1

1 Lal Davida a hung upat hnung le tar tieng chun puon an inthuo teu khomin a pang a lum thei chuong dêr naw a. 2 A siehlawhai chun, "Lal enkoltu ding le dontu ding nunghak thienglàm zongpêk ei tiu khai. Ama'n zâlpui sien la, ei pu pang chu hung lum el a tih" an ta. 3 Chuongchun, Israel ram sûng po poa chun nunghàk hmèl tha an zong a, Sunam mi nunghak hmèl tha deu el Abishag an hmu a, lal kuomah an hung thuoi a. 4 Nunghàk hmèl tha tak el a na, lal chu a enkol a, a um ngha a, sienkhom lal chun a pawl nawh. 5 Chun, Hagit laka Davida naupa Adonija chun, "Kei hi lala um ding tak chu ka nih" a ta, a hmang dingin tawlailir le sakorhai a buotsai a, a hmaa tlântu ding mi sawmnga a ruot bok a. 6 A pa chun, "Ieng leia hieng thil hi i thaw am a na?" tiin a lo inrol chuong nawh. Ama chu Absalom sang, a dottu char, tlangvàl hmèl tha tak a nih. 7 Adonija chun Zeruia naupa Joab le thiempu Abiathar hai chu a rawn a, ama tieng an thang a. 8 Sienkhom thiempu Zadok hai, Jehoiada naupa Benaia hai, zawlnei Nathan hai, Simei hai, Rei hai le Davida vêngtu mi huoisenhai ruok chun Adonija chu an zui nuom ve nawh. 9 Adonija chun beram le bawng, a ran chawm thauhai chu En Rogel bula um Zohelet lungpuia chun a that a, inthawina a'n hlàn a, chu taka chun lal nau, a unauhai po po le Judai rama lal khawnbawlhai po po chu a fiel khawm a, 10 sienkhom zawlnei Nathan hai, Benaia hai, lal vêngtu mi huoisenhai le a unaupa Solomon hai ruok chu a fiel ve nawh. 11 Chun, zawlnei Nathan chun Solomon nu Bathseba kuomah, "Ei pu Davida hriet loin Hagit naupa Adonija chu lalin a um tah ti i lo hriet ve am? 12 Tu hin nangma him dàn ding le i naupa Solomon him thei dàn ding chu hril ka ti che. 13 Lal kuomah lût la, a kuomah, 'Aw lalpa, ka pu, i naupa Solomon hi i hnunga lal hung ni ngei ding le i lalthungpha hung hluo ngei dingin i bawinu kuomah inkhâm meuin thu i tiem tah a ni naw am a ni? Iem a ta tu hin Adonija chu lalah a um el ta hi?' va ti rawh. 14 Lal i biek lai zingin kei khom hung lût vèng ka ta, i thu hril chu hung namnghet ka tih" a ta. 15 Bathseba chu lal pindana chun a va lût a, lal chu a lo tar kuong el ta a, Sunam nunghak Abishag chun a rong a lo bawl a. 16 Bathseba chun dingthathuonin lal chu chibai a bûk a, lal chun, "Ieng am i dit a?" a ta. 17 Ama chun, "Ka lalpa, nangma ngeiin i siehlaw kuoma hin LALPA i Pathien sâlin, 'I naupa Solomon chu ka hnungah lal hung nîng a ta, ka lalthungpha hung hluong a tih' tiin inkhâm meuin thu i tiem a. 18 Ngai ta, tu hlak hin Adonija chu lalah a hung um ta a, chu chu ka pu, ka lalpa hin i la hriet si nawh. 19 Ran tam tak, bawng le beram thau tak tak inhlànin, lal naupahai po po le thiempu Abiathar le i sipai kawmandar Joab hai a fiel a, i siehlaw Solomon ruok chu a fiel sa ve nawh. 20 Ka pu, ka lalpa hnunga hin lalthungphaah tu am hung inthung a ta ti i puong hun ding chu Israelhaiin an nghâk thup el a nih. 21 Chuong naw chun hieng hi hung nîng a ta, ka lalpa hi a pi le puhai kuoma a chawl ve pha chun, kei le ka naupa Solomon hi thil suol thawtuah an mi ngai el ding a nih" a ta. 22 Chuonga lal a biek lai zing chun zawlnei Nathan chu a hung lût a. 23 "En ta, zawlnei Nathan khom a hung ve ie" tiin lal chu an hril a. Lal kuom a va tlung chun lal hmaah hnuoi sikin a bokkhup a. 24 Nathan chun, "Aw lalpa, ka pu, 'Ka hnungah Adonija hi lalin thung a tih i ti am a ni? 25 Voisun hin a fe thlàk a, ran thau thau, beram le bawng tuoi a that teu a, lal naupahai po po, sipai lalhai le thiempu Abiathar hai a fiel a, fain an dawn tlàng a, 'Pathienin Adonija huolhim raw se' tiin an khêk ruol a nih. 26 Amiruokchu, i siehlaw ngei ngei kei le thiempu Zadok hai, Jehoiada naupa Benaia hai le i siehlaw Solomon hai ruok chu a mi fiel ve nawh. 27 Hi hi lalpa ka pu thua a thaw a ni si chun lalpa ka pu hin a hnunga lalthungphaa thung ding chu a tu tak hi'm a na ti i siehlawhai hi a lo hril ve naw a ni maw?" a ta. 28 Chu phing leh lal Davida chun, "Bathseba kha hung ko lût ro" a ta. Chuongchun, a hung lût a, lal hmaa chun a ngîr a. 29 Lal chun, "Buoina po poa inthoka ka hringna san suoktu LALPA hringna sâlin ka hril a, 30 LALPA Israelhai Pathien hming sâla, 'I naupa Solomon hi ka hnungah lal la ni ngei a ta, ka hmunah lalthungphaa hin la'n thung a tih' tia thu ka'n khàm ang khan voisun ngei hin ka hlen suok ding a nih" a ta. 31 Bathseba chun hnuoi sika bokkhupin lal chu chibai a bûk a, "Ka pu le ka lal Davida hi kumkhuoin dam zing raw se" a ta. 32 Lal Davida chun, "Thiempu Zadok le zawlnei Nathan le Jehoiada naupa Benaia hai kha hung ko lût ro" a ta, a hmaa chun an hung a. 33 Lal chun an kuomah, "In pu khawnbawlhai thuoi unla, ka naupa Solomon hi ka sabengtung chunga ngei inchuongtir unla, Gihon-ah zu fepui ro. 34 Chu taka chun thiempu Zadok le zawlnei Nathan haiin Israelhai lal dingin hriek nâl hai sien la; chun, tawtawrawt mût unla, 'Lal Solomon dam sawt raw se' tiin khêk ro. 35 Ama chu hung zui tung inla, ka lalthungphaa hin inthungtir unla, ka aiin ro rêl raw se. Israelhai le Judahai chunga rorêltu dingin ka ruot a nih" a ta. 36 Jehoiada naupa Benaia chun, "Amen! Ka pu, ka lalpa thu chu LALPA a Pathien khomin pom ngei raw se. 37 LALPA chu ka pu, ka lalpa kuomah a um hlak ang bokin Solomon kuoma khom um sien la, ka pu, lal Davida lalthungpha nêka ropui lemin a lalthungpha chu siem raw se" a ta. 38 Chuongchun, thiempu Zadok hai, zawlnei Nathan hai, Jehoiada naupa Benaia hai, Keret mihai le Pelet mihai chu an zu fe a, Solomon chu Davida sabengtung chungah an inchuongtir a, Gihon-a chun an thuoi a. 39 Thiempu Zadok chun hriek siena fungki chu hmun thienghlima puon ina inthok chun a làk suok a, Solomon chu hriek a nàl a. Chun, tawtawrawt an mût a, mi po po chun, "Lal Solomon dam sawt raw se" tiin an khêk a. 40 Mipuihai chun ama chu an zui tung a, nasa taka lawmin theihlehai an mût a, an ri chun hnuoi a nghor nghing a. 41 Adonija le a mi fielhaiin ruoi an kîl zo tawm chun ri an hriet a. Joab-in tawtawrawt ri a hriet chun, "Khawpui sûnga ri so veng vung chu iem an ta leh?" a ta. 42 A hril lai zingin thiempu Abiathar naupa Jonathan chu a hung tlung a. Adonija chun, "E khai, hung lût rawh. Nang ang mi fel chun chanchin lawmum hung hawn ngei i tih" a ta. 43 Jonathan chun, "Ka hawn naw top el. Ei pu, lal Davidan lalah Solomon a sie tah annawm. 44 Solomon zui dingin thiempu Zadok hai, zawlnei Nathan hai, Jehoiada naupa Benaia hai, Keret mihai leh Pelet mihai chu a tir a, lal sabengtung chungah an inchuongtir a, 45 thiempu Zadok le zawlnei Nathanin Gihon hmunah lal dingin hriek an nàl a, chu taka inthok chun hlim takin an hung kîr a, an hlim ri chun khawpui a thangkhawk a, chu ri chu a nih in ri hriet chu. 46 Chun, Solomon chu tu hin a ram lalthungphaah a thung ta bok. 47 Lal khawnbawlhai chun Davida chu an hung lawmpui a, 'I Pathienin i hming nêkin Solomon hming chu suktha lem sien la, i lalthungpha nêkin a lalthungpha chu ropui lemin siem raw se' an ti a. Ei pu lal Davida khomin a khumah kûnin Pathien a chawibiek a, 48 'LALPA, Israelhai Pathien, ka lalthungphaa inthung ding mi ka hmu phâk ngeia voisuna hung ruottu chu inpâkin um raw se' a ti a nih" a ta. 49 Chu thu chu an hrietin Adonija mi fielhai po po chu an ti ta hle a, an tho a, an zàm dar ta vong a. 50 Adonija chun Solomon a ti leiin a tho a, maichâm ki a va chel a. 51 Chun, lal Solomon kuomah, "Adonija chu a ti taluo a, 'Lal Solomon chun a siehlaw hi kawlhnàma sukhlum lo dingin inkhâm meuin voisun hin thu tiem raw se' tiin maichâm ki a chel el a nih" tiin an va hril a. 52 Solomon chun, "Mi ringum a nih ti a'n langtir phot chun a sam zâi khat khom hnuoiah tla naw nih; amiruokchu, a suol ti hriet suok a ni ruok chun thìng a tih" a ta. 53 Chuongchun, Solomon chun mi a tir a, maichâma inthokin an hung thuoi thlâk a, lal Solomon chu chibai a bûk a, Solomon chun, "I in tieng inlawi ta rawh" a ta.

2

1 A thi a hung hnai chun Davidan a naupa Solomon kuomah thuro a sie a: 2 "Leilunga chêng po po khawsak dàn angin ka fe ve hun a hung tlung têp ta a. Hrât takin um la, patling takin khawsa la, 3 LALPA i Pathienin lampui hraw ngei dinga a ruothai chu hraw la, i thilthaw iengkima le i fena taphotah i hmuingil theina dingin Mosie Dàna chuong thupêk le dânhai chu vong tlat rawh. 4 Chuonga i khawsa chun LALPAN ka kuoma, 'Ka hmaah fimkhur taka i thlahai an khawsa a, lungril le thlaraua ringum taka ka lampui an hraw chun, Israelhai lalthungphaa inthung ding mi invai ngai naw ti nih' tia a lo tiem chu LALPAN vong zing a tih. 5 "Zeruia naupa Joab-in keima chunga le Israel sipaihai kawmandar, Nera naupa Abner le Jether naupa Amasa chunga a thaw dânhai kha nang khomin i hriet a. Indo lai ang elin muongleiah anni chu a that a, ama kawngchun le kekokah an thisen a'n kaitir ta vong a nih. 6 I rem hriet dàn ang peiin ama chu hung thaw la, amiruokchu a luah kel sam to rak khopin thlamuong takin thlân muolah inliemtir naw rawh. 7 "Gilead mi Barzila nauhai chunga ruok chu lunginsietna inlangtir la, i dawkâna thlaithlêng kîltuhai lai inthangtir rawh. I unaupa Absalom laka ka râltlân laia mi tan tlattu an nih. 8 "Chun, Bahurima inthoka hung Benjamin mi, Gera naupa Simei, Mahanaim-a ka fe tuma tongsie tinrêng mi'n phurtu kha nangni lai hin a um a nih ti hre zing rawh. Jordana a mi hung hmuok tumin LALPA hmingin, 'Ka kawlhnàm chun that naw ning chengah' tiin thu ka'n khàm a. 9 Tu ruok hin chu, thiem changin insuo naw rawh. Pa var tak i ni leiin a chunga i thaw ding chu hre el i tih. A lu tuok chu thisen leh thlânah vui liem rawh" a ta. 10 Chun, Davida chu a thlatuhai kuomah a chawl a, Davida Khawpuia chun an phûm a. 11 Israelhai chungah kum sawmli ro a rèl a, Hebrona inthokin kum sari le Jerusalema inthokin kum sawmthum le kum thum. 12 Chuongchun, Solomon chu a pa Davida lalthungphaa chun a thung a, a lalna chu det taka suknghetin a hung um ta pei a. 13 Chun, Hagit naupa Adonija chu Solomon nu Bathseba kuomah a fe a, Bathseba chun, "A tha tienga hung am i ni?" a ta, ama chun, "A tha tienga hung ni e" a ta. 14 Ama bok chun, "I kuomah hril ding ka nei a nih" a ta, Bathseba chun "Hril ta la" a ta. 15 Ama chun, "I hriet tah angin ram hi ka ta a ni tah zet a, Israelhai po po khomin keima hi lal dinga an mi beisei zing ka ni a, sienkhom thil a hung inthlâk thut a, ram chu ka unaupa kutah a um nawk ta a, LALPAN a pêk a nih. 16 Tu hin thil pakhat chauh hni che ka nuom a, chu chu mi'n hlawsamtir lul naw rawh" a ta. Ama chun, "Hni ta la" a ta. 17 Adonija chun, "Lunginsiet takin Lal Solomon mi hnipêk la, Sunam nunghak Abishag hi ka nuhmei dingin mi pe raw se. Nanga hni chu sêl ngam naw nih" a ta. 18 Bathseba chun, "Ni e, lal kuomah hung hrilpêk ka ti che" a ta. 19 Bathseba chu Adonija thil hni hrilpêk dingin lal Solomon kuoma chun a fe a. Lal chun lo lawm lût dingin a ngîr a, a hmaa chun a kûn a, a lalthungpha chu a nu bulah a'n son hnaitir a, a thung a, a chang tieng chun a nu chu a'n thungtir a. 20 Ama chun lal kuomah, "Thil chikte hni ding che ka nei a, mi'n hlawsamtir lul naw rawh" a ta. Lal chun a kuomah, "Hni ta la, nu, hnawl naw top ka tih" a ta. 21 Ama chun, "Sunam nunghak Abishag hi i unaupa Adonija nuhmei dingin inneitir rawh" a ta. 22 Lal Solomon chun a nu kuomah, "Ieng dinga Sunam nunghak Abishag chu Adonija ta dinga i hnipêk am an ta a? Chuong ang thil i hnipêk ta rau rau si chun ram khom hi hnipêk law law ta la, ka upa a ni hi teh- ama le thiempu Abiathar le Zeruia naupa Joab hai ta ding chen khomin tie!" a ta. 23 Chun, LALPA hming sâlin Solomon chu a'n khàm a, "Hi a thil hni hi Adonijain a thipui naw chun Pathienin a law lawin mi law sien, chu nêka nasa khom chun mi thaw raw se. 24 Tu hin ka pa Davida lalthungpha nghet taka mi'n hluotirtu le a tiem tah anga kan sûngkuo lal sûngkuoa mi'n dinpêktu LALPA hringna chu sâlin ka hril, Adonija chu voisun ngei ngei hin sukhlum nîng a tih" tiin. 25 Chuongchun, lal Solomon chun Jehoiada naupa Benaia chu a tir a, ama chun Adonija chu a va bei a, a that a. 26 Thiempu Abiathar kuoma chun lalin, "Anathot khuoa i in le lo umna tieng kîr dai rawh. Thi tlâk i nia chu ka pa Davida hmaah LALPA Pathien Bawm i lo zawn tah hlak leiin le ka pa rinum tuorna po poah i lo tuor ve ta hlak leiin, tu hin chu la sukhlum nawng ka ti che" a ta. 27 Chuongchun, LALPAN Silo khuoa Eli sùngkuo chungchâng thu a hril kha a hung tlung kim a, Solomon chun Abiathar chu thiempu a ninaa inthokin a bàn a. 28 Joab-in chu thu chu a lo hrietin, Absalom tieng thang naw sien khom Adonija phierpuitu a ni leiin, LALPA puon inah a tlân lût a, maichâm ki a chel a. 29 LALPA puon inah tlân lût a, Joab-in maichâm ki a chel thu chu Solomon an hril a. Solomon chun Jehoiada naupa Benaia chu a ko a, "Fe la, va sât hlum rawh" a ta. 30 Chuongchun, Benaia chu LALPA puon ina chun a lût a, Joab kuomah, "Lalin hung suok rawh a ti che a nih" a ta. Ama chun, "Suok lo e, hi taka hin thi el ka tih" a ta. Joab-in a lo don dàn chu Benaia chun lal kuomah a ripawt a. 31 Lal chun Benaia chu thu a pêk a, "A ti ang tak chun thaw rawh. Sât hlum la, phûm hmang rawh, a san um dêr loa Joab-in thisen a'n suona maw laka inthoka kei le ka pa sûnghai hi i sukfihlim theina dingin. 32 Ama nêka fel lem le tha lem mi pahnih, Israelhai sipai hotu Nera naupa Abner le Judahai sipai hotu Jether naupa Amasa hai kha ka pa hriet loin a lo bei a, kawlhnàmin a that a. 33 LALPAN an thisen maw chu Joab lu chunga le a thlahai lu chungah kumkhuoin inphurtir sien la, Davida le a thlahai, a sûngkuohai le a lalthungpha chungah LALPA thlamuongna chu kumkhuoin um zing raw se" a ta. 34 Chuongchun, Jehoiada naupa Benaia chu a hang fe a, Joab chu a bei a, a that a, thlalèra ama rama chun an phùm a. 35 Chun, lal chun Joab hmunah Jehoiada naupa Benaia chu sipai kawmandarah a sie a; Abiathar hmunah Zadok chu thiempuah a sie bok a. 36 Chun, lalin Simei chu a'n kotir a, a kuomah, "Jerusalema hin i in ding bawl la, chu taka inthok chun khaw lai khom suok naw rawh. 37 I suok ni, Kidron vadung i kàn ni lâ làin thi ngei ngei i tih ti hre rawh; i thisen maw chu nangma lu chunga ngei um a tih" a ta. 38 Simei chun lal kuomah, "A'n dik annawm; lalpa, ka puin a hril ang chun i siehlaw hin thaw pei a tih" a ta. 39 Simei chu Jerusalemah sawt fe a um a. Kum thum a hung invoi chun Simei suokhai laia pahni chu Gath khaw lal Maaka naupa Akis kuomah an tlàn hmang a. Simei kuoma chun, "I suokhai chu Gath khuoah an um" ti an hung hril a. 40 Chu phing leh a sabengtung chungah a chuong a, a suokhai zong dingin Gath khuoa Akis kuoma chun a fe a, a suokhai chu Gath-a inthok chun a hung thuoi kîr nawk a. 41 Simei chu Jerusalema inthokin Gath khuoah a fe a, a hung kîr nawk tah ti thu chu Solomon an hril a. 42 Lal chun Simei chu a'n kotir a, a kuomah, "Jerusalem i suoksan ni, hmun danga i suok ni lâ làin i thi ngei ngei ding a nih tiin LALPA hming sâlin thu ka'n khàmtir che a ni naw am a ni? Nang khomin ka kuomah, 'I hril hi a tha, zawm ngei ka tih' i ti kha. 43 Ieng leia LALPA kuoma i'n khàmna chu zawm loa thu ka pêk che chu i poisa naw am a na? 44 Ka pa Davida chunga ritlona i'n suo po po kha i lungrilah i la hriet vong a. Tuhin i suolna kha LALPAN a thungrul ding che a nih. 45 Lal Solomon ruok chu malsawmin um a ta, Davida lalthungpha chu LALPA hmaah kumkhuoin suknghet nîng a tih" a ta. 46 Lal chun Jehoiada naupa Benaia chu thu a pêk a, a suok a, Simei chu a bei a, a that ta a. Chuongchun, ram chu Solomon kutah suknghetin a um ta a.

