1

1 LALPA siehlaw Mosie thi hnungin, LALPA chun Mosie kaiza vêngtu Nuna naupa Josua kuomah, 2 "Ka siehlaw Mosie chu a thi ta a. Tuhin Israel mi po po hi ka pêk ding rama fe dingin inpuocha hai sien, Jordan vadung kânpui rawh. 3 Mosie kuoma ka hril tah ang khan, kea in sirna taphot chu pe vong ka ti chêu. 4 In ram chu Lebanon thlalera inthoka vadungpui Eufretis chena Hit mihai ram po po le thlang tieng Tuipui Liena chen nìng a tih. 5 I dam sûng tu khomin hne thei nawng an ti che. Mosie kuoma ka um ang khan i kuoma khom um ka ta, thlathlam ngai nawng ka ti che a, zàmsan ngai bok nawng ka ti che. 6 Hrât tak le huoisen takin hma tawn la, in pi le puhai kuoma inkhâm meua pêk ka tiem rama chun hieng mihai hi thuoi lût la, inhluotir rawh. 7 Hrât tak le huoisen takin hma la rawh. In fena taphotah in dingchang theina dingin ka siehlaw Mosie pêk chêu dàn po po kha fîmkhur takin zawm unla, chang tieng amanih voi tieng amanih pêtsan naw ro. 8 Hi Dàn Bu hi tiem zing hlak la, zieka um iengkim chu fîmkhur taka i zawm theina dingin a sûn a zânin dawnkhawl hlak rawh. Chuongchun, kong iengkimah hmuingilin hung hlawtling i tih. 9 Hrât tak le huoisen taka um dinga ka ti che kha hre zing la, thlabâr naw la, zâm bok naw rawh, kei LALPA hin i fèna taphotah umpui zing ka ti che" a ta. 10 Chuongchun, Josua chun Israel mipui thuoituhai chu thu a pêk a, 11 "Riebûk fang unla, mipuihai kuomah, 'In rawsot chawi ding inpei ro, tuta inthoka ni thumnaah hi taka inthok hin Jordan vadung kân ei ta, LALPA in Pathienin in ta dinga a pêk chêu ram chu lûtin ei va hluo ding a nih' tiin hril ro" a ta. 12 Reuben hnam hai, Gad hnam hai le Manase hnam zâtve hai kuoma ruok chu Josua chun, 13 "LALPA Pathienin nangni chêngna dinga Jordan vadung sak tieng ram a pêk chêu thu LALPA siehlaw Mosien a hril chêu kha hre zing ro. 14 Nunau le ran ruolhai chu Jordan vadung sak tienga Mosien ram a pêk cheua hin lo um an ta, nangni laia râl do thei chinhai ruok chu inrâlthuomin, in unauhai hmaah Jordan vadung hi in lo kai hmasa ding a nih. 15 Nangni ang boka anni khom LALPAN chawlna hmun pe a, LALPA in Pathienin a pêk ram an hluo ve hma khat chun in unauhai chu in thangpui ding a nih. Chu zoa chun LALPA siehlaw Mosie pêk chêu Jordan vadung râl sak tieng, nisa suokna tieng chun hung kîr nawk in ta, in la hluo ding a nih" tiin a hril a. 16 Anni chun Josua kuomah, "Thu i mi pêk taphot chu thaw pei kan ta, fe dinga i mi tirna taphota khom fe pei kan tih. 17 Kong iengkima Mosie thu kan zawm pei hlak ang khan, i thu khom zawm pei kan tih. LALPA i Pathien chu Mosie kuoma a um hlak ang khan i kuoma khom um ve phot el raw se. 18 Tu khom i thu kal a, i hril ieng khom zawm nuom lo chu sukhlumin um a tih. Hrât tak le huoisen takin hma la sau sauh rawh" tiin an hril a.

2

1 Nuna naupa Josua chun, "Fe unla, a ram va thlithlai ro, abîkin Jeriko khuo saw" tiin a rûkin Sitima inthokin enthlatu mi pahnih a tir a. Chuongchun, an fe a, nawchizor pakhat, a hming Rahab inah an lût a, chu taka chun an tlung a. 2 Miin, "Ngai ta, voizân khan a ram enthla dingin Israel thlahai an hung a nih" tiin Jeriko lal chu an hril a. 3 Jeriko lal chun Rahab kuomah mi a tir a, "I ina hung tlung mikhuolhai kha hung thuoi rawh, a ram pumpui enthla dinga hung an nih" tiin thu a'n cha a. 4 Nuhmei chun mi pahnihai chu a thuoi a, a thup a. Lal mi tirhai kuoma chun, "A ni ngei, an hung annawm, ana chu khaw laia inthoka hung am an nih ti ka hriet nawh. 5 Thimbut, khaw kul kotkhâr an khâr hun lai vel khan mihai chu an suok nawk a, khaw tieng am an pan ti ka hriet naw a, hnot vat inla chu in la hnot phâk el thei" a ta. 6 Amiruokchu, anni chu in chungah a thuoi a, zìza kuong a buk khawmna hnuoia chun a thup a. 7 Jordan vadung kai chena hnot dinga a khaw mihai an suok charin kul kotkhâr chu an khàr a. 8 Enthlatuhai chu an zàl hmain in chunga chun an kuomah a hang fe a. 9 Chuong mihai kuoma chun, "Hi ram hi LALPAN a pêk ta chêu ti ka hriet a, nangni tînain a mi man tawl a, hi rama chênghai hi nangni tiin kan intui zop el a nih. 10 Aigupta rama inthoka in hung suoka in ta dinga LALPAN Tuipui Sen a sukkangpêk dàn chêu le Jordan suo tienga Amorhai lal pahnih, Sihon le Oga hai in sukbohmang dàn hai kha kan lo hriet vong a. 11 In chanchin kan lo hrietin kan lungril a'n tui zop a, nangni leia lungril zâm naw hrim hrim an um nawh: LALPA in Pathien chu chung tieng vâna le hnuoi tieng leihnuoia Pathien a ni si a. 12 Chuleiin, in chunga lunginsietna ka'n entir chêu ang bok hin nangni khomin ka sûngkuohai chungah lunginsietna inentir ve unla, 13 ka nu le ka pahai, ka tâhai le ka zuorpuihai le an thil nei taphothai chu hla a, kan hringna hi mi humpêk dingin LALPA hming sâlin lunginsiet takin ka kuomah inkhâm unla, inchikna chieng tak mi màksanpèk ro" a ta. 14 Mihai chun a kuomah, "Kan thilthaw hi i hril suok naw phot chun in thi aiin thîng kan ta, LALPAN ram hi a mi pêk pha khom lunginsiet kan ti che a, i chungah ringum takin thawng kan tih" an ta. 15 Chuongchun, a in chu khawpui inhuonna kul chunga um a ni leiin, anni chu tukvera inthokin hruihruolin a thlâk thla a. 16 An kuoma chun, "A hnottuhai chêu khan an hmu pal hlauh nawna ding cheuin tlâng tieng pan unla, chu taka chun ni thum vel, an hung kîr nawk hma po chu, inbi hmang unla, chu hnung chun in kìr nawk ding a nih" tiin thu a'n cha a. 17 Mihai chun a kuomah, "Inkhâma thu i mi'n tiemtir ringot hin chu mi khuop el thei naw nih. 18 Hi rama kan hung lût pha leh, i mi khai thlâkna tukvera hin hi pat sen hi lo khai la, i nu le pahai, i tahai le zuorpuihai le i sûngkuohai po po khom hi ina hin i lo thuoi lût vong ngai a tih. 19 Tu khom, hi ina inthoka tuola suok thisen maw chu kan chungah tla thei naw nih. Nang le hi ina i kuoma umhai laka ruok chu tu khomin kut an thlâk chun a thisen maw chu keinin phur kan tih. 20 Chun, kan thilthaw hi i hril suok vai chun inkhâma thu kan intiemnaa hin maw kan phur thei bok nawh" an ta. 21 Ama chun, "In thu ang peiin ni raw se" a ta. Chuongchun, anni chu a'n fètir a, an suok a, tukvera chun puon sen chu a khit de a. 22 Anni chu an fe a, tlâng chu an va tlung a, chu taka chun ni thum sûng, anni hnottuhai an kîr nawk hma po chu, an inbi a; anni hnottuhai chun lampui intluonin an zong an zong a, sienkhom an hmu zo si nawh. 23 Chu zoah mi pahnihai chu tlânga inthok chun an kîr thla a, Jordan vadung an kàn a, Nuna naupa Josua kuom an tlung a, an chunga thil tlung po po chu an hril vong a. 24 Josua kuoma chun, "LALPAN ram chu ei kutah a lo pêk takzet el; eini leiin a ram mipuihai chu thlabârin an intui zop el a nih" an ta.

3

1 Zîngkàr inhma takin Josua le Israel thlahai po po chu Sitim-a inthokin an inthok suok a, Jordan vadung an tlung a, an kàn hmain chu taka chun an riek a. 2 Ni thum hnunga chun hotuhaiin riebûk chu an fang vel a, 3 "Thiempu Levi thlahaiin LALPA in Pathien Thuthlung Bawm zawna an suok in hmu pha leh in umnaa inthoka insonin anni chu in zui ding a nih. 4 Hi lampui hi a hmain in la hraw ngai naw leiin anni chun lampui kawkhmung an ti chêu. Amiruokchu, nangni le Thuthlung Bawm inkârah kilometer khat vel a um ding a nih; in va hnai taluo ding a ni nawh" tiin an hril a. 5 Josua chun mipui kuomah, "Insukthienghlim ro, zînga hin eini lai thil mak tak el LALPAN a thaw ding a nih" a ta. 6 Chun, thiempuhai kuoma chun, "Thuthlung Bawm chu zawn unla, mipui hmaah fe ro" a ti bok a. Chuongchun, bawm chu an zawn a, mipui hma an thuoi a. 7 LALPA chun Josua kuomah, "Mosie kuoma ka um hlak ang khan i kuoma khom ka um ding a nih ti an hriet theina dingin voisun hin Israel mi po po mithmua ngei ka chawimawi tan ding che a nih. 8 Thuthlung Bawm zawntu thiempuhai chu Jordan vadung kamah tui chu pala ngîr dingin hril rawh" a ta. 9 Josua chun Israelhai kuomah, "Hi taka hin hung unla, LALPA in Pathien thuhai chu hung ngaithla ro. 10 Nangni lai Pathien hring chu a um zing a, in hmaah Kanan mihai, Hit mihai, Hiv mihai, Periz mihai, Girgas hai, Amor hai le Jebu hai chu matheiloin a hnot suok ding a nih ti hi thila inthok hin hre thei in tih. 11 Ngai ta u, khawvel po po LALPA Thuthlung Bawm chun in hma thuoiin hi Jordan vadung hi a kân hmasa ding a nih. 12 Tuhin, Israel hnam tina mi sawm le pahni thlang suok ro. 13 LALPA, khawvel po po LALPA thuthlung bawm zawntu thiempuhaiin Jordan vadung tui an pal tan charin Jordan vadung luong chu inchat a ta, a hnar tienga inthoka tui hung luong po po chu vùm thûra intiengin ngîr a tih" a ta. 14 Chun, Jordan vadung kân dinga puon ina inthoka mipui an suok chun Thuthlung Bawm zawntu thiempuhai chu mipui hmaa chun an fe a. 15 Hi hun hi busîk hun, Jordan vadung kuong a liem zur zur hun lai a nih. Bawm zawntuhai chun Jordan vadung chu an tlung a, bawm zawntu thiempuhai kein vakama tui a tawk charin, 16 a hnar tienga inthoka tui hung luong chu a tawp a, hla fea Zarethan sevela um khuo pakhat Adam an ti hmuna chun tumbu ang elin tui chu an tieng thûr a, Tuipui Thi tienga luong thla ding chu a kangchat a, Jeriko khaw zawn taka chun mipui chun vadung chu an kai a. 17 Hnuoi chàra Israel mipuiin vadung an kân vong chenin, LALPA Thuthlung Bawm zawntu thiempuhai chu Jordan vadung lailunga chun an ngîr a.

4

1 A hnam pumpuiin Jordan an kàn hnung chun LALPAN Josua kuomah, 2 "Mipuihai laia inthokin mi sawmpahni, hnam tina inthokin mi pakhat pei, thlang suok la, 3 thiempuhai ngîrna Jordan vadung lailung taka inthokin lung sawmpahni la hai sien, chu chu hung put hai sien, voizàna in riekna ding hmunah i kuomah hung sie raw hai se" tiin thu a pêk a. 4 Chuongchun, Josua chun Israel thlahai laia mi sawm le pahni, hnam tina inthoka a thlanghai chu a ko a. 5 Josua chun an kuomah, "LALPA in Pathien bawm hmaah fein Jordan vadung lailunga lung, Israel pahnam zât, lung pakhat seng put suok ro. 6 Tuta hnunga in nauhaiin, 'Hieng lunghai hi ieng tina am a na?' tia an la hung indon pha chêu leh in ta dinga inchikna tha tak la nîng a tih. 7 Chu pha chun in nauhai kuomah, 'LALPA Thuthlung Bawm hmaah Jordan tui a kang chat lei a nih; Jordan an kàn laiin tui chu a hung kang chat annawm. Hieng lunghai hi Israel thlahaiin chu thil chu kumkhuoa an hriet zingna dinga an bùm a nih' tiin in la hril ding a nih" a ta. 8 Josua hril ang chun Israel thlahai chun an thaw a, vadung lài taka inthok chun Israel pahnam zât lung sawm le pahni chu an put suok a, an riekna hmuna chun an sie a. 9 Chun, Thuthlung Bawm zawntu thiempuhai ngîrna lài tak, Jordan vadung lailunga chun Josuan lung sawm le pahni a phun a, chuonghai chu tu chen hin a la um zing. 10 Mosien Josua a hril ang le LALPAN thaw dinga thu Josua a pêk po po anga mipuiin iengkim an thaw zo vong chenin, bawm zawntu thiempuhai chu Jordan vadung lailunga chun an ngîr a, mipui chu inhmaw takin Jordan vadung chu an kai ta vong a. 11 An kai vong hnung chun LALPA bawm le a zawntu thiempuhai khom mipuihai mithmuah an kai ve ta a. 12 Reuben thla hai, Gad thla hai le Manase hnam laia a zâtve hai chun râlthuom chawiin, Mosien an kuoma a lo hril tah ang khan, mipui hmaah an lo kài a. 13 Indo dinga inrâlthuom ngot mi sîngli laiin indo dingin Jeriko phai chu LALPA hmaah an tlung a. 14 Chu ni chun Israel thlahai po po mithmuah LALPAN Josua chu a chawimawi a; Mosie ang bokin a dam sûng inzain an ngaisâng a. 15 Chun, LALPAN Josua kuomah, 16 "Thuthlung Bawm zawntu thiempuhai kha Jordan vadunga inthoka hung suok dingin thu pe rawh" a ta. 17 Josua chun, "Jordan vadunga inthok khan hung suok ta ro leh" tiin thiempuhai chu thu a pêk a. 18 LALPA Thuthlung Bawm chu zawnin thiempuhai chu vadunga inthokin an hung suok a, an suok charin Jordan vadung tui chu a pangngaiin a kuong liem zur zurin a hung luong nawk a. 19 Thla khatna ni sawma chun Jordan vadunga inthokin an suok a, Jeriko sak tieng Gilgal-ah umhmun an khuor a. 20 Jordan vadunga inthoka an hung put lung sawm le pahni chu Gilgala chun Josua-in a phun a. 21 Israel thlahai kuoma chun, "Nakie hunah in thlahaiin an pahai kuomah, 'Hieng lunghai hi ieng tina am a na?' tia an la hung indon pha chêu chun, 22 'Israel thlahaiin Jordan vadung hi hnuoi chârah an fe kài lei a nih' tiin in la hril ding a nih. 23 LALPA in Pathien chun Tuipui Sen kan kàn hma khata kan hmaa a lo sukkangchat ang khan Jordan vadung khom hi in kai hma khat chu in hmaah LALPA in Pathien chun a sukkangchat a nih. 24 Hnuoia hnam po poin LALPA kut hrâtzie an hriet theina ding le LALPA in Pathien chu in ti zing theina dingin hieng hi a thaw a nih" a ta.

