Garo John
JOHANNI SEA NAMA KATTA
Janggini Katta
/1 Chengon Katta gnangchim, ua Katta Isol baksachim aro ua Katta Isolchim.
Chengonin ua Katta Isol baksanchim. Uachin Isol pilakkon ong-ataha; pilak
ong-atgiminrangoni mingsaba ua gride ong-jaha. Ua Kattaan janggi ong-achim,
aro ua janggi manderangna seng-a ong-achim. Seng-a andalao teng-sua aro andala
uko mamingdakeba kimitna amjaha.
Isolni watatgimin Johan minggipa mande saksa gnangchim. Ua seng-ani gimin
manderangna sakki on-na re-baaha; jedakode uamang pilakan knae bebe ra-na
man-gen. Ua an-tangde seng-a ong-jachim; indiba seng-ani gimin sakki on-asa
re-baaha. Pilak manderangko seng-atgipa, ua chong-motgipa seng-a a-gilsakona
re-baaha.
Ua Katta a-gilsakonchim. Isol a-gilsakko uchin ong-ataha; indiba a-gilsak uko
uijachim. Ua an-tanghi manderangonan re-baachim; indiba uni manderang uko
ra-chakjaha. Indiba pilak uko ra-chakgiparangna aro bebera-glparangna Isolni
de ong-china gita, ua uamangna bilko on-aha. Uamang a-gilsakni bewalo, be-enni
ba mandeni sikaoni atchijachim; indiba Isoloni atchigiparang ong-achim.
Ua katta mande pil-e an-chingni gesepo dongaha. Pagipani saksakamkam Depanteni
rasongko gita, ka-saa aro bebean gapgipa uni rasongko an-ching nikaha. Johan
uni gimin sakki on-e, aganaha, "Angni ja-man re-bagipa, angna dal-batgipa
ong-a; maina angni atchina skangan ua gnangchim," ine uani giminan anga
na-simangna aganachim.
Uni ka-saa suakaoniko ua an-ching pilaknan jaksrame ka-saanirangko on-aha.
Isol Niamko Moseni jakchi on-aha, ka-saa aro bebeko Jisu Kristoni jakchi
on-aha. Darangba Isolko mamingsaloba nikkuja. Pagipa baksa chengoningipa Uni
saksakamkam Depante uko parape-aha.
Johan Baptize Ka-atgipani Katta
Jerusalemo donggipa Jihudirang, Kamal dal-giparangko aro Levirangko Johanona
watate, "Na-ara sawa?" ine sing-on, ua jechakgija srangsrang rongtalen
aganchakaha; "Angade Kristo ong-ja." Uamang sing-taiaha, "Indide na-ara
sawasa? Na-an Elijahma?" Ua aganchakaha, "Ong-ja, angade ong-ja." Uamang
sing-taiaha, "Na-a Katchinikgipama?" Ua aganchaktaiaha, "Ong-ja." Uamang uo
sing-taiaha, "Na-a sawa chong-mot chingna aganbo, maina chingko
watatgiparangna, chinga aganepilna nanga. Na-a an-tangni gimin maiko agana?"
Johan aganehakaha, "Isaiahni agansoa gita, 'Gitelni ramako srongatbo, -ine
bakrao inwatgipani ku-rang, angan."
Watatgiminrangoni mitam Pharisrang Johano sing-aha, "Na-a Kristo ong-jaode,
Elijah ong-jaode, ba katchinikgipaba ong-jaode, na-a, mainasa baptize ka-ata?"
Johan aganchakaha, "Anga na-simangko chio napolata; indiba na-simangni gisepo
saksa gnang, jeko na-simang uija Uan angni ja-man re-bagnigipa; uni
ja-koprangni buduko engnamangba anga kraja."
Jordan Chibimani nalsachi Bethanyo, jeo Johan manderangko baptize
ka-atengachim, uano iarang ong-aha.
Isolni Mes Bi-sa
Salgipino Jisuni an-tangona re-baengako nike, Johan aganaha, "Hiwa, Isolni Mes
Bi-sa, a-gilsakni papko ra-anggipa! Uani gimnan anga aganengachim, 'Angni
ja-man saksa re-baenga; indiba ua angna hate dal-batgipa ong-a; maina angni
atehina skangan ua gnangchim.' Ian ua ong-a. Uan sawa ong-a, uko angaba
uikujachim; indiba Israelna uko uiatna anga re-baa aro chio baptize ka-ata."
Iako Johan sakki ong-e aganaha, "Salgioni paroa gita, Gisikni Uni kosakona
ong-onbae dongako anga nikaha. Anga uko uikujachim; indiba chio baptize
ka-atna angko watatgipa Isol angna aganaha, 'Jeni kosako Gisikni ong-onbae
dongako na-a nikgen, uan Gisik Rongtalgipao baptize ka-atgipa ong-a! Anga
iako nikaha, aro anga na-simangna agana; Uan Isolni Depante ong-a!"
Jisuni Skanggipa Sninggiparang
Sal gipino Johan pile an-tang sninggipa sakgnimung dongengachim. Jisuni
re-baengako nike ua aganaha, "Hiwa nibo! Isolni Mes Bi-sa." Uni aganako knae,
sninggipa sakgni Jisu baksa re-angpaaha. Uamangni ja-rikbaako nike, Jisu
an-pile uamangna aganaha, "Na-simang maiko am-enga?" Uamang una aganaha,
"Na-ara bano dongenga, Rabbi?" (Skigipa) Ua uamangna aganaha, "Re-bae nibo."
Uamang re-ange uni dongramko nikeaha, aro unsalo uamang unbaksan dongaha; unon
attamchibara bri kontamang ong-achim. Johanni aganako knae Jisuko
ja-rikanggipa sakgnioni saksara, Simon Pitorni jonggipa, Andrew ong-achim. Ua
adatang Simonko nikechenge, aganaha. "Chinga Kristoko (To nonggimin) nikaha.
Unon ua uko Jisuona rimbaaha. Jisu uko nitate, una aganaha, "Na-an Johanni
depante Simon ong-a, nang ko Kephas minggen." (Iako pe-skaode Pitor, ba Ro-ong
ong-a).
Jisu Philip Aro Nathanaelko Okama
Salgipino Jisu Galiliona re-angna mangsongaha; unon Philipko man-e, una
aganaha, "Angbaksa re-bapabo." Philipba, Andrew aro Pitorni donggipa songjinma
Bethsaidaonin ong-achim. Philip Nathanaelko man-e, una aganaha, "Jeni gimin
Mose Niamo aro Katchinikgiparang sesoahachim; uko chinga man-aha, uan Josephni
depante, Nazarethoni Jisu ong-a." Nathanael una aganaha, "Nazarethoni maiba
nama ong-katna man-ama?" Philip una aganaha, "Re-bae niboching."
Jisu Nathanaelni an-tangona re-baengako nike, una aganaha, "Uan kakketgipa
mande, uo tol-napa gri." Nathanael una aganaha, "Na-a angko maikai ui-a?" Jisu
una aganchakaha, "Philipni okanma skangan, na-a dumbur boini kokkimao
dongengon anga nang-ko nikachim." Nathanael una aganohakaha, "Rabbi, Na-an
Isolni Depante! Na-an Israelni Raja!" Jisu una aganchakaha, "Dumbur bolni
kokkimao anga nang-ko nikachim inani giminan na-a bebera-ahama? larangna bate
dal-batgiparangkon na-a nikgen. Ua aganangkuaha, "Beben anga na-simangna
agana, na-simang salgini oako aro Isolni sa-grerangni mandeni Depanteona
gadoangako aro ong-onangako nikgen."
Kanao Bia Ka-a
/2 Gittamgipa salo Galilini Kanao bia ka-ani ong-on, Jisuni ma-gipa uno
gnangchim. Jisu aro uni sninggiparangkoba ua biaona okamachim. Unon alao chu
bon-changoa, Jisuni ma-gipa una aganaha, "Uamango chu bon-changaha." Jisu una
aganaha, "Ama, na-a maina angko ja-donggaatenga? Angni sal sokkuja" Uni
ma-gipa chakkolrangna aganaha, "Ua na-simangna jeko agana ukon dakbo."
Jihudirangni dakbewal gita, ja-sujaksuna muan gni, ba muan gitam chakgipa
ro-ongni basing te-dok uano dona gnangchim. Jisu uamangna aganaha, "Ia
basingrango chiko gapatbo." Uamang uarango rikingona sokpile gapataha. Unon ua
uamangna aganaha, "Da-o mitam we-e, cha-dilgipaona ra-angbo." Uamang uko
ra-angaha. Cha-dilgipa chu pilatgimin chiko ringotaha aro uko baoniko man-aha
uijaha; indiba we-bagipa chakkolrangde uko uiachim. Unon cha-dilgipa chawariko
okame, una aganaha, "Pilakan namgipa chuko on-chenge, pekjokoa nambregijako
manderangna on-a; na-ade namgipa chuko da-onaba rakkikuaha." Ia skanggipa
chinko Jisu Galilini Kanao dake, an-tangni rasongko parapeaha, aro uni
sninggiparang uo bebera-aha. Iani ja-mano ua an-tangni ma-gipa, jonggiparang
aro sninggiparang baksa Kapernaumona ong-onangaha; aro ua- mang uno banggija
salrangna dongaha.
Jisu Torom Nokkona Re-anga
Jihudirangni watchangani Alani sal sepangaha aro Jisu Jerusalemchina doangaha.
Ua Torom noko matchu, mes, aro paroa palgiparangni aro tangka sregiparangni
asongako man-eaha. Ua budurangni betsmitko dake, Torom nokoniko mes,
matchurang baksa uamangko a-rikataha. Ua tangka sregiparangni paisarangko
satpripraaha, uamangni mejrangko bikpilataha. Ua paroa pal- giparangna
aganaha, Iarangko ianoniko ra-angbo; angni Pagipani nokko antidam dakatnabe."
'Nang-ni nokna bimchipanian angko cha minokgen,' ine seako um sninggiparang
gisik ra-aha.
Jihudirang una aganchakaha, "Iarangko dakna nang-o bil gnang me mesokna, na-a
mai chinko dakgen?" "Jisu uamangna aganchakaha, "Ia nokko rubo, aro anga sal
gittamon uko chakatatgen." Unon Jihudirang aganaha, "Ia Torom Nokko rikna
bilsi sotbridok nangaha, na-a iako salgittamon chakatatna amgenma? Indiba ua
be-entangni torom nokkosa aganengachim. Ua sigiminrangoni chakatpilon, uni
sninggiparang ia agana kattako gisik ra-aha; aro uamang Sastroko aro Jisuni
agana kattako bebera-aha.
Jisu Pilak Manderangkon Uia
Watchangani Alao, ua Jerusalemo dongmittingo, uni daka chinrangko nike,
bang-en uni bimingo bebera-aha. Indiba Jisu uamango ka-dongjaha; maina ua
pilak manderangkon uiachim. Mandeni gimin una pilakba sakki on-e aganna
nangjachim; maina ua an-tangan mandeo mai gnang uitokachim.
Jisu Aro Nikodemus
/3 Jihudirangni sason ka-gipa, Nikodemus minggipa Pharisi saksa gnangchim. Ua
Jisuona walo re-bae aganaha, "Rabbi, na-a Isoloni re-bagipa, skigipa ong-a ine
chiuga uia; maina Isol nang baksa dongjaode, pilakba nang-ni daka chinrangko
dakna amja."
Jisu una aganchakaha, "Beben anga nang-na agana, mande kosakoni atchijaskal
Isolni Songnokko nikna man-ja." Nikodemus una aganaha, "Mande budepa ong-oa
maidake atchitaina man-kua? Ma-ani oko gnigipa changna nape atchina man-ama?"
Jisu aganchakaha, "Bebekon anga nang-na agana, mande chionimung, Gisikoni
atchijaode Isolni Songnoko napna man-ja. Be-enoni atchigipa be-enan aro
Gisikoni atchigipa gisikan. Anga nang-na aganani gimin aiao inmanabe,
'Na-simang kosakoni atchitaina nangchongmota.' Balwa jechi sika uchi bala, aro
na-a uni gam-ako knaa; indiba bachini balbara aro bahina balanga uko uija.
Gisikkoni atchigipa sakanti uandaken ong-a."
Nikodemus una aganchakaha, "Iaranga maikai ong-na ama?" Jisu una aganaha,
"Na-a Israeini skigipa saksa ong-eba iarangko uijama? Bebekon anga nang-na
agana, chingni uigiminkon chinga agana, aro chingni nikgiminni giminan chinga
sakki on-a; indioba na-simang chingni sakkiko ra-chakja. A-gilsakni gimin
aganon na-simang bebera-jaode, salgirangni gimin anga aganode, maikai
bebera-gen? Salgioni ong-onbagipa Mandeni Depantena agre darangba salgichi
gadoangkuja.
"Bakrao Mose maikai chipuko de-doaha, Mandeni Depanteba uandaken de-doako
mann-a nanggen; maikai uo bebera-gipa sakanti jringjrotni janggiko manna
amgen. Isol a-gilsakna inditan ka-saaha, ua an-tangni saksa kam-kam Depan-
tekon on-jok; maikai Uo bebera-gipa sakanti sigija jringjrotni janggiko
man-gen. A-gilsakko bichal ka-china, Isol Depanteko a-gilsakona watatjaha;
indiba a-gilsak maikai uchi jokatako man-gen.
"Uo bebera-gipa sakantikon bichal ka-ja; indiba uo bebera-gijagipakode da-on
bichal ka-manaha; maina ua Isolni saksakam-kam Depanteni bimingo bebera-jaha.
"Ua bichala ian; seng-a a-gilsakona re-baaha; indiba manderang seng-ana bate
andalako namnikbataha; maina uamangni kamrang namjachim.
Namgijako dakgipa sakanti seng-ako mitchia aro an-tang kamrangko parak
ong-atjana gita, ua seng-aona re-baja. Bebeko dakgipa seng-aona re-baa,
jedakode uni kamrang Isolo pangchake dakgiminrang ong-a ine parape-na
man-gen."
Jisu Aro Johan
Iani ja-mano Jisu aro uni sninggiparang Judea jolona re-baaha. Ua uamang
baksa uano donge baptize kaataha. Johanba Salim sambajoini Aenono baptize
ka-atangachim; maina ua biapo chi bang-achim. Manderang uona re-bae bang-en
baptize ka-atako man-tokengachim; maina Johanko patoko dongkujachim.
Unon rongtalatani gimin Johanni sninggiparang aro saksa Jihudini gisepo
jegrikani ong-kataha. Uamang Johannona re-bae, una aganaha, "Rabbi, nibo!
Jordanni nalsachi nang baksa donggipa jeni gimin na-a sakki on-achim; uaba
baptize ka-atenga, aro uona pilakan re-anga." Johan aganchakaha, "Salgioni
on-giminna agre mande mamingkoba man-na amja. Na-simang an-tangtangan angni
agangimin kattani sakkirang ong-a. 'Anga Kristo ong-ja, indiba una skang angko
watatsoaha.' Namchikko man-gipaan chawari ong-a indiba un baksa dongpae
knatimgipa, chawarini ripengtang, uni kurangko knae katchabea. Uandaken angni
katchaaba chu-sokaha. Ua dal-roroangna nanga indiba anga on-roroangna nanga."
Salgioni Re-bagipa
Kosakoni re-bagipa, pilakna batgipa ong-a; a-gilsakonigipade a-gilsaknin aro
a-gilsakni gitan agana. Salgioni re-bagipa pilaknan beta. Ua an-tangni
nikgimin aro knagiminni giminsa sakki on-a; indiba pilakba uni sakkiko
ra-chakja. Uni sakkiko ra-chakgipa mande, Isol bebegipa ong-a ine ra-manaha.
Isolni watatgimin mande Isolni kattarangko agana; maina Isolni on-gimin gisik-
ni ari gri. Pagipa Depantena ka-saa aro uni jako pilakkon on-tokaha. Depanteo
bebera-gipa jringjrotni janggikon man-aha. Depanteko manigijagipa jringjrotni
janggiko uina man-ja; indiba Isolni ka-onangasa uni kosako dongkama."
Jisu aro Samariam me-chik
/4 Jisu an-tang baptize ka-atjaoba, uni sninggiparang Johanna bate bang-bata
sninggiparangko dakenga aro baptize ka-atenga ine Pharisirang knamanaha ine
Jisu uioa; Ua Judeako wate Gahlichina re-angpilaha. Ua Samaria gita
nappakangna nangani gimin Jakobni an-tang depante Josephna on-gimin a-ba
damsani sepango donggipa Samariani Sykar minggipa songona re-baaha. Uano
Jakobni chia-kolba gnangchim. Songree neng-ahani gimin Jisu chia-kol sambao
asonge dongaha; da-o saljatchimang ong-achim.
