1

1 Ahab thi hnungin Israelhai chungah Moab mihai an hel a. 2 Ahazia chu Samaria-a a pindan chunghnung tukver zawngdaikal awnga chun a tla a, a'n tet sil leiin mi a tir a, "Fe unla, ka natna hi ka dam suokpui ding le ding naw Ekron khuoa an pathien Baal-Zebub va rawn ro" tiin thu a'n cha a. 3 Nisienlakhom, LALPA vântirkoin Tisbe mi Elija kuomah, "Tho la, Samari khaw lal mi tirhai lo be dingin hang fe la, an kuomah, 'Israel rama hin Pathien a um ta naw leia Ekron khaw pathien Baal-Zebub rawn dinga fe in ni? 4 Hi lei hin LALPAN hi hi a ti a nih: i khuma inthok khan tho kàng ta loin thi ngei ngei i tih' tiin hril rawh" a ta. 5 A mi tirhai an hung kîr chun lalin, "Ieng tiziea in hung kîr nawk am a na?" a ta. 6 Anni chun, "Mi pakhat mi be dingin a hung a, kan kuomah, "Fe nawk ta unla, lal kuoma chun LALPAN hieng hin a tih: Israel rama hin Pathien a um ta naw leia Ekron khaw pathien Baal-Zebub rawn dinga fe in ni? Hi lei hin LALPAN, 'I khuma inthok khan tho kàng ta loin thi ngei ngei i tih' a ti a nih" an ta. 7 Lal chun, "Nangni be dinga hung, chuong ang thu hriltu cheu chu mi ieng ang am a na?" a ta. 8 Anni chun, "Sahmulin a'n thuom a, savun kawngchùn a chûn bok" an ta. Lal chun, "Tisbe mi, Elija a ni chu" a ta. 9 Chuongchun, lal chun Elija kuomah a sipai kapten chu mi sawmnga thuoiin a tir a. Tlâng sîpa inthung Elija kuoma chun kapten chu a hang fe a, "Nang Pathien mi, lalin hung thla nghal raw se a ti che a nih" a ta. 10 Elija chun, "Pathien mi ka ni takzet chun vâna inthokin mei hung tla sienla, nang le i rawihai sawmnga le khan kâng hlum vong raw se cheu" a ta. Chuongchun, vâna inthokin mei a hung tla a, kapten le a rawihai sawmnga chu a kâng hlum ta vong a. 11 Lal chun kapten dang, mi sawmnga bok thuoi chu a tir nawk a. Kapten chun Elija kuomah, "Nang Pathien mi, lalin hung thla nghal raw se' a ti che a nih" a ta. 12 Elija chun, "Pathien mi ka ni takzet chun vâna inthokin mei hung tla sienla, nang le i rawihai sawmnga kha kâng hlum vong raw se cheu" a ta. Chuongchun, vâna inthokin Pathien mei a hung tla a, kapten le a rawihai sawmnga chu a kâng hlum ta vong a. 13 Lal chun a voi thumnaah sipai kapten dang, mi sawmnga bok thuoiin a tir nawk a. Kapten chu a hang fe a, Elija hmaa chun dingthathuonin, "Pathien mi, lunginsiet takin ka hringna le hieng i siehlaw mi sawmngahai hringna hi mi hlutpêk hrâm rawh. 14 En ta, vâna inthoka mei hung tla chun ka hmaa kapten pahnihai le an rawihai a kâng hlum zo vong a ni kha. Tu ruok hin chu ka hringna hi mi hlutpêk hrâm rawh" a ta. 15 LALPA vântirko chun Elija kuomah, "Ama ruol hin fe thla rawh, ti dêr naw rawh" a ta. Chuongchun, Elija chu a tho a, ama ruol chun lal kuomah a zu fe a. 16 Lal kuoma chun, "LALPAN hi hi a ti a nih: Israel rama hin rawn ding Pathien a um ta naw leia Ekron khaw pathien Baal-Zebub rawn dinga mi i tir a ni? Hi lei hin LALPAN, 'I khuma inthok khan tho kàng ta loin thi ngei ngei i tih' a ti a nih" a ta. 17 Chuongchun, Elija hril Pathien thu ang chun a thi ta a. Ahazia chun naupa a nei naw leiin a unaupa Joram chu ama hmunah, Juda lal Jehosafat naupa Jehoram inlal kum hninaa chun a hung inlal ta a. 18 Ahazia inlal laia thil tlunghai le a thilthawhai chu Israel lalhai inlal lai chanchin inziekna lekhabuah a chuong a ni naw am a ni?

2

1 LALPAN thawngaleivira vân tieng Elija a lâk tawm chun Elija le Elisa chu Gilgal panin an fe a. 2 Elija chun Elisa kuomah, "Hi taka hin lo um rawh, LALPAN Bethelah a mi tir a nih" a ta. Elisa ruok chun, "LALPA hringna le i hringna sâlin ka hril hi, um hmangsan nawng ka ti che" a ta. Chuongchun, Bethelah an zu fe tlàng a. 3 Bethela zawlnei ruol chu Elisa kuomah an hung a, "Voisun hin i pu hi LALPAN a lâk ding a nih ti i hriet am?" an ta. Elisa chun, "Hre e, sienkhom hril puok naw ro" a ta. 4 Chun, Elija chun, "Elisa, hi taka hin lo um rawh, LALPAN Jeriko khuoah a mi tir a nih" a ta. Elisa ruok chun, "LALPA hringna le i hringna sâlin ka hril hi, um hmangsan nawng ka ti che" a ta. Chuongchun, Jerikoa chun an zu fe tlàng a. 5 Jerikoa zawlnei ruol chu Elisa kuomah an hung a, "Voisun hin i pu hi LALPAN a lâk ding a nih ti i hriet am?" an ta. Elisa chun, "Hre e, sienkhom hril puok naw ro" a ta. 6 Chun, Elija chun Elisa kuomah, "Hi taka hin lo um la, LALPAN Jordan vadungah a mi tir a nih" a ta. Elisa ruok chun, "LALPA hringna le i hringna sâlin ka hril hi, um hmangsan nawng ka ti che" a ta. Chuongchun, an pahni chun Jordan panin kein an fe tlàng a. 7 Jordan kama Elija le Elisa ngîrna ep taka chun hla deu hlekah zawlnei ruol sawmnga an ngîr ve a. 8 Elija chun a silpuon chu a hlîp a, a ziel tom a, tui chu a vuok a, khing tieng khing tieng a hung inthe a, an pahni chun hnuoi chàrah an fe kai a. 9 An kai hnung chun Elija chun Elisa kuomah, "I kuoma inthoka lâk hmanga ka um hma hin ieng am thawpêk lang che i nuom a? a ta. Elisa chun, "I thlarau chang lêt hni hi chang ka nuom" a ta. 10 Elija chun, "Thil khir tak i hni a, amiruokchu lâk hmanga ka um lai i mi hmu chun chang i ta, i mi hmu naw chun chang naw ti nih" a ta. 11 Chuonga titi pum zinga an fe lai chun mei tawlailir le mei sakor an hung inlang thut a, an inkàrah tlain a hung sukthe a, Elija chu thawngaleivirin vânah a kâi a. 12 Chu chu Elisa chun a hmu zing a, "Pa, pa, aw Israelhai santu ropui, i fe an ta maw?" tiin a ko zui a. Elisa chun ama chu a hmu ta si nawh. Chu phing leh a silpuon chu a pot thlêr a. 13 Elija silpuon hung tla chu a lâk a, a kîr a, Jordan vadung kama chun a ngîr a. 14 Elija silpuon hung tla chun tui chu a vuok a, "LALPA, Elija Pathien kha khaw lai am a um ta a?" a ta. Tui a zuk vuok chun khing tieng khing tieng a hung inthe a, Elisa chu a kai ta a. 15 Jerikoa inthoka hung zawlnei hon, lo thlîr zingtuhai chun, "Elija thlarau chu Elisa chungah a chêng ta ngei leh!" an ta. Ama chu be dingin an va hnai a, hnuoi sikin chibai an bûk a. 16 Anni chun a kuomah, "I siehlawhai hin pa ngal hrât tak tak mi sawmnga kan nei a, i pu zong dingin tir tawl raw khai. LALPA thlarauin thuoi a ta, khaw lai tlâng amanih ruom amaniah a'n thum nawk el khom a ni thei a nih" an ta. Elisa chun, "Tir lo e, tir dêr naw ro" a ta. 17 Amiruokchu, hang sèl pei inzakum khopa an nor lui tlat leiin "Tir el ro" a ta. Chuongchun, mi sawmnga an tir a, ni thum an zong a, an hmu zo naw a. 18 Jeriko tieng Elisa kuomah an hung kîr chun, "Fe naw ro ka ti rèng cheu an naw maw?" a ti a. 19 Chu khuoa mihai chun Elisa kuomah, "En ta, pu, i hmu ang hin hi khuo hi a lawilèn inhoi hle sienkhom kan tui tlàn hi a tha naw a, thlai khom a suok tha thei naw a nih" an ta. 20 Ama chun, "Tuiûm thar hung la unla, chi thun ro" a ta, chuongchun an hung lâk a. 21 Tuikhurah a va fe a, chi a phul a, mihai kuoma chun, "LALPA chun hieng hin a tih: 'Tui hi ka sukthieng tah. Tuta inthok chu a thipui um ta naw ni hai a, a ram tharsuok khom hlawk tàng a tih' a ti a nih" a ta. 22 Elisa hril ang chun, voisun chen hin a tui chu a hrisel ta zing a nih. 23 Chu taka inthok chun Elisa chu Bethelah a fe a. Lampuia a thang lai chun khuoa inthokin tleirawl ruol an hung suok a, "Fe tung rawh, lukawkpa, Fe tung rawh, lukawkpa" tiin an lo nuisaw a. 24 A ngha kîr a, anni chu a hmu a, LALPA hmingin tongsie a'n phur a. Chu phing leh ram hnuoia inthokin savom pahni an hung suok a, anni laia naupang sawmli le pahni chu an hung pot chen neng a. 25 Chun, Karmel tlângah a fe a, chu taka inthok chun Samaria khuoah a kîr nawk ta a.

3

1 Juda lal Jehosafat inlala inthoka kum sawm le kum rietah Ahab naupa Joram chu Samaria khuoah Israelhai lalin a hung um a, kum sawm le kum hnih ro a rèl a. 2 Ama chun LALPA mithmuah thil suol a thaw hlaka chu a nu le pa ang êm chun a thaw ve nawh. A pain Baal lung a lo phun chu a pei hmang a. 3 Sienkhom, Nebat naupa Jeroboam suolnaa chun a kop ve a, Israelhai thil suol a'n thawtir a, chu lampui chu a mâksan ta nawh. 4 Moab lal Mesa chu beram vai mi a na, Israel lal kuomah sie chawinain beramte nuoi khat le beram nuoi khat hmul a pêk hlak a. 5 Amiruokchu Ahab thi hnungin Moab lal chu Israel lal lakah a hel a. 6 Chuong lai chun lal Joram chu Israelhai po po khawm dingin Samaria-a inthokin a suok a. 7 Chun, Juda lal Jehosafat kuomah, "Moab lal ka lakah a hel leiin i mi hang beipui thei naw di'm a nih?" tiin mi a tir a. Ama chun, "Hang beipui thei e. Nang le kei, ka mihai le i mihai le ka sakorhai le i sakorhai chu thang hmunkhat vong ei ni annawm" a ta. 8 Chun, ama bok chun, "Khaw tieng panga inthokin am hang bei ding i ti a?" a ta, Joram chun, "Edom thlalèr tienga inthokin" a ta. 9 Chuongchun, Israel lal chu Juda lal le Edom lal leh an inthok suok a, ni sari sûng an fe kuol hnung chun anni le an ranhai dawn ding tui an nei ta naw a. 10 Israel lal chun, "Iem ei chang top ding an ta leh! Lal pathumhai hi Moabhai kuta inhlàn dingin LALPAN a mi ko khawm am an ta ding maw?" a ta. 11 Jehosafat ruok chun, "Ama hmanga Pathien ei rawn theina dingin hi taka hin LALPA zawlnei pakhat khom an um naw a ni maw?" a ta. Israel lal hnuoia ofisar pakhat chun, "Safat naupa Elisa a um. Ama chu Elija kut tuia buokpêk hlaktu kha a nih" a ta. 12 Jehosafat chun, "A kuomah LALPA thu a um chu" a ta. Chuongchun, Israel lal le Jehosafat le Edom lal chu ama hmu dingin an fe thla a. 13 Elisa chun Israel lal kuomah, "Nang le kei iem inmatna ei nei a? I pa zawlneihai le i nu zawlneihai kuoma fe lem rawh" a ta. Israel lal chun, "Fe lo e. Lal pathum hi Moab-hai kuta pêk dingin LALPAN a mi thuoi khawm a nih" a ta. 14 Elisa chun, "A rong ka bawl Iengkim LALPA hringna sâlin ka hril, nangni laia hung thang Juda lal Jehosafat hmel inza ni naw lang chu en khom en nawng ka ti che a, ngaisak bok nawng ka ti che. 15 Chuong a ni ta si leh tingtang tum thiem hung ko ro" a ta. Tingtang tum thiemin a hang tum chun LALPA kut chu a chungah a hung tlung a. 16 Ama chun, "Hi hi LALPA thu chu a nih: 'Hi ruoma hin khur cho teu ro. 17 Thli ri amanih ruo sûr ri amanih hre naw ti niu a, sienkhom hi ruom hi tuiin hung sip a ta, nangni le in ran haiin dawn ro. 18 Chu chu LALPA ngaia chu thil chìn tham a nih. Moab-hai khom in kutah ka pêk bok ding a nih. 19 Kul nei khuo po po le khawpui deu hlek po chu sukse vong unla, an thing thahai phûr vong unla, an tuikhurhai hruk ping unla, lo tha lai po po chu lungin dêng se vong ro' tiin" a ta. 20 A zînga inthawina thilhlân hun vel lai chun, ngai ta, Edom ram tienga inthokin tui a hung luong ta huou huou a, a ram chu tuiin a sip ta a. 21 Anni bei dingin lalhai an hung inthok ti Moab-haiin an hriet chun râldo thei chin po po chu an ko khawm a, ramri-a chun thang an lo khaw a. 22 Zîng inhma takin Moabhai chu an tho a, an hma zawna tui nisain a zuk el chu thisen anga sen kûkin an hmu a. 23 Anni chun, "Thisen a ni saw. Lalhai chu anni le anni an indo a, an inthat tawl a ni ngei saw. Thaw ro, Moabhai, râllâk sum va'n khawm ei tiu" an ta. 24 Israelhai inkulna hmun an hung tlung chun Israelhai chu an che thut a, an lo bei a, an hnot zàm a, an ram chu an rûn a, Moab mihai chu an that a. 25 An khawpuihai chu an suksiet a, lo thatna hmun taphot chu lungin an dêng siet a, lung an dêng bum hnêr hnûr a. An tuikulhai chu an hruk bit vong a, thing tha taphot chu an phûr a. Khuo an sukchim lo um sun chu Kir Hareset chauh a na, chu khom chu saihli chawi pawlin an inhuol a, an per hrep a. 26 Moab lal chun a ngam tawl naw ding a nih ti a hrietin Edom tienga baw tlang tumin kawlhnàm chawi mi zasari ruol a thuoi suok a, amiruokchu an hlawsam a. 27 Chu phing leh a naupa upa tak, a ro hluotu ding chu a thuoi a, kul tlânga chun pumraw inthawinaiin a'n hlàn a. Israelhaiin chu chu an hmuin râpthlâk an ti a, a an intawl kîr a, an ram tieng an kîr nawk ta a.

