিম্মিকান আংগিত্তা হং·ওদে! ইন্দিবা ইসলচানিখো সাকফ্রাকফ্রাকান মিংফ্রাক দাক্কে মা·ন্নানিখো মান·জক। সাকফ্রাকনি মা·ন্নানিরাং দিংথাং দিংথাং হং·আ। 8 বিয়াগিজারাংনা আরো রান্দি মিচিকরাংনা আংআ আগানিংজক, বিসং আংগিত্তা দাক্কে দংনা মা·ন্নোদে বিসংনা উয়া নামনুয়া। 9 ইন্দিবা বিসং আন·থাংথাংখো চাকচিকেতনা মান·জাওদে বিয়াখানা, মুয়ানা বে·এননি হা·সিকাও খাম্মানা বাত্তে বিয়া দাক্কান নামবাতা। 10 জেরাং বিয়াজক বিসংনা আংআ ইখো গি·য়েতিংজক- আংআদে গি·য়েৎজা, গিত্তেলান গি·য়েতিংজক- জিকগিবা জেদাক্কে সেগিবাওনি রি·য়াংআরিজা। 11 ইন্দিবা বিয়া রি·য়াংআরিওদে বিয়াজাখানা বা সেগিবামুং দা·আবা নাংরিমখানা। সেগিবাবা বিনি জিকগিবাখো ওয়াতজাখানা। 12 গিপ্পিনরাংখো গিত্তেল আগানজা ইন্দিবা আংআ আগানিংজক, সাকসা জংআদানি খ্রীষ্টও বিবিরা·গিজা জিক দংওদে আরো উয়া জিক বিমুং দংনা হা·ম্মোদে বিনি সে বিখো ওয়াতজাখানা। 13 দা·আবা মিচিক সাকসানি খ্রীষ্টও বিবিরা·গিজাগিবা সে দংওদে আরো উয়া সে বিমুং দংনা হা·ম্মোদে উয়া সেখো বিয়া ওয়াতজাখানা; 14 মুয়ানা জিকচা বিবিরা·গিজাগিবা সেখো আরো সেচা উয়া বিবিরা·গিজাগিবা জিকখো ইসল রংথালগিবা ইন্নে চান্না। ইন্দাকজাওদে না·সংনি বি·সারাংদে রংথালজানুয়ামিং; ইন্দিবা ইসল বিসংখো রংথালগিবা ইন্নে চান্না। 15 ইন্দিবা উয়া বিবিরা·গিজাগিবা সে বা জিক রি·য়াংনা হা·ম্মোদে রি·য়াংখানা। ইন্দাকা অবস্থাও উয়া বিবিরা·গিবা জংআদা বা নআবি খাএ-সিক্কে দন্নাও দংজা। ইসলদে আনচিংখো থম·থমাও দংখানান রিক্কামজক। 16 ও জিকগিবা, না·আ বাদিকে দাক্কে হা·আইয়া, নাং·নি সেখো না·আ জক্কেৎনা মান·জানুয়া? ও সেগিবা, না·আ বাদিকে দাক্কে হা·আইয়া নাং·নি জিকখো না·আ জক্কেৎনা মান·জানুয়া? 17 গিত্তেল জেখো জে অবস্থাও দনজক আরো ইসল জেখো জেনি গিম্মিনো রিক্কামজক, উগিত্তান বিয়া রি·খানা। আংআ গিম্মিক মন্ডলীচান ইখো গি·য়েতিংআ। বিগিল রাতগিবা মান্দিখো রিক্কামা হং·জকমা? ইন্দিদে বিয়া বিগিল রাত্তানি চিনখো রিপ্পাকে গালজাখানা। 18 বিগিল রাতগিজা মান্দিখো রিক্কামা হং·জকমা? ইন্দিদে বিখো বিগিল রাতজাখানা। 19 বিগিল রাত্তোবা মুয়া হং·আ আরো রাতজাওবা মুয়া হং·আ, ইসলনি গি·য়েতাখো মানিয়ান চং·মত খাৎথা হং·আ। 20 ইসল জেখো জে অবস্থাও রিক্কামজক বিয়া উয়া অবস্থাওন দংখানা। 21 নাং·খো রিক্কামো না·আ নকখল দংআমিংমা? উনি গিম্মিন দা·আ দুক দাক্কাবো; জাকগিত্তেল হং·আনি চলখো মা·ন্নোদে উখো রা·চাকবো। 22 নকখল দংমিত্তিংও গিত্তেল জেখো রিক্কামজক বিয়া গিত্তেলচা জাকগিত্তেল হং·জক। উয়ানদাক্কে জেখো জাকগিত্তেল অবস্থাও রিক্কামজক বিয়া খ্রীষ্টনি নকখল হং·জক। 23 বাং·আ দামচা না·সংখো ব্রিজক; মান্দিনি নকখল দা·আ হং·আবো। 24 জংআদারাং, ইসল জেখো জে অবস্থাও দংআখো রিক্কামজক বিয়া ইসলনি মিকখাংও উগিত্তান দংখানা। 25 মি·থ্রারাংনি গিম্মিনো গিত্তেলচানিখো আংআ মামুং গি·য়েতাখো মান·জা। ইন্দিদে ইসলনি খা·সাচাক্কাখো মা·ন্নে আংআ বিবিরা·না খ্রাগিবা হং·জক ইন্নে আংনি হা·সিকাখো আগানিংজক। 26 দুক মান·বিয়ানি জে সাল সকবাংজক উনি হা·সেল আংনি চানচিয়াদে না·সং জে জেগিত্তা দংআ উগিত্তা দংআন না·সংনা নাম্মা। 27 নাং·নি জিক দংআমা? দংওদে জিকখো দা·আ ওয়াতনা হা·ম্মাবো। নাং·নি জিক দংজামা? ইন্দিদে দা·আ বিয়ানা হা·ম্মাবো। 28 ইন্দিবা না·আ বিয়াওদে নাং·নি পাপ হং·জা। সাকসা মি·থ্রা মিচিক বিয়াওদে বিনিবা পাপ হং·জা। ইন্দিবা জেরাং বিয়ানুয়া বিসং ইয়া সংসালো দুকখো মা·ন্নুয়া, আরো আংআ ইরাংনিখো না·সংখো জক্কেৎনা হা·ম্মিংআ। 29 জংআদারাং, আংনি আগান্না হাম·গিবা ইয়ান- সময় বাং·এ দংজাজক। উনি গিম্মিন দা·আওনি দিপ্পাৎ জিক দংগিবারাং জিক দংগিজা গিত্তা রি·না নাংনুয়া; 30 দুক দাকগিবারাং দুক দাকগিজা গিত্তা; হান·সেংগিবারাং হান·সেংগিজা গিত্তা; ব্রিগিবারাং বিসংনি ব্রিয়া জিনিসরাংখো জাকখালনা বিল দংগিজা গিত্তা; 31 হা·গিলসাকনি গিম্মিনো দংগিবারাং দংগিজা গিত্তা; মুয়ানা হা·গিলসাকনি বিমাং দিংথাং হং·ইংজক। 32 আংআ হা·ম্মা জেদাক্কে না·সং চানচিয়ারাংওনি জক্কে দংনা মা·ন্না। বিয়াগিজা মান্দি গিত্তেলনি গিম্মিনো চানচিয়া; বাদিকে দাক্কে বিয়া গিত্তেলখো খুসি দাকনুয়া ইখো চানচিয়া। 33 বিয়াগিবা মান্দি নকদাংখো চানচিয়া; বাদিকে দাক্কে বিয়া জিকখো খুসি দাকনুয়া ইখো চানচিয়া। 34 ইন্দাকে সামগ্মিচা বিখো সাল্লা। সে দংগিজা মিচিক আরো মি·থ্রা মিচিক গিত্তেলনি গিম্মিনো চানচিয়া জেদাক্কোদে বিয়া বে·এনো আরো খা·থংও গিত্তেলনি হং·না মা·ন্না। ইন্দিবা বিয়াগিবা মিচিক নকদাংনি গিম্মিনো চানচিয়া; বিয়া বাদিকে দাক্কে সেখো খুসি দাকনুয়া উখো চানচিয়া। 35 ইয়া খাৎথাখো আংআ না·সংনি নাম্মানান আগানিংজক। আংআ না·সংখো রি·ম্মে রা·রিকনা উখো আগানজাংআ, বাত্তেসা জেখো দাকনা নাংআ আরো নাম্মা উখো দাকনা না·সংখো খা·দংএতা, জেদাক্কে না·সং গিসিক নাংএ গিত্তেলনা দাকচাকে হ·ন্না মা·ন্না। 36 সাবা বিনি মি·থ্রা দেমিচিকনা খাকখেৎখো দাকজা ইন্নে চানচিওদে, মিচিকনি বিয়ানি বিলসি বাত্তাংওদে আরো বিয়া বিখো বিয়াএতনা নাংনুয়া ইন্নে চানচিওদে বিনি আন·থাংনি হা·সিকা গিত্তান কাম দাকখানা। মিচিক বিয়াখানা, উনাদে পাপ হং·জা। 37 ইন্দিবা জে মান্দিনি খা·থং থম·থমে দংআ, জেনি সাক্কাও মামুংবা দংজা ইন্নে বিয়া আন·থাংনি হা·সিকা গিত্তান কাম দাকনা মা·ন্না, বিয়া বিনি দেমিচিকখো বিয়াএতজানুয়া ইন্নেন থিক দাক্কে দন্নোদে বিয়া নাম্মাখোন দাক্কা। 38 ইন্দাকোদে নিকনা মা·ন্না, দেমিচিকখো বিয়া হন·গিবা নাম্মাখো দাক্কা আরো বিয়া হন·গিজাগিবা উনাবাত্তে নাম্মাখো দাক্কা। 39 সেগিবা থাংএ দংআ দিপ্পাৎ জিকগিবা বিচা খাআও দংআ। ইন্দিবা সেগিবা সিয়োদে বিয়া জেখো হা·সিকা বিখো বিয়ানা মা·ন্না, উয়া মান্দি জেদাক্কে গিত্তেলনি হং·আ। 40 ইন্দিবা আংনি চানচিয়া গিত্তাদে বিয়া জেগিত্তা দংআ উগিত্তান দংওদে বিয়া নাম্মে দংনুয়া। আংনি চানচিয়া গিত্তাদে আংআ ইসলনি গিসিকচা ইয়া খাৎথাখো আগানিংজক।

১ করিন্থীয়রাংনা 8

1 দা·আও আংআ মিত্তে বিমাংনা চিন·গিবা চা·আনি গিম্মিনো আগানিংজক। আনচিং হা·আইয়া, আনচিংনি গিম্মিকনি হা·আইয়া দংআ। হা·আইয়া মান্দিখো গাং·বিংএতা, ইন্দিবা খা·সাদে মান্দিখো থারিয়া। 2 হা·আইয়া ইন্নে চানচিগিবা জেগিত্তা হা·আইনা খ্রাআ উগিত্তা দা·আওবা হা·আইখুজা। 3 ইন্দিবা ইসলনা জেআন খা·সাআ বিখো ইসল হা·আইয়া। 4 দা·আও মিত্তে বিমাংনা চিন·গিবা চা·আনিখো চা·আনি গিম্মিনো আগানিংজক। আনচিং হা·আইয়া, হা·গিলসাকো মিত্তে বিমাং মামুংবা হং·জা আরো ইসলবা সাকসাসান দংআ। 5 সালগিওবা হং·খানা বা হা·গিলসাকোবা হং·খানা, মিত্তে ইন্নে মামুং দংওদে- মিত্তেবা বাং·আ, গিত্তেলবা বাং·আ- 6 ইন্দাকোবা আনচিংনাদে ইসল সাকসাসান দংআ। বিয়ান ফাগিবা; বিচানিন গিম্মিক রি·বাআ আরো বিনি গিম্মিনান আনচিং থাংএ দংআ। আরো গিত্তেলবা আনচিংনি সাকসাসান দংআ, বিয়ান যীশু খ্রীষ্ট। বিচান গিম্মিক রি·বাআ আরো বিচান আনচিং থাংএ দংআ। 7 ইন্দিবা ইন্দাকগিবা হা·আইয়াখো গিম্মিকদে হা·আইজা। মিত্তে বিমাংখো হামুয়ানি বেওয়াল দংআমিং ইন্নে মিত্তে বিমাংনা চিন·গিবা চা·আখো দা·আওনা দিপ্পাৎ মিত্তামরাং চা·এ দংআ। উনি গিম্মিন বিসংনি গিসিকনি চানচিয়ারাং বিলগ্রি ইন্নে মারাং নাংআনি হং·আ। 8 ইন্দিবা চা·আচা আনচিং ইসলনি রা·চাকগিবাখো মান·জা। আনচিং চা·জাওদে নামগিজানি মামুংবা হং·জা, আরো চা·আওবা আনচিংনি মামুং লাভ হং·জা। 9 ইন্দাকোবা সিমসাকবো! না·সংনি জাকগিত্তেল হং·আ বিবিরা·আও বিলগ্রিরাংনা পাপনি হা·সেল হং·জাখানা। 10 নাং·নিদে হা·আইয়া দংআ, ইন্দিবা জেনি চানচিয়া বিলগ্রি হং·আ বিয়া নাং·খো মিত্তে অলাখিগিবা নক্কো চা·আখো নিক্কোদে বিয়াবা মিত্তে বিমাংনা চিন·গিবা চা·আখো চা·না হাম·জানুয়ামা? 11 চানচিয়াও উয়া বিলগ্রিগিবা, উয়া জংআদানা, জেনি গিম্মিন খ্রীষ্ট সিয়ামিং, নাং·নি হা·আইয়াচান বিনি নামগিজা হং·আ। 12 ইন্দাকে না·সং না·সংনি জংআদানি সাক্কাও পাপ দাক্কে বিসংনি বিলগ্রি চানচিয়াও দুক হ·ন্নে না·সং খ্রীষ্টনি সাক্কাওন পাপ দাক্কা। 13 উনি গিম্মিন চা·আনি হা·সেল আংনি জংআদা পাপও গা·আকোদে আংনি জংআদা পাপও গা·আকজাখানা আংআ বে·এন চা·আখোন ওয়াতনুয়া।

১ করিন্থীয়রাংনা 9

1 আংআ জাকগিত্তেল হং·জামা? আংআ ওয়াত্তেতা হং·জামা? আনচিংনি গিত্তেল যীশুখো আংআ নিকখুজামা? গিত্তেলনা আংআ জে কামখো দাকজক না·সং উনিন বিথি হং·জামা? 2 সাকগিপ্পিনরাং আংখো ওয়াত্তেতা ইন্নে খু·রাচাকজাওবা না·সংদে খু·রাচাকবো। না·সং গিত্তেলনি মান্দি হং·এন আংনি ওয়াত্তেতা হং·আখো ফিন্নিকা। 3 আংনি ওয়াত্তেতা হং·আনি গিম্মিনো সিং·রকগিবারাংনা আংআ ইন্দাকে আগানচাকা- 4 চিংনি চা·আ-রিংআনি বিল দংজামা? 5 সাকগিপ্পিন ওয়াত্তেতারাং, গিত্তেলনি জংআদারাং আরো পিতর জেদাক্কে আন·থাংথাংনি জিকখো রা·এ আগানফ্রাকনা হং·খাতা, উয়ানদাক্কে খ্রীষ্টও বিবিরা·গিবা আন·থাংনি জিকখো রা·এ আগানফ্রাকনা হং·খাতানি বিল চিংনি দংজামা? 6 বার্ণবা আরো আংখোসান কাম দাক্কে চা·না নাংনুয়ামা? 7 আন·থাংনি থাংখাখো খরস দাক্কে সাবা সিপাইনি কামখো দাক্কা? আংগুর বাগানখো জেআন দাক্কা বিয়া উনি বিথিখো চা·জামা? জিল্লানিরাংখো জিলগিবা উনি সকখো রিংজামা? 8 আংআ বুদ্ধিচাসান ইয়া খাৎথাখো আগানিংআমা? মোশিনি নিয়ামরাংবা উয়া আপসান খাৎথাখোন আগানজামা? 9 উয়ো চক্কা দংআ, “মি গা·মিত্তিংও মা·সুনি খু·সুকখো দা·আ খাথিপাবো।” ইসল মা·সুনাসান চানচিয়ামা? 10 চং·মতদে বিয়া আনচিংনি গিম্মিনান ইয়া খাৎথাখো আগানজামা? হো·এ, ইখো আনচিংনা গিম্মিনান চক্কামিং, মুয়ানা হা·বা উইগিবা আরো মি মাড়াইগিবা, মিখো মান·ফানা খা·দংএন বিসংনি উখো দাকনা নাংআ। 11 না·সংনি গিসেপো চিংআ গিসিকনি বিৎচ্রিখো গোজক ইন্নে না·সংচানিখো হা·গিলসাকনি গান্নাচিন্না-চা·আখো চিম্মংওদে উয়া বাং·বাতানি হং·আমা? 12 ইনি গিম্মিনো না·সংনি সাক্কাও সাকগিপ্পিনরাংনি দাবি দংওদে চিংনি আরোবা বাং·এ দংজানুয়ামা? ইন্দিবা চিংআদে উয়া দাবিখো দাকগিজা বাত্তেসা গিম্মিকখোন চাকচিকিংজক, জেদাক্কে খ্রীষ্টনি গিম্মিনো নাম্মা খাৎথাখো আগানফ্রাকাও চিংআ মামুং চাংফেংআনি হং·আরিজা। 13 না·সং হা·আইজামা, থরম নকনি কামখো দাকগিবারাং থরম নকনিখোন চা·আখো মা·ন্না, আরো গানচিনি কামখো দাকগিবারাং গানচিনা চিন·গিবাওনি বাকখো মা·ন্না? 14 উয়ানদাক্কেন গিত্তেল ইখো গি·য়েৎজক, জেরাং আগানফ্রাকা বিসং উনিখোন গান্নাচিন্না-চা·আনিখো মান·খানা। 15 ইন্দিবা আংআ মামুংখোন জাকখালজা। জেদাক্কে না·সং আংনা ইন্দাকে দাকসোআ উনি গিম্মিনো আংআ ইখো চকজা। আংনি ইয়া রাসং দাক্কাখো সাবা গিম্মায়েতোদে উনা বাত্তে আংনি সিয়ান নামবাতা। 16 আংআ নাম্মা খাৎথাখো আগানফ্রাকিংজক, ইন্দিবা ইনি গিম্মিন আংনি রাসং দাক্কানি মামুংবা দংজা, মুয়ানা আংনি উখো দাকনান নাংনুয়া। দুক আংনা, আংআ উয়া নাম্মা খাৎথাখো আগানফ্রাকজাওদে! 17 আংআ আন·থাংনি হা·সিকাও আগানফ্রাকোদে আংনি বকসিস দংআন, আরো আন·থাংনি হা·সিকাও আগানফ্রাকজাওবা আংনি উখো দাকনা নাংনুয়া ইন্নেন আংআ উখো দাক্কা। 18 ইন্দাকোদে আংনি বকসিস মুয়া দংআ? ইয়ান উয়া বকসিস হং·আ, জে সময়ও আংআ আগানফ্রাকা উনো উনি ফাল জে বকসিস দংআ উখো জাকখালগিজা থাংখাগ্রি উয়া কামখো আংআ দাকনা মা·ন্না। 19 আংআ দারাংনি নকখল হং·জাওবা আন·থাংখো আংআ গিম্মিকনি নকখল দাকজক, জেদাক্কে বাং·আখোন খ্রীষ্টনা হামনা মা·ন্না। 20 যিহূদীরাংখো হামনা আংআ যিহূদীরাংচা যিহূদীরাং গিত্তা হং·জক। আংআ মোশিনি নিয়ামনি নিং·আও হং·জাওবা নিয়ামনি নিং·আও হং·গিবারাংখো হামনা আংআ বিসং গিত্তা হং·জক। 21 দা·আবা নিয়ামনি নিং·আও দংগিজারাংখো হামনা আংআ নিয়ামও দংগিজা মান্দি গিত্তা হং·জক। ইনি অর্থ ইয়ান হং·জা, আংআ ইসলনি হন·গিবা নিয়ামনি হা·ফালও দংআ; আংআদে খ্রীষ্টনি নিয়ামনি নিং·আওন দংআ। 22 বিবিরা·আও বিলগ্রিগিবারাংচা আংআ উয়ানদাকগিবা মান্দি গিত্তান হং·জক, জেদাক্কে খ্রীষ্টনা চু·গিম্মিক দাক্কে বিসংখো হামনা মা·ন্না। গিম্মিকচান আংআ গিম্মিক গিত্তা হং·জক জেদাক্কে মিত্তাম মান্দিখো জক্কেৎনা মা·ন্না। 23 ইরাংখো আংআ নাম্মা খাৎথানান দাক্কিংজক জেদাক্কোদে ফাত্তিয়াখো মান·ফাআ। 24 না·সং হা·আইজামা খাত্তে খা·ল্লাও গিম্মিকান খাত্তা ইন্দিবা সাকসাসান বকসিসখো মা·ন্না? না·সং বকসিসখো মা·ন্না গিত্তা খাতবো। 25 জেরাং খাত্তে খা·ল্লাও খাল·ফাংআ বিসং গিম্মিকান স্খাংওনিন রাক্কা নিয়ামও রি·য়া। হাম্মানি জে মালা নাসিয়া উয়া মালাখো মা·ন্না ইন্নেন বিসং উখো দাক্কা, ইন্দিবা চিংআ উখো দাক্কা উয়া বকসিসখো মা·ন্না জেআন মামুং সালোবা নাসিজানুয়া। 26 উনি গিম্মিন মিকসংআগ্রি আংআ খাতজা। বাংবাং হা·দামও দক্কে জাকথমে দকগ্রিকগিবা গিত্তা আংআ হং·জা। 27 বাত্তেসা আংআ বে·এনখো দুক হ·ন্নে আন·থাংনি নিং·আও দন্নিংজক, জেদাক্কে গিপ্পিনরাংচা নাম্মা খাৎথাখো আগানফ্রাকানি জা·মানো আংআ আন·থাং বকসিসখো মা·ন্না খ্রাগিজা হং·জা।

১ করিন্থীয়রাংনা 10

1 জংআদারাং, আংনি হা·ম্মা ইয়ান জেদাক্কে না·সং হা·আইনা মা·ন্না, আনচিংনি ফাগিৎচামরাং গিম্মিকান উয়া গাদিলাও দংআমিং আরো গিম্মিকান লোহিত সাগাল গিত্তা রি·য়াংআমিং। 2 মোশিমুং আপসান হং·না গাদিলাও আরো সাগালও বিসং গিম্মিকান রিপ্পলেতাখো মা·ন্নামিং। 3 ইসলনি হন·গিবা উয়া আপসান চা·আখো আরো উয়া আপসান চিখো বিসং গিম্মিকান রিংআমিং। ইসলনি হন·গিবা জে রং·থি বিসংমুং গ্রিম রি·য়ামিং উনিখোন বিসং রিংআনি চিখো মা·ন্নুয়ামিং; আরো খ্রীষ্টন উয়া রং·থিমিং। 5 ইন্দাকোবা ইসল উয়া মান্দিরাংওনি ফাকমা মান্দিরাংখো নামনিকজামিং। উনি গিম্মিন বিসংনি মাংগিসিরাং হা·গিসি জওলো গা·আকে দংজক। 6 জেদাক্কে আনচিং নিক্কে স্নিংনা মা·ন্না উনি হা·সেলান ইরাং হং·আমিং, বিসং জেগিত্তা নামগিজানা মাদ্দুয়ামিং আনচিং উগিত্তা দাকজাখানা। 7 বিসংনি গিসেপো সাবা সাবা মিত্তে বিমাংখো জেদাক্কে হামুয়ামিং না·সং উগিত্তা দা·আ দাক্কাবো। রংথালগিবা শাস্ত্রও চক্কা দংআ, মান্দিরাং চা·না-রিংনা আসংজক, জা·মানো খুসি হং·এ চ্রকনা মেশানা চাখাতজক। 8 বিসংনি গিসেপো মিত্তামরাং থি·ল্লেকানি গিম্মিন সালসানোন হাজাল খলগ্রিক গিত্থাম মান্দি সিয়ামিং। আনচিং উগিত্তা থি·ল্লেকজাখান। 9 বিসংনি গিসেপো মিত্তামরাং গিত্তেলখো রুরাএ জেদাক্কে চিপ্পু সু·আনা সিয়ামিং উগিত্তা আনচিং গিত্তেলখো রুরাএ নিজাখান। 10 বিসংনি গিসেপো মিত্তামরাং খা·আওনাংআখো ফারাকে জেদাক্কে ব·ন্নেতগিবা সা·গ্রেনি জাক্কো গিম্মামিং উগিত্তা না·সং দা·আ খা·আওনাংআখো ফারাকাবো। 11 সাকগিপ্পিনরাং ইখো নিএ স্নিংখানা উনি হা·সেল বিসংনি সাক্কাও ইরাং হং·আমিং। আরো আনচিং জেরাং চাসংনি বন·খামাও সকজক, আনচিংখো সিমসাকেতনান ইরাংখো চক্কা হং·জক। 12 ইনি গিম্মিন সাবা রাক্কে চাদেংএ দংআ ইন্নে চানচিওদে বিয়া গা·আকজানা গিত্তা সিমসাকখানা। 13 মান্দিনি জাংগিও জে রুরাআ সক্কা উরাংনি আগ্রে না·সংনি জাংগিও দিংথাং রুরাআ সকজা। ইসল বিবিগিবা হং·আ; চাকনা আগ্রেফিল্লে রুরাআ বিয়া না·সংনি সাক্কাও হন·জানুয়া, বাত্তেসা রুরাওনি হং·খাতানি রামাখো ফিন্নিকেতনুয়া জেদাক্কে না·সং চাকনা মা·ন্না। 14 ইনি গিম্মিন আংনি খা·সাগিবা রিপ্পেংরাং, না·সং মিত্তে বিমাংখো হামুয়াওনি খাতবো। 15 না·সংনি বুদ্ধি দংআখো হা·আইএন আংআ ইরাংখো আগানিংজক। আংনি আগানাখো না·সং আন·থাংথাং বিচাল দাক্কে নিবো। 16 গিত্তেলনি মিয়াথামও মিৎথেলে জে ফাত্তিয়ানি রিংচাকানিখো আনচিং রিংআ, উয়া খ্রীষ্টনি হান·চিনি বাকখো রা·আ গিত্তা হং·জামা? আরো জে রুটিখো আনচিং ফি·থংএ চা·আ উয়াবা খ্রীষ্টনি বে·এননি বাকখো রা·আ গিত্তা হং·জামা? 17 আনচিং বাং·ওবা বে·এনসান হং·আ, মুয়ানা গি·সাসান রুটি দংআ, আরো আনচিং গিম্মিকান উয়া রুটি গি·সানি বাকখোন রা·আ। 18 ইস্রায়েল জাতরাংনি খাৎথাখো চানচিবো। বিসংনি গিসেপো জেরাং বলি হন·গিবাখো চা·আ বিসং উয়া গানচিনি গিম্মিকোন দংফাজামা? 19 আংনি ইয়া খাৎথাও ইখোন হা·আইনা মা·ন্নামা, মিত্তে বিমাংনা বলি হন·গিবা চা·আ মামুং মংসংগিবামা বা মিত্তে বিমাং মামুং মংসংগিবা হং·আমা? 20 ইন্দাকেদে হং·জা, বাত্তেসা আংআ আগানিংআ, গিপ্পিন জাতরাং জেখো বলি হ·ন্না উখো ইসলচা দাকজা, গিসিক নামগিজাগিবারাংচান দাক্কা। গিসিক নামগিজাগিবারাংমুং না·সংখো নাংরিমাখো আংআ হাম·জা। 21 গিত্তেলনি রিংচাকানিখো আরো মিত্তেরাংনি রিংচাকানিখো ইয়া গি·গ্মিওনি না·সং রিংনা মান·জা। গিত্তেলনি দনচাকানি সাক্কাও আরো মিত্তেরাংনি দনচাকানি সাক্কাও দংগিবা ইয়া গি·গ্মিওনিখো না·সং রা·চাকনা মান·জা। 22 ইখো দাক্কে আনচিং বিবিন গিত্তেলখো খা·আওনাংএতনা হা·ম্মামা? আনচিং বিনা বাত্তে বিল্লাকামা? 23 সাবা সাবা আগানা, “মামুং দাক্কা খ্রাগিজানি হং·জা।” ইয়াদে থিকান হং·আ, ইন্দিবা গিম্মিকদে মান্দিনা নাম্মাখো দাকজা। মামুং দাক্কা খ্র্রাগিজানি হং·জাওবা, ইন্দিবা গিম্মিকদে মান্দিনা রিক্কা ইন্দাকেদে হং·জা। 24 দারাংবা বিনা আন·থাংনা নাম্মাখো দাকগিজা বাত্তেসা গিম্মিকান সাকগিপ্পিননা নাম্মাখো দাকখানা। 25 বাজালো ফালগিবা বে·এনখো চা·বো; খা·থংখো থম·থমেৎনা মামুংখো দা·আ সিং·আবো, 26 মুয়ানা রংথালগিবা শাস্ত্রনি আগানা গিত্তা, “হা·গিলসাক অরো উনি গিসেপো দংগিবা গিম্মিক গিত্তেলনিন হং·আ।” 27 বিবিরা·গিজাগিবা সাবা না·সংখো চা·না আগানোদে আরো না·সং রি·য়াংনা হা·ম্মোবা ইন্দিদে গিসিকখো থম·থমেৎনা মামুংখো সিং·গিজা না·সংনি মিকখাংও হন·গিবাখো চা·বো। 28 ইন্দিবা সাবা না·সংনা ইন্দাকে আগানোদে, “ইখো মিত্তে বিমাংনা বলি হন·জক,” ইন্দিদে ইখো আগানগিবানা আরো গিসিকনা উখো দা·আ চা·আবো। 29 আংআ না·সংনি গিসিকনি খাৎথাখো আগানজা, সাকগিপ্পিননি গিসিকনি খাৎথাখো আগানিংআ। ইন্দিবা সাকগিপ্পিননি গিসিকনা মুয়ানা আংনি জাকগিত্তেল হং·আখো ফেং·নুয়া? 30 আংআ মিৎথেলে চা·ওদে জে চা·আনি গিম্মিন আংআ মিৎথেলা উনা মুয়ানা আংখো জিনুয়া? 31 উনি গিম্মিন না·সং চা·বো-রিংবো আরো জেবা দাকবো, গিম্মিকখোন ইসলনি রাসংনা দাকবো। 32 জেদাক্কে আংআ গিম্মিক মান্দিখো খুসি দাক্কা না·সংবা উগিত্তান দাকবো; যিহূদী বা যিহূদী হং·গিজা বা ইসলনি মন্ডলীনি মান্দিরাংনি রামাখো দা·আ ফেং·আবো। আংআ আন·থাংনি নাম্মাখো দাকগিজা সাকগিপ্পিনরাংনি নাম্মাখো দাকনা হা·ম্মা জেদাক্কে বিসং পাপওনি জক্কাখো মা·ন্না।

১ করিন্থীয়রাংনা 11

1 আংআ জেদাক্কে খ্র্রীষ্ট গিত্তা রি·য়া না·সংবা উয়ানদাক্কে আং গিত্তা রি·বো। 2 আংআ না·সংখো মিৎথেলা, মুয়ানা না·সং গিম্মিকোন আংনি খাৎথাখো গিসিক রা·আ, আরো আংআ না·সংনা জেখো স্খিয়া উগিত্তা রি·য়া। 3 আংআ ইখোন হা·ম্মা জেদাক্কে না·সং হা·আইনা মা·ন্না, খ্রীষ্টন সাকগিম্মিক মি·আসানি স্খুথং, সেগিবা বিনি জিকগিবানি স্খুথং, আরো ইসল খ্রীষ্টনি স্খুথং হং·আ। 4 জে মি·আসা স্খু ফিনদাপে বি·আ বা আগানসোগিবা গিত্তা ইসলনি খাৎথাখো আগানা বিয়া বিনি স্খুখো চন্নিকা। 5 জে মিচিক স্খু ফিনদাপগিজা বি·আ বা আগানসোগিবা গিত্তা খাৎথা আগানা বিয়া বিনি স্খুখো চন্নিকা, মুয়ানা উনোদে বিয়া খিন্নি রক্কা মিচিক গিত্তান হং·নুয়া। 6 মিচিক স্খুখো ফিনদাপজাওদে বিয়া খিন্নিখো রক্কে গালখানা। ইন্দিবা মিচিকনা খিন্নি রক্কে গাল্লা খ্রাচা·আনি হং·আ ইন্নে বিয়া বিনি স্খুখো ফিনদাপে দনখানা। 7 স্খু ফিনদাপা মি·আসানা খ্রাজা, মুয়ানা ইসল মি·আসাখো আন·থাংনি জা গিত্তা থারিয়ামিং আরো ইসলনি রাসং মি·আসাও ফারাকা; ইন্দিবা মি·আসানি রাসং মিচিকও ফারাকা। 8 মি·আসা মিচিকওনি রি·বাজা ইন্দিবা মিচিকদে মি·আসাওনি রি·বাআ। 9 মিচিকনি গিম্মিন মি·আসা হং·জা ইন্দিবা মি·আসানি গিম্মিন মিচিক হং·আ। 10 উনি গিম্মিন আরো সা·গ্র্রেরাংনি গিম্মিন বাম্মানি চিন গিত্তা স্খু ফিনদাপা মিচিকনা খ্রাআ। 11 গিত্তেলমুং নাংরিমে জিকগিবা বিনি সেগিবানি সাক্কাও ফাংচাকা, দা·আবা সেগিবাবা বিনি জিকগিবানি সাক্কাও ফাংচাকা; 12 মুয়ানা জেদাক্কে মি·আসাওনি মিচিক রি·বামিং উয়ানদাক্কে দা·আবা মিচিকোন মি·আসা আৎচিয়া। ইন্দিবা গিম্মিকান ইসলওনি হং·আ। 13 না·সং আন·থাংআন বিচাল দাক্কে নিবো। স্খুয়ো বা·রা হন·গিজা ইসলচা বি·আ মিচিকনা মা·গাপামা? 14 বুদ্ধিচা ইখো হা·আইনা মান·জামা, মি·আসা খিন্নিখো রো·এ দন্নোদে বিনা মান্দিরা·গিজানি হং·আ, 15 ইন্দিবা মিচিক খিন্নিখো রো·এ দন্নোদে বিনা রাসং দাক্কানি হং·আ? আন·থাংখো ফিনদাপনান মিচিকনা খিন্নি রো·আখো হন·জক। 16 সাবা ইখো রা·এ জিগ্রিকনা হা·ম্মোদে আংআ ইন্দাকে আগান্নুয়া, দিংথাং নিয়াম চিংনিবা দংজা বা ইসলনি মন্ডলীরাংওবা দংজা। 17 দা·আও আংআ জেনি গিম্মিন গি·য়েৎনা হা·ম্মিংজক উনি গিম্মিনো না·সংখো মিৎথেলজা, মুয়ানা না·সং জেদাক্কে মন্ডলীও আপসান হং·আ উনি হা·সেল না·সংনি নাম্মা হং·গিজা নামগিজান হং·আ। 18 আংআ খিন্নাংআ, না·সং মন্ডলী গিত্তা আপসান হং·আনি সময়ও না·সংও মা·আৎগ্রিকা দংআ, আরো আংআ উখো অকখিসা বিবিবা রা·আ। 19 না·সংনি গিসেপো চানচিয়ারাং আপসান হং·জানুয়ান জেদাক্কে ইসলনি মিক্রোনও না·সংনি গিসেপো খাকখেৎ মান্দি সা হং·আ, উখো নিকনা মা·ন্না। 20 মন্ডলী হং·এ আপসান হা·দামও জেখো চা·আ উয়াদে গিত্তেলনি মিয়াথাম হং·জা, 21 মুয়ানা না·সং সাকসাবা সাকগিপ্পিননা সেংগিজান চা·এ গাল্লা। আরো উনি হা·সেল সাকসা অকখ্রিয়ানা দাক্কা আরো সাকগিপ্পিন চুফেক্কা। 22 চা·না-রিংনা না·সংনি নক-জাম দংজামা? না·সং ইসলনি মন্ডলীখো চন্নিকিংজকমা আরো জেরাংনি মামুংআন দংজা বিসংখো খ্রাচা·এতিংআমা? আংআ না·সংনা মুয়াখো আগান্নুয়া? ইনি হা·সেল আংআ না·সংখো মিৎথেলনুয়ামা? মিৎথেলজাস্রাং। 23 আংআ না·সংনা জেখো স্খিয়া উখো আংআ গিত্তেলচাখো মা·ন্না। জেনি ওয়াল্লো গিত্তেল যীশুখো বোবিলরাংনি জাক্কো রি·ম্মে হ·ন্নামিং, 24 উনি ওয়াল্লো বিয়া রুটিখো রা·এ ইসলখো মিৎথেলামিং আরো উখো ফি·থংএ আগানামিং, “ইয়া আংনি বে·এন জেখো না·সংনান হ·ন্নুয়া; আংখো গিসিক রা·না ইন্দাকে দাকবো।” 25 চা·আনি জা·মানো বিয়া রিংচাক্রাখো রা·এ আগানামিং, “আংনি হান·চিচা ইসলনি জে গিত্তাল খু·রাচাক্কাখো রা·রিকনুয়া উয়া খু·রাচাক্কানি চিন হং·জক ইয়া রিংচাক্রা। না·সং উনিখো রিংআ রিক্ষিতান আংখো গিসিক রা·না ইন্দাকে দাকবো।” 26 উনি গিম্মিন বিনি রি·বাখুজানা দিপ্পাৎ না·সং ইয়া রুটিখো চা·আ আরো ইয়া রিং·চাক্রাওনিখো রিংআ রিক্ষিতান গিত্তেলনি সিয়ানি খাৎথাখো আগানফ্রাকবো। 27 উনি গিম্মিন জেআন খ্রাগিজা দাক্কে ইয়া রুটিখো চা·আ আরো রিংচাক্রাওনিখো রিংআ বিয়া গিত্তেলনি বে·এননি আরো হান·চিনি সাক্কাও পাপ দাক্কা ইন্নে দোসি হং·আ। 28 উয়া রুটিখো চা·না আরো রিংচাক্রাওনিখো রিংনা স্খাং মান্দি আন·থাংখো পরীক্ষা দাক্কে নিখানা, 29 মুয়ানা চা·মিত্তিংও বিয়া গিত্তেলনি বে·এননি গিম্মিনো হা·আইজাওদে উয়া চা·আনি হা·সেল বিয়া আন·থাংনি সাক্কাওন শাস্তিখো রিংগামে রা·বাআ। 30 উনি গিম্মিনান না·সংনি গিসেপো মিত্তামরাং বিলগ্রি আরো বে·এন সাজক, দা·আবা মিত্তামরাং সিজক। 31 আনচিং আন·থাংথাংখো বিচাল দাক্কে নিওদে আনচিং গিত্তেলনি বিচালওনি জক্কা। 32 ইন্দিবা আনচিংনি বিচালখো গিত্তেল দাক্কোদে বিয়া আনচিংখো শাসন দাক্কা, জেদাক্কোদে হা·গিলসাকনি গিম্মিকমুং আনচিংখো দোসি ইন্নে চানজা। 33 উনি গিম্মিন আংনি জংআদারাং, না·সং মন্ডলী হং·এ গি·সা হা·দামও চা·না থম·দাকও সাকসা দা·আও সাকসানা সেংসোবো। 34 সাবা অকখ্রিওদে বিয়া নকনিখো চা·এ রি·বাখানা, জেদাক্কোদে মন্ডলী হং·এ গি·সা হা·দামও থ·ম্মানি হা·সেল শাস্তিখো মা·ন্না নাংজা। দিংথাংরাংনি বিদিংও জেনসালো আংআ রি·বানুয়া উনো নাম্মাখো আগান্নুয়া।

১ করিন্থীয়রাংনা 12

1 জংআদারাং, গিসিক রংথালগিবানি হ·ন্নানি গিম্মিনো না·সংনি হা·আইগিজা দংআখো আংআ হাম·জা। 2 না·সং হা·আইয়া, জেনসালো না·সং ইসলখো অলাখিজানুয়ামিং উনো ইন্দাকগিবা মিত্তে বিমাংচা না·সংখো সাল্লাংনুয়ামিং জেরাং খু·সুক আগান্না মান·জা। 3 আংআ না·সংনা আগানিংআ, ইসলনি গিসিকচা খু·সুক আগানজোকনো দারাংবা ইন্দাকে আগানজা, “যীশুনি সাক্কাও শাপ গা·আকখানা।” দা·আবা গিসিক রংথালগিবাচা হং·জাওদে দারাংবা ইন্দাকে আগান্না মান·জা, “যীশুন গিত্তেল হং·আ।” 4 আপসান গিসিক রংথালগিবানি মংসংগিবা হ·ন্নানিরাং দিংথাং দিংথাং হং·আ। 5 আনচিং দিংথাং দিংথাং চলচা গিত্তেল আপসাননা দাকচাকে হ·ন্নিংআ। 6 আনচিং সাকফ্রাকফ্রাকনা দিংথাং দিংথাং কামখো র·ন্না হং·জক, ইন্দিবা আপসান ইসল দিংথাং দিংথাং চলচা আনচিং সাকফ্রাকফ্রাকনি গিসেপো কাম দাক্কা। 7 গিম্মিকনি নাম্মানান মান্দি সাকফ্রাকফ্রাকনি গিসেপো গিসিক রংথালগিবা দিংথাং দিংথাং দাক্কে ফারাকা। 8 সানাবা সানাবা উয়া গিসিক রংথালগিবাচা হা·আইয়ানি খাৎথাখো বা বুদ্ধিনি খাৎথাখো আগান্না হ·ন্না। 9 সাকগিপ্পিনরাংখো উয়া আপসান গিসিকচা বিবিরা·আনি বা জম্মা-সা নাম্মেতানি বিলখো বা আইয়াও ইনমানগিবা কাম দাক্কানি বিলখো বা আগানসোগিবা হং·এ ইসলনি খাৎথাখো আগানানি বিলখো বা নামগিবা আরো নামগিজা গিসিকরাংখো হা·আইয়ানি বিলখো হ·ন্না। দা·আবা সানাবা সানাবা গিপ্পিন গিপ্পিন খু·সুকখো আগানানি বিলখো বা গিপ্পিন খু·সুকরাংখো ফি·এ আগানে হ·ন্নানি বিলখো হ·ন্না। 11 ইয়া গিম্মিক কামরাংখো উয়া আপসান গিসিক রংথালগিবা দাক্কা। বিনি হা·সিকা গিত্তান বিয়া ইয়া হ·ন্নানিরাংখো সাকফ্রাকফ্রাকনা দিংথাং দিংথাং দাক্কে হ·ন্না। 12 বে·এন গি·সানি জেদাক্কে বাক বাং·এ দংআ আরো উয়া বাকরাং বাং·ওবা গিম্মিকখো রা·এ গি·সামাংমাং বে·এন হং·আ, খ্রীষ্টবা উগিত্তান হং·আ। 13 আনচিং যিহূদী বা যিহূদী হং·গিজাগিবা, নকখল বা জাকগিত্তেল হং·গিবা, দিমদাকান আপসান গিসিক রংথালগিবাচা আপসান বে·এনো রিপ্পলজক। আনচিং গিম্মিকান উয়া আপসান গিসিক রংথালগিবাখো মান·জক। 14 গি·সামাংমাং বাকচা বে·এনখো থারিজা, বাং·আ বাকচান উখো থারিয়া। 15 জা·চক ইন্দাকে আগানোদে, “আংআ জাক হং·জা, উনি গিম্মিন বে·এননি বাকবা হং·জা,” ইন্দাকোদে উয়া বে·এননি বাক হং·জা ইন্দাকেদে হং·জা। 16 নাচিল ইন্দাকে আগানোদে, “আংআ মিক্রোন হং·জা ইন্নে বে·এননি বাকবা হং·জা,” ইন্দাকোদে উয়া বে·এননি বাক হং·জা ইন্দাকেদে হং·জা। 17 বে·এন গিম্মিকান মিক্রোন হং·ওদে খিন্নানা বিল বানো দংনুয়ামিং? আরো বে·এন গিম্মিকান নাচিল হং·ওদে সিম্মিলোতানি বিল বানো দংনুয়ামিং? 18 ইসল জেদাক্কে হা·ম্মামিং উয়ানদাক্কেন বিয়া বে·এননি বাকরাংখো গি·ফ্রাকফ্রাক দাক্কে বে·এননি গিসেপো দনজক। 19 গিম্মিক বাকরাং আপসান হং·ওদে বে·এন বাও দংনুয়ামিং? 20 বাক বাং·আন ইন্দিবা বে·এনদে গি·সাসান। 21 মিক্রোন জাকখো আগান্না মান·জা, “নাং·খো আংনা নাংজা,” দা·আবা স্খু জা·চক সামগ্মিখো ইন্না মান·জা, “না·সংখো আংনা নাংজা।” 22 চং·মতান বে·এননি জে বাকরাং বিলগ্রি ইন্নে চানচিমা·ন্না উরাংআন নাংবাত্তা। 23 বে·এননি জে বাকরাংখো আনচিং মান্দিরা·না খ্রাগিজাগিবা ইন্নে চানচিমা·ন্না উয়া বাকরাংখো মান্দিরা·বিয়া। জে বাকরাংখো হা·ফালও ফিন্নিকনা মান·জা উরাংখো আনচিং নাম্মে থারিয়ে ফিনদাপে দন্না, 24 ইন্দিবা হা·ফালও জে বাকরাংখো ফিন্নিকনা মা·ন্না উরাংখো ফিনদাপনা নাংজা। বে·এননি জে বাকরাং মান্দিরা·গিজানি হং·আ ইসল উরাংখো বাং·এ মান্দিরা·এতা আরো বাক গিম্মিকখো আপসান দাক্কা, 25 জেদাক্কে বে·এন বাক হং·আংজা বাত্তেসা বাকরাং গি·সা গিপ্পিননা আপসান দাক্কে চানচিস্খাআ। গি·সা সা·দিকোদে উমুং দিংথাংরাংবা সা·দিকাখো মা·ন্না। 26 গি·সা বাক মান্দিরা·খো মা·ন্নোদে বাক গিম্মিকান উমুং হান·সেংফাআ। 27 না·সংআন খ্রীষ্টনি বে·এন আরো সাকফ্রাকফ্রাক উয়া বে·এননি গি·ফ্রাকফ্রাক বাক হং·আ। 28 ইসল মন্ডলীও স্খাং ওয়াত্তেতারাংখো, গ্মিগিবাও আগানসোগিবারাংখো, গিত্থামগিবাও স্খিগিবারাংখো দনজক। জা·মানো ইন্দাকগিবা মান্দিরাংখো দনজক জেরাং আইয়াও ইনমানানি কামখো দাকনা বিল মান·জক, জেরাং জম্মা-সাআরাংখো নাম্মেতনা বিল মান·জক, জেরাং দাকচাকনা বিল মান·জক, জেরাং নিরক্ষিনা বিল মান·জক আরো জেরাং গিপ্পিন গিপ্পিন খু·সুকখো আগান্না বিল মান·জক। গিম্মিকান ওয়াত্তেতারাং হং·আমা? 29 গিম্মিকান আগানসোগিবা হং·আমা? গিম্মিকান স্খিগিবা হং·আমা? গিম্মিকনিন আইয়াও ইনমানগিবা কাম দাক্কানি বিল দংআমা? 30 গিম্মিকনিন জম্মা-সাআরাংখো নাম্মেতানি বিল দংআমা? গিম্মিকান দিংথাং দিংথাং খু·সুকচা আগানামা? গিম্মিকান উখো ফি·এ আগানে হ·ন্নামা? বিবিন হং·জা! 31 বাত্তেসা আংআ আগানা, না·সং নাংবাৎগিবা হ·ন্নানিরাংখো মা·ন্না গিসিক নাংবো। দা·আও আংআ না·সংনা নামবাৎগিবা গি·সা রামাখো ফিন্নিকিংজক:

১ করিন্থীয়রাংনা 13

1 আংআ মান্দিনি আরো সা·গ্রেরাংনি খু·সুকচা খাৎথা আগানোবা ইন্দিবা আংও খা·সা দংজাওদে আংআ রাক্কে গাম·গিবা ঘণ্টা বা চাপচেং গিত্তা হং·আরিজক। 2 আগানসোগিবা গিত্তা খাৎথা আগানানি বিল দংওদে, নিং·থুগিবারাংখো হা·আইনা মা·ন্নোদে, আরো আংনি গিম্মিক হা·আইয়ারাং দংওদে, আরোবা হা·ব্রিখো হা·দাম দামসাওনি হা·দাম দামসাওনা জিত্তেতনা গিত্তা বিবিরা·আ দংওদে, ইন্দিবা আংও খা·সা দংজাওদে আংনি মামুং দামআন দংজা। 3 আংনি দংগিবারাংখো আংআ দিল্লা-চন্নারাংনা চা·না হ·ন্নোদে, আরোবা বে·এনখোবা সো·খানা হ·ন্নোদে, ইন্দিবা আংও খা·সা দংজাওদে আংনি মামুং লাভআন দংজা। 4 খা·সা ফাংনান চাকচিকা, খা·সাচাক্কা, মিকনেংজা, রাসং দাকজা, গাং·বিংজা, 5 নামগিজা বেওয়ালখো দাকজা আন·থাংনি নাম্মাখো দাকনা হাম·জা, খা·আওনাংজা, দারাংনি নামগিজা বেওয়ালখো গিসিক রা·রিকজা, 6 নামগিজাখো রা·এ হান·সেংজা বাত্তেসা বিবিখো রা·এ হান·সেংআ। 7 খা·সা গিম্মিকখোন চাক্কা, গিম্মিকখোন বিবিরা·না হা·ম্মা, গিম্মিকো খা·দংআ আরো গিম্মিক অবস্থাওন খেম·খেম দংআ। 8 ইয়া খা·সাদে মামুং সালোবা বন·জা। আগানসোগিবা গিত্তা খাৎথা আগানানি বিল দংগিবা ব·ন্নাংনুয়া; দিংথাং দিংথাং খু·সুুকচা খাৎথা আগানানি বিল রি·য়াংনুয়া; হা·আইয়াবা ব·ন্নাংনুয়া; 9 মুয়ানা আনচিং গিম্মিকখো চু·গিম্মিক দাক্কে হা·আইজা, আগানসোগিবা হং·এবা চু·গিম্মিক খাৎথা আগান্না মান·জা। 10 ইন্দিবা জেআন চু·সকা উয়া জেনসালো রি·বানুয়া উনো জেআন চু·সকজা উয়া ব·ন্নাংনুয়া। 11 আংআ বি·সামিত্তিংও বি·সা গিত্তা খাৎথা আগান্নুয়ামিং, বি·সা গিত্তা চানচিনুয়ামিং আরো বি·সা গিত্তা বিচালবা দাকনুয়ামিং। দা·আও আংআ দাল·জক, উনি গিম্মিন বি·সানি বেওয়ালরাংখো ওয়াতজক। 12 আনচিং দা·আও জেদাক্কে জানিরাও দিম্মেলে নিক্কিংআ, ইন্দিবা উনোদে মিকখাংগ্রিক নিকনা মা·ন্নুয়া। আংনি দা·আও হা·আইগিবা চু·গিম্মিক হং·জা, ইন্দিবা ইসল জেদাক্কে আংখো চু·গিম্মিক দাক্কে হা·আইয়া উনো উয়ানদাক্কে আংআ চু·গিম্মিক দাক্কে হা·আইনা মা·ন্নুয়া। 13 ইন্দাকোদে নিকনা মা·ন্না বিবিরা·আ, খা·দংআ আরো খা·সা-ইয়া মিংগিত্থামান বন·খামওনা দিপ্পাৎ দংআ; ইন্দিবা ইরাংনি গিসেপো খা·সান দাল·বাৎগিবা হং·আ।

১ করিন্থীয়রাংনা 14

1 ইন্দাকগিবা খা·সানা না·সং মংসংবাত্তে খ্রেংবো, আরো গিসিক রংথালগিবানি হ·ন্নানিখো, মংসংদে আগানসোগিবা গিত্তা খাৎথা আগানানি বিলখো মা·ন্না ইন্নে না·সংও হা·সিকা দংখানা। 2 দিংথাং খু·সুকচা জে মান্দি খাৎথা আগানা বিয়া মান্দিমুং খাৎথা আগানজা ইন্দিবা ইসলমুং আগানা, মুয়ানা দারাংবা উখো হা·আইজা। বিয়া গিসিকচা নিং·থুগিবা বিবিখো আগানা। 3 ইন্দিবা জেআন আগানসোগিবা গিত্তা আগানা বিয়া মান্দিরাংচা ইন্দাকফিল্লে খাৎথা আগানা জেআন বিসংখো রিক্কা আরো খা·দংএতা আরো খা·নাম্মেতা। 4 দিংথাং খু·সুকচা জে মান্দি খাৎথা আগানা বিয়া আন·থাংখোন রিক্কা, ইন্দিবা আগানসোগিবা গিত্তা জে খাৎথা আগানা বিয়া মন্ডলীনি মান্দিরাংখো রিক্কা। 5 আংআ হা·ম্মা জেদাক্কে না·সং গিম্মিকান দিংথাং দিংথাং খু·সুকচা আগান্না মা·ন্না, ইন্দিবা আরো বাং·এ হা·ম্মা জেদাক্কে না·সং আগানসোগিবা গিত্তা আগান্না মা·ন্না। দিংথাং খু·সুকচা জে মান্দি খাৎথা আগানা, মন্ডলীনি মান্দিরাংখো রিকনা ইন্নে বিনি খাৎথাখো বিয়া ফি·এ আগানজাওদে, ইন্দাকোবা জেআন আগানসোগিবা গিত্তা খাৎথা আগানা বিয়ান দাল·বাৎগিবা হং·আ। 6 উনি গিম্মিন জংআদারাং, আংআ না·সংচা রি·বাএ দিংথাং খু·সুকখোসান আগানোদে, ইন্দিবা উচা ইসলনি বিবিখো ফারাকানি খাৎথাখো বা হা·আইয়ানি খাৎথাখো বা আগানসোগিবা গিত্তা ইসলনি হন·গিবা খাৎথাখো বা স্খিয়ানি খাৎথাখো আগানজাওদে, ইন্দিদে আংআ না·সংনা মুয়া নাম্মাখো দাকনা মা·ন্নুয়া? 7 আরোবা, বাংসি বা বেহালা গিত্তা জাংগিগ্রি মিক্কুগিবা নাম্মে থাল্লে দিংথাং দিংথাং সুলও গাম·জাওদে, ইন্দিদে বাংসি বা বেহালাও বাগিবা সুল গা·ম্মিংআ উখো বাদিকে দাক্কে হা·আইনুয়া? 8 দাকগ্রিকানি সিংগা নাম্মেথাল্লে গাম·জাওদে সা দাকগ্রিকনা রি·য়াংনা আন·থাংখো থারিসোনুয়া? 9 উয়ানদাক্কেন জে খু·সুকখো মান্দিরাং হা·আইজা না·সং উয়া খু·সুকচা আগানোদে ইন্দিদে না·সং জেখো আগানা উখো বাদিকে দাক্কে হা·আইনা মা·ন্নুয়া? মুয়ানা উনো না·সং জেখো আগানা উখোদে বালওয়াচান আগানা। 10 ইয়া হা·গিলসাকো বাং·আ খু·সুকরাং দংআ; উরাংনি গিসেপো মিংসাবা অর্থগ্রি হং·জা। 11 ইনি গিম্মিন আংআ মামুং খু·সুকনি অর্থখো হা·আইজাওদে ইন্দিদে জেআন খু·সুক আগানা বিচাদে আংআ গিপ্পিন হা·সংনি মান্দি গিত্তা হং·নুয়া আরো বিয়াবা আংচা উগিত্তান হং·নুয়া। 12 না·সংনাবা ইয়া খাৎথা খ্রাআ। না·সং গিসিক রংথালগিবানি হ·ন্নানিরাংখো মা·ন্না হা·ম্মোদে জে হ·ন্নানিরাংচা মন্ডলীখো রিকনা মা·ন্না উরাংখোন বাং·এ মা·ন্না খ্রেংবো। 13 ইনি গিম্মিন দিংথাং খু·সুকচা জে মান্দি খাৎথা আগানা বিয়া বি·খানা জেদাক্কে উখো বিয়া ফি·এ আগানে হ·ন্না মা·ন্না। 14 আংআ দিংথাং খু·সুকচা বি·ওদে আংনি গিসিকান বি·আ ইন্দিবা আংনি খা·থং মামুং কামখো দাকজা। 15 ইন্দাকোদে আংনি মুয়াখো দাকনা খ্রাআ? আংআ গিসিকচা বি·নুয়া, বুদ্ধিচাবা বি·নুয়া; আংআ গিসিকচা মিৎথেলানি গীতখো রিং·নুয়া, বুদ্ধিচাবা মিৎথেলানি গীতখো রিং·নুয়া। 16 ইন্দাকজাওদে না·আ গিসিকচা মিৎথেলোদে উয়া খু·সুকখো হা·আইগিজা মান্দি উয়ো দংওদে বিয়া বাদিকে দাক্কে নাং·নি মিৎথেলাও আমেন ইন্নে ইনস্খানুয়া? বিয়াদে না·আ মুয়াখো আগানা উখো হা·আইজা। 17 না·আ নাম্মেদাক্কেন মিৎথেলাখো হ·ন্নাবা গ্মাং, ইন্দিবা উনি হা·সেল উয়া সাকগিপ্পিন মান্দিখোদে থারিয়া হং·জা। 18 আংআ না·সং গিম্মিকনা বাত্তে দিংথাং দিংথাং খু·সুকরাংচা বাং·এ খাৎথা আগান্না মা·ন্না ইন্নে ইসলখো মিৎথেলা। 19 ইন্দাকোবা মন্ডলীও দিংথাং দিংথাং খু·সুকচা হাজাল হাজাল খাৎথা আগানানা বাত্তে গিপ্পিনরাংনা স্খিনা আংআ বুদ্ধিচা মিংবংআ খাৎথাখোসান আগান্নুয়া। 20 জংআদারাং, বি·সারাং গিত্তা দা·আ চানচিয়াবো। নামগিজারাংনি গিম্মিনো না·সংনি গিসিক বি·সারাং গিত্তা স্রংখানা, ইন্দিবা চানচিয়াও না·সং জা·দালগিবা হং·বো। 21 মোশিনি নিয়ামও গিত্তেল আগানা, “দিংথাং খু·সুকনি মান্দিরাংনি খু·সুক গিত্তা আরো গিপ্পিনরাংনি খু·সুক গিত্তা আংআ ইয়া জাতচা খাৎথা আগান্নুয়া, ইন্দিবা বিসং আংনি আগানাখো খিন্নাজানুয়া।” 22 ইন্দাকোদে নিকনা মা·ন্না, বিবিরা·গিবারাংনা দিংথাং খু·সুকচা খাৎথা আগানা মামুং চিন হং·জা, বাত্তেসা বিবিরা·গিজাগিবারাংনা উয়া গি·সা চিন হং·আ; ইন্দিবা বিবিরা·গিজাগিবারাংনা আগানসোগিবা গিত্তা খাৎথা আগানা মামুং চিন হং·জা, বাত্তেসা বিবিরা·গিবারাংনা উয়া গি·সা চিন হং·আ। 23 মন্ডলীনি মান্দি গিম্মিক হা·দামসানো থম·দাকানি জা·মানো গিম্মিকান দিংথাং দিংথাং খু·সুকখো আগানোদে আরো উয়া মন্ডলীনি হা·ফালনি মান্দিরাং আরো বিবিরা·গিজাগিবারাং নিং·আও রি·বাওদে, ইন্দিদে বিসং না·সংখো খোরে ইনজানুয়ামা? 24 ইন্দিবা গিম্মিকান আগানসোগিবা গিত্তা খাৎথা আগানোদে আরো উনো বিবিরা·গিজাগিবা বা মন্ডলীনি হা·ফালনি মান্দি নিং·আচা রি·বাওদে, ইন্দিদে উয়া মান্দি গিম্মিকনি খু·সুকচা আন·থাংনি পাপখো হা·আইচাকনা মা·ন্নুয়া আরো উয়া খাৎথারাংচান বিনি খা·থংনি বিচাল হং·নুয়া। 25 উনোদে বিনি খা·থংনি নিং·থুয়ারাং হং·খাতনুয়া আরো বিয়া উয়ো হা·আও থুগোপে ইসলখো রাসং দাক্কে আগান্নুয়া, “বিবিন ইসল না·সংও দংআ।” 26 জংআদারাং, ইন্দিদে আংআ মুয়াখো আগান্নুয়া? না·সং জেনসালো মন্ডলীও হা·দামসানো থম·দাকা উনো না·সংনি গিসেপো সাবা মিৎথেলে গীতখো রিং·আ, সাবা স্খিয়েতা, সাবা ইসলনি বিবিখো ফারাকা, সাবা দিংথাং খু·সুকচা খাৎথা আগানা, দা·আবা সাবা উখো ফি·এ আগানা। জেখোন দাকখানা গিম্মিকখোন মন্ডলীখো রিকনা ইন্নে দাকখানা। 27 সাবা দিংথাং খু·সুকচা আগানোদে সাকগ্মি বা বাং·ওদে সাকগিত্থাম সাকফ্রাকফ্রাক দাক্কে খাৎথা আগানখানা, আরো দা·আও সাকসা উখো ফি·এ আগানখানা। 28 ফি·এ আগান্না গিত্তা সাকসাবা দংজাওদে বিসং মন্ডলীও খাৎথা আগানজাখানা; বিসং সাকসান থাংথাং আন·থাংমুং আরো ইসলমুং খাৎথা আগানখানা। 29 জেরাং আগানসোগিবা গিত্তা খু·সুক আগানা বিসং সাকগ্মি বা সাকগিত্থাম দাক্কে খু·সুক আগানখানা আরো সাকগিপ্পিনরাং উনি বিচালখো দাক্কে নিখানা। 30 আসংএ দংগিবাচা ইসলনি বিবি ফারাকোদে খু·সুক আগানগিবা আগানাখো দনখানা, 31 মুয়ানা না·সং গিম্মিকান সাকফ্রাকফ্রাক দাক্কে আগানসোগিবা গিত্তা খাৎথা আগান্না মা·ন্না জেদাক্কে গিম্মিকান স্খিয়াখো আরো খা·দংআখো মা·ন্না। 32 আগানসোগিবারাংনি গিসিক বিসংনি আন·থাংথাংনি নিং·আও বাম্মে দংআ। 33 ইসল বিলদিং বিলদাংনি ইসল হং·জা, বিয়া থম·থমানি ইসল। ইসলনি মান্দিরাংনি গিম্মিক মন্ডলীও জেদাক্কে হং·এ দংআ, 34 উয়ানদাক্কে মিচিকরাং মন্ডলীও স্রক দংখানা, মুয়ানা বিসংখো খু·সুক আগান্না হন·জা। বাত্তেসা মোশিনি নিয়ামও দংআ গিত্তা বিসং বাম্মে দংখানা। 35 বিসং মামুংখো হা·আইনা হা·ম্মোদে নকচা বিসংনি সেগিবাচা সিং·খানা, মুয়ানা মন্ডলীও খাৎথা আগানা সাকসা মিচিকনা খ্রাচা·আনি হং·আ। 36 ইসলনি খাৎথা না·সংওনিন হং·খাতামিংমা বা উয়া না·সংচাসান রি·বামা? 37 সাবা আন·থাংখো আগানসোগিবা চানচিওদে বা গিসিক মান·গিবা মান্দি চানচিওদে বিয়া ইন্দাকে খু·রাচাকখানা, আংনি না·সংচা চকগিবা গিম্মিকান গিত্তেলনি গি·য়েতা। 38 সাবা উখো রা·চাকজাওদে বিখোবা রা·চাকজানুয়া। 39 উনি গিম্মিনান আংনি জংআদারাং, আগানসোগিবা গিত্তা খাৎথা আগান্না ইন্নে মংসংএ খা·দংবো আরো দিংথাং দিংথাং খু·সুকরাংখো আগান্না দা·আ বেং·আবো। 40 গিম্মিকখোন জেদাক্কে খ্রাএ আরো নাম্মেদাক্কে দাক্কা।

১ করিন্থীয়রাংনা 15

1 জংআদারাং, জে নাম্মা খাৎথাখো আংআ না·সংচা আগানফ্রাকামিং, উয়া নাম্মা খাৎথাখো আংআ না·সংনা গিসিক রা·এতিংজক। না·সং উখো রা·চাকজক আরো উয়ো খেম·খেম দংজক। 2 জে খাৎথাখো আংআ না·সংচা আগানফ্রাকামিং উখো না·সং রি·ম্মে রা·রিকে দংওদে উয়া নাম্মা খাৎথাচান না·সং পাপওনি জক্কাখো মা·ন্নিংজক-ইন্দিদে না·সংনি বিবিরা·আ হা·ফালনিসান হং·জাওদে। 3 আংআ আন·থাং জেখো মান·জক উখো নাংবাতা গিত্তা না·সংনাবা হন·জক। উয়া বিদিং হং·জক ইয়ান-রংথালগিবা শাস্ত্রনি আগানা গিত্তা খ্রীষ্ট আনচিংনি পাপনি গিম্মিন সিয়ামিং, 4 বিখো গোপ্পামিং, শাস্ত্রনি আাগানা গিত্তা সালগিত্থামনি সালো বিখো সিয়াওনিখো থাংচাএতজক, 5 আরো বিয়া পিতরনা আরো জা·মানো বিনি ওয়াত্তেতারাংনা মিকখাং ফা·আমিং। 6 উনি জা·মানো বিয়া উয়া সময়ওন রিৎচাবংআনাবা বাত্তে বাং·আ জংআদারাংনা মিকখাং ফা·আমিং। বিসংওনি মিত্তামরাং সিয়োবা বাং·আ মান্দি দা·আওনাবা দিপ্পাৎ থাংএ দংআ। 7 উনি জা·মানো বিয়া যাকোবনা আরো জা·মানো গিম্মিক ওয়াত্তেতারাংনা মিকখাং ফা·আমিং। 8 সাল হং·গিজাও আৎচিগিবা আংনাবা বিয়া গিম্মিকনি জা·মানো মিকখাং ফা·আমিং। 9 আংআন ওয়াত্তেতারাংনি গিসেপো চনবাৎগিবা, আরোবা, ওয়াত্তেতা ইন্নে সানিবা রিক্কামাখো মা·ন্নাবা আংআ খ্রাজা, মুয়ানা ইসলনি মন্ডলীখো আংআ গিচ্চিয়েৎনুয়ামিং। 10 ইন্দিবা আংআ দা·আও ইসলনি খা·সাচাক্কানান ইন্দাকে হং·জক। আংনি সাক্কাও বিনি উয়া খা·সাচাক্কা বিথিগ্রি হং·জা। আংআ সাকগিপ্পিন ওয়াত্তেতারাংনা বাত্তে বাং·এ কাম দাকজক; আংআসান কাম দাক্কা ইন্দাকেদে হং·জা, বাত্তেসা আংনা ইসলনি জে খা·সাচাক্কা দংআ উয়া খা·সাচাক্কান উখো দাকজক। 11 উনি গিম্মিন আংআন আগানফ্রাকা হং·জাওবা সাকগিপ্পিন ওয়াত্তেতারাংআন আগানফ্রাকা, চিংআ ইখো রা·এন আগানফ্রাকা আরো না·সং ইখোন বিবিরা·জক। 12 ইন্দিবা খ্রীষ্টখো সিয়াওনি থাংচাএতজক ইন্নে আগানফ্রাকোদে না·সংনি গিসেপো সাবা সাবা বাদিকে দাক্কে আগানিংআ, সিগিবারাংনি থাংচাফিল্লা ইন্নে মামুংবা দংজা? 13 সিগিবারাং থাংচাজাএন দংওদে খ্রীষ্টখোবা থাংচাএতজা; 14 আরো খীষ্টখো থাংচাএতজাওদে চিংনি আগানফ্রাকাবা বু·আ আরো না·সংনি বিবিরা·আবা বু·আ। 15 ইনাআগ্রে ইয়ো ইয়া খাৎথাখোন ফিন্নিকা হং·আ, ইসলনি গিম্মিন চিংআ বু·এ সাক্ষি হ·ন্নিংআ, মুয়ানা চিংনি সাক্ষি ইয়ান, ইসল খ্রীষ্টখো সিয়াওনিখো থাংচাএতজক। ইন্দিবা সিগিবারাংখো থাংচাএতান হং·জাওদে বিয়া খ্রীষ্টখোবা থাংচাএতজা, 16 মুয়ানা সিগিবারাংখো থাংচাএতজাওদে খ্রীষ্টখোবা থাংচাএতজা। 17 খ্রীষ্টখোন থাংচাএতজাওদে না·সংনি বিবিরা·আ বিথিগ্রি হং·আ আরো দা·আওবা না·সং পাপওন গা·আকে দংখুংআ। 18 ইন্দাকোদে খ্রীষ্টমুং নাংরিমে জেরাং সিজক বিসংদে নাসিজক। 19 খ্রীষ্টনি সাক্কাও আনচিং জেখো খা·দংআ উয়া ইয়া জাংগিনাসান হং·ওদে মান্দি গিম্মিকনি গিসেপো আনচিংনিন নামজাবাতনুয়া। 20 ইন্দিবা বিবিন খ্রীষ্টখো সিয়াওনিখো থাংচাএতজক। বিয়া স্খাংগিবা বিথি, আগানস্খাওদে সিয়াওনি জেরাংখো থাংচাএতনুয়া বিসংনি গিসেপো বিয়ান স্খাং থাংচাজক। 21 সাকসা মান্দিও সিয়া রি·বাআ ইন্নে সিয়াওনি থাংচাবা সাকসা মান্দিওন রি·বাআ। 22 আদমমুং নাংরিমে দংআ ইন্নে জেদাক্কে গিম্মিক মান্দিন সিয়া, উয়ানদাক্কে খ্রীষ্টমুং জেরাং নাংরিমে দংআ বিসং গিম্মিকখো থাংচাএতনুয়া; 23 ইন্দাকোবা উরাংও পালা দংআ-স্খাংগিবা বিথি গিত্তা খ্রীষ্ট, জা·মানো জেরাং খ্রীষ্টনি আন·থাংনি হং·আ। খ্রীষ্টনি রি·বানি সালো বিসংখো থাংচাএতনুয়া। 24 উনি জা·মানো জেনসালো খ্রীষ্ট গিম্মিক শাসন দাক্কানিরাংখো, বিলরাংখো ব·ন্নেতি ফাগিবা ইসলনি জাক্কো সংনকখো হ·ন্নেতনুয়া উনসালো বন·খামগিবা সাল রি·বানুয়া। 25 ইসল জেনা দিপ্পাৎ খ্রীষ্টনি গিম্মিক বোবিলখো বিনি জা·চক নিং·আও দনজানুয়া উয়োনা দিপ্পাৎ খ্রীষ্টখো রাজানি কামখো দাকনা নাংনুয়া। 26 বন·খামগিবা বোবিল হং·জক সিয়া, উখোবা ব·ন্নেতনুয়া। 27 শাস্ত্রনি আগানা গিত্তা, “বিয়া গিম্মিকখোন বিনি জা·চক নিং·আও দনজক।” গিম্মিকখোন নিং·আও দনজক ইন্নে আগানোদে থাল্লেন হা·আইনা মা·ন্না, জেআন গিম্মিকখো খ্রীষ্টনি নিং·আও দনজক উয়া ইসল আন·থাংখো দনদাপেন উখো দাকজক। 28 জেনসালো গিম্মিকখোন খ্রীষ্টনি নিং·আও দন্না হং·নুয়া, উনো জেআন গিম্মিকখো খ্রীষ্টনি নিং·আও দন্নামিং উয়া ইসলান জেদাক্কে সাকসা খাম·খাম নকগিবা হং·না মা·ন্না উনি গিম্মিন দেফান্থিবা আন·থাং ইসলনি নিং·আও দংনুয়া। 29 ইন্দিবা সিগিবারাংনা জেরাং রিপ্পলা বিসংনি মুয়া হং·নুয়া? সিগিবারাংখো থাংচাএতজাএন দংওদে মুয়ানা বিসং সিগিবারাংনা রিপ্পলা? 30 আরো মুয়ানাবা আনচিং ফাংনান হং·সিয়াও গা·আকিংআ? 31 জংআদারাং, আনচিংনি গিত্তেল খ্রীষ্ট যীশুনি কামও না·সংখো রা·এ আংনি জে রাসং, উয়া রাসংচা আংআ ইখো বিবিন আগানিংজক, সালাজ্রিংআন আংআ সিয়ানি মিকখাংগ্রিক হং·ইংজক। 32 ইফিষও ব্রিংনি মাৎবুরুংরাংমুং আংআ দাকগ্রিকনা নাংআমিং, উখো হা·গিলসাকনাসান মিকসংএ দাক্কোদে আংনি মুয়া নামগ্মি হং·জক? সিগিবারাংখো থাংচাএতজাএন দংওদে আগানরোংআ খাৎথা গিত্তা, “হাই, আনচিং চা·না-রিংনা, মুয়ানা আম্বুননি সালো আনচিং সিনুয়া।” না·সং দা·আ ব্রাংআবো। 33 ইন্দাকে আগানা দংআ, “নামগিজাগিবা রিপ্পেং নামগিবা মান্দিখোবা নামগিজা দাক্কা।” 34 ইনি গিম্মিন না·সং না·সংনি গিসিকখো মিকরাকেতবো আরো দা·আ পাপ দাক্কাবো। না·সংওনি সাবা সাবা ইসলখো হা·আইয়ান হা·আইজা; আংআ না·সংখো খ্রাচা·এতনা ইখো আগানিংআ। 35 সাবা আগান্নাবা দংআ, “সিগিবারাংখো বাদিকে দাক্কে থাংচাএতনুয়া? বাদাকা বে·এনখো রা·এ বিসং চাখাতনুয়া?” 36 না·আদে জাদা! না·আ আন·থাং জে বিৎচ্রিখো গি·আ উয়া সিজাওদে বিৎচ্রি চাজা। 37 নাং·নি গোগিবাওনি জে বিৎচ্রি হং·আ উখো না·আ গি·জা বাত্তেসা না·আ গি·ফ্রাকখোসান গি·আ-উয়া গমনি হং·খানা বা দিংথাং মামুং বিৎচ্রিনি হং·খানা। 38 ইন্দিবা আন·থাংনি হা·সিকা গিত্তান ইসল উয়া বিৎচ্রিনা বে·এন হ·ন্না। বিয়া রং·ফ্রাকফ্রাক বিৎচ্রিনান বে·এন হ·ন্না। 39 গিম্মিক বে·এনান আপসান হং·জা। মান্দিনি বে·এন দিংথাং, জিল্লানিরাংনি দিংথাং আরো না·থকনি দিংথাং হং·আ। 40 সালগিসাকো বাং·আ বে·এন দংআ, হা·গিলসাকোবা বে·এন বাং·এ দংআ, ইন্দিবা সালগিসাকনি বে·এনরাংনি চিং·আ আরো হা·গিলসাকনি বে·এনরাংনি চিং·আ দিংথাং হং·আ। 41 সাল, জাজং আরো আস্কিরাংনি চিং·আবা দিংথাং। আরোবা, চিং·আনি খ্রি আস্কি গি·সা গি·সাওনি দিংথাং। 42 সিগিবারাংনি থাংচাবা উগিত্তান দাক্কা। বে·এনখো গোপ্পানি জা·মানো উয়া নাসিয়া, ইন্দিবা উয়া বে·এনখো ইন্দাকফিল্লে থাংচাএতনুয়া জেআন মামুং সালোবা নাসিজানুয়া। 43 উখো মান্দিরা·গিজা হা·আও দাপ্পা, ইন্দিবা মান্দিরা·এ চাখাত্তেতনুয়া; বিলগ্রি অবস্থাও হা·আও দাপ্পা, ইন্দিবা বিলগ্মাংও চাখাত্তেতনুয়া; 44 ইন্দাকারি বে·এনখো হা·আও দাপ্পা, ইন্দিবা রামরাম হং·গিজা বে·এনখোদে চাখাত্তেতনুয়া। ইন্দাকারি বে·এন দংওদে রামরাম হং·গিজা বে·এনবা দংআ। 45 শাস্ত্রও ইন্দাকে চক্কা দংআ, “স্খাংগিবা মান্দি আদম জাংগিগ্মাংগিবা হং·জক।” আরো বন·চতগিবা আদম জাংগিখো হন·চাকগিবা গিসিক হং·জক। 46 ইন্দিবা জেআন রামরাম হং·গিজাগিবা উয়া স্খাংগিবা হং·জা, বাত্তেসা জেআন রামরামগিবা উয়ান স্খাংগিবা, উনি জা·মানো রামরাম হং·গিজাগিবা। স্খাংগিবা মান্দি হা·আওনি রি·বামিং-বিয়া হা·আওনিন থারিগিবা হং·আ; 47 ইন্দিবা গ্মিগিবা মান্দি সালগিওনি রি·বামিং। 48 হা·গিলসাকনি মান্দিরাং উয়া হা·আচা থারিগিবা মান্দি গিত্তা দাক্কা, আরো জেরাং সালগিচানা রি·য়াংনুয়া বিসং উয়া সালগিনি মান্দি গিত্তা দাক্কা। 49 জেদাক্কে আনচিং উয়া হা·আচা থারিগিবা মান্দি গিত্তা হং·জক উয়ানদাক্কে উয়া সালগিনি মান্দি গিত্তাবা হং·নুয়া। 50 জংআদারাং, আংআ জেখো আগানিংআ উয়া ইয়ান- মান্দি বিনি বে·এন-হান·চিখো রা·এ ইসলনি সংনকখো মান·রিকগিবা হং·না মান·জা। জেআন নাসিনুয়া উয়া ইন্দাকা মামুংনি মান·রিকগিবা হং·না মান·জা জেআন নাসিজানুয়া। 51 আংআ না·সংনা মিংসা নিং·থুয়া বিবিখো আগান্না, খিন্নাবো। আনচিং গিম্মিকান সিনুয়া ইন্দাকেদে হং·জা, ইন্দিবা দিংথাং ফিল·নুয়া। 52 দিকদিকসাওন, মিক্রোন মিকজাপনা স্খাং, বন·খামগিবা সালনি সিংগানি গা·ম্মামুং আনচিং গিম্মিকান দিংথাং ফিল·নুয়া। উয়া সিংগা গাম·জোকনো সিগিবারাং ইন্দাকনুয়া বিসং মামুং সালোবা নাসিজানুয়া; আরো আনচিংবা দিংথাং হং·নুয়া। 53 নাসিগিবাখো বা·রা গিত্তা দাক্কা ইন্দাকা মামুংখো গান্না নাংনুয়া জেআন মামুং সালোবা নাসিজানুয়া। আরো জেআন সিয়া বিখো ইন্দাকে গান্না নাংনুয়া জেআন মামুং সালোবা সিজা। 54 জেআন নাসিয়া আরো সিয়া, উরাং জেনসালো উয়ানদাক্কে দিংথাং হং·নুয়া উনো রংথালগিবা শাস্ত্রনি ইয়া খাৎথা চু·সকনুয়া, সিয়া ব·ন্নাংএ হাম্মা সকজক। 55 “ও সিয়া, নাং·নি হাম্মা বাও? ও সিয়া, নাং·নি বেরি বাও?” 56 সিয়ানি বেরি পাপ, আরো পাপনি বিলআন মোশিনি নিয়াম। 57 ইন্দিবা ইসলখো মিৎথেলা, আনচিংনি গিত্তেল যীশু খ্রীষ্টও বিয়া আনচিংনা হাম্মাখো হন·খামা। 58 উনি গিম্মিনান, আংনি খা·সাগিবা জংআদারাং, বিল্লাকে চাদেংবো, মামুংআন জেদাক্কে না·সংখো মজিমেতনা মান·জা। ফাংনান গিত্তেলনি কামনা আন·থাংখো চু·গিম্মিক দাক্কে ফাকওয়াতবো, মুয়ানা না·সং হা·আইয়া, বিনি কামনা না·সংনি গাম্মা বিথিগ্রি হং·জা।

১ করিন্থীয়রাংনা 16

1 দা·আও আংআ ইসলনি মান্দিরাংনা দাকচাকনা চান্দা গিল্লানি গিম্মিন আগানিংআ। গালাতিয়া হা·দকনি মন্ডলীরাংনি মান্দিরাংনা আংআ জেখো দাকখানা আগানা না·সংবা উখোন দাকবো। 2 না·সং গিম্মিকান না·সংনি মা·ন্না গিত্তা আনথিনি স্খাংগিবা সালো অকখিসা চিম্মংবো, জেদাক্কে আংনি রি·বানি জা·মানো চান্দা গিলনা নাংজা। 3 জেনসালো আংআ না·সংচা রি·বানুয়া উনসালো না·সংনি গিলগিবা উয়া হ·ন্নানিখো যিরূশালেমচা রা·আংনা না·সং জেরাংখো খ্রাগিবা চানচিনুয়া, আংআ চিঠি হ·ন্নে বিসংখো ওয়াত্তেতনুয়া। 4 আংনিবা রি·য়াংনা নাংনুয়া ইন্নে চানচিওদে বিসং আংমুং রি·য়াংনা মা·ন্নুয়া। 5 ম্যাসিডোনিয়া হা·দক হং·এ আংআ না·সংচা রি·বানুয়া, মুয়ানা আংআ ম্যাসিডোনিয়া গিত্তান রি·য়াংনুয়া। 6 না·সংমুং বাং·গিজা সালনা দংনাবা গ্মাং, বা সিন·খারিও না·সংমুংআন দংনুয়া, জেদাক্কে আংআ জেচাবা রি·য়াংআ না·সং আংনি রি·য়াংআনিখো থারিয়ে হ·ন্না মা·ন্না। 7 রি·য়াংমিত্তিংও আংআ দা·আও না·সংমুং গ্রংনা হাম·জা, মুয়ানা আংআ ইখো খা·দংআ, গিত্তেল হ·ন্নোদে আংআ না·সংমুং বাং·গিজা সালনা দংনুয়া। 8 ওয়াতচাংআনি সালোনা দিপ্পাৎ আংআ ইফিষওন দংনুয়া, 9 মুয়ানা জে কামও বিথিখো বাং·এ মা·ন্না উয়া কামনা মিংসা দাল·বিয়া চল আংচা রি·বাআ; ইনি হা·সেল দা·আবা বাং·আরাংএন চাংফেংআবা চাংফেংআ। 10 তীমথিয় রি·বাওদে নিবো জেদাক্কে বিয়া না·সংমুং খেনমানগিজা দংনা মা·ন্না, মুয়ানা জেগিত্তা আংআ গিত্তেলনি কামখো দাক্কিংআ বিয়াবা উগিত্তা দাক্কিংআ। 11 ইনি গিম্মিন দারাংবা বিখো চন্নিকজাখানা। না·সং বিখো থম·থমে ওয়াত্তেতবো, জেদাক্কে বিয়া আংচা রি·বানা মা·ন্না। বিয়া জংআদারাংমুং রি·বানুয়া ইন্নে আংআ সেংসোএ দংআ। 12 আংআ দা·আও জং আপল্লোনি গিম্মিন আগানিংআ। আংআ বিখো মল·মলবিয়ামিং জেদাক্কে বিয়া জংআদারাংমুং না·সংচা রি·য়াংআ, ইন্দিবা দা·আও বিয়া মামুং দাক্কেবা রি·য়াংনা হাম·জাজক। জা·মানো চল মান·জোকনোন বিয়া রি·য়াংনুয়া। 13 না·সং সিমসাকবো, বিবিরা·আও খেম·খেম দংবো, খেনমানগিজাগিবা আরো বিল্লাকগিবা হং·বো। 14 না·সং জেখোন দাকবো খা·সানি গিসিকখো রা·এন দাকবো। 15 জংআদারাং, না·সংদে হা·আইয়া, স্তিফাননি নকনি মান্দিরাংআন আখায়া হা·দকনি স্খাংগিবা বিবিরা·গিবা হং·আ। ইসলনি মান্দিরাংনা দাকচাকে হ·ন্না বিসং আন·থাংথাংখো ফাকওয়াতজক। 16 উনি গিম্মিন ইন্দাকগিবা মান্দিরাংনি নিং·আও বাম্মে দংনা খু·রাচাকনা আংআ না·সংচা মল·মলিংজক। আরো সাকগিপ্পিনরাং জেরাং ইন্দাকা কামখো দাকনা রি·বাএ নেং·বিয়ানি কামখো দাক্কা বিসংনি নিং·আও বাম্মে দংনাবা খু·রাচাকবো। 17 স্তিফান, ফর্তুনাত আরো আখায়িক রি·বাজক ইন্নে আংআ নাম্মেন খুসি হং·জক, মুয়ানা না·সংনি দংজাএ চু·ওংগিজাখো বিসংআন চু·ওংএতজক। 18 বিসং আংনি আরো না·সংনি খা·থংখো খা·দংএতজক। না·সং ইন্দাকগিবা মান্দিরাংখো মান্দিরা·বো। 19 এশিয়া হা·দকনি মন্ডলীরাংনি মান্দিরাং না·সংখো সালাম হ·ন্নিংআ। আকিলা, প্রিষ্কিল্লা আরো বিসংনি নকনি মন্ডলীরাংনি মান্দিরাং গিত্তেলনি খা·সামুং না·সংখো সালাম হ·ন্নিংআ। 20 গিম্মিক জংআদারাংবা না·সংখো সালাম হ·ন্নিংআ। খা·সানি গিসিকখো রা·এ না·সং সাকসা সাকগিপ্পিননা সালাম হন·বো। 21 আংআ পৌল জাকথাংচা ইয়া সালামনি খাৎথাখো চকজক। 22 সাবা গিত্তেলনা খা·সাজাওদে বিনি সাক্কাও শাপ গা·আকখানা। আনচিংনি গিত্তেল রি·বাখানা। 23 গিত্তেলনি ফাত্তিয়া না·সংমুং দংখানা। 24 না·সং গিম্মিকনান খ্রীষ্টও আংনি খা·সা দংখানা।

২ করিন্থীয়রাংনা 1

1 আংআ পৌল ইসলনি হা·সিকাচা খ্রীষ্ট যীশুনি সাকসা ওয়াত্তেতা হং·জক। আংআ আরো আনচিংনি বিবিরা·গিবা জং তীমথিয় করিন্থ সংজিলমানি ইসলনি মন্ডলী আরো আখায়া হা·দকনি ইসলনি গিম্মিক মান্দিরাংনা ইয়া চিঠিখো চক্কিংজক। 2 আনচিংনি ফাগিবা ইসল আরো আনচিংনি গিত্তেল যীশু খ্রীষ্ট না·সংনা খা·সাচাকখানা আরো থম·থমাখো হন·খানা। 3 আনচিংনি গিত্তেল যীশু খ্রীষ্টনি ইসল আরো ফাগিবানি রাসং হং·খানা। বিয়ান খা·সাচাকগিবা ফাগিবা হং·আ; বিয়ান গিম্মিক খা·নাম্মানি ইসল হং·আ। 4 চিংনি দুক গিম্মিকও বিয়া খা·নাম্মেতাখো হ·ন্না, জেদাক্কে বিচানিখো মান·গিবা খা·নাম্মেতাখো চিংআ সাকগিপ্পিনরাংনি দুক মান·মিত্তিংও হ·ন্না মা·ন্না। 5 খ্রীষ্ট গিত্তা দাক্কে চিংআ জেদাক্কে বাং·এ দুকখো চাকচিকিংজক উয়ানদাক্কে বিগিত্তা খা·নাম্মেতাখোবা মা·ন্নিংজক। 6 চিংআ জে দুকখো চাক্কা উখো না·সংখো খা·নাম্মেতনা আরো জক্কেৎনা মিকসংএন চাক্কা। জে খা·নাম্মেতাখো চিংআ মা·ন্না উখো না·সংখো খা·নাম্মেতনা মিকসংএন মা·ন্না। জেনসালো না·সং চিং গিত্তা দাক্কে আপসান দুকখো চাকনুয়া উনো ইয়া খা·নাম্মা উয়া দুকরাংখো চাকচিকে চাকনা দাকচাকনুয়া। 7 না·সংনি গিম্মিন চিংনি বিবিরা·আ খেম·খেম দংআ, মুয়ানা না·সং জেদাক্কে চিংনি দুকরাংখো মান·ফাগিবা হং·আ উয়ানদাক্কে চিংনি খা·নাম্মেতাখোবা মান·ফাগিবা হং·আ। 8 এশিয়া হা·দকো চিংআ জে দুকও গা·আকামিং, আংআ হা·ম্মা উখো জেদাক্কে না·সং হা·আইনা মা·ন্না। উয়ো ইন্দাকে চাকনা হামফিলগিজা সিনজেতা চিংনি সাক্কাও হং·আমিং জেনি হা·সেল চিংআ থাংএ দংনা খা·দংজাজকমিং। 9 চিংআ চানচিয়ামিং, দা·আওদে চিংআ সিনাজকান। ইন্দিবা চিংনি ইয়া অবস্থা ইনি গিম্মিনান হং·আমিং জেদাক্কে চিংআ আন·থাংথাংনি সাক্কাও ফাংচাকগিজা ইসল, জেআন সিগিবারাংখো থাংচাএতা, বিনি সাক্কাও ফাংচাকা। 10 বিল্লংগিবা সিয়াওনি বিয়া চিংখো জক্কেতামিং আরো দা·আওবা জক্কেতিংজক। চিংআ বিনি সাক্কাও ইখো খা·দংনা, বিয়া ফাংনান চিংখো জক্কেতনুয়া। 11 আরো না·সংবা চিংনা বি·এ দাকচাকবো। ইন্দাকোদে বাং·আরাংনি বি·আনি হা·সেল জে ফাত্তিয়াখো চিংআ মা·ন্নুয়া উনি গিম্মিন চিংনা বাং·আরাংএন ইসলখো মিৎথেলনুয়া। 12 জেনি হা·সেল চিংআ রাসং দাক্কা উয়া ইয়ান-চিংনি চানচিয়া ইখো সাক্ষি হ·ন্নিংআ, ইসলনি হন·গিবা রংথালাও আরো স্রংআও চিংআ গিম্মিক মান্দিনি গিসেপো মংসংদে না·সংনি গিসেপো জাংগি মিৎথাংজক। উয়া জাংগিখো চিংআ হা·গিলসাকনি হা·আইয়াও মিৎথাংএতজা বাত্তেসা ইসলনি খা·সাচাক্কাও মিৎথাংএতজক। 13 না·সং জেখো পড়িনা আরো হা·আইনা মা·ন্না উনা আগ্রে মামুংখোবা চিংআ না·সংচা চকজাংআ। আংআ ইন্দাকে খা·দংআ, জেদাক্কে না·সং অকখিসা দাক্কে চিংখো হা·আইনা মান·জক, উয়ানদাক্কে চু·গিম্মিক দাক্কে হা·আইনা মা·ন্নুয়া, গিত্তেল যীশুনি রি·বানি সালো না·সং জেদাক্কে চিংনি রাসং হং·নুয়া উয়ানদাক্কে চিংআবা না·সংনি রাসং হং·নুয়া। 15 ইয়া খাৎথাখো বিবি হা·আইএ আংআ না·সংচা স্খাংআন রি·য়াংনুয়া ইন্নে থিক দাক্কামিং, জেদাক্কে না·সং রাং·গ্মি ফাত্তিয়াখো মা·ন্না। 16 আংআ থিক দাক্কামিং, ম্যাসিডোনিয়াচা রি·য়াংমিত্তিংও না·সংমুং গ্রংগ্রিকে রি·য়াংনুয়া আরো ম্যাসিডোনিয়াওনি দা·আবা না·সংচান রি·বাফিলনুয়া, জেদাক্কে না·সং আংখো যিহূদিয়াচানা ওয়াত্তেতনা দাকচাকনা মা·ন্না। 17 আংআ ইখো হাংজাং থিক দাক্কামিং ইন্নে না·সং চানচিয়ামা? জেদাক্কে রামরাম মান্দি আপসান সময়ও “হো·এ” ইন্নে আগানা দা·আবা “হং·জা” ইন্নে আগানা, উয়ানদাক্কে আংআ মামুংখো থিক দাক্কামা? 18 ইসল বিবিরা·না খ্রাগিবা হং·আ, জেদাক্কে ইয়া খাৎথা বিবি উগিত্তান ইয়াবা বিবি হং·আ, না·সংচা চিংনি খাৎথা আপসান সময়ও “হো·এ” আরো “হং·জা” ইন্নে আগানানি হং·জা। 19 জেনি খাৎথাখো সীলবান, তীমথিয় আরো আংআ না·সংচা আগানফ্রাকজক উয়া যীশু খ্রীষ্ট, ইসলনি দেফান্থি, আপসান সময়ও “হো·এ” আরো “হং·জা” দাকগিবা হং·জা; 20 বিয়া ফাংনান “হো·এ” হং·আ। ইসলনি গিম্মিক খু·রাচাক্কা খ্রীষ্টও “হো·এ” ইন্নে আগানা। উনি গিম্মিন ইসলনি রাসংনা খ্রীষ্টও আনচিং “আমেন” ইন্নে আগানা। 21 খ্রীষ্টমুং জেআন চিংখো আরো না·সংখো নাংরিমেতি রাক্কে চাদেংএতি দন্না বিয়া ইসল হং·আ। বিয়ান আনচিংখো তেল সিতজক, 22 আগানস্খাওদে বিনি আন·থাংনি গাম গিত্তা বিয়া চিংখো সীলমোহর সু·এ দনজক; আরো জেরাংখো চিংনা হ·ন্নুয়া উনি স্খাংগিবা বাক গিত্তা বিয়া চিংনি খা·থংও গিসিক রংথালগিবাখো হন·জক। 23 আংনি জাংগিচা মিকচেতে আংআ ইসলখো সাক্ষি দন্নে আগানিংআ, শাস্তিওনি না·সংখো জক্কেৎনান আংআ করিন্থচা রি·য়াংফিলজাজক। 24 নকগিবা গিত্তা হং·এ চিংআ না·সংনি বিবিরা·আও জাক হ·ন্নিংআ ইন্দাকেদে হং·জা, বাত্তেসা না·সং জেদাক্কে হান·সেংআখো মা·ন্না উনি গিম্মিনান না·সংমুং কাম দাক্কিংআ, মুয়ানা বিবিরা·আও না·সং রাক্কে চাদেংএ দংআ।

২ করিন্থীয়রাংনা 2

1 উনি গিম্মিন আংআ গিসিকথাংও ইখো থিক দাকজক, না·সংখো দা·আবা দুক হ·ন্না ইন্নে না·সংচা রি·য়াংজানুয়া, 2 মুয়ানা না·সংখোন আংআ দুক হ·ন্নোদে আংখো সা হান·সেংএতনুয়া? জেরাংখো আংআ দুক হ·ন্নুয়া উয়া না·সংনা আগ্রে আংখো হান·সেংএতনা দারাংবা দংজা। 3 জেনসালো আংআ রি·য়াংনুয়া উনো জেরাংচানিখো আংআ হান·সেংএতাখো মা·ন্না খাৎথা দংআ বিসংচাখো জেদাক্কে দুক মান·জা উনি গিম্মিনান আংআ ইয়া খাৎথাখো চক্কামিং। না·সংনি সাক্কাও আংনি ইন্দাকা বিবিরা·আ দংআ, আংনি খুসি হং·আও না·সংবা খুসি হং·আ। 4 নাম্মেন দুক মা·ন্নে আরো গিসিক সা·দিকে মিকচি গাল্লে আংআ না·সংচা চক্কামিং। না·সংখো দুক হ·ন্না ইন্নে আংআ চকজা, বাত্তেসা না·সংনা আংনি খা·সাআ বাসিক উখো হা·আইএতনান চক্কামিং। 5 সাবা আংখো দুক হ·ন্নে দংওদে রাং·দাত্তে খু·সুক আগানগিজা ইখোসান আগান্না, বিয়া আংখোসান দুক হন·জা, ইন্দিবা না·সং গিম্মিকখো অকখিসাদে দুক হ·ন্না। 6 না·সংনি ফাকমা মান্দিরাং আপসান হং·এ বিনা জে শাস্তিখো হন·জক উয়ান বিনা চু·ওংআ। 7 ইনাবাত্তে না·সং দা·আও বিখো ক্ষেমা দাকবো আরো খা·নাম্মেতবো, জেদাক্কে বিয়া দুক মান·বিএ খা·দংআগ্রি হং·জা। 8 উনি গিম্মিন মংসংবাত্তে না·সংখো মল·মলিংআ, বিনা না·সংনি খা·সাখো ফিন্নিকবো। 9 আংআ থিক্ষেলে নিনা হা·ম্মামিং না·সং গিম্মিকনি বিদিংও বাম্মে দংআমা, আরো ইনি গিম্মিনান আংআ না·সংচা চক্কামিং। 10 মামুংনি গিম্মিন না·সং সাখোবা ক্ষেমা দাক্কোদে আংআবা বিখো ক্ষেমা দাক্কা। আরো বিবিন আংআ মামুংখো ক্ষেমা দাক্কে দংওদে খ্রীষ্টনি মিকখাংও না·সংনি গিম্মিনান উখো দাকজক, 11 জেদাক্কে শয়তান আনচিংনি সাক্কাও মামুং দাকনা চলখো মান·জা। বিনি নামগিজা চানচিয়ানি খাৎথাখো আনচিং হা·আইজা ইন্দাকেদে হং·জা। 12 আংআ ত্রোয়া সংজিলমাও খ্রীষ্টনি গিম্মিন নাম্মা খাৎথাখো আগানফ্রাকনা রি·য়াংএ নিকজক, উয়ো কাম দাকনা ইন্নে গিত্তেল আংনা গি·সা চল দাক্কে হন·জক। 13 ইন্দাকোবা গিসিকথাংও আংআ থম·থমাখো মান·জা, মুয়ানা আংনি বিবিরা·গিবা জং তীত উয়ো দংজামিং। উনি গিম্মিন ত্রোয়ানি মান্দিরাংখো ওয়াত্তে আংআ ম্যাসিডোনিয়াচানা রি·য়াংআরিজক। 14 ইসলখো মিৎথেলা, আনচিং খ্রীষ্টমুং নাংরিমজক ইন্নে ইসল বিনি হাম্মে-রি·য়াও ফাংনান আনচিংখো রি·দিলা। খ্রীষ্টখো হা·আইয়া সিম্মিলগিবা বিবা গিত্তা হং·আ। ইসল বিনি হাম্মে-রি·য়াও উয়া সিম্মিলগিবা বিবাখো চিং গিত্তা হা·দাম গিম্মিকো গিপ্পাংএতা। 15 জেরাং জক্কেতাখো মা·ন্নিংজক আরো জেরাং ব·ন্নিংজক বিসংচা ইসলনা চাক্কে চিংআ বিবিন খ্রীষ্টনি সিম্মিলা বিবা গিত্তা হং·আ। 16 ইন্দিবা জেরাং ব·ন্নিংজক বিসংচা চিংনি সিম্মিলা বিবা হং·জক সিয়ানি বিবা, জেনি বিথি ফাংনাজলনি সিয়া; আরো জেরাং জক্কেতাখো মা·ন্নিংজক বিসংচা চিংআ জাংগিনি সিম্মিলা বিবা, জেনি বিথি ফাংনাজলনি জাংগি। ইয়া কামনা সা খ্র্রাগিবা হং·আ? 17 আন·থাংথাংনি নামগ্মিনা গিম্মিন জেরাং ইসলনি খাৎথাখো রা·এ বাদিংআ চিংআ উয়ানদাকগিবা মান্দিরাং গিত্তা হং·জা; বাত্তেসা খ্রীষ্টমুং নাংরিমে ইসলনি মিকখাংও ইসলনি ওয়াত্তেতা মান্দি গিত্তা চিংআ খাকখেৎ খা·থংওনি খাৎথা আগানা।

২ করিন্থীয়রাংনা 3

1 চিংআ ইরাংখো আগানে দা·আবা আন·থাংথাংখো মিৎথেলনা হা·বাচেংজকমা? সানিবা সানিবা জেদাক্কে নাংআ, উয়ানদাক্কে চিংনিবা না·সংচা বা না·সংচানিখো মিৎথেলানি চিঠিখো নাংইংজকমা? মামুং দাক্কেবা হং·জা। 2 না·সংআন চিংনি খা·থংও চকগিবা চিঠি। উয়া চিঠিনি খাৎথাখো গিম্মিকান হা·আইয়া আরো গিম্মিকান উখো পড়িজক। 3 খ্রীষ্টনি চকগিবা চিঠি আরো চিংনি কামনি বিথি না·সংআন হং·আ উখো নাম্মে থাল্লে নিকনা মা·ন্না। ইয়া চিঠিখো কালিচা চকজা বাত্তেসা থাংগিবা ইসলনি গিসিকচান চক্কা। ইখো রং·থি সাক্কাও চকজা, মান্দিনি খা·থং সাক্কাওন চক্কা। 4 খ্র্রীষ্টচা ইসলনি সাক্কাও চিংনি ইন্দাকে বিবিরা·বিআনি হং·জক। 5 ইন্দিবা চিংনি আন·থাংথাংনি মামুং দাক্কানি বিল দংআ ইন্নে চিংআ দাবি দাকনা মা·ন্না ইন্দাকেদে হং·জা, বাত্তেসা চিংনি উয়া বিল ইসলওনিন রি·বাআ। 6 গি·সা গিত্তাল খু·রাচাক্কাখো হা·আইএতনা বিয়ান চিংখো খ্রাগিবা দাকজক। ইয়া খু·রাচাক্কা গিম্মিকখোন মানিয়ানি বিদিং হং·জা, ইন্দিবা গিসিক রংথালগিবানি রি·দিলাও খা·থংনি বাম্মানি বিদিং হং·আ; মুয়ানা নিয়াম সিয়াখো রা·বাআ, ইন্দিবা গিসিক রংথালগিবা জাংগিখো হ·ন্না। 7 রং·থিও চকগিবা জে নিয়ামনি হা·সেল সিয়া রি·বাআ উয়া নিয়ামখো হ·ন্নানি সালো ইসলনি রাসং ফারাকামিং। উনি গিম্মিন মোশিনি মিকখাংবা ইসলনি রাসংও থেং·সুয়ামিং। উয়া থেং·সুয়া খা·সিনসিন ব·ন্নাংওবা ইস্রায়েলনি মান্দিরাং মোশিনি মিকখাংচাবাকা নিয়েতনা মান·জাজক। 8 ইনি বিথি ইন্দাকফিল্লে রাসং গাপগিবা হং·ওদে, গিসিক রংথালগিবানি কামনি বিথি আরোবা রাসং গাপগিবা হং·জানুয়ামা? 9 জে নিয়ামচা মান্দিখো দোসি ইন্নে থিক দাক্কা উনি কাম ইন্দাকফিল্লে রাসং গাপগিবা হং·ওদে, জে নিয়ামচা মান্দিখো দোসগ্রি ইন্নে রা·চাকা উনি কাম আরোবা বাসিক বাং·এ রাসং গাপগিবা হং·আ! 10 আরো বিবিন, জেআন স্খাংও রাসংনি হং·আমিং, দা·আও উনি রাসং দংজাজক ইন্নে আগানোন চলিয়া, মুয়ানা উনাবাত্তে দা·আওনি নিয়ামনি রাসং আরোবা বাং·আ। 11 জেআন ব·ন্নাংইংজক উয়া ইন্দাকফিল্লে রাসং গাপগিবা হং·ওদে জেআন ফাংনাজলনি দংনুয়া উয়া আরোবা বাসিক বাং·এ রাসং গাপগিবা হং·আ! 12 চিংনি ইন্দাকে খা·দংআ দংআ ইন্নেন চিংআ ফি·ফ্রাকে খাৎথা আগানা। 13 চিংআ মোশি গিত্তা দাকজা, মুয়ানা মোশি বিনি মিকখাংখো ফিনদাপামিং জেদাক্কোদে বিনি মিকখাংনি থেং·সুয়া কমিয়াখো ইস্রায়েলরাং নিকনা মান·জা। 14 ইন্দিবা উয়া মান্দিরাংনি গিসিক রাকজকমিং। উনি গিম্মিন দা·আওবা উয়া গিৎচাম খু·রাচাক্কাখো পড়িজোকনো বিসংনি খা·থংনি সাক্কাও উয়ানদাকগিবা পর্দা দংআরিয়ান, মুয়ানা খ্রীষ্টমুং নাংরিমে দংওসান উয়া পর্দা জিত্তাংআ। 15 ইন্দিবা দা·আওবা মোশিনি নিয়ামনি খি·তাপরাংখো পড়িয়ানি সময়ও ইস্রায়েলনি মান্দিরাংনি খা·থং উয়া বা·রা ফেং·গিবাও ফিনদাপা দংআ। 16 ইন্দিবা বিসংওনি সাবা গিত্তেলচানা ফি·ল্লোদে উয়া পর্দা জিত্তাংআ। 17 ইয়া গিত্তেলান গিসিক রংথালগিবা হংআ; আরো জেওন গিত্তেলনি গিসিক উয়োন জাকগিত্তেল হং·আ। 18 ইনি গিম্মিন আনচিং জেরাং খ্রীষ্টমুং নাংরিমজক, আনচিং গিম্মিকান মিকখাং ফিনদাপগিজা জানিরাও বিমাংখো নিআ গিত্তা গিত্তেলনি রাসংখো নিক্কেন আন·থাংথাংবা রাসংও দাল·রোরোবাএ দিংথাং হং·ফিলে বিগিত্তান হং·ইংজক। গিত্তেলনি, আগানস্খাওদে গিসিক রংথালগিবানি বিলচান ইন্দাকে হং·আ।

