1 Kei Peter, Isu Krista tirko hin Ponto ram dàm, Galati ram dàm, Kapadokia ram dàm, Asia ram dàm le Bithunia rama dàm Pathien mi thlang um darhai chu chibai ka bûk. 2 Pa Pathien hriet lawk anga thlang, Isu Krista thu awi ding le a thisena tlêng fai dinga Thlarau sukthienghlimhai chu in nih. In chungah lunginsietna le inremna sukpungin um raw se. 3 Ei Lalpa Isu Krista Pathien le Pä chu inpâkin um raw se. Ama chun a zangaina ropui tak leia mithi laia inthoka Isu Krista a keithona zàra chun beiseina hring nei dingin nun thar a mi pêk a. 4 Ro se thei lo, hmêl hem lo le chuoi thei lo hluotu ding ei lo ni tah a, chu chu in ta dingin vànah sie diem a ni tah. 5 In sandamna buotsaia um tah chu hun nuhnunga suklanga a um ni chenin, ama in ringna leiin Pathien thilthawtheina chun hum zing a tih. 6 Hi sawt naw te sûng hin fiena le lungngaina tinrêng in tuok a ni khomin, hlim takin um ro. 7 Chuong thil chu in ringna a tak ngeizie fiena ding a nih. Se thei rangkachak hman meia fie a ni chun, a nêka hlu lem in ringna chu fie ding a ni hrim a nih, Isu Krista hung inlang phaa a hlîr ni a, inpâkna dàm, ropuina dàm le chawimawna dâm in dong theina dingin. 8 Ama hmu lo khomin in hmangai a, tu hin ama in la hmu hrì nawa chu in ring a, hlimna hril seng lo khopa nasain in sip a ni hi, 9 in ringna ra, in thlarau sandamna chu in hmu mèk leiin. 10 Hi sandamna chungchang hi zawlneihaiin fimkhur taka zongin an sui a, in chunga Pathien thilpêk, lunginsietna hung tlung ding chu an lo puong a nih. 11 Annia Krista thlarau um chun Krista tuorna le a hnunga chawimawia a um ding thu chu a'n hriettir lawk a, a hung ding le a hung dàn ding chu hriet an tum hlak a nih. 12 Anni ta ding ni loin nangni ta dinga rongbawl an nih ti inhriettir an ni a, vàna inthoka tirh Thlarau Thienghlim hmanga in kuoma Chanchin Tha hriltuhai khan chu thu chu an hril ta chêu kha. Chuong thil chu vàntirkohai chen khomin hmù vè an chàk ngawi ngawi a nih. 13 Chuleiin, in lungril chu thilthaw dinga inpei diemin, mani inthunun unla, Isu Krista hung inlang huna lunginsietna vùra in um ding chu beisei tlat ro. 14 Nau thu awi thei anga umin, kha hmaa in mawl laia châkna suol in zui ang khan zui ta naw ro. 15 A kotu cheu a thienghlim angin nangni khom in chèt dàn iengkimah lo thienghlim lem ta ro. 16 Pathien Lekha thuin, "Kei ka thienghlim a, nangni khom in thienghlim ding a nih" a ti si a. 17 Paa in ko hi thlier bik nei lo, mi tin an thilthaw ang peia rêlpêktu a ni leiin, hi khawvela in châm sùng hin ama chu inzà le tì dêkin khawsa ro. 18 In thlatuhaia inthoka in dong sawng, nun dàn invêtthlâk taka inthoka thil se thei tangkaruo le rangkachaka intlan in ni naw a, 19 beramte hmêl hem lo le soisèl bo, Krista thisen hlua intlan in ni lem ti in hriet si a. 20 Ama chu leilung insieng hmaa ruot lawk a ni a, tuta hun nuhnunga hin in ta dingin a hung inlang tah a nih. 21 Mithi laia inthoka keithotu le ropuina petu Pathien chu ama leiin in ring tah a, chuongchun Pathien chu in ringna le beiseina innghatna tak a hung ni tah a nih. 22 Thutak zawma in insukthieng tah leiin unauhai khom titak zetin in hmangai tah a, chuleiin lungril po poin inhmangai tuo ro. 23 Chi hmon thei ni loin, chi hmon thei lo Pathien thu hring le tloa inthoka pieng thar in nih. 24 "Mi po po hi ram hlo ang an na, An ropuina khom hlo pâr ang a nih; Hlo chu a hung vuoi a, A pâr chu a til a; 25 Lalpa thu ruok chu, Chatuonin a um zing"ti a ni si a. Chu ngêi chu a nih Chanchin Tha an hril chêu kha.
