1

1 Efraim tlâng ram Ramathaim- zofim khuoah mi pakhat a hming Elkana a um a, ama chu Jehoram naupa a na, ama chu Elihu naupa a na, ama chu Tohu naupa a na, ama chu Efraim mi Zufa naupa a nih. 2 Elkana chun nuhmei pahni a nei a, pakhat chu Hana a na, pakhat chu Penina a nih. Penina chun nau a nei a, Hana ruok chun a nei ve nawh. 3 Iengkim LALPA chawibiek ding le a hmaa inthawina inhlàn dingin Elkana chu an khuoa inthokin Silo khuoah kum tinin a hang fe zie hlak a, chu taka chun thiempu Eli naupa Hofni le Finehas hai chun thiempu sin an thaw a. 4 Inthawina an inhlàn ding pha Elkana chun a nuhmei Penina le a naupa le naunu hai chan ding seng sa iemani zât a sem hlak a. 5 Hana ruok chu a hmangai a, LALPAN a sul a khâr hri bok leh, chan hni a siempèk bîk zie hlak a. 6 LALPAN a sul a khâr lei chun a khingpuinu chun a lung khei zawng ding tak thawin a suklungsen hlak a. 7 Kum tin kum tin elin LALPA ina Hana a fe zâtin a khingpuinu chun elsènin a suktap a, bu a nghei pha hiel hlak a. 8 Elkana chun, "Hana, ieng dinga i tap am? Iem a ta bu i fâk naw? Iem a ta i lung a hnuol? Naupa sawm nêk khomin i ta dingin ka hlu lem naw maw?" tiin a thlêm hlak a. 9 Tum khat chu Silo-a an fàk an dawn zoin Hana chu a tho a. Chuong lai chun thiempu Eli chu LALPA tempul kotkhàr ban bula thungnaah a'n thung a. 10 Beidong le lungril na taka tap hlop hlop pumin Hana chu LALPA kuomah a tongtai a. 11 LALPA kuomah, "Iengkim LALPA, i bawinu rinum tuor hi zuk thlîr la, hre zing rawh. I bawinu hi theinghil loa nau pasal i pêk chun, a dam sûng po po LALPA ta dingin pe suok ka ta, a lu khom vaw ni ngai hrim hrim naw nih" tiin inkhàm meuin thu a tiem a. 12 Chuonga a tongtai mel mel laia a hmùr inphu chu thiempu Eli chun a lo thlîr zing a. 13 Hana chu lungril takin a tongtai a, ri nei si loin a hmùr a'n phu sep sep a. 14 Eli chun zu inrui sawnin, "Ieng chen am inruiin i um zing ding a na? I uoiin sie hmang raw khai" a ta. 15 Hana chun, "K'an rui naw ie, Pu, nu lungril rimsi tawpkhawk ka ni hi. Zu amanih uoiin amanih ka dawn nawh; LALPA hmaah ka lungril ka phor suok lem a nih. 16 I siehlaw hi nuhmei rilo angah mi sie naw rawh; ka lungrila sip liem ka lungngaina le beidongna hai ka phor suok lem a nih" tiin a don a. 17 Eli chun, "Lungmuong takin fe ta rawh, LALPA, Israelhai Pathien chun i hni ang tak chu hung pe raw se che" a ta. 18 Ama chun, "I bawinu hin i mit tlung ngei raw se" a ta. Chuongchun, nuhmei chu a fe a, bu a fâk a, lungngai hmèl a put zing ta naw a. 19 A zînga chun inhma takin an tho a, LALPA an chawibiek a, an khuo Rama tieng an kîr nawk a. Elkana chun a nuhmei a pawl a, LALPAN ama nu chu a hriet zing a. 20 Chuongchun, Hana chun nau a pai a, nau pasal a nei a, "LALPA kuoma ka hni suok a nih" a ta, a hmingah Samuel a sak a. 21 Chun, LALPA hmaa kum tina pumraw inthawina an nei hlak ang le a thu intiemkamna hlen dingin a sûnghai thuoiin Elkana chu Silo-ah a hang fe a. 22 Hi tum hin Hana ruok chu a hang fe ve nawh. A pasal kuomah, "Naupang hin nene a nghei pha le chauh ama thuoiin LALPA hmaah hang inhlàn ka ta, chu taka chun ama chu um zing tâng a tih" a ta. 23 A pasal Elkana chun, "Tha i ti ang tak chun thaw rawh. Nene nêk i'n bàntir chenin hi taka hin um rawh; LALPAN i thu chu sukpuitlingpêk ngei raw se che" a ta. Chuongchun, naupangin nene nêk a bàn hma khat chu Hana chu inah a um a, a naupa chu a enkol a. 24 Nene nêk a bàn chun naupang dawng tak la ni sien khom a nu Hana chun bawngchal kum thum mi keiin, beiphit kilogram sawm le uoiin savun pèng khat chawi bokin Silo khuoa LALPA inah a fepui a. 25 Bawngchal chu an that a, naupang chu Eli kuomah an thuoi a. 26 Nuhmei chun, "Pu, i hringna sâlin ka hril, kei hi i bula hi hmuna ngîra LALPA kuoma tongtai nu ngei kha ka nih. 27 Hi naupang hi hniin ka tongtai a, ka hni ang takin LALPAN a mi pêk a. 28 Tuhin keikhomin LALPA kuomah naupang hi ka hung inhlàn a, a dam sûnga LALPA ta dinga pêk suok a nih" a ta. Chu taka chun Samuel chu LALPA rongbawlin a um ta a.

2

1 Chun, Hana chu hieng hin a tongtai a:"LALPA-ah ka lungril a hlim a, LALPAN ka ki a chawisâng a, Hmèlmahai lakah ka uong thei ta a, A sandamnaa chun ka lawm a nih. 2 LALPA anga thienghlim an um nawh, Nangma ang tu khom an um nawh, Ei Pathien ang Lungpui an um nawh. 3 Uongthuong takin tong zing naw la, Tong chaltlai hmang ta naw rawh, Iengkim hretu chu LALPA Pathien a nih, Mi tin thilthaw a bûk vong hlak. 4 Râlhrâthai thalngul a suktliek a, Mi hrât nawhai chu a sukhrât a, 5 Khophai chu bu zongin an inhlaw a, Phingtâmhai tlai takin an um a; Nu chingin nau 'sal sari a hring a, Nau hau nuin a sùn hmang zo tah. 6 LALPAN a sukhlum a, a sukhring a, Thlânah a hnûk lût a, a kei tho a; 7 A sukpasie a, a sukhausa bok a, A suktlawm a, a chawisâng bok a. 8 Pasie chu pilvuta inthok a lâk suok a, Rethei chu êk dûra inthok a chawisâng a; Ama chu milien lai a'n thangtir a, Chawimawina lalthungpha a'n hluotir. Leilung nghatsan chu LALPA ta a na, A chungah khawvel hi a'n nghat a. 9 A mi thienghlimhai kè a vêngpèk a, Mi rilohai chu thimah a hmet dei. Tha hrât hi dingchangna a ni nawh, 10 LALPA dotu chu inchek vong an ta, Vân a'nthokin inrûm khum a ta, LALPAN kawl kil chen ro rêl a tih. A ruot lal chu sukhrât a ta, A hriek nâl ki chu chawimawi a tih"tiin. 11 Chun, Elkana chu a chêngna khuo Rama tieng a kîr nawk a, naupang chun thiempu Eli hnuoiah LALPA rong a bawl a. 12 Eli naupahai chu an rilo hle a, LALPA inzàna hrim an nei nawh. 13 Mipuihai laka an lo thaw dàn chu, miin inthawina inhlàn a, a sa an suong lai chun thiempu siehlaw chu sa thurna thir kut zum thum nei chawiin hung a ta, 14 sa suongna bêl bau lien amanih, bêl dawt nei amanih, bêl khei nei amanih le bêl ieng chi khom ni sien zuk sun a ta, sa a lâk suok suok chu thiempu ta dingin a lâk hlak a. Silo-a LALPA kuoma thil inhlàna hung Israelhai po po chungah chuong ang chun an lo thaw hlak a. 15 Chu bâkah, a thauhai an raw hmain thiempu siehlaw chu inthawina inhlàntu kuomah hungin, "Thiempu em hmin ding sa mi hung pe rawh, i sa suong hi fa naw nih, a sel chau a nih a dit" tiin a hung hril a. 16 Chun, inthawituin, "A thau hi hang raw phot ei ta, a dang chu i dit zât zât i lâk ding a nih" a ti pha leh siehlaw chun, "Ni lo e, i mi pêk nghal ding a nih. I mi pêk naw chun ka lâk lui tho ding a nih" a ti hlak a. 17 Hienga LALPA kuoma thilhlàn inza naw taka an lo thaw hlak lei hin tlangvàlhai suolna chu LALPA mithmua chun thil theidaum tak a nih. 18 Amiruokchu, Samuel chu naupang te khom ni sien, puon zâi inhmia siem thiempu zakuo efod chu hâkin LALPA hmaah rong a bawl a. 19 Chu bâka chun a nuin zakuo fuol a thuipèk a, kum tin pumraw inthawina inhlàn dinga a pasal le Silo-a an fe zâtin a chawipèk hlak a. 20 Eli chun Elkana le a nuhmei chu mal a sawm a, "LALPA ta dinga thilhlân in inhlàn hi a'n hlàntu nuhmei thlaa inthokin LALPAN rul cheu raw se" a ta, chuongchun in tieng an kîr nawk ta a. 21 LALPA chun Hana chu a kan a, nau a pai a, naupa pathum le naunu pahni a nei a. Chun, naupang Samuel chu LALPA hmaa chun a hung seilien pei a. 22 Eli chu a hung upa ta hle a, Israel mihai po po chunga a nauhai thilthaw po po le Intuokna Puon in kotkhâr bula rongbawltu nuhmeihai an zàlpui hlak thu dâm chu a hriet a. 23 Chuongchun, an kuomah, "Ieng leia hieng ang thil hi in thaw am a na? Hieng mihai po po baua inthok hin in thil rilo thawhai ka lo hriet vong a nih. 24 Hieng ding hi a ni nawh, ka nauhai! Pathien mihai laia in chanchin an hril thang hi a tha naw tieng vong a nih. 25 Mi pakhat chungah mi dangin thil suol a thaw chun Pathienin an chungthu a rêl thei a, amiruokchu, LALPA chungah miin thil suol a thaw ruok chun tuin am a chungthu hrilpêk tàng a ta?" a ta. Chuong sa khom chun a nauhai chun an pa zilhauna chu an poisa chuong nawh, LALPA chun sukhlum dingin a lo ruot tawl ta si a. 26 Naupang Samuel ruok chu a hung inthang lien deu deu a, Pathien le mihriemhai ditsak a hlaw a. 27 Chun, Eli kuomah Pathien mi a hung a, a kuomah, "LALPA chun hieng ang hin a tih: 'Aigupta rama Faraw bawia in um lai khan in thlatuhai kuomah ka hung inlàr hlak a ni naw am a ni? 28 In thlatu chu Israel hnam po po laia inthoka ka thlang suok, ka maichâmah fe a, rimtui raw a, ka hmaah thiempu zakuo hâk a, ka thiempu ni dinga ka ruot a ni naw am a ni? In thlatuhai chu Israel mihaiin meia pumraw thilhlân an inhlàn po po kha ka pêk a ni naw am a ni? 29 Ieng leiin am ka umnaa inhlàn dinga ka ruot ka kuoma inthawinahai le ka puola thilhlânhai chu chèksol a, kei nêka i nauhai chawimawi lem a, nangni insukthauna dinga ka mi Israelhai inthawinaa a sa tha tha in hmang am a na? 30 "Chuleiin, LALPA, Israelhai Pathien chun hieng hin a puong a nih: 'Keiin i sûnghai le i pa sûnghai chu kumkhuoin ka hmaah um an tih lo ti lang khom, nangni chu um top naw ti niu. Mi chawimawitu taphot chu chawimawi ka ta, mi hmusittu taphot chu hmusit ka tih. 31 Ngai ta, i hrâtna le i pa sûnghai hrâtna ka sât thlàk hun a hung tlung vak ding a na, in sûngkuoa mi tar kûna dam hrim hrim um naw ti niu. 32 Hi ka chèngna ina hin buoina tlung a ta, Israel mihai ruok chu malsawm ka ta, inhnarin la thlîr vong vong in ta, i insûnga ruok chu tar kûna dam tu khom um naw ni hai. 33 Chun, ka maichâma inthoka ka sukbohmang nawhai chu i mitthli suktlatu le i lungril suklungngaitu ding chaua hlà nîng an ta, i ina inthoka pieng taphot chu an vânglai takin thi pei an tih. 34 " 'Chun, i naupahai pahnih, Hofni le Finehas hai chunga thil hung tlung ding hi i ta dingin inchikna nîng a tih, an pahniin ni khat sûngin an thi ve ve ding a nih. 35 Ka lungril le ngaituona anga ka rongbawltu ding keiman thiempu ringum indin ka ta, a sûngkuo khom indin nghet ka ta, ka hriek nâl hmaa chun rong bawl zing tâng a tih. 36 Chun, hieng hi nîng a ta, i sûngkuo la dam sun po po chu tangka le bei hlek hniin invâk an ta, a hmaa chun kûn an ta, 'Fâk ding ka hmu theina dingin thiempu sin ieng amani bêk mi'n thawtir raw khai' tiin la hnîng an tih' a ti a nih" a ta.

3

1 Naupang Samuelin Eli hnuoia LALPA rong a bawl lai chun LALPA thu a tlung inkhàt hle a, inlàrna khom a hung tlung zen zen nawh. 2 Chuong lai chun Eli mit chu a chàu tàk leiin khuo a hmu mumal thei ta naw a, a zâlna hmun pangngaia chun a zâl a. 3 LALPA tempula PathienThuthlung Bawm bula chun Samuel chu a zàl a. Chun, Pathien khawnvar khom an la that hman hmain, 4 LALPA chun Samuel a ko a. Samuel chun, "Hi taka hin ka um?" a ta. 5 Eli kuomah a va tlân vat a, "I mi ko maw? Hi taka hin ka um" a ta. Ama chun, "Ka ko naw che, va zâl nawk ta rawh" a ta. Chuongchun a fe a, a zâl nawk ta a. 6 LALPA chun Samuel chu a ko nawk a. Samuel chu a tho a, Eli kuomah a fe a, "I mi ko maw? Hi taka hin ka um" a ta. Eli chun, "Ka naupa, ka ko naw che. Fe la, va zâl nawk ta rawh" a ta. 7 Chuong lai chun Samuel chun LALPA a la hriet ve naw a, LALPA thu chu a kuoma puong a la ni bok nawh. 8 LALPA chun Samuel chu a ko nawk a, chu chu a ko voi thumna a nih. Samuel chu a tho a, Eli kuomah a fe a, "I mi ko maw? Hi taka hin ka um" a va ti nawk a. Chu phing leh naupang chu LALPAN a ko a nih ti Eli chun a hriet ta a. 9 Eli chun Samuel kuomah, "Fe la, va zâl nawk ta rawh. A ko nawk che chun, 'LALPA, thu chu hril rawh, i siehlaw hin a ngaithlàk ie' ti rawh" a ta. Samuel chu a khuma chun a va zâl nawk a. 10 LALPA chu a hung a, a bula chun a ngîr a, a hmaa ang bok khan, "Samuel, Samuel" tiin a ko nawk a. Samuel chun, "Thu chu hril rawh, i siehlaw hin a ngaithlâk ie" a ta. 11 LALPA chun Samuel kuomah, "Ngai ta, Israel rama a hre taphothai na khel ngei ngei ding thil ka thaw ding a nih. 12 Chu huna chun Eli kuoma a sûngkuo chungchâng thua thaw dinga ka thil hril po po chu a bula inthoka a tawp chenin ka hlen ding a nih. 13 A nauhaiin thil suol thaw a, Pathien an sukmuolphozie hre zing sia a khap naw leia an sûngkuo chungthu kumkhuoa dinga ka rêl chu ama khom ka hril tah. 14 'Eli sûngkuo bawsietna chu inthawina amanih thilhlân amania sukre thei ni ta naw nih' tiin ka lo inkhàm ta si a" a ta. 15 Samuel chu zîng tieng chen a in a, LALPA in kotkhârhai chu a hong a. Inlàrna a hmu chu Eliin hrieng a tih ti Samuel chun a tithawng hle a. 16 Amiruokchu, Eli chun a hung pan a, "Ka naupa Samuel" tiin a hung ko a. Samuel chun, "Hi taka hin ka um" a ta. 17 Eli chun, "Ieng thil am LALPA chun a hril che a? Ka lakah ieng khom ip naw rawh. I kuoma a hril po po chu ka lakah ip i nei chun i chungah Pathienin a nat thei ang tawpin thaw raw se" a ta. 18 Chuongchun, Samuel chun iengkim chu ip nei dêr loin a hril a. Eli chun, "LALPA a na, tha a ti ang peiin thaw raw se" a ta. 19 Samuel chu a hung inthang lien pei a, a kuomah LALPA a um a, a hril hrim hrim chu a sukdik pei a. 20 Dan-a inthoka Beersheba chena Israel mihai po po chun Samuel chu LALPA zawlnei indik a ni takzet ti an hung hriet tah vong a. 21 LALPA chu Silo-a chun a'n làr zui pei a, Samuel kuomah a thu a puong hlak a. Samuel thu chu Israel mihai po po lai a hung inthang suok ta a.

4

1 Chuong lai chun Israelhai chu Filistin mihai do dingin an inthok suok a, Israelhai chu Ebenezer-ah an inkul a, Filistinhai chu Afek-ah an inkul bok a. 2 Filistinhai chun Israelhai chu an hung bei a, an hne a, indona hmuna chun mi sângli lai an that a. 3 An inkulnaa Israel sipaihai an hung kîr chun an upahaiin, "Ieng leiin am voisun hin Filistinhai hmaah LALPAN a mi suktlawm am nîng a ta? Thaw ro, eini leh fe a, ei hmèlmahai kuta inthoka mi san suoktu dingin Silo-a inthokin LALPA Thuthlung Bawm hang làng ei tiu khai, " an ta. 4 Chuongchun, Silo-ah mi an tir a, chu taka cherubim chunga inthung Iengkim LALPA Thuthlung Bawm chu an va làk a, Eli naupa Hofni le Finehas hai khomin bawm chu an hung zui ve a. 5 An inkulna hmuna Thuthlung Bawm a hung tlung chun hnuoi nghor hning hiel khopin Israelhai chu an khêk dur dur a. 6 An khêk ri Filistinhaiin an lo hriet chun, "Hebrai mihai inkulnaa an khêk dur dur chu ieng tizie am an ta le? an ta. An inkulnaah LALPA Thuthlung Bawm a hung tlung ti an hriet chun an ti hle a. 7 "An inkulnaah Pathien a hung a ni chu! Ei chung a pik ie! Kha hma khan hieng thil hi a la um ngai nawh. 8 Ei chung a pik ie! Chuong ang Pathien kut hrâta inthok chun tuin am mi san suok tàng a ta? Chuong ang Pathienhai chu an nih thlalèra hri chi tinrênga Aigupta mihai sukhlumtu kha! 9 Aw nangni Filistin mihai, huoisen takin um ro. Insukpasal ro, chuong naw chun in thu hnuoia an um ang bok khan an thu hnuoiah um ve rawi in tih. Insukpasal unla, bei pei ro" an ta. 10 Chuongchun, Filistin mihai chun an hung bei a, Israelhai chu an intlawm a, an inkulna tieng an tlânsie a, an that teu a, Israel sipai sîngthum an thi a. 11 Chun, Pathien Bawm chu an lâkpèk a, Eli naupahai Hofni le Finehas chu an that bok a. 12 Chu ni chun Benjamin thlaa mi pakhat chu a zakuo inek nung le a luah pilvut kai nuoiin indona hmuna inthok chun Silo a tlân tlung a. 13 A va tlung chun Eli chun lam sîra a thungnaa inthokin a lo thlîr zing a, a lungrila a tithawngpui tak chu Pathien bawm a nih. Khuo a hung tlung a, chanchin a hang hril chun a khuoin an khêk ta chèl chûl el a. 14 An khêk ri Eli-in a lo hriet chun, "Ieng leia an khêk chêl chûl am a na?" a ta. Chu mi chun inhmaw takin Eli kuom tieng a pan a, thil chinchàng chu a va hril a. 15 Eli chu kum sawmkuo pariet mi a ni ta a, a mitin khuo a hmu dukdak thei ta nawh. 16 A kuoma chun, "Indona hmuna inthoka hung ka na, voisun ni ngeia hung tlânsie ka nih" a ta. Eli chun, "Ka naupa, ieng tin am thil a um a?" a ta. 17 Chanchin hung intluntu chun, "Filistinhai hmaah Israelhai an tlânsie a, mi tam tak an thi a, i nauhai Hofni le Finehas khom an thi a, Pathien Bawm khom an lâkpèk" a ta. 18 Pathien Bawm thu a hril charin kotkhàr bula thungnaa inthung Eli chu a thalin a tlu a, a ring a del tliek a, a thi ta a; ama chu a tar tain a'n thazo ta si nawh. Israelhai chungah kum sawmli ro a rêl hman a nih. 19 Chun, a mo, Finehas nuhmei chun nau a pai a, a nau nei hun a hnai ta hle a. Pathien Bawm an lâkpèk thu le a tarpu le a pasal thi thu a hang hriet chun a nau hase a'n tan nghal a, nau a nei a, a na chu a tuor zo ta naw a. 20 A chat thla tawmin nau domtu nuhmei chun, "Beidong naw rawh, nau pasal i nei ta hi" a ta. Nisienlakhom, a don ta naw a, a ngaisak ta bok nawh. 21 Thuthlung Bawm an lâkpèk a, a tarpu le a pasal an thi ta bok lei chun, "Ropuinain Israel a suoksan tah" tiin nau domtu chun naute hmingah Ikabod a sak a. 22 Ama chun, "Thuthlung Bawm an lâkpèk leiin ropuina chun Israel a suoksan tah" a ti a nih.

