1

1 Israel lal Davida naupa Solomon thuvarhai chu: 2 Varna le inchûktirna tha dong theina ding le thu inril hriet thiem theina ding dâm, 3 Var taka khawsak dàn dâm, indik tak le thlei bîk nei loa ro rêl thiem theina ding dâm, 4 Mi mawlhai sukvar a, hrietna le fîmkhur taka remruot thiemna thalaihai pe ding dâm, 5 Mi varhan ngàithla a, hrietna an sukpungna ding dâm, hrietthiemna nei mihaiin thuoitua an hmang theina ding dâm, 6 Thuvar hai, tekhinthu hai, mi varhai thu le hla khirh hai an hriet thiem theina ding dâmin. 7 LALPA ti hi hrietna tobul a nih, Mi invêthai ruok chun varna le inchûktirna chu an hmusit hlak. 8 Ka naupa, i pa zirtirnahai che hi ngàithla la, I nu inchûktirna khom nghatsan naw rawh. 9 I lu cheimawitu tonlairang nîng a ta, I rîng mawitu thî ni bok a tih. 10 Ka naupa, mi suolhai zawr thlûkin um naw rawh. 11 "Hung rawh, thisen insuo dingin, Anni chu inchân ei ta, Poi tawk lohai chu lambun ei ta, 12 Thlàn ang elin anni rawi chu, A hring pumin dol vong ei tih, Khuorkhurûma tlahai ang elin; 13 Ro hlu tam tak hmûng ei ta, Ei thil rokhaiin ei inhai sungsip ei tiu; 14 Keini tieng hin hung thang la, Poisa bawm intâwm ei tiu"Tia an zâwr chê khomin, 15 Ka naupa, anni lai thang ve naw la, An lampui hraw ve naw rawh. 16 Thil suol hnotin ke an pên a, Thisen insuo dingin an kut a tuonrang. 17 Vatêhai hmù lai zing a, Lèn châng kam chu a hlawk nawh. 18 Chuong mihaiin an inchân chu, Anni thisen bok a na, Mani inlambun an nih. 19 Hlawkna indik lo hnottuhai chu, Chuong ang chu an tawpna a nih, A neituhai hringna ngêi a làkpèk hlak. 20 Kotthlêr le tuolzawla hai, Varna chun tlâng a'n sam a; 21 Kotthlêr lûn lai a khêk a, Khawpui kotsuoah thu a hril: 22 "Mi mawlhai, ieng chen top am, In la mawl zing ding a na?angni varna deusawtuhai, Ieng chen am in deusaw ding? 23 Ka zilna cheu ngàithla unla chu, Ka lungril nangni tieng hongin, Ka thu ka hril ding cheu a ni bah! 24 Kuta hûiin ka ko cheu a, In mi ûksak nuom si nawh. 25 Ka thurawn la nuom lo a, Ka zilna in pom naw leiin, 26 Siet in tuok pha leh innui ka ta, Vàngduoinan a tlâkbuok pha cheu, Ka nuisaw ve ding cheu a nih; 27 A nih, thlipui anga a nuoi pha cheu, Thawngaleivir anga a làk pha cheu, Lungngai buoinan a chìm pha cheu, 28 Mi ko in ta, don naw ning cheu; Mi zong in ta, mi hmu naw ti niu. 29 Hrietna chu in theida a, LALPA in ti nuom naw a, 30 Ka thurawnhai pom nuom lo a, Ka zilnahai in hmusit leiin, 31 In nun rà chu fa tâng in ta, In remruot chun insukkhop in tih. 32 Mi mawlhan an mawl invaina, An la thipui ding a na, Invêthan an ngai sukngamna, An la sietpui bok ding a nih. 33 Ka thu ngàitu chu him a ta, Sietna hrim hrim ti ve loin, Lungmuong takin khawsâng a tih.