3

1 Solomon chun Aigupta lal Faraw leh inkungkeina siemin Faraw naunu chu nuhmeiah a nei a, a lal in ding le LALPA tempul a bawl mêk lai chu an zo hma le kula Jerusalem a'n huon zo hma po chun a nuhmei chu Davida khawpuiah a sie a. 2 LALPA hminga tempul bawl a ni hri si naw leiin mipuihai chun hmun sânga hai inthawina an inhlàn hlak a. 3 Solomon khom hmun sângaa hai inthawiin rimtui inhlàn ve hlak sienkhom LALPA a hmangaizie chu a pa Davida thuruothai zawmin a'n entir a. 4 Chun, lal chu inthawina inhlàn dingin Gibeon-ah a fe a, chu chu an hmun sâng po po laia poimaw tak a nih. Chu taka chun Solomonin pumraw thilhlân sângkhat zet maichâma chun a'n hlàn a. 5 Gibeon khuoa chun zânah a mangin a kuomah LALPA a hung inlàr a, Pathien chun, "I dit dit mi hni la, pêng ka ti che" a ta. 6 Solomon chun, "I siehlaw, ka pa Davida kha i lakah ringum le fel takin a um a, lungril ngîl tak a put leiin a chungah lunginsietna nasa tak i'n langtir a. I lunginsietna ropui tak chu inlangtir peiin voisun hin a lalthungpha chu a naupa i hung inhluotir pei a. 7 Tu hin aw LALPA, ka Pathien, i siehlaw hi ka pa Davida hmunah lalah i siem taa chu naupangte chauh ka la ni a, ka mawphurna hlen suok dàn ding khom ka la hriet nawh. 8 I mi thlanghai tam tak, ieng zâta tam am an nih ti khom hriet lohai chunga hin i siehlaw hi lalah i mi sie a. 9 Chuleiin, i mihai ro ka rêl thiem theina dingin varna lungril le a sie a tha ka thlier thiem theina dingin hrietthiemna lungril i siehlaw hi mi pe rawh. Chuong naw chun i mi hieng zozaihai ro hi tu in am rêl zo an ta?" a ta. 10 Solomon thil hni chun LALPA a suklawm a. 11 Chuongchun, a kuomah, " I ta dinga dam sawtna dâm, hausakna dâm le i hmèlmahai thina ding dâm hni loa rorêl thiemna i hni leiin, 12 i hni ang tak chun thawng ka ta, varna le hriet thiem theina lungril pêng ka ti che a, nangma ang hrim tu khom an la um ngai naw ang bokin tu khom um nawk ta ngai naw ni hai. 13 Chu bâka chun i mi hni sa lo hausakna le hmingthangna khom pe sa bok ka ti che a, i dam sûngin a tluk phak che lal tu khom um naw ni hai. 14 I pa Davidan ka lampui hrawa ka thu a zawm ang boka i khawsa ve chun dam sawtna khom pêng ka ti che" a ta. 15 Chun, Solomon chu a thang har a, a mang a nih ti a hriet suok a. Chuongchun, Jerusalemah a kîr nawk a, LALPA Thuthlung Bawm hmaa chun a ngîr a, pumraw inthawina le inremna inthawina thilhlânhai chu a'n hlàn a, chu zoah a khawnbawlhai po po ta dingin ruoi a the a. 16 Thubuoi nei nawchizor pahni hi lal hmaah an hung ngîr a. 17 Pakhat lem chun, "Ka lalpa, hi nu leh hin in khata um hlak kan ni a, chu ina kan um lai chun nau ka nei a. 18 Ka nau a pienga inthoka ni thumnaa chun ama khomin nau a nei ve a. Keini pahni chauh naw chu kan inah mi dang tu khom an um nawh. 19 Hi nu nau hi zânah a thi a, a del hlum a ni nghe nghe a. 20 Zân rilah a tho a, i siehlawnu in lai chun ka bula zâl ka nau chu a lâk a, a zàlpui a, a nau thisa chu ka bulah a hung inzàltir a. 21 Zîngkar ka nau chu nene hang pêk ka tum a, a thi sa a lo ni zing a. Zing khawvarah ka hang en chieng chun ka nau kha a lo ni ta dèr da'l a" a ta. 22 Pakhat lem chun, "Ni hlak a tim ie! A dam lem hi ka naupa a na, a thi lem kha i naupa a nih" a ta. A hmasa lem chun, "A teu naw êm el! A thi hi i naupa a na, a dam hi ka naupa a nih" a ta, lal hmaa chun an insèl ta rak el a. 23 Lal chun, "Hi nu hin 'A dam hi ka nau a na, a thi lem hi i nau a nih' a ta, kha nu khan, 'A thi hi i nau a na, a dam hi ka nau a nih' a ti tlat bok si a. 24 Chuleiin, kawlhnàm hung la ro" a ta, an hung lâk a. 25 Lal chun, "Naute kha a laiah tan bong unla, a chenve chu pakhat kha pe unla, a chenve dang chu pakhat kha pe ro" a ta. 26 Naute dam nu chun a nau chu a lunginsiet êm êm a, lal kuomah, "Pu, lunginsiet takin naute hi ama kha pe el ro. That lul naw ro" a ta. Pakhat lem chun, "A tu khomin chang bîk nawng kan tih. Tan bong ro" a ta. 27 Chu phing leh lal chun, "Naute dam lai kha a hmasa lem kha pe ro, ama ngei kha a nu chu a ni kha" a ta. 28 Israel mihai po poin lal thurem dàn an hang hriet chun maktiin an inza hle a, ro indik taka rêl thiem dingin Pathienin varna a pêk a nih ti an hriet a.

4

1 Solomon chu Israelhai po po chungah lalin a hung um ta a. 2 Hienghai hi hotu lien a hnuoia thokhai chu an nih: Zadok naupa Azaria chu thiempu a nih; 3 Sisa naupa Elihoref le Ahija chu lekha ziektu; Ahilud naupa Jehosafat chu chanchin rikawttu; 4 Jehoiada naupa Benaia chu sipai kawmandar lu tak; Zadok le Abiathar hai chu thiempu; 5 Nathan naupa Azaria chu biel hotuhai inrawitu; Nathan naupa bok Zabud chu lal thiempu le lal mi rawn; 6 Ahisar chu lal in enkoltu; Abda naupa Adoniram chu sinthawa sor luihai hotu a nih. 7 Solomon chun Israel ram pumpui chu biel sawm le pahniin a the a, biel tinah enkoltu lârsâp a sie seng a, chuonghai chun lal le a sûngkuohai fâk ding an ngaituo a, kum khata larsap tin mawphurna chu lal le a sûngkuohai thla khat tlàk ding hung tum seng a nih. 8 Chuong larsaphai hming chu: Efraim tlângramah Ben-Hur; 9 Makaz hai, Salbim hai, Beth Semes hai le Elon Bethanan khuo haiah Ben–Deker; 10 Arubot bielah (Sukot le Heber khom huom sain) Ben-Hesed; 11 Nafot Dor bielah Solomon naunu Tafat pasal Ben-Ahinadab; 12 Tanak khuo, Megido khuo, Jezreel phai monga Zarethan khaw bula um Bet Shan biel po po, Bet Shana inthoka Jokmeam râla um Abel Mehola khuo chenin Ahilud naupa Baana; 13 Gilead biela Ramo khuoah Ben-Geber (ama chun Manase naupa, Gilead biela Jair lobuk po po hai, Basan rama Argob biel po po le kula inhuon, kul kotkhâra dâr tluon hmang khaw ropui tak tak sawmruk chu a chang sa a nih); 14 Mahanaim bielah Ido naupa Ahinadab; 15 Naftali bielah Solomon naunu Basemat pasal Ahimaz; 16 Aser le Alot bielah Husai naupa Baana; 17 Isakar bielah Parua naupa Jehosafat; 18 Benjamin bielah Ela naupa Simei; 19 Gilead biel (Amorhai lal Sihon le Basanhai lal Oga ram po poah) Uria naupa Geber a nih. Hienghai po po bâka hin a ram pum chunga hotu pakhat a la um bok. 20 Judahai le Israelhai chu tuifinriet kama phaiphin anga tam an hung ni ta a, an fâkin an dawn a, hlim takin an khawsa a. 21 Solomon chun Eufretis vadunga inthoka Filistinhai ram chen le Aigupta ramri chena ram po po chungah ro a rêl a. Chuong ram po pohai chun Solomon kuomah sie an hung chawi hlak a, a dam sùng po po chu a khuo le tui an nih. 22 Solomon ni khat khorsaw chu beiphit indip tak kilogram sângnga le beiphit pangngai kilogram sîngkhat; 23 bawngchal, ina chawm thau sawm, bawngchal hlobeta chawm thau sawmhni, beram le kèl zakhat; chu bâka chun sakhi, sangai, sakhi chal le ar thau tak tak hai leh. 24 Solomon chu Eufretis vadung thlang tieng ram po po, Tipsaa inthoka Gaza chena lal a na, a se vela ramhai po po leh inrem takin an khawsa a. 25 Solomon dam sung po chu Dan-a inthoka Beersheba khuo chena inzar Judahai le Israelhai chu mani grèp huon le theichang kung bula muong taka khawsa an nih. 26 Solomon chun tawlailir hnûktu sakor siena in sâng li le sakor sîngkhat le sânghni a nei a. 27 Biel tina lârsâphai chun an thaw hun dinga ruot thla sengah Solomon ta ding le a dawkâna kiltuhai po po fâk ding chu khorsaw an hung pêk seng a, pêk kim lo an nei ngai nawh. 28 Chun, mi tinin an thaw zât dinga bituk ang pei chu a siena dinga ruot hmuna chun sakor tawlailir hnûktu sakorhai le sakor danghai fâk dingin barli le bupawl an hung sie bok hlak a. 29 Pathienin Solomon chu varna le sungril mit varna inthûk tak le thil hriet thiem theina zau tak, tuifinriet kama tiem seng lo tieuvut anga tam a pêk a. 30 Solomon varna chun khawsak mihai varna po po le Aigupta mihai varna po po khom a khûm vong a. 31 Mi po po nêkin a var a, Ezra mi Ethan le Mahol nauhai Heman hai, Kalkol hai le Darda hai nêk khomin a var lem a, a hming chu an se vela hnam po po lai a'n thang ta hle a. 32 Thuvar sângthum a hril a, hla sângkhat le panga a phuok bok a. 33 Thing le ruo le hna nei chi hrim hrim chanchin, Lebanon tlânga sidar thinga inthoka kul banga hung to suok husop chanchin dâm chenin a hriet hne hle a; sa le vate chanchin dâm, bokvâka invâk chihai chanchin dâm le nga chanchin dâm mi a hril hlak a. 34 Khawvela lalhai, Solomon varzie chanchin hre phak taphot chun a varna thu ngaithla dingin a kuomah mi an hung tir a.

5

1 Tura lal Hiram chun Solomon chu a pa Davida thlâktua lala hriek nâl a ni tah ti a lo hriet chun, Davida le inngaina taka lo khawsa hlak a ni leiin Solomon kuoma chun palai a tir a. 2 Solomon chun Hiram kuomah hieng ang hin thu a thon kîr a: 3 "Ka pa Davida kha a sè vel kil tina mihai leh indoa a buoi leiin le a ke hnuoia a hmèlmahai LALPAN a sie vong hma khat chun LALPA a Pathien hming chawitu ding tempul a bawl thei nawh ti i hriet a. 4 Tu ruok hin chu LALPA ka Pathienin sîr tinah muongna a mi pêk a, hmèlma amanih le siet tuok amanih khom a um ta nawh. 5 Chun, LALPAN ka pa Davida kuoma, "I aia lala ka sie ding i naupa chun ka hminga ding tempul chu hung bawl a tih' tia a lo hril tah angin, LALPA ka Pathien ta ding tempul bawl ka tum a. 6 Chuleiin, Lebanon tlânga mi sidar thinghai kha mi phûrpêk dingin thu pe la, ka mihai chu i mihai lai thang vêng an ta, i mihai hlaw chu i ti ang zât zàt pêng ka tih. Sidon mihai ang tluka thing phûr thiem ve ka mihai lai tu khom an um nawh ti i hriet si a" tiin. 7 Hiramin Solomon thucha a lo hriet chun a lawm hle a, "Hi hnam ropui tak chunga rorêltu ding nau var Davida kuoma petu LALPA chu voisun hin inpâkin um raw se" a ta. 8 Chuongchun, Hiram chun Solomon kuomah, "I thu mi hung incha kha ka lo hriet a, sidar thing le far thing chu i mamaw ang ang hung pêng ka ti che. 9 Ka mihaiin Lebanon tlânga inthokin tuipuiah hung tol thlâng an ta, thakna ding hmun i tinaah pûmin hung intol thlâktir ka ta, chu taka chun sût an ta, i lo lâk pei ding a nih. Nang khomin ka sûngkuohai hi fâk ding pein ka insûng mamaw i lo phuhrùk ve ding ni naw nim" tiin thu a thon a. 10 Chuong ang chun sidar thing le far thing chu Solomon mamaw ang peiin Hiram chun a pêk a. 11 Solomon khomin Hiram le a sûngkuohai fâk dingin huit beiphit metric tonb sânghni le oliv hriek tha chi litar nuoi li a thon a, chu chu kum tina Solomonin Hiram a pêk hlak dàn chu a nih. 12 LALPAN a tiem angin Solomon chu varna a pêk a. Hiram le Solomon chun inlaichinna tha tak neiin an inkârah inremna thu an thlung a. 13 Lal Solomon chun Israel ram sûngah sinthawa sor lui mi sîngthum a nei a. 14 Chuonghai chu thla khat peia inthlâk dingin tum khatah mi sîngkhat pei Lebanon-ah a tir a, thla khat zoah an hung kir a, thla hni sûng anni in tieng an um a. Chuonga sinthawa sor luihai inrawituhai hotu chu Adoniram a nih. 15 Solomon chun thil phurtu mi sîngsari le lung sertu mi sîngriet tlânga chun a nei a. 16 Chuonghai bâka chun sinthawhai inrawia an sinthaw keihruoitu mi sângthum le zathum a nei bok a. 17 Lal thupêkin lung lâknaa inthokin lung tha le lien tak tak, a chunga lung an serhai remna ding le tempul thuta hmang dingin an hung lâk a. 18 Solomon le Hiram mistirihai le Gebal mihai chun lunghai chu serin, thinghai chu an ât a, tempul bawlna dingin an buotsai a.

6

1 Israel thlahaiin Aigupta ram an suoksana inthoka kum zali le kum sawmrietna, Israelhai chunga Solomon a hung inlala inthoka kum lina le a thla hnina, Ziv thlaa chun LALPA tempul chu Solomonin a bawl tan a. 2 Solomonin LALPA tempul a bawl chu a dung meter sawmhni pasaria sei, a khang meter kuoa lien, a'n sângzie meter sawmpathum le centimeter nga a nih. 3 Tempul tuolpûk bathlâr chu hmun thienghlim tieta sei, a khang meter kuoa lien a na, tempul kota inthok chun meter li le a chenve a sor dawk a. 4 Tempul banga chun tukver, a puo tieng para a sûng tieng inzui chi, a siem a. 5 Tempul puo tieng, a hnung tieng le a sîr ve vea chun a huol tuokin tempul bang ringsanin pindan sawng thum, sawng tin inkâr chu meter hni le centimeter hnia insângin a bawl a. 6 A sawng hnuoi tak pindan chu meter hni le centimeter hnia lien a na, a sawng lailung chu meter hni le centimeter saria lien a na, a sawng chung tak chu meter thum le centimeter khata lien a nih. Tempul banga a kalkhang rol ngai loa sawng tin chu a hnuoi banga innghat thei dingin sawng tina tempul bang chu a hnuoia mi nêkin a chunga mi chu inphan lem hreta siem a nih. 7 Tempul an bawl lai chun lunghai chu lung làkna hmuna ser sa vong hmang a ni leiin an bawl sûngin tubo vuok ri dâm, hreia thil tuk ri dâm le hriemhrei ri hrim hrim tempul hmuna chun hriet ding a um nawh. 8 A hnuoi tak pindan lûtna chu tempul sim tieng sìrah a um a. A sawnga lawn kaina dingin kailawn inher kuol a um a, chuong ang bokin a sawng chunghnung tak kaina khom chu siem a nih. 9 Chuong ang chun tempul chu a bawl zo a, a chungah sidar kalkhang khangin chu chunga chun sidar thingphêk a dàng a. 10 Tempul bang ringsana bawl pindan sawng po po chu meter hni le centimeter hni senga insânga bawl a na, sawng tinah sidar kalkhang a hmang vong a. 11 Chun, LALPA thu chu Solomon kuomah a hung tlung a, 12 "Tempul chu i lo bawl zo ta a, ka thusuokhai zui a, ka thupêk le dânhai zawma i kengkaw tlat chun, nangma hmangin Davida kuoma ka thu tiem chu sukpuitling ka tih. 13 Israelhai lai chêng ka ta, ka mi Israelhai chu thlathlam ngai naw ning" a ta. 14 Chuong ang chun Solomonin tempul chu a bawl zo ta a. 15 Tempul sûng tieng bang inthuona dingin sidar thingphêk a hmang a, a tuonga inthoka a siling chenin thingphêk a bel vong a, a tuongah fâr thingphêk a pha a. 16 A chawr tieng kil tak meter kuo-a sei chu a tuonga inthoka a siling chenin sidar thingphêkin a ping a, chu chu tempul sûnga Hmun Thienghlimtak chu a nih. 17 Hmun Thienghlimtak lût hmaa pindan chu meter sawmpariet-a sei a nih. 18 Chu pindan sûng tieng po po chu sidar thingphêka inthuo khum vong a na, chu taka chun ûm lim le par vul lai lim a ker a; lung hrim hrim inlang lo dinga arênga sidar thingphêka inkhum vong a nih. 19 Chun, LALPA Thuthlung Bawm siena dingin tempul sûngrila chun pindan a buotsai a. 20 Chu pindan chu a dung meter kuo, a khang meter kuo le a'n sângzie meter kuo a na, rangkachak hlîrin a'n luon khum vong a, chu taka sidar thinga siem maichâm khom chu a'n luon khum bok a. 21 Chuong ang chun tempul sûng tieng po po chu rangkachak hlîr hlakin Solomon chun a'n luon khum vong a, pindan sûngril tak lûtna kotkhâra chun rangkachak khaidiet a thlung a, kotkhâr khom chu rangkachak hlîra inluon khum vong a nih. 22 Tempul sûng tieng cheina hrim hrim le Hmun Thienghlimtaka maichâm khom chu rangkachaka inluon khum vong a nih. 23 Pindan sûngrila chun oliv thinga siem cherub pahnih, meter li le centimeter li ve vea insâng a sie a. 24 Cherub thla khing khat chu meter hni le centimeter hnia sei a na, a thla khing tieng khom meter hni le centimeter hnia sei bok a na, a thla ki hmawr ve ve inkâr chu meter li le centimeter li a nih. 25 Cherub pahnina khom chu meter li le centimeter lia sei bok a na, cherubhai chu an insângzie le lienzie thuhmun char a nih. 26 Cherubhai chu meter li le centimeter lia insâng ve ve an nih. 27 Cherubhai chu pindan sûngril tak, Hmun Thienghlimtaka chun an sie a, thla an zàr a, pakhat thla chun bang khing tieng a va tawk a, cherub pakhat dang thla khomin bang khing tieng chu a va tawk bok a, chu pindan lailung taka chun an thla ki ve ve chu an intawk a. 28 Cherubhai chu rangkachak tuia inluon an nih. 29 Chun, a sûng tieng le puo tieng banga chun a vêl tuokin cherub dâm, tûm thing dâm le pâr vul lai lim dâm a ker a. 30 Sûng tieng le puo tienga tempul tuong po po chu rangkachak tuiin a'n luon a. 31 Chun, Hmun Thienghlim tak lûtna dingin kotkhâr tuok hni oliv thingin a siem a, kotkhâr bieng chu kil nga nei a nih. 32 Oliv thing kotkhâr pahnia chun cherub hai, tûm thing hai le pâr vul lai lim a ker a, chuonghai chu rangkachak sut phêkin a tuom khum vong a. 33 Tempul sûng lûtna kotkhâr kawm chu kil li nei, kil tin inchen vong, oliv thinga siem a nih. 34 Chun, fâr thing hmangin kotkhâr pahni a siem a, kotkhâr tin chu thing phêk hnia siem, kopzaa zom, kei thlep thei a nih. 35 Chuong kotkhâra chun cherub dâm, tûm thing dâm le pâr vul lai lim dâm a ker a, chuonghai chu rangkachak sut phêkin inruol takin a tuom khum a. 36 Tempul hmaa chun kotzawl sùngril lem a siem a, lung insersuon thuo thum le sidar thingphêk thuo khatin a'n huon a. 37 LALPA Tempul thut chu a kum lina, Ziv thla chun an rem zo a. 38 A kum sawm le kum khatna, thla rietna Bul thlaah tempul chu a rel dàn ding ang takin iengkim chu zo fel a ni ta a. Kum sari zet a bawl a nih.