5

1 Israel thlahaiin Jordan vadung an kàn zo hma poa LALPAN Jordan vadung tui a dangchat ti thu Jordan vadung thlang tienga um Amor lalhai po po le tuifinriet kama um Kanan lalhai po poin an hriet chun an lungril a tui zop a, Israelhai hang do ngamna lungril put hrim hrim an um ta nawh. 2 Chuong lai chun LALPAN Josua kuomah, "Lungthìrin chemte siem la, Israel thlahai chu a tum hninaa dingin an ser vun tanpêk nawk rawh" a ta. 3 Chuongchun, Josua chun lungin chemte a siem a, Gibeat Haralot-ahb Israel thlahai ser chu a tanpêk a. 4 Ser a tanpêkna san chu hi hi a nih: Aiguptaa inthoka hung suok, râl do thei chin po po chu Aigupta an suoksan hnung khan thlalèr lamlakah an thi zo deu vong tah a. 5 Aigupta rama inthoka hung suok po po kha chu sertan sa vong an na; amiruokchu, Aigupta an suoksan hnunga thlalèr lamlaka pieng po po ruok chu sertan lo vong an nih. 6 LALPA rawl an ngaithlak nuom naw leia Aiguptaa inthoka suok râl do thei chin sukbohmanga an um vong chen khan, Israel thlahai chu thlalerah kum sawmli top an invâk an invâk a. Inkhâm meua an thlatuhai kuoma a lo tiem tah nenetui le khuoizu luongna ram chu an hmu ve LALPAN a phal si nawh. 7 Chuongchun, an thlahai, anni aiaw dinga a'n dinhai chu lamlaka chun ser tan lo an la ni zing leiin chuonghai ser chu Josua in a tanpêk a nih. 8 Mi po poin ser an tan hnung chun, an dam hma khat an riebûk pangngaia chun an châm zing a. 9 LALPA chun Josua kuomah, "Voisun hin Aiguptahai hmusitna chêu hi nangnia inthokin ka lâk hmang tah a nih" a ta, chuleiin, chu hmun chu voisun chen hin Gilgal tia ko a la ni zing. 10 Chu thla ni sawm le palina zân tieng chun Jeriko phai Gilgala an umna hmuna chun Israel thlahaiin Fekân Kùt an hmang a. 11 Fekân Kût tumtiek tuk là lá chun a ram tharsuok ngei bu, chol thang lo bei le beipèr an fâk tan a. 12 A ram suok bu an fâk tûka inthok chun manna a tla ta naw a, Israel thlahai chun manna an dong ta ngai bok nawh. Chu kuma inthok chun Kanan ram bu le bâl chu an ring ta lem a nih. 13 Josua chu Jeriko khaw bula a um laiin a hang ngha a, ngai ta, a hmaa chun mi pakhat, kawlhnâm phawi saa ngîr a hmu a. Josua chun a pan hnai a, a kuomah, "Keini tienga thang i ni, kan hmèlmahai tienga thang lem?" tiin a'n don a. 14 Ama chun, "Ni lo e, LALPA sipaihai hotua hung ka nih" a ta. Josua chun hnuoiah bokkhupin chibai a bûk a, a kuomah, "Ka lalpan a siehlaw kuoma hin ieng am hril ding a nei a na?" a ta. 15 LALPA sipaihai hotu chun Josua kuomah, "I kea inthokin i pheikhok kha hlîp rawh; i ngîrna kha hmun thienghlim a nih" a ta. Chuongchun, Josua chun a hlîp a.

6

1 Israelhai leiin Jeriko khuo chu an khâr tlat a, tu khom a lût le suok an um nawh. 2 Chun, LALPAN Josua kuomah, "En ta, Jeriko khuo le an lal le an râl do mihai hi i kutah ka pêk tah. 3 A khuo hi râl kâp mi po po leh voi khat hêl suok phot rawh. Chuong ang chun ni ruk sûng i thaw ding a nih. 4 Thuthlung Bawm hmaah beramchal ki tawtawrawt chawi thiempu pasari infetir rawh. A ni sarina chun thiempuhaiin tawtawrawt mût an ta, khawpui chu voi sari in hêl suok ding a nih. 5 Thuok seia tawtawrawt an mùt ruoi ruoi ri in hriet pha leh mipuihai chu inkhêktir dur dur la, khawpui kul chu chim thla rup a ta, mipui chu mani hma zawn sengah an kai tung ding a nih" a ta. 6 Chuongchun, Nuna naupa Josua chun thiempuhai chu a ko a, an kuomah "LALPA Thuthlung Bawm kha zawn unla, a hmaah tawtawrawt chawi thiempu pasari fe raw hai se" a ta. 7 Mipuihai kuoma chun, "Hma tieng pan peiin khawpui chu hêl suok ro. Râlthuom chawihai kha LALPA Bawm hmaah a hmatawngah fe raw hai se" tiin thu a pêk a. 8 Mipuihai kuoma Josuan thu a hril zo chun LALPA hmaa beram ki tawtawrawt pasari chawi thiempuhai chun an tawtawrawt chawi chu mûtin an inthok suok a, LALPA Thuthlung Bawm zawntuhai chun an zui a. 9 Tawtawrawt mût thiempuhai hmaa chun râlthuom chawi pawl chun hma an thuoi a, vêngtuhai chun hnung dalin Bawm chu an som a. 10 Chun, Josua chun mipuihai kuomah, "Khêk naw unla, in rawl khom suksâng naw ro. Khêk ro ka ti pha le chauh in khêk ding a nih" a ta. 11 Chuongchun, LALPA Thuthlung Bawm chun khawpui voi khat a'n hèl suoktir a, chu zo chun mipuihai chu an riebûk tieng an kìr a, chu taka chun an riek a. 12 Zîngkàr inhma takin Josua chu a tho a, thiempuhai chun LALPA Thuthlung Bawm chu an zawn a. 13 Chun, tawtawrawt pasari chawi thiempu pasarihai chun tawtawrawt mûtin LALPA Bawm hmaah an fe a, a hmatawngah râlthuom chawi râl do mihai chu an thang a, a hnungdâltuhai chun Bawm chu an som a, thiempuhai chun fe malamin tawtawrawt an mût zing a. 14 A ni hnina khom chun khawpui chu voi khat an hêl suok a, riebûka chun an hung kîr nawk a; chuong ang ngot chun ni ruk sûng an thaw a. 15 A ni sari ni chun vartienah an tho a, a hmaa an thaw ang bokin khawpui chu an hêl suok a, amiruokchu hi ni hin voi sari zet an hêl suok a nih. 16 Voi sari an hêlna dinga thiempuhaiin tawtawrawt an hang mût ruoi ruoi phing leh Josua chun mipuihai kuomah, "Khêk ta ro leh! Hi khawpui hi LALPAN a mi pêk ta si a. 17 Khawpui le a sûnga thil um po po hi LALPA ta dinga inhlân fai thak ding a nih. Nawchizor Rahab le a in sûnga a kuoma um po pohai ruok chu, enthlatu ei tirhai kha a lo thup leiin, hlàa hum ding a nih. 18 Amiruokchu, hluihlawnc thila chun inthier fihlim ro, chuong naw chun a ieng khom lo la pal in ta, in chungah sietna intlun rawi in tih. Chuonga in thaw chun Israelhai riebûk hi sietna phur tlâkah siem in ta, buoina hung intlun in tih. 19 Tangkaruo le rangkachakhai le dâr le thîra siem hmangruo le thil danghai po po chu LALPA chanpuol a ni leiin, LALPA thil siekhawmna ina sie ding a nih" a ta. 20 Chuongchun, tawtawrawt a hung inri chun mipui chu an khèk dur dur a. Tawtawrawt inri ruoi ruoi a, mipui an khêk dur dur lai chun Jeriko kul bang chu a hung chim a, mipui chu mani hma zawn sengah an kai tung a, khawpui chu an làk ta a. 21 A khawpui chu LALPA ta dingin an inhlàn a, khawpuia chêng hringna nei taphot nuhmei pasal, a chîn a lien, bawngchalhai, beramhai le sabengtunghai chenin, an sukhlum vong a. 22 Josua chun ram enthla dinga mi a tir pahnihai kuoma chun, "Nawchizor ina chun fe unla, a kuoma thu in intiem tah angin, chu nuhmei chu a nei po po leh va thuoi suok ro" a ta. 23 Enthlatu tlangvàlhai chu an va lût a, Rahab chu a nu le pa, a tâhai leh, a nei po po le chun an va thuoi suok a, a laichin unauhai po po khom chu an thuoi suok bok a, Israelhai riebûk puo tieng an inumtir a. 24 Khawpui chu a sûnga thil um po po leh an raw fai vong a; tangkaruo le rangkachakhai, dâr le thîra siem bûr le bèlhai chauh chu LALPA thil siekhawmna inah an sie a. 25 Amiruokchu, Jeriko khuo enthlatu dinga a mi tirhai lo thuptu nawchizor Rahab le a nei po po le a sûnghai ruok chu Josua chun a hlà vong a, Israelhai lai tu chen hin an khawsa ta zing a nih. 26 Chuong lai chun Josuan, "Jeriko khuo indin thar nawk tumtu taphot chun LALPA tongsie phur a ta, a nau lutîr chânin a lungphum chu phûm a ta, a nau tlum tak chânin a kul kotkhârhai chu indin a tih" tiin vangsietna thu chu a'n sam a. 27 LALPA chun Josua chu a umpui a, a ram pumah a hming a hung inthang ta hle a.

7

1 Amiruokchu, Israel thlahai lai chun hluihlawn thilah ringum lo taka khawsa an lo um a. Juda hnama mi Zera naupa Zabdi (Zimri), chu naupa Karmi, chu naupa Akan chun hluihlawn thil a lâk leiin LALPA lung chu Israelhai chungah a sen hle a. 2 Chun, Josua chun Jeriko khuoa inthokin Bethel suo tienga Beth-aven depa um Ai khuoa chun mi a tir a, an kuomah, "Hang fe unla, ram hang enthla ro" a ta. Mihai chu an hang fe a, Ai khuo chu an hang thlithlai a. 3 An hung kîr nawk chun Josua kuomah, "Ai khuo bei ding chun mi po po fe ngai kher naw nih. A la dingin mi sânghni sângthum vel tir la, mi tlawmte chauh an na, mi po po suksawl kher ngai naw nih" an ta. 4 Chuongchun, mi sângthum vel chauh chu taka chun an hang fe a, sienkhom Ai khuohai chun an lo intlawm dêr a; 5 mi sawmthum le paruk an lo that a, an khaw kul kotkhàra inthokin an lung làkna khur Sebarim chen an hung hnot a, an liem thlâkna tênbarama chun an that tawl a. Chu chun mipui a sukzàm a, tui angin an lungril a suktui a. 6 Chuongchun, Josua chun a silfèn a pot thler a, LALPA Bawm hmaa chun hnuoi sikin zân tieng chen a bokkhup a, Israel upahai khom chun a thaw anga thaw vein, an luah pilvut an inphul a. 7 Josua chun, "E khai, LALPA Chunghnungtak, Amor-hai kuta pêka sukhlum el dingin ieng leia hi mipuihai hi Jordan vadung i thuoi kai am a na? Jordan vadung ràla khan lungawi takin um tok tok inlang ni ta lem ding kha! 8 Aw LALPA, hmèlmahai hnota Israelhai an tlànse el ta hi, iem hril tàng ka ta? 9 Kanan mihai le hieng laia chêng hnamhai hin hung hrieng an ta, mi hung inhuol an ta, hnuoia inthok hin kan hming an nuoi bo vong el ding a ni hi. Chuong chu a ni si chun, i hming ropui tak hi ieng am i law ta ding a na?" a ta. 10 LALPA chun Josua kuomah, "Tho rawh. Ieng dinga khânga i bokkhup zing am? 11 Israelhai hin thil suol an thaw a nih. An vong zing dinga thu ka pêk, ka thuthlung chu an bawsiet a. Thil hluihlawn laia mi an làk a, an inrûk a, khêl an hril a, an thil neihai lai an zep rùk a nih. 12 Chu lei chu annawm Israelhaiin an hmèlmahai an ngam naw chu. Siet tuok tlâka hluihlawna an insiem leiin annawm an tlànsiet a, an hmèlmahaiin an hnot thlûr chu. Thil hluihlawnhai chu nangni laia inthoka in sukbo phot naw chun nangni lai ka um ta naw ding a nih. 13 Fe la, mipuihai chu inhlàn thienghlim phot rawh. Hieng ang hin hril tawl rawh: 'Zînga dingin insukthienghlim ro khai. LALPA, Israelhai Pathienin, Aw Israelhai, nangni lai hin hluihlawn thil a um a nih. Nangni laia inthoka hluihlawn thil hi in lâk hmang hma khat chu in hmèlmahai hne thei naw ti niu. 14 Chuongchun, zînga hin a chî chiin in hung inlang ding a nih. LALPAN a pom hnamhai chu a pahnam hnamin hung an ta, LALPAN a pom pahnam chu a sûngkuo kuoin hung an ta, LALPAN a pom sûngkuo chu a pasal a pasalin an hung inlang ding a nih. 15 Tu khomin hluihlawn thil a kol hmu suok a ni chun, LALPA thuthlung a bawsiet lei le Israelhai lai thil suol invêt thlâk tak a thaw leiin, a thil nei po po leh meia raw hmang ding a nih' a ti a nih' tiin hril tawl rawh" a ta. 16 A tuk zîngkar inhma takin Josua chu a tho a, Israel hnamhai chu a chî chiin a hmaah an hung inlang a, Juda chihai chu man an lo ni ta a. 17 Juda pahnamhai chu an hung inlangtir a, Zera pahnam chu an lo man a. Zera pahnamhai chu a sûngkuo kuoin an hung inlangtir a, Zimri sûngkuo chu man an ni a. 18 Zimri sûngkuoa mi chu a mal malin an hung inlangtir a, Juda hnama mi Zera naupa Zimri, chu naupa Karmi, chu naupa Akan chu man a lo ni ta a. 19 Josua chun Akan kuomah, "Ka naupa, LALPA, Israelhai Pathien kuoma chun ropuina inkhumtirin ama chu chawimawi rawh. I thilthaw chu mi hril la, ka lakah ieng khom ip naw rawh" a ta. 20 Akan chun, "LALPA, Israelhai Pathien chungah thil suol ka thaw hrim a nih. Ka thaw dân chu hieng ang hin a nih. 21 Ei râllâk lai khan Babulonad mi korfuol mawi tak le tangkaruo kilogram hni vel le rangkachak tlang kilogram chanve vel bûk ka hmu a, ka'n hnar êm a, ka lâk el a nih. Ka puon ina hnuoi sûngah ka thup a, tangka khom chu hnuoia chun a um" a ta. 22 Josua chun mi a tir a, puon in tieng chun an tlàn a, a puon ina chun a lo thup ngei a, a hnuoiah tangkaruo khom a um a. 23 Chuong thilhai chu puon ina inthok chun an hung làk a, Josua le Israel mi po po hmaa chun an hung chawi a, LALPA hmaa chun an sie a. 24 Josua le Israelhai chun Zera naupa Akan chu tangka hai, korfuol hai, rangkachak tlang hai, a naupa le naunuhai, a bawngchalhai, a sabengtunghai, a beramhai, a puon in le a thil nei po po le chun Akor ruomah an thuoi a. 25 Josua chun, "Ieng ti leia hi buoina hi kan chungah i hung intlun am a na? Voisun hin i chunga khom buoina LALPAN a hung intlun ve ding a nih" a ta. Israel mipui chun Akan le a sûnghai chu lungin an dêng hlum a, an thil nei popo leh meiin an raw a. 26 Akan chu vûm hnûrin lung an indel khum a, Pathien lungsenna nasa tak chu a' kei kîr nawk tah a nih. Hi hmun hi tu chen hin Akor Ruom ti a la ni zing.

