1

1 Juda lal Jehoiakim inlala inthoka kum thumnaa chun Babulon lal Nebukadnezzar chu Jerusalemah a hung a, a'n huol a. 2 LALPA thuin Juda lal Jehoiakim chu a man a, Pathien ina bûr le bèl thenkhat khom a lâk sâ bok a, chuonghai chu Babulon tieng a pathien inah a hawn a, rosum sie khawmnaa chun a sie a. 3 Chun lal chun Israelhai lal thla le milien nauhai, tlangvàl pieng fel le hmêl tha, 4 thil hrang hrang inchûk thei dinga lungvar nei, hrietna nei tha, thil man zung zung thei mi le lal ina thok tlâk mi ni dinghai chu thlang suok a, Kaldai tong le an thu le hla inchûktir dingin a lal ina thoktuhai po po hotu Aspenaz chu thu a pêk a. 5 Ni tina an fâk le dawn ding bu le uoiin chu lal chokaa inthoka mi ngèi pe dingin lal chun thu a pêk bok a. Chuong anga kum thum a zirtir hnung chun lal hmaah an inlang ding a nih. 6 Chuong an mi thlanghai chu Juda thlaa mi Daniel hai, Hanania hai, Misael hai le Azaria hai an nih. 7 Lal ina hotu chun an hming thar ding a sakpêk a, Daniel chu Beltesazar a'n bùk a, Hanania chu Sadrak, Misael chu Mesak, Azaria chu Abednago a'n bûk bok a. 8 Daniel ruok chun lal bu le uoiin-a insukporchè naw a tum tlat leiin lal in hotu kuoma chun chuong anga insukporchè lo dinga phalna chu a hni a. 9 Pathienin Daniel chu a hotu ditsakna le lunginsietna a'n dongtir a. 10 Sienkhom, hotu chun Daniel kuomah, "In fàk le dawn ding ruottu ka pu, lal hi ka ti a nih. Nakie hin nangni kum ruolpuihai nèka se lemin hung hmu sien cheu iem mi law tâng a ta? Lal chun nangni leiin ka lû la ngêi a tih" a ta. 11 Daniel hai, Hanania hai, Misael hai le Azaria hai enkoltu dingin lal ina hotu tak chun mi pakhat a ruot a. Daniel chun a kuomah, 12 "I siehlawhai hi ni sawm sûng mi ensin rawh. Chu sûng chun fàk ding thlai le dawn ding tui chauh naw chu thil dang mi pe naw rawh. 13 Chu zoah kan hmèl le lal bu fatuhai hmèl enkhì la, i hmu dàn angin i siehlawhai chunga hin thaw rawh" a ta. 14 Chuong ang chun a remti a, ni sawm sûng a ensin a. 15 Ni sawm hnung chun lal bu fatu tlangvàlhai po po nêkin anni chu an inlang hrisel lemin an sà khom a nàm tha lem a. 16 Chuongchun, anni enkoltu chun lal bu hnienghnâr le uoiin chu a lâk hmang a, thlai ringot a pêk ta lem a. 17 Hieng tlangvàl palihai hi Pathienin thu le hla le thil tinrêng hriet theina le hriet thiemna a pêk a. Daniel lem chu inlàrna le mang tinrêng hril fie theina a pêk a. 18 Lal hmaa an inlang ni dinga ruot a hung tlung chun lal in hotu chun anni chu Nebukadnezzar hmaah a thuoi a. 19 Lal chun a lo biek tawl a, Daniel le Hanania le Misael le Azaria hai tluka var mi dang tu khom a hmu naw a, lal ina thoktu dingin a lâk tawl nghal a. 20 Lalin varna thu le hriet thiemna tinrêng thil a'n donhai hrim hrim chu a ram puma mitdawivaihai le dawithiemhai lèt sawmin an hriet lem vong ti a hung hriet ta a. 21 Daniel lem chu lal Kura inlal hnung kum khatna chen a thok zom pei hrim a nih.

2

1 Nebukadnezzar inlala inthoka kum hnìnaab chun zàn khat chu mang a nei a, a mang chu a ngàituo buoi leiin a in nawk thei ta naw a. 2 Lal chun a mang chu hril dingin mitdawivaihai, aikei thiemhai, dawi thiemhai le arasi hmanga aisan thiemhai chu a ko khawm a, an hung a, a hmaah an ngìr a. 3 Lal chun an kuomah, "Ka lung sukzìngtu mang ka nei a, a umzie iem a nih ti hriet ka nuom a nih" a ta. 4 Arasi rawn mihai chun Aramik tongin, "Aw laltak, kumkhuoin dam rawh. I mang chu i siehlawhai hi hril phot la, a umzie hril kan ti che" an ta. 5 Lal chun an kuomah, "Hi hi thu tlûkna ka siem nghet chu a nih: Ka mang le a hrilfiena in mi hril thei naw chun chan nawi vong nîng in ta, in in khom hmunhnokah inchangtir ka tih. 6 Ka mang chu in mi hril thei a, a umzie in mi hril bok chun thilpêk le lawmman le chawimawina ropui tak keimaa inthokin dong in tih. Chuleiin ka mang chu mi hril unla, mi hril fiepek bok ro" a ta. 7 Anni chun, "Lalin a mang chu a siehlawhai hi mi hril phot sien la, a hrilfiena chu hril el kan tih" an ti nawk a. 8 Lal chun an kuomah, "Ka thu tlûkna siem kha ka hlen ding a nih ti in hriet leiin hun pot sei dàn in zongna mei mei a nih ti ka hriet tah. 9 Ka mang in mi hril thei naw a ni chun thuhmun sengin ka hrem ding cheu a nih. Ka thu ka thlâk thei beiseiin ka hmaah khêl inzawt kuol a, thu hmang lo in phan khawm mei mei a ni hi. Ka mang chu mi hril phot unla, in hril fie thei le thei naw hre el ka tih" a ta. 10 Arasi rawn mihai chun lal kuomah, "Lal thil indon hi a thaw thei ding khawvelah tu khom um naw ni hai. Hieng ang thil hi ieng anga lal ropui khomin mitdawivai hai, aikei thiem hai le arasi hmanga aisân thiem hai kuomah an indon ngai nawh. 11 Lal thil indon hi a harsa taluo. Hieng thil hi pathienhai chauh naw chun lal kuomah tu khomin hril thei naw ni hai, anni hlak chu mihriem laia chêng an ni vê si nawh" an ta. 12 An thu hril chun lal chu namen loa a suklungsen leiin Babulon rama mi var po pohai chu sukhlum vong dingin thu a pêk a. 13 Mi varhai that dinga lal thupêk lei chun Daniel le a ruolhai khom chu sukhlum dingin an zong a. 14 Mi varhai sukhlum dinga tirh, lal vêngtu kawmandar Ariok chu Danielin var tak le thiem takin a lo inbiekpui a. 15 Lal vêngtu pawl kawmandar kuoma chun, "Iengti dàna chuong ang lawma thupêk khauh chu lalin a'n suo am a na?" a ta. Ariok chun Daniel kuomah thil um dàn iengkim chu a hrilfie a. 16 Chu phing leh Daniel chu lal kuomah a fe a, a mang chu a hrilfie theina dinga hun iemani chen bèk la pe dingin a hni a. 17 Daniel chu a inah a'n lawi a, a ruolhai Hanania le Misael le Azaria kuoma chun thil um dàn chu a hril a. 18 Babulon mivarhai ruola anni khom chu sukhluma an um ve nawna dinga vàn Pathien zângaina ngèn a, thu khir chu hril fie theina hni dingin a hril tawl a. 19 Chu zân lá là chun thu inthup chu Pathienin Daniel kuomah a hung inhriettir a. Daniel chun vàn Pathien inpâkin, 20 "Pathien hming chu kumkhuoin, Inpâkin um zing raw se; Varna le thilthawtheinahai, Ama ta vong a ni si a. 21 Hun le hun bihai thliekin, Lalhai siein a pei thlàk a. Mi var kuomah varna a pêk a, Man riltu kuomah hrietna. 22 Thu ril le thil inthuphai, Ama chun a puong lang a, Thima thil um a hriet a, Amaah var a chèng zing. 23 Aw ka thlàtuhai Pathien, Lawmthu hrilin ka'n pàk che; Varna le theina mi pein, Ka hni i mi'n hriettir a, Lal mang i mi'n hriettir tah"tiin lawmthu a hril a. 24 Babulon mi varhai sukhlumtu dinga lalin a ruot Ariok kuomah Daniel chu a fe a, a kuomah, "Babulon mi varhai hi sukhlum naw rawh. Lal kuomah mi thuoi la, keiin a mang chu hril fiepêk ka tih" a ta. 25 Ariok chun Daniel chu lal kuomah a fepui nghàl a, a kuomah, "Juda saltànghai laia mi, lal mang umzie hril fie theitu ding mi pakhat ka hmu ie" a ta. 26 Lal chun Daniel (Beltesazar tia an ko bok) kuoma chun, "Ka manga ka thil hmu chu mi hrilin, a umzie i hril fie thei ding maw?" a ta. 27 Daniel chun, "Mi var, aikei thiem, mitdawivai thiem le aisân thiem tu khomin lal thil indon, thu inthup tak chu hrilfie thei naw ni hai. 28 Amiruokchu, thu inthuphai puong theitu Pathien chu vànah a um. Ama chun lal Nebukadnezzar kuomah thil la hung tlung dinghai chu a hung puong a ni hi. Khuma i zàl laia i mang le i ngàituona hluotu inlàrnahai chu hieng hi a nih: 29 Aw laltak, khuma i zàl laiin thil la hung tlung dinghai chu i ngàituo a, thu inthuphai puong langtu chun thil la hung tlung dinghai chu a'n hmùtir che a nih. 30 Aw laltak, keima hin mihai nêka varna ka hau lem lei ni loin, lal chun i mang umzie chu hre a, i lungrila thil hung lùt chu i hriet thiem theina dingin hi thu inthup umzie hi ka kuoma puong a ni chauh lem a nih. 31 "Aw laltak, i hang dàk suok a, i hmaah milim lien tak a lo ngìr a, a ropuiin a tle sur a, a hmêlin mi a râp a. 32 A lu chu rangkachak hlîr, a awm le bânhai chu tangkaruo, a phìng le a malpuihai chu dâr, 33 a ngalhai chu thîr, a kepàrhai chu thîr le pil raw chang inpola siem a nih. 34 Chuonga i thlîr zing lai chun, mihriem kut thang der loin lung a hung chim thla a, milim ke, thîr le pila siem chu a del a, a koi dar ta vong a. 35 Chu ruol chun thîr hai, pil hai, dâr hai, tangkaruo hai le rangkachak hai chu an koi dar vong a, nipui laia hrizawla bu sî ang el an hung ni a, a hlek khom hlà nei loin thliin a lèn hmang ta vong a. Milim deltu lung ruok chu tlâng lien takah a hung inchang a, hnuoi hi a hluo sip ta mup a. 36 "Hi hi i mang chu a ni a, chu hrilfiena chu lal kuomah hang hril ei tih. 37 Aw laltak, nang hi lalhai lal chu i nih. Vàna Pathienin lalram dâm, thilthawtheina dàm, hrâtna dâm le ropuina dàm a pêk che a. 38 I kutah mihriemhai le chunglèng vatehai le hnuoilèng ramsahai a sie a, an chêngna hmun taphotah an chungah lalin a siem che a, rangkachak lû ang chu i nih. 39 "I hnunga hin i lalram nêka hnuoihnung lem lalram hung ngìr a tih. Chu hnunga chun lalram pathumna, dâr ang chu, hung ngìr a ta, hnuoi pumpui chungah inlal a tih. 40 A tawpah, lalram palina, thîr anga khauh chu hung ngìr a tih. Thîr chun a vuok taphot vaw bong a, a vuok nawi angin, ama chun lalram danghai po po chu sir hmâtin vaw nawi a tih. 41 A kepàr chu a then thîr, a then pila siem a nih ti i hmu ang ngei khan, ram lungruol lo nîng a ta; thîr le pil inpol a nih ti i hmu ang khan, thîr khauhna ruok chu iemani chenah la nei zing a tih. 42 Chun, a kepàr chu a then thîr, a then pil a ni ang bokin, a ram chu hmun thenkhatah hrât a ta, hmun thenkhat ruok chu ongrop a tih. 43 Thîr le pil chang inpol a nizie i hmu ang bok khan, mipuihai khom hnam tin inchekpol nîng an ta, thîr le pil an inzom tak tak thei naw ang bokin, inzom zing thei naw ni hai. 44 "Chuong lalhai hun lai chun vàn Pathien chun lalram se thei ta lo ding chu hung indin a ta, chu ram chu hnam danghai hnuoiah sie ni ta ngai bok naw nih. Lalram danghai po po chu tukdolin suktawp vong a ta, kumkhuoin ngîr zing a tih. 45 Chu chu a nih inlàrnaa lung i hmu, mihriem kut thang loa hung chim thla, thîr hai, dâr hai, pil hai, tangkaruo hai le rangkachak hai del nawi vongtu lung umzie tak chuh. Pathien ropui tak chun thil la hung tlung dinghai chu lal kuomah a puong a nih. Mang chu a tak ngèi a na, a hrilfiena khom hi a'n dik bok" a ta. 46 Lal Nebukadnezzar chu Daniel hmaah a bokkhup a, inzà takin chibai a bûk a, thilhlân le rimtuihai chu Daniel kuomah hung inhlàn dingin a mihai chu thu a pêk a. 47 Lal chun Daniel kuomah, "Hi thil inthup i puong theia inthok hin i Pathien chu pathienhai po po Pathien, lalhai Lal, thu inthup puongtu a lo ni chieng ngei el" a ta. 48 Chuongchun, lal chun Daniel chu ngîrhmun insâng takah a hlàngkai a, thilpêk tam takin a vur a. Babulon biel pumpui chunga rorêltu le a mi varhai po po chunga lû takah a siem a. 49 Chun, Daniel hnìna angin lal chun Sadrak hai, Mesak hai le Abednago hai chu Babulon biel enkoltuhai lai hotuah a ruot seng a, Daniel ruok chu lal bulah a um ta zing a.