7

1 Ama in ruok chu Solomonin kum sawm le kum thum sûngin a bawl zo chau a. 2 A lal in, 'Lebanon Ramngaw Run' tia a ko chu a dung meter sawmli pali, a khang meter sawmhni pahni le a'n sângzie meter sawmpathum le centimeter nga a na; sidar thing ban tlar thumc a phun chunga chun sidar thing tlungpûm, ât le nawt nâm chu a ban zawn peiah a khang a. 3 Tlar khatah tlungpûm sawm le panga pei a um a, a rêngin tlungpûm sawmli le panga a na, chu chunga chun sidar thingphêk a dàng a. 4 A bang tieng tlar ve vea chun insang takah tukver pathum seng inhma tonin a hong a. 5 Kotkhâr le tukver bienghai chu kil li neia siem vong a na, a banga tukver pathumhai chu a khing tieng tlara tukver pathumhai le inep tuo vong a nih. 6 Ban neiin hulhliepd a siem a, a dung chu meter sawmhni pahnia sei le a khang meter sawmpathum le centimeter nga a lien a nih. A do kàngtu banhai chu a tlarin a phun a, ban le bang inkarah a lûtna ding kailawm a siem a, ban khel chu dithlafarfèmin a hung inkhum a. 7 Chun, rorelna pindan a siem a, chu taka chun lalthungpha a sie a, chu chu rorêlna hmun a nih. A tuonga inthoka siling chen sidar thingphêk a bel khum vong bok a. 8 Chuong ang char chu chu taka inthoka iemani chena hlaah ama umna dingin in a bawl a. Chuong ang bok chu a nuhmei Faraw naunu umna dingin in a bawl bok a. 9 Chuonghai po po chu in inhuonna tuol kot lien taka inthok le a in thuta inthoka dithlafarfèm chenin lung man tam chi, a huntawk ang chara ser, a sûng tieng le a puo tieng hmorhai khom a âtnaa inruol hmara ât vonga bawl a nih. 10 A in thut lungphumhai chu lung tha le lien tak tak, a then meter thum le centimeter nga, a then meter lia sei a nih. 11 Chu chunga chun lung tha tak tak, a huntawk ding ang chara ser le sidar thing tluon a rem a. 12 LALPA tempul kota tuolpûk le in bathlàrhai ang bokin in inhuon sûng tuol zawl lien tak chu lung insersuon thuo thum le sidar thingphêk thuo khata inhuon a nih. 13 Lal Solomon chun Tura khuoa mi Huram a va'n thuoitir a. 14 Ama chu Naftali hnama mi hmeithai naupa a na, a pa chu Tura mi, dâr sut le ser thiem a nih. Huram chu dâr sut le ser tienga chemkal le thiem tak el a ni a, lal Solomon kuoma chun a hung a, a sin ding a ruot po po chu a thawpêk a. 15 Huram chun dâr ban meter rieta insâng le meter nga le centimeter thum biela lien pahni a sung a. 16 Dâr ban sîpa inthut ding a lu kheipar, dâr bokin meter hni le centimeter hnia insâng ve ve pahnih a sûng bok a. 17 Chu lu kheipara chun khaidiet inher thlop chit chet lim pasari a um a. 18 Khaidiet inher thlophai chu theibufai lim tlar hniin an huol tir a, chu chun ban lu kheipar chu a cheimawi a, chuong ang chun a pakhat dang khom chu a siem a. 19 Hulhliep ban sîpa dâr lu kheipar a siemhai chu lili pâr lim anga mawi vong a na, meter khat le centimeter rieta insâng a nih. 20 Chun, dâr ban pahni sîpa a lu kheipara khaidiet inher thlop chunga chun theibufai lim zahni a vel tuokin a sie bok a. 21 Chuong dâr banhai chu tempul hulhliepa chun a phun a, sim tienga ban chu Jakine a'n bûk a, hmar tienga ban chu Boaz a'n bûk bok a. 22 A ban sîpa a lu kheiparhai chu lili pâr ang an nih. Chuongchun, ban siem sin chu zo a ni ta a. 23 Chun, dâr tuizêng lien tak el, meter hni le centimeter hnia insâng, hol tlanga meter li le centimeter lia lien, a rei kuol chu meter sawmpathum le centimeter hnia lien, a sung a. 24 A rei kuol hnuoi chara chun tuiûmf lem zathumin tlar hniin a vel tuokin a'n huoltir a, chuonghai chu tuizêng le a ruola sung nghal vong a nih. 25 Tuizêng chu bawngchal lim sawmpahni chunga innghat a na, bawngchalhai chu pathumin hmar tieng, pathumin sim tieng, pathumin sak tieng, pathumin thlang tieng an ngha a, tui zèng chu an chunga chun a'n thut a, an mei chun sûng tieng a ngha a. 26 Tuizèng bang sazie chu millimeter sawmsari le panga a na, a rei chu lili pâr ang le no rei iner ang a na, tui litar sîngli keng a nih. 27 Chun, dâr bokin nor lir thei bawm sawm a siem a, pakhat pei chu meter khat le centimeter rieta sei, meter khat le centimeter rieta lien le meter khat le centimeter thuma insâng a nih. 28 Bawm tin chu kil li neia siem a nih. 29 A kawm banga chun sakeibaknei lim dâm, bawngchal lim dâm le cherub lim dâm a ker a. Sakeibaknei le bawngchal limhai chung le hnuoia chun pâr thi lim, a suta sut a um a. 30 Bawm thut kil lia chun dâr tawlailir ke pali le a kei virtu dâr kalkhang a um a. Bawm sûng kil tinah dâr maihùn innghatna a um a, chu innghat ban palihai chu pâr thi lim hriela siem, a sunga sung vong a nih. 31 Bawm sina chun a kuolin tuibêl siena ding a um seng a. A chung tieng chun tuibêl chu centimeter sawmli pangain a hung lor suok a, a hnuoi tieng chu centimeter sawmpariet a tlum thung a. A vêl chun mi lim ker a um a. A kawm innghatna ruok chu inkuol loin kil li neia siem a nih. 32 A ke palihai chu dâra siem, centimeter sawmruk paruka insâng, a bawm bang hnuoia inbûk a na, a ke inbûkna kalhai le tawlailir bawm chu sung kop vong a nih. 33 A kè chu tawlailir kè ang a na, a kal hai, a ke kuol tlâng hai, a kuol do nghettu hai le a laivir po po chu thîra sung vong a nih. 34 Chun, a bawm kil lia chun bawm le inzomina a dotu thut a um seng a. 35 A tlâng vêttu centimeter sawmhni pahnia sei thil kuol a um a. A dotu banhai chu a bawm banghai leh sung zom vong a nih. 36 A dona le a bawm banga hai chun hmun ruokna taphotah cherub lim dâm, sakeibaknei lim dâm le tûm thing lim dâm a sie sip vong a, thil lim chuong nawna a tlânghai chu pâr thi lim inher chietin a chei a. 37 Chuong ang chun nor lir thei bawm sawm a siem a, an inang vong a, an intiet vong bok. 38 Chun, insawpna ding dâr maihùn sawm a siem bok a. Maihùn tin chu hol tlanga meter khat le centimeter rieta lien, litar zariet inleng vong a nih. 39 Tempul sim tieng chun thil thut panga a sie a, hmar tieng chun panga a sie bok a; tui zêng ruok chu sim sak kilah a'n thut a. 40 Huram chun insawpna bèl dâm, suodur dâm le berbu dâm khom a siem bok a. Chuongchun, 41 dâr banpui pahni dâm; ban lu bawk, no rei anga inkûm dâm; ban lu bawka khaidiet lem tlar hni a kuola um hai dâm; 42 ban lu bawka theibufai lem zali, ban tinah tlar hnih, tlar tin zakhata a rem kuol hai dâm; 43 nor lir thei bawm sawm le maihùn sawm dâm; 44 dâr tuizêng le a thut bawngchal sawmpahni dâm; 45 bêl dâm, suodûr dâm le berbu dâm chu a nih. Huramin LALPA tempula hmang dinga lal Solomon a siempêkhai po po hi dâr tle chi vonga siem a nih. 46 Hieng thilhai hi Jordan phaizawl Sukot le Zarethan inkâra bêl hemna hmuna lalin a'n sungtir a nih. 47 A tam tham êm leiin hienghai hi Solomon chun bûk chuong loin a sie a, chuleiin a dâr bûk zât rikzie hriet a ni nawh. 48 Solomon chun LALPA tempula hmang ding hmangruo dang khom tam tak a'n siemtir a, chuonghai chu: rangkachak maichâm hai; hlànbei siena rangkachak dawkân hai; 49 Hmun Thienghlim hmaa sie ding khawnvar siena sawm, chang tieng panga le voi tieng panga, rangkachak hlang hlaka a ser hai; rangkachak pârte lim hai, khawnvar hai le chaiche hai; 50 rangkachak maihùn hai, khawnvar phita chep ruolna hai, berbu hai, thlêng hai, mei lâkna hai; Hmun Thienghlimtak pindan kotkhâr le hmun thienghlim kotkhâra inbûk rangkachak kopza po po hai dâm chu a nih. 51 Solomonin LALPA tempula dinga hmangruo an siemtir po po chu zo a ni ta a. Chuongchun, a pa Davida lo inhlân tah tangkaruo le rangkachak le bûr le bêlhai chu a lâk a, LALPA tempula rosum siekhawmnaa chun a sie a.

8

1 Davida khawpui, Zion-a inthoka LALPA Thuthlung Bawm chu Tempula son dinga hung zawn tung dingin Solomon chun Israel upahai, pahnam tina luhai le sûngkuo tina luhai chu a kuoma hung inlang dingin Jerusalemah a ko khawm a. 2 Israel mi po po chu thla sarina, Ethanim thlaa kûta chun Solomon kuomah an hung inkhawm a. 3 Israel upahai an hung tlung chun thiempuhai chun Bawm chu an zawn a. 4 LALPA Bawm an zawn ruol chun Intuokna Puon in le a hmangruo le bûr le bêl po po chu thiempuhai le Levi chia mihai chun an zawn sa bok a. 5 Lal Solomon le a kuoma Israel mi pungkhawm po po chu Bawm hmaa chun an fe a, beram le bawng tam tak, a zât inchik sèng lo le tiem sèng lo chun an inthawi a. 6 Thiempuhai chun LALPA Thuthlung Bawm chu a umna ding, tempul sûngril, Hmun Thienghlim Taka chun an lâk lût a, cherub thla zàr hnuoia chun an sie a. 7 Cherubhai chun Thuthlung Bawm chungah thla an zàr a, an thla chun Bawm le a zawnfung chen chu a zâr khum a. 8 A zawnfung hmawr chu Hmun Thieng Tak kotkhâra inthokin hmu thei a na, puo tienga inthok ruok chun hmu phâk a ni nawh; chuong ang chun tu chen hin a la um zing. 9 Aigupta rama inthoka an suok hnunga LALPAN Horeb tlânga Israel thlahai kuoma thu a thlung laia Mosien LALPA Thuthlung inziekna lungphêk pahni a sie chauh naw chu Bawm sûnga chun ieng dang khom a um nawh. 10 Chun, thiempuhaiin Hmun Thienghlim Tak an suoksan charin LALPA in chu sûmin a hung inkhum ta mup a. 11 Sûm lei chun thiempuhaiin rong khom an bawl thei ta naw hiel a, LALPA ropuinain Tempul chu a sip si a. 12 Solomon chun, "LALPA chun sûm sà mupah hung chêng ka tih i lo ti ta hrim a. 13 A nih, kumkhuoa i chêngna ding, i ta dingin Tempul mawi tak el ka bawlpêk ta che ie" a ta. 14 A hmaa chun Israel mi pungkhawmhai po po chu an ngîr a. Solomon chun anni tieng a ngha a, mal a sawm tawl a: 15 "LALPA, Israelhai Pathienin bau ngeia ka pa Davida kuoma thu a lo tiem tah chu ama kut ngeia a hung hlen suok tah leiin ama chu inpâkin um raw se. 16 Ama chu, 'Aiguptaa inthoka ka mi Israelhai ka thuoi suoka inthok khan Israel hnamhai khuo laia a ieng khom hi ka hming umna ding Tempul bawlna dingin ka la thlang ngai naw a, amiruokchu ka mi Israelhai chunga rorêltu dingin Davida hi ka thlang a nih' titu kha a nih. 17 Ka pa Davida khan Israel Pathien, LALPA hminga ding Tempul bawl a lo tum hlak a. 18 Sienkhom ka pa kuomah LALPAN, 'Ka hminga ding Tempul bawl nuomna lungril i nei hi i thaw tha ngot el. 19 Amiruokchu, nang chu ka Tempul bawltu ding i ni nawh, i naupa, i thàlbea inthoka suok ngei chu ka hminga ding Tempul bawltu ding chu a nih' tiin a lo hril a. 20 LALPAN a thutiem chu a hung suknghet a, a tiem tah ang ngeiin kei chun ka pa Davida chu ka hung thlàk a, tu hin Israelhai lalthungphaah ka hung inthung ta a, LALPA Pathien, Israelhai Pathien hminga ding Tempul chu ka lo bawl ta ngei bok a. 21 Chu taka chun Thuthlung Bawm siena ding hmun ka ruot a, chu Thuthlung Bawma chun LALPAN Aigupta rama inthoka ei pi le puhai a thuoi suok hnunga an kuoma thu a thlung, LALPA thuthlung inziekna lungphêk chu a um a nih" a ta. 22 Solomon chu Israel mi pungkhawm po po hmuah LALPA maichâm hmaa chun a ngîr a, vân tieng banin kut a phar a, 23 a tongtai a: "Aw LALPA, Israelhai Pathien, lungril po poa i lampui hrawtu i siehlawhai kuoma i hmangaina thuthlung vong tlattu, nangma ang hi chung tieng vâna le hnuoi tieng leihnuoiah Pathien dang hrim an um nawh. 24 Ka pa, i siehlaw Davida kuoma bau ngeia thu i tiem chu i hung hlen a, chu chu voisuna kan hmu hi a nih. 25 "Tu hin aw LALPA, Israelhai Pathien, ka pa Davida kuoma, 'Ka mithmua i um dàn anga i thlahai khom ka mithmua fimkhur taka an um ve phot chun, Israel lalthungpha hluotu ding mi chu invai ngai naw ti nih' tia thu i lo tiem kha vong ngei dingin ka ngèn che. 26 Aw Israelhai Pathien, ka pa Davida kuoma thu i tiem kha hung intlungtir ngei rawh. 27 "Amiruokchu, nang Pathien meu chu hnuoi mihai lai i chêng nuom tak tak ding am a ni? Vânhai, vân insâng tak hmanin an dawl zo naw che a na, hi ka Tempul bawla lem hin chu i va hang inleng naw nasa zuol awm de aw! 28 Chuong sa khom chun aw LALPA Pathien, zangaina hnia i siehlaw tongtaina hi lo ngaisak la, voisuna i hma ngeia tongtaia i siehlaw hung kona che hi lo ngàithlapêk hràm rawh. 29 'Chu taka chun ka hming chu um a tih' i lo tina hmun tieng hi ngha a, i siehlaw hung tongtaina chu i lo ngàithlàk theina dingin, hi Tempula hin sûn le zânin mit inlèn zing hlak rawh. 30 Hi hmun tieng hi nghaa i siehlaw le i mi Israelhai dawvàn hung kaina chu lo ngàithlapêk rawh. I chêngna vâna inthok chun lo ngaithla la, i hriet pha leh lo ngaidam hlak rawh. 31 "Mi tu khomin a tuolbawm poi a tawk a, inkhàm hiel a lo ngai a, hi Tempula i maichâm hmaa thu inkhâm dinga a hung pha chun, 32 vâna inthokin lo ngàithla la, che nghal la, i siehlawhai chungah ro hung rèl la, a thiem naw lem lu chunga chun a thil suol thawna maw chu intlâktir la, poi tawk nawtu chu thiem inchangtir la, a thiemzie chu namnghet rawh. 33 "Nangma lakah an suol leia hmèlmahaiin i mi Israelhai an hnè changin, nangma tieng hung ngha a, i hming lam a, hi Tempula hin ngaidam an hung inhni pha chun, 34 vâna inthokin lo ngàithla la, i mi Israelhai suolna chu ngaidampèk la, an pi le puhai kuoma ram i pèka chun thuoi kîr nawk rawh. 35 "I mihaiin i lakah thil suol an thaw leia vânin ruo hrim a'n sûrtir ta naw changin, hi hmun tieng hi nghaa hung tongtai a, i hming lam a, i hrem leia an suolhai an sim pha chun, 36 vâna inthokin lo ngàithla la, i siehlaw, i mi Israelhai suolna chu lo ngaidam la, an khawsak dàn ding lampui indik kawkhmu la, i mihai rochana i pêk rama chun ruo hung insûrtir rawh. 37 "A ramah tàm tla a, hripui dâm, inlawngna dâm le hmonna hri dam inlèng a, khauthikthi le tuktulung dâm intâm a, an khuo khaw lai khom hmèlmahaiin inhuol a, sietna le hri le hrài ieng khoma a tlàk buok chàngin, 38 i Tempul tieng kut hung phar a, hrem an tuor dàn chit chu mani lungril sengah pai a, i mi Israelhai laia mi tu khomin i kuomah tongtaia hnina an hung intlun chàng chun, 39 i chêngna vâna inthokin lo ngàithla la, ngaidam la, che la, an ngaituona seng i hriet leiin an nina ang peiin thaw rawh, nangma chauh hi mihriem po po lungril hretu i ni si a. 40 Chuongchun, kan pi le puhai kuoma ram i pêka hin an um sûng chun ieng lai khomin nangma ti nachàng hung hre pha tâng an tih. 41 "Ram dang mi, i mi Israel mi ni ve lo, sienkhom i hming leia ram hla taka inthoka hung pantuhai che khom, 42 (i hming ropui tak le kut hrât tak phara i thawpêkzie hi mihaiin an la hung hriet pei ding a ni si leiin) Tempul tieng nghaa an hung tongtai pha chun, 43 i chêngna vâna inthokin lo ngaithla la, ram dang mi thil hni ang chu lo thawpêk la, chuongchun i mi Israelhai ang bokin khawvela hnam tinin i hming hung hrea tiin, hi ka Tempul bawl hin i hming a put ngeizie hung hre thei an tih. 44 "I mihaiin hmèlmahai an bei pha, i tirna hmun chu khaw tieng khom ni sien, i khawpui thlang le i hminga ding Tempul ka bawlna hmun tieng hi nghaa LALPA kuoma an hung tongtai chun, 45 i chêngna vâna inthokin an tongtaina le hnina chu lo ngàithlapêk la, an hnina chu lo pompêk rawh. 46 "I lakah thil suol an thaw a, (tu khom suol lo an um bok si naw a), an chungah i lung a sen a, hmèlma kutah i pèk a, an ram tieng, hnâi tè amanih hla tak amaniah sala an thuoi pha, 47 sala an thuoina hmunah hung inngaituo suok a, insîr a, an intàngna rama inthokin hung ngèn a, 'Thil suol kan lo thaw a, poi kan lo tawk a, rilo takin kan lo khawsa a nih' an ti pha, 48 an hmèlmahai, sala thuoituhai rama inthoka lungril le thlaraua nangma tieng hung ngha kîr a, an pi le puhai i pêk ram tieng, i khawpui thlang le i hming dinga ka bawl Tempul tieng hi nghaa an hung tongtai pha chun, 49 i chêngna vâna inthokin an tongtaina le hnina chu lo ngàithlapêk la, an hnina chu lo pompêk la, 50 i mipuihai thil suol thaw chu lo ngaidam la, an poi tawkna po po chu ngaidam la, sala mantuhai chu inlunginsiettir rawh; 51 i mi, i rochanhai, Aigupta rama inthoka rawtuina pûma inthoka i hung thuoi suokhai an ni si a. 52 "I siehlaw hnina le i mi Israelhai hnina lakah i mit insim ngai naw la, an hung ko pha che lo ngàithlapêk hràm rawh. 53 Aw LALPA Pathien, Aigupta rama inthoka kan pi le puhai i thuoi suok laia i siehlaw Mosie hmanga i puong tah ang khan, i rochan dinga khawvel hnam po po laia i ser hrang bîk an ni si a" tiin. 54 LALPA kuoma a tongtaina le hnina po po Solomonin a'n sam zo chun vân tieng kut phara a dingthathuonna LALPA maichàm hmaa inthok chun a tho a. 55 Chuongchun a ngîr a, rawl inring takin Israel mi pungkhawm po po chu mal a sawm a: 56 "A thutiem anga chawldamna Israelhai petu LALPA chu inpâkin um raw se. A siehlaw Mosie hmanga thil tha a lo tiem po po chu pakhat khom a'n khèl nawh. 57 Ei thlatuhai kuoma LALPA Pathien a um hlak ang bokin ei kuoma khom um sien la, mi thlathlam loin mi màksan ngai bok naw raw se. 58 Ei thlatuhai kuoma thu a pêk hai, ruot hai le dàn hai chu zawm a, lungril po poa a lampuihai ei hraw theina dingin ei lungrilhai chu ama tieng innghattir raw se. 59 Ni tina ei mamaw ang peia a siehlaw chungthu le a mi Israelhai chungthua kut a rol theina dingin LALPA kuoma hnina ka'n tlunhai po po hi sûn le zânin LALPA ei Pathien kuoma chun châm zing raw se. 60 Chuongchun, hnuoia mi po poin LALPA chu Pathien a nizie le ama naw chu tu khom an um nawzie hung hre thei tâng an tih. 61 Amiruokchu, voisun ang hin a thuruothai le thupêkhai chu nunpuia zawm tlat dingin in lungrilhai chu LALPA ei Pathienah a kop tlat ding a nih" tiin. 62 Lal le Israel mihai po po chun LALPA hmaah inthawina an inhlàn a. 63 Solomon chun LALPA kuomah inremna inthawinain bawngchal sînghni le sânghni le beram nuoi khat le sînghni a'n hlân a. Chuong ang chun lal le Israel mihai po po chun LALPA tempul chu an inhlàn a nih. 64 LALPA hmaa dâr maichâm chu pumraw thilhlân dâm, bu le bâl thilhlân dâm le inremna thilhlâna a thauhai inhlànna dingin a chin taluo leiin, chu ni ma chun LALPA tempul hma zawna tuolpûk lailung chu lalin a'n hlàn thienghlim a, chu taka chun pumraw thilhlânhai, bu le bâl thilhlânhai le inremna thilhlâna a thauhai chu a'n hlàn a. 65 Chu tum chun Solomon le Israel mipui pungkhawm, Hamath kotsuoa inthoka Aigupta ruom chena mi fe khawmhai chun kût chu an hmang a. LALPA ei Pathien hmaah ni sari an hmang phot a, ni sari dang an hmang zom nawk a, a rêngin ni sawm le ni li sûng zet an kût tlàng a. 66 A tumtiek tûk chun mipui chu lalin a'n tintir a. Mipui chun lal chu mal an sawm a, LALPAN a siehlaw Davida le a mi Israelhai chunga a thatna chuong ang zozai a'n langtir lei chun lungril hlim tak le lawm takin an in tieng an kîr tawl ta a.