8

1 Chun, LALPAN Josua kuomah, "Ti naw la, zâm bok naw rawh. Tho la, i sipai po po thuoi la, Ai khuoah hang fe rawh; ngai ta, Ai khaw lal le a mihai le a khuo le ram chu i kutah ka pêk ta che. 2 Jeriko le an lal chunga i thaw ang bok khan Ai khuo le an lal chunga khom i thaw ve ding a nih. Râllâk le ranhai chauh nangni puola dingin la thei in tih. Chun, a rûka khawpui inchàntu ding a hnung tieng mi sie rawh" a ta. 3 Chuongchun, Josua le a sipaihai po po chu Ai khuo bei ding chun an inthok suok a. A mi huoisen laia mi sîng thum a thlang suok a, zâna chun a tir suok a. 4 An kuoma chun, "Fimkhur takin ngaithla ro. Khawpui bei dingin a khaw hnung tieng a rûkin in inchàn ding a nih. Khawpuia inthokin um hla taluo naw ro. Inrêngin inring zingin um ro. 5 Kei le ka kuoma um po poin khawpui chu hung hnai kan ta, a hma anga mi bei dinga an hung suok charin an hmaah tlânsieng kan ta. 6 'A hmaa ang bok khan ei hmaah an tlànse nawk ta rèk ie' tiin mi hung hnot an ta, kan thlem suok thei chen chen thlem suok kan ta. 7 Kan tlànse pha leh in inchàn rûknaa inthokin hung suok in ta, khawpui chu in làk ding a nih. 8 Khawpui in lâk charin raw nghal ro. LALPAN thu a pêk ang chêu khan thaw ro. Chuong ang tak chun thaw ro, thu ka pêk ta chêu hi" a ta. 9 Josua chun anni chu a'n fetir a, Ai khaw thlang tieng, Bethel le an inkâra chun an inhuol rûk a; chu zân chun Josua ruok chu mipuihai lai puon inah a riek a. 10 Zîngkàr inhma takin Josua chun a mihai chu a khawm a, ama le Israelhai hotuhai chu Ai khuo panin mipui hmaah an inthok suok a. 11 A kuoma um râl do mihai po po khom Ai khuo panin an inthok suok a, a khaw bul an hang tlung a, hmar tieng tlângah thanghmun an khuor a, Ai khuo le an inkâra chun ruom a um a. 12 Ai khuo thlang tieng, Bethel le inkâra inchantu dingin mi sâng nga a sie a. 13 Hmar tienga inthoka bei pawl ding sipaihai thanghmun le thlang tieng panga inthoka arûka inchantu dinghai thanghmun a rêl fel vong hnungin, chu zân chun Josua chu ruoma chun a fe a. 14 Ai khaw lalin a hmu chun ama le khawpuia a mihai chu zîngkàr inhma takin an tho a, a hmun ruot Araba zawna chun Israelhai chu bei dingin an inthok suok a; khawpui hnung tieng chun ama bei dingin an inchàn ti a hriet si nawh. 15 Josua le Israel mihai po po chu a tlawm lem ni awm takin thlalèr tieng an tlàn ta hum hum el a. 16 Khawpuia umhai po po chu anni hnot dingin an inko khawm a, Josua chu an hnot a, khawpuia inthok chun a thlem suok tawl ta a. 17 Ai khuo le Bethel khuoa mihai chu Israelhai hnotin an inthok suok vong leiin an khawpui chu khàr loin an màksan el ta a. 18 Chu phing leh LALPAN Josua kuomah, "I kuta fei i chawi khan Ai khuo tieng tin rawh; i kutah hi khawpui hi ka pêk ding che a nih" a ta. Chuongchun, Josua chun a feiin Ai khuo tieng chu a hei tin a. 19 Arûka inchàntuhai kha an hung suok nghal a, a kut a phar charin an tlàn a, khawpuia chun an lût a, an làk a, an raw ta nghal a. 20 Ai khaw mihaiin an hnung tieng an hei thlir chun khawpui kàng khu vân tienga fe tung ngùt ngùt el chu an hmu a, khaw tieng tieng khom hang tlàn theina an nei ta nawh- thlalèr tienga an hnothai khan a hnottuhai chu an hung hnot lêt ve thung ta bok si. 21 Arûka inchàntuhaiin khawpui chu an lâk tah ti Josua le a mihaiin an hmu chun Ai khuoa mihai bei ding chun an inlêt kîr a. 22 Khawpui latu pawl chu khuoa inthokin bei dingin an hung suok bok a, Israelhai chun an kârche a, khing tieng khing tieng an dang chep leiin pakhat khom hlà le insuo an nei nawh. 23 Ai khaw lal chu a hringin an man a, Josua kuomah an thuoi a. 24 Ai khaw mi, phûla um le thlalèr tienga anni hung hnottuhai po po khom chu kawlhnâma an that fai vong hnungin, Israelhai chu Ai khuoa la um hai that dingin an lût a. 25 Chu nia Ai khaw mi an that po po chu, a nuhmei a pasalin, sîngkhat le sânghni an nih. 26 A fei inletna kutin Ai khuohai po po a rawt ram dêr hma khat chu Josua chun a kut a'n thla nuom si nawh. 27 LALPAN thu Josua a pêk angin, chu khawpuia ranhai le râllâkhai ruok chu anni puola dingin Israelhai chun an làk a. 28 Josua chun Ai khuo chu a raw a, kumkhuoa hmunhnok bûm khawmna muol le voisun ni chena hmun rausanah a'n changtir tah a nih. 29 Ai khaw lal chu zân tieng chenin thinglèrah a khai a, nisa tlak tawmin thlinglèra inthok chun an lâk thlak a, khawpui kul kotkhàr bula chun a ruong chu an pei a, a chunga chun lung an intieng vûm thûr a, chu chu tu chen hin a la um. 30 LALPA siehlaw Mosiein ziek ngeia a Dàn Bua Israel thlahai kuoma thu a pêk angin, Josua chun lung ser lo le thîr ha be la tuor ngai der lo ngot hmangin Ebal tlânga chun LALPA, Israelhai Pathien ta dingin maichâm a siem a. 31 Chu maichâma chun LALPA ta dingin pumraw thilhlân le inremna thilhlânhai inhlànin a'n thawi a. 32 Chu taka chun Israel thlahai hma ngeiah, Josua chun Mosien dàn chu lunga chun a ziek sawng a. 33 Malsawmpêk anni ding phaa an thaw dàn ding LALPA siehlaw Mosien a lo hril tah angin, Israel thlahai po po chu an upa hai, hotu hai, rorêltu hai le anni laia um hnam dang mihai leh chun thiempu Levihai zawn LALPA Thuthlung Bawm tieng nghain, khing tieng khing chun an ngîr a, a zâtve chun Gerizim tlâng an hmason a, a zâtve dang chun Ebal tlâng an hmason bok a 34 An ngîr fel hnung chun Dàn bua thu po po, malsawmna thu hai, tongsie dong ding thu hai Josua chun a tiem suok a. 35 Mosie thupêk po po chu Israel mi pungkhawm po po le nuhmei le naupang chikté tè le anni laia hnam dang chênghai chen hrietah Josua chun tiem hmai a nei hrim hrim nawh.

9

1 Hieng thilhai hi Jordan vadung thlang tienga lalhai po po, tlâng le phai le tuifinriet zau tak kam tluona chêng, Lebanon chena inzar phei Hit hai, Amor hai, Kanan mihai, Periz hai, Hiv hai le Jebu haiin an lo hriet chun, 2 inthuruola Josua le Israelhai chu do hrawn tumin an pung khawm a. 3 Nisienlakhom, Josuan Jeriko khuo le Ai khuo a thaw dàn Gibeon mihaiin an lo hriet chun, 4 dawha hmangin an che thung a. Palai anga insiemin, an ip hlui tak tak hai le savuna siem uoiin pêng hlui tak tak, inek phen phun le phawk ta hai chu sabengtung an hung inphurtir luoi a; 5 pheikhok hlui tak le inphawk tek tuk an bun a, zakuo tiek neng nung an hàk a; bei tawl ngar vun el, a then chu hmuor ta dam fâk dingin an chawi a. 6 Chuong ang chun Gilgala an inkulnaa chun Josua kuomah an fe a, ama le Israelhai kuoma chun, "Ram hla taka inthoka hung kan na, thu mi thlungpui ro" an ta. 7 Israel mihai chun Hiv mihai kuoma chun, "Kan kawl hnaia um khom in lo ni el thei a, nangni leh iengtin am thuthlung siem thei kan ta?" an ta. 8 Anni chun Josua kuomah, "In siehlawhai kan ni hih" an ta. Josua chun, "Tuhai am in na, khaw laia inthoka hung am in na?" tiin a'n don a. 9 Anni chun, "LALPA in Pathien hi a hming a'n thang êm leiin i siehlawhai hi ram hla taka inthoka hung kan nih. A chanchin an hrilhai kan lo hriet ve hlak a: Aigupta rama a thilthawhai po po dâm, 10 Jordan suo tienga Amorhai lal pahnih- Hesbona lal Sihon le Basan ram lal, Ashtarot khuoa um Oga hai chunga a thilthaw po po hai kha kan lo hriet si a. 11 Chun, kan upahai le kan rama chênghai po poin, 'Lampuia in fâk ding chawi unla, anni chu va'n biekpui unla, an kuomah, 'In siehlaw kan ni hi; kan kuomah thu thlung ro' ti dingin thurawn an mi pêk a. 12 Hi bei hi in kuom tieng hung dinga kan suok tûka lum hlota kan fûn a na, tu hin chu a khong ta hle a, a ap rak an tah. 13 Hieng uoiin chawina savun pênghai dâm hi uoiin kan thun chun savun thar a la ni a, tu ruok hin chu a kak tuor el ta hi. Kan inzin sawt leiin kan silfènhai le pheikhokhai khom a tiek zo tah a nih" an ta. 14 Israel mihai chun fâk ding an chawihai chu an en vela chu ieng khom an chungchâng thuah LALPA an rawn nawh. 15 Chuongchun, Josua chun inremna thuthlung a siempui a, chu chu pungkhawm hotuhai chun inkhâm meuin an pompui a. 16 Remna thuthlung an siempuia inthoka ni thuma chun Gibeon-hai chu an kawl hnai tea um an nih ti Israelhai chun an hriet suok ta a. 17 Israel thlahai chu an fe pei a, ni thum niin an khawpuihai an tlung a. An khawpuihai chu Gibeon dâm, Kefira dâm, Berot dâm le Kiriat-Jearim dâm a nih. 18 LALPA, Israelhai Pathien hminga pungkhawm hotuhaiin an kuoma inkhâm meua thu an lo thlung ta leiin, anni chu Israelhaiin an bei ve nawh. Hi lei hin pungkhawmhai chu an hotuhai chungah nasa takin an chier a. 19 Sienkhom an hotuhai chun an kuomah, "LALPA, Israel Pathien sâlin an kuomah kan lo inkhâm ta si a, chuleiin anni chu ei tawk a thieng nawh. 20 An kuomah ei lo inkhâm ta si leiin ei thu ei bawsiet chun ei chungah lungsenna tlung rawi a tih, hieng ang hin an chungah thawng ei ta, hlà tawl el ei tih. 21 Hlà tawl ei ta, sienkhom pungkhawm po po thing phurtu le tui chawituah hmang ei tiu" an ta, chuongchun hotuhai thu lo intiemkamna chu an zawm ta a. 22 Josua chun Gibeon-hai chu a ko a, an kuomah, "Keini hnaia chêng ve ni zing si a ieng dinga ram hla taka hung anga inhrila in mi hlêm am a na? 23 Chu lei chun tongsie phur in hung ni ta a, kan Pathien ina thing ti ding phurtu le tui chawituah thangin kan bawiah um zing in tih" tiin a hril tawl a. 24 Anni chun Josua kuomah, "LALPA in Pathien chun hi ram hi a pêk chêu a, a sûnga chênghai po po sukhlum vong dingin a siehlaw Mosien thu a pêk ti khom kan ring a. Chuongchun, hma in hung sawn pei dàn kan hrietin, in mi that kan inlau a, hieng hin kan hung thaw el a nih. 25 Ngai ta, tu hin i kuta um kan ni a, i ngaia tha le indika i hriet ang chun kan chunga hin thaw pei rawh" an ta. 26 Chuongchun, anni chu a hum a, Israelhan an that a khap a. 27 Chu nia inthok chun Gibeonhai chu pungkhawmhai le LALPAN a la ruot ding hmuna LALPA maichâm ta dinga thing phurtu le tui chawituah a ruot a, voisun ni chenin chu sin chu an thaw ta pei a nih.

