1

1 Davida naupa Solomon kuoma chun LALPA a Pathien a um leiin a lalna chu a ram sûngah a suknghet a, nasa takin a sukropui a. 2 Solomon chun Israelhai po po, sipai sâng chunga kawmandarhai le za chunga kawmandarhai, rorêltuhai, Israel pahnam tina thuoituhai le sûngkuo tina lukhàituhai chu a ko khawm a. 3 Pungkhawmhai po po chu Gibeon hmun sàngah a thuoi tung a, chu taka chun LALPA siehlaw Mosiein thlalèra a siem biekbûk, Intuokna Puon in kha a la um a. 4 Pathien Bawm ruok chu Kiriat Jearim-a inthokin Jerusalemah an lâk tung ta a, a siena dinga Davida buotsai puon ina chun an sie a. 5 Amiruokchu, Hura naupa Uri naupa Bezalel siem dâr maichàm chu Gibeon-a biekbûk hmaa chun a la um zing leiin, Pathien rawn dingin Solomonin chu hmun chu a panpui tawl a nih. 6 Intuokna Puon in hmàia um dâr maichâma chun Solomon chu LALPA hmaah a hang fe a, maichâma chun pumraw thilhlân sângkhat a hang inhlàn a. 7 Chu zân chun Solomon kuomah Pathien a hung inlâr a, a kuomah, "I dit dit mi hni rawh, pêng ka ti che" a ta. 8 Solomon chun Pathien kuomah, "Ka pa Davida kuoma khan lunginsietna nasa tak i'n langtir a, ama hmunah lalin i mi lo sie ta a. 9 Aw LALPA Pathien, pilvut anga tam mipuihai chunga rorêltuah i mi sie ta si hin chu, ka pa Davida kuoma i thu tiem kha sukpuitling rawh. 10 Hi mihai hi ka thuoi theina dingin varna le hrietna mi pe rawh. Chuong naw chun i mi hieng zozaihai ro hi tuin am rêlpêk thei an ta?" a ta. 11 Pathien chun Solomon kuomah, "Hieng ang lungril hi put a, sum le pai dâm, hausakna dâm, chawimawina dâm le i hmèlmahai thina ding dâm hni lo a, dam sawtna hai khom hni bok lo a, an chunga lala ka siena che ka mihai ro i rêlpêk theina dinga varna le hrietna i mi hni lem leiin, 12 varna le hrietna ka pèk che bàkah i hma le i hnunga lal tu khomin an nei dër lo ding sum le pai hai, hausakna hai le chawimawina hai pe sa bok ka ti che" a ta. 13 Chuongchun, biekbûk umna Gibeon hmun sànga inthokin Solomon chu Jerusalem tieng a kîr nawk a, Israelhai chungah ro a rêl a. 14 Solomon chun sakor-tawlailir sângkhat le zali le indona sakor sîngkhat le sânghni a nei a, chuonghai chu tawlailir sie khawmna khawpui hrang hrangah a sie a, a then Jerusalemah a kol a. 15 A'n lal sùng hin Jerusalemah tangkaruo le rangkachak chu lung ang elin a bûm hnèr hnûr a; sidar thing khom phai thuta theichang bil ang hiela ngai thei khopin a hau a nih. 16 Solomon sakorhai chu Aigupta le Kilikia a inthokin lal aiawa sumdawnghai chun an inchawk suok hlak a. 17 Aigupta rama inthoka an inchawkhai chu tawlailir pakhat peiah tangkaruo shekel zaruk, sakor pakhat peiah tangruo shekel za le sawmnga an pêk a. Anni chun Hit lalhai le Aram lalhai kuomah an zor sawng hlak.

2

1 Solomon chun LALPA hminga ding tempul le ama ta ding lal in bawl dingin thupêk a'n suo a. 2 Thil phurtu mi sîngsari le tlânga lung sertu ding mi sîngriet le anni inrawitu ding mi sângthum le zaruk a ruot a. 3 Solomon chun Tura lal Hiram kuomah, "Ka pa Davidan a in a bawl laia sidar thing i lo thon hlak ang khan sidar thing mi hung thon ve raw khai. 4 LALPA ka Pathien hminga ding tempul bawl tan ka tum mèk a. Chu chu kei le ka mihai ta dinga hmun serh, LALPA hmaa rimtui rawna ding dâm, chatlak loa hlânbei kan sie zingna ding dâm, zîng le zân le Sabat le thla thar hun le LALPA kan Pathien hminga hunbi ruot kûthai kan hmang chànga pumraw thilhlân kan inhlân zingna ding chu a nih. Chu chu Israelhai thaw dinga kumkhaw thu ruot a ni si a. 5 "Ka tempul bawl ding chu ropui tak a nih, kan Pathien chu pathien danghai po po nêka râpthlàk le ropui lem a ni si a. 6 Sienkhom, vân zâu tak le insâng tak hmana a keng zo lo chu tuin am a tempul ding bawlpêk thei a ta? A hmaa inthawina thilhlânhai rawna ding chauh naw chu kei telul hin iengtin am a ta dingin tempul chu bawlpêk thei ka ta? 7 "Chuleiin, Judai ram le Jerusalema mi themthiem, ka pa Davidan a lo ruoi hlakhai le thok tlâng ding mi pakhat, rangkachak le tangkaruo, dâr le thîr them tienga chemkal, pat senduk le sen lâr le dumpawl nam thiem le thil ker thiem mi hung tirpêk raw khai. 8 Chun, Lebanon-a inthokin sidar thing, far thing le algum thing mi hung lapêk bok rawh, i mihai chu thing phûr thiem an nih ti ka hriet si a. 9 Tempul ka bawl ding chu lien tak le ropui tak a ni ding a ni leiin, thing ka mamaw tawk ka hmu theina dingin ka mihai chu i mihai lai thok ve raw hai se. 10 I siehlawhai le thing phûrtuhai chu huit beiphit kilogram maktaduoi hni, barli beiphit kilogram maktaduoi hni, uoiin litar nuoi li le oliv hriek litar nuoi li pêng ka tih" tiin lekha a thon a. 11 Tura lal Hiram chun, "LALPAN a mihai a hmangai leiin an lalah a siem che a. 12 Lal Davida kuoma nau var tak, lungvar nei le hriet thiemnaa inthuom, LALPA tempul le ama lal in bawltu ding petu LALPA, Israel Pathien, hnuoi le vân siemtu chu inpâkin um raw se. 13 Mi themthiem tak el Huram-Abi ka hung tir ding a nih. 14 A nu chu Dan hnama mi a na, a pa chu Tura mi a nih. Rangkachak le tangkaruo, dâr le thîr, lung le thing, pat senduk le senlâr le dumpawl le zâi inhmi tinrêng a ieng ieng khom them thiem a nih. Thil ker tienga chemkal le ieng ang ruongâm khom a lim an pêk taphot chu ker thiem vong a nih. I mistiri themthiem ruol le ka pu Davida ruoi mi themthiemhai leh thok tlâng raw hai se. 15 "Ka lalpain a siehlawhai hung thon dinga a tiem huit le barli hai, uoiin le oliv hriek hai chu hung thon sien la, 16 keinin Lebanona thing chu i dit zât zât lo phûr kan ta, tuifinrietah Jopa khaw kai chen hung tolpêk kan ti che a, chu taka inthokin nangin Jerusalem tieng i lo tol tung pei ding annawm" tiin donna lekha a thon a. 17 A pain intiemna a thaw ang khan Solomon khomin Israel rama ram dang mi um po po chu a tiem a, an rêngin mi nuoi khat sîngnga sângthum le zaruk an nih. 18 Chuonghai laia mi sîngsari chu thil phurtu ding, sîngriet chu tlânga lung sertu ding le sângthum zaruk chu sinthawhai inrawitu ding an nih.

3

1 Solomon chun Jerusalema Moria Muol, a pa Davida kuoma LALPA a hung inlàrna, Jebu mi Arauna hrizawl, Davidan hmun a lo buotsaia chun LALPA tempul chu a bawl a. 2 Lal a nia inthoka kum lina, thla hnina le ni hninaa chun a bawl tan a. 3 Pathien tempul thut dinga Solomon rem chu a dung meter sawmhni le pasari le a khang meter kuo a nih. 4 Tempul tuolpûk bathlàr chu tempul khang le intiet char, meter kuo a na, a'n sângzie chu meter sawmpathum le a chenve a nih. A sûng chu rangkachaka inluon vong a nih. 5 Chun, pindan lien lem banga chun far thing a hmang a, chu chu rangkachak hlîr hlakin a'n luon khum a, chu taka chun tûm thing le khaidiet lim a'n chuongtir a. 6 Tempul chu lunghlu chi hrang hrangin a cheimawi a; rangkachak khom Parvaim rangkachak ngot a hmang a. 7 Tempul kalkhanghai, banghai, kotkhâr le tuong hai chu rangkachaka inluon vong a na, a banga hai chun cherub lim a ker a. 8 Hmun Thienghlim Tak chu a dung le a khang meter kuo ve ve a na, a sûng chu rangkachak hlir hlaka inluon vong a na, chu taka ding chun rangkachak kilogram sînghni le sângkhat vel a hmang a. 9 A kilna khom rangkachak thîrkil vong a hmang a, thîrkil pakhat chu gram zanga le sawmsari peia rik a nih. Pindan siling po po khom rangkachak tuia inluon vong a nih. 10 Chun, Hmun Thienghlim Taka sie dingin cherub lim pahni a'n siemtir a, chuonghai chu rangkachaka inluon vong a nih. 11 Cherubhai chun thla an zâr a, meter kuo an zàr khum a. Cherub pakhat thla chu meter hni le centimeter hnia sei a na, a thla ki pakhat chun tempul bang a va sun phak a; a thla khing tieng khom chu meter hni le centimeter hnia sei bok a na, cherub pakhat thla ki chu a va hawl phak a. 12 Chuong ang bokin cherub dang thla khom chu meter hni le centimeter hnia sei a na, a thla ki pakhat chun tempul bang a va sun phak a, a thla khing tieng chu meter hni le centimeter hnia sei bok a na, cherub pakhat thla ki chu a va hawl phak a. 13 Chuong cherubhai chun meter kuo inkhumin thla an zàr a, kea ngîrin in sûng tieng an ngha ve ve a. 14 Hmun Thienghlim Tak lûtna puonzâr chu a dumpawl le senduk le sen lâr inpol, pat zâi inhmi taka khawng a na, chu taka chun cherub lem an zep chuoi a. 15 Chun, tempul hmaa phun ding dâr ban pahnih, meter riet ve vea insâng le a sîpa inchuon ding, a lu thut mum meter hni le centimeter hni ve vea insâng chu a siem bok a. 16 A lu thut mum khei par chu khaidiet inher thlopin a vêt kuol a, khaidieta chun theibufai lim zakhat a khai tlar bok a. 17 Chu dâr banhai chu tempul kota chun sim tieng pakhat, hmar tieng pakhat a phun a. Sim tienga ban chu Jakin a'n bûk a, hmar tienga mi chu Boaza a'n buk bok a.

4

1 Solomon chun dâr maichâm a dung meter kuo, a khang meter kuo, a'n sângzie meter li le a chenve a siem a. 2 Chun, dâr tuizêng kuol a sung a, chu chu a laiah hol tlanga meter li le a chenve le an sângzie meter hni le centimeter hni a nih. A rei kuol chu meter sawm le pathum le centimeter hnia lien a nih. 3 A rei hnuoi chara chun bawngchal lim, meter chenve dan peia intlarin, a vêt suok a. Chu bawngchal limhai chu tlar hniin a um a, tuizèng le sakhata sung vong a nih. 4 Tuizèng chu bawngchal sawmpahni chunga inthut a na, bawngchal pathumin hmar tieng, pathumin sim tieng, pathumin sak tieng, pathumin thlang tieng an ngha a. Bawngchalhai chunga chun tuizèng chu a'n nghat a, an rêngin hnung tieng an innghat tuo seng a. 5 Tuizèng bang chu millimeter sawmsari le panga vela sà a na, a rei chu no rei ang, lili pâr vul lai ang a nih. Tuizèng chu tui litar sîngli keng a nih. 6 Chu zoah insawpna ding maihùn sawm a siem a, panga chu sim tieng, panga dang chu hmar tieng, a sie a. Chuonghai chu pumraw thilhlânhai sawpna dingin an hmang a, tuizênga mi ruok chu thiempuhai insawpnaa hmang ding a nih. 7 Chun, a siem dàn dinga ruot ang takin rangkachak khawnvar siena ding sawm a siem a, tempula chun sim tieng panga, hmar tieng panga ve ve a sie a. 8 Dawkân sawm a siem a, tempula chun sim tieng panga, hmar tieng panga ve ve a sie a. Thil thèna ding rangkachak berbu zakhat a siem bok a. 9 Chun, thiempuhai umna ding tuolzawl a siem a, a puo tieng chun tuolzawl lien tak le a kotkhârpui chu a siem bok a, kotkhâr chu dâr tuiin a'n luon a. 10 Chun, tuizèng chu tempul sim sak tieng kila chun a sie a. 11 Bûr le bêl dâm, vutluo dâm le thil thèna berbu dâm a siem bok a. Chuongchun, Pathien tempula dinga lal Solomonin Huram an siemtir chu a zo ta a. 12 Chuong a siempèkhai chu: dâr ban pahnih; a ban sîpa thut mum ding a hmor inbawk pahnih; ban sîpa thut mum hmor inbawk pahnihai cheina ve ve hai; 13 ban sîpa thut mum hmor bawk khei para theibufai lim zali, tlar hnia a rem hai dâm; 14 maihûnhai le an innghatna thuthai; 15 tuizêng le a'n thutna bawngchal sawmpahnihai dâm; 16 bûr le bèl hai, suodur hai, sa thurna thîrkut hai le chuonghai le inzom thil danghai po po. Huram-Abiin LALPA tempula ding lal Solomon a siempêkhai po po chu dâr tle chi vonga siem a nih. 17 Lal chun Jordan phai Sukot le Zarethan inkâra pilbel khurah chuonghai popo chu a'n sûngtir vong a nih. 18 Hieng po po Solomonin a'n siemtirhai hi a tam tham êm leiin dâr an hmang zât khom bûk seng ruol lo a nih. 19 Solomonin tempul hmangruo dang a'n siemtirhai chu: rangkachak maichâm dâm, hlânbei siena dawkan dâm; 20 ruot anga Hmun Thienghlim hmaa sit ding rangkachak hlîr hlaka siem khawnvar siena hai le khawnvar sit ding dâm; 21 rangkachak hlîra siem pârte lim hai, khawnvar hai, chaiche hai, 22 khawnvar phita chep ruolna hai, thil thèna berbu hai, thlêng hai, mei lâkna hai dâm; Hmun Thienghlim Tak pindana kotkhârhai le a pindan puia kotkhârhai dâm a nih.

5

1 LALPA tempul ding Solomonin a bawl zo chun a pa Davidan thil a lo inhlàn ta po po tangkaruo le rangkachak le in cheina hmangruo po po chu a hung lâk a, LALPA tempula rosum sie khawmnaa chun a sie a. 2 Solomon chun Israel upahai, Israel thlahai laia hnam tin thuoituhai le sûngkuo tina lukhàituhai chu Davida Khawpui Zion-a inthoka LALPA Thuthlungna Bawm chu Tempul tienga zawn tung dingin Jerusalemah a'n chà khawm a. 3 Chuongchun, Israel mihai po po chu thla sarinaa kût lai chun lal kuomah an hung khawm a. 4 Israel upahai an hung tlung chun thiempu Levi-hai chun Thuthlung Bawm chu an zawn tung a, 5 Intuokna Puon in le a cheina le a hmangruo thienghlimhai po po khom chu an zawn tung bok a. 6 Lal Solomon le a kuoma Israel mi pungkhawmhai po po chu Thuthlung Bawm hmaa chun an hung a, beram le bawngchal tam tak, a zât khom inchik le tiem seng ruol lo chu inhlànin an inthawi a. 7 Chuongchun, thiempuhai chun LALPA Thuthlungna Bawm chu a umna ding Tempul sûngril, Hmun Thienghlim Taka chun an lâk lût a, cherubhai thla zâr hnuoia chun an sie a. 8 Cherubhai chun Thuthlung Bawm chungah thla zârin, bawm le a zawnfunghai chu an zàr khum a. 9 Bawm zawnfung chu a sei leiin a hmawr chu Hmun Thienghlim kota inthok khomin a'n lang phâk a, sienkhom hmun danga inthok ruok chun hmu thei a ni nawh; chuong ang chun tu chen hin a la um zing. 10 Bawm sûnga chun Aigupta rama inthoka Israelhai an hung suok hnunga Horeb tlânga LALPAN an kuoma thu a thlungna lung phêk pahni Mosien a sie chauh naw chu ieng dang khom a um nawh. 11 Chun, hmun thienghlima inthokin thiempuhai chu an hung suok a. Chu taka thiempu umhai chu ieng ang pawla mi khom ni hai sien, an insukthienghlim vong a. 12 Levi-hai laia rimawi tumtu le hla saktu Asaf hai, Heman hai, Jeduthan hai le an naupahai le sûngkuohai po po chu puon zâi inhmia khawng thuom inbelin, dârbenthek dâm, perkhuong dâm le tingtang dâm chawiin maichâm sak tieng pangah an ngîr a. Tawtawrawt mûttu thiempu za le sawmhni an thang sa bok a. 13 LALPA inpâkna le a kuoma lawmthu hrilna hla an sak le tawtawrawt an mût ri chu zài khatin a luong a. Chuongchun, tawtawrawt le dârbenthek le rimawi danghai leh rema, "Ama chu a tha si a, A ngilneinan kuomtluong a dai"tia rawl tawp insuoa LALPA inpâkna hla an sak lai chun LALPA tempul chu sûmin a hung baw sip ta mup a. 14 Sûm lei chun thiempuhaiin rong an bawl thei ta naw hiel a, Pathien tempul chu LALPA ropuinain a sip si a.