9

1 Solomonin LALPA tempul le ama in a nuom dàn ang taka a bawl zo hnung chun, 2 kha hmaa Gibeon-a LALPA a hung inlàr ang khan Solomon kuomah a hung inlàr nawk a. 3 LALPA chun a kuomah, "Ka kuoma tongtaia i hung hni kha ka lo ngaithlâk a, hi i Tempul bawl hi kumkhuoa ka hming umna dingin ka sukthienghlim ta a, chu taka chun ka mit le ka lungril fu zing hlak a tih. 4 "Nang khom i pa Davida anga lungril ringum tak le ngîl tak puta ka hmaah i khawsa ve a, ka thupêkhai po po zui a, ka thusuokhai le dânhai po po i zawm chun, 5 i pa Davida kuoma, 'Israelhai lalthungpha hluotu ding mi invai ngai naw ti nih' tia ka lo tiem tah angin, Israelhai chungah i lalthungpha chu kumkhuoin suknghet ka tih. 6 "Amiruokchu, nang le i nauhaiin in mi nghatsan a, ka thupêkhai le thusuokhai zawm lo a, pathien dang rong bawla in biek chun, 7 ka pêk tah hi rama inthok hin Israelhai chu sukbo ka ta, ka hminga dinga ka sukthienghlim tah hi Tempul hi hnawl bok ka tih. Chu pha chun Israelhai chu hnam tin laia mi nuizatbûr le hmusit hung nîng an tih. 8 Tu hin hi Tempul hi ropui hlein inlang sienkhom, a fe pèl taphotin maktia deusawin, 'Iengti lawm lawma LALPA an Pathienin hienga a ram le Tempul hi a thaw el am nîng a ta?' la ting an tih. 9 Mihai chun, 'Aigupta rama inthoka an pi le puhai thuoi suoktu LALPA an Pathien chu an nghatsan a, pathien dang an chel a, an biek a, an rong an bawl leiin hieng sietna po po hi an chungah LALPAN a hung intlungtir a nih' tiin la don an tih" a ta. 10 Solomonin kum sawmhni sûngin LALPA Tempul le lal in chu a bawl zo a. 11 Chu sûnga sidar thing hai, far thing hai le rangkachak a mamaw zât po po chu Tura lal Hiramin a tumpêk vong leiin Solomon chun Galili biela khaw sawmhni a pêk a. 12 Solomonin khuo a pêkhai chu en dingin Hiram chu Turaa inthokin a'n thok suok a, a hmu chun a lung a awi naw hle a. 13 Hiram chun Solomon kuomah, "Ka unaupa, khuo i mi pêkhai hi ieng ang khuo am an ni ta le?" a ta, a khuohai chu 'Kabulg ram' tiin a'n bùk a, chu hming chu tu chen hin a la put zing a nih. 14 Chun, Hiram chun lal Solomon chu rangkachak kilogram sângli dang a thon nawk a. 15 Solomonin sinthawa a sor luihai chu LALPA Tempul le ama lal in le a in thuthai bawltu ding dâm, Jerusalem kul dâm, Hazor khuo dâm, Megido khuo dâm le Gezer khuo dâm bawl tha dinga a sor an nih. 16 Gezer khuo chu Aigupta lal Faraw-in a hmain a rûn a, a lâk a, a raw a, Kanan mi chênghai po po a that vong a, chu zoah a naunu, Solomon nuhmei a'n somtir a nih. 17 Solomon chun Gezer khuo chu a'n din thar nawk a. Beth Horon thlang hnung lem dâm, 18 Baalat khuo le Israel ram thlalèra Tamar khuo dâm, 19 thil a siekhawmna khuohai, tawlailir le sakor a siena khuohai, Jerusalem le Lebanon le a op ram sûnga bawl dinga a ti po po chu a bawl bok a. 20 Chun, Israel mi ni ve lo, Amor mi hai, Hit mi hai, Periz mi hai, Hiv mi hai le Jebu mi la um sun hai, 21 chuong mihai thla, Israel mihaiin an sukchimit thieng lohai chu an nih Solomonin a sor luihai chu, tu lai chena an thaw dàn ang hin. 22 Israel mihai ruok chu Solomonin suokah a siem ve naw a, sipaia dâm, sorkar thoktua dâm, ofisar-a dâm, kaptena dâm, a sakor tawlailir le sakor chung chuong mi kawmandara dâm a hmang thung a. 23 Chuonghai chu Solomonin in bawl prawzek-hai chunga hotu bik le sinthawhai vêngtu mi zanga le sawmnga a ruoihai chu an nih. 24 Davida khawpuia inthoka Solomonin a bawlpèk ina Faraw naunu a hung inson hnung chun a inthuthai khom chu a siem tha a. 25 Solomon chun kum tinin LALPA ta dinga maichâm a siema chun pumraw thilhlân le inremna thilhlânhai chu voi thum inhlànin, LALPA hmaa chun rimtui rawin a'n thawi zie a, tempul dânin a phûthai chu a hraw kim hlak. 26 Lal Solomon chun Edom rama Elath bul, Agaba litengsawla um Ezion Geber-a chun long ruol a'n siemtir a. 27 Hiram chun a longpu ruol, tuinfinrieta che thanghai chu longa Solomon siehlawhai chu thangpui dingin a tir a. 28 Chuonghai chu Ofir-ah an fe a, rangkachak kilogram sîngkhat le sângli chuong an hung hawn a, Solomon an hung pêk a.

10

1 Solomon hming inthangzie le LALPA hming le an inkungkeina chanchin Seba lalnuin a lo hriet chun thu khir tak taka fie tumin a'n thok suok a. 2 Hnungzuitu tam tak le sanghawngsei tam tak thuoiin Jerusalemah a hang fe a, rimtui le rangkachak le lunghlu tam tak a phur teuh bok a. Solomon kuom a tlung chun lungrila indon nuom a nei po po chu phorin a'n don a. 3 A thu indon taphot chu lal Solomon chun a don vong a, hriet naw le hrilfie harsa ti hrim a nei nawh. 4 Seba lalnu chun Solomon varzie chu a hriet a, a in bawl ropuizie hai a hmu a; 5 Solomon dawkâna fâk ding an hung siehai dâm, a khawnbawl thung khup el hai dâm, rongbawltuhai le an inchei dàn mawizie hai dâm, uoiin semtuhai dâm le Tempula pumraw inthawinaa thil a'n hlân tamzie hai dâm Seba lalnuin a hmu chun maktiin a ngaina a hriet naw hiel a. 6 Lal kuoma chun, "I thilthawhai le i varzie hai ka rama inthoka ka lo hriet kha a lo indik khop el. 7 Keima hunga mit ngeia ka hmu hma chun ka lo awi ngai naw a, a chenve khom an mi lo hril naw lem a ni hi tie! Varna le hausaknaah an hung hril nêk daiin i lo insâng lem a nih. 8 I mihai hi ieng ang lawma hamtha am an na! I bula chêng, i varna thu ngaithla roptu i siehlawhai hi an va hang hamtha ngei de aw! 9 LALPA i Pathien, a lawmtu che le lalthungphaa sietu che chu inpâkin um raw se. LALPAN kumkhuoin Israelhai a hmangai leiin fel taka an rorêltu dingin a sie che a ni hi" a ta. 10 Chuongchun, lal kuomah thilpêk rangkachak kilogram sângli le rimtui le lunghlu tam tak a pêk a. Seba lalnuin rimtui Solomon a pêk ang zozaia tam chu tukhomin an pêk nawk ta ngai nawh. 11 (Hiram long ruol Ofira rangkachak tam tak phura fehai chun almuk thing tam tak le lunghlu an hung phur teu bok a. 12 Lal chun almuk thinghai chu LALPA Tempul le ama lal in thut do nghetna dingin a hmang bâkah rimawi tumtuhai hmang ding tingtang le perkhuong siemnain a hmang bok a. Chuong ang zozâia tam almuk thing chu a hnungin an lâk lût ta ngai naw a, an hmu ta ngai bok nawh. ) 13 Lal Solomon chun Seba lalnu dit le hni taphot chu a thawpêk bâkah a lal ina rosum tam tak a pêk bok a, chuongchun a rawihai leh ama ram tieng a kîr nawk ta a. 14 Kum tina Solomon kuta rangkachak lût zât chu kilogram sînghni le sângthum a nih. 15 Chu bâka chun sumdawngtu le thil zortuhai le Arab lalhai le a ram optuhaia inthokin sie le leiman a hmu teuh bok a. 16 Lal Solomon chun rangkachak sut phêkin phaw lien tak tak zahni a siem a, phaw pakhat peiah rangkachak kilogram thum le gram sawmnga vel an hmang a. 17 Chun, rangkachak sut phêk bokin phaw chin lem zathum a siem bok a, phaw pakhat peiah rangkachak kilogram khat le gram sawmsari an hmang a. Chuonghai chu a lal in 'Lebanon Ngawpui Rûn' a chun a sie a. 18 Chun, lal chun saiha ngotin lalthungpha ropui tak a siem bok a, chu chu rangkachak tuia inluon vong a nih. 19 Lalthungpha kai tungna chu kailawn paruk a um a, lalthungpha hnung tieng chu a'n kuol pup a, thungna sîr ve vea chun kut innghatna bân a um a, chu sîr ve vea chun sakeibaknei lem an ngîr a. 20 Kailawn paruka chun sakeibaknei lem sawmpahnih, kailawn sir tinah pakhat pei an ngîr a, chuong ang chu khaw lai rama khom an la siem ngai nawh. 21 Lal Solomon no po po chu rangkachaka siem vong a na, Lebanon Ngawpui Rûna a bûr le bêlhai chu rangkachak hlîr hlaka siem vong a nih. Solomon dam lai chun tangkaruo chu ieng thama ngai a ni naw leiin a bûr le bêlhai chu tangkaruoa siem hrim hrim a um nawh. 22 Lal chun tuifinrieta Hiram long ruol le inzin hlak sumdawng long ruol a nei a, chuonghai chun kum thum dan peiah rangkachak dâm, tangkaruo dâm, saiha dâm, zawng le ngau lien chi dâm an hung phur hlak a. 23 Hausakna le varnaah Solomon chun khawvela lal dang po po a khûm vong a. 24 Pathienin a lungrila varna thu a siepèk chu ngaithla dingin khawvela mi po poin Solomon chu an hung pan huoi huoi hlak a. 25 Chun, kum tinin a kuoma hung taphotin thilpêk tangkaruo le rangkachaka siem thil dâm, silfèn dâm, râlthuom dâm, rimtui dâm, sakor dâm le sabengtung dâm an hung chawi hlak a. 26 Solomon chun tawlailir sângkhat le zali le sakor sîngkhat le sânghni a nei a, chuonghai chu tawlailir siena khuoa hai le Jerusalemah ama kuomah a sie a. 27 Lal chun Jerusalemah thil a hau êm leiin tangkaruo dâm chu lungte angina a tam a, sidar thing khom tlâng thuta theichang bil ang hielin a tam bok. 28 Solomon sakorhai chu Musri le Kilikih rama inthoka a lâk deu vong a nih. Chu taka inthok chun lal sumdawnghaiin a honin an inchawk hlak a, 29 tawlailirhai chu Aigupta rama inthokin pakhat peiah tangkaruo shekel zaruk le sakor chu tangkaruo shekel za sawmnga peiin an inchawk a. Chun, Hit mihai le Aram lalhai kuomah an zor sawng bok a.

11

1 Solomon chun Faraw naunu chauh naw khom nuhmei dang tam tak Moab mi dâm, Amon mi dâm, Edom mi dâm, Sidon mi dâm, Hit mi dâm a hmangai a. 2 Chuong hnamhai chu an nih LALPAN Israelhai kuoma, "Anni leh innei pol naw ro, an pathien tieng innghattir ngei ngei an ti cheu" tia a lo hril chu. Chuong sa khom chun Solomon chun nghet takin a hmangai tawl tlat si a. 3 Lal naunu ringot khom nuhmei zasari a nei a, hmei zathum a nei bok a, a nuhmeihai chun a lungril an thuoi kawipêk ta a. 4 A hung upat hnung chun Solomon lungril chu a nuhmeihaiin pathien dang tieng an inpêttir a, a pa Davidan lungril po po LALPA Pathien tieng a pêk ang khan a pêk ve ta naw a. 5 Sidonhai biek pathiennu Astoret dâm le Amonhai pathien tirdakum Moleki dâm a zui ve el ta a. 6 Solomon chun LALPA mithmuin thil suol a lo thaw ta a, a pa Davidan LALPA a zui angin a zui pumhlum zo ta nawh. 7 Chuongchun, Jerusalem suo tieng muolah Solomon chun Moab-hai pathien tirdakum Kemos ta ding le Amon-hai pathien tirdakum Molek ta dingin hmun sàngj a siem a. 8 Chuong ang bokin hnam dang mi a nuhmeihai ta ding sengin an pathienhai kuoma inthawina le rimtui inhlànna ding hmun sàng a siempêk bok a. 9 LALPA Israelhai Pathien, a kuoma voi hni zet hung inlàr tah chu Solomonin a lungrila a nghatsan tàk leiin a chungah LALPA a lungsen hle a. 10 Pathien danghai zui lo dingin khap sienkhom Solomon chun LALPA thupêk chu a zawm si nawh. 11 Chuongchun LALPAN Solomon kuomah, "Hieng hi i khawsak dàn a lo ni ta a, ka thuthlung le thuruothai zawm dinga thu ka pêkhai che chu i zawm nuom si naw leiin i kuta inthokin i lalram hi lapêk ka ti che a, i hnuoia mi pakhat kuomah pêng ka tih. 12 Amiruokchu, i pa Davida zârin, chuong thil chu i dam lai êm chun thaw naw ning, i naupa kuta inthokin la hmang lem ka tih. 13 I pa Davida zàr le ka khawpui thlang Jerusalem zàrin, a ram pumpui chu lapêk vong loin hnam khat chu la pe hrâm ka tih" a ta. 14 Chuongchun, Edom mi Hadad, Edom lal sûngkuoa inthoka hung suok chu Solomon hmèlmaah LALPA chun a hung indin suok a. 15 Chu hma chun, Davidan Edom mihai a do laiin an mithihai phûm dinga hang fe a sipai kawmandar Joab chun Edom mihai chu a that vong a, 16 Edom rama pasal po po an that vong hmà khat chu Joab le Israel mihai chu thla ruk zet Edom ramah an inkul a nih. 17 Chu lai chun Hadad chu naupang te chauh a la ni a, a pa hnuoia sinthawtuhai leh Aigupta ramah an tlàn a. 18 Midian rama inthokin an suok a, Paran-ah an fe a, Parana inthok chun mi thuoiin Aigupta an pan a, Aigupta lal Faraw chun in le ram pein, fâk ding a lo ngaituopèk a. 19 Hadad chun Faraw mit a tlung êm leiin a nuhmei, lalnu Tapenes sangnu chu nuhmeiah a'n neitir a. 20 Tapenes sangnu chun naupa a hming Genubat a neipèk a, Tapenes chun a enkol a, Faraw nauhai lai chun a khawsa ve ta a. 21 Lal Davida chu a thlatuhai lai a chawl tah ti le a sipai kawmandar Joab khom a thi tah ti Aigupta rama inthoka Hadad-in a lo hriet chun Faraw kuomah, "Ka rama ka kîr nawk theina dingin ka suok mi phalpèk rawh" a ta. 22 Faraw chun a kuomah, "Ka kuoma i um hin iem tlâksam i nei a, chuonga i ram tienga kîr nawk i nuom el chu?" a ta. Hadad chun, "Tlâksam lem chu ieng khom ka nei nawh, sienkhom mi'n fetir hrim hrim raw khai" a ta. 23 Chun, Eliada naupa Rezon, a pu Zoba lal Hadadezer kuoma inthoka tlân hmang chu Pathienin Solomon hmèlmaah a hung indin bok a. 24 Davidan Zoba sipaihai a that lai khan ama chun mi a khawm a, chuong helpawlhai thuoitua chun a thang a, Damaska khuoah an fe a, an hne a, ama chu lalin a um a. 25 Hadad-in buoina a siem bâkah Solomon dam sûng po po chun Rezon chu Israelhai hmèlma a ni zing a, Aram-ah lalin a um a, Israelhai a theida hle a. 26 Chun, Nebat naupa Jeroboam khom Solomon lakah a hel a. Ama chu Efraim mi, Zeredaa inthoka hung, Solomon thoktu laia pakhat a na, a nu Zarua chu hmeithai a nih. 27 Solomon laka a hel dàn chanchin khom hieng ang hin a nih: Solomon chun lal in innghatna thut zawl do nghettu ding a siem bâkah a pa Davida khawpuia kul inhuonna bang se lai po po chu a thol tha a. 28 Jeroboam chu mi huoisen hmingthang a na, tlangvàl taima tak a nih ti Solomonin a hmu chun Josefa sûngkuoa sinthawa sor luihai po po chunga hotuah a sie a. 29 Chuong hun lai chun Jeroboam chu Jerusalema inthokin a suok a, Silo khuoa zawlnei Ahija, silfèn thara inthuom chun lam lakah a lo hmu a, an pahni chauin ram hnuoia chun an um a. 30 Ahija chun a hâk lai silfèn thar hlok chu phel sawm le phel hniin a pot thlêr a. 31 Ama chun Jeroboam kuomah, "Phel sawm hi la rawh. LALPA Israelhai Pathien chun hieng hin a hril: 'Ngai rawh, lalram hi Solomon kuta inthokin ka lâk hmang ding a na, hnam sawm chu ka pêk ding che a nih. 32 Amiruokchu, ka siehlaw Davida le Israel thla po pohai khawpui laia ka khawpui thlang bîk Jerusalem zârin hnam khat chu la chang a tih. 33 Ama chun a mi nghatsan a, Sidonhai pathiennu Astoret dâm, Moab-hai pathien Kemos dâm, Amon thlahai pathien Molek dâm a biek a, a pa Davida anga khawsa loin, ka lampui a hraw naw a, ka mithmuah thil indik lo a thaw a, ka thupêkhai le ka dânhai a zawm bok nawh. 34 'Sienkhom, a pa Davida, ka siehlaw le ka thlang, ka thupêkhai le thuruothai zawmtu zârin a ram pumpui ruok chu Solomon kuta inthokin lâkpêk nawng ka ta, a dam sûng bêk chu lalah inumtir ka tih. 35 A naupa kuta inthokin lalram chu lapêk ka ta, hnam sawmhai chu ka pêk ding che a nih. 36 Amiruokchu, ka hming umna dinga ka thlang Jerusalema hin ka siehlaw Davida thlahaiin rorêltu an nei zing theina dingin a naupa kuomah hnam khat chu la pe hrâm ka tih. 37 'Nang ruok hi chu ka ruot che a, i nuom dàn ang takin ro rêl i ta, Israelhai chungah lal nîng i tih. 38 Thu ka pêkhai che po po anga thaw a, ka lampui hraw a, ka siehlaw Davidan a thaw anga ka thuruothai le thupêkhai kengkaw a, ka mithmuah thil indik i thaw phot chun i kuomah um ka ta, Davida ka'n din nghet ang bok khan i sûngkuo indin nghet ka ta, Israelhai hi pêng ka ti che. 39 Hi lei hin Davida thlahai chu suktlawm ka ta, sienkhom kumkhuo chun ni naw nih' a tih" tiin. 40 Chuongchun, Solomon chun Jeroboam chu that a tum a, sienkhom Aigupta lal Sisak kuomah a tlân a, chu taka chun Solomon thi hma khat chu a um ta zing a. 41 Solomon inlal sûnga thil tlunghai, a thilthaw po po le a varna thuhai chu Solomon chanchin inziekna buah a chuong. 42 Solomon chun Jerusalema inthokin Israelhai chungah kum sawmli ro a rêl a. 43 Chuongchun, Solomon chu a thlatuhai kuomah a chawl a, a pa Davida khawpuia chun an phûm a, a naupa Rehoboam chun lalna chu a hung hluo ta a.