Unon Samariani me-chik saksa chi ko-na re-baaha aro Jisu una aganaha, "Angna
ringna on-bo." (Uni sninggiparang cha-aniko brena songjinmachi
re-angman-ahachim.) Samariani me-chik una aganaha, "Maikaisa na-a Jihudi mande
ong-eba, anga, Samaria me-chikoniko ringna bi-a?" (Maina Jihudirang aro
Samariarang cha-rim ringrunjachim.) Jisu una aganchakaha, "Na-a Isolni on-ako
aro 'Angna ringna on-bo me nang-na agangipako uigenchimode, na-a uo
bi-genchim, aro ua nang-na chijanggiko on-genchim." Me-chik una aganaha,
"Skigipa, nang-o ko-chakani gri, aro chia-kola tu-a; na-a baoniko chijanggiko
man-gen? Na-an chingni Jakobnaba dal-batama? Ua ia chia-kolko chingna on-aha;
aro ianoniko an-tangba aro uni dedrang aro jakrangba ringangaha."
Jisu una aganchakaha, "Ia chiko ringgipa sakanti ringna siktaigen, indiba anga
je chiko on-gen uko ringgipa pilakan mamingdakeba ringna siktaijawa. Anga je
chiko on-gen ua uno chimik ong-e, uko jringjrotni janggiona dilanggen." Ua
me-chik una aganaha, "Skigipa, angna ua chiko on-bo, jedakode anga ringna
siktaijawa aro indita ramako ianona re-bae chi ko-ena nangjawa."
Jisu una aganaha, "Re-angbo, nang-ni segipako okame ianona rimbabo." Me-chik
una aganchakaha, "Ango segipa dongja." Jisu una aganaha, "Na-a, 'Ango segipa
dongja,' ine aganaha, kakketan ong-a; Indiba nang-o segipa sakbongajok, aro
da-o nang-o doggipaba nang-ni segipa ong-ja. Na-a bebekon aganaha." Ua me-chik
Jisuna aganaha, "Skigipa, na-a saksa katchinikgipa ong-a ine anga nikaha.
Chingni pagitchamrang ia a-brio olakiachim, aro na-simang agana, Jerusalemsa
olakiani biap aro unosa pilakan olakina nangchongmota." Jisu una aganaha,
"Angko bebera-bo, sal re-baenga na-simang Pagipako ia a-brioba ba Jerusalemoba
olakijawa. Na-simang jeko uija uko olakia, chingade jeko uia ukosa olakia;
maina jokatani Jihudirangoni ong-a. Da-o sal re-baenga jensalo
olakichongmotgiparang gisiko aro bebeo Pagipako olakigen; maina an-tangko
indake olakigipa manderangkon Pagipa am-a. Isol Gisikan, aro uko
olakigiparang gisiko aro bebeo olakina nanga." Ua me-chik aganaha, "Anga uia
Kristo (To nonga man-gipa) re-baenga. Ua re-baon an-chingna pilakkon agane
on-gen." Jisu una aganaha, "Nang baksa aganenggipa angan Ua."
Uochachan uni sningiparang re-baaha, aro ua me-chik baksa agangrike dongengana
uamang aiao inmanaha; indiba, "Na-a maiko am-enga?" ba "Na-a un baksa maina
agangrikenga?" ine saksaba uo sing-jaha. Unon ua me-chik an-tang basingko
donange songjinmaona daariangenba manderangna aganeaha. "Angni pilak
dakgiminko aganna amgipa mandeko re-bae niebo, Uan Kristo ong-jama?" Uamang
songjinmaoni re-ongkatbae uona re-batokaha.
Unomitingo sninggiparang uko mol-mole aganaha, "Rabbi, na-a cha-boaha." Jisu
uamangna aganaha, "Ango cha-na gita cha-ani gnang, jeko na-simang uija."
Sninggiparang saksa sakgipinna aganaha, "Saoba una cha-aniko ra-baahama?" Jisu
uamangna aganaha, "Angko watatgipani namnikako dakan aro uni kamko chu-sokatan
angni cha-ani ong-a. 'Rakari sokna da-o jabri dengenga; ine na-simang
aganjama? Anga na-simangna agana, na-simangni mikgronrangko de-chaoe
a-barangchiko niatbo, uarang minaha aro ratna namaha. Ratgipa an- tangni
man-gniko man-enga aro jringjrotni janggiona biteko chimongengaha; jedakode
satgipa aro ratgipa katcharimna man-gen. Indake saksa sata aro sakgipin
ratskaa ine aganania bebe ong-a. Jena na-simang neng-e gamjachim, uko ratna
anga na-simangko watata; gipinrang neng-bee gam-aha aro uamangni jakmani
biterango na-simang bak man-paaha." Songjinmaoni bang-bea Samaria manderang
uko bebera-aha; maina ua me-chik sakki on-e aganengachim, "Ua pilak angni
dakgiminrangko agane on-tokaha." Unon Samariani manderang uko an-tangtang
baksa dongkuchina mol-molaha, aro ua uano salgnina dongaha. Uni agana
kattarangna sakgipinrangba bang-en bebera-aha, aro uamang ua me-chikna
aganaha, "Nang-ni aganani giminsan chinga bebera-aijaha; da-o chinga
an-tangtangba uko knaaha, aro uan a-gilsakko jokatgipa ong-chongmota ine
uiaha."
Jisa Subidarani Depanteko An-sengata
Sal gnini ja-mano Jisu uanoni Galiliona re-angaha. (Katchinikgipa songtango
mandera-ako man-ja ine Jisu an-tangan sakki on-aha. Ua Galiliona re-baoa,
Galilini manderang uko rimchaksoaha; maina uamang Watchangani Alaona
re-angenba Jerusalemo pilak uni dakarangko nikachim.
Ua Galilini Kanaona re-bapiltaiaha jeo ua chiko chu pilatachim. Uano rajani
saksa Subidar gnangchim; uni depante Kapernaumo sae dongengachim. Ia mande,
Jisu Judeaoni Galiliona re-baaha ine knaoa, uona re-ange, an-tangni depanteko
re-bae an-sengatchina mol-moleaha; maina ua sinasiengachim. Jisu una aganaha,
"Na-simang chinrangko aro aiao inmananirangko nikjaskal bebe- ra-jawa." Rajani
Subidar una aganaha, "Skigipa, angni bi-sa sina skangan re-bapabo." Jisu una
aganaha, "Re-angbo nang-ni depante tanggnok." Ua mande Jisuni an-tangna agana
kattako bebera-e re-angaha. Ua ong-onangmitingon, uni nokkolrang uko gronge
aganaha, "Nang-ni depante tangenga." Salni badia bako ua namkalna a-bachengaha
ine ua uamango sing-aha. Uamang una aganaha, "Mejalo saljatahi on-tisa
badeangachibara sawaka namanga- ha." Uochachan "Nangni depante tangginok" ine
Jisu aganachim, ine pagipa uiaha. Unon ua aro uni nokgimikba Jisuo bebera-aha.
Ian Judeaoni Galiliona re-bae, uni daka gnigipa chin ong-achim.
Bethesda Chibolo An-sengata.
/5 Iani ja-mano Jisu Jerusalemchina doangaha; maina Jihudirangni maniani sal
gnangchim. Jerusalemo Mes cholgugapakchi grimra dambonga gnanggipa, Ibri
ku-sikchi Bethesda minggipa chibol damsa gnangchim. Uano bang-bea sagipa
manderang mikgri, jakora aro ja-ajak sikrepgiparang chini moako nisenge
dongtokengachim. (Maina je saini bakoba ua chibolona sa-gre re-bae chiko
moatrongachim. Unon chi moani ja-mano je mandean skang chio ong-one auea, ua
je saaoniba an-sengako man-achim.) Bilsi kolatchichetna saenggipa mande saksa
uano tue dongengachim. Unon Jisu ua mande uano ruuta sairangna tue
dongengachim ine uie, una aganaha, "Na-a an-sengatako man-na namnikama?"
Sagipa mande una aganchakaha, "Skigipa, chiko moatmitingo angko chibolo
donatna gita, angni mande saksaba dongja. Angni re-angmitingon sakgipin angna
skang ong-onerongaia." Jisu una aganaha, "Chakatbo, nang-ni tuchakaniko ra-e
re-rorobo." Ua mande bakan an-sengatako man-aha, aro an-tang tuehakaniko ra-e
re-roroaha. Uan Neng-takani sal ong-achim. Uni gimin Jihudirang an-sengatako
man-gipa mandena aganaha, "Ian Neng-takani sal ong-a; na-a nang-ni tuchakaniko
de-tommalja." Ua uamangna aganchakaha, "Angko an-sengatgipa mandean angna
aganaha, 'Nang-ni tuchakaniko ra-e re-rorobo.' " Uamang uo sing-aha, "'De-tome
re-rorobo,' ine agangipa mandea sawa?" Indiba uati sawachim; ua an-sengatako
man-gipa mande uijachun. Ua biapo mande jinma dongani gimin Jisu uanoni
re-angskaaha.
Iani ja-mano Jisu uko Torom noko gronge aganaha, "Nibo, na-a an-sengatako
man-aha, pap ka-tainabeaha, majna nang-na maiba namjabata ong-naba donga." Ua
mande re-ange an-tangko an-sengatgipa mandea Jisuan ong-a ine Jihudi- rangna
aganeaha. Unon iarangko Neng-takani salo ua dakahani gimin Jihudirang Jisuko
a-rikna a-bachengaha. Jisu uamangna aganchakaha, "Angni Pagipa da-ona kingking
jaktipgija kam ka-enga, angaba ugitan dakenga." Iani giminan Jihudirang uko
batesa so-otsrangna am-aha; maina ua Neng-takani salkosan pe-aigija, an-tangko
Isol baksa apsan dake, Isolko an-tangni Pagipa inachim.
Depante Ong-ani Bil
Jisu uamangna aganchakaha, "Beben anga na-simangna agana, Depante skatangde
mamingkoba dakna amja. Ua Pagipani dakako nikesan dakna amaia; maina Pagipa
jeko daka, ukon Depanteba daka. "Pagipa Depantena ka-saa aro pilak. an-tangni
dakako una me-soka; aro iarangna dalbatgipa kamrangkoba ua una me-sokgen
maikai na-simang aiao inmangen. Pagipa maikai sigiminrangko chakatate janggiko
on-a, uandaken Depanteba an-tangni namnikgiparangna janggiko on-a. Pagipa
darangkoba bichal ka-ja; indiba pilak bichal ka-aniko Depantenan on-aha;
maikai uamang jedake Pagipako mandera-a, Depantekoba mandera-na man-gen. Soaba
Depanteko mandera-jaode, uko watgipa Pagipakon ua mandera-ja.
"Beben anga na-simangna agana, angni kattako knachake, angko watatgipako
bebera-gipaan jringjrotni janggiko man-aha. Ua bichalona re-baja; indiba
siaoni janggiona ga-bataha. Beben anga na-simangna agana, Sal re-baenga, aro
da-oba ong-a, jeo sigiminrang Isolni Depanteni ku-rangko knagen, aro uko
knachakgiparang tanggen. Maikai Pagipa an-tangan janggini ja-pang ong-a,
uandaken Depantekoba janggini ja-pang ong-china on-aha. Iana agreba, ua
Mandeni Depante ong-ani gimin pilak bichalni bilkoba una on-aha. Na-simang
iana aiao inmanaha; maina sal re-baenga pilak gopramogiparangba uni ku-rang-
ko knae ong-katbagen. Jerangni kamrang namachim uamang jringjrotni janggiona
chakatatako man-gen. Namgijako dakgiparang bichalona chakatatako man-skagen.
Anga an-tangni bilo mamingkoba dakna amja; Apani agana gitasa anga bichal
ka-a; aro angni bichal kakket ong-a; maina anga an-tangni namnikako am-jaenga;
indiba angko watatgipani namnikakosa am-a."
Jisuni Sakkirang
"Anga an-tangni gimin sakki on-ode, angni sakki bebe ong-ja. Angni gimin
sakki on-gipa sakgipin gnang, aro anga uia; angni gimin uni sakki on-ara bebe
ong-a. Na-simang Johanona watataha, aro ua bebena sakki on-aha. Anga mandeni
sakkio pangchakade ong-ja; indiba na-simang maikai joktako man-gen anga
iarangko agana. Ua ching-enggipa aro teng-enggipa tochri ong-achhn; aro
na-simang uni teng-suao dikdiksasan katchana sikaha. Johanni sakkina bate
dal-batgipa sakki ango gnang. Da-o angni dakenggipa kamrang, Pagipani angna
ka-e chu-sokatchina on-gimin ong-a; uarangan angko Pagipa watataha ine angni
gimin sakki on-a. Angko watatgipa, Apa an-tangan angni gimin sakki on-aha;
na-simang maming saloba uni ku-rangko knakuja aro uni bimangko nikkuja. Uni
katta na-simango dongkamja; maina uni watatgipako na-simang bebera-ja.
Na-simang Sastrorangoniko am-a; maina uarango jringjrotni janggi donga ine
na-simang chanchia. Uaranga angni giminsan sakki on-a. Indiba janggiko
man-na gita na-simang angona re-bana sikja.
"Mandeni rasong on-ako angna nangja; indiba anga na-simangko uia; na-simangni
ka-tongo Isolna ka-sara dongja. Anga angni Pagipani bimingo re-baaha, aro
na-simang angko ra-chakja; indiba sakgipin an-tangni bimingo re-baode,
na-simang uko ra-chakgen. Saksangipa Isolni rasongko am-gija, an-tangtangskani
rasongko am-gipa, na-simang maikai bebera-na ama? Anga na-simangko Apana
matnange agangen ine chanchinabe. Na-simangko matnanggipade Mosesa, jeo
na-simang ka-donganiko donaha. Na-simang Moseko bebera-ode angkoba
bebera-genchim; maina angni giminan ua seaha. Na-simang uni segimimangko
bebera-jaode, na-simang maikai angni kattarangko be- bera-gen."
Jisu Hajalbongana Ala
/6 Iani ja-mano Jisu Galili Sagal (Tiberia) nalsachi re-angaha. Unon bang-bea
jinma uko ja-rikangaha; maina sagiparangko an-sengate bilakgipa kamrangko
dakako uamang nikachim. Jisu a-briona doange an-tangni sninggiparang baksa
asongaha. Unon Jihudirangni Watchangani Alani sepangahachim. Jisu niwilwaloa
bang-bea manderangni an-tangona re-baengako nikaha. Uni gimin Jisu Philipna
aganaha, "Ia pilak manderangko okkaatna an-chinga baoniko chu-onga gita
cha-aniko brena man-gen." (Ua an-tangni daknasiako uiachim; indiba Philipko
nina gitasa ua iako aganaha.) Philip aganchakaha, "Ia pilak man- derangna
on-tiprak tikatnamangba tangka hajalsana bate pittako brena nang-genchim."
Uni sninggiparangoni sakgipin; Simon Pitorni jonggipa Andrew aganaha, "Iano
bi-sa saksa gnang, uo job mini pitta dotbonga aro na-tok manggni donga; indiba
indita manderangna uara mai ong-gen?" Jisu uamangna aganaha, "Mande- rangko
asongatbo." (Ua biap gimikon samsirarachim) Unon pilak manderang asongaha, aro
sak hajalbongamang mande gnangchim. Unikoa Jisu pittako ra-e Isolko mittelaha,
aro asonggipa manderangna sualataha. Ua na-tokkoba ra-e indaken dakaha aro
uamang pilakan nanga gita cha-tokaha. Uamang pilakan cha-e okkaman-oa, Jisu
an-tangni sningiparangna aganaha, "Agitchagipa pe-tonggimin pittarangko
chimongbo, jedakode on-tisamangba gimajawa." Uandaken uamang manderangni
cha-spa job mini pitta petonggiminrangko chimongtokoa ke- ra chi-gni ong-aha.
Uno donggipa manderang Jisuni ia aiao inmangipa jakmako nike aganaha.
"Aigilsakona re-bagnigipa katchinikgipa ian ong-chongmota." Uandaken uamang
re-bae, uko rim-e raja songdranasia ine Jisu uiaha; uni gimin ua saksan
a-brichina doangtaiaha.
Jisu Chi Kosako Re-a
Attain ong-ahaon uni sninggiparang sagalona ong-onangaha. Uamang ringo gakate
Kapernaumchina batangengachim. Unon andalbapilaha, indiba Jisude uamangona
re-bakujachim. Da-o balwa ta-rakbeengani gimin sagal pokpekbe- aha. Uamang
mail gittam, ba mail brimang choangaha, unon Jisuni chi kosako ring sepang
sepang re-baengako nike uamang kenaha. Jisu uamangna aganaha, "Angasa,
kenabe," Unon uamang uko ringo gakatatna namnikaha; indiba uamang je biapona
re-angengachim, uanona ua ring bakan sokangskaaiaha.
