1

1 Benjamin ram Anathot khuoa thiempuhai laia mi pakhat Hilkia naupa Jeremia thuhai chu a nih. 2 Juda lal, Amon naupa Josia inlala inthoka kum sawm le kum thumnaaha a kuomah LALPA thu a hung tlung a. 3 Juda lal, Josia naupa Jehoiakim inlal lai khomin a hung tlung a; Juda lal Josia naupa Zedekia inlala inthoka kum sawm le kum khatna, thla nganaab Jerusalem mipuihai sala thuoi an ni chen khan, a hung tlung bok a. 4 LALPA thu ka kuomah a hung tlung a, 5 Sûla ka'n din hmâ chè khan, Ka lo hriet dai ta che a, Sûla inthoka i suok hmâin, Ka lo ser hran ta che a, Hnamhai kuoma zawlnei dingin, Ka lo ruot ta che a nih" tiin. 6 Kei chun, "E khai, Chunghnungtak LALPA, tong dàn khom ka la thiem nawh, naupang ka la ni si a" ka ti a. 7 LALPA ruok chun ka kuomah, " 'Ka la naupang' ti naw rawh. Ka tirna chê taphot kuomah fêng i ta, hril dinga thu ka pêkhai chè chu i hril ding a nih. 8 San suok pei ding chein i kuomah ka um ding a ni leiin anni chu ti dêr naw rawh" a ta. 9 Chun, LALPA chun a kutin ka bau a hung them a, "Tu hin ka thuhai chu i bauah ka sie ta a. 10 Ngài ta, hnamhai le lalramhai chu phawi a, thiek a, suksie a, pei thla a, siem tha a, indin dingin ka ruot che a nih" tiin a mi hril a. 11 LALPA thu chu ka kuomah a hung tlung a, "Jeremia, iem i hmu a?" a ta. Kei chun, "Ruon thing kau zàr ka hmuh" ka ta. 12 LALPA chun, "I hmu indik ie, ka thu hlen dàn ding ka melkâi zing a nih" a ta. 13 LALPA thu chu ka kuomah a hung tlung nawk a, "Iem i hmu a?" a ta. Kei chun, " Hmar tienga bêl intlok bor bor ka hmu a, hieng tieng hin a hung so liem têp a nih" ka ta. 14 LALPA chun, "A rama chênghai po po chungah hmar tienga inthokin sietna a hung tlung ding a nih. 15 Hmar tieng lalrama chêng po pohai hi ka ko suok têp tawl an tah" a ta. "An lalhai chu hung an ta, Jerusalem kotkhàr bulah, An lalthungpha hung rem an ta, A bang po po chu inhuol an ta, Judai rama khuo po po khom, Anni chun inhuol an tih. 16 Rilo taka mi màksan a, Pathien dang hmaa rimtui inhlàn a, An kuta siem an biek leiin, Anni chu ka hrem ding thu, Ka hung puong lang ding a nih. 17 "Chuleiin, insiem zo nghal rawh. Ngîr suok la, hril dinga thu ka pêkhai che chu an kuomah va puong rawh. An hmaah zâm dèr naw rawh, chuong naw chun an hmaah sukzâm ka ti che. 18 Voisun hin a ram puma Juda lal le hotuhai, thiempuhai le mipuihai chu ep dingin khawpui kul nghet tak nei, thîr ban le dâr bang nei angah ka siem che a nih. 19 Bei an ti che a, sienkhom hnè nawng an ti che, kei i kuomah ka um a, san suok ka ti che" ti hi LALPA thu suok a nih.

2

1 LALPA thu ka kuomah a hung tlung a: 2 Fe la, Jerusalem hriet ngeiah, Hieng thuhai hi puong dar rawh:'I tleirawl le mo thar laia, I mi suklawm nuomzie kha, Ka theinghil ngai hrim hrim nawh. I mi hmangai êm êm a, Tuk lo ram thlalèra khom, I mi zui hlak a ni kha. 3 Israel chu LALPA ta d'in, Mi thienghlim tak la niin, A tharsuok hmasa a nih; Ama fa ramtuhai chu, Thiem naw changa ruot an na, Sietnain a tlâk buok hlak'Tiin LALPA chun a hril. 4 Nangni Jakob sûngkuohai, Israel thla po pohai, LALPA thu hi lo ngai ro. 5 Hieng hin LALPA chun a hril:"Inthlatuhan keimaah, Ieng am fel nawna hmuin, An mi fesan dai a na?Hmangna bo milem bein, Hmangna boah an insiem a. 6 'Aigupta ram a'nthok a, Thlalèr ram tawl pal tlang a, Ram fil, ruom inthûk kâr a, Thìna hlim le ram tawl hmun, Tu khom inzin ngai nawna, Tu khom chèng ngai nawnaa, Mi thuoi tlangtu LALPA kha, Khaw lai am a um ta a?'Tiin an indon ta nawh. 7 Ram tha le a tharsuokhai, Hnienghnâr taka tlàn dingin, Keiman ka thuoi lùt cheu a, Sienkhom in hung lùt hnungin, A ram in sukporche a, Ka rochan in sukmuolpho. 8 In thiempuhai chen khomin, 'Khaw lam LALPA a um a?'Ti hrimin an indon nawh. Dàn kengkawtuhai khomin, Keima an mi hriet naw a, Thuoituhai ka lakah an hel. Zawlneihan Baal hmingin, In kuomah thu an hril a, Milem hmang lo an zui a. 9 "Chuleiin khing ka ti cheu, In nauhai thlahai chen khom, Ka khing pei ding cheu a nih, Tiin LALPA chun a hril. 10 Kittim thlierkàrah fein, A kamhai zu fang ta u'm; Kedarc chen mi tir unla, Ngun takin bi chieng hai sien, Hieng hi an thaw hlak hrim am, Ti dâm en fie raw hai se. 11 Pathien tak ni naw sien khom, Hnam danghai chun an pathien, An thlàk mei mei hlaka maw?Ka mihai ruok chun an Ropuina, Milem hmangloin an thlàk si. 12 Vànhai, in pangzat naw maw?Maktiin inthin hawp ro"Tiin LALPA chun a hril. 13 Ka chungah thil suol pahnih, Ka mihaiin an thaw a:Hringna tui kei mi hnawlin, Tuikhur ding an cho fawm a, Tuikhur kak le fâm thla zing, Tui intling thei lo ding chu. 14 Israel chu siehlaw a ni?Vanlunga piengd am a ni?Ieng leia râllâk thila, A'n chang el am an ta a? 15 Sakeibaknei inrûmha'n, An inhûk khum dur dur a, A ram an sukpawn zo a, A khuohai an raw fai a, Hnung son ram an inchangtir. 16 Memfise le Tapanhes-haiin, I lu an vaw kol rìt a. 17 LALPA i Pathien thuoi lai che, Nangin i tlànsan leiin, Hieng thilhai hi i chungah, I'n tlungtir a ni naw maw? 18 Sihorf tuihai dawn dinga, Aigupta tieng i pan hi, Iem a na i hlawkpui ding?Eufretis tui dawn ding a, Asuria-a i fe chu, Iem a na i hlawkpui ding? 19 I rîtlonan hrem a che a, I hnungtolnan zil a ti che. Tìna hlek khom mi nei loa, LALPA i Pathien i tlànsan hi, Ieng ang suol khà am a na, Ngaituoin hre suok ta rawh, "Lalpa, Iengkim LALPA chun a tih. 20 Tiena tlânga inthok khan, I ringkol suktliekpèkin, I khaidiet ka suktan a, Sienkhom, ka rong bawl loin, Tlâng sâng thing buk tin hnuoiah, Milem hmaah bokkhupin, I mi hur hmangsan lem a. 21 Grêp inziet tak ang leTha tak ang ka phun che a, Ieng leia grêp puopaa, I hung inchang am a na? 22 Changala insawp faiin, Sabon innàl teu la khom, Porchè i kaina lai chu, Ka mitah a'n lang zing tho, Chunghnungtak LALPAN a tih. 23 'Porchè ka kai hrim hrim nawh, Baal ka hnot zui ngai nawh'Iengtin am i ti thei a?Ruoma i um dàn en la, I thilthawhai ngàituo rawh. Sanghawngsei hur lai angin, Ram tinah i tlân vêl kha. 24 Ram sabengtung hur laia, A chàkna a suok chàng a, Thli chen a'n hnam hlak angin, Tuin am i chàkna chu, An chel hnè ta ding a na?A hung beiseituhaiin, An zong sawl che ngai loin, Anni i hnot lem hlak si. 25 Ram dang pathienhai hnotin, I kè sukna pha naw la, I dang khom suktawl naw rawh. Sienkhom i poisa naw a, 'Inhrilin a sawt ta nawh, Ram dang pathien ka ngai a, Ka hnot naw thei naw a nih'Tiin i don lem si kha. 26 "Rûkru an man suok pha a, A'n zak êm êm hlak ang hin, Israel sûngkuohai khom, An lalhai le hotuhai, Thiempuhai le zawlneihai, An muolpho vong ta si a. 27 Thing kuomah, 'Ka pâ i nih, 'Lung kuomah 'I nau ka nih'Tituhai chun hnung nghatin, An hmai an mi'n son nuom nawh. Sienkhom, buoina an tuok pha, 'Hung la, mi hung san suok rawh'An ti nawk ang loi bok si. 28 In kutsuok pathienhai chu, Khaw la'm an um zo ta a?Hung san suok raw hai cheu chu!Aw Juda, khuo i nei zàt anga tam, Pathien i nei bok si a! 29 Ieng leia in mi khing am?Ka lakah in hel vong si, "Tiin LALPA chun a hril. 30 "I nauhai chu ka hrem a, Sienkhom ieng khom a sawt nawh, That phana'n an hmang chuong nawh. Sakeibaknei hnukrawl angin, Nangni rawi kawlhnâm ngei chun, Ka zawlneihai a lem hlak. 31 "Nangni tuta ruoltharhai, LALPA thu hi ngaituo ro:Israelhai ta dingin, Thlalèr ka ni am a ni?Thim sa ka chang ta'm a ni?Ieng leia ka mihaiin, 'Kan zalen engthawl ta a, I kuom tieng kîr nawng kan tih'Tia an hril am a na? 32 Nuhmeiin a'n cheinahai, A theinghil hlak am a ni?Mo khomin a mo thuomhai, A theinghil hlak am a ni?Ka mihai ruok chun ni tam, Tiem seng loa sawt hiel chu, An mi lo theinghil ta si. 33 Ngaizawng zawr i va thiem de!Nawchizorhai chen hiel khom, I zirtir thei an ta hi! 34 Mihaiin i silfènahPoi tawk lo le retheihai, Thisen kai chu an hmu a; I in rok naw hai sien khom, I sukhlum tawl a ni kha. 35 Chuong sà khom chun nang ruok chun, 'Ieng khom suksuol ka nei nawh, Ka chungah a lungsen nawh'I la ti ta tàl si a. Thiem changa i'n ngai leiin, I chungah ro rêl ka tih. 36 I um dàn thlâk zung zungin, Ieng dinga mi dawr kuol che?Asuria thaw ang bok khan, Aigupta khoma thawin, La sukzak vèng a ti che. 37 I lua i kut suiin, Chu hmun chu suoksan i tih, Ringsana i neihai chu, LALPAN a hnawl tawl leiin, Hung thangpui nawng an ti che.

3

1 "Miin nuhmei ma sien la, Suokin pasal dang nei sien, A nuhmei chu a ko nawk ding?A ram a sukporchè vong naw ding?Nang khom nawchizor ang elin, Ngàizawng i kop rawn êm êm a, Ka kuomah i kîr nawk ding maw?"Ti hi LALPA thu suok a nih. 2 Tlâng kol lul tieng khi thlîr la, An zalpui nawna che hmun hrim, Khaw lai am a um rêng rèng a?Thlalèra chêng Arab mi angin, Zàlpui ding nghâkin lam sîrah, I thung ngat ngat hlak a ni kha. I hurna le ritlonain, Ram i sukporchè zo ta hi. 3 Chu lei chun ruo a sûr naw a, Thâl ruo hrim khom a sûr naw hi. Chuong sa khom chun hmai suksain, Zakmaw nawchizor ang elin, Inzak hmèl hrim i put naw hih. 4 Tu el khom khan mi hung koin, "Ka naupang laia inthoka, Mi hmangaitu ka Pâ i nih; 5 I lung i suksen zing ding maw?Kumkhuoin a sen el ding maw"Tiin i hung tong a ni kha!Sienkhom a suol theipatawpin, Suol i la thaw zom zing tho" 6 Lal Josia inlal laiin LALPAN ka kuomah, "Hnung tol hmang Israel thilthaw kha i hmu am? Tlâng sâng tinah fein, thing buk tin zàr hnuoiah a uire a. 7 Hieng ang thil a thaw hnung hin ka kuom tieng hung kìr nawk naw ni'm ka lo ti a, sienkhom a hung kìr chuong naw a, a zuorpuinu mi ringum lo Juda khomin a hmu a. 8 Hnung tol hmang Israel chu màkna lekha ka pêk a, a uiretna zozai lei chun ka tir hmang a. Chu chu a zuorpuinu mi ringum lo Juda-in a hmu zing sa khomin a mi tì chuong naw a, a fe suok a, a va uire ve a. 9 Israelhai uiretna chu ienga khom ngai loin, a ram chu sukporchein, thing le lung bul bein a uire a. 10 Chuong sà khom chun a zuorpuinu Juda chu ringum loin a um a, a lungril taka thaw loin ka kuom tieng a hung kìr tehlèm a" tiin LALPA chun a hril. 11 Chun, LALPA chun ka kuomah hieng ang hin a hril a: Mi ringum lo Israel chu a zuorpuinu mi hlêm hmang Juda nêk chun fel lemah a'n ngai a nih. 12 Hi thu hi hmar tieng va puong dar ro:'Mi ringum lo nang Israel, Hung kìr rawh, LALPAN a tih; Mel rum ta naw ning chengah, Zàngai thei tak ka ni si a, Lungsen kumkhuo naw ningah'Ti hi LALPA thu suok a nih. 13 LALPA i Pathien helsanin, Thing buk zâr tin hnuoia hai, Ram dang pathienhai lakah, Indawin i'n phalrài a, Ka thu hril i zawm nuom nawh, Ti hi pomin inpuong rawh"Ti hi LALPA thu suok a nih. 14 "Nangni mi ringum nawhai, hung kìr ta ro" ti hi LALPA thu suok a nih. "Kei hi in pasal ka na, a thlangtu cheu ka nih. Nangni laia mi khawpuia mi pakhat le sûngkuoa inthokin mi pahnih ka thlang ding cheu a na, Zion-ah thuoi ka ti cheu. 15 Ka lung tuok mi berampuhai pêng ka ti cheu a, anni chun hrietna le hriet thiemnain keithuoi an ti cheu. 16 Chu huna nasa taka mi in hung pung pha chun, 'LALPA thuthlung bawm' in kol lai hun kha ngai ta nawng in ta, hre fu ta bok nawng in ta, Thuthlung Bawm siem nawk ngai ta bok naw nih. 17 Chu pha chun Jerusalem chu 'LALPA Lalthungpha' ti hung ni tàng a ta, hnam tinhai chu LALPA hming chawimawi dingin Jerusalemah hung an tih. An lungril suol le lululna chu put zing ta naw ni hai. 18 Chu nia chun Juda sûngkuohai le Israel sûngkuohai chu infin an ta, in thlatuhai hluo dinga ka rochung rama chun hmar tienga inthokin hung tlàng an tih. 19 "Keima ngeiin hieng hin ka hril kha:'Ka nauhai anga en a, Ram ditum tak chu pe a, Hnam tu khom hluo nêka tha, Ram inrochungtir cheu a, Kei mi zui hi ma loa, 'Pâ' tia in mi ko hi, Ka lo beisei hlak a na. 20 Sienkhom, nuhmei ringum lo, Pasal uiresantu angin, Aw, Israel sûngkuohai, In mi uiretsan si a"Ti hi LALPA thu suok a nih. 21 Tlâng kol vula inthoka, Israelhaiin thil ngènaAn tap ri chu ka hriet a, LALPA an Pathien theinghilin, Lam naw tieng an pèt ta si. 22 "Nangni mi ringum lohai, Ka kuom tieng hung kìr ta ro; In hnung tolna lungril chu, Keiin lo sukdam ka tih. ""Ni e, hung kîr ngei kan tih, Kan LALPA, Pathien i nih. 23 Muol le tlânga inthoka, Kan milem biek so ri hi, Inhlèmna vong a lo nih; Nang chu LALPA kan Pathien, Israelhai sandamna, I lo ni takzet si a. 24 Kan tleirawl lai a'nthok khan, Kan thlatuhai inrim ra, Beram ruol le bawng ruolhai, An naupa le naunu chenin, Inzakna hre phâk dèr lo, Milem biekna mei meiah, Kan lo sèng ral hlak si a. 25 Ei muolphona chu silin, Inzak takin zâl ei tiu. LALPA ei Pathien chungah, Eini le ei thlatuhan, Thil suol ei thaw hlak si a; Ei tleirawla inthoka, Voisun hunhai chen khomin, LALPA ei Pathien thu chu, Ei zawm nuom ngai si naw" in tih.

4

1 "Aw Israel, i lamlèt ding a ni chun, Keima tieng hung kìr nawk rawh"Ti hi LALPA thu suok a nih. "I milem tirdakumhai, Ka hmu loah sie hmang a, I pêt hmang ta naw ding chun, 2 Thudik lampui chu hraw a, Indik tak le fel taka, Nun hmang dinga i'n tiem chun, Hring zing LALPA hming sâlin, Hnamhai chu malsawm ka ta, Annin mi chawimawi an tih. " 3 Judai rama mihai le Jerusalem mihai kuomah LALPA chun hieng hin a hril:"In hnuoihai inlet unla, Hling lai thlài chî thlâk naw ro. 4 Nangni Juda mihai leJerusalema chênghai, LALPA-ah ser tan unla, In lungril ser chu tan ro. In tan nuom naw a ni chun, Ka lungsenna chok a ta, Kàng hmât tawl rawi a ti cheu, Tu khom thel ruol ni naw nih. 5 "Judai ramah hril unla, Jerusalemah puong ro:Ram pumah tawtawrawt mûtin, 'Inrêngin hung tlàn khawm unla, Kul nei khuoah tlân lût ei tiu', Tiin inring takin khêk ro. 6 Zion tieng pan dingin hril ro, Himna hmun zongin tlân nghàl ro!Hmar tienga inthokin sietna, Ka hung intlungtir ding a nih, Sietna râpthlâk tak el chu. " 7 A buzawla inthokin, Sakeibaknei a hung suok, Hnamhai suksetu ding chu; A umna a suoksan tah, In ram sukram vong dingin. In khuohai tlu ram a ta, Hluotu tu khom nei naw nih. 8 Chuleiin, saiip silin, Tap le inrûmin khêk ro. LALPA lungsenna râpthlâk chun, Ami la'n kiengsan si naw a. 9 LALPA chun hieng hin a tih: "Chu ni chun, lal le hotuhai lungril zâm a ta, thiempuhai chu thlabâr an ta, zawlneihai pang inzâng a tih. 10 Chun, kei chun LALPA kuomah, "Aw Chunghnungtak LALPA, hieng mihai le Jerusalema mihai hi i hlèm letdèr a ni hi! 'Thlamuong takin um in tih' i ti a, kan rìng le kawlhnâm an inmat ta si hi" ka ta. 11 Chu pha chun hieng mihai le Jerusalem mihai kuomah, "Thlalèr tlâng fila inthokin ka mihai tieng thli lum tak a hrâng a, sienkhom ka mihai zâp fai ding le mût fai dinga hrâng a ni nawh. 12 Thli na tak chu keimaa inthokin hung a tih. Tuhin an chungthu hi keiin rêl ka tih" ti thu inhriettir nîng an tih. 13 Ngai ta, sûmpui angin a hung a, A tawlailirhai khom chu, Thawngaleivir ang a na, A sakor thuoihai khom chu, Mupui vuong nêkin an hràt lem. Ei chung a va hang pik de aw!Ei se let dêr an ta hi! 14 Aw, nang Jerusalem, Sandam i ni theina dingin, I lungril suol sawp fai rawh. Ieng chen am lungril rilo, I la put pei ding a na? 15 Dan le Efraim tlângramah, I siet tuok ding an puong tah. 16 I vêla hnamhai hril la, Jerusalemah puong rawh:'Ram hla taka inthokin, Mi'n huoltu ding an hung a, Judai ram khuo po poah, Indona thu an puong a, 17 Lo vèngtuhai ang elin, Jerusalem an inhuol, Ka chungah an hel leiin'Tiin LALPA chun a hril. 18 I nungchang le thilthawin, Hieng thilhai hi i chungah, A hung intlun a ni hi. Hi hi i hremna tuor chu a na, Nâ khom i ti êm êm a, I lung a sun tlang a ni hih. 19 Aw a na ngei, aw a na ngei!Nâ ti taluo'n ka'n kon a. Aw, ka lung a va hang dong de!Ka lung an inthumhron a, Ka'n rûm naw thei naw a nih. Tawtawrawt ri chu ka hriet, Indo râlkhêl rihai chu. 20 Sietna chungah sietna a tlung, A ram pumin a tlu hmât a, Ka chèngna puon in ngèi khom, Thawk-le-khatin a tlu ram tah. 21 Ieng chen am indo hi hmuin, Tawtawrawt ri ka ngaithlàk ding? 22 "Ka mihai an invèt zo a, Tu am ka nih an mi hriet nawh; Naupang invèt ang an na, Hriet thiemna an nei tlat nawh. Thil suol thaw tieng an balam a, Thil tha thaw an thiem si nawh. " 23 Leihnuoi hi ka zuk en a, Ruongâm bo le ruok a na, Vànah var hrim a um nawh. 24 Tlânghai chu ka hei thlîr a, An inthin dur dur el a, Muolhai chu an inthèn a. 25 Ka ngha vêl a, mi an um nawh, Chunglèng vate po po khom, An vuong hmang zo vong ta si. 26 Ka hang ngha vèl a, ngai ta, Lo hmun thahai po po chu, Thlalèr an inchang vong a, LALPA lungsenna hmaah, Khuohai an tlu ram vong si. 27 LALPA chun hieng hin a tih:"A ram pumin sieng a ta, Sienkhom sukram vong naw ning. 28 Chuleiin, hnuoi ngûi a ta, Vàn khom inthim khup a tih; Ka hril tah chu sût naw ning, Ka rèl tah chu hlen ka tih. 29 Sakor chungchuong mihai leThalngul chawituhai ri hrie'n, Khaw tina mi tlân sieng an tih. A then ram hnuoiah tlân lûtin, A then lungpuiah kâi an ta, Khuohai rausan vong an ta, Hluotu tu khom um nawh. 30 Aw, nang mi roka um nu, Ieng am a na i thaw kha?Puon senlàra inthuomin, Rangkachak incheinahai, Ieng leia i'n bel am a na?Ieng leia i mit dâm kha, I nàl dum vèl am a na?Inchei la khom a sawt nawh. I tlangvàlhan an hnawl ta che, I hringna a nih làk an tum. 31 Nau lutîr hring ding nuhmei, Nau hase tuor inrûm anga, Zion naunu inrùm ri ka hriet; A kuthai chu phar vêlin, "Ka chung a va pik de aw!Tuolthattu kutah ka nun, Pèkin a um ta si a"Tia a khèk lai ri chu.

5

1 "Jerusalem kotthlêra hinA suk a tungin tlân vèl la, Tuolzawlahai zong vong la, Indik taka thilthaw hlak, Thutak zong mi pakhat bêk, I hmu pal hlauh a ni chun, Hi khuo hi ngaidam ka tih. 2 LALPA hringna sâlin thu, Intiemin inkhâm sien khom, Khêlin an inkhâm zing tho. " 3 Aw LALPA, thutak i zong a, I vuok tawl a, nâ an hriet nawh, I rawt nawi, an sim chuong nawh. Lung thìr nêk a chang hielin, An hmèlhai an sukrum a, Sim an tum chuong dêr naw. 4 Kei chun, "Mi pasie an ni a, An mawlin an invêt bok a, LALPA lampui an hriet naw a, Pathienin an thaw vè dingaA tuk chin khom an hriet nawh. 5 An thuoituhai kuomah fein, Anni chu inbiekpui ka tih; Anni chun LALPA dànhai lePathien thu tak hrieng an tih"Tiin ka lo ngaituo hlak a. Sienkhom zai khata luongin, An ringkol an suktliek a, An khaidiet an suktan a. 6 Chuleiin, ram palailèngah, Sakeibakneiin sèng a ta, Thlalèra satenen pot chen an ta, An kotah keiten inchàn a ta, A suok phot lo pot chen a tih, An hel dàn hi a râpthlàk a, An hnungtolna a tam bok si. 7 "Ieng leia ka ngaidam ding che?I nauhan an mi nghatsan a, Pathien ni lohai hming chu, Sâlin thu an inkhàm a. An mamaw po ka phuhrùk a, Sienkhom an mi uiresan a, Nawchizor bûkah an intom. 8 Sakor hur chawm thau angin, Mani tuolbawm nuhmei châkin, A tu el khom an inhrâm si. 9 Hi lei hin ka hrem naw ding maw?Chuong ang hnamhai chunga chun, Phuba ka lâk naw ding maw?"Ti hi LALPA thu suok a nih. 10 "A grêp huon hang suosam ro, Amiruokchu sukram naw ro. A kâuhai sât thla vong ro, LALPA ta an ni si naw a. 11 Israel le Juda sûngkuohai chu, Ka lakah an ringum naw hulhuol"Ti hi LALPA thu suok a nih. 12 LALPA chungthuah khêl hrilin, "Ieng khom mi law teu naw nih, Sietna ei chungah tlung naw nih; Tàm le kawlhnâm tuok naw'm ei nih. 13 Zawlneihai chu thlî ang chauh, Anniah thu a um nawh; An hrilhai po po khom chu, An chungah tla vong raw se"Tiin an hril hlak a ni kha. 14 Chuleiin, LALPA Iengkim Pathien chun hieng hin a hril:"Chuong chu an hril hlak leiin, I bàua ka thuhai hi, Meiah inchangtir ka ta, Meia raw hmang vong dingin, Hieng mihai hi thingherah, Inchangtir tawl vong ka tih. 15 Aw, Israel sûngkuohai, Nangni beitu ding cheuin, Hnam danghai hung thuoi ka tih, Tiin LALPA chun a hril. Hnam upa le hnam tlo tak, An tong khom i hriet ngai lo, An hril khom i man phâk lo, Ka hung thuoi ding a ni si. 16 An thal bawm thlàn inhong ang, Râl hrât khawkhêng vong an nih. 17 I lo tharsuok fa ram an ta, I naupa le naunuhai lem an tih. I beram ruol le bawng ruolhai, I grêp rà le theichang ràhai, Anni chun fa zo an ta, Kul khuo i ringsanhai chu, Kawlhnâmin suksieng an tih. 18 "Chuong nia hai khom chun sukchimit nawng ka ti cheu" ti hi LALPA thu suok chu a nih. 19 "Mihaiin, 'Ieng dinga LALPA ei Pathienin hieng thil hi ei chungah a thaw el am a na?' an ti huna chun, 'An mi fesan a, an rama ngei ram dang pathien rong an bawl angin, tu hin mi ramah ram dang mihai rong an bawl ding a nih' tiin la hril in tih. 20 Jakob sûngkuo kuoma le, Judai ramah hi hi hril dar rawh: 21 Mi invèt le chawlolhai, Mit nei sia hmu thei si lo, Na nei sia hre thei si lohai, Hi thu hi lo ngaithla ro: 22 In mi tì ding an naw maw?Ka hmaah in inthin naw maw?Tuipui ramri dinga tieupho, Kumkhuoa a kàn lo ding, Khampêktu chu kei hi ka nih. Tuipui fawn invor sienkhom, A kuong a liem chuong naw a, Inri hum hum sienla khom, A ramri a pèl ngai nawh. 23 Sienkhom hienghai lungril hi, A lululin a hel a, An tukhnungkhur mi'n nghatin, An mi fesan tah a nih. 24 An lungril suongtuonaah, 'Ruo hmasa le ruo nuhnung, A hun taka hung tirtu, Bu sîk hun mi ruotpêktu, LALPA ei Pathien ngei chu, Ei tî ding a nih' ti nachâng, An ngaituonaah a um nawh. 25 In bawsietnahai leiin, Hieng thil hi in chàn hlak a, In suolna leiin thil tha, In chang naw pha hlak a nih. 26 Ka mipuihai laia hin, Mi rilo ruol an um a, Vate vètu ang elin, Mihai an inchàn rûk a, Châng kamin mi an awk a. 27 Vatea sip bawm angin, An in inhlèmnan a sip a, An hung hausa tuol tuol a, Thil an thaw thei deu deu bok. 28 An thàu a, an hung nàm a. Thil tha naw thawna tiengah, Chin tawk hrim hrim an nei nawh. Fahràhai chan thatna ding, An hrilpêk nuom ngai naw a, Pasiehai an tan ngai nawh. 29 Hi lei hin hrem tawl loin, Ka um el ding am a ni?Chuong ang hnamhai chunga chun, Phuba ka lâk naw ding maw?"Ti hi LALPA thu suok a nih. 30 Thil râpthlàk le pangzatum, Hi rama hin a tlung a: 31 Zawlneihan khêl an hril a, Thiempuhan an thu hmangin, Nuom dàn dânin an rêl a, Chuong ang zawnga khawsak chu, Ka mipuihan an lawm si. A tawp iem ni tâng a ta?

6

1 "Nangni Benjamin thlahai, Himna zongin tlân hmang ro, Jerusalem suoksan ro!Tekoa-hai hril dingin, Tawtawrawt chu mût unla, Beth-Hakerem-ah puong dar ro!Hmar tieng panga inthokin, Sietna a hung inthok ie, Tlàksietna râpthlâk tak chu. 2 Zion naunu hmêl tha leInno chu suksieng ka tih. 3 Ama chu hung do dingin, Berampuhai chu hung an ta, An beram ruol hung thuoi an ta, A vêlah puon in kei an ta, An nuomna sengah um an tih. 4 "Do dingin inbuotsai ro khai!Tho ro, sùnchangah bei ei tiu!Sienkhom, a va hang poi ngei de!Nisa a tla dier dier ta a, Ni hlim khom a sei ta hle hi. 5 Thaw ro, zànah bei lem ei tiu, A kulhai ei suksiet ding a nih. " 6 Iengkim LALPA chun a hril:"A thinghai phûr thlu unla, Jerusalem inhuolna dingin, A vêlin hnuoi sung pawng ro. Nêksawrnaa sip khawpui hin, Hremna a tuor ngei ding a nih. 7 Tuikulah tui a pût angin, Khawlona a phù suok zing a. Inpawngnêkna le inroknahai, A sûnga hin a hluor a; A natna le hliemna tuorhai, Hmu ding a um zing a nih. 8 Aw Jerusalem, fimkhur hlè la, Ka zilna che hi poisa rawh; Chuong an naw chun nghatsanin, Hmun rausanah siem ka ti che a, Hluotu hrim nei naw ti nih. " 9 Iengkim LALPA chun hieng hin a tih:Israel mi hlaa um sunhai chu, Grêp rà i lo fai kèl angin, An rêngin rût khawm vong la, A kâu tin chu kuta maiin, A rêngin lo fài kèl rawh. " 10 Tu am bein, fimkhur dingin, Ka'n hriettir ta ding a na?An ngaithlàk nawna dingin, An nàhai an sukset a, LALPA thu chu an ta dingin, Ngai nghokum a'n chang ta a, An hlimpui ta hrim hrim nawh. 11 Sienkhom LALPA lungsennan, A mi hluo sip tlat leiin, Insùm harsa ka ti a nih. "Khawlaia naupang ruol leTlangvàl pungkhawmhai chungah, Bun suokin hrîkthla el rawh; Nupa khomin tuor an ta, Upa, tarkûna damhai khomin. 12 Chu rama chênghai chunga, Ka kut hi kan let pha chun, An in le lo le nuhmeihai, A rêngin chân vong an ta, Mi dangin neipêk an tih"Ti hi LALPA thu suok a nih. 13 A chîn taka inthokaA lien tak chenin tu khom, Duàmnain an sip a, Zawlnei le thiempuhaiin, Mi hlèm ringot an thaw a. 14 Ka mihai hliempui tuor chu, Rûndàlin an tuompèk a, 'Dam a tih, dam a tih' an ta, A dam chuong teu si naw a. 15 An chàng dàn luoksuokum chu, An inzàpui dèr naw maw? Inzàpui teu teu lo e!An hmài a tim hrim hrim nawh. Chuleiin, a tluhai lai, Anni khom tlu vêng an ta, Anni ka hrem huna chun, Pei thlâkin um vong an tih'Tiin LALPA chun a hril. 16 LALPA chun hieng hin a tih:"Lamthuomah ngîrin en ro, Lampui hlun chu indon ro, Lampui tha indon suok unla, Chu lampui chu hraw unla, Chu chun in thla muong a ta, Chawl hadamna hmung in tih. "Amiruokchu, nangni chun, "Hraw nawng kan tih" in ti si. 17 Nangni enkaitu dingin, Râlvêngtuhai ka sie a, "Tawtawrawt ri ngaithla ro"Tiin ka hril diem cheu a, Nisienlakhom, nangni chun, 'Ngaithla naw ning' in ti si. 18 An chunga thil tlung ding chu, Aw hnamhai, ngaithla unla, Hrepuituhai, en chieng ro. 19 Aw leihnuoi, lo ngaithla rawh, Hienghai chunga hin sietna, Ka hung intlun ding a nih, An thil phanhai râ ngei chu; Ka thuhai ngaithla loin, Ka dànhai an hnawl si a. 20 Seba a'nthoka rimtui le, Ram hlaa mafu hmui chu, Iem a na ka thlâkhla ding?In pumraw thilhlànhai chu, Lawm tlâkah ka ruot naw a, In inthawinahai khom chun, A mi suklawm chuong bok nawh. " 21 LALPA chun hieng hin a tih:Hieng mihai lampuia hin, Tlûkna ka sie ding a nih. Pâhai le naupâhai chu, Inpal thlu rem rum an ta, Tuolbawmhai le ruolhai khom, Tlu hlum rem rum tawl an tih. 22 Hi hi LALPA chun a hril:Hmar tieng rama inthokin, En rawh, sipai an hung saw; Hnuoi kila hnam ropui chu, Chok thoin a um mèk tah. 23 Thal ngul le fei an chawi a, An kolin zà an ngai nawh. Sakora an tlàn ri chu, Tuipui inrum ang a na, Râlthuom an inbel vong a, Do ding chea hung an nih, Aw, nang Zion naunu. " 24 An rìva kan lo hriet a, Kan kuthai a zoi zo tah. Lungngainan a mi man a, Nau hase tuor ang kan nih. 25 Ram tieng fe suok naw unla, Lampuiah invâk naw ro, Hmêlmahan kawlhnâm an chawi, Kil tinah râl an hung lien. 26 Aw ka mihai, saiip silin, Vut lai intâl ta ro khai; Naupa mal chân ang topin, Sûnin tap rak rak ta ro, Sawt nawteah suksetu'n, A mi nang thut ding a nih. 27 "Thîr fietuah ka siem che a, Ka mihai hi kapathîr an na, Fiein an lampui inchieng rawh. 28 An rêngin hel hmang an na, Mi hrilsiet an hmang bok a, Dâr le thîr ang hi an na, An thilthawna iengkimah, Ngharêk an kai vong a nih. 29 Pùm zâptun a zâp ling a, Suon chu a'n tui ral vong hlak. Annihai rawi ruok hi chu, Mi suolhai pei vong naw chun, Sukthieng tum a tangkai nawh. Tangkaruo êk sie ang a, LALPA hnawl hnung an ni si. 30 (A um nawh)