২ করিন্থীয়রাংনা 4

1 ইয়া নিয়ামখো হা·আইএতানি কামখো খা·সাচাক্কে ইসল চিংনা হন·জক ইন্নে চিংআ খা·দংআগ্রি হং·জা। 2 মান্দিরাং থুম্মুয়ে খ্রাচা·আনি জে কামরাংখো দাক্কা চিংআ উরাংখো রেকথেক দাকজা। চিংআ কামরাংও বু·আনি মামুংখো দাকজা, ইসলনি খাৎথাও মামুং বু·আনিখো দনজা। বাত্তেসা চিংআ ইসলনি বিবিখো ফারাকে বিনি মিকখাংওন মান্দি গিম্মিকনি গিসিকচা আন·থাংথাংখো রা·চাকনা খ্রাগিবা দাক্কে ফিন্নিকা। 3 চিংনি নাম্মা খাৎথা ফিনদাপে দংওদে জেরাং ব·ন্নাংইংজক বিসংচান ফিনদাপে দংআ। 4 বিবিরা·গিজাগিবা মান্দিরাংনি গিসিকখো ইয়া চাসংনি মিত্তে মিকগ্রি দাক্কে দনজক জেদাক্কে বিসং নাম্মা খাৎথানি সেং·আখো নিকনা মান·জা। ইয়া নাম্মা খাৎথাও খ্রীষ্টনি রাসং ফারাকজক, আরো ইয়া খ্রীষ্টন ইসল চাচা দাক্কা। 5 চিংআদে আন·থাংথাংনি গিম্মিন আগানফ্রাকজা, বাত্তেসা ইন্দাকে আগানফ্রাকা, যীশু খ্রীষ্টন গিত্তেল আরো যীশুনি গিম্মিনান চিংআ না·সংনি নকখল হং·জক। 6 চিংআ ইয়া খাৎথাখো আগানফ্রাকিংজক, মুয়ানা জেআন আগানামিং, “আন্দালাওনি সেং·খানা,” উয়া ইসলান চিংনি খা·থংও চিং·আমিং, জেদাক্কে বিনি রাসংখো হা·আইয়ানি সেং·আ ফারাকা। ইয়া রাসংআন খীষ্টনি মিকখাংও দংআ। 7 ইন্দিবা ইয়া গামখো হা·আনি দনচাক্রাও দনজক, আরো চিংআন উয়া হা·আনি দনচাক্রা। হা·আনি দনচাক্রাও উখো দন্না জেদাক্কোদে মান্দিরাং হা·আইনা মা·ন্না, ইন্দাকগিবা রামরাম হং·গিজা বিল আনচিংনি আন·থাংওনি রি·বাজা বাত্তেসা ইসলওনিন রি·বাআ। 8 গিম্মিকচানিন চিংআ সিনজেতাখো মা·ন্নিংজক, ইন্দাকোবা চিংআ গা·আকখুজা। নাওয়াং চাওবা চিংআ খা·দংআগ্রি হং·খুজা; 9 গিচ্চিয়েতাখো মা·ন্নোবা ইসল চিংখো ওয়াতগালজা; হা·আও গোস্থাপোবা চিংআ ব·ন্নাংজা। 10 চিংআ ফাংনান গিত্তেল যীশুনি সিয়াখো চিংনি বে·এনো রা·বিতে রি·ইংআ, জেদাক্কে চিংনি বে·এনো যীশুনি জাংগিবা ফারাকা। 11 চিংআ জেরাং থাংএ দংআ চিংখো ফাংনান যীশুনি গান্দা সিয়ানি জাক্কো ফাকওয়াতে হ·ন্নিংজক, জেদাক্কোদে সিয়ানি নিং·আও দংগিবা চিংনি বে·এনো যীশুনি জাংগিবা ফারাকা। 12 উনি গান্দা চিংও সিয়া কাম দাক্কিংজক ইন্দিবা না·সংও জাংগি কাম দাক্কিংজক। 13 রংথালগিবা শাস্ত্রও চক্কা দংআ, “আংআ বিবিরা·জক ইন্নেন খু·সুক আগানজক।” ইন্দাকে আপসানখোন বিবিরা·আ ইন্নে চিংআবা খু·সুক আগানিংজক, 14 মুয়ানা চিংআ হা·আইয়া, জেআন গিত্তেল যীশুখো থাংএতামিং বিয়া বিমুং চিংখোবা থাংএতনুয়া আরো না·সংমুং চিংখোবা আন·থাংনি মিকখাংও চাদেংএতনুয়া। 15 গিম্মিকান না·সংনি নাম্মানান হং·জক, জেদাক্কে ইসলনি জে খা·সাচাক্কাখো বাং·আ মান্দিরাংনা হন·জক উয়া খা·সাচাক্কানা বাং·আরাংএন ইসলখো আরোবা বাং·এ মিৎথেলা আরো ইন্দাকে ইসলনি রাসং হং·আ। 16 ইনি গান্দা চিংআ খা·দংআগ্রি হং·জা। চিংনি হা·ফালনি বে·এন ব·ন্নাংওবা চিংনি নিং·আনি মান্দি সালনি সাল গিত্তাল হং·বারিকরিকিংআ। 17 দা·আও চিংআ বাং·গিজা সালনা অকখিসা মা·মাং জে দুকখো চাক্কিংজক উনি হা·সেল চিংআ ফাংনাজলনি রাসংখো মা·ন্নুয়া। ইয়া রাসং ইন্দাকেন বাং·আ জেখো থোনা মান·জা। 18 জেখো নিকনা মা·ন্না আনচিং উখো নিজাংআ, বাত্তেসা জেখো নিকজা উখোন নিইংজক। জেখো নিক্কা উয়া বাং·গিজা সালনাসান, ইন্দিবা জেখো নিকজাংআ উয়াদে ফাংনাজলনি।

২ করিন্থীয়রাংনা 5

1 চিংআ ইয়া খাৎথাখো হা·আইয়া, ইয়া হা·গিলসাকো চিংআ জে তাম্বুও দংআ, আগানস্খাওদে জে বিলগ্রি বে·এনো চিংআ দংআ উয়া নাসিয়োবা ইসলনি হন·গিবা গি·সা নক চিংনি দংআ। ইয়া নকখো মান্দিনি জাকচা থারিজা, সালগিও উয়া ফাংনাজলনান দংআ। 2 ইয়া বে·এনো দংমিত্তিংও চিংআ রাং·স্ফিতিংআ আরো খা·থং গিম্মিকচা হা·ম্মিংআ জেদাক্কে সালগিনি উয়া গিত্তাল বে·এনচা চিংখো ফিনদাপা; 3 মুয়ানা ইয়া খাৎথা বিবি, উয়া বে·এনখো মান·জোকনো নিকনা মা·ন্নুয়া চিংআ খমলং হং·জা। 4 বিবিন ইয়া বিলগ্রি বে·এনো দংএন চিংআ রিৎজিমানি হা·সেল রাং·স্ফিতিংআ। চিংআ বে·এনগ্রি হং·না হা·ম্মা ইন্দাকেদে হং·জা, বাত্তেসা উয়া গিত্তাল বে·এনচা ফিনদাপাখো হা·ম্মা জেদাক্কে সিয়ানি নিং·আও দংগিবা চিংনি বে·এন ফাংনাজলনা থাংএ দংগিবা বে·এনো দিংথাং ফি·ল্লাংআ। 5 ইনি গিম্মিনান ইসল চিংখো থারিজক আরো উনি স্খাংগিবা বাক গিত্তা গিসিক রংথালগিবাখো বিয়া চিংনা হন·জক। 6 ইনি গিম্মিন মামুং সালোবা চিংআ খেনজা, আরো চিংআ ইখো হা·আইনা মা·ন্নিংজক, জেওনা দিপ্পাৎ ইয়া বে·এননি নকও চিংআ দংনুয়া উয়োনা দিপ্পাৎ গিত্তেলওনি চিংআ চে·ল্লে দংনুয়া। 7 জেখো নিক্কিংআ চিংআ উচা রি·জা, বাত্তেসা বিবিরা·আচা রি·য়া। 8 চিংআ খেনজা আরো চিংআ বে·এননি নকওনি চে·ল্লে দংএ গিত্তেলমুং দংআখোন নাম্মা ইন্নে চানচিয়া। 9 উনি গিম্মিন চিংআ বে·এননি নকও দং বা দা·আ দং, চিংনি মিকসংআ হং·জক গিত্তেলখো খুসি দাক্কা। 10 মুয়ানা খ্রীষ্টনি বিচালনি মিকখাংও আনচিংনি গিম্মিকখো ফারাকনুয়া, জেদাক্কে আনচিং গিম্মিকান ইয়া বে·এনো দংমিত্তিংও জেখো দাকজক উয়া নামখানা বা নামজাখানা উনা খ্রাএ উনি মা·ন্নানিখো মা·ন্না। 11 গিত্তেলনা খেন্না ইন্নে চিংআ আন·থাংথাংনি গিম্মিন মান্দিনি গিসিকো বিবিরা·এতনা হা·ম্মা। চিংআ জেগিত্তা দাক্কা, উখো ইসল নাম্মে থাল্লেন হা·আইয়া আরো না·সংনি গিসিকোবা উয়া থাল্লা ইন্নে আংআ খা·দংআ। 12 ইনি গিম্মিন চিংআ না·সংচা দা·আবা আন·থাংথাংখো মিৎথেলজা বাত্তেসা চিংখো রা·এ না·সংনি রাসং দাক্কানি হা·সেলখো ফিন্নিকিংআ, জেদাক্কে খা·থংখো নিগিজা জেরাং হা·ফালনি বিমাংখো নিএ রাসং দাক্কা বিসংনা না·সং আগানচাকনা মা·ন্না। 13 চিংআ খোরে চাএ দংওদে ইসলনি গিম্মিনান চাজক, আরো নাম্মা গিসিকো দংওদে না·সংনি গিম্মিনান দংজক। 14 খ্রীষ্টনি খা·সান চিংখো বাম্মেতে দন্নে রি·দিলিংআ, মুয়ানা ইখো চিংআ হা·আইনা মান·জকান, গিম্মিকনা হং·এ সাকসা সিজক, আরো উনি গিম্মিন গিম্মিকান সিজক। 15 বিয়া গিম্মিকনি হং·এ সিয়ামিং জেদাক্কে থাংএ দংগিবারাং আন·থাংথাংনা থাংএ দংজা, বাত্তেসা জেআন বিসংনা সিয়ামিং আরো থাংচাফিলজক বিনান থাংএ দংআ। 16 উনি গিম্মিন দা·আওনি দিপ্পাৎ চিংআ মান্দিখো বিনি হা·ফালচাখো নিএ বিচাল দাকজা। খ্রীষ্টখোদে চিংআ স্খাং উয়ানদাক্কেন বিচাল দাক্কামিং, ইন্দিবা দা·আওদে ইন্দাকে দাকজাজক। 17 সাবা খ্রীষ্টমুং নাংরিমে দংওদে বিয়া গিত্তাল দাক্কে আৎচিজক। বিনি গিৎচাম গিম্মিক মুচ্চিয়ে গিম্মিক গিত্তাল হং·জক। 18 ইরাং ইসলওনিন হং·আ। খ্রীষ্টচা বিয়া আন·থাংমুং চিংখো নাংরিমগ্র্রিকেতজক, আরো বিমুং গিপ্পিনরাংখো নাংরিমগ্রিকেতানি কামখো চিংনা হন·জক। 19 ইনি অর্থ হং·জক, ইসল মান্দিনি পাপখো রিম·গিজা খ্রীষ্টচা আন·থাংমুং মান্দিখো নাংরিমগ্রিকেতিংআমিং, আরো উয়া নাংরিমগ্রিকেতানি খবলখো হা·আইএতানি কামখো বিয়া চিংনা হন·জক। 20 উনি গিম্মিনান চিংআ খ্রীষ্টনি খবল হন·গিবা গিত্তা বিনি হং·এ খাৎথা আগানিংজক। আসলদে ইসল আন·থাংআন চিংনি গিসেপো মান্দিরাংচা মল·মলজক। উনি গিম্মিন খ্রীষ্টনি হং·এ চিংআ মল·মলিংজক, “না·সং ইসলমুং নাংরিমগ্রিকবো।” 21 যীশু খ্রীষ্টও মামুং পাপ দংজামিং; ইন্দিবা ইসল আনচিংনি পাপখো বিনি সাক্কাও হ·ন্নে বিখোন পাপনি হা·দামও চাদেংএতজক, জেদাক্কে খ্রীষ্টমুং নাংরিমে দংআনি হা·সেল ইসলনি রংথালা আনচিংনি রংথালা হং·আ।

২ করিন্থীয়রাংনা 6

1 ইসলমুং কাম রিম·ফাগিবা হং·এ চিংআ না·সংখো ইন্দাকে মল·মলিংজক, ইসলনি খা·সাচাক্কাখো মান·জক ইন্নে না·সং উখো দা·আ নাসি-নাদা দাক্কেতাবো। 2 ইসল রংথালগিবা শাস্ত্রও আগানজক, “খ্রাগিবা সময়ও আংআ নাং·নি খাৎথাখো খিন্নাজক আরো পাপওনি জক্কানি সালো আংআ নাং·না দাকচাকজক।” নিবো, দা·আওন খ্রাগিবা সময়, দা·আলান জক্কানি সাল। 3 খ্রীষ্টনি গিম্মিন চিংআ জে কামখো দাক্কা উখো জিজাখানা ইন্নে চিংআ ইন্দাকগিবা মামুংখোবা দাকজা জেনি হা·সেল দারাংবা গিসিকো চাংফেংআখো মান·জা। 4 উনা বাত্তে গিম্মিকোন ইসলনা দাকচাকে হন·গিবা ইন্নে চিংআ আন·থাংথাংখো ফিন্নিকা। গিচ্চিয়ারাংও, হং·সিয়ারাংও আরো দুকরাংও বাং·এ চাকচিকে চিংআ ইখোন ফিন্নিকিংজক। 5 বাসিক রাং·সা চিংখো দকজক-সিকজক, বাসিক রাং·সা জেলো দনজক, বাসিক দক্কা-সু·আ চিংনি সাক্কা গিত্তা রি·য়াংজক, বাসিক নেং·বিএ কাম দাকজক, বাসিক থুগিজা ওয়ালখো সেং·এতজক আরো বাসিক রাং·সা চা·গিজা দংজক। 6 ইনাআগ্রে চিংনি খাকখেৎ জাংগিচা, চিংনি হা·আইয়াচা, চাকচিকানি গুণচা আরো খা·সাচাক্কাচা, গিসিক রংথালগিবাচা, চিংনি খাকখেৎ খা·সাচা, 7 বিবিখো আগানফ্রাকাচা আরো ইসলনি বিলচা চিংআ ইখো ফিন্নিকিংজক, চিংআ ইসলনা দাকচাকে হন·গিবা। দা·আবা জাক সামগ্মিও খাকখেৎনি জাকরিমরারাংখো রা·এ চিংআ ইখো ফিন্নিকিংজক, চিংআ ইসলনা দাকচাকে হন·গিবা। 8 মান্দিরাং চিংখো মান্দিরা·খানা বা রা·জাখানা, চিংনি গিম্মিন নাম্মাখো আগানখানা বা নামগিজাখো আগানখানা, চিংআ ইসলনা দাকচাকে হন·গিবা হং·আ ইখো চিংআ ফিন্নিকিংআ। মান্দিরাং চিংখো থকাই চা·গিবা ইন্নে আগানা, ইন্দিবা চং·মতদে চিংআ বিবিনি রামাও রি·য়া। 9 মান্দিরাং চিংখো হা·আইনা হাম·জা, ইন্দিবা গিম্মিকান চিংখো হা·আইয়া। চিংআ সিনা গিত্তিক দাক্কিংজক, ইন্দাকোবা থাংএ দংখুংআ। চিংখো দক্কিংজক-সিক্কিংজক, ইন্দাকোবা সিয়েতখুজাংআ। 10 চিংআ দুক বাং·এ মা·ন্নিংজক, ইন্দাকোবা চিংনি খা·থং ফাংনান হান·সেংআও গাপ্পা। চিংআ আন·থাংদে দিল্লা, ইন্দাকোবা চিংআ বাং·আখোন নকমা চায়েতিংজক। চিংনি মামুংআন দংজা, ইন্দাকোবা চিংআ গিম্মিকখোন মান·রিকগিবা হং·আ। ইন্দাকেন চিংআ ফিন্নিকিংজক, চিংআ ইসলনা দাকচাকে হন·গিবা হং·আ। 11 করিন্থীনি বিবিরা·গিবারাং, চিংআ না·সংচা স্রংস্রাংএন খাৎথা আগানজক আরো না·সংচা চিংনি খা·থংখো এংফ্রাকজক। 12 চিংআ চিংনি খা·থংখো না·সংনা এংফ্রাকে দনজক, ইন্দিবা না·সং না·সংনি খা·থংখো চিংনা চিপচাংএ দনজক। 13 আংনি দেদ্রাং গিত্তা আংআ না·সংনা আগানিংজক, চিংআ জেগিত্তা না·সংনা চিংনি খা·থংখো এংফ্রাকে দন্না না·সংবা উগিত্তান না·সংনি খা·থংখো চিংনা এংফ্রাকে হন·বো। 14 না·সং বিবিরা·গিজাগিবারাংমুং আপসান জোয়ালখো দা·আ ফাকখ্রংও গাত্তাবো। খাকখেৎমুং খাকখেৎগিজা বানো নাংরিমা? সেং·আমুং আন্দালা নাংরিমামা? 15 খ্রীষ্টমুং বলীয়ালনি, আগানস্খাওদে শয়তানমুং বাও আপসান হং·আ? ইসলনি মান্দি গিত্তা বিবিরা·গিবানি জে মান·রিকানি দংআ উয়ো বিবিরা·গিজাগিবানি বাক মুয়া? 16 আরো ইসলনি দংগিবা নকও মিত্তে বিমাংনি হা·দাম বাও? আনচিংদে থাংগিবা ইসলনি দংআনি নক হং·আ। রংথালগিবা শাস্ত্রও ইসল আগানজক, “আংআ আংনি মান্দিরাংনি গিসেপো দংনুয়া, আরো বিসংমুংআন রি·ফানুয়া। আংআ বিসংনি ইসল হং·নুয়া, আরো বিসং আংনি আন·থাংনি মান্দি হং·নুয়া।” 17 ইসল আরোবা আগানজক, “ইনি গিম্মিন না·সং বিবিরা·গিজাগিবারাংওনি হং·খাতে রি·বাবো আরো দিংথাং হং·বো। মারাং নাংগিবা মামুংখো দা·আ রি·ম্মাবো, ইন্দাকোদে আংআ না·সংখো রা·চাকনুয়া।” 18 ইনাআগ্রে “বিল্লাকস্রাংগিবা গিত্তেল আগানা, ‘আংআ না·সংনি ফাগিবা হং·নুয়া আরো না·সং আংনি দেদ্রাং হং·নুয়া।’ ”

২ করিন্থীয়রাংনা 7

1 খা·সাগিবা রিপ্পেংরাং, আনচিংনা ইয়া খু·রাচাক্কারাং দংআ ইন্নে হাই, আনচিং বে·এন আরো খা·থংনি গিম্মিক মারাং নাংআওনি আন·থাংথাংখো রংথালেতনা আরো ইসলখো খেনচাকে অলাখিয়ে চু·গিম্মিক রংথালানি রামাও রি·না। 2 না·সংনি খা·থংও চিংনা হা·দাম থারিবো। চিংআদে দারাংমুং অন্যায়খো দাকজা, দারাংনি নামগিজাখো দাকজা আরো দারাংখোবা থকাই চা·জা। 3 ইয়া খাৎথাখো আংআ না·সংখো দোস হ·ন্না আগানজাংআ। আংআদে স্খাংআন আগানজক, না·সং চিংচা ইন্দাকফিল্লেন খা·সাগিবা হং·আ, চিংআ না·সংমুং সিনাবা গং·আ, থাংনাবা গং·আ। 4 না·সংখো আংআ বিবিরা·বিয়া আরো না·সংনি গিম্মিন আংআ রাসং দাকবিংজক। চিংনি গিম্মিক দুকরাংনি গিসেপো আংনি খুসি গাপসুয়াকিংজক আরো আংআ বাং·এ খা·নাম্মেতাখো মান·জক। 5 ম্যাসিডোনিয়াচা সক্কেবা চিংনি বে·এন নেং·থাকাখো মান·জা; গিম্মিক গিত্তান চিংআ নেং·আখো মা·ন্না-গিম্মিকচান গোলমাল দংআমিং আরো খা·থংও খেনচাকামিং। 6 ইন্দাকোবা ইসল, জেআন দুক মান·গিবারাংখো খা·নাম্মেতা হ·ন্না, বিয়া তীতনি রি·বাচা চিংখো খা·নাম্মেতজক। 7 ইন্দাকেসান হং·জা, তীত আন·থাং না·সংচানিখো খা·নাম্মেতাখো মান·জক ইন্নে চিংআবা খা·নাম্মেতাখো মান·জক। না·সংনি হা·সিকাখো আরো দুকনি খাৎথাখো বিয়া চিংনা আগানজক আরো ইখো হা·আইএতজক, না·সং আংনা নাম্মেন চানচিংআ, আরো উনি হা·সেল আংআ আরোবা খুসি হং·জক। 8 আংআ আংনি স্খাংনি চিঠিচা না·সংখো দুক হ·ন্নোবা আংনি দুক দংজা। জেনসালো আংআ নিকজক, উয়া চিঠি বাং·গিজা সালনা হং·ওবা না·সংখো দুক হ·ন্না উনো আংআ অকখিসা হং·ওবা দুক মা·ন্নামিং, ইন্দিবা দা·আওদে আংআ হান·সেংআ। 9 না·সং দুকখো মা·ন্নামিং ইন্নে আংআ খুসি হং·জা, বাত্তেসা না·সং দুক মা·ন্নে পাপওনি গিসিক ফিল·জক ইন্নে খুসি হং·জক। ইসলনি হা·সিকা গিত্তান না·সং ইয়া দুকখো মা·ন্নামিং, আরো উনি গিম্মিন চিংনি হা·সেল না·সংনি নামগিজানি মামুংবা হং·জা। 10 ইসল জে দুকখো হ·ন্না উনি গিম্মিন পাপওনি গিসিক ফি·ল্লা আরো উনি হা·সেল পাপওনি জক্কাখো মা·ন্না, আরো উনো দুক দাক্কানি মামুংবা দংজা। ইন্দিবা হা·গিলসাকনি হন·গিবা দুকদে মান্দিনা সিয়াখো রিংগামে রা·বাআ। 11 চানচিয়ে নিবো, জেনসালো ইসল না·সংখো দুক হ·ন্নামিং না·সং উনো জা·মানচাকজা, উনো দোসগ্রি দাক্কে আন·থাংথাংখো ফিন্নিকনা না·সং বাসিক হা·সিকামিং, পাপখো বাসিক মিৎচিয়ামিং, গিসিকো বাসিক খেন্নামিং, বাসিক হা·সিকামিং, বাসিক চানচিয়ামিং আরো পাপনি শাস্তিখো হ·ন্না বাসিক হা·সিকামিং। ইন্দাকে উরাংনা না·সং দোসগ্রি হং·আ ইখো গিম্মিক গিত্তান না·সং ফিন্নিকামিং। 12 উয়া চিঠিখো আংআ চক্কাদে চক্কামিং, ইন্দিবা জেআন অন্যায় দাক্কা বা জেনি সাক্কাও অন্যায় দাকজক বিনা চকজা, বাত্তেসা না·সং চিংনা বিবিন খা·সাআ ইখো ইসলনি মিকখাংও না·সংচা ফারাকখানা ইন্নে চক্কামিং। 13 ইয়ো চিংআ খা·নাম্মেতাখো মান·জক। উয়া খা·নাম্মেতামুং তীতনি খুসিখো নিক্কে চিংআবা খুসি হং·জক মুয়ানা না·সং গিম্মিকচাখো বিয়া গিসিকো নাম্মেন থম·থমাখো মান·জক। 14 আংআ খুসি হং·জক, মুয়ানা না·সংখো রা·এ আংআ বিচা রাসং দাক্কামিং, আরো উনি হা·সেল আংনি খ্রাচা·আখো মা·ন্না নাংজাজক। উনা বাত্তে না·সংচা আগানা চিংনি গিম্মিক খাৎথা জেগিত্তা বিবি হং·আমিং, উগিত্তান তীতচা না·সংখো রা·এ চিংনি রাসং দাক্কাবা বিবিন হং·আ ইখো ফিন্নিকা হং·জক। 15 না·সং গিম্মিকান জেগিত্তা খেনচাকে আরো মান্দিরা·এ বিখো রা·চাকে বাম্মে ফিন্নিকামিং, উখো গিসিক রা·এ না·সংনা বিনি খা·সা আরোবা বাং·বাতজক। 16 আংআ খুসি হং·জক, মুয়ানা গিম্মিকোন আংআ না·সংনি সাক্কাও ফাংচাকনা মা·ন্না।

২ করিন্থীয়রাংনা 8

1 জংআদারাং, ম্যাসিডোনিয়ানি মন্ডলীরাং ইসলচাখো জে মংসংগিবা খা·সাচাক্কাখো মান·জক উনি গিম্মিনো চিংআ না·সংনা আগানিংজক। 2 বাং·এ দুক চাক্কারাংও বিসংনি নাম্মেন পরীক্ষা হং·আমিং আরো বিসং নাম্মেন দিল্লোবা বিসংনি গিসিকো ইন্দাকফিল্লে হান·সেংআ দংআমিং ইন্নে বিসং জাকস্রামে হ·ন্নামিং। 3 আংআ বিসংনা চাক্কে ইখো সাক্ষি হ·ন্নিংজক, বিসং হা·সিকেন আন·থাংথাংনি মা·ন্না গিত্তা, আরো উনা বাত্তেবা জাকস্রামে হ·ন্নানিখো হ·ন্নামিং। 4 বিসং নাম্মেন হা·সিক মানচায় চিংচা মল·মলামিং জেদাক্কে ইসলনি জে মান্দিরাং দিল্লা-চন্নাও দংআ বিসংনি দিল্লা-চন্নাখো হা·রিকানি কামখো বিসং দাকনা মা·ন্না। 5 চিংনি খা·দংআনি বাত্তেবা বাং·এ বিসং হ·ন্নামিং-আন·থাংথাংখোন বিসং স্খাং গিত্তেলচা আরো জা·মানো ইসলনি হা·সিকা গিত্তা চিংচা হ·ন্নামিং। 6 ইখো নিক্কে চিংআ তীতখো মংসংবাত্তে মল·মলামিং, হ·ন্নানি জে কামখো বিয়া না·সংও দাকবাচেংআমিং জেদাক্কে উখো বিয়া বন·চত্তেতা। 7 গিম্মিকান, আগানস্খাওদে বিবিরা·আ, ইসলনি গিম্মিন আগানানি বিল, হা·আইয়া, গিসিক নাংআ আরো চিংনা খা·সা না·সংও জেদাক্কে বাং·এ দংআ উয়ানদাক্কে হ·ন্নানি গুণবা না·সংনি গাপসুয়াকে গা·আকখানা। 8 ইখো আংআ গি·য়েতিংজক ইন্দাকেদে হং·জা, ইন্দিবা গিপ্পিনরাংনি গিসিক নাংআনি খাৎথাখো না·সংনা আগানে আংআ পরীক্ষা দাক্কে নিনা হা·ম্মা না·সংনি খা·সা বাসিক খাকখেৎ হং·আ। 9 না·সংদে আনচিংনি গিত্তেল যীশু খ্রীষ্টনি খা·সাচাক্কে হ·ন্নানিখো হা·আইয়া, বিয়া আন·থাং নকমা হং·এবা না·সংনা দিলজক, জেদাক্কে বিনি দিল্লাচা না·সং নকমা চানা মা·ন্না। 10 না·সংনি নাম্মানি গিম্মিন আংআ আংনি চানচিয়াখো আগানিংজক। না·সংআন রি·য়াংগিবা বিলসিও চান্দা গিল্লানি কামখো দাক্কামিং আরো উয়া কামও হা·সিকবিয়াখো ফিন্নিকামিং। 11 দা·আও উয়া কামখো ব·ন্নেতবো। জে গিসিক নাংআখো রা·এ না·সং উয়া কামখো দাকনা হা·সিকামিং উয়া আপসান গিসিক নাংআচা না·সংনি মা·ন্না গিত্তা উখো ব·ন্নেতবো। 12 সানিবা হ·ন্না হা·সিকা দংওদে বিচা জেচিক দংআ উচিকিনান বিনি হ·ন্নানিখো ইসল রা·চাকা, বিনি জেচিক দংজা উচিকান হং·জা। 13 গিপ্পিনরাং নাম্মে দংখানা আরো না·সং দুকও দংখানা ইখো আংআ হাম·জা, বাত্তেসা না·সংনি গিম্মিকনি অবস্থা আপসান হং·খানা ইখো আংআ হা·ম্মা। 14 দা·আও না·সংচা বাসিক বাং·এ দংআ উচা বিসংনি নাংআখো মা·ন্নুয়া, দা·আবা বিসংনি বাং·জোকনো বিসং না·সংনি নাংআখো হ·ন্নুয়া। ইন্দাকে গিম্মিকনি অবস্থা আপসান হং·নুয়া। 15 রংথালগিবা শাস্ত্রও চক্কা দংআ, “জেরাং বাং·এ চিম্মংজক বিসংনি গিৎচাজাজক আরো জেরাং অকখিসা চিম্মংজক বিসংনি চৎচাংজাজক।” 16 আংনি খা·থংও না·সংনা জে গিসিক নাংআ দংআ, উয়া গিসিক নাংআখোন ইসল তীতনি খা·থংওবা হন·জক ইন্নে আংআ বিখো মিৎথেলা। 17 তীত চিংনি মল·মলাখো রা·রিকজক, ইন্দিবা উনা বাত্তেবা ইয়ান দাল·বাতা, বিয়া আন·থাংনি হা·সিকাচা নাম্মেন গিসিক নাংএ না·সংচা রি·য়াংইংজক। 18 তীতমুং চিংআ দা·আও সাকসা জংখোবা ওয়াত্তেতিংজক। যীশু খ্রীষ্টনি গিম্মিনো নাম্মা খাৎথাখো আগানফ্রাকানি কামও গিম্মিক মন্ডলীন ইয়া জংখো মিৎথেলা। 19 ইয়া মন্ডলীরাং বিখোসান মিৎথেলা ইন্দাকেদে হং·জা, চিংমুং ইয়া হ·ন্নানিখো রা·আংখানা মন্ডলীরাং বিখো বাচ্ছিয়েবা রা·জক। গিত্তেলনি রাসংনা আরো গিপ্পিনরাংনা দাকচাকানি কামও গিসিক নাংআখো ফিন্নিকনা চিংআ ইয়া হ·ন্নানিখো রা·আংনা থিক দাক্কিংজক। 20 ইয়া দাল·বাৎগিবা হ·ন্নানিখো সুয়ালাও দারাংবা জেদাক্কে চিংখো মামুংখো আগান্না মান·জা উনি গিম্মিন চিংআ ইয়া জংখোবা ওয়াত্তেতিংজক। 21 চিংআ গিত্তেলনি মিকখাংওসান হং·জা, ইন্দিবা মান্দিরাংনি মিকখাংওবা খাকখেৎ দাক্কে রি·না গিসিক হ·ন্না। 22 ইনাআগ্রে বিসংমুং চিংআ চিংনি দা·আও সাকসা জংখোবা ওয়াত্তেতিংজক। বিনি গিসিক নাংআখো বিয়া চিংনা বাং·এন ফিন্নিকজক। দা·আও না·সংখো বিয়া বাং·এ বিবিরা·জক ইন্নে বিয়া আরোবা গিসিক নাংবিজক। 23 তীতনি গিম্মিন আংনি আগানানি ইয়ান দংআ- বিয়া আংনি রিপ্পেং আরো আংমুং বিয়া না·সংনা কাম দাক্কা। আরো গিপ্পিন জংআদারাংনা আংনি আগানানি ইয়ান দংআ- মন্ডলীরাং বিসংখো বাচ্ছিয়ে রা·এ ওয়াত্তেতিংআ। ইয়া জংআদারাংচা খ্রীষ্টনি রাসং হং·আ। 24 উনি গিম্মিন আগান্না, বিসংচা স্রংস্রাংএন না·সংনি খা·সাখো ফিন্নিকবো আরো মুয়ানা না·সংখো রা·এ চিংআ রাসং দাক্কা ইখো বিসংনা ফিন্নিকবো, জেদাক্কে মন্ডলীরাং উখো নিকনা মা·ন্না।

২ করিন্থীয়রাংনা 9

1 ইসলনি মান্দিরাংনা হ·ন্নানি জে কাম হং·ইংজক উনি গিম্মিনো না·সংচা চক্কানি মামুংআন দংজা, 2 মুয়ানা ইয়া কামনা না·সংনি গিসিক নাংআখো আংআ হা·আইয়া। আংআ না·সংখো রা·এ ম্যাসিডোনিয়ানি মান্দিরাংচা ইখো আগানে রাসং দাক্কা, রি·য়াংগিবা বিলসিওনি আখায়ানি মান্দিরাং, আগানস্খাওদে না·সং ইয়া হ·ন্নানি গিম্মিন থারিসোএ দংআ। না·সংনি ইয়া গিসিক নাংআ বিসংওনি ফাকমা মান্দিরাংখো মিকরাকেতজক। 3 আংআ ইয়া জংআদারাংখো ওয়াত্তেতিংজক জেদাক্কে ইনি গিম্মিনো না·সংখো রা·এ চিংনি রাসং দাক্কা বিবি হং·আ ইখো বিসং নিকনা মা·ন্না, আরো আংআ জেগিত্তা আগানজক উগিত্তান জেদাক্কে না·সং বিবিন থারিসোএ দংনা মা·ন্না। 4 ইন্দাকজাওদে ম্যাসিডোনিয়ানি মান্দিরাং আংমুং রি·য়াংফাএ না·সংনি থারিসোগিজাখো নিক্কোদে ইন্দিদে না·সংনি সাক্কাও চিংনি ইন্দাকফিল্লে বিবিরা·আনি গিম্মিন চিংআ খ্রাচা·নুয়া; আরো না·সংবা খ্রাচা·নুয়া। 5 উনি গিম্মিন আংআ ইয়া জংরাংখো স্খাং না·সংচা রি·য়াংখানা মল·মলনা নাংনুয়া ইন্নে চানচিজক, জেদাক্কে না·সং জে দাল·বাৎগিবা হ·ন্নানিখো হ·ন্না খু·রাচাক্কামিং উখো বিসং স্খাংআন থারিয়ে দনসোনা মা·ন্না। উনি গিম্মিন না·সংচানিখো চিংনি দ্রাএ মামুংখো রা·না নাংজানুয়া, বাত্তেসা না·সং জেখো হ·ন্নুয়া উয়া হ·ন্নানি গিত্তা স্খাংআন থারিসোয়া দংনুয়া। 6 গিসিক দনবো, জেআন বিৎচ্রিখো অকখিসা গোওয়া বিয়া মিবিথিখো অকখিসান রাতনুয়া আরো জেআন বিৎচ্রিখো বাং·এ গোওয়া বিয়া মিবিথিখো বাং·এ রাতনুয়া। 7 সাকফ্রাকান গিসিকথাংথাংও জেখো চানচিয়ে দনজক বিয়া উখোন হন·খানা। সাবা গিসিকো দুক রা·এ হন·জাখানা বা হ·ন্না নাংনুয়া ইন্নে হন·জাখানা, মুয়ানা জেআন খুসি হং·এ হ·ন্না ইসল বিনা খা·সাআ। 8 না·সংনা গিম্মিক গিত্তা খা·সাচাক্কানি বিল ইসলনি দংআ, জেদাক্কে না·সংনি নাংগিবা গিম্মিকান ফাংনান না·সংচা দংআ; আরো উনি গিম্মিন জেদাক্কে না·সং গিম্মিক নাম্মা কামরাংনা জাকস্রামে হ·ন্না মা·ন্না। 9 রংথালগিবা শাস্ত্রও চক্কা দংআ, বিয়া জাকস্রামে দিল্লা-চন্নারাংনা হন·জক; বিয়া ফাংনাজলনা খাকখেৎগিবা হং·আ। 10 জেআন গামগিবানা বিৎচ্রিখো আরো চা·না রুটিখো হ·ন্না বিয়া না·সংনা গোনা বিৎচ্রিখোবা হ·ন্নুয়া আরো উখো জাল্লেতনুয়া। আরো বিয়া না·সংনি নাম্মা কামনি বিথিখো বাং·এ হ·ন্নুয়া। 11 না·সং গিম্মিক গিত্তান নকমা হং·নুয়া জেদাক্কে না·সং জাকস্রামে হ·ন্না মা·ন্না, আরো উয়োন চিং গিত্তা ইসলখো মিৎথেলা হং·নুয়া। 12 না·সংনি ইয়া কামনি হা·সেল ইসলনি মান্দিরাংনি দিল্লা দংজানুয়া ইন্দাকেসান হং·জা; ইসলনি গিম্মিন বাং·আ মান্দিরাংনি মিৎথেলাবা গাপসুয়াকনুয়া। 13 না·সং বিবিরা·না খ্রাগিবা হং·আ, না·সংনি ইয়া হ·ন্না উখো ফিন্নিকনুয়া, আরো উখো নিক্কে বিসং ইসলনি রাসংখো দাকনুয়া, মুয়ানা না·সং খ্রীষ্টনি গিম্মিন নাম্মা খাৎথাখো বিবিরা·এ উয়ো বাম্মে দংজক আরো না·সং জাকস্রামে বিসংনা আরো গিপ্পিনরাংনা হন·জক। 14 ইসলচাখো না·সং জে বন·চাংগিজা খা·সাচাক্কাখো মান·জক উনি গিম্মিন বিসং খা·থং গিম্মিকো না·সংনা বি·নুয়া। 15 জে হ·ন্নানি খাৎথাখো খু·সুকচা ফারাকনা মান·জা ইসলনি উয়া হ·ন্নানি গিম্মিন বিখো মিৎথেলা।

২ করিন্থীয়রাংনা 10

1 খ্রীষ্টনি সনথল আরো খা·সাচাকগিবা খা·থংনি খাৎথাখো গিসিক রা·এ আংআ পৌল আন·থাংআন না·সংখো মল·মলিংজক। মান্দিরাং আগানা, আংআ না·সংমুং দংমিত্তিংও খেনসিক খেনসিক দাক্কে দংআ, ইন্দিবা দংজামিত্তিংওদে খেনমানগিজাগিবা হং·আ। 2 চিংআ রামরাম মান্দিরাং গিত্তা জাংগিখো থাংএতিংজক ইন্নে জেরাং চানচিয়া বিসংনি সাক্কাও খেনমানগিজাখো জেচিক ফিন্নিকনা নাংনুয়া ইন্নে আংআ চানচিয়া, আংআ হা·ম্মা জেদাক্কে আংনি রি·বাজোকনো উচিকিন খেনমানগিজাখো আংনি ফিন্নিকনা নাংজা। 3 চিংআ বে·এন-হান·চিনি মান্দি হং·ওবা চিংআ জে দাকগ্রিকিংজক উয়া বে·এন-হান·চিনি দাকগ্রিকা হং·জা। 4 রামরাম মান্দি জে জাকরিমরারাংখো রা·এ দাকগ্রিকা চিংআ উখো রা·এ দাকগ্রিকজা, ইন্দিবা ইসলনি বিলচা চিংনি জাকরিমরারাং কিল্লারাংখোবা ফি·এ গালনা মা·ন্না। 5 চিংআ মান্দিনি বু·আ খাৎথাখো নাসিয়েতা আরো ইসলখো হা·আইয়ানি রামাও জে চানচিয়ারাং গাং·বিংএ স্খু দি·চাএ চাদেংআ উখো ব·ন্নেতা; আরো গিসিকনি গিম্মিক চানচিয়াখো চিপচাংএ খ্রীষ্টও বাম্মে দন্না। 6 জেনসালো না·সং চু·গিম্মিক বাম্মে দংনুয়া উনোবা জেরাং মানিজানুয়া বিসংখো চিংআ শাস্তি হ·ন্না থারিয়ে দংসোনুয়া। 7 না·সংদে হা·ফালনি মিকখাং-বিমাংখো নিক্কিংআ। সাবা আন·থাংখো খ্রীষ্টনি ইন্নে বিবিরা·আওদে ইখোবা বিনি চানচিনা নাংনুয়া, জেদাক্কে বিয়া খ্রীষ্টনি হং·আ উয়ানদাক্কে চিংআবা খ্রীষ্টনি হং·আ। 8 না·সংখো থারিখানা মিকসংএ গিত্তেল চিংনা বিলখো হ·ন্না, না·সংনি নামগিজাখো দাকনাদে হং·জা। ইখো রা·এ আংআ রাসং দাক্কোবা উনি গিম্মিন আংআ খ্রাচা·জানুয়া। 9 আংনি ইয়া খাৎথানা দা·আ ইন্দাকে চানচিয়াবো, আংআ চিঠিচা না·সংখো খেন্নেতিংজক। 10 মিত্তাম মান্দিরাং আগানা, “বিনি চিঠিরাং গিসিকখো সা·দিকেতা আরো উয়া বিল্লাকবাতা, ইন্দিবা বিয়া সেফাংও দংজোকনো ইন্দাকে নিকনা মা·ন্না, বিয়া বিলগ্রিগিবা হং·আ আরো বিনি খাৎথা খিন্নানা গিত্তা ইন্দাকা মামুং হং·জা।” 11 ইন্দাকগিবা মান্দি হা·আইখানা, চিংআ দংজাএ চিংনি চিঠিও জে খাৎথাখো আগানিংআ, দংজোকনো ইন্দাকেন দাকনুয়া। 12 না·সংনি গিসেপো মিত্তামরাং আন·থাংথাংখো মিৎথেলা। চিংআ বিসংনি দলও আন·থাংথাংখো গালনা বা বিসংমুং আন·থাংথাংখো থসুসানা ফা·জা। বিসং বাসিক জাদা! মুয়ানা বিসং আন·থাংথাং জেখো নাম্মা ইন্নে চানচিয়া উমুং আন·থাংথাংখো থসুসাআ আরো উচান আন·থাংথাংখো বিচাল দাক্কা। 13 ইন্দিবা জেচিক রাসং দাকনা নাংআ উনা বাত্তেদে চিংআ রাসং দাকজানুয়া, বাত্তেসা ইসল চিংনি কামনা জেচিক সীমানা থিক দাক্কে হন·জক উনি নিং·আও দংএন রাসং দাকনুয়া; আরো উনি নিং·আও না·সংবা দংআ। 14 উনি গিম্মিন জেনসালো চিংআ না·সংনি খাৎথাখো আগানে রাসং দাক্কা উনো বাং·এ মামুংখোদে আগানজা। চিংআ না·সংচা রি·য়াংজাওদে চিংনি ইন্দাকে রাসং দাক্কা বাং·এ হং·নুয়ামিং। ইন্দিবা চিংআ খ্রীষ্টনি গিম্মিন নাম্মা খাৎথাখো আগানফ্রাক জলজলে না·সংচাবা রি·য়াংআমিং। 15 ইনাআগ্রে গিপ্পিনরাংনি কামখো রা·এবা চিংআ রাসং দাকজা- দাক্কোদে উয়া সীমানানা বাত্তে হং·নুয়ামিং। চিংআ ইন্দাকে খা·দংআ, না·সংনি বিবিরা·আ বারিকরিকওন না·সংনি গিসেপো চিংআ আরোবা বাং·এ কাম দাকনা মা·ন্নুয়া। 16 উনো না·সংচানি রি·য়াংএ আরোবা চে·ল্লা হা·দামরাংচা নাম্মা খাৎথাখো আগানফ্রাকনা মা·ন্নুয়া। ইনি গিম্মিন দারাংবা ইন্দাকে আগান্না মান·জানুয়া, সাকগিপ্পিন মান্দি জেও কাম দাকজক বিসংনি উচানি কামনা চিংআ রাসং দাক্কিংআ। 17 ইন্দিবা শাস্ত্রনি খাৎথা গিত্তা, “রাসং দাকগিবা গিত্তেলখো রা·এন রাসং দাকখানা;” 18 মুয়ানা আন·থাংখো রাসং দাক্কানি গিম্মিন দারাংখোবা নাম্মা ইন্নে ফিন্নিকনা মান·জা, বাত্তেসা গিত্তেল জেখো রাসং দাক্কা বিখোন নাম্মা ইন্নে নিকনা মা·ন্না।

২ করিন্থীয়রাংনা 11

1 না·সং আংনি অকখিসা গিসিক সেং·গিজাখো চাকবো ইখো আংআ হা·ম্মা। ইখো না·সং চাক্কিংজকান। 2 না·সংনি গিম্মিন আংআ আংনি খা·থংও ইসলনি হন·গিবা গিসিক সা·দিকাও সা·দিকিংজক, মুয়ানা আংআ চাওয়ারি সাকসা মা·মাংমিং, আগানস্খাওদে খ্রীষ্টমুং না·সংনি বিয়ানি গিম্মিনো থিক দাক্কে দনসোজক, জেদাক্কে রংথালগিবা নামচিক গিত্তা বিচান না·সংখো হ·ন্না মা·ন্না। 3 ইন্দিবা উয়া চিপ্পু বিনি নামগিজা বুদ্ধিচা জেদাক্কে হবাখো থগিয়েতামিং উয়ানদাক্কে খ্রীষ্টনি গিম্মিন স্রংআ আরো রংথালা অলাখিয়াওনিখো সাবা না·সংখোবা থগিয়েতনা দংআ ইন্নে আংআ খেনমানিংআ। 4 জে যীশুনি খাৎথাখো চিংআ আগানফ্রাকজক সাবা বিনা আগ্রে গিপ্পিন যীশুনি খাৎথাখো না·সংচা আগানফ্রাকোদে, বা জে গিসিক রংথালগিবাখো না·সং মান·জক বিনা আগ্রে দিংথাং দাকগিবা গিসিকখো না·সং মা·ন্নোদে, বা জে নাম্মা খাৎথাখো না·সং রা·চাকজক উনা আগ্রে দিংথাং দাকগিবা নাম্মা খাৎথাখো না·সং মা·ন্নোদে, খুসি হং·এন উরাংখো মানিয়ে রা·আ। 5 ইন্দিবা আংআ উয়ানদাকগিবা “মংসংগিবা” ওয়াত্তেতারাংনা বাত্তে জা·মান চাক্কা ইন্নে আংআদে চানচিমানজা। 6 আংআ নাম্মেদাক্কে খাৎথা আগান্না মান·জা ইন্দাকোবা আংনি হা·আইয়া দংআ আরো উখো গিম্মিক গিত্তান না·সংচা ফারাকজক। 7 ইসলনি হন·গিবা নাম্মা খাৎথাখো আংআ না·সংচা আগানফ্রাকে আন·থাংখো চন্নেতজক জেদাক্কে না·সংখো দাল·নিকে ফিন্নিকনা মা·ন্না। ইনি হা·সেল আংআ পাপ দাকজকমা? 8 না·সংনা দাকচাকে হ·ন্না আংআ গিপ্পিন মন্ডলীরাংচাখো থাংখা রা·জক, আগান্না রি·য়াংওদে বিসংচাখো রা·সেকজক। 9 না·সংমুং দংমিত্তিংও আংনি চু·ওংজাওবা আংআ দারাংনিবা বোঝা হং·জা, মুয়ানা ম্যাসিডোনিয়াওনি রি·বাগিবা জংআদারাংআন আংনি চু·ওংগিজাখো চু·সকেতামিং। মামুংনান আংআ না·সংনি বোঝা হং·খুজা আরো হং·বা হং·জানুয়া। 10 আংও খ্রীষ্টনি জে বিবি দংআ উগিত্তা আংআ আগান্না, আখায়া হা·দকনি মামুং হা·দামওন আংনি ইয়া রাসং দাক্কাখো দারাংবা দনচাংএতনা মান·জানুয়া। 11 মুয়ানা আংআ ইয়া খাৎথাখো আগানিংজক? না·সংখো খা·সাজানি গিম্মিনমা? আংআ না·সংনা খা·সা ইখো ইসল হা·আইয়া। 12 জেরাং বিসংনি রাসং দাক্কাখো রা·এ আন·থাংথাংখো চিংনি আপসান ইন্নে ফিন্নিকনা হা·ম্মা বিসং উয়া চলখো মান·জাখানা উনি গিম্মিন আংনি দাকগিবাখো আংআ দাক্কেন দংনুয়া। 13 চং·মতদে উয়ানদাকগিবা মান্দিরাং বু·এ চা·গিবা ওয়াত্তেতা আরো থকাই চা·গিবা কাম রিম·গিবা হং·আ। আন·থাংথাংখো খ্রীষ্টনি ওয়াত্তেতা ইন্নে ফিন্নিকনা বিসং আন·থাংথাংখো দিংথাং দাকফিলা। 14 ইনি গিম্মিন আইয়াও ইনমানানি মামুং দংজা, মুয়ানা শয়তানবা আন·থাংখো সেং·আও চু·সকগিবা সা·গ্রে হং·আ ইন্নে ফিন্নিকনা আন·থাংখো দিংথাং দাক্কে গাল্লা। 15 ইন্দাকোদে জেরাং শয়তাননা দাকচাকে হ·ন্না বিসং আন·থাংথাংখো দিংথাং দাক্কে খাকখেৎনা দাকচাকে হ·ন্না ইন্নে ফিন্নিকোদে, উনোদে আইয়াও ইনমানানি মুয়া দংআ? জা·মানো বিসংনি কামনি খ্রি মা·ন্নাগিবাখোন বিসং মা·ন্নুয়া। 16 আংআ দা·আবা আগান্না, দারাংবা আংখো জাদা ইন্নে চানচিজাখানা। না·সং ইন্দাকে চানচিওদে জাদা ইন্নেন আংখো রা·চাকবো, জেদাক্কোদে আংআ অকখিসা রাসং দাকনা মা·ন্না। 17 আংআ দা·আও গিত্তেলনি গি·য়েতা গিত্তা আগানজাংআ, ইন্দিবা আন·থাংনি গিম্মিন রাসং দাকনা রি·য়াংএ জাদা গিত্তান আগানিংআ। 18 মান্দিরাং জেখো রা·এ রাসং দাক্কা, বাং·আরাংএন উখো রা·এ রাসং দাক্কোদে আংআবা মুয়ানা দাকজানুয়া? 19 না·সং হা·আইগিবা হং·আ ইন্নে খুসি হং·এ জাদারাংখো চাকচিকা। 20 ইয়াসান হং·জা, সাবা না·সংখো নকখল দাক্কোদে, না·সংখো চু·গিম্মিক ব·ন্নেতোদে, না·সংখো জা·গাও গাল্লোদে, না·সংনি নকগিবা হং·ওদে বা না·সংনি নাথেংখো চরাইওদে, না·সং উরাংখোবা চাক্কা। 21 ইরাংনি গিম্মিন চিংআ না·সংচা বিলগ্রিমিং ইখো আংআ খ্রাচা·এ খু·রাচাকিংজক। জেখো রা·এ রাসং দাকনা গিপ্পিনরাং ফা·আ আংআবা উখো রা·এ রাসং দাকনা ফা·আ; ইয়া খাৎথাখো আংআ জাদা গিত্তান আগানিংজক। 22 রাসং দাকগিবারাং ইব্রীয় হং·আমা? আংআবান উয়ান হং·আ। বিসং ইস্রায়েলনি হং·আমা? আংআবান উয়ান হং·আ। বিসং অব্রাহামনি দেরিচ্ছু হং·আমা? আংআবান উয়ান হং·আ। 23 বিসং খ্রীষ্টনা দাকচাকে হন·গিবা হং·আমা? আংআ আরোবা বাং·এ দাক্কে উয়ান হং·আ। গিসিকো রা·রিকবো, আংআ খোরে মান্দি গিত্তা খাৎথা আগানিংআ। খ্রীষ্টনা দাকচাকে হ·ন্না রি·য়াংএ আংআ বিসংনা বাত্তে বাং·এ বিমচিপজক, বাং·এ জেলো দংজক, আরোবা বাং·এ দক্কা চা·জক, রাং·নিরাং সিনা গিত্তিক হং·জক। 24 যিহূদীরাংনি জাক্কো আংআ রাং·বংআ সৎব্রি চাবুক দক্কাখো চা·জক, 25 বেতচা আংখো রাং·গিত্থাম দকজক। রাং·সাও আংখো রং·থিচা গোথাত্তামিং। রাং·গিত্থাম আংনি জাহাস রিপ্পামিং। সালসা আরো ওয়ালসা আংআ সাগালনি চিও দংআমিং। 26 আংআ হা·সং বাং·এ রোমজক। চি দা·ল্লানি গিম্মিন, রা·সেকে রা·গিবারাংনি গিম্মিন, আন·থাংনি জাতস্খা মান্দিরাংনি গিম্মিন আরো গিপ্পিন জাতরাংনি গিম্মিন আংআ হং·সিয়াও গা·আকজক। ইনাআগ্রে সংজিলমাও, হা·গিসি জওলো, সাগালও আরো বু·এ চা·গিবা জংআদারাংনি গিসেপোবা আংআ হং·সিয়াও গা·আকজক। 27 খ্রীষ্টনা দাকচাকে হ·ন্না রি·য়াংএ আংআ দুকনি গিসেপোবা নেং·দিকে কাম দাকজক। আংআ থুগিজা বাসিক ওয়াল সেং·এতজক, অকখ্রিয়ানা আরো চি রিংনা হা·সিকানা দুক মান·জক, চা·গিজা দংজক, সি·ন্নানা আরো বা·রা-চলারাং দংজানা দুক মান·জক। 28 ইরাংনা আগ্রেবা গিম্মিক মন্ডলীরাংনা সালাজ্রিংআন আংআ চানচিবিংজক। 29 সাবা বিলগ্রি হং·ওদে আংআ বিমুং বিলগ্রি হং·ফাজামা? সানিবা হা·সেলো সাবা পাপও গা·আকোদে উনা গান্দা আংআ খা·খিমচাজামা? 30 আংনি রাসং দাকনান নাংওদে আংআ আংনি বিলগ্রিখো রা·এন রাসং দাকনুয়া। 31 আনচিংনি গিত্তেল যীশু খ্রীষ্টনি ইসল আরো ফাগিবা, জেআন ফাংনাজলনা রাসংখো মা·ন্না খ্রাগিবা হং·আ, বিয়া হা·আইয়া আংআ বু·এ আগানজাংআ। 32 দামেস্কও রাজা আরিতানি নিং·আও দংগিবা শাসন দাকগিবা আংখো রিম·না ইন্নে দামেস্করাংনি সংজিলমাখো রাক্ষিখানা গি·য়েতামিং। 33 ইন্দিবা দেয়ালনি জানলা গিত্তা আংখো খকো দাক্কে রং·খাত্তেতামিং, আরো ইন্দাকেন আংআ বিনি জাকওনি খাত্তে রি·য়াংআমিং।

২ করিন্থীয়রাংনা 12

1 আংনি দা·আবা অকখিসা রাসং দাকনা নাংইংজক। ইনি হা·সেল মামুংখো মান·দাপজাওবা জে মিকজুমাংরাংখো গিত্তেল আংনা ফিন্নিকজক আরো জেরাংখো আংনা ফারাকজক উরাংনি গিম্মিন আংআ দা·আও আগান্নুয়া। 2 খ্রীষ্টও বিবিরা·গিবা সাকসা মান্দিখো আংআ হা·আইয়া। বিলসি চি·ব্রিনা স্খাং সালগিওনা সক্কে বিখো রা·দোআংআমিং। উনো বিয়া বিনি বে·এন বিমাংও দংআমা দংজামিং উখো আংআ হা·আইজা, ইসল হা·আইয়া। 3 আংআ হা·আইয়া, উয়া মান্দিখো হান·সেংবিগিবা সংনকচা রা·দোআংআমিং। বিয়া ইন্দাকগিবা খাৎথাখো খিন্নামিং জেখো খু·সুকচা আগান্না মান·জা আরো মান্দিনা উখো আগান্নাবা হন·জা। উনো বিয়া বিনি বে·এন বিমাংও দংআমা দংজামিং উখো আংআ হা·আইজা, ইসল হা·আইয়া। 5 ইয়া মান্দিনি গিম্মিন আংআ রাসং দাকনুয়া, ইন্দিবা আংনি আন·থাংনি গিম্মিন রাসং দাকজানুয়া, আংনি বিলগ্রিনাসান দাকনুয়া। 6 আংআ রাসং দাকনা হা·ম্মোদে জাদা গিত্তা দাকজানুয়া, মুয়ানা আংআ বিবিখোন আগান্নুয়া। ইন্দাকোবা আংআ রাসং দাকজানুয়া, মুয়ানা আংনি কামখো নিক্কে বা আংনি খাৎথাখো খিন্নাএ মান্দিরাং আংখো জেগিত্তা চানচিয়া উনাবাত্তে বাং·এ আংখো চানচিজাখানা। 7 আংনা বাং·আখোন ফারাকজক ইন্নে জেদাক্কে আংআ গাং·বিংগিবা হং·জা, ইখো মিকসংএ আংখো দুক হ·ন্না আংনি বে·এনো বুসু গি·সাখো, আগানস্খাওদে শয়তাননি সা·গ্রেখো হ·ন্নামিং। 8 গিত্তেলখো আংআ রাং·গিত্থাম মল·মলামিং জেদাক্কে বিয়া আংচানিখো উখো হা·রিকেতা। 9 ইন্দিবা বিয়া আংনা আগানজক, “আংনি খা·সাচাক্কান নাং·না চু·ওংআ, মুয়ানা বিলগ্রিওন আংনি বিল চু·গিম্মিক দাক্কে ফারাকা।” উনি গিম্মিন আংনি বিলগ্রিনা আংআ খুসি হং·বিএন রাসং দাকনুয়া, জেদাক্কে খ্রীষ্টনি বিল আংনি সাক্কাও দংআ। 10 উনি গিম্মিন খ্রীষ্টনা বিলগ্রিও, চন্নিকাও, দুক মা·ন্নাও, সিনজেতাও আরো নামগিজাও আংআ খুসি হং·আ, মুয়ানা আংনি বিলগ্রি হং·মিত্তিংওন আংআ বিল্লাকগিবা হং·আ। 11 আংআদে জাদান হং·জক, ইন্দিবা না·সংআন আংখো ইন্দাকে হং·এতা, মুয়ানা না·সংআন আংখো রাসং দাকনা নাংআমিং। আংআ মামুং হং·জাওবা না·সংনি উয়া “মংসংবাৎগিবা” ওয়াত্তেতারাংনা বাত্তে মামুং দাক্কেবা চনজা। 12 বাং·এ চাকচিকে না·সংনি গিসেপো দাল·বাতা আরো আইয়াও ইনমানানি বাং·আ কামখো দাক্কে আংআ আন·থাংখো সাকসা ওয়াত্তেতা ইন্নে ফিন্নিকজক। 13 না·সং গিপ্পিন মন্ডলীরাংনা বাত্তে মামুং গিত্তান চনজা; মিংসাওসা না·সং চন্না, আরো উয়া ইয়ান হং·আ, আংআ না·সংনি বোঝা হং·জা। ইনি গিম্মিন আংখো ক্ষেমা দাকবো। 14 আংআ দা·আও ইয়া রাং·গিত্থামগিবাও না·সংচা রি·য়াংনা থারিয়ে দংসোংজক। আংআ না·সংনি বোঝা হং·জানুয়া, মুয়ানা আংআ না·সংনি মামুংখো মা·ন্না হাম·জা, না·সংখোসা মা·ন্না হা·ম্মা। বি·সারাং বিসংনি মা·আ-ফাআরাংনা থাংখা-পয়সাখো চিম্মংনুয়া ইন্দাকেদে হং·জা বাত্তেসা বি·সারাংনান থাংখা-পয়সাখো চিম্মংআ মা·আ-ফানিন খ্রাআ। 15 আংআ খুসি হং·বিএন না·সংনা আংনি গিম্মিকখো খরস দাকনুয়া আরো আন·থাংখোবা হ·ন্নেতনুয়া। আংআ না·সংনা বাং·এ খা·সাওদে আংনা না·সং বাং·গিজা খা·সানুয়ামা? 16 জেবা হং·খানা, আংআ না·সংনি বোঝা হং·জা, ইন্দিবা ইনি হা·সেল সাবা আগান্নাবা দংআ, আংআ চালাক ইন্নে দাক্কামব্রুএ না·সংখো ব্রাংএতজক। 17 আংআ না·সংচা জেরাংখো ওয়াত্তেতামিং বিসংওনি সাকসাচাবা আংআ না·সংখো থগিয়েতজকমা? 18 আংআ তীতখো রি·য়াংখানা মল·মলামিং আরো বিমুং উয়া জংখোবা ওয়াত্তেতামিং। তীত না·সংখোবা থগিয়েতামা? মামুং সালোবা হং·জা। আংআ তীতমুং আপসান চানচিয়াখো রা·এ আপসান দাক্কে কাম দাকজামা? 19 ইয়া চিঠিরাংচা চিংআ না·সংচা আন·থাংনা চাক্কে খাৎথা আগানা ইন্নে না·সং চানচিয়ামা? খ্রীষ্টমুং নাংরিমে চিংআ ইসলনি মিকখাংও খাৎথা আগানিংআ। খা·সাগিবা রিপ্পেংরাং, না·সংখো থারিয়ে রা·না ইন্নেন চিংআ ইয়া খাৎথারাংখো আগানিংআ। 20 আংআ খেনচাকিংআ, জেনসালো আংআ না·সংচা রি·বানুয়া উনো আংআ না·সংখো জেগিত্তা নিকনা হা·ম্মা উগিত্তা নিকজানাবা দংআ, আরো না·সংবা আংখো জেগিত্তা নিকনা হা·ম্মা উগিত্তা নিকজানুয়া। আংআ খেনচাকিংআ, না·সংনি গিসেপো নিরিয়া-গিসিয়া, মিকনেংআ, খা·আওনাংআখো ফিন্নিকা, মা·আৎগ্রিকা, ইন্না-জিআ, গিপ্পিননি খু·সুকরাংখো রা·এ আগানা, গাং·বিংআ আরো গোলমালরাং দংনুয়া। 21 আংআ খেনচাকিংআ, জেনসালো আংআ না·সংচা রি·য়াংনুয়া উনো আংনি ইসল না·সংনি মিকখাংও আংখো খ্রাচা·এতনুয়া, আরো জেরাং স্খাংও পাপ দাক্কামিং ইন্দিবা বিসংনি মারাং নাংআওনি, থি·ল্লেকাওনি আরো নামগিজাওনি গিসিকখো ফি·ল্লেতখুজা, বিসংনি বাং·আরাংনা আংআ দুক মা·ন্নুয়া।

২ করিন্থীয়রাংনা 13

1 ইয়া রাং·গিত্থামগিবাও আংআ না·সংচা রি·বাজক। শাস্ত্রও চক্কা দংআ, “সাকগ্মি বা সাকগিত্থাম সাক্ষিনি খু·সুকচা ইরাং বিবি হং·আ ইন্নে নিকনা মা·ন্না।” 2 রাং·গ্মিগিবাও আংআ না·সংচা দংমিত্তিংও স্খাংও জেরাং পাপ দাক্কামিং বিসংখো আরো সাকগিপ্পিনরাংখো আংআ সিমসাকেতামিং। দা·আও আংআ দংজাওবা দা·আবা না·সংখো সিমসাকেতি আগানিংজক, জেনসালো আংআ রি·বানুয়া উনো সাকসাখোবা ওয়াতজানুয়া, 3 মুয়ানা খ্রীষ্ট আংনি গিসেপো খাৎথা আগানা উখো না·সং নিকনা হা·ম্মা। বিয়া না·সংনি গিম্মিন বিলগ্রি হং·জা, বাত্তেসা বিনি বিলখো বিয়া না·সংনি গিসেপো ফিন্নিকা। 4 বিখো বিলগ্রি অবস্থাও চিসলো দাৎখাপামিং, ইন্দিবা ইসলনি বিলও বিয়া থাংএ দংআ। চিংআ বিমুং নাংরিমে বিলগ্রি হং·জক, ইন্দিবা না·সংনি গিম্মিন ইসলনি বিলও বিমুং চিংআ থাংএ দংনুয়া। 5 না·সং আন·থাংথাংখো নিফিলে নিবো না·সং বিবিন খ্রীষ্টখো বিবিরা·আমা রা·খুজা। না·সং আন·থাংথাংখো নাম্মেদাক্কে নিবো। খ্রীষ্ট যীশু না·সংনি খা·থংও দংআ, ইখো না·সং হা·আইজামা? ইন্দাকোবা নাম্মেদাক্কে নিয়ানি গিম্মিন জেদাক্কে না·সংনি খাকখেৎ হং·গিজাখো রিম·না মান·জা। 6 ইন্দিবা আংআ খা·দংআ না·সং হা·আইনা মা·ন্নুয়া, চিংখো খাকখেৎ ইন্নে ফিন্নিকা হং·জক। 7 চিংআ ইসলচা বি·আ জেদাক্কে না·সং মামুং নামগিজা কামখো দাকজা। গিপ্পিনরাং চিংখো খাকখেৎ ইন্নে চানচিখানা চিংআ ইখো হা·ম্মা ইন্দাকেদে হং·জা। চিংআ হা·ম্মা, বিসং চিংখো খাকখেৎ ইন্নে চানচিজাওবা না·সং জেআন নাম্মা উখো দাকবো। 8 বিবিনি সাক্কাও চিংনি মামুং বিল দংজা ইন্দিবা বিবিনা দংআ। 9 জেনসালো চিংআ বিলগ্রি হং·আ আরো না·সং বিল্লাকগিবা হং·আ উনো চিংআ খুসি হং·আ। আরো চিংআ ইখো বি·আ জেদাক্কে না·সং গিম্মিকখো থিক দাক্কে রা·এ চু·সকানি রামাও রি·য়া। 10 ইনি গিম্মিন আংনি দংগিজাওন আংআ না·সংনা ইরাংখো চক্কিংজক, সকবাজোকনো জেদাক্কে গিত্তেল আংনা জে বিলখো হন·জক উখো জাকখালনা নাংজা। না·সংখো রিক্কা উয়া বিলনি মিকসংআ হং·আ, না·সংনি নামগিজাখো দাকনাদে হং·জা। 11 জংআদারাং, দা·আওদে রি·য়াংনাজক। না·সং না·সংনি গিম্মিকখো থারিয়ে চু·সকানি রামাও রি·য়াংবো। আংনি খাৎথাও গিসিক হন·বো। না·সংনি গিসিক আপসান হং·খানা, আরো না·সং থম·থমাও দংবো। ইন্দাকোদে খা·সা আরো থম·থমানি ইসল না·সংমুং দংনুয়া। 12 খা·সানি গিসিকখো রা·এ না·সং সাকসা সাকগিপ্পিননা সালাম হন·বো। 13 ইসলনি গিম্মিক মান্দিরাং না·সংনা সালাম হ·ন্নিংআ। 14 আনচিংনি গিত্তেল যীশু খ্রীষ্টনি খা·সাচাক্কা, ইসলনি খা·সা আরো গিসিক রংথালগিবানি নাংরিমা না·সং গিম্মিকমিং দংখানা।

গালাতীয়রাংনা 1

1 আংআ পৌল খ্রীষ্টনি সাকসা ওয়াত্তেতা হং·আ। ইয়া ওয়াত্তেতা দাক্কে সংআখো আংআ মান্দিচাখো বা মান্দিনি গিসেপো মান·জা, বাত্তেসা যীশু খ্রীষ্ট আরো ফাগিবা ইসল, জেআন খ্রীষ্টখো সিয়াওনি থাংচাএতামিং, বিসংচাখোন আংআ উখো মান·জক। 2 আংআ আরো আংমুং দংফাগিবা বিবিরা·গিবা জংআদারাং, চিংআ দিমদাকান গালাতিয়া মন্ডলীরাংনা চক্কিংজক। 3 আনচিংনি ফাগিবা ইসল আরো গিত্তেল যীশু খ্রীষ্ট না·সংনা খা·সাচাকখানা আরো থম·থমাখো হন·খানা। 4 আনচিংনি ইসল আরো ফাগিবানি হা·সিকা গিত্তা খ্রীষ্ট আনচিংনি পাপনি গিম্মিন জাংগিথাংখো হন·চাকামিং, জেদাক্কে বিয়া দা·আওনি ইয়া নামগিজা হা·গিলসাকনি জাকনিখো আনচিংখো জক্কেৎনা মা·ন্না। 5 ফাংনাজলনা ইসলনি রাসং হং·খানা। আমেন। 6 খ্রীষ্টনি খা·সাচাক্কাও জেআন বিনি আন·থাংনি মান্দি হং·খানা না·সংখো রিক্কামামিং, না·সং ইন্দাকে থেংরিন বিখো ওয়াত্তে দিংথাং দাকগিবা নাম্মা খাৎথাচা না·সংনি গিসিক সকজক ইখো নিক্কে আংআ আইয়াও ইনমানিংজক। 7 আসলদে উয়া নাম্মা খাৎথান হং·জা। ইন্দাকোবা মিত্তাম মান্দি দংআ জেরাং না·সংখো থম·থমে দংনা রন·জাংআ, আরো খ্রীষ্টনি নাম্মা খাৎথাখো দিংথাংএতনা হা·ম্মিংআ। 8 ইন্দিবা জে নাম্মা খাৎথাখো চিংআ না·সংনা আগানফ্রাকজক উখো দন্নে দিংথাং দাকগিবা নাম্মা খাৎথাখো না·সংনা আগানফ্রাকোদে, উখো চিংআ আন·থাংআন দাক্কোবা বা সাকসা সা·গ্রেবা দাকখানা, ইন্দিদে বিনি সাক্কাও শাপ গা·আকখানা। 9 স্খাংওবা আংআ জেগিত্তা আগানা উগিত্তা দা·আওবা আগানিংআ, জে নাম্মা খাৎথাখো না·সং রা·চাকজক উখো দন্নে দিংথাং দাকগিবা নাম্মা খাৎথাখো সাবা আগানফ্রাকোদে বিনি সাক্কাও শাপ গা·আকখানা। 10 ইনি গিম্মিন আংআ সাচাখো মিৎথেলা মা·ন্না হা·ম্মা, মান্দিচাখো বা ইসলচাখো? বা মান্দিখো খুসি দাকনা হা·ম্মামা? দা·আওবা আংআ মান্দিখো খুসি দাকনা হা·ম্মোদে আংআ খ্রীষ্টনি নকখল হং·জা। 11 জংআদারাং, আংআ না·সংনা আগানিংজক, জে নাম্মা খাৎথাখো আংআ আগানফ্রাকজক উয়া মান্দিনি থারিগিবা খাৎথা হং·জা। 12 আংআ মান্দিচাখো উখো মান·জা বা দারাংবা আংনা উখো স্খিজা, বাত্তেসা যীশু খ্রীষ্ট আন·থাংআন আংনা উখো ফারাকামিং। 13 যিহূদী থরমখো মানিমিত্তিংও আংআ বাদিকে দাক্কে জাংগি মিৎথাংনুয়ামিং না·সং উখো খিন্নাজক। আরো না·সং ইখোবা খিন্নাজক, বাদিকে বিল্লংএন আংআ ইসলনি মন্ডলীরাংখো গিচ্চিয়েতনুয়ামিং আরো উখো ব·ন্নেতনা হাম·নুয়ামিং। 14 আংনি আপসান বিলসিনি বাং·আ যিহূদীরাংনা বাত্তেবা আংআ উয়া থরমও বাং·এ বাত্তামিং। ইনা আগ্রে আংনি ফাগিৎচামরাংওনি জে নিয়াম রি·বাজক উনি গিম্মিনোবা আংআ নাম্মেন গিসিক নাংবাতামিং। 15 ইন্দিবা ইসল আৎচিয়াওনিন আংখো বাচ্ছিয়ে দন্নামিং আরো বিনি খা·সাচাক্কাচান ওয়াত্তেতা হং·না বিয়া আংখো রিক্কামামিং। 16 জেদাক্কে আংআ গিপ্পিন জাতরাংচা খ্রীষ্টনি নাম্মা খাৎথাখো আগানফ্রাকা, ইনি গিম্মিন জেনসালো ইসল বিনি হা·সিকা গিত্তা বিনি দেফান্থিখো আংনা ফারাকজক উনো আংআ সাকসা মান্দিমুংবা খু·ফাত্তিজাজক। 17 আরোবা, জেরাং আংনা স্খাং ওয়াত্তেতা হং·আমিং যিরূশালেমো আংআ বিসংচাবা রি·য়াংজা। আংআ উনো আরব হা·সংচা রি·য়াংআমিং আরো জা·মানো দা·আবা দামেস্ক সংজিলমাওনা ফিল·বামিং। 18 ইনি বিলসি গিত্থামনি জা·মানো আংআ স্খাং পিতরমুং গ্রংনা যিরূশালেমচানা রি·য়াংআমিং, আরো উয়ো বিমুং সালচিবংআ দংআমিং। 19 উনো গিত্তেলনি জং যাকোবনা আগ্রে ওয়াত্তেতারাংমুং আংআ গ্রংজা। 20 আংআ না·সংনা জেখো চক্কিংজক উনি মামুংআন বু·আ হং·জা, ইনি সাক্ষি ইসলান হং·আ। 21 জা·মানো আংআ সিরিয়া আরো কিলিকিয়ানি গিসেপো দিংথাং দিংথাং হা·দামচানা রি·য়াংআমিং। 22 যিহূদিয়ানি খ্রীষ্টান মন্ডলীরাং আংখো হা·আইজামিং। 23 বিসং ইয়া খাৎথাখোসান খিন্নামিং, “জে মান্দি আনচিংখো গিচ্চিয়েতনুয়ামিং বিয়া দা·আও খ্রীষ্টখো বিবিরা·আনি খাৎথাখো আগানফ্রাকিংজক, স্খাংদে উখো বিয়া ব·ন্নেতনা হা·ম্মামিং।” 24 আরো বিসং আংনি গিম্মিন ইসলনি রাসংখো দাকনা হা·বাচেংজক।

গালাতীয়রাংনা 2

1 বিলসি চি·ব্রিনি জা·মানো আংআ বার্ণবামুং দা·আবা যিরূশালেমচানা রি·য়াংজক, আরো তীতখোবা রিম্মাংফাজক। 2 ইসলনি হা·সিকা ফারাকানি জা·মানো আংআ উয়োনা রি·য়াংজক। জে নাম্মা খাৎথাখো গিপ্পিন জাতরাংচা আংআ আগানফ্রাকা উখো আগানজক। মন্ডলীনি দা·ল্লা-রাক্কা মান্দিরাংনা উরাংখো সিউলেন আগানজক, মুয়ানা আংআ ইন্দাকারি গাম্মিংজকখন ইন্নে আংআ খেন্নিংজকমিং। 3 ইন্দিবা যিহূদী হং·জাওবা আংনি রিপ্পেং তীতখো বিগিল রাতনা দাকজা। 4 বু·এ চা·গিবা মিত্তাম জংআদারাং সিউল দাক্কে নাপ্পানি গিম্মিন ইয়া খু·সুক হং·খাতামিং। খ্রীষ্ট যীশুও বিবিরা·গিবা গিত্তা চিংনি জাকগিত্তেলনি দোসখো রিম·না ইন্নেন বিসং সিউল নাপ্পামিং জেদাক্কে চিংখো নকখল থারিনা মা·ন্না। 5 ইন্দিবা নাম্মা খাৎথানি বিবিখো জেদাক্কে না·সংনা রাক্ষিনা মা·ন্না উনি গিম্মিন দিকদিকসা মা·মাংনাবা বিসংনি খাৎথাখো চিংআ মানিয়ে রা·জাজক। 6 মন্ডলীনি মংসংগিবা মান্দিরাং নাম্মা খাৎথানি গিম্মিন গিত্তাল দাক্কে মামুংখোন আংনা আগানজা। বিসং জেবা হং·খানা উনা আংনি মামুংআন হং·জা। ইসল হা·ফালনি মিকখাং-বিমাংখো নিএ বিচাল দাকজা। 7 জেবা হং·খানা, বিসং ইখো নিকজক, জেদাক্কে যিহূদীরাংচা নাম্মা খাৎথাখো আগানফ্রাকানি কামখো পিতরনা হ·ন্নামিং, উয়ানদাক্কে গিপ্পিন জাতরাংচা নাম্মা খাৎথাখো আগানফ্রাকানি কামখো ইসল আংনা হন·জক। 8 ইখো বিসং নিকনা মান·জক, মুয়ানা যিহূদীরাংচা পিতরনি ওয়াত্তেতানি কামনি খি·সাংও জেআন দংআমিং গিপ্পিন জাতরাংচা আংনি ওয়াত্তেতানি কামনি খি·সাংওবা উয়া ইসলান দংআমিং। 9 উয়া দা·ল্লা-রাক্কা মান্দিরাং, আগানস্খাওদে যাকোব, পিতর আরো যোহন ইরাংখো নিক্কে হা·আইনা মা·ন্নামিং, ইসলচাখো আংআ মংসংগিবা খা·সাচাক্কাখো মা·ন্না। বিসংমুং চিংনি নাংরিমাখো ফিন্নিকনা ইন্নে বিসং আংমুং আরো বার্ণবামুং জাক্রা জাকখো মেলিগ্রিকেতজক। চিংআ গিপ্পিন জাতরাংচা রি·য়াংনুয়া আরো বিসং আন·থাং যিহূদীরাংচা রি·য়াংনুয়া ইন্নে বিসং গং·জক। 10 বিসং মিংসাখো মল·মলামিং, জেদাক্কে চিংআ দিল্লা-চন্নারাংনি খাৎথাখো গিসিক রা·আ; আংআবা উখোন দাকনা গিসিক নাংআমিং। 11 পিতর সিরিয়া হা·সংনি আন্তিয়খিয়াওনা রি·বাওন আংআ গং·জাজক, মুয়ানা বিয়া অন্যায় দাক্কামিং। 12 বিবিরা·গিবা যিহূদীরাংনি জে দল গিপ্পিন জাতরাংখো দ্রাএ বিগিল রাতনা হা·ম্মা, বিসংওনি মিত্তামরাং যাকোবচানি রি·বানা স্খাং পিতর গিপ্পিন জাতরাংমুং চা·রিমনুয়ামিং। ইন্দিবা উয়া দলনি মান্দিরাং রি·বাওন বিয়া বিসংনা খেন্নে গিপ্পিন জাতরাংখো ওয়াত্তে আন·থাংখো দিংথাং দাকজক। 13 আন্তিয়খিয়ানি বিবিরা·গিবা গিপ্পিন যিহূদীরাং পিতরমুং ইন্দাকে বু·এ চা·ফামিং। আরোবা, বার্ণবাবা বিসংনি বু·এ চা·আনা ব্রাংগিবা রামাও রি·য়ামিং। 14 ইন্দিবা জেনসালো আংআ নাম্মা খাৎথানি বিবিমুং বিসংনি কাম আপসান হং·গিজাখো নিকজক উনো আংআ দিমদাকনি মিকখাংও পিতরনা আগানজক, “না·আ যিহূদী হং·এবা যিহূদীরাং গিত্তা রি·গিজা গিপ্পিন জাতরাং গিত্তা রি·জক উনো বাদিকে দাক্কে গিপ্পিন জাতরাংখো যিহূদীরাং গিত্তা রি·খানা আগানিংআ? 15 “চিংআ যিহূদী, পাপী গিপ্পিন জাত হং·এ আৎচিজা। 16 ইন্দিবা চিংআ ইয়া খাৎথাখো হা·আইয়া, নিয়াম মানিয়ানা ইসল মান্দিখো দোসগ্রি ইন্নে রা·চাকজা, বাত্তেসা যীশু খ্রীষ্টখো বিবিরা·আনি গিম্মিনান রা·চাকা। উনি গিম্মিন চিংআবা খ্রীষ্টখো বিবিরা·জক, জেদাক্কে নিয়াম মানিনা হং·জা বাত্তেসা খ্রীষ্টখো বিবিরা·আনি গিম্মিনান দোসগ্রি ইন্নে রা·চাকানি হং·আ; মুয়ানা নিয়াম মানিয়ানি গিম্মিন দারাংখোবা দোসগ্রি ইন্নে রা·চাকজানুয়া। 17 “খ্রীষ্টও গিত্তা দোসগ্রি ইন্নে ইসলনি রা·চাকনা খ্রাগিবা হং·না হা·ম্মাও ইখোন নিক্কিংআ, গিপ্পিন জাতরাং গিত্তা চিংআবা পাপী, ইন্দাকোদে ইনি অর্থ ইয়ান হং·আমা খ্রীষ্ট পাপনা দাকচাকে হ·ন্না? মামুং দাক্কেবা হং·জা। 18 জেখো আংআ ফি·এ গালজক উখো আংআ দা·আবা থারিওদে আংআ আন·থাংআন আন·থাংখো দোসি ইন্নে ফিন্নিকা। 19 নিয়ামনি দাবিরাংচা নিয়ামচান আংআ সিজক জেদাক্কে আংআ ইসলনি গিম্মিন থাংএ দংনা মা·ন্না। 20 আংখো খ্রীষ্টমুং চিসলো দাৎখাপজক। উনি গিম্মিন দা·আওদে আংআ থাংএ দংজা, খ্রীষ্টআন আংও থাংএ দংআ। দা·আও ইয়া বে·এনো আংআ জে জাংগিখো মিৎথাংএতিংআ উখো ইসলনি দেফান্থিখো বিবিরা·আচান মিৎথাংএতিংজক। বিয়া আংনা খা·সাএ আংনি গিম্মিন আন·থাংখো হন·চাকামিং। 21 ইসলনি ইয়া খা·সাচাক্কাখো আংআ ওয়াতগালজানুয়া, মুয়ানা মান্দি নিয়ামখো মানিয়াচান ইসলনি রা·চাকনা খ্রাগিবা হং·না মা·ন্নোদে খ্রীষ্ট বু·এন সিয়ামিং।”

গালাতীয়রাংনা 3

1 ও হা·আইচাকগিজা গালাতীয়রাং! সা না·সংখো যাদু মনতল দাকজক? যীশু খ্রীষ্টখো চিসলো দাৎখাপামিং ইখো না·সংচা নাম্মেদাক্কেন আগানফ্রাকজক। 2 আংআ না·সংচাখোসান হা·আইনা হা·ম্মা, না·সং নিয়ামখো মানিয়ে গিসিক রংথালগিবাখো মা·ন্নামিংমা, নাম্মা খাৎথাখো খিন্নাএ বিবিরা·এ মা·ন্নামিং? 3 না·সং ইন্দাকেন হা·আইচাকগিজাগিবা হং·আমা? গিসিক রংথালগিবাচা গিত্তাল জাংগি হা·বাচেংএ দা·আও আন·থাংনি খ্রেংআও চু·সকনা হা·ম্মিংআমা? 4 না·সং বু·এন ইন্দাকফিল্লে দুক চাকজকমা? না·সংনি উয়া দুক চাক্কা নাসিনাদা হং·জা ইন্নে আংআ খা·দংআ। 5 মুয়ানা ইসল গিসিক রংথালগিবাখো না·সংনা র·ন্না আরো না·সংনি গিসেপো ইন্দাকফিল্লে আইয়াও ইনমানগিবা কামখো দাক্কা উখো চানচিয়ে নিবো। নিয়ামখো না·সং মানিয়া ইন্নেন বিয়া ইরাংখো দাক্কামা, নাম্মা খাৎথাখো খিন্নাএ বিবিরা·জক ইন্নে দাক্কা? 6 অব্রাহামনি খাৎথাখো চানচিয়ে নিবো। রংথালগিবা শাস্ত্রও চক্কা দংআ, “অব্রাহাম ইসলনি খাৎথাখো বিবিরা·জক আরো উনি গিম্মিন ইসল বিখো দোসগ্রি ইন্নে রা·চাকজক।” 7 ইনি গিম্মিন ইয়া খাৎথাখো না·সং হা·আইএ দনবো, ইসলখো বিবিরা·গিবারাংসান অব্রাহামনি দেদ্রাং হং·আ। 8 রংথালগিবা শাস্ত্রও স্খাংআন চক্কা দংআমিং, বিবিরা·আনি গিম্মিনান গিপ্পিন জাতরাংখো ইসল দোসগ্রি ইন্নে রা·চাকনুয়া। অব্রাহামচা স্খাংআন ইয়া খাৎথাখো আগানে নাম্মা খাৎথাখো আগানামিং, “নাং·ওন গিম্মিক জাতরাং ফাত্তিয়াখো মা·ন্নুয়া।” 9 ইন্দাকোদে নিকনা মা·ন্না, ইসলখো বিবিরা·এ অব্রাহাম জেদাক্কে ফাত্তিয়াখো মা·ন্নামিং উয়ানদাক্কে উনি জা·মানোনি ইসলখো বিবিরা·গিবারাংবা উয়া ফাত্তিয়াখো মা·ন্নিংজক। 10 রংথালগিবা শাস্ত্রও চক্কা দংআ, “উয়া মান্দি শাপ মান·গিবা হং·আ, জেআন নিয়ামও চকগিবা গিম্মিক খাৎথাখো মানিজা।” ইন্দাকোদে নিকনা মা·ন্না, জেরাং নিয়ামখো মানিয়াও ফাংচাকা বিসং গিম্মিকনি সাক্কাও ইয়া শাপ দংআ। 11 ইনা আগ্রে ইখোবা নাম্মেদাক্কে নিকনা মা·ন্নিংজক, নিয়ামখো মানিয়ানি গিম্মিন ইসল দারাংখোবা দোসগ্রি ইন্নে রা·চাকজা, মুয়ানা রংথালগিবা শাস্ত্রনি আগানা গিত্তা, “জেখো দোসগ্রি ইন্নে রা·চাকা বিয়া বিবিরা·আচান জাংগিখো মা·ন্নুয়া।” 12 বাত্তেসা নিয়াম আগানা, “জে মান্দি নিয়াম গিত্তা রি·য়া বিয়া উয়োন জাংগিখো মা·ন্নুয়া।” 13 নিয়ামখো মানিজানি গিম্মিন জে শাপ আনচিংও দংআমিং, খ্রীষ্ট উয়া শাপখো আন·থাংনি সাক্কাও রা·এ আনচিংখো জক্কেৎজক। রংথালগিবা শাস্ত্রও ইয়া খাৎথা চক্কা দংআ, “জেখো ফাংও খাদিংদিয়া বিয়া শাপ মান·গিবা হং·আ।” 14 ইসল অব্রাহামনা জে ফাত্তিয়াখো র·ন্নামিং উয়া ফাত্তিয়াখো জেদাক্কে যীশু খ্রীষ্টও গিপ্পিন জাতরাংবা মা·ন্না, আরো আনচিং জেদাক্কে বিবিরা·আচা খু·রাচাকগিবা গিসিক রংথালগিবাখো মা·ন্না, উনি গিম্মিনান খ্রীষ্ট উয়া শাপখো আন·থাংনি সাক্কাও রা·আমিং। 15 জংআদারাং, আংআ মিংসা রামরাম খাৎথাচা ইয়া বিদিংখো আগানে র·ন্নিংজক। রাং·সামাই মান্দিও মামুং চুক্তি থিক দাকমানোদে উয়া চুক্তিখো দারাংবা গালনা মান·জা বা উমুং মামুংখো রা·চাপনাবা মান·জা। 16 অব্রাহাম আরো বিনি দেরিচ্ছুরাংচা ইসল খু·রাচাক্কামিং। রংথালগিবা শাস্ত্র আগানজা, “দেরিচ্ছুরাংচা,” আগানস্খাওদে বাং·আ দেরিচ্ছুরাংচা, বাত্তেসা আগানা, “নাং·নি দেরিচ্ছুচা,” আগানস্খাওদে গি·সা বিৎচ্রিচা, আরো খ্রীষ্ট হং·জক উয়া বিৎচ্রিওনি। 17 আংনি খাৎথানি অর্থ হং·জক, ইসল অব্রাহামনি সময়ও খু·রাচাকগিবা গি·সা নিয়ামখো র·ন্নামিং। উনি বিলসি রিৎচাব্রি খলাৎচিনি জা·মানো নিয়ামখো র·ন্নামিং, ইন্দিবা ইনি হা·সেল স্খাংনি উয়া খু·রাচাক্কাখো গালজাজক; ইনি গিম্মিন বিনি খু·রাচাকগিবান দংআরিজক। 18 নিয়ামখো মানিয়াও ইসলনি ফাত্তিয়াখো মা·ন্না ফাংচাকোদে খু·রাচাক্কানি সাক্কাওদে ফাংচাকজা। ইন্দিবা ইসল খা·সাচাক্কে গি·সা খু·রাচাক্কা গিত্তা অব্রাহামখো ফাত্তিয়ামিং। 19 ইন্দাকোদে মুয়ানা নিয়ামখো র·ন্নামিং? মান্দিনি পাপ দাক্কানা ইসলনি খু·রাচাক্কামুং নিয়ামখো নাংরিমেতামিং। জেনি গিম্মিন ইসল খু·রাচাক্কামিং অব্রাহামনি উয়া দেরিচ্ছু রি·বাখুজানা দিপ্পাৎ নিয়ামখো র·ন্নামিং। সা·গ্রেরাংচা ইয়া নিয়ামখো রা·রিকে দন্নামিং। 20 ইন্দিবা সাকসা নাংরিমেতগিবা দংওদে নাংজা; আরো ইসল সাকসাসান হং·আ। 21 ইন্দাকোদে নিয়াম ইসলনি দাকগিবা খু·রাচাক্কারাংনি সাক্কাও হং·আমা? হং·জাস্রাং। জাংগি র·ন্না মা·ন্না গিত্তা দাকগিবা নিয়ামখো ইসল র·ন্না মা·ন্নোদে উখো মানিয়াচা মান্দি ইসলনি রা·চাকনা খ্রাগিবা হং·না মা·ন্নুয়ামিং। 22 ইন্দিবা রংথালগিবা শাস্ত্র মান্দি গিম্মিকখো পাপনি হা·সেল দোসি ইন্নে থিক দাকজক, জেদাক্কে যীশু খ্রীষ্টখো জেরাং বিবিরা·আ বিসং বিসংনি উয়া বিবিরা·আনি গিম্মিন খু·রাচাকগিবা ফাত্তিয়াখো মা·ন্না। 23 বিবিরা·আ রি·বানা স্খাং নিয়াম আনচিংখো রাক্ষিয়ে দন্নামিং আরো বিবিরা·আ ফারাকজা দিপ্পাৎ আনচিংখো চিপ্পে দন্নামিং। 24 ইন্দাকোদে নিকনা মা·ন্না, খ্রীষ্টচা সকনা ইয়া নিয়ামান আনচিংখো রি·দিলগিবা হং·আ, জেদাক্কে বিবিরা·আচা আনচিংখো দোসগ্রি ইন্নে রা·চাকা। 25 ইন্দিবা দা·আও বিবিরা·আ রি·বাজক ইন্নে আনচিং নিয়ামনি নিং·আও দংজাজক। 26 খ্রীষ্ট যীশুখো বিবিরা·আচা না·সং গিম্মিকান ইসলনি দেদ্রাং হং·জক, 27 মুয়ানা না·সং জেরাং খ্রীষ্টও রিপ্পলজক, বা·রা গিত্তা দাক্কে না·সং খ্রীষ্টচা আন·থাংথাংখো ফিনদাপজক। 28 যিহূদী আরো যিহূদী হং·গিজারাংও, নকখল আরো জাকগিত্তেল হং·গিবারাংও, মিচিক আরো মি·আসারাংও দিংথাংগ্রিকানি মামুং দংজা, মুয়ানা খ্রীষ্ট যীশুমুং নাংরিমে না·সং গিম্মিকান আপসান হং·জক। 29 না·সং খ্রীষ্টনি হং·জক ইন্নে অব্রাহামনি দেরিচ্চুবা হং·জক। আরো ইসল জেখো র·ন্না অব্রাহামচা খু·রাচাক্কামিং না·সংবা উখো মান·রিকগিবা হং·জক।

গালাতীয়রাংনা 4

1 আংনি খাৎথানি অর্থ ইয়ান হং·আ- বি·সা ফাআনি গিম্মিকখো মান·রিকগিবা হং·ওবা বিনি চন্না দিপ্পাৎদে বিমুং আরো নকখলমুং দিংথাংগ্রিকানি মামুং দংজা। 2 বিনি ফাগিবা জেওনা দিপ্পাৎ সালখো থিক দাক্কা উয়োনা দিপ্পাৎ বিখো নিরকগিবারাংনি নিং·আও দংনা নাংআ। 3 উয়ানদাক্কেন আনচিংবা আনচিংনি চনমিত্তিংও হা·গিলসাকনি বাং·আ দাকবেওয়ালরাংনি নকখল হং·এ দংআমিং। 4 ইন্দিবা সাল চু·সকানি জা·মানো ইসল বিনি দেফান্থিখো ওয়াত্তেতজক। উয়া দেফান্থি মিচিকনি অকো আৎচিজক আরো নিয়ামনি নিং·আও জাংগি মিৎথাংজক, 5 জেদাক্কে নিয়ামনি নিং·আও দংগিবা মান্দিরাংখো বিয়া জক্কেৎনা মা·ন্না, আরো ইসলনি দেদ্রাং গিত্তা আনচিংখো রা·চাকনা মা·ন্না। 6 না·সং দেদ্রাং ইন্নেন ইসল বিনি দেফান্থিনি গিসিকখো না·সংনি খা·থংও দংনা ওয়াত্তেতজক। উয়া গিসিক ইসলখো আব্বা আ্ববা, আগানস্খাওদে আপফা ইন্নে রিক্কামা। 7 ইনি গিম্মিন না·সং নকখল হং·জাজক দেসা হং·আ। না·সং দেআন হং·ওদে ইসল জেখো র·ন্না খু·রাচাক্কা উখো না·সং মান·রিকনুয়া। 8 স্খাংও জেনসালো না·সং ইসলখো হা·আইজামিং উনো না·সং জেরাংনা দাকচাকে র·ন্নামিং উরাং মামুং মিত্তেআন হং·জা। 9 ইন্দিবা দা·আওদে না·সং ইসলখো হা·আইজক; বাত্তেসা ইসলান না·সংখো হা·আইয়া ইন্নে আগানোন থিক হং·নুয়া। ইন্দাকোদে বাদিকে দাক্কে না·সং দা·আবা হা·গিলসাকনি উয়া বিলগ্রি আরো বিথিগ্রি দাকবেওয়ালরাংচা ফিল্লিংজক? দা·আবা না·সং উরাংনি নকখল হং·না হা·ম্মিংআমা? 10 না·সং মংসংগিবা সাল, জা আরো বিলসিখো মানিংআ। 11 না·সংনি গিম্মিন আংআ ইন্দাকে খেনমানিংজক, না·সংনি গিসেপো আংআ বু·আরিন গামজকখন। 12 জংআদারাং, আংআ না·সংখো মল·মলিংআ, না·সং আং গিত্তা হং·বো, মুয়ানা আংআবা না·সং গিত্তা হং·জক। না·সং আংনি সাক্কাও মামুং অন্যায়খো দাকজা। 13 না·সং ইখো হা·আইয়া, আংআ জম্মামিং ইন্নে আংআ স্খাং না·সংচা নাম্মা খাৎথাখো আগানফ্রাকনা মা·ন্নামিং। 14 আংনি জম্মা না·সংখো দুক র·ন্নোবা না·সং আংখো চন্নিকজা বা মিৎচিজা, বাত্তেসা ইসলনি সা·গ্রেখো বা খ্রীষ্ট যীশুখো জেদাক্কে রা·চাকামিং উয়ানদাক্কেন না·সং আংখো রা·চাকামিং। 15 ইন্দিবা দা·আও আন·থাংথাংখো রাসং দাক্কে চানচিয়া বাচ্চা রি·য়াংজক? মা·ন্নোদে না·সং না·সংনি মিক্রোনখো ওত্তে আংনা র·ন্নুয়ামিং ইন্নে আংআ না·সংনি গিম্মিন ইন্দাকে সাক্ষি র·ন্না মা·ন্না। 16 দা·আও বিবিখো আগানানি গিম্মিন আংআ না·সংনি বোবিল হং·জকমা? 17 উয়া সাকগিপ্পিন মান্দিরাং না·সংনি গিম্মিন খা·দংজক, ইন্দিবা উয়াদে নাম্মাখো মিকসংএ হং·জা। বিসং আংচানিখো না·সংখো ফি·ল্লেতনা হা·ম্মা, জেদাক্কে না·সং বিসংনা খা·দংআ। 18 খাকখেৎখো মিকসংএ খা·দংনা নাংআ। আংআ না·সংও দংজোকনোসান হং·জা, ইন্দিবা ফাংনান খা·দংআ নাম্মা। 19 আংনি দেদ্রাং, জেওনা দিপ্পাৎ না·সং খ্রীষ্ট গিত্তা হং·জানুয়া উয়োনা দিপ্পাৎ দা·আবা আংআ না·সংনি গিম্মিন বি·সা বা·আ গিত্তা দুকখো চাক্কিংজক। 20 আংআ ইন্দাকে হা·সিকিংআ, ইয়া চিঠি চক্কাখো দন্নে দা·আওন আংআ না·সংচা রি·য়াংএ না·সংমুং খু·সুক আগান্না, মুয়ানা না·সংনি গিম্মিন আংআ মুয়াখো দাকনুয়া উখো হা·আইনা মান·জাংজক। 21 না·সং জেরাং নিয়ামনি নিং·আও দংনা হা·ম্মিংআ, না·সং আংনা দে আগানে নি, নিয়াম জেখো আগানা উখো না·সং খিন্নানা মান·জামা? 22 শাস্ত্রও চক্কা দংআ অব্রাহামনি দেফান্থি সাকগ্মি দংআমিং, বিসংওনি সাকসানি মা·গিবা সাকসা নকখলমিং আরো দা·আও সাকসানি মা·গিবা অব্রাহামনি চং·মত জাকগিত্তেলগিবা জিকমিং। 23 উয়া নকখল মিচিকনি বি·সা ইন্দাকারিন আৎচিয়ামিং, ইন্দিবা জাকগিত্তেলগিবা জিকনি বি·সাদে ইসলনি খু·রাচাক্কানি হা·সেল আৎচিয়ামিং। 24 আংআ থসুসাএ ইয়া খাৎথারাংখো আগানিংজক। ইয়া সাকগ্মি মিচিকচা গি·গ্মি খু·রাচাক্কাখো আগানানি হং·আ। গি·সাদে সিনাই হা·ব্রিওনি রি·বাআ আরো উয়া উনি নিং·আও মান্দিখো নকখল হং·না রা·আংজক। ইয়ান উয়া নকখল হাগার। 25 আরব হা·সংনি সিনাই হা·ব্রিখো হাগার ইন্নে হা·আইয়া। হাগার দা·আওনি যিরূশালেমনি বিমাং গিত্তাবা হং·আ, মুয়ানা যিরূশালেম বিনি দেদ্রাংখো রা·এ নকখল হং·জক। 26 ইন্দিবা জেআন সালগিনি যিরূশালেম, বিয়াদে জাকগিত্তেলগিবা হং·আ; বিয়ান আনচিংনি মা·গিবা। 27 রংথালগিবা শাস্ত্রও চক্কা দংআ, “ও সা·গ্রি মিচিক, মামুং সালোবা জেনি বি·সা হং·খুজা, না·আ খুসি হং·এ গীত রিং·বো; না·আ, মামুং সালোবা জেআন বি·সা বা·আনি দুকখো মান·খুজা, না·আ চ্রিকফ্রেতে গীত রিং·বো, খুসি হং·এ চ্রিকবো; মুয়ানা জেনি সেগিবা দংআ বিনা বাত্তে সেগিবা দংগিজানি বাং·এ বি·সা হং·নুয়া।” 28 জংআদারাং, না·সং ইসহাক গিত্তান ইসলনি খু·রাচাক্কানি গিম্মিন আৎচিজক। 29 ইন্দিবা উয়া সময়ও ইন্দাকারি আৎচিগিবা গিসিক রংথালগিবানি বিলচা আৎচিগিবাখো গিচ্চিয়েতনুয়ামিং। আরো দা·আওবা ইন্দাকেন হং·ইংজক। 30 ইন্দিবা রংথালগিবা শাস্ত্র মুয়াখো আগানা? রংথালগিবা শাস্ত্র ইন্দাকে আগানা, জেদাক্কে নকখল মিচিক আরো বিনি দেফান্থিখো রং·খাত্তেতা, মুয়ানা নকখল মিচিকনি দেফান্থি মামুং দাক্কেবা জাকগিত্তেলগিবা জিকনি দেফান্থিমুং গামরাংখো মান·রিকগিবা হং·না মান·জা। 31 জংআদারাং, ইন্দাকোদে নিকনা মা·ন্নিংজক, আনচিংদে নকখল মিচিকনি বি·সা হং·জা, বাত্তেসা আনচিং জাকগিত্তেলগিবা জিকনি বি·সা হং·আ।