10

1 Josuan Ai khuo a lâk a, a suksiet vong thu le Jeriko khuo le an lal chunga a thaw ang boka Ai khaw lal chunga khom a thaw thu dâm, Gibeon khuoa mihaiin Israelhai chu inremna an siempui a, anni lai an chêng ve tah ti thu dâm Jerusalem khaw lal Adoni Zedek-in a lo hriet a. 2 Chu thu lei chun ama le a mipuihai chu nasa takin an ti a. Gibeon chu khaw poimaw le lal khawpui a na, Ai khuo nêkin a lien lem a, a sûnga chênghai chu râldo thiem vong an ni si a. 3 Jerusalem lal Adoni Zedek chun Hebron khaw lal Hoham hai, Jarmut khaw lal Piram hai, Lakis khaw lal Jafia hai le Eglon khaw lal Debir hai chu inpunin, 4 "Gibeon khuoin Josua le Israel thlahai inremna a siempui leiin hung unla, va bei hron ei tiu" tiin a'n chà khawm a. 5 Chuongchun, Amor mihai lal panga- Jerusalem lal, Hebron lal, Jarmut lal, Lakis lal le Eglon lal- hai chu an pung khawm a, an sipaihai po po leh an inthok suok a, Gibeon khaw epah thanghmun an khaw a, an bei ta mup mup el a. 6 Gibeon-hai chun Gilgala an riekhmuna um Josua kuoma chun mi an tir a, "Tlâng rama chêng Amor lal po po inthuruolin mi bei hron dingin an hung pung khawm a nih. I siehlawhai hi hung thlathlam naw la, inrang takin hung la, mi hung san suok rawh, san kan ngai a ni hi" tiin thu an thon a. 7 Chuongchun, Josua le a kuoma um râl kâp mi le pasaltha po po chu Gilgala inthok chun an inthok suok a. 8 LALPA chun Josua kuomah, "Ti tawl der naw rawh; anni chu i kutah ka pêk ta che. Anni lai tu khom a ngam ding che an um nawh" a ta. 9 Zân khuoa Gilgala inthoka fein Josua chun a hang bei thut a. 10 Israelhai hmaa chun anni rawi chu LALPAN a sukchi-ai a, an buoi ta nuoi nuoi a, Gibeon-a chun Israelhaiin hnena ropui tak an chang a, Bet Horon panna lam tunga chun Azeka le Makeda chen an hnot a, lampui intluonin an sât hlum pei a. 11 Chun, hieng hi a na, Israelhai hmaa tlànsiehai chu Bet Horon-a inthoka Azek khuo panna tieng an liem thlâk laiin an chungah vâna inthokin LALPAN riel lien tak tak a'n sûrtir a, riel dèng hlum chu Israelhaiin kawlhnâma an sât hlum nêkin an tam lem. 12 LALPAN Israelhai kuta Amor mihai a pêk ni chun, Israelhai po po hmaah Josua chun LALPA kuomah, "Aw, turnipui, Gibeon chungah ngîr zing la, Aw, sorthlapui, Aijalon Ruom chungah ngîr zing rawh"tiin thu a'n sam a. 13 Chuongchun, Israelhaiin an hmèlmahai chunga phuba an lâk zo hma khat chun nisa chu ni khat pum hlum inson loin vân laizawlah a ngîr zing a. Chu thu chu Jasar Bu-ah an ziek naw am a ni? 14 Chuong ang ni, LALPAN mihriem rawl a ngâithlàk ni ang hrim hrim chu a hma khomin, a hnung khomin, a la um ngai nawh. Israelhai chu LALPAN a dopui takzet si a. 15 Chuongchun, Josua chu Israelhai po po leh an riekhmun Gilgala chun a kîr nawk ta a. 16 Chun, lal pangahai chu an tlân hmang a, Makeda pûkah an inbi a. 17 Makeda pûkah lal pangahai an inbi ti an hriet chun Josua an hung hril a. 18 Ama chun, "Pûk baua chun lung lien tak tak inhlum lût unla, a vèngtu ding mi sie nghal bok ro. 19 Nangni ruok chu um ve naw ro. In hmèlmahai chu hnot pei unla, an hnung tienga inthokin bei unla, an khuoah inlûttir hrim hrim naw ro. Anni chu LALPA in Pathienin in kuta a pêk ta sa a nih" a ta. 20 Josua le Israelhai chun anni chu an suksiet vong a, an khaw kula tlân tlung hman mi tlawmte ti chau naw chu an that fai vong a nih. 21 Chuongchun, an sipai po po chu Josua rawia an inkulna Makeda riekhmuna chun him takin an hung kîr a, tu khom Israelhai kal zawnga bau phong ngam hrim an um ta nawh. 22 Josua chun, "Pûk bau kha hong unla, lal pangahai kha ka kuomah hung thuoi ro" a ta. 23 Pûka inthokin lal panga- Jerusalem lal, Hebron lal, Jarmut lal, Lakis lal le Eglon lal- hai chu an hung thuoi suok a. 24 Josua kuomah an hung thuoi chun Israel thlahai po po chu a ko khawm a, ama le hung sipai kawmandarhai kuoma chun, "Hung unla, hieng lalhai rìng hi hung sir de ro" a ta. Chuongchun an hung hnai a, an rìnga chun an sir de a. 25 Josua chun, "Ti naw unla, zâm bok naw ro. Hrât tak le huoisen takin um ro. Hieng ang bok hin hmèlma indo dinghai chunga khom LALPAN a thaw pei ding a nih" a ta. 26 Chu zoa chun Josuan lalhai chu a sât hlum vong a, thing kung panga lêrah an ruong chu zân tieng chen a'n khàitir a. 27 Josua thupêk angin, an ruong chu ni tlâk tawmin an lâk thlâk a, an inbikrûkna pûka chun an pei lût a, pûk bàu chu lung lien tak takin an sìn khum a, chu chu tu chen khom hin a la um. 28 Chu ni chun Josuan Makeda khuo chu a lâk a, an lal chopin kawlhnâmin a sât hlum a, iengkim a suksiet vong a, pakhat khom a hringa hlà a nei nawh. Jeriko lal chunga a thaw ang bokin Makeda lal chunga khom a thaw a nih. 29 Josua chun Israelhai po po leh Makeda khuoa inthokin Libna khuo a va bei a, 30 chu khuo chu LALPAN an lal chopin Israelhai kuta chun a pêk nawk a. Josua chun chu khuo le a sûnga um po po chu kawlhnâmin a that vong a, a sûnga um tu khom hlà hrim hrim an nei nawh. Jeriko lal chunga a thaw ang bokin chu khaw lal chunga khom chun a thaw a nih. 31 Josua le a kuoma um Israelhai po po chun Libnaa inthokin Lakis khuo tieng an pan a, thanghmun an khaw a, an bei a. 32 Lakis khuo khom chu LALPAN Israelhai kutah a pêk a, a ni hninain an làk a, chu khuo le a sûnga um po po chu kawlhnâmin an sukhlum vong a, Libna khaw chunga an thaw ang bok khan an thaw ve a nih. 33 Chun, Gezer khaw lal Horam chu Lakis khuo thangpui dingin a hang fe a, ama le a rawihai chu pakhat khom hlà nei dêr loin Josua chun a lo that vong a. 34 Josua le a kuoma um Israelhai po po chun Lakis khuoa inthokin Eglon khuo tieng an pan a, thanghmun an khaw a, an bei a. 35 Chu ni chun chu khuo chu an làk a, chu ni vêk chun khuo chu an sàm a, a sûnga um po po chu an sukhlum vong a, Lakis khaw chunga an thaw ang bok khan an thaw ve a nih. 36 Josua le a kuoma um Israelhai po po chu Eglon-a inthokin Hebron an kai tung a, an bei a. 37 A khawpui chu an làk a, a sûnga um po po le an khawper po po chu kawlhnâmin an bei a, an lal chopin an sukhlum vong a. Eglon an thaw ang bokin a khuo le a sûnga umhai chu an inram fai thak a nih. 38 Chu zoah Josua le a kuoma um Israel thlahai po po chu kîr lêtin Debir khuo an bei a. 39 A khuo chu an làk a, an khawperhai khom, a sûnga um po po leh, kawlhnâmin an bei a, an lal chopin an that vong a, pakhat khom hlà an nei nawh. Hebron khaw chunga an thaw ang khan Debir khuo le an lal chungah khom an thaw a nih, Libna khuo le an lalhai chunga an thaw ang bok khan. 40 Chuongchun, Josua chun chuong lai biel po po chu, tlâng ram hai, sim tieng ram hai, tlâk tieng tlâng thuta um phai ram hai le tlâng pangpêra um khuohai le an lalhai po po thang sain, a tukdol vong a, tu khom dama a hlà an um nawh. LALPA, Israelhai Pathienin thu a pêk angin, a'n thuok thei taphot chu a that fai thak a nih. 41 Kades-barnea inthoka Gaza chenin, Gosen ram po po le Gibeon chenin a tukdol vong a. 42 Tum khata hieng lalhai po po hi Josuan hnea an ramhai a lâk vong theina san chu LALPA, Israelhai Pathienin Israelhai chu a dopui lei a nih. 43 Chuongchun, Josua le a kuoma um Israelhai po po chu an riekhmun Gilgal tieng chun an kîr nawk ta vong a.

11

1 Hazor khaw lal Jabin-in chu chu a lo hrietin Madon khaw lal Jobab dâm, Simron khaw lal dâm, Aksaf khaw lal dâm, 2 hmar tieng tlâng rama lal, Kinneret sim tienga Araba lal dâm, khawthlang tieng tlâng thuta lalhai dâm, Kinneret sim tieng Arabaa lal dâm, tlâk tienga tlâng thuta umhai le Dor khaw zoa lalhai dâm, 3 sak tieng le thlang tienga um Kanan mihai dâm, tlâng rama um Amor hai, Hit hai, Periz hai, Jebu hai dâm, Mizpa biel Hermon tlâng hnuoia um Hiv hai kuomah mi a tir a. 4 An sipai po po, tam tak el, tuifinriet kama tieu zât zet el chu sakor le tawlailir tam tak leh an hung inthok ta rup el a. 5 Chuong lalhai po po chu an intuok khawm a, Israelhai chu bei dingin Merom tuihmunahe an inkul a. 6 LALPA chun Josua kuomah, "Ti tawl dèr naw rawh. Zîngah tuta huna hin that dingin Israel kutah ka pêk suok tawl ding a nih. An sakor zaper thà sat unla, an tawlailir raw vong bok ro" a ta. 7 Chuongchun, Josua le râl kâp mi po po chun Merom tuihmunah an bei thut a. 8 LALPA chun Israelhai kutah a pêk a, an hne a, Sidon khaw lien lem chen dâm, Misrefot Maim chen dâm le suo tieng pangah Mizpa Ruom chen an hnot a, pakhat khom hlà nei dêr loin an that vong a. 9 LALPAN thaw dinga Josua a hril angin, an sakor zaper thàhai an satpêk a, an tawlailirhai an rawpêk bok a. 10 Chuong lai chun Josua chu a kîr nawk a, Hazor khuo a lâk a, an lal chu kawlhnâmin a that a. Hazor chu chuong lai vel rama khaw poimaw tak a nih. 11 A sûnga chêng po po chu kawlhnâmin a that vong a. A'n thuok thei taphot chu hlà nei loa a rawt chimit zoin Hazor khuo chu a raw a. 12 Josua chun chu biela lal khuohai chu a lâk a, an lalhai a man khawm a, kawlhnâmin a sukhlum vong a. LALPA siehlaw Mosien thu a pêk angin, a sukchimit tawl vong a nih. 13 Chuong chu a ni lai zingin, Hazor khuo ti chauh naw chu, muolpawnga khuo an lo indin ta sa hai ruok chu pakhat khom an raw nawh. 14 Chuong khawpuia inthoka an râllâk le ranhai chu Israelhaiin an puola dingin an lâk a, mihriem ruok chu an sukbohmang vong hma khat chu kawlhnâmin an that pei a, a'n thuok taphot chu hlà an nei nawh. 15 LALPAN a siehlaw Mosie thu a pêk angin, Mosie khomin Josua chu thu a pêk a, chu chu Josua-in a hlen a nih; LALPAN Mosie kuoma thu a pêk po po chu hlen naw hrim a nei nawh. 16 Chuongchun, Josua chun hieng ram po po hi a làk a: sim tieng ram po po, Gosen ram po po, tlâk tieng panga tlâng thut po po, Araba le Israelhai tlângram po po, 17 Seir tlâng hang zomtu Halak tlânga inthoka Hermon tlâng hnuoi, Lebanon phairuoma um Baal Gad chenin a lâk a, an lalhai po po a man a, a vuok thlûk a, a that a. 18 Chuong lalhai chu Josuan hun sawt tak a'n dopui tawl a nih. 19 Gibeon khuoa um Hiv mihai ti chauh naw chu Israelhai le inremna siem khuo hrim hrim an um naw a, indoa a lâk vong a nih. 20 LALPAN Mosie thu a lo pêk tah ang khan, anni rawi chu lunginsietna nei dêr loa suksea a sukchimit tawl vongna dingin, LALPA ngei chun an lungril a sukkhau a, Israelhai chu a'n dotir a nih. 21 Chuong lai hun bok chun Josua chu a'n thok suok a, Hebron dâm, Debir dâm, Anab dâm, Judai tlângram dâm le Israel tlâng rama um Anakhai chu an khawpuihai leh a sukchimit vong a. 22 Chuongchun, Gaza, Gath le Asdod khuoa a dam sun tlawmte la um ti naw chu Israelhai ramah Anakhai tu khom an um ta nawh. 23 LALPAN Mosie kuoma a hril ang khan, Josua chun a ram pumpui a lâk a, Israelhai chu an hnam inthe dàn ang peiin an rochan dingin a pêk a, a ram chu a hung ralmuong ta a.

12

1 Ni suokna tienga Jordan ràl ram, Arnon Ruoma inthoka Hermon tlâng chen le sak tieng panga Araba ram chena lalhai, Israel thlahaiin an tukdol tah le an ram an lâkpêkhai chu hienghai hi an nih: 2 Amor mi Hesbona lal Sihon ramin a huop chin chu Arnon ruom sira um Aroer khuoa inthoka Arnon ruom lailunga khaw um le chu taka inthoka Amonhai ramri Jabok vadung chen a na, chu chun Gilead ram chenve a huop sa a. 3 Chun, Jordan varuom, Galili dila inthoka sim tieng Tuipui Thi sak tieng Bet Jesimot chen le Pisga sim tieng tlâng pangpêr po po a huop sa bok a nih. 4 Basan lal Oga khom an hne a. Ama chu Refaim hnam tlawmte la um sun laia mi a na, Astarot-a inthoka Edrei chena lal a nih. 5 A lalramin a huop sahai chu Hermon tlâng hai, Salka khuo hai, Basan ram po po, Gesur-hai le Maaka-hai ramri chen le Gilead ram zatve, Sihon ramri chen a nih. 6 LALPA siehlaw Mosie le Israelhaiin chuong lalhai chu an hne a, LALPA siehlaw Mosie chun an ram chu Reuben hnam le Gad hnam le Manase hnam zatvehai rochanah a sem a. 7 Jordan vadung ràl thlang tienga Josua le Israelhaiin an tukdolhai chu Baal Gad-a inthoka Lebanon phairuom chen, chu taka inthoka Seir tlâng hang suntu Halak tlâng chen a nih. Chuong ramhai chu Israel hnamhai inthe dàn ang peiin Josua chun an rochanah a sem tawl a. 8 Tlâng ram po po, tlâk tieng tlâng thut po po, Araba hai, tlâng pangpêr hai, thlalèr hai, sim tieng ramhai po poa Hit mihai, Amor mihai, Kanan mihai, Periz mihai, Hiv mihai le Jebu mihai lal um zât le an khaw hluohai chu: 9 Jeriko lal pakhat le Bethel bula Ai khaw lal pakhat; 10 Jerusalem lal pakhat, Hebron lal pakhat; 11 Jarmut lal pakhat, Lakis lal pakhat; 12 Eglon lal pakhat, Gezer lal pakhat; 13 Debir lal pakhat, Geder lal pakhat; 14 Horma lal pakhat, Arad lal pakhat; 15 Libna lal pakhat, Adulam lal pakhat; 16 Makeda lal pakhat, Bethel lal pakhat; 17 Tapua lal pakhat, Hefer lal pakhat; 18 Afek lal pakhat, Lasaron lal pakhat; 19 Madon lal pakhat, Hazor lal pakhat; 20 Simron Meron lal pakhat, Aksaf lal pakhat; 21 Tanak lal pakhat, Megido lal pakhat; 22 Kedes lal pakhat, Karmel tlânga Jokneam lal pakhat, 23 Dor zo tlâng lal pakhat, Gilgala Goyim lal pakhat le 24 Tirza lal pakhat an na, an rêngin lal sawmthum le pakhat an nih.