5

1 Filistinhai chun Pathien Bawm chu an lâk a, Ebenezer-a inthokin Asdod khuoah an fepui a. 2 Bawm chu an pathien Dagon tempulah an zawn lût a, Dagon lem sîra chun an sie a. 3 A zing inhma taka Asdod khuohai an tho chun LALPA Bawm hmaa chun Dagon chu a hmaia hnuoi sikin a lo tlu dèr a. Dagon chu an làk a, a umna pàngngàia bok an sie nawk a. 4 A zìngah an tho chun Dagon chu LALPA Bawm hmaa a hmaia hnuoi sika zâl chu an hmu nawk a. A lu le a bânhai chu a tliek vong a, a bonghai chu kotkhàr bulah an inhlum rum a, a pum chauh chu a um ta a. 5 Hi lei hin Dagon thiempuhai le Dagon be dinga Asdod tempula hung tukhomin tu chen hin tempul kotkhàr bul chu an la sir ngam nawh. 6 Asdod le a se vela umhai chungah LALPA kut chu nasa takin a tla a, an chungah sietna a tlung a, pânsie an invoi a. a 7 Asdod khuoa mihaiin chuong thil chu an hmuin, "Israelhai Pathien Bawm chu eini kuomah um zing naw raw se, ei chunga le ei pathien chunga a kut thlàk a na êm el" an ta. 8 Chuongchun, Filistin lalhai po po chu an ko khawm a, "Israelhai Pathien Bawm chu ieng tin am thaw tàng ei ta?" an ta. Anni chun, "Israelhai Pathien Bawm chu Gath khuoah va fepui ro" tiin an lo hril a, chuongchun Pathien Bawm chu an fepui ta a. 9 Gath khuoa Bawm an son hnung chun LALPA kut chu a khawpui chungah a tla a, thlabàrin an chi-ai a. A khaw mihai chu a chin a lienin pânsiein a hrem a. 10 Chuongchun, Pathien Bawm chu Ekron tieng an thon a. Pathien Bawmin Ekron khuo a lût tawm chun, "Ei ni le ei mipuihai sukhlumtu dingin Israelhai Pathien Bawm an hung zawn kîr ie" tiin an khèk a. 11 Chuongchun, Filistin lalhai po po chu an ko khawm a, an kuomah, "Keini le kan mihai a mi sukhlum nawna dingin Israelhai Pathien Bawm hi thon hmang unla, a umna ngaia bok kîr nawk raw se" an ta. 12 LALPA kut chu a rik hle a, thi inlauna chun a khawnawtin a sukthlabàr a. A thi nawhai khomin pânsie an tuor a, khawpuia an inrûm ri chun vân a tong a.

6

1 LALPA bawm chu Filistinhai ramah thla sari a um a. 2 Filistinhai chun an thiempuhai le ai en thiemhai an ko a, "LALPA Bawm hi iem ei law ding a na? Ieng tin am ei thon kîr ding a na ti mi hril ro" tiin an indon a. 3 Anni chun, "Israelhai bawm hi in thon kîr ding khomin a ruok chun infètir naw ro. A kuomah bawsiet inthawina inhlàn unla, chuongchun sukdamin um in ta, nangnia inthoka kut a làkson nawna san khom hung hrieng in tih" an ta. 4 Filistinhai chun, "Ieng ang bawsiet inthawina am inhlàn ei ta?" an ta. Anni chun, "Ràngkachakin khuoihli lem panga le mazute lem panga siem unla, Filistin lal tinin pakhat seng inhlàn ro, in rênga chunga hri inlêng le in lalhai chunga hri inlêng chu thuhmun a ni si a. 5 Chuleiin, khuoihli lem le in ram suksetu mazute lem chu siem unla, Israelhai Pathien chu chawimawi ro, a kut chu in chunga le in pathienhai chungah a sukzàng nuom el rawi mawh! 6 Faraw le Aigupta mihaiin lungril an sukkhauh ang khan ieng dinga in lungril in sukkhauh am? Anni chungah na taka a thaw lei khan Israelhai chu insuoin an infètir chauh a ni naw am a ni? 7 Chuleiin, tu hin tawlailir thar buotsai unla, bawngpui pahni, a nene sawr lai, ringkol la bât ngai dêr lo chu buotsai unla, tawlailir chu inkeitir unla, an tehai chu hung thuoi kîr unla, thlung ro. 8 LALPA Bawm chu la unla, tawlailira chun sie unla, bawsiet inthawina dinga in inhlàn ràngkachak thil hluhai chu thingremah khumin a sîrah sie unla, infètir unla, inthla el ro. 9 Ramri tieng pana Beth-semes tieng tawlailir a fe chun ei chunga thil tlung tha lo tak hi ama thaw nîng a ta, a fe naw chun a mi hremtu chu ama kut ni loin, eini chunga tla ve hrim hrim a nih ti hrieng ei tih" an ta. 10 Chuong ang tak chun an thaw a, bawngpui, a nene sawr lai pahni an va kei a, tawlailir chu an inkeitir a, an tehai chu in tieng an khum a. 11 Chun, LALPA Bawm chu tawlailira chun an sie a, rangkachak mazute lem le khuoihli lem siena thingrem chu an sie bok a. 12 Bawngpuihai chun Beth-semes an pan ngat ngat a, inbu pei pumin lampui chu an hraw a, voi tieng amanih chang tieng amani khom an pèt nawh. Filistin lalhai chun Beth-semes ramri chenin an zui a. 13 Beth-semes khuoa mihai chun ruoma hin bu an lo sìk a, an hang ngha a, Bawm chu an hmu a, an lawm hle a. 14 Tawlailir chu Beth-semes khuoa Josua loa chun a lût a, lungpui lien tak umna lai chun a ngîr ta zing a. Chun, tawlailir thing chu an chèk nawi a, bawngpuihai chu LALPA ta dinga pumraw inthawinaah an inhlàn a. 15 Levihai chun LALPA Bawm le rangkachak thil lem umna thingrem chu an lâk thlàk a, lungpui chunga chun an sie a. Chu ni vèk chun Beth-semes khuoa mihai chun pumraw thilhlân le inthawinahai chu LALPA kuomah an inhlàn a. 16 Chun, Filistin lal pangahai chun chuong thil chu an hmu hnungin a ni lá làin Ekron tieng an kîr nawk ta a. 17 Filistin mihaiin bawsiet inthawina dinga rangkachaka siem khuoihli lem an inhlân zât chu hieng ang hin a nih: Asdod khaw puolin pakhat, Gaza khaw puolin pakhat, Askelon khaw puolin pakhat, Gath khaw puolin pakhat le Ekron khaw puolin pakhat seng a nih. 18 Rangkachaka siem mazute lem an inhlàn zât chu Filistin lal pangahai khuo, kula inhuon le an khawperhai po po zât a nih. LALPA Bawm an innghatna lungpui chu Beth-semes khuo Josua loah tu chen hin inchikna dingin a la um zing a nih. 19 Amiruokchu, LALPA Bawm sûng an en leiin Beth-semes khuoa mihai chu Pathienin a hrem a, mi sawmsarib a sukhlum a. LALPA kut thlàk nat leia thihai chu mipuiin an sûn a. 20 Beth-semes khaw mihai chun "Hi Pathien thienghlim LALPA hmaa hin tu am ngîr theiin, ei kuoma inthok hin tu kuom tieng am pan tung nawk a ta?" an ta. 21 Chuongchun, Kiriath-jearim khuoa mihai kuoma chun, "Filistin mihaiin LALPA Bawm an hung sie nawk ta a, hung thla unla, in kuom tieng la tung ro khai" tia hril dingin mi an tir a.

7

1 Chuongchun, Kiriath-Jearim khuoa mihai chu an hung a, LALPA Bawm chu an làk tung a, tlânga Abinadab ina chun an chawi a, a naupa Eleazar chu LALPA Bawm enkoltu dingin an inhlàn thienghlim a. 2 LALPA Bawm chu kum sawmhni zet Kiriath-Jearimah a um a, chu sûng chun Israelhai chu LALPA tieng an lung an lèng nawk ta a. 3 Samuel chun Israel sûngkuo po po kuomah, "In lungril po poa LALPA tienga hung ngha in ni tak tak chun, ram dang pathienhai le Astoret lemhai chu sie hmang dai unla, in lungril LALPA ta dingin buotsai unla, ama rong chauh bawl ro, chuongchun Filistinhai kuta inthok hin san suok a ti cheu" tiin a hril a. 4 Israel mihai chun Baal le Astoret hai lem chu an sie hmang a, LALPA rong chauh chu an bawl ta a. 5 Samuel chun, "Israel mihai po po Mizpa-ah ko khawm vong ro, LALPA kuomah tongtaipêk ka ti cheu" a ta. 6 Mizpa-a chun an fè khawm a, tui an chawi a, LALPA hmaah an bun thlàk a. Chu ni chun bu an nghei a, "LALPA lakah thil suol kan lo thaw a nih" tiin an inpuong a. Mizpaa inthok chun Samuelin Israelhai ro a rêlpèk a. 7 Mizpaah Israelhai an pung khawm ti Filistinhaiin an lo hriet chun anni chu bei dingin Filistin lalhai chu an inthok tung a. Filistinhai hung thu Israelhaiin an lo hriet chun an ti hle a. 8 Samuel kuomah, "Filistinhai kuta inthoka a mi san suok theina dingin LALPA chu ma loin ko zing rawh" an ta. 9 Samuel chun beramte, nene ne lai a lâk a, LALPA kuomah pumraw inthawina dingin a'n hlàn a. Israelhai aiawin Samuel chun LALPA a ko a, LALPA chun a hung don a. 10 Samuelin pumraw thilhlân a'n hlàn lai chun Filistinhai chun Israelhai chu bei dingin an hung nangching têp ta a. Nisienlakhom, chu ni chun LALPAN vâninrumin Filistinhai chu a hrawk a, nasa takin a sukchi-ai a, Israel mihai chun an intlawm ta dèr a. 11 Israelhai chu Mizpaa inthok chun an suok a, Filistinhai chu Beth Kar chuonhnuoi chen an hnot a, lampui intluonin an that a. 12 Samuel chun lung a lâk a, Mizpa le Sen inkâra chun a phun a, "Hi chen rauh hi LALPAN a mi thangpui a nih" tiin a hmun hmingah Ebenezer a'n bûk a. 13 Chuongchun, Filistinhai chu tukdolin an um a, Israel ram chu an rûn nawk ta ngai nawh. Samuel dam sûng po po chu LALPA kutin Filistinhai a dang tlat a nih. 14 Filistinhaiin Israelhai an lâkpèk khuo po po chu, Ekron-a inthoka Gath chenin, Israelhai kutah an pêk kîr nawk vong a, an sevel ram po po chu Filistinhai kuta inthokin Israelhaiin an san suok a, Israel mihai le Amor mihai inkârah inremna a hung um ta a. 15 Samuel chun a dam sûngin Israel mihai ro a rêl a. 16 Kum tinin Bethel le Gilgal le Mizpa khuohai chu a kan vèl hlak a, a fena naah Israelhai ro a rêl pei a. 17 Amiruokchu, ama in umna Rama khuoah a kîr nawk zie a, chu taka inthok khom chun Israelhai ro a rêl a, LALPA ta dingin maichâm a siem a.

8

1 Samuel chu a hung upa ta a, a naupahai chu Israelhai chunga rorêltuah a sie a. 2 A upa tak hming chu Joel a na, a dottu hming chu Abija a na, Beershebaa inthokin ro an rèl a. 3 Nisienlakhom, a nauhai chun a um dàn la ve loin sum le pai an hnot a, thamna an làk a, indik lo takin ro an rèl a. 4 Chuongchun, Israel upahai po po chu an inkhawm a, Rama khuoah Samuel kuoma chun an fe a, 5 a kuomah, "Ngai ta, i hung upa ta hle a, i naupahai hlak chun i um dàn an lâk ve si naw a, hnam dang po pohai thaw dàn angin kan chunga rorêltu dingin lal mi ruotpêk rawh" an ta. 6 "Rorêltu dingin lal mi ruotpêk rawh" an ti lei chun Samuel chu a lawm naw hle a, LALPA kuomah a tongtai a. 7 LALPA chun a kuomah, "Mipuiin i kuoma an hril po po chu ngaithla rawh. Nangma an dit naw lei che a ni naw a, an chunga rorêltu dingin keima an mi dit naw lei lem a nih. 8 Aigupta rama inthoka ka thuoi suok nia inthok tah khan tu chen hin mi nghatsan le pathien dang rong mi bawlsan an ching a, chuong ang chun i chunga khom an thaw ve a ni hih. 9 Chuleiin, an thu ngaithla la, amiruokchu, an chunga lalhaiin an la hung thaw dàn dinghai chu ngun takin hril lawk tawl rawh" a ta. 10 Samuel chun LALPA thu po po chu lal hnitu mipuihai chu a hril vong a. 11 An kuoma chun, "In chunga rorêltu lal a la hung chêt dàn ding chu hieng ang hin nîng a tih: A tawlailir le a sakorhai enkoltu dingin in naupahai lâkpèk a ti cheu a, a tawlailir hmaa chun tlân an tih. 12 A then chu mi sâng chunga kawmandar dâm le sawmnga chunga kawmandar dàmin sieng a ta, a thenin a hnuoi inletin a bu sîk an ta, a then râlthuom siemtu le a tawlailir hmangruo siemtuah hmang tawl a tih. 13 In naunuhai chu rimtui siemtua dâm, bu suongtua dâm, bei siemtua dâm hmang a tih. 14 Chun, in in le lohai, in grèp huonhai le in oliv huonhai a thá thà lâkpèk a ti cheu a, a siehlawhai pêng a tih. 15 In bu tharsuok le in uoin tharsuok sawma pakhat lâng a ta, a thoktuhai kuomah pêng a tih. 16 In bawipa le bawinuhai le in ran ruol laia a tha tak ngot le in sabengtunghai chu ama hmang dingin lapêk a ti cheu. 17 In beram ruol laia mi sawma pakhat lâng a ta, nangni ngei a siehlawah thang in tih. 18 Chu ni chu a tlung pha leh in lal thlang laka inthoka thawvengna hniin inrûm in ta, chu huna chun LALPAN donsak naw ni cheu" a ta. 19 Nisienlakhom, mipuihai chun Samuel thu chu an ngaithlak nuom naw a, "Ni lo e, kan chunga lal ding kan dit a nih. 20 Chuongchun, hnam danghai ang hung ni vêng ei ta, ei lal chun ro mi rêlpèk a ta, hma thuoiin ei ràlhai mi dopèk a tih" an ta. 21 Samuel chun an hril po po chu a hriet a, LALPA hmaa chun a hril sawng pei a. 22 LALPA chun, "An thu ngaithla la, lal pe tawl rawh" a ta. Samuel chun Israel mihai kuomah, "Mi tin mani khuo sengah kîr nawk ta ro" a ta.

9

1 Benjamin hnama mi pa challang tak el a um a, a hming chu Kisa a na, ama chu Abiel naupa a na, ama chu Zeror naupa a na, ama chu Bekora naupa a na, ama chu Afia naupa a nih. 2 Kisa chun naupa a nei a, a hming chu Saula a nih. Ama chu tlangvàl duongkai tha tak el a na, ama tluk hrim Israelhai lai an um naw a, a dung khomin mi a khûm vong a nih. 3 Saula pa Kisa chun a sabengtung ruol an tla hmang leiin a naupa Saula kuomah, "Siehlawhai laia pakhat hi thuoi la, ei sabengtunghai va zong rawh" a ta. 4 Chuongchun, Efraim tlângram le Salisa le a se vel chen an dap vong a, sienkhom an hmu zo naw a. Salim bielah an zong nawk a, sienkhom an hmu nawh. Chu zoah Benjaminhai ramah an zong nawk a, sienkhom an hmu zo chuong nawh. 5 Zufa biel an tlung chun Saulan a siehlaw kuomah, "Thaw rawh, kîr nawk tâng ei tih. Chuong naw chun ka pa'n a sabengtunghai nèk hmanin eini mi lo ngaituo lem rawi a tih" a ta. 6 A siehlaw chun, "Ngai ta, hi khuoa hin Pathien mi a um a, mi inzaum tak a na, a hril taphot chu a hung tlung indik ngei ngei hlak a nih. Thaw ta, a umnaa chun fêng ei ta, ei fèna ding tieng khom mi hril thei rawi naw nim" a ta. 7 Saula chun a siehlaw kuomah, "An leh, ei fe ding chun iem a na ei chawipèk hrim hrim ding? Ei bu chawi hlak ei fâk zo ta si. Pathien mi kuoma thilpêk chawi ding ei nei dêr naw a nih. Iem nei ei nei hrim hrim a?" a ta. 8 Siehlaw chun, "Tangka shekel hmun lia thea hmun khat chu ka la kol a, chu chu ei fèna ding a mi hril manah Pathien mi chu pe el ei tih" a ta. 9 (Kha hma khan chu Israel mihai laia miin Pathien rawn an nuom changin, "Thaw ro, hmutheitu kuomah fèng ei tiu" an ti hlak a; tu laia 'zawlnei' an ti hlak hi 'hmutheitu' an ti hlak a nih. ) 10 Saula chun a siehlaw kuomah, "A tha hlauh a ni chu, fêng ei tih" a ta. Chuongchun, Pathien mi umna khuo tieng pan chun an inthok suok a. 11 Khuo an pan tung lai chun tui chawia hung nunghàk ruol an hmu a, "Hi taka hin hmutheitu a um?" tiin an indon a. 12 Anni chun, "Um e. In hma ela khan a fe. Inhmaw unla, hmun sângah mipuiin inthawina an nei ding a ni leiin kan khuoah voisun hin a hung vak a nih. 13 Khuo in lût charin, hmun sânga bu fâka a fe hmain ama chu hmu el in tih. An inthawina malsawmna hriltu ding a ni leiin, a tlung hma chun tu khomin bu fa naw ni hai, chu zoah fielhai chun bu an fâk chauh hlak a nih. Chuleiin, fe unla, hang nang el in tih" an ta. 14 Chuongchun, khuo chu an pan tung a, an lût chun hmun sânga fe ding Samuel chu an hang nang a. 15 Saula hung hma ni khata chun LALPAN Samuel kuomah hieng ang hin thu a puong a: 16 "Hieng tik huna hin zingah Benjamin rama inthokin tlangvàl pakhat i kuomah hung tir ka ta, ka mi Israelhai chunga hotu dingin hriek lo nâl rawh. Ama chun Filistinhai kuta inthokin ka mihai san suok a tih. An khèk ri chun ka kuom a hung tlung tah leiin anni chu ka ngaisak a nih" tiin. 17 Samuelin Saula a hmu char chun LALPAN a kuomah, "En ta, i kuoma ka hril pa kha; ama hin ka mihai chungah ro rèl a tih" a ta. 18 Chuongchun, Saula chun kul kotkhàra ngîr Samuel chu a va hnai a, "Hmutheitu in chu khaw lai am a um ti mi hril raw khai" a ta. 19 Samuel chun, "Keima hi hmutheitu chu ka nih. Ka hmaah fein hmun sâng tieng khi pan la, voisun hin ka kuomah bu i fâk ding a nih. Zîngah infetir chauh ka ti che a, i thil hriet nuom po po khom hril vong ka ti che. 20 I sabengtung, ni thum inhmang tah khom chu lungkham naw rawh, an hmu tah. Israelhai mamaw tak tu am a na? Nang le i pa sûnghai hi in ni naw am a ni?" a ta. 21 Saula chun, "Israel pahnamhai laia hnam chîn tak Benjamin hnama mi ka ni a, Benjamin pahnam sûnga khom a chîn tak kan nih. Iengti leia hieng thil hi ka kuomah i hril am a na?" a ta. 22 Samuel chun Saula le a siehlaw chu a thuoi a, mikhuol pindana chun a thuoi lût a, an mi fiel sawmthumhai lai chun thungna poimaw takah a'n thungtir a. 23 Samuel chun bu suongtu kuomah, "Sie hran dinga ka pêk che satlang kha tu hin hung la rawh" a ta. 24 Thlai suongtu chun a mal le an thil buotsai danghai chu a hung lâk a, Saula hmaa chun a sie a, Samuel chun, "En ta, hi huna i ta dinga sa ka lo sie hranpêk che chu a nih. Ka mikhuolhai ruol hin kìlin fa rawh" a ta. Chu ni chun Saula chu Samuel leh thlaithlèng an kìl tlâng ta a. 25 Inthawina hmun sânga inthoka khuoa an fe thlâk hnung chun Samuelin Saula chu in chung zawlah a'n biekpui a. 26 Zîngkàr inhma takin an tho a, Samuel chun Saula chu in chung zawlah a ko tung a, "In siem zo la, infetir tâng ka ti che" a ta. Saula a'n siem zo chun Samuel leh an suok tlàng a. 27 Kotsuo an tlung chun Samuelin Saula kuomah, "Siehlaw hi ei hmaa lo fe dingin hril rawh. Nang ruok chu hi taka hin la ngîr phot la, Pathiena inthoka ka thu dong chu ka hril ding che a nih" a ta, siehlaw chu a lo fe hmasa a.