Manderang Jisuko Am-a
Sal gipino sagaini nalsachi ring bolsana agre gipin dongjahachim, aro Jisu
an-tangni sninggiparang baksa ua ringo gakatjahachim, aro uamang
an-tangtangrara re-angaha ine mande jinma nikaha. Gitelni Isolko mittele
pittako pe-gipa biap sambaona Tiberiasoni gipin ringrangba re-baaha. Jisu aro
uni sningiparang uano dongja ine jinma nikoa, uamang an-tangtangba ringrango
gakate Kapernaumona Jisuko am-e re-angaha.
Jisa Janggmi Pitta
Uamang uko sagal nalsachi nikeoa aganaha, "Rabbi, na-a basako ianona
re-baaha?" Jisu uamangna aganchakaha, "Beben anga na-simangna agana,
chinrangko nikani gimin ong-ja, indiba pittarangko cha-e okkaahani giminsa
na-simang angko am-enga. Gimagnigipa cha-anina gamnabe; indiba jringjrotni
janggiona dongkamgipa cha-anina gambo. Ia cha-aniko Mandeni Depante
na-simangna on-gen; maina Pagipa Isolan an-tang bilni mohorko uo su-aha."
Uamang una aganaha, "Chinga Isolni kamrangko ka-na gita maiko dakna nanga?"
Jisu uamangna aganchakaha, "Isolni kam ian, chongmotan jeko ua watataha, uo
na-simang bebera-na nanga." Uni gimin uamang una aganaha, "Chinga nike
bebera-na man-na gita, na-a mai chinko daka? Na-a maiko daka? An-chingni
pagitchamrang bakrao mannako cha-aha; Sastroo agana gita, "Cha-china ua
uamangna salgioniko cha-aniko on-aha.'" Jisu uamangna aganaha, "Beben anga
na-simangna agana Mose na-simangna salgioni cha-aniko on-jachim; indiba angni
Pagipasa na-simangna chong-motgipa cha-aniko salgioniko on-a. Salgioni
ong-onbae a-gilsakna janggiko on-gipaan, Isolni on-gipa cha-ani ong-a."
Uamang una aganaha, "Gitel, ia cha-aniko chingna pangnan on-bo." Jisu uamangna
aganaha, "Angan janggini cha-ani; angona re-bagipa sakanti maimingdakeba
okkrijawa, aro ango bebera-gipa sakanti mamingdakeba ringna siktaijawa.
Indiba anga na-simangna agana, na-simang angko nikahaoba, angko bebera-ja.
Jemangko Apa angna on-aha, uamang angona re-baa aro angona re-bagipako anga
mamingdakeba an-pilatjawa. Antangni sika gita ong-ja, indiba angko watagipani
namnikako dakna anga salgioni re-baaha. Angko watatgipani nangnika ian;
chong-motan angna on-giminrangoni saksamangkoba anga gimaatjawa; indiba
chon-kaman salo pilakkon janggiona chakatatgen. Angni Pagipani namnika ian;
chongmotan Depanteko nikgipa aro bebera-gipa sakanti jringjrotni janggiko
man-gen, aro chon-kaman salo anga uko chakatatgen."
Jihudirang iani gimin mitengmiteng aganna a-bachengaha; maina ua aganachim;
"Angan salgioni ong-onbagipa cha-ani." Uamang aganaha, "Ia mande Josephni
depante, Jisu ong-jama? An-chinga uni ma-apako uia; indide, da-o ua maikai
an-tangko salgioni ong-onbaaha ine agana?" Jisu uamangna aganchakaha,
"Na-simangni gisepo miteng-miteng aganabe. Angko watatgipa Pagipa angona
salbajaskal darangba angona re-bana amja, aro ukosan bon-kaman salo anga
chakatatgen, Katchinikgiparang seaha, 'Pilak manderangan Isolni skiako
man-gen.' Apaoniko knae skia man-gipa pilakan angona re-baa. Pilakan Pa-
gipako nikaha iade ong-ja. Jean Isoloni ong-a uasan Pagipako nikaha.
"Beben anga na-simangna agana, bebera-gipaan jringjrotni janggiko man-aha.
Angan jringjrotni cha-ani. Na-simangni pagitchamrang bakrao manako cha-eba
siaha; indiba salgioni ong-onbagipa cha-aniko cha-gipa sakanti sijawa. An- gan
salgioni ong-onbagipa tanggipa cha-ani ong-a. Ia cha-aniko cha-gipa sakanti
jringjrotnan tanggen. Je cha-aniko anga on-gen uan angni be-en ong-a jeko anga
a-gilsakni tanggnina on-a."
Ian Jihudirangni gisepo ka-onange jegrikaniko an-bachengataha, "Ia mande
maikai be-entangko an-chingna on-na ama?" ine uamang an-tangtangni gisepo
sing-aha. Jisu uamangna aganaha, "Beben anga na-simangna agana, na-simang
Mandeni Depanteni be-enko cha-jaode, aro uni an-chiko ringjaode, na-simang
an-tangtanggode janggiko man-jawa. Angni be-enko cha-gipa aro angni an-chiko
ringgipa jringjrotni janggiko man-a, aro bon-kaman salo anga uko chakatatgen.
Angni be-en chong-motgipa cha-ani aro angni an-chi chong-motgipa ringani
ong-a. Angni be-enko cha-gipa aro angni an-chiko ringgipa ango dongkama aro
anga uo dongkama. Tanggipa Paggipa angko watataha gita aro anga Pagipana tanga
gita, angko cha-gipa angna tanggen. Ian salgioni ong-onbagipa cha-ani ong-a.
Iade na-simangni pagitchamrangni cha-eba sigipa cha-ani gita ongja. Ia
cha-aniko cha-gipa jringjrotnan tanggen." Ka- pernaumni Sinagogo skimitingo
Jisu iako aganaha.
Jringjrotni Janggin Kattarang
Iako knae, uni sninggiparangoni bang-en aganaha, "Ia skiania rakdugaa. Iako
sawa knachakna man-gen?" "Uamang aganjaoba, Jisu an-tangni sninggiparang iani
gimin miteng-miteng aganenga ine uie, inaha, "Ian na-simanko ja-gitotama?
Mandeni Depante jeo dongachim, uona uni gadoangako na-simang nikosai?
Janggiko on-gipa Gisik ong-a, be-ende gamchatja. Angni na-simangna agangipa
kattarangan Gisik aro janggi ong-a; indiba na-simangoni mitam bebera-ja."
(Jisu a-bachengantal bebera-gijagiparangko aro an-tangko bobilni jako
on-gnigipako uiachim.) Ua aganaha, "Iani giminan anga na-simangna aganaha,
chong-motan Pagipa salbajaskal darangba angona re-bana amja."
Pitor Jisuko Kuchaka
Iani giminan uko ja-rikgiparangoni bang-en uko watangaha aro un baksa
re-angpajaha. Uni gimin Jisu sakchigni sninggiparangna aganaha, "Na-simangba
angko wate re-anggenma?" Simon Pitor una aganaha, "Gitel chingara saona
re-anggen? Jringjrotni janggini Kattarang nang-on gnang. Na-an Isolni
Rongtalgipa ong-a ine chinga uia, aro bebera-a" Jisu uamangna aganchakaha,
"Anga na-simang sakchigniko sejachimma? Indiba na-simangoni saksade diabol
ong-a!" Ua Simon Iskariotni depante, Judasni gimin aganengachim; maina
sakchigni sninggiparangoni uko bobilni jako on-gipa Judas ong-achim.
Jisu Aro Uni Joggiparang
/7 Iani ja-mano Jisu Galili jol gita songreangengachim. Jihudirang uko so-otna
am-engani gimin ua Judeao songrena sikjachim. Jihudirangni Jamdap-pine maniani
sal sepangahani gimin Jisuni jonggiparang una aganaha. "Nang-ko
ja-rikgiparang nang-ni kamrangko nikna man-na gita, na-a ia biapko wate
Judeaona re-angbo. An-tangko mingsingatna sikode pilakba mamingkoba donnue
dakja. Na-a iarangko dakengani gimin a-gilsak gimikan nang-ni gimin uichina!
(Uni jonggiparangba uko bebera-jaengachim.) Jisu uamangna aganaha,
"Na-simangnade je salba nama; indiba angna sal sokkujaenga. A-gilsak na-sim-
angko mitchina man-ja; indiba angkode mitchia; maina uni re-anirang namja ine
ang a aganen dongenga. Na-simang ua manianiona re-angbo, angade re-angjawa;
maina angnisal sokkuja." Iako aganenba ua Galilion dongrikaha.
Jamdap Pine Manianio Jisu Dongpa-a
An-tangni jonggiparang manianiona re-angmanoa, uaba an-tangko nikatgija
re-angpa-aha. Jihudirang manianio uko am-e sing-aha, "Uara bao?" Ja-mano uni
gimin bang-an agantokengachim. "Uan namgipa mande ong-a," gipinrang
aganengachim, "Ong-ja, ua jinmako dilsretenga." Je ong-oba Jihudirangna kenani
gimin darangba uni gimin parakede aganjaha.
Unon maniani bimitingo Jisu Torom nokona gadoange skina a-bachengaha.
Jihudirang aiao inmane aganaha, "Ia mande poraigija, maikai indita skia
man-a?" Jisu uamangna aganchakaha, "Angni skiara angoni ong-ja; indiba angko
watatgipaonisa. Saoba uni sikako dakna namnikode, ia skiani Isolnima ba angoni
ong-a, uko ua uigen.
Je mandean biltangchi agana, ua an-tangna rasongko am-a; indiba jean an-tangko
watatgipani rasongko am-a, uan kakket ong-a aro uo tol-napa gri. Mose
na-simangna Niamko on-jachimma? Indioba na-simangoni saksaba Niamko mani-
rongja. Na-simang maina angko so-otna am-enga?" Jinma aganchakaha, "Nango kore
donga, nang-ko sawa so-otna am-enga?" Jisu uamangna aganchakaha, "Nengtakani
salo anga kam mingsako dakaha, aro ua na-simang pilakkon dil-dil ong-ataha.
Mose na-simangna bigil rasotani bewaiko on-aha. Uan Moseoni ong-ja; indiba
pagitchamrangonisa. Uko na-simang Neng-takani salrangoba dakronga. Moseni
Niamko pe-jana gita mande Neng-takani salo bigil ra-sotako man-ode, indide
anga Neng-takani salo saksa Mandeni saako an-sengatani gimin na-simang maina
angko ka-onanga? Mandeko nikari bichal ka-nabe; indiba na-simangni bichalrango
kakket ong-bo."
Uan Kristo Ong-ama?
Jerusalemoni mitam manderang aganaha, "Ian uamangni so-otna am-enggipa
ong-jama? Indioba niboching, ua paraken aganenga, uamang mamingkoba aganna
amjaha. Uan Kristo ong-a ine sason ka-giparangba uichong-motahama? Ia mande
baoni ong-a, an-ching uia. indiba Kristo re-baon, ua baoni ong-a pilakba
uijawa." Jisu Torom noko skimitingo uamangna inwate aganaha, "Na-simang angko
uia; aro anga baoni na-simang uia; indiba anga an-tangni bilo ra-bajaha. Ang-
ko watatgipa bebe ong-a aro na-simang uko uija. Anga uko uia maina anga uonin
ong-a, aro uan angko watataha." Uamang uko rim-na tekkelbeaha; indiba darangba
uni kosako jak sniljaha; maina uni sal sokkujachim. Unon jinmaoni bang-en Uo
bebera-e aganaha. "Kristo re-baoa, ia mandeni dakgiminrangna bate chinrangko
dakgenma?"
Jisuko Rim-na Nitimgiparangko Watata
Jisuni gimin jinmani bang-en agananirangko Pharisirang knaaha, arc kamal
dal-giparang aro Pharisirang uko rim-na nitimgiparangko watataha. Jisu
uamangna aganaha, "Anga na-simang baksa dikdiksana dongkugen aro uni jamano
anga angko watatgipaona re-anggen. Na-simang angko am-gen, indiba angko
man-jawa; maina jeo anga donga na-simang uanona re-bana amja." Jihudirang
an-tangtangni gisepo agangrikaha "Ua baona re-angnasia, an-chinga maikai uko
am-e man-jawa? Gipin ma-kringrangni gisepo ma-eke donggipa Jihudirangona
re-angnasiama, aro ua gipin ma-kringni manderangna skinasiama? 'Na-simang
angko am-gen, indiba angko man-jawa, aro jeo anga donga uanona na-simang
re-bana amja' ine ua maina agana?"
Tanggipa Chini Chiring
Maniani bon-kamgipa aro mongsongbatgipa salo Jisu chadenge inwate aganaha,
"Saoba ringna sikode, angona re-bae ringechina. Sastroo agana gita, 'Jean ango
bebera-a, tanggipa chini chibima uni ka-tongo jokgen'" (Ua an-tango
bebera-giparangni man-nasigipa Gisikni gimin iako aganengachim; maina uno-
mitingo gisikko uamangna on-kujachim aro Jisu an-tangan rasongo de-doako
man-kujaengachim.)
Manderangni Gisepo ma-maleka
Jinmanoni mitam iarangko knae, uamang aganaha, "Beben, ian ua katchinikgipa
ong-a." Gipinrang aganskaaha, "Ian Kristo ong-a;" indiba mitam agantaiaha,
"Kristo Gi-lilioni re-bagenma? Kristo Daudni bitchrioni aro Daudni donggipa
gittim Bethlehemoni re-baa," ine Sastroo aganjama?" Uandaken ji- nmani gisepo
uani gimin dingtang dingtang dake agantokaha. Uamangoni mitam uko rim-na
sikaha, indiba pilakba uni kosako jak on-jaha.
Dilgiparangni Bebera-gijani
Nitimgiparang, kamal dal-giparang aro Pharisirangona re-bapiloa, uamang
nitimgiparango sing-aha, "Na-simang maina uko rim-bajaha?" Nitimgiparang
aganchakaha, "Ia mandeni agana gita pilakba agankuja." Pharisirang uamangna
agantaiaha, "Na-simangkoba brangatahama? Sason ka-giparangoni aro
Pharisirangoni saoba uo bebera-ahama? Indiba ia Niamko uigijagipa jinma, sao
man-giparang ong-a." Skango Jisuona re-bagipa, uamangoni saksa, Nikodemus
uamangna, aganaha, "Mandeko knachenggija aro uni dakako uigija, an-chingni ni-
am jekoba bichal ka-na man-ama?" Uamang una aganchakaha, "Na-aba Galilionima?
Sastrooniko am-e nibo, Galilioni katchinikgipa ong-katja." Unon uamang
sakantian noktangtangchi re-angtokaha.
Til-ekao Rim-a Man-gipa Me-chik
/8 Unon Jisu Joitun a-briona doangaha, Pringwalni ua Torom nokona re-bataiaha.
Pilak manderang unona re-baoa, ua asonge uamangna skina a-bachengaha. Sastro
skigiparang aro Pharisirang til-ekao rim-a man-gipa saksa me-chikko uona
rimbaaha. Uamang uko Jisu aro an-tangtangni gisepo chadengate una aganaha,
"Skigipa, ia me-chikko til-ekmitingchachaon rim-aha. Moseni Niamo dongimin
gita, indakgipa me-chikko ro-ong gotatani ong-a, na-a maiko agana?" Uni kosako
matnanganiko ra-bana man-na gita, uamang uko majoe iako sing-engachim. Indiba
Jisu bamgope a-ao an-tangni jaksichi seaha. Uamang uo sing-haoa, ua
chadengsronge uamangna aganaha. "Na-simangoni pap grigipa, uan uko ro-ong
gotatchengchina." Pil-e ua bamgope, a-ao setaiaha. Uamang iako knaoa,
bribatgipaoni a-bachenge saksani ja-mano saksa re-ongkatangtokaha, aro Jisusan
ua me-chik baksa ua biapo donggrikaiaha. Unon Jisu chadenge una aganaha,
"Mechik, uamanga baosa? Nang-ko pilakba matnang- jahama?" Ua aganaha, "Pilakba
gri, skigipa." Jisu aganaha, "Angaba nang-ko matnangja. Re-angbo, da-ontal pap
ka-tainabeaha."
Jisu A-gilsakni Seng-a
Pil-e Jisu uamangna aganaha, "Angan a-gilsakni seng-a. Angko ja-rikgipa
mamingdakeba andalao re-rurajawa; indiba janggini seng-ako man-gen."
Pharisirang una aganaha, "Na-a an-tangni gimin sakki on-enga, nang-ni sakki
bebe ong-ja." Jisu uamangna aganchakaha, "Anga an-tangni gimin sakki
on-genchimoba, angni sakki bebe ong-a; maina anga baoni re-baa aro bachina
re-anga, anga uia. Indiba anga baoni re-baa aro bachina re-anga uko na-simang
uija. Na-simang mandeni gita bichal ka-a; anga pilakkoba bichal ka-ja. Anga
bichal ka-omangba angni bichal kakket ong-a; maina anga saksan ong-ja; angko
watatgipa Pagipa ang baksa donga. Na-simangni Niamo sea gita mande sakgnini
sakki bebe ong-a. Anga an-tangni gimin sakki on-a, aro angko watatgipa
Pagipaba angni gimin sakki on-a." Uamang una aganaha, "Nang-ni Pagipara bao?"