12

1 Rehoboam chu Sekem khuoah a fe a, Israel mihai po po khom chu lala siem dingin chu taka chun an fe ve a. 2 Nebat naupa Jeroboam, lal Solomon leia Aigupta rama tlân hmang chun chu ri chu a lo hriet a, Aigupta rama inthokin a kîr nawk a. 3 Israel mi pungkhawmhai po po chun Jeroboam chu an ko a, ama rawiin Rehoboam kuomah an fe a, 4 "I pa khan kan phur a sukrik taluo a, inrim taka a mi sorna le ringkol rik tak a min phurtir hi tuhin mi sukzângpèk la, i rong bawl kan tih" an ta. 5 Rehoboam chun, "Kîr nawk ta inla, ni thum hnungah hung nawk ro" a ta. Chuongchun, mipuihai chu an fe hmang ta a. 6 Lal Rehoboam chun a pa Solomon dam sùng po poa a hnuoia sinthaw hlak upahai chu a rawn a, "Hieng mipuihai hi iengti anga don dingin am in ngai a?" a ta. 7 Anni chun, "Voisun hin an siehlawah um a, an rong bawl a, tha taka i don tawl phot chun kumkhuoin i siehlawah um an tih" an ta. 8 Sienkhom, upahai remruotpui chu Rehoboam chun pom loin, ama ruoltlâkpui tlangvàl ruol, a bula khawsa hlakhai chu a rawn lem a. 9 An kuomah, "Iem in ngaidân ve chu? Mipuihaiin, 'I pa ringkol min phurtir hi mi sukzângpèk deu rawh' an ti hi iengtin am ei don ding a na?" a ta. 10 A ruolchamhai chun, "Hieng mipuihai kuoma hin, 'I pa ringkol mi'n phurtir hi mi sukzângpèk rawh' tia hung hriltuhai kuomah hieng hin hril rawh: 'Ka kutte hi ka pa kawng nêkin a lien lem. 11 Ka pa khan phur rik tak a'n phurtir cheu a, kei chun in phur chu ka sukrik zuol ding a nih. Ka pa khan vuokna hruolin a hrîk hlak cheu a, kei ruok chun khawmuol kaikuongin ka hrîk ding cheu a nih' tiin hril rawh" an ta. 12 Lalin, "Ni thum hnungah hung nawk ro" a ti angin ni thum hnungah Jeroboam le mipuihai po po chu Rehoboam kuomah an hung nawk a. 13 Lal chun upahai thurawn a lâk naw leiin mipuihai chu inrum takin a lo biek a. 14 Tlangvàlhai remruotpui angin, "Ka pa khan in phur a lo sukrik a, kei chun ka sukrik zuol ding a nih. Ka pa khan vuokna hruolin a hrîk hlak cheu a, kei ruok chun khawmuol kaikuongin ka hrîk ding cheu a nih" a ta. 15 Chuong ang chun mipuihai thu chu lal chun a ngâithlàk nuom nawh; chu thil hung tlung chu LALPAN Silo mi Ahija hmanga Nebat naupa Jeroboam kuoma a lo hril tah chu sukdikna dinga LALPA thilthaw a nih. 16 Lal chun an thu a ngâithlàk nuom dèr nawh ti Israelhaiin an hriet hnung chun lal kuomah, "Davida lakah iem chanvo kan nei hrim a?Jessai naupa lakah rochan iem kan nei ve a? Aw Israelhai, in puon in tieng kîr nawk ta ro. Aw Davida, i sûngkuo chu nangin enkol ta rawh" an ta. Chuongchun, Israelhai chu in tieng an kìr ta rip a. 17 Judai ram khuoa um Israelhai ruok chu Rehoboam inlalna hnuoiah an la um zing a. 18 Lal Rehoboam chun sinthawa sor luihai inrawitu Adoniram chu a tir a, Israelhai chun lungin an lo dêng hlum a. Lal Rehoboam ruok chu a tawlailirah a lût hman hràm a, Jerusalem tieng a tlân sie a. 19 Chuongchun, Israelhai chu Davida sûngkuo lakah tu chen hin an hel tah a nih. 20 Israel mihai chun Jeroboam a hung kîr nawk tah ti an hriet chun, an pungkhawmnaa hung dingin an ko a, Israelhai chunga lalah an siem a. Juda hnam chauh naw chu Davida sûngkuo tienga thang an um ta nawh. 21 Rehoboamin Jerusalem a hung tlung chun Israel sûngkuohai chu do a, Solomon naupa Rehoboam ta dinga la lêt nawk dingin Juda hnama mi le Benjamin hnama mihai laia mi huoisen thlang bîk mi nuoi khat le sîng riet a khawm a. 22 Amiruokchu Pathien mi Semai kuomah Pathien thu a hung tlung a, 23 "Judai ram lal Solomon naupa Rehoboam kuoma le Juda le Benjamin sûngkuo po pohai kuoma le mi danghai kuoma khom, 24 LALPAN hieng ang hin a hril: Hang fe naw ro, Israel thla, in unauhai chu hang do der naw ro, mani in tieng fe vong ro. Hi thil hi keima thaw a nih' tiin hril tawl rawh" a ta. Chuongchun LALPA thu chu an awi a, LALPA ti ang chun an kîr ta vong a. 25 Chuongchun, Jeroboam chun Efraim tlângrama Sekem khuo chu kulin a'n huon a, chu taka chun sawt naw te a um a. Chu taka inthok chun a suok nawk a, Peniel khuo chu kulin an huon nawk a. 26 Jeroboam chun a lûngrilin, "Tuhin lalram hi Davida sûngkuoa kîr nawk el theia um a nih. 27 Hienghai hi inthawi dinga LALPA Tempula an hang fe pha chun an lalpa, Judai ram lal Rehoboam tieng an lungril thle nawk a ta, kei mi that an ta, lal Rehoboam tieng pakai nawk el an tih" tiin a'n ngaituo a. 28 Chuongchun, lal chun mi a rawn a, rangkachak bawngte lim pahni a siem a, an kuomah, "In ta dinga Jerusalema hang fe chu a hautak taluo. Aw Israelhai, en ta u, Aigupta rama inthoka thuoi suoktu cheu in pathienhai hi" a ta. 29 Pakhat chu Bethelah a sie a, a dang chu Dan-ah a sie bok a. 30 Chu chu thil suol inthawtirtu a hung ni ta a, mipuihai chun a pahnia be dingin Bethel le Dan chen chen khom an fe el ta si. 31 Jeroboam chun hmun sàngah in dâm a bawl a, Levi thlaa mi ni lo vântlâng laia mi a nuom nuom thiempuah a siem a. 32 Judai rama kût an hmang hlak ang bokin a thla rietna, ni sawm le ni ngana chu Jeroboam chun kût niah a ruot a, maichâma chun inthawina a'n hlàn a. Chu chu Bethelah a thaw a, a bawngte lem siem kuoma chun inthawina a'n hlân a, hmun sànga ding thiempu a ruothai chu Bethela chun a sie bok a. 33 Amain a nuom anga a ruot thla ngei, thla rietna, ni sawm le ni nganaah Bethela maichâm a siema chun a hang inthawi a. Chuong ang chun, Israel thlahai ta dinga kût ruotin, maichâma chun thilpêk a hang inhlàn a nih.

13

1 Maichâma Jeroboamin inthawina inhlàn dinga a ngîr lai chun LALPA thuin Judai rama inthokin Bethela chun Pathien mi a hung a. 2 LALPA thuin maichâm chu a'n riem khum a, "Aw maichâm, maichâm, LALPA chun, 'Ngai ta, Davida sûngkuoa inthokin naupa a hming Josia hung pieng a ta, i chunga rimtui raw hlaktuhai le hmun sànga thiempuhai hi i chunga ngei hin inthawina dingin la hung hmang a ta, i chunga hin mihriem ruhai an la hung raw ding a nih' a tih" tiin. 3 Chun, chu ni vêk chun inchikna a pêk a: "Hi hi inchikna dinga LALPA thu puong chu a nih: maichâm hi koi phok a ta, a chunga meivâp hi inbaw vong a tih" a ta. 4 Pathien miin Bethela maichâm a'n riem khum lai ri lal Jeroboamin a hriet chun "Man ro" a ta, maichâma inthok chun kutin a hang ban a. Man tuma a banna bàn chu a'n kon nghal a, a lâk kîr thei ta naw a. 5 Maichâm chu a'n phel phok a, LALPA thua Pathien miin inchikna a pêk ang khan, meivâp chu an baw ta vong a. 6 Chun, lal chun Pathien mi kuomah, "Ka bân hi a hung that nawk theina dingin LALPA i Pathien kuomah tongtaiin mi hnipêk rawh" a ta. Chuongchun, Pathien mi chun a hnipêk a, lal kut chu a hmaa ang bokin a hung pangngai nawk ta a. 7 Lal chun Pathien mi kuomah, "Ka in tieng ka kuomah hung la, bu dâm fa la, thilpêk khom pêng ka ti che" a ta. 8 Pathien mi chun lal kuomah, "I thil nei po po zâtve mi pe ding ni la khom i inah hung naw ning. Hi hmuna hin bu fain tui dawn bok naw ning. 9 LALPA chun, 'Ieng khom fain i dawn ding a ni naw a, i hungna lampui hrawin i hung kîr nawk ding a ni bok nawh' tiin thu a mi pêk a nih" a ta. 10 Chuongchun, Bethela a hungna lampui chu hraw ta loin lam dangah a kîr a. 11 Chun, Bethela chun zawlnei putar pakhat hi a um a, a nauhai chun chu nia Bethela Pathien mi thilthaw po po le lal kuoma a hril chu a kuomah an hril sawng a. 12 An pa chun, "Khaw tieng lam am a hraw a?" a ta, a nauhai chun Judai rama inthoka hung Pathien mi kîrna tieng lam chu an kawkhmu a. 13 A nauhai kuoma chun, "Sabengtung mi buotsaipêk ro" a ta, an buotsai a, sabengtung chunga chun a chuong a. 14 Pathien mi chu a hnot zui a, saisaw thing hnuoia a lo chawl lai chu a hnot phâk a, a kuomah, "Judai rama inthoka hung Pathien mi chu i ni maw?" a ta, ama chun "Ni e" a ta. 15 Zawlnei chun, "Ka inah hung la, bu dâm hung fa raw khai" a ta. 16 Pathien mi chun, "Kîrin nang ka zui thei naw che a, hi hmuna hin fain ka dawn thei bok nawh. 17 LALPA thu chun, 'Chu taka chun bu fain tui i dawn ding a ni naw a, i va fena lam pangngaia chun i hung kîr nawk ding a ni bok nawh' tia hril ka ni si a" a ta. 18 Zawlnei putar chun, "Nangma ang boka zawlnei ka ni ve hi. Vântirkoin ka kuomah 'Faa a dawn theina dingin i in tieng hung thuoi kîr nawk rawh' tiin LALPA thu chu a mi hril a nih" tiin thukhêl a hril a. 19 Chuongchun, Pathien mi chu a in tieng a kîrpui a, a ina chun fain a dawn a. 20 Chuonga dawkân kîla an thung lai chun a thuoi kîrtu zawlnei putar kuoma chun LALPA thu a hung tlung a. 21 Judai rama inthoka hung Pathien mi kuoma chun inring takin, "LALPA thu a hung tlung a, 'LALPA thu chu i kal a, LALPA i Pathien thupêk che chu i zawm naw a, 22 i hung kîr nawk a, faa dawn dêr lo dinga a tina che hmuna ngei chun bu faa tui i dawn leiin, i ruong chu i thlatuhai zâlna hmunah phum ni ve naw nih' tiin a hril a nih" a ta. 23 Chun, LALPA miin faa a dawn zo chun a hung thuoi kîrtu zawlnei chun sabengtung a buotsaipèk a. 24 A hang fe chu lam lakah sakeibaknei leh an intuok a, a lo se hlum a, a ruong chu lampuia chun a thalin a zâl a, a ruong sîr khing tieng chun sabengtung chu a ngîr a, khing tieng panga chun sakeibaknei chu a ngîr ve zing bok a. 25 Chun, chu lam hung hraw mi thenkhatin lampuia ruong zâl le a bula sakeibaknei ngîr zing an hmu thu chu zawlnei putar umna khuoa mihai chu an va hril a. 26 Lam laka va thuoi kîrtu zawlneiin chu thu a lo hriet chun, "Pathien mi, LALPA thu awi nuom nawtu kha a ni chu. LALPA thuin a hril angin, LALPAN sakeibaknei kutah a pêk a, a lo thàm a, a se hlum a ni chu" a ta. 27 A nauhai kuoma chun, "Sabengtung mi buotsaipêk ro" a ta, an buotsaipêk a. 28 Chuongchun, a fe a, lam laia a thala ruong zâl le a bula sakeibaknei le sabengtung ngîr zing chu a va hmu a, sakeibaknei chun ruong chu a la fâk naw a, sabengtung khom chu ieng khom a law bok nawh. 29 Chuongchun, zawlnei chun Pathien mi ruong chu a'n hlawm a, sabengtung chunga chun a hlàng kai a, a kîrpui a, zawlnei putar khuoa chun sûn ding le vûi dingin a lûtpui a. 30 Chun, ruong chu ama thlânah a'n zâltir a, "A va poi ngei de aw, ka unaupa" tiin a ta a. 31 A vui hnung chun a nauhai kuomah, "Ka thi pha chu Pathien mi zâlnaa hin mi hung phûm ve un la, a ru bula hin ka ruhai hung inzâltir ve ro. 32 Pathien thua Bethela maichâm le Samari ram khawpui hmun sànga in po pohai a'n riem khumna thu kha a hung tlung indik ngei ngei ding a ni si a" a ta. 33 Chuong thil po po hnunga khom chun Jeroboam chun a um dàn suolhai chu a la bànsan chuong naw a, hmun sànga thiempu dingin vântlâng mi a nuom nuom a la ser hrang ta zing a. 34 Chu chu Jeroboam sûngkuo suolna, an tlûkna siemtu le khawvela inthoka sukbohmangtu chu a nih.

14

1 Chuong lai chun Jeroboam naupa Abhija chu a hung damnaw ta a. 2 Jeroboam chun a nuhmei kuomah, "Inthok la, Jeroboam nuhmei i nih ti an hriet thei nawna dingin inchei danglam la, Silo-ah fe rawh. Chu taka chun zawlnei Ahija a um a, ama chu hi mihai chunga lala ka la hung um ding thu mi hriltu kha a nih. 3 Bei tluon sawm le kêk iemani zât le khuoizu bûr khat chawi la, a kuomah va fe la, naupang um dàn ding chu lo hril a ti che" a ta. 4 A hril angin Jeroboam nuhmei chun a thaw a, Silo-a Ahija inah a fe a. A upat leiin Ahija mit chu a'n thim ta a, khuo a hmu thei ta nawh. 5 Amiruokchu, LALPAN Ahija kuomah, "Jeroboam nuhmei chu a naupa damnaw chungthu indon ding chein a hung mêk a, chu chu kha kha tiin i lo hril ding a nih. A hung pha chun mi dang ni awm takin hung insiem a tih" a ta. 6 Chun, Ahija chun kotkhâra a hung pèn lut lai ri a hriet charin, "Nang Jeroboam nuhmei, hung lût raw khai. Ieng dinga mi dang anga i'n siem am a na? Chanchin tha naw tak hril ding chea tir ka nih. 7 Kîr nawk ta la, Jeroboam kuoma chun "LALPA, Israelhai Pathien chun hieng hin a tih: 'Mipuihai laia inthokin ka chawisâng che a, ka mi Israelhai chungah hotuah ka siem che a, 8 Davida sûngkuohai ram ka lâkpêk a, chu chu ka pêk che a, sienkhom nang ruok chu ka siehlaw Davida angin i um ve nawh; ama ruok chun ka thupêkhai a zawm a, ka mithmuah thil tha chauh thaw a tum a, a lungril po poin a mi zui hlak. 9 Nang ruok chun i hmaa mihai po po nêkin thil suol i thaw nasa lem a, lungsen dinga mi cho phawkin, hnam dang pathienhai lem thîrin i siem a, hnung tieng i mi nghatsan a. 10 'Chuleiin, Jeroboam sûngkuoah sietna hung intlungtir ka ta. Jeroboama inthoka nau pasal pieng taphot chu, bawia um amanih zalena um amani khom, sukram vong ka ta, miin êk tawng a raw fai vong hma khata a raw angin Jeroboama sûngkuo chu raw fai vong ka tih. 11 Jeroboam sûngkuoa mi, khawpuia thi taphot chu uiin fâng an ta, ram hnuoia thi taphot chu chunglêng vatehaiin tlàn an tih. Chu chu LALPA thu a nih' tiin hril rawh. 12 "Chuongchun, tho la, i in tieng kîr nawk el ta rawh. Khawpui sûng i kein i sir charin naupang chu thîng a tih. 13 Ama chu Israelhai po poin sûn an ta, vui an tih, Jeroboam sûngkuo lai ama chauh chu thlàna phûm hlaw ding um sun chu a nih. Jeroboam sûngkuo lai hin ama chunga chauh hin thatna iemani LALPA Israelhai Pathien chun a hmu a nih. 14 "Voisun lá là hin Jeroboam sûngkuo sukbohmangtu ding LALPAN ama ta dingin Israelhai lal ding hung indin suok a tih. Voisun ngei hin tie! Tak tak maw? Ni e, tu ngei el hin tie! 15 LALPAN Israel chu vuong a ta, va kama phairuong ang elin inhning an tih. LALPA chu suklungsen a, pathiennu Aser lem thinghai siema an phun leiin, an puhai a lo pêk tah, hi ram tha taka inthok hin Israelhai chu pot suok fai vong a ta, Eufretis Vadungpui ràla chen la sukdar vong a tih. 16 Jeroboamin thil suol a thawhai lei le Israelhai khom thil suol a'n thawtir leiin, Israelhai chu nghatsan a tih" a ta. 17 Chuongchun, Jeroboam nuhmei chu a tho a, a suok a, Tirza khuo tieng a pan a, an sumphuk a tlung charin naupang chu a thi a. 18 LALPAN a siehlaw zawlnei Ahija hmanga a hril tah angin an phûm a, Israelhai po poin an sûn a. 19 Jeroboam inlal laia thil tlung dang hai, a râl bei thu dâm le a rorêl dânhai chu Israel lalhai chanchin inziekna lekhabuah a chuong. 20 Kum sawmhni le kum hni sûng ro a rêl hnungin a thlatuhai kuomah a chawl a, a naupa Nadab chun a lalna chu a hung hluo a. 21 Solomon naupa Rehoboam chu Judai ramah lalin a um a, a hung inlal chun kum sawmli le kum khat mi a na, LALPAN a hming umna dinga Israel hnamhai khuo po po laia a thlang khawpui Jerusalema chun kum sawm le pasari a'n lal a, a nu hming chu Naami a na, Amon mi a nih. 22 Judahai chun LALPA mithmuah thil suol an thaw a, an thlatuhai po po khûma an suol lei chun a thîkthu an chok tho a. 23 Hmun sàng siemin, muol bawk insângna deu taphot le thingbuk inzâr thatna taphotah lung ser le pathiennu Asera lem thinghai chu an phun a. 24 A ram sûnga chun pasal inzorna bûk dâm siemin, Israel thlahai hmaa LALPAN a hnot suok tah hnamhai ang bokin thil tirdakum tinrêng an thaw ve a. 25 Lal Rehoboam inlala inthoka kum nganaah Aigupta lal Sisak chun Jerusalem a hung rûn a. 26 LALPA tempula rosum le lal ina rosumhai chu a lâk fai vong a, Solomon siem rangkachak phawhai po po khom a lâk sa bok a. 27 Lal Rehoboam chun a aiin dâr phaw a siem a, lal in kot vêngtu kawmandarhai chu a'n koltir a. 28 LALPA tempulah lal a fe pha leh vêngtuhai chun dâr phaw chu an chawi a, an hung kîr pha leh vêngtuhai pindana a siena hmuna chun an thak kîr nawk hlak a. 29 Rehoboam inlal sûnga thil tlung danghai le a thilthaw po po chu Juda lalhai inlal lai chanchin ziekna lekhabuah a chuong. 30 Rehoboam le Jeroboam chu indo zing zinga khawsa an nih. 31 Chun, Rehoboam chu a thlatuhai kuoma chun a chawl a, Davida khawpuiah a thlatuhai lai an phûm a. A nu hming chu Naama a na, Amon mi a nih. A naupa Abija chun a lalna chu a hung hluo a.