7

1 LALPA thu chu Jeremia kuomah a hung tlung a: 2 "LALPA in kotkhàra chun ngîr la, hi thu hi puong rawh: 'Nangni Juda mi, LALPA chawibiek dinga kotkhàr sûnga hung lùthai, LALPA thu hi ngaithla ro. 3 Iengkim LALPA, Israelhai Pathien chun hieng hin a tih: In um dàn le in thilthaw dànah insiemtha unla, hi hmuna hin inchèngtir ka ti cheu. 4 'Hi hi LALPA tempul, LALPA tempul, LALPA tempul' in ti lei ringota him dinga in inring a ni chun chu chu khêl a nih. 5 "In um dàn le thilthaw dànhai in insiem tha takzet a, indik taka indawr tuo a, 6 hnam dang mihai, fahrahai le hmeithaihai poi tawk lo a, hi hmuna hin thisen in insuo naw a, in sietna ding pathien dang in zui naw phot chun, 7 hi ram, tiena tlânga inthoka in thlatuhai kuoma ka pèka hin, kumkhuoin inchêngtir ka ti cheu. 8 Sienkhom en ta u, khêl thu, thu hmang lo chu in ringsan lem si. 9 "Rûk inruin, tuol thatin, uirein, pathien danghai hming sâla inkhâmin, Baal hmaah rimtui rawin, in hriet ngai lo pathienhai chu zui zing siin, 10 tu hin hi tempul, keima hming ngei chawitua hin in hung a, ka hmaah ngîrin, 'Ei him tah ie!' in ti hin, hieng thil tirdakum po po hi thaw thei dinga him taa inngai in ni? 11 Hi tempul, ka hming chawitu hi suomhmang pûka in ngai am a ni? Ka bithlâk zing cheu a nih" ti hi LALPA thu suok a nih. 12 "Ka hming chêngnaa ka hmang hmasak Siloa chun fe unla, ka mi Israelhai rîtlona leia ka thilthaw chu va en ro. 13 Hieng thil in thaw zing pum khomin, kei chun ka la biek tawk tawk cheu a, sienkhom in mi ngaithlàk naw a, ka ko cheu a, in mi don bok nawh, LALPA chun a tih. 14 Silo chunga ka thaw ang khan, hi tempul, ka hming chawitu, nangni le in thlahai kuoma ka hmun pèk, in ringsan hlak chunga khom hin ka thaw ve ding a nih. 15 Efraim thla, in unauhai ka hnot suok vong ang khan, nangni khom ka kuoma inthokin hnot suok vèng ka ti cheu, ti hi LALPA thu suok a nih. 16 "Chuleiin, hieng mihai hi hung tongtaipèk naw la, an ta dingin ka kuomah dawvàn hung kai naw la, hung hnipêk naw bok rawh, ka ngaithlàk naw ding che a ni leiin. 17 Judai ram khuoa hai le Jerusalem kotthlêra an thilthawhai hi i hmu naw am a ni? 18 Naupanghan thing an fom a, pahaiin mei an sèm a, nuhaiin bei tlang an hmet a, vàn lalnu kuoma inhlàn dingin bei an siem a, pathien danghai kuomah dawn thilhlân uoiin an bun suok a, ka lungsen cho phawk dingin. 19 Kei hi a ní an cho phawk chu? Anni sietna ding le muolphona ding an thaw lem an naw maw?" ti hi LALPA thu suok a nih. 20 Chuleiin, Chunghnungtak Pathien chun hieng hin a tih: "Ngai ta u, hi hmun chunga dâm, mihriem le sahai chunga dâm, rama thing le hnuoia thei rahai chunga dâm ka lungsenna le lung inlingna chu hrîk thlàng ka ta, kàng a ta, mit naw nih" tiin. 21 Hi hi Iengkim LALPA, Israelhai Pathien chun a hril: "Fe unla, pumraw thilhlàn chu inthawina pangngaiah bel sa unla, a sâ khom chu fa law law ro. 22 Aiguptaa inthoka in thlatuhai ka hung thuoi suok khan, pumraw thilhlân le inthawina thilhlân chungchàngah in thlatuhai kuomah ieng khom ka phût nawh. 23 Hi thu hi a nih ka pêk lem chu: 'Ka thupêk zawm unla, in Pathien nîng ka ta, ka mihai nîng in tih. Ka thupêk ang taka in khawsa chun, in ta dingin thâng a tih, ' tiin. 24 Nisienlakhom, an ngaithlàk naw a, an ûksak bok nawh; chuong nêk hmanin, an lungril tha naw tieng chu awnin tuklul an insuo a, hma tieng pan nêkin an hnungtol ta lem a. 25 In thlatuhaiin Aigupta an suoksana inthoka voisun chen hin ka rongbawltu zawlneihai chu in kuomah ka tir ni tin hlak a. 26 Nisienlakhom, an ngaithlàk naw a, an bengkhon bok nawh. Lululin rîng an sukkhong a, an thlàtuhai nêkin thil tha lo an thaw nasa lem. 27 "Chun, hieng thu po po hi an kuomah hril la khom ngaithla naw ni hai che a, ko la khom don naw bok an ti che. 28 An kuomah hieng hin hril rawh: Hi hnam hin LALPA an Pathien thu an ngaithlàk naw a, a keithuoina an zawm bok nawh. Thudik a bo ta a, an baua inthokin a suok ta nawh. 29 I sam tan la, peihawn rawh. Tlâng sâng kol vula chun lûsun angin um rawh. Hi suonhai chunga hin kei LALPA hi ka lungsen a, peithlain ka hnungson tawl ta si a. 30 "Judai rama chênghai chun ka mithmuah thil suol an thaw a. Ka hming chawitu ina chun an thil tirdakum milemhai siein an sukporche a. 31 Meia an naupa le naunuhai rawna dingin Hinom Ruoma chun Tofet bawlhmunhai an siem a, chuong chu ka thupêk a ni naw a, ka ngaituonaa khom a lût ngai nawh. 32 Chuleiin, fimkhur ro, nihai chu a hung tlung ding a ni tah, LALPA chun a tih. Chu pha chun mihaiin 'Tofet' amanih 'Hinom Ruom' ti ta loin 'Insàmna Ruom' ti ta lem an tih, a ruoma phûm sèng naw khop Tofeta chun mithi ruong zâl a tih. 33 Ruonghai chu chunglèng vatehai le ram sahaiin tlàn an ta, tu khomin hnot zâm naw ni hai. 34 Judai rama khawpuihai le Jerusalem kotthlêra hai chun lawmna le hlimna ri hrim hrim, mo le moneitu rawlhai khom sukrè vong ka ta, rausan ram inchang tàng a tih.

8

1 LALPAN hieng ang hin a hril: "Chu phá chun Juda lalhai rù dàm, hotuhai rù dàm, thiempuhai rù dàm, zawlneihai rù dàm, Jerusalema chênghai rù dàm chu an thlàna inthokin la suok an tih. 2 Ngaina taka an rong an bawl, an zui, an rawn le biek hlak nisa le thla le vàna arasihai hmua chun an rùhai chu phor suok an ta, la khawm an ta, phûm nawk ta naw ni hai a, hnuoia hmunhnok dèng bùm angin indar a tih. 3 Hi hnam suol tak la um sun po po, ka hnot darna hmuna la chambânghai chun dam nêkin thì thlang lem an tih ti hi Iengkim LALPA thu suok a nih. 4 Chuong naw khom chu an kuomah, LALPA chun hieng hin a tih:Mi an tlu pha, tho ta loin, An um song hlak am a ni?An pèt hmang pha, kîr ta loin, An liem song hlak am a ni? 5 Ieng leia hi mihai hi, An pèt hmang hlak am a na?Ieng leia Jerusalem hi, A pêt hmang hlak am a na?Lam indik lo hraw tlatin, Hung kìr zai hrim an rèl nawh. 6 Nâ sitin ka ngaithlàk a, Thudik hril an um dèr nawh. "Iem ka thaw leh?" an ti a, An suol an bànsan nuom nawh. Indonaa sakor lìm angin, An lampui tieng seng an tlàn. 7 Chunglêng tuivaarngo chun, Hunbi inthlàk a hriet a, Vathu, vamûr le kànghlai ha'n, An inpèm hun ding an hriet. Keima mihai ruok hin chu, LALPA thuruot an hriet nawh. 8 Iengtin am 'Mi var kan nih, LALPA dàn koltu kan nih'In ti ngam hrim hrim a na?In lekhaziektuhaiin, An kawlom khêlhlip hmanga, An hlèm lei cheu a ni kha. 9 Mi varhai chu inzakin, Chî-àiin man tuok an tih. LALPA thu an hnawl si chun, Ieng varna'm nei tâng an ta? 10 Chuleiin mi dang kuomah, An nuhmeihai pêng ka ta, An in le lohai khom chu, Mi dangin chang tàng an tih. A chîn tak le lien tak chenin, Duàmna ringotin an sip a, Zawlneihai le thiempuhai khom, Mi hlèm ringot a nih an thaw. 11 Ka mihai hliempui tuor chu, Rùndâlin an tuompèk a, 'Dam a tih, dam a tih' an ta, A dam chuong teu teu si nawh. 12 An chàng dàn luoksuokum chu, An inzàpui dèr naw maw? Inzàpui teu teu lo e!An hmài a tim naw hrim hrim. Chuleiin, a tluhai lai, Anni khom tlu vêng an ta, Anni ka hrem huna chun, Pei thlâkin um vong an tih'Tiin LALPA chun a hril. 13 LALPA chun hieng hin a hril:"Sìk ding nei dêr naw ni hai, Grêp hrui rà naw ni a, Theichang rà bok naw ni a, A hnàhai vuoi vong a tih. An kuoma ka pêk po khom, La kîrpêk nawk vong ka tih"Ti hi LALPA thu suok a nih. 14 'Ieng leia inhawr khawma, Ei thung zing el am a na?Thaw ro, kul nei khuoa hai, Thi dingin tlân khawm ei tiu!LALPA ei Pathien hlak chun, A lakah ei suol leiin, Tûr tui a mi'n dawntir a, Bohmang dinga a ruot sa, Ei ni tawl vong tlat si a. 15 Muongna ei beisei hlak a, Sienkhom thil tha a tlung nawh; Dam hun ding ei beisei a, Thlaphângna chauh ei dong si. 16 Hmêlma sakor hnàr hnawt ri, Dan a'nthokin ei hriet a, An sakor inhràm ri chun, Ram pumpui a sukthin a. A ram sûnga um po po, Khawpui le a mi chènghai, Rawt ram dingin an hung ie" tiin. 17 " Nangni lai rûl tûr neihai, Tu khom khawi ngam thei lo chu, Ka hung tir tawl ding a na, Chuonghai chun chuk an ti cheu"Ti hi LALPA thu suok a nih. Jeremia'n Jerusalem a tà 18 Ka hlimna a hung chuoi a, Lungngainan a mi tuom a, Ka lung a na ngawi ngawi a. 19 A ram dung le khanga chêng, Ka mihai tap ri chu ngai ro:'Zion-ah LALPA a um naw maw?A sûngah a Lal a um naw maw?"Tia an tap khêk ri chu. "An milim siem fawmhai leHnam dang pathienhai bein, Ieng leia ka lungsenna, An cho phawk hrim am a na?" 20 "Bu sîk hun a liem ta a, Nipui khom a tawp ta a, Sandam ei la ni si nawh"Tiin mipui an beidong. 21 Ka mihai an hliem chàngin, Kei khomin ka tuor ve a, Hrilhaiin ka sùnpui hlak. 22 Gilead-ah thing hnai damdawi, A um hlol naw a ni maw?Chu taka chun sukdamtu, A um ve naw am a ni?Ka mihai hliempui tuor hi, Ieng leia a dam thei naw?

9

1 Ka thlunglu hi siktui hnârah, Ka sîngmit hi mitthli hnârah, Inchang thei sien la chu aw!Ka mi an thathai sûnin, Sùn le zàn ka tà ding bah! 2 Thlalèrah khuolbûk nei lang, Ka mihai hi màksan daiin, Intom bo ka va nuom ngei!Uire hmang vong an ni si!Depde fuon khawm ruol an nih. 3 "An leiin khêl kâp suok di'n, Thal ngul angin a'n pei zing. A ram sûngah thudikin, Hnèna a chang thei ta nawh. Suol pakhata inthokin, Suol dangah an pakai a, Kei an mi hriet fûk ta nawh"Tiin LALPA chun a hril. 4 "Ruolhai lakah fimkhur ro, In unauhai ring naw ro. Unauhai chu hlèmhmang an na, Ruolhai chu mi demhmang an nih. 5 Ruolin ruol dang a hlèm a, Thudik hril an um ta nawh. An lei chu khêl hril dingin, An inchûktir ngat ngat a, Anni rawi sawlpui tak chu, Thil suol thaw ngat ngat a nih. 6 Hlèmhmang laia chêng i na, Inhlèma an buoi leiin, Kei an mi hriet fûk ta nawh"Ti hi LALPA thu a nih. 7 Chuleiin, Iengkim LALPA chun, Hieng ang hin a hril a nih:"Ngaitu, ka mihai suol leiin, Raw tuina meiah rawin, Anni chu ka fie ding a nih. Chuong bàka thaw dàn ding chu, Ieng am a um chuong bîk a? 8 An lei chun thalhlawn angin, Khêl a phu suok zung zung a; An tuolbawm seng bàu thain, An biek liem liem tawl hlak a, Sienkhom an lungril ruok chun, Châng an kam khum tawl hlak si. 9 Hieng thil lei hin anni chu, Ka hrem naw ding am a ni?Chuong ang hnamhai chunga chun, Phuba ka lâk naw ding maw?"Tiin LALPA chun a hril. 10 Tlânghai sûnin tap ka ta, Inring takin khêk ka ta, Thlalèr phùl khom sûn ka tih; Rausan hmun inchang zoin, Tu khom an fè ta naw a, Bawng inbu ri a rè ta a, Chunglèng vahai an tìn hmang a, Ran ruol tla an um ta nawh. 11 "Jerusalem chu hmun se ram, Sihal chèngna hmun nîng a ta, Judai rama khawpuihai chu, Hluotu tu khom um loin, Rausan hmunah inchang a tih. " 12 Chuong thil chu hre thiem ding tawk mi var an um naw a ni maw? Tu am a na LALPA thu lo dongtu le puongtu ding chu? Tu khom hraw ngai lona thlalèr ang topa ieng leia ram chu a se hmât zo am an ta a? 13 LALPA chun, "An kuoma dàn ka pèkhai chu an hnawl a, ka rawl an ngaithlàk nuom naw a, ka thu an zawm nuom bok nawh. 14 Zawm nêk hmanin lulul an insuo a, an thlatuhaiin an lo inchûktir ang khan, Baal an biek ta lem a. 15 Chuleiin, Iengkim LALPA, Israelhai Pathien chun, "Ngai ta u, hieng mihai hi bu khá infâktir ka ta, an dawn dingin tui khà peng ka tih. 16 Anni le an thlatuhai khomin an la hriet ngai lo hnamhai lai chun sukdar ka ta, ka sukbohmang vong hmâ khat chu kawlhnâmin inhnottir ka tih" a ta. 17 Hi hi Iengkim LALPA chun a hril:"Tuhin in ngaituo ro khai, Nuhmei ruol tap khêkhai chu, Hung dingin hril tawl unla, Tap thiem thiem hung raw hai se. 18 Inhmaw takin hung hai sien, Kan mitthli far zoi zoi a, Tui anga a luong chenin, Mi hung tap khum raw hai se. 19 Zion-a inthok khomin, Tap ri chu an hriet phâk a, 'Ei va hang se ta ngei maw!Ei va hang muolpho de aw!Ei inhai a ram zo tah, Ei ram suoksan el ei tiu'Ti chu an tap hla a nih. 20 Aw nangni nuhmei ruolhai, LALPA thu hi ngaithla ro; A thu in naah lût sien, In naunuhai chu tap hla, Insam dàn zirtir unla, Mani tuolbawmhai seng chu, Lusûn hla inchûktir ro. 21 Thìna chu ei tukverah, A hung invâk lût ta a, Ei kul sùngah a lût tah; Kotthlêra naupang inhnel, Hmu ding an um ta naw a, Tuolzawla tlangvâl um khawm, Hmu ding hrim an um ta nawh. 22 "Miruong chu hnawmhnok angin, Tuol lai indar phung a ta, Buphal lâk hmai ang elin, Tu khomin inkhawm naw nih"Tiin LALPA chun a hril. 23 LALPA chun hieng hin a tih: "Mi varin a varna uongpui naw sien la, mi hrât khomin a hràtna uongpui naw sien, mi hausa chun a sum le pai uongpui bok naw raw se. 24 A uongpui taphot chun kei LALPA, hi hnuoi chunga zangaina le indikna hmanga fel taka rorêl hlaktu le chuong ang thil lawm hlaktu ka nizie a hriet thiemna le a hrietna chu, uongpui lem raw se, " tiin. Chu chu LALPA thu suok a nih. 25 LALPA chun, "Ngai ta u, taksa chauha sertanhai ka hremna ding nihai chu a hung tlung mèk a nih. 26 Aigupta mi hai, Juda hai, Edom mi hai, Amon mi hai, Moab mi hai le thlalèr ram hla taka um, baksam ziet kawnghai po po khom chu hrem ka tih. Chuonghai chu sertan lo hnam vong an na, Israel sûngkuohai ngèi khom lungril tienga sertan lo an nih" tiin.

10

1 Aw, Israel sûngkuohai, LALPA hril hi lo ngaithla ro, 2 LALPA chun hieng hin a tih:"Hnam danghai chìng dàn taphot, Thaw ve di'n inchûk naw ro; Vàna inchiknahai chu, Hnam dangha'n an tì angin, Nangni chun ti ve naw ro. 3 Hnam danghai thil chìnghai chu, Hmangna bo thil vong a nih:Rama thing an va làk a, Kut themthiemha'n hrei hmangin, Milem an hung ker suok a. 4 Tangkaruo le rangkachakin, Milem chu an cheimawi a, A tlûk el nawna dingin, Tubo le thîrkil hmangin, Nghet takin an kil khawm a. 5 Leipuia vate ti ding, Tikhai an sie ang a nih:Milem chu an tong thei nawh; Kè an nei ve naw leiin, A puta put son an ngai. Anni chu tì naw unla, Ieng poi an tawk thei naw a, Thil tha an thaw thei bok nawh. " tiin. 6 Aw LALPA nangma ang hrim, Mi tu khom an um dèr nawh; I hrât a, thil i thaw thei a, I hming a ropui bok. 7 Aw, nang hnam tinhai Laltak, Tu'm inzà lo an um ding che?Inzà i phû hrim a nih, Hnam tina mivarhai leAn lalram sûng po poah, Nangma ang an um dèr nawh. 8 An rêngin mi chawlol leHmangna bo an ni vong a, Hmangna bo thing milim chu, An zirtirtu a ni si. 9 Tangkaruo an sut phèk chu, Tarsis a'nthokin an làk a, Upaz-a inthokin rangkachak. Themthiem le rangkachak sertuhan, Milim an hung siem suok a, Puon dumpawl le sendukin, Chuonghai chu an inthuomtir a, Sienkhom kuta siem an ni si. 10 LALPA ruok chu Pathien tak, Pathien hring, chatuon Lal a nih. A lungsen pha, hnuoi a'n hnìng a, A lungsenna inling chu, Hnamhaiin an tuor zo nawh. 11 "An kuomah hieng hin hril rawh: 'Hieng pathienhai, hnuoi le vànhai siemtu khom ni ve lohai hi chu hnuoia inthokin la bohmang an ta, vànkhup hnuoia inthokin bohmang vong an tih' tiin" a ta. 12 Sienkhom a thilthawtheinan, Pathienin hnuoi a siem a, A varnaa khawvel indinin, A hriet thiemnan vàn a zàr phar. 13 A rawl a hang insuo pha, Vàn tui a'n ri hum hum a; Kawl bulah sûm hung suokin, Ruo sûrin kawl a'n leptir a, A thli bawma inthokin, Thli a hung inthè suok hlak. 14 Mi tin an chawlol zo a, Hrietna hrim an nei naw a, Rangkachak sertu phot chu, A milemhan sukzak an tih, Inhlèmna thil vong a na, Maniin thuok an nei nawh. 15 An rêngin hmangna bo leNuizatbûr an ni vong a, An chungthu rèl a ni pha, An rêngin bohmang an tih. 16 Jakob Chanpuol LALPA ruok chu, Anni ang a ni ve nawh; Thil iengkim Siemtu a na, Israel chu a ro hluotu a na, A hming chu Iengkim LALPA a nih. 17 An inhuol mèk ta cheu leiin, In puonthuo zielin tlân suok ro. 18 LALPA chun hieng hin a tih:"Tuta a rama chênghai hi, Ka thâm suok tawl ding a nih. An man khawm vong theina di'n, Buoinan hung tlàk buok a tih" tiin. 19 Ka hliem chu ka vangduoi ngei!Sukdam ruol ka ni si nawh!"Ka natna a ni tlat leiin, Keiman ka tuor el ma naw'n!"Tiin kei ka'n hnèm fawm a. 20 Ka puon in a chim ta a, A thlungna a chat vong tah. Ka nauhai an thuoi hmang a, Puon in mi zârpêktu ding, Tu khom an um ta si nawh. 21 Beram vêngtuhai hlak chun, An hmuingil theina dinga, LALPA hang rawn nachang khom, An hriet teu teu bok si nawh. Chuleiin, an beram ruol, An inchek dar vong a nih. 22 Ngai tu, ri a hung tlung chu, Hmar tieng panga inthokaBuoina rî râpthlâk tak chu; Judai khawpuihai sukramin, Sihal ruol chèngna hmunah, An inchangtir ding a nih. 23 Mihriem nun hi aw LALPA, Ama thua nung a ni naw a, Mihriem chun ama le ama, A'n thuoi thei nawh ti ka hriet. 24 Aw LALPA, mi thunun la, Sienkhom lungsenin ni loin, Zaidam takin mi thunun rawh, Chuong naw chun thi el ka tih. 25 Nangma pom ve nuom nawtu, I hming lam ve nuom nawtu, Hnam dang mihai chunga chun, I lungsenna bun thla lem rawh. Jakob sûngkuohai fa zoin, An ram an suktlaran a, An fàk ram rìt an ta hi.

11

1 Hi hi Jeremia kuoma LALPA thu hung tlung chu a nih: 2 Hi thuthlungin a bitukhai hi ngaithla la, Judai ram le Jerusalema chênghai kuomah hril rawh. 3 LALPA, Israel Pathien chun hieng hin a hril: "Hi thuthlunga thu bitukhai ngaithla nawtu chu tongsie phurin um raw se. 4 Chuonghai chu Aigupta ram, rawtuina meia inthoka in thlatuhai ka hung thuoi suok laia an zawm dinga thu ka pèkhai chu a nih. An kuomah, 'Ka thu awiin ka hril taphothai hi zawm unla, ka mihai nîng in ta, kei khom in Pathien nîng ka tih. 5 Chuongchun, nenetui le khuoizu luongna ram, in thlatuhai kuoma inkhâm meua pêk ka lo tiem chu hlen suok ka tih' ka ta, chu chu voisuna in hluo ram hi a nih" a ta. Chun, kei chun, "Amen, Aw LALPA" tiin ka don a. 6 LALPA chun ka kuomah, "Judai ram khuoa hai le Jerusalem kotthlêra hai hieng thu po po hi puong rawh: "Hi thuthlunga thu bitukhai hi zawm ro. 7 Aigupta rama inthoka in thlatuhai ka hung thuoi suok nia inthoka voisun chen hin, 'Ka thu zawm ro' tiin ka hril zing tawl a. 8 Sienkhom, an awi nuom naw a, an ngaisak bok nawh; chuong nèk hmanin lulul takin an lungrila rîtlona chu an zawm lem hlak. Zawm dinga ka pèk thuthlung thuhai chu an zawm naw leiin chuong thil po poa tongsie chu an chungah a hung tlung tah a nih" tiin. 9 LALPA chun ka kuomah, "Juda mihai le Jerusalema chênghai hin thil phierrûk an nei a. 10 An thlatuhai, ka thu ngaithla nuom nawtuhai suolna tieng chun an kìr nawk a, pathien danghai zuiin an rong an bawl a, Israel sûngkuo le Juda sûngkuohai chun an thlatuhai kuoma ka thuthlung chu an bawsiet tah a nih. 11 Chuleiin, LALPA chun hieng hin a tih: Ngai ta u, an pumpel thei lo ding sietna chu an chungah ka hung intlungtir ding a nih. Mi ko khêk hai sien khom, don tawl naw ning. 12 Sietnan a hung tlàk buok pha chun, Judai rama khuohai le Jerusalema chênghai chun rimtui rawa an biek hlak pathienhai chu ko khêk an ta, chuonghai chun sietna laka chun hung thangpui naw ni hai. 13 Aw Juda, khuo i nei zât hiela tam pathien i nei a, thil inzakumthlâk tak el, Baal hmaa rimtui i rawna ding maichàm khom Jerusalem kotthlêr zât hiel i nei bok hi. 14 Chuleiin, hieng mihai hi tongtaipèk naw la, an ta dingin ka kuomah dawvàn hung kai naw rawh, an beidong huna khom an mi kona chu ka don naw ding a ni si a" tiin. 15 "Mi tam tak suolpui hlak siin, Ka hmangai chun ka tempulah, Ieng am a thaw rêng rêng a na?Sa ser i hung inhlànhai leiin, Hremna pumpel i'n ringa maw?Rîtlona i thaw phâ phà leh, Inhoi i ti chauh hlak si a" tiin. 16 'Oliv thing hring le mawi, Kûr thluka ra tha insuo hlak', Tiin LALPAN a ko hlak che. Sienkhom thlipui anga nasa, Meipui inrûm hum huma chun, A raw hmang ding che a na, I kauhai kàng hmang a tih. 17 Israel sûngkuohai le Juda sûngkuohaiin suol thaw a, Baal kuomah rimtui inhlàn a, nangni phuntu cheu, Iengkim LALPA chu lungsen dinga in cho phawk leiin, nangni ngeiin in chunga sietna in intlun thu chu a hung puong a nih. 18 That tuma an mi phierrûkna chu LALPAN a mi'n hriettir leiin ka hriet a, chuong lai chun an thilthaw po po chu a mi'n hmutir a. 19 Kei chu that dinga an thuoi beramte nunnem tak ang ka ni leiin hieng anga an mi lo phierrûk thu khom hi ka lo hriet dèr si nawh:"Thing chu a rà leh phûr ei ta, Hringmi khawvela inthok hin, Ama chu sât thlâng ei ta, Tu khom hriet ta lo dingin, A hming khom sukbo ei tih. " 20 Sienkhom aw Iengkim LALPA, Rorêlna fel kengkawtu, Sungril le lungril fietu, Iengkimthawthei i ni leiin, Anni rawi chunga phuba, I làk phâ mi'n hmutir rawh, Ka chungthu hi i kuomah, Iengkim ka'n koltir si a. 21 Chuleiin, Iengkim LALPA chun, "I hringna la tumtu Anathot mihai, 'Kan kuta i thi nawna dingin LALPA hmingin thu hril ta naw rawh' tituhai kuoma chun hieng hin a tih: 22 'Anni chu hrem tawl ka ta, tlangvàlhai chu kawlhnâmin thîng an ta, an naunuhai le naupahai chu tàmin thîng an tih. 23 Anathot mihai ka hrem kum a tlung pha chun an chungah sietna ka hung intlungtir ding a ni leiin a thi mahla tu khom um naw ni hai' tiin" a ta.

12

1 Aw LALPA, ka chungthuhai, I kuoma ka hung intlun changin, Indik takin i thaw hlak. Sienkhom ka vuivaina thu chu, Ka hung hril tho ding a nih:Ieng leia mi suolhai hi, An hmuingil hlak am a na?Ieng leia mi depdehai, Inhoi taka an um hlak? 2 I phun a, zung an kei a, Inthangin an hung ra a, An hmûrah i hnai zing a, An lungrilah i hla si. 3 Aw LALPA, i mi hriet a, Nangin i mi hmu zing a, Ka ngaituo zing che ti khom, Enin i fie vong hlak kha. That ding beram ang elin, Anni rawi hi hnûk suok la, Thata an um ni ding khom, Nangma chun hung ruot ta rawh. 4 Ieng chen am ram hi tawlin, Hnà tinrêng an vuoi vong ding?A chêngtuhai rîtlona leiin, Ramsahai an ram zo a, Vate khom an thi zo tah. Chu bâka chun mihaiin, "Ei chungah ieng am a tlung, Ti dâm chu en hlak a tim!"An ti hiel ta chê a nih. 5 Mi leh in intlànsiek hmana, An hnebàn che a ni chun, Sakor dàm leh lem lem chu, Iengtin am in intluk ding?Hmun hima hman i'n sui thlu chun, Jordan ramngawpuia lem chu, Iengtin am i che ta ding? 6 I unau le sûnghai chenin, An lo inphatsan ta che a, An dem luoi luoi che a nih. An lo biek tha che khomin, Anni chu ring ta naw rawh. 7 Ka in chu suoksan ka ta, Ka ro khom màksan ka tih; Ka hmangai chu hmêlma kutah, Ka pêk suok ta ding a nih. 8 Ka rochan ka tihai hlak, Ram hnuoia keipui angin, An lo inchang zo tah a, An mi'n rûm khum dur dur a, Ka theidà zawng tak a nih. 9 Ka rochanhai chu vate ang, Muin la dinga a vèl lai zing, Vate dangin an ching hron, An lo ni ta hiel naw maw?Ramsa po po ko khawm la, A fa dingin hung thuoi rawh. 10 Berampuhan ka grêp huon, Chîlin an suksiet zo a, Ka lo tha tak el khom chu, Ram tawl an inchangtir zo. 11 Rausan hmunah an siem a, Tawlin a thing bor bor a, Tu ngaisak a hlaw ta nawh. 12 Tlâng ram kol sen vunga chun, Sukramtu invâk an ta, A ram dung le khanga mihai, LALPA kawlhnàmin lem a ta, A him tu khom um naw nih. 13 Bu chi chu thè vèng an ta, Sienkhom hling chauh sîk an ta, Chau hnêpin inrim sien khom, Ieng khom hlawkpui naw ni hai. LALPA lungsen inling lei chun, An sìk sun khom inzàpui an tih. 14 Hi hi LALPA hril chu a nih: "Ka mi Israelhai kuoma ro hluo ding ka pêk ram lo la hêktu an tuolbawm ram rilohai chu an rama inthokin pot dok ka ta, anni laia Juda sûngkuo umhai khom chu la suok ka tih. 15 Ka lâk suok hnung chun anni chu lunginsiet nawk ka ta, an rochan ram sengah hung thuoi nawk ka tih. 16 Kha hmaa Baal hminga inkhâm dàn ka mihai lo zirtir hlaktu ni hai sien khom, ka mihai um dàn anga khawsa ve a, 'LALPA hringna sâlin kan intiem' tia ka hminga an inkhâm ve pha chun, ka mihai lai indin tawl ka tih. 17 Sienkhom ka thu ngaithla nawtu hnam taphot chu pot suok ka ta, sukbo ka tih" ti hi LALPA thu suok a nih.

13

1 Chun, LALPA chun ka kuomah, "Fe la, puon kawnghrèn inchaw la, chu chun i kawngah inhrên la, sienkhom tui intawktir dêr naw rawh" a ta. 2 Chuongchun, LALPA thu angin puon kawnghrèn chu ka'n chawk a, ka kawngah ka hrèn a. 3 Chun, LALPA thu chu ka kuomah a hung tlung nawk a, 4 "I kawnghrèn inchawk, i kawnga i hrèn kha sût la, Eufretisg vadungpui pan la, chu taka chun lungpui kuo karah thup rawh" tiin a mi hril a. 5 Chuongchun ka fe a, LALPA mi hril ang chun Eufretis-a lungpui kuo kara chun ka thup a. 6 Ni iemani zàt hnung chun LALPAN, "Fe la, Eufretis vadung pan la, hrènpuon i thup kha la suok rawh" a ta. 7 Chuongchun, Eufretis vadung tieng chun ka fe a, hrènpuon chu ka siena hmuna inthok chun ka pur dok a, sienkhom a lo hmon vong ta a, ienga ding khomin a tlâktlài ta nawh. 8 Chun, LALPA thu chu ka kuomah a hung tlung a: 9 "Hieng ang bok hin Judahai chapopui le Jerusalemhai suongtawlol chu ka suksiet ding a nih. 10 Hi hnam rilo, ka thu ngaithla nuom lo a, anni tuklulna lungril zuia pathien danghai rong bawl le be lemtuhai hi, hi hrènpuon, ieng ding khoma hmang tlâk ta lo ang bok hi an nih. 11 Hrènpuon chu kawngah ka vêt zing ang hin Israel sûngkuo pumpui le Juda sûngkuo pumpui hi ka mihai, ka hmingthangna, mawina le ropuina ni dinga ka kuoma um tlat dinga ka siem an ni a, sienkhom ka thu an ngai si nawh. 12 "An kuomah hieng hin hril rawh: 'Hieng hin LALPA, Israel Pathienin a hril: Uoiin peng po po chu uoiin thun sip ro' ti hi. Chun, tu khomin, 'Uoiin peng tin sung sip ding chu ka hriet nawa i ngai a ni?' an ti chun, 13 nangin hieng hin hril tawl rawh: 'LALPA chun hieng hin a tih: Hi rama chêng po po, Davida lalthungphaa inthung lalhai dàm, thiempuhai dàm, zawlneihai dàm le Jerusalema chênghai po po chu hrâi rui hrep tawl ka tih. 14 Anni le anni invaw hmâttir ka ta, pahai le nauhai chu insuol an tih. Anni chu hlà loa ka sukbohmang theina dingin lunginsietna le zàngaina le lâinatna insuo naw ning. 15 Nâ dawin ngaithla unla, A tu khom chapo naw ro, LALPA thu suok a ni hi. 16 LALPA in Pathien chawimawi ro:Inthimna a hung tir hma, Tlâng thimah insui thlu a, In ke pèn a'n phet hma hin; Var in beisei lai zingin, Beidongna thimpui zîngin, Thim sâ inchangtir a tih. 17 In ngaithlàk chuong naw ruok chun, In chaponahai leiin, Arûkin tàng ka ti cheu; LALPA beram dit ruolhai, Sala thuoi an ni ding chu, Lung na takin tàng ka ta, Mitthliin mi'n sil a tih. 18 Lal le a nu kuoma chun, 'In lalthungphaa inthok khan, Khai leh, hung tum thla ta ro; In lallukhum khumhai kha, Lak thlâk a ni ta ding si'Tiin an kuomah hril rawh. 19 Sim tieng khuohai po po chu, Tu khom suok thei lo dingin, Inhuolin dang chêp an ta, Tu khom suok thei naw ni hai. Juda mihai po po chu, Sala thuoiin um an ta, An rêngin intâng an tih. 20 Hmar tieng son mit inlèn la, A hunghai saw hei thlîr rawh. I beram ruol enkolhai, I uongpui êm êm hlak kha, Khaw lai am an um ta a? 21 Ruol thaa i siem kha LALPAN, Nangma rûntuah a sie pha chun, Nuhmei nau hase angin, Nâ i ti hle naw ding maw? 22 'Ieng leiin am hieng thil hi, Ka chungah a tlung a na?'Tia i'n don a ni chun, I suolnahai lei a nih:I puonbil an hlìmpèk che a, An soisak che a ni kha! 23 Ethiopia miin a rong, A thlâk thei hlak am a ni?Keite khomin a zie tiel, A thup thei hlak hrim hrim maw?Thil suol thaw chînghai khomin, Thil tha an thaw thei ngai nawh. 24 "Thlalèr thliin a lèn hmang, Bu sî vuong dar ang elin, Ka sukdar ding cheu a nih. 25 Nangin kei mi theinghil a, Pathien dang i biek leiin, Chu chu i chan dinga tlu, Keiman ka ruot chu a nih; Ti hi LALPA thu suok a nih. 26 "Kei ngeiin i puonbil chu, I hmai inkhum hiel khopin, Ka hlìmpèk ding chè a na, I zàmaw inlang a tih. 27 Tlâng tin le phûl hmuna hai, Uirea hur kawdàk a, Zakmaw taka inzor a, Tirdakum i thawhai kha, Ka phawk suok vong ta si che. Aw Jerusalem, i chung a pik!Ieng chen am i porchè ding?