গালাতীয়রাংনা 5

1 খ্রীষ্ট আনচিংখো জাকগিত্তেল দাকজক জেদাক্কে আনচিং জাকগিত্তেল দংনা মা·ন্না। উনি গিম্মিন না·সং খেম·খেম দংবো, দারাংবা জেদাক্কে না·সংখো দা·আবা নকখল থারিনা মান·জা। 2 আংআ পৌল না·সংনা আগানিংজক, খিন্নাবো-না·সংখো বিগিল রাত্তান হং·ওদে না·সংচা খ্রীষ্টনি মামুং দাম দংজা। 3 আংআ দা·আবা গিম্মিকচা ইন্দাকে সাক্ষি র·ন্নিংআ, জেনি বিগিল রাত্তা হং·আ বিয়া নিয়াম গিম্মিকখো মানিনা নাংআ। 4 না·সং জেরাং নিয়ামখো মানিয়ে ইসলনি রা·চাকগিবা হং·না হা·ম্মা না·সংদে খ্রীষ্টওনি দিংথাং হং·আংজক, ইসলনি খা·সাচাক্কাওনি জিত্তাংজক। 5 ইন্দিবা দোসগ্রি ইন্নে আনচিংখো রা·চাকনুয়া, ইয়া খা·দংআও বিবিরা·আচা গিসিক রংথালগিবাও আনচিং নিচাকে দংআ; 6 মুয়ানা জেরাং খ্রীষ্ট যীশুনি হং·আ, বিসংচা বিগিল রাত্তা বা রাতগিজানি মামুং দামআন দংজা, বাত্তেসা জে বিবিরা·আ খা·সাচা কাম দাক্কা উয়া বিবিরা·আন চং·মত হং·আ। 7 না·সংদে নাম্মেদাক্কেন রি·ইংআমিং; ইন্দাকোদে বিবিখো মানিয়ে দংনা না·সংখো সা চাংফেংজক? 8 জে চানচিয়াখো না·সং মানিয়ে রা·জক, জেআন না·সংখো রিক্কামা উয়া ইসলওনি উরাং রি·বাজা। 9 অকখিসা মা·মাং ওয়ানথি থম·গিম্মিক ময়দাখো ফিং·এতা। 10 না·সংনি গিম্মিনো গিত্তেলনি সাক্কাও আংআ ইন্দাকে বিবিরা·আ, না·সং আরবা দিংথাং চানচিয়াখো রা·চাকজানুয়া। ইন্দিবা জেআন না·সংখো খেম·খেম দংনা রন·জাংআ, বিয়া জেআন হং·খানাবো, বিয়া বিনি শাস্তি মা·ন্নানিখো মা·ন্নুয়া। 11 জংআদারাং, দা·আওবা আংআ ইন্দাকে আগানফ্রাকোদে, মান্দিরাং বিগিল রাতনা নাংআ ইন্দাকোদে দা·আওবা মুয়ানা আংখো গিচ্চিয়েতিংজক? ইন্দাকোদে চিসলনি সাক্কাও খ্রীষ্টনি সিয়ানি চাংফেংআ দংজাজক। 12 জেরাং না·সংখো গোলমালও গাল্লিংআ, বিসং আন·থাংথাংখো খাসি দাক্কে গালখানা ইখো আংআ হা·ম্মা। 13 জংআদারাং, জাকগিত্তেল হং·না ইন্নেন ইসল না·সংখো রিক্কামজক। ইন্দিবা না·সংনি পাপ-বেওয়ালনি হা·সিকারাংখো চু·সকেতনা ইন্নে ইয়া জাকগিত্তেলখো দা·আ জাকখালাবো। উনাবাত্তে খা·সানি গিসিকখো রা·এ সাকসা সাকগিপ্পিননা দাকচাকে রন·বো, 14 মুয়ানা গিম্মিক নিয়ামখো রা·চাপে খাৎথা মিংসাও ইন্দাকে আগানানি হং·আ, “নাং·নি সংসুলনা আন·থাং গিত্তা খা·সাবো।” 15 ইন্দিবা না·সং সাকসা সাকগিপ্পিনমুং নিরিয়ো-গিসিয়োদে আরো মিকনেংগ্রিকওদে ইন্দাকোদে সিমসাকবো! ইন্দাকে দাক্কোদে না·সং সাকসা সাকগিপ্পিনখো ব·ন্নেতনুয়া। 16 আংনি আগানা ইয়ান- না·সং গিসিক রংথালগিবানি নিং·আও রি·বো। ইন্দাকোদে না·সং পাপ-বেওয়ালনি হা·সিকাখো চু·সকেতজানুয়া। 17 পাপ-বেওয়ালনি হাম·গিবা গিসিক রংথালগিবানি সাক্কাও আরো গিসিক রংথালগিবানি হাম·গিবা পাপ-বেওয়ালনি সাক্কাও হং·আ। পাপ-বেওয়াল আরো গিসিক রংথালগিবা সাকসা সাকগিপ্পিননি সাক্কাও ইন্নে না·সংনি দাকনা হা·ম্মাখো দা·আ দাক্কাবো। 18 না·সং গিসিক রংথালগিবাচান রি·ওদে না·সং নিয়ামনি নিং·আও হং·জা। 19 পাপ-বেওয়ালনি কামরাংখো নাম্মেদাক্কেন নিক্কা। উরাং হং·জক- স·বাকা, মারাং নাংআ, হা·সিগিজা, 20 মিত্তে বিমাংখো অলাখিয়া, যাদু মনতল দাক্কা, বোবিল দাক্কা, নিরিয়া-গিসিয়া, মাদ্দুয়া, খা·আওনাংআ, আন·থাংনাসান দাক্কা, মা·আৎগ্রিকা, 21 মিকনেংআ, চুফেক্কা, জেজাকে চু রিংআ, আরো ইন্দাকে বাং·এ দাক্কারাং। স্খাংও জেদাক্কে আংআ না·সংখো সিমসাকেতামিং দা·আওবা ইন্দাকেন আগানিংজক, জেরাং ইন্দাকে কাম দাক্কা ইসলনি সংনকও বিসংনি হা·দাম দংজানুয়া। 22 ইন্দিবা গিসিক রংথালগিবানি বিথি হং·জক- খা·সা, খুসি হং·আ, থম·থমা, চাকচিকানি গুণ, খা·সাচাক্কানি গিসিক, নামগিবা গিসিক, বিবিগিবা, 23 সনথল আরো আন·থাংখো বাম্মেতানি। ইরাংনি সাক্কাও নিয়াম দংজা। 24 জেরাং খ্রীষ্ট যীশুনি, বিসং বিসংনি পাপ-বেওয়ালখো উনি গিম্মিক নামগিজা হা·সিকাখো চিসলো দাৎখাপে ব·ন্নেতজক। 25 আনচিং গিসিক রংথালগিবাচা জাংগি মা·ন্নে দংওদে হাই, আনচিং গিসিক রংথালগিবানি নিং·আওন রি·না। 26 জেদাক্কে আনচিং বু·এ দাল·নিকজা আরো সাকসা সাকগিপ্পিনখো মাংমেংএতজা আরো মিকনেংজা।

গালাতীয়রাংনা 6

1 জংআদারাং, না·সংও সাবা রাং·গিত্তিক পাপও গা·আকোদে, না·সং জেরাং গিসিক রংথালগিবানি নিং·আও রি·ইংআ না·সং বিখো দি·চাএ রা·বাবো। ইন্দাকোবা নম·বিয়া গিসিকখো রা·এ না·সং ইয়া কামখো দাকবো আরো আন·থাংনি গিম্মিন সিমসাকে দংবো, জেদাক্কে না·সংবা পাপও গা·আকজা। 2 না·সং সাকসা সাকগিপ্পিননি বোজাখো রিপ্পিএ রা·বো। ইন্দাকেন না·সং খ্রীষ্টনি নিয়ামখো মানিনা মা·ন্নুয়া। 3 মামুং হং·গিজান সাবা আন·থাংখো মংসংগিবা ইন্নে চানচিওদে বিয়া আন·থাংখো থকাইয়া। 4 গিম্মিকান আন·থাংনি কামখো পরীক্ষা দাক্কে নিখানা। ইন্দাকোদে গিপ্পিনমুং আন·থাংখো থসুসাগিজা বিনি আন·থাংনি কামনা বিয়া রাসং দাকনা মা·ন্নুয়া, 5 মুয়ানা গিম্মিকনিন আন·থাংথাংনি দাক্কানিখো দাকনা খ্রাআ। 6 ইসলনি খাৎথাখো জেনা স্খিয়েতা বিয়া জেদাক্কে বিনি স্খিয়েতগিবানা বিনি গিম্মিক নামগিবা বস'রাংনি বাকখো র·ন্না। 7 না·সং দা·আ ব্রাংআবো, ইসলমুং খাল· গিচ্চিয়া চলিজা; মুয়ানা জেআন জেখো গোনুয়া বিয়া উখোন রাতনুয়া। 8 পাপ-বেওয়ালখো খুসি দাক্কানি বিৎচ্রিখো গোওদে উয়োনি ব·ন্নানি বিথিখো মা·ন্নুয়া। ইন্দিবা গিসিক রংথালগিবাখো খুসি দাক্কানি বিৎচ্রিখো গোওদে উয়োনি ফাংনাজলনি জাংগিনি বিথিখো মা·ন্নুয়া। 9 জেদাক্কে আনচিং নাম্মা কামখো দাকজ্রিংএ নেং·বকজা, মুয়ানা উখো ওয়াতগিজা দাকজ্রিংওদে আনচিং থিক সময়ও উনি বিথিখো মা·ন্নুয়া। 10 চলখো মান·জোকনোন আনচিং জেদাক্কে গিম্মিকনা, মংসংদে ইসলনি নকনি মান্দিরাংনা নাম্মাখো দাক্কা। 11 নিবো, বাসিক দা·ল্লা অক্ষরও আংআ না·সংনা আন·থাংনি জাকচা চক্কিংজক। 12 জেরাং হা·ফালও আন·থাংখো নাম্মে ফিন্নিকনা হা·ম্মা বিসংআন না·সংখো বিগিল রাত্তেতখানা দাক্কিংআ। খ্রীষ্টনি চিসলনা বিসং জেদাক্কে সিনজেতাখো মান·জা উনি হা·সেলান বিসং ইন্দাকে দাক্কিংআ। 13 জেরাংনি বিগিল রাত্তা হং·জক বিসংবা নিয়ামখো মানিজা। ইন্দাকোবা বিসং না·সংনি বিগিল রাত্তাখো হা·ম্মা জেদাক্কে রাসং দাক্কে আগান্না মা·ন্না, না·সং বিসংনি দলও রি·বাজক। 14 গিত্তেল যীশু খ্রীষ্টনি চিসলনা আগ্রে আংআ জেদাক্কে দিংথাং মামুংওবা রাসং দাকজা। ইয়া চিসলোন হা·গিলসাক আংচা সিজক আরো আংআবা হা·গিলসাকচা সিজক। 15 বিগিল রাত্তা বা রাতজানি মামুং দামআন দংজা, খ্রীষ্টও গিত্তাল দাক্কে আৎচিয়ান দাল·বাতা খাৎথা হং·আ। 16 ইয়া নিয়ামও রি·গিবারাংনা, আগানস্খাওদে ইসলনি চং·মত ইস্রায়েলরাংনা বিয়া থম·থমাখো আরো খা·সাচাক্কাখো রন·খানা। 17 বন·চতাচা আগান্না, দারাংবা আংখো নেং·এতজাখানা, মুয়ানা যীশুখো দক্কানি চিনখো আংআ আন·থাংনি বে·এনো রা·বিতে রি·ইংজক। 18 জংআদারাং, আনচিংনি গিত্তেল যীশু খ্রীষ্টনি খা·সাচাক্কা না·সংনি খা·থংও দংখানা। আমেন।

ইফিষীয়রাংনা 1

1 আংআ পৌল ইসলনি হা·সিকাও খ্রীষ্ট যীশুনি সাকসা ওয়াত্তেতা হং·আ। ইফিষ সংজিলমাও জেরাং ইসলনি মান্দি হং·আ আরো খ্রীষ্ট যীশুখো বিবিরা·আ বিসংনা আংআ ইয়া চিঠিখো চক্কিংআ। 2 আনচিংনি ফাগিবা ইসল আরো গিত্তেল যীশু খ্রীষ্ট না·সংনা খা·সাচাকখানা আরো থম·থমাখো রন·খানা। 3 আনচিংনি গিত্তেল যীশু খ্রীষ্টনি ফাগিবা আরো ইসলনি রাসং হং·খানা। আনচিং খ্রীষ্টমুং নাংরিমজক ইন্নে সালগিনি গিসিকনি ফাত্তিয়াখো ইসল আনচিংনা রন·জক। 4 জেদাক্কে আনচিং ইসলনি মিক্রোনও রংথালগিবা আরো খাকখেৎগিবা হং·না মা·ন্না উনি গিম্মিন হা·গিলসাক হং·না স্খাংআন ইসল খ্রীষ্টও আনচিংখো বাচ্ছিয়ে রা·জক। বিনি খা·সানি গিম্মিন বিয়া খুসি হং·এ আন·থাংনি হা·সিকাও স্খাংআন ইন্দাকে থিক দাক্কামিং, যীশু খ্রীষ্টও বিনি বি·সা গিত্তা বিয়া আনচিংখো রা·চাকনুয়া। 6 বিয়া ইখো দাক্কামিং জেদাক্কে বিয়া বিনি দেফান্থিও ইন্দিনারি আনচিংনা খা·সাচাক্কা উনা বিখো রাসং দাক্কা। 7 ইসলনি বন·চাংগিজা খা·সাচাক্কা গিত্তাদে খ্রীষ্টমুং নাংরিমে বিনি হান·চিচা আনচিং জক্কাখো মান·জক, আগানস্খাওদে পাপওনি ক্ষেমা মান·জক। 8 ইয়া খা·সাচাক্কাখো ইসল বিনি হা·আইবাত্তামুং আরো বুদ্ধিমুং জাকস্রামে আনচিংনা রন·জক। 9 জেগিত্তা বিয়া হা·ম্মামিং আরো স্খাংআন খ্রীষ্টও থারিয়ে দনসোআমিং, উগিত্তান বিয়া বিনি নিং·থুয়া মিকসংআখো আনচিংনা আগানামিং। 10 বিয়া থারিয়ে দনসোআমিং, সাল চু·সকানি জা·মানো উয়া মিকসংআ গিত্তা কাম দাকনা ইন্নে বিয়া সালগিনি আরো হা·গিলসাকনি গিম্মিকখো আপসান দাক্কেতি খ্রীষ্টনি শাসননি নিং·আও রা·বানুয়া। 11 ইসল বিনি বিচালচা আন·থাংনি হা·সিকা গিত্তান গিম্মিক কামখো দাক্কা। বিনি মিকসংআ গিত্তা বিয়া স্খাংআন জেখো থারিয়ে দনসোআমিং উগিত্তান খ্রীষ্টও বিনি আন·থাংনি মান্দি হং·না বিয়া আনচিংখো বাচ্ছিয়ে রা·জক। 12 আনচিং জেরাং স্খাংআন খ্রীষ্টও খা·দংজক, উয়া আনচিংআন জেদাক্কে ইসলনি রাসংনা মিৎথেলা উনি গিম্মিনান বিয়া আনচিংখো বাচ্ছিয়ে রা·জক। 13 আরো না·সংবা বিবিনি খাৎথাখো, আগানস্খাওদে পাপওনি জক্কাখো মা·ন্নানি নাম্মা খাৎথাখো খিন্নাএ খ্রীষ্টখো বিবিরা·জক। খ্রীষ্টমুং নাংরিমজক ইন্নে ইসল বিনি খু·রাচাকগিবা গিসিক রংথালগিবাচা না·সংখো সীল সু·এ দনজক। 14 জেরাং ইসলনি আন·থাংনি গাম হং·আ বিসংনা বিয়া মিংসা মান·রিকানি বিলখো র·ন্না খু·রাচাকজক। বিসংখো জেওনা দিপ্পাৎ চু·গিম্মিক দাক্কে জক্কেৎজানুয়া উয়োনা দিপ্পাৎ উয়া মান·রিকানি বিলনি স্খাংগিবা বাক গিত্তা গিসিক রংথালগিবাখো বিসংনা রন·জক। আরো ইরাংচান ইসলনি রাসংনি মিৎথেলা হং·নুয়া। 15 ইনি গিম্মিন জেনসালো আংআ গিত্তেল যীশুনি সাক্কাও না·সংনি বিবিরা·আখো আরো ইসলনি গিম্মিক মান্দিরাংনা না·সংনি খা·সানি খাৎথাখো খিন্নাজক, 16 উনোনি মামুং সালোবা না·সংনা মিৎথেলাখো র·ন্না আংআ দনচাংখুজা। 17 বি·মিত্তিংও আংআ না·সংখো গুয়ালজা। আংআ বি·আ জেদাক্কে আনচিংনি গিত্তেল যীশু খ্রীষ্টনি ইসল, আগানস্খাওদে উয়া রাসংনি ফাগিবা না·সংনা গিসিকনি হা·আইয়ানি বিলখো র·ন্না, জেদাক্কে না·সং বিখো আরোবা নাম্মেদাক্কে হা·আইনা মা·ন্না। 18 আংআ আরোবা বি·না জেদাক্কে না·সংনি খা·থংনি মিক্রোন খুলিয়াংআ, জেদাক্কে বিনি রিক্কামানি গিম্মিন না·সংনি খা·থংও জেগিত্তা খা·দংআ উখো না·সং হা·আইনা মা·ন্না; আরো উমুং ইখোবা হা·আইবো, বিচা বিনি মান্দিরাং বাসিক দা·ল্লা গাম গিত্তা হং·আ আরো আনচিং জেরাং বিবিরা·গিবা হং·আ আনচিংনি খা·থংও বিনি বাসিক দা·ল্লা বিল কাম দাক্কিংআ। ইয়া উয়া আপসান বিলআন হং·আ, 20 জেচা বিয়া সিয়াওনিখো খ্রীষ্টখো থাংচাএতজক আরো সালগিও বিনি জাক্রাচানা আসংএতজক। 21 সালগিসাকো জেরাংনি জাক্কো গিম্মিক শাসন আরো বিলরাং দংআ বিসংখো বিয়া খ্রীষ্টনি নিং·আও দনজক। আরো জেনা জে বিমুংখোন দনখানা, উয়া ইয়া চাসংওন হং·খানা বা রি·বাগিবা চাসংওন হং·খানা, গিম্মিক বিমুংনি সাক্কাও খ্রীষ্টনি বিমুং দংআ। 22 গিম্মিকখো ইসল খ্রীষ্টনি জা·চক নিং·আও দনজক আরো বিনা গিম্মিকনি বিলখো রন·জক, আরো বিখোন মন্ডলীনি স্খু দাক্কে বাচ্ছিয়ে রা·জক। 23 ইয়া মন্ডলী চং·মতদে খ্রীষ্টনিন বে·এন। জেআন গিম্মিক গিত্তা গিম্মিকখো চু·সকেতা উয়া খ্রীষ্টনি চু·সকা হং·জক ইয়া মন্ডলী।

ইফিষীয়রাংনা 2

1 বামগিজানা আরো পাপনি হা·সেল না·সং সিগিবামিং। 2 হা·গিলসাকনি চানচিয়ারাং গিত্তা স্খাংদে না·সংবা উয়ানদাক্কে বামগিজা আরো পাপও রি·নুয়ামিং। জে গিসিক সিলগানি বিলগ্মাংরাংনি রাজা হং·আ উয়া গিসিক নামগিজাগিবা ইসলনা বামগিজাগিবা মান্দিরাংও কাম দাক্কা, আরো না·সং উয়া গিসিক জলজল রি·নুয়ামিং। 3 আনচিংবা দিমদাকান স্খাংদে আন·থাংথাংনি পাপ-বেওয়ালনি হা·সিকাখো চু·সকে উয়া মান্দিরাংমুং জাংগি মিৎথাংনুয়ামিং। পাপ-বেওয়ালওনি জে হা·সিকারাং আরো চানচিয়ারাং হং·খাতা উগিত্তা চিংআ কাম দাকনুয়ামিং। ইন্দাকা বেওয়ালনা চিংআবা গিপ্পিনরাং গিত্তা ইসলওনিখো শাস্তি মা·ন্না খ্রাগিবা হং·আমিং। 4 ইন্দিবা ইসল খা·সাচাক্কাও চু·সকগিবা হং·আ; বিয়া আনচিংখো নাম্মেন খা·সাআ। 5 ইনি গিম্মিন বামগিজানা আনচিংনি সিয়ে দংমিত্তিংও খ্রীষ্টমুং আনচিংখো বিয়া থাংচাএতজক। ইসলনি খা·সাচাক্কাচা না·সং পাপওনি জক্কাখো মান·জক। 6 আনচিং খ্রীষ্ট যীশুমুং নাংরিমজক ইন্নে ইসল আনচিংখো খ্রীষ্টমুং থাংচাএতি খ্রীষ্টমুংআন সালগিও আসংএতজক। 7 বিয়া ইন্দাকা কামরাংখো দাকজক জেদাক্কে বিয়া বিনি বন·চাংগিজা খা·সাচাক্কাখো রি·বাগিবা চাসংরাংনা ফিন্নিকনা মা·ন্না। বিয়া খ্রীষ্ট যীশুও আনচিংনা খা·সাচাক্কে জেখো দাকজক উয়োন বিনি ইয়া খা·সাচাক্কা ফারাকজক। 8 ইসলনি খা·সাচাক্কাও বিবিরা·আচা না·সং পাপওনি জক্কাখো মান·জক। না·সং আন·থাংচাদে ইয়া হং·জা, উয়া ইসলনিন র·ন্নানি হং·আ। 9 ইখো কামনি বিথি গিত্তা রন·জা, জেদাক্কে দারাংবা রাসং দাকনা মান·জা। 10 আনচিং ইসলনি জাকনি থারিগিবা হং·আ। ইসল খ্রীষ্ট যীশুমুং নাংরিমেতি আনচিংখো গিত্তাল দাক্কে থারিজক জেদাক্কে আনচিং নাম্মা কামখো দাক্কা। ইয়া নাম্মা কামখো বিয়া স্খাংআন থারিয়ে দন্নামিং, জেদাক্কে আনচিং উখো দাক্কে জাংগি মিৎথাংআ। 11 আৎচিয়া গিত্তাদে না·সং যিহূদী হং·জা। জাকচা বে·এনো জেরাংখো বিগিল রাতজক, আগানস্খাওদে জেরাং আন·থাংথাংখো বিগিল রাতগিবা মান্দি ইন্নে আগানে দংআ বিসং না·সংখো বিগিল রাতগিজা মান্দি ইন্নে আগানা। 12 গিসিক রা·রিকবো, স্খাংও না·সং খ্রীষ্টওনি দিংথাং দংআমিং; ইস্রায়েল জাতনি জে বিল দংআ না·সং উয়া বিলনি হা·ফালও দংআমিং; ইস্রায়েল জাতনা ইসল জে গি·সা গি·গ্মি খু·রাচাক্কাগ্মাং নিয়ামখো দাক্কামিং উমুং না·সংনি মামুং নাংরিমা দংজামিং; না·সংনি মামুং খা·দংআ দংজামিং; আরো ইয়া হা·গিলসাকো না·সং ইসলগ্রিন দংআমিং। 13 চেংও না·সং চে·ল্লাও দংআমিং, ইন্দিবা খ্রীষ্ট যীশুমুং নাংরিমজক ইন্নে না·সংখো দা·আও বিনি হান·চিচা সেফাংচানা রা·বাজক। 14 বিয়ান আনচিংনি থম·থমা হং·আ। যিহূদী আরো যিহূদী হং·গিজাগিবা ইয়া জাতগ্মিখো বিয়ান আপসান দাকজক। বিয়া বিনি চিসলো দাৎখাপগিবা বে·এনচা গি·য়েতা গিম্মিকখো আরো নিয়াম মাংগ্মাং মোশিনি নিয়ামনি বিলখো দি·গাল্লেতজক। ইন্দাকেন জে বোবিল দাকগিবা গিসিক ইয়া জাতগ্মিও দেয়াল গিত্তা চাদেংএ দংআমিং উখো বিয়া ফি·এ গালজক। বিয়া ইখো দাক্কামিং জেদাক্কে ইয়া জাতগ্মিচা বিয়া আন·থাংআন সাকসা গিত্তাল মান্দি থারিনা মা·ন্না, আরো ইন্দাকেন উয়া জাতগ্মিও জেদাক্কে থম·থমা দংআ। 16 ইয়াবা বিনি মিকসংআমিং, চিসলো সিয়ে উয়া জাতগ্মিখো বিয়া আপসান বে·এনো ইসলমুং দা·আবা নাংরিমেতা, মুয়ানা ইয়া জাতগ্মিও জে বোবিল গিসিক দংআমিং উখো বিয়া বিনি চিসলো সিয়াচা ব·ন্নেতজক। 17 না·সং জেরাং চে·ল্লাচা দংআমিং আরো বিসং জেরাং সেফাংও দংআমিং, দিমদাকচান বিয়া রি·বাএ থম·থমানি নাম্মা খাৎথাখো আগানফ্রাকামিং। 18 বিচান আপসান গিসিক রংথালগিবাচা ফাগিবাচা রি·য়াংআনি বিল আনচিংনি গিম্মিকনি দংআ। 19 ইনি গিম্মিন না·সংখো হা·আইগিজানিবা হং·জা, গিপ্পিন হা·সংনিবা হং·জা; ইন্দিবা ইসলনি মান্দিরাংমুং না·সংবা বিনি সংনকনি আরো বিনি নকনি মান্দি হং·জক। 20 ওয়াত্তেতারাং আরো আগানসোগিবারাং ফাংচাকানি হং·আ, আরো উয়া ফাংচাকানি দাল·গিবা রং·থি খ্রীষ্ট যীশু আন·থাং হং·আ। উয়া ফাংচাকানি সাক্কাওন না·সংখো রিকজক। 21 খ্রীষ্টমুং নাংরিমে দংআনি হা·সেল দালাননি বাক গিম্মিক আপসান হং·এ গিত্তেলনি দংআনি গি·সা রংথালা নক রিক্কা হং·ইংজক। 22 না·সং বিমুংআন নাংরিমজক আরো উনি গিম্মিন না·সংখোবা আপসান রিক্কিংজক, জেদাক্কে গিসিক রংথালগিবাচা না·সং ইসলনি দংআনি হা·দাম হং·না মা·ন্না।

ইফিষীয়রাংনা 3

1 ইনি গিম্মিন আংআ পৌল ইসলচা বি·ইংজক। না·সং জেরাং গিপ্পিন জাত হং·আ না·সংনান আংআ খ্রীষ্ট যীশুনি বন্দি হং·জক। 2 না·সং ইখো খিন্নাবিবিজকান, ইসল বিনি খা·সাচাক্কানি নিয়ামখো হা·আইএতানি কামখো আংনা ফাকওয়াতজক। 3 বিনি নিং·থুয়া মিকসংআখো বিয়া মংসংগিবা ফারাকাচা আংনা আগানজক, আরো ইনি গিম্মিনো আংআ না·সংচা অকখিসা খু·সুকচা চকজক। 4 খ্রীষ্টনি গিম্মিনো উয়া নিং·থুয়া মিকসংআখো হা·আইয়ানি বিল আংনি দংআ ইন্নে না·সং উখো পড়িজোকনো হা·আইনা মা·ন্নুয়া। 5 গিসিক রংথালগিবাচা উয়া নিং·থুয়া মিকসংআ দা·আও জেগিত্তা বিনি রংথালগিবা ওয়াত্তেতা আরো আগানসোগিবারাংচা ফারাকজক, চেংওনি মান্দিরাংচা উগিত্তা ফারাকজা। 6 উয়া নিং·থুয়া মিকসংআ হং·জক ইয়ান - নাম্মা খাৎথাচা গিপ্পিন জাতরাং খ্রীষ্ট যীশুমুং নাংরিমে যিহূদীরাংমুং আপসান চলখো মান·রিকগিবা হং·নুয়া, আপসান বে·এননি বাক হং·নুয়া, আরো আপসান খু·রাচাকগিবা ফাত্তিয়াখো মান·রিকগিবা হং·নুয়া। 7 ইসল বিনি দাল·বাতা বিলচা আংনা জেগিত্তা খা·সাচাকজক উয়া খা·সাচাক্কানি র·ন্নানি গিত্তা বিয়া আংনা নাম্মা খাৎথাখো আগানফ্রাকানি কামখো রন·জক। 8 ইসলনি গিম্মিক মান্দিনি গিসেপো আংনা বাত্তে চনবাতা সাকসাবা দংজা, ইন্দাকোবা খ্রীষ্টনি জে গামনি খাৎথাখো চু·গিম্মিক দাক্কে হা·আইনা মান·জা, গিপ্পিন জাতরাংচা উয়া গামনি নাম্মা খাৎথাখো হা·আইএতানি কামখো ইসল খা·সাচাক্কে আংনান রন·জক। 9 ইনা আগ্রে বিনি নিং·থুয়া মিকসংআখো বাদিকে দাক্কে কাম দাক্কেতনুয়া উখো ফারাকানি কামখোবা বিয়া আংনা রন·জক। গিম্মিকখো থারিগিবা ইসল বাসোকোনিন বিনি উয়া মিকসংআখো সিউল দাক্কে দন্নামিং। 10 বিয়া উখো দাক্কামিং জেদাক্কে খ্রীষ্টনি মন্ডলীও সালগিনি গিম্মিক শাসন দাকগিবা আরো বিলখো মান·রিকগিবারাংচা ফারাকগিবা ইসলনি হা·আইয়া দা·আও ফারাকা। 11 ইয়ান বিনি ফাংনাজলনি হা·সিকামিং, আরো উয়া হা·সিকাখো বিয়া আনচিংনি গিত্তেল খ্রীষ্ট যীশুও চু·সকেতজক। 12 খ্রীষ্টমুং নাংরিমে বিখো বিবিরা·আচা আনচিং ইসলনি মিকখাংও খেনমানগিজা চাদেংনা বিল মান·জক। 13 ইনি গিম্মিন আংআ মল·মলিংআ, না·সংনা আংআ দুকরাংখো চাক্কিংজক ইন্নে না·সং দা·আ খেনমানাবো, মুয়ানা না·সংনি রাসংনান উরাং হং·ইংজক। 14 সালগি আরো হা·গিলসাকনি গিম্মিক জাংগিগ্মাংরাংনি দিংথাং দিংথাং নকনি গিম্মিকখো জেনি দেদ্রাং ইন্নে রিক্কামা উয়া আপফানি মিকখাংও আংআ বি·না জা·স্খু দে·ম্মিংজক। 16 আংআ বি·না জেদাক্কে ইসলনি বন·চাংগিজা রাসং গিত্তা বিয়া না·সংনা ইন্দাকগিবা বিলখো র·ন্না জেদাক্কে গিসিক রংথালগিবাচা না·সংনি খা·থং বিল্লাকা, 17 আরো বিবিরা·আচা খ্রীষ্ট না·সংনি খা·থংখো চু·গিম্মিক মান·রিকা। আংআ আরোবা বি·না জেদাক্কে খ্রীষ্টনি খা·সাও না·সং জা·দিল সু·এ নাপ্পে খেম·খেমে দংআ, 18 আরো ইসলনি মান্দি গিম্মিকমুং না·সংবা ইখো হা·আইনা মা·ন্না, খ্রীষ্টনি উয়া খা·সানি মামুং গ্রো গিপ্পেং দংজা, মামুং সীমানা দংজা। 19 খ্রীষ্টনি উয়া খা·সাখো বুদ্ধিচা হা·আইনা মান·জা; ইন্দাকোবা আংআ বি·না জেদাক্কে না·সং উয়া খা·সাখো হা·আইনা মা·ন্না, জেদাক্কে ইসলনি গিম্মিক চু·সকাও না·সং চু·সকগিবা হং·আ। 20 আনচিংনি খা·থংও ইসলনি জে বিল কাম দাক্কা উয়া বিল গিত্তা বিয়া আনচিংনি হা·ম্মা আরো চানচিয়ানা বাত্তেবা বাং·এ দাকনা মা·ন্না। 21 খ্রীষ্ট যীশুও আরো মন্ডলীও চাসংওনি চাসংওনা দিপ্পাৎ ফাংনাজলনা ইসলনি রাসং হং·খানা। আমেন।

ইফিষীয়রাংনা 4

1 উনি গিম্মিন গিত্তেলনা বন্দি দংএ আংআ না·সংচা ইন্দাকে মল·মলিংজক, ইসল জেনি হা·সেল না·সংখো রিক্কামজক উনা খ্রাএ রি·বো। 2 না·সংনি গিসিক-বেওয়াল জেদাক্কে চু·গিম্মিক রিন্নকা আরো সনথল হং·আ। চাকচিকবো আরো খা·সানি গিসিকখো রা·এ সাকসা সাকগিপ্পিনখো চাকবো। 3 জে থম·থমা আনচিংখো নাংরিমেতজক উয়া থম·থমাচা গিসিক রংথালগিবানি রন·গিবা নাংরিমাখো রাক্ষিনা মংসংবাত্তে খ্রেংবো। 4 ইসল না·সংখো রিক্কামজক ইন্নে না·সংনি গিসেপো মিংসাসান খা·দংআ দংআ, গি·সাসান বে·এন দংআ, সাকসাসান গিসিক রংথালগিবা দংআ, 5 সাকসাসান গিত্তেল দংআ, মিংসাসান বিবিরা·আ দংআ, মিংসাসান রিপ্পলা দংআ, 6 আরো গিম্মিকনি ইসল আরো ফাগিবা সাকসাসান দংআ। বিয়ান গিম্মিকনি সাক্কাও; বিয়ান গিম্মিকনি গিসেপো আরো গিম্মিকনি খা·থংও দংআ। 7 ইন্দিবা খ্রীষ্ট জেদাক্কে থারিয়ে দনসোজক উয়া গিত্তাদে আনচিং গিম্মিকান মংসংগিবা খা·সাচাক্কাখো মান·জক। 8 রংথালগিবা শাস্ত্রও ইনি গিম্মিন চক্কা দংআ, বিয়া জেনসালো সালগিচানা গাদোজক, উনসালো বন্দিরাংখো রিম্মাংফাজক, আরো বিয়া মান্দিরাংনা বাং·এ র·ন্নানিখোবা রন·জক। 9 “বিয়া গাদোজক,” ইয়া খু·সুকওনি ইখোন হা·আইনা মান·জামা, খ্রীষ্ট হা·নিংআওনা হং·ওনবামিং? 10 জেআন হং·ওনবামিং বিয়ান গিম্মিকখো চু·সকেতনা দা·আবা সিলগানা বাত্তেবা সাক্কাচানা গাদোজক। 11 বিয়ান মিত্তাম মান্দিখো ওয়াত্তেতা, মিত্তামখো আগানসোগিবা, মিত্তাম মান্দিখো নাম্মা খাৎথাখো আগানফ্রাকগিবা আরো মিত্তামখো ফামং আরো স্খিএতগিবা দাক্কে বাচ্ছিয়ে রা·জক। 12 বিয়া ইরাংখো বাচ্ছিয়ে রা·জক জেদাক্কে ইসলনি মান্দি গিম্মিক বিনান দাকচাকে র·ন্না থারিসোআ আরো ইন্দাকে খ্রীষ্টনি বে·এন রিক্কা হং·আ। 13 ইনি মিকসংআ হং·জক, জেদাক্কে আনচিং গিম্মিকান ইসলনি দেফান্থিখো বিবিরা·এ আরো বিখো নাম্মেদাক্কে হা·আইনা মা·ন্নে আপসান হং·আ; আরো খ্রীষ্ট জেদাক্কে গিম্মিক গুণও চু·সকগিবা হং·আ, আনচিংবা জেদাক্কে উগিত্তান গিম্মিক গুণও চু·সকগিবা হং·আ। উনোদে আনচিং আরবা বি·সা গিত্তা দংজানুয়া। 14 মান্দিরাং নামগিজা বুদ্ধিচা গিপ্পিনরাংখো ব্রাংআ রামাচানা রা·আংনা জে ব্রাংগিবা স্খিয়াখো স্খিয়েতা, উয়া ব্রাংগিবা স্খিয়াও আনচিং বালওয়াও ফকফেকা গিত্তা ইচা-উচা দাকজানুয়া। 15 বাত্তেসা আনচিং খা·সানি গিসিকখো রা·এ খ্রীষ্টনি গিম্মিনো বিবিখো আগান্নুয়া আরো গিম্মিক গিত্তা দাল·রোরোএ খ্রীষ্ট গিত্তা হং·নুয়া। বিয়ান বে·এননি স্খুথং। 16 গিম্মিক বে·এনখো ইন্দাকে খাআ দংআ, জেদাক্কোদে বাক গিম্মিক আন·থাংথাংনি হা·দামও দংএ বে·এনমুং নাংরিমে দংআ। বাক গিম্মিক থিক দাক্কে কাম দাকমিত্তিংও বে·এন গিম্মিকান স্খুনি রি·দিলাও দাল·রোরোআ আরো খা·সাও আন·থাংখো রিক্কা। 17 ইনি গিম্মিন আংআ আগানিংজক, আরো গিত্তেলনি হং·এ মংসংবাত্তেন আগানিংজক- গিপ্পিন জাতরাং জেদাক্কে নামগিজা চানচিয়াও বিসংনি জাংগিখো মিৎথাংআ না·সং উগিত্তাদে জাংগিখো দা·আ মিৎথাংআবো। 18 বিসংনি গিসিক আন্দালাও গা·আকে দংআ। খা·থং রাক্কা ইন্নে বিসং ইসলনি গিম্মিনো মামুংখো হা·আইজা, আরো উনি গিম্মিন ইসলনি রন·গিবা জাংগিওনি বিসং বাং·এ চে·ল্লাও দংআ। 19 বিসংনি চানচিয়া গক্কা হং·জক, উনি হা·সেল খা·নামগিজা হা·সিকাখো রা·এ মারাং নাংগিবা গিম্মিক কামরাংখো দাকনা বিসং লাগামগ্রি হা·সিকাও আন·থাংথাংখো ওয়াত্তেতজক। 20 ইন্দিবা না·সংদে খ্রীষ্টনি গিম্মিনো ইন্দাকা স্খিয়াখো মান·খুজা। 21 না·সং বিনি গিম্মিন খিন্নামিং, আরো বিমুং নাংরিমে বিনি গিসেপো জে বিবি দংআ উগিত্তা স্খিয়াখো মা·ন্নামিং। 22 না·সং ইয়া স্খিয়াখো মা·ন্নামিং, না·সংনি গিৎচাম জাংগিনি গিৎচাম ‘আংআ’খো গিৎচাম বা·রা গিত্তান গালনা নাংনুয়া, মুয়ানা দাক্কামব্রুআ হা·সিকাচা উয়া গিৎচাম “আংআ” নাসিংজক। 23 উনি ফালো না·সংনি গিসিকখো ইসলচা গিত্তাল দাক্কে রিকখানা রন·বো, 24 আরো ইসলনি রন·গিবা গিত্তাল “আংআ”খো গিত্তাল বা·রা গিত্তান গানবো। বিবিনি দোসগ্রিচা আরো রংথালাচা ইয়া গিত্তাল “আংআ”খো ইসল গিত্তা থারিয়া হং·জক। 25 ইনি গিম্মিন না·সং বু·আখো ওয়াতবো আরো সাকসা সাকগিপ্পিনচা বিবিখো আগানবো, মুয়ানা আনচিং গিম্মিকান সাকসা সাকগিপ্পিনমুং নাংরিমা। 26 খা·আওনাংওদে উয়া খা·আওনাংআনি হা·সেল দা·আ পাপ দাক্কাবো; সাল নাপনা স্খাংআন না·সংনি খা·আওনাংআখো ওয়াতবো, 27 আরো শয়তাননা দা·আ চল র·ন্নাবো। 28 জেআন চা·উয়া বিয়া আরবা চা·উজাখানা, বাত্তেসা আন·থাংনি জাকচা খাকখেৎ দাক্কে কাম রিম·খানা জেদাক্কে দংগিজারাংনা র·ন্না গিত্তা বিনি মামুং দংআ। 29 না·সংনি খু·সুকওনি মামুং নামগিজা খাৎথা হং·খাতজাখানা, বাত্তেসা নাংআ গিত্তা গিপ্পিনখো রিকনা ইন্নে জেআন নাম্মা উয়ানদাক্কা খাৎথান হং·খাতখানা, জেদাক্কোদে উখো জেরাং খিন্নাআ উচা বিসংনি নাম্মা হং·আ। 30 না·সং ইসলনি গিসিক রংথালগিবাখো দা·আ দুক র·ন্নাবো, জেচা ইসল জক্কানি সালোনা দিপ্পাৎ না·সংখো সিল সু·এ দনজক। 31 মাংমেংআরাংখো ফিন্নিকা, খা·আওনাংআখো ফিন্নিকা, খা·আওনাংআ, চ্রিকে নিরিয়া-গিসিয়াখো, সাউইয়া-খা·চাআখো, আরো গিম্মিক মিকনেংআরাংখো না·সংচাখো চে·ল্লেতবো। 32 না·সং সাকসা সাকগিপ্পিননা খা·সাচাকবো, গিপ্পিননি দুকও দুক মান·ফাবো, আরো ইসল জেগিত্তা খ্রীষ্টও না·সংখো ক্ষেমা দাকজক উগিত্তা না·সংবা সাকসা সাকগিপ্পিনখো ক্ষেমা দাকবো।

ইফিষীয়রাংনা 5

1 ইসলনি খা·সাগিবা দেদ্রাং গিত্তা না·সং ইসল গিত্তা দাক্কে রি·বো। 2 খ্রীষ্ট জেদাক্কে আনচিংখো খা·সামিং আরো আনচিংনি গিম্মিন ইসলনা মিকসংএ সিম্মিলগিবা বলি গিত্তা আন·থাংখো হন·চাকামিং, উয়ানদাক্কেন না·সংবা খা·সানি রামাও রি·বো। 3 থি·ল্লেকা, মারাং নাংআ আরো মাদ্দুয়ানি খাৎথাখোবা জেদাক্কে না·সংনি গিসেপো খিন্নাজা, মুয়ানা ইসলনি মান্দিরাংনা ইন্দাকা খাৎথারাং খ্রাজা। 4 মামুং খ্রাচা·আনি বেওয়ালরাং আরো হং·গিজা-নাংগিজা আরো হা·সিগিজা ইনগিচ্চিয়া খাৎথারাং না·সংও হং·জাখানা, মুয়ানা ইরাংবা খ্রাজা। উনা বাত্তে না·সং ইসলখো মিৎথেলবো। 5 না·সং হা·আইয়ান, থি·ল্লেকগিবারাং, মারাং নাংগিবারাং আরো মাদ্দুগিবারাং, আগানস্খাওদে জেরাংখো মিত্তে বিমাং অলাখিগিবা ইন্নে আগান্না মা·ন্না খ্রীষ্টনি আরো ইসলনি সংনকো বিসংনি মামুং মান·রিকানি বিল দংজা। 6 বু·আ খাৎথারাংচা সাবা না·সংখো ব্রাংগিবা রামাচানা রিম্মাংজাখানা, মুয়ানা জেরাং মানিগিজা উয়া কামরাংখো দাক্কা ইসলনি শাস্তি বিসংনি সাক্কাও রি·বাআ। 7 ইন্দাকগিবা মান্দিরাংমুুং দা·আ নাংরিমাবো, 8 মুয়ানা স্খাংও না·সং আন্দালাও দংওবা দা·আওদে গিত্তেলমুং নাংরিমে সেং·আওনা রি·বাজক। সেং·আও চু·সকগিবা মান্দিনি জেগিত্তা রি·না নাংআ না·সং উগিত্তা রি·বো, 9 মুয়ানা জেআন নাম্মা, দোসগ্রি আরো বিবি উয়ান হং·জক সেং·আনি বিথি। 10 উনোদে না·সং থিকখেলে নিনা মা·ন্নুয়া বাগিবা কামরাংনা গিত্তেল খুসি হং·আ। 11 আন্দালানি বিথিগ্রি কামমুং না·সং দংজাখানা; উনা বাত্তে না·সং উরাংনি দোসখো ফিন্নিকে হন·বো 12 মুয়ানা মান্দিরাংনি সিউল দাক্কে দাকগিবা ইয়া কামরাংনি খাৎথাখো আগানাবা খ্রাচা·আনি হা·সেল হং·আ। 13 সেং·আচা মামুং কামনি দোসখো ফিন্নিকোদে উয়া ফারাকা, 14 মুয়ানা সেং·আন গিম্মিকখো ফারাকেতা। ইনি গিম্মিন রংথালগিবা শাস্ত্রও চক্কা দংআ, “ও থুয়ে দংগিবা মান্দি, চাখাতবো, সিয়াওনি থাংচাবো; উনোদে নাং·নি সাক্কাও খ্রীষ্ট সেং·আখো হ·ন্নুয়া।” 15 না·সং বাদিকে দাক্কে রি·ইংজক উনি বিদিংও নাম্মেদাক্কে চানচিএ নিবো। বুদ্ধিগ্রি মান্দিরাং গিত্তা রি·গিজা হা·আইগিবারাং গিত্তা রি·বো। 16 না·সংনি জাক্কো নাম্মা কামখো দাক্কানি জে চল দংআ উখো চু·গিম্মিক দাক্কে দাকবো, মুয়ানা ইয়া চাসংদে নামজা। 17 উনি গিম্মিন আগান্না, না·সং দা·আ বুদ্ধিগ্রি হং·আবো, বাত্তেসা গিত্তেলনি হা·সিকাখো হা·আইএ রা·বো। 18 দা·আ চুফেকগিবা হং·আবো, উনোদে বিংবাং হং·আংনুয়া। উনা বাত্তে চু·গিম্মিক দাক্কে রংথালগিবা গিসিকনি নিং·আও বাম্মে দংবো, 19 আরো গীতরাংনি গীতচা, মিৎথেলাচা আরো গিসিকনি গীতচা না·সং সাকসা সাকগিপ্পিনমুং খু·সুক আগানবো; না·সংনি খা·থংও গিত্তেলনা মিংএ গীত রিং·বো। 20 ফাংনান গিম্মিকনা আনচিংনি গিত্তেল যীশু খ্রীষ্টনি বিমুংও ফাগিবা ইসলখো মিৎথেলবো। 21 খ্রীষ্টখো অলাখিয়ানি গিম্মিন না·সং সাকসা সাকগিপ্পিননা বামবো। 22 না·সং জেরাং জিক হং·আ, গিত্তেলখো মানিয়ে রি·য়ানি চিন গিত্তা না·সং আন·থাংথাংনি সেগিবানা বাম্মে দংআখো মানিয়ে রা·বো, 23 মুয়ানা খ্রীষ্ট জেদাক্কে মন্ডলীনি স্খোথং হং·আ, আগানস্খাওদে বিনি বে·এননি স্খু, উয়ানদাক্কে সেগিবাবা জিকথাংনি স্খু হং·আ। ইনা আগ্রেবা খ্রীষ্টন ইয়া বে·এননি জক্কেৎগিবা হং·আ। 24 আরো মন্ডলী জেগিত্তা খ্রীষ্টনি নিং·আও বাম্মে দংআ উগিত্তা জিকবা গিম্মিক বিদিংও সেথাংনি নিং·আও বাম্মে দংনা খ্রাআ। 25 না·সং জেরাং সেগিবা হং·আ, খ্রীষ্ট জেদাক্কে মন্ডলীনা খা·সামিং আরো উনি গিম্মিন আন·থাংখো হন·চাকামিং উয়ানদাক্কে না·সংবা গিম্মিকান জিকথাংনা খা·সাবো। 26 খ্রীষ্টনি মিকসংআ ইয়ান জেদাক্কে বিয়া মন্ডলীখো রংথালেতনা বিনি খাৎথাচা চিও সু·গালে রাসংগ্মাং অবস্থাও আন·থাংনি মিকখাংও রা·বানা মা·ন্না। উয়া সময়ও মন্ডলীও মামুং মারাং নাংআনি চিন বা উয়ানদাকগিবা মামুং দংজানুয়া, বাত্তেসা উয়া রংথালা আরো খাকখেৎ হং·নুয়া। 28 সেগিবা জেদাক্কে বে·এনথাংনা খা·সাআ উয়ানদাক্কেন বিনি জিকথাংনাবা খা·সানা খ্রাআ। জেআন আন·থাংনি জিকনা খা·সা বিয়াদে আন·থাংনান খা·সা। 29 দারাংবা আন·থাংনি বে·এনখো মিৎচিজা, বাত্তেসা বিয়া বিনি বে·এনখো জিল্লা আরো যতন রা·আ। উয়ানদাক্কেন খ্রীষ্টবা বিনি মন্ডলীখো যতন রা·আ, 30 মুয়ানা আনচিং বিনি বে·এননি বাক হং·আ। 31 রংথালগিবা শাস্ত্রও চক্কা দংআ, “ইনি গিম্মিনান মান্দি মা·খো-ফাখো ওয়াত্তে বিনি জিকথাংমুং আপসান হং·এ দংনুয়া আরো বিসং সাকগ্মি বে·এন গি·সান হং·নুয়া।” 32 ইয়া মিংসা নিং·থুয়া খাৎথা-ইন্দিবা চং·মতদে আংআ খ্রীষ্ট আরো বিনি মন্ডলীনি খাৎথাখো আগানিংআ। 33 ইন্দিবা উয়া খাৎথারাংদে দংখানাবো। না·সং গিম্মিকান জিকথাংখো আন·থাং গিত্তা খা·সাবো, আরো জিকবা জেদাক্কে সেথাংখো মান্দিরা·আ।

ইফিষীয়রাংনা 6

1 দেদ্রাং, গিত্তেল জেগিত্তা হা·ম্মা উগিত্তান না·সং মা·আ-ফাখো মানিয়ে রি·বো, মুয়ানা উয়ানদাক্কেন হং·না নাংআ। 2 রংথালগিবা শাস্ত্রও স্খাংগিবা গি·য়েতামুং জে খু·রাচাক্কা দংআ উয়া ইয়ান- “নাং·নি মা·আ-ফাখো মান্দিরা·বো, 3 জেদাক্কে নাং·নি নাম্মা হং·আ আরো না·আ বাং·আ সালনা দিপ্পাৎ ইয়া হা·গিলসাকো থাংএ দংনা মা·ন্না।” 4 না·সং জেরাং ফাগিবা, না·সং না·সংনি দেদ্রাংখো দা·আ মাংমেংএতাবো, বাত্তেসা গিত্তেলনি শাসন আরো স্খিয়াও বিসংখো মান্দি দাকবো। 5 না·সং জেরাং নকখল, না·সং জেদাক্কে খ্রীষ্টখো মানিয়া উয়ানদাক্কে খেন্না আরো মান্দিরা·আমুং খা·থংওনি না·সংনি ইয়া হা·গিলসাকনি নকগিবারাংখো মানিবো। 6 মান্দিখো খুসি দাক্কানি গিসিকখো রা·এ না·সংনি নকগিবারাংনি মিকখাংওসান বিসংখো দা·আ মানিয়াবো, উনা বাত্তে খ্রীষ্টনি নকখল হং·এ ইসলনি হা·সিকাখো মানিয়ে না·সং নকগিবারাংখো মানিবো। 7 জেদাক্কোদে না·সং মান্দিনা দাকচাকে রন·জা ইন্দিবা গিত্তেলনাসা দাকচাকে র·ন্না উয়ানদাক্কে খুসি হং·এ না·সংনি নকগিবানা দাকচাকে রন·বো, মুয়ানা না·সং হা·আইয়ান, 8 গিম্মিকান বিনি গিম্মিক নামগিবা কামরাংনা গিত্তেলচাখো বকসিসখো মা·ন্নুয়া- উয়া নকখলান হং·খানা, আরো জাকগিত্তেলগিবান হং·খানা। 9 না·সং জেরাং নকগিবা, না·সংবা না·সংনি নকখলরাংমুং উয়ানদাক্কে দাকবো। বিসংখো খেন্নেতাখো ওয়াতবো, মুয়ানা না·সংদে হা·আইয়ান, বিসংনি আরো না·সংনি গিত্তেল আপসান আরো বিয়া সালগিচা দংআ; বিনি মিক্রোনও গিম্মিকান আপসান হং·আ। 10 বন·চতাও আগান্না, গিত্তেলমুং নাংরিমে বিনিন রন·গিবা বিলও বিল্লাকগিবা হং·বো। 11 দাকগ্রিকনা ইন্নে ইসলনি রন·গিবা গিম্মিক গান্না-চিন্নাখো গানবো, জেদাক্কে না·সং শয়তাননি দিমদাক চালাকিনি সাক্কাও বিল্লাকে চাদেংনা মা·ন্না। 12 আনচিংনি ইয়া দাকগ্রিকা মান্দিনি সাক্কাওদে হং·জা, বাত্তেসা উয়া আন্দালানি সংনকখো শাসন দাকগিবা আরো বিলখো মান·রিকগিবারাংনি সাক্কাও, আন্দালা হা·গিলসাকনি বিল্লাকগিবা গিসিকরাংনি সাক্কাও, আরো সিলগানি গিম্মিক গিসিক নামগিজাগিবারাংনি সাক্কাও। 13 উনি গিম্মিন না·সং দাকগ্রিকনা ইন্নে ইসলনি রন·গিবা গিম্মিক গান্না-চিন্নাখো গান্নে রা·বো, জেদাক্কে শয়তান জেনসালো রি·বানুয়া উনো না·সং বিখো চাংফেংনা মা·ন্না আরো গিম্মিকখো ব·ন্নেতি চাদেং খেম·খেমে দংনা মা·ন্না। 14 ইনি গিম্মিন বিবিচা খাংখারিখো খাএ, চেলখো রাক্ষিনা ইন্নে খাকখেৎ জাংগিচা চেলখো ফিনদাপে, 15 আরো থম·থমানি নাম্মা খাৎথাখো আগানফ্রাকনা ইন্নে জা·চকখো থারিসোএ চাদেংএ দংবো। 16 ইনা আগ্রে বিবিরা·আনি সিপখোবা দি·এ রা·বো; উয়া সিপচা না·সং শয়তাননি গিম্মিক চিং·গিবা তীরখো খিম্মিতে গালনা মা·ন্নুয়া। 17 স্খুখো রাক্ষিনা ইন্নে ইসলনি রন·গিবা জক্কেতাখো স্খুও র·ন্নে গিসিক রংথালগিবানি মি·ল্লামখো, আগানস্খাওদে ইসলনি খাৎথাখো রা·চাকবো। 18 গিসিক রংথালগিবাচা রি·এ গিসিকো ফাংনান বি·বো। ইনি গিম্মিন মিকরাকে দংএ ইসলনি গিম্মিক মান্দিরাংনা ফাংনান বি·আরি দংবো। 19 আংনাবা বি·বো জেদাক্কে আংনি খাৎথা আগানমিত্তিংও ইসল আংনা ইন্দাকা খু·সুকখো র·ন্না জেদাক্কোদে আংআ খেনমানগিজা বিনি রন·গিবা নাম্মা খাৎথানি নিং·থুয়া খাৎথারাংখো আগানফ্রাকনা মা·ন্না। 20 ইয়া নাম্মা খাৎথাখো আগানফ্রাকনা ইন্নে আংখো জেংজুলচা খাএ দন্নোবা আংআ খ্রীষ্টনি সা·গ্রেনি কামখো দাক্কিংজক। বি·বো জেদাক্কে জেলো দংএ জেগিত্তা উয়া নাম্মা খাৎথাখো আংনি আগানফ্রাকনা নাংআ উগিত্তা খেনমানগিজা উখো দাকনা মা·ন্না। 21 আংআ বাদিকে দংআ আরো আংনি সাল বাদিকে রি·য়াংইংজক উখো খা·সাগিবা জং আরো গিত্তেলনি বিবিরা·না খ্রাগিবা দাকচাকে রন·গিবা তুখিকচাখো হা·আইনা মা·ন্নুয়া। 22 জেদাক্কে না·সং চিংনি গিম্মিন হা·আইনা মা·ন্না আরো বিয়া জেদাক্কে না·সংখো খা·দংএতনা মা·ন্না উনি গিম্মিনান আংআ বিখো না·সংচা ওয়াত্তেতজক। 23 ফাগিবা ইসল আরো গিত্তেল যীশু খ্রীষ্ট জংআদারাংনা থম·থমা, বিবিরা·আ আরো খা·সাখো রন·খানা। 24 আনচিংনি গিত্তেল যীশু খ্রীষ্টনা জেরাংনি খা·সাআ খেম·খেম দংআ বিসং গিম্মিকনি সাক্কাও ইসলনি খা·সাচাক্কা দংখানা।

ফিলিপীয়রাংনা 1

1 তীমথিয় আরো আংআ পৌল- চিংআ খ্রীষ্ট যীশুনি নকখল হং·আ। খ্রীষ্ট যীশুমুং নাংরিমগিবা ইসলনি জে মান্দিরাং ফিলিপী সংজিলমাচা দংআ চিংআ বিসংচা আরো বিসংখো নিরক্ষিগিবারাংচা আরো বিসংনা দাকচাকে রন·গিবারাংচা চক্কিংজক। 2 আনচিংনি ফাগিবা ইসল আরো গিত্তেল যীশু খ্রীষ্ট না·সংনা খা·সাচাকখানা আরো থম·থমাখো রন·খানা। 3 আংআ না·সংখো গিসিক রা·আ দিপ্পাতান আংনি ইসলখো মিৎথেলা। 4 না·সংনা বি·মিত্তিংও আংআ ফাংনান খুসি হং·এ বি·এ দংআ, 5 মুয়ানা যীশু খ্রীষ্টনি গিম্মিনো নাম্মা খাৎথাখো আগানফ্রাকানি কামনা না·সং স্খাংওনি দা·আওনা দিপ্পাৎ আংনা দাকচাকে রি·বাংজক। 6 আংনি ইন্দাকা বিবিরা·আ দংআ, না·সংনি খা·থংও জেআন নাম্মা কামখো দাকনা হা·বাচেংজক বিয়া খ্রীষ্ট যীশুনি রি·বানি সালোনা দিপ্পাৎ উখো দাক্কে ব·ন্নেতনুয়া। 7 না·সং দিমদাকনা আংনি চানচিয়া ইন্দাকে হং·আন খ্রাআ, মুয়ানা না·সং আংনি খা·সাগিবা হং·আ। আংআ জেলো দংনা বা নাম্মা খাৎথানা চাক্কে চাদেংএ উনি বিবিখো ফিন্নিকনা, উনি হা·সেল না·সং দিমদাকান আংমুং ইসলনি খা·সাচাক্কাখো মান·রিকফাগিবা হং·আ। 8 খ্রীষ্ট যীশুনি খা·সাখো খা·থংও দন্নে আংআ না·সংখো বাসিক খা·সাআ উনি সাক্ষি ইসল হং·আ। 9 আংআ বি·না জেদাক্কে না·সংনি খা·সাআ হা·আইয়ামুং আরো বিচাল-বুদ্ধিমুং আপসান হং·এ বাড়িরিকরিকা। 10 ইন্দাকোদে নামবিবিয়াখো না·সং হা·আইচাকে বাচ্ছিয়ে রা·না মা·ন্নুয়া। উনোদে না·সং যীশু খ্রীষ্টও খাকখেৎ জাংগিনি বিথিচা চু·সকে খ্রীষ্টনি রি·বানি সালোনা দিপ্পাৎ খাকখেৎ আরো দোসগ্রি দংনা মা·ন্নুয়া, আরো ইনি হা·সেল ইসলনি রাসং আরো মিৎথেলা হং·নুয়া। 12 জংআদারাং, আংআ হা·ম্মা জেদাক্কে না·সং ইখো হা·আইনা মা·ন্না, আংনি সাক্কাও জেরাং হং·জক উনি হা·সেল নাম্মা খাৎথাখো আগানফ্রাকানি কাম আরোসা বাতরিকরিকাংজক। 13 আরো উনি হা·সেল ইনি রাজানি সিপাইরাং আরো গিপ্পিনরাং হা·আইনা মান·জক, খ্রীষ্টনি গিম্মিনান আংআ বন্দি হং·এ দংইংজক। 14 ইনা আগ্রে আংনি ইন্দাকে বন্দি হং·এ দংআনি গিম্মিন বাং·আ জংআদারাং গিত্তেলনি সাক্কাও আরোসা বাং·এ sl;daফাংচাকনা স্খিজক আরো উনি গিম্মিনান বিসং খেনচাকগিজা ইসলনি খাৎথাখো আগানফ্রাকনা আরোসা ফাস্রাংজক। 15 বিসংনি গিসেপো সাবা সাবা মিকনেংআখো আরো মা·আৎগ্রিকানি গিসিকখো রা·এ খ্রীষ্টনি গিম্মিন আগানফ্রাকা, দা·আবা গিপ্পিনরাংদে নাম্মাখো মিকসংএন উখো দাক্কা। 16 ইয়া মান্দিরাংনি গিসিকো খা·সাআ দংআ ইন্নেন বিসং খ্রীষ্টনি গিম্মিনো আগানফ্রাকা, মুয়ানা বিসং ইখো হা·আইয়া, নাম্মা খাৎথানা চাদেংএ খাৎথা আগান্না ইন্নেন আংখো দনজক। 17 ইন্দিবা উয়া স্খাংগিবা দলনি মান্দিরাং আন·থাংথাংনি নাম্মানা খ্রীষ্টনি গিম্মিন আগানফ্রাকে দংআ, নামগিবা মিকসংআখো রা·এ উখো দাকজা। বিসং চানচিয়া, ইনি হা·সেল আংনি বন্দি দংআ অবস্থাও বিসং আংখো দুক র·ন্না মা·ন্নুয়া। 18 ইন্দিবা উনি হা·সেল মুয়া হং·আ? চং·মত খাৎথা হং·জক, ইনি গিম্মিন জেদাক্কেন হং·খানা খ্রীষ্টখো আগানফ্রাকা হং·ইংজক- উয়া দাকমিকনা মিকসংএন হং·খানা আরো নাম্মাখো মিকসংএন হং·খানা; আরো উনান আংআ খুসি হং·আ। আংনি ইয়া হান·সেংআ মামুং সালোবা বন·জানুয়া, 19 মুয়ানা আংআ হা·আইয়া, আংনি সাক্কাও জেরাং হং·জক উনি বন·চতগিবা বিথি হং·নুয়া আংনি জক্কা; আরো উয়া না·সংনি বি·আচা আরো যীশু খ্রীষ্টনি গিসিকনি দাকচাকাচান হং·নুয়া। 20 আংনি বিবিরা·আ খেম·খেম দংআ, আংআ মামুংনান খ্রাচা·জানুয়া বাত্তেসা আংআ বাং·এ ফা·আনুয়া, স্খাংও আংনি গিসেপো খ্রীষ্টনি রাসং জেদাক্কে ফারাকামিং উয়ানদাক্কে দা·আওবা ফারাকনুয়া-আংআ থাংএবা দং বা সিয়েবা দং; 21 মুয়ানা আংনা জাংগি হং·জক খ্রীষ্ট আরো সিয়া হং·জক মান·দাপা। 22 ইন্দিবা আংআ থাংএন দংওদে উয়া আংখো ইন্দাকগিবা মিংসা কামনা চল দাক্কে র·ন্নুয়া জেও বাং·এ বিথি হং·আ। বাগিবাখো আংআ বাচ্ছিয়ে রা·নুয়া উখো হা·আইজা। 23 সামগ্মিআন আংখো সাল্লিংজক। আংআ সিয়ে খ্রীষ্টমুং দংনা হা·ম্মা, মুয়ানা উয়ান বাং·এ নাম্মা। 24 ইন্দাকোবা না·সংনা আংনি আরোবা বাং·এ থাংএ দংনা নাংআ। 25 আংআ থাংএ দংনুয়া ইখো আংআ হা·আইবিবিয়া আরো না·সং দিমদাকমুংআন দংনুয়া, জেদাক্কে না·সংনি বিবিরা·আ বাং·আংআ আরো উনোদে না·সং খুসি হং·আ। 26 উনি গিম্মিন না·সংওনা দা·আবা রি·বানি হা·সেল না·সং খ্রীষ্ট যীশুও আংখো রা·এ হান·সেংবিনুয়া। 27 দাল·বাতা খাৎথা ইয়ান, ইন্দাকফিল্লে না·সং না·সংনি জাংগিখো থাংএতা জেআন খ্রীষ্টনি গিম্মিনো নাম্মা খাৎথানা খ্রাআ। ইন্দাকোদে আংআ আন·থাং রি·বাএ না·সংখো নিআ বা চে·ল্লাওনি না·সংনি খাৎথাখো খিন্নাআ, আংআ হা·আইনুয়া, না·সং গিসিকো আপসান হং·এ চাদেংএ খেম·খেমে দংআ আরো জে বিবিরা·আ নাম্মা খাৎথাচা রি·বাআ উনি গিম্মিন আপসান হং·এ কাম দাক্কিংজক। 28 জেরাং না·সংনি বোবিল দাক্কে দংআ বিসংনি মামুংনা না·সং দা·আ খেন্নাবো। ইয়োন নিকনা মা·ন্নুয়া, বিসং ব·ন্নাংইংজক আরো না·সং জক্কাখো মা·ন্না রি·য়াংইংজক; আরো ইয়া জক্কা ইসলচানিন রি·বাআ। 29 না·সংনা খা·সাচাকজক জেদাক্কে খ্রীষ্টখোসান না·সং বিবিরা·আ ইন্দাকে হং·জা, উনি গিম্মিন দুকখোবা চাকনা মা·ন্না। 30 স্খাংও না·সং জেদাক্কে আংনি দুক চাক্কাখো নিকজক আরো দা·আওবা উনি গিম্মিন জেখো খিন্নাংজক, না·সংবা উয়ানদাকগিবা দুকও গা·আকজক।

ফিলিপীয়রাংনা 2

1 ইন্দাকোদে খ্রীষ্টমুং নাংরিমানি গিম্মিন খা·দংএতাখো মা·ন্নোদে, খ্রীষ্টনি খা·সানি গিম্মিন খা·নাম্মেতাখো মা·ন্নোদে, গিসিক রংথালগিবা আরো না·সংনি গিসেপো নাংরিমা দংওদে, না·সংনি খা·থংও খা·সাচাক্কা দংওদে, 2 উনো ইন্দাকে না·সং আংনি হান·সেংআখো চু·সকেতবো- না·সং দিমদাকনি গিসিক আপসান হং·খানা, না·সং সাকসা দা·আও সাকসানা খা·সাবো আরো গিসিকো আপসান হং·বো। 3 আন·থাংনাসান মান·দাপনা খা·দংএ বা গাং·বিংএ মামুংখো দা·আ দাক্কাবো, বাত্তেসা রিন্নকে গিপ্পিনখো আন·থাংনা বাত্তে দাল·নিকবো। 4 আন·থাংখোসান রা·এ দা·আ দংআবো, বাত্তেসা সাকসা সাকগিপ্পিননা চানচিবো। 5 খ্রীষ্ট যীশুনি জে গিসিক দংআমিং উয়া জেদাক্কে না·সংনি খা·থংওবা দংআ। 6 আসলদে বিয়া ইসলান হং·এ দংজক, ইন্দিবা ইসলমুং আপসান হং·এ দংনা বিয়া চানচিজাজক। 7 বাত্তেসা বিয়া নকখল হং·এ আরো মান্দি গিত্তা আৎচিয়ে আন·থাংখো দনজক। 8 ইনাআগ্রে মান্দিনি বিমাংখো রা·এ সিয়োনা দিপ্পাৎ, আরোবা, চিসলনি সাক্কাও সিয়োনা দিপ্পাৎ বাম্মে দংএ বিয়া আন·থাংখো চন্নিকজক। 9 ইসল ইনি গিম্মিনান বিখো গিম্মিকনা বাত্তে চু·য়াকাও দি·দোএতজক আরো ইন্দাকা মিংসা বিমুং রন·জক জেআন গিম্মিক বিমুংনা বাত্তে দাল·বাতা, 10 জেদাক্কে সালগিও, হা·গিলসাকো আরো হা·নিংআও জেরাং দংআ বিসং গিম্মিকান যীশুনি মিকখাংও জা·স্খু দে·ম্মা, 11 আরো ফাগিবা ইসলনি রাসংনা যীশু খ্রীষ্টআন গিত্তেল ইন্নে খু·রাচাক্কা। 12 আংনি খা·সাগিবা জংআদারাং, না·সংদে ফাংনান বাম্মে দংআ। উয়ানদাক্কে আংনি দংওসান হং·জা, ইন্দিবা মংসং দাক্কে দা·আও আংনি দংজামিত্তিংওবা না·সং অলাখিয়ে আরো খেনচাকে না·সংনি কামও ফিন্নিকবো, না·সং পাপওনি জক্কাখো মান·জক। 13 ইসল না·সংনি খা·থংও ইন্দাকে কাম দাক্কিংজক জেনি হা·সেল বিয়া জে কামও খুসি হং·আ উয়া কামখো দাকনা হা·সিকা আরো বিল না·সংনি হং·আ। 14 না·সং জিচাকগিজা আরো জিগ্রিকগিজা গিম্মিকখো দাকবো, জেদাক্কে না·সং দোসগ্রি আরো খাকখেৎ হং·না মা·ন্না আরো ইয়া চাসংনি গিসিকগ্রি আরো নামগিজা বেওয়ালনি মান্দিরাংনি জাংচিও ইসলনি খ্রাগিবা বি·সা হং·না মা·ন্না। উয়া মান্দিরাংনি মিকখাংও না·সংদে জাংগি হন·চাকগিবা খাৎথাখো ফারাকে ইয়া হা·গিলসাকো আস্কি গিত্তা থেং·সুএ দংআ। ইন্দাকোদে জেনসালো খ্রীষ্ট রি·বানুয়া উনিসালো আংআ ইখো রা·এ রাসং দাকনা মা·ন্নুয়া, আংনি খ্রেংআ আরো বিমচিপা নাসি-নাদা হং·জাজক। 17 জে বিবিরা·আনি বলিচা না·সং ইসলখো অলাখিয়া উনি সাক্কাও আংনি হান·চিখো বলি গিত্তা রুদাপোবা খুসি হং·আ আরো না·সংমুং হান·সেংআ। 18 না·সংনিবা উয়ানদাক্কেন আংমুং খুসি হং·ফানা আরো হান·সেংনা নাংআ। 19 আংআ খা·দংআ, গিত্তেল যীশু নামনিকোদে আংআ তীমথিয়খো থেংরিন না·সংচা ওয়াত্তেতনুয়া, জেদাক্কে না·সংনি খবলখো মা·ন্নে আংআবা খা·দংএতাখো মা·ন্না। 20 আংমুং ইন্দাকগিবা সাকসাবা দংজা, জেআন তীমথিয় গিত্তা বিবিন না·সংনা চানচিয়া। 21 গিপ্পিনরাং যীশু খ্রীষ্টনি বিদিংও বিমচিপগিজা আন·থাংনাসান বিমচিপা। 22 ইন্দিবা না·সং হা·আইয়ান, তীমথিয় বিখো খ্রাগিবা দাক্কে ফিন্নিকজক, মুয়ানা জেগিত্তা দেফান্থি ফাগিবামুং কাম দাক্কা উগিত্তান বিয়া আংমুং যীশু খ্রীষ্টনি গিম্মিন নাম্মা খাৎথাখো আগানফ্রাকানি কামও বিমচিপজক। 23 উনি গিম্মিন আংনি অবস্থা মুয়া হং·নুয়া উখো হা·আইএ থেংরিন আংআ বিখো ওয়াত্তেতনুয়া ইন্নে খা·দংআ। 24 ইন্দাকোবা আংআ গিত্তেলনি সাক্কাও ইন্দাকে বিবিরা·আ, থেংরিন আংআবা রি·বানা মা·ন্নুয়া। 25 আংআ ইপাফ্রদীতখো না·সংচা ওয়াত্তেতনা নাংআ ইন্নে চানচিজক। বিয়া আংনি বিবিরা·গিবা জংআদা। চিংআ আপসানান কাম দাক্কা আরো খ্রীষ্টনা দাকগ্রিকা। দাকচাকে রন·গিবা গিত্তা আংনি নাংআখো র·ন্না বিখোন না·সং আংচা ওয়াত্তেতামিং। 26 বিয়া না·সং গিম্মিকখো নিনা হা·ম্মা ইন্নে আংআ বিখো ওয়ালফিলেতিংজক। ইনাআগ্রে না·সং বিনি জম্মাখো খিন্নাজক ইন্নে বিয়া নাম্মেন চানচিংজক। 27 আরো বিবিন বিয়া ইন্দাকে জম্মামিং বিয়া সিনা গিত্তিক দাকজকমিং, ইন্দিবা ইসল বিনা খা·সাচাকজক- বিনি সাক্কাওসান খা·সাচাক্কা ইন্দাকে হং·জা, আংনাবা খা·সাচাক্কা জেদাক্কে আংআ দুকনি সাক্কাও দুক মান·জা। 28 উনি গিম্মিন নাম্মেন খা·দংএ আংআ বিখো ওয়াত্তেতিংজক জেদাক্কে বিখো নিক্কে না·সং হান·সেংআ আরো আংনিবা বাং·এ চানচিনা নাংজা। 29 ইনি গিম্মিন গিত্তেলনি মান্দি গিত্তা চু·গিম্মিক হান·সেংআও বিখো রা·চাকবো, আরো ইন্দাকগিবা মান্দিরাংখো না·সং মান্দিরা·বো। 30 খ্রীষ্টনি কামনা বিয়া সিয়ানি মিকখাংগ্রিক হং·আমিং। না·সংনি দংগিজাও আংনা জেখো দাকনা মান·জাজক উখো দাকনা বিয়া বিনি জাংগিখো হন·চাকনাবা হা·ম্মামিং।

ফিলিপীয়রাংনা 3

1 বন·চতাও আগান্না, আংনি জংআদারাং, না·সং গিত্তেলমুং নাংরিমে দংআ ইন্নে হান·সেংবো। না·সংচা দা·আবা ইয়া আপসান খাৎথাখোন চকনা আংনি মামুং নেং·আনি হং·জাংআ, আরো না·সংখো সিমসাকেতনা উখো দাক্কা নাম্মা। 2 উয়া আছাকরাংওনি, আগানস্খাওদে জেরাং নামগিজা কামখো দাক্কা আরো বে·এনখো দ্রাএ মাত্তেতনা-বুএতনা দাক্কা বিসংওনি সিমসাকবো! 3 আনচিংআন চং·মত বিগিল রাতগিবা মান্দি, মুয়ানা আনচিং ইসলনি গিসিকচা বিখো অলাখিয়া আরো খ্র্রীষ্ট যীশুখো রা·এ রাসং দাক্কা আরো দাকবেওয়ালরাংনি সাক্কাও ফাংচাকজা। 4 আংআ উখো দাকনাদে মা·ন্নুয়ামিং। দাকবেওয়ালরাংনি সাক্কাও ফাংচাকানি হা·সেল দংআ ইন্নে সাবা চানচিয়োদে বিয়া হা·আইখানা, আংনি বিনা বাত্তেবা বাং·আ হা·সেল দংআ। 5 সালচেতনি সালো আংখো বিগিল রাত্তামিং; ইস্রায়েল জাতনি গিসেপো বিন্যামীননি মা·চংও আংআ আৎচিয়া; আংআ সাকসা খাকখেৎ ইব্রীয় হং·আ; মোশিনি নিয়ামখো মানিয়াও আংআ সাকসা ফরীশী হং·আ; 6 থরমনি বিদিংও আংআ ইন্দাকে বিমচিপামিং, খ্রীষ্টনি মন্ডলীখো আংআ গিচ্চিয়েতনুয়ামিং; আরো ইসলনি রা·চাকনা খ্রাগিবা হং·না খা·দংএ মোশিনি নিয়াম মানিয়াও দারাংবা আংখো জিনা মান·জানুয়ামিং। 7 ইন্দিবা উনি হা·সেল আংআ জেখো মান·দাপামিং খ্রীষ্টনা আংআ দা·আও উরাংখো নামজা ইন্নেন চানচিয়া। 8 চং·মতদে জেনি হা·সেল আংআ ইয়া নামগিজারাংখো মানিয়ে রা·জক আংনি উয়া গিত্তেল খ্রীষ্ট যীশুখো হা·আইয়াও জে গামচাৎগিবা ফাত্তিয়া দংআ, উমুং দংগিবা গিম্মিকখোন আংআ নামজা ইন্নে চানচিয়া। খ্রীষ্টখো জেদাক্কে আংআ মা·ন্না আরো আংখো জেদাক্কে খ্রীষ্টমুং নাংরিমাখো নিক্কা উনি গিম্মিন আংআ উরাংখো চামবাল ইন্নে চানচিয়া। নিয়ামখো মানিয়ানি গিম্মিন আংআ দোসগ্রি হং·আ ইন্দাকেদে হং·জা, ইন্দিবা খ্রীষ্টখো বিবিরা·আনি গিম্মিন ইসল আংখো দোসগ্রি দাক্কে রা·চাকজক। ইয়া দোসগ্রি ইসলচানি রি·বাআ আরো উয়া বিবিরা·আনি সাক্কাও ফাংচাকা। 10 আংআ খ্রীষ্টখো হা·আইনা হা·ম্মা আরো জে বিলচা সিয়াওনি বিখো থাংচাএতামিং উয়া বিলখো হা·আইনা হা·ম্মা। আংআ বিনি দুকরাংখো মান·ফানা হা·ম্মা। জে গিসিকখো রা·এ বিয়া সিয়ামিং আংআবা উয়া গিসিকখো মা·ন্না হা·ম্মা। 11 উনি গিম্মিন জেবা হং·খানাবো আংআ সিয়াওনি চাখাতবিবিনুয়া। 12 আংআ জেনা খ্রেংইংআ উখো দা·আওন মান·জক বা চু·সকজক ইন্দাকে হং·জা। ইন্দিবা জেনি হা·সেল খ্রীষ্ট যীশু আংখো রি·ম্মামিং উখোন রিম·না আংআ খাত্তিংজক। 13 জংআদারাং, আংআ উখো রিম·না মান·জক ইন্নে চানচিজা। ইন্দাকোবা আংআ মিংসা কামখো দাক্কিংআ- খি·সাংচানি গিম্মিকখো গুয়ালে মিকখাংচানা নিচাকে বিল গিম্মিকচা আংআ বন·চতা সিমানাওনা খাত্তিংজক। ইনি হা·সেল খ্রীষ্ট যীশুও সালগিচানা ইসলনি রিক্কামাও জে বকসিস দংআ উখো জেদাক্কে আংআ মা·ন্না। 15 ইনি গিম্মিন আনচিং জেরাং চু·সকাওনা নামসাং সক্কাংজক আনচিংনি উয়া আপসান গিসিক দংনা নাংআ। আরো মামুংনা না·সংনি দিংথাং চানচিয়া দংওদে ইসল না·সংনা উখোবা ফিন্নিকে র·ন্নুয়া। 16 জেবা হং·খানাবো, আনচিং চু·সকাওনা বাসিক সকজক উনি খ্রি আনচিংনি রি·না নাংআ। 17 জংআদারাং, না·সং গিম্মিকান আং গিত্তা রি·বো আরো জেরাং ইন্দাকে রি·য়া বিসংখো হা·আইএ রা·বো। বাদিকে রি·না নাংআ উখো চিংআ না·সংনা ফিন্নিকজক। 18 আংআ না·সংনা দাপ্পেৎ দাপ্পেতান আগানজক আরো দা·আও মিকচি গাল্লে দা·আবা আগানিংজক, ইন্দাকগিবা বাং·এন দংআ জেরাং খ্রীষ্টনি চিসলনি বোবিল গিত্তা দাক্কে রি·ইংআ। 19 বিসংনি ফালও ব·ন্নানি দংআ; বিকমান বিসংনি ইসল; জেআন খ্রাচা·আনি হং·আ উখো রা·এ বিসং রাসং দাক্কা; আরো হা·গিলসাকনি গিম্মিনোসান বিসংনি গিসিক গা·আকে দংআ। 20 ইন্দিবা আনচিংনি চং·মত দংরামদে সালগিসা; উয়োনি আনচিংনি জক্কেৎগিবা গিত্তেল যীশু খ্রীষ্টনি রি·বানি সালনা আনচিং খা·দংএ সেংসোংআ। 21 বিয়া আনচিংনি বিলগ্রি বে·এনখো বিনি রাসংগ্মাং বে·এন গিত্তা দাকনুয়া। জে বিলচা গিম্মিকখো বিয়া আন·থাংনি নিং·আও রা·বাআ উয়া বিলচান বিয়া ইয়া কামখো দাকনুয়া।

ফিলিপীয়রাংনা 4

1 আংনি জংআদারাং, আংআ না·সংনা খা·সাআ আরো না·সংখো নিনা হা·ম্মা। না·সংআন আংনি হান·সেংআ, আংনি হাম্মানি মালা হং·আ। না·সং গিত্তেলমুং নাংরিমে খেম·খেম দংবো। 2 উবদিয়া আরো সুন্তখী, আংআ না·সংচা মংসংএ ইখো মল·মলিংজক- গিত্তেলমুং নাংরিমজক ইন্নে না·সংনি গিসিক আপসান হং·খানা। 3 আরো আংমুং চং·মত কাম রিম·ফাগিবা, আংআ নাং·খোবা মল·মলিংআ- না·আ ইয়া মিচিকরাংনা দাকচাকবো। বিসং খ্রীষ্টনি গিম্মিন নাম্মা খাৎথানা আংমুং আরো ক্লীমেন্ত আরো আংনি গিপ্পিন কাম রিম·ফাগিবারাংমুং দুকখো চাক্কামিং। জাংগিনি-খি·তাপও বিসংনি বিমুং চক্কা দংআ। 4 গিত্তেলমুং নাংরিমজক ইন্নে না·সং ফাংনান হান·সেংএ দংবো। আংআ দা·আবা আগান্না, না·সং হান·সেংএ দংবো। 5 না·সংনি গিসিক রিন্নকাখো জেদাক্কে গিম্মিকান নিকনা মা·ন্না। গিত্তেল থেংরিন রি·বাংজক। 6 মামুংখো রা·এ দা·আ জাজ্রেংআবো, বাত্তেসা না·সংনি গিম্মিক হা·ম্মাখো মিৎথেলামুং বি·আচা ইসলনা আগানবো। 7 উনি গিম্মিন, ইসলনি রন·গিবা জে থম·থমাখো মান্দি চানচিয়েবা হা·আইনা মান·জা, খ্রীষ্ট যীশুও উয়া থম·থমা না·সংনি খা·থং আরো গিসিকখো জক্কেৎনুয়া। 8 বন·চতাও আগান্না, জংআদারাং, জেআন বিবি, জেআন খ্রাগিবা, জেআন নাম্মা, জেআন খাকখেৎ, জেআন নিথুয়া, জেআন মান্দিরা·আখো মা·ন্না খ্রাগিবা, জেআন নাম্মা আরো মিৎথেলনা খ্রাআ, উচা না·সং গিসিক রন·বো। 9 না·সং আংচা জেখো স্খিজক আরো নাম্মা ইন্নে রা·চাকজক আরো আংও জেখো নিকজক আরো আংনি খু·সুকচা জেখো খিন্নাজক, উরাংখো রা·এন আন·থাংথাংখো বিমচিপে দনবো। উনোদে থম·থমেতগিবা ইসল না·সংমুং দংনুয়া। 10 গিত্তেল আংনা নাম্মেন হান·সেংআখো রন·জক, মুয়ানা বাং·আ সালনি জা·মানো না·সং দা·আবা আংনা চানচিংজক। আংনাদে ফাংনান না·সংনি চানচিয়া দংআমিংআন, ইন্দিবা উখো না·সং ফিন্নিকনা চল মান·খুজা। 11 আংনি মামুং নাংআনা আংআ ইয়া খাৎথাখো আগানিংআ ইন্দাকে হং·জা, মুয়ানা জে অবস্থাবা হং·খানা আংআ উয়োন নাম্মে দংনা স্খিজক। 12 চু·ওংগিজাও আরো বাং·এ দংমিত্তিংও আংআ নাম্মে দংনা হা·আইয়া। বিকমা গাপ্পাও হং·খানা বা মামুং দংগিজাও হং·খানা, বাং·এ দংআও হং·খানা বা চু·ওংগিজাও হং·খানা- গিম্মিক অবস্থাওন বাদিকে দাক্কে নাম্মে দংনা মা·ন্না উখো আংআ স্খিজক। 13 জেআন আংনা বিলখো র·ন্না বিচান আংআ গিম্মিকখো দাকনা মা·ন্না। 14 ইন্দাকোবা না·সং আংনি দুকখো মান·ফাগিবা হং·এ নাম্মাখোন দাকজক। 15 ফিলিপীনি মন্ডলীনি মান্দিরাং, না·সংদে আন·থাংথাংআন হা·আইয়া, না·সং স্খাং নাম্মা খাৎথাখো খিন্নানি জা·মানো জেনসালো আংআ ম্যাসিডোনিয়াখো ওয়াত্তে রি·য়াংআমিং, উনো না·সংনা আগ্রে গি·সা মন্ডলীবা আংমুং র·ন্না-রা·আও দংফাজা। 16 থিষলনীকীচা আংনি দংমিত্তিংও না·সং দাকচাকারাংখো ওয়াত্তেতি আংনি নাংআনিখো চু·সকেতামিং। 17 মামুং বকসিসখো আংআ হা·ম্মা ইন্দাকে হং·জা, ইন্দিবা আংআ ইন্দাকা বিথিনা খা·দংইংআ জেআন না·সংনি বিমুংও চিম্মংএন দংনুয়া। 18 আংনি মা·ন্নাগিবা গিম্মিকখোন আংআ মান·জক। আংনি নাংআনি বাত্তেবা আংনি বাং·এন দংআ। ইপাফ্রদীতনি জাক্কো না·সংনি ওয়াত্তেতগিবা বকসিসখো মা·ন্নে দা·আও আংনি চু·ওংজক। ইয়া বকসিসরাং সিম্মিলা আরো রা·চাকনা খ্রাগিবা বলি হং·আ, 19 আরো উনি গিম্মিন ইসল খুসি হং·আ। আংনি ইসল বিনি রাসংগ্মাং বন·চাংগিজা গামনি খ্রি খ্রীষ্ট যীশুও না·সংনি গিম্মিক নাংআখো চু·সকেতনুয়া। 20 চাসংওনি চাসংওনা দিপ্পাৎ ফাংনাজলনা আনচিংনি ফাগিবা ইসলনি রাসং হং·খানা। আমেন। 21 খ্রীষ্ট যীশুমুং নাংরিমগিবা ইসলনি গিম্মিক মান্দিনা আংনি সালামখো রন·বো। আংমুং দংফাগিবা জংআদারাং না·সংনা সালাম র·ন্নিংআ। 22 ইসলনি গিম্মিক মান্দিরাং জেরাং ইয়ো দংআ, মংসংদে সম্রাট কৈসরনি নকনি মান্দিরাং না·সংনা সালাম র·ন্নিংআ। 23 গিত্তেল যীশু খ্রীষ্টনি খা·সাচাক্কা না·সংনি খা·থংও দংখানা।

কলসীয়রাংনা 1

1 আংআ পৌল ইসলনি হা·সিকাও খ্রীষ্ট যীশুনি সাকসা ওয়াত্তেতা হং·জক। কলসী সংজিলমাও ইসলনি মান্দিরাংনা আরো খ্রীষ্টমুং নাংরিমা বিবিরা·গিবা জংআদারাংনা, বিসংনা আংআ আরো জং তীমথিয় ইয়া চিঠিখো চক্কিংআ। আনচিংনি ফাগিবা ইসল না·সংনা খা·সাচাকখানা আরো থম·থমাখো হন·খানা। 3 খ্রীষ্ট যীশুখো না·সংনি বিবিরা·আ আরো ইসলনি দিমদাক মান্দিরাংনা না·সংনি খা·সাখো চিংআ খিন্নাজক, আরো উনি গিম্মিন চিংআ না·সংনা বি·আ রিক্ষিতান আনচিংনি গিত্তেল যীশু খ্রীষ্টনি ফাগিবা ইসলখো চিংআ মিৎথেলা। 5 সালগিচা না·সংনা জেখো চিম্মংজক উখো মা·ন্না খা·দংআওনিন না·সংনি গিসেপো ইয়া বিবিরা·আ আরো খা·সাআ আৎচিজক। জে নাম্মা খাৎথা, আগানস্খাওদে বিবিনি খাৎথা না·সংচা সকজক উয়োন না·সং ইয়া খা·দংআনি খাৎথাখো খিন্নাজক। 6 ইয়া নাম্মা খাৎথা হা·গিলসাক গিম্মিকো গিপ্পাংএ বিথি নাংইংজক আরো সালনিসাল বাতরোরোংজক। জেনসালো না·সং ইয়া নাম্মা খাৎথাখো খিন্নাজক আরো ইসলনি খা·সাচাক্কাখো হা·আইবিবিজক উনসালোনি উয়া না·সংওবা উয়ানদাক্কেন কাম দাক্কিংজক। 7 উয়া নাম্মা খাৎথাখো না·সং চিংনি খা·সাগিবা কাম রিম·ফাগিবা ইপাফ্রাচা খিন্নাজক। বিয়া না·সংনি হং·এ খ্রীষ্টনি সাকসা বিবিগিবা দাকচাকে হন·গিবা হং·আ। 8 গিসিক রংথালগিবা না·সংনা খা·সানি জে গিসিকখো হন·জক উনি গিম্মিনো ইপাফ্রা চিংনা আগানজক। 9 ইনি গিম্মিন না·সংনি খাৎথাখো খিন্নানি জা·মানোনিন চিংআ ফাংনাজ্রিং না·সংনা বি·ইংজক। গিসিকনি হা·আইয়া আরো বুদ্ধিচা জেদাক্কে না·সং ইসলনি হা·সিকাখো চু·গিম্মিক দাক্কে হা·আইনা মা·ন্না চিংআ উখোন ইসলচা হা·ম্মিংআ। 10 ইনি গিম্মিন না·সং জেদাক্কে খাকখেৎ কামখো দাক্কে বিথি মা·ন্না আরো ইসলখো আরোবা নাম্মেদাক্কে হা·আইনা মা·ন্না; আরো ইন্দাকে গিম্মিকোন জেদাক্কে গিত্তেলখো খুসি দাকনা ইন্নে বিনি খ্রাগিবা হং·এ রি·না মা·ন্না। 11 ইন্দাকে হং·না মা·ন্না, মুয়ানা ইসল বিনি বিল গিম্মিকচা না·সংখো বিল্লাকেতিংজক জেদাক্কে সালাজ্রিং না·সং হান·সেংএ চাকচিকে গিম্মিকখো চাক্কা আরো ফাগিবা ইসলখো মিৎথেলা। সেং·আনি সংনকো ইসলনি মান্দিরাং জে বিলখো মা·ন্নুয়া উখো মান·রিকনা বিয়া না·সংখো খ্রাগিবা দাকজক, 13 মুয়ানা বিয়া আন্দালানি সংনকওনি আনচিংখো জক্কেতি বিনি খা·সাগিবা দেফান্থিনি সংনকো রা·বাজক। 14 ইয়া দেফান্থিমুং নাংরিমে আনচিং জকজক, আগানস্খাওদে আনচিং পাপওনি ক্ষেমা মান·জক। 15 ইয়া দেফান্থিন নিকগিজা ইসলনি জা গিত্তা হং·আ। গিম্মিকখো থারিয়ানি স্খাং বিয়ান দংআমিং আরো গিম্মিক থারিয়ানি সাক্কাও বিয়ান দাল·বাৎগিবা, 16 মুয়ানা সিলগাও আরো হা·গিলসাকো, জেখো নিক্কা আরো জেখো নিকজা, গিম্মিক বিনি জাকচা থারিয়া হং·জক। সালগিসাকো জেরাংনি জাক্কো সংনকখো মান·রিকা, গিত্তেল দাক্কা, শাসন আরো বিল দংআ বিসং গিম্মিকখো বিনি জাকচা বিনি গিম্মিনান থারিয়া হং·জক। 17 বিয়ান গিম্মিকনা স্খাং দংআমিং আরো বি গিত্তান গিম্মিক খেম·খেমে দংআ। 18 ইনাআগ্রে বিয়ান বিনি বে·এননি, আগানস্খাওদে মন্ডলীনি স্খুথং হং·আ। বিয়ান স্খাংগিবা আরো বিয়ান সিয়াওনি স্খাং থাংচামিং, জেদাক্কে গিম্মিকো বিয়ান দাল·বাৎনা মা·ন্না। 19 ইসল হা·ম্মামিং জেদাক্কে বিনি গিম্মিক চু·সকা খ্রীষ্টওন দংআ। 20 ইনাআগ্রে হা·গিলসাকোবা হং·খানা বা সালগিওবা হং·খানা, খ্রীষ্টও বিয়া আন·থাংমুং গিম্মিকখো নাংরিমেতনাবা হা·ম্মামিং। খ্রীষ্ট চিসলনি সাক্কাও বিনি হান·চিখো হ·ন্নে থম·থমাখো রা·বামিং ইন্নেন ইন্দাকে নাংরিমনা মা·ন্না। 21 সালসাদে না·সং ইসলচানি চে·ল্লে দংআমিং আরো বিনি সাক্কাও না·সংনি গিসিকো বোবিল দাক্কা দংআমিং। না·সংনি নামগিজা কামরাংও উয়া ফারাকা হং·জক। 22 ইন্দিবা খ্রীষ্টনি সিয়াও বিনি বে·এনচা ইসল আন·থাংমুং দা·আও না·সংখো নাংরিমেতজক, জেদাক্কে বিয়া না·সংখো রংথালে, খাকখেৎ দাক্কে আরো দোসগ্রি দাক্কে আন·থাংনি মিকখাংও চাদেংএতনা মা·ন্না। 23 ইনি হা·সেল খ্রীষ্টনি গিম্মিন নাম্মা খাৎথাওনি না·সং জে খা·দংআখো মান·জক উয়োনি চে·ল্লাচা রি·য়াংগিজা বিবিরা·আও না·সং খেম·খেম দংনা নাংনুয়া। উয়া নাম্মা খাৎথাখো হা·গিলসাক গিম্মিকো আগানফ্রাকজক আরো না·সং উখো খিন্নাজক। আংআ পৌল ইয়া নাম্মা খাৎথাখো আগানফ্রাকগিবা হং·জক। 24 না·সংনা আংআ জে দুকখো চাক্কিংজক উয়ো আংআ হান·সেংআখোন মা·ন্নিংজক। খ্রীষ্টনি বে·এননা, আগানস্খাওদে মন্ডলীনা বিনি দা·আওবা জে দুক চাকনা দংখুংআ উখো আংআ আংনি বে·এনোন চু·সকেতিংজক। 25 ইসল বিনি খাৎথাখো না·সংচা চু·গিম্মিক দাক্কে আগানফ্রাকানি কামখো আংনা হন·জক ইন্নেন আংআ মন্ডলীনা দাকচাকে হন·গিবা সাকসা হং·জক। 26 ইসলনি খাৎথাও জে নিং·থুয়া খাৎথা চেংওনি মান্দিরাংচা চাসংওনি চাসংওনা দিপ্পাৎ থুম্মুয়ে দংআমিং, দা·আও বিনি মান্দিরাংচা উয়া ফারাকা হং·জক। 27 ইসল হাম·জক, গিপ্পিন জাতরাংওবা বিনি ইয়া নিং·থুয়া খাৎথানি রাসং বাদাকা উখো বিনি গিম্মিক মান্দিরাং হা·আইনা মান·খানা। উয়া বিবি ইয়ান- খ্রীষ্ট না·সংনি খা·থংও দংআ ইন্নে না·সং রাসং মা·ন্নানি খা·দংএতাখো মান·জক। 28 আরো উয়া খ্রীষ্টনি গিম্মিনো চিংআ আগানফ্রাকা, আগানস্খাওদে ইসলনি হন·গিবা হা·আইয়ামুং চিংআ মান্দি গিম্মিকখো সিমসাকেতা আরো স্খিয়েতা, জেদাক্কে গিম্মিকখোন চিংআ খ্রীষ্টও চু·সকেতনা মা·ন্না। 29 ইখো মিকসংএন ইসলনি জে বিল আংও কাম দাক্কিংআ উয়া বিল গিত্তা আংআ সিমাংথাংমাং গাম্মিংজক।

কলসীয়রাংনা 2

1 আংআ না·সংখো হা·আইএতনা হা·ম্মা, না·সংনা আরো লায়দিকেয়া সংজিলমানি মন্ডলীনি মান্দিরাংনা, আরো আংখো জেরাং নিকখুজা বিসং গিম্মিকনা আংআ গাম্মিংজক। 2 আংআ হা·ম্মা জেদাক্কে বিসং খা·থংও খা·দংএতাখো মা·ন্না আরো খা·সাও আপসান হং·আ, আরো খ্রীষ্টখো হা·আইয়ানি গিম্মিন জেখো মা·ন্না উখো বাং·এ মান·দাপা। উনি গিম্মিন ইসলনি নিং·থুয়া খাৎথাখো, আগানস্খাওদে খ্রীষ্টখো বিসং হা·আইনা মা·ন্নুয়া। 3 খ্রীষ্টও গিম্মিক হা·আইয়া আরো বুদ্ধি থুম্মুয়ে দংআ। 4 আংআ না·সংনা ইয়া খাৎথাখো আগানিংজক জেদাক্কে দারাংবা গিসিক ব্রাংএতানি খু·ফারাংচা না·সংখো ব্রাংগিবা রামাচা রা·আংজাখানা। 5 বে·এনগ্মাং আংআ না·সংনি গিসেপো দংজাওবা গিসিকচা দংআ আরো নাম্মেদাক্কে না·সংনি রি·য়াখো আরো খ্রীষ্টনি সাক্কাও না·সংনি খেম·খেম বিবিরা·আখো নিক্কে হান·সেংইংজক। 6 জেদাক্কে না·সং খ্রীষ্ট যীশুখো গিত্তেল দাক্কে রা·চাকজক উয়ানদাক্কেন বিমুং নাংরিমে না·সংনি জাংগিখো মিৎথাংএতবো। 7 খ্রীষ্টও জা·দিল সু·এ নাপ্পে বিনি গিসেপোন না·সং দাল·রোরোবো। না·সং স্খিয়াখো মা·ন্নে জেখো বিবিরা·জক উয়ো খেম·খেমে দংবো আরো ইসলখো সালাজ্রিং মিৎথেলে দংবো। 8 না·সং সিমসাকবো, জেদাক্কে দারাংবা মান্দিনি বাংবাং দাক্কামব্রুআ চু·য়াকগিবা চানচিবাত্তানি স্খিয়াচা না·সংখো চিপচাংএ সাল্লে রা·আংনা মান·জা। খ্রীষ্টমুং উয়া স্খিয়া আপসান হং·ফাজা; মান্দিনি দাকবেওয়াল আরো হা·গিলসাকনি বাং·আ বেওয়ালরাংনি সাক্কাওন উয়া ফাংচাকা। 9 ইসলনি গিম্মিক চু·সকা খ্রীষ্টও বে·এন বিমাংখো রা·এ দংখামিংজক, আরো খ্রীষ্টমুং নাংরিমে না·সংবা উয়া চু·সকাখো মান·জক। 10 বিয়া সিলগাসাকনি গিম্মিক শাসন দাকগিবা আরো বিলখো মান·রিকগিবারাংনি সাক্কাও দংআ। 11 ইনাআগ্রে না·সং খ্রীষ্টমুং নাংরিমজক ইন্নে না·সংনি বিগিলখো রাত্তাবা হং·জক। মান্দিনি জাক্কো ইয়া বিগিলখো রাত্তা হং·জা, খ্রীষ্ট আন·থাংআন উখো রাতজক; আগানস্খাওদে বে·এননি সাক্কাও পাপ-বেওয়ালনি জে বিল দংআমিং উয়া বিলওনি বিয়া না·সংখো জক্কেৎজক। 12 রিপ্পলাচা খ্রীষ্টমুং না·সং গোপ্পাখো মান·জক; ইন্দাকেসান হং·জা, জেআন সিয়াওনি খ্রীষ্টখো থাংচাএতজক উয়া ইসলনি বিলখো বিবিরা·আচা না·সংখো খ্রীষ্টমুং থাংচাএতাবা হং·জক। 13 না·সংদে পাপনি হা·সেল আরো বিগিল রাতগিজানি হা·সেল সিয়ে দংআমিং, ইন্দিবা ইসল না·সংখো খ্রীষ্টমুং থাংচাএতজক। বিয়া আনচিংনি গিম্মিক পাপখো ক্ষেমা দাকজক, 14 আরো আনচিংনি সাক্কাও জে দলিল দংআমিং উনি গিম্মিক দাবি মাংগ্মাং উখো ওয়াতগালজক। উয়া দলিলখো বিয়া চিসলো সিলচা দাৎখাপে গালজক। 15 বিয়া সিলগাসাকনি গিম্মিক নামগিজা শাসন দাকগিবা আরো বিলখো মান·রিকগিবারাংনি বিলখো নাসিয়েতজক। আরো ইন্দাকে বিয়া খ্রীষ্টনি চিসলচা বিসংনি সাক্কাও হামজক আরো গিম্মিকনি মিকখাংও বিসংখো খ্রাচা·এতজক। 16 উনি গিম্মিন চা·আ-রিংআখো বা থরমনি মামুং মানিয়ানি সালখো বা জা গিত্তালখো বা নেং·থাকানি সালখো রা·এ না·সংখো দোস হ·ন্নানি বিল সাকসানিবা দংজা। 17 ইরাংদে রি·বাগিবা চাসংও মুয়া হং·নুয়া উনি জাগ্রিংমিং, ইন্দিবা জেআন চং·মত উয়াদে খ্রীষ্টওন দংআ। 18 আন·থাংথাংনি বে·এনখো দুক হ·ন্না আরো সা·গ্রেরাংখো অলাখিনা নাংআ ইন্নে জেরাং চানচিয়া বিসং জেদাক্কে না·সংনি বকসিসখো মা·ন্নাও চাংফেংজা। ইন্দাকগিবা মান্দি জেখো নিকজক ইন্নে দাকমিকা উনি গিম্মিনো দা·ল্লা দা·ল্লা খাৎথাখো আগানা আরো ইন্দাকারিন গাং·বিংআ, মুয়ানা বিসংনি গিসিক পাপ-বেওয়ালনি নিং·আও হং·আ। 19 বিসং নাম্মেদাক্কে রাক্কে স্খুখো, আগানস্খাওদে যীশু খ্রীষ্টখো রি·ম্মে রা·রিকজা, ইন্দিবা উয়া স্খুনি রি·দিলাচান বে·এন গিম্মিক গ্রেং-বে·এনমুং নাংরিমে আরো খেম·খেমে ইসলনি হা·সিকা গিত্তা দাল·রোরোআ। 20 খ্রীষ্টমুং সিফাএ না·সং হা·গিলসাকনি বেওয়ালরাংওনি চে·ল্লাচানা জিত্তে রি·বাওদে হা·গিলসাকনি মান্দিরাং গিত্তান না·সং মুয়ানা দা·আবা হা·গিলসাকনি নিয়ামনি নিং·আও দংইংজক? 21 জে জিনিসরাং জাকখালারি দংআনি হা·সেল চা·ম্মে নাসিয়াংআ উয়া জিনিসরাংনি গিম্মিনো ইন্দাকা নিয়াম দংআ- দা·আ রি·ম্মাবো, দা·আ চা·আবো, দা·আ দাংথাপেতাবো। ইয়া নিয়ামরাংদে মান্দিনি হন·গিবা গি·য়েতা আরো স্খিয়াসান হং·আ। 23 ইয়া নিয়ামরাংখো নিনাদে হা·আইয়া গাপ্পা গিত্তা নিক্কা, মুয়ানা বাদিকে দাক্কে অলাখিনা মা·ন্না, বাদিকে দাক্কে আন·থাংথাংখো চন্নিকনা মা·ন্না, বাদিকে দাক্কে আন·থাংনি বে·এনখো দুক হ·ন্না মা·ন্না, উয়া ইয়া নিয়ামরাংখো মান্দিরাংনা হা·আইয়েতা, ইন্দিবা পাপ-বেওয়ালখো বাম্মেতনা ইরাংনি মামুং দামআন দংজা।