4

1 Zawlnei ruol laia pakhat nuhmei chun Elisa kuomah, "I siehlaw ka pasal chu a lo thi ta a, ama chu Pathien ti mi a nih ti i hriet. Tu hin a leibatna pa chun ka naupahai pahni chu bawia nei dingin a hung thuoi tum a nih" tiin a beidongna thu chu a hung intlun a. 2 Elisa chun, "Iem ka thawpêk thei ding che a na? Inah iem i nei mi hril rawh" a ta. Ama chun, "I bawinu hin sahriek bûr khat chauh naw chu ieng khom nei ka nei nawh" a ta. 3 Elisa chun, "Fe la, i tuolbawmhai bêl ruok po po haw khawm la, tlawmte chauh haw naw rawh. 4 Chun, i inah lût la, i nauhai leh kot inkal khum unla, chuong bêl ruok po poa chun sahriek chu sung sip unla, a sip po a tumin sie pei ro" a ta. 5 Hmeithai chu a inah a'n lawi a, a nauhai leh kot an inkal khum a. Bêlhai chu a kuomah an hung chawi a, a lo sung sip pei a. 6 Bêl a sung sip vong hnung chun a nauhai kuomah, "Bel hung la sa ro" a ta. Anni chun, "Bêl dang a um ta nawh" an ta, sahriek chu a kang ta a. 7 Chun anni chun Pathien mi chu an va hril a, ama chun, "Sahriek chu va zor unla, i leibat chu va rul la, a chuong po chu i nauhai le in khawsakna dingin hmang ro" a ta. 8 Ni khat chu Elisa chu Sunam khuoah a'n zin a, chu taka chun nuhmei neinung tak el a um a, bu fa dingin a lo fiel a. Chuong ang chun, a fe le hungah chu ina chun chawlin bu a fâk hlak a. 9 Chu nuhmei chun a pasal kuomah, "Ei in hung sir vet pa hi Pathien mi a nih ti ka hriet. 10 A mi hung sir changa a riekna dingin in sawnga khin a pindan ding siempêk ei ta, khum dâm, dawkan dâm, thungna dâm le khawnvar siena dâm siepêk ei tih" a ta. 11 Ni khat chu Elisa a hung nawk a, a pindana chun a kai tung a, a zâl a. 12 A siehlaw Gehazi kuoma chun, "Sunam nu kha hung ko ta" a ta, a va ko a, a hmaa chun a hung ngîr a. 13 Ama chun a siehlaw kuomah, "Hieng hin hril rawh: 'Hieng khopa buoi hin i mi lo enkol a, thawpêk thei che iem kan nei a? Lal kuoma dâm sipai kawmandar kuoma dâm iem ka hnipêk ding cheu?' tiin" a ta. Ama chun, "Ka chipuihai laia in neia khawsa ka ni annawm" a ta. 14 Elisa chun a siehlaw kuomah, "Chuong a ni si chun iem ei thawpêk ding aw?" a ta. A siehlaw chun, "Nau pasal nei lo a na, a pasal hlak chu a tar ta bok si a" a ta. 15 Elisa chun, "Va ko nawk rawh" a ta, ama chu kotkhâr bieng chelin a hung ngîr a. 16 Elisa chun a kuomah, "Tu ang hun a hung tlung pha leh nau pasal pom tâng i tih" a ta. Ama chun, "Ni lo pu, nang Pathien mi chun i siehlawnu hi hlêm der lul naw rawh" a ta. 17 Chun, nuhmei chu a hung inrai a, Elisan a kuoma a hril ang ngei khan chu hun vela chun nau pasal a nei ta a. 18 Naute chu a hung sei lien pei a. Ni khat chu busîktuhai kana fe a pa chu a zui ve a. 19 A pa kuomah, "Ka lu, ka lu" a ta. A siehlaw kuoma chun, "Pom la, a nu kuomah va thak rawh" a ta. 20 Siehlaw chun a nu kuomah a pom phei a, sûnchang lai chen a nu mal chungah a'n thung a, a thi el ta a. 21 A naupa chu Pathien mi pindana chun a pom tung a, a khum chungah a'n zàl a, kot a khâr a, a suok ta a. 22 A pasal chu a ko a, "Pathien mi kuomah fea ka hung kîr nawk nghal theina dingin siehlaw pakhat le sabengtung mi buotsaipêk rawh" a ta. 23 A pasal chun, "Voisun khera iem a kuoma fe a tûl a na? Thla thar ni khom a ni naw a, Sabat khom a ni bok si nawh" a ta. Ama chun, "A poi chuong lem" a ta. 24 Chuongchun, sabengtung chungah a chuong a, a siehlaw kuomah, "Hma thuoi la, fe pei la, thu ka pêk che a ni naw chun muongchang dêr naw rawh" a ta. 25 Chuonga fe peiin Pathien mi umna Karmel tlâng chu a tlung a. Ràla inthokin Pathien mi chun a lo hmu a, a siehlaw Gehazi kuomah, "En ta, Sunama nuhmei kha a ni tlat el! 26 Tlân la, lo va tuok la, 'I dam maw? I pasal a dam maw? I naupa a dam maw?' lo ti rawh khai" a ta. Ama chun, "Dam e" a ta. 27 Chun, tlânga Pathien mi kuom a hang tlung chun a keah a chel a. Gehazi chun ama chu va nam kieng a tum a, sienkhom Pathien mi chun, "Tosan rawh. Beidongna nasa takin a tlâk buok a ni hi. Chu chu LALPAN ka lakah a thup hri a, a mi la hril hri naw a nih" a ta. 28 Ama chun, "Pu, nau pasal ka hni che am a ni? 'Ka beisei suksângin mi hlèm der lul naw rawh' ka ti lem che a ni naw maw?" a ta. 29 Elisa chun Gehazi kuomah, "I silpuon kha i kawngah zêl la, ka hmol hi chawi la, tlân nghal rawh. Lampuiah tu khom chibai naw la, an chibai che khomin bûk ve kher naw la, ka hmol hi naupang hmaiah innghat rawh" a ta. 30 Sienkhom, chu naupang nu chun, "LALPA hringna le i hringna sâlin ka hril, "Inthla naw top ka ti che" a ta, a tho a, a zui ta a. 31 Chun, Gehazi chun hma a lo khal a, naupang hmaia chun hmol chu a sie a, sienkhom ieng ri khom a suok naw a, a châng bok nawh. Chuongchun, Gehazi chu a tlàn kîr nawk a, "Naupang chu a la thanghar chuong nawh" tiin Elisa chu a hril a. 32 Elisan in a hung tlung chun naupang chu ama khumah thiin an lo inzàl a. 33 A lût a, kot a'n khâr khum a, LALPA kuomah a tongtai a. 34 Chun, khumah a kài a, naupang chu hmûr le hmûr, mit le mit, kut le kut inchuktuoin a chungah a bok a. Chuonga a chunga a hang bok chun naupang pang chu a hung lum tan ta a. 35 Elisa chu a tho a, pindana chun an vâk vèl a, khuma chun a kài a, naupang chunga chun a bok nawk a. Chuongchun, naupang chu voi sari a hung insim a, a mit a hung meng ta a. 36 Elisa chun Gehazi chu a ko a, "Sunam nu kha hung ko rawh" a ta. A ko a, a hung lût chun, "I naupa hi pom ta raw leh" a lo ta. 37 Amanu chu a ke bulah a bokkhup a, chu zoah a naupa chu a pom a, a suokpui ta a. 38 Elisa chu Gilgal tieng a kîr nawk a, chu lai rama chun tàm a tla nasa hle a. Zawlnei ruolin an hung inhmupui a, a siehlaw kuoma chun, "Bel lien tak khan bu hruoi suongpêk rawh" a ta. 39 Chun, mi pakhat hi ram tieng hmeruo zongin a fe a, ram hrui a hmu a, ûm ra chu a silpuon sipin a hung fûn a, a khoi a, iem a nih ti hre lo chun bu hruoia chun a thlâk a. 40 Bu hruoi chu an hang thur a, an fâk tan chun, "Aw Pathien mi, bêl sûnga hin thina a um" tiin an khêk chûl a, an fâk thei naw a. 41 Elisa chun, "Beiphit hung la ro" a ta. Bêla chun beiphit chu a phul a, "Hi mihai fâk ding hin thur ta ro leh" a ta, bêl sûnga chun tium ieng khom a um ta naw a. 42 Chun, Baal Salisaa inthokin mi pakhat a hung a, Pathien mi ta dingin bu thar hmasa taka inthoka siem barli beipèr sawmhni le bu thar vui iemani zât a hung chawi a. Elisa chun, "Mipui fâk dingin sem ro" a ta. 43 A siehlaw chun, "Ieng tin am hieng zât chauh hi mi za zet fâk ding chun ka sem ngam ding?" a ta. Elisa ruok chun, "Mipui fâk dingin sem ro. Hieng hin LALPA chun a hril: 'Fa seng an ta, an fâk bang khom iemani zât um a tih' tiin" a ta. 44 Chuongchun a hang sem a, an fâk seng a, LALPA hril ang khan, an fâk mahla iemani zât a la chuong a nih.

5

1 Aram lal sipai kawmandar Naaman a um a. Ama hmangin LALPAN Aramhai chu hnena a'n changtir hlak leiin a pu mita chu mi ropui tak le ngaisàngum tak a nih. Ama chu sipai huoisen a na, amiruokchu phâr a nih. 2 Aram mihai chu a pawl pawla an ramsuoknaah voi khat chu Israel rama inthokin nuhmei te pakhat hi salah an hung hawn a, Naaman nuhmei rong a bawl hlak a. 3 A pi kuoma chun, "Ka pu hin Samaria-a um zawlnei pakhat va hmu sien ka va ti de aw! A phâr hi a lo sukdam el ding a ni si a" a ta. 4 Naaman chu a pu kuomah a fe a, Israel rama inthoka nuhmei naupang an hung thuoiin a hrilhai chu a pu a hril a. 5 Aram lal chun, "Zu fe raw khai, Israel lal kuomah lekhathon ziek ka tih" a ta. Chuongchun tangkaruo chêng sîngthum, rangkachak chêng sângruk le inthlâkna ding thuomhnaw man tam tuok sawm chawiin a'n thok suok a. 6 Israel lal ta dinga a lekha chawia chun, "Hi lekha hi chawiin ka kawmandar Namaan chu a phâr i lo sukdampêk dingin i kuomah ka hung tir a nih" ti a chuong a. 7 Israel lalin chu lekha a hang tiem zo chun a lal puon a kei thlèr a, "Kei hi Pathien am ka ni? Mi sukhluma sukhring thei am ka ni? Ieng dinga hi mi hin phâr sukdam dinga ka kuoma a hung tir am a na? Ngai ta u, ka chunga buoina siem tuma remchâng a zong dàn hi!" a ta. 8 Israel lalin a puon a kei thlèr thu Pathien mi Elisan a lo hriet chun thu a thon a, "Ieng dinga i puon i pot thlêr am a na? Chu mi chu ka kuomah hung tir la, Israel rama hin zawlnei a um ti hre el a tih" tiin. 9 Chuongchun, Naaman chu a sakor le tawlailirhai leh a fe a, Elisa in kota chun a chawl a. 10 Elisa chun, "Jordan vadungah voi sari inphûm la, i vunhai chu hung pangngai nawk a ta, hung dam inthieng el i tih" ti hril dingin mi a tir a. 11 Naaman chu lungsen takin a kîr nawk ta a. "Ngai ta u, ama ngei hung suok a ta, ka hmaah ngîr a ta, LALPA Pathien hming lam a ta, ka'n phàrna hmun hmuna chun a kut thin a ta, ka phàr chu sukdam dingin ka lo beisei a na. 12 Damaskaa vadung Abana le Pharpar hai chu Israel rama vadung po po nêka thienghlim lem an ni naw am a ni? Chuong vadunga hai chun insilin ka'n sukthienghlim thei naw am a ni?" a ta. Chuongchun, lungsen takin a kîr nawk a. 13 Chun, Naaman siehlaw chun a va hnai a, "Pa, zawlnei khan thil khir tak inthawtir ding che ni sien, i thaw el naw ding maw? 'Va'n sil la, va'n sukthienghlim rawh' i kuoma a ti kha thaw ding lem awm a ni naw maw?" a ta. 14 Chuongchun, a tum a, Pathien mi ti ang chun voi sari a zuk inphûm a, a pangti chu naute vun ang elin a hung um a, a hung inthieng ta a. 15 Naaman chu a rawihai leh Pathien mi in tieng chun a kîr nawk a, a hmaah a ngîr a, a kuomah, "Israel rama chauh naw chu khawvel hmun dangah Pathien a um nawh ti tu hin ka hriet tah. Tuhin i siehlaw thilpêk hi mi pompêk hrâm rawh" a ta. 16 Elisa ruok chun, "A rong ka bawl LALPA hringna sâlin ka hril, ieng khom la naw ning" a ta. Naamanin a ngên raka chu a lâk nuom chuong nawh. 17 Naaman chun, "Chuong chu a ni si leh i siehlaw hi sabengtung pahni phur tawk bêk pil mi pe raw khai; tuta inthok chu i siehlaw hin LALPA kuoma chauh naw chu pumraw thilhlân le inthawina hrim hrim pathien dang kuomah inhlân ta naw ningah. 18 Hi thil pakhata chauh hin LALPAN i siehlaw hi ngaithiem raw se: Aramhai pathien Rimon be dinga ka pu a fe chângin a hnung ka zui a ngai a Rimon tempula ka puin ka kut ringsana kûna chibai a bûk pha ka kûn ve a ngài hlak a, chu chungthua kher chun, i siehlaw hi LALPAN ngàidam raw se" a ta. 19 Elisa chun, "Thlamuong takin fe rawh" tiin a'n thla a, a kuoma inthok chun a suok ta a. 20 An la phâk hlat hmain Elisa siehlaw Gehazi chun, "Ka pu hin Aram mi Naaman thil hung chawihai la hlek loin a'n fetir nawk el a, LALPA hringna sâlin ka hril hi, va hnot ka ta, iemani zât bêk chu va lapêk ka tih" a ta. 21 Chuongchun. Gehazi chun Naaman chu a hnot zui a. A kuom tienga hung tlân mi tu amanih Naamanin a hmu chun lo be dingin a tum a, "Thil tha tieng thu chu ni awm tak maw?" a ta. 22 Ama chun, "Ni e, thil tha tieng thu a nih. Ka puin, 'Efraim tlângrama inthokin zawlnei pahniin an mi hung sir thut a, anni chu tangkaruo chêng sângthum le inthlâkna ding silfên pahni pe raw khai' tia hril dingin a mi tir a nih" a ta. 23 Naaman chun "Sângruk hi la lem hrâm raw khai" a ti tàl a. Chuongchun, tangkaruo sângruk chu inthlâkna ding silfên pahni le chun ip hniah a thun a, a siehlaw pahnihai chu a'n phurtir a, Gehazi hmaa chun an fe a. 24 Tlâng an tlung chun Gehazin ip hnihai chu a lâk a, inah a sie hre a. Chuongchun, mi pahnihai chu a tir kîr nawk ta a. 25 Gehazi chu inah a lût a, a pu hmaa chun a ngîr a. Elisa chun, "Gehazi, khaw laia fe che?" a ta, ama chun, "I siehlaw hi khaw lai khom ka fe nawh" a ta. 26 Sienkhom Elisa chun, "A be ding chea tawlailira inthoka mi a hung tum lai khan ka thlarau chu i kuomah a fe pei a ni naw am a ni? Tu hi tangka hai, silfên hai, oliv huon hai, grep huon hai, bawinu hai le bawipa hai làk hun am a ni? 27 Naamana phàr chu nang le i thlahai chungah kumkhuoin kop lem tâng a tih" a ta. Gehazi chu Elisa kuoma inthok chun a suok a, vûr anga varin a taksa chu a hung inphàr ta vong a.

6

1 Zawlnei ruol chun Elisa kuomah, "Ngai ta, i bula kan inthung khawmna hmun hi kan intar taluo a nih. 2 Jordan vadungah zu fêng kan ta, thing zu put kan ta, kan inthung khawmna ding chu taka chun in bawl kan ti aw?" an ta. Ama chun, "Zu fe ro" a ta. 3 Anni laia pakhat chun, "I siehlawhai lai hin nang khom hung ve ta la" a ta, ama chun "Hung vèng ka ti chu" a ta. 4 Chuongchun, anni le chun a fe ve a. Jordan vadung an tlung chun thing an phûr a. 5 Mi pakhatin thing a tuk lai chu a hreipui ha a tlong a, tuiah a tla a. Ama chun, "Pu, a va poi de aw! Mi hrei ka haw a ni nawk nghal si a" a ta. 6 Pathien mi chun, "Khaw lai am a na a tlâkna?" a ta, ama chun a tlâkna lai chu a kawkhmu a. Elisa chun thing kau a sât a, tuia chun a khaw lût a, hrei ha chu a hung inlàng suok ta a. 7 Elisa chun, "La raw leh" a ta, a hei ban a, a lâk a. 8 Chun, Aram lalin Israelhai a'n dopui a. A ofisarhai a rawn hnung chun, "Chu hmun kha hmuna chun inchàn ei tiu" a ta. 9 Pathien mi chun Israel lal kuomah, "Chuong hmuna fe chu fimkhur ro, Aram mihai an hung ding a nih" tiin mi a tir hlak a. 10 Israel lal chun Pathien miin a hrilna hmun chu a va'n thlithlaitir pei hlak a. An hung zàtin Elisa chun lal chu a lo hril lawk pei leiin chuong hmuna hai chun an inhum thei pei a. 11 Chu chun Aram lal chu a suklungsen hle a. A ofisarhai chu a ko a, "Eini lai hin a tu tak hi'm a na Israel lal tienga thang rûk, in mi hril thei naw maw?" tiin a'n don a. 12 Anni laia ofisar pakhat chun, "Aw ka lal le ka pu, a thang rûk tu khom kan um nawh. Israel rama um Zawlnei Elisa a ni lem. I khum pindan sûngrila i hrilhai chen khom hi Israel lal kuomah a ripawt vong a nih" a ta. 13 Lal chun, "Mi tira ka man theina dingin fe unla, a umna va zong suok ro" a ta. Anni chun, "Dothan khuoah a um" tiin an hung ripawt a. 14 Chuongchun, sakor le tawlailir le sipai tam tak a tir a, zânah an va fe a, khuo chu an inhuol a. 15 Pathien mi siehlaw chu zîng inhma takin a tho a, tuolah a va dâk a, sipaihaiin sakor leh tawlailir leh khuo an lo inhuol khup chu a hmu a. "E khai, pu, ieng tin am ei thaw ta ding a na?" a ti chûl a. 16 Zawlnei chun, "Ti naw ta la. Anni tienga thang nêkin eini tienga thang an tam lem dai annawm" a ta. 17 Elisa chu a tongtai a, "LALPA, a hmu theina dingin a mit hung sukvarpêk rawh" a ta. LALPA chun siehlaw mit chu a sukvarpêk a, Elisa umna vel tlânga mei tawlailir le sakor sip hmur el chu a hmu ve thei ta a. 18 Ama tieng pana hmèlmahai an hung thlâk lai chun LALPA kuomah Elisa a tongtai a, "Hienghai hi an mit sukdel rawh" a ta, Elisa hni ang chun an mit a sukdel ta vong a. 19 Elisa chun, "Hi chu lampui a ni nawh, hi chu khuo a ni nawh. Mi zui pei unla, in mi zong kuoma chun thuoi ka ti cheu" a ta, Samaria khawpuia chun a thuoi lût vong a. 20 Khawpui an lût hnung chun Elisan, "LALPA, an hmu theina dingin an mit sukvarpêk rawh" a ta. Chuongchun, an mit chu LALPAN a hongpêk a, an hang ngha vel chun Samaria khawpui sûngah an lo um ta dêr el a. 21 Israel lalin anni rawi a hmu chun Elisa kuomah, "Pa, kan that tawl el ding?" a ti chûl a. 22 Elisa chun, "That lo e. Kawlhnàm le thalngul hmanga sala in manhai khom in that ngai lem. Bu le dawn ding pe la, fain dawn hai sien, an pu kuomah kîr nawk raw hai se" a ta. 23 Chuongchun, fâk ding hnienghnàr takin an buotsaipêk a, faa an dawn zo chun an infètir ta vong a, an pu kuomah an kîr nawk a. Aram lal sipaihai chun Israel ram an rûn nawk ta ngai nawh. 24 Chu hnung chun Aram lal Ben-Hadad chun a sipai po po a khawm a, Samaria khawpui chu an hang inhuol a. 25 An inhuol bet tlat leiin Samaria chu an tàm nasa êm êm a, sabengtung lu hi tangkaruo shekel sawmrietin an zor a, vathu êk khom gram zahniah tangkaruo shekel ngain an zor hiel a nih. 26 Chun, kul tlânga Israel lal a fe lai chu nuhmei pakhatin, "Aw laltak, ka pu, mi thangpui rawh" tiin a ngèn a. 27 Ama chun, "LALPAN a thangpui che a ni ngot naw chun kei chun iengtin am ka thangpui ding che a na? Hrizawla inthokin maw? Grèp sawrna khura inthokin maw? 28 Iem a na i harsatna chu?" a ta. Nuhmei chun, "Hi nu hin, 'Voisuna ei fâk dingin i nau thaw la, zîngah ka nau ei fâk dingin thaw vêng ka tih' a ta. 29 Chuongchun, ka naupa chu kan suong a, kan fâk ta a. A tûka chun a kuomah, 'I naupa hung thaw ve ta raw leh' ka ta, sienkhom a thup hmang dai si a" a ta. 30 Lalin chu chu a hrietin a lal thuom a pot thlèr a. Kul tlânga a fe lai chu mipuiin an en thup a, a zakuo hnuoia chun saiip a lo hâk zing a. 31 Ama chun, "Safat naupa Elisa rìng voisuna tan a ni naw chun LALPAN a law law mi law sien, chu nêka nasa khom chun mi thaw raw se" a ta. 32 Elisa chu a inah a um a, upa ruolin an pan a. Lalin hma lawka a tirhai an hung tlung hma chun upahai kuomah, "Hi tuolthattupa hin ka lu la dingin mi a hung tir ti in hriet ve naw maw? Ngai ta u, mi tirhai an hung tlung pha leh kotkhâra khan lo dang tlat ro. A hnunga ke pên ri khom chu a pu ke pèn ri a ni nghe nghe ta naw maw?" a ta. 33 Chuonga a biek tawl lai zing chun mi tirhai chu an hung tlung thla a. Lal chun, "Hi sietna hi LALPAA inthok a nih. Ieng leiin am LALPA chu ka nghâk zing ding a na?" a ta.