3

1 Lal Nebukadnezzar chun Babulon biel Dura phaizawlah rangkachak milim, meter sawmhni pasaria insâng le a khang meter thum vela lien a'n din a. 2 A hnuoia ram bung hrang hranga lal tênau hai, aiawtu hai, optu hai, rorêltu hai, remruottu hai, sum enkoltu hai, dàn hre mi hai le biel hrang hranga rorêltuhai chu a milim indin inhlànnaa thang dingin lal Nebukadnezzar chun a fiel khawm a. 3 Milim inhlàn ni chun ram bung hrang hranga lal tênau hai, aiawtu hai, optu hai, rorêltu hai, remruottu hai, sum enkoltu hai, dàn hre mi hai le biel hrang hranga rorêltuhai chu an hung fuon khawm a, milim hmaa chun an ngîr khup a. 4 Tlângsamhai chun inring takin, "Aw hnam tina mi, mi tina mi le tong tina mihai, hi hi in thaw dinga thupêk chu a nih: 5 Tawtawrawt hai, theihle hai, perkhuong hrui sawmli neihai, tingtang hai, perkhuong hai, baja hai le rimawi tum rîk thei po pohai ri in hriet pha leh lal Nebukadnezzar rangkachak milim indin hmaah bokkhup unla, chibai bûk ro. 6 Tu khom bokkhupa chibai bûk lo chu rawtuina meipuia pei lût ni nghal an tih" tiin an insam a. 7 Chuongchun tawtawrawt hai, theihle hai, tingtang hai le tum rîk thei po po ri an hriet charin hnam tina mi, mi tina mi le tong tin hmanghai chu lal Nebukadnezzar rangkachak milim indin hmaa chun an bokkhup a, chibai an bûk a. 8 Chuong lai chun Kaldai mi thenkhat chu a hma tieng an hung a, Judahai chu an hung hèk a. 9 Lal Nebukadnezzar kuoma chun, "Aw laltak, kumkhuoin dam rawh. 10 Nangin aw laltak, mi tu khom tawtawrawt hai, theihle hai, perkhuong hrui sawmli neihai, tingtang hai, perkhuong hai, baja hai le rimawi tum rîk thei po po inri hre taphot chun bokkhupin rangkachak milim chibai bûk ding le 11 tu khom bokkhupa chibai bûk naw taphot chu rawtuina meipuia pei lût nghal dingin thupêk i siem a. 12 Sienkhom Juda mi thenkhat, biela hotua i siem Sadrak hai, Mesak hai le Abednago hai chun aw lalpa, i pathien rong an bawl nuom ve naw a, rangkachak milim i'n din chu chibai an bûk nuom ve nawh" tiin an hril a. 13 Nebukadnezzar chu nasa takin a lungsen a, Sadrak hai, Mesak hai le Abednago hai chu hung thuoi nghal dingin thu a pêk a, an rêngin a hmaa chun an hung thuoi a. 14 Nebukadnezzar chun an kuomah, "Sadrak, Mesak le Abednago, ka pathienhai rong bawl nuom loa, ka rangkachak milim indin khom chibai in bûk nuom naw thu an hril hi thudik a ni? 15 ​Tawtawrawt hai, theihle hai, perkhuong hrui sawmli nei hai, tingtang hai, perkhuong hai, baja hai le rimawi tum rîk thei po po inri hre a, ka milim siem hmaa bokkhupa chibai in bûk chun a tha. Chibai in bûk nuom naw a ni ruok chun rawtuina meipuia pei lût ni nghal in tih. Ka kuta inthoka san suok ding cheu chu ieng pathien tak am ni tâng a ta?" a ta. 16 Sadrak le Mesak le Abednago chun lal kuomah, "Aw Nebukadnezzar, hi thua hin i hmaah kan inhril hlìp khom a ngai dèr nawh. 17 Kan Pathien, a rong kan bawl hlak chun rawtuina meipuia inthokin a mi san suok thei a, i kuta inthok khomin aw laltak, ama chun mi san suok el a tih. 18 Chuong chu a ni naw a lo ni khomin, aw laltak, i pathienhai rong chu bawl nawng kan ta, i rangkachak milim indin khom chibai bûk bok nawng kan tih ti hi i hriet kan nuom" tiin an hril a. 19 Nebukadnezzar chu a hmêl danglam khopin Sadrak le Mesak le Abednago hai chunga chun a lung a sen a. Rawtuina meipui chu a lêt saria sa zuol dinga buk sà dingin thu a pêk a. 20 Sadrak le Mesak le Abednago hai chu khuopa meipuia pei dingin a sipai ruol laia mi hrât hràt hai chu thu a pêk bok a. 21 Anni rawi chu an korfuol, an zakuo hnuoi, an lukawm le an silfèn danghai chopa khuopin meipui inhlap puot puota chun an dèng lùt a. 22 Lal thupèk chu a'n hmaw êm lei le meipui chu a chok nasat êm leiin Sadrak le Mesak le Abednago peitu sipaihai chu meiin a kàng hlum a, 23 an pathum chun khuop pumin meia chun an tlu lùt a. 24 Chun, lal Nebukadnezzar chu maktiin a tho thut a, thurawn petuhai kuoma chun, "Khuop puma meipuia ei peihai kha mi pathum an ni naw maw?" a ta. Anni chun, "Aw laltak, ni chieng e" tiin an don a. 25 Ama chun, "En ta u! Khuop loa mi pali mei laia nâ hre dêr loa inlon kuol ka hmu tlat el! A palina lem chu pathien naupa ang a nih" a ta. 26 Nebukadnezzar chun rawtuina meipui kotkhâr chu a hung pan hnai a, "Sadrak, Mesak, Abednago, nangni Chunghnungtak Pathien siehlawhai, hung suok unla, hi taka hin hung ro" tiin a ko khêk a. Chuongchun, Sadrak le Mesak le Abednago chu meipuia inthok chun an hung suok a. 27 Ram bung hrang hranga lal tênau hai, aiawtu hai, optu hai le lal remruotpuitu hai chun an hung ngìr huol a, meiin an taksa a kâng thak naw a, an sam zâi khat khom a hlieu kir naw a, an korfuolhai a kàng naw a, mei rim khom an innam dêr nawh ti chu an hmu a. 28 Chu phing leh Lal Nebukadnezzar chun, "Sadrak, Mesak le Abednago hai Pathien chu inpâkin um raw se. Ama chun a vàntirkohai a hung tir a, a siehlawhai chu a hung san suok ta si a. Ama chu an ring leiin lal thupêk chu an kal a, anni Pathien chauh naw chu pathien dang hrim hrim rong bawl lo ding le chibai bûk lo dingin an hringna chen khom chàn an huom a nih. 29 Chuleiin, mi tin, hnam tin le tong tina mi tu khom Sadrak le Mesak le Abednago Pathien kal zawnga thu hril taphot chu sàt nawi nîng an ta, an inhai khom hmunhnok dèng bum angin inchang a tih ti thu ka pêk a nih; hieng anga san suok theitu pathien dang hrim hrim an um si nawh" a ta. 30 Chuongchun, Sadrak le Mesak le Abednago hai chu lalin Babulon ram biel hotuah a'n kaisàngtir ta a.