10

1 Samuel chun a hriek bûr chu a phor a, hriek chu Saula luah a bur a, a fawp a, "LALPA chun a rochan Israelhai chunga rorêltu dingin hriek a nàl che. 2 Voisuna i mi suoksan hnung hin Benjamin ramria Rachel thlân bul Zelza-ah mi pahni intuokpui i ta, anni chun i kuomah, 'Sabengtung i zonghai kha an hmu ta a, i pa chun sabengtung ngaituo ta loin nang mol a ngaituo che a, 'Ka naupa chu ieng am a chang an ta maw?' a ti a ti el a nih' tiin hril an ti che. 3 "Chun, chu taka inthok chun fe pei i ta, Tabor saisuo thing va tlung i ta, chu taka chun mi pathum, Bethela Pathien be dinga fehai chu intuokpui i ta, pakhat chun kèlte pathum kei a ta, pakhat chun beipêr pathum chawi a ta, pakhat chun uoiin pêng chawi a tih. 4 Chibai bûk an ti che a, beipêr pahni chu pêng an ti che a, chu chu la rawh. 5 Chu zoah Filistin sipaihai umna Pathien tlâng Gibea chu va tlung i ta, chu taka chun perkhuong dâm, khuongte dâm, theihle dâm, tingtang dâm chawia zawlnei ruol, hmun sânga inthoka hung thlahai chu intuokpui i ta, thu hril duol duol an tih. 6 Chun, LALPA thlarau i chungah nasa takin hung tlung a ta, nang khom an thu hrilnaa chun thang vèng i ta, mi danglam daiah hung inchang i tih. 7 Hieng inchiknahai hi i chungah a hung tlung pha leh thil hung um dàn zir ang peiin i thaw ding a nih, Pathien i kuomah a um si a. 8 Chun, ka fe hmain Gilgalah lo zu fe hmasa la, keikhom pumraw inthawina le inremna inthawinahai inhlàn dingin hung thla vèng ka ta, ka hung tlung phaa i thaw ding ka hung hril hma che chu ni sari sûng mi lo nghak rawh" a ta. 9 Samuel a màksan ding tawmin Pathienin Saula chu lungril thar a pêk a, chuong inchiknahai po po chu, chu ni chun a chungah a hung tlung vong a. 10 Gibea an tlung chun zawlnei ruolin an lo hmuok a, Pathien Thlarau chu a chungah thilthawtheinain a hung tlung a, an thu hrilnaa chun a thang ve ta a. 11 A hmaa ama lo hretuhaiin zawlneihai ruola thu a hang puong ve an hmu chun, "Kisa naupa chungah ieng top am a tlung an ta le? Saula chen khom zawlneiah a lo thang an ta maw?" tiin an indon tuo a. 12 A umna khuoa mi pakhat chun, "Hieng zawlneihai khom hi an pahai chu iem an ni bik a? a lo ti a. Chu taka inthok chun, "Saula chen khom zawlneiin a thang an ta?" ti chu infiemna tongkam takah an hung hmang pha tah a nih. 13 Chun, zawlnei anga thu a hril zoin Saula chu hmun sângah a fe a. 14 Saula pate chun Saula le a siehlaw kuomah, "Khaw lai am in fe a?" tiin a lo indon a. Ama chun, "Sabengtung zongin kan fe a, kan hmu naw phing leh Samuel kuomah kan fe a nih" a ta. 15 A pate chun, "Samuel chun i kuomah iem a lo hril che, mi hang hril ta" a ta. 16 Saula chun a pate kuomah, "Sabengtunghai chu an hmu tah ti a mi hril" a ta, inlalna thu ruok chu ieng khom a pate kuoma chun a hril sa nawh. 17 Samuel chun Israel mipuihai chu Mizpaah LALPA hmaah a ko khawm a. 18 Israel thlahai kuoma chun, "LALPA, Israelhai Pathien chun hieng ang hin a tih: 'Israelhai chu Aigupta rama inthokin ka thuoi suok a, Aigupta mihai kuta inthok le a suknomnatu po pohai laka inthokin ka san suok a; 19 nisienlakhom voisun hin an mangangna le rinumna po poa inthoka sanhimtu an Pathien chu an mi dit naw a, ka kuomah, 'Ni lo e, lal mi siempêk rawh' an ti a. Chuleiin, tu hin Israel hnam po po le pahnam po po chu LALPA hmaah hung inlang ro" a ta. 20 Chuongchun, Samuel chun Israel mi po po chu a hung inlangtir a, Benjamin hnam chu thlang a lo ni ta a. 21 Benjamin chihai chu an sûngkuoin an hung inlang a, Matri sûngkuoa mi, Kisa naupa Saula chu thlang a lo ni ta a, sienkhom ama an hang zong a, an hmu naw a. 22 Chuongchun LALPA kuoma chun, "Ama chu a la hung inlang naw zing am a ni?" tiin an indon a, LALPA chun, "Ngai ta u, a thuomhnaw lai an birûk a ni kha" a ta. 23 Chuongchun an tlàn a, an va thuoi suok a, mipui lai a hang ngîr chun anni lai a dung a'n sâng tak a. 24 Samuel chun mipui kuomah, "LALPA mi ruot hi in hmu am? Mi po po lai ama ang hrim an um nawh" a ta. Mipui chun, "Pathienin laltak chu humhim raw se" tiin an khèk a. 25 Samuel chun lal hnuoia an invong dàn dinghai chu mipui a zirtir a, lekhabuah a ziek thlàk a, LALPA hmaa chun a sie tha a. Chu zoah mipui chu mani in sengah a'n tìntir tawl ta a. 26 Saula khom Gibea khuoa a inah a kîr a, Pathienin an lungril a them tah mi huoisenhai chun an zui a. 27 Buoina siem châk mi rilo thenkhat ruok chun, "Ieng tin am hi mi hin a mi san suok ding a na?" tiin an deusaw a, thilpêk ieng khom an pêk nuom nawh. Saula ruok chu a to zing a.

11

1 Amon mi Nahas chun Gilead rama Jabes khuo rûn tumin a hang inhuol a. Jabes mi po po chun Nahas kuomah, "Keini leh thuthlung siem la, i thu hnuoiah um kan tih" an ta. 2 Amon mi Nahas ruok chun, "Hieng ang hin in kuomah thuthlung siem thei ka tih: in mit chang tieng khel dok vong ka ta, Israelhai po po sukhmèlhem ka tih" a ta. 3 Jabes khuoa upahai chun a kuomah, "Israel ram po poah mi kan tir theina dingin ni sari sûng mi la ngai rawh. Mi sandam thei ding tu khom an um naw chun i kutah hung inpe lût kan tih" an ta. 4 An mi tirhai chu Saula umna Gibea khuoah an fe a, an thil ngiet an hang ripawt chun mipui chu an tap khêk chûl el a. 5 Chuong lai chun Saula chu loa inthokin bawngchal khalin a hung a, "Iem a ta mipui an tap chu?" a ta. Jabes khuoa mihai thu hril chu an hril sawng a. 6 Saulan chu thu a hriet char chun a chungah Pathien Thlarau thilthawtheina a hung tlung a, a lung a sen hle a. 7 Bawngchal tuok khat a that a, an sa a chan nawi vong a, Israel ram po poa chun a'n semtir a, "Tu khom Saula le Samuel hung zui nuom naw taphot chu hieng ang hin an bawngchal thaw ve nîng a tih"tiin. Chuongchun, LALPA tìna chu mipuihai lai chun a'n lêng a, thu khat chelin an inthok suok a. 8 Bezek hmunah Saulan anni chu a tiem a, Israel mihai chu nuoithum an na, Juda mihai chu sîngthum an nih. 9 Chun, an mi hung tirhai kuoma chun, "Jabes mihai kuomah hieng hin hril ro: 'Zînga hin sûnchang hmain san suok nîng in tih' tiin" a ta. An mi tirhai chu an kìr a, Jabes mihai chu an hril a, an lawm hle a. 10 Anni chun Amon mihai kuomah, "Zînga hin kan hung inpêk ding a na, in nuom ang angin kan chungah thaw ro" an ta. 11 A zînga chun Saulan a mihai chu pawl thumin a the a, khawfingchatah an inkulna hmuna chun a va hlù khum a, Amon mihai chu sûnchang lai chen an that a, an that mahlahai chu an tlàn dar vong a, a kopa um hrim hrim an um nawh. 12 Mipuihai chun Samuel kuomah, "Tuhai am an na, 'Kan chungah Saulan ro a rèl telul ding maw' tituhai kha? Chuong mihai chu hung thuoi suok unla, lo sukhlum kan tih" an ta. 13 Saula chun, "Voisun hi LALPAN Israelhai a san suok ni a na, voisun kher hin chu tu khom sukhlum lo ding a nih" a ta. 14 Chun, Samuel chun mipuihai kuomah, "Thaw ro, Gilgalah fêng ei ta, ram chu indin thar nawk ei tiu khai" a ta. 15 Chuongchun, mi po po chu Gilgalah an fe a, Saula chu LALPA hmaah lalin an siem nghet ta a. Chu taka chun inremna inthawina LALPA hmaah an inhlàn a, Saula le Israelhai chun lawmna ropui tak an siem a.

12

1 Samuel chun Israel mi po po kuomah, "Ngai ta u, ka kuoma in thu hril po po ka ngaithlâk a, lal ding khom ka siempêk ta cheu a. 2 Tu hin chu thuoitu lal in lo nei ta hi. Kei ruok chu ka lo upa tain ka luah kèl sam a to ta a, ka naupahai in kuomah an um hi. Ka tleirawla inthokin voi sûn chen hin in thuoitu ka lo ni hlak a. 3 Tu hin in hmaah ka ngîr a. LALPA le a hriek nâl hmaa hin mi hang fie hrim ta um khai. Tu bawngchal am lapêkin, tu sabengtung am ka lâkpêk hlak a? Tu am hlèmin, tu am ka sukduda hlak a? Thlei bîk nei dingin tu laka inthokin am thamna ka lâk hlak a? Hieng thilhai hi ka lo thaw pal a um chun rul nawk vong ka ti cheu" a ta. 4 Mipui chun, "I mi hlêm ngai naw a, i mi sukduda ngai bok nawh. Tu kuta inthok khomin ieng khom i lâk ngai nawh" an ta. 5 Samuel chun an kuomah, "Ka kutin thil awm lo ka thaw ngai nawzie voisuna mi hrepuitu chu LALPA a na, a hriek nàl lal khom hi a ni bok" a ta. Mipui chun, " Ni e, LALPA chu hrepuitu a nih" an ta. 6 Samuel chun mipui kuomah, "Mosie le Aron ruottu le Aigupta rama inthoka in pi le puhai thuoi suoktu chu LALPA a nih. 7 Chuleiin, LALPA hmaa hin ngaithla thap unla, LALPAN in chunga le in pi le puhai chunga thil fel taka a lo thaw dânhai chieng takin hang suipui ka ti cheu. 8 Aigupta rama Jakob a lût hnung khan, in pi le puhai chun LALPA an ko a, LALPA chun Mosie le Aron a tir a, anni chun in pi le puhai chu Aigupta rama inthokin an thuoi suok a, hi hmuna hin a'n umtir a. 9 Nisienlakhom, LALPA Pathien chu an theinghil a, ama chun Hazor sipai hotu Sisera kuta le Filistin mihai kuta le Moab lal kutah a zor a, anni chun an do a. 10 Chu phing leh thangpuitu dingin LALPA an ko a, 'LALPA chu kan nghatsan a, Baal-hai le Astoret-hai rong kan bawl leiin kan lo suol a nih. Nisienlakhom, kan hmèlmahai kuta inthokin mi san suok ta la, chuongchun i rong bawl tâng kan tih' an ta. 11 "Chun, LALPA chun Jerubaal dàm, Barak dàm, Jeftha dàm le Samuel haic dàm a tir a, in hmèlma khing tieng khing tienga inthokin a san suok cheu a, him takin in um a. 12 Amiruokchu, LALPA Pathien chu in lal a ni zing si laiin Amonhai lal Nahas chu nangni do dingin a hung ti in hriet charin ka kuomah, 'A ni naw ie, lalin mi op lem raw se' in ti a. 13 Chuong ang chun tu hin in lal thlang le dit chu en ro, en ro, LALPA chun lal a siempèk ta cheu a ni hih. 14 LALPA chu ti a, a rong chu bawl a, a thu zawm a, a thupêkhai lakah hel lo a, nangni le in chunga rorêltu lal leh LALPA Pathien zuitu in ni chun thâng a ta, 15 amiruokchu, LALPA rawl ngaithla lo a, LALPA thupêk in helsan ruok chun in pi le puhaiin LALPA kut an tuor ang bokin nangni khomin tuor vêng in tih. 16 Chuleiin, ngaithla ngun ro, LALPAN in mithmua thil ropui tak a thaw ding hi lo en ro. 17 Voisun hin bu an sìk a ni naw am a ni? Vân inrûmtir ding le ruo insûrtir dingin LALPA ko ka ta, chuongchun lal in hni thua hin thil suol in thaw nasatzie hrein hmung in tih" a ta. 18 Chuongchun, Samuel chun LALPA a ko a, chu ni chun LALPAN vân a'n rûmtir a, ruo an sûrtir bok a, mipui chun LALPA le Samuel chu an ti ta êm êm a. 19 Mipui chun Samuel kuomah, "Kan thi nawna dingin LALPA i Pathien kuomah i siehlawhai hi mi tongtaipêk rawh, lal kan hni hin kan suolna chu a belsa zuol si a" an ta. 20 Samuel chun mipui kuomah, "Ti naw ro, thil tha lo tak chu in thaw ngei a, sienkhom LALPA chu pêt hmangsan naw unla, in lungril po poin LALPA rong chu bawl ro. 21 Hmangna bo milem bieksan naw ro. Chuonghai chun thil tha intlun naw ni cheu a, san suok thei bok naw ni hai cheu, hmangna bo thil an ni tlat a. 22 A hming ropui tak leiin LALPAN a mihai chu hnawl naw nih, a mihaia siem cheu hi LALPA lawmzawng tak a ni si a. 23 Keima chungthua chu, nangni ta dinga tongtaipêk bànsanin LALPA lakah thil suol thaw ngai naw top ka ta, lampui tha le indik kawkhmu pei lem ka ti cheu. 24 LALPA chu ti phot unla, in lungril po poin titakzetin a rong bawl unla, in ta dinga thil ropui a thawhai hi ngaituo ro. 25 Amiruokchu, suol taka thil in la thaw rop chun, nangni le in lal chopin phit hmang a ti cheu" a ta.

13

1 Saula chu kum sawmthum le kum hni a niin a'n lal tan a, Israelhai chungah kum sawmli le kum hni a'n lal a. 2 Saula chun Israelhai laia inthokin mi sângthum a thlang suok a, sânghni chu Mikmas le Bethel tlângramah Saula kuomah an um a, sângkhat chu Benjamin ram Gibea khuoah Jonathan kuomah an um a, a dang po po chu an in tieng a tirkîr vong a. 3 Jonathan chun Geba-a Filistinhai râlvêng bûk a bei a, chu chu Filistinhai chun an lo hriet a. Chuongchun, Saulan, "Hebrai mihai po poin lo hre ro" tiin a ram pumah tawtawrawt an mûttir a. 4 Israel mi po po chun, "Saula'n Filistinhai râlvêng bûk a bei a, Filistinhai theida a phur" ti thu chu an lo hriet ta a, mipuihai chu Saula kuomah Gilgala chun an ko khawm a. 5 Filistinhai chu Israelhai bei dingin an inchà khawm a, tawlailir sîngthum, sakor chung chuong mi sângruk le sipaihai chu tuifinriet kama tieu zât zeta tam an nih. Chuongchun, an kai tung a, Beth-aven sak tieng Mikmas-ah an inkul a. 6 Chuonga an sipaihai hnawchèpa an um ti Israelhaiin an hriet chun pûka hai, chîmbuka hai, lungpui kâra hai, khura hai le tuikula hai an inbi a. 7 Hebrai mi thenkhat lem chu Jordan vadung kânin Gad le Gilead rama hai an tlàn a. Saula ruok chu Gilgalah a la um zing a, a sipaihai hlak chu tiin an inthin hawp a. 8 Samuel ni ruot angin Saula chun ni sari sûng Gilgala chun a lo nghâk a, sienkhom Samuel chu Gilgalah a hung ta si naw leiin mipui chun an tlân darsan ta a. 9 Saula chun, "Pumraw thilhlân le inremna thilhlân dinghai chu ka kuomah hung chawi ro" a ta, pumraw inthawina chu a'n hlàn a. 10 Saulan an hlàn zo charin Samuel a hung tlung a, Saula chun a va hmuok a. 11 Samuel chun, "Ieng thil am i lo thaw ta le?" a ta. Saula chun, "Mipui an tin dar ka hmu a, nang hlak i ni ruot niah i hung tlung ta bok si naw a, Filistin mihai hlak Mikmas-ah an pung khawm lui lui bok si leh, 12 chuongchun kan ngaituo a, 'Filistinhaiin Gilgalah an mi hung bei tèp ta si a, LALPA ditsakna ka la hni bok si nawh' ka ta; chuleiin, pumraw thilhlân chu thaw lo thei loah ka ngai leiin ka lo inhlàn el a nih" a ta. 13 Samuel chun Saula kuomah, "I thilthaw hi thil invêtthlàk a nih. LALPA i Pathienin thu a pêk che chu i zawm naw a nih; zawm chu ni la, LALPA chun Israelhai chungah i lalna hi kumkhuoin a suknghet awm vei leh. 14 Tu ruok hin chu i lalna hin dai sawt naw nih; LALPA thupêk chu i zawm naw leiin, LALPA chun ama lungril ang put mi a zong a, a mihai chunga rorêltu dingin a ruot tah a nih" a ta. 15 Samuel chun Gilgal a mâksan a, Benjamin ram Gibea khuoa chun a hang fe a. Saula chun a kuoma umhai chu a tiem a, mi zaruk vel an nih. 16 Saula le a naupa Jonathan le an kuoma umhai chu Benjamin rama Gibea khuoa chun an um a, Filistinhai chu Mikmas-ah an inkul a. 17 Filistin tienga inthoka hung rûntu pawl chu hmun thumah an inthe a. Pawl khat chun Shual bula Ofra tieng chu an pan a, 18 pawl khat chun Beth Horon tieng an pan a, pawl khat chun thlalèr dep Zeboim ruom tieng ep ramri lam tieng chu an hraw a. 19 Filistinhaiin, "Hebrai mihai hin kawlhnâm le fei dâm siem rawi an tih" an ti leiin Israel ram pumah thîrsu hrim hrim an um nawh. 20 Chuleiin, Israel mihai chun an làngkawn hai, lungràl hai, hreipui hai le kawite hai an tàt ngei ding pha Filistinhai umnaah an zu fe hlak a. 21 Làngkawn le lungràl tàt ngeina man chu shekel hmun thuma thea hmun hni a na, thîr kut le hreipui le ran hawlna thîr zum tàt ngeina man chu shekel hmun thuma hmun khat a nih. 22 Chuong chu a ni leiin, an indo ni chun Saula le Jonathan ti chauh naw chu an kuoma mi umhai chu kawlhnâm amanih fei amanih nei hrim hrim an um nawh. 23 Chun, Filistinhai chun an sipai pawl khat chu Mikmas kawn tienga lo inchàntu dingin an tir a.