2

1 Ka naupa, ka thuhai hi pom la, 2 Varna tieng i na daw la, Hre thiem dingin i lungril pe rawh. 3 Thu ril hriet theina chu zong la, Hriet thiem theina hni hlak rawh. 4 Tangkaruo anga zonga, Ro phùm rûk anga i dap chun, 5 LALPA ti nachang hung hre-in, Pathien hrietna man suok i tih. 6 Varna petu chu LALPA a na, Hrietna le hmu fûk theina chu, Amaa inthoka suok a nih. 7 Mi ngîlhai ta dingin hlawtlingna, A lo sêk khawmpêk hlak a, Indik taka kalchawituhai ta din, Ama chu an phaw a ni bok. 8 Mi indikhai kalchawi a vèngpêk a, Ama ringtuhai lampui a hum hlak. 9 Chuongchun, thil fel, indik le inlai, Lampui tha tinrêng hung hrieng i tih. 10 Varna chu i lungrilah hung lût a ta, Hrietna chun i nun sukinhoi a tih. 11 Fimkhur thiemnan enkai a ti che a, Hrietthiemna chun vêng a ti che. 12 Mi rilohai lampuia inthok le Thu teplo hril hmanghaia inthokin, Varna chun san suok a ti che. 13 Anni chun lam ngìl pètsanin, Lampui inthimah an lùt a; 14 Thil tha naw thaw an hlimpui a, Suol hèm kawia um an lawm bok. 15 An lampuihai a kikawi a, Suol tieng awn tlat mi an nih. 16 Kam thluma lawithlèmtu che, Nuhmei suol lakah vêng a ti che; 17 Pathien hmaa a thu tiem ngainêp a, A vàng lai koppui lêrsantu a nih. 18 A in tieng pan chu thìna a na, A lampui chun mithi khuo a sun. 19 A in pantuhai chu tu khom, An hung kîr nawk tah ngai naw a, Hringna lam an paw ta ngai nawh. 20 Mi thahai lampui chu hraw la, Mi felhai lampuiah kal chawi rawh. 21 Mi ngîlhai chun ram hluong an ta, Dem kai lohai chu chêng zing an tih. 22 Mi rilohai chu sàt thlâk nîng an ta, Phatsantuhai chu phawi hmang nîng an tih.

3

1 Ka naupa, ka zirtirna hi theinghil naw la, Ka thupêkhai i lungrilin vong tlat rawh. 2 Chuongchun sawt tak dam i ta, Vàngneina vûrin um i tih. 3 Hmangaina le ringumnahai, Inthlà ngai hrim hrim naw la, I rîngah hlì zing hlak la, I lungril phêkah ziek rawh. 4 ​Pathien le mihriemhai lakah, Ditsakna le hming tha hlawng i tih. 5 I lungril po poin LALPA ring la, I hrietnaah innghat naw rawh. 6 I thilthaw taphotah ama hre la, I lampui suktluongpêk a ti che. 7 Mani var inti ngai naw la, LALPA tì la, suol màksan rawh. 8 I taksa'n hrisel phang a ta, I rùhai khom sukhràt a tih. 9 I thil neiin LALPA chawimawi la, I tharsuok hmasahai po po khomin; 10 Chuongchun, i bu in sung vûm a ta, I dawnbèl uoiin tharin sung sip a tih. 11 LALPA thununna chè chu, Ka naupa, ngainêp naw la, A zilna chè khom theidà naw rawh. 12 Pain a nau dit a thunun angin, LALPAN a hmangaihai a zil hlak. 13 Varna hmu phâktu chu a hamtha, Hrietthiemna nei phâktu khom. 14 Tangkaruo nei nêkin a hlawk a, Rangkachak nêk daiin a hlu lem. 15 Lunghlu rubi nèkin a hlu lem a, Duthusàm ieng khomin a tluk nawh. 16 A chang tieng dam sawtna a um, A voi tieng hausakna le ropuina. 17 A lampuihai chu a hlimum a, Thlamuongna lampui vong a nih. 18 A cheltu din hringna thing a na, A pomtu taphot hamthâng an tih. 19 LALPA chun varna hmangin, Leihnuoi bulthut a phûm a, Hrietna hmangin vànvèl a'n din. 20 A hrietnan li inthûkhai a sukthe a, Sûm hmangin daidaw a'n tlâktir. 21 Bûk thiemna le fimkhur thiemna, Ka naupa, vong tlat hlak la, I hmu phâk loah inthlà naw rawh. 22 I nun sukhringtu nîng a ta, I rîng cheimawitu ni bok a tih. 23 Nghet takin kal chawi i ta, I sir inphet ngai naw nih. 24 Ti loin zâl hmun rem i ta, Imu inhnik takin in i tih. 25 Mi suolhan sietna an tuok ang, Tuok ve thut inlau naw rawh. 26 LALPAN vêng tlat a ti che a, I ke chânga awk phal naw nih. 27 I thaw thei thil a ni phot chun, Mamawhai pêk di'n i thil tha nei, Inro ngai hrim hrim naw rawh. 28 Nuoma i pèk thei zing si, "Zîngah hung la, pêng ka ti che"I tuolbawm kuomah ti naw rawh. 29 Ngàingam taka i bula um, I tuolbawm phier rûk naw rawh. 30 I poi ieng khom tawk lohai chu, A san boin hêk ngai naw rawh. 31 Mi nunrawng inhnar naw la, A lampui hraw ngai naw rawh. 32 LALPAN mi lûtinle a theida a, Mi ngîlhai ruok chu a ringzo. 33 Mi rilo sûngkuo chungah, LALPA tongsie a fu a, Mi fel sûngkuo chunga ruok chu, Malsawmna a vur lem hlak. 34 Chapohai chu a hmusit a, Inngàitlawmhai zàngàina a pêk. 35 Mi varin chawimawina rochung a ta, Mi invêtin muolphona chang a tih.