13

1 Josua chu a hung upa a, a kum a tam ta hle hnung chun LALPAN a kuomah, "I lo upa ta a, ram lâk ding hlak chu a la tam hle si. 2 Hieng ramhai hi a nih la lâk lohai chu: Filistin ram po po le Gesur-hai ram po po; 3 sim tienga Avithai ram po po (Aigupta ramria um Sihor vadunga inthoka hmar tieng panga Ekron ramri chen hi Kanan mihai rama ngai a na, Filistin mi lal pangahai chu Gaza, Ashdod, Askelon, Gat le Ekron-ah an um a); 4 Kanan mihai ram bok, Sidon mihai umna Meara-a inthoka Amorhai ramri Afek chen; le 5 Gebalhai chêngna biel; sak tieng Lebanon ram, Hermon tlâng hnuoi Baal Gad-a inthoka Hamat Kawn chen. 6 Lebanona inthoka Misrefot-maim chenin, tlâng rama chêng po po le Sidon mi po pohai chu Israel thlahai hmaa hin hnot suok ka ta, thu ka pêk che ang khan, Israelhai rochanah siempêk ngei ngei rawh. 7 Chuong ang chun, hi ram hi hnam kuo hai le Manase hnam zâtvehai rochanah sempêk rawh" a ta. 8 Reuben hnam le Gad hnam le Manase hnam zâtve chun Jordan sak tieng ram, LALPA siehlaw Mosien a pêk chu, an lo chang ta a. 9 Chu ram chu Arnon Ruom sîra um Aroer khuoa inthoka ruom lailung taka khawpui le Medeba phai ram po po, Dibon chen; 10 Amorhai lal Hesbon khuoa lal Sihon khawpui po po, Amon thlahai ramri chen; 11 Gilead ram le Gesurhai le Makathai ramri chen le Hermon tlâng po po, Basan ram po po, Salka khuo chen; 12 Astarot le Edrei khuoa lala inthung Basan ram lal Oga ram po po, Refaim hnam la um sunhai Mosien beia a lo hnot suok tawlna ram chenin a nih. 13 Amiruokchu, Gesurhai le Makathai chu Israel thlahai chun an hnot suok naw a, Israel thlahai lai tu chen hin an la chêng ta zing lem a nih. 14 Rochan ding a pêk ve naw chu Levi hnamhai chauh an nih; an kuoma a lo hril tah ang khan anni rochan chu LALPA, Israelhai Pathien ta dinga meia thilhlânhai chu a ni lem si a. 15 Reuben thlahai chu an sûngkuo ang peiin Mosien ram a lo pêk ta a. 16 An ram chun Arnon Ruom sîra um Aroer khuoa inthoka ruom lailunga khawpui le Medeba phaizawl po po, 17 Hesbon le chu phai rama khawpui po po Dibon hai, Bamot Baal hai, Bet Baal Meon hai; 18 Jahaz hai, Kedemot hai, Mefat hai, 19 Kiriathaim hai, Sibma hai, ruom khoa um Zeret Shahar hai; 20 Behpeor hai, Pisga tlâng pangpèr hai, Bet-jesimot hai; 21 tlâng zawla khawpui po po hai, Amor mi, Hesbona lal Sihon lalram po po khom a huom a nih. Sihon chu Mosien a hne a, chu ruol chun chuong lai rama Sihon lo thangpuitu Midian lal Evi hai, Rekem hai, Zur hai, Hur hai le Reba hai chu a tukdol vong bok a nih. 22 Chuong lal a thathai bâka chun Israelhai chun Beor naupa Balaam, aienthiem chu kawlhnâmin an that sa bok a. 23 Chuongchun, Reuben thlahai ramri chin chu Jordan le a kam po po chu a nih. Hieng khawpuihai le khawtehai hi Reuben thlahai ta dinga an sûngkuo zir ang peia rochana an ruot chu a nih. 24 Gad thlahai chu an sûngkuo zir ang peiin Mosien ram a lo pêk a. 25 An ramri chu Jazer khuo le Gilead rama khawpui po po le Amon thlahai ram zâtve, Raba khaw depa um Aroer khuo chen; 26 Hesbona inthoka Ramat-mitzpe le Betonim chen; Mahanaim-a inthoka Debir ramri chen; 27 ruom tieng chu Bet-haram hai, Bet-nimra hai, Sukot hai, Zafon hai, Hesbona lal Sihon ram la sem lo, Jordan sak tienga a ram, Galili dil chen chu a nih. 28 Hienghai hi, a khawpui le a khawtehai po po leh, Gad thlahai ta dinga an sûngkuo zir peia an rochan dinga an ruot chu a nih. 29 Mosien Manase hnam zâtve, Manase thlahai laia a zâtve ta dinga an sûngkuo zir ang peia ram a lo pêk chu hieng ang hin a nih. 30 An ramri chu Mahanaim-a inthokin Basan ram po po, Basan ram lal Oga ram po po le Basan rama Jair khawpui khaw sawmruk leh; 31 Gilead ram zâtve le Basan ram lal Oga rama Astarot Edrei khuo hai leh; chuong chu Manase naupa Makira thla, Makira naupahai a zâtvehai ta dinga an sûngkuo zir ang peia an rochana ruot chu a nih. 32 Hienghai hi a nih Moab phai, Jeriko zawn, Jordan râl sak tieng Mosien an rochan dinga a lo sem chu. 33 Levi chihai ruok chu Mosien rochan ding a pêk ve nawh. An kuoma a lo hril tah ang khan, LALPA Israel Pathien chu an rochan a ni lem.

14

1 Thiempu Eleazar le Nuna naupa Josua le Israel pahnam tina luhaiin Israel thlahai kuoma an rochan dinga Kanan ram an sempêk dàn chu hieng ang hin a nih. 2 Mosie kuoma LALPAN thu a lo pêk tah angin, hnam kuohai rochan ding seng chu thum vawrin an sem a. 3 Mosie chun hnam hni le hnam zâtve ta dingin Jordan suo tiengah rochan a lo pêk ta a, Levi chihai ruok chu anni lai chun rochan ding a pêk ve nawh. 4 Josefa nauhai chu hnam hniin an hung um ta a, chu chu Manase le Efraim an nih. Khawpuia umhmun khuorna ding le khaw kawla an ran tlatna ding hmun ti chauh naw chu Levi chihai chun rochan an nei ve nawh. 5 LALPAN thu Mosie a pêk ang tak khan Israel thlahai chun ram chu an insem a nih. 6 Chun, Juda thlahai chu Gilgal khuoah Josua kuomah an fe a. Keniz mi, Jefune naupa Kaleb chun a kuomah, "Kades-Barnea LALPAN Pathien mi Mosie kuoma eini pahni chungchang a hril kha i hriet a. 7 LALPA siehlaw Mosien Kades-barnea inthoka ram enthla dinga a mi tir khan kum sawmli mi ka ni ta a, ka lungril char chu a kuomah ka hril a. 8 Amiruokchu, ka fepui ka unau danghai khan mipui lungril an sukzam a, kei ruok chun LALPA ka Pathien chu lungril takin ka pom tlat a. 9 Kha ni khan inkhâm meuin Mosie chun ka kuomah, 'LALPA ka Pathien chu lungril taka i zui leiin, i kea i sir ram taphot chu kumkhuoa nang le i nauhai rochan ni ngei ngei a tih' tiin a mi hril a. 10 "Ngai ta, hi thu hi Mosie kuoma a hril hnungin, thlalèra Israelhai an invàk sûng po po khan LALPA chun thu a tiem angin, kum sawmli le panga damin a mi la hla a, tu hin kum sawmriet pangaa upa ka lo ni ta hi. 11 Chuong sa khom chun, Mosien a mi tir suok ni ang khan voisun khom hin ka la hrât zing a, râl beia suok ding khomin kha hma ang bok khan thahrui ka la nei zing a nih. 12 Kha nia LALPAN pêk a mi tiem, hi tlângram hi tu hin mi pe ta la. Nang khoma kha tuma i hriet ang ngei khan, an khawpuihai chu Anakhai chêngna, kul ropui taka inhuon khup a ni kha. Amiruokchu, aman a ti angin, LALPA thangpuinain anni chu hnot suok ka tih" a ta. 13 Josua chun Jefune naupa Kaleb chu mal a sawm a, Hebron khuo chu a rochanah a pêk a. 14 Chuongchun, Keniz mi Jefune naupa Kaleb chun LALPA, Israel Pathien chu lungril taka a zui tlat leiin, chu nia inthok chun Hebron khuo chu a rochan a hung ni tah a nih. 15 Hebron chu Anak mihai laia mi ropui tak Arba hming chawiin Kiriat Arba ti a ni hlak. Chu taka inthok chun a ram chu indona laka inthokin a hung ralmuong ta a.

15

1 An sûngkuo zir ang peia Juda thlahai chanpuola ruot chu Edom ramri chen le sim tawp rawta Zin thlalêr chen a nih. 2 Sim tienga an ramri chin chu Tuipui Thi sim tienga litengsawl a na, 3 chu taka inthok chun Ainuvet Kawn (Akrabim) ah a tan tung a, Zin thlalèrah fe peiin Kades-barnea sim tieng a va tan a. Chu zoah Hezron fe thlengin Addar-ah a kai a, Karka a hêl kuol a. 4 Chu zoa chun Azmon tieng fein Aigupta ruomah a lût a, tuifinrietah a tawp a ni. Chu chu sim tienga an ramri chin ding chu a nih. 5 Sak tieng ramri chu Jordan vadung suo, Tuipui Thi chen a nih. 6 Hmar tieng ramri chu Jordan vadung suoa intanin Bet Hogla-ah a kai tung a, Bet Araba hmar tieng a pan pei a, Reuben naupa Bohan lungphun tieng a kai tung a, 7 Akor ruoma inthokin Debirah a fe tung a, hmar tieng inherin Gilgalah a lût a, chu chu sim tieng panga ruom Adumim Kawn epa um a nih. Chu taka inthoka fe peiin Ensemes tuikhurah a tan a, Enrogelah a suok a. 8 Ramri chu Hinom ruomah fe tungin Jebu-hai ram sìr sim tieng, Jerusalem chu fe thlengin a kai tung a, Hinom thlang tieng ruom bula um tlâng sîpa chun a kai a, hmar tieng Refaim ruom tawp chen a fe a. 9 Tlâng sîpa inthok chun ramri chu Neftoa tuikhurah a fe thla a, Efron tlânga khawpuihai a va paw a, chu taka inthok chun Bala (Kiriat Jearim) tieng a kawi thla a. 10 Chu zoah tlâk tieng inherin Bala-a inthokin Seir tlâng a pan a, Jearim tlâng (Kesalon) hmar tieng pangpêr hrawin, Bet Semes ah a fe thlâk a, Timna a tan tlang a. 11 Chu taka inthok chun Ekron hmar tieng pangpêr chu hrawin Sikeron tieng a'n her a, Bala tlâng a hraw a, Jabneel a tlung a, tuifinrietah a tawp. 12 Thlang tieng ramri chu Mediterranean Tuipui kam zar zar a nih. Chuong ang chu an sûngkuo zir ang peia Juda thlahai ramri huom sûng chu a nih. 13 A kuoma LALPAN thu a pêk angin, Josua chun Jefune naupa Kaleb chu Juda thlahai lai chun chanpuol a siempêk a, chu chu Kiriat Arba, Hebron an ti bok chu a nih. Arba chu Anak pu a nih. 14 Kaleb chun Anak naupasal pathum Sesai, Ahiman le Talmai hai chu Hebrona inthokin a hnot suok a. 15 Chu taka inthok chun Debir khuo, kha hmaa Kiriat Sefer tia an ko hlaka mihai chu a rûn a. 16 Kaleb chun, "Hi khuo latu tu chu ka naunu Aksa inneitir ka tih" a ta. 17 Kaleb unaupa Kenaz, chu naupa Otniel chun a lâk a, Kaleb chun a naunu Aksa chu a'n neitir ta a. 18 Otniel inah Aksa a hung inlawi chun, a pa kuoma ram hni dingin a pasal chu a'n fui a. A sabengtung chunga inthoka Aksa a hung tum chun Kaleb-in, "Iem ka thawpêk ding che?" tiin a lo indon a. 19 Ama chun, "I ditsakna vochuom ka hni a nih. Sim tieng ram i mi pêk ta si hin chu tuikhur khom mi pe sa ve rawh" a ta. Chuongchun, tuikhur chuon chung le tuikhur chuon hnuoi chu a pêk sa a. 20 An sûngkuo zir ang peia Juda thlahai rochan chu hieng ang hin a nih: 21 Edom ramri hrùl, sim tawp monga Juda hnamhai khawpui chang chu Kabzel, Eder, Jagur, 22 Kina, Dimona, Adada, 23 Kedes, Hazor, Itnan, 24 Zip, Telem, Bealot, 25 Hazor Hadata, Keriot Hezron (chu chu Hazor), 26 Amam, Sema, Molada, 27 Hazar Gada, Hesmon, Bet Pelet, 28 Hazar Shual, Beerseba, Biziothia, 29 Bala, Iim, Ezem, 30 Eltolad, Kesil, Horma, 31 Ziklak, Madmana, Sansana, 32 Lebaot, Silhim, Ain le Rimon, a rêngin khaw sawmhni pakuo le an khawperhai an nih. 33 Thlang tieng tlâng thuta khuohai chu: Estaol, Zora, Asna, 34 Zanoa, En Ganim, Tapua, Enam, 35 Jarmut, Adulam, Soko, Azeka, 36 Saraim, Adithaim le Gedera (Gederothaim), khaw lien sawm le pali le an khawperhai; 37 Zenan, Hadasha, Migdal, Gad, 38 Dilean, Mizpa, Joktheel, 39 Lakis, Bozkat, Eglon, 40 Kabon, Lahmas, Kitlis, 41 Gederot, Beth Dagon, Naama le Makeda, khaw lien sawm le paruk le an khawperhai; 42 Libna, Ether, Asan, 43 Ipta, Asna, Nezib, 44 Keila, Akzib le Maresa, khaw lien pakuo le an khawperhai; 45 Ekron le a sevela lobuk le khawper hai: 46 Ekron thlang tieng chu Asdod hnaia mi po po le an khawper hai; 47 Asdod khaw sevela lobuk le khawper hai; Gaza le a sevela lobuk le khawper hai, Aigupta Ruom chen le Mediterranean Tuipui kam chenin a nih. 48 Chun, tlâng ram tieng chu Samir, Jatir, Soko, 49 Dana, Kiriat Sana (chu chu Debir), 50 Anab, Estemo, Anim, 51 Gosen, Holon, le Gilo, khaw lien sawm pakhat le an khawperhai; 52 Arab, Duma, Esan, 53 Janim, Bet Tapua, Afeka, 54 Humta, Kiriat Arba (chu chu Hebron) le Zior, khaw lien pakuo le an khawperhai; 55 Maon, Karmel, Zip, Jutta, 56 Jezreel, Jokdeam, Zanoa, 57 Kain, Gibea le Timna, khaw lien sawm le an khawperhai; 58 Halhul, Bet Zur, Gedor, 59 Marat, Beth Anot le Eltekon, khaw lien paruk le an khawperhai; 60 Kiriat Baal (chu chu Kiriat Jearim) le Raba, khaw lien pahni le an khawperhai a nih. 61 Thlalèr tieng chu Bet Araba, Midin, Sekaka, 62 Nibsan, Chi Khawpui le En Gedi, khaw lien paruk le an khawperhai a nih. 63 Juda hnamhai chun Jerusalema um Jebuhai chu an hlu suok vong naw a, tu chen hin Jebuhai chu Judahai leh an la chêng hmunkhat zing a nih.