6

1 Solomon chun, "Aw LALPA, 'Sûm sà mupah chêng ka tih' i ti a. 2 Tu hin kumkhuoa i chêngna ding, i ta dingin tempul mawi tak ka bawlpêk ta che ie" a ta. 3 Chun, a ngha kîr a, a hmaa ngîr Israel mi pungkhawmhai po po chu mal a sawm a: 4 "LALPA, Israelhai Pathienin ama bau ngeia ka pa Davida kuoma thu a lo tiem tah chu ama kut ngeia a hung hlen suok tah leiin inpâkin um raw se. 5 Ama chun, 'Aigupta rama inthoka ka mihai ka thuoi suok nia inthok khan Israel hnamhai laia a ieng khuo khom hi ka hming umna ding Tempul bawlna dingin ka la thlang ngai naw a; ka mi Israelhai chunga lukhàitu ding tu khom ka la thlang ngai bok nawh. 6 Amiruokchu, ka hming umna dingin Jerusalem hi ka lo thlang ta a, ka mi Israelhai chunga rorêltu dingin Davida hi ka lo thlang ta bok a nih' tiin a lo hril a. 7 "Ka pa Davida chun LALPA Israelhai Pathien hminga ding Tempul bawl a lungril hlak a. 8 Amiruokchu LALPAN a kuomah, 'Ka hminga ding Tempul bawl nuomna lungril i nei hi i thaw tha ngot el. 9 Sienkhom, nang chu ka Tempul bawltu ding i ni nawh, i naupa, i thàlbea inthoka suok ngei chu ka hminga ding Tempul bawltu ding chu a nih' tiin a lo hril a. 10 Chun, LALPAN a thutiem chu a hung suknghet a, a tiem tah ang ngeiin kei chun ka pa Davida lalna ka hung hluo a, tu hin Israelhai lalthungphaah ka hung inthung ta a, LALPA Pathien, Israelhai Pathien hminga ding Tempul chu ka lo bawl ta ngei bok a. 11 Chu taka chun Israel thlahai kuoma a lo thlung, LALPA Thuthlungna Bawm chu ka sie tah a nih" a ta. 12 Chun, Israel mi pungkhawmhai chu hma sonin LALPA maichâm hmaa chun Solomon chu a ngîr a, kut a phar a. 13 Dâr dawkân, a dung meter hni le centimeter hnia sei le a khang meter hni le centimeter hnia lien, a'n sângzie meter khat le centimeter thum a siem a, Tempul tuolzawl laili taka a'n thut chunga chun a lawn kai a, Israel thla pungkhawm po po hmaah a dingthathuon a, vân tieng nghain bân a phar a. 14 Chuongchun hieng hin a tongtai a: "Aw LALPA, Israelhai Pathien, lungril po poa i lampui hrawtu i siehlawhai kuoma i hmangaina thuthlung vong tlattu, nangma ang hi chung tieng vâna le hnuoi tieng leihnuoiah Pathien dang hrim an um nawh. 15 Ka pa, i siehlaw Davida kuoma bau ngeia thu i tiem chu nangma kut ngeiin i hung hlen a, chu chu voisuna kan hmu hih a nih. 16 "Tu hin aw LALPA, Israelhai Pathien, ka pa Davida kuoma, 'Ka mithmua i um dân anga i thlahai khom ka mithmua fimkhur taka ka dân an zawm ve phot chun, Israel lalthungpha hluotu ding mi chu invai ngai naw ti nih' tia thu i lo tiem kha vong ngei dingin ka ngèn che. 17 Aw Israelhai Pathien, ka pa Davida kuoma thu i tiem kha hung hlen ngei rawh. 18 "Amiruokchu aw LALPA, hnuoia mihriemhai lai chu i chêng tak tak ding am a ni? Vân insâng tak hmanin a keng naw che a, hi ka Tempul bawla lem hin chu i va hang inleng naw nasa zuol awm de aw! 19 Chuong sa khom chun aw LALPA Pathien, zangaina hnia i siehlaw tongtaina hi lo ngaisak la, voisuna i hma ngeia tongtaia i siehlaw hung kona che hi lo ngàithlapèk hràm rawh. 20 'Chu taka chun ka hming chu um a tih' i lo tina hmun tieng hi ngha a, i siehlaw hung tongtaina chu i lo ngàithlâk theina dingin, hi tempula hin sùn le zânin mit inlèn zing hlak rawh. 21 Hi hmun tieng hi nghaa i siehlaw le i mi Israelhai kan hung tongtai pha chun mi lo ngàithlapèk rawh. A nih, i chèngna vâna inthok chun lo ngàithla la, i hriet pha leh kan suolnahai lo ngaidam hlak rawh. 22 "Mi tu khomin a tuolbawm poi a tawk a, hi Tempula i maichâm hmaa a thiem thu inkhâm meua a hung intlun pha chun, 23 vâna inthokin lo ngàithla la, che nghal la, i siehlawhai chungah ro hung rèl la, a thiem naw lem lu chunga chun a thil suol thawna maw chu intlâktir la, poi tawk nawtu chu thiem inchangtir la, a thiemzie chu namnghet rawh. 24 "Nangma lakah an suol leia hmèlmahaiin i mi Israelhai an hne chângin, nangma tieng hung ngha kîr a, i hming lam a, hi Tempula hin ngaidam an hung inhni pha chun, 25 vâna inthokin lo ngàithla la, i mi Israelhai suolna chu ngaidampèk la, an pi le puhai kuoma ram i pèka chun thuoi kîr nawk rawh. 26 "I mihaiin i lakah thil suol an thaw leia vanin ruo hrim a'n sùrtir ta naw changin, hi hmun tieng hi nghaa hung tongtai a, i hming lam a, i hrem leia an suolhai an sim pha chun, 27 vâna inthokin lo ngàithla la, i siehlaw, i mi Israelhai suolna chu lo ngaidam la, an khawsak dân ding lampui indik kawkhmu la, i mihai rochana i pêk rama hin ruo hung insùrtir rawh. 28 "A ramah tàm tla a, hripui dâm, inlawngna dâm le hmonna hri dâm inlèng a, khauthikthi le tuktulung dâm intâm a, hmèlmahan an khuohai inhuol a, sietna le hri le hrai ieng khoma a tlàk buok chângin, 29 i Tempul tieng kut hung phar a, hrem an tuor dân chit chu mani lungril sengah pai a, i mi Israelhai laia mi tu khomin i kuomah tongtaia hnina an hung intlun châng chun, 30 i chêngna vâna inthokin lo ngàithla la, ngaidam la, che la, an ngaituona seng i hriet leiin an nina ang peiin thaw rawh, nangma chauh hi mihriem po po lungril hretu i ni si a. 31 Chuongchun, kan pi le puhai kuoma ram i pêka hin an um sûng chun ieng lai khomin nangma ti nachâng hung nei pha tang an tih. 32 "Ram dang mi, i mi Israelhai ni ve lo, sienkhom i hming leia ram hla taka inthoka hung pantu che khom, (i hming ropui tak le kut hrât tak phara i thawpêkzie hi mihaiin an la hung hriet pei ding a ni si leiin) Tempul tieng nghaa an hung tongtai pha chun, 33 i chêngna vâna inthokin lo ngàithla la, ram dang mi thil hni chu lo thawpêk la, chuongchun i mi Israelhai ang boka khawvela hnam tinin i hming hung hrein, tiin, hi ka Tempul bawl hin i hming a put ngeizie hung hre thei an tih. 34 "I mihaiin hmèlmahai an bei pha, i tirna hmun chu khaw tieng khom ni sien, i khawpui thlang le i hminga ding Tempul ka bawlna hmun tieng hi nghaa LALPA kuoma an hung tongtai chun, 35 i chêngna vâna inthokin an tongtaina le hnina chu lo ngàithlapêk la, an hnina chu lo pompèk rawh. 36 "I lakah thil suol an thaw a, (tu khom suol lo an um bok si naw a), an chungah i lung a sen a, hmèlma kutah i pèk a, an ram tieng, hnâi tè amanih hla tak amaniah sala an thuoi pha, 37 sala an thuoina hmunah inngaituo suok a, insîr a, an intàngna rama inthokin hung ngèn a, 'Thil suol kan lo thaw a, poi kan lo tawk a, rilo takin kan lo khawsa a nih' an ti pha, 38 an hmèlmahai, sala thuoituhai rama inthoka lungril le thlaraua nangma tieng hung ngha kîr a, an pi le puhai i pêk ram tieng, i khawpui thlang le i hming dinga ka bawl Tempul tieng hi nghaa an hung tongtai pha chun, 39 i chêngna vâna inthokin an tongtaina le hnina chu lo ngàithlapèk la, an hnina chu lo pompèk la, i laka i mipuihai thil suol thaw chu lo ngaidam rawh. 40 "I siehlaw hnina le i mi Israelhai hnina lakah i mit insîm ngai naw la, hi hmuna inthoka an hung ko pha che chun lo ngàithlapèk hràm rawh. 41 Tuhin hung tho la LALPA Pathien, I thilthawtheina Thuthlung Bawm leh, I tempula hin hung chêng ta rawh. I thiempuhai chu LALPA Pathien, Sandamnain inthuom tawl la, An chunga i thatna leiin, I mi thienghlimhai chu hlim raw se. 42 I hriek nâl hi LALPA Pathien, Hnawl hmang ngai hrim hrim naw la, I siehlaw Davida kuomaI tiem hmangaina ropui kha, Theinghil ngai hrim hrim naw rawh"a ta.

7

1 Solomon tongtai zo chun vâna 2 LALPA ropuinain LALPA tempul a sip lei chun thiempuhai chu an lût thei naw a. 3 Israel thlahai po poin vâna inthoka mei hung tla le Tempul chunga LALPA ropuina inzâm an hmu chun tempul tuolzawl lungrema chun bawka hnuoi sikin an bokkhup a, "Ama chu a tha si a, A ngilneinan kumtluong a dai"tiin lawmthu an hril a, LALPA chu an chawibiek a. 4 Chuongchun, lal le mipuihai chun LALPA hmaah inthawinahai an inhlàn a. 5 Lal Solomon chun inthawinain bawngchal sînghni le sânghni le beram le kèl nuoikhat le sînghni a'n hlàn a. Chuong ang chun lal le mipuihaiin Pathien Tempul chu an inhlàn a nih. 6 Thiempuhai chu an hmun sengah an ngìr a, Levi-hai khom, "A hmangainan kumtluong a dai" tia LALPA an chawibiek chânga an tum hlak dinga Davidan LALPA rimawi hmangruo a'n siemtirhai chu chawiin an ngìr a. Levihai epa chun thiempuhaiin tawtawrawt an mût a, Israel mipui po po chu an ngîr thup a. 7 Dâr maichâm a siem chun pumraw thilhlân dâm, bu le bâl thilhlân dâm le sathau an inhlànhai chu a keng naw leiin Solomon chun LALPA tempul hmaa tuolzawl inhuon sûng khom chu a'n hlàn thienghlim a, chu taka chun pumraw thilhlân le inremna inthawina thilhlâna a thauhai chu an inhlàn a. 8 Chu tum chun Solomon le Israel mi po po, Hamat Kawna inthoka Aigupta Varuom chena mi pungkhawmhai chun ni sari sûng kût an hmang a. 9 A ni riet ni chun inkhawmna ropui tak an nei a, chuong ang chun ni sari sûng Tempul inhlàn lawmna an hmang bâkah ni sari dang kûtb an hmang bok a. 10 Chun, thla sarina ni sawmhni le ni thum ni chun mipui chu a'n tìntir a, LALPAN Davida le Solomon le a mi Israelhai chunga a thatna a'n langtir lei chun hlim tak le lawm takin mihai chu an in tieng an kìr nawk ta a. 11 Solomonin LALPA Tempul le ama in chu a nuom ang taka bawl zo a, LALPA Tempula ding le ama ina dinga thaw ding a lungrila a lo phan po pohai a hlen suok zo chun, 12 zânah Solomon kuomah LALPA a hung inlàr a, a kuomah "I tongtaina ka lo hriet a, hi hmun hi ka kuoma inthawina in hung inhlànna ding tempulah ka ruot tah. 13 Vânhai ka khâr leia hnuoiah ruo hrim a sûr naw chàng amanih, khau hon ka hung tir leia a ram an fâk ram châng amanih, ka mihai laia hripui ka hung inlêngtir châng amania, 14 ka hming puttu ka mihaiin inpha hnuoia ka kuomah an hung tongtai a, an mi zong a, an um dàn suolhai an nghatsan chun, vâna inthokin lo ngàithlang ka ta, an suolhai ngaidam ka ta, an ram chu thawi dam nawk ka tih. 15 Hi hmuna tongtaia in hung hnina laka chun ka mit phong ka ta, ka na sit bok ka tih. 16 Kumkhuoa ka hming umna dingin hi Tempul hi ka ruot a, ka sukthienglim ta a, chutaka chun ka mit le ka lungril fu zing hlak a tih. 17 "Nang khom i pa lungril ang put a, ringum tak le ngîl taka ka hmaah i khawsa ve a, ka thupêkhai po po zui a, ka thusuokhai le Dânhai po po i zawm ve chun, 18 i pa Davida kuoma. 'Israelhai lalthungpha hluotu ding chu mi invâi naw ti nih' ti a ka lo tiem tah angin, Israelhai chungah i lalthungpha chu kumkhuoin suknghet ka tih 19 "Amiruokchu, nangnin mi nghatsan a, ka thupêkhai le thusuokhai zawm lo a, pathien dang rong bawla in biek chun, 20 ka pêk tah hi rama inthok hin Israelhai chu phawi hmang ka ta, ka hminga dinga ka sukthienghlim tah hi Tempul hi hnawl bok ka ta, hnam tin nuizatbur le hmusit hung nîng a tih. 21 Tu hin hi Tempul hi ropui hlein inlang sienkhom, a fe pèl taphotin pangzatin, "Iengti lawm lawma hienga LALPA an Pathienin a thaw el am a na?" la ting an tih. 22 Mihai chun, 'Aigupta rama inthoka an pi le puhai thuoi suoktu LALPA an Pathien chu an nghatsan a, pathien dang an chel a, an biek a, an rong an bawl leiin hieng sietna po po hi an chungah LALPAN a hung intlungtir a nih' tiin la don an tih" a ta.

8

1 LALPA tempul le ama in ding kum sawmhni sûnga Solomonin a bawl zo hnung chun, 2 Hiramin khuo a pêkhai chu a bawl tha a, chuong khuoa hai chun Israelhai chu hmun a'n khuortir a. 3 Chu zoah Solomon chun Hamat Zoba a bei a, a lâk a. 4 Thlalèra khuo Tadmor chu a bawl tha a, Hamat biela hmangruo siekhawmna khuo po po khom a'n din tha bok a. 5 Beth Heron chuonchung le Beth Heron chuonhnuoia khuohai chu a bawl tha a, kul bang nei, kotkhâr le a kalna nei vongin a siem a. 6 Chuong ang bokin Baalat khuo le Jerusalem le Lebanon le a lalram sûng po poa hmangruo sie khawmna le sakor-tawlailir le indosakor sie khawmna khawpui po po hai chu a'n din thar vong bok a. 7 Israel mi ni lo hnam danghai, Israelhaiin sukbohmang loa an hlà Hit hai, Amor hai, Periz hai, Hiv hai le Jebu hai thlahai chu 8 Solomonin suoka neiin sinthawah a sor lui a, tu chen hin chuong ang chun an la um a. 9 Israel thlahai ruok chu Solomonin siehlaw anga sor ve loin, sipaia dâm, sipai hotua dâm, tawlailir le sakor chung chuong mihai hotua dâm a sie lem a. 10 Chuonghai chu mipuihai inrawitu, Solomon thoktu luhai an na, an rêngin zahni le sawmnga an nih. 11 Solomon chun "Ka nuhmei chu Israel lal Davida inah a um ding a ni nawh, LALPA Bawm lûtna hmun taphot chu hmun thienghlim a ni si a" a ta, Faraw naunu chu Davida Khawpuia inthokin ama puola a chêngna dinga a bawlpêk ina chun a thuoi tung a. 12 Solomon chun tempul hulhliep hmaa LALPA maichâm a siema chun inthawinahai a'n hlàn hlak a. 13 Mosie thupêk anga ni ser bîk Sabat hai, thla thar lawmna nia hai, kût bi nei huna hai, kum khata kût pathum- chol thang lo bei kûta dâm, chawlkar kûta dâm le bawkte kûta dâm pumraw thilhlân inhlàn dinga bitukhai chu a'n hlàn a. 14 A pa Davida lo ruot tah angin thiempu pawl le Levi pawlhai chu an chanpuol seng ni tina thaw tûl ang peia thaw ding, hlaa inpâkna thuoitu pawl dâm le ni tina an mamaw ang peia thiempuhai thangpuitu ding dâm a ruot a. Kotkhâr hrang hrang vêngtu ding a pawl pawlin a ruot bok a. Chuong anga an thaw ding seng chu Pathien mi Davidan a lo ruot sa diem a nih. 15 Lal Davidan thiempuhai le Levi-hai thaw ding le rosum siena an enkol dàn dinga thu a pêk iengkim chu a pêk ang thlapin an thaw vong a. 16 Solomonin bawl dàn dinga a riruong ang thlapin LALPA Tempul chu a thut an rema inthoka an zo fel chenin an bawl a, chuongchun LALPA Tempul chu zo fel a lo ni ta a. 17 Chu zoah Solomon chu Edom rama Agaba litengsawla um Ezion Geber le Elath a chun a fe a. 18 Chu taka chun Hiramin a longpuhai, tuinfinrieta che thang mihai chu long leh a tir a, Solomon siehlawhai leh Ofir-ah an fe a, chu taka mi chu rangkachak kilogram sîngkhat le sângrukc laia tam an va phur a, lal Solomon kuomah an inhlàn a.

9

1 Seba lalnuin Solomon hming inthangzie a lo hriet chun zawna khir tak taka fie dingin Jerusalemah a hang inzin a. Hnung zuitu tam tak leh, rimtui le rangkachak le lunghlu tam tak phurtu sanghawngsei ruol leh Solomon kuom a hang tlung a, a lungrila a pai po po chu phorin a titipui a. 2 A thil indon po po chu Solomonin a don vong a, hriet naw le hrilfie harsa ti hrim a nei nawh. 3 Solomon varzie dâm, a lal in bawl ropuizie dâm, 4 dawkana fâk ding an siehai dâm, a khawnbawl thung khup el hai dâm, rongbawltuhai le an inchei dàn hai dâm, uoiin semtuhai dâm le LALPA tempula pumraw thilhlân a'n hlànhai dâm Seba lalnu-in a hmu chun mak a ti hiel a. 5 Lal kuoma chun, "I thilthawhai le i varziehai ka rama inthoka ka lo hriet kha a lo indik khop el. 6 Keima hunga mit ngeia ka hmu hma chun ka lo awi ngai naw a, a chenve khom an mi lo hril naw lem a ni hi tie! Varna le hausaknaah an hung hril nèk daiin i lo insâng lem a nih. 7 I mihai hi ieng ang lawma hamtha am an na! I bula chêng, i varna thu ngàithla roptu i siehlawhai hi an va hang hamtha ngei de aw! 8 Nangma chunga lawmtu LALPA i Pathien ta dinga rorêltua a lalthungphaa sietu che chu inpâkin um raw se. LALPAN kumkhuoin Israelhai tungding a nuom leiin fel tak le indik taka an rorêltu dingin a sie che a ni hi" a ta. 9 Chuongchun, lal kuomah thilpêk rangkachak kilogram sângli le rimtui le lunghlu tam tak a pêk a. Seba lalnuin rimtui Solomon a pêk ang zozàia tam chu tu khomin an pêk nawk ta ngai nawh. 10 (Hiram long ruol Ofira rangkachak tam tak phura fehai chun almuk thing tam tak le lunghlu an hung phur teu bok a. 11 Lal chun almuk thinghai chu LALPA tempul kailawn le ama lal in kailawn siemnan a hmang bâkah rimawi tumtuhai hmang ding tingtang le perkhuong siemnain a hmang bok a. Chuong ang zozàia tam almuk thing chu a hnungin Judai ramah an hmu ta ngai nawh. ) 12 Lal Solomon chun Seba lalnu dit le hni taphot chu a thawpêk bâkah a lal ina rosum tam tak chu amanu hung chawi nêka tam a pêk bok a, chuongchun a rawihai leh ama ram tieng a kîr nawk ta a. 13 Kum tina Solomon kuta rangkachak lût zât chu kilogram sînghni le sângthum a nih. 14 Chu bâka chun sumdawnghai le dawrkaihaiin sie an pêk bâkah Arabiaa lalhai le a ram optuhaia inthokin sie le leiman a hmu teu bok a. 15 Lal Solomon chun rangkachak sut phêkin phaw lien zahni a siem a, phaw pakhat peiah rangkachak kilogram sari vèl an hmang a. 16 Chun, rangkachak sut phêk bokin phaw chin lem zathum a siem bok a, phaw pakhat peiah rangkachak kilogram hni an hmang a. Chuonghai chu a lal in 'Lebanon Ngawpui Rûn' a chun a sie a. 17 Chun, lal chun saiha ngotin lalthungpha ropui tak a siem a, chu chu rangkachak tuiin a'n luonkhum vong a. 18 Lalthungpha kai tungnaa chun kailawn paruk a um a, kailawn thut le inzomin rangkachak tlanga siem ke nghatsan a um a. Lalthungpha sîr ve vea chun kut innghatna chelbân a um a, chu sîr ve vea chun sakeibaknei pahnih an ngîr a. 19 Kailawn paruk sîr tona chun sakeibaknei sawmpahni, sîr tinah pakhat pei an ngîr a, chuong ang chu khaw lai rama khom an la siem ngai nawh. 20 Lal Solomon no po po chu rangkachaka siem vong a na, Lebanon Ngawpui Rûna a bûr le bêlhai chu rangkachak hlîr hlaka siem vong a nih. Solomon dam lai chun tangkaruo chu ieng thama ngai a ni naw leiin a bûr le bêlhai chu tangkaruoa siem hrim a um nawh. 21 Lal chun tuifinrietah sumdawng long ruol a nei a, chu chu Hiram longpuhaiin an khal a, chuonghai chun kum thum dan peiah rangkachak dâm, tangkaruo dâm, saiha dâm, zawng le ngau lien chi dâm an hung phur hlak a. 22 Hausakna le varnaah Solomon chun khawvela lal dang po po a khûm a. 23 Pathienin a lungrila varna thu a siepêkhai chu ngàithla dingin khawvela lal po poin Solomon chu an hung pan huoi huoi hlak a. 24 Chun, kum tinin a kuoma hung taphotin thilpêk tangkaruo le rangkachaka siem thil dâm, silfên dâm, râlthuom dâm, rimtui dâm, sakor dâm le sabengtung dâm an hung chawi hlak a. 25 Solomon chun sakor-tawlailir le sakor siena hmun sângli a nei a, indo sakor khom sîngkhat le sânghni a nei a, chuonghai chu tawlailir siena khuoa hai a sie a, a then Jerusalemah a kol a. 26 Solomon chu Eufretis vadunga inthoka Filistinhai ram chen le Aigupta ramri chena lalhai po po chunga lal tak a nih. 27 Lal chun Jerusalemah thil a hau êm leiin tangkaruo dâm chu lungte ang hiel le sidar thing khom tlâng thuta theichang bil ang hiela ngai khopin a siem a nih. 28 Solomon sakorhai chu Aigupta rama inthok le hmun hrang hranga inthoka a lâk a nih. 29 Solomon inlal laia thil tlung danghai chu a bula inthoka a tawp chenin zawlnei Nathan thu zieka hai, Silo mi Ahija hril lawkna thu inziekna bua hai, Nebat naupa Jeroboam chungthua zawlnei Ido-in inhriettirna a donghai inziekna bua hai a chuong. 30 Solomon chu Jerusalemah Israel mihai po po chungah kum sawmli a'n lal a. 31 A pi le puhai kuoma a chawl chun a pa Davida khuoah an phûm a, a naupa Rehoboam chun a lalna chu a hung hluo ta a.