Jisu aganchakaha, "Na-simang angkoba aro angni Pagipakoba uija. Na-simang
angko uiode, angni Pagipakoba uigenchim." Ua ia kattarangko Torom nokni tangka
donramo skimitingo aganaha. Unon pilakba uko rim-jaha, maina uni sal
sokkujachim.
Bebera gijagiparangko Mikrakata
Pil-e ua uamangna aganaha, "Anga re-angenga aro na-simang angko am-gen, indiba
na-simang paptangtangon sigen. Anga jeona re-angenga na-simang uanona re-bana
amjawa." Jihudirang aganaha, "Ua an-tangkon so-otnakakon; maina, 'Anga jeona
re-angenga uanona na-simang re-bana amjawa,' ine ua aganaha?" Ua uamangna
aganaha, "Na-simang ka-maoni ong-a, angara kosakoni ong-a, na-simang
a-gilsakoni ong-a angade ia a-gilsakoni ong-ja. Iani giminan anga na-si-
mangko paptangtangon sigen ine aganaha. 'Angan ua ong-a,' ine na-simang
bebera-jaode, paptangtangon sigen." Uni gimin uamang una aganaha, "Na-ara
sawa?" Jisu uamangna aganaha, "A-bachengatal anga na-simangna aganjachimma?
Na-simangni gimin aganna aro bichal ka-na ango bang-en gnang; indiba angko
watatgipa an-tangan bebe ong-a, aro anga jeko. Uoniko knaaha, uko a-gilsakna
agana."
Ua Pagipani gimin uamangna aganengachim ine uamang ma-sijaha. Jisu aganaha,
"Na-simang Mandeni Depanteko de-doahaon, 'Angan ua ong-a,' ine ma-sigen. Anga
an-tangni bilo mamingkoba dakja; indiba Apani angna skiaha gitasa anga
iarangko aganaia. Angko watatgipa angbaksa gnang, ua angko saksan watkuja;
maina uni namikakosan anga pangnan daka." Ua iarangko aganengon bang-en Uo
bebera-aha.
Nokkol Aro Jakgitelgiparang
Jisu an-tango bebera-gipa Jihudirangna aganaha, "Na-simang angni kattao
dongkamode, na-simang angni chong-motgipa sninggiparang ong-a; aro na-simang
bebeko uigen aro bebean na-simangko jakgitel ong-atgen." Uamang una
aganchakaha. "Chinga Abrahamni deritchurang ong-a aro chinga pangna- ba,
pilakniba nokkol ong-kuja. Na-a maikai agana, 'Na-simang jakgitel ong-gen.'"
Jisu uamangna aganaha, "Beben anga na-simangna agana, pap dakgipa sakanti
papni nokkol ong-a. Nokkol pangnan noko dongja, indiba degipasa dongkama.
Indide Degipa na-simangko jakgitelatode, na-simang jakgitel ong-chongmotgen.
Na-simang Abrahamni deritchurang ong-a ine anga uia; indiba na-simang angko
so-etna am-enga; maina angni kattako na-simang knachakja. Angni Pagipao anga
jeko nikaha, ukon agana; indiba na-simangde pagitchamrangoniko jeko knaa ukosa
daka."
Uamang una aganchakaha, "Abraham chingni pagipa ong-a." Jisu uamangna aganaha,
"Na-simang Abrahamni dedrang ong-genchimode, uni kamrangko dakgenehim. Anga
Isoloniko knae bebeko agana, aro ianan na-simang angko so-otna am-enga.
Abrahamde indake dakjachim. Na-simangni pagipani kamrangkon na-simang daka."
Uamang una aganaha, "Chinga deburing ong-ja, chingni Pagipa Isol saksan
ong-a." Jisu uamangna aganaha, "Isol na-simangni Pagipa ong-genchimode,
na-simang angna ka-sagenchim, maina anga Isoloni re-baaha aro anga da-o ianon
dongenga. Anga angni sika gita re-bajaha, indiba Uan angko watataha. Maikaisa
na-simanga angni aganako ma-sija? Na-simang angni kattako knachakja.
Na-simang, na-simangni pagipa diaboloni ong-a, aro na-simangni pagipani
skarangkosa na-simang dakna namnika. Ua a-bachengaonin mande so-otgipa ong-a.
Ua bebegipa ong-ja; maina uo bebe gri. Ua kakketgijako aganon bewaltang gitan
agana; maina uan tol-gipa ong-a aro kakketgijani pagipa ong-a. Indiba angade
bebekon agana aro uni giminan na-simang angko bebera-ja. Ango pap donga ine
na-simangoni sawa mesokna ama? Anga bebeko aganode na-simang maina ango
bebera-ja? Saoba Isoloni ong-ode, ua Isolni kattarangko knachaka. Na-simang
Isoloni ong-jani giminsa angko knachakja."
Jisu Aro Abraham
Jihhudirang una aganchakaha, "Na-a Samariani mande aro kore chagipa ong-a ine
chingni aganara kakket ong-jama?" Jisu aganchakaha, "Anga kore chaja, indiba
angni Pagipako anga mandera-a, aro na-simang angko mandera-ja. Anga an-tang
rasongko am-ja uko am-gipa aro bichal ka-gipa saksa gnang. Beben anga
na-simangna agana, saoba angni kattako rakkiode, ua mamingdakeba sijawa."
Jihudirang una aganaha, "Na-a kore chaa ine chinhga uia; maina Abraham siaha
aro katchinikgiparangba siaha; indiba na-a aganenga, 'Soba angni kattako
rakkiode, ua mamingdakeba sijawa,' An-chingni pagipa Abraham siaha, na-a una
dal-batama? Katchinikgiparangba siaha, na-ara an-tangko sawa ine chanchia?
Jisu aganchakaha, "Anga an-tangko rasong chaatode, angni rasong mamingba
ong-ja. Angni Pagipasa angko rasong chaata, jeni gimin na-simang agana, 'Uan
an chingni Isol ong-a.' Indioba na-simang uko uija, indiba anga uko uia. Anga
uko uija ine aganode angaba na-simang gita tol-gipa ong-genchim; indiba anga
uko uia aro uni kattako rakkia. Na-simangni pagipa Abraham angni saiko nikna
ka-srokachim; aro ua uko nike katchaaha." Jihudirang una aganaha, "Na-a bilsi
sotbongaan ong-kuja, na-a Abrahamko nikahama?" Jisu uamangna aganaha, "Beben
anga na-simangna agana Abrahamni atchina skangan 'Anga' donga" Unon uamang uko
gotatna, ro-ongrangko koltokaha; indiba Jisu an-tangko dongnue Torom nokoni
re-ongkatangaha.
Jisu Mikgri Atchigipako Nikata
/9 Jisu re-angon, atchiaonin mikgrigipa saksa mandeko nikaha. Uni
sninggiparang uo sing-aha, "Skigipa, ua mikgri ong-e atchina sawa pap ka-aha;
ia mandeanma, ba uni ma-apama?" Jisu aganchakaha, "Ua mandeni ba ma-apani
paprangni gimin ong-ja; indiba Isolni bilakgipa kamko uo parape-na gitasa, ua
mikgri ong-e atchiaha. Sal dongengon angko watatgipani kamranko anga ka-na
nanga. Wal re-baenga jeo pilakba kara ka-na amja. A-gilsako dongmitingo angan
a-gilsakni seng-a ong-a." Ua iako aganmanon, a-ao stuenba, ua stuchi a-dubek
dakaha, aro ua mandeni mikgronrango a-dubekko nonge, Una aganaha, "Siloam
(Watata) minggipa chibolona-re-ange miksuebo." Ua re-ange miksueaha, aro ua
nikna man-e re-bapilaha.
Noksulrang aro skango uko bi-amgipa ong-achim ine nikgiparang aganaha, "Ian
asonge bi-amronggipa mande ong-jama?" Mitam aganaha, "Ian ua," gipinrang
aganaha, "Ong-ja, ian ugita dakgipa ong-a." Ua mande an-tangan aganaha, "An-
gan Ua." Uamang una aganaha, "Indide nang-ni mikgronrangko maikaisa oaha?"
Ua aganchakaha, "Jisu minggipa mande, a-dubek dake angni mikgronrango nonge,
angna aganaha, 'Siloamona re-ange miksuebo,' Uni gimin anga re-ange miksueaha,
aro nikna man-aha." Uamang una aganaha, "Uara bao?" ua aganchakaha, "Anga
uija."
Pharisirang Aa-seagatani Gimin Sing-roka
Uamang ua skango mikgrigipa mandeko Pharisirangona rimangaha; maina
Neng-takani salon Jisu a-dubekko dake ua mandeni mikgronrangko oahachim.
Pharisirangba ua maikai nikna man-aha ine changsa uo sing-taiaha. Ua ua-
mangna aganaha, "Ua a-dubekko angni mikgronrango nongaha aro anga miksuoa
nikna man-aha." Pharisirangoni mitam aganaha, "Ia mande Isoloni ong-ja maina
ua Neng-takani saiko manija." Sakgipinrang aganaha, "Papi mande ong-ode,
maikai indakgipa chinrangko dakna man-a?" Indaken uamangni gisepo dingtang-
grikani ong-aha. Uamang mikgrigipa mandena agantaiaha, "Nang-ni aganbagimin
gita ua nang-ni mikgronrangko oaha, na-a uni gimin maiko agana." Ua aganaha,
"Uan katchinikgipa ong-a."
Indiba ua mande mikgrichim aro nikpilna man-aha ine ua mandeni ma-apako okame,
uamango sing-jaskal Jihudirang ia agananiko bebera-jaha, aro uamango sing-aha,
"Ian na-simangni depantema jeko na-simang mikgri atchiachim ina? Indiba ua
da-o maikai nikaha?" Uni ma-apa aganchakaha, "Ian chingni de- pante ong-a aro
ua mikgri ong-e atchiachim ine chinga uia; indiba da-o ua maikai nikaha, ba
sawa uni mikgronrangko oaha chinga uija. Uo sing-bo, uan dal-gimin mande
ong-a; ua an-tangni gimin aganna man-gen." Jihudirangna kenani gimin uni
ma-apa uamangna indake aganachim; maina uko saoba Kristo ong-a ine aganode,
uko a-pal gale chelatna nanggen ine uamang tik ka-somanaehim. Iani giminan uni
ma-apa aganaha, "Ua dal-gimin mande ong-aha, uo sing-bo."
Uandaken gnigipa changna uamang je mandean mikgrichim, uko okame, una aganaha,
"Isolko rasong chaatbo. Ia mande papi ong-a ine chinga uia." Ua aganchakaha,
"Ua papi ong-ama ong-ja anga uija, mingsako anga uia; anga mikgrichim aro da-o
anga nika." Uamang una aganaha, "Ua nang-na maiko daka- ha, ua nang-ni
mikgronrangko maikai oaha?" Ua uamangna aganchakaha, "Anga na-simangna
aganman-aha, aro na-simang knachakja. Na-simang maina knataina sika?
Na-simangba uni sninggiparang ong-pana sikama?" Unon uamang manenge aganaha,
"Na-an uni sninggipa ong-a, chingade Moseni sninggiparangsa. Mosena Isol
aganaha ine chinga uia; indiba ia mandca baoni ong-skaa chinga uija." Ua mande
aganchakaha, "Ia mande baoni ong-a uko na-mangni uigijanian aiao inmanani
ong-a; indioba ua angni mikgronrangko oaha! An-ching uia Isol papirangko
knachakja, indiba saoba uko mandera-e uni namnikako dakode, Isol uko knachaka.
Mikgri ong-e atchigipa mandeni mikgronrangko saoba oaha ine an-chinga
mamingsoloba knakujachim. Ia mande Isoloni ong-jagenchimode, ua mamingdakeba
iako dakna man-jawachim." Uamang una aganchakaha, "Na-a chugimikan paponi
ong-baa, aro na-a chingna skipilama?" Unikoa uamang uko a-pal galataha.
Uamang uko a-pal galataha ine knaoa, Jisu uko gronge aganaha, "Na-a Mandeni
Depanteo bebera-ama?" Ua aganchakaha, "Skigipa, uara sawa, anga maikai uo
bebera-na man-gen." Jisu una aganaha, "Na-a uko nikaha, aro ua nang baksa
agangrikgipaan ong-a." Ua aganaha, "Gitel, anga bebera-a," aro ua uni mikkango
tuchikkope uko olakiaha. Jisu aganaha, "Bichal ka-na anga ia a-gilsakona
re-baaha; jedakode mikgrirang nikna man-gen aro nikgiparang mikgri ong-gen."
Un baksa donggipa Pharisirang iako knae aganaha, "Chingara mikgrirangma?" Jisu
uamangna aganaha, "Na-simang mikgri ong-genchimode, na-simang pap gri
ong-genchim. 'Chinga nika,' ine aganengani giminan na-simango pap dong- kua."
Mes Jakni Gimin Toe Skia
/10 "Beben anga na-simangna agana, Cholguga gita napgija dingtangchiko gakate,
mes nolo napgipa cha-ugipa aro dokprete ra-gipa ong-a. Mesrangko nirikgipa
cholguga gita napa. Do-ga dongtimgipa una do-gako osoa aro mesrangba uni
ku-rangko knachaka. Ua an-tangni mesrangko biming minge okaina aro uarangko
dilongkatanga. Ua an-tangni mesrangko moongkatmanoa uarangna skang re-a,
mesrangba uni ku-rangko uiani gimin uko ja-rika. Uarang agittal manderangko
ja-rikja; indiba uoni katpila, maina uarang agittalrangni ku-rangko uija."
Jisu uamangna ia toe skianiko aganaha; indiba ua uamangna maiko aganengachim,
uamang masijaha.
Jisuan Nama Nirikgipa
Jisu agantaiaha, "Beben anga na-simangna agana, angan mesrangni cholguga
ong-a. Pilak angna skang re-bagiparang cha-ugiparang aro dokprete ra-giparang
ong-a, aro mesrang uamangko knachakjachim. Angan cholguga aro ang gita saoba
napbaode, uan jokatako man-gen aro naprurae cha-aniko man-gen. Cha-ugipa
cha-una, so-otna aro gimaatna re-baa. Anga re-baaha, maikai ua- mang janggiko
man-gen, aro uko suakpile man-gen. Angan nama nirikgipa ong-a. Nama nirikgipa
mesrangna janggitangko on-chaka. Tangkanasan kam ka-aigipa mande nirikgipa
ong-ja, ba mesrangni nokgipa ong-ja. Se-el re-baako nikode, ua mesrangko
watgale kata. Unon se-el uarangiro balanga aro bilding- bildingata. Ua
tangkanasan kam ka-gipa ong-ani gimin mesrangna simsakja. Angan nama nirikgipa
ong-a. Anga angni mesrangko uia aro angni mesrangba angko uia. Pagipa angko
uia gita, angaba Pagipako uia, aro mesrangna anga angni janggiko on-chaka. Ia
noloni ong-gijagipa angni gipin mesrangba gnangpitti, uarangkoba anga mobana
nanga, uarangba angko knachakgen, jedakode nirikgipa saksan aro jaksan
ong-gen. Pagipa angna ka-saa; maina anga angni janggiko on-chaka, jedakode
anga uko man-pilna amgen. Pilakba uko angoniko ra-angja; indiba anga an-tangan
namnike uko on-chaka. Iako anga an-tangan on-na aro ra-pilna bil gnang. Iakon
dakchina angni Pagipa angna aganaha."
Ia katiarangni gimin pil-e Jihudirangni gisepo dingtanggrikani ong-kattaiaha.
Uamangoni bang-en aganaha, "Ua kore chagipa aro pagia ong-a. Na-simang maina
uko knatimenga? Sakgipinrang aganaha, "Iarang Kore chagipani kattarang ong-ja.
Kore chagipa mande mikgri manderangni mikgronrangko ona amama?"
Jihudirang Jisuko Jechaka
On-kanganiko maniani Jerusalemo ong-aha, aro unomiting sin-kari ong-engachim.