14

1 Khaw inthàl ding chungthua, LALPA hril chu hi hi a nih: 2 "Judai ramin a sûn a, Khawpuihai a ngûi ruoi a, A ram chu an tà khum a, Jerusalema inthokin, Tap ri a so veng vung a. 3 Mi lienha'n an siehlawhai, Tui chawi dingin an tir a, Tuikul tieng an pan tawl a, Sienkhom tui hrim an hmu nawh. An tuibèl leh hrilhaiin, Beidong takin an kîr a, An lu puon an khup khum a. 4 Ruo a sûr dêr naw leiin, Hnuoi chu a hung kak tuor a, Lo neituhan hrilhaiin, An lu puon an khup khum a. 5 Phùla zasukpui khomin, Pet ding a nei naw leiin, A tê chu a màksan a. 6 Ram sabengtunghai khom chu, Tlâng sâng filah an ngìr a, Sihal inthuok ang topin, An inthuok ve hlop hlop a, Ram hring an thlìrna lamah, An mithai a chàu zo tah. 7 Kan suolnan mi hêk sien khom, I hming leiin Aw LALPA, Mi hung thangpui lul raw khai. Kan hnungtolna a tam a, I lakah kan suol a nih. 8 Aw, Israelhai Tlumte thlîr, Beidong huna Sandamtu, Hi ramah mikhuol anga, Zàn khat chauh riek ding ang a, Ieng dinga um am i na? 9 I chî-ài ve am an ta?Ieng leia mi san thei lo, Pasaltha anga i um?Sienkhom nang chu aw LALPA, Keini lai i um zing a, I hming puttu kan ni a, Mi màksan tawl naw hràm rawh! 10 Hi mihai chungchànga hin, LALPA chun hieng hin a hril:"Invâk hmang inhoi an ta, An kè an thunun ngai nawh. Chu lei tak chun anni hi, LALPAN a lawm tawl naw a, An rîtlozie a hriet zing a, An suol leiin hrem a tih" tiin. 11 LALPA chun ka kuomah, "Hieng mihai thatna ding hin hnipêk naw rawh. 12 Bu nghei hai sien khom an rawl lo ngaithla naw ning; pumraw thilhlân le bu le bâl thilhlân an hung inhlànhai khom lo pom bok naw ning. Chuong nèk hmanin, kawlhnâm le tàmpui le hripuiin ka sukbohmang tawl ding a nih" a ta. 13 Kei chun, "E khai, LALPA Chunghnungtak, i zawlneihai po poin, 'Kawlhnâm tuok naw ti niu a, tàm khom tuor bok naw ti niu. Hi hmuna hin muongna hlun ka pêk lem ding chêu a nih' tiin i thu an lo hril rop hlak si a" ka ta. 14 LALPA chun, "Zawlneihaiin ka hmingin khêl an hril hlak a ni chu. Anni chu ka tir naw a, ka ruot naw a, ka biek tawl bok nawh. An thil hmu khom ni lo, hmangna bo thumvawra an thil dong le an lungril suongtuona mei mei an hrilpèk cheu a ni chu" a ta. 15 Chuleiin, LALPA chun hieng hin a hril: Ka tir khom ni hlei lo, ka hming sâla, 'Hi rama hin kawlhnâm le tàm tlung naw nih' tia hriltu cheu zawlneihai chu kawlhnâm le tàmin bohmang an tih. 16 Chun, an chungthu an hril mihai chu tàm le kawlhnâm inlèng lei chun Jerusalem kotthlêrah pei suokin um an ta, anni le an nuhmeihai, an naunuhai le naupahai chun phûmtu hrim nei naw ni hai. An phù ang hrimin an chungah sietna ka bur khum ding a ni si a. 17 "Hi hi an kuomah hril rawh:'Ka mi, ka naunu thienglâm chun, Siet dêrna khop kut tuok a, Hliempui na tak a tuor leiin, Ka mitthli hi sûn le zànin, Chawl loin luong zing raw se. 18 Ramhnuoiah ka va suok leh, Kawlhnâma an thathai ruong, Zâl thlek thluk ka va hmu a; Khawpui sûngah ka lût leh, Tàmpuia thi ka hmu bok a. Zawlneihai le thiempuhai khom, Hriet lo ram an pan zo tah' tiin. " 19 Juda chu i hnawl dèr el an ta?Zion khom i tirdak am an ta?Sukdam thei naw hiel khop a, Ieng dinga i mi'n tuortir am?Muongna hun kan beisei a, Thil tha ieng khom a tlung nawh, Damna hun kan beisei a, Thlaphângna chauh a tlung lem. 20 Kan suolzie hi aw LALPA, I hmaah kan inphat nawh, Kan thlàtuhai suolzie khom; Kan lo suol takzet si a. 21 I hming leiin mi thìm naw la, I lalthungpha ropui tak chu, A muolpho phal lul naw rawh. Kan kuoma i thuthlunghai kha, Hre zingin bawse naw hràm rawh. 22 Hnam dang pathienhai lai hin, Ruo hung tir thei tu'm an um?Vànin a'n sùrtir am a ni?Ni lo e, nangma i nih, Aw kan LALPA kan Pathien. Kan beisei nang chauh i nih:Hieng thil po po thawtu chu, Nangma chauh i ni si a.

15

1 LALPA chun ka kuomah, "Mosie le Samuel khom ka hmaah hung hai sien, ka lungrilin hi mihai tieng hi ngha chuong naw nih. Ka hmu phàk loah hnot suok la, fe hmang dai raw hai se. 2 'Khaw la'm kan fe ding?' tia an indon che chun, an kuomah hieng ang hin hril rawh:Hieng ang hin LALPAN a tih:'Thi dinga ruothai chu thìnaah, Kawlhnâm tuor ding chu kawlhnâmah, Tàmpui tuor ding chu tàmpuiah, Saltàng ding chu saltàngnaah' tiin. 3 "LALPA chun hieng hin a tih: 'Suksetu dingin thil chi li tir ka tih- sukhlumtu ding kawlhnâm, an ruong fen hmangtu dingin ui, fa zo le sukraltu dingin chunglèng vatehai le hnuoia ramsa kolhai. 4 Jerusalema Juda lal Hezekia naupa Manase thilthaw leiin hnuoia lalhai po po tirdakah siem tawl ka tih. 5 " Aw Jerusalem. Tuin am a lunginsiet ding che?Aw, Jerusalem, Tuin am a tà ta ding che? I chanchin indon dingin, Tu hrim am chawl tâng an ta? 6 Nangin i mi hnawl thlàk a, I hnungtol deu deu pei si. Chuleiin, sukse ding chein, I chungah kut thlâk ka ta, Zâi daw zozai ta naw ning"Ti hi LALPA thu suok a nih. 7 Khaw tin kul kot bula chun, Cheiruongin vaw dar ka ta, Sietna le lusûnnain, Ka mihai tlâk buok a tih, An nun dàn an thlâk si nawh. 8 Hmeithai pung deu deu an tih, Tuipui tieu nêka tamin. Sûn chang lai tak suksetu, Tlangvàlhai lai tir ka ta, Beidongna le thlaphângnan, Hung nangchìng thut tawl a tih. 9 Sal sari hringtu nu chu, Thidangin tlu hlum a ta, Sûn lai a ni liem a ta, Hming sein muolpho a tih. A thi bâng la um po chu, Kawlhnâma sukhlum dingin, Hmêlma kutah pêng ka tih"Ti hi LALPA thu suok a nih. 10 Ram pum do le khing dinga, I mi nei kher kher hi chu nu, Ka chung a va hang pik ngei!Tu khom inpûktir loin, Tu tâ pûk lo khom ni lang, Tongsie an mi'n phur vong si. 11 LALPA chun hieng hin a tih: "A san tha tak a um chun, San him ngei ka ti cheu a, Siet ni le lungzîng niah, Hmêlmahai chu in hmaah, Hung inkûntir ngei ka tih. 12 "Hmar tienga thîr le dâr chu, Tu'n am suktliek thei an ta? 13 Ka mihai suolna leiin, An ro hlu le sum po po chu, Râllâk sumah pêng ka tih. 14 Hmèlma ram hriet ngai loah, Salah thuoi an ti cheu a, Ka lungsen chu chok a ta, Chu chun hlieu hrep a ti cheu" tiin. 15 Aw LALPA, nang chun i hriet, Mi hre zingin, mi kan la, Mi sukdudatuhai chungaKa phuba chu mi lapêk rawh. Nang chu i dawthei leiin, Mi la hmang ve lul naw la, Nangma leia ka tuorzie kha, Mi hrepêk zing lem hlak rawh. 16 I thuhai ka dong pha leh, Kei chun ka fâk miel miel a, Ka ta dinga lawmna leLungril sukhlimtu a nih. Aw Lalpa, Iengkim Pathien, I hming puttu ka ni si a. 17 Inhoina chèntuhai lai, Ka thung ve ngai dèr naw a, Hlimhlop ka chèn ve ngai nawh; Kut i mi'n nghat khum leiin, Makhât chauin ka'n thung a, Lunghnûrnain i mi sung sip. 18 Ieng leia ka nat tuor hi, A rè thei dêr naw'm a na?Ieng leia ka hliem tuor hi, Dam thei loa a um zing?Ka laka hin vadungte, Bèl tlâk lo le kang el hlak, I'n chang el ding a ni maw? 19 LALPA chun hieng hin a tih:"I sim chun tungding ka che, Ka rong i bawl theina di'n; Hmangna bo thu hril lo a, Thu tak hriltu i ni chun, Ka thu puongtu nîng i ta, Mihai chu nangin pan loin, Annin pan lem an ti che. 20 Hienghai laka hin kul bang, Dâr bangah siem ka ti che. Hung bei hlak an ti che a, Sienkhom hnè nawng an ti che, San suok le hum ding chein, I kuomah ka um si a. 21 Mi rilohai kut a'nthokin, Keiman san suok ka ti che a, Mi nunrawnghai lak a'nthokin, Keiman hum him ka ti che"Ti hi LALPA thu suok a nih.

16

1 LALPA thu chu ka kuomah a hung tlung a: 2 "Nuhmei i nei ding a ni naw a, hi hmuna hin nau le te i nei ding a ni bok nawh" tiin. 3 Hi hmuna pieng naunu le naupahai le anni hringtu nu le pahai chungthua chun LALPAN hieng ang hin a tih: 4 'Hripuiin thîng an ta, tu khomin phûmin sûn naw ni hai a, an ruong chu tuolah hmunhnok angin indar a tih. Kawlhnâm le tàmpuiin thi bok an ta, an ruong chu chunglêng vatehai le ramsahaiin tlân an tih. 5 LALPA chun hieng hin a tih: "Khawsawt ina ruoi an siemnaah lût naw la, sûn dingin fe naw la, anni chu tà bok naw rawh, hieng mihai laka hin ka malsawmna hai, hmangaina hai le lâinatna hai chu ka lâk kîr ta si a, " ti hi LALPA thu suok a nih. 6 "Hi rama hin mi lien le mi chìnhai thîng an ta, tu khomin phûmin sûn naw ni hai a, anni sûnnain tu khomin lu vaw kol bok naw ni hai. 7 Mithi sûnhai ràlna dingin tu khomin fâk ding pe naw ni hai a, an nu amanih an pa amanih lei khomin, anni hnêmna dingin tu khomin dawn ding pe naw ni hai. 8 "Chun, ruoi thèna hmuna hrim hrim anni lai thunga kîl ve dingin i lût ding a ni nawh. 9 Iengkim LALPA, Israel Pathien chun hieng hin a hril: 'Ngai ta, i mithmu le i dam sûng ngei hin hlimna le lawmna ri le mo le moneitu rawlhai khom hi hmuna inthok hin sukrè vong ka tih' tiin. 10 "Hieng thuhai po po hi mihai kuoma i hril pha chun annin, 'Ieng leiin am hieng ang lawma sietna hi LALPAN kan chungah a thaw el am a na? Iem kan thaw suol a um? LALPA ei Pathien chungah ieng suol am kan thaw hrim hrim a?' tîng an tih. 11 Chun, nangin, 'In thlatuhaiin mi màksan a, Pathien danghai hnot a, an rong bawl a, anni be a, mi fesan a, ka dàn an zawm naw lei a nih. 12 Nangni hlak chun tuklul insuoa in lungrila rîtlona chu zawm lemin, in thlatuhai nêka nasa lemin in thaw nawk pei si a. 13 Chuleiin, hi rama inthok hin nangni le in thlatuhai khoma an la hriet ngai lo rama chun ka hnot suok ding cheu a na, chu taka chun a sûn a zànin pathien danghai rong bawl in ta, ka ditsakna hmu naw ti niu' ti hi LALPA thu suok a nih. 14 Chun, LALPA thu suok chun hieng hin a hril: "Mihaiin, 'Aiguptaa inthoka Israel nauhai thuoi suoktu LALPA hringna sâlin' ti ta loa, 15 'Hmar tieng ram le a hnot darna rama inthoka Israelhai hung thuoi suoktu LALPA hringna sâlin' tia in inkhàm hun a la hung tlung ding a nih. An thlatuhai kuoma ka pèk rama chun ka thuoi kìr tawl nawk ding a ni si a" tiin. 16 "Ngamantu tam tak ko ka ta, anni chun man tawl an tih. Sapêltu tam tak tir bok ka ta, anni chun muol le tlâng tin le lungpui kak kara mihai khom chu hung pèl suok an tih. 17 An um dàn po po ka hmu vong a, ka lakah thup a um naw a, an suolnahai khom ka mita inthoka thup a um bok nawh. 18 Hringna nei lo milem tirdakuma a ram an sukporchè lei le ka rochung ram chu an pathien lem tirdakuma an suksip leiin, an rìtlona le suolna chungah a let hniin thungrul ka tih" ti hi LALPA thu suok chu a nih. 19 Aw LALPA, Ka hràtna le ka kulpui, Lungzing nia ka bèlbul, Kawlkawdonga inthokin, Hnam tin i kuomah hung an ta, "Kan thlatuhai rochung chu, Hmangna bo dèr pathien lem, Milem siem fawm el an nih. 20 Miin mani pathien ding, A siem fawm thei am a ni?Chuong ang milem siem fawm chu, Pathien an ni thei si nawh"Tiin la hung hril an tih. 21 Chuleiin, tu tum khom hin, Ka hrâtna le thilthawtheina, Hang inhriettir nawk ka tih. Ka hming hi LALPA a nizie, Chu chun hung hre tâng an tih.

17

1 "Juda suolna chu thîr kawlom le lunghlu hmor zum ngei taka an lungril phèka ker a na, an maichàm kia khom ker a ni bok. 2 An nauhai khomin thing buk hnuoi le tlâng sîp tina bawlhmun an siemna le an pathiennu Asera lem thing an phunna hmunhai chu an hung hriet kar vong a nih. 3 A ram dung le khanga i suolna leiin a rama ka tlânghai le i hausakna le rosum po po chu, i hmun sânga bawlhmunhai po po leh, râllâk sumah ka pêk ding a nih. 4 I bawsietna leiin i chanpuol ka'n rochungtir che ram hi chân i tih. I lakah ka lungsenna chu mei anga a chok zing leiin, i hriet ngai lo ramah i hmêlmahai rong bawl i tih, " tiin. 5 LALPA chun hieng hin a tih:"Mihriem ringsana neitu, Mihriem hrâtnaa innghattu, Lungrila LALPA nghatsantu chu, Tongsie phurin um raw se. 6 Thlalèr hlobuk ang a na, Vangneina a hung phâ khom, Dong ve phàk ngai naw ni a, Thlalèr ram tawl, tu hluo lo, Chi leilungah chêng a tih. 7 LALPAA ringna nghattu, Ama ringzotu ruok chu, Mi hamtha a va ni ngei! 8 Tui luongna bula thing phun, Vakama zung kei angin, Thâl tlung ding a ti naw a, A hnàhai a hring zing hlak. Khaw thâl kum a poisa naw a, Rà naw kum a nei bok nawh. 9 Lungril hi ieng po nèka, Mi hlèm hmang chungchuong a na, Beidongum khopin a sie a, hTu'n am hre thiem thei a ta? 10 "Kei hi lungril entu LALPA, Ngaituonahai fie hlaktu, Mi tin an nun dàn ang leThilthaw dàn ang phû peia, Lawmman pe hlaktu ka nih. " 11 Kut tling loa hausa chu, Mani tui ni lo op kêutu, Varung ang chauh hi a nih. A vànglaiin a hausaknan, Ama chu la tinsan a ta, Mi invêt la hlawng a tih. 12 A tîra inthoka chawi sàng, Lalthungpha anga ropui chu, Ei tempul hmun hi a nih. 13 Aw LALPA, Israel beisei, Nangma phatsantuhai chu, Sukmuolphoin um an tih. Nangma nghatsantuhai chu, Pilvuta hming ziek angin, An la bohmang ding a nih, Hringna tuikhur LALPA chu, An invàk hmangsan si a. 14 Aw LALPA, mi sukdam la, Chuongchun dam ka ta, Mi sanhim la, Chuongchun him ka tih, Ka'n pàk hlak chu nang i nih. 15 "Khaw'm a na LALPA thu chu?Tu'n hung hlen sien ni naw ni!"Tiin an hril an hril hlak. 16 Nangma zuitu berampu, Ka nìna ka'n phat ngai nawh; Sietna hung intlungtir chu, Ka dit nawh ti i hriet chieng. Ka baua thu suok hrim hrim, Nangin i hriet vong a nih. 17 Mi sukthlabâr naw hràm rawh, Nang chu siet tuok nikhuo a, Ka'n humhimna i ni si. 18 Mi sukdudatuhai chu, Nangman sukmuolpho tawl la, Kei chu mi sukmuolpho naw. Sukthlabârin um hai sien, Kei chu mi sukthlabâr naw. Sietna ni intlungtir la, A lêtin sukse tawl rawh. 19 LALPA chun hieng hin a mi hril: "Vàntlâng lûtna tieng kul kotkhàr, Juda lalhai lûta an suokna le Jerusalem kul kotkhàr po poa chun fein va ngîr rawh. 20 Chun, an kuomah, 'Nangni Juda lalhai, Juda mi po po le Jerusalema chêng, hieng kotkhâra lût hlaktuhai, LALPA thu hi lo ngaithla ro. 21 LALPA chun hieng hin a tih: Chawlniin thil phur lo dingin fimkhur unla, Jerusalem kul kotkhàrah thil phurin lùtpui bok naw ro. 22 Chawlniin in ina inthokin phur in phur suok ding a ni naw a, sin hrim hrim in thaw ding a ni bok nawh. In thlatuhai kuoma thu ka pèk angin chawlni chu in inser thienghlim ding a nih. 23 Chuong sà khom chun in ngaithlàk naw a, in uksak bok nawh; in insuklulul a, inthununna in ngài thei naw a, in donsak bok nawh. 24 LALPA thu suok chun hieng hin a tih: Amiruokchu, ka thu hi in poisa a, chawlniin ieng khom kul kotkhàr sûngah hung la lût lo a, sin ieng khom thaw loa in inser thienghlim chun, 25 hi khawpui kul kotkhâra hin lalhai le hotuhai, Davida lalthungphaa thunghai chu tawlailir le sakora chuonghai le an hnung zuitu mi lienhai, Judai rama mihai le Jerusalema chênghai chu hung lût an ta, hi khawpuia hin chêng song tàng an tih. 26 "Chun, Judai ram khawpuihaia inthok dâm, Jerusalem sèvêl khuohaia inthok dâm, Benjamin rama inthok dâm, thlang tieng tlâng thut vèla inthok dâm, sim tienga inthok dâmin hung an ta, pumraw thilhlân le inthawina hai, bu le bâl thilhlân le rimtui hai le lawmna thilpêkhai chu LALPA tempula chun hung inhlàn an tih. 27 Amiruokchu, phur ieng khom Jerusalem kul kotkhâra phur lût loa chawlni inser thienghlim dinga ka hril ang cheua in thaw naw vai chun, kul kotkhàrah thel ruol lo mei insuoktir ka ta, a kul po po kàng hmang vong a tih" tiin.

18

1 LALPA thu chu Jeremia kuomah a hung tlung a: 2 "Tho la, bêlhemtu inah zu fe la, chu taka chun ka thuhai inhriettir ka ti che" a ta. 3 Bêlhemtu inah chun ka zu fe a, a bêl siemna khawlah sin a lo thaw a. 4 Pilpoka bêl a siem lai chu a kuta a tawk siet pal pha leh a pilpok bok chu hmangin tha a ti dàn ang takin bêl dangin a siem nawk pei a. 5 Chuongchun, LALPA thu chu ka kuomah a hung tlung nawk a: 6 "Aw Israel sûngkuohai, bêlhemtu thaw dàn ang hin ka thaw thei ve naw chêu am a ni?" ti hi LALPA thu suok a nih. "Aw Israel sûngkuohai, bêlhemtu kuta pilpok ang el hin ka kuta um in nih. 7 Ieng huna khom ram le hnam pot suok a, thiek a, suksiet ka tum thu puong lang khom, 8 chu hnam chun a chungthu ka hril leia thil tha lo a chìng chu a nghatsan chun a chunga thil tha lo thaw ka tum chu inkei kîr ka tih. 9 Ieng huna khom ram le hnam ka siem ding thu le indin ding thu lo hril tah lang khom, 10 ka thu hril ngaithla lo a, ka mithmuah thil tha lo an thaw chun, an ta dinga thil tha thaw ka tum chu sût nawk ka tih. 11 "Chuleiin, Juda mihai le Jerusalema chênghai kuoma chun, 'Ngai ta u, in lakah thil tha naw phier ka nei a, sietna ka hung intlungtir ding a nih. Mi tinin in thilsuol thawhai chu sim unla, in um dàn tha nawhai le thil tha naw in thawhai chu nghatsan ro' tia va hril tawl dingin LALPAN a mi tir a nih. 12 Anni ruok chun, "A tûl nawh. Kan nuom ang angin um kan ta, kan nuom leh lulul insuoin suol zom pei kan tih" tîng an tih. 13 Chuleiin, LALPAN hieng hin a tih:"Hieng ang hrim hi an um hlak am?Tiin hnam danghai indon hrim ta u!Israel nunghâk thienglâm chun, Thil pangzatum tak a thaw a nih. 14 Lebanon tlàng sìpa vûr chun, A tlâng an kiengsan hlak am?Hla taka inthoka hung luong, A tui dei chu a kang hlak am? 15 Ka mihai ruok chun mi theinghilin, Hmangna bo milem bein, An hmaah rimtui an inhlàn a, Chu chun a'n sui thlûktir a, Tiena inthoka an hraw hlak, Lampui hlun chu pêtsanin, Tuk lo lam an hraw ta si. 16 A ram tlaran vong a ta, Mi hmusit inchang a ta, Mi invâk vèl taphotin, Pangzatin lu thin an tih. 17 Khawsak thlipui ang elin, Hmêlma hmaah phìn dar ka ta, Sietna an tuok nia chun, Ka hmêl inhmutir loin, Tukkhum innghat lem ka tih. 18 Chun, anni chun, 'Thaw ro, Jeremia hi phierrûk ei tiu; dàn thu mi zirtirtu ding thiempuhai, thurawn mi petu ding mi var hai, thu mi hriltu ding zawlneihai um zing tho an tih. Thaw ro, soisel mur mur ei ta, a hril hrim hrim hi ngaisak nawng ei tiu" an ta. 19 Mi ngaisak rawh, Aw LALPA, Mi hêktuhai hril hi lo ngaithla rawh. 20 Tha hi maw suolin an rul hlak?Ka tlàkna ding tlâkkhur an cho si. An laka i lungsen la kieng dinga, Ka hnìpèk tawl kha hre zing rawh. 21 An nauhai tàmpui intuoktir la, Kawlhnâm ngei inhmatontir rawh. An nuhmeihai nau boin hmeithai sien, An pasalhai sukhlumin um hai sien, An tlangvàlhai khom indonaah, Kawlhnâmin thi vong raw se. 22 Mi man tuma, tlâkkhur cho a, Ka kea an mi phì awkna ding, Arûka châng an kam leiin, Rûntuhai i'n nangtir thut la, An inah khêk rong rong raw hai se. 23 Mi that tuma an phierrûk dàn, LALPA nang chun i hriet vong. An suol thaw hi ngaidam naw la, I mithmuah thai bo naw rawh. I hmaah thè thal vong la, I lungsen ni'n soisa hrep rawh.

19

1 Chun, LALPA chun ka kuomah, "Fe la, bêlhemtu pil bêl va'n chaw la, khawtlâng upahai le thiempuhai thuoi la, 2 bêlhemtuhai lùtna kotkhàr bula Ben Hinom ruoma chun fe thla la, chu taka chun i kuoma thu ka hril ding che hi puong rawh. 3 Hieng ang hin hril rawh: 'Juda lalhai le Jerusalema chênghai, LALPA thu hi lo hre ro. Israelhai Pathien, Iengkim LALPA chun hieng hin a tih: Ngai ta u, hi hmuna hin sietna ka hung intlungtir ding a na, a hre taphot nà nghor a tih. 4 Hieng mihai hin an mi zàmsan a, hi hmun hi an sukporche a, anni le an pahai le an lalhai khomin an la hriet ngai lo hnam dang pathienhai an làk lùt a, an kuomah an inthawi a, hi hmun hi poi tawk lo thisenin an suksip a. 5 Chun, ka thupêk le thaw dinga ka hril khom ni lo, ka ngaituonaa khom la lût ngai lo thil thawin, Baal ta dinga an nauhai pumraw thilhlâna an inhlàn theina dingin bawlhmun, hmun sâng an indin bok a. 6 Chuleiin, ngai ta, hi hmun hi Tofet amanih Ben Hinom Ruom amanih ti ta loa Insàmna Ruom an la ti lem ni ding chu a hung tlung ding a nih. 7 " 'Hi hmuna hin Judai ram le Jerusalema mihai thil tumhai chu suktlol vong ka ta, that tuma zongtu an hmêlmahai kawlhnâmah tlûng an ta, an ruonghai chu chunglèng vatehai le hnuoia ramsahai bu dingin pêng ka tih. 8 Hi khawpui hi nuoi hmât ka ta, mi nuizatbûrah siem ka ta, a fe pèl taphotin a hliem tuor lei chun maktiin inchek khum an tih. 9 An naupahai le naunuhai sà infâktir ka ta, an hringna la tumtu hmêlmahaiin an inhuol tom beidong lai chun anni le anni sa infa ton an tih. 10 "Chun, i fepuihai mithmuah bèl chu vaw koi i ta, 11 an kuomah, 'Iengkim LALPA chun hieng hin a tih: bêlhemtuin bêl a vuok koi a, siem that nawk ruol a ni naw ang hin, hi hnam le hi khawpui hi bêl ang hin vaw dar ka tih. An mithihai chu Tofet-ah phûm an ta, a hmun khomin keng naw nih. 12 Hieng ang char hin hi hmun le hi khawpuia chênghai chunga hin thaw vèng ka ta, hi khawpui hi Tofet angin siem ka tih' LALPA chun a tih. 13 Jerusalema inhai le Juda lalhai in po po, in chunga rimtui raw a, vàn lêngruol le pathien dang dang be a, dawn thilhlânhai an bun suokna hmun po po chu Tofet hmun ang boka tirdakumah inchang vèng a tih" tiin. 14 LALPAN thu hril dinga a tirna hmun Tofet-a inthok chun Jeremia chu a hung tung a, LALPA tempul inhuonna sùnga chun a ngîr a, mipuihai kuomah, 15 "Hi hi Iengkim LALPA, Israelhai Pathienin a hril chu a nih: 'Ngai ta u, thil tha lo ka hrilhai po po kha hi khawpui le khaw dang po po chunga hin ka hung intlungtir ding a nih, insuklulul a, ka thu an ngaithlàk naw leiin' tiin" a ta.

20

1 LALPA tempula hotu tak, Imer naupa thiempu Pasurin Jeremia thu hrilhai chu a lo hriet a. 2 Chuongchun, thiempu Pasur chun zawlnei Jeremia chu mi a'n vuoktir a, LALPA tempula Benjamin Kotkhàr Chuonchunga chun kol inbuntirin ripah a hrèn a. 3 A zînga Pasurin Jeremia kol bun a sût lai chun Jeremian, "Pasur, LALPAN i hming hi a thlâk ta a, Magor-Misabib tia ko ni lem tàng i tih. 4 LALPA chun hieng hin a tih: Ngai ta, nangma le i ruolhai po po ta dingin mi tibaiumah siem ka ti che a, hmêlmahai kawlhnàma i ruolhai an sàm thlùk lai chu i mit ngeiin hmung i tih. Judahai po po Babulon lal kutah pe vong ka ta, ama chun Babulon tieng sala a thuoi naw po kawlhnâmin that a tih. 5 Chu bâkah, khawpui hausakna po po hai, a thaw suok le thar suok po po hai, a ro hlu po po hai le Juda lalhai rosum po po hai chu hmêlmahai kutah pêng ka ta, anni chun rok an ta, lâng an ta, Babulon tieng hawn vong an tih. 6 Chun, nang Pasur chu, i ina chêng po pohai leh, salah intâng i ta, Babulon tieng thuoi an ti che a, chu taka chun thîng i ta, khêl thu i'n bà hlak i ruolhai po po leh chu taka chun phûm an ti che" a ta. 7 Aw LALPA, nangin i mi hlèm a, Hlèmin ka um let dèr a ni hi. Ka nêkin i hrât lem si a, Ka dol zor dèr a ni hi. Sùnnithlâka mi chêksolin, Mi tinin an mi nuisaw. 8 Ka hang khêk ve zàt hlak chun, Inpawngnêkna thuhai leSietna thu ngot ka puong si. LALPA thu ka puonghai chun, Nuizatbûr mi'n changtirin, Mi hal kawng a mi'n hlawtir. 9 "Ama sâm sâ ta naw ningah, A hmingin hril ta ngai naw ning"Tia ka hang hril hlak chun, Ru sûnga mei thun angin, I thu chun ka lungrilah, Mei angin a mi hlieu a, Ka pai tok tok thei naw a, Ka topui thei hlol si nawh! 10 Sîr tina mi deusawin, "Titna ringot hril hlakpa, I hril phot ripawt kan tih"Tiin an mi nuisaw a, Ka hril suol an inchàn a, Chu chun kei chu mi khita, Phuba lâk an tum a nih. 11 Sienkhom mi hrât le huoisen, LALPAN a mi umpui leiin, Mi sukdùdàtuhai chu, Mi hnè loin tlûng an ta, An tum hlawsam dêr an ta, Kumkhuoin muolpho an ta, An muolpho hmingsietna chu, Theinghil ni ta ngai naw nih. 12 Aw Iengkim LALPA, Mi indik chu bi chieng a, Lungril le ngaituonahai, Thlîthlàia en fie hlaktu, An chunga i phuba làk chu, Mit ngeiin mi'n hmutir rawh, Ka chungthu hi i kutah, Ka'n koltir vong ta si a. 13 LALPA kuomah hla sak ro!LALPA inpâkin chawimawi ro!Mi suolhai kuta inthokin, Thangpui ngaihai hringna chu, San suokin a hum si a. 14 Ka hung pieng thlàkna ni chu, Tongsie phurin um raw se!Ka nu'n a mi nei ni chu, Malsawmin um naw raw se! 15 "Nau pasal i nei!" ti a, Ka pa kuomah hung hril a, A lungril suklawmtu chu, Tongsie phurin um raw se. 16 Lungsietna nei dêr lo a, LALPA sukram khuo angin, Chu mi khom chu um sien la, Zîngkâr tap ri ngaithla sien, Sûn chang pha leh indo ri. 17 Sûlah mi lo sukhlum sien, Sûl chu ka thlàn nîng a ta, A mi von song el ding bah! 18 Buoi le lungngaina tuor a, Ka nihai inzak taka, Hmang zo nawk el ding chauin, Ieng leia sul a'nthokin, Ka pieng rêng rèng am a na?

21

1 Malkija naupa Pasur le Maseia naupa thiempu Zefania hai chu Lal Zedekian Jeremia kuomah a tir a. 2 Ama chun an kuomah, "Hi, Babulon lal Nebukadnezzar chun a mi do ta si a. LALPAN kha hmaa thil mak a thaw hlak ang bok khan a mi thawpèk chun, a'n kîrtir el thei a. Chu thu chu Jeremia-in LALPA kuomah mi lo indonpèk raw se" a ta. 3 Jeremia chun an kuomah, "Zedekia kuomah hieng ang hin va hril ro. 4 Israelhai Pathien, LALPA chun hieng hin a tih: 'Ngai ta, Babulon lal le Kaldai mi, kul puo tienga inhuoltuhai che i dona hriemhrei chu nangma tieng inlettir ka ta, khawpui sùnga hin hmêlmahai chu thuoi lût ka tih. 5 Keima ngei hin lungsen tak le intûr takin, keima kut hrât ngei inletin, intìmna nei dêr loin ka bei ding cheu a nih. 6 Hi khuoa chêng mihriem le ranhai chu nghaisàng ka ta, hripuiin thîng an tih. 7 Chu hnunga chun Zedekia le a thoktuhai le mi dang, hi khuoa chêng, kawlhnâm le tàma thi lohai chu Babulon lal Nebukadnezzar le hmêlmahai kuta le anni that tumtuhai kuta chun pêng ka tih. Kawlhnâm ngeiin that an ta, lunginsiet naw ni hai a, lainat bok naw ni hai' ti hi LALPA thu suok a nih. 8 "Chu bâkah, mipuihai kuomah hieng hin hril rawh: 'Ngai ro, in hmaah hringna lampui le thìna lampui ka sie ding a nih. 9 Hi khawpuia um taphot chu kawlhnâm amanih, tàm amanih, hripuiin amanih thîng an tih. Tu khom tlân suoka, a'n huoltu cheu Kaldaihai kuoma inpehai chu dam an ta, an hringna humin um a tih. 10 Hi khawpui thatna ding nêka a sietna ding thaw ka tum leiin, Babulon lal kutah pèk nîng a ta, meiin raw hmang a tih' ti hi LALPA thu suok a nih. 11 "Juda lal sûngkuohai chungthua LALPA thu hi ngaithla ro. 12 Aw Davida sûngkuohai, LALPA chun hieng hin a tih:'Tûk tinin ro rêlpêk unla, Sukdùdàtu kuta inthokin, Roka um chu san suok ro; Chuong naw chun ka lungsennan, In thil tha naw thaw leiin, Meichok angin kàng a ta, Thel ngaina hrim um naw nih. 13 Nang, tlâng sîp zawla chêng, Lungpui zawl chungah chuonga, 'Tu'n am an mi bei thei ding?An mi hlù khum ngam ding maw?'Tituhai, ka khing chêu a nih, Ti hi LALPA thu suok a nih. 14 In thilthaw phû ang peiin, Ka hrem ve ding chêu a nih. . In ramngaw kàng ral dingin, Mei insuopêk ka ti chêu a, A vêl po kàng vong a tih, Ti hi LALPA thu suok a nih.