1 Chuongchun, suol tinrêng bânsan unla, inhlêm le inlêmder hai, inthîk le inhril siethai po po bânsan ro. 2 In sandamnaah in inthanglien pei theina dingin, naute pieng hlim angin thlarau tieng nenetui, tui pol lo chu châk hle ro. 3 "Lalpa thatna chu hang intem ve hrim ta u" ti ziek a ni kha. 4 Ama chu pan ro, Hringna Lung, mihriemhai hnawl, Pathien thlang hlu tak chu a ni si a. 5 Chuongchun, nangni khom hringna lung anga thlarau in dinga rem khawm le thiempu thienghlim hung ni vein, Isu Krista zàra Pathien pom tlàk, thlarau tienga inthawina chu inhlàn ro. 6 Pathien Lekha thuin, "En ta, lungphum hlu tak ka thlang chu, Zaiawn thutah ka phûm a; Tu khom ama ring zotu chu, Muolpho ngai naw nih" a ti si a. 7 Nangni ringtuhai ta ding chun lung hlu tak a na, ring nawtuhai ta ding ruok chun "In bawltuhai lung hnawl ngei kha, A kila lung tangkai tak a hung ni tah" a ti bàkah ziek danga chun, 8 "Mi insui thlûkna ding lung, An intol thlûkna ding lung ngei chu" tiin a chuong ve thung a. Thu an awi naw leiin an tlu a, chuong anga um ding rènga ruot chu an nih. 9 Nangni ruok chu hnam thlang, Lalpa thiempu, hnam thienghlim, Pathien ta bik, ama var ropui taka chêng dinga thima inthoka ko suoktu chêu inpâkumzie chu puongtu ding in nih. 10 Kha hma khan Pathien mi in ni ngai naw a, tu ruok hin chu in ni tah; zangaina hlaw ve ngai lo khan tu hin chu zangaina in lo chang tah a nih. 11 Unauhai, hi khawvela hin ram dang mi le mikhuol el in ni leiin, in thlarau kala do hlaktu châkna suolhai laka chun inthier fihlîm dingin ka ngèn chêu a nih. 12 Ringnawtuhai lai mawi takin khawsa unla, thil suol thawa an intum chêu a lo ni khomin in thil thaw thathai an mit ngeiin hmûng an ta, Pathienin a mi hung kan ni pha leh ama chawimawi thei an tih. 13 Lalpa leiin mihriem ruot thuneituhai kuoma chun intuklût ro. Thuneina insâng tak neitu lal tak kuoma dàm le 14 thil suol thawtuhai hrem ding le thil tha thawtuhai chawimawi dinga lalin a tir sawng lârsaphai thu chu awi ro. 15 Ieng khom hre lohai thu hril invêtthlàkhai chu thil tha thawa sêl dong dingin Pathienin a dit chêu a nih. 16 Pathien bawihai in ni ang hrimin, zalèn unla, sien khom in zalènna chu suol thawna dinga suonlam remchângah hmang naw ro. 17 Mi po po inzà thiem unla, unauhai hmangai unla, Pathien ti unla, laltak chu chawimawi ro. 18 Nangni siehlawhai, in puhai thupèk awi unla, a tha le ngilneihai chauh ni loin, a khauhhai khom inzà ro. 19 Miin Pathien lawmzawng nia a hriet tlat leia a tuor kher naw ding khom a tuor chun, chu chu Pathien lawmzawng a nih. 20 In suol leia in tuor chun sel takin tuor inla khom in ta dingin hming thatna ding iem um a ta? Thil tha in thaw sà khoma kut in tuor ruok chun Pathien lawmzawng a nih. 21 Hieng anga um dinga ko in ni a, Krista khomin in ta dingin a tuor a, a hniekhnung in zui theina dingin enton ding a màksanpêk chêu a ni kha. 22 Ama chun thil suol a thaw ngai naw a, a bàuah hlêmna thu a suok ngai bok nawh. 23 Miin an biek el khomin a thungrul ve naw a, a tuor laiin a vau lèt ve naw a, indik taka rorêltu kuoma chun a'n koltir lem hlak a nih. 24 Suol thisana felna tieng ei hring theina dingin, ama taksa ngeiin thinga khan ei suolhai a phur a, a hliemna behai chun sukdam ei ni tah. 25 Beram angin lam in inhmang tah a, tu ruok hin chu in thlarau Vêngtu le Hotu kuoma chun in hung kîr nawk tah a nih.