কলসীয়রাংনা 3

1 ইন্দাকোদে না·সং খ্রীষ্টমুং সিয়াওনি থাংচাওদে খ্রীষ্ট সালগিচা জেও ইসলনি জাক্রাচানা আসংএ দংআ উয়া সালগিনি গিম্মিন গিসিক নাংবো। 2 হা·গিলসাকনি গিম্মিনো চানচিগিজা বাত্তেসা সালগিনি গিম্মিনো চানচিবো। 3 না·সংদে সিজক আরো না·সংনি জাংগি খ্রীষ্টমুং ইসলও থুম্মুয়া দংআ। 4 জেআন না·সংনি জাংগি উয়া খ্রীষ্ট জেনসালো ফারাকনুয়া উনো না·সংবা বিমুং বিনি রাসংও ফারাকনুয়া। 5 উনি গিম্মিন না·সংনি পাপ-বেওয়ালও দংগিবারাংখো ব·ন্নেতবো। উয়ো থি·ল্লেকারাং, মারাং নাংআরাং, নামগিজা হা·সিকারাং আরো মাদ্দুয়ারাং দংআ জেখো মিত্তে বিমাংখো অলাখিয়া ইন্নেবা আগান্না মা·ন্না। 6 জেরাং ইসলখো মানিজা বিসংনি সাক্কাও ইরাংনি হা·সেলান ইসলনি শাস্তি সকবাংজক। 7 না·সংবা স্খাংদে উগিত্তান রি·নুয়ামিং, 8 ইন্দিবা দা·আওদে খা·আওনাংআখো, মিকনেংআখো, খা·চাআ-সাউইয়াখো আরো নামগিজা খু·সুকরাংখো না·সংচানিখো চে·ল্লেতবো। 9 সাকসা সাকগিপ্পিনচা দা·আ বু·এ আগানাবো, মুয়ানা না·সংনি গিৎচাম ‘আংআ’খো বিনি কাম মাংগ্মাং বা·রা গিত্তা অক্কে গাল্লে না·সংদে গিত্তাল ‘আংআ’খো গানজক। ইয়া গিত্তাল ‘আংআ’ আরোবা গিত্তাল হং·রিকরিকে বিনি আৎচিয়েতগিবা জা গিত্তা হং·ইংজক, জেদাক্কে উয়া আৎচিয়েতগিবাখো না·সং চু·গিম্মিক দাক্কে হা·আইনা মা·ন্না। 11 ইন্দাকা অবস্থাও গিপ্পিন জাত বা যিহূদী জাতরাংও, বিগিল রাতগিবা বা বিগিল রাতগিজাগিবা মান্দিরাংও, পড়িগিজারাংও, চনগিবা জাতরাংও, নকখল বা জাকগিত্তেলগিবা মান্দিনি গিসেপো দিংথাং হং·আনি মামুং দংজা; উয়ো খ্রীষ্টন দাল·গিবা আরো বিয়া সাকফ্র্রাকফ্রাকওন দংআ। 12 ইনি গিম্মিন ইসল জেরাংখো বাচ্ছিয়ে আন·থাংনা দিংথাং দাক্কে দনজক বিনি উয়া খা·সাগিবা মান্দি হং·এ না·সং নামনিকাচা, খা·সাচাক্কাচা, রিন্নকাচা, রিন্নকগিবা গিসিকচা আরো চাকচিকাচা আন·থাংথাংখো থারিবো। 13 সাকসা সাকগিপ্পিনখো চাকচিকবো আরো সাখোবা না·সংনি দোস হ·ন্না মামুং দংওদে বিখো ক্ষেমা দাকবো। গিত্তেল জেদাক্কে না·সংখো ক্ষেমা দাকজক উয়ানদাক্কে না·সংবা সাকসা সাকগিপ্পিনখো ক্ষেমা দাকনা নাংআ। 14 আরো ইরাংমুং খা·সাচা আন·থাংথাংখো থারিবো। খা·সান উয়া গুণরাংখো আপসান দাক্কে চু·সকেতা। 15 জে থম·থমাখো খ্রীষ্ট হ·ন্না উয়া থম·থমা না·সংনি খা·থংও দংএ না·সংখো রি·দিলেতখানা। থম·থমাও দংখানা ইন্নেন না·সংখো বে·এনসান গিত্তা রিক্কামজক। না·সং মিৎথেলবো। 16 খ্রীষ্টনি খাৎথাখো না·সংনি খা·থংও চু·গিম্মিক দাক্কে দংনা হন·বো। ইসলনি হন·গিবা হা·আইয়াচা সাকসা দা·আও সাকসানা স্খিবো আরো নাম্মাখো আগানবো আরো খা·থংও মিৎথেলে ইসলনা মিংএ গীতরাংনি গীতখো আরো গিসিকনি আরো মিৎথেলানি গীতখো রিং·বো। 17 না·সং জেখোবা আগানবো বা দাকবো গিত্তেল যীশুনি বিমুংও উখো দাকবো আরো বিচান ফাগিবা ইসলখো মিৎথেলবো। 18 না·সং জেরাং জিকগিবা, না·সং দিমদাকান সেগিবানি নিং·আও দংবো, মুয়ানা গিত্তেলনি মান্দি গিত্তা ইয়ান খ্রাআ। 19 না·সং জেরাং সেগিবা, না·সং দিমদাকান জিকনা খা·সাবো আরো বিমুং দা·আ নামগিজা বেওয়ালখো দাক্কাবো। 20 বি·সারাং, না·সং গিম্মিক কামও মা-ফানি নিং·আও বাম্মে দংবো, মুয়ানা ইনি হা·সেল গিত্তেল খুসি হং·আ। 21 না·সং জেরাং ফাগিবা, না·সংনি বি·সারাংনি গিসিকখো দা·আ মাংমেংএতাবো, জেদাক্কে বিসং খা·দংআগ্রি হং·জা। 22 না·সং জেরাং নকখল, না·সং গিম্মিক কামও না·সংনি ইয়া হা·গিলসাকনি নকগিবারাংনি নিং·আও বাম্মে দংবো। জে সময়ও বিসং না·সংখো নিআ উনোসান বিসংখো খুসি দাকনা বিসংনি নিং·আও বাম্মে দংনুয়া ইন্দাকেদে হং·জা, বাত্তেসা খাকখেৎ খা·থংও গিত্তেলখো অলাখিয়ে বিসংনি নিং·আও বাম্মে দংবো। 23 না·সং জেখোবা দাকবো, উখো মান্দিরাংনা দাকজা বাত্তেসা গিত্তেলনা দাক্কিংআ ইন্নে গিসিক নাংএ দাকবো, 24 মুয়ানা না·সংদে হা·আইয়া, গিত্তেল বিনি মান্দিরাংনা জেখো দনজক উখো না·সং বকসিস গিত্তা দাক্কে বিচানিখোন মা·ন্নুয়া। না·সং জেনা দাকচাকে হ·ন্নিংআ বিয়া গিত্তেল খ্রীষ্ট। 25 অন্যায় দাকগিবা বিনি বিথিখো মা·ন্নুয়া। গিত্তেলনি মিক্রোনও গিম্মিকান আপসান হং·আ।

কলসীয়রাংনা 4

1 নকগিবারাং, সালগিও না·সংনিবা সাকসা নকগিবা দংআ ইখো হা·আইএ না·সং না·সংনি নকখলরাংমুং নাম্মা আরো খাকখেৎ বেওয়ালখো দাকবো। 2 না·সং মিৎথেলে আরো সিমসাকে বি·এ আন·থাংথাং দংবো; 3 আরো উমুং চিংনাবা বি·বো জেদাক্কে খ্রীষ্টনি নিং·থুয়া খাৎথাখো আগানফ্রাকনা ইন্নে ইসল চিংনা চলখো হ·ন্না। উয়া নিং·থুয়া খাৎথানান আংখো বন্দি দাক্কে দনজক। 4 জেগিত্তা থাল্লে ইয়া বিদিংখো আংনি আগান্না নাংআ, বি·বো জেদাক্কে আংআ উগিত্তান আগান্না মা·ন্না। 5 ইসলনি মান্দি হং·গিজারাংমুং বুদ্ধিখো জাকখালে রি·বো আরো খ্র্রীষ্টনি গিম্মিন সাক্ষি হ·ন্না ইন্নে গিম্মিক চলখো জাকখালবো। 6 ফাংনান না·সংনি খু·সুকরাং চি·আ আরো খাসিম ফুগিবা চা·আরাং গিত্তা রা·চাকানি হং·খানা, জেদাক্কে সানা বাদিকে দাক্কে আগানচাকনুয়া উখো না·সং হা·আইনা মা·ন্না। 7 চিংনি খা·সাগিবা জং আরো বিবিরা·না খ্রাগিবা দাকচাকে হন·গিবা আরো চিংমুং গিত্তেলনি কামখো রিম·ফাগিবা তুুখিক আংনি গিম্মিক খবলখো না·সংনা হ·ন্নুয়া। 8 জেদাক্কে না·সং চিংনি গিম্মিন হা·আইনা মা·ন্না আরো বিয়া জেদাক্কে না·সংখো খা·দংএতনা মা·ন্না উনি গিম্মিন আংআ বিখো না·সংচা ওয়াত্তেতজক। 9 তুখিকমুং আংআ চিংনি বিবিরা·না খ্রাগিবা আরো খা·সাগিবা জং ওনীষিমখোবা ওয়াত্তেতজক। বিয়া না·সংনিন সাকসা হং·আ। বিসং ইয়োনি গিম্মিকখোন না·সংনা আগান্নুয়া। 10 আংমুং বন্দি হং·এ দংফাগিবা জং আরিষ্টার্খ আরো বার্ণবানি চাচ্চি মার্কবা না·সংনা সালাম হ·ন্নিংজক। মার্কনি গিম্মিনো না·সংদে স্খাংআন গি·য়েতাখো মান·জক, বিয়া না·সংচা রি·বাওদে বিখো রা·চাকবো। 11 জেখো যুষ্ট মিংআ উয়া যীশুবা না·সংনা সালাম হ·ন্নিংআ। যিহূদীরাংনি গিসেপো ইয়া সাকগিত্থামসান ইসলনি সংনকনা আংমুং কাম দাক্কা। বিসং আংখো বাং·এন খা·দংএতজক। 12 ইপাফ্রাবা না·সংনা সালাম হ·ন্নিংআ। বিয়া না·সংনি আন·থাংনি মান্দিরাংওনি সাকসা আরো বিয়া খ্রীষ্ট যীশুনি নকখল হং·আ। বিয়া সালাজ্রিং বি·আচা না·সংনা দাকগ্রিকিংজক জেদাক্কে না·সং চু·সকগিবা হং·এ আরো গিম্মিকো ইসলনি হা·সিকাখো হা·আইএ রাক্কে চাদেংনা মা·ন্না। 13 ইপাফ্রানি গিম্মিন আংআ ইয়া খাৎথাখো আগান্না মা·ন্না, না·সংনি গিম্মিন আরো লায়দিকেয়া আরো হিয়রাপলি সংজিলমাও জেরাং দংআ বিসংনা বিয়া নাম্মেন গাম্মিংজক। 14 খা·সাগিবা ডাক্তার লূক আরো দীমা না·সংনা সালাম হ·ন্নিংজক। 15 লায়দিকেয়ানি বিবিরা·গিবা জংআদারাংনা আরো নুম্ফা আরো বিনি নক্কো জে মান্দিরাং মন্ডলী হং·এ থম·দাকা, বিসংনাবা সালাম হন·বো। 16 ইয়া চিঠিখো না·সং পড়িয়া বন·জোকনো লায়দিকেয়ানি মন্ডলীনাবা ইয়া চিঠিখো পড়িনা হন·বো, আরো লায়দিকেয়া মন্ডলীনা জে চিঠিখো ওয়াত্তেতনুয়া উখোবা না·সং পড়িবো। 17 আর্খিপ্পনা ইয়া খাৎথাখো আগানবো, “গিত্তেলনা দাকচাকে হ·ন্না জে কামখো নাং·না হন·জক উখো ব·ন্নেতনা মংসংবাত্তে গিসিক হন·বো।” 18 আংআ পৌল জাকথাংচা ইয়া সালামনি খাৎথাখো চক্কিংজক। গিসিক রা·রিকবো, আংআ বন্দি হং·এ দংআ। ইসল না·সংনা খা·সাচাকখানা।

১ থিষলনীকী 1

1 ফাগিবা ইসল আরো গিত্তেল যীশু খ্রীষ্টমুং নাংরিমগিবা থিষলনীকী মন্ডলীনা সীলবান, তীমথিয় আরো আংআ পৌল ইয়া চিঠিখো চক্কিংজক। আনচিংনি ফাগিবা ইসল আরো গিত্তেল যীশু খ্রীষ্ট না·সংনা খা·সাচাকখানা আরো থম·থমাখো হন·খানা। 2 চিংআ ফাংনান বি·আও না·সং গিম্মিকখো গিসিক রা·এ ইসলখো মিৎথেলা। 3 বিবিরা·আনি গিম্মিন না·সং জে কামখো দাক্কিংজক, খা·সানি গিম্মিন জেদাক্কে গাম্মিংজক আরো আনচিংনি গিত্তেল যীশু খ্রীষ্টনি সাক্কাও খা·দংআনি গিম্মিন জেদাক্কে চাকচিকিংজক, উখো চিংআ ফাংনান আনচিংনি ফাগিবা আরো ইসলনি মিকখাংও বি·আও গিসিক রা·আ। 4 ইসলনি খা·সাগিবা আংনি জংআদারাং, চিংআ হা·আইয়া বিয়ান না·সংখো বাচ্ছিয়ে রা·জক, 5 মুয়ানা চিংনি আগানফ্রাকগিবা নাম্মা খাৎথা খু·সুকচাসান না·সংচা রি·বাজা, ইন্দিবা বিলচা, গিসিক রংথালগিবাচা উয়া রি·বামিং। না·সংমুং দংমিত্তিংও না·সংনি নাম্মানা চিংআ বাদিকে দাক্কে রি·য়া-দোআ না·সং উখো হা·আইয়া। 6 বাং·আ গিচ্চিয়াওবা গিসিক রংথালগিবানি হন·গিবা হান·সেংআমুং উয়া নাম্মা খাৎথাখো রা·চাকে না·সং চিং গিত্তা আরো গিত্তেল গিত্তা দাক্কে রি·ইংজক। 7 ইনি গিম্মিন ম্যাসিডোনিয়া আরো আখায়া হা·দকনি গিম্মিক বিবিরা·গিবারাংচা না·সং দাক্কে ফিন্নিকানি হং·জক। 8 ম্যাসিডোনিয়া আরো আখায়া হা·দকোসান না·সংচানি গিত্তেলনি খাৎথা গিপ্পাংজক ইন্দাকে হং·জা, ইন্দিবা ইসলনি সাক্কাও না·সংনি বিবিরা·আনি খাৎথাবা গিম্মিক হা·দামচান গিপ্পাংজক। ইনি গিম্মিনো চিংনি মামুংখোন আগান্না নাংজা, 9 মুয়ানা বাদিকে দাক্কে না·সং চিংখো রা·চাকামিং মান্দিরাং চিংনা উখো আগানিংজক। বিসং আরোবা আগানজক, না·সং বাদিকে দাক্কে মিত্তেরাংওনি ফিল·বাএ থাংগিবা আরো বিবিগিবা ইসলচা রি·বাজক জেদাক্কে বিনা দাকচাকে হ·ন্না মা·ন্না, 10 আরো সালগিওনি বিনি দেফান্থিনি রি·বানি গিম্মিন সেংসোনা মা·ন্না। উয়া দেফান্থিন হং·জক যীশু, জেখো বিয়া সিয়াওনি থাংচাএতামিং। ইসলনি জে শাস্তি রি·বাংজক উয়া শাস্তিওনি ইয়া যীশুন আনচিংখো জক্কেৎনুয়া।

১ থিষলনীকী 2

1 জংআদারাং, না·সংচা চিংনি রি·য়াংআ নাসিনাদা হং·জা, ইখো না·সং আন·থাংথাংআন হা·আইয়া। 2 না·সং ইখোবা হা·আইয়া, ইনা স্খাং চিংআ ফিলিপী সংজিলমাচা গিচ্চিয়াখো মা·ন্নামিং আরো মান্দিরা·গিজাখোবা মা·ন্নামিং। ইন্দিবা ইন্দাকে চাংফেংআরাং দংওবা আনচিংনি ইসলচানি খেনমানগিজাখো মা·ন্নে বিনি নাম্মা খাৎথাখো চিংআ ফারাকেন না·সংনা আগানামিং। 3 চিংনি স্খিয়া ব্রাংগিবা স্খিয়াওনি হং·জা, নামগিজা মিকসংআওনিবা হং·জা, বা চিংআ দাক্কামব্রুএবা মামুং খাৎথাখো আগানজাংআ; 4 বাত্তেসা খ্রাগিবা চানচিয়ে নাম্মা খাৎথাখো হা·আইয়েতানি কামখো ইসল চিংনা হন·জক ইন্নেন চিংআ উগিত্তা আগানিংজক। মান্দিখো খুসি দাকনা চিংআ ইয়া খাৎথাখো আগানজাংআ, ইন্দিবা জেআন চিংনি খা·থংখো থিকখেলে নিআ উয়া ইসলখো খুসি দাকনা ইন্নেন আগানিংজক। 5 না·সং হা·আইয়া মামুং সালোবা চিংআ চি·আ খাৎথাখো আগানজা, আরো মাদ্দুয়াখো ফিনদাপে দন্নে দাক্কামব্রুএ মামুং খাৎথাখোন চিংআ আগানজা, ইসলান উনি সাক্ষি হং·আ। 6 মান্দিচাখো আগানস্খাওদে না·সংচাখো বা গিপ্পিনচাখো চিংআ রাসংখো মা·ন্না হাম·জা। খ্রীষ্টনি ওয়াত্তেতা গিত্তা চিংনি মান·রিকানি বিলখো চিংআ না·সংনি সাক্কাও জাকখালনা মা·ন্নুয়ামিং, 7 ইন্দিবা মা·আ জেদাক্কে বিনি আন·থাংনি বি·সারাংখো যতন রা·আ, না·সংমুং দংমিত্তিংও চিংআবা না·সংমুং উয়ানদাক্কে দাক্কামিং। 8 না·সংখো নাম্মেন খা·সাবিয়ানা না·সংনা ইসলনি নাম্মা খাৎথাখো হ·ন্নাসান হং·জা, না·সংনা আন·থাংথাংনি জাংগিখো হন·চাকনাবা চিংআ হা·ম্মামিং, মুয়ানা চিংচা না·সং খা·সাগিবা হং·আ। 9 জংআদারাং, চিংনি গাম্মাখো আরো নেং·আনি খাৎথাখো না·সংনি গিসিক দংবিবিআনখোন। না·সংচা ইসলনি নাম্মা খাৎথাখো আগানফ্রাকও চিংআ ওয়ালসাল গামজক, জেদাক্কে চিংআ না·সং দারাংনি সাক্কাও বোজা হং·না নাংজা। 10 না·সং জেরাং বিবিরা·জক, না·সংমুং চিংনি বেওয়াল জে রংথালা আরো খাকখেৎ হং·আমিং উনি সাক্ষি না·সংবা হং·আ আরো ইসলবা হং·আ। 11 না·সং হা·আইয়া, ফাআ জেগিত্তা আন·থাংনি বি·সাখো খা·দংএতা, খা·নাম্মেতা আরো গি·য়েতা চিংআবা না·সং গিম্মিকখো উয়ানদাক্কেন দাকনুয়ামিং, জেদাক্কে ইসলনি মান্দি হং·এ না·সং উগিত্তান রি·য়া। ইসল বিনি আন·থাংনি সংনকখো আরো রাসংখো মান·রিকনা ইন্নেন না·সংখো রিক্কামিংআ। 13 চিংআ ফাংনান ইসলখো মিৎথেলিংআ, মুয়ানা ইসলনি খাৎথাখো চিংচাখো খিন্নাএ না·সং জেনসালো বিবিরা·আমিং উনো না·সং উখো মান্দিনি ইন্নে হং·জা, ইন্দিবা ইসলনি খাৎথা ইন্নেন রা·চাকামিং। আরো বিবিন উয়া ইসলনিন খাৎথা। না·সং জেরাং বিবিরা·জক, না·সংনি খা·থংও উয়া খাৎথান কাম দাক্কিংআ। 14 জংআদারাং, যিহূদিয়া হা·দকো খ্রীষ্ট যীশুমুং নাংরিমগিবা ইসলনি জে মন্ডলীরাং দংআ, না·সংনি অবস্থা বিসং গিত্তান হং·আ। যিহূদীরাংনি জাক্কো বিসং জেদাক্কে দুকরাংখো চাকজক, না·সংবা সংথাংনি মান্দিরাংনি জাক্কো উয়ানদাক্কে আপসান দুকরাংখো চাকজক। 15 উয়া যিহূদীরাংআন গিত্তেল যীশুখো আরো আগানসোগিবারাংখো স·ওতে গাল্লামিং, আরো চিংখোবা বিসং গিচ্চিয়েতজক। বিসং ইসলখো খুসি দাকজা, আরো গিম্মিক মান্দিনি সাক্কাও বিসং বোবিল দাক্কা। 16 বিসং চিংখো চাংফেংআ জেদাক্কোদে গিপ্পিন জাতরাংখো পাপওনি জক্কেৎনা ইন্নে বিসংচা চিংআ মামুং খাৎথাখো আগান্না মান·জা। ইন্দাকেন উয়া যিহূদীরাং ফাংনান পাপনি সাক্কাও পাপখো গাৎদাপ্পিংজক, আরো ইসলনি খা·আওনাংআ চু·গিম্মিক দাক্কে বিসংনি সাক্কাও গা·আকজক। 17 জংআদারাং, গিসিকওনি হং·জাওবা বে·এনোনি চিংআ দিকদিকসানা না·সংখো ওয়াত্তে দংজক। ইনি গিম্মিন চিংআ নাম্মেন হা·সিকবিএ না·সংমুং দা·আবা গ্রংনা দাক্কামিং। 18 উনি গিম্মিন চিংআ, মংসংদে আংআ পৌল না·সংচা রি·বানা হা·ম্মামিং, ইন্দিবা শয়তান চিংখো ফেং·আমিং। 19 আনচিংনি গিত্তেল যীশু জেনসালো রি·বানুয়া উনো বিনি মিকখাংও না·সংআন চিংনি খা·দংআনি, হান·সেংআনি আরো রাসংনি মালা হং·জানুয়ামা? 20 বিবিন, না·সংআন চিংনি রাসং হং·আ, না·সংআন চিংনি হান·সেংআনি হং·আ।

১ থিষলনীকী 3

1 জে সময়ও চিংআ আরবা চাকনা মান·জাজক উনো এথেন্স সংজিলমাও সাকসান দংনা থিক দাক্কে চিংনি জং তীমথিয়খো ওয়াত্তেতামিং। বিয়া খ্রীষ্টনি নাম্মা খাৎথাখো হা·আইয়েতানি কামনা ইসলনি কাম রিম·ফাগিবা হং·আ। চিংআ বিখো ওয়াত্তেতামিং জেদাক্কে বিয়া না·সংখো বিবিরা·আও খেম·খেম দন্না আরো খা·দংএতনা মা·ন্না, 3 জেদাক্কে ইয়া দুকরাংও না·সং সাকসাবা ওয়ালফিলে রি·য়াংজা। না·সং আন·থাংআন হা·আইয়া, দুকরাং চিংনা থিক দাক্কান দংআ। 4 দুকরাং চিংনি সাক্কাও দংনুয়ান উয়া খাৎথাখো না·সংমুং দংমিত্তিংও চিংআ রিত্তাপ রিত্তাপান আগানামিং, আরো উগিত্তান হং·জক, ইখো না·সং হা·আইয়া। 5 উনি গিম্মিন জে সময়ও আংআ আরবা চাকনা মান·জাজক উনো বিবিরা·আও না·সং বাদাকা অবস্থাও দংআ উখো হা·আইনা ইন্নেন তীমথিয়খো ওয়াত্তেতামিং। শয়তান না·সংখো মাদ্দুয়েতজকখোন আরো চিংনি গাম্মা ইন্দাকারি হং·জকখোন ইন্নে আংআ খেন্নিংআমিং। 6 দা·আও তীমথিয় না·সংচানি চিংচা রি·বাফিল্লে না·সংনি খা·সাআ আরো বিবিরা·আনি গিম্মিনো নাম্মাখোন আগানজক। বিয়া আগানা, খা·সানি গিসিকখো রা·এ না·সং ফাংনান চিংখো গিসিক রা·আ, আরো চিংআ জেগিত্তা না·সংখো নিকনা হা·ম্মিংআ না·সংবা উগিত্তান চিংখো নিকনা হা·ম্মিংআ। 7 ইনি গিম্মিন জংআদারাং, তীমথিয়নি খু·সুকচা না·সংনি বিবিরা·আখো খিন্নাএ চিংনি গিম্মিক সা·দিকা আরো দুকওবা চিংআ খা·নাম্মেতাখো মান·জক। 8 গিত্তেলনি সাক্কাও না·সংনি বিবিরা·আ খেম·খেম দংওন চিংনি জাংগিনি রাসং হং·আ। 9 না·সংনি গিম্মিন ইসলনি মিকখাংও চিংনি জে হান·সেংআ, উনি হা·সেল বাদিকে দাক্কে না·সংনি গিম্মিন বিখো মিৎথেলনুয়া উখো চিংআ হা·আইজা। 10 চিংআ ওয়ালসাল ইসলচা খা·থংওনি মল·মলিংআ জেদাক্কে চিংআ না·সংখো নিকনা মা·ন্না আরো না·সংনি বিবিরা·আও চু·ওংগিজাখো চু·সকেতনা মা·ন্না। 11 আনচিংনি ফাআ আরো ইসল আন·থাং আরো আনচিংনি গিত্তেল যীশু জেদাক্কে না·সংচা রি·য়াংআনি রামাখো থারিয়ে হ·ন্না। 12 গিত্তেল দাকখানা, চিংআ জেগিত্তা না·সংনা খা·সাআ উগিত্তা না·সংবা সাকসা সাকগিপ্পিনখো, আরোবা, গিম্মিকনা খা·সাআ জেদাক্কে বাং·বাতে গাপসুয়াকা। 13 ইন্দাকোদে বিয়া না·সংনি খা·থংখো খেম·খেমেতনুয়া, জেদাক্কে আনচিংনি গিত্তেল যীশু জেনসালো বিনি গিম্মিক মান্দিরাংখো রিমবাফানুয়া উনো আনচিংনি ফাআ আরো ইসলনি মিকখাংও না·সং খাকখেৎ আরো রংথালবো।

১ থিষলনীকী 4

1 জংআদারাং আরোবা আগান্না, ইসলখো খুসি দাকনা ইন্নে বাদিকে দাক্কে রি·না নাংআ উয়া স্খিয়াখোদে না·সং চিংচাখো মান·জক, আরো বিবিন না·সং উগিত্তান রি·ইংজক। ইন্দাকোবা গিত্তেল যীশুনি হং·এ চিংআ না·সংখো মল·মলিংজক আরো স্খিয়েতিংজক জেদাক্কে না·সং আরোবা বাং·এ উগিত্তান রি·য়া। 2 গিত্তেল যীশুচাখো বিলখো মা·ন্নে চিংআ না·সংনা মুয়াখো মুয়াখো গি·য়েৎজক উখো না·সং হা·আইয়া। 3 ইসলনি হা·সিকা ইয়ান- না·সং রংথালবো, আগানস্খাওদে গিম্মিক থি·ল্লেকাওনি চে·ল্লে দংবো, 4 আরো জেরাং ইসলখো হা·আইজা উয়া গিপ্পিন জাতরাং গিত্তা বে·এননি নামগিজা হা·সিকাও রি·গিজা না·সং গিম্মিকান আন·থাংথাংনি বে·এনখো রংথালে মান্দিরা·আমুং চাকচিকে দন্না স্খিবো। 6 ইনি গিম্মিনো অন্যায় দাক্কে সাকসা দা·আও সাকসা জংআদাখো থকাইজাখানা। চিংআ স্খাংআন না·সংনা আগানজক আরো সিমসাকেতজক, ইন্দাকা অন্যায়রাংনা গিত্তেলান শাস্তি হ·ন্নুয়া, 7 মুয়ানা ইসল রংথালগিজা দাক্কে রি·না ইন্নে আনচিংখো রিক্কামজা, রংথালে রি·না ইন্নেন রিক্কামজক। 8 উনি গিম্মিন ইয়া স্খিয়াখো জেআন জেগালা বিয়া মান্দিখো জেগালজা, বাত্তেসা জেআন বিনি গিসিক রংথালগিবাখো না·সংনা হন·জক উয়া ইসলখোন জেগালা। 9 জংআদাস্খানা খা·সানি গিম্মিন না·সংনা মামুংখো চকনা নাংজা, মুয়ানা ইসলান না·সংখো সাকসা সাকগিপ্পিননা খা·সাগ্রিকাখো স্খিজক। 10 আরো বিবিন না·সং ম্যাসিডোনিয়া হা·দকনি গিম্মিক জংআদারাংনা খা·সাআ। ইন্দিবা জংআদারাং, না·সংচা চিংনি মল·মলা ইয়ান না·সংনি ইন্দাকা খা·সাআ জেদাক্কে আরোবা বারিয়া। 11 চিংআ না·সংনা জেখো গি·য়েৎজক উগিত্তা থম·থমা জাংগিখো মিৎথাংনা, কামথাংও বিমচিপে দংনা আরো জাকথাংচা গামনা গিসিক নাংবো, 12 জেদাক্কে জাওয়া গিপ্পিন মান্দিরাংনি মিক্রোনও না·সংনি রি·য়া-দোআরাং খ্রাআনি হং·আ আরো গিপ্পিননি সাক্কাও ফাংচাকনা নাংজা। 13 জংআদারাং, জেরাং সিজক বিসংনি মুয়া হং·নুয়া উখো না·সং হা·আইজাখানা ইখো চিংআ হাম·জা, জেদাক্কে জেরাংনি গিসিকো মামুং খা·দংআনি দংজা বিসং গিত্তা দাক্কে না·সং দুকও গা·আকজা। 14 জে সময়ও চিংআ বিবিরা·আ যীশু সিয়ামিং আরো দা·আবা থাংচাফিলজক উনো চিংআ ইখোবা বিবিরা·আ, জেরাং যীশুমুং নাংরিমে সিজক ইসল বিসংখোবা যীশুমুং রিম্মাংফানুয়া। 15 গিত্তেলনি স্খিয়া গিত্তান চিংআ না·সংনা আগানিংআ, চিংআ জেরাং থাংএ দংআ আরো গিত্তেলনি রি·বাফিল্লানা দিপ্পাৎ থাংএ দংনুয়া, মামুং দাক্কেবা চিংআ উয়া সিগিবারাংনা স্খাংদে রি·য়াংজানুয়া। 16 রাক্কে গি·য়েতামুং আরো দাল·গিবা সা·গ্রেনি খু·রাং আরো ইসলনি সিংগানি গা·ম্মামুং গিত্তেল আন·থাংআন সালগিওনি হং·ওনবানুয়া। খ্রীষ্টমুং নাংরিমে জেরাং সিজক উনো বিসংআন স্খাং থাংচানুয়া। 17 উনি জা·মানো আনচিং জেরাং থাংএ দংখুনুয়া, আনচিংখোবা সিলগাচা গিত্তেলমুং আপসান হং·না ইন্নে বিসংমুং গাদিলাও দাক্কে দি·দোএ রা·আংনুয়া। আরো ইন্দাকে ফাংনাজলনা আনচিং গিত্তেলমুং দংনুয়া। 18 উনি গিম্মিন না·সং ইন্দাকা খাৎথারাংখো আগানে সাকসা সাকগিপ্পিনখো খা·নাম্মেতবো।

১ থিষলনীকী 5

1 জংআদারাং, বাসোকো আরো বাদাকগিবা সময়ও উয়া হং·নুয়া উনি গিম্মিনো না·সংচা মামুংখো চকনা নাংজা। না·সং আন·থাংথাংআন নাম্মেদাক্কে হা·আইয়া, ওয়াল্লো জেগিত্তা চা·খক রি·বাআ গিত্তেলনি উয়া সালবা উগিত্তান রি·বানুয়া। 3 জেনসালো মান্দিরাং আগান্নুয়া, “থম·থমজক, খেন্নানি মামুংবা দংজা,” উনো হা·ন্নোগ্মাং মিচিকনি রাং·গিত্তিক দাক্কে বি·সা বা·আনি সা·দিকা গিত্তা উয়া মান্দিরাংনা বন·গিম্মিকানি হং·নুয়া। মামুং দাক্কেন বিসং জকজানুয়া। 4 ইন্দিবা জংআদারাং, না·সংদে আন্দালাও দংজাংআ, উয়া সাল চা·খক গিত্তা না·সংচা রি·বানুয়া। না·সংদে গিম্মিকান সেং·আনি আরো সালনিসা মান্দি হং·আ। আনচিং ওয়াল্লোনি বা আন্দালানি মান্দি হং·জা। 6 উনি গিম্মিন গিপ্পিনরাং গিত্তা জেদাক্কে আনচিং থুজা, বাত্তেসা মিকরাকে দংআ আরো আন·থাংথাংখো বাম্মেতে দন্না। 7 জেরাং থুয়া বিসং ওয়াল্লোন থুয়া, আরো জেরাং চুফেক্কা বিসং ওয়াল্লোন চুফেক্কা। 8 ইন্দিবা আনচিং সালনি মান্দি হং·আ; উনি গিম্মিন চেল·খো রাক্ষিনা ইন্নে বিবিরা·আ আরো খা·সাচা চেল·খো ফিনদাপে আরো স্খুখো রাক্ষিনা ইন্নে জক্কেতানি খা·দংআখো স্খুও স্থিকে হাই, আনচিং আন·থাংথাংখো বাম্মেতে দন্না। 9 শাস্তি মা·ন্নাদে হং·জা বাত্তেসা আনচিংনি গিত্তেল যীশু খ্রীষ্টও জকনা ইন্নেন ইসল আনচিংখো থিক দাক্কে দনজক। 10 খ্রীষ্ট আনচিংনা সিয়ামিং, জেদাক্কে আনচিং থাংএ দং বা সিয়ে দং, আনচিং জেদাক্কে বিমুংআন থাংএ দংনা মা·ন্না। 11 ইনি গিম্মিন দা·আও না·সং জেগিত্তা দাক্কা উগিত্তান সাকসা সাকগিপ্পিনখো খা·দংএতনা আরো সাকসা সাকগিপ্পিনখো থারিরিকরিকবো। 12 জংআদারাং, চিংআ না·সংখো মল·মলা, জেরাং না·সংনি গিসেপো গাম্মিংআ, গিত্তেলনি হং·এ না·সংখো রি·দিলা আরো না·সংনা স্খিয়া বিসংখো মান্দিরা·বো। 13 বিসং জেখো দাক্কা উনি গিম্মিন খা·সানি গিসিকখো রা·এ বিসংখো মান্দিরা·বো। না·সং আন·থাংথাংনি গিসেপো থম·থমে দংবো। 14 জংআদারাং, চিংআ না·সংনা ইন্দাকে স্খিয়েতিংজক- জেরাং আলসিয়া বিসংখো সিমসাকেতবো; জেরাংনি খা·সকা দংজা বিসংখো খা·সকেতবো; জেরাং বিলগ্রি বিসংনা দাকচাকবো আরো গিম্মিকখো চাকচিকবো। 15 নিবো, অন্যায়নি সাক্কাও দারাংবা অন্যায়খো দাকজাখানা। না·সং সাকসা সাকগিপ্পিননি, আরোবা, গিপ্পিনরাংনি নাম্মাখো দাকনা হাম·বো। 16 ফাংনান হান·সেংবো, 17 ফাংনান বি·বো, 18 আরো গিম্মিক অবস্থাও ইসলখো মিৎথেলবো; মুয়ানা খ্রীষ্ট যীশুও না·সংনা ইয়ান ইসলনি হা·সিকা হং·আ। 19 গিসিক রংথালগিবাখো দা·আ খিম্মিতেতাবো। 20 জেরাং আগানসোগিবা হং·এ ইসলনি খাৎথাখো আগানা বিসংনি খাৎথাখো দা·আ চন্নিকাবো, বাত্তেসা গিম্মিকখোন থিকখেলে নিবো। 21 জেআন নাম্মা উখো রি·ম্মে রা·রিকবো, 22 আরো গিম্মিক নামগিজাওনি চে·ল্লাও দংবো। 23 থম·থমেৎগিবা ইসল আন·থাংআন না·সংখো চু·গিম্মিক দাক্কে রংথালেতখানা, আরো আনচিংনি গিত্তেল যীশু খ্রীষ্টনি রি·বাফিল্লানি সালো না·সংনি বে·এনখো-গিসিকখো দোসগ্রি দাক্কে দনবো। 24 গিসিক দনবো, জেআন না·সংখো রিক্কামা বিখো ফাংচাকনা মা·ন্না; বিয়া উখো দাকবিবিনুয়ান। 25 জংআদারাং, চিংনা বি·বো। 26 খা·সানি গিসিকখো রা·এ গিম্মিকনা সালাম হন·বো। আংআ গিত্তেলনি বিমুংও না·সংনা ইখো গি·য়েতিংজক, ইয়া চিঠিখো জেদাক্কে গিম্মিক জংআদারাংনা পড়িয়ে খিন্নাএতা। 28 আনচিংনি গিত্তেল যীশু খ্রীষ্টনি খা·সাচাক্কা না·সংমুং দংখানা।

২ থিষলনীকী 1

1 ফাগিবা ইসল আরো গিত্তেল যীশু খ্রীষ্টমুং নাংরিমগিবা থিষলনীকী মন্ডলীনা সীলবান, তীমথিয় আরো আংআ পৌল ইয়া চিঠিখো চক্কিংআ। 2 ফাগিবা ইসল আরো গিত্তেল যীশু খ্রীষ্ট না·সংনা খা·সাচাকখানা আরো থম·থমাখো হন·খানা। 3 জংআদারাং, না·সংনা সালাজ্রিংআন ইসলখো চিংনি মিৎথেলনা নাংআ। না·সংনি বিবিরা·আ নাম্মেন বাং·ইংজক আরো না·সং সাকসা সাকগিপ্পিননি সাক্কাও খা·সাআ গাপসুয়াকিংজক ইন্নেন চিংনি উয়া মিৎথেলাখো হ·ন্না খ্রাআ। 4 আরো ইনি গিম্মিনান ইসলনি মন্ডলীরাংনি মিকখাংও না·সংখো রা·এ চিংআ রাসং দাক্কিংজক, মুয়ানা জে গিচ্চিয়ারাংখো আরো দুকরাংখো না·সং চাক্কিংজক উনি গিসেপোবা না·সংনি চাকচিকা আরো বিবিরা·আ দংখুংআ। 5 ইরাং গিম্মিকান ইসলনি খাকখেৎ বিচালখো ফিন্নিকানি হং·আ। আরো ইনি মিকসংআ হং·জক, জেদাক্কে না·সংখো ইসলনি সংনকনা খ্রাগিবা দাক্কে চান্না। ইনি গিম্মিনান না·সং ইন্দাকফিল্লে দুক চাক্কিংজক। 6 ইসলনি খাকখেৎ বিচাল ইয়ান- জেরাং না·সংখো দুক হ·ন্না বিয়া বিসংখো দুক হ·ন্নুয়া; 7 আরো না·সং জেরাং দুক মা·ন্নিংজক বিয়া চিংমুং না·সংখোবা দুকওনি জক্কেৎনুয়া। জেনসালো গিত্তেল যীশু বিনি বিল্লাকগিবা সা·গ্রেরাংখো রা·এ চিং·গিবা ওয়া·আলনি গিসেপো সালগিওনি ফারাকনুয়া উনোন ইরাং হং·নুয়া। জেরাং ইসলখো হা·আইজা আরো জেরাং গিত্তেল যীশুনি গিম্মিন নাম্মা খাৎথাখো মানিয়ে রি·জা বিসংনা উনো বিয়া শাস্তি হ·ন্নুয়া। 9 গিত্তেল জেনসালো রি·বানুয়া উনো বিসংনা ইন্দাকে শাস্তি হ·ন্নুয়া জেনি হা·সেল বিসং বিনি দংআনি আরো বিল্লাকানি হা·ফালও গা·আকে ফাংনাজলনা গিম্মানুয়া। উনসালো বিনি আন·থাংনি মান্দিরাংও বিনি রাসং ফারাকনুয়া আরো জেরাং বিবিরা·আ বিসংও রাসং হং·নুয়া। না·সংবা উয়া বিবিরা·গিবারাংও দংআ, মুয়ানা না·সং চিংনি সাক্ষি হ·ন্নাখো বিবিরা·জক। 11 উনি গিম্মিন চিংআ ফাংনান না·সংনা বি·আ জেদাক্কে আনচিংনি ইসল না·সংখো বিনি রিক্কামনা খ্রাগিবা দাক্কে চানচিয়া, আরো জেদাক্কে বিনি বিলচা না·সংনি নাম্মা কামখো দাক্কানি হা·সিকাখো বিয়া চু·সকেতা আরো বিবিরা·আনি গিম্মিন না·সং জে কামরাংখো দাক্কিংআ উয়ো জেদাক্কে বিয়া চু·গিম্মিকেতা। 12 ইন্দাকোদে আনচিংনি ইসল আরো গিত্তেল যীশু খ্রীষ্টনি খা·সাচাক্কানি গিম্মিন আনচিংনি গিত্তেল যীশুনি রাসং না·সংও ফারাকনুয়া, আরো না·সংবা বিও রাসং মা·ন্নুয়া।

২ থিষলনীকী 2

1 জংআদারাং, আনচিংনি গিত্তেল যীশু খ্রীষ্ট রি·বানুয়া আরো আনচিংখো থম·দাকে বিনি আন·থাংচা রিম্মাংনুয়া। ইনি গিম্মিনো চিংআ না·সংখো মল·মলিংজক- 2 “গিত্তেলনি সাল সকবাজক,” ইখো ইন্নে আগানসোগিবা দাক্কে সানিবা খাৎথা আগানা বা সাকগিপ্পিননি খাৎথা বা চিংনি চক্কা চিঠি ইন্নে চানচিয়ে না·সং দা·আ জাব্রাংআবো বা দা·আ খেন্নাবো। 3 জেদাক্কে দারাংবা না·সংখো ব্রাংগিবা রামাচানা রা·আংজা, মুয়ানা উয়া সাল রি·বানা স্খাং ইসলনি সাক্কাও বিল্লংএ বোবিল দাক্কে চাখাতানি হং·নুয়া, আরো উয়া বামগিজাগিবা মি·আসা, জেনি ব·ন্নানি খাৎথা দংআ, বিয়া ফারাকনুয়া। 4 ইসল ইন্নে জেরাং দংআ উরাংনি সাক্কাও আরো অলাখিনা দংগিবা গিম্মিকনি সাক্কাও চাদেংএ বিয়া আন·থাংখো দা·ল্লে ফিন্নিকনুয়া; আরোবা, ইসলখো অলাখিগিবা নক্কো আসংএ বিয়া আন·থাংখো ইসল ইন্নে দাবি দাকনুয়া। 5 আংআ না·সংচা দংমিত্তিংও ইয়া খাৎথারাংখো না·সংনা আগান্নুয়ামিং, উখো না·সং গিসিক রা·জামা? 6 উয়া বামগিজাগিবা মি·আসা জেদাক্কে থিক সময়না স্খাং ফারাকনা মান·জা উনি গিম্মিন জেআন বিখো চাংফেংএ দন্না উখোদে না·সং হা·আইয়া। না·সং ইখোবা হা·আইজক, বামগিজাগিবা মি·আসানি নিং·থুয়া কামরাং দা·আওবা হং·ইংআ, 7 ইন্দিবা জেআন বিখো চাংফেংএ দন্না বিয়া জিত্তাংজা দিপ্পাৎদে চাংফেংএন দংনুয়া। উনি জা·মানো উয়া বামগিজাগিবা মি·আসা ফারাকনুয়া। 8 গিত্তেল যীশু বিনি খু·সুকনি বিবাচা ব·ন্নেতনুয়া আরো বিনি রাসংচা বিনি বিলখো ব·ন্নেতনুয়া। 9 উয়া বামগিজাগিবা মি·আসা জেনসালো রি·বানুয়া উনো শয়তাননি বিল দংনুয়া। উয়া বিল্লাকা ফারাকনুয়া বু·আনি গিম্মিক চিনও আরো আইয়াও ইনমানানি কামও আরো বিল্লাকানি কামও, 10 আরো ব·ন্নানি রামাও রি·গিবা মান্দিরাংখো থগিয়েতনা দাকমিকানি গিসেপো। ইয়া মান্দিরাং ব·ন্নাংনুয়া, মুয়ানা পাপওনি জকনা বিসং বিবিখো নামনিকজাজক আরো উখো বিবিবারা·জাজক। 11 ইনি গিম্মিন ইসল বিসংচা ইন্দাকগিবা বিলখো ওয়াত্তেতনুয়া জেআন বিসংখো ব্রাংগিবা রামাচানা রা·আংনুয়া, জেদাক্কে বিসং বু·আখো বিবিরা·আ। 12 ইনি গিম্মিন জেরাং বিবিও বিবিরা·গিজা খ্রাগিজা কামও হান·সেংআখো মান·জক বিসং গিম্মিকখো বিচালও দোসগ্মাং ইন্নে রিম·নুয়া। 13 গিত্তেলনি খা·সাগিবা আংনি জংআদারাং, না·সংনা ফাংনান ইসলখো চিংআ মিৎথেলনা নাংআ, মুয়ানা পাপওনি জকনা ইসল স্খাংওনিন না·সংখো বাচ্ছিয়ে রা·জক। গিসিক রংথালগিবাচা ইসলনি গিম্মিন না·সংখো দিংথাং দাক্কে দন্নাও আরো নাম্মা খাৎথানি বিবিও না·সংনি বিবিরা·আও না·সং পাপওনি জক্কাখো মান·জক। 14 চিংআ জে নাম্মা খাৎথাখো আগানফ্রাকিংজক উনি গিসেপোন উয়া জক্কাখো মা·ন্না ইন্নে বিয়া না·সংখো রিক্কামজক, জেদাক্কে না·সং আনচিংনি গিত্তেল যীশু খ্রীষ্টনি রাসংনি বাকখো মান·ফাগিবা হং·আ। 15 উনি গিম্মিন জংআদারাং, খেম·খেম দংবো, আরো চিঠিচা বা খাৎথাচা জে স্খিয়াখো চিংআ না·সংনা হ·ন্না উখো রি·ম্মে রা·রিকবো। 16 আনচিংনি গিত্তেল যীশু খ্রীষ্ট আন·থাং আরো আনচিংনি ফাগিবা ইসল না·সংনি খা·থংও খা·দংএতখানা আরো গিম্মিক নাম্মা কামও আরো খাৎথাও না·সংখো খেম·খেম দনখানা। বিয়ান চিংনা খা·সাজক আরো খা·সাচাক্কে বন·চাংগিজা দিদিআখো আরো হান·সেংআ গাপ্পা খা·দংএতাখো হন·জক।

২ থিষলনীকী 3

1 বন·চতাও আগান্না জংআদারাং, চিংনা বি·চাকবো জেদাক্কে গিত্তেলনি খাৎথা না·সংনি গিসেপো থেংরিদাক্কে গিপ্পাংআমিং উয়ানদাক্কেন উয়া গিপ্পাংরিকরিকা আরো রাসং মান·রিকরিকা। 2 আরোবা বি·চাকবো জেদাক্কে চিংআ গিসিকগ্রি আরো নামগিজাগিবা মান্দিরাংনি জাকওনি জক্কাখো মা·ন্না, মুয়ানা গিম্মিক মান্দিনিন বিবিরা·আ দংআ ইন্দাকেদে হং·জা। 3 ইন্দিবা গিত্তেলদে বিবিরা·না খ্রাগিবা হং·আ; বিয়ান না·সংখো খেম·খেম দন্নুয়া আরো শয়তাননি জাকওনি না·সংখো রাক্ষিনুয়া। 4 গিত্তেলমুং নাংরিমা ইন্নে না·সংনি গিম্মিন চিংনি ইন্দাকা বিবিরা·আ দংআ, চিংআ না·সংনা জেগিত্তা গি·য়েৎজক উগিত্তান না·সং কাম দাক্কিংআ আরো দাকনুয়া। 5 গিত্তেল জেদাক্কে না·সংনি খা·থংখো ইসলনি খা·সানি রামাও আরো খ্রীষ্টনি চাকচিকানি রামাও রা·আংআ। 6 জংআদারাং, আনচিংনি গিত্তেল যীশু খ্রীষ্টনি বিমুংও চিংআ না·সংনা ইন্দাকে গি·য়েতিংজক-সাবা আলসিয়া দাক্কে রি·ওদে আরো চিংচাখো না·সং জে স্খিয়াখো মান·জক উখো মানিজাওদে, ইন্দাকোদে না·সং বিমুং দা·আ রি·য়াবো। 7 বাদিকে দাক্কে চিং গিত্তা রি·না নাংআ উখো না·সং আন·থাংআন হা·আইয়া। না·সংমুং দংমিত্তিংও চিংআ আলসিয়া দাক্কে রি·জা, 8 বা দাম হন·গিজা দারাংনি চা·আখো চা·জা। চিংআ সালওয়াল কাম দাকজক আরো নেং·দিকবিজক জেদাক্কে চিংআ দারাংনি বোজা হং·আংজা। 9 না·সংচানি দাকচাকাখো মা·ন্না চিংনি বিল দংজা ইন্দাকে হং·জা, ইন্দিবা না·সং জেদাক্কে চিং গিত্তা রি·য়া উনি গিম্মিনান চিংআ ইন্দাকে কাম দাক্কে না·সংনা ফিন্নিকামিং। 10 না·সংচা দংমিত্তিংওন চিংআ না·সংখো গি·য়েতি আগানামিং, সাবা কাম দাকনা হাম·জাওদে বিয়া চা·জাখান। 11 চিংআ খিন্নানা মা·ন্নিংআ, না·সংও সাবা সাবা আলসিয়া দাক্কে রি·ইংআ আরো মামুং কামখোন দাকজাংআ, উনা বাত্তে গিপ্পিনখো রা·এসা দংআ। 12 আনচিংনি গিত্তেল যীশু খ্রীষ্টনি হং·এ চিংআ ইন্দাকগিবা মান্দিরাংনা গি·য়েতিংজক আরো স্খিয়েতিংজক, বিসং জেদাক্কে থম·থমে কাম দাক্কে আন·থাংথাংনি চা·আখো আন·থাংথাংআন থারিয়া। 13 জংআদারাং, নামগিবা কামও দা·আ নেং·নিকাবো। 14 ইয়া চিঠিও চক্কা চিংনি খাৎথাখো সাবা মানিজাওদে উয়া মান্দিখো হা·আইয়ে দনবো। বিমুং দা·আ রি·ফাবো জেদাক্কে বিয়া খ্রাচা·আখো মা·ন্না। 15 ইন্দিবা বিখো বোবিল ইন্নেবা দা·আ চানচিয়াবো, বাত্তেসা জংআদা ইন্নে বিখো সিমসাকেতবো। 16 থম·থমেতগিবা গিত্তেল আন·থাং ফাংনান গিম্মিকো না·সংনা থম·থমাখো হন·খানা। গিত্তেল না·সং গিম্মিকমুং দংখানা। 17 ইয়া সালামনি খাৎথাখো আংআ পৌল আন·থাংনি জাক্কো চক্কিংজক। ইয়ান আংনি গিম্মিক চিঠিনি চিন হং·আ; আংআ ইন্দাকেন চক্কে দংআ। 18 আনচিংনি গিত্তেল যীশু খ্রীষ্টনি খা·সাচাক্কা না·সং গিম্মিকমুং দংখানা।

১ তীমথিয় 1

1 আনচিংনি জক্কেৎগিবা ইসল আরো খ্রীষ্ট যীশুনি গি·য়েতাও আংআ পৌল যীশু খ্রীষ্টনি সাকসা ওয়াত্তেতা হং·জক। খ্রীষ্ট যীশুনি সাক্কাওন চিংনি গিম্মিক খা·দংআ। 2 বিবিরা·গিবা হং·এ আংনি চং·মত বি·সা তীমথিয়চা আংআ ইয়া চিঠিখো চক্কিংজক। আনচিংনি ফাগিবা ইসল আরো আনচিংনি গিত্তেল খ্রীষ্ট যীশু নাং·না খা·সাচাক্কাখো আরো থম·থমাখো হন·খানা। 3 ম্যাসিডোনিয়াচা রি·য়াংমিত্তিংও আংআ নাং·না জেখো আগানামিং দা·আওবা উখোন আগানিংজক- না·আ ইফিষ সংজিলমাওন দংবো, জেদাক্কে মিত্তাম মান্দিরাংখো গি·য়েৎনা মা·ন্না জেদাক্কে বিসং আরবা ব্রাংগিবা স্খিয়াখো স্খিয়েতজা। 4 বিসংনা ইন্দাকেবা গি·য়েৎবো জেদাক্কে বিসং গল্প আগানারাংও আরো দাল·বিয়া মা·চংরাংও গিসিক হন·জা। ইরাং ইসলনি কামখো গাল্লে বাং·আ জিগ্রিকানিরাংখো থারিয়া ইন্দিবা ইসল বাদিকে দাক্কে বিনি কামখো চালাইয়া উখো বিবিরা·আচা হা·আইনা মা·ন্না। 5 ইন্দাকে গি·য়েতানি মিকসংআ হং·জক খা·সাখো মিকরাকেতা। ইয়া খা·সা খাকখেৎ খা·থং, নাম্মা চানচিয়া আরো চং·মত বিবিরা·আওনি রি·বাআ। 6 মিত্তাম মান্দিরাং ইরাংওনি জিত্তাংএ হং·গিজা নাংগিজা খু·সুকরাংচা গিসিক হন·জক। 7 বিসং আন·থাংথাংনি খু·সুকখো আন·থাংথাংআন হা·আইজা আরো জে বিদিংও আগানা উরাংখোবা হা·আইজা ইন্দাকোবা বিসং মোশিনি নিয়ামনি স্খিগিবা হং·না হা·ম্মা। 8 আনচিং হা·আইয়া নিয়াম নাম্মা, উখো নাম্মেদাক্কে জাকখালনা মা·ন্নোসা। 9 আনচিং ইখোবা হা·আইয়া, নাম্মা মান্দিনা ইয়া নিয়ামখো হন·জা; ইখো বিসংনান হ·ন্নামিং জেরাং নিয়ামখো মানিজা আরো জেরাং বাম্মে দংজা, জেরাং অলাখিজা আরো পাপী হং·আ, জেরাং রংথালজা আরো থরমি হং·জা, জেরাং মা-ফাখো স·ওতে গাল্লা, জেরাং স·ওতে গাল্লা, 10 জেরাং থি·ল্লেকা, জেরাং মি·আসা-মি·আসাস্খা মিচিক-মিচিকস্খামুং নামগিজাখো দাক্কা, জেরাং নকখল-বাদিংআনি কামখো দাক্কা, জেরাং বু·এ খু·সুক আগানা আরো বু·আখো সাক্ষি হ·ন্না, আরো জেরাং বিবিগিবা স্খিয়ানি সাক্কাও দিংথাং কামখো দাক্কা। 11 রাসংগ্মাং ইসলনি নাম্মা খাৎথা গিত্তা জে স্খিয়া, উয়া স্খিয়ান চং·মত স্খিয়া হং·আ। ইয়া নাম্মা খাৎথাখো আগানফ্রাকানি কামখো বিয়া আংনা হন·জক। 12 আনচিংনি গিত্তেল খ্রীষ্ট যীশু, জেআন আংনা বিলখো হন·জক, বিখো আংআ মিৎথেলা, মুয়ানা বিয়া আংখো বিবিগিবা দাক্কে চানচিয়ে বিনা দাকচাকে হ·ন্নানি কামও বাচ্ছিয়ে রা·জক। 13 স্খাংও আংআ খ্রীষ্টখো খাল·স্থাপনুয়ামিং আরো গিচ্চিয়েৎগিবা আরো খা·গ্রাকগিবা হং·আমিং ইন্দাকোবা বিয়া আংখোন ইয়া কামনা বাচ্ছিয়ে রা·জক। বিয়া আংনা খা·সাচাকজক, মুয়ানা আংনি বিবিরা·গিজানা আংআ হা·আইগিজান উরাংখো দাকনুয়ামিং। 14 আনচিংনি গিত্তেল আংনা চৎচাংগিজা খা·সাচাকজক আরো খ্রীষ্ট যীশুমুং নাংরিমানি গিম্মিনো জে বিবিরা·আ আরো খা·সা রি·বাআ উখো হন·জক। 15 ইয়া খাৎথা বিবিরা·না খ্রাআ আরো রা·চাকনাবা খ্রাআ, পাপওনি পাপীরাংখো জক্কেৎনা ইন্নেন খ্রীষ্ট যীশু হা·গিলসাকো রি·বামিং। উয়া পাপীরাংনি গিসেপো আংআন দাল·গিবা। 16 আরো উনি গিম্মিনান ইসল আংনা খা·সাচাকজক, জেদাক্কে দাল·গিবা পাপী আংআ, আংওন খ্রীষ্ট যীশু বিনি বন·চাংগিজা চাকচিকাখো ফিন্নিকনা মা·ন্না। বিখো বিবিরা·আনি গিম্মিনো জেরাং ফাংনাজলনি জাংগিখো মা·ন্নুয়া বিসং জেদাক্কে আংখো নিক্কে স্নিংনা মা·ন্না উনি গিম্মিনান বিয়া আংনা ইন্দাকে দাকজক। 17 জেআন চাসং গিম্মিকনি রাজা, জেনি চা·ম্মানি দংজা আরো জেখো নিকজাংআ, ফাংনাজলনা উয়া সাকসা মা·মাং ইসলনি রাসং হং·খানা। আমেন। 18 খা·সারা বি·সা তীমথিয়, নাং·নি গিম্মিনো গিপ্পিনরাং আগানসোগিবা দাক্কে জে খাৎথাখো আগানামিং উয়া খাৎথা গিত্তা আংআ নাং·না ইখো গি·য়েতিংজক। উয়া খাৎথাখো গিসিকো দন্নে না·আ খ্রীষ্টনা চাক্কে জাংগিগাল্লে দাকগ্রিকে রি·য়াংবো, 19 আরো উমুং বিবিরা·আখো আরো নাম্মা চানচিয়াখো রাক্ষিবো। মিত্তাম মান্দিরাং নাম্মা চানচিয়ানি খাৎথাখো খিন্নাচাকগিজা বিসংনি বিবিরা·আখো নাসিয়েতা। 20 উয়া মান্দিরাংও দংআ হুমিনায় আরো আলেকসান্দর। উনি গিম্মিন শয়তাননি জাক্কো আংআ বিসংখো ওয়াতজক, জেদাক্কে বিসং ইন্দাকা স্খিয়াখো মা·ন্না, ইসলখো চন্নিকনা নাংজা।

১ তীমথিয় 2

1 স্খাংআন আংআ আগানিংজক, জেদাক্কে গিম্মিকনা ইসলচা মল·মলা, বি·আ আরো মিৎথেলাখো হ·ন্না। 2 ইন্দাকে রাজারাংনা আরো জেরাংনি জাক্কো বিল দংআ বিসং দিমদাকনা বি·না নাংনুয়া, জেদাক্কে ইসলখো অলাখিয়ে আরো খাকখেৎ দাক্কে রি·এ আনচিং খেম·খেমে আরো থম·থমে জাংগি মিৎথাংএতনা মা·ন্না। 3 আনচিংনি জক্কেৎগিবা ইসলনি মিক্রোনও উয়া নাম্মা আরো ইনান বিয়া খুসি হং·আ। 4 বিয়া হা·ম্মা জেদাক্কে দিমদাকান পাপওনি জক্কাখো মা·ন্না আরো খ্রীষ্টনি গিম্মিনো বিবিখো নাম্মেদাক্কে হা·আইনা মা·ন্না। 5 ইসল সাকসাসান দংআ আরো ইসল আরো মান্দিনি গিসেপো নাংরিমেতানিবা সাকসাসান দংআ। উয়া নাংরিমেতগিবা হং·জক মান্দি খ্রীষ্ট যীশু। 6 বিয়া দিমদাক মান্দিখো জক্কেৎনা জাংগিথাংখো হন·চাকামিং। ইসলনি থিক দাকসোগিবা সময়ও উনি গিম্মিনো সাক্ষি হন·জক, 7 আরো ইয়া সাক্ষিখো হ·ন্না ইন্নে ইসল আংখো আগানফ্রাকগিবা, ওয়াত্তেতা আরো গিপ্পিন জাতরাংচা বিবিরা·আনি আরো বিবিনি স্খিগিবা গিত্তা বাচ্ছিয়ে রা·জক। আংআ বিবিখো আগানিংআ, বু·আখোদে আগানজা। 8 আংআ হা·ম্মা জেদাক্কে দিমদাক হা·দামচা মি·আসারাং খা·আওনাংআখো বা নিরিয়ানি গিসিকখো রা·বিতগিজা খাকখেৎ খা·থংও জাক সামগ্মিখো দি·চাএ বি·আ। 9 আংআ ইখোবা হা·ম্মা জেদাক্কে মিচিকরাং রিন্নকে রি·য়া আরো বিচাল-বুদ্ধিখো জাকখালে খ্রাগিবা বা·রা-চলাখো গান্না। জেদাক্কে বিসং রকম রকম দাক্কে খিন্নিখো সাক্কে, সোনা আরো মুক্তানি আরো গামচাৎগিবা বা·রারাংচা আন·থাংথাংখো থারিজা। 10 উনাবাত্তে জেদাক্কে বিসং নাম্মা কামরাংচা আন·থাংথাংখো থারিয়া। জে মিচিকরাং আন·থাংথাংখো ইসলখো অলাখিগিবা ইন্নে আগানে দংআ উয়া মিচিকরাংনা উয়ান খ্রাগিবা কাম হং·নুয়া। 11 খু·সুক আগানগিজা আরো চু·গিম্মিক বাম্মে দংএ মিচিকরাং স্খিখানা। 12 স্খিনা আরো মি·আসানি সাক্কাও নকগিবা হং·না আংআ সাকসা মিচিকনাবা হন·জা। বাত্তেসা বিনি স্রক দাক্কে দংআন খ্রাআ, 13 মুয়ানা স্খাং আদমখো আরো জা·মানো হবাখো থারিয়ামিং। 14 ইনাআগ্রেবা আদম দাক্কামব্রুআও ব্রাংজা, ইন্দিবা মিচিকদে ব্রাংআমিং আরো ইসলনি গি·য়েতাখো মানিজামিং। 15 ইন্দিদে বিয়া বি·সা আৎচিয়েতাচা পাপওনি জক্কাখো মা·ন্নুয়া; মিচিকরাংনি নাম্মা বিচাল-বুদ্ধিখো জাকখালে বিবিরা·আও, খা·সাও আরো রংথালাও রি·না নাংনুয়া।

১ তীমথিয় 3

1 ইয়া খাৎথাখো বিবিরা·না খ্রাআ, সাবা মন্ডলীখো নিরক্ষিগিবা হং·না হা·ম্মোদে বিয়া নাম্মা কামখোন দাকনা হা·সিকা। 2 উনি গিম্মিন নিরক্ষিগিবাখো ইন্দাকগিবা হং·না নাংনুয়া জেদাক্কে দারাংবা বিখো দোস হ·ন্না মান·জা। বিনি সাকসাসান জিক দংনুয়া। বিয়া আন·থাংখো বাম্মেতি দন্নুয়া আরো বিনি নাম্মা বিচাল-বুদ্ধি দংনুয়া। বিয়া খ্রাএ রি·নুয়া আরো সকবাগিবারাংনা দাকচাকে হ·ন্না নামনিকনুয়া। বিনি গিপ্পিনরাংনা স্খিয়েতানি বিল দংনুয়া। 3 জেদাক্কে বিয়া চুফেকগিবা আরো খা·আওনাংরাকগিবা হং·জা আরো বাত্তেসা বিনি গিসিক রিন্নকখানা আরো বিয়া নিরিগিসিজাখানা বা থাংখা-পয়সারাংনা মাদ্দুজাখানা। 4 জেদাক্কে বিয়া আন·থাংনি নকনি গিম্মিকখো খ্রাএ নিরক্ষিনা মা·ন্না আরো বিনি বি·সারাং জেদাক্কে বাম্মে আরো সনথল দাক্কে রি·য়া। 5 জেআন বিনি আন·থাংনি নকখো নিরক্ষিনা হা·আইজা বিয়া বাদিকে দাক্কে ইসলনি মন্ডলীখো নিরক্ষিনুয়া? 6 মন্ডলীখো নিরক্ষিগিবা জেদাক্কে গিত্তাল বিবিরা·গিবা হং·জা, মুয়ানা গিত্তাল বিবিরা·গিবা হং·ওদে বিয়া গাং·বিংনাবাগ্মাং আরো শয়তাননা হ·ন্না খ্রাগিবা শাস্তিখো মা·ন্না খ্রাগিবা হং·নাবাগ্মাং। 7 হা·ফালনি মান্দিরাংচা বিনি বিমুংখো মিংসিংনা নাংআ, জেদাক্কে বিয়া ইন্না-জিআখো মান·জা আরো শয়তাননি জা·গাও গা·আকজা। 8 উয়ানদাক্কে দাকচাকে হন·গিবারাংবা জেদাক্কে মান্দিরা·আখো মা·ন্না খ্রাগিবা হং·আ আরো খু·সুক চলসানি মান্দি হং·আ। বিসং জেদাক্কে চুফেকগিবা হং·জা, আরো খ্রাগিজা দাক্কে লাভ দাকনা হা·সিকজা। 9 জেদাক্কে বিসং রংথালা গিসিকো খ্রীষ্টান থরমখো বিবিরা·আনি নিং·থুয়া বিবিখো রি·ম্মে রা·রিকা। 10 স্খাং বিসংখো থিকখেলে নিচেংনা নাংনুয়া, জা·মানো বিসং দোসগ্রি ইন্নে ফিন্নিকনা মা·ন্নোদে দাকচাকে হন·গিবা হং·না মা·ন্নুয়া। 11 উয়ানদাক্কেন বিসংনি জিকরাংবা জেদাক্কে মান্দিরা·আখো মা·ন্না খ্রাগিবা হং·আ। বিসং জেদাক্কে গিপ্পিনরাংনি নামগিজাখো আগানে রওমজা আরো আন·থাংথাংখো বাম্মেতি দন্না। গিম্মিক গিত্তান জেদাক্কে বিসংখো বিবিরা·না মা·ন্না। 12 দাকচাকে হন·গিবানিবা সাকসাসান জিক দংনুয়া। বিয়া জেদাক্কে নাম্মেদাক্কে বিনি বি·সারাংখো আরো নকদাংখো নিনা মা·ন্না। 13 জে দাকচাকে হন·গিবা নাম্মেদাক্কে কামখো দাক্কা বিয়া মান্দিরা·আখো মা·ন্না আরো খ্রীষ্ট যীশুখো বিবিরা·আনি গিম্মিন বিনি খা·থং খেনমানজা। 14 নাং·চা থেংরিন রি·য়াংনা মা·ন্নুয়া ইন্নে আংআ খা·দংআ। ইন্দিবা মামুংনি হা·সেলো আংনি রি·য়াংনা হারিমোদে ইনি গান্দা আংআ নাং·না ইরাংখো চক্কিংজক, জেদাক্কে না·আ হা·আইনা মা·ন্না ইসলনি নকনি মান্দিরাংনি বেওয়ালরাং বাদিকে হং·না খ্রাআ। ইয়া নক হং·জক থাংগিবা ইসলনি মন্ডলী, জেআন ফাংচাকানি আরো খ্রং গিত্তা ইসলনি বিবিখো রি·ম্মে রা·রিকা। 16 খ্রীষ্টান থরমখো বিবিরা·আনি নিং·থুয়া বিবি দাল·বাতা হং·আ উখো জেগালনা মান·জা। উয়া বিবি ইয়ান- বিয়া মান্দি হং·এ ফারাকজক; বিয়া দোসগ্রি গিসিক রংথালগিবা ইখো ফিন্নিকজক; সা·গ্রেরাং বিখো নিক্কামিং; গিম্মিক জাতরাংচা বিনি গিম্মিনো আগানফ্রাকামিং; হা·গিলসাকো বিখো মান্দিরাং বিবিরা·আমিং; সালগিও বিখো রাসংমুং দি·দোএ রা·আংআমিং।

১ তীমথিয় 4

1 গিসিক রংথালগিবা নাম্মেথাল্লে আগানজক, রি·বাগিবা চাসংও মিত্তাম মান্দিরাং খ্রীষ্টান থরমখো বিবিরা·আওনি চে·ল্লাংনুয়া আরো দাক্কামব্রুআ গিসিক আরো গিসিক নামগিজাগিবারাংনি স্খিয়াওনা গিসিক হ·ন্নুয়া। 2 গিসিক সেল·জাজক ইন্দাকা বু·এ চা·গিবা মান্দিরাংনি বু·এ চা·আনা ইন্দাকে হং·নুয়া। 3 বিসং মান্দিখো বিয়াজাখানা গি·য়েতা আরো মিত্তাম চা·আরাংখো নিমখানা আগানা। ইন্দিবা বিবিরা·গিবারাং, জেরাং ইসলনি বিবিখো হা·আইজক, বিসং জেদাক্কে মিৎথেলে চা·আ উনি গিম্মিনান ইয়া চা·আরাংখো ইসল থারিজক। 4 ইসলনি থারিয়া গিম্মিক বস্তুরাংআন নাম্মা, উনি গিম্মিন মামুংখো নামজা ইন্নে চানচিয়ে গাল্লা খ্রাজা; ইন্দিবা উখো জেদাক্কে মিৎথেলে রা·চাকা, 5 মুয়ানা ইসলনি খাৎথা আরো বি·আচা উয়া রংথালানি হং·আ। 6 ইয়া বিদিংরাংখো না·আ জংআদারাংনা হা·আইএতোদে ইন্দিদে খ্রীষ্টান থরমখো বিবিরা·আনি জে বিবিখো আরো খাকখেৎ স্খিয়াখো না·আ মানিয়ে রি·জক, উয়ো চু·সকগিবা হং·এ খ্রীষ্ট যীশুনি সাকসা খ্রাগিবা দাকচাকে হন·গিবা হং·নুয়া। 7 ইসলখো রা·এ অলাখিগ্রি গল্পরাংওনি চে·ল্লে দংবো; উরাংদে বুৎচুমারাংনি বানাইয়া গল্পরাং গিত্তা হং·আ। বাত্তেসা ইসলখো অলাখিনা দাকবো। 8 বে·এনখো অকখিসা নাম্মা, ইন্দিবা ইসলখো অলাখিয়াও গিম্মিক গিত্তান নাম্মা; উনি গিম্মিন দা·আওনি জাংগিনা আরো রি·বাগিবা জাংগিনা খা·দংআ দংআ। 9 ইয়া খাৎথা বিবিরা·না খ্রাগিবা আরো চু·গিম্মিক দাক্কে রা·চাকনাবা খ্রাগিবা হং·আ। 10 ইনি গিম্মিনান আনচিং জাংগিগাল্লে গাম্মিংআ আরো হা·সিকবিএ কাম দাক্কিংআ, মুয়ানা থাংগিবা ইসলনি সাক্কাও আনচিং খা·দংআ। বিয়ান গিম্মিক মান্দিরাংনি জক্কেৎগিবা হং·আ, মংসংদে বিসংনি জেরাং বিখো বিবিরা·আ। 11 না·আ ইরাংনি গিম্মিনো গি·য়েৎবো আরো স্খিয়েতবো। 12 না·আ ফান্থি ইন্নে দারাংবা নাং·খো চন্নিকজাখানা। খু·সুক আগানাও, রি·য়া-দোআও, খা·সাও, বিবিরা·আও আরো রংথালাও বিবিরা·গিবারাংচা না·আ দাকফিন্নিকগিবা হং·বো। 13 আংনি রি·বাখুজা দিপ্পাৎ না·আ বিবিরা·গিবারাংখো রংথালগিবা শাস্ত্রখো পড়াইএ খিন্নাদিল্লাও, আগানফ্রাকাও আরো স্খিয়েতানি কামও আন·থাংখো বিমচিপে দনবো। 14 মন্ডলীনি দাল·গিবারাং জেনসালো নাং·নি সাক্কাও বিসংনি জাকখো দন্নামিং উনো আগানসোগিবা গিত্তা দাক্কে খু·সুক আগানানি জে মংসংগিবা হ·ন্নানিখো নাং·না হ·ন্নামিং উখো না·আ দা·আ গাল্লে দন্নাবো। 15 ইরাংনি গিম্মিনো গিসিক হন·বো; আন·থাংখো চু·গিম্মিক দাক্কে উয়ো দনবো, জেদাক্কে গিম্মিকান ইখো নিকনা মা·ন্না না·আ মিকখাংচানা সক্কাংইংজক। 16 নাং·নি আন·থাংনি গিম্মিনো আরো নাং·নি স্খিয়ানি গিম্মিনো সিমসাকে দংবো। ইরাংখো দাকসোবো, মুয়ানা উনি গিম্মিনো না·আ আন·থাংখো রাক্ষিনা মা·ন্নুয়া আরো নাং·নি খাৎথাখো খিন্নাগিবারাংখোবা রাক্ষিনা মা·ন্নুয়া।

১ তীমথিয় 5

1 জেরাং বুদেফা হং·জক, বিসংনি দোসখো ফিন্নিকনা রি·য়াংএ রাক্কা খু·সুকখো দা·আ আগানাবো; ফাআ গিত্তা চানচিয়ে বিসংখো থারিবো। ফান্থিরাংখো জংআদা চানচিয়ে বিসংখো থারিবো। 2 মিচিক মা·আরাংখো মা·আ গিত্তা চানচিয়ে থারিবো আরো মি·থ্রারাংখো ন-আবি গিত্তা চানচিয়ে রংথালাও থারিবো। 3 জে রান্দি মিচিকরাংনি দারাংবা দংজা বিসংখো যতন রা·এ নিরকবো। 4 ইন্দিবা রান্দি মিচিকনি বি·সা-আংদি বা সু·গিবা দংওদে উয়া বি·সা-আংদি বা সু·গিবারাংআন জেদাক্কে স্খাং আন·থাংথাংনি নকনা দাক্কানিখো দাক্কে ইসলনা খা·ফাকে ফিন্নিকাখো স্খিয়া। ইন্দাকে বিসং বিসংনি ফাগিৎচামরাংনি খা·সানি জিন্নাংখো চতনা মা·ন্নুয়া, আরো ইনি গিম্মিনান ইসল খুসি হং·আ। 5 জে রান্দি মিচিকনি দারাংবা দংজা বিয়া ইসলনি সাক্কাওন বিনি খা·দংআ গিম্মিকখো দন্নে ওয়ালসাল ইসলচা বি·এ আরো মল·মলে দংআ। 6 ইন্দিবা জে রান্দি মিচিক হা·সিকরামরাম জাংগিখো থাংএতা বিয়া থাংমিত্তিংওবা সিয়া গিত্তা হং·আ। 7 ইরাংনি গিম্মিন গি·য়েৎবো জেদাক্কে দারাংবা বিসংখো দোস হ·ন্না মান·জা। 8 জেআন আন·থাংনি চাচ্চিরাংনা, মংসংদে আন·থাংনি নকখো নিজা বিয়া উচা বিনি বিবিরা·আখো জিচাকজক; বিয়া বিবিরা·গিজাগিবানা বাত্তেবা নামজা। 9 রান্দি মিচিকরাংনি বিমুংও সাকসা রান্দি মিচিকনি বিমুংখো রা·চাপনা স্খাং ইখো নিনা নাংনুয়া, বিনি বিলসি সতদক হং·আমা আরো বিয়া সেগিবানি বিবিরা·না খ্রাগিবা হং·আমিংমা। 10 ইনাআগ্রেবা নাম্মা কামনা বিনি মিংসিংআ দংনা নাংনুয়া। ইন্দাকা নাম্মা কামরাংও দংআ -বি·সা-আংদিরাংখো নিরকা, চাচ্চি সকবাগিবারাংনা দাকচাকে হ·ন্না, ইসলনি মান্দিরাংনি জা·চকখো সু·গালে হ·ন্না, জেরাং দুকও গা·আকা বিসংনা দাকচাকা, আরো দিংথাং নাম্মা কামরাংও দংফা। 11 মি·থ্রা রান্দিরাংনি বিমুংখো রান্দিরাংনি বিমুংরাংমুং দা·আ চক্কাবো, মুয়ানা বিসংনি বে·এননি হা·সিকারাং চাখাতজোকনো আরো খ্রীষ্টনা বিসংনি খা·ফাকা কমিয়াংজোকনো বিসং সে খিমনা হা·ম্মা। 12 ইনি গিম্মিন বিসং বিসংনি স্খাংনি খু·রাচাক্কাখো ফি·আ ইন্নে আন·থাংথাংনি সাক্কাও শাস্তিখো রা·বা। 13 ইনাআগ্রে বিসং নকরিখিতচা রোমে আলসিয়া হং·না স্খিয়া। বিসং আলসিয়াসান হং·জা, ইন্দিবা হং·গিজা-নাংগিজা খু·সুকখো আগান্না আরো গিপ্পিনখো রা·এ জাচাএ আগান্না স্খিয়া আরো জেখো বিসংনি আগানা খ্রাজা উয়া খাৎথাখো আগানা। 14 উনি গিম্মিন আংআ ইখো স্খিয়া, মি·থ্রা রান্দিরাং বিয়াখানা, বি·সানি মা·গিবা হং·খানা, আন·থাংথাংনি নকদাংখো নিখানা আরো বোবিলরাংনা জিয়ানি মামুং চলখো হন·জাখানা। 15 দা·আওন মিত্তাম রান্দি মিচিকরাং ফি·ল্লাংএ শয়তাননি রামাও রি·ইংজক। 16 খ্রীষ্টও বিবিরা·গিবা সাকসা মিচিকনি নক্কো মিত্তাম রান্দি মিচিকসারাং দংওদে উয়া মিচিকান বিসংখো নিরকখানা। ইয়া রান্দিরাংখো নিরকানি কামখো মন্ডলীনি সাক্কাও গালনা নাংজা, জেদাক্কে জে রান্দি মিচিকরাংনি দারাংবা দংজা মন্ডলী বিসংখো নিরকনা মা·ন্না। 17 মন্ডলীনি দাল·গিবারাং জেরাং মন্ডলীখো চালাইয়া, মংসংদে জেরাং ইসলনি খাৎথাখো আগানফ্রাকনা আরো স্খিএতনা কাম দাক্কা, বিসংনি মা·ন্নানি বাং·না নাংআ। 18 রংথালগিবা শাস্ত্রও দংআ, “মি গা·মিত্তিংও মা·সুনি খু·সুকখো দা·আ খাথিপাবো।” আরোবা চক্কা দংআ, “জেআন কাম দাক্কা বিয়া বেতন মা·ন্না খ্রাআ।” 19 সাকগ্মি বা সাকগিত্থাম সাক্ষিনি সাক্ষি হ·ন্না আগ্রে মন্ডলীনি দাল·গিবানি সাক্কাও মামুং দোসনি খাৎথাখো দা·আ খিন্নাবো। 20 জে দাল·গিবারাং পাপ দাক্কারিন দংআ মন্ডলীনি গিম্মিক মান্দিনি মিকখাংও বিসংনি দোসখো ফিন্নিকে হন·বো জেদাক্কে গিপ্পিন দাল·গিবারাংবা খেন্না। 21 ইসল আরো খ্রীষ্ট যীশু আরো বাচ্ছিয়ে রা·গিবা সা·গ্রেরাংনি মিকখাংও আংআ নাং·না ইখো গি·য়েতিংআ- দারাংনা চাকগিজা ইরাংখো দাকবো আরো সাকসাখোসান নিএ মামুং কামখো দা·আ দাক্কাবো। 22 থেংরি দাক্কে সানিবা সাক্কাও জাক দন্নে সাকসাখো মামুং কামনা দা·আ থিক দাক্কাবো। গিপ্পিনরাংনি পাপ দাক্কাও বিসংমুং দা·আ দংফাবো। আন·থাংখো খাকখেৎ দনবো। 23 সময়মিত্তিং না·আ জম্মাসাআও গা·আকা ইন্নে বিকমানি হা·সেল অকখিসা দাক্কে আংগুর বিৎচিখো রিংবো; চিখোসান দা·আ রিংআবো। 24 সানিবা সানিবা পাপখো ইন্দাকে নাম্মেদাক্কে নিকনা মা·ন্না, উনি বিচাল স্খাংআন হং·আংআ। দা·আবা সানিবা সানিবা পাপখো জা·মানো নিকনা মা·ন্না। 25 উয়ানদাক্কে খাকখেৎ কামখো নাম্মেদাক্কে নিকনা মা·ন্না, আরো জেরাংখো নিকনা মান·জা উরাংবা থুম্মুয়ে দংজা।

১ তীমথিয় 6

1 জে নকখলরাংনি নাম্মেন গামনা নাংআ বিসং গিম্মিকান বিসংনি নকগিবারাংখো মান্দিরা·আখো মা·ন্না খ্রাগিবা দাক্কে চানচিখানা, জেদাক্কে দারাংবা ইসলনি বিমুংখো আরো আনচিংনি স্খিএতাখো জিনা মান·জা। 2 জে নকখল খ্রীষ্টও বিবিরা·গিবা নকগিবানি নিং·আও দংআ বিয়া জেদাক্কে বিবিরা·গিবা জংআদা ইন্নেন উয়া নকগিবাখো চন্নিকজা বাত্তেসা আরোবা নাম্মেদাক্কে বিনা দাকচাকে হ·ন্না, মুয়ানা বিনি দাকচাকে হ·ন্নাও জেআন দাকচাকাখো মা·ন্নিংআ বিয়াদে বিবিরা·গিবা হং·আ আরো বিনি খা·সাগিবা হং·আ। ইরাংনি গিম্মিনো স্খিয়েতবো আরো নাম্মাখো আগানবো। 3 সাবা দিংথাং দাক্কে স্খিওদে আরো খাকখেৎখো, আগানস্খাওদে আনচিংনি গিত্তেল যীশু খ্রীষ্টনি স্খিয়া আরো ইসলখো অলাখিয়ানি স্খিয়াখো মানিজাওদে বিয়া গাং·বিংগিবা হং·আ। 4 বিয়া মামুংখোন হা·আইজা; নিরিয়া আরো জিগ্রিকা জেদাক্কে বিনি গি·সা সাআ গিত্তা হং·আ। ইরাংনি বিথি হং·জক- মিকনেংআ, নিরিয়া, জিআ, ফত্তা, 5 আরো গিসিক চনগিবারাংনি গিসেপো গোলমাল দাক্কা। ইন্দাকা মান্দিরাংও ইসলনি বিবি দংজা; বিসং খ্রীষ্টনি থরমনি বিবিখো হা·গিলসাকো মান·দাপানি চল ইন্নে চানচিয়া। 6 ইন্দিবা খুসি হং·গিবা গিসিকো খ্রীষ্ট থরমনি বিবিরা·আ গিত্তা রি·ওদে নাম্মেন মান·দাপানি হং·আ। 7 হা·গিলসাকো আনচিংদে মামুংখোন রা·এ রি·বাজা আরো হা·গিলসাকনিখোবা মামুংখোন রা·আংনা মান·জানুয়া। 8 ইন্দিদে চা·আ আরো বা·রা দংজোকনোন আনচিং খুসি হং·নুয়া। 9 ইন্দিবা জেরাং মা·ন্নে চা·গিবা হং·না হা·ম্মা বিসং বাং·আ রুরাও আরো জা·গাও গা·আকা, আরো ইন্দাকা নামগিজাস্রাং হা·সিকা বিসংনি হং·আ জেরাং মান্দিখো ব·ন্নেতাও আরো হং·সিয়াও গাল্লেতা। 10 থাংখা-পয়সানা নামনিকা হং·জক নামগিজা গিম্মিকনি জা·থিং। বাং·আরাংএন থাংখা-পয়সানা মাদ্দুয়ে খ্রীষ্টান থরমখো বিবিরা·আওনি জিত্তাংএ আন·থাংথাংনি সাক্কাও বাং·আ দুকরাংখো রিংগামে রা·বাজক। 11 ইন্দিবা না·আদে ইসলনি মান্দি; ইরাংওনি না·আ খাতবো। খাকখেৎ জাংগি, অলাখিয়া, বিবিরা·আ, খা·সাআ, চাকচিকা আরো রিন্নকা গিসিক-বেওয়ালনা গিসিক নাংবো। 12 খ্রীষ্টখো বিবিরা·আনি গিম্মিন বিনা চাক্কে সিমাংথাংমাং দাকগ্রিকে রি·য়াংবো। জে ফাংনাজলনি জাংগিনি গিম্মিন ইসল নাং·খো রিক্কামামিং উয়া ফাংনাজলনি জাংগিখো রি·ম্মে রা·রিকবো। না·আ বাং·আ মান্দিরাংনি মিকখাংওন নাং·নি বিবিরা·আনি সাক্ষিখো হ·ন্নামিং। 13 ইসল জেআন গিম্মিকনা জাংগিখো হ·ন্না আরো খ্রীষ্ট যীশু, জেআন পন্তীয় পিলাতনি মিকখাংও বিবিনি গিম্মিনো সাক্ষি হ·ন্নামিং, উয়া ইসল আরো খ্রীষ্ট যীশুনি মিকখাংও আংআ নাং·না ইখো গি·য়েতিংজক- 14 আনচিংনি গিত্তেল যীশু খ্রীষ্ট ফারাকখুজা দিপ্পাৎ খাকখেৎ দাক্কে আংনি গি·য়েতাখো মানিয়ে রি·য়াংবো, জেদাক্কে দারাংবা নাং·খো জিনা মান·জা। 15 উয়া মিৎথেলা মান·স্রাংগিবা ইসল, জেআন সাকসা মা·মাং শাসন দাকগিবা হং·আ, জেআন রাজারাংনি রাজা আরো গিত্তেলরাংনি গিত্তেল হং·আ, বিয়ান বিনি খ্রাগিবা সময়ও খ্রীষ্টখো ফারাকেতনুয়া। 16 সাকসা মা·মাং ইসলসান সিয়ানি নিং·আও হং·জা। বিয়া ইন্দাকগিবা সেং·আও দংখামা জেও সাকসা মান্দিবা রি·য়াংনা মান·জা। সাকসা মান্দিবা বিখো মামুং সালোবা নিকখুজা, নিকনা মা·ন্নাবা মান·জা। মান্দিরা·আ আরো বিল ফাংনাজলনা বিনিন হং·আ। আমেন। 17 জেরাং ইয়া হা·গিলসাকো মা·ন্নে চা·আ বিসংনা ইন্দাকে গি·য়েৎবো জেদাক্কে বিসং গাং·বিংগিজা আরো গামরাংনি সাক্কাও ফাংচাকগিজা ইসলনি সাক্কাও ফাংচাকা। বিয়ান গিম্মিকখো জাকস্রামে আনচিংনা হ·ন্না। 18 মা·ন্নে চা·গিবারাংনা গি·য়েৎবো জেদাক্কে বিসং গিপ্পিননি নাম্মাখো দাক্কা, খাকখেৎ কামও দংআ, জাকস্রামে হ·ন্না আরো বিসংনি গামরাংনি বাকখো গিপ্পিনরাংনাবা হ·ন্না। 19 ইনি গিম্মিন বিসং আন·থাংথাংনা ইন্দাকে গাম চিম্মংনুয়া জে রি·বাগিবা চাসংও বিসংনা বিল্লাকা ফাংচাকানি গিত্তা হং·নুয়া, জেদাক্কে খাকখেৎ জাংগিখো বিসং রাক্কে রি·ম্মে রা·রিকনা মা·ন্না। 20 ও তীমথিয়, জেখো রাক্ষিনা নাং·না হন·জক উখো নাম্মেদাক্কে রাক্ষিবো। বু·আ হা·আইয়ানি খা·ফাকাগ্রি হং·গিজা-নাংগিজা খাৎথাওনি আরো স্খিয়াওনি চে·ল্লে দংবো। 21 মিত্তাম মান্দি ইন্দাকা হা·আইয়াখো দাবি দাক্কে খ্রীষ্ট থরমনি বিবিরা·আওনি চে·ল্লাচা জিত্তে রি·য়াংজক। ইসল না·সংনা খা·সাচাকখানা।

২ তীমথিয় 1

1 খ্রীষ্ট যীশুও ফাংনাজলনি জাংগিনি খু·রাচাক্কা গিত্তা ইসলনি হা·সিকাও আংআ পৌল খ্রীষ্ট যীশুনি সাকসা ওয়াত্তেতা হং·জক। 2 ইয়া চিঠিখো আংআ আংনি খা·সাগিবা বি·সা তীমথিয়না চক্কিংআ। ফাগিবা ইসল আরো আনচিংনি গিত্তেল খ্রীষ্ট যীশু নাং·না খা·সাচাক্কাখো আরো থম·থমাখো হন·খানা। 3 আংনি ফাগিৎচামরাং জেগিত্তা ইসলনা দাকচাকে হ·ন্নুয়ামিং উগিত্তা আংআবা নাম্মা গিসিকো ইসলনা দাকচাকে হ·ন্না; আরো নাং·না ওয়ালসাল বি·মিত্তিংও আংআ বিখো মিৎথেলা। 4 নাং·নি গ্রাপাখো গিসিক রা·এ নাং·খো নিকনা হা·সিকিংজক, জেদাক্কোদে আংনি গিসিক খুসি হং·আ। 5 নাং·নি খা·থংও জে বিবিরা·আ দংআ উখোবা আংনি গিসিকো দংআ। ইয়া বিবিরা·আ স্খাংও নাং·নি আম্বি লোয়ী আরো নাং·নি মা·আ উনীকীনি খা·থংও দংআমিং, আরো আংআ হা·আইয়া, ইয়া বিবিরা·আ নাং·নি খা·থংওবা দংআ। 6 ইনি গিম্মিন আংআ নাং·না দা·আবা ইয়া খাৎথাখো আগান্না হা·ম্মা-নাং·নি সাক্কাও আংনি জাক দন্নাচা ইসল নাং·না জে হ·ন্নানিখো হন·জক উখো দা·আবা দি·চাবো। 7 ইসল আনচিংনা খেন্নানি গিসিকখো হন·জা; বিয়া আনচিংনা ইন্দাকা গিসিকখো হন·জক জেও বিল, খা·সাআ আরো আন·থাংখো বাম্মে রা·রিকানি বিল দংআ। 8 উনি গিম্মিন আনচিংনি গিত্তেলনি গিম্মিনো সাক্ষি হ·ন্না দা·আ খ্রাচা·আবো, আরো বিনি গিম্মিন বন্দি হং·গিবা আংআ, আংখো রা·এবা দা·আ খ্রাচা·আবো। উনা বাত্তে ইসল নাং·না জে বিলখো হন·জক উগিত্তা বিনি নাম্মা খাৎথাখো আগানফ্রাকনা আংমুং দুক চাকবো। 9 ইসলান আনচিংখো পাপওনি জক্কেৎজক আরো রংথালে জাংগি থাংএতনা রিক্কামজক। আনচিংনি মামুং কামনি হা·সেল বিয়া ইখো দাকজা, বাত্তেসা বিনি মিকসংআ আরো খা·সাচাক্কানি গিম্মিনোন দাকজক। হা·গিলসাক হং·চেংনা স্খাং খ্রীষ্ট যীশুও বিয়া বিনি খা·সাচাক্কাখো আনচিংনা হ·ন্নামিং, 10 ইন্দিবা দা·আও আনচিংখো জক্কেৎগিবা খ্রীষ্ট যীশুনি ইয়া হা·গিলসাকো রি·বাচা বিয়া উয়া খা·সাচাক্কাখো ফারাকজক। খ্রীষ্ট সিয়াখো ব·ন্নেতজক আরো নাম্মা খাৎথাচা ব·ন্নাগ্রি জাংগিনি খাৎথাখো ফারাকজক। 11 আরো ইয়া নাম্মা খাৎথাখো হা·আইএতনান আংখো আগানফ্রাকগিবা, ওয়াত্তেতা আরো স্খিগিবা দাক্কে বাচ্ছিয়ে রা·জক। 12 ইনি গিম্মিনান আংআ ইন্দাকা দুকরাংখো চাক্কিংজক; ইন্দাকোবা আংআ খ্রাচা·জা, মুয়ানা আংআ হা·আইয়া আংআ সানি সাক্কাও ফাংচাকজক। আংআ খাকখেতান হা·আইয়া, আংআ বিচা জেখো দনজক খ্রীষ্টনি রি·বানি সালনা উখো রাক্ষিয়ানি বিল বিনি দংআ। 13 না·আ আংচাখো জেখো খিন্নাজক উয়া চং·মত স্খিয়াখো না·আ জা·রিকবো; আরো খ্রীষ্ট যীশুমুং নাংরিমানি গিম্মিন আনচিংনি খা·থংও জে খা·সাআ আরো বিবিরা·আ রি·বাজক উখোবা রি·ম্মে রা·রিকবো। 14 ইসল নাং·না জেখো রাক্ষিনা হন·জক উখো রংথালা গিসিকচা রাক্ষিবো, জেআন আনচিংনি খা·থংও দংআ। 15 না·আ হা·আইয়া এশিয়া হা·দকনি গিম্মিকান আংচানি জিত্তাংজক। বিসংনি গিসেপো ফুগিল্ল আরো হর্মগিনি দংআ। 16 অনীষিফরনি নকনি সাক্কাও গিত্তেল খা·সাচাকখানা; বিয়া বাং·এন আংখো খা·দংএতজক, আরো আংনি বন্দি হং·আনা বিয়া খ্রাচা·জাজক। 17 বিয়া রোমও দংমিত্তিংও আংখো বাং·এ সান্দিয়ে আংখো মা·ন্নামিং। 18 ইফিষও বাদিকে দাক্কে বিয়া আংনা হালদুজক উখো না·আ নাম্মেদাক্কে হা·আইয়া। গিত্তেল দাকখানা, জেদাক্কে খ্রীষ্টনি রি·বানি সালো বিয়া গিত্তেলচাখো খা·সাচাক্কাখো মা·ন্না।

২ তীমথিয় 2

1 আংনি বি·সা, খ্রীষ্ট যীশুনি খা·সাচাক্কাও না·আ বিল্লাকবো। 2 বাং·আ সাক্ষিরাংনি মিকখাংও আংনি খু·সুকও জে স্খিয়ানি খাৎথাখো না·আ খিন্নাজক উয়া স্খিয়াখো রি·ম্মে রা·রিকনা না·আ ইন্দাকা বিবিগিবা মান্দিরাংনা হন·বো জেরাংনি গিপ্পিনরাংখো স্খিয়েতানি বিল দংআ। 3 খ্রীষ্ট যীশুনি সাকসা খ্রাগিবা সিপাই গিত্তা না·আ চিংমুং দুকখো চাকবো। 4 দাকগ্রিকনা রি·য়াংএ দারাংবা আন·থাংখো সংসালো দনজা, জেদাক্কোদে সিপাই গিত্তা জেআন বিখো রা·জক বিখো বিয়া খুসি দাকনা মা·ন্না। 5 উগিত্তান খা·ল্লাও দংএ সাবা নিয়াম গিত্তা খাল·জাওদে হাম্মানি মালাখো মান·জা। 6 জে গামগিবা গাম্মা বিয়ান স্খাং মিনি বাকখো মা·ন্না খ্রাআ। 7 আংআ জেখো আগানিংআ উখো না·আ চানচিবো, মুয়ানা গিত্তেলান নাং·না গিম্মিকখো হা·আইয়ানি বিলখো হ·ন্নুয়া। 8 যীশু খ্রীষ্টনি গিম্মিনো ইয়া খাৎথাখো গিসিকো দনবো, বিখো সিয়াওনিখো থাংচাএতামিং আরো বিয়া দায়ূদনি মা·চংনি মান্দিমিং। জে নাম্মা খাৎথাখো আংআ আগানফ্রাকা উয়ো ইয়া খাৎথা দংআ, 9 আরো ইয়া নাম্মা খাৎথাখো আগানফ্রাকনান আংআ দুকখো চাক্কিংআ; আরোবা, দোসগ্মাং গিত্তা আংখো খাবা খাজক। ইন্দিবা ইসলনি খাৎথাখোদে খাখুজা। 10 ইনি গিম্মিন ইসল জেরাংখো বাচ্ছিয়ে রা·জক বিসংনা আংআ গিম্মিকখো চাক্কিংআ, জেদাক্কে বিসংবা খ্রীষ্ট যীশুও পাপওনি জক্কাখো মা·ন্না আরো ফাংনাজলনি রাসংখো মা·ন্না। 11 ইয়া খাৎথা বিবিরা·না খ্রাআ, খ্রীষ্টমুং আনচিং সিয়ে দংওদে, বিমুংআন আনচিং থাংএবা দংনুয়া। 12 আনচিং চাকচিকে চাক্কোদে, ॥য়2 বিমুং শাসন দাকফানুয়া। বিখো আনচিং জিচাকোদে, ॥য়2 বিয়াবা আনচিংখো জিচাকনুয়া। 13 আনচিং বিবিগিবা হং·জাওবা বিয়া বিবিগিবা হং·আ, মুয়ানা বিয়া আন·থাংখো জিচাকনা মান·জা। 14 ইয়া খাৎথারাংখো মান্দিরাংনা গিসিক রা·এতবো। ইসলনি মিকখাংও বিসংখো সিমসাকেতবো জেদাক্কে বিসং হং·গিজা-নাংগিজা খু·সুকখো রা·এ জিগ্রিকজা। ইনি মামুং দামআন দংজা, বাত্তেসা জেরাং উখো খিন্নাআ বিসংখো উয়া ব·ন্নেতা। 15 জেনি সাক্কাও ইসল খুসি হং·আ, আগানস্খাওদে জেনি খ্রাচা·আ মা·ন্নানি মামুং হা·সেল দংজা উয়ানদাক্কা কামনি মান্দি গিত্তা আরো জেআন খাকখেৎ দাক্কে বিবিনি খাৎথাখো স্খিয়া উয়া মান্দি গিত্তা আন·থাংখো ইসলনি মিকখাংও দন্না হাম·বো। 16 ইসলনা খা·ফাকাগ্রি আরো নামগিজা খাৎথারাংওনি চে·ল্লে দংবো, মুয়ানা ইন্দাকা নামগিজা খাৎথারাংনা মান্দিরাংনি গিসিকো ইসলনা খা·ফাকানি গিসিক গিম্মানুয়া। 17 জেরাং ইন্দাকা খাৎথারাংখো আগানা বিসংনি স্খিয়া সোগিবা ফারি গিত্তা জালরোরোনুয়া। ইন্দাকা মান্দিরাংও দংআ হুমিনায় আরো ফিলীত। 18 বিসং ইসলনি বিবিওনি চে·ল্লাংজক। বিসং আগানা, বিবিরা·গিবারাংনি সিয়াওনি থাংচাফিল্লা স্খাংআন হং·জক। ইরাং সানি সানি বিবিরা·আখো নাসিয়েতজক। 19 ইন্দাকোবা ইসলনি রিকগিবা ফাংচাকানি চাদেংএন দংআ, আরো উনি সাক্কাও সীলমোহর গিত্তা ইয়া খাৎথারাং চক্কা দংআ, “গিত্তেল হা·আইয়া, সারাং বিনি হং·আ,” আরো “জেআন খ্রীষ্টখো গিত্তেল ইন্নে রিক্কামা বিয়া গিম্মিক পাপওনি চে·ল্লাচা রি·য়াংখানা।” 20 দাল·গিবা নকও সোনা-রূপানি দনচাক্রারাং দংআ ইন্দাকেসান হং·জা, ইন্দিবা বলনি আরো হা·আনি দনচাক্রারাংবা দংআ। উরাংও মিত্তাম দনচাক্রারাং দাল·বিয়া কামনা আরো মিত্তাম দনচাক্রারাং চনবিয়া কামনা জাকখালা। 21 জেরাং ইন্দাকা চনচনগিবা কামনি দনচাক্রা গিত্তা হং·আ, বিসংওনি জিতবাএ সাবা আন·থাংখো রংথালেতোদে ইন্দিদে বিয়া ইন্দাকা দনচাক্রা গিত্তা হং·নুয়া জেখো দাল·বিয়া কামও জাকখালিংআ। রংথালা মিকসংআনা বিখো দিংথাং দাক্কে দন্নুয়া, বিয়া গিত্তেলনি কামখো দাকনুয়া আরো গিম্মিক নাম্মা কামখো দাকনা বিয়া থারিয়ে দংসোনুয়া। 22 ফান্থি চাসংনি নামগিজা হা·সিকাওনি না·আ খাৎবো আরো জেরাং খাকখেৎ খা·থংও গিত্তেলখো রিক্কামা বিসংমুং নামগিবা জাংগিনা, বিবিরা·না, খা·সানা আরো থম·থমানা গিসিক নাংবো। 23 হং·গিজা-নাংগিজা, গক্কা জিগ্রিকাও দা·আ দংফাবো, মুয়ানা না·আদে হা·আইয়া উরাং নিরিয়া-গিসিয়াখো থারিয়া। 24 জেআন গিত্তেলনি নকখল হং·আ, বিনি নিরিনা নাংজা, বাত্তেসা বিনি গিম্মিকনা খা·সাচাকনা নাংআ। বিনি গিপ্পিনরাংনা স্খিনা বিল আরো চাক্কানি গুণ দংনা নাংনুয়া। 25 জেরাং বিনি সাক্কাও চাদেংআ বিসংখো বিনি রিন্নকে স্খিএতনা নাংনুয়া। উয়া স্খিয়াখো বিয়া জেদাক্কে ইখো খা·দংএ হ·ন্না, ইসল বিসংনি গিসিকখো ফি·ল্লেতানি চলখো হ·ন্নুয়া জেদাক্কে ইসলনি বিবিখো বিসং নিং·থুয়ে হা·আইনা মা·ন্না। আনচিংনি 26 উনি গিম্মিন বিসং শয়তাননি জা·গাওনি খাতবানুয়া, মুয়ানা শয়তান বিনি হা·সিকাখো মানিখানা বিসংখো রি·ম্মামিং।

২ তীমথিয় 3

1 ইয়া খাৎথাখো গিসিক দনবো, বন·খামা সালও বিল্লংআ সময় সকবানুয়া। 2 মান্দি আন·থাংখোসান নামনিকনুয়া, থাংখানা মাদ্দুনুয়া, রাসং দাকনুয়া, গিম্মিকখো চন্নিকনুয়া, গিম্মিকনি নামগিজাখো আগান্নুয়া আরো মা·গিবা-ফাগিবাখো মানিজানুয়া। 3 বিসংও খা·সাআ দংজানুয়া, আরো বিসং নিরিয়ে-গিসিয়ে নাংরিমজানুয়া। বিসং গিপ্পিনখো জাচানুয়া, আন·থাংখো বাম্মেতনা মান·জানুয়া, খা·গ্রাক হং·নুয়া, আরো নামগিবা গিম্মিকখো মিৎচিনুয়া। 4 বিসং বিবিগিজাগিবা, নাথিমাং আরো গাং·বিংগিবা হং·নুয়া। ইসলখো খা·সাগিজা বিসং হা·গিলসাকনি সুকখো নামনিকনুয়া। 5 হা·ফালনি বিমাংখো নিকজোকনো ইসলনা বিসং বাসিক খা·ফাকা গিত্তা নিক্কা, ইন্দিবা ইসলখো অলাখিয়ানি বিলখোন বিসং জিচাকা। ইন্দাকগিবা মান্দিরাংওনি চে·ল্লাও দংবো। 6 ইন্দাকা মান্দিরাংনি গিসেপো সাবা সাবা নকরিক্ষিতও নাপ্পে গিসিক নম·বকগিবা মিচিকরাংখো ব্রাংআ রামাচানা রা·আংআ। ইন্দাকা মিচিকরাংনি সাক্কাও পাপ গাপ্পে দংআ; বিসং বাং·আ নামগিজা হা·সিকারাংচা রি·য়া। 7 বিসং ফাংনান স্খিয়ানি খাৎথাখো খিন্নাংআ, ইন্দিবা ইসলনি বিবিখো মামুং সালোবা নিং·থুয়ে হা·আইনা মান·জাংআ। 8 জেদাক্কে যান্নি আরো যাম্ব্রি মোশিনি সাক্কাও চাদেংআমিং উয়ানদাক্কেন ইয়া মান্দিরাংবা উয়া বিবিনি সাক্কাও চাদেংআ। ইরাংনি গিসিক নামজাস্রাং আরো খ্রীষ্ট থরমখো বিবিরা·আনি মামুংখো বিসংনি গিসেপো নিকজা। 9 ইন্দিবা বিসং আরবা মিকখাংচা রি·য়াংনা মান·জানুয়া, মুয়ানা যান্নি আরো যাম্ব্রিনি জাদাখো জেগিত্তা গিম্মিকান নাম্মেদাক্কে নিক্কামিং উগিত্তা বিসংনি জাদাখোবা গিম্মিকান নাম্মেদাক্কে নিকনা মা·ন্নুয়া। 10 না·আ আংনি স্খিএতাখো, রি·য়ারাংখো, মিকসংআখো, বিবিরা·আখো, চাক্কানি গুণখো, খা·সাখো আরো চাকচিকাখো নাম্মেদাক্কেন নিকজক। 11 ইনাআগ্রেবা আন্তিয়খিয়াচা, ইকনিয়াচা আরো লুস্ত্রাচা আংআ জেগিত্তা গিচ্চিয়াখো আরো দুকখো চাকজক উরাংখোবা না·আ হা·আইয়া, ইন্দিবা উরাংওনিখো গিত্তেল আংখো রাক্ষিয়ামিং। 12 চংমতদে জেরাং খ্রীষ্ট যীশুমুং নাংরিমে ইসলখো অলাখিয়ে জাংগি মিৎথাংএতনা হা·ম্মা বিসং গিচ্চিনুয়ান। 13 ইন্দিবা নামগিজাগিবা মান্দিরাং আরো দাক্কামব্রুগিবারাং আরোসা নামজাস্রাংনুয়া। বিসং গিপ্পিনরাংখো ব্রাংআ রামাচানা রা·আংনুয়া আরো আন·থাংথাংবা ব্রাংআ রামাচা রি·নুয়া। 14 ইন্দিবা না·আ জেখো স্নিংজক আরো বিবিরা·বিবিজক উয়ো খেম·খেমে দংবো, মুয়ানা সারাংচানি না·সং উখো স্খিজক উখো না·সং হা·আইয়া। 15 বি·সাওনি না·আ রংথালগিবা শাস্ত্রনিখো স্নিংআ। আরো ইয়া রংথালগিবা শাস্ত্রন নাং·খো খ্রীষ্ট যীশুখো বিবিরা·আচা পাপওনি জক্কেতাখো মা·ন্নানি হা·আইয়াখো হ·ন্না মা·ন্না। 16 রংথালগিবা শাস্ত্রনি গিম্মিক খাৎথা ইসলওনি রি·বাআ আরো উয়া স্খিনা, সিমসাকেতনা, থারিফিলনা আরো নামগিবা জাংগিখো থারিনা নাংগিবা, 17 জেদাক্কে ইসলনি মান্দি চু·গিম্মিক দাক্কে খ্রাগিবা হং·এ নাম্মা কামখো দাকনা ইন্নে থারিসোনা মা·ন্না।