4

1 Hi hi khawvel pumpuia chi tin, hnam tin le tong tinhai kuoma Lal Nebukadnezzar thucha chu a nih:"In rênga chungah hmûingìlna nasa takin pung raw se. 2 "Chunghnungtak Pathienin ka ta dinga inchikna mak le thil mak a'n entirhai hi ka hril nuom cheu a nih. 3 Inchikna a'n entirhai chu, A va hang ropui ngei de!A thil mak thaw a ropui. A ram chu kum hlun ram a na, Suon an um sûng po po chu, Rorêltu ni zing a tih. 4 Kei, Nebukadnezzar hi ka lal inah inhoi tak le hnienghnâr takin ka khawsa a. 5 Sienkhom zàn khat chu mang pangzatum tak el ka nei a. Inlàrnaa ka thil hmuhai chu khum laizawlah ka ngàituo a, ka lungril a sukmangang hle a. 6 Chuleiin, ka mang chu hrilfie dingin Babulon mi varhai po po chu ka hmaa hung thuoi dingin thu ka pêk a. 7 Chuongchun, mitdawivai thiem hai, aikei thiem hai, arasi hmanga aisân thiem hai le dawithiemhai chu an hung a, ka mang chu ka hril tawl a, sienkhom an mi hrilfie thei naw a. 8 A tawpah Daniel a hung a, ka mang chu ka hril a (Ama hi ka pathien hming chawia Beltesazar ti hming ka'n puttir a na, amaa hin pathien thienghlimhai thlarau chu a um a nih). 9 A kuomah, "Aw Beltesazar, mitdawivai thiemhai hotu, nangmaah pathien thienghlimhai thlarau a um ti ka hriet a, i ta dingin ieng anga thu inthup khom hrilfie intak a um nawh. Ka mang chu hi hi a na, mi hang hrilfiepêk raw leh. 10 Khuma ka zàl laia inlàrna ka hmu chu hi hi a nih: Ka hei ngha a, ka hmaa chun ram lailung takah thing lien tak el, namên loa insâng hi a lo ngìr a. 11 Thing chu detdo takin a'n thang lien pei a, a zîkin vàn a tong a; hnuoi tawp kila inthok khoma hmu thei a nih. 12 A hnahai a mawi a, a rà a tam a, hring tinin khopkhamin an tlàn a. Ramsahaiin a zâr hlim an bèl a, chunglêng vatehaiin a zârah riebûk an rem a, taksa put hringcha po po chawmtu a nih. 13 "Ka khum laizawla inlàrna ka hmu lai chun ka hei en a, ka hmaa chun vêngtu mi thienghlim, vàna inthoka hung tum lai chu ka hmu a. 14 Rawl inring taka khêkin, "Thing kha phûr unla, a kàuhai kha tan unla, a hnahai sât thla vong unla, a ràhai chu pei dar ro. A hnuoia ramsa chènghai chu tlàn hmang hai sien, a zâra vatehai khom vuong hmang vong raw hai se. 15 A bul le a zunghai ruok chu hlà unla, thîr le dârin thlung unla, hlo buk lai ngîr vê zing sien, vàn daidawin tlàk khum sien, hnuoia hlo buk lai ramsa angin khawsa ve raw se. 16 Chuong anga kum sari a hmang zo hma po chu mihriem lungril put ta loin ramsa lungril put raw se. 17 " 'Hi thurêl puongtu chu mi thienghlim vàntirkohai an nih, Chunghnungtak chu mihriemhai lalram chunga thuneitu, a ditsak taphot kuoma lalram chu pe theitu le mi hnuoihnung tak khom inhluotir theitu a ni hlakzie tu khomin an hriet theina dingin' tiin. 18 "Chu chu a nih, kei Lal Nebukadnezzarin manga ka hmu chu. Tuhin nang Beltesazar, ka mang umzie chu hang hrilfie raw leh, ka lalrama mi var tu khomin an mi hril fiepêk thei si naw a. Pathien thienghlimhai thlarau chu nangmaah a um leiin, nang chun i hril fie thei a nih" a ta. 19 Chu phing leh Daniel (Beltesazar tia ko bok) chu a ti hle a, iemani chen chu ieng khom a hril thei nawh. Lal chun a kuomah, "Beltesazar, mang le a hril fiena leiin thlaphâng naw rawh" a ta. Beltesazar chun, "Ka lalpa, mang chu a theidàtu che mang le a hrilfiena chu i hmêlmahai chan ni lem hlauh sienla ni ding maw! 20 Thing i hmu, nghet taka vàn tonga hung inthang lien, kawl kil tawpa inthok khoma hmu thei, 21 a hnà mawi tak, a rà tam êm êm, mi tin tlàn tham, a buk hnuoi ramsahaiin chêngnaa an nei, a zârhai chu chunglèng vatehaiin riebûka an lo hmang hlak chu, 22 aw laltak, nang hi i nih. Ropuiin i hung hrât a, vàn tong khopin i hung lien a, i lalram chun kawl kil chen a tlung a nih. 23 "A nih, aw laltak, vàna inthoka vàntirko mi thienghlim hung tum i hmu khan, 'Thing chu phûr thlu unla, sukbohmang ro. A bul le a zunghai ruok chu thîr le dâra khitin hlo buk lai la um zing sien, vàn daidawin tlàk khum sien, kum sari a'n voi hmâ khat chu ram sa angin khawsa raw se' a ti a ni kha. 24 "Aw laltak, a hrilfiena le Chunghnungtakin laltak, ka lalpa chungthua thu a rèl tah chu hi hi a nih: 25 I khuo le tuihaia inthoka hnot suokin um i ta, ramsahai lai khawsâng i ta, ran angin hlo pet i ta, vàn daidawin tlàk khum a ti che. Chunghnungtak chu mihriemhai lalram po po chunga lal tak a nizie le lalna chu a ditsak taphot kuomah a pèk hlakzie i hriet thiem a, i pom hma khat chu kum sari sûng chuong ang chun um i tih. 26 Chun, a bul chu hlà dinga thû a pèk angin, vànin thû a neizie i hung hriet pha chun i lalram chu pèk kîr ni nawk i tih. 27 Chuleiin, aw laltak, ka thurawn pèk che hi pom tlâkah ngai rawh. I suolhai bànsan la, thil indik thaw la, i rîtlona khom nêksawrhai chungah ngilneinain inlangtir lem rawh, i hung hmùingîl pei thei tâkduoiin" a ta. 28 Chuong thil po po chu Nebukadnezzar chungah a hung tlung a. 29 Thla sawm le thla hni an voi hnung chun Babulona a lal in chungah lal chu a'n vàk a, 30 Khawpui a hei thlìr vèl chun, "Babulon khaw ropui le mawi tak hi, ka lal in umna ding le ka ropuiizie inentirna dinga keima kut hrât ngeia ka bawl a ni naw am a ni?" a ta. 31 A la tong lai zing chun vàna inthoka rawlin, "Aw Nebukadnezzar, i chungthu chu hieng anga rèl a nih: I lalna chu i kuta inthokin làk hmang a ni tah. 32 Mihai laia inthoka hnot suok nîng i ta, ramsahai lai chêng i ta, ran angin hlo pet i tih. Mihriemhai lalram chunga thuneitu le a ditsakhai kuoma inlalna petu chu Chunghnungtak a nizie i hriet suok le pom hmâ po, kum sari sûng chu, chuong ang chun um i tih" tiin a hung hril a. 33 Chu ni lá là chun hrila um tah chu Nebukadnezzar chungah a hung tlung nghal a, mihriemhai laia inthokin an hnot suok a, ran angin hlo a pet ve a, vàn daidawin a tlàk khum a, a sam chu mupui hmul anga seiin a hung inthang a, a tinhai chu vate tin ang el a hung ni ta a. 34 Chun, a hun a hung tlingtlàk chun, kei Nebukadnezzar hin vàn tieng mit ka hang inlèn a, ngaituona pangngai ka hung put nawk ta a. Chuongchun, Chunghnungtak chu inpâkin, chatuona hring chu inzà takin ka chawimawi a:A ram chu chatuon lalram a na, Suon po po dai a ni si. 35 Leilung hluotu hnamhai hi, Ieng tham khom an ni si nawh. Vàna sipai ruolhai leHnuoia chêngtuhai chungah, A nuom angin a thaw hlak. Tû khom a kut thlâk ding chu, Kei kîr thei an um naw a, "Iem a na i thaw hrim hi?" Ti thei tû khom an um nawh. 36 Ngaituona pângngâi ka hung put chara inthok chun ka lalram ropuina dingin ka'n zaumna le ropuina chu pêk kîrin ka um a. Ka mi rawn hlakhai le ka khawnbawlhai chun an mi hung zong suok a, ka lalthungphaah an mi'n thungtir a, a hmaa nêka ropuia tungdingin ka hung um nawk tah a nih. 37 Chuongchun, kei Nebukadnezzar hin tu hin Vàn Lal chu inpâka inzàin ka chawi sàng a nih. A thilthaw taphot indikin, a lampui taphot a fel a, chapo taka kal chawituhai chu a suktlawm hlak, " tiin.