7

1 Elisa chun, "LALPA thu hi ngàithla rawh. LALPA chun, 'Zîngah hieng ang hun vela hin Samaria khaw kul kotkhâr bulah beiphit indip tha tak kilogram thumah shekel khat pei le barli beiphit indip tha tak kilogram rukah shekel khat peiin zor an tih' tiin a hril" a ta. 2 Lalin a ringsan tak sipai hotu chun Pathien mi kuomah, "LALPAN a vân tukver a hong ding ni ta hrim sienkhom, chuong ang chu thil thei a ni hliek ding am a ni?" a ta. Elisa chun, "I mit ngeiin hmung i ta, fâk ruok chu fa ve naw ti nih" a ta. 3 Kul kotkhâr bula chun phàr pali an um a. Anni chun, "Ieng leiin am hi taka hin thi nghâkin ei inthung zing ding a na? 4 Khaw sûngah lût inla hlak khawpui an tàm leiin ei va thi tho awm si a. Hi taka hin thung zing inla hlak ei thi tho bok ding a na. Thaw ro, Aram sipaihai tieng tlu lût rok el ei tiu. An mi hlà leh dam ei ta, an mi that leh ei thi a ni el ding annawm" tiin an inbiek a. 5 Chuongchun, Aram sipaihai inkulna hmuna fe ding chun thimbutin an inthok suok a. Aram sipaihai riebûk tontir an va tlung chun tu khom an lo um ta naw a. 6 Aram sipaihai chu LALPAN tawlailir ri dâm, sakor ke pen ri dâm, sipai tam tak ri dâm a'n hriettir leiin, "Ngai ta u, Israel lal hin Hit lalhai le Aigupta lalhai ruoiin a mi hung bei an ta hi" an ta. 7 Chuongchun, an tho a, thimbutin an tlân se ta a, an puon in hai, sakor hai, sabengtung hai le an riebûk chu a ngai charin an mâksan a, an hringna humhim dingin an tlânse ta vong a. 8 Phàrhaiin riebûk tontir an va tlung chun puon in pakhatah an lût a, fain an dawn a, chu taka tangkaruo dâm, rangkachak dâm le silfên dâm chu an làk a, an va thup hmang a. Chun, an hung kîr nawk a, puon in dangah an lût nawk a, chu taka thil umhai khom chu an làk a, an va thup hmang nawk a. 9 Nakie deu chun, "Eini thilthaw dàn hi a'n dik naw top a nih. Voisun hin chanchin lawmum a tlung a, eini chauh a hretu ei ni a, hril loa khawvar chen ei nghâk chun hrem tuok ei tih. Chuleiin, thaw ro, fêng ei ta, lal sûngkuohai va hril ei tiu" tiin an inbiek a. 10 Chuongchun, khaw kul kotkhâr vêngtu chu an va ko khêk a, "Aramhai riebûkah kan va fe a, tu khom an um ta dêr naw a, mihriem ri hrim hrim khom a um naw a, an sakorhai le sabengtunghai chu an inthlung a, an puon inhai khom a ngai ngaiin a la um zing a nih" tiin an hril a. 11 Chu thu chu kotkhâr vêngtuhai chun an khêkpui a, lal in sûnga mihai chu an va hril a. 12 Lal chu zâna chun a tho a, a khawnbawlhai kuomah, "Aramhai mi thaw dàn hi hril ka ti cheu. Ei tàmzie hi an hriet a, chuleiin, 'Khawpuia inthoka an hung suok pha a hringin lo man ei ta, khaw sûngah ei lût ding a nih' tiin rama inbirûk dingin an riebûk an suoksan a ni chu" a ta. 13 A khawnbawl laia pakhat chun, "Ieng le khaw leh, hi khawpuia chênghai hi a thi tahai chan ang bok chang hmabâk vong ei ni hi. Chuleiin, khawpuia sakor um sun panga hi thuoiin tuhai amanih tir inla, ieng thil am a tlunga ti enfie hrim hrim ei tiu khai" a ta. 14 Chuongchun, sakor tawlailir pahni le a hnûktu ding sakorhai chu an buotsai a, Aram sipaihai hnot dingin an tir a. Lal chun tawlailir khaltuhai kuomah, "Fe unla, ieng thil am a tlung va en fie ro" tiin thu a pêk a. 15 Anni chun Jordan vadung chen an va hnot a, an inhmaw taluo leia Aram sipaihaiin an silfên le thuomhnaw an peihai chu lampui intluonin a um zel zul a. An mi tirhai chu an hung kîr a, thil umzie chu lal an hril a. 16 Chuongchun, mipui chu an inthok suok a, Aramhai riebûk chu an va rok ta mur mur a. LALPA thu ang ngeiin, beiphit dip kilogram thum chu shekel khat pei le barli beiphit kilogram ruk chu shekel khat peiin an zor a. 17 Chun ofisar, lalin ringsan taka a hmang kha kotkhâr vêngtuin lal chun a ruot a. Pathien mi ina lal a hung thlâk laia a lo hril tah ang khan, mipui inzi nuoi nuoi chun ama chu an chìl hlum dèr el a. 18 Lal kuoma Pathien miin "Zîngah hieng ang hun vela hin Samaria khaw kul kotkhâr bula hin beiphit indip tha tak chu kilogram thumah shekel khat pei le barli beiphit indip tha tak chu kilogram rukah shekel khat peiin zor an tih' tia a hril ang charin a hung tlung a nih. 19 Chu ofisar chun Pathien mi kuomah, "LALPAN a vân tukver a hong ding ni ta hrim sienkhom, chuong ang chu thil thei a ni hliek ding am a ni?" a ti a nih. Pathien mi chun, "I mit ngeiin hmung i ta, fâk ruok chu fa ve naw ti nih" a ti a. 20 Chu char chu a chungah a hung tlung a, kotkhâra chun mipuiin an chìl nuoi nuoi a, a thi ta dèr el a.

8

1 Elisa chun a naupa thi hnung a sukdampêk nuhmei kuoma chun, "Tho la, nang le i sûnghai leh in um theina hmun hmunah lo va um hri phot ro, LALPAN hi rama hin kum sari tàm a'n tlâktir ding a nih" a ta. 2 Pathien mi hril ang chun nuhmei chun a thaw a, ama le a sûnghai chu Filistinhai ramah kum sari an va um a. 3 Kum sari hnungin nuhmei chu Filistinhai rama inthokin a hung kîr a, a in le lo pekîr dinga hni dingin lal kuomah a hung a. 4 Chu lai chu lalin Pathien mi siehlaw Gehazi kuoma, "Elisan thil ropui a thawhai po po chu mi hril rawh" tia a lo indon lai tak a nih. 5 Nuhmei naupa thi hnung Elisan a sukhring nawk thu Gehaziin a lo hril lai taka chu nuhmei ngei lal kuomah a hung a hmu chun, "Aw laltak, ka pu, hi nuhmei naupa hi annawm Elisan a sukhring nawk chu! Hi a naupa ngei hi annawm a sukhring nawk chu" a ta. 6 Lal chun nuhmei chu a chanchin a'n don a, ama chun a hril a. Chun, a thil hni chungchànga chun lal chun a thoktu pakhat kuomah, "A ta po po le a lo tharsuok po po chenin, hi ram a suoksana inthoka a hung kîr nawk chen sûnga mi chu pe kîr vong rawh" a ta. 7 Elisa chu Damaska khuoah a fe a, Aram lal Ben Hadad chu a lo damnaw a, Pathien mi a hung thu chu an hril a. 8 Ama chun Hazael kuomah, "Thilpêk chawi la, Pathien mi chu va hmu rawh. Ka natna hi ka dam suok thei ding am ti ama hmangin LALPA mi lo rawnpêk rawh" a ta. 9 Hazael chu Elisa hmu dingin a fe a, Damaskaa an thil nei tha tinrêng, sanghawngsei sawmli phur tawk a chawi a, a hmaa chun a va ngîr a, "I naupa Ben Hadad, Aram lalin, 'Ka damnaw hi ka tha suok nawk ding?' ti indon dingin i kuomah a mi tir a nih" a ta. 10 Elisa chun, "Fe la, a kuomah, 'Hung tha suok ngei i tih' ti va hril rawh. Chun, a thi ngei ding thu khom LALPAN a mi hril a nih" a ta. 11 Hazael chu vîng hiel khopin Elisha chun mit la son dêr loin a en a. Chu zoah Pathien mi chu a tap ta a. 12 Hazael chun, "Pu, ieng dinga i tap am?" a ta. Elisa chun, "Israelhai poi i la tawk nasat dingzie ka hmu tlang vong lei a nih. An kulhai rawpêk i ta, an tlangvàlhai kawlhnàmin that i ta, an naupanghai chu hnuoi vuoknan hmang i ta, nuhmei nau pai lai hai phing chen phir thlêr i tih" a ta. 13 Hazael chun, "Kei i siehlaw uicho mei mei hin chuong ang thil nasa chu ieng tin am a thaw thei ding?" a ta. Elisa chun, "Aram lal i la hung ni dingzie LALPAN a mi'n hmutir a nih" a ta. 14 Chuongchun, Elisa kuoma inthok chun a suok a, a pu kuom tieng chun a fe a. A pu Ben Hadad chun, "Elisan ieng tin am a lo hril che a?" a ta, ama chun, " 'Tha suok nawk mol a tih' tiin a mi hril a nih" a ta. 15 Sienkhom a zîngah Hazael chun puon sa tak hi tuiah a'n chie a, chu chun Ben Hadad chu a hmaiah a hup hlum a, a lalna chu a hung hluo ta a. 16 Israel lal Ahaba naupa Joram a'n lala inthoka kum ngana, Juda lala Jehosafat a thang lai chun a naupa Jehoram chun a lalna chu a hung hluo a. 17 Juda lal a hung ni chun kum sawmthum le kum hni mi a na, Jerusalemah kum riet ro a rêl a. 18 Ahab sûnghai ang bokin, Israel lalhai lampui hraw chu a hung hraw ve a, Ahab naunu chu nuhmeiah a nei a, LALPA mithmuah thil tha lo tak a thaw hlak a. 19 Amiruokchu, a siehlaw Davida leiin LALPAN Judai ram chu a suksiet nuom naw a, kumkhuoa Davida le a thlahai ta dinga rorêltu inneitir zing chu a lo tiem ta si a. 20 Jehoram hun lai chun Edom mihai chu Judahai lakah an hel a, lal an insiem chop a. 21 Chuongchun, Jehoram chu a tawlailir po po leh Zair khuoah a va fe a. Edomhai chun a tawlailir kawmandarhai leh an inhuol vong a, sienkhom zâna chun an tawn tlang a, an suok thei hram a, a sipaihai chu an in tieng seng an tlân dar ta vong a. 22 Edomhai chu tu chen hin Judahai lakah an la hel ta zing a nih. Chuong lai bok chun Libna khuo khom an lo hel ve a. 23 Jehoram inlal laia thil tlung danghai le a thilthawhai chu Juda lalhai inlal lai chanchin inziekna lekhabuah a chuong. 24 Jehoram chu a thlatuhai kuomah a chawl a, Davida khawpuiah an phûm a, a hmuna chun a naupa Ahazia chu lalin a hung um ta a. 25 Israel lal Ahab naupa Joram inlal kum sawm le pahninaa chun Juda lal Jehoram naupa Ahazia chu a hung inlal tan a. 26 Ahazia-in ro a rêl tan chun kum sawmhni le kum hni mi a na, Jerusalemah kum khat ro a rêl a. A nu hming chu Athalia a na, Israel lal Omri tunu a nih. 27 Ahazia chu Ahab sûngkuohai mâkpa a ni ang hrimin an lampui hraw chu a hraw ve a, LALPA mithmuah thil tha lo tak a thaw hlak a. 28 Ahab naupa Joramin Gilead biel Ramot khuoa Aram lal Hazael a hang beinaa chun Ahazia chu a thang ve a, Aramhai chun Joram chu an lo inhliem a. 29 Aram lal Hazael a beinaah Joram chu Aram haiin Ramot khuoa an lo inhliem tàk lei chun insukdam dingin Jezreel-ah a kîr nawk a. Chuongchun, Jehoram naupa Juda lal Ahazia chu Ahab naupa Joram hliem chu kan dingin Jezreel khuoah a zu fe a.

9

1 Zawlnei Elisa chun zawlnei ruol laia pakhat chu a ko a, a kuomah, "Dier kei la, hi hriek bûr hi chawi la, Gilead biela Ramot khuoah va fe rawh. 2 I tlung pha leh Nimsi naupa Jehosafat naupa Jehu indon suok la, i hmu pha leh a ruolhai laia inthokin ko bing la, pindan sûngah lùtpui rawh. 3 Chun, hriek bûr hi la la, a lu chungah hriek bur la, "LALPAN hieng hin a hril: 'Israel lal ni dingin hriek ka nàl che' tiin. Chu zoah kot hong la, muongchang loin hung tlàn kir nawk vang vang rawh" a ta. 4 Chuongchun, zawlnei tlangvàl chu Gilead biela Ramot khuoa chun a fe a. 5 A tlung chun sipai ofisar ruol thung khawm a hmu a. "Kawmandar, i kuomah thucha hril ding che ka nei" a ta. Jehu chun, "A tu tak hi'm ie?" a ta, ama chun "Nangma kuomah" a ta. 6 Jehu chu a tho a, pindanah an lût a, zawlnei chun a luah hriek a bur a, "LALPA, Israel Pathienin hieng hin a tih: LALPA mipui, Israelhai chunga lal dingin hriek ka nàl che. 7 Ka siehlaw zawlneihai thisen le LALPA siehlawhai po po thisen phuba chu Jezebel laka ka lâk theina dingin i pu Ahab sûnghai chu i sukbohmang vong ding a nih. 8 Ahab sûngkuo chu an ram ngei ding a nih. Israel rama mi Ahab thla pasal taphot chu, bawi le bawi naw khom, ka sukbohmang vong ding a nih. 9 Ahab sûngkuohai chu Nebat naupa Jeroboam sûngkuohai le Ahija naupa Baasa sûngkuohai ang bokin siem ka tih. 10 Chun, Jezebel ruong chu Jezreel khaw kul bulah uiin fâng an ta, phûmtu ding hrim um naw ni hai' tiin" a ta. Chuongchun, kot a hong a, a tlân suok ta nghal a. 11 A ruolhai kuoma Jehu a hung nawk chun an ni laia pakhat chun, "Iengkim a tha de maw? Ieng leia kha mi invètpa kha i kuomah a hung tlat am a na?" a ta. Jehu chun, "Ama kha in hriet mi a na, a thu hril ding awm in hriet tho annawm" a ta. 12 Anni chun, "Hre teu hlak kan tim ie! Mi hang hril ta" an ta. Jehu chun, "Hi hi a thu mi hril chu a nih: 'LALPAN hieng hin a tih: Israelhai chunga lalah hriek ka nâl che' tiin" a ta. 13 Chuongchun, inrang takin an silpuonhai an hlip a, kailawn chunga chun an pha a, tawtawrawt an mût a, "Jehu lal a ni tah" tiin an khèk a. 14 Nimsi naupa Jehosafat naupa Jehu chun Joram chu a phier tan ta a (Chu chu Joram le Israel mi po poin Aram lal Hazael laka Gilead biela Ramot khuo an vêng lai a nih. 15 Lal Joram ruok chu Aram lal Hazael leh an indonaah Aram mihaiin an inhliem a, insukdam dinga Jezreel khuoa a kîr nawk hun lai a nih). Jehu chun a ruolhai kuomah, "Keima tienga thang in ni chun mi tu khomin hi thu hi Jezreel khuoa an zu hril nawna dingin Ramot khuo insuoktir naw hrim hrim ro" a ta. 16 Chuongchun Jehu chu tawlailirah a chuong a, Jezreel khuoah a fe a. Chu taka chun Joram chu nat khuma zâl a na, Juda lal Ahazia khom ama en dingin a zu fe a. 17 Jezreel kula ralvêngtuin Jehu le a sipaihai hung thlâk lai a hmu chun, "Sipai tuhai amanih hung thla ka hmuh" a ta. Joram chun, "Sakor chung chuong mi ko la, anni hmuok dingin tir la, 'A tha tieng thu am a ni?' tiin va'n don raw se" a ta. 18 Chuongchun, sakor chung chuong pakhat chu anni hmuok dingin a fe a, "Lalin, 'A tha tieng thila hung am in ni?' ti indon dingin a mi tir a nih" a ta. Jehu chun, "Chu chu nanga hriet ding ieng am a um a? Ka hnunga hin mi zui rawh" a ta. Ralvêngtu chun, " Ka mi tir chu a va tlung ngei a, sienkhom a hung kîr nawk ta nawh" a ta. 19 Mi dang an tir nawk a, ama chun Jehu chu thu ngai bok a'n don nawk a. Jehu chun, "Chu chu nanga hriet ding ieng am a um a? Ka hnunga hin mi zui rawh" a ti nawk a. 20 Ralvêngtu chun, "Ka mi tir chu a va tlung ve ngei a, sienkhom a hung kîr chuong bik nawh. An thuoitu tawlailir khal dàn saw Nimsi naupa Jehu khal dàn a hoi khop el, mi invêt ang elin a khal hlak a nih" a ta. 21 Joram chun, "Ka tawlailir hung buotsai ro" tiin thu a pêk a, an hung buotsai zo chun anni tawlailir ve veah Israel lal Joram le Juda lal Ahazia chu Jehu hmuok dingin an suok a, Jezreel mi Nabot huonah an intuok a. 22 Joramin Jehu a hmu chun, "A tha tieng thil am a ni, Jehu?" a ta. Ama chun, "I nu Jezebelin milem biek le dawi a chìng nasat sùng hin that tieng thil iengtin am a um thei ding a na?" a ta. 23 Joram chun a tawlailir chu a kei her a, a tlân a, Ahazia kuomah, "Inhlemna a nih, Ahazia" a ta. 24 Chu phing leh Jehu chun a thalngul a kuoi a, Joram dâr inchuktuonaah a kâp a, thal chun a lungah a dawt tlang a, tawlailira chun a op ta rop el a. 25 Jehu chun tawlailir tienga inrawitu Bidkar kuomah, "Va hnûk thla la, Jezreel mi Nabot huona ngei khan pei hawn rawh. Kha hmaa nang le kei, a pa Ahab tawlailir hnunga ei fe tum khan LALPAN hi thu hi a lo hril lawk tah a nih ti i hriet zing ka ring. 26 LALPAN, 'Zani khan Nabot le a naupahai thisen suok ka hmu ngei annawm' a ti kha. Chun, LALPA bokin, 'Hi hmuna ngei hin ka thungrul ding che a nih' a ti bok. Chuongchun, LALPA thu ang chun a ruong saw va la la, hi hmuna ngei hin dehawn rawh" a ta. 27 Juda lal Ahazia-in chuong thilhai a hmu chun Bet Hagan tieng a tlân tung a. Jehu chun a hnot a, "Ama khom kha that nghal ro" tiin a khêk a. Ibleam kawl, Gur panna tungah a tawlailira chuong chu a'n inhliem a, sienkhom Megido tieng a tlân hmang a, chu taka chun a thi a. 28 A siehlawhai chun tawlailirin Jerusalem tieng an phur tung a, Davida khawpuia a thlàna chun a thlatuhai lai an phûm a. 29 Ahazia chu Ahab naupa Joram inlala inthoka kum sawm le pakhatnaah Judahai chunga hung inlal tan a nih. 30 Chu zoah Jehu chu Jezreel khuoah a fe a. Jezebelin a lo hriet chun a mithai a lo nàl a, a sam dâm a lo chei a, tukverah a dâk a. 31 Kul kotkhâra Jehu a lût lai chun, "Mani puhai thattu Zimri, a tha tieng thu am a ni?" a lo ta. 32 Anni umna tukver tieng chu a hang en a, "Tu am ka tienga thang? Tu am?" a ta. Mi tilre pahni pathum vel an hung dâk suok a. 33 Ama chun, "Kha nu kha hung thè thla ro" a ta, an hung thè thlâk a, a thisen inkhieng chun bang le sakorhai chu a per khum nuoi a, ama chu an lo chîl a. 34 Jehu chu a lût a, fain a dawn a. "Tongsephurnu kha lo va ngaiven unla, lal naunu a ni si a, va phûm ro" a ta. 35 Phûm dinga an va fe chun a luru dâm, a ke bawr dâm le kutpha bawr dâm chauh naw chu hmu ding a um ta naw a. 36 An hung kìr a, Jehu an va hril a, ama chun, "Hi hi LALPAN a siehlaw Tisbe mi Elija hmanga, 'Jezreel hmuna ngei hin uihaiin Jezebel ruong chu la fâng an tih. 37 Jezreel hmuna ngei hin Jezebel taksa chu êk tawng angin, 'Hi hi Jezebel a nih' ti tu khom hriet thei lo dingin la'n dar a tih' ti thu a hril kha a ni hi" a ta.