২ তীমথিয় 4

1 খ্রীষ্টনি রি·বাফিল্লা আরো বিনি সংনকনি গিম্মিন গিসিক রা·এ ইসলনি মিকখাংও আরো জেআন থাংগিবারাংখো আরো সিগিবারাংখো বিচাল দাকনুয়া উয়া খ্রীষ্ট যীশুনি মিকখাংও আংআ নাং·না ইখো গি·য়েতিংজক- 2 ইসলনি খাৎথাখো আগানফ্রাকবো; সময় হং·ওবা হং·জাওবা, ফাংনান আগানফ্রাকনা থারিসোএ দংবো; নাম্মেন চাকচিকে স্খিয়েতি মান্দিরাংনি দোসখো ফিন্নিকে হন·বো, বিসংখো সিমসাকেতবো আরো নাম্মাখো আগানবো। 3 ইন্দাকা সময় রি·বানুয়া জেনসালো বিবিনি স্খিয়াখো মান্দিরাং চাকজানুয়া, বাত্তেসা আন·থাংথাংনি হা·সিকাখো চু·সকেতনা বিসং ইন্দাকা বাং·আ স্খিএতগিবারাংখো চিম্মংনুয়া জেরাং বিসংখো খুসি দাকনা গিত্তা স্খিয়েতনুয়া। 4 বিসং ইসলনি বিবিখো খিন্নাগিজা গল্পখো খিন্নানা হাম·নুয়া। 5 ইন্দিবা না·আ আন·থাংখো গিম্মিক অবস্থাওন বাম্মে দনবো, দুকখো চাকবো আরো খ্রীষ্টনি গিম্মিন নাম্মা খাৎথাখো আগানফ্রাকবো, আরো ইসল নাং·না জে কামখো দাকনা হন·জক উখো চু·গিম্মিক দাক্কে দাকবো। 6 আংখো দা·আও বলি হ·ন্না গিত্তা রুগালে হ·ন্নিংজক; আংনি সিয়ানি সাল সকবাজক। 7 খ্রীষ্টনা চাক্কে আংআ সিমাংথাংমাং দাকগ্রিকজক, আংনা থিক দাকগিবা রামানি বন·চতাওনা দিপ্পাৎ খাতজক আরো খ্রীষ্টনি থরমনি বিবিরা·আখো রি·ম্মে রা·রিকজক। 8 উনি গিম্মিন আংনা নাম্মা জাংগিনি বকসিসখো দনসোজক। বিচালনি সালো খাকখেৎ বিচাল দাকগিবা গিত্তেল আংনা উয়া বকসিস গিত্তা হাম্মানি মালাখো হ·ন্নুয়া। ইন্দাকোবা বিয়া আংনাসান হ·ন্নুয়া ইন্দাকেদে হং·জা, জেরাং বিনি রি·বাফিল্লানা গিসিক নাংএ নিচাকসোএ দংজক বিসং গিম্মিকনা হ·ন্নুয়া। 9 না·আ নাম্মেন খ্রেংবো জেদাক্কে আংচা থেংরি রি·বানা মা·ন্না, 10 মুয়ানা দীমা দা·আওনি হা·গিলসাকখো নামনিকে আংখো ওয়াত্তে থিষলনীকীচা রি·য়াংজক। ইনাআগ্রেবা ক্রীষ্কেন্ত গালাতিয়াচা আরো তীত দালমাতিয়াচা রি·য়াংজক; 11 লূকসান আংমুং দংআ। না·আ মার্কখো রিম্মে আংচা রি·বাবো, মুয়ানা আংনি কামনা বিখো নাম্মেন নাংবিয়া। 12 আংআ তুখিকখো ইফিষচা ওয়াত্তেতজক। 13 ত্রোয়ানি মান্দি কার্পচা আংআ বে·এননি জে বা·রাখো গাল্লে দনবাজক, রি·বানি সালো না·আ উখো রা·বাফাবো। ইনাআগ্রেবা বিল·রিমরিমে দনগিবা খি·তাপরাং, মংসংদে জেরাংখো বিগিলনি সাক্কাও চক্কা উরাংখো রা·বাফাবো। 14 তামানি কামখো রিম·গিবা আলেকসান্দর আংনি বাং·এ নামগিজাখো দাকজক। বিয়া জেখো দাক্কা উখো গিত্তেলান সৎনুয়া। 15 না·আবা বিনি গিম্মিন সিমসাকে দংবো, মুয়ানা বিয়া আনচিংনি আগানফ্রাকাখো নাম্মেন চাংফেংআমিং। 16 জেনসালো আংনি স্খাংগিবা বিচাল হং·আমিং উনো দারাংবা আংনা দাকচাকজাজক, বাত্তেসা গিম্মিকান আংখো ওয়াত্তে রি·য়াংআমিং; ইন্দাকোবা ইখো বিসংনি গ্রো রিম·জাখানা। 17 ইন্দিবা গিত্তেল আংমুং দংআমিং আরো আংনা বিলখো হ·ন্নামিং। উনি গিম্মিন আংআ চু·গিম্মিক দাক্কে নাম্মা খাৎথাখো আগানফ্রাকনা মা·ন্নামিং আরো গিপ্পিন জাতরাং গিম্মিকান উখো খিন্নামিং। ইসল আংখো সিংহনি খু·সুকওনিখো জক্কেতামিং। 18 গিত্তেল আংখো গিম্মিক নামগিজা কামওনি রাক্ষিনুয়া আরো নাম্মেদাক্কে থম·থমে বিনি সালগিনি সংনকচা রিম্মাংনুয়া। চাসংওনি চাসংওনা ফাংনাজল বিনি রাসং হং·খানা। আমেন। 19 প্রিষ্কিল্লা আরো আকিলা আরো অনীষিফরনি নকনা আংনি সালামখো হন·বো। 20 ইরাস্ত করিন্থওনা দংআরিজক আরো ত্রফিমখো আংআ জম্মাখো মিলীতচা দনবাজক। 21 না·আ নাম্মেদাক্কে খ্রেংবো জেদাক্কে সিন·খারিনা স্খাং ইয়ো রি·বানা মা·ন্না। উবুল, পুদেন্ত, লীন, ক্লৌদিয়া আরো গিম্মিক জংআদারাং নাং·না সালাম হ·ন্নিংজক। 22 গিত্তেল নাং·মুং দংফাখানা। ইসলনি খা·সাচাক্কা না·সংনি খা·থংও দংখানা।

তীতনা 1

1 আংআ পৌল ইসলনি নকখল আরো যীশু খ্রীষ্টনি সাকসা ওয়াত্তেতা হং·জক, জেদাক্কে আংআ ইসলনি বাচ্ছিয়ে রা·গিবা মান্দিরাংখো বিবিরা·আনি রামাচানা রিমবানা মা·ন্না, আরো ইসলনা বাম্মামুং জে বিবি দংফা উয়া বিবিখো হা·আইখানা বিসংনা দাকচাকনা মা·ন্না। 2 ফাংনাজলনি জাংগিখো মা·ন্না খা·দংএ আংআ খ্রীষ্টনা দাকচাকে রি·য়াংইংজক। হা·গিলসাক হং·না স্খাংআন ইসল, জেআন বু·আখো আগানজা, বিয়া ইয়া জাংগিখো র·ন্না খু·রাচাক্কামিং। 3 আনচিংনি জক্কেৎগিবা ইসলনি গি·য়েতা গিত্তা আংআ জেখো আগানফ্রাকা উচা ইসল বিনি খাৎথাখো থিক সময়ওন ফারাকজক। 4 খ্রীষ্টখো বিবিরা·আও জেআন আংমুং আপসান হং·ফাজক, আংনি উয়া চং·মত বি·সা তীতনা আংআ ইয়া চিঠিখো চক্কিংআ। আপফা ইসল আরো আনচিংখো জক্কেৎগিবা খ্রীষ্ট যীশু নাং·না খা·সাচাকখানা আরো থম·থমাখো রন·খানা। 5 ক্রীট চিচাংও জে কাম দা·আওবা বন·খুজা উখো থিক দাকখানা ইন্নেন আংআ নাং·খো ক্রীট চিচাংওনা দনবামিং। আংআ নাং·না জেগিত্তা গি·য়েতামিং উগিত্তা গিম্মিক সংজিলমানি মন্ডলীও দাল·গিবারাংখো কামরাংও দনবো। 6 মন্ডলীনি দাল·বাৎগিবাখো ইন্দাকে হং·না নাংনুয়া জেদাক্কে দারাংবা বিখো দোস র·ন্না মান·জা। বিনি সাকসাসান জিক দংনুয়া। বিনি বি·সারাং জেদাক্কে খ্রীষ্টও বিবিরা·আ, জেদাক্কে বিসং আন·থাংথাংনি হা·সিকা গিত্তা রি·জা আরো বামগিজাগিবা হং·জা। 7 ইসলচাখো দাকনা নাংআখো মান·গিবা মান্দি গিত্তা উয়া দাল·গিবাখো ইন্দাকে হং·না নাংনুয়া জেদাক্কে দারাংবা বিখো জিনা মান·জা। জেদাক্কে বিয়া গিত্তক গ্রেং রাকগিবা, খা·আওনাংগিবা, চুফেকগিবা হং·জা। অন্যায় দাক্কে মান·দাপাও বিনি গিসিক দংজাখানা; 8 উনা বাত্তে সকবাগিবারাংখো যতন রা·না আরো খা·সাচাক্কানি কামখো দাকনা জেদাক্কে বিয়া নামনিকা। বিনি নাম্মা বিচাল-বুদ্ধি দংনুয়া, বিয়া খাকখেৎ হং·নুয়া আরো ইসলনা বামনুয়া আরো আন·থাংখো বাম্মেতে দন্নুয়া। 9 ইসলনি বিবিরা·না খ্রাগিবা খাৎথা, জেখো আংআ স্খিয়েতজক, উখো বিনি রাক্কে রি·ম্মে রা·রিকনা নাংনুয়া, জেদাক্কে চং·মত স্খিয়ানি বিদিংও বিয়া আগানফ্রাকনা মা·ন্না আরো বোবিল দাকগিবারাংনা ব্রাংআনিখো ফিন্নিকে র·ন্না মা·ন্না। 10 ইন্দাকগিবা বাং·আ মান্দি দংআ জেরাং বামগিজাগিবা হং·আ, জেরাং হং·গিজা-নাংগিজা খু·সুকখো আগানা আরো জেরাং দাক্কামব্রুএ রওমা। জেরাং বিগিল রাত্তাখো দা·লনিকা, মংসংদে আংআ বিসংনি খাৎথাখোন আগানিংআ। 11 ইন্দাকগিবা মান্দিরাংনি খু·সুকখো মিৎথিপনা নাংআ, মুয়ানা অন্যায় দাক্কে মান·দাপনা বিসং ইন্দাকা স্খিয়াখো র·ন্না জেখো বিসংনি স্খিয়েতনা নাংজা; আরো ইন্দাকে বিসং মিত্তাম নকরাংখো ব·ন্নেতজক। 12 বিসংনি আন·থাংথাংনিন সাকসা আগানসোগিবা ইয়া খাৎথাখো আগানজক, “ক্রীট চিচাংনি মান্দিরাং ফাংনান বু·এ চা·গিবা, ব্রিংনি মাৎবুরুংরাং গিত্তা আরো আলসিয়া আরো চা·না নালগিবা হং·আ।” 13 খাৎথাদে বিবিন হং·আ। ইনি গিম্মিন বিসংনি দোসখো ফিন্নিকে রন·বো জেদাক্কে বিসং খ্রীষ্টান থরমনি বিবিরা·আখো নাম্মেদাক্কে রি·ম্মে রা·রিকা, 14 আরো যিহূদীরাংনি গল্প আগানারাংও আরো জেরাং ইসলনি বিবিওনি ফি·ল্লাংজক বিসংনি গি·য়েতাও নাচিল রন·জাখানা। 15 জেরাংনি খা·থং রংথালা বিসংচা গিম্মিকান রংথালা, ইন্দিবা জেরাংনি খা·থং নামজাস্রাং আরো জেরাং বিবিরা·গিজাগিবা হং·আ বিসংচা মামুংআন রংথালানি হং·জা; আরোবা, বিসংনি খা·থং আরো গিসিকবা নামজাস্রাং। 16 খু·সুকচা বিসং ইসলখো হা·আইয়া ইন্নে আগানা, ইন্দিবা বিসংনি কামচা বিসং বিখো জিচাকা। বিসং মিৎচিনা খ্রাগিবা আরো বামগিজাগিবা হং·আ; বিসং মামুং নাম্মা কামনান খ্রাজা।

তীতনা 2

1 না·আ ইন্দাকফিল্লে স্খিয়েতবো জেদাক্কে নাং·নি খাৎথামুং চং·মত স্খিয়া আপসান হং·আ। 2 জেরাং বুদেফা, বিসংনা আগানবো জেদাক্কে বিসং গিম্মিকনি বিদিংও আন·থাংথাংখো বাম্মেতে দন্না; জেদাক্কে বিসং মান্দিরা·আখো মা·ন্না খ্রাগিবা হং·আ; জেদাক্কে বিসংনি নাম্মা বিচাল দাক্কানি বুদ্ধি দংআ, বিবিখো বিবিরা·আ, খা·সাআ আরো চাকচিকানি গুণ দংআ। 3 উয়ানদাক্কে বিলসি বাৎগিবা মিচিকরাংনা আগানবো, বিসংনি রি·য়ারাংও জেদাক্কে ইসলনা খা·ফাকা দংআ আরো বিসং জেদাক্কে নাম্মাখো স্খিয়া। গিপ্পিনখো জিনা বা চুফেকগিবা হং·না বিসং খ্রাজা। 4 ইন্দাকোদে বিসং মি·থ্রা মিচিকরাংনা স্খিনা মা·ন্নুয়া জেদাক্কে বিসং সেগিবানা আরো বি·সারাংনা খা·সাআ, 5 আন·থাংথাংখো বাম্মে দন্না, রংথালে দংআ, নকদাংখো নিআ, খা·সাচাকগিবা হং·আ আরো সেগিবানি নিং·আও বাম্মে দংআ, জেদাক্কে দারাংবা ইসলনি খাৎথাখো চন্নিকনা মান·জা। 6 উয়ানদাক্কে ফান্থিরাংখো স্খিয়েতবো জেদাক্কে বিসং আন·থাংথাংখো বাম্মেতে দন্না। 7 গিম্মিকোন না·আ বিসংচা নাম্মা কামনা দাক্কে ফিন্নিকগিবা হং·বো। নাং·নি স্খিয়াও জেদাক্কে নামগিবা মিকসংআ দংআ, উয়ো জেদাক্কে নাংএগিজা সক্কেগিজা গিসিক দংজা। 8 দারাংবা জেদাক্কে নাং·নি দোসখো রিম·না মান·জা উগিত্তা চং·মত স্খিয়াখো হন·বো, জেদাক্কে না·সংনি সাক্কাও দংগিবা মান্দিরাং খ্রাচা·আ মা·ন্না, মুয়ানা আনচিংনি গিম্মিনো নামজা ইন্নানি বিসংনিদে মামুংআন দংজানুয়া। 9 নকখল হং·গিবারাংনা আগানবো, জেদাক্কে গিম্মিকো বিসং নকগিবারাংনি নিং·আও দংআ, বিসংখো খুসি দাকনা হা·ম্মা, খু·সুকনি সাক্কাও খু·সুক আগানজা, 10 আরো নকগিবারাংনি জিনিসখো চা·উজাখানা, বাত্তেসা বিসং বিবিরা·না খ্রাগিবা হং·আ উখো ফিন্নিকা, জেদাক্কে বিসং আনচিংখো জক্কেৎগিবা ইসলনি গিম্মিন জে স্খিয়া দংআ উখো গিম্মিক গিত্তা নিথোয়ে রা·না মা·ন্না। 11 ইসলনি জে খা·সাচাক্কাচা পাপওনি জক্কাখো মা·ন্না উখো গিম্মিক মান্দিরাংচান ফারাকা হং·জক। 12 ইয়া খা·সাচাক্কান আনচিংখো স্খিয়েতিংজক জেদাক্কে আনচিং ইসলনা বামগিজাখো আরো হা·গিলসাকনি হা·সিকারাংখো জিগালে ইয়া হা·গিলসাকোন আন·থাংথাংখো বাম্মে দন্নে ইসলনা বাম্মামুং খাকখেৎ জাংগিখো মিৎথাংএতা। 13 আরো আনচিংনি চুবাৎগিবা ইসল আরো জক্কেৎগিবা যীশু খ্রীষ্টনি রাসংগ্মাং ফারাকানি খুসিগ্মাং খা·দংআ চু·সকনা গিম্মিনান গিসিক নাংএ নিচাকে দংআ। 14 যীশু খ্রীষ্ট আনচিংনি গিম্মিন আন·থাংনি জাংগিখো হন·চাকামিং, জেদাক্কে গিম্মিক পাপওনি আনচিংখো জক্কেৎনা মা·ন্না আরো উনি গিম্মিন ইন্দাকগিবা দলসা মান্দিখো রংথালেতনা মা·ন্না জেরাং বিনিসান হং·নুয়া আরো জেরাং গিপ্পিনরাংনা দাকচাকনা হা·সিকনুয়া। 15 উনি গিম্মিন চু·গিম্মিক বিলখো রা·এ না·আ ইয়া বিদিংরাংও স্খিয়েতবো, নাম্মাখো আগানবো আরো দোসখো ফিন্নিকে হন·বো। জেদাক্কে দারাংবা নাং·খো চন্নিকজা।

তীতনা 3

1 ইসলনি মান্দিরাংখো গিসিক রা·এতবো জেদাক্কে বিসং শাসন দাকগিবা আরো জেরাংনি জাক্কো বিল দংআ বিসংনি নিং·আও দংআ, বাম্মে দংআ আরো মান্দিরাংনা গিম্মিক গিত্তা দাকচাকনা থারিয়ে দংসোআ। 2 বিসং দারাংখো জিজাখানা বা নিরিজাখানা, বাত্তেসা বিসং জেদাক্কে সনথল গিসিকনি হং·আ আরো গিম্মিকমুং রিন্নকে জাকখালা। 3 চিংআবা স্খাংদে গিসিক সেং·আগ্রি আরো বামগিজাগিবা হং·আমিং, ব্রাংগিবা রামাও রি·নুয়ামিং, আরো নাম্মাখো চাকনুয়ামিং আরো বাং·আ হা·সিকারাংনি নকখল দংআমিং। চিংআ গিপ্পিনরাংখো মিকনেংনুয়ামিং নাংএগিজা সক্কেগিজা আরো নামগিজাখো দাকনা চানচিয়ে জাংগি মিৎথাংনুয়ামিং। আন·থাংসং মিৎচিনা খ্রাগিবা হং·ওবা চিংআ সাকসা সাকগিপ্পিনখো মিৎচিনুয়ামিং। 4 ইন্দিবা জেনসালো আনচিংখো জক্কেৎগিবা ইসলনি খা·সাচাক্কা আরো খা·সা ফারাকজক উনো বিয়া পাপওনি আনচিংখো জক্কেৎজক। 5 মামুং নাম্মা কামনা বিয়া আনচিংখো জক্কেৎজা, বিনি খা·সাচাক্কানি গিম্মিনান উখো দাকজক। গিসিক রংথালগিবাচা গিত্তাল দাক্কে আৎচিয়েতে আরো গিত্তাল দাক্কে থারিয়ে বিয়া আনচিংনি খা·থংখো সু·গালে চি·রংএতজক, আরো ইন্দাকেন বিয়া আনচিংখো জক্কেৎজক। 6 আনচিংখো জক্কেৎগিবা যীশু খ্রীষ্টচা বিয়া জাকস্রামে গিসিক রংথালগিবাখো আনচিংনা রন·জক, 7 জেদাক্কে আনচিং ফাংনাজলনি জাংগিনি খা·দংআখো মা·ন্নে ইসলনি গিম্মিকখো মান·রিকগিবা হং·আ। ইন্দাকে হং·না মান·জক, মুয়ানা ইসলনি খা·সাচাক্কাচা আনচিংখো দোসগ্রি দাক্কে রা·চাকজক। 8 ইয়া খাৎথা বিবিরা·না খ্রাগিবা হং·আ। আংআ হা·ম্মা, না·আ ইয়া বিদিংরাংও দিংচিকবো, জেদাক্কে ইসলখো জেরাং বিবিরা·জক বিসং গিপ্পিনরাংনা দাকচাকানি কামও আন·থাংথাংখো বিমচিপাও দন্না গিসিক র·ন্না। মান্দিরাংনা ইয়ারাং নাম্মা আরো দাকচাকানি হং·আ। 9 জাদা গিত্তা জিগ্রিকা, মা·চং চান্না, নিরিয়া-গিসিয়া আরো নিয়ামরাংখো রা·এ জিগ্রিকাওনি না·আ চে·ল্লাচা দংবো, মুয়ানা ইরাংখো দাক্কে মামুং হং·জানুয়া; ইরাং গিম্মিকান বু·আরি-সু·আরি হং·আ। 10 জে মান্দি ব্রাংগিবা স্খিয়াখো র·ন্নে মা·আৎগ্রিকাখো থারিয়া বিখো স্খাং রাং·সা, জা·মানো দা·আও রাং·সা সিমসাকেতবো। ইন্দাকাও কাম হং·জাওদে বিমুং নাংরিমাখো দনথংবো। 11 না·আদে হা·আইয়ান, ইন্দাকগিবা মান্দিনি চানচিয়া নামজা। বিয়া পাপী হং·আ; বিয়া আন·থাংআন আন·থাংনি দোসখো ফিন্নিকা। 12 আংআ আর্তিমা বা তুখিকখো নাং·চা ওয়াত্তেতজোকনোন না·আ নীকপলিচা আংচা রি·বানা মংসং দাক্কে খ্রেংবো, মুয়ানা আংআ নীকপলিচান সিন·খারিও দংনুয়া ইন্নে থিক দাকজক। 13 উকিল সীনা আরো আপল্লোনি রি·য়াংআনি রামানা মা·ন্না দিপ্পাৎ দাকচাকবো, জেদাক্কে বিসংনি মামুংনা দিলজা। 14 গিপ্পিনরাংনা দাকচাকানি কামও আন·থাংথাংখো বিমচিপাও দন্না আনচিংনি মান্দিরাংনি স্খিনা নাংনুয়া, জেদাক্কে বিসং গিপ্পিনরাংনি নাংআনিখো র·ন্না মা·ন্না। ইন্দাকে দাক্কোদে বিসংনি জাংগি বিথিগ্মাং হং·নুয়া। 15 আংমুং জেরাং দংআ বিসং গিম্মিকান নাং·খো সালাম র·ন্নিংজক। খ্রীষ্টখো বিবিরা·আনি গিম্মিন জেরাং আনচিংনা খা·সাআ বিসংনা সালাম রন·বো। না·সং গিম্মিকনি সাক্কাও ইসলনি খা·সাচাক্কা দংখানা।

ফিলীমন 1

1 আংআ পৌল খ্রীষ্ট যীশুও বন্দি হং·জক। আংআ আরো চিংনি বিবিরা·গিবা জং তীমথিয় চিংনি খা·সাগিবা রিপ্পেং আরো কাম রিম·ফাগিবা ফিলীমনচা, 2 চিংনি নগিবা আপ্পিয়াচা, চিংমুং দাকগ্রিকফাগিবা আর্খিপ্পচা আরো নাং·নি নকচা জেরাং মন্ডলী গিত্তা আপসান হং·ফাংআ বিসংনা ইয়া চিঠিখো চক্কিংজক। 3 আনচিংনি ফাগিবা ইসল আরো গিত্তেল যীশু খ্রীষ্ট না·সংনা খা·সাচাকখানা আরো থম·থমাখো রন·খানা। 4 আংআ ফাংনান বি·আও নাং·খো গিসিক রা·এ নাং·নি গিম্মিন ইসলখো মিৎথেলিংআ, 5 মুয়ানা গিত্তেল যীশুনি সাক্কাও নাং·নি বিবিরা·আ আরো ইসলনি দিমদাক মান্দিরাংনা নাং·নি খা·সাখো আংআ খিন্নাংজক। 6 আংআ ইন্দাকে বি·আ, নাং·নি বিবিরা·আনি গিম্মিন নাং·নি র·ন্নাচা জেদাক্কে খ্রীষ্টনি রাসং হং·আ। ইনাআগ্রেবা খ্রীষ্টমুং নাংরিমে আনচিং জে ফাত্তিয়ারাংখো মান·জক উখো চু·গিম্মিক দাক্কে হা·আইনা মা·ন্নে জেদাক্কে নাং·নি র·ন্নানি কাম আরোবা বাৎরোরোআ। 7 জং, নাং·নি খা·সাখো নিক্কে আংআ খুসি হং·বিয়া আরো খা·দংআখো মান·জক, মুয়ানা না·আ ইসলনি মান্দিরাংনি খা·থংও গিত্তাল খা·দংআখো রা·বাআ। 8 ইনি গিম্মিন আংআ খ্রীষ্টচা নাং·না নাং·নি দাকগ্মিনি বিদিংও খেনচাকগিজা গি·য়েৎনা মা·ন্নুয়ামিং, 9 ইন্দাকোবা উখো দাকগিজা খা·সানি গিম্মিন আংআ নাং·খো মল·মলিংআ। সাকসা বুদেফা হং·এ আরো দা·আওরোরো খ্রীষ্ট যীশুনা বন্দি হং·এ আংআ পৌল নাং·চা আংনি বি·সা ওনীষিমনা মল·মলিংআ। জেলো আংনি বন্দি হং·এ দংমিত্তিংও বিয়া বিবিরা·গিবা হং·এ আংনি বি·সা হং·জক। 11 সালসাদে নাং·চা বিনি মামুং দাম দংজামিং, ইন্দিবা দা·আওদে বিয়া নাং·চা আরো আংচা সাকগ্মিচান নাংগিবা মান্দি হং·আ। 12 জেবা হং·খানা, আংআ বিখো নাং·চা ওয়াত্তেতফিল্লিংজক; বিয়া আংনি জাংগি গিত্তান খা·সাগিবা হং·আ। 13 আংআ বিখো আংনি আন·থাংচান রা·রিকনা হা·ম্মামিং, জেদাক্কে নাম্মা খাৎথাখো আগানফ্রাকানি গিম্মিন আংনি বন্দি হং·এ দংমিত্তিংও বিয়া নাং·নি হং·এ আংনা দাকচাকে র·ন্না মা·ন্না। 14 ইন্দিবা নাং·নি আগানাখো মান·গিজানি আগ্রে আংআ মামুংবা দাকনা হাম·জামিং, জেদাক্কে দ্রাএ নাং·নি খা·সাচাক্কাখো রা·না নাংজা, বাত্তেসা না·আ আন·থাংনিন খা·সাচাকবো। 15 না·আ জেদাক্কে বিখো ফাংনাজলনা ফি·ল্লে মা·ন্না, উনি গিম্মিনান বিয়া বাং·গিজা সময়না নাং·চানি দিংথাং হং·আংজকমিং। 16 ইন্দিবা বিখো না·আ আরবা নকখল গিত্তা মান·জানাজক বাত্তেসা নকখলনাবা বাত্তা, আগানস্খাওদে খা·সাগিবা জং গিত্তা মা·ন্নাজক। বিয়া আংচা নাম্মেন খা·সাগিবানি হং·আ, ইন্দিবা মান্দি আরো বিবিরা·গিবা জং গিত্তা নাং·চা আরোবা খা·সাগিবা হং·আ। 17 উনি গিম্মিন না·আ আংখো আপসান বিবিরা·আও বিবিরা·গিবা ইন্নে চানচিওদে আংখো জেগিত্তা রা·চাকনুয়ামিং ওনীষিমখোবা উগিত্তান রা·চাকবো। 18 বিয়া নাং·নি মামুং নামগিজাখো দাক্কে দংওদে বা নাং·চা গ্রোনাংগিবা হং·ওদে উখো আংনি গ্রো ইন্নেন চানবো। 19 আংআ পৌল আন·থাংনি জাকচান চক্কিংজক, আংআ উয়া গ্রোখো চতনুয়া। ইয়া খাৎথাখো আংনি আগান্না নাংজা, খ্রীষ্টখো বিবিরা·আও না·আ আন·থাংআন আংচা গ্রোনাংগিবা হং·আ। 20 জং, আনচিং গিত্তেলনি হং·জক ইন্নে আংআ হা·ম্মা, না·আ আংনা মিংসা নামগ্মিখো দাকবো। বিবিরা·গিবা জং গিত্তা না·আ আংনি খা·থংও গিত্তাল খা·দংএতাখো রন·বো। 21 না·আ আংনি খাৎথাখো মানিয়ে রা·নুয়া ইখো হা·আইএন আংআ নাং·না ইয়া চিঠিখো চক্কিংআ। আংআ হা·আইয়া, আংআ জেখো আগানা না·আ উনাবাত্তেবা বাং·এ দাকনুয়া। 22 দা·আও মিংসা খাৎথাখো আগানিংজক-সকবাগিবারাংনি নকখো আংনা থারিয়ে দনসোবো, মুয়ানা আংআ ইন্দাকে খা·দংআ, না·সংনি বি·আনি গিম্মিন আংখো না·সংচা ওয়ালফিল্লেতনুয়া। 23 ইপাফ্রা নাং·না সালাম র·ন্নিংআ; বিয়া খ্রীষ্ট যীশুনা আংমুং বন্দি হং·এ দংআ। 24 ইনাআগ্রে মার্ক, আরিষ্টার্খ, দীমা আরো লূক আংনি ইয়া কাম রিম·ফাগিবারাং নাং·না সালাম র·ন্নিংজক। 25 আনচিংনি গিত্তেল যীশু খ্রীষ্টনি খা·সাচাক্কা না·সংনি খা·থংও দংখানা।

ইব্রীয়রাংনা 1

1 চেংও আগানসোগিবারাং গিত্তা ইসল আনচিংনি ফাগিৎচামরাংচা দিংথাং দিংথাং দাক্কে রাং·নিরাং অকখিসা অকখিসা দাক্কে খাৎথা আগানামিং। 2 ইন্দিবা ইয়া সালরাংনি বন·খামাও বিয়া বিনি দেফান্থি গিত্তা আনচিংমুং খাৎথা আগানজক। ইসল বিনি দেফান্থিখো গিম্মিকখো মান·রিকগিবা হং·না বাচ্ছিয়ে রা·জক। দেফান্থিচান বিয়া গিম্মিকখো থারিজক। 3 ইসলনি গিম্মিক গুণ উয়া দেফান্থিওন দংআ; দেফান্থিন ইসলনি চু·গিম্মিক বিমাং হং·আ। দেফান্থি বিনি বিল্লাকগিবা খাৎথাচা গিম্মিকখো রি·ম্মে রা·রিকে চালাইয়া। মান্দিনি পাপখো হা·রিকানি জা·মানো দেফান্থি সালগিও চুবাৎগিবা ইসলনি জাক্রাচা আসংজক। 4 বিনি ফাগিবাচাখো বিয়া জে বিমুংখো মান·জক উয়া জেদাক্কে সা·গ্রেরাংনা বাত্তে দাল·বাতা, উয়ানদাক্কে বিয়া আন·থাংবা সা·গ্রেরাংনা বাত্তে দাল·বাতা। 5 ইসল মামুং সালোবা সাকসা সা·গ্রেনা ইয়া খাৎথাখো আগানামা, “না·আ আংনি দেফান্থি, দা·আলান আংআ নাং·নি ফাগিবা হং·জক”? দা·আবা বিয়া মুয়াখো আগানা, “আংআ বিনি ফাগিবা হং·নুয়া আরো বিয়া আংনি দেফান্থি হং·নুয়া”? 6 হং·জা, বিয়া উখো আগানজা। ইসল বিনি দাল·বাৎগিবা বি·সাখো ইয়া হা·গিলসাকো ওয়াত্তেতানি সময়ও আগানিংজক, “ইসলনি দিমদাক সা·গ্রেরাং বিখো ইসল গিত্তা দাকনিকে মান্দিরা·খানা।” 7 সা·গ্রেরাংনি বিদিংও ইসল আগানিংজক, “বিয়া বিনি সা·গ্রেরাংখো বালওয়া দাকজক; বিনি নকখলরাংখো চিং·গিবা ওয়া·আল দাকজক।” 8 ইন্দিবা দেফান্থিনি বিদিংও ইসল আগানিংজক, “ও ইসল, নাং·নি সিংহাসন ফাংনাজলনি হং·আ; নাং·নি শাসন খাকখেৎনি শাসন হং·আ। 9 না·আ খাকখেৎখো নামনিকা আরো অন্যায়খো মিৎচিয়া; উনি গিম্মিন ইসল, নাং·নি ইসল, নাং·নি রিপ্পেংরাংনা বাত্তে বাং·এ হান·সেংআনিখো তেল গিত্তা দাক্কে নাং·নি সাক্কাও রুদাপজক।” 10 ইসল আরোবা আগানজক, “গিত্তেল, না·আ স্খাংওনিন হা·গিলসাকনি ফাংচাকানিখো রিক্কামিং; সিলগাবা নাং·নি জাক্কো থারিয়া হং·আ। 11 উরাং ব·ন্নাংনুয়া, ইন্দিবা না·আ ফাংনাজলনা দংনুয়া। বা·রা গিত্তান উরাং গিৎচাম হং·নুয়া। 12 উরাংখো না·আ বা·রা গিত্তান বি·ল্লে দনবো, আরো বা·রা গিত্তা উরাংখো দিংথাংএতনুয়া। ইন্দিবা না·আদে দিংথাং হং·জানুয়া, আরো নাং·নি চাসং মামুং সালোবা বন·জানুয়া।” 13 ইসল মামুং সালোবা সাকসা সা·গ্রেনা ইয়া খাৎথাখো আগানামা, “জেওনা দিপ্পাৎ আংআ নাং·নি বোবিলরাংখো নাং·নি জা·চকনি খা·মাও দনজা, উয়োনা দিপ্পাৎ না·আ আংনি জাক্রাচা আসংবো”? 14 সা·গ্রেরাং দিমদাকান দাকচাকে হন·গিবা গিসিক হং·জামা? জেরাং পাপওনি জক্কাখো মা·ন্নুয়া বিসংনা দাকচাকে হ·ন্না ইন্নেন বিসংখো ওয়াত্তেতজক।

ইব্রীয়রাংনা 2

1 ইনি গিম্মিন আনচিং জেখো খিন্নাজক উখো মানিনা আনচিংনি আরোবা গিসিক হ·ন্না নাংআ, জেদাক্কে উয়োনি আনচিং চে·ল্লাচানা জিত্তাংজা। 2 সা·গ্রেরাংচা জে খাৎথাখো আগানামিং উনি মামুংবা দিংথাং হং·খুজা; ইনাআগ্রেবা জেআন ইসলনি গি·য়েতাখো মানিজাজক আরো বিনি খাৎথাখো খিন্নানা হাম·জা বিয়া বিনি শাস্তিখো মান·জক। 3 ইন্দাকোদে পাপওনি জকনা ইসল ইন্দাকা দাল·বাতা নিয়ামখো দাকজক উখো আনচিং চন্নিকোদে বাদিকে দাক্কে আনচিং জকনুয়া? পাপওনি জক্কানি খাৎথাখো স্খাং গিত্তেল যীশুআন আগানামিং আরো জেরাং উখো খিন্নামিং বিসং আনচিংচা উয়া জক্কানি বিবিখো ফিন্নিকজক। 4 উমুং ইসলবা বাং·আ চিনরাংখো আরো আইয়াও ইনমানানি আরো বিলনি কামচা আরো আন·থাংনি হা·সিকা গিত্তা গিসিক রংথালগিবানি হন·গিবা হ·ন্নানিচা উনি গিম্মিনো সাক্ষি হন·জক। 5 রি·বাগিবা চাসংনি জে হা·গিলসাকনি খাৎথাখো চিংআ আগানিংজক, ইসল উখো সা·গ্রেরাংনি নিং·আও দনজা। 6 রংথালগিবা শাস্ত্রও মিংসা হা·দামও সাবা ইয়া খাৎথাখো আগানে সাক্ষি হন·জক: মান্দি মুয়া, না·আ বিনি গিম্মিনো চানচিয়া? মান্দিনি বি·সাবা মুয়া, না·আ বিচা গিসিক হ·ন্না? 7 না·আ মান্দিখো সা·গ্রেরাংনা বাত্তে অকখিসা চন্নেতজক। রাজানি মুকুট গিত্তা না·আ বিনা রাসংখো আরো মান্দিরা·আখো হন·জক, 8 আরো বিনি জা·চক নিং·আও গিম্মিকখো দনজক। জেনসালো ইসল গিম্মিকখোন মান্দিনি নিং·আও দনজক উনো বিয়া মামুংখোন উয়োনিখো গালজাজক। গিম্মিকখোন আনচিং দা·আও মান্দিনি নিং·আও নিকনা মা·ন্নিংআ ইন্দাকেদে হং·জা, 9 ইন্দিবা যীশুখোদে আনচিং নিকনা মা·ন্নিংআ। বিখো সা·গ্রেরাংনা বাত্তে অকখিসা চন্নিকেতামিং, জেদাক্কে ইসলনি খা·সাচাক্কাও গিম্মিক মান্দিনি হং·এ বিয়া আন·থাংআন সিচাকনা মা·ন্না। বিয়া দুকখো চাক্কে সিয়ামিং ইন্নে হাম্মানি মালা গিত্তা রাসং আরো মান্দিরা·আখো বিনা হন·জক। 10 গিম্মিক ইসলনি গিম্মিনান আরো গিম্মিক বিচান হং·আ। উনি গিম্মিন বাং·আ দেদ্রাং বিনি রাসংনি বাকখো মান·রিকফাখানা ইখো মিকসংএ জক্কানি ফাংচাকগিবা যীশুখো দুক চাক্কাচা চু·সকেতা ইসলনা থিক কামআন হং·আ। 11 জেআন মান্দিরাংখো রংথালেতা উয়া যীশু আন·থাংআন আরো জেরাংখো বিয়া রংথালেতা উয়া মান্দিরাং গিম্মিকান ইসলনি নকনি মান্দি হং·আ। ইনি গিম্মিন যীশু উয়া মান্দিরাংখো জংআদা ইন্নে রিক্কামনা খ্রাচা·জা। 12 রংথালগিবা শাস্ত্রও বিয়া ইসলনা আগানা, “জংআদারাংচা আংআ নাং·নি বিদিংও আগানফ্রাকনুয়া আরো মন্ডলীও নাং·খো মিৎথেলে গিত রিং·নুয়া।” 13 যীশু দা·আবা আগানা, “আংআ ইসলনি সাক্কাও ফাংচাকনুয়া।” আরো দা·আও মিংসা হা·দামও বিয়া আগানা, “ইয়া নিবো, আংআ আরো উয়া দেদ্রাং জেরাংখো ইসল আংনা হন·জক।” 14 উয়া দেদ্রাং বে·এন-হান·চিনি মান্দি হং·আ। উনি গিম্মিন যীশু আন·থাংবা বে·এন-হান·চিনি মান্দি হং·জক, জেদাক্কে সিয়ানি বিল জেনি জাক্কো দংআ উয়া শয়তানখো বিয়া আন·থাংনি সিয়াচা বিলগ্রি দাক্কা, 15 আরো সিনা খেন্নে জেরাং নকখল গিত্তা জাংগি মিৎথাংজক বিসংখো জক্কেতা। 16 যীশু সা·গ্রেরাংনা দাকচাকজা, বাত্তেসা অব্রাহামনি দেরিচ্ছু-সু·রিচ্ছুরাংনান বিয়া দাকচাকা। 17 উনি গিম্মিন যীশুখো গিম্মিক গিত্তান বিনি জংরাং গিত্তা হং·না নাংজক, জেদাক্কে বিয়া সাকসা খা·সাচাকগিবা আরো বিবিগিবা খামাল দাল·বাৎগিবা গিত্তা ইসলনা দাকচাকে হ·ন্না মা·ন্না। ইখো মিকসংএ ইন্দাকে হং·আ, জেদাক্কে বিয়া আন·থাংনি সিয়াচা মান্দিনি পাপখো হা·রিকে ইসলখো খুসি দাক্কা। 18 বিয়া আন·থাংআন রুরাআখো চাক্কে দুক চাক্কামিং ইন্নে জেরাং রুরানি মিকখাংও চাদেংআ বিসংনা বিয়া দাকচাকনা মা·ন্না।

ইব্রীয়রাংনা 3

1 উনি গিম্মিন রংথালগিবা জংআদারাং, না·সং জেরাং সালগিখো মান·রিকগিবা হং·না ইন্নে বিনি রিক্কামাও খু·চাকজক, না·সং যীশুনি গিম্মিনো গিসিক নাংবো। জেখো আনচিং বিবিরা·জক বিয়ান ইসলনি ওয়াত্তেতগিবা উয়া মান্দি আরো উয়া খামাল দাল·বাৎগিবা হং·আ। 2 ইসলনি নকনি মান্দিরাংখো নিরক্ষিয়ানি কামও মোশি জেদাক্কে বিবিরা·না খ্রাগিবা হং·আমিং উয়ানদাক্কে যীশুখো জেআন বাচ্ছিয়ে রা·আমিং উয়া ইসলচা বিয়াবা বিবিরা·না খ্রাগিবা হং·আমিং। 3 জে মান্দি নকখো রিক্কা বিয়া জেদাক্কে উয়া নকনা বাত্তে বাং·এ মান্দিরা·আখো মা·ন্না, উগিত্তা ইসল যীশুখো মোশিনা বাত্তে আরোবা বাং·এ রাসংখো মান·রিকগিবা ইন্নে চানচিজক। 4 গি·ফ্রাক নকখো সাকসা হং·জাওদে দা·আও সাকসা রিক্কা, ইন্দিবা ইসলান গিম্মিকখো রিকজক। 5 বিবিন মোশি ইসলনি নক্কো দাকচাকে হন·গিবা গিত্তা বিবিরা·না খ্রাগিবা হং·আমিং, জেদাক্কে রি·বাগিবা চাসংও জেখো আগানা হং·নুয়া উনি গিম্মিনো বিয়া সাক্ষি হ·ন্না মা·ন্না। 6 ইন্দিবা খ্রীষ্ট উয়া নকনি দেফান্থি গিত্তা বিবিরা·না খ্রাগিবা হং·আমিং। আনচিংনি খা·দংবিবিয়ানি গিম্মিন গিসিকো জে হান·সেংআ রি·বাআ, উয়ো আনচিং বন·খামাওনা দিপ্পাৎ খেম·খেমে দংওদে নিকনা মা·ন্নুয়া, আনচিংআন ইসলনি নকনি মান্দি হং·আ। 7 উনি গিম্মিন গিসিক রংথালগিবা আগানামিং, “দা·আলো না·সং বিনি খাৎথাও নাচিল সংওদে! 8 বিয়া আগানা, না·সংনি ফাগিৎচামরাং গিত্তা না·সংনি খা·থংখো না·সং দা·আ রাক্কেতাবো। বিসং হা·গিসি জওলো বোবিল দাক্কে চাখাতে আংখো পরীক্ষা দাক্কামিং। 9 না·সংনি ফাগিৎচামরাং উনো আংখো থিকখেলে নিআমিং, আরো বিলসি সৎব্রি দিপ্পাৎ উয়া সময়নি মান্দিরাং আংনি কামখো নিক্কামিং। 10 আংআ বিসংনি সাক্কাও নাম্মেন মাংমেংএ আগানামিং, ‘ইয়া মান্দিরাংনি খা·থং ব্রাংগিবা রামাও রওমিংজক; বিসং আংনি রামাখো হা·আইজাজক।’ 11 উনি গিম্মিন আংআ খা·আওনাংএ মিকচেতি আগানামিং, ‘আংনি হন·গিবা নেং·থাকানি হা·দামচা বিসং রি·য়াংনা মান·জানুয়া।’ ” 12 জংআদারাং, সিমসাকবো! না·সংনি গিসেপো দারাংনি গিসিক জেদাক্কে নামগিজাগিবা আরো বিবিরা·গিজাগিবা হং·জা। ইন্দাকগিবা গিসিক থাংগিবা ইসলওনি চে·ল্লাচা রি·য়াংআ। 13 ইনা বাত্তে জেনসালোনা দিপ্পাৎ রংথালগিবা শাস্ত্রনি ‘দা·আল’ খাৎথাখো আগান্না মা·ন্না, উনি সালরিক্ষিতান না·সং সাকসা সাকগিপ্পিননা খা·দংএতবো, জেদাক্কে না·সংনি দারাংনি গিসিক পাপনি বু·দাপাও গা·আকে রাকজা; 14 মুয়ানা স্খাং জে খাকখেৎ খা·দংআ আনচিংনি দংআমিং, আনচিং উয়ো বন·খামাওনা দিপ্পাৎ খেম·খেমে দংওদে নিকনা মা·ন্নুয়া, আনচিং খ্রীষ্টমুং মান·রিকফাগিবা হং·জক। 15 অকখিসা স্খাং মা·মাং আগানা, দা·আল না·সং বিনি খাৎথাও নাচিল সংওদে! বিয়া আগানজক, “না·সংনি ফাগিৎচামরাং গিত্তা না·সংনি খা·থংখো না·সং দা·আ রাক্কেতাবো।” 16 সারাং ইসলনি খাৎথাখো খিন্নাএবা বিখো মাংমেংএতামিং? বিসং উয়া মান্দিরাং হং·জামা জেরাংখো মোশি মিসর হা·সংওনিখো রং·খাতে রা·বামিং? 17 আরো বিলসি সৎব্রি দিপ্পাৎ ইসল সারাংনি সাক্কাও খা·আওনাংএ দংআমিং? বিসং উয়া মান্দিরাং হং·জামা জেরাং পাপ দাক্কামিং আরো জেরাংনি মাংগিসিরাং হা·গিসি জওলো গা·আকে দংআমিং? 18 আরো সারাংচাবা ইসল মিকচেতি আগানামিং, বিসং বিনি হন·গিবা নেং·থাকানি হা·দামচা রি·য়াংনা মান·জানুয়া? বিসং উয়া মান্দিরাং হং·জামা জেরাং বিখো বিবিরা·গিজা মানিজামিং? 19 ইয়ো নিকনা মা·ন্না, বিসংনি বিবিরা·গিজানি গিম্মিনান বিসং ইসলনি হন·গিবা নেং·থাকানি হা·দামচা রি·য়াংনা মান·জামিং।

ইব্রীয়রাংনা 4

1 ইসলনি হন·গিবা নেং·থাকানি হা·দামচা রি·য়াংনা জেখো খু·রাচাক্কামিং উয়া খু·রাচাক্কা আনচিংনাবা খ্রাআ। উনি গিম্মিন আনচিংনি সিমসাকনা নাংনুয়া, জেদাক্কে সাকসাখোবা উয়া খু·রাচাকগিবা ফাত্তিয়ানি খ্রাগিজাগিবা দাক্কে নিকনা মান·জা। 2 ইস্রায়েলরাংচা জেগিত্তা নাম্মা খাৎথাখো আগানফ্রাকামিং উগিত্তা আনচিংচাবা আগানফ্রাকজক। ইন্দিবা উয়া নাম্মা খাৎথাচা ইস্রায়েলরাংনি মামুংআন লাভ হং·জাজক, মুয়ানা বিসং উখো খিন্নাএ বিবিরা·জাজক। 3 ইন্দিবা আনচিং বিবিরা·জক আরো বিনি উয়া খু·রাচাকগিবা নেং·থাকানি হা·দামচা রি·বাজক। ইয়া নেং·থাকানি গিম্মিন ইসল আগানামিং, “উনি গিম্মিন আংআ খা·আওনাংএ মিকচেতি আগানামিং, ‘আংনি হন·গিবা নেং·থাকানি হা·দামচা বিসং রি·য়াংনা মান·জানুয়া।’ ” ইন্দিবা ইয়োদে মামুং ব্রাংআনি দংজা, হা·গিলসাকখো থারিয়ানি জা·মানো ইসলনি কাম ব·ন্নে নেং·থাকনা হা·বাচেংআমিং। 4 রংথালগিবা শাস্ত্রনি মিংসা হা·দামও স্নিগিবা সালনি গিম্মিনো আগানা দংআ, “ইসল স্নিগিবা সালো মামুং থারিয়ানি কামখো দাকজাজক।” 5 বিয়া দা·আবা আগানজক, “আংনি হন·গিবা নেং·থাকানি হা·দামচা বিসং রি·য়াংনা মান·জানুয়া।” 6 দা·আও ইয়া খাৎথা থিক হং·আ, মিত্তাম মান্দি বিনি হন·গিবা নেং·থাকানি হা·দামচা রি·য়াংনা মা·ন্নুয়া; ইন্দিবা জে ইস্রায়েলরাংনা স্খাং নাম্মা খাৎথাখো আগানফ্রাকামিং বিসংনি বামগিজানি হা·সেলোন বিসং ইসলনি হন·গিবা নেং·থাকানি হা·দামচা রি·য়াংনা মান·জাজক। 7 ইনি গিম্মিন ইসল জেগিত্তা স্খাংও ইস্রায়েলরাংচা আগানামিং উগিত্তান বাং·আ সালনি জা·মানো রাজা দায়ূদ গিত্তা দা·আবা আগানজক, দা·আলো না·সং বিনি খাৎথাও নাচিল সংওদে! বিয়া আগানজক, “না·সংনি খা·থংখো না·সং দা·আ রাক্কেতাবো।” ইখো আগানে বিনি হন·গিবা নেং·থাকানি হা·দামচা রি·য়াংনা ইন্নে ইসল দা·আও গি·সা সময়খো থিক দাক্কামিং আরো বিয়া উনি বিমুংখো দন্নামিং দা·আল। 8 যিহোশূয় ইস্রায়েলরাংখো উয়া নেং·থাকানি হা·দামচা রা·আংওদে ইন্দিদে ইসল জা·মানো দা·আও গি·সা সময়নি খাৎথাখো আগানজানুয়ামিং। 9 ইন্দাকোদে নিকনা মা·ন্না, ইসলনি মান্দিরাংনা নেং·থাকানি চল দংআ, 10 মুয়ানা ইসল জেগিত্তা বিনি থারিয়ানি কামখো ব·ন্নেতি নেং·থাকামিং থিক উগিত্তা দাক্কে জে মান্দি ইসলনি হন·গিবা নেং·থাকানি হা·দামচা রি·য়াংআ, বিয়াবা বিনি কামওনি নেং·থাকাখো মা·ন্না। 11 ইনি গিম্মিন হাই, আনচিং উয়া নেং·থাকাখো মা·ন্না মংসংএ খা·দংনা। দারাংবা জেদাক্কে উয়া বামগিজাগিবা ইস্রায়েলরাং গিত্তা ইসলখো মানিগিজা বিনি হন·গিবা নেং·থাকাওনি ওয়াতগালাখো মান·জা। 12 ইসলনি খাৎথা থাংগিবা আরো কাম হং·এতগিবা আরো সামগ্মি গিত্তান মাৎগিবা মি·ল্লামনা বাত্তেবা মাত্তা। ইয়া খাৎথা মান্দিনি গিসিক-খা·থং আরো গ্রেংজলজলও থিং·নাপে মাত্তা-বুআ আরো মান্দিনি খা·থংনি গিম্মিক হা·সিকা আরো চানচিয়াখো পরীক্ষা দাক্কে নিআ। 13 থারিয়ানি মামুংআন ইসলচা থুম্মুয়ে দংজা। জেচা আনচিংনি হিসাব হ·ন্না নাংনুয়া বিনি মিক্রোনও গিম্মিকখোন নিকনা মা·ন্না আরো ফারাকা। 14 ইনি গিম্মিন হাই, আনচিং স্রংস্রাং দাক্কে ইসলনি দেফান্থি যীশুনি সাক্কাও আনচিংনি বিবিরা·আখো খু·রাচাক্কে রি·য়াংনা, মুয়ানা বিয়ান আনচিংনি খামাল দাল·বাৎগিবা হং·আ জেআন সালগিচা রি·য়াংএ দা·আও ইসলনি মিকখাংও দংআ। 15 আনচিংনি খামাল দাল·বাৎগিবা ইন্দাকগিবা সাকসা হং·জা জেআন আনচিংনি বিলগ্রিনা আনচিংমুং সা·দিকাখো মান·জা, মুয়ানা আনচিং গিত্তা দাক্কে বিয়াবা গিম্মিক গিত্তান পাপনি রুরাআনি মিকখাংও চাদেংআমিং ইন্দাকোবা পাপ দাকজাজক। 16 উনি গিম্মিন হাই, আনচিং খেনগিজা ইসলনি খা·সাচাক্কানি সিংহাসননি মিকখাংচা রি·য়াংনা, জেদাক্কে নাংআনি সময়ও উয়োনি আনচিং বিনি খা·সানিক্কাখো আরো খা·সাচাক্কাখো মা·ন্না।

ইব্রীয়রাংনা 5

1 মান্দিরাংনা চাকগিবা হং·এ ইসলনা দাকচাকে হ·ন্না ইন্নে সাকফ্রাক খামাল দাল·বাৎগিবাখো মান্দিনি গিসেপোনি বাচ্ছিয়ে রা·আ, জেদাক্কে বিয়া মান্দিনি পাপনি হা·সেল মাৎবুরুংরাংখো বলি হ·ন্না আরো গিপ্পিন জিনিসরাংখোবা বলি হ·ন্না। 2 জেরাং হা·আইগিজা পাপ দাক্কা আরো ব্রাংআ রামাচা রি·য়াংআ বিসংমুং বিয়া সনথল বেওয়ালখো দাকনা মা·ন্না, মুয়ানা বিনি গিসেপোবা বিলগ্রি হং·আনি দংআ। 3 বিয়া জেদাক্কে গিপ্পিন মান্দিরাংনি পাপনি হা·সেল মাৎবুরুংরাংখো বলি হ·ন্না উয়ানদাক্কে আন·থাং বিলগ্রি ইন্নে আন·থাংনি পাপনি হা·সেলোবা বিনি উয়া বলিখো হ·ন্না নাংআ। 4 খামাল দাল·বাৎগিবা হং·আনি মান্দিরা·আখো দারাংবা আন·থাং রা·না মান·জা, ইন্দিবা ইসল জেখো রিক্কামা বিয়ান উয়া মান্দিরা·আখো মা·ন্না, জেদাক্কে খামাল দাল·বাৎগিবা হং·না ইন্নে ইসল হারোণখো রিক্কামামিং। 5 ইয়া খাৎথাদে খ্রীষ্টনাবা খ্রাআ। খ্রীষ্ট আন·থাংনি হা·সিকাচা খামাল দাল·বাৎগিবা হং·না ইন্নে আন·থাংখো দা·ল্লেতজাজক; ইসলান ইখো আগানে বিনা উয়া মান্দিরা·আখো হ·ন্নামিং, না·আ আংনি দেফান্থি, দা·আলান আংআ নাং·নি ফাগিবা হং·জক। 6 উয়ানদাক্কে ইসল দা·আও মিংসা হা·দামও আগানামিং, না·আ ফাংনাজলনা মল্কীষেদক গিত্তা খামাল হং·আ। 7 জেআন বিখো সিয়ানি জাক্কোনি জক্কেৎনা মা·ন্নুয়ামিং উয়া ইসলচা যীশু ইয়া হা·গিলসাকো দংমিত্তিংও রাক্কে চ্রিকে গ্রাপগ্রাপে মল·মলামিং আরো বি·আমিং। বিনি অলাখিয়ামুং বাম্মাবা দংআমিং ইন্নে ইসল বিনি বি·আখো খিন্নাচাক্কামিং। 8 ইন্দিবা ইসলনি দেফান্থি হং·এবা বিয়া দুক চাক্কাচা বাম্মাখো স্খিয়ামিং। 9 ইন্দাকে জেনসালো বিয়া চু·সকাখো মান·জক উনো বিনি নিং·আও বামগিবা গিম্মিকনা বিয়া ফাংনাজলনা জক্কানি রামা হং·জক। 10 ইসল বিখো মল্কীষেদক গিত্তা দাক্কে দাল·বাৎগিবা খামাল ইন্নে আগানফ্রাকজক। 11 ইনি গিম্মিনো বাং·আ খাৎথা চিংনি আগানানি দংআ ইন্দিবা উখো হা·আইএতি আগানা রাক্কা, মুয়ানা গিসিকনি বিবিখো না·সং আলথুয়ে হা·আইনা মান·জা। 12 ইয়া সময়রাংও না·সং স্খিগিবা হং·না খ্রাআমিং, ইন্দিবা উনা বাত্তে ইসলনি খাৎথানি হা·বাচেংগিবা খাৎথারাংখোন দা·আবা না·সংনা স্খিয়েতনা ইন্নে স্খিগিবাখো নাংইংজক। রাক্কা চা·আনা বাত্তে চনগিবা বি·সারাং গিত্তা দা·আবা না·সংনি সক রিংনা নাংইংজক। 13 জেআন সকখো রিংএ থাংআ বিয়াদে দা·আওবা বি·সা, আরো খাকখেৎ জাংগিনি গিম্মিনো জেদাক্কা স্খিয়া দংআ উয়ো বিয়া ব্রিখুজা। 14 জেরাংনি বিলসি সকজক বিসংসান রাক্কা চা·আখো চা·না মা·ন্না, আগানস্খাওদে ইসলনি খাৎথানি রাক্কা স্খিয়ারাংখো হা·আইনা মা·ন্না। বাং·আ বেওয়ালরাংনি গিম্মিন বিসং নাম্মা-নামজাখো বিচাল দাকনা স্খিজক।

ইব্রীয়রাংনা 6

1 ইনি গিম্মিন খ্রীষ্টনি বিদিংও স্খাং জে স্খিয়াখো মান·জক, হাই, উখো বাত্তাংএ আনচিং চু·সকাওনা সক্কাংনা। বিথিগ্রি কামওনি গিসিক ফি·ল্লেতা, ইসলনি সাক্কাও বিবিরা·আ, 2 দিংথাং দিংথাং রিপ্পলানি বিদিংও স্খিয়া, জাক দনদাপা, সিগিবারাংনি থাংচাআ আরো ফাংনাজলনি শাস্তি-ইন্দাকগিবা হা·বাচেংআনি খাৎথারাংখো রা·এ আনচিং জেদাক্কে দা·আবা গিত্তাল দাক্কে ফাংচাকানিখো রিকফিলজা। 3 ইসল হ·ন্নোদে আনচিং চু·সকনুয়া; 4 মুয়ানা জেরাং রাং·সা সেং·আখো নিকজক, সালগিনি হ·ন্নানি থোআখো আরো গিসিক রংথালগিবাখো মান·জক, 5 ইসলনি খিন্নাথোগিবা খাৎথানি থোআখো মান·জক আরো জে চাসং রি·বাংজক উনি বিলনি বিদিংও হা·আইজক, 6 আরো উনি জা·মানো খ্রীষ্টওনি ফি·ল্লে রি·য়াংজক, বিসংখো দা·আবা গিত্তাল দাক্কে গিসিক ফি·ল্লানি রামাও রিমবানা মান·জা। ইয়াদে হং·না মান·জা, মুয়ানা বিসং আন·থাংআন ইসলনি দেফান্থিখো দা·আবা চিসলো দাৎখাপিংজক আরো গিম্মিকনি মিকখাংও বিখো মান্দিরা·জাংজক। 7 জে হা·আ জেম·জেম মিকখানি চিখো চা·চিপে হা·বা গামগিবারাংনি নাংগিবা সামবিজাকরাংখো চাএতা উয়া হা·আ ইসলনি ফাত্তিয়াখো মা·ন্না। 8 ইন্দিবা জে হা·আ বুসুগ্রিম আরো বিদুরাংখো চাএতা উয়া হা·আ কামনা চলিজা আরো উয়ো শাপ গা·আকানি খেন্না দংআ। বন·চতাও মান্দিরাং উখো সো·এ গাল্লা। 9 খা·সাগিবা রিপ্পেংরাং, চিংআ ইন্দাকা খু·সুকরাংখো আগানিংআ ইন্দাকোবা চিংআ বিবিরা·আ, না·সংনি অবস্থা উয়ানদাক্কে দাকজা; পাপওনি জক্কানি বিথিখো না·সংনি জাংগিও নিকনা মা·ন্নিংআ। 10 ইসল খাকখেৎ বিচাল দাকগিবা হং·আ; ইনি গিম্মিন না·সংনি কামখো আরো বিনি মান্দিরাংনা দাকচাকে হ·ন্নে না·সং বিনা জে খা·সাখো ফিন্নিকজক আরো ফিন্নিকিংজক, উখো বিয়া গুয়ালজানুয়া। 11 চিংআ হা·ম্মা, না·সং দিমদাকান জেদাক্কে বন·চতানা দিপ্পাৎ আপসান হা·সিকাখো ফিন্নিকা। উনোদে না·সং চু·গিম্মিক দাক্কে না·সংনি খা·দংআ চু·সকনুয়া ইন্নে দংনুয়া। 12 না·সংনি আলসিয়া হং·আখো চিংআ হাম·জা; চিংআ হা·ম্মা, জেরাং বিবিরা·আচা আরো নাম্মেন চাকচিকাচা ইসলনি খু·রাচাকগিবা ফাত্তিয়াখো মান·রিকা না·সং বিসং গিত্তা হং·বো। 13 জেনসালো ইসল অব্রাহামচা খু·রাচাক্কামিং উনো বিয়া আন·থাংনি বিমুংওন মিকচেতামিং, মুয়ানা বিনা বাত্তে দাল·বাতা সাকসাবা দংজা জেনি বিমুংও বিয়া মিকচেতনা মা·ন্না। 14 বিয়া ইখো আগানে খু·রাচাক্কামিং, “আংআ নাং·না ফাত্তিনুয়া আরো নাং·নি মা·চংখো জাল্লেতনুয়া।” 15 ইনি গিম্মিন অব্রাহাম জে সময়ও নাম্মেন চাকচিকজক উনো ইসল জেখো হ·ন্না খু·রাচাক্কামিং উখো বিয়া মান·জক। 16 আন·থাংনা বাত্তে জেআন দাল·বাৎগিবা হং·আ বিনি বিমুংওন মান্দিরাং মিকচেতা। উনোদে উয়া মিকচেতা ইয়া মিকসকাখো হ·ন্না, জেখো আগানা হং·জক উয়া বিবি হং·আ, আরো ইনি হা·সেল গিম্মিক গোলমালরাং ব·ন্নাংআরিয়া। 17 ইসল জেখো হ·ন্না খু·রাচাক্কামিং, জেরাং উখো মা·ন্নুয়া বিসংনা বিয়া ইয়া মিকচেতাও নাম্মেথাল্লে ফিন্নিকনা হা·ম্মামিং, বিয়া জেখো থিক দাকজক উয়াদে আরবা দিংথাং হং·জাংআ। ইনি গিম্মিন বিয়া মিকচেতাচা ইখো ফিন্নিকজক, বিয়া জেখো থিক দাকজক উয়াদে হং·নুয়ান হং·নুয়া। 18 ইসলনি খু·রাচাক্কা আরো মিকচেতা মামুং সালোবা দিংথাং হং·জা। ইসল, জেআন বু·এ আগান্না মান·জা, বিয়ান ইখো খু·রাচাকজক আরো মিকচেতজক, জেদাক্কে আনচিংনি মিকখাংও জে খা·দংআ দংআ উখো রিম·না ইন্নে খাতনা রি·য়াংএ আনচিং নাম্মেন খা·দংএতাখো মা·ন্না। 19 ইয়া খা·দংআ আনচিংনি জাংগিও সিলথিন গিত্তা চং·মত আরো খেম·খেম হং·আ, আরো উয়া রংথালবাৎগিবা হা·দামনি পর্দানি ফিল·সাচা, আগানস্খাওদে ইসলনি মিকখাংচা রি·য়াংএ সক্কা। 20 যীশুআন আনচিংনি হং·এ আনচিংনা স্খাং উয়া হা·দামচানা রি·য়াংজক। বিয়া ফাংনাজলনা মল্কীষেদক গিত্তা দাক্কে খামাল দাল·বাৎগিবা হং·জক।

ইব্রীয়রাংনা 7

1 ইয়া মল্কীষেদক শালেমনি রাজা আরো চুবাৎগিবা ইসলনি খামালমিং। অব্রাহাম রাজারাংখো হাম্মে ফিল·বামিত্তিং সময়ও ইয়া মল্কীষেদকখো বিয়া গ্রংআমিং। মল্কীষেদক অব্রাহামনা ফাত্তিয়ামিং, 2 আরো অব্রাহাম গিম্মিক জিনিসরাংনি বাক চিখুংওনি বাকসাখো বিনা হ·ন্নামিং। মল্কীষেদক বিমুংখো ফি·ওদে ইনি অর্থ হং·জক খাকখেৎনি রাজা। মল্কীষেদক দা·আবা শালেমনিবা রাজামিং, আরো উনি অর্থ হং·আ থম·থমানি রাজা। 3 মল্কীষেদকনি মা·গিবা-ফাগিবা বা মা·চং চান্নানি দংজামিং। ইসলনি দেফান্থি গিত্তা বিনি জাংগিনি হা·বাচেংআবা দংজামিং, বন·চতাবা দংজামিং; বিয়া ফাংনাজলনি খামাল হং·আ। 4 নিবো, মল্কীষেদক বাসিক দাল·বাতা! আনচিংনি দাল·বাৎগিবা ফাগিৎচাম অব্রাহামবা বিনা গিম্মিকনি বাক চিখুংওনি বাকসাখে হ·ন্নামিং। 5 লেবিনি মা·চংও জেরাং খামাল হং·জা, ইস্রায়েলরাংচাখো, আগানস্খাওদে বিসংনি জংআদারাংচাখো নিয়াম গিত্তা বাক চিখুংনি বাকসাখো বিসংনি দি·এ রা·না নাংআ। ইয়া জংআদারাং অব্রাহামনি মা·চং হং·ওবা উখো দাকনা নাংআ। 6 ইন্দিবা ইয়া মল্কীষেদক লেবিনি মা·চংনি হং·গিজাবা অব্রাহামচাখো বাক চিখুংনি বাকসাখো রা·আমিং আরো জেচা ইসল খু·রাচাক্কামিং উয়া অব্রাহামখো ফাত্তিয়াবা ফাত্তিয়ামিং। 7 ইয়ো মামুং খেনচাকানি দংজা, জেআন ফাত্তিয়াখো মা·ন্না উনা বাত্তে জেআন ফাত্তিয়াখো হ·ন্না বিয়ান দাল·বাতা। 8 সামসাচা নিকনা মা·ন্নিংআ, সিয়ানি নিং·আও হং·গিবা লেবীয়রাংআন বাক চিখুংনি বাকসাখো দি·এ রা·আ; ইন্দিবা দা·আও সামসাচা নিকনা মা·ন্নিংআ, জেখো থাংএ দংআ ইন্নে সাক্ষি হন·জক বিয়া, আগানস্খাওদে মল্কীষেদকান বাক চিখুংনি বাকসাখো রা·আংআ। 9 ইয়ো ইন্দাকেবা আগানো চলিয়া, লেবিনি মা·চংনি জেআন বাক চিখুংনি বাকসাখো রা·আ বিয়াবা অব্রাহাম গিত্তা মল্কীষেদকনা বাক চিখুংনি বাকসাখো হ·ন্নামিং; 10 মুয়ানা অব্রাহামমুং জেনসালো মল্কীষেদক গ্রংআমিং উনো ইয়া লেবি বিনি ফাগিৎচাম অব্রাহামনি বে·এনো দংআমিং। 11 জেরাং খামালনি কামখো দাকনুয়ামিং উয়া লেবিনি মা·চংরাংনি কামনি সাক্কাও ফাংচাকে ইসল ইস্রায়েলরাংনা বিনি নিয়ামখো হ·ন্নামিং। লেবিনি মা·চংনি খামালরাংনি কামও চু·সকাখো মা·ন্নোদে, ইন্দিদে স্খাংগিবা লেবীয় খামাল হারোণখো দন্নে মল্কীষেদক গিত্তা দাক্কা দা·আও সাকসা খামালনি রি·বানা মুয়ানা নাংআমিং? 12 জে সময়ও খামালনি পদখো বদল দাক্কা উনো নিয়ামখোবা বদল দাকনা নাংআ। 13 জেনি গিম্মিনো আংআ ইয়া খাৎথারাংখো আগানিংআ উয়া যীশু লেবিনি মা·চংওনি রি·বাজা বাত্তেসা দা·আও গি·সা মা·চংওনি রি·বামিং। উয়া মা·চংনি দারাংবা মামুং সালোবা খামাল হং·এ গানচিনি সাক্কাও মাৎবুরুংরাংখো বলি হন·খুজা। 14 ইখো থাল্লে নিকনা মা·ন্না, আনচিংনি গিত্তেল যিহূদানি মা·চংওনি রি·বামিং। ইয়া মা·চংওনি সাকসা মান্দি খামাল হং·নুয়া উয়া খাৎথাখো মোশি মামুং সালোবা আগানজাজক। 15 ইন্দাকোদে মল্কীষেদক গিত্তা দাক্কা দা·আও সাকসা খামাল রি·বাজক ইন্নে চিংআ জেখো আগানজক উখো আরোবা থাল্লে হা·আইনা মা·ন্না। 16 বিনি ইয়া খামাল হং·আদে মা·চংনি গিম্মিনো মামুং নিয়ামনি সাক্কাও ফাংচাকজা, উয়া বিনি বন·খামগিজা জাংগিনি বিলনি সাক্কাও ফাংচাকা। 17 রংথালগিবা শাস্ত্র ইখো সাক্ষি হ·ন্না, না·আ ফাংনাজলনা মল্কীষেদক গিত্তা দাক্কা খামাল হং·আ। 18 মোশিনি নিয়ামরাং মামুংখোন চু·সকেতনা মান·জা, উনি গিম্মিন স্খাং খামালনি কামনি জে নিয়াম দংআমিং উখো বিলগ্রি আরো কামনা চলিজা ইন্নে গালজক। দা·আও উনি হা·দামও উনা বাত্তে দাল·বাতা মিংসা খা·দংএতাখো হন·জক। উচা আনচিং ইসলচা সকনা মা·ন্না। 20 যীশুনি খামাল হং·আনি পদখো ইসল মিকচেতি থিক দাক্কামিং। লেবিনি মা·চংরাং খামাল হং·আনি সময়ও ইসল মামুংখো মিকচেতজা, 21 ইন্দিবা বিয়া যীশুখো দাল·বাৎগিবা খামাল দাক্কানি সময়ও মিকচেতামিং। রংথালগিবা শাস্ত্রও ইনি গিম্মিনো চক্কা দংআ, গিত্তেল মিকচেৎজক, “না·আ ফাংনাজলনি গিম্মিন খামাল হং·আ।” ইনি গিম্মিনো বিয়া বিনি গিসিকখো বদলাইজানুয়া। 22 ইয়োনি আনচিং হা·আইনা মা·ন্নিংজক, যীশু আরোবা দাল·বাতা গি·সা খু·রাচাক্কানি জামিন হং·জক। 23 লেবীয়রাংনি গিসেপো বাং·এন খামাল হং·আমিং, মুয়ানা সিয়াচা চাংফেংআখো মা·ন্নে বিসং দারাংবা ফাংনাজলনা খামালনি কামখো দাক্কে রি·য়াংনা মান·জাজক। 24 ইন্দিবা যীশু ফাংনাজলনা থাংএ দংআ ইন্নে বিনি খামাল হং·আনি পদ মামুং সালোবা দিংথাংজানুয়া। 25 ইনি গিম্মিন জেরাং বিগিত্তা ইসলচা রি·বাআ বিসংখো বিয়া চু·গিম্মিক দাক্কে জক্কেৎনা মা·ন্না, মুয়ানা বিসংনা মল·মলচাকনা বিয়া ফাংনান থাংএ দংআ। 26 ইন্দাকা সাকসা রংথালগিবা, দোসগ্রি আরো খাকখেৎ দাল·বাৎগিবা খামালান আনচিংনা নাংআমিং। বিয়া পাপী মান্দিনা বাত্তে দিংথাং হং·আ আরো ইসল বিখো সিলগানা বাত্তেবা চু·য়াকাও দি·দোজক। 27 গিপ্পিন দাল·বাৎগিবা খামালরাং জেদাক্কে স্খাং আন·থাংনি আরো জা·মানো গিপ্পিননি পাপনি গিম্মিন মাৎবুরুংরাংখো বলি হ·ন্নুয়ামিং, উয়ানদাক্কে ইয়া খামালনি উখো দাকনা নাংজামিং, মুয়ানা বিয়া ফাংনাজলনা ইন্নে রাং·সাসান আন·থাংনি জাংগিখো হন·চাকে উয়া কামখো ব·ন্নেতজক। 28 নিয়াম বিলগ্রি মান্দিরাংখোন দাল·বাৎগিবা খামালনি পদও দন্না; ইন্দিবা নিয়ামনি জা·মানো জেখো মিকচেতামিং উয়া মিকচেতা ফাংনাজলনা চু·সকাখো মান·গিবা ইসলনি দেফান্থিখো দাল·বাৎগিবা খামালনি পদও দনজক।

ইব্রীয়রাংনা 8

1 চিংআ জেখো আগানিংআ উনি চং·মত খাৎথা ইয়ান, আনচিংনি ইন্দাকগিবা সাকসা খামাল দাল·বাৎগিবা দংআ জেআন সালগিও চুবাৎগিবা ইসলনি সিংহাসননি জাক্রাচা আসংজক। 2 বিয়া রংথালবাৎগিবা হা·দামও, আগানস্খাওদে চং·মত অলাখিয়ানি-তাম্বুও ইসলনা দাকচাকে হ·ন্নিংজক। উয়া অলাখিয়ানি-তাম্বুখো মান্দি থারিজা, উখো গিত্তেলান থারিজক। 3 গিম্মিক খামাল দাল·বাৎগিবারাংখো মাৎবুরুংরাংখো বলি হ·ন্না আরো গিপ্পিন জিনিসরাংখো বলি হ·ন্না দন্না, উনি গিম্মিন ইয়া খামাল দাল·বাৎগিবানিবা মামুংখো বলি হ·ন্না নাংআ। 4 ইন্দিবা বিয়া দা·আও ইয়া হা·গিলসাকো দংওদে খামাল হং·না মান·জানুয়ামিং, মুয়ানা ইয়ো নিয়াম গিত্তা বলি হ·ন্নাদে খামাল দংআন। 5 খামাল গিত্তা বিসংনি ইয়া কাম সালগিনি কামনি গি·সা নমুনা আরো জাগ্রিংসান হং·আ। উনি গিম্মিন জেনসালো মোশি উয়া অলাখিয়ানি তাম্বুখো থারিনা রি·য়াংআমিং উনো ইসল ইখো আগানে মোশিখো সিমসাকেতামিং, “সিনাই হা·ব্রিনি সাক্কাও নাং·না জে নমুনাখো ফিন্নিকজক উগিত্তান গিম্মিক থারিয়া হং·খানা উখো নিবো।” 6 ইন্দিবা দা·আও আনচিং নিক্কিংআ, যীশু খামাল হং·আনি জে কামখো মান·জক উয়াদে উয়া খামালরাংনি কামনা বাত্তেবা বাং·এন দাল·বাতা, জেগিত্তা জে খু·রাচাক্কানি বিয়া নাংরিমেতগিবা হং·জক উয়া খু·রাচাক্কা স্খাংনি খু·রাচাক্কানা বাত্তেবা বাং·এন দাল·বাতা; মুয়ানা ইয়া খু·রাচাক্কা আরোবা নামনামগিবা খু·রাচাক্কাও ফাংচাকা। 7 স্খাংনি খু·রাচাক্কা খাকখেৎ হং·ওদে গ্মিগিবা খু·রাচাক্কা নাংজানুয়ামিং। 8 ইন্দিবা ইসল বিনি মান্দিরাংনি দোসখো ফিন্নিকনা রংথালগিবা শাস্ত্রও আগানজক: গিত্তেল আগানা, “সাল সকবাংজক জেনসালো আংআ ইস্রায়েল আরো যিহূদানি মান্দিরাংনা গি·সা গিত্তাল খু·রাচাক্কাখো থারিনুয়া। 9 মিসর হা·সংওনি বিসংনি ফাগিৎচামরাংখো আংআ জাকখো রি·ম্মে রং·খাতি রা·বামিত্তিংও বিসংনা জে খু·রাচাক্কাখো হ·ন্নামিং ইয়া গিত্তাল খু·রাচাক্কা উয়া খু·রাচাক্কা গিত্তা হং·জানুয়া। বিসং আংনি উয়া খু·রাচাক্কা গিত্তা রি·জাজক ইন্নে আংআ বিসংচা গিসিক হন·জা।” গিত্তেল ইখো আগানা। 10 গিত্তেল আরোবা আগানা, “জা·মানো আংআ ইস্রায়েলরাংনা জে খু·রাচাক্কাখো হ·ন্নুয়া উয়া হং·জক, আংনি নিয়ামখো আংআ বিসংনি গিসিকো দন্নুয়া আরো বিসংনি খা·থংওবা উখো চক্কে দন্নুয়া। আংআ বিসংনি ইসল হং·নুয়া আরো বিসং আংনিন মান্দি হং·নুয়া। 11 নকসুলথাংখো আরো জংথাংখো দারাংবা ইখো আগানে স্খিএতজানাজক, ‘গিত্তেলখো হা·আইনা স্খিবো,’ মুয়ানা গিম্মিকান আংখো হা·আইনুয়া। 12 উনি গিম্মিন আংআ বিসংনি অন্যায়খো ক্ষেমা দাকনুয়া, বিসংনি পাপখো আর মামুং সালোবা গিসিক রা·রিকজানুয়া।” 13 ইসল ইয়া খু·রাচাক্কাখো গিত্তাল আগানে স্খাংনি খু·রাচাক্কাখো গিৎচাম ইন্নে চলিগিজা দাক্কে গালজক। জেআন গিৎচাম আরো বাং·আ সালনি ইন্নে নাসিয়াংজক উয়া থেংরিন ব·ন্নাংনুয়া।

ইব্রীয়রাংনা 9

1 ইসলনা দাকচাকে হ·ন্না আরো অলাখিনা ইন্নে স্খাংগিবা খু·রাচাক্কাও মিত্তাম নিয়ামখো হ·ন্নামিং আরো ইয়া হা·গিলসাকো অলাখিনা মংসংগিবা গি·সা হা·দামনি খাৎথাবা উয়ো দংআমিং। 2 আরো উগিত্তা দাক্কে গি·সা তাম্বুখো রিক্কামিং। উয়া তাম্বুনি স্খাংগিবা বাকও গাসা, টেবিল আরো চিন·গিবা রুটি দংনুয়ামিং। ইয়া স্খাংগিবা বাকখো মিংআমিং রংথালগিবা হা·দাম। 3 গ্মিগিবা পর্দানি ফিল·সাচা তাম্বুনি দা·আও গি·সা বাক দংআমিং; উখো মিংআমিং রংথালবাৎগিবা হা·দাম। 4 ইয়া বাকও চা·চেৎ সো·না সোনানি গানচি আরো নিয়াম সিন্দুক দংআমিং। উখো সোনাচা ফা·দাপামিং। উয়ো সোনানি দনচাক্রাও মান্না দংআমিং, হারোণনি জে গল·দিকও বিবাল বাল্লামিং উয়া গল·দিক, আরো খু·রাচাক্কাখো চক্কাগ্মাং গি·গ্মি রং·প্লেং দংআমিং। 5 উয়া সিন্দুকনি সাক্কাও ইসলনি রাসংও চু·সকগিবা গি·গ্মি সোনানি করূব দংআমিং। উরাংনি গ্রাংরাংখো উয়া সিন্দুকখো গ্রিপগিবারাংনি সাক্কাও বাওয়াংএতনুয়ামিং। ইয়া গ্রিপগিবানি সাক্কাও পাপখো ফিনদাপা হং·নুয়ামিং। ইরাংখো দা·আও মিংফ্রাক দাক্কে আগান্না মান·জা। 6 ইন্দাকে গিম্মিকখো থারিয়ানি জা·মানো খামালরাং সময়ফ্রাকওন তাম্বুনি স্খাংগিবা বাকও নাপ্পে ইসলনা দাকচাকে হ·ন্নুয়ামিং; 7 ইন্দিবা গ্মিগিবা বাকও, আগানস্খাওদে রংথালবাৎগিবা হা·দামও খামাল দাল·বাৎগিবাসান নাপনুয়ামিং। বিলসিও রাং·সাসান বিয়া বলি হন·গিবা মাৎবুরুংনি হান·চিখো রা·এ উয়ো নাপনুয়ামিং। বিনি আন·থাংনি পাপনি হা·সেলো আরো মান্দিরাং হা·আইগিজা জে পাপরাংখো দাক্কা উনি গিম্মিনো বিয়া ইয়া হান·চিখো হন·চাকনুয়ামিং। 8 ইয়ো গিসিক রংথালগিবা ইখো ফিন্নিকে হ·ন্নিংজক, জে সময়ওনা দিপ্পাৎ ইয়া অলাখিয়ানি তাম্বু দংনুয়া উনোনা দিপ্পাৎ উয়া রংথালবাৎগিবা হা·দামও নাপ্পানি রামা এংআ দংজানুয়া। 9 দা·আওনি চাসংনা ইয়া গি·সা চিন হং·আ জেআন আনচিংনা আগানে হ·ন্নিংআ, বলি হন·গিবা মাৎবুরুংরাং আরো গিপ্পিন জিনিসরাং অলাখিগিবানি গিসিকখো থাল্লেতনা মান·জা। 10 উরাং বে·এননিসান বিদিং হং·আ, আগানস্খাওদে চা·আ-রিংআ আরো থরমনি নিয়াম গিত্তা রংথালানিসান বিদিং হং·আ। গিম্মিকখো থারিফিল্লানি সময়ওনা দিপ্পাৎ উরাং কামও নাংআমিং। 11 ইন্দিবা খ্রীষ্ট রি·বামিং রি·বাগিবা চাসংনি গিম্মিক নামগিবা বিদিংরাংনি দাল·বাৎগিবা খামাল হং·এ। আরোবা নামবাতা আরো নাম্মা অলাখিয়ানি তাম্বুও ইসলনা দাকচাকে হ·ন্না বিয়া রি·বামিং। মান্দিনি জাক্কো ইয়া তাম্বুখো থারিজা, আগানস্খাওদে ইয়া হা·গিলসাকনি মামুং জিনিস হং·জা। 12 দো·মক আরো মা·সুনি হান·চিখো রা·এ খ্রীষ্ট উয়া রংথালবাৎগিবা নকদ্রিংচা নাপজামিং। বিয়া আন·থাংনি হান·চিখো রা·এ রাং·সাসান উয়ো নাপ্পামিং। ইন্দাকে বিয়া ফাংনাজলনা পাপওনি জক্কানি চলখো দাকজক। 13 মারাং নাংগিবারাংনি সাক্কাও দো·মক আরো মা·সু বিফারাংনি হান·চিখো বা মা·সু বি·সাখো সো·গিবা হা·দুবুখো ফুদাপনুয়ামিং; উনি গিম্মিন বিসংনি হা·ফালনি বে·এনসান রংথালনুয়ামিং। 14 ইন্দিবা জেআন ফাংনাজলনি গিসিক রংথালগিবা গিত্তা ইসলচা আন·থাংখো খাকখেৎ বলি গিত্তা হন·চাকজক উয়া যীশুনি হান·চি আনচিংনি গিসিকখো বিথিগ্রি কামওনি আরোবা বাসিক বাং·এ রংথালেতনুয়া, জেদাক্কে আনচিং থাংগিবা ইসলনা দাকচাকে হ·ন্না মা·ন্না! 15 ইসল জেরাংখো রিংগামে ফাংনাজলনি মান·রিকানি বিলখো হ·ন্না খু·রাচাক্কামিং বিসং জেদাক্কে উখো মা·ন্না উনি গিম্মিনান খ্রীষ্ট মিংসা গিত্তাল খু·রাচাক্কানি নাংরিমেতগিবা হং·জক। মান্দি ইয়া মান·রিকানি বিলখো মান·জক, মুয়ানা স্খাংগিবা খু·রাচাক্কা দংমিত্তিংও মান্দি জে পাপরাংখো দাক্কামিং উয়া পাপরাংওনি মান্দিখো জক্কেতানি দাম গিত্তা খ্রীষ্ট জাংগিথাংখো হন·চাকামিং। 16 উইলখো কাম দাক্কেতনা হা·ম্মোদে জেআন উইলখো দাকজক বিনি সিয়াখো ফিন্নিকনা নাংআ, 17 মুয়ানা মান্দিনি সিয়ানি জা·মানোন উইলখো কামও নাংএতনা মা·ন্না। জেআন উইল দাকজক বিয়া থাংএ দংমিত্তিংও উখো কামও নাংএতনা মান·জা। 18 উয়ানদাক্কেন স্খাংগিবা খু·রাচাক্কাবা হান·চিনি আগ্রে কাম দাক্কেতা হং·জা। 19 গিম্মিক মান্দিচা নিয়ামনি গিম্মিক গি·য়েতাখো আগানানি জা·মানো মোশি দো·মক আরো মা·সু বি·সানি হান·চিখো রা·জক আরো উমুং চিখো ব্রিনে গিচ্চাকা রংনি মেষনি খিম্মিলচা আরো এসোব ফাংনি ডালাচা উখো নিয়ামনি খি·তাপনি সাক্কাও আরো মান্দিরাংনি সাক্কাও গোসাতজক। 20 উখো দাকমিত্তিংও বিয়া আগানামিং, “ইয়ান উয়া খু·রাচাক্কানি হান·চি, জে খু·রাচাক্কা গিত্তা কাম দাকনা ইসল না·সংখো গি·য়েৎজক।” 21 অলাখিয়ানি তাম্বু আরো অলাখিয়ানি কামও জাকখালনা গিম্মিক জিনিসনি সাক্কাওবা মোশি উগিত্তান হান·চিখো গোসাত্তামিং। 22 মোশিনি নিয়াম গিত্তা গিম্মিক জিনিসখোন হান·চিচা রংথালেতিংআ আরো হান·চি হং·গিজাদে পাপওনি ক্ষেমা মান·জা। 23 জেরাং সালগিনি জিনিস গিত্তা দাক্কা উরাংখো মাৎবুরুংখো বলি হ·ন্নাচা রংথালেতনা নাংআমিং ইন্দিবা জে আদতে সালগিনি জিনিস উরাংখো রংথালেতনা ইন্নে আরোবা দাল·বাতা বলি হ·ন্না নাংআ। 24 আদত রংথালগিবা হা·দাম গিত্তা দাক্কা মান্দিনি থারিয়া রংথালা হা·দামও খ্রীষ্ট নাপজা, বাত্তেসা উনা বাত্তে বিয়া সালগিও নাপজক জেদাক্কে বিয়া আনচিংনা হং·এ ইসলনি মিকখাংও দা·আও দংনা মা·ন্না। 25 খামাল দাল·বাৎগিবা মাৎবুরুংনি হান·চিখো রা·এ জেগিত্তা বিলসি রিক্ষিত রংথালবাতগিবা হা·দামচা নাপ্পা, খ্রীষ্ট আন·থাংখো রাং·নিরাং বলি হ·ন্না উয়ানদাক্কে সালগিচা নাপজা। 26 উখোন দাকনা নাংওদে হা·গিলসাক হং·চেংওনি বিখো বাং·এন দুক চাক্কে সিনা নাংনুয়ামিং; ইন্দিবা দা·আও গিম্মিক চাসংনি বন·খামাও বিয়া রাং·সাসান ফারাকজক জেদাক্কে আন·থাংখো ফাকওয়াতে বিয়া পাপখো হা·রিকনা মা·ন্না। 27 ইসল থিক দাক্কে দনজক, সাকফ্রাক মান্দিন রাং·সা সিনুয়া আরো উনি জা·মানো বিনি বিচাল হং·নুয়া। 28 উয়ানদাক্কেন বাং·আ মান্দিনি পাপনি বোজাখো রিপ্পিনা খ্রীষ্টখোবা রাং·সাসান বলি হন·জক। বিয়া দা·আও রাং·সা রি·বানুয়া, ইন্দিবা উনো পাপনা সিনা রি·বাজানুয়া, বাত্তেসা জেরাং বিনা নিচাকসোএ দংআ বিসংখো চু·গিম্মিক দাক্কে জক্কেৎনা রি·বানুয়া।

ইব্রীয়রাংনা 10

1 নিয়ামও জেরাং দংআ উরাং রি·বাগিবা চাসংনি দিমদাক নামগিবা বিদিংরাংনি জাগ্রিংসান হং·আ; উয়ো চং·মত দাল·বাৎগিবা বিদিংরাং দংজা। উনি গিম্মিন জেরাং ইসলখো অলাখিনা রি·বাআ নিয়াম মামুং দাক্কেবা বিলসিওনি বিলসিওনা ইন্দাকে আপসান দাক্কে মাৎবুরুংরাংখো বলি হ·ন্নাচা বিসংনা চু·সকাখো হ·ন্না মান·জা। 2 নিয়াম বিসংখো চু·সকেতনান মা·ন্নোদে মাৎবুরুংরাংখো বলি হ·ন্না দংজানুয়ামিং, মুয়ানা অলাখিগিবারাং রংথালনা মা·ন্নোদে পাপনি হা·সেল আন·থাংথাংখো দোসগ্মাং চানচিজানুয়ামিং। 3 ইন্দিবা ইয়া মাৎবুরুংরাংখো বলি হ·ন্নারাং বিলসি রিক্ষিতান আন·থাংথাংনি পাপনি খাৎথাখো বিসংখো গিসিক রা·এতা, 4 মুয়ানা মা·সু বিফা আরো দো·মকনি হান·চি মামুং দাক্কেবা পাপখো হা·রিকনা মান·জা। 5 উনি গিম্মিন খ্রীষ্ট ইয়া হা·গিলসাকো রি·বানি সময়ও ইসলনা আগানামিং, “মাৎবুরুং আরো গিপ্পিনখো বলি হ·ন্নাখো না·আ হাম·জা, ইন্দিবা আংনা না·আ গি·সা বে·এনখো থারিজক। 6 সো·এ বলি হ·ন্নাও আরো পাপনি হা·সেল বলি হ·ন্নাও না·আ খুসি হং·জাজক। 7 জা·মানো আংআ আগানামিং, ‘ইয়ান, আংআ রি·বাজক; শাস্ত্রও আংনি রি·বানি বিদিংও চক্কা দংআ। ও ইসল, নাং·নি নামনিকাখো আংআ মানিনা রি·বাজক।’ ” 8 সাক্কানি খাৎথারাংনি গিসেপো খ্রীষ্ট স্খাং আগানচেংজক, “মাৎবুরুং আরো গিপ্পিনখো বলি হ·ন্না, সো·এ বলি হ·ন্না আরো পাপনি হা·সেল বলি হ·ন্নাখো না·আ হাম·জাজক আরো উয়ো খুসিবা হং·জাজক।” ইয়া বলি হ·ন্নাখো নিয়ামনি গি·য়েতা গিত্তান দাক্কোবা বিয়া ইয়া খাৎথাখো আগানামিং। 9 জা·মানো খ্রীষ্ট আগানজক, “নিবো আংআ নাং·নি নামনিকাখো মানিনা রি·বাজক।” গ্মিগিবা নিয়ামখো দন্না ইন্নে বিয়া স্খাংনি নিয়ামখো দি·এ গালজক। 10 ইসলনি উয়া নামনিকা গিত্তান যীশু খ্রীষ্টনি বে·এনখো রাং·সাসান বলি হ·ন্নাচা ইসলনা মিংএ আনচিংখো দিংথাং দাকজক। 11 গিম্মিক খামাল ফাংনান চাদেংএ ইসলনা দাকচাকে হ·ন্না আরো রাং·নিরাং আপসান দাক্কে বলি হ·ন্না, ইন্দিবা ইন্দাকে বলি হ·ন্না মামুং দাক্কেবা পাপখো হা·রিকনা মান·জা। 12 ইন্দিবা যীশু পাপনি হা·সেল ফাংনাজলনা গি·সা মা·মাং বলি হ·ন্নে ইসলনি জাক্রাচা আসংজক। 13 আরো উয়োনি জেওনা দিপ্পাৎ বিনি বোবিলরাংখো বিনি জা·চকনি খা·মাও দনজা উয়োনা দিপ্পাৎ বিয়া সেংসোংজক, 14 মুয়ানা ইসলনা মিংএ জেরাংখো দিংথাং দাকজক উয়া রাং·সা বলি হ·ন্নাচা বিয়া ফাংনাজলনা বিসংনা চু·সকাখো হন·জক। 15 গিসিক রংথালগিবাবা ইনি বিদিংও চিংচা সাক্ষি হ·ন্নিংজক। স্খাং বিয়া আগানজক, 16 গিত্তেল আগানা, “জা·মানো আংআ বিসংনা জে খু·রাচাক্কাখো হ·ন্নুয়া উয়া হং·জক, আংনি নিয়ামখো আংআ বিসংনি খা·থংও দন্নুয়া আরো বিসংনি গিসিকো উখো চক্কে দন্নুয়া।” 17 উনি জা·মানো গিসিক রংথালগিবা আগানজক, “আংআ বিসংনি পাপ আরো অন্যায়খো মামুং সালোবা গিসিক রা·জানুয়া।” 18 উনি গিম্মিন ইসল পাপ আরো অন্যায়খো ক্ষেমা দাক্কোদে পাপনি হা·সেল বলি হ·ন্না ইন্নে আরবা মামুং দংজা। 19 জংআদারাং, যীশু খ্রীষ্টনি হান·চিনি গুণচা উয়া রংথালবাৎগিবা হা·দামও নাপনা আনচিংনি খা·সোকা দংআ। 20 খ্রীষ্ট আনচিংনা গি·সা গিত্তাল আরো থাংগিবা রামাখো খুলিয়েতজক, জেদাক্কে আনচিং পর্দা গিত্তা, আগানস্খাওদে বিনি বে·এনচা ইসলনি মিকখাংও দংনা মা·ন্না। 21 ইনাআগ্রে আনচিংনি সাকসা দাল·বাৎগিবা খামালবা দংআ, জেনি সাক্কাও ইসলনি নকনি মান্দিরাংখো নিরকনা হন·জক। 22 উনি গিম্মিন বিবিরা·আও জে খেম·খেমা রি·বাআ, হাই, আনচিং উয়া চু·সকগিবা খেম·খেমাও খাকখেৎ খা·থংও ইসলনি মিকখাংচা রি·য়াংনা; মুয়ানা দোসগ্মাং চানচিয়ানি জাকওনি আনচিংনি খা·থংখো হান·চি গোসাত্তে রংথালেতজক আরো গ্রিকা চিচা আনচিংনি বে·এনখো সু·গালজক। 23 বিবিরা·গিবা হং·এ আনচিংনি জে খা·দংআ দংআ, হাই, আনচিং খেম·খেম হং·এ বিনি খাৎথাখো খু·রাচাকনা, মুয়ানা জেআন খু·রাচাকজক বিয়া বিবিরা·না খ্রাগিবা হং·আ। 24 হাই, আনচিং সাকসা সাকগিপ্পিননি বিদিংও চানচিনা জেদাক্কে আনচিং খা·সাগ্রিকনা আরো নাম্মা কামখো দাকনা সাকসা সাকগিপ্পিনখো খা·দংএতনা মা·ন্না। 25 মিত্তাম মিত্তাম মান্দিনি বেওয়াল দংআ গিত্তা দাক্কে আনচিং খ্রিমাও নাংরিমাখো জেদাক্কে দনগালজা, বাত্তেসা খ্রীষ্টনি রি·বানি সাল সকবারিকরিকওন আনচিং সাকসা সাকগিপ্পিনখো আরোবা খা·দংএতরিকরিকনা। 26 ইসলনি বিবিখো হা·আইয়ানি জা·মানো আনচিং হা·সিকমানচাএ পাপ দাক্কারি দংওদে পাপনি গিম্মিন আনচিংনি আরবা মামুং বলি হ·ন্নানি দংজাজক; 27 বিচালনা নাম্মেন খেন্নে সেংসোআনি দংআ আরো ইসলনি বোবিলরাংখো হা·দুবু দাক্কে গালনা গিত্তা ওয়া·আল দংআ। 28 সাবা মোশিনি নিয়ামরাংখো জিচাকোদে মামুং খা·সাচাক্কাখো মান·গিজান সাকগ্মি বা সাকগিত্থামনি সাক্ষিনি সাক্ষি হ·ন্নানি হা·সেল বিনি সিনা নাংআ। 29 ইন্দাকোদে ইসলনি দেফান্থিখো জেআন মিৎচিজক, জে হান·চিচা বিয়া রংথালজক ইসলনি উয়া খু·রাচাক্কানি হান·চিখো জেআন মারাং নাংআ চানচিজক আরো জেআন খা·সাচাক্কা উয়া গিসিক রংথালগিবাখো জেআন চন্নিকজক, চানচিয়ে নিবো, বিয়া আরোবা বাসিক শাস্তিখো মা·ন্না খ্রাগিবা হং·আ! 30 আনচিং বিখো হা·আইয়া জেআন আগানা, “অন্যায়নি শাস্তি হ·ন্নানি বিল আংনিসান দংআ; জেআন জেখো মা·ন্নুয়া আংআ বিনা উখোন হ·ন্নুয়া।” বিয়া দা·আও মিংসা হা·দামচা আগানা, “গিত্তেলান বিনি মান্দিরাংনা খ্রাগিবা বিচালখো দাকনুয়া।” 31 থাংগিবা ইসলনি জাক্কো গা·আকা বাসিক খেনবিয়ানি হং·আ! 32 চেংওনি খাৎথারাংখো গিসিক রা·এ নিবো। উনো সেং·আখো মা·ন্নে দুকখো চাক্কানি বিল্লংআওবা না·সং খেম·খেম দংআমিং। 33 মিত্তাম সময়রাংও দিমদাকনি মিকখাংও চন্নিকাখো আরো গিচ্চিয়াখো চাক্কে না·সং খা·দিংস্থেকানি মান্দি হং·এ দুকখো চাক্কামিং; জেরাংনি সাক্কাও উয়ানদাক্কে দাক্কামিং বিসংমুং দুক চাক্কামিং; 34 আরো জেরাং জেলচানা রি·য়াংআমিং বিসংনি দুকনা দুক মান·ফামিং। না·সংনি জিনিসরাংখো রা·সেকাখো না·সং হান·সেংএন মানিয়ে রা·আমিং, মুয়ানা না·সং হা·আইয়ামিং আরোবা নামবাতা আরো বন·চাংগিজা গাম না·সংনা দংআ। 35 উনি গিম্মিন না·সং দা·আ খা·সকগিজা হং·আবো, মুয়ানা ইনি বকসিস নাম্মেন দাল·বাতা। 36 না·সংনি খেম·খেম দংনা নাংআ, জেদাক্কে ইসলনি হা·সিকা গিত্তা কাম দাক্কানি জা·মানো ইসল জেখো হ·ন্না খু·রাচাক্কা উখো না·সং মা·ন্না; 37 মুয়ানা ইসলনি খাৎথা গিত্তা, “জেনি রি·বানি খাৎথা দংআ বিয়া বাং·গিজা সালনি গিসেপোন রি·বানুয়া, হারিমজানুয়া। 38 আরো জে মান্দিখো আংআ দোসগ্রি ইন্নে রা·চাকজক বিয়া বিবিরা·আচা জাংগি মা·ন্নুয়া; ইন্দিবা সাবা ফি·ল্লে রি·য়াংওদে বিনি সাক্কাও আংআ খুসি হং·জানুয়া।” 39 জেরাং ফি·ল্লাংএ ব·ন্নাংআ আনচিংদে উয়া দলনি হং·জা; জেরাং বিবিরা·এ জক্কাখো মা·ন্না আনচিং উয়া দলনিন হং·আ।