14

1 Ni khat chu Saula naupa Jonathanin râlthuom chawi tlangvàl kuomah, "Thaw ta, râl khing tienga Filistinhai râlvèngtu sipaihai umnaa son va fèng ei tih" a ta, sienkhom a pa ruok chu a hril nawh. 2 Saula chu Gibea kotsuoa Migron theibufai kung hnuoia chun a um a, a kuoma um chu mi zaruk lai an nih. 3 Chuonghai laia pakhat chu Ahija a na, thiempu thuom efod a hâk a. Ama chu Siloa LALPA thiempu Eli naupa Finehas naupa Ahitub unaupa Ikabod naupa a nih. Chun, Jonathan chu a fe ti tu khomin an hriet bok nawh. 4 Filistinhai râlvèng bûk panna, Jonathan fe tumna chu kawn, khing tieng khing tienga lungtolawt chep de a na, pakhat chu Bozez an ta, pakhat chu Seneh an tih. 5 Lung tolawt pakhat chu Mikmas zawn, hmar tieng panga um a na, a dang pakhat chu Geba ep sim tienga um a nih. 6 Jonathan chun râlthuom chawitu tlangvàl kuomah, "Thaw rawh, LALPAN thil a mi thawpêk tâkduoiin ser tan lo ruol sipaihai umnaa son va fêng ei tih, LALPA ta ding chun a tlawm amanih a tam amanih ieng khom a thei naw a um chuong si naw a" a ta. 7 A râlthuom chawitu chun, "I lungril ang char chu thaw rawh, lungril le thlarauin ka thlop che a nih" a ta. 8 Jonathan chun, "Chuong an leh hung rawh, an umna tieng son va kai ei ta, mi lo thlîr raw hai se. 9 Annin, 'Kan hung hma chun lo nghâk phot ro' an tih leh kai loin ei umnaa chun um ei ta. 10 Amiruokchu, "Hung kai ro" an ti leh kai ei ta, chu chu LALPAN anni chu ei kutah a pêk a nih ti inchikna nîng a tih" a ta. 11 Chuongchun, an pahni chun Filistin diuti-hai hmua chun an va'n lang a. Filistinhai chun, "En tu, Hebrai mihai chu an inbîkna kuoa inthokin an hung invâk suok ie" an ta. 12 Vêngtuhai chun Joanathan le râlthuom chawitu kuoma chun, "Hung tung ro, lo zil met kan ti cheu" an ta. Jonathan chun a râlthuom chawitu kuomah, "Ka hnunga hin mi hung zui rawh, LALPAN Israelhai kutah a pêk tawl tah a ni chu" a ta. 13 Jonathan chu a kut le kea thangin a'n ban tung a, a hnunga chun a râlthuom chawitu chun a zui a. Jonathan hmaa chun Filistinhai chu an tlu zot zot a, a râlthuom chawitu chun a hnungah a hung that pei a. 14 Chu an bei voi khatnaa chun Jonathan le a râlthuom chawitu chun sangngam khat biel velah mi sawmhni an that a nih. 15 Chuongchun, Filistin sipai po po, an riebùka inkulhai, phula umhai, a hmatawnga umhai le rûntu pawlhai chu chî-âinain a man a, hnuoi chu an hning dur dur a. Chu chî-âina chu Pathien hung tir a nih. 16 Benjamin ram Gibea Saula râlvêng bûka inthoka an hang en chun sîr tinah sipai an tè dar hum hum a, an buoi nuoi nuoi el a. 17 A bula umhai kuoma chun Saulan, "Tu hin hang intiem unla, tuhai am a kim naw hang en ta u" a ta. An hang intiem chun Jonathan le a râlthuom chawitu chu an lo um ve naw a. 18 Saula chun Ahija kuomah, "Pathien Bawm chu hang la raw khai" a ta. Chuong lai chun Pathien Bawm chu Israel thlahai kuoma um a nih. 19 Chun, Saulan thiempu a biek lai mêk chun Filistinhai riekhmun tienga buoi mur murna chu a hung zuol deu deu pei a. Saula chun thiempu kuomah, "La thaw naw phot el rawh" a ta. 20 Chuongchun, Saula le a kuoma um po pohai chu an tlân khawm a, indonaa chun an fe ta a. Filistin mihai chu namen loin an buoi a, anni le anni kawlhnâmin an insàt a. 21 Kha hmaa Filistinhai tienga thang le an inkulnaa hang fe Hebrai mihai khom chu Saula le Jonathan tienga thang Israel mihai kuoma chun an hung pakai a. 22 Efraim tlâng rama Israel mi inbihaiin Filistinhai tlânsiet thu an hriet chun indoah an hung thang ve a, an hnot zui ta ngat ngat a. 23 Chuongchun, chu ni chun LALPAN Israelhai chu a san suok a, Beth-aven tlung rakin an bei a. 24 Chu ni chun, "Ka hmèlmahai chunga phuba ka lâk hma le khaw inthim hmaa bu fa taphot chu tongse phurin um raw se" tia Saula a'n kham leiin Israel mihai chu an beidong hle a, sipai tu khom bu fa an um nawh. 25 Sipai po po chun ramhnuoi an va tlung a, hnuoia chun khuoizu a lo um a. 26 Mipui chun ramhnuoia khuoizu lo luong chu an hmu a, sienkhom tu khomin an liek nawh, inkhàmna chu an ti leiin. 27 Jonathan ruok chun a pa inkhàmnain mipuihai chu a khuop ti a hriet naw a, a hmol chawi lai hmawr zum chun khuoithlâr chu a zuk sun a, a liek a, a mit meng a hung fie ta a. 28 Chu phing leh sipai pakhat chun, "I pa chun mi tu khom voisuna bu fa taphot chu tongsie phur dingin a mi khuop tlat a, chu leia mipui an tamsawl a ni hi" a ta. 29 Jonathan chun, "Ka pa hin mi a sukbeidong lem chauh a nih. En ta u, khuoizu tlawmte ka hang intem leiin ka mitmeng khom a hung fie ta hi. 30 Mipuiin an râllâk thil an hmu taphot an du duin fa hai sienla lem chu voisun hin ei va thaw tha nasa zuol awm de! Tuta nêk dai hin Filistinhai ei that rawn lem naw ding maw?" a ta. 31 Chu ni chun Mikmas-a inthokin Aijalon chenin Filistin mihai chu an bei a, mipuihai chu an chàu ta hle a. 32 Chuongchun, mipuihai chun an râllâkhai chu a bawin an baw a, beramhai, bawnghai le bawng tuoihai chu an man a, tuola chun an that a, a thisen pumin an fâk a. 33 Chun, mi thenkhatin, "Ngai ta, mipuihai chun sá chu a thisen puma an fâk leiin LALPA chungah thil suol an thaw tah" tiin Saula chu an hril a. Saula chun, "Thuthlung in bawsiet a nih. Ka bula hin lung lien tak mi hung inhlumpêk ro" a ta. 34 Saula bok chun, "Mipuihai lai fe unla, 'Mi tinin a bawng le beram chu a thisen puma faa LALPA chunga thil suol thaw loin, ka kuoma hung kei hai sien la, hi taka hin that raw hai se' a tih tiin va hril ro" a ta. Chu zân chun mi tinin mani bawngchal seng an hung kei a, chu taka chun an that a. 35 Saula chun LALPA ta dingin maichâm a siem a, chu chu LALPA ta dinga maichâm a siem hmasakna tak a nih. 36 Saula chun, "Zânah inthok suok ei ta, zîng khaw var chenin Filistinhai zu rok ei ta, tu khom a hringin hlà hrim hrim nawng ei tiu" a ta. Anni chun, "Tha i ti dàn ang takin thaw rawh" an ta. Thiempu ruok chun, "Pathien la hang rawn hmasa phot ei tih" a ta. 37 Saula chun Pathien kuomah, "Filistinhai chu ka zu bei dim a ni? Israelhai kutah anni chu pêng i ti?" tiin a'n don a, sienkhom chu ni chun Pathienin a don nawh. 38 Chun, Saula chun Israelhai kuomah, "Nangni sipai hotuhai, ka kuoma hin hung unla, voisun hin ieng suol am ei thaw ti zong suok ei tiu. 39 Israelhai hnena petu LALPA hring zing hmingin thu ka tiem a, ka naupa Jonathan chungah a tla khomin, a thi ngei ding a nih" a ta, tu khomin ieng khom an hril nawh. 40 Chu zoah Saula chun Israelhai kuomah, "Nangni po kha tieng khan ngîr unla, kei le ka naupa Jonathan hi tieng hin ngîr kan tih" a ta. Mihai chun, "Tha i ti dàn ang takin thaw rawh" an ta. 41 Chuongchun, LALPA Israelhai Pathien kuoma chun Saulan, "A'n dik tak chu hung suklang rawh" tiin a tongtai a. Saula le Jonathan inkâra thumvawr chu a tlu a, mipui chu an fihlim ta vong a. 42 Saula chun, "Kei le ka naupa Jonathan inkâra dingin thum chu vawr ro" a ta, Jonathan chungah a tlu a. 43 Saula chun Jonathan kuomah, "Iem a na i thaw mi hril raw khai" a ta. Jonathan chun, "Ka hmol chawi hmora mi khuoizu tlawmte chu ka'n tem ngei kha tie. Chu lei chun ka thi ding maw?" a ta. 44 Saula chun, "Jonathan, i thi naw chun Pathienin a nuom ang taka nasain mi soisak raw se" a ta. 45 Mipui chun Saula kuomah, "Israelhai sansuokna ropui tak hung intluntu Jonathan hi a thi ding maw? Ni thei teu naw nih. LALPA hring zing hming sâlin kan hril, a sam zâi pakhat khom hnuoiah tla naw nih; voisuna a thilthaw hi Pathienin a thangpui lei a nih" an ta, mipui chun Jonathan chu thi lo dingin an sanhim ta a. 46 Chuongchun, Saulan Filistin mihai a hnot chu a kîrsan a, an ram tieng an insaseng tawl ta a. 47 Israelhai chunga lal a hung nia inthokin Saula chun sîr tinah hmèlma Moab mihai, Amon mihai, Edom mihai, Zoba lalhai le Filistin mihai chu a do a, a nghatna tieng tieng chun a hne tawl pei a. 48 Huoisen taka doin Amalek mihai chu a hne a, Israelhai chu anni rok hlaktuhai kuta inthokin a san suok tah a nih. 49 Saula naupahai chu Jonathan, Ishvi le Malki-Shua an nih. A naunu pahnihai chu, a upa lem hming Merab a na, a naupang lem hming chu Mikal a nih. 50 Saula nuhmei chu Ahimaz naunu Ahinoam a nih. Saula sipaia kawmandar chu Nera naupa Abner a na, Nera chu Saula pa unaupa a nih. 51 Saula pa Kisa le Abner pa Nera chu Abiel nauhai an nih. 52 Saula dam sùng po po chu Filistinhai leh nasa takin an indo hlak a; Saula chun mi hrât le huoisen a hmu taphot chu a hnuoia thok dingin a lâk pei a.

15

1 Samuel chun Saula kuomah, "Israelhai lal ni dinga hriek nâl ding chea LALPA hung tir kha ka na, tu hin LALPA thu chu ngaithla rawh. 2 Iengkim LALPA chun hieng hin a hril: Aigupta rama inthoka Israelhai an hung laia Amalek mihaiin lo lambuna an soisak lei khan ka hrem tawl ding a nih. 3 Tuhin Amalekhai bei dingin fe la, an thil nei hrim hrim hlà nei dêr loin sukbohmang vong rawh. Tu khom hlà nei naw la, a nuhmei a pasal, naupang le naute, bawng le beram le sanghawngsei le sabengtung hai chu that ram vong rawh" a ta. 4 Chuongchun, Saula chun mipui chu a ko khawm a, Telaim khuoa chun a tiem a, Israel mi nuoi hni le Juda mi sîngkhat an nih. 5 Saula chun Amalek mihai khuo chu a zu tlung a, ruom kârah an lo lambun a. 6 Saula chun Ken mihai kuomah, "Hung suok unla, Amalek mihai laia inthokin inthier fihlim ro, chuong naw chun sukhlum ve pal rawi ka ti cheu. Nangni chun Israel thlahai Aigupta rama inthoka an hung suok lai khan in lo lunginsiet si a" a ta. Chuongchun, Ken mihai chu Amalek mihai laia inthok chun an inthier fihlim a. 7 Chu zoah Saula chun Amalek mihai chu Havilaa inthoka Aigupta sak tienga Sur chenin a bei a. 8 Amalekhai lal Agag chu a hringin a man a, a mihai chu kawlhnâmin a that ram vong a. 9 Amiruokchu, Saula le a mihai chun Agag chu an hla a, beram le bawng tha tha, bawngchal tuoi le beram thau tha tha le thil tha an ti hrim hrim chu an sukhlum naw a, a tha naw an ti le a ongrop hai ruok chu an sukhlum vong a. 10 Chuongchun, LALPA thu chu Samuel kuomah a hung tlung a, 11 "Saula hin a mi nghatsan a, ka thupêk anga a thaw naw leiin lala ka lo ruot hi ka'n sìr a nih" a ta. Samuel chu a lungzîng hle a, zânkhuoin LALPA a ko a. 12 A zînga chun inhma takin Samuel chu a tho a, Saula hmuok dingin a suok a. Sienkhom, "Saula chu Karmel tlângah a fe a, chu taka chun ama hriet zingna lung a phun a, chun, a kîr nawk a, a fe pei a, Gilgalah a fe thlàk" tiin Samuel chu an lo hril a. 13 Samuel-in Saula kuom a tlung chun Saulan, "LALPAN malsawm che raw se. LALPA thupêk angin ka thaw tah" a ta. 14 Samuel chun, "Chuong beram inbe ri ka naa hung lût le bawng inbu ri ka hriethai chu ieng thil am an ta a?" a ta. 15 Saula chun, "Sipaihaiin Amalek mihai ta an hung lâkpêk a ni chu. LALPA i Pathien kuoma inthawina dingin sipaihaiin beram tha tha le bawngchal tha tha an hla a, a dang po chu kan sukhlum vong a nih" a ta. 16 Samuel chun Saula kuomah, "La to ta, LALPAN voizàna ka kuoma thu a hril chu hang hril ka ti che" a ta. Saula chun, "Mi hril raw khai" a ta. 17 Samuel chun, "Nangma ngaia ieng khop lo i ni zing lai khan Israel hnamhai lu taka sie i ni naw maw? LALPA chun Israelhai chunga lal dingin hriek a nâl che a. 18 LALPA chun a tir suok che a, 'Fe la, mi suolhai, Amalek mihai chu sukhlum vong rawh, an bohmang dêr hma khat chu bei pei rawh' a ti che a. 19 Iengti leia LALPA thu chu inza loa i um am a na? Ieng leia râllâk thil chu baw huom huom a, LALPA mithmuah thil suol i thaw am a na?" a ta. 20 Saula chun, "LALPA thu chu ka zawm annawm. LALPA mi tirnaa chun ka fe a. Amalek mihai chu ka sukhlum vong a, an lal Agag ka hung hawn a. 21 Râllâk thil, sukbohmang el ding laia beram le bawng tha tha chu Gilgala LALPA i Pathien kuoma inthawina dingin sipaihaiin an hung hawn bok a nih" a ta. 22 Samuel chun Saula kuomah, "LALPA chun a thupêk zawm ang tlukin pumraw thilhlânhai le inthawinahai hi a lawm am a ni? Inthawina nêkin thu awi a tha lem a, beramchal thau nêkin a thu poisak a tha lem. 23 Helna hi aien thiemna suol ang a na, lululna hi milem biekna suol ang a nih. LALPA thu chu i hnawl leiin, ama khomin lal dingin a hnawl ta che a nih" a ta. 24 Chun, Saula chun Samuel kuomah, "Thil suol ka lo thaw a nih. LALPA thupêk le i thu mi pêkhai chu ka lo bawsiet a nih. Mipuihai chu ka ti a, anni tieng ka lo thlè a nih. 25 Chuongchun, ka suol ngaidam la, LALPA ka chawibiek theina dingin mi fepui nawk hram raw khai" tiin a ngen a. 26 Samuel chun, "Fepui naw top ka ti che. LALPA thu chu i hnawl a, Israelhai chunga lalah LALPA khomin a hnawl ta che a nih" a ta. 27 Chuongchun, fe dinga Samuel a hang inher lai chu Saulan a zakaw fuol hmorah a man a, a zakuo chu a'n thler a. 28 Samuel chun, "Voisuna inthok hin Israel lalram chu LALPAN a lâkpèk ta che a, i nêka tha lem i tuolbawmhai laia mi pakhat a pêk tah. 29 Ama Israel Ropuina chun khêl a hril ngai naw a, a lamlêt ngai bok nawh; Ama chu mihriem anga lungril thlâk dingin mihriem a ni ve si nawh" a ta. 30 Saula chun, "Ka lo suol a nih. Amiruokchu, lunginsiet takin Israel upahai le mipuihai hmaa hin mi chawimawi la, LALPA i Pathien chu ka chawibiek theina dingin mi fepui hram raw khai" a ta. 31 Chuongchun, Samuel chun Saula chu a kîrpui a. Saula chun LALPA chu a chawibiek a. 32 Chu zoah Samuel chun, "Amalekhai lal Agag chu ka kuomah hung thuoi ro" a ta. Agag chun thina chu a pumpel taa inngaiin, ngaingam takin Samuel kuoma chun a hung a. 33 Sienkhom, Samuel chun, "I kawlhnâmin nuhmeihai nau nei loa i siem ang bokin i nu khom nuhmei laia nau nei lo ni ve tâng a tih" a ta, Gilgala LALPA maichâm hmaa chun Agag chu a sât hlum a. 34 Chun, Samuel chu Rama khuoah a fe a, Saula ruok chun a in umna Gibea tieng a pan tung a. 35 Saula chan chu Samuel chun tuorpui hle sienkhom a thi chenin Saula chu a hmu nawk ta ngai nawh. Israelhai lala Saula a lo siem leiin LALPA chu a'n sîr hle si a.

16

1 LALPA chun Samuel kuomah, "Ka mi Israelhai lal dinga ka hnawl ta hnung Saula hi ieng chen am i sûn ding a na? I hriek bûr fungkiah hriek thun sip la, fe rawh. Bethlehem khuoa Jesai kuomah ka tir ding che a nih. A naupahai laia mi lal dingin ka ruot tah" a ta. 2 Samuel chun, "Iengtin am fe thei ka ta? Saulan a lo hriet chun a mi that el ding a nih" a ta. LALPA chun, "Bawngla tuoi kei la, 'LALPA kuoma inthawi dinga hung ka nih' ti rawh. 3 Chun, inthawinaa chun Jessai chu ko la, i thaw ding hril ka ti che. Mi ka kawkhmu ding che chu hriek i mi nâlpêk ding a nih" a ta. 4 Samuel chun LALPA hril angin a thaw a. Bethlehem a tlung chun a khaw upahaiin inthin pumin an lo hmuok a, "A tha tienga hung am i ni?" tiin an indon a. 5 Samuel chun, "A tha tienga hung ni e, LALPA kuoma inthawi dinga hung ka nih. Insukthieng unla, inthawinaah hung ro" a ta. Chun, Jesai le a naupahai chu a sukthieng a, inthawinaa hung thang dingin a fiel a. 6 An hung tlung chun Samuelin Eliab chu a hmu a, a lungrilin, "LALPA hriek nâl ding chu LALPA hmaa um hi a ni ngei el" a ta. 7 Sienkhom, LALPA chun Samuel kuomah, "A hmel tieng amanih, a dung insâng tieng amaniah en naw rawh, ama hi chu ka dit nawh. LALPA chun mihriem en dàn angin a en ve nawh; mihriem chun puo tieng inlang dàn an en hlak a, LALPA ruok chun lungril tieng a en lem hlak a nih" a ta. 8 Chun, Jesai chun Abinadab a ko a, Samuel hmaa chun a hungpui a. Ama chun, "Hi khom hi LALPA thlang a la ni nawh" a ta. 9 Jesai chun Sama a hung thuoi a, Samuel chun, "Hi khom hi LALPA thlang a la ni naw rop" a ta. 10 Chuongchun, Jesai chun a nau pasarihai chu Samuel hmaah a hung inlangtir a, Samuel chun Jesai kuomah, "Hienghai khom hi LALPA thlang an la ni nawh. " a ta. 11 Samuel chun Jesai kuomah, "Hitaka hin i naupahai an kim vong a ni?" a ta, ama chun, "A naupang tak a la um nawh, beram a vêng a nih" a ta. Samuel chun Jesai kuomah, "Va'n kotir raw khai. A hung tlung hma khat chu ei tan thei naw ding a nih" a ta. 12 Chuongchun, a va'n kotir a, an hung thuoi a. Ama chu sàr veng vong, hmèl tha tak le mit meng mawi tak a nih. LALPA chun Samuel kuomah, "Ama hi a nih; tho la, hriek va nâl rawh" a ta. 13 Samuel chun a hriek thunna fungki chu a lâk a, a unauhai mithmua ngei chun hriek a nàl a, chu nia inthok chun Davida chungah LALPA Thlarau chu thilthawtheina leh a hung tlung a. Samuel chu a tho a, Rama khuoah a fe ta a. 14 LALPA thlarau chun Saula chu a suoksan a, LALPA tirh ramhuoiin ama chu a soisak a. 15 Saula siehlawhai chun a kuomah, "En ta, Pathien tir ramhuoiin a soisak che a ni hi. 16 Kan pu hin a siehlawhai hi tingtang tum thiem zong dingin thu mi pe sien, ama chun Pathien tir ramhuoiin a hung hluo pha che tingtang chu tum a ta, hung tha el i tih" an ta. 17 Saula chun a siehlawhai kuomah, "Chuonga tum thiem chu zong inla, ka kuomah hung thuoi ro" a ta. 18 A siehlaw laia pakhat chun, "Bethlehema Jesai naupa tingtang tum thiem ka hmu ta a. Ama chu mi huoisen, râldo thiem, thu hril thiem le hmel tha tak a na, a kuomah LALPA khom a um" a ta. 19 Chuongchun, Saula chun Jesai kuomah mi a tir a, "Beram vêngtu i naupa kha ka kuomah hung tir rawh" tiin thu a'n cha a. 20 Jesai chun sabengtung a buotsai a, bei le uoiin peng khat a'n phurtir a, kèl tuoi a hung lâk bok a, chuonghai chu inchawitirin a naupa David chu Saula kuomah a tir a. 21 Davida chun Saula kuom chu a va tlung a, a hmaa chun a ngîr a, ama chun a lo ngaina hle a, a râlthuom chawituhai laia pakhatah a hmang a. 22 Saula chun Jesai kuomah, "I naupa Davida hi ka kuomah um raw se. Ka mit a tlung hle a nih" ti thu hril dingin mi a tir a. 23 Pathien tir ramhuoiin Saula chu a hung soisak zàtin Davida chun tingtang a lâk a, a tum a, Saula chu a hung har a, a tha nawk a, ramhuoi chun a suoksan hlak.