10

1 Samaria khuoah Ahab naupahai sawmsari an um a. Jehu chun lekha a ziek a, Samaria khawpuia upahai, hotuhai le Ahab nauhai lo enkol tleituhai kuomah a thon seng a. 2 , A lekhaa chun, "In pu naupahai enkoltu niin, tawlailirhai le sakorhai neiin, kula inhuon khuoah chêngin, râlthuom koltu in ni bok a. 3 Hi lekha hi in hmu charin in pu naupahai laia fel tak le tlâk tak dinga in ngai chu a pa lalthungphaah inthungtir unla, in pu ta ding chun dopui ro" tiin. 4 Nisienlakhom, anni chu an ti ta êm êm a, "Lal pahni hmana an ngam naw chu einin iengtin am ei ngam lul ding a na?" an ta. 5 Chuongchun, lal in enkoltu, khawpui optu, upahai le naupanghai enkol tleituhai chun, "I siehlawhai kan ni a, thaw dinga i mi hril taphot chu thaw pei kan tih. Tu khom lalah siem nawng kan tih. Nangin tha i ti ang angin thaw lem rawh" ti thu chu Jehu kuoma hril dingin mi an tir a. 6 Chu phing leh Jehu chun lekha a thon nawk a, "Keima tienga thang in ni a, ka thu in zawm takzet ding a ni chun, in pu naupa in kolhai seng lu hung la un la, zingah hieng tik huna hin ka kuomah Jezreel-ah hung ro" tiin. Lal naupa sawmsarihai chu khawpuia mi lien ruol, anni enkol tleituhai kuoma um an nih. 7 Lekha an hmu chun lal nauhai chu an man a, sawmsari chu an that a, an luhai chu bawmràngah an sie a, Jezreelah Jehu kuomah an thon a. 8 Zuolko a hung tlung chun Jehu kuomah, "Lal naupahai lu chu an hung lâk tah" tiin a hril a. Ama chun, "Kul kotkhâr bulah hmun hniah intieng khawm unla, zîngkàr chen um raw se" a ta. 9 A tûk zîngkàr chun Jehu chu a va suok a, mipui hmaa chun a ngîr a, an kuomah, "Poi intawk nawh. Kei ruok chun ka pu ka phierrûk a, ka that a. An leh, hienghai po po hi tu that am ni tâng an ta? 10 Ahab sûngkuo chungthua LALPA thu hrim hrim mal khat khom inkhêl a um nawh ti tu hin hre ta ro. A siehlaw Elija hmanga LALPAN thu a hril kha a hung intlungtir tah a ni hi" a ta. 11 Jehu chun Jezreel khuoa Ahab sûngkuo la um po po, ama hnuoia lu tak nina chelhai, a ruol thahai le a thiempuhai po po chu a that ram a, tu khom hlà hrim a nei nawh. 12 Chun, Jehu chu a'n thok suok a, Samaria tieng a fe a. 13 Lampuia berampuhai beram hmul vawna Beth Eked a va tlung chun Juda lal Ahazia unauhai laia a then a hmu a. Ama chun, "Tuhai am in na?" a ta, anni chun, "Ahazia unauhai kan nih. Lal nauhai le lalnu Jezebel zu chibai dinga hung kan nih" an ta. 14 Jehu chun, "A hringin man tawl ro" a ta, a hringin an man a, beram hmul vawnaa tuikhur bul khura chun an that a, an rêngin sawmli le pahni an na, pakhat khom damin an hlà nawh. 15 Chu taka inthoka a suok chun ama hmuok dinga hung Rekab naupa Jehonadab chu a'n tuokpui a. Jehu chun chibai a bûk a, a kuomah, "I chunga lungril indik ka put ang hin ka chungah i put ve am?" a ta, Jehonadab chun, "Put ve e" a ta. Jehu chun, "Chuong an leh i kut kha mi hang pe ta" a ta, a hang pêk a, tawlailira chun a kei kai a. 16 Jehu chun, "Ka kuomah hung la, LALPA ta dinga thahnem ka ngaizie hung hmu ve hrim hrim rawh" a ta. Chuongchun, a tawlailira chun an chuongtir a. 17 Samaria a tlung chun Ahab sûngkuohai Samariaa la um sunhai chu a that vong a; Elija hmanga LALPA thu ang ngeiin a sukchimit tawl tah a nih. 18 Jehu chun mipui po po chu a ko khawm a, an kuomah, "Ahab khan Baal rong hi a bawl met chauh a na, Jehu hin chu uor takin a bawl ding a nih. 19 Chuleiin, Baal zawlneihai po po, a betuhai po po le an thiempuhai po po ka kuoma hin hung ko khawm ro. Baal ta dingin inthawina ropui ka'n hlan ding a ni leiin tu khom a kim naw um naw raw hai se. A hung naw an um chun damin suok naw ni hai" a ta. Jehu chun Baal betuhai chu sukhlum tuma dawhaa a thaw tawl a nih. 20 Jehu chun, "Baal hmingin kûtpui siem ro" a ta, chu chu nasa takin an hril thang a. 21 Israel ram po poah an hril dar a, Baal betuhai po po chu an hung a, a thang naw hrim hrim an um nawh. Baal tempula chun an lût a, kotkhâra inthokin a chawr tieng chen an inthung sip hmur a. 22 Jehu chun tempula silfên enkoltuhai kuomah, "Baal rongbawltu po po bât ding puon hung lapêk ro" a ta, an hung lâk a. 23 Jehu chu Rekab naupa Jehonadab leh Baal tempula chun a lût a. Jehu chun Baal betuhai kuomah, "Hi taka hin Baal betu ni lo, LALPA betu lo um ve pal rawi an tih, zong unla, en fel ro" a ta. 24 Chuongchun, inthawina le pumraw thilhlân inhlàn dingin an lût a. Jehu chun puo tieng mi sawmriet a lo sie rûk ta hrim a. An kuomah, "Hieng in kuta ka pêk cheu hi tu khom in insuo vai chun, a'n suotu chun a'n suo aiin a hringna chân a tih" a ta. 25 Pumraw thilhlân an inhlàn zoin Jehu chun vêngtu sipaihai le an hotuhai kuomah, "Va lût unla, va that ro; tu khom insuo dêr naw ro" a ta, kawlhnâmin an sât hlum ta vong a. Vêngtu sipaihai le an hotuhai chun an ruong chu an dêng suok a, chu zoah Baal tempul sûngrila chun an lût a. 26 A sûngrila Baal lim thingtum an phun chu an hung lâk suok a, an raw a. 27 Baal lim lung an phunhai chu an vuok nawi vong a, Baal tempul chu an sukchim a, tu chen hin mihaiin inhnawmna hmunah an la hmang zing a nih. 28 Chuong ang chun Jehu-in Israel rama inthokin Baal biekna chu a sukbo a nih. 29 Sienkhom, Jehu chun Nebat naupa Jeroboam suolna, Bethel le Dan khuoa rangkachak bawngte lem biek chu a bân chuong naw a, chu thil lei chun Israelhai chu thilsuol an thawtir zing tho. 30 LALPA chun Jehu kuomah, "Ka mit tlung taka thil i thaw lei le ka dit dàn anga Ahab sûnghai chunga i thaw leiin i naupahai chu suon lina chenin Israel lalthungphaah inthung an tih" a ta. 31 Amiruokchu, Jehu chun LALPA, Israelhai Pathien dàn chu a lungril po poin a zawm naw a, Jeroboamin Israelhai thil suol a'n thawtir anga inthawtir chu a bânsan chuong nawh. 32 Chuong lai chun LALPAN Israel ram chu a sukchin tan ta a. 33 Aram lal Hazael chun Israel ram Jordan vadung sak tieng po po, sim tieng Arnon vadunga Aroer khuo chenin a hne vong a, chu chun Gilead le Basan biel, Gad hnam, Reuben hnam le Manase hnamhai chêngna a huom vong a nih. 34 Jehu inlal laia thil tlung danghai le a thilthaw le a hlen suokhai chu Israel lalhai inlal lai chanchin inziekna lekhabuah a chuong. 35 Jehu chu a thlatuhai kuomah a chawl a, Samaria-ah an phûm a, a naupa Jehoahaz chun a lalna chu a hung hluo a. 36 Samaria-a inthoka Israelhai chunga Jehu inlal sûng chu kum sawmhni le kum riet a nih.

11

1 Ahazia nu Athalia-in a naupa thi thu a lo hriet chun, lal naupahai po po chu that vong dingin thu a pêk a. 2 Ahazia naupa Joash ruok chu Israel lal Joram naunu Jehoseba, Ahazia farnu chun that dinga ruot lal naupahai laia inthok chun a lâk hmang a, Athalia hmu thei lo dingin khum pindanah a enkoltu leh a thup a, that a ni ta naw a. 3 Athalia-in ram rorêlna a chel sûng, kum ruk chu LALPA Tempul sûngah a enkoltu leh an inbi hmang a. 4 A kum sarinaa chun Tempula thiempu Jehoiada chun lal vêngtu hai Keret mihai le lal in vêngtu hai laia sipai zakhat pawl pei inrawitu kawmandarhai chu LALPA Tempul sûnga ama inhmupui dingin a'n kotir a, LALPA Tempula chun inkhàm meua thu a thlungpui hnung chun lal naupa chu a'n hmutir tawl a. 5 An kuomah, "Sabat nia diutia in hung pha leh hmun thuma thea hmun khatin lal in vêng in ta; 6 hmun thuma thea hmun khatin kula Sur Kotkhâr vêng in ta; hmun thuma thea hmun khat dang chu kul kotkhâr vêngtuhai hnungah in diuti ding a nih. 7 Pawl hni dang, Sabat nia diuti ve lo poin lal ta dingin LALPA Tempul hi in vêng ding a nih. 8 Mi tinin hriemhrei chawiin lal chu sîr tinah vêng in ta, tu khom in vêng himna huol sûnga hung lût hrim hrim chu that pei ro. Lal lût le suok chu in zui pei ding a nih" tiin thu a pêk a. 9 Sipai za pawl peia kawmandarhai chun thiempu Jehoiada hril ang tak chun an thaw a, mani rawihai po, Sabat nia diuti ding pawl le awl ding pawl chu an thuoi a, thiempu Jehoiada kuomah an fe a. 10 LALPA Tempula um Davida feihai le phawhai chu kawmandarhai a pêk a. 11 Vêngtu sipaihai chun hriemhrei chawi sengin, Tempul sim tieng panga inthoka hmar tieng chenin, maichâm le Tempul hrûla chun lal chu an ngîr huol mup a. 12 Chuongchun, Jehoiada chun lal naupa chu a hung thuoi suok a, lallukhum a'n khumtir a, lalhaiin thuthlung le dàn le thupêk an kengkaw ding hai inziekna bu chu a pêk a, lalah a puong a, hriek a nàl a, mipuihai chun kut an ben dur dur a, "Lal chu dam sawt raw se" tiin an khèk a. 13 Vêngtu sipaihai le mipuihai ri Athalia-in a lo hriet chun LALPA Tempula mipuihai lai chun a va fe a. 14 Chun, a hang en a, lal chu dàn angin ban hrûlah a lo ngîr a, sipai kawmandarhai le tawtawrawt mûttuhai chu lal bula chun an ngìr a, chu rama mihai chu an hlim êm êm a, tawtawrawt an mût an mût a. Athalia chun a puonhai a pot thlêr a, "Phierrûkna! Phierrûkna!" tiin a khêk a. 15 Thiempu Jehoiada chun ama chu man dingin kawmandarhai chu thu a pêk a, "LALPA Tempula em chu that lo ding" a lo ti ta leiin, an kuomah, "Sipaihai kâra khan hung thuoi suok unla, a zuitu taphot chu that ro" a ta. 16 Lal in huonga sakor lûtna kot a tlung chun an man a, chu taka chun an that a. 17 Mipuihai chu LALPA mihai an hung nina dingin Jehoiada chun LALPA le lal le mipuihai inkârah thuthlung a siem a, lal le mipuihai inkârah a siem bok a. 18 A ram mipuihai po po chu Baal tempulah an fe a, an sukchim a, maichâmhai le milemhai chu an vuok nawi vong a, Baal thiempu Matan chu maichâm hmaah an that a. Thiempu Jehoiada chun LALPA Tempul vêngtu dingin vêngtu sipai a sie a. 19 Chuongchun, sipai kawmandar hai, Kerit mi hai le vêngtu sipai hai chu a thuoi a, LALPA Tempula inthokin lal chu an thuoi thlàk a, vêngtu sipaihai lûtna kota chun lûtin lal inah an fe a, lal chu a lalthungphaah an inthungtir ta a. 20 Chuongchun, chu rama mi po po chu an lawm a, Athalia chu lal inah kawlhnàma an that ta leiin khawpuia chun buoina a re ta a. 21 Ro a hung rêl tan chun Joash chu kum sari mi a nih.

12

1 Israel lal Jehu inlala inthoka kum sarinaah Juda lal Joash chu a hung inlal tan a, Jerusalemah kum sawmli a'n lal a, a nu hming chu Zibia a na, Beersheba khaw mi a nih. 2 Thiempu Jehoiada inchûktirna hnuoia a um sûng po chun LALPA mithmuah Joash chun thil indik a thaw hlak a. 3 Hmun sânghai ruok chu a la sukbo chuong naw a, mihai inthawiin rimtui an la raw zing a. 4 Joash chun thiempuhai kuomah, "LALPA Tempula mi thil hung chawi le inhlàn-thutiem hlenna dâm, intiemnaa thang phâk chin chawi dinga bituk dâm, mani lung puok dàn ang peia pêk-hai po po chu la khawm vong ro. 5 Thiempu tinin rong an bawlpêkhai thil hung chawi lo lâk khawm chu an mawphurna seng ni sien la, chuong an lâk khawmhai chu hmangin Tempul sietna lai po hi siem tha raw hai se" a ta. 6 Amiruokchu, Joash chu kum sawmhni le kum thum a'n lal hnung khomin thiempuhai chun Tempul siem that sin chu an la thaw naw zing a. 7 Chuleiin, Joash chun thiempu Jehoiada le thiempu danghai chu a ko khawm a, an kuomah, "Ieng leia tempul riper sin hi in la thaw naw zing am a na? Tempul siemnaa hmang dingin tuta inthoka tangka in lâk khawm taphot chu hung inhlàn pei ta ro" a ta. 8 Thiempuhai chun mihaia inthoka tangka khon ta lo ding le anniin tempul riper sin khom la ta lo dingin an remti a. 9 Chuongchun thiempu Jehoiada chun thingrem bawm a hung lâk a, a sìn chu an ver pop a, LALPA Tempul lûtna chang tieng, maichâm bula chun an inthut a, LALPA Tempula tangka an hung chawi po po chu kotkhâr vêngtu thiempu chun thingrem sûngah a lo thlâk pei a. 10 Bawma chun tangka a tam ti an hriet pha leh lal lekha ziektu le thiempu laltak chu an fe a, an tiem a, ipah an thun a. 11 Hmang zât ding an sukfel hnung chun tangka chu Tempul bawlhai inrawitua ruothai kuomah an pêk suok a, 12 anni chun LALPA Tempul bawla thoktuhai, mistirihai, lung sertuhai le cho suoktuhai hlawah dâm, LALPA Tempul sietna lai siemna ding thing le lung ser sa inchawkna ding dâm le Tempul siemna dinga an mamaw taphot inchawkna dâmin an hmang a. 13 LALPA Tempula sum hung lûthai chu LALPA Tempula thlèng dâm, khawnvar phita chepna dâm, maihùn dâm, tawtawrawt dâm, rangkachak amanih tangkaruo bûr le bèlhai dâm siemnaah hmang ta loin, 14 Tempul siemtuhai hlawah an hmang lem ta a. 15 Ringum tak le indik taka an thaw hlak leiin an sum hmangnahai chu en fel zui dinga zieka inchik ngai ieng khom a um nawh. 16 Bawsiet inthawina thilhlân le suol inthawinaa thilhlân tangkahai ruok chu thiempu chan a ni leiin LALPA Tempulah an hung chawi lût ve nawh. 17 Hieng hun lai vel hin Aram lal Hazael chun Gath khuo a hang bei a, a lâk a, chu zoah Jerusalem bei dingin fe pei a tum a. 18 Amiruokchu, Joash chun Juda lal a pu Jehosafat hai, Jehoram hai le Ahazia hai le ama ngeiin a lo inhlàn tah thil ser po po chu LALPA tempula mi le lal ina ro siekhawmnaa mi rangkachak um po po chu a lâk suok vong a, Aram lal Hazael chu a thon a, chuongchun Jerusalem chu rûn ta loin a'n hnûk kîr tah a nih. 19 Joash inlal sûnga thil tlung dang po po le a thilthawhai chanchin chu Juda lalhai inlal lai chanchin inziekna lekhabuah a chuong. 20 A mihaiin an phierrûk a, Sila pan sukna, Jerusalem sak tienga hnuoi an vur ruol chunga in an bawlna hmuna chun an that a. 21 Thoktu a thattuhai chu Simeat naupa Jozakar le Somer naupa Jehozabad an nih. Chuongchun a thi a, a thlatuhai lai Davida khawpuia chun an phûm a, a naupa Amazia chun a lalna chu a hung hluo ta a.