Jisu Torom nokni, Solomonni Grimrao re-ruraengachim. Unon Jihudirang uko
changdule una aganaha, "Na-a maina indita chingko jajrengate dona, na-an
Kristo ong-chongmotode, chingna paraken agansrangboaha." Jisu uamangna
aganchakaha, "Anga aganaha, indiba na-simang bebera-ja. Angni Pagipani
bimingo daka kamrangan angni gimin sakki on-enga. Indiba na-simang angni
mesrang ong-jani gimin ango bebera-ja. Angni mesrang angni ku-rangko knachaka,
anga uarangko uia, aro uarang angko ja-rika, Anga uamangna jrin- gjrotni
janggiko on-a. Uarang mamingdakeba gimajawa aro pilakba uarangko ang jakoniko
ra-sekjawa. Angna iarangko on-gipa, angni Pagipa pilakna bate dal-bata, aro
Pagipani jakoniko pilakba imamingkoba ra-seka-angna amja. Apamung anga saksan
ong-a."
Unon Jihudirang uko ro-ong gotatna ro-ongrangko koltokaha. Jisu uamangna
aganchakaha, "Anga na-simangna Pagipaoniko bang-a nama kamrangko mesokaha,
uarangoni badia kamna na-simang angko ro-ong gotatnasia?" Jihudirang una
aganchakaha, "Nama kamni giminde chinga nang-ko ro-ong gotatjaenga, indiba
kal-stapani giminsa; maina na-a mande ong-eba an-tangko Isol daka," Jisu
uamangna aganchakaha, "Na-simangni Niamo indake sea dongjama? 'Auga agana,
Na-simangan isolrang ong-a'? Jemangona Isolni katta re-baaha uamangko isol-
rang inaha, aro ua Sastroko dingtangatna manja Jeko Isol rongtalate
a-gilsakona watataha, uko, 'Angan Isolni Depante,' inani gimin, "Na-a
kalstapa" inama? Anga Pagipani kamrangko dakjaengode na-simang angko
bebera-nabe; indiba anga uarangko dakenga. Na-simang angko bebera-jaoba,
kamrangkode bebera-pabo; jedakode Pagipa ango gnang aro anga Pagipao gnang ine
na-simang ma-sina aro uina man-gen." Uni gimin uamang uko rim-ha jotton
ka-taiaha, indiba uamangni jakrangonin ua uijapile jokangaha.
Jordan nalsachi, jeo skango Johan baptize ka-atgipa baptize ka-atengachim,
uanonan Jisu re-angtaiaha, aro ua uano dongaha. Unon bang-en uona re-bae
aganaha. "Johan maming aiao inmananiragko dakjachim; indiba ia mandeni gimin
pilak Johanni agana kattarang kakket ong-a" Indake uano bangen uo bebera-aha.
Lazarusni Sia
/11 Mariam aro uni abitang Marthani song, Bethanyo Lazarus minggipa mande
saengachim. Uan, Gitelni ja-ao similgipa toko nonge knitangchi usitgipa
Mariamni jonggipa ong-achim. Uni gimin abitangrang Jisuona watate aganataha,
"Gitel, nang-ni ripeng saenga." Iako knae Jisu aganaha, "Ia sa-ania siana
ong-ja; indiba Isolni rasongnasa ong-a; jedakode Isolni Depanteko uachi rasong
chaatna man-gen." Martha, Mariam aro Lazarusna Jisu ka-saachim. Ua saengachim
ine knaoba ua an-tangni dongenggipa biapon sal- gnina dongangkuaha. Uni
ja-manosa ua an-tangni sninggiparangna aganaha, "Hai an-ching Judeachi
re-taina." Sninggiparang una aganaha, "Gitel, mejasamangmang Jihudirang
nang-ko ro-ong gotatna am-engachim; na-a uchian re-angtaiengama?" Jisu
aganchakaha, "Salsao konta chigni dongjama? Salo re-ode mande jagitotja, maina
ua ia a-gilsakni seng-ako nika; indiba ua walo re-ode, ua jagitota; maina uo
seng-a gri." Iako aganenba ua aganangkuaha, "An-chingni ripeng Lazarus
tusiaha; indiba uko demensana anga re-enga." Sninggiparang una aganaha,
"Gitel, ua tusiaiode, namgen." Jisu uni siani gimmsa aganengachim; indiba
uamang tusibewaini giminsa aganenga ine chanchiskaengachim. Unon Jisu uamanga
rongtalen aganaha, "Lazarus siaha. Anga uano dongjahana na-simangni gimin
katchaa; maina na-simang bebera-na man-gen. Hai an-ching uanona re'na." Unon
Jonja minggipa Thomas sninggipaskarangna aganaha, "Hai an-chingba un baksa
re-e sipana".
Jisoan Chakatpilam aro Janggi
Jisu re-baon, Lazarus gopramo sal bri ong-pilaha ine nkeaha. "Bethany
Jerusalemoni sepangchim, mail gnimangsanchim. Martha aro Mariamko uamangni
jonggipani gimin kadimeatna bang-a Jihudirang re-baaha. Jisu re-baenga ine
knaon Martha uko grongna re-angaha; indiba Mariam nokon dongrikaha. Unon
Martha Jisuna aganaha, "Gitel, na-a iano donggenchimode, angni jonggipa si-
jawachim. Da-omangba, na-a jeko Isoloniko bi-a, ua nang-na on-gen ine anga
uia." Jisu una aganaha, "Nang-ni jonggipa chakatpilgen." Martha una aganaha,
"Bon-kaman salo chakatpilon, ua chakatpilgen ine anga uia. Jisu una aganaha,
"Angan chakatpilani aro Janggi. Ango bebera-gipa siomangba tanggen. Ango
donggipa aro bebera-gipa sakanti mamingsaloba sijawa. Na-a iako bebera-ama?"
Ua una aganaha. "Oe, Gitel, a-gilsakona re-bagipa, Isolni Depante, na-an
Kristo ong-a ine anga bebera-a."
Jisu Grapa
Ua iako aganenba, re-ange an-tangni nogipa Mariamko okameaha, aro ua una
srisrik aganaha, "Gitel re-baaha aro ua nang-ko okamenga." Mariam iako knaon
bakan chakate uona re-baaha. Da-o Jisu songona sokbasrangkujaengachim; indiba
Marthani uko grongegipa biaponpittichim. Unon Mariam baksa noko donge, uko
ka-dimeatenggipa Jihudirangba, uni bakan chakate re-ongkatangako nike, uko
ja-rikangaha; maina ua gopramona re-ange grapnakenga ine uamang chanchiaha.
Jisuni donggipa biapona re-bae nikeon; ua uni ja-ao ga-ake aganaha, "Gitel,
na-a iano donggenchimode, angni jonggipa sijawachim." Jisu, uni aro un baksa
jarikbaenggipa Jihudirangni grapako nikaha. Unon uaba duk man-e, rangspite
aganaha. "Na-simang uko bano gopaha?" Uamang una aganaha, "Gitel re-bae
niebo." Jisu grapaha. Unon Jihudirang aganaha, "Nibo, ua una mairongpile
ka-saachim." Indiba uamangoni mitam aganaha, "Mikgri mandeni mikgronrangko
ogipa mandea, ia mandeni siako champengna man-jawachimma?"
Lazarasko Tangchaata
Jisu dukko mesoktaie gopramona re-baaha; uan rong-kolsachim aro uko ro-ong
mittutekachim. Jisu aganaha, "Ro-ongko jitatbo." Ua sigipa mandeni abitang
Martha una aganaha, "Gitel, da-onade sengginok, un siaan sal bri ong-pilaha."
Jisu una aganaha, "Anga nang-na aganjachimma, na-a bebera-ore, Isolni ra-
songko nikgen?" Uni gimin uamang ro-ongko jitataha, rao Jisu salgichiko
nigitoe aganaha, "Apa, na-a angko knachakahani gimin anga nang-ko mittela.
Anga an-tangan uia na-a angko pangnan knachaka; indiba chadengdulenggipa
manderangni giminsa anga iako agana; jedakode na-an angko watataha ine uamang
uina man-gen." Iako aganenba ua gam-bee inwate inaha, "Lazarus ong-katbabo."
Unon, ua sigipa mande, ja-a-jak ba-ra kaa gnang aro mikkango ba-ra remrema
gnang ong-katbaaba. Jisu uamangna aganaha, "Uko engbo aro re-china on-bo."
Jisuko So-otaa Melaprua
Uni gimin Mariamona re-bagipa bang-a Jihudirangan uni dakako nike uo
bebera-aha. Indiba uamangoni mitam Pharisirangona re-ange Jisuni dakako
uamangna aganaha. Unon kamal dal-giparang aro Pharisirang (Sandedrin)
malaaniko tom-ate aganaha, "Ia mande bangen chinrangko dakenga, an-chinga
maiko dakenga? An-chinga uko indaken dakna on-angaiode, pilakan uo
bebera-gen; aro ja-mano Romeni manderang re-bae an-chingni a-songko aro
ma-kringkoba nisiatgen." Uamangoni saksa, ua bilsio Kamal Dal-batgipa
ong-gipa, Kaiaphas uamangna aganaha, "Na-simang mamingkon uija, mandera- ngna
aro an-chingni ma-kring gimik gimajana gita, na-simangna saksa mandeni sian
nambata." Iako ua an-tangoniko aganjachim; indiba ua bilsio, Kamal Dal-batgipa
ong-e, ma-kringna Jisu sina nanga ine katchinike aganaha.
Ma-kringmangmangnasan ong-aigija, bildingbildang dongenggipa Isolni
dedrangkoba toksan chimongna nanggenchim. Uni gimin ua saloni Jihudirang
Jisuko so-otna tik ka-srangaha. Uni gimin Jisu, Jihudirangni gisepo
mikangparake re-rurajaha; indiba uanoni bakrani sepang jolni Ehpraim minggipa
songjinmaona re-angaha, aro uano ua sninggiparang baksa dongaha.
Unon Jihudirangni Watchangni Alani sepangaha, aro songrangoni Jerusalemona
bang-en an-tangtangko rongtalatna doangaha. Uamang Jisuko am-e an-tangtangni
gisepo aganengachim. "Na-simang maikai chanchia? Ua alaona re-bajawama, ba
re-bagenma?" Saoba, ua bano donga uiode, uko rim-na man-na gita, uiatna
nangchongmota ine kamal dal-giparang aro Pharisirang ge-etaniko donaha.
Jisuko Bethanyo To Nooga
/12 Watchangni Alanina saldok skang Jisu Bethanyona re-baaha. Lazarus uano
gnangchim, jeko ua sigiminrangoniko chakatataha. Uamang una cha-aniko uano
sachisoaha, aro Martha dangdike on-aha, Lazarus unbaksa cha-na asongpaeng-
giparangoni saksa ong-achim. Unon Mariam poagnimangni similbegipa uro dam
rakbegipa toko Jisuni ja-arango nonge, an-tangni knichin uni ja-arangko
usitaha. Ua nok gimikon to similgopaha. Judas Iskariot, uni sninggiparangoni
saksa, jean uko bobilni jako on-nasiachim, aganaha, Ia similgipa toko mainasa
ritchaskumang tangkana palenba kangalrangna on-jajok?" Ua iako kangal- rangna
chanchie aganade ong-jachim; indiba ua cha-ugipa ong-achim. Ua rongdikra
ong-e, rongdikoniko cha-urongachim. Jisu aganaha, "Uni sika gita dakchina
on-bo; angko gopani salona ua similgipa toko donchina on-bo. Na-simang baksa
kangalrang pangnan donga, indiba anga dongkamjawa."
Lazarusni Kosako Melaprua
Jisu Bethanyo donga ine uioa, Jihudirangoni bang-bea jinma re-baaha. Jisuni
giminsan uamang re-bajachim; indiba sigiminrangoniko tangchaatgipa Lazaruskoba
nina re-baaha. Kamal dal-giparang Lazaruskoba so-otna tik ka-soman-ahachim;
maina uni a-selan bang-a Jihudirangan uamangko wate Jisuko bebera-engachim.
Jerusalemo Rasong Chae Napa
Sal gipino Alaona re-bagipa bang-bea jinma, Jisu Jerusalemchina re-baenga ine
knasoaha. Unon uamang Kejur cheksirangko ra-e uko rimchaksona
re-ongkatangtokaha. Uamang inchrotokengachim. Hojana ! Pattia man-gipa,
Gitelni bimingo re-bagipa! Pattia man-gipa, Israeini Raja!" Jisu gada
mangsako man-e, uni kosako gakataha; jedake Sastroo sesoahachim; "Da'ken,
Zionni demechik; Nibo, nang-ni Raja. Gada bi-sani kosako gakate re-baenga."
Skangode uni sninggiparang iako ma-sikujachim; indiba Jisuko rasong
chaatahaon, uni giminan iako sesoaha aro manderang pilakan iarangko unan
dakaha ine uamang gisik ra-aha, Ia, jinma, Lazarusko gopramoniko okame
siaoniko chakatatmitingo uano dongachim aro uamang una sakkiko on-aha. Unon
pilak jinmaba ia aiao inmananiko knaahani gimin uko rimchaksona re-angsoaha.
Pharisirang saksa sakgipinna aganaha, "Niboching, an-ching mamingkoba dakna
amjaenga; a-gilsak gimikan uni ja-man re-angaha!"
Alao olakina doanggiparangni gisepo mitam Greekrangba gnangchim. Galili,
Bethsaidaoni Philipona re-ange uamang mol-mole aganaha. "Skigipa, chinga
Jisuko nikna sikachim." Philip, Andrewona re-bae aganaha; unon Andrew aro
Philip damsan re-bae Jisuna aganaha. Jisu uamangna aganchakaha, "Sal sokaha,
da-o Mandeni Depanteko rasong chaatna nanga. Beben anga na-simangna agana,
eomni bitchil a-ao ga-ake sijaode, ua rongsamangmang dongaia; indiba ua
siahaode bang-en bite nanga. Janggitangna ka-sagipa uko gimaata, aro ia
a-gilsako janggitangna ka-sanikgijagipa jringjrotiu janggina uko ripinggen.
Soaba angna dangdike on-genode, angni ja-man re-bapachina; maikai jeo anga
donga uanon angna dangdike on-gipaba donggen. Saoba angna dangdike on-genode,
Apaba uko mandera-gen."
Jisu An-tang Signini Gimin Agansoa
Da-o angni janggi jingjengenga, aro anga maiko agangen. Apa, ia saloniko angko
jokatbo ine anga agangenma? indiba ianan anga re-baaha. Apa, nang-ni bimingko
rasong chaatbo." Unon salgioni ku-rang ong-baaha, "Anga uko rasong chaataha,
aro anga pil-e uko rasong chaatgen." Uano chadengenggipa jinma iako knae
"Mikka Kimpreta," ine aganaha; sakgipinrang aganaha, "Sa-gre Una aganaha."
Jisu aganchakaha, "Ua ku-rang angni gimin ong-ja, indiba na-simagni giminsa.
Da-o ia a-gilsakni bichal ong-engaha, aro ia a-gilsakni sason ka-gipako
a-rikatgen. Angko ia a-gilsakoniko de-daman-ahaon, anga pilak manderangkon
an-tangona salbakgen." (Ua maidake sina nanggenchim uako me-osksoe iako
aganaha). Jinma aganchakaha, "An-chingni Niamo agana, Kristo jringirotna
donggen. Indiba Mandeni Depanteko de-doatna nanggen ine na-a maikai agana. Ia
Mandeni Depantea sawa?" Jisu uamagna aganchakaha. "Na-simangni gisepo seng-a
dikdiksana dongkugen. Andala na-simangko srapjana gita, seng-engpition
re-rurabo; maina andalao re-ruragipa bachina re-enga, ua an-tangan uija.
Seng-engpittion na-simang seng-ao bebera-bo; jedakode na-simang seng-ani
dedrang ong-bana man-gen." Iako aganenba Jisu uamangoni re-anga dongnueaha.
Jihudirangni Bebera-gijani
Uamangni mikkango inidita chinrangko dakahaoba, uamang uo bebera-jaha. Isaiah
katchinikgipani ia agangimin katta chu-sokna gita ian ong-aha:
"Gitel chingni kattako sawa bebera-aha? Aro Giteini bilko sana parape-aha?"
Uamang bebera-na man-jaha; maina Isaiah agantaiaha:
"Uamangni mikgronrangchi nikjana, Uamangni gisikrangchi ma-sijana, Aro gisik
pil-e an-sengatako man-jana, Uamangni mikgronrangko ua mikgriataha, Aro
uamangni ka-tongrangko rakataha."
Isaiah Jisuni rasongko nike, uni giminan iako aganahachim.
Indake onggenchimoba bang-en sason ka-giparangmangba uo bebera-aha; indiba
a-pal gala man-na Pharisirangna kenani gimin uamang uko ku-chakjachim; maina
uamang Isoloni rasongko man-ana bate manderangni rasong on-ako man-na
namnikbatachim.