17

1 Filistin mihai chun indo dingin an sipaihai an khawm a, Judai rama Soko khuoah an pung khawm a, Soko le Azeka inkâra Efes Damim-a chun thanghmun an khaw a. 2 Saula le Israel mihai khom an pung khawm a, Ela ruomah thanghmun an khaw a, Filistinhai lo dang dingin an inzar phar a. 3 Filistinhai chun tlâng pakhat an hluo a, Israelhai chun tlâng dang an hluo a, an inkâra chun ruom a um a. 4 Gath khaw mi a hming Goliat chu Filistinhai inkulnaa inthok chun Israelhai chu cho dingin a hung suok a. A dung chu meter thum deuthawa insâng a nih. 5 Dâr awmphaw kilogram sawmnga pasaria rik a hâk a, dâr lukhum a khum bok a. 6 Dâr ngal phaw a ngala chun a bun a, a ruongzàng tieng chun dâr fei a pai a. 7 A fei ngul chu puonkhawngna themtlâng tiet a na, a fei lu zum chu kilogram saria rik a nih. A phaw chawitu chu a hmaah a fe a. 8 Goliat chu a ngîr a, Israel sipaihai chu a khêk khum a, "Indo dinga ieng leia in mi hung ep am a na? Kei hi Filistin mi ka ni naw maw? Nangni khom Saula siehlawhai in ni naw maw? Nangni laia pakhat thlang suok unla, a mi bei dingin hung thla raw se. 9 A mi hnea a mi sukhlum chun in siehlawah um kan ta, keiin ka ngama ka sukhlum ruok chun kan siehlawah um in ta, kan rong bawl in tih" tiin. 10 Filistin mi bok chun, "Voisun hin Israel sipai po po ka cho cheu. Mi pakhat hung thlang suok unla, lo inbei kan tih" a ta. 11 Filistinpa rawl an hriet chun Saula le a sipaihai chu zamzalin an inthin hawp a. 12 Chun, David chu Efrat mi Jesai naupa, Judai rama Bethlehem khaw mi a nih. Jesai chun nau pasal pariet a nei a, Saula hun lai chun upa tak le tar tak a ni tah. 13 Jesai naupahai laia a upa tieng pathum chun indonaah Saula an zui a, chuonghai chu an upat dàn indotin Eliab hai, Abinadab hai le Sama hai an nih. 14 Davida chu an unau laia naupang tak a na, Saula zuituhai chu a upa tieng pathum an nih. 15 Davida chu Saula kuoma inthokin Bethlehema a pa beram enkol dingin a fe zing zing hlak a. 16 Ni sawmli sûng zet el chu Filistinpa chu zîng tieng le zân tieng zâtin a hung suok a, Israelhai chu a cho hlak a. 17 Ni khat chu Jesai chun a naupa Davida kuomah, "Bufai zeu tawl kilogram sawm le bei tluon sawm hi chawi la, i unauhai inkulna hmunah va tlânpui vat raw khai. 18 Chun bawngnene khal tlang sawm hi an pawla sângkhat chunga kawmandar ta dingin chawipêk bok la, i unauhai iem an chang hung indon la, an chanchin hung hawnkîr rawh. 19 Saula le anni le Israel mi po po chu Filistin mihai beiin Ela ruomah an um a nih" a ta. 20 Zîngkàr inhma takin Davida chun a ran ruolhai chu berampuhai kuomah mâksanin a pa Jesaiin thu a pêk ang chu phurin a uhai inkulna tieng panin a suok a. Râl bei dinga sipaihai an inthok mêk lai le an khêk dur dur lai chun an inkulna chu a va tlung a. 21 Israelhai le Filistinhai chu inbei dingin an lo inzar phei a, sipai le sipai chu an lo inep thup el a. 22 Davida chun a thil chawi chu fâk ding enkoltuhai kuta chun a sie a, sipaihai umna tieng chun a tlân a, a uhai chu chibai a bûk a. 23 Chun, a unauhai a biek lai chun Filistinhai mi suongtawlol Goliat, Gath khuoa mi chu sipai pawlhai laia inthokin a hung inchawm suok a, a chona thu pangngai bok a hril nawk a, chu chu Davidan a lo hriet a. 24 Israel mihaiin chu pa an hmu chun ti êm êmin an tlânsie a. 25 Israel mihai chun, "Kha mihriem hung suok kha in hmu am? Israel mihai cho dinga hung suok a ni kha. Tu khom ama that thei taphot chu lalin nasa takin sum tieng sukhausang a ta, a naunu pêng a ta, a pa sûngkuohai chun Israel rama hin leiman le sie ieng khom chawi ve naw ni hai" an ta. 26 Davida chun a bula ngîrhai kuomah, "Hi Filistinpa thattu le Israelhai hmingsietna sukrètu chunga chun ieng am ie an thaw ding chu? Hi sertan lo Filistinpa hi tu am a na, Pathien hring sipaihai a hang cho ngam vei chu?" a ta. 27 Anni chun, "A sukhlumtu taphot chu kan hril tah ang khan a chungah thaw nîng a tih" an ti nawk a. 28 Davida u a upa takin mihai kuoma a sang thuhril a lo hriet chun Davida chungah nasa takin a lung a sen a, "Ieng dinga hi taka hung thla ve che? Thlalèra beram tlawmte kha tu am i'n vêngtir a na? I chapozie le i lungril rîtlozie ka hriet. Indo en ding dâmin maw i hung mei mei chu?" a ta. 29 Davida chun, "Iem a na ka thaw suol? Ka tong khom in khap a ni?" a ta. 30 Chuongchun, mi dang kuom tieng a ngha a, a hril ngai bok chu a hril nawk a, mihai chun a hmaa an don ang bok khan an don nawk a. 31 Davida thu hril lo hretuhai chun Saula kuomah an hril sawng a, Saula chun a ko a. 32 Davida chun Saula kuomah, "Hi pa lei hin tu khomin lung sukhnuol naw raw hai se; i siehlaw hi fêng ka ta, keiin va bei ka tih" a ta. 33 Saula chun, "Hi Filistinpa bei ding hin nang êm chu fe lo e. Tleirawl chauh i la ni a, ama ruok chu a tleirawla inthoka indo mi a ni si a" a ta. 34 Sienkhom Davida chun Saula kuomah, "I siehlaw hin ka pa beram ka vêng hlak a. Sakeibaknei amanih savom amanih an hung a, beram ruol laia beram te an lâk chang a um hlak. 35 Chuonghai chu ka hnot a, ka bei a, an baua inthokin ka san suok hlak a; chun, mi bei dinga an hung inthok changin an bâk hmulah ka man a, ka bei a, ka that hlak a nih. 36 I siehlaw hin sakeibaknei le savomhai khom ka that ta hlak. Chuong ang bok chun sertan lo Filistinpa khom hi ka soisak ding a nih, Pathien hring sipaihai dâm a hang cho ngam vei chu. 37 Sakeibaknei kutbawr le savom kutbawra inthoka mi sansuoktu LALPA chun hi Filisitinpa kuta inthok khom hin mi sansuok ngei a tih" a ta. Saula chun, "Chuong an leh fe raw leh, LALPAN umpui a ti che" a ta. 38 Ama thuomin Saula chun Davida chu a'n thuomtir a, dâr lukhum a'n khumtir a, awmphaw a'n hâktir bok a. 39 Davida chun a thuom chungah kawlhnâm a pai a, hang fe a tum a, chuong ang chun a la thaw ngai si naw leiin Davida chun Saula kuomah, "Ka la thaw thang naw leiin hieng hin chu fe thei naw nîng" a ta, a hlîp nawk a. 40 Chuongchun, a hmol chu a chawi a, vadungtea lung inmum tha panga a rût a, a beram vêngna mansaa chun a pai a, a kuta virvom chawiin Filistinpa chu a pan ta a. 41 Filistinpa chu a hung phei a, Davida chu a hung pan hnai a, a phaw chawitu chu a hmaa chun a fe a. 42 Filistinpa chu a hang ngha a, Davida a hmu chun a tham naw hle a, sâr veng vong, mit meng mawi tak le tleirawl el a ni si a. 43 Davida kuoma chun, "Ui am ka ni, hmol le i mi hung pan chu?" a ta. Filistinpa chun an pathienhai hming salin Davida chu tongsie a'n phur a. 44 "Hi taka hin hung rawh, i taksa kha chunglêng vatehai le ram sahai lo infâktir ka tih" a ta. 45 Davida chun Filistinpa kuomah, "Nang chu kawlhnâm dâm, fei dâm, feite dâm chawiin mi bei dingin i hung a, kei ruok chu i cho pùng púng Iengkim LALPA, Israel sipaihai Pathien hmingin ka hung bei che a nih. 46 Voisun hin nang hi ka kutah LALPAN a mi pêk ding a na, hnêng ka ti che a, i rîng tan ka tih. Filistin sipaihai ruong chu voisun hin chunglêng vatehai le ram sahai ka'n fâktir ding a nih. Chuongchun, hnuoi chunga mi po po hin Israelhai lai Pathien a um ti hre thei an tih. 47 Chun, LALPA chun kawlhnâm le feiin a sandam nawh ti pungkhawm po po hin hre thei bok an tih. Indona chu LALPA indona a ni si a; Ama chun kan kutah nangni rawi hi a mi pêk ding a nih" a ta. 48 Bei dinga Filistinpain a hung pan hnai lai chun Davida chu inrang takin sipaihai umna tieng chun lo bei dingin a tlân phei a. 49 Davida chun a mansa a pur a, lungte a phor a, a virvom chun Filistinpa chaldâr takah a dêng a, a chalah lung chu a tlum a, a khupbokin a tlu ta ruoi ruoi el a. 50 Chuongchun, Davida chun Filistinpa chu saihli le lungtein a ngam a, kawlhnâm thang dêr loin a per thlûk a, a that ta a. 51 Davida chu a tlân a, Filistinpa bula chun a va ngîr a, a kawlhnâm chu a paia inthokin a lâk suok a, chu chun a that a, a lu chu a tan a. Filistinhaiin an mi hrât khawkhèng a thi ti an hriet chun an tlânsie a. 52 Israel mihai le Juda mihai chu an tho a, an khêk dur dur a, Filistin mihai chu Gath chen le Ekron kul kotkhàr chen an hnot a. Filistin mi an thathai chu Saraim lampui intluonin, Gath-a inthoka Ekron chenin an inthal pheng phung a. 53 Israelhaiin Filistin mihai an hnot chu an hung kîr a, an riebûk chu an rok a. 54 Davida chun Filistinpa lu chu a lâk a, Jerusalemah a fepui a, a râlthuom ruok chu a puon inah a sie a. 55 Filistinpa bei dinga Davida a fe lai Saulan a hmu khan a sipai kawmandar Abner kuomah, "Abner, hi tleirawl hi tu naupa am a na?" a ta, Abner chun, "I hringna sâlin ka hril, aw lalpa, ka hriet dêr nawh" a ta 56 Lal chun, "Hi naupang hi tu naupa am a na ti indon suok rawh" a ta. 57 Filistinpa a that zo hung kîr tieng Davida chu Abnerin Saula kuomah a thuoi a, Filistinpa lu chu a la chawi zing a. 58 Saula chun, "Tu naupa am i na, tlangvàl?" a ta. Davida chun, "Bethlehema mi, i siehlaw Jesai naupa ka nih" a ta.

18

1 Davidan Saula kuoma thu a hril zo chun Jonathan lungril chu Davida chungah a fu ta hmak a, ama a'n hmangai ang topin a hmangai a. 2 Chu nia inthok chun Saula chun Davida chu a pa in tieng infètir phal ta loin ama inah a'n umtir nghal a. 3 Jonathan chun David chu lungril taka a ngaina leiin dam sûnga ruol tha ni dingin zawlin a man a. 4 A zakuo fuol hâk lai chu a hlîp a, Davida a pêk a, a thuom le a kawlhnâm le a thalngul le a kawngchûn chenin a pêk sa a. 5 Saulan thil thaw dinga a tirna taphotah hlawtling taka a hlen pei leiin Davida chu a sipaihai lai ngîrhmun insâng takah Saula chun a hlângkai a. Chu chun mipui po po le Saula thoktuhai chen khom a suklawm a. 6 Davidan Filistinpa a that hnunga mihai an hung kîr chun, Israel khaw tinah nuhmeihai chu hla saka lâmin khuong le dâr le tum rîk thei tinrêng leh hlim takin Lal Saula hmuok dingin an hung suok a. 7 Nuhmeihai chun làm pumin, Saulan a sânga sâng a that a, Davidan a sînga sing a thattiin an insam a. 8 An hla sak chun hmai sen rak khopin Saula lung a suksen el a. "Davida chu a sînga sîng thatah an ngai a, kei chu a sânga sâng chauh thatah an mi ngai a na, a ram ti ngot naw chu chang naw muol ieng am a nei ta a?" tiin a ngaituo a. 9 Chu nia inthok chun Saula chun David chu a thîk ta êm êm a. 10 A zînga chun Pathien tir thlarau suolin Saula chu nasa takin a hung soisak a, ni danga a thaw dàn pangngaiin Davidan tingtang a tum lai chun thu a hril buon buon a. 11 Saula chun fei a chawi a, "Banga son Davida hang khaw dè chor ka tih" tiin a khaw a, Davida chun voi hnih a'n tawl kiengsan hman a. 12 Davida kuomah LALPA a um a, ama hlak a màksan ta si leiin Saula chun Davida chu a ti a nih. 13 Chuleiin, Davida chu a son hmang a, sipai sâng chunga kawmandar-ah a sie a, an ràl beinaah Davida chun hma a thuoi a. 14 A kuomah LALPA a um leiin a thilthaw taphotah nasa takin a hmuingil a. 15 A hlawtlingzie Saulan a hriet chun ama chu a ti nawkzuol a. 16 Israelhai le Judahai po po ruok chun râl beinaa an hma thuoitu a ni leiin Davida chu an ngaina hle a. 17 Chun, Saula chun Davida kuomah, "Ka naunu upa lem Merab hi i nuhmei dingin ka pêk che. Huoisen takin ka rong bawl phot la, LALPA indonaa hin thang la nasa rawh" a ta. Saula chun a lungrilin, "Kei chun a chungah kut thlâk naw ning. Filistinhaiin thaw lem raw se" a ti a. 18 Davida chun Saula kuomah, "Lal mâkpa ni dingin kei hi tu am ka na, ka sûnghai le kan pahnam hi Israelhai lai khom ieng am an ni a?" a ta. 19 Amiruokchu, Saula naunu Merab le Davida innei hun a hung tlung chun Meholat mi Adriel nuhmei dingin Saula chun a pêk lem ta dai a! 20 Saula naunu Mikal chun Davida a ngaizawng a, chu thu chu Saula kuomah an hril a, a lawm hle a. 21 Saula chun a lungrilin, "A'n awkna ding châng le Filistin mihaiin a chunga kut an thlâkna remchâng a ni tàkduoiin ka naunu chu pêng ka tih" a ta. Chuleiin, Saula chun Davida kuomah, "Voisun hin ka mâkpa ni theina remchâng i nei nawk tah" a ta. 22 Saula chun a siehlawhai kuomah, "Arûkin Davida inbiekpui unla, 'Ngai ta, lal chu i chungah a lawm hle a, a siehlawhai po po khomin an hmangai che a, chuleiin lal mâkpaah um rawh' ti ro" a ta. 23 Chuong thu chu siehlawhai chun Davida an hril sawng a. Davida ruok chun, "Lal mâkpa ni hi thil tenaua in ngai am a ni? Kei chu mi rethei le tu hriet hlaw lo ka ni hi" a ta. 24 Saula siehlawhaiin Davida thu hril an ripawt chun Saulan, 25 "Davida kuomah hi thu hi va hril ro: 'Lal chun hmèlma chunga phuba lâkna dingin Filistinhai ser vun hmawr zakhat ti naw chu a naunu man dingin ieng khom a dit nawh' ti ro" a ta. Filistinhai kuta Davida inthitir dàn ding chu chuong ang chun Saulan a phier rûk a nih. 26 Saula siehlawhaiin chuong ang thu Davida an hril chun, lal mâkpa a hang ni el ding chu a lawm hle a. 27 Ni tiem a bo hmain Davida le a mihai chu an inthok suok a, Filistin mi zahni an that a, an ser vun hmawr chu a hung chawi a, lal mâkpa a ni theina dingin lal chu kim takin a pêk a, Saula chun a naunu Mikal chu nuhmeiah a'n neitir ta a. 28 Saula chun Davida kuomah Pathien a um ti le a naunu Mikal chun a hmangai ti a hung hmu chieng ta a. 29 Chu taka inthok chun Saula chun Davida chu a ti nawkzuol a, a dam sûnga a hmèlma a hung ni ta a. 30 Filistin sipai kawmandarhai chun an hung indopui zing a, an hung do zàtin Davida chu Saula kawmandar danghai nêkin a hlawtling lem zie a, a hming chu a hung inthang ta êm êm a.

19

1 Saula chun a naupa Jonathan le a siehlawhai po po chu Davida that dingin a hril a. 2 Jonathan ruok chun Davida chu a ngaina êm leiin a kuomah, "Ka pa Saula hin sukhlum dàn che remchâng a zong leiin zînga inthok chu fîmkhur la, inbi hmang la, chu taka chun um zing rawh. 3 Fe suok ka ta, i umna phùlah ka pa ngîrpuiin inbiekpui ka ta, ka thil hriet chu hung hril nawk ka ti che" a ta. 4 Jonathan chun a pa Saula hmaah Davida chu inpâkin, "Lal chun a siehlaw Davida chungah poi tawk lul naw raw se, i poi ieng khom a tawk naw a, i ta dinga thil tha tak vong a nih a thaw lem hlak chu. 5 Thi huomin Filistinpa a bei a, LALPAN Israelhai po po ta dingin ropui takin a'n hnètir a, chu chu nang khomin i hmu a, i lawm hle kha. Chuleiin, poi tawk lo chungah ieng leiin am thil suol thawin, a san um loin Davida chu i that ding a na?" a ta. 6 Saula chun Jonathan thu hril chu a pom a, "LALPA hringna sâlin ka hril, Davida chu sukhlum ni naw top a tih" tiin thu a'n khàm a. 7 Jonathan chun Davida chu a ko a, chuong thil po po chu a hril a. Jonathan chun Davida chu Saula kuomah a thuoi a, a hma ang bokin a kuomah a um nawk ta a. 8 Indo a hung um nawk a, Davida chu a'n thok suok a, Filistin mihai chu nasa takin a va bei a, a that teu a, a hmaa chun an tlânsie dur dur a. 9 Chun, Saula chu a ina fei chawia a'n thung laiin LALPA tirh ramhuoiin a hung soisak a. 10 Davidan tingtang a tumpêk lai chun Saulan bang le thil khop tumin a fei chun a khaw a, sienkhom Davida chu a lo inhèm hman a, banga chun fei chu a khaw bur ngur el a. Davida chu a tlân suok a, chu zân chun a him ta a. 11 Saula chun Davida chu a in tieng inchàna zîngkàra that dingin mi a tir a. Davida nuhmei Mikal chun, "Voizân hin i hringna hum dinga i tlân naw chun zînga chu that ngei an ti che" a ta. 12 Mikal chun Davida chu tukver tieng an rel suoktir a, a tlân hmang a, a him ta a. 13 Mikal chun milem a lâk a, khuma chun a'n zâl a, puon a'n siltir a, a lu tieng chu kel hmulin a'n khum a. 14 Davida man dinga Saula mi tirhai an hung tlung chun Mikalin "A damnaw a nih" a lo ta. 15 Saula chun Davida en dingin a mihai chu a tir nawk a, an kuomah, "A khum pumin hung zawn unla, lo that ka tih" a ta. 16 Sienkhom, khum pindana a mi tirhai an lût chun khuma milem zâl, a lu tieng kèl hmula inkhum chu an hmu ta a. 17 Saula chun Mikal kuomah, "Ieng dinga mi dawhaa ka hmèlma i'n suoktir am a na?" a ta. Mikal chun, " 'I mi'n rel suoktir naw chun ka that ding che a nih' a mi ti tlat annawm" a ta. 18 Him taka Davida a tlân suok hnung chun Rama khuoah Samuel kuomah a fe a, a chunga Saula thilthaw dàn po po chu a hril a. Davida le Samuel chu Naioth-ahd an fe a, chu taka chun an um a. 19 Saulan Naioth-ah Davida a um ti a hung hriet chun man dingin mi a tir a. 20 Samuel rawia zawlnei ruolin thu hrila an insawi duol duol lai chu an va hmu a, Saula mihai chunga khom Pathien Thlarau a hung tlung a, insawi duol duolin thu an hril ve ta a. 21 Chu chu Saula an hril chun mi tam lem a tir a, anni khom chun thu an va hril ve ta duol duol a. Saula chun a voi thumnaah mi a tir nawk a, anni khom chun thu an va hril duol duol tho a. 22 A tawpah Saula ngei chu Rama khuo panin a'n thok suok a, Seku hmuna tuikul lien tak chu a va tlung a, "Samuel le Davida khaw lai am an um a?" tiin a'n don a, mihai chun, "Rama khuoa Naioth-ah an um" an ta. 23 Saula chunga khom Pathien Thlarau a hung tlung ve a, a fe pei a, Rama khuoa Naioth a tlung chenin thu a hril malam pei a. 24 Saula chun a silfên a hlîp a, Samuel hmaa chun thu a hril ve ta muol muol a, chu ni le zânkhuo chun saruokin a zâl a. Chu lei chun, "Saula khom zawlnei lai a thang ve an ta?" ti tongkam hi a hung suok a nih.