10

1 Rehoboam chu Sekem khuoah a fe a, Israel mihai po po khom ama chu lala siem dingin chu taka chun an fe ve a. 2 Nebat naupa Jeroboam, lal Solomon leia Aigupta rama tlân hmang chun chu ri chu a lo hriet a, Aigupta rama inthokin a kîr nawk a. 3 Israel mi pungkhawmhai po po chun Jeroboam chu an ko a, ama rawiin Rehoboam kuomah palai an fe a, 4 "I pa khan kan phur a sukrik taluo a, tuhin inrim taka a mi sorna le ringkol rik tak a min phurtir hi mi sukzângpêk la, i rong bawl kan tih" an ta. 5 Rehoboam chun, "Kîr nawk ta unla, ni thum hnungah hung nawk ro" a ta, palaihai chu an suok a. 6 Lal Rehoboam chun a pa Solomon dam sûng po poa a hnuoia sinthaw hlak upahai chu a rawn a, "Hieng mihai hi iengti anga don dingin am in ngai a?" a ta. 7 Anni chun, "Voisun hin hieng mihai thu hi ngilnei tak le tha taka i lo dongsawng chun kumkhuoin i siehlawah um an tih" an ta. 8 Sienkhom, upahai remruotpui chu Rehoboam chun pom loin, ama ruoltlâkpui tlangvàl ruol, a bula khawsa hlakhai chu a rawn lem a. 9 An kuomah, "Iem in ngai ve dàn chu? Mipuihaiin, 'I pa ringkol mi'n phurtir hi mi sukzangpêk deu rawh' an ti hi iengtin am ei don ding a na?" a ta. 10 A ruolchamhai chun, " 'I pa ringkol min phurtir hi mi sukzângpêk rawh' tituhai kuoma chun, 'Ka kutte hi ka pa kawng nêkin a lien lem. 11 Ka pa khan phur rik tak a'n phurtir cheu a, kei chun in phur ka sukrik zuol ding a nih. Ka pa khan vuokna hruolin a hrîk hlak cheu a, kei ruok chun khawmuol kaikuongin ka hrîk ding cheu a nih' tiin hril rawh" an ta. 12 Lalin, "Ni thum hnungah hung nawk ro" a ti angin ni thum hnungah Jeroboam le Israelhai chu Rehoboam kuomah an hung nawk a. 13 Lal chun upahai thurawn a lâk naw leiin inrum takin a lo biek a. 14 Tlangvàlhai remruotpui angin, "Ka pa khan in phur a lo sukrik a, kei chun ka sukrik zuol ding a nih. Ka pa khan vuokna hruolin a hrîk hlak cheu a, kei ruok chun khawmuol kaikuongin ka hrîk ding cheu a nih" a ta. 15 Chuong ang chun mipuihai thu chu lal chun a ngàithlàk nuom nawh; chu thil hung tlung chu LALPAN Silo mi Ahija hmanga Nebat naupa Jeroboam kuoma a lo hril lawk tah chu sukdikna dinga LALPA thilthaw a ni si a. 16 Lal chun an thu a ngàithlâk nuom der nawh ti Israelhaiin an hrietin lal chu hieng ang hin an don a:"Davida lakah iem chanvo kan nei hrim a? Jesai naupa lakah rochan iem kan nei ve a? Aw Israelhai, in puon in tieng kîr nawk ta ro. Aw Davida, i sûngkuo chu nangin enkol ta rawh" tiin. Chuongchun, Israelhai chu in tieng an kìr ta rip a. 17 Judai rama um Israelhai chunga chauh Rehoboam chu lal a hung ni ta a. 18 Lal Rehoboam chun sinthawa mi sor luihai inrawitu Adoniram chu Israel pungkhawmhai kuomah a tir a, anni chun lungin an lo dèng hlum a. Lal Rehoboam ruok chu a tawlailirah a lût hman hràm a, Jerusalem tieng a tlân sie a. 19 Chuongchun, Israelhai chu Davida sûngkuo lakah tu chen hin an hel tah a nih.

11

1 Rehoboamin Jerusalem a hung tlung chun Israel sûngkuohai chu do ding le an ram del po chu a rama la kîr nawk dingin Juda hnama mi le Benjamin hnama mihai laia mi huoisen thlang bîk mi nuoi khat le sîng riet a khawm a. 2 Amiruokchu Pathien mi Semai kuomah LALPA thu a hung tlung a, 3 "Judai ram lal Solomon naupa Rehoboam kuoma le Juda le Benjamin sûngkuo po pohai kuomah, 4 LALPAN hieng ang hin a hril: 'Hang fe naw ro, Israel thlahai, in unauhai chu hang do hlek naw ro. Mani in tieng seng kîr nawk ro. Hi thil hi keima thaw a nih' tiin hril tawl rawh" a ta. Chuongchun LALPA thu chu an awi a, Jeroboam chu hang bei loin an kîr ta vong a. 5 Rehoboam chu Jerusalemah a um a, Judai ram vèng himna dingin a khuohai a siem tha a. 6 Chuonghai chu Bethlehem hai, Etam hai, Tekoa hai, 7 Bet Zur hai, Soko hai, Adulam hai, 8 Gath hai, Maresa hai, Zif hai, 9 Adoraim hai, Lakis hai, Azeka hai, 10 Zora hai, Aijalon hai le Hebron hai an na, Judai ram le Benjamin rama kul nei khuohai chu an nih. 11 Chuong kulhai chu a suknghet a, khaw tinah vêngtu kawmandar a sie vong a, fâk ding dâm, hriek dâm le uoiin dâm a sêk khawl a. 12 Khaw tinah râlthuom phaw le fei hai a sie a, khaw hrât takin a siem tawl a. Chuong ang chun Judai ram le Benjamin ram chu a ta a hung ni ta a. 13 Israel ram biel tina thiempuhai le Levihai chu Rehoboam tieng an thang a. 14 Jeroboam le a nauhaiin LALPA thiempu dingin an hnawl si leiin, Levihai chun an in le lo le ran tlatna hmunhai chu mâksanin Judai ram le Jerusalem an pan a. 15 Hmun sànga kèlchal le bawngte lem a siehai bieknaa hmang dingin Jeroboam chun ama thiempuhai chu a ruot lem a. 16 Chun, Israel hnamhai laia LALPA Israelhai Pathien tienga lungril thle taphot chun LALPA, an pi le puhai Pathien kuoma inthawi dingin Jerusalem tieng Levihai chu an zui bok a. 17 Chuonghai chun Solomon naupa Rehoboam chu tanin, Judai ram chu an suknghet a, kum thum sûng chu Davida le Solomon hai lampui hraw chu an hraw ve a. 18 Rehoboam chun Davida naupa Jerimot naunu Mahalat chu nuhmeiah a nei a. Mahalat nu chu Abihail a na, ama chu Jesai naupa Eliab naunu a nih. 19 Naupa pathum Jeush, Semaria le Zaham hai a hringpèk a. 20 Ama hnunga chun Absalom naunu Maakai a nei a, ama chun Abija, Ataia, Ziza le Selomit hai a hringpèk a. 21 Rehoboam chun Absalom naunu Maakai chu a nuhmei danghai le hmeihai po po nêkin a hmangai lem a. Rehoboam chun nuhmei sawm le pariet le hmei sawmruk a nei a, naupa sawmhni le pariet le naunu sawmruk a nei. 22 Chun, Rehoboam chun Maakai naupa Abija chu lala a siem theina dingin a unauhai laia chunghnung takah a sie a. 23 Var takin rem a ruot a, a naupahai chu Judai ram le Benjamin ram po poa kul nei khuoa hai chun mawphurna pein a'n um dartir a, fâk ding tam tak a pêk a, nuhmei tam tak a'n neitir tawl bok a.

12

1 Rehoboam chu a hung inlal nghet phing leh ama tienga thang Israelhai po po leh LALPA dàn an nghatsan ta a. 2 LALPA chungah an ringum naw leiin lal Rehoboam inlala inthoka kum nganaa chun Aigupta lal Sisak-in Jerusalem a hung rûn a. 3 Sisak chun sakor-tawlailir sâng le indo sakor sîngruk le Libya mi hai, Suki mihai le Kushd mihai, tiem seng loa tam chu Aiguptaa inthokin a hung thuoi a, 4 Judai rama kula inhuon khuohai chu a lâk a, Jerusalem chen a hang tlung a. 5 Rehoboam le Juda hnama lukhàituhai, Sisak an ti leia Jerusalema pungkhawmhai kuoma chun zawlnei Semaia a hang fe a, an kuomah, "LALPA chun hieng hin a hril: 'In mi nghatsan a, chuleiin kei khomin Sisak kutah ka mâksan ve ta cheu a nih' a tih" tiin a hril a. 6 Israel lal le an lukhàituhai chu inpha hnuoiin, "LALPA chu a'n dik a nih" an ta. 7 An inpha hnuoi ti LALPAN a hmu chun LALPA thu chu Semaia kuomah a hung tlung a, "An inpha hnuoi leiin anni chu sukse loin intlan suok vat tawl ka tih. Sisak hmangin Jerusalem chungah ka lungsenna bun thla ta naw ning. 8 Amiruokchu, ka rongbawl le hnuoi lalhai rongbawl indanglamzie an hriet theina dingin Sisak thu hnuoiah sie tawl ka tih" a ta. 9 Aigupta lal Sisak chun Jerusalem chu a bei a, LALPA tempul le lal ina rosum po po chu a lâk fai vong a, Solomon siem rangkachak phawhai po po khom a lâk bok a. 10 Lal Rehoboam chun a aiin dâr phaw a siem a, lal in kot vêngtu kawmandarhai chu a'n koltir a. 11 LALPA tempulah lal a fe pha leh vêngtuhai chun dâr phaw chu an chawi a, an hung kìr pha leh vêngtuhai pindana a siena hmuna chun an thak kîr nawk hlak a. 12 Rehoboam inpha hnuoi lei chun LALPAN a lungsenna a lâk kieng a, a suksiet vong ta naw a, Judai ram chu a tha tluong pei a. 13 Lal Rehoboam chu Jerusalemah inlal zom peiin a'n suknghet pei a. Kum sawmli le kum khat a ni kuma inlal tanin, LALPAN a hming umna dinga Israel hnam po pohai hmun laia a thlang bìk khuo Jerusalema chun kum sawm le kum sari a'n lal a, a nu hming chu Naama a na, Amon mi a nih. 14 LALPA tieng lungril a pêk naw leiin thil suol a thaw a. 15 Rehoboam inlal sûnga thil tlunghai, a bula inthoka a tawp chen chu zawlnei Semaia ziek le zawlnei Ido zieka inthla sawng dàn chanchin an suinaah a chuong. Rehoboam le Jeroboam chu an indo zing zing hlak a. 16 Chun, Rehoboam chu a pi le puhai kuomah a chawl a, Davida khuoah an phûm a, a naupa Abija-in a lalna chu a hung hluo ta a.

13

1 Israel lal Jeroboam inlala inthoka kum sawm le kum rieta chun Abija chu Judahai chunga lalah a hung um a. 2 Jerusalemah kum thum a'n lal a, a nu hming chu Maaka a na, Gibea khaw mi Uriel naunu a nih. Abija le Jeroboam chu an indo a. 3 Abija chun indo mi, sipai huoisen thlang khawm nuoi li leh a va bei a, Jeroboam chun mi hrât thlang khawm nuoi riet leh thang a lo khaw a. 4 Abija chu Efraim tlâng rama Zemaraim tlângah a ngîr a, "Aw Jeroboam le Israel mi po pohai, lo ngaithla ro. 5 LALPA, Israel Pathien chun Israel ram chu Davida le a thlahai kuomah machi thuthlunge thlungin kumkhuoa dingin a pêk tah ti in hriet naw am a ni? 6 Chuong sa khom chun Nebat naupa Jeroboam, Davida naupa Solomon siehlaw chu a pu chungah a lo hel el ta hi! 7 Solomon naupa Rehoboam chu naupang dawng a la ni lai le a la do hne tawl hmain ama kal zawngin Jeroboam chun mi hmangna bo ruol a'n pung khawm a. 8 Tu khom hin Davida thlahai kuta um LALPA ram chu do dingin in inpuocha a, sipai khom in hau hle a, Jeroboamin in pathien dinga a siempêk cheu bawngte lemhai khom in kuomah a um a. 9 LALPA thiempu, Aron nauhai le Levi-hai chu hnot suokin, ram dang mihai thaw danin thiempu in insiem chop a ni naw am a ni? Bawngchal tuoi le beramchal pasari chawia hung inhlàn taphothai chu pathien ni hrim hrim lohai thiempuah in lo siem thei pei a ni khah. 10 "Keini Pathien ruok chu LALPA a na, ama chu kan inphatsan naw a, LALPA rongbawltu thiempuhai khom Aron naupahai le anni thangpuitu Levihai an nih. 11 Ni tin zîng tieng le zân tieng pumraw thilhlân le rimtui thilhlân LALPA kuomah an inhlàn a; dawkân thienghlimah bei an sie diem a, zân tieng zàtin rangkachak khawnvar sienaa khawnvarhai chu an insit a. Keini chun LALPA kan Pathien thupêk chu kan zawm zing a, nangni ruok chun ama chu in nghatsan ta si a. 12 Ngai ta u, Pathien chu kan kuomah a um a, ama chu mi thuoitu a nih. A thiempuhai chun nangni dona dingin tawtawrawt mût an tih. Israel mihai, in pi le puhai Pathien LALPA chu kalin do naw ro, hmuingil naw top in tih" a ta. 13 Nisienlakhom Jeroboam chun an hnung tienga inchàntu sipai a sie a, ama chu Judahai hma tieng chun a um a. 14 Judahai an hang ngha kîr chun hnung tieng le hma tieng râlin an inhuol an hmu a, chuongchun LALPA chu koin thiempuhai chun tawtawrawt an mût a. 15 Judahai chu an khèk dur dur a, an khèk ruol chun Abija le Judahai hmaah Pathienin Jeroboam le Israel mihai po po chu a suktlawm a. 16 Judahai hmaa chun Israelhai chu an tlânsie a, Pathienin an kutah a pêk a. 17 Abija le a mihai chun an that teu a, Israel sipai tha tha nuoinga an that a nih. 18 Chu tum chun Israel mihai chu an tlawm a; LALPA, an pi le puhai Pathiena an innghat leiin Judahai chun hnèna an chang a nih. 19 Abija chun Jeroboam chu a hnot a, Bethel khuo hai, Jesana khuo hai, Efron khuo hai le an khawperhai chu a lâkpêk a. 20 Abija inlal sûngin Jeroboam chu a ngîr suok nawk ta nawh. LALPAN a hrem a, a thi a. 21 Abija ruok chu a hung hrât deu deu a. Nuhmei sawm le pali a nei a, naupa sawmhni le pahni le naunu sawm le paruk a nei a. 22 Abija chanchin danghai, a thilthawhai le a thil hrilhai chu zawlnei Iddo ziek chanchin inchiknaah a chuong.

14

1 Abija chu a pi le puhai kuomah a chawl a, Davida khawpuia chun an phûm a, a naupa Asa chun lalna chu a hung hluo a, a'n lal sûngin a ram chu kum sawm zet râlmuongin a um a. 2 Asa chun LALPA Pathien mithmuah thil tha le indik a thaw hlak a. 3 Ram dang pathienhai maichâm le hmun sànga bawlhmun po po chu a thiek a, an lung biekhai chu a vuok koi a, Asera lem thinghai chu a phûr thlûk vong a. 4 Judahai chu LALPA, an pi le puhai Pathien chu zong ding le a dàn le thupêkhai chu zawm dingin thu a pêk a. 5 Judai ram khaw tina hmun sànghai le rimtui inhlànna bawlhmunhai po po chu a thiek vong a, a'n lal sûngin a ram chu râlmuongin a um a. 6 Râl a muong leiin Judai rama chun kul nei khuohai an din a, LALPAN râlmuongna a pêk leiin chu sûng chun tu khomin an hung do nawh. 7 Ama chun Judahai kuomah, "Thaw ro, hieng khuohai hi indin ei tiu khai; kulin inhuon ei ta, râlvêng bûk sànghai bawl ei ta, kul kotkhâr le a kalnahai siem ei tiu. LALPA ei Pathien ditzawng ei zong leiin ram chu ei kutah a la um zing a, sîr tinah râlmuongna a mi pêk a nih" a ta. Chuongchun, khuohai chu an indin tha a, an hmuingil pei a. 8 Asa chun Juda mi, phaw le fei chawi sipai nuoithum a nei a; chun, Benjamin mi, phaw le thal hmang nuoihni le sîngriet a nei bok a, chuonghai chu mi hrât le huoisen vong an nih. 9 Chun, Kusf mi Zera chun sipai maktaduoi khat le sakor-tawlailir zathum thuoiin anni chu rûn dingin a hung inthok a, Maresa a hung tlung a. 10 Anni chu dang dingin Asa chu a'n thok suok a, Maresaa Zefatha ruoma chun thanghmun a khaw a. 11 Asa chun LALPA Pathien a ko a, "LALPA, nang chauh naw chu mi hrât tak laka mi hrât nawhai san theitu tu khom an um nawh. Aw LALPA kan Pathien, mi hung thangpui raw khai, nang chu kan innghatna i na, hieng sipai tam tak hi bei dingin i hmingin kan hung inthok suok a nih. Aw LALPA, nang chu kan Pathien i na, mihriemin ngam lul naw raw se che" tiin a tongtai a. 12 Chuongchun, LALPAN Asa le Judahai hmaa chun Kush mihai chu a bei a, an tlânse dur dur a. 13 Asa le a mihai chun Gerar chenin an hnot a, Kush mihai chu an that rawn êm leiin an thang zo ta naw a, LALPA le a sipaihai hmaa chun an tlawm ta dêr a. Judahai chun râllâk sum tam tak an lâk a. 14 Gerar le a se vela khuohai po po chu an suksietpêk a, LALPA tiumna chu an chungah bunin a um si a. Chuongchun, khuohai chu an rok a, râllâk tam tak an làk a. 15 Ranpuhai bûk khom an rok a, an ran ruol beram, kèl le sanghawngsei tam tak an thuoi a, Jerusalem tieng an kîr nawk ta a.

15

1 Oded naupa Azaria chungah Pathien thlarau a hung tlung a. 2 Asa hmuok dingin a suok a, a kuomah, "Asa le Juda mi po po le Benjamin mi po po hai, mi lo ngàithla ro. Amaa in um sûng po nangniah LALPA khom um a tih. In zong chun ama chu hmung in ta, in inphatsan chun inphatsan vêng a ti cheu. 3 Israelhai chu Pathien tak be loin hun sawt tak an khawsa a, zirtirtu ding thiempu an nei naw a, dàn khom an hriet bok nawh. 4 Amiruokchu, an beidongin LALPA, Israel Pathien tieng an ngha a, an zong a, ama chu an hmu a. 5 Chuong hun lai chun a ram chu buoina rûnpuiin a chîm leiin inzin suok ngamna khom a ni nawh. 6 Hnam le hnam, khuo le khuo an insuksiet rem rum a, an chungah beidongna chi tinrêng Pathienin a'n tlungtir a nih. 7 Nangni ruok chu hrât takin um unla, inthlada naw ro, in thilthaw ra chu in hmu ding a ni si a" a ta. 8 Chuong thuhai le zawlnei Oded naupa Azaria thu hrilhai Asa-in a hriet chun a sukhuoi pha a, Judai ram le Benjamin ram po po le Efraim tlângrama khuo an lâk po poa inthok chun thil tirdakum mi lemhai chu a'n thiel fai vong a. LALPA Tempul tuola maichâm chu a siem tha a. 9 LALPA chun a umpui ti an hrietin Israel rama inthokin mi tam takin an hung bel a. Asa chun Judai ram le Benjamin rama mihai le anni laia chêng Efraim le Manase le Simeon mihai chu a ko khawm a, 10 a hung inlala inthoka kum sawm le kum ngana, a thla thumnaa chun Jerusalemah an hung pung khawm a. 11 Chu ni chun an râllâk bawngchal zasari le beram le kèl sângsariin LALPA kuomah an inthawi a. 12 Lungril po po le thlarau po poa LALPA, an pi le puhai Pathien chu zong dingin thu an thlung a. 13 LALPA, Israelhai Pathien zong lo chu a chin a lien, nuhmei pasal tu khom sukhlum dingin thu an thlung bok a. 14 LALPA kuomah rawl inring taka khêkin, tawtawrawt le beram ki mûtin, intiemkamna thu chu an insam a. 15 Titakzeta intiemkamna thu an thlung tlang leiin Judai ram mihai chu an lawm hle a, thahnemngai takin LALPA chu an zong a, hmu khom an hmu hrim a, LALPA chun kil tinah hadamna a pêk a. 16 Lal Asa chun a pi Maaka khom chu Asera lem tirdakum tak thing an kertir leiin lalnu a nina a hlippêk a. Asa chun a milem siem chu a phûr thluk a, a sât nawi vong a, Kidron vadungah a raw a. 17 Israel rama inthokin hmun sànghai chu inthiel fai zo naw sienkhom Asa lungril chu a dam sûngin LALPA chungah a ringum a nih. 18 A pain Pathien kuoma a lo inhlân tah leh ama lo inhlân tah tangkaruo le rangkachak le bûr le bèlhai po po chu Pathien tempulah a lâk lût a. 19 Asa inlal hun kum sawmthum le kum nga sûngin indo hrim hrim a um nawk ta nawh.

16

1 Asa inlal kum sawmthum le kum ruknaah Israel lal Baasa-in a hang bei a, Juda lal Asa rama inthoka tu khom suoka an lût thei nawna dingin Rama khuo chu kulin an huontir a. 2 Chu phing leh Asa chun LALPA tempul le ama ina mi tangkaruo le rangkachak um po po chu a lâk suok a, Damaskaa Aram lal Ben-Hadad kuomah a thon a, 3 "Ka pa le i pa inkâra inremna thuthlung an siem ang bok khan nangma le keima inkâra khom thuthlung siem vêng ei tih. En ta, tangkaruo le rangkachak ka hung thon hi. Israel lal Baasa le in thuthlung lo siem tah kha sût la, ka rama inthokin a sipaihai hi hnûk dok raw se" tiin thu a thon a. 4 Ben-Hadad chun lal Asa thu chu a remtipui a, Israel rama khuohai rûn dingin a sipai kawmandarhai a tir a, Ijon khuo dâm, Dan khuo dâm, Abel Maim le Naftalia biela hmangruo sie khawmna khuo po po chu a bei a. 5 Chu thu chu Baasa-in a hriet charin Rama khuo an huon lai chu a tawpsan ta a. 6 Chuongchun, Asa chun Juda mihai po po chu a'n pun khawm a, a thuoi a, Baasa-in Rama kul siemna dinga thing le lung a lâk khawmhai po po chu an lâk vong a, chu chu Geba le Mizpa khuo siemna dingin an hmang ta a. 7 Chuong lai chun zawlnei Hanani chu Juda lal Asa kuomah a hung a, a kuomah, "LALPA i Pathienah innghat loa Aram lal i ring lem leiin Israel lal sipaihai chu i'n suo tah a ni kha. 8 Kush mihai le Libia mihai khan sipai le sakor-tawlailir le sakor chungchuong mi tam tak an nei a ni naw am a ni? Sienkhom, LALPA i ring leiin i kutah a pêk che a ni kha. 9 Ama tienga lungril pe vongtuhai chu sukhrât dingin hnuoi chung po poa hin LALPAN mit a'n lèn kuol zing hlak a nih. Thil invêtthlàk tak i thaw leiin tuta inthok chu indopui nei zing tâng i tih" a ta. 10 Asa chu zawlnei chunga chun a lungsen hle a, lung inah a khum ta hiel a. Chu taka inthok chun mi dang chunga khom rawng taka kut thlâk a hung ching ta a. 11 Asa chanchin a bula inthoka a tawp chen chu Juda le Israel lalhai chanchin inziekna bu-ah a chuong. 12 Kum sawmthum le kum kuo a'n lal kumin Asa kepâr chu nasa takin a hung na ta a, a na inrim hle a, sienkhom a natnaa chun LALPA rawn loin damdawi thiemhai a ruoi lem a. 13 Kum sawmli le kum khat a'n lal kumin Asa chu a thi a, a pi le puhai kuomah a chawl ve ta a. 14 Davida khawpuia ama thlân dinga a kera chun an phûm a. A kuonga chun rimtui siemtuhaiin rimtui chi hrang hrang an siemhai chu an thun teu a, chu chunga chun a ruong chu an inzàl a, inza inentirnain ama puolin meipui nasa tak an sep a.