Jisuni Kattachin Bichal Ka-gen
Jisu inwate aganaha, "Angko bebera-gipa, angosan ong-ja, indiba angko
wafatgipao bebera-aha; aro angko nikgipa, angko watatgipakon nikaha. Anga
a-gilsakni seng-a ong-e re-baaha, jedakode ango bebera-gipa sakanti andalao
dongjawa. Angni kattarangko knae manigijagipako anga bichal ka-ja; maina anga
a-gilsakko bichal ka-na re-bajaha; indiba a-gilsakko jokatnasa. Angni
kattarangko ra-chakgija jegalgipako bichal ka-gipa gnang; angni agangipa
kattarangan chon-kaman salo uko bichal ka-gen. Anga an-tangni bilo agankuja
indiba angko watatgipa Pagipa an-tangan maiko inna nanga aro maiko aganna
nanga uko ge-etmanaha. Uni ge-etgiminrang jringjrotni janggi ong-a ine anga
uia. Anga jeko agana, Apani agangimin gitasan anga aganaha."
Jisu An-tang Sninggiparangni Ja-arangko Ja-suata
/13 Ian Watchangni Alanina skanggipa sal ong-achim. Ua a-gilsakko wate
Pagipaona re-ani sal sokaha ine Jisu uiaha. Ua ia a-gilsako an-tangni
manderangna ka-saachim aro chon-kamaona kingkingan ua uamangna ka-saaha. Simon
Iskariotni depante, Judas, uko bobilni jako on-na nanga ine diabol
donsoman-ahachim. Jisu miattam cha-mitingo, Pagipa an-tangni jako pilakkon
on-manaha aro Ua Isoloni re-baaha aro Isolonan re-angenga ine uie, Ua
cha-ramoni chakate an-tangni chinpakra ba-rarangko done, ba-ra siksako ra-enba
kang-kare kae rangkareo chi rue Sninggiparangni ja-suate, an-tangni kang-kareo
wentonggipa ba-rachi ipakna a-bachengaha. Ua Simon Pitorona sokeon, Pitor Una
aganaha. "Gitel na-a angni ja-arangkoba ja-suatnasiama?" Jisu una
aganchakaha, "Anga maiko dakenga na-a uikuja; indiba ja-mano na-a ma-sigen."
Pitor una aganaha, "Na-a mamingdakeba angni ja-arangko ja-suatna nangja." Jisu
una aganchakaha, "Anga nang-ko ja-suatjaode, na-a ang baksa bak nangpaja."
Unon Simon Pitor una aganaha, "Gitel, indide angni ja-arangkosan ong-aigija
angni jakrangko aro skokoba auatbo." Jisu una aganaha, "Aumangiminko
ja-arangko ja-suatana agre nangani gri; maina an-gimikan rongtala. Na-simang
rongtala; indioba na-simang pilakande ong-ja." Jisu an-tangko bobilna
on-nasienggipa mandeko uiachim. lani giminan ua aganaha, "Na-simang pilakande
rongtala ong-ja."
Ua uamangni ja-arangko ja-suatmanoa an-tangni chinpakra ba-rarangko chine,
asongenba, uamangna aganaha, "Na-simang angni dakako ma-siama? Na-simang angko
'Skigipa aro 'Gitel,' ina. Na-simang bebekon agana; maina anga indaken
ong-bebea. Indide anga na-simangni 'Gitel,' aro 'skigipa' ong-eba; na-simangko
ja-suatahaode, na-simangba saksa sakgipinko ja-suatgrikria nanga. Anga
na-simangna, dakmesokaniko on-aha; na-simangba, anga jedake na-simangna
dakaha, uandaken dakbo. Beben anga na-simangna agana, nokkol gitelna bate
dal-batja. Iarangko uie na-simang ugita dakode, na-simang an-senga. Na-simang
gimikni gimin anga aganja; angni segiminrangko anga uia. Indiba 'Angni pittako
cha-gipan angni bobil, ine Sastroo sea kattarang chu-sokna nanggen. Ia ong-na
skangan anga da-on na-simangna aganengaha; maikai iarang ong-ahaon na-simang
'Angan Ua' ine bebera-na man-gen. Beben anga na-simangna agana, jean angni
watatgipako ra-chaka, angkon ra-chaka, aro jean angko rachaka angko
watatgipako 'ra-chaka."
Jisu An-tangko Bobilna On-gniko Agansoa
Jisu duk ong-bee aganaha, "Beben anga na-simangna agana, na-simangoni saksa
angko bobilni jako on-gen." Sninggiparang jajajiji dake saksa sakgipinko
nitatgrikaha; maina ua sakori miksongachim uamang uijaha. Uni Sninggiparangoni
saksa, jena ua ka-saachim. Jisuni jakrachi asongengachim. Simon Pitor ua sako
miksongachim me-sokchina uko mikjapataha. Jisuni ka-bako dan-dana gnang ua
sing-e aganaha. "Gigel, uara sawa?" Jisu aganchakaha, "Jena anga ia pitta
tong-sako ringchakanio sim-bole on-gen, uan ua." Unon ua pitta tong-sako
sim-bole, uko ra-ongkate Simon Iskariotni depante, Judasna on-aha. Ua uko
man-oa Satan no napaha. Jisu una aganaha, "Na-a jeko daknasia, uko bakbakan
dakbo." Ua maina iako aganaha; uano asonggiparangoni pilakba uko uijaha. Mitam
chanchiaha, Judas rongdikko rikkiengani gimin, alaona maikoba brechina.
ong-jaoba kangalrangna maikoba on-china, Jisu una aganenga inesa chanchiachim.
Uandaken ua pittako cha-manarin, uanoni trraken re-ongkatangaha. Unon
walahachim.
Gital Ge-etani
Ua re-ongkatangmanoa, Jisu aganaha, "Da-o Mandeni Depanteko rasong chaatgen.
Unon Isolko rasong chaatahaode, Isolba uko an-tangni mikkango rasong chaatgen,
aro ua uko bakbakan dakgen. Angni dederacharang dikdiksana anga na-simang
baksa dongkugen. Anga Jihudirangna aganaha gitan, na-simangnaba agana.
"Na-simang angko am-gen, indiba jeona anga re-anga; na-simang uanona re-bana
amja" Ge-eta gitaiko anga na-simangna on-a. Na-simang ka-sagrikbo; anga
na-simangna ka-saaha gitan na-si-mangba ka-sagrikbo. Na-simangni
ka-sagrikachin na-simangko pilakan angni sninggiparang ong-a ine uigen."
Pitorni Jechakaniko Jisu Agansoa
Simon Pitor Una aganaha, "Gitel, na-a bachina re-angenga?" Jisu aganchakaha,
"Anga jeona re-a na-a da-o ang baksa re-bana man-ja; indiba ja-mano
re-bapagen." Pitor una aganaha, "Gitel, da-o anga maina re-bapana man-jawa?
Anga nang-ni a-sel jangeitangkon on-chakgen." Jisu aganchakaha, "Na-a angni
a-sel janggitangko on-chakgenma? Beben anga nang-na agana angko changgittam
jechakkujaskal do-o gisikjawa."
Jisuan Pagipaona Rama
/14 "Na-simangni ka-tongko Jajrengatnabe; Isolo bebera-bo aro angoba
bebera-bo. Apani noko bang-en dringrang gnang. Indake ong-jagenchimode, anga
na-simangna agangenchim. Anga na-simangna biapko tarina re-nasia. Anga re-ange
na-simangna biapko tarisoe, anga re-bapile na-simangko an-tangona rimanggen;
jedakode jeo anga donga na-simangba dongpana man-gen. Anga baona re-angenga
ramako na-simang uia." Thomas una aganaha, "Gitel, na-a baona re-angenga,
chingade uija; ramako chinga maidake uigen?" Jisu una aganaha, "Angan rama,
bebe aro janggi. Angko re-jaode pilakba Apaona re-ja. Na-simang angko uiode
angni Pagipakoba uia. Da-ontaltal na-simang uko uia aro uko nikaha."
Philip una aganaha, "Gitel, chingna Pagipako me-sokbo, unon chingna chu-onga."
Jisu una aganaha, "Indita ru-ute anga na-simang baksa dongaha, indiba na-a
angko uikujama, Philip? Angko nikgipa Pagipakoba nikaha, indide na-a maidake
agana, 'Pagipako chingna mesokbo?' Anga Pagipao gnang aro Pagipa ango gnang
ine na-a bebera-jama? Na-simangna jeko agana anga uko an-tangoniko aganja;
indiba Pagipa ango donge an-tangni kamrangko daka. Anga Pagipao gnang aro
Pagipa ango gnang ine bebera-bo, ong-jaode, ia kamrangni giminan bebera-bo.
Beben anga na-simangna agana, angko bebera-gipa, anga je kamrangko dakenga
uaba uarangko dakgen; aro iarangna bateba dal-bata kamrangko ua dakgen. Anga
Pagipaona re-angenga, aro jeko na-simang angni bimingo bi-gen uko anga dakgea;
jedakode Depanteo Pagipako rasong chaatna man-gen. Angni bimingo na-simang
maikoba bi-ode, anga uko on-gen."
Gisik Rongtalgipako Ku-rachaka
Na-simang angna ka-saode angni ge-etanirangko manigen. Anga Pagipao bi-gen aro
na-simangna dakchakgipa, sakgipinko ua na-simangona watatgen, aro ua
jringirotnan na-simang baksa dongkamgen. Uan bebeni Gisik, jeko a-gilsak
ra-chakna man-ja; maina ua uko nikaba nikja aro uiaba uija; indiba na-si-
mangde uko uia; ua na-simang baksa donga aro na-simangon donga.
Anga na-simangko dakchaka gri watangjawa; anga na-simangona re-bagen.
Dikdiksani ja-manon a-gilsak angko niktajawaha; indiba na-simang angko nikgen;
maina anga tanga, na-simangba tanggen. Unsalo anga angni Pagipao gnang aro
anga na-simango gnang ine na-simang uigen. Angni ge-etanirangko uie uarangko
manigipaan angna ka-sagipa ong-a, aro angna ka-sagipa Pagipani ka-saako
man-skagen, aro anga una ka-see an-tangko una parape.-gen." Judas una aganaha,
"Gitel, agilsakna parape-gija na-a an-tangko chingna parape-nasienga, ian
maikai ong-na ama?" Jisu una aganchakaha, "Saoba angna ka-saode, ua angni
kattako manigen aro Apaba una ka-sagen; unpn chinga uona re-bae, uo donggen,
Angna ka-sagijagipa angni kattarangko manija. Na-simang je kattarangko
knaenga, uan angni ong-ja, indiba angko watatgipa Pagipanisa.
"Anga na-simang baksa dongengpittion ia kattarangko na-simangna aganman-aha.
Angni bimingo Apa na-simangna Dakchakgipa, Gisik Rangtalgipako watatgen. Ua
na-simangna pilakkon skigen aro anga jerangko na-simangna aganaha uarangko
gisik ra-atgen. Tom-tomaniko anga na-simangna donanga, a-gilsakni on-a gita
ong-ja, anga an-tangni tom-tomanikon na-simangna on-a. Na-simangni ka-tongko
jajrengatnabe aro kennabe. 'Anga re-angenga aro anga na-simangona
re-bapilgen,' ine angni aganako na-simang knaaha. Na-simang angna ka-saode,
anga Pagipaona re-angengani gimin na-simang katchagenchim; maina angna bate
Pagipa dal-bata. Ia ong-na sakng anga da-omangba na-simangna aganman-aha,
jedakode iarang chu-sokoa, na-si-mang bebera-na man-gen. Anga na-simang baksa
bang-e agangrikchajawaha, maina ia a-gilsakko sason ka-gipa re-baenga. Ua
angni kosako bil man-ja; indiba anga Pagipana ka-saa, aro Pagipani angna
ge-etaha gita, anga dakenga ine a-gilsak uina man-na gita ia pilakan ong-gen.
"Chakatbo, hai an-ching ianoni re-na."
Jisuan Draka Budu Chong-mot
/15 "Angan Draka budu chong-mot, aro angni Pagipa gamgipa ong-a. Ango bite
nanggijagipa cheksiantiko ua den-e gala, aro bite nanggipa cheksiantiko ua
rongtalata, jedakode ua bang-bate bite nangna man-gen. Angni na-simangna agan-
gimin kattarangchin na-simang rongtalatako man-aha. Ango dongkambo aro anga
na-simango dongkamgen; cheksi buduo dongkamjaode an-tangan bite nangna amja,
uandaken na-simangba ango dongkamjaode bite nangna amja. Angan draka budu
na-simanga cheksirang ong-a; jeo anga dongkama, aro jean ango dongkama ua
bang-en bite nanga maina angna agre na-simang mamingkoba dakna amja.
Soba ango dongkamjaode, cheksiko gita uko a-palchi galata aro ua ran-a. Ua
cheksirangko chimonge wa-alo gala aro uarangko kama. Na-simang ango
dongkamode aro angni kattarang na-simango dongkamode, jeko nanga na-simang
bi-bo aro na-simangna on-gen. Na-simang angni chong-motgipa sninggiparang
ong-e, bang-en bite nangachisan angni Pagipako rasong cha-atgen. Pagipa
jedake angna ka-saaha, angaba na-simangna ka-saa. Na-simang angni ka-saaon
dongkambo. Anga jedake Pagipani ge-etanirangko mania aro uni ka-saaon
dongkama; uandaken na-simanga angni ge-etanirangko maniode angni ka-saaon
dongkamgen.
Angni katchaa maikai na-simaango dongkamgen, aro na-simangni katchaa maikai
chusokgen anga iako na-simangna aganaha. Ian angni ge-etani ong-a, anga jekai
na-simangna ka-saaha na-simangba indaken ka-sagrikbo. Janggitangko ripeng-
tangna on-chakana bate dal-batgipa ka-saani gri. Na-simang angni
ge-etanirangko maniode angni ripengrang ong-a. Anga na-simangko chakkolrang
injawaha, maina giteltangni dakengako chakkol uija; indiba anga na-simangko
ripengrang inaha; maina Apaoniko pilak knagiminko anga na-simangna uiataha.
Na-simangde angko sejachim; indiba angasa na-simangko seaha, aro na-simang
re-ange dongkamgipa biteko nangna gita anga na-simangko donaha. Uni gimin
angni bimingo na-simang Pagipao jeko bi-gen, ua na-si- mangna on-gen. Iakon
anga na-simangna ge-eta; na-simang ka-sagrikbo.
A-gilsakni Mitchiani
A-gilsak na-simangko mitchiode, na-simangko mitchina skangan angkon mitchiaha
ine na-simang uibo. Na-simang a-gilsakni ong-genode, a-gilsak an-tangnina
ka-sagenchim. A-gilsak na-simangko mitchia, maina na-simang a-gilsakni
ong-ja; indiba anga na-simangko a-gilsakonikon seaha. Na-simangna anga jeko
aganaha gisik ra-bo. Giteltangna bate chakkol dal-batja; uamang angkon
arikahaode, na-simangkoba a-rikgen. Angni bimingni a-sel uamang ia pilakkon
na-simangna dakgen; maina uamang agko, watatgipakon uija. Anga re-bae
uamangna aganjagenchimode uamangni pap dongjawachim; indiba da-ode uamango
papna pasikani dongjaha. Angko mitchigipa angni Pagipako mitchia. Pilakni
dakkugijagipa kamrangko anga uamangni gisepo dakjagenchimode, uamangni pap
dongjawachim; Indiba uamang angni kamrangko nikmanaha; indioba uamang angko
aro angni Pagipako mitchiaha. "Maming a-sel grian uamang angko mitchiaha." Ine
uamangni Niamo ia segimin kattarang chu-sokna gita iarang ong-aha.
Anga na-simangona Pagipaoniko Dakchakgipako wataton, Ua bebeni Gisik Pagipaoni
re-bae, angni gimin sakki ong-gen. Na-simangba angni sakkirangan ong-a; maina
a-bachengantal na-simangba ang baksanchim."
/16 "Bebera-aoni ga-akjana gita anga iarangko na-simangna aganmanaha. Uamang
na-simangko sinagogoniko a-pal galatgen; sal re-baenga, jeo na-simangko
so-otgipa, toromni kamko dakenga ine chanchigen. Uamang Pagipakoba aro ang-
koba uijani gimin iako dakgen. Iarangko anga na-simangna aganaha, jedakode
na-simangna ong-ahaon, anga na-simagna uamangni gimin mikrakatmanaha ine gisik
ra-na man-gen.
Bonkamgipa Kattarang.
A-bachengon anga na-simangna iarangni gimin aganjachim, maina anga na-simang
baksanchim. Indiba da-o anga angko watatgipaona re-angenga, aro na-simangoni
saksaba "Na-a bachina re-anga?" ine ango sing-jaha. Indiba anga iarangko
na-simangna aganahani gimin na-simangni ka-tongrango tikkelan gapaha. Indiba
anga na-simangna bebekon aganenga; na-simangni namgninan anga re-angenga;
maina anga re-angjaode, ua Dakchakgipa na-simangona re-bajawa; indiba anga
re-angahaode anga uko na-simangona watatgen. Ua re-baon a-gilsakna papni
gimin, bebeni gimin, aro Isolni bichaini gimin uiatgen. Angko bebera-gijanian
pap ong-a ine ua mesokgen. Anga Pagipaona re-angenga aro na-simang angko nik-
jawaha, iachi bebeko mesokgen. Ia a-gilsakni sason ka-gipako bichal ka-aha ine
mesokachi, bichaini gimin sakki on-gen.