20

1 Davida chu Rama khuo Naioth- a inthokin a tlân hmang a, Jonathan kuomah a fe a, a kuomah, "Iem a na ka thaw suol? I pa poi ieng am ka tawk a, hienga mi that a tum hi?" a ta. 2 Jonathan chun, "That naw top a ti che. Thi naw ti nih. Ngai ta, ka pa hin thil lien amanih thil chin amani khom mi hril loin ieng khom a thaw ngai nawh. Ieng leiin am hi thu hi ka lakah a ip ding? Ip naw top a tih" a ta. 3 Davida chun, "I pa chun i mi ditsakzie hi a hriet chieng a. 'Hi thil hi chu Jonathanin hre naw raw se, a sukbeidong awm êm el' a ti lungril khom a ni el thei. Chuong chu a ni lai zingin, nangma le keima inkâra tla thei chu thina chau hi a nih ti Pathien hringna le i hringna salin ka hril" a ta. 4 Jonathan chun, "Thaw dinga i mi ti taphot chu i ta dingin thawng ka tih" a ta. 5 Davida chun, "Ngai ta, zîng hi thla thar lawmna hun a ni ta a, lal kuoma ruoi ka kîl ngei a ngai a, sienkhom ni thum ni zân tieng chenin phùl tieng inbiru dingin fe lem el ka tih. 6 I pain ka um naw hi a hriet suok leh, 'Davida chun a khuo Bethlehema fe vak dingin a mi hni a, an sûngkuo ta dinga kum tina inthawina an nei hun a ni leiin' lo ti rawh. 7 'A tha chu' a ti leh i siehlaw hi a him nîng a ta, sienkhom a lung a sen ruok chun ka poi tawk a tum tlat a nih ti hre chieng thei i tih. 8 I siehlaw chunga hin ngilneina insuo rawh, nang le zawla inman dingin LALPA hmaah thu ei thlung ta si a. Bawsiet ka nei a ni chun nangin mi that el rawh. Ieng leiin am i pa kuta chun i mi pêk suok ding?" a ta. 9 Jonathan chun, "Chu chu thaw ngai naw ning. Ka pain i chungah poi tawk a tum ti ka hriet phot chun ka hril naw ding che am a ni?" a ta. 10 Davida chun Jonathan kuomah, "I pain bùl deuin lo don sienla che, tuin am mi hril tâng a ta?" a ta. 11 Jonathan chun, "Hung ta, phûla son va fe vak ei tih" a ta, an fe ta a. 12 Jonathan chun Davida kuomah, "LALPA Israelhai Pathien chu hrepuitu ni raw se. Hieng ang huna hin zîngah an naw leh zîng nawk hin ka pa lo dawp ka ta, a ditsak che chun hung hril ngei ka ti che. 13 I poi tawk a la tum tlat a, chu chu ka hril naw che amanih, him taka ka'n suoktir che amanih a ni naw chun, LALPAN Jonathan hi ieng anga na khomin a law lawin law raw se. LALPA chu i kuomah um raw se, ka pa kuoma a um hlak ang bokin. 14 Ka dam sûng phot chun LALPA lunginsietna chuoi lo chu ka chungah inlangtir zing la, 15 ka thi khomin ka sûngkuohai chungah i lunginsietna chu tawp naw sien la, LALPAN Davida hmèlmahai po po hnuoi chunga inthoka a sukbohmang vong chen khomin tawp naw raw se" a ta. 16 Chuongchun, Jonathan chun, "LALPAN Davida hmèlmahai chu zong suok raw se" tiin Davida sûngkuo le chun thu a thlung a. 17 Jonathan chun Davida chu a hringna tluka a hmangai leiin Davida khoma ama chu hmangai zing dingin thu a'n tiemkamtir nawk a. 18 Jonathan chun Davida kuomah, "Zîng hi thla thar ni a ni ta a, i thungna a ruok ding a ni leiin i um naw chu inhriet hlèng a tih. 19 Zîng nawk zân tieng hin kha hmaa buoina intan hlima i'n bikrûkna hmuna khan hung la, Ezel lungpui bula bok khan mi lo nghâk rawh. 20 Inthemthiem ni awm takin thal pathum a sîra khan hung kâp ka ta. 21 Chun, naupang kuomah, "Ka thalhai kha va zong rawh" tiin tir ka ta. "En ta, thal chu i hnung tieng khan a um, la la, hung chawi rawh" ka ti chun, LALPA hringna sâlin ka hril, a muongum a, i ta dingin ti ding a um nawh tina nîng a tih. 22 Amiruokchu, naupang kuomah, "En ta, thalhai chu i khêl tieng son a um" ka ti chun fe hmang nghal rawh; LALPAN a'n fe hmangtir che nìng a tih. 23 Chun, hi hi hre zing rawh, nang le keiin hi chungchanga ei thu hril mi hrepuitu chu LALPA ni kumkhuong a tih" a ta. 24 Chuongchun, Davida chu phùla chun a'n bi a, thla thar ruoi kîl hun a hung tlung chun lal chu kîl dingin a'n thung a. 25 Lal chu ni danga a thungna pangngai bang hnaia chun a thung a, Jonathan chu a hma zawna chun a thung a, Saula dotah Abner a thung a, Davida thungna chu a ruok a. 26 Amiruokchu, chu ni chun Saulan ieng khom a hril nawh. "A chungah thil ieng amani a tlung leia thienghlim lo nîng a tih, ni ngei ngei a tih" a ti lungril a. 27 Amiruokchu, a ni hnina khom chun Davida hmun chu a la ruok ta zing leiin Saula chun a naupa Jonathan kuomah, "Ieng leia Jesai naupa hi zani le voisun khom ruoi kîl dinga a hung ve naw am a na?" a ta. 28 Jonathan chun, "Davidan Bethlehema fe phalna nasa takin a mi hni a. 29 'Mi'n fètir hram rawh khai. Kan khuoah kan sûngkuoin inthawina kan nei ding a na, ka uhaiin hung ngei dingin an mi'n cha a nih. I mit tlunga ka um a ni phot chun ka unauhai hmu dingin mi'n fètir hrâm raw khai' a ta. Chu leia lal dawkâna hung kil ve thei lo a nih" a ta. 30 Saula lungsen chu Jonathan chunga chun a'n tèk a, "Nang, nuhmei kawmaw le lulul naupa, Jesai naupa chu i muolphona ding le a hringtu che i nu muolphona dingin i thlang ti ka hriet nawa i bawl a ni? 31 Jesai naupa dam sùng chun nang le i lalram chu suknghet ni ngai naw nih. Chuleiin, inkotir nghal la, ka kuomah hung thuoi ro, a thi ngei ding a nih" a ta. 32 Jonathan chun a pa Saula chu a don a, "Ieng leiin am sukhlum a ni ding? Iem a thaw suol hrim a?" a ta. 33 Saula chun khaw tumin a fei chu a hlàng ûr a, chu taka inthok chun Davida chu that a lo tum tak tak a nih ti Jonathan chun a hriet ta a. 34 Lungsen takin dawkâna inthok chun Jonathan chu a tho a, a pain muolpho taka Davida a soisak lei chun poi a ti a, chu thla ni hninaa chun ruoi chu a kîl ve ta nawh. 35 Zîngkàr chun Jonathan chu Davida hmu dingin phùla chun a fe a, naupang a thuoi a. 36 Naupang kuoma chun, "Tlân la, ka thal kâphai hi va zong raw khai" a ta. A tlân charin thal chu ama khela chun a kâp a. 37 Naupangin Jonathan thal kâp thlâkna hmun a va tlung chun Jonathanin, "Thal chu i khela mi saw an naw maw?" a ta. 38 Chun, Jonathan bokin, "Hung tlân nawk nghal rawh. Inhmaw la, muong naw rawh" a ta, naupang chun thal chu a rût khawm a, a pu kuom tieng chun a hung tlàn a. 39 (Naupang chun chu thil chu ieng khom a hriet ve nawh, Jonathan le Davida chauin an hriet a nih). 40 Jonathan chun a hriemhreihai chu naupang kuomah a pêk a, "Chawi la, in tieng lo kîr nawk ta rawh" a ta. 41 Naupang a fe hnung chun Davida chu lungpui sim tieng panga inthok chun a hung suok a, Jonathan hmaah bawka hnuoi sikin voi thum a bokkhup a, an infawp a, an tap a, Davida chu a tap nasa zuol bîk a. 42 Jonathan chun Davida kuomah, "Thlamuong takin fe ta rawh. 'LALPA chu nang le ei inkâr le ka thlahai le i thlahai inkâra kumkhuoa hrepuitu a nih' tiin LALPA hmingin inruolthatna thu ei intiemkam ta kha" a ta. Chuongchun, Davida chu a fe a, Jonathan khom chu khuo tieng a kîr nawk ta a.

21

1 Davida chu Nob khuoa thiempu Abimelek kuomah a fe a. Abimelek chun inthin pumin a lo hmuok a, "An leh, makhât chaua hung i ni? Tu khom fepui i nei naw maw?" a ta. 2 Davida chun thiempu Abimelek kuomah, "Lalin thil iemani thaw ding a mi dânde a, 'I thil thaw ding le ka thupêk che hi mi dang tu khomin hre naw raw se' a ti a nih. Ka mihai le kan inhmuna hmun ding ruok chu ka hril tawl tah. 3 Tu hin i kutah iem kol i nei a? Bei tluon nga mi pe la, an naw khoma i nei thei ang zât zât chu" a ta. 4 Thiempu chun Davida kuomah, "Bei pangngai chu kol ka nei dêr nawh. Bei thienghlim hlânbei ruok chu ka nei, tlangvàlhai chu nuhmei laka an thienghlim phot chun" a ta. 5 Davida chun, "Kan suok naran chang khomin nuhmei lakah kan inthier fihlim hlak hrim hrim a. Tu lem hin chu thil poimaw bîk thaw dinga suok kan ni leiin thienghlim nawkzuol ngei an tih" a ta. 6 Chuongchun, thiempu chun hlânbei chu a pêk a; chu taka chun hlânbei, LALPA hmaa inthoka an lâk nia bei tharlâma an thlâk zie hlak ti chauh naw chu bei dang a um nawh. 7 Chun, chu ni chun Saula siehlaw laia mi pakhat, a hming Doeg, Edom mi, Saula beram enkoltuhai laia lu tak chu LALPA hmaa thil hlen ding a nei leiin chu taka chun a lo um ve a. 8 Davida chun Abimelek kuomah, "Fei amanih kawlhnâm amanih i kol naw maw? Lalin inhmaw thuta a mi tir a ni leiin ka kawlhnâm le hriemhrei dang ieng khom ka hung chawi hman naw a nih" a ta. 9 Thiempu chun, "Ela ruoma i that, Filistin mi Goliat kawlhnâm kha thiempu zakuo hnunga khan puona tuomin a um kha. Chu chu i lâk nuom chun la la, chu naw chu a dang a um nawh" a ta. Davida chun, "Chu bâk bâk chu iem, mi hung pe raw khai" a ta. 10 Davidan Saula chu a ti leiin chu ni lâ la chun Gath lal Akis kuomah a tlân a. 11 Akis siehlawhai chun, "Ama hi a ram lal Davida kha a va hoi de! 'Saulan a sânga sâng a that, Davidan a sînga sîng a that'tia làm puma a chungchang thu hlaa an sak dur dur kha a ni naw maw?" an ta. 12 Davida chun chuong thu chu a lungrilin a pai zing a, Gath lal Akis chu a tì ta hle a. 13 Chuongchun, an rênga hmaa chun a um dàn a sukdanglam a, invêt nungchang a'n sìr a, kotkhàrhai a thai tiel a, a khâkhmulah a zer huom a'n fartir duon duon a. 14 Akis chun a siehlawhai kuomah, "En ta u, invêt a nih ti hre zing sia ieng dinga ka kuomah in hung thuoi am a na? Mi invêt ka tlâksam leia ka hmaa a'n vètzie inentir dinga in hung thuoi a ni? Hi mi hi ka inah hung chuong lût hrep naw raw se" a ta. 15 (A um nawh)

22

1 Davida chun Gath khuo chu a suoksan a, Adulam pûkah a fe a, chu taka chun a um ti a sûnghaiin an lo hriet chun zu kan dingin an fe thla a. 2 Mi beidong le leibat neihai le lungawi nawna neihai chu a bula chun an hung fuon khawm a, an hotuah a um a, mi zali lai hiel an hung tling ta a. 3 Chu taka inthok chun Davida chu Moab ram Mizpa-ah a fe a, Moab lal kuoma chun, "Pathienin thil a mi thawpêk ding ka hriet hma po chu ka nu le pahai hi i kuomah lo um raw hai se aw?" a ta. 4 Chuongchun Moab lal kuoma chun anni chu a mâksan a, kulbìnga Davida a um sûng po chu chu taka chun an lo um a. 5 Chun, thiempu Gad chun Davida kuomah, "Kulbìnga hin um zing loin Judai ramah fe rawh" a ta. Chuongchun, Davida chu a suok a, Heret ramngawah a lût a. 6 Saula chun Davida le a mihai chu an hmu suok tah ti thu a lo hriet a. Ama chu Gibea tlâng tamariske thing buk hnuoiah fei chawiin a thung a, a rawihai chun an ngîr huol a. 7 Saula chun an kuomah, "Nangni Benjamin mihai, ngaithla ro. Jesai naupain lo le grèp huonhai a pêk ding cheu a ni? Sipai sângkhat chunga kawmandar le zakhat chunga kawmandarin a sie tawl ding cheu am a ni? 8 Chu lei chu a ni, hienga ka chunga thil in phier rûk hi? Ka naupain Jesai naupa thu a thlungpui khom khan tu khomin in mi hril nawh. Tu khom a mi'n voi in um naw a, voisùna a thaw ang hin kei mi'n chàn rûk dinga ka naupain ka siehlaw a'n fui por thu khom tu khomin in mi hril bok nawh" a ta. 9 Saula bula ngîr Edom mi Doeg chun a lo don a, "Jesai naupa chu Nob khuoah Ahitub naupa Abimelek kuoma a hung ka hmu a. 10 Thiempu Abimelek chun LALPA a rawnpêk a, fâk ding a pêk bok a, Filistin mi Goliat kawlhnâm a pêk bok" a ta. 11 Chu phing leh lal chun Ahitub naupa thiempu Abimelek le a pa sûngkuo, Nob khuoa thiempu sinthaw po po chu a ko a, lal kuoma chun an rêngin an hung a. 12 Saula chun, "Ahitub naupa, tu hin ngaithla rawh" a ta. Ama chun, "Ni e, ka lalpa" a ta. 13 Saula chun, "Bei le kawlhnâm dâm pe a, LALPA dâm rawnpêk a, voisuna a thaw anga mi do ding le mi'n chàn rûk dinga ieng leia nang le Jesai naupa hin thu in phier rûk am a na?" a ta. 14 Abimelek chun lal kuomah, "Lal mâkpa, a vêngtuhai che chunga kaptena i sie, i sûngkuohai laia mi inzaum tak Davida anga i ta dinga ringum hi i siehlawhai po po lai hin tu am an um a? 15 Tuta tum chauh hi Pathien ka biek rawnpêk tanna a ni am a ni? Ni lo e! Lal chun i siehlaw amanih a pa sûngkuohai rèng rèng amanih mi'n tum naw raw se; i siehlaw hin nangni inkâr thu po po hi ieng khom ka hriet ve dèr nawh" a ta. 16 Nisienlakhom lal chun, "Abimelek, i thi ngei ngei ding a nih, nang le i pa sûngkuohai po po leh" a ta. 17 A bula ngîr vêngtu sipaihai kuoma chun, "Ngha kîr unla, hieng thiempuhai hin Davida an san a, a tlân hmang ti hre zing sia an mi hril naw leiin, that vong ro" tiin thu a pêk a. Amiruokchu, lal siehlawhai chun LALPA thiempuhai chunga chun kut an thlâk nuom nawh. 18 Chu phing leh lal chun Doeg chu thu a pêk a, "Ngha kîr la, hieng thiempuhai hi bei rawh" a ta. Edom mi Doeg chu a ngha kîr a, thiempuhai chu a bei a, thiempu zakuo hâk mi sawmriet le panga a that a. 19 Chun, thiempuhai khuo Nob chu kawlhnâmin a bei a, a nuhmei a pasalin, naupang le nene ne lai chenin, bawng le sabengtung le beramhai leh a sât hlum a. 20 Sienkhom Ahitub naupa Abimelek naupahai laia pakhat, a hming Abiathar chu a tlân suok hman a, Davida kuomah a tlân a. 21 Abiathar chun LALPA thiempuhai Saulan a that thu chu Davida a hril a. 22 Davida chun, "Kha nia Edom mi Deog lo um ve khan Saula a hril ngei ngei ding ti ka hriet sâ hrim a nih. I pa sûngkuohai po po chu keima leia thi an nih. 23 Nang chu ka kuomah um la, ti dêr naw rawh; nangma that tumtu che chun kei khom mi that a tum a nih. Ka kuomah i um chun him i tih" a ta.