16

1 Josefa thlahai chanpuol chu Jeriko zawn, Jordan vadunga inthoka thlalèr hnai tieng, sak tieng Jeriko tuihmunah a suok a, Jerikoa inthok chun tlâng ramah Bethel (chu chu Luz) chenin a kai tung a, 2 Bethela inthok chun Atarot-a Ark-hai ram a fe thleng a, 3 chu taka inthok chun Jaflet-hai ram tieng panin thlang tieng an her thla a, Bet Horon chuonhnuoi chen a fe a, chu zoah Gezer tieng a fe a, tuifinrietah a suok a. 4 Chu po chu Manase le Efraim, Josefa thlahai chanpuol chu a nih. 5 An sûngkuo zir peia Efraim thlahai ramri chu hieng ang hi a nih: sak tienga an chanpuol ramri chu Astarot Adar-a inthokin Bet Horon chuonchungah, 6 tuifinriet chen a fe a. Chu taka inthok chun Mikmethat hmar tieng fein, Tanat Silo panin sak tieng an her a, Janoa chu a tan tlang a. 7 Janoat-a inthok chun Atarot le Naara-ah a fe thlak a, Jeriko a hraw a, Jordan vadungah a suok a. 8 Tapua-a inthokin ramri chu thlang tieng Kana vadung ruom a zui a, tuifinrietah a suok a. Chu chu an sûngkuo zir ang peia Efraim thlahai chanpuol ram chu a nih. 9 Chun, Manase thlahai chanpuol sûnga Efraim thlahai chanpuol dinga ruot hrang khawpuihai le an khawperhai khom chu a thang sa bok a nih. 10 Chun, Gezer-a um Kanan mihai chu an hnot suok vong naw leiin, tu chen hin Kanan mihai chu sinthawa sor lui dingin Efraim mihai lai an la um a nih.

17

1 Manase thlahai chanpuol chu hieng hi a nih. Manase chu Josefa nau lutîr a na, Manase nau lutîr chu Makir a na, Gilead mihai thlatu bul a nih. Makir chu mi râl hrât a ni leiin Gilead le Basan ram a nei a. 2 A chanpuol chu Manase thlahaiin an insem a, chuonghai chu Abiezer, Helek, Asriel, Sekem, Hefer le Semida hai an nih. Anni hi Josefa naupa Manase thla pasalhai chu an nih. 3 Manase naupa chu Makir, Makir naupa chu Gilead, Gilead naupa chu Hefer an nih. Hefer naupa Zelofehad chun nau nuhmei ngot a nei a, chuonghai chu Mahla, Noa, Hogla, Milka le Tirza an nih. 4 Anni chu thiempu Eleazar le Nuna naupa Josua le hotuhai kuoma chun an fe a, "Kan unauhai lai rochan mi pe ve dingin LALPA chun Mosie thu a pêk a nih" an ta. Chuongchun, LALPA thupêk angin Josua chun anni chu an pa unauhai lai chun chanpuol a pêk ve ta a. 5 Jordan râla mi Gilead le Basan ram bâka Manase thlahai chan chu biel sawm a nih; 6 pasal ang boka an naunuhaiin chanpuol an nei ve leiin Gilead ram chu Manase thla danghai chun an chang tah a nih. 7 Manase thlahai ramri chu Aserhai ramria inthoka Mikmetha le Sekem sak tieng inkâr a nih. Chu zoah Entapua chènghai huom sa dingin sim tieng a fe a. 8 Tapua sevela ram chu Manase thlahaiin an chang a, ramria um Tapua khawpui ruok chu Efraim thlahai ta a nih. 9 Ramri chu Kana vadungteah a fe thlâk a. Vadungte sim tienga khuohai chu Manase rama um ni sienkhom Efraim thlahaiin an chang a. Manase-hai ramri chu vadungte hmar tieng fein Mediterranean Tuipuiah a suok a. 10 Sim tieng Efraim-hai an um a, hmar tieng Manase-hai an um a, thlang tienga an ramri chu tuifinriet a nih. Aser hnamhai chu hmar thlangah an um a, Isakar hnamhai chu hmar sak tieng an um bok a. 11 Isakar le Aser ram hluo sûnga um Bet Shan le Ibleam le an sevela khuohai le Dor, Endor, Tanak, Megido le an se vela khuohai chu Manase thlahaiin an chang a. 12 Nisienlakhom, Kanan mihai chun um lui an tum tlat leiin Manase thlahai chun chuong khawpuia umhai chu an hnot suok thei naw a. 13 Israel thlahai an hung hrât hnung ruok chun anni rawi chu sinthawa sor dingin an inumtir a, an hnot suok fai vong ta nawh. 14 Chun, Josefa thlahai chun Josua kuomah, "Keini hnam hi LALPAN nasa takin mal a mi sawm a, kan tam tak êm êm vei leh, ieng tiziea rochung ding chanpuol khat le hmun khat chauh i mi ruotpêk bîk am a na?" an ta. 15 Josua chun an kuomah, "Chuonga in tam a, Efraim tlâng ram hi in ta dinga an chèp taluo a ni chun Periz-hai le Refaim-hai ram ngaw dâm khi umna dingin hang thiek ro chu" a ta. 16 Josefa thlahai chun, "Tlâng ram hi a'n chêp taluo deu a nih, phaia Kanan mi chênghai hlak chun thîr tawlailir an nei a, Beth-sean khawpuia umhai le Jezreel phai ruom le a sevel khuohai chun thîr tawlailir an nei fur bîk a nih" an ta. 17 Josua chun Josefa sûngkuo, Manase le Efraim thlahai kuoma chun, "In tam hle a, hrât khom in hrât bok a, chan khat ringot chu nei naw ti niu. 18 Tlângram khi in ta ding nîng a ta, ram ngawpui khom ni sien thiek unla, in thiek phâk chin chin chu in ta nîng a tih. Kanan mihai chun thîr tawlailir neiin hrât hle hai sienkhom, in la hnot suok vong ding annawm" a ta.

18

1 Israel thlahai po po chu an rêngin Silo khuoah an intuokkhawm a, chu taka chun Intuokna Puon in an zar a. 2 A ram chu an thu hnuoiah um ta sienkhom Israel thlahai laia hnam sarihai chun an chanpuol an la chang hri nawh. 3 Josua chun Israelhai kuomah, "LALPA in pi le puhai Pathienin a pêk ta chêu ram hi ieng chen am hluo loin in la nghâk ding a na? 4 Hnam tina mi pathum seng hung thlang suok unla, a ram va fang vel dingin tir suok ka ta, an ram hluo ding seng chanchin hung ziek an ta, chu zoah ka kuomah hung kîr nawk an tih. 5 A ram chu hmun sariah thè phot in ta, Juda thlahai chu sim tienga an chanpuolah um an ta, Josefa sûngkuohai chu hmar tienga an chanpuolah um an tih. 6 Ram chu hmun sariah thè unla, chu chu ziekin mi hung pe unla, hi taka hin LALPA ei Pathien hmaah thum lo vawrpêk ka ti chêu. 7 Levihai ruok chun nangni lai chan an nei ve naw a, LALPA thiempu nina sin hi an chanpuol a nih. Chun, Gad thlahai, Reuben thlahai le Manase hnam zâtve hai ruok chu Jordan râl sak tieng LALPA siehlaw Mosien an chanpuol seng a lo pêk ta kha" a ta. 8 Ram entu le a um dàn ziek thlatu dinghai an inthok suok lai chun Josuan, "Fe unla, ram chu va en chieng unla, a um dàn ziek thlain ka kuomah hung kîr nawk unla, Silo hmuna hin LALPA hmaah thum lo vawrpêk ka ti chêu" tiin thu a'n cha a. 9 Mihai chu an fe a, ram chu an va fang a, hmun sariah an the a, lekhabuah a khuo po po chu an ziek thlâk a, an riebûk Silo-ah chun an hung kîr nawk a. 10 Silo-a chun Josuan LALPA hmaah thum a lo vawrpêk a, chu taka chun an hnam inthe dàn ang peiin ram chu a sem a. 11 An sûngkuo zir ang peia ram sem dinga thum an vawr chu Benjamin thlahai chungah a tla hmasa tak a, an ramri chin chu Juda thlahai le Josefa thlahai inkâr a nih. 12 Hmar tieng panga an ramri chu Jordan vadungah a'n tan a, ramri chu Jeriko sîr hmar tieng a fe tung a, chu taka inthok chun thlang tieng panin tlâng ramah a fe tung pei a, ramri tawpna chu Bet-aven thlalèr a nih. 13 Chu taka inthok chun Luz (Bethel) sim tieng pangpèrah a fe a, chu taka inthok chun Bet Horon tlâng chuonhnuoia um Atarot Adar tlângah a fe thlâk a. 14 Bet Horon sim tieng tlâng bula inthokin thlang tieng pangah sim tieng panin a fe kuol a, Juda thlahai khawpui Kiriat-Baal (Kiriat-jearim) ah a tawp a, chu chu thlang tienga an ramri chu a nih. 15 Sim tieng ramri chu Kiriat Jearim thlang tieng kotsuoa inthokin a'n tan a, Neftoa tuikhurah a hung suok a. 16 Ramri chu Refaim Ruom hmar tieng, Ben Hinom ruom ep tlâng thuta chun a liem thla a, Jebuhai khawpui sim tieng pangpèr zuiin Hinom ruomah a fe thlâk a, En Rogel a zu sun a. 17 Chu taka inthok chun hmar tieng a kawi a, En Semes tieng a fe a, Adumim Kawn epa um Gelilot chen a tlung a, chu taka inthok chun Reuben naupa Bohan Lungphun a zuk sun a. 18 Bet Araba hmar tieng pangpèr zuiin Araba-ah a fe thlâk a. 19 Chu taka inthok chun Bet Hogla hmar tieng pangpèr a zui thlâk a, sim tienga Jordan vadung suo, Tuipui Thi hmar tieng litengsawlah a tawp a. Hi hi sim tieng ramri chu a nih. 20 Sak tieng panga ramri chu Jordan vadung a nih. Chuonghai chu an sûngkuo zir ang peia Benjamin thlahai chanpuol kil tina huoltu ramri chu a nih. 21 Benjamin thlahaiin an sûngkuo zir ang peia khuo an hluohai chu Jeriko, Bet-holga, Emek-keziz, 22 Bet-Araba, Zemaraim, Bethel; 23 Avim, Para, Ofra, 24 Kefar-Amoni, Ofni le Geba, khaw sawmpahni le an khawperhai; 25 Gibeon, Rama le Berot, 26 Mizpa, Kefira le Moza, 27 Rekem, Irpel le Tarala, 28 Zela, Haelep le Jebuhai khawpui (Jerusalem), Gibea le Kiriat, khawpui sawmpali le an khawperhai an nih. Chuonghai chu Benjamin sûngkuo ta dinga rochan chu a nih.