17

1 A naupa Jehosafat chun a lalna chu a hung hluo a, Israelhai do thei dingin a ngîrhmun a suknghet a. 2 Judai rama kul nei khuo po poah vêngtu sipai a sie a, Judai ram le a pa Asa lo lâk Efraim rama khuoa hai chun sipai hmunpui a sie vong bok a. 3 Jehosafat chun a hung inlal tîr lai chun a thlatu Davida kalchawi dàn a zui a, Baal a biek naw leiin a kuomah LALPA a um a. 4 Israel lalhai chìng dàn zui ve loin an pi le puhai Pathien a zong a, a thupêkhai a zawm a. 5 Chuleiin, a ram chu ama enkolna hnuoiah LALPAN a suknghet a, Judai rama mi po poin thilpêk an hung pêk a, hausain a hung ropui ta hle a. 6 A lungril chu LALPA lampui tieng a thle a, Judai ram hmun sànga bawlhmun po po chu a thiek a, Ashera lem thinghai chu a phûr thlûk vong bok a. 7 A hung inlala inthoka kum thumnaa chun a thoktu Ben-Hail hai, Obadia hai, Zekaria hai, Nathanel hai le Mikaia hai chu Judai ram khuoa mihai inchûktir dingin a tir suok a; 8 chuonghai chu Levi chia mi Semaia hai, Nethania hai, Zebadia hai, Asahel hai, Semiramot hai, Jehonathan hai, Adonija hai, Tobija hai le Tob-Adonija hai bâkah thiempu Elisama le Jehoram haiin an zui a. 9 LALPA Dàn Bu chawiin Judai rama khaw tin an sir a, mihai an inchûktir a. 10 Judai ram vela ram dang po po chun LALPA an ti leiin tu khomin Jehosafat chu an do ngam nawh. 11 Filistin mi thenkhatin Jehosafat chu thilpêk an hung inhlàn a, a thenin sie dingin tangkaruo an hung chawi a; Arab mihai khomin ran ruol, beramchal sângsari le zasari le kèlchal sângsari le zasari an hung pêk bok a. 12 Jehosafat chu a hung ropui deu deu a, Judai rama chun kul le thil siekhawmna khuohai a bawl a, 13 Judai ram khuoa hai chun fâk ding a sèk khawm teu a. Jerusalemah râl do thiem mi a sie teu bok a. 14 A chi chiin mani chi hotu an nei a, Juda thlahai laia sipai sângkhat pei inrawituhai chunga kawmandarhai chu Adna a na, mi nuoithum chunga kawmandar a nih. 15 A dottu chu Jehohanan a na, sipai nuoihni le sîngriet chunga kawmandar a nih. 16 A pathumna chu LALPA rongbawltu dinga ama thu ngota inpe Zikri naupa Amasia a na, sipai nuoihni chunga kawmandar a nih. 17 Benjamin sûngkuoa inthok chun, sipai huoisen Eliada, thal le phaw chawi mi nuoihni chunga kawmandar le 18 Jehozabad, indo dinga inrâlthuom sa mi nuoikhat le sîngriet chunga kawmandar hai an nih. Hienghai hi Judai ram sûnga kul nei khaw hrang hranga sipai a siehai bâka lal kuoma umhai chu an nih. 19 (A um nawh)

18

1 Jehosafat chu hausaa a hung ropui ta hle hnung chun ama sûngkuoa mi le Israel lal Ahab sûngkuoa mi chu inneitir dingin rem a ruot a. 2 Kum iemani zât hnunga chun Israelhai lal Ahab hmu dingin Samaria-ah a zu fe a. Ahab chun beram le bawng tam tak a lo that a, Gilead biela Ramot khuo chu dopui dingin a lo fiel a. 3 Ama chun Jehosafat kuomah, "Gilead biela Ramot khuo i mi hang rûnpui nuom naw maw?" a ta. Jehosafat chun, "Kei le nang le ka mihai le i mihai chu thang hmunkhat ei ni a, râl chu ei bei tlâng ding annawm" a ta. 4 Chun, Jehosafat chun Israel lal kuomah, "LALPA thu dâm la nghâk phot la tie" a ta. 5 Chuongchun, Israel lal chun zawlnei zali a ko khawm a, an kuomah, "Gilead biela Ramot khuo ka hang bei ding am bei naw ding?" tiin a'n don tawl a. Anni chun, "Hang bei rawh, LALPAN i kutah pêng a ti che" an ta. 6 Sienkhom, Jehosafat chun, "Hi taka hin LALPA zawlnei tu amani bêk hang rawn ding an um naw maw?" a ta. 7 Israel lal chun, "LALPA mi rawnpêk ding zawlnei pakhat Imla naupa Mikaia chu a um annawm. Amiruokchu ama hi ka mi theida zawng tak el a na, ka chungchang thu hi a se tieng ngot naw chu a tha tieng a la hril ngai hrim hrim nawh" a ta. Jehosafat chun, "Lalin chuong chun ti naw hràm raw se" a ta. 8 Lal chun a thoktuhai laia mi pakhat a ko a, "Imla naupa Mikaia hang ko vat rawh" a ta. 9 Israel lal le Juda lal Jehosafat chu Samaria kul kotkhâr bula hrizawla chun lal thuom inbelin, an lalthungphaa ve vea chun an inthung a, zawlnei dang po po chun an hmaah thu an hril a. 10 Chun, Kenana naupa Zedekia chun thîrin siel ki lim a siem a, "Hieng ang hin LALPAN a hril: 'Hi ki hin Aram mihai chu an bohmang chenin phir tlang i tih' tiin" a ta. 11 Chuong ang bokin zawlnei po po chun, "Gilead biela Ramot-ah hang fe la, hang hlawtling rawh khai, LALPAN lal kuomah a pêk ding a nih" tiin an hril seng bok a. 12 Chun, Mikaia ko dinga an tir chun a kuomah, "Ngai ta, zawlneihai po po chun inkhuongruol takin lal chu hlawtling ngei dingin an hril a nih. Nang khomin anni ang chun ngai ve la, a tha tiengin hrilpêk ve raw khai" a ta. 13 Sienkhom Mikaia chun, "LALPA hringna sâlin ka hril hi, LALPAN a mi hril chauh chu hril thei ka tih" a ta. 14 A hung tlung chun lalin a kuomah, "Mikaia, Gilead biela Ramot ka hang bei ding am bei lo ding?" a ta. Ama chun, "Bei la, hlawtling i tih, LALPAN lal kutah a pêk ding a ni si a" a ta. 15 Lal chun, "Voi ieng zât top am LALPA hminga thutak chauh mi hril dingin thu ka'n khamtir ta che a?" a ta. 16 Mikaia chun, "Israelhai chu vêngtu nei lo beram anga tlânga indar vong ka hmu a; LALPAN, 'Hienghai hin hotu an nei ta naw a, mi tin mani in tieng thlamuong takin inlawi diel raw hai se' a ti a nih" a ta. 17 Chun, Israel lal chun Jehosafat kuomah, "Ka chungthua chu a se tieng zawng naw chu a tha tieng hrim hrim a hril ngai nawh ti ka hril ta hrim che kha" a ta. 18 Mikaia chun a hril zom pei a, "Chuleiin, LALPA thu hi ngàithla rawh. LALPA chu a lalthungphaa inthung a, a chang tieng le voi tienga vân mipui po po ngîr, ka hmu a. 19 Chun, LALPA chun, 'Ahab hi Gilead biela Ramot khuoa hang infetir a, râl kuta thi dingin tuin am thlêm thlu thei a ta?' a ti a. Pakhatin hieng hin a ti a, mi dangin chuong ang chun an ti bok a. 20 Chun, thlarau pakhat hi a hung suok a, LALPA hmaah a ngîr a, 'Keiin thlêm thlu thei ka tih' a ta. 21 Chun, LALPA chun a kuomah, 'Iengtin am?' a ta. Ama chun, 'Zu fêng ka ta, zawlnei po po hai hmûrah thlarau khelhlipah inchang ka tih' a ta. LALPA chun, 'Thlêm hne ngei i ta, hlawtling bok i tih. Fe la, chuong ang tak chun zu thaw rawh' a ta. 22 Chuongchun, ngai ta, LALPAN hieng i zawlneihai po po hmûra hin thlarau khelhlip a sie a, siet tuok dingin i chungthu hi LALPA chun a rêl tah a nih" a ta. 23 Kenana naupa Zedekia chun a hung hnai a, "LALPA thlarau chun i kuoma thu hril lem dingin kei hi iengtik am ie a mi suoksan chu?" tiin Mikaia biengah a ben a. 24 Mikaia chun, "Lo ngai zing rawh, pindan rila inbi dinga i fe ni pha leh la hrieng i tih" a ta. 25 Chun, Israel lal chun, "Mikaia hi khawpui optu Amon le lal naupa Joash kuomah thuoi unla, 26 an kuomah, 'Lal chun hieng hin a tih: Hi mi hi lung inah khum unla, ka hung kîr nawk hma khat chu bei le tui chauh lo pe ro' a tih" tiin thu a pêk a. 27 Mikaia chun, "Dama i hung kîr nawk a ni hrim chun LALPA chun keima hmangin thu a hril nawh tina nîng a tih" a ta. Chun, ama vêkin, "Nangni mipuihai, in rêngin ka hril hi inchik rân ro" a ta. 28 Chuongchun, Israel lal le Juda lal Jehosafat chu Gilead biela Ramot khuo bei dingin an suok a. 29 Israel lal chun Jehosafat kuomah, "Kan indo pha kei chu insiem danglam ka ta, nang ruok chun lal incheiin inchei zing rawh" a ta. Chuongchun, Israel lal chu a'n siem danglam a, indonaa chun a thang ve ta a. 30 Aram lal chun tawlailir khaltu hotu kuomah, "Israel lal chauh naw chu mi chîn amanih mi lien amanih tu khom bei naw ro" tiin thu a pêk a. 31 Tawlailir khaltuhaiin Jehosafat an hmu chun, "Israel lal a ni ngei hi" tiin bei tumin an inhuol a, Jehosafat chu inring takin a khêk a, LALPA Pathienin a hung don a, a hung beituhai chu a dang kirpêk a. 32 Tawlailir khal hotuhai chun Israel lal a ni nawh ti an hriet chun an kîrsan ta a. 33 Chun, mi pakhat hin tum bik khom nei loin a thalngul a kuoi a, Israel lal chu a awmphaw inzomna kâr takah a kâp a. Ama chun a tawlailir khaltu kuomah, "Tawlailir kha kei her la, sipaihai laia inthok hin mi tlân suokpui rawh, hliem na tak ka tuok a nih" a ta. 34 Chu nia an indo chu an inbei nasa hle a. Lal chu a tawlailir chunga chun Aram mihai tieng nghain a thung a, nisa tlâk ruol chun a thi ta a.

19

1 Jehosafat chu him takin Jerusalema a inah a kîr nawk ta a. 2 Zawlnei Hanani naupa Jehu chun a lo hmuok a, a kuomah, "Mi rilo thangpuiin, LALPA theidatu chu i'n thloppui ding maw? Hi lei hin LALPA lungsenna chu i chungah a fû a nih. 3 Amiruokchu, hi rama inthoka Asera lem thinghai inthiel fai a, LALPA chu i zong leiin thatna kong iemani chu i la nei hih" a ta. 4 Jehosafat chu Jerusalemah a um a, a mihai kanin Beershebaa inthokin Efraim tlângram chen a'n zin a, LALPA, an pi le puhai Pathien tieng a thuoi kîr tawl nawk a. 5 Khaw tinah, Judai rama kul nei khuo po poa chun rorêltuhai a sie a. 6 Rorêltuhai kuoma chun, "In thilthaw taphot ngun taka ngaituoin thaw hlak ro. Mihriem ta dinga ro rêl in ni naw a, LALPA aia rorêltu in ni lem. Ama chu ro in rèl pha in kuomah a um zing a nih. 7 Chuleiin, LALPA chu tiin, fimkhur takin ro rêl hlak ro, LALPA ei Pathiena chun indiknawna dâm, thlei bìk neina dâm le thamna fâk dâm a um si nawh" a ta. 8 Jehosafat chun Jerusalema khom LALPA dânhai kengkawtu ding le thubuoihai ching feltu dingin Levihai, thiempuhai le Israel sûngkuoa lukhàituhai laia thenkhat chu a ruot bok a, chuonghai chu Jerusalemah an um a. 9 An kuoma chun, "LALPA ti dêkin, ringum tak le lungril po poin a rong in bawl ding a nih. 10 In khuo le tui chanpuihai, khawpuia um mi tu khomin thubuoi an hung intlun a, tuolthat dâm le Dàn thupêk hai, thuruot hai le thusuok hai bawsietna chungthu dâma inkhing an ni chun LALPA chunga thil suol thaw lo dinga fimkhur dingin hril ro, chuong naw chun nangni le in unauhai chungah LALPA lungsenna hung tlung hlauh rawi a tih. Indik taka in thaw chun thiem naw chang ngai naw ti niu. 11 LALPA tieng thil hrim hrima hotu tak chu thiempu Amaria nîng a ta; lal tieng le inzom thil hrim hrima hotu tak chu Juda sûngkuoa lukhàitu, Ismael naupa Zebadia nîng a ta; Levihai chu rorêltuhai thusuok kengkawtu nîng an tih. Huoi takin thaw unla, indik taka thawtuhai kuoma chun LALPA chu um raw se" a ta.

20

1 Chu hnunga chun Moab mihai le Amon mihai chu Meunhai iemani zât leh inthukopin Jehosafat do dingin an inthok suok a. 2 Mi tuhaiin amanih Jehosafat kuomah, "Nangma do dingin Tuipui Thi râl Edom rama inthokin sipai tam tak an hung a, tu hin Hazazon Tamar-ah an um tah" tiin an hung hril a (chu hmun chu Engedi an ti bok hlak). 3 Jehosafat chu a ti hle a, LALPA thuoina hniin a tongtai a. A ram pumpuia bu nghei dingin thu a pêk bok a. 4 LALPA thuoina hni dingin Judai ram hmun tina inthokin Judahai chu Jerusalemah an hung tlân khawm a. 5 Jehosafat chu LALPA tempul inhuonna tuolzawl thara chun Judai rama inthok le Jerusalema inthoka hung mipui pungkhawmhai hmaa chun a ngîr a. 6 Chuongchun Pathien kuomah, "Aw LALPA, kan pi le puhai Pathien, vâna um Pathien chu i ni naw am a ni? Nang chu hnam le ram po po chunga rorêltu i nih. Thilthawtheina le hrâtna chu i kutah a um a, tu khom ngam ruol i ni nawh. 7 Aw kan Pathien, hi rama chênghai hi i mi Israelhai hmaah hnot suokpêkin, ruola i nei Abraham thlahai kuomah kumkhuoa dingin i pêk tah a ni naw am a ni? 8 Hi rama hin khawsain i hming umna ding hmun thienghlim khom an indin ta a. 9 Chun, i kuomah, 'Sietnain a mi tlâk buok a, kawlhnàma hremna amanih, hripui inlêng amanih, tàm tlâk amanih kan tuok pha hi Tempul, i hming umnaa hin i hmaah ngîrin hung ko kan ti che a, nangin mi lo ngàithlapêkin mi hung sandam rawh' tiin dawvan an lo kai ta kha. 10 "Chuongchun, ngai ta, tuhin Aiguptaa inthoka Israelhai an hung laia an rûn ding i phal naw leia sukbohmang loa an fesan Amon thla hai, Moab thla hai le Seir tlânga mihai khan an mi hung bei tum a ni hi. 11 En ta, an mi hang thungrul tum dàn hrim hrim hi! Kan rochan dinga ram i mi pêka inthoka mi hnot suok an tum a ni hi. 12 Aw kan Pathien, an chungthu i hung rèl naw ding am a ni? Mi chuong zozai mi bei dinga hung inthokhai chu hang do hne ziezàng ding kan ni nawh. Thaw ngaina hrim kan hriet naw a, nangma tieng kan hung ngha lem a ni hi" tiin a tongtai a. 13 Chun, Judahai po po chu nu le nau leh LALPA hmaa chun an ngîr a. 14 Chuongchun, mipui laia ngîr ve zing Jahaziel chungah LALPA thlarau a hung tlung a. Ama chu Zekaria naupa a na, ama chu Benaia naupa a na, ama chu Jeiel naupa a na, ama chu Matania naupa a na, ama chu Levi chia mi Asaf thla a nih. 15 Ama chun, "Lal Jehosafat le Judai ram le Jerusalema chênghai, lo ngàithla ro. LALPA chun hieng hin a tih: 'Ti naw unla, chuong sipai tam tak lei chun zâm bok naw ro. Indona chu nangni indona a ni naw a, Pathien indona a ni lem. 16 Zînga hin zu bei ro. Ziz kawna an hung kài tung lai nîng a ta, Jeruel thlalèra ruom tawp tieng zu hmung in tih. 17 Hi indonaa hin in chêt ve ngai naw nih. Thanghmun khaw unla, nghet takin ngîr unla, aw Juda mihai le Jerusalem mihai, LALPA sansuokna chu thlîr ringot el ro. Ti naw unla, zâm bok naw ro. Zîngah bei dingin inthok ro, LALPA chu nangni tieng a thang ding a ni si a" a ta. 18 Chuongchun, Jehosafat chu hmaia hnuoi sikin a kûn a, Juda mi po po le Jerusalem mi po po chun LALPA chawibiekin a hmaah an kûn a. 19 Kohat thla le Kora thla Levihai chu an ngîr a, rawl inring takin LALPA, Israel Pathien chu an inpàk a. 20 A zînga chun inhma takin an inthok suok a, Tekoa thlalèr an pan a. An suok ding chun Jehosafat chu a ngîr a, "Aw Juda mihai le Jerusalem mihai, ka thu hi lo ngàithla ro. LALPA in Pathien chu ring zo unla, sukdingchang a ti cheu; a zawlneihai chu ring zo unla, hmuingil in tih" a ta. 21 Mipuihai a'n fûi zo chun sipaihai hmaah fe a, lawn puma, "LALPA kuomah lawmthu hril ro, A ngilneinan kumtluong a dai"tia LALPA inpâkna hla sak a, a thienghlimna mawizie chawimawitu ding mi a ruot a. 22 Chuonga inpâkna hla an hang sak tan char chun Judai ram rûn dinga hung Moab hai, Amon hai le Seir tlânga mihai lo lambuntu ding LALPAN a sie a, chuongchun anni rawi chu intlawmin an um ta a. 23 Amon mihai le Moab mihai chun Seir tlânga um Edom mihai chu that chimit le sukbohmang vong tumin an bei rak el a; Edom mihai an that zo hnung chun anni le anni chu insukchimit tumin an inbei nawk rak a. 24 Judahaiin thlalèr zuk thlîr theina hmun an tlung chun sipai tam tak inkulna tieng chu an zuk thlîr a, hnuoiah an tlu thal phung a, dama tlân suok hrim an um nawh. 25 Chuongchun, Jehosafat le a rawihai chu râllâk thil inkhawm dingin an fe a, hmangruo le silfên le thil man tam, phur seng lo an lâk a, a tam êm leiin a sêk khawmna dingin ni thum top a lâk a nih. 26 A ni li ni chun Beraka ruomah an inkhawm a, LALPA an chawimawi a, chu lei chun voisun ni chen hin Beraka Ruomg tia ko a la ni zing. 27 Chu zoah Jehosafatin hma a thuoi a, LALPAN an hmèlmahai a hnèpèk leiin hlim takin Jerusalem tieng an kîr nawk ta a. 28 Chuongchun, perkhuong le tingtang rem a, tawtawrawt mûtin Jerusalem an lût a, LALPA Tempulah an fe a. 29 LALPAN Israel hmèlmahai a do ti an hang hriet chun ram tina mihai chun Pathien chu an ti ta hle a. 30 Sîr tinah Pathienin muongna a pêk leiin Jehosafat ram chu a ràlmuong ta hle a. 31 Chuongchun, Jehosafat chun Judai ram chungah ro a rêl a. A hung inlal chun kum sawmthum le kum nga mi a na, Jerusalemah kum sawmhni le kum nga a'n lal a. A nu hming chu Azuba a na, Silhi naunu a nih. 32 A pa Asa lampui hraw chu pensan loin a hraw ve a, LALPA mithmuah thil indik a thaw a. 33 Hmun sànghai ruok chu sukbo loin a la um zing a, mipuihai khomin an pi le puhai Pathien tieng lungril an la pêk bok nawh. 34 Jehosafat inlal sûnga thil tlung danghai chu a bula inthoka a tawp chenin Hanani naupa Jehu chanchin zieknaah a chuong a, chu chu Israel lalhai chanchin inziekna buah a chuong. 35 A hnungin, Juda lal Jehosafat chun ritlona leia thiem naw chang tah Israel lal Ahazia chu a'n thuruolpui a. 36 Sumdawng long ruol siem a remtipui a, chu chu Ezion Geber-ah an siem tlàng a. 37 An siem zo chun Maresa mi Dodavahu naupa Eliezer chun Jehosafat kuomah, "Ahazia leh in inkop leiin LALPA chun i thil siemhai hi suksepêk a ti che" a ta. An longhai chu a koi dar vong leiin sumdawng dingin an suok thei ta nawh.