5

1 Lal Belsazar chun a mi ropui sângkhat ruol ta dingin ruoi ropui tak a the a, uoiin an dawn tlàng a. 2 Belsazarin uoiin a dawn lai chun a nuhmei hai, a hmei hai le a mi lien hai uoiin dawnna dingin a pa Nebukadnezzarin Jerusalem Tempula inthoka tangkaruo le rangkachak no a hung làkhai laia mi chu hung la suok dingin thu a pêk a. 3 Chuongchun, Jerusalem Tempula inthoka an làk rangkachak no mawihai chu an hung chawi a, lal le a nuhmei hai le hmei hai le a milien hai chun zu dawnnain an hmang a. 4 Chuonga zu an dawn lai chun rangkachak dâm, tangkaruo dâm, thîr dàm, dâr dâm, lung dàm le thing dàma siem an milem pathienhai chu an chawimawi a. 5 Chuong lai tak chun mihriem kutpàr a hung inlang a, lal ina khawnvar siena bula bang zût nama chun thu a hung ziek a, a ziek lai chu lal chun a thlîr zing a. 6 A hmai chu a hung dàng a, a ti êm leiin a khûp le khûp invaw tuo hlop hlop khopin a'n thin a, a ke thà a zoi thla vong a. 7 Lal chun a aikei thiem hai, arasi hmanga aisân thiem hai le dawithiem hai chu a'n kotir a, chuong Babulon mi varhai kuoma chun, "Tu khom hi thu ziek hi tiema a hrilfiena mi hril theitu chu puon senduk insiltir nîng a ta, rangkachak thi inhlìtir ni bok a ta, a rama rorêltu lien tak pathumnaah sie nîng a tih" a ta. 8 Chuongchun, lal mi varhai po po chu an hung lùt a, sienkhom ziek chu an tiem thei naw a, an hril fie thei bok nawh. 9 Lal Belsazar chu a thlabâr zuol a, a hmai khom a hung dàng zuol a, a milienhai hlak chun thaw ngaina an hriet bok si nawh. 10 Lal le a milienhai ri chu hrein lalnu chu ruoithèna pindana chun a hung lùt a, "Aw laltak, kumkhuoin dam rawh. Thlabâr naw rawh. I hmai khom dâng naw raw se. 11 I lalrama hin pathien thienghlimhai thlarau nei mi pakhat a um a. I pa, laltak hun lai khom khan chu mi chun pathienhai tluka thu inril hriet theina le varna a kol ti hriet suok a ni ta a; i pa, lal Nebukadnezzar ngeiin dawivai thiem hai, aikei thiem hai, arasi hmanga aisân thiem hai le dawi thiem hai hotu takah a siem a. 12 Ama Daniel, i pain Beltesazar tia a ko chu mi lungril hrât, hrietna hau le hriet thiemna nei mi, manghai hrilfie thiem, thu khirkhàn hrilfie thei mi le harsatna hrang hrang sut kieng theitu a nih. Daniel chu inkotir la, thuziek umzie chu hril fie thei a ti che" a ta. 13 Chuongchun, Daniel chu lal hmaa chun an hung thuoi a. Lal chun, "Nang Daniel, ka pa laltakin Judai rama inthoka saltàng a hung thuoi laia mi chu i ni maw? 14 Nangmaah pathienhai thlarau a um thu le sungril mit varna nei, lungril hrât tak le var chungchuong i ni thu ka lo hriet a. 15 Hi thu ziek hi tiema a umzie mi hrilfie dingin mi varhai le aikei thiemhai an hung thuoi a, sienkhom tu khomin a umzie an mi hril thei naw a. 16 Nang ruok chun thil harsahai khom hril fiein i sukfel thei ti ka lo hriet a. Hi thil ziekhai hi tiema i mi hril fie thei chun puon senduk insiltir nîng i ta, rangkachak thi inhlìtir ni bok i ta, ka lalrama rorêltu lû tak pathumnaah sie ni bok i tih" a ta. 17 Daniel chun lal kuomah, "I thilpêkhai chu nangma ta ni sien, i lawmmanhai chu mi dangin chang raw hai se. Sienkhom thil ziek chu lal hriet dingin tiem ka ta, a umzie hril fie bok ka tih. 18 Aw laltak, Chunghnungtak Pathien chun i pa Nebukadnezzar kuomah chunghnungna hai, inlalna hai, ropuina hai, chawimawina hai le mawina hai a pêk a. 19 Ngîrhmun insâng tak a pêk lei chun mi tina mi le hnam tina mi le tong tina mihai chun an ti a, a hmaa chun an inthin hlak a. Lal chun sukhlum dinga a tihai chu a sukhlum a, dama a hlà nuomhai chu a hla a, a chawisàng nuomhai a chawisàng a, a suktlawm nuomhai chu a suktlawm a. 20 Sienkhom a hung chapo a, uongthuongnain a lungril a sukngar phing leh a lalthungphaa inthokin a pei thlàk a, a ropuina po po chu a làkpêk vong a. 21 Chun, mihriemhai laia inthoka hnot suokin, ramsa lungril a'n puttir a, ram sabengtunghai lai a khawsa a, ran angin hlo a pet a, vàn daidawin a tlàk khum a, Chunghnungtak Pathien chu mihriemhai lalram chunga thuneitu tak le a ditsak taphothai chunga lalna petu a nizie a hriet suok le pom hmâ chun chuong ang chun a khawsa a nih. 22 "Sienkhom a naupa nang Belsazar chun hieng po po hi i hrieta chu inngàitlawm i tum nawh. 23 Inphàhnuoi nêk hmanin vàna LALPA i cho a, a tempula nohai chu i kuomah i hung inlàktir a, i nuhmeihai le hmeihai le i milienhaiin zu dawnnain in hmang a. Rangkachak dâm, tangkaruo dâm, dâr dâm, thîr dàm, thing le lung dàma siem i milem pathienhai, ieng khom hmu thei lo, ngàithla thei lo le hre thei lohai chu i chawimawi a, i hringna le i lampui po po a kuta koltu che Pathien ruok chu inzà nachâng i hriet nawh. 24 Chuleiin ama chun hi thu ziek ding hin kut a hung tir a nih. 25 "Hi hi a nih a ziek chu: MENE, MENE, TEKEL, PARSINc. 26 A hrilfiena chu hi hi a nih: MENE: Pathienin i lal hun sùng dinga a ruot chu a tawp tah. 27 TEKEL: Bûkin i um a, i tling ta nawh. 28 PARSIN: I lalram chu thein a um a, Media le Persia kuomah pêk a ni tah" a ta. 29 Chun, Belsazar thupêkin Daniel chu puon senduk an insiltir a, rangkachak thi an inhlìtir a, a lalrama rorêltu lû tak pathumnaah a puong a. 30 Chu zân lá là chun Babulon mi Belsazar chu that a ni a, 31 Media mi Daria, kum sawmruk le pahnia upa chun ram chu a chang tah a nih.