23

1 Chun, Davida kuomah, "Filistinhaiin Keila khuo an rûn a, an hrizawla buhai khom an lâkpèk vong a nih" tiin an hung hril a. 2 Davida chun Pathien a rawn a, "Inthok suokin Filistinhai chu ka zu bei ding am a ni?" tiin a'n don a. LALPA chun, "Filistin mihai chu zu bei la, Keila khuo chu zu san suok rawh" a ta. 3 Davida mihai ruok chun a kuomah, "Ngai ta, hienga Judai rama ei um hman hin ei ti a na, Keila khuoah zu fe a, Filistin sipaihai ei zu bei nawk lem lem chu a va tium nasa zuol awm de!" an ta. 4 Davida chun LALPA a rawn nawk a. LALPA chun, "Tho la, Keila-ah fe thla rawh, Filistin mihai chu i kutah pêng ka ti che" a ta. 5 Chuongchun, Davida le a mihai chu Keilaa chun an fe thla a, Filistin mihai chu an zu bei a, an ranhai an lâkpèk a, an that teu a. Chuong ang chun Keila khuoa mihai chu Davidan a humhim a nih. 6 Keila khuoa Davida kuoma Abimelek naupa Abiathar a hung tlân chun thiempu zakuo a hung chawi a. 7 Chun, Keila khuoah Davida a fe ti Saula an hril chun, "Pathienin ka kutah a pêk tah a ni chu; kul kotkhâr le a kalna nei khuoah lûtin Davida chun ama le ama a'n khum tâng an ta chu" a ta. 8 Chuongchun, Saula chun Keila khuoa Davida le a mihai inhuol dingin a sipaihai chu a ko khawm a. 9 Saulan a chunga thil tha lo thaw dingin a phan rûk ti Davidan a lo hriet chun thiempu Abiathar kuomah, "Thiempu zakuo kha hung la rawh" a ta. 10 Davida chun Pathien kuomah, " Aw LALPA, Israelhai Pathien, Saula chun keima leiin khuo sukse dingin Keila-ah hung a tum ti thu ka lo hriet a. 11 Keila khuoa mihai hin kei le ka mihai hi Saula kutah mi pêng an ti'm? I siehlawin ka lo hriet dàn angin Saula chu a hung ding am a ni? Aw LALPA, Israelhai Pathien, lunginsiet takin i siehlaw hi mi hril rawh" a ta. LALPA chun, "Hung a tih" a ta. 12 Davida chun, "Keila khuoa mihai hin kei le ka mihai hi Saula kutah mi pêng an tim?" a ta. LALPA chun, "Pêng an ti che" a ta. 13 Chuongchun, Davida le a mi zaruk vel chu an tho a, Keila khuoa inthokin an suok a, a remchangna tieng hmun hmunah an insaseng pei a. Keila khuoa inthokin Davida a tlân suok tah ti Saula an hril chun an inthok suok ding chu an thulh ta a. 14 Davida chu Zif thlalèr tlângrama kulbînga chun a um a. Ni tin tinin Saula chun Davida chu a zong a, sienkhom Pathienin a kutah a pêk nawh. 15 Zif thlalèra Hores hmuna a um laiin ama that tumin Saula a hung inthok ti Davidan a lo hriet a. 16 Chun, Saula naupa Jonathan chu Hores-a chun Davida kuomah a fe a, Pathiena innghat dingin a kut a sukhrâtpek a. 17 A kuomah, "Ti dêr naw rawh, ka pa Saulan i chungah kut thlâk naw nih. Israelhai chungah lalin um i ta, kei i dottu nîng ka tih. Ka pa Saula khomin chu chu a hriet vong a nih" a ta. 18 An pahni chun LALPA hmaah thu an thlung a. Chuongchun, Jonathan chu in tieng a kîr nawk a, Davida chu Hores-ah a um ta zing a. 19 Zif mihai chu Gibea um Saula kuoma chun an fe a, "Davida chu keini lai, Jesimon sim tieng Hakila muola Hores kulbìngah a'n bi zing a ni naw am a ni? 20 Chuleiin aw lalpa, i nuom hun hunah hung thla la, lalpa kuta ama pêk chu kan mawphurna ni raw se" an ta. 21 Saula chun, "In mi ngaituona leiin LALPAN malsawm cheu raw se. 22 Kîr nawk ta unla, a sulhnung le ama hung hmutuhai chu va dilsût zuol ro. Dawha nei taka che hlak a nih ti miin an mi hril a. 23 Inbîknaa a hmang hlak hmun po po sui suok unla, thu chieng tak leh ka kuomah hung nawk ro. Chu pha leh nangni ruolin hung ka ta, hi rama um hi a ni phot chun Juda mi sâng tam tak lai khom zong suok ka tih" a ta. 24 Chuongchun, anni chu an suok a, Saula inthok suok hmain Zif tieng an kîr nawk a, sienkhom Davida le a mihai chu Jesimon sim tieng Arabaa Maon thlalèra chun an lo inson ta a. 25 Saula le a mihai chu Davida zong suok dingin an inthok a, chu chu Davida an hril a, Maon thlalèra lungpui bèl dingin a fe thlâk a. Saulan a lo hriet chun Maon thlalèra chun Davida chu a hnot a. 26 Saula chu tlâng pang khing tieng chun a fe a, Davida le a mihai chu tlâng let liem tieng an fe a. Saula tiin Davida chu inhmaw takin a tlân a; Saula le a mihai hlak chun Davida le a mihai chu man tumin an inhuol vel a. 27 Chuong lai tak chun Saula kuomah zuolko a hung a, "Inhmaw takin hung rawh, Filistin mihaiin ei ram an hung bei a nih" tiin a hung ko a. 28 Saula'n Davida a hnot lai chu a kîrsan a, Filistin mihai bei ding chun a fe ta lem a. Chuleiin, hi hmun hi Sela Hamalekot tiin an ko tah a nih. 29 Chu taka inthok chun Davida chu a fe tung a, Engedi kulbìnga chun a'n bi a.

24

1 Filistin mihai a va hnot zàm hnunga Saula a hung kîr chun, "Davida chu Engedi thlalèrah a um" tiin an hril a. 2 Saula chun Israelhai po po laia mi sângthum a thlang suokhai chu thuoiin, sakèlhai tlatna ram lungkawhrot hmun tieng chun Davida zong dingin a'n thok suok a. 3 Lampuia chun beram riek khawmna pûk pakhat hi a va tlung a, Saula chu inthier dingin a va lût a. Davida le a mihai chu pûk ril tieng chun an um a. 4 Mihai chun, "Voisun ni hi a nih LALPAN i kuoma, 'I nuom ang anga i law dingin i hmèlma chu i kutah pêng ka ti che' tia a hril che kha" an ta. Chuongchun Davida chu a tho a, a rûkin Saula silpuon hmor chu a va ât thlàk a. 5 A hnunga chun Saula silpuon hmor a at thlàk chu a lungrilin an thiem naw hle a. 6 A mihai kuoma chun, "LALPA hriek nâl, ka lalpa chunga hieng ang thil ka thaw amani le a chunga kut ka thlâk chu LALPAN mi phalpêk naw hram raw se, ama chu LALPA hriek nâl ta sa a ni tlat si a" a ta. 7 Chuong ang thu chu hrilin Davida chun a mihai chu a zil a, Saula an bei chu a khap a. Chuongchun, Saula chun pûk chu a suoksan a, a fe ta a. 8 Davida khom pûka inthok chun a hung suok a, "Ka pu, ka lalpa" tiin Saula chu a ko zui a. Saula a hang ngha kîr a, Davida chun hnuoi sikin chibai a bûk a. 9 Davida chun Saula kuomah, "Ngai ta, 'Davida chun i sietna a zong a nih' tia mihaiin i kuoma an hril chu ieng dinga i awi hlak am a na? 10 Ngai ta, voisun hin hi pûka hin LALPAN ka kutah a'n hlànzie che i mit ngeiin i hmu a; thenkhat chun sukhlum ding chein an mi ti a, sienkhom kei chun, 'Ka lalpa chungah kut thlâk naw ning, LALPA hriek nâl a ni leiin' ka ta, i hringna ka hla a. 11 Chu chau chu a ni nawh. Pa, en ta, i silpuon hmawr hlek khom ka chawi zing hi. I silpuon hmawr at thla thei sia ka that naw chea inthok khan ka kuta hin thil tha naw le bawsietna a um nawh ti le nangin ka hringna lâk tumin mi zong mi zong la khom, i chungah ka suol ve nawh ti hre ngei ngei raw khai. 12 Nang le ei inkâr thu hi LALPAN rêl sien la, LALPA chun ka poi i tawkna chunga phuba chu mi la pêk sien la, kei chun i chungah kut thlâk naw hrim hrim ka tih. 13 Tienlai thuvar chun, 'Misuola inthokin thil suol a suok hlak' a lo ti a, chuleiin i chungah kut thlâk naw ning. 14 Israel lal chu tu zong dinga inthok suok am a na? Tu am a na i hnot thlûr hi? Ui thi hnung maw? Ui hrik maw? 15 Eini inkâra rorêltu chu LALPA ni raw se. Ka chungthu hi ngaituoin thiem mi'n chang sien, i kuta inthok hin mi san suok raw se" a ta. 16 Davidan a hril zo chun Saulan, "Ka naupa Davida, chu chu i rawl ngei chu a ni maw?" a ta, inring takin a tap a. 17 Saula bok chun, "Keima nêk daiin i fel lem. Nang chun tha takin i mi thaw a, kei ruok chun tha lo takin ka thaw che a nih. 18 Voisun i kutah keima hi LALPAN pe zing si chea i mi sukhlum nawa inthok hin ka chunga i thatzie i suklang a nih. 19 Miin a hmèlma hmu sien la, him rongin a'n suo ding maw? Voisuna i mi thaw thatna chungah LALPAN thil thain rul che raw se. 20 Ngai ta, lal i la hung ni ngei dingzie le Israel lalram khom i kut hnuoiah suknghet a ni dingzie ka hriet. 21 Chuleiin, ka thlahai le ka pa sûngkuoa inthoka ka hming sukbo lo dingin LALPA hmingin ka kuomah inkhâm meuin thu intiemkam rawh" a ta. 22 Chuongchun, Davida chun Saula kuomah thu a'n tiemkam a. Saula chu a in tieng a kîr a, Davida le a mihai chu kulbìnga chun an kai a.

25

1 Samuel chu a thi a, Israel mihai po po chu an pung khawm a, an sùn a, a umna Rama khuoa chun an phûm a. Chu zoah Davida chu Maonf thlalèr tieng a'n son thla a. 2 Maon khuoa chun mi hausa pakhat a um a, a'n bèngbelna tak chu Karmel tlâng a na, chu taka chun beram sângthum le kel sâng khat a vai a, a beram hmul vawin Karmel tlângah a um a. 3 A hming chu Nabal a na, a nuhmei hming chu Abigail a nih. Nu var tak le hmel tha tak a na, a pasal ruok chu pa biek intak le tikkom, Kaleb thlaa mi a nih. 4 Thlalèra Davida a um lai chun Nabal chu Karmel tlângah a beram hmul vawin a fe ti a hriet a. 5 Chuongchun tlângvàl sawm a tir a, an kuomah, "Karmel tlânga khin Nabal kuomah hang fe unla, ka hmingin chibai hang bûk ro. 6 Chun, a kuomah, 'I chunga le i sûnghai chunga le i nei po po chungah dam sawtna le thlamuongna tlung raw se. 7 Beram hmul vawin hi taka hin i um ti Davidan a hriet a, i beram vêngtuhai hi kan kuoma khawsa hlak an nizie dâm, an poi ieng khom kan tawk ngai nawzie dâm le Karmel tlânga an um sùngin thil ieng khom an inhmang ngai nawzie dâm lo hre ve la ti a nuom a. 8 Chu chu i beram vêngtuhai indon la, anni ngeiin hril an ti che. Hi, ruoi the ni takin kan hung tlung a, kan tlangvàlhai hi lo ditsak la, i nei ang ang chu i siehlawhai le i naupa Davida lo pe ve rawh tiin a mi'n cha a nih' tiin hril ro" a ta. 9 Davida rawihai an tlung chun Davida hmingin a thucha chu Nabal kuomah an hril a, a donna chu an nghâk a. 10 Iemani chen hnunga chun Davida rawihai kuoma chun Nabalin, "Tu'm a na Davida chu? Jesai naupa chu tu am a na? Tu lai hin an puhai tlân hmangsan siehlaw an tam khop el. 11 Ka beihai, ka tuihai le ka beram hmul vawtuhai ta dinga ran ka that sa chu tu am an nih ti khom hriet lohai kuomah ka pêk lul ding maw?" a ta. 12 Tlangvàlhai chu an kîr nawk a, chuong thu po po chu Davida an hril a. 13 Davida chun a mihai kuomah, "In kawlhnâm pai seng ro" a ta, an pai a, Davida khomin a pai a, mi zali laiin Davida chu an zui tung a, mi zahni chu thuomhnaw vêng dingin an sie a. 14 Nabal siehlaw laia pakhat chun Nabal nuhmei Abigail kuomah, "Thlalèra inthokin chibai bûk dingin Davidan ka pu kuomah mi a hung tir a, sienkhom ka puin a lo ràu tawl a. 15 Nisienlakhom, hieng mihai hi kan chungah an tha êm êm a, phûla kan um tlàng sùng po poin kan poi an tawk ngai naw a, kan thil ieng khom a'n hmang ngai bok nawh. 16 Anni bula beram kan vêng sûng po poin sûn le zânin kan ta dinga kulpui an ni ringot a nih. 17 Tu hin ka pu le a sûngkuohai chunga sietna hung tlung ding hi dawn la, iem i thaw thei in ngaituo rawh. Ama hlak hi tu khom biek thei lo khopa mi rilo a ni si a" a ta. 18 Abigail chun inhmaw takin bei tlang zahnih, uoiin pêng pahnih, fâk el theia inpei sa diem beram pum nga, bu em tang kilogram sawm le pasari, grèp em tawl bawr zakhat le theichang em tawl phêk zahni chu a lâk khawm a, sabengtung a'n phurtir a. 19 Siehlaw tlangvàl kuoma chun, "Ka hmaah fe pei unla, hung zui ka ti cheu" a ta, sienkhom a pasal Nabal ruok chu a hril nawh. 20 A sabengtungah chuonga tlâng kâr leisekot a hraw lai chun Davida le a mihai chun an hung pan thlàk a, an intuok ta a. 21 Davida chun, "Ieng khom a'n hmang nawna dingin hi pa thil nei po po hi a thlawn mei meiin ka lo vêngpèk a ni takluo ngei hi tie! Thil tha chu thil tha loin a mi thungrul ta si a. 22 Zîngah zîngkàr chena a ta po po laia mi pasal naupang pakhat té khom ka hlá vai chun Pathienin Davida hi a nuom ang angin law sien la, chu nêka nasa khomin thaw raw se" a lo ti zo hlim hlol a nih. 23 Abigailin Davida a hmu chun a sabengtunga inthokin inrang takin a tum a, bawka hnuoi sikin chibai a bûk a. 24 Chun, a ke bula chun a bokkhup a, "Ka lalpa, keima ngèiin thiem naw arbawm chu phur el ka tih. I siehlaw hin thu a hril ding phalpêk la, i siehlawnu thu hril hi lo ngaithlapêk hrâm rawh. 25 Ka lalpa hin mi rilo Nabal thu chu ienga khom ngai naw hram raw se, ama chu a hming ang char put zo, mi Invêt a na, thil invêtthlak a thaw hlak hrim a nih. Kei i siehlawnu hin ka pu hung tirh tlangvàlhai chu ka lo hmu ve naw lei a nih. 26 Thisen insuo lo ding le i kuta phuba la lo dinga siemtu che chu LALPA a nih. Tu hin LALPA hringna le i hringna sâlin ka hril, i hmèlmahai le i that nawna ding zongtuhai po po chu Nabal anga hrem ni raw hai se. 27 Pu, i ta dinga i siehlawin thilpêk a hung chawi hi nangma hung zuitu tlangvàlhai kuomah pêk ni raw se. 28 I siehlawnu hin thaw suol a nei a ni chun lunginsiet takin ngaidam rawh. LALPA indona chu i bei leiin ama chun i lalna chu suknghet a ta, i dam sùngin i chungah thil tha lo hrim hrim a tlung hmu naw ti nih. 29 I hringna lâk tuma hnottu che um hai sienkhom, miin a rohlu a vêng him tlat angin LALPA i Pathien chun ka pu hringna chu vêng himpêk a tih. I hmèlmahai ruok chu miin saihlia saihlum a per hmang angin per hmang a tih. 30 LALPA chun a tiem anga i chunga thil tha po po intlungtir a, Israelhai lala a siem pha che chun, 31 ka pu hin a san um loa thisen insuo lo a, phuba i lâk bok naw lei hin lungrila poitina le insîrnain hnot zui naw ni che. LALPAN ka pu chunga thil tha a thaw pha chun i siehlawnu hi hung hre zing rawh aw" a ta. 32 Davida chun Abigail kuomah, "Voisuna mi hmuok dinga tirtu che LALPA, Israelhai Pathien chu inpâkin um raw se. 33 Phuba la a, mi ka that ding voisuna mi'n pumpeltirtu i remhrietna chu malsawmin um bok raw se. 34 I chunga kut ka thlâk ding vêngtu chu LALPA a nih. Nangin mi lo hmuok vat naw la chu, LALPA Israelhai Pathien hringna sâlin ka hril, zînga khawvar chen hin Nabal mihai chu naupang pakhat te khom hla nei naw top ka tih" a ta. 35 Chuongchun, Davida chun a thil hung chawipêkhai chu a lâk a, "Thlamuong takin i in tieng kîr nawk ta rawh. I thu ka ngaithlàk a, i hnina khom ka pompêk ta che" a ta. 36 Abigail chu Nabal kuomah a hang fe a, a ina chun lal ruoi the ang elin ruoi a lo the a, an rui leiin a hlim hle a, chuleiin zîng khawvar hma chun ieng khom a hril nawh. 37 Zîngkàra Nabal uoiin inrui a hung har chun a nuhmeiin thil chinchang chu a hril a, a lung an chek dar a, a pumin a zeng ta vong a. 38 Ni sawm vel hnunga chun LALPAN Nabal chungah kut a thlâk a, a thi ta a. 39 Davidan Nabal thi thu a hriet chun, "Nabalin hmusit taka a mi thawna laka phuba mi lapêk a, a siehlawin thil tha lo a thaw ding laka cheltu LALPA chu inpâkin um raw se. Nabal thil tha naw thaw chu ama lu chunga ngei LALPAN a'n tlâktir a ni chuh" a ta. Chun, Abigail chu a nuhmei dinga va be dingin Davida chun mi a tir a. 40 Davida siehlawhaiin Karmel tlânga Abigail kuom an tlung chun, "Davidan a nuhmei dinga thuoi ding chein a mi tir a nih" tiin ama chu an va biek a. 41 Ama chu a tho a, a bawka hnuoi sikin chibai a bûk a, "In siehlawnu hi in rong bawl ding le ka pu ke sawp dinga siehlaw ka ni ie" a ta. 42 Abigail chu a tho vat a, sabengtung chungah a chuong a, a hnung zuitu nunghâk pangahai le chun Davida mi hung tirhai chu a zui a, Davida nuhmeiah a um ta a. 43 Davida chun Jezrel-a mi Ahinaomi chu a lo nei ta bok a, a nuhmeiah an um ve ve ta a. 44 Saula naunu Mikal, Davida nuhmei ruok chu a pain Galim khuoa mi Laisa naupa Palti a lo inneitir tah hrim a nih.

26

1 Zif mihai chu Saula umna Gibea-ah an fe a, "Davida chu Jesimon epa Havila muolah a'n bi a ni naw am a ni?" an ta. 2 Chuongchun, Saula chun a mi thlang thieu sângthum thuoiin Davida zong dingin Zif thlalèra chun a fe thlâk a 3 Saula chun Jesimon ep Havila muola lampui sîra chun thanghmun a khuor a, Davida ruok chu thlalèrah a'n kul thung a. 4 Ama zongin Saula a hung ti Davidan a hriet chun enthlatu mi a tir a, a hung tak tak ti an hriet chieng ta a. 5 Chuongchun, Davida chu a tho a, Saula thanghmun khuornaa chun a fe a. Saula le a sipai kawmandar Nera naupa Abner zâlna chu a hmu a, Saula chu an riebûk sûnga chun a zâl a, a vèlin sipaiin an inhuol a. 6 Davida chun Hit mi Abimelek le Zeruia naupa Abisai, Joab unaupa kuoma chun, "Saula umna riebûka zu fe dingin a tu lemin am in mi zui ding?" a ta. Abisai chun, "Keiin zui ka ti che" a ta. 7 Zâna chun Davida le Abisai chu sipaihai riebûka chun an zu fe a, Saula chu riebûk sùngrila chun a lo zâl a, a lu thluon tieng chun a fei chu hnuoiah a sun bûr a. Abner le a mihai chu a vela chun ama inhuol tuokin an zâl bok a. 8 Abisai chun Davida kuomah, "Voisun hin Pathienin i hmèlma chu i kutah a pêk che a ni hi. Chuleiin, fei hin hnuoi leh hang sun dèng ka ti aw, voi hni ka sun ngai naw nih" a ta. 9 Davida chun Abisai kuomah, " That naw rawh. LALPA hriek nâl chunga kut thlâk tu am thiem chang an um hlak a? 10 LALPA hringna sâlin ka hril hi, LALPA chun a chungah kut thlâk a tih, a thlâk naw khoma a thi ni la hung tlung el a tih. Chu chu a ni naw le khom indonaah fêng a ta, la thi el a tih. 11 LALPA hriek nâl chunga kut thlâk chu LALPAN mi phal lul naw raw se. A lu thluona fei le tuiûm kha chu la la, fesan ei tih" a ta. 12 Saula lu thluona a fei le a tuium chu Davida chun a lâk a, an fesan a. LALPAN imu inhnik taka a'n intir tawl leiin tu khomin an hmu naw a, tu khom an thang har bok nawh. 13 Davida chu râl khing tieng a kai a, tlâng sîpah a ngîr a, an inkàr chu hla rei a ni tah. 14 Chu taka inthok chun sipaihai le Nera naupa Abner chu a ko khêk a, "Abner, i mi hung don naw ding am a ni?" a ta. Abner chun, "Tu am i na lal hang ko tho ngam hrim hrim chu?" a ta. 15 Davida chun Abner kuomah, "Pasal i ni naw maw? I ni tak tak naw am a ni? Israelhai lai hin nangma ang tu am an um a? Iengtiziea i pu i vêng tha naw am a na? Lal, i pu chu that dingin tuhai amanih an hung kha. 16 I thaw indik naw top a nih. LALPA hringna sâlin ka hril hi, LALPA hriek nâl i pu i vêng tha naw leiin nang le i sipaihai kha thi tlâk in nih. Hang ngha vel la, lal lu thluona fei le a tuiûm kha khaw lai am an um ta a?" a ta. 17 Saula chun Davida rawl a nih ti a hriet a, "David, ka naupa, chu chu i rawl ngei an naw maw?" a ta. Davida chun, "Aw lal le ka pu, ka rawl ni e. 18 Iengtiziea ka pu hin a siehlaw hi a hnot thlûr am a na? Ieng thil am ka thaw suol a, thiem naw changna ding ieng poi am ka tawk rêng rèng a? 19 Tu hin ka lalpa, ka pu hin a siehlaw thu hi ngaithla raw se. Mi do dinga i lungril chokthotu chu LALPA a ni chun thilhlân chu pom hràm sien la, mihriem nauhai an ni ruok chun LALPA hmaah tongsie phurin um raw hai se. 'Fe la, pathien danghai rong va bawl rawh' tiin, LALPA rochung rama ka chanvo hluo ve thei lo dingin an mi hnot suok a ni hi. 20 Tu hin LALPA um nawna ram leilung hla taka hin ka thisen infartir lul naw ro. Tlânga varung pèl dinga mi a ramsuok ang elin, Israel lal meu uihrik zong dingin a'n thok suok a ni hi" a ta. 21 Saula chun, "Thil suol ka lo thaw a nih. Ka naupa David, hung kîr rawh. Voisun hin ka hringna chu i hlutsak leiin i sietna ding ieng khom thaw tum ta naw ning. Invêt angin ka lo khawsa chieng khop el, nasa takin ka thaw suol a nih" a ta. 22 Davida chun, "Hi, lal fei chu ka kol hi, in tlangvàl laia pakhatin hung la raw se. 23 LALPA chun mi tin an fel le an ringum man a pêk hlak a. LALPA chun ka kutah voisun hin a'n hlan che a, sienkhom LALPA hriek nâl chungah kei chun kut thlâk naw ning. 24 Voisuna i hringna ka ngaihlut ang bok hin LALPAN ka hringna ngaihlu sien, buoina po po lakah mi san suok raw se" a ta. 25 Saula chun Davida kuomah, "Ka naupa David, malsawmin um raw khai; thil ropui tak tak la thawng i ta, hnèna chu chang ngei i tih" a ta. Chuongchun, Davida chu a fe a, Saula khom a in tieng a kîr nawk ta a.