15

1 Nebat naupa Jeroboam inlala inthoka kum sawm le kum rieta chun Abijak chu Judahai chunga lalah a hung um tan a. 2 Jerusalemah kum thum a'n lal a, a nu hming chu Maaka a na, Absalom naunu a nih. 3 A pa ang bokin thil suol a thaw ve a; a pu Davidan a lungril a pêk zo angin a lungril chu LALPA a Pathien tieng a pêk zo ve nawh. 4 Sienkhom Davida zârin LALPA a Pathien chun Jerusalema rorêltu ding pein, ama hung thlâktu ding naupa a'n dinpêk a, Jerusalem khuo a'n din nghet bok a. 5 Hit mi Uria chunga thil suol a thaw ti chauh naw chu Davida chun LALPA thupêkhai a bawsiet ngai naw a, LALPA mithmuah thil tha a thaw hlak. 6 Abija dam sûngin Rehoboam le Jeroboam chu an indo zing a. 7 Abija inlal sunga thil tlung danghai le a thilthawhai chu Juda lalhai inlal lai chanchin inziekna lekhabuah a chuong. Abija le Jeroboam chu an indo hlak a. 8 Chun, Abija chu a thlatuhai kuomah a chawl a, Davida khawpuia chun an phûm a, a naupa Asa chun a lalna chu a hung hluo a. 9 Israelhai lal Jeroboam inlala inthoka kum sawmhninaah Asa chu Judahai lalah a hung um tan a. 10 Kum sawmli le kum khat Jerusalemah a'n lal a, a pi hming chu Maaka a na, Absalom naunu a nih. 11 Asa chun a pu Davida ang bokin LALPA mithmuah thil fel a thaw hlak a. 12 Pasal inzorhai chu a rama inthokin a hnot suok a, a pa le puhai milem siem po po chu a pei hmang vong bok a. 13 A pi Maaka chen khom pathiennu Asera lem tirdakum tak a'n siemtir leiin lalnu nu a ninaa inthokin a bàn a, a thing milem insiemtirhai chu a phûr thlûk a, Kidron vadungah a raw a. 14 An hmun sànghai chu thiekpêk naw sienkhom a dam sûngin a lungril po po chu LALPA tieng a ngha tlat a. 15 A pain a lo inhlàn tah le ama ngeiin a lo inhlàn tah tangkaruo le rangkachak le thil danghai chu LALPA tempulah a lâk lût a. 16 Juda lal Asa le Israel lal Baasa chu an inlal sûng po an indo hlak a. 17 Israel lal Baasa chun Judahai a hang bei a, Judahai lal Asa rama inthoka tu khom hung lûta an suok thei nawna dingin Rama khuo chu kulin an huontir a. 18 Chun, Asa chun LALPA tempula mi le ama lal ina mi tangkaruo le rangkachak um po po chu a lâk suok a, a siehlawhai kutah a'n chawitir a, Damaska khuoa um Aram lal, Hezion naupa Tabrimon naupa Ben Hadad kuomah a tir a. 19 A kuoma chun, "I pa le ka pahai an indo hlak leiin nang le kei inkârah inremna thuthlung siem ei tih. En ta, tangkaruo le rangkachak thilpêk khom ka hung thon hi. Israel lal Baasa hi ka rama inthoka a'n hnûk dokna ding chun ama le in inkâra thuthlung i lo siem tah kha tu hin sût el rawh" tiin thu a thon a. 20 Ben Hadad chun Lal Asa thu chu a remti a, chuongchun Israel khuohai chu bei dingin a sipai kawmandarhai a tir a, Ijon khuo dâm, Dan khuo dâm, Abel Beth Maaka khuo dâm, Kinneret biel po po le Naftalia ram po po chu an bei a. 21 Chu thu chu Baasa-in a hriet charin Rama khuo kula a'n huon lai chu a tawpsan a, Tirza tieng a kîr nawk ta a. 22 Chu phing leh Lal Asa chun Judai ram po poah thu a thon vel a, Baasa-in Rama khuo inhuonna dinga thing le lung a hmanghai chu tu khom a awl um loin an thak ta mur mur a, chuonghai chu Lal Asa chun Mizpa khuo le Benjamin rama Geba khuo siemna dingin a hmang a. 23 Lal Asa inlal laia thil tlung danghai le a thilthawhai po po le a khaw siemhai chanchin chu Juda lalhai chanchin inziekna lekhabuah a chuong. Sienkhom a tar tieng chun a keah hri tha lo a hung invoi a. 24 Asa chu a thlatuhai kuomah a chawl a, Davida khawpuiah a thlatuhai lai an phum a. A naupa Jehosafat chun a lalna chu a hung hluo a. 25 Jereboam naupa Nadab chu Juda lal Asa inlal kum hninaah Israel lalin a hung um a, Israelhai chungah kum hnih a'n lal a. 26 LALPA mithmuah thil tha lo tak a thaw hlak a, a pa lam hraw chu a hraw ve a, Israelhai chu thil suol a'n thawtir ve a. 27 Chun, Isakar sûngkuo laia mi Ahija naupa Baasa chun a phier rûk a, Nadab le Israelhai po poin Filistinhai khuo Gibethon an inhuol lai chun Nadab chu a that a. 28 Juda lal Asa inlal kum thumnaa Baasa-in Nadab a that chun a hmunah lalin a um nghal a. 29 Lal a hung ni charin Jeroboam sûngkuo po po chu a that ram vong a. LALPAN a siehlaw Silo khaw mi Ahija hmanga a lo hril tah ang khan, Jeroboam sûngkuoa mi a'n thuok thei taphot chu hlà hrim a nei nawh. 30 Jeroboam thil suol thaw chun Israelhai chu a thuoi suol a, chu chun LALPA, Israelhai Pathien a suklungsen a nih. 31 Nadab inlal sûnga thil tlung danghai le a thilthawhai po po chu Israel lalhai inlal lai chanchin inziekna lekhabuah a chuong. 32 Juda lal Asa le Israel lal Baasa chu an inlal sûng po an indo a nih. 33 Judahai lal Asa inlala inthoka kum thumnaa chun Ahija naupa Baasa chu Tirza khuoah Israelhai chungah an lal tan a, kum sawmhni le kum li a'n lal a. 34 LALPA mithmuin thil tha lo tak a thaw hlak a, Jeroboam ang boka Israelhai chu suolna lampuia thuoitu le thil suol inthawtirtu a nih.

16

1 Baasa chungthua LALPA thu chu Hanani naupa Jehu kuomah a hung tlung a: 2 "Pilvuta inthokin ka lâk suok che a, ka mi Israelhai thuoituah ka sie che a, sienkhom Jeroboam lam hraw bok chu i hraw ve a, ka mi Israelhai chu thil suol i'n thawtir a, an suolnahai chun ka lungsenna i chok tho a. 3 Tu hin Baasa le a insûng hi ka lem hmang têp a, Nebat naupa Jeroboam le a sûnghai ang khan ka siem ve tawl ding a nih. 4 Baasa sûngkuo laia mi khaw sûnga thi ta phot chu an ruong uiin fâng an ta, ram hnuoia thi taphot chu chunglêng vatehaiin tlàn an tih' a ta. 5 Baasa inlal sûnga thil tlung danghai, a thilthawhai le thil hlen suokhai chu Israel lalhai chanchin inziekna lekhabuah a chuong. 6 Baasa chu a thlatuhai kuomah a chawl a, Tirza khuoah an phûm a. A naupa Ela chun a lalna chu a hung hluo a. 7 Jeroboam ang bokin Baasa chun LALPA mithmuah suol tinrêng thaw a, a thil suol thawhai chun LALPA a suklungsen a. Chun, Jeroboam sûngkuohai a that vong bok leiin Baasa le a sûnghai chungthuah LALPA thu chu zawlnei Hanani naupa Jehu hmangin a hung tlung a nih. 8 Juda lal Asa inlala inthoka kum sawmhni le kum ruknaa chun Baasa naupa Ela chu Tirza khuoah Israelhai lalin a hung um a, kum hni sûng a'n lal a. 9 A thoktu laia pakhat, a tawlailir zàtve chunga hotua a siem Zimri chun a phier rûk a. Chuong lai chun Ela chu Tirza khuoah a um a. 10 Tirzaa a lal in enkoltu Arza inah zu a lo inrui laiin, Juda lal Asa inlal kum sawmhni le kum saria chun Zimri chu a va lût a, a bei a, a that a, a lalna chu a hluo ta a. 11 Zimri chun lalthungpha a hluo charin Baasa sûnghai po po chu a that vong a, a laichinhai le ruol thahai laia pasal taphot chu tu khom hlà hrim a nei nawh. 12 Baasa sûngkuo chungthua LALPA thu zawlnei Jehu hmanga a hril tah angin Zimri chun a that vong a. 13 Baasa le a naupa Ela chun milem hmang lo bea Israelhai khom an thuoi suol leiin LALPA Israelhai Pathien lungsenna an chok tho a nih. 14 Ela inlal sûnga thil tlunghai le a thilthaw iengkim chu Israel lalhai inlal lai chanchin inziekna lekhabuah a chuong. 15 Juda lal Asa inlala inthoka kum sawmhni le kum saria chun Zimri chu Tirza khuoah ni sari sûng a'n lal a. Chuong lai chun sipaihai chu Filistinhai khuo, Gibethon bula chun an inkul a. 16 Zimriin phier rûka lal a that thu an inkulna hmuna inthoka Israelhaiin an hriet chun chu ni lá là chun an kawmandar Omri chu an riebûka chun Israel lal dingin an puong a. 17 Chuongchun, Omri le a kuoma um Israel mi po po chun Gibethon an suoksan a, Tirza an pan tung a, an inhuol a. 18 Khuo chu an lâk ngei ding a nih ti Zimriin a hriet chun lal in kulbîngah a tlân lût a, in chu a raw a, a kâng hlum ta a. 19 LALPA mithmuah thil suol thaw a, a suol thaw lei le Jeroboam lampui a hraw ve leia Israelhai thil suol a'n thawtir leiin chuong ang chun a thi a nih. 20 Zimri inlal sûnga thil tlung danghai le a thil phier rûk thuhai chu Israel lalhai inlal lai chanchin inziekna lekhabuah a chuong. 21 Chuongchun, Israel mipuihai chu pawl hniin an inthe a, a zâtve chun Ginat naupa Tibni chu lala siem tumin an zui a, a zâtvein Omri chu an zui a. 22 Sienkhom, Omri zuituhai chun Ginat naupa Tibni zuituhai chu an hne a, Tibni chu an that a, Omri chu a hung inlal a. 23 Juda lal Asa inlala inthoka kum sawmthum le kum khatnaa chun Omri chu Israelhai chunga chun a'n lal tan a, kum sawm le kum hnih a'n lal a, Tirza khuoa a'n lal sûng chu kum ruk a nih. 24 Chun, Semer kuoma inthokin Samariaa tlâng tangkaruo kilogram sawmsariin a'n chawk a, chu chu kulin a'n huon a, khawpui a siem a, a khaw hmingah a tlâng neitu hmasa Semer hming chawiin Samaria a'n puttir a. 25 Omri chun LALPA mithmuin thil tha lo tak a thaw hlak a, a hmaa mihai po po nêkin thil suol a thaw nasa bik a. 26 Nebat naupa Jeroboam thaw dàn po po a lâk a, Israelhai chu hmangna bo milem inbiektirin, an thil suol thaw chun LALPA Israelhai Pathien chu an suklungsen hle a. 27 Omri inlal sûnga thil tlung danghai le a thilthaw le hlen suok hai chu Israel lalhai inlal lai chanchin inziekna lekhabuah a chuong. 28 Omri chu a thlatuhai kuomah a chawl a, Samaria-ah an phûm a. A naupa Ahab chun a lalna chu a hung hluo a. 29 Juda lal Asa inlala inthoka kum sawmthum le kum rietnaah Omri naupa Ahab chu Israelhai chungah a hung inlal tan a, Samaria khuoa inthokin kum sawmhni le kum hni Israelhai lalah a um a. 30 Omri naupa Ahab chu a hmaa mihai po po nêkin LALPA mihmuin thil fel lo tak a thaw hlak a. 31 Nebat naupa Jeroboam suolna ang thaw vetuhai chu iengma loa ngai ni awm takin Sidon lal Ethbaal naunu Jezebel chu nuhmeiah a nei a, Baal rong bawlsanin a biek ve el ta a. 32 Samari khuoah Baal in a bawl a, chu taka chun maichâm a siem a. 33 Chun, pathiennu Asera lemhai chu a siem a, a hmaa Israelhai lal po po nêk khomin LALPA, Israelhai Pathien lungsenna chu a cho suok nasa lem a nih. 34 Ahab inlal laiin Bethel mi Hiel chun Jeriko a bawl tha a. LALPAN Nuna naupa Josua hmanga a lo hril tah angin, a lungphum chu a nau lutîr Abiram chânin a phûm a, a kul kotkhârhai chu a nau tlum tak Segub chânin a'n din bok a.

17

1 Gilead rama Tisbe khaw mi Elija chun Ahab kuomah, "LALPA, a rong ka bawl, Israelhai Pathien hringna sâlin ka hril, kum iemani zât chu ka thu loin daidaw tla naw ni a, ruo sûr bok naw nih" a ta. 2 Chun, LALPA thu chu Elija kuomah a hung tlung a, 3 "Hi taka inthok hin suok la, khaw sak tieng pan la, Jordan sak tienga um Kerit varuoma chun inbi hmang rawh. 4 Chu vadung tui chu tlàn i ta, a chawmtu ding che vaàkhai khom thu ka pêk tah" tiin. 5 Chuongchun, hrila a um ang tak chun a thaw a, Jordan sak tienga um Kerit varuoma chun a fe a, chu taka chun a um a. 6 Vaàkhai chun zîng le zân bei le sa an hung thak a, vadung tui chu a tlàn a. 7 A ramah ruo a sûr ta naw leiin iemani chen hnungah vadung tui chu a hung kang ta a. 8 Chun, LALPA thu chu a kuomah a hung tlung a, 9 "Tho la, Sidon rama Zarefat-ah fe la, chu taka chun um rawh. A chawmtu ding che hmeithai khom thu ka pêk tah" tiin. 10 Chuongchun a tho a, Zarefat khuoa chun a fe a, kul kotkhâr a va tlung chun hmeithai pakhat hin thing a lo fom a. Elija chun a ko a, a kuomah, "Ka dawn ding bêlin tui tlawmte mi hung lapêk thei i ti?" a ta. 11 Tui la dinga a fe lai chun, "Bei tlawmte bèk mi hung chawipèk bok rawh aw" a ta. 12 Hmeithai chun, "LALPA i Pathien hringna sâlin ka hril, bei chu ka nei dèr naw a, ka nei ve sun chu bêla beiphit vei khat le ûma sahriek tlawmte chauh a nih. Chu chu kei le ka naupa fâk dinga siem dingin thing ka hung fom vak a nih. Chu chu fâng kan ta, thi chu kan hmabâk a ni el tah" a ta. 13 Elija chun a kuomah, "Ti dêr naw rawh. Fe la, i ti ang tak chun va thaw rawh. Amiruokchu, beiphit le sahriek tlawmte i nei chun bei chikte mi siempèk hmasa phot la, hung chawi rawh, chu zoah i naupa le in ta ding chu i siem ding a nih. 14 LALPA, Israelhai Pathien chun 'Hi rama LALPAN ruo a hung insûrtir hma khat chun beiphit vei khat umna bêl chu phai naw ni a, sahriek tlawmte siena ûm chu kang bok naw nih' a ti a nih" a ta. 15 Chuongchun a fe a, Elija hril ang tak chun a thaw a, ni tina ama le a sûngkuo le Elija fâk khop chu a um zing a. 16 Elijain LALPA thu a hril ang khan, beiphit siena bêl chu a phai chuong naw a, sahriek ûm khom chu a kang chuong bok nawh. 17 Iemani chen hnunga chun in neitunu naupa chu a damnaw a, a natna chu a zuol deu deu a, a tawpah a thuok a tawp ta a. 18 Ama chun Elija kuomah, "Aw Pathien mi, nangin kei i mi khingna san ding iem a um a? Ka suolna mi'n hriet nontir ding le ka naupa mi thatpêk dinga hung i lo ni maw?" a ta. 19 Elija chun, "I naupa kha mi hang pe ta" a ta, a pom lai chu a lâk a, a umna pindan tieng chun a pom tung a, a khumah a'n zàl a. 20 Chun, LALPA a ko a, "Aw, LALPA ka Pathien, ka chêngna hmeithai chunga hin vangduoina intlungtirin a naupa hi ieng dinga i hung inthitir el am a na?" a ta. 21 Naupang chunga chun voi thum a bok a, tap pumin LALPA a ko a, "Aw LALPA, ka Pathien, lunginsiet takin hi naupang hringna hi hung pekîr nawk hràm rawh' a ta. 22 LALPA chun Elija hnina chu a lo ngàithlàkpêk a, naupang hringna chu amaah a hung kîr nawk a, a hung har ta a. 23 Elija chun naupang chu a pom a, pindana inthok chun a tumpui a, a nu kuoma chun, "En ta, i naupa hi a hung dam nawk tah ie" a ta, a pêk a. 24 Nuhmei chun Elija kuomah, "Tu zet hin chu Pathien mi i nizie le i baua LALPA thu i puong chu thutak a ni takzetzie ka hriet tah" a ta.

