1

1 Hieng thuhai hi Jordan sak tieng, Paran le Tofel, Laban, Hazerot le Dizahab inkâr, Sufa ruom depa um Araba thlalera Israel mihai po po an um laia an kuoma Mosie hril a nih. 2 Seir tlâng hrawa fe chun Horeb le Kadesh Barnea inkâr chu ni sawm le ni khat lam a nih. 3 Kum sawmlina, thla sawm le pakhatna ni hmasa tak chun LALPAN Israelhai chungthua hril ding thu a pêk po po chu an kuomah Mosien a hril a. 4 Chu chu Hesbon-a um Amorhai lal Sihon a hnè hnung le Astarot-a um Basanhai lal Og chu Edrei hmuna a hnè hnung a nih. 5 Jordan sak tieng Moab ramah hi dân hi Mosien a puong tan a nih: 6 "LALPA ei Pathien chun Horeb tlângah hieng ang hin a mi hril a nih: 'Hi tlânga hin in chàm sawt thawkkhat tah. 7 In riebùkhai thiek unla, Amor mihai umna tlângram tieng inson suok unla, Araba le a se vel tlângrama hai, thlang tieng tlâng thut phaizawla hai, sim tieng panga hai, Kanan mihai chèngna tuipui kama hai, Lebanon tlâng khèl Eufretis Vadungpui chenin fe ro. 8 Ngai ta u, hi ram hi ka pêk ta chêu a nih. In thlatu Abraham hai, Isak hai, Jakob hai le an thla la hung pei dinghai kuoma inkhâm meua LALPAN a pèk chêu rama chun lût unla, hluo ta ro' tiin 9 "Chun, chuong lai chun in kuomah, 'Keima ngot chun ka phur zo ta naw chêu a nih. 10 LALPA in Pathien chun a sukpung chêu a, vàna arasi zât anga tam in lo ni ta hi. 11 LALPA, in thlatuhai Pathien chun tuta nêka a lêt sângin sukpung sienla chêu, a tiem angin malsawm raw se chêu. 12 Amiruokchu, iengtin am keima chauh chun in harsatnahai, phurrikhai le in kàra thubuoihai chu phur zo tàng ka ta? 13 In hnam chita inthokin mi var, thil chinchàng hrie le inzà phurhai chu thlang suok unla, in chunga rorêltuah sie tawl ka tih' tiin ka biek chêu a. 14 Chun, nangnin, 'I thilthaw tum chu kan ta dingin a tha ngot el' tiin in mi don a. 15 "Chuong ang chun in hnam chita mi challang, mi var le inzaum in hung thlang suokhai chu sâng chunga hai, za chunga hai, sawmnga chunga hai, sawm chunga hai rorêltu dinga siein, in hnam lukhàitu dinghai khom ka ruotpêk chêu a. 16 In rorêltuhai kuomah, 'In mihai laia thubuoi um hrim hrim chu ngun takin ngàithlapèk unla, Israel unau le unau inkâr thu amanih, Israel mi le nangni laia hnam dang umhai inkâr thu amanih chu indik takin, thlei bik nei loin rêlpèk ro. 17 Ditsak bik nei naw unla, mi chîn mi lien a tu el khom thuhmûn vonga enin an thu rêlpêk ro. Tu khom tithawng naw ro, in thu rêl thlûk chu Pathiena inthok a ni si a. In ta dinga rèl khir taluohai ruok chu ka kuomah hung put lût unla, keiman lo rêl ka tih' tiin thu ka pêk a. 18 Chu lai chun in thaw ding danghai khom ka hril ta chêu kha. 19 "Chu zoah, LALPAN thu a mi pèk angin Horeb tlânga inthokin ei suok a, in hmu tah thlalèr ram lien tak le tium tak chu fe thlengin Amor mihai chèngna tlângram tieng panin, Kadesh Barnea ei tlung a. 20 Chun, in kuomah, 'LALPA ei Pathienin a mi pêk Amorhai chèngna tlângram chu in hung tlung ta hi. 21 Ngai ta u, LALPA in Pathien chun hi ram hi a pêk tah chêu a nih. LALPA, in thlàtuhai Pathienin a hril angin, hang fe unla, ram chu hang hluo ro. Ti naw unla, zâm bok naw ro' tiin ka hril chêu a. 22 Chu phing leh inrêngin ka kuomah in hung a, 'A ram hang thlithlai a, lampui ei hraw ding le khuo ei sir ding hai chanchin hung ripawt nawktu ding enthlatu tir hmasang ei tiu' in ti a. 23 In thil rot chu thaa ka hriet leiin nangni laia mi sawm le pahnih, pahnam tina mi pakhat pei, ka thlang suok a. 24 Anni chu an suok a, tlângrama chun an kài a, Eskol ruom chen an tlung a, an thlithlai vong a. 25 A ram suok thei iemani zât hung hawn thlain, 'LALPA ei Pathienin ram a mi pêk chu ram tha tak a nih' tiin an hung ripawt a. 26 "Nisienlakhom, kai tung nuom loin, LALPA in Pathien thupêk laka chun in hel a. 27 In puon ina hai chun, 'LALPAN a mi theida a, mi sukbohmang tumin Amorhai kuta pêk dingin Aigupta rama inthokin a mi thuoi suok a nih. 28 Ieng leiin am ie ei pan tung ding? Ei unauhai hlak chun, 'A rama chênghai chu eini nêk daiin an lien a, an insàng lem a, an khuohai a lien a, vàn tongin kul an nei a, mi lien Anak thlahai khom kan hmuh', an ti nawk nghal a, lungril an sukzâm vong annawm' tiin in chier a. 29 "Chun, kei chun in kuomah, 'Thlabàr naw unla, anni chu ti bok naw ro. 30 In hmathuoitu LALPA in Pathien chun, Aigupta rama in mit hmua ngei a thawpêk chêu ang khan, anni chu dopêk a ti chêu. 31 Pain a naupa a puok ang elin LALPA chun thlalèra khom, hi hmun hi in tlung chenin, a puok chêu ti in hmu ta kha' ka ti a. 32 Sienkhom, chuong saa in hmaah fe a, in riekna hmun ding zongpêk a, zânah meichokin, sûnah sùmin in hma thuoi a, 33 in lampui ding a kawkhmu chêu khom chun, LALPA in Pathien chu in la ring chuong nawh. 34 "In thil hrilhai LALPAN a hriet chun a lung a sen a, 35 "Hi suon suol taka mi tu khom hin in pi le puhai kuoma inkhâm meua pèk ka tiem ram chu hmu naw ni hai, 36 Jefune naupa Kaleb ti chauh naw chun. Ama chun hmung a ta, a sir ram chu ama le a thlahai kuomah pêng ka tih, lungril po poa LALPA a zui leiin" tiin a'n khàm a. 37 Nangni leiin ka chunga khom LALPA chu a lungsen a, 'Nang khom lût bik naw ti nih. 38 I kaiza vêngtu Nuna naupa Josua ruok chu lût a tih. Ama hi infui phûr rawh, Israelhai thuoiin a la'n hluotir ding a ni si a. 39 Naupang chiktê te, râllâka an lâk el dinga in hrilhai, tuta a sie a tha la hre thei lohai hi chu rama chun lût an ta, anni chu pêng ka ta, hluong an tih. 40 Inrêng hin kîr nawk unla, Tuipui Sen tieng panin thlalèrah fe ro' tiin a hril a. 41 "Chun, nangnin, 'LALPA chungah thilsuol kan lo thaw tah a nih. LALPA kan Pathienin thu a pèk angin kai tung kan ta, hang bei kan tih' tiin in mi don a. Chuongchun, mi tinin râlthuom in inbel a, tlângram pan tung chu olsam hle dingin in ngai a. 42 Sienkhom, LALPA chun ka kuomah, 'Fe naw raw hai se, hang do bok naw raw hai se, nangni lai ka um naw ding a ni si a. 'In hmèlmahaiin lo intlawm an ti chêu' tiin an kuomah hril rawh' a mi ti a. 43 Chu thu chu ka hril chêu a, in pom nuom naw a, LALPA thupêk chu kalin, awm-êu takin tlânga chun in hang fe lui a. 44 Chu tlâng hluotu Amorhai chun an lo bei chêu a, khuoi hon angin Seir tlânga inthokin Horma chenin an hnot thlùr chêu a. 45 In hung kîr a, LALPA hmaah in tap a, sienkhom LALPA chun in tap rawl chu a ûksak naw a, a na a sit bok nawh. 46 Chuongchun, Kadesh-ah ni tam tak, in um pha a ni kha.

2

1 "Chuongchun kan inher kîr a, 2 Chun, LALPA chun a mi biek a, 3 'Hi tlâng hi in hèl suok rawn ta a, hmar tieng pan ta ro. 4 Hieng ang hin mipuihai chu thu pe rawh: Seir tlânga um Esau thla, in unauhai ram chu in pal tlang ding a na, an ti ding chêu a ni leiin fimkhur hle ro. 5 Indo dingin cho naw ro, an ram chu kepha tiet khom ka pêk naw ding chêu a nih. Seir tlângram hi Esau chanpuola ka pêk a ni tah. 6 In fàk le dawn khom a man tangkaruoin in pèk ding a nih. 7 LALPA in Pathien chun in kut sinthaw mal a sawm a, thlalèr ram zau tak in pal tlang lai khomin a enkai zing chêu a. Kum sawmli sûng hin LALPA in Pathien chun a umpui chêu a, tlàksam ieng khom in nei nawh, ' tiin. 8 Chuong ang chun Elat le Ezion-geber a inthokin Araba lam chu hrawin ei unauhai, Seir tlânga um Esau thlahai ram chu kan pal tlang a, Moab thlalèr panin kan fe a. 9 "Chun, LALPAN ka kuomah, 'Moab-hai kha sukbuoi naw unla, indo dingin cho bok naw ro, an ram hlek khom ka pêk naw ding chêu a nih. Ar khuo chu Lota thlahai chanpuola ka pèk a ni tah' a ta. 10 (Chu hmuna chun a hmain Anak-hai ang boka mi lien le dung insàng Emim an tihai chu tam tak an um hlak a. 11 Anni chu Anak-hai ang boka Refa tia ko ni hai sienkhom Moab mihai chun Emim tiin an ko a nih. 12 Chun, tuta hma chun Seir tlânga hin Hor-hai an um hlak a, sienkhom Esau thlahaiin an hlu suok a, an tukdol hnung chun an hmun chu an hluo tah a nih, LALPAN Israelhai chanpuola ram a pèk an thaw ang khan. ) 13 "Chun, LALPAN ka kuomah, 'Tho unla, Zered varuom chu kân ro' a ta, chuongchun Zered varuom chu kan fe kai a. 14 Kadesh-barnea kan suoksana inthoka Zered vadung kan kân chen inkâra hin kum sawmthum pariet a tlâ a nih. Chu sûng chun, an kuoma LALPA a'n khàm angin, chu suona mi laia râl kâp thei chin chu an mang fai thak a nih. 15 Mipui laia inthoka sukchimit an ni vong hma khat chu LALPA kut chun a khing tlat tawl si a. 16 "Râl kâp thei chin an thi zo vong hnung chun 17 LALPAN a mi biek a, 18 'Voisun hin Moab ram chu Ar khuoah in fe thleng ding a nih. 19 Amon-hai umna in va paw pha khom sukbuoi naw unla, indo dingin cho bok naw ro. Amon-hai ram chu Lota thlahai chanpuola ka pêk tah leiin an ram chu a hlekte khom in chanpuola dingin pe nawng ka ti chêu' a ta. 20 "(Chu hmun khom chu a hmaa chêng hlak Refahai rama ngai a na, sienkhom Amon-hai chun anni chu Zamzumhai tiin an ko. 21 Mi lien tak, tam tak el, Anak-hai ang boka dung insâng tak tak an nih. Anni rawi chu LALPAN a sukbohmang a, an umna chu Amon-haiin an hung hluo tah a nih. 22 Chuong ang bok chun LALPAN Seir tlânga um Esau thlahai ta ding khomin a thawpèk a, Hor-hai chu a sukbohmang a, anni hmuna chun voisun chen hin an chèng tah a nih. 23 Khaw hrang hranga chènga Gaza chena inzar Av-hai khom Kret thlierkâra inthoka hung Kaptorhaia chun an sukboral a, an ram chu a hluopèk tah a nih. ) 24 "Chun, LALPAN ka kuomah 'Tuhin suok unla, Arnon Ruom fe thleng ro. Amon mi, Hesbona lal Sihon le a ram chu i kutah ka pêk suok tah. Hluo tan inla, indopui ro. 25 Voisuna inthok hin vànkhup hnuoia hnam tin tisimah siem ka ti che a, i chanchin an hriet ringot khomin thlabâr le beidongin inthin hawp an tih' a ta. 26 "Chuongchun, Kedemot thlalèra inthokin Hesbon lal Sihon kuomah inremna thu inchawtirin palai ka tir a, 27 "I ram kan hraw tlang mi phalpêk raw khai. Lamlien peiah fèng kan ta, chang tieng amanih voi tieng amanih pêt nawng kan tih. 28 Kan bu fâk ding le tui dawn ding mi'n chawktir la, a manah tangkaruo pêng kan ti che. 29 Jordan kâna LALPA kan Pathien ram mi pèk kan lùt hma chenin, Seir tlânga um Esau thlahai le Ar khuoa um Moab mihaiin kan chunga an thaw ang bokin, nang khomin kea i ram kan hraw tlang mi phalpêk hrâm rawh" tiin. 30 Sienkhom, Hesbon lal Sihon chun a ram kan hraw ding chu a phal nawh. LALPA in Pathien chun tuta a ram ei hluo lai zing hi in kuta a pèk theina dingin a thlarau suklululin a lungril a sukkhaupèk a nih. 31 LALPA chun ka kuomah, 'Ngai ta, Sihon le a ram chu ka'n hlan tan mek ta che a, tuhin a ram chu la la, hluo tan pei ta ro' tiin a mi hril a. 32 Chuongchun, Sihon le a mihai po po chu mi bei dingin Jahaz-ah an hung a. 33 LALPA ei Pathien chun ama chu kan kutah a pêk a, ama le a naupahai le a sipaihai po po chu kan that vong a. 34 Chu tum chun a khuo po po chu kan làk a, kan suksiet vong a, a mi chènghai tu khom damin kan hlà nawh. 35 An ranruolhai le khuo kan làknaa kan râllàkhai ruok chu kan puola dingin kan hawn a. 36 Arnon ruom sìra Aroer le a ruom panga khaw umhaia inthoka Gilead chenin kan ngam lo khuo hrim a um nawh. LALPA ei Pathien chun a mi pêk vong a nih. 37 Amiruokchu, LALPA ei Pathien thupêk angin, Amon mihai ram chu ei tawk sa ve naw chauh a ni khah, Jabok vadung kama khuohai le tlângrama khuohai khom.

3

1 "Chu zoah kan inson a, Basan kan pan tung a, Basan lal Oga chu a sipai po po leh Edrei hmunah mi bei dingin a hung inthok suok a. 2 LALPA chun ka kuomah, "Ama chu ti dêr naw rawh, a sipai po po le a ram leh i kutah ka pêk diem tah a nih. Hesbona Amor lal Sihon chunga i thaw ang bok khan a chunga khom thaw ve rawh" a ta. 3 "Chuong ang chun LALPA ei Pathien chun Basan lal Oga le a sipai po po chu kan kutah a mi pêk a, hlà nei loin kan that vong a. 4 Chu tum chun Basan lal Oga ram, Argob biel po po le khuo sawmrukhai chu làk naw kan nei nawh. 5 Hieng khuo po po hi kul bang insâng tak taka inhuon le kul kotkhâr le a kalna nghet tak tak nei vong an na, kula inhuon lo khuo khom tam tak a um bok a. 6 Hesbona Sihon lal chunga kan thaw ang bokin kan sukbohmang vong a, an khuohai le a sùnga cheng mihriem po po, nuhmei le naupang chenin, kan inram fai vong a nih. 7 An ran ruolhai le khuoa mi kan ràllàk thilhai ruok chu kan puola dingin kan lâk a. 8 "Chu tum chun hieng Amor lal pahnihai ram, Jordan vadung sak tienga mi hi Arnon ruoma inthoka Hermon tlâng chen kan làk a. 9 (Hermon chu Zidonhai chun Sirion an ta, Amorhai chun Senir an tih). 10 Tlâng zam pheia khuo po po, Gilead chenin, Basan ram po po, Basan lal Oga khuo Saleka le Edrei chenin kan lâk vong bok a. 11 (Basan lal Oga chu mi lien Refahai laia la dam um sun a na, a khum chu thira siem, a dung meter 4 12 "Chu tuma kan ram làkhai, Arnon ruom sìra Aroer hmar tienga inthoka Gilead tlàng zâtve chu, a ram sûnga khuo um po po leh Reuben hnam le Gad hnam hai ka pêk a. 13 Gilead tlâng zâtve dang le Oga inlalna ram Basan po po chu Manase hnam zâtve kuomah ka pêk a. (Basana Argob biel po po hi Refahai ram tia hriet a ni hlak. 14 Manase thlaa mi Jair chun Argob biel po po, Gesur-hai le Makat-hai ramri chen a chang a, chu ram chu a hming chawia koin, Basan chu tu chen hin Havot-Jair ti a la nih. 15 Gilead chu Makir ka pêk a. 16 Reuben hnam le Gad hnamhai ruok chu Gilead-a inthoka Arnon ruom chen ka pêk a. A ruom lailung chu sim tienga an ramri a na, hmar tieng panga chu Amonhai leh Jabok vadungah an inramri a. 17 Thlang tieng ramri chu Jordan vadung, hmar tieng chu Kineret Dil, sim tieng tawp chu Araba Tuipui (Chi Tuipui)c le sak tieng chu Pisga tlâng thut chen a nih. 18 "Chu tum chun in kuomah, 'LALPA in Pathienin hi ram hi in hluo dinga a pêk chêu a ni ngei el. Amiruokchu, râl do thei chin taphot chun râlthuom inbelin, in unau Israelhai hmaah Jordan vadung hi in kàn ding a nih. 19 Nangni ang boka in unauhai khom LALPAN ralmuonga a siem hma po le Jordan thlang tienga LALPA in Pathienin ram a pèk chêu chu an hluo chenin, in nuhmeihai, in nauhai le in ranruolhai chu khuo ka pèk ta cheua chun lo um raw hai se, ran khom in hau ta hle ti ka hriet si a. 20 Chu zoah, in chanpuola ka pèk chêu rama hin in hung kìr nawk ding a nih' tiin thu ka pêk chêu a ni kha. 21 "Chun, chuong lai bok chun Josua kuomah, 'LALPA i Pathienin lal pahnihai chunga a thaw dânhai kha mit ngeiin i hmu a. I fena dinga lalhai chunga khom khang ang bok khan LALPAN thaw pei a tih. 22 Anni chu ti naw rawh, LALPA i Pathien ngei chun dopêk a ti che' tiin thu ka pêk a. 23 "Chu tum bok chun, 'Aw LALPA Chunghnungtak, i ropuizie le i kut hrâtzie chu i siehlaw kuoma hin i'n entir tan mèk tah a. 24 Thil ropui tak i thaw anga thaw ve thei hnuoi le vànah pathien dang tu hrim am an um a? 25 Chu ram tha, Jordan râl ram le tlâng ram mawi tak el chu Lebanon chena hmu ve dingin min kàitir ve lul rawh khai' tiin LALPA chu ka ngên a. 26 Nisienlakhom, nangni leiin LALPA chu ka chungah a lung a sen a, a mi ngàithlàk nuom nawh. LALPA chun ka kuomah, 'A hun tah. Hi chungthua hin chu mi be nawk ta ngai hrim hrim naw rawh. 27 Pisga tlâng sîpah hang kài la, sim le hmar le sak le thlang tieng mit inlènin, a ram chu hang thlìr vel rawh, Jordan ruok chu kân naw ti nih. 28 Amiruokchu, Josua hi thu pe la, infui tha la, sukhrât rawh; hieng mipuihai hi ama'n thuoi kai a ta, i hang hmu ding ram chu inhluotir a tih' a ta. 29 Chuongchun, Beth Peor bul ruoma chun umhmun kan khuor a.