13

1 Juda lal Ahazia naupa Joash inlala inthoka kum sawmhni pathumnaa chun Jehu naupa Jehoahaz chu Samaria khawpuiah Israelhai lalin a hung inthung a, kum sawm le pasari ro a rêl a. 2 LALPA mithmuah thil suol a thaw hlak a, Nebat naupa Jeroboam suolna kha chîng vein, Israelhai chu thil suol a'n thawtir a, chu lampui chu a mâksan ta nawh. 3 Chuong lei chun LALPA lung chu Israel chungah a chok a, hun sawt tak sûng chu Aram lal Hazael le a naupa Ben Hadad thuhnuoiah a pêk tawl tah a nih. 4 Chun, Jehoahaz chun LALPA ditsakna a ngên rak a, Aram lalin Israelhai a sukrimsik nasatzie chu LALPAN a hmu leiin a thu chu a lo ngaithlàkpêk a. 5 LALPA chun sansuoktu a pêk a, Aramhai thuneina hnuoia inthok chun an intàl suok a, kha hma ang bok khan Israelhai chu mani inah an khawsa nawk ta a. 6 Amiruokchu, Israelhai thil suol inthawtirtu Jeroboam sûngkuohai suolna kha an mâksan chuong naw a, an la sunzom zing a, Asera lim thinghai khom Samaria khawpuia chun a la ngîr zing tho a. 7 Jehoahaz chun sakor chungchuong mi sawmnga le tawlailir sawm le sipai sîngkhat ti chauh naw chu sipai a nei zo ta naw a, Aram lalin a dang po po chu a sukram vong a, hrizawla pilvut ang elin a chil pher tah a nih. 8 Jehoahaz inlal sûnga thil tlung danghai le a thilthawhai chu Israel lalhai inlal laia an chanchin inziekna lekhabuah a chuong. 9 Jehoahaz chu a thlatuhai kuomah a chawl a, Samaria-ah an phûm a, a naupa Jehoash chun a lalna chu a hung hluo a. 10 Juda lal Joash inlala inthoka kum sawmthum le pasarinaa chun Jehoahaz naupa Jehoash chu Samaria khawpuiah Israelhai lalin a hung inthung a, kum sawmparuk a'n lal a. 11 LALPA mithmuah thil suol tak a thaw a. Israelhai thil suol inthawtirtu Nebat naupa Jeroboam suolnahai chu bansan nêkin a chîng zui pei lem a. 12 Jehoash inlal sûnga thil tlung danghai, a thilthawhai le a hlen suokhai le Juda lal Amazia le an indo thuhai chu Israel lalhai inlal lai chanchin inziekna lekhabuah a chuong. 13 Jehoash chu a thlatuhai kuomah a chawl a, Samaria khawpuiah Israel lalhai lai an phûm a. A naupa Jeroboam pahnina chun a lalna chu a hung hluo ta a. 14 Elisa chu thi suolin a damnaw a. Israel lal Jehoash chun a zu kan a, "Pa, pa, Israel vêngtu ropui" tia insamin a ta a. 15 Elisa chun, "Thalngul le thal iemani zât hung la rawh" a ta, a hung làk a. 16 Elisa chun Israel lal kuomah, "Thalngul kha chel rawh" a ta, a hang chel chun a kut chungah Elisa chun kut a'n nghat a. 17 "Sak tieng tukver kha hong rawh" a ta, lal chun a hong a. Elisa chun, "Kâp raw leh" a ta, a kâp a. "LALPA hnèna thal, Aramhai chunga LALPA hnèna thal a nih. Afek hmunah Aramhai chu boral dêr khopin i hnè ding a nih" tiin a puong a. 18 Chun, "Thalhai kha hung la rawh" a ti nawk a, lal chun a lâk a. "Hnuoi sun rawh" a ta, voi thum a sun a. 19 Pathien mi chu lal chungah a lung a sen a, "Voi nga voi ruk lai sun la chu Aramhai tukdolin i sukram vong tawl ding a ni vei leh. Voi thum chauh i sun leiin voi thum chauh hnêng i tih" a ta. 20 Elisa chu a thi a, an phûm ta a. Kum a hung invoi chun Moab-haiin an ram chu thâlah an hung rûn a. 21 Mi pakhat an phûm ding lai tak rûntu pawl chu an hmu thut a, a ruong chu Elisa thlàna chun an thlâk a. A ruongin Elisa ruhai a zuk tawk chun mithi chu a hung hring nawk a, a ngîr el ta a. 22 Aram lal Hazael chun Jehoahaz inlal sûng po po chun Israelhai chu a sukrimsi hle a. 23 Nisienlakhom, Abraham hai, Isak hai le Jakob hai kuoma a thuthlung leiin LALPAN anni chu a hmangai a, a làinat a, a ngàisak a. Tu chen hin anni chu sukbohmang a nuom naw a, a kuoma inthokin a pei hmang nuom bok nawh. 24 Aram lal Hazael chu a thi a, a naupa Ben Hadad chun a lalna a hung hluo a. 25 Jehoahaz naupa Jehoash chun Hazael naupa Ben Hadadin a pa Jehoahaz a rûna khuo a lâkpêk tahai kha a lâk nawk vong a. Joash chun voi thum a hne a, Israel khuohai chu a lâk nawk vong a nih.

14

1 Israel lal Jehoahaz naupa Jehoash inlala inthoka kum hninaa chun Joash naupa Amazia chu Juda lalah a hung inthung a. 2 Lal a ni chun kum sawmhni le panga mi a nih. Jerusalemah kum sawmhni le pakuo lalin a thung a, a nu hming chu Jehoaddin a na, Jerusalem khaw mi a nih. 3 Pathien mithmuah thil tha a thaw a, a pu Davida ruok chu a tluk zo nawh. Iengkimah a pa Joash thaw dàn a zui a. 4 Amiruokchu, hmun sânga bawlhmunhai chu a la sukbo chuong naw a, Israelhaiin chu taka chun inthawina le rimtui an la'n hlân zing tho. 5 A ram chu a suknghet phing leh a pa thattuhai chu a that ve thung a. 6 Amiruokchu, Mosie Dàn bua "Nauhai leiin pahai chu sukhlum ding a ni naw a, pahai leiin nauhai sukhlum ding a ni bok nawh, mi tin mani suol leiin an thi ding a nih" tia LALPA thupêk ang dungzuiin, chuong tuolthattuhai nauhai ruok chu a that ve nawh. 7 Ama hin Chi Ruomah Edomhai mi sîngkhat a that a, an khawpui Sela a lâk a, Joktheel tiin a thlâk a, chu hming chu tu chen hin a la put zing. 8 Amazia chun Israel lal Jehu naupa Jehoahaz naupa Jehoash kuomah a mi a tir a, "Hung la, pa le pa chu inhmasonin inbei ei tih" tiin chona thu a thon a. 9 Israel lal Jehoash ruok chun Juda lal Amazia kuomah, "Lebanon tlânga hlingin Lebanon tlânga sidar thing kuomah, 'I naunu kha ka naupa nuhmeiah inneitir raw khai' tiin thu a'n cha a. Chun, ram sa huoi hi a hung a, hling chu a hung chìl thlûk a. 10 Nang hin Edom i zu hne lei sekin i lungril a chapo a ni hi tie! Hnèna i chang kha suongin lungawi takin inah intom tok tok rawh. Nangma chopa Juda ram sietna ding ieng leia buoina chok suok i tum tâl tâl am a na?" tiin a lo don a. 11 Amiruokchu, Amazia chun a lo bengkhon nuom naw leiin Israel lal Jehoash chu a hang fe a, Juda lal Amazia le chun Juda ram Bet Semes-ah hmai intuoin an inbei a. 12 Juda lal chu Israel lal lakah a tlawm a, mi tin chu mani in tieng an tlân kìr ta vong a. 13 Israel lal Jehoash chun Juda lal Ahazia naupa Joash naupa Amazia chu Bet Semes-a chun a man a, Jerusalemah a kai tung a, Jerusalem kul chu Efraim Kotkhàra inthoka a kil chen, meter zahni vela sei chu, a sukchim a. 14 Chun, LALPA Tempul le lal ina ro an siekhawmnaa mi rangkachak le tangka le bûr le bèl um taphot chu a lâk vong a, hrèn tâng ding mi iemani zât a manhai leh an khawpui Samaria tieng a kîr nawk ta a. 15 Jehoash inlal sûnga thil tlung danghai le a thilthawhai le a hlen suokhai, Juda lal Amazia le an indo chanchinhai chu Israel lalhai inlal lai chanchin inziekna lekhabuah a chuong. 16 Jehoash chu a thlatuhai kuomah a chawl a, Samaria khawpuia chun Israel lalhai lai an phûm a. A lalna chu a naupa Jeroboam pahnina chun a hung hluo ta a. 17 Juda lal Joash naupa Amazia chu Israel lal Jehoahaz naupa Jehoash thi hnungin kum sawm le kum nga a la dam a. 18 Amazia inlal laia thil tlung danghai chu Juda lalhai inlal lai chanchin inziekna lekhabuah a chuong. 19 Jerusalemah ama chu an phier rûk a, Lakis-ah a tlân a, sienkhom a hmelmahai chun an hnot zui a, chu taka chun an that a. 20 A ruong chu sakorin an hung phur a, a thlatuhai lai Davida khawpuiah an phûm a. 21 Judai ram mihai chun Amazia naupa Azaria, kum sawm le kum ruk mi chu, an thuoi a, lalah an siem a. 22 A thlatuhai kuoma Amazia a chawl hnungin Azaria chun Elath khuo chu Judai ramah a lâk lût nawk a, a siem tha a. 23 Juda lal Joash naupa Amazia inlala inthoka kum sawm le panganaa chun Israel lal Jehoash naupa Jeroboam pahnina chu Samaria-ah Israel lalin a hung inthung a, kum sawmli le pakhat ro a rèl a. 24 LALPA mithmuah thil suol tinrêng a thaw a, Israelhai thil suol inthawtirtu Nebat naupa Jeroboam suolna po po chu inkiengsan hrim a nei nawh. 25 LALPA, Israelhai Pathienin a siehlaw, Gath Hefer mi, Amitai naupa zawlnei Jona hmanga a lo hril tah angin, Hamath kawna inthoka Tuipui Thi chen chu Israel ramah a hui lût nawk a. 26 Israel mi tu khom, bawi khom bawi naw khomin rinumna nasa tak an tuor chu LALPAN a hmu a, thangpuitu tukhom an um si nawh. 27 LALPA chun Israel hming chu vân hnuoiah nuoi bo dèr a tum naw leiin, sansuoktu dingin Jehoash naupa Jeroboam pahnina kut a hung hmang a nih. 28 Jeroboam pahnina inlal sûnga thil tlung danghai, a thilthawhai, a râl bei thuhai, Israel ta lo ni ta hlak, Hamat kawna inthoka Damaska chen Israel rama a hui lût nawk chanchinhai chu Israel lalhai inlal lai chanchin inziekna lekhabuah a chuong. 29 Jeroboam pahnina chu a thlatuhai kuomah a chawl a, a lalna chu a naupa Zekaria-in a hung hluo ta a.

15

1 Israel lal Jeroboam pahnina inlala inthoka kum sawmhni le pasarinaa chun Juda lal Amazia naupa Azaria chu lalin a hung inthung a. 2 A hung inlal chun kum sawm le kum ruk mi a na, Jerusalemah kum sawmnga le kum hni ro a rêl a. A nu chu Jerusalem mi, a hming chu Jekoli a nih. 3 A pa Amazia ang bokin LALPA mithmuah thil indik a thaw a. 4 Amiruokchu, hmun sànga bawlhmunhai chu a la sukbo chuong naw a, Israelhaiin chu taka chun inthawina le rimtui an la'n hlân zing tho. 5 LALPAN lal Azaria chu a thi chenin phàr hriin a hrem a, in hranah a um a, a naupa Jotham chun a aiin lal in chu a enkol a, a ram mihai chu ro a rêlpêk a. 6 Azaria inlal laia thil tlung danghai le a thilthawhai chu Juda lalhai inlal lai chanchin inziekna lekhabuah a chuong. 7 Azaria chu a thlahai kuomah a chawl a, Davida khawpuia chun an phûm a, a naupa Jotham chun a lalna chu a hung hluo ta a. 8 Juda lal Azaria inlala inthoka kum sawmthum le parietnaa chun Jeroboam pahnina naupa Zekaria chu Samaria-ah Israel lalin a hung inthung a, thla ruk a'n lal a. 9 A pa ang bokin LALPA mithmuah thil suol a thaw a. Israelhai thil suol inthawtirtu Nebat naupa Jeroboam lampui hraw chu an kiengsan nawh. 10 Jabesh naupa Salum chun Zekaria chu a phier rûk a, mipui hmaah a bei a, a that a, a hmunah lalin a hung um a. 11 Zekaria inlal sûnga thil tlung danghai chu Israel lalhai inlal lai chanchin inziekna lekhabuah a chuong. 12 Chuongchun Jehu kuoma LALPAN, "I thlahai chu suon lina chenin Israel lalthungphaah inthung an tih" tia a lo hril chu a hung tlung kim tah a nih. 13 Juda lal Uzia inlala inthoka kum sawmthum le pakuonaa chun Jabesh naupa Salum chu Israel lalah a hung inthung a, Samaria-a inthokin thla khat a'n lal a. 14 Chun, Gadi naupa Menahem chu Tirza khuoa inthokin Samaria-ah a fe a, Salum chu a that a, a hmunah lalin a hung um ta a. 15 Salum inlal sûnga thil tlung danghai le a thil phier rûkhai chanchin chu Israel lalhai inlal lai chanchin inziekna lekhabuah a chuong. 16 Chuong lai chun Menahem chu Tirzaa inthokin a suok a, Tipsa khuoin kot an lo hongpêk nuom naw leiin a khuo le a se vel po po chu a bei a, a suksiet vong a, nuhmei inrai lai phing chenin a phir thlèr vong a. 17 Juda lal Azaria inlala inthoka kum sawmthum le pakuonaa chun Gadi naupa Menahem chu Israel lalah a hung inthung a, Samaria khuoah kum sawm ro a rêl a. 18 LALPA mithmuah thil suol a thaw a, Israelhai thil suol inthawtirtu Nebat naupa Jeroboam lampui hraw chu a'n lal sûng po poin a pêtsan nawh. 19 Assuria lal Pul, Tiglat-Pilesar an ti bok chun ram chu a hung rûn a, Menahem chun a rama ama lalna a suknghet theina dinga thangpuitu dingin tangkaruo kilogram sîngthum le sângli pein a lo tlon a. 20 Tangka a pêk chu Menahemin Israel rama mi hausa pakhat peiah tangka shekel sawmnga seng phùt luia a'n thawtir a nih. Chuongchun, Asuria lal chu a ramah sawt um loin a kîr nawk ta a. 21 Menahem inlal sûnga thil tlung danghai le a thilthawhai po po chu Israel lalhai inlal lai chanchin inziekna lekhabuah a chuong. 22 Menahem chu a thlatuhai kuomah a chawl a, a naupa Pekahia chun a lalna chu a hung hluo ta a. 23 Juda lal Azaria inlala inthoka kum sawmnganaa chun Menahem naupa Pekahia chu Israel lalah a hung inthung a, Samari khuoa inthokin kum hni ro a rêl a. 24 Pekahia chun LALPA mithmuah thil suol a thaw a, Israelhai thil suol inthawtirtu Nebat naupa Jeroboam suolna chu a'n kiengsan ngai nawh. 25 A sipai hotuhai laia pakhat, Remalia naupa Peka chun ama chu a phier rûk a, Gilead mi sawmnga thuoiin Samaria-a lal in kul sûngah Pekahia chu Argob le Arie hai leh a that a, Peka chu lalin a hung um ta a. 26 Pekahia inlal laia thil tlung dang le a thilthawhai po po chu Israel lalhai inlal lai chanchin inziekna lekhabuah a chuong. 27 Juda lal Azaria inlala inthoka kum sawmnga le pahninaa chun Remalia naupa Peka chu Samaria-ah Israel lalin a hung inthung a, kum sawmhni ro a rêl a. 28 Ama chun LALPA mithmuah thil suol a thaw a, Israelhai thil suol inthawtirtu Nebat naupa Jeroboam suolna chu a'n kiengsan ngai nawh. 29 Israel lal Peka inlal lai chun Assuria lal Tiglat-Pilesar chun Ijon hai, Abel Beth Maaka hai, Janoa hai, Kedes hai le Hazor khuohai po po dâm, Gilead le Galili biel le Naftalia ram chenin a lâk vong a, a ram mihai chu Assuria ramah salin a thuoi a. 30 Juda lal Uzia naupa Jotham inlal kum sawmhninaa chun Ela naupa Hose chun Remalia naupa Peka chu a phier rûk a, a bei a, a that a, a lalna chu a hung hluo ta a. 31 Peka inlal sûnga thil tlung danghai le a thilthawhai po po chu Israel lalhai inlal lai chanchin inziekna lekhabuah a chuong. 32 Israel lal Remalia naupa Peka inlala inthoka kum hninaa chun Uzia naupa Jotham chu Juda lalah a hung inthung a. 33 A hung inlal chun kum sawmhni le panga mi a na, Jerusalemah kum sawm le kum ruk a'n lal a. A nu hming chu Jerusa a na, Zadok naunu a nih. 34 A pa Uzia ang bokin LALPA mithmuah thil tha a thaw a. 35 Amiruokchu, hmun sànga bawlhmunhai chu a la sukbo chuong naw a, Israelhaiin chu taka chun inthawina le rimtui an la'n hlân zing tho. Jotham chun LALPA Tempul lûtna korkhâr sakhnung lem chu a siem tha a. 36 Jotham inlal laia thil tlung danghai le a thilthawhai po po chu Juda lalhai inlal laia an chanchin inziekna lekhabuah a chuong. 37 Chuong lai hun chun Aram lal Rezin le Remalia naupa Peka chu Judahai bei dingin LALPAN a tir tan ta a. 38 Chun, Jotham chu a thlatuhai lai a chawl a, a pi le puhai lai Davida khawpuia chun an phùm a, a naupa Ahaz chun a lalna chu a hung hluo ta a.

16

1 Israel lal Remalia naupa Peka inlala inthoka kum sawm le pasarinaa chun Juda lal Jotham naupa Ahaz chu a hung inlal tan a. 2 Lal a ni hin Ahaz chu kum sawmhni mi a na, Jerusalemah kum sawm le kum ruk a'n lal a. A pu Davida angin LALPA a Pathien mithmuah thil tha a thaw ve nawh. 3 Israel lalhai lampui hraw hlak chu a hraw ve a, LALPAN Israel thlahai hmaa a hnot suok hnam danghai thil chìng tirdakum tak el chu a thaw a, a naupa ngei khom meiah a'n hlân hiel a. 4 Hmun sànga bawlhmuna dâm, muol sîpa dâm le thing buk zar lien tin hnuoia dam inthawiin rimtui a'n hlàn hlak a. 5 Chun, Aram lal Rezin le Israel lal Remalia naupa Peka chu Jerusalem bei dingin an hang fe a, Ahaz chu an inhuol a, sienkhom an hnè thei naw a. 6 Chuong hun lai chun Aram lal Rezin chun Elath khuo chu Aram ta dingin a lâk nawk a, Elath-a inthokin Judahai a hnot suok a, Edom mihai a thun lût a, tu chen hin an la hluo ta zing a nih. 7 Ahaz chun Asuria lal Tiglat-Pileser kuomah, "I siehlaw le i hnuoia lala um ka na, mi bei dinga hung Aram lal le Israel lalhai kuta inthok hin mi hung san suok rawh" tia hril dingin mi a tir a. 8 Ahaz chun Assuria lal kuoma pêk dingin LALPA Tempul le lal ina ro siekhawmnaa tangkaruo le rangkachak um taphot chu a lâk suok a, a thon bok a. 9 Asuria lal chun a ngênna chu a lo remti a, Damaska a rûn a, a lâk a, a khuoa chênghai po po chu Kir ramah salin a thuoi a, Rezin chu a that bok a. 10 Lal Ahaz chu Asuria lal Tiglat-Pileser be dingin Damaska khuoah a fe a. Damaska khuoa chun maichâm a hmu a, a lim le an siem dàn ang chie chu enton dingin thiempu Uria kuomah a thon a. 11 Damaskaa inthoka Ahaz a hung kîr hmain thiempu Uria chun maichâm chu lal Ahaz-in a ruongàm a thon ang char chun a lo siem zo hman a. 12 Damaskaa inthoka lal a hung kîr chun maichâm chu a hmu a, a va pan a, maichâma chun a kai a. 13 Maichâma chun pumraw thilhlân dâm, bu le bâl thilhlân dâm, dawn thilhlân dâm le inremna inthawina thilhlân dâm inhlànin thisen a the a. 14 LALPA hmaa dâr maichâm, LALPA tempul tuol le a maichâm siem thar inkâra um chu a lâk son a, a maichâm siem thar hmar tieng chun a sie a. 15 Lal Ahaz chun thiempu Uria kuomah, "Hi maichâm lien taka hin zîng tienga pumraw thilhlân le zân tienga bu le bâl thilhlân dâm, lal ta dinga pumraw thilhlân le bu le bâl thilhlân dâm, a ram mipui ta dinga pumraw thilhlân dâm, bu le bâl thilhlân dâm le dawn thilhlân dâm chu inhlàn la, pumraw thilhlân le inthawinaa thilhlân thisenhai po po chu maichâma chun thè rawh. Dâr maichâm ruok hi chu aiennaa ka hmang ding maichâm nîng a tih" tiin a hril a. 16 Thiempu Uria chun Lal Ahaz thupêk ang tak chun a thaw a. 17 Lal Ahaz chun dâr maichâm sîr tuok inkhumna bang chu a hawk thlâk a, maihùnhai chu a tolnaa inthok chun a lâk son vong a. Dâra siem bawngchal chunga inthut tuizèng chu a lâk thlâk a, lung rem chungah a'n thut a. 18 Tempula Sabat ni poa a chung an zâr hlak chu a lâk hmang a, Assuria lal dit dàn angin, lal ina inthoka tempula lal lûtna kot khom chu a khâr bok a. 19 Lal Ahaz inlal laia thil tlung danghai le a thilthaw danghai chu Juda lalhai inlal laia an chanchin inziekna lekhabuah a chuong. 20 Ahaz chu a thlatuhai kuomah a chawl a, anni lai chun Davida khawpuiah an phùm a, a naupa Hezekia chun a lalna chu a hung hluo ta a.