"Na-simangna angni agangni bang-en gnangpitti; indiba da-o na-simang uarangko
chakna amja, Bebeni gisik re-baon, ua na-simangko pilak bebeona dilgen; maina
ua an-tangoniko agangen aro ua ong-gnirangkoba na-simangna parakatgen. Ua
angna rasongko on-gen; maina ua angni agangniko angoniko ra-e na-simangna
aganskagen. Pagipao je gnang pilakan angnin; uni giminan anga aganaha,
chong-motan Gisik angni on-ako ra-chake, na-simangna agangen."
Duk Aro Katchaani
"Dikdiksani ja-mano na-simang angko nikjawaha," aro dikdiksani ja-manon
na-simang angko niktaigen. Uni sninggiparangoni mitam saksa sakgipinna
aganaha, "Ua chingna aganenga, 'Dikdiksani ja-manon na-simang angko nikjawaha,
aro dikdiksani ja-manon na-simang angko nikgen, maina anga Apaona re-angenga.'
Iani miksongara mai?" Uni gimin uamang aganaha, 'Dikdiksani ja-manon' ine
aganengara maiako miksonga? Ua maini gimin aganenga an- ching uija.'" Jisu
uamangni an-tango sing-nasiako uie uamangna aganaha, "Na-simang an-tangtangni
gisepo maiko agangrikenga? Dikdiksani ja-manon na-simang agko nikjawaha; pil-e
dikdiksani ja-manon na-simang angko nikgen, ine angni aganani giminanma?'"
Beben anga na-simangna agana, na-simang kalimgen aro grapgen, indiba a-gilsak
katchagen. Na-simangko duk ong-atgen; indiba na-simangni duk katchaani
ong-pilskagen. An-pakmitingo ma-gipa saknabee duk man-a maina uni sal ong-aha;
indiba bi-sako jako man-ahaon, a-gilsako demikkang nikahani gimin ua katchaa
aro ua an-tangni saknaako gisik ra-jaha. Na-simangba da-o duk ong-a, indiba
anga na-simangko niktaigen aro na-simagni ka-tong katchagen, aro na-simangni
katchaako na-simangoniko pilakba ra-angjawa. Unsalo na-simang ango
singjawaha. Beben anga na-simangna agana, Pagipao na-simang maikoba bi-ode,
angni bimingo ua na-simangna uko on-gen. Da-ona kingkingba na-simang angni
bimingo mamingkoba bi-kuja. Bi-bo unon na-simang man-gen, Jedakode na-simangni
katchaa chu-sokgen."
A gilsakko Cheani
"Iarangko anga na-simangna toesan aganaha; sal re-baenga anga na-simangna
idake aganjaha; indiba Pagipani gimin anga na-simangna talen agangen. Unsalo
na-simang angni bimingo bi-gen aro anga na-simangni pal Pagipao bi-chakgen ine
anga aganja. Pagipa an-tangan na-simangna ka-saa maina na-simang angna
ka-saaha aro anga Isoloni re-baa ine bebera-aha. Anga Pagipaoni ia a-gilsakona
re-baaha. Pil-e anga a-gilsakko watange Pagipaona re-angenga." Uni
sninggiparang aganaha, "Ah! Da-ode na-a toe agangija rongtalen aganenga. Na-a
pilakkon uia, ine chiga uia, aro darangba nang-o sing-na nangjaha. Na-a
Isoloni re-baa ine chinga iachin bebera-a." Jisu uamangna agancha- kaha,
"Da-ode na-simang bebera-ama? Nibo, sal re-baenga aro sokaha, na-simang
sakprakprakan angko saksan gale noktangtangchi katanggen, aro na-simag bilding
bildangatako man-gen. Indiba anga saksan ong-jawa, maina Pagipa ang baksa
donga. Na-simang ango tom-tomaniko man-na gita anga iarangko na-simangna
aganaha. A-gilsako na-simang duk man-begen, indiba ka-dongbo anga a-gilsakko
chemanaha."
Jisu An-tangni Sninggiparangna Bi a
/17 Jisu iarangko agane salgichiko nigite inaha, "Apa, sal sokaha, nang-ni
Depanteko rasong chaatbo, jedakode ua nang-ko rasong chaatna man-skagen.
Maina na-a una on-gimin pilakna jringjrotni janggiko on-china pilak
manderangni kosako una bilko on-aha. (Nang-ko, saksangipa Isol chong-motko aro
nang-ni watatgipa Jisu Kristoko uiaan jringjrotni janggi ong-a.) Nang-ni angna
dakna on-gimin kamko anga chu-sokate, anga ia a-sako nang-ko rasong chaataha.
Apa, a-gilsak ong-bana skangan anga nangbaksa je rasongo dongachim; uchi da-o
nang-ni sambao angko rasong chaatbo.
"Ia a-gilsakoniko jemangko na-a angna on-aha, ua manderangna anga nang-ni
bimingko parape-aha. Uamang nang-ninchim, na-a uamangko angna on-aha aro
uamang nang-ni kattako maniaha. Da-ode, pilak nang-ni angna on-giminrang
nang-onin ong-a ine uamang uia; maina nang-ni angna on-gimin kattarangte anga
uamangna on-aha. Uamang uarangko ra-chakaha aro anga nang-oni ong-a ine uamang
skie ra-aha; aro na-an angko watataha ine uamang bebera-aha; Anga a-silsakna
bi-jaenga, indiba nang-ni angna on-giminrangnasa; maina uamang nang-nin ong-a.
Angni pilakan nang-nin ong-a aro nang-ni pilakan angnin ong-a; aro anga
uamangon rasong chaatako man-aha. Angade a-gilsako dongjawaha, maina anga
nang-ona re-nasia; indiba uamangde a-gilsakon ong-a. Rongtalgipa Apa,
jemangkon na-a angna on-aha nang-ni bimingo na-a uamangko rakkibo; jedakode
an-chinga jekai ong-a uandaken uamangba an-san ong-na man-gen. Uamang baksa
anga dongmitingo, nang-ni angna on-giminrangko anga nang-ni bimingo rakkiaha,
aro anga uamangko nitimaha. Uamangoni gimagnigipa mandena agre pilakba
gimajaha; ian Sastroni katta gita chu-sokgen. Da-o anga nang-ona re-baenga;
a-gilsako iarangko anga aganenga jedakode angni katchaa uamango chu-sokna
man-gen. Anga uamangna nang-ni kattako on-aha, aro a-gilsak uamangko
mitchiaha; manina anga jedake a-gtlsakni ong-ja, uamangba a-gilsakni ong-ja.
Uamangko a-gilsakoniko ra-angna nanga ine anga bi-jaenga, indiba
namgijagipaoniko uamangko rakkibo ine bi-a. Anga jedake a-gilsakoni ong-ja
uandaken uamangba a-gilsakoni ong-ja. Nang-ni katta bebe ong-a, uamangko bebeo
rongtalatbo. Na-a angko a-gilsakona watataha gita, angaba uamangko a-gilsakona
watata. Umangni a-sel anga an-tangko on-kangaha, jedakode uamangba bebena
an-tangtangko on-kangna man-gen.
Uamang namangmangsan anga bi-jaenga; indiba jemangan uamangni kattachi ango
bebera-a, uamangnaba bi-a. Uamangba an-san ong-china. Apa, jedake na-a ango
donga aro anga nang-o donga, uandaken uamangba an-chingo dongchina; maikai
na-an angko watataha ine a-gilsak bebera-na man-gen. Nang-ni angna on-gimin
rasongko anga uamangna on-aha, jedakode an-chinga an-san ong-a gita, uamangba
an-san ong-na man-gen. Anga uamango donga, aro na-a ango donga, jedakode
uamang an-san ong-srangna man-gen, maikai na-a angko watataha aro na-a angna
ka-saaha gita, angaba uamangna ka-saa ine a-gilsak uina man-gen.
Apa, anga jeo donga uano nang-ni angna on-giminrangni dongpaako anga namnika.
Maikai a-gilsak ong-na skangan nang-ni angna ka-sae on-gimin rasongko uamangba
nikgen. O, Kakketsranggipa Apa, a-gilsak nang-ko uikuja, indiba anga nang-ko
uiaha, aro na-a angko watataha ine ia manderang uiaha. Anga nang-ni bimingko
uamangna uiatmanaha aro uiatangkugen; jedakode na-a je ka-saachi angna
ka-saaha ua ka-saani uamangoba donggen, aro angaba maikai uamango donggen.
Jisuko Rim-a
/18 Jisu irangko aganmanon ua an-tangni sninggiparang baksa Kidron chiring
nalsachi donggipa bari damsaona re-angaha. Uko bobilni jako on-nasienggipa
Judasba ua biapko uiachim; maina Jisu an-tangni sninggiparang baksa uano
tom-rongachun. Judas sipairangni kotoksako aro kamal dal-giparangni aro
Pharisirangni peadarangko rime tochrirang bilchamrang aro silchidarerang baksa
uanona re-baaha. Jisu an-tangna pilak ong-nasiengako uie, re-ongkatbae
uamangna aganaha, "Na-simang sako am-enga?" Uamang una aganchakaha,
"Nazarethoni Jisuko." Ua uamangna aganaha, "Angan Ua," Unon uko-bobilna
on-nasienggipa Judasba uamang baksa dongengachim. "Angan Ua," ine Jisu
uamangna aganahaon, uamang tang-pile a-ao ga-akaha. Uni gimin Ua uamango
sing-taiaha, "Na-simang sako am-enga?" Uamang aganaha, "Nazarethoni Jisu- ko"
Jisu aganchakaha, 'Angan Ua' ine anga na-simangna aganaha, Na-simang angko
anrengode ia manderangko watatbo." Nang-ni angna on-giminrangoniko anga
saksakoba gimaatkuja.' ine uni agangimin kattarang chu-sokna gita ia ong-aha.
Simon Pitor an-tango donggipa tonualko saloke, kamal Dalbatgipani nokkolko
dokaha aro uni jakrani nachilko den-pakataha. Ua nokkoini bimi- ngko Malkus
mingachim. Jisu Pitorna aganaha, "Nang-ni tonualko chukopo chippilbo. Apa jeko
angna on-aha, ua ringchakaniko anga ringna nangjawama?"
Jisuko Annasni Mikkangona Rimanga
Sipairangni kotok, uamangni dilgipa aro Jihudirangni Peadarang Jisuko rim-e
kaaha. Uamang uko Annasona runangchengaha; maina uan ua bllsio Kamal
Dal-batgipa, Kaiaphasni o-bite ong-achim. Manderangna saksa mandeni sian nama
ine Jihudirangna ku-pattigipa Khaiaphasan ong-achim.
Pitor Jisuko Jechaka
Simon Pitor aro sakgipin sninggipa Jisuko ja-rikangaha. Ua sninggipa Kamal
Dal-batgipako uiachim; aro ua Kamal Dal-batgipani sara ning-chi Jisu baksa
napangpa-aha. Indiba Pitor cholgugani a-palchi chadenge dongengachim. Uni
gimin ua sakgipin sningglpa, Kamal Dal-batgipani uigipa re-ongkatange, do-ga
dongtimgipa me-chik bi-sana agane, Pitorko ning-china rimbaaha. Ua me-chik
bi-sa Pitorna aganaha, "Na-aba ia mandeni sniaggiparangoni saksa ong-jama?" Ua
aganaha, "Angade ong-ja." Sin-ani gimin nokkolrang aro peadarang anggalni
wal-timko so-e wal-tim chaktokengachim. Pitorba uamang baksa chadenge wa-al
chakpaengachim.
Kamal Dal-batgipa Jisuko Sing roka
Kamal Dal-batgipa Jisuko Uni sninggiparangni gimin aro uni skiani gimin
sing-aha. Jisu una aganchakaha, "Anga a-gilsakna paraken aganaha. Anga pangnan
Sinagogrango aro Torom noko, jeo Jihudirang tom-a, uamangna skiaha, aro anga
mamingkoba donnue aganjachim. Na-a maina angko sing-a? Anga uamangna maiko
aganachim, ua knagiparango sing-bo, uamangan uitoka." Ua iarangko aganon,
sepango chadengenggipa peadarangoni saksa Jisuko natengo satkape aganaha.
"Na-a Kamal Dal-batgipana indake aganchakama?" Jisu una aganaha, "Anga
ong-gija dake aganahaode, ong-gijako mesokbo; indiba kakket ong-ode, maina
angko doka?" Unikoa Annas uko kaa gnang Kaiaphas Kamal Dal-batgipaona
watataha.
Pitor Pil-e Jisuko Jechaka
Simon Pitor chadenge wal-tim chakengachim; uamang una aganaha, "Na-aba uni
sninggiparangoni saksa ong-a." Ua jechaksrange aganaha, "Angade ong-ja"
Pitorni nachil den-pakgipa mandeni ma-drang, Kamal Dal-batgipani nokkolrangoni
saksa aganaha, "Anga bario unbaksa nang-ko nikjachimma?" Pil-e Pitor
jechaktaiaha, aro bakan do-o gisikaha.
Jisuko Pilatona Rimanga
Uamang Jisuko pringwalni Kaiaphasoniko Governorni nokona rimangaha.
Jihudirang an-tangtangde ua nokona napangjaha, maina uamang uanona napangode
marang nangatako man-e Watchangani Alaniko cha-na man-jawachim. Unon Pilat
an-tangan a-palona re-bae uamangna aganaha. "Ia mandeni kosako na-simang mai
matnanganiko ra-baa?" Uamang una aganchakaha, "Ia mande namgijako dakgipa
ong-jagenchimode, chinga uko nang-ni jako on-jawachim." Pilat uamangna
aganaha, "Uko na-simang an-tangtangan rimange na-simangni niam gita bichal
ka-bo." Jihudirang una aganchakaha, "Mandeko so-otna chingo bil dongja."
Maidake Jisu sina nanggenchim, uni agansogimin gita chu-sokna ian ong-aha.
Pilat nokchina re-pilangenba Jisuko okamate uo sing-aha, "Na-a Jihudirangni
Raja ong-ama?" Jisu aganchakaha, "Na-a iako an-tang gisikonikon aganengama, ba
sakgipinrangsa angni gimin nang-na agane on-ahama?" Pilat aganchakaha, "Anga
Jihudima? Nang-ni ma-kring aro Kamal dal-giparangsa nang-ko angni jako on-aha.
Na-a maiko dakaha?" Jisu aganchakaha, "Angni songnok ia a-gilsakoni ong-ja.
Angni songnok ia a-gilsakoni ong-genchimode, angko Jihudirangni jako on-jana
gita angko ja-rikgiparang dakgrikchakgenchim; indiba angni songnok ia
a-gilsakoni ong-ja." Pilat una aganaha, "Indide na-an raja ong-ama?" Jisu
aganchakaha, "Angan raja ong-a ine na-an aganaha; ianan anga atchiaha aro
bebena sakki on-na anga a-gilsakona re-baaha. Bebeo dongkam- gipa sakanti
angni ku-rangko knachaka." Pilat una aganaha, "Indide bebea mai?" Iako
aganenba ua Jihudirangona re-angpile uamangna aganaha, "Anga uo maming
namgijako nikjaha."
Jisuko So-otna on-a
Pilat aganangkuaha, "Indiba na-simangni dakbewal gita, anga watchangni Alani
salo na-simangna koidi saksako watna nanga. Jihudirangni Rajako anga watode,
na-simang namnikgenma? Uamang a-bokchakaha, "Ukode ong-ja, Barabbaskosa."
(Barabbas saksa dokprete ra-gipa ong-achim.)
/19 Unon Pilat Jisuko rim-e betsmitchi dokataha, aro sipairang bu-suni mukutko
wate uni skoo stikataha, aro ba-ra gitchakmrangko chinataha. Uamang uona
re-bae aganengachim, "Salam, Jihudirangni Raja," aro uko satkapto- kengachim.
Pilat a-palchi re-angpile Jihudirangna aganaha, "Nibo, anga uo maming
namgijako nikja ine mesokna anga uko na-simangona rimongkatbaenga." Uni gimin
Jisu bu-surangni mukutko stika gnang aro ba-ra gitchakmrangko china gnang
a-palona re-baaha. Pilat uamangna aganaha, "Nibo, Mandekol" Indiba Kamal
dal-giparang aro peadarang uko nikon, jrojro a-boke intokaha. "Uko Chisolo
datkapbo! uko Chisolo datkapbo!" Unon Pilat uamangna aganaha, "Na-simang
an-tarigtangan uko rimange chisolo datkapbo; maina angade uo maming namgijako
nikja." Jihudirang aganchakaha, "Chingni niam gnang, aro ua niam gita ua sina
nangchongmota; maina ua an-tangko Isolni Depante dakaha." Iako knaoa Pilat
kenbataha, aro ua nokchina re-angpile Jisuna aganaha, "Na-a baoni re-baa?"