ইব্রীয়রাংনা 11

1 আনচিং জেখো মা·ন্নুয়া ইন্নে খা·দংএ দংআ উখো আনচিং মা·ন্নুয়ান ইয়ান বিবিরা·আ হং·আ। আরো উয়া বিবিরা·আচান আনচিং বিবিন হা·আইনা মা·ন্না, আনচিং জেখো নিকজাংআ উয়া চং·মতান দংআ। 2 বিবিরা·আনি গিম্মিনান আনচিংনি ফাগিৎচামরাং ইসলনি রাসং দাক্কাখো মা·ন্নামিং। 3 বিবিরা·আচান আনচিং হা·আইনা মা·ন্না, ইসলনি খু·সুকচা ইয়া হা·গিলসাক হং·আমিং। উনি গিম্মিনো হা·আইনা মা·ন্না, জেখো আনচিং নিকনা মা·ন্না উয়া মামুং নিকগিবা জিনিসওনি হং·জা। 4 বিবিরা·আনি গিম্মিন কয়িননা বাত্তে হেবলনি বলি হ·ন্না ইসলনি মিক্রোনও আরোবা নামবাতামিং। হেবলনি বিবিরা·আনি গিম্মিনান ইসল বিনি বলি হ·ন্নাখো রা·চাকে বিনি বিদিংও, বিয়া দোসগ্রি ইন্নে সাক্ষি হ·ন্নামিং। হেবল সিজক ইন্দাকোবা বিনি বিবিরা·আচা বিয়া দা·আওবা খাৎথা আগানিংআ। 5 বিবিরা·আনান হনোক সিজামিং; বিখো সালগিচা দি·চাএ রা·আমিং। ইসল বিখো রা·আংআমিং ইন্নে বিখো সান্দিয়ে মান·জাজক। হনোকখো রা·আংনা স্খাং, হনোক বিখো খুসি দাক্কা ইন্নে ইসল সাক্ষি হ·ন্নামিং। 6 বিবিরা·আনি আগ্র্রে ইসলখো খুসি দাকনা মান·জা, মুয়ানা ইসলচা জেআন রি·য়াংআ, বিনি ইখো বিবিরা·না নাংনুয়া ইসল দংআ আরো জেরাং বিনি হা·সিকা গিত্তা রি·য়া বিসং বিনি জাকনিখো বিসংনি মা·ন্নানিখো মা·ন্না। 7 জেখো উনোবা নিকখুজা উনি গিম্মিনো ইসল নোহখো সিমসাকেতামিং। নোহ ইসলখো অলাখিগিবা হং·আমিং ইন্নে ইসলনি খাৎথাখো বিবিরা·এ গি·সা জাহাস থারিয়ামিং, জেদাক্কে বিনি নকনি মান্দিরাং জকনা মা·ন্না। নোহ বিনি বিবিরা·আচান হা·গিলসাকখো দোসগ্মাং ইন্নে ফিন্নিকামিং আরো ইসলচা দোসগ্রি ইন্নে রা·চাকনা খ্রাগিবা হং·আনি বিলখো মা·ন্নামিং, জেখো বিবিরা·আনি গিম্মিনোসান মা·ন্না। 8 ইসল জেনসালো অব্রাহামখো রিক্কামামিং উনো বিবিরা·আনি গিম্মিনান বিয়া ইসলনি খাৎথাখো মানিয়ামিং আরো গামজিন গিত্তা জে হা·দামখো বিনি মা·ন্না খাৎথা দংআমিং উয়া হা·দামচা বিয়া রি·য়াংআমিং। উনোবা বিয়া হা·আইখুজামিং বিয়া বাচ্চা রি·য়াংইংআ ইন্দাকোবা বিয়া রি·য়াংনা হং·খাতামিং। 9 ইসল জে হা·সংখো অব্রাহামনা হ·ন্না খু·রাচাক্কামিং বিয়া বিবিরা·আনি গিম্মিনান সংগিপ্পিননি মান্দি হং·এ উয়ো সংদংআমিং। বিমুং জেরাং উয়া আপসান খু·রাচাক্কানি ফাত্তিয়ানি বাকখো মান·ফামিং উয়া ইসহাক আরো যাকোব গিত্তা দাক্কে বিয়াবা তাম্বুরাংও দংনুয়ামিং; 10 মুয়ানা জে সংজিলমা ফাংনাজলনি বিয়া উয়া সংজিলমানা সেংএ দংআমিং। উয়া সংজিলমানি নকসাখো থারিয়া আরো রিক্কানি কামখো ইসলান দাকজক। 11 সারানি বি·সা হং·আনি বিলসি বাত্তাংজকমিং ইন্দাকোবা বিবিরা·আনি গিম্মিনান বিয়া অব্রাহামনি বি·সাখো বিকমাও চাংরিকানি বিলখো মা·ন্নামিং, মুয়ানা বিয়া বিবিরা·আমিং, জেআন খু·রাচাকজক বিয়া বিবিরা·না খ্রাগিবা হং·আ। 12 ইনি গিম্মিন বিলসি বাত্তে চলিগিজা বে·এনখো রা·এবা অব্রাহাম সিলগানি আস্কি গিত্তা আরো সাগাল রিক্কামনি হান·চেং গিত্তা চানসকগিজা বি·সানি ফাগিবা হং·আমিং। 13 ইয়া মান্দিরাং বিবিরা·আও জাংগি মিৎথাংএ সিজক। ইসল বিসংনা জেখো হ·ন্না খু·রাচাক্কামিং উখো বিসং মান·জা, ইন্দিবা চে·ল্লাওনি উখো নিক্কামিং আরো খুসিবা হং·আমিং। ইয়া হা·গিলসাকো বিসং হা·সং গিপ্পিননি আরো গিপ্পিন হা·সংও সংদংগিবা হং·আ উখো বিসং খু·রাচাক্কাবা খু·রাচাক্কামিং। 14 জেরাং উখো খু·রাচাক্কা বিসং নাম্মেথাল্লে ইখো হা·আইএতা, বিসং আন·থাংথাংনা হা·সং দামসাখো সান্দিংআ। 15 জে হা·সংওনি বিসং হং·খাতে রি·বামিং উয়া হা·সংনি খাৎথাখো বিসং চানচিয়োদে উয়া হা·সংচা রি·য়াংফিল্লানি চলখো বিসং মা·ন্নুয়ামিং। 16 ইন্দিবা বিসং আরোবা নাম্মা গি·সা হা·সংখো, আগানস্খাওদে সালগিখো সান্দিংআমিং। উনি গিম্মিনান ইসল আন·থাংখো বিসংনি ইসল ইন্নে আগান্না খ্রাচা·জা, মুয়ানা বিয়া বিসংনান গি·সা সংজিলমাখো রিক্কামিং। 17 অব্রাহামখো পরীক্ষা দাক্কানি সময়ও বিয়া ইসলখো বিবিরা·আনি গিম্মিনান ইসহাকখো বলি হ·ন্নামিং। জেচা ইসল খু·রাচাক্কামিং বিয়ান বিনি সাকসা খাম·খাম দেফান্থিখো বলি হ·ন্না রি·য়াংআমিং। 18 ইয়ান উয়া দেফান্থি জেনি বিদিংও ইসল আগানামিং, “ইসহাকনি মা·চংখোন নাং·নি মা·চং ইন্নে চান্নুয়া।” 19 অব্রাহাম বিখো বলি হ·ন্না গং·জক, মুয়ানা বিয়া বিবিরা·নুয়ামিং ইসল সিগিবাখো থাংচাএতনা মা·ন্না। আগান্না রি·য়াংওদে, অব্রাহামদে সিয়ানি দ·গাওনিন ইসহাকখো মান·ফিলামিং। 20 বিবিরা·এন ইসহাক রি·বাগিবা চাসংনা যাকোব আরো এষৌখো ফাত্তিয়ামিং। 21 বিবিরা·এন যাকোব সিনা হা·ম্মিত্তিংও যোষেফনি সাকগ্মি দেফান্থিখো ফাত্তিয়ামিং আরো গল·দিকনি সাক্কাও ফাংচাকে ইসলখো অলাখিয়ামিং। 22 বিবিরা·এন যোষেফ সিনা হা·ম্মিত্তিংও মিসর হা·সংওনি ইস্রায়েলরাংখো রি·য়াংখানা আগানামিং আরো বিনি মাংগিসিখো মুয়া দাকনা নাংনুয়া উখোবা আগানামিং। 23 মোশিনি আৎচিয়ানি জা·মানো বিনি মা·গিবা-ফাগিবা বিবিরা·এন জাগিত্থাম বিখো থুম্মুয়ে দন্নামিং, মুয়ানা বিসং নিক্কামিং দেফান্থি নিথুয়া আরো বিসং রাজানি গি·য়েতানা খেনজাজক। 24 বিবিরা·আনি গান্দান মোশি দা·ল্লানি জা·মানো হাম·জাজক, সাবা বিখো ফরৌণনি দেমিচিকনি বি·সা ইন্নে রিক্কামা। 25 বিয়া পাপনি ব·ন্নারিগিবা হান·সেংআখো গাল্লে ইসলনি মান্দিরাংমুং গিচ্চিয়াখো চাক্কাখোন বাচ্ছিয়ে রা·জক। 26 বিয়া মিসরনি গামজিননা বাত্তে খ্রীষ্টনা চন্নিকানি দাম বাং·আ ইন্নে চানচিজক, মুয়ানা বিনি মিক্রোন বকসিসচানা দংআমিং। 27 ইসলনি সাক্কাও বিনি বিবিরা·আনি গিম্মিনান বিয়া রাজানি খা·আওনাংআনা খেনগিজা মিসর হা·সংখো ওয়াত্তামিং, মুয়ানা জেখো নিকজাংআ বিখো জেদাক্কে নিকনা মা·ন্নিংআ উয়ানদাক্কে বিয়া চাকচিকামিং। 28 বিয়া বিবিরা·এন ওয়াতচাংআনি সালখো আরো হান·চি গোসাত্তানি নিয়ামখো মানিয়ামিং, জেদাক্কে ব·ন্নেতগিবা জে সা·গ্রে স্খাংগিবা বি·সারাংখো দক্কে গালনুয়া বিয়া ইস্রায়েলরাংখো রিম·জা। 29 বিবিরা·এন ইস্রায়েলরাং রান·গিবা হা·আনি সাক্কা গিত্তা রামা রি·য়াংআ গিত্তা দাক্কে লোহিত সাগালখো বাত্তামিং ইন্দিবা মিসরনি মান্দিরাং উখো দাকনা রি·য়াংএ রিপ্পে সিজক। 30 বিবিরা·এন ইস্রায়েলরাং সালস্নিনা দিপ্পাৎ যিরীহো সংজিলমানি দেয়ালখো উইলউইলে রি·য়ানি জা·মানো উয়া গা·আকজক। 31 বিবিরা·আনি গিম্মিনান দারি রাহব যিরীহো সংজিলমাও দংগিবা বামগিজা মান্দিরাংমুং ব·ন্নাংজাজক, মুয়ানা বিয়া উয়া সিউল নিথিমগিবারাংখো রিপ্পেং গিত্তা রা·চাকামিং। 32 ইনাবাত্তে আংআ আরবা মুয়াখো আগান্নুয়া? গিদিয়োন, বারক, শিম্‌শোন, যিপ্তহ, দায়ূদ, শময়েল আরো আগানসোগিবারাংনি খাৎথাখো আগানানি সময় আংনি দংজা। 33 বিবিরা·আচান বিসং হা·সংখো হাম্মে রা·আমিং, খাকখেৎ বিচালখো দাক্কামিং, ইসলনি খু·রাচাক্কানি চু·সকাখো মা·ন্নামিং, সিংহরাংনি খু·সুকখো মিৎথিপামিং, 34 ওয়া·আলনি বিলখো খিমিতামিং, মি·ল্লামচা সু·আওনি জক্কামিং, বিলগ্রি হং·এবা বিল্লাকামিং, দাকগ্রিকাও বিলখো ফিন্নিকামিং আরো হা·সং গিপ্পিননি সিপাইনি দলরাংখো হা·রিকেতামিং। 35 মিচিকরাং বিসংনি সিগিবা মান্দিরাংখো দা·আবা থাংআখো মান·ফিলামিং। সাকগিপ্পিনরাং আন·থাংনি হা·সিকাও জেলওনি জক্কাখো রা·গিজা গিচ্চিয়েতাখো চাক্কামিং, জেদাক্কে বিসং সিয়াওনি থাংচাএ আরোবা নামবাতা জাংগিখো মান·রিকগিবা হং·আ। 36 দা·আবা সাকগিপ্পিনরাং খাল·স্থাপাখো আরো নাম্মেন দক্কাখো, আরোবা, জেংজুলচা খাআখো আরো জেলও দংআখো চাক্কামিং। 37 মান্দিরাং বিসংখো রং·থিচা গোথাতামিং, মি·ল্লামচা থং·গ্মি দাক্কে রাথংআমিং আরো মি·ল্লামচা স·ওতামিং। বিসং গিচ্চিয়েতাখো আরো নামগিজা বেওয়ালখো মা·ন্নামিং, আরো দিল্লাও গা·আকে মেষ আরো দো·মকনি বিগিলখো গান্নে রওমনুয়ামিং। 38 বিসং হা·গিসিওনি হা·গিসিওনা, হা·ব্রিওনি হা·ব্রিওনা, রং·খলোনি রং·খলোনা, হা·খলোনি হা·খলোনা খাত্তে রওমনুয়ামিং। হা·গিলসাক ইয়া মান্দিরাংনা হা·দাম হ·ন্না মান·জামিং। 39 বিবিরা·আনি গিম্মিনান বিসং দিমদাকান মিৎথেলাখো মা·ন্নামিং, ইন্দিবা ইসল জেখো হ·ন্না খু·রাচাক্কামিং উখো বিসং মান·জাজক; 40 মুয়ানা ইসল আনচিংনা আরোবা নাম্মাখো থিক দাক্কে দন্নামিং। বিয়া ইখো থিক দাক্কামিং, আনচিংখো দনগালে বিসংনা চু·সকাখো হন·জানুয়া।

ইব্রীয়রাংনা 12

1 ইন্দাকোদে নিকনা মা·ন্না, ইসলনা বিবিরা·না খ্রাগিবানি সাক্ষি গিত্তা বাং·আ মান্দিরাং আনচিংখো উইলউইলে দংআ। ইনি গিম্মিন হাই, আনচিং গিম্মিক চাংফেংআখো আরো জে পাপ আনচিংখো রিম·চিখাপা উখো চে·ল্লাচা জিত্তেতি মিকখাংনি খাতসুসাও চাকচিকে খাতনা। 2 আরো হাই, আনচিংনি মিক্রোনখো যীশুনি সাক্কাও খেম·খেম দন্না জেআন বিবিরা·আনি ফাংচাকা আরো চু·সকা হং·আ। বিনি মিকখাংও জে হান·সেংআখো দন্নামিং উনি গিম্মিনান বিয়া মান্দিরা·গিজাখো নিগিজা চিসলো সিয়াখো চাকজক আরো দা·আও ইসলনি সিংহাসননি জাক্রাচা আসংএ দংআ। 3 জেআন পাপীরাংনি ইন্দাকে বোবিল দাক্কাখো চাকজক না·সং বিনি গিম্মিনো চানচিবো, জেদাক্কে না·সংনি গিসিক বিলগ্রি আরো খা·দংআগ্রি হং·আরিজা। 4 পাপমুং দাকগ্রিকতে দাকগ্রিকতে না·সংনি দা·আওবা হান·চি গা·আকনা গিত্তা অবস্থা হং·খুজা। 5 ইসল বিনি দে গিত্তা না·সংখো খা·দংএতি জে খাৎথাখো আগানজক না·সং উখো গুয়ালজক। বিয়া আগানা, আংদে, গিত্তেলনি শাসনখো দা·আ চন্নিকাবো, আরো বিনি খা·চাজোকনো ॥য়1 দা·আ খা·দংআগ্রি হং·আবো; 6 মুয়ানা গিত্তেল জেনা খা·সাআ বিখোন শাসন দাক্কা, আরো দে গিত্তা জেরাংখো রা·চাকা, বিসং সাকফ্রাকখোন বিয়া শাস্তি হ·ন্না। 7 না·সং ইয়া দুকরাংখো শাসন গিত্তা চাক্কিংজক। ইসল না·সংমুং ফাগিবা গিত্তান দাক্কিংজক। ইন্দাকগিবা দে দংআমা জেখো বিনি ফাগিবা শাসন দাকজা? 8 গিম্মিক বি·সাখোন শাসন দাক্কানি হং·আ। না·সং শাসন মান·জাওদে না·সংদে দেব্রিংসা হং·আ, চং·মত দেগিবা হং·জা। 9 ইনাআগ্রেবা আনচিং নিকজক, আনচিংনি হা·গিলসাকনি ফাগিবারাং আনচিংখো শাসন দাকনুয়ামিং আরো আনচিং বিসংখো মান্দিরা·নুয়ামিং। ইন্দাকোদে জেআন গিম্মিক গিসিকনি ফাগিবা হং·আ বিনি নিং·আও দংনা আনচিংনি আরোবা খ্রাআনি হং·জামা, জেদাক্কে আনচিং জাংগিখো মা·ন্না? 10 আনচিংনি হা·গিলসাকনি ফাগিবারাং জেখো নাম্মা ইন্নে চানচিনুয়ামিং উগিত্তান আনচিংখো শাসন দাকজক, আরো উয়া বাং·গিজা সালনা মা·মাং; ইন্দিবা আনচিংনি নাম্মানান ইসল আনচিংখো শাসন দাক্কা জেদাক্কে বিনি রংথালাখো আনচিং মান·ফা। 11 শাসনখো আনচিং হান·সেংআনি হং·আ ইন্নে চানচিজা, বাত্তেসা দুকনি হা·সেল হং·আ ইন্নেন চানচিয়া; ইন্দিবা ইসলনি শাসনখো মানিয়ানি বিথি হং·জক থম·থমাও চু·সকা নাম্মা জাংগি। 12 উনি গিম্মিন না·সংনি হান·মা গক্কা জাকখো আরো বিলগ্রি জা·স্খুখো বিল্লাকেতবো। 13 না·সংনি রি·য়ানি রামাখো স্রংএতবো, জেদাক্কে জা·খরা মান্দিনি অবস্থা আরোবা নামজাস্রাং হং·জা, বাত্তেসা বিয়া নামখানা। 14 দিমদাক মান্দিমুং থম·থমাও দংফানা আরো রংথালনা গিসিক নাংবো। রংথালজাওদে দারাংবা গিত্তেলখো নিকজানুয়া। 15 নিবো, দারাংবা জেদাক্কে ইসলনি খা·সাচাক্কাওনি বাদ গা·আকজা। নিবো, বিসিগ্মাং খা·গিবা ফাংনি জা·দিল গিত্তা চাবাএ দারাংবা জেদাক্কে দুকখো থারিয়ে বাং·আ মান্দিখো মারাং নাংএতজা। 16 নিবো, দারাংবা জেদাক্কে এষৌ গিত্তা খাকখেৎগিজাগিবা বা ইসলখো অলাখিগিজাগিবা হং·জা। এষৌ মিফাল ফালসা চা·না দেজাক্রানি মান·রিকানি বিলখো ফাল্লেতামিং। 17 না·সং হা·আইয়া, জা·মানো বিয়া গ্রাপগ্রাপে ফাত্তিয়াখো বি·আম্মামিং ইন্দাকোবা বিখো জেগালজক, মুয়ানা গিসিক ফি·ল্লানি চল উনো আরবা দংজাজকমিং। 18 জে চিং·গিবা হা·ব্রিখো রিম·না মা·ন্না উয়ানদাকগিবা হা·ব্রিচা না·সং রি·বাখুজা। না·সং বিল্লংএ আন্দালানি আরো বালওয়া মিকখা থারাকাওনি বা সিংগানি গা·ম্মানি আরো খু·রাং গা·ম্মানি সেফাংওবা রি·বাখুজা। জেরাং উয়া খাৎথাখো খিন্নামিং বিসং মল·মলে আগানামিং জেদাক্কে বিসংচা আরবা মামুংখো আগানজা। 20 মুয়ানা বিসং ইন্দাকে গি·য়েতাখো চাকনা মান·জামিং-“মাৎবুরুংবা উয়া হা·ব্রিখো নাংএতোদে উখো রং·থিচা গোথাৎনুয়া।” 21 জেখো নিক্কামিং উয়া ইন্দাকা খেনজাগকানি হং·আমিং, মোশি আগানামিং, “আংআ খেন্নে থিল·থিলিংজক।” 22 না·সংদে সিয়োন হা·ব্রি আরো থাংগিবা ইসলনি সংজিলমানি সেফাংও রি·বাজক। উয়া সংজিলমা হং·জক সালগিনি যিরূশালেম। না·সং হাজাল হাজাল সা·গ্রেরাংনি হান·সেংআওনা রি·বাজক; 23 দেজাক্রানি বিলখো মান·রিকগিবা মান্দি গিত্তা জেরাংনি বিমুং সালগিও চক্কা দংআ বিসংনি রিকগিবা মন্ডলীচা রি·বাজক; জেআন দিমদাক মান্দিরাংনি বিচাল দাকগিবা হং·আ উয়া ইসলচা রি·বাজক; জে মান্দিরাং চু·সকাখো মান·জক উয়া দোসগ্রি মান্দিরাংনি গিসিকচা রি·বাজক; 24 জেআন গি·সা গিত্তাল খু·রাচাক্কানি নাংরিমেতগিবা হং·আ উয়া যীশুচা রি·বাজক; আরো হেবলনি হান·চিনা বাত্তে জে হান·চি আরোবা দাল·বাতা খাৎথাখো আগানা, না·সং উয়া গোসাতগিবা হান·চিচা রি·বাজক। 25 সিমসাকবো! জেআন খাৎথা আগানিংআ বিনি খাৎথাখো দা·আ জেগালাবো। মোশি ইসলনি সিমসাকেতাখো হা·গিলসাকো আগানানি জা·মানো মান্দিরাং বিনি খাৎথাখো জেগালামিং ইন্নে জকজাজক, উনো জেআন সালগিওনি আনচিংখো সিমসাকেতা বিনি খাৎথাখো জেগালোদে আনচিংদে মামুং দাক্কেবা জকজানুয়া ইয়ো চানচিয়ানি দংজা। 26 উয়া সময়ও ইসলনি খু·সুকান হা·গিলসাকখো মজুমেতামিং, ইন্দিবা দা·আও বিয়া ইন্দাকে খু·রাচাকজক, “আংআ দা·আও রাং·সাসান হা·গিলসাকখো মজুমেতনুয়া ইন্দাকে হং·জা, ইন্দিবা সিলগাখোবা মজুমেতনুয়া।” 27 “দা·আও রাং·সা,” ইয়া খু·ফা মিংগ্মিওনি হা·আইনা মা·ন্না, জে জিনিসরাংখো মজুমেতনা মা·ন্না, আগানস্খাওদে জেরাংখো থারিজক উরাংখো দনজানুয়া, জেদাক্কে জে জিনিসরাংখো মজুমেতনা মান·জা উরাং থম·থম দংআ। 28 উনি গিম্মিন জে হা·খিংখো মজুমেতনা মান·জা আনচিং উয়া হা·খিংখো মা·ন্না রি·য়াংইংজক ইন্নে হাই, আনচিং ইসলচা মিৎথেলগিবা হং·না। ইন্দাকোদে ইসল জেগিত্তা খুসি হং·আ উগিত্তান আনচিং অলাখিয়ামুং আরো খেন্নামুং বিনা দাকচাকে হ·ন্না মা·ন্নুয়া। 29 আনচিংনি ইসল বন·খামেতগিবা ওয়া·আল গিত্তা হং·আ।

ইব্রীয়রাংনা 13

1 না·সং সাকসা সাকগিপ্পিনখো জংআদা গিত্তা খা·সাবো। 2 সকবাগিবারাংখো যতন রা·না দা·আ গুয়ালা; সাবা সাবা হা·আইগিজান ইন্দাকে সাগ্রেরাংখো যতন রা·জক। 3 জেরাং জেলো দংআ বিসংমিং জেদাক্কে না·সংবা বন্দি হং·জক, আরো জেরাং গিচ্চিংজক বিসংমিং জেদাক্কে না·সংবা গিচ্চিংজক, ইন্দাকে বিসংনি খাৎথাখো গিসিক রা·বো। 4 গিম্মিকান জেদাক্কে জিক-সে খিম্মাখো মান্দিরা·এ নিআ। সেগিবা আরো জিকগিবানি গিসেপো খিম্মাখো রংথালে রা·রিকনা নাংআ, মুয়ানা জেগিত্তা দাক্কেবা থি·ল্লেকা হং·খানা, জেরাং উনা দোসগ্মাং হং·আ ইসল বিসংখো শাস্তি হন·নুয়া। 5 থাংখা পয়সানি মাদ্দুয়াওনি আনথাংথাংখো চে·ল্লাও দনবো। না·সংনি মুয়া দংআ উয়োন খুসি দংবো। ইসল আগানজক, “আংআ মামিং সালোবা নাং·খো ওয়াত্তে রি·য়াংজানুয়া বা গালজানুয়া।” 6 ইনি গিম্মিন আনচিং খেনমানগিজা আগান্না মা·ন্না, গিত্তেল আংনি দাকচাকগিবা, আংআ খেনজানুয়া; মান্দি আংখো মুয়া দাকনা মা·ন্না? 7 জেরাং না·সংচা ইসলনি খাৎথাখো আগান্নুয়ামিং না·সংনি উয়া দাল·গিবারাংনি খাৎথাখো গিসিক রা·বো। বিসংনি জাংগিনি বন·চতগিবা বিথিনি খাৎথাখো নাম্মে চানচিবো আরো বিসং গিত্তা না·সংবা বিবিরা·বো। 8 যীশু খ্রীষ্ট রি·য়াংগিবা সালো জেগিত্তা দংআমিং, দা·আলবা উগিত্তান দংআ আরো জ্রিংজ্রৎনা উগিত্তান দংনুয়া। 9 বাং·আ গিত্তাল গিত্তাল স্খিয়া জেদাক্কে না·সংখো ব্রাংগিবা রামাচানা রা·আংজা। আনচিংনি গিসিক ফাকওয়াতগিবা চা·আনি সাক্কাও দংগিজা জেদাক্কে ইসলনি খা·সাচাক্কানি সাক্কাও খিম·খিম দংআ। জেরাং উয়া চা·আনি সাক্কাও ফাংচাকে রি·নুয়ামিং, উয়া চা·আওনি বিসংনি মামিং লাভ হং·জা। 10 আনচিংনি গি·সা গানচি দংআ আরো জেরাং ইস্রায়েলরাংনি উয়া অলাখিয়ানি তাম্বুও কাম দাক্কা, আনচিংনি উয়া গানচিনি সাক্কাও ফাকওয়াতগিবা মামিংখো চা·আনি বিল বিসংনি দংজা। 11 পাপনি হা·সেলো বলি হন·গিবা মাৎবুরংনি হান·চিখো রা·এ ইস্রায়েলনি দাল·বাৎগিবা খামাল দাল·বাৎগিবা হা·দামচা রি·য়াংআ, ইন্দিবা উয়া মাৎবুরংনি বে·এনখো ইস্রায়েলরাংনি দংআনি হা·দামনি হা·ফালচা রা·আংএ সো·এ গাল্লা। 12 উয়ানদাক্কে যীশুবা যিরূশালেম সংজিলমানি হা·ফালচা দুক চাক্কে সিয়ামিং, জেদাক্কে বিনি আনথাংনি হান·চিচা মান্দিখো পাপওনি রংথালেতনা মা·ন্না। 13 উনি গিম্মিন হাই, বিনি চন্নিকাখো আনথাংরাং রা·চাকে আনচিং সংজিলমানি হা·ফালচা বিচা রি·য়াংনা, 14 মুয়ানা ইনো আনচিংনি দংখামগিবা সংজিলমা দংজা; ইন্দিবা জে সংজিলমা সকবানুয়া উনা আনচিং সেংসোএ দংআ। 15 ইনি গিম্মিন খ্রীষ্টও গিত্তা রি·বাবো, আনচিং ইসলচা ফাংনান মিৎথেলাখো হ·ন্না, আগানস্খাওদে ইসলনি মান্দি ইন্নে জেরাং আনথাংথাংখো খু·রাচাক্কা বিসং বিসংনি খু·সুকথাংচা ইসলখো রাসং দাকখানা। 16 নাম্মা কামখো দাকনা আরো গিপ্পিননি দংগিজাও দাকচাকনা দা·আ গুয়ালা, মুয়ানা ইসল ইন্দাকা হ·ন্নানিও খুসি হং·আ। 17 না·সংনি দাল·গিবারাংনি খাৎথাখো মানিয়ে রি·বো আরো বিসংনি নিং·আও বাম্মে দংবো, মুয়ানা জেরাং ইসলচা হিসাব হন·নুয়া উয়ানদাকগিবা মান্দি গিত্তান বিসং না·সংখো নিরকখিয়া। বিসংনি নিং·আও বাম্মে দংবো জেদাক্কে বিসং বিসংনি কামখো খুসি হং·এ দাকনা মা·ন্না, দুক চাক্কে হং·জা। দুক চাক্কেন দাকনা নাংওদে উয়ো না·সংনি মামিং লাভ হং·জানুয়া। 18 চিংনা বি·চাকবো। গিম্মিকো চিংআ নাম্মে রি·না হাম·মা ইন্নে চিংআ হা·আইয়া, চিংনি গিসিক থাল্লা। 19 ইন্দিবা আংআ না·সংখো গিসিক নাংবাতে বি·খানা মল·মলিংআ, জেদাক্কে আংআ আরোবা থেংরি না·সংমিং নাংরিমনা মা·ন্না। 20 জে হান·চিও থম·থমেতগিবা ইসলনি জ্রিংজ্রৎনি খু·রাচাক্কা দংআ উচা ইসল আনচিংনি গিত্তেল যীশু খ্রীষ্টখো, আগানস্খাওদে মেষরাংনি উয়া দাল·বাৎগিবা নিরকখিগিবাখো সিয়াওনি থাংচাএতজক। 21 জেরাং নাম্মা উচা বিয়া বিনি হা·সিকা গিত্তা রি·খানা না·সংখো চু·গিম্মিক দাক্কে থারিখানা। বিনি মিক্রোনও জেরাং নাম্মা যীশু খ্রীষ্টও আনচিংনি খা·থংও বিয়া উখোন দাকখানা। জ্রিংজ্রৎনা ইসলনি রাসং হং·খানা। আমেন। 22 জংআদারাং, না·সংচা আংনি মংসংগিবা মল·মলা ইয়ান, আংনি ইয়া স্খিয়াখো না·সং মানিয়ে রা·বো। আংআদে না·সংচা বাং·এ লিক্ষিজাজক। 23 আংআ না·সংনা হা·আইয়েতনা হাম·মা, আনচিংনি জং তীমথিয় জকজক। বিয়া থেংরি রি·বাওদে বিখো রিম্মে না·সংখো নিনা রি·বানুয়া। 24 না·সংনি গিম্মিক দাল·গিবারাংনা আরো ইসলনি মান্দিরাংনা চিংনি সালামখো হন·বো। ইটালী হা·সংনি ইসলনি মান্দিরাং না·সংখো সালাম হন·নিংআ। 25 না·সংনি গিম্মিকনি সাক্কাও ইসলনি খা·সাচাক্কা দংখানা।

যাকোব 1

1 আংআ ইসল আরো গিত্তেল যীশু খ্রীষ্টনি নকখল যাকোব, হা·গিলসাকনি দিমদাক হা·দকো বিলদিং বিলদাং দাক্কে দংগিবা যিহূদী জাতনি মা·চং চি·গ্মি মান্দিরাংনা সালাম র·ন্নিংআ। 2 আংনি জংআদারাং, না·সং জেনসালো গিপ্পিন গিপ্পিন রুরাও গা·আকা উনো উখো নাম্মেন খুসি হং·আনি হা·সেল ইন্নে চানচিবো, 3 মুয়ানা না·সং হা·আইয়া না·সংনি বিবিরা·আনি রুরাআ না·সংনি চাকচিকাখো বারিয়েতা। 4 উয়া চাকচিকাখো না·সংনি জাংগিও চু·সকে কাম দাকনা রন·বো, জেদাক্কে না·সং খাকখেৎগিবা হং·না মা·ন্না, আরো জেদাক্কে না·সংনি গিসিকো মামুংনান দিলজাখানা। 5 না·সংনি সানিবা হা·আইয়া হং·মানজাওদে বিয়া ইসলচা বি·খানা, উনোন ইসল বিনা উখো র·ন্নুয়া, মুয়ানা ইসল মামুংনাবা মা·নেংগিজা দিমদাকনান জাকস্রামে র·ন্না। 6 ইন্দিবা গিসিকো মামুংনা খেনচাকগিজা বিবিরা·এ বিখো ইসলচা বি·না নাংনুয়া, মুয়ানা গিসিকো জাজাওদে বিয়া বালওয়ানা ফক্‌ফেক্‌গিবা সাগালনি চি ফক্‌ফেকারাং গিত্তা হং·আ, বালওয়ান উখো স্ফাকে রা·আংআ। 7 ইন্দাকগিবা মান্দিদে ইসলচাখো মামুংখোবা মা·ন্না খা·দংজাখানা। 8 বিয়াদে গিসিকো জাজাগিবা মান্দি হং·আ আরো আন·থাংনি দিমদাক কামওন থম·থমজা। 9 দিলগিবা জংআদা জে ইসলো বিবিরা·আ বিখো ইসল চুবাত্তাও দন্না ইন্নে বিয়া আন·থাংখো রাসং দাকখানা। 10 আরো জে মা·ন্নে চা·আ, ইসল বিখো রিন্নকেতা ইন্নে বিয়াবা আন·থাংখো রাসং দাকখানা, মুয়ানা সামচেংরাংনি বিবাল গিত্তা বিয়াবা সিনা নাংনুয়া। 11 সাল দিং·বিয়ে নাবাওন উয়া সামচেং সিক্রেপা, বিবালরাং রুরংএ গা·আকা আরো উরাংনি নিথুয়াবা ব·ন্নাংআ। মা·ন্নে চা·গিবাবা উগিত্তান বিনি কাম খা·মিত্তিংরাংওন ব·ন্নাংনুয়া। 12 রুরানি সালো জে চাকচিকা বিয়ান ফাত্তিয়া মান·গিবা হং·আ, মুয়ানা আন·থাংখো দিমদাক রুরাও হামগিবা দাক্কে ফিন্নিকনা মা·ন্নোদে হাম্মানি মালা গিত্তা বিয়া জাংগিখো মা·ন্নুয়া। জেরাং ইসলনা খা·সাআ বিসংনা বিয়া ইয়া জাংগিখো র·ন্নুয়া ইন্নে খু·রাচাক্কা। 13 গিসিকো পাপ দাকনা হা·সিকোদে সাবা আগানজাখানা, “ইসল আংখো পাপনি রামাওনা সাল্লাংআ।” মামুং নামগিজান ইসলখো পাপনি রামাওনা সালবানা মান·জা, আরো ইসলবা দারাংখো পাপনি রামাওনা সালবাজাংআ। 14 মান্দিনি গিসিকনি হা·সিকান মান্দিখো পাপচানা সাল্লাংআ আরো জা·গাওনা গাল্লা। 15 গিসিকো হা·সিকারাং গাপজকোন পাপখো হং·এতা আরো পাপ গাপজকোন সিয়াখো হং·এতা। 16 আংনি খা·সাগিবা জংআদারাং, দা·আ গুয়ালা। 17 জাংগিনি দিমদাক নিথোগিবা আরো নামবাৎগিবা র·ন্নানিরাং সালগিচানি রি·বাআ; আরো উয়া ইসলচানি রি·বাআ, বিয়ান গিম্মিক থেং·সুয়ানি ফাগিবা হং·আ। বিয়া থম·থমগিজাগিবা জাগ্রিং গিত্তা দাকফিল্লে রি·য়াংজা। 18 বিনি আন·থাংনি হা·সিকাচা বিবিনি খাৎথা গিত্তা বিয়া আনচিংখো বিনি দেদ্রাং থারিজক, জেদাক্কে আনচিং বিনি থারিগিবা বস্তুরাংনি গিসেপো স্খাং নাংগিবা বিথি গিত্তা হং·না মা·ন্না। 19 আংনি খা·সাগিবা জংআদারাং, আংনি ইয়া খাৎথাখো গিসিক রা·বো-না·সং দিমদাকান খিন্নানা গং·রাকগিবা হং·বো, ইন্দিবা থেংরি থেংরি দাক্কে খাৎথা আগান্না বা খা·আওনাংনা দা·আ গং·রাকাবো; 20 মুয়ানা ইসল আনচিংচাখো জেদাক্কে রংথালগিবা জাংগিখো হা·ম্মা উয়া খা·আওনাংআ গিত্তা রি·বাজা। 21 ইনি গিম্মিন না·সংও দংগিবা রংথালগিজা আরো নামগিজাগিবা দিমদাকখোন ওয়াতবো। ইসলনি খাৎথানি জে বিৎচ্রিখো না·সংনি খা·থংও গি·মানজক, উখো গিসিক রিন্নকে রা·চাকবো। পাপনিখো না·সংখো জক্কেতানি বিল ইয়া খাৎথাওন দংআ। 22 ইন্দিবা ইসলনি খাৎথাখো খিন্নারিওন হং·জানুয়া, উগিত্তা কামবা দাকনা নাংনুয়া। না·সং ইসলনি খাৎথাখো খিন্নাইমিংনা উগিত্তা কাম দাকজাওদে আন·থাংথাংখোন থগিয়ানি হং·আ । 23 জে উয়া খাৎথাখো খিন্নারিয়া ইন্দিবা উগিত্তা কাম দাকজা বিয়াদে ইন্দাকগিবা মান্দি গিত্তা হং·আ, জে আন·থাংনি মিকখাংখো জানিরাও নিক্কে রি·য়াংআরিবা উনোন উখো গুয়ালারিয়া। 25 ইন্দিবা মান্দিখো জক্কেৎনা জে চু·সকগিবা নিয়াম দংআ উখো নাম্মে গিসিক নাংএ নিগিবাদে উয়া নিয়ামখো খিন্নারিন গুয়ালগিজা বাত্তেসা উগিত্তা কামখোবা খা·আ। ইন্দাকে বিয়া আন·থাংনি কামরাংনি গিম্মিন ফাৎথিয়াখো মা·ন্না। 26 সাবা আন·থাংখো থরম দাকগিবা ইন্নে চানচিওদে ইন্দিবা আন·থাংনি স্রিবাক্‌খো সিমসাকে রা·রিকজাওদে বিয়া আন·থাংখো থগিয়া। উনো বিনি থরম দাক্কারাং বু·আনি হং·আ। 27 রান্দি আরো ফাগ্রি-মা·গ্রিরাংখো দুকনি সালো নিরকখিয়া আরো হা·গিলসাকনি নামগিজারাংনিখো আন·থাংখো গ্রো নাংএতগিজা নাম্মে দাক্কে রাক্ষিয়ান আপফা ইসলনি মিক্রোনও খাকখেৎ হং·গিবা আরো বিবিগিবা থরম হং·আ।

যাকোব 2

1 আংনি জংআদারাং, না·সং আনচিংনি রাসংনি গিত্তেল যীশু খ্রীষ্টও বিবিরা·ওদে, দিমদাকখোন আপসান দাক্কে নিবো। 2 না·সংনি থরম নক্কো সাকসা মান্দি নিথুয়া বা·রাচলাখো চিন্নে-গান্নে আরো জাক্কো সোনানি আংটিখো গান্নে রি·বাজক; দা·আবা দা·আও সাকসা দিলগিবা মান্দিবা খেন্থাসুরি বা·রাচলাখো চিন্নে রি·বাজক ইন্নে চানচিচিপবো। 3 উনো না·সং নিথুয়া বা·রাচলা চিনগিবা মান্দিখো নাম্মেন মান্দিরা·এ ইন্নোদে, “না·আ ইয়া নামবাৎগিবা হা·দামও আসংবো,” আরো উয়া দিলগিবা মান্দিখো, ‘‘না·আ হাইওয়ানো চাদেংবো’’ বা ‘‘ইনো আংনি জা·চকনি কেচ্ছিয়োনা আসংবো” ইন্নোদে, 4 ইন্দাকোদে না·সং আন·থাংথাংওন চন্না-দা·ল্লা দাক্কে মা·আতাখো রা·বাজামা আরো নামগিজাখো মিকসংএ বিচাল দাকজামা? 5 খিন্নাবো, আংনি খা·সাগিবা জংআদারাং। ইয়া হা·গিলসাকনি মিক্রোনও দিল্লা-চন্না মান্দিরাংখো ইসল বিবিরা·আও মা·ন্নে চা·গিবা হং·না বাচ্ছিয়ে রা·জামা? জেরাং ইসলনা খা·বাকা উরাংখো বিয়া জে সংনকখো র·ন্নুয়া ইন্নে খু·রাচাক্কামিং, উয়া সংনকখো মান·রিকনাবা ইসল বিসংখোন বাচ্ছিয়ে রা·জামা? 6 ইন্দাকোবা উয়া দিলগিবা মান্দিরাংখোন না·সং চন্নিকজক। ইন্দিবা মা·ন্নে চা·গিবারাং না·সংখো দুক রন·জামা? আরো না·সংখো বিচাল দাকগিবা নকচানা সাল্লে রা·আংজামা? 7 জেনি বিমুং গিত্তা না·সংখো রিক্কামা মা·ন্নে চা·গিবারাং উয়া মান্দিরা·আনি বিমুংখো জিজামা? 8 রংথালগিবা শাস্ত্রও চক্কা দংআ, “নাং·নি সংসুল নকসুলখো আন·থাং গিত্তা খা·সাবো।’’ না·সং বিবিন ইয়া নিয়াম গিত্তা রি·ওদে, না·সং নাম্মাখোন দাক্কিংজক। 9 ইন্দিবা না·সং দিমদাকখো আপসান দাক্কে নিজাওদে না·সং পাপখো দাক্কিংআ। উনো ইয়া নিয়ামান না·সংখো নিয়াম ফি·গিবা ইন্নে না·সংনি গ্রোখো রি·ম্মা। 10 সাবা নিয়াম দিমদাকখো মানিয়ে গি·সা মাংমাং নিয়ামখো ফি·ওদে বিয়া দিমদাক নিয়ামরাংখোন ফি·গিবা ইন্নানি হং·আ। 11 জেআন আগানা, “দা·আ স·বাকা,” উয়ান দা·আবা আগানা, “দা·আ স·ওতা।” ইন্দাকোদে না·সং স·বাকগিজা স·ওতোদে না·সং নিয়াম ফি·গিবা হং·জামা? 12 জে নিয়াম মান্দিখো জক্কেতা উয়া নিয়ামচা জেরাংখো বিচাল দাকনুয়া, উরাং গিত্তান আগানবো আরো দাকবো; 13 মুয়ানা জে খা·সাচাকজা, বিচালনি সালো বিয়াবা খা·সাচাক্কাখো মান·জানুয়া। বিচালনি সাক্কাও খা·সাচাক্কা হাম্মা। 14 আংনি জংআদারাং, আন·থাংও বিবিরা·আ দংআ ইন্নে সাবা আগানোদে ইন্দিবা কামচা উখো ফিন্নিকজাওদে, উয়ো মুয়া লাভ দংআ? উয়া বিবিরা·আ বিখো পাপনিখো জক্কেৎনা মা·ন্নামা? 15 না·সংনি সানিবা জংআদানি বা ন-আবিনি নক্কো মামুং চা·আনিবা দংজা, গান্নানি বা·রারাংবা দংজা ইন্নে চানচিচিপবো। 16 উনো না·সংনি গিসেপো সাবা বিখো, ‘‘নাং·নি নামখানা, চা·এ রিংএ নাম্মে দংরিমবো” ইন্নোদে, ইন্দিবা বিনি নাংআনিরাংখো র·ন্নে দাকচাকজাওদে, বিনি মুয়া নাম্মানি হং·নুয়া? 17 ইন্দাকেন, জে বিবিরা·আও কাম দংফাজা, উয়া বিবিরা·দে সিগিবা হং·আ। 18 সাবা আগান্নাবা দংআ, ‘‘নাং·ও বিবিরা·আ দংআ আরো আংও নামগিবা কাম দংআ।’’ ইয়াদে নাম্মান। কামগ্রি নাং·নি বিবিরা·খো আংনা ফিন্নিকবো, আরো আংআ আংনি বিবিরা·আখো কামচা নাং·না ফিন্নিকনুয়া। 19 ইসল সাকসাসান দংআ ইন্নে না·আ বিবিরা·আ, হং·জামা? ইয়াদে নাম্মান! ইন্দিবা গিসিক নামগিজাগিবারাংবা বিখোদে বিবিরা·আ আরো থিল·থিলে খেন্না। 20 আইয়াও জাদাস্রাং! কামগ্রি বিবিরা·আনি বিথি দংজা ইখো না·আ নিনা হা·ম্মিংআমা? 21 আনচিংনি ফাগিৎচাম অব্রাহাম জেনসালো বিনি দেফান্থি ইস্‌হাকখো গানচি সাক্কাও দন্নে বলি র·ন্নামিং, উনো উয়া কামনি গিম্মিন বিখো দোসগ্রি ইন্নে রা·চাকজামা? 22 না·আদে নিকনান মা·ন্নিংআ, বিনি বিবিরা·আমুং কামবা আপসান দংফা আরো বিনি কামআন বিনি বিবিরা·আখো চু·সকেতামিং। 23 ইন্দাকে রংথালগিবা শাস্ত্রনি ইয়া খাৎথা চু·সকজক, “অব্রাহাম ইসলখো বিবিরা·আ আরো উনি হা·সেলো ইসল বিখো দোসগ্রি ইন্নে চানজক।” উনি গিম্মিন বিখো ইসলনি রিপ্পেং ইন্নে মিংজক। 24 ইন্দাকোদে না·সং নিকনা মা·ন্নিংআ, বিবিরা·আনি গিম্মিন ইসল মান্দিখো দোসগ্রি ইন্নে চান্না ইয়াদে হং·জা, ইন্দিবা বিবিরা·আ আরো কাম দাক্কা ইয়া মিংগ্মিনি গান্দাসা ইসল মান্দিখো দোসগ্রি ইন্নে চান্না। 25 আরো দারী রাহবখো বাদিকে দাক্কে দোসগ্রি ইন্নে চান্নামিং? বিয়া সিউল দাক্কে নিগিবা যিহূদীরাংখো থুম্মুয়ে দন্নানি জা·মানো গিপ্পিন রামা গিত্তা বিসংখো ওয়াত্তেতানি গিম্মিন বিখো দোসগ্রি ইন্নে চান্নামিং। 26 জাংগিগ্রি বে·এন জেদাক্কে সিয়ানি হং·আ, উয়ান দাক্কে কামগ্রি বিবিরা·আবা সিয়ানি হং·আ।

যাকোব 3

1 আংনি জংআদারাং, না·সং দিমদাকান দা·আ স্খিগিবা হং·না রি·য়াংআ, মুয়ানা না·সং হা·আইয়া, স্খিগিবা ইন্নে আনচিংখো গিপ্পিনরাংনা বাত্তে রাকবাত্তেন বিচাল দাকনুয়া। 2 আনচিং দিমদাকান দিংথাং দিংথাং দাক্কে পাপ দাক্কে দংআ। সাবা খাৎথাচা পাপ দাকজাওদে বিনি গ্রো নাংজা; উনোদে বিনি দিমদাক বে·এনখো বিয়া সিমসাকে রা·রিকনা মা·ন্না। 3 ঘোড়াখো বাম্মেতে রা·রিকনা আনচিং উনি খু·সুকও লাগাম ফাত্তা, আরো উনোন জেচা হা·সিকা উচান উখো রা·আংনা মা·ন্না। 4 আরোবা নিবো, জাহাস দাল·বিওবা বালওয়া থারাকে বালফাকে উখো স্ফাকে রা·আংআ ইন্দাকোবা গি·সা চনগিবা বৈঠাচান চালাইগিবা উখো জেচা হা·সিকা উচান রা·আংনা মা·ন্না। 5 স্রিবাকবা উগিত্তান হং·আ, বে·এননি গি·সা চন্না বাক হং·ওবা উয়া নাম্মেন দা·ল্লে খু·সুক আগান্না মা·ন্না। আরোবা অকখিসা ওয়া·আলান বাদিকে দাক্কে গি·সা দা·ল্লা ব্রিংখো খাম্মে গালনা মা·ন্না! 6 স্রিবাকবা উয়া ওয়া·আল গিত্তান হং·আ। আনচিংনি বে·এনো দংগিবা বাকরাংনি গিসেপো স্রিবাক নামজাবাৎগিবা হা·গিলসাক গি·সা গিত্তা হং·আ। নরকনি ওয়া·আলো খাম্মে বিয়া বে·এন গিম্মিকখোন নাসিয়েতা আরো জাংগিনি রামাও ওয়া·আল সো·এতা। 7 মান্দি দিমদাক মাৎবুরুং, দো·ও, চিপ্পু আরো না·থকরাংখো বাম্মেতে রা·রিকনা মা·ন্না আরো রা·রিকজক, 8 ইন্দিবা স্রিবাকখো সাকসা মান্দিবা বাম্মেতে রা·রিকনা মান·জা। উনো থম·থমগিজা, নামগিজাগিবা আরো সিয়েতগিবা বিসি গাপ্পা। 9 ইয়া স্রিবাকচান আনচিং আনচিংনি গিত্তেল আরো আপফা ইসলখো মিৎথেলা, দা·আবা ইয়া স্রিবাকচান বিগিত্তা থারিগিবা মান্দিখো শাপ র·ন্না। 10 আনচিংনি গি·সা খু·সুক গিত্তান নাম্মা আরো শাপ র·ন্নারাং হং·খাতে রি·বাআ। আংনি জংআদারাং, ইন্দাকে হং·না খ্রাজাস্রাং। 11 চি হা·খল খলসাওনি রাং·সানোন চি·গিবা আরো খা·গিবা চি হং·খাতনা মা·ন্নামা? 12 আংনি জংআদারাং, ডুমুর বিফাংও জলপইনি বিথি নাংনা মা·ন্নামা? বা আংগুর বিদুও ডুমুরনি বিথি নাংনা মা·ন্নামা? উগিত্তান খাসিম খা·ওয়াকগিবা চিওবা চি·গিবা চিখো মান·জা। 13 না·সংনি গিসেপো সা হা·আইগিবা আরো বুদ্ধি দংগিবা হং·আ? বিয়া বিনি রংথালগিবা জাংগিচা হা·আইয়ানি হং·খাতে রি·বাগিবা রিন্নকগিবা কামখো দাক্কে ফিন্নিকখানা। 14 ইন্দিবা মিকনেংআনি গিম্মিন না·সংনি খা·থং খা·ফিলোদে আরো না·সং আন·থাংনাসান চানচিগিবা হং·ওদে আন·থাংনি হা·আইয়ানি গিম্মিন দা·আ রাসং চাআবো আরো বিবিখো দা·আ বু·এ আগানাবো। 15 ইন্দাকগিবা হা·আইয়া সালগিচানি হং·খাতবাজা, ইন্দিবা হা·গিলসাকো, মান্দিনি নামগিজা হা·সিকারাংমুং আরো গিসিক নামগিজাগিবারাংমুংআন উয়া দংফা; 16 মুয়ানা জেও মিকনেংআ আরো আন·থাংথাংখো রা·এ চানচিয়ানিসান দংআ, উয়োন গোলমাল আরো গ্রো নাংআনি দিমদাকান দংআ। 17 ইন্দিবা সালগিচানি হং·খাতবাগিবা হা·আইয়াদে হা·বাচেংওন রংথালা, থম·থমা, রিন্নকা, চাকচিকা, খা·সাচাক্কা আরো নাম্মা কামরাংনি বিথি উয়ো গাপ্পা, উয়ো বু·এ চা·আ দংজা। 18 আরো জেরাং থম·থমানি গিম্মিন খ্রেংআ বিসং থম·থম দাক্কে বিৎচ্রিখো গোআ আরো উনি বিথি হং·জক নাম্মা জাংগি।

যাকোব 4

1 না·সংনি গিসেপো নিরিয়া গিসিয়া আরো দাকগ্রিক্কারাং বাচ্চানি রি·বাআ? না·সংনি বে·এনো দাকগ্রিকে দংগিবা হা·সিকারাংওনি উরাং রি·বাজামা? 2 না·সং হা·ম্মা, ইন্দিবা মান·জা। না·সং স·ওতা আরো মাদ্দুুয়া, ইন্দিবা জেখো হা·সিকা উখোদে মান·জা। না·সং নিরিংআ আরো দকগ্রিক্কিংআ, ইন্দাকোবা না·সংনি মামুংআন দংজা, মুয়ানা না·সং ইসলচা বি·জা। 3 না·সং হা·ম্মেবা মান·জাংজক, মুয়ানা না·সং না·সংনি হা·সিকারাং গিত্তা দাকনা ইন্নে নামগিজারাংখো মিকসংএ হা·ম্মে দংআ। 4 বিবিরা·গিজাগিবা মান্দিরাং! হা·গিলসাকনি রিপ্পেং হং·আদে ইসলনি বোবিল হং·আ, ইখো না·সং হা·আইজামা? উনি গিম্মিন জে মান্দি হা·গিলসাকনি রিপ্পেং হং·না হা·সিকা বিয়াদে আন·থাংখো ইসলনি বোবিল দাক্কে থারিয়ে রা·আ। 5 আনচিংনি খা·থংও ইসল জে গিসিক রংথালগিবাখো রন·জক, উনা বিয়া থিং·থিংএ সেংএ দংআ, রংথালগিবা শাস্ত্রনি ইয়া খাৎথাখো না·সং বু·আ ইন্নে চানচিয়ামা? 6 ইন্দিবা ইসলনি খা·সাচাক্কা আরোসা বাত্তা। উনি গিম্মিন শাস্ত্রও চক্কা দংআ, “গাং·বিংগিবারাংখো ইসল চাংফেংআ, ইন্দিবা রিন্নকগিবারাংনা খা·সাচাক্কা।’’ 7 ইনি গিম্মিন ইসলনি নিং·আও বাম্মে দংবো। শয়তানখো চাংফেংবো উনোদে বিয়া না·সংখো ওয়াত্তে খাতনুয়া। 8 ইসলনি সেফাংওনা রি·য়াংবো, ইন্দাকোদে বিয়াবা না·সংনি সেফাংওনা রি·বানুয়া। পাপীরাং না·সংনি জাকথাংখো থাল্লেতবো। জাজাগিবা মান্দিরাং, না·সংনি খা·থংখো রংথালেতবো। 9 দুক দাকবো, গিসিকখো সা·দিকেতবো আরো গ্রাপবো। না·সংনি খা·দিংআখো ওয়াত্তে গিসিকখো সা·দিকেতবো আরো খুসি হং·আখো ওয়াত্তে দুক দাকরিমবো। 10 গিত্তেলনি মিকখাংও আন·থাংথাংখো বাম্মেতবো, ইন্দাকোদে বিয়ান না·সংখো দি·চানুয়া। 11 জংআদারাং, না·সং সাকসা সাকগিপ্পিননি নামগিজাখো জাচাএ দা·আ আগানা। সাবা জংআদাথাংনা চাকগিজা বিসংখো জাচাএ আগানোদে বা বিসংনি নামগিজাখো সান্দিওদে বিয়া নিয়ামরাংনা চাকগিজা খাৎথা আগানা আরো নিয়ামরাংনি নামগিজাখো সান্দিয়ে রি·য়া। নিয়ামরাংনি নামগিজাখো সান্দিওদে না·আ উখো মানিজা ইন্দিবা উনি বিচালখোসা দাক্কিংআ। 12 নিয়ামখো রন·গিবা আরো বিচাল দাকগিবা সাকসাসান দংআ। বিয়ান জক্কেৎনা আরো ব·ন্নেতনাবা মা·ন্না। ইন্দিবা সংসুল নকসুলনি দোসখো সান্দিগিবা না·আ সা? 13 না·সংনি গিসেপো সাবা সাবা ইন্নে দংআ, “দা·আল বা আম্বুনো চিংআ অমুক সংজিলমাচা রি·য়াংএ বিলসিসা দংবানুয়া আরো উনো বাদিংএ বাং·এ মান·দাপনুয়া।’’ 14 ইন্দিবা আম্বুনো মুয়া হং·নুয়া ইখোদে না·সং হা·আইজা। না·সংনি জাংগিবান মুয়া? না·সংদে গুরি গিত্তা দিকদিক সানাসান দংআ, জা·মানো গিম্মায়ে রি·য়াংআ। 15 উনাবাত্তে না·সংনি ইন্দাকে আগানান খ্রাআ, “গিত্তেল হা·সিকোদে, চিংআ থাংএ দংনুয়া আরো ইখো বা উখো দাকনুয়া।’’ 16 ইন্দাকগিজা ইখোন নিকনা মা·ন্নিংআ, না·সং গাং·বিংগিবা আরো রাসং চাগিবা হং·আ। ইন্দাকে রাসং দাক্কান নামজা। 17 ইন্দাকোদে নিকনা মা·ন্না, নাম্মা কামখো দাকনা হা·আইএবা উখো দাকজাওদে বিয়া পাপখো দাক্কা।

যাকোব 5

1 মা·ন্নে চা·গিবারাং, না·সং খিন্নাবো। না·সংনি সাক্কাও জে দুকরাং সকবাংজক উনা না·সং গ্রাপবো আরো মা·রিংবো। 2 না·সংনি গামজিনরাং নাসিজক আরো না·সংনি বা·রাচলারাংখোবা জ·ওংরাং রাতজক। 3 না·সংনি সোনা আরো রূপারাংখো মারাম চা·জক, আরো উয়া মারাম না·সংনি সাক্কাও সাক্ষি র·ন্নুয়া আরো ওয়া·আল গিত্তা না·সংনি বে·এনখো চা·এ গালনুয়া। ইয়া বন·খামগিবা সালরাংও না·সং গামজিনরাংখো চিম্মংজক। 4 না·সংনি হা·বাও জে গামগিবারাং মি রাত্তামিং না·সং বিসংনি বেতনখো রন·জা; আরো নিবো, উয়া গামগিবারাং চ্রিকে না·সংখো গ্রো নাংএতা। বিল্লাকস্রাংগিবা গিত্তেলনি নাচিলো গামগিবারাংনি চ্রিকা সক্কাংজক। 5 ইয়া হা·গিলসাকো না·সং নাম্মেন মাহা মাহা দাক্কে সালখো রি·য়াংএতজক আরো হা·সিকা রামরাম আন·থাংখো রি·দিলজক। স·ওতানি সালনা না·সং আন·থাংথাংখো মিল্লেতি দনজক। 6 দোসগ্রিরাংখো না·সং গ্রো নাংএতজক আরো স·ওতে গালজক, ইন্দিবা বিসং না·সংখো চাংফেংজাজক। 7 ইনি গিম্মিন জংআদারাং, গিত্তেলনি রি·বাখুজানা দিপ্পাৎ দিমদাকখো চাকচিকে সেংসোবো। হা·বানি গামচাৎগিবা মিরাংনা হা·বা উয়িগিবা বাদিকে দাক্কে সেংসোয়া আরো স্খাংগিবা আরো বন·খামগিবা মিকখানা সেংসোএ দংআ, উখো নিকজক? 8 না·সংবা উগিত্তান চাকচিকে সেংসোবো আরো খা·থংথাংখো থম·থমে রা·রিকবো, মুয়ানা গিত্তেল থেংরিন রি·বাংজক। 9 জংআদারাং, ইসল না·সংনি গ্রোখো রিম·জানা গিত্তা না·সং সাকসা সাকগিপ্পিননি গ্রোখো দা·আ রি·ম্মাবো। নিবো, বিচাল দাকগিবা দ·গাচিলনি সেফাংস্রাংও সকবাজক। 10 জংআদারাং, জে আগানসোগিবারাং গিত্তেলনি হং·এ খাৎথা আগানামিং, দুকনি সালো বাদিকে বিসং চাকচিকামিং উখো চানচিয়ে নিবো। 11 জেরাং চাকচিকে সেংসোজক বিসংখো আনচিং ফাত্তিয়া মান·গিবা ইন্না। না·সং ইয়োবনি চাকচিকানি খাৎথাখো খিন্নাজক আরো গিত্তেলনি কামরাংনি বন·চতগিবা বিথিরাং নাম্মা উখোবা নিকজক। গিত্তেল নাম্মেন খা·সাবিয়া আরো খা·সাচাক্কা। 12 আংনি জংআদারাং, আংআ মংসংদে ইয়া খাৎথাখো আগানা, না·সং সালগিসাক, হা·গিলসাক বা গিপ্পিন বস্তুরাংনি বিমুংও দা·আ মিকচেতা। বাত্তেসা না·সং হং·ওদে ‘হং·আ’, হং·জাওদে ‘হং·জা’ ইন্নে আগানবো জেদাক্কে না·সং বিচালও গ্রো নাংএ গা·আকজা। 13 না·সংও সাবা দুক মা·ন্নিংআমা? বিয়া বি·খানা। সাবা সুক মা·ন্নিংআমা? 14 বিয়া মিৎথেলে গীত রিং·খানা। সাবা সাআংআমা? বিয়া মন্ডলীনি দাল·বাৎগিবা মি·আফারাংখো রিক্কামখানা। বিসং গিত্তেলনি বিমুংও বিনি স্খুও তেলখো সিত্তে বিনা বি·খানা। 15 বিবিরা·এ বি·আনি গিম্মিন উয়া সাগিবা মান্দি নাম্মাংনুয়া; গিত্তেলান বিখো নাম্মেতনুয়া। আরো বিয়া পাপ দাক্কে দংওদে, ইসল বিখো ক্ষেমা দাকনুয়া। 16 ইনি গিম্মিন না·সং সাকসা সাকগিপ্পিনচা পাপথাংখো খু·রাচাকগ্রিকবো আরো সাকসা সাকগিপ্পিননা বি·গ্রিকবো, জেদাক্কে না·সং নাম্মাংনা মা·ন্না। ইসলনি হা·সিকা গিত্তা জেআন রি·য়া বিনি বি·আও বিল দংআ ইন্নে উয়া বিথি র·ন্না। 17 এলিয় আনচিং গিত্তান সাকসা মান্দিমিং। বিয়া মিকখা ওয়াজাখানা মল·মলে বি·আনি গিম্মিন বিলসি গিত্থাম জাদকনা দিপ্পাৎ হা·দকো মিকখা ওয়াজা। 18 উনি জা·মানো বিয়া দা·আবা বি·ফিলজক; উনোন সিলগাচানি মিকখা ওয়াবাজক আরো হা·বানি মিরাংবা নামজক। 19 আংনি জংআদারাং, না·সংনি গিসেপো সাবা বিবিওনি চে·ল্লাচানা জিত্তাংওদে আরো না·সংও সাবা বিখো রিমবাফিল্লোদে, 20 ইন্দাকোদে হা·আইএ দনবো- সাবা সাকসা পাপীখো ব্রাংগিবা রামানিখো রিমবাফিল্লোদে বিয়া বিখো সিয়ানিখো জক্কেতা আরো বাং·আ পাপরাংখো ফিনদাপে দন্নানি হং·আ।

১ পিতর 1

1 ইসলনি বাচ্ছিয়ে দনগিবা জে মান্দিরাং পন্ত, গালাতিয়া, কাপ্পাদকিয়া, এশিয়া আরো বিথুনিয়া হা·দকো গিপ্পাংএ হা·সং গিপ্পিননি মান্দি গিত্তা সংদংইংজক, বিসংচা আংআ যীশু খ্রীষ্টনি ওয়াত্তেতা পিতর ইয়া চিঠিখো চক্কিংজক। 2 আপফা ইসল বিনি চানচিসোআ গিত্তা না·সংখো বাচ্ছিয়ে রা·জক, আরো বিনান মিকসংএ গিসিক রংথালগিবা না·সংখো দিংথাং দাক্কে দনজক। ইনি মিকসংআ হং·জক, জেদাক্কে না·সং যীশু খ্রীষ্টখো মানিয়া আরো বিনি হান·চিখো গোসাত্তাচা না·সংখো রংথালেতানি হং·আ। ইসল না·সংনা বাং·এ খা·সাচাক্কাখো আরো থম·থমাখো রন·খানা। 3 আনচিংনি গিত্তেল যীশু খ্রীষ্টনি ইসল আরো ফাগিবানি রাসং হং·খানা। যীশু খ্রীষ্টখো সিয়াওনি থাংচাএতি ইসল বিনি বাং·বাত্তা খা·সাচাক্কাও আনচিংখো গিত্তাল দাক্কে আৎচিয়েতজক। উনি গিম্মিনো আনচিং গি·সা থাংগিবা খা·দংএতাখো মান·জক, 4 আগানস্খাওদে রি·বাগিবা চাসংও ইন্দাকগিবা গি·সা গামখো মা·ন্নানি খা·দংএতাখো আনচিং মান·জক জেআন মামুং সালোবা বন·জানুয়া, জেও নামগিজা মামুং দংজানুয়া আরো জেআন ফাংনাজলনা গিত্তাল দংনুয়া। ইয়া গাম না·সংনা সালগিও চিম্মংআ দংআ। 5 না·সং চু·গিম্মিক দাক্কে জক্কাখো মান·গিজানা দিপ্পাৎ ইসলনি বিলও বিবিরা·আও না·সংখো রাক্ষিয়ে দন্না হং·ইংজক। সাল বন·খামও ফারাকনা ইন্নে উয়া জক্কানিখো থারিয়ে দন্না হং·জক। 6 বাং·গিজা সালনা বাং·আ রুরাও দা·আও না·সংখো দুক মা·ন্না নাংইংজক, ইন্দাকোবা জক্কাখো মা·ন্না খা·দংএ না·সংনি গিসিক হান·সেংআও গাপ্পিংজক। 7 ইন্দাকা রুরাআ সকবা জেদাক্কে না·সংনি বিবিরা·আ খাকখেৎ ইখো নিকনা মা·ন্না, আরো উনি গিম্মিনো যীশু খ্রীষ্টনি ফারাকানি সালো না·সং মিৎথেলাখো, রাসংখো আরো মান্দিরা·আখো মা·ন্না। জে সোনা নাসিনুয়া উখোবা ওয়া·আলো সো·এ খাকখেৎ দাক্কে রা·আ; ইন্দিবা না·সংনি বিবিরা·আনি দামদে উয়া সোনানা বাত্তে আরোবা বাং·আ। 8 না·সং খ্রীষ্টখো নিকখুজা ইন্দাকোবা না·সং বিনা খা·সা; না·সং দা·আও বিখো নিকজাওবা না·সং বিখো বিবিরা·আংজক, আরো জে হান·সেংআখো খু·সুকচা আগান্না মান·জা আরো জে সালগিনি রাসংও গাপ্পা, উয়া হান·সেংআও না·সং হান·সেংইংজক; 9 মুয়ানা না·সংনি বিবিরা·আনি বন·খামগিবা বিথিখো না·সং মা·ন্না রি·য়াংইংজক, আরো উয়া হং·জক না·সংনি চু·গিম্মিক জাংগি জক্কা। 10 জে ফাত্তিয়াখো না·সংনি মা·ন্নানি খাৎথা দংআ উনি বিদিংও জে আগানসোগিবারাং স্খাংও আগানাংজক, বিসং ইয়া জক্কানি বিদিংখো হা·আইনা ইন্নে বাং·এ খবল রা·আমিং আরো সিং·রকামিং। 11 বিসংনি খা·থংও খ্রীষ্টনি গিসিক স্খাংআন সাক্ষি র·ন্নে আগানামিং, খ্রীষ্টখো দুক চাকনা নাংনুয়া আরো ইনি জা·মানো বিয়া রাসংখো মা·ন্নুয়া। আগানসোগিবারাং হা·আইনা হা·ম্মামিং খ্র্রীষ্টনি উয়া গিসিক বাগিবা সময় আরো বাদাকা অবস্থানি খাৎথাখো বিসংনা আগানিংআমিং। 12 ইন্দিবা ইসল বিসংনা ফিন্নিকে র·ন্নামিং, বিসং জে খাৎথারাংখো আগানিংআমিং উচা বিসং আন·থাংথাংনা দাকচাকগিজা না·সংনান দাকচাকে র·ন্নিংআমিং। সালগিওনি ওয়াত্তেতা গিসিক রংথালগিবানি রি·দিলাচা জেরাং না·সংচা খ্রীষ্টনি বিদিংও নাম্মা খাৎথাখো আগানফ্রাকজক বিসং আগানসোগিবারাংনি উয়া খাৎথারাংখোন না·সংনা হা·আইএতজক। আরোবা, সা·গ্রেরাংবা ইরাংনি বিদিংও হা·আইনা হা·সিকা। 13 ইনি গিম্মিন না·সংনি গিসিকখো মিকরাকেতবো আরো আন·থাংথাংখো বাম্মেতে দনবো। যীশু খ্রীষ্ট জেনসালো ফারাকনুয়া উনো না·সং জে ফাত্তিয়াখো মা·ন্নুয়া উয়া ফাত্তিয়াখো মা·ন্না চু·গিম্মিক খা·দংআখো রা·এ সেংসোবো। 14 ইসলনি নিং·আও বাম্মে দংগিবা বি·সা গিত্তা না·সং না·সংনি স্খাংনি নামগিজা হা·সিকা গিত্তা জাংগিখো দা·আ মিৎথাংআবো; উনোদে না·সং ইসলখো হা·আইজামিং। 15 উনা বাত্তে জেআন না·সংখো রিক্কামজক বিয়া জেগিত্তা রংথালা, না·সংবা না·সংনি গিম্মিক রিয়া·দোআও উগিত্তান রংথালবো। 16 রংথালগিবা শাস্ত্রও ইসল আগানজক, “আংআ রংথালা ইন্নে না·সংবা রংথালনা নাংনুয়া।” 17 ফাগিবা ইসল গিম্মিক মান্দিনি কামনি খ্রি বিনি বিচালখো দাক্কা, দারাংনি মিকখাংখো নিএ উখো দাকজা। ইনি গিম্মিন বিখো না·সং ফাগিবা ইন্নে রিক্কামোদে ইয়া হা·গিলসাকো জেওনা দিপ্পাৎ হা·সং গিপ্পিননি মান্দি গিত্তা দংআ উয়োনা দিপ্পাৎ বিনা খা·ফাকে খেন্নাও না·সংনি জাংগিখো মিৎথাংবো। 18 না·সং হা·আইয়া, জাংগিনি রামাও রি·না না·সংনি ফাগিৎচামরাংচাখো মান·গিবা নামগিজা বেওয়ালরাংওনি সোনা বা রূপা গিত্তা দাক্কে চা·ম্মে ব·ন্নাংগিবা মামুং জিনিসচা না·সংখো জক্কেৎজাজক; 19 না·সংখো জক্কেৎজক দোসগ্রি আরো খাকখেৎ মেষ-বি·সা যীশু খ্রীষ্টনি হান·চিচা। 20 হা·গিলসাক হং·না স্খাংআন ইসল ইনি গিম্মিন বিখো থিক দাক্কে দন্নামিং, ইন্দিবা ইয়া বন·চতা সময়ও না·সংনি গিম্মিনান বিয়া ফারাকজক। 21 ইসল বিখো সিয়াওনি থাংচাএতি রাসংখো রন·জক আরো বিওন না·সং ইসলখো বিবিরা·জক; আরো উনি গিম্মিনান না·সংনি বিবিরা·আ আরো খা·দংআ ইসলনি সাক্কাওন দংআ। 22 দা·আও বিবিখো মানিয়ে রা·এ না·সং না·সংনি খা·থংখো রংথালেতজক, আরো উনি গিম্মিন বিবিরা·গিবা জংআদারাং না·সংচা ইন্দাকফিল্লে খা·সাগিবা হং·আ। উনি গিম্মিন আগান্না, না·সং সাকসা সাকগিপ্পিনখো খা·থংচা নাম্মেন খা·সাবো। 23 জে বিৎচ্রি নাসিয়া ইন্দাকগিবা বিৎচ্রিওনি না·সং গিত্তাল দাক্কে আৎচিজা, বাত্তেসা জে বিৎচ্রি মামুং সালোবা নাসিজা উয়োনিন না·সং আৎচিয়া। উয়া বিৎচ্রি হং·জক ইসলনি থাংগিবা আরো ফাংনাজলনি খাৎথা। 24 রংথালগিবা শাস্ত্রও চক্কা দংআ, গিম্মিক মান্দি সামচেং গিত্তা, আরো সামচেংনি বিবাল গিত্তান বিসংনি গিম্মিক নিথুয়া; সামচেং সিক্রেপাংআ, আরো বিবালবা গা·আকাংআ, 25 ইন্দিবা গিত্তেলনি খাৎথা ফাংনাজলনা দংআ। আরো ইয়া খাৎথান উয়া নাম্মা খাৎথা, জেখো না·সংচা আগানফ্রাকা হং·জক।

১ পিতর 2

1 ইনি গিম্মিন গিপ্পিনরাংনি নামগিজাখো দাকনা গিম্মিক হা·সিকা, গিম্মিক বু·দাপা, বু·এ চা·আ, মিকনেংআ আরো গিম্মিক জিআনি খাৎথারাংখো না·সংনি খা·থংওনিখো হা·রিকেতবো। 2 দা·আও মা·মাং আৎচিজক ইন্দাকগিবা বি·সা গিত্তা না·সংনি গিসিকনি বাতরোরোআনি গিম্মিন খাকখেৎ সকচিখো মা·ন্না ইন্নে না·সং নাম্মেন হা·সিকমানচাবো, জেদাক্কে উচা বাতরোরোএ না·সং জক্কানি চু·সকাওনা সকনা মা·ন্না। 3 গিত্তেলনি খা·সাচাক্কাখোদে না·সং মান·জকান। 4 ইন্দাকগিবা গি·সা থাংগিবা রং·থি দংআ জেখো ইসল বাচ্ছিয়ে রা·জক আরো জেআন বিনি মিক্রোনও নাম্মেন গামচাতানি হং·আ, ইন্দিবা মান্দিরাং বিখো জেগালজক। খ্রীষ্টন হং·জক উয়া রং·থি; না·সং বিচা রি·বাজক ইন্নে থাংগিবা রং·থি গিত্তা দাক্কে না·সংখো রা·এবা ইসলনি দংআনি নকখো থারিয়া হং·ইংজক। উনি গিম্মিন খামাল গিত্তা ইসলনা না·সংখো দিংথাং দাক্কেতজক, জেদাক্কে না·সং ইন্দাকা গিসিকখো বলি র·ন্না জেআন যীশু খ্রীষ্ট গিত্তা ইসলনি রা·চাকনা খ্রাগিবা হং·আ। 6 রংথালগিবা শাস্ত্রও চক্কা দংআ, নিবো, গি·সা গামচাৎবিয়া রং·থিখো আংআ বাচ্ছিয়ে রা·জক; আরো উখো সিয়োননি নকসিকনি ফাংচাকানি রং·থি গিত্তা সংজক। জেআন বিখো বিবিরা·আ বিয়া মামুং দাক্কেবা খা·দংআগ্রি হং·জানুয়া। 7 ইনি গিম্মিন না·সং বিবিরা·জক ইন্নে না·সংচা উয়া রং·থি নাম্মেন গামচাৎগিবা হং·আ; ইন্দিবা জেরাং বিবিরা·জাজক বিসংনা শাস্ত্রনি ইয়া খাৎথা থিক হং·আ, নক রিকগিবারাং জে রং·থিখো দনগালজকমিং, উয়ান গিম্মিকনা বাত্তে নাংগিবা রং·থি হং·জক। 8 দা·আবা শাস্ত্রনি ইয়া খাৎথাবা খ্রাআ, উয়া ইন্দাকগিবা রং·থি হং·আ জেও মান্দিরাং জা·গিদত্তা চা·নুয়া, আরো জেআন মান্দিনি জা·গিদত্তা চা·আনি হা·সেল হং·নুয়া। মান্দিরাং ইসলনি খাৎথাখো মানিজা ইন্নেন জা·গিদত্তা চা·আ, আরো ইনি গিম্মিনান বিসং থিক হং·এ দংআ। 9 ইন্দিবা না·সংদে “বাচ্ছিগিবা মা·চং হং·জক; না·সংখো রা·এ খামালরাংনি সংনকখো রিকজক; না·সং ইসলনা মিংএ দিংথাং দাকগিবা জাত হং·আ আরো বিনি আন·থাংনি মান্দি হং·জক;” জেদাক্কে আন্দালাওনি না·সংখো জেআন বিনি আইয়াও ইনমানগিবা সেং·আও রিংগামে রা·বাজক না·সং বিখোন রাসং দাকবো। 10 সালসাদে না·সং ইসলনি মান্দি হং·জামিং, ইন্দিবা দা·আওদে হং·জক; সালসাদে না·সং খা·সাচাক্কাখো মান·জামিং, ইন্দিবা দা·আওদে মান·জক। 11 খা·সাগিবা রিপ্পেংরাং, ইয়া হা·গিলসাকো না·সং হা·সং গিপ্পিননি মান্দি হং·আ আরো হা·সং গিপ্পিনো বাং·গিজা সালনা সংদংগিবা ইন্নে আংআ না·সংখো মংসংবাত্তে মল·মলিংআ, না·সং পাপ-বেওয়ালনি হা·সিকারাংওনি চে·ল্লে দংবো, 12 মুয়ানা উরাং না·সংনি গিসিকনি সাক্কাও দাকগ্রিকা। ইসলখো জেরাং হা·আইজা বিসংনি গিসেপো না·সং নাম্মেদাক্কে রি·বো জেদাক্কে খ্রাগিজাখো দাকগিবা ইন্নে বিসং না·সংখো জিয়োবা না·সংনি নাম্মা কামরাংখো নিআ আরো বিচালনি সালো না·সংনি উয়া কামরাংনা ইসলখো রাসং দাক্কা। 13 না·সং গিত্তেলনি নিং·আও বাম্মে দংএ মান্দিনি সংগিবা শাসন দাকগিবারাংনি নিং·আও দংবো। সম্রাট গিম্মিকনি দাল·গিবা ইন্নে বিনি নিং·আও দংবো; 14 খ্রাগিজাখো দাকগিবারাংখো শাস্তি র·ন্না আরো জেরাং নাম্মা কামখো দাক্কা বিসংখো মিৎথেলনা সম্রাট জে শাসন দাকগিবারাংখো ওয়াত্তেতা বিসংনি নিং·আওবা দংবো। 15 ইসলনি হা·সিকা ইয়ান, জেদাক্কে না·সং নাম্মা কামখো দাক্কে জাদা মান্দিরাংনি বুদ্ধিগ্রি খাৎথারাংখো দনথংএতা। 16 জাকগিত্তেল মান্দি গিত্তা জাংগি মিৎথাংবো, ইন্দিবা নামগিজাখো ফিনদাপনা দা·আ উয়া জাকগিত্তেলখো জাকখালাবো। উনা বাত্তে ইসলনি নকখল হং·এ জাংগি মিৎথাংবো। 17 মান্দি গিম্মিকখো মান্দিরা·বো, না·সংনি বিবিরা·গিবা জংআদারাংনা খা·সাবো, ইসলখো অলাখিবো, সম্রাটখো মান্দিরা·বো। 18 নকনি নকখলরাং, না·সং না·সংনি নকগিবারাংখো মান্দিরা·এ বিসংনি নিং·আও দংবো। জে নকগিবারাং নামগিবা আরো খা·সাচাকগিবা হং·আ বিসংনি নিং·আওসান দংনুয়া ইন্দাকে হং·জা, ইন্দিবা জেরাং নামগিজাখো জাকখালা বিসংনি নিং·আওবা দংবো। 19 সাবা খ্রাগিজা দাক্কে দুক চাক্কোদে আরো ইসলখো গিসিক রা·এ উখো চাক্কোদে ইসলনি মিক্রোনও বিয়া মিৎথেলাখো মা·ন্না খ্রাগিবা হং·আ। 20 খ্রাগিজা কামনা দক্কা চা·এ না·সং উখো চাক্কোদে উনা রাসং দাক্কানি মুয়া দংআ? ইন্দিবা নাম্মা কামখো দাক্কেবা না·সং উনি হা·সেল দুক মা·ন্নে উখো চাক্কোদে, উয়ান ইসলনি মিক্রোনও মিৎথেলাখো মা·ন্না খ্রাআ হং·আ। 21 ইনি গিম্মিনান ইসল না·সংখো রিক্কামজক, মুয়ানা খ্রীষ্ট না·সংনা দুক চাক্কে না·সংচা দাক্কে ফিন্নিকাখো দন্নাংজক, জেদাক্কে না·সংবা বিগিত্তান রি·য়া, 22 জেআন মামুং পাপখো দাকখুজা বা জেনি খু·সুকো মামুং বু·আনি খাৎথা দংজামিং। 23 মান্দিরাং বিখো চন্নিকজক ইন্নে বিয়া বিসংখো ফি·ল্লে চন্নিকজাজক, আরো দুক চাক্কানি সময়ও নামগিজাখো দাকস্খানাবা খেন্নেতজামিং, বাত্তেসা জেআন খাকখেৎ বিচালখো দাক্কা বিনি জাক্কো বিয়া আন·থাংখো ফাকওয়াতামিং। 24 বিয়া চিসলনি সাক্কাও আন·থাংনি বে·এনো আনচিংনি পাপনি বোজাখো রিপ্পিএ রা·জক, জেদাক্কে আনচিং পাপনি দাবিরাংচা সিএ ইসলনি হা·সিকা গিত্তা রি·না ইন্নে থাংএ দংআ। বিনি বে·এননি মাত্তা না·সংখো নাম্মেতজক। 25 ব্রাংগিবা রামাচা রি·য়াংগিবা মেষ গিত্তা না·সংবা ব্রাংগিবা রামাচানা রি·য়াংআমিং, ইন্দিবা জে রাক্ষুয়াল না·সংনি খা·থংখো নিরকখিয়া না·সং বিচা রি·বাফিলজক।

১ পিতর 3

1 উয়ানদাক্কে না·সং জেরাং জিকগিবা হং·আ, না·সং গিম্মিকান সেগিবানি নিং·আও দংআখো মানিয়ে রা·বো, জেদাক্কে বিসংনি গিসেপো সাবা সাবা ইসলনি খাৎথাখো বিবিরা·জাওবা না·সংনি রি·য়া-দোআরাং খ্রীষ্টচানা বিসংখো সাল্লে রা·আ। ইনি হা·সেল না·সংনি মিংসা খাৎথাখোবা আগান্না নাংজানুয়া, 2 মুয়ানা বিসং আন·থাংথাংআন না·সংনি রংথালগিবা জাংগিখো আরো ইসলনা অলাখিয়াখো নিকনা মা·ন্নুয়া। 3 দিংথাং দিংথাং দাক্কে খিন্নি সাক্কা, গান্না-চিন্না বা নিথুয়া নিথুয়া বা·রা- ইন্দাকা হা·ফালনি গান্না-চিন্নাচা আন·থাংখো দা·আ সাজাইনা দাক্কাবো, 4 বাত্তেসা জেনি নিথুয়া ব·ন্নাংজানুয়া উয়া ন·ম্মা আরো থম·থম দাকগিবা গিসিক-বেওয়ালচা না·সংনি খা·থংখো সাজাইবো। ইসলনি মিক্রোনও উয়ান গামচাৎবিয়া। 5 চেংওনি ইসলখো অলাখিগিবা জে জিকগিবারাং ইসলনি সাক্কাও খা·দংনুয়ামিং বিসং আন·থাংথাংনি সেগিবানি নিং·আও দংএ ইন্দাকেন আন·থাংথাংখো সাজাইনুয়ামিং; 6 জেদাক্কে সারা অব্রাহামনি নিং·আও দংআমিং আরো বিখো গিত্তেল ইন্নে রিক্কামনুয়ামিং। না·সং খেন্নাখো আন·থাংনি সাক্কাও কাম দাকনা রন·গিজা জেখো নাম্মা উখোন দাক্কা ইন্দিদে ইখোন নিকনা মা·ন্নুয়া, না·সং সারানি খ্রাগিবা বি·সা হং·আ। 7 উয়ানদাক্কেন না·সং জেরাং সেগিবা হং·আ, না·সং বুদ্ধিখো জাকখালে জিকমুং দংখামবো। বিসং না·সংনি বিলগ্রিগিবা বাজু হং·আ, আরো বিসংবা না·সংমুং ইসলনি খা·সাচাক্কে রন·গিবা গিত্তা জাংগিখো মা·ন্নুয়া। উনি গিম্মিন বিসংখো মান্দিরা·বো জেদাক্কে না·সংনি বি·আও চাংফেংআখো মান·জা। 8 বন·চতাও আগান্না, না·সংনি গিম্মিকনি গিসিক আপসান হং·খানা। না·সং সাকসা সাকগিপ্পিননি দুকও দুক মান·ফাবো, জংআদা গিত্তা খা·সানি গিসিকখো রা·রিকবো আরো খা·সাচাকবো আরো সনথল হং·বো। 9 অন্যায়নি সাক্কাও দা·আ অন্যায় দাক্কাবো বা সাবা খা·চাওদে বিখো দা·আ খা·চাফিলাবো, বাত্তেসা বিসংনা ফাত্তিয়াখো হাম·বো; মুয়ানা ফাত্তিয়াখো মা·ন্না ইন্নেন ইসল না·সংখো রিক্কামজক। 10 রংথালগিবা শাস্ত্রও চক্কা দংআ, জেআন সুখনি জাংগিখো মিৎথাংনা হা·ম্মা আরো নামগিবা সালখো নিকনা খা·দংআ, নামগিজা খু·সুকওনি বিনি স্রিবাকখো, বু·আ খু·সুকওনি বিনি খু·চিলখো বিয়া থিক দনখানা। 11 নামগিজা কামওনি বিয়া চে·ল্লাচা দংখানা, আরো নাম্মা কামখো দাকখানা; থম·থমানা হা·সিকমানচাএ বিয়া বিখো জা·রিকাখো ওয়াতজাখানা। 12 জেরাং খাকখেৎনি রামাও রি·য়া বিসংনি সাক্কাও গিত্তেলনি মিক্রোন দংআ, বিসংনি বি·আখো খিন্নাচাকনা বিনি নাচিল সংআন দংআ; ইন্দিবা জেরাং নামগিজা কামখো দাক্কা, গিত্তেল বিসংনি সাক্কাও চাদেংআ। 13 নাম্মা কামখো দাকনা না·সংনি হা·সিকা দংওদে সা না·সংনি নামগিজাখো দাকনুয়া? 14 ইসলনি হা·সিকা গিত্তা রি·না রি·য়াংএ না·সংখো দুক চাকনাবা নাংওদে না·সং ফাত্তিয়াখো মান·গিবা হং·আ। জেরাং না·সংখো দুক র·ন্না বিসংনা না·সং দা·আ খেন্নাবো বা দুকনি সালো দা·আ জাজ্রেংআবো, 15 বাত্তেসা খ্রীষ্টখো না·সংনি খা·থংও গিত্তেল দাক্কে হা·দাম রন·বো। না·সংনি খা·দংআনি গিম্মিনো সাবা সিং·ওদে বিনা আগানচাকনা ফাংনান থারিয়ে দংসোবো, ইন্দিবা ইন্দাকে আগানচাক্কাখো সনথল দাক্কে আরো খা·ফাকে রন·বো। 16 না·সংনি গিসিকখো থাল্লে দনবো, জেদাক্কে খ্রীষ্টনি মান্দি গিত্তা না·সংনি নাম্মা দাকবেওয়ালরাংখো জেরাং জিআ বিসং না·সংখো জিজক ইন্নে খ্রাচা·আ। 17 নামগিজা কামখো দাক্কে দুক মা·ন্নানা বাত্তে ইসলনি হা·সিকাও নাম্মা কামখো দাক্কে দুক মা·ন্না নামবাতা। 18 খ্রীষ্টবা পাপনি গিম্মিনো রাং·সাসান সিয়ামিং। ইসলচা আনচিংখো রা·আংনা ইন্নে উয়া দোসগ্রি মান্দি পাপ দাকগিবারাংনি গিম্মিন, আগানস্খাওদে আনচিংনি গিম্মিন সিয়ামিং। বে·এনো বিখো দক্কে গাল্লামিং, ইন্দিবা গিসিকচা বিখো থাংচাএতামিং আরো বিয়া বন্দি দংগিবা গিসিকরাংচা রি·য়াংএ আগানফ্রাকামিং। 20 স্খাংও নোহনি উয়া জাহাস থারিয়ানি সময়ও ইসল জেনসালো চাকচিকে সেংসোআমিং উনো জেরাং বামগিজা হং·আমিং ইয়া গিসিকরাং বিসংনিন। উয়া জাহাসও গাখাতে মিত্তামরাং, আগানস্খাওদে সাকচেৎ উয়া চিওনি জক্কেতাখো মা·ন্নামিং। 21 ইয়া হং·জক রিপ্পলানি গি·সা ছবি দা·আও না·সংখো জেআন জক্কেতা। রিপ্পলা না·সংনি বে·এননিখো ময়লাখো থাল্লেতা ইন্দাকে হং·জা; ইসলচা ইয়া গি·সা রংথালা চানচিয়ানি হং·আ। যীশু খ্রীষ্টনি সিয়াওনি থাংচাএ চাখাতাচা না·সংখো জক্কেতানি হং·আ। 22 যীশু সালগিচা রি·য়াংজক আরো দা·আও ইসলনি জাক্রাচা আসংএ দংআ, আরো সালগিসাকনি সা·গ্রেরাং, বিলখো মান·রিকগিবারাং আরো শাসন দাকগিবারাং বিনি নিং·আও দংআ।

১ পিতর 4

1 উনি গিম্মিন খ্রীষ্ট বে·এনো দুকখো চাক্কামিং ইন্নে না·সংবা আন·থাংথাংনি খা·থংও উয়া আপসান গিসিকখো থারিবো, মুয়ানা বে·এনো জেআন দুকখো চাকজক বিয়া পাপখো ওয়াতজক। 2 উনি গিম্মিন ইয়া হা·গিলসাকনি থাংএ দংনাগিবা জাংগিখো বিয়া হা·গিলসাকনি নামগিজা হা·সিকারাংও হান·সেংএ মিৎথাংএতজা, বাত্তেসা ইসলনি হা·সিকাখো মানিয়েন রি·য়া। 3 জেরাং ইসলখো হা·আইজা বিসং গিত্তা না·সংবা স্খাংওদে নামজাস্রাংখো দাক্কে, নামগিজা হা·সিকারাংও দংএ, চু ফেক্কে, জেজাকবিয়ে চু রিংএ আরো চা·এ-রিংএ আরো মিৎচিয়ানি মিত্তে বিমাংখো হামুয়ে বাং·আ সময় রি·য়াংএতনুয়ামিং। 4 ইন্দিবা দা·আও উয়া মান্দিরাংআন নিক্কে আইয়াও ইনমানা, না·সং বিসংনি উয়া বিংবাং দাক্কাও দংফাজাংজক, আরো উনি গিম্মিন বিসং না·সংখো জাচাএ খাৎথা আগানা। 5 ইন্দিবা জেআন থাংগিবা আরো সিগিবা গিম্মিকনি বিচালখো দাকনা ইন্নে থারিয়ে দংসোজক বিচা বিসংনি হিসাব হ·ন্না নাংনুয়া। 6 সিগিবারাংচাবা উনি গিম্মিনান খ্রীষ্টনি বিদিংও নাম্মা খাৎথাখো আগানফ্রাকা হং·আমিং, জেদাক্কে বে·এনচাবাক্কানি মান্দি গিত্তান বিসংনি বিচাল হং·ওবা গিসিকো বিসং ইসল গিত্তা থাংএ দংনা মা·ন্না। 7 দা·আও গিম্মিকনি বন·খামগিবা সাল সেফাংজক। উনি গিম্মিন না·সংনি গিসিকখো খেম·খেম দনবো আরো আন·থাংথাংখো বাম্মেতে দনবো জেদাক্কে বি·না মা·ন্না। 8 আরো গিম্মিকনা বাত্তে দা·ল্লা খাৎথা হং·জক, না·সং সাকসা সাকগিপ্পিনখো নাম্মেন খা·সাবো, মুয়ানা খা·সাআ বাং·আ পাপখো ফিনদাপে দন্না। 9 মামুং মাংমেংআখো ফিন্নিকগিজা না·সং সাকসা সাকগিপ্পিনখো সকবাগিবা গিত্তা রা·চাকবো। 10 দিংথাং দিংথাং দাক্কে ফারাকা ইসলনি খা·সাচাক্কাখো মা·ন্নে জে মান্দি বিবিরা·না খ্রাগিবা দাক্কে উখো কাম দাক্কেতজক, উয়ানদাকগিবা মান্দি গিত্তা না·সং ইসলচাখো জেগিত্তা হন·চাকাখো মান·জক উখো সাকসা সাকগিপ্পিননা দাকচাকে হ·ন্না ইন্নে জাকখালবো। 11 সাবা আগানফ্রাকোদে ইন্দাকে আগানফ্রাকখানা জেদাক্কে বিয়া ইসলনি আন·থাংনি খু·সুকখো আগানিংআ। সাবা দাকচাকে হ·ন্নোদে ইসলনি হন·গিবা বিলচা বিয়া দাকচাকে হন·খানা, জেদাক্কে যীশু খ্রীষ্টও গিম্মিক গিত্তা ইসলান রাসংখো মা·ন্না। রাসং আরো বিল ফাংনাজলনা বিনিন হং·আ। আমেন। 12 খা·সাগিবা রিপ্পেংরাং, না·সংখো দা·আও ওয়া·আলনি রুরাআ গিত্তা রি·য়াংনা নাংইংজক ইন্নে উনি গিম্মিনো আইয়াও ইনমানে দা·আ চানচিয়াবো, না·সংনি সাক্কাও মামুং আইয়াও ইনমানানি হং·ইংআ। 13 উনা বাত্তে না·সং খ্রীষ্টনি দুক চাক্কানি বাকখো রা·ফাংজক উয়ো হান·সেংবো, জেদাক্কে বিনি রাসং জেনসালো ফারাকনুয়া উনো না·সং হান·সেংআও চু·সকা। 14 খ্রীষ্টনি গিম্মিন না·সং চন্নিকাখো মা·ন্নোদে না·সং ফাত্তিয়াখো মান·গিবা হং·আ, মুয়ানা ইসলনি রাসং গাপগিবা গিসিক না·সংনি সাক্কাও দংআ। 15 না·সংনি গিসেপো সাবা স·ওতে গালগিবা, চা·খক, খ্রাগিজাখো দাকগিবা হং·এ বা খ্রাগিজা দাক্কে গিপ্পিননি বিদিংও জাক র·ন্নে দুক চাকজাখানা। 16 ইন্দিবা খ্রীষ্টান হং·এ সাবা দুক চাক্কোদে খ্রাচা·জাখানা, বাত্তেসা বিনি উয়া বিমুং দংআ ইন্নে বিয়া ইসলখো রাসং দাকখানা। 17 বিচাল হং·আনি সাল সকজক আরো উয়া ইসলনি নকনি মান্দিরাংওনিন হং·বাচেংনুয়া। আরো উয়া বিচালখো আনচিংওনিন দাক্কোদে জেরাং ইসলনি হন·গিবা নাম্মা খাৎথাখো মানিয়ে রা·জাজক বিসংনি অবস্থা মুয়া হং·নুয়া? 18 শাস্ত্রও দংআ, ইসলখো অলাখিগিবা মান্দিনি জক্কাখো মা·ন্না ইন্দাকেন রাক্কোদে, জেরাং পাপ দাকগিবা আরো ইসলনা খা·ফাকাগ্রি হং·আ, বিসংনি অবস্থা মুয়া হং·নুয়া? 19 ইন্দাকোদে ইসলনি হা·সিকাচা জেরাং দুক চাক্কিংআ, বিসং বিসংনি বিবিরা·না খ্রাগিবা থারিয়েতগিবানি জাক্কো আন·থাংথাংখো ফাকওয়াতখানা আরো নাম্মা কামখো দাকখানা।

১ পিতর 5

1 আংআ খ্রীষ্টনি দুক চাক্কানি সাক্ষি আরো খ্রীষ্টনি জে রাসং ফারাকনুয়া উখো মান·ফাগিবা হং·আ। উনি গিম্মিন না·সংনি গিসেপো জেরাং মন্ডলীনি দা·ল্লা-রাক্কা হং·আ বিসংনা আংআ দা·আও সাকসা দাল·গিবা গিত্তা ইখো স্খিয়েতিংজক- 2 না·সংনি গিসেপো ইসলনি জে মেষনি দল দংআ না·সং বিসংনি রাক্ষুয়াল হং·বো। নিরকখিনা নাংনুয়া ইন্নে বিসংখো নিরকনুয়া ইন্দাকে হং·জা, বাত্তেসা আন·থাংনি হা·সিকাওন উখো দাকবো, মুয়ানা ইসল না·সংচাখো ইখোন হা·ম্মা। মান·দাপনা খা·দংএ ইয়া কামখো দা·আ দাক্কাবো, ইন্দিবা হা·সিকমানচাএ দাকবো; 3 না·সংনি নিং·আও জেরাং দংআ বিসংনি সাক্কাও দা·আ গিত্তেল হং·আবো, বাত্তেসা ইন্দাকগিবা হং·বো জেদাক্কে না·সংখো নিক্কে বিসং স্খিনা মা·ন্না। 4 ইন্দাকোদে জেনসালো দাল·গিবা রাক্ষুয়াল মিকখাং ফা·নুয়া উনো হাম্মানি মালা গিত্তা বিনি রাসংখো মান·ফাগিবা হং·নুয়া, আরো উয়া মামুং সালোবা নাসিজানুয়া। 5 উয়ানদাক্কে ফান্থিরাং, না·সং দাল·গিবারাংনি নিং·আও দংবো। না·সং গিম্মিকান রিন্নকে সাকসা সাকগিপ্পিননা দাকচাকে রন·বো, মুয়ানা রংথালগিবা শাস্ত্রনি খাৎথা গিত্তা, “ইসল গাং·বিংগিবারাংনি সাক্কাও চাদেংআ, ইন্দিবা রিন্নকগিবারাংনা খা·সাচাক্কা।” 6 উনি গিম্মিন ইসলনি বিলনি মিকখাংও আন·থাংথাংখো হন·দিমেতবো, জেদাক্কে থিক সময়ও বিয়া না·সংখো চু·য়াকেতা। 7 না·সংনি গিম্মিক চানচিয়ারাংখো বিনি সাক্কাও গালবো, মুয়ানা বিয়া না·সংনি গিম্মিনো চানচিয়া। 8 আন·থাংথাংখো বাম্মেতে দনবো আরো সিমসাকে দংবো, মুয়ানা না·সংনি বোবিল শয়তান গাম·গিবা সিংহ গিত্তা দাক্কে সাখো চা·এ গালনুয়া উখো সান্দিয়ে রমিংজক। 9 বিবিরা·আও খেম·খেমে দংএ শয়তানখো চাংফেংবো, মুয়ানা না·সংদে হাআইয়া, হা·গিলসাক গিম্মিকো না·সংনি বিবিরা·গিবা জংআদারাং আপসান দুকরাংখো চাক্কিংজক। 10 জেআন গিম্মিক গিত্তা খা·সাচাক্কানি ইসল বিয়া বিনি ফাংনাজলনি রাসংখো মান·ফানা না·সংখো রিক্কামজক, মুয়ানা খ্রীষ্টমুং না·সং নাংরিমজক। না·সং বাং·গিজা সালনা দুকখো চাক্কানি জা·মানো ইসল আন·থাংআন না·সংখো চু·সকেতনুয়া আরো খেম·খেম দন্নুয়া, বিলখো র·ন্নুয়া আরো রাকগিবা ফাংচাকানি সাক্কাও না·সংখো চাদেংএতনুয়া। 11 বিনি বিল ফাংনাজলনা দংখানা। আমেন। 12 সীলবান, জেখো আংআ আংনি বিবিরা·না খ্রাগিবা জং ইন্নে চানচিয়া, বিনি জাকচা ইয়া চিঠিখো আংআ অকখিসা খু·সুকচা না·সংনা চকজক, জেদাক্কে আংআ না·সংখো খা·দংএতনা মা·ন্না আরো ইসলনি চং·মত খা·সাচাক্কানি সাক্ষিখো র·ন্না মা·ন্না। না·সং ইসলনি ইয়া খা·সাচাক্কাও খেম·খেমে দংবো। 13 ইসল না·সংমুং জেরাংখো বাচ্ছিয়ে রা·জক বাবিলনি উয়া মন্ডলীনি মান্দিরাং না·সংনা সালাম র·ন্নিংআ, আরো আংনি বি·সা মার্কবা না·সংনা সালাম র·ন্নিংআ। 14 খা·সানি গিসিকখো রা·এ না·সং সাকসা সাকগিপ্পিননা সালাম রন·বো। না·সং জেরাং খ্রীষ্টনি আন·থাংনি হং·জক, না·সংনি থম·থমা হং·খানা।

২ পিতর 1

1 আংআ শিমোন-পিতর যীশু খ্রীষ্টনি সাকসা নকখল আরো ওয়াত্তেতা হং·আ। আনচিংনি ইসল আরো জক্কেতগিবা যীশু খ্রীষ্ট খাকখেৎগিবা হং·আ, আরো উনি গিম্মিন না·সংবা চিংনি গিত্তান আপসান বিবিরা·আখো মান·জক। ইনি গিম্মিন আংআ না·সংনা ইয়া চিঠিখো চক্কিংজক। 2 ইসল আরো আনচিংনি গিত্তেল যীশুখো নাম্মেদাক্কে হা·আইয়াচা না·সংনি সাক্কাও খা·সাচাক্কা আরো থম·থমা দংখানা। 3 জেআন বিনি রাসং আরো বিনি গুণচা আনচিংখো রিক্কামজক, বিখো নাম্মেদাক্কে হা·আইয়াচান বিনি ইসলনি বিল ইন্দাকাখো রন·জক জেচা আনচিং ইসলনা খা·ফাকে জাংগি মিৎথাংনা মা·ন্না। 4 বিয়া আন·থাংনি রাসংও আরো গুণচা আনচিংচা গামচাৎবিয়া আরো দাল·বাতাখো খু·রাচাকজক। ইনি মিকসংআ হং·জক, মান্দিনি নামগিজা হা·সিকানি হা·সেল হা·গিলসাকো জে নামজাস্রাং চিম্মংজক উয়োনি না·সং জক্কেতাখো মা·ন্নে জেদাক্কে ইসলনি গিসিক-বেওয়ালখো মান·ফাগিবা হং·আ। 5 ইনি গিম্মিন নাম্মেন খা·দংএ না·সংনি বিবিরা·আমুং নাম্মা গিসিক-বেওয়াল, নাম্মা গিসিক-বেওয়ালমুং হা·আইয়া, 6 হা·আইয়ামুং আন·থাংখো বাম্মেতা আরো আন·থাংখো বাম্মেতামুং চাকচিকা, চাকচিকামুং ইসলনা খা·ফাকা, 7 খা·ফাকামুং জংআদানা খা·সা আরো উয়া খা·সামুং আরোবা নাম্মেমানচা খা·সানি গিসিকখো দনফাবো। 8 না·সংনি ইয়া গুণরাং দংওদে আরো উয়া গাপসুয়াকফিল্লেন দংওদে, ইন্দাকোদে আনচিংনি গিত্তেল যীশু খ্রীষ্টখো নাম্মেন হা·আইয়ানি কামও না·সং বিথিগ্রি হং·জানুয়া। 9 জে মান্দিনি নিং·আও ইয়া গুণরাং দংজা বিয়া বাং·এ চে·ল্লে নিকনা মান·জা, বিয়া মিকগ্রি। বিখো বিনি স্খাংনি পাপওনি রংথালেতজক উখো বিয়া গুয়ালজক। 10 ইনি গিম্মিন জংআদারাং, ইসল বিবিন না·সংখো রিক্কামজক আরো বাচ্ছিয়ে রা·জক উখো হং·বিবিএতনা আরোবা বাং·এ হা·সিকমানচাবো। ইন্দাকে দাক্কোদে না·সং মামুং সালোবা জা·গিদত্তা চা·জানুয়া। 11 ইনি গিম্মিন আনচিংনি গিত্তেল আরো জক্কেৎগিবা যীশু খ্রীষ্টনি সংনকও না·সংখো হা·সিকমানচাএ রা·চাকনুয়া। 12 ইনি গিম্মিনান আংআ ফাংনান ইয়া বিদিংরাংখো না·সংখো গিসিক রা·এতিংজক। না·সং ইরাংখো হা·আইয়ান আরো জে বিবি না·সংনি খা·থংও দংআ উয়ো খেম·খেমেবা দংআ। 13 ইন্দিবা আংআ চানচিয়া, জেওনা দিপ্পাৎ আংআ ইয়া তাম্বু গিত্তা বে·এনো থাংএ দংনুয়া উয়োনা দিপ্পাৎ ইয়া বিদিংরাংখো গিসিক রা·এতে না·সংখো মিকরাকেতে দন্না আংনি খ্রাআনি হং·আ; 14 মুয়ানা আংআ বাং·এ ইয়া বে·এনো দংজানুয়া ইখো আনচিংনি গিত্তেল যীশু আংনা আগানজক। 15 আংনি সিয়ানি জা·মানোবা জেদাক্কে না·সং ইরাংখো গিসিক রা·আ, আংআ উনি গান্দা দাকনা নাম্মেন খ্রেংনুয়া। 16 আনচিংনি গিত্তেল যীশু খ্রীষ্টনি বিল আরো বিনি রি·বাখো না·সংচা আগান্না রি·য়াংএ চিংআ মামুং বানাইগিবা গল্পখো আগানজা; চিংআ বিনি রাসংখো আন·থাংনি মিক্রোনোন নিকজক। 17 “ইয়ান আংনি খা·সাগিবা দেফান্থি, বিনি সাক্কাও আংআ খুসি হং·বিয়া,” সালগিওনি আগানা ইয়া খাৎথাচা খ্রীষ্ট ফাগিবা ইসলচাখো মান্দিরা·আ আরো রাসংখো মা·ন্নামিং। 18 চিংআ বিমুং উয়া রংথালগিবা হা·ব্রিচা দংআমিং উনো সালগিওনি আগানা ইয়া খাৎথারাংখো খিন্নামিং। 19 শাস্ত্রও আগানসোগিবারাং জেখো আগানজক উখো চিংচা বিবি ইন্নে ফিন্নিকা হং·জক। আন্দালাও না·সংনি মিক্রোন জেদাক্কে চাক্কিচানা দংআ উয়ানদাক্কেন জেওনা দিপ্পাৎ ওয়ালসেং·জা আরো না·সংনি খা·থংও ফ্রিংনি আস্কি নাবাজা উয়োনা দিপ্পাৎ আগানসোগিবারাংনি খাৎথাও গিসিক র·ন্নোদে না·সংনা নাম্মা। 20 ইন্দিদে গিম্মিকনা স্খাং ইয়া খাৎথাখো গিসিকো রা·রিকবো, শাস্ত্রও দংগিবা মামুং খাৎথা আগানসোগিবারাংনি গিসিকথাংও থারিগিবা খাৎথা হং·জা, 21 মুয়ানা আগানসোগিবারাং বিসংনি হা·সিকা গিত্তা মামুং খাৎথাখো আগানজা; গিসিক রংথালগিবানি রি·দিলাচান বিসং ইসলনি রন·গিবা খাৎথাখো আগানজক।