6

1 Daria chun a lalram biel za le sawmhnia optu dinghai a thlang a. 2 Optuhai chunga chun hotu pathum a ruot a, chuonghai laia pakhat chu Daniel a nih. Lal ditzawng anga biel optuhaiin ro an rèl theina dingin hotu pathumhai chu an mawphurna biel ding seng a ruotpèk a. 3 Daniel chu mi thei chungchuong a ni leiin hotuhai lai chun a thaw tha tak a, lal chun a ram pumpuia rorêltua sie a lungril a. 4 Hi thil lei hin a thokpui hotuhai le biel optuhai chun suksiet tumin a thaw suol an inchàn a, sienkhom an hmu thei si nawh. A ringum a, a hlemhlè ve naw a, thil ngaizal mi a ni naw leiin a'n dik nawna an hmu zo nawh. 5 A tawpah chuong mihai chun, "A Pathien dàn zawm thu le inzom thilah a ni ngot naw chun ama awkna ding remchang hmu zo ngai naw'm ei nih" an ta. 6 Chuongchun, hotuhai le biel optuhai chu lal kuomah a honin an fe a, a kuomah, "Aw lal Daria, kumkhuoin dam rawh. 7 Lal hnuoia hotuhai, thuneituhai, biel optuhai, thurawn petuhai le optuhai po po chu ni sawmthum sûng, aw laltak, i kuoma chauh naw chu pathien amanih mihriem tu khom amanih kuoma thil hni taphot chu sakeibaknei pùka thlàk ni sien ti thupêk hi insuo le kengkaw ni sien ti kan remti tlàng a. 8 Tuhin aw laltak, thupêk chu puongin ziek ngeiin insuo la, Media le Persia dàn sukdanglam thei lo ni dingin lalin a hming ziekna suoi ngei nam raw se" tiin an hril a. 9 Chuong ang chun thupêk chu Daria chun ziek ngeia insuoin a suoiin a nam nghet a. 10 Thupêk chu insuo a ni tah ti Danielin a hriet charin in sawng tienga a pindan, Jerusalem tieng ngha tukver umnaa chun a'n lawi a. A hmaa a thaw dàn ang bokin, Pathien kuomah dingthathuona lawmthu hrilin ni tin voi thum a tongtai zie a. 11 Chun, hieng mihai hi a ruolin an hang fe a, Pathien kuoma thil hnia a tongtai lai chu an hmu a. 12 Chuongchun, lal kuomah an fe a, lal thupêk chu hrilin a kuomah, "Aw laltak, ni sawmthum sûng chu nangma kuoma chauh naw pathien amanih mihriem amanih tu khom kuoma hnìna siem taphot chu sakeibaknei pûka pei ding ti thupêka khan i hming ziekin suoi i nam a ni naw maw?" an ta. Lal chun, "Ziek e. Chu chu thupêk ngïr lai, sût thei lo Media le Persia dàn a nih" a ta. 13 Anni chun lal kuomah, "Aw laltak, Juda mi saltànghai laia mi Daniel khan a poisa naw che a, khapnaa i hming ziek khom kha a poisa bok nawa, ni tin voi thum a la tongtai zing a nih" an ta. 14 Lalin chu thu a hriet chun nasa takin beidong a, Daniel chu san suok a tum tlat a, ni tlâk chenin a theitawpin a bei a. 15 Sienkhom mihai chu a honin lal kuomah an fe a, a kuomah, "Nang laltakin Media le Persia dàn ang thlapa suoi nama thupêk i'n suo tah chu sukdanglam thei a ni nawh ti i hriet" an ta. 16 Chuongchun, lal chun thu a pêk a, Daniel chu an man a, sakeibaknei pùkah an thlàk a. Lal chun Daniel kuomah, "I Pathien, ringum taka a rong i bawl rop hlak chun sanhim che raw se" a ta. 17 Pûk chu lungin an sìn a, tu khomin Daniel chu an làk suok thei nawna dingin lung chu an chàr a, lal le mi lienhai chun suoi an nam khum a. 18 Lal chu inah a'n lawi a, bu a nghei a, mi sukhlimtuhai a ko naw a, zànkhuoin a in bok nawh. 19 Lal chu zîngkàr inhma takin a tho a, inhmaw takin sakeibaknei pûka chun a fe a. 20 Daniel an thlàkna pûk a tlung chun tap rawlin, "Aw Daniel, Pathien hring rongbawltu, ringum taka a rong i bawl hlak Pathien chun sakeibaknei laka inthokin a san suok thei che am?" tiin a ko khèk a. 21 Daniel chun lal kuomah, "Aw laltak, kumkhuoin dam rawh. 22 Ka Pathien chun a vàntirko a hung tir a, sakeibakneihai bàu a sukchìp a, ieng khom an mi law nawh; a mithmuah soisel boin ka um si a. Chun, aw laltak, i chungah ieng poi khom ka tawk naw bok " a ta. 23 Lal chu a lawm ta êm êm a, Daniel chu pûka inthoka la suok dingin thû a pêk a, chuongchun an lâk suok a, Pathien a ring tlat leiin hliem pakhat khom a tuor nawh. 24 Chun, lal thupêkin Daniel hèktuhai chu an hung thuoi khawm a, an nuhmei le nauhai leh sakeibaknei pûka chun an pei lùt a. Pûk tuong khom tlung hman loin sakeibakneihai chun an lo pot chen a, an rùhai khom an se hawp vong a. 25 Lal Daria chun a ram sûng po poa mi tin le hnam tin le tong tin hmanghai kuoma chun lekha a ziek a:"In rênga chungah hmûingìlna nasa takin pung raw se. 26 "Ka ram op sùng po poa hin mihaiin Daniel Pathien chu tia inzà dingin hi thupêk hi ka siem a nih:Ama chu Pathien hring a na, Kumkhaw dai Pathien a na, A ram chu suksiet ruol lo, A lalna tawp nei lo a nih. 27 San suokin a sandam a, Vàn le hnuoiah inchikna, Thil makhai a thaw hlak a, Sakeibaknei kut a'nthok, Daniel khom a san suok a" tiin. 28 Chuongchun, Daniel chu Daria inlal sûng le Persia mi Kura inlal sûng po po chun kong iengkimah a hmûingìl ta hle a.

7

1 Babulona lal Belsazar inlal kum khatnaah Daniel chu khuma a zàl laiin a mangin inlârna a hmu a, a mang chu a tlângpui a ziek thlak a. 2 Daniel chun, "Zàna inlàrna ka hmu chu ka hei en a, ka hmaa chun kawl kil lia inthokin thli a hung hràng a, tuipui chu a sukso buon buon a. 3 Tuipuia inthok chun sakol lien tak tak pali, inang lo seng hi, an hung suok a. 4 A pakhatna chu sakeibaknei ang a na, mupui angin thla a nei a, ka en zing lai chun a thla chu an pot kol a, hnuoia inthokin an kei tho a, mihriem angin ke pahniin an inngìrtir a, mihriem lungril an inputtir a. 5 Chun, ka hmaa chun sakol pahnina chu a lo ngìr a, savom ang a na, a kè hnung tieng chauin a ngîr a, a baua chun nâkru pathum a sè put a, rawl hung suok chun, "Tho la, i khop tawkin sa fa rawh" tiin an hril a. 6 Chu hnunga chun ka hang en a, sakol dang a hung inlang nawk a, keite tiel ang a na, a hnung tieng chun vate thla ang thla pali a nei a, lu pali a nei bok a, a kuomah chun rorêl theina thuneina an pèk a. 7 Chuonga zàna inlàrna ka en zing lai chun ka hmaah sakol palina chu a hung inlang a, pangzatum tak le tibaium tak a ni a, a hrât êm êm a. Thîr hà inhrol tak tak a nei a, a sa sèhai chu a pot chen a, a dolin a dol zung zung a, a fàk bâng po chu a chìl sop hrep a. Sakol dang ang loin kî khom sawm zet a nei a. 8 A kîhai ka en zing lai chun ki dang chikte hi a hung mawng nawk a, ki hmasa pathum chu an phawi a. Hi ki mawng thar hin mihriem mit ang mit a nei a, a bàu chun uongna thu ngot a sâk suok a. 9 Chuonga ka thlîr zing lai chun, Lalthungpha an hung rem a, Chu chun Tienlaimi hi a'n thung a; A silfen chu vûr angin a vâr a, A sam khom sahmul var ang a nih. A lalthungpha chu meichok ang a na, A ke kuolhai chu a chok puot puot a. 10 A hmaa inthok chun meilingVadung angin a luong suok a. Sâng tamin a rong an bawl a, Sîng tam a hmaah an ngîr bok a. Rorêlna chu an hang tan a, Lekhabuhai chu an phar a. 11 "Ka en zing lai chun, chapo taka a ki chu a tong a tong leiin sakol palina chu an that a, a ruong chu an chan phit a, meia chun an pei a. 12 Sa danghai thuneina khom chu an làkpèk vong a, iemani chen an la dam ruok chu an phalpèk a. 13 Zàna inlàrna ka hmu chu ka en zing laiin, ngai ta, vàn sûm laia inthoka hung thla mi pakhat, mihriem naupa ang hi ka hmu a. Tienlaimi chu a hung pan a, a hmaa chun an hung thuoi a. 14 Thuneina hai, ropuina hai le thilthawtheinahai chu a kuomah an pèk a, mi tin, hnam tin le tong tina mihai chun an chawibiek a. A lalna chu lalna hlun, ral ngai lo ding a na, a lalram chu tû suksiet thei ngai lo ding chu a nih. 15 Kei, Daniel hi, zàna inlàrna ka hmuhai chun an mi sukthlaphang a, ka lungril an chokbuoi hle a. 16 Hieng thil umziehai po po hi mi hril fie dingin chu taka ngîr laia pakhat chu ka va pan a, ka'n don a. Chuongchun thil um dàn le a hrilfienahai chu a mi hril a: 17 "Sakol pali i hmuhai kha hnuoia lalram pali la hung ngìr dinghai chu an nih. 18 Amiruokchu, Chunghnungtak mi thienghlimhai chun lalram chu chang an ta, kumkhuoin nei an tih, a nih, chatuona inthoka chatuon chenin" a ta. 19 Chun, sakol palina, a danghai nêka danglam bik, tìbàium tak el, thîr ha le dâr tin nei, a sa sehai pot nawi a, dol zung zung a, a fàk bànghai chil sop hlak chungchang chu hriet ka châk ta a. 20 A lua ki sawm um chungchàng dâm, ki dang a hung inder suok hnunga ki hmasa pathum a tlong dàn hai, ki mit nei le a baua uongna thu a'n pawt suok zing chungchàng dâm khom chu hriet ka châk bok a. 21 Chun, ka en zing a, kî chun mi thienghlimhai chu a do a, a hne a. 22 Sienkhom Tienlaimi chu a hung a, Chunghnungtak mi thienghlimhai chu hnèna a'n changtir ta lem a, lalram an hluo hun chu a hung tlung ta a. 23 Chun, sakol palìna chungchàng chu hieng ang hin a hril a: "Hi sakol palìna hi hnuoia lalram hung ngir ding palìna chu a nih. Lalram danghai nêk khan danglam a ta, hnuoi pumpui hi dol a ta, a kein chîl sop a ta, rawt nawi a tih. 24 A kî sawmhai chu hi lalrama inthoka lal sawm hung suok dinghai chu an nih. Anni hnunga hin lal pakhat hung suok a ta, a hmaa lal pathumhai chu tukdol a tih. 25 Chunghnungtak chu kalin hril se bor bor a ta, mi thienghlimhai chu nêksawr a ta, hun bi ruothai le dànhai chu thlâkthleng vong tum a ta, mi thienghlimhai chu hun khat le a chenve a kutah pèkin um an tih. 26 "Amiruokchu, rorêlna um a ta, a thuneina chu lapêk an ta, kumkhuoin sukbohmang an tih. 27 Chu zoah vànkhup hnuoia lalramhai chunga lalna, thuneina le ropuina chu Chunghnungtak mi thienghlimhai kutah pêng an tih. A lalram chu lalram kum hlun nîng a ta, rorêltuhai po po chun chawibiekin a thu zawm an tih. 28 Hi hi thil tawp dàn chu a nih. Kei, Daniel hin, hmai dâng hiel khopa tiin ka thil hmuhai chu ka ngàituo a, lungrilin ka pâi rûk ta zing a.