21

1 Jehosaafat chu a pi le puhai kuomah a chawl a, anni lai Davida khawpuia chun an phûm a, a naupa Jehoram chun a lalna chu a hung hluo a. 2 Jehoram unauhai, Jehosafat naupahai chu Azaria, Jehiel, Zekaria, Azariahu, Mikael le Sefatia an nih. Chuonghai chu Judai rama Israel lalh Jehosafat naupahai chu an nih. 3 An pa chun a nauhai chu thilpêk tam tak, tangkaruo le rangkachak le thil hlu tam tak bâkah Judai rama kul nei khuo tam tak rochung sienkhom, ram ruok chu Jehoram kuomah nau upa tak a nina zarin a pêk a. 4 A pa ram chungah a lalna a suknghet phing leh a unauhai po po le Israel hnamhai laia lukhàitu tam tak chu kawlhnàmin a sukhlum vong a. 5 Jehoram chu kum sawmthum le kum hni a niin a'n lal tan a, Jerusalemah kum riet a'n lal a. 6 Israel lalhai ang bokin Ahab sûngkuohai lampui chu a hraw ve a, Ahab naunu chu nuhmeiah a nei a, LALPA mithmuah thil tha lo a thaw a. 7 Amiruokchu, LALPAN Davida kuoma ama le a thlahai chena kumkhuoa lal inneitir zing dinga a lo tiem tah leiin, Davida sûngkuo chu sukbohmang a nuom nawh. 8 Jehoram inlal laiin Edomhai chu Judahai lakah an hel a, lal an insiem chop a. 9 Jehoram chu a sipai hotuhai le a tawlailir po po leh anni chu bei dingin a suok a. Edomhai chun ama le a tawlailir hotuhai chu an inhuol vong a, sienkhom zânah a bei a, an tawn tlang a. 10 Tu chen hin Edomhai chu Judahai lakah an la hel ta zing a nih. Jehoram chun LALPA, a pi le puhai Pathien chu a nghatsan leiin, chuong hun lai bok chun Libna khuo khom an hel a. 11 Chun, Judai ram tlânga hai chun hmun sànghai a siem a, Jerusalem mihai chu inuirètirin, Judahai chu a thuoi suol a. 12 Jehoram chun zawlnei Elijaa inthokin lekhathon a hmu a: "LALPA, i pu Davida Pathien chun hieng hin a tih: 'I pa Jehosafat lampui i hraw naw a, Juda lal Asa lampui khom i hraw bok nawh. 13 Chu nêk hmanin Israel lalhai lampui i hraw lem a, Judahai le Jerusalema umhai chu Ahab sûngkuohai angin i'n uiretir a, nang nêka tha lem i pa sûngkuoa mi i unauhai i that a. 14 Chuleiin, tu hin i mipuihai, i naupahai le nuhmeihai le i thil nei po po chungah LALPA chun na takin kut a thlâk ding a nih. 15 I rîl po po a suok vong chenin rîl natna re thei lo invoi bok i tih" tiin. 16 Chun, LALPA chun Kush mihai vela um Filistinhai le Arabhai lungril chu Jehoram do dingin a chok tho a. 17 Chuongchun, Judai ram an hung bei a, an rûn a, lal ina thil tha po po chu, a naupahai le a nuhmeihai chenin, an lâk vong a, a nau mi tlum tak Jehoaza (Ahazia) chauh naw chu a naupahai lai tu khom mâksan an nei nawh. 18 Chu hnunga chun sukdam thei lo rîl natnain LALPAN a hrem a. 19 Chun, hieng ang hin a hung tlung a, a kum hninaa chun a natna leiin a rîl chu a suok vong a, na tak tuorin a thi a. A pa inzàna le sunnaa a mihaiin meipui an seppêk ang khan an seppêk ve nawh. 20 Kum sawmthum le kum hni a niin Jehoram chu a'n lal tan a, Jerusalemah kum riet a'n lal a. Inrotu nei loin a thi a, Davida khawpuiah an phûm a, lalhai thlàna ruok chu a ni nawh.

22

1 Kha hmaa Jerusalem hung rûntu Arab mihai le an inkoppuihaiin Jehoram naupahai laia an mi tlum tak Ahazia ti lo chu an that fai vong leiin, Jerusalem mihai chun Jehoram nau mi tlum tak Ahazia chu Judai ram lalah an siem a, a hung inlal tan ta a. 2 A hung inlal chun Ahazia chu kum sawmhni le kum hnii mi a na, Jerusalemah kum khat a'n lal a, a nu hming chu Athalia a na, Omri tunu a nih. 3 Ahazia khom chun Ahab sûngkuohai lampui chu a hraw ve a, thil suol thaw dinga keithuoitu chu a nu a nih. 4 Ahab sûngkuohai ang bokin LALPA mithmuah thil suol a thaw a, a pa thi hnungin Ahab sûngkuo danghai chu thurawn a lâkna le a chunga sietna intluntu an nih. 5 Gilead biel Ramot khuoa Aram lal Hazael do dinga Ahazia-in Israel lal Ahab naupa Joram a fepuina san khom anni thurawn a lâk lei a nih. Chu taka chun Joram chu Aram mihaiin an lo inhliem a. 6 Chuongchun, Aram lal Hazael a va donaa Ramot-a an lo inhliem chu insukdam dingin Jezreel-ah a hung kîr a. Chun, Juda lal Jehoram naupa Ahazia chu Ahab naupa Joram hliem kan dingin Jezreel-ah a zu fe a. 7 Ahazia-in Joram a zu kan lai chun a chungah Pathienin sietna a hung intlungtir a. Ahazia a hung tlung chun Ahab sûngkuo suksetu dinga LALPA hriek nâl Nimsi naupa Jehu chu tuok dingin Joram chun Ahazia chu a fepui a. 8 Jehu-in Ahab sûngkuo chunga kut a thlâk lai chun Joram damnaw en dinga fe Ahazia mihai- Juda hotuhai le Ahazia sûngkuohai chu a hmu a, a that vong a. 9 Chun, Ahazia chu an zong a, Samaria-a inbirûk chu an hmu a, an man a, Jehu kuomah an hung thuoi a, an that a. "A lungril po poa LALPA zong hlak Jehosafat naupa a ni si a" an ti leiin a phûmin an phûm a. Chuongchun, Ahazia sûngkuoa inthokin lal nina chel theia hrât mi an nei ta naw a. 10 Ahazia nu Athalia chun a naupa thi a hriet charin Juda sûngkuoa lalhai po po chu that chimit tumin hma a lâk a. 11 Ahazia naupa Joash ruok chu lal Jehoram naunu Jehoseba chun lal nau a that dinghai laia inthok chun a lâk hmang a, a dontunu leh a pindanah a thup a. Chuonga lal Jehoram naunu Jehoseba, Ahazia farnu le thiempu Jehoiada nuhmeiin Joash a thup lei chun Athalia-in a that ve thei ta naw a. 12 Athaliain ram rorêlna kum ruk a chel sûng po chun Pathien Tempulah anni kuomah a thup rûk a nih.

23

1 A kum sarinaah Jehoiada chun ngam takin, vêngtu zakhat pawl pei kawmandar Jeroham naupa Azaria hai, Jehohanan naupa Ishmael hai, Obed naupa Azaria hai, Maaseia naupa Adaia hai, Zikri naupa Elishaphat hai chu thu a thlungpui a. 2 Anni chu Judai ram khaw tinah an fe a, Levihai le Israel sûngkuoa lukhàituhai chu an ko khawm a, Jerusalemah an hung a. 3 Pungkhawm po po chun Pathien tempulah lal kuoma chun thu an thlung a. Thiempu Jehoiada chun an kuomah, "LALPA chun Davida thlahai chungchanga thu a lo tiem tah angin, lal naupa chu lalah a um ding a nih. 4 In thaw dàn ding chu hieng hi a nih: Sabat nia diutia hung nangni thiempuhai le Levihai chu hmun thuma thea hmun khatin kotpui in vêng ding a nih. 5 Hmun thuma thea hmun khat chu lal inah um in ta, hmun thuma thea hmun khat dang chun kul kotkhâr vêng in ta, mipui po po chu LALPA tempul inhuon sûng tuolah an um ding a nih. 6 Rongbawla um thiempuhai le Levihai chauh naw chu tu khom LALPA Tempulah an lût ding a ni nawh. Anni chu lût le suok thei dinga ser thienghlim an ni a, mi dang ruok chun an chan dinga LALPA ruot hmun seng chu an vêng ding a nih. 7 Levihai chu mani hriemhrei chawi sengin, inring sain lal bulah um an tih. Mi dang Tempula hung lût taphot chu in that pei ding a nih. Lal lût le suok chu in zui pei bok ding a nih" tiin thu a pêk a. 8 Levihai le Judahai po po chun thiempu Jehoiada hril ang tak chun an thaw a, mani rawihai po, Sabat nia diuti ding pawl le awl ding pawl chu an thuoi a, thiempu Jehoiada kuomah an fe a, thiempu Jehoiada chun diuti zo tahai khom chu a'n tintir nawh. 9 Chun, kawmandarhai kuoma chun LALPA tempula um Davida feihai le phaw lien le phaw chinhai chu a pêk a. 10 Vêngtu sipaihai chun hriemhrei chawi sengin, tempul sim tieng panga inthoka hmar tieng chenin, maichâm le tempul hrûla chun an ngîr huol mup a. 11 Jehoiada le a nauhai chun lal naupa Joash chu an hung thuoi suok a, lallukhum an inkhumtir a, lalhaiin thuthlung le Dàn le thupêk an kengkaw ding hai inziekna bu chu an pêk a, lalah an puong a, hriek an nâl a, "Lal chu dam sawt raw se" tiin an khèk a. 12 Vêngtu sipaihai le mipuihaiin lal chawimawia an inzi mur mur ri Athalia-in a lo hriet chun LALPA Tempula mipuihai lai chun a va fe a. 13 Chun, a hang en a, an thaw dàn anga kotkhâr ban hrûla lal ngîr chu a hmu a, sipai kawmandarhai le tawtawrawt mûttuhai chu lal bula chun an ngìr a, chu rama mihai chu an hlim êm êm a, tawtawrawt an mût an mût a, hla saktuhai chun rimawi tinrêng tumin inpâkna hla an sak a. Athalia chun a puonhai a pot thlèr a, "Phierrùkna! Phierrùkna!" tiin a khêk a. 14 Thiempu Jehoiada chun chu minu chu man dingin sipai za chunga kawmandarhai chu thu a pêk a, "LALPA ina chu that lo ding" a lo ti ta leiin, an kuomah, "Sipaihai kâra khan hung thuoi suok unla, a zuitu taphot chu that sa ro" a ta. 15 Lal in huonga sakor lûtna kot a tlung chun an man a, chu taka chun an that a. 16 Mipuihai chu LALPA mihai hung ni ngei dingin thiempu Jehoiada chun LALPA le lal le mipuihai inkârah thu a thlungpui a. 17 A ram mipuihai po po chu Baal an biekna tempulah an fe a, an sukchim a, maichâmhai le milemhai chu an vuok nawi vong a, Baal thiempu Matan chu maichâm hmaa chun an that a. 18 Mosie Dàn bua ziek anga hlim taka hla sak puma LALPA tempula pumraw thilhlân inhlàntu dinga Davida thupêk anga Levi chia mi thiempu an lo hmang hlakhai thlahai ngei chu LALPA tempul enkaitu dingin Jehoiada chun a sie tawl nawk a. 19 Thiempu Jehoiada chun LALPA Tempulah mi porche tu khom an lût nawna dingin LALPA Tempul kotkhâr vêngtu dingin vêngtu sipai a ruot bok a. 20 Chun, sipai kawmandar hai, khawnbawl hai, mipui chunga rorêltu hai le a ram mipuihai po po chu a thuoi a, LALPA Tempula inthokin lal chu an hung thuoi thlâk a, vêngtu sipaihai lûtna kot chuonchunga chun lûtin lal inah an fe a, lal chu a lalthungphaah an inthungtir ta a. 21 Chuongchun, chu rama mi po po chu an lawm a, Athalia chu lal inah kawlhnàma an that ta leiin khawpuia buoina chu a re ta a.

24

1 Joash hung inlal tan chun kum sari mi chauh a la ni a, Jerusalemah kum sawmli a'n lal a, a nu hming chu Zibia a na, Beersheba khaw mi a nih. 2 Thiempu Jehoiada inchûktirna hnuoia a um sûng po chun LALPA mithmuah Joash chun thil indik a thaw hlak a. 3 Chun, Jehoiada chun nuhmei pahnih a'n neitir a, naunu le naupa tam tak an hringpêk a. 4 Chu hnungah Joash chun LALPA Tempul siem that a nuom a. 5 Thiempuhai le Levihai chu a ko khawm a, an kuomah "Judai ram khaw tinah fe unla, LALPA Tempul bawl thatna dinga Israel mi tu khomin kum tina a pêk dinga bituk chu va la khawm ro. Tu hin thaw nghal ro" a ta. Sienkhom, Levihai chun an thaw nghal el chuong nawh. 6 Chuleiin, lal chun thiempu lal tak Jehoiada chu a ko a, a kuomah, "LALPA siehlaw Mosie le Israel pungkhawmhaiin Thuthlungna Puon in siemnaa hmang dinga Israel mi tu khomin an thaw zât ding bi an tuk kha Judai ram le Jerusalema mihai laka inthoka hung la khawm dingin ieng leia Levihai hi i tir suok naw am a na?" a ta. 7 Nu rilo Athalia nauhaiin Pathien Tempul chu rokin, hmangruo thienghlimhai chen khom Baal bieknaah an lo hmang zo ta si a. 8 Chuongchun, lal thupêkin thingrem bawm an siem a, LALPA Tempul lûtna kot puoa chun an sie a. 9 Thlalèra Pathien siehlaw Mosiein Israelhai thaw zât ding a bituk chu LALPA ta dinga hung pe dingin Judai ram po po le Jerusalema mihai kuoma chun lalin inhriettirna a thon dar a. 10 Thoktuhai le mipuihai chun lawm takin an hung pèk a, bawm chu a sip liem chenin thawlawm an hung thlâk rui rui a. 11 Bawm chu Levihaiin a enkoltu dinga ruot lal thoktuhai kuomah ni tin an hung chawi a, a sip pha leh lal lekha ziektu le thiempu lal tak hnuoia thoktuin bawma inthokin an lâk suok a, a bawm chu a umnaah an inthut nawk a. Chuong ang chun ni tin an thaw a, tangka tam tak an khawl khawm a. 12 Lal le thiempu Jehoiada chun LALPA Tempul enkoltuhai kuta chun an pêk suok a, LALPA in ripêrtu ding lung sertuhai le thing them thiemhai le dâr le thîr tienga mi themthiemhai an ruoi a. 13 Thoktuhai chun taima takin an thaw a, anni vilna hnuoiah sin tha takin an thaw a, Pathien Tempul chu a ngai chiein an siem tha a, an indin nghet nawk ta a. 14 An siem zo chun tangka la um po po chu lal le Jehoiada kuomah an hung chawi a, chu sum chun LALPA Tempula rongbawlnaa hmang ding bûr le bèlhai, pumraw inthawinaa hmang ding hmangruohai, rangkachak le tangkaruoa siem thlêng le hmangruo danghai chenin an siem a. Jehoiada dam sûng po chun LALPA tempula chun chatlak loin pumraw thilhlân chu an inhlàn zing hlak. 15 Jehoiada chu a hung upa ta hle a, tar kûna damin kum za le sawmthum a niin a thi a. 16 Israel rama Pathien ta ding le a Tempul ta dinga thil tha a thaw leiin Davida khawpuiah lalhai zâlnaa chun an phûm a. 17 Thiempu Jehoiada thi hnung chun Juda mi lienhai chu an hung a, lal kuomah dawvan an hung kai a, lal chun an thu chu a lo pom a. 18 Chuongchun, an pi le puhai Pathien Tempul chu nghatsanin Asera lem thinghai le milem danghai chu an biek a, an bawsietna lei chun Judai ram le Jerusalem chungah LALPA lungsenna a hung tlung a. 19 LALPA kuoma thuoi kîr nawk dingin an kuomah zawlneihai a tir a, an thiem nawzie an inhriettir a, sienkhom an ngàithlâk nuom chuong nawh. 20 Chun, thiempu Jehoiada naupa Zekaria chungah LALPA thlarau a hung tlung a. Ama chu mipui hmaah a ngîr a, an kuomah, "Pathienin hieng hin a tih: Ieng leia LALPA thupêk in bawsiet am a na? Hmuingil naw ti niu. LALPA chu in nghatsan leiin ama khomin a nghatsan ta cheu a nih" a ta. 21 Sienkhom ama chu an phier rûk a, lal thupêkin, LALPA Tempul inhuonna sûnga chun lungin an dèng hlum a. 22 Chuong ang chun lal Joash chun a chunga Jehoiada lunginsietna chu theinghilin a naupa chu a thatpêk a. Jehoiada chun a thi tawmin, "Hi hi LALPAN hmuin aman phuba chu la raw se" a ta. 23 Chu kum, kum tawp tieng chun Aram sipaihaiin Joash chu an hung rûn a, Judai ram le Jerusalemah an lût a, an mi lienhai po po an that a, an râllâk sum po po chu Damaska tieng an thon a. 24 Hung rûntu Aram sipaihai chu mi tlawmte ni hai sienkhom an nêka tam dai Juda sipaihai LALPAN an kutah a pêk a nih. LALPA, an pi le puhai Pathien chu Juda mihaiin an nghatsan leiin, chuong ang chun Joash chungah hremna a'n tlungtir a nih. 25 Joash chu na taka an inhliem hnungin Aramhai chun an kîrsan a. Thiempu Jehoiada naupa a that leiin Joash chu ama mihai ngeiin an phierrûk a, a khum laizawlah an that a, Davida khawpuiah an phûm a, sienkhom lalhai thlàna ruok chu a ni nawh. 26 A phiertuhai chu Amon mi nuhmei Simeat naupa Zabad le Moab mi nuhmei Simrit naupa Jehozabad an nih. 27 A naupahai chungchang thu dâm, a chunga hrillawkna tam tak hai dâm le Pathien Tempul siem that a ni dàn chanchin po po chu lalhai chanchin inziekna buah a chuong. A naupa Amazia chun a lalna chu a hung hluo a.