17

1 Juda lal Ahaz inlala inthoka kum sawm le pahninaa chun Ela naupa Hosea chu Samaria khawpuiah Israel lalin a hung inthung a, kum kuo ro a rêl a. 2 LALPA mithmuin thil tha lo tak a thaw a, amiruokchu a hmaa lalhai ang èma nasa chun a thaw ve nawh. 3 Asuria lal Salmaneser-in a hung rûn a, sie khuoah a siem a, a kuomah sie a chawi hlak a. 4 Hosea chun a phier rûk a, Aigupta lal So kuomah mi a tir a, chu thu chu Asuria lalin a lo hriet bâkah kum tina a chawi hlak sie chu a hung pêk ta bok naw leiin Hosea chu Salmaneser chun a man a, lung inah a khum a. 5 Asuria lal chun a ram pumpui chu a hung rûn a, Samaria khawpuiah a hang fe a, kum thum zet a'n huol a. 6 Hosea inlala inthoka kum kuonaa chun Asuria lal chun Samaria khawpui chu a lâk a, Israelhai chu Assuria ram tieng salin a thuoi a, Hala rama dâm, Gozan rama Habor vadung phaia hai le Medes-hai khuoa dâm a'n umtir a. 7 Hienga Israelhai an hung umna san chu Aigupta lal Faraw kut hnuoia inthoka hung thuoi suoktu LALPA an Pathien chungah thil suol thaw a, 8 pathien danghai be a, an hmaa LALPAN a hnot suok hnam danghai khawsak dàn anga khawsa a, Israel lalhai ngeiin thil tha lo an hung chìng suok lei a nih. 9 Israelhai chun LALPA an Pathien theida zawng thil tha lo arûkin an thaw a; ralvêng bûk insàng le kula inhuon khuo taphotah an ta dingin hmun sàng an siem a. 10 Tlâng sàng tin le thing buk inzâr lien taphot hnuoiah lung milem le Asera lim hai an inngìr khep khup a. 11 An hmaa LALPAN a hnot suok hnam danghai ang bokin hmun sânga bawlhmun taphotah rimtui an inhlàn a. Chuong ang thil rilo chu an thaw leiiin LALPA lungsenna an cho suok a. 12 LALPAN, "Hieng thil hi thaw ve naw ro" ti sienkhom milem an biek a. 13 LALPA chun, "In um dàn suolhai mâksanin, zawm dinga ka siehlaw zawlneihai hmanga in pi le puhai ka pêk Dânhai po po le ka thupêkhai le thu suokhai chu zawm ro" tiin Israelhai le Judahai chu zawlnei tin le thil hmutheituhai chu hmangin LALPAN a hril hlak a. 14 Chuong sa khom chun an ngaithlâk nuom naw a, LALPA an Pathien ring zo nuom loin, an pi le puhai ang bokin, lulul an insuo ve a. 15 A thupêkhai le an pi le pua inthoka a thu lo thlunghai le an kuoma thu a lo inhriettirhai chu an hnawl a. Milem hmangna bo an zui a, mi hmangna boah an insiem a. LALPAN, "Anni ang chun thaw ve naw ro" lo ti sienkhom an kawl le kienga hnam danghai thaw dàn an làk a. 16 LALPA an Pathien thupêk po po nghatsanin milem pahni, bawngte lem an sung a, Asera lem thing an siem a, vâna ni le thla le arasihai an biek a, Baal bein a rong an bawl bok a. 17 An naupahai le naunuhai chu meiah an inhlàn a. Aien le dawi an chìng a, LALPA lungsenna cho phawk dingin a mithmuah thil suol thawin an inzor a. 18 Chuleiin, LALPA chu Israelhai chungah a lung a sen ta êm êm a, a mithmu phâk loah a son hmang dai a, Juda hnam chauh naw chu a um an um ta nawh. 19 Judahai khom chun LALPA an Pathien thupêk chu an zawm naw a, Israelhai thil chìng bok chu an hung chìng ve a. 20 LALPAN Israel thlahai hrim hrim chu a hnawl a, a hrem a, a mithmu phâk loa a son bo dai hma khat chun roktuhai kutah a pêk suok ta a. 21 Davida sûngkuoa inthoka Israel a lâk hmang chun an lal dingin Nebat naupa Jeroboam chu an siem a, Jeroboam chun Israelhai chu LALPA zui lo dinga zawr hmangin, suol nasa tak a'n thawtir a. 22 LALPAN a siehlaw zawlneihai po po hmanga a lo hril lawk tah anga a mithmu phâk loa a son bo dai tawl hma khat chu Israelhai chun Jeroboam suolna chu an thlathlam ngai nawh. 23 Chuongchun, Israelhai chu an rama inthokin Asuria ramah salin an thuoi a, tu chen hin an la um a nih. 24 Asuria lal chun Babulon, Kutha, Ava, Hamat le Sefarvaim khuoa mihai chu Samaria rama Israel thlahai hmun le hma hluo sip dingin a'n cha khawm a, Samaria ram chu an hung hluo a, an khuoa hai chun umhmun an khuor a. 25 An um hlim chun LALPA an chawibiek naw leiin ama chun anni lai sakeibaknei ruol a tir a, a then an se hlum a. 26 Chuongchun, Assuria lal kuomah, "Samaria ram hluo dinga i hung son hnamhai hin hieng lai ram Pathien biek dàn hi an hriet ve naw leiin ama chun anni lai sakeibaknei ruol a tir a, hieng lai ram Pathien biek dàn hre lohai chu an se hlum tawl a nih" tiin ripawt an thon a. 27 Asuria lal chun, "Samaria-a inthoka sala inthuoihai laia thiempu pakhat kha thuoi kîr unla, nangni lai um ve sien, chu ram Pathien biek dàn chu zirtir raw se cheu" tiin thu a pêk a. 28 Chuongchun, Samaria rama inthoka an thuoi laia thiempu pakhat chu Bethel khuoah a va um a, an thaw dàn ding a zirtir a. 29 Amiruokchu, hnam tinin khaw hrang hrangah anni puol senga ding pathien an siem a, Samaria mihaiin hmun sànga biekbûk an lo bawlhaia chun an sie a. 30 Babulona mihai chun Sukot Benot lim an biek a, Kuthahaiin Nergal lim an biek a, Hamat mihai chun Asima lim an biek a. 31 Avi mihai chun Nibhaz lim le Tartak lim an biek a, Sefarvit-hai chu Sefarvaimhai pathien Andramelek le Anamalek kuomah inthawiin an nauhai meiah an inhlàn hlak a. 32 LALPA an chawibieka chu hmun sànga an bawlhmuna hai anni aia inthawina inhlântu dingin thiempu an nuom nuom an ruot hlak a. 33 LALPA an chawibieka chu an hungna rama an chìng dàn ang sengin an pathienhai rong an la bawl zing tho. 34 Tu chen hin an chîng dàn pangngai an la thlâkthleng nawh. LALPA chawibiek an ni nawh, LALPAN Jakob, 'Israel' ti hminga a ko thlahai kuoma dàn le thu a pêkhai chu an zawm si naw leiin. 35 LALPAN Israelhai kuoma thu a thlung khan, "Pathien danghai be naw unla, an hmaah kûnin, an rong bawl naw unla, an kuomah inthawina inhlàn bok naw ro. 36 Kei LALPA, thilthawtheina nasa tak leh bân phar meua Aigupta rama inthoka thuoi suoktu cheu hi a nih in biek ding chu. A hmaa chun kun unla, a kuomah inthawina inhlàn ro. 37 In ta dinga ziek a thuruot hai, rorêl hai, dàn hai le thupêk hai chu fimkhur takin zawm hlak ro. Pathien danghai chawibiek naw ro. 38 Nangni le thuthlung ka siem kha theinghil naw unla, pathien danghai chawibiek naw ro. 39 LALPA in Pathien chauh chawibiek ro; ama chu in hmèlmahai kuta inthoka sansuoktu ding cheu chu a ni si a" tiin a lo hril a. 40 Amiruokchu, iengti kong khomin a thu chu an pom nuom chuong naw a, kha hmaa an ching dàn pangngai kha an la sunzom zing tho. 41 Chuongchun, hieng mihai hin LALPA be hai sienkhom an milemhai rong an la bawl zui zing bok a. Tu chen hin an tu le tehai chen khomin an pi le puhai thaw dàn angin an la thaw zing a nih.

18

1 Israel lal, Ela naupa Hosea inlala inthoka kum thumnaa chun Ahaz naupa Hezekia chu Juda lalin a hung inthung a. 2 Lal a hung ni chun kum sawmhni panga mi a na, Jerusalemah kum sawmhni le kum kuo a'n lal a. A nu hming chu Abija a na, Zekaria naunu a nih. 3 A pu Davida thilthaw dàn anga thaw vein, LALPA mithmuah thil tha a thaw hlak a. 4 Hmun sànga an bawlhmunhai chu a pei hmang a, an lungphunhai chu a vuok nawi a, Asera lem thinghai chu a phûr a. Chuong lai hun chen chun Mosie dâr rul siem Nehustan an tia chun Israelhaiin rimtui an la raw hlak leiin a vuok nawi vong a. 5 Hezekia chun LALPA, Israelhai Pathienah ringna a'n nghat a. Juda lalhai lai ama ang hrim a hma khomin, a hnung khomin an um ta nawh. 6 Nghet takin LALPA a chel tlat a, a zui zing a, LALPAN Mosie kuoma thu a pêkhai chu a zawm tlat bok a. 7 LALPA chun a umpui zing a, a thilthaw tinrêngah a hlawtling a. Assuria lal lakah a hel a, a thu a awi zing nuom ta nawh. 8 Râl vêng bûk le kul nei khuo Filistinhai ram chin po po chu Gaza chenin a hne vong a. 9 Lal Hezekia inlala inthoka kum lina, Israel lal Ela naupa Hosea inlala inthoka kum sarinaa chun Asuria lal Salmaneser chun Samaria khawpui chu a hung bei a, a'n huol a. 10 Kum thum an inhuol hnungin Asuria-hai chun an làk a. Samaria an lâk kum hi Israel lal Hosea inlala inthoka kum kuona a nih. 11 Asuria lal chun Israel mihai chu salah a thuoi a, Hala rama dâm, Gozan rama Habor vadung phaia dâm le Medes-hai khuoa dâm a'n umtir a. 12 LALPA an Pathien thu zawm loa a thuthlung, a siehlaw Mosie hmanga LALPAN thu a pêk po pohai chu an bawsiet leiin hieng thil hi an chungah a hung tlung a nih. LALPA thupêkhai chu an ngaithlàk nuom naw a, an thaw nuom bok nawh. 13 Hezekia inlala inthoka kum sawm le palinaa chun Asuria lal Senakerib chun Judai rama khuo, kula inhuonhai chu a hung bei a, a lâk a. 14 Juda lal Hezekia chun Lakis khuoa Asuria lal kuomah, "Ka lo suksuol a nih. Inhnûk kîr la, ka laka i thil ngiet po po chu pêng ka ti che" tiin thu a thon a. Asuria lal chun Juda lal Hezekia chu tangkaruo kilogram sîngkhat le rangkachak kilogram sângkhat chawi dingin a tuk a. 15 Hezekia chun LALPA Tempul le lal ina ro siekhawmnaa an nei po po chu a pêk a. 16 Hi tum hin Juda lal Hezekia chun LALPA Tempul kotkhâr le kotkhâr bieng tuomna rangkachakhai chen khom a khok fai vong a, Assuria lal a pêk a nih. 17 Asuria lal chun a sipai hotu lien tak tak pathum Tartan hai, Rabsari hai le Rabsakeb hai chu sipai tam tak leh Lakis-a inthokin Jerusalema lal Hezekia bei dingin a tir a. Jerusalem an tlung chun an tui lâkna kor chuonchunga tui kul, Puonsawptuhai Hmun panna lampuia chun an chawl a. 18 Chu taka inthok chun lal chu an hang ko a, lal in enkoltu lu tak Hilkia naupa Eliakim hai, lekha ziektu Sebna hai, chanchin ziektu Asaf naupa Joa hai chu an hung suok a. 19 Rabsake chun an kuomah, "Lal Hezekia kuomah hieng hin hril ro: 'Lal ropui tak Asuria lal chun hieng hin a tih: I ringsan, i'n nghatna hi ieng am a na? 20 Indonaa dingin remruot thiem le sipai hrât tak tak kan nei dâm i ti a, sienkhom kawk boa inpawt mei mei ang a nih. A tu am ringsanin ka lakah i hel ngam hrim hrim a na? 21 Tu hin ngai rawh, luong hmol por tah, kut chu ât thi thei, innghai chun mi sukhliem thei Aigupta ang mei mei chauh hi ka'n hnèmpui dâm i ti maw! Aigupta lal Faraw inhnèmpuituhai chan chu chuong ang char chu ni vong a tih. 22 Tu hin, 'Kan ringsan chu LALPA kan Pathien a nih' i ti dàm a ni chun, Judahai le Jerusalem mihai kuoma Hezekia'n, 'Jerusalema maichâm hmaa chauh hin in biek ding a nih' a ti leia hmun sànga a bawlhmun le maichâmhai po po a dehawnpêkpa kha a ni naw maw? 23 "Chuongchun, ka pu Asuria lal kuomah hung la, indawrpui rawh: a chunga chuong ding mi i hmu indai phot chun sakor sânghnih khom pêng ka ti che. 24 Aigupta mihai tawlailir le sakor chung chuonghai i ringsan ringota chu ka pu mihai laia hotu chîn tak khom hi i dang kîr zo ding am a ni? 25 Chu bakah, LALPA thu thang loin hi hmun hi bei le hne dinga hung am ka ni? LALPA ngei chun hi ram hi hang beia sukse dingin a mi hril a nih' tiin" a ta. 26 Hilkia naupa Eliakim le Sebna le Joa chun Rabsake kuomah, "Lunginsiet takin Aramik tongin mi hrilpêk rawh, i siehlawhai hin kan hriet thei tho si a; kul chunga umhai hrieta chu Hebrai tong chun mi be ta naw hram rawh" an ta. 27 Rabsake chun, "Ka pu chun in pu kuoma le nangni kuoma chauh hieng thu hi hril dingin a mi tir am a ni? Kul chunga thunghai, nangni le anni mani êk faa mani zun la dawn dinghai kuoma khom a mi tir naw am a ni?" a ta. 28 Chuongchun, Rabsake chu a ngîr a, Hebrai tongin inring takin a khêk a, "Lal ropui tak Asuria lal thu hi lo ngàithla ro. 29 Lal chun hieng hin a tih: 'Hezekia hlèm bawlin um naw ro, ama chun ka kuta inthokin a san suok thei naw cheu. 30 Hezekia chun, 'LALPAN mi san suok ngei a ta, hi khawpui hi Asuria lal kutah pêk ni naw nih' tiin LALPA chu ring dingin thu hne naw raw se cheu. 31 Hezekia thu ngai naw ro. Asuria lal chun hieng hin a tih: Mi'n rempui unla, ka kuomah hung inpe ro. Chuongchun, mi tinin mani huona grèp le theichang fain, mani tuibêl ngeia tui chu dawn zing thei in tih. 32 Chu chu nangni ram ang boka ram hnienghnâr, bu le uoiin thar tamna ram, bei le grèp tamna ram, oliv le khuoizu tamna rama ka thuoi hma cheua in khawsak dàn ding chu a nih. Thi nêkin hring thlang lem ro. Hezekian, 'LALPAN mi san him a tih' tia a thlêm cheu khomin a thu la naw ro. 33 Tu hnam pathienin am hi ram hi Asuria lal kuta inthokin a san suok ti in hriet ta hlak a? 34 Hamat le Arpad hai pathien kha khaw lai am an um zo ta a? Sefarvaim hai, Hena hai le Ivva hai pathienhai khom kha khaw lai am an um zo ta a? Samaria chu ka kuta inthokin an san him am a ni? 35 A tu ram pathienin am hi ram hi ka kuta inthokin an san suok thei ta hlak a? LALPA chun ka kuta inthokin Jerusalem khuo hi a san suok telul ding maw?' tiin" a ta. 36 Lal Hezekiain, "Anni chu don dêr naw ro" tia thu a pêk angin mihai chun ieng khom an hril nawh. 37 Chuongchun, Hilkia naupa Eliakim, lal in enkoltu lu tak le lekha ziektu Sebna le chanchin ziektu Asaf naupa Joa hai chu Hezekia kuomah an fe a, an puonhai an pot thlêr a, Rabsake thu hrilhai chu an hril sawng a.