4

1 "Aw Israelhai, dàn le thupêk ka zirtir ding hai chêu hi tu hin ngàithla ro. LALPA, in thlatuhai Pathienin ram a pêk chêu chu hring le dama in hluo theina dingin ka hrilhai hi zawm ro. 2 Thu ka pêk bâk chêu hi belsa naw unla, pei bok naw unla, ka pêk chêu ang tak hin LALPA in Pathien thupêkhai chu vong tlat ro. 3 Baal-peor-a LALPA thilthaw kha in mit ngeiin in hmu a, LALPA in Pathien chun Peor hmunah nangni laia Baal betu po po a sukhlum vong a; 4 sienkhom nangni laia LALPA in Pathien cheltu taphot chu hring le damin tu chen hin in la um hih. 5 "Ngai ro, lûta in va hluo ding rama khom in zawm pei dingin LALPA ka Pathienin thu a mi pêk ang takin a dàn le thupêkhai chu ka zirtir chêu a nih. 6 Fimkhur takin zawm unla, chu chu hnam dangha'n an hriet ve hunah, 'Hi hnam hi hnam var tak le thil hre mi tak an lo ni hih' ting an ta, in varzie le changkâng bìkzie hung hrieng an tih. 7 Ei ko châng phota mi don hlak LALPA ei Pathien anga an ko chânga ngaisak hlak pathien nei ve hnam ropui dang tu am an um a? 8 Tuta in hmaa ka siepêk chêu dàn le thupêkhai anga dàn fel nei hi hnam ropui dang tu am an um ve a? 9 "Mit ngeia in thil hmuhai kha theinghil lo ding le in dam sûnga in lungrila a bo nawna dingin, ngun taka mani invêngin, fimkhur ro. In nauhai le in tuhai zirtir ro. 10 Horeb tlânga LALPA in Pathien hmaa in ngîr tuma LALPAN ka kuomah, "Ka hmaa hin mipuihai chu ko khawm la, a ram leilunga an chêng sûng poa mi ti dàn an inchûk theina ding le an nauhai an zirtir dingin ka thuhai lo inhriettir ka tih" a ti ni khom kha hre zing ro. 11 In hung hnai a, tlâng thutah in ngîr a, sûm dum le thim sa mup kârah tlâng chu vàn tongin a chok puot puot a. 12 Chu zoah LALPA chun meichoka inthokin a hung biek chêu a. A thu hril chu in hriet a, a hmèl put dàn awm ruok chu in hmu naw a, rawl chauh in hriet a nih. 13 A Thupêk Sawm, in zawm dinga dân a pêk, lungphêk pahnia a ziek chu, a hung puong a. 14 Chu tum chun Jordan kâna ram inhluo phaa in zawm ding dàn le thupêkhai chu zirtir ding cheuin thu a mi pêk a ni kha. 15 "Horeb tlânga meichoka inthoka LALPAN a biek chêu khan a ruongâm ieng khom in hmu naw kha. Chuleiin fimkhur hle ro, 16 chuong naw chun hung porchein, in ta dingin milem dâm siem fawmin, thil lem, pasal amanih nuhmei amanih lem dâm, 17 an naw leh hnuoia chêng ransa amanih lem dâm, boruoka vuong vate amanih lem dâm, 18 hnuoia bokvâka invâk chi le tuia chêng nga amanih lem dâm siem rawi in tih. 19 Chun, vàn tieng in hang en a, vàn mawitu nisa hai, thlahai le arasihai in hmuin, chuonghai chun hîpin, an hmaa kûn châkna nei naw unla, LALPAN vàn khup hnuoia hnam tin ta dinga a ruot thilhai chu be naw ro. 20 Nangni chu, tuta in ni ang hrim hin a mihai, a rohluotu ni dinga LALPAN rawtuina meia inthoka a lâk suok, Aigupta rama inthoka a thuoi suokhai in nih. 21 "Kei ruok chu nangni leiin LALPA in Pathienin in hluo dinga ram a pêk ding chêu, ram tha taka chun fe ve dingin Jordan vadung ka kài ve a phal tlat naw a nih. 22 Kei chu Jordan kâi ve loin hi lai rama hin thîng ka ta, nangni ruok chun kân in ta, chu ram tha chu hluong in tih. 23 LALPA in Pathienin thuthlung in kuoma a thlunghai kha theinghil lo dingin fimkhur ro. LALPA in Pathienin a khap angin, ieng lem khom in biek dingin nangni ta dingin pathien lem siem naw ro. 24 LALPA in Pathien chu mei anga mi kàng hmang thei, Pathien thîkthusie tak a ni si a. 25 "Tu le tehai nei a, chu rama sawt tak in chêng hnung dàmin hung porche a, milem siem a, LALPA in Pathien mithmuah suol thaw a, a lungsenna in cho phawk dàm a ni chun, 26 Jordan kâna in va hluo ding rama inthok chun bohmang vak in tih ti in chungchâng thua mi hrepuitu dingin tu hin hnuoi le vàn ka fiel a nih; chêng sawt naw ti niu a, matheiloin sukbohmang nîng in tih. 27 LALPA chun hnam tin lai sukdar a ti chêu a, LALPAN a hnot darna chêu hnamhai lai chun mi tlawmte chauh dam khawsuok in tih. 28 Chu taka chun thing le lunga mihriem siem pathien lem, hmu thei lo, hre thei lo, fa thei lo le rim khom hre thei lo hai chu bieng in tih. 29 Amiruokchu, chu taka inthok khom chun LALPA in Pathien chu zong a, in lungril po po le in thlarau po poa in dap chun hmu nawk in tih. 30 Buoina in tuok a, chuong thilhai in chungah a tlung pha chun, a tawpah LALPA in Pathien tieng hung kîr nawkin a thu zawm tâng in tih. 31 LALPA in Pathien chu zangai thei tak Pathien a ni a, thlathlam naw ni chêu a, sukbohmang bok naw ni chêu a, inkhâm meua in pi le puhai kuoma thu a thlung chu theinghil ngai bok naw nih. 32 "Tiena tlânga in um hma dai, Pathienin hnuoia mihriem a siem lai kha ngaituoin, kawlkawdong chen khom dap unla, hieng ang thil ropui hi a tlung ta hlak hrim hrim am? Hieng ang thil hi miin an hriet ta hlak am? 33 Pathienin meichoka inthoka a biek mi, la dam si, nangni ang hi mi an um ta hlak am? 34 Fiena dâm, inchikna le thil mak dâm, indona dâm hmang a, kut hrât tak phar a, in mithmu ngeia LALPA in Pathienin Aiguptaa thil ropui le râpum tak a thawpèk chêu anga hnam dang kuta inthoka mani ngeia a hnamhai la suok ngam pathien dang an um hlak am? 35 "LALPA chu Pathien a nizie in hriet theina dingin hieng thilhai hi in kuoma suklangin a um a nih; ama naw chu Pathien dang hrim an um si nawh. 36 A thunun theina ding cheuin vàna inthokin a rawl a'n hriettir chêu a. Hnuoi chungah a meipui a'n hmutir chêu a, meia inthokin a rawl in ngàithlàk a. 37 In thlatuhai a hmangai a, anni hnunga an thlahai chu a thlang leiin, Aigupta rama inthokin ama'n umpuiin, a thilthawtheina ropui tak chun a thuoi suok chêu a, 38 nangni nèka hnam ropui lem le hrât lemhai ramah thuoiin, in rochung dinga a pêk theina ding cheuin, anni chu a hnot suokpêk chêu a, tuta ang hi in hung ni tah a nih. 39 "Chuleiin, tu hin in lungrilah vongin, hnuoi le vànah LALPA chu Pathien a nizie pom ro. Pathien dang hrim an um nawh. 40 Nangni le in thlahai ta dinga tha a ni lei le LALPA in Pathienin kumkhuoa dinga ram a pêk cheua hin in chêng sawt theina dingin, tuta a dàn le thupêk ka pêkhai chêu hi in zawm ding a nih. " 41 Theidana le tum lawk rêng lei ni loa tu khom mani tuolbawm that paltu tuol tlànna dingin Jordan ràl, ni suokna tieng chun Mosien khuo pathum a ruot a, 42 chu khuo a ienga khom a tlân lût hman chun him a tih. 43 Chuong khuohai chu Reuben hnam puol delh, thlalera tlâng zawla um Bezer khuo dâm, Gad hnam puol delh Gilead tlânga Ramot khuo dâm le Manase hnam puol delh Basan biela Golan khuo dâm a nih. 44 Hi hi Israelhai kuoma Mosie dàn pèk chu a nih. 45 Hienghai hi thil bituk dâm, thupêk dâm le dàn dâm, Aiguptaa inthoka an hung suok hnung, 46 Jordan sak tieng Beth Peor ep ruoma an um laia Mosien a pèk a nih. Hi lai ram hi Amor mi, Hesbon khuoa um lal Sihon ram a nih. Ama chu Mosie le Israel thlahaiin Aigupta an suoksan hnungin an hung hne a, a ram chu an hluopèk a. 47 Chuong ang bokin Jordan sak tienga um Basan lal Oga ram khom an hluopêk bok a. 48 An ram làkin a huop chin chu Arnon ruom sîra khuo Aroer a inthoka hmar tienga Sirion tlâng, Hermon tlâng an ti bok chen a nih. 49 Chun, Jordan ràl sak tieng chu Araba ram po po a na, sim tieng chu Pisgah pangpêr hnuoia Tuipui Thi chenin a nih.

5

1 Chun, Mosien Israelhai po po a ko khawm a, an kuomah, "Aw Israel mihai, ngaithla ro, hieng thupêk le dànhai hi nangni hrietin voisun hin ka puong a nih. Inchûk unla, zawm ngei ngei ro. 2 LALPA ei Pathien chun Horeb tlànga khan thû a mi thlungpui a. 3 Ei thlatuhai kuomah ni loin, eini, voisuna hring le dama la umhai kuoma ngei hin a nih thû a thlung chu. 4 LALPA chun hmai intonin tlânga khan meichoka inthokin a biek chèu a. 5 Kha tum khan meichok chu in ti leiin tlângah in lawn ngam naw a, LALPA le nangni inkârah kei ka ngîr a, LALPA thu chu in kuomah ka puong a ni kha. Hieng hin a hril a: 6 'Keima hi LALPA i Pathien, Aigupta rama bawia inthoka thuoi suoktu cheu chu ka nih. 7 "Keima naw Pathien dang hrim hrim nei naw rawh. 8 "I ta dingin milem insiem naw rawh, chung tieng vâna mi amanih, hnuoi tieng leihnuoia mi amanih, tui sùnga um amanih, a ieng angpui khom, i siem ding a ni nawh. 9 Chuonghai hmaa chun i kûn ding a ni naw a, i chawibiek ding a ni bok nawh. Kei, LALPA hi i Pathien, thîkthusie, pahai khawhlona leia nauhai hrem hlak, mi theidatuhai chu suon thumna le suon lina chen khom hrem hlaktu le, 10 mi hmangai a, ka thupêk zawmtuhai ruok chu an thla, a sânga sâng chen chunga lunginsietna inlangtir hlaktu chu ka nih. 11 "LALPA i Pathien hming hmang thäi naw rawh. LALPA chun a hming hmang pawlawttu chu thiem naw inchangtir loin a'n suo awm si nawh. d 12 "LALPA i Pathien thupèk chê angin, thienghlim takin sabat inser rawh. 13 Ni ruk sûng thokin i sin po po thaw la, 14 ni sarina ruok chu LALPA i Pathien sabat ni a ni leiin, chu ni chun sin hrim hrim i thaw ding a ni nawh; i naupa le naunu hai, i bawipa le bawinu hai, i bawngchal le sabengtung hai, i ran hai hrim hrim le in khaw sunga chêng hnam dang mi hai khomin an thaw ding a ni nawh; nangma ang bokin i bawipahai le bawinuhai khom an chawl ve ding a nih. 15 Nangni khom Aigupta rama khan bawi in ni a, chu taka inthok chun LALPA in Pathien hin a kut hràt khawkhêng pharin a thuoi suok chêu a nih ti hre zing rawh. Chuleiin, LALPA in Pathien chun sabat ni hi inser dingin thu a pêk chêu a nih. 16 "LALPA i Pathien thupêk che ang khan, i nu le pa chawimawi rawh, chuongchun dam sawt i ta, LALPA i Pathien pêk che rama hin hmûingìl i tih. 17 "Tuol that naw rawh. 18 "Uire naw rawh. 19 "Inru naw rawh. 20 "I vênghai laka hrepuitu derah insiem naw rawh. e 21 "I tuolbawm nuhmei inhnar naw la, a in le ram amanih, a bawipa le bawinu amanih, a bawngchal le sabengtung amanih le a thil nei ieng khom inhnar naw rawh" tiin. 22 "Hieng thupêkhai hi tlânga sûm le thim sa mup kâra meichoka inthoka rawl inring taka in rênga pungkhawmhai laia a puong a na, thil dang a belsa nawh. Chuonghai chu lungphëk pahniah a ziek a, a mi pëk a nih. 23 "Tlâng kâng puot puot laia thima inthoka rawl in hriet khan in hnam lukhâituhai le upahai chun an mi hung hnai a. 24 Anni chun, 'Ngai ta, LALPA ei Pathien chun a ropuizie le inlalzie a hung inlangtir a, meia inthoka a rawl chu kan hriet a. Pathienin a biek mihriem khom a la dam thei ti voisun hin kan hmu tah. 25 Tuhin ieng leiin am kan thi ding? Amiruokchu, LALPA kan Pathien rawl kan hriet zing chun hi mei râpthlâk tak hin mi lemin thi el kan tih. 26 Meia inthoka suok Pathien hring rawl kan hriet ang hriea thi thei mihriem ni si la dam zing tu am an um a? 27 Nangin va hnai la, LALPA kan Pathien hril po po chu va ngaithla lem raw khai. LALPA kan Pathienin i kuoma a hril po po chu nangin kan kuomah hril sawng i ta, lo ngaithlang kan ta, zawm kan tih' an ti a. 28 "Ka kuoma in thu hril chu LALPA chun a lo hriet a, ama chun ka kuomah, 'Mipuihaiin i kuoma an hril kha ka lo hriet a, an thu hrilhai po po kha tha ka tih. 29 Chuong ang lungril chu puta mi tiin, ka thupêkhai po po zawm rop nihai sien chu aw, anni le an nauhai khom kumkhuoin an hmûingìl awm vei leh! 30 Fe la, 'In puon ina hai kîr nawk ta ro' va ti rawh. 31 Nang ruok chu ka bulah ngîr la, an hluo ding ram ka pèka an zawm ding thu i zirtir ding po po, ka thupêkhai, ka thusuok hai le ka dàn hai chu hril ka ti che' a ti a. 32 Chuleiin, LALPA in Pathien thupêk cheu chu fimkhur takin zawm ro; chang tieng amanih voi tieng amanih pêtsan naw ro. 33 In hluo ding rama chun hmûingîl taka khawsa a, sawt tak in hluo theina dingin LALPA in Pathien thupêk ang takin kal chawi ro.

6

1 "Jordan vadung kâna in va hluo ding rama in kai phaa nangni le in nauhai le in tùhaiin LALPA in Pathien chu ti a, 2 in damsùng poa a dânhai le thupêkhai chu zawm a, chu hmuna in chêng sawt theina dinga LALPA in Pathienin nangni zirtir dinga a mi pêk, a thupêk hai, thusuok hai le dànhai chu hieng hi a nih. 3 Chuleiin, aw Israel, i thatpui ding le LALPA, i pi le puhai Pathienin thu a tiem anga nenetui le khuoizu luongna rama nasa taka i hung pung theina dingin, ngâithla la, fimkhur takin zawm rawh. 4 "Aw Israel mihai, ngâithla ro. LALPA ei Pathien chauh hi LALPA chu a nih. 5 LALPA in Pathien chu in lungril po poin, in thlarau po poin, in hràtna po poin in hmangai ding a nih. 6 Voisuna thupêk ka pêk chêu hi lungrilah in vong zing ding a nih. 7 In nauhai taima takin zirtir unla, ina in um chàng amanih, lama in lawn lai amanih, in zàl le tho pha amani khomin hril zing hlak ro. 8 Inchikna dingin bânah zem unla, in chalah hrên bok ro. 9 Chun, in in kotkhàr bienga hai le in tuolkotah hai ziek bok ro. 10 "LALPA in Pathienin in pu Abraham hai, Isak hai le Jakob hai kuoma inkhâm meua pêk a tiem chêu ram, in indin khom ni dêr lo khawpui hnienghnâr tak tak hai, 11 in sèng thang dêr loa thil tha tinrênga sung sip in hai, in chìng ni dêr lo grêp huon le oliv huon hai, in cho ni dêr lo tuikul hai umnaa a thuoi lût chêu hunah, fa le dawna in tlai pha chun, 12 bawia in intàngna ram Aiguptaa inthoka thuoi suoktu chêu LALPA chu theinghil lo dingin fimkhur ro. 13 LALPA in Pathien chu ti unla, a rong chauh bawl unla, a hming sâlin thu tiem hlak ro. 14 Pathien dang, in kawl le kienga pathienhai chu in biek ding a ni nawh. 15 Nangni laia um LALPA in Pathien hi Pathien thîkthusie a na, in chungah a lungsen chok a ta, hnuoi chunga inthokin sukbohmang hlauh rawi a ti chêu. 16 Masaa in fie ang khan LALPA in Pathien chu fie naw ro. 17 LALPA in Pathien thupêkhai le a thil bituk le thusuokhai chu fimkhur takin vong tlat ro. 18 LALPA mithmua fel le tha chu thaw unla, in ta dingin thâng a ta, in puhai kuoma inkhàm meua LALPA tiem ram thaa chun lûtin hluo thei in ta, 19 LALPAN a hril angin, in mithmu ngeiah in hmèlmahai chu hnot suok a tih. 20 "Chun, in nauhaiin, 'LALPA ei Pathien thupêk, a thil bitukhai, thusuokhai le dânhai chu a umzie iem a na?' tia nakie an la hung indon pha chêu, 21 nangnin in nauhai kuomah, 'Aigupta rama chu Faraw bawi kan ni a, sienkhom LALPA kut hràtin a mi thuoi suok a. 22 Kan mithmua ngei inchikna le thil mak nasa tak le râpthlak tak tak, Aigupta ram chunga le Faraw le a sûngkuohai po po chungah LALPAN a'n entir a. 23 Keini ruok chu kan pi le puhai kuoma inkhâm meua pêk a tiem rama chun mi thuoi lût dingin Aigupta rama inthokin a mi thuoi suok a. 24 Chuongchun, voisuna ei um anga hring le dama uma ei hnienghnâr pei theina dingin, LALPA chun hieng thupêkhai hi zawm a, LALPA ei Pathien chu ti dingin thu a mi pêk a nih. 25 Thu a mi pêk anga a dânhai po po fimkhur taka ei zawm chun, chu chu ei dingchangna ding a nih' tiin in hril ding a nih.

7

1 "LALPA in Pathienin in hluo ding rama a thuoi lût pha chêu, in hmaa nangni nêka lien lem le hrât lem hnam pasari, Hit hai, Girgas hai, Amor hai, Kanan hai, Periz hai, Hiv hai le Jebu hai a hnot suok pha le 2 anni chu LALPA in Pathienin in kutah pe a, in hne hun pha chun, in inram vong tawl ding a nih. Inremna thuthlung siempui naw unla, zangaina inhmutir bok naw ro. 3 Nuhmei pasalah in inneipui ding a ni naw a, an naunuhai chu in naupahai, in naupahai chu an naunuhai in inneitir ding a ni nawh. 4 Chuong naw chun, in naupahaiin an mi zui lai hi pathien dang be dingin thuoi kawi an ta, LALPA lungsenna chu in chungah inling a ta, a sukbohmang nghal el ding chêu a nih. 5 An chungah hieng hin in thaw ding a nih: an maichâmhai sukchim unla, an lung biekhai vaw koi unla, an pathiennu Aseraf lem thinghai chu phûr unla, an milem siem fawn hai chu raw hmang vong ro. 6 LALPA in Pathien ta dinga hnam thienghlim in ni si a. Hnuoi chunga hnam po po laia a ro puol bik hnam dinga LALPA in Pathienin a thlang chêu in nih. 7 "Hnam dang nêka in tam lem leia LALPAN ngainaa a thlang chêu a ni nawh; hnam po po laia a tlawm tak in nih. 8 LALPAN a hmangai chêu lei le in pi le puhai kuoma inkhâm meua thu a lo tiem tah chu hlen a nuom lei lemin LALPA kut hrâtin bawia in intângna ram Aigupta lal Faraw kuta inthokin a'n tlan suok chêu a nih. 9 Chuleiin, LALPA in Pathien hi Pathien a nih ti hre ro; Pathien ringum, ama hmangaia a thupêkhai zawmtu chunga chu suon sâng chen khoma a hmangaina thuthlung vong zing hlak le, 10 a theidatuhai ruok chu chop le chila thungrula sukbohmang hlaktu a nih; ama theidatuhai chu sawt riel loin, chop le chilin thungrul a tih. 11 Chuleiin, voisuna ka pêk chêu thupêk hai, thusuok hai le dàn hai hi fimkhur takin zawm ro. 12 "Hieng dânhai hi ngaisak a, fimkhur taka in zawm chun, in pi le puhai kuoma inkhâm meua a tiem ang khan, LALPA in Pathien chun nangni laka a hmangaina thuthlung chu vong zing a tih. 13 Hmangai a ti chêu a, malsawm a ti chêu a, sukpung a ti chêu. In pi le puhai kuoma inkhâm meua pêk a tiem rama chun in rila ra hai, in lo tharsuok bu le bâl le in uoiin thar le oliv hriek thar hai, in bawng tehai le beram tehai chu malsawm a tih. 14 Hnam dang po po nêkin malsawmna dong nasàng in ta, a nuhmei a pasalin a ching um naw ti niu a, in ranhai khom te thuoi lo um naw ni hai. 15 LALPA chun hri po po la hmangpêk a ti chêu a, Aigupta rama hri pangzatum ang kha nangni chungah inlêngtir naw ni a, nangni theidatuhai chungah inlèngtir lem a tih. 16 LALPA in Pathienin in kuta hnam a pêk ding chêu po po hi in sukchimit vong ding a nih. Lunginsiet naw unla, an pathienhai rong bawl naw ro; in ta dingin châng a ni ding a ni si a. 17 "In lungrilin, 'Hieng hnamhai hi eini nêkin an hrât lem si a, ieng tin am ei hnot suok ding a na?' in ti khom a ni thei. 18 Anni chu ti naw ro: Faraw le Aigupta po po chunga LALPA in Pathienin a thaw kha hre zing ro. 19 Fiena nasa tak dâm, inchikna mak dâm, thil mak dâm hmang a, kut hrât chu phara LALPA in Pathienin a lâk suok dàn chêu mit ngeia hmutu in ni kha. LALPA in Pathien chun hnam dang in tihai chungah khang ang bok khan a thaw ve ding a nih. 20 Chu bâkah, a thi mahla, inbi hmanghai khom bel hlum vong dingin LALPA in Pathien chun anni lai khuoivànriel tir a tih. 21 Anni chu ti naw ro, nangni laia thang, LALPA in Pathien chu Pathien ropui le râpum a ni si a. 22 Chuong hnamhai chu LALPA in Pathien chun a zâiin hnot suokpêk a ti chêu. Voi khat thilthuin inram vong naw ro, chuonga in thaw chun in vêlah ramsa hung pung taluong an tih. 23 LALPA in Pathien chun anni chu pêng a ti chêu a, an chimit chenin sukchi-ai tawl a tih. 24 An lalhai in kutah pêng a ti chêu a, an hming chu vânkhup hnuoia inthokin thai bo in ta, insukbohmang vong chenin dang theitu chêu tu khom um naw ni hai. 25 Pathien lem an siem fawmhai chu in raw vong ding a nih. Chu taka tangkaruo amanih rangkachak amanih chu inhnar naw unla, in ta dingin in lâk ding a ni bok nawh. Chuong naw chun inawk pal rawi in tih, LALPA in Pathien ngaia thil tirdakum a ni si a. 26 In inah thil tirdakum la lûtin chu thil ang boka sietna tuok ve dingin in insiem ding a ni nawh; namen loa tenin in theida ding a nih, sietna tuok dinga ruot sa a ni si a.