8

1 Lal Belsazar inlala inthoka kum thumnaa chun kei, Daniel kuoma hin inlàrna dang a hung inlang a. 2 Inlàrnaa chun Elam biela Susan lal in, Ulai tuikor kama umin ka lo inhmu a. 3 Ka hang ngha vèl a, ka hmaa tuikor kama chun beramchal, ki pahni nei ngîr hi ka hmu a, a kî chu a sei hle a. Ki khat chu ki dang nek chun a sei lem a, a sei lem chu a mawng nuhnung lem a nih. 4 Beramchalin thlang tieng le hmar tieng le sim tieng nora a'n phìt lai chu ka hmu a, sa dang hrim hrim ama cho ngam an um naw a, a laka inthoka san suok thei an um nawh. A nuom ang anga chein a'n hrosa a, a hung chalngèng ta hle a. 5 Ka thil hmu ka ngàituo lai chun khawthlang tienga inthokin kèlchal, a mit khing hni inkâra kî langsàr deu nei hin hnuoi pum hlênin a hung inlang thut a, a kè chun hnuoi khom a tawk nawh. 6 Tuikor bula ngîr beramchal, ki hni nei chu lungsen êm êmin a hung pan a. 7 Beramchal chu na takin a baw a, a sik a, a kî pahni chu a siktliekpêk a, hnuoiah a sik thlûk a, a sir ziel a, a kuta inthoka beramchal san suok thei tû khom an um nawh. 8 Kèlchal chu a hung chalngèng ta hle a, sienkhom a hràt vànglai takin a ki hrêu chu a tliek a, a hmuna chun ki pali, kawl kil li nghain a hung mawng a. 9 Ki pali laia ki pakhata inthok chun ki chikte a hung indawn suok a, tlawm taka intanin sim tieng le sak tieng le Ram Mawid tieng chun nasa takin a hung inzàr lien a. 10 Vàn lêngruol tong hiel khopin a'n thang lien a, arasi bawr iemani zât zet chu hnuoiah a hol thlâk a, a sir hmàt a. 11 Chuong vàn lêngruolhai lal anga insuklienin, ni tina pumraw thilhlân an inhlàn hlak hai chu a lâkpèk a, a Hmun Thienghlim chu a suksiet a. 12 Vàn mi thienghlim pawlhai laia helna leiin, vàn mihai le ni tina inthawina thilhlânhai chu ama kuta chun an pèk a, iengkimah a hung hlawtling a, thutak chu hnuoia pei thlâkin a um ta a. 13 Chun, vàntirko pakhat tong ri ka hriet a, a kuoma chun vàntirko dangin, " Ni tina pumraw thilhlân chungthu dâm, helna leia sukramna a tlung thu dâm, sir ziel dinga Hmun Thienghlim le chu taka chênghai chu pèk suok an ni thu dàma inlàrna hi hlen kim a nina dingin hun ieng chen am lâng a ta?" a ta. 14 Ama chun, "Zîng tieng le zàn tieng voi sânghni le zathum sûng awng a ta, chu zoah Hmun Thienghlim chu inthien fai ni nawk a tih" a ta. 15 Kei Daniel hin inlàrna chu thlîra a umzie hriet ka tum lai chun, ka hmaah mi pakhat, mihriem ni awm tak hi a hung ngìr a. 16 Ulai tuikor kama inthok chun pasal rawlin, "Gabriel, hi pa hi inlàrna umzie chu hril fie rawh" tia a hung hril ri ka hriet a. 17 Ka bul a hung hnai chun ka ti hle a, a hmaah ka bokkhup a. Ama chun, "Mihriem naupa, inlàrna hi hun tawp ding hrilna a nih ti hre rawh" a ta. 18 A tong lai chun hmaia hnuoi sikin indên takin ka lo in a, sienkhom a mi keihar a, a mi chel ngìr a. 19 Ama chun, "Ngai ta, lungsenna ni a hung tlung phaa thil um dàn ding chu ka hril ding che a nih, inlàrna i hmu hi khawvel tawp ding thu hrilna a ni si a" a ta. 20 Chun, ama chun ka kuomah, "Beramchal ki pahni nei i hmu kha Media le Persia lalhai tìna a nih. 21 Kelchal inhmul dum kha Grik lal tìna a na, a mit le mit inkâra a ki hrêu kha an lal hmasa tak chu a nih. 22 Chun, kha a ki tliekna hmuna ki pali hung indawn suokhai kha, chu hnama inthoka ram pali la hung suok ding thu inentirna a nih; thilthawtheina ruok chu a ki hreu angin nei ta naw ni hai. 23 An inlal tawp tienga helhai an hung rilo tawpkhawk pha chun lal hmêl tium tak, thil phierrûk thiem, hung suok a tih. 24 Nasa takin hung hràt a ta, sienkhom a thilthawtheina chu amaa inthok suok ni naw nih. Ràpthlâk takin thil sukram a ta, a thaw taphotah hlawtling a ta, mi hrât khawkhènghai le mi thienghlimhai chu suksieng a tih. 25 Inhlèm chu thil hlawkah hung inchangtir an ta, chu taka a pukhawi tak chu ama nîng a tih. Muonga an inngai laiin mi tam tak suksieng a ta, lalhai Lal chu khing a ta, sienkhom mihriem kut thang loa suksietin um a tih. 26 Zîng tieng le zàna inlàrna inhmutira i um tahai kha thudik a na, amiruokchu hun sawt tak hnunga la tlung ding chauh a ni leiin inlàrnahai kha chàr khum rawh, " a ta. 27 Kei Daniel hin ka thil hmu chu ka chàupui phâ dèr a, ni tam tak dam loin ka zâl a. Ka hung tho inkàng thei chun lal sin chu ka sunzom nawk a. Inlàrna chu pangzatum ka ti hle a, hriet thiem phàk ruol a ni si nawh.

9

1 Zarzia naupa Daria, Media hnama mi chu Babulon ram lalah a hung um a. 2 A hung inlala inthoka kum khatnaa chun kei, Daniel hin LALPAN zawlnei Jeremia hmanga Jerusalem a sukram hun sûng dinga a lo hril chu kum sawmsari a nih ti lekhabua inthokin ka hung hriet ta a. 3 Chuongchun, bu ngheiin, saiip silin, vuta inbuolin, LALPA Pathien kuomah tongtaiin dawvan ka kai a. 4 LALPA Pathien hmaah inphorin, ka mihai thil suol thaw leiin thupha ka chawi a:"Aw LALPA, Pathien ropui le tium, ama hmangaitu le a thupêk zawmtuhai chunga a hmangaina thuthlung vong tlat hlaktu, 5 i lakah thil suol thawin i poi kan tawk a. Kan rilo a, kan hel a, i thupêk le dànhai kan nghatsan a. 6 Nangma hminga kan lal hai, mi lien hai, pa hai le a ram mipui po po kuoma thu hung hril hlaktu i siehlaw zawlneihai thu chu kan ngàithlàk nuom bok nawh. 7 "Aw LALPA, nang chun indik takin thil i thaw hlak a, keini ruok chun i hmâimawkna ding ngot kan thaw lem hlak si. Judai rama mi hai, Jerusalem le Israel rama mihai le ram hla le hnaia i hnot darhai po po hi i lakah kan ringum ngai si nawh. 8 Aw LALPA, keini le kan lal hai, mi lien hai le pâ hai hi i lakah kan suol leiin inzaknan kan sip a ni hi. 9 LALPA ka Pathien, nang chun ngil i nei a, i lakah hel hlak inlang khom nang chun i mi ngàidam hlak. 10 LALPA kan Pathien thu kan zawm naw a, a siehlaw zawlneihai hmanga dàn a mi pèkhai khom chu kan vong bok nawh. 11 Israel mi po poin i dàn an bawsiet a, an nghatsan che a, i thu an awi nuom si nawh. Kan suol tlat si leiin i siehlaw Mosie Dàn bua inziek tongsie po po le i hming sâl meua kan chunga thil tha lo intlungtir dinga i lo inkhàmna po po kan chungah bun thlâkin a um tah a nih. 12 Keini le kan lalhai chunga thil hung tlung dinga i hrilhai chu hung hlenin, sietna râpthlâk tak kan chungah i hung intlungtir a. Jerusalem tluka naa i soisak khuo hi vànkhup hnuoiah tu khuo khom a um nawh. 13 Mosie Dàna inziek angin, hieng sietnahai hi kan chungah hung tlung sien khom kan suolhai sima thutak tieng ngaisak dingin LALPA kan Pathien ditsakna kan zong nuom si nawh. 14 LALPA kan Pathien chun iengkim indik takin i thaw hlak leiin, kut kei loin kan chungah sietna i hung intlungtir a ni si a. Chuong sà khom chun i thu kan awi nuom chuong si nawh. 15 "Aw LALPA kan Pathien, Aigupta rama inthokin i kut hràtin i mihai i thuoi suok a, tu chen hin hming i ser a. Keini ruok chu i chungah kan suol a, i poi kan lo tawk a nih. 16 Aw LALPA, i felna po po leiin i lungsenna le intûrna chu i khawpui Jerusalem, i tlâng thienghlima inthok hin la hmang tah dingin ka ngèn che. Kan suolna lei le kan pahai bawsietna leiin Jerusalem le i mipuihai hi kan kawl le kienga mihai nuizatbûr kan inchang zo ta si a. 17 "A nih, tuhin aw Pathien, i siehlaw tongtaina le hnìna hi lo ngàithla hràm rawh. Aw LALPA, nangma zâr bêkin i Hmun Thienghlim ram ta hnung hi ditsakna mitin hung en nawk hràm raw khai. 18 Aw Pathien, i nâ mi dawpêk la, mi ngâithla la, i mit mengin i hming puttu khawpui hang ram tàk dàn hi zuk en ta. Kan felna leia i hmaa dawvan hung kâi kan ni naw a, i zangaina ropui tak lei lema hung kâi kan nih. 19 Aw LALPA ngàithla la, aw LALPA ngàidam rawh; nangma lei bêkin aw ka Pathien, che nghal la, sawt riel ta naw rawh, i khawpui le i mipuihai hin i hming an put si a" tiin. 20 Chun, ka suol le ka mi Israelhai suol thupha chawiin ka tongtai pei a, LALPA ka Pathien kuomah a tlâng thienghlim indin thar nawk dingin ka hni a. 21 Chuonga ka tongtai lai chun, kha hmaa inlàrnaa ka hmu tah Gabriel chun zàn tieng pumraw thilhlân hun lai vel hin hrât taka vuongin a mi hung pan a. 22 Ama chun ka kuomah, "Daniel, sùngril mit varna le hriet thiemna lungril pe ding chein ka hung a nih. 23 I hnî hlima inthok khan a donna pèk i ni tah ti ka hung hril che a nih, ngàisak i hlaw hle si a. Chuleiin, ka thucha hung hawn hi ngun takin ngàituo la, inlàrna i hmu chu a umzie hre chieng rawh. 24 "I mihai le khawpui thienghlim hi bawsietna le suolna laka inthoka inthiel faina ding dàm, rîtlonaa inthoka inthien faina ding dàm, chatuon felna làk lûtna ding dàm, inlàrna le hril lawknahai hlenna ding dàm le mi thienghlimtak hriek nàlna ding dàmin hapta sawmsari ruot a nih. 25 Jerusalem tungding le bawl that dinga thupêk insuo a nia inthoka Hriek Nàl lala a hung inthung chenin hapta sari nîng a tih ti hre fie rawh. Harsatna tam tak kàrah Jerusalem kotthlêr siemna ding le tên khurhai chona dingin hapta sawmruk le pahnih ruot a tih. 26 Hapta sawmruk le pahni hnunga chun Hriek Nal chu thatin um a ta, mi le sa tu khom nei naw ni a, lal dang hung suok a ta, ama chun a sipaihai thuoiin khawpui le tempul chu suksieng a tih. Tawpna chu tui lien angin hung a ta, a tawp chenin indona um a tih, sukramna chu tlung dinga ruot sâ a ni si a. 27 Hapta khat sùng chu mi tam tak thuthlung siempui a ta, sienkhom hapta chenveah inthawinahai le thilhlânhai chu suktawp a tih. Tempul sîr khata chun sukramtu tirdakum sieng a ta, a tawpna hun dinga ruot a tlung phaa a chunga lungsenna bun thlâk a ni chenin tempula chun um a tih" a ta.