২ পিতর 2

1 ইন্দিবা ইস্রায়েলরাংনি গিসেপো জেদাক্কে বু·এ চা·গিবা আগানসোগিবা দংআমিং উয়ানদাক্কে না·সংনি গিসেপোবা বু·এ চা·গিবা স্খিগিবা দংনুয়া। বিসং স্রক দাক্কে ইন্দাকা ব্রাংআ স্খিয়াখো রা·বানুয়া জেআন মান্দিখো ব·ন্নেতনুয়া; আরোবা, জেআন বিসংখো ব্রিজক উয়া গিত্তেলখোবা জেগালনুয়া। ইন্দাকে দাক্কে বিসং থেংরিন আন·থাংথাংখো ব·ন্নেতনুয়া। 2 বাং·এন বিসংখো নিক্কে নামজাস্রাং হং·নুয়া। বিসংনি হা·সেলান মান্দিরাং বিবিনি রামাখো জিনুয়া। 3 মাদ্দুএ বু·আনি খাৎথাখো আগানে বিসং আন·থাংথাংনি মান·দাপানি গিম্মিন না·সংখো কাম দাক্কেতনুয়া। বিসংনি শাস্তি স্খাংওনিন বিসংনি সাক্কাও দংআ, আরো বিসংনি ব·ন্নাদে হারিমজাজক। 4 সা·গ্রেরাং জেনসালো পাপ দাক্কামিং উনো ইসল বিসংখো ওয়াতজাজক বাত্তেসা নরকনি আন্দালগিবা হা·খলো গাল্লে বিচালনা দনজক। 5 আরো বিয়া গিৎচাম হা·গিলসাকখোবা ওয়াতজাজক, বাত্তেসা ইসলনা খা·ফাকাগ্রি মান্দিরাংনি সাক্কাও চি দা·ল্লাখো রা·বামিং; ইন্দিবা নোহ আরো গিপ্পিন সাকস্নিখো বিয়া রাক্ষিয়ামিং। ইয়া নোহ ইসলখো অলাখিয়ানি গিম্মিনো আগানফ্রাকনুয়ামিং। 6 সদোম আরো ঘমোরা সংজিলমাখো ওয়া·আলচা ব·ন্নেতি ইসল উয়া সংজিলমানি মান্দিরাংখো শাস্তি র·ন্নামিং, জেরাং ইসলখো অলাখিজা বিসংনি অবস্থা মুয়া হং·নুয়া; 7 ইন্দিবা লোটখো বিয়া রাক্ষিয়ামিং। লোট ইসলখো অলাখিগিবা মান্দি হং·আমিং। উনি নিয়ামখো মানিগিজাগিবা মান্দিরাংনি নামগিজানা বিয়া দুক মা·ন্নুয়ামিং। 8 ইসলখো অলাখিগিবা উয়া মান্দি বিসংনি গিসেপো দংখামে বিসংনি কামখো নিনুয়ামিং আরো বিসংনি খাৎথাখো খিন্নানুয়ামিং, আরো নিয়ামনি সাক্কাও বিসংনি কাম দাক্কাখো নিএ বিনি ইসলনা অলাখিয়ানি খা·থংও নাম্মেন দুকখো মা·ন্নুয়ামিং। 9 ইরাংওনি ইখো নিকনা মা·ন্না, জেরাং গিত্তেলখো অলাখিয়া বিসংখো বিয়া রুরাওনি জক্কেৎনা হা·আইয়া। ইনাআগ্রেবা জেরাং অলাখিগিবা হং·জা, মংসংদাক্কে জেরাং বিসংনি পাপ-বেওয়ালনি নামগিজা হা·সিকা গিত্তা রি·য়া আরো শাসনখো চন্নিকা বিয়া বিসংনা শাস্তি মান·খানা বিচালনি সালোনা দিপ্পাৎ দন্নাবা হা·আইয়া। ইয়া বু·এ চা·গিবা স্খিগিবারাং নাম্মেন খেনগিজাগিবা হং·আ। বিসং আন·থাংনি হা·সিকা গিত্তা রি·য়া আরো সালগিসাকনি রাসংখো মান·গিবারাংনি সাক্কাও চন্নিকানি খাৎথাখো আগান্না খেনজা; 11 সা·গ্রেরাং বিলও দাল·বাতোবা গিত্তেলচা বিসংনি গিম্মিনো ইন্দাকা মামুং নালিশ দাকজা জেও চন্নিকানি খাৎথা দংআ। 12 ইন্দিবা বুদ্ধিগ্রি জে জাংগিগ্মাংগিবারাং বিসংনি হা·সিকানি নিং·আও আরো রি·ম্মে স·ওতে গালনা ইন্নেন জেরাং আৎচিয়া, ইয়া বু·এ চা·গিবা স্খিগিবারাং বিসং গিত্তান হং·আ। বিসং জেখো হা·আইজা উনি বিদিংও নামগিজা খাৎথা আগানা। আন·থাংনি নামগিজাওন বিসং ব·ন্নাংনুয়া। 13 বিসংনি নামগিজা কামনি মা·ন্না গিত্তা বিসং দুকখো চাকনুয়া। ইয়া মান্দিরাং সালো চা·গ্রিম-রিংগ্রিমাও জেজাকে চু রিংএ হান·সেংআখো মা·ন্না। জেনসালো বিসং না·সংমুং চা·না আসংফা উনো জেজাকে চু রিংরিরিকে বিসংনি নামগিজা হা·সিকাও বিসং উয়া চা·আ-রিংআনি গিসেপো খ্রাচা·আ আরো মান্দিরা·গিজানিখো রা·বাআ। 14 বিসংনি মিক্রোন থি·ল্লেকাও গাপ্পা আরো বিসং পাপ দাক্কাখো দনথংজা। গিসিক খেম·খেম দংগিজাগিবারাংখো বিসং মাদ্দুএতি ব্রাংগিবা রামাচানা রিম্মাংআ। বিসংনি খা·থং মাদ্দুনাসান ্লিংআ। বিসংনি সাক্কাও শাপ দংআ। বিসং স্রংআ রামাখো দন্নে ব্রাংআ রামাচা রি·য়াংজক। 15 বিসং বিয়োরনি দেফান্থি বিলিয়মনি রামাখো রিম·জক। বিলিয়ম নামগিজা কামনি বকসিসখো মা·ন্না হা·ম্মামিং, 16 ইন্দিবা বিনি নামগিজা কামনা বিয়া মাংসা আব্রা গাধাচাখো খা·চাখো চা·আমিং। উয়া গাধা মান্দি গিত্তা খু·সুক আগানে বিনি খোরে চাআও চাংফেংআমিং। 17 ইয়া মান্দিরাং রা·ন্না চিমিক গিত্তা আরো থারাকগিবা বালওয়ানা বালফ্রংগিবা রিপ্পম চি গিত্তা হং·আ। নাম্মেন আন্দালাখো বিসংনা চিম্মংএ দন্না। 18 বিসং সেল·গিজা আরো দাল·বিয়া খু·সুকখো আগানা আরো মান্দিনি পাপ-বেওয়ালনি নামগিজা হা·সিকাখো মিকরাকেতি বিসং ইন্দাকা মান্দিরাংখো ব্রাংআ রামাচা রা·আংআ জেরাং খ্রাগিজাও দংখামগিবা মান্দিরাংওনি হং·খাতে রি·বানি রামাও দংআমিং। 19 উয়া বু·এ চা·গিবা স্খিগিবারাং উয়া মান্দিরাংনা জাকগিত্তেলখো র·ন্না খু·রাচাক্কোবা, ইন্দিবা আন·থাংথাংদে নামজাস্রাং কামনি নকখল হং·আ; মুয়ানা সাবা মামুংও হামজাওদে বিয়া উনি নকখল হং·আ। 20 আনচিংনি গিত্তেল আরো জক্কেৎগিবা যীশু খ্রীষ্টখো নাম্মে হা·আইয়ানি গিম্মিন হা·গিলসাকনি নামগিজাওনি খাত্তাংএবা জেনসালো বিসং দা·আবা উয়া আপসান নামগিজাও গা·আকা উয়ো হামজাজক, উনো বিসংনি অবস্থা স্খাংনি অবস্থানা বাত্তেবা নামজাজক। 21 বিসং নাম্মা কামনি রামাখো হা·আইওবা জে রংথালগিবা গি·য়েতাখো বিসংনা র·ন্নামিং উখো বিসং জেগালামিং। ইন্দাকা অবস্থাও বিসংনা থিক রামাখো হা·আইজান নাম্মা। 22 বিসংনি গিম্মিনো ইয়া আগানজ্রিংগিবা খাৎথা বিবি হং·জক, “আছাক আন·থাংনি ওয়াকগাল্লাচাবাক্কা নিফিলা,” আরো “ওয়াকখো হাবুএতোবা উয়া হা·দুবেকও থুরিমরিমা।”

২ পিতর 3

1 খা·সাগিবা জংআদারাং, না·সংচা ইয়ান আংনি গ্মিগিবা চিঠি। গি·গ্মি চিঠিওন আংআ না·সংখো মিত্তাম বিদিংরাংখো গিসিক রা·এতি না·সংনি খাকখেৎ গিসিকখো সিমসাকেতনা হাম·জক। 2 রংথালগিবা আগানসোগিবারাং জে খাৎথারাংখো আগানাংজক উরাংখো আরো না·সংনি ওয়াত্তেতারাংচা আনচিংনি গিত্তেল আরো জক্কেৎগিবা জেখো গি·য়েতি দন্নাংজক, আংআ হা·ম্মা জেদাক্কে না·সং উখো গিসিক রা·আ। 3 স্খাং ইয়া খাৎথাখো গিসিক রা·বো, নাম্মা বিদিংখো রা·এ জেরাং খা·দিংস্থেকনা নামনিকা বিসং বন·খামওনা রি·বাএ খা·দিংস্থেকনুয়ান। বিসং আন·থাংনি হা·সিকা গিত্তান রি·নুয়া, 4 আরো আগান্নুয়া, “বিয়া রি·বানা খু·রাচাক্কামিং উনি মুয়া হং·জক? হা·গিলসাক হং·চেংওনি জেগিত্তা রি·য়ামিং উগিত্তান আনচিংনি ফাগিৎচামরাংনি সিয়ানি জা·মানো গিম্মিক উয়া আপসান দাক্কে রি·ইংজক।” 5 ইয়া মান্দিরাং হা·সিকেন গুয়ালিংআ, স্খাংও ইসলনি খাৎথাচা সিলগাসাক হং·আমিং আরো চিচা আরো চিওনি হা·গিলসাকবা হং·আমিং। 6 উয়োনি হা·গিলসাকদে চি দা·ল্লানা ব·ন্নাংজকমিং। 7 আরো ইসলনি উয়া আপসান খাৎথাচান দা·আওনি সালগিসাক আরো হা·গিলসাকখো ওয়া·আলো সো·এ গালনা দনজক; ইসলনা খা·ফাকগিজা মান্দিরাংনি বিচাল আরো ব·ন্নাংআনি সালনা সক্কে উখো রাক্ষিয়া হং·ইংজক। 8 ইন্দিবা খা·সাগিবা জংআদারাং, ইয়া খাৎথাখোদে দা·আ গুয়ালাবো, গিত্তেলচা সালসাদে বিলসি হাজালসা গিত্তা হং·আ আরো বিলসি হাজালসাদে সালসা গিত্তা হং·আ। 9 সাবা সাবা চানচিয়া গিত্তেল বিনি খু·রাচাক্কাখো চু·সকেতনা হারিমিংজক, ইন্দিবা উয়াদে হং·জা। চং·মতদে বিয়া না·সংনা চাকচিকিংজক, মুয়ানা সাবা ব·ন্নাংখানা ইখো বিয়া হাম·জা, বাত্তেসা গিম্মিকান জেদাক্কে পাপওনি গিসিক ফি·ল্লা ইখোন বিয়া হা·ম্মা। 10 ইন্দিবা গিত্তেলনি সাল চা·খক গিত্তা সকবানুয়া। উনি সালো সালগিসাক ব·ন্নাংনুয়া আরো জাজং-সাল-আস্কি গিম্মিকান খাম্মে ব·ন্নাংনুয়া। হা·গিলসাক আরো উনি গিসেপো জেরাং দংআ উয়া গিম্মিকান খাম্মাংনুয়া। 11 গিম্মিক ইন্দাকে ব·ন্নাংনা রি·য়াংইংজক ইন্নে না·সংনি বাদাকগিবা মান্দি হং·না খ্রাআমিং? হা·সিকমানচাএ ইসলনি সালনা নিচাকসোএ না·সং রংথালে আরো ইসলনা খা·ফাকে জাংগি মিৎথাংনা নাংআ। উনি সালো সালগিসাক খামতে খামতে ব·ন্নাংনুয়া আরো জাজং-সাল-আস্কি ওয়া·আলো গলিনুয়া। 13 ইন্দিবা আনচিং ইসলনি খু·রাচাক্কা গিত্তা গিত্তাল সিলগা আরো গিত্তাল হা·গিলসাকনা নিচাকসোংআ। উয়ো গিম্মিক ইসলনি হা·সিকা গিত্তা হং·নুয়া। 14 খা·সাগিবা জংআদারাং, না·সং দা·আও ইরাংনা সেংএ দংআ ইন্নে জাংগিগাল্লে খ্রেংবো জেদাক্কে বিয়া রি·বাএ না·সংখো খাকখেৎ হং·এ দোসগ্রি অবস্থাও থম·থমে দংআখো নিকনা মা·ন্না। 15 গিসিকো রা·রিকবো, মান্দিখো পাপওনি জক্কেতাখো মা·ন্না চলখো র·ন্না আনচিংনি গিত্তেল চাকচিকে দংআ। ইয়া আপসান খাৎথাখো আনচিংনি খা·সাগিবা জংআদা পৌলবা ইসলনি রন·গিবা হা·আইয়াচা না·সংনা চকজক। 16 বিনি গিম্মিক চিঠিওন বিয়া ইন্দাকা বিদিংরাংনি গিম্মিনো ইয়া আপসান খাৎথাখোন চক্কা। উরাংনি গিসেপো মিত্তাম বিদিংরাং দংআ জেখো হা·আইনা রাক্কা। উনি গিম্মিন জেরাং জা·রিকগিবা হং·আনি স্খিয়াখো মান·জাজক আরো জেরাংনি গিসিক জাব্রাংআ বিসং দিংথাং শাস্ত্র গিত্তা ইরাংনি অর্থখোবা থাল্লে আগানগিজা আন·থাংথাংনি ব·ন্নাংআনিখো রিক্কামে রা·বাআ। 17 খা·সাগিবা জংআদারাং, না·সং ইয়া খাৎথাখো স্খাংআন হা·আইনা মান·জক ইন্নে সিমসাকবো, জেদাক্কে ইন্দাকা বিংবাং মান্দিরাংনি ব্রাংআচা না·সংখো ব্রাংএতজাখানা, আরো না·সংনি গিসিকনি খেম·খেমাওনি না·সং জিত্তাংজা। 18 না·সং আনচিংনি গিত্তেল আরো জক্কেৎগিবা যীশু খ্রীষ্টনি খা·সাচাক্কাও আরো বিনি বিদিংও হা·আইয়াচা দাল·রোরোআংবো। দা·আও আরো ফাংনাজলনা দিপ্পাৎ বিনিন রাসং হং·খানা। আমেন। ॥ভব

১ যোহন 1

1 স্খাংওনিন জেআন দংআমিং, জেনি খু·সুকনি খাৎথাখো চিংআ খিন্নাজক, জেখো মিক্রোনথাংচা নিকজক, জেখো নাম্মেদাক্কে নিজক, জেখো জাকথাংচা দাংথাপজক, ইনো উয়া থাংগিবা খাৎথাখোন চক্কিংজক। 2 উয়া জাংগি ফারাকামিং। চিংআ বিখো নিকজক আরো বিনি গিম্মিনো সাক্ষি হ·ন্নিংজক। জেআন ফাগিবাচা দংআমিং আরো চিংচা ফারাকামিং উয়া ফাংনাজলনি জাংগিনি খাৎথাখোন না·সংনা আগানিংজক। 3 জেখো চিংআ নিকজক আরো জেনি খু·সুকনি খাৎথাখো চিংআ খিন্নাজক বিনি গিম্মিনোন না·সংনা আগানিংআ। চিংআ উখো আগানিংজক জেদাক্কে না·সংমুং আরো চিংমুং নাংরিমানি হং·আ। ইয়া নাংরিমা ফাগিবা আরো বিনি দেফান্থি যীশু খ্রীষ্ট আরো আনচিংনি গিসেপো হং·আ। 4 চিংনি হান·সেংআ জেদাক্কে চু·গিম্মিক হং·আ উনি গিম্মিনান চিংআ ইরাংখো চক্কিংআ। 5 জে খাৎথাখো চিংআ যীশু খ্রীষ্টচাখো খিন্নাএ না·সংনা আগানিংআ উয়া ইয়ান-ইসল সেং·আ; বিও আন্দালানি মামুংআন দংজা। 6 আনচিং ইন্দাকে আগানোদে, ইসলমুং আরো চিংমুং নাংরিমা দংআ ইন্দাকোবা আন্দালাও রি·ওদে ইন্দিদে আনচিং বু·আখো আগানিংজক, বিবিনি রামাও রি·জাংজক। 7 ইন্দিবা ইসল জেদাক্কে সেং·আও দংআ আনচিংবা উয়ানদাক্কে সেং·আও রি·ওদে আনচিংনি গিসেপো নাংরিমা দংআ আরো বিনি দেফান্থি যীশুনি হান·চি গিম্মিক পাপওনি আনচিংখো রংথালেতা। 8 আনচিংও পাপ দংজা ইন্নে আনচিং আগানোদে আনচিং আন·থাংথাংখো থগিয়া। উনি গিম্মিন ইখোন হা·আইনা মা·ন্না, আনচিংনি খা·থংও ইসলনি বিবি দংজা। 9 আনচিং আনচিংনি পাপখো খু·রাচাক্কোদে বিয়া উনোন আনচিংনি পাপখো ক্ষেমা দাক্কা আরো গিম্মিক খ্রাগিজাওনিখো আনচিংখো রংথালেতা, মুয়ানা বিয়া ফাংচাকনা খ্রাগিবা আরো মামুং সালোবা খ্রাগিজাখো দাকজা। 10 আনচিং পাপ দাকজা ইখো আগানোদে বিখো বু·এ চা·গিবা ইন্নে আগানানি হং·আ, আরো বিনি খাৎথা আনচিংনি খা·থংও দংজা।

১ যোহন 2

1 আংনি খা·সাগিবা বি·সারাং, না·সং জেদাক্কে পাপ দাকজা উনি গিম্মিনান আংআ না·সংচা ইয়া খাৎথারাংখো চক্কিংআ। সাবা পাপ দাক্কেন দংওদে ফাগিবাচা আনচিংনা চাক্কে খাৎথা আগানানি সাকসা দংআ; বিয়া যীশু খ্রীষ্ট, জেআন দোসগ্রি হং·আ। 2 আনচিংনি পাপখো হা·রিকনা ইন্নে খ্রীষ্ট বিনি আন·থাংনি জাংগিখো হন·চাকে ইসলখো খুসি দাকজক। আনচিংনি পাপসান হং·জা, ইন্দিবা গিম্মিক মান্দিনি পাপখো হা·রিকনা বিয়া উখো দাকজক। 3 বিনি গিম্মিক গি·য়েতাখো আনচিং মানিয়ে রি·ওদে আনচিং ইখো খাকখেৎ দাক্কে হা·আইয়া, আনচিং বিখো হা·আইনা মান·জক। 4 জেআন আগানা, “আংআ বিখো হা·আইয়া,” ইন্দিবা বিনি গি·য়েতাখো মানিজা বিয়া বু·গিবা হং·আ; বিও বিবি দংজা। 5 ইন্দিবা জেআন বিনি খাৎথাখো মানিয়া বিও ইসলনি খা·সা বিবিন চু·সকজক। সাবা আগানোদে বিয়া খ্রীষ্টও দংআ ইন্দিদে খ্রীষ্ট জেগিত্তা রি·য়ামিং উগিত্তা বিয়াবা রি·না নাংআ। ইচান আনচিং হা·আইনা মা·ন্না, আনচিং বিমুং নাংরিমে দংআ। 7 খা·সাগিবা বি·সারাং, আংআ না·সংচা গিত্তাল গি·য়েতানি খাৎথাখো চকজাংআ, বাত্তেসা স্খাংওনিন জে গি·য়েতা দংআমিং উখোন চক্কিংআ। না·সং জে খাৎথাখো স্খাংও খিন্নাজক উয়ান উয়া গিৎচাম গি·য়েতা। 8 ইন্দিদে ইয়া জে গি·য়েতানি খাৎথাখো দা·আও আংআ না·সংচা চক্কিংআ উয়া গিৎচাম হং·ওবা গিত্তাল। ইয়া গি·য়েতানি বিবিখো যীশু খ্রীষ্টও আরো না·সংনি জাংগিও নিকনা মান·জক, মুয়ানা আন্দালা গিম্মাংজক আরো উয়া চং·মত সেং·আ দা·আও চিং·ইংআ। 9 জে মান্দি আগানা বিয়া সেং·আও দংআ ইন্দাকোবা বিনি জংআদাখো মিৎচিয়া বিয়া দা·আওবা আন্দালাওন দংখুআ। 10 জেআন বিনি জংআদানা খা·সা বিয়া সেং·আও দংআ আরো বিনি ইয়ো জা·গিদত্তানি মামুং হা·সেল দংজা। 11 ইন্দিবা জেআন বিনি জংআদানা মিৎচিয়া বিয়া আন্দালাও দংআ আরো আন্দালাওন রি·ইংজক। বিয়া হা·আইজা বিয়া বাচ্চা রি·য়াংইংআ, মুয়ানা আন্দালা বিনি মিক্রোনখো মিকগ্রি দাক্কেতজক। 12 বি·সারাং, খ্রীষ্টনি গিম্মিন না·সংনি পাপখো ক্ষেমা দাকজক ইন্নেন আংআ না·সংচা চক্কিংজক। 13 ফাগিবারাং, উয়া স্খাংওনিন জেআন দংআ না·সং বিখো হা·আইজক ইন্নেন না·সংচা চক্কিংজক। ফান্থিরাং, শয়তাননি সাক্কাও না·সং হামজক ইন্নেন না·সংচা চক্কিংজক। 14 বি·সারাং, আংআ না·সংচা চকজক, মুয়ানা না·সং ফাগিবা ইসলখো হা·আইয়া। ফাগিবারাং, আংআ না·সংচা চকজক, মুয়ানা উয়া স্খাংওনিন জেআন দংআ না·সং বিখো হা·আইজক। ফান্থিরাং, আংআ না·সংচা চকজক, মুয়ানা না·সং বিল্লাকগিবা হং·আ আরো ইসলনি খাৎথা না·সংনি খা·থংও দংআ, আরো না·সং শয়তাননি সাক্কাও হামজক। 15 না·সং হা·গিলসাক আরো হা·গিলসাকনি মামুংখোবা দা·আ নামনিকাবো। সাবা হা·গিলসাকনা খা·সাওদে বিয়া ফাগিবানা খা·সাজা, 16 মুয়ানা হা·গিলসাকো জেরাং দংআ- বে·এননি হা·সিকা, মিক্রোননি মাদ্দুয়া আরো নকদাংনি বিদিংও গাং·বিংআ-ইরাং মামুংআন ফাগিবাওনি রি·বাজা, হা·গিলসাকওনিন রি·বাআ। 17 হা·গিলসাক আরো হা·গিলসাকনি নামগিজা হা·সিকারাং ব·ন্নাংইংজক, ইন্দিবা ইসলনি হা·সিকাখো জেআন মানিয়া বিয়া ফাংনাজলনা দংনুয়া। 18 বি·সারাং, ইয়ান বন·চতা সময় হং·আ। না·সংদে খিন্নাজক, খ্রীষ্টনি বোবিল রি·বাংজক, ইন্দিবা বিনি আরোবা বাং·আ বোবিলরাং রি·বাএ গালজক। উনি গিম্মিন আনচিং হা·আইনা মা·ন্নিংআ, ইয়ান বন·চতা সময় হং·আ। 19 খ্র্রীষ্টনি ইয়া বোবিলরাং আনচিংওনি হং·খাতজক। বিসং আনচিংনি মান্দি হং·জামিং। বিসং আনচিংনিন হং·ওদে আনচিংমুংআন দংনুয়ামিং, ইন্দিবা বিসং হং·খাতে রি·য়াংজক ইন্নে হা·আইনা মা·ন্নিংআ, বিসং সাকসাবা আনচিংনি হং·জা। 20 না·সং উয়া রংথালগিবাচাখো তেল সিত্তাখো মান·জক, আগানস্খাওদে গিসিক রংথালগিবাখো মান·জক আরো না·সং গিম্মিকান বিবিখো হা·আইনা মান·জক। 21 বিবিখো হা·আইজা ইন্নে আংআ না·সংনা চকজক ইন্দাকে হং·জা, ইন্দিবা না·সং বিবিখো হা·আইয়া আরো ইখোবা হা·আইয়া, বিবিওনি বু·আ রি·বাজা; আরো উনি গিম্মিনান আংআ না·সংনা চকজক। 22 জেআন আগানা, যীশুদে খ্রীষ্ট হং·জা, বিয়া বু·এ চা·গিবানি আগ্রে মুয়াবা হং·আ? ফাগিবা আরো দেফান্থিখো জেআন জেগালা বিয়ান খ্রীষ্টনি বোবিল হং·আ। 23 দেফান্থিখো জেআন জেগালা বিমুং ফাগিবানি মামুং নাংরিমা দংজা, ইন্দিবা দেফান্থিখো জেআন খু·রাচাক্কা বিমুং ফাগিবানিবা নাংরিমা দংআ। 24 স্খাংওনি না·সং জেখো খিন্নাএ রি·বাংজক উয়া না·সংনি খা·থংও দংখানা। স্খাংওনি না·সং জেখো খিন্নাএ রি·বাংজক উয়া না·সংনি খা·থংও দংওদে না·সং দেফান্থি আরো ফাগিবামুং নাংরিমে দংনুয়া। 25 ইয়ান হং·জক ফাংনাজলনি জাংগি, জেখো খ্রীষ্ট আনচিংনা হ·ন্না খু·রাচাকজক। 26 জেরাং না·সংখো ব্রাংগিবা রামাচানা রা·আংনা হা·ম্মিংআ বিসংনি গিম্মিনো আংআ না·সংচা ইরাংখো চকজক। 27 ইন্দিবা না·সং খ্রীষ্টচাখো তেল সিত্তাখো মান·জক, আগানস্খাওদে গিসিক রংথালগিবাখো মান·জক। বিয়া না·সংনি খা·থংও দংআ। ইনি গিম্মিন গিপ্পিননি স্খিয়া না·সংনা নাংজানুয়া। গিম্মিকনি বিদিংও গিসিক রংথালগিবান না·সংনা স্খিয়াখো হ·ন্নিংজক। বিয়া বিবি, বু·আ হং·জা। উনি গিম্মিনান বিয়া জেদাক্কে না·সংখো খ্রীষ্টও দংনা স্খিয়েতা উয়ানদাক্কেন খ্রীষ্টও দংবো। 28 বি·সারাং, উনি গিম্মিন আগানিংজক, না·সং খ্রীষ্টওন দংখামবো জেদাক্কে বিয়া জেনসালো ফারাকনুয়া উনো আনচিং খা·সোকা আরো বিয়া জেনসালো রি·বানুয়া উনো বিনি মিকখাংও আনচিংনি খ্রাচা·না নাংজা। 29 বিয়া মামুং সালোবা খ্রাগিজাখো দাকজা ইখো না·সং হা·আইওদে, ইখোবা হা·আইএ রা·রিকবো- জেরাং খ্রাগিবা কামও আন·থাংথাংখো বিমচিপে দন্না, ইসলওনিন বিসং আৎচিয়া।

১ যোহন 3

1 নিবো, আপফা ইসল আনচিংনা বাসিক খা·সাআ! বিয়া আনচিংখো বিনি দেদ্রাং ইন্নে রিক্কামা, আরো চং·মতদে আনচিং উয়ান। ইনি গিম্মিন হা·গিলসাক আনচিংখো হা·আইজা, মুয়ানা হা·গিলসাক ইসলখোবা হা·আইজাজক। 2 খা·সাগিবা বি·সারাং, দা·আও আনচিং ইসলনি দেদ্রাং হং·আ, ইন্দিবা জা·মানো মুয়া হং·নুয়া উখো দা·আওবা ফারাকখুজা। ইন্দিদে আনচিং হা·আইয়া, খ্রীষ্ট জেনসালো ফারাকনুয়া উনো আনচিং বিগিত্তান হং·নুয়া, মুয়ানা বিয়া আদতে জেগিত্তা হং·আ, উয়া বিমাংওন আনচিং বিখো নিকনা মা·ন্নুয়া। 3 জেআন খ্রীষ্টনি সাক্কাও ইন্দাকে খা·দংআখো দন্না বিয়া আন·থাংখো খাকখেৎ দাক্কা জেদাক্কে খ্রীষ্ট খাকখেৎ হং·আ। 4 জেরাং পাপ দাক্কা বিসং ইসলনি খাৎথাখো মানিজা। ইসলনি খাৎথাখো মানিগিজান হং·জক পাপ। 5 না·সংদে হা·আইয়া, আনচিংনি পাপখো হা·রিকনা ইন্নেন খ্রীষ্ট ফারাকামিং। খ্রীষ্টও মামুং পাপ দংজা। জেরাং খ্রীষ্টও দংআ বিসং পাপও গা·আকে দংজা। 6 জেরাং পাপও গা·আকে দংআ বিসং খ্রীষ্টখো নিকবা নিকখুজা আরো হা·আইবা হা·আইখুজা। 7 বি·সারাং, সাবা না·সংখো ব্রাংগিবা রামাচা রিম্মাংজাখানা। খ্রীষ্ট খ্রাগিজাখো দাকজা, আরো জেআন খ্রাগিবা কামও আন·থাংখো বিমচিপে দন্না বিয়াবা খ্রাগিজাখো দাকজা। 8 জেআন পাপ দাক্কেন দংআরিয়া বিয়া শয়তাননি হং·আ, মুয়ানা শয়তান স্খাংওনিন পাপ দাক্কে রি·বাংজক। শয়তাননি কামখো ব·ন্নেতনা ইন্নেন ইসলনি দেফান্থি ফারাকামিং। 9 ইসলওনি জেআন আৎচিজক বিয়া পাপও গা·আকজা, মুয়ানা ইসলনি গিসিক-বেওয়াল বিচা দংআ। ইসলওনি আৎচিজক ইন্নে বিয়া পাপও গা·আকে দংনা মান·জা। 10 জেরাং খ্রাগিবা কামও আন·থাংথাংখো বিমচিপে দনজা আরো জংআদানা খা·সাজা, বিসং ইসলনি হং·জা। ইয়োন নিকনা মা·ন্না, সারাং ইসলনি দেদ্রাং হং·আ আরো সারাংবা শয়তাননি দেদ্রাং হং·আ। 11 জে খাৎথাখো না·সং স্খাংওনি খিন্নাএ রি·বাংজক উয়া ইয়ান- আনচিং সাকসা সাকগিপ্পিননা খা·সানা নাংআ। 12 উনি গিম্মিন আংআ আগানিংজক, আনচিং জেদাক্কে কয়িন গিত্তা হং·জা। কয়িন শয়তাননি মান্দিমিং আরো বিনি জংখো বিয়া স·ওতামিং। মুয়ানা বিয়া বিখো স·ওতামিং? মুয়ানা বিয়া নামগিজা কামখো দাকনুয়ামিং, আরো বিনি জংগিবা খ্রাগিবা কামখো দাকনুয়ামিং। 13 জংআদারাং, হা·গিলসাকনি মান্দিরাং না·সংনা মিৎচিয়োদে উনা দা·আ আইয়াও ইনমানাবো। 14 আনচিং জংআদারাংনা খা·সা ইন্নেন হা·আইনা মা·ন্নিংজক, আনচিং সিয়াওনি জাংগিওনা বাত্তে রি·বাজক। জেরাং খা·সাজা বিসং সিয়াও দংআ। 15 জংআদানা জেআন মিৎচিয়া বিয়া স·ওতগিবা হং·আ। সাকসা স·ওতগিবানি ফাংনাজলনি জাংগি দংজা, উখো না·সং হা·আইয়ান। 16 খ্রীষ্ট আনচিংনা আন·থাংনি জাংগিখো হন·চাকামিং, উনি গিম্মিন খা·সাআ মুয়া উখো আনচিং হা·আইনা মান·জক। ইন্দাকোদে আনচিংবা জংআদারাংনা আন·থাংনি জাংগিখো হন·চাকনা নাংআ। 17 ইয়া হা·গিলসাকো চা·এ থাংএ দংআনি অবস্থা জেনি দংআ, বিয়া বিনি জংআদানি চা·আ-রিংআনি দংগিজাখো নিক্কেবা মিক্রোন মিকচিপে দন্নোদে বাদিকে দাক্কে বিনি খা·থংও ইসলনা খা·সা দংনা মা·ন্না? 18 বি·সারাং, আনচিং জেদাক্কে খু·সুকনাসান খা·সাখো ফিন্নিকগিজা কামচা চং·মত খা·সাখো ফিন্নিকা। 19 ইনি হা·সেল আনচিং হা·আইনা মা·ন্নুয়া, আনচিং বিবিনি হং·আ। ইনাআগ্রেবা মামুংনি বিদিংও আনচিংনি খা·থং আনচিংখো দোস হ·ন্নোদে ইসলনি মিকখাংও আনচিংনি খা·থংখো আনচিং খা·নাম্মেতনা মা·ন্নুয়া। ইসল আনচিংনি খা·থংনা বাত্তেবা দাল·বাতা আরো বিয়া গিম্মিকখোন হা·আইয়া। 21 খা·সাগিবা বি·সারাং, আনচিংনি খা·থং আনচিংখো দোস হন·জাওদে ইসলনি মিকখাংও আনচিং খা·সকনুয়া। 22 উনি গিম্মিন আনচিং জেখো হাম·নুয়া উখো বিচানিখো মা·ন্নুয়া, মুয়ানা বিয়া জে গি·য়েতারাংখো হন·জক উরাংখো আনচিং মানিয়া আরো বিয়া জে কামও খুসি হং·আ আনচিং উখোন দাক্কা। 23 বিনি গি·য়েতা ইয়ান-আনচিং জেদাক্কে বিনি দেফান্থি যীশু খ্রীষ্টখো বিবিরা·আ আরো সাকসা সাকগিপ্পিননা খা·সাআ। ইয়া গি·য়েতাখোন বিয়া আনচিংনা হন·জক। 24 বিনি গি·য়েতাখো জেআন মানিয়া বিয়া বিও দংআ আরো বিয়াবা বিমুং দংআ। জে গিসিক রংথালগিবাখো বিয়া আনচিংনা হন·জক উয়া গিসিক রংথালগিবাচা আনচিং হা·আইনা মা·ন্না, বিয়া আনচিংনি খা·থংও দংআ।

১ যোহন 4

1 খা·সাগিবা বি·সারাং, না·সং গিম্মিক গিসিকখো দা·আ বিবিরা·আ; বাত্তেসা বিসং ইসলওনি রি·বামা রি·বাজা উখো থিকখেলে নিবো, মুয়ানা হা·গিলসাকো বু·এ চা·গিবা আগানসোগিবারাং বাং·এ হং·খাতজক। 2 ইসলনি গিসিকখো না·সং ইন্দাকে হা·আইনা মা·ন্নুয়া- জে গিসিক খু·রাচাক্কা যীশু খ্রীষ্ট মান্দি হং·এ রি·বামিং উয়া গিসিকান ইসলওনি রি·বাআ; 3 ইন্দিবা জে গিসিক ইয়া যীশুখো জিচাকা গিসিক ইসলওনি রি·বাজা। ইয়া উয়া খ্রীষ্টনি বোবিলনি গিসিক। উয়া গিসিক রি·বাংজক উখোদে না·সং খিন্নাজক, আরো আদতে উয়া গিসিক দা·আওন হা·গিলসাকো দংআ। 4 ইন্দিবা বি·সারাং, না·সং ইসলনি। না·সং উয়া বু·এ চা·গিবারাংনি সাক্কাও হামজক, মুয়ানা ইয়া হা·গিলসাকো জেআন দংআ, উনা বাত্তে জেআন না·সংনি খা·থংও দংআ বিয়া দাল·বাতা। 5 উয়া দাক্কামব্রুগিবারাং ইয়া হা·গিলসাকনি হং·আ; উনি গিম্মিন বিসং ইয়া হা·গিলসাকনি খাৎথাখো আগানা আরো হা·গিলসাক বিসংনি খাৎথাখো খিন্নাআ। 6 আনচিং ইসলনি; জেআন ইসলখো হা·আইয়া বিয়া আনচিংনি খাৎথাখো খিন্নাআ, ইন্দিবা জেআন ইসলনি হং·জা বিয়া আনচিংনি খাৎথাখো খিন্নাজা। ইরাংচান আনচিং বিবিনি গিসিক আরো দাক্কামব্রুআনি গিসিকখো হা·আইনা মা·ন্না। 7 খা·সাগিবা বি·সারাং, আনচিং জেদাক্কে সাকসা সাকগিপ্পিননা খা·সাআ, মুয়ানা খা·সাআ ইসলওনিন রি·বাআ। জেরাংনি খা·থংও খা·সা দংআ, ইসলওনিন বিসং আৎচিয়া আরো বিসং ইসলখো হা·আইয়া। 8 জেরাংনি খা·থংও খা·সা দংজা বিসং ইসলখো হা·আইজা, মুয়ানা ইসল আন·থাংআন খা·সা হং·আ। 9 আনচিংনা ইসলনি খা·সা ইন্দাকে ফারাকজক- বিয়া বিনি সাকসা খাম·খাম দেফান্থিখো ইয়া হা·গিলসাকো ওয়াত্তেতামিং জেদাক্কে আনচিং বিচা জাংগিখো মা·ন্না। 10 আনচিং ইসলনা খা·সামিং ইন্দাকে হং·জা, ইন্দিবা বিয়া আনচিংনা খা·সাএ বিনি দেফান্থিখো ওয়াত্তেতামিং, জেদাক্কে দেফান্থি বিনি আন·থাংনি জাংগিখো হন·চাকাচা আনচিংনি পাপখো হা·রিকেতি ইসলখো খুসি দাক্কা। ইয়ান হং·জক খা·সা। 11 খা·সাগিবা বি·সারাং, ইসল ইন্দাকে আনচিংনা খা·সাজক ইন্নে আনচিংনিবা সাকসা সাকগিপ্পিনখো খা·সানা নাংআ। 12 দারাংবা মামুং সালোবা ইসলখো নিকখুজা। আনচিং সাকসা সাকগিপ্পিননা খা·সাওদে হা·আইনা মা·ন্নুয়া, ইসল আনচিংনি খা·থংও দংআ আরো বিনি খা·সা আনচিংনি খা·থংও চু·গিম্মিক দাক্কে কাম দাক্কিংজক। 13 বিনি গিসিকখো বিয়া আনচিংনা হন·জক, আরো ইচান আনচিং হা·আইনা মা·ন্না, আনচিং বিও দংআ আরো বিয়াবা আনচিংনি খা·থংও দংআ। 14 চিংআ নিকজক আরো সাক্ষি হ·ন্নিংজক, ফাগিবা দেফান্থিখো মান্দিনি জক্কেৎগিবা দাক্কে ওয়াত্তেতামিং। 15 যীশু ইসলনি দেফান্থি ইন্নে সাকফ্রাকান খু·রাচাক্কা, ইসল বিও দংআ আরো বিয়াবা ইসলও দংআ। 16 ইসল আনচিংনা খা·সা ইখো আনচিং হা·আইয়া, আরো বিনি খা·সানি সাক্কাও আনচিংনি বিবিরা·আ দংআ। ইসল আন·থাংআন খা·সা হং·আ। খা·সাও জেআন দংআ বিয়া ইসলওন দংআ আরো ইসল বিও দংআ। 17 ইন্দাকেন খা·সা আনচিংনি খা·থংও চু·সকা, জেদাক্কে বিচালনি সালো আনচিং খা·সোকা, মুয়ানা ইয়া হা·গিলসাকো আনচিংনি জাংগি বিনিন জাংগি গিত্তা হং·আ। 18 ইয়া খা·সাও খেন্না দংজা, বাত্তেসা চু·সকগিবা খা·সা খেন্নাখো হা·রিকেতা, মুয়ানা খেন্নামুং শাস্তিনি চানচিয়া দংফাআ। জেআন খেন্না বিয়া খা·সাও চু·সকাখো মান·খুজা। 19 বিয়া আনচিংখো স্খাং খা·সামিং ইন্নেন আনচিং খা·সা। 20 জেআন আগানা বিয়া ইসলনা খা·সা ইন্দাকোবা বিনি জংআদাখো মিৎচিয়া বিয়া বু·এ চা·গিবা, মুয়ানা মিক্রোনও নিক্কা জংআদানা জেআন খা·সাজা বিয়া নিকগিজা ইসলনা বাদিকে দাক্কে খা·সানা মা·ন্না? 21 আনচিং বিচানিখো ইন্দাকা গি·য়েতাখো মান·জক, ইসলখো জেরাং খা·সা বিসং জেদাক্কে জংআদানাবা খা·সা।

১ যোহন 5

1 জেরাং বিবিরা·আ যীশুআন উয়া খ্রীষ্ট হং·আ, ইসলওনিন বিসং আৎচিয়া। জেরাং আপফানা খা·সা বিসং বিনি বি·সানাবা খা·সা। 2 আনচিং ইসলনা খা·সা আরো বিনি গি·য়েতাখো মানিয়া ইন্নে ইখো হা·আইয়া, ইসলনি বি·সারাংনাবা আনচিং খা·সা। 3 ইসলনি গি·য়েতাখো মানিয়ান ইসলনা খা·সা হং·আ। বিনি গি·য়েতা চ্রিমা বোজা গিত্তা হং·জা, 4 মুয়ানা ইসলনি সাকফ্রাক বি·সা হা·গিলসাকখো হাম্মা। হা·গিলসাকনি সাক্কাও হাম্মা হং·জক আনচিংনি বিবিরা·আ। 5 জেরাং বিবিরা·আ যীশু ইসলনি দেফান্থি হং·আ, বিসংসান হা·গিলসাকখো হাম্মা। 6 ইয়ান যীশু খ্রীষ্ট, জেআন চি আরো হান·চি গিত্তা রি·বামিং। চিচাসান হং·জা, ইন্দিবা চি আরো হান·চিচা রি·বামিং। গিসিক রংথালগিবা ইনি বিদিংও সাক্ষি হ·ন্না, মুয়ানা বিয়া আন·থাংআন বিবি হং·আ। 7 গিসিক রংথালগিবা, চি আরো হান·চি- ইয়া গি·গিত্থামচা উয়া সাক্ষি রি·বাআ আরো উয়া গি·গিত্থামনি সাক্ষি আপসান হং·আ। 9 আনচিং মান্দিনি সাক্ষিখো রা·চাকা, ইন্দিবা ইসলনি সাক্ষি উনা বাত্তেবা দাল·বাতা; আরো বিয়া বিনি দেফান্থিনি বিদিংও উয়া সাক্ষিখো হন·জক। 10 ইসলনি দেফান্থিখো জেআন বিবিরা·আ বিনি খা·থংও উয়া সাক্ষি দংআ। জেরাং ইসলখো বিবিরা·জা বিসং বিখো বু·এ আগানগিবা থারিজক, মুয়ানা ইসল বিনি দেফান্থিনি বিদিংও জে সাক্ষিখো হন·জক উখো বিসং বিবিরা·জাজক। 11 উয়া সাক্ষি ইয়ান, ইসল আনচিংনা ফাংনাজলনি জাংগিখো হন·জক আরো উয়া জাংগি বিনি দেফান্থিও দংআ। 12 ইসলনি দেফান্থিখো জেআন মান·জক বিয়া উয়া জাংগিখোবা মান·জক; ইন্দিবা ইসলনি দেফান্থিখো জেআন মান·জাজক বিয়া উয়া জাংগিখোবা মান·জাজক। 13 না·সং জেরাং ইসলনি দেফান্থিখো বিবিরা·আ, না·সংচা আংআ ইরাংখো চকজক জেদাক্কে না·সং হা·আইনা মা·ন্না, না·সং ফাংনাজলনি জাংগিখো মান·জক। 14 ইসলনি সাক্কাও আনচিংনি দংআ, বিনি হা·সিকা গিত্তা আনচিং মামুংখো হা·ম্মোদে বিয়া আনচিংনি খাৎথাখো খিন্নাআ। 15 আনচিং ইন্দাকে হা·আইওদে আনচিং জেখো হা·ম্মা উখো বিয়া খিন্নাআ ইন্দিদে ইখোবা হা·আইয়া, আনচিং বিচানিখো জেখো হা·ম্মা উখো আনচিং মান·জক। 16 সাবা বিনি জংআদাখো ইন্দাকফিল্লে পাপ দাক্কাখো নিক্কোদে জেআন সিনা গিত্তা হং·জা, ইন্দিদে বিয়া ইসলচা হাম·নুয়া আরো উনা বিয়া বিখো থাংএতি দন্নুয়া। আংআ ইয়ো বিসংনি খাৎথাখোন আগানিংজক জেরাং পাপ দাক্কিংআ ইন্দাকোবা বিসংনি পাপ সিনা গিত্তা হং·জা। ইন্দিবা সিনা গিত্তা পাপবা দংআ। উনি গিম্মিনো মল·মলখানা আংআ না·সংখো আগানজা। 17 দিমদাক অন্যায়আন পাপ হং·আ, ইন্দিদে দিমদাক পাপ সিনা গিত্তা হং·জা। 18 আনচিং হা·আইয়া, ইসলওনি জেআন আৎচিজক বিয়া পাপও গা·আকে দংজা। জেআন ইসলওনি আৎচিয়ামিং বিয়ান বিখো রাক্ষিয়া, আরো শয়তান বিখো রিম·না মান·জা। 19 আনচিং হা·আইয়া আনচিং ইসলনি হং·আ, আরো হা·গিলসাক দিমদাক শয়তাননি বিলনি নিং·আও গা·আকে দংআ। 20 আনচিং আরোবা হা·আইয়া, ইসলনি দেফান্থি রি·বাএ আনচিংনা হা·আইয়ানি বিলখো হন·জক জেদাক্কে বিবিগিবা ইসলখো আনচিং হা·আইনা মা·ন্না। জেআন বিবিগিবা ইসল আনচিং বিমুং নাংরিমা, আগানস্খাওদে বিনি দেফান্থি যীশু খ্রীষ্টমুং নাংরিমা। বিয়ান চং·মতগিবা ইসল আরো বিয়ান ফাংনাজলনি জাংগি। 21 বি·সারাং, মিত্তে বিমাংমুং না·সংনি মামুং নাংরিমা দংজাখানা।

২ যোহন 1

1 ইসল জেখো বাচ্ছিয়ে রা·জক উয়া মিচিক আরো বিনি বি·সারাংচা উয়া বুদেফা দাল·গিবা আংআ ইয়া চিঠিখো চক্কিংআ। ইসলনি বিবিনি গান্দা আংআ না·সং দিমদাকনা খা·সা। আংআসান না·সংনা খা·সা ইন্দাকেদে হং·জা, ইন্দিবা জেরাং ইসলনি বিবিখো হা·আইনা মান·জক বিসং দিমদাকান না·সংনা খা·সা। 2 জে বিবি আনচিংনি খা·থংও দংআ আরো ফাংনাজলনা আনচিংমুং দংনুয়া উয়া বিবিনি গিম্মিনান চিংআ না·সংনা খা·সা। 3 ফাগিবা ইসল আরো উয়া ফাগিবানি দেফান্থি যীশু খ্রীষ্টচানিখো বিবি আরো খা·সাচা খা·সানিকা, খা·সাচাক্কা, আরো থম·থমা আনচিংমুং দংনুয়া। 4 ফাগিবা আনচিংনা জেখো গি·য়েৎজক উগিত্তান নাং·নি মিত্তাম বি·সারাংখো ইসলনি বিবিনি রামাও রি·য়াখো নিক্কে আংআ খুসি হং·বিজক। 5 আনচিং জেদাক্কে সাকসা সাকগিপ্পিননা খা·সা, ইয়ান হং·জক নাং·চা আংনি মল·মলা। খা·সাগিবা ননো, আংনি চকগিবা গিত্তাল গি·য়েতা হং·জা, বাত্তেসা ইয়া গি·য়েতাখো চিংআ স্খাংওনিন মা·ন্নামিং। 6 খা·সা হং·জক ইসলনি গি·য়েতা গিত্তা রি·য়া। না·সং স্খাংওনিন জে গি·য়েতানি খাৎথাখো খিন্নাএ রি·বাংজক উগিত্তান না·সং খা·সানি রামাও রি·বো। 7 হা·গিলসাকো ইন্দাকা বাং·আ মান্দি হং·খাতজক জেরাং দাক্কামব্রুএ রওমিংআ। যীশু খ্রীষ্ট মান্দি হং·এ রি·বামিং বিসং উখো খু·রাচাকজা। ইন্দাকা মান্দিরাংআন দাক্কামব্রুগিবা আরো খ্রীষ্টনি বোবিল হং·আ। 8 না·সং সিমসাকে দংবো, জেদাক্কে না·সংনি নেং·আনি বিথি গিম্মাগিজা না·সং গিম্মিক বকসিসখোন মা·ন্না। 9 জেরাং খ্রীষ্টনি হন·গিবা স্খিয়াখো বাত্তাংএ রি·য়াংআ আরো উয়া স্খিয়াও খেম·খেমে দংজা বিসংনি খা·থংও ইসল দংজা। ইন্দিবা জেআন উয়া স্খিয়াও খেম·খেম দংআ বিনি খা·থংও ফাগিবা আরো দেফান্থি সাকগ্মিআন দংআ। 10 দারাংবা না·সংচা রি·বাএ উখো স্খিএতজাওদে ইন্দিদে না·সংনি নক্কো বিখো দা·আ নকচাকাবো আরো দা·আ সালামবা হ·ন্নাবো। 11 জেআন বিখো সালাম হ·ন্না বিয়া বিনি নামগিজা কামনি বাকখোবা রা·আ। 12 না·সংচা আংনি বাং·আ খাৎথা চকনা দংআমিং ইন্দাকোবা লেকখা আরো কালিচা উখো চকনা হাম·জা। উনা বাত্তে আংআ না·সংচা রি·য়াংএ মিকখাংগ্রিক খু·সুক আগান্না খা·দংআ, জেদাক্কে আনচিংনি হান·সেংআ চু·সকা। 13 ইসলনি বাচ্ছিয়ে দনগিবা নাং·নি ন-আবিনি বি·সারাং নাং·না সালাম হ·ন্নিংজক।

৩ যোহন 1

1 ইসলনি বিবিনি গিম্মিনো আংআ জেনা খা·সা আংনি উয়া খা·সাগিবা রিপ্পেং গাইয়চা উয়া বুদেফা দাল·গিবা আংআ ইয়া চিঠিখো চক্কিংজক। 2 খা·সাগিবা রিপ্পেং, আংআ ইন্দাকে বি·আ জেদাক্কে না·আ গিম্মিক গিত্তা নাম্মেদাক্কে রি·য়া আরো গিসিকওনি না·আ জেগিত্তা নাম্মেদাক্কে রি·ইংজক উগিত্তান নাং·নি বে·এনবা নাম্মে দংখানা। 3 আংআ নাম্মেন খুসি হং·জক জে সময়ও মিত্তাম বিবিরা·গিবা জংআদারাং রি·বাএ নাং·নি বিদিংও ইন্দাকে সাক্ষি হন·জক, ইসলনি বিবিনা না·আ বিবিরা·না খ্রাগিবা হং·আ আরো উগিত্তান রি·ইংজক। 4 আংনি বি·সারাং ইসলনি বিবিও রি·ইংআ, ইয়া খাৎথাখো খিন্নানা বাত্তে দাল·বাতা হান·সেংআ আংনি আরবা দংজা। 5 খা·সাগিবা রিপ্পেং, হা·আইগিজাবা বিবিরা·গিবা জংআদারাংনা না·আ জেখো দাক্কিংজক উখো বিবিরা·না খ্রাগিবা হং·এন দাক্কিংজক। 6 মন্ডলীনি দিমদাকনি মিকখাংও বিসং নাং·নি খা·সানি খাৎথাখো আগানজক। ইসল জেদাক্কে খুসি হং·আ উয়ানদাক্কে না·আ বিসংনি রি·য়াংআনিখো দাক্কে হ·ন্নোদে নামনুয়া। 7 বিসং খ্রীষ্টনি গিম্মিনান হং·খাতজক আরো বিবিরা·গিজাগিবারাংচাখো মামুংখোন রা·চাকজা। 8 উনি গিম্মিন ইন্দাকগিবা মান্দিরাংনা আনচিংনি দাকচাকনা নাংআ, জেদাক্কে ইসলনি বিবিনা আনচিংবা বিসংনি কাম খা·রিমগিবা হং·আ। 9 আংআ মন্ডলীচা গি·সা চিঠি চক্কামিং, ইন্দিবা দিয়ত্রিফেস্‌ মন্ডলীও দাল·গিবা হং·না হা·ম্মা ইন্নে চিংনি খাৎথাখো মানিজা। 10 উনি গিম্মিন বিয়া জেখো দাক্কিংজক আংনি রি·বানি জা·মানো উখো দিমদাকনা হা·আইএতনুয়া। বিয়া আনচিংখো মিকনেংএ বু·আ খাৎথাখো বাং·এ আগানা। উয়োবা সুক মান·জাএ বিয়া আন·থাংবা জংআদারাংখো রা·চাকজাংজক আরো জেরাং বিসংখো রা·চাকনা হা·ম্মা বিসংখোবা ফেং·চাংজক আরো মন্ডলীওনিখো গাল্লেতিংজক। 11 খা·সাগিবা রিপ্পেং, নামগিজাখো জা·রিকগিজা বাত্তেসা নাম্মাখো জা·রিকবো। জেআন নাম্মা কামখো দাক্কা বিয়া ইসলনি মান্দি হং·আ, আরো জেআন নামগিজা কামখো দাক্কা বিয়া ইসলখো নিকখুজা। 12 দিমদাকান দীমীত্রিয়খো মিৎথেলিংজক, আরোবা, ইসলনি বিবিবা উখো দাক্কা। চিংআবা বিখো মিৎথেলিংজক। না·আদে হা·আইয়ান চিংআ জেখো আগানা উয়া বিবি হং·আ। 13 বাং·আ খাৎথাখোন আংনি নাং·না চকনা দংআমিং, ইন্দিবা কালি-কলমচা আংআ উখো চকনা হাম·জা। 14 ইন্দাকে খা·দংআ, থেংরিন নাং·খো নিকনুয়া, আরো উনো মিকখাংগ্রিকে আনচিং খু·সুক আগান্না মা·ন্নুয়া। 15 নাং·নি থম·থমা হং·খানা। নাং·নি রিপ্পেংরাং নাং·না সালাম হ·ন্নিংআ। উনি রিপ্পেংরাংনা সাকফ্রাকফ্রাকনা দিংথাং দিংথাং দাক্কে চিংনি সালামখো হন·বো।

যিহূদা 1

1 আংআ যীশু খ্রীষ্টনি নকখল আরো যাকোবনি জংআদা যিহূদা। আপফা ইসল জেরাংখো রিক্কামজক আরো খা·সাজক আরো যীশু খ্রীষ্ট জেরাংখো রাক্ষিজক বিসংচা আংআ ইয়া চিঠিখো চক্কিংজক। 2 ইসল না·সংনা বাং·এ খা·সাচাক্কাখো, থম·থমাখো আরো খা·সাখো হন·খানা। 3 খা·সাগিবা রিপ্পেংরাং, পাপওনি জে জক্কেতাখো আনচিং দিমদাকান মান·জক উয়া জক্কেতানি গিম্মিনো আংআ না·সংচা চকনা হা·সিকবিয়ামিং। ইন্দাকোবা খ্রীষ্টান থরমনি বিবিরা·আ, জেখো ইসল বিনি মান্দিরাংনা ফাংনাজলনা হন·জক, উনা চাক্কে জেদাক্কে না·সং জাংগিগাল্লে দাকগ্রিকা উনা খা·দংএতনা ইন্নে আংআ না·সংচা চকনা নাংআখো চানচিজক। 4 ইয়াদে নাংআসা, মুয়ানা জে মান্দিরাংনি শাস্তিনি গিম্মিনো স্খাংআন শাস্ত্রও চক্কামিং বিসং না·সংনি গিসেপো স্রক স্রক দাক্কে নাপজক। ইসলনা ইয়া মান্দিরাংনি খা·ফাকা দংজা; আনচিংনি ইসলনি খা·সাচাক্কাখো বিসং নামজাস্রাংনি মিংসা ফা·সিকা ইন্নে চানচিয়া আরো জেআন আনচিংনি সাকসা খাম·খাম নকগিবা আরো গিত্তেল হং·আ উয়া যীশু খ্রীষ্টখো বিসং জিচাকা। 5 না·সংদে ইনি বিদিংও নাম্মেদাক্কেন হা·আইয়া; ইন্দাকোবা আংআ না·সংনা ইয়া খাৎথাখো গিসিক রা·এতনা হা·ম্মা, মিসর হা·সংওনিখো ইস্রায়েলরাংখো জক্কেতি রা·বানি জা·মানো জেরাং বিবিরা·জাজক গিত্তেল বিসংখো ব·ন্নেতামিং। 6 ইনাআগ্রে জে সা·গ্রেরাং আন·থাংথাংনি মান·রিকানি বিলখো রাক্ষিগিজা আন·থাংথাংনি হা·দামখো ওয়াত্তে রি·য়াংজকমিং বিসংনি খাৎথাখো গিসিক রা·বো। উয়া বিল্লংআনি সালনি বিচালনা মিকসংএ ইসল বিসংখো ফাংনাজলনা আন্দালাও খাএ দনজক। 7 সদোম, ঘমোরা আরো উরাংনি সেফাংরাংনি গিম্মিক সংজিলমানি মান্দিরাংবা বিসং গিত্তান থি·ল্লেকা, আরোবা, হং·গিজা দাক্কে থি·ল্লেকামিং। জেরাং ফাংনাজলনি ওয়া·আলো খাম্মানি শাস্তিখো মা·ন্নুয়া বিসং বিসংনিন নমুনা হং·এ দংআ। 8 ইন্দাকোবা ইয়া বু·এ চা·গিবা স্খিএতগিবারাং উয়ানদাক্কে নামগিজা জুমাংনি জা·দিনাচা আন·থাংথাংনি বে·এনখো মারাং নাংএতিংজক, সা·গ্রেরাংনি শাসনখো মানিজাংজক আরো উয়া রাসংনি মান্দিরাংখো চন্নিকে খাৎথা আগানিংজক। 9 দাল·গিবা সা·গ্রে মীখায়েল জে সময়ও মোশিনি বে·এনখো রা·এ শয়তানমুং জিগ্রিকিংআমিং উনো মীখায়েল বিখো চন্নিকে খাৎথা আগানে বিখো দোস হ·ন্না ফা·জামিং। বাত্তেসা বিয়া আগানামিং, “গিত্তেল নাং·খো চাংফেংখানা।” 10 ইন্দিবা ইয়া বু·এ চা·গিবা স্খিগিবারাং জেখো হা·আইজা উনি গিম্মিনো নামগিজা খাৎথাখো আগানা আরো বুদ্ধিগ্রি মাৎবুরুংরাং গিত্তা আন·থাংওনিন জেখো হা·আইয়া উচান ব·ন্নাংআ। 11 হং·সিখানা উয়া মান্দিরাংনা! বিসং কয়িননি রামাচানা রি·য়াংজক, মান·দাপনা ইন্নে বিলিয়মনি ব্রাংআও আন·থাংথাংখো ফাকওয়াতজক আরো কোরহ গিত্তা বোবিল দাক্কে ব·ন্নাংজক। 12 ইয়া মান্দিরাং জে সময়ও খেনমানগিজা না·সংনি চা·আও দংফা উনো না·সংনি উয়া চা·আও বিসং ময়লা গিত্তা হং·আ। বিসং আন·থাংথাংনাসান চানচিয়া। বিসং বালওয়াও বালফাকগিবা চিগ্রি গাদিলা গিত্তা হং·আ। বিথি আক্কানি সময়ও বিথিগ্রি ইন্নে জা·দিল মাংগ্মাং ফিক্কে গাল্লেতা বিফাং গিত্তা বিসং সামগ্মিচানিন সিয়া গিত্তা হং·আ। 13 বিসং মিকখা-বালওয়া রাক্কাও সাগালনি চি ফকফেকা গিত্তা দাক্কা; সাগালনি চিনি স্ফু গিত্তান বিসংনি খ্রাচা·আনি কামরাং বালবোআ। বিসং খেম·খেম দংগিজা আস্কি গিত্তান দাক্কা; ফাংনাজলনা নাম্মেন আন্দালা বিসংনা চিম্মংএ দন্না হং·জক। 14 আদমনি চাসং স্নিগিবা মি·আসা হনোক ইয়া মান্দিরাংনি বিদিংও স্খাংআন আগানামিং, “নিবো, গিত্তেল বিনি হাজাল হাজাল রংথালগিবা সা·গ্রেরাংখো রা·এ দিমদাকখো বিচাল দাকনা রি·বাংজক, আরো খা·ফাকাগ্রি মান্দিরাং খা·ফাকগিজা দাক্কে জে নামগিজা কামরাংখো দাকজক আরো উয়া খা·ফাকাগ্রি পাপীরাং গিত্তেলনি সাক্কাও জে রাক্কা খাৎথারাংখো আগানজক উনি গিম্মিন বিয়া বিসংখো দোস হ·ন্না রি·বাংজক।” 16 ইন্দাকগিবা মান্দিরাং ফাংনান খুসি হং·গিজানি গিসিকখো ফিন্নিকা, আন·থাংথাংনি কপালনা দোস হ·ন্না আরো খা·থংনি নামগিজা হা·সিকারাং গিত্তা রি·য়া, বিসং আন·থাংথাংখো রা·এ রাসং দাক্কা আরো মা·ন্নাসান মান্দিরাংখো রাসং দাকমিকব্রুআ। 17 ইন্দিবা খা·সাগিবা রিপ্পেংরাং, জে খাৎথারাংখো আনচিংনি গিত্তেল যীশু খ্রীষ্টনি ওয়াত্তেতারাং স্খাংআন আগানামিং উখো না·সং গিসিক রা·এ নিবো। 18 বিসং না·সংনা ইয়া খাৎথাখো আগান্নুয়ামিং, “ইনগিৎচিয়ান জেরাংনি বেওয়াল বিসং বন·খামানি সালো রি·বানুয়া আরো বিসংনি খা·ফাকাগ্রি হা·সিকারাং গিত্তা রি·নুয়া।” 19 ইন্দাকগিবা মান্দিরাং মা·আৎগ্রিকানিখো থারিয়া আরো বিসং আন·থাংথাংনি হা·সিকা গিত্তা রি·য়া। বিসংনি খা·থংও গিসিক রংথালগিবা দংজা। 20 ইন্দিবা খা·সাগিবা রিপ্পেংরাং, না·সং না·সংনি রংথালা বিবিরা·আনি সাক্কাও ফাংচাকে আন·থাংথাংখো থারিয়ে রা·বো আরো গিসিক রংথালগিবাচা রি·দিলাখো মা·ন্নে বি·বো। 21 আনচিংনি গিত্তেল যীশু খ্রীষ্টনি খা·সাচাক্কা জেদাক্কে না·সংখো ফাংনাজলনি জাংগিওনা রা·আংআ উনান সেংসোএ না·সং ইসলনি খা·সাও দংবো। 22 না·সংনি গিসেপো জেরাংনি বিবিরা·আ খেম·খেম হং·জা বিসংনা খা·সাচাকবো। 23 ওয়া·আলোনিখো দি·চাএ রা·বাএ গিপ্পিনরাংখো জক্কেৎবো। পাপ-বেওয়ালচা জেরাংনি জাংগি ময়লা হং·জক বিসংনি মারাং নাংগিবা বা·রানাবা মিৎচিবো আরো আন·থাংথাংখো সিমসাকে দন্নে বিসংনা খা·সাচাকবো। 24 সাকসামাংমাং ইসল জেআন আনচিংনি জক্কেৎগিবা বিয়া না·সংখো জা·গিদত্তা চা·আওনিখো রাক্ষিয়ে খাকখেৎ অবস্থাও আন·থাংনি রাসংনি মিকখাংও হান·সেংআমুং রা·বানা মা·ন্না। চেংওনি জেগিত্তা দংআমিং উগিত্তা দা·আওবা আরো ফাংনাজলনা আনচিংনি গিত্তেল যীশু খ্রীষ্টও ইসলনি রাসং, বিল আরো বিল্লাকা দংখানা। আমেন।

ফারাকগিবা খাৎথা 1

1 ইয়া খি·তাপও জেরাংখো চক্কা হং·জক উরাংখো যীশু খ্রীষ্টআন ফারাকজক। ইয়া বিদিংরাংখো ইসল খ্রীষ্টচা ফারাকামিং, জেদাক্কে বাং·গিজা সালরাংনি গিসেপোন জেরাং হং·না রি·য়াংইংজক উখো বিয়া বিনি নকখলরাংনা আগানা। খ্রীষ্ট বিনি সা·গ্রেখো ওয়াত্তেতি বিনি নকখল যোহননা ইয়া বিদিংরাংখো আগানামিং। 2 ইসলনি খাৎথা আরো যীশু খ্রীষ্টনি সাক্ষিনি গিম্মিনো যোহন জেখো নিক্কামিং, উনি বিদিংওন বিয়া ইনো সাক্ষি হন·জক। 3 ইসলনি খাৎথা জেখো ইনো চক্কা হং·জক, জেআন উখো পড়িয়া বিয়া ফাত্তিয়া মান·গিবা হং·আ আরো জেরাং উখো খিন্নাআ আরো মানিয়া বিসংবা ফাত্তিয়া মান·গিবা হং·আ, মুয়ানা সাল সেফাংজক। 4 আংআ যোহন এশিয়া হা·দকনি গি·স্নি মন্ডলীচা চক্কিংজক। জেআন দংআ, জেআন দংআমিং আরো জেআন রি·বাংজক বিয়া আরো বিনি সিংহাসননি মিকখাংও জে সাকস্নি গিসিক দংআ বিসং আরো যীশু খ্রীষ্ট না·সংনা খা·সাচাকখানা আরো থম·থমাখো হন·খানা। যীশুআন বিবিগিবা সাক্ষি আরো সিয়াওনি বিয়ান স্খাং থাংচামিং আরো বিয়ান হা·গিলসাকনি রাজারাংখো শাসন দাকগিবা হং·আ। বিয়া আনচিংনা খা·সা আরো আন·থাংনি হান·চিচা পাপওনি আনচিংখো জক্কেৎজক। 6 বিয়া আনচিংখো রা·এ গি·সা সংনক থারিজক আরো বিনি ফাগিবা আরো ইসলনা দাকচাকে হ·ন্না খামাল দাকজক। ফাংনাজলনা যীশু খ্রীষ্টনি রাসং হং·খানা আরো ফাংনাজলনা বিনি বিল দংখানা। আমেন। 7 নিবো, বিয়া গাদিলাও দাক্কে রি·বাংজক। গিম্মিক মিক্রোন বিখো নিকনুয়া; জেরাং বিখো সু·আমিং বিসংবা নিকনুয়া আরো হা·গিলসাকনি গিম্মিক জাত বিনা রাক্কে রাক্কে গ্রাপনুয়া। ইন্দাকেন হং·খানা, আমেন। 8 গিত্তেল ইসল আগানিংজক, “আংআন উয়া আল্‌ফা আরো ওমিগা জেআন দংআ, জেআন দংআমিং আরো জেআন রি·বাংজক। আংআন বিল্লাকস্রাংগিবা।” 9 আংআ না·সংনি জংআদা যোহন; যীশুমুং নাংরিমে আংআ না·সংমুং আপসান দুকখো, আপসান সংনকখো আরো আপসান চাকচিকানি বাকখো মান·ফাগিবা হং·জক। ইসলনি খাৎথা আরো যীশুনি সাক্ষিনি বিদিংও আগানফ্রাকামিং ইন্নে আংখো পাট্‌ম চিচাংচা রা·আংএ দন্নামিং। 10 গিত্তেলনি সালও আংআ মংসংএ গিসিক রংথালগিবানি নিং·আও দংআমিং। ইন্দাকমিত্তিংও আংনি খি·সাংচা সিংগানি গা·ম্মা গিত্তা সাকসানি গাম·বিয়া খু·রাংখো খিন্নাজক। 11 বিয়া আংনা আগানজক, “জেখো নিকনুয়া উখো গি·সা খি·তাপও চকবো, আরো উখো ইফিষ, স্মূর্ণা, পর্গাম, থুয়াতীরা, সার্দ্দি, ফিলাদিল্‌ফিয়া আরো লায়দিকেয়া- ইয়া দামস্নি সংজিলমানি গি·স্নি মন্ডলীরাংচা ওয়াত্তেতবো।” 12 খাৎথা আগানগিবাখো নিনা ইন্নে আংআ হান·ফিলজক আরো সোনানি বলস্নি গাসাখো নিকজক। 13 উয়া গাসারাংনি জাংচিও মান্দিনি দেফান্থি গিত্তা দাক্কা সাবা সাকসা দংআমিং। বিয়া জা·ফাওনা সক্কা রো·আ চলাখো গান্নামিং আরো বিনি চেলও সোনানি খাথংআ খাআ দংআমিং। 14 বিনি স্খুনি খিন্নি মেষনি খিম্মিল গিত্তা আরো বরফ গিত্তা বক্কামিং আরো বিনি মিক্রোন ওয়াল·স্রি গিত্তা দাক্কামিং। 15 বিনি জা·চক ওয়া·আলো সো·এ চি·রংএতগিবা নাম্মেন চিং·ব্রাপা পিতল গিত্তা দাক্কা, আরো বিনি খু·রাং থারাকে চি বালজকানি গা·ম্মা গিত্তা দাক্কামিং। 16 বিয়া বিনি জাক্রানি জাক্কো রংস্নি আস্কিখো রি·ম্মে রা·রিকামিং আরো বিনি খু·সুকোনি গি·সা মি·ল্লাম হং·খাতে রি·বাংআমিং জেনি সামগ্মিওন মাত্তা দংআমিং। বিনি মিকখাং-বিমাং সাল গিত্তান দাক্কামিং। 17 বিখো নিক্কে আংআ সিয়া গিত্তা বিনি জা·চকনি কেচ্চিও গা·আকাংআরিজক। উনো বিয়া বিনি জাক্রা জাকখো আংনি সাক্কাও দন্নে আগানজক, “দা·আ খেন্নাবো। আংআন স্খাংগিবা আরো বন·চতগিবা, 18 আংআন ফাংনাজলনা থাংগিবা। আংআ সিয়ামিং, আরো নিবো, দা·আও আংআ চাসংওনি চাসংওনা ফাংনাজলনা থাংএ দংআ। আংচা সিয়ানি আরো সিগিবা হা·দামনি চাবি দংআ। 19 ইনি গিম্মিন না·আ জেখো নিকজক, দা·আও জেরাং হং·ইংজক আরো ইরাংনি জা·মানো জেরাং হং·নুয়া উরাংখো চক্কে দনবো। 20 জে বলস্নি সোনানি গাসাখো আরো আংনি জাক্রা জাক্কো জে রংস্নি আস্কিখো না·আ নিকজক উনি নিং·থুয়া অর্থ ইয়ান- উয়া রংস্নি আস্কি হং·জক গি·স্নি মন্ডলীনি সাকস্নি সা·গ্রে আরো বলস্নি গাসা হং·জক উয়া গি·স্নি মন্ডলী।

ফারাকগিবা খাৎথা 2

1 “ইফিষ সংজিলমানি মন্ডলীনি সা·গ্রেচা ইয়া খাৎথাখো চকবো- জেআন বিনি জাক্রা জাক্কো রংস্নি আস্কিখো রি·ম্মে সোনানি বলস্নি গাসানি জাংচিও রি·রোরোআ বিয়া ইয়া খাৎথাখো আগানিংজক: 2 আংআ নাং·নি কাম, গাম্মা আরো চাকচিকানি খাৎথাখো হা·আইয়া। আংআ হা·আইয়া না·আ নামগিজা মান্দিরাংখো চাকনা মান·জা, আরো জেরাং ওয়াত্তেতা হং·জাওবা আন·থাংখো ওয়াত্তেতা ইন্নে দাবি দাক্কা বিসংখো রুরাএ নিজক আরো বিসং বু·এ চা·গিবা হং·আ ইখোবা নিকনা মান·জক। 3 নাং·নি চাকচিকা দংআ আরো না·আ আংনা নাম্মেন দুক চাকজক, নম·বকে গা·আকজাজক। 4 ইন্দাকোবা নাং·নি সাক্কাও আংনি ইয়া খাৎথাখো আগানানি দংআ, স্খাংও আংনা নাং·নি জেগিত্তা খা·সা দংআমিং উখো না·আ গিম্মায়েতে গালজক। 5 চানচিয়ে নিবো, না·আ বাসিক চু·য়াকাওনি বাসিক খা·মাওনা হং·খাতজক। ইয়া অবস্থাওনি না·আ গিসিক ফিল·বো আরো স্খাংও জে কামরাংখো দাকনুয়ামিং উয়া কামচা ফি·ল্লাংবো। না·আ গিসিক ফিল·জাওদে আংআ নাং·চা রি·বাএ নাং·নি চাক্কি দনচাকগিবাখো দনগিবা হা·দামওনি জিত্তেতি গালনুয়া। 6 ইন্দিদে নাং·নি ইয়া মিংসা গুণ দংআ, নীকলায়তীয়েরাং জেখো দাক্কা উনা না·আ মিৎচিয়া, আরো আংআবা উনা মিৎচিয়া। 7 জেনি খিন্নানা নাচিল দংআ বিয়া খিন্নাখানা, গিসিক রংথালগিবা মন্ডলীরাংনা মুয়াখো আগানিংআ। জেআন হামনুয়া বিনা আংআ ইসলনি সংনকনি বলজাংগিনি বিথিখো চা·না হ·ন্নুয়া। 8 “স্মূর্ণানি সংজিলমানি মন্ডলীনি সা·গ্রেচা ইয়া খাৎথাখো চকবো- জেআন স্খাংগিবা আরো বন·চতগিবা, জেআন সিয়ামিং আরো থাংচাজক, বিয়া ইয়া খাৎথাখো আগানিংজক: 9 নাং·নি দুক আরো দিল্লানি খাৎথাখো আংআ হা·আইয়া, ইন্দাকোবা না·আ নকমা হং·আ। আন·থাংথাংখো যিহূদী ইন্নে আগানোবা জেরাং যিহূদী হং·জা বাত্তেসা শয়তাননি দলনি মান্দি হং·আ, বিসং নাং·নি সাক্কাও জেখো আগানা উখো আংআ হা·আইয়া। 10 না·আ জে দুকরাংখো চাকনা রি·য়াংইংজক উনা মামুং দাক্কেবা দা·আ খেন্নাবো। খিন্নাবো, শয়তান না·সংওনিখো মিত্তামখো রুরাএ নিনা জেলো দন্নুয়া, আরো সালচিখুংনা দিপ্পাৎ না·সং দুক চাকনুয়া। না·আ সিয়াওনা দিপ্পাৎ বিবিগিবা হং·এ দংবো, ইন্দাকোদে হাম্মানি মালা গিত্তা আংআ নাং·না জাংগিখো হ·ন্নুয়া। 11 জেনি খিন্নানা নাচিল দংআ বিয়া খিন্নাখানা, গিসিক রংথালগিবা মন্ডলীরাংনা মুয়াখো আগানিংআ। জেআন হামনুয়া গ্মিগিবা সিয়া মামুং দাক্কেবা বিনি নামগিজাখো দাকজানুয়া। 12 “পর্গাম সংজিলমানি মন্ডলীনি সা·গ্রেচা ইয়া খাৎথাখো চকবো- জে মি·ল্লাম সামগ্মিচা মাত্তা উনি নকগিবা ইয়া খাৎথাখো আগানিংজক: 13 না·আ বাও সংদংইংআ উখো আংআ হা·আইয়া; উয়ো শয়তাননি সিংহাসন দংআ। ইন্দাকোবা না·আ আংনি গিম্মিনো বিবিগিবা হং·এ দংআ আরো আংনি সাক্কাও নাং·নি বিবিরা·আখো জিচাকজা। আরোবা, জেও শয়তান দংআ উয়ো জে সময়ও আংনি বিবিগিবা সাক্ষি আন্তিপাস্‌খো না·সংনি মিকখাংও স·ওতামিং উনোবা না·আ নাং·নি বিবিরা·খো জিচাকজাজক। 14 ইন্দাকোবা নাং·নি সাক্কাও আংনি মামুং আগানানি দংআ। নাং·নি উচা ইন্দাকগিবা মান্দিরাং দংআ জেরাং বিলিয়মনি স্খিয়া গিত্তা রি·য়া। বালাক রাজানা বিলিয়ম স্খিয়েতামিং জেদাক্কে বিয়া মিত্তে বিমাংনা চিনগিবা চা·আখো চা·আচা আরো থি·ল্লেকাচা ইস্রায়েলরাংখো পাপচানা রা·আংআ। 15 ইনাআগ্রেবা নীকলায়তীয়রাংনি স্খিয়া গিত্তা জেরাং রি·য়া ইন্দাকগিবা মিত্তামরাংবা নাং·নি উচা দংআ। 16 ইনি গিম্মিন ইন্দাকা অবস্থাওনি গিসিক ফিল·বো। গিসিক ফিল·জাওদে আংআ থেংরিন নাং·চা রি·বানুয়া আরো আংনি খু·সুকনি মি·ল্লামচা বিসংমুং দাকগ্রিকনুয়া। 17 জেনি খিন্নানা নাচিল দংআ বিয়া খিন্নাখানা, গিসিক রংথালগিবা মন্ডলীরাংনা মুয়াখো আগানিংআ। জেআন হামনুয়া বিনা আংআ সিউল দনগিবা মান্নাওনি অকখিসা মান্না আরো খানসা গ্বিবক রং·থিখো হ·ন্নুয়া। উয়া রং·থিনি সাক্কাও ইন্দাকগিবা মিংসা গিত্তাল বিমুং চক্কা দংনুয়া জেখো দারাংবা হা·আইজা; উখো জেআন মা·ন্নুয়া বিয়াসান উখো হা·আইনুয়া। 18 “থুয়াতীরা সংজিলমানি মন্ডলীনি সা·গ্রেচা ইয়া খাৎথাখো চকবো- ইসলনি দেফান্থি, জেনি মিক্রোন ওয়াল·স্রি গিত্তা আরো জা·চক নাম্মেন চিং·ব্রাপা পিতল গিত্তা দাক্কা বিয়া ইয়া খাৎথাখো আগানিংজক: 19 আংআ নাং·নি কামখো, নাং·নি খা·সাখো, নাং·নি বিবিরা·খো, নাং·নি দাকচাকে হ·ন্নাখো আরো নাং·নি চাকচিকানি খাৎথাখো হা·আইয়া। আরো না·আ স্খাংও জে কামরাংখো দাক্কামিং উনাবাত্তে দা·আও আরোবা বাং·এ কাম দাক্কিংআ উয়া খাৎথাখোবা আংআ হা·আইয়া। 20 ইন্দাকোবা নাং·নি সাক্কাও আংনি ইয়া খাৎথাখো আগানানি দংআ, না·আ ঈষেবল মিংগিবা উয়া মিচিকনি খ্রাগিজা দাক্কাখো চাক্কিংজক। ইয়া ঈষেবল আন·থাংখো আগানসোগিবা ইন্নে আগানা। বিনি স্খিএতাচা বিয়া আংনি নকখলরাংখো ব্রাংএতা জেদাক্কে বিসং থি·ল্লেকা আরো মিত্তে বিমাংনা চিন·গিবা চা·আখো চা·আ। 21 থি·ল্লেকাওনি গিসিক ফিল·খানা আংআ বিনা সময় হ·ন্নামিং ইন্দিবা বিয়া গিসিক ফিল·না গং·জাজক। 22 উনি গিম্মিন আংআ বিখো থুরামো গাল্লে দন্নুয়া, আরো জেরাং বিমুং থি·ল্লেকা বিসং থি·ল্লেকাওনি গিসিক ফিল·জাওদে বিসংখো নাম্মেন দুকও গালনুয়া। 23 বিনি বি·সারাংখোবা আংআ স·ওতে গালনুয়া। উনো দিমদাক মন্ডলীরাং হা·আইনা মা·ন্নুয়া, আংআন মান্দিনি খা·থং আরো গিসিকখো সান্দিয়ে নিআ। আংআ কামনি খ্রি না·সং সাকফ্রাকফ্রাকনা বিথিখো হ·ন্নুয়া। 24 থুয়াতীরানি মিত্তাম মান্দিরাং, না·সং জেরাং উয়া স্খিয়া গিত্তা রি·জা আরো জেখো শয়তাননি উয়া থিং·নাপা স্খিয়া ইন্নে আগানা উখো হা·আইজা, না·সংনা আংআ আগানিংজক: না·সংনা আংআ দিংথাং মামুং কামখো দাকনা হন·জানুয়া। 25 না·সংচা দংআরাংখো, আংনি রি·বাখুজানা দিপ্পাৎ উখো রাক্কে রি·ম্মে রা·রিকবো। 26 ফাগিবা জেদাক্কে দিমদাক জাতনি সাক্কাও আংনা বিলখো হন·জক, উয়ানদাক্কে জেআন হামনুয়া আরো আংনি হা·ম্মা গিত্তা জেআন বন·চতাওনা দিপ্পাৎ দাকনুয়া বিনাবা আংআ উয়া বিলখো হ·ন্নুয়া। বিয়া সিলনি গল·দিকচা বিসংখো শাসন দাকনুয়া আরো হা·আনি মি·দিকরাং গিত্তা বিসংখো দকফি·এ গালনুয়া। 28 জেআন হামনুয়া বিনা আংআ ফ্রিংওয়ালনি আস্কিখোবা হ·ন্নুয়া। 29 জেনি খিন্নানা নাচিল দংআ বিয়া খিন্নাখানা, গিসিক রংথালগিবা মন্ডলীরাংনা মুয়াখো আগানিংআ।

ফারাকগিবা খাৎথা 3

1 “সার্দি সংজিলমানি মন্ডলীনি সা·গ্রেচা ইয়া খাৎথাখো চকবো- ইসলনি সাকস্নি গিসিকখো আরো আস্কি রংস্নিখো জেআন রি·ম্মে দংআ বিয়া ইয়া খাৎথাখো আগানিংজক: আংআ নাং·নি কামনি খাৎথাখো হা·আইয়া। থাংএ দংআ ইন্নে নাং·খো হা·আইয়া, ইন্দিবা আদতে না·আ সিজক। 2 না·আ চাখাতবো আরো মিত্তামরাং জেরাং সিনা গিত্তা হং·জক বিসংখো বিল্লাকেতবো, মুয়ানা আংনি ইসলনি মিকখাংও নাং·নি মামুং কামনি বন·চতাখো আংআ নিকখুজা। 3 ইনি গিম্মিন না·আ জেখো মান·জক আরো খিন্নাজক উখো গিসিক রা·বো আরো মানিবো আরো ইন্দাকা অবস্থাওনি গিসিকখো ফিল·বো। না·আ চাখাতজাওদে আংআ চা·খক গিত্তা রি·বানুয়া, আরো আংআ বাগিবা সময়ও নাং·চা রি·বানুয়া উখো না·আ হা·আইনাবা মান·জানুয়া। 4 ইন্দিবা সার্দিও নাং·নি ইন্দাকগিবা মিত্তাম মান্দিরাং দংআ জেরাং বিসংনি বা·রা-চলা, আগানস্খাওদে রি·য়া-দোআরাংখো নামগিজা দাকজা। বিসং খ্রাগিবা মান্দি ইন্নেন গ্বিবক বা·রাখো গান্নে আংমুং রি·নুয়া। 5 জেআন হামনুয়া বিয়া ইন্দাকা গ্বিবক বা·রাখো গান্নুয়া। জাংগিনি-খি·তাপওনি বিনি বিমুংখো আংআ মামুং সালোবা রিপ্পাকে গালজানুয়া, বাত্তেসা আংনি ফাগিবানি আরো বিনি সা·গ্রেরাংনি মিকখাংও আংআ বিখো খু·রাচাকনুয়া। 6 জেনি খিন্নানা নাচিল দংআ বিয়া খিন্নাখানা, গিসিক রংথালগিবা মন্ডলীরাংনা মুয়াখো আগানিংআ। 7 “ফিলাদিল্‌ফিয়া সংজিলমানি মন্ডলীনি সা·গ্রেচা ইয়া খাৎথাখো চকবো- জেআন রংথালগিবা আরো বিবিগিবা, জেচা দায়ূদনি চাবি দংআ, জেনি এংজোকনো দারাংবা চিপনা মান·জা আরো চিপজোকনো দারাংবা এংনা মান·জা, 8 বিয়া ইয়া খাৎথাখো আগানিংআ: আংআ নাং·নি কামনি খাৎথাখো হা·আইয়া। নিবো, আংআ নাং·নি মিকখাংও গি·সা দ·গাখো এংএ দনজক জেখো চিপচাংআনি বিল দারাংনিবা দংজা। আংআ হা·আইয়া নাং·নি বিল বাং·জা, ইন্দিবা না·আ আংনি খাৎথাখো মানিজক আরো আংখো জিচাকজাজক। 9 জেরাং আন·থাংখো যিহূদী ইন্নে আগানা ইন্দিবা যিহূদী হং·জা, শয়তাননি দলনি উয়া বু·এ চা·গিবা মান্দিরাংখো আংআ নাং·চা রিমবানুয়া আরো নাং·নি জা·চকও সালাম দাক্কেতনুয়া, আরো বিসংখো হা·আইএতনুয়া, আংআ নাং·না খা·সাআ। 10 চাকচিকানি জে গি·য়েতাখো আংআ হ·ন্নামিং উখো না·আ মানিজক; উনি গিম্মিন ইয়া হা·গিলসাকনি সাক্কাও জে দুকনি সাল রি·বাংজক উয়া সালওনি আংআ নাং·খো রাক্ষিনুয়া। জেরাং ইয়া হা·গিলসাকনি বিসংখো রুরাএ নিনা ইয়া দুকনি সাল রি·বানুয়া। 11 আংআ থেং·রিন রি·বাংজক। নাং·নি দংগিবাখো রাক্কে রি·ম্মে দনবো, জেদাক্কে নাং·নি হাম্মানি বকসিসখো দারাংবা রা·সেকে রা·জা। 12 জেআন হামনুয়া বিখো আংআ আংনি ইসলনি নকনি গি·সা খ্রং দাকনুয়া; বিয়া মামুং সালোবা হা·ফালচা রি·য়াংজানুয়া। আংআ বিনি সাক্কাও আংনি ইসলনি বিমুংখো আরো আংনি ইসলনি সংজিলমানি বিমুংখো চকনুয়া। গিত্তাল যিরূশালেমআন উয়া সংজিলমা। সালগিওনি আংনি ইসলচানি ইয়া সংজিলমা হং·ওনবানুয়া। জেআন হামনুয়া আংআ বিনি সাক্কাও আংনি গিত্তাল বিমুংখোবা চকনুয়া। 13 জেনি খিন্নানা নাচিল দংআ বিয়া খিন্নাখানা, গিসিক রংথালগিবা মন্ডলীরাংনা মুয়াখো আগানিংআ। 14 “লায়দিকেয়া সংজিলমানি মন্ডলীনি সা·গ্রেচা ইয়া খাৎথাখো চকবো- জেআন আমেন, জেআন বিবিরা·না খ্রাগিবা আরো বিবিগিবা সাক্ষি, জেআন ইসলনি থারিয়ানি জা·ফাং, বিয়া ইয়া খাৎথাখো আগানিংআ: আংআ নাং·নি কামনি খাৎথাখো হা·আইয়া। 15 না·আ খা·সিনাবা খা·সিনজা, দিং·আবা দিং·জা। না·আ খা·সিনোদে বা দিং·ওদে নামনুয়ামিং। 16 ইন্দিবা না·আ খা·সিনাবা খা·সিনজা দিং·আবা দিং·জা, উনি গিম্মিন আংআ নাং·খো আংনি খু·সুকওনি খু·চি গিত্তা দাক্কে গাল্লেতনুয়া। 17 না·আ আগানিংআ, ‘আংআ নকমা; আংআ নকমা হং·জক, উনি গিম্মিন আংআ মামুংনান দিলজা।’ দে নাম্মান, ইন্দিবা না·আদে হা·আইজা, না·আ দুক মান·গিবা, খা·সাচাক্কানি মান্দি, দিল্লা, মিকগ্রি আরো খমলং হং·আ। 18 উনি গিম্মিন আংআ নাং·না ইন্দাকে গি·য়েতিংজক- না·আ আংচানিখো ওয়া·আলো সো·এ খাকখেৎ দাকগিবা সোনাখো ব্রিএ রা·বো জেদাক্কে নকমা হং·না মা·ন্না। আংচানিখো গ্বিবক বা·রাখো ব্রিএ গানবো জেদাক্কে নাং·নি খমলং হং·আনি খ্রাচা·আখো নিকনা নাংজা। আংচানিখো মিক্রোনও হন·গিবা মলমখো ব্রিএ রা·বো জেদাক্কে না·আ নিকনা মা·ন্না। 19 আংআ জেরাংনা খা·সা বিসংনিন দোসখো ফিন্নিকে হ·ন্না আরো শাসন দাক্কা। উনি গিম্মিন ইন্দাকা অবস্থাওনি গিসিক ফিল·না গিসিক নাংবো। 20 নিবো, আংআ দ·গাচিল কেচ্চিও চাদেংএ দকথিকিংআ। সাবা আংনি খু·রাংখো খিন্নাএ দ·গা এংএ হ·ন্নোদে আংআ নিং·আচা বিচা রি·য়াংনুয়া আরো বিমুং চা·নুয়া-রিংনুয়া, আরো বিয়াবা আংমুং চা·নুয়া-রিংনুয়া। 21 “আংআ হাম্মে জেগিত্তা আংনি ফাগিবামুং বিনি সিংহাসনও আসংজক, উয়ানদাক্কে জেআন হামনুয়া বিখো আংআ আংমুং আংনি সিংহাসনও আসংনা বিল হ·ন্নুয়া। 22 জেনি খিন্নানা নাচিল দংআ বিয়া খিন্নাখানা, গিসিক রংথালগিবা মন্ডলীরাংনা মুয়াখো আগানিংআ।”

ফারাকগিবা খাৎথা 4

1 উনি জা·মানো আংআ সালগিনি দ·গা গি·সা এংআখো নিকনা মান·জক। সিংগা গা·ম্মা গিত্তা জেনি গিত্তকনি খু·রাংখো আংআ স্খাংও খিন্নামিং বিয়া আংনা আগানজক, “না·আ চাখাতে ইয়োনা রি·বাবো। ইরাংনি জা·মানো জেরাং হং·না হাম·বিবিংজক উখো আংআ নাং·না ফিন্নিকনুয়া।” 2 আরো উনোন আংআ গিসিক রংথালগিবানি রি·দিলাও সালগিও গি·সা সিংহাসনখো নিকনা মান·জক। আংআ নিকজক, উয়া সিংহাসনও সাকসা আসংএ দংআ। 3 বিনি মিকখাং হীরা আরো সার্দি মণি গিত্তা দাক্কা। সিংহাসননি সামব্রিও সুনদারে গি·সা দংআমিং; উখো নিনাদে থিক গি·সা পান্না গিত্তা দাক্কে নিক্কা। 4 উয়া সিংহাসননি সামব্রিও আরোবা খলগ্রিকব্রি সিংহাসন দংআমিং, আরো উয়া সিংহাসনরাংও সাক খলগ্রিকব্রি মি·আফারাং আসংএ দংআমিং। বিসংনি চলা গ্বিবকামিং আরো বিসংনি স্খুও সোনানি মুকুট দংআমিং। 5 উয়া সিংহাসনওনি মিকখা রিপরাপা, খু·রাং আরো মিকখা খিম্‌প্রেতানি গা·ম্মা হং·খাতিংআমিং। সিংহাসননি মিকখাংও গি·স্নি চাক্কি চিং·ইংআমিং। উয়া চাক্কিরাং হং·জক ইসলনি সাকস্নি গিসিক। 6 উয়া সিংহাসননি মিকখাংও রং·চি গিত্তা গ্রিকগিবা গি·সা জানিরানি সাগাল দংআমিং। উয়া সিংহাসনরাংনি জাংচিও দংগিবা সিংহাসননি সামব্রিও সাকব্রি জাংগিগ্মাংগিবারাং দংআমিং। বিসংনি মিকখাংচা আরো খি·সাংচাবাকা মিক্রোন গাপ্পামিং। 7 স্খাংগিবা জাংগিগ্মাংগিবানি মিকখাং সিংহ গিত্তা, গ্মিগিবানি মা·সু বি·সা গিত্তা, গিত্থামগিবানি মান্দি গিত্তা আরো ব্রিগিবানি বিলগিবা দো·রেং গিত্তা দাক্কা। 8 ইয়া সাকব্রি জাংগিগ্মাংগিবানি দিমদাকনি গি·দক দাক্কে গ্রাং দংআমিং আরো উনি বে·এন দিমদাকও মিক্রোন গাপ্পামিং। উরাং সালওয়াল ইন্দাকে খাৎথা আগানিংআমিং, “বিল্লাকস্রাংগিবা গিত্তেল ইসল, জেআন দংআমিং, জেআন দংআ আরো জেআন রি·বাংজক, বিয়া রংথালা, রংথালা, রংথালা।” 9 ফাংনাজলনা থাংগিবা গিত্তেল ইসল, জেআন সিংহাসনও আসংএ দংআ, ইয়া জাংগিগ্মাংগিবারাং জে সময়ওন বিনা রাসং, মান্দিরা·আ আরো মিৎথেলাখো হ·ন্না, 10 উনোন উয়া সাক খলগ্রিকব্রি মি·আফারাং সিংহাসনখো মান·রিকগিবা, আগানস্খাওদে জেআন ফাংনাজলনা থাংএ দংআ বিখো থুচিকোপে সালাম দাক্কা। ইয়া মি·আফারাং উনো উয়া সিংহাসননি মিকখাংও বিসংনি মুকুটখো এংএ দন্নে আগানা, 11 “আনচিংনি গিত্তেল আরো ইসল, না·আ রাসং, মান্দিরা·আ আরো বিলখো মা·ন্না খ্রাগিবা, মুয়ানা না·আন দিমদাকখো থারিজক; আরো নাং·নিন হা·সিকাচা উরাং থারিয়া হং·জক আরো দংখুংআ।”

ফারাকগিবা খাৎথা 5

1 জেআন উয়া সিংহাসননি সাক্কাও আসংএ দংআমিং বিনি জাক্রা জাক্কো আংআ গি·সা খি·তাপখো নিকজক। খি·তাপনি নিং·আচা আরো হা·ফালচা চক্কা দংআমিং আরো গি·স্নি মোহরচা সীলমোহর সু·আ দংআমিং। 2 জা·মানো আংআ সাকসা বিল্লাকগিবা সা·গ্রেখো রাক্কে ইয়া খাৎথাখো আগানাখো খিন্নাজক, “সা ইয়া সীলমোহররাংখো ফি·এ খি·তাপখো এংনা খ্রাগিবা হং·আ?” 3 ইন্দিবা সালগিও বা হা·গিলসাকো বা হা·নিংআও সাকসাবা উয়া খি·তাপখো এংনা মান·জাজক, নিং·আনিখো নিনাবা মান·জাজক। 4 উনো আংআ নাম্মেন গ্রাপিংজকমিং, মুয়ানা ইন্দাকগিবা সাকসাখো মান·জাজক জেআন উয়া খি·তাপখো এংনা বা নিনা খ্রাগিবা হং·আ। 5 জা·মানো মি·আফারাংওনি সাকসা আংনা আগানজক, “দা·আ গ্রাপাবো। যিহূদা মা·চংনি সিংহ, জেআন দায়ূদনি দেরিচ্ছু-সু·রিচ্ছু হং·আ, বিয়া হামজক। বিয়ান উয়া খানস্নি সীলমোহরখো ফি·এ খি·তাপখো এংনা মা·ন্না।” 6 সাকব্রি জাংগিগ্মাংগিবা আরো মি·আফারাংনি জাংচিও দংগিবা সিংহাসননি সাক্কাও সাকসা মেষ বি·সাখো আংআ চাদেংএ দংআখো নিকজক। উয়া মেষ বি·সাখো স·ওতে গালজকমিংখোন ইন্নে আংআ চানচিংআমিং। উয়া মেষ বি·সানি গ্রং গং·স্নি আরো মিক্রোন রং·স্নি দংআমিং। ইসলনি জে সাকস্নি গিসিকখো হা·গিলসাকনি হা·দাম দিমদাকচা ওয়াত্তেতিংআ ইয়া মিক্রোনরাং হং·জক উয়া সাকস্নি গিসিক। 7 জা·মানো উয়া মেষ বি·সা রি·বাএ সিংহাসনও আসংএ দংগিবানি জাক্রা জাকনিখো খি·তাপখো রা·জক। 8 খি·তাপখো রা·আনি জা·মানো উয়া সাকব্রি জাংগিগ্মাংগিবা আরো সাক খলগ্রিকব্রি মি·আফারাং মেষ বি·সানি মিকখাংও থুচিকপজক। বিসংনি দিমদাকনি জাক্কো গি·সা দাক্কে বীণা আরো গি·সা দাক্কে ধূপও গাপ্পা সোনানি দনচাক্রা দংআমিং। উয়া ধূপও গাপ্পা দনচাক্রারাং হং·জক ইসলনি মান্দিরাংনি বি·আ। 9 বিসং ইয়া গিত্তাল গীতখো রিং·আমিং: “না·আন উয়া খি·তাপখো রা·এ উনি সীলমোহররাংখো এংনা খ্রাগিবা, মুয়ানা নাং·খো স·ওতে গাল্লা হং·জকমিং। না·আন নাং·নি হান·চিচা গিম্মিক মা·চং, খু·সুক, হা·সং আরো জাতরাংওনি মান্দিরাংখো ইসলনা ব্রিজক। 10 না·আ বিসংখো রা·এ গি·সা সংনক রিক্কে রা·জক আরো আনচিংনি ইসলনা দাকচাকে হ·ন্না ইন্নে খামাল দাকজক। হা·গিলসাকো বিসংআন শাসন দাকনুয়া।” 11 জা·মানো আংআ নিয়েতজক; আরো আংআ উয়া সিংহাসন, জাংগিগ্মাংগিবা আরো মি·আফারাংনি সামব্রিও বাং·আ সা·গ্রেরাংনি খু·রাংখো খিন্নাজক। উয়া সা·গ্রেরাং দংআমিং হাজাল হাজাল, কোটি কোটি। 12 বিসং রাক্কে রাক্কে ইয়া খাৎথাখো আগানিংআমিং: “জে মেষ বি·সাখো স·ওতে গাল্লা হং·জকমিং, বিয়ান বিলখো, গামখো, হা·আইয়াখো, বিল্লাকাখো, মান্দিরা·আখো, রাসংখো আরো মিৎথেলাখো মা·ন্না খ্রাগিবা।” 13 জা·মানো সালগিও, হা·গিলসাকো, হা·নিংআও আরো সাগালও জাংগিগ্মাংগিবা জেরাং দংআ, আরোবা, উরাংনি গিসেপো আরো জেরাং দংআ দিমদাকখো আংআ ইয়া খাৎথাখো আগানাখো খিন্নাজক: “সিংহাসননি সাক্কাও জেআন আসংএ দংআ বিনি আরো উয়া মেষ বি·সানি মিৎথেলা, মান্দিরা·আ, রাসং আরো বিল ফাংনাজলনা দংখানা।” 14 উয়া সাকব্রি জাংগিগ্মাংগিবারাং আগানজক, “আমেন।” জা·মানো উয়া মি·আফারাং থুচিকপে অলাখিজক।

ফারাকগিবা খাৎথা 6

1 মেষ বি·সা জে সময়ও উয়া খানস্নি সীলমোহররাংনি স্খাংগিবাখো ফি·ইংআমিং উনো আংআ নিয়েতজক; আরো আংআ উয়া সাকব্রি জাংগিগ্মাংগিবারাংনি গিসেপো সাকসাখো মিকখা খিমফ্রেতা গিত্তা খু·রাংও আগানাখো খিন্নাজক, “রি·বাবো।” উনো আংআ মাংসা গ্বিবক ঘোড়াখো নিকনা মান·জক। 2 জেআন উনি সাক্কাও আসংএ দংআমিং বিনি জাক্কো গি·সা চ্রি দংআমিং। বিনা গি·সা মুকুটখো হন·জক আরো বিয়া হামগিবা গিত্তা হং·খাতে হামরোরোএ রি·জক। 3 মেষ বি·সা জে সময়ও গ্মিগিবা সীলমোহরখো ফি·জক উনো আংআ গ্মিগিবা জাংগিগ্মাংগিবানি আগানাখো খিন্নাজক, “রি·বাবো।” 4 উনো ওয়া·আল গিত্তা গিচ্চাকা দা·আও মাংসা ঘোড়া হং·খাতজক। জেআন উনি সাক্কাও আসংএ দংআমিং বিনা হা·গিলসাকনিখো থম·থমাখো রা·দোআংখানা বিল হন·জক, জেদাক্কে মান্দিরাং সাকসা সাকগিপ্পিনখো স·ওতে গাল্লা। বিনা গি·সা দাল·বিয়া তরুয়ালখোবা হন·জক। 5 মেষ বি·সা জে সময়ও গিত্থামগিবা সীলমোহরখো ফি·জক উনো আংআ গিত্থামগিবা জাংগিগ্মাংগিবানি আগানাখো খিন্নাজক, “রি·বাবো।” জা·মানো আংআ মাংসা গিসিম ঘোড়াখো নিকজক। জেআন উনি সাক্কাও আসংএ দংআমিং বিনি জাক্কো গি·সা থগিবা দংআমিং। 6 আরো আংআ উয়া সাকব্রি জাংগিগ্মাংগিবারাংনি গিসেপো সাকসাখো আগানাখো খিন্নাজক, “সাকসা কাম রি·ম্মে চা·গিবানি সালসানি কামনা সেরসা গম বা সের গিত্থাম যবখো মা·ন্না। তেল আরো আংগুর বিৎচিখো না·আ দা·আ নাসিয়েতাবো।” 7 মেষ বি·সা জে সময়ও ব্রিগিবা সীলমোহরখো ফি·জক উনো আংআ ব্রিগিবা জাংগিগ্মাংগিবানি আগানাখো খিন্নাজক, “রি·বাবো।” 8 উনো আংআ বকদেলেপগিবা মাংসা ঘোড়াখো নিকজক। জেআন উনি সাক্কাও আসংএ দংআমিং বিনি বিমুং হং·জক সিয়া; আরো সিগিবা হা·দাম বিনি থিক জা·মান জা·মান রি·ইংআমিং। হা·গিলসাকনি বাক ব্রিনি বাকসানি সাক্কাও বিসংনা বিলখো হন·জক, জেদাক্কে বিসং মি·ল্লাম, আকাল, সিয়া আরো হা·গিলসাকনি ব্রিংনি মাৎবুরুংরাংচা মান্দিরাংখো স·ওতে গাল্লা। 9 জে সময়ও বিয়া বংআগিবা সীলমোহরখো ফি·জক উনো আংআ গি·সা গানচিনি খা·মাও ইন্দাকগিবা মান্দিরাংনি গিসিকখো নিকনা মান·জক জেরাংখো ইসলনি খাৎথানি গিম্মিন আরো সাক্ষি হ·ন্নানি গিম্মিন স·ওতে গালজকমিং। 10 বিসং রাক্কে চ্রিকে আগানজক, “ও রংথালগিবা আরো বিবিগিবা গিত্তেল, জেরাং ইয়া হা·গিলসাকনি হং·আ, বিসংখো বিচাল দাকনা আরো বিসংনি সাক্কাও চিংনি হান·চিনি গান্দাস্খাখো দাকনা না·আ আরবা বাসিক হারিমখুনুয়া?” 11 উনো বিসং গিম্মিকনা গি·ফ্রাক দাক্কে গ্বিবক চলাখো হন·জক আরো আগানজক, বিসংমুং রিম·ফাগিবা আরো জংআদারাং, জেরাংখো বিসং গিত্তান দাক্কে স·ওতে গাল্লা হং·নুয়া বিসং চু·সকগিজা দিপ্পাৎদে বিসং জেদাক্কে আরোবা অকখিসা সময় সেংসোখুয়া। 12 জা·মানো আংআ নিকজক, বিয়া জে সময়ও দকগিবা সীলমোহরখো ফি·জক উনো বিল্লংএ বাংগুরিজক। সাল নাম্মেন গিসিমজক আরো জাজং হান·চি গিত্তা গিচ্চাকজক। 13 বালওয়া থারাকজোকনো জেদাক্কে ডুমুর বিফাংওনি ডুমুর সময় হং·গিজান গা·আকারিয়া উয়ানদাক্কেন সিলগানি আস্কিরাং হা·গিলসাকনি সাক্কাও থাকওয়াতে গা·আকজক। 14 বিল·রিরিমে দনগিবা লেকখা গিত্তান সিলগা বিল·রিরিমজক; আরো গিম্মিক হা·ব্রি আরো চিচাং আন·থাংথাংনি হা·দামওনি জিত্তাংআরিজক। 15 হা·গিলসাকনি গিম্মিক রাজা আরো দাল·গিবা মান্দিরাং, সুবিদার, মা·ন্নে চা·গিবা আরো বিল্লাকগিবা মান্দিরাং আরো সাকফ্রাক নকখল আরো জাকগিত্তেল মান্দিরাং হা·ব্রিনি হা·খলরাংচা আরো রং·থিনি মিৎথিনারাংচা আন·থাংরাংখো থুম্মুয়ে গালজক। 16 বিসং হা·ব্রি আরো রং·থিরাংখো আগানজক, “চিংনি সাক্কাও গা·আকবো আরো জেআন উয়া সিংহাসনও আসংএ দংআমিং বিনি মিকখাংওনি আরো মেষ বি·সানি খা·আওনাংআওনিখো চিংখো থুম্মুয়ে দনবো, 17 মুয়ানা বিসংনি খা·আওনাংআখো ফারাকানি উয়া দাল·বাৎগিবা সাল সকবাংজক, আরোবা সা উনি মিকখাংও চাদেংএ দংনা মা·ন্না?”