25

1 Amazia chu kum sawmhni le kum nga mi a niin lal a hung ni a, Jerusalemah kum sawmhni le pakuo ro a rêl a. A nu chu Jerusalem mi, a hming Jehoaddin a nih. 2 LALPA mithmuah thil tha a thaw a, a lungril ruok chu a pêk vong nawh. 3 A ramah a lalna a suknghet hnung chun a pa thattuhai chu a that ve a. 4 An nauhai ruok chu a that sa ve nawh; Mosie Dàn bua LALAPA thu, "Nauhai leiin pahai sukhlum ding an ni naw a, pahai leiin nauhai sukhlum ding an ni bok nawh, mi tin mani suol leiin an thi ding a nih" ti kha a zawm a nih. 5 Amazia chun Judahai chu a ko khawm a, Juda le Benjamin mi po po chu an sûngkuo dungzui peiin sângkhat chunga kawmandara dâm le zakhat chunga kawmandara dâm a'n umtir a, pasal kum sawmhni le chung tieng, fei le phaw chawia râl do thei chin chu mi nuoithum an nih. 6 Chu bâkah, Israel rama mi hrât le huoisena hril nuoi khat chu tangkaruo kilogram sângthum le zali sengin a ruoi bok a. 7 Nisienlakhom, a kuomah Pathien mi, mi pakhat a hung a, "Aw lalpa, Israel sipaihai hi thuoi sa naw rawh. Israel mihai lai LALPA a um ta naw a, Efraimhai lai khom a um ta bok nawh. 8 Fein huoisen takin va bei khom ni ta hrim la, i hmèlmahai hmaah Pathienin suktlawm tho a ti che, hne theitu le suktlawm theitu chu Pathien a ni si a" a ta. 9 Amazia chun Pathien mi kuomah, "An leh, Israel sipaihai ka ruoina tangkaruo zozai kha iem ka law ta ding a na?" a ta. Pathien mi chun, "LALPAN a nêka tam lem dai a pêk thei che" a ta. 10 Chuongchun, Amazia chun Efraimhai rama inthoka sipai hung po po chu an in tieng a tirkîr ta vong a. Anni chu Judahai chunga chun an lung a sen hle a, lungsen takin an kîr a. 11 Amazia chun zâm loin a sipaihai chu Chi Ruom tieng a panpui a, chu taka chun Seir mi sîngkhat an that a. 12 A hringin mi sîngkhat an man bok a, chuonghai chu rawl khoah an thuoi a, rawla chun an nam thlâk a, an tla dar pheng phung a. 13 Chuong lai chun Amazia-in sipai a tir kîrhai khan Judai rama khuohai, Samaria inthoka Bet Horon chenin an bei a, mi sângthum an that a, râllâk tam tak an hawn bok a. 14 Edomhai rûn zoa Amazia a hung kîr chun Seir mihai pathienhai chu a hung hawn a, a pathiena dingin a'n din a, chibai a bûk a, rimtui dâm a'n hlàn a. 15 Chu lei chun Amazia chungah LALPA lung a chok a, a kuomah zawlnei a tir a, ama chun, "Hieng hnam danghai pathien, i kuta inthoka a mihai khom san suok thei hlei lo chu ieng ding hrima i biek am a na?" a ta. 16 A hril lai zing chun lalin, "Lal kuoma thurawn petu dingin tuin am a siem che a? To vat rawh! Ieng leiin am i hringna i chàn ding?" a ta. Zawlnei chun, "Hienga i thaw lei le ka thu i ngàithlâk nuom naw leiin Pathienin sukbohmang che a tum a nih ti ka hriet" a ta, a to ta a. 17 Juda lal Amazia-in a remruotpuituhai a rawn hnungin Israel lal Jehu naupa Jehoahaz naupa Joash kuomah, "Hung la, pa le pa inhmatonin hang inbei ei tih" tiin chona thu a thon a. 18 Israel lal Joash chun Juda lal Amazia kuomah, "Lebanon tlânga hlingin Lebanon tlânga sidar thing kuomah, 'I naunu kha ka naupa nuhmeiah inneitir raw khai' tiin thu a'n cha a. Lebanon tlânga chun ram sa a hung a, hling chu an hung chîl thlûk ta dêr a. 19 Nang hin 'Ngai ta, Edom ka hnè bân dèr' tiin i uong a ni hi tie. I inah intom tok tok lem rawh. Ieng dinga nang le Judai ram chopa sietna ding chok suok i tum am a na?" tiin mi a tir ve a. 20 Nisienlakhom, Amazia chun a lo ngàithlâk nuom nawh; Edomhai pathien a biek leia Pathienin Judai ram chu a hmèlmahai kuta a pêk theina dinga a thaw a ni si a. 21 Chuongchun, Israel lal Joash chu a hang fe a, Juda lal Amazia le chun Judai ram Bet Semes khuoah hmaisanah an inbei ta ngei a. 22 Israelhai chan chu a tha lem leiin Judahai chu mi tin mani in tieng an tlân kîr ta vong a. 23 Israel lal Joash chun Juda lal, Ahazia naupa Joash, chu naupa Amazia chu Bet Semes-a chun a man a, Jerusalemah a thuoi a, Jerusalem kul chu Efraim kotkhâra inthoka kul bang meter zahni vela sei chu a sukchim a. 24 Obed-Edom enkolna hnuoia um LALPA Tempul kudama rangkachak le tangkaruo le bûr le bèl um po po le lal ina um po po chu a lâk a, mi hrên ding a man bok a, Samaria khuo tieng a kîr nawk ta a. 25 Juda lal Joash naupa Amazia chu Jehoahaz naupa Israel lal Jehoash thi hnungin kum sawm le kum nga a la dam a. 26 Amazia inlal laia thil tlung danghai chu, a bula inthoka a tawp chenin, Juda lalhai le Israel lalhai chanchin inziekna buah a chuong. 27 Amazia-in LALPA zui a bànsana inthokin Jerusalema chun that tuma phierrûk an um zing leiin a tawpa chu Lakis khuoah a tlân a, sienkhom a hmèlmahai chu an hnot zui a, chu taka chun an that a. 28 A ruong chu sakorin an inphur kîrtir a, a pi le puhai kuomah Davida khawpuiah an phûm ta a.

26

1 Judai rama mihai chun kum sawm le kum ruk mi Uzia chu an thuoi a, a pa Amazia aiin lalah an siem a. 2 Ama chun a pa Amazia thi hnungin Elath khuo chu a bawl tha a, Judai ramah a sie lût nawk a. 3 Uzia a hung inlal chun kum sawm le kum ruk mi a na, Jerusalemah kum sawmnga le kum hni ro a rêl a. A nu chu Jerusalem mi, a hming Jekolia a nih. 4 A pa Amazia thilthaw ang pei thaw vein LALPA mithmuah thil tha a thaw hlak a. 5 Zekaria dam sûng po chun Pathien ti dingin a zirtir a, Pathien a zong hlak a, LALPA a zong sûng po chun Pathienin a sukhmuingil pei a. 6 Uzia chun Filistinhai a rûn a, Gath kul hai, Jabne kul hai, Asdod kul hai a sukchim a. Asdod khaw kawla khuohai le Filistinhai rama khaw thenkhathai chu a'n din thar a. 7 Chun, Pathienin Filistinhai laka le Gur Baala um Arabhai le Meunhai laka chun a thangpui a. 8 Amon mihai chun Uzia kuomah sie an hung chawi hlak a. A hung hrât ta hle leiin Aigupta ram chenin a hming a hung inthang ta a. 9 Uzia chun Jerusalem kul bang kila kotkhâr le ruom tienga kotkhâr inkâra kul kawina tak bang hrula chun in insâng a bawl a, kul chu a'n huon thar a. 10 Thlalèra khom in insânghai a bawl a, ran tam tak a nei leiin tlâng thut le zawla hai chun tuikul tam tak a siem a. Lohma tieng ngaina mi tak a ni leiin tlângram le phairam thatna hmuna a lohai le grèp huona hai chun sinthawtu a sor teu a. 11 Uzia chun indo dinga inpei zing sipai tam tak a nei a, chuonghai chu lal thoktu Hanania inrawina hnuoiah an um a, lekha ziektu Jeiel le hotu Maaseia hai chun a pawl pawlin an inchik thlap a. 12 Sipaihai chunga chun kawmandar sânghni zaruk an um a. 13 Chuonghai hnuoia chun râldo thiem thalh mi nuoithum le sângsari le zanga, hmèlma laka lal ta dinga hrât taka dotu ding, an um a. 14 Uzia chun a sipai po pohai ta dingin phaw hai, fei hai, thîr lukhum hai, thalngul hai, virvoma hmang ding lungte mum hai a buotsai a. 15 Kulbing sànga hmang ding le kul kil tina inthoka thal kâpna ding le lung lien tak tak vor suokna ding khawlhai mi themthiemhai siem chu Jerusalemah a sie teu a. A hming chu ram tinah a hung inthang a, Pathienin a thangpui leia chuong khopa hung hrât chu a nih. 16 Nisienlakhom, a hung hrât hnung chun a hung chapo ta hle a, chu chu ama phûr thlutu a hung ni ta a. LALPA, a Pathien chungah thil suol a thaw a, maichâmah rimtui raw dingin LALPA tempulah a lût a. 17 Thiempu Azaria chun a zui a, mi huoi tak tak LALPA thiempu sawmriet an thang bok a. 18 Anni chun Lal Uzia chu hmaisanah an khap a, a kuomah, "Uzia, LALPA ta dinga rimtui raw hi nangma thaw ding a ni nawh, rimtui raw dinga ser hrang Aron thlaa mi thiempuhai thaw ding a ni lem. Hmun thienghlima inthok hin suok vat rawh. LALPA chungah thil suol i thaw a nih. LALPA Pathien laka chawimawi i hlawna ding khom a ni nawh" an ta. 19 Lal Uzia chu a lungsen a, rimtui rawna ding mei lâkna chu a chawi a. Chuonga thiempuhai chunga LALPA tempula maichâm hmaa a lungsen lai chun a bawkah a hung inphâr suok ta a. 20 Thiempu laltak Azaria le thiempu danghaiin an hang en chun a bawka phâr um chu an hmu a, inrang takin an hawl suok nghal a. LALPAN a hrem leiin ama ngei khomin fe suok a nuom ta hrim a. 21 Chuongchun, Uzia chu a thi chena a'n phàr leiin lal ina inthokin a suok a, in hranah a um a, LALPA Tempulah a lût thei ta naw bok a. A naupa Jotham chu a ram mipuihai chunga ama aia rorêltu le optuin lal inah a um ta a. 22 Uzia inlal sûnga thil tlung danghai chu a bula inthoka a tawp chenin Amoz naupa zawlnei Isaiin a ziek. 23 Uzia chu a pi le puhai kuomah a chawl a, mihaiin "Ama chu phâr a nih" an ti leiin a pi le puhai zâlna kawl hnaia lalhai thlân hmuna chun an phûm a. A naupa Jotham chun a lalna chu a hung hluo ta a.

27

1 Jotham a hung inlal chun kum sawmhni le kum nga mi a nih. Jerusalemah kum sawm le kum ruk lalin a um a; a nu chu Zadok naunu, a hming Jerusa a nih. 2 A pa Uzia-in a thaw ang bokin LALPA mithmuah thil tha a thaw hlak a, sienkhom a pa thaw angin LALPA Tempul sûnga ruok chu a lût lui ve nawh. Mipuihai ruok chun thil tirdakum thaw an la chîng zing a. 3 Chun, LALPA Tempula kotkhâr chunghnung lem chu a siem tha a, Ofel muola kul banghai chu nasa takin a'n din thar nawk a. 4 Judai ram tlâng pheia chun khuohai a'n din a, ramngaw hmuna hai chun kul le vêngbûk insànghai a bawl bok a. 5 Jotham chun Amon lal a do a, a hne a. Chu kum chun Amonhaiin tangkaruo kilogram sângthum zali, huit metric ton sângkhat le barli metric ton sângkhat an hung pèk a. Chuong zât bok chu a kum hnina le kum thumnaa khom an hung pèk bok a. 6 LALPA a Pathien hmaa ringum taka kal a chawi leiin Jotham chu a hung hrât ta deu deu a. 7 Jotham inlal sûnga thil tlung danghai, a râl do po po le a thilthaw danghai po po chu Israel le Juda lalhai chanchin inziekna buah a chuong. 8 Kum sawmhni le kum nga mi a niin a hung inlal a, Jerusalemah kum sawm le kum ruk a'n lal a. 9 Jotham chu a pi le puhai kuomah a chawl a, Davida khawpuia chun an phûm a, a naupa Ahaz chun a lalna chu a hung hluo ta a.

28

1 Ahaz chu kum sawmhni mi a niin a hung inlal a, kum sawm le kum ruk Jerusalemah a'n lal a. A thlatu Davidan LALPA mithmuah thil tha a thaw angin a thaw ve naw a. 2 Israel lalhai lampui a hraw lem a, a biek dingin Baal pathien, milem sung chop a siem a. 3 Ben Hinom ruomah inthawina rimtui a raw a, Israelhai hmaa LALPAN hnam a hnot suokhai thil chîng tirdakum tak chu zui vein a naupahai chen meiah a'n hlàn a. 4 Hmun sànga maichâma hai le tlâng sîp le thing buk inzâr thatna hnuoi taphotah inthawiin rimtui a raw hlak. 5 Chuleiin, LALPA a Pathienin ama chu Aram lal kutah a pêk a, an hung hne a, a mihai tam tak chu an man a, Damaska tieng salah an thuoi a. Israel lal kutah a pêk bok a, ama chun mi tam tak a that a, 6 Judahaiin LALPA, an pi le puhai Pathien chu an nghatsan tâk leiin, Remalia naupa Peka lem chun ni khat thilthuin Judai rama mi huoisen ngot mi nuoikhat le sînghni a that a. 7 Chun Efraim mi hrât Zikri chun lal naupa Maaseia hai, lal in enkoltu Azrikam hai le lal dottu Elkana hai chu a that a. 8 Israel sipaihai chun Judahai chu an unauhai ni hai sien khom nuhmei le naupang nuoi hni zet an man a, salah an thuoi a, râllâk tam tak an lâkpêk bok a, chuonghai chu Samaria-ah an hawn a. 9 Amiruokchu, chu taka chun LALPA zawlnei, a hming Oded a um a, Samaria hung tlung ding sipaihai chu tuok dingin a suok a. An kuomah, "Judahai chungah LALPA in Pathien lung a sen leiin in kutah anni chu a pêk cheu a. Sienkhom lungsena in suom ri khan vân a hang tlung a 10 Tu hin Judai ram le Jerusalem mihai chu a nuhmei a pasalin bawiah siem in tum pei a. LALPA in Pathien chungah thil suol in thaw a ni naw maw? 11 Tu hin ngàithla ro, in unauhai, sala in manhai hi inkîrtir nawk ro. LALPA lungsenna nasa tak in chungah a'n ling a nih" a ta. 12 Efraim-hai thuoitu thenkhat, Jehohanan naupa Azaria hai, Mesilemot naupa Berekia hai, Salum naupa Jehizkia hai le Hadlai naupa Amasa hai chun indonaa inthoka hung kîrhai chu hmaisanah an lo hal bok a. 13 An kuomah, "In sal manhai chu hi khuoa hin hung thuoi lût naw ro. LALPA lakah thil suol ei thaw dêr ta a, mi hrem nuom hiel khopin ei suklungsen a nih. Ei thil suol thaw tah bâkah la thaw sap pei in tum am a ni" an lo ti ve a. 14 Chuongchun, an hotuhai le mipui pungkhawmhai kutah sipaihai chun sala an hung thuoihai le râllâk sumhai chu an inhlân a. 15 An hming hril tah thuoituhai chu an hung tho a, tânghai chu an thuoi a, saruoka um po chu râllâk silfènhai chun an inthuomtir a, puon an pêk a, pheikhok an inbuntir a, fâk le dawn ding le inzûtna ding hriek an pêk a, a ongrophai chu sabengtung chungah an inchuongtir a, Tûm khuo Jerikoa an unauhai kuomah an zu thak a, Samaria tieng an hung kîr nawk a. 16 Hieng hun lai hin lal Ahaz chun ama thangpuitu dingin Asuria lal a fiel a. 17 Edomhai chun Judai ram an hung rûn nawk a, mihai chu salah an thuoi a. 18 Chuong lai zing chun Filistinhai khomin tlâng thuta khuohai le Judai ram sim tieng an hung rûn a, Beth Semes hai, Aijalon hai, Gederoh hai le Soko hai, Timna hai le Gimzo hai le an sè vela khuohai chu an hung bei a, an làk, an hluo a. 19 Juda lal Ahaz chun Judai ramah rîtlona sukhluor a, LALPA lakah a ringum naw hulhuol leiin LALPAN Judahai chu a suktlawm a nih. 20 Asuria lal Tiglat-Pileser khom a kuomah a hung a, sienkhom thangpui nêk hmanin a sukbuoi lem a. 21 Ahaz chun LALPA tempul le a lal ina inthok le a mi lienhaia inthokin rangkachak a lâk a, Asuria lal chu a pêk a, sienkhom a sawtpui chuong nawh. 22 Buoinain a nangching lai chun lal Ahaz chu LALPA lakah a suol zuol sauh lem a. 23 Ama hung dotu Damaska mihai pathien kuoma chun a'n thawi a, "Aram lal pathien chun anni a thangpui leiin keikhom a mi thangpui ve theina dingin a kuomah ka'n thawi a nih" dâm a ti a. Nisienlakhom, chu chu ama le Israel mi po po sietna a ni si a. 24 Ahaz chun Pathien Tempul cheinahai chu a lâk khawm a, a chawi hmang vong a. LALPA Tempul kothai chu a kal a, Jerusalem kotthlèr kil tinah maichâm a siem a. 25 Judai ram khaw tinah pathien danghai ta dinga rimtui inhlànna ding hmun sàng a siem a, a pi le puhai Pathien, LALPA chu a cho lungsen a. 26 Ahaz inlal laia thil tlung danghai le a khawsak dàn po po chu, a bula inthoka a tawp chenin, Juda le Israel lalhai chanchin inziekna buah a chuong. 27 Ahaz chu a pi le puhai kuomah a chawl a, Jerusalem khawpuiah an phûm a, Israel lalhai thlàna ruok chu a ni nawh. A naupa Hezekia chun a lalna chu a hung hluo ta a.

29

1 Hezekia chu kum sawmhni le panga a niin a hung inlal tan a, Jerusalemah kum sawmhni le pakuo a'n lal a. A nu chu Zekaria naunu, a hming Abija a nih. 2 Hezekia chun a thlatu Davida thaw dàn zuiin Pathien mithmuah thil indik a thaw a. 3 A'n lal tan kum thla khatnaa chun LALPA Tempul kotkhârhai chu a hong nawk a, a chei tha a. 4 Thiempuhai le Levihai chu a thuoi lût a, suo tieng tuolzawla chun a ko khawm a. 5 An kuomah, "Nangni Levihai, ka thu hi ngàithla ro. Tuhin nangni insukthienghlim phot unla, chu zoah LALPA, in pi le puhai Pathien Tempul hi inthien fai unla, Hmun Thienghlima inthokin thil porche po po inthiel fai vong ro. 6 Ei pi le puhai chu an lo ringum naw a, LALPA ei Pathien mithmuah thil suol an thaw a, ama an nghatsan a. LALPA chêngna hmun chu an hnungson a. 7 Tempul kotkhârhai chu an khâr a, khawnvarhai chu an sukmit a. Israelhai Pathien Hmun Thienghlima chun rimtui an raw ta naw a, pumraw thilhlân an inhlàn ta bok nawh. 8 Chuleiin, Judai ram le Jerusalem mihai chungah LALPA lungsenna chu a tla a, in mit ngeia in hmu ang hin, mi pangzat le makti le nuizatbur dingin a lo siem tah a nih. 9 Hieng lei hin an nawm ei pi le puhai kha kawlhnàma sàm thlukin an lo um a, an naupa le naunu le nuhmeihai chu mi salah an um chu nih. 10 A lungsen inling chu an kieng theina dingin, LALPA, Israelhai Pathien kuomah thuthlung thlung ka tum a nih. 11 Ka nauhai, LALPA chun a rongbawltu ni a, a hmaa ngîra a rong bawl ding le rimtui inhlân dinga a ruot cheu in ni leiin, tu hin chu a rong bawl unla, inthlada ta hrim hrim naw ro" a ta. 12 Chuongchun, Levihai chu an inthok suok a. Chuonghai chu, Kohat thlaa inthokin Amasai naupa Mahat le Azaria naupa Joel hai; Merari thlaa inthokin Abdi naupa Kisa le Jehalelel naupa Azaria hai; Gerhon thlaa inthokin Zima naupa Joah le Joah naupa Eden hai; 13 Elizafan thlaa inthokin Simri le Jeiel hai; Asaf thlaa inthokin Zekaria le Matania hai; 14 Heman thlaa inthokin Jehiel le Simei hai; Jeduthan thlaa inthokin Semaia le Uziel hai an nih. 15 Anni chun an unauhai an ko khawm a, an insukthienghlim a, LALPA thua lal thupêk angin LALPA Tempul chu sukfai dingin an lût a. 16 Thiempuhai chu LALPA Hmun Thienghlim inthiel fai dingin an lût a, LALPA Tempul sûnga thil thieng lo an hmu po po chu LALPA Tempul tuolzawla chun an hung lâk suok a, chu chu Levihaiin an lâk a, Kidron vadungah an fepui a. 17 Thla khatna ni khat nia inthienna sin an bei tan chu a ni rietnaa chun LALPA hulhliep chen an phâk hman a. Ni riet dang LALPA Tempul inthien chu an bei nawk a, thla khatna, ni sawm le ni ruk ni chun an zo fel ta a. 18 Chu zoa chun lal Hezekia kuomah an fe a, "LALPA Tempul chu kan inthien fai zo ta a, pumraw thilhlân inhlànna maichâm hai, chu taka hmang bûr le bèl po po hai, hlânbei siena dawkân hai le hmangruo dang po po khom. 19 Chun, Ahaz inlal laia depde taka thil a lâk hmang po po kan inchik vong a, kan inthien bok a, tu hin LALPA maichâm hmaah a um" an ta. 20 Hezekia chu zîng inhma takin a tho a, khawpuia mi lienhai chu a ko khawm a, LALPA Tempulah a hang fepui a. 21 Ram le Hmun Thienghlim le Judahai ta dinga suol thawina dingin bawngchal pasari, beramchal pasari, beramchal te pasari le kèlchal pasari an kei a, Aron thla thiempuhai kuoma chun LALPA maichâma inhlàn dingin a pêk a. 22 Bawngchalhai chu an that a, thiempuhai chun a thisen chu an lâk a, maichâm chu an the a. Beramchalhai khom chu an that a, a thisen chun maichâm chu an the a. Chun, beramtehai khom chu an that a, a thisen chun maichâm chu an the a. 23 Suol thawina ding kèlchalhai chu lal le pungkhawmhai hmaa chun an hung kei a, an chungah kut an innghat a. 24 Thiempuhai chun an that a, lalin Israel mihai po po ta dinga pumraw thilhlân le inremna thilhlân inhlàn dinga thu a pêk angin, kèl thisen chu Israel mi po po ta dinga inremna siemna dingin maichâma chun suol thawinaah an inhlàn a. 25 Chun, Davida le lal zawlnei Gada le zawlnei Nathan thupêk angin, LALPA tempula chun Levihai chu dârbenthek hai, perkhuong hai le tingtang hai tum dingin lal chun a sie a; chu chu a zawlneihai hmanga LALPA thupêk a nih. 26 Levihai chun Davida insiemtir rimawi hmangruohai chu chawiin inring zingin an ngîr a, thiempuhai chun tawtawrawt an chawi bok a. 27 Hezekia chun pumraw thilhlân chu inhlàn ta dingin thu a pêk a. An inhlàn tan chun tawtawrawt le Israel lal Davida insiemtir rimawihai leh remin LALPA hla chu an sak tan ve a. 28 Hla sak pawlin hla sak a, tawtawrawt mûttuhaiin an mût lai chun LALPA chawibiekin mipuihai chu an kûn a, chuong ang chun pumraw thilhlân chu an zo chenin an thaw a. 29 Inthawina thilhlânhai an inhlàn zo chun lal le a kuoma um po po chun dingthathuonin Pathien an chawibiek a. 30 Lal Hezekia le a thoktuhai chun Davida phuok le zawlnei Asaf phuok inpâkna hla hai chu sak dingin Levihai chu thu an pêk a. Chuongchun, hlim takin inpâkna hla chu an sak a, kûnin Pathien an chawibiek a. 31 Hezekia chun, "Tuhin LALPA kuomah nangni in inhlàn ta a. Hung hnai unla, LALPA tempulah inthawina le lawmthu hrilna thilhlân hung inhlàn ta ro khai" a ta. Mipuihai chun inthawina hai le lawmthu hrilna thilhlânhai an hung inhlàn a; a nuom taphotin pumraw thilhlân an hung inhlân bok a. 32 Mipuiin pumraw thilhlân an hung inhlàn zât chu bawngchal sawmsari le beramchal za le beramte zahni a na, chuonghai po po chu LALPA ta dinga pumraw thilhlân vong a nih. 33 Thilhlân po po chu bawngchal zaruk le beram sângthum a nih. 34 Amiruokchu, thiempu an indai naw leiin pumraw thilhlânhai chu a vun an inhlip seng naw a. Thiempu danghai an insukthienghlim hma po le an sin an zo hma po chu an unau Levihai chun an thangpui a (Levihai chu insukthieng thuah thiempuhai nêk hmanin an khermei lem si a). 35 Pumraw thilhlân chu a tam hle a, pumraw thilhlân le inkopa inhlàn hlak inremna thilhlâna ding thau hai, dawn ding thilhlâna ding uoiin hai khom chu a tam êm êm el a. Chuong ang chun LALPA Tempula rongbawlna chu an tan thar nawk a nih. 36 LALPA thangpuina zâra chuong po po hun sawt nawte sûnga an thaw thei leiin Hezekia le mipuihai chu an hlim êm êm a.