4

1 Ka nauhai, in pa zirtirna hi ngàithla unla, Hre thiem dingin ngaiven tha ro. 2 Inchûktirna tha ka pêk cheu hi, Ka zirtirna nghatsan naw ro. 3 Ka pa inah tlanglakte ka ni lai, Ka nu nau mal duot ka nih. 4 Hieng hin ka pa'n a mi zirtir a:"Lungrilin ka thuhai hi vong zing la, Ka thupêkhai zawm la, hringpui i tih. 5 Varna nei la, hrietthiemna nei rawh; Ka thuhai hi theinghil naw la, Pètsan ngai hrim hrim naw rawh. 6 Varna nghatsan ngai naw la, Humhim a ti che a; Ngàina rop hlak la, Vêng zing a ti che. 7 Varna nei hi a poimaw tak a, Chuleiin, varna nei rawh; Thil dang ieng po nêk khomin, Hrietthiemna lungvar chu thlang rawh. 8 Ngàihlu la, chawisâng a ti che, Pom la, chawimawi a ti chê. 9 Tonlairang intontir a ti che a, Lallukhum ropui inkhumtir a ti chê. 10 Ka naupa, ka thu ngàithla la, Ka thu hril che hi pom tlat la, Chuongchun dam sawt phàng i tih. 11 Varna lampui ka kawkhmu che a, Lam ngîlah ka thuoi che hi. 12 I pheikhài sukzâng a ta, Tlân rak la khom tlu naw ti nih. 13 Ka zirtirna hi chel tlat la, Inthlàdà ngai dèr naw rawh; Vong tlat rawh, i hringna a nih. 14 Mi rilohai lampui sir naw la, Mi suolhai lampui hraw naw rawh. 15 Pumpel la, hraw naw rawh, Nghatsan la, i lam hrawa chun fe rawh. 16 Suol thaw lo chun an in thei naw a, Mi an sukthlûk hmâ khat chu, An imu hrim a suok thei nawh. 17 Rîtlona hi an bu ring a na, Nunrawngna hi an uoiin a nih. 18 Mi felhai lampui ruok chu, Zîng ni zung ang hi a na, A hung êng zuol deu deu a, Nisa a hung suok ang hi a nih. 19 Mi suolhai lampui ruok chu, Thim sà tak ang hi a na, An insuina khom an hriet nawh. 20 Ka naupa, ka hril hi ngàiven la, Ka thuhai hi ngàithla ngun rawh. 21 Hmû phâk loah inthlà naw la, I lungrilah vong tlat hlak rawh. 22 A hmutu ta di'n hringna a na, A taksa ta di'n hriselna a nih. 23 Thil dang po po nêk khomin, I lungril vêng fimkhur rawh, Hringna hnâr a ni si a. 24 Tong chaltlài hmang ngai naw la, Thu porchè hril bànsan rawh. 25 Hma tieng tlûn takin en la, I hma zawn bi ngar ngar rawh. 26 I lampui ding en ngun la, I kalchawi khom tluong a tih. 27 Voi tieng chang tieng pêt naw la, Suol lakah i kè vêng tha rawh.

5

1 Ka naupa, ka varna thu hi ngàiven la, Thu ril ka hril hi ngàithla rawh, 2 Fîmkhur thiem theina nei a, I hmûrin hrietna a vong theina dingin. 3 Uire nu hmûrah khuoizu a far a, Sahriek nêkin a dang a'n nàl lem. 4 Sienkhom, a tawp tieng ruok chu, Sairam khâkin a tong a kha a, Kawlhnâm ngeituo angin a ngei. 5 Thìna tieng panin ke a pên a, A lampui chun thlàn khur a sun. 6 Hringna lam hraw a tum naw a, Lam kikawi indik lo a hraw a, Ama hlak chun a hriet si nawh. 7 Chuong chun tu hin ka naupahai, Ka hril cheu hi ngàithla unla, Ka hril cheu hi pêtsan naw ro. 8 A kawl hnaiah fe naw unla, A tuol kot khom va hnai naw ro. 9 In hrâtna tak chu mi dang pein, Nunrawng kutah thi pal rawi in tih; 10 Mi dangin in hausakna tlân an ta, Mi insûng ta dinga inrim ni