18

1 Chun, iemani chen hnung, a kum thumnaa chun LALPA thu chu Elija kuomah a hung tlung a, "Fe la, Ahab hmaah va'n lang la, chu zoah ruo hung insûrtir ka tih" tiin a hril a. 2 Chuongchun, Elija chu Ahab hmaah a va'n lang a. Samari rama chun tàm chu a hrâng hle a. 3 Ahab chun LALPA ti mi tak Obadia, a lal in enkoltua a hmang chu a ko a. 4 Jezebelin LALPA zawlneihai a rawt lai khomin Obadia hin zawlnei zakhat zet chu pûk pahniah sawmnga ve vea thupin fâk le dawn pein a chawm tawl a nih. 5 Ahab chun Obadia kuomah, "Ei ranhai that ngai loa ei sakorhai le sabengtunghai tlatna ding hna hring umna hmun a um tak duoiin a ram sûnga tui hnâr le vadung umna taphot fang rawh" a ta. 6 Chuongchun, an ram fang ding chu an insem a, Ahab chu amain a suok a, a fe nawna tieng chun Obadia chu a fe a. 7 Chuonga Obadia a fe lai chu Elija leh an intuok a. Obadia chun a la hriet a, a hmaa chun hnuoi sikin a bokkhup a, "Ka pu Elija kha i ni chie si maw?" a ta. 8 Ama chun, "Ni e. Fe la, i pu kuomah, 'Saw taka son Elija a um' tiin va hril rawh" a ta. 9 Obadia chun, "I siehlaw hi Ahab kuta thi dinga i hang pêk el chu, iem ka thaw suol a um a? 10 LALPA i Pathien hringna sâlin ka hril hi, ka pu hin nangma zong dinga mi a tir nawna hnam le ram a um nawh. Tu hnam le ram khomin i um naw thu an hril pha leh an hmu zo naw takzet che thu inkhàm meuin a'n samtir zie a nih. 11 Tu hin, 'Elija chu hi taka hin a um' ti hril dingin i mi tir si hi. 12 Ka mâksan pha che LALPA Thlarauin khaw tieng am a thuoi ding che ti ka hriet nawh. I um ti Ahab va hril lang, a hmu zo si naw che chun mi that a tih. I siehlaw hi tleirawl ka ni laia inthoka LALPA chawibiektu ka ni bok si a. 13 Jezebelin zawlneihai a rawt laia ka thilthaw kha ka pu hin i hriet naw a ni maw? Pûk pahniah LALPA zawlnei zakhat, pûk pakhatah sawmnga ve vein ka thup a, fâk le dawnin ka chawm tawl a ni kha. 14 Amiruokchu, tu hin ka pu kuomah fe a, 'Elija hi taka hin a um' ti hril dingin i mi tir si hih. Mi that ngei ngei a tih" a ta. 15 Elija chun, "A rong ka bawl Iengkim LALPA hringna sâlin ka hril hi, voisun hin Ahab ka hmu ngei ngei ding a nih" a ta. 16 Chuongchun Obadia chu Ahab be dingin a fe a, a va hril a, Ahab chu Elija hmu dingin a hung a. 17 Elija a hmu chun, "Nanga pa hi i ni maw Israelhai sukbuoitu chu?" a ta. 18 Elija chun, "Israelhai ta dingin buoina ieng khom ka siem nawh. Nang le i pa in ni lem. LALPA thupêkhai chu bânsanin Baal in zui ta lem a. 19 Israel mihai po po chu Karmel tlânga mi hung hmu dingin ko khawm tawl rawh. Baala zawlnei zali le sawmnga ruol le Jezebel dawkâna thlaithlèng kîl hlak Asera zawlnei zali ruol khom kha hung ko khawm vong rawh" a ta. 20 Chuongchun, Ahab chun Israel thlahai po po kuomah mi a tir a, zawlneihai le chun Karmel tlângah a ko khawm a. 21 Elija chun mipuihai chu a va hnai a, "Lungawp inkàiin ieng chen top am in um ding a na? LALPA hi Pathien a ni chun zui unla, Baal hi Pathien a ni chun zui ro" a ta. Mipui chun ieng khom an hril nawh. 22 Elija chun an kuomah, "Kei chauh hi LALPA zawlneihai laia la um sun chu ka ni ta a, Baal ruok chun zawlnei zali le sawmnga a nei. 23 Bawngchal pahni hung kei unla, anni chan dingin bawngchal pakhat thlang hai sien, chan nawi hai sien, thing chungah sie hai sien, mei ruok chu a hnuoiah sêm loin. Kei khomin bawngchal dang chu buotsai ka ta, thing chungah sieng ka ta, sienkhom a hnuoiah mei sêm loin. 24 Chu zoah in pathien hming lam unla, kei khomin ka LALPA hming chu lam ka ta, ei kona meia hung dontu taphot chu Pathien ni raw se" a ta. Mipui chun, "I hril chu a tha" an ta. 25 Elija chun Baal zawlneihai kuomah, "Bawngchal pakhat lem lem hi nangni puola ding thlang unla, buotsai unla, in tam bìk êm leiin nangnin tan hmasa ro. In pathien hming ko unla, sienkhom a hnuoiah mei sêm naw ro" a ta. 26 Chuongchun an chanpuol bawngchal chu an lâk a, an buotsai a. Chu zoah Baal hming chu zîng tienga inthoka chawhnung tieng chen chun an ko an ko a. 'Aw Baal, mi hung don rawh" tiin an khêk a. Sienkhom riva hrim hrim a um naw a, dontu tu khom an um nawh. Maichâm an siem chu an lâm huol an lâm huol a. 27 Sûnchanga chun Elija'n anni chu ti-elin, "Khêk inring deu ro khai! In pathien chu a ni chie sia maw! A'n ngaituo vung vung amanih, a buoi amanih, a'n zin hmang amanih khom ni rawi naw nim. An naw leh a in a, kei tho a ngai khom ni ta bâng a tih" a ta. 28 Chuongchun, an khêk inring zuol sau a, an chìng dàn pangngaiin inthi pheng phungin kawlhnàmin an inât a, feiin an insun pop a. 29 Nisa a hung inher a, zân tieng inthawi hun ding chenin thu insamin an insawi duol duol a, sienkhom donna riva hrim a um naw a, dontu an um naw a, ûksaktu an um bok nawh. 30 Chu phing leh Elija chun mipuihai kuomah, "Mi hung hnai ro khai" a ta, mipui chun an va hnai a. LALPA maichâm an sukchim ta hnung chu a siem tha a. 31 Chun, "I hming chu Israel ni tâng a tih" tia LALPA thu lo dongtu Jakob naupahai hnam zât lung sawm le pahni Elija chun a lâk a. 32 Chu lunghai chun LALPA maichâm a siem a, maichâm sîr tuokin tui litar sawmpali vel inlengna ding a cho huol a. 33 Thing chu a hang rem fel a, bawngchal chu a chan nawi a, thing chunga chun a sie a. "Bêl paliah tui sung sip unla, pumraw thilhlân le thing hi hung buok khum ro" a ta. 34 Chun, "Hung bur nawk ro" a ta, an bur khum nawk a. "A voi thumna dingin hung bur nawk ro" a ta, an bur khum nawk a. 35 Tui chu maichâm vela chun a luong dum dum a, a khur cho huola chun a'n tling sip dul a. 36 Zân tieng inthawi huna chun Elijan maichâm a va pan hnai a, "Aw LALPA, Abraham Pathien, Isak le Israel Pathien, voisun hin Israelhai Pathien i nizie le kei i siehlaw hin hieng thil po po hi nangma thupêka ka thaw a nih ti hung inhriettir tawl rawh. 37 Aw LALPA, mi hung don rawh. Hieng mipuihai hin nang LALPA hi Pathien i nizie hre a, an lungril inlamlêt a, sima i kuom tieng an hung kîr theina dingin aw LALPA, mi hung don ngei rawh" a ta. 38 Chuongchun, LALPA mei chu a hung tla a, pumraw thilhlân hai, thing hai, lung hai, le pilvuthai chu a kang hmang a, khur cho huola tui khom chu a hîp kang ta vong a. 39 Mipuiin chuong thil po po an hmu chun an bokkhup a, "LALPA hi Pathien chu a lo nih, LALPA hi Pathien chu a lo nih" tiin an khêk a. 40 Elija chun an kuomah, "Baal zawlneihai hi man unla, pakhat khom insuo naw ro" a ta. Chuongchun an man a, Kison ruomah an thuoi thlâk a, an that tawl ta a. 41 Chun, Elijan Ahab kuomah, "Fe tung la, fain dawn ta rawh, ruopui vanawn sûr ding ri a hung chu" a ta. 42 Ahab chu a fe a, fain a dawn a; Elija ruok chu Karmel tlâng sìpah a kai a, hnuoi sikin a kûn a, a kap kârah a lu a thun a. 43 A siehlaw kuoma chun, "Fe tung la, tuipui tieng hei thlir ta" a ta. A ti ang chun a hang kai a, a hei thlir vel a, "Ieng khom a um nawh" a ta. Chuong ang chun voi sari zet Elija chun, "Hang en nawk rawh" tiin a tir non a. 44 A voi sarinaa chun, "Tuipuia inthokin mihriem kuttum tiet sûm a hung suok ka hmuh" a ta. Ama chun, "Ahab kuomah hang fe la, 'I tawlailir buotsai la, fe thla ta rawh, ruoin nang rawi a ti che' ti rawh" a ta. 45 Sawt naw tea chun vân chu sûmin a hung duk ta kul a, thli a hung inthok a, ruopui vânawn a hung sûr a, Ahab chu a tawlailirah chuongin Jezreel khuo tieng a pan a. 46 LALPA thilthawtheina chu Elija chungah a um a, a zakuo fuol chu a kawngah zemin, Ahab hmaa chun Jezreel chenin a tlân khal a.

19

1 Elija thilthaw po po le kawlhnàma zawlneihai po po a'n thattir thu chu Ahab-in Jezebel kuomah a hril vong a 2 Jezebel chun Elija kuomah mi a tir a, "Khang i thathai laia pakhat ang bok khan zînga hin ka siem ve naw che chun pathienhaiin an law law mi law hai sien, chuong nêka nasa hman chun mi thaw raw hai se" tiin thu a thon a. 3 Elija chun a ti leiin a hringna hum dingin a tlân ta nghal a. Judai rama Beersheba a tlung chun a siehlaw chu a mâksan a, 4 ama ruok chu chu taka inthoka ni khat lam thlalèrah a fe a. Hmunphi thing bul a tlung chun a buk hnuoiah a thung a, "LALPA ka tuor tawk tah. Ka hringna hi la el ta rawh. Ka thlatuhai nêkin ka tha chuong bîk bok si nawh" tiin thi nuomin a tongtai a. 5 Thing buk hnuoia chun a zâl a, a in ta a. Inrang takin vântirkoin a hung not har a, "Tho la, fa rawh" a ta. 6 A hang ngha vel a, a lu thluona chun tuiûm le meilinga em hmin diem beiper a hmu a. Chuongchun a fâk a, a zâl a, a in nawk ta a. 7 Chun, LALPA vântirko chu a hung nawk a, "Tho la, fa rawh, i fena ding ban zo naw rawi i tih" a ta. 8 Chuongchun a tho a, fain a dawn a, a bu fâk lei chun tha a hung nei a, Pathien tlâng Horeb a tlung chenin ni sawmli le zân sawmli a fe a. 9 A tlung chun pûk pakhat a hmu a, riek dingin a lût a. Chu taka chun Pathienin a biek a, "Elija, hi taka hin iem a na i thaw?" a ta. 10 Ama chun, "Iengkim LALPA Pathien ta dingin nasa takin thahnem ka ngâi hlak a. Israelhaiin i thuthlung an hnawl a, i maichâmhai an sukchim a, i zawlneihai chu kawlhnàmin an that a. Kei chauh hi ka ni ta a, keikhom hi mi that an tum zing a nih" a ta. 11 LALPA chun a kuomah, "Pûka inthok khan hung suok la, tlânga khin LALPA hmaah hang ngîr rawh, LALPA chun a hung fe pèl ding a nih" a ta. Chu zo chun thlipui na takin tlâng chu a hung mût phel a, LALPA hmaa chun lungpuihai chu a mût koi pheng phung a, sienkhom thlia chun LALPA chu a um nawh. Thlipui a hrâng zo chun simkhawlei a hung inhnìng dur dur a, sienkhom simkhawleia chun LALPA chu a um nawh. 12 Simkhawlei a hung inhning zo chun mei a hung suok puot puot a, sienkhom meia chun LALPA chu a um nawh. Mei a hung suok zo chun rawl dam diei a hung suok a. 13 Chu chu Elijan a hriet chun a korfuolin a hmai a hup a, a suok a, pûk kota chun a ngîr a. Rawl chun a kuomah, "Elija, hi taka hin ieng thawa um am i na?" a hung ti a. 14 Elija chun, "LALPA Iengkim Pathien ta dingin nasa takin thahnem ka ngâi hlak a. Israelhaiin i thuthlung an hnawl a, i maichâmhai an sukchim a, i zawlneihai chu kawlhnàmin an that a. Kei chauh hi ka ni ta, kei khom hi mi that an tum zing a nih" a ta. 15 LALPA chun a kuomah, "I hungna lampui tieng khan kîr nawk la, Damaska thlalèrah fe rawh. I tlung pha leh Aram lal dingin Hazael chu hriek nâl rawh. 16 Chun, Nimsi naupa Jehu chu Israel lalah hriek nàl la, Abel Mohala inthoka hung Safat naupa Elisa chu zawlneia nangma thlâktu dingin hriek nàl bok rawh. 17 Hazael kawlhnàm pumpel taphot chu Jehu-in that a ta, Jehu kawlhnàm pumpel taphot chu Elisa-in hung that a tih. 18 Chuong sa khom chun, Baal hmaa la kûn ngai lo le Baal la fawp ve ngai lo mi sângsari ka ta dingin ka huol zing a nih" a ta. 19 Chuongchun, chu taka inthok chun a suok a, Safat naupa Elisa chu a va zong suok a. Bawngchal tuok sawmpahni sorin lo a lo kei a, ama ngeiin bawngchal tuok sawmpahni chu a khal a nih. Elija chu a kuomah a fe a, a silpuon a va'n hâktir a. 20 Elisa chun a bawngchal sorhai chu a mâksan a, Elija chu a zui a. "Ka nu le pa fawpin vàn thla zet ka ta, chu zoah hung zui ka ti che" a ta. Elija chun, "Va chibai rawh, ka khap rêng rêng che le'm" a ta. 21 Elisa chu a kîr nawk a, a bawng sorhai chu a hung thuoi a, a that a, bawng sorna hmangruohai chun sa chu a suong a, mipuihai kuomah a sem a, an fâk tlàng a. Chu zoa chun a suok a, Elija chu a zui a, a rong a bawlpêk a.

20

1 Aram lal Ben-Hadad chun a sipai po po a khawm a, lal sawmthum le pahnihai chun an sakorhai le tawlailirhai leh an zui a, Samaria chu an inhuol a, an bei a. 2 Israel lal Ahab kuomah mi tirin thu a thon a, "Hi hi Ben-Hadad thu chu a nih: 3 I tangkaruo le rangkachak po po le i nuhmei le nauhai laia a tha tha chu ka ta a nih" tiin. 4 Israel lal chun, "Aw laltak, ka pu, i hril ang chun a ni hrim annawm, keima le ka nei po po chu i ta a nih" tiin a lo don a. 5 Chun, Ben-Hadad mi tirhai chu an hung nawk a, a kuomah, "Hi hi Ben-Hadad thu chu a nih: 'I tangkaruo le rangkachakhai le i nuhmeihai le nauhai ka lâkpêk ding che thuah mi ka hung tir ta a. 6 Amiruokchu, zîngah hieng tik hun vela hin nang le iIthoktuhai po po in dap dingin ka thoktuhai ka hung tir ding a nih. In ro hlu po po hung lâkpêk an ti cheu a, tol hmang an tih' a ti a nih" tiin an hril a. 7 Israel lal chun a rama upahai po po chu a ko khawm a, an kuomah, "En ta u, hi mi hin thil tha lo thaw a hang tum nasat dàn hi! Ka nuhmeihai le nauhai le ka tangkaruohai le rangkachakhai a hung ngèn khan ka lo sèl khom a ni bok si naw a" a ta. 8 Upahai le mipui po po chun, "Lo ûksak naw la, a thil ngiethai chu lo remtipui bok naw rawh" an ta. 9 Chuongchun, Ben-Hadad mi tirhai kuoma chun, "Ka lalpa, lal kuoma chun hieng ang hin hril ro: 'I thil ngiet hmasa po kha chu i siehlaw hin thaw ngei a ta, tuta i hung ngiet ruok hi chu thaw thei naw nih' tiin" a ta. A donna chu hawnin Ben-Hadad kuomah an kîr nawk a. 10 Chun, Ben-Hadad chun Ahab kuomah "Vei khat peia ka mihai kuoma sem ding Samaria-a hin pilvut ka hla vai chun, pathienhaiin an law law mi law hai sien, chuong nêka nasa khom chun mi thaw raw hai se" tiin mi a tir nawk a. 11 Israel lal chun, " 'Sipai huoisenhai chu indo hma ni loin indo zo hnungah a nih an uong chauh hlak chu' tiin hung hril ro" a ta. 12 Ama le lalhaiin riebûka zu an dawn laiin chu thu chu Ben-Hadad chun a lo hriet a, a mihai kuoma chun, "Va bei ro leh" a ta, khawpui chu bei dingin an insiem ta a. 13 Chuong lai chun Israel lal Ahab kuomah zawlnei a hung a, "Hieng hin LALPAN a hril: 'Saw zozài sipai ruol saw i hmu am? Voisun hin sawnghai po po saw i kutah ka pêk ding a nih, chuongchun, LALPA chu ka nih ti hre tâng i tih' tiin" a ta. 14 Ahab chun, "Tuhaiin am an bei ding?" a ta. Zawlnei chun, "'Biel tin optuhaihai hnuoia sipai thlang khawmhaiin' ti hi LALPA thu suok chu a nih" a ta. Lal chun, "Tuin am hma a thuoi ding?" a ta. Zawlnei chun, "Nangin tie" a ta. 15 Ahab chun biel tin optuhai hnuoia sipai thlanghai chu a ko khawm a, an rêngin zahni le sawmthum le pahni an nih. Chu zoah Israel thlahai po po chu a khawm a, an rêngin sângsari an nih. 16 Sûnchang lai an inthok suok a, Ben-Hadad le a thangruolpui lal sawmthum le pahnihai chu an riebûkah zu an lo dawn rui a. 17 Biel tin optuhai thlang khawm sipai thothàng thahai chun hma an tawn a, hma lawk dinga Ben-Hadad mi tirhai chun an lo hmu a, "Samari khuoa inthokin mi an hung suok" tiin an hril a. 18 Ama chun, "Inrem nuoma hung an ni leh a hringin lo man unla, indo dinga hung an ni leh a hringin lo man bok ro" a ta. 19 Biel optuhai thlang khawm sipaihai chu khawpuia inthok chun an suok a, an hnungah sipai nawlpui chun an zui a. 20 Mi tinin an bitum seng chu an that a, chuongchun Aram mihai chu an tlânsie a, Israelhai chun an hnot a. Aram lal Ben-Hadad ruok chu sakor chungah chuongin, sakor chung chuong mi iemani zât leh a tlân suok a. 21 Israelhai lal chun hma a nor pei a, sakorhai le tawlailirhai chu an bei a, Aram mi tam tak an that a. 22 Chu hnunga chun Israel lal kuoma chun zawlnei a hung a, a kuomah, "Kum nawk thâl hunah Aram lalin a hung do nawk ding che a ni leiin sipai la bel sauh sauh unla, thaw tûlhai chu thaw ngei ro" a ta. 23 Chun, Aram lal hotuhai chun lal kuomah, "An pathienhai chu tlângram pathien an ni leiin eini nêkin an hrât lem a nih. Phaizawlah inbeipui inla, mi ngam naw ni hai. 24 Chun, hi hi thaw ngei rawh: lalhai hi an rêngin thlâk vong la, anni hmunah ram optuhai sie la, 25 sipaihai sakor le tawlailir i chân zât char kha indin thar nawk la, phaizawlah inbeipui ei ta anni nêk chun hrât lem ngei ei tih" an ta. An thu chu a pom a, an ti ang tak chun a thaw a. 26 A kum nawk thâlah Ben-Hadad chun Aram mihai chu a khawm a, Israelhai do dingin Afek chen a hang tlung a. 27 Israel thlahai chu an pung khawm a, fâk ding an sêk khawm a, lo bei dingin an inthok a. Aramhai epa chun Israelhai chu hmun hniah thanghmun an khuor a. Aramhai le hrilkhi chun Israelhai chu kèlte tlawmte bok khawm ang chauh an nih. Aramhai chu a ram phêkin an inzâr sip mup a. 28 Chun, Pathien zawlnei pakhat hi Israel lal kuomah a hung a, "LALPA chun hieng hin a hril: 'Aram mihaiin LALPA hi phaizawl pathien ni loa tlângram pathien ni dinga an ngai leiin, hieng zozài sipaihai hi i kutah pêng ka ta, kei hi LALPA chu ka nih ti hung hrieng i tih' tiin" a ta. 29 Ni sari sûng chu an inep tuo a, a ni sari ni chun an inbei ta a, Israel thlahai chun Aram mihai chu ni khat thilthuah nuoi khat an that a. 30 That bânghai ruok chu Afek khaw sûngah an tlàn lût a, mi sînghni le sângsari chu kul chimin a del hlum a. Ben-Hadad chu khawpui sûngah a tlân lût a, pindan rilah a'n bi a. 31 A rawihai chun a kuomah, "Ngai ta, Israel sûngkuoa lalhai hi zàngài thei tak mi an nih ti kan hriet a. Saiip dierkeiin, hruola rîng inkhitin Israel lal kuoma va fêng ei ta, ei hringna a hlà nuom el rawi mawh" an ta. 32 Chuongchun, saiip dierkei a, rîngah hruol bâtin Israel lal kuoma chun an fe a, a kuomah, "I siehlaw Ben-Hadadin, 'Lunginsiet takin mi hlà hrâm raw se' a tih" an ta. Ama chun, "A la dam a ni maw? Ka unaupa annawm" a ta. 33 Chuong mihai chun ngai tha takin, a lungril taka a hril sawnin, "Ni e, i unaupa Ben-Hadad ni e" an ta. Ama chun, "Va fe unla, hung thuoi ro" a ta. Ben-Hadad chu a hung suok a, a kuomah a hung a, tawlailirah a lo inchuongtir a. 34 Ben-Hadad chun a kuomah, "Ka pain i pa laka inthoka khuo a lo lâkhai kha pe kîr nawk vong ka ti che a; ka pain Samaria dawrpui hmun a siem ang bok khan nang khomin Damaska khawpuiah dawrpui hmun i siem ve ding annawm" a ta. Ahab chun, "Chuong anga thu i thlung phot chun infètir ka ti che" a ta. Chuongchun, a kuomah thu a thlung a, a'n fètir ta a. 35 Chun, zawlnei naupahai laia pakhat hin LALPA thuin a ruolpa kuomah, "Mi hang vaw raw khai" a ta, sienkhom a vuok nuom naw a. 36 Zawlnei chun a kuomah, "LALPA thu i awi naw leiin i mi liemsan charin sakeibakneiin lo sèng a ti che" a ta. A fe suok charin sakeibaknei a'n tuokpui a, a lo se hlum ta a. 37 Zawlnei chun mi dang a hmu a, a kuomah, "Lunginsiet takin mi hang vaw ta leh" a ta, mi chun a vuok a, a vuok sil ta a. 38 Chuongchun, zawlnei chu a fe a, lampuia chun lal a lo inchàn a, a mit chauh inlangin hmai a tuom a. 39 Lal a hung tlung chun a lo ko a, "I siehlaw hi indona runpui hmunah a fe a, mi pakhat hi a râl man thuoiin a hung a, ka kuomah, "Hi mi hi lo vêng rawh, a tlân hmang hlauh chun a hringna aiah i hringna chân i ta, chuong a ni naw chun tangkaruo sângthum chawi i tih' a ta. 40 Chun, i siehlaw hi a khing khinga ka buoi vel sûngin chu mi chu a lo bo ta dai a" a ta. Israel lal chun, "I chungthu chu nangin i rêl zo dêr tah annawm" a ta. 41 Chu phing leh zawlnei chun a hmai tuomna chu a hawk a, lal chun zawlneihai laia mi a nih ti a hriet ta a. 42 Zawlnei chun lal kuomah, "LALPAN hieng ang hin a tih: 'Thi ngei dinga ka ti ta sa chu i'n suoktir leiin a hringna aiah i hringna, a mihai aiah i mihai chân i tih" a ta. 43 Hmai thûm le lungdongin, Israel lal chu Samaria tieng a kîr ta a.