Jisu una mamingkoba aganchakjaha. Unon Pilat aganaha, "Na-a angna aganna
jechakama? Anga nang-ko watna aro nang-ko chisolo datkapna bil gnang ine na-a
uijama?" Jisu aganchakaha, "Na-a kosakoni bilko man-jaode, na-a angni kosako
maming bilkoba man-jawachim. Uni gimin angko nang-ni jako on-gipani papan
dal-bata." Iako knae Pilat uko watna am-beahachim; indiba Jihudirang jro-jro
intokaha, "na-a ia mandeko watode, Caesarni ripeng ong-ja; an-tangko raja
dakgipa sakanti Caesarko warachaka."
Pilat ia kattarangko knaahaon, Jisuko a-palona rimongkatbataiaha; aro "Ro-ong
Angimin" minggipa bichal ka-ram biapo asongaha; jeko Ibri Ku-sikchi "Gabbatha"
mingachim. Ian Watchangani Alanina skangipa saini saljatchimango ong-achim. Ua
Jihudirangna aganaha, "Nibo, ian na-simangni Raja!" Uamang jrojro a-boke
inaha, "Uko so-otbo! Uko so-otbo! uko chisolo datkapo!" Unon Pilat uamangna
aganaha, "Anga na-simangni Rajako chisolo datkapboma?" Kamal dal-giparang
aganchakaha, "Caesarna agre chingni gipin raja gri." Unon uko chisolo
datkapchina, ua uamangni jako on-aha.
Jisuko Chisolo Datkapa
Uamang Jisuko rimangaha aro ua an-tangni chisoiko ripee "Skobikrok" (Golgotha)
minggipa biapona re-angaha. Uano unbaksa samtangtangchi sakgipin sakgniko,
Jisuko jatchio done, chisolo datkapaha. Pilat uiataniko see chisolni kosako
donaha. "NAZARETHONI JISU, JIHUDIRANGNI RAJA." ine seachim. Jihudirangoni
bang-en ia uiataniko poraiaha; maina je biapo Jisuko chisolo dakapachim, uan
songjimnani sepangchim. Uko Ibri, Latin aro Greek ku-sikrangchi seaha. Uni
gimin Jihudirangni Kamal dal-giparang Pilatna agana- ha, 'Jihudirangni Raja'
ine sepanabe; indiba 'Angan Jihudirangni raja ong-a ine Ua aganaha,' ine
seskabo," Pilat aganchakaha, "Anga jeko, seaha, seaha."
Sipairang Jisuko chisolo datkapman-ahaoa, uamang uni ba-rarangko bak bri dake
suale ra-aha; sipai sakprakan bakprak man-achim. Uamang cholakoba ra-aha, ua
kosakoni intal sikgimikgipa, biritchu grigipa ong-achim. Uni gimin uamang
agangrikaha, "Hai an-ching iako chitjana, indiba ua sani ong-gen, una chitti
kale nina." Sastroni kattarang maikai chu-sokgen, sipairang iako dakaha:
"Uamang an-tangtangni gisepo Suate ra-aha angni, ba-rarangko; Angni gana
chinanina Uamang kal-aha chittiko."
Da-o Jisuni ma-gipa, uni ma-jongtang, Klopasni jikgipa Mariam aro Magdalene
Mariammang uni chisol sambao dongengachim. Jisu an-tang magipako aro uni
sepango chadenggipa ka-sara sninggipako nike, an-tang ma-gipana aganaha, "Ama,
nibo, nang-ni depanteko." Unon ua sninggipanaba aganaha, "Nibo, nang-ni
ma-gipako." Un salintal, ua sninggipa uko an-tang nokona rimangaha.
Jisuni Sia
Da-o pilakan chu-sokmanaha ine Jisu uiaha. Unon Sastro chu-sokna gita ua
aganaha, "Anga ringna sika". Meseng bitchian gapgipa rangkare uano gnanchim,
aro uamang uko spongjoo simchope, go-olo siksepe uni ku-sikona donatalia. Ua
meseng bitchiko ringchopman-oa aganaha, "Pilakan chu-sokaha." Unon ua sko
choknoke janggi galaha.
Jisuko Oksiko Su a
Uan Sambasiani sal ong-aehim. Uni gimin Jihudirang chisolo datkapa man-gipa
manderangni ja-arangko pe-e, manggisirangko ra-angatchina Pitalko aganaha,
Neng-takani salo bikaprangko chisolo donjana uamang iako dakaha. (Ua
Neng-takani sal dal-achim). Uni gimin sipairang re-bae skanggipa mandeni aro
ua sakgipin Jisu baksa datkapa man-gipani ja-arangko pe-aha. Unon uamang
Jisuona re-bae, ua simanaha ine nikoa uni ja-arangko pe-jaha; indiba
sipairangoni saksa uni oksiko sel-uchi su-aha. Unon bakan an-chi aro chi
ong-kataha. (Na-simang bebera-na man-na gita, ian uko nikgipa saksani agana
katta, aro uan bebe ong-a. Bebekon aganenga ine. ua uia.) Uni greng dotsakoba
be-atjaha;" ine segimin Sastroni katta chu-sokna gita iarang ong-aha. "Uamang
an-tangtangni su-giminko nigen," ine Sastroni damgipin bakoba sea gnangchim.
Jisuko Gopa
Iani ja-mano Arimatheani Joseph, Jihudirangna kene sriksrik Jisuni sningipa
ong-pagipa, Jisuni manggisiko ra-angna Pilato bi-aha; aro Pilat liko
ra-angchina on-aha. Uni gimin ua re-bae Jisuni manggisiko ra-angaha. Unikoa
skango, walo Jisuona re-bagipa, Nikodemusba, similgipa bringimin mur aro
agorko kilo sotbongamang ra-baaha. Uandaken uamang Jihudirangni gopna tari
bewalgita Jisuni manggisiko ua bringimin similgipa baksa mosina ba-rachi
wenaha. Uko chisolo datkapgipa biapo ban damsa gnangchim; aro ua bario
dararigkoba gopkugijagipa gopram gital gesa gnangchim. Jihudirangni sambasiani
sal ong-ani gimin aro ua gopramba sepangon dongani gimin uamang Jisuko uanon
donaha.
Gop-ram Bangbang ong-a
/20 Antini skanggipa salo pringwalni, andalengpittion, Magdalene Mariam
gopramona re-bae, gopramoni ro-ongko jitataha ine nikaha. Uni gimin ua Simon
Pitor aro Jisuni sakgipin ka-sara sninggipaona sketbakket katbae, uamangna
aganeaha, "Uamang Gitelko gopramoniko raongkatangaha; uamang uko bano donaha
chinga uija." Uni gimin Pitor aro ua sakgipin sninggipa gop- ramchina
re-chakatangaha. Uamang sakgnian damsan katangaha, indiba sakgipin sninggipa
Pitorna bate tarakbatani gimin katsekange gopramona skang sokcaha. Ua gopram
ning-chide napangsrangjaha, indiba gonggonge niuatoa mosina ba-rarangni ga-ake
dongengako nikataha. Simon Pitorba uko rikbae sokeaha aro uade gopramchinan
napangsrange, mosina ba-rarangni ga-ake dongako nikeaha. Uni skoo kagipa
ba-rade mosina ba-rarang baksa dongjachim, indiba ua tome dingtang biapo
dongachim. Unon gopramona skang soksogipa, sakgipin sninggipaba napangsrange
nikenba bebera-aha; maina sigiminrangom chakatna nanga ine Sastroo agana
kattako uamang man-sikujaengachim. Unon sninggipa- rang nokchi re-angpilaha.
Jisu Magdalene Mariamna Mikkang Pa-a
Mariam gopramni a-palo chadenge grapengachim. Grapa gnang ua gopramko nina
gonggongaha, Ua Jisuni bimangko donram biapo, saksa skopangchi aro sakgipin
ja-chokchi chinggipa sa-grerangni asongengako nikaha. Uamang una agana- ha.
"Na-a maina grapenga?" Ua uamangna aganaha, "Uamang angni Gitelko ra-angaha,
aro uko bano donaha anga uija." Ua iako agane an-piloa, Jisuni chadengengako
nikaha; indiba ua Jisu ong-achim ine uijaha. Jisu una aganaha, "Na-a maina
grapenga? Na-a sako am-enga?" Uko bari gamgipa ine chanchie, ua una aganaha,
"Skigipa, na-a uko ra-angahaode, uko bano donaha aganpabo, aro anga uko
ra-anggen." Jisu una aganaha, "Mariam." Unon ua an-pile Jihudi ku-sikchi una
aganaha, "Rabboni" (Skigipa) Jisu una aganaha, "Na-a angko dangtapkunabe, anga
Pagipaona gadoangkuja, indiba angni jongadarangona re-ange uamangna aganbo.
'Anga angni aro na-simangni Pagipaona, angni aro na-simangni Isolona
doangenga." Magdalene Mariam sning- giparangona re-ange aganaha, "Anga Gitelko
nikaha," aro ua an-tangna agangiminrangko aganeaha.
Jisu An-tangni Sninggiparangna Mikkang Pa-a
Antini skangipa sal, Robibar attamchibara Jihudirangna kene, sninggiparang
do-garangko chipchange dringo damsan tom-e dongtokengachim. Unon Jisu uamangni
jatchiona re-bae chadengeaha, aro ua uamangna aganaha, "Na-simangna tom-tom
ong-china." Ua iako aganenba uamangna an-tangni jakrangko aro oksikko
mesokaha, Sninggiparang Gitelko nikoa katchatokbeaha. Jisu pil-e uamangna
aganaha, "Na-simangna tom-tom ong-china. Pagipa angko watataha gita, angaba
na-simangko watata." Iako aganenba ua uamango spodape aganaha, "Gisik
Rongtalgipako ra-chakbo. Na-simang jemangni paprangko wata, uamangko wata,
aro na-simang jemangni paprangko watja uamangko watja.
Jisu Aro Thomas
Sak chignioni saksa Jonja minggipa Thomas, Jisuni re-baon uamang baksa
dongjachim. Gipin sningiparang una aganaha, "Chinga Gitelko nikaha." Ua
uamangna aganaha, "Anga uni jakrango, kojalrangni pariko nikjaskal, aro ua
kojalrangni pario angni jaksichi jotape nijaskal, aro angni jakchi uni oksikko
dangtape nijaskal anga mamingdakeba bebera jawa."
Sal chetni ja-mano uni sninggiparang, nokningo dongtoktaiengachim; aro
Thomasba uamang baksanchim. Unon do-garangko chiptokachim aro Jisu uamangni
jatchio chadenge aganaha, "Na-simangna tomtom ong-china." Unikoa ua Thomasna
aganaha, "Angni jakrangko nibo aro nang-ni jaksiko snile iano jotapbo aro
nang-ni jakrangko snile oksikko dangtapbo; bebera-gijagipa ong-nabe; indiba
bebera-gipa ong-bo." Thomas una aganchakaha, "Angni Gitel aro angni Isol."
Jisu una aganaha, "Na-a angko nikahani gimin bebera-aha, jemangan angko
nikgija bebera-a uamang an-senga."
Ia Ki-tapni Miksonga
Ia ki-tapo sekugijagipa bang-bea chinrangkoba Jisu an-tang sninggiparangni
mikkango dakaha; indiba iarangkosan seaiaha; jedakode Jisuan, Kristo, Isolni
Deapante ong-a ine na-simang bebera-na man-gen, aro bebera-enba, uni bimingo
na-simang janggiko man-gen.
Jisu Saksni Sninggiparangna Mikkang Pa-a
/21 Iani ja-mano Jisu Tiberias Sagalo sninggiparangna mikkang pa-aha; aro
an-tangko indake mesokaha. Simon Pitor, jonja minggipa Thomas, Galilini
Kanaoni Nathanael, Zebedeeni depanterang aro gipin sakgni sninggiparang damsan
dongtokengachim. Simon Pitor uamangna aganaha, "Anga na-tok rim-na
re-angenga." Uamang una aganaha, "Chingaba nang baksan re-gen." Uamang re-ange
an-tangtangni ringo gakataha aro uamang walgimiko mamingkoba man-jaha. Pring
seng-oa Jisu chisamo chadengaha, indiba uan Jisu ong-a ine sninggiparang
uijaha. Jisu uamangna aganaha, "Dedrang, na-simang na-tok man-a- ma?" Uamang
aganchakaha, "Dongja." Ua uamangna aganaha, "Ringni jakrachipak chekko
galatboching, unon man-gen." Uni gimin uamang chekko galataha, aro na-tok
bang-ani giminan uamang chekko salnan man-japilaha. Jisuni ka-sara snin-gipa
Pitorna aganaha, "Uan Gitel." Simon Pitor, "Uan Gitel" ine knaon, an-tangni
chinpakrako chingope, sagalo chokonpruangaaha; indiba gipin sninggiparangde
ringon, na-tokarigipa chekko sale re-baengachim; maina uamang a-gaoni chel-bea
ong-jachim, mikritchagnimangsan ong-aigenchim. Uamang a-gaona gakatoa anggaini
wa-alo na-tok so-ako aro adita pittako nikeaha. Jisu uamangna aganaha, "Da-o
na-simangni rim-gipa na-tokrangoniko mitam ra-babo." Simon Pitor ringona
re-ange, dal-dalgipa, na-tokraragipa chekko a-gaona saldobaaha. Uano
mangritchasa sotbonga gittam gnangchim, aro indita na-tok bang-oba chek
grinjaha. Jisu uamangna ag- anaha, "Re-babo mipring cha-ebo." Uan Gitel
ong-achim ine uienba sninggiparangoni darangba "Na-a sawa?" ine sing-na
pa-jaha. Jisu re-bae pittako ra-e uamangna on-aha aro apsan dake na-tokkoba
on-aha. Siaoni chakatpilani ja-mano sninggiparangna Jisuni mikkang pa-a ian
gittamgipa chang ong-achim.
Jisu Aro Pitor
Mipring cha-manon Jisu, Simon Pitorna aganaha, "Johanni depante, Simon,
iamangna bate na-a angna ka-sabtama? Ua una aganaha, "Oe, Gitel, anga nang-na
ka-saa ine na-an uia." Ua una aganaha, "Angni mes bi-sarangko nirokbo."
Gnigipa changna ua una agantaiaha, "Johanni depante, Simon, na-a angna
ka-saama?" Ua una aganaha, "Oe, Gitel, anga nang-na ka-sa ine na-an uia." Ua
aganaha, "Angni mesrangko nirokbo." Gitamgipa changna ua una aganaha, "Johanni
depante, Simon, na-a angna ka-saama?" Pitor duk man-aha; maina chang gittamna
kingking ua uo sing-aha, "Na-a angna ka-saama?" Ua una aganchakaha, "Gitel,
na-a pilakkon uia, anga nang-na ka-saa ine na-an uia." Jisu una aganaha,
"Angni mesrangko nirokbo. Beben anga nang-na agana, na-a dambemitingode
kang-kare kae jechina sika re-achim; indiba budepa ong-ahaon na-a jakrangko
bawanggen, aro sakgipinrang nang-ni kang-kareko kae, jechi na-a re-na sikja
uchinan rim-anggen." Pitor maidakgipa siachi Isolko rasong chaatgen, uko
mesoksoe ua iako aganaha. Ua iako aganenba una inaha, "Ang baksa re-bapabo."
Jisu Aro ua Sakgipin Sningipa
Pitor an-piloa, Jisuni ka-sara sninggipani ja-rikbaengako nikaha. (Uan
miattam cha-mitingo, Jisuni ka-bako dangdale, 'Gitel, nang-ko sawa bobilni
jako on-nasienga?' ine agangipa ong-achim.) Pitor uko nikenba Jisuna aganaha,
"Gitel, uara mai ong-gen?" Jisu una aganaha, "Angni re-baona kingking uni
dongako anga namnikode, nang-nara mai ong-a? Na-a ang baksa re-bapabo." Uni
gimin ua sninggipa sijawa ine jongadarangni gisepo agan- grikani ong-aha.
Indioba ua sijawa ine Jisu una aganjachim; indiba "Angni re-baona kingking uni
dongako anga namnikode, nang-nara mai?" inesa aganachim.
Aganchotani
Ua sninggipaan iarangni gimin sakki on-gipa, aro uan iarangko see donaha; aro
uni sakki bebe ong-a ine an-chinga uia. Jisuni dakgimin kamrangba bang-en
gnangpittichim, uarang mingprakprako setokode, anga chanchia segimin
kittaprang ia a-gilsakon chakjawachim.