10

1 Persia lal Kura inlala inthoka kum thumnaa chun Daniel (Beltesazar tia ko bok) kuomah thu a hung tlung a. Chu thu chu thu indik, indona ropui tak chungchàng thu a na, a thu umzie khom inlàrnaah a hril fiepèk a. 2 Chuong lai chun kei Daniel hi hapta thum pumhlûm lusûnin ka um a. 3 Bu dukdak ka fâk naw a, sâ amanih uoiin amanih ka bàuah a lût naw a, hapta thum a tlingtlàk hma chun hriek khom ka'n nàl bok nawh. 4 Chun, thla khatna ni sawmhni le palìna chun vadung lien tak Tigris kamah ka lo ngìr a. 5 Ka hang en a, mi pakhat puon zài inhmia inthuom le a kawnga rangkachak hlîr kawngchûn inzem hi ka hmu a. 6 A taksa chu beril lung ang, a hmêl chu kawlphe anga var, a mit chu meiser chok ang, a bân le kehai chu dâr nawt tle sèt ang le a rawl chu mipui tam tak rawl ang a nih. 7 Chu inlàrna chu kei Daniel chauh hin ka hmu a, ka bula umhai chun inlàrna chu an hmu ve naw a, sienkhom chuong ang thil tibaiumin a tuom lei chun inbikna ding zongin an tlànsie a. 8 Chuongchun, keima chauh ka ni ta a, inlàrna râpthlâk tak chu ka hmason a, tha hrui hrim ka nei naw a, mithi ang elin ka hmêl chu a dâng a, ka zoi vong a. 9 Sienkhom a tong ri chu ka hriet a, ka ngàithlàk lai chun bawka hnuoi sikin ka lo in innghil ta dèr a. 10 Chun, kutin a mi hung chel a, ka kut le kehai chu a'n thin hlop hlop a. 11 Ama chun ka kuomah, "Aw Daniel, Pathien mi ngàinat i nih. Tu hin ngîr inchang la, ka thu hril ding che hi fimkhur takin ngàithla rawh, i kuoma tir ka ni si a" a ta. Chu thu chu a hril zoin inthin pumin ka ngîr suok a. 12 Ama chun ka kuomah, "Daniel, ti naw rawh. Pathien hmaa inngàitlawm ding le hrietthiemna lungril put dinga lungril i siem nia inthok khan i thuhai chu ngàithlàkin a um a, chu leia hung chu ka nih. 13 Persia ram hotu ruok chun ni sawmhni le ni khat a mi dodal a. Persia lalin a mi chàr de tlat leiin mi san dingin vàntirko hotu Mikael a hung a. 14 I mihai chunga thil la hung tlung dinghai chu hril ding chein tuhin ka hung a nih, inlàrna i hmu kha thil la hung tlung ding thu a ni si a" a ta. 15 A hril lai chun hnuoi sikin ka bokkhup a, ka tong thei naw a. 16 Mi pakhat, mihriem ang deu hin ka hmùr a hung them a, chuongchun ka bàu ka ka a, ka hmaa ngîr kuoma chun, "Aw ka lalpa, inlàrna ka hmu chun a mi suklungngai a, thahrui hrim ka nei nawh. 17 Ka lalpa, i siehlaw kei hin iengtin am ka biek ding che a na? Thâ hrim ka nei naw a, ka'n thuok dèp dêp chauh a ni hi" ka ti a. 18 Chuongchun, mihriem ang deua inlang chun a mi them nawk a, a mi sukhràt a. 19 Ama chun, "Ti naw rawh, nang Pathien ngàinat mi! Thlamuong takin um rawh! Tuhin hung hràt ta rawh, hung hràt ta rawh" a ta. Chuonga a hril lai chun ka hung hràt a, "Ka lalpa, hril pei rawh, i mi sukhràt ta si a" ka ta. 20 Ama chun ka kuomah, "I kuoma ka hung san hi i hriet am? Tuhin Persia ram hotu bei dingin ka kîr ding a na, ka hnè phâ leh Grik ram hotu hung inthok a tih. 21 Sienkhom, a hmasain Thudik Bua inziek chu hril phot ka ti che: hieng mihai ka beinaa ka tienga thang chu in hotu Mikael chauh kha a nih.