1 Chuong ang bokin nangni nuhai, in pasalhai thu awi ro; chuongchun anni lai ringnawtu an lo um a ni khomin thu hril kher ngai loin in nungchang chun hnè el a tih, 2 anni ngeiin thienghlim tak le inza taka in khawsakzie chu an hmu ding a ni si a. 3 In hmèl thatna chu puo tieng incheina sam chei lêr dàm, incheina hmangruo rangkachak dâm le silfèn to inbel dàma innghat ni naw raw se. 4 Chuong nêk hmanin, sûng tieng hmêl thatna, nunnêmna le zâidawna thlarau, mawina chuoi thei loa inthuom ni lem raw se. Chu chu Pathien mit hmuah a hlu hlie hlie a nih. 5 Chuong ang chun tiena tlânga nuhmei thienghlim, Pathiena beiseina innghattuhai kha, an pasalhai thu awinain an lo inthuom mawi a nih; 6 Sarin Abraham thu a awi a, "Ka lalpa" tia a ko ang khan. Indik taka in thaw chun Sari nauhai nîng in ta, titna ding hrim nei naw ti niu. 7 Nangni pähai, chuong ang bokin nupa in nìnaah in nuhmeihai lakah zâi daw unla, derdêp lema siem an ni lei le Pathien lunginsietna thilpêk hringna chu hluopuitu chèu an ni leiin, inzà takin cheibawl ro. Chuongchun, in tongtaina hluotu ieng khom a um naw ding a nih. 8 A tawp taka chun, in rênga lungril hmun khat putin, inlainata unau anga inhmangai tuoin, inlunginsietin thuhnuoirol takin um ro. 9 Suol chu suolin thungrul naw unla, tongsie khom tongsiea thungrul loin malsawmpêk lem ro; malsawmna dong dingin annawm Pathienin a ko chêu chu. 10 Pathien lekha thuin, "Tu khom mani nun thlâkhla a, Ni tha hmua dam sawt nuom chun, Suol lakah a lei vêng tha sien, A hmùrin khêl hril naw raw se. 11 Suol nghatsanin thil tha thaw ro, Inremna zongin hnot pei ro. 12 LALPAN mi felhai a hmu zing, An ko pha a ngaithlâk var hlak. Suol thawtuhai laka ruok chu, LALPA hmèl a'n tùr zing hlak"a ta. 13 Thil tha thaw tieng thahnem in ngai chun tuin am in chungah thil tha naw a thaw ding? 14 Thil indik in thaw leia tuor in ni chun hamthaah inngai ro. An thil tìhai chu ti ve naw unla, sukthlaphangin um naw ro. 15 In lungrilah Krista chu inzain Lalah sie ro. In beisei san indontu taphot chêu chu hril fie nghal dinga inpei sa zingin um ro. 16 Nisienlakhom, thuhnuoirol le hawihawm takin, sie le tha hrietna fîm tak neiin thaw hlak unla, chuongchun, Kristaa in um dàn tha hril hnawmtuhai chu sukzakin um an tih. 17 Pathien remtia tuor in ni rau rau si chun thil suol thaw leia tuor nêkin thil tha thaw leia tuor chu a tha lem. 18 Krista khom ei suolhai leiin voi khat a thi a, Pathien kuoma a mi thuoi theina dingin, mi fel chu mi fel naw ta dingin a thi a nih. Taksaa sukhlum a na, thlaraua ruok chu sukhringin a um a. 19 Ama chun lung ina intâng thlarauhai kuoma khom thu a zu hril a. 20 Chuonghai chu Nova long tuk sûnga Pathienin dawthei taka a nghâk laia awi nuom nawtuhai thlarau kha an nih. Longa chun mi tlawm te, pariet chauh sanhim an nih. 21 Chu angpui, baptisma hin, Isu Krista thonawkna leiin tu hin a sandam tah chêu a nih; baptisma chu taksa tirdakum sawpfaina chauh a ni naw a, sie le tha hrietna fîm taka Pathien kuoma thu tiemna hi a ni lem. 22 Isu Krista chu vànah fein Pathien chang tieng a um a, vàntirkohai le lalna le thuneina po po chu a thuhnuoiah an um ta vong a nih.