21

1 Chuong thil hnunga chun Jezreel mi Nabot grèp huon le inzomin thil a hung tlung a. Chu grèp huon chu Jezreel khuoa Samaria lal Ahab in bul ela um a nih. 2 Ni khat chu Ahab chun Nabot kuomah, "I huon hi ka in bul ela um a ni leiin thlai huona ka siem theina dingin mi'n changtir rawh khai. A aiah grèp huon tha lem pêng ka ti che a, suma i lâk nuom chun a man ang hu i sak taphot chu pêng ka ti che" a ta. 3 Sienkhom Nabot chun, "Ka puhai ro ka pêk che chu LALPA khomin phal naw raw se" a ta. 4 Jezreel mi Nabotin, "Ka puhaia inthoka ka rochung ram chu pe thei nawng ka ti che" a ti lei chun Ahab chu hmai thûm le lungsenin inah a'n lawi a, inhmùr bûtin khumah a zâl a, bu khom a fâk nuom naw a. 5 A nuhmei Jezebel chu a va lût a, "Ieng tiziea chuong ang khopa lungril naa, bu khom fa ta lo hiel am i na? a ta. 6 Ama chun, "Jezreel mi Nabot ka biek a, 'I grèp huon hi mi'n chawktir rawh. I nuom lem chun a aiin grèp huon dang pêng ka ti che' ka ti a. Ama chun, 'Ka grèp huon chu pe thei nawng ka ti che' tiin a mi don a" a ta. 7 A nuhmei Jezebel chun, "Tu hin Israelhai chunga lal i ni naw maw? Tho la, bu fa la, hlim takin um rawh. Jezreel mi Nabot huon chu keiin pêng ka ti che" a ta. 8 Chuongchun, Ahab hmingin lekha a ziek a, a suoi a nam a, Nabot umna khuoa upahai le mi lûnhai kuoma chun a thon a. 9 Chu lekhaa chun, "Bu nghei thu lo puong unla, mipuihai lai Nabot chu a hmatawngah inthungtir ro. 10 A hmaah ama ep charah mi suol turu pahnih inthungtir unla, chuonghai chun mipui hmaah, 'Pathien le lal a hril siet' tiin hêk raw hai se. Chu zoah, thuoi suok unla, dêng hlum ro" tiin a ziek a. 11 Nabot umna khuoa upahai le mi lûnhai chun Jezebel ti ang chun an thaw a. 12 Bu nghei ni an puong a, Nabot chu mipui hmatawnga chun an inthungtir a. 13 Chun, mi suol turu pahnihai chu an hung a, ama epa chun an inthung a, mipui hmaa chun, "Nabot hin Pathien le lal a hrilsiet' tiin an hêk a. Chuongchun, khaw puo tieng an thuoi a, lungin an dêng hlum a. 14 Chun, Jezebel kuomah, "Nabot chu lungin an dêng hlum tah" tia hril dingin mi an tir a. 15 Nabot chu lungin an dêng hlum tah ti Jezebelin a hriet chun Ahab kuomah, "Tho la, Jezreel mi Nabot grèp huon, a'n chawktir phal naw che chu nei ta raw leh; Nabot chu a dam ta nawh, a thi tah" a ta. 16 Ahab-in Nabot a thi tah ti a hriet chun a tho a, Nabot grèp huon chu nei dingin a fe thlàk ta a. 17 Chun, LALPA thu chu Tisbe mi Elija kuomah a hung tlung a: 18 "Samaria-a Israelhai lal Ahab inbepui dingin fe thla rawh. Tu hin Nabot grèp huonah a um a, nei tuma chu taka fe thla chu a nih. 19 A kuomah, 'LALPAN hieng ang hin a tih: Ama chu thatin a huon i neipêk a ni naw am a ni?' ti rawh. Chun, a kuoma bok, 'LALPAN hieng ang hin a tih: Uiin Nabot thisen an liekna hmuna ngei hin i thisen khom hi an la liek ve ding a nih' ti rawh" tiin. 20 Chun, Ahab chun Elija kuomah, "Ka hmèlmapa, i mi hung hmu ta khong khong maw!" a ta. Elija chun, "Ka hung hmu ta ngei che, LALPA mithmuah suol thaw dingin i lo inzor ta tlat si a. 21 Ngai ta, i chunga hin sietna intlungtir ka ta, sukbohmang dai ka ti che a, Ahab-a inthok hin nau pasal taphot chu, bawi ni sien ni naw sien la, sukbohmang vong ka tih. 22 Nangin i mi suklungsen lei le Israelhai chu thil suol i'n thawtir leiin Nebat naupa Jeroboam sûnghai le Ahija naupa Baasa sûnghai ang elin i sûnghai siem ka tih' tiin. 23 Chun, Jezebel chungthu khom hieng hin LALPAN a hril: 'Jezreel khaw kul bulah Jezebel hi uiin la fâng an tih. 24 Ahab sûngkuoa mi khawpuia thi taphot chu uiin fâng an ta, ram hnuoia thi taphot chu chunglêng vatehaiin tlàn an tih' tiin" a ta. 25 (A nuhmei infuipor leia LALPA mithmua thil tha lo thaw dinga inzor Ahab ang hrim hrim hi tu khom an la um ngai nawh. 26 LALPAN Israel thlahai hmaa a hnot suokpêk Amor mihai ang bokin, rìtlo theipatawpa riloin milem a biek a nih) 27 Chuong ang thu Ahab-in a hriet chun a silfènhai a pot thlêr a, saiip a sil a, bu a nghei a, saiip silin a zâl a, zainêm takin a um a. 28 Chun, LALPA thu chu Tisbe mi Elija kuomah a hung tlung a, 29 "Ka hmaa Ahab inngàitlawmzie hi i hmu am? Ka hmaa a'n phà hnuoi êm leiin ama huna chu sietna intlungtir loin, a naupa hunah intlungtir lem ka tih" a ta.

22

1 Kum thum sûng Aramhai le Israelhai chu indo loin an um a. 2 A kum thumnaa chun Juda lal Jehosafat chu Israelhai lal hmu dingin a zu fe a. 3 Israel lal chun a khawnbawlhai kuomah, "Gilead biela Ramot khuo hi eini ta a nih ti hre zing sia ieng leia Aram lal kuta inthoka lapêk loa ei um am a na?" a ta. 4 Chuongchun, Jehosafat kuomah, "Gilead biela Ramot khuo i mi hang beipui nuom ve naw maw?" a ta. Jehosafat chun Israel lal kuomah, "Kei le nang, ka mihai le i mihai le ka sakorhai le i sakorhai chu thang hmunkhat vong ei ni annawm" a ta. 5 Chun, Jehosafat chun Israel lal kuomah, "LALPA thu dâm la nghâk phot la tie" a ta. 6 Chuongchun, Israel lal chun zawlnei zali lai a ko khawm a, an kuomah, "Gilead biela Ramot khuo ka hang bei ding am bei naw ding?" tiin a'n don a. Anni chun, "Hang bei rawh, LALPAN i kutah pêng a ti che" an ta. 7 Sienkhom, Jehosafat chun, "Hi taka hin LALPA zawlnei tu amani bêk hang rawn ding an um naw maw?" a ta. 8 Israel lal chun, "LALPA mi rawnpêk ding zawlnei pakhat Imla naupa Mikaia chu a um annawm. Amiruokchu ama hi ka mi theida zawng tak el a na, ka chungchàng thu hi a se tieng ngot naw chu a tha tieng a la hril ngai hrim hrim nawh" a ta. Jehosafat chun, "Lalin chuong chun ti naw hràm raw se" a ta. 9 Lal chun a thoktuhai laia mi pakhat a ko a, "Imla naupa Mikaia hang ko vat rawh" a ta. 10 Israel lal le Juda lal Jehosafat chu Samaria kul kotkhâr bula hrizawla chun lal thuom inbelin, an lalthungpha ve vea chun an inthung a, zawlnei dang po po chun an hmaah thu an hril a. 11 Chun, Kenana naupa Zedekia chun thîrin siel ki a siem a, "Hieng ang hin LALPAN a hril: 'Hi ki hin Aram mihai chu an bohmang chenin phir tlang i tih' tiin" a ta. 12 Chuong ang bokin zawlnei po po chun, "Ramot-ah hang fe la, hang hlawtling rawh khai, LALPAN lal kuomah a pêk ding a nih" tiin an hril seng bok a. 13 Chun, Mikaia ko dinga an tir chun a kuomah, "Ngai ta, zawlneihai po po chun inkhuongruol takin lal chu hlawtling ngei dingin an hril a nih. Nang khomin anni ang chun ngai ve la, a tha tiengin hrilpêk ve raw khai" a ta. 14 Sienkhom Mikaia chun, "LALPA hringna sâlin ka hril hi, LALPAN a mi hril chauh chu hril thei ka tih" a ta. 15 An hung tlung chun lalin a kuomah, "Mikaia, Gilead biela Ramot khuo ka hang bei ding am bei lo ding?" a ta. Ama chun, "Bei la, hlawtling i tih, LALPAN lal kutah a pêk ding a ni si a" a ta. 16 Lal chun, "Voi ieng zât top am LALPA hminga thutak chauh mi hril dingin thu ka'n khâmtir ta che a?" a ta. 17 Mikaia chun, "Israelhai chu vêngtu nei lo beram anga tlânga indar vong ka hmu a; LALPAN, 'Hienghai hin hotu an nei ta naw a, mi tin mani in tieng thlamuong takin inlawi diel raw hai se' a ti a nih" a ta. 18 Chun, Israel lal chun Jehosafat kuomah, "Ka chungthua chu a se tieng naw chu a tha tieng hrim hrim a hril ngai nawh ti ka hril ta che kha" a ta. 19 Mikaia chun a hril zom pei a, "Chuleiin, LALPA thu hi ngàithla rawh. LALPA chu a lalthungphaa inthung a, a chang tieng le voi tienga vân mipui ngîr khup lai chu ka hmu a. 20 Chun, LALPAN, 'Ahab hi Gilead rama Ramot khuoah hang fe a, râl kuta thi dingin tuin am thlêm thlu thei a ta?' a ti a. Pakhatin hieng hin a ti a, mi dangin chuong ang chun an ti bok a. 21 Chun, thlarau pakhat hi a hung suok a, LALPA hmaah a ngîr a, 'Keiin thlêm thlu thei ka tih' a ta. 22 Chun, LALPAN a kuomah, 'Iengtin am?' a ta. Ama chun, 'Zu fêng ka ta, zawlnei po po hmûrah thlarau khêlhlipah inchang ka tih' a ta. LALPA chun, 'Thlêm hne ngei i ta, hlawtling bok i tih. Fe la, chuong ang tak chun zu thaw rawh' a ta. 23 Chuongchun, ngai ta, LALPA chun hieng i zawlneihai po po hmûra hin thlarau khêlhlip a sie a, siet tuok dingin i chungthu LALPA chun a rêl tah a nih" a ta. 24 Kenana naupa Zedekia chun a hung hnai a, "Iengtik lai khan am LALPA thlarau chun i kuoma thu puong lem dingin iengtik khan am ie kei a mi suoksan chu?" tiin Mikaia biengah a ben a. 25 Mikaia chun, "Lo ngai zing rawh, pindan rila inbi dinga i fe ni pha leh la hrieng i tih" a ta. 26 Israel lal chun, "Mikaia hi khawpui optu Amon le lal naupa Joash kuomah thuoi unla, 27 hieng hin an kuomah, 'Hieng ang hin lal chun a tih: Hi mi hi lung inah khum unla, him taka ka hung kîr nawk hma khat chu bei le tui chauh lo pe ro' a tih" tiin thu a pêk a. 28 Mikaia chun, "Dama i hung kîr nawk a ni hrim chun LALPAN keima hmangin thu a hril nawh tina nîng a tih" a ta. Chun, ama vêkin, "Nangni mipuihai, in rêngin ka hril hi inchik rân ro" a ta. 29 Chuongchun, Israel lal le Juda lal Jehosafat chu Gilead biela Ramot khuo rûn dingin an inthok suok a. 30 Israel lal chun Jehosafat kuomah, "Insiem danglam ka ta, indonaa chun hang thang vèng ka tih. Nang ruok chu i lal puon hin inchei zing rawh" a ta. Chuongchun, Israel lal chu a'n siem danglam a, indonaa chun a hang thang ve ta a. 31 Aram lal chun tawlailir khaltu hotu sawmthum le pahnihai kuoma chun, "Israel lal ti chauh naw chu mi chîn amanih mi lien amanih tu khom bei naw ro" tiin thu a pêk a. 32 Chun, tawlailir khaltu hotuhaiin Jehosafat an hmu chun, "Israel lal a ni ngei hi" tiin bei tumin an inhuol a, Jehosafat chu a hung khêk suok ta a. 33 Tawlailira chuong hotuhai chun Israel lal a ni nawh ti an hriet phing leh an hnot lai chu an kîrsan ta a. 34 Chun, mi pakhat hin tum bik khom nei loin a thalngul a kuoi a, Israel lal chu a awmphaw inzomna kar takah a kâp a. Ama chun a tawlailir khaltu kuomah, "Tawlailir kha kei her la, sipaihai laia inthok hin mi tlân suokpui rawh, hliem na tak ka tuok a nih" a ta. 35 Chu nia an indo chu an inbei nasa hle a. Lal chu a tawlailir chunga chun Aramhai tieng nghain a thung a, zân tieng chun a thi a, a hliemnaa inthoka thisen far chu tawlailir sûnga chun a luong nguoi nguoi a. 36 Ni tlâk tawm chun sipaihai kuomah, "Mi tin mani khuo le ram tieng kîr nawk vong ta ro" tiin tlâng an insam a. 37 Chuongchun, lal chu a thi a, Samaria-a chun an hung phur a, chu taka chun an phûm a. 38 A tawlailir chu Samaria dila nawchizor ruol insilna hlak kama chun an sawp a, LALPA thu hrila a um ang ngei khan a thihai chu uiin an liek a. 39 Ahab inlal laia thil tlunghai le a thilthaw dang po po, saiha hmanga lal in a bawl le khaw kul a siemhai po po chu Israel lalhai inlal lai chanchin inziekna lekhabuah a chuong. 40 Chuongchun, Ahab chu a thlatuhai kuomah a chawl a, a naupa Ahazia chun a lalna chu a hung hluo a. 41 Israel lal Ahab inlala inthoka kum linaah Asa naupa Jehosafat chu Judahai chungah a hung inlal tan a. 42 A hung inlal chun kum sawmthum le kum nga mi a na, Jerusalemah kum sawmhni le kum nga ro a rèl a. A nu hming chu Azuba a na, Silhi naunu a nih. 43 A pa Asa lampui hraw po po chu a hung hraw ve a, pènsan dèr loin LALPA mithmuah thil tha a thaw hlak. Hmun sânghai ruok chu a sukbo naw a, mihaiin chuonga hai chun inthawiin rimtui an la'n hlàn zing hlak. 44 Jehosafat chun Israel lal leh inremna a siem a. 45 Jehosafat inlal laia thil tlung danghai le a thil hlen suokhai le hnèna a changhai chu Juda lalhai inlal lai chanchin inziekna lekhabuah a chuong. 46 A pa Asa inlal hnung khoma la um zing, pasal inzorna in po po chu a khâr a. 47 A'n lal lai hin Edom ramah lal an um naw a, Juda lalin a ruot, lal aiawtuin ro a rèl a. 48 Jehosafat chun Ofir-a rangkachak phur dingin sumdawng long ruol a siem a, sienkhom Ezion Geber-ah long siet an tuok leiin an fe ta nawh. 49 Chuong lai chun Ahab naupa Ahazia chun Jehosafat kuomah, "Ka mihai hi i mihai leh fe raw hai se" a tia chu Jehosafatin a remti nawh. 50 Jehosafat chu a thlatuhai lai a chawl a, Davida khawpuiah an phûm a; a naupa Jehoram chun a lalna chu a hung hluo a. 51 Juda lal Jehosafat inlala inthoka kum sawmpasarinaa chun Ahab naupa Ahazia chu Samaria khuoah Israelhai chungah a hung inlal tan a, kum hni a'n lal a. 52 Ama chun LALPA mithmuah thil tha lo a thaw hlak a, a nu le a pa lam hraw dâm, Nebat naupa Jeroboam, Israelhai thil suol inthawtirtu lam hraw dâm chu a zui ve a. 53 A pa thaw ang taphot a thaw ve a, Baal rong a bawl a, a biek hlak a, LALPA, Israelhai Pathien chu a suklungsen hle a.