11

1 "Chun, Media mi Daria inlal tan kuma inthok khan ama thangpui ding le hum dingin kei hi ka ngîr tlat a nih" a ta. 2 "Chun, tuhin thudik ka hril ding che a nih. Persia ramah lal pathum hung suok an ta, a palìna chu a danghai nêkin nasa takin hausa lem a tih. A hausakna leia a ngìrhmun a sukhràt phâ chun Grik ram do dingin cho a tih. 3 Chun, lal hrât tak hung inlang a ta, a hrâtna nasa tak chu hmangin a nuom ang angin thawng a tih. 4 A'n lal vanglai takin a ram chu khoi dar nîng a ta, kawl kil liah sem dar an tih. A thlàhai ni lo lal dang hung inlal an ta, sienkhom ama ang tluka hrât tu khom um naw ni hai. 5 "Sim tieng lal chu hung hràt a ta, sienkhom a kawmandarhai laia pakhat chu ama nêkin hung hràt lem a ta, ama ramah thuneina nasa tak neiin inlal a tih. 6 Kum iemani zât hnungah sim tieng lal chun hmar tieng lal chu inruolthatpuiin, a naunu chu nuhmeiah inneitir a ta, sienkhom lal naunu chun thuneina chel zing naw ni a, hmar tieng lal le a thlàhai khom inlal sawt naw ni hai. Chuong hun lâi vèk chun lal naunu le a pa le a siehlaw hung somhai chu that vong an tih. 7 Chu hnung chun lal naunu sûngkuo laia pakhat chu hung inlal a ta, hmar tieng lal le a sipaihai chu do a ta, an kulah hlûkhum a ta, bei a ta, hnèng a tih. 8 An pathienhai, an milim sunghai, tangkaruo le rangkachaka siem an bûr le bêl tha tak takhai chu sim tieng ramah tol hmang a tih. Kum iemani zàt chu hmar tieng lal chu tawkbuoi naw nih. 9 Chu zoah hmar tieng lal chun sim tieng ram chu rûn a ta, sienkhom hnot kîr an tih. 10 Chun, hmar tieng lal naupa chu sim tieng do dingin insingsàng a ta, sipai tam tak khawm a ta, tui lien sàng dang ruol lo angin an kul bul chen inhuol a tih. 11 Mi tam tak thuoiin sim tieng lal chu lungsen takin hmar tieng lal chu bei dingin inthok suok a ta, hmar tieng lal chu sipai tam tak leh lo thang a ta, sienkhom tlawm a tih. 12 Hmar tieng sipai tam tak a thuoi hmang leiin sim tieng lal chu insuong hlêng a ta, mi tam tak that a ta, sienkhom hnèna chu chang zing naw nih. 13 Hmar tieng lal chun a hma nêka tam lem sipai khawm a ta, kum iemani zàt hnungah râlthuom kima inthuom sipai tam tak leh hung bei lêt a tih. 14 "Chu huna chun sim tieng lal chu do dingin mi tam tak hung ngîr suok an tih. I chihai laia thisen insuo hmanghai khom inlàrna sukpuitling dingin hel vêng an ta, sienkhom hlawtling naw ni hai. 15 Chu phing leh hmar tieng lal chu hung a ta, kul inhuolna dingin muol pawng siem a ta, kula inhuon khawpui chu lâng a tih. Sim tieng sipai hràtna chun dang zo naw ni a, an sipai hrât takhai khom che thei naw ni hai. 16 Rûntu chun a nuom ang angin thawng a ta, tu khomin kal ngam naw nih. Ama chun Ram Mawiah umhmun khuor a ta, a kutah sukram theina kol a tih. 17 A hrâtna po po leh hung inthok a ta, a ram a suksiet theina dingin sim tieng lal ruol thaa siem dingin a naunu chu nuhmeia inneitir tum a ta, sienkhom a tum chu hlawtling naw ni a, hlawkpui bok naw nih. 18 Chu hnung chun tuipui kam ramhai chu bei a ta, tam tak lâng a ta, sienkhom a kawmandar laia pakhat chun a chapona chu suktawp a ta, ama chungah bun lèt a tih. 19 Chu zoah a rama a kul umna tieng kîr nawk tum a ta, sienkhom that an ta, chu chu a tawpna nîng a tih. 20 Ama thlâktu lal chun a lalna chu ropui taka kengkaw zing tumin sie inchawi luitir dingin siekhontuhai tir suok a ta, sienkhom kum sawt naw teah lungsen lei le indo lei khom ni loin lal chu suksietin um a tih. 21 A hmuna chun mi rilo deu el pakhat hung inlal a ta, dàn anga lallukhum inkhumtir khom ni naw ni a, dawha hmangin, a ram mipuiin muonga an inngai lai chu hung rûn thut a ta, lalna chu hung hluong a tih. 22 A hmaa chun ama kaltu sipai tam tak chu tui lien angin hrût hrep a ta, lèn hmang a ta, chuonghai lai chun thuthlungtu lal khom thang a tih. 23 Vervêk taka inruolthatna thu hnam danghai a thlungpui hnungin anni chu hlêm a ta, a zuitu mi tlawmte leh hung ngîr suok a tih. 24 A ram sûnga biel hausa sahai chu muonga an inngai laiin rûn thut a ta, a pi le puhai khoma an thaw ngai lo chu thawin, a hnungzuituhai chu râllâk thil le a sum rokhai chu sem a tih. Kul nei khuohai lâk dàn ding phierrûk a ta, sienkhom hun sawt dai naw nih. 25 "A hràtna le huoisenna chu chok thoin, sipai tam tak leh sim tieng lal chu bei a ta. Sim tieng lal khomin sipai tam tak le hrât tak leh lo do a ta, sienkhom an lo phierrûkna leiin hmar tieng lal chu ngam naw nih. 26 A ruoi hnienghnâr kîlpui hlakhai ngei chun ama chu sukbohmang an ta, a sipaihai tlân dar an ta, indonaah tam tak thîng an tih. 27 Hieng lal pahnihai hin insuksiet tumna lungril put rân siin ruoi kîl tlàngin thukhêlin indawr an ta, sienkhom hlawtling naw vê vèng an ta, a hun ruotah la tawp vé vè tho an tih. 28 Hmar tieng lal chu rosum tam tak leh ama ram tieng kìr a ta, sienkhom a lungrilin thuthlung thienghlim chu thiekpêk tum a ta, a nuom anga a thaw zoah a ramah kîr nawk a tih. 29 "Hun ruota chun sim tieng lal chu do nawk a ta, amiruokchu a hmaa ang ni ta naw nih. 30 Ama do dingin thlang tieng tuipui kam ramaf inthokin long ruol hung an ta, a lungril zâm a ta, a lungsen hrìk thlàkna dingin thuthlung thienghlim chu thiek tum a ta, thuthlung thienghlim kaltuhai chu hung ditsak a tih. 31 A sipaihai chu tempul inhuonna kul suosam dingin hung inthok an ta, hmun thienghlim chu sukporchèng an ta, ni tina pumraw inthawina thilhlân an thaw hlak chu suktawp an ta, sukrautu thil tirdakum chu sieng an tih. 32 Thuthlung inphatsantuhai chu tongkam thluma inpâk derin sukporchêng a ta, sienkhom Pathien thu zawmtuhai ruok chu nghet taka thang tlatin ama chu do an tih. 33 "Anni laia mi varhai chun mi tam tak zirtir an ta, sienkhom iemani hun sûng chu a then kawlhnâm le meiin thîng an ta, a then lung inah khum an ta, a then chu rok bok an tih. 34 An tlu pha thangpuitu nei tlawm an ta, lungrila ti tak tak lo mi tam takin anni chu zui an tih. 35 Mi var thenkhat chu tawp hun a tlung chena thlit fìm a, sukthieng a, bal kai loa an um theina dingin tuor bok an tih, hun ruot chu a la hung tlung ding chauh a ni si a. 36 "Lal chun a nuom dàn ang angin thawng a ta, ama insukropuiin inchawisâng a ta, pathienhai po po chungah insieng a ta, pathienhai Pathien kalin, hril tìpa nei loin inpawt a ta, lungsenna hrîk thlâk zo a ni hmâ khat hlawtling a tih, ruota lo um ta sa chu a hung tlung ngei ding a ni si a. 37 A thlàtuhai pathien chu poisa naw ni a, nuhmei ruol ngainat pathienhai le pathien dang hrim hrim khom poisa bok naw ni a, an rênga chungah insieng a tih. 38 Annihai nêkin kul humtu pathien chu chawimawi lem a ta, a pi le puhai hriet ngai lo pathienhai chu rangkachak hai, tangkaruo hai, lunghlu hai le thil hluhai pein chawimawi a tih. 39 Ram dang pathienhai thangpuinain kul nghet tak takhai chu bei a ta, tu khom ama pom taphot chu suklien a ta, tam tak chungah ro inrêltir a ta, a ram chu man neiin sem a tih. 40 "Chun, tawpna huna chun sim tieng lalin ama chu hung bei a ta, hmar tieng lal chun tawlailir leh, sakor chungchuong mi le long tam tak leh ama chu do dingin thlipui angin inthok suok a tih. Ram tam tak do a ta, tui lien sàng angin hrût hmang a tih. 41 Ram Mawi khom chu rûn a tih. A hmaah ram tam tak tlûng an ta, sienkhom Edom le Moab le Amon hnam thuoituhai ruok chu a kuta inthoka san suok nîng an tih. 42 Ram tam tak chungah inlal a ta, Aigupta khomin pumpel bik naw nih. 43 Aigupta rama rangkachak le tangkaruo sie khawmna le a ram thil hluhai po po chu hung lâng a ta, Libya mihai le Ethiopia mihai khom a thu hnuoiah kûn an tih. 44 Sienkhom, sak tieng le hmar tienga inthoka rîva a hrietin a lung thawng a ta, anni do ding le sukchimit dingin lungsen takin inthok suok a tih. 45 Tuipui le tlâng thienghlim le mawi inkârah bûk khuor a ta, sienkhom a tawpna hung tlung a ta, tu khomin thangpui naw ni hai.

12

1 "Chu huna chun i mihai vêng hlaktu hotu ropui tak Mikael chu hung suok a tih. Hnamhai an uma inthoka la tlung ngai lo buoina nasa tak tlung a tih. Chu huna chun, I mihai, lekhabua hming chuong taphothai ruok chu san himin um an tih. 2 Hnuoi pilvuta zâl tah mi tam tak chu hung tho an ta, thenkhat chu chatuon hringna chang dingin tho an ta, thenkhat ruok chu inzakna le chatuon muolphonaah lût an tih. 3 Mi varhai chu vàna var angin êng an ta, felnaa mi tam tak thuoi lûttuhai chu arasi angin chatuonin var tâng an tih. 4 Sienkhom aw nang Daniel, thu ziekna bu chu ziel la, tawpna hun a tlung chenin chàr tlat rawh. Hre nuomin mi tam tak tlân vêl ruoi an ta, hrietnag pung phâng a tih" a ta. 5 Chun, kei Daniel chun ka hang en a, ka hmaa chun vakam tuoka mi pahni ngîr ka hmu a. 6 Vadung hnâr tienga um puon zâi inhmia inthuom kuoma chun pakhatin, "Hieng thilmakhai tlung kimna ding hin kum ieng zât am la ngai a ta?" a ta. 7 Puon zâi inhmia inthuom, va hnâr tienga um chun a kut chang tieng le voi tieng chu vàn tieng a phar a, chatuona hring hming chu sâlin, "Hun khat, hun hnih, hun chenve sûngh nîng a tih. Pathien mihai sukdùdàna a tawp pha leh hieng thil po po hi hlen kim nîng a tih" a ta. 8 A tong ri chu ka hriet a, a umzie ruok chu ka hriet nawh. Chuleiin, "Ka lalpa, hieng po po tawpna chu iem nîng a ta?" tiin ka'n don a. 9 Ama chun, "Daniel, fe ta rawh, thuhai chu a tawp hun chena dinga chàr a ni tah. 10 Mi tam tak thlit fim le sukthieng le fai vara siem nìng an ta, sienkhom mi rilohai chu rilo zing an tih. Mi rilo tu khomin hre thiem thei naw ni hai a, mi varhai ruok chun hre thiem an tih. 11 Ni tina pumraw thilhlân suktawp a nia inthoka sukràutu tirdakum sie a hung ni hun inkârah ni sângkhat le zahni le sawmkuo tlâng a tih. 12 Nghâk hràm hrám a, ni sângkhat le zathum le sawmthum le panga nghâk tlungtu chu a eng an thawl. 13 Nang chu a tawp chenin fe pei rawh. Chun, chawl i ta, i nihai tawpna a tlung pha leh i rochana ruot chu dong dingin tho nawk i tih" a ta.