ফারাকগিবা খাৎথা 7

1 উনি জা·মানো আংআ সাকব্রি সা·গ্রেখো হা·গিলসাকনি সামব্রি খি·থিকওনা চাদেংএ দংআখো নিকজক। বিসং হা·গিলসাকনি খি·থিকব্রিনি বালওয়াখো ফেং·এ রা·রিকিংআমিং, জেদাক্কে হা·গিলসাক, সাগাল বা বলবিফাংও বালওয়া বালজা। 2 জা·মানো আংআ দা·আও সাকসা সা·গ্রেখো সালারামচানি চাখাতে রি·বাখো নিকজক। বিচা থাংগিবা ইসলনি সীলমোহর দংআমিং। জে সাকব্রি সা·গ্রেনা হা·গিলসাক আরো সাগালনি নামগিজাখো দাক্কানি বিল হ·ন্নামিং উয়া সাকব্রি সা·গ্রেখো বিয়া নাম্মেন রাক্কে চ্রিকে আগানজক, 3 “আনচিংনি ইসলনি নকখলরাংনি কপালও সীলমোহর সু·খুজানা দিপ্পাৎ হা·গিলসাক, সাগাল বা বলফাংরাংখো দা·আ নাসিয়েতাবো।” 4 জা·মানো আংআ উয়া সীলমোহর সু·আ মান্দিরাংনি নম্বলখো খিন্নাজক। ইস্রায়েলরাংনি গিম্মিক মা·চংওনি রিৎচাসা সৎব্রিব্রি হাজাল মান্দিখো সীলমোহর সু·আমিং: 5 যিহূদানি মা·চংওনি হাজাল চি·গ্মি। রূবেণনি মা·চংওনি হাজাল চি·গ্মি। গাদনি মা·চংওনি হাজাল চি·গ্মি। 6 আশেরনি মা·চংওনি হাজাল চি·গ্মি। নপ্তালিনি মা·চংওনি হাজাল চি·গ্মি। মনঃশিনি মা·চংওনি হাজাল চি·গ্মি। 7 শিমিয়োননি মা·চংওনি হাজাল চি·গ্মি। লেবিনি মা·চংওনি হাজাল চি·গ্মি। ইষাখরনি মা·চংওনি হাজাল চি·গ্মি। 8 সবূলূননি মা·চংওনি হাজাল চি·গ্মি। যোষেফনি মা·চংওনি হাজাল চি·গ্মি। বিন্যামীননি মা·চংওনি হাজাল চি·গ্মি। 9 উনি জা·মানো আংআ গিম্মিক জাত, মা·চং, হা·সং আরো খু·সুকওনি ইন্দাকফিল্লে মান্দি জিলমাখো নিকজক, দারাংবা বিসংখো চান্না মান·জাজক। গ্বিবক চলাখো চিন্নে বিসং উয়া সিংহাসন আরো মেষ বি·সানি মিকখাংও খেজুর বিজাকখো জাক্কো রা·এ চাদেংএ দংআমিং। 10 বিসং রাক্কে চ্রিকে আগানিংআমিং: “জেআন সিংহাসনও আসংএ দংআ, আনচিংনি উয়া ইসল আরো মেষ বি·সানি জাক্কোন পাপওনি জক্কানি দংআ।” 11 জা·মানো সা·গ্রেরাং গিম্মিকান উয়া সিংহাসনখো, মি·আফারাংখো আরো সাকব্রি থাংগিবা জাংগিগ্মাংগিবারাংখো উইলউইলে চাদেংজক। বিসং সিংহাসননি মিকখাংও থুচিকপে ইসলখো অলাখিয়ে আগানজক, 12 “আমেন। রাসং, হা·আইয়ানি, মিৎথেলা, মান্দিরা·আ, বিল আরো বিল্লাকা ফাংনাজলনা আনচিংনি ইসলনিন হং·খানা। আমেন।” 13 উনো সাকসা মি·আফাআ আংনা আগানজক, “গ্বিবক চলাখো চিনগিবা ইয়া মান্দিরাং সা? আরো বাচ্চানিবা ইরাং রি·বাজক?” 14 আংআ বিনা আগানজক, “নিবো, উখো না·আন হা·আইয়া।” বিয়া আংনা আগানজক, “উয়া বিল্লংআ দুকওনি জেরাং রি·বাজক ইরাং বিসংআন। ইরাং আন·থাংনি চলাখো মেষ বি·সানি হান·চিও সু·গালে গ্বিবকেতজক। 15 উনি গিম্মিন ইরাং ইসলনি সিংহাসননি মিকখাংও দংআ আরো সালগিনি থরম নক্কো ইরাং সাল-ওয়াল বিনা দাকচাকে হ·ন্নিংআ। জেআন সিংহাসনও আসংএ দংআ বিয়ান ইরাংনি সাক্কাও বিনি তাম্বুখো রিকনুয়া। 16 ইরাং আরবা অকখ্রিজানাজক, চি রিংনাবা হা·সিকজানাজক; সালনি দিং·আ ইরাংনি বে·এনো আরবা নাংজানাজক, দিংআবা দিংজানুয়া, 17 মুয়ানা উয়া মেষ বি·সা জেআন সিংহাসননি সাক্কাও দংআ বিয়ান ইরাংনি রাকখুয়াল হং·নুয়া। থাংগিবা চিমিকনি সেফাংও বিয়া বিসংখো রা·আংনুয়া, আরো ইসল ইরাংনি মিকচিখো রিপ্পাকেতনুয়া।”

ফারাকগিবা খাৎথা 8

1 জা·মানো মেষ বি·সা জে সময়ও স্নিগিবা সীলমোহরখো ফি·জক উয়া সময়ও সালগিও আধা ঘণ্টানি গিত্তা জ্রিপজ্রিপ দংজক। 2 জে সাকস্নি সা·গ্রে ইসলনি মিকখাংও চাদেংএ দংআ আংআ বিসংখো নিকনা মান·জক। বিসংনি জাক্কো গি·স্নি সিংগা হন·জক। 3 উনি জা·মানো দা·আও সাকসা সা·গ্রে রি·বাএ গানচিনি মিকখাংচা চাদেংজক। বিনি জাক্কো গি·সা চা·চেৎ সো·আনি সোনানি দনচাক্রা দংআমিং। বিনা বাং·এ চা·চেৎখো হন·জক জেদাক্কে বিয়া সিংহাসননি মিকখাংনি সোনানি গানচিনি সাক্কাও ইসলনি দিমদাক মান্দিরাংনি বি·আমুং উয়া চা·চেৎখো ফাকওয়াতা। 4 উয়া সা·গ্রেনি জাকওনি চা·চেৎনি ওয়াল·খুয়া ইসলনি মান্দিরাংনি বি·আমুং সাক্কাচানা ইসলনি মিকখাংও গাদোয়াংজক। 5 উনো উয়া সা·গ্রে গানচিওনি ওয়াল·খু রা·এ উয়া চা·চেৎ দনগিবা দনচাক্রাখো গাপ্পেতজক আরো হা·গিলসাকচানা গাল্লেতজক। উনি গিম্মিন মিকখা খিমফ্রেতানি গা·ম্মারাং আরো নাংআ-নাংসি গাম·ফ্রেতারাং, আরো মিকখা রিপরাপা আরো বাংগুরিয়া হং·জক। 6 জে সাকস্নি সা·গ্রেনি জাক্কো গি·স্নি সিংগা দংআমিং, উনি জা·মানো বিসং উরাংখো সিকনা থারিসোজক। 7 স্খাংগিবা সা·গ্রে বিনি সিংগাখো সিক্কেতানি জা·মানো হান·চিগ্মাং স্থিল আরো ওয়া·আল হা·গিলসাকওনা গাল্লেতা হং·জক। উনি গিম্মিন বাক গিত্থামনি বাকসা হা·গিলসাক, বাক গিত্থামনি বাকসা বলবিফাং আরো দিমদাক জেংরাং খামজক। 8 উনি জা·মানো গ্মিগিবা সা·গ্রে বিনি সিংগাখো সিকজক। উনো খানসা দা·ল্লা চিং·গিবা হা·ব্রি গিত্তা দাক্কা খানসা বস্তু সাগালচা গাল্লেতা হং·জক। উনো সাগালনি বাক গিত্থাম চিনি বাকসা চি হান·চি হং·আংজক, 9 সাগালনি বাক গিত্থামনি বাকসা জাংগিগ্মাংগিবারাং সিথকজক, আরো বাক গিত্থামনি বাকসা জাহাস বন·চকৎজক। 10 জা·মানো গিত্থামগিবা সা·গ্রে বিনি সিংগাখো গা·ম্মেতজক। উনো রংসা দা·ল্লা আস্কি গিত্তা চিং·এ চিং·এ সিলগাওনি গা·আকজক। 11 উয়া আস্কিনি বিমুংখো খা·গিবা বল মিংআমিং। বাক গিত্থামনি বাকসা চিবিমা আরো চিমিকনি সাক্কাও উয়া আস্কি গা·আকজক। উনি হা·সেল বাক গিত্থাম চিনি বাকসা খা·জক আরো উয়া খা·গিবা চিনি হা·সেল বাং·আ মান্দি সিজক। 12 উনি জা·মানো ব্রিগিবা সা·গ্রে বিনি সিংগাখো সিকজক। উনি গিম্মিন সালনি বাক গিত্থামনি বাকসা, জাজংনি বাক গিত্থামনি বাকসা আরো আস্কিরাংনি বাক গিত্থামনি বাকসা আন্দালজক। সালনি বাক গিত্থামনি বাকসাও আরো ওয়ালনি বাক গিত্থামনি বাকসাও মামুং সেং·আ দংজাজক। 13 জা·মানো আংআ দো·রেং মাংসাখো সিলগাও নাম্মেন সাক্কাচা বিল্লাখো নিকজক, আরো উয়া দো·রেংখো রাক্কে আগানাখো খিন্নাজক, “গিপ্পিন সা·গ্রে সিংগাখো সিকনা হা·ম্মিংজক, বিসংনি সিংগা সিকজোকনো জেরাং ইয়া হা·গিলসাকনি হং·আ বিসংনি হং·সিয়া, হং·সিয়া, হং·সিয়া হং·নুয়া।”

ফারাকগিবা খাৎথা 9

1 জা·মানো বংআগিবা সা·গ্রে সিংগাখো সিকজক, আরো আংআ রংসা আস্কিখো নিকজক। উয়া আস্কি সিলগাওনি হা·গিলসাকওনা গা·আকামিং। উয়া আস্কিনা থিং·বিয়া হা·খলনি চাবিখো হন·জক। 2 আস্কি উয়া থিং·বিগিবা হা·খলখো এংজক; উনো দাল·বিয়া চুলাওনি জেগিত্তা ওয়াল·খুয়া হং·খাতা, উগিত্তা দাক্কেন উয়া হা·খলওনি ওয়াল·খুয়া হং·খাতনা হা·বাচেংজক। উয়া হা·খলনি ওয়াল·খুচা সাল আরো সিলগা আন্দালাংজক, 3 আরো উয়া ওয়াল·খুয়াওনি বাং·আ হাগুক স্খালরাং হা·গিলসাকো হং·খাতে রি·বাজক। উয়া হাগুক স্খালরাংনা হা·গিলসাকনি মাংখ্রাং গিত্তা বিলখো হন·জক। 4 বিসংনা ইন্দাকে আগানা হং·জক জেদাক্কে বিসং হা·গিলসাকনি মামুং জেং বা সবুজ রংনি মামুংখো বা বলবিফাংখো নাসিয়েতজা; জে মান্দিরাংনি কপালও ইসলনি সীলমোহর সু·আ দংজা বিসংখোসান নাসিয়েতা। 5 ইয়া মান্দিরাংখো দকথাত্তে গাল্লানি মামুং বিলখো বিসংনা হন·জাওবা, জাবংআনা দিপ্পাৎ সায়েতানি বিলখো বিসংনা হন·জক। মাংখ্রাং জে সময়ও মান্দিখো বুয়েতা উনো জেগিত্তা সা·দিকানি হং·আ ইয়া হাগুকরাংনি হন·গিবা সা·দিকাবা থিক উগিত্তান দাক্কা। 6 উয়া সময়ও মান্দিরাং সিয়াখো সান্দিনুয়া ইন্দিবা মামুং দাক্কেবা উখো মান·জানুয়া; বিসং সিনা হাম·নুয়া ইন্দিবা সিয়া বিসংচানি খাত্তাংনুয়া। 7 উয়া হাগুক স্খালরাংনি বিমাং দাকগ্রিকনা থারিসোগিবা ঘোরা গিত্তা দাক্কা। বিসংনি স্খুও সোনানি মুকুট গিত্তা দাকগিবা মিংসা বস্তু দংআমিং, আরো বিসংনি মিকখাং মান্দি গিত্তা দাক্কামিং। 8 বিসংনি খিন্নি মিচিকরাংনি খিন্নি গিত্তা আরো বিসংনি ওয়াগাম সিংহনি ওয়াগাম গিত্তা দাক্কা। 9 বিসংনি চেলো সিলনি বিসিংখাপ গিত্তা দাক্কা চলা দংআমিং। বাং·বিয়া ঘোরা আপসান দাকগ্রিকানি রথখো সাল্লে খাতজোকনো জেগিত্তা গা·ম্মা, বিসংনি গ্রাংনি গা·ম্মাবা উগিত্তান হং·আমিং। 10 বিসংনি খি·মি আরো বেরি মাংখ্রাংনি খি·মি আরো বেরি গিত্তা দাক্কামিং। জাবংআ দিপ্পাৎ মান্দিরাংখো নাসিয়েতানি বিল বিসংনি খি·মিও দংআমিং। 11 থিং·বিগিবা হা·খলনি সা·গ্রেআন ইয়া হাগুক স্খালরাংনি রাজা হং·আমিং। ইব্রীয় খু·সুকচা উয়া সা·গ্রেনি বিমুং হং·আমিং আবদ্দোন আরো গ্রীক খু·সুকচা আপল্লুয়োন, আগানস্খাওদে ব·ন্নেতগিবা হং·আ। 12 স্খাংগিবা হং·সিয়া বন·জক। নিবো, ইনি জা·মানো আরোবা মিংগ্মি হং·সিয়া রি·বাংজক। 13 জা·মানো দকগিবা সা·গ্রে বিনি সিংগাখো সিকজক। ইসলনি মিকখাংও সোনানি জে গানচি দংআ উয়া গানচিনি গি·ব্রি গ্রংওনি আংআ সাকসানি খাৎথা আগানাখো খিন্নাজক। জেচা সিংগা দংআমিং উয়া দকগিবা সা·গ্রেনা বিয়া আগানজক, 14 “জে সাকব্রি সা·গ্রেখো দাল·বাৎগিবা চিবিমা ইউফ্রেটিসও খাএ দন্না বিসংখো ওয়াত্তেতবো।” 15 উনো উয়া সাকব্রি সা·গ্রেখো ওয়াত্তেতজক। ইয়া বিলসিনি ইয়া জা, ইয়া সাল আরো ইয়া ঘণ্টানা উয়া সা·গ্রেরাংখো থারিয়ে দনসোআমিং জেদাক্কে বিসং বাক গিত্থামনি বাকসা মান্দিরাংখো দকথাত্তে গাল্লা। 16 জা·মানো আংআ খিন্নানা মান·জক, ঘোরাও গাখাতগিবা সিপাই হং·আমিং মিলিয়ন রিৎচাগ্মি। 17 মিকজুমাংও জে ঘোরারাংখো আরো উরাংনি সাক্কাও আংআ জেরাংখো নিকজক বিসংনি মিকখাং ইন্দাকামিং- বিসংনি চেলখো রাক্ষিগিবা চলা ওয়া·আল গিত্তা গিচ্চাকা, নিল আরো গন্ধক গিত্তা রিম্মিতা রংনি হং·আমিং। ঘোরারাংনি স্খু সিংহনি স্খু গিত্তা দাক্কামিং আরো উরাংনি খু·সুকওনি ওয়া·আল, ওয়াল·খুয়া আরো গন্ধক হং·খাতিংআমিং। 18 ওয়া·আল, ওয়াল·খুয়া আরো গন্ধক- ইয়া গি·গিত্থাম শাস্তিরাংচা বাক গিত্থামনি বাকসা মান্দিরাংখো দক্কে গালজক। 19 উয়া ঘোরারাংনি খু·সুক আরো খি·মিওন বিসংনি বিল দংআমিং, মুয়ানা বিসংনি খি·মিরাং চিপ্পু গিত্তা দাক্কামিং। উয়া খি·মিরাংনি স্খুচা বিসং মান্দিরাংখো নাসিয়েতিংআমিং। 20 ইন্দিবা ইন্দাকা শাস্তিরাংনি জা·মানোবা জে মান্দিরাং থাংএ দংজক বিসং আন·থাংথাংনি জাকচা থারিগিবা মিত্তে বিমাংওনি গিসিক ফিল·জাজক। বিসং গিসিক নামগিজাগিবারাংখো আরো জেরাং নিকনা, খিন্নানা বা রামা রি·না মান·জা ইন্দাকগিবা সোনা, রূপা, পিতল, রং·থি আরো বলচা থারিগিবা মিত্তে বিমাংখো হামুয়ারিন দংজক। 21 ইনাআগ্রেবা স·ওতা, যাদু মন্তল দাক্কা, থি·ল্লেকা আরো চা·উআ ইরাংওনিবা বিসং গিসিক ফিল·জাজক।

ফারাকগিবা খাৎথা 10

1 উনি জা·মানো আংআ দা·আও সাকসা বিল্লাকগিবা সা·গ্রেখো সালগিওনি হং·ওনবাআখো নিকজক। বিনি গানদিং-চিনদিং গাদিলা, আরো বিনি স্খু সাক্কাও সুনদারে দংআমিং। বিনি মিকখাং সাল গিত্তা আরো বিনি জা·চক ওয়া·আলনি খ্রং গিত্তা দাক্কামিং। 2 বিনি জাক্কো এংএ দনগিবা খানসা চন্না খি·তাপ দংআমিং। বিয়া বিনি জাক্রানি জা·চকখো সাগালনি সাক্কাও আরো জাক্কাসিনি জা·চকখো হা·আনি সাক্কাও দন্নে সিংহনি রান্না গিত্তা গা·ম্মে চ্রিকজক। বিনি চ্রিকামুং থারিমে রাং·স্নি মিকখা খিমফ্রেতা গিত্তা গাম·জক। 4 জে সময়ও রাং·স্নি মিকখা খিমফ্রেতা গাম·জক উনো আংআ চকনা হাম·জক। ইন্দিবা সালগিওনি আংনা ইয়া খাৎথাখো আগানজক, “রাং·স্নি মিকখা খিমফ্রেতা জে খাৎথাখো আগানজক উখো সিউল দাক্কে দনবো, দা·আ চক্কাবো।” 5 জে সা·গ্রেখো আংআ সাগাল আরো হা·আনি সাক্কাও চাদেংএ দংআখো নিক্কামিং বিয়া বিনি জাক্রানি জাকখো সালগিচানা দি·চাজক। 6 জেআন ফাংনাজলনা থাংএ দংআ আরো সিলগা, হা·গিলসাক, সাগাল আরো উরাংও দংগিবা গিম্মিকখো থারিজক, বিনি বিমুংও মিকচেতি উয়া সা·গ্রে আগানজক, “আরবা হারিমজানাজক। 7 ইন্দিবা স্নিগিবা সা·গ্রে বিনি সিংগাখো সিক্কানি সালো ইসলনি নিং·থুয়া মিকসংআ চু·সকনুয়া। ইসল বিনি আন·থাংনি নকখলরাংচা, আগানস্খাওদে আগানসোগিবারাংচা জেখো আগানামিং উগিত্তান ইরাং হং·নুয়া।” 8 আংআ সালগিওনি জেনি খাৎথা আগানাখো খিন্নামিং বিয়া দা·আবা আংনা আগানজক, “জে সা·গ্রে সাগাল আরো হা·আনি সাক্কাও চাদেংএ দংআ বিচা রি·য়াংএ বিনি জাকনিখো এংএ দনগিবা খি·তাপখো রা·বো।” 9 উনো আংআ উয়া সা·গ্রেচা রি·য়াংএ উয়া খি·তাপখো আংনা হ·ন্না আগানজক। বিয়া আংনা আগানজক, “ইখো রা·এ চা·এ গালবো। নাং·নি বিকমাখো ইয়া খা·এতনুয়া, ইন্দিবা খু·সুকও বিজা বিৎচি গিত্তা চি·নুয়া।” 10 উনো সা·গ্রেনি জাকনিখো উয়া চনগিবা খি·তাপখো রা·এ আংআ চা·এ গালজক। আংনি খু·সুকও উখো বিজা বিৎচি গিত্তা চি·এ নিকজক, ইন্দিবা চা·আনি জা·মানো আংনি বিকমা খা·জক। 11 জা·মানো আংনা ইয়া খাৎথাখো আগানজক, “নাং·খো দা·আবা বাং·আ হা·সং, জাত, খু·সুক আরো রাজানি বিদিংও রি·বাগিবা চাসংনি খাৎথাখো আগানসোনা নাংনুয়া।”

ফারাকগিবা খাৎথা 11

1 জা·মানো থয়ে নিগিবা গল·দিক গিত্তা দাক্কা গি·সা গল·দিকখো আংনা হন·জক আরো আগানজক, “থরম নকখো আরো গানচিখো থবো আরো জেরাং উনো ইসলখো অলাখিয়া বিসংখো চানবো। 2 ইন্দিবা থরম নকনি হা·ফালও জে হা·থিলা দংআ, উখো দা·আ থোয়াবো, মুয়ানা উখো গিপ্পিন জাতরাংনা হন·জক। বিসং জাসৎব্রিগ্মি জারাং দিপ্পাৎ রংথালগিবা সংজিলমাখো জা·চকচা গা·বেলবেলনুয়া। 3 ইন্দিবা আংআ আংনি সাকগ্মি সাক্ষিনা ইন্দাকা বিলখো হ·ন্নুয়া জেনি গিম্মিনো বিসং সালা চটখো গান্নে হাজালসা রিৎচাগ্মি সৎদক সালনা দিপ্পাৎ আগানসোগিবা হং·এ খাৎথা আগান্নুয়া।” 4 উয়া সাকগ্মি সাক্ষি হং·জক জলপই বিফাং ফাংগ্মি আরো গাসা বলগ্মি, জেরাং হা·গিলসাকনি গিত্তেলনি মিকখাংও চাদেংএ দংআ। 5 সাবা বিসংনি নামগিজাখো দাকনা হা·ম্মোদে ইন্দিদে বিসংনি খু·সুকওনি ওয়া·আল হং·খাতে উয়া বোবিলরাংখো সো·এ গালনুয়া। জেআন বিসংখো নামগিজাখো দাকনা হাম·নুয়া বিখো ইন্দাকে সিনা নাংনুয়া। 6 ইয়া মান্দিরাং জে সালওনা দিপ্পাৎ আগানসোগিবা গিত্তা খাৎথা আগান্নুয়া উনোনা দিপ্পাৎ মিকখা ওয়াজাখানা উনি গিম্মিন সিলগাখো চিপচাংএ দন্নানি বিল বিসংনি দংনুয়া। চিখো হান·চি দাক্কানি আরো হা·সিক রামরাম শাস্তিরাংচা হা·গিলসাকনি নামগিজাখো দাক্কানি বিলবা বিসংনি দংনুয়া। 7 বিসংনি সাক্ষি হ·ন্না ব·ন্নানি জামানো উয়া থিং·নাপগিবা হা·খলওনি মাংসা মাৎবুরুং হং·খাতে রি·বাএ বিসংমুং দাকগ্রিকনুয়া আরো বিসংখো হাম্মে দকথাত্তে গালনুয়া। 8 বিসংনি গিত্তেলখো জে সংজিলমাও চিসলও দাৎখাপামিং উয়া দাল·বাৎগিবা সংজিলমানি রামাও বিসংনি মাংগিসি গা·আকে দংনুয়া। উয়া সংজিলমানি বিমুং চং·মতদে সদোম আরো মিসর হং·জা, ইন্দাকোবা উগিত্তান দাক্কা ইন্নে উয়া সংজিলমাখো সদোম আরো মিসর ইন্না। 9 উনো হা·সং গিম্মিক, মা·চং, খু·সুক আরো জাতওনি মান্দিরাং সাল গিত্থাম সাল ফাকসা দিপ্পাৎ উয়া মাংগিসিরাংখো নিনুয়া। 10 বিসং বিসংনি বে·এনরাংখো গোপনা হন·জানুয়া। বিসং সিজক ইন্নে জেরাং ইয়া হা·গিলসাকনি হং·আ বিসং খুসি হং·নুয়া আরো হান·সেংনুয়া। মান্দিরাং সাকসা সাকগিপ্পিননা বকসিস ওয়াত্তেতনুয়া, মুয়ানা জেরাং ইয়া হা·গিলসাকনি বিসং ইয়া সাকগ্মি আগানসোগিবারাংনি হা·সেল দুক মা·ন্নামিং। 11 ইন্দিবা ইয়া সালগিত্থাম সালফাকসানি জা·মানো ইসলনি হন·গিবা বালজাংগি বিসংনি নিং·আও নাপজক। উনি হা·সেল বিসং জা·চকচা গা·চাক্কে চাদেংজক। উনো জেরাং বিসংখো নিকজক বিসং নাম্মেন খেনজক। 12 জা·মানো উয়া সাকগ্মি সাক্ষি সালগিওনি রাক্কে ইয়া খাৎথাখো আগানাখো খিন্নাজক, “ইয়োনা চাখাতে রি·বাবো।” উনো বিসং বিসংনি বোবিলরাংনি মিক্রোনথাংওন খানসা গাদিলাও দাক্কে সালগিচানা গাদোয়াংজক। 13 উয়া সময়ও বিল্লংএ বাংগুরিজক আরো উয়া সংজিলমানি বাক চিকখুংনি বাকসা বি·গ্রপাংজক। উয়া বাংগুরিয়াও হাজালস্নি মান্দি সিথকজক। উনি গিম্মিন উয়ো দংগিবা গিম্মিকান খেন্নে সালগিনি ইসলখো রাসং দাকনা হা·বাচেংজক। 14 ইন্দাকে গ্মিগিবা হং·সিয়া বন·জক। নিবো, থেংরিন গিত্থামগিবা হং·সিয়া রি·বাংজক। 15 জা·মানো স্নিগিবা সা·গ্রে বিনি সিংগাখো সিকজক। উনো সালগিচা রাক্কে রাক্কে আগানা হং·জক, “হা·গিলসাকনি সংনক দা·আও আনচিংনি গিত্তেল আরো বিনি খ্রীষ্টনি হং·জক। 16 বিয়া ফাংনাজলনা শাসন দাকনুয়া।” জে সাক খলগ্রিকব্রি মি·আফারাং ইসলনি মিকখাংও বিসংনি সিংহাসননি মিকখাংও আসংএ দংআমিং বিসং থুগোপে ইসলখো অলাখিয়ে আগানজক, 17 “বিল্লাকস্রাংগিবা গিত্তেল ইসল, না·আ দংআ আরো না·আ দংআমিং। চিংআ নাং·খো মিৎথেলা, মুয়ানা না·আ নাং·নি দাল·গিবা বিলখো জাক্কো রা·এ শাসন দাকনা হা·বাচেংজক। 18 গিম্মিক জাত খা·আওনাংজক, আরো নাং·নি খা·আওনাংআখো ফিন্নিকানি সাল হং·জক। সিগিবারাংখো বিচাল দাক্কানি সাল সকবাজক, আরো নাং·নি নকখলরাংনি, আগানস্খাওদে আগানসোগিবারাংখো আরো নাং·নি মান্দিরাংখো আরো চন্না-দা·ল্লা গিম্মিকান জেরাং নাং·না খা·ফাকা বিসংনা বকসিস হ·ন্নানি সাল সকবাজক। ইনাআগ্রেবা জেরাং হা·গিলসাকনি নামগিজাখো দাক্কিংআ, বিসংখো ব·ন্নেতানি সালবা সকবাজক।” 19 জা·মানো সালগিনি থরম নকখো এংআ হং·জক আরো উনো ইসলনি নিয়াম সিন্দুকখো নিকজক। উনো মিকখা রিপরাপা আরো গাম·ফ্রেতা খু·রাং আরো মিকখা খিমফ্রেতা আরো বাংগুরিয়া আরো নাম্মেন স্থিল গা·আকনা হা·বাচেংজক।

ফারাকগিবা খাৎথা 12

1 জা·মানো সালগিও মিংসা দাল·গিবা চিনখো নিকনা মান·জক- সাকসা মিচিক, জেনি গানদিংচিনদিং সালমিং আরো জা·চক কক্ষুমাও জাজং দংআমিং। রংচিগ্মি আস্কিচা থারিয়া গি·সা মুকুট বিনি স্খুও দংআমিং। 2 বিয়া হা·ন্নোগ্মাংমিং আরো বি·সা বা·আনি সা·দিকানা চ্রিকিংআমিং। 3 জা·মানো সালগিও দা·আও মিংসা চিনখো নিকনা মান·জক- ওয়া·আল গিত্তা গিচ্চাকা মাংসা দাল·বিয়া চিপ্পু স্খাল। উনি দৎস্নি স্খু আরো চিখুং গ্রং, আরো স্খুরাংও গি·স্নি মুকুট দংআমিং। 4 বিনি খি·মিচা বিয়া সিলগানি বাক গিত্থামওনি বাকসা আস্কিখো সাল্লে রা·বাএ হা·গিলসাকচানা গোএতজক। জে মিচিকনি বি·সা হং·না হা·ম্মিংআমিং উয়া দাল·বিয়া চিপ্পু স্খাল বিনি মিকখাংও চাদেংআমিং জেদাক্কে বি·সা আৎচিয়ানি জা·মানোন বিয়া মিন্নকে গালনা মা·ন্না। 5 মিচিকনি সাকসা দেফান্থি হং·জক। উয়া দেফান্থিন সিলনি গল·দিকখো রা·এ গিম্মিক জাতখো শাসন দাকনুয়া। উয়া বি·সাখো ইসল আরো বিনি সিংহাসনচা দি·এ রা·জক, 6 আরো উয়া মিচিক হা·গিসি জওলচানা খাত্তাংজক। ইসল উয়া হা·গিসি জওলচানা বিনা গি·সা হা·দামখো থিক দাক্কে দন্নামিং জেদাক্কে হাজালসা রিৎচাগ্মি সৎদক সাল বিয়া উনো হালদুআখো মা·ন্না। 7 জা·মানো সালগিও দাকগ্রিকা হং·জক। মীখায়েল আরো বিনি নিং·আও দংগিবা সা·গ্রেরাং উয়া দাল·বিয়া চিপ্পু স্খাল আরো উনি সা·গ্রেরাংমুং দাকগ্রিকজক। 8 উয়া দাল·বিয়া চিপ্পু স্খাল হামজাজক আরো সালগিও বিসংখো দংনাবা হন·জাজক। 9 উনো উয়া দাল·বিয়া চিপ্পু স্খাল আরো বিমুং বিনি সা·গ্রেরাংখো হা·গিলসাকোনা গাল্লেতজক। ইয়া দাল·বিয়া চিপ্পু স্খাল হং·জক উয়া গিৎচাম চিপ্পু জেখো দিয়াবল বা শয়তান মিংআ। বিয়া হা·গিলসাকনি গিম্মিক মান্দিরাংখো ব্রাংগিবা রামাচা রা·আংআ। 10 জা·মানো আংআ সালগিওনি রাক্কে রাক্কে সাকসানি আগানাখো খিন্নাজক, “দা·আও জক্কেতা, বিল আরো আনচিংনি ইসলনি সংনক আরও বিনি খ্রীষ্টনি বিল সকবাজক, মুয়ানা জে আনচিংনি জংরাংখো দোস হ·ন্নুয়ামিং বিখো সালগিচাখো গাল্লেতজক। আনচিংনি ইসলনি মিকখাংও বিয়া সালওয়াল বিসংনি দোসখো ফিন্নিকনুয়ামিং। 11 মেষ বি·সানি হান·চি আরো আন·থাংথাংনি সাক্ষিচা বিসং বিখো হাম্মেতজাজক। বিসং আন·থাংথাংনা বাং·এ খা·সাজানি হা·সেলান বিসংনি জাংগিখো হ·ন্না বিসং গং·আমিং। 12 “উনি গিম্মিন ও সালগি, হান·সেংবো; না·সং জেরাং উনো দংআ, হান·সেংবো। ইন্দিবা হা·গিলসাক আরো সাগাল, হং·সিখানা না·সংনা! মুয়ানা শয়তান না·সংনি সাক্কাও হং·খাতে রি·বাজক। শয়তান খা·আওনাংজক, মুয়ানা বিয়া হা·আইয়া বিনি সময় বাং·এ দংজাজক।” 13 উয়া দাল·বিয়া চিপ্পু স্খাল জে সময়ও নিকজক, বিখো হা·গিলসাকচানা গাল্লেতজক উনো জে মিচিকনি বি·সা হং·আমিং উয়া চিপ্পু স্খাল বিমুং বোবিল দাকনা হা·বাচেংজক। 14 উনো উয়া মিচিকনা দাল·বিয়া মাংসা দো·রেংনি গি·গ্মি গ্রাংখো হন·জক জেদাক্কে বিয়া হা·গিসি জওলো বিনি হা·দামচা বিল্লে রি·য়াংনা মা·ন্না। উনো উয়া চিপ্পু স্খালনি নিকগিজাও বিলসি গিত্থাম জাদকনা বিয়া হালদুআখো মা·ন্নুয়া। 15 উনো উয়া দাল·বিয়া চিপ্পু স্খাল উয়া মিচিকনি জা·মানচা দংএ বিখো চিও সাল্লে রা·আংনা ইন্নে বিনি খু·সুকওনি চি রং·খাতে গি·সা চিবিমা থারিজক, 16 ইন্দিবা হা·গিলসাক উয়া মিচিকনা দাকচাকজক। উয়া চিপ্পু খু·সুকওনি জে চিখো রং·খাত্তেতজক হা·গিলসাক বিনি খু·সুকখো ওয়াংএ উখো রিংএ গালজক। 17 উনো উয়া চিপ্পু মিচিকখো নাম্মেন খা·আওনাংজক; আরো উয়া মিচিকনি দংখুগিবা মান্দিরাং, আগানস্খাওদে জেরাং ইসলনি গি·য়েতাখো মানিয়া আরো যীশুনি স্খিয়াখো রি·ম্মে রা·রিকা বিসংনি সাক্কাও বিয়া দাকগ্রিকনা রি·য়াংজক আরো সাগালনি রিক্কামো চাদেংএ দংজক।

ফারাকগিবা খাৎথা 13

1 উনি জা·মানো আংআ মাংসা মাৎবুরুংখো সাগালচানি হং·খাতে রি·বাখো নিকজক। উয়া মাৎবুরুংনি গ্রং চিকখুং আরো দৎস্নি স্খু দংআমিং। উয়া গ্রংরাংনি সাক্কাও চিকখুং মুকুট দংআমিং আরো স্খুরাংনি সাক্কাও ইসলখো চন্নিকনা ইন্নে দিংথাং দিংথাং বিমুংরাং লিক্ষিয়া দংআমিং। 2 উয়া মাৎবুরুং নিনা মাৎচা গিত্তা দাক্কামিং, আরো উনি জা·চকরাং মাকবিলনি জা·চক গিত্তা দাক্কামিং আরো মিকখাং সিংহনি মিকখাং গিত্তা দাক্কামিং। উয়া চিপ্পু বিনি বিলখো, সিংহাসনখো আরো দাল·বাতা বিলখো উয়া মাৎবুরুংনা হন·জক। 3 মাৎবুরুংনি গি·সা স্খুও ইন্দাকা মাত্তা দংআমিং জেনি হা·সেলো বিয়া সিনা গিত্তা দাকজকমিং, ইন্দিবা উয়া মাত্তা নামজকমিং। উনি গিম্মিনো হা·গিলসাকনি গিম্মিক মান্দিরাং আইয়াও ইনমানে উয়া মাৎবুরুংখো জা·রিকজক। 4 চিপ্পু উয়া মাৎবুরুংনা বিলখো হ·ন্নামিং ইন্নে মান্দিরাং উয়া চিপ্পুখো ইসল চাচা মান্দিরা·এ সেলামজক, আরো মাৎবুরুংখোবা উয়ানদাক্কে সেলামে আগানজক, “ইয়া মাৎবুরুং গিত্তা হং·আ সা দংআ? আরো সাবা বিমিং দাকগ্রিকনা মা·ন্না?” 5 রাসং দাকনা আরো ইসলখো চন্নিকনা ইন্নে উয়া মাৎবুরুংনা খু·সুক আগানানি বিলখো হন·জক। উয়া মাৎবুরুং জেদাক্কে জাসৎব্রিগ্মি জারাং দিপ্পাৎ বিনি মান·রিকানি বিলখো জাকখালনা মা·ন্না উনি গিম্মিনো বিনা হন·জক। 6 উনো উয়া মাৎবুরুং ইসলনি সাক্কাও, বিনি বিমিংনি আরো বিনি দংরামানি সাক্কাও আরো সালগিও জেরাং দংআ বিসংনি সাক্কাও নাম্মেন চন্নিকানি খাৎথাখো আগান্না হা·বাচেংজক। 7 ইসলনি মান্দিরাংমিং দাকগ্রিকে বিসংখো হাম্মে রা·আনি বিলখো বিনা হন·জক আরো গিম্মিক মা·চং, হা·সং, খু·সুক আরো জাতনি মান্দিরাংনি সাক্কাও বিনা মান·রিকানি বিলখো হন·জক। 8 জেরাং ইয়া হা·গিলসাকনি, আগানস্খাওদে জেরাংনি বিমিং মেষ বি·সানি জাংগিনি খি·তাপও লিক্ষিয়া দংজা বিসং গিম্মিকান উয়া মাৎবুরুংখো ইসল চাচা মান্দিরা·এ সেলাম দাকনুয়া। ইয়া মেষ বি·সাখো হা·গিলসাক হং·না স্খাংআন স·ওতে গালনা থিক দাক্কামিং। 9 জেনি খিন্নানা নাচিল দংআ, বিয়া রংথালগিবা শাস্ত্রনি ইয়া খাৎথারাংখো খিন্নাখানা: 10 জেখো চিপচাংএ দন্নানি খাৎথা দংআ বিখো চিপচাংএ দন্নুয়া। জেখো মিল্লামচা স·ওতনা খাৎথা দংআ বিয়া স·ওতাখো মান·নুয়া। ইনি গিম্মিন ইসলনি মান্দিরাংনি চাকচিকা আরো বিবিরা·আ দংনা নাংনুয়া। 11 উনি জা·মানো আংআ হা·আওনি দা·আও মাংসা মাৎবুরুংখো হং·খাতে রি·বাখো নিকজক। মেষ গিত্তা উনি গ্রং গি·গ্মি দংআমিং, ইন্দিবা উয়া চিপ্পু গিত্তা বিয়া খাৎথা আগান্নুয়ামিং। 12 ইয়া মাৎবুরুং স্খাংগিবা মাৎবুরুংনি হং·এ বিনি গিম্মিক বিলখো জাকখালনা হা·বাচেংজক; আরো জেরাং ইয়া হা·গিলসাকনি হং·আ বিসংখো বিয়া উয়া স্খাংগিবা মাৎবুরুংখো, আগানস্খাওদে জেনি বিল্লংএ মাতগিবা নামজকমিং বিখো ইসল ইন্নে সেলামেতজক। 13 বিয়া দাল·গিবা আইয়াও ইনমানগিবা কামরাংখো দাকনা হা·বাচেংজক, আরোবা, মান্দিরাংনি মিক্রোনথাংও সিলগাওনি হা·গিলসাকওনা ওয়া·আলখো রং·খাত্তেতজক। 14 উয়া স্খাংগিবা মাৎবুরুংনি হং·এ জে আইয়াও ইনমানগিবা কামরাংখো দাকনা বিনা বিলখো হ·ন্নামিং বিয়া উরাংখো দাক্কে মান্দিরাংখো ব্রাংগিবা রামাচানা রা·আংনা হা·বাচেংজক। স্খাংগিবা মাৎবুরুং জেআন মিল্লামচা মাত্তাখো মান·নেবা থাংএ দংআমিং, গ্মিগিবা মাৎবুরুং মান্দিরাংনা আগানজক জেদাক্কে বিসং বিনি গি·সা বিমাংখো থারিয়া। 15 উয়া বিমাংনা জাংগি হ·ন্নানি বিলবা বিনা হন·জক, জেদাক্কে উয়া বিমাং খু·সুক আগান্না মা·ন্না আরো জেরাং উয়া বিমাংখো ইসল চাচা মান্দিরা·এ সেলাম দাকজানুয়া বিসংখো দক্কে গালনা মা·ন্না। 16 বিয়া চন্না-দা·ল্লা, মান·নে চা·গিবা-দিল্লা, জাকগিত্তেল আরো নকখল, গিম্মিকখোন জাক্রা জাক্কো বা কপালনি সাক্কাও গি·সা চিনখো রা·না মানিয়েতজক। 17 ইনি গিম্মিনো উয়া চিননা আগ্রে সাওবা মামিংখো ব্রিনা বা ফালনা মান·জাজক। উয়া চিন হং·জক উয়া মাৎবুরুংনি বিমুং বা উনি বিমুংনি নম্বল। 18 ইরাংখো হা·আইনা বুদি নাংআ। জেনি বুদি দংআ বিয়া উয়া মাৎবুরুংনি নম্বলখো চান্নে নিখানা, মুয়ানা উয়াদে সাকসা মান্দিনি বিমুংনি নম্বল হং·আ। আরো উয়া নম্বল হং·জক রিৎচাদক সৎদক দক।

ফারাকগিবা খাৎথা 14

1 জা·মানো আংআ নিয়েতজক, উয়া মেষ বি·সা সিয়োন হা·ব্রিনি সাক্কাও চাদেংএ দংআ। বিমিং হাজাল রিৎচাসা সৎব্রিব্রি মান্দি দংআ। বিসংনি কপালও মেষ বি·সা আরো বিনি ফাগিবানি বিমুং লিক্ষিয়া দংআ। 2 জা·মানো আংআ সালগিওনি চি দা·ল্লা গিত্তা আরো রাক্কে মিকখা খিমপ্রেতা গিত্তা খিন্নাজক। জেখো খিন্নাআ উয়া বীণা বাজাইয়ানি গাম·মা গিত্তা দাক্কামিং। 3 উয়া সিংহাসন আরো উয়া সাকব্রি জাংগিগ্মাংগিবা আরো উয়া মি·আফারাংনি মিকখাংও বিসং মিংসা গিত্তাল গিতখো রিং·ইংআমিং। দারাংবা উয়া গিতখো স্খিনা মান·জাজক; উয়া হাজাল রিৎচাসা সৎব্রিব্রি মান্দিরাং, জেরাংখো হা·গিলসাকনি মান্দিরাংওনিখো ব্রিএ রা·আমিং বিসংসান স্খিনা মান·জক। 4 ইরাং উয়া মান্দি, জেরাং মিচিকরাংমিং থি·ল্লেকে আন·থাংথাংখো মারাং নাংএতজা। জেচা মেষ বি·সা রি·য়াংআ বিসং বিখো জা·রিকে রি·য়াংআ। ইসল আরো মেষ বি·সানা স্খাংগিবা বিথি গিত্তা হ·ন্না মান্দিরাংওনিখো বিসংখো ব্রিএ রা·আমিং। 5 মামিংসালোবা বিসং বু·এ খাৎথা আগানজা, আরো বিসংনি মামিং দোসখো মান·জা। 6 জা·মানো আংআ দা·আও সাকসা সা·গ্রেখো সিলগানি নাম্মেন সাক্কাচা বিল্লাখো নিকজক। হা·গিলসাকো সংদংগিবা মান্দিরাংচা, আগানস্খাওদে গিম্মিক জাত, মা·চং, খু·সুক আরো হা·সংনি মান্দিরাংচা আগানফ্রাকনা বিচা জ্রিংজ্রৎনি নাম্মা খবল দংআমিং। 7 বিয়া রাক্কে রাক্কে ইয়া খাৎথাখো আগানিংআমিং, “ইসলনা খেনবো আরো বিখো রাসং দাকবো, মুয়ানা বিচাল দাক্কানি সাল সকবাজক। জেআন সিলগা, হা·গিলসাক, সাগাল আরো চিমিকখো থারিজক বিখো অলাখিবো।” 8 জা·মানো গ্মিগিবা দা·আও সাকসা সা·গ্রে বিনি জা·মান জা·মান রি·বাএ আগানজক, “উয়া বাবিল সংজিলমা বন·নাংজক। জে সংজিলমা বিনি থি·ল্লেকানি চুখো গিম্মিক জাতনান রিংএতা উয়া সংজিলমা বন·নাংজক।” 9 উনি জা·মানো গিত্থামগিবা দা·আও সাকসা সা·গ্রে বিসংনি জা·মান জা·মান রি·বাএ রাক্কে আগানজক, “সাওবা উয়া মাৎবুরুং আরো বিনি বিমাংখো অলাখিওদে আরো বিনি চিনখো কপালও বা জাক্কো রা·আওদে, 10 ইন্দাকোদে বিখো ইসলনি খা·আও নাংআনি চুখো রিংনা নাংনুয়া। ইয়া চুমিং চিখো ব্রিনগিজা ইসলনি খা·আও নাংআনি রিংচাক্রাও র€দাপজক। রংথালগিবা সা·গ্রেরাংনি আরো মেষ বি·সানি মিকখাংও ওয়া·আল আরো গন্ধকচা উয়া মান্দিখো সা·খাম্মেতনুয়া। 11 জে ওয়া·আল ইয়া মান্দিরাংখো সা·খাম্মেতনুয়া উয়া ওয়া·আলনি ওয়াল·খু জ্রিংজ্রৎনা হং·খাতারি দংনুয়া। জে মান্দি উয়া মাৎবুরুং আরো বিনি বিমাংখো অলাখিনুয়া আরো বিনি বিমুংনি চিনখো রা·নুয়া বিয়া সালো বা ওয়ালো মামিংসালোবা নেং·থাকাখো মান·জানুয়া।” 12 জেরাং ইসলনি গি·য়েতাখো মানিয়া আরো যীশুও বিবিরা·গিবা হং·এ দংআ ইসলনি উয়া মান্দিরাংনি ইন্দাকা অবস্থাও চাকচিকা দংনা নাংআ। 13 জা·মানো আংআ সাকসাখো সালগিওনি আগানাখো খিন্নাজক, “ইয়া খাৎথাখো লিক্ষিবো-দা·আওনি জেরাং গিত্তেলমিং নাংরিমে সিনুয়া বিসং ফাত্তিয়াখো মান·গিবা হং·আ।” গিসিক রংথালগিবা ইয়া খাৎথাখো আগানিংআ, “হো·এ বিসং ফাত্তিয়াখো মান·গিবা হং·আ। বিসংনি কামওনি বিসং নেং·থাকাখো মান·নুয়া, মুয়ানা বিসংনি কামনি বিথি বিসংমিং দংনুয়া।” 14 জা·মানো আংআ নিয়েতও গি·সা গ্বিবকা গাদিলাখো নিকজক, আরো উয়া গাদিলানি সাক্কাও মান্দিনি দেফান্থি গিত্তা দাক্কা সাকসা আসংএ দংআমিং। বিনি স্খুও হাম্মানি সোনানি মুকুট দংআমিং আরো জাক্কো দংআমিং নাম্মেন মাতগিবা কাৎচি। 15 জা·মানো দা·আও সাকসা সা·গ্রে থরম নকওনি হং·খাতে রি·বাজক আরো গাদিলানি সাক্কাও আসংএ দংগিবাখো রাক্কে চ্রিকে আগানজক, “নাং·নি কাৎচিখো রিম·বো, মিবিথিখো রাতবো, মুয়ানা মি বিথিখো রাত্তানি সময় হং·জক; হা·গিলসাকনি মি বিথি চু·গিম্মিক মিনজক।” 16 উনো জেআন উয়া গাদিলানি সাক্কাও আসংএ দংআমিং বিয়া হা·গিলসাকো বিনি কাৎচিখো রিম·জক, আরো হা·গিলসাকনি মিখো রাত্তা হং·জক। 17 জা·মানো সালগিনি থরম নকওনি দা·আও সাকসা সা·গ্রে হং·খাতে রি·বাজক। বিচাবা গি·সা কাৎচি দংআমিং। 18 জা·মানো গানচিওনি দা·আও সাকসা সা·গ্রে হং·খাতে রি·বাজক। ওয়া·আলনি সাক্কাও বিনি বিল দংআমিং। জে সা·গ্রেচা মাতগিবা কাৎচি দংআমিং বিখো ইয়া সা·গ্রে রাক্কে রিংগামে আগানজক, “নাং·নি কাৎচিখো রিম·বো আরো হা·গিলসাকনি আংগুল বিফাংওনি আংগুলখো রাত্তে চিম্মংবো, মুয়ানা আংগুল মিনজক।” 19 উনো উয়া সা·গ্রে হা·গিলসাকো বিনি কাৎচিখো রিম·জক আরো হা·গিলসাকনি গিম্মিক আংগুলখো রাত্তে চিম্মংজক। জা·মানো উরাংখো আংগুল মাড়াই দাক্কানি হা·খলচা গাল্লেতজক। ইয়া আংগুল মাড়াইগিবা হা·খল হং·জক ইসলনি বিল্লংআ খা·আও নাংআ। 20 সংজিলমানি হা·ফালচা আংগুল মাড়াই দাক্কানি হা·খলও উয়া আংগুলরাংখো মাড়াই দাক্কানি জা·মানো উয়োনি হান·চি হং·খাতবাজক আরো ঘোরারাংনি খু·সুকনি লাগামওনা দিপ্পাৎ হং·জক। উনি গিম্মিন রিৎচা গিত্থাম কি:মি: দিপ্পাৎ গিম্মিক হা·দাম হান·চিও রিপজক।

ফারাকগিবা খাৎথা 15

1 জা·মানো সালগিও আংআ দা·আও গি·সা দাল·গিবা আরো আইয়াও ইনমানগিবা চিনখো নিকজক। নিকজক, সাকস্নি সা·গ্রে আরো বিসংনি জাক্কো বন·চতগিবা মিংস্নি সাবিসি। ইরাংখো বন·চতগিবা সাবিসি ইন্নে আগানিংআ, মুয়ানা ইরাংচা ইসলনি খা·আও নাংআবা বন·নুয়া। 2 জা·মানো আংআ ওয়া·আলমিং ব্রিনগিবা জানিরানি গি·সা সাগাল গিত্তা দাক্কাখো নিকজক, আরো জেরাং উয়া মাৎবুরুং আরো বিনি বিমাং আরো বিনি বিমুংনি নম্বলনি সাক্কাও হামজক বিসংখোবা নিকজক। ইসলনি হন·গিবা বীণাখো জাক্কো রা·এ বিসং উয়া জানিরানি সাগালনি রিক্কামচা চাদেংএ দংআমিং। 3 বিসং ইসলনি নকখল মোশিনি আরো উয়া মেষ বি·সানি ইয়া গীতখো রিং·আমিং: “বিল্লাকস্রাংগিবা গিত্তেল ইসল, বাসিক দা·ল্লা আরো আইয়াও ইনমানা নাং·নি কাম! ও গিম্মিক জাতনি রাজা, নাং·নি রামা বাসিক খাকখেৎ আরো বিবি হং·আ! 4 গিত্তেল, সা নাং·না খেনজানুয়া? সা নাং·নি বিমুংখো রাসং চাএতজানুয়া? না·আসান রংথালা। গিম্মিক জাত নাং·চা রি·বানুয়া, গিম্মিকান নাং·খো অলাখিনুয়া; মুয়ানা নাং·নি খাকখেৎ বিচাল ফারাকজক।” 5 উনি জা·মানো আংআ নিকজক, সালগিও উয়া থরম নকখো, আগানস্খাওদে সাক্ষি তাম্বুখো এংআ হং·জক। 6 উনো উয়া সাকস্নি সা·গ্রে মিংস্নি সাবিসিখো রা·এ থরম নকচানি হং·খাতে রি·বাজক। বিসং চি·রংরং বা·রাখো গান্নামিং আরো চেলও সোনাচা খাথংআ দংআমিং। 7 উয়া সাকব্রি জাংগিগ্মাংগিবাওনি সাকসা উয়া সাকস্নি সা·গ্রেনা খানস্নি সোনানি দনচাক্রাখো হন·জক। ইসল, জেআন চাসংওনি চাসংওনা জ্রিংজ্রৎনা থাংএ দংআ, উয়া দনচাক্রারাং বিনি খা·আও নাংআও গাপ্পামিং। 8 ইসলনি রাসং আরো বিল্লাকাওনি জে ওয়াল·খু হং·খাতিংআমিং উয়া ওয়াল·খু থরম নক্কো গাপজক। উয়া সাকস্নি সা·গ্রেনি মিংস্নি সাবিসি বন·গিজা দিপ্পাৎ দারাংবা উয়া থরম নক্কো নাপনা মান·জাজক।

ফারাকগিবা খাৎথা 16

1 জা·মানো আংআ খিন্নাজক, উয়া থরম নকওনি উয়া সা·গ্রে সাকস্নিখো সাকসা রাক্কে রাক্কে ইন্দাকে আগানিংআ, “না·সং রি·য়াংএ ইসলনি খা·আও নাংআও গাপগিবা গি·স্নি দনচাক্রাখো হা·গিলসাকনি সাক্কাও ফাক্কেবো।” 2 উনো স্খাংগিবা সা·গ্রে রি·য়াংএ আন·থাংনি দনচাক্রাখো হা·গিলসাকনি সাক্কাও ফাক্কেতজক। উনি গিম্মিন জেরাংনি সাক্কাও উয়া মাৎবুরুংনি চিন দংআমিং আরো জেরাং বিনি বিমাংখো অলাখিনুয়ামিং বিসংনি বে·এনো নাম্মেন নামগিজা আরো বিষগ্মাং ফোড়া হং·খাতজক। 3 গ্মিগিবা সা·গ্রে আন·থাংনি দনচাক্রাখো সাগালনি সাক্কাও ফাক্কেতজক। উনো সাগালনি চি সিয়া মান্দিনি হান·চি গিত্তা হং·জক, আরো সাগালনি গিম্মিক জাংগিগ্মাংরাং সিথকজক। 4 জা·মানো গিত্থামগিবা সা·গ্রে চিবিমা আরো চিমিকনি সাক্কাও আন·থাংনি দনচাক্রাখো ফাক্কেতজক। উনি হা·সেল হান·চিনি চিবিমা আরো চিমিক হং·আংআরিজক। 5 চিনি সাক্কাও জে সা·গ্রেনি বিল দংআমিং আংআ বিখো ইয়া খাৎথাখো আগানাখো খিন্নাজক: “ও রংথালগিবা, না·আ দংআ আরো না·আ দংআমিং। না·আ খাকখেৎগিবা, মুয়ানা না·আ ইয়া শাস্তিরাংখো হন·জক। 6 ইয়া মান্দিরাং ইসলনি মান্দিরাংখো আরো আগানসোগিবারাংখো স·ওতে গালজক। উনি গিম্মিন না·আ বিসংনা ইয়া হান·চিখো রিংনা হন·জক আরো ইয়ান বিসংনা খ্রাজক।” 7 আংআ গানচিওনি সাকসাখো ইন্দাকে আগানাখো খিন্নাজক: “বিল্লাকস্রাংগিবা গিত্তেল ইসল, নাং·নি গিম্মিক বিচাল বিবি আরো খাকখেৎ হং·আ।” 8 সাকব্রি সা·গ্রে সালনি সাক্কাও আন·থাংনি দনচাক্রাখো ফাক্কেতজক। উনি হা·সেল মান্দিরাংখো ওয়া·আলচা সো·এতনা সালনা বিলখো হন·জক। 9 উনো নাম্মেন দিং·দোএ মান্দিরাংনি বে·এন খামজক, আরো ইয়া সাবিসিরাংনি সাক্কাও জেনি বিল দংআ বিসং উয়া ইসলখো চন্নিকনা হা·বাচেংজক। ইন্দিবা বিসং গিসিক ফিল·জাজক আরো ইসলনি রাসংখো দাকজাজক। 10 জা·মানো বংআগিবা সা·গ্রে উয়া মাৎবুরুংনি সিংহাসননি সাক্কাও বিনি দনচাক্রাখো ফাক্কেতজক। উনি গিম্মিন উয়া মাৎবুরুংনি সংনক আন্দালজক। সা·দিকানা মান্দিরাং বিসংনি স্রিবাকখো চিকনা হা·বাচেংজক আরো বিসংনি ইয়া সা·দিকা আরো ফোড়ানা বিসং সালগিনি ইসলখো চন্নিকনা হা·বাচেংজক, ইন্দিবা বিসং বিসংনি নামগিজা কামওনি গিসিক ফিল·লেতজাজক। 12 জা·মানো দকগিবা সা·গ্রে দাল·বাৎগিবা চিবিমা ইউফ্রেটিসনি সাক্কাও আন·থাংনি দনচাক্রাখো ফাক্কেতজক। উনি গিম্মিন সালারামনি হা·সংনি রাজারাংনি রি·য়ানি রামা থারিনা ইন্নে উয়া চিবিমানি চি থিপজক। 13 উনো আংআ দিপ্‌লক গিত্তা সাকগিত্থাম গিসিকখো নিকনা মান·জক। উরাং উয়া চিপ্পু, উয়া মাৎবুরুং আরো উয়া দাকমিকগিবা আগানসোগিবানি খু·সুকওনি হং·খাতে রি·বাংআমিং। 14 উয়া নামগিজাগিবা গিসিকরাং আইয়াও ইনমানগিবা কামরাংখো দাক্কিংআমিং। বিল্লাকস্রাংগিবা ইসলনি উয়া দাল·বিয়া সালো দাকগ্রিকনা ইন্নে বিসং হা·গিলসাক গিম্মিকনি রাজারাংখো আপসান চিম্মংজক। 15 যীশু আগানা, “নিবো, আংআ চা·খক গিত্তা রি·বানুয়া। উয়া মান্দি ফাত্তিয়া মান·গিবা হং·আ, জেআন মিকরাকে দংআ আরো আন·থাংনি বা·রাখো গান্নে দংআ, জেদাক্কে বিখো খমলং হং·এ রোমনা নাংজা আরো মান্দিরাং বিনি খ্রা·চাখো নিকনা মান·জা।” 16 ইব্রীয় খু·সুকচা জে হা·দামনি বিমুং হরমাগিদোন, নামগিজাগিবা গিসিকরাং উয়া রাজারাংখো উনো থম·দাকেতজক। 17 জা·মানো স্নিগিবা সা·গ্রে বিনি দনচাক্রাখো বালওয়াও ফাক্কেতজক। উনো থরম নকনি সিংহাসনওনি রাক্কে ইয়া খাৎথারাংখো আগানা হং·জক, “জেআন হং·আনি উয়া হং·আংজক।” 18 উনো মিকখা রিপরাপজক, নাম্মেন গাম·না নাংজক আরো মিকখা খিমপ্রেতনা হা·বাচেংজক আরো ইন্দাকে বিল্লংএ বাংগুরিজক জে দাক্কাখো হা·গিলসাকো মান্দি হং·চেংআনি জা·মানোনি আর মামিং সালোবা নিকখুজামিং। উয়া বাংগুরিয়া নাম্মেন বিল্লংআমিং। 19 বিমিং দংগিবা সংজিলমা বাক গিত্থাম হং·আংজক আরো দিংথাং দিংথাং জাতরাংনি সংজিলমা গা·আকাংজক। জা·মানো উয়া বাবিলখো ইসল গিসিক রা·জক, আরো বিয়া বিনি খা·আও নাংআনি চুখো রিংচাক্রাও গাপ্পে বাবিলনা রিংনা হন·জক। 20 উনো গিম্মিক চিচাং গিম্মাজক আরো হা·ব্রিরাংখো আর নিকজাজক। 21 সিলগাওনি মান্দিনি সাক্কাও দা·ল্লা রং·থি গিত্তা স্থিল গা·আকনা হা·বাচেংজক। উনি গি·ফ্রাকআন হং·আমিং 36 কেজি। উনি হা·সেল মান্দিরাং স্থিলনি মাত্তানা ইসলখো জিনা হা·বাচেংজক, মুয়ানা উয়া স্থিলনি মাত্তা বিল্লংআমিং।

ফারাকগিবা খাৎথা 17

1 জে সাকস্নি সা·গ্রেনি জাক্কো গি·স্নি দনচাক্রা দংআমিং বিসংওনি সাকসা রি·বাএ আংনা আগানজক, “চিনি সাক্কাও জে দাল·গিবা দারি আসংএ দংআ, রি·বা, বিনি শাস্তিখো আংআ নাং·না ফিন্নিকনা। 2 হা·গিলসাকনি রাজারাং বিমিং থি·ল্লেকামিং, আরো জেরাং ইয়া হা·গিলসাকনি বিসং বিনি থি·ল্লেকানি আংগুল বিৎচিও চুফেকগিবা হং·আমিং।” 3 জা·মানো উয়া সা·গ্রে আংখো হা·গিসি জওলচানা রিম্মাংজক। উনো আংআ গিসিক রংথালানি নিং·আও দংআমিং। উনো আংআ সাকসা মিচিকখো মাংসা গিচ্চাক রংনি মাৎবুরুংনি সাক্কাও আসংএ দংআখো নিকজক। ইসলখো চন্নিকনা ইন্নে বাং·আ বিমুংরাং উয়া মাৎবুরুংনি সাক্কাও লিক্ষিয়া দংআমিং। উনি দতস্নি স্খু আরো গংচিকখুং গ্রং দংআমিং। 4 উয়া মিচিক গিচ্চাক রংনি বা·রাখো গান্নামিং আরো বিনি বে·এনো সোনা, গামচাতা রং·থি আরো মুক্তানি গয়না দংআমিং। নামজাস্রাং আরো বিনি থি·ল্লেকানি ময়লাও গাপ্পা গি·সা সোনানি দনচাক্রা বিনি জাক্কো দংআমিং। 5 বিনি কপালও ইন্দাকা বিমুং লিক্ষিয়া দংআমিং জেনি বিদিংও মিংসা নিং·থুয়া বিবি দংআমিং। উয়া বিমুং হং·জক, “বাবিল, দারি বিমারাংনি আরো হা·গিলসাকনি নামজাস্রাংরাংনি মা·গিবা।” 6 আংআ নিকজক, উয়া মিচিক ইসলনি মান্দিরাংনি হান·চিখো আরো জেরাং যীশুনি গিম্মিনো সাক্ষি হন·জক বিসংনি হান·চিখো রিংএ চুফেকগিবা হং·এ দংআ। 7 আংআ বিখো নিক্কে নাম্মেন আইয়াও ইনমানজক। উনো উয়া সা·গ্রে আংনা আগানজক, “না·আ মুয়ানা আইয়াও ইনমানিংজক? মিচিকনি আরো জে মাৎবুরুং বিখো রিপ্পিএ রা·আংআ উয়া মাৎবুরুংনি নিং·থুয়া অলথোখো নাং·না আগানে হন·নিংজক। ইয়া উয়া মাৎবুরুং জেনি দৎস্নি স্খু আরো গং·চিকখুং গ্রং দংআমিং। 8 জে মাৎবুরুংখো না·আ নিক্কামিং উয়া চেংও দংআমিং ইন্দিবা দা·আও দংজা। জা·মানো বিয়া উয়া থিং·নাপগিবা হা·খলওনি চাখাতে রি·বাএ জ্রিংজ্রৎনা দিপ্পাৎ শাস্তিখো মান·নুয়া। উনো জেরাং ইয়া হা·গিলসাকনি হং·আ, আগানস্খাওদে হা·গিলসাক হং·চেংআনি সালওনি জেরাংনি বিমিং জাংগিনি খি·তাপও লিক্ষিয়া দংজা বিসং উয়া মাৎবুরুংখো নিক্কে আইয়াও ইনমান্নুয়া; মুয়ানা উয়া মাৎবুরুং স্খাংও দংআমিং, ইন্দিবা দা·আও দংজা, ইন্দাকোবা দা·আবা নিকনুয়া। 9 “দা·আও জেখো আগানা হং·নুয়া উখো হা·আইনা সেং·গিবা গিসিক নাংআ। উয়া দৎস্নি স্খু হং·জক দৎস্নি হা·ব্রি জেনি সাক্কাও মিচিক আসংএ দংআ। উয়া দৎস্নি স্খু দা·আবা দৎস্নি রাজাবা হং·আ। 10 উয়া রাজারাংওনি সাকবংআ স্খাংআন বন·জক, সাকসা দা·আওবা দংখুংআ আরো সাকগিপ্পিনদে দা·আওবা রি·বাখুজা। উয়া রাজা রি·বানি জা·মানো বিখো মিত্তাম সময়না দংনান নাংনুয়া। 11 জে মাৎবুরুং স্খাংও দংআমিং ইন্দিবা দা·আওদে দংজা বিয়া উয়া দৎস্নিওনি সাকসা হং·ওবা বিয়া চেৎগিবা রাজা; বিয়া জ্রিংজ্রৎনা দিপ্পাৎ শাস্তিখো মান·নুয়া। 12 “জে গং·চিকখুং গ্রংখো না·আ নিকজক উরাং সাকচিকখুং রাজা হং·আ। বিসং দা·আওবা শাসন দাকচেংখুজা, ইন্দিবা বিসং উয়া মাৎবুরুংনা স্খাং মিত্তাম সময়না রাজা হং·এ শাসন দাক্কানি বিলখো মান·নুয়া। 13 ইয়া রাজারাংনি মিকসংআ আপসান হং·আ, আরো বিসং গিম্মিকান বিসংনি বিলখো আরো মান·রিকানি বিলখো উয়া মাৎবুরুংনা হন·নুয়া। 14 ইরাং মেষ-বি·সানি সাক্কাও দাকগ্রিকনুয়া আরো মেষ-বি·সা বিসংখো হাম্মেতজানুয়া, মুয়ানা বিয়া গিত্তেলরাংনি গিত্তেল আরো রাজারাংনি রাজা হং·আ। জেরাংখো রিক্কামজক আরো বাচ্ছিয়ে রা·জক আরো জেরাং বিবিগিবা হং·আ বিসংআন বিমিং দংনুয়া।” 15 জা·মানো উয়া সা·গ্রে আংনা আগানজক, “না·আ জে চিখো নিকজক, জেনি সাক্কাও উয়া দারি বিমা আসংএ দংআ, উয়া হং·জক বাং·আ হা·সং, বাং·আ মান্দি, বাং·আ জাত আরো বাং·আ খু·সুক। 16 না·আ জে গং·চিকখুং গ্রংখো নিকজক উরাং আরো উয়া মাৎবুরুং উয়া দারি বিমাখো মিৎচিনুয়া। বিসং বিখো বন·নেতনুয়া আরো খমলং দাকনুয়া আরো বিনি বে·এনখো চা·নুয়া; জা·মানো বিখো ওয়া·আলচা সো·এ গালনুয়া। 17 মুয়ানা ইসল বিসংনি খা·থংও ইন্দাকগিবা হা·সিকাখো হন·জক জেদাক্কে বিনি খাৎথা চু·সকা। উনি হা·সেলও বিসং গিসিকচা আপসান হং·এ উয়া মাৎবুরুংচা বিসংনি গিম্মিক বিলখো হন·চাকনুয়া, জেদাক্কে ইসলনি খাৎথা চু·সকগিজা দিপ্পাৎ বিয়া শাসন দাকনা মা·ন্না। 18 জে মিচিকখো না·আ নিক্কামিং উয়া হং·জক উয়া সংজিলমা, জেআন হা·গিলসাকনি গিম্মিক রাজারাংনি সাক্কাও শাসন দাক্কিংজক।”

ফারাকগিবা খাৎথা 18

1 উনি জা·মানো আংআ দা·আও সাকসা সা·গ্রেখো সালগিওনি হং·খাতে রি·বাখো নিকজক। বিনি দাল·গিবা বিল দংআমিং আরো হা·গিলসাক বিনি রাসংও থেং·সুজক। 2 বিয়া রাক্কে চ্রিকে আগানজক, “বন·জক, উয়া সংজিলমা বন·জক! উয়া দা·আওদে নামগিজাগিবা গিসিকরাংনি দংআনি হা·দাম হং·জক আরো সাকফ্রাকফ্রাক নামগিজাগিবা গিসিকরাংনি থম·দাকগিবা আরো মারাং নাংগিবা আরো সাক্কাও বিলগিবা দো·ওরাংনি বিচাপ হং·জক। 3 মুয়ানা উয়া উনি থি·ল্লেকানি চুখো গিম্মিক জাতনান রিংনা হন·জক। হা·গিলসাকনি রাজারাং উমিং থি·ল্লেকজক, আরো হা·গিলসাকনি বাদিংগিবারাং উনি লাগামগ্রি হা·সিকাচা নকমা হং·জক।” 4 জা·মানো আংআ সালগিওনি দা·আও সাকসাখো আগানাখো খিন্নাজক, “আংনি মান্দিরাং, না·সং বাবিলওনি হং·খাতে রি·বাবো জেদাক্কে বিনি পাপনি বাকখো না·সং মান·ফাজা, আরো জে সাবিসিরাং উনি সাক্কাও গা·আকনুয়া উনি মামিংখোন না·সংনি চাকনা নাংজাখানা। 5 বিনি পাপ সিলগাওনা সক্কে চু·য়াকজক আরো বিনি নামগিজা কামনি খাৎথাখো ইসল গিসিক রা·জক। 6 উয়া গিপ্পিনরাংমিং জেগিত্তা হান·সেংএ জাকখালা উমিংবা উগিত্তান জাকখালবো; উনি কামনি গিম্মিক বিথিখো উনা হন·বো। জে দনচাক্রাও উয়া গিপ্পিনরাংনা নামগিজাখো ব্রিন্নুয়ামিং, উয়ো উনি গিম্মিক শাস্তিখো ব্রিনে উনা রিংনা হন·বো। 7 বিয়া আন·থাংনি গিম্মিনো জেসিক রাসং দাকজক, জেসিক নামজাস্রাং দাক্কে দংখামজক, উসিকান গিচ্ছিয়া আরো দুকখো উনা হন·বো; মুয়ানা উনি খা·থংও উয়া চানচিয়া, ‘আংআদে রানি হং·এ আসংএ দংআ, আংআ রান্দি হং·জা; মামিংদাক্কেবা আংআ দুকখো চাকজানুয়া।’ 8 উনি গিম্মিন সালসাওন গিম্মিক সাবিসি উনি সাক্কাও গা·আকনুয়া; উরাং হং·জক সিয়া, দুক আরো আকাল। ওয়া·আলচা উখো সো·এ গালনুয়া, মুয়ানা জেআন উখো বিচাল দাকনুয়া উয়া গিত্তেল ইসল বিল্লাকস্রাংগিবা হং·আ।” 9 হা·গিলসাকনি জে রাজারাং উমিং থি·ল্লেকজক আরো নামগিজা দাক্কে উমিং দংখামজক বিসং উখো সো·এ গাল্লানি সময়ও ওয়াল·খু নিক্কে গ্রাপনুয়া আরো উনা দুক দাকনুয়া। 10 বিসং উনি গিচ্চিয়াখো নিক্কে খেন্নে চেল্লাও চাদেংএ আগান্নুয়া, “আইয়াও বাবিল, আইয়াও! উয়া সংজিলমা, বিলগ্মাং উয়া সংজিলমা! ইন্দাকে খনতাসাওন নাং·নি শাস্তি সকবাজক!” 11 হা·গিলসাকনি বাদিংগিবারাংবা উনা গ্রাপনুয়া আরো দুক দাকনুয়া, মুয়ানা বিসংনি জিনিসরাংখো সাকসাবা ব্রিজানুয়া। 12 বিসংনি উয়া বস্তুরাংও দংআ- সোনা, রূপা, গামচাতগিবা রং·থি আরো মুক্তা; সেন·চিপচিপ মদিনানি বা·রা, রংনি বা·রা, রেশমী আরো গিচ্চাকা বা·রা; বাং·আ সিম্মিলা গানথং আরো মংমানি ওয়াগামনিখো থারিয়া বাং·আ বস্তুরাং; নাম্মেন গামচাতগিবা গানথংচা থারিয়া আরো পিতল, সিল আরো মার্বেল রং·থিচা থারিয়া বাং·আ বস্তুরাং; 13 দালচিনি, এলাচি, চাচাৎ, সিম্মিলগিবা তেল আরো কুন্দুরু; আংগুর বিৎচি, তেল, ময়দা আরো গম; মা·সু আরো মেষ, ঘোড়া আরো গাড়ি আরো নকখল। 14 উয়া বাদিংগিবারাং আগান্নুয়া, “জে বিথিখো না·আ মা·ন্না হাম·মামিং উয়া নাং·ওনি চে·ল্লাংজক; নাং·নি গিম্মিক গাম আরো রাসং বন·জক। মান্দিরাং আর মামিং সালোবা উরাংখো মান·জানুয়া।” 15 জেরাং ইয়া বস্তুরাংখো বাদিংএ নকমা হং·আমিং উয়া বাদিংগিবারাং উনি গিচ্চিয়াখো নিক্কে খেন্নে চে·ল্লাচা চাদেংএ দংনুয়া। 16 বিসং গ্রাপে গ্রাপে দুক দাক্কে আগান্নুয়া, “আইয়াও, আইয়াও! সেন·চিপচিপ মদিনানি বা·রা আরো গিচ্চাকা বা·রাখো গানগিবা আরো সোনা, গামচাতগিবা রং·থি আরো মুক্তাচা থারিয়া উয়া সংজিলমা! 17 ইন্দিসিক বাং·গিজা সালওন নাং·নি ইন্দাকা গামরাং গিম্মিক নাসিজক!” জাহাসনি দাল·গিবা কাম রিম·গিবা, চি রামা গিত্তা রি·গিবারাং, জাহাসখো চালাইগিবারাং আরো সাগালও জেরাং বাদিংআ বিসং গিম্মিকান চে·ল্লাচা চাদেংএ দংজক। 18 বিখো সো·মিত্তিংও ওয়াল·খু নিক্কে বিসং চ্রিকে আগান্নুয়া, “আর বাগিবা সংজিলমা ইয়া সংজিলমা গিত্তা দাক্কা?” 19 বিসং বিসংনি স্খুও হা·দুলাখো হন·নে চ্রিকনুয়া আরো গ্রাপে গ্রাপে দুক দাক্কে আগান্নুয়া, “আইয়াও, উয়া সংজিলমা, আইয়াও! সাগালও জেরাংনি গাম দংআ বিসং বিনি গামচান নকমা হং·আমিং; আরো নিবো, খনতাসাওন বিয়া বন·নাংজক!” 20 উনো উয়া সা·গ্রে আগানজক, “ও সালগি, উয়া সংজিলমানি বন·নানা হান·সেংবো। ইসলনি মান্দিরাং, ওয়াত্তেতারাং আরো আগানসোগিবারাং হান·সেংবো। না·সংনি সাক্কাও বিয়া জেখো দাক্কামিং উনি গিম্মিন ইসল বিনি বিচালখো দাকজক।” 21 জা·মানো সাকসা বিল্লাকগিবা সা·গ্রে জাতা গিত্তা দাল·বিয়া গি·সা রং·থিখো রা·এ সাগালও গাল্লেতি আগানজক, “ইন্দাকেন উয়া বাবিল সংজিলমাখো গাল্লেতনুয়া। উখো আর মামিং সালোবা মান·জানাজক। 22 জেরাং বাংসি সিক্কা, গিত রিং·আ আরো বাংসি বা সিংগা সিক্কা বিসংনি গাম·মাখো আর মামিং সালোবা নাং·ও খিন্নাজানাজক। মামুং সালোবা নাং·ও কাম রিম·গিবাখো মান·জানুয়া। জাতানি মামুং গাম·মাখো নাং·ও আর মামিং সালোবা খিন্নাজানাজক। 23 চাক্কিনি সেং·আ আর মামিং সালোবা নাং·ও থেং·সুজানুয়া। চাওয়ারি-নামচিকনি গিত্তকনি খু·রাংখোবা নাং·ও মামিংসালোবা খিন্নাজানুয়া। নাং·নি বাদিংগিবারাং হা·গিলসাকো মংসংগিবা হং·আমিং, আর গিম্মিক জাতআন নাং·নি মনতলনা ব্রাংনুয়ামিং। 24 আগানসোগিবারাংখো, ইসলনি মান্দিরাংখো আরো জে মান্দিরাংখো ইয়া হা·গিলসাকো দক্কে গালজক বিসংনি হান·চিখো ইয়া বাবিলওন মান·জক।”

ফারাকগিবা খাৎথা 19

1 উনি জা·মানো আংআ সালগিও মান্দি জিলমানি মুক্কুয়াখো খিন্নাজক। বিসং আগানিংআমিং, “হাল্লেলয়া! জক্কেতা, রাসং আরো বিল, গিম্মিকান আনচিংনি ইসলনি, 2 মুয়ানা বিনি বিচাল বিবি আরো খাকখেৎ হং·আ। জেআন বিনি থি·ল্লেকাচা হা·গিলসাক গিম্মিকখো মারাং নাংএতামিং উয়া দাল·গিবা দারিখো ইসল শাস্তি হন·জক আরো বিনি নকখলরাংনি হান·চিনি দাকস্খাখো বিয়া বিনি সাক্কাও রা·জক।” 3 বিসং গ্মিগিবাও আগানজক, “হাল্লেলূয়া! বিওনি জ্রিংজ্রৎনা ওয়াল·খু হং·খাতনুয়া। 4 ইসল, জেআন সিংহাসনও আসংএ দংআ বিখো উয়া খলগ্রিকব্রি মি·আফারাং আরো উয়া সাকব্রি জাংগিগ্মাংগিবা থুচিকোপে অলাখিয়ে আগানজক, “আমেন। হাল্লেলূয়া!” 5 উনো সিংহাসনওনি সাকসা আগানজক, “ইসলনি নকখলরাং আরো না·সং জেরাং ইসলনা খা·ফাকে খেন্না, না·সং চন্না-দা·ল্লা গিম্মিকান আনচিংনি ইসলখো রাসং দাকবো।” 6 জা·মানো আংআ মান্দি জিলমানি মিক্কুয়া, রাক্কে চিনি মিক্কুয়া আরো রাক্কে মিকখা খিমপ্রেতানি খু·রাং গিত্তা দাক্কে আগানা ইয়া খাৎথাখো খিন্নাজক, “হাল্লেলূয়া! আনচিংনি বিল্লাকস্রাংগিবা গিত্তেল ইসল সংনকখো শাসন দাকনা হা·বাচেংজক। 7 রি·বাবো, আনচিং গিসিকো খুসি হং·এ নাম্মেন হান·সেংনা আরো বিখো রাসং দাকনা, মুয়ানা মেষ বি·সানি বিয়ানি সাল সকজক আরো বিনি নামচিক আন·থাংখো থারিজক। 8 চিং·গিবা, চি·রংআ আরো সেন·চিপচিপা মদিনানি বা·রাখো বিনা গান্না হন·জক। উয়া বা·রা ইসলনি মান্দিরাংনি বাম্মানি হং·আ।” 9 জা·মানো উয়া সা·গ্রে আংনা আগানজক, “ইয়া খাৎথাখো লিক্ষিবো, ‘মেষ-বি·সানি বিয়ানি চা·আও জেরাংনা আগানা বিসং ফাত্তিয়াখো মান·গিবা হং·আ।’ ” বিয়া ইয়া খাৎথাখোবা আগানজক, “ইরাং ইসলনিন খাৎথা আরো ইয়া বিবি হং·আ।” 10 উনো আংআ উয়া সা·গ্রেনি জা·চকও থুচিকোপে বিখো ইসল চাচাএ মান্দিরা·এ অলাখিজক। ইন্দিবা বিয়া আংনা আগানজক, “ইয়া মুয়াখো দাক্কিংআ? আংআ নাং·নি গিত্তা নকখল হং·ফা। ইসলখোন অলাখিবো। নাং·নি বিবিরা·গিবা জংআদারাং, জেরাং যীশুনি স্খিয়াখো রি·ম্মে রা·রিকা, আংআ বিসংনিন সাকসা হং·আ। যীশুনি স্খিয়ান আগানসোগিবারাংনি স্খিয়ানি চং·মত হং·আ।” 11 জা·মানো আংআ নিকজক সালগি এংআন দংআ, আরো উয়ো মাংসা গ্বিবক ঘোড়া দংআ। জেআন উয়া ঘোড়ানি সাক্কাও আসংএ দংআ বিনি বিমিং হং·আ বিবিরা·না খ্রাগিবা আরো বিবি। বিয়া খাকখেৎ বিচালখো দাক্কা আরো দাকগ্রিকা। 12 বিনি মিক্রোন ওয়া·আল গিত্তা চিং·আ আরো বিনি স্খুও মুকুট বাং·আমিং। বিনি বে·এনও ইন্দাকগিবা মিংসা বিমিং লিক্ষিয়া দংআমিং, জে বিমিংখো বিনি আগ্রে দারাংবা হা·আইজা। 13 হান·চিও রিপ্পা বা·রাখো বিয়া গান্নামিং, আরো বিনি বিমিং হং·আ ইসলনি খাৎথা। 14 সালগিনি সিপাইরাং গিব্বক চি·রংআ সেন·চিপচিপা মসিনানি বা·রাখো গান্নে গিব্বক ঘোড়াও গাখাতে বিখো জা·রিকে রি·য়াংইংআমিং। 15 বিয়া জেদাক্কে গিম্মিক জাতরাংখো দকনা মা·ন্না উনি গিম্মিনো বিনি খু·সুকওনি গি·সা মাতগিবা মিল্লাম হং·খাতবাংআমিং। বিয়া সিলনি গল·দিকচা গিম্মিক জাতখো শাসন দাকনুয়া আরো আংগুর মাড়াই দাক্কানি হা·খলও বিয়া জা·চকচা আংগুরখো গা·বেকবেকনুয়া। ইয়া আংগুর মাড়াই দাক্কানি হা·খল হং·জক বিল্লাকস্রাংগিবা ইসলনি খা·আও নাংআ। 16 বিনি বা·রাও আরো জা·ফিংও ইয়া বিমুং লিক্ষিয়া দংআ, “রাজারাংনি রাজা, গিত্তেলরাংনি গিত্তেল।” 17 জা·মানো আংআ সাকসা সা·গ্রেখো সালও চাদেংএ দংআখো নিকজক। জে দো·ওরাং সিলগাচা বিল্লিংআমিং বিয়া উরাং গিম্মিকখো রাক্কে চ্রিকে আগানজক, “রি·বা, ইসলনি দাল·গিবা মিয়াত্থামখো চা·ফানা থম·বো, 18 জেদাক্কে না·সং রাজা, কমান্ডার, বিল্লাকগিবা মান্দি, ঘোড়া আরো উয়া ঘোড়াও গাখাতগিবা মান্দিরাংখো, জাক গিত্তেলগিবা আরো নকখলরাংনি আরো দা·ল্লা-চন্না গিম্মিক মান্দিনি বে·এনখো চা·না মা·ন্না।” 19 জা·মানো আংআ নিকজক, জেআন উয়া ঘোড়ানি সাক্কাও আসংএ দংআমিং বিনি আরো বিনি সিপাইরাংনি সাক্কাও দাকগ্রিকনা ইন্নে উয়া মাৎবুরুং আরো হা·গিলসাকনি রাজারাং বিসংনি সিপাইরাংখো রা·এ চিম্মংথকজক। 20 উয়া মাৎবুরুংখো রিম·জক আরো জে দাকমিকগিবা আগানসোগিবা বিনি হং·এ আইয়াও ইনমানগিবা কামখো দাকনুয়ামিং বিখোবা রিম·জক। জেরাং উয়া মাৎবুরুংনি চিনখো রা·আমিং আরো বিনি বিমাংখো অলাখিয়ামিং উয়া দাকমিকগিবা আগানসোগিবা উয়া আইয়াও ইনমানানি কামরাংচা বিসংখো ব্রাংএতে দন্নামিং। চিং·গিবা গন্ধকনি ওয়া·আলনি চিও থাংআ অবস্থাও ইয়া সাকগ্মিখো গাল্লেতজক। 21 জেআন উয়া গিব্বক ঘোড়ানি সাক্কাও আসংএ দংআমিং বিনি খু·সুকওনি জে মিল্লাম হং·খাতবামিং উচা বিসংনি গিপ্পিন রিপ্পেংরাংখো স·ওতে গাল্লা হং·জক। উনি গিম্মিন দো·ওরাং বিকমা গাপ্পে বিসংনি বে·এনখো চা·জক।

ফারাকগিবা খাৎথা 20

1 উনি জা·মানো আংআ সা·গ্রে সাকসাখো সালগিওনি হং·খাতে রি·বাখো নিকজক। বিনি জাক্কো উয়া থিং·নাপগিবা হা·খলনি চাবি আরো গি·সা দাল·বিয়া জেংজুল দংআমিং। 2 বিয়া উয়া চিপ্পুখো, আগানস্খাওদে উয়া গিৎচাম চিপ্পু জেখো দিয়াবল বা শয়তান মিংআ বিখো রিম·মে বিলসি হাজালসানা খাজক আরো উয়া থিং·নাপগিবা হা·খলচা গাল্লেতজক। জা·মানো বিয়া উয়ো তালা হন·নে উনি সাক্কাও মোহর সু·জক, জেদাক্কে ইয়া বিলসি হাজালসা বন·জা দিপ্পাৎ ইয়া হা·গিলসাকনি জাতরাংখো আর ব্রাংআনি রামাচানা রা·আংনা মান·জা; উনি জা·মানো বিখো বাং·গিজা সালনা ওয়াত্তেতনুয়া। 4 জা·মানো আংআ সিংহাসন মিত্তামখো নিকজক, আরো জেরাং উনি সাক্কাও আসংএ দংআমিং বিসংনি জাক্কো বিচাল দাক্কানি বিলখো হ·ন্নামিং। ইসলনি খাৎথা আরো যীশুনি স্খিয়া গিত্তা রি·না ইন্নে জেরাংনি স্খু দেনথংএ গাল্লামিং, আংআ বিসংনি গিসিকরাংখো নিকনা মান·জক। বিসং উয়া মাৎবুরুংখো বা উনি বিমাংখো অলাখিজা আরো কপালও বা জাক্কো উনি চিনখোবা রা·জা। বিসং থাংচাজক আরো হাজালসা দিপ্পাৎ খ্রীষ্টমিং শাসন দাকজক। 5 ইয়া স্খাং সিয়াওনি থাংচাআ আরো দা·আও জেরাং থাংচাজক বিসং ফাত্তিয়া মান·গিবা আরো রংথালগিবা হং·আ। স্খাং জেরাং থাংচামিং উয়া মান্দিরাংনি সাক্কাও গ্মিগিবা সিয়ানি মামিং বিল দংজা, বাত্তেসা বিসং ইসল আরো খ্রীষ্টনি খামাল হং·নুয়া আরো উয়া বিলসি হাজালসা খ্রীষ্টমিং শাসন দাকনুয়া।। ইন্দিবা উয়া বিলসি হাজাল বন·জা দিপ্পাৎ দংখুগিবা সিগিবা মান্দিরাং থাংচাজাজক। 7 উয়া হাজাল বিলসি বন·নাংজোকনো শয়তানখো বিনি জেলওনি ওয়াত্তেতনুয়া। 8 উনো বিয়া রি·য়াংএ গিম্মিক হা·গিলসাকনি জাতরাংখো, আগানস্খাওদে গোগ-মাগোগখো ব্রাংআ রামাচানা রা·আংনুয়া আরো দাকগ্রিকনা ইন্নে বিসংখো চিম্মংএতনুয়া। ইরাং সাগালনি হান·চেং গিত্তা বাং·নুয়া। 9 উনো আংআ নিকজক বিসং রি·বাসোএ ইসলনি মান্দিরাংনি দংআনি হা·দামখো আরো বিনি উয়া নামনিকগিবা সংজিলমাখো চিপচাংএ দনজক। ইন্দিবা সালগিওনি ওয়া·আল হং·খাতে বিসংখো খাম্মেতজক। 10 জেআন বিসংখো ব্রাংআ রামাচানা রাআংআমিং উয়া শয়তানখো চিং·গিবা গন্ধকনি চিরিংও গাল্লেতা হং·জক। উয়া চিপ্পু আরো দাকমিকা আগানসোগিবাখো স্খাংআন উচা গাল্লেতা হং·জক। উচা বিসং জ্রিংজ্রৎনা সালওয়াল সা·দিকাখো চাকনুয়া। 11 জা·মানো আংআ গি·সা দাল·বিয়া গ্বিবক সিংহাসন আরো উনি সাক্কাও সাকসাখো আসংএ দংআখো নিকজক। উনি মিকখাংওনি হা·গিলসাক আরো সিলগা গিম্মাজক, বিসংনি হা·দাম আর মামিংচাবা দংজাজক। 12 জা·মানো আংআ নিকজক, দা·ল্লা-চন্না গিম্মিক সিগিবা মান্দিরাং উয়া সিংহাসননি মিকখাংও চাদেংএ দংআ। উনি জা·মানো মিত্তাম খি·তাপরাংখো এংআ হং·জক। জা·মানো দা·আও মিংসা খি·তাপখো এংআ হং·জক। উয়া হং·জক জাংগিনি খি·তাপ। ইয়া সিগিবা মান্দিরাংনি কামনি গিম্মিনও উয়া খি·তাপরাংও জেদাক্কে লিক্ষিয়া হং·আমিং উয়ানদাক্কে বিসংনি বিচাল হং·জক। 13 জে সিগিবা মান্দিরাং সাগালও দংআমিং, সাগাল বিসংখো দি·এ রা·জক। ইনাআগ্রেবা সিয়া আরো সিগিবা হা·দামও জে সিগিবা মান্দিরাং দংআমিং, সিয়া আরো সিয়ানি হা·দাম বিসংখোবা ফিল·লেতজক। গিম্মিকখো বিনি কামনি খ্রি বিচাল দাক্কা হং·জক। 14 জা·মানো সিয়া আরো সিগিবা হা·দামখো চিরিংও গাল্লেতা হং·জক। ইয়া ওয়া·আলনি চিরিংও গা·আকান গ্মিগিবা সিয়া হং·আ। জেরাংনি বিমিং উয়া জাংগিনি হা·দামও গাল্লেতা হং·আ।

ফারাকগিবা খাৎথা 21

1 জা·মানো আংআ গি·সা গিত্তাল সিলগা আরো গি·সা গিত্তাল হা·গিলসাকখো নিকজক। স্খাংগিবা সিলগা আরো স্খাংগিবা হা·গিলসাক বন·নাংজকমিং আরো সাগালবা দংজামিং। 2 জা·মানো আংআ উয়া রংথালগিবা সংজিলমাখো, আগানস্খাওদে গিত্তাল যিরূশালেমখো সিলগাওনি আরো ইসলওনি হং·খাতে রি·বাখো নিকজক। মিচিকখো জেগিত্তা বিনি চাওয়ারিনা থারিয়ে দন্না, ইয়া সংজিলমাখোবা উগিত্তান থারিয়ামিং। 3 জা·মানো আংআ সাকসাখো উয়া সিংহাসনওনি রাক্কে ইয়া খাৎথাখো আগানাখো খিন্নাজক, “দা·আও মান্দিও ইসলনি দংআনি হা·দাম হং·জক। বিয়া মান্দিমিংআন দংনুয়া আরো বিসং বিনিন মান্দি হং·নুয়া। বিয়া আন·থাংআন মান্দিমিং দংনুয়া আরো বিসংনিন ইসল হং·নুয়া। 4 বিয়া বিসংনি মিকচিখো রিপ্পাকে হন·নুয়া। সিজানাজক; দুক, গ্রাপা আরো সা·দিকা আর দংজানাজক, মুয়ানা স্খাংনি গিম্মিক বন·জক।” 5 জেআন উয়া সিংহাসনও আসংএ দংআমিং বিয়া আগানজক, “নিবো, আংআ গিম্মিকখোন গিত্তাল দাক্কে থারিংজক।” জা·মানো বিয়া দা·আবা আগানজক, “ইয়া খাৎথাখো লিক্ষিবো, মুয়ানা ইয়া খাৎথারাং বিবিরা·না খ্রাগিবা আরো বিবি হং·আ।” 6 বিয়া আংনা আরোবা আগানজক, “বন·জক। আংআ আলফা আরো ওমিগা- হা·বাচেংআনি আরো বন·নানি। জেআন চি রিংনা হা·সিকা বিনা আংআ জাংগিনি চিমিকওনি দামগ্রি চি রিংনা হন·নুয়া। 7 জেআন হামনুয়া বিয়া ইরাংখো মান·রিকগিবা হং·নুয়া। আংআ বিনি ইসল হং·নুয়া আরো বিয়া আংনি দেফান্থি হং·নুয়া। 8 ইন্দিবা চিং·গিবা ওয়া·আল আরো গন্ধকনি চিমিকও দংআন হং·নুয়া খেনগিবা, বিবিরা·গিজাগিবা, মিৎচিনা খ্রাগিবা, স·ওতগিবা, থি·ল্লেকগিবা, মনতল দাকগিবা, বিমাংখো অলাখিগিবা আরো গিম্মিক বু·এ চা·গিবারাংনি বন·চতগিবা অবস্থা। ইয়ান হং·জক গ্মিগিবা সিয়া।” 9 জে সাকস্নি সা·গ্রেনি জাক্কো বন·চতগিবা সাবিসি গাপ্পা গি·স্নি দনচাক্রা দংআমিং বিসংওনি সাকসা আংচা রি·বাএ আগানজক, “রি·বা, আংআ নাং·না মিচিক, আগানস্খাওদে মেষ-বি·সানি জিকগিবাখো ফিন্নিকনা।” 10 জা·মানো উয়া সা·গ্রে আংখো গি·সা দা·ল্লা আরো চু·য়াকা হা·ব্রিচানা রিম্মাংজক। উনো আংআ রংথালগিবা গিসিকনি নিং·আও দংআমিং। 11 উয়া সংজিলমানি নাম্মেন রং·থি চিং·ব্র্রাপা গিত্তা জানিরা গিত্তা হীরা গিত্তা। 12 উয়া সংজিলমানি গি·সা দা·ল্লা চু·য়াকা দেয়াল দংআমিং আরো উয়ো চি·গ্মি দ·গা দংআমিং, আরো উয়া দ·গাও চি·গ্মি সা·গ্রে দংআমিং। 13 দগারাংনি গিগিত্থাম সালারামচাবাকা, গিগিত্থাম, গিগিত্থাম আরো গিগিত্থাম সালগ্রোচাবাকা দংআমিং। 14 উয়া সংজিলমানি দেয়ালনি চিগ্মি ফাংচাকা দংআমিং আরো উরাংনি সাক্কাও মেষবিসানি চিগ্মি ওয়াত্তেতানি চিগ্মি বিমিং দংআমিং। 15 জেআন আংমিং খাতথা আগানিংআমিং বিনি জাক্কো গিসা সোনানি থোসুসাগিবা গলদিক দংআমিং, জেদাক্কে বিয়া উয়া সংজিলমা, উনি দগারাংখো আরো দেয়ালরাংখো থোনা মাননা। 16 সংজিলমা রো·আ আরো আপসান। জামানো বিয়া উয়া গলদিকচা সংজিলমাখো থোআনি জামানো নিকজক উয়া রো·আ, চুয়াকাও হাজালগ্মি রিতচাব্রি কিলোমিটার হং·আ। 17 জামানো বিয়া দেয়ালখো থোআনি জামানো উয়া রিতচাসা হংজক। মান্দি জেগিত্তা থোআ উয়া সা·গ্রে উগিত্তান থোআমিং। 18 উয়া দেয়ালখো হীরাচা থারিয়ামিং আরো সংজিলমা চিরংআ কাচ গিত্তা সোনাচা থারিয়া। 19 উয়া সংজিলমানি দেয়ালনি ফাংচাকারাংও বাংআ গামচাতগিবা রং·থি হননা দংআমিং। স্খাংগিবা হীরানি, গ্মিগিা নীলকান্তমনিনি, গিত্থামগিবা তামামনিনি, ব্রিগিবা পান্নানি, 20 বংআগিবা সূর্যকান্তমনিনি, 21 চিগ্মি দগা হংজক চিগ্মি মুক্তা। গিম্মিক দ·গা গিফ্রাকফ্রাক মুক্তাচা থারিয়ামিং। সংজিলমানি রামা চিরংআ কাচ গিত্তা খাকখেত। 22 আংআ উয়া সংজিলমাও থরম নকখো নিকজাজক, মুয়ানা গিত্তেল ইসল আরো মেষ-বিসান উয়া সংজিলমানি থরম নক হংআমিং। 23 উযা সংজিলমাও থেংসুখাননা সাল বা জাজং নাংজা, মুয়ানা ইসলনি রাসংআন উনো সেংআখো হননা আরো মেষ বিসান উনি চাক্কি; 24 আরো গিম্মিক জাত উয়া সেংআচা রি·নুয়া। হা·গিলসাকনি রাজারাং বিসংনি রাসংচা উয়া সংজিলমাও রি·বানুয়া। 25 সালো দগারাং চিপ্পা দংজানুয়া আরো উনো ওয়ালবা ওয়ালজানুয়া। 26 গিম্মিক জাতনিন রাসং আরো মান্দিরা·আ উনো রাবানুয়া। 27 মারাং নাংআ বা নামজাস্রাং দাক্কা বা বু·এ আগানা ইন্দাকগিবা মান্দি উনো মামিংসালোবা নাপনা মানজানুয়া; জেরাংনি বিমিং মেষবিসানিন জাংগিনি খিতাপও লিক্ষিয়া দংআ বিসংআন উনো নাপনা মা·ন্না।

ফারাকগিবা খাৎথা 22

1 জা·মানো উয়া সা·গ্রে জাংগিনি চিনি চিবিমাখো আংনা ফিন্নিকজক। উয়া ক্রিস্টাল গিত্তা গ্রিকামিং আরো ইসলনি আরো মেষ-বি·সানি সিংহাসনওনি হং·খাতে সংজিলমানি রামা জাংচিও চিবিমা দংআমিং। 2 উয়া চিবিমানি সামগ্মি রিক্কামওন বলজাংগি দংআমিং। উয়ো চি·গ্মি বিথি নাংআ। জা রিক্ষিতান উয়ো বিথি নাংআ আরো উনি বিজাকচা গিম্মিক জাতনি মান্দি নাম্মিংআ। সাও আরবা দংজানুয়া। 3 ইসলনি আরো মেষ-বি·সানি সিংহাসন উয়া সংজিলমাও দংনুয়া আরো বিনি নকখলরাং বিনা দাংদিকে হন·নুয়া। 4 বিসং বিনি মিকখাংখো নিকনা মান·নুয়া আরো বিনি বিমিং বিনি কপালও লিক্ষিয়া দংনুয়া। 5 ওয়াল দংজানাজক আরো বিসংনি চাক্কিনি বা সালনি সেং·আ নাংজানাজক, মুয়ানা গিত্তেল ইসল আন·থাংআন বিসংনি সেং·আ হং·নুয়া। বিসং জ্রিংজ্রৎনা শাসন দাকনুয়া। 6 জা·মানো উয়া সা·গ্রে আংনা আগানজক, “ইয়া খাৎথারাং বিবিরা·না খ্রাগিবা আরো বিবি হং·আ। গিত্তেল ইসল, জেআন আগানসোগিবারাংনি গিসেপো খাৎথা আগানামিং বিয়া বিনি সা·গ্রেখো ওয়াত্তেতজক, জেদাক্কে মিত্তাম সালনি গিসেপো জেরাং হং·না রি·য়াংইংজক উখো উয়া সা·গ্রে বিনি নকখলরাংনা ফিন্নিকনা মা·ন্না।” 7 যীশু আগানজক, “নিবো, আংআ থেংরিন রি·বাংজক। ইয়া খি·তাপনি গিম্মিক খাৎথা, আগানস্খাওদে ইসলনি খাৎথাখো জে মানিয়া বিয়া ফাত্তিয়াখো মান·গিবা হং·আ।” 8 আংআ যোহন ইরাংখো খিন্নাজক আরো নিকজক। গিম্মিকখো খিন্নানি আরো নিক্কানি জা·মানো, জে সা·গ্রে আংনা ইরাংখো ফিন্নিকজক আংআ বিখো সালাম দাকনা বিনি জা·চকও থুচিকপজক। 9 ইন্দিবা বিয়া আংনা আগানজক, “দনবো, আংআ নাং·নি আরো নাং·নি বিবিরা·গিবা জংআদারাংনি, আগানস্খাওদে আগানসোগিবারাংনি আরো জেরাং ইয়া খি·তাপনি গিম্মিক খাৎথাখো মানিয়া বিসংমিং নকখল হং·ফা। ইসলখোন অলাখিবো।” 10 জা·মানো বিয়া আংনা আগানজক, “ইয়া খি·তাপনি গিম্মিক খাৎথা, আগানস্খাওদে ইসলনি খাৎথাখো না·আ দা·আ থুম্মুয়ে দন্নাবো, মুয়ানা সাল সকবাজক। অন্যায় দাকগিবা, ইনি জা·মানোবা বিয়া অন্যায় দাকখানা; 11 নামজাস্রাংগিবা, ইনি জা·মানোবা বিয়া নামজাস্রাং দংখানা। খাকখেৎ মান্দি ইনি জা·মানোবা খাকখেৎ কামখো দাকখানা আরো জে মান্দি রংথালগিবা, বিয়া ইনি জা·মানোবা রংথালে দংখানা।” 12 যীশু আগানিংজক, “নিবো, আংআ থেংরিন রি·বাংজক আরো গিম্মিকনা বিনি কামনি খ্রি হ·ন্নানি বকসিস আংচান দংআ। 13 আংআ আলফা আরো ওমিগা, স্খাং আরো বন·চতা, হা·বাচেংআনি আরো বন·নানি। 14 “ফাত্তিয়া মান·গিবা, জেরাং বিসংনি বা·রাখো সু·গালে গাল্লা জেদাক্কে বিসং জাংগিনি বিফাংনি বিথিখো চা·না মা·ন্না আরো দ·গা গিত্তা সংজিলমাও নাপনা মা·ন্না। 15 আচাক গিত্তা নামজাস্রাং মান্দি, মনতল দাকগিবা, থি·ল্লেকগিবা, স·ওতগিবা, বিমাংখো অলাখিগিবা, আরে জেরাং বুআখো নামনিকা আরো বু·আও রি·আ বিসং গিম্মিকান হা·ফালচা গা·আকে দংআ। 16 “আংআ যীশু আংনি সা·গ্রেখো ওয়াত্তেতজক জেদাক্কে বিয়া না·সংচা মন্ডলীরাংনা ইরাংনি বিদিংও সাক্ষি হ·ন্না মা·ন্না। আংআ দায়ূদনি জা·দিল আরো মা·চং, ফ্রিংনি চিং·গিবা আস্কি হং·আ।” 17 রংথালগিবা গিসিক আরো মিচিক আগানিংআ, “রি·বাবো।” আরো জেআন ইয়া খাৎথাখো খিন্নাংজক বিয়াবা আগানখানা, “রি·বাবো।” জেনি চি রিংনা হা·সিকা বিয়া রি·বাখানা আরো জেআন চি রিংনা হাম·মা বিয়া দামগ্রি জাংগিনি চিখো রিংখানা। 18 জে মান্দি ইয়া খি·তাপনি গিম্মিক খাৎথাখো, আগানস্খাওদে ইসলনি খাৎথাখো খিন্নাআ আংআ বিচা ইয়া সাক্ষিখো হন·নিংজক, সাওবা ইমিং মামিংখো জুরাওদে ইন্দিদে ইসলবা ইয়া খি·তাপও লিক্ষিগিবা গিম্মিক সাবিসিরাংখো বিনি জাংগিও জুরাএতনুয়া। 19 আরো ইয়া খি·তাপনি গিম্মিক খাৎথা, আগানস্খাওদে ইসলনি খাৎথাওনি সাওবা মামিংখো দনগালোদে ইন্দিদে ইসলবা ইয়া খি·তাপও লিক্ষিগিবা বলজাংগি আরো রংথালা সংজিলমানি মান·রিকানি বিলখো বিনি জাংগিওনি দনগালনুয়া। 20 জেআন ইরাংনি বিদিংও সাক্ষি হন·নিংজক বিয়া আগানিংজক, “বিবিন আংআ থেংরিন রি·বাংজক।” আমেন। গিত্তেল যীশু, রি·বাবো। 21 গিত্তেল যীশুনি ফাত্তিয়া ইসলনি গিম্মিক মান্দিরাংমিং দংখানা। আমেন।