19

1 Hezekian chu chu a lo hrietin a silfênhai a pot thlêr a, saiip a'n bel a, LALPA tempulah a lût a. 2 Lal in enkoltu lu Eliakim le lekha ziektu Sebna le thiempu upahai chu saiip inbelin Amoz naupa zawlnei Isai kuomah a tir a. 3 Anni chun a kuomah, "Hezekia-in hieng hin a tih: 'Voisun hi beidongna ni, invauna ni le hmaimawkna ni a na; naute pieng a hun ta sia a hring suokna dingin a nuin tha sang ding a nei ta si naw ang hi kan nih. 4 A pu Asuria lalin Pathien hring hrilsie dinga a tir Rabsake thu hrilhai po po chu LALPA i Pathien chun hre ngei a ta, a thu hriethai lei chun ama chu LALPAN la hal ve rawi nawnim. Chuleiin, hlaa la um sunhai ta dingin tongtaipêk rawh' tiin" a ta. 5 Hezekia mi tirhai chun Isai kuom an hung tlung a. 6 Isai chun an kuomah, "In pu chu hieng ang hin hril ro: 'LALPA chun hieng hin a tih: I thu hriet, Asuria lal hnuoia thoktuhai mi hrilsietna chu ti dêr naw rawh. 7 Ngai ta, a sûnga chun thlarau sieng ka ta, thuthang a hriet charin a ram tieng kîr nawk a ta, chu taka chun kawlhnàmin inthattir ka tih, a tih' tiin" a ta. 8 Rabsake chun Asuria lalin Lakis a suoksan ti a hrietin an hnûk kîr a, Libna khuo a lo bei lai chu a va hmu a. 9 Chuong lai bok chun Aigupta lal Kushc mi Tirhaka chu ama rûn dingin a hung ti Asuria lal Senakerib chun thu a dong leiin Hezekia kuomah mi a tir a, 10 "Hieng ang hin Juda lal Hezekia kuoma chun hril ro: 'I ring Pathien chun 'Jerusalem hi Asuria lal kutah pêk ni naw nih' tiin hlêm naw raw se che. 11 Asuria lalhaiin ram po po sukse vonga an chunga kut an thlâk dàn khom i hriet chieng kha. 12 An leh, nang hi san him ni bik dinga inngai i ni? Ka pi le puhaiin Gozan hai, Haran hai, Rezef hai le Tel Assar-a um Eden mihai an sukbohmang lai khan in hnam pathienhai chun an san suok a ni? 13 Hamat lal hai, Arpad lal hai, Sefarvaim khaw lal hai, Hena lal hai le Iva lal hai kha tu hin khaw lai am an um zo ta a?' tiin" thu a'n phurtir a. 14 Chu lekha a hmu chun Hezekian a hang tiem a, LALPA Tempulah a tlân lût a, LALPA hmaah lekha chu a phar a. 15 LALPA kuoma chun, "Aw LALPA, Israelhai Pathien, cherubhai inkâra lalthungphaa inthung, nang chauh hi hi hnuoia lalram po po chunga Pathien i nih. Hnuoi le vân hi nangma siem a nih. 16 Aw LALPA, i na lo dawin mi ngàithla hram rawh; aw LALPA, i mit mengin mi hung en ta; Senakerib-in Pathien hring a hrilsietna thu hi lo ngàithla hràm rawh. 17 "A nih, aw LALPA, Senakeribin hnam le ramhai a sukram nasatzie hi thudik a nih. 18 An pathienhai chu meiah a pei a, a suksiet a, chuonghai chu pathien an ni naw hrim a, mihriem kuta siem thing le lung mei mei an nih. 19 Chuleiin aw LALPA kan Pathien, nangma chauh hi LALPA Pathien i nizie hnuoia lalram po po hin an hriet theina dingin, a kuta inthokin mi hung san suok ngei rawh" tiin a tongtai a. 20 Chun, Amoz naupa Isai chun Hezekia kuomah, "LALPA, Israel Pathien chun hieng hin a tih: 'Asuria le Senakerib chungthua i tongtaina kha ka lo hriet. 21 A chungchang thua LALPA kalna thu chu hi hi a nih:" 'Zion nunghàk thienglâm chun, Hmusitin a nuizat che, Jerusalem naunu chun, I tlân siet lai a hmuin, A lu a thin khum che a nih. 22 Tu lak am i rawl suksàng a, Vauna le hrilsietna sàk suok a, Mit i hang meng sâng vèl chu?Israel Mi Thienghlim chungah. 23 I mi tirhai chu hmangin, LALPA chu i vau khawng a, 'Ka tawlailir tam tak leh, Tlâng sângah ka hung kai a, Lebanon tlâng sìp ka chuon a, An sidar thing insâng takhai, An far thing thá thàhai le chun, Ka nuom nuomin ka phûr a, An ram ril le ngaw thatna, Lût nawna hrim ka nei nawh. 24 Ram dangah tuikhur choin, An ram tuihai ka tlàn a; Aigupta vadungte po po, Kein ka pal kangpêk vong'Tiin i hril hlak a ni kha. 25 " 'Tiena tlânga inthokaKeiman ka lo ruot ta sa, Ka ruohmang ta sa lei a, Thil hung tlung a nizie hai, Khaw kula lungremhai khom, I sukchim hnèr hnûrzie hai, I hriet fûk naw a ni maw? 26 Tha nei lo mipuihai chu, Chi-aiin an muolpho a, Phûla hlo hna ang an na, Hna zîk dawng ang an ni a, In chunga hlo a hung mawng, A'n thang lien hmaa nisa'n, A em vuoi ang hi an nih. 27 " 'I chêngna hmun ka hriet a, I fe le hung ka hriet vong, Ka chunga i lungsen khom. 28 Ka chungah lung suksen a, Tong uong i mi thaw khum chu, Ka na'n a lo hriet leiin, I hnâr le i baua chun, Ka thîr bar inbûk ka ta, I hungna lama bok chun, In kîrtir nawk ka ti che'tiin" a ta. 29 Chun, Isai chun Hezekia kuomah, "I ta ding chun hienghai hi, Inchikna ding nîng a tih:Tu kum bu tuolto ring in ta, Kum nawk ring bok in tih. Kum thumnaah bu tuin, A ra khom sîk tang in ta, Grèp huonhai siem unla, A ra suokhai chu tlàn ro. 30 Hlaa la um Juda sûngkuo chun, Hnuoi tieng zung hung kei an ta, A lêr tieng ra insuong an tih. 31 Jerusalema inthokin, Hlaa umhai hung suok an ta, Zion tlânga inthokin, A dam sunhai hung suok an tih. Iengkim LALPA thahnemngaina zàrin, Chuong ang chun hlen suok a tih. 32 "Chuleiin, Assuria lal chungthua chun LALPAN hieng ang hin a hril:'Hi khawpui hi lût naw ni a, Thal khomin kâp bok naw nih. Phaw leh hung inlang naw ni a, Inhuolna ding hlàn daw naw nih. 33 A hungna lamah kîr nawk a ta, Hi khawpui hi lût naw nih, Ti hi LALPA thu suok a nih. 34 Keima zâr le ka siehlaw Davida zârin, Hi khawpui hi huol him ka tih'tiin" a ta. 35 Chu zân chun LALPA vântirko chu a'n thok suok a, Asuria-hai riebûka chun mi nuoi khat le sîngriet le sângnga a sukhlum a. Zîng tieng an hang tho chun mithi ruong ngot an lo ni el ta a. 36 Chuongchun Asuria lal Senakerib chun an riebûk chu a suoksan a, Ninevi khuoah a um a. 37 Chun, tempula an pathien Nisrok a biek laiin a nauhai pahnih, Adramalek le Sarezer chun kawlhnàmin an hung sât hlum a, Ararat ramah an tlàn lût a, a naupa Esarhadon chun a lalna chu a hung hluo ta a.

20

1 Chuong hun lai chun Hezekia chu thi ngamin a na a. Chun, Amoz naupa zawlnei Isai chun a hung kan a, a kuomah, "LALPA chun hieng hin a tih: 'Dam suok loin i thi ding a na, i sûngkuo um dàn ding rel fel rawh' tiin" a ta. 2 Hezekia chu bang tieng a ngha a, LALPA kuomah, 3 "Aw LALPA, i hmaah ringum tak le inpe fai thakin kal ka chawi hlakzie le i mithmua thil tha ka thaw hlakzie kha mi hrepêk zing rawh" tiin a tongtai a, namen loin a tap a. 4 Isai chun lal chu a mâksan a, sienkhom lal tuolzawl a khèl hma chun LALPA thu a hung tlung a, 5 "Kîr nawk la, ka mihai thuoitu Hezekia kuomah hieng hin hril rawh: 'LALPA, i pu Davida Pathien chun hieng hin a tih: I tongtaina kha ka lo hriet a, i mitthli tlâk khom ka hmu a. Ngai ta, sukdam ka ti che a, ni thum niah LALPA Tempulah fe pei nawk tâng i tih. 6 Chun, i dam sùng kum khom kum sawm le kum ngain suksei ka ta, nang le hi khawpui hi Asuria lal lakah san him ka ta, keima zâr le ka siehlaw Davida zârin hi khawpui hi huol him bok ka tih, a tih' tiin" a ta. 7 Chun, Isai chun a kuomah, "Theichang hmet hnàk kha hung la ro" a ta, a khuoihlia chun a bel a, a hung dam nawk ta a. 8 Chun, Hezekia chun Isai kuomah, "LALPAN mi sukdam a ta, LALPA Tempulah ni thum niin ka hang kai nawk ta ding a nih ti inchikna iem nîng a ta?" a ta. 9 Isai chun, "LALPAN a sukdam ngei ding che a nih ti i ta dinga LALPA laka inchikna chu hi hi nîng a tih: hlim chu sirbi sawm chen intawl tung am i nuom, an naw leh sirbi sawm chen intawl kîr lem?" a ta. 10 Hezekia chun, "Sirbi sawm chen intawl tung chu thil olsam a na, sirbi sawm chen intawl kîr lem raw se" a ta. 11 Chuongchun, zawlnei Isai chun LALPA a hang ko a, LALPA chun lal Ahaz sirbi siema hlim chu sirbi sawm a'n tawl kîrtir a. 12 Chuong lai chun Babulon lal Baladan naupa Merodak Baladan chun Hezekia damnaw thu a lo hriet leiin lekhathon le thilpêk inchawitirin mi a tir a. 13 Hezekia chun anni chu a lo lawm a, a thil hlu siena po po dâm, tangka le rangkachak dâm, rimtui dâm, hriek hlu tak dâm, râlthuom a siena dâm le a ina ro um po po chu a'n entir a; a ina mi le a ram sûnga thil inentir naw hrim a nei nawh. 14 Chun, zawlnei Isai chu Hezekia kuomah a fe a, "Hienghai hin iem an hril a, khaw laia inthoka hung am an na?" tiin a'n don a. Hezekia chun, "Ram hla tak, Babulona inthoka hung an nih" a ta. 15 Zawlnei chun, "I ina hin ieng ieng am an hmu ta a?" a ta. Hezekia chun, "Ka in sûnga thil um po po hi an hmu vong ta a, ka ro laia mi inentir naw hrim hrim a um nawh" a ta. 16 Isai chun Hezekia kuomah, "LALPA thu hi lo ngàithla raw khai. 17 'Ngai ta, i in sûnga um po po le voisun chena i pi le puhai ro khawl khawmhai chu Babulon tienga an fepui ni la hung tlung a ta, ieng khom mâksan hrim nei naw ni hai' LALPAN a tih. 18 'Chun, i thlahai, nangma taksa le thisen put ngei la hung pieng dinghai laia mi ngei khom la thuoi hmang an ta, Babulon lal ina an sor mi tilrehai lai la thang vêng an tih' a tih" a ta. 19 Hezekia chun Isai kuomah, "LALPA thu i hril hi a tha" a ta. Ama bokin, "Ka dam sûng muongna le himna a um phot chun" a la ti nawk nghal a! 20 Hezekia inlal sùnga thil tlung danghai, a thilthawhai po po, khawpuia tui lâkna kor siema tui a lâk lût dânhai po po chu Juda lalhai inlal lai chanchin inziekna lekhabuah a chuong. 21 Hezekia chu a thlatuhai kuomah a chawl a, a naupa Manase chun a lalna chu a hung hluo ta a.

21

1 Lal a hung ni chun Manase chu kum sawm le pahni mi chauh a la ni a, Jerusalemah kum sawmnga le kum nga ro a rêl a. A nu hming chu Hefziba a nih. 2 Israelhai hmaa LALPAN hnam a hnot suokhai thil chìng tirdakum takhai chu thaw vein LALPA mithmuah thil tha lo takhai a thaw hlak a. 3 A pa Hezekia-in a thiek ta hnung hmun sànga an bawlhmunhai chu a'n din thar nawk a; Israel lal Ahab thaw dàn angin Baal ta dingin maichâm a siem a, pathiennu Asera lim thing a siem a, vâna ni le thla le arasihai a biek a, an rong a bawl a. 4 LALPAN, "Jerusalemah ka hming inumtir ka tih" a tina hmuna chun maichâm hrang hrang a siem a. 5 LALPA tempul inhuonna sùng tuol zawl pahnia chun vâna um po po ta dingin maichâm a siem a. 6 A naupa ngei chu meia inthawinaah inhlânin, dawithiem a hmang a, aisan thiemhai a ruoi a, rau ko thiem le be thiemhai a rawn hlak a. Chuong ang chun thil suol tak el thawin LALPA suklungsen dingin a cho phawk hlak a. 7 LALPAN Davida le Solomon kuoma, "Hi Tempul le Israel hnamhai hmun po po laia ka thlang suok Jerusalema hin kumkhuoin ka hming inumtir ka ta, 8 ka thupêk po po le ka siehlaw Mosie-in Dàn a pêkhai po po kha an zawm phot chun, an pi le puhai ka pêk tah rama inthok hin Israelhai ke chu inpên suoktir ta naw ning" a lo ti ta sa hmuna ngei chun Asera lim thing kerhai chu a sie a. 9 Mipuihai chun LALPA thu an zawm naw a, Manase chun a thuoi hmang tawl a, Israelhai hmaa LALPAN a hnot suok hnamhai nêk hmana nasain thil tha lo an thaw a. 10 Chun, LALPAN a siehlaw zawlneihai hmangin thu a hril a: 11 "Juda lal Manase hin hieng thil suol tirdakum tak hi a thaw a. A hmaa Amor mihai nêk hmanin thil suol a thaw nasa lem a, milem bieknaah Judahai a thuoi lût a. 12 Chuleiin, LALPA, Israelhai Pathien chun hieng hin a tih: 'Ngai ta u, a hre taphot na khawk rum rum khopin Jerusalem le Judai ram chungah sietna ka hung intlungtir ding a nih. 13 Samaria ka hremna ang le Israel lal Ahab le a sûngkuohai chunga ka thaw ang charin Jerusalem chunga khom thaw vêng ka ta, miin thlêng a hrûk faia a'n khup angin, Jerusalem chu hrût fai ka ta, inkhup ka tih. 14 Ka rochana ka la hlà sunhai khom zâmsan ka ta, an hmèlmahai kutah pe suok ka tih. 15 Aiguptaa inthoka an pi le puhai ka thuoi suoka inthokin voisun ni chen hin ka mithmuah thil suol an thaw a, ka lung suksen dinga an mi cho phawk leiin an hmèlmahai po poin rok an ta, suom an tih' tiin" a ta. 16 Chu bâkah, Manase chun thil suol tak tak thawin, Judahai chu milem a'n biektir el chauh khom ni loin, poi tawk lo mi a that rawn êm êm a, Jerusalem khaw dung le le vaiah an thisen a luong nguoi nguoi a nih. 17 Manase inlal laia thil tlung danghai, a thilthawhai le a suol thawhai chu Juda lalhai inlal lai chanchin inziekna lekhabuah a chuong. 18 Manase chu a thlatuhai kuomah a chawl a, a lal ina huon, Uza huona chun an phûm a, a naupa Amon chun a lalna chu a hung hluo ta a. 19 Lal a hung ni chun Amon chu kum sawmhni le kum hni mi a nih; Jerusalemah kum hnih a'n lal a, a nu hming chu Mesulemet a na, Jotba khuoa Haruz naunu a nih. 20 A pa Manase ang bokin LALPA mithmuah thil suol a thaw a. 21 A pa lampui hraw po po a hraw ve a, milemhai bein an rong a bawl a. 22 LALPA, a thlatuhai Pathien chu a mâksan a, LALPA lampui hrim a hraw nawh. 23 A thoktuhaiin Amon chu an phier rûk a, lal inah an that a. 24 Chu zoah mipuiin lal Amon phiertu po chu an that vong a, a naupa Josia chu ama hmunah lalah an sie a. 25 Amon inlal sûnga thil tlung danghai le a thilthawhai po po chu Juda lalhai inlal lai chanchin inziekna lekhabuah a chuong. 26 Ama thlân Uza huona chun an phûm a, a naupa Josia chun a lalna chu a hung hluo ta a.

22

1 Lal a hung ni chun Josia chu kum riet mi a ni a, Jerusalemah kum sawmthum le kum khat ro a rèl a. A nu hming chu Jedida a na, Bozkat khaw mi, Adaia naunu a nih. 2 LALPA mithmuah thil tha a thaw a, a pu Davida lampui po po a hraw a, voi tieng amanih chang tieng amanih a pêtsan nawh. 3 Josia inlala inthoka kum sawm le parietnaah Mesulam naupa Azalia naupa Safan, lekha ziektu chu lalin LALPA Tempula chun a tir a. 4 "Thiempu laltak Hilkia kuomah hang fe la, mihaiin LALPA Tempula tangka an hung chawi, kotkhâr vêngtuin a lo lâk khawmhai chu lo tiem fel dingin hang hril rawh. 5 Tangka chu LALPA Tempul ripêra thoktuhai inrawitu kuomah inhlàn hai sien, 6 LALPA Tempul ripêrtu karpentar hai, in bawltu mistiri hai le lung sertuhai hlaw bâkah Tempul bawlnaa hmang ding thing le lung ser sa inchawkna dingin hmang raw hai se. 7 Tangka an pêk suok chu indik taka an hmang hlak leiin an hmang dàn en zui dinga an inchik khom ngai chuong lèm naw nih" a ta. 8 Chun, thiempu laltak Hilkia chun lekha ziektu Safan kuomah, "LALPA Tempulah Dàn Bu ka hmu suok tlat el!" a ta. Dàn bu chu Safan a pêk a, a tiem a. 9 Lekha ziektu Safan chun lal kuomah, "I mihai chun Tempula tangka um po chu an lâk suok a, LALPA Tempul bawltuhai le inrawituhai kuomah an pêk tah" a ta. 10 Chun, lekha ziektu Safan bok chun, "Thiempu Hilkia-in lekhabu a mi lo pêk annawm" tiin lal chu a hril a, lal hmaa chun a hang tiem a. 11 Lalin Dàn lekhabu thuhai a hang hriet chun a lal puon a pot thlêr a. 12 Thiempu Hilkia hai, Safan naupa Ahikam hai, Mikaia naupa Akbor hai, lekha ziektu Safan le lal enkoltu Asaia hai kuoma chun thu a pêk a: 13 "Fe unla, hi lekhabu hmu suoka um sûnga thu chuong, keima le mipui le Judahai po po inchûk dinghai chu LALPA mi va rawnpêk ro. Hi lekhabu thuhai hi ei pi le puhai khan an lo zawm naw leiin ei chunga LALPA lungsenna chu a'n ling ta hle a nih; eini chungthua zieka umhai angin an lo khawsa si naw a" a ta. 14 Chuongchun, thiempu Hilkia hai, Ahikam hai, Akbor hai, Safan hai le Asaia hai chu lal silfên enkoltu Harhas naupa Tikva naupa Salum nuhmei, zawlnei Hulda, Jerusalem vèng thara um kuoma chun an fe a, an va biek a. 15 Ama chun an kuomah, "LALPA, Israel Pathien chun hieng hin a tih, 'Ka kuoma hung tirtu cheu chu hieng hin hril ro: 16 LALPAN hieng hin a tih: 'Ngai ta u, lalin a tiem lekhabua inziek dàn ang tak khan, hi hmun le a sûnga chênghai chunga hin sietna ka hung intlungtir ding a nih. 17 Mi nghatsan a, pathien danghai kuomah rimtui inhlàn a, an kut ngeia an siem milemhai chun ka lungsenna an cho suok leiin, ka lungsenna chu hi hmun laka hin chok a ta, mit el thei naw nih' tiin. 18 LALPA indon dinga hung tirtu cheu Juda lal kuoma chun hieng hin hril ro: 'I thu hriet chungchang thua LALPA, Israelhai Pathien hril chu hi hi a nih: 19 Hi hmun le a sûnga chênghai hi tongsephur le sukdara an um ding thu i lo hrietin i lungril i suknêm a, LALPA hmaah i'n ngaitlawm a, i puonhai pot thlêr a, ka hmaah i tap leiin, keikhomin i thu chu ka lo ngàithlâk a nih, LALPAN a tih. 20 Chuleiin, i thlatuhai kuomah thuoi ka ti che a, thlamuong taka vui liemin um i ta, hi hmuna sietna ka hung intlungtir dinghai po po chu i mitin hmu ve naw ti nih' tiin" a ta. Chuongchun, chu thu chu lal kuomah an hung hawn a.