30

1 Hezekia chun Israel ram le Judai ram po poah mi a tir a, Efraim-hai le Manase-hai rama khom lekha a thon a, Jerusalema LALPA Tempulah hung a, LALPA, Israelhai Pathien Fekàn kût hung hmang dingin a fiel a. 2 Lal le a mi lienhai le Jerusalema pungkhawmhai po po chun a thla hninaa Fekàn kût hmang an rot a. 3 Chuong lai chun thiempua ser thienghlim an la tam tawk naw bâkah Jerusalemah mipui an la pung khawm tam tawk naw leiin a hun pangngaiah an la kût thei hri naw a. 4 Lal le pungkhawmhai chun an thil rot chu tha hlein an ngai a. 5 Chuleiin, Israel ram po poah, Beershebaa inthoka Dan chenin LALPA, Israelhai Pathien ta dinga Fekàn kût Jerusalema hung hmang dinga inhriettirna chu thon dar an rêl thlûk a. Dàn ang chun tam tak pungkhawma hmang ding a na, sienkhom chuong ang chun hmang a la ni hri nawh. 6 Chuongchun, lal thupêkin Israel ram le Judai ram hmun tinah lal le a mi lienhai lekhathon chu thu phurtuhaiin an tlânpui a. Chu lekhathona chun, "Nangni Israel thlahai, Asuria lalhai kuta inthoka tlân suok la dam sunhai tieng LALPA a hung ngha nawk theina dingin, LALPA, Abraham Pathien, Isak Pathien le Israel Pathien tieng hung ngha kîr nawk ro. 7 In pi le puhai le in unauhai chu LALPA, in pi le puhai Pathien chunga an ringum naw leia mihai pangzata a siemzie nangni ngeia in hmu ang hin nangni ruok chu um ve naw ro. 8 In pi le puhai ang khan lulul ve naw unla, LALPA kuomah tlu lût unla, kumkhuoa dinga a ser thienghlim, a hmun thienghlima chun hung ro. LALPA, in Pathien rong chu bawl ro, chuongchun in chunga a lungsenna nasa tak chu nangni lakah a lâk kieng ding a nih. 9 LALPA kuom tieng in hung kìr chun, in unauhai le in nauhai chu sala mantuhai inlungsiettir a ta, hi rama hin hung kîr nawk an tih; LALPA in Pathien chu ngilnei tak le zàngài thei tak a ni si a. Ama tieng in ngha phot chun nghatsan hrim hrim naw ni cheu" tiin. 10 Lekhathon tlànpuituhai chu khaw tinah, Efraim le Manase hai ram po poah, Zebulun ram chenin an fe a, sienkhom anni chun hmusitin an lo nuizat a. 11 Amiruokchu, Aser hai, Manase hai Zebulun hai laia thenkhat ruok chu inphahnuoiin, Jerusalemah an fe a. 12 Judai rama lem chu LALPA thu anga lal le mi lienhai thupêk chu hlen suok ngei dingin Pathien kut chu mipuihai chungah a um a, lungril hmun khat a'n puttir a. 13 A thla hninaa chun chol thang lo bei kût hmang dingin mipui tam tak Jerusalemah an pung khawm a. 14 Jerusalem khaw sûnga maichâm an lo siemhai po po chu an thiek vong a, rimtui rawna maichâmhai po po khom an suksiet a, Kidron vadungah an dehawn a. 15 A thla hnina ni sawm le ni linaa chun Fekân kûtna beramte chu an that a. Thiempuhai le Levihai khom an inzak em leiin an lo insukthienghlim ta a, pumraw thilhlânhai chu LALPA tempula chun an hung lâk lût a. 16 Pathien mi Mosie dâna a hril ang takin mani thawna ding hmun senga chun an um a, thiempuhai chun Levihai hung chawi thisen chu an the a. 17 Mipuihai lai chun ser le sâng thaw dinga insukthieng hman lo le chu leia LALPA kuoma Fekan kût beramte inhlàn thei lo an um a, chuonghai chu LALPA ta dinga inthienna dingin a thienghlim lohai puolin Levihai chun Fekân kûtna beramtehai chu an that a. 18 Efraim mihai, Manase mihai, Isakar mihai le Zebulun mihai laia tam tak chu insukthienghlim lo an ni a, sienkhom dàn lo angin fekân kûtna ruoi chu an fâk ve a. Anni ta ding chun Hezekia-in a hnipêk a, 19 "Tu khom lungril taka Pathien, an pi le puhai LALPA Pathien zongtu taphot chu Hmun Thienghlim dàn ang takin insukthienghlim naw hai sienkhom LALPA thatna chun ngaidam tawl raw se" tiin a tongtai a. 20 Hezekia tongtaina chu LALPAN a lo ngàithlâk a, mipuihai chu a sukdam a. 21 Jerusalema um Israelhai chun chol thang lo bei kût chu hlim takin ni sari sûng an hmang a; Levihai le thiempuhai chun LALPA chawimawina rimawi hmangruohai chu inring taka tumin ni tinin LALPA kuomah inpâkna hla an sak a. 22 Levihaiin thiem taka LALPA chawibiekna rong an bawlna chungthuah Hezekia chun Levihai chu a'n pâk tawl a. Chuong ang chun, LALPA an pi le puhai Pathien kuomah inremna thilhlânhai chu inhlàna LALPA chawimawiin, an chan seng faa dawnin, ni sari sûng kût ruoi an the a. 23 Pungkhawmhai po po chun ni sari dang kût sunzom an rot a, chuongchun ni sari dang chu hlim takin an kût nawk a. 24 Juda lal Hezekia chun an kûtna dingin mipuihai kuomah bawngchal sângkhat le beram sângsari a pêk a; mi lienhai khomin bawngchal sângkhat le beram le kèl sîngkhat an hung thaw bok a. Thiempu tam tak chu an lo insukthienghlim ta bok a. 25 Juda mipui po po chu, thiempuhai le Levihai leh, Israel rama inthoka hunghai le hnam dang, Israel rama inthoka hung le Judai rama umhai chu an hlim hle a. 26 Jerusalema mihai khom nasa takin an hlim a, Israel lal Davida naupa Solomon thi hnungah chuong ang hrim hrima hlimna chu Jerusalemah a la um ngai nawh. 27 Thiempuhai le Levihai chun ngîrin mipuihai chu mal an sawm a, Pathienin a lo ngàithlâk a, an tongtaina chun a chêngna Hmun Thienghlim vân chu a tlung si a.

31

1 Chuong po po chu an thaw zo hnungin chu taka um Israel mihai chu an inthok suok a, Judai ram po po le Benjamin ram le Efraim ram le Manase ram sûnga an lungserhai po po chu an vuok koi a, Asera lem thinghai chu an phûr a, hmun sànga an bawlhmun le maichâm po po chu an sukchim vong a. An suksiet vong hnung chun Israelhai chu anni khuo seng le an in le lo sengah an kîr nawk ta a. 2 Hezekia chun thiempuhai le Levihai chu an pawl inthe dàn le thaw ding chan an insem ang peia pumraw thilhlân le inremna thilhlân inhlàntu ding dâm, rongbawltu ding dâm, lawmthu hriltu ding dâm le LALPA chêngna in kotkhâra inpâkna hla saktu ding dâm a ruot a. 3 Lal chun ama ran ruola inthokin zîng le zàna pumraw thilhlân ding dâm, LALPA dânin a tuk anga Sabat ni dâm, thla thar lawm ni dâm le hunbi nei kût hmang chânga inhlân dinghai chu a tum a. 4 Thiempuhai le Levihai chu LALPA dâna an inpêk zo theina dingin an chanpuol dinghai chu pe dingin lal chun Jerusalema chênghai chu thu a pêk a. 5 Thupêk a suok charin Israel thlahai chun phal takin an bu le bâl tharsuok hai, uoiin hai, hriek hai, khuoizu hai le an lo tharsuok hmasa tak hai chu an hung pèk tuk tuk a; chun, an iengkima sawma pakhat chu an hung pêk bok a. 6 Israel mi le Juda mi, Judai rama chênghai chun an ranhai sawma pakhat le LALPA an Pathien chanpuola thilpêk an inhlàn thienghlim tahai laia sawma pakhat chu an hung chawi khawm a, an intieng khawm hnêr hnûr el a. 7 A thla thumnaa an lâk khawm tan kha a thla sarinaah an lâk khawm zo a. 8 Hezekia le a thoktuhaiin chuong thilpêk vùm thûr el an hang hmu chun LALPA an chawimawi a, Israel mipuihai chu an inpâk hle a. 9 Hezekia chun an thil sie khawm chungchang thu chu thiempuhai le Levihai chu a'n don a. 10 Zadok sûngkuoa mi thiempu laltak Azaria chun, "Mihaiin LALPA Tempula an thilpêk an hung chawia inthok hin chu fâk ding kan nei zing ta a, LALPAN a mipuihai mal a sawm a, hieng zozai hi fâk seng lo a la vûm thûr el a nih" a ta. 11 Chuongchun, LALPA Tempula chun a sie khawmna ding hmun siem dingin Hezekia chun thu a pêk a, chuong ang tak chun an thaw a. 12 Chu zoah indik takin an thilpêk hai, sawma pakhathai le Pathien puola thilpêk an inhlàn hai chu an hlù lût a. A enkoltu lu tak chu Levi mi Konania a na, a dottu chu a unaupa Simei a nih. 13 Konania le a unau Simei inrawina hnuoia thok dinga lal Hezekia le Pathien Tempula hotu Azaria haiin enkaitu mi an ruothai chu Jehiel hai, Azazia hai, Nahat hai, Asahel hai, Jeromot hai, Jozabad hai, Eliel hai, Iskamia hai, Mahat hai le Benaia hai an nih. 14 Levi mi Imna naupa Kore, sak tieng kotkhâr vêngtu chu mani nuom thua Pathien kuoma thil an hung inhlânhai lo dongtu le LALPA kuoma thawlawm le thilpêk an hung inhlânhai semtu a nih. 15 Thiempuhai umna khaw tina ringum taka lo thangpuituhai chu Eden hai, Miniamin hai, Jesua hai, Semaia hai, Amaria hai le Sekania hai an nih; anni chun an unauhai chu a pawl pawlin, a chin a lien kuomah an chanvo ding seng an sempêk hlak. 16 Chun, thlatu inzieknaa hming chuong pasal, kum thumj le a chung tieng mi, an pawl inthe dàn le mawphurna insem dàn ang dungzuia LALPA Tempula ni tina fe tûlhai ruok chu an inthangtir sa ve nawh. 17 Thiempuhai sinthaw dàn ding chu an chi inthla dàn ang dungzuiin an ruot a, Levihai ruok chu, kum sawmhni chung tieng po, an sinthaw dungzuiin, an thangna ding pawl an ruot a. 18 Thiempuhai chu an nuhmei hai, ieng anga naupang khom an naunu le naupa hai le an sûngkuoa thang mi danghai leh ringum taka an insukthienghlim zing leiin an sûngkuo inziekna anga tiem sa vong an nih. 19 Chun, Aron thla thiempuhai, khaw se vel phûla chênghai le khaw hrang hranga chêng le Levi thlahai hming inzieknaa chuong taphothai chanvo semtu ding mi ruot bîk an um bok a. 20 Chuong ang chun Judai ram po poah Hezekia chun a thaw a, LALPA a Pathien mithmuah tha le indik le ringum takin thil a thaw hlak a. 21 Pathien Tempula rongbawlna thua dâm, dàn le thupêkhai a zawmna konga dâm le Pathien a zongnaa dâm iengkim a lungril po poin a thaw a, a hmuingil pei a.

32

1 Chuonga ringum taka Hezekia-in thil a thaw hnung chun Asuria lal Senakerib-in Judai ram a hung rûn a, lâk tumin kul nei khuohai chu a'n huol a. 2 Jerusalem rûn dingin Senakerib a hung inthok ti Hezekia-in a hriet chun a mi lienhai le sipai hotuhai chu a rawn a, 3 khaw puo tienga tuikul po po chu khàr a rot a, anni chun an thangpui a. 4 Chuongchun, mi tam tak an pung khawm a, "Ieng leiin am Asuria lal chun tui tam tak a nei ding?" an ta, a rama luong lût vadungte tui hnar po po chu an dang chat vong a. 5 Chu zoah Hezekia chun inrim taka thokin kul bang chim tah po po chu a siem tha a, kulbing insânghai a'n din thar a, kul puo tieng kul dangin a'n huon thuo a, Davida khawpui thut chu a suknghet a, hriemhrei le phaw tam tak a siem bok a. 6 Chun, indonaa mipuihai inrawitu ding hotu a siem a, khawpui kotzawla chun a ko khawm a, 7 "Hrât tak le huoi takin um ro. Asuria lal le a sipai tam takhai chu ti naw unla, zâm bok naw ro, ama nêka thil thaw thei lem ei kuomah a um si a. 8 Ama kuoma chu mihriem bân chauh a um a, eini kuoma ruok chu mi thangpuitu ding le ei râl dotu ding LALPA ei Pathien a um a nih" tiin a thlamuong a. Juda lal Hezekia thu hril chun mipuihai chu a sukhuoi a. 9 Senakerib-in Lakis khuo a'n huol lai chun Jerusalema Juda lal Hezekia le Juda mipuihai po po kuomah a ofisarhai a tir a, hi thu hi a'n cha a: 10 "Asuria lal Senakerib chun hieng hin a tih: 'Jerusalem inhuol a ni ta hnung khoma in um zing ngamna san chu iem ni tâng a ta? 11 Hezekia-in, 'LALPA ei Pathien chun Asuria lal kuta inthokin mi san suok a tih' tia a hril cheu kha, phingtâm le dangchâra in thina dinga a hlèm bawlna cheu a ni kha. 12 Hezekia ngei hi hmun sânga maichâmhai sukchim a, Judai ram le Jerusalema mihai kuoma, 'Maichâm pakhatah Pathien bein, a chungah pumraw thilhlân in inhlàn ding a nih' titu kha a ni naw am a ni? 13 Ram danghai chunga kei le ka pi le puhaiin kan thaw dàn in la hriet naw a ni maw? Chuong hnamhai pathienhai chun ka kuta inthokin an ramhai chu an humpêk thei am a ni? 14 Ka pi le puhaiin an sukbohmang ta hnung a tu hnam pathien hin am ka kuta inthokin an san suok tah ti in hriet ta hlak a? In Pathien chun ieng tin am ka kuta inthokin a san suok thei bik ding cheu? 15 Hieng ang hin Hezekia chun hlèmin thuoi suol naw raw se cheu. Ama chu ring naw ro; tu hnam pathien le ieng ram pathien khom ka kuta inthok le ka pi le puhai kuta inthoka san suok thei an um nawh. In Pathien lem lem chun ka kuta inthokin san suok naw nawkzuol a ti cheu" tiin. 16 Senakerib mihai chun chu nêka nasa lem chun Pathien le a siehlaw Hezekia chu an biek sisaw a. 17 Chun, Asuria lal chun Israelhai LALPA Pathien hmusit zawngin, "Ram dang mi pathienhaiin ka kuta inthoka an mipuihai an san suok thei naw ang bokin, Hezekia Pathien khomin ka kuta inthokin san suok naw top a tih" tiin a ziek bok a. 18 Khawpui chu an lâk theina dinga Jerusalem mipuihai rîkrâp le sukthlabâr dingin kul chunga umhai chu Hebrai tongin an khêk khum a. 19 Jerusalem Pathien chu mihriem kuta siem, khawvela mi danghai pathien ang mei meiin an hril a. 20 Chuong ang thil lei chun, lal Hezekia le Amoz naupa zawlnei Isai chu vân tieng nghain an tongtai a. 21 Chuongchun, LALPAN vântirko a tir a, Asuria lal riekhmuna mi hrât huoisen po po le an hma thuoitu le hotuhai po po chu a sukhlum vong a, hmai thûmin a ram tieng a kîr nawk a. A pathien tempula a fe chu ama nauhai ngeiin kawlhnàmin an lo sàthlum a. 22 Chuong ang chun LALPAN Hezekia le Jerusalema mihai chu Asuria lal Senakerib kuta inthok le mi dang po po kuta inthokin a sanhim a, an kawl le kienga mihai lakah a vêng a. 23 Chun, mi tam takin LALPA ta dingin Jerusalemah thilpêk an hung chawi a, Juda lal Hezekia chu thil hlu tak tak an hung pèk a. Chu taka inthok chun nasa taka hnam tin ngaisâng a hung hlaw ta a. 24 Chuong lai chun Hezekia chu thi ngamin a na a, LALPA kuomah a tongtai a, a lo don a, inchikna mak a pêk a. 25 Nisienlakhom, Hezekia lungril chu a chapo a, a chunga zàngàina inhmutira a um angin a thaw ve naw leiin ama le Judai ram le Jerusalem chunga chun LALPA lung nasa takin a sen a. 26 Hezekia chun a lungril chapona chu a'n sìr a, chuong ang bokin Jerusalem mipuihai chun an insìr ve leiin Hezekia dam sûng chun LALPA lungsenna chu an chungah a tlung ta nawh. 27 Hezekia chun sum le pai a hung hau a, a hung ropui ta hle a, tangkaruo hai, rangkachak hai, lunghlu hai, rimtui hai, phawhai le thil hlu tam tak sie khawmna in a bawl a. 28 Bu le uoiin le hriek sie khawmna in a bawl bok a. Ran ruol tinrêng sie khawmna ding bûk le beram huong hai a bawl a. 29 Khuohai a siem a, bawng ruol le beram ruol tam tak a nei a, Pathienin hausakna nasa takin a vûr a. 30 Hezekia bok hin Gihon vadung chuonchung lem chu a khâr a, Davida khawpui thlang tieng pangah an luong thlâktir a. Chuongchun, Hezekia chu a thilthaw po poah a hmuingil pei a. 31 Amiruokchu, Babulon lalin a rama inchikna mak hung tlung chu indon dinga palai a hung tir chun, a lungrila thil um po po a hriet theina dinga fie dingin Pathienin a thlathlam a. 32 Hezekia inlal sûnga thil tlung danghai le a thilthaw thathai chu Amoz naupa Isai inlàrna bu, Juda lalhai le Israel lalhai chanchin inzieknaah a chuong. 33 Hezekia chu a pi le puhai kuomah a chawl a, Davida thlahai thlânmuola chun an phûm a. Juda mi po po le Jerusalema mihai po poin a thi ni chun ropui takin an sûn a. A naupa Manase chun a lalna chu a hung hluo ta a.