1 Chuongchun, ei ta dinga Kristan taksaa a tuor angin nangni khomin chuong ang lungril chu put ve ro; taksa ngeia tuortu chun suol a bànsan ta hlak a; 2 taksa puta a dam sûng chun mihriem châknahaia hring ta loin Pathien ditzawngin a hring ta lem hlak a nih. 3 Ringnawtuhai nuomzawnga porchè taka khawsa a, tisa châknaa inhmang a, uoiin inrui a, hlimhlop le zu hmun hlimna chèn a, mi lem biekna tirdakum taka kha hmaa hun inkhaw ral zozai kha a huntawk tah. 4 Tu hin an nuomtawlnaa in intawl ve ta naw leiin mak an ti a, an hril siet chêu a ni hi. 5 A la dam laihai le thi tahai ngaituo dinga inpei zing sa kuoma chun an chungthu anni ngeiin la hril an tih. 6 Hi lei hin annawm lo thi tahai kuoma khom khan Chanchin Tha hril a ni chu, mi danghai ang boka an mihriem taksa chungthu rêl a ni phaa Pathien hmaa thlaraua an hring theina dingin. 7 Thil po po tawp hun chu a hnai ta a, chuleiin in tongtai theina dingin lungril fîm tak putin mani inthunun ro. 8 Thil dang po nêkin lungril taka inhmangai tuo uor ro, inhmangaina chun suol tam tak a'n khum si a. 9 Chier loin inmikhuol tuo ro. 10 Mi tinin thlarau thilpèk in dong seng chu mi danghai rongbawlpèkna dingin hmang unla, kong hrang hrangin Pathien lunginsietna chu sem dar ro. 11 Tu khomin thu a hril chun Pathien thu ngei hril raw se. Rongbawltu khomin Pathienin hràtna a pèk angin bawl raw se; chuongchun, Isu Krista leiin Pathien chu iengkimah chawimawiin um thei a tih, ropuina le thilthawtheina chatuonin ama ta a ni si a. Amen. 12 Dittakhai, fiena rinum tak in tuok hi thilmak tak hung tlung angah ngai naw ro. 13 Krista tuorna intawmpuitu in ni leiin lawm lem unla, ropui taka a hung inlang pha chun lawm le hlimin in la sip ding a nih. 14 Krista hming leia hal in tuok chun in vangnei ie, nangniah thlarau ropui, Pathien thlarau chu a chêng tìna a nih. 15 Nangni lai tu khomin tuolthat lei amanih, rûkrùk lei amanih, thil suol thaw lei amanih, mi sukbuoi leiin amaniin tuor naw raw se. 16 Kristien in ni leia tuor in ni ruok chun inzak naw unla, Krista hming in put leiin Pathien chawimawi lem ro. 17 Pathien sûngkuohai lai hin rorêlna tan a hun tah khop el. Lo tan ni tah inla, Pathien Chanchin Tha awinawtuhai ngìrhmun chu iem ni tâng a ta? 18 Pathien Lekha thuin, "Mi indikhai hman sandam a harsa chun, mi suolhai le sakhaw mi lohai chan lem chu ieng top am ni tâng a ta? 19 Chuong lei chun, Pathien remti anga tuortuhai chun thil tha thaw peiin, an thlarau chu Siemtu ringum tak kuomah inkoltir raw hai se.
1 Nangni laia kohran upahai chu kei, upa ve bok, Krista tuornahai hmutu le ropuina hung inlang ding chang ve beiseitu hin ka'n fui a ni. 2 Nangni laia Pathien beramhai chu enkol tha ro. Thaw dinga ti in ni lei ni loin, Pathien dit dàn anga nangnia thaw inhawkna leiin thaw unla, sum tienga in inhawmthaw lei ni loin, rongbawl nuomna lungril putin enkol ro. 3 In enkolhai chungah insuklal naw unla, an enton tlâkin um lem ro. 4 Chuongchun, Beram Vêngtu Laltak a hung pha chun ropuina lallukhum chul thei lo chu chang in tih. 5 Chuong ang bokin nangni thalaihai, upahai thu awi ro. In rêngin thuhnuoirolnaa inthuomin rong inbawlpêk ro. "Pathienin chapohai a dodàl a, inngaitlawmhai ruok chu a lunginsiet hlak" ti a ni si a. 6 Chuleiin, a hun takah chawimawia in um theina dingin Pathien kut hrât tak hnuoia chun inphàhnuoi ro. 7 In lungzingna po po ama chungah innghat vong ro, a ngaisak èm êm chêu a nih. 8 Ngaiven unla, fimkhur ro; in hmelma Diebol chun sakeibaknei inrùm angin sè ding zongin a vê zing chêu a nih. 9 Ringnaah ngîr nghet unla, ama chu do ro. Khawvel hmun danga in unauhai khomin chuong ang bok chu an tuor ti in hriet si a. 10 Sawt naw te in tuor hnungin, Kristaa a chatuon ropuina chang dinga kotu chèu, lunginsietnaa sip Pathien chun hung tungding a ti chêu a, siem thaa sukhrâtin, suknghet a ti chêu. 11 Ama kuoma chun thilthawtheina kumkhuoin um raw se. Amen. 12 Unaupa, mi ringum a nih ti ka hriet Sila kuta hin hi lekha tawite hi ka hung thon chêu a nih. Hi hi Pathien lunginsietna chu a nih ti inhriettir ding chêu le chu taka chun ngîr nghet tlat dinga ka'n fùina chêu a nih. 13 Babulon kohran, nangni ang boka thlanghai hin chibai an bùk chê; ka naupa Marka khomin a bûk chèu. 14 Krista hmangainaa kut inchelin, chibai inbûk ro. Nangni Kristaa umhai po po kuomah inremna um raw se.