23

1 Chuongchun, lal chun Judai ram le Jerusalema upahai po po chu a ko khawm a. 2 Judai rama mi po po, Jerusalema mi po po, thiempuhai le zawlneihai le mipui, a chîn taka inthoka a lien tak chen chu thuoiin LALPA Tempulah a fepui a, LALPA Tempula an lekhabu hmu suok thuthlung bua chuong thuhai chu an hriet ngeiah a tiem suok a. 3 Lal chu ban hrûlah a ngîr a, chu lekhabua chuong thuthlung chu namnghet nawk ding le chu thu anga lungril po po le thlarau po poa LALPA zui ding le a thupêk hai, a thu inhriettir hai le a thuruot hai chu zawm dingin LALPA hmaah thu a thlung thar a, mipui po po khomin thuthlung chu zui dingin an intiemkam a. 4 Lal chun thiempu laltak Hilkia le a dottu thiempuhai le kotkhâr vêngtuhai chu LALPA Tempul sûnga Baal hai, Asera hai le vâna thil umhai po po biekna dinga siem mi lim le bûr le bèlhai chu la suok vong dingin thu a pêk a, Jerusalem khaw kawl, Kidron phùla chun an raw hmang a, a vâphai chu Bethelah an fepui a. 5 Juda lalhaiin Judai ram khaw hrang hrang le Jerusalem le a se vel hmun sànga milem betuhai ta dinga rimtui inhlàntu dinga thiempu an ruothai po po le Baal hmaa dâm, ni le thla le arasi le vâna thil umhai po po kuoma dâm rimtui inhlàntu thiempuhai po po chu a sukbohmang vong a. 6 LALPA Tempula Asera lim thing chu Kidron vadungah a lâk thlàk a, an raw a, an rawt dip vong a, a diphai chu vântlâng thlânmuolah an the dar a. 7 Tempula nuhmeiin Asera ta dinga puon an khawngna, a nuhmei a pasala inzor ruol um khawmna inhai chu a thiekpèk bok a. 8 Judai ram Geba le Beersheba inkâr khaw hrang hranga thiempuhai po po chu a thuoi khawm a, rimtui an inhlànna hmun sànga bawlhmun po po chu a suksiet vong a. Khawpui lûtna kotsuo voi tienga khawpui optu Josua-in kotkhâr a bawl bula sakel huoi an biekna hmun sànghai po po chu a sukchim vong bok a. 9 Chuong hmun sànga thiempuhai chun Jerusalema LALPA maichâmah rong bawl ve thei naw hai sienkhom, thiempuhai lai chol thang lo bei an fâk ve hlak a nih. 10 Molek kuoma meia inthawinaa an naupa le naunu hai an inhlàn ta nawna dingin Ben Hinom ruoma an inthawina hmun Tofet chu a suksiet a. 11 Juda lalhaiin nisa kuoma inhlân ding sakor an pêkhai chu LALPA Tempul lûtnaa kotkhâr bula lal in vêngtu Nathanmelek pindana inthoka hla lo teah a son hmang a, an nisa pathien an keina tawlailirhai chu a raw bok a. 12 Chun, Ahaz insawng chung zawla Juda lalhai maichâm siemhai le Manase-in LALPA Tempul inhuonna sûng kot zawl hmun hnia maichâm a siemhai chu lal chun a sukchim a, a vuok nawi vong a, a nawihai chu Kidron vadungah a pei a. 13 Chun, Jerusalem sak tienga Sietna Muol sim tienga Sidonhai pathiennu tirdakum Astoret ta ding dâm, Moab-hai pathien tirdakum Kemos ta ding dâm, Amon-hai pathien tirdakum Molek ta ding dâma Israel lal Solomon-in hmun sàng a siemhai po po chu a sukchim a. 14 Josia chun an lungphunhai chu a vuok koi vong a, Asera lim thinghai chu a phûr thlùk a, chuong bawlhmunhai po poa chun mihriem ru a sie a. 15 Israelhai thil suol inthawtirtu Nebat naupa Jeroboamin Bethela maichâm le hmun sàng a siemhai chen chun a sukchim a, a raw a, a rawt nawi vong a, Asera lim thinghai khom chu a raw a. 16 Chun, Josia chu a hang ngha vel a, tlânga thlânhai chu a hmu a, thlâna ruhai chu a va'n lâktir a, chuong ang thu chu Pathien miin a lo hril lawk ang ngeiin, maichâma chun ruhai chu a raw a, a suksiet a. 17 Lal chun, "Saw saw tu lungphun am a na?" tin a'n don a. A khaw mihai chun, "Pathien mi, Judai rama inthoka hung, Bethela maichâm chunga i thaw tah hi a hung tlung ding thu lo hril lawktu a nih" an ta. 18 Lal chun, "Sawng son um raw se. Tu khomin a ruhai la son naw raw se" a ta. Chuongchun, a ruhai chu Samaria inthoka zawlnei hung ruhai le chun ieng khom an thaw ve nawh. 19 Bethela a thaw ang chiein Israel lalhaiin LALPA suklungsena an bawl Samaria ram khuo po poa hmun sànghai le an bawlhmun po po chu Josia chun a thiek vong a. 20 Chun, hmun sànga thiempuhai po po chu maichâm chungah a that a, mihriem ruhai chu a raw a, Jerusalem tieng a kîr nawk ta a. 21 Lal chun mi po po kuomah, "Hi thuthlung bua chuong ang hin LALPA in Pathien ta dingin Fekân Kût hmang ro" tiin thu a pèk a. 22 Israelhai chunga rorêltuhaiin ro an rèla inthok le Israel lalhai le Juda lalhai inlal sûngin chuong ang chun Fekân Kût an la hmang ropui ngai nawh. 23 Lal Josia inlala inthoka kum sawm le parietnaa chun Fekân Kût chu Jerusalemah LALPA ta dingin an nei nawk ta chauh a nih. 24 LALPA tempula thiempu Hilkia hmu suok lekhabua dàn thuin a phùt ang takin Josia chun rau ko thiem le dawi thiemhai le in tina an pathien limhai, milemhai le thil tirdakum po po chu Judai ram le Jerusalema inthokin a sukbo vong a. 25 Mosie dàn anga lungril po po, thlarau po po le hrâtna po poa LALPA rong Josia anga bawltu hi a hma khomin a hnung khomin lal an um ngai nawh. 26 Chuong sa khom chun Manase-in LALPA a lo suklungsenna po po leiin Judahai chunga a lungsenna chu a la rè chuong nawh. 27 Chuongchun, LALPAN, "Israel ka son bo ang bokin Judahai khom hi ka hmu phàk loah la son bo vêng ka tih, hi khuo, ka thlang Jerusalem ngei el, 'Chutaka chun ka hming chu um a tih' ka ti le Tempul ngei khom hi hnawl ka tih" a la ti zing a nih. 28 Josia inlal sûnga thil tlung danghai le a thilthaw po po chu Juda lalhai inlal lai chanchin inziekna lekhabuah a chuong. 29 Josia inlal lai hin Aigupta lal Faraw Neko chu Asuria lal thangpui dingin Eufretis vadung chen a hang fe a. Lal Josia chun lo bei dingin a'n thok suok a, Neko leh an inbei a, Josia chu Megido-ah a lo that a. 30 Josia siehlawhai chun a ruong chu Megido-a inthokin Jerusalem tieng tawlailirin an phur tung a, ama thlâna chun an phûm a. A ram mipuihai chun Josia naupa Jehoahaz chu an thuoi a, hriek an nàl a, a pa lalna chu a hung hluo ta a. 31 Lal a hung ni chun Jehoahaz chu kum sawmhni le kum thum mi a na, Jerusalemah thla thum a'n lal a, a nu hming chu Hamutal, Libnaa inthoka hung, Jeremia naunu a nih. 32 A puhai ang bokin LALPA mithmuah thil suol a thaw a. 33 Jerusalema inthoka a'n lal thei nawna dingin Faraw Neko chun Hamat ram Ribla-ah khaidietin a thlung a, a ram chu tangkaruo kilogram sângthum le zali le rangkachak kilogram sawmthum le pali a'n chawitir a. 34 Faraw Neko chun Josia naupa Eliakim chu a pa Josia aiin a'n laltir a, a hming chu Jehoiakim tiin a thlàkpêk a. Jehoahaz ruok chu Aigupta ramah a thuoi a, chu taka chun a thi ta a. 35 Jehoiakim chun Faraw Neko tuk zât tangkaruo le rangkachak a pêk a, chu chu a pêk theina dingin a ram mihaia inthok chun an neinung dàn zirin sie an chawitir a, tangkaruo le rangkachak an chawi zât ding a tuk a. 36 Jehoiakim an lal chun kum sawmhni le kum nga mi a na, Jerusalemah kum sawm le kum khat a'n lal a, a nu hming chu Zebida a na, Ruma khaw mi Pedaia naunu a nih. 37 Chun, a pi le puhai thaw dàn angin, LALPA mithmuah thil suol a thaw hlak a.

24

1 Jehoiakim inlal lai chun Nebukadnezzar, Babulon lalin a hung rûn a, Jehoiakim chu sie khuoah a siem a, sienkhom kum thum a um hnung chun a lungril a thlâk a, Nebukadnezzar laka chun a hel a. 2 LALPA chun ama do dingin Babulon hai, Aram hai, Moab hai le Amon hai chu a tir suok a. LALPA thu, a siehlaw zawlneihai a lo inpuongtir tah anga Judai ram chu sukse dingin a tir tawl a nih. 3 Manase thil suol thaw po po lei le Jerusalemah poi tawk lo mi a that teuh leiin LALPAN a ngaidam nuom naw a, 4 a hmu phâk loa anni chu son hmang dingin hieng thil hi Judahai chungah LALPA thupêkin a'n tlungtir a nih. 5 Jehoiakim inlal laia thil tlung dang le a thilthawhai chu Juda lalhai inlal laia an chanchin inziekna lekhabuah a chuong. 6 Jehoiakim chu a thlatuhai kuomah a chawl a, a naupa Jehoiachin chun a lalna chu a hung hluo ta a. 7 Babulon lalin Eufretis vadunga inthoka Aigupta ruom chen chu a ramah a siem vong leiin Aigupta lal chu a rama inthokin mi rûn dingin a'n thok suok nawk ta ngai nawh. 8 Jehoiachin a hung inlal chun kum sawm le pariet mi a na, Jerusalemah thla thum a'n lal a, a nu hming chu Nehusta a na, Jerusalem mi, Elnathan naunu a nih. 9 A pa thaw dàn ang bokin LALPA mithmuah thil suol a thaw hlak a. 10 Chuong lai chun Nebukadnezzar mihai chu Jerusalemah an hang fe a, khuo chu an inhuol a. 11 An inhuol lai chun Nebukadnezzar chu Jerusalema chun a hang fe a. 12 Juda lal Jehoiachin chu a nu hai, a mi hai, a thoktu hai, a khawnbawl hai le rongbawltu hai leh a kuoma chun an hung inpèk a. Babulon lal inlala inthoka kum rietnaa chun Jehoiachin chu a man a. 13 LALPAN a lo hril tah angin, Jerusalema LALPA Tempula rosum po po le lal ina thil hlu po po chu a lâk a, LALPA Tempula Israel lal Solomonin rangkachak bûr le bêl a siem po po chu a hawn vong a. 14 Jerusalema mi po po, mi lien po po, mi hrât le huoisen po po le kut themthiem le thil siem thiemhai po po chu mi sîngkhat zet salah a thuoi a. A rama mi rethei mong khawnhai chauh an mâksan a nih. 15 Nebukadnezzar chun Jehoiachin chu Babulon tieng a thuoi a, a nu hai, a nuhmei hai, a thoktuhai le mi challang po po chu a thuoi sa bok a. 16 Sipaia thang tlâk mi sângsari le kut themthiem le thil siem thiem mi sângkhat zet a thuoi a nih. 17 Jehoiachin pate Matania chu a aiin lalah a sie a, a hming chu Zedekia tiin a thlâkpèk a. 18 Zedekia a hung inlal chun kum sawmhni le pakhat mi a na, Jerusalemah kum sawm le kum khat a'n lal a, a nu hming chu Hamutal a na, Libna khaw mi Jeremia naunu a nih. 19 Jehoiakim thaw dàn po po chîng vein, LALPA mithmuah thil suol a thaw hlak a. 20 LALPA lungsenna leiin Jerusalem le Judahai chungah hieng po po hi a hung tlung a, a tawpah a hmu phâk loah a hnawl hmang tawl ta a. Chuongchun, Zedekia chu Babulon lal chunga chun a hel ta a.

25

1 Zedekia inlala inthoka kum kuona, thla sawm le ni sawma chun Babulon lal Nebukadnezzar chun a sipai po po thuoiin Jerusalem a hang bei a, umhmun an khuor a, dâi an inhuon khum vong a. 2 Zedekia inlala inthoka kum sawm le pakhatna chenin khuo chu an inhuol a. 3 Thla lina, ni kuo ni chun khuo chu an tàm ta êm êm a, fâk ding hrim hrim a um ta naw a. 4 Chuongchun, khawpui inhuonna bang chu an ver pop a, Babulon sipaihaiin khuo chu inhuol vong hai sienkhom, zâna chun sipai po po chu lal huon bul, kul bang inthuo inkâra chun an inrel suok vong a, Araba tieng panin an fe a. 5 Amiruokchu, Babulon sipaihai chun an hnot zui a, lal chu Jeriko phaiah an hnot phâk a, a sipaihai chu an tlân dar ta vong a. 6 Chuongchun, lal chu an man a Babulon lal kuomah Ribla khuoah an thuoi a, a chungchang an rêl a. 7 Zedekia mithmu ngeiah a nauhai chu an that a, ama chu a mit pahniin an khel dok a, dâr kol an inbuntir a, Babulon tieng an fepui ta a. 8 Babulon lal Nebukadnezzar inlala inthoka kum kuona, thla ngana ni sari ni chun lal vêngtu kawmandar Nebuzaradan chu Jerusalemah a lût a. 9 LALPA tempul le lal in le Jerusalema in po po chu a raw a, in poimaw po po chu raw fai lo a nei nawh. 10 Babulon sipai po po chun lal vêngtu kawmandar inrawina hnuoiah Jerusalem inhuonna kul bang chu an sukchim vong a. 11 Khawpui sûnga mi la umhai chu Nebuzaradan chun salah a thuoi vong a. 12 A rama mi rethei mong khawnhai ruok chu vêngtu pawl kawmandar chun grèp huon enkoltu ding le loa sinthawa sor dingin a mâksan a. 13 Chun, LALPA Tempula dâr ban hai le dâr tuizêng le a'n thutnahai chu Babulon mihai chun an sukkoi vong a, dâr chu Babulon tieng an hawn a. 14 Chun, bêl hai, vutluo hai, khawnvar phita chep ruolna hai, haihaw hai le dâr bûr le bèl po po, rongbawlna dinga an hmanghai chu, an lâk a. 15 Chun, mei lâkna hai, maihûn hai le tangkaruo le rangkachaka siem hrim hrim chu lal vêngtu kawmandar chun a lâk vong a. 16 Solomonin LALPA Tempula dinga a'n siemtir dâr ban pahni le dâr tuizeng le a'n thutna hai chu hang bûk ruol khom a ni nawh. 17 Ban pahni chu intiet char a na, meter rieta insang ve ve a na, a sîpa chun dâra sung a kheibawk a um ve ve a, chu dâr sung kheibawk insângzie chu meter 1 18 Vêngtu pawl kawmandar chun thiempu laltak Seraia le a dottu Zefania le kotkhâr vêngtu pathumhai chu salah a thuoi a. 19 Khawpuia la um zinghai lai chun sipai hotu hai, lal khawnbawl panga hai, lal ina lekha ziektu hai, sipai dinga mi latuhai laia hotu le a rawihai mi sawmruk chu khaw sûnga chun an man bok a. 20 Vêngtu pawl hotu Nebuzaradan chun anni chu thuoi a, Babulon lal kuomah Ribla khuoa chun a thuoi a. 21 Hamat ram, Riblaa chun lal chun a'n sukhlumtir vong a. Chuong ang chun, Judahai chu an rama inthoka hla takah sala thuoiin an lo um tah a nih. 22 Nebukadnezzar chun Judai rama an mâksanhai optu dingin Safan naupa Ahikam naupa Gedalia chu a ruot a. 23 Chuongchun, sipai pawl hotu po po le an rawihaiin Babulon lalin optuah Gedalia a sie ti an hriet chun Mizpa khuoah Gedalia kuomah an hung a, chuonghai chu Nethania naupa Ismael hai, Karea naupa Johanan hai, Netofat mi Tanhumet naupa Seraia hai, Makat naupa Jazania hai le an mihai an nih. 24 Gedalia chun chuong mihai le an rawihai kuoma chun inkhâm meuin, "Babulon sorkar mi lienhai hi ti naw ro. Hi rama hin chêng unla, Babulon lal hnuoiah um unla, in ta dingin thàng a tih" tiin a lo thlamuong tawl a. 25 Amiruokchu, thla sarinaa chun lal thlaa mi, Elisama naupa Nethania naupa Ismael chun mi sawm Mizpa-ah a thuoi a, Gedalia chu a that a, a bula um Juda mi le Babulon mi umhai chu a that vong a. 26 Chu phing leh mi po po chu a chin a lienin, sipai hotuhai leh Babulon mihai chu an ti leiin Aigupta ramah an tlàn ta vong a. 27 Babulon sala Juda lal Jehoiachin intânga inthoka kum sawmthum le pasarina, thla sawm le thla hnina, ni sawmhni le ni sari ni chun Evil Merodak chu Babulon lalah a hung um a, Jehoiachin chu tâng ina inthokin a thuoi suok a. 28 Ngilnei takin a biek a, Babulona a kuoma um lalhai nêka inzaumin a sie a. 29 Jehoiachin chun a saltângna zakuo chu a hlîp a, a dam sûng po chun lal bulah thlaithlêng a kîl ve ta a. 30 Jehoiachin dam sung po chun ni tina ama inenkolna tawk somdawlna lal chun a pêk hlak.