33

1 Manase a hung inlal chun kum sawm le pahni mi a ni a, Jerusalemah kum sawmnga le kum nga a'n lal a. 2 Israelhai hmaa LALPAN a hnot suok hnamhai chîng dàn tirdakum tak chu zuiin LALPA mithmuah thil suol a thaw a. 3 A pa Hezekia-in a sukchim hmun sànghai chu a'n din thar nawk a, Baal maichâmhai a bawl a, Ashera lem thinghai a phun a, vâna um po po khi a biek a, an rong a bawl a. 4 Chun, LALPAN "Jerusalem-ah kumkhuoin ka hming um a tih" a tina LALPA Tempula ngei chun pathien danghai maichâm a bawl a. 5 LALPA Tempul tuolzawl ve vea chun vâna um po po ta dingin maichâm a siem a. 6 Ben Hinom ruomah a naupahai meiah a'n hlàn a, aisan a chîng a, dawi a hmang a, ramhuoi zawlhai le rau ko thiem hai a rawn a, LALPA suklungsen dingin a mithmuah thil suol tam tak a thaw a. 7 Pathienin Davida le a naupa Solomon kuoma, "Hi tempul le Israel thlahai hmun laia ka thlang Jerusalema hin ka hming chu kumkhuoin inumtir ka ta, 8 Mosie hmanga thu ka pêk hai, dàn hai, thusuok hai le thuruot po po hai chu fimkhur taka an zawm phot chun, an pi le puhai ka pêk tah hi rama inthok hin Israelhai ke chu inpên suoktir ta naw ning" a lo tina Pathien tempula chun ama milem inkertir chu hung chawiin a sie a. 9 Manase chun Judahai le Jerusalema mihai chu thuoi suolin, LALPAN Israelhai hmaa a sukbohmang hnamhai nêka nasa lemin thil suol an thaw a. 10 Manase le a mihai kuoma chun LALPAN thu a hril hlaka chu an ngaisak nawh. 11 Chuleiin, LALPAN Asuria sipai kawmandarhai a tir a, Manase chu an man a, a hnârah khaidiet an inbuntir a, dâr kol an inbuntir bok a, Babulon tieng an thuoi a. 12 Beidong taka a um lai chun LALPA a Pathien ditsakna chu a zong a, a pi le puhai Pathien hmaa chun nasa takin a'n phàhnuoi a. 13 Chuonga tongtaia a hang hni chun LALPA lung a tawk a, a hnina chu LALPAN a ngàithlâk a, Jerusalemah a rama chun a thuoi kîr nawk a. Chu phing leh Manase chun LALPA chu Pathien a nizie a hung hriet ta a. 14 Chu hnung chun Davida khawpui inhuonna tuol bang, Gihon vadung thlang tieng ruoma inthoka Nga Kotkhâr lûtna chenin, a siem tha a, Ofel muol inhuol velin insâng takin a rem a. Chun, Judai rama kul umna khaw tinah sipai kawmandar a sie vong a. 15 Ram dang pathienhai le milemhai po po chu LALPA Tempula inthokin a'n thiel fai vong a, LALPA Tempul muol le Jerusalema maichâm a siemhai po po chu khuoa inthokin an pei hmang vong a. 16 LALPA maichâm a siem tha a, inremna thilhlân inthawina le lawmthu hrilna thilhlânhai a'n hlàn a, Judahai chu LALPA Israelhai Pathien rong bawl dingin a hril a. 17 Mipuihai chu hmun sànga an inthawi hlak chu an la thaw zing a, sienkhom LALPA an Pathien kuoma chauh a ni ta lem. 18 Manase inlal laia thil tlung danghai le Pathien kuoma a tongtai thu hai, LALPA, Israelhai Pathien hminga a kuoma zawlneiin thu a hrilhai chu Israel lalhai chanchin inziekna buah a chuong. 19 A tongtaina thu le a hninain Pathien lungril a tawk thu hai, a'n phàhnuoi hmaa a khawsak dàn hai, a suolna le ringum nawna hai, hmun sàng a bawlna hmun hai le Asera lem thing le a milem siem fawmhai a siena hmun po po chanchin chu Hozaiin a chanchin a ziekna buah a chuong. 20 Chuongchun, Manase chu a pi le puhai kuomah a chawl a, ama inah an phûm a, a naupa Amon chun a lalna chu a hung hluo ta a. 21 Amon chu kum sawmhni le kum hni a ni kumin a'n lal tan a, Jerusalemah kum hni a'n lal a. 22 A pa Manase thaw ang bokin LALPA mithmuah thil suol a thaw a, a pa Manase siem fawm milem po po kuomah a'n thawi a, an rong a bawl a, a suol zuol sauh lem a nih. 23 A pa Manase inphahnuoi ang khan LALPA hmaah a'n phahnuoi ve nawh. 24 Chun, a siehlawhaiin an phierrûk a, ama inah an that a. 25 Nisienlakhom. Amon phiertu po po chu mipuiin an that vong a, mipui chun a naupa Josia chu lalah an siem a.

34

1 Josia chu kum riet mi a niin a'n lal tan a, Jerusalemah kum sawmthum le kum khat a'n lal a. 2 LALPA mithmuah thil tha a thaw hlak a, a thlatu Davida lampui chu a hraw a, voi tieng amanih chang tieng amanih a pêtsan ngai nawh. 3 Kum riet a'n lal kum, naupang tak a la ni laia inthok hrimin a pu Davida Pathien chu a zong tan a, kum sawm le kum hni a'n lal kumin Judai ram le Jerusalema hmun sàng hai, Asera lem thinghai, milem siem fawm le sung fawm hai po po chu an thiel fai vong a. 4 Baal maichâmhai chu a mithmua ngei an sukchim a, a bula rimtui rawna maichâmhai chu a suksiet vong a, Asera lem thinghai chu a phûr a, milemhai le thil limhai po po chu a rawt nawi vong a, a nawihai chu chuong milem hmaa inthawituhai thlàn chunga chun a phul a. 5 An maichâmhai chunga chun thiempuhai ru a raw a, Judai ram le Jerusalem chu a'n thiel fai a. 6 Chuong ang chun Manase hai, Efraim hai, Simeon hai le Naftali hai chêngna khuohai le an kawl vela hmun rausan tahai chenin a thaw vong a. 7 Maichâmhai a sukchim a, Asera lem thinghai chu a phûr a, milem siem fawmhai chu a rawt nawi a, rimtui rawna maichâmhai chu a vuok koi vong a. Chuong ang chun Israel ram sûng po poah a thaw a, Jerusalem tieng a kîr nawk ta a. 8 Josia inlala inthoka kum sawm le parietnaa a ram le tempul an inthien fai tumin lal chun LALPA a Pathien tempul siem tha dingin Azalia naupa Safan hai, khawpui optu Maaseia hai le lekha ziektu Joahaz naupa Joa hai chu a tir a. 9 Thiempu Hilkia kuomah an fe a, kotkhâr vêngtu Levihaiin Manase mi hai, Efraim mi hai, Israel mi hlaa la um sun po po hai, Juda mi le Benjamin mi hai le Jerusalema chêng haiin Pathien tempula thawlawm an hung chawi an lo lâk khawmhai chu an lo pêk a. 10 Chu sum chu LALPA Tempul siem thatnaa inrawitu dinga ruothai kuoma chun an pêk sawng a, anni chun Tempul ripêrtuhai le cheituhai hlawah an pêk a. 11 Juda lalhaiin an lo intawptir tah Tempul siem thatna ding lung ser sa dâm, tlungpûm le kalkhanga hmang ding thing dâm inchawkna dingin themthiemhai le in bawltuhai kuomah an pêk a. 12 Mihai chun an sin ringum takin an thaw a. An hotuhai, sin rêlbawltu palihai chu Levi chia mi ngot, Merari thlaa mi Jahat le Obadia le Kohat thlaa mi Zekaria le Mesulam hai an nih. Hieng Levihai hi rimawi tum thiem vong an nih. 13 Levi danghai chu thil phurtuhai inrawitu dâm le sinthawhai thaw ding iengkim rêlbawltu dâm an na; Levi thenkhat chu lekha ziektu dâm, thil rikawttu dâm le kotkhâr vêngtu dâm an nih. 14 Chun, LALPA Tempula sum an sie khawmhai an phor lai chun thiempu Hilkia chun Mosie hmanga pêk LALPA Dàn bu chu a hmu suok a. 15 Hilkia chun lekha ziektu Safan kuomah, "LALPA Tempulah dàn bu kan hmu suok" a ta, Safan chu a pêk a. 16 Safan chun lekhabu chu lal kuomah a chawi a, a kuomah, "I siehlawhaiin thaw dinga i ruot po po chu an thaw a. 17 LALPA Tempula tangka um po chu an lak suok a, hotuhai le sinthawtuhai an pêk a. 18 Chun, thiempu Hilkia-in lekhabu a mi pêk" tiin lal chu a hril a. Safan chun lal hmaah lekhabu chu a hang tiem a. 19 Lalin Dàn thuhai a hang hriet chun a silpuon a pot thlêr a. 20 Lal chun Hilkia hai, Safan naupa Ahikam hai, Mika naupa Abdon hai, lekha ziektu Safan hai le lal siehlaw Asaia hai kuomah thu a pêk a: 21 "Fe unla, hi lekhabu in hmu suoka thu zieka umhai chungthua hin keima le Israel le Judai rama hlaa la um sunhai ta dingin LALPA mi va rawnpêk ro. Ei pi le puhaiin hi dàn bua inziek ang hin LALPA thu chu an lo zawm naw leiin ei chungah LALPA a lo lungsen nasa ta hle a nih" a ta. 22 Chuongchun, lalin a tirhai le Hilkia chu silfên enkoltu Hasra naupa Tokat, Tokat naupa Salum nuhmei, zawlneinu Hulda kuoma chun an fe a, chu chungthua chun an va rawn a. Ama chu Jerusalem biel hninaa um a nih. 23 Ama chun an kuomah, "LALPA Israel Pathien chun hieng hin a tih: 'Ka kuoma hung tirtu cheu kuoma chun hieng hin hril ro: 24 LALPA chun hieng hin a tih: Ngai ta u, hi hmun le a sûnga umhai chunga hin sietna intlungtir ka ta, Juda lal hmaa an tiem suok lekhabua chuong tongsie po pohai khom chu intlungtir ka tih. 25 Mi nghatsan a, pathien dang kuomah rimtui raw a, an kuta an siem fawm thilhaia ka lungsenna an cho phawk leiin, hi hmuna hin ka lungsenna chu bun thlâng ka ta, sukre ni naw nih. 26 LALPA thu indon dinga tirtu cheu Juda lal kuoma chun hieng hin hril ro: LALPA, Israelhai Pathien chun hieng hin a tih: 27 Chuong thu i hriethai chun i lungril an suknem a, hi hmun le a sûnga chênghai siet ding chungchang thu chu hre a, ka hmaah inphahnuoi a, i puon pot thlêra i tap leiin kei khomin i thu ka lo ngàithlâk a. 28 Ngai rawh, i pi le puhai kuomah thuoi ka ti che a, thlamuong taka vui liem nîng i ta, hi hmun le a sûnga chênghai chunga sietna ka hung intlun ding chu i mitin hmu ve naw ti nih' tiin hril ro" a ta. Chu thu chu lal kuomah an intlun a. 29 Chuongchun, lal chun mi a tir a, Judai ram le Jerusalema upahai po po chu a ko khawm a. 30 Judai rama mi po po, Jerusalema mi po po, thiempuhai le Levihai le mipui hai, a chin a lien chu LALPA Tempulah a hang fepui a, LALPA Tempula an hmu suok thuthlung bua thu po po chu an hriet ngeiah a tiem suok a. 31 Lal chu a ngîrna dinga ruot, ban hrûla chun a ngîr a, chu lekhabua chuong thuthlung thu chu suknghet dingin a lungril po po le thlarau po poin LALPA zui ding le a thupêk hai, thupuong hai le thuruot hai chu pom dingin LALPA hmaa chun thu a thlung a. 32 Chu zoah Jerusalema um po po le Benjamin mihai po po khom chu chuong ang taka um dingin intiemkamna a'n neitir a; Jerusalema umhai chun Pathien, an pi le puhai Pathien thuthlung ang chun an thaw a. 33 Josia chun Israel thlahai hluo ram sûnga inthokin milem tirdakumhai po po chu a'n thiel fai vong a, Israel rama umhai po po chu LALPA an Pathien rong a'n bawltir a. Ama dam sûng po chun LALPA, an pi le puhai Pathien chu pêtsan loin an zui a.

35

1 Josia chun Jerusalemah LALPA ta dingin Fekân Kût a buotsai a, Fekân kût beramte chu thla hmasa tak ni sawm le ni linaa chun a that a. 2 Thiempuhai sinthaw ding a ruotpek a, LALPA tempula rongbawl sin thaw dingin a'n fui a. 3 Israel mihai zirtirtu, Pathien ta dinga ser hrang Levihai kuoma chun, "Israel lal Davida naupa Solomon tempul bawla chun bawm thienghlim chu sie a ni tâk leiin hmun tina liengkoa zawn kuol a ngai ta naw a, chuleiin in hun chu LALPA in Pathien le a mi Israelhai rongbawlna dingin hmang lem ta ro. 4 In zui dinga Israel lal Davida le a naupa Solomon haiin an lo ziek angin, in sûngkuo inthe dàn ang peia tempula mawphurna an pêk cheu chu thaw dingin inbuotsai ro. 5 Hmun Thienghlima in umna ding senga chun ngîr unla, in lo ngaisak dinga ruot sûngkuohaiin tempula thilhlân an hung inhlàn chu lo thangpui ro. 6 Fekân kût beramte chu that unla, insukthienghlim unla, mi a hunghai chu thangpui dingin inbuotsai unla, Mosie hmanga LALPAN thu a pêkhai po po chu zawm ro" a ta. 7 Kûta hung mipuihai inhlàn dingin Josia chun ama ran ruol laia mi beramte le kèlte sîngthum le bawngchal sângthum a tumpêk a, chuonghai chu lal taa mi vong a nih. 8 Lal thoktu lienhai khomin phal takin mipuihai le thiempuhai le Levihai ta dingin an hung tumpêk bok a. Pathien Tempula hotu Hilkia hai, Zekaria hai le Jehiel hai khomin Fekân kûta inhlàn dingin thiempuhai chu beramte sânghni le zaruk le bawngchal zathum an tumpêk a. 9 Levihai hotu Konania le a unauhai Semaia le Nethanel hai le mi dang Hasabia hai, Jeiel le Jozabad hai khomin Fekân kûta Levihai inhlàn dingin beramte le kèlte sângnga le bawngchal zanga an tumpêk bok. 10 Chuongchun, rongbawlna chu an buotsai a, lal thupêk angin thiempuhai chu an hmun sengah an ngîr a, Levihai khom chu an pawl dàn ang peiin. 11 Chun, fekân kûtna ding ranhai chu an that a, thiempuhaiin thisen chu an the a, Levihai chun a vun an inhlip a. 12 Mosie lekhabua chuong angin, an sûngkuo inthe dàn ang peiin, LALPA kuoma inhlàn ding pumraw thilhlânhai chu an sie hrang a, chuong ang bok chun bawngchalhai khom chu an thaw a. 13 A dàn ang takin fekân kût beramte sa chu an em hmin a; an inhlàn thienghlimhai chu bêl hrang hrangah an suong a, mi po po fâk dingin inhmaw takin an thur suok a, an sem a. 14 Chu zoah Levihai chun anni le thiempuhai fâk ding an buotsai a. Aron thla thiempuhai chu pumraw thilhlân le thauhai rawin zân inthim chena an buoi leiin Levihai chun anni le Aron thla thiempuhai fâk ding chu an buotsai a nih. 15 Chun, Davida le Asaf le Heman le lal zawlnei Jeduthun hai thupêk angin hla saktu Asaf nauhai chu anni hmunah an ngìr a, kotkhâr vêngtuhai chu kotkhâr tinah an um a, an unau Levihaiin fâk ding an hung buotsaipêk hlak leiin an sin an fesan ngai nawh. 16 Chu ni chun fekân kûta rongbawlna ser le sâng chu an zo vong a, Lal Josia thupêk angin pumraw thilhlân po po chu LALPA maichâma chun an inhlàn a. 17 Jerusalema um Israel mi po poin Fekân kût le Chol thang lo bei kût chu ni sa ri sûng an hmang a. 18 Zawlnei Samuel hun laia inthokin chuong anga nasa chun Fekân kût an la hmang ngai nawh. Thiempuhai, Levihai, Jerusalema um po po le Judai ram le Israel rama mi po po thang tlâng vonga Josia-in fekân kût a hmangpui ang hin Israel lal tu khomin an la hmangpui ngai nawh. 19 Fekân kût hi Josia inlala inthoka kum sawm le parietnaah an hmang a nih. 20 Josia-in Tempul siem that a zo hnung chun Aigupta lal Neko chu Karkemis rûn dingin Eufretis vadung tieng panin a'n thok tung a, Josia chun lo bei dingin a sipaihai leh a'n thok suok a. 21 Lal Neko chun, "Nang Juda lal, kei le nang ieng leiin am ei inbei ding a na? Ka do lai hnam chau a nih ka bei nuom. Pathienin inhmaw taka fe dingin a mi ti a nih. Ka kuoma um Pathien kal zawngin che lul naw rawh, chuong naw chun sukbohmang a ti che" tia hril dingin palai a tir a. 22 Nisienlakhom, Pathienin a biek ngei Neko thu hril chu Josia chun ngàithlaa inhnûk kîr nekin a lal thuom chu inthlâkin a'n siem danglam a, Megido ruomah lo bei dingin a fe a. 23 Thal kâp mihaiin Josia chu an inhliem a. A mihai kuoma chun, "Hi taka inthok hin mi fe hmangpui ro, hliem na tak ka tuok a nih" a ta. 24 A siehlawhai chun a tawlailira inthokin an zawn suok a, tawlailir dangah an sie a, Jerusalem tieng an phur tung a, a thi a, a pi le puhai thlânah an phûm a, Juda mi po po le Jerusalema mi po po chun an sûn a. 25 Zawlnei Jeremia chun Josia sûnna hla a phuok a, hla saktuhaiin Jeremia tap hla hi tu chen khom hin an la sak hlak. Sûnna hla sak hi Israel ramah an hung chìng a, chuong hlahai chu Sûnna hla buah a chuong. 26 Josia inlal sûnga thil tlung dang le LALPA dàn po po zawm dinga a'n pèk zozie le a thilthaw thathai chu, 27 a bula inthoka a tawp chenin, Israel lalhai le Juda lalhai chanchin inzieknaah a chuong.

36

1 Chuongchun, chu rama mihai chun Josia naupa Jehoahaz chu an thuoi a, Jerusalemah a pa aiin lalah an siem a. 2 Jehoahaz inlal tan chun kum sawmhni le kum thum mi a na, Jerusalemah thla thum a'n lal a. 3 Aigupta lalin Jerusalema a lalna chu a hung bànpêk a, a ram chu tangkaruo kilogram sângthum zali le rangkachak kilogram sawmthum le pali chu sie-ah a'n chawitir a. 4 Neko chun Jehoahaz unaupa Eliakim chu Judai ram le Jerusalema lalah a siem a, a hming chu Jehoiakim tiin a thlâkpêk a. Chun, Neko chun a unaupa Jehoahaz chu Aigupta ramah a thuoi a. 5 Jehoiakim chu kum sawmhni le panga a niin a'n lal tan a, Jerusalemah kum sawm pakhat lalin a um a, LALPA Pathien mithmuah thil tha lo a thaw hlak a. 6 Babulon lal Nebukadnezzar chu ama bei dingin a hung inthok a, Babulona thuoi dingin kol a'n buntir a. 7 Nebukadnezzar chun LALPA tempula bûr le bèlhai khom Babulon tieng a chawi a, Babulon khuoa a pathien tempula chun a sie a. 8 Jehoiakim chanchin dang le thil tirdakum a thawhai le a khawsak dànhai chu Israel lal le Juda lalhai chanchin inziekna buah a chuong. A naupa Jehoiakin chun a lalna chu a hung hluo a. 9 Jehoiakin a hung inlal chun kum sawm le pariet mi a na, Jerusalemah thla thum le ni sawm a'n lal a, LALPA mithmuin thil tha lo a thaw hlak a. 10 Kum a hung invoi chun Nebukadnezzarin mi a hung tir a, LALPA tempula bûr le bèl tha tak tak leh Babulon tieng a'n thuoitir a, a unaupa Zedekia chu Judai ram le Jerusalema lalah a sie a. 11 Zedekia chu kum sawmhni le pakhat a niin a hung inlal a, Jerusalemah kum sawm pakhat a'n lal a. 12 LALPA a Pathien mithmuah thil tha lo a thaw hlak a, LALPAN a thu hriltua a hmang zawlnei Jeremia laka chun a'n phàhnuoi nuom nawh. 13 Chun, Pathien hmingin Lal Nebukadnezzar chungah ringum zing dingin intiemkam sienkhom a laka chun a hel a, lulul a'n suo a, LALPA Israelhai Pathien tieng ngha nuom loin a lungril a sukkhau a. 14 Chu bâkah, thiempuhai lukhàituhai po po le mipuihai chun Pathien hre lo mihai thaw dàn ang bokin thil tirdakum tinrêng thawin, Jerusalema tempul, LALPA ta dinga inhlàn thienghlim chu milem bieknaa hmangin an sukporche a. 15 LALPA, an pi le puhai Pathien chun mipuihai le a chèngna Tempul chu a lainat si leiin an kuomah zawlnei a tir a tir a. 16 Sienkhom, Pathien mi tirhai chu an lo nuizat a, an thuhai chu an lo ngainêp a, a mihai chunga LALPA lungsenna hung inthok chu suklungawi nawk ngaina hrim inkaw lo khopin zawlneihai chu an lo suknomna a nih. 17 Chuleiin, LALPA chun anni soisa dingin Babulon lal a hung tir a, Tempul sûnga chen khom an tlangvàlhai chu a that a, mipuihai chungah zàngàina nei dêr loin a che a, nunghàk le tlangvàl le upa le tar tu khom hlà bik nei loin kawlhnàmin a that a, Nebukadnezzar kutah Pathienin a pêk tawl vong si a. 18 Pathien Tempula bûr le bèl po po, a lien a chin, LALPA rosum an sie khawm po po hai le lal le mi lienhai sum sie khawm po po hai khom chu Babulon tieng a hawn vong a. 19 Chu zoah a sipaihai chun Pathien Tempul chu an raw a, Jerusalem kul banghai chu an sukchim a, lal inhai po po an raw fai vong a, thil hlu ieng khom suksiet loa mâksan an nei nawh. 20 That loa an hlà, tlawmte la dam um sunhai chu Babulon tieng Nebukadnezzar chun salah a thuoi a, chu taka chun ama le a pahai siehlawah, Persiahai hung lien chenin, an um ta a. 21 LALPAN zawlnei Jeremia hmanga a lo hril chu hung tlung kimin, zawlnei lo hril ang ngeiin, a tawpah a ram chu rausanin a um a, kum sawmsari sûng chu sabat chawl a hmang tah a nih. 22 Persia lal Kura inlal tan kumin zawlnei Jeremia baua LALPAN thu an hriltir chu a hung tlung kim theina dingin LALPAN lal Kura lungril a chok tho a, a ram po poa tlâng insampui dingin ziekin hi thu hi a puong a: 23 "Persia lal Kura chun hieng hin a tih: 'Hnuoia lalram po po hi LALPA, vân Pathien chun a mi pêk ta a. Judai ram Jerusalemah a Tempul bawl dingin a mi ruot bok a. Nangni laia LALPA mi taphot chu Israel ramah kîr nawk thei in tih. LALPA in Pathien chun umpui cheu raw se'" tiin.