1 Isu Krista siehlaw le Jakob unaupa Juda chun, Pa Pathien lunginsietna le Isu Krista vèng himnaa um, kohai chu chibai ka bûk chèu. 2 Lunginsietna dàm, inremna dàm, hmangaina dàm in chungah tam tak vûrin um raw se. 3 Sandamna ei dong tlàng chungchang thu hi in kuoma hung ziek châk êm êm hlak lang khom, Pathienin a mi thienghlimhai kuoma ringna thu tum khata a lo inkol nghettir tah kha tan tlat dinga infuina thu chu mâkmawa ngaiin in kuomah ka hung ziek ta lem a nih. 4 Nangni lai hin mi thenkhat, kha hmaa thiem naw chang dinga ruot an ni thu zieka lo um tahai kha, an inzep rûk a. Anni hi Pathien ngaisak lo mi an ni a, lunginsietna chu an hurnaa inhmang dinga phalna petu angin an inlet hlauh a, ei Hotu tak le Lalpa nei sun Isu Krista chu an hnawl bok a nih. 5 Hieng thil hi in hriet tah sa vong ni sienkhom, inhriettir non chêu ka nuom a nih. Lalpan Aigupta rama inthoka Israel mihai a san suok khan, anni laia ringnawtuhai chu a hnungin a sukbohmang a. 6 Vàntirkohai khom an umna suoksana an sin zàmsanhai chu an chung thu Rorêlna Ni ropuia ngaituo dingin, chatuon thîr khaidieta khitin thim hnuoiah a sie a. 7 Chuong ang bokin Sodom le Gomora khuohai khom, an sè vel khuohai leh, hurna tirdakuma an inhmang hnung khan, chuong ang thawtuhai chu kumkhaw hremhmuna hrem an ni ding thu vauh lawkna dinga hmangin, meia hrem an ni kha. 8 Chuong ang char chun, hieng zêla um anga inhrilhai hin an taksa an sukporchè a, thuneituhai an poisa naw a, vàn mihai an hrilsiet a. 9 Mikael, vàntirko chunghnung tak hmanin, Diebol le Mosie ruong chungchanga an insêl buoi lai khan, tongsie hmanga hal a nuom naw a, "Lalpan hal lem raw se che" a ti el lem a ni kha. 10 Hieng mihai ruok hin chu an hriet thiem naw taphot an hril siet a; ngaituona nei lo, ramsahai anga pienvar zui lemtu an ni leiin, mani an insuksiet hlak. 11 Lungsiet chu an va um de aw! Kaina lampui an hraw a, tangka hnotin Balaam suolna lampuia chun an tlân a, Kora angin an hel a, an bohmang ve tah! 12 Chuong mihai chu hmangaina ruoi sukhmêlhemtu an ni a, inzakna hmu phak dêr loin nangni lai ruoi an kîl ve a, an fâk tuom tuom a, berampu, mani chauh insukkhoptuhai ang an nih. Sûm tui pai lo le favâng thing, ra nei lo, a zung puma tlu kar tah, voi hni thi non ta ang chu an nih. 13 Inhuom bût bûta tuipui a'n sok anga mani muolphona dinga phul bût bûta insok hlak mi le arasi vâkvaihai, kumkhuoa an chèngna dinga thima khom thim sa tak an huolpêkhai ang chu an ni bok. 14 Adam thla fe peia a pasarina Enok chun hieng mihai chungchang thu hi a lo hril lawk a, "En ta u, Lalpa chu a mi thienghlim sâng tam tak leh a hung ie. 15 Pathien ngaisak nawhai po poin Pathien ti loa Pathien ti naw zawnga thil an thaw po po le Pathien kal zawnga thu na tak tak an hrilhai po po chungthu chu rêl dingin a hung a nih. " tiin. 16 Chuong mihai chun chierna ding le soisèlna ding chauh an zong a, an châkna suol chauh an hnot a, mani an inhril sathâu a, an chan hlawkna dinga chu a derin mi an inpâk luom hlak. 17 Dittakhai, nangni ruok chun ei Lalpa Isu Krista tirkohai thu hril lawk kha hre zing ro. 18 "Hun nuhnunga chun cheksoltuhai, Pathien ngaisak loa mani chàkna ang peia khawsa hlak mi la hung um an tih" ti an hril tah chêu kha. 19 Chuonghai chu inthèna suksuoktu, tisa mi, Thlarau nei nawhai an nih. 20 Dittakhai, nangni ruok chu in ringna thienghlim taka chun inrem nghet unla, Thlarau Thienghlimin tongtai ro. 21 Pathien hmangainaa chun chêng zing unla, chatuon hringnaa thuoi lûttu ding chèu ei Lalpa Isu Krista lunginsietna chu nghâk ro. 22 Ringduophai chu lunginsiet unla, 23 meia inthoka san suok ngaihai chu hnûk suok nghal ro. Thenkhat ruok chu tì pumin lunginsiet unla, an pang tirdakumin a tawk an silfèn chen khom chu ten hle ro. 24 Tlu lo dinga vêng theitu chêu, a ropuina hmaa soisèl bo le hlim êm èma inngirtir theitu chêu, 25 Pathien um sun, a mi sandamtu kuoma chun, ei Lalpa Isu Krista zàrah, ropuina hai, inlalna hai, thilthawtheina hai, thuneina hai, hun fe tah po poa inthoka tuta le chatuon chenin um pei raw se. Amen.