19

1 An thum vawr voi hnina chu Simeon thlahai le sûngkuohai chungah a tla a. An chanpuol chu Judahai ram sûngah a thang a. 2 Chuonghai chu Beersheba (Sheba), Molada, 3 Hazar Shual, Bala, Ezem, 4 Eltolad, Bethul, Horma, 5 Ziklak, Bet Markabot, Hazar Susan, 6 Bet Lebaot le Saruhen, khaw sawmpathum le an khawperhai dam; 7 Ain, Rimon, Ether le Asan, khaw li le an khawperhai le 8 hieng khuohai sevela khawpui po po, sim tieng rama Balat-Ber chenin. Chuonghai chu an sûngkuo zir peia Simeon thlahai chanpuol chu a nih. 9 Simeon thlahai chanpuol chu Juda thlahai chana mi a nih, an mamaw bâka lien an rochung leiin. Chuongchun, Simeon thlahai chun Judahai chan sûnga mi chanpuol chu an dong a nih. 10 Thum vawr voi thumna chu Zebulun hnam le sûngkuohai chungah a tla a. An chanpuol ramri chu Sarid chen a nih. 11 Thlang tieng panin Marala a pan a, Dabeset a sir a, Jokneam kawla varuom chen a tlung a. 12 Sarid-a inthokin sak tieng, nisa suokna tieng a'n her a, Kislot Tabor ram a tlung a, Daberat le Jafia chen a fe a. 13 Chu taka inthok chun sak tieng pan peiin Gat Hefer le Et Kazin-ah a fe a, Rimon-ah a hung suok a, Nea tieng a pan a. 14 Chu taka inthok chun ramri chu Hanathon hmar tieng panin an her kuol a, Ifta El ruomah a tawp a. 15 Hi bâka hin Katat, Nahalal, Simron, Idala le Bethlehem khuohai khom a thang sa. A rêngin khuo sawmpahni le an khawperhai an nih. 16 Chuonghai chu Zebulun hnam le sûngkuohai chanpuol khuohai le an khawperhai chu a nih. 17 Thum vawr voi lina chu Isakar hnam le sûngkuohai chungah a tla a. 18 An ramri chin chu Jezrel, Kesulot, Sunem; 19 Hafaraim, Sion, Anaharat, 20 Rabit, Kision, Ebez; 21 Remet, Enganim, Enhada le Bet Pazez a nih. 22 A ramri chun Tabor, Sahazuma le Bet Semes a tawk a, Jordan vadungah a tawp a, arêngin khaw sawmparuk le an khawperhai an nih. 23 Chuong khawpuihai le an khawperhai chu Isakar hnam le sûngkuohai chanpuol chu a nih. 24 Thum vawr voi ngana chu Aser hnam le sûngkuohai chungah a tla a. 25 An ram huop chin chu Helkat, Hali, Beten, Aksaf, 26 Alamelek, Amad le Misal an nih. Thlang tieng ramri chun Karmel le Sihor Libnat a zu tlung a. 27 Chu taka inthok chun sak tieng Bet Dagon tieng inherin Zebulun le Ifta El ruom fe thlengin hmar tieng Bet Emek le Neiel tieng a fe a, voi tieng pangah Kabul a fe thleng a. 28 Fe peiin Abdon, Rehob, Hamon le Kana sirin Sidon Lien chen a fe a. 29 Chu taka inthok chun ramri chu Rama tieng a'n her kîr a, kula inhuon Tura khuo a sir a, Hosa tieng a'n her a, Akzib bielah Mediterranean Tuipui a sun a, 30 Uma, Afek le Rehob a sir bok a. Arengin khaw sawmhni le pahni le an khawperhai an nih. 31 Chuonghai chu Aser hnam le sûngkuohai chanpuol khuohai le an khawperhai chu a nih. 32 Thum vawr voi rukna chu Nafthali hnam le sûngkuohai chungah a tla a. 33 An ramri chu Helep-a inthokin Zananmim-a saisaw thingkung lienah, Adaminekeb le Jamnia fe thlenga Nakum chen va tlungin, Jordan vadungah a tawp a. 34 Chu taka inthok chun ramri chu thlang tieng inherin Aznot Tabor-ah a fe a, chu taka inthok chun Hukok chen a fe a. Sim tieng Zebulun leh an inri a, thlang tieng Aser leh an inri a, sak tieng Jordan leh an inri bok. 35 Kula inhuon khuohai chu Zidim, Zer, Hamat, Rakat, Kineret, 36 Adama, Rama, Hazor, 37 Kedes, Edrei, En Hazor, 38 Iron, Migdal El, Horem, Bet Anat le Bet Semes a nih. An khaw hluo chu arêngin khuo sawmpakuo le an khawperhai a nih. 39 Chuonghai chu Nafthali hnam le sûngkuohai chanpuol khuohai le an khawperhai chu a nih. 40 Thum vawr voi sarina chu Dan hnam le sûngkuohai chungah a tla a. 41 An chanpuol ram huop sùng chu Zorah, Eshtaol, Ir Semes, 42 Salabin, Aijalon, Ithla, 43 Elon, Timna, Ekron, 44 Elteke, Gibethon, Balat, 45 Jehud, Bene Berak, Gath Rimon, 46 Mejarkon le Rakon bakah Jopa khuo sevela ram po po a nih. 47 Dan thlahai hin nuom elin an ram chu an hluo thei naw leiin Lesem khuo an hang rûn a, an lâk a, kawlhnâma an sukbohmang hnung chun an hluo a, an pu Dan hming chawiin Lesem chu Dan an inbûk a. 48 Chuonghai chu Dan hnam le sûngkuohai chanpuol khuohai le an khawperhai chu a nih. 49 Chuongchun, an chanpuol seng ding chu insema an ramri ding an thè fel hnung chun Israel thlahai chun Nuna naupa Josua chu anni lai chanpuol an pêk ve a. 50 LALPA thupêk angin, Efraimhai tlâng rama a khaw dit Timnat Sera chu an pêk a, chu taka chun khawpui a siem a, a um ta a. 51 Chuonghai po chu a nih Silo hmuna LALPA hmaa Intuokna Puon in kotah thum vawr a, thiempu Eleazar hai, Nuna naupa Josua hai le Israel thlahai laia hotuhaiin ram an lo sem dân chu. Chuong ang chun ram insem chu an zo tah a nih.

20

1 Chun, LALPA chun Josua a biek a, 2 "Mosie hmanga ka hril ta chêu ang khan, tu khom tum lawk lei ni loa tuol that palh chu thisen phuba la tumtu laka a him theina dingin, 3 a tuol tlânna ding khawpui ruotpêk dingin Israelhai chu hril rawh. 4 Chuong khawpui laia a ienga khom chun tlân a ta, khawpui lûtna kotkhàrah va ngîr a ta, chu taka khaw upahai hrieta chun a chanchin intlun a ta, anni chun khaw sûngah thuoi lût an ta, anni lai a chêng ve theina dingin a umna ding ruotpêk an tih. 5 Thisen phubalatu dingin a hung hnot a ni khomin a kutah an lo pêk ding a ni nawh, a tuolbawm chu a hmaa theidana nei loa pangpala a that a ni leiin. 6 Mipui rorêltuhai hmaa ngîra a chungthu rèl a ni hma le chuong laia chu khuoa thiempu chu a thi hma khat chun, chu khuoa chun a um zing ding a nih. Chu zoah a hung tlân suoksan khuoa chun ama ina ngei kîr nawk thei a tih ti hril rawh" a ta. 7 Chuongchun, Galili biel tlângrama Naftali-hai khuo Kedes dâm, tlâng rama Efraim-hai khuo Sekem dâm, tlâng rama Juda-hai khuo Kiriat Arba (Hebron) dâm chu an ruot a. 8 Jordan râl sak tieng chun Reuben-hai biela thlalèr tlâng zawla um Bezer dâm, Gilead biela Gad-hai khuo Ramot dâm le Basan biela Manase-hai khuo Golan dâm chu an ruot bok a. 9 Israel thlahai laia mi amanih anni laia um hnam dang mi amanih tu khom tum reng lei ni loa pangpala tuol thattu chu rorêltuhaiin a chungthu an rêl hma khat thisen phubalatu laka a him theina dingin, chuong khuo ruota hai chun a tuol tlàn thei a nih.

21

1 Thiempu Eleazar le Nuna naupa Josua le Israel thlahai laia hnam tin luhai kuoma chun Levi chia mi sûngkuo luhai chu an fe a. 2 Kanan rama Silo khuoah chun, "LALPAN Mosie hmangin kan umna ding khawpuihai le kan ran tlatna ding dai vela hlobet hmunhai mi pe dingin thu a lo pêk a nih" tiin an va hril a. 3 Chuongchun, LALPA thupêk angin, Israel thlahai chun an chanpuola inthokin hieng khuohai le a dâi vêlhai chu Levi chihai an pêk a: 4 A sûngkuo kuoa insemna dinga an thum vawr chu Kohat chungah a tla hmasa tak a. Levi hnama mi thiempu Aron thlahai chu Juda hnam le Simeon hnam le Benjamin hnam hai chanpuola mi khaw sawm le khaw thum an pêk a. 5 Kohat thla a danghai po chun Efraim hnam, Dan hnam le Manase hnam zâtve chanpuola inthokin khaw sawm an chang a. 6 Gerson thlahai chun Isakar hnam, Aser hnam, Nafthali hnam le Basana Manase hnam zâtve hai chanpuola mi khaw sawm le khaw thum an chang a. 7 Merari thlaa sûngkuohaiin Reuben, Gad le Zebulun hnamhai chanpuola inthokin khaw sawm le khaw hnih an chang a. 8 LALPAN thu Mosie a pêk tah angin, chuong khuohai le a sevela ran tlatna hmunhai chu Israel thlahaiin an chanpuola inthokin Levi hnamhai ta dingin an lo pêk a nih. 9 An thum vawr chu Levi chi, Kohat hnama mi Aron thlahai chunga chun a tla hmasa tak leiin, 10 hieng khuohai hi Juda hnam le Simeon hnam chanpuola inthokin an pêk a: 11 Judai tlângrama Anak pu Arba hming chawi khuo Kiriat Arba (Hebron an ti bok) le a dâi vel chu an pêk a. 12 A khaw sevèla lo hmunhai le khawperhai ruok chu Jefune naupa Kaleb rochan dingin an pêk a. 13 Aron thla thiempuhai chu tuol that palhai tlânna dinga inhumhimna khuo an ruot Hebron khuo bâkah Libna, 14 Jatir, Estemoa, 15 Holon, Debir, 16 Ain, Jita le Bet Semes khuohai le ran tlatna ding a dai vel, a rêngin khaw kuo chu Juda le Simeon thlahai chanpuola inthokin an pêk a nih. 17 Benjamin hnam chanpuola inthokin khaw li- Gibeon, Geba, 18 Anathot le Almon- hai chu ran tlatna hmun leh an pêk bok a. 19 Aron thla thiempuhai ta dinga khuo le a dai vela ran tlatna hmun an pêk po po chu khaw sawm le khaw thum a nih. 20 Levi chi, Kohat thla danghai po chu Efraim hnam chanpuola inthokin khuo an pêk a. 21 Chuonghai chu Efraim tlângrama tuol thathai tlànna dinga inhumhimna khuoa ruot Sekem, Gezer, 22 Kibzaim le Bet Horon khuohai le a dâi vêl ran tlatna hmun, arêngin khaw li a nih. 23 Chun, Dan hnama inthokin Elteke, Gibethon, 24 Aijalon le Gat Rimon, khaw li le a dâi vêla ran tlatna hmun an pêk bok a. 25 Manase hnam zâtvea inthokin Tanak le Gat Rimon, khaw hni le a dai vela ran tlatna hmun chu an pêk bok a nih. 26 Hieng khaw sawm le a dai vela ran tlatna hmunhai chu Kohat thla danghai ta dinga pêk a nih. 27 Levi chia mi Gerson hnamhai chu Manase hnam zâtvea inthokin tuol thathai tlànna dinga inhumhimna khuo an ruot Basan rama Golan khuo le Be Estara, khaw hnihai le a dai vel ran tlatna hmun chu an pêk a. 28 Isakar hnama inthokin Kishion, Daberat, 29 Jarmut le En Ganim, khaw li le a dai vela ran tlatna hmun chu an pêk a. 30 Aser hnama inthokin Misal, Abdon, 31 Helka le Rehob, khaw li le a dai vela ran tlatna hmun chu an pêk a. 32 Naftali hnama inthokin Galili biela inthoka tuol thathai tlânna ding inhumhimna khuo an ruot Kedes bakah Hamot Dor le Kartan, khaw thum le a dai vela ran tlatna hmun chu an pêk bok a. 33 Gerson hnam kuoma khuo le a dai vela ran tlatna hmun an pêk zât po chu khaw sawm le khaw thum a nih. 34 Levi chia mi Merari thlahai ta dinga an pêk po chu: Zebulun hnama inthokin Jokneam, Karta, 35 Dimna le Nahalal, khaw li le a dai vela ran tlatna hmun hai; 36 Reuben hnama inthokin Bezer, Jahaz, 37 Kedemot le Mephat, khaw li le a dai vela ran tlatna hmun hai; 38 Gad hnama inthokin Gilead biela tuol thathai tlânna dinga inhumhimna khuo an ruot Ramot, Mahanaim, 39 Hesbon le Jazer, khaw li le a dai vela ran tlatna hmun hai chu a nih. 40 Chuonghai chu Levi chia mi Merari thlahai chang chu a na, a rêngin khaw sawm le khaw hni a nih. 41 Israel thlahai ram sûnga Levi chihaiin khuo le a dai vela ran tlatna hmun an hluo po po chu khaw sawmli le khaw riet a nih. 42 Hieng khaw tina hin, a khaw lai khuoa khom, a dai velah ran tlatna hmun a um vong a nih. 43 Chuongchun, an pi le pua inthoka Israel thlahai kuoma LALPAN inkhâm meua pêk a tiem ram chu an hluo a, umhmun an khuor ta a. 44 LALPAN an thlatuhai kuoma inkhâm meua a lo tiem tah angin, hmun tinah muongna a pêk a, an hmèlmahai chu an kutah a pêk leiin anni hmaa thang thei tu khom an um nawh. 45 LALPAN Israel sûngkuo ta dinga thil tha a lo tiemhai po po chu a thlawn hrim um loin a hung tlung kim vong a nih.