8

1 "Dam taka um a, hung pung pei a, in pi le puhai kuoma inkhâm meua LALPAN pêk a tiem ram chu lûta in hluo theina dingin voisuna thupêk ka pêk chêu hi fimkhur takin zawm ro. 2 A thupêkhai in vong ding le ding naw hrietna dinga kum sawmli hiel LALPA in Pathienin in lungril fie ding le suktlawm dinga thlalèra a thuoina po po chêu kha hre zing ro. 3 Mihriem hi bei chauin a hring naw a, Pathien baua thu tin suokin a hring lem a nih ti a'n hriettir theina ding cheuin a suktlawm chêu a, in tàm a phal a, chun in hriet ngai lo, in pi le puhai khoma an la hriet ngai lo manna chun a chawm chêu a nih. 4 Chu kum sawmli sûng chun in silfènhai a tiek naw a, in ke khom a'n vûng bok nawh. 5 Pain nau a thunun angin LALPA in Pathien chun a thunun chêu a nih ti hi lungrilin hre zing ro. 6 "LALPA in Pathien thupêkhai zawmin, a lampui hrawin, ama chu inza ro. 7 LALPA in Pathien chun ram tha tak, tlânga inthoka hung luong vadungte hai, tuikhur hai, tlâng le phaia luong dem dem tuihnàr umna; 8 bu hai, barli hai, grep hai, theichang hai, theibufai hai, hriek nei oliv hai le khuoizu tamna ram; 9 chat loa bei in tlànna ding, ieng khom in tlâksam nawna ding ram, a lunghai chu thîr le a tlânga inthoka dâr in cho suok theina ding rama chun a thuoi lût ding chêu a ni si a. 10 "In fàk a, in tlai hle pha, ram tha tak a pêk lei chêuin LALPA in Pathien chu inpâk ro. 11 Voisuna ka pêk chêu a thupêkhai, thusuokhai le dânhai hi zawm loin LALPA in Pathien chu theinghil pal hlau rawi in tih, fimkhur ro 12 Chuong naw chun fa a, tlai a, in tha tak bawla in hluo huna dâm, 13 in bawng ruol le beram ruolhai, in tangka le rangkachakhai le in thil nei po po a hung pung pha chun, 14 in lungril hung chapoin, bawia in intàngna Aigupta rama inthoka thuoi suoktu chêu LALPA in Pathien chu theinghil el in tih. 15 Ama chun thlalèr zau tak le tium tak, ram tawl le tui um nawna hmun, mi chuk na tak rûl tûr nei mi le mi sè na tak khawmuol kaikuonghai tamna hmuna chun a thuoi tlang tah chêu a; lungpui sakhata inthokin tui a sun suokpêk chêu a, 16 in pi le puhaiin an la hriet ngai lo manna chun chawmin, fiein a suktlawm chêu a nih, tuta hnunga in thatna dingin. 17 Nangni chun, 'Ka hausakna hi keima theina le kut hrâtnaa ka hlaw suok a nih' in ti lungril khom a ni el thei. 18 Nisienlakhom, sum le pai lam suok theina petu chêu le voisun chena in pi le puhai kuoma inkhâm meua a thuthlung suknghettu chu LALPA in Pathien a ni lem ti hre zing ro. 19 LALPA in Pathien chu in theinghil a, pathien danghai zui a, an rong bawla in biek vai chun bohmang ngei ngei in tih ti voisun hin ka hril lawk chêu a nih. 20 In hmaa hnam danghai LALPAN a suksiet ang khan, LALPA in Pathien thupêk in zawm naw chun sukbohmangin um vêng in tih.

9

1 "Aw Israelhai, ngàithla ro. Nangni nêka hnam lien lem le hrât lem, an khawpuihai khom vân tonga kula inhuon chu va hlu suok dingin Jordan vadung in kân el ding a ni ta hi! 2 Anni chu Anak thlahai, mi lien le dung insâng tak tak an nih ti in hriet ta a, 'Tuin am Anak thlahai chu an ngam thei ding?' in ti hlak kha. 3 Nisienlakhom, meichok anga lem zo theitu, voisuna in hmaa fe ding hi LALPA in Pathien a nih ti hre chieng ro. Ama chun anni chu sukbohmang a ta, in hmaa ngei tukdol tawl a tih. In kuoma LALPAN a tiem tah angin, anni chu hnot suok in ta, sukchimit nghal in tih. 4 "LALPA in Pathienin a hnotsuokpêk pha chêu in lungrilin, 'Kan felna leiin hi ram hi hluo dingin LALPAN a mi thuoi lût a nih' ti naw ro. Hieng hnamhai hi an rîtlona leiin LALPAN a hnot suok ding a nih. 5 In fel lei le in ringum leia ram chu hluo ding in ni naw a, hieng hnamhai hi an suol êm leiin le in pi le pu Abraham hai, Isak hai, Jakob hai kuoma inkhâm meua LALPAN a lo tiem tah chu hlen dingin LALPA in Pathienin anni chu a hnot suokpêk ding chêu a ni lem. 6 Hi ram tha tak hi hluo dinga LALPAN a pêk chêu hi in fel lei a ni nawh ti hre ro; hnam lulul tak in ni si a. 7 "Thlalèra LALPA in Pathien lung in suksenzie kha theinghil ngai naw ro. Aigupta in suoksana inthoka hi hmun in tlung chen hin LALPA laka hel in hmang hle a nih. 8 Horeb tlânga khan nangni sukhlum pha khop hielin LALPA lung in suksen a nih. 9 Lungphêk, in kuoma LALPAN thu a thlungna lungphêk chu la dinga tlânga ka hang fe lai khan ni sawmli le zân sawmli ka hang thang a, chu sûng chun bei ka fâk naw a, tui ka dawn bok nawh. 10 LALPA chun lungphêk pahni, Pathien kutpâra ziek chu a mi pêk a. Chu lungphêka chun in pungkhawm nia tlânga inthoka LALPAN in kuoma thu a hril po po kha a chuong a. 11 "Ni sawmli le zân sawmli hnunga chun lungphêk pahnih, thuthlungna lungphêkhai chu LALPAN a mi pêk a. 12 LALPA chun ka kuomah, 'Tho la, hi taka inthok hin fe thla nghal rawh. Aiguptaa inthoka i thuoi suok, i mihai chu an insukporche zo ta khu. Zawm dinga thu ka pêk lampui chu an pêtsan ta pang a, milem siem fawn an insiem ta khu' a ta. 13 Chun, LALPA chun ka kuomah, 'Hi mihai hi ka en vang vang a, hnam lulul an lo ni takzet hi tie! 14 Mi'n kiengsan la, anni sukbohmang ding le vânkhup hnuoia inthoka an hming thai bo dingin ka law law hang law tawl ka tih. Nang ruok chu anni nêka hnam hrât lem le tam lemin siem ka ti che' a ta. 15 "Chuongchun, tlânga inthok chun lungphêk pahni chu kuta chawiin ka kîr thla a, tlâng chu a chok puot puot a. 16 Ka hei thlîr chun, ngai ta u, LALPA in Pathien lakah in lo suol ta a, milem, bawng tuoi lem siem fawn chu in lo insiem a, LALPAN lampui hraw dinga thu a pêk chêu chu in lo pètsan ta pang ti ka hmu a. 17 Chuongchun, kut khing hnia ka chawi lungphêk chu ka pei thlàk a, in mithmua ngei a koi dar ta vong a. 18 "Chun, ni sawmli le zân sawmli LALPA hmaah kûnin ka bokkhup nawk a. LALPA lung suksen a, a mithmua thil suol in thaw po po lei chun bu ka fâk naw a, tui ka dawn bok nawh. 19 LALPA lungsen inling chu ka ti a, sukbohmang vong chêu khopin a lung insuksen bok si a. Sienkhom, chu tum khom chun LALPA chun a mi ngàithlàk nawk a. 20 Sukbohmang nuom khopin Aron chunga khom LALPA lung chu a sen a, sienkhom chu lai chun Aron ta ding khomin ka hnipêk a. 21 Chun, in thil suol thaw, bawng tuoi lem in siem chu ka lâk a, ka raw a, hnuoiah ka suknawi a, pilvut angin ka rawt dip a, a dip chu tlânga inthoka hung luong tuia chun ka dehawn a. 22 "Chun, Tabera le Masa le Kibrot-hatava hmuna hai LALPA in suklungsen bok a. 23 Kadesh-barnea hmunah LALPAN, 'Ram ka pêk chêu chu hang hluo ta ro' tia a tir lai chêu khan LALPA in Pathien thupêk chu helsanin, ama chu in ring naw a, a rawl in ngàithlàk bok nawh. 24 Ka hriet tir cheua inthok khan LALPA chunga hel hmang mi in ni hrim a. 25 Chuongchun, LALPAN, 'Ka sukbohmang tawl ding a nih' a ti lei chêu khan LALPA hmaah ka kûn a, ni sawmili le zân sawmli zet ka bokkhup a ni kha. 26 LALPA kuoma chun, 'Aw Chunghnungtak LALPA, thilthawtheina ropui taka i kut hrâta Aigupta rama inthoka i'n tlan suok, i mihai le i rochanhai hi sukbohmang lul naw raw khai. 27 I siehlaw Abraham hai, Isak hai, Jakob hai kha hre zing la, hi mihai lululzie dâm, ritlozie dâm le suolzie dâm ruok hi chu hmu khûm lul rawh. 28 Chuong naw chun i mi hung thuoi suokna rama mihaiin, 'LALPAN a ram tiema chun a thuoi lût thei naw leiin le a theida tawl leiin thlalerah that dingin a thuoi suok tawl a nih' ti pal rawi an tih. 29 I thilthawtheina ropui tak le i bân phara i thuoi suok, i mihai le i rochanhai an ni mieu si a' tiin ka ngên a.

10

1 "Chuong lai chun LALPAN ka kuomah, 'A hmaa ang bok kha lungphêk pahni ser la, tlângah ka kuomah hung tung rawh. Chun, thingin bawm siem bok rawh. 2 Lungphêk i dêng koia thu chuonghai kha lungphêka chun lo ziek ka ta, bawma chun i sie ding a nih" a ta. 3 "Chuongchun, sitim thingin bawm ka siem a, a hmaa ang char lungphêk pahnih ka ser bok a, lungphêk pahni chu chawiin tlânga chun ka hang fe a. 4 Lungphêka chun a hmaa a ziek ang, in pungkhawm nia tlânga meichoka inthoka LALPAN in kuoma a hril thupêk sawm chu a ziek a, chu chu LALPAN a mi pêk a. 5 Tlânga inthok chun ka kîr thla a, bawm ka siema chun lungphêk chu ka sie a, LALPAN thu a mi pêk angin chu taka chun a um ta zing a. 6 "(Israel thlahai chu Jakan nauhai tuikula inthokin Mosera-ah an fe a, chu taka chun Aron chu a thi a, chu hmuna chun an vui a, a naupa Eleazar chun a ai hung awin thiempu sin a thaw a. 7 Chu taka inthok chun Gudgoda-ah an fe a, chu taka inthok chun tui tamna hmun Jokbat-ah an inson pei a. 8 Chuong lai chun Levi hnam chu LALPA thuthlung bawm zawntu ding le voisun ni chena an thaw anga a hmaah ngîr a, a rongbawltu ding le a hminga malsawmpêktu ni dingin LALPAN a sie hrang a. 9 Chuleiin, Levi hnamhai chun an unauhai lai chanvo le rochan an nei ve naw a, an kuoma LALPAN a hril tah angin, LALPA chu an rochan a nih. ) 10 "Chun, a hmaa ang bok khan tlânga chun ni sawmli le zân sawmli ka thang a, chu tum khom chun LALPAN ka thu a ngàithlàk a, LALPA chun a sukbohmang ta naw chêu a ni kha. 11 LALPA chun, "Tho la, mipuihai hma zu thuoi rawh, an pi le puhai kuoma anni ka pêk dinga inkhâm meua ka tiem ram chu lûta an hluo theina dingin" a ta. 12 "Aw leh, aw Israel thlahai, nangni laka LALPA Pathienin a phût chu ieng dang ni loin, LALPA in Pathien chu ti a, a lampui po po hraw a, ama hmangai a, in lungril po po le in thlarau po poa LALPA in Pathien rong chu bawl a, 13 in thatna dinga voisuna ka pêk chêu LALPA thupêk le thusuokhai po po zawm chu a nih. 14 Vânhai, vân chung insâng tak hai le hnuoi le a sûnga um po po hi LALPA in Pathien ta vong a nih. 15 Chuong sa khom chun in pi le puhai kha ngainain a hmangai a, nangni an thlahai hi, voisuna in ni ang hin, hnam dang po po nêka a thlanghai chu in nih. 16 Chuleiin, lungril ser vun tan unla, lulul zing ta naw ro. 17 LALPA in Pathien chu pathienhai Pathien, lalhai Lal, Pathien ropui tak, hrât tak le râpum tak, tu khom ditsak bîk nei lo, thamna khom la ngai lo a ni si a. 18 Pa nei lohai le hmeithaihai chungthu fel takin a rêlpêk hlak a, ram dang mihai chu hmangaiin fâk ding le silfènhai a pêk hlak. 19 Chuleiin, ram dang mihai chu in hmangai ve ding a nih, nangni khom Aigupta rama khan ram dang mi in ni ve kha. 20 LALPA in Pathien chu ti unla, a rong chu bawl ro. Ama chu chel nghet tlat unla, a hming sâlin thu tiem hlak ro. 21 Ama chu in inpâk ding tak chu a nih; ama chu in Pathien, in mithmu ngeia thil ropui le râpum tak thawpêk hlaktu chêu chu a ni si a. 22 Aigupta rama fe thla in pi le puhai kha mi sawmsari chauh an ni a, tu ruok hin chu LALPA in Pathien chun vâna arasi anga tamin a sukpung tah chêu a nih.

11

1 "Chuleiin, LALPA in Pathien chu hmangaiin, thaw dinga a tuk hai, a thusuok hai, a dàn hai le a thupêk hai chu vong tlat ro. 2 Voisuna in nauhai hi LALPA in Pathien thununna hmua tonhriettu an ni nawh. Khanga a ropuizie hai, a bân tha hrâtzie hai, bân a pharzie hai; 3 Aigupta ram sûnga Aigupta lal Faraw le a ram sûng po poa inchiknahai le thil dang dang a thawzie hai; 4 Aigupta sipaihai le an sakor le an tawlailir hai chunga a thawzie le an hnot lai cheua Tuipui Sen tuia vur khuma tu chena LALPAN a sukbohmangzie hai kha theinghil ngai naw ro. 5 Hi hmun in tlung hma poa thlalera in chunga a thilthaw dânhai, 6 Reuben naupa Eliaba naupa Dathan le Abhiram hai chunga a thaw dàn hai, hnuoiin a bau a ka a, Israel mihai hmu lai ngeia anni sûngkuo chauh le an puon in le an ran nei po po a lem vong dàn hai hmutuhai kha in nauhai hi an ni nawh. 7 Chuong anga thil ropui LALPAN a thaw dânhai mit ngeia hmutu chu nangni hi in nih. 8 "Hung hràt a, in pan ram chu lûta in hluo theina ding le nenetui le khuoizu luongna ram, 9 LALPAN inkhâm meua in pi le puhai le an thlahai pêk a tiem rama chun in chêng sawt theina dingin tuta thu ka pêk chêu, thupêk po po hi in zawm ding a nih. 10 In hluo ding ram chu in hung suokna Aiguptaa thlai chi in thlâk a, thlai huon anga harsa taka ke ngot hmanga tuia in chawm hlak ang kha a ni nawh; 11 in va hluo ding ram chu tlâng le phairuom umna, vân ruotui dong ram a nih. 12 Chu ram chu LALPA in Pathien ram duot a na; kum bula inthoka kum tawp chenin LALPA in Pathien mit a fu zing hlak. 13 "Chuongchun, voisuna thupêk ka pêk chêu hi fimkhur taka zawm a, LALPA in Pathien chu in lungril po po le in thlarau po poa hmangai a, a rong in bawl chun, 14 a hunbi takah thâl ruo le favang ruo hung tir a ta, bu le bâl le uoiin le oliv hriek inthar in ta, 15 in ranhai tlàn ding in ramah hlo pêng a ti chêu a, fain tlai in tih. 16 "Fimkhur ro, chuong naw chun zawr hmanga umin pêt hmang in ta, pathien dang bein an hmaah kûn hlauh rawi in tih. 17 Chuonga in thaw chun, in chungah LALPA lungsen a ta, vân khâr a ta, ruo sûr naw ni a, hnuoiin ra insuo naw ni a, LALPA pêk chêu ram tha taka inthok hin bohmang nghal in tih. 18 "Chuleiin, hieng ka thuhai hi in lungril le ngaituonaah khum unla, inchikna dingin in bânah zem unla, in chalah hrên bok ro. 19 Chuong chu ina in inthung lai amanih, lama in lawn lai amanih, in zâl lai amanih le in tho hun amani-ah in nauhai zirtir hlak ro. 20 Chun, in kotkhâr bienga hai le in tuolkota hai ziek ro. 21 Chuongchun, LALPAN in pi le puhai kuoma inkhâm meua pêk a tiem rama chun in dam sûng ni le in nauhai dam sûng ni chu hnuoi chunga vân a um sûng ni angin sei a tih. 22 "LALPA in Pathien chu hmangai a, a lampui po po hraw a, ama chel tlat dinga thahnemngai taka hieng ka pêk chêu thupêk po po hi in zawm phot chun, 23 LALPAN hieng hnam po po hi hnot suokpêk a ti chêu a, nangni nêka ropui lem le thil thaw thei lem hnamhai ram chu hluong in tih. 24 In kephaa in sir taphot chu in ta nîng a ta, in ram chu thlalera inthoka Lebanon chen le Eufretis vadunga inthoka thlang tieng Mediterranean tuipui chen inzâr a tih. 25 Tu khomin cho hne naw ni hai chêu a, in fena taphotah LALPA in Pathien chun, thu a tiem tah angin, a ram pumah nangni pangzatna le tina inlèngtir a tih. 26 "Ngai ta u, voisun hin in hmaah malsawmna le tongsie ka sie: 27 voisuna ka pêk chêu, LALPA in Pathien thupêkhai hi in zawm chun, malsawmna; 28 LALPA in Pathien thupêkhai zawm lo a, in hriet ngai lo pathien danghai be dinga a thupêkhai in pêtsan ruok chun, tongsie. 29 Chun, in hluo ding rama LALPA in Pathienin a thuoi lût pha chêu, malsawmna chu Gerizim tlânga inthokin puong unla, tongsie chu Ebal tlânga inthokin inphur ro. 30 Hieng tlâng pahnihai hi Jordan ruoma chêng Kanan mihai rama mi, Jordan vadung tlâk tienga um an nih. Chu chu Gilgal khaw kawla More saisaw thinga inthoka thlang tieng pang hla lo tea um a nih. 31 "LALPA in Pathienin a pêk chêu ram chu lûta hluo dingin Jordan vadung in kân tèp a ni tah. 32 Chu ram chu hluoa in khawsa pha chun, voisuna in hmaa ka sie thupêkhai le dânhai po po hi in zawm ngei ngei ding a nih.