27

1 Davida chun a lungrilin, "Ieng ni amani chu Saula kuta hin ka la thi ngei awm hi. Ka ta dinga thaw ding tha tak chu Filistinhai rama tlân lût a nih. Chu chun, Israel ram po poa Saulan a mi zong hi tawpsan a ta, a kuta inthokin suok thei ka tih" tiin a'n ngaituo a. 2 Chuongchun, a mi zaruk thuoiin Davida chu Maok naupa Akis, Gath lal kuoma chun a fe a. 3 Davida le a mihai chu Gath-a chun Akis kuomah an khawsa a. Mi tinin an sûngkuohai an thuoi a, Davida khomin a nuhmeihai pahni, Jezrel-a mi Ahinoam le Karmela mi Abigail, Nabal nuhmei thisan chu a thuoi a. 4 Gath khuoah Davida a tlân ti Saulan a hriet chun a zong nawk ta naw a. 5 Davida chun Akis kuomah, "I mit ka tlung a ni chun, i rama khaw pakhata hin ka umna ding mi ruotpêk la, chu taka chun um kan tih. I siehlaw hi ieng dingin am lal khuoah i kuomah a um zing ding a na?" a ta. 6 Lal Akis chun chu ni lâ là chun Ziklag khuo a pêk a, chuleiin voisun chen hin Ziklag chu Judai ram lalhai ta a la ni ta zing a nih. 7 Davida chu Filistinhai rama chun kum khat le thla li a um a. 8 Chun, Davida le a mihai chun Gesur mi hai, Girzi mi hai le Amalek mi hai chu an hang rùn a; chuong hnamhai chu Sur panna lampuia Telam chen le Aigupta ram chena inzâr an nih. 9 Davidan a rûnna hmuna hrim hrim chun a nuhmei a pasalin tu khom a dama hla a nei naw a, an beram le bawnghai, an sabengtung le sanghawngseihai le an silfênhai ruok chu a lâk a, Akis kuomah a kîr nawk hlak a. 10 Akis chun, "Voisun khaw tieng am i rùn a?" a ta. Davida chun, "Sim tienga um Judai ram dâm, Jerahmeel-hai ram dâm le Ken mihai ram dâm" a ta. 11 "Hieng ang hin Davida chun a thaw hlak hrim a nih" titu ding an um pal nawna ding tiin Davida chun tu khom dama hlà a nei naw hlak hrim a nih. Filistinhai rama a um sûng po po chun chuong ang chu a thaw dàn a nih. 12 Akis chun Davida hril chu awiin, "A mihai theida a phur nasa ta êm leiin kumkhuoin ka siehlawah a um ding a ni hi" a ti lungril a.

28

1 Chuong lai chun Filistinhai chun Israelhai do dingin an sipaihai an khawm a. Akis chun Davida kuomah, "Nang le i mihai hi ka kuomah in hung ve ngei ding a nih ti hre ro" a ta. 2 Davida chun, "Ni e, chu pha chun nang ngeiin i siehlaw hin iem a thaw thei ti hrieng i tih" a ta. Akis chun, "A tha chu, mi vêngtuah sie kumkhuong ka ti che" a ta. 3 Samuel chu a thi ta a, Israel mi po poin an sûn a, ama khuo Rama-ah an vui a. Saula chun rau inzawlpui neihai le aienthiemhai chu a rama inthokin a hnot suok vong ta a. 4 Filistin mihai chu an pung khawm a, Sunema chun an hung a, an inkul a, Saula chun Israelhai po po chu a khawm a Gilboa chun an inkul ve a. 5 Saulan Filistin sipaihai a hmu chun a ti hle a, a lungril chu thlabarnain a sip a. 6 Saula chun LALPA a rawn a, sienkhom mang amani, Urim amani le zawlnei amani hmangin donna hrim hrim a hmu nawh. 7 Chuongchun a siehlawhai kuomah, "A kuomah fea ka rawn ding aienthiem nuhmei mi zongpêk ro" a ta. A siehlawhai chun, "Endor khuoah nuhmei aienthiem a um" an ta. 8 Chuongchun, Saula chu silfèn dang inbelin a'n siem danglam a, mi dang pahnih thuoiin nuhmei kuoma chun a fe a, "A hming ka hril taphot rau chu mi kopêk rawh" a ta. 9 Sienkhom nuhmei chun, "Ngai ta, Saula thilthaw i hriet a, a rama inthokin aienthiem le dawithiemhai a sukbo vong ta a. Ka thina dingin ieng dinga chang i kam am a na?" a ta. 10 Saula chun LALPA hming sâlin, "LALPA hringna sâlin ka hril, hi thil lei hin i chungah hremna tlung naw nih" a ta, a kuomah inkhâmin thu a tiem a. 11 Chu phing leh nuhmei chun, "Tu am kopêk lang che i nuom a?" a ta, ama chun "Samuel mi ko pêk rawh" a ta. 12 Nuhmeiin Samuel a hmu chun a khêk rak a, Saula kuoma chun, "Ieng dinga i mi hlem? Saula i ni zing si a" a ta. 13 Lal chun a kuomah, "Ti dêr naw rawh. Iem i hmu a?" a ta. Nuhmei chun, "Hnuoia inthoka thlarau hung suok ka hmuh" a ta. 14 Saula chun, "Ieng ang hmèl am a put a?" a ta, nuhmei chun, "Putar tak hi a hung suok a, korfuol a hâk" a ta. Saula chun Samuel a nih ti a hriet nghal a, hmaia hnuoi sikin chibai a bûk a. 15 Samuel chun Saula kuomah, "Ieng leia hienga ko suoka i mi sukbuoi am a na?" a ta. Saula chun, "Ka bei a dong êma a nih. Filistinhaiin an mi hung do a, Pathien hlakin a mi nghatsan ta bok si a. Zawlnei amanih mang amanih hmang khoma a mi don ta naw hrim hrim. Chuleiin, ka thaw ding indon ding chein ka ko el che a nih" a ta. 16 Samuel chun, "Chuonga LALPAN a nghatsan ta che a, i hmèlma a lo ni tah ti hre zing siin ieng leia thu i min don am a na? 17 Keima hmanga a hril che ang khan LALPA chun i chungah a thaw a ni ta chu. LALPA chun i kuta inthokin ram chu a lâkpêk ta che a, i tuolbawm Davida ngei chu a pêk tah a nih. 18 LALPA thu i awi naw a, Amalek mihai chunga nasa taka a lungsenna chu i hlenpêk naw leiin tu hin i chungah hieng hin a thaw an ta hi. 19 Chu naw khom chu, LALPAN nangma le Israelhai po po chu Filistinhai kutah pêng a ta, zînga hin nang le i naupa leh ka kuomah hung um tâng in tih. LALPA chun Israel sipai khom Filistinhai kutah pêng a tih" a ta. 20 Samuel thu hril lei chun Saula chu a ti ta êm êm a, hnuoiah a tlu let dêr a, sûnnithlak le zânkhawvàra bu fa ta lo a ni bok a, tha le zung hrim a nei nawh. 21 Nuhmei chu Saula kuomah a hung a, nasa taka lungngaiin a hmu a, a kuomah, "Ngai ta, i siehlawnu hin i thu ka awi a, ka hringna chàn huomin thaw dinga i mi hril chu ka thaw a. 22 Lunginsiet takin i siehlawnu thu hi awi ve thung la, bu tlawmte bèk siempêk ka ti che a, i fe phaa thahrui i nei theina dingin fa hrâm rawh" a ta. 23 Sienkhom a nuom naw a, "Fa naw ning" a ti tlat a. A mi thuoihai le nuhmei chun an ngên tlat leiin an thu chu a awi ta a. Chuongchun, hnuoia inthok chun a hung tho a, khuma chun a'n thung a. 24 Nuhmei chun bawng tuoi thau tak a nei a, inrang takin a va that a, beiphit a lâk a, a hmet a, chol thang lo bei a siem a, 25 Saula le a siehlawhai hmaa chun a sie a, an fâk ta a. Chuongchun an tho a, chu zân chun an fe ta a.

29

1 Filistinhai chun an sipaihai po po chu Afek-ah an ko khawm a, Israelhai chun Jezrel-a tuikhur bulah thanghmun an khaw a. 2 Filistin lalhai chun an rawihai a za ruol le a sâng têl tèla an the darhai chu somin an fe zut zut a, Davida le a mihai chu Akis leh a hnung dâlah an thang a. 3 Filistin kawmandarhai chun, "Hieng Hebrai mihai hin iem a na an hung thaw ve?" an ta. Akis chun, "Hi hi Davida, Israel lal Saula hnuoia ofisar a ni naw am a ni? Saula mâksana ka kuoma a hung tlûk lût nia inthoka voisun ni chen hin, kum khat nêka tam rau ka kuomah a um ta a, a tlâk nawna hrim hrim ka la hmu nawh" a ta. 4 Sienkhom Filistin lalhai chu a chungah an lung a sen a, "Chu pa chu i hmun ruotpêka khan inkîrtir rawh, indonaa chu ei kuomah hung naw raw se, indonaah ei hmèlma tieng thang pal hlau rawi a tih. Eini mihai lu lâng a ta, a pu leh inrem nawk hlauh sing an ta. 5 Hi Davida hi a ni naw maw, làm pum a, Saulan a sânga sâng a that, Davidan a sînga sîng a that"tia a chungchang thu hlaa an sak hlak kha?" an ta. 6 Akis chun David chu a ko a, "LALPA hringna sâlin ka hril, mi ringum i ni a, ka sipaia thang dingin ka dit êm êm che a. Ka kuoma i hung nia inthoka voisun ni chen hin i tlâk nawna hrim hrim ka la hmu naw a, sienkhom lalhaiin an pom tlat naw che a nih. 7 Chuleiin, Filistinhai lalhai suklungninaw nêkin lungawi takin kîr lem el rawh" a ta. 8 Davida chun, "An leh iem a na ka thaw suol chu? Ka hung nia inthoka voisun chen hin i siehlaw laka hin thil indik lo i hmu hrim hrim am a ni? Ieng leiin am ka pu, lal hmèlma do dingin ka fe ve thei naw ding?" a ta. 9 Akis chun, "Ka mita chu Pathien vântirko angin i tha a, amiruokchu Filistin kawmandarhaiin, 'Indonaa chu eini lai hung thei naw nih' an ti tlat a nih. 10 Chuleiin, i kuoma hung ve, i pu siehlawhai le hin zîngkàr inhma takin tho unla, khuo a var hlimin kîr nawk ro" a ta. 11 Chuongchun, Davida le a mihai chu Filistin rama kîr nawk dingin zîng inhma takin an tho a, Filistinhai chun Jezrel an pan tung a.

30

1 Ni thum hnunga Davida le a mihaiin Ziklag an tlung chun Amalekhaiin Negev le Ziklag khuo chu an lo rûn dèr ta a, an raw a, 2 nuhmeihai le chu khuoa um taphot chu a chîn a lienin salah an man a, tu khom that loin an thuoi vong a. 3 Davida le a mihaiin an umna khuo an va tlung chun a lo kâng fai ta a, an nuhmeihai le an naupahai le naunuhai chu salah an lo man fai vong a. 4 Davida le a mihai chu inring takin, chaua an rawl a suok thei naw hiel chenin, an tap a. 5 Davida nuhmei pahnih, Jezrel-a mi Ahinoam le Karmela Nabal nuhmei thisan Abigail-hai khom chu an thuoi a. 6 A mihai chun lunga dêng hiel an nuom el leiin Davida chu a beidong hle a, mi tin chu an naupahai le naunuhai lei chun an lung a na hle si a. Davida ruok chu LALPA a Pathienah a'n sukhrât a. 7 Davida chun Abimelek naupa thiempu Abiathar kuomah, "Thiempu zakuo Efod kha hung la raw khai" a ta, Abiathar chun a hung lâk a. 8 Davida chun "Mi hung rùntuhai hi hnot lang hnot phâk ka tim?" tiin LALPA chu a'n don a. LALPA chun, "Hnot rawh, hnot phâk ngei ngei i ta, san suok tawl ngei ngei bok i tih" a ta. 9 Chuongchun, Davida le mi zarukhai chun an hnot a, Besor Ruom inthûk an tlung chun a then an mâksan a. 10 Mi zahni pawl chu an chau ta êm leiin Besor Ruom chu an kàn pei ta naw a, sienkhom Davida le mi zali chun an hnot ta ngar ngar a. 11 Phûla hin Aigupta mi an hmu a, David kuomah an hung thuoi a, fâk ding bei le dawn ding tui an pêk a, 12 theichang tawl fûn khat le grèp em tawl bawr hnih an pêk bok a, chuonghai a hang fâk chun a hung har nawk a, ni thum le zân thum bu fa ta lo le tui dawn ta lo a ni si a. 13 Davida chun a kuomah, "Tu am i na? Khaw laia inthoka hung am i na?" tiin an don a. Ama chun, "Aigupta tlangvàl, Amalek siehlaw ka nih. Ni thum a ni ta a, ka damnaw leiin ka puin a mi mâksan el a nih. 14 Kereth sim tieng le Judahai chan sim tieng kan rûn a, Kaleb sim tieng kan rûn bok a, Ziklag khuo khom kan raw" a ta. 15 Davida chun, "Chuonghai umnaa chun mi thuoi thei i tim?" a ta. Ama chun, "Mi that lo ding le ka pu kuta mi pe kîr nawk lo dingin Pathien hming sâlin ka kuomah thu intiemkam phot la, chuonghai umnaa chun thuoi ka ti che" a ta. 16 A zuk thuoi tlung chun, ngai ta, Filistin ram le Judai rama inthoka râllâk tam tak an hawn leiin ruoi an lo the mup mup a, an lo um dar nuoi el a. 17 Davida chun thimbuta inthoka a zîng zân tieng chenin a bei ngat ngat a, sanghawngsei chunga chuong tlangval zali tlân suokhai ti naw chu a that fai vong a. 18 Amalekhai râllâk po po chu a lâk kîr nawk a, a nuhmei pahnihai chu a san suok bok a. 19 Chuongchun, a chîn a lien, an naupahai le an naunuhai, an râllâkhai le an thil lâkhai po po chu kim takin Davida chun a hung hawn kîr nawk vong a. 20 Davida chun beram ruol le an ran ruol po po chu a lâk a, a rawihai chu a'n somtir a, "Hienghai hi Davida râllâk a nih" tiin an insam pei a. 21 An chàu leia mi zahni a mâksanna Besor Ruom an tlung chun ama le a fepuihai hmuok dingin an hung suok a, Davidan a chibai tawl a. 22 Sienkhom Davida zuituhai laia mi suolhai le buoina siem chinghai po chun, "An hung ve si naw leiin râllâk ei va lâk kîrhai hi an chang ve ding a ni nawh. Amiruokchu, mi tinin an nuhmei le nauhai seng ruok chu an thuoi phalpêk ei tih" an ta. 23 Davida chun an kuomah, "Unauhai, LALPAN a mi pêk thilhai chu chuong ang chun in thaw ding a ni nawh. Ama chun mi humin, mi dotuhai chu ei kutah a pêk a. 24 Hi thila hin tuin am in thu chu a pom ding? Indonaa zu fehai chan ang tho chu thuomhnaw vêngtuhai khomin inang sengin an chang ve ding annawm" a ta. 25 Chu nia inthok chun tu chen hin Israelhai ta dinga thupêk le dânah an hmang tah a nih. 26 Davidan Ziklag a hung tlung chun râllâk thenkhat chu a ruolhai, Juda upahai kuoma chun, "Hi, LALPA hmèlmahai laka râllâk thilpêk chu kan hung hlè ve cheu a nih" tiin a thon tawl a. 27 Chu thilpêk lo dongtuhai chu Bethel-a um hai, Ramot sim tienga um hai, Jatira-a um hai, 28 Aroer-a um hai, Sifmot-a um hai, Estemo-a um hai, 29 Rakala um hai, Jehramel mi hai Ken mi hai, 30 Horma-a um hai, Bor Asan-a um hai, Athaka um hai, 31 Hebron-a umhai le Davida le a mihai chettlatna hlak hmun po poa umhai an nih.

31

1 Filistinhai chun Israelhai chu an bei a, Israelhai chu an tlânsie a, Gilboa tlângah mi tam tak an that a. 2 Filistinhai chun Saula le a nauhai chu an hnot ngat ngat a, a naupa hai pathum Jonathan, Abinadab le Malki-Shua chu an that a. 3 Saula chu an bei nasa hle a, thal kâp mihai chun an hnot phâk a, na takin an inhliem a. 4 Saula chun a râlthuom chawitu kuomah, "I kawlhnâm phawi la, mi sun tlang rawh; chuong naw chun hieng sertan lohai hi hung an ta, mi hung sun an ta, nuizat siemnaah mi hmang pal rawi an tih" a ta, sienkhom a râlthuom chawitu pang chu a'n za leiin a thaw ngam naw a. Chuleiin, Saula chun a kawlhnâm a lâk a, a baw a. 5 A râlthuom chawituin Saula a thi tah ti a hmu chun ama khomin a kawlhnâm a baw a, a thi ve ta a. 6 Chuongchun, Saula le a naupa hai pathum le a râlthuom chawitu le a mihai po po chu ni khat thilthuah an thi ta vong a nih. 7 Saula le a naupahai an thi vong thu le Israel sipaihai an tlân sie ti ruom râl khing tienga Israel umhai le Jordan râla umhaiin an lo hriet chun an khuohai suoksanin an tlân sie a, Filistinhai chu an hung a, an khuohai chu an hluo ta a. 8 A zîngah Filistinhaiin an râl thathai thuom hlippêk dinga an va fe chun Saula le a nau pasal pathumhai chu Gilboa tlângah thiin an va hmu a. 9 Chun, a lu chu an tan a, a râlthuom chu an hlip a, a chanchin chu an milem biekna tempul le mihai kuoma hril dar dingin an thon dar a. 10 A râlthuom chu an pathiennu Astoret tempulah an sie a, a ruong chu Betsan kul bangah an târ a. 11 Chun, Jabes Gilead-a umhaiin Filistin mihaiin Saula an thaw dàn an lo hriet chun, 12 a zân a zànin an mi huoisen po po chu Betsan panin an inthok suok a, Saula ruong le a naupahai ruong chu Betsan kul banga inthok chun an lâk thlàk a, Jabes-ah an hung hawn a, chu taka chun an raw a. 13 Chun, an ruhai chu an rût khawm a, Jabes-a tamarisk thing hnuoiah an phûm a, ni sari sûng bu ngheiin an sûn a.