22

1 Josua chun Reuben hnam, Gad hnam le Manase hnam zâtve hai chu a ko a, 2 an kuomah, "LALPA siehlaw Mosien thu a pêk taphot chu in zawm pei a, ka thupêkhai khom in zawm pei a, 3 hun sawt taka inthok khan voisun ni chen hin in unauhai thlathlam loin LALPA in Pathienin thaw dinga a ti chêu chu in hlen pei a. 4 Tu hin LALPA in Pathienin a lo tiem tah angin, in unauhai khomin muongna an lo chang ve tah leiin LALPA siehlaw Mosien Jordan râla in chanpuol dinga ram a lo pêk tah cheua chun in puon in tieng kîr nawk ta ro. 5 Amiruokchu, LALPA in Pathien chu hmangai a, a lampui po po hraw a, a thupêkhai chu zawm a, ama chu chel tlat a, lungril po po le thlarau po poa a rong in bawl zing theina dingin LALPA siehlaw Mosien dàn thu a pêkhai chêu kha fimkhur takin kengkaw tlat ro" a ta. 6 Josuan anni chu mal a sawm a, a'n fetir a, an in tieng an kîr nawk ta a. 7 Manase hnam zâtve chanpuol chu Basan ramah Mosien ram a lo pêk tah a, an chanpuol zâtve dang chu Jordan râl thlang tieng an unauhai lai Josuan ram a pêk a. 8 In tieng a'n kîrtir tawm chun Josuan, "In puon in tieng ran ruol tam tak leh, tangkaruo le rangkachak, dâr le thîr le silfèn tam tak leh hnienghnâr takin kîr nawk ta unla, in hmèlmahai laka in râllâkhai hi in unauhai leh insem tlâng ro" tiin malsawmnain a'n thla a. 9 Chuongchun, Reuben thla hai, Gad thla hai le Manase hnam zâtve hai chun Israel thlahai chu Kanan rama Silo khuoa chun màksanin, Mosie kuoma LALPA thupêk angina an ram chan Gilead ram tieng chun an kîr nawk ta a. 10 Kanan ram Jordan thlang tienga um Gelilot hmun an hung tlung chun, Reuben thla hai, Gad thla hai le Manase hnam zâtve hai chun vadung kamah maichâm ropui le langsàr tak el an siem a. 11 Kanan ram bul tak, Jordan thlang tieng, Israel thlahai rama um Gelilot hmunah Reuben thla hai, Gad thla hai le Manase hnam zâtve haiin maichâm an siem ti thu chu Israel mi danghai kuoma chun an hung hril a. 12 Israel pung khawmhaiin an lo an hriet chun, anni chu do dingin Silo khuoah an hung tlân khawm a. 13 Thiempu Eleazar naupa Finehas chu Israel thlahai chun Reuben thla hai, Gad thla hai le Manase hnam zâtve hai umna Gilead rama chun an tir a. 14 Ama ruol chun Israel hnam tina lu tak nina chel seng mi sawm an tir sa bok a. 15 Reuben thla hai, Gad thla hai le Manase hnam zâtve hai kuomah Gilead rama chun an fe a, an kuomah, 16 "LALPA mi pungkhawmhai po poin, 'Hieng el hin ieng tin am Israel Pathien laka in ringna chu a'n phet ding a na? Iengtin am LALPA chu nghatsana helin, nangni ta dingin maichâm chu in insiem el a na? 17 Peor-a an thil suol thaw hman kha a huntawk ta vei leh! LALPA mihai chungah hripui an leng hiela chu, tu chen khom hin kha taka ei bawsietna kha ei la tlèng fai zo naw a ni si a. 18 Tu hin LALPA chu in nghatsan nawk an ta naw maw? Voisun hin LALPA lakah in hel chun, zînga hin Israel sûngkuo chungah lungsen a tih. 19 In ram hluo hi a porche a ni chun, LALPA ram sûng, LALPA biekbûk umnaah hung um unla, ram chu ei intlâng el ding a nih. Amiruokchu, LALPA kan Pathien maichâm ti lo maichâm dang hrim hrim siem zawngin LALPA lakah hel naw unla, keini lakah hel bok naw ro. 20 Zera naupa Akan-in hluihlawn thila thupêk a bawsiet lei khan Israel mipui po po chungah lungsenna a tla a ni naw maw? A suolna kha ama chauin a thipui naw kha' an ti a nih" tiin an hril a. 21 Reuben thla hai, Gad thla hai le Manase hnam zâtve hai chun Israel hnam tin luhai kuoma chun, 22 "LALPA ropui chu LALPA Pathien a nih. LALPA ropui, LALPA Pathien chun a hriet. Israelhai khomin hre raw hai se. Hi kan thilthaw hi LALPA laka helna le bawsietna a ni chun, voisun hin mi hlà dêr naw ro. 23 LALPA nghatsan tuma keini ta dinga pumraw inthawina amanih, bu le bâl thilhlân amanih le inremna thilhlân inhlànna dinga maichâm kan insiem a ni chun LALPA ngeiin kan chungthu ngaituo raw se. 24 A nih, mi hlà teu naw raw se! Nakie hin in thlahaiin kan thlahai kuomah, 'Nangni hin LALPA, Israelhai Pathien hi in hmang phâk vena ding iem a um a? 25 Nangni Reuben thlahai le Gad thlahai, LALPAN nangni le keini ramri dingin Jordan hi a siem a na, LALPAA hin chanpuol in nei ve hrim hrim nawh' la hung ti hlauh rawi an ta, kan thlahai chu LALPA ti nachang hre loin siem pal an tih ti inlauna leia fimkhur thu hlaah hi thil hi kan thaw a nih. 26 Hi maichâm kan siem hi pumraw thilhlân inhlànna ding amanih le inthawina ding amania kan siem a ni nawh. 27 Chuong nêk hmanin, nangni le keini chun LALPA chu a hmun thienghlima ngei chawibiekin, pumraw thilhlân le inthawina thilhlânhai chu ei inhlàn lem hlak a nizie eini le ei thlahai inkâra inchikna dinga kan thaw a nih. Chuongchun, nakie hunah in thlahaiin kan thlahai kuomah, 'LALPA-ah chan ieng khom in nei ve nawh' an la hung ti nawna ding a nih. 28 Hi thil hi a hung tlung pal hlauh a ni khomin, kan thlahai chun, 'En ta u, ei thlatuhai khan LALPA maichâm ang ang an siem hi. Hi maichâm hi pumraw thil inhlànna ding le inthawina inhlànna dinga an siem a ni nawh; nangni le keini inkâra hrepuitu dinga an siem a nih' an la hung ti thei ding thil ngaituoa kan thaw a ni lem. 29 LALPA chungah helin, LALPA chu voisun hin nghatsan nawng kan ta, a biekbûk hmaa LALPA ei Pathien maichâm ti ngot naw chu pumraw thilhlân le inthawina thilhlân dang dang hai inhlànna dingin maichâm dang siem naw top kan tih" an ta. 30 Thiempu Finehas le a hungpui Israel hnam tin luhaiin Reuben thla hai, Gad thla hai le Manase thla chanve hai thukhawchang an hriet chun an lawm hle a. 31 Thiempu Eleazar naupa Finehas chun Reuben thla hai, Gad thla hai le Manase thla hai kuoma chun, "LALPA lakah in lo hel nawzie le LALPA chu voisun hin ei kuomah a um ti ka hriet ta a, LALPA khomin Israelhai a hrem naw ding a ni chuh" a ta. 32 An inbiek zo chun thiempu Eleazar naupa Finehas le hotuhai chu Reuben le Gad thla hai umna Gilead-a inthok chun Kanan ram tieng an kîr nawk a, Israelhai kuomah an thu hawn chu an ripawt a. 33 An ripawt an hriet chun an lawm hle a, Pathien an inpâk a, Reuben le Gad thla hai umna hang rùn a, sukchimit vong ding ti thu hrim an hril ri ta nawh. 34 Reuben le Gad thlahai chun maichâm hmingah Ed an inbûk a, chu chu 'LALPA chu Pathien a nizie eini inkâra hrepuitu a nih' tìna a nih.

23

1 LALPAN Israelhai chu an kawl le kienga hmèlmahai laka inthoka sawt rei muongna a pêk hnung chun Josua khom hung upain a tar ta hle a. 2 Josua chun Israel upa hai, thuoitu hai, rorêltu hai le hotu hai chu a ko khawm a, an kuomah, "Ka upa tain ka kum khom a lo tam ta hle a. 3 LALPA in Pathienin hieng laia hnamhai chunga nangni leia a thaw dânhai kha in hmu a, LALPA in Pathien chun ama ngeiin a dopêk chêu a ni kha. 4 Sak tieng Jordan vadung le thlang tieng Tuipui Lien chen inkâra chêng hnam ei hne tahai le ei la tukdol lohai umna ram chenin in ram chanpuola dingin ka ruot fel vong tah kha hre zing ro. 5 Anni chu in hmaa inthokin LALPA in Pathien ngei chun hnot suok vong a ta, in mithmu ngeiah nam dok tawl a ta, LALPA in Pathienin a tiem chêu ang khan an ram chu hluong in tih. 6 "Chuleiin, hrât takin um unla, Mosie dàn lekhabua chuong po po hi voi tieng amanih chang tieng amanih in pêtsan nawna dingin fimkhur takin zawm ro. 7 Nangni laia hnam la umhai leh hin inpolsop naw ro; an pathien hminghai lam naw unla, an pathien hming salin inkhâm naw unla, an rong bawl naw unla, an hmaah bokkhup bok naw ro. 8 Tuta chena in um ang hin, LALPA chu chel nghet tlat ro. 9 LALPA chun in hmaa hnam ropui le hrât tak tak hai a hnotsuokpêk chêu a, nangni hmaa thang thei voisun ni chen hin tu khom an um nawh. 10 A tiem tah angin LALPA chun in hmèlmahai a dopui chêu leiin nangni laia mi pakhat khomin a sâng tel in hnot zâm el a ni khah. 11 Chuleiin, LALPA in Pathien hi hmangai dingin fimkhur ro. 12 "Amiruokchu, LALPA chu in nghatsan a, hieng hnam tam tak, nangni laia la umhai leh hin inkeizap a, nuhmei pasala in innei tuo a, in inkoppui vai chun, 13 LALPA in Pathienin in hmaah hieng hnamhai hi hnotsuokpêk ta naw ni chêu ti hre chieng ro. LALPA in Pathienin a pêk chêu ram tha taka inthoka a sukchimit vong hma khat chu anni chu in ta dinga bil le châng, in ruongzâng ta dinga vuokna hmol, le in mit ta dinga hling hung ni lem an tih ti chieng takin hre ro. 14 "Tu hin leilung dàn angin kei chu ka liem ve ding a ni tah. LALPA in Pathienin in chungchâng thua thil tha a tiemhai po po a tlung kim naw pakhat khom a um nawh ti lungril le ngaituona po poin in hriet. A tiem taphot chu a hung tlung kim vong a, pakhat khom inkhêl a um nawh. 15 Amiruokchu, LALPA in Pathienin thil tha a tiemhai po po a hung tlung kim tah ang bok hin, LALPA in Pathienin hi ram tha tak a pêk cheua inthoka a sukbohmang vong hma khat chêu chun LALPAN thil tha lo in chunga hung tlung thei a hrilhai po po chêu khom kha la hung intlungtir a tih. 16 LALPA in Pathienin a thuthlung zawm dinga thu a pêk chêu chu bawse a, ama chu fesan a, pathien danghai rong bawl a, an hmaah in kûn vai chun, LALPA lungsenna chu in chungah inling a ta, ram tha tak a pêk cheua inthok hin sukbohmang nghal a ti chêu" a ta.

24

1 Josua chun Israel hnam po po chu Sekemah a ko khawm a, Israel upahai, thuoituhai, rorêltuhai le hotuhai chu a'n kotir vong a, Pathien hmaa chun an hung inlang a. 2 Josua chun mi po po kuomah, "Hieng hin LALPA, Israel Pathien chun a hril: 'Tiena tlânga in thlatuhai, Abraham le Nahor pa Tera chen kha, Vadungpui khêl tieng an um a, pathien dang an biek hlak a. 3 Amiruokchu, in pu Abraham chu a umna Vadungpui khêla inthokin ka thuoi suok a, Kanan ram sûng po po-ah ka thuoi a, chi thla tam tak ka pêk a, Isak khom ka pêk a ni kha. 4 Isak-a inthokin Jakob le Esau ka pêk nawk a. Seir tlângram chu Esau chanpuol dingin ka pêk a, Jakob le a nauhai ruok chu Aigupta ramah an fe thla a. 5 "'Chun, Mosie le Aron ka tir a, Aigupta ram chu thil mak thawa ka hrem zo hnungin ka thuoi suok chêu a. 6 Aigupta rama inthoka ka thuoi suok chêu hnungin tuipui in va tlung a, Aigupta mihai chun in thlatuhai chu tawlailir le sakor chung chuong mihai leh Tuipui Sen chenin an hung hnot a. 7 Anni chun thangpuitu dingin LALPA an ko a, Aigupta mihai le nangni inkâra chun thimpui ka'n tlâktir a; chun, anni chu tuipuiin ka'n tuomtir a, a chim pil ta vong a. Aigupta mihai chunga ka thaw po po chu mit ngeiin in hmu vong a ni kha. Chu zoah thlalerah hun sawt tak in khawsa a. 8 " 'Chun, Jordan sak tienga um Amor mihai ramah ka thuoi tlung chêu a. An lo do chêu a, sienkhom in kutah ka pêk tawl a. In mithmua ngei ka sukbohmang tawl a, an ram ka lakpêk a. 9 Moab lal Zipor naupa Balak-in a do ding lai chêu khan tongsie inphurtu ding cheuin Beor naupa Balaam chu a ko a. 10 Amiruokchu, Balaam thu chu ka ngaithlâkpêk naw a, nangni mal a sawm ta lem hlauh chêu a, a kuta inthokin ka sansuok chêu a ni kha. 11 "'Chu zoah Jordan in kàn a, Jeriko in hung tlung a. Jeriko khuohai chun an lo do chêu a, chuong ang bokin Amor mi hai, Periz mi hai, Kanan mi hai, Hit mi hai, Girgas mi hai, Hiv mi hai le Jebu mi hai chun an do chêu a, sienkhom in kutah ka pêk tawl vong a. 12 In hmaah khuoingal hon ka tir a, in hmaah anni chu an lo hnot hmang a, Amor lal pahnihai ngei khom kha, in kawlhnâm le in thalngul leia zâm an ni nawh. 13 Chuongchun, in thaw sawl thak lo ram le nangni bawl ni dêr lo khawpuihai ka pêk chêu a, chu taka chun in um a; in chìng sawl khom ni lo grêp huon le oliv huona mi in fâk a ni hi' tiin. 14 Josua chun a hril pei a. "Chuleiin, LALPA chu ti unla, titakzet le indik takin a rong bawl unla, in thlatuhaiin Vadungpui râl le Aiguptaa an biek hlak pathienhai kha pei hawn vong unla, LALPA rong chauh bawl ro. 15 LALPA rongbawl hi tha lo awma hrie in um a ni chun, tu rong am in bawl ding, Vadung râla in pi le puhaiin an rong an bawl hlak pathienhai rong am, annawleh tuta in umna Amorhai rama an pathienhai rong lem am in bawl ding ti voisun hin thlang ro. Kei le ka sûnghai ruok hin chu LALPA rong a nih kan bawl ding" a ta. 16 Mipui chun, "LALPA Pathien màksana pathien danghai rong kan bawl chu thil hnai lo a nih. 17 LALPA kan Pathien ngei chu annawm keini le kan thlatuhai Aigupta bawia inthoka mi thuoi suok a, kan mithmu ngeia thilmak nasa tak thaw a, kan inzin sûng po po le lampuia hnam tam tak kan pal tlanghai laka khom mi huolhimtu chu. 18 LALPA chun kan hmaah hnam po po, chu rama um Amor-hai ngei khom chu, a hnot suok vong a nih. Chuleiin, keini khomin LALPA rong a nih kan bawl ding; ama chu kan Pathien a ni si a" tiin an don a. 19 Josua chun mipui kuomah, "LALPA rong chu in bawl thei ngùt dim maw! Ama chu Pathien thienghlim a na; ama chu Pathien thîkthu sie a nih. In helna le in suolnahai ngaidam naw nih. 20 LALPA chu nghatsan a, ram dang mi pathienhai rong in bawl vai chun, in chunga a that zing lai hin hung ngha lêt thut a ta, in chungah sietna intlunin sukbohmang a ti chêu" a ta. 21 Mipuihai ruok chun Josua kuomah, "Ni lo e, LALPA rong a nih kan bawl ding chu" an ta. 22 Josua chun, "LALPA rongbawl inthlang lem thua hrepuitu chu nangni ngei hi in nih" a ta. Mipui chun, "Ni e, hrepuitu kan nih" tiin an don a. 23 Josua chun, "Chuong a ni leh tu hin ram dang mi pathien umhai po po chu inthiel fai vong unla, LALPA, Israel Pathien kuoma chun in lungrilhai pe ro" a ta. 24 Mipuihai chun, "LALPA kan Pathien rong bawl kan ta, a thu zawm pei kan tih" an ta. 25 Chu ni chun mipuihai ta dingin Josua chun thuthlung a siem a, Sekema chun an zawm ding thupêk le dânhai chu a pêk a. 26 Hieng thupêkhai hi Josua chun Pathien Dânbu-ah a ziek thlâk a. Chun, lung lien tak a lâk a, LALPA hmun thienghlim bul saisaw kung hnuoia chun a phun a. 27 Mipui kuoma chun, "En ta u, hi lung hi ei thu mi hrepuitu ni raw se. LALPAN ei kuoma thu a hril po po kha hi lung hin a hriet vong a. LALPA lakah in ringum naw chun hi lung hi nangni kâra hrepuitua ngîr ding chu a nih" a ta. 28 Chu zoah Josua chun mipuihai chu anni chanpuol ram sengah a'n kîrtir a. 29 Chu hnunga chun Nuna naupa Josua, LALPA siehlaw chu kum za le sawm mi niin a thi a. 30 Gaza tlâng hmar tieng pang, Efraim tlâng rama ama chanpuol ramri sûng Timnat-sera hmuna chun an phùm a. 31 Josua dam sûng po le ama nêka dam sawt upahai, Israelhai ta dinga iengkim LALPAN a thawpêk dàn tonhriettuhai an la dam sûng po chun Israelhai chun LALPA rong an bawl hlak a. 32 Chun, Israel thlahaiin Aigupta rama inthoka Josefa ru an hung hawn tung chu Sekem khuoa hmun, Sekem pa Hamor nauhaia inthoka Jakobin tangka zaa ram a'n chawka chun an phùm a, chu hmun chu Josefa thlahai rochanin a hung um ta a nih. 33 Aron naupa Eleazar khom chu a thi a, Efraim tlâng rama ama puola hmun an pêk, a naupa Finehas rochung tlânga chun an phum a.