12

1 "LALPA, in thlatuhai Pathienin a pêk chêu ram chu hluo a, a ram leilunga in um sùnga fimkhur taka in zawm dinga thupêk le dàn a pêkhai chêu chu hieng hi a nih. 2 Hnam in va hlu suok dinghaiin an pathienhai an biekna hmun hrim hrim, tlâng sânga hai, muola hai le thing buk hnuoia mihai chu in suksiet vong ding a nih. 3 An maichâmhai sukchim unla, an lung biekhai vaw koi vong unla, an pathiennu Asera lem thinghai chu raw vong unla, an pathien lem siem fawnhai sât bong vong unla, chuong hmuna inthok chun an hminghai nuoi bo vong ro. 4 "Anni biek dàn angin LALPA in Pathien chu in biek ve ding a ni nawh. 5 LALPA in Pathienin in hnam po po laia a hming umna ding hmun a la ruot ding chu zong lem unla, chu hmuna chun in fe ding a nih. 6 Chu taka chun in pumraw thilhlânhai, in inthawinahai, in sawma pakhathai, kûta thèn thilhlânhai, intiemkamna thilpêkhai, in nuom thua thilhlânhai, in bawng ruol le beram ruol laia pieng hmasa takhai in hung inhlàn ding a nih. 7 Chu taka chun malsawmtu chêu LALPA in Pathien hmaah nangni le in sûngkuoin in kut inrim ra chu fain hlim takin in um ding a nih. 8 "Mi tinin mani tha tizawng ang senga tuta ei thaw ang hin in thaw ding a ni nawh, 9 LALPA Pathienin a pêk chêu chawlna ram chu tlungin in la rochung hri si nawh. 10 Sienkhom, Jordan hi kânin, LALPAN rochana a pêk chêu ram chu la hluong in ta, him taka in um theina dingin in vela hmèlma po po lakah chawlna la pêng a ti chêu. 11 Chu pha chun, LALPA in Pathienin a hming innghatna dinga a ruot hmuna chun in hung chawi dinga thu ka pêk pumraw thilhlânhai, in inthawinahai, in sawma pakhathai, kûta thèn thilhlânhai, in thil nei tha tha laia LALPA kuoma pêk dinga in intiemhai chu hung chawi ro. 12 Chu taka chun nangni le in naupa le naunuhai, in bawipa le bawinuhai, nangni laia rochan le ram huol ding nei ve lo Levi hnamhai le chun LALPA in Pathien hmaah hlim takin um in tih. 13 Nuomna hmun hmunah pumraw thilhlân chu inhlàn lo dingin fimkhur ro; 14 nangni laia hnam khat ram chanpuola LALPA hmun thlang le ruota chauh in pumraw thilhlânhai chu inhlàn in ta, chu taka chun thu ka pêk po po chêu hi in thaw ding a nih. 15 "Amiruokchu, LALPA in Pathienin malsawmna a pêk chêu ang peiin, khaw lai khuoa khom in ranhai chu that thei in ta, sazuk le sakhi sa in fâk angin, a thieng le thieng naw khomin in nuom zât zât fa thei in tih. 16 Sienkhom, a thisen chu fa naw ro; tui angin hnuoiah in bun thlâk ding a nih. 17 Sawma pakhat in pêk bu le bâl hai, uoiin thar hai, hriek hai, in bawng ruol le beram ruol laia pieng hmasa tak hai, in thutiema mi hai, in nuom thua thil in inhlân hai le kût phaa in inhlàn, thèn thilhlân hai chu in inah fa thei naw ti niu. 18 LALPA in Pathienin a ruot hmuna chun LALPA in Pathien hmaah nangni le in naupa le naunu hai, in bawipa le bawinu hai le in khuoa um Levi-hai leh in fâk lem ding a nih. In kut sinthaw tinrêng chungah LALPA in Pathien hmaah in hlim ding a nih. 19 In rama in chêng sûng phot chun Levi-hai hi ngaithà lo dingin fimkhur ro. 20 "LALPA in Pathienin thu a tiem ang cheua in ram a zauh lien pha chu, sa in ngaia in fâk chàk pha leh in du zât zât fa thei in tih. 21 LALPA in Pathienin a hming innghatna hmuna a la ruot ding chu a hla taluo a ni chun, thu ka pêk chêu ang khan, in bawng ruol le beram ruol laia mi chu in khaw hmunah that thei in ta, in nuom zât zât fa thei in tih. 22 Sazuk le sakhi sa in fâk angin, a thieng le thieng naw khomin fa thei in tih. 23 Sienkhom thisen ruok chu fa lo dingin fimkhur ro, hringna chu thisenah a um a, a hringna pumin sa chu in fâk ding a ni nawh. 24 In fâk ding a ni dèr nawh; tui angin hnuoiah bun thla lem ro. 25 Fa naw ro, chuongchun nangni le in nauhai ta dingin thâng a ta, LALPA mithmua thil indik thaw ni bok in tih. 26 "Thil thienghlim le inhlàn dinga in tiemhai chauh chu chawiin LALPA hmun ruota chun fe ro. 27 In pumraw thilhlànhai chu LALPA in Pathien maichâmah, a taksa le a thisen leh, inhlàn ro; in inthawina thisen chu maichâm sîra chun bun thla unla, a sa ruok chu fa thei in tih. 28 Thu ka pêk po po chêu hi fimkhur takin zawm ro, chuongchun LALPA in Pathien mithmuah thil indik thaw nîng in ta, nangni le in hnunga in nauhai ta dingin thang a tih. 29 "In va rûn le hlu suok ding hnam danghai chu LALPAN sukbopêk a ti chêu a, ram chu hluoin umhmun khuor in tih. 30 Amiruokchu, in hnot suok hnung le hluo hnung, in hmaa sukborala an um hnungin, 'Hieng hnamhai hin ieng tin am an pathien rong an bawl aw? An thaw angin eini khomin thaw vêng ei tiu' ti ve lo dingin fimkhur ro, chuong naw chun inawk pal rawi in tih. 31 Anni biek dàn angin LALPA in Pathien chu in biek ve ding a ni nawh. Anni chun an pathienhai an bieknaah LALPA theida zawng thil tirdakum tinrêng an thaw a, an naupa le naunuhai ngei khom an pathienhai ta dingin meiah inhlànin an raw hlak a nih. 32 "Thaw dinga thu ka pekhai chêu angin in thaw ding a nih; in belsa ding a ni naw a, in pei ding a ni bok nawh.

13

1 "Nangni lai zawlnei amanih mang neitu amanih a hung suok a, inchikna le thil mak a puong a, 2 inchikna le thil mak a puong chu a hung tlung a, 'Thaw ro, an pathienhai hi zui ei ta, be vêng ei tiu' tia in la hriet ngai lo pathien dang zui dinga a ti chêu chun, 3 chu zawlnei amanih mang neitu thu chu in zawm ding a ni nawh. Lungril po po le thlarau po poa in hmangai le hmangai naw ti hrietna dinga LALPA in Pathienin a fiena chêu a nih. 4 LALPA in Pathien chauh hi a nih in zui ding le inza ding chu. A thupêkhai vongin zawm unla, a rong bawl unla, chel nghet tlat ro. 5 Chu zawlnei amanih mang neitu amanih chun Aigupta rama inthoka thuoi suok a, bawia in intângna rama inthoka intlan suoktu LALPA in Pathien lakah inheltir a, LALPA in Pathienin hraw dinga thu a pêk chêu lampuia inthoka kei pêt chêu a tum leiin ama chu in sukhlum ding a nih. Chuong ang mi chu nangni laia inthokin inthiel fai ro. 6 "Chun, i unaupa amanih, i naupa amanih, i naunu amanih, i nuhmei pom lai amanih, 7 i ruol tha bul amanih ngei khomin in thlatuhai la biek ngai lo pathien dang, in kawl le kienga umhai amanih le ram kil le kapa chênghai pathien biek amanih chu be dingin arûkin a zawr che khomin, 8 zawr thlûkin i um ding a ni naw a, a thu i ngaithlâk ding a ni bok nawh. Ama chu zangaina inhmutir naw la, hlà naw la, hliekhu bok naw rawh. 9 I sukhlum ngei ngei ding a nih. Nangin sukhlum dingin kut thlâk hmasàng i ta, chu zoah mipuiin. 10 Bawia in intângna ram Aiguptaa inthoka thuoi suoktu chêu LALPA in Pathien lampuia inthoka kei pèt chêu a tum leiin, lungin in dêng hlum ding a nih. 11 Chuongchun, Israel mi po poin hrieng an ta, ting an ta, nangni lai chuong ang thil suol hrim hrim thaw chu sim an tih. 12 "LALPA in Pathienin in chêngna dinga a pêk chêu laia khuo pakhata inthokin thuthang in hriet a, 13 anni laia mi rilo thenkhat hung suokin, in la hriet ngai lo pathien dang be dingin mihai an thuoi hmang ti an hung hril charin, 14 chîk taka indon chiengin zong suok ro. Thuthang chu a'n dik a, hieng ang thil tirdakum hi nangni lai an lo thaw ngei ti in hriet chieng pha leh, 15 chu khuoa umhai chu, mihriem le an ran ruol po po leh, kawlhnâmin matheiloin sukhlum vong ro. 16 A khaw sûnga in râllâk po po chu khaw lailungah dêng bum unla, a khuo le râllâk thil po po chu LALPA in Pathien kuoma pumraw thlihlânah raw fai vong ro. Kumkhuoa indin thar nawk ta ngai lo dingin ram song a tih. 17 Chuong anga hnawl fithla thil hrim hrim chu in lâk ding a ni nawh, chuong chun LALPAN a lungsenna chu kei kîr a tih. 18 LALPA in Pathien thu chu awi a, voisuna ka pêk chêu a thupêk po po zawm a, a mithmuah thil indik in thaw chun zangaina inhmutirin lunginsiet a ti chêu a, in pi le puhai kuoma inkhâm meua a tiem tah angin, sukpung bok a ti chêu.

14

1 "LALPA in Pathien nauhai in ni leiin mithi sûn chànga mani insun pop le lu vaw kol an thaw hlak angin thaw ve naw ro. 2 LALPA in Pathien ta dinga hnam thienghlim, hnuoi chunga hnam po pohai laia a ro chan bîk hnam dinga a thlang chêu in nih. 3 "Thil porche hrim hrim fa naw ro. 4 In fâk thei ding sahai chu bawng, beram, kèl, 5 sakhi, sazuk, sasen, sathar, ram kèl, ram lawi le ram beram a nih. 6 Sa tinrêng, tin inkàk suok le an thil fâk a soia soi nawi chi taphot chu fa thei in tih. 7 Amiruokchu, tin inkàk suok le an thil fâk a soia soi chi hieng sanghawngsei, mazupui le sangawi hai ruok hi chu fa naw ro. An thil fâk a soia soi chi, sienkhom tin inkàk si lohai chu in ta dinga sa porche a nih. 8 Chun, vok hi a tin inkàk a nia chu a thil fâk a soi naw leiin in ta dinga sa porche a na, a sa in fâk ding a ni naw a, a ruong khom in tawk ding a ni bok nawh. 9 "Tuia chêng, pângpar le phuhlip nei taphot chu fa thei in tih, 10 pângpar le phuhlip nei naw taphot chu fa thei naw ti niu, in ta dinga porche a nih. 11 "Vate thienghlim taphot chu fa thei in tih. 12 Hienghai ruok hi chu in fâk ding a ni nawh: mupui hai, lungdup hai, mu-arla hai, 13 mulukol hai, ngawihup hai, mute chi hrim hrim hai, 14 vaak chi hrim hrim hai, 15 vangalsâng hai, vabak hai, tuifinrieta vate hai, mu chi tinrêng hai, 16 hrângkir hai, simbuk hai, chingpirinu hai, simbuksielki hai, 17 tuivalong hai, vadunga mu chi hrim hrim, 18 kànghlai, dila vate chi hrim hrim, vakhawhri le bâk. 19 Thilhring, thla neia a hona vuong chi hrim hrim chu in ta dinga thil porche a nih. 20 Sienkhom, thla nei, a thienghlim taphot ruok chu fa thei in tih. 21 "Sa tlaw hrim hrim fa naw ro. In kuoma um ram dang mi fâk ding ruok chun pe thei in ta, hnam dang mihai kuomah zor thei bok in tih. Nangni ruok chu LALPA in Pathien ta dinga hnam thienghlim in nih. Kèlte chu a pui nenetuiin suong naw ro. 22 "Kum tina in lo tharsuok sawma pakhat chu in sie hran ngei ngei ding a nih. 23 LALPA in Pathien inza dàn in hriet rop theina dingin, bu le bâl, uoiin le oliv hriek in tharsuokhai le in beram le bawng ruol laia pieng hmasa takhai chu LALPAN a hming innghatna dinga a thlang hmuna chun in fâk hlak ding a nih. 24 LALPA in Pathienin mal a sawm hun chêu a, LALPA in Pathienin a hming innghatna dinga a la ruot ding chu a hla taluo leia in sawma pakhathai chu in chawi thei naw a ni ruok chun, 25 tangka sumah inchangtir unla, chu chu chawiin LALPA in Pathien hmun ruota chun fe ro. 26 Sum chun in chàk zawng zawng bawng amanih, beram amanih, uoiin amanih le zu amanih inchaw unla, chu taka chun nangni le in sûngkuohai chun LALPA in Pathien hmaah fain dawn in la, hlim takin um ro. 27 Nangni laia um Levihai chu ngaithà der naw ro, anni puola rochan nei an ni ve si nawh. 28 "Kum thum a'n voi zàtin chu kuma in tharsuok po poa sawma pakhat chu la khawm vong unla, in khuo hmun pakhatah hlu khawm ro. 29 Chuongchun, in khuoa um Levi-hai, nangni laia chanvo le rochan nei ve lohai le ram dang mihai le pa nei lohai le hmeithaihai chun khop takin hung fa ve thei an ta, LALPA in Pathienin in kut sinthaw po poah malsawm a ti chêu.

15

1 "Kum sari invoi zàtin in leibatuhai leibat chu in ngaidam ding a nih. 2 In ngaidam dàn ding chu hieng ang hin a nih: leibatu nei taphotin a chipui Israel mi laka a sum inpûktir chu a ngaidam ding a nih. LALPA ngaidamna chu puong a ni tah leiin tu khomin a unau le a chipui Israel mi leibat chu a thìn ding a ni ta nawh. 3 Hnam dang mihai leibat ruok chu thin lui thei in ta, sienkhom in unauhai leibat chu in ngaidam ding a nih. 4 LALPA in Pathien thu chu fîp taka awi a, voisuna ka pêk chêu a dânhai hi fimkhur taka in zawm chun, 5 LALPA in Pathienin in rochana a pêk chêu rama hin nasa takin malsawm a ti chêu a, mi rethei hrim hrim um naw top in tih. 6 A tiem tah angin LALPA in Pathien chun malsawmna vur a ti chêu a, hnam danghai inpûktir in ta, nangni chun pûk ve naw ti niu. Hnam tam tak chungah ro rêl in ta, in chunga ruok chu tu khomin ro rêl naw ni hai. 7 "Chun, LALPA in Pathienin ram a pêk cheua in umna khaw lai khuoa khom in unauhai lai mi rethei an um chun an chungah lungril sukngar naw unla, kom bok naw ro. 8 Chuong nêk hmanin an lakah inphalin, an tlâksam taphot chu phal takin inpûktir ro. 9 'Ngaidamna kum, kum sarina chu a hnai tah' tia i unau tlasam chu hazat a, a mamaw phuhrûkpêk nuom nawna lungril rilo put lo dingin fimkhur ro; chuong naw chun in chungchâng thuah LALPA ko a ta, thiem naw changna suol thawtu ni pal hlauh rawi in tih. 10 Inphal takin, inrona lungril nei dêr loin pe ro; chuonga in thaw chun in kut sinthaw taphotah LALPA in Pathienin malsawm a ti chêu. 11 Chu rama chun mi rethei an um naw lai um naw nih. Chuleiin, in ram sûnga in unau mi retheihai le tlasamhai lakah tiktlai dingin thu ka pêk chêu a nih. 12 "In Hebrai chanpui, pasal amanih nuhmei amanih ama le ama in kuomah a hung inzor a, kum ruk in rong a bawl ta chun a kum sarinaah in insuo zalèn ding a nih. 13 In insuoktir pha leh kutbenthekin insuoktir naw ro. 14 In ran ruol laia ran dâm, in hrizawla bu dâm le in grep sawrna khura uoiin dâm, LALPA in Pathienin mal a sawm dàn chêu ang peiin, phal takin pe ve ro. 15 Aigupta rama khan bawi in ni a, LALPA in Pathien chun a'n tlan suok chêu a nih ti theinghil ngai naw ro. Chu lei chun a nih voisuna hienga thu ka pêk chêu chu. 16 "Amiruokchu, nangni le in sûngkuo a ngainat lei le in inngei tlâng leia in kuomah, 'Suoksan naw nîng chêu' a ti tlat chun, 17 thirzum làng in ta, kotkhâr sana chun a na ver in ta, dam sûnga in bawi ni tâng a tih. In bawinu chunga khom chuong ang chun in thaw ve ding a nih. 18 "Bawi insuo hi rin ngai naw ro, kum ruk sûnga inhlawfaa in ruoi siehlaw lêt hnia tam sin a thawpêk ta chêu a nih. Chun, LALPA in Pathienin in thilthaw iengkimah malsawm a ti chêu. 19 "In bawng ruol le beram ruol laia a chal pieng hmasa tak taphot chu LALPA in Pathien chanpuola dingin sie hrang ro. In bawngchal pieng hmasa tak chu in sor ding a ni nawh; in beramchal pieng hmasa tak hmul khom in vaw ding a ni bok nawh. 20 LALPA in Pathien hmaah kum tinin LALPAN hmun a la ruot dinga chun, nangni le in sûnghai leh, in fâk hlak ding a nih. 21 Hmèl hemna nei a ke inbai dâm, mit indel dâm le soisel kai thei hrim hrim chu LALPA in Pathien kuoma inthawinain in hmang ding a ni nawh. 22 Chuong ang chu mani inah in fâk ding a nih. Inthieng le thieng naw khomin sazuk le sakhi sa angin fa thei vong an tih. 23 A thisen ruok chu in fâk ding a ni nawh; tui angin hnuoiah in bun thlâk ding a nih.

16

1 "Abib thla chu thla serah hmang unla, hi thla hin zânah Aiguptaa inthokin a thuoi suok chêu leiin LALPA in Pathien Fekan Kût chu hmang hlak ro. 2 LALPAN a hming innghatna hmun a la ruot dinga chun LALPA in Pathien Fekan Kûta inthawinaah in beram ruol le bawng ruol laia mihai chu inhlàn ro. 3 Chol thang bei leh in fâk ding a ni nawh. Aigupta rama inthoka inhmaw taka in suok ni kha in dam sûnga in hriet zing theina dingin ni sari sûng chu chol thang lo bei, tuorna bei in fàk ding a nih. 4 Ni sari sûng chu in ram sûngah tu khomin chol an kol ding a ni nawh. A ni hmasa tak zân tienga rana in inthawina sa chu a zîng tieng chen in hlà ding a ni bok nawh. 5 "Fekan Kûta inthawina chu LALPA in Pathienin a hming innghatna hmun a la ruot dinga chauh naw chu in umna khaw lai hmuna khom in inhlàn ding a ni nawh. 6 Chu taka chun Aigupta in suoksan ni champha zân tieng nisa tlàkin Fekan Kût inthawina chu in inhlàn ding a nih. 7 LALPAN hmun a ruota chun raw hmin unla, fa un la, zîngkar in puon inah inlawi nawk ro. 8 Ni ruk sûng chu chol thang lo bei in fâk ding a nih. A ni sarina chu LALPA in Pathien ta dinga inkhawmpui thienghlim nîng a ta, sin in thaw ding a ni nawh. 9 "Bu in lâk tan nia inthoka chawlkàr sarina chu inchik ro. 10 Chu ni chun LALPA in Pathienin mal a sawm dàn chêu ang peia in tharsuok laia mi chu mani pêk nuom tawk ang seng inhlânin LALPA in Pathien ta dingin chawlkâr kût in nei ding a nih. 11 LALPA in Pathienin a hming innghatna hmun a la ruot dinga chun nangni le in naupahai le in naunuhai, in bawipa le in bawinu hai, in umnaa um Levi hai, nangni laia um ram dang mihai, pa nei lohai le hmeithaihai leh LALPA in Pathien hmaah hlim takin um ro. 12 Aigupta rama khan bawi in nih ti hre zing unla, hieng thupêkhai hi fimkhur takin zui ro. 13 "In hrizawl le grep sawrna khura in tharsuok po po in hlù lût vong pha leh ni sari sûng Bawkte Kùt hmang ro. 14 Nangni le in naupahai le in naunuhai, in bawipa le in bawinuhai, in umnaa um Levi hai, nangni laia um ram dang mihai, pa nei lohai le hmeithaihai leh Kût ni chun hlim takin um ro. 15 LALPAN hmun a la ruot ding hmuna chun LALPA in Pathien ta dingin ni sari in kût ding a nih. LALPA in Pathien chun in tharsuok po po le in kut sinthawna po poah malsawm a ti chêu a, in lawmna khom kim a tih. 16 "Nangni laia pasal po po chu LALPA in Pathienin hmun a ruota chun ama hmaah kum tin voi thum in inlang ding a nih; chu chu chol thang lo bei kùta hai, chawlkàr kûta hai le bawkte kûta hai nîng a tih. Chun, LALPA hmaah tu khom kut ruokin in inlang ding a ni nawh. 17 LALPA in Pathienin malsawmna an dongtir chêu ang peiin mi tinin mani thei ang tawk an pêk seng ding a nih. 18 "LALPA in Pathienin a pêk chêu khaw tina chun in hnam ang peiin rorêltu le hotu insiem unla, chuonghai chun mipui ro fel takin an rêlpêk ding a nih. 19 Indik lo takin ro an rêlpêk ding a ni naw a, ditsak bîk an nei ding a ni bok nawh. Thamna hrim hrim la naw ro; thamna chun mi varhai mit a sukdel a, mi indikhai thu khom a kei her hlak. 20 LALPA in Pathien ram pêk chêu hi dama in hluo theina dingin indikna le felna chauh in zawm ding a nih. 21 "LALPA in Pathien maichâm in la siem ding bula chun Asera lem thing in phun ding a ni nawh. 22 LALPA in Pathien theida zawng lung milem in phun ding a ni bok nawh.

17

1 "Bawngchal amanih beram amanih hmèl hemna le that nawna nei hrim hrimin LALPA in Pathien kuomah in inthawi ding a ni nawh, chu chu LALPA ta dingin thil tirdakum a nih. 2 "LALPA in Pathienin a pêk chêu in umna khaw lai khuoa khom nuhmei amanih pasal amanih tu khom Pathien thuthlung bawsetu, LALPA mithmua suol thawtu, 3 ka thupêk kala pathien danghai betu le an rongbawltu le nisa amanih, thla amanih, vâna arasi amanih betu an um ti an hril chêu chun ngun takin indon chieng ro. 4 Chuong ang thil tirdakum thaw chu Israel ramah an um ngei ti in hriet chieng chun, 5 thil suol thawtu pasal amanih nuhmei amanih chu kul kotkhàr puo tieng thuoi suok unla, lungin dêng hlum ro. 6 Hretu pahni amanih pathum baua inthoka thu inchieng hnunga sukhlum ding a na, hretu pakhat bau chaua inthok chun tu khom sukhlum ding a ni nawh. 7 A hretuhai chun sukhlum ding chungah kut thlâk hmasàng an ta, chu zoah mipuiin. Chuong ang chun nangni laia inthokin suol chu in inthiel fai ding a nih. 8 "Thisen insuo thua dâm, inkhingna thua dâm le invuokna thua dâm nangni rêl dinga thu khir taluoa in hriet taphot chu LALPA in Pathienin hmun a la ruot dinga chun fepui ro. 9 Thiempu Levihai le rorêltuhai kuomah fe unla, rawn unla, anni chun thu sukthlùk dàn ding lo kawkhmùng an ti chêu. 10 LALPAN hmun a la ruot dinga an thu tlûkna ang chu zuiin, an kawkhmu dàn chêu ang chun fimkhur takin thaw ro. 11 Thu sukthlûk dàn an lo zirtir chêu le rorêl dàn an lo hril chêu ang tak chun thaw unla, chang tieng amanih voi tieng amanih pêtsan naw ro. 12 LALPA in Pathien hmaa rongbawl hlak thiempuhai le rorêltuhai inza nawtu chu in sukhlum ding a nih. Israelhai laia inthokin suol chu inthiel fai ro. 13 Chu chu mi po poin hrieng an ta, ting an ta, inza naw ngam naw ni hai. 14 "LALPA in Pathienin a pêk chêu ram chu tlung a, hluo a, in va um pha, 'Ei kawl le kienga hnamhai ang bokin lal nei vêng ei tiu' in ti huna chun, 15 LALPA in Pathienin a thlang ngei chu lalah in nei ding a nih. Nangni unau laia mi a ni ngei ding a nih. In unau Israel mi ni lo, hnam dang chu nangni optu dingin in sie ding a ni nawh. 16 Chu bâkah, lal chun ama ta dingin sakor tam tak a nei ding a ni naw a, sakor zu la dingin Aigupta ramah mi a tir kîr ding a ni bok nawh. LALPA chun in kuomah, 'Tuta inthokin chu hmuna chun in kîr nawk ding a ni ta nawh' a ti sa a ni kha. 17 Nuhmei tam tak a nei ding a ni bok nawh, chuong naw chun a lungril thuoi pêtin um rawi a tih. Tangkaruo le rangkachak a khawl khawm teu ding a ni bok nawh. 18 "Lalah a thung pha chun hieng dânhai hi Levi chi thiempuhai kuoma inthoka lain a kut ngeiin lekhabu zielah a ziek thlâk ding a nih. 19 Chu chu kol a ta, a dam sûng po a tiem hlak ding a nih, LALPA a Pathien chu ti a, hieng dânhai le thupêkhai hi fimkhur taka zui a, 20 a unauhai nèka thaa inngai bik lo a, dàn hi voi tieng chang tieng a pêtsan nawna dingin. Chuongchun ama le a thlahai chun Israel lalramah sawt tak ro rêl an tih.

18

1 "Thiempu Levi-hai, Levi hnama mi po po chun Israelhai lai chanpuol amanih rochan amanih an nei ding a ni nawh; Pathien kuoma meia thilhlânhai chu ring an tih, chu chu an rochan a ni si a. 2 An unauhai lai rochan nei naw ni hai; LALPAN an kuoma a hril tah angin, LALPA chu an rochan a nih. 3 "Inthawina inhlàntu mipuihai laka thiempu chanpuol chu hieng hi a nih: bawngchal khom, beram khom a dàr, a bekbawr ve ve le a sûng po. 4 In bu le bâl, uoiin le hriek in thar suok hmasa tak dâm le in beram laia a hmul in vaw hmasa tak dâm chu in pêk bok ding a nih. 5 LALPA in Pathienin LALPA hminga rongbawla um kumkhuo dingin in hnam po po laia anni le an thlahai chu a thlang an ni si a. 6 "Levi mi tu khomin in umna Israel rama ieng khuo khom suoksan a, LALPAN a la ruot ding hmunah châk taka a hung inpèm chun, 7 chu taka LALPA hmaa rongbawla um a unauhai, a Levi chanpuihai ang bokin LALPA a Pathien hmingin rong a bawl ding a nih. 8 An sûngkuo thil nei a zor man chu hmu sienkhom, thiempu danghai chanpuol dong ang chu dong ve tho a tih. 9 "Chun, LALPA Pathienin a pêk chêu ram in lût pha chun, chu taka hnamhaiin thil tirdakum an thaw hlak chu in thaw ve ding a ni nawh. 10 Mani naupa amanih naunu amanih meia inhlàntu dâm, aien ching le thumvawr ching dâm, mitvaidawi thiem dâm, dawithiem dâm, 11 dawi vêttu dâm, ramhuoi zawl ruoitu dâm, rau ko thiem dâm le mithi inbiekpui ching mihai chu nangni lai an um ding a ni nawh. 12 Hieng thil thawtu taphot chu LALPAN a tirdak a, hieng ang chìng dàn tirdakum an chìng leiin LALPA in Pathien chun hieng hnamhai hi in hmaah a hnot suokpêk ding chêu a nih. 13 LALPA in Pathien hmaah soisel bo in ni ding a nih. 14 "In hlu suok ding hnamhai chun aien thiem le thumvawr chìnghai thu an ngàithlàk hlak a, nangni ruok chun chuong anga in thaw ve chu LALPA in Pathienin a phal nawh. 15 LALPA in Pathien chun nangni laia inthokin keima ang bok zawlnei a hung tirpêk ding chêu a nih, a thu lo ngàithla ro. 16 Horeb tlânga mipui in pungkhawm ni khan, 'LALPA kan Pathien rawl chu min hriettir ta naw la, hi mei râpthlâk tak hi mi'n hmutir ta naw rawh, thi rawi kan tih' tiin LALPA in Pathien chu in ngèn a ni kha. 17 LALPA chun ka kuomah, 'An thu hril chu a tha. 18 An unauhai laia inthokin nangma ang zawlnei indinpêk ka tih. A bauah ka thu sieng ka ta, hril dinga thu ka pêk taphot chu ama chun anni chu hril a tih. 19 Ka hminga hriltu zawlnei baua thu ka siehai ringnawtu chu a chungthu keiman ngaituong ka tih. 20 Amiruokchu, ka hminga hril dinga thu ka pêk ni lo hriltu zawlnei amani le pathien dang hminga hriltu zawlnei taphot chu in sukhlum ding a nih' a ta. 21 "Tuhin lungrilin, 'Ieng tin am thu chu LALPA hril a ni le ni naw ti kan hriet thei ding?' tiin in indon a ni thei. 22 Zawlneiin LALPA hmingin thu a hril a, a thil hril chu a hung tlung naw a, a hlawtling naw bok chun, chu chu a nih LALPA hril naw thu chu. Chu zawlnei chun ringvànga a hril mei mei a nih. Ama chu in ti ding a ni nawh.

19

1 "LALPA in Pathienin a pêk chêu rama um hnamhai chu sukbohmang a, nangnin anni chu hnot suok a, an khuo le in le lohai in hluo pha chun, 2 LALPA in Pathienin in rochung dinga a pêk chêu ram chu biel thumah the unla, 3 biel tina hmun laili taka chun nangni ta dingin khuo pakhat seng ruot unla, tuolthathai an tlàn lût theina dingin lampui siem bok ro. 4 "Chu taka tlân lûta him thei tuolthathai chu tum rêng lei le a hmaa theidana um loa mani tuolbawm that palhai chu an nih. 5 Entirnan, mi pakhat chu a tuolbawm leh thing phûr dingin ramah an fe a, thing tuk dinga hreipui a hlàng laiin a hrei chu a tlong a, a tuolbawm chu a dêng hlum pal tah ang dâm hi a nih. Chu pa chu inhumhimna khuo laia pakhata chun tlân lût a ta, him a tih. 6 Chuong naw chun phuba latu lungsen inling chun hnot a ta, inhumhimna khuo chu pakhat chauh a lo ni chun, a hlat leiin hnot phâk a ta, that pal hlauh rawi a tih, a hmaa intheidana nei loa a that a ni leiin thi awm a ni si nawh. 7 Chu lei chun a nih nangni ta dinga inhumhimna khuo pathum ruot bîk dinga thu ka pêk chu. 8 "Chun, LALPA in Pathienin in pi le puhai kuoma inkhâm meua thu a lo tiem tah anga in ram hluo chu zauhpêk a, a ram pum a pêk pha chêu chun, 9 LALPA in Pathien chu hmangai a, a lampui hraw rop dinga voisuna thu ka pêk chêu hi fimkhur taka in zawm zing chun, hi khuo pathum bâka hin khaw dang pathum in ta dingin in la siem bel ding a nih. 10 LALPAN rochung dinga a pêk chêu ram sûnga hin poi tawk lo thisen in insuo nawna ding le chuong ang thisen maw chu in chungah a tlâk nawna dingin ka hril chêu ang hin in thaw ding a nih. 11 "Amiruokchu, miin a tuolbawm theida a, inchàn rûk a, bei a, that a, inhumhimna khuo laia pakhata hin a tlân lût chun, 12 a khaw upahai chun ama chu ko an ta, khuoa inthok chun thon kîr an ta, sukhlum dingin thisen phuba latu ding kuta chun an inhlàn ding a nih. 13 In lunginsiet ding a ni nawh. Poi tawk lo thisen insuotu maw chu in chungah a tlâk nawna dingin, chuong ang mi chu Israel rama inthokin inthiel fai unla, in ta dingin thang a tih. 14 LALPA in Pathienin hluo ding le rochung dinga a pêk chêu rama chun a hmaa hluotuhaiin an lo phun tah in tuolbawm ramri lung chu in son ding a ni nawh. 15 Tu khom suol thaw le mi poi tawka intum leia thubuoi nei chu hrepuitu pakhat baua inthok ringot chun thiem naw in inchangtir ding a ni nawh. Hrepuitu pahni amanih pathum amanih baua inthoka thuin in suknghet chauh ding a nih. 16 Hrepuituah mi sietna ding zongtu a thang a ni chun, hêka um le hrepuitu chu an pahniin LALPA hmaah inlangin, 17 chuong hun laia thiempu le rorêltuhai hmaa chun an ngîr ding a nih. 18 Rorêltuhai chun ngun takin dawp an ta, thu hretua ngîr chu hretu der a ni a, a unau chu khèla a'n tum a ni chun, a unau chunga thaw a tum char chu ama chungah in thaw ding a nih. 19 Chuong anga thawin nangni laia inthokin suol chu inthiel fai ro. 20 Mi danghaiin chu chu hrein ting an ta, tuta hnungah nangni lai chuong ang thil suol chu thaw ta ngai naw ni hai. 21 In lunginsiet ding a ni nawh: hringna aiah hringna, mit aiah mit, ha aiah ha, kut aiah kut, ke aiah ke a ni ding a nih.

20

1 "In hmèlmahai leh indo dinga in suok huna an sakor hai, tawlailir hai le nangni nêk daia tam an sipai hai in hmu pha chun ti naw ro, Aigupta rama inthoka thuoi suoktu chêu LALPA in Pathien chu in kuomah a um ding a ni si a. 2 In indo tawmin sipaihai hmaah thiempu hung a ta, in kuomah, 3 'Aw, Israelhai, ngàithla ro, tuhin in hmèlmahai leh in indo ding a nih. Ti naw unla, zâm naw ro; an hmaah thlabârin chî-ai naw ro. 4 In hmèlmahai dopêk ding chêu le hnèna inchangtir ding cheua nangni kuoma um chu LALPA in Pathien a ni si a' tiin an hril ding a nih. 5 "Chun, hotuhai chun in mihai kuomah, 'In thar bawla la inhlân hman lo in um am? A inah kîr nawk raw se, nakie thi pal a ta, mi dangin a in chu inhlân hlauh rawi an tih. 6 Chun, grep huon siema a ra la sor hman lo in um am? A inah kîr nawk raw se, nakie thi pal a ta, mi dangin sor hlauh rawi an tih. 7 Nuhmei ding huola la nei hman lo in um am? A inah kîr nawk raw se, nakie indonaah thi pal a ta, mi dangin nei hlauh rawi an tih' tiin in hril ding a nih. 8 Chun, hotuhai bokin, 'A ti le a zàm in um am? A inah kîr nawk raw se, ama ang bokin a unauhai khom lo lungphâng rawi an tih' ti ro. 9 Hotuhaiin an sipaihai kuoma thu an hril zo pha leh, sipaihai inrawitu ding kawmandar an thlang ding a nih. 10 "Khuo rûn dinga in va hnai pha chun, a khaw mihai kuomah inrem in nuom thu hril hmasa phot ro. 11 Inrem an lo nuoma an lo inpêk chun, chu taka mi po po chu sinthawah sor in ta, in rong an bawl ding a nih. 12 Inrem nuom loa an lo do chêu chun, a khuo chu inhuol ro. 13 In kutah LALPAN a pêk pha chêu chun, a sûnga um pasal po po chu that fai vong ro. 14 Nuhmei le naupanghai, ran ruol le an thil nei dang in râllâkhai chu nangni puola dingin hawn thei in ta, LALPA in Pathienin in hmèlmahai thil râllâka a pêkhai chêu chu hmang thei in tih. 15 Chuong ang chun in umnaa inthoka ram hla, in kawl hnaia um hnam danghai ta ni lo khuohai chu in thaw ding a nih. 16 "Amiruokchu, LALPA in Pathienin rochana a pêk chêu ram sûnga khuoa hai ruok chu inthuok thei taphot chu hla nei naw ro. 17 LALPA in Pathienin thu a pêk ang cheuin, sukchimit vong tawl ro. Chuong hnamhai chu Hit hai, Amor hai, Kanan hai, Periz hai, Hiv hai le Jebu hai an nih. 18 Chuong naw chun an pathien biek dàn tirdakum tak chu zui ve dingin zirtìr an ti chêu a, LALPA in Pathien lakah thil suol thaw rawi in tih. 19 "Chun, hun sawt tak khuo in inhuol a, la dingin nasa takin in indo a ni khomin a khuoa thinghai chu phûr thlu naw ro, a ra in la sor ding a ni leiin phûr naw ro. Tuola thinghai chu ieng leiin am in inhuol ve ding? 20 A ra fâk thei lo thinghai ruok chu khuo in lâk chena kul inhuon khumnaa hmang dingin phûr thei in tih.

21

1 "LALPA in Pathienin hluo dinga a pêk chêu rama chun khawhnawmah tu amanih sukhlumin um sien, a philtu hriet ni si naw sien, 2 in upahai le rorêltuhai hung an ta, an philna hmuna inthokin a vela khuohai hlatzie chu inkhìng an ta, 3 a ruong zâlnaa inthoka khaw hnai taka upahai chun bawng la tuoi, la sor ngai lo le ringkol la bât ngai lo chu hung kei an ta, 4 loa inlet ngai lo le thlai la chingna ngai lo, tui luongna ruoma chun kei thlâng an ta, chu taka chun a rîng an tan ding a nih. 5 Chun, LALPA in Pathienin a rongbawltu, LALPA hminga malsawmtu le thubuoi le invuok thuhai rêltu dinga a ruot, Levi naupasal thiempuhai chun hung pan hnai an ta, 6 a ruong umnaa inthoka khaw hnai taka upahai chun ruoma bawng la rîng an tan chunga chun an kut sawpin, 7 "Kan kutin hi thisen hi kan insuo naw a, kan mit khomin thaw a ni lai a hmu bok nawh. 8 Aw LALPA, i'n tlan suok kan mi Israelhai ta dinga inremna kan hung siem hi lo pom la, poi tawk lo thisen insuona laka a maw chu kan mipuihai chungah intlâktir lul naw rawh" tiin hril an ta, thisen insuona laka chun ngaidam nîng an tih. 9 Chuonga LALPA mithmua thil indik in thaw chun poi tawk lo thisen maw chu in chunga inthokin inthiel fai in tih. 10 "In hmèlmahai in va do a, LALPA in Pathienin in kutah a pêk chêu a, 11 sala in thuoi nuhmeihai lai chun hmèl tha in tizawng le nuhmei dinga in ditzawng in hmu chun, 12 in inah thuoi unla, an lu vawpèk unla, an kut tin tan raw hai se. 13 An sal thuom chu hlip an ta, in ina um an ni ta leiin, thla khat sûng an nu le pahai sûn an ta, chu hnungah pawl thei in ta, an pasal nîng in ta, in nuhmei ni bok an tih. 14 Sienkhom, in lung tlûk zawng an lo ni naw chun an nuomna naa fe in phalpêk ding a nih. Sumin in zor ding a ni nawh, in sukhmingsiet ta si a. 15 "Miin nuhmei pahni nei sien, pakhat chu ditin pakhat chu theida sien, a dit le a theida chun nau pasal neipêk ve ve hai sien, a nau lutîr chu a theida nau chu ni sien, 16 a ro chu a naupahai a'n khawmtir hunah a dit tak naupa chu a theida naupa nêka upa lemah a siem ding a ni nawh. 17 A theida chu a nau lutîr, a ro po poa chan hni khawmtuah a sie ding a nih. A nau lutîr chu a pa hrâtna ra hmasa tak a na, nau lutîr nina chu a chanpuol a nih. 18 "Miin nau pasal lulul le hel hmang tak nei sien, a nu le pa thu awi loin an thununna pom nuom naw sien, 19 a nu le pa chun chelin, an khaw kul kotkhâr bula upahai kuoma chun an hung thuoi ding a nih. 20 An khaw upahai kuoma chun, "Kan naupa hi mi lulul tak le hel hmang tak a ni a, kan thu khom a awi nuom naw a, inthè chek hmang le zu inrui hmang a nih" an ti ding a nih. 21 Chuongchun, khuoa mi po po chun lungin an dêng hlum ding a nih. Nangni laia inthokin suol chu in inthiel fai ding a nih. Chu chu Israel mi po poin hrieng an ta, ting an tih. 22 "Tu khom thina khop thil suol thawtu chu sukhlum a ni a, thinglèrah in khai a ni chun a ruong chu thinga chun zânkhuoin a um ding a ni nawh. 23 A thi ni lá làin in phûm ding a nih, tu khom thinga khai chu Pathien tongsie phur a ni si a. LALPA in Pathienin in rochung dinga a pêk chêu ram hi in sukporche ding a ni nawh.

22

1 "I unaupa bawngchal amanih beram amanih invâk hmang i hmu chun ngaitha loin a inah thuoi kirpêk ngei ngei rawh. 2 I unau chu i kawl hnaia um a ni naw amanih, a neitu chu i hriet naw amanih a ni chun, i in tieng thuoi la, lo kol la, a hung zong pha i lo pêk nawk ding a nih. 3 A sabengtung le a silfèn le a thil inhmang hrim hrim khom ngàitha loin chuong ang chun i thaw ding a nih. 4 I unau sabengtung amanih bawngchal amanih lama tlu i hmu chun ngàitha loin kei thopui nawk rawh. 5 "Nuhmeiin pasal thuomhnaw an inbel ding a ni naw a, pasal khomin nuhmei thuomhnaw an inbel ding a ni bok nawh. Tu khom chuong anga thawtu chu LALPA in Pathienin a tirdak a nih. 6 "Lam sîr hnuoi amanih thinglèr amaniah vate bu i hmu a, a puiin a tui amanih a te amanih a op lai a ni chun a pui chu a tê leh la ngai naw rawh. 7 A tê chu la thei i ta, a pui ruok chu i'n suo ngei ding a nih, chu chu i ta dingin thang a ta, dam sawt bok iItih. 8 "In thar in bawl pha a chunga inthoka mi an tlâk nawna ding le thisen suokna in a ni nawna dingin a chung chu palin inhuon ro. 9 Chun, in grep huonah thil chi hni ching pol naw ro, chuong naw chun in thil ching tharsuok le in grep ra chu sukporchein um rawi a tih. 10 Lo keinaah bawngchal le sabengtung hmang kop naw ro. 11 Sahmul le pat khawng pol silfèn inbel ngai naw ro. 12 In silfèn tlâng hmun liah pebuk in siem ding a nih. 13 "Miin nuhmei a nei a, a pawl hnungin a dit naw a, 14 'Hi nuhmei hi ka nei a, ka pawl a, nunghàk thienglàm a nina ka hmu nawh' tia muolpho taka a sukpawi chun, 15 nunghàk nu le pahaiin kul kotkhâra khaw upahai kuomah nunghàk thienglàm a nizie an hung suklang ding a nih. 16 Nunghàk pa chun upahai kuomah, 'Hi pa hi ka naunu ka'n neitir a, sienkhom a dit nawk naw a. 17 Tu hin, 'I naunu hi nunghàk thienglàm a nina ka hmu nawh' tiin muolpho takin a siem a, sienkhom ka naunu hi nunghàk thienglàm a nizie fiena chu hieng hi a nih' tiin an puonpha chu upahai hmaa chun phar an ta, 18 upahai chun ama chu hrem an ta, 19 Israel nunghàk thienglàm a sukhmingsiet leiin tangka shekel za inchawitir an ta, a nunghàk nu le pa chu pêng an ta, a nuhmei ni zing a ta, a dam sûngin ma thei naw nih. 20 "Amiruokchu, chu mi thu chu a'n dik a, nunghàk chu nunghàk thienglàm a nizie fiena a um naw chun, 21 a pa in kotah hung thuoi suok an ta, a khuoa pasalhai chun lungin dêng hlum an tih, a pa ina a um laia nawchizor anga khawsa a, Israelhai ramah thil inzakumthlàk tak a thaw leiin. Nangni laia inthokin suol chu in inthiel fai ding a nih. 22 "Pasal tu khomin mi nuhmei a zâlpui chun an pahniin in sukhlum ngei ding a nih. Israel rama inthokin suol chu in inthiel fai ding a nih. 23 "Miin khuoah nunghàk thienglàm, mi nuhmei huol lai intuokpuia a lo zâlpui chun, 24 an pahniin khaw kul kotkhàrah thuoi in ta, in dêng hlum ngei ding a nih- nuhmei chu khuoa um ni siin santu koa a khêk naw leiin le pasal chun mi dang nuhmei a sukhmingsiet leiin. Nangni laia inthokin suol chu in inthiel fai ding a nih. 25 "Amiruokchu, miin ramhnuoiah mi nunghàk huol sa a'n tuokpui a, a pawngsuol chun, a pawngsuoltu pasal chu sukhlum ding a nih. 26 Nunghàk chun thina khop suol a thaw naw leiin ieng khom law naw ro. Hieng ang thil hi mani tuolbawmhai beia that ang a nih. 27 Mi chun nunghàk chu ramhnuoiah a va tong fûk a, nunghàk chu a khêk a, sienkhom santu ding a hmu si naw lei a nih. 28 "Miin nunghàk thienglàm, mi la huol lo a hmu a, a suol lui an hmu chun, 29 a zàlpuitu chun a nunghàk pa chu tangkaruo shekel sawmnga a pêk ding a nih. A nunghàk chu a sukhmingsiet ta leiin a nei ngei ding a nih; a dam sûngin ma thei naw nih. 30 "Tu khomin mani pahai nuhmei zâlpuiin a pa khum a sukporchè ding a ni nawh.

23

1 "Tu khom tilmu koi le mi tilrè chu LALPA mihai pungkhawmnaah an thang ve ding a ni nawh. 2 Sawn le an thlahai, suon sawmna chen khom LALPA mihai pungkhawmnaah an thang ve ding a ni bok nawh. 3 "Amon mi amanih Moab mihai le an thlahai amanih chu, suon sawmna chenin, LALPA mihai pungkhawmnaah an thang ve ding a ni nawh. 4 Aigupta rama inthoka in hung suok khan anni chun bei le tui chawia hung hmuok chêu nêk hmanin, Aram Naharaim ram Pethor khuoa Beor naupa Balaam chu tongsie inphur ding cheuin an ruoi lem a ni kha. 5 Amiruokchu, LALPA in Pathien chun Balaam chu a ngaithlak nuom naw a, LALPA in Pathien chun a hmangai chêu leiin a tongsie inphur ding chêu chu in ta dinga malsawmnaah LALPA in Pathien chun a'n changtir ta vong lem a nih. 6 In dam sûng phot chu anni leh inruol thatna thuthlung in siem ding a ni nawh. 7 "Edom-hai chu in lungten ding a ni nawh, in unauhai an ni si a. Aigupta mihai khom in lungten ding a ni nawh, an ramah mikhuolin in zu um ta si a. 8 An thlahai chu suon thumnaa inthokin LALPA mihai pungkhawmnaa chun thang ve thei an tih. 9 "In hmèlmahai bei dinga in va rieknaah thil thieng lo hrim hrim lakah in inthier fihlim ding a nih. 10 Nangni laia tu khom zâna amaa inthoka thil pût leia inthieng nawna kai a um chun riebûka inthokin suok a ta, tuolah a um ding a nih. 11 Zân tieng insil fai a ta, nisa a tlâk pha leh riebûkah hung kîr nawk thei a tih. 12 "Inzun le inhnawmna ding riebûk puo tieng hmun bîk ruot ro. 13 Hnuoi chona ding hmangruo nei unla, khur cho unla, in zun le êk chu vur nawk ro. 14 LALPA in Pathien chun nangni hum ding le in hmèlmahai laka san him dinga in riebûk a fang zing leiin, nangni lai thil tirdakum hmua a zàmsan nawna ding cheuin, in riebûk vong thienghlim ro. 15 "Suok tu khomin a pu tlânsana nangni a hung bèl chêu chun, a pu kuomah in pêk kîr nawk ding a ni nawh. 16 A umna khuo dinga a thlang le a um nuomna in ina chun nangni lai inumtir ro. In suknomna ding a ni nawh. 17 "Israel mi nuhmei nawchizor an um ding a ni nawh; Israel mi pasal inzor an um ding a ni bok nawh. 18 Nuhmei amanih pasalg amanih inzorna man chu in thutiem tlâkna dingin LALPA in Pathien inah in hung chawi lût ding a ni nawh, a ieng ieng khom chu LALPA in Pathien ngaiin tirdakum a nih. 19 "A pung umin in unauhai in inpùktir ding a ni nawh, poisa amanih, bu amanih le a pung uma inpùktir thei thil hrim hrim khom. 20 Ram dang mihai chu a pung umin inpùktir thei in ta, in unau Israelhai ruok chu a pung umin in inpùktir ding a ni nawh. Chuongchun, in hluo ding rama chun LALPA in Pathienin in kut sinthaw iengkimah malsawm a ti chêu. 21 "LALPA in Pathien kuomah thutiem in nei chun sawt riel loin pe tlâk vat ro, LALPA in Pathien chun hung thîn ngei a ti chêu a, suola thiem naw chang rawi in tih. 22 Thutiem kongah in insùm ruok chun suola thiem naw chang naw ti niu. 23 Baua in hril suok taphot chu in hlen ngei ding a nih, in bau ngeia LALPA in Pathien kuoma in nuom thua in intiem a ni si a. 24 "I tuolbawm grep huonah i fein i dit tawkin a ra fa thei i ta, sienkhom i bawmah ra khat khom i pâi ding a ni nawh. 25 I tuolbawm loah i fe chun, a buvui thliek thei i ta, amiruokchu a bu ngîr lai chu kawitein i ât ding a ni nawh.

24

1 "Miin nuhmei a nei a, a nungchang mawihnai loa a hriet leia a chungah a lungni naw chun, inmâkna lekha ziekpêk a ta, pêng a ta, an in tieng inkîrtir a tih. 2 A ina inthoka a suok hnung chun mi dang nei thei a tih. 3 A pasal hnuhnung lem chun a dit naw a, inmâkna lekha a pêk a, a ina inthoka a'n suoktir amanih, an naw leh a pasal chu a thi a ni khomin, 4 a matu, a pasal hmasa, a mâk leia sukporchetu khan nei nawk thei ta naw nih. Nei nawk chu LALPA ngaia tirdakum a nih. LALPA in Pathienin hluo dinga a pêk chêu rama hin suol in phur lût ding a ni nawh. 5 "Nuhmei nei thar chu indonaah in infetir ding a ni naw a, mawphurna dang khom in pêk ding a ni bok nawh. Kum khat sûng chu in tieng a nuom ang angin a nuhmei leh hlim takin a um ding a nih. 6 "Bat aia dàkhamah bu rawtna lung amanih, a chung tienga a rawtna lung amanih in hrènpek ding a ni nawh, chu chu mi hringna hrènpêk ang a nih. 7 "Tu khomin a unau Israel chanpui inru a, sal anga a soisak amanih le a zor hmu suok a ni chun, a'n rutu chu sukhlum ngei ding a nih. Nangni laia inthokin suol chu inthiel fai ro. 8 "Vun natna hri hrim hrim chungchàngah, Levi mi thiempuhaiin an zirtir chêu ang tak khan, fimkhur takin thaw ro. An kuoma thu ka pêk ang tak kha fimkhur takin zawm ro. 9 Aigupta rama inthoka in hung suok hnunga lam laka LALPA in Pathienin Miriam chunga a thaw kha hre zing ro. 10 "I tuolbawm kuomah thil i'n pûktirin a aia dàkhama hrèn dinga a thil inhlàn chu la dingin a inah i lût ding a ni nawh. 11 Tuolah lo nghàk la, i thil pûktu chun a dàkham chu i kutah hung pe lem raw se. 12 Mi rethei a ni chun a dàkham chu zân chen in hrènpêk ding a ni nawh. 13 A silpuon chu sila a in theina dingin, a dàkham chu nisa tlâk pha leh pe kîr nawk ngei ngei ro. Chuongchun, ama chu in chungah lawm a ta, LALPA in Pathien mithmuah thil fel thaw nîng in tih. 14 "Inhlawfaa in ruoi mi rethei le tlasam chu, in hnam chanpui Israel mi a ni amanih, in khuoa um ram dang mi a ni amanih khomin in nèksawr ding a ni nawh. 15 A thaw nia a hlaw chu nisa tlâk hma ngeiin pe ro, mi rethei a ni leiin a hlawa innghat a nih. Chuong naw chun in chungthuah LALPA ko a ta, suola thiem naw chang ni hlau rawi in tih. 16 "Pahai chu an nauhai leiin in sukhlum ding a ni naw a, nauhai khom an pahai leiin in sukhlum ding a ni bok nawh; mi tin mani suolna seng leia sukhlum an ni ding a nih. 17 "Ram dang mihai le fahrahai ro chu indik lo takin in rèlpêk ding a ni nawh; hmeithai silpuon khom dàkhamah in hrènpêk ding a ni bok nawh. 18 Nangni khom Aigupta bawiah in um a, chu taka inthok chun LALPA in Pathienin a'n tlan suok chêu a nih ti hre zing ro. Chuleiin hieng hi thaw dingin thu ka pêk chêu a nih. 19 In loa bu in sìk pha, in sìk hmaihai chu inkhawm dingin kîr nawk ta naw ro, ram dang mihai, fahrahai le hmeithaihai ta dingin hlà ro. Chuongchun, LALPA in Pathienin in kut sinthaw po poah malsawm a ti chêu. 20 In oliv ra in vuok til pha, a zâra til mahlahai chu vaw til dingin fe nawk ta naw unla, ram dang mihai, fahrahai le hmeithaihai ta dingin hlà ro. 21 In huona grep ra in lo pha a to in zong ding a ni nawh; ram dang mihai, fahrahai le hmeithaihai ta dingin hlà ro. Aigupta rama bawi in ni lai kha hre zing ro. Chuleiin, hieng hi thaw dingin thu ka pêk chêu a nih. 22 (A um nawh)

25

1 "Mi an inkhing chun rorêlnaah fêng an ta, rorêltuhaiin lo rêlpêk an ta, mi fel chu thiem inchangtir an ta, mi suol chu thiem naw an inchangtir ding a nih. 2 Mi suolin vuok a phu chun rorêltuin inzâltir a ta, a hmaah invuoktir a ta, a suol dàn zirin an vuok zât ding bi chu thliek a tih. 3 Amiruokchu voi sawmli nèka tam a'n vuoktir ding a ni nawh. Voi sawmli chuong vuok a ni chun, in mithmuah in unaupa chu muolpho a tih. 4 "Bawngchalin bu a chil laiin a hmûr khuop naw ro. 5 "Urêng an um khawm a, nau pasal nei loin anni laia mi chu thi ta sien, a thipa nuhmei chu mi dang, puo tieng miin an nei ding a ni nawh. A pasal unauhaiin rochung an ta, nuhmeiah nei an ta, an unaupa thaw ding chu a chunga chun thawng an tih. 6 Nau pasal a neipêk hmasa tak chun Israel laia a hming a bo nawna dingin a unau thi tah hming chu a put ding a nih. 7 Sienkhom, ama chun a unaupa nuhmei chu a nei nuom naw chun, a unaupa nuhmei chu kul kotkhàr bula upahai kuomah fêng a ta, "Ka pasal unaupain Israelhai lai a unaupa hming inumtir zing a nuom naw leiin a unaupa thaw ding chu ka chungah a thaw nuom nawh" a ti ding a nih. 8 A khaw upahai chun ama chu ko an ta, inbiekpui an tih. 9 Ama chun, "Ka nei nuom nawh" tia a thang tlat chun a unaupa nuhmei chun upahai hmaah hang pan a ta, 'A unaupa sûngkuo indin nuom nawtu chunga chun hieng anga thaw ni pei raw se' tiin a pheikhok hlippêk a ta, a hmaiah chil sâkkhum a tih. 10 Chu pa le a thlahai chu 'Sûngkuo pheikhok hlippêk' ti hming inputtir nîng an tih. 11 "Mi insuol hai sien, a pakhat lem nuhmei chun a pasal san suok dingin an suolpuipa sera chun man sien, 12 chu nu kut chu in tanpêk ding a nih. In lunginsiet ding a ni nawh. 13 "In mansaah bùkna thuhmun ni si, a rik dàn inang lo, pakhat a rik lem, pakhat a zâng lem in nei ding a ni nawh. 14 Inkhina thuhmun ni si, a lien lem le a chin lem um bok si khom in inah in kol ding a ni nawh. 15 Bûklung indik le fel le inkhina indik le fel in nei ding a nih, chuongchun LALPA in Pathienin a pêk chêu rama hin dam sawt in tih. 16 LALPA in Pathien chun chuong anga thawtu ni lo, indik lo taka mi dawrtu chu a tirdak a nih. 17 "Aigupta rama inthoka in hung suok laia Amalek mihaiin lampuia an lo thaw dàn chêu kha hre zing ro. 18 Sawl le chaua in inzin lai khan lampuiah an lo lambun chêu a, Pathien tina nei hlek loin a hnufuol po an sât hlum a ni kha. 19 Chuongchun, LALPA in Pathienin hluo ding le rochung ding ram a pêka in dorâlhai laka muongna a pêk pha chêu chun, Amalekhai hi vânkhup hnuoia tu hriet hlaw ta lo dingin sukchimit ro. Chu chu theinghil dèr naw ro!

26

1 "In rochung dinga LALPA in Pathienin a pêk chêu ram chu lût a, hluo a, in va um pha chun, 2 LALPA in Pathienin a pêk chêu in ram leilung ra suok hmasa tak seng chu hung chawi in ta, bawmah sieng in ta, LALPA in Pathienin a hming innghatna dinga a la ruot ding hmuna chun in fepui ding a nih. 3 Chuong hun laia thiempu kuoma chun fêng in ta, a kuomah, 'LALPAN kan pi le puhai kuoma inkhâm meua pêk a tiem rama chun kan hung tlung tah ti LALPA i Pathien hmaah ka puong a nih" tiin in hril ding a nih. 4 Thiempu chun in kuta inthokin bawm chu lâng a ta, LALPA in Pathien maichâm bula chun inthut a tih. 5 Chun, nangnin LALPA in Pathien hmaa chun, "Kan pu chu Aram mih, mi vâkvai a na, Aigupta ramah a fe thla a, a zu um a, mi tlawmte chauh an la nih. Chu taka chun hnam ropui tak, thilthawthei tak le tam tak an hung ni ta a. 6 Aigupta mihai chun an mi suknomna a, an mi sukrethei a, sin harsá sa an mi'n thawtir a. 7 Chuongchun, LALPA, kan pi le puhai Pathien chu kan ko a, LALPA chun kan rawl a lo ngaithlâk a, kan retheizie hai, kan rimsikzie hai le an mi neksawr nasatzie hai chu a hriet a. 8 LALPA chun Aigupta rama inthokin kut hrât tak hmangin, bân pharin, thil râpum tak tak le inchikna le thil mak tak hai thawin a mi thuoi suok a, 9 hi hmuna hin a mi thuoi lût a, hi ram, nenetui le khuoizu luongna ram hi a mi pêk a. 10 Chuleiin, aw LALPA, i mi pêk kan ram leilung tharsuok hmasa tak seng chu kan hung chawi a nih' in va ti ding a nih. Chun, LALPA in Pathien hmaa chun in bawmhai chu inthut unla, a hmaah kûn ro. 11 Nangni le Levi mihai le nangni laia ram dang mi umhai le in sûngkuohai kuomah thil tha tinrêng LALPA in Pathienin a pêk lei chêuin hlim takin in um ding a nih. 12 "Chun, a kum thumna, in thil tharsuok po po sawma pakhat in pêk dinghai chu in sie fel pha leh in khuoa Levi mihai, ram dang mihai, fahrahai le hmeithaihai chun faa an tlai theina dingin, in pêk ding a nih. 13 LALPA in Pathien hmaah, "I thu mi pêk angin ka ina inthokin thilpêk thienghlim chu ka lâk suok a, Levi mi hai, ram dang mihai, fahrahai le hmeithaihai ka pêk a, i thupêk po po pètsan ka nei naw a, pakhat tè khom theinghil ka nei nawh. 14 Ka lusun lai khomin ka tharsuok inhlàna mi chu ka pur ngai naw a, inthieng nawna ka kai laiin ka tawk ngai naw a, mithi puola ding khomin ka'n hlàn bok nawh. LALPA ka Pathien thu chu ka zawm a, a thu mi pêk po po ang chun ka thaw a nih. 15 I chêngna hmun thienghlim, vâna inthokin mi zuk thlîr la, i mi Israelhai le kan pi le puhai kuoma inkhâm meua pêk i tiem ram, nenetui le khuoizu luongna ram hi mal hung sawm rawh' in ti ding a nih. 16 "LALPA in Pathien chun hieng a thupêkhai le dânhai hi fimkhur taka zawm dingin voisun hin thu a pêk chêu a; chuleiin, in lungril po po le in thlarau po poa pomin in zawm ding a nih. 17 Nangni khomin LALPA chu in Pathien a nizie, a lampuihai hraw a, a thupêk hai, thusuok hai le dân hai zawm a, a thu in awi dingzie chu voisun hin in puong a. 18 A mihai, a tiem tah anga a ro puol bik hnam le a thupêkhai zawmtu ding in nizie voisun hin LALPAN a puong a nih. 19 A tiem tah anga hnam dang po po chung daia inpâk le hmingthang le chawimawi hlaw ding le LALPA in Pathien mi thienghlimhai ni dingin a thlang chêu ti a puong bok a nih.

27

1 "Chun, Mosien Israel upahai leh, mipuihai kuomah, "Voisuna thupêk ka pêkhai chêu hi zawm ro. 2 Jordan vadung in kàn nia LALPA in Pathienin a pêk chêu ram in lût pha chun, lung lien tak tak phun inla, lung chàrnain chàr khum ro. 3 LALPA in Pathienin in pi le puhai kuoma pêk a tiem chêu ram, nenetui le khuoizu luongna rama in lût pha chun hieng dàn thuhai hi lung phêka hai chun ziek thla ro. 4 Jordan vadung in kàn pha chun, voisuna thu ka pêk ang chêu hin, Ebal tlângah lunghai hi phun unla, lung chàrnain zût khum ro. 5 Chu taka chun LALPA in Pathien ta dingin lungin maichâm siem ro. A siemna dingin thîr hmangruo hrim hrim hmang naw ro. 6 LALPA in Pathien maichâm chu ram lung hmangin siem unla, LALPA in Pathien kuomah pumraw inthawina inhlàn ro. 7 Inremna thilhlàn inhlàn bok unla, chu taka chun fain LALPA in Pathien hmaah hlim takin in um ding a nih. 8 Chun, lungphuna hai chun hieng dàn thu po po hi fie takin in ziek ding a nih" tiin thu a pêk a. 9 Mosie chun, thiempu Levi-hai le chun, Israel mi po po chu a biek a, "Aw Israel mihai, ngun takin ngàithla ro. Voisun hin LALPA in Pathien mihai in hung ni ta a. 10 Chuleiin, LALPA in Pathien thu chu awi unla, voisuna thupêk le dàn ka pêkhai chêu hi zawm ro" a ta. 11 Chu ni chun Mosien mipuihai chu thu a pêk a: 12 "Jordan vadung in kàn pha leh mipuihai malsawm dingin Gerizim tlângah hieng hnamhai hi an ngîr ding a nih: Simeon, Levi, Juda, Isakar, Josefa le Benjamin. 13 Chun, tongsie inphur dingin hieng hnamhai hi Ebal tlângah an ngîr ding a nih: Reuben, Gad, Aser, Zebulun, Dan le Napthali. 14 "Levihai chun rawl inring takin mipuihai kuomah hieng thuhai hi an insam ding a nih: 15 "Kut themthiemna hmanga LALPA ta dinga tirdakum milem kertu le sungtu le chu chu arûka betu taphot chu tongsie phurin um raw se" tîng an ta, mipui po po chun "Amen" an lo ti ding a nih. 16 "A nu le pa inza nawtu taphot chu tongsie phurin um raw se" tîng an ta, mipui po po chun "Amen" an lo ti ding a nih. 17 "A tuolbawm ramri sontu taphot chu tongsie phurin um raw se" tîng an ta, mipui po po chun "Amen" an lo ti ding a nih. 18 "Lampuia inthoka lampui loa mitdel thuoi pêngtu taphot chu tongsie phurin um raw se" tîng an ta, mipui po po chun "Amen" an lo ti ding a nih. 19 "Ram dang mihai, fahra hai le hmeithai hai ro indik lo taka rêlpêktu taphot chu tongsie phurin um raw se" tîng an ta, mipui po po chun "Amen" an lo ti ding a nih. 20 "A pa khum inza loa a pa nuhmei zàlpuitu taphot chu tongsie phurin um raw se" tîng an ta, mipui po po chun "Amen" an lo ti ding a nih. 21 "Ran ieng khom rìmtu taphot chu tongsie phurin um raw se" tîng an ta, mipui po po chun "Amen" an lo ti ding a nih. 22 "A farnu amanih, a pa naunu amanih, a nu naunu amanih zàlpuitu taphot chu tongsie phurin um raw se" tîng an ta, mipui po po chun "Amen" an lo ti ding a nih. 23 "A tarpinu zàlpuitu taphot chu tongsie phurin um raw se" tîng an ta, mipui po po chun "Amen" an lo ti ding a nih. 24 "Arûka tuolbawm thattu taphot chu tongsie phurin um raw se" tîng an ta, mipui po po chun "Amen" an lo ti ding a nih. 25 "Poi tawk lo mi thatna dinga thamna latu taphot chu tongsie phurin um raw se" tîng an ta, mipui po po chun "Amen" an lo ti ding a nih. 26 "Hi dàn thuhai chel nghet nawtu taphot chu tongsie phurin um raw se" tîng an ta, mipui po po chun "Amen" an lo ti ding a nih.

28

1 "LALPA in Pathien thu chu awi a, voisuna ka pêk chêu a thupêk po po hi in zawm chun, LALPA in Pathienin hnam po po laia chunghnung takah hlâng kai a ti chêu. 2 LALPA in Pathien thu in zawm chun hieng malsawmnahai hi in chungah vùr a ta, chu chun zui pei a ti chêu: 3 " In tieng le ram tieng malsawm a ti chêu. 4 "In rîla ra malsawm a tih, in lo ra suok le in ran ruolhai, in bawngte le beramte hai leh. 5 "In bawm le bei in hmetna thlênghai malsawm a tih. 6 "In fe le hung, in suok le lût malsawm a tih. 7 "Nangni dotu, in hmèlmahai LALPAN hnèpêk a ti chêu a, bei ding cheua sîr khata inthoka hung inthokhai chu sîr sariah tlân dar an tih. 8 "In bu in le in kut sinthawna iengkimah LALPAN malsawmna hung tir a ta; ram a pêk cheua chun LALPA in Pathienin malsawm a ti chêu. 9 "In kuoma inkhâm meua a lo intiem tah angin, LALPA in Pathien thupêkhai in zawm a, a lampuihai in hraw phot chun, LALPA chun ama ta dinga hnam thienghlimah suknghet a ti chêu. 10 Chuongchun, khawvel hnam tinin LALPA hminga kohai in nih ti hrieng an ta, tîng an ti chêu. 11 Inkhâm meua pêk chêu a tiem rama chun hnienghnàrna tinrêngin vùr a ti chêu a, in rîla rahai, in ran ruolhai le in lo ra suokhai malsawm a tih. 12 "LALPA chun a hun taka in ram chawmtu ding ruotui pe ding chêu le in kut sinthawhai po po malsawm dingin vâna a hausakna zèngpui chu hung hongpêk a ti chêu a; chuongchun, hnam tam tak inpûktir in ta, nangni ruok chun pûk ve naw ti niu. 13 LALPA in Pathien thupêkhai ngaisak a, voisuna thu ka pêkhai chêu hi fimkhur taka in zawm chun, a mei ni loin a luah LALPAN siem a ti chêu a, a mong dàp ni loin a chunghnung takah thang rop in tih. 14 Pathien danghai be ding le an rong bawl dingin voisuna ka thupêkhai chêu hi chang tieng amanih voi tieng amanih in pètsan ding a ni nawh. 15 "Amiruokchu, LALPA in Pathien thu in awi naw a, voisuna ka pêk chêu a thupêkhai le dânhai hi fimkhur taka in zawm naw chun hieng tongsiehai hi in chungah hung tlungin nangchîng a ti chêu: 16 "In tieng le ram tieng tongsie phur in tih. 17 "In bawm le bei in hmetna thlênghaiin tongsie phur an tih. 18 "In rîla ra chun tongsie phur a tih, in lo ra suok le in ran ruolhai, in bawngte le beramte hai leh. 19 "In fe le hung, in suok le lùtin tongsie phur in tih. 20 "LALPA chun in chungah tongsie le in kut sinthaw taphotah buoina le inhalna hung tir a ta, thil suol thawa in mi hnung son leiin suksietin um thut in tih. 21 Hluo dinga in lûtna rama inthoka sukbohmang in ni hma khat chu LALPAN hri inlêngtir a tih. 22 LALPAN ngorna dâm, khawsik le invùngna dâm, lum khawkhèng le tawlna dâm, tlolna le hmonna hri damin hrem a ti chêu a, in bohmang hma khat chu zui pei a ti chêu. 23 In chunga vân chu dâr angin inchang a ta, hnuoi chu kapathir angin inchang a tih. 24 In rama ruotui chu LALPAN pilvut dipah inchangtir a ta, in bohmang hma khat vâna inthokin in chungah pilvut insûrtir a tih. 25 "LALPAN in hmèlmahai lakah suktlawm a ti chêu a, anni chu sîr khatah inthokin bei in ta, sîr sariah tlânsieng in ta, khawvel ram tinah mi pangzat nîng in tih. 26 In ruong chu chunglèng vatehai le ramsahaiin tlàn hut hut an ta, a hawl zàmtu ding tu khom um naw ni hai. 27 Sukdam thei lo Aiguptaa khuoihli le pang inbawkna dâm, pânna huoisuol le inthak dâmin LALPAN hrem a ti chêu. 28 Invêtna dâm, mitdelna dâm le lungril buoina dâmin LALPAN hrem a ti chêu a; 29 Sùn changa khom thimthama mitdel inmai angin inmai in ta, in thaw taphotah hlawsam in ta, ni tin ni tina neksawr le rokin um in ta, santu ding hrim nei naw ti niu. 30 "Nei dinga nuhmei in huol chu mi dangin chang an ta, zàlpui an tih. In bawl in ta, sienkhom hluo naw ti niu. Grep huon siem in ta, a ra sor hman naw ti niu. 31 In mithmua ngei in bawngchal that an ta, a sa hlek khom chang ve phâk naw ti niu. In sabengtung lâkpêk an ti chêu a, hmu kîr nawk ta naw ti niu. In beramhai chu in hmèlmahai kuomah pêng an ta, tu khomin san suok naw ni hai. 32 In nau pasalhai le nau nuhmeihai chu hnam danghai pêng an ta, ni tin tina in thlirnain in mit chau zo a ta, thaw thei ieng khom nei si naw ti niu. 33 In ram ra suok le in sin inrim rahai chu in hriet ngai lohaiin tlàn an ta, ni tin tinin neksawr chauh hlawng in tih. 34 Chuong in thil hmuhai chun sukvêt zo a ti chêu. 35 Sukdam thei lo khuoihli na chiin in khùp le ke bawm a ta, in kekhonga inthoka in lu sîp chenin tuom a tih. 36 "Nangni le in lal chopin in pi le puhaiin an hriet ngai lo hnamhai kuomah LALPA chun thuoi a ti chêu a, chu taka chun pathien dang, thing le lunga siem chu bieng in tih. 37 LALPAN a thuoi hmangna ding chêu hnamhai pangzat le hal kawng le endong nîng in tih. 38 In loah thlai chi thlâk teuh in ta, sîka muol ruok chu nei naw ti niu, khauin fa zo an tih. 39 Grêp phun in ta, enkol in ta, sienkhom a uoiin dawn naw ti niu a, grêp khom lo bok naw ti niu, a nge-in an fâk zo ding a ni si a. 40 In ram hmun tinah oliv huon nei inla khom a hriek sawr naw ti niu, oliv rahai chu an hlamtil zo ding a ni si a. 41 Naunu le naupa nei in ta, sienkhom nangni ta ni naw ni hai, salah an thuoi tawl ding a ni si a. 42 In thei kung po po le in thlai tharsuok chu khau honhai chan nîng a tih. 43 "Ram dang mi, nangni laia umhai chu insâng tuol tuol an ta, nangni chu inhnuoi tiel tiel in tih. 44 Inpûktir an ti chêu a, nangni ruok chun inpûktir ve naw ti niu. Anni chu a lu nîng an ta, nangni chu a mei nîng in tih. 45 Hieng tongsie po po hi in chungah hung tlung a tih. LALPA in Pathien thu in awi naw a, a thupêkhai in zawm naw leiin a sukbohmang hma khat chêu anni chun hnot thlûrin nangchîng an ti chêu. 46 Chuong thilhai chu nangni le in thlahai ta dinga kumkhuoa inchikna le thil mak nîng a tih. 47 In hnienghnâr hunah LALPA in Pathien rong chu hlim tak le lawm taka in bawl naw leiin, 48 phingtâm le dangchâr, saruok le rethei mong tolin LALPA hung tirh in hmèlmahai rong chu bawl in tih. A sukbohmang chêu hma khat chu in rîngah thîr kol inbâttir a ti chêu. 49 "LALPA chun ram hla tak, hnuoi tawpa inthokin nangni bei dingin hnam dang, an tong khom in hriet ngai nawhai chu hung tir a ta, mupui inbir thla angin hung thâm an ti chêu; 50 anni chu upa inzàna le naupang lunginsietna nei lo, hnam kolsen tak an nih. 51 In ram vong hma khat chenin in ranhai le in ram tharsuokhai fâng an ta, bu le bâl le uoiin le hriek le in bawng le beram inte tharhai chu hlà hrim nei naw ni hai. 52 In ring zo êm êm in khuo inhuonna kul bang insânghai chu a chim vong chenin LALPA in Pathienin a pêk chêu ram sûnga khuo po po chu inhuol an tih. 53 "In hmèlmahaiin dangchêpa an inhuol lai cheua in rimsik tuor leiin, LALPA in Pathienin a pêk chêu in rîla ra, in naupahai le naunuhai sa chu fâng in tih. 54 Nangni laia pa zaidam tak le inzaum tak khomin a unau amanih, a nuhmei dit tak le a la umpui a nauhai takngiel khom lunginsiet naw nih. 55 In hmèlmahaiin nasa taka in khuohai dangchêpa an inhuol leiin, a nauhai sa chu a thil nei sun a na, tu khom sem phal naw nih. 56 Hmèlmahaiin kul kotkhàr an inhuol a, an dangchêp tlat leia iengkim in tlâksam tâk lei chun, nangni laia nu zaidam le derdêp, a um inno leia a kepha khoma hnuoi la sir ngai lo khomin chuong ang tho chun um vêng a ta, a nauhai sa chu a rûka fâk a nuom leiin, a pasal dit tak dâm, a naunuhai le naupahai dâm chu huphur a ta, 57 a naute pieng hlim sa le a hlamzui naute bawm chenin arûkin fâng a tih. 58 "LALPA in Pathien hming ropui tak le râpum tak chu inza lo a, a dàn thu, zieka umhai hi fimkhur taka in zawm naw chun, 59 LALPAN nangni le in thlahai chungah hri mak tak tak le na tak tak dâm, sietna inkieng el thei lo ding dâm, natna khir tak, dam mei mei thei lo ding dâm chu inlèngtir a tih. 60 In ti hle hlak Aiguptaa hrihai kha in chungah inlèngtir a ta, inthla naw ni chêu. 61 Sukbohmang in ni chenin, hi Dàn Bu-a chuong lo natna le sietna mak tak tak hai khom inlêngtir bok a tih. 62 LALPA in Pathien thu chu inzawm naw leiin, vâna arasi zât ni hlak kha tlawmte chauh hung ni tàng in tih. 63 LALPA chun sukhnienghnâr le sukpung chêu a nuom ang bokin suksiet le sukbohmang chêu khom hung nuom tàng a ta, lûta in va hluo ding rama inthok chun son hmang a ti chêu. 64 "Chuongchun, LALPA chun kawlkila inthoka kawlkil khing tieng tawp chenin chi tin lai sukdar a ti chêu a, chu taka chun thing le lung, in pi le puhai khoma an hriet ngai lo pathien danghai chu bein an rong bawl in tih. 65 Chuong hnamhai lai chun hadamna hrim hrim hmu naw ti niu a, in ke ta dingin chawlna hmun hrim um naw ni a, chu taka chun lungrila lungkhamna dâm, khawsawt leia mit chauna dâm le lungril nguina dâm pe lem a ti chêu. 66 Ieng lai khom ti dor dorin, sùn le zân thlaphângnaa sipin, iem in chang ding ti hrim hre loin, khawsàng in tih. 67 In lungrila titna lei le in mita in thil hmuhai lei chun, zîng tieng po leh, 'Zân tieng ni ta sien aw!' tîng in ta, zân tieng po leh 'Zîng tieng ni ta sien!' tîng in tih. 68 Kîr nawk ta ngai lo dinga ka ti chêu Aigupta rama chun longin LALPAN tir kîr a ti chêu. Chu taka chun in hmèlmahai bawipa le bawinu ni dingin inzor in ta, sienkhom tu khomin inchaw nuom naw ni hai chêu.

29

1 LALPAN Israelhai kuoma Horeb tlânga thu thlung dinga Mosie thu a pêk bàka Moab rama thu thlung dinga a pêkhai chu hieng hi a nih. 2 Mosie chun Israel mihai po po chu a ko khawm a, an kuomah, "Aigupta rama Faraw chunga hai, 3 a mihai po po chunga le a ram po po chunga LALPAN fiena râpthlâk tak tak hai, inchikna mak tak tak le thil mak ropui tak tak a thawhai po po kha mit ngeiin in hmu a. 4 Amiruokchu, voisun ni chen hin LALPAN hriet thiemna lungril dâm, hmu fie theina mit dâm le hriet theina nakawr dâm a la pêk naw chêu. 5 Kum sawmli hiel thlalèra ka thuoi sûng chêu khan in silfènhai in hàk chul naw a, in pheikhokhai khom in la bun tiek bok nawh. 6 Bei in fâk naw a, uoiin amanih zu dang khom in dawn nawh. Hieng hi LALPA chu in Pathien a nizie in hrietna dinga ka thaw a nih. 7 "Chun, hi hmun in hung tlung hin Hesbona lal Sihon le Basana lal Oga hai chu mi do dingin an hung inthok a, anni chu ei lo hne a. 8 An ram chu ei lâkpêk a, Reuben hnam le Gad hnam le Manase hnam zatve hluo dingin ei pêk a. 9 Chuleiin, in thilthaw po poa in hmuingil theina dingin thuthlung ka pêkhai chêu hi pom unla, zawm ro. 10 "Voisun hin in rêngin, in hnam thuoitu luhai, upahai le hotuhai dam, 11 nu le nau, ram dang mi in umpuihai, thing phùrtu le tui chawituhai dàm chenin LALPA in Pathien hmaah in hung a. 12 LALPA in Pathienin in kuoma inkhâm meua a namnghet, thuthlung a siema chun lût dingin voisun hin hi taka hin in hung ngîr a; 13 in thlatu Abraham hai, Isak hai, Jakob hai kuoma le nangni kuoma a lo tiem tah anga in Pathien a ni theina dingin, ama mi ni dingin a suknghet chêu a nih. 14 Hi inkhâmna le thuthlungna hi in kuoma chauh ka pêk nawh; 15 voisuna LALPA ei Pathien hmaa ngîrhai le tuta ei kuoma la um ve lohai kuoma khom ka pêk a nih. 16 "Aigupta rama ei khawsak dàn le hnam danghai pal tlanga hi hmuna ei hung dânhai chu nangni ngeiin in hriet. 17 Anni rawi thil kol tirdakum, thing le lung le tangkaruo le rangkachaka siem milemhai khom in hmu ta kha. 18 Voisuna nangni laia mi pasal amanih, nuhmei amanih, sûngkuo amanih le hnam amanih tu khom chuong hnamhai pathien chu be dinga LALPA in Pathien nghatsan in um nawna dingin fimkhur ro; chuong anga tûr kha pai chun nangni lai zung an kei nawna dingin fimkhur bok ro. 19 "Voisuna inkhâmna thu ngaithlatuhai lai hin, lulul taka mani lampui hraw zing sia iengkim tluong dinga lungrila ngaitu an um nawna dingin fimkhur ro. Chu chun ram hnawng le ram tawl chungah sietna intlun a tih. i 20 Chuong ang mi chu LALPAN ngaidam naw ni a, a lungthîkna sosâng chun hlieu a ta, hi lekhabua chuong tongsie po po chu a chungah tlâng a ta, a hming chu vânkhup hnuoia inthokin LALPAN thai bo a tih. 21 Hi Dàn Bua chuong tongsie inphurna thuthlung po po dungzuiin, ama chu Israel hnamhai laia inthokin LALPAN thlur bing a ta, sietnain inhnottir bok a tih. 22 "In hnunga la hung zuitu in nauhai le hla taka inthoka hung ram dang mihai chun sietnain hi ram a tlâkbuok dàn le hri le hraia LALPAN a hrem dânhai chu la hmung an tih. 23 A ram pum chu chi raw chang le kât ang el, ieng khom chìng thei lona, ieng khom mawng thei lona, hlobet takngiel khom a mawng nawna ramah inchang a tih. LALPA lungsen sosânga a suksiet Sodom le Gomora le Adma le Zeboiim hai ang chie nîng a tih. 24 Hnam tinin, 'Ieng leia hi ram hi hieng lawm lawma LALPAN a thaw el am a na? Hieng lawm lawma ieng leia a lungsen a sosâng am a na?' la tîng an tih. 25 Chuongchun, mihaiin, 'Aigupta rama inthoka a thuoi suok laia a thuthlung, an pi le pua inthoka LALPA an Pathien thuthlung chu nghatsana, 26 pathien dang, an hriet ngai lo pathienhai, aman a ruot ni lohai rong chu bawla an biek lei a nih. 27 Chuleiin, hi lekhabua chuong tongsie po po chu hi ram chunga intlungtir dingin LALPA lungsen chu a chok a nih. 28 A lungsen nasa tak leiin LALPA chun anni chu an rama inthokin a pot suok vong a, ram dangah a dêng lût tawl a nih, tuta an um ang hin' la tîng an tih. 29 "Thil inthuphai chu LALPA ei Pathien ta a na, thil puong suoka umhai ruok chu, hieng dàn thuhai po po hi ei zawm theina dingin, kumkhuoa eini le ei thlahai ta a nih.

30

1 "In hmaah thlang ding malsawmna le tongsie ka sie tah a. LALPA in Pathienin hnam danghai lai a hnot dar pha chêu, tuta dit thlangna ka pêk chêu hi in hriet suok hun la um a tih. 2 Nangni le in thlahaiin LALPA in Pathien kuom tieng hung kîr nawk a, voisuna thupêk ka pêkhai hi lungril po po le thlarau po poa in zawm chun, 3 LALPA in Pathien chun in vangneinaj hung tungding nawk a ta, lunginsiet a ti chêu a, hnam tin laia a hnot darna cheua inthokin hung thuoi khawm nawk a ti chêu. 4 Hnuoi kilkhawra a hnot suok in um khomin, chu taka inthok chun LALPA in Pathien chun rût khawmin hung thuoi kîr nawk a ti chêu. 5 LALPA in Pathien chun in pi le puhai hluo ram ngeia chun thuoi lût a ti chêu a, chu ram chu hluo nawk in ta, in pi le puhai nèka hmuingil lem le tam lemin siem a ti chêu. 6 Chun, in khawsak theina ding le in lungril po po le in thlarau po poa in hmangai theina dingin, LALPA in Pathien chun in lungril le in thlahai lungril ser chu tanpêk a ti chêu. 7 Chun, hieng tongsie po po hi LALPA in Pathien chun a theidatu le suknomnatu chêu in hmèlmahai chungah bun lêt a tih. 8 Chuongchun, LALPA chu pom nawkin, voisuna ka pêk chêu thupêkhai hi hung hraw nawk in tih. 9 LALPA in Pathien chun in kut sinthaw tinrênga hai, in rila ra hai, in ran vai chunga hai le in lo thlai suok tinrêngah a tontawin sukpung a ti chêu. 10 Hi Dàn bua chuong a thupêkhai le a dânhai zawm dinga LALPA in Pathien kuom tienga lungril po po le thlarau po poa in kir chun in pi le puhai chunga a lawm ang bok khan in chungah LALPA lawm nawk a ta, sukhnienghnâr a ti chêu. 11 "Voisuna ka thupêkhai chêu hi in ta dinga thil harsa taluo amani le in tlin phâk lo thil a um nawh. 12 'Kan hrieta kan zawm theina dingin tu am vâna hang lawnin mi hang lapêk a ta?' ti dingin vâna um a ni si nawh. 13 'Kan hrieta kan zawm theina dingin tu am tuifinriet ràla fein mi va lapêk a ta?' ti dingin tuifinriet ràla um khom a ni bok nawh. 14 Chuong nêk hmanin, thu chun a hnai hle chêu a, in baua le in lungrilah a um a nih. 15 "Ngai ta u, tuhin in hmaah hringna le hmuingilna le thina le sietna ka sie a ni hi. 16 LALPA in Pathien hmangai ding dâm, a lampui hraw ding dâm le a rorêlhai pom ding dàma thu ka pêkhai chêu hi in zawm chun hring le damin um in ta, hung pung in ta, in va hluo ding rama chun LALPA in Pathienin malsawm a ti chêu. 17 Amiruokchu, in lungril naw tieng ngha a, thu awi lo a, thuoi hmanga um a, pathien danghai bea an rong in bawl chun, 18 bohmang ngei ngei in tih ti tuhin ka hril chêu a nih. Jordan vadung kân a, hluo dinga in lûtna rama chun dam sawt naw ti niu. 19 In hmaa hringna le thina, malsawmna le tongsie ka sie hi tuhin in chungchang thua hrepuitu dingin hnuoi le vân ka ko a nih. Tuhin, hringna chu thlang ro, nangni le in thlahai khom an hring theina ding le 20 LALPA in Pathien chu hmangai a, a rawl ngaithla a, in chel nghet tlat theina dingin. LALPA chu in hringna a ni leiin, in pu Abraham hai, Isak hai, Jakob hai kuoma inkhâm meua pêk a tiem rama chun kum sawt tak indamtir a ti chêu" a ta.

31

1 Chun, Mosie chu a va suok a, Israel mi po po kuoma chun hieng thu hi a hril a: 2 "Tuhin kum za le sawmhnih ka lo ni ta a, LALPAN ka kuomah, 'Hi Jordan vadung hi kân naw ti nih' a mi ti a, ka thuoi pei thei ta naw ding chêu a nih. 3 LALPA in Pathien chun in hma thuoi a ta, hieng hnamhai hi sukbohmang a ta, an ram chu in hluo ding a nih. Chun, LALPAN a lo hril tah angin, Josua hin inrawi a ti chêu. 4 LALPAN Amorhai lal Sihon le Oga le an ramhai a sukbohmang ang khan anni chunga khom thaw veng a tih. 5 LALPAN anni chu in kutah pêng a ti chêu a, thupêk ka pêk chêu ang tak khan an chungah in thaw ding a nih. 6 Hrât tak le huoisen takin um ro. Ti naw unla, anni leiin thlabâr bok naw ro, a fepuitu chêu chu LALPA a ni si a; ama chun màksan ngai naw ni chêu a, zàmsan ngai bok naw ni chêu" tiin. 7 Chun, Mosien Josua a ko a, Israel mihai po po hmua chun a kuomah, "Hrât tak le huoisen takin um rawh, an pi le pua inthoka LALPAN inkhâm meua pêk a tiem rama chun hi mihai hi i fepui ding a na, an rochan seng chu i'n hluotir ding a nih. 8 I hmathuoitu chu LALPA nîng a ta, umpui zing a ti che; ama chun màksan ngai naw ni che a, zàmsan ngai bok naw ni che. Ti naw la, zâm dèr naw rawh" a ta. 9 Chun, Mosie chun dàn chu a ziek thlâk a, LALPA thuthlung bawm zawntu Levi naupa thiempuhai le Israel upahai chu a pêk a. 10 Mosie chun an kuomah, "Kum sari dan pei, bat ngaidamna kum, Bawkte Kùt hunah, 11 hmun a la ruot dinga Israel mi po po LALPA in Pathien hmaa in hung inlang pha leh hi dàn hi an hriet ngeiah in tiem hlak ding a nih. 12 Dàn chu ngaithla a, LALPA in Pathien ti dàn inchûk a, a dânhai fimkhur taka an zawm theina dingin mipuihai chu a nuhmei a pasalin, in naupang tehai le in umpui ram dang mihai khom dàn thu chu ngaithla dingin ko khawm ro. 13 Jordan vadung kâna in va hluo ding rama in um sûng po poa LALPA in Pathien ti dàn an inchùk theina dingin, a la hre ngai lo an nauhai khomin an ngaithlâk ngei ding a nih" a ta. 14 Chun, LALPA chun Mosie kuomah, "Ngai ta, i thi hun a hnai ta a, Josua ko la, Intuokna Puon inah hung unla, ama ka ruot thu lo hril ka tih" a ta. Chuongchun, Mosie le Josua chu an fe a, Intuokna Puon ina chun an va'n lang a. 15 LALPA chu puon ina chun sûm ngìrin a hung inlâr a, puon in kotkhàr lu chunga chun a ngîr a. 16 LALPA chun Mosie kuomah, "Ngai ta, i pi le puhai kuomah i chawl innghil ding a ni ta a, hienghai ruok hi chu an lûtna rama ram dang mihai pathien kuoma chun inzor an ta, mi nghatsan an ta, an kuoma ka thuthlung chu bawsieng an tih. 17 Chu pha chun an chungah ka lung sen a ta, zàmsan ka ta, an lakah ka hmèl thup ka ta, suksietin um an tih. Sietna le harsatna tinrêngin tlâk buok tawl a ta, chu pha chun, 'Eini lai ei Pathien a um ta naw leiin hieng sietnahai hi ei chungah a hung tlung a ni naw maw?' ting an tih. 18 Chu pha chun rilo taka pathien dang tieng an mi nghatsan leiin anni lakah ka hmèl thup ngei ngei ka tih. 19 "Chuleiin, hi hla hi an ta dingin ziek thla la, Israelhai inchûktir la, anni laka ka thu hrepuitu dingin insaktir tawl hlak rawh. 20 An pi le puhai kuoma inkhâm meua ka tiem, nenetui le khuoizua luong rama chun, khop le tlaia uma an hung hnienghnâr phing leh kei mi hnawla ka thuthlunghai bawsiein, hnam dang pathien tieng nghain la bieng an tih. 21 Sietna le harsatna tam takin a tlâk buok pha, hi hla hi an thlahaiin an la hriet zing ding a ni leiin, an ngîrhmun inhriet suoktirtu la nîng a tih. Inkhâm meua pêk ka tiem rama ka hung thuoi lût hma khom hin an lungril puthmang chu ka hriet ta sa hrim a nih" a ta. 22 Chuongchun, chu ni lá là chun Mosien hla chu a ziek suok a, Israelhai chu a'n chûktir a. 23 LALPA chun Nuna naupa Josua kuomah, "Hrât tak le huoisen takin um rawh, inkhâm meua ka tiem rama chun Israelhai hi i thuoi lût ding a nih; chun, i kuomah um pei ka tih" tiin a hril a. 24 Chuong dàn thuhai chu a bula inthoka a tawp chen lekhabua Mosien a ziek zo hnung chun, 25 thuthlung bawm zawntu Levihai kuomah, 26 "Hi Dân Bu hi la unla, in chungchang thua hrepuitu dingin LALPA in Pathien thuthlung bawm bulah sie ro. 27 Hel in hmangzie le in lululzie ka hriet a, ka la dam lai le in kuoma ka la um zing lai hmanin LALPA chungah in hel rop hlak a, ka thi hnung lem chun ieng ang topin am in zuolkai ding maw! 28 An hriet ngeia hieng thu hi ka hril theina dingin, in hnam thuoitu luhai le in hotuhai chu ka hmaah hung ko khawm unla, in chungchâng thu mi hrepuitu dingin hnuoi le vân ko ka tih. 29 Ka thi hnungin nasa takin hung tla sieng in ta, ka thupêkhai hi hung nghatsan in ta; LALPA mithmuah thil suol thawin, in kut ngeia in siem thilhai chun chophawkin suklungsen in ta, sietnain tlâkbuok a ti chêu" a ta. 30 Chuongchun, Israel mi pungkhawmhai po po hmaah, an na ngeia an hriet dingin, hieng hla thuhai hi a bula inthoka a tawp chenin Mosie chun a'n sam a:

32

1 Aw vânhai, na lo sit ro, Thu ka hril ding a ni hi; Ka tongkam suok thuhai hi, Leilungin ngaithla raw se. 2 Ka thu inchûktirhai chu, Khuongruo angin sûr sien la, Ka thu hril dinghai khom chu, Vân dàidaw angin tla raw se, Hlobet le thlai hring chawm dingaRuo phisi sûr seng seng ang hin. 3 LALPA hming chu puong ka tih, Ropuina chu Pathien pe ro! 4 Ama chu Lungpui a na, A kutsuok a tha famkim a, A lampui tin a'n dik vong. Ama chu Pathien ringum, Thil tha naw hrim thaw ngai lo, Mi ngîl le indik a nih. 5 Sienkhom a mihai ni tlâk loin, A lakah in ringum naw a, In lungril lût-inle le kawiin, Suon bengtla lo in inchang si. 6 Aw, mi invêt le ngolhai, Hieng hin maw LALPA in rul?A hringtu le siemtu chêu, In Pa ngei kha a ni naw maw? 7 Tienthu hluihai kha suiin, In pi le puhai kha ngaituo ro; In pahai le upahai kuomah, Thil chinchâng indon unla, Iengkim hril chieng an ti chêu: 8 Chunghnungtakin hringmihaiA thè dar hun lai dâm leIsrael hnam tam zàt ang peia, An ramri a khampèk lai kha. 9 LALPAN a chanpuol dingin, Jakob thlahai a thlang a nih. 10 Thlalèr thli sie hrangnaah, An vâkvai lai a hmu a; Hliekhuin a enkol a, Mit nauleng angin a vèng, 11 Muvânlaiin a buzawl a, A tèhai vuong inchûktir a, A thla zàr chungah sie a, A vuongpui hlak ang elin. 12 LALPA chauh an thuoitu a nih, Hnam dang pathien an thang ve nawh. 13 Tlângramah an chuongtir a, A ram tharsuokin a chawm a:Lungpui kàra khuoizu dàmin, Lungthîla to oliv hriek dàmin, 14 An ran ruola inthoka suokBawngnene le a khal dàmin, Beram tuoi thau tak tak dàmin, Basan bawngchal le kèl dàmin, Bu le uoiin inhnik tak dàmin, A chawmlien tawl a ni kha. 15 Jakobin chu chu tlànin, Jesurunk chu a hung thàu a, Hel châkin a ke a per a, Mit pawnga inhnaw thauin, A Pathien a nghatsan a, A Sandamtu, Lungpui chu, A hung ngainèp tah a nih. 16 Hnam dang pathien an biek a, A thîkthu an chok tho a, An thil tirdakum thaw chun, A lungsen an cho suok a. 17 Pathien kuomah ni loin, An hriet ngai dèr lo pathien, Vai hnunga an hriet thar chauh, An pi le puhaiin an ti ngai lo, Ramhuoi kuomah an inthawi a. 18 Anni hringtu Lungpui chu, An hung ngaisak ta naw a, Anni siemtu Pathien chu, An hung theinghil ta si a. 19 LALPAN chu chu a hmu a, Thîkin a lung a na hle a, A naunu le naupahai chu, A lungsenin a hnawl a. 20 "Ka hmèl inhmutir naw nîng, Iem an chang hrim en ka tih; Suon bengtla lo tak an na, Ringumna hrim an pài nawh. 21 Pathien ni lo hrim hrimhai, Annin an mi'n thìktir a, An siem fawn milemhai chun, Ka lungsen an chok tho a; Chuleiin keima khomin, Thîk khop tling lo hnamhai chu, Anni inthîktir ka ta, Hnam invêthai chu hmangin, Anni chu cho phawk ka tih. 22 Ka lungsenna chu chokin, Seol mong chen kàng a ta, Hnuoi le a tharsuokhai khom, Meichokin lem hmang a ta, Tlâng thut chen kàng ral a tih. 23 Sietnain vur tawl ka ta, Ka thalin kâp zing ka tih. 24 Tàmpui mitsìm tir ka ta, Lum le hripui tiumin, Anni chu lem zo a ta, Anni sukhlumtu dingin, Ramsa ha ngei tir ka ta, Rûl tûr nei tir bok ka tih. 25 Kotthlerah thal inlêngin, Suon nei loin thîng an ta, Insùngah thlabàrnain, Ro la hung rêlkhum a ta, Nunghâk, tlangval le naute, Tar chenin bohmang an tih. 26 Anni chu hnot dar vong a, Mihriemhai hriet ta lo dinga, Nuoi bo ding ka tia chu, 27 Hmèlmahai nuizatbur a, An um ding ka'n lâu bok si:Hmèlmahan hre thiem lo a, "Kan kuta kan hnè a nih, LALPA thaw vong a ni nawh"An ti pal ding ka vêng si. 28 Varna nei lo hnam an na, Hrietthiemna hrim an nei nawh. 29 Varin hre thiemhai sien chu, An la tawp dàn ding hai khom, Dawn thiem el ding an ni bah! 30 An Lungpuiin zor naw sien, LALPAN hnawl tawl ni naw sien, Ieng tin am mi pakhatin, Sâng khat hnot zâm thei an ta?Ieng tin am mi pahniin, Tiem sèng lo hnot zâm an ta? 31 Hmèlmahan an lungpui chu, Ei Lungpui ang a ni nawzie, An hriet chieng em em a nih. 32 Sodom le Gomora anga suol, Grep kha, tûr nei ang an nih. 33 An uoiin khom rûl tûr ang, Chongkor tûr hrât ang a nih. 34 LALPAN an thilthaw a hriet a, Phuba laa a hrem hun ding, Remchâng a zong zing a nih. 35 "Phuba làk hi ka chan a na, Anni chu thungrul ka ta, A hun a hung tlung pha chun, An sir la'n phet vong a tih. An sietna ni a hnai ta a, Sietnan hung nang vak a tih. " 36 A mihai ro chu LALPAN, A hung rèlpêk ding a nih, A siehlaw chan hung chau a, Bawi le bawi naw tu el khom, Thi bâng an tlawmzie a hmuin, A bawihai lunginsiet a ta, Amàn hung san suok a tih. 37 "Khaw lai am an pathienhai, An ringsan lungpuihai chu? 38 An inthawina thau fatu, Uoiin thilhlàn an pêkhai, Lo dawn zo vongtuhai chu?Nangni thangpuitu dingin, Tu hin hung tho hai sien la, In bêlbul di'n hmang ro chu! 39 "Kei chu keima ngei ka nih, Pathien dang hrim an um nawh, Ti hi hung hre ta ro khai; Ka that a, ka sukhlum a, Ka'n hliem a, ka sukdam a; Chu chu ka kuta inthoka, Inchu thla thei an um nawh. 40 Vân tieng ka kut phar suokin, Ka hringna sâlin ka hril: 41 Ka kawlhnâm ngei tât tlè a, Indik tak a ro ka rêl pha leh, Hmèlmahai chungah phuba, Ka la lâk ngèi ding a na, Mi theida hlaktuhai chu, Ka la thungrul ding a nih. 42 Ka thalhai chu thisenin, Ka la hrai rui ding a na, Ka kawlhnâm khomin taksa, A la lem ding a ni si:Thathai le manhai thisen, Hmèlma hotuhai lu chu"Tiin LALPA chun a hril. 43 Aw, nangni hnam tinrênghai, A mipuihai leh hlim ro; A siehlawhai thisen phuba, A lâk ding a ni si a; A dotuhai chunga chun, Phuba a lâk ding a na, A ram le a mihai suol chu, A ngaidam ding a ni si. 44 Mosie le Nuna naupa Josua chun chuong hla thu po po chu mipui hriet ngèiah an insam a. 45 Israelhai po po hrietah Mosien a'n sam zo hnung chun, 46 "Voisuna hla thu in kuoma khûn taka ka'n samhai hi lungrilin vong tlat unla, hieng dânhai hi fimkhur taka zawm dingin in nauhai chu thu pe ro. 47 Thu mei mei a ni nawh, in hringna a nih. Jordan vadung kâna in va hluo ding rama chun, hieng thil lei hin dam sawt in tih" a ta. 48 Chun, chu ni vèk chun LALPAN Mosie a biek a, 49 "Moab ram Jeriko zawna Abarim tlâng dunga Nebo tlânga chun hang kai la, Israel thlahai hluo dinga ka pêk Kanan ram chu hang thlîr rawh. 50 Hor tlângah i unaupa Aron a thi a, a chipuihai kuoma thuoi a ni ang bok khan iIlawn kaina tlânga chun thîng i ta, i chipuihai kuomah thuoi ni tâng i tih. 51 Zin thlalèr Kadesh hmuna Meriba tuia khan Israel thlahai hmaah in pahniin in mi ring zo naw a, Israelhai lai ka thienghlimna in kengkaw zo naw lei khan a nih. 52 Chuleiin, Israel thlahai kuoma ka pêk ram chu ràla inthokin hmung i ta, lût ruok chu lût ve naw ti nih" tiin.

33

1 Hi hi a thi hmaa Pathien mi Mosien Israelhai mal a sawmna chu a nih. 2 Hieng ang hin a sawm a:"Sinai tlânga inthokinLALPA chu a hung suok a, Seir tlângah ni zung angin, Ei chungah a hung inzàm a, Paran tlânga inthokin, Ama chu a êng suok a. Sim tieng tlâng pangpèra chun, Vântirko sâng tam takin, Ama chu an hung zui a. 3 A mihai hmangaitu a na, A mi thienghlimhai a hum a, A ke bulah an hung kûn a, A bau suok thuhai chu an dong: 4 Mosien Dàn thu a mi pêkhai, Jakob sûngkuohai ro hlu chu. 5 Jeshurun chunga lal a na, Mipui thuoitu luhai leIsrael hnam chunga chun. 6 "Reuben chu dam khawsuok sien, Thi mang loin dam raw se, A mihai tlawm hle sien khom. " 7 Juda hnam chungthua chun:"LALPA, Juda khêk ri ngaithla la, A mihai kuomah thuoi lût la, A kut nangin sukhrâtpêk la, A hmèlmahai dopui rawh. " 8 Levi hnam chungthua chun:" I Thummim chu Levi pe la, I Uriml chu i laka ringum kuomah:Massa hmuna khan i fie a, Meriba tuiah i fie ta bok kha. 9 A nu le pa le unauhai nêkin, I chungah a ringum lem a, I thupêkhai a zawm a, I thuthlung a vong tlat a 10 I dânhai zawm pei dingin, Israel nauhai an zirtir a, I maichâmah rimtui inhlànin, Pumraw inthawina a'n hlàn. 11 Aw LALPA, a kut malsawmin, An thilthaw taphotah lawm la; An hmèlmahai tha sat tan rawh, Ngîr suok ta ngai der lo dingin. " 12 Benjamin hnam chungthua chun:"LALPA ditsak hlaw mi chu, A bulah him takin chêng a ta, Chung Pathienin sunnithlâkin, Ama chu hliekhùng a ta, A ruongah himin inbeitir a tih. " 13 Josefa hnam chungthua chun:" A ram chu LALPAN malsawm sien, Vân daidawin chawm sien la, Hnuoi rila inthoka suok tuiin; 14 Nisain a pêk ra hlu tak hai, Thla tin tharsuok thil hluhaiin; 15 Tlâng hlunha'n ra hlu insuoin, Muol hlunha'n an hnienghnârna, Hung insuopêk hai sien la; 16 Leilung pêk thei thil tha famkim, Chîmbuk choka um ditsakna chu, A unauhai laia thuoitu challang, Josefa chu hung ni raw se. 17 Bawngchal lutîr angin a mawi a, A ki chu ramsiel ki hreu ang a na; Manase mi a sânga tiem, Efraim mi sângsawmhai chu, A ki zumhai chu an na, Chu chun hnamhai a phir tlang a, Kawl kil tawp chenin a sik lèng. " 18 Zebulun hnam chungthua chun:"Tuipuia a sumdawngnaah, Zebulun chu hlim raw se; In tienga Isakar hausakna chu, Hung pung zuol pei raw se. 19 An tlàngah hnamhai ko an ta, Inthawina indik inhlàn an ta, Tuifinriet hausakna tlàn an tih, A kama ro phumrûkhai leh. " 20 Gad hnam chungthua chun:" Gad-hai ram inzauhpêktu, Pathien chu inpâkin um raw se; Gad chu sakeibaknei ang a na, Bân le luah a ham thlèr a; 21 Ram thatna tak a thlang a, Rorêltu chanvo a chang a, Mipui luhai an inkhawm pha, Israelhai kuoma dân thupêkhai, LALPA rorêlna fel a kengkaw. " 22 Dan hnam chungthua chun:"Dan chu Basan rama inthokaSakeibaknei tuoi anga, Hung inchawmsuok chu a nih. " 23 Naftali hnam chungthua chun:"Aw Naftali, ditsakna hlawtu, LALPA malsawmnaa sip, Sim le thlang rochungtu i nih. " 24 Aser hnam chungthua chun:"Nau laia malsawmna vochuom, Dongtu chu Aser a na, A unauhai ditsak hlaw sien, Oliv hriek hau hle raw se. 25 A khuo kotpui kalnahai chu, Thîr le dâra siem vong ni sien, A dam sûng dai zât po chu, A tha khom hrât zing a tih. " 26 Aw Jeshurun, i Pathien ang, Pathien dang hrim an um nawh, Vân sum chungah ropui takin, Thangpui ding che'n a hung inthok. 27 Chatuon Pathienin a hum che, A chatuon bànin a dom zing che. "Sukbohmang ro" tia khêkin, I hmèlmahai a hnot suok a. 28 Vânin daidaw a'n tlâktirna, Bu le uoiin thar tamna ramah, Israel chu chêng him a ta, Jakob tuikhur chu him a tih. 29 Aw Israel, i va hamtha ngei de!Nang anga LALPA sandam hnam, Tu hnam am an um hlak a?Ama chu i phaw le thangpuitu che, I kawlhnâm ropui a nih. I hmèlmahai chu i hmaah, Hungin hung intuklût an ta, An hmun sânghai chîl pher i tih" a ta.

34

1 Mosie chu Moab phaia inthokin Jeriko zawn Nebo tlânga Pisga sîpa chun a hang kai a, chu taka chun ram chu Gilead-a inthoka Dan chen LALPAN a'n entir vong a: 2 Naftali le Efraim ram po po, Manase le Judai ram po po, a thlang tieng tuifinriet chen; 3 sim tieng Negev ram po po le Tûm khawpui Jeriko phai ruom, Zoar chenin. 4 Chu zoah LALPAN, "Hi ram hi a nih Abraham hai, Isak hai, Jakob hai kuoma, 'In thlahai la pêng ka tih' tia inkhâm meua ka lo tiem chu. I mit ngeiin ka'n hmutir ta che a, sienkhom nang ruok chu chu taka chun lût naw ti nih" a ta. 5 Pathien siehlaw Mosie chu LALPA thu angin chu hmun Moab rama chun a thi a. 6 Beth-peor zawn Moab rama ruomah a phûm a, sienkhom voisun ni chen hin a thlàn umna tu khomin an hriet nawh. 7 A thi chun Mosie chu kum za le sawmhni a ni ta a, sienkhom a mit a la chàu naw a, a tha khom a la chuoi bok nawh. 8 Israel thlahai chun Moab phaiah ni sawmthum sûng, tapa sùnna hun a tawp chenin, Mosie chu an ta a. 9 Chun, Nuna naupa Josua chu Mosien a ai awtu dinga a namnghêt a ni leiin thlarau varnain a sip a, Israelhai chun a thu an ngaithlàk a, LALPAN thu Mosie a pêk ang pei chun an thaw a. 10 , LALPAN hmaisana a biek Mosie ang hi Israaelhai lai zawlnei tu khom an suok ta nawh. 11 Aigupta lal Faraw le a thuoihruoihai mithmua le an ram sûnga Mosie hmanga inchikna le thil mak tam tak a thaw anga thaw dingin LALPAN zawlnei dang tu khom a hmang ngai nawh. 12 Israelhai mithmua thil ropui le râpum tak tak Mosien a thaw anga thaw zawlnei dang an um bok nawh.