22

1 LALPA chun hieng hin a tih, "Juda lal inah zu fe la, hi thu hi zu hril rawh: 2 Aw, Juda lal, Davida lalthungphaa inthung, nangma le i thoktuhai le hi kotkhàra hung lùt hlak i mihai leh, LALPA thu suok hi lo ngaithla ro. 3 LALPA chun hieng hin a tih: Indik tak le fel takin ro rêl unla; sukdudatu kuta inthokin rok tuokhai chu san suok unla; mikhuolhai, fahrahai le hmeithaihai nêksawr le an chunga indik lo taka thaw chîng naw unla; hi hmuna hin poi tawk lo thisen insuo bok naw ro. 4 Hi thu hi fimkhur taka in zawm chun, Davida lalthungphaa inthung lalhai chu tawlailir amanih le sakor amanih chunga hai chuongin, an thoktuhai le mipuiin zuiin, hi in kotkhàra hin lût hlak an tih. 5 Amiruokchu, hieng thupêkhai hi in zawm naw chun hi lal in hi tlu ram vong a tih ti keima ngei insâlin ka hril a nih ti hi LALPA thu suok a nih' tiin. " 6 LALPA chun Juda lal in chungthu chu hieng ang hin a hril:Ka ta dingin Gilead ang el leLebanon tlàng sìp ang ni la khom, Thlalèrin siem ka ti che a, Khawpui rausan hnung angin. 7 Suksetu ding hung tir ka ta, Hreipui hung chawi seng an ta, I sidar thá thàhai phûr an ta, Meipuiah tì hlut hlut an tih. 8 "Chun, hnam danghai, hi khawpui hung pal tlangtuhai chun, 'Ieng dinga hieng ang lawma LALPAN hi khawpui chunga hin a thaw el am a na?' tiin indon tuong an tih. 9 'An Pathien, LALPA thuthlung chu màksana hnam dang pathienhai be a, an rong an bawl lei a nih' tiin don an tih. 10 Lal thi chu tà naw unla, A um naw chu sûn naw ro; Saltàng chu sûn rak lem ro, A pieng le murna ramah, Hung kîr ta ngai naw ni a, Hmu khom hmu ta bok naw nih. 11 Juda lal Josia naupa Salum, i a pa Josia hung thlâktu, hi hmuna inthoka thuoi hmanga um chu hung kîr nawk ta ngai naw nih, ti hi LALPA thu suok a nih. 12 Sala an thuoinaa an siena hmuna chun thîng a ta, hi hmun hi hung hmu nawk ta ngai naw nih. 13 "Felnawnaa lal in bawl a, Indik loa insawng bawltu, A ram mihai sor hrep a, An hlaw pe si lotu chu, A chung a va hang pik ngei! 14 'In ropui tak bawl ka ta, Pindan chunghnung lien tak leh; Tukver lien tak siem ka ta, Sidar thing phêk bel ka ta, Rong senin nàl vong ka tih'Titu chung ngei chu a pik. 15 Sidar thing in i bawl leiin, Inlal lemah i'n ngai a ni?I pa khan fâk le dawn ding, A tlasam hlak am a ni?Indik taka a thaw leiin, A hmuingil an nawm a ni? 16 Mi pasie le tlasamhai, Chungthu a rèl fel hlak a, Iengkimah a tluong a ni kha. Chuong ang chu nang ngei khomin, I mi hriet dàn ding an naw maw?Ti hi LALPA thu suok a nih. 17 Sienkhom hlèprûk dàn ding le, Poi tawk lo thisen insuoa, Nêksawra làklui dànhai, Lungrilin i mel ràn si. 18 Chuleiin, Juda lal Josia naupa Jehoiakim chungthu chu LALPAN hieng ang hin a hril:'' 'A poi ngei maw, unaupa!A poi ngei maw, unaunu!'Tiin sûn naw ni hai a; 'I pâm ngei maw, ka lalpa!I ropuina a pâm ie!'Tiin sûn bok naw ni hai. 19 Sabengtung phûm ang elin, Jerusalem kul puo tieng, A ruong chu kei phît an ta, Tuola chun dehawn an tih. 20 Lebanon tlângah kaiin, Chu tak a'nthok chun khêk la, Basan chen thangkhawk raw se; Abarim tlângah tap rawh, I'n zompuihai po po kha, An bohmang vong ta si a. 21 I ngai i sukmuong lai khan, Fimkhur di'n ka'n fui che a, 'Ngaithla naw nîng' i ti si. I tleirawl lai a'nthok a, Chu chu i um dàn a na, Ka thu i ngaithlàk nuom nawh. 22 I berampuhai po po, Thliin lèn hmang vong a ta, I'n zompuihai po po khom, Salah intâng vong an tih. I rîtlonahai leiin, Chu pha chun muolpho taka, Hmaimawkin la um i tih. 23 Lebanon Ngaw Runaj chêng, Sidar ina bu khuortu, Nau hase ang topa nâ, Natnan a bawm pha chea, I nat tuor inrûm ding chu, Ieng am top am nîng a ta! 24 "Nang Jehoiachink hi Juda lal Jehoiakim naupa, ka suoi namna kutsebi khom ni la, ka kuta inthokin ka phawi suok ding chè a nih. 25 That dinga zongtu che, Babulon lal Nebukadnezzar kuta le Kaldaihai kuta ngei chun pe suok ka ti che. 26 I piengna ni lo ram dangah nang le i nu, a hringtu che hi pei suok ka ta, chu taka chun thîng in tih. 27 Kìr nawk in châk êm êmna rama chun kîr nawk ta naw ti niu" tiin. 28 Hi Jehoiachin hi bêl koi dar, Mi hnawl hnung a ni naw maw?Ama le a thlahai chu, An hriet ngai lo rama chun, Ieng leia an pei suok am? 29 Aw ram, aw ram, aw ram, LALPA thu hi lo ngai rawh! 30 Hieng hin LALPA chun a hril:Nau nei dèr naw ang elin, Hi mipa hi inchik rawh:Pa hmuingîl lo ding a na, A thlàhai laia tu khom, Mi hmuingîl um naw ni a, Davida lalthungphaah, Tu khom inthung naw ni a, Judai ram chungah tu khom, Inlal ngai bok naw ni hai, "Tiin LALPA chun a puong.

23

1 "Ka ran tlatna hmuna beramhai suksetu le sukdartu berampu chu a chung a va hang pik ngei" ti hi LALPA thu suok a nih. 2 Chuleiin, LALPA, Israelhai Pathien chun ka mihai enkoltu berampuhai kuomah hieng thu hi a hril: "Ka ran ruolhai sukdar a, hnot hmang a, in enkol tha naw leiin, in thilthaw indik naw leiin ka hrem ding cheu a nih, " ti hi LALPA thu suok a nih. 3 "Ka ran ruol, hlaa la um sunhai chu ka hnot darna hmuna inthokin thuoi khawm nawk ka ta, an huongah tla nawk an ta, chu taka chun nasa takin hung pung an tih. 4 Anni enkoltu ding berampu sieng ka ta, tiin an thlà phâng ta naw ni a, tu khom inhmang um ta nawng an tih" ti hi LALPA thu suok a nih. 5 "Ngai ta, Davida ta dinga felna kau zâr ka hung insuopêk hun ding chu a hung tlung ding a nih" ti hi LALPA thu suok a nih. Ama chu lalah inthung a ta, var takin a ram pumah indik tak le fel takin hung thawng a tih. 6 Ama huna chun Juda chu sandamin um a ta, Israel chu him takin um a tih. A hmingah EI FELNA LALPA tiin ko an tih. 7 "Chuongchun, chu hun chu a hung tlung ding a ni tah" ti hi LALPA thu suok a nih. "Chu phâ chun, 'Aigupta rama inthoka Israelhai thuoi suoktu LALPA hringna sâlin' ti ta loin, 8 'Hmar tieng ram le a hnot darna ram po poa inthoka Israel thlahai hung thuoi khawm nawktu LALPA hringna sâlin' tiin thu inkhâm lem tàng an tih. Chu phâ chun anni rama ngei um tâng an tih" tiin. 9 Zawlneihai chungthua chun:Ka lung hi a koi dar a, Ka rùhai an inthin a. Zu rui ang el ka ni ie, Zuin a chie zor ang el. Chu chu LALPA thaw a na, A thu thienghlim lei a nih. 10 Ram chu uiretnan sipin, Tongsie phur a ni leiin, A ram phêkin a tawl a, Thlalèra hmun hringhai khom, A hung tawl zo ta vong a, Zawlneihan lam suol hrawin, An thilthawtheina kol chu, Fel naw takin an hmang si. 11 "Zawlneihai le thiempuhan, Pathien an poisa naw a, Ka tempul sûnga chen khom, Rîtlona thil ka hmu si"Tiin LALPA chun a hril. 12 Chuleiin an lampui khom, Hung innâl deu deu a ta, Thimah hnot lût nîng an ta, Chu chun intol thlûng an tih. Ka hrem hun a tlung pha chun, Sietnain vur tawl ka tih"Tiin LALPA chun a hril. 13 "Samaria zawlneihai lai, Thil tirdakum ka hmu a, Baal thu an hril tawl a, Israelhai an thuoi hmang. 14 Jerusalema zawlnei lai, Thil râpthlâk tak ka hmu a, Uirea khêl hringpuiin, Thil suol thawtuhai kut chu, Sukhrâttuah an thang a, Tu khomin an rìtlona, Bàn an tum naw phà a nih. Jerusalem mihai hi, Ka ta ding chun Sodom leGomorra mi ang an nih. 15 Zawlneihai chungchanga Iengkim LALPA thu suok chu hi hi a nih:"Bu khá in fâktir tawl ka ta, Tûr tui indawntir tawl ka tih, Jerusalema zawlneihai leiin, Pathien ngaisak nawna lungril, A ram pumah a'n lêng si" tiin. 16 Iengkim LALPA chun hieng hin a hril:" Zawlneihai thu hril awi naw ro, Beiseina lem petuhai hi. LALPA bàua an dong ni lo, An lungrila an suongtuo thil, In kuomah an hril hlak si a. 17 Kei mi hmusittu kuomah, 'I ta dingin thâng a tih'Tiin an hrilpêk rop a; An lungril nuomzawng hnota, Lulul insuohai kuomah, 'Sietna i chungah tlung naw nih'Tiin an hrilpêk bok hlak. 18 LALPA remruotna hmunah, A tu am thang ve hlakin, Ama hmu le a thu hrein, An ngaithlàk tah hrim hrim a? 19 LALPA lungsenna thlipui chu, En rawh a hung hràng ding a nih, Thawngaleivir a hung thla, Mi suolhai lu nuoi dingin. 20 A lungrila a thil tum, A hlen kim zo hmâ khat chun, LALPA lungsen kîr naw nih. A ni a hung tlung pha chun, Iengkim la hre chieng in tih. 21 Hieng zawlneihai hi ka tir nawh, Anni thu a nih an invirpui; An kuomah thu ka hril nawh, Anni thu a nih an hril. 22 Ka remruotnaa thang ve, An lo ni chu ni sienla, Ka mihai kuomah ka thu, An puong dar tah ding a na, Thil tha naw an thaw lakah, Inlamlettir tâng an tih. 23 "Hla taka um Pathien ni loin, hnâitea um Pathien ka ni lem" ti hi LALPA thu suok a nih. 24 "Ka hmu thei lona dinga inbiru thei tu am an um ding a na?" ti hi LALPA thu suok a nih. "Kei hi hnuoi le vàn hluo siptu ka nih" ti hi LALPA thu suok a nih. 25 " 'Mangah ka mang, mangah ka mang' tia ka hminga khêl hril hlaktu zawlneihai thu hril chu ka hriet. 26 Zawlnei khêlhlip, mani suongtuona thu hril hlakhaiin hieng ang lungril hi ieng chen am an put ding a na? 27 Anni le anni mang inhril tuoin, an thlatuhaiin Baal an biek leia ka hming an theinghil ang khan, ka mihai chu ka hming intheinghiltir an tum a nih. 28 Mang neitu zawlnei chun a mang chu hril sien la, ka thu hretu zawlnei ruok chun ka thuhai chu ringum takin puong raw se. Bu tak le bupawlin ieng am inangna an nei a?" ti hi LALPA thu suok a nih. 29 "Ka thu hi mei ang le lung vuok nawina tubo ang a ni naw am a ni?" ti hi LALPA thu suok a nih. 30 "Chuleiin, ngai rawh, ka thu ni awm taka an ruolhai thu hril sawng hlak zawlneihai hi ka do a nih" ti hi LALPA thu suok a nih. 31 "Ngai ta u, zawlnei mani phuokfawm hril tlor a, 'LALPAN a tih' ti hlaktuhai hi ka do a nih" ti hi LALPA thu suok a nih. 32 "A nih, ka tir le ruot khom ni lo, mang tehlèm mei mei hrila khêl muhluma ka mihai thuoi hmang chîng hlak zawlneihai hi ka do takzet a nih. Ka mihaiin tangkaipuina hlek khom an nei nawh" ti hi LALPA thu suok a nih. 33 "Hieng mipuihai laia mi tuin amanih, zawlnei tuin amanih, thiempu tuin amanih 'LALPA thucha chu ieng am a na?' tia an indon cheu chun, 'Nangni hi a thuchal chu in na, ka pei hmang ding cheu a nih' ti hi LALPA thu suok a nih, tiin in don ding a nih. 34 Zawlnei amanih, thiempu amanih le tu el khomin, 'Hi hi LALPA thucha chu a nih' a ti chun ama le a sûngkuohai hrem ka tih. 35 Nangni laia in chîng tak chu, 'LALPAN iengtin am a don? LALPAN iengtin am a hril?' tia in ruolhai amanih in sûnghai amanih in indon kuol hi a nih. 36 Amiruokchu, 'LALPA thucha' ti ruok chu hril ta naw ro; mi tinin in hril chu nangni thucha a ni leiin, Iengkim LALPA, ei Pathien, Pathien hring thucha chu in keilet mei mei a nih. 37 Zawlnei kuoma chun, 'LALPAN iengtin am a don che? LALPAN iengtin am a hril a?' tiin indon ro. 38 'LALPA thucha chu' in ti vai chun, LALPA chun hieng hin a tih: 'LALPA thucha chu in ti ding a ni nawh' ka ti sain 'LALPA thucha chu a nih' in ti leiin, 39 ngai ro, ka pot suok ngei ding cheu a na, ka kuoma inthokin pei hmang ka ti cheu, nangni le in pahai kuoma ka lo pêk tah hi khawpui leh hin. 40 Chun, kumkhaw muolphona le inzakna theinghil thei ruol lo chu in chungah hung intlungtir ka tih" tiin.

24

1 Nebukadnezzar, Babulon lalin Judahai lal Jehoiakim naupa Jehoiachin le Juda hotuhai, mi themthiemhai le thîrsuhai leh Jerusalema inthoka Babulon tieng sala a thuoi hnung khan LALPA tempul hmaa theichang bawm hni inthut chu LALPAN a mi'n entir a. 2 Bawm pakhata chun theichang tha tak, a rà hmin hmasa ang chu a um a, bawm danga chun theichang tha lo, fàk tlâk lo khopa sie a lo um a. 3 LALPA chun ka kuomah, "Jeremia, ieng am i hmu a?" a ta. Kei chun "Theichang ka hmuh. A then chu a tha hle a, a then chu fàk tlâk loa sie a nih" ka ta. 4 Chun, LALPA thu chu ka kuomah a hung tlung a. 5 "LALPA, Israelhai Pathien chun hieng hin a tih: Juda lal saltânghai, Kaldaihai rama an thatna dinga ka tir suokhai chu, hieng theichang ra tha ang hin ka en tawl ding a nih. 6 An thatna dingin an chungah mit inlèn zing ka ta, hi rama hin thuoi kîr nawk ka ta, anni chu thiek hmang loin tungding ka ta, phawi hmang loin phun lem ka tih. 7 Kei hi LALPA ka nizie an mi hriet theina dingin lungril pêng ka tih. Ka mihai nîng an ta, kei an Pathien nîng ka ta, an lungril po po leh keima tieng an hung ngha kìr nawk ding a ni si a. 8 "Theichang tha lo, fàk thei lo khopa sie ang hin Judahai lal Zedekia le a thoktuhai le Jerusalema la chambâng, hi rama la umhai le Aigupta rama chênghai chu nghatsan tawl ka tih. 9 Ka hnot hmangna khawlai rama khom mihai tirdak le theida dingin siem tawl ka ta, mi vîn le hal kawng, mi nuizat le tongsie phurin um an tih. 10 Anni le an thlatuhai kuoma ram ka pèka inthoka sukbohmang anni hmâ khat chu anni lai kawlhnâm le tàm le hripui inlèngtir ka tih" tiin.

25

1 Juda lal Josia naupa Jehoiakim inlala inthoka a kum lina chun Judai rama mihai po po chungthua LALPA thu chu Jeremia kuomah a hung tlung a; chu chu Babulon lal Nebukadnezzar inlal kum khatnam a nih. 2 Chuongchun, zawlnei Jeremia chun Judai rama um po po le Jerusalema chêng po po kuomah chu thu chu a hril a: 3 Kum sawmhni le kum thum sûng, Amon naupa Juda lal Josia inlal kum sawm le kum thumnaa inthokin tu chen hin LALPA thu chu ka kuomah a hung tlung hlak a, chuonghai chu ka hril ka hril hlak cheu a, sienkhom in ngaithlàk si nawh. 4 Chun, LALPAN in kuomah rongbawltu zawlneihai a hung tir a hung tir hlaka chu an thu in ngaithlàk naw a, an hrilhai in poisa bok nawh. 5 Anni chun, "Mi tin mani suolna lampuia inthok le thil tha naw thaw in chìngnaa inthokin hung kìr un la, LALPAN nangni kuoma le in thlatuhai kuoma tiena tlânga inthoka kumkhuoa dinga a pèk cheu rama chun chêng thei in tih. 6 Pathien danghai be ding le an rong bawl dingin zui naw unla, in kuta siem milemhaiin mi cho lungsen naw unla, chuongchun sukna nawng ka ti cheu" tia LALPA hril chu in kuomah an puong hlak a ni kha. 7 "Nisienlakhom, in mi ngaithlàk naw a, in kuta siem thilhaiin in mi cho phawk a, nangni le nangni chungah thil tha lo in intlun hlak" ti hi LALPA thu suok a nih. 8 Chuleiin, Iengkim LALPA chun hieng hin a hril: "Ka thu in ngaithlâk si naw leiin, 9 hmar tienga hnamhai le ka siehlaw Babulon lal Nebukadnezzar chu ko ka ta, hi ram le a sûnga umhai le a kawl vela hnam chènghai po po chu hung bei an tih. Sukbohmang vong tawl ka ta, mi pangzat le endong nîng an ta, kumkhuoin tlu ram an tih. 10 Hlimna le lawmna ri hai, mo le moneitu rawl ri hai, bu rawt ri hai le khawnvar êng hai po po suktawp vong ka tih. 11 Hi ram pumpui hi rausan ramah inchangtir ka ta, Babulon lal rong kum sawmsari sûng bawl an tih. 12 "Kum sawmsari a'n voi pha leh Babulon lal le a hnam, Kaldai mihai chu an suolna leiin hrem ka ta, kumkhuoin sukram ka tih" ti hi LALPA thu suok a nih. 13 "Ka hril tah po pohai, hi lekhabua ziek po pohai le hnamhai chungthua Jeremia hril lawk po pohai chu, chu ram chunga chun hung intlungtir ka tih. 14 Hnam tum tum le lal ropui tak tak hai chun anni chu salah thuoi ve thung an ta, an thilthaw ang pei le an kut sinthaw ang phu peiin ka thungrul ding a nih" tiin. 15 LALPA, Israelhai Pathien chun ka kuomah hieng hin a tih: "Hi ka lungsenna uoiin no hi ka kuta inthokin la la, ka tirna ding che hnamhai chu indawntir rawh. 16 Dawn an ta, pêm tliei tliei an ta, anni lai kawlhnâm ka'n lêngtir ding a ni leiin invêt zo an tih" tiin. 17 Chuongchun, LALPA kuta no chu ka lâk a, a mi tirna hnamhai po po chu ka'n dawntir a. 18 Jerusalem le Judai ram khuoa hai fèin, an lalhai le hotuhai chu ka'n dawntir a, chu taka inthoka voisun ni chen hin rausan hmun, mi pangzat, nuisaw le tongsephur an hung ni ta pei a nih. 19 Chun, Aigupta ramah fein, Faraw le a mi lienhai, thoktuhai le mipuihai chu kan biekpui a, chu no tiuma mi chu an dawn bok a, 20 anni bâkah a rama chêng ram dang mihai khomin an dawn a. Chuongchun, Uz rama lalhai dâm; Palestina rama lal po po, Askelon le Gaza le Ekron khuoa lalhai le Asdod khuoa mâksana la umhai dâm; 21 Edom le Moab le Amon thlahai dâm; 22 Tura le Sidona lalhai le tuipui kam rama lalhai dâm; 23 Dedan hai, Tema hai, Buz hai le ram hlaa chênghai dâm; 24 Arabia rama lalhai po po le thlalèra ram dang mi chênghai po po dâm; 25 Zimri hai, Elam hai le Media hai lalhai dâm; 26 hmar tieng lalhai, hmun hla le hnaia mihai le hnuoia lalram po poin an dawn seng a. An rênga an dawn hnung chun Sesak laln khomin dawn vêng a tih. 27 Chun, Iengkim LALPA, Israelhai Pathien chun hieng hin hril rawh a mi tih: Dawn unla, inrui unla, inluok unla, tlu unla, tho ta naw ro, nangni lai kawlhnâm ka hung tir ding a ni si a. 28 Sienkhom, i kuta inthoka no chu la nuom loa an dawn nuom bok naw chun, an kuomah hieng hin hril rawh: 'In dawn ngei ding a nih' ti hi Iengkim LALPA thu suok a nih. 29 'En ta u, ka hminga ko khawpui chunga khom sietna ka'n tlungtir tan a, nangni lem chun hremna pumpel thei in inring hrim hrim am a ni? Hremna pumpel naw top in tih, hnuoi chunga chênghai po po chungah kawlhnâm ka'n let ding a ni si a' ti hi Iengkim LALPA thu suok a nih. 30 "Chuleiin an kuomah hieng thuhai hi puong la, hieng ang hin hril rawh:LALPA chu vàn sânga inthok, A hung khêk suok ding a na, A chêngna thienghlim a'nthok, Hi ram hi inrûm khum a tih. Grêp sawrtuhai khêk ang elin, Hnuoia chênghai po po hi, A hrawk khum ding a ni si. 31 A thangkhawk ri so vêl chun, Kawl kil chen nghor suok a tih; Hnuoia hnamhai po po chu, LALPAN a khing ding a na, Hringmihai ro rêl a ta, Mi rilohai po po chu, Kawlhnâmin sukhlum a tih'Ti hi LALPA thu suok a nih. 32 Iengkim LALPA chun hieng hin a tih:"En ta, sietna rùnpui chu, Hnam tin chungah a tlung ie; Hnuoi hmun tawpa inthokin, Thli sie a hung inthok saw!" 33 Chu nia LALPA mi thathai chun hnuoi tawpa inthoka hnuoi tawp chen dâp suok an ta, sùn lo, làk khawm lo le phùm loin um an ta, hnuoi chungah hmunhnok angin pei dar an tih. 34 Berampuhai, tap rak unla, Inring takin khêk rong rong ro; Beram ruol hmathuoituhai, Hnuoiah intâl top top ro. Thata in um ni a tlung, Belhemtu bêl ang el a, Dèng dar in ni ding ni chu. 35 Berampuhai ta dingin, Tlàn hmangna a um naw a, Beram ruol thuoitu ta dingin, Suok ngaina a um ta nawh. 36 Berampu rawl chu ngai ro, Ran ruol thuoitu tap ri chu; An tlatna hlobet hmun chu, LALPAN a sukram mêk a; 37 LALPA lungsenna leiin, Tlatna hmun hring muongum chu, Rausanin a um mêk si. 38 Sakeibaknei ang elin, A buzawl suoksan a tih; Nêksawrtu kawlhnâm lei leLALPA lung intûr leiin, An ram a ram zo ta si.

26

1 Juda lal Josia naupa Jehoiakim inlal tan tìr lai LALPA thu chu Jeremia kuomah a hung tlung a. 2 "LALPA chun hieng hin a hril a: 'LALPA tempul tuol sûngah ngîr la, Judai ram hmun hrang hranga inthoka LALPA tempula chawibiek dinga hunghai kuomah thu ka pèkhai po po che kha ieng khom hmai nei dêr loin hril vong rawh. 3 Ngàithla a, an um dàn suol màksan khom an um miel el thei a nih. Chuong a ni chun, an suolna leia an chunga sietna intlungtir ka tum chu intlungtir loin ka thu sût ka tih. 4 Chun, nangin an kuomah, 'Hi hi LALPAN a hril: In kuoma ka pêk, ka thu in poisa naw a, ka dàn khom in zawm bok nawh. 5 In kuoma ka hung tir rop hlak ka zawlneihai thu in poisa naw leiin, 6 hi in hi Siloo angin suksieng ka ta, hnuoi chunga hnam tinrêng tongsephurin um a tih' tiin hril bok rawh" tiin. 7 Thiempu hai, zawlnei hai le mipui po po chun LALPA tempula Jeremia thu hril chu an ngàithlàk a. 8 Mipuihai kuoma hril dinga LALPAN thu a pêk po po a hril zo chun thiempu hai, zawlnei hai le mipui hai chun an man a, "I thi ngei ding a nih. 9 Ieng dinga LALPA hming sâla, 'Hi tempul hi Silo ang la nîng a ta, hi khawpui hi hluotu um loin la rausan an tih' tia i hril am a na?" an ta. Chuongchun, LALPA tempula chun mipuiin Jeremia chu an bawr luoi luoi a. 10 Hieng thu hi lal ina Juda rorêltuhaiin an hriet chun tempulah an hang fe a, LALPA tempul lûtna Kotkhàr Thara chun an inthung a. 11 Thiempuhai le zawlneihai chun rorêltuhai le mipuihai kuomah, "Hi khawpui siet ding thu hi a hril lawk leiin hi pa hi thi tlâk a nih. In nâ ngeiin a hril khom in hriet kha!" an ta. 12 Jeremia chun rorêltuhai le mipuihai kuomah, "In thu ngàithlàk tah po po ang khan, hi tempul le hi khawpui siet ding thu hi hril dingin LALPAN a mi tir a nih. 13 Chuleiin, tuhin in um dàn le chêt dàn insiem tha unla, LALPA in Pathien thu chu awi ro, chuongchun LALPAN in chunga sietna hung tlung ding a puong tah chu sût nawk a tih. 14 Kei ruok chu in kuta um ka ni hi; indik le tha in ti dàn ang angin mi thaw ro. 15 In mi sukhlum chun nangni le hi khawpui le a sûnga chênghai chungah poi tawk lo thisen maw chu tlâng a tih ti hre ro; LALPA chun in hriet ngèia hieng thuhai hi indik taka hril dingin a mi tir si a" a ta. 16 Chuongchun, rorêltuhai le mipuihai chun thiempuhai le zawlneihai kuomah, "Hi mi hi thi ding a ni nawh! LALPA ei Pathien hmingin ei kuoma thu a hung hril a ni hi" an ta. 17 A ram mi upa iemani zât an hung ngìr suok a, mipui pungkhawm hmaa chun, 18 "Juda lal Hezekia hun lai khom khan Moreset mi Mika khomin Juda mi po po kuomah, "Iengkim LALPA chun hieng hin a hril:'Zion chu lo anga inlet nîng a ta, Jerusalem chu tlu se rem rum a ta, Tempul muol chu chîmbukin bawm a tih"tiin a lo hril lawk a ni kha. 19 Juda lal Hezekia le Judahai khan ama chu an sukhlum am a nih? LALPA tiin, LALPA ditsakna an ngèn a, LALPAN an chunga sietna intlungtir dinga a puong ta chu a sût nawk a ni naw am a ni? Sietna râpthlâk tak chu eini ngeiin ei tong buok têp lem a ni hi! 20 Chun, mi dang, Kiriat Jearim mi, Semaia naupa Uria khomin LALPA hmingin hi khawpui siet ding thu bok hi Jeremia ang hin a hril lawk ve kha. 21 Lal Jehoiakim le a mi lienhai po po le rorêltuhaiin an hriet chun Uria chu lalin sukhlum a tum a, sienkhom chu chu Uria-in a lo hriet a, tiin a tlân hmang a, Aigupta ramah a fe a. 22 Lal Jehoiakim chun Aigupta ramah Akbor naupa Elnathan le mi iemani zàt a tir a. 23 Uria chu Aigupta rama inthokin an hung thuoi kîr a, lal Jehoiakim hmaah an thuoi a, kawlhnâmin a sât hlum a, mi naran phùmnaah a ruong an pei lût a ni kha" an ta. 24 Chu bâkah, Safan naupa Ahikam chun Jeremia chu a tan tlat leiin, that dingin mipui kuomah an pèk lût ta naw a nih.

27

1 Juda lal Josia naupa Zedekia inlal tan hlimin LALPA kuoma inthokin hi thu hi a hung tlung a. 2 LALPA chun, "Ringkol le a hrui siem la, i ringah bât rawh. 3 Edom lal hai, Moab lal hai, Amon lal hai, Tura lal hai le Sidon lal hai kuoma chun Jerusalema Juda lal Zedekia kuoma an palai hung tirhai hmangin an kuomah thu thon rawh. 4 Hieng thu hi an puhai kuoma hril dingin hril rawh: Israel Pathien, Iengkim LALPA chun hieng hin a tih: 5 'Ka thilthawtheina ropui tak leh ka bân pharin hnuoi le mihriemhai le a chunga um ramsahai hi ka siem a, ka pèk nuom nuom kuomah ka pêk a. 6 Tu khom hin ka rongbawltu Babulon lal Nebukadnezzar kutah hi ram po po hi ka pêk tah a, ramsahai khom ama rong bawl dingin ka pêk tah bok a nih. 7 Ama tlâkran hun a tlung hma chun hnam po poin ama le a nauhai le a tuhai rong bawl an ta, chu hnunga ruok chu a siet hun hung tlung a ta, hnam hrang hrang le lal tum tumin an thu hnuoiah sie ve thung tàng an tih. 8 "Amiruokchu, hnam amanih ram amanih tu khom Babulon lal Nebukadnezzar ringkol bât nuom lo le a rong bawl nuom lo an um chun chuonghai chu amain a tukdol hmain kawlhnâm le tàm le hripuiin keiman hrem tawl ka tih. 9 In zawlnei hai, aisanthiem hai, mang hril fie thiem hai, rau ko thiem hai le dawithiem haiin in kuomah, 'Babulon lal rong bawl naw ti niu' an ti chun an thu ngâithla naw ro. 10 Keiin in rama inthoka hla takah ka hnot suok theina ding cheu le in bohmang theina dingin in kuomah khêl thu an hril hlak a nih" ti hi LALPA thu suok a nih. 11 'Amiruokchu, Babulon lal ringkol bât a, a rong bawl nuomtu hnam chu an ram ngaiah inumtir ka ta, a hnuoi inlet an ta, chu taka chun chêng zing an tih'" ti hi LALPA thu suok a nih. 12 Chun, Juda lal Zedekia kuomah chu thu char chu hieng hin ka hril a: Babulon lal ringkol bât unla, ama le a mihai rong bawl unla, chuongchun hring in tih. 13 Babulon lal rong bawl nuom lo hnam chungthu LALPAN a hril tah ang khan, ieng leiin am kawlhnâm hai, tàm hai le hripui hai leiin nang le i mihai chu in thi ding? 14 Zawlnei tu khomin in kuomah, 'Babulon lal rong bawl naw ro' an hung ti chun ngâithla naw ro, in kuoma khêl thu an hril mei mei a ni lem. 15 'Anni chu ka tir an ni naw a, ka hming sâlin khêl thu an hril hlak a, nangni le in kuoma thu hung hriltuhai chu hnot suok a, ka sukbohmang theina ding cheuin' ti chu LALPA thu suok a nih. 16 Chun, thiempuhai le mipuihai kuoma khom ka hril bok a. LALPA chun hieng hin a tih: In kuoma zawlnei tu khomin, 'Ngai ro, Babulona inthokin LALPA tempula bûr le bêlhai chu an hung chawi kîr nawk vak ding a nih' an ti chun awi naw ro, khêl thu an hril cheu a nih. 17 Anni chu ngâithla naw unla, Babulon lal rong bawl unla, hring in tih. Ieng leiin am hi khawpui hi sukrama a um ding chu? 18 Zawlnei an ni a, LALPA thu an kuomah a um a ni chun, LALPA tempul le Juda lal in le Jerusalema bûr le bêl la umhai chu Babulon tienga tol a ni nawna dingin Iengkim LALPA kuomah ngèn lem raw hai se. 19 Chuong ang chun Iengkim LALPAN dâr ban hai, dâr tuizem hai, thilthuta hmang tawlailir hai le bûr le bêl, khawpuia an màksanhai chungchang thu chu a hril a ni kha. 20 Babulon lal Nebukadnezzar-in Juda lal Jehoiakim naupa Jehoiachinp le Judai ram le Jerusalema mi tha po po Babulon tienga sala a thuoi khan chuonghai chu a lâk sà naw hrim a nih. 21 A nih, LALPA tempul le Juda lal in le Jerusalema thil màksana la umhai thu kha Iengkim LALPA, Israel Pathien chun a hril a nih. 22 "Chuonghai chu Babulon tieng làkin um an ta, anni ka hung kan hma po chu chutaka chun um zing an ta, keiin la kîr nawk ka ta, hi hmuna hin sie kîr nawk ka tih" ti hi LALPA thu suok a nih.

28

1 Juda lal Zedekia inlala inthoka a kum lina, thla nganaq chun Azur naupa zawlnei Hanania, Gibeon mi chun thiempuhai le mipui po po hmaah LALPA tempula chun a mi biek a, ka kuomah, " 2 Iengkim LALPA, Israel Pathien chun hieng hin a tih: Babulon lal ringkol chu suktliek ka tih. 3 Babulon lal Nebukadnezzarin LALPA tempula inthoka bûr le bèl a lâk po po chu kum hni sûngin hi hmuna ngei hin hung inthaktir nawk vong ka tih. 4 Hi hmuna hin Juda lal Jehoiakim naupa Jehoiachin le Babulona fe Juda mi sala intânghai po po chu hung thuoi kîr nawk vong ka ta, Babulon lal ringkol chu ka suktliek ding a nih' ti hi LALPA thu suok a nih" tiin. 5 Chu phing leh zawlnei Jeremia chun LALPA tempula ngîr thiempuhai le mipuihai hmaa chun zawlnei Hanania chu a don a. 6 Ama chun, "Amen, chuong ang chun LALPAN thaw sien ni ding maw! LALPA tempula bûr le bèlhai le saltânghai chu i hril ang chun LALPAN thawin hi hmuna hin hung intlungtir nawk vong raw se. 7 Amiruokchu, nangma le mipuihai hriet phâk ngeia ka hril hi lo ngâithla rawh. 8 Kha hma daia inthok tah khan, nangma le keima inlang hma khan zawlneihai chun ram tam tak le lalram tam tak chunga indona dâm, sietna dâm le hripui dâm hung tlung ding thu an hril lawk hlak a. 9 Muongna hun hung tlung ding zawlnei hrilhai chu a hung tlung indik chun, ama chu LALPA tir ngei a nih ti chieng el a tih" a ta. 10 Zawlnei Hanania chun zawlnei Jeremia ringkol bàt lai chu a lâk thlàk a, a suktliek a. 11 Mipui po po hmaa chun Hanania-in, "Hieng hin LALPA chun a tih: Hieng ang bok hin Babulon lal Nebukadnezzar ringkol chu kum hni sûng ngeiin hnamhai po po ringa inthokin suktliek ka tih' a ti a nih" a ta. Chu phing leh zawlnei Jeremia chun a mâksan ta a. 12 Zawlnei Hanania-in zawlnei Jeremia ringkol bàt a suktliek hnung chun LALPA thu chu a hung tlung a, 13 "Fe la, Hanania kuomah hieng ang hin va hril rawh: Thing ringkol i suktliek a, chu ai chun thîr ringkol i siempêk lem a. 14 Hieng ang hin Israel Pathien, Iengkim LALPA chun a hril: Babulon lal Nebukadnezzar rong an bawl theina dingin hieng hnam po po hi thîr ringkol i'n bâttir a nih; ama rong bawl an ta; ram hnuoia ramsahai chen khom ama ka pêk bok a nih, tiin. 15 Chun, zawlnei Jeremia chun zawlnei Hanania kuomah, "Ngai rawh, Hanania, LALPAN a tir awzawng naw che! Hieng mihai hi khêl thu inringtir i tum mei mei a ni lem. 16 'Ngai ta, hnuoi chunga inthok hin ka sukbohmang dai ding chè a nih' ti hi LALPA thu suok a nih. LALPA laka helna thu i tlâng insampui leiin tu kum ngei hin thîng i tih" a ta. 17 Chuongchun, chu kum thla sarinaa chun zawlnei Hanania chu a thi ta a.

29

1 Hi hi Jerusalema inthoka Nebukadnezzarin Babulon tienga sala a thuoi upa hai, thiempu hai, zawlnei hai le mi dang hai laia a dam la um sunhai kuoma Jerusalema inthoka zawlnei Jeremia lekhathon chu a nih. 2 Chu chu lal Jehoiachin le lalnu nu hai, lal ina thoktu hai, Judai ram le Jerusalema thuoitu hai, mi themthiem hai le thirsu haiin Jerusalem an suoksan hnung kha a nih. 3 Chu lekha chu Safan naupa Elasa le Hilkia naupa Germaria hai, lal Zedekia-in Babulona lal Nebukadnezzar kuoma a tirhai chu a'n chawitir a. Hieng hin a ziek a: 4 Hi hi Iengkim LALPA, Israel Pathienin Jerusalema inthoka Babulona sala an thuoihai kuoma a hril chu a nih: 5 "Inhai bawlin umhmun khuor unla, thlaihai chîngin a tharsuok fa ro. 6 Nuhmei pasal inneiin, naupa le naunuhai nei unla, in naupahai nuhmei ding zongpèk unla, in naunuhai pasal ding zongpèk bok ro, nangni anga thla an hung nei ve theina dingin. Chu taka chun hung pung unla, kiem tieng pan naw ro. 7 Sala ka thuoina cheu khuo ta dinga muongna le hmuingilna chu zong ro. Chu ding chun LALPA kuomah hni ro; a hmuingil chun nangni khom in hmuingil ve ding a ni si a. 8 A nih, hi hi Iengkim LALPA, Israel Pathien hril chu a nih: "Nangni laia zawlneihai le aisanthiemhai hlèmin um naw ro. An mang an hril cheu chu ngaithla naw ro. 9 Ka hmingin khêl thu an hril cheu a ni kha. Anni chu ka mi tirhai an ni nawh" ti hi LALPA thu suok a nih. 10 Hi hi LALPA hril chu a nih: "Babulon ta dinga kum sawmsari a tlingtla pha leh hung kan ka ti cheu a, hi hmuna thuoi kîr nawk ding cheua ka thu tiem inzaum tak chu hung hlen ka tih. 11 In hmuingilna ding dâm, thil tha lo in chunga a tlung nawna ding dâm, beiseina neia hma tieng in thlîr theina ding dâma in ta dinga ka remruothai chu ka hriet, " ti hi LALPA thu suok a nih. 12 "Chun, ka hming lamin, ka kuomah hung tongtai in ta, lo ngaithlàng ka ti cheu. 13 Mi zong in ta, in lungril po poa in mi zong huna chun mi hmûng in tih. 14 Nangni mi hmu theiin um tàng ka ta, hnam tin lai le ram tina ka hnot darna cheu hmuna inthok chun thuoi khawm nawkin, in saltângnaa inthokin thuoi kîr ka ti cheu" ti hi LALPA thu suok a nih. 15 Nangni chun, "LALPAN Babulon rama khom kan ta dingin zawlnei a mi'n dinpêk" in ti khom a ni el thei. 16 Davida lalthungphaa thunghai le Jerusalema la chambâng, Babulon tienga sala thuoi sa ve lo in unauhai chungchàng thu LALPAN a hril chu hieng ang hi a nih. 17 A nih, Iengkim LALPA chun hieng ang hin a tih: "An chungah kawlhnâm dâm, tàm dâm le hripui dâm inlêngtir ka ta, theichang hrût, fâk tlâk dèr lo angin siem ka tih. 18 Kawlhnâm le tàm le hripuiin hnot zui ka ta, hnuoia lalram po po intentir ka ta, mi tongsie le pangzat phur an ta, ka sukdarna hnam po po hmusit le hal kawng nîng an tih. 19 An kuomah ka thu hriltu ding ka siehlaw zawlneihai ka tir ka tir khoma an lo ngaithlâk nuom si nawh. Nangni saltânghai khomin in ngaithlâk chuong bik nawh" ti hi LALPA thu suok a nih. 20 'Chuleiin, Jerusalema inthoka Babulona ka thon hmang, nangni saltâng po pohai, LALPA thu hi ngaithla ro. 21 Ka hming sâla in kuoma khêl thu hril hlaktu Kolai naupa Ahab le Maseia naupa Zedekia chungthua Israel Pathien, Iengkim LALPA hril chu hi hi a nih: "Babulon lal Nebukadnezzar kutah pêng ka ta, in mithmu ngèiah anni chu sukhlum a tih. 22 Anni lei chun Judai rama mi Babulona saltàng po po chun, 'Babulon lalin meia a raw hlum Zedekia le Ahab angin LALPAN i chungah thaw ve raw se' ti hi tongsie inphurna tonglamkeiah hung hmang pha hiel an tih. 23 Israel rama chun thil invêt thlâk tak an thaw a, an tuolbawmhai nuhmei an uirepui a, ka hming sâlin, ka thupêk ni si loin, khêl thu an hril a. Chu chu kei a hmutu le hrepuitu chu ka nih" ti hi LALPA thu suok a nih. 24 Nehelam mi Semaia kuomah hi thu hi hril rawh. 25 "Israel Pathien, Iengkim LALPA chun hieng hin a tih: Nangma thuin thiempu Maseia naupa Zefania kuomah lekha i thon a, thiempu dang po pohai le Jerusalema mipuihai kuomah a kawpi i thon tawl a. Zefania kuoma chun, 26 'LALPA tempul enkoltu dingin LALPAN Jehoiada aiin thiempuah a ruot che a, mi invêt, zawlnei inti taphothai chu thîr kol i'n buntir ding i nih. 27 Ieng dinga Anathot khaw mi Jeremia, in kuoma zawlnei anga hung insàl kha i zil naw am a na? 28 Babulona dâm lekha a hung thon a, 'In sal intâng sûng ding hi a sawt ding a ni leiin in bawlin umhmun khuor unla, huonhai siemin a tharsuok chu fa ro' dâm a hung ti a nih" tiin. 29 Thiempu Zefania-in Semaia lekhathon a hmu chun Jeremia kuomah a chawi a, a tiem a. 30 Chu phing leh LALPA thu chu Jeremia kuomah a hung tlung a: 31 "Hi thucha hi saltànghai kuomah thon rawh: Nehelam mi Semaia chungthua LALPA thu suok chu hi hi a nih: Semaia kha ka tir ni si loin thil dâm a hril lawk a, khêl thu a'n ringtir cheu a. 32 Chuleiin, LALPA chun hieng hin a tih: Nehelam mi Semaia le a thlàhai chu hrem ngei ngei ka tih. Ka laka hel thu a hril leiin hieng a mihai lai hin tu khom dam khawsuok um naw ni hai a, ka mihai ta dinga thil tha ka thaw dinghai khom hmu phâk bok naw nih' ti hi LALPA thu suok a nih", tiin.

30

1 Jeremia kuoma LALPA thu hung tlung chu: 2 "Hi hi LALPA, Israel Pathien hril chu a nih: 'Ka thu hril po po che hi lekhabuah ziek thla rawh. 3 Ngai ta, ka mi Israel le Juda saltànghai ka thuoi kîr nawk hun le an thlatuhai rochung dinga ram ka pêka ka tungding tawl nawk hun chu a hung tlung mèk a nih' ti hi LALPA thu suok a nih. 4 Israel le Juda chungthua LALPA thuhai chu hieng hi a nih: 5 LALPA chun hieng hin a tih:" 'Thlaphâng tap rawl ka hriet, Muongna ni lo, lungphâng ri. 6 Indonin hang en vel tu'm, Pasalin nau an nei thei maw?Chuong ni sî chun ieng lei a, Nuhmei nau hase ang a, Pasalthahan an tài dom a, An hmài a dâng am a na? 7 Chu ni râpthlàk dingzie chu, A tlukpui um thei naw nih. Jakob beidong ni a na, Sienkhom san suok nîng a tih. 8 Chu ni chun, an ringkol bàt chu suktliek ka ta, a hrui chu sukchat ka ta, ram dang mihaiin anni chu rongbawltuah hmang ta ngai naw ni hai. 9 LALPA an Pathien le an lal dinga ka tungding ding Davida rong chu bawl lem tàng an tih, Iengkim LALPA chun a tih. 10 Chuleiin, aw ka siehlaw Jakob, Lungphâng hrim hrim naw la, Aw Israel, zâm der naw raw khai, Ti hi LALPA thu suok chu a nih. "Ram hla takah um la khom, San suok ngèi ngêi ka ti che a, I saltàngna rama inthokin, I thlàhai chu san suok ka tih. Muongna le himna hmunah, Jakob chu chêng nawk a ta, Thlabârin um ta naw nih. 11 Umpuiin hum ka ti che, Ti hi LALPA thu suok a nih. Ka sukdarna cheu hnamhai, An rêngin sukram lang khom, Sukram vong nawng ka ti cheu. Thunun ka ti cheu a, Sienkhom a hun tawk chauin; Hrem lo chun suok naw ti niu. " 12 LALPA chun hieng hin a tih:"I hliemna sukdam ruol an nawh, A bè sukdam thei a ni nawh. 13 I pânna sukdam dingin, Enkoltu che an um naw a, Damdawi hrim a um bok nawh. 14 I'n koppuihai po po khan, An theinghil vong ta che a, Ngaisak chê an um tah nawh. Hmêlma angin ka vuok che a, Mi tawrot angin ka hrem che, I bawsietna a tam èm a, I suolna a nasa si leiin. 15 Ieng dinga i hliemna leiaI tap khêk ringot am a na?I natna sukdam ruol an nawh; I bawsietna a tam lei le, I suolna a nasat leiin, Hieng po po hi i chungah, Ka hung intlungtir a nih. 16 Nangma fa ramtuhai chu, Fâk ramin um vèng an ta, In hmêlmahai po po chu, Salah la'n tàng vèng an tih. A hung roktuhai cheu chu, Mihaiin rok vèng an ta, Râllâka latuhai che chu, Râllâkin la vêng an tih. 17 Sukhrisel nawk ka ti che a, I hliemhai sukdam ka tih, "LALPA thu suok chun a tih, 'Tû ngaisak hlaw lo Zion, Mi hnot suok hnung' an ti che leiin. 18 LALPA chun hieng hin a tih:Jakob puon ina chênghai, Hung intuoi thar nawk ka ta, Anni lunginsiet ka ta, An muol le tlâng ngeia chun, An khawpui tlu ram hnung chu, Hung indin thar nawk ka tih. 19 Chu mihaia inthok chun, Lawmthu hrilna hlahai leLawmna ri hung suok a ta, Anni chu sukpung ka ta, Tlawm tieng pan ngai naw ni hai. Anni chu chawisâng ka ta, Endong ni ta nawng an tih. 20 Tuta hmaa ang bokin, An nauhai hung pung an ta, An khaw tlànga chênghai chu, Ka hmaah phun nghet ka ta, Anni nêksawrtu taphot chu, Keiman hrem pei tawl ka tih. 21 Anni mi le sâ ngei chu, An thuoitu hung nîng a ta, An rorêltuhai khom chu, Anni mi bok nîng an tih. Ka bulah hung thuoi ka ta, Aman mi hnai tâng a tih. Keimain ka fiel naw chun, Tu'n am mi hnai ngam a ta?Ti hi LALPA thu suok a nih. 22 Chun, ka mihai nîng in ta, Kei in Pathien chu nîng ka tih. 23 En ta, LALPA lungsenna thlipui, Thlipui intûr ngul el chu, Mi rilohai nuoi dingin, A hung hràng thla ding a nih. 24 A thil tum a hlen hma chun, LALPA lungsen intûr chu, A lamlêt naw ding a nih. Ni la hung tlung dinga chun, Hi hi la hre thiem in tih.

31

1 "Chu hnunga chun kei hi, Israelhai Pathien ni tâng ka ta, Anni khom ka mihai nîng an tih" Ti hi LALPA thu suok a nih. 2 LALPA chun hi thu hi a hril:"Kawlhnâma thi mahlahai chun, Thlalèrah ditsakna hmûng an ta, Keima hungin, Israelhai chu, Chawl hadamna pêng ka tih. " 3 Tien lai khan chu ei kuomah, LALPA a hung inlang hlak a, Ei kuomah hieng hin a hril a:Hmangai tawp loa hmangaiin, Laina takin ka kei hnài che a. 4 Aw Israel nunghak thienglâm, Indin thar nawk ka ti che a, Tungdingin um nawk i ta, I khuongtè leh inthokin, Hlim takin lâm nawk i tih. 5 Samari tlâng dung tluonin, Grêp huon siem nawk i ta, Loneituhan chîng an ta, Annin a rà tlàn an tih. 6 Efraim tlângrama ngei chun, "Thaw ro, Zion-ah fêng ei tiu, LALPA ei Pathien kuomah"Tia vêngtuhai an khêk ni, A la hung tlung ding a ni si. 7 LALPA chun hieng hin a tih:Jakob ta di'n lawm hla rem ro, Hnam laia ropui tak ta dingin, Inring taka khêk suokin, Chawimawiin puong suok unla, "Hlaa um sun i mi Israelhai chu, LALPA, nangin humhim rawh" tiin. 8 "En ta u, hmar tieng rama inthokin, Anni chu hung thuoi ka ta, Kawl kil tawp chena mi khom, An rêngin thuoi khawm ka tih. Mitdel dâm le kebai dâm, Nuhmei nau pai inrik dâm, Nau hase invoi mek dâm, Anni lai chun thang an ta, Mi tam tak hung khawm an tih. 9 Mitthli pumin hung an ta, Chuonga ka thuoi kìr lai chun, Tongtai mol mol tawl an ta, Vadung kam hmun ruol remah, An insui nawna dingah, Anni chu thuoi tawl ka tih. Israelhai pà ka na, Efraim chu ka nau lutìr a nih. r 10 Khawvela hnam po pohai, LALPA thu lo ngaithla ro; Tuipui ràl ram hla takah, A thuhai chu puong dar ro. Israelhai sukdartu chun, A lâk khawm nawk ding a na, Berampuin a beramhai, A vèng angin vêng a tih. 11 Jakob chu LALPAN intlan a ta, Anni nêk daia hrât lem, Kut a'nthok san suok a tih. 12 Zion tlàng sîpah chuongin, Hlimna hlâ hung sak an ta, Bu hai, uoiin hai, hriek hai, Beram ruol le bawng ruolhai, Hnienghnâr taka hung vurtu, LALPA chungah lawm an tih. An hringna chu tuia chawm zing, Huon hring dup ang nîng a ta, Lungzîngin um tah naw ni hai. 13 An nunghàkhai lâm an ta, Tlangvàlhan hung zawm an ta, A tar a zûr hlim an tih. An lusûn chu lawmnaahInchangtir lem tàng ka ta, Lungngaina nêkin hlimna, Thlamuongnan vûr lem ka tih. 14 Thiempuhai hrâi tlai ka ta, Ka hausak hnienghnàrna chun, Ka mihai sung sip ka tih, Ti hi LALPA thu suok a nih. 15 LALPA chun hieng hin a tih:"Rama khuoa ri an hriet chu, Lusun tap khèk rong rong a nih; Rakilin a nauhai a ta a, An um ta si naw leiin, Thlèm tlài ruol hrim a ni nawh. " 16 LALPA chun hieng hin a tih:" I tap lai bâng ta raw khai, I mitthli khom hul ta raw se, I thilthaw'n lukhawng neiin, Hmêlma rama inthokin, An hung kìr nawk ding a nih"Ti hi LALPA thu suok a nih. 17 "Hma tieng beisei ding i nei, I nauhai chu an ram ngeiah, An hung kìr nawk ding a nih"Ti hi LALPA thu suok a nih. 18 "Efraim inrûm ri chu ka hriet:'Bawng tuoi hel sawi ang elin, Nangin i mi thunun a, Thununin ka um ta hi. Mi siem thar la, hung kìr ka tih, LALPA ka Pathien i ni si a. 19 Invâk hmang ka sim ta a, Ka hung inhriet chieng hnungin, Poitiin awm ka chum a; Ka tleirawl suolna phurin, Inzakin ka hmâi a mawk' tiin. 20 Efraim chu ka nau dit tak, Ka lawmna a ni naw maw?Ka khak chàng um rop sien khom, Ka theinghil ngai hrim hrim nawh. Lungrilin ka thlâkhla a, Ka lunginsiet hlè a nih"Ti hi LALPA thu suok a nih. 21 'Lam inchiknahai siem la, Lam kawkhmunahai târ rawh. I lamlien hraw en ngun rawh. Aw Israel nunghàk thienglâm, I khuo tieng hung kìr nawk rawh. 22 Aw, nang naunu lepchie, Ieng chen am i'n vàk rawlai ding?LALPAN hnuoi hi a letlingin, A lo siem danglam am an ta, Nuhmeiin pasal a lèng lem el hi? 23 Iengkim LALPA, Israel Pathien chun hieng hin a tih: An saltàngnaa inthoka ka thuoi kìr tawl pha chun Judai ram le a khawpuia chênghai chun hieng ang tongkam, 'Aw nang tlâng thienghlim, Felna a chèngna tlângpui, LALPAN malsawm che raw se'ti hi la hmang nawk an tih. 24 Judai ram le a khawpuia hai chun mi po po chu chêng tlâng an ta, loneituhai le beram vêngtuhai chu chêng tlâng an tih. 25 Chàuhai chu sukhar ka ta, tamsawlhai chu hrâi tlai ka tih" tiin. 26 Chuongchun, ka hang har a, ka ngha vel a. Ka mang chu inhoi ka ti hle a. 27 'Ngai ta u, Israel sûngkuo le Juda sûngkuohai ka phun nawk ding hun le an ran ruolhai ka sukpung nawk ding hun chu a hung tlung ding a nih. 28 Phawi dok le kei thlûk a, thè zap le suksiet dinga ka'n chàn ang khan anni ka tungding hun le phun nawk ding hun chu ka mel kâi zing a nih" ti hi LALPA thu suok a nih. 29 Chuong nia hai chun mihaiin, 'Pahaiin grêp thùr an fàk a, An nauhai hà a suktim'ti dâm hi ti nawk ngai tah naw ni hai. 30 Chuong nêk hmanin, mi tinin mani suol thaw thipui an ta, grêp thùr fatu hà chu tim lem tàng a tih. 31 "Ngai ta u, Israel sûngkuo le Juda sûngkuo leh thuthlung thar ka siem ding hun chu a hung tlung ding a nih" ti hi LALPA thu suok a nih. 32 Aigupta rama inthoka an thlatuhai kuta chela ka thuoi suok laia ka thuthlung ang kha ni ta naw nih. An ta dinga lû ka ni zing khomin chu thuthlung chu an bawsiet a ni kha" ti hi LALPA thu suok a nih. 33 "Chu ni a hung tlung pha chun, Israelhai chu thuthlung thar siempui ka ta, an ngaituonaah ka dànhai sieng ka ta, an lungrilah ziek bok ka ta, an Pathien nîng ka ta, anni chu ka mihai nîng an tih. 34 Tu khomin mani tuolbawmhai amanih unau amanih kuomah, "LALPA chu hre rawh" tiin zirtir ta naw ni hai a, a chîn taka inthoka a lien tak chenin, an rêngin mi hre vong tàng an tih. An ritlonahai chu ngaidamin, an suolnahai chu hre zing ta naw ning" ti hi LALPA thu suok a nih. 35 LALPA chun hieng hin a hril:"Sùn elvartu dinga nisa petu, Zàn elvartu dinga thlà le arasi petu, Tuipui inrûm dinga chokthotu chu-A hming Iengkim LALPA a nih. 36 Hieng thu ruothai po po hi, Ka hmua an bo hun chauin, Israel thlâhai khom chu, Hnam an nina a'nthokin, Ka hmaah bo chauh an tih" tiin. 37 LALPA chun hieng hin a hril:"Vàn khi inkhì thei a ni pha, Hnuoi thut zong suok a ni phâ chauh, Israel thlâhai khom chu, An thilthaw leiin hnawl ka tih" tiin. 38 "Hananel kulbîng sànga inthoka a Kil Kotkhàr chen bawl thar a ni ding hun chu a hung tlung mêk a nih" ti hi LALPA thu suok a nih. 39 "A'n khìna hrui chu Gareb tlâng chenin tlûn takin fe thleng a ta, Goa tieng kawi a tih. 40 Mithi ruong le vut peina ruom pumpui le khawhnawm po po, Kidron vadung chenin, sak tieng Sakor Kotkhàr kil chen chu LALPA ta dinga ser thienghlim nîng a ta, a khawpui chu sukdar le thiek ni ta ngai naw nih" tiin.

32

1 Juda lal Zedekia inlala inthoka kum sawmnas le Lal Nebukadnezzar inlala inthoka kum sawm le kum rietnaa chun Jeremia kuomah LALPA thu a hung tlung a. 2 Babulon lal sipaihaiin Jerusalem an inhuol lai a na, zawlnei Jeremia ruok chu Juda lal in vêngtuhai inkulnaa chun an intàngtir a. 3 Juda lal Zedekia chun Jeremia kuomah, "Ieng leia thil hril lawk i chîng am a na? Hieng hin i hril a, 'Hieng hin LALPA chun a tih: Hi khawpui hi Babulon lal kutah ka pêk tèp a, ama chun a lâk ding a nih. 4 Juda lal Zedekia chu Babulon lal kuta inthokin tlân suok naw ni a, a kutah pèkin um a ta, hmai intonin, a mit ngeiin hmung a tih. 5 Zedekia chu Babulon ramah thuoi a ta, ama ka kan hmâ khat chu chu taka chun um zing a tih. Kaldai mihai chu do inla khom hlawtling chuong naw ti niu. Chu chu LALPA thu suok a nih' ti dâmin ieng leia i hril am a na?" a ta, chu thil leia lung ina a khum a nih. 6 Jeremia chun, "LALPA thu chu ka kuomah a hung tlung a: 7 Ngai rawh, i papui Salum naupa Hanamel chu Anathot khuoa inthokin i kuomah hung a ta, 'Ka lo mi'n chawpêk rawh, nang chu laichin hnai le an ro khom khawm thei, a'n chaw ding tak i nih' tiin a hung ngèn ding che a nih" tiin. 8 Chuongchun LALPA hril ang ngei chun ka papui naupa Hanamel chu lal vêngtuhai inkulna sûnga chun a hung a, ka kuomah, 'Benjamin rama Anathot khuoa ka lo inchaw ta la, ka ro khawm theitu i ni leiin a'n tlantu ding tak i na, i ta dingin inchaw el rawh' a ta. Chuongchun, hi hi LALPA thu ngei kha a nih ti ka hriet ta a. 9 Ka papui naupa Hanamel, Anathot khaw mi lo chu ka'n chawk ta a, tangka chu kan hang bûk a, tangkaruo shekel sawm le pasari a nih. 10 Inchawkna lekhaa chun ka hming ka ziek a, suoi ka nam a, hrepuituhai hming ka'n inziektir bok a, phahlaa chun tangkaruo chu kan bùk a. 11 Inchawkna lekha, inchawk a ni dàn le a umzie ziekna le suoi namna kawpi le suoi nam lo kawpi chu ka lâk a, 12 chuong lekhahai chu ka papui naupa Hanamel le hrepuitua hming chuonghai mithmua le vêngtuhai inkulna huong sûnga Juda inthunghai po po mithmua chun Maseia naupa Neria naupa Baruk chu ka pêk a. 13 Chuonghai hmaa chun Baruk chu hieng ang hin thu ka pêk a: 14 'Hi hi Iengkim LALPA, Israel Pathien hril chu a nih: Hieng lekhahai, inchawkna lekha, suoi nam le nam nawhai hi sawt tak a um theina dingin pil bêlah sie rawh. 15 Israel Pathien, Iengkim LALPA chun, 'Hi rama hin in hai, lo hai le grêp huon hai mihaiin an la'n chawk ding a nih, a tih' tiin. 16 Neria naupa Baruk kuoma inchawkna lekha ka pêk zo chun LALPA kuomah ka tongtai a: 17 "Aw LALPA Chunghnungtak, i kut thilthawtheina nasa tak chu pharin hnuoi le vànhai i siem a. Ieng khom i ta ding chun thaw harsa a um nawh. 18 Sâng tam tak chungah i hmangaina i'n langtir a, an pàhai suolna leiin an nauhai i hrem bok a. Aw Pathien ropui le thilthawthei, i hming chu Iengkim LALPA a na, 19 i thiltumhai a lien a, i thilthawhai a ropui a. Mihriem nauhai um dàn po po i hmu vong a, mi tin an um dàn le thilthaw phû ang peiin lawmman i pêk hlak. 20 Aiguptaa khan inchikna le thil mak tam tak i thaw a, tu chen khom hin Israelhai le mihriemhai po po chungah i la thaw zom zing a, chu chu i nìna hrim, i hming sukthangtu a nih. 21 I mi Israelhai chu Aigupta rama inthokin inchikna le thil mak leh, i kut thilthawtheina chu pharin, thil râpthlàk tak tak thawin i thuoi suok a. 22 Hi ram, nenetui le khuoizu luongna ram, an pi le puhai kuoma pèk i lo tiem tah chu i pêk a. 23 An hung lût a, an hluo a, sienkhom i thu an awi naw a, i dàn an zawm naw a, i thupêk angin an thaw bok nawh. Chuleiin, hieng sietnahai hi an chungah i hung intlungtir a nih. 24 "En ta, khawpui inhuolna le làkna dinga hnuoi an sung pawng po po hi? Kawlhnâm le tàm le hripui leiin khawpui chu a hung beitu Babulon mihai kutah pèkin a um ding a ni si a. I hril tahai po po kha i hmu ang hin a hung tlung mèk tah a ni hi. 25 Aw LALPA Chunghnungtak, khawpui chu Babulon mihai kutah pèk ding ni sien khom, nang ngeiin 'Lo chu tangkain inchaw la, hrepuitu ko rawh' i mi ti bok si a" tiin. 26 Chu zoah LALPA thu chu Jeremia kuomah a hung tlung a: 27 "Kei hi LALPA, mi po po Pathien chu ka nih. Ka ta dingin thaw harsa a um am a ni? 28 Chuleiin, LALPA chun hieng hin a tih: Hi khawpui hi Babulon mihai le Babulon lal Nebukadnezzar kutah ka'n hlàn têp a, ama chun lâng a tih. 29 Hi khawpui rûntu Babulon mihai chu hung lût an ta, rawng an ta, kàng dur dur a ta, ka lungsenna cho phawk dinga Baal kuoma rimtui inhlàn a, pathien danghai kuomah inthawia dawn ding an bun thlâkna in chung po po khom raw chim vong an tih. 30 "Israelhai le Judahai chun an tleirawla inthokin ka mithmuah thil suol naw chu ieng khom thaw an nei nawh. A nih, Israelhai chun kuta an siem fawm milema mi cho phawk naw chu ieng dang khom thaw an nei nawh" ti hi LALPA thu suok a nih. 31 Hi khawpui hi an rela inthoka tu chen hin, ka mithmua inthoka sukbohmang dai awm hrimin, ka lung suksenna ding ngot an thaw ngat ngat a nih. 32 Israel le Juda mipui hai, an lal hai, hotu hai, thiempu hai, zawlnei hai le Juda mi le Jerusalema mi hai chun ka lungsenna ding thil tha lo ngot an thaw a. 33 Ka tieng ngha loin tukhnungkhur an mi'n nghat a, zirtir ngat ngat tawl lang khom an ngaithlàk nuom naw a, insiem that an tum bok nawh. 34 Ka hming chuongna in chu sukporchè dingin milem tirdakum an làk lùt a. 35 Ben Hinom ruomah Baal ta dingin hmun sânghai an bawl a, an naunuhai le naupahai chu Molek kuoma meia inhlàn dingin an pèk a; chuong thil chu thaw dingin thu ka pêk ngai naw a, hieng thil theidaum hi thawin Judahai chu suol inthawtir an tih ti khom ka ngaituonaah a lût ngai hrim hrim bok nawh. 36 Israelhai Pathien, LALPA chun hieng hin a lo hril a: "Hi khawpui hi Babulon lal kutah pèk nîng a ta, kawlhnâm le tàm le hripui tuor a tih. 37 Sienkhom, ka lungsen inling laia ka hnot hmangna ram po poa inthok chun anni chu hi hmuna hin hung thuoi khawm nawk ka ta, him takin inumtir ka tih. 38 Ka mihai nîng an ta, kei an Pathien nîng ka tih. 39 Anni thatna ding le an thlàhai thatna ding le kumkhuoa an mi tì song theina dingin, anni chu lungril hmun khat inputtirin zai khatin inluongtir ka tih. 40 An kuomah kumkhaw thuthlung siem ka ta, an thatna ding thaw ma ngai nawng ka ta, an mi nghatsan nawna dingin, mi ti dingin an lungril sukphûr zing ka tih. 41 An thatna ding thaw chu ka lawmzawng nîng a ta, ka lungril po poin hi rama hin phun nghet tawl ka tih" tiin. 42 LALPA chun hieng hin a tih: "Hi mihai chunga thil tha naw ka'n tlungtir ang bok khan an kuoma thil tha ka tiem po pohai kha intlungtir ka tih. 43 'Hi rausan ram, sa le mihriem an chèng ta nawna ram, Babulonhai kuoma pèk suok ta hnung ram' in ti ngèia hin mihaiin in le lo inchawin an la bawl nawk ding a nih. 44 Benjamin rama hai, Jerusalem le a sèvel khuoa hai, Judai ram khawpuia le tlângram khuoa hai, thlang tieng phai thuta hai le sim tieng khawpuia hai chun mihaiin tangkain lo inchawng an ta, inchawkna lekha ziek an ta, suoi nam an ta, hrepuituhai ko an tih; an vàngneina chu ka sukhmuingil nawk ding a ni si a' ti hi LALPA thu suok a nih.

33

1 Lal in vêngtuhai inkulna huong sûnga Jeremia an intàngtir lai chun LALPA thu voi hnìna chu a kuomah a hung tlung nawk a. 2 "Hnuoi indintu, duong suoktu le suknghettu LALPA, a hming khom LALPA chun hieng hin a tih: 3 'Mi hung ko la, don ka ti che a, thil ropui le i zong suok phàk ngai lo dinghai chu hril ka ti che. 4 LALPA, Israel Pathien chun hieng hin a tih: Babulont mihaiin an inhuolna cheu laka thang khawna ding le kul suknghetna dingin in inhai le lal in chen thiek hiel inla khom, 5 Babulon mihai chu hung lût tho an ta, ka lung inling leia ka sukhlumhai ruong chun hi khawpui hi sip a tih, an rîtlona leiin hi khawpui laka hin ka hmêl ka thup ding a ni si a. 6 "Amiruokchu, damna le hrilselna hung intlungtir nawk ka tih. Ka mihai chu sukdam ka ta, muongna le himna hnienghnâr takin tlàn an tih. 7 Juda le Israel chu an saltàngnaa inthokin hung thuoi kîr ka ta, a hmaa an nìna ang bokin suknghet nawk ka tih. 8 Chun, ka laka an suolna chu tlêng fai ka ta, ka laka an helna po po chu ngaidam ka tih. 9 Hi khawpui chungah hin that insuo a, hmuingìlna le muongna hnienghnâr taka ka vùrzie hretu le hmutu hi hnuoia hnamhai chun maktiin anni chu tiin inthin an ta, chuonghai hmaa chun hi khawpui hi kei mi sukhlimtu, suklawmtu le mi chawimawitu hung ni tâng a tih. 10 'LALPA chun hieng hin a tih: 'Hi hmun rausan le ram tah hnung tia an hril hlak le Judai ram khawpui hai, Jerusalem kotthlèr ram ta hnung, sâ le mihriem an chêng ta nawna hmuna an hril ngeia hin, 11 hlimna le lawmna ri hai, mo le moneitu rawl ri hai, LALPA tempulah, LALPA kuomah lawmthu hril ro, LALPA chu a tha si a, A ngilneinan kumtluong a daitia inthawina thilhlân an inhlàn rihai chu la hung hre nawk in tih. A ram vàngneina chu a hmaa ang bokin ka tungding nawk ding a ni si a' ti hi LALPA thu suok a nih. 12 "Iengkim LALPA chun hieng hin a tih: Mi le sâ an chèng ta nawna hmun rausan le khawpui ram hnung hmun tina chun ran tlatna hmun hring hung um nawk a ta, chuong hmuna hai chun berampuhan an beramhai intlattir an tih. 13 Tlâng ram khuoa hai, phai ram khuoa hai, sim tieng khawpuia hai, Benjamin rama hai, Jerusalem le a sè vèla hai le Judai ram khawpuia hai berampuhaiin an beramhai la hung tiem nawk mol mol an tih' ti hi LALPA thu suok a nih. 14 " 'Ngai ta, Israel sûngkuo le Juda sûngkuo laka ka thu tiem inzàum tak chu ka hlen suok ni ding a hung tlung mêk a nih' ti hi LALPA thu suok a nih. 15 'Chu ni le chu huna chun, Davida zungzâma inthokin, Felna Zâr inder suoktir ka ta, Ama chun fel tak le indik takin, A ramah ro hung rêl a tih. 16 Chuong nia chun Juda chu, Sanhimin um tàng a ta, Jerusalem khawpui khom, Him takin um tàng a tih. 'LALPA, Kan Felna chu'Ti hi a hming nîng a tih. ' 17 LALPA chun hieng hin a tih: "Davida chun Israel sûnghai lai lalthungphaa inthung ding mi invâi ngai naw nih; 18 thiempuhai, Levi chia mihai khomin ka hmaah inthawina pumraw thilhlânhai le bu le bâl thilhlânhai inhlàn zingtu ding mi invâi bok naw ni hai" tiin. 19 LALPA thu chu Jeremia kuomah a hung tlung a: 20 "LALPA chun hieng hin a tih: 'Sùn le zàn ta dinga thuthlung ka ruothai vé vè hi sukdanglam a, a hung tlung hun ding taka tlung lo dinga sùn le zàn in siem thei a ni chun, 21 ka rongbawltu Davida kuoma a lalthungpha hluotu ding mi a nei zing dingzie thu ka thlung chu sukdanglam thei ni chauh a tih; chuong ang bokin ka rongbawltu Levi chihai le thiempuhai kuoma ka thuthlung khom thiek thei ni chauh a tih. 22 Ka rongbawltu Davida thlàhai le ka hmaa rongbawltu Levi thlàhai khom vàna arasi tiem sèng lo ang le tuipui kama tieu vut tiem sèng lo ang elin sukpung ka tih. " 23 Chun, LALPA thu chu Jeremia kuomah a hung tlung a: 24 " 'LALPA thlang sûngkuo hnihai ram chu a suksiet tah' tia mihai hril hi i lo hriet ve hlak am? Chuong ang chun ka mihai chu hmusitin hnama khom an tiem sa ve ta naw a nih. 25 LALPA chun hieng hin a tih: Sùn le zàn kuoma ka thuthlung hi a nghet naw a, hnuoi le vàn um dàn ding ka ruot hi a nghet naw a ni chauhin, 26 Jakob thlahai le ka rongbawltu Davida thlahai chu pei hmang ka ta, Abraham hai, Isak hai, Jakob thlahai chunga rorêltuah a thlahai chu inumtir naw ning. An vàngneina chu tungdingin, ka lunginsiet tawl ding a ni si a" tiin.

34

1 Babulon lal Nebukadnezzar le a sipai ruol po po le a hnuoia ram po poa lalhai le an sipaihaiin Jerusalem le a sè vèla khuohai an bei laia LALPA thu Jeremia kuoma hung tlung chu: 2 "LALPA, Israel Pathien chun hieng ang hin a tih: 'Juda lal Zedekia kuomah fe la, a kuomah hieng hin hril rawh: 'Hi hi LALPA thu chu a nih. Hi khawpui hi Babulon lal kutah ka pêk têp ta a, ama chun meiin rawng a ta, 3 a kuta inthokin intâl suok naw top i tih. Man nîng i ta, a kutah pêng an ti che a, bàu ngeiin inbiekpui i ta, Babulon ramah thuoi a ti che. 4 Aw Juda lal Zedekia, LALPA thutiem hi ngaithla pei rawh. I chungchang thua chun LALPAN hieng hin a tih: kawlhnâmin thi nawng i ta, thlamuong takin chawl lem i ta, 5 i hmaa lal lo thi tah i pi le puhai ang bokin nang khom an sùnna le inzanain rimtui rawpêk an ti che a, 'Aw Pu' tiin sûn an ti che' ti hi keima ngeiin ka tiem a nih' ti hi LALPA thu suok a nih" tiin. 6 Zawlnei Jeremia chun chuong thuhai po po chu Jerusalema Juda lal Zedekia chu a hril a. 7 Babulon lal sipai ruolin Jerusalem an inhuol lai chun Judai rama kul nei khuo dang an la làk naw chu Akis le Azeka hai chauh a ni tah. 8 Hebrai mi bawipa amanih bawinu amanih nei po poin an bawihai insuo vong dinga Lal Zedekia-in Jerusalema um mipuihai chu thu a thlungpui hnungin Jeremia kuomah LALPA thu a hung tlung a. 9 Chu dungzui chun, mi tinin Hebrai mi bawi an neihai chu a nuhmei a pasalin an insuo ding a na, tu khomin mani Juda chanpuihai hrim hrim bawiah an sie ding a ni ta nawh. 10 Chuong ang chun hotuhai le mipuihai chun an bawi kol senghai chu insuo zalèn an remti a, an insuo a. 11 Amiruokchu, iemani chen hnungah an lungril an thlàk a, an bawi insuohai chu la kîrin bawiah an siem nawk ta a. 12 Chuongchun, LALPA thu chu Jeremia kuomah a hung tlung a. 13 "Hi hi LALPA, Israel Pathien hril chu a nih: In pi le puhai Aigupta bawia inthoka ka hung thuoi suok lai khan thu ka thlungpui a. 14 An kuomah, 'Tu khomin in unaupa Hebrai mi, in kuomah an hung zora in inchawk chun, kum ruk in rong a bawl pha, a kum sarìnaah in insuo zalèn ding a nih' tiin ka hril a. In thlàtuhai chun ka thu an ngaithlàk naw a, an mi ûksak bok nawh. 15 Tu lai hnâi el khan inlamlêtin ka mithmuah thil indik in thaw a, mi tinin in unau chanpuihai chu in insuo zalèn a. Ka hming put tempula chun ka hmaah thuthlung in siem a. 16 Amiruokchu, in lungril in thlàk a, in nuom dàn ang taka in insuo in bawinu le bawipahai chu in thuoi kìr a, ka hming in suksiet a, in bawia sie nawk dingin in làk lui tawl nawk tah hi. 17 "Chuleiin, LALPA chun hieng hin a tih: Ka thu in zawm naw a, in unau chanpuihai chu zalènna in pèk nuom nawh. Chuleiin tu hin kawlhnâm le tàmpui le hripuiin zalen taka a nuoi dingin zalènna ka pêk cheu a, hi hnuoia lalramhai po po tirdak kai in tih. 18 Ka thuthlung bawsetuhai po po le ka hmaa an thutlung zawm si lohai chu bawng tuoi tan bong, a bong kàra fe thleng ang charin siem vêng ka tih. 19 Judai ram le Jerusalema hotu hai, rorêltu hai, thiempu hai le a rama chêng hai po po, bawng tuoi tan bong kàra fe thlenga thu an thlung hlen lotuhai chu, 20 that tuma zongtu an hmêlmahai kutah pêng ka ta, an ruonghai chu chunglèng vate le hnuoia ramsâhai tlàn ding chauh nîng a tih. 21 "Juda lal Zedekia le a rawihai chu that tuma zongtu an hmêlmahai le Babulon lal sipai ruol, anni tinsantuhai kuta chun pêng ka tih. 22 Hi khawpuia hung kìr nawk ding hin thu pêng ka ta, hung bei nawk an ta, lâng an ta, raw ram vong an tih. Judai ram khawpuihai chu hluotu um loin sukram ka tih" ti hi LALPA thu suok a nih.

35

1 Juda lal Josia naupa Jehoiakim inlal laia Jeremia kuoma LALPA thu hung tlung chun: 2 "Rekab sûngkuohai chu LALPA tempul sûnga pindan pakhatah hung dingin fiel tawl la, dawn ding uoiin pe rawh" tiin a mi hril a. 3 Chuongchun, Habazinia naupa Jeremia naupa Jaazania le a unauhai le an naupahai po po le Rekab sûngkuo po po kuoma chun ka fe a. 4 An rêngin LALPA tempula Pathien mi Igdalia naupa Hanan naupahai pindana chun ka hung thuoi a, chu pindan chu tempul hotuhai pindan bul, kotkhàr vêngtu Salum naupa Maaseia pindan chunga um a nih. 5 Chun, Rekab sûngkuoa pahai hma senga chun berbu le no iemani zàt, uoiin sung sip chu ka sie a, "Uoiin hi dawn ro khai" ka ti a. 6 Nisienlakhom, anni chun, "Uoiin chu kan dawn ngai nawh. Kan thlàtu Rekab naupa Jonadab chun, 'Nangni le in thlàhai tu khomin kumkhuoin uoiin in dawn ding a ni nawh; 7 inhai bawlin, thlaihai chîngin, grêp huonhai in siem ding a ni bok naw a, in umna rama hin in dam sawt theina dingin in dam sùngin puon inah chêng ro, ' tiin thu a mi pèk a nih. 8 Chuongchun, kan thlàtu Rekab naupa Jonadab-in tongbaua thu a mi'n chà po po- kan dam sùnga keini le kan nuhmeihai le kan naupahai le naunuhaiin uoiin dawn lo ding dàm, 9 kan chèngna ding in bawl lo ding dàm, grêp huon siem lo ding dàm, thlài chîng lo ding- tihai dàm chu kan zawm a, 10 puon ina hai kan um lem a, kan thlàtu Jonadab thupêk po po chu awiin kan zawm vong a nih. 11 Chun, Babulon lal Nebukadnezzarin ram a hung bei lai khan, 'Thaw ro, Kaldai sipai ruol le Aram sipai ruolhai laka ei him theina dingin Jerusalemah tlàn ei tiu' kan ta, kan hung a, kan chèng ve el tah a nih" an ta. 12 Chun, LALPA thu chu Jeremia kuomah a hung tlung nawk a. 13 "Israel Pathien, Iengkim LALPA chun hieng hin a tih: Judai rama mihai le Jerusalema mihai kuomah fe la, an kuomah, LALPA chun, 'Ka thuhai a inthoka thil tha inchûkin in zawm naw ding am a nih?' a ti a nih. 14 Rekab naupa Jonadab chun a nauhai kuomah uoiin dawn lo dingin thu a pêk a, an thlatu thupèk chu inzà èm êma zawmin voisun chen hin uoiin an dawn naw a nih. Kei chun voi tam ka hril non ka hril non ta cheu a, sienkhom ka thu hrim in zawm nawh. 15 Ka rongbawltu zawlneihai chu in kuomah ka hung tir ka hung tir hlak a. In kuomah, 'Mi tinin in um dàn suol màksan unla, in thil thawhai thlâkin insiem thar unla, pathien danghai rong bawl dingin zui naw ro. Chuongchun, nangni le in thlàhai kuoma ka pèk rama hin chêng in tih' tiin an hril hlak cheu a, sienkhom in bengkhon naw a, in mi ngaithlak nuom bok nawh. 16 Rekab naupa Jonadab thlâhai ruok chun an thlàtu thupèk an zawm a, hi mihai ruok hin chu ka thupêk an ngaithlâk si nawh. 17 Chuleiin, Iengkim LALPA, Israel Pathien chun hieng hin a tih: Ngai ro, Judai ram le Jerusalema chênghai po po chungah sietna hung intlun dinga ka lo hril tahai po po kha ka hung intlungtir ding a nih. An kuomah thu ka hril a, an mi ngaithlâk nuom si naw a, anni ka ko leh an mi don bok si nawh" tiin. 18 Jeremia chun Rekab thlàhai kuomah, "Iengkim LALPA, Israel Pathien chun hieng ang hin a tih: 'In thlàtu Jonadab thupèk zawm a, a thu suok po po zui a, a ti dàn ang taka in thaw leiin, 19 Rekab naupa Jonadab chun kumkhuoin ka hmaa rongbawla ngîr ding mi invâi ngai naw nih' ti hi Iengkim LALPA, Israelhai Pathien thu suok a nih" tiin a hril tawl a.

36

1 Juda lal Josia naupa Jehoiakim inlala inthoka kum linaa chun Jeremia kuomah LALPA thu a hung tlung a: 2 "Lekhabu ziel la la, chu taka chun i kuoma ka thu hril tah po po, Israel chungthu dâm, Juda chungthu dâm, hnam po po chungthu dâm, Josia hun laia i kuoma ka hrila inthoka voisun ni chena thil tlunghai po po chu ziek thla rawh, 3 Juda sûngkuohai chun an chunga sietna intlungtir ka tum po po chu hrea an um dàn suolhai an sim tâkduoiin; an sim chun an rîtlona le suolna chu ngaidam ka tih" a ta. 4 Chuongchun, Jeremia chun Neria naupa Baruk chu a ko a, a kuoma LALPA thu hril po po chu a hril a, savun lekhaah Baruk chun a lo ziek thlâk pei a. 5 Jeremia chun Baruk kuomah, "LALPA tempula fe thei lo dinga khuokhir ka ni si a. 6 Chuleiin, nang fe la, ka tongbaua inthoka LALPA thu ka hril, lekhabu ziela i ziek kha chawi la, bu nghei niah LALPA tempula um mipuihai hriet ngeiah tiem suok rawh; Juda mi, an khuoa inthoka hunghai po po hrieta khom tiem suok bok rawh. 7 Mihaiin an um dàn suolhai inlamlêt a, LALPA hmaah ngaidam an inhni tâkduoiin, ka ti a nih. LALPA thu puong, a mihai laka a lungsen inling dàn hi a râpthlâk êm si a" a ta. 8 Chuongchun, Neria naupa Baruk chun zawlnei Jeremia hril ang chun lekhabua LALPA thuhai chu LALPA tempula chun a tiem suok ta a. 9 Juda lal Josia naupa Jehoiakim inlala inthoka kum ngana thla kuonaau chun Jerusalema mi po po le Judai ram khaw tina inthoka Jerusalema hung mi po po chun LALPA hmaa bu nghei thu an puong a. 10 Baruk chun LALPA tempul lutna Kotkhàr Thar chuonchunga ziektu Safan naupa Gemaria pindana inthokin Jeremia thu dong lekhabua um chu mi po po hrietah a tiem a. 11 Safan naupa Gemaria naupa Mikaia'n lekhabua mi LALPA thuhai po po a hriet chun, 12 lal inah a fe thla a, ziektu pindana chun a lût a, chu taka chun hotu po po chu an lo inthung a. Chuonghai chu ziektu Elisama hai, Semaia naupa Delaia hai, Akbor naupa Elnathan hai, Safan naupa Gemaria hai, Hanania naupa Zedekia hai le hotu danghai an nih. 13 Mikaia chun mihai hrieta Barukin lekhabua mi a tiem thuhai chu a hriet ang angin a hril tawl a. 14 Hotuhai po po chun Kushi naupa Selemia naupa Nethania naupa Jehudi chu Baruk kuomah an tir a, "Mihai hrieta i tiem lekhabu chu chawiin hung rawh" tia hril dingin thu an incha a. Chuongchun, Neria naupa Baruk chu lekhabu ziel chawiin a hung a. 15 Anni chun, "Inthung la, kan hriet ngeiah tiem ve raw khai" an ta, Baruk chun a tiem tan ta a. 16 Chuong thuhai an hang hriet chun tiin an inen a. Baruk kuoma chun, "Hieng thu po po hi lal kan hril ngei ngei ding a nih. 17 Hieng thu po po hi iengtinam i ziek thlàk a na? Jeremia-in a hril che a ni? tiin an indon a. 18 Baruk chun, "Ni e, aman a hril a, keiin savun lekhaah lekhatuiin ka lo ziek thlàk a nih" a ta. 19 Hotuhai chun Baruk kuomah, "Fe la, Jeremia leh inbi hmang ro; tu khomin in umna hre naw raw hai se" an ta. 20 Ziektu Elisama pindanah lekhabu ziel chu an sie hnungin lal tuolzawla chun lal kuomah an fe a, an thu hriet po po chu an hril a. 21 Lal chun lekhaziel chu la dingin Jehudi a tir a, ziektu Elisama pindana inthok chun a hung làk a, lal le a bula ngîr hotuhai hrieta chun a tiem a. 22 Thla kuona a ni ta a, lal chu a thlasik ina chun a hmaa thuka mei chu awiin a'n thung a. 23 Jehudiin thlep thum amanih thlep li amanih a tiem zo chun lal chun a chemtein lekhabu ziel chu a ât bong a, thuka chun a hmatiemin a rênga a raw hmang vong chenin a dèng lût pei a. 24 Lal le a thoktuhai, hieng thu po po ngaithlatuhai chun tit hmel an put naw a, silfèn kei thlêr khom an um bok nawh. 25 Elnathan hai, Delaia hai le Gemaria hai chun lekhabu ziel chu raw hmang lo dingin lal kuomah an ngên raka chu a sawt chuong nawh. 26 Chuong nêk hmanin, lal chun a naupa Jerameel le Azriel naupa Seraia le Abdeel naupa Selemia hai chu ziektu Baruk le zawlnei Jeremia hai chu man dingin a tir a. Sienkhom, anni pahni chu LALPAN a thuprûk a. 27 Jeremia thu hril sawng Barukin a lo ziek thlàk po po lalin a raw hmang hnung chun LALPA thu Jeremia kuomah a hung tlung a: 28 "Lekhabu ziel dang la la, lekhabu ziel hmasaa thu po po, Juda lal Jehoiakimin a raw hmang tahai chu ziek thla nawk vong rawh. 29 Chun, Juda lal Jehoiakim chungchang thua chun hieng hin hril rawh: LALPA chun hieng hin a tih: 'Babulon lal chu hung ngèi a ta, hi ram hi suksein, hi taka um a mi le sâhai hi sukbohmang vong a tih' tia ziekna lekhabu chu nangin, 'Ieng dinga chuong thil chu i ziek am a na?' tiin lekhabu ziel chu i lo raw hmang a. 30 Chuleiin, Juda lal Jehoiakim chungthua chun LALPAN hieng ang hin a tih: Davida lalthungphaa inthung ding mi nei naw ni a, a ruong khom sùn ni lum em ding le zàna vur del dingin pei suok an tih. 31 Chun, a rîtlona leiin ama le a thlàhai le a rongbawltuhai chu hrem ka ta; anni le Jerusalema chênghai le Juda mihai chunga sietna hung tlung ding ka puong tahai, an ngaithlàk nuom lo po po chu hung intlungtir ka tih" tiin. 32 Chuongchun, Jeremia chun lekhabu ziel dang a lâk a, ziektu Baruk, Neria naupa chu a pêk a, ama chun Jeremia bàua inthoka thu a hmaa lekhabua a ziek ta po po, Jehoiakimin meia a raw hmanghai chu a ziek suok nawk vong a, chuonghai bàka chun thu inang iemani zàt a bel sa bok a.

37

1 Josia naupa Zedekia chu Juda lal dingin Babulon lal Nebukadnezzar chun a ruot a, Jehoiakim naupa Jehoiachin aiin a hung inlal ta a. 2 Nisienlakhom ama le a rongbawltuhai le a rama mihai chun LALPA thu zawlnei Jeremia hril chu an poisa nawh. 3 Chun, lal Zedekia chun Selemai naupa Jehukal le Maaseia naupa thiempu Zefania hai pahni chu zawlnei Jeremia kuomah, "LALPA, ei Pathien kuomah mi tongtaipek rawh" tia ngèn dingin a tir a. 4 Chuong lai chun Jeremia chu lung inah an la khum hri naw leiin mipuihai lai a nuom nuomin a la lêng thei a. 5 Faraw sipaihai chu Aiguptaa inthokin an hung inthok suok a, an hung ti Jerusalem inhuoltu Babulon sipaihaiin an hriet chun Jerusalema inthokin an inhnûk suok a. 6 Chuongchun LALPA thu chu zawlnei Jeremia kuomah a hung tlung a, 7 "LALPA Israel Pathien chun hieng hin a tih: Juda lal, mi rawn dinga mi hung tirtu kuoma chun hieng hin hril rawh: Ngai ta, Faraw sipai ruol, nangma santu dinga hunghai chu an ram tieng kîr nawk an tih. 8 Chu zoah Babulon sipaihai chu hung kìr an ta, khawpui hi hung bei an ta, lâng an ta, raw hmang an tih. 9 LALPA chun hieng hin a hril: 'Babulonhai chun mi'n kiengsan ngei an tih' ti lungril neiin nang le nang inhlèm naw rawh. Inkiengsan teu naw ni hai! 10 A hung beitu che Babulon sipaihai hi hnè vongin, a hliemhai chauh an puon inah màksan khom ni la, chuonghai chu hung suokin khawpui hi raw hmang tho an tih" tiin. 11 Faraw sipaihai leia Babulon sipaihaiin Jerusalema inthoka an inhnuk dok hnung chun, 12 Jeremia chun Benjamin rama a chanvo ram la dingin khawpuia inthok chun a'n thok suok a. 13 Sienkhom Benjamin Kotkhàr a tlung chun vêngtuhai kapten, Hanani naupa Selemia naupa a hming Irija chun, "Babulonhai tieng inpêk i tum a nih" tiin a lo man a. 14 Jeremia chun, "Ni hlak a tim ie! Babulonhai tieng inpe naw ning" a ta, sienkhom a ngaithlàk naw a, a man a, hotuhai kuomah a thuoi a. 15 Hotuhai chu Jeremia chunga chun an lung a sen hle a, an vuok a, ziektu Jonathan ina chun an intàngtir a, chu chu tàng ina an hmang a nih. 16 Jeremia chu in hnuoi ripa chun an khum a, chu taka chun hun sawt tak an intàngtir a. 17 Chun, lal Zedekia chun a ko suok a, arûkin "LALPA kuoma inthokin thu iemani bêk a um am?' tiin a'n don a. Jeremia chun, "Um e. Babulon lal kuta inmantirin um i tih. 18 Nangma chunga le i thoktuhai le i mipui hai chungah ieng am ka suksuol a, hienga lung ina i mi khum el hi? 19 I kuoma, 'Babulon lalin hung bei naw ni che' tia hriltu che i zawlneihai kha khaw lai am an um zo ta a? 20 Aw ka pu, lal tak, ka hnìna hi ngâithlaa mi pompêk dingin ka ngèn che a nih; ziektu Jonathan ina chu mi'n kîrtir ta lul naw rawh, chuong naw chun thi el ka tih" a ta. 21 Lal Zedekia chun thu a pêk a, vêngtuhai inkulna sûnga chun a'n tàngtir a, ni tin bei siemtuhai bei tlang khat, khawpuia bei a um sûng phot chu a pêk a, chuong ang chun Jeremia chu vêngtuhai inkulna sûnga chun a um ta zing a.

38

1 Chun, Matan naupa Sefatia le Pasur naupa Gedalia le Selemia naupa Jukal le Malkija naupa Pasur haiin mipuihai kuoma Jeremia'n, 2 "LALPA chun hieng hin a tih: hi khawpuia um zinghai chu kawlhnâm amanih, tàm amanih, hripuiin amanih thîng an ta, Babulonhai kuoma inpehai ruok chu an hringna sanhimin um an ta, dam an tih. 3 Hi khawpui hi Babulon lal sipaihai kutah pèk nîng a ta, lâng an tih, ti hi LALPA thu suok a nih" tia a hril chu an ngàithlàk a. 4 Chuongchun, hotuhai chun lal kuomah, "Hi mi hi sukhlum ni sien ti kan ngèn chê a nih. Ama hin hieng thu hi a hril leiin mipuihai le hi khawpuia la um sun sipaihai lungril khom a sukhnuol vong a nih. Hi mi hin hi mipuihai thatna hi a zong naw a, an sietna ding a zong lem a nih" an ta. 5 Lal Zedekia chun, "Ngai ta u, ama chu in kuta um an nawm; lal hi in dit naw zawng thaw thei a ni lèm" a ta. 6 Chuongchun, Jeremia chu an thuoi a, vêngtuhai inkulna huong sùnga um lal naupa Malki in hnuoia rip inthûk taka chun hruiin an thlàk thla a. Chu khur sùng ripa chun chirdiek ngot naw chu tui a um naw a, Jeremia chu chirdieka chun an thlàk thla a nih. 7 Chun, Ethiopia mi, lal ina um hlak, mi tilre Ebedmelek chun chir khura Jeremia an thlàk thu chu a lo hriet a, chuong lai chun lal chu Benjamin Kotkhàr bula chun a'n thung a. 8 Ebedmelek chu lal ina inthokin a suok a, lal kuoma chun, 9 "Ka lalpa, hieng mihai hin zawlnei Jeremia chungah rilo takin thil an thaw a, hnuoi sùng ripah zawlnei Jeremia an thlàk thla a, chu taka chun phingtamin thi el a tih, khawpuia takngiel khom bei a um ta si naw a" a ta. 10 Lal chun Ethiopia mi Ebedmelek chu thu a pêk a, "Hi taka inthok hin mi sawmthum thuoi la, Jeremia chu a thi hmâ ngeiin khura inthok chun la suok ro" a ta. 11 Ebedmelek chun mihai chu a thuoi a, lal tangka siena in hnuoia chun an lût a, zakuo tiek le silfèn hluihai chu a chawi a, hnuoi sùnga ripa chun Jeremia kuomah hruiin a thlâk thla a. 12 Ethiopia mi Ebedmelek chun Jeremia kuomah, "Hieng puon tiekhai hi i zak hnuoiah hrui hin thlung de rawh" a ta, chuong ang chun Jeremia chun a thaw a. 13 Jeremia chu khura inthok chun an khài suok a. Jeremia chu vêngtuhai inkulna huong sùnga chun a um ta zing a. 14 Lal Zedekia chun zawlnei Jeremia chu a ko a, LALPA tempul lûtna kotkhàr pathumnaa chun an hung thuoi a. Lal chun Jeremia kuomah, " Thil indon ka ti che a, ka lakah ieng khom ip nei naw rawh" a ta. 15 Jeremia chun Zedekia kuomah, "Ka hril che chun i mi sukhlum ngei naw ding maw? Thurawn pe lang che khom i ngàithlàk awm si naw a" a ta. 16 Lal Zedekia chun Jeremia kuomah, "Ka hringna siemtu LALPA hringna sâlin thu ka'n tiem a, sukhlum naw top ka ti che a, i hringna làk tumtuhai kuoma khom pe bok nawng ka ti che" tiin a rûkin thu a'n khàm a. 17 Jeremia chun Zedekia kuomah, "Iengkim LALPA, Israel Pathien chun hieng hin a tih: 'Babulon lal hotuhai kuomah in inpèk chun him in ta, hi khawpui hi raw hmang ni naw ni a, nang le i sûnghai khom hlàin um an tih. 18 Babulon lal kuoma in inpèk naw ruok chun hi khawpui hi Babulonhai kuta pèk nîng a ta, rawng an ta, a kuta inthokin suok naw top i tih" a ta. 19 Lal Zedekia chun Jeremia kuomah, "Babulonhai kuta lo inpe tah Judahai mi'n mantirin, nuizatbûrah mi siem an tih ti ka'n lau a nih" a ta. 20 Jeremia chun, "Inmantir naw ni che, i kuoma ka hril hi LALPA rawl a na, awi el rawh. Chuongchun, i ta dingin thâng a ta, dam bok i tih. 21 Inpêk i nuom naw chun hi hi LALPAN thu a mi hril chu a nih: 22 Ngai rawh, Juda lal ina nuhmei la um po pohai chu Babulon lal hotuhai kuoma thuoiin um an ta, nuhmeihai chun, I ringsan i ruolhai ngei khan, Thuoi suolin an hnè che a, Kemit tlumin chirdiek i pal a, I ruolhan an zàmsan ta si chetiin hla sak khum an ti che. 23 I nuhmeihai le nauhai po po chu Babulon mihai kuomah thuoi vong an ta, an kuta inthokin intâl suok naw ti ni a, Babulon lal kutah manin um i ta, nangma leiin hi khawpui hi rawng a tih" a ta. 24 Zedekia chun Jeremia kuomah, "Hieng thuhai hi tu khomin hre naw raw se, chuongchun thi naw ti nih. 25 Nisienlakhom, hotuhan ka biek che hi an hriet a, i kuomah an hung a, 'Lal kuoma i hril chu mi hril ve rawh; kan lakah ieng khom ip nei naw la, chuong naw chun kan that ding che a nih' an ti chun, 26 nangin an kuomah, 'Jonathan inah mi'n kîrtir ta naw rawh, chuong naw chun ka thi el ding a nih' tiin hnìna ka siem a nih' i ti ding a nih" a ta. 27 Chun, hotuhai po po chu Jeremia kuomah an hung a, an hung indon ta ngei a, lalin thu a pêk ang tak chun a lo hril a, tu khomin an indon sap ta nawh, lal le an inbiekna chu a hrie tu khom an um bok si nawh. 28 Chuongchun, Jeremia chu Jerusalem an làk ni chenin vêngtuhai inkulna huong sûnga chun a um ta zing a.

39

1 Jerusalem làk a ni dàn chu hieng ang hi a nih: Judai lal Zedekia inlala inthoka kum kuona thla sawmnaav chun Babulon lal Nebukadnezzar le a sipai po po chun Jerusalem an hung bei a, an inhuol a. 2 Zedekia inlal kum sawm le pakhatna, thla lina ni kuoa chun khawpui kul chu an sut tlang a. 3 Chuongchun, Babulon lal hnuoia hotu Samgar mi Nergal Sarezer hai, an hotu lu tak Nebo-Sarsekim hai, lal mi rawn tak Nergal-Sarezer hai le hotu dang tam tak an hung lût a, kotkhàr lailung taka chun umhmun an rem a. 4 Juda lal Zedekia le a sipaihaiin an hmu chun an tlânsie a, zàna chun lal huon tienga kul bang pahni inkâra lama chun an inrel a, Arabia panna tieng chun an suok a. 5 Amiruokchu, Babulon sipaihai chun an hnot a, Jeriko phaizawlah Zedekia chu an hnot phàk a, an man a, Babulon lal Nebukadnezzar kuomah Hamat ram Ribla khuoa chun an thuoi a, ama chun a chungthu chu a lo rêl a. 6 Riblaa chun Zedekia mithmu ngeiah a naupahai chu Babulon lal chun a that a, Juda mi tha tam tak a that bok a. 7 Chu zoah Zedekia mit chu a khel dokpèk a, dâr kol a'n buntir a, Babulon tieng a thuoi a. 8 Babulon mihai chun lal in le mi dang in po po chu an raw a, Jerusalem kul bang chu an sukchim vong a. 9 Lal vêngtuhai kawmandar Nebuzaradan chun khawpuia mipui la umhai le a kuoma mania hung inpehai chu Babulon tieng salin a thuoi a. 10 A bâng la um sun, mi rethei ruol ieng khom nei lohai chu Judai ramah Nebuzaradan chun a màksan a, grêp -huon le lohai a pêk tawl a. 11 Jeremia chungthua ruok chu Babulon lal Nebukadnezzar chun vêngtu kawmandar Nebuzaradan kuomah, 12 "Ama hi thuoi la, a chungah tha takin thaw la, sukna naw la, i kuoma a hril ang peiin thaw lem rawh" tiin thu a pêk a. 13 Vêngtu hotu Nebuzaradan chun an hotu lu tak Nebusazban hai, Nergal-Sarezer le Babulon lal hnuoia ofisar lienhai chu a ko khawm a, 14 Jeremia chu vêngtuhai inkulna huong sûnga inthok chun an ko suok a, Safan naupa Ahikam naupa Gedalia kuta chun a in tienga fepui dingin a'n koltir a, chuongchun ama mihai lai chun a khawsa vè nawk ta a. 15 Vêngtuhai inkulna huong sùnga Jeremia an khum lai chun a kuomah LALPA thu a hung tlung a: 16 "Ethiopia mi Ebedmelek kuomah Iengkim LALPA, Israel Pathien thu chu hieng hin hril rawh: 'Ngai rawh, hi khawpui laka ka thuhai chu i mithmu ngèiah ka hlen tèp a, thatna ni loin sietna ka hung intlungtir ding a nih. 17 Chu ni chun nang ruok chu san suok ka ti che a, i mi tìhai kutah pèk lût ni vê naw ti nih ti hi LALPA thu suok a nih. 18 Kei i mi ring tlat leiin hum ka ti che a, kawlhnâmin thi naw ti ni a, i hringna chu san himin um ngei a tih' ti hi LALPA thu suok a nih' tiin va hril rawh" a ta.

40

1 Lal vêngtu sipai kawmandar Nebuzaradanin Rama khuoa Jeremia a'n suo hnung chun LALPA thu chu Jeremia kuomah a hung tlung a. A'n suo hma chun Jeremia chu Judai ram le Jerusalema um hai, Babulon tienga sala an thuoi mèkhai lai chun khaidiet bunin a lo um ve a. 2 Vêngtu kawmandarin Jeremia a hmu chun a kuomah, "LALPA i Pathien chun hi hmuna sietna hung tlung ding hi a lo puong tah a. 3 Tu hin LALPA chun a hung intlungtir ta a, thaw dinga a hril ang takin a thaw ta ngei a. Hieng po po hi a hung tlungna san chu LALPA thu zawm loa a lakah an suol lei a nih. 4 Nisienlakhom, nang chu voisuna inthok hin i khaidiet bun chu ka sutpêk che a, Babulon tieng ka kuoma hung i nuom leh hung la, lo enkol ka ti che a, i nuom naw leh i nuomna tieng tieng fe la, ram po po i hmaah a'n zâr duoi hih. 5 I nuom leh Babulon lalin Juda khuohai optu dinga a sie Safan naupa Ahikam naupa Gedalia kuomah kîr la, an naw leh fe i nuomna tieng tieng fe rawh" a ta. 6 Vêngtu kawmandar chun fàk ding le thilpêk a pêk a, a'n fetir ta a. Jeremia chu Ahikam naupa Gedalia kuomah Mizpa khuoa chun a fe a, a kuoma chun a rama mi la um sunhai lai a um ve ta a. 7 Chun, ram hnuoia um sipai hotuhai po po le an rawihaiin Ahikam naupa Gedalia chu ram optu ding le a rama mi rethei tak tak, sala thuoi ve lohai enkoltu dingin Babulon lalin a ruot ti an hriet phing leh, 8 Gidelia kuomah Mizpaa chun an hung a, chuonghai chu Nethania naupa Ismael hai, Karea naupa Johanan le Jonathan hai, Tanhumet naupa Seraia hai, Netofat mi Efai naupa hai, Makat naupa Jaazania hai le an mihai an nih. 9 Safan naupa Ahikam naupa Gedalia chun anni le an mihai kuomah, "Babulon mihai rongbawla um hi ti naw ro. Hi rama hin um inla, Babulon lal rong bawl unla, in ta dingin thâng a tih. 10 Kei ruok chu nangni aiawa Babulon mihai hmaa ngîr dingin Mizpa khuoa hin um ka ta, nangni ruok chun uoiin hai, nipuia rà theihai le hriekhai chu la khawm unla, in bêlpuia hai chun sie khawm unla, khawpui in hluo tah haia chun chêng ro" tiin a lo hril a. 11 Chuong ang bokin, Moab rama chênghai, Amon mihai laia chênghai, Edom rama chênghai le ram danga Juda um haiin Babulon lalin Judai ramah mi tlawmte a màksan ti le rorêltu dingin Safan naupa Ahikam naupa Gedalia chu a siem ti an hriet chun, 12 Judai ramah, Mizpa khuoa Gedalia kuoma chun an tlàn darna hmun hrang hranga inthokin an hung kìr a, uoiin le nipuia rà thei an hung chawipêk teu a. 13 Chuonghai bàka chun Karea naupa Johanan le sipai pawl hotu, rama umhai po po chu Mizpa khuoah Gedalia kuoma chun an hung a, 14 a kuomah, "Amon mihai lal Baalis chun i hringna la dingin Nethania naupa Ismael a hung tir ti i hriet naw a ni maw?" an ta. Ahikam naupa Gedalia ruok chun an thu hril chu a ring nawh. 15 Karea naupa Johanan chun arûkin Mizpa khuoa Gedalia chu a'n biekpui a, "Arûkin mi'n fètir la, Nethania naupa Ismael chu va that ka ta, chu chu tu khomin hre naw ni hai. Ieng leiin am ama chun i hringna lain, i kuoma um Juda mihai po po le Judai rama la um sunhai hi indarin an bohmang ding a na?" a ta. 16 Ahikam naupa Gedalia ruok chun Karea naupa Johanan kuomah, "Chuong thil chu thaw hrim hrim naw rawh! Ismael chungchàng thu i hril hi khêl a nih" a ta.

41

1 Favâng lailung vêlah Elisama naupa Nethania naupa Ismael, lal chia mi le lal khawnbawl laia pakhat chun mi sawm thuoiin Mizpa khuoa Ahikam naupa Gedalia kuoma chun a hung a, chu taka chun bu an fàk tlàng a. 2 Nethania naupa Ismael chu a mi thuoi sawm le chun an tho thut a, Safan naupa Ahikam naupa Gedalia, Babulon lalin ram optua a siem chu kawlhnâmin an that a. 3 Ismael chun Mizpa khuoa Gedalia kuoma Juda um po po le chu khuoa Babulon sipai um ve hai chu a that bok a. 4 Gedalia an that ni zìnga chun, an that tì tu khomin an la hriet hmain, 5 Sekema inthok dâm, Siloa inthok dâm le Samaria inthok dâmin mi sawmriet, khâkhmul vaw a, silfènhai kei thlêr a, mani inât pop neng nungin, LALPA ina inhlàn ding bu le bal thilhlân le rimtui chawiin, an hung a. 6 Nethania naupa Ismael chu Mizpa khuoa inthokin anni hmuok dingin a suok a, lampui intluonin a tap a. Anni a hmu chun an kuomah, "Ahikam naupa Gedalia kuomah hung ro" a ta. 7 Khawpui sùng an lùt chun Nethania naupa Ismael le a mi thuoihai chun anni chu an that a, khuorkhurûmah an pei a. 8 Anni laia sawm ruok chun, "Mi that naw ro, ram hnuoiah bu hai, buman hai, hriek hai le khuoizu hai kan thuprûk teu si a" an ti leiin an hla a, an unauhai ruol chun an that sa ve ta naw a. 9 Ismaelin Gedalia ruola a thathai ruong a peina khuorkhurûm chu lal Asa-in Israel lal Baasa laka inhumhimna dinga khur a siem a nih. Nethania naupa Ismael chun chu chu mithi ruongin a vur sip a. 10 Ismael chun Mizpa khuoa mi a dam um sun lal naunuhai le Ahikam naupa Gedalia hnuoia vêngtu kawmandar Nebuzaradanin a'n koltir, Mizpa khuoa la um po pohai chu salah a thuoi vong a, chuonghai le chun Amon mihai ram panin a suok a. 11 Karea naupa Johanan le a kuoma um sipai pawl hotuhaiin Nethania naupa Ismael thil suol thaw po po an lo hriet chun, 12 mi po po chu an thuoi a, Nethania naupa Ismael bei ding chun an fe a, tui tamna hmun Gibeon-a chun an va hmu a. 13 Ismael kuoma umhai po po chun Karea naupa Johanan le a kuoma um sipai pawl hotuhai po po an hang hmu chun an lawm hle a. 14 Chuongchun, Ismaelin Mizpaa inthoka sala a thuoi po po chu an ngha kìr a, an kìr a, Karea naupa Johanan tieng chun an pakai tah deu vong a. 15 Nethania naupa Ismael ruok chu mi pariet leh Johanan kuta inthok chun an tlàn suok a, Amon mihai kuomah an tlàn lùt a. 16 Ahikam naupa Gedalia-in Gibeon-a inthoka a hung thuoi sipaihai, nu le nauhai le thoktuhai chu Nethania naupa Ismaelin Gedalia a that hnung chun a chang ta vong a, chuonghai laia a dam la um sun, Johananin Ismael kuta inthoka a san suokhai chu Johanan le a sipai hotuhai chun an rêngin Mizpa khuoa inthok chun an thuoi suok a, 17 Babulon mihai laka tlàn suok tumin Aigupta an panpui a, Bethlehem khaw bula Gerut Kimhama chun an chawl a. 18 Babulon lalin ram optu dinga a ruot Ahikam naupa Gedalia chu Nethania naupa Ismaelin a that lei chun an ti êm êm a nih.

42

1 Chun, sipai pawl hotuhai le Karea naupa Johanan le Hosaia naupa Jezania le mipui po po, a chîn taka inthoka a lien tak chenin zawlnei Jeremia chu an hung hnai a, a kuomah, 2 "I hmaa kan hnìna hi lo pom la, hieng la dam sunhai po po ta ding hin LALPA i Pathien kuomah mi tongtaipèk dingin kan ngèn che a nih. I mi hmu ang hin, mi tam tak ni hlak kha tlawmte chauh hlàin kan um ta hi. 3 Khaw tieng am kan pan ding a na, ieng am kan thaw ding a na ti mi hril dingin LALPA i Pathien kuoma chun mi hnipêk rawh" an ta. 4 Zawlnei Jeremia chun, "In thu chu ka hriet. In hnì angin LALPA Pathien kuoma chun tongtai mol ka tih. LALPAN a mi hril po pohai chu ip nei dêr loin hril vong ka ti cheu" a ta. 5 Anni chun Jeremia kuomah, "LALPA i Pathienin kan ta dinga thu a hril che ang peia kan thaw naw chun LALPA chu kan lakah thu hretu indik le ringum ni raw se. 6 Kan tirna che LALPA thu chu a sie a tha khom ni sien, LALPA kan Pathien thu chu awi ngei ngei kan tih; a thu awi chu kan ta dinga thatna ding a ni si a" an ta. 7 Ni sawm hnunga chun LALPA thu chu Jeremia kuomah a hung tlung a. 8 Chuongchun, Karea naupa Johanan le a kuoma um sipai pawl hotu po po le mipui, a chîn taka inthoka a lien tak chenin, a ko khawm a. 9 An kuomah, "LALPA in Pathien, a hmaa in hnìna intlun dinga in mi tirna khan hieng hin a tih: 10 'Hi rama hin in um zing chun thiek loin tungding ka ti cheu a, phawi loin phun ka ti cheu; in chunga sietna ka'n tlungtir hin poi ka ti vè a nih. 11 Tuta in tì èm èm Babulon lal hi tì dêr naw ro. Ama chu tì naw ro, keima in kuomah ka um a, keiin a kuta inthokin san suok ka ti cheu. 12 In chungah zàngaina insuo a, in ramah a'n kìrtir nawk theina ding cheuin in chungah zàngaina inentir ka tih' ti hi LALPA thu suok a nih. 13 "Amiruokchu, 'Hi rama hin um nawng kan tih' tia LALPA in Pathien rawl chu poisa loa in um a, 14 'A teu nawh. Aigupta ramah fe lem kan tih. Chu taka chun indona tuok tah nawng kan ta, tawtawrawt rì hre tah naw bok kan ta, tàm tuor khom um tah naw nih' in ti a ni ruok chun, 15 Aw Juda la um sunhai, LALPA thu chu hre ro khai, Iengkim LALPA, Israel Pathien chun hieng hin a tih: 'Aigupta rama lût ding le chu taka chêng dinga in ngha lui tlat a ni chun, 16 in ti ang ngeiin kawlhnâmin Aigupta rama chun nangchîng a ti cheu a, in ti ang ngeiin tàmin hnot zui pei bok a ti cheu a, chu taka chun thîng in tih. 17 Aigupta rama chêng dinga ngha lui tlat po po chu chuong ang chun kawlhnâm le tàm le hripuiin thîng an ta, an chunga sietna ka'n tlungtir ding laka chun tu khom himin suok naw ni hai. 18 "Iengkim LALPA, Israel Pathien chun hieng hin a tih: Jerusalema chênghai chunga ka lungsenna ka bun thlâk ang bokin Aigupta rama in lût pha chun in chungah ka lungsenna bun thlâng ka ta, tongse phur le mi makti huoi huoi, mi biek sìsaw le hril siet nîng in ta, hi hmun hi hmu nawk ta ngai naw ti niu. 19 Aw Juda la um sunhai, LALPA chun in chungthu ding a hril ta a, Aiguptaa chun lût naw ro. Voisuna chieng taka ka hril cheu hi hre mol ro. 20 'LALPA kan Pathien kuomah mi tongtaipèk la, LALPA kan Pathienin a ti taphot mi hril la, zawm pei kan tih' tia LALPA in Pathien kuoma in mi tir a ni leiin in thìna ding thil chu thaw lul naw ro. 21 Voisuna in kuoma ka puong, LALPA in Pathien mi hril thu chu in awi nuom chuong si naw hi! 22 Chuongchun, hi hi hre ro: in chèng nuomna hmuna chun kawlhnâm le tàm le hripuiin thi ngêi in tih" a ta.

43

1 LALPAN mipuihai kuoma LALPA an Pathien thuhai hril dinga Jeremia a tir anga a hril zo chun, 2 Hosaia naupa Azaria le Karea naupa Johanan le mi uongthuong po pohai chun Jeremia kuomah, "Nang hin khêl i hril a nih. LALPA kan Pathien chun, 'Aigupta rama chêng dingin fe naw ro' ti hril dingin a tir hrep naw che. 3 Babulon mihai mi'n mantir a, an mi that amanih sala an mi thuoi theina dinga Neria naupa Barukin a hung infui por chê a ni lem hi" an ta. 4 Chuongchun, Karea naupa Johanan le sipai pawl hotuhai le mipuihai chun Judai rama um zing dinga LALPA hril chu an awi nuom ta naw a. 5 Awi nêk hmanin Karea naupa Johanan le sipai pawl hotuhai chun Juda la um sunhai, hnam danghai laia hnot dara um, sienkhom Judai rama chêng nawk dinga hung kìrhai po po chu an thuoi a. 6 Babulon lal vêngtu kawmandar Nebuzaradanin Safan naupa Ahikam naupa Gedalia le zawlnei Jeremia le Neria naupa Baruk hai kuoma mi a màksan, pasal le nu le nauhai le lal naunuhai po po chu an thuoi vong bok a. 7 Chuongchun, LALPA thu chu awi loin Aigupta rama chun an fe a, Tahpanhes khuo chen an zu tlung a. 8 Tahpanhes khuoa an um lai chun Jeremia kuomah LALPA thu a hung tlung a. 9 "Lung lien tak tak la khawm la, Tahpanhes-a Faraw in lùtna kotsuoa lung rem kailawn sîra chun pil hnâkah Judahai mithmu lâi ngèiin phûm rawh. 10 Chun, an kuomah, "Israel Pathien, Iengkim LALPA chun hieng hin a tih: 'Ngai rawh, ka rongbawltu Babulon lal Nebukadnezzar chu inchà suok ka ta, hieng lung phùmhai chunga hin a lalthungpha chu innghat ka ta, a lal puon in zàr khum a tih. 11 Ama chu hung a ta, Aigupta ram hung rûn a ta, thi dinga ruothai chungah thìna, sala intâng dinghai chungah saltàngna, kawlhnâma thi dinghai chunga kawlhnâma thìna hung intlun a tih. 12 Aigupta rama an pathien tempulhai chu rawng a ta, kàng a ta, an pathienhai chu salah hawn a tih. Berampuin a silfena inthoka thil hrik a thin fai angin Aigupta ram chu thin fâi vong a ta, ngaingam takin suoksan a tih. 13 Aigupta ram Heliopolis-a an nisa pathien tempula lung ban insànghai chu sukchim a ta, tempula Aigupta pathienhai chu meiin rawng a tih' ti rawh" a ta.

44

1 Aigupta chuonhnuoia khuo Migdol hai, Tahpanhes hai le Memfis hai le Aigupta chuonchung a Juda chênghai po po chungthua Jeremia kuoma thu hung tlung chu: 2 Iengkim LALPA, Israel Pathien chun hieng hin a tih: 'Jerusalem le Juda khawpui po po chunga sietna ka hung intlun tahai chu in hmu a, an thil suol thaw leiin chuonghai chu tuhin an ram ta vong a, hluotu an um ta nawh. 3 Ka lungsenna chok tho dinga anni khomin, nangni khomin, in thlatuhai khomin in hriet ngai lo pathien danghai rong bawl a, an kuomah rimtui an inhlàn lei a nih. 4 Chuong sà khom chun keiman, 'Hieng thil tirdakum, ka theida zawng hi chu thaw lul naw ro' ti hril dingin ka rongbawltu zawlneihai ka hung tir ka hung tir a. 5 Sienkhom, an ritlona chu nghatsan a, pathien danghai kuoma rimtui inhlàn lo dinga ka hril chu an ngàithlàk nuom chuong nawh. 6 Chuleiin ka lungsenna le lung inlingna chu an chungah ka bun thlàk a, Judai ram khawpuihai le Jerusalem kotthlêrhai chu a kàng a, voisun hin an ram dêr a, rausanin an um tah a nih. 7 "Chuleiin, tu hin LALPA, Iengkim Pathien, Israel Pathien chun hieng hin a tih: Nangni laia a nuhmei a pasal, naupang le naute chen khom hlà um dèr loa rawt chimit vong tum ang hrimin ieng leia hieng thil suol hi in hringna chungah in thaw am a na? 8 In va chèngna Aigupta pathienhai kuomah rimtui rawin, in kuta siem thil ngei chun ieng leia lungsen dinga in mi cho phawk am a na? Nangni le nangni insuksieng in ta, hnuoia hnam tin tongsie phurin, mi biek sìsaw hung nîng in tih. 9 In thlàtuhai, Juda lalhai le lalnuhai, nangni le in nuhmeihaiin Judai ram le Jerusalem kotthlêra rîtlona thil in thaw zozàihai kha in theinghil ta'm a ni? 10 Voisun ni chen hin inphà hnuoiin in mi la'n zà chuong naw a, in thlàtuhai le nangni kuoma ka pèk, ka dàn le thu suokhai chu in la zawm chuong bok nawh. 11 "Chuleiin, Iengkim LALPA, Israel Pathien chun hieng hin a tih: 'Ngai ro, in chungah sietna hung intlungtir ding le Judahai po po rawt chimit vong dingin lungril ka siem tah a nih. 12 Juda mi la um sun, Aigupta rama chèng lui tumhai chu la hmang tawl ka tih. An rêngin Aigupta ramah bohmang an ta, kawlhnâm an naw leh tàmin bohmang an tih. A nih, a chîn taka inthoka a lien tak chenin kawlhnâm an naw leh tàmin thîng an tih. Mihaiin tongsie inphurin pangzat an ta, demin hril sieng an tih. 13 Jerusalem ka hrem ang bokin Aigupta rama chênghai chu kawlhnâm le tàm le hripuiin ka hrem ding a nih. 14 Chuongchun, Aigupta rama chêng dinga fe Juda la um sunhai chun Judai rama kìr nawk nuom êm êm hai sien khom, a rûka inrel suok tihai chauh naw chu, tu khom kîr dinga dam khawsuok um naw ni hai. 15 Chuongchun, pasal po po, an nuhmeihaiin pathien danghai kuomah rimtui an inhlàn ti hretuhai le chu taka um nuhmeihai le mipui tam tak, Aigupta chuonhnuoi le chuonchunga um hai chun Jeremia kuomah, 16 "LALPA hminga kan kuoma thu i hrilhai hi ngâithla nawng kan tih. 17 Keini le kan thlàtuhai, kan lalhai le kan hotuhaiin Judai ram khawpuia le Jerusalem kotthlêra hai an lo thaw ta hlak ang khan vàn lalnu kuomah rimtui rawin, a kuomah dawn ding uoiin bun suok kan ta, kan hril ang char khan thawng kan tih. Khang lai huna khan fâk le dawn thilah kan hnienghnàr a, kan tha a, sietna hrim kan hriet nawh. 18 Amiruokchu, vàn lalnu kuomah rimtui raw lo a, dawn thil kan inhlàn ta nawa inthokin iengkim kan tlasam a, kawlhnâm le tàma sukbohmangin kan um ta lem a nih" an ta. 19 Chun, nuhmei ruol chun, "Vàn lalnu kuomah rimtui raw a, dawn ding kan bun suok lai khan, ama limin bei dàm siemin, a kuomah dawn thil kan bun suok hlak ti kan pasalhaiin an hriet nawa i ngai am a ni?" an lo ti ve a. 20 Jeremia chun ama dontu po po, nuhmeihai le pasalhai kuomah, 21 "Judai ram khawpuia hai le Jerusalem kotthlêra hai, nangni le in thlàtuhai, in lalhai le hotuhai le a ram mipuihaiin rimtui an rawhai chu LALPAN hre zingin, a lungrilah a pai zing naw am a ni? 22 Thil suol le tirdakum in thawhai chu LALPAN a tuor zo ta naw a, in ram chu mi diriem le rausan hung niin, hluotu khom a nei ta naw a ni hi. 23 Rimtui in raw a, LALPA chungah in suol a, LALPA thu awi nuom loin, a dàn hai, thupêk hai le bitukhai in zawm nuom naw leiin tuta in hmû zing sietna hi in chungah a hung tlung a nih" a ta. 24 Chu bâkah mi po po le nuhmeihai hrietah Jeremia chun, "Nangni Juda mi Aiguptaa chênghai, LALPA thu hi lo ngaithla ro. 25 Iengkim LALPA, Israel Pathien chun hieng hin a tih: Vàn lalnu kuoma rimtui raw le dawn thil bun suok dinga in lo intiem tah ang ngeiin nangni le in nuhmeihaiin a takin, thilthawin in inentir tah a. In thu tiem ang ngei chun thaw mol ro! In thu inkhàmna chu vong tlat ro! 26 Amiruokchu, nangni Aigupta rama um Juda mihai, LALPA thu hi ngâithla ro. Kei LALPA Chunghnung tak hin ka hming ropui tak sâlin thu ka'n tiemkam a, Aigupta rama chêng Juda mi tu khomin, 'Iengkim LALPA hringna sâlin' tiin ka hming hmangin thu intiemkam ta naw ni hai ti hi LALPA thu suok a nih. 27 Ngai ro, an thatna ding ni loin an sietna dingin inchàn zing tawl ka ta; suksiet vong an ni chenin Aigupta rama Judahai chu kawlhnâm le tàmin rawt ka tih. 28 Kawlhnâma sukhlum mahla tlawmte chu Aigupta rama inthoka suokin Judai ramah lût an ta; chu pha chun Juda dang po po, Aiguptaa chêng dinga lûthai chun tu thu am a dingchang lem, anni thu am ka thu, ti la hrieng an tih. 29 "Chun, ka thu chu ngîrin, ka lo zilhau tah chêu anga hi hmuna hin ka hrem ngei dingzie cheu inchikna chu hi hi nîng a tih: 30 Faraw Hofra, w Aigupta lal chu a hmêlma, a hringna làk tuma zongtu Babulon lal Nebukadnezzar kutah Juda lal Zedekia ka pèk ang bok khan pe suok ka tih' ti hi LALPA thu suok a nih" a ta.

45

1 Juda lal Josia naupa Jehoiakim inlala inthoka a kum linaa zawlnei Jeremia thu hrilhai lekhabu ziela Barukin a ziek thlàk hnunga zawlnei Jeremia-in Neria naupa Baruk kuoma a hril chu a nih. 2 "Aw Baruk, LALPA, Israel Pathien chun i kuomah hieng hin a tih: 3 Nangin, 'Ka chung a va hang pik de aw! Lungngaina ka tuor hi LALPAN a mi bel sàpèk a; ka'n rûmnain ka chàu zo ta a, hadamna hrim ka hmu nawh' i ti a. 4 LALPA chun i kuomah hieng hin hril dingin a mi tih: "Hieng hin LALPA chun a tih: 'A ram pumpuiah ka bawl tahai chu thiek ka ta, ka phun tahai chu phawi ka tih. 5 Chuong a ni si chun i ta dingin ieng am thil ropui zong ding a um a? Zong naw law law lem rawh. A ram pumah sietna ka hung intlungtir ding a na, sienkhom i fèna taphotah i hringna chu hlàpêk pei ka ti chê' tiin" a ta.

46

1 Hnamhai chungchàng thua zawlnei Jeremia kuoma LALPA thu hung tlung chu hi hi a nih: 2 Aigupta chungchàng thu: Juda lal Josia naupa Jehoiakim inlala inthoka a kum lìnaa Eufretis vadung kama khuo Karkhemis hmunax Babulon lal Nebukadnezzarin Aigupta lal Faraw Neko sipaihai a hnè chungchàng thua chun: 3 "Phaw chîn le lienhai chawiin, Hma tieng norin râl tawn ro! 4 In sakorhai buotsai unla, Sakor chungah chuong unla, In thîr lukhum khum unla, Mani hmun sengah inring ro!In feihai kha tât ngei unla, In thìr zakuohai kha hâk ro. 5 Iem a na ka thil hmu hi?An thlabâr tawl hle a ni saw!An pasalthahai an tlawm a, Tukkhum sonin an zàm sie!Bak lêngin an tlânsie a, Hnung tieng ngha kîr an um nawh, Sîr tinah titna a hrâng si"Ti hi LALPA thu suok a nih. 6 "Tuon thâ an tlànse hman nawh, Râlhrâthai an suok thei bok nawh. Eufretis vadung hmar tieng chun, An inpal tlu rem rum el a. 7 Nile anga hung lien hi tu am?Tuifawn sàng anga hung lien hi? 8 Nile angin Aigupta a hung lien, Tuipui lien insàng ang elin; "Hnuoi hi chìm khum vong ka ta, Khawpuihai le a hluotuhai, Chìm hlum vong ka tih" a tih. 9 Aw sakorhai, hma tawn ro!Aw tawlailirhai, tlân hrat ro, Ethiopia le Libya mihai chu, Phaw chawiin an hung inthok a, Thalkàptu chu Lydiay mihai an nih. 10 Sienkhom chu chu LALPA ni, Iengkim LALPA ni, Phuba a làkna ni a ni si a. Hmêlma chungah phuba lain, Kawlhnâm chun mawl rak khopin, Thisen liek ngat ngat a ta, Thisen inrui bûr a tih. Lalpa, Iengkim LALPA chun, Hmar tieng Eufretis vèla chun, Inthawina a hmang ding a nih. 11 Aw Aigupta naunu thienglâm, Gilead tlàngah hang kai la, Thing hnài damdawi hang la rawh; Damdawi i sèng thlawn rawn tah, Sienkhom i dam phá si nawh. 12 I muolphona rihau chu, Hnam tinin hung hrieng an ta, I tap ri'n hnuoi sip a tih. Râl hrât vé vè insut an ta, An pahniin tlu ruol an tih" tiin. 13 Babulon lal Nebukadnezzar hung ding thu le Aigupta a rùn ding thua LALPAN zawlnei Jeremia kuoma a hril chu: 14 Aigupta ramah puong dar unla, Migdol-ah tlâng insam unla, Memfis le Tahpanhes-ah puong ro:Thanghmun khawin inrâlring ro, In vèla mihai po po hlak chu, Kawlhnâmin a lem zo ta si. 15 Ieng leia i mi huoisenhai, An che ngam naw am a na?LALPAN a nam tlum tawl a, Ngîr suok ngam ding an ni nawh. 16 An sir inphet zing a ta, Indel tlu rem rum an tih. "Nêksawrtu kawlhnâm tlànsanin, Ei pieng le murna ramah, Thaw ro, fe kîr nawk ei tiu"Tiin inhril tuong an tih. 17 "Aigupta lal Faraw hin, A rî chauh a sukna a, A huna hlak hung inlang si lo"Tiin makti tawl an tih. 18 "Ka hringna salin ka hril:Tlâng laia Tabor tlàng ang el, Tuipui bula Karmel tlàng ang, Mi lien a hung ding a nih"Tiin Laltak chun a hril, A hming Iengkim LALPA chun. 19 Nangni Aiguptaa chênghai, Saltàng dingin insiem ro; Memfis chu la rausan an ta, Hluotu boin tlu ram a tih. 20 Aigupta chu bawng la nal a na, Sienkhom hmar tienga inthokin, A sètu ding tlip a hung. 21 A sipai ruoi khawmhai chu, Bawng tuoi thau ang el an na; Sienkhom thanghmun khaw loin, Anni khom tlânsieng an tih, An chungah sietna ni leHremna ni a tlung pha chun. 22 Hmêlmahan an hung hnai pha, Rûlpui tlânsie ang elin, Aigupta chu insûk a ta, Hreipui leh hung inthok an ta, Thing angin phûr thlùng an tih. 23 Ieng anga pik ni sien khom, A ramngaw chu thiek an tih, Ti hi LALPA thu suok a nih. Khàu ruol nêka tam an na, Tiem seng ruol an ni nawh. 24 Aigupta naunu muolpho a ta, Hmar tieng mihai kutah pêng an tih. " 25 Iengkim LALPA, Israel Pathien chun hieng hin a tih: "Ngai ta u, Thebes-a Amonhai pathien hai, Faraw hai, Aiguptaa an pathienhai le an lalhai le Farawa innghattu po pohai chungah hremna ka hung intlungtir ding a nih. 26 Anni that tuma zongtuhai le Babulon lal Nebukadnezzar le a rongbawltuhai kutah pe suok ka tih. Amiruokchu, a hnungin Aigupta ram chu khâ hmâ ang bok khan hluoin hung um nawk a tih" ti hi LALPA thu suok a nih. 27 Aw, ka siehlaw Jakob, ti naw, Aw Israel, zâm dèr naw rawh. Ram hla taka inthok khomin, San suok ngèi ka ti che a, Saltàngnaa inthokin, I thlàhai san suok ka tih. Tu khom sukbuoi ta loin, Him tak le thlamuong takin, Jakob chu la um a tih. 28 Aw, ka siehlaw Jakob, ti naw, I kuomah ka um si a. Ka hnot darna cheu hnamhai, Ka suksiet vong khom ni sien, Sukse vong nawng ka ti cheu. Hrem chu hrem ka ti cheu a, Indik takin thawng ka tih, Hremna pumpel naw ti niu"Ti hi LALPA thu suok a nih.

47

1 Faraw-in Gazaa Filistinhai a rûn ding thua zawlnei Jeremia kuoma LALPA thu hung tlung chu: 2 LALPA chun hieng hin a tih:"Hmar tieng panga inthoka, Tui hung lien dàn hi thlîr rawh; A kuong liem zur zur a ta, Ram le iengkim chìm a ta, Khawpui le a sûnga chênghai, An rêngin chìm vong a tih. Mihai chu tap khêk an ta, A rama chênghai po po, Tapin khêk rong rong an tih. 3 Sakor pèn thuop thuop rihai, Râl tawlailir thûm dur dur le, An ri so chur chur kàra chun, An nauhai ngaisak chang loin, Pahai chu tlân sieng an ta, An kuthai zoi vong a tih. 4 Filistinhai chu hung bei a, A suosàm ni a tlung ta a, Tura khuo le Sidon khuo, Thangpui thei um sunhai chu, A that ram ni a tlung tah. Kaftorz kama inthoka hung, Filistin la dam sunhai chu, LALPAN a suksiet tawl tèp si. 5 Lusûn pûrdo Gaza chun, A lû vaw kol vong a ta, Askelon chu chimit a tih. Aw, phâia chêng mi um sunhai, Ieng chen am nangni le nangni, In insun pei ding a na? 6 "Aw, nang LALPA kawlhnâm, Ieng tik am chawl tâng i ta?I pâiah chun lût nawkin, Chawl ta rawh" ti'n khêk in tih. 7 LALPAN thu a pêk si chun, Ieng tin am chawl thei a ta?Askelon le tuipui kama chênghai, Do dingin thu a pêk mieu si a.

48

1 Moab chungthua Iengkim LALPA, Israel Pathien hril chu hi hi a nih:Nebo chung a va pik de aw!Sukramin a um ding a ni si a; Kiriathim chu lâng an ta, Hmâi mawk takin siem an ta, A kulhai sukmuolphoin, An sukchim ding a ni si. 2 Moab hming chu tu khomin, Uongpui ta ngai naw ni hai. Mihai chun Hesbonah, "Hi hnam hi nuoi bo ei tiu"Tiin la phierrûk an tih. Aw nang Madmen khuo khom hi, I la chimit ding a nih, Kawlhnâmin hnot thlûr a ti che. 3 Heronaim rihau chu ngai ta, Sietna râpthlàk rìhàu chu! 4 Moab chu koi dar a ta, A nauhai inchiek ri chu, Zoar chen hre phâk an tih. 5 Nasa taka tap pumin, Luhit tungah kai an ta, Horonaim suka hai khom, Thlaphâng tap ri inlêng a tih. 6 Tlân ro, in hringna ta dingin, Thlalèrah inbi hmang ro. a 7 I theina le sumah i'n nghat leiin, Salah man vêng an ti che. In pathien biek Khemos chu, A thiempu le rongbawltuhai leh. Salah thuoi hmang bok an tih. 8 Suksetu chun i khawpui tin, A hung rûn tawl ding a na, A pumpel um naw ni hai. Phai ruom le tlâng zawla chêng, Tu khom sukse vong a tih, Ti hi LALPA thu suok a nih. 9 Moab chu machi thè khum rawh, Sukram a ni ding si a; A khuohai chu rausan an ta, Hluotu tu khom nei naw nih. 10 LALPA sin ngaithâtu chu, Tongsie phurin um raw se; Thisen insuona dingaKawlhnâm hmang ngai nawtu chu, Tongsie phurin um raw se! 11 A bêla sie tok tok hlak, Uoiin angin Moab chu, Muong takin a um hlak a, Bun suok a tuok ngai naw a, Salah an thuoi ngai bok nawh. Chuleiin a'n hnik zing a, A rim khom a danglam nawh. 12 Sienkhom bun suoktu ding mi, Ka tir ni hung tlung a ta, Anni chun bun suok an ta, An bun suok fâi rìt pha leh, Bêl chu vaw koi vong an tih, Ti hi LALPA thu suok a nih. 13 Israel sûngkuohaiin, Bethela an bawng lem biek, An muolphopui ang bok khan, Moab khomin a pathien, Khemos inzàpui a tih. 14 'Tu cho ruol lo mi râlhrât, Indoa huoisen kan nih'Ieng leia in ti'm a na? 15 Moab chu ram vong a ta, A khuohai chu rûn an ta, A tlangvàl thá thàhai chu, Indonaah suom an tih, Iengkim LALPA chun a tih. 16 Moab chu a tlu têp a, Sietnan hung nang thut a tih. 17 A kawl hnai vela umhai, A hmingthangzie hretuhai, 'Khang anga hmol ropui si. A tliek ruop el hi chu aw!'Tiin ama chu tà ro. 18 Nangni Dibon hraichawihai, In ropuina suoksanin, Hnuoi chàra hin hung thung ro; Moab suksetu ngei chun, Nang khom hung bei a che a, I kulhai sukchim a tih. 19 Aroer khuoa chênghai chun, Lamah ngîrin thlîr vêl ro; Pasal hung tlânsiehai leNuhmei hung inrelhai chu, 'Ieng thil am a tlung ta leh?'Tiin lo indon tawl ro. 20 Moab a muolpho ta ie, A tlu hmât ta vong el ie!Tia sûnin tap khêk ro. Moab a siet tâk thu hi, Arnon-a khom puong dar ro. 21 Rorêlna a hung tlung ie, Tlâng zawla khuohai chungah-Holon, Jahza le Mefaat, 22 Dibon, Nebo le Beth Diblathaim, 23 Kiriathaim, Beth Gamul le Beth Meon, 24 Keriot le Bozra khuoahai, Moab rama khuo po po, A hnai le kilkhawr chunga chun. 25 Moab ki a rawt tliek a, A bân khom a suktliek bok"Ti hi LALPA thu suok a nih. 26 "Moab chu vâi rui dèr rawhLALPA a khing ngam leiin; A luokah inbuol sien la, Mi nuizatbûr kai raw se. 27 Israel chu i ta dingin, Nuizatbûr a ni hlak maw?Rûkru lai an man sa maw, A chanchin i hril zàt a, Hmusit tak le endong a, I lu i thin zie hlak hi? 28 Moab rama chêngtuhai, In khawpuihai tlânsanin, Lungpui kàra bû sep hlak, Vàthû angin pûk tontirah, Nangni khom bû khuor ve ro. 29 Moab chapozie kan hriet, A hang insie sàngziehai, A uongzie le chaltlaizie, A lungril indûziehai chu. 30 A chapo a tangkai nawh, A uongin kawk a nei nawh"Ti hi LALPA thu suok a nih. 31 Chuleiin, inring takin, Moab chu tà khum ka ta, Moab pumpui sûn ka ta, Kir Hareset mihai sûn ka tih. 32 Aw Sibma grêp kûnghai, Jazer ka ta nêk hmana, Nasain tàng ka ti cheu. I zârhai chu Tuipui Thi chen, An inzàr phar dei duoi a, Suksetun a hmal vong a, I grêp le thei hminhai chu, A hmal fai vong ta si a. 33 Moab rama huona hai, Hlim le lawm rî a re a; Uoiin sawrna khur a'nthok, Uoiin a suok ta naw a, Hlima grêp chìl sawr rìhai, Hriet ding hrim a um ta nawh. Khêk rì an hriethai khom chu, Hlimna khêk rì an ta nawh. 34 Hesbon khuoa inthokaEleale le Jahaz chenin, An khêk rì a'n hriet phàk a; Zoar a'nthok Horonaim leEglath Selisiya chenin. Nimrim tuikhurhai chen khom, A lo kang zo ta si a. 35 Hmun sânga an inthawina, An biek pathienhai kuoma, Rimtui an inhlànnahai khom chu, Keiin suktawp vong ka tih, Ti hi LALPA thu suok a nih. 36 Theihlê angin ka lungrilah, Moab sùnna hla a'n ri a; Kir Hareset-hai sùnna hla chu, Ka lungrilah a'n ri bok a. Hausakna an khawl khawmhai, A riral zo vong ta si a. 37 Mi tinin lu an vaw kol a, An khàkhmul an vaw bok a; Mi tinin bân an àt pop a, Saiip an kawngchun seng bok. 38 Moab in chung po po leAn tuolzawl po pohai chu, Lusûnna hmun a'n chang a, Tu dit lo bêl ang elin, Moab ka vuok dar ta si, Ti hi LALPA thu suok a nih. 39 A va hang koi nasa de!An va hang tap nasa ngei!Moab chu muolpho taluo'n, Tu khom a hmason ngam nawh. A kawl le kienga chênghai, Nuizatbûr inchang zoin, Mi pangzat a kâi ta si. 40 Hieng hin LALPA chun a hril:"En ro, mupui chu thla zârin, Moab chungah a bir thla a. 41 Khawpuihai chu la'ng a ta, Kulhai khom la vong a tih. Chu ni a hung tlung pha chun, Moab mihrânghai lungril chu, Nuhmei nau hase lai angin, Thlaphângnain sip a tih. 42 LALPA a cho ngam leiin, Moab hnam chu rîral a tih. 43 Aw nangni Moab mihai, Thlaphângna le khuorkhurûm, Chânghaiin an lo nghàk cheu"Ti hi LALPA thu suok a nih. 44 Titna tlânsan tumtu chu, Khuorkhurûmah tlâng a ta, Khuorkhurûm suoksantu chu, Chânga chun inawk a tih. Hremna a tuor ding kum chu, A hung tlung vak ding a nih"Ti hi LALPA thu suok a nih. 45 Hesbon hlim phèna inbi, Râltlânhai bei a dong ngei!Sihon lal khawpui Hesbon chu, Mei suok tanna hmun a na, Moabhai bawksam a kàng ie, Chapo ri siehai lu bùr chu. 46 Aw Moab, i chung a pik!Khemos mihai an boral tah. I naunu le naupahai chu, Salah an thuoi tawl ta si. 47 Sienkhom ni nuhnunga chun, Moab vàngneinahai chu, Ka tungding nawk ding a nih"Ti hi LALPA thu suok a nih. Hi chen hi Moab chungthu hrilna chu a nih.

49

1 Amon chungthua chun LALPAN hieng ang hin a hril:"Israelin nau a nei naw maw?Rohluotu ding a nei naw a ni?Iengti leia Gad-hai ram chu, Molekinb a chang am a na?Ieng leia a mihaiin, An khuohai an hluo am a na? 2 Sienkhom indona rihai, Amon khawpui Raba-ahAn hriet hun la tlung a ta, A khuo tlu ram vong a ta, A sevel khuohai khom chu, A rêngin raw fai an tih. Ama hnot suoktuhai chu, Israelin hnot suok a tih"Ti hi LALPA thu suok a nih. 3 Aw Hesbon, tap rak rak rawh, Ai khuo suksiet a ni ta si a!Nangni Raba khaw mihai, Inring takin tap rak rak ro!Saiip silin sûn unla, Kul sûngah tlân vêl ruoi ro, Molek le a thiempuhai, A rongbawltu po po leh, Salah an thuoi ding a ni si. 4 Aw naunu ringumlonu, Ieng leia i phairuom thahai, I suong bèk bêk am a na?I hausaknahai chu suongin, 'Tuin am a mi bei ngam ding?'Tiin i tong hlak a ni kha. 5 I vêl tina inthokin, I chungah thlabârnahai, Ka hung intlun ding a nih. Hnot hmang vong an ti cheu a, Tlânsehai hûikhawmtu ding, Tu khom um ta naw ni hai"Lalpa, Iengkim LALPAN a tih. 6 Nisienlakhom chu hnungah, Amon thlàhai vàngneina chu, Ka tungding nawk ding a nih'Ti hi LALPA thu suok a nih. 7 Edom chungthua chun Iengkim LALPA chun hieng hin a hril:Teman-ahc mi var hrim hrim, An um dèr ta naw a ni?Thurawn pe theitu rem hrie, An bo dèr el am an ta?An varna a thing zo maw? 8 Nangni Dedana chênghai, Ngha kîrin tlânsie unla, Pûk rilah inbi hmang ro, Esau ka hrem huna chun, Sietna hung intlun ka tih. 9 Grêp lotuhai an hung pha, Hlà tawk an nei naw ding maw?Zànah rûkru an hungin, An dit bàk an làk hlak maw? 10 Kei chun Edom innàm ka ta, A'n bìkna hâi lâng ka ta, Inbi hmang thei ta naw nih. A nauhai le laichinhai, A tuolbawmhai bo an ta, Hmu ding hrim um ta naw nih. 11 I fahrahai chu mâksan la, Keiman lo hum him ka tih; I hmeithâihai chen khomin, Kei hi mi ring raw hai se. " 12 LALPA chun hieng hin a tih: No chu a dawn naw dinghai hman an indawntir si chun, hrem lo topin i suok thei ding am a ni? Hrem loin suok naw top i tih, no chu i dawn ngei ding a nih. 13 Bozra chu tlu ramin, mi pangzat, diriem le tongsie inphur huoi huoi hung nîng a ta, a khuohai chu kumkhuoin tlu ram a tih" ti hi LALPA thu suok chu a nih. 14 LALPA thucha ka hriethai chu:Hnam tinhai kuomah hi thu hi, Hril dingin palai an tir a:"Pung khawm unla, bei ro, Indo puongin khêk suok ro!" tiin 15 "Ngaita, nang chu hnamhai lai, Ka sukchìn ding chè a na, Mihai endong nîng i tih. 16 I'n sukparapnahai kha, Lungrila i chaponain, A dawi vèt lei che a nih. Aw nang rawl lung kâra chêng, Tlâng sîpa umhmun khuortu, Mupui bu sepna angaInsângah bu sep la khom, Chu hmun sânga inthok chun, Hnûk thla tho tho ka ti che, "Ti hi LALPA thu suok a nih. 17 "Edom chu pangzat an ta, Mi inlon vèl taphotin, A hliemnahai chu hmuin, Maktiin nuisawng an tih. 18 Sodom le Gomorra khuo leAn kawl vèla khuo po po, Suksieta a um ang khan, Tu khom chêng ta naw ni a, Tu khomin hluo ta naw nih, "Ti hi LALPA thu suok a nih. 19 Jordan ram pik a'nthok a, Ran tlatna hmun phûlzawlaSakeibaknei hung angin, Ama rama inthokin, Edom chu hnot thlûr ka ta, A chunga thuneitu ding, Ka nuom taphot ruot ka tih. Keima ang tu'm an um a?Mi cho thei ding tu'm an um?Berampu tu am mi kal thei? 20 Edom chunga thaw dingaLALPA ruot chu ngâithla ro, Teman mihai chunga a ruot khom. An ran tehruoi fen hmang an ta, Anni leiin ran tlatnahai, A rêngin suksieng a tih. 21 An tlûksiet ri a hriet pha, Hnuoi inthin dur dur a ta, An beidong khêk thangkhawk chun, Tuipui Sen ruom khawk a tih. 22 En ta, mupui vuong tung khi, A hung bir thla ding a na, Bozra chungah thla zâr a ta, Chu ni a hung tlung pha chun, Moab mihrânghai lungril chu, Nuhmei nau hase lai angin, Thlaphângnain sip a tih. 23 Damaska chungthua chun:"Hamat le Arpad an chî-ài, Thu tha lo an hriet leiin. An lungril a zâm hle a, Tuifawn insawk zing angin, An lungril a chawmchawrok. 24 Damaska chu zoi thlain, Tlân hmang di'n a'n singsa a, Thlabârnan a man khong a, Nuhmei nau hase angin, Lungngaina tuorin a'n kon. 25 Khaw inlâr le hlim thei chu, Rausanin a lo um tah. 26 Chu taka thalaihai chu, Kotthlêrah tlu phung an ta, A sipaihai chimit an tih, "Iengkim LALPA chun a tih. 27 "Damaska kul chu rawng ka ta, Ben-Hadad kulpui chu kàng hmang a tih. " 28 Kedarhai le Hazor ramhai Babulon lal Nebukadnezzarin a hung bei ding thua LALPA thu suok chu:"Tho unla, Kedar hai bei unla, Khawsak mihai chu nuoi bo ro. 29 An puon in le ran ruolhai, An puonzàr le hmangruohai, Iengkim làkpêk vong unla, An sanghawngseihai hawn ro. "Sîr tinah titnan a'n huol cheu"Tiin mihan khêk khum an tih. 30 "Nangni Hazora chênghai, Inhmaw takin tlân hmang ro!Pûk rila hai chun inbi hmang ro. Babulon lal Nebukadnezzar chun, Do ding che'n thu a phierruk a, Suksiet a tum che a nih"Ti hi LALPA thu suok a nih. 31 "Nuoma ngai sukngam ringot, Kul le kotkhâr khom nei lo, Kot kalna tluon khom nei lo, Thlalêra khawsahai chu, Tho unla, va bei tawl ro, "Ti hi LALPA thu suok a nih. 32 "An sabengtung ruolhai leAn ran ruolhai po po chu, Râlin lâkpêk vong an ta, Lu ziet kawng hlak hnamhai chu, Thli angin lèn dar ka ta, Kil tin a'nthokin sietna, An chungah bun thlâng ka tih, "Ti hi LALPA thu suok a nih. 33 "Hazor chu sihal ruolhai, Chèng khawmna hmun nîng a ta, Rausan hmun ni kumkhuoin, Tu khom chêng ta naw ni a, Tu khomin hluo ta naw nih. " 34 Juda lal Zedekia inlal tan tira Elam chungthua LALPA thu, zawlnei Jeremia kuoma hung tlung chu: 35 LALPA Iengkimthawthei chun hieng hin a tih:"En ta, Elamhai suongtawlol tak, An thalngul ul tliek ka tih. 36 Kawl kil lia inthokin, Thli thuong li hung tir ka ta, Elam chungah hrâng a ta, Thli thuong li chun lèn dar a ta, A lèn dar nawna hnam le, An tlân dar nawna hmun hrim, Khaw lai hmun khom um naw nih. 37 That tuma anni zongtu, An hmêlmahai hmaa chun, Anni chu vaw dar ka ta, An chungah sietna buok ka tih, Ka lungsenna inling ngei chu; Ka sukchimit vong hma khat, Kawlhnâmin hnot thlûr ka tih. 38 An lal le hotuhai suksein, Elama chun ka lalthungpha, Ka hung innghat ding a nih, "Ti hi LALPA thu suok a nih. 39 "Sienkhom Elam vangneina, Ka tungdingpêk nawk hun chu, A la hung tlung ding a nih, "Ti hi LALPA thu suok a nih.

50

1 Babulon le Kaldai ram chungthua Jeremia hmanga LALPA hrilhai chu: 2 "Hnam tin lai hrilin puong rawh, Puonzâr khâiin puong suok rawh, Ieng khom ip nei dêr naw rawh. Hieng hin i hril ding a nih:Babulon chu tlawm a ta, Beld chu muolpho dèr a ta, Titnan Marduk sip a ta, A hmêl chu inzak a ta, A limhai thlaphâng an tih. 3 Hmar tienga hnam pakhatin, Ama chu hung do a ta, A ram suktlaran a ta, Tu khom chêng ta naw ni a, Mi le sà zâm hmang an tih. 4 "Chu hun le ni a tlung pha, Israel le Judahai chu, Hung insuikhawm tâng an ta, LALPA an Pathien zongin, Tap pumin hung pan an tih. 5 Zion lampui indonin, Zion tieng ngha tâng an ta, Hungin LALPA chel an ta, An theinghil ta ngai lo ding, Kumkhaw thuthlung thlung an tih. 6 Ka mihai chu beram angin, An lo inhmang zo ta a, Berampuhan thuoi suolin, Tlânga hai an invàk hmang a. Muol le tlâng dungahai chun, An invàk dar ta vong a, An huong khom an hriet ta nawh. 7 A hmú hmùn an lo fàk a, 'Ieng poi khom kan tawk dèr nawh, LALPA, an tlatna huongpui, An thlàtuhai beisei chu, An suol hmangsan lei a nih'Tiin an ràlhan an hril. 8 "Babulon chu tlànsanin, Kaldai ram chu mâksan ro, Kèl ruol thuoitu kèlchal ang, Nangni khom hung ni ta ro. 9 Babulon hung bei dingin, Hmar tienga hnam ropuihai, Suikhawmin chok tho ka ta, Ama chu hung ep an ta, Hmar tieng panga inthokin, An hung làk ding a ni si. Kut ruoka kîr ngai dèr lo, Râl do thiemhai thal angin, Hlawsama kîr um naw nih. 10 Babulon chu rok an ta, A roktuhai tlai an tih, "Ti hi LALPA thu suok a nih. 11 Nang ka rochanhai roktu, Bu chîltu bawngla tuoi angin, Bupawl lai invêl kuolin, Sakorchal inhràm angin, Hlima lawmin um la khom, 12 I nû la'n zak hlèng a ta, A hringtu che hmaimawk a tih-Hnamhai laia hnuoihnung tak, Thlalêr ram tawl le fil ang, I la ni ding a ni si a. 13 LALPA lungsenna leiin, Hluoin um ta naw ni a, Ràusan dèrin um a ta, Babulon sir taphotin, A hliemna zozai lei chun, Pangzatin diriem an tih. 14 Thalngul chawituhai poin, Babulon inhuol unla, Kâp ro, in thal ren naw ro, LALPA lakah a suol si a. 15 Sîr tinah hawhaw'n nor ro:Ama ngei a hung inpèk, A râlvêngbùk a tlù ie!A kul bang a chim dur dur. LALPA thungrul ni a na, Mi a thaw dàn ang charin, A chungah phuba la ro. 16 Babulona inthokin, Chi thètu le bu âttuhai, An rêngin hnot hmang unla, Hung nêktu kawlhnâm tiin, An mihai umna panin, An ram tieng tlân seng raw se. 17 Sakeibaknei hnot dar angin, Israelhai chu an tlàn dar a; Asuria lalin a fâk hmasa phot a, A tawpa an rû chen kheltu chu, Babulon lal Nebukadnezzar a nih. 18 Chuleiin, Israelhai chungthua chun Iengkim LALPA, Israel Pathien chun hieng hin a tih:"Asuria lal ka hrem ang khan, Babulon lal le ram hrem ka tih. 19 Sienkhom Israel ruok chu, A tlatnaah thuoi kîr ka ta, Karmel tlâng le Basan ramah, Efraim le Gilead muolah, Khop takin tla nawk a tih. 20 Chu hun chu a tlung pha chun, Israel bawsietnahai chu, Zong suok tumin dap an ta, Sienkhom ieng khom um naw nih. Juda suolna hrim hrim khom, Hmu ding um ta bok naw nih, A dam sun, ka hlàhai chu, Ka ngaidam ding a ni si"Ti hi LALPA thu suok a nih. 21 Merathaim ram chu bei unla, Pekod-a chênghai khom chu; Hnotin, thatin, rawt ram unla, Ka thupêk ang takin thaw ro"Ti hi LALPA thu suok a nih. 22 A ramah indona rî a so a, Sietna rì râpthlâk tak chu. 23 Leihnuoi tubo lien tak el, Babulon chu a koi dar a, A va hang se nasa de aw!Hnam tin lai Babulon chu, A va hang ram nasa ngei de! 24 Aw Babulon, ka châng kamah, I'n ring hma'n i awk chieng de!Hmu suok le man i ni tah, LALPA chu i khing leiin. 25 LALPA chun a lungsennaHriemhreihai la suok dingin, A râlthuom siena a hong a, LALPA Iengkim LALPAN chun, Kaldai ramah thaw ding a nei. 26 Kawl kil tina inthokin, Ama chu hung bei unla, A sum siekhawmna hong un la, Bu hûm angin deng vûm ro. Iengkim sukse vong unla, Hlà ieng khom nei dêr naw ro. 27 Ran thatna inah thuoiin, A bawngchal tuoi that vong ro. Hrema an um ni ding chu. A hun a hung tlung ta si a, An chung a va hang pik ngei! 28 A tempul suksetuhai laka, LALPA ei Pathien phuba làk dàn, Babulona inthoka tlân suok, Râltlân kìrhan Zion tlànga, An hril chu lo ngaithla ro. 29 Babulon beitu dingin, Thal kàp thiemhai ko khawm ro. Tlân suok um dèr lo dingin, A vêlin inhuol tlat ro. A thilthaw thungrul unla, A thaw angin thaw ve ro, Israel Mi Thienghlim, LALPA chu a khing ngam leiin. 30 Chuleiin, a tlangvalhai, Kotthlêra hai tlûng an ta, Ni khat thil thu ringotin, A sipaihai chimit an tih"Ti hi LALPA thu suok a nih. 31 Ngai rawh, aw nang mi chapo, Khingin ka do chê a nih; I ni ding chu a tlung tah, Hremna i tuor hun ding chu, Iengkim LALPA chun a tih. 32 Mi chapo inpal thlùng a ta, Tu khomin kei tho naw nih; A khuohai rawpêk ka ta, A vêla umhai po po leh, An rêngin kang hlum a tih. 33 Iengkim LALPA chun a hril:"Israelhai le Judahai chu, Suknomnatin an um a, Sala mantuhai po po chun, Nghet takin an chel tlat a, An insuo nuom hrim hrim nawh. 34 Sienkhom an Tlantu a hrât, A hming Iengkim LALPA a nih. Ama chun a kûl a tâia tanin, An ramah muongna intlun a ta, Babulona chênghai ruok chun, Muongna hrim hmu naw ni hai. 35 "Babulona chêng Kaldaihai, An mi lien le varhai chungah, Kawlhnâm inlèngtir ka tih"Tiin LALPA Pathienin a hril. 36 A zawlnei derhai chungah, Kawlhnâm inlèngtir ka ta, Mi invêt inchang an tih. A pasalthahai chungah, Kawlhnâm inlèngtir ka ta, Thlabârnain sip an tih. 37 A sakor le tawlailirhai, Hnam dang an sorhai chungah, Kawlhnâm inlèngtir ka ta, An rêngin thaiduop an tih. A ro sie khawlhai chungah, Kawlhnâm inlèngtir ka ta, A rosumhai rok an tih. 38 A tuikhurhai chunga khom, Kawlhnâm inlèngtir ka ta, A rêngin kang vong a tih, Milem pangzatum tamna, An invêtchilna ram a nih. 39 Thlalèr ram sakolhai leSatenê ruolin hluong an ta, Chingpirinuhai chêng an ta, Hluo ni ta ngai naw ni a, Suon a'nthok suon dang chenin, Tu khom chêng ta naw ni hai. 40 Sodom le Gomorra khuo leAn sèvela khuo po po, Sukram a ni vong ang khan, Tu khom um ta naw ni a, Tu khom chêng ta bok naw nih"Ti hi LALPA thu suok a nih. 41 En ta, hmar tienga inthokin, Sipai ruol an hung a ni saw!Hnuoi kil tawpa inthokin, Hnam ropui le lal tam takhai, An hung inthok a ni saw! 42 Phaw le feihai an chawi a, An rawng a, ngil an nei nawh. Tuipui so hum hum angin, Sakor chungah an hung chuong; Râl bei dinga insingsain, Aw nang Babulon naunu, An hung rûn ding che a nih. 43 Babulon lalin a hriet chun, A kuthai a zoi thla a, Lungngainain a man a, Nuhmei nau hase angin. 44 Jordan ngawa inthokaRan tlatna hmun hringa suokSakeibaknei ang elin, Babulona chênghai chu, Keiman hnot suok thut ka ta, A chunga thuneitu ding, Ka dit ang ang ruot ka tih. Keima ang tu'm an um a?Mi cho thei tu hrim am an um?A tù berampu hrimin am, An mi cho thei ding a na? 45 Babulon le Kaldai chunga, LALPA thaw tum hi ngai ro:Ran tehai chu kei hmang a ta, Ran tlatna hmun po po chuAnni leiin sukram a tih. 46 Babulon tlawm thu riva chun, Hnuoi nghor hnìng dur dur a ta, A tap ri chu hnam tin lai, A thangkhawk ding a ni si.

51

1 LALPA chun hieng hin a tih:Ngai ta, Babulon chunga leLeb Kamaie mihai chunga chun, Suksetu chu tir ka tih. 2 Babulon chu sêp fai ding leA ram sukse vong dingin, Ram dang mi hung tir ka tih. A siet ni a tlung pha chun, Sîr tinah inhuol an tih. 3 Thal kâptuin a thalngul, Kuoina hman nei naw ni a, Thîr zakuo hâk hman naw nih. A thalaihai hlà nei dêr naw la, A sipaihai rawt chimit rawh. 4 Kaldai ramah that teu an ta, Kotthlêrah inthal phung an tih. 5 Israel Mi Thienghlim hmaah, A ram chu suolin sip sien khom, Pathien, Iengkim LALPA chun, Israel le Judahai chu, A màksan tawl ngai si nawh. 6 "Babulon chu tlànsan ro, In hringna hum di'n tlân ro!A suolna thì phà naw ro. LALPA thungrul hun a na, A phû ang tak hmûng a tih. 7 Babulon chu LALPA kutaRangkachak no ang a na, Chu chun hnuoi pum a'n ruitir a; Hnamhan a uoiin an dawn a, An inhài hmuol vong a nih. 8 Babulon tlu dar thut a tih. Ama chu tà rak rak ro!A hung dam thei takduoiin, Thinghnài damdawiin zût ro. 9 "Babulon sukdam ka tum a, Sienkhom a dam thei si nawh; Chuleiin, mani ram sengah, Ama chu màksan ei tiu. A thiem nawna'n vàn a tong a, Vàn sânga sûm a hang tong. 10 'LALPA chun a mi'n thiem tah. LALPA ei Pathien thilthaw hi, Thaw ro, Zion-ah puong ei tiu. ' 11 Thalhai chu tât ngei unla, In phawhai chu chawi seng ro!Babulon suksetu dingin, Media lalhai lungril chu, LALPAN a chok tho a nih. LALPAN phuba lâng a tih, A tempul phuba ngei chu. 12 Babulon kul bang ep-a chun, In puonzâr chu khai unla, Vêngtu tam lem sie unla, Enthlatu sie bok unla, Lambun dingin inring ro!Babulon mihai chunga, LALPAN thaw a tumhai chu, A hung hlen suok ding a nih. 13 Nang tui tam tak laia chêng, Sum le pai hau êm êmtu, I tawpna chu a tlung tah, I nun hrui sat chat ni chu. 14 Iengkim LALPA chun maniInsâl meuin thu a'n khàm a:Khau hon anga tam mihriem, I lakah hung tir ka ta, Hlado insam khum an ti che. 15 A theinain hnuoi a siem a, A varnain khawvel a'n din a, A remhrietnain vàn a zar a. 16 A rawl a hung insuo pha, Vàna tui an ri dur dur a; Kawl kilah sûm a'n suoktir a, Ruo a sûr a, kawl a'n lep a, Thlî chu a bawma inthokin, A hung insuo hum hum a. 17 Mi tin chu an chawlol a, Hrietna hrim an nei naw a, Rangkachak sertuhai chu, An milem serin a sukzak a, An milemhai chu thuok nei lo, Inhlèmna thil mei mei an nih. 18 Tlâktlaina an nei naw a, Mi nuizatbùr vong an na, An chungthu rèl a ni pha, An la bohmang ding a nih. 19 Jakob Chanvo ve ruok chu, Chuong ang chu a ni ve nawh. Thil iengkim Siemtu a nih, A rohluotu hnam chenin; A hming chu Iengkim LALPA. 20 Râldonaa ka hembawk, Ka hriemhrei chu nang i nih:Hnamhai le lalramhai chu, Nangma hmangin ka sukdar a, 21 Sakor le a chung chuonghai, Tawlailir le a khaltuhai chu, Nangma hmangin ka phìn dar. 22 A nuhmei a pasalin, Putar le tleirawlhai dâm, Nunghàk le tlangvàlhai dâm, Nang le chu ka ngam vong a, 23 Berampu le ran ruolhai, Loneitu le bawngchalhai, Ram optu le thoktuhai, Nang le chu ka thuhnè vong. 24 "Babulon le Kaldai mihaiin, I mithmu ngeia Zion chungaThil tha lo an thaw po po chuKa thungrul ngei ding a nih, "Ti hi LALPA thu suok a nih. 25 "Aw nang suksetu tlâng lien, Khawvel po po suksetu, Ka khing che a nih" ti hiLALPA thu suok chu a nih. "I chungah kut thlâk ka ta, Rawlah inhlum ka ti che a, Tlâng kâng hawpah siem ka ti che. 26 In kila a lungphum dingin, I lung làk ni ngai naw ni a, Inthuta rem ding khomin, I lung la ngai naw ni a, Kumkhuon rausan nîng i tih"Ti hi LALPA thu suok a nih. 27 "A ramah puonzâr khâi la, Hnamhai lai tawtawrawt mûtin, Ama do ding hnamhai buotsai la, Ararat le Minni le AskenazRamhai hi inpung khawm la, An kawmandar ding ruot la, Khau hon anga tam sakor, Anni bei dingin tir rawh. 28 A do ding hnamhai buotsai la, Media lalhai, ram optuhai, Thoktuhai le an ram ophai leh. 29 Ram chu na tuorin a'n thin a, Babulon sukram dèr a, Hluotu nei ta loa siem chu, LALPA tum tlat chu a nih. 30 Babulon râlhrâthai chun, An râldo lai chu an bàng a, Kulpui sûngah an intom a, An pachangna a hung re a, Thaiduopah an inchang zo a; An inhai a kàng dur dur a, Kotpui kalnahai a tliek a. 31 Khawpui po po an lâk thu, Babulon lal hril dingin, Zuolko an tlàn zûr zut a, Tirhai chu an insùlpel zut zut. 32 Vadung kâihai an làk a, Phairuong bil chu an raw a, Sipaihai an zàm zo tah. 33 Iengkim LALPA, Israel Pathienin hieng hin a tih:"Babulon naunu chan chun, Hrìzawla bu chìl lai a ang!Bu anga an chìl hrep hun chu, A hung tlung ding a ni si a. 34 "Babulon lal Nebukadnezzarin, A mi lem zo vong tawl a, Phìn darin a mi sukchi-ai a, Bêl angin a mi bun suok a, Rûlpui angin a mi dol a, Inhnik a tizawng po poin, A phingpui a sukkhop a, Chu zoah a mi luok suok a. 35 Zion tlànga chênghai chun, 'Kan chunga a thaw angin, Babulon chungah tlung sien, Soisakna tuor ve raw se' ti sien, Jerusalema chênghai khomin, 'Kan thisen maw po po chu, A chungah tla vong raw se" ti sien. 36 Chuleiin, LALPAN hi hi a hril:"Ngai ta, nangma tan ka ti che a, I phuba khom lapêk ka ti che; A tuipui sukkang vong ka ta, A tuikhur khom sukkang ka tih. 37 Babulon chu tlu ram a ta, Sihalhai tuol lèngna hmun, Mi makti le inchek khum, Tu chêng nawna hmun nìng a tih. 38 Sakeibaknei vàng lai angin, A mihai an inhùk dum dum a, Sakeibaknei tehruoi angin, Mi an inngur khum hlak a. 39 An inrawp zuol lai takin, An ruoi ding buotsai ka ta, Khuo hre loin hrâi rui ka ta, Hlimin innui khêk an ta, Chu zoah tho ta lo dingin, Kumkhuoin in tâng an tih"Ti hi LALPA thu suok a nih. 40 "That ding beramte angin, Beramchal le kelchal angin, Anni chu thuoi hmang ka tih. " 41 Khawvel uongpui Sesakf chu, An la man ruou ding a na, Babulon chu hnam tin lai, Mi pangzat hung kai a tih. 42 Babulon chungah tui lien a ta, Tui fawn sàngin chim pil a tih. 43 A khawpuihai chu rausan khuo, Thlalêr ram tawl, mi chêng nawna, Khuolzin tu khom sir lona hmun, Hung inchang vong tâng a tih. 44 Babulona Bel chu hrem ka ta, A lo dol tah po po khom, Inluok suoktir nawk ka tih. Hnamhan hung bèl ta naw ni a, Babulon kul bang chu chim a tih. 45 "Ka mihai, hung suoksan ro!Hringna hum di'n tlân suok ro!LALPA lungsenna tium lakah, Insanhim di'n tlân suok ro. 46 Thuthang a hung inlèng pha, Zâm naw unla, ti bok naw ro. Tu kum thuthang lo hrieng in ta, Kum nawk thuthang hre bok in tih, Ram sûngah inpawngnêkna thu leLal le lal insuol rì a'n thang. 47 Babulona an milemhai, Ka hrem ni la tlung ngei a ta, A ram pumin muolpho a ta, Mi ka sukhlumhai po po chu, A bulah tlu phung an tih. 48 Hmar tieng panga inthokin, Suksetuhan hung rûn an ta, Hnuoi le vàn le a sûnga mihan, Babulon siet tuok lawm an tih"Ti hi LALPA thu suok a nih. 49 Israelhai a that teuh leiin, Babulon chu tlu ngei a tih, Khawvel puma mi tam tak, Thìna intluntu a ni si a. 50 Nangni kawlhnâm pumpeltuhai, Muongchàng loin tlân suok ro!Ram hla taka inthok khomin, LALPA chu hre zing unla, Jerusalem theinghil naw ro. 51 "LALPA in, hmun thienghlimah, Ram dang mi an lût leiin, Kan muolphona chunga chun, Inzakin kan hmài a mawk. " 52 "Sienkhom a ram pumpuia, An milemhai ka hrem ni chu, A la hung tlung ding a na, Hliem tuorin inrûm an tih, "Ti hi LALPA thu suok a nih. 53 Babulon chun vàn tongin, A kulhai suknghet sien khom, Suksetu ding hung tir ka tih"Ti hi LALPA thu suok a nih. Babulon siet ding thu 54 Babulona inthoka tap ri, Kaldai ramin sietna râpthlàk, A tuok ri chu ngaithla ro. 55 LALPAN Babulon sukmit a ta, A vaupùm ri na tak chu, A hung hmet dei ding a nih. Tuipui fawn insok angin, Hmêlma lungsen sosâng a ta, An ri chu thangkhawk a tih. 56 Suksetu chun Babulon, A hung bei ngei ding a na, Pasalthahai man a ta, An thlàhai suktliek a tih. LALPA, Thungrultu Pathienin, La thungrul ngèi ngèi a tih. 57 A hotuhai le a mi varhai, Optuhai le thangpuituhai, An pasalthahai khom chu, An rêngin hrâi rui ka ta, In song an ta, har ta naw ni hai"Tiin Laltak chun a hril a, A hming Iengkim LALPA a nih. 58 "Babulon kul sà tak chu, A la tlu hmât ding a na, A kotkhàr insânghai khom, A la kàng hmang ding a nih; Hmang loin mipuihai chu, An insuksawl mei mei a, An hnam sininrimna chu, Meia ti ding chauh a nih"Iengkim LALPA chun a tih. 59 Hi hi Juda lal Zedekia inlala inthoka kum linaa Babulon tienga Zedekia le fe ve Seraia kuoma zawlnei Jeremia-in thucha a pèk chu a nih. Seraia chu lal in enkoltu lû tak a na, a pa chu Maseia naupa Neria a nih. 60 Jeremia chun Babulon chunga sietna hung tlung ding po po chu inchikin lekha zielah a ziek thlâk vong a. 61 Ama chun Seraia kuomah, "Babulon i tlung pha leh hieng thuhai po po hi tiem ngei la, 62 'Aw LALPA, hi hmun hi kumkhuoa mi le sa chêng ta lona dinga i sukram ding thu chu i lo hril tah hi' ti rawh. 63 Chun, hi lekha ziel hi i tiem zo pha lungtum leh khit de la, Eufretis vadungah pei la, 64 'Babulon chu hieng ang hin a mi chênghai leh la pil a ta, a chunga sietna ka hung intlun ding lei chun tho nawk ta ngai naw nih' tiin i hril ding a nih" a ta. Hi po hi Jeremia thu chu a nih.

52

1 Zedekia a hung inlal chun kum sawmhni le kum khat mi a na, Jerusalemah kum sawm le kum khat a'n lal a. A nu hming chu Hamutal a na, Libna khuoa Jeremia naunu a nih. 2 Ama chun Jehoiakim thaw ang bokin thil suol a thaw a. 3 LALPA lung a sen êm leiin hieng thilhai hi Jerusalem leh Judai ramah a hung tlung a, a tawpah a mithmua inthokin a pei suok a. Zedekia chu Babulon lal chunga chun a hung hel tah a nih. 4 Zedekia inlal kum kuona thla sawmna le ni sawmag chun Babulon lal Nebukadnezzar le a sipai ruol po po chu Jerusalem do dingin an hung inthok a, riebûk an khuor a, a vêlin kulin an inhuol khum a. 5 Lal Zedekia inlal kum sawmpakhatna chenin khawpui chu inhuolin an chàrchil a. 6 A kum sawmpakhatna thla lina ni kuonah chun khawpui chu an hung tàm ta hle a, mipuiin fàk ding ieng khom an nei ta nawh. 7 Chuongchun, khawpui kul bang chu an sut hong a, sipaihai po po chu an tlàn suok a. Babulon mihai chun khuo chu inhuol vêl vong hai sienkhom, lal huon bang pahni inkàra lampuia chun zànah an inrel suok a, Araba lampuia chun an fe a. 8 Amiruokchu, Babulon sipaihai chun Zedekia chu an hnot zui a, Jeriko phaizawlah an zu nang a. A sipaihai chu an tlàn dar vong a, 9 ama chu an man a, Hamat rama Ribla khuoa chun Babulon lal kuomah an thuoi a, ama chun a chungthu chu a rèl a. 10 Babulon lal chun Zedekia naupa chu a mithmu ngeiah a that a, Riblaa chun Juda mi lienhai po po khom a that bok a. 11 Chu zoah Zedekia mit chu a khel dokpèk a, dâr kol a'n buntir a, Babulon tieng a thuoi a, chu taka chun a thi chenin lung inah a sie a. 12 Babulon lal Nebukadnezzar inlala inthoka kum sawm le kum kuona, thla ngana ni sawmi chun lal vêngtu pawl kawmandar, Babulon lal hmaa ngîr hlak, Nebuzaradan chu Jerusalemah a lût a. 13 LALPA tempul le lal in le Jerusalema in po po chu a raw a; Jerusalema in poimaw taphot chu hlà a nei nawh. 14 Babulon lal vêngtu pawl sipai kawmandar hnuoia sipaihai chun Jerusalem kul bang chu an sukchim vong a. 15 Vêngtu pawl kawmandar Nebuzaradan chun mipuihai laia mi rethei tak tak, khawpuia an màksanhai, a hmaa Babulon lal kuoma lo inpe tahai le themthiem la um sunhai chu salah a thuoi vong a. 16 Sienkhom, a rama mi rethei mongtol thenkhat ruok chu grèp huon enkoltu ding le loa sinthaw dingin Nebuzaradan chun a màksan a. 17 LALPA tempula dâr banhai le dâr tuizèng inthutnahai chu a vuok chim a, a dârhai chu Babulon tieng a hawn vong a. 18 Tempula an hmang bûr le bèlhai, vutluohai, khawnvar phita chep ruolnahai, maihùnhai, thlèng le dâr hmangruo po po, tempula rongbawlnaa an hmang hlakhai chu a lâk vong a. 19 Chun, màihùn hai, mei lâkna berbu hai, thil thèna maihunte hai, bêl hai, khawnvar siena hai, dawn ding inhlàn chànga hmang hlak thlèng le thlèngkûm, rangkachak le tangruoa siem po po chu kawmandar chun a lâk vong a. 20 Dâr ban pahnihai le dâr tuizèng le a thut, son thei le dâra siem bawngchal lim sawmpahni, Solomonin LALPA tempula dinga a'n siemtir rikzie chu bûk zo ruol a ni nawh. 21 Ban pakhat insàngzie chu meter riet, a lienzie meter nga le centimeter li vel tuok a na, a sa zawng chu centimeter riet a na, a lai chu a kawrong a. 22 A ban hmawra dâr lu bawk chu meter khat le centimeter thuma insâng a na, a lu bawk vel tuoka chun dâra mawi taka siem theibufai lim a'n tlar suok a, dâr ban pakhat dang, chuong ang boka theibufai lim chuongna chu, inang chara siema nih. 23 Chun, a panga chun theibufai lim sawmkuo paruk a um a, a vêla cheimawina theibufai lim um zàt chu zakhat a nih. 24 Kawmandar Nebuzaradan chun thiempu lal Seraia le a dota mi thiempu Zefania le kotkhàr vêngtu pathumhai chu a man a. 25 Khawpuia la um sipai hotu hai, lal khawnbawl mi pasari, a rama sipai latu lu tak le a mihai sawmruk, khawpuia la umhai chu a thuoi tawl bok a. 26 Kawmandar Nebuzaradan chun anni chu Riblaa um Babulon lal kuoma chun a thuoi a. 27 Hamat ram Riblaa chun Babulon lal chun anni chu a'n thattir a. Chuongchun, Juda hnam chu an rama inthokin sala thuoiin an um ta a. 28 Nebukadnezzarin sala a thuoihai chu: a kum sarinaahj Juda mi sângthum le sawmhni le pathum an na; 29 Nebukadnezzar kum sawm le kum riet a'n lal kumah, k Jerusalem mi zariet le sawmthum le pahnih an na; 30 kum sawmhni le kum thum a'n lal kuml a lal vêngtu pawl kawmandar Nebuzaradan-in a hung thuoi po Juda mi zasari le sawmli le panga an na, an rêngin sângli le zaruk an nih. 31 Sala Juda lal Jehoiachin kum sawmthum le kum sari a'n tàng kum, Babulon lal Evil-Merodakm inlala inthoka kum khatnaa chun Juda lal Jehoiachin chu saltàngnaa inthokin Babulon lal chun a'n suo ta a. 32 Jehoiachin chu hoihawm takin a biek a, a kuoma um ve lal danghai nêka insâng lemah a sie a. 33 Chuongchun a saltàngna zakuo chu hlîpin, a dam sûng hun po lal dawkanah fain a dawn ve ta a. 34 A thi chena ama inphuhrukna dingin Babulon lal chun Jehoiachin chu sum le pai a pêk thlar bok a nih.