1

1 Hienghai hi Jakobin Aigupta rama a lûtpui Israel naupahai hming le an sûngkuo bing senghai chu a nih: 2 Reuben, Simeon, Levi le Juda; 3 Isakar, Zebulun le Benjamin; 4 Dan le Naftali; Gad le Aser. 5 Jakob thlahai chu an rêngin sawmsaria an ni a, Josefa ruok chu Aiguptaa lo um ta sa a nih. 6 Josefa le a unauhai le anni hun laia suon po po chu an thi vong ta a. 7 Israel thlahai chun chi tam tak thlain nasa takin an hung pung a, Gosen ram chu an hung sip el ta a. 8 Aigupta rama chun Josefa hre ngai lo lal thar a hung inlal a. 9 A mipuihai kuoma chun, "En ta u, Israelhai hi, eini ta dingin an tam taluo tah. 10 Thaw ro, anni hi dawha thiemin soisak ei tiu, chuong naw chun hung tam zuol pei an ta, indo a um pha ei hmelmahai leh thang kop an ta, ei rama inthokin tlàn suok hlauh rawi an tih" a ta. 11 Chuongchun, anni suknomna dingin an chungah siehlaw vêngtuhai an sie a, Faraw hmang dingin Pithom le Ramases-ah thawluinain kudàm an inbawltir a. 12 Amiruokchu, an soisak rimsik po leh pung zuola an indar nasa ting leiin, Aigupta mihai chun Israel mihai chu an hung ti ta hle a, 13 an sor inrim nasa tul tul a. 14 Sin hàutak, lung chàrna le têklei siema inrim taka sorin, lo sin rinum tinrèng inthawtirin, an nun a rimsik thei dàn patawpin Aigupta mihai chun rawng takin an sor a. 15 Aigupta lal chun Hebrai mihai nau domtu Sifra le Pua hai kuoma chun, 16 "Hebrai mihai nau in dom pha leh, pasal a ni chun that unla, nuhmei a ni leh hla ro" tiin thu a pêk a. 17 Nau domtuhai chun Pathien an ti leiin Aigupta lalin a hril ang chu zawm loin nau pasalhai chu an indamtir vong lem a. 18 Aigupta lal chun nau domtuhai chu a'n kotir a, "Hieng hi ieng leia thawa nau pasalhai chu in indamtir pei am a na?" tiin a'n don a, 19 Nau domtuhai chun Faraw kuomah, "Pu, Hebrai nuhmeihai chu Aigupta nuhmei ang an ni ve naw a, an thothàng a tha leiin nau domtu tlung hmain nau an lo nei hman dêr ta hlak a nih" an ta. 20 Nau domtuhai chunga chun Pathienin ngil a nei a, chuongchun Israel mihai chu pungin an hung tam zuol pei ta lem a. 21 Nau domtuhai chun Pathien an ti leiin sûngkuo neiin an hung pung ve a. 22 Chun, Faraw chun a mihai po po kuomah, "Hebrai mi nau pasal hung pieng hlim taphot chu Nile vadungah pei un la, nau nuhmei ruok chu hlâ ro" tiin thupêk a'n suo a.

2

1 Chun, Levi sûngkuoa mi pakhatin Levi chia mi bok nuhmeiah a nei a. 2 A hung inrài a, nau pasal a nei a, nau lawmum tak a nih ti a hmu chun thla thum zet a thup a. 3 A thup zing thei ta naw phing leh phairuongin bawm a siem a, alkatarain a zût phûi vong a, chu taka chun naute chu a'n zàltir a, Nile vakam hnaia phairuong lai chun a sie a. 4 Naute chunga chun iem a hung tlung hrim ti hmu tumin a unu chu hla feah a ngîr a. 5 Chun, Faraw naunu chu vadunga insil dingin a zu fe a, a tirtawnhai chun vadung kamah kein an zui a. Phairuong lai chun bawm a zuk hmu a, a siehlawnu chu a zu'n lâktir a. 6 A hang hong chun naute a hmu a. Naute chu a tap a, a lunginsiet ta êm êm a, "Hi hi Hebrai naute a ni hi tie!" a ta. 7 A unu chun Faraw naunu kuomah, "Hi naute don pêktu ding che hi Hebrai nuhmei ka va zongpèk ding che?" a ta. 8 Ama chun, "Va zong ta la" a ta. Nuhmeite chu a fe a, naute nu chu a hung thuoi a. 9 Faraw naunu chun a kuomah, "Hi naute hi fepui la, mi donpèk la, i don man hlaw pêng ka ti che" a ta. Chuongchun, nuhmei chun naute chu a lâk a, a don ta a. 10 Naute chu a hung inthang lien a, Faraw naunu kuoma chun a thuoi a, a naupain a um ta a. "Tuia inthoka ka lâk suok a ni leiin' a ta, a hmingah Mosie a sak a. 11 Mosie chu a hung puitling hnungin ni khat chu a mihai umna hmunah a fe a, inrim taka sin an thaw lai chu a thlîr a. Aigupta mi pakhatin a unau Hebrai mi a vuok lai chu a hmu a. 12 A ngha vêl a, mi dang a hmu naw phing leh Aigupta mi chu a vuok hlum a, phaiphina chun a phûm hmang a. 13 A zînga chun a suok nawk a, Hebrai mi le Hebrai mi insuol lai a hmu a, a thaw indik naw pa lem kuoma chun, "Ieng dinga i Hebrai chanpui i vuok am a na?" a ta. 14 Chu mi chun, "Tuin am kan chunga thuneitu le rorêltu dingin a ruot che a? Aigupta mi i that ang boka mi that ve iI tum a ni?" a ta. Mosie chun a lungrilin, "Ka thilthaw kha tlângin an hriet tah a ni awm de aw!" a ta, a ti thawng ta hle a. 15 Chu riva chu Faraw khomin a lo hriet a, Mosie chu that a tum a, sienkhom Mosie chu Faraw kuoma inthokin a tlân hmang a, Midian ram a tlung a, tuikul sìrah a'n thung a. 16 Chun hieng hi a na, Midian rama thiempu chun nau nuhmei pasari a nei a, anni chun an pa beram ruol chu tui pe dingin tuikula chun an hung a, taikuonga chun tui an sung sip a. 17 Beram vêngtu dang an hung a, anni chu an hung hnot zam a, sienkhom Mosie chun anni chu a lo san a, an beramhai chu tui a'n dawntir a. 18 Nunghàkhaiin an pa Reuel kuom an tlung chun, "Iem a ta voisun chu in va hung inlawi inhma ngei de?" a lo ta. 19 Anni chun, "Aigupta mi pakhatin beram vêngtuhai lakah a mi san suok a. Tui dâm a mi thâlpêk a, beram ruol khom tui a pêka a nih" an ta. 20 Ama chun, "An leh ama chu khaw la'm a um ta le? Iengtiziea in hung màksan el am a na? Va ko inla, bu dâm hung fa raw se" a ta. 21 Mosie chun chu pa kuoma um chu a remti a, ama chun a naunu Zipora chu nuhmeia nei dingin Mosie a pêk a. 22 Zipora chun nau pasal a nei a, Mosie chun, "Mi rama pêm ka lo ni ta hi" a ta a hmingah Gersom a sak a. 23 Chun, sawt fe hnunga chun Aigupta lal chu a thi a. Israelhai saltàng inrùm ri le thangpuitu ngaia an khêk ri chun Pathien kuom a hang tlung a. 24 Pathienin an inrùm ri chu a lo hriet a, Abraham le Isak le Jakob kuoma a thuthlung chu a hriet zing a. 25 Pathienin Israel thlahai chu a zuk thlîr a, a zuk ngaisak a.

3

1 Mosie chun Midian rama thiempu, a tarpupa Jethro beram ruol chu a vèng a; chun, râl tieng thlaler ram hla tak chen a beramhai khalin, Horeb, b Pathien tlâng chu a zu tlung a. 2 Chu taka chun chîmbukah meichokin LALPA vàntirko a kuomah a hung inlàr a. Kàng si loa chîmbuk chok chu Mosien a hmu zing a. 3 Chuongchun a lungrilin, "Chîmbuk saw a chok a, a kâng bok si naw a, a va mak de! Va en chieng hrim ka tih" a ta. 4 En chieng dinga a fe lai chu Pathienin a hmu a, chîmbuka inthok chun, "Mosie, Mosie" tiin Pathien chun a ko a. Mosie chun, "Hi taka hin ka um" a ta. 5 Pathien chun, "Kha bâk kha hung hnai sap ta naw rawh. I pheikhok kha hlîp rawh, i ngîrna kha hmun thienghlim a nih" a ta. 6 Chun, Pathien vêkin, "Kei hi i thlatuhai Pathien, Abraham Pathien, Isak Pathien le Jakob Pathien chu ka nih" a ta. Chu phing leh Mosie chun a hmai a hup a, Pathien chu a en ngam naw a. 7 LALPA chun, "Aigupta rama ka mihai rimsikzie ka hmu zing a, sal vêngtuhai kut an tuor leia an inrùm ri ka lo hriet a, an tuorna ka hriet zing a nih. 8 Chuleiin, Aiguptahai kuta inthoka anni chu san him ding le chu rama inthoka thuoi suok a, Kanan mihai, Hit mihai, Amor mihai, Periz mihai, Hiv mihai le Jebu mihai umna, ram tha le thawveng, nenetui le khuoizu luongna rama chun thuoi lût dingin, ka hung tum a nih. 9 Tu hin Israelhai inrûm ri chun ka kuom a tlung zing a, Aigupta mihaiin an suknomnat dàn khom ka hmu zing. 10 Thaw rawh, tu hin Aigupta rama inthoka ka mi Israelhai thuoi suok dingin Faraw kuomah ka tir ding che a nih" a ta. 11 Mosie chun Pathien kuomah, "Faraw kuomah fe a, Aigupta rama inthoka Israelhai thuoi suoktu ding chun kei hi tu am ka ni leh?" a ta. 12 Pathien chun, "Ka umpui ding che annawm. Keima tir ngei i nizie i ta dinga inchikna chu hi hi nîng a tih: Aigupta rama inthoka ka mihai i hung thuoi suok pha chun, hi tlânga ngei hin Pathien chu chawibiek in tih"a ta. 13 Mosie chun Pathien kuomah, "Israelhai kuoma chun zu fe ta lang, an kuomah 'In thlatuhai Pathien chun in kuomah a mi tir a nih' zu ti ta lang, anni rawiin, "A hming ieng am a na?' lo ti sien, iem a na ka hril ding?" a ta. 14 Pathien chun Mosie kuomah, "KEIMA CHU KA NIH. c Israelhai kuoma chun, 'KEIMA chun in kuomah a mi tir a nih' i ti ding a nih" a ta. 15 Chun, Pathien vèk chun Mosie kuomah, "Nangin Israelhai kuoma chun, 'LALPA, in thlatuhai Pathien, Abraham Pathien, Isak Pathien le Jakob Pathien chun in kuomah a mi hung tir a nih' i ti ding a nih. Hi hi kumkhuoa ka hming chu a nih, suon po po chena in mi hriet zingna ding hming chuh. 16 Fe la, Israel upahai ko khawm la, an kuomah, 'LALPA, in thlatuhai Pathien, Abraham Pathien, Isak Pathien, Jakob Pathien chu ka kuomah a hung inlàr a, hieng hin a tih: Ka hung kan cheu a, Aigupta rama an soisak dàn cheu khom ka hmu vong. 17 Aiguptaa sukrinuma in umnaa inthoka thuoi suokin, Kanan mihai, Hit mihai, Amor mihai, Periz mihai, Hiv mihai le Jebu mihai umna ram, nenetui le khuoizu luongna rama chun thuoi lût ka ti cheu ti ka tiem ta sa a nih' tiin hril rawh. 18 "Chuongchun, i thu lo ngaithlàng an tih. Chun, nang le Israel upahai chu lal kuomah fe unla, a kuomah, 'LALPA, Hebraihai Pathienin a mi hung kan a, chuleiin, thlaler ni thum lamah LALPA kan Pathien kuoma kan va'n thawi theina dingin, lunginsiet takin fe mi phalpêk rawh' ti ro. 19 Chun, kut hrât takin a'n thaw luitir a ni ngot naw chun Aigupta lal chun infetir phal mei mei naw ni cheu ti ka hriet. 20 Chuongchun, keiin ka kut phar suok ka ta, anni laia thil mak ka la thaw ding po po chun Aigupta chu hrem ka ta, chu zoa chun insuoktir a ti cheu. 21 "Chun, hi mihai hi Aigupta mihai inlunginsiettir ka ta, in suok pha khom kut ruokin suok naw ti niu. 22 Nuhmei taphotin a tuolbawmnu le a ina um nuhmei kuomah tangkaruo le rangkachaka siem incheina thilhai le silfènhai hni sien, chuonghai chun in naunu le in naupa hai inthuomtir ro. Chuong ang chun Aigupta mihai chu in rok ding annawm" a ta.

4

1 Mosie chun, "Mi ringhlela ka thu ngàithla loin, 'I kuomah LALPA inlâr naw nih' mi tihai sien, iem a na ka law ding?" a ta. 2 Pathienin a kuomah, "I kuta i chawi kha iem a na?" a ta, ama chun "Hmol" a ta. 3 LALPA chun, "Hnuoiah pei rawh" a ta. A pei thlâk charin rûlin a'n chang a, Mosie chu a tlânsie a. 4 LALPA chun a kuomah, "I kutin ban la, a meia khan man rawh" a ta, a ban a, a hei man chun a hmolah a hung inchang nawk a. 5 LALPA chun, "Hi hi LALPA, an thlatuhai Pathien, Abraham Pathien, Isak Pathien le Jakob Pathien chu i kuomah a hung inlâr ngeizie an ring theina ding a nih" a ta. 6 Chun, LALPA chun, "I kutin i korfuol mansa kha hang pur rawh" a ta. Mosie chun a pur a, a hang lâk suok chun, ngai ta, a kut chu vur anga varin a lo inphàr ta vong a. 7 LALPA chun, "Tu khan i kutin i mansa pur nawk rawh" a ta. Mosie chun a pur a, a hang lâk suok chun a kut chu a pang vun dang ang charin a hung um nawk el ta a. 8 LALPA chun Mosie kuomah, "Inchikna thilmak i thaw voi khatna hi an awi naw a, i thu an ngàithlàk naw a ni khomin a voi hnina hi chu awi tàng an tih. 9 Hi inchikna thil mak pahni hi pom lo a, i thu an la ngàithlak naw rop a ni chun, Nile vadung tui zu thâl la, chu chu hnuoi chârah bun thla la, tui chu thisenah hung inchang el a tih" a ta. 10 Mosie chun LALPA kuomah, "Aw LALPA, kei hi chu kha hma le i siehlaw i biek hnung khom hin, mi bau themthiem ka ni ngai naw a, pa dangawk le muong taka thu hril mi ka ni si a" a ta. 11 LALPA chun a kuomah, "Mihriem bau hi tu pêk am a na? Tong thei lo le naseta siemtu chu tu am a na? Tu am a na mit sukvara sukdel theitu? Kei, LALPA hi ka ni naw am a ni? 12 Tu hin fe el rawh, tong dàn zirtir ka ti che a, i hril dinghai chu hril pei ka ti che" a ta. 13 Mosie chun, "Aw LALPA, hi thilthaw ding hin chu mi dang tir lem el ta la" a ta. 14 LALPA chu Mosie chungah a lungsen a, a kuomah, "I unaupa Aron, Levi chia mi hi teh? Ama hi chu a bau a themthiem ti ka hriet. Nangma hmu ding chein a hung nghe nghe a, a hmu pha che chu a lungril lawm a tih. 15 Ama chu inbiekpui la, a bauah thú hi tù rawh; in pahnia in tong dàn ding le thaw ding chu hril pei ka ti cheu. 16 Ama chu mipuihai kuoma i thu hril sawngtu, i ta dinga bau nîng a ta, nang chu ama ta dingin Pathien ang nîng i tih. 17 Amiruokchu, inchikna thil mak i thawna dingin hi hmol hi chawi rawh" a ta. 18 Mosie chu a tarpupa Jethro kuomah a kîr nawk a, a kuomah, "Aigupta rama ka mihai zu kan a, a dama muol an la um am ti en dinga ka fe mi phalpêk rawh" a ta. Jethro chun, "Ni e, thlamuong takin fe rawh" a ta. 19 Chun, Midian rama chun LALPAN Mosie kuomah, "Aigupta ramah kîr nawk ta la, a that tumtu che po po kha an thi ram vong tah" a ta. 20 Chuongchun, Mosie chun a nuhmei le a naupahai chu sabengtung chungah a'n chuongtir a, Aigupta panin an inthok suok a. Chun, a kutin Pathien hmol chu a chawi a. 21 LALPA chun Mosie kuomah, "Aigupta ram i tlung pha chun inchikna thil mak thaw theina ka pêk che hi Faraw hmaah i thaw ding a nih. Sienkhom a lungril sukkhaupèk ka ta, mihai chu insuoktir phal el naw nih. 22 Chu pha chun Faraw kuomah hieng hin hril rawh: 'Hi hi LALPA thu chu a nih: Israel hi ka nau lutîr a na, 23 ka naupa chun ka rong a bawl theina dingin insuoktir rawh khai, ka ti a, i'n suoktir phal naw vei a, chuleiin i naupa, i nau lutîr chu sukhlum ka tih, a tih' ti rawh" a ta. 24 Chun, lampuia an riekna hmuna chun LALPAN Mosie chu a zu sir a, a sukhlum hman vang a. 25 Ziporra chun lung sìr ngei a lâk a, a naupa ser vun chu a tan thlàk a, chu chun Mosie ke chu intawktirin, "Nang hi ka ta dingin pasal, thisen insuo hmang i lo ni ngei luo hi tie!" a ta 26 Chuongchun, LALPA chun a tawk ta naw a (Hi taka 'thisen insuo hmang pasal' a ti hin sertan thu a hril a nih). 27 LALPA chun Aron kuomah, "Mosie tuok dingin thlalerah fe rawh" a ta. Chuongchun, Mosie chu Pathien tlângah a'n tuokpui a, a fawp a. 28 Mosie chun LALPAN a tir thu po po le inchikna thil mak a'n thawtir dàn ding po po chu Aron a hril vong a. 29 Mosie le Aron chun Israel upahai po po chu an ko khawm a, 30 LALPAN Mosie kuoma thu a hrilhai po po chu Aron chun a hril sawng nawk vong a, inchikna thil makhai a thaw bok a, mipui chun an awi ta a. 31 LALPAN Israel thlahai ngaisak a, an rinum tuor nasatzie a hmu tah ti an hriet chun kûnin ama chu an chawibiek a.

5

1 Chu hnunga chun Mosie le Aron chu Faraw kuomah an fe a, "LALPA Israelhai Pathienin hieng hin a tih: 'Ka mihai hi thlalera ka kuoma kût an hmang theina dingin infetir rawh' tiin" an ta. 2 Faraw chun, "A thu awi a, Israelhai kan suoktir ngotna san ding LALPA chu tu am a na? Chu LALPA chu ka hriet ngai nawh; Israelhai khom insuoktir bok naw ning" a ta. 3 Anni chun, "Hebraihai Pathien chun a mi hung kan a. Tu hin hi taka inthoka ni thum lama hla thlalerah fe a, LALPA kan Pathien kuoma kan inthawi theina dingin lunginsiet takin mi'n fetir rawh, chuong naw chun hripui amanih kawlhnâm amanih hung inlèngtir rawi a tih" an ta. 4 Aigupta lal ruok chun, "Mosie le Aron, ieng dinga an sin thaw buoi laia hieng mipuihai hi thuoi hmang phèt in tum am a na? In sin seng va thaw tok tok ro" a ta. 5 Faraw bok chun, "En ta u, a ram mipui hi an tam ta hle a, an sin in hung sukchai nasatzie hih!" a ta. 6 Chu ni lâ là chun sinthaw vêngtuhai le an hotuhai kuoma chun, 7 "Tuta inthok chu kha hma ang khan têklei siemna dingin bupawl pe ta naw ro, anni ngeiin inzong chop raw hai se. 8 A hmaa an siem zât tho siem dingin tuk unla, suktlawm chuong naw ro. An tha a bo a, chu leia 'Kan Pathien kuomah fein va'n thawi kan tih' tia inphin an ni hi. 9 Pasalhai sin sukrik zuol unla, khel thu an ngaisak hman nawna dingin chawl loin sin inthawtir ro" a ta. 10 Chu ni ngei chun sinthaw vêngtuhai le an hotuhai chun, "Faraw thupèk angin, tuta inthok chu bupawl pêk ni ta naw ti niu. 11 Nangnin bupawl chu in hmu theina ang anga inthokin la khawm ro. In sina tuk zât chu suktlawm ni bok naw nih" tiin mipui chu an hril a. 12 Chuongchun, mipui chu Aigupta ram hmun tinah bupawl aia hmang ding bu kung bul la khawm dingin an fe dar ta chum chum a. 13 Sinthaw vêngtuhai chun, "Bupawl in dong laia in thaw suok zât bok kha ni tin in thaw suok ding a nih" tiin an nor zing bok a. 14 Chun, sinthaw vêngtuhaiin Israel mi hotua an ruothai chu, "Iengtiziea zani le voisun hin kha hma ang boka têklei in siem zât dinga bituk chu in la siem zo naw?" tiin an vuok a. 15 Chuongchun, Israelhai hotuhai chu Faraw kuomah an fe a, "I siehlawhai hi ieng dinga hieng lawm lawma i mi soisak am a na? 16 I siehlawhai hi bupawl hrim hrim i pêk ta naw a, i mihai hlak chun, 'Têklei siem ro' tiin an mi nor zing bok si. I siehlawhai hin an mi vuok a, sienkhom a thaw indik nawtu chu i mihai an ni lem sia" tiin an beidong thu an va'n tlun a. 17 Ama ruok chun, "In tha a bo annawm, mi thabo ruol in nih. In thabo lei annawm, 'LALPA kuomah va'n thawi kan tih' in ti hi. 18 Chuleiin, fe unla, in sin va thaw ro. Bupawl pêk ni ta nawng in ta, sienkhom têklei siem zât dinga an bituk cheu chu in siem zo hrim hrim ding a nih" a ta. 19 Ni tina têklei siem zât dinga an bituk chu suktlawm a ni chuong naw ding thu Israel hotuhaiin an hriet chun an chan sietzie chu an hmu suok a. 20 Faraw ina inthoka an hung suok chun lampuia ngîr Mosie le Aron chu an hmu a, an kuomah, 21 "Faraw le a siehlawhai mithmuah tirdakum in mi'n kaitir a, an mi thatna dingin kawlhnâm an kutah in sie leiin LALPA chun nangni enin in chungthu rêl raw se, " an ta. 22 Chun, Mosie chu LALPA tieng a ngha a, "Aw LALPA, hi mihai chunga hin ieng leia buoina i siempèk am a na? Hi ding lei hin a ni maw i mi tir chu? 23 Faraw kuoma i hminga thu ka va hril nia inthokin hi mihai chunga hin harsatna a'n tluntir a, i mihai hlak chu i hung san bok si nawh" a ta.

6

1 LALPA chun Mosie kuomah, "Tu hin Faraw chunga ka thaw dàn ding chu hmu tâng iitih: ka kut hrât leiin anni chu insuoktir a ta, ka kut hrât leiin anni chu a rama inthokin hnot suok a tih" a ta. 2 Pathien vèk chun Mosie kuomah, "Kei hi LALPA chu ka nih. 3 Abraham le Isak le Jakob kuomah Iengkim Pathien ka nina angin ka'n lâr a, amiruokchu LALPA hming hin an kuomah keima ka la'n hriettir ngai nawh. 4 Mikhuol anga an khawsakna Kanan ram chu pe dingin anni chu thu ka thlung a. 5 Chu bâkah, Aigupta sala intâng Israelhai inrum ri ka hriet a, ka thuthlung khom ka hriet zing. 6 ''Chuleiin, Israelhai kuomah hi thu hi hril rawh: 'Kei hi LALPA chu ka nih. Aiguptahai bawi nina ringkol rik tak in bâtnaa inthokin san suok ka ti cheu a, an bawia inthokin insuoktir ka ti cheu a, bân phar meua ropui rêlin intlan suok ka ti cheu. 7 Ka mihai nîng in ta, kei in Pathien nîng ka tih. Chu pha chun keima hi LALPA in Pathien, Aiguptahai bawi ringkola inthoka thuoi suoktu cheu ka nizie hung hre tàng in tih. 8 Abraham le Isak le Jakob kuoma bân phar meua pêk ka tiem rama chun thuoi lût ka ti cheu a, chu ram chu in rochanah pêng ka ti cheu. Kei hi LALPA chu ka nih' tiin hril tawl rawh" a ta. 9 Chu thu chu Israelhai kuomah Mosien a hril a, sienkhom an lungril zuoina lei le rimsi taka an intàngna lei chun a thu hril chu an ngàithlàk nuom nawh. 10 Chun, LALPA chun Mosie kuomah, 11 " Va fe la, Aigupta lal Faraw kuoma chun a rama inthoka Israelhai insuoktir dingin hril rawh" a ta. 12 Sienkhom Mosie chun LALPA kuomah, "Israelhai hmana ka thu an ngàithlàk nuom naw chun, kei mi dang inawk thu hril hi Faraw chun ieng leiin am a lo ngàithlàk ding?" a ta. 13 Chun, LALPAN Mosie le Aron chu a biek a, "Aigupta rama inthoka Israelhai thuoi suok dingin thu ka pêk ta cheu a nih ti thu chu Israel mipuihai le Aigupta lal chu hril ta ro" a ta. 14 Hienghai hi Israel pahnam tin luhai chu an nih: Israel nau lutîr Reuben naupahai chu Hanok hai, Pallu hai, Hezron hai le Karmi hai an na, anni hi Reuben chi-hnamhai chu an nih. 15 Simeon naupahai chu Jemuel hai, Jamin hai, Ohad hai, Jakin hai, Zohar hai le Kanan nuhmei laka a naupa Shaul hai an nih. Hienghai hi Simeon chi-hnamhai an nih. 16 An inchik dana Levi naupahai chu Gerson hai, Kohat hai le Merari hai an nih. Levi chu kum za le sawmthum pasari a dam. 17 Gerson naupahai chu Libni hai le Simei hai an nih. 18 Kohat naupahai chu Amram hai, Izhar hai, Hebron hai le Uziel hai an nih. Kohat chu kum za le sawmthum pathum a dam. 19 Merari naupahai chu Mali le Musi hai an nih. Chuonghai po chu an chanchin inchiknaa Levi pahnamhai chu an nih. 20 Amram chun a pa farnu Jokebed chu nuhmeiin a nei a, a naupahai chu Aron le Mosie an nih. Amram chu kum za le sawmthum pasari a dam. 21 Izar naupahai chu Kora hai, Nefek hai le Zikri hai an nih. 22 Uziel naupahai chu Misa hai, Elzafan hai le Sithri hai an nih. 23 Aron chun Aminadab naunu, Nason zuorpuinu Eliseba chu nuhmeiin a nei a, ama chun naupa Nadab hai, Abihu hai, Eleazar hai le Ithamar hai a neipèk a. 24 Kora naupahai chu Asir hai, Elkana hai le Abiasaf hai an na, chuonghai chu Kora chi-hnamhai chu an nih. 25 Aron naupa Eleazar chun Putiel naunu chu nuhmeiin a nei a, naupa Finehas a neipèk a. Chuonghai chu Levi sungkuoa pahnam pei luhai chu an nih. 26 Aron le Mosie kuoma ngei hin a nih LALPAN, "Aigupta rama inthokin Israel thlahai hi an chi-hnam inthe dàn ang peiin thuoi suok rawh" tia a lo hril chu. 27 Anni pahni chu an nih Aigupta lal Faraw va bie a, Israel thlahai chu Aigupta rama inthoka insuoktir dinga va nortu chu. Chu thil thawtuhai chu Mosie le Aron hai ngei chu an nih. 28 Chun, Aigupta rama LALPAN Mosie a biek ni chun LALPAN, 29 "Kei hi LALPA chu ka nih. Aigupta lal Faraw kuoma chun ka hril po pohai che hi intlun rawh" tiin Mosie chu a hril a. 30 Mosie chun LALPA kuomah, "Kei hi pa dang inawk ka na, keima thuhril telul hi Farawin ieng tin am a ngàithlàk ding a na?" a ta.

7

1 LALPA chun Mosie kuomah, "Ngai ta, Faraw ta dingin Pathien ang hielin ka siem che a, i unaupa Aron chu i zawlnei nîng a tih. 2 Hril dinga thu ka pêk taphot che chu puong suok i ta, i unaupa Aron chun Faraw kuomah a rama inthoka Israelhai po po insuoktir dingin hril raw se. 3 Amiruokchu, Faraw lungril sukkhauh ka ta, Aigupta ramah inchikna thil mak sukpung ka ta, sienkhom ngàithla naw ni che. 4 Chu pha chun Aigupta chungah kut thlâk ka ta, ropui rêlin ka mi Israelhai chu thuoi suok ka tih. 5 Aigupta chungah kut inlèn a, Israelhai ka thuoi suok pha chun kei hi LALPA chu ka nih ti hre tàng an tih" a ta. 6 Mosie le Aron chun LALPA thupêk ang charin an thaw a. 7 Faraw kuoma thu an hril lai hin Mosie chu kum sawmriet mi a ni ta a, Aron chu kum sawmriet pathum mi a ni tah. 8 LALPA chun Mosie kuomah, 9 "Farawin, 'Thil mak thaw ro' a ti pha leh nangin Aron kuomah, 'I hmol kha la la, Faraw hmaah pei la, rûlin inchang a tih' tiin hril rawh" a ta. 10 Chuongchun, Mosie le Aron chu Faraw kuomah an fe a, LALPA thupêk ang char chun an thaw a. Aron chun Faraw le a thoktuhai hmaah a hmol chu a pei a, rûlin a hung inchang a. 11 Faraw khomin a mi varhai, dawithiemhai le mitdawivai thiemhai chu a ko ve a, anni khomin an mitdawivai thiem rùk chu hmangin chuong ang chun an thaw ve a. 12 An hmol chu an hang pei seng a, rûlin an inchang ta vong a. Amiruokchu, Aron hmol chun hmol dang po po chu a lem vong a. 13 Chuong sa khom chun Faraw chun a lungril a sukkhau zing a, LALPAN a hril ang khan, an thu a ngàithlàk nuom nawh. 14 LALPA chun Mosie kuomah, "Faraw lungril a la khau zing a, mihai chu a la'n suoktir phal nawh. 15 Zîngkar leh Faraw tui insilna ding hmuna chun fe la, ama chu hmu dingin Nile vadung kamah lo nghâk la, rûla inchang thei i hmol kha chawi bok rawh. 16 Chun a kuomah hieng ang hin hril rawh: 'LALPA, Hebrai mihai Pathien chun hi thu hi i kuoma hril dingin a mi tir a nih: thlalera an mi chawibiek theina dingin ka mihai hi infetir rawh ka tia chu tu chen hin i la bengkhon nuom nawh. 17 Chuleiin, LALPA chun hieng hin a tih: Hi hin LALPA ka nizie chu hrieng in tih: Ngai ta, ka kuta ka chawi hmol hin Nile vadung chu vuong ka ta, thisenin inchang a tih. 18 Nile vadunga ngahai chu thing an ta, a vadung chu thu vong a ta, a tui chu Aigupta mihaiin dawn naw ni hai' tiin hril rawh a mi tih" a ta. 19 Chun, LALPAN Mosie kuomah, "Hieng hin Aron kuomah hril rawh: i hmol kha kutin chawi la, Aiguptaa vadungpui hai, vadungte hai, tui lam hai, dil hai le tui intling khawmna taphot chungah inlet la, tui po po chu thisenah inchang a tih. Aigupta ram po po chu thisenin sip a ta, thing kuong le lung bêla tui um po po khom thisenah inchang a tih' tiin hril rawh" a ta. 20 Mosie le Aron chun LALPA thupêk ang charin an thaw a, hmol chu a hang inlet a, Faraw le a thoktuhai po po hmua ngei chun tui chu a vuok a, chuongchun vadunga tui po po chu thisenin a hung inchang ta vong a. 21 Vadunga nga chu an thi vong a, vadung chu a thu vut vut a, Aigupta mihai chun tui chu an dawn nuom ta naw a, thisen hlak chu Aigupta ram sûng po poah a um vong el si a. 22 Aigupta rama mitdawivaihai khomin an thiemna rùk hmangin chuong ang chun an hang thaw ve a, chu chun Faraw lungril a sukkhau a, LALPAN a hril tah ang khan, an thu le hla a ngàithlàk nuom chuong nawh. 23 Ngàithla nèk hmanin Faraw chu a in tieng a fe a, lungkham khom a lungkham zui nawh. 24 Vadung tui chu an dawn thei si naw leiin Aigupta mi po po chun tui dawn ding zongin Nile vadung kam vel chu an cho ta sup sup a. 25 Pathienin Nile vadung a vuoka inthokin ni sari zet a ni ta a.

8

1 Chun, LALPAN Mosie kuomah, "Faraw kuomah fe la, hieng hin hril rawh: 'Ka mihai infetir rawh, an mi chawibiek theina dingin. 2 An suok ding i phal naw chun a ram pumah utok intàmtir ka tih. 3 Nile vadung hi utokin sip an ta, i lal ina chen hungin, i riekna pindana hai, i khum chunga hai, i thoktuhai le i mipuihai ina hai, in thuk sùnga hai, bei tlang in hmetna thlênga hai hung lût sup sup an ta, 4 nang le i mipuihai le i thoktuhai panga chen khom invak sup sup an tih' tiin" a ta. 5 Chun, Pathienin Mosie kuomah, "Aron kuomah hieng hin hril rawh, 'I kutah hmol chawiin, vadung le tui lam le dil chunga hai i hmol chu inlet la, Aigupta ram chungah utok hung intàm raw se'ti rawh" a ta. 6 Chuongchun Aron chun Aiguptaa tui chunga hai chun a ban a phar a, utok an hung suok a, a ram phêkin an hung intàm a. 7 Sienkhom, an mitdawivaihai chun an thiemna rùk hmangin chuong ang chun an thaw ve a, hnuoi chunga chun utok an hung insuoktir ve a. 8 Faraw chun Mosie le Aron chu a'n kotir a, an kuomah, "Kei le ka mipuihai laia inthoka utok hi la hmang dingin LALPA kuomah mi hnipêk unla, in mipuihai chu LALPA kuoma inthawina inhlàn dingin infètir ka tih" a ta. 9 Mosie chun Faraw kuomah, "Nile vadunga um lai ti lo po po, nang le i thoktuhai le i mipuihai laia inthoka utok la hmang dinga i ta dinga ngênna ka neipèk hun ding che chu nangman hung ruot rawh" a ta. 10 Faraw chun, "Zingah ni raw se" a ta. Mosie chun, "I ti ang chun ni raw se, LALPA kan Pathien ang hi an um nawh ti i hriet theina dingin. 11 Utokhai chun nang le i in, i thoktuhai le i mihai in chu suoksan vong an ta, Nile vadunga chauh um tàng an tih" a ta. 12 Mosie le Aronin Faraw an màksan hnungin Mosie chun Faraw chunga utok a'n tamtir chungthuah LALPA a ko a. 13 LALPA chun Mosie ngên angin a thawpêk a, in le tuol lai le rama utokhai chu an thi ta vong a. 14 Utok thi chu an deng vùm hnèr hnûr a, a ram phêkin a thu vut vut a. 15 Chuonga an hung re nawk ta phing leh Faraw chun a lungril a sukkhau a, LALPA lo hril tah ang khan, an thu chu a ngàithlàk nuom ta naw a. 16 Chun, LALPA chun Mosie kuomah, "Hieng hin Aron hril rawh" 'I hmol kha inlet la, pilvut vaw la, Aigupta ram po poa pilvut chu hrikind hung inchang a tih" a ta. 17 Chuong ang chun a thaw a, Aronin a hmol a hang inlet a, hnuoia pilvut a vuok charin Aigupta rama pilvut po po chu hrikin an hung inchang a, sa le mihriem hai chu an hung baw a. 18 An mitdawivaithiemhai chun an thiemna rûk hmanga thaw ve an tum a, an hlawsam dèr a. Hrik chun sa le mihriem hai chu an bawm a. 19 Mitdawivaithiemhai chun Faraw kuomah, "Hi hi Pathien kut a nih"e an ta. Sienkhom, Faraw lungril chu sukkhauin a um a, LALPA hril tah angin, an thu chu a ngàithlàk nuom chuong nawh. 20 LALPA chun Mosie kuomah, "Zîngkàr inhma takin tho la, insil dinga Faraw a fe lai va nangching la, hi thu hi va hril rawh: Hieng hin LALPA chun a hril: 'Ka mihai infetir rawh, an mi chawibiek theina dingin'. 21 Ka mihai i'n suoktir naw chun nang le i thoktuhai le i mihai inah tho hon hung tir ka ta, Aigupta mihai in po po chu thoin sip an ta, an chêngna ram po po khom thoin sip an tih. 22 Chu ni chun ka mihai umna Goshen ramah tho hrim hrim an um ve nawna dingin anni chu thlier hrang ka ta, chuongchun LALPA chu ka nih ti hung hre thei in tih. 23 Chun, ka mihai le i mihai chu thlier hrang ka tih. Hi inchikna thil mak hi zîngah hung tlung a tih' tiin hril rawh" a ta. 24 Chuong ang char chun LALPAN a thaw a, Faraw in le a thoktuhai ina chun tho an hung vuong lût ta hum hum el a, Aigupta ram hmun tin el chu thoin an suksiet a. 25 Chuongchun, Faraw chun Mosie le Aron chu a'n kotir a, "Fe unla, hi rama hin in Pathien kuoma chun va'n thawi el ro" a ta. 26 Mosie chun, "Chu chu thil fel ni naw nih. LALPA kan Pathien kuoma kan inthawina chu Aigupta mihai tirdak zawng nîng a tih. An tirdak zawng a lo ni chun, lungin an mi deng naw ding maw? 27 Ama thupêk angin, LALPA kan Pathien kuoma inthawi ding chun hi taka inthoka ni thum lam thlalerah kan fe a ngai a nih" a ta. 28 Faraw chun, "LALPA in Pathien kuoma inthawi dingin thlalerah infetir ka ti cheu, amiruokchu fe hla naw ro. Tu hin mi tongtaipêk raw leh" a ta. 29 Mosie chun, "Ka suoksan char che hin LALPA kuomah ngèn ka ta, zìnga hin Faraw le a thoktuhai le a mipuihai chu thoin inkiengsan an tih. Amiruokchu, LALPA kuoma inthawia an fe ding chu phal nawk lo a, dawhaa inhlèm nawk ta lo ding a ni thua hin Faraw hi chieng phot sien" a ta. 30 Chuongchun, Mosie chun Faraw chu a màksan a, Pathien kuomah a tongtai a. 31 LALPA chun Mosie ngên ang takin a thawpêk a, Faraw le a thoktuhai le a mipuihai kuoma inthokin tho tlimpui chu a hawl hmang a, pakhat hlekte khom an um ta nawh. 32 Chu tum khom chun Faraw chun a lungril a sukkhau a, mihai chu an suoktir phal nawh.

9

1 Chun, LALPA chun Mosie kuomah, "Faraw kuomah fe la, hieng hin hril rawh: 'LALPA, Hebraihai Pathien chun hieng hin a tih: Ka mihai hi infetir rawh, an mi chawibiek theina dingin. 2 Infetir loa i chel tàng tawl zing chun Pathien kutin ran pûl hri râpthlâk tak el chu ran tlatna hmuna in sakorhai, 3 sabengtunghai, sanghawngseihai, bawng le beram le kêl ruolhai chungah inlèngtir a tih. 4 Amiruokchu, LALPAN Aiguptahai ran ruol le Israel mihai ran ruol chu the hrang a ta, Israelhai ran vai hrim hrim thi ve naw ni hai' tiin" a ta. 5 LALPAN a thaw hun ding chu tukin, "Zìngah LALPAN hi rama hin chuong ang chun thawng a tih" a ti bok a. 6 A zìnga chun chuong ang chun LALPAN a thaw a, Aigupta mihai ran po po chu an pûl ta vong a, Israel thlahai ran ruok chu pakhat khom an thi ve nawh. 7 Chun, Faraw chun en fie dingin mi a tir a, Israel mihai ran chu pakhat khom an thi ve nawh ti an hmu a. Chuong sa khom chun a lungril a sukkhau a, mihai chu an suoktir nuom nawh. 8 Chun, LALPA chun Mosie le Aron kuomah, "Thuka mi inting iemani zat chawi inla, Faraw hma bulah Mosien boruokah vawr raw se. 9 Chu chu a ram po po chungah vut dip khuin inchang a ta, chu chun Aigupta rama mi le sa po po chu khuoihli huoisuol invoitir a tih" a ta. 10 Chuongchun, thuka inting chu an chawi a, Faraw hmaah ngîrin Mosie chun boruokah a vawr a, mi le sa po poin khuoihli huoisuol an invoi a. 11 Mitdawivaithiemhai chun Aigupta mihai invoi ang bok khuoihli chu an invoi ve leiin Mosie chu an cho hne ta naw a. 12 Amiruokchu LALPAN Faraw lungril chu a sukkhau a, Mosie kuoma a lo hril lawk tah ang hrimin, Faraw chun Mosie le Aron thu chu a ngàithlàk nuom chuong nawh. 13 Chun, LALPAN Mosie kuomah, "Zîngkar inhma takin tho la, Faraw va hlù khum la, a kuomah, 'LALPA, Hebraihai Pathien chun hieng hin a tih: Ka mihai infètir rawh, an mi chawibiek theina dingin. 14 Chuong a ni naw chun, tuta tum hin chu nang le i thoktuhai le i mihai chungah hripui tak tak ka hung inlêngtir ding a nih, keima ang hrim hi hnuoia hin an um nawh ti in hriet theina dingin. 15 Tu khom hin ka kut phar a, hri hung inlêngtir a, nang le i mipuihai chu hnuoia inthoka sukram vong thei cheu ka nih. 16 Ka thilthawtheizie inentir ding che le khawvel po poa ka hming puong darna dinga ka hlà mei mei che a nih. 17 Ka mihai chungah insukngêngin i la'n suoktir nuom naw zing a. 18 Chuleiin, tu ang hun zînga hin Aigupta ram a pienga inthoka tu chen khoma la tla ngai lo rielpui ka'n tlàktir ding a nih. 19 I ran ruol nei po po le rama i thil nei po po chu a bûkah khum dingin thu pe rawh, mi le sa rêng rèng tuola umhai chu rielin a dêng hlum vong ding a ni si a' ti rawh" tiin. 20 Faraw thoktuhai laia LALPA thu poisatuhai chun an ranhai le an suokhai chu inhmaw takin an in sûngah an hawl lût tawl a. 21 LALPA thu poisa nawtuhai ruok chun an ranhai le suokhai chu ran tlatna hmunah an inumtir a. 22 LALPA chun Mosie kuomah, "Aigupta ram po poa mihriem le sa le loa thlai tinrèng chungah riel a tlàk theina dingin vân tieng i kut phar rawh" a ta. 23 Mosie chun a hmol chu vân tieng a hang inlet a, LALPAN vàninrum ri le riel a zuktir a, kawl inlepin hnuoi a kâp zor zor a. Chuongchun, Aigupta ram chunga chun LALPAN riel a'n tlàktir ta chur chur el a. 24 Riel a tlàk ruolin a suk a tungin kawl a'n lep ton zok zok a. Aigupta ram a pienga inthokin chuong ang lawma thli sie chu a la hrang ngai nawh. 25 Riel chun Aigupta ram puma loa thil um po po le sa le mihriemhai khom a dêng hlum vong a, loa thlaihai le thinghai khom a dêng kol vong a. 26 Riel a tlàk ve nawna chu Israelhai umna Gosen ram chauh a nih. 27 Chun, Faraw chun Mosie le Aron chu a'n kotir a, "Tuta tum hin chu thilsuol ka thaw a nih. LALPA a'n dik a, kei le ka mihai ruok chu kan suol a nih. 28 Hun ta êm êm raw se. Vân inrûm le riel bona dingin LALPA kuomah hni unla, chu chun insuoktir ka ti cheu, sawt um ta naw ti niu" a ta. 29 Mosie chun, "Khawpui hi ka suoksan pha leh kut pharin LALPA kuomah tongtai ka tih. Vàninrum hi bo a ta, riel tla ta bok naw ni a, chu chun hnuoi hi LALPA ta a nizie hrieng in tih. 30 Amiruokchu, nang le i rawihai hin LALPA Pathien tìna hlek khom in la nei naw rop ti ka hriet" a ta. 31 Pat le barli a dêng siet vong a, barli chu a vui lai a na, pat chu a pâr lai a nih. 32 Huit le vai butun ruok chu an la to naw leiin a dêng siet ve nawh. 33 Mosie chun Faraw a màksan a, khawpuia inthok chun a fe suok a. LALPA tieng a kut a phar a, vàninrum le riel chu a tawp a, ruo khom a sûr zom ta nawh. 34 Farawin ruo le riel le vàninrum a tawp tah ti a hmu chun a suol a pu nawk a, ama le a rawihai chun lungril an sukkhau a. 35 Chuongchun, LALPAN Mosie kuoma a lo hril tah ang khan, Faraw chun a lungril a sukkhau a, Israelhai chu an suoktir nuom nawh.

10

1 Chun, LALPA chun Mosie kuomah, "Faraw kuomah fe la, LALPA chu ka nih ti in hrietna dinga inchikna thil mak tam tak ka thaw theina ding le chuong inchiknahai chu thaw a, 2 khau taka Aigupta mihai ka soisak thuhai chu in nauhai le in tu le tehai kuoma in inzawt theina dingin, Faraw le a thoktuhai lungril ka sukkhau a nih" a ta. 3 Chuongchun, Mosie le Aron chu Faraw kuomah an fe a, "LALPA, Hebraihai Pathien chun hieng ang hin a hril: 'Ka hmaah ieng chen top am inngâitlawm nuom loa i um ding chu? Ka mihai hi insuoktir rawh, an mi chawibiek theina dingin. 4 Ka mihai i'n suoktir phal naw chun zînga hin in ramah khàu honpui ka hung intàmtir ding a nih. 5 Hnuoi hi inlang thei lo khopin dâp sip an ta, rielin a dêng hlum bàk thil tlawmte inla neihai le rama thing hna la um sunhai chu fa ram vong an tih. 6 Nang le i thoktuhai le i mihai inah sip vong an ta, chuong ang chu i pi le pu huna hi ram in hluo nia inthoka an la tong ngai lo thil nîng a tih' a tih" tiin an hril a. Mosie chu a nghakìr a, Faraw chu a suoksan ta a. 7 Faraw thoktuhai chun a kuomah, "Ieng chen top am hi pa hi ei ta dingin châng a'n chang ding a na? Hienghai hin LALPA an Pathien chu an chawibiek theina dingin infètir el rawh. Aigupta ram hi sukramin a um zo tah ti i la hriet naw a ni maw?" an ta. 8 Chuongchun, Mosie le Aron chu Faraw kuomah an hung thuoi nawk a, an kuomah, "Fe unla, LALPA in Pathien chu va chawibiek ro. Amiruokchu, tuhai am an na a fe ding chu?" a ta. 9 Mosie chun a don a, "LALPA kuoma kût hmang ding kan ni leiin kan rêngin a chin a lien, kan naunu le naupahai le kan ran ruol po po leh fêng kan tih" a ta. 10 Faraw chun, "Nunau le in ran ruol le ka'n fetir ding cheu a ni chun, LALPA Pathien chun umpui mol raw se cheu! Thil suol thaw tum in ni hlak chu a chieng bal sia le! 11 Chuong chu ni thei naw nih. In ngèn tah angin, pasal po fe unla, LALPA chu va chawibiek ro" a ta. Mosie le Aron chu Faraw kuoma inthok chun an hnot suok a. 12 Chun, LALPA chun Mosie kuomah, "I kut kha Aigupta chungah phar rawh, a ram phêka khâu honpui hung intàm a, rielin a dêng siet bâk a rama thlai po po an fâk ram vong theina dingin" a ta. 13 Chuongchun, Mosie'n a hmol chu Aigupta ram chunga chun a hang inlet a. LALPA chun sunnithlâk le zânkhawvarin chu rama chun sak thli a'n hràngtir a. A tûk zînga chun thliin khauhai chu a hung lèn lût hum hum a; 14 khauhai chun Aigupta an rûn a, a ram sûng hmun tinah an fu a, an tam êm êm el a. Chuong ang lawma khàu intâm nasa chu a hmain hriet a la ni ngai naw a, hriet ni nawk ta ngai bok naw nih. 15 Hnuoi an tuom sip vong leiin a ram phèkin a'n thim khup el a. Riel dêng siet bâk chu a rama thlai tinrêng le thei ra po po chu an fâk ram a, Aigupta ram chu thil inder hrim hrim hmu ding um loin a kol rît a. 16 Faraw chun inrang takin Mosie le Aron chu a'n kotir a, an kuomah, "LALPA in Pathien le nangni lakah thil suol ka thaw a. 17 Tu hin ka suolna hi mi ngâidam nawk hrâm inla, LALPA in Pathien kuomah hi hripui tium hi la hmang dingin mi ngènpêk ro" a ta. 18 Mosie chun Faraw chu a fesan a, LALPA kuomah a tongtai a. 19 LALPA chun sak thli chu thlang thlipui hrât takin a'n changtir a, khauhai chu Tuipui Senah a lèn lût vong a, Aigupta ramah khàu hlek khat khom a màksan nawh. 20 Amiruokchu, LALPAN Faraw lungril chu a sukkhauh leiin Israelhai chu a'n suoktir phal chuong nawh. 21 Chun, LALPA chun Mosie kuomah, "Vân tieng khin i kut hang phar rawh, Aigupta rama hin ieng lai khoma an la hriet ngai lo thimpui a hung inzir theina dingin" a ta. 22 Chuongchun, Mosie chun vân tieng kut a hang phar a, ni thum sûng zet Aigupta ram chu thimpuiin a'n khum a. 23 Tu khom an inhmu thei naw a, mani umna hmuna inthokin ni thum sûng chu an invàk suok thei bok nawh. Israelhai umna ruok chu a var vong thung a. 24 Faraw chun Mosie chu a'n kotir a, a kuomah, "Fe unla, LALPA in Pathien chu va chawibiek ro. Nunau khom an rêngin thuoi unla, in ran ruolhai ruok chu màksan ro" a ta. 25 Mosie chun, "LALPA kan Pathien kuoma kan inthawi theina dingin pumraw inthawinaa kan hmang dinghai chu chawi i mi phalpèk ding annawm. 26 Kan ran ruolhai chu keini leh an fe ngei ding a na, an tin hlek khom màksan ni naw nih. LALPA kan Pathien kan chawibieknaah a then hi kan hmang a ngai a, a hmun kan tlung hma chun ieng thil am hmangin LALPA chu kan chawibiek ding ti kan hriet si nawh" a ta. 27 Faraw lungril chu LALPAN a sukkhau tlat leiin anni chu a'n suoktir phal chuong nawh. 28 Faraw chun Mosie kuomah, "Ka hmu phâk loah fe hmang dai rawh! Ka hmaah hung inlang ta lo hrim hrim dingin fimkhur rawh. I hmel ka hmu nawk ni chu i thi ni ding nîng a tih" a ta. 29 Mosie chun, "I ti ang tak chun ni raw se. I hmaah hung inlang nawk ta ngai naw ning" a ta.

11

1 LALPA chun Mosie kuomah, "Faraw le Aigupta chungah hripui dang ka la hung inlèngtir ding a nih. Chu zoa chun infètir a ti cheu a, a'n fètir pha cheu chu a hnotin a nih a hnot suok ding cheu. 2 Mihai kha hril la, a nuhmei a pasalin an tuolbawmhai kuomah tangkaruo le rangkachaka siem incheina thilhai chu hni raw hai se, " a ta. 3 Mihai chu LALPAN Aigupta mihai lunginsiet a'n hlawtir a; chun Mosie chu Aigupta rama Faraw thoktuhai le a mipuihaiin nasa takin an ngaisâng bok a. 4 Mosie chun, "Hieng ang hin LALPA chun a hril: 'Zân ril velah Aigupta ram sir suok ka tih. 5 Aigupta rama nau pasal pieng hmasa tak taphot, Faraw nau lutîr, lalthungphaa inthung laia inthoka bu rawtna lunga thok bawinu nau lutîr chen khom thi'ng an ta, ran chen khom a chal pieng hmasa tak chu thi vong bok an tih. 6 Aigupta ram chu tap inrûm riin sip a ta, chuong ang hrim hrim chu a hmain a la um ngai naw a, um nawk ta ngai bok naw nih. 7 Israelhai lai ruok chu uiin mi amanih ran amanih an inbau ri tak ngiel khom hriet ni naw nih. Chu pha chun LALPAN Aigupta mi le Israel mihai chu a thlier ngei a nih ti hre tàng in tih. 8 I thoktuhai po po hi ka kuomah hungin ka hmaah la bokkhup an ta, 'Fe ta rawh, nang le a zuituhai po po le hin' tiin mi la hung ngên an ta, chu pha chun suok ka tih" a ta. Chuongchun, Faraw kuoma inthok chun lungsen takin a suok a. 9 LALPA chun Mosie kuomah, "Aigupta ramah thil mak tam lem ka thawna dingin Faraw chun i thu ngàithlàpèk naw ni che" a ta. 10 Mosie le Aron chun chuong thil makhai chu Faraw hmaah thaw hai sien khom LALPAN Faraw lungril a sukkhau tlat leiin a rama inthokin Israelhai chu a'n suoktir nuom si nawh.

12

1 Chun, LALPAN Aiguptaa chun Mosie le Aron a biek a, "Tuta thla hi in ta dingin thla hmasa tak nîng a ta, 2 kum khat sûnga thla in tiem tanna nîng a tih. 3 Hi thla ni sawmnaa hin sûngkuo tinin mani sûngkuo ta ding seng beram tuoi pakhat la chit dingin Israel thlahai po po hril rawh. 4 Chun, beram tuoi thatna khop ni loa tlawm sûngkuo an um chun an tuolbawmhai leh an sûngkuo tamzie ang peiin beram pakhat intlàng raw hai se. Mi tin fâk khop tawk ang peia hisapin beram tuoi that ding zât chu ruot ro. 5 Ran tuoi in thlang dinghai chu kum khata upa, hmel hem lo nîng a ta, kel amani beram amani laia mi a ni ding a nih. 6 Chu thla ni sawm le ni lina chen chu kol inta, chu zàn tieng thimbut chun Israel sûngkuo tinin in that seng ding a nih. 7 A thisen iemani zât làng in ta, chu chu a sa in fàkna in kotkhâr bieng chung le sîr ve veah in tàt ding a nih. 8 Chu zân lá là chun a sa chu meiah em hminin, chol thang lo bei le thlai hna kha leh in fâk ding a nih. 9 A selin fa naw unla, tuiin suong naw unla, a lu le a ke le a sûng thang vongin in em hmin ding a nih. 10 A zînga ding ieng khom hla naw ro; a tûk chena fâk bâng la um chu meiah raw hmang ro. 11 Chun, hieng ang hin in fâk ding a nih: thuom inbel sa diema pheikhok bunin, hmol chawiin, inhmaw takin fa ro, LALPA fekàn kût a ni si a. 12 "Chu zân ngei chun Aigupta ram fang ka ta, mihriem le sa, nau lutîr po po chu sukhlum ka ta, Aigupta rama pathienhai po po chu an chungthu rèlpêk ka tih; kei hi LALPA chu ka ni si a. 13 Thisen chu in ta dingin in umna inchikna nîng a ta, thisen ka hmuna taphot chu fe kân pei ka tih. Aigupta ka hrem ni chun nangni sukse thei hri rêng rèng inlèng ve naw nih. 14 "Hi ni hi theinghil loa in inser hlak ding ni, thang la hung thar peihai khomin LALPA ta dinga kût hmanga an inser kumkhuo ding chu a nih. 15 Ni sari sûng chu chol thang lo bei in fâk ding a nih. A ni hmasa takah chol hrim hrim ina inthokin in inthiel fai vong ding a nih. Tu khom hi ni sari sûnga chol thang bei fàtu chu Israel sûngkuo laia inthokin in thlauthlàk ding a nih. 16 A ni hmasa tak le a tawpna takah inkhawmna hun ser in nei ding a nih. Hi ni hin mani fâk siem ti chauh naw chu sin dang hrim hrim in thaw ding a ni nawh. 17 "Chol Thang lo Bei Kût hi in inser ding a nih, chu ni ngei chun Israel mipuihai chu Aigupta rama inthokin ka thuoi suok a nih. Thangthar peihai khomin dâna neiin hi ni hi an inser hlak ding a nih ti hi kumkhaw thupêk a nih. 18 A thla hmasa tak ni sawm pali zân tienga inthoka ni sawmhni pakhat zân tieng chen chol thang lo bei in fâk ding a nih. 19 Ni sari sûng chu in inah chol hrim hrim a um ding a ni nawh. A rama pieng le mikhuol tukhom chol thang bei fâtu chu Israel sûngkuo laia inthokin in thlauthlàk ding a nih. 20 Chol thanga siem ieng khom fa naw ro. Khaw lai khom um inla, chol thang lo bei in fâk ding a nih' tiin hril rawh" a ta. 21 Mosie chun Israel upahai chu a ko khawm vong a, an kuomah, "Fe vat unla, in sûngkuo tin ta ding beram tuoi va thlang unla, Fekân Kûta ding beramte chu that ro. 22 Husop kau thliek unla, maihùna beramte thisena chun phum unla, in kotkhâr chung le bieng ve veah thisen chu tât seng ro. A tûk khuo a var hma chun tu khom mani ina inthokin suok naw ro 23 LALPAN Aigupta mihai hrem dinga a ram a hung fang pha, in kotkhâr chung le bieng intona thisen kai chu hmung a ta, fe kân a ta, sukhlumtu chu nangni sukhlum dinga a hung lût phal naw nih. 24 "Ka thupêkhai hi nang le i thlahaiin in hung zawm kumkhuo ding a nih. 25 LALPAN pêk a tiem cheu ram in lût pha khom hi ni hi inser hlak ro. 26 In nauhaiin, "Hi ni in inser hin ieng am in ta dingin umzie a nei a?" tia an indon pha che chun, 27 'Hi hi LALPA Fekân leia inthawina a nih, ama chun Aigupta mihai a sukhlum lai khan kan inhai fekânin ami hlà a, Aigupta rama Israel nauhai in chu a hung fe kân pei lei a nih' tiin in hril tawl ding a nih" tiin. Chu zoah mipui chun kûnin Pathien an chawibiek a. 28 Mosie le Aron kuoma LALPAN thu a pêk ang charin Israelhai chun an thaw a. 29 Zân rila chun LALPAN Aigupta rama nau lutîr po po, lalthungphaa inthung Faraw naupaa inthoka rip sûnga intâng nau lutîrhai le ran pieng hmasa tak po po chenin a sukhlum ta vong a. 30 Faraw chu a thoktuhai po po le Aigupta mi po po le chun zânah an tho a, Aigupta chu lusun tap riin a sip a, mithi um nawna in hrim a um si nawh. 31 Faraw chun Mosie le Aron chu a zân a zânin a'n kotir a, an kuomah, "Tho unla, nangni le Israel thlahai po po hi ka mipuihai laia inthok hin suok ro. In mi hni ang khan fe unla, LALPA chu va chawibiek ro. 32 In ti ang khan, in ran ruolhai khom thuoi unla, fe ta ro. Chun, mal mi sawm bok ro" a ta. 33 Aigupta mihai chun Israelhai kuomah, "In suok vat naw chun kan thi fai zo hman ding a nih" tiin an ram suoksan inhmaw dingin an nor a. . 34 Chuongchun, mihai chun an bei hmet lai khom chu chol pol hman loin, an hmetna thlêng le chun puonin an fûn a, liengkoah an inchuon a. 35 Mosien a hril tawl ang khan Israelhai chun Aigupta mihai chu tangkaruo le rangkachaka siem incheina thilhai le silfènhai chu an hni a. 36 LALPA chun anni chu Aigupta mihai lunginsiet a'n phurtir a, an hní hnì an pêk a; chuong ang chun Aigupta mihai thil chu an rokpèk tah a nih. 37 Israel thlahai chun Ramases khuoa inthokin Sukoth an tlung a, naupang tiem loin, puitling, kea lawn ringot khom nuoi ruk lai an nih. 38 Anni ruol chun hnam dang mi tam tak an fe ve a, beram ruol le bawng ruol an som teu bok a. 39 Aiguptaa inthoka chol thang lo bei hmet sa an chawihai chun chol thang lo bei an siem a. An bei hmeta chol an pol hman nawna san chu inhmaw taka hnaw suoka an um lei a nih, an fâk ding buotsaina hun takngiel khom an nei hman si nawh. 40 Aigupta rama Israel thlahai an um sûng chu kum zali le sawmthum a nih. 41 Kum zali le sawmthum an voi ni charin LALPA mihai chun Aigupta ram chu an suoksan ta vong a nih. 42 Chu zân, Aiguptaa inthoka a thuoi suok zân chun LALPAN a vêng zing tawl angin, hi zân hi inserin, Israel mi po po chun, suon la hung pei ding chena khom, LALPA chawimawi dingin an meng khawvar ve ding a nih. 43 LALPA chun Mosie le Aron kuomah, "Fekân Kût in hmang dàn ding chu hieng ang hin a nih: Hnam dang mihan kût sa hi an fâk ve ding a ni nawh. 44 Amiruokchu, tangkaa bawi in inchawk tah, ser in tanpèk tahai ruok chun fa thei an ta, 45 mikhuol lènglak le sinthawa mi in sorhai ruok chun fa thei naw ni hai. 46 In insûng ngeiah in fâk ding a nih; puo tieng chawi the phal a ni naw a, a ru in suktliek ding a ni bok nawh. 47 Israelhai po poin chu ni chu an inser ding a nih. 48 Nangni laia chêng ram dang miin LALPA Fekân Kût hmang ve an nuom chun an sûngkuoa pasal poin ser an intantir ding a nih; chuonga an thaw chun a rama pieng ang thoin thang ve thei an tih. Sertan lo tu khomin kût sa an fâk ding a ni nawh. 49 Chu dàn chun a rama pieng le ram dang mi, nangni laia khawsahai khom a huop vong a nih" a ta. 50 LALPAN Mosie le Aron a hril ang takin Israel thlahai po po chun an thaw a. 51 Chu ni chun LALPAN Israel thlahai chu Aigupta rama inthokin a thuoi suok tah vong a nih.

13

1 LALPA chun Mosie kuomah, 2 "Mihriem a ni leh nau pasal, ran a ni leh a chal pieng hmasa tak chu ka kuomah hung inhlan pei rawh; Israel thlahai laia mi sul nêr hmasa tak chu ka ta a nih" a ta. 3 Chun, Mosie chun mipuihai kuomah, "Voisun, bawia in intàngna laka LALPA kut hrâta Aigupta rama inthoka a thuoi suokna cheu ni hi in inser hlak ding a nih. Hi ni hin chol thanga siem bei hrim hrim in fâk ding a ni nawh. 4 Voisun, Abib thlaa hin in suok a ni hih. 5 Kanan mihai, Hit mihai, Amor mihai, Hiv mihai le Jebu mihai ram hluo, khuoizu le nenetui luongna, in thlatuhai kuoma inkhâm meua pêk a tiem ramah LALPAN a thuoi tlung pha cheu chun hi ni hi tuta thlaa hin in inser hlak ding a nih. 6 Ni sari sûng chu chol thang lo bei in fâk ding a nih. A ni sarina chu LALPA ta dinga kût a ni ding a nih. 7 Ni sari sûng chun chol thang lo bei in fâk ding a nih. Chol thanga siem thil hrim hrim nangni lai a um ding a ni nawh. In umna taphotah chol a um ding a ni bok nawh. 8 Chu ni chun in nauhai kuomah, 'Aigupta rama inthoka kan suok lai khan LALPAN thil a mi thawpèk leiin hi ni hi kan inser a nih' tiin in hril ding a nih. 9 LALPA dàn chu in bauah a um zing theina dingin, hi thil inser hi in kutzie ang le in chalmit inkâra inchikna angah ngai ro. LALPA kut hrâtin Aiguptaa inthokin a thuoi suok ta si cheu a. 10 Hi dàn thu hi zawmin kum tin kût hi a hun takah in hmang zie hlak ding a nih. 11 "Chun, in pi le puhai kuoma inkhâm meua pêk a tiem Kanan ramah LALPAN thuoi lûta a tiem ram a pêk pha cheu chun, 12 in rila ra hmasa tak pasal taphot chu LALPA kuomah in inhlàn ding a nih. In ran laia a chal pieng hmasa tak khom LALPA kuomah in inhlan bok ding a nih. 13 Sabengtung chal pieng hmasa tak chu beramtein in intlan ding a nih. In intlan nuom naw chun a ring in suktliek ding a nih. In nau lutîr pasal taphot chu in intlan bok ding a nih. 14 "Chun, hi hnung peiah i nauhaiin, 'Hi thil umzie hi iem a na?' tia an hung indon pha che chun a kuomah, 'LALPA kut hrâtin bawia kan intàngna Aigupta rama inthokin a mi thuoi suok a. 15 Lulul taka Farawin mi chàr dè a tum tlat laiin, LALPAN Aigupta rama nau lutîr po po, a mihriem a sain, a sukhlum vong a. Chuleiin ran laia a chal pieng hmasa tak phot LALPA kuomah inhlân a, kan naupasal pieng hmasa tak phot kan intlan hlak chu nih. 16 Chu chu i kutzie le i chalmit inkâra inchikna ang el khan LALPA kut hrâtin Aiguptaa inthoka a mi thuoi suokzie inchikna a nih' tiin hril hlak rawh" a ta. 17 Farawin mihai a'n suo khan Filistinhai ram tieng chu lam hnaina lem ni sienkhom Pathienin chu tieng chun a thuoi nawh. Pathienin "Indona an tuok pal chun insîr an ta, Aigupta ram tieng kîr nawk hlauh rawi an tih" a ti lei a nih. 18 Chuongchun, mipuihai chu Tuipui Sen tieng panin thlaler lamah Pathienin a thuoi a, indo dinga inrâlring zingin Aigupta rama inthokin Israel thlahai chu an inthok suok tah a nih. 19 Josefan, "Pathienin a la hung kan nawk ngei ngei ding cheu a na, ka ruhai chu hi taka inthok hin in zawn tung ding a nih" tia Israel thlahai a'n cha anga thaw dinga thu inkhâm meua a lo intiemtir tah angin, Mosie chun Josefa ruhai chu a hawn tung a. 20 Sukot-a inthok chun an fe pei a, thlaler tontira khuo Ethama chun riebûk an khuor a. 21 Sùn le zàna an inzin theina dingin LALPA chun sùnah sûm lawnin an hma a thuoi a, zânah mei lawnin an lampui a el var bok a. 22 An hma thuoitu sùna sûm lawn le zâna mei lawn chun mipui chu a fesan ngai hrim hrim nawh.

14

1 Chun, LALPA chun Mosie kuomah, 2 "Israelhai hi kîr nawk dingin hril la, Migdol le Tuipui inkâra Pi-hahiroth kawl, Baâl Zefon ep chie tuipui kama chun riek raw hai se. 3 Faraw chun lungrilin, 'Israelhai chu thlaler huol vel ram palailakah chi-ai takin an intàng an tah' ting a ta. 4 Keiin Faraw lungril chu sukkhauh ka ta, hung hnot a ti cheu a, Faraw le a sipaihai hmangin keiin chawimawina chang ka ta, Aigupta mihai chun LALPA chu ka nizie hung hre tàng an tih" a ta. Israelhai chun a hril ang tak chun an thaw a. 5 Israelhai an tlân suok vong tah ti Aigupta lal an hril chun, Faraw le a thoktuhai chun an lungril an thlàk a, "Ieng am a na ei thaw ta hi? Israelhai ei insuoktir ringot hi, tuin am ei rong bawl tàng a ta?" an ta. 6 Chuongchun Faraw chun a tawlailir a'n buotsaitir a, a sipaihai chu a thuoi a. 7 Aigupta mihai tawlailir bàkah a tawlailir laia a tha tak vong zaruk le tawlailir khal thiem thlanghai le chun an hnot a. 8 Ngam taka suok Israelhai chu hnot zui dingin LALPAN Aigupta lal Faraw lungril chu a sukkhauh a nih. 9 Faraw sakor tawlailir le a khaltuhai le Aigupta sipaihai chun Israelhai chu Baâl Zefon ep Pi-hahiroth bul tuipui kama an riek lai chu an va hnot phàk a. 10 Farawin a hung hnot lai chun mipui chu an hang ngha a, Aigupta mihaiin an hung hnot phâk el ding a nih ti an hmu chun, thlabârin LALPA an ko khèk a. 11 Mosie kuomah, "Aigupta rama khan thlàn ding a um naw leia thlalera hin thi dinga i mi thuoi a lo ni maw? Ieng leia hienga mi thaw dinga Aigupta rama inthoka i mi thuoi suok? 12 Aigupta rama khom khan, 'Mi chokbuoi ta naw rawh. Keini chun Aigupta mihai rong hi bawl el kan tih' tiin kan hril che an naw maw? Thlalera thi hlol nêkin Aigupta mihai rong kha lo bawl inla a tha lem awm vei leh!" an ta. 13 Mosie chun mipui chu zâp deiin, "Ti naw ro. Ngîr nghet unla, voisuna LALPAN sansuokna a hung intlunpèk ding cheu hi thlîr ringot ro. Voisuna Aigupta mi in hmuhai hi hmu nawk ta ngai naw ti niu. 14 LALPAN dopèk a ti cheu; ngàingam takin um tok tok ringot ro" a ta. 15 LALPA chun Mosie kuomah, "Ieng dinga i mi ko khêk am a na? Israelhai kha hma tieng pan pei dingin hril rawh. 16 I hmol kha chawi la, tuipui chungah inlet la, hnuoi chàra Israelhaiin tuipui hi an kàn theina dingin, tuipui hi inthe raw se. 17 Aigupta mihaiin an hnot zui theina ding cheuin an lungril sukkhauh ka ta, Faraw le a sipaihai, a sakor tawlailirhai le a sakor chungchuong mihai lakah chawimawina hmùng ka tih. 18 Faraw le a sakor tawlailirhai le a sakor chungchuong mihai laka chawimawina ka hmu pha leh Aigupta mihai chun LALPA chu ka nizie hre tàng an tih" a ta. 19 Israelhai hmaa fe Pathien vântirko chu an hnung tieng a'n son a, sum lawn khom chu an hmaa inthoka insonin an hnung dàlah a thang a, 20 Aigupta mihai le Israel mihai inkâra chun a hung tla a. Zân khuoin sum lawn chun Israelhai umna tieng chu a el var a, Aigupta mihai umna tieng chu a hlie thim leiin zânkhuoin an hung pan hnai thei nawh. 21 Chun, Mosien tuipui chunga chun kut a phar a, LALPAN zânkhuoin khaw sak thli hrât takin tuipui chu a'n nam kîrtir a, tuipui chu a hung intan a, tuipui tuong chu hnuoi chàrah a hung inchang el tah a. 22 An chang tieng le voi tieng bang anga tui ngîr khup kâra chun Israelhai chun tuipui chu hnuoi chàrah an fe kai a. 23 Aigupta mihai chun hnot peiin, Faraw sakor hai, a tawlailirhai le a sakor chungchuong mihai chun tuipuiah an hnot lût a. 24 Khawfingchat vela chun LALPAN mei le sum lawn chunga inthokin Aigupta mihai chu a zuk en a, a sukbuoi ta nuoi nuoi a. 25 An tawlailir kehai a sukthlongpêk a, an fe dukdak thei ta naw a. Aigupta mihai chun, "Israelhai tieng LALPA a thang a, a mi do a ni hi! Inrang takin kîrsan ei tiu" an ta. 26 LALPA chun Mosie kuomah, "Aigupta mihai hi an tawlailir le an sakor chungchuonghai leh tuiin a chim pil tawlna dingin i kut kha tuipui chungah phar rawh" a ta. 27 Mosie chun tuipui chungah kut a phar a, khuo a var charin tuipui chu a pangngaiin a hung inmat nawk a. 28 Aigupta mihai chun tlàn suok an tum a, sienkhom LALPAN tuipuiah a'n lèn lûttir ta vong a. Tuipui a hung a luong inmat nawk chun, tawlailir le sakor chungchuonghai po po le tuipuia Israelhai hnot lûttu Faraw sipaihai po po chu a chim pil ta vong a, pakhat khom an suok nawh. 29 Israelhai ruok chun hnuoi chàrah tuipui chu an fe thleng a, an voi le changah tui bang insi khup chu a ngîr a. 30 Chu ni chun Israelhai chu LALPAN Aigupta mihai kuta inthokin a sansuok a, tuipui kama Aigupta mi thihai ruong zâl thluk chu an hmu a. 31 Aigupta mihai chunga LALPA thilthaw ropui tak chu Israelhai chun an hmu a, mipuiin LALPA chu an ti a, LALPA le a siehlaw Mosie chu ringsanah an nei ta a.

15

1 Chuongchun, Mosie le Israelhai chun LALPA chawimawiin hi hla hi an sak a:"LALPA inpâkna hla sak ka tih, Ropui takin a hne ta si a; Sakor le a chunga chuonghai chu, Tuipuiah a pei thlâk tah. 2 LALPA chu ka hrâtna le ka hla, Mi sandamtu a hung ni tah. Ama chu ka Pathien a na, Ama chu inpâk ka ta, Ka thlatuhai Pathien a na, Ama chu chawimawi ka tih. 3 LALPA chu râlhrât a na, A hming khom LALPA a nih. 4 Faraw tawlailirhai leA sipaihai po po chu, Tuipuiah a pei thlâk tah. A hotu suongtawlolhai, Tuipui Senah an pil vong. 5 Tuiin a chìm pil vong a, Lungtum thlâk ang vang vangin, Li rilah an pil hmang tah. 6 LALPA, i kut chang tieng chu, Thilthawtheinan a sip a, LALPA, i kut chang tieng chun, Hmelmahai i pot nawi vong. 7 I lalna ropui tak chun, Nangma khingtuhai che chu, I pei thlâk tawl ta vong a, I lungsenna puok dar chun, Anni chu bu pawl angin, A kàng hmang vong ta si a. 8 I hnâr i hang hnawt meu chun, Tui a hung intieng thûr a, Tuifawn insawk lai hai khom, Bang angin an ngîr khup a, Lipui rila tuihai khom, An inkhal zo tah a nih. 9 Hmelma chun chapo takin, 'Hnot thlûrin hnot khûm ka ta, Ka râllâkhai chu semin, Ka du tawkin chèn ka ta, Ka kawlhnâm chu phawi suokin, Ka kut ngeiin anni chu, Sukbohmang ka tih' a tih. 10 Sienkhom thuoka i mût chun, Tuipuiin a chim pil tawl a, Tuia suon tum thlâk angin, Tuipuiah an pil vang vang. 11 Aw LALPA, nang ang hrim hi, Tu pathien am an um a?Thienghlimna tienga ropui, Ropuina tienga râpum, Thil mak ropui tak thaw hlak, Tu hrim am um tàng an ta? 12 I kut chang tieng i phar a, Hnuoiin a lem zo tawl tah. 13 I hmangaina chuoi lo chun, I'n tlansahai i thuoi a, I hmun thienghlim tlung chenin, I hrâtnan thuoi pei i tih. 14 Hnam danghan an hriet pha chun, Tiin inthin hawp an ta, Filistin mihai khom chu, Thlaphangnan man tawl a ta, 15 Edom lalhai chi-aiin, Moab hotuhai khom chu, Inthinnan man tawl a ta; Kanan rama chênghai khom, Intui ral zo vong an tih. 16 Titna le thlaphangnaha'n, Anni chu tlâkbuok a ta, I bân tha hrât an hmuin, Lung angin inchang an tih, Aw LALPA, i mihaiin, I'n chawk sa i mihaiin, Chu hmun an fe thleng chenin. 17 Anni chu hung thuoi lûtin, I ro hluo tlânga ngei chun, Anni chu la phun i ta, Chu hmun chu chêngna dinga, Aw LALPA i siem a na, A hmun thienghlim khom LALPA, I kuta i'n din a nih. 18 LALPA chun ro rêl a tih, Chatuon a'nthok chatuon chenin"tiin. 19 Faraw sakor hai, tawlailir hai le sakor chungchuong hai chu tuipuia an lût zoin LALPAN tui chu a hung inluong kîrtir a, Israelhai ruok chun hnuoi chârah tuipui chu an fe thleng a nih. 20 Chun, zawlnei Miriam, Aron farnu chun khuongte a chawi a, a hnunga chun nuhmei po poin khuongte chawiin an zui a, an làm a. 21 Miriam chun hi hla hi a sakpèk a: "LALPA inpâkna hla sak ka tih, Ropui takin a hne ta si; Sakor le a chunga chuonghai, Tuipuiah a pei thlâk tah"tiin. 22 Mosie chun Israelhai chu Tuipui Sena inthok chun Sur thlalerah a thuoi a, ni thum zet an inzin sûngin tui hrim an hmu nawh. 23 Mara hmun an hung tlung a, tui chu a kha leiin an dawn thei naw a, chu leia chu hmun chu Mara ti an inbùk a nih. 24 Mipui chun Mosie kuomah, "Iem a na ei dawn ta ding?" tiin a chunga chun an chier a. 25 Mosie chun LALPA a ko a, ama chun thing pakhat hi a kawkhmu a, chu chu tuiah a zuk dêng lût a, tui chu a hung inhnik ta a. Chu hmuna chun LALPAN thupêk le dânhai a siempêk a, anni chu a fie bok a. 26 "LALPA in Pathien rawl fimkhur taka ngâithla a, a mit hmua thil indik thaw a, a thupêkhai le a dânhai in poisa chun, Aigupta mihai chunga hremna hri ka'n lèngtir ang kha nangni chunga chu inlèngtir ve naw ning; kei hi LALPA, a sukdamtu cheu chu ka ni si a" a ta. 27 Chun, tui hnar sawm le pahni le tûm thing sawmsari umna Elim chu an tlung a, chu hmuna chun tuikhur bulah an riek a.

16

1 Israel mipui po po chu Elim hmuna inthok chun an suok a, Aigupta ram an suoksana inthoka thla hnina ni sawm le pangaa chun Elim le Sinai inkâra um, Sin thlaler chu an tlung a. 2 Israel mipui chu thlalera chun Mosie le Aron chungah an chier a. 3 Israelhai chun an kuomah, "Aigupta ramah sa bêl bulah thung a, du tawka bei ei tlàn lai khan LALPA kutah lo thi ta lem inla a that awm vei leh, hi thlaler hmuna hin pungkhawmhai po po hi phingtâma thi dingin in mi thuoi suok a lo ni hi tie!" an ta. 4 Chuongchun LALPAN Mosie kuomah, "In fâk ding vâna inthokin bu ka'n sûrtir ding a nih. Mitinin an ni khat tlâk pei chauh rût raw hai se. Chuong ang chun ka thupêk an zawm le zawm naw hang fie tawl ka tih. 5 A ni ruknaa ruok chu an ni hni tlak rûtin an siem ding a nih" a ta. 6 Mosie le Aron chun Israelhai kuomah, "Aiguptaa inthoka thuoi suoktu cheu hi LALPA a nizie zàn tieng hin hrieng in tih. 7 Chun, zîng tieng leh LALPA ropuizie hmung in tih, a chunga in chierna thu chu a hriet ta si a. Keini hi ieng telul am kan na, in mi chier khum chu?" an ta. 8 Mosie chun, "LALPAN zàn tieng sa le zîng tieng bu a pêk cheu in hmu pha chun a thawtu chu LALPA a nih ti hre tàng in tih, a laka in chierna kha a lo hriet ta si a. Keini hi tu am kan ni a? Keini laka chier ni loin Pathien laka chier in ni lem" a ta. 9 Chun, Mosie chun Aron kuomah, "Israel pungkhawmhai kuomah, 'LALPA hmaah hung ro, in chierna kha a hriet ta si a' tiin hril rawh" a ta. 10 Aronin Israel mipuihai kuoma thu a hril lai chun, thlaler tieng an hei thlîr a, LALPA ropuina chu sûmah a hung inlang a. 11 Chun, LALPAN Mosie chu a biek a, 12 "Israelhai chierna kha ka lo hriet; an kuomah, 'Zànbuah sa fàng in ta, a tûka ruok chu tlai takin bu fa tâng in tih. Chuongchun, kei hi LALPA in Pathien chu ka nih ti hrieng in tih' a tih tiin hril rawh" a ta. 13 Zàn tieng chun an riekbûk tuom khopin vamim an hung vuong lût ta hum hum a; zîngkar chun an riebûk vela chun daidaw a lo tla dup el a. 14 Daidaw a hang hul chun thlaler hnuoi chunga chun thil biel inpèr chik té tè, daidaw khal ang el chu a bang uoi el a. 15 Chu chu Israelhaiin an hmu chun, "Hi hi iem a na?"f an ta, iem a nih ti an hriet si nawh. Mosie chun an kuomah, "In fâk dinga LALPA bei pêk cheu a ni hi. 16 Hi hi LALPA thupêk chu a nih: Mi tinin mani mamaw tawk peiin in rût khawm ding a nih. In puon ina chêng mi pakhat pei ta dingin litar hni pei in rùt ding a nih" a ta. 17 A hril ang chun Israelhai chun an thaw a, a rût teuh an um a, tlawmte rùt an um bok a. 18 Noa an inkhi pha a rût tamin a hau bìk naw a, a rût tlawmin a chang tlawm chuong bìk bok nawh. Mi tinin mani khop tawk seng an rût a. 19 Chun, Mosien an kuomah, "Tu khomin a zînga fâk dingin khêk naw ro" a ta. 20 Amiruokchu, thenkhatin an poisa naw a, a zînga dingin an sie a, sienkhom a lo innge vong a, a rim a se êm êm a, chuleiin an chungah Mosie lung a sen hle a. 21 Tûk tin mani fâk khop tawk chauh an rût ta seng a, nisa a hung insâng pha leh a'n tui ral vong hlak. 22 A ni ruk nia ruok chu a lêt hnia tam, mi pakhatah litar li pei an rût a, chu chu khawtlâng hotuhai chun Mosie kuomah an hung ripawt a. 23 Ama chun an kuomah, "Hi hi LALPA thupêk chu a nih: 'Zînga chu LALPA Chawlni thienghlim, Sabat a ni leiin chawlna ni ding a nih. Chuleiin, beia zeu nuomin zeu unla, a suonga suong nuomin suong ro. In fâk mahla chu zînga dingin hla ro" a ta. 24 Mosie hril ang chun a zînga ding khom an hla a, sienkhom a thûm naw a, a'n nge bok nawh. 25 Mosie chun an kuomah, "Voisun chu hi hi fa ro. Voisun hi LALPA ta dingin Sabat a na, tuolah rùt ding um naw nih. 26 Ni ruk sûngin tûk tin rût in ta, a ni sari ni ruok chu Sabat a ni leiin rût ding ieng khom um naw nih" a ta. 27 A ni sari ni chun mi thenkhat chu rût dingin an suok a, amiruokchu rùt ding an hmu nawh. 28 Chun, LALPA chun Mosie kuomah, "Ieng chen am ka thupêk le ka dânhai hi poisa loin in um ding a na? 29 En ta, LALPA chun chawlni a pêk cheu a, chuleiin a ni ruk niah ni hni ring bu a pêk cheu a nih. Mi tin in umnaah um tok tok unla, a ni sarinaa chu tukhom suok dok naw ro" a ta. 30 Chuongchun, mipuihai chu a ni sarinaa chun an chawl a. 31 Israel sûngkuohai chun chu thil chu manna tiin an ko a. Maruoi mu anga vâr sar el a na, hang fâk chun beipèra khuoizu nàl ang a nih. 32 Mosie chun an kuomah, "Hi hi LALPA thupêk chu a nih: Manna omer khat la unla, suon la hung thar pei dinghai khoma Aigupta rama inthoka ka thuoi suok lai cheua thlalera fâk ding bu ka pêk cheu hi an hriet zing theina dingin, sie tha ro" a ta. 33 Mosie chun Aron kuomah, "Bel chawi la, a sûngah manna litar hni thun rawh. Chu chu Pathien hmaah suon la hung thar pei ding chena vong dingin LALPA hmaah sie rawh" a ta. 34 LALPAN Mosie kuoma thu a pêk angin, manna chu vong zing dingin Aron chun Thuthlungna hmaa chun a sie a. 35 Israelhai chun mihriem chêngna ram, Kanan ramri bul an tlung chenin manna chu kum sawmli sûng an ring a nih. 36 Chuong laia bu inkhinaa an hmang tak chu efa a na, chu chu litar sawmhni tluk a nih.

17

1 Israelhai chu Sin thlalera inthok chun LALPA thupêk angin hmun dang dangah an inson pei a, Refidim-ah riebûk an khuor a, sienkhom chu taka chun mipui dawn ding tui a um si nawh. 2 Mipuihai chun Mosie kuomah, "Dawn ding tui mi pe rawh" an ta. Mosie chun an kuomah, "Ieng dinga kei in mi mawsiet am a na? Ieng dinga LALPA in fie?" a ta. 3 Mipui hlak chu an dang a châr si leiin Mosie chungah an chier a, "Ieng dinga keini le kan nauhai le kan ran ruolhai hi thlalera dangchâra thi ding hin Aigupta rama inthokin i mi thuoi suok am a na?" tiin an suosal a. 4 Chuongchun, Mosie chun LALPA a ko a, "Hi mihai hi ieng am ka law ding a na? Lungin an mi dêng têp a ni ta si a" a ta. 5 LALPA chun Mosie kuomah, "Mipuihai hmaah Israel upahai kha thuoi la, Nile vadung i vuokna hmol kha chawi bok la, fe rawh. 6 Horeb-a lungpui chunga son i hmaah lo ngîr ka ta, lungpui chu vaw la, mipui dawn ding tui hung suok el a tih" a ta. Chuong ang chun Israel upahai mit hmuah Mosie chun a thaw a. 7 Chu hmun hminga chun Massa le Meribag a'n bùk a, Israelhaiin ama chu inhalpui a, "LALPA chu eini lai a um tak tak meu am um tak tak naw" tia an fie lei a nih. 8 Refidima an um lai chun Amalek mihaiin Israelhai chu an hung bei a. 9 Mosie chun Josua kuomah, "Eini laia mi iemani zât thlang suok la, Amalekhai chu va bei ro. Zîngah tlâng sîpa khin Pathien hmol hi chawiin lo ngîr ka tih" a ta. 10 Mosie thupêk angin Josua chun Amalek mihai chu a va do a, Mosie le Aron le Hur chu tlâng sîpa chun an kai tung a. 11 Mosien bân a phar sûng po chun Israelhaiin an hne a, a bân a lâk thlàk pha leh Amalek mihai chu an hràt ve thung a. 12 Mosie bàn a hung kham chun lung an va lâk a, chu chunga chun a thung a, a bân chu a phar zing theina dingin Aron le Hur chun a bân khing tieng ve vea thangin nisa tlàk chenin an dompui a. 13 Chuong ang chun Josuain Amalek sipaihai chu kawlhnâm hmangin a tukdol tah a nih. 14 Chun, LALPA chun Mosie kuomah, "Hi thu hi hriet zing dingin lekhabuah ziek thla la, Amalek mihai hi vân hnuoi mi tu khom hriet ta lo dingin ka nuoi bo ding a nih ti Josua ngei khom hril rawh" a ta. 15 Chu hmuna chun Mosien maichàm a siem a, a hmingah Jehova Nissih a'n bûk a. 16 Ama vèkin, "LALPA lalthungpha tieng kut ka phar ta si a. LALPA chun suona inthoka suon nawk peiah Amalek mihai chu do tâng a tih" a ta.

18

1 Mosie tarpu Jethro, Midianhai thiempu chun Mosie le a mi Israelhai chunga Pathienin thil a thawpèk le Aigupta rama inthoka a hung thuoi suok dàn chanchin po po chu a lo hriet ve a. 2 Mosien a nuhmei Zipora le a naupahai pahnih a tir kîr khan a tarpu Jethro chun a lo umpui a. 3 Mosie chun a naupa upa lem hmingah Gersom a sak a, chu chu 'Ram dangah mikhuol ka lo ni tah' tina a nih. 4 Chun, a naupa dang hmingah Eliezar a sak a, chu chu "Ka thlatuhai Pathien chu mi thangpuitu a na, Faraw kawlhnâma inthoka mi sansuoktu a nih' tina a nih. 5 Mosie tarpu Jethro chun Mosie nuhmei le naupahai chu thlalera Pathien tlâng kawla Mosie riebûk khuorna hmuna chun a hung thuoi a. 6 Jethro chun Mosie kuomah, "Kei, i tarpu hi i nuhmei le nauhai thuoiin ka hung ding a nih" tiin thu a thon lawk a. 7 Mosie chun a tarpu chu a lo va hmuok a, kûnin chibai a bûk a, a fawp a. An inchibai hnung chun puon inah an lût a. 8 Mosie chun Israelhai leia Faraw le Aigupta mihai chunga LALPA thilthaw dàn chanchin le an inzinna lampuia harsatna an tuokhai le LALPAN a san suok pei dànhai iengkim chu a tarpu chu a hril vong a. 9 LALPAN Aiguptahai kuta inthoka Israelhai a sansuok dàn le an ta dinga thil tha a thawpêk dàn chanchin lawmum po po chu a hrietin Jethro chu a lawm hle a. 10 Jethro chun, "Aigupta mihai le Faraw kuta inthoka sanhimtu cheu le Aiguptahai thu hnuoia inthoka Israelhai sansuoktu LALPA chu inpâkin um raw se. 11 Tu hin LALPA chu pathien dang po po nêka ropui lem a nih ti ka hriet tah, chuong thilhai chu chapo taka Israelhai nghaisatuhai chunga a thaw a ni si a" a ta. 12 Mosie tarpu Jethro chun Pathien kuomah pumraw thilhlàn le inthawina dang dang a'n hlân a. Aron le Israel upahai po po chu Pathien hmaa Mosie tarpu inthawina ruoi chu kîl dingin an hung a. 13 A zînga chun Mosie chu mipuihai ro rêlpêk dingin a thung a, zîng tienga inthoka zàn tieng chenin mipuiin an ngîr ngha tuou el a. 14 Chuonga mipuihai ta dinga thil a thaw po po a tarpuin a hmu chun, "Mipuihai hi iem a na i thawpèk tak chu? Ieng leia nang chauh rorêltua thang a, zîng tienga inthoka zàn tieng chen mipuiin an ngîr huol che am a na? " a ta. 15 Mosie chun, "Mipuihai hi Pathien rawn dinga ka kuoma hung an nih. 16 Thubuoi an nei pha leh ka kuomah an hung intlun a, an thu ka lo rèlpèk a, Pathien thupèk le dànhai ka lo hril tawl bok a" a ta. 17 Mosie tarpu chun, "I thilthaw dàn hi a tha nawh. 18 Nang le a hung pantuhai che in insukchàu mei mei lem ding a nih. Hi sin hi i ta dingin a rik taluo a, makhàt chaua hang tlin ruol a ni nawh. 19 Ka thu hi ngâithla la, rem ruotpui ka ti che a, Pathienin malsawm a ti che. Nang chu Pathien hmaa mipui aiawtuah thang la, an thubuoihai chu Pathien kuomah intlun rawh. 20 Thupèk le dànhai chu inchûktir i ta, an um dàn ding le an thaw dàn dinghai chu i kawkhmu pei ding a nih. 21 Amiruokchu, anni laia mi hmang tlâk, Pathien ti mi, mi ringum, hlawkna indik lo theida mihai chu thlang suok la, chuonghai chu sâng ruol, za ruol, sawmnga ruol le sawm ruol chunga dâm hotuah ruot rawh. 22 Chuonghai chun ieng lai khomin mihai ro chu rèlpèk hai sien, thu lien tham deu chauh i kuomah hung put lût hai sien, thu chîn tham chu anniin rêl vong raw hai se. Chu chun i phur nasa takin hung zâng a tih, an phurpui ding che a ni leiin. 23 Chuong anga i thaw a, Pathien khomin thaw dinga a ti a ni chun, hung tlin thei tàng i ta, mipuihai khom lungawi takin mani in tieng inlawi thei tàng an tih" a ta. 24 Mosie chun a tarpu thu chu a ngâithlâk a, a hril ang takin iengkim a thaw a. 25 Israelhai laia mi hmang tlâkhai chu a thlang khawm a, mipuihai hotua dâm, thoktuhai hotua dâm, a sâng ruol, zanga ruol, za ruol, sawmnga ruol le sawm ruol chunga dâm hotuah a sie a. 26 Chuonghai chun ieng lai khomin mipuihai chu ro an rêlpèk a, thu lien tham deuh chu Mosie kuomah an hung intlun a, thu chîn tham ruok chu anniin an rêl ta vong a. 27 Mosie chun a tarpu Jethro chu a vàn thla a, a ram tieng panin a kîr nawk tah a.

19

1 Israelhaiin Aigupta an suoksana inthoka a thla thumna ni tak chun Sinai thlaler an tlung a. 2 Refidima inthoka Sinai thlaler chu hung tlung an nih. Sinai tlâng ep thlalerah Israelhai chun riebûk an khuor a. 3 Chu zoah Mosie chu Pathien hmu dingin tlângah a hang lawn a, tlânga inthok chun LALPAN a hung biek a, "Jakob sûngkuohai be la, Israelhai kuomah hi thu hi puong rawh: 4 'Nangni ngeiin Aigupta chunga ka thilthawhai in hmu tah a, mupuiin a thla zâra a te a chawi anga chawiin, ka ta dingin ka thuoi suok cheu a nih. 5 Tu hin ka thu a rênga zawma ka thuthlunghai in vong zing phot chun hnam po po laia ka ro hlu bik nîng in tih. Khawvel pumpui hi ka ta a ni lai zingin, 6 nangni chu ka ta dinga lalram thiempu le hnam ser hran nîng in tih' ti hi Israelhai kuoma i hril ding chu a nih" a ta. 7 Chuongchun, Mosie chu a kîr nawk a, Israel upahai chu a ko khawm a, LALPAN thu a pêkhai po po chu an kuomah a hril vong a. 8 Mipui chun lunginruol takin, "LALPA hril taphot chu thaw pei kan tih" an ti duol duol a. Mipui donna chu Mosien LALPA a hril sawng a. 9 Chun, LALPA chun Mosie kuomah, "Nang le ei inbiek lai ngei mipuiin hre a, an ring tlat theina ding chein sûm sa tak lai i kuomah ka hung inlang ding a nih" a ta. Mosie chun mipuihai donna chu LALPA a hril sawng a. 10 Chun, LALPA chun Mosie kuomah, "Mipuihai kuomah va fe la, voisun le zînga hin insukthienghlimin an puonhai sawp fai hai sien, 11 a ni thumna nia dingin lo inring raw hai se, chu ni chun LALPA chu mipui hmua ngei Sinai tlângah a hung tum ding a ni si a. 12 A tlâng sir vela um mipuihai fe theina chin ding ramri khang la, tukhom tlânga kai lo ding le tlâng thut khom tawk lo dinga fimkhur dingin hril rawh. Tu khom tlâng hang tawk taphot chu sukhlum ni ngei ngei an tih. 13 Tu khomin kuta tawk loin, lunga dèng hlum amani thala kap hlum nîng an tih. Sa khom ni sien, mihriem khom ni sien, indamtir lo ding a nih. Beram ki an mût ruoi ruoi pha le chauh mipuiin tlâng chu an hung tlung ding a nih" a ta. 14 Tlânga inthoka Mosie a fe thlâk hnung chun mipuihai chu a'n hlàn thienghlim a, an puonhai an sawptir bok a. 15 Chun, an kuomah, "A ni thumnaa dingin inbuotsai ro. Nuhmei le pasal khom inpawl naw ro" a ta. 16 A ni thumna tûka chun vân a hung inrùm dur dur a, kawl a hung inlep zuk zuk a, tlâng sîp chu sûm sa takin a hung tuom a, tawtawrawt an ri ruoi ruoi a, riebûka um mipuihai chu an inthin hawp a. 17 An riebûka inthok chun mipuihai chu Pathien inhmupui dingin Mosien a thuoi suok a, tlâng thuta chun an ngîr a. 18 LALPA chu Sinai tlânga chun meiin a hung tum a, tlâng chu meikhuin a tuom a. Rawtuina meikhu ang elin tlânga inthok chun meikhu intûr ngul el chu a suok hlut hlut a, a tlâng chu a'n thin bup bup a, 19 tawtawrawt ri chu a'n ring zuol deu deu bok a. Mosie chun thu a hang hril a, Pathien chun rawlin a hung don a. 20 LALPA chu Sinai tlâng sîpah a hung tum a, Mosie chu hung dingin a ko a, chuongchun a kai tung a. 21 LALPA chun a kuomah, "Tum thla la, LALPA hmèl hmu tuma mipuiin an hung paw thleng lui nawna ding le tam tak an thi pha nawna dinga fîmkhur dingin zu hril rawh. 22 LALPA hung pantu thiempuhai khom an inhlân thienghlim ding a nih, chuong naw chun an chungah LALPA tuong hlauh rawi a tih" a ta. 23 Mosie chun LALPA kuomah, "Mipuihai chun Sinai tlâng hung kai naw ni hai. Nangma ngeiin, 'A tlâng vela hin ramri khangpèk la, chu sûng chu hmun thienghlimah sie rawh' tia i mi lo hrilthi ta lei khan" a ta. 24 LALPA chun Mosie kuomah, "Fe thla la, Aron kha hung thuoi rawh. Thiempu danghai chun LALPA kuoma hung dingin hung nêr lui naw raw hai se, chuong naw chun an chungah LALPA tuong rawi a tih" a ta. 25 Chuongchun, Mosie chu mipuihai kuoma chun a zu fe a, chuong thu chu a zu hril tawl a.

20

1 Pathien chun hieng thu po po hi a hril a: 2 "Kei hi bawia in intàngna Aigupta rama inthoka thuoi suoktu cheu LALPA in Pathien chu ka nih. 3 "Keima naw chu Pathien dang nei naw rawh. 4 "I ta dingin milem siem naw rawh, chung tieng vâna mi amanih, hnuoi tieng hnuoia mi amanih, tui sûnga mi amanih lem i siem ding a ni nawh. 5 Chuong thil hmaa chun kûnin i chawibiek ding a ni nawh. Kei, LALPA i Pathien hi Pathien thîkthu sie, pahai thil suol thaw leia an nauhai hrem hlak, mi theidatuhai chu an thlahai suon thum suon li chen khom hrem hlak le 6 mi hmangaia ka thupèk zawmtuhai ruok chu suon sâng tam tak chen chunga khom hmangaina inlangtir hlaktu chu ka nih. 7 "LALPA Pathien hming sàlin khel hril naw rawh; LALPA chun a hming hmang suoltu chu hrem loin insuo naw nih. 8 "Sabat hi thienghlim taka inser ding a nih ti hre zing rawh. 9 Ni ruk sûng chu thokrimin sin thawng i ta, 10 ni sarina ruok chu LALPA i Pathien chawlni a nih. Chu ni chun sin ieng khom i thaw ding a ni nawh, nangni le i naupa le naunu, i suoknu le suokpa, i ranhai le i ina chêng ram dang mihai khomin. 11 Ni ruk sûngin LALPAN hnuoi le vânhai, tuifinriet le a sûnga um po pohai a siem a, a ni sarinaa ruok chu a chawl si a. Chuleiin, LALPAN chawlni chu mal a sawm a, a sukthienghlim a nih. 12 "I nu le pa chawimawi rawh, chuongchun LALPA i Pathienin a pêk che rama hin dam sawt i tih. 13 "Tuol that naw rawh. 14 "Uire naw rawh. 15 "Inru naw rawh. 16 "I vènghai khelin hêk naw rawh. 17 "I vènghai in le lo inhnar naw rawh. I tuolbawm nuhmei amanih, a siehlawnu le siehlawpa amanih, a bawngchal le sabengtung amanih le a thil nei dang hrim hrim inhnar bok naw rawh" tiin. 18 Mipuihai chun vâninrum dâm, kawlinlep dâm, tawtawrawt ri dâm hre a, tlâng kâng khu lui lui dâm an hmu chun thlabârin an inthin a. 19 Hla taka ngîrin Mosie kuomah, "Nangman kan kuomah thu hril lem ta la, lo ngàithlâng kan tih. Pathien ruok chun kan kuomah hril ta naw hrâm raw se, kan thi el thei ding a nih" an ta. 20 Mosie chun an kuomah, "Ti naw ro. Pathien tina nei a, thil suol in thaw nawna dingin Pathienin a hung fie cheu a ni hi" a ta. 21 Pathien umna sûm sà tak tieng pana Mosie a fe lai chun mipui chu hla takah an ngîr a. 22 LALPA chun Mosie kuomah, "Vâna inthoka ka hung biek che ti Israelhai chun an hriet a, an kuomah hieng hin hril rawh: 23 Keima ti lo pathien dang hrim hrim in nei ding a ni nawh; tangkaruo le rangkachaka siem pathien lem khom in ta dingin siem bok naw ro. 24 "Pilin ka ta dingin maichâm siem unla, in beramhai, in kèlhai le in bawnghai chu pumraw thilhlàn le inremna inthawina dingin inhlàn ro. Khaw lai khom ka hming ka'n hriettirna taphota chun in kuomah hung ka ta, mal sawm ka ti cheu. 25 Chun, lung hmanga maichâm in siem pha leh lung ser hmangin siem naw ro, hriemhrei in hmang chun sukporche rawi in tih. 26 Ka maichâm kailawnah kai tung naw ro, in saruokna inlang pal rawi a tih.

21

1 "Chun, hienghai hi ro an rêl dàn ding i siepèk dinghai chu a nih: 2 Bawi dinga Hebrai mi in inchawk chun kum ruk sûng in rong bawl a ta, a kum sarinaa ruok chu intlan loin zalen thei a tih. 3 Ama chaua hung lût a ni chun ama chauin suok a ta, a nuhmei le hung lût an ni ruok chun a nuhmei khom a suok sa ve ding a nih. 4 A puin nuhmei a lo inneitir a ni chun, a nuhmei le a nauhai chu a pu ta nîng an ta, ama chauh suok thei a tih. 5 "Amiruokchu bawi chun, 'Ka pu le ka nuhmei le nauhai hi ka hmangai êm leiin ka suok nuom nawh' a ti chun, 6 a pu chun rorêltu hmaah thuoi a ta, kotkhâr amanih kotkhâr bieng bulah thîr zumin a na verpêk a ta, a dam sûngin a pu bawi ni tâng a tih. 7 "Tu khomin bawi dinga a naunu a zor chun, bawipa angin ama chu suok el thei naw nih. 8 A pu chun ama hmang dinga a thlang a lo ni a, a pu chu a suklawm bok si naw chun, mi dang intlan suoktir a ta, sienkhom a pu chun mi dang kuomah zor thei naw nih. 9 A naupa nuhmei dinga a huol a lo ni chun a naunu ang charin a en ding a nih. 10 A naupan nuhmei dang a neisan a ni khomin, fâk le dawn le sil le fên a pêk bâkah a nuhmei a nina chanvo chu a hlippèk ding a ni nawh. 11 Chuong thil pathumhai chu a thawpèk si naw chun, intlanna sum pe loin, zalenin suok thei a tih. 12 "Tu khomin mi a vuok hlum chun ama khom sukhlum ve ngei ngei ding a nih. 13 Chun, tum rèng lei ni loa Pathienin a'n tlungtir a ni ruok chun, a tlàn lûtna ding hmun keiman ruotpèk ka tih. 14 Amiruokchu, phierrûk a, tum rêng leia a that a ni chun ka maichâma inthokin thuoi hmang unla, sukhlum ro. 15 "Tu khom mani nu le pa vawtu chu sukhlum ngei ro. 16 Tu khom mihriem inrua zortu amanih, a la kol zing laia man amanih a ni chun ama chu sukhlum ngei ro. 17 Tu khom mani nu le pa tongsie inphurtu chu sukhlum ngei ro. 18 "Chun, mi an inhal a, pakhatin lunga dêngin amanih kuttum a thlâk a, thi ruok chu thi êm loa khum beta a um chun, 19 hliema um kha a hung tho inkàng a, funghrol thuna tuol a suok thei pha leh a vawtu kha insuo ding a nih; amiruokchu hliem tuortu hun inhmang hu zât rul a ta, a dam var chena inenkolnaa seng po po tum bok a tih. 20 "Tu khomin a bawipa amanih a bawinu amanih hmola a vuok hlum chun ama chu hrem ngei ding a nih; 21 sienkhom bawi chu ni khat ni hni hnunga a hung tho inkàng nawk ruok chun hrem lo ding a nih, bawi chu ama thil nei laia mi a ni si a. 22 "Pasal insuolin nuhmei inrai lai lo tawk sa palin nau insiet pha sien, hliem na naw sienkhom, a pasalin a ngèn zât le rorêltuin a remti ang zât chu a sukhliemtu chu inchawitir ding a nih. 23 A hliem na a ni ruok chun hringna aiah hringna, 24 mit aiah mit, ha aiah ha, kut aiah kut, ke aiah ke, 25 raw aiah raw, hliem aiah hliem, vuok aiah vuokin in thung lêt ding a nih. 26 "Tu khomin a bawinu amanih bawipa amanih mitah vawin lo sukse pal sien, a mit siet aia zângna domna dingin bawi chu a'n suo zalen ding a nih. 27 A bawinu amanih bawipa amanih ha a lok tlam chun, a ha tlam aia zângna domna dingin a bawi chu a'n suo zalen ding a nih. 28 "Bawngchalin nuhmei amanih pasal amanih a sikhlum chun, chu bawngchal chu in dênghlum ngei ding a nih; a sa khom fa naw ro. Bawngchal neitu ruok chu hrem lo ding a nih. 29 Bawngchal chu a hma khoma mi sik hmang a ni a, a neitu khomin chu chu a hriet a, sienkhom a khum nuom chuong si naw leia nuhmei amanih pasal amanih a lo sikhlum a ni ruok chun, a bawngchal chu dênghlum ding a na, a neitu khom sukhlum bok ding a nih. 30 Amiruokchu, intlan dinga intukna a um chun hringna aiah an tuk zât taphot chu pêka intlan thei nîng a tih. 31 Mi naupa amanih naunu amanih khom lo sikhlum sien, hi dàn ang boka rèl ding a nih. 32 Bawinu amanih bawipa amanih a lo sikhlum a ni ruok chun bawi neitu kuomah tangka shekel sawmthum pêng an ta, a bawngchal ruok chu lunga dêng hlum ding a nih. 33 "Chun, miin a khur nei sìn lo amanih, a khur cho nel nawk loa a um leia bawngchal amanih sabengtung amanih a lo tla hlum chun, 34 khur neitu chun rul a ta, ran neitu kuomah zângna domna tangka pêng a ta, ama chun ran ruong chu inhlawm a tih. 35 "Chun, mi pakhat bawngchalin mi dang bawngchal lo sikhlum sien, bawngchal la dam chu zor an ta, a man le bawngchal thi ruong chu inzât charin insem an tih. 36 Amiruokchu, bawngchal la dam chu a hma khoma mi sik hmang a na, a neituin a khum nuom si naw lei a ni chun a neitu chun bawngchal chu pêng a ta, bawngchal thi ruong chu aman chang thung a tih.

22

1 "Miin bawngchal amanih beram amanih inru a, that a, a zor chun, bawngchal pakhat aiin bawngchal panga le beram pakhat aiin beram pali chawi a tih. 2 "Miin a in roktu chu a rok laia a vuok hlum chun, a vawtu chunga chun thisen phuba lâk ding a ni nawh; 3 amiruokchu, nisa suok hnunga a vuok hlum a ni ruok chun a thisen lakah maw phur a tih. Rûkru chun a thil inrûk chu thung kîr a ta, pêk ding a nei naw ruok chun a thil inrûk thungna dingin ama chu zor ding a nih. 4 Ran inrûtu kutah bawngchal amanih, sabengtung amanih, beram amanih a hringa man a ni chun a lêt hniin rul a tih. 5 Tu khomin a lo amanih grep huon amaniah ran a'n tlattir a, ranhai chu invâka mi loah an lût chun a lo le a grep huon thatna lai takin a rul ding a nih. 6 "Miin mei insuo a, lo hnawm inkàng zaptir a, mi buphal amanih, bu kung amani le lo po po a kâng siet chun, mei insuotu chun a rul ngei ding a nih. 7 "Tu khomin a tuolbawm kutah a sum le pai le thil neihai inkol thattir sien, chu chu a koltu ina inthokin inhmang ta sien, rûkru chu man a ni phot chun a lêt hniin a rul ding a nih. 8 Rûkru chu man a ni si naw chun, a koltu chu rorêltu hmaah inlangin, ama thaw a ni le ni naw inchieng raw se. 9 Bawng amanih, sabengtung amanih, beram amanih le silfèn le thil dang inhmang thuah hrim hrim, tu khomin 'Hi hi chu ka ta a nih' a ti chun an pahni thubuoi chu rorêltu hmaah an intlun ding a nih. Rorêltuin thiem naw a'n changtir taphot chun a tuolbawmpa laka chun a lêt hni chawi a tih. 10 "Tu khomin a sabengtung amanih, bawngchal amanih, beram amanih le ran dang ieng khom a tuolbawm kutah inkol thattir sien, ran chu thi le hliem le suomin lo um sien, a thawtu tu khomin hmu si naw hai sien, 11 a koltu chun ran chu a tawk nawzie inchiengna dingin a tuolbawm hrieta ngei Pathien hmaah inkhàmna a nei ding a nih. Chu chu ran neitu chun pom a ta, a koltu chun a rul a ngai ta nawh. 12 Amiruokchu, an inrûkpêk a ni ruok chun a koltu chun a rul ding a nih. 13 Sain a se a ni chun, a sa hlek hung chawi sien, sa se ran ai chu a rul ngai naw nih. 14 "Tu khomin a tuolbawm ran a hmang haw a, a neitu um naw laia ran chu a hliem amanih a thi chun, a hmang hawtu chun rul a tih. 15 A neitu um lai a ni ruok chun rul a ngai nawh. Ran chu a man chawia haw a ni ruok chun a haw man chauh chawi a tih. 16 "Pasalin nunghàk thienglâm, nuhmei dinga mi la huol lo chu thlêma a zâlpui chun, man le muol pein nuhmeiah a nei ngei ding a nih. 17 A pain a naunu chu inneitir a phal tlat naw khomin nuhmeia a lo siem tah leiin a man chu a pêk tho tho ding a nih. 18 "Nuhmei dawithiem hrim hrim chu damin hlà naw ro. 19 "Tu khom ran rìmtu taphot chu sukhlum ro. 20 "Tu khom LALPA ti chauh lo pathien dang kuoma inthawi hrim hrim chu sukbohmang ding a nih. 21 "Ram dang mi tukhom thaw sein neksawr naw ro, nangni khom Aigupta ramah mikhuol in ni hlak kha. 22 "Hmeithai amanih fahra amanih hai chu neksawr naw ro. 23 In soisak tha naw vai chun mi hung zuolko an ta, an rawl lo ngâithlàng ka ta, 24 ka lung sen phut a ta, kawlhnâmin hung sukhlum rawi ka ti cheu a, in nuhmeihai chu hmeithai hung nîng an ta, in nauhai khom fahra hung nîng an tih 25 "Nangni laia um ka mi, mi retheihai kuomah sum in inpûktir pha an bat angah ngai naw unla, a pung phùt bok naw ro. 26 I tuolbawm silpuon chu bandaa i lo hrènpèk a ni khomin nisa tlâk ruolin pe kîr nawk rawh; 27 a silpuon nei sun a na, a taksa suklumna dinga a silpuon a ni leiin ieng am silin zâl tàng a ta? A mi hung ko vai chun lo ngàithla ngei ka ta, kei hlak chu mi lunginsiet thei tak ka ni bok si a. 28 "Pathien hrilse naw la, i mihai chunga rorêltu chu tongsie inphur bok naw rawh. 29 I thlai thar hmasa tak le uoiin thar i sawr hmasa tak chu i hung inhlân ding a nih. I naupa upa tak chu i mi pêk ding a nih. 30 Chuong ang bokin i bawng le beramhai khom i thaw ve ding a nih. Ni sari chu a pui kuomah um a ta, a ni riet ni-ah i mi pêk ding a nih. 31 Chun, ka mi thienghlimhai in ni ding a nih. Chuleiin, ram sa se sa hrim hrim in fâk ding a ni nawh; ui kuomah in pêk lem ding a nih.

23

1 "Thuthang indik lo in hril dar ding a ni nawh. Mi rilo thangpuitu dingin thuhretu riloah in insiem ding a ni nawh. 2 Thil suol thaw tum mipui lai inzêl ve naw ro. Thubuoi hrilnaah mipui tieng awn zawnga thangin thudik chu in sukbuongbar ding a ni nawh. 3 Mi rethei khom a thubuoiah in tan bîk ding a ni bok nawh. 4 "In hmelma bawngchal amanih a sabengtung amanih invâk hmang in hmu chun a kuomah in khal kîrpèk nawk ngei ngei ding a nih. 5 Nangni theidatu cheu sabengtung chu a phurin a del de lai in hmu chun, ieng angin thangpui rin inla khom, thangpui loin in màksan ding a ni nawh. 6 "In mi, rethei tak takhai thubuoi chu, indik naw takin in rêlpèk ding a ni nawh. 7 Khêla inhêknaah thang ve naw unla, poi tawk lo le mi indikhai sukhlumtuah thang naw ro, mi rilo chu ka'n suo naw ding a ni si a. 8 "Thamna la naw ro, thamna chun a hmutuhai mit a sukdel a, mi indikhai thu khom a hèm kawi hlak. 9 "Ram dang mihai nêksawr naw ro, nangni khom Aigupta rama mikhuola in um lai khan mikhuol ni umzie in hriet chieng ta si a. 10 "Kum ruk sûng chu in loah bu tuin a ra sik la, 11 a kum sarinaa ruok chu inlet lo le hmang loin sie ro; chu taka inthok chun mi retheihaiin fa ve thei an ta, an lâk mahla po chu ramsahaiin tlàn bok an tih. Chuong ang bokin in grep huonhai le in oliv huonhai chu thaw ro. 12 Ni ruk sûng in sin thaw unla, ni sarinaa chun chawl ro. Chuongchun in bawngchalhai le in sabengtunghai khom chawl thei vèng an ta, in insûnga pieng in bawihai le hnam dang mihai khom chawl hadam ve thei an tih. 13 In kuoma ka hril po po hi ngaiven unla, pathien dang hming hrim hrim lam naw unla, in baua inthok khomin mihaiin hre naw hrim hrim raw hai se. 14 "Kum khatah voi thum ka ta dingin kût hmang ro. 15 Chol thang lo bei kût hmang unla, thu ka pêk tah ang cheu khan, ni sari sûng chu chol thang lo bei ring ro. Hi hi Abib thla sûnga ni ruotah khan hmang unla, chu thla chu Aigupta rama inthoka in suokna thla a ni kha. Chun, ka hmaah tu khom kut ruokin in hung inlang ding a ni nawh. 16 "Loa in bu tharsuok hmasa takin Busîk Kùt hmang ro. Chun, kum tawp pawl tlâkah in lo tharsuok in hlu lût vong pha leh Pawl Kût hmang ro. 17 Kum khatah pasal po po Chunghnung tak LALPA hmaah voi thum an hung inlang ding a nih. 18 "Chol thanga siem thil hrim hrim leh ka kuomah inthawina thisen inhlân naw ro. Chun, kûta thil hlâna hmang thau rêng rêng chu a tûk zing chenin sie ngai naw ro. 19 "In lo tharsuok hmasa tak laia a tha tak vong chu LALPA in Pathien kuomah hung chawi ro. Kel tuoi sa chu a pui nenetuiin suong ngai naw ro. 20 "En ta, in lampuia vêng zing ding cheu le hmun ka buotsaia thuoi tlungtu ding cheuin ka vântirko in hmaah ka hung tir ding a nih. 21 Ama chu ngaiven unla, a thu ngàithla ro. A lakah hel naw ro, ama chun ka hming a put leiin in helna chu a ngaidam awm si naw cheu. 22 Amiruokchu, a thu in pom a, a hril taphot in thaw pei chun, in hmèlmahai hmèlma nîng ka ta, in dohai dotu ni bok ka tih. 23 Ka vântirko chun in hma thuoi pei a ta, Amor hai, Hit hai, Periz hai, Kanan hai, Hiv hai le Jebu hai umnaa chun thuoi a ti cheu a, anni chu ka la sukbohmang dai ding a nih. 24 An pathienhai hmaah kûnin chawibiek naw unla, an thil chìnghai chu chìng bok naw ro. Anni chu inram vong unla, an lung biekhai chu suknawi vong ro. 25 LALPA in Pathien rong chauh bawl unla, fâk le dawnah sukhnienghnar ka ti cheu a, nangni laia inthokin natna hri la hmang ka ta, 26 nau insiet amani le ching amani nangni lai um naw ni ti niu a, in dam kum khom a tluontlingin suksei ka tih. 27 "In hmaah ka tiumna infètir ka ta, tu hnam khom in hmasuon taphot chu sukchi-ai ka ta, in hmèlmahai po po chu in hmaah intlânsiettir ka tih. 28 In fèna ding lampuia inthoka Hiv hai, Kanan hai le Hit hai hnot suoktu dingin in hmaah khuoivânriel tir ka tih. 29 Amiruokchu, kum khat sûng chun hnot suok vong el naw ning, chuong naw chun a ram chu rausan vong an ta, in ta dinga ram sa tium hung tam taluong an tih. 30 A ram pum la thei khopa in hung pung hun chenin ahmatiemin in hmaa mihai hnot suokpêk pei ka ti cheu. 31 "In ramri ding chu Tuipui Sena inthoka Filistinhai Tuipuii chen le thlalera inthoka Tuipui chen khangpêk ka ti cheu a, chu rama umhai chu nangni kutah pêng ka ta, anni chu hnot suok in tih. 32 Anni amani le an pathienhai amani leh thu in thlung ding a ni nawh. In ram sûngah an um ding a ni bok nawh, chuong naw chun ka chungah hin suol inthawtir pal an ti cheu; in ta dinga châng tium chu an pathienhai chawibiek a nih' tiin" a ta. 33 (A um nawh)

24

1 Chun, ama chun Mosie kuomah, "Nang le Aron le Nadab le Abihu le Israel upa sawmsarihai kha ka kuomah hung tung unla, rala inthokin mi hung chawibiek ro. 2 Mosie chauin LALPA hung pan hnai sien, mi dang chun hung hnai naw ro. Mipui khom ama leh hung naw raw hai se" a ta. 3 Mosie chu a zu fe a, LALPA thu le rorêl dànhai po po chu mipui a zu hril a, anni chun lunginruol takin, "LALPA hril taphot chu thaw pei kan tih" an ta. 4 Mosie chun LALPA hril po po chu a ziek thlàk vong a. A zînga chun inhma takin a tho a, tlâng thuta chun maichâm a siem a, Israel hnam sawm le hnam hni aiawin lung sawmpahni a phun a. 5 Chu zoa chun Israel tlangvalhai chu pumraw thilhlàn nei dingin a tir a, inremna thilhlàna dingin LALPA kuomah bawngchal tuoiin an inthawi a. 6 Mosie chun ran thisen zâtve chu a lâk a, maihùnah a sie a, thisen zâtve dang chu maichâmah a the a. 7 Chun, Thuthlungna Bu chu a lâk a, mipui hrietah a tiem a, anni chun, "LALPA hril taphot chu thaw pei kan ta, zawm pei kan tih" an ti duol duol a. 8 Mosie chun thisen chu a chawi a, mipui chu thèin, "Ngai ta u, hi thuthlungna bua Pathienin in kuoma thu a lo thlung tah po po thuthlungna thisen chu a ni hih" a ta. 9 Mosie le Aron, Nadab le Abihu le Israel upa sawmsarihai chu an kai tung a, 10 Israelhai Pathien chu an hmu a, a ke innghatna chu lungmantam safir rem khawm ang, vân anga inthieng a nih. 11 Sienkhom Israel hotuhai chunga chun Pathienin a kut a'n let nawh; Pathien chu an hang hmu a, fain an dawn tlàng a. 12 LALPA chun Mosie kuomah, "Tlânga khin ka kuomah hung kai la, chu taka chun lo um la, mipuihai zirtirna dinga an ta dinga lungphêka dân le thupêk ka ziekhai chu lo pêng ka ti che" a ta. 13 Mosie chu a kaiza vêngtu Joshua leh a'n thok suok a, Pathien tlânga chun a hang fe a. 14 Upahai kuoma chun, "Kan hung kîr nawk hma khat chu hi taka hin mi lo nghâk zing ro. Nangni lai Aron le Hur an um a, thubuoi nei taphot an kuomah fe raw hai se" a ta. 15 Mosien tlâng a tlung chun tlâng chu sûmin a baw a, 16 LALPA ropuina chu Sinai tlângah a um a, sûmin tlâng chu ni ruk a bawm khum a, a ni sarina chun suma inthokin LALPAN Mosie chu a hung ko a. 17 Israelhai hmu dàn chun, LALPA ropuina chu tlâng sîpa kâng hmang thei mei ang el a nih. 18 Mosie chu sûm zìnga chun a va lût a, tlânga chun a hang lawn a, ni sawmli le zân sawmli a hang um a.

25

1 Chun, LALPAN Mosie chu a biek a, 2 "Israelhai kuomah hril la, ka kuomah thilhlàn hung chawi raw hai se. Lungrila an phal ang ang thilpêk an hung chawihai chu ka ta dingin i lo lâk khawm ding a nih. 3 Thilpêk i lâk khawm dinghai chu hienghai hi nîng a tih: rangkachak dâm, tangkaruo dâm le dâr dâm; 4 patzài dumpawl, senduk le senlâr dâm, puon zài inhmi dâm, kèl hmul dâm, 5 beramchal vun, rong sena nam dâm, tui bawngvunj dâm, sitim thingk dâm, 6 khawnvara sit ding oliv hriek dâm, hriek nàl phaa pol chi mawsawla dâm le rimtui raw ding dâm, 7 Efod le awmbela bel ding onik lung le lunghlu dang dang hai chu an nih. 8 Chun, anni laia ka chêng ve theina ding in thienghlim mi bawlpêk rawh. 9 A ruongam ka'n entir ang che khan biekbûk chu bawlin a sûnga hmangruo ding po po khom i siem ding a nih. 10 "Chun, sitim thingin bawm insiemtir la, a dung chu centimeter za le sawmpakhat, a khang chu centimeter sawmruk le paruk le a'n sâng tieng centimeter sawmruk le paruk nîng a tih. 11 A sûng le puo tieng rangkachak hlîr hlakin inluon khum vong la, a tlâng po po chu rangkachakin i kawm bok ding a nih. 12 Rangkachak kuol pali siem la, a ke thutah khing tieng pahnih, a dang tieng pahnih, inbûk rawh. 13 Sitim thing bokin a zawnna ding zawnfung siem la, chu chu rangkachak tuiin inluon rawh. 14 Bawm zawnna ding zawnfunghai chu rangkachak kuola chun a khing a khingin rol lût ve ve rawh. 15 Rangkachak kuola zawnfung i rol lût chu um zing a ta, lâk suok ta lo ding a nih. 16 Chun, bawm sûnga chun lungphêka Thuthlung inziek ka la pêk ding che chu i sie ding a nih. 17 "Rangkachak hlîrin zangàina thungpha, l a dung centimeter za le sawm, a khang centimeter sawmruk le paruka lien i siem ding a nih. 18 Chun, zangàina thungpha sin hmor intona inthut ding rangkachak cherub lim, a suta sut ngei i siem ding a nih. 19 A sin hmor khing tieng chun cherub lim pakhat sie la, a khing tieng chun pakhat dang sie bok la, zangàina thungpha leh an inmat ding a nih. 20 Cherubhai chu inhmatonin zangaina thungpha tieng nghâng an ta, an thlain zangàina thungpha chu zâr khum an tih. 21 Bawm chunga chun zangàina thungpha chu innghat i ta, bawm sûnga chun Thuthlung ka la pêk ding che chu i sie ding a nih. 22 Chu taka chun intuokpui hlak ka ti che a, thuthlung bawm chunga cherub pahni inkâra zangàina thungpha chunga inthok chun Israel mihai kuoma thu ka pêk ding taphot chu pe hlak ka ti che. 23 "Chun, sitim thingin dawkân siem la, a dung chu centimeter sawmriet le pariet, a khang chu centimeter sawmli le pali le an sângzie chu centimeter sawmruk le paruk a ni ding a nih. 24 Chu chu rangkachak hlîr tuiin inluon vong la, a tlâng chu rangkachakin kawm rawh. 25 Milimeter sawmsari panga tieta lienin a kawm siem i ta, chu chu rangkachakin i kawm ding a nih. 26 Rangkachak naval pali siem i ta, chuonghai chu dawkân ke pali kil tina chun inbûk rawh. 27 A zawnfung rol lûtna dingin rangkachak navalhai chu dawkân kawm sîra inbûk ding a nih. 28 Sitim thingin dawkân zawnna ding zawnfung siem la, rangkachak tuiin inluon rawh. 29 Chu taka ding chun rangkachak hlîra siem thlèng dâm, no dâm, uoiin thilhlàn bun thlâkna ding no tung le maihùn dâm i sie ding a nih. 30 Dawkàn chunga chun ieng lai khomin ka hmaah hlànbeim i sie rop ding a nih. 31 Chun, rangkachak hlîrin khawnvar siena i siem ding a nih. A ngul le bulthut chu a sera ser ding a na, a lu tienga a kumùm le a pâr vul lai limhai leh ser inzom vong ding a nih. 32 A ngula inthok chun kau ruk, sîr khatah kau thum, sîr khing tieng kau thum a pêng suok ding a nih. 33 A zâr tinah ruon pâr kûmùm lai le a pàr lai lim pathum um a ta, a kau nawka chun chuong ang bok chu um a tih. Chuong ang chun khawnvar siena pêng paruk chu i siem ding a nih. 34 Khawnvar siena ngula chun ruon kûmùm ang pàr vul lai lim pali a um ding a nih. 35 A zâr chung le hnuoi inkârah pâr kumum pakhat pei a um ding a nih. 36 A kumum le pârhai po po le a ngul le thut hai chu rangkachak hlîr tlang sakhata inthoka ser ding a nih. 37 Chu taka sie ding chu khawnvar pasari siem i ta, i sit pha leh a vel chu a elvar vong ding a nih. 38 Khawnvar phita chep ruolna le hmangruo danghai khom rangkachak hlîra siem ding a nih. 39 Khawnvar siena le a hmangruo ding po po siemna dingin rangkachak hlîr hlak talenn khat i hmang ding a nih. 40 Tlânga a ruongam kan entir ang che khan iengkim i siem ding a nih ti hre rawh.

26

1 "Chun, puonhlap thlè sawm hmangin biekbûk siem la, chuong puonhlaphai chu patzâi inhmi thlur kop, a dumpawl, a senduk le sendâng inpola siem, puon khawng thiemhaiin cherub lim thiem taka an zep chei a ni ding a nih. 2 Puonhlap po po chu a sei tieng meter sawmpahni, a khang tieng meter hni seng, a ni ding a nih. 3 Puonhlap panga chu thui zom phot la, chu zoah panga dang chu thui zom nawk rawh. 4 Puonhlap thui zom hmasak sîr hmora chun a naval ding a dum pawlin siem la, chuong ang bokin a dang i thui zoma khom chu siem bok rawh. 5 Puonhlap pakhata chun a naval sawmnga siem la, a danga khom chun sawmnga siem bok la, a navalhai chu an inep tuo vong ding a nih. 6 Chu zoah rangkachakin a chep dèna ding sawmnga siem la, a chepdèna chun a naval tinah chep de la, biekbûk chu pindan pakhat a hung ni ding a nih. 7 Chun, biekbûk chung inkhumna dingin kêl hmula inthoka khawng puonhlap thle sawmpakhat i siem ding a nih. 8 Puonhlap chu a sei tieng meter sawmpathum, a khang tieng meter hni nîng a ta, thle tin chu an intiet vong ding a nih. 9 Puonhlap panga chu phêk khata dingin thui zom la, puonhlap paruk chu phêk danga dingin thui zom bok rawh. Puon in kot tieng chun puonhlap paruk thui zom chu zar la, a sîr tak chu thlep ding a nih. 10 Puonhlap pakhat hmor tieng tlànga chun a naval sawmnga siem la, chuong ang bokin puonhlap danga chun siem bok rawh. 11 Chun, an inkei bât tonna ding dâr kom sawmnga siem la, a naval tin ve veah puonhlap pahnihai chu dar kom chun kom de la, biekbûk chu pindan pakhat hung nîng a tih. 12 A chung inkhumna sahmul puon chenve lor chu biekbûk chawr tieng inkhâi thla raw se. 13 Chun, a chung sîr tuoka puonhlap, centimeter sawmngaa lor ve ve khom chu inkhâi thla el raw se. 14 Chun, beramchal vun, rong sena nam chun puon in chung chu inkhum i ta, chu chunga chun tui bawng vunin i la'n khum nawk ding a nih. 15 "Biekbûk banga intung ding sitim thing phêk tlûn tak rem khawm rawh. 16 Phêk tin chu a dung meter lia insâng le a khang centimeter sawmruk le paruka hlaiin i rem ding a nih. 17 Phêk tin chu phêk dang leh phui taka an inman nghet theina dingin phêk tinah mantu pahni i siem vong ding a nih. A bang phêk po po chu chuong ang vonga siem ding a nih. 18 Biekbûk sim songa dingin phêk sawmhni siem i ta, 19 a mongpha ding tangkaruo phêk sawmli siem bok la, bang phêk khat pei chu a mongpha pahni peiah innghat a tih. 20 Biekbûk hmar songa ding khomin phêk sawmhni siemla, 21 a mong phaa hmang ding tangkaruo phêk sawmli siem bok la, bang phêk khat pei chu a mong pha pahni peiah innghat a tih. 22 Biekbûk chawr, thlang tienga dingin phêk ruk siem la, 23 phêk hni chu a kila thang ding a nih. 24 A kila phêk hni hi a thuta inthoka a lêr chen kil zom thlap ding a nih. 25 Chuong ang chun, phêk riet um a ta, tangkaruoa siem a mong pha sawmparuk um bok a ta, a mong pha pahni pei chu bang phêk pakhat peia hmang ding a nih. 26 "Chun, sitim thing tluonin bangru ding sawmpanga siem la, biekbûk bang khing tienga bang phêk rem tlara chun bangru panga bel la, 27 a khing tieng khom panga bel bok la, biekbûk chawr thlang tienga bang phêk rem tlara chun panga bok bel rawh. 28 A bangru lailung taka mi, bang chenvea insânga bel chun biekbûk chu a vêl tuokin a man khawm ding a nih. 29 Bang phêk po po chu rangkachak tuiin inluon khum vong la, a bangru man khawmna dingin rangkachak naval siem la, a bangru po po chu rangkachak tui inluon vong bok rawh. 30 Tlânga a ruongâm ka'n entir che ang charin biekbûk chu i bawl ding a nih. 31 "Biekbûk sûng pindana zar ding chu patzâi inhmi thlur kop, a dumpawl, a senduk le senlâr inpola khawng, puon khawng thiemhaiin cherub lim thiem taka an zep chei a ni ding a nih. 32 Sitim thing ban pali, rangkachak tuia inluon le tangkaruo phêk pali thuta phuna chun rangkachak navalah puonzâr chu khàiin i zar ding a nih. 33 Puonzâr chu i zar zo pha leh Thuthlung Bawm chu a sûng tieng sie lût i ta, puonzâr chun Hmun Thienghlim le Hmun Thienghlim tak chu a daidan ding a nih. 34 Hmun Thienghlim taka chun Thuthlung Bawm le a sintu Zangàina Thungpha chu sie rawh. 35 Puonzâr puo tienga dawkân kha hmar tieng sie la, khawnvar innghatna kha sim tieng sie rawh. 36 "Biekbûk lûtna kotkhàra zar ding chu patzâi inhmi thlûr kop, a dumpawl, a senduk le a senlâr inpola khawng, puon khawng thiemhai kutsuok a ni ding a nih. 37 Puonzâr khaina dingin sitim thing ban panga, rangkachak tuia inluon vong chu phun la, puonzâr chu rangkachak navala chun khai rawh. Ban panga thuta hmang ding dâr phêk panga sung bok rawh.

27

1 "Sitim thingin maichâm kil li nei, a dung le khang meter hni le centimeter hni ve vea sei le lien le meter khat le centimeter thuma insâng chu siem rawh. 2 Maichâm kil tinah a kî siem la, maichâm le a kihai chu thing sakhat inzom vong ding a na, dâr tuiin inluon khum vong bok rawh. 3 A hmangruo, vut luokna ding vutluo le vut siena ding belhai, thil thènaa hmang ding maihùnhai, sa thurna ding thîrkuthai le hme suongna bêlhai chu dâra siem vong a ni ding a nih. 4 Chun, maichâma dingin dâr lèn siem i ta, a lèn chung tieng sîr lia chun a khaina kuol i siem bok ding a nih. 5 Chu thîr lèn inphan chu maichâm zawl hnuoi, a chenvea insânga chun i sie ding a nih. 6 Maichâm zawnna ding sitim thing tuoi siem la, dâr tuiin inluon khum la, 7 zawn phaa a zawnfung rol lûtna dingin maichâm sîr khing ve vea chun a khei kuol siem tawl bok rawh. 8 Maichâm chu thingphêk bangin inkhum i ta, a lai chu a kawrongin i sie ding a nih. Tlânga a ruongâm ka'n hmutir che ang char khan i siem ding a nih. 9 "Biekbûk tuolzawl chu puon zâi inhmi thlùra khawng puonzârin inhuon i ta, sim tienga mi chu meter sawmli le palia sei nîng a ta, 10 puonzâr khaina ding chu ban sawmhni le ban inthutna ding dâr phêk sawmhni siem i ta, puonzâr bângna tluon le a thlung nghetna hmangruo po po chu tangkaruoa siem a ni vong ding a nih. 11 Hmar song tieng khom meter sawmli le palia sei nîng a ta, ban sawmhni le ban inthutna ding dâr phêk sawmhni le puonzâr bângna tluon le a thlung nghetna hmangruo po po chu i siem bok ding a nih. 12 "Thlang tieng tuol zawla chun meter sawmhni le pahnia sei puon zar ding a na, ban sawm le a thut sawm um bok a tih. 13 Suo tieng, nisa suokna tienga inhuonna puonzâr khom meter sawmhni le pahnia sei a ni ding a nih. 14 A lûtna sîr khata chun meter ruk le centimeter ruka sei puonzâr le ban pathum le a thut pathum um a ta, 15 khing tieng khom meter ruk le centimeter ruka sei bok puonzâr le ban pathum le a thut pathum a um bok ding a nih. 16 "Tuol kot tieng khom ban pali le a thut pali siem i ta, a puonzâr dingin meter kuoa sei, pat zâi inhmi thlùr kopa khawng, a dum pawl, a sen duk le a sen lâr inpol, puon khawng thiemhai kutsuok chu i khâi bok ding a nih. 17 Tuolzawl inhuonna ban po po chu tangkaraw tluonin zom vong i ta, puonzâr bàngna kuoi po po chu tangkaruoa siem nîng a ta, a ban thut chu dâr vong a ni ding a nih. 18 A tuol zawl seizie chu a dung meter sawmli le pali le a khang meter sawmhni le pahni nîng a ta, pat zâi thlura siem puonzâr, meter hni le centimeter hnia insângin inhuon i ta, a ban thut chu dâr vonga siem a ni ding a nih. 19 Biekbûka hmangruo hmanghai po po le puon in sûng le a tuol zawla puonzâr kei nghetna hmangruo po po chu dâra siem vong a ni ding a nih. 20 "Khawnvar chu zân tin sit chok a ni zing theina dingin oliv hriek an sawr laia thlit fim hlak chu hung chawi dingin Israelhai chu thu pe rawh. 21 Biekbûka Thuthlung Bawm siena puonzâr puo tieng, Intuokna Puon ina chun Aron le a nauhaiin zân tienga inthoka zîng tieng chenin LALPA hmaah khawnvar chu an insit chok zing ding a nih. Hi hi suon la hung thar pei dinga khom Israelhai laia an thaw dinga kumkhaw thupêk chu nîng a tih.

28

1 "I u Aron chu a naupa Nadab hai, Abihu hai, Eleazar hai le Ithamar hai le chun ko la, ka ta dinga thiempu ni dingin Israel mihai laia inthokin ser hrang rawh. 2 I u Aron chun inza phur a, ngaisâng a hlaw theina dingin silfèn thienghlim siempêk bok rawh. 3 Aronin ka rong a bawl theina dinga inhlàn thienghlim a ni huna a hàk ding silfèn thienghlim thuipêk dingin hieng tieng thila varna le chemkalna ka pêkhai kha hril rawh. 4 Silfèn an siem dinghai chu awma inbel chi awmbel, thiempu dàr bàt zakuo, o korfuol, korchung chei infuol, kawng inrêk le bân bûl, lukhum le kawngzem a nih. Hieng silfèn thienghlimhai hi i unaupa Aron le a naupahaiin thiempu rong an mi bawlpèk theina dingin an siempèk ding a nih. 5 Chu siemna ding chun rangkachak zâi dâm, patzâi dum pawl, sen duk le sen lâr dâm le puon zâi inhmi thlùr kop an hmang ding a nih. 6 "Thiempu dàr bàt zakuo Efod chu rangkachak zâi, patzâi dum pawl, sen duk le sen lâr le pat zâi inhmi tak thlùr kop hmanga mi themthiemhaiin an riruong ang taka khawng ding a nih. 7 Hnung tieng le hma tieng dàr khing tieng khing tieng huopa hâk thei dinga a sîr ve vea tingmit a ni ding a nih. 8 A dàr zemna hruol chu chuong ang boka thiem taka siem, rangkachak zâi dâm, pat zâi dum pawl, sen duk le sen lâr le pat zâi inhmi thlùr kopa siem ding a na, tluon inzom a ni ngei ding a nih. 9 "Onik lung pahni la khawm la, chu taka chun Israel thlahai hming ker rawh. 10 An hming ziek dàn ding chu an pienga an upat dàn indotin nîng a ta, lung pakhatah hming paruk, a dangah hming paruk a chuong ding a nih. 11 Lunghlu ker thiemin suoi namna ding mawi taka a ker ang elin Israel nauhai hming chu inkertir la, chu lunghai chu rangkachak zâiin phier khum la, 12 Israel thlahai hriet zingna lung dingin a dàrbak ve vea chun khit de rawh. Aron chun an hminghai chu LALPA hmaa hriet zingna dingin a liengkoah a phur ta ding a nih. 13 Chun, lungmantam phumna dingin rangkachak zâi phier la, 14 rangkachak hlîr hlaka siem khaidiet pahnih her thlop la, chu chu lung phumna rangkachak zâi phiera chun inbûk rawh. 15 Mi themthiem tak kutsuok anga thiemin, rorelna awmbel siem rawh. Thiempu dàr bàt ang bokin rangkachak zâi le patzâi dum pawl, sen duk le sen lâr le puon zâi inhmi le thlùr kopin siem rawh. 16 Kil li nei, a dung centimeter sawmhni le pahnih, a khang centimeter sawmhni le pahnih nîng a ta, chu chu a thuoa thlep theia siem ding a nih. 17 A chunga chun lunghlu tlar li bel rawh. A tlar hmasa taka chun rubi, topaz le beril lung um a ta, 18 a tlar hninaah torkuis, safir le emeral lung um a ta, 19 a tlar thumnaah jasin, agate le amethi lung um a ta, 20 a tlar linaa chun krisoli, onik le jaspi lung a um ding a nih. Chu lunghai chu rangkachak zâiin zem khum ro. 21 Lung po chu sawmpahni nîng a ta, lung tin chun Israel thlahai hming put seng an ta, lung tin chu Israel hnam sawmpahnihai suoi namna lung ang nîng a tih. 22 "Awmbela ding rangkachak hlîr zâi her thlopin hruol rawh. 23 Rangkachak naval pahni siem la, chuonghai chu awmbel chung tieng sîr ve vea chun inbûk rawh. 24 Rangkachak khaidiet her thlop chu awmbel sîr ve vea rangkachak naval pahnia chun thlung rawh. 25 Chun, rangkachak khaidiet her thlop pahni hmor khing tieng ve ve chu thiempu zakuo hma tieng dàrbaka rangkachak zâia phier khum lung pahni le chun inbûk zom rawh. 26 "Rangkachak naval dang pahni siem la, chuonghai chu awmbel kil khing tieng, thiempu dàr bât zakuo dep, a sûng tieng chun inbûk rawh. 27 Chun, rangkachak naval dang siem la, chuonghai chu thiempu dàr bât zakuo hma tienga thiempu zakuo dàrzem chung char, a sîr hmora chun inbûk rawh. 28 Thiempu zakuoa naval le awmbela navala chun pat dumpawl hruolin khit mat la, chuonga i thaw chun awmbel chu thiempu zakuoa inthok chun inphaw hawk thei naw nih. 29 "Kei LALPA hin Israel thlahai chu ka hriet zing theina dingin Hmun Thienghlima ka hmaa Aron a hung lût zâtin an hming chuongna rorêlna awmbel chu a lung zawn takah a hàk zie hlak ding a nih. 30 Chun, rorêlna awmbela chun Urim le Thummimp khom inthangtir ve rawh, LALPA hmaa Aron a hung inlang zàta a lungrila an um ve theina dingin. Chuong ang chun, LALPA hmaa a'n lang zàtin Israelhai rorêlna chu a lung zawnah Aron chun a put zing ding a nih. 31 "Efod hnuoia hàk ding thiempu incheina korfuol chu puon dumpawl hlang hlaka siem ding a nih. 32 A lai taka chun lu thunna ding chep awng la, a awng rei chu a'n ek nawna dingin zakuo tlâng an kîm angin kîm vong rawh. 33 Korfuol hmor vêl tuoka khai dingin pat zâi dum pawl, sen duk le sen lâr hmangin theibufai lim siem la, a kâr inthlâk peiah rangkachak telnêng khai rawh. 34 Korfuol hmor tlang vêl tuokin theibufai lim le rangkachak telnêng chu inkârthlâkin a um ding a nih. 35 LALPA hmaa rongbawl dinga Aronin Hmun Thienghlim a lût ri le chu taka inthoka a suok nawk ri chu hriet thei dingin a korfuol chu a hàk zie ding a nih, a thi pha nawna dingin. 36 "Chun, rangkachak hlîr hlak phèk siem la, chu taka chun suoi namna kutsebia an ker ang elin, LALPA PUOL ti ker rawh. 37 Chu phèk chu thiempu lukawm hma tieng bel la, patzâi hruol dumpawlin khit de rawh. 38 Chu chu Aron chalbawk zawna chun um a ta, Israelhaiin thilpêk thienghlim LALPA ta dinga an inhlàn pha, an thilpêk inhlàna an suol tlâk tum chu ieng khom ni sien, Aron chun phurpêk pei a ta, LALPA hmaa pom tlâka an um theina dingin Aronin a chalbawkah a bel zing ding a nih. 39 Aron hàk ding korchung le a lukawm ding chu patzâi inhmi taka inthoka khawng le siem a ni ding a nih. A cheizemq khom patzâi inhmia khawng le mawi taka chei a ni bok ding a nih. 40 Aron nauhai khomin mi inza le ngaisâng an phur theina dingin, korfuol le cheizem le lukawm siempêk rawh. 41 Hieng silfènhai hi i u Aron le a nauhai inhâktir la, ka ta dinga rongbawltu thiempu ni dinga hriek nàlin namnghet la, ser hrangin inhlân rawh. 42 "An saruok inkhumna dingin kawnga inthoka malpui chen huop kekorte siempêk rawh. 43 Chu chu Aron le a nauhaiin Intuokna Puon in an lût pha le Hmun Thienghlima rong bawl dinga maichâm bula an fe pha an bun zie hlak ding a nih, inlang pala an thipui nawna dingin. Hi hi Aron le a thlahai ta dinga kumkhaw thupêk chu a nih.

29

1 "Chun, thiempu sin thawa ka rong an bawl theina dingin anni chu hieng ang hin inhlàn thienghlim rawh: Hmèl hemna nei lo bawngchal tuoi pakhat le beramchal tuoi pahni hung kei la, 2 chol thang lo beiphit indip takin bei siem la, sahriek le bei hmet polin kek siem la, beiper inphàn siem bok la, a chungah thau nàl rawh. 3 Chuonghai chu bawmah thun la, bawngchal le beram chal pahni keiin chu chu hung chawi rawh. 4 Chu zoah Aron le a nauhai chu Intuokna Puon in kotah hung thuoi la, dân angin tuiin insiltir rawh. 5 Thiempu silfèn chu hung chawi la, korchung, korfuol, efod le awmbel hai chu Aron inhàktir la, thiem taka ta cheizem chun a kawng hrên nghet rawh. 6 Chun, 'LALPA PUOL' ti inbelna lukawm chu inkawmtir rawh. 7 Hriek nàl chi hung la la, a luah buok rawh. 8 A nauhai khom hung thuoi la, korfuol inhàktir tawl la, 9 lukawm inkawmtir bok rawh. Chu zoah Aron le a nauhai chu cheizem inzemtir la, namnghet la, thiempu ni kumkhuo tàng an tih. Chuong ang chun Aron le a nauhai chu i namnghet ding a nih. 10 "Bawngchal chu Intuokna Puon in kota chun hung kei la, Aron le a nauhaiin bawng lu chungah kut innghat raw hai se. 11 Intuokna Puon in tuola chun LALPA hmaah bawngchal chu that rawh. 12 Bawngchal thisen chu iemani zàt la la, i kutpàr hmorin maichâm kia chun thisen chu infar la, a dang chu maichâm ke thuta chun bun thla vong rawh. 13 Bawngchal phing sûnga a thau po po, a thin le a kal tuomtu duor le thau po po chu ât thla la, maichâma chun raw rawh. 14 Bawngchal sa le a vun le a êk ruok chu dâi puo tieng i raw hmang ding a nih, chu chu suol ta dinga inhlàn a ni si a. 15 "Beramchal pakhat chu hung kei la, Aron le a nauhaiin beramchal lu chungah kut innghat raw hai se. 16 That la, a thisen chu la la, maichâm chunga chun a vêlin thè rawh. 17 Beramchal chu chan nawi vong la, a sûng le a kehai chu sawp fai la, a lu le a sa dang le chun sie khawm rawh. 18 Chun, beram sa po po chu maichâma chun raw rawh, LALPA kuoma pumraw thilhlàn, LALPA ta dinga meia inhlàn, rim inhnik chu a ni si a. 19 "Beramchal dang khom chu hung kei la, Aron le a nauhaiin beramchal lu chungah kut innghat raw hai se. 20 That la, a thisen iemani zât la la, Aron le a nauhai chang tieng natila dâm, chang tieng kutpui le chang tieng kepuia dâm chun tât la, chu zoah maichâm chunga chun a vêlin thè rawh. 21 Thisen iemani zàt le hriek iemani zàt la la, Aron le a nauhai silfèna chun thè la, ama le a nauhai chu inhlàn thienghlim hung ni tàng an tih. 22 Chun, beram thau, a mei bul thau tak le a sûng thau le a thin le kal tuomna duor le a thau po po le a chang tieng mal chu la la, chu chu namnghetna beram nîng a tih. 23 Bawma chol thang lo bei, LALPA ta dinga inhlàna inthoka mi, hrieka zèu beiphek le kêk le beiper inphàn chu la bok rawh. 24 Chuonghai chu LALPA hmaa thèn thilhlâna dingin thên la, Aron le a naupahai kuta chun inhlàn rawh. 25 Chu zoah an kuta inthokin la kîr la, pumraw thilhlàn danghai leh LALPA hmaa rim inhnika inchang dingin meiah inhlàn rawh. 26 Aron namnghetna dinga beramchal inhlàn ir chu la la, LALPA hmaa thèn thilhlàn dingin thèn la, chu zoa chun a sa chu i chanpuol hung ni tàng a tih. 27 "Thiempu namnghetnaa thilhlàn, beramchal ir le a mal, ka kuoma thèn thilhlàna inhlàn thienghlim chu thiempu Aron le a naupahai chanpuol ding a nih. 28 Ka mihaiin inremna inthawina thilhlàn ka kuoma an hung inhlàn ir le a mal chu thiempuhai chanpuol ni rop a tih ti hi Israelhai laka ka thu ruot chu a nih. 29 Aron silfèn thienghlimhai chu a thlahaiin rochung pei an ta, chu taka inthok chun thiempua hriek nàl le namnghet hung ni pei an tih. 30 Thiempua Aron hung thlâktu a naupa chun Hmun Thienghlima rong bawl dinga Intuokna Puon ina a hung pha leh ni sari sûng a hâk ding a nih. 31 "Thiempu namnghetnaa inhlàn beramchal sa chu hmun thienghlima chun suong rawh. 32 Intuokna Puon in kota chun beramchal sa le bawma beihai chu Aron le a naupahaiin an fâk ding a nih. 33 Chuong inremna thilthawna, anni namnghetna le inhlàn thienghlimna dinga pumraw thilhlànhai chu anni chun fâng an ta, amiruokchu sa ser a ni leiin mi dang chun fa thei naw ni hai. 34 Chun, a zîng chena namnghetna sa le bei fàk bâng la umhai chu meia raw hmang ding a nih; sa ser a ni leiin fâk ding a ni nawh. 35 Chuongchun, thu ka pêk tah po po che ang hin Aron le a naupahai chunga chun thaw la, ni sari sûng inser thienghlim raw hai se. 36 Chun, ni tin suol thawina dinga inremna thilhlànah bawngchal hung inhlàn la, inremna siemin maichâm sukfai la, hriek nàlin sukthienghlim rawh. 37 Maichâma inthienna dinga inremna thilhlàn chu ni sari sûng thawin sukthienghlim la, chuongchun maichâm chu thil thienghlim tak hung nîng a ta, maichâm tawk taphot khom hung thienghlim pei an tih. 38 "Maichâma chun ni tin pel loin beram tuoi pahnih, kum khat a upa in hung inhlàn zie ding a nih. 39 Beram tuoi pakhat chu zîng tieng inhlàn unla, beram tuoi dang chu zân tieng inhlàn ro. 40 Zîng tienga beram in inhlàn ruol chun beiphit indip tak kilogram khat, oliv hriek, a sawra sawr litar khat le chokpol le dawn thilhlànah uoiin litar khat in hung inhlàn sa ding a nih. 41 Zân tieng thimbuta in inhlàn pha khom zîng tienga in thaw ang charin thaw ro. Chu chu LALPA ta dinga meia thil inhlàn le rim inhnik chu a nih. 42 Hi hi in thlahai chena Intuokna Puon in kot bula LALPA hmaa pumraw inthawi in inhlân rop dân ding chu a nih; chu taka chun ka mihai hmu dingin hung ka ta, inbiekpui hlak ka ti cheu. 43 Chu hmuna chun Israel mipuihai inhmupui ka ta, chu hmun chu ka ropuina varin sukthienghlim ka tih. 44 Puon in le maichâm chu sukthienghlim ka ta, Aron le a naupahai chu ka rongbawltu thiempu dingin ser hrang tawl ka tih. 45 Israel mipuihai lai chêng ka ta, an Pathien nîng ka tih. Anni lai ka chêng theina dinga Aiguptaa inthoka thuoi suoktu LALPA an Pathien chu ka nih ti hrieng an tih, LALPA an Pathien chu ka ni si a. 46 (A um nawh)

30

1 "Rimtui rawna ding sitim thingin maichâm siem rawh. 2 Maichâm chu a dung centimeter sawmli le panga, a khang centimeter sâwmli le panga, kil li nei nîng a ta, a'n sângzie chu centimeter sawmkuo nîng a tih. A kihai chu maichâm le sakhat, inzom vong a ni ding a nih. 3 A chung le a sîr po po le a kihai chu rangkachak hlîrin inluon khum la, a ko tlâng sîr tuokin rangkachak bel vong rawh. 4 A zawnfung rolna dingin a tlâng sîr hnuoi tieng puo ve veah rangkachak naval inbûk la, khing tieng khom chuong ang bok chun inbûk rawh. 5 A zawnfung ding khom sitim thingin siem la, rangkachakin inluon khum rawh. 6 Thuthlung Bawm chunga Zangàina Thungpha, ka'n tuokpuina hlak ding che khêla puonzâr dot chara chun maichâm chu innghat rawh. 7 "Tûk tin Aron-in khawnvar a buotsai pha leh rimtui a raw zie ding a nih. 8 Zân tieng thimbuta khawnvar a sit zâtin rimtui raw bok a ta, chuong ang chun thang la hung um peia khom LALPA ta dingin in raw pei hlak ding a nih. 9 Hi maichâma hin rimtui dang amanih, pumraw inthawina amanih, bu le bâl thilhlàn amanih le dawn ding thilhlàn amanih in inhlàn ngai ding a ni nawh. 10 Maichâm inthienna dingin, inremna dinga suol thawina thisen chu kum tin Aron-in maichâm ki-ah a nâl zie ding a nih. Chu chu kumkhuoin kum tin voi khat in thaw zie ding a nih; maichâm chu LALPA ta dinga thil thienghlim tak a ni si a. 11 LALPA chun Mosie kuomah, 12 "Intiempui laia hripuia in thi nawna dingin, Israel mi tiem laia thang taphot chun an tiem hunah LALPA kuomah hringna intlanna man an pêk seng ding a nih. Chuonga an thaw chun in intiem pha hripui inlêng naw nih. 13 Intiempuia thang taphotin a pêk zât dinga tuk, tempula an pêk hlak zât shekel zàtve an pêk seng ding a nih (shekel khat chu gerah sawmhnia rik a nih); chu chu LALPA puola dinga thilhlàn a nih. 14 Tiem laia thang kum sawmhni le a chung tieng po chun LALPA kuomah hi thilhlàn hi an pêk seng ding a nih. 15 Hringna intlanna dinga shekel zàtve an pêk nèka tam chu mi hausain a pêk ding a ni naw a, chu nèka tlawm khom chu mi retheiin a pêk ding a ni bok nawh. 16 Intlanna sum in hmu chu Intuokna Puon in enkolna dingin hmang ro. In hringna intlanna thil hi LALPAN Israelhai a hriet zingna sik a nih" tiin a hril a. 17 Chun, LALPA chun Mosie kuomah, 18 "Insawpna dingin dâr maihùn siem la, a thut khom dâr bokin siem la, chu chu Intuokna Puon in le maichâm inkârah inthut la, chu taka chun tui sie rawh. 19 Chu tui chu Aron le a naupahaiin kut le ke sawpnain hmang an tih. 20 Intuokna Puon ina an lût ding zàtin, an thi nawna dingin, tui chun an insawp ngei ding a nih. Chun, pumraw thilhlàn LALPA hmaa meia an inhlàn ding zàtin, an thi nawna dingin, an kut le ke an sawp zie bok ding a nih. 21 Suon la hung um pei dinga khom hi hi Aron le a thlahai kuoma kumkhaw thupêk a nih" a ta. 22 Chun, LALPA chun Mosie kuomah, 23 "Rimtui inhnik tak laia mi, murra tui kilo ruka rik, thingzungthak rim inhnik kilo thum, mafu rimtui kilo thum, 24 thingzungthak kau hawng kilo ruk le oliv hriek litar li, biekbûka shekel hmang lai anga bùk chu hung chawi rawh. 25 Chuonghai chu rimtui siem thiemin thiem taka a chokpol angin chokpol la, hriek nàla hmang dingin hriek thienghlimah siem rawh. 26 Chu rimtui chu hienghai hi nàl rawh: Intuokna Puon in hai, Thuthlung Bawm hai, 27 dawkàn le a hmangruo hai, khawnvar siena le a hmangruo hai, rimtui rawna maichâm hai, 28 pumraw inthawina maichâm le a bûr le bêl hai le maihùn le a thut hai chu. 29 Thienghlim tak an hung ni theina dingin i sukthienghlim ding a nih; chuong thilhai tawk taphot chu hung thienghlim an tih. 30 "Chun, hriek chu Aron le a naupahai khom nàl la, thiempu sin thawa ka rong an bawl theina dingin, sukthienghlim tawl rawh. 31 Israelhai kuomah hieng hin hril rawh: 'Hi hriek hi suon la hung um pei dinghai ta ding khoma hriek thienghlim chu a nih. 32 Mi naran nàl naw unla, a siem dân hmangin siem bok naw ro. Hriek thienghlim a ni angin hriek thienghlimah ngai ro. 33 Tu khom hieng ang hriek rimtui hi siem a, thiempu ni ve lo a nàl chun ama chu nangni laia inthokin tuithlàr ro' tiin hril rawh" a ta. 34 Chun, Pathienin Mosie kuomah, "Rim inhnik gom hnai dâm, onika dâm le galbanum thing hnai dâm le beraw fîm tak chu inzât vongin hung la la, 35 rimtui siem thiemin a siem angin, chuonghai chu chokpolin rimtui inhnik tak siem rawh. Chu rimtui chu machia saw thieng, fîm tak le thienghlim tak a ni ding a nih. 36 A then rawt dip la, Intuokna Puon ina Thuthlung Bawm hma, ka'n tuokpuina ding chea chun thè rawh. Chu chu i ta dingin thil thienghlim tak a ni ding a nih. 37 Hi rimtui siem dân hmang hin i ta ding khomin rimtui siem ngai naw la, LALPA ta dinga thil thienghlimah ngai rawh. 38 Nangni lai tu khomin hieng ang rimtui hi mani hmang dinga siemtu chu a chipuihai laia inthoka tuithlàr ding a nih" a ta.

31

1 LALPA chun Mosie kuomah, 2 "Ngai ta, Juda hnama mi Hura naupa Uri, chu pa naupa Bezalel chu ka thlang suok a. 3 Themthiemna dâm, theina dâm le thil hrang hrang siem thiem dinga chemkalna dâm nei dingin Pathien Thlarauin ka sung sip a nih. 4 Rangkachak le tangkaruo le dàr hmanga thil mawi taka siem thiemna dâm, 5 lungmantam ser le bel mawi dàn hai, thing them le ker thiemna dâm le kong tinrênga themthiemna dâm ka pêk a nih. 6 Chu bâkah, ama thangpuitu dingin Dan hnama mi Ahisamak naupa Oholiab chu ka ruot a; thu ka pêk che anga iengkim an siem theina dingin thoktu danghai khom kut themthiemna ka pêk vong a nih. 7 An siem dinghai chu Intuokna Puon in dâm, Thuthlung Bawm dâm, a chunga um ding Zangàina Thungpha dâm, Biekbûk hmangruohai po po dâm, 8 dawkàn le a hmangruo po po dâm, rangkachak hlir hlaka siem khawnvar siena le a hmangruo po po dâm, rimtui rawna maichâm dâm, 9 pumraw inhlànna maichâm le a hmangruo bûr le bêl hai dâm, maihùn le a thut dâm, 10 Aron le a nauhaiin thiempu sin thawa ka rong an bawl huna an inthuomna ding silfèn thienghlim dâm, 11 thiempu namnghetnaa nàl ding hriek dâm le Hmun Thienghlima raw ding rimtui dâm a nih. Thu ka pêk che ang char khan an siem ding a nih, " a ta. 12 LALPA chun Mosie kuomah, 13 "Israelhai kuomah hieng ang hin hril rawh: 'Ka Sabat hi in inser ding a nih. In Pathien, a sukthienghlimtu cheu chu ka ni ngeizie in hrietna dinga nangni le in thla la hung pei dinghai le keima inkâra inchikna a nih. 14 Chuleiin, Sabat hi inser ro, in ta dinga ni thienghlim a ni si a. Tu khom a bawsetu taphot chu sukhlum ngèi ngèi ding a nih. Hi nia tu khom sin thaw lui taphot chu a mihai laia inthoka tuithlàr ding a nih. 15 Ni ruk sûng in sin thawng in ta, ni sari ni ruok chu Sabat chawl, LALPA ta dinga ni thienghlim a nih. Tu khom Sabat nia sin thaw chu sukhlum ngèi ding a nih. 16 Israel nauhai chun Sabat chu kumkhuoa kan thuthlungna a nih ti hrein an inser ngei ding a nih. 17 Keima le Israel nauhai inkàra kumkhaw inchikna nîng a tih, ni ruk sûngin LALPAN hnuoi le vânhai a siem a, a ni sarina nia chun a sinthawa inthokin a chawl si a' tiin hril bok rawh" a ta. 18 Chuongchun, Sinai tlânga LALPAN Mosie a biek zo chun Thuthlung lungphèk pahni, Pathien kut ngeia ziek lungphèkhai chu Mosie kuomah a pêk a.

32

1 Mosie chu tlânga inthoka a hung thlàk intak ta êma mipuiin an hriet lei chun Aron kuomah an fe khawm a, "Thaw ta, kan hma thuoitu dingin pathien lem mi siempèk rawh. Hi Mosie, Aigupta rama inthoka mi thuoi suoktu hlak hi iem a chang tah ti kan hriet si nawh" an ta. 2 Aron chun an kuomah, "In nuhmeihai, in naupahai le naunuhai be lai rangkachak nabe kha hung chawi khawm ro" a ta. 3 Mipuihai chun rangkachak nabe an be lai chu hlîpin Aron kuoma chun an hung chawi a. 4 An pêkhai po chu a lâk khawm a, hmangruo ieng ieng amani hmangin bawngte lem angin a sung a. Mihai chun, "Aw Israelhai, hi hi Aigupta rama inthoka thuoi suoktu cheu pathien chu a ni hi" an ta. 5 Chu chu Aronin a hriet chun bawngte lem hmaa chun maichâm a siem a, "Zînga hin LALPA ta dingin kût nei ei tih" tiin tlâng a'n samtir a. 6 A tûk zìnga chun inhma takin an tho a, pumraw thilhlàn an inhlàn a, inremna thilhlànhai an hung pêk bok a. Chu zoah mipui chu fa le dawn dingin an inthung khawm a, hlimhlop chèn dingin an tho nawk a. 7 LALPA chun Mosie kuomah, "Fe thla vat rawh khai, Aigupta rama inthoka i hung thuoi suokhai kha an insukporche zo ta khu! 8 Ka thupêkhai sawt naw teah nghatsanin bawngte lem an insiem a, an biek a, a kuomah an inthawi a, 'Aw, Israelhai, hi hi Aigupta rama inthoka thuoi suoktu cheu pathien chu a nih' an ti chu!" a ta. 9 LALPA bok chun Mosie kuomah, "Hieng mihai hi ka enthlâk zing a, en ta, hnam lulul tak an lo ni hi tie! 10 Lo inrol naw la, ka lungsen inlingin hang kâng hmang vong tawl ka tih. Chu zoah nang ruok chu hnam ropui takin siem ka ti che" a ta. 11 Mosie ruok chun LALPA Pathien ditsakna ngenin, "Aw LALPA, i thilthawtheina ropui tak le kut hrâta Aigupta rama inthoka i hung thuoi suokhai chunga hin ieng leiin am i lung i sukling ding a na? 12 Ieng leiin am Aigupta mihaiin, 'Thil tum tha lo neiin, thlalera sukhlum vong ding le khawvela inthoka sukchimit vong dingin a thuoi suok tawl a nih' an mi hung tizui ding? I lungsen inkei dei la, i mihai chungah sietna intlun lo hrâm dingin inhnûk kîr raw khai. 13 I siehlaw Abraham hai, Isak hai, Israel hai kuoma, 'Arasi zât khin in thlahai la sukpung ka ta, hi ram pêk ka lo tiem tah chu in thlahai la pe bok ka ta, kumkhuoin hluo tàng in tih' tia i hming sâla i lo intiemnahai kha hre zing raw khai" tiin a ngên rak a. 14 LALPA chun a hnina chu pomin, a mihai chunga sietna intlun dinga a vauna laka chun a'n hnûk kîr a. 15 Thuthlung lungphêk pahnih, a hma tieng le hnung tienga thu inker sip chu a kuta chawiin Mosie chu tlânga inthokin a hung thla a. 16 Lungphêkhai chu Pathien kutsuok a na, a chunga thu inkerhai chu Pathien ziek ngei a nih. 17 Chun, Josua chun mipui khêk ri a hrietin Mosie kuomah, " Chu! riebûk tienga ri ka hriet chu indo ri a va ang de!" a ta. 18 Mosie chun, "Chu chu hnetu khêk ri a ni naw a, tlawmhai khêk ri a ni bok nawh; hla sak ri a nih ka hriet lem chu" a ta. 19 Mosien riebûk a hung pan lai chun bawngte lem le an làm mup mup lai chu a hmu a, a lungsen chu an ling thut a, a lungphêk chawihai chu a pei thlâk a, tlâng bula chun a koi dar ta vong a. 20 Bawngte lem an siem chu a lâk a, meiah a raw a, a rawt nawi vong a, tui chungah a phul a, chu chu Israelhai a'n dawntir a. 21 Mosie chun Aron kuomah, "Hienghai hin i chungah iem thil lawm am an thaw a, hienga thil suol nasa tak el an chunga i'n tlungtir hi?" a ta. 22 Aron chun, "Ka lalpa, ka chungah lung suksen naw rawh. Hieng mihai hi suol tieng awn tlat mi an nih ti i hriet annawm. 23 Ka kuomah an hung a, 'Kan hma thuoitu ding pathienhai mi siempêk rawh. Hi Mosie, Aigupta rama inthoka mi thuoi suoktu hlak hi a chanchin kan hriet ta si naw a' an hung ti a. 24 Kei chun, 'Rangkachak incheina nei taphotin hlip raw hai se' ka ta. Rangkachak chu an hung chawi a, meiah ka rawtui a, bawngte lem hi a hung suok el a nih" a ta. 25 An nuom dân dàna mipui intàl vel chu Mosien a hmu a, an hmèlmahai nuizatbûr inchang khopin Aronin a lo intàltir tawl a nih ti a hriet a. 26 Chuongchun, riebûk lûtna kota chun Mosie chu a ngîr a, "Tukhom LALPA kuom tienga thang taphot chu ka kuom tieng hin hung ro" a ta. Levi thlahai po chu a bula chun an hung vong a. 27 Mosie chun an kuomah, "LALPA, Israelhai Pathien chun hi hi a hril a nih: 'Mi tinin in kawlhnâm pai unla, riebûk kota inthoka a tawp chen a suk a tungin fang inla, mi tinin in unauhai khom, in ruolhai khom, in tuolbawmhai khom that pei ro' a ti a nih" a ta. 28 Levi thlahai chun Mosie ti ang chun an thaw a, chu ni chun mi sângthum vel an that a. 29 Mosie chun an kuomah, "Voisun hin in nauhai ngei le in unauhai ngei khom in do ngam leiin LALPA ta dinga sie hrang in ni ta a, voisun hin mal a sawm cheu a nih" a ta. 30 A zînga chun Mosien mipui kuomah, "Thil suol nasa tak el in lo thaw ta a, sienkhom tuhin LALPA kuomah hang fèng ka tih, in suolna lakah inremna ka siem thei takduoiin" a ta. 31 Chuongchun, Mosie chu LALPA kuomah a hang fe nawk a, "Hienghai rawi suol thaw hi a râpthlâk a nih. Anni ta dingin rangkachak pathien an insiem a. 32 Sienkhom tu hin lunginsiet takin an suol ngaidam hrâm raw khai. I ngaidam thei lul naw chun kei hi i mihai hming ziekna lekhabua inthokin mi thai bo dai el lem rawh" a ta. 33 LALPA chun Mosie kuomah, "Ka chunga thil suol thawtuhai hming chauh ka lekhabua inthokin thai bo ka tih. 34 Tu hin fe la, fena ding ka hril ta che hmuna khan mipuihai chu thuoi phot la, ka vântirkoin iI hma thuoi pei a tih. Amiruokchu, ka hrem ding pha chu an suolna ngeia chun hrem ka tih" a ta. 35 Chuongchun, Aron siem bawngte chunga an thil thaw lei chun mipuihai chu LALPAN hripuiin a hrem tawl tah a.

33

1 Chun, LALPA chun Mosie kuomah, "Nang le Aigupta rama inthoka i hung thuoi suokhai khan hi hmun hi suoksanin, Abraham le Isak le Jakob kuoma 'In thlahai ta dingin ka la pêk ding a nih' tia inkhâm meua ka lo tiem ram tieng chu pan tung ro. 2 In hmaah ka vântirko tir ka ta, Kanan mihai, Amor mihai, Hit mihai, Periz mihai, Hiv mihai le Jebu mihai chu lo hnot suok a tih. 3 Khuoizu le nenetui luongna ram chu pan tung unla, sienkhom hnam lulul tak in ni leiin nangni lai fe ve naw ning, lampuiah sukbohmang tawl rawi ka ti cheu" a ta. 4 Chu thu chu mipuiin an hrietin an bei a dong hle a, an tap a, tukhomin incheina thil an inbel nawh. 5 LALPA chun Mosie kuomah, "Hieng thu hi Israelhai kuomah hril rawh: 'Hnam lulul tak in nih. Chom khat khom ka'n tlonpui cheu chun ka sukbohmang pal el thei cheu a nih. Tu hin in incheina thil po po hlîp thla vong unla, ieng am ka law ding cheu la sukfel ka tih' tiin" a ta. 6 Chuongchun, Horeb tlânga chun Israelhai chun an incheina thil po po chu an hlîp thlàk ta vong a nih. 7 Mosie chun puon in chu a som pei a, riebûk an khuorna taphotah an riebûka inthoka hla feah a zar a, chu chu 'Intuokna Puon in' tiin a'n bûk a, LALPA rawn nuom taphothai chun puon in chu an pan hlak a. 8 Puon ina lût dinga Mosie suok an hmu pha leh mi po poin mani puon in kot senga inthokin a lût chenin an thlir thup hlak a. 9 Puon ina Mosie lût charin sûm ngir chu a hung tum a, puon in kotkhâra chun a ngîr a, Mosie kuomah LALPA chun thu a hril hlak a. 10 Intuokna Puon in kotkhâra sûm ngîr an hmu pha leh mi po po chun mani riebûk kot senga inthokin kûnin an chawibiek hlak a. 11 Ruolcham biek ang elin LALPA chun Mosie chu inhmatonin a biek hlak. Chu zoah Mosie chu a puon inah a hung kîr nawk hlak a, ama thangpuitu tlangval Joshua, Nuna naupa ruok chun puon in chu a màksan ve ngai nawh. 12 Mosie chun LALPA kuomah, "Ngai ta, nangin ka kuomah 'Hienghai hi thuoi suok rawh' i ti a, sienkhom tuin am a mi fepui ding ti i mi hril bok si nawh. Nang chun, 'Hminga ko nal khopa ka hriet che a na, ka mit khom i tlung ti ka hriet bok' i ti a. 13 Chuonga i mit dàm ka lo tlung takzet a ni chun, nangma hre a, i mit ka tlung zing theina dingin i konglam mi zirtir rawh. Hi hnam hi i mihai ngei an nih ti hre zing rawh, " a ta. 14 LALPA chun, "Ka umpuina chun som zing a ti cheu a, hadamna pêng ka ti cheu" a ta. 15 Mosie chun, "I mi som zing naw ding chun hi taka inthok hin m'n fe suoktir lul naw rawh. 16 Nangin i mi fepui si naw chun kei le ka mihai chungah i lawm a nih ti tuin am hre thei an ta? I mi fepui ruok chun hnuoi hmun tina chênghaiin i mihai hi kan danglam bikzie hrieng an tih" a ta. 17 LALPA chun Mosie kuomah, "Ka mit i tlung lei le hminga ka ko hiel i ni leiin i thil mi hni chu thawng ka tih" a ta. 18 Mosie chun, "I hmel mi'n hmutir hram ta la" a ta. 19 LALPA chun, "Ka thatna po po i hmaah inlangtir ka ta, i hmaa ngei kei LALPA hin ka hming puong hlak ka tih. Ka nuom taphot lunginsiet ka ta, ka nuom taphot chungah za ngâi ka tih. 20 Ka hmêl ruok chu hmu thei naw ti nih, ka hmêl hmua dam zing thei an um awm si nawh" a ta. 21 LALPA bok chun, "En ta, ka bula hin i ngîr theina ding lungpui a um a, chu taka chun lo ngîr rawh. 22 Ropui taka ka hung pha leh lungpui kak kâra hin lo um la, ka fe khel hma khat che ka kutin hlieng ka ti che a, 23 ka liem pha ka kut chu la son ka ta, ka hnung tieng chauh hmu thei i ta, ka hmel ruok chu hmu thei naw ti nih" ta.

34

1 Chun, LALPAN Mosie kuomah, "A hmaa ang bok kha lung phêk pahni ser la, lung phêk i sukkoi taa thu inziek kha ziekpêk nawk ka ti che. 2 Zîngah zîng tieng siem zo la, Sinai tlângah hung la, tlâng sîpah ka hmaah hung inlang rawh. 3 Tu khomin an zui ding che a ni naw a, tlângah tu khom an inlang ding a ni bok nawh; beram ruol le bawng ruol khom tlâng bula chu tla naw raw hai se, " a ta. 4 Chuongchun, Mosie chun a hmaa ang bokin lung phêk pahni a ser a, LALPAN thu a pêk angin, lung phêk pahni chu a kuta chawiin zîng inhma takin Sinai tlângah a kai a. 5 LALPA chu sùmah a hung tum a, Mosie bula chun a ngîr a, LALPA a nizie a hril a. 6 A hma tienga Mosie a fe pèl lai chun, "Kei hi LALPA, mi lainattu le lunginsiettu, lung inuoi, hmangaina le ringumnaa sip LALPA Pathien, 7 sâng tam tak chunga hmangaina inlangtirtu le an rîtlona hai, helna hai le suolna hai ngaidam hlaktu, amiruokchu thiem loa ruothai chu insuo ngai lo le an pahai suolna leia an nauhai le an nauhai nauhai, suon thum suon lina chen khom hrem hlaktu chu ka nih" tiin a puong a. 8 Mosie chun inrang taka bokkhupin a chawibiek a. 9 "Aw LALPA, tuhin i mit ka tlung takzet a ni chun, LALPA chun mi fepui hrâm raw se. Hnam lulul tak chu an ni ngei el, sienkhom kan rîtlona le suolnahai chu ngaidam la, i ro hluotuah mi pom lul rawh" a ta. 10 LALPA chun, "Ngai ta, nang leh thu ka thlung ding a nih. Khawvel po poa tu hnam chunga khom la thaw ngai lo thil mak chu i mihai hmaah ka thaw ding a nih. I ta dinga thil râpum tak ka thaw ding chu in kawl vela umhai po poin la hmung an tih. 11 Voisuna thu ka pêk che hi zawm rawh. Amor mihai, Kanan mihai, Hit mihai, Periz mihai, Hiv mihai le Jebu mihai chu i hmaa inthokin hnot suok ka tih. 12 I fena ding rama chêng hnamhai leh thuthlung siem lo dingin fimkhur rawh, chuong naw chun nangni lai châng inchang an tih. 13 An maichâmhai sukchim vong unla, an lungphunhai vaw koi vong unla, an pathiennu Asera lem po po phûr thlu vong ro. 14 Pathien dang hrim hrim be naw ro, in LALPA a hming Thîka hi Pathien thîkthusie a ni si a. 15 "A ram mihai leh thuthlung siem lo dingin fîmkhur ro; an pathienhai kuomah inzorar an inhlàn pha chun nangni khom fiel vêng an ti cheu a, an inthawina sa fa ve hlauh rawi in tih. 16 In naupahaiin an naunuhai an nei chun, an pathienhai kuoma an inzor pha in naupahai khom an thil chîng chu thaw ve dingin thuoi lût ve pal rawi an tih. 17 "In ta dingin sung chop pathien insiem naw ro. 18 "Chol thang lo Bei Kùt in hmang hlak ding a nih. Thu ka pêk ta cheu ang khan, ni sari sûng chu chol thang loa siem bei chauh in fâk ding a nih. Hi kût hi Abib thlaa a hun ruota ngei in hmang ding a nih. Abib thla chu Aigupta in suoksan thla kha a nih. 19 "Sul kêu hong hmasa tak chu ka chan a nih, in ran vai, beram ruol le bawng ruol laia a chal pieng hmasa takhai khom. 20 Sabengtung pieng hmasa tak chu beramtein intlan unla, in intlan naw chun a nghawng suktliek ro. In nau pasal pieng hmasa tak chu in intlan ding a nih. Ka hmaah tu khom kut ruokin an hung inlang ding a ni nawh. 21 "Ni ruk sûng sin thaw unla, a ni sarinaa ruok chu chawl ro. Lo kei hun le bu sîk huna khom chawl hlak ro. 22 Bu in tharsuok hmasa takin Chawlkar Kût hmang unla, in buhai in hlu lût vong pha leh Pawl Kût hmang bok ro. 23 "I mihai laia pasal po po chu LALPA, Israel Pathien hmaah kum tin voi thum an hung inlang zie ding a nih. 24 In hmaa hnam danghai chu hnot suok ka ta, in ram zauh lien pei ka ta, LALPA in Pathien hmaa inlang dinga kum khatah voi thum in hang fe changin tu khomin in ram chu hung lâk tum naw ni hai. 25 "Ka kuoma thisen in hung inhlàn pha leh, chol thanga siem thil ieng khom inhlàn sa naw unla, Fekân Kùt inthawina sa khom a zînga chen in sie ding a ni nawh. 26 "In lo tharsuok laia a tha tak ngot chu LALPA in Pathien inah in hung chawi ding a nih. Kelte sa chu a pui nenetuiin in suong ding a ni nawh, " a ta. 27 LALPA bok chun Mosie kuomah, "Hieng thuhai hi ziek thla diem rawh, hieng thuhai dungzui hin a nih nang le Israel kuomah thu ka thlung chu nih" a ta. 28 Mosie chu LALPA bulah bu fa lo le tui dawn loin ni sawmli le zân sawmli a um a, a lung phêk chawia chun thuthlungna thu, Thupêk Sawm chu a lo ziekpêk a. 29 Tlânga inthoka thuthlung inziekna lung phêk pahni chawia Mosie a hung kìr chun, LALPA leh an inbiek leia hmêl èng a put chu a hriet dêr nawh. 30 Aron le Israelhaiin Mosie hmel èng an hmu chun an pan hnai ngam naw a. 31 Sienkhom, Mosie chun anni chu a ko a, Aron le khawtlâng hotuhai chun an hung hnai a, a lo inbiekpui a. 32 Chu zoah Israel mipuihai khom chun an hung pan hnai a, LALPAN Sinai tlânga thu a pêkhai po po chu a lo pèk sawng a. 33 Anni a biek zoin Mosie chun a hmai chu hmaidierin a'n khum a. 34 Amiruokchu, LALPA be dinga Puon ina a lût sûng po a hmai inkhumna chu a hlîp hlak. A hung suok pha leh LALPA thupêkhai chu Israelhai kuomah a hung hril a, 35 mipuiin a hmêl èng an hmu hlak a. Chu zoah LALPA inbepui dinga a lût nawk hma po chu hmaidier a khum nawk hlak.

35

1 Mosie chun Israel thla sûngkuohai po po chu a ko khawm a, an kuomah, "Hieng hi in thaw dinga LALPA thupêk chu a nih. 2 Ni ruk sûng sin thawnain hmang in ta, a ni sarina ruok chu in ta dinga ni ser, LALPA chawl ni Sabat a nih. Tu khom hi nia sin thaw lui chu sukhlum ding a nih. 3 Sabat ni chun in chêngna hmunah hrim hrim mei in inkhùk ding a ni nawh, " a ta. 4 Mosie chun Israel thla pungkhawmhai kuomah, "Hi hi LALPA thupêk chu a nih: 5 'In thil neia inthokin LALPA ta dingin thilpêk hung pe ro. Mani phal ang ang hung chawi ro: rangkachak dâm, tangkaruo dâm, dâr dâm; 6 pat zâi dumpawl, senduk le senlâr dâm, puon zâi inhmi dâm, kèl hmul dâm; 7 beram vun, rong sena nam dâm le tui bawng vun dâm; sitim thing dâm; 8 khawnvara sit ding oliv hriek dâm; hriek nàl phaa pol chi mawsawla le rimtui raw ding dâm; 9 thiempu zakuo dâr bak le awmbela bel ding onik lung le lunghlu dang dang dâm. 10 "Nangni laia kut themthiem po po hung unla, LALPA hril dân angin hieng po po hi hung siem raw hai se: 11 biekbûk le puon in le a'n khumna ding dâm, a man nghetna ding dâm, a bang ding thing phêk dâm, a bangru dâm, a ban dâm, a ban thut dâm; 12 thuthlung bawm le a zawnfung le a chunga zangàina thungpha le a hlietu ding puonzâr dâm; 13 dawkàn le a zawnfung le a hmangruo po po le hlànbei dâm; 14 khawnvar siena le a hmangruohai, khawnvar le a tuia hmang ding hriek dâm; 15 rimtui rawna maichâm le a zawnfung dâm, hriek nàla hmang ding hriek rimtui le rimtui raw ding dâm; biekbûk lûtna kota zar ding puonzâr dâm; 16 pumraw inthawina maichâm le dâr lên inphanhai, a zawnfung le bûr le bêlhai dâm; dâr maihùn le a thut dâm; 17 tuolpûka zar ding puonzâr le a banhai le a thuthai dâm; tuolpûk kota zar ding puonzâr dâm; 18 biekbûk puon in le a tuolpûk puon in kil dèna hmangruohai le hruihai dâm; 19 hmun thienghlima rongbawlnaa hmang ding silfèn mawi tak taka khawnghai, thiempuhaiin rong an bawl huna hàk ding thiempu Aron silfèn thienghlim le a naupahai silfèn dinghai dâm" a ta. 20 Israel thla pungkhawmhai chu an tìn dar ta a. 21 Lungrila pêk nuomna neihai chun Intuokna Puon in le chu taka rongbawlna hmangruo ding le silfèn thienghlim siemna dinghai chu LALPA hmaah an hung chawi a. 22 An phal ang taphot chu a nuhmei a pasalin rangkachak bânbun dâm, nabe dâm, suoi namna kutsebi dâm, thi dâm le incheina belmawi tinrêng dâm le rangkachak tlang dâm hung pein, LALPA hmaah thên thilhlànahs an hung inhlàn a. 23 Chun, pat zâi dumpawl, senduk le senlâr dâm, puon zâi inhmi dâm, kèl hmul dâm, beram vun, rong sena nam dâm, tui bawng vun dâm le an nei taphot chu, an hung chawi khawm bok a. 24 Tangkaruo le dâr pe nuomhai chun LALPA kuomah an hung pêk a, sitim thing neihai chun an nei ang ang chu an hung chawi bok a. 25 Pat them thiem nuhmei po poin pat an kher a, chuong an pat kher a dumpawl, a senduk le a senlâr dâm, pat zâi inhmi dâm chu an hung chawi a. 26 Kèl hmul kher thiem nuhmeihai chun phùr takin an kher a. 27 An hotuhai chun thiempu zakuo le a awmbela hmang dingin onik lung le lunghlu dang dang an hung thaw khawm a. 28 Mawsawla le khawnvara sit ding oliv hriek dâm, hriek nàla hmang ding hriek rimtui le raw ding rimtui dâm an hung chawi bok a. 29 Chuong ang chun, LALPAN Mosie kuoma siem ding le thaw dinga a ti taphothai siemna dingin Israel mi, a nuhmei a pasalin mani lungril puok suok ang peiin LALPA kuomah thilpêk an hung chawi khawm a nih. 30 Chun, Mosie chun Israelhai kuomah, "Ngai ta u, Juda hnama mi Hur naupa Uria, chu naupa Bezalel chu LALPAN a thlang a, 31 ama chu chemkalna, theina le hrietna nei ding le kong tinrênga kut themthiemna nei dingin Pathien Thlarauin a sung sip a, 32 rangkachak le tangkaruo le dâr hmanga mawi taka thil siem dân ding riruong thiemna dâm, 33 thiem taka lungmantam kera mawi taka zep thiemna dâm, mawi taka thing chei thiemna hai le ze mawi hrang hrang siem thiemna hai dâmin a'n thuom a nih. 34 Ama le Dan hnama mi Oholiab, Ahisamak naupa chu mi danghai zirtir thiem theina a pêk bok a. 35 Anni chu thil tinrêng thiem taka siem thiemna dâm, thaw ding thiem taka riruong lawk theina dâm, pat zâi dumpawl, senduk le senlâr le puon zâi inhmi hmanga ze mawi taka khawng thiemna le thui thiemna dâm nei dingin lungril varnain a sung sip a.

36

1 "Chuong ang chun, LALPAN thu a pêk ang tak chu zuia a hmun thienghlim an bawl theina dingin Bezalel le Oholiab le mi danghai chu themthiemna le theina le a thaw dàn ding hriet theina chu LALPAN a pêk a nih" tiin a hril a. 2 Mosie chun Bezalel le Oholiab le mi themthiem ruol, LALPAN theina a pêk le phûr taka thaw dinga inpe nuom taphothai chu a ko khawm a. 3 Biekbûk bawlna dinga Israelhaiin thilpêk an hung pêk khawm po po chu themthiemhai kutah Mosie chun a pêk suok a. Chun, tûk tinin mipuihai chun anni lungril puok suokin thilpêk an hung inhlàn sap pei bok a. 4 Chuongchun, biekbûk bawla sinthaw themthiemhai chun an sinthaw lai chu màksanin Mosie kuomah an fe a, 5 a kuomah, "LALPAN thu a pêk anga bawl zo vong theina khop nèka tam hiel mipuiin thilpêk an hung chawi khawm tah" tiin an va hril a. 6 Chu phing leh Mosie chun, "Tu khom a nuhmei a pasalin biekbûk bawlna ding thilpêk hung chawi ta naw ro" tiin an riebûka chun tlâng a'n samtir a. 7 An mamaw nèka tam hiel biekbûk bawlna ding hmangruo an nga tàk leiin hung pe sap ta lo dingin an indangkîr a nih. 8 Sinthawhai laia mi themthiemhai chun biekbûk puonzâr ding thlè sawm, pat thlûr dumpawl, senduk le senlâra khawng, puon khawng thiemhaiin cherubim lim thiem taka an zep chu an siem a. 9 Puonzâr tin chu a dung meter sawmpahnia sei le a khang meter hnia lien vong a nih. 10 Puonzâr thle nga chu an thui zom a, a dang thlè nga khom chu an thui zom bok a. 11 Puonzâr zom khat hmor tlânga chun a naval ding a dumpawlin an siema, chuong ang bokin zom danga khom chun an siem bok a. 12 Puonzâr zom khata chun a naval sawmnga a um a, zom danga khom chun sawmnga an um bok a, a navalhai chu inep tuo vonga siem a nih. 13 Chu zoah rangkachakin a chep dèna ding sawmnga an siem a, a chepna chun a naval tinah an chep de a, biekbûk chu pindan pakhat a hung ni ta a. 14 Chun, biekbûk chung inkhumna dingin kel hmul puonzâr sawmpakhat an siem a. 15 Puonzâr thlè tin chu a dung meter sawmpathuma sei le a khang meter hni senga lien a na, puonzâr thlè sawmpakhat chu an inchen vong a nih. 16 Puonzâr thlè nga chu an thui zom a, puonzâr thlè ruk dang khom chu an thui zom bok a. 17 Puonzâr zom khat hmor tieng tlànga chun a naval sawmnga an siema, chuong ang bokin puonzâr zom danga khom chun an siem bok a. 18 Chun, dârin a chep dèna ding sawmnga an siem a, a naval tin ve veah puonzâr pahnihai chu an chep de a, biekbûk chu pindan pakhat a hung ni ta a. 19 Chun, beramchal vun, rong sena nam chun puon in chung chu an inkhum a, chu chunga chun tui bawng vunin an inkhum nawk a. 20 "Biekbûk banga intung dingin sitim thing phêk tlûn tak a rem khawm a. 21 Thing phêk an remhai chu a dung meter lia insâng, a khang centimeter sawmruk paruka hlai seng a nih. 22 Bang phêk tin sîr ve ve chu a bulthuta inphun thei dingin a hmor sir ve ve sak zum vong a nih. Chuong anga a hmor sakzum pahni chu phêk tinah an siem vong a. 23 Biekbûk sim songa chun bang phêk sawmhni an phun a, 24 a thuta hmang ding tangkaruoin bulthut sawmli an siem a, bang phêk tinah bulthut pahni pei a um a, chu taka chun bang phêk tinah a sir hmor sakzum pahni chu an phun a. 25 Biekbûk hmar songa ding khomin bang phêk sawmhni an siem a, 26 a bulthut ding tangkaruoin sawmli an siem bok a, bang phêk tinah bulthut pahni pei a um, chu taka chun a bang phêk hmor sakzum chu an phun a. 27 A sîr kil, biekbuk thlang tienga dingin bang phêk paruk an siem a, 28 a kila dingin bang phêk pahni an siem bok a. 29 Hi a sîr kila thang bang phêk pahni hi a thuta inthoka a lêr chena kil kop a nih. 30 Chuongchun, bang phêk pariet inphunna ding a bulthut sawmparuk chu tangkaruoin an siem a, a bulthut pahni pei chu bang phêk pakhat peiah an hmang a nih. 31 "Chun, a bangru ding sitim thing tluonin tlar nga an siem a, 32 chu chu sir tinah tlar nga an inbûk a. 33 A bangru lailung tak chun biekbûk bang sir tuok chun a man khawm a. 34 Bang phêk po po chu rangkachak tuia inluon vong a nih. A bangru rolna ding rangkachak naval an siem bok a. A bangru po po chu rangkachak tuia inluon vong a ni bok. 35 "Biekbûk puonzâr ding chu patzâi inhmi thlur kop, a dumpawl, a senduk le senlâr inpola siem, puon khawng thiemhaiin cherub lim thiem taka an zep a nih. 36 A zarna dingin sitim thing ban pali, rangkachak tuia inluon chu an siem a, a thut dingin tangkaruo phêk pali an siem a, puon zâr khaina ding rangkachak kuol an siem bok a 37 Biekbûk lûtna kotkhàra zar dingin patzâi inhmi thlur kop, a dumpawl, a senduk le a senlar inpola khawng, puon khawng thiemhai kutsuok an siem a, 38 puonzâr khaina dingin sitim thing ban panga le a khaina kuol, rangkachak tuia inluon vong chu an siem a. Ban panga thuta hmang ding dâr phêk panga an siem bok a.

37

1 Bezalel chun sitim thingin Thuthlung Bawm a siem a, a dung chu meter khat le centimeter sawma sei, a khang chu centimeter sawmruk le paruka lien le a'n sângzie chu centimeter sawmruk le paruk a nih. 2 A sûng tieng le puo tieng chu rangkachak hlîr tuia inluon suok vong a na, a tlâng chu a vela rangkachaka kawm vong a nih. 3 A zawnfung rol lûtna dingin rangkachak naval pali a sung a, bawm sîr khing tieng khing tieng chun pahni ve ve a'n bûk a. 4 A zawnfung dingin sitim thing tluon pahni a siem a, rangkachak tuiin a'n luon khum a. 5 A zawnfunghai chu a khing a khinga rangkachak naval a'n bûka chun a rol lût ve ve a. 6 Rangkachak hlîrin zangàina thungpha sìn, a dung meter khat le centimeter sawma sei, a khang centimeter sawmruk le paruka lien a siem bok a. 7 A sìn hmawr tieng ve vea chun rangkachaka siem cherub lim, a sera ser chu a'n ngìrtir a. 8 A hmawr khing tieng chun cherub pakhat a ngìr a, a khing tieng hmorah pakhat dang a ngìr bok a, an ke chu zangàina thungpha sìn leh sakhata inzom a nih. 9 Cherubhai chun thla an zâr a, an thla chun Thuthlung Bawm sìn chu a zâr khum a. Inhmatonin an ngìr a, zangàina thungpha sìn chu an bi ve ve bok a. 10 Chun, sitim thingin dawkàn a siem a, a dung centimeter sawmriet le parieta sei, a khang centimeter sawmli le palia lien, a'n sângzie centimeter sawmruk le paruk a nih. 11 Chu chu rangkachak hlîrin a'n luon khum vong a, a tlâng chu rangkachakin a kawm vong bok a. 12 Millimeter sawmsari le pangaa lienin a kawm a siem a, chu chu rangkachakin a tlâng kawm vong a. 13 A zawnfung rolna ding rangkachak naval pali a sung a, 14 dawkàn kawm sîra chun a'n bûk a. 15 A zawnfung chu sitim thingin an siem a, rangkachak tuiin a'n luon a. 16 Chu taka hmang ding chun rangkachak hlîrin thleng dâm, berbu dâm le uoiin thilhlàn bun thlàkna ding no tung dâm an siem a. 17 Chun, rangkachak hlîrin khawnvar siena a siem a, a ngul le a bulthut chu a sera ser ngot a na, a lu bawk hai, pâr kumùm lai le vul lai lim hai le chun rangkachak tlang khata inthoka ser zom vong a nih. 18 A ngula inthok chun kau rukin a pêng suok a, sîr khatah kau thum, sîr khing tieng kau thum indotin a um thlie a. 19 A kau hmawr sîp, a lu chu ruon pâr lim, no rei parh ang a na, a kuonga chun ruon pâr kumum lai le pâr lai lim pathum a um a; chuong ang bok chun khing tieng kaua khom chun a um bok a. 20 Khawnvar siena ngul sîpa chun a lu bawk a um a, chu hnuoia chun a kumum lim le a pâr vul parh lai lim pali a um a. 21 Chuonghai chu zâr chunghnung le hnuoihnung pêngna inkâr ngula um a nih. 22 A kumum le kauhai chu a ngul le a thut leh rangkachak hlîra ser zom vong a nih. 23 Chun, chu taka sie ding chu khawnvar pasari a siem a, khawnvar phita chep ruolna le hmangruo danghai khom rangkachak hlîra siem vong a nih. 24 Khawnvar siena le a hmangruo po po siemnain rangkachak hlîr hlak kilogram sawmngat vel a hmang zo a nih. 25 Sitim thingin rimtui rawna maichâm kil li nei, a dung centimeter sawmli le panga, a khang centimeter sawmli le panga bok, centimeter sawmkuoa insâng a siem bok a, a kila a kihai le chun sakhata inzom vong a nih. 26 A chung le a sîr po po le a kihai chu rangkachak hlîr tuiin a'n luon a, a ko tlâng sir tuokin rangkachakin an kawm vong bok a. 27 A zawnfung rolna ding a tlâng sîr hnuoi puo tieng ve veah rangkachak naval a'n bûk a. 28 A zawnfung khom sitim thingin a siem a, rangkachak tui an inluon khum a. 29 Chun, hriek nàl chi, hriek thienghlim le raw chi rimtui inhnik tak el chu rimtui siem thiemhaiin an siem bok a.

38

1 Sitim thingin maichâm kil li nei, a dung meter hni le centimeter hni, a khang meter hni le centimeter hni le a'n sângzie meter khat le centimeter thum a siem a. 2 Maichâm kil tinah a kî a siem a, maichâm le a kihai chu an inzom vong a, dâr tuiin a'n luon vong bok a. 3 Maichâm hmangruo bûr le bêl po po, vutluo le vut siena bêl hai, thil thènaa hmang maihûn hai, sa thurna thir haihaw hai le hme suongna bêl hai chu dâra siem vong a nih. 4 Maichâm chung zawl le a hnuoi inkâr lailunga zar ding dâr lèn a siem a. 5 Dâr lên inbûkna sîr ve vea chun a zawnfung rolna ding dâr naval a sung chu a'n bûk a. 6 Sitim thingin maichâm zawnfung a siem a, dâr tui a'n luon a, 7 zawnfung chu maichâm sîr khing ve vea navala chun a rol lût a. Maichâm chu thingphêkin a'n huon a, a lai chu a kawrongin an sie a. 8 Intuokna Puon in lûtna bula rongbawltu nuhmei ruol dârthlalang thaw khawma inthok chun dâr maihùn le a thut an siem bok a. 9 Chu zoah biekbûk inhuon sûngah tuol zawl a siem a, sim tienga mi chu meter sawmli le palia sei a na, puon zâi inhmia khawng puonzâr a zar a. 10 Ban sawmhni le ban inthutna ding dâr phêk sawmhni a siem a, ban tina chun tangkaruoa siem puonzâr bàngna kuoi le thlung nghetna a um a. 11 Hmar song tieng khom chu meter sawmli le palia sei a na, ban sawmhni le ban inthutna ding dâr phêk sawmhni bok a um a, ban tina chun tangkaruoa siem puonzâr bângna kuoi le a thlung nghetna a um seng bok a. 12 Thlang tieng tuolpûk chu meter sawmhni le pahnia lien a na, puonzâr an zar a, ban sawm le a thut sawm a um a, ban tinah tangkaruoa siem puonzâr bângna kuoi le a thlung nghetna a um vong a. 13 Suo tieng, nisa suokna tieng khom chu meter sawmhni le pahnia lien a nih. 14 Meter ruk le centimeter ruka sei puonzâr le ban pathum le a thut pathum chu a lûtna sîr khing tieng chun a um a, 15 khing tieng panga khom chun meter ruk le centimeter ruka sei bok puonzâr le ban pathum le a thut pathum a um bok. 16 Tuol kot huol vela an zar puonzârhai chu pat zâi inhmi thlùr kopa mawi taka khawng a nih. 17 A ban thuthai chu dâra siem a na, a bana a kuoi le a thlung nghetna po po chu tangkaruoa siem a na, a ban sîp hmawr po po chu tangkaruoa inluon khum a na, tuol zawl ban po po chu tangkaruoa tuom mawi vong a nih. 18 A tuolzawl lûtna kota puonzâr chu pat zâi inhmi tak thlùr, a dum pawl, a sen duk le a sen lâr inpola khawng, puon khawng thiemhai kutsuok a na, meter kuoa sei le a tuolpûk puonzâr ang boka meter hnia insâng a nih. 19 Ban pali le dâra siem thut pali a nei a, a bana a kuoina le a thlung nghetna po po chu tangkaruoa siem vong a na, ban sîp hmawr po po chu tangkaruoa inluon vong a nih. 20 Biekbûk puon in le a tuol inhuonnaa a kil dèna po po chu dâra siem vong a nih. 21 Hienghai hi biekbûk, thuthlung biekbûk bawlnaa an hmangruo hmang zât, Mosie thupêk anga thiempu Aron naupa Ithamar inrawina hnuoia Levi chihaiin an inchikhai chu a nih. 22 Juda hnama mi Hur naupa Uria, chu naupa Bezalel chun LALPAN siem dinga Mosie kuoma thu a pêk po po chu a siem vong a. 23 Ama le thok chu Dan hnama mi Ahisamak naupa Oholiab, thil ziek thiem, kut themthiem, pat dumpawl, senduk le senlâr le pat zai inhmi tak hmanga puon khawng thiem a nih. 24 Hmun thienghlim bawlna dinga thèn thilhlâna rangkachak an pêk po po chu hmun thienghlima bûkna an hmang angin kilogram sângkhat a nih. 25 Intiemnaa thang tahai poin tangkaruo an pêk zât chu kilogram sângthum le zali le sawmthum a nih. 26 Chu chu, kum sawmhnia inthoka a chung tieng tiem po pasal nuoi ruk sângthum le zanga le sawmnga haiin hmun thienghlima shekel an pêk zât le inhen char a nih. 27 Biekbûk ban le puonzâr ban thuta hmang dinga tangkaruo an sung po po zât chu kilogram sângthum le zali a na, a thut pakhat peiah kilogram sawmthum le pali a lût a nih. 28 A bana thil bângna le ban hmawr inluonna le a zem nghetnaa tangkaruo Bezalal-in a hmang po po chu kilogram sawmthum a nih. 29 Thèn thilhlàna dâr an inhlàn po po chu kilogram sânghni zali le sawmhni panga a nih . 30 Chuonghai chu Intuokna Puon in ban thuta dâm, dâr maichâm le dâr lên inphan le a bûr le bêl po po siemnaa dâm, 31 biekbûk tuol zawl inhuonna ban thuta dâm, a kot ban thuta dâm, biekbûk puon in le a tuol zawla puonzârhai kil dêna dàma hmang a nih.

39

1 Chun, Mosie kuoma LALPA thupêk angin, pat dumpawl, senduk le senlâr hmangin hmun thienghlima rongbawltu thiempuhai silfèn ding mawi takin an siem a, Aron ta dingin silfèn thienghlim an siem bok a. 2 Efod chu pat zâi inhmi thlùr kop, a dumpawl, senduk le senlâr hmangin an siem a. 3 Rangkachak chu inphân takin an sut pèr a, pat dumpawl, senduk le senlâr le zep dingin inhmi takin an chik thler sang a. 4 Dàrbak pahnih an siem a, efod kila chun a hmor chu an tingmit a, chu chun a man nghet a nih. 5 Kawnga efod hrên dena ding, efod ang chie an siem a, Mosie kuoma LALPA hril angin, chu chu efod le khawng inzom a nih. 6 Chu taka chun onik lung pahnihai chu rangkachaka a phûmna khuor an siema chun an phûm lût a, a chunga chun lunghlu ker thiemin suoi namna ding mawi taka a ker angin Jakob nauhai hming sawmpahni chu an ker a. 7 Mosie kuoma LALPA hril ang takin, chu lung chu Israel nauhai hriet zingna lungah efod dàrbaka chun rangkachak zâiin an phan de a nih. 8 Mi themthiem tak kutsuok anga thiemin, efod ang bokin rangkachak zâi le patzâi inhmi thlùr kop, a dumpawl, a senduk le a senlâr hmangin awmbel an siem a. 9 Awmbel chu a dung le khang centimeter sawmhni le pahni ve ve, a thuoa thlep phaa kil li nei a nih. 10 Chu taka chun lungmantam tlar li an zep a. A tlar hmasa taka chun rubi, topaz le beril lung a um a, 11 a tlar hninaah torkuis, safir le emeral lung a um a, 12 a tlar thumnaah jasin, agate le amethi lung a um a, 13 a tlar linaa chun krisoli, onik le jaspi lung a um. Chu lunghai chu rangkachak zâiin an zem khum a. 14 Lung po chu sawmpahni a na, lung tina chun Israel thlahai hming an ker seng a, lung tin chu Israel hnam sawmpahnihai suoi namna lung ang a nih. 15 Awmbel khit dena dingin rangkachak hlîr zâi chu her thlopin an hruol bok a. 16 Lungmantam phumna rangkachak khuor pahni an siem le rangkachak naval pahni an siem chu awmbel kil chung tieng an inbûk ve ve a. 17 Rangkachak khaidiet her thlop chu awmbel sîr ve vea rangkachak navala chun an thlung a. 18 A hmor khing tieng chu lungmantam phûmna rangkachak khuor pahni le chun an thlung zom a; awmbel thlungna chu efod dârbak hma tienga inthlung a nih. 19 Rangkachak naval dang pahni an siem a, awmbel kil hnuoi tieng, a sûng tieng, efod depah an inbûk a. 20 Chun, rangkachak naval dang pahni an siem bok a, chuonghai chu efod dàrbak bul tieng inbelna laia kawnghren chungah an inbûk a. 21 Mosie kuoma LALPA hril ang takin, awmbel chu inphaw hawk loa kawnghren chunga a kop thlap theina dingin awmbela rangkachak naval le efod-a rangkachak naval chu pat dumpawlin an sui mat a. 22 Efod hnuoia hâk ding korfuol an siem chu puonkhawngtuhaiin a dumpawl hlaka pat an khawng a nih. 23 A lai taka chun lu thunna ding an chep awng a, a rei inek nawna dingin am kîm vong a. 24 Zakaw fuol hmor tlânga chun pat zâi dumpawl, senduk le senlâr hmanga siem theibufai lim a vel tuokin an bel a. 25 Rangkachak hlîrin telneng an siem a, theibufai lim le rangkachak telnênghai chu inkarthlakin an khai a. 26 Chu thuom, a hmor tlânga telneng le theibufai lim inkârthlàka khai chu Mosie kuoma LALPA thupêk anga biekbûka rongbawlnaa hâk dinga siem a nih. 27 Puonkhawng thiem ruoiin, Aron le a nauhai ta dingin pat zâi inhmia inthoka khawng puon hmangin korfuol an siem a, 28 lukawm dâm, dierkhim dâm le kekor ding dâm khom an siem bok a. 29 Mosie kuoma LALPA hril ang takin thil thui thiemhaiin patzâi inhmi thlùr kopa an khawng a dumpawl, senduk le senlâr hmangin, mawi takin cheizemu an siem bok a. 30 Chun, rangkachak hlîrin chala hrên ding rangkachak phêk an siem a, chu taka chun suoi namnaa an ker ang elin, LALPA PUOL ti an ker a. 31 Mosie kuoma LALPA hril ang takin thiempu lukawm hma tieng chun pat hruol dumpawlin an khit de a. 32 Chuongchun, Intuokna Puon in biekbûk bawlna ding sin po po chu zo fel a lo ni ta a. Mosie kuoma LALPA thupêk ang charin Israelhai chun an thaw a. 33 Chu zoah biekbûk ding chu Mosie kuomah an hung tol a: puon in le a hmangruo po po, a cheina hmangruo hai, a chep nghetna hai, a bang phêk hai, a bangru hai, a ban hai, a ban thut hai; 34 a chung khum ding beramchal vun, rong sena an nam hai, tui bawng vun hai, daidanna puonzâr hai; 35 Thuthlung Bawm le a zawnfung hai le zangàina thungpha hai; 36 dawkàn le a hmangruo po po le hlànbei hai; 37 rangkachak hlîra siem khawnvar siena le khawnvar sie tlar ding hai le a hmangruohai, khawnvar tuia hmang ding hriek hai; 38 rangkachak maichâm hai, hriek nàla hmang ding hriek rimtui hai, rimtui raw ding hai, puon in lûtna kota zar ding puonzâr hai; 39 dâr maichâm le dâr lên inphan hai, a zawnfung hai, dâra siem bûr le bêl hai, maihùn le a thut hai; 40 biekbûk tuolzawla zar ding puonzâr hai, a ban le thut hai, tuolpûk lûtna kota zar ding puonzâr hai, tuolpuka puonzâr keina hrui le a kildena hai, biekbûk cheina hmangruo po po hai; 41 hmun thienghlima rongbawlna ding silfèn mawi taka khawng hai, thiempu Aron le naupahaiin thiempu rong an bawl huna an hàk ding silfèn thienghlim hai dâm a nih. 42 Chuong thilhai chu Mosie kuoma LALPA thupèk ang charin Israelhai chun an siem a. 43 Mosie chun a lo endik a, LALPA hril ang charin an thaw ti a hmu a. Chuongchun, anni chu Mosien mal a sawm a.

40

1 LALPA chun Mosie kuomah, 2 "A thla khatna ni khatnaah Intuokna Puon in biekbûk chu inngîr rawh. 3 A sûngah Thuthlung Bawm chu sie la, puonzârin hlie khum rawh. 4 Dawkàn la lût la, a umna ding taka chun sie rawh. Khawnvar siena la lût bok la, a khawnvarhai inbûk rawh. 5 Rimtui rawna rangkachak maichâm chu Thuthlung Bawm hmaah sie la, biekbûk lûtna kotah puonzâr zar rawh. 6 "Biekbûk lûtna kot hmaiah pumraw inhlànna maichâm chu innghat la, 7 maihùn chu Intuokna puon in le maichâm inkarah sie la, tui sie bok rawh. 8 Biekbûk tuolpûk ding a vêlin rem la, tuolpûk lûtna kota chun puonzâr zar rawh. 9 "Hriek nàl chi chawi la, biekbûk le a sûnga um po po chu hriek nàl la, a cheina thilhai chenin inhlan thienghlim vong la, chuongchun hung thienghlim a tih. 10 Chu zoah pumraw inhlànna maichâm le a bûr le bêl po po nàl la, maichâm chu inhlàn thienghlim la, chuongchun hung thienghlim a tih. 11 Maihùn le a thut chu hriek nàl la, inhlàn thienghlim rawh. 12 "Aron le a naupahai chu Intuokna Puon in kotah hung thuoi la, dân angin tui insil raw hai se. 13 Chu zoah Aron chu silfèn thienghlim inhâktir la, hriek nàl la, thiempu nia ka rong a bawl theina dingin inhlàn thienghlim rawh. 14 A naupahai hung thuoi la, korfuol inhâktir tawl rawh. 15 Chuongchun, thiempu sin chu thaw a, ka ta dinga rong an bawl theina dingin, an pa hriek i nàl ang bok khan anni khom hriek nàl ve rawh. Hriek nàl an ni hnung chun an thlahai chen khom thiempu hung ni zui pei tâng an tih" tiin a hril a. 16 Mosie chun LALPA thupêk angin iengkim a thaw a. 17 Chuongchun, Aigupta an suoksana inthoka kum hnina thla hmasa tak le ni hmasa taka chun biekbûk ding chu bawl zo a ni ta a. 18 Mosie chun biekbûk bulthut chu a rem hmasa phot a, a bang phêkhai chu a'n tung a, a bangruhai chu a rol a, a banhai chu a phun a. 19 LALPA thupêk angin, biekbûk chung chu puonin a zar khum a, a chungkhum a'n thuo bok a. 20 Chun, Thuthlungna lungphêk pahni chu a lâk a, Thuthlung Bawma chun a sie a, a zawnfunghai chu a rol lût a, a chunga chun zangàina thungpha chu a sie a. 21 Thuthlung Bawm chu biekbûka chun a hung chawi lût a, LALPA thupêk angin puonzâr a zar khum a, Thuthlung Bawm chu an hlietir a. 22 Mosie chun dawkân chu Intuokna Puon in sûng, biekbûk hmar tieng, puonzâr puo tieng chun a sie a. 23 LALPA thupêk angin dawkàn chunga chun LALPA hmaah hlànbei a sie a. 24 Khawnvar siena chu Intuokna Puon in sûng, biekbûk sim tieng, dawkàn epa chun a sie a. 25 LALPA thupêk ang takin khawnvarhai chu LALPA hmaa chun a sie a. 26 Mosie chun rangkachak maichâm chu Intuokna Puon in sûng, puonzâr hmaa chun a sie a. 27 LALPA thupêk angin maichâm chunga chun rimtui a raw a. 28 Chun, biekbûk lûtna kota chun puonzâr a zar a. 29 Pumraw inhlànna maichâm chu Intuokna puon in biekbûk kot bula chun a sie a, LALPA thupêk angin a chunga chun pumraw thilhlàn le fâk ding thilhlàn chu a'n hlàn a. 30 Maihùn chu Intuokna Puon in le maichâm inkârah a sie a, insawpna ding tui a sie bok a, 31 chu chu Mosie le Aron le a naupahaiin kut le ke sawpna dingin an hmang a. 32 Mosie kuoma LALPA thupêk angin, Intuokna Puon in an lût ding zât le maichâm bula an fe ding zâtin an insawp hlak. 33 Chu zoah Mosien biekbûk le maichâm vela chun tuolzawl a siem a, tuolzawl lûtna kota chun puonzâr a zar a. Chuong ang chun Mosie chun a sin chu a zo ta a. 34 Chu zoah, Intuokna Puon in chu sûmin a hung tuom ta mup a, biekbûk chu LALPA ropuinain a hung hluo sip a. 35 Chuonga sûm a zîng mup lei le LALPA ropuinain biekbûk chu a hluo sip leiin Intuokna puon in sûnga chun Mosie khom a lût thei ta naw a. 36 Israelhai inzin sùng po po chun, sûmin biekbûk a'n kiengsan pha chauh an riebûka inthokin an inson suok hlak. 37 Sûmin a baw sùng chu an fe son ngai nawh. 38 Thlalera Israelhai inzin sùng po po an mithmu ngeiah LALPA sùm chu sùnah biekbûk chungah inzàmin, zânah zânkhuoin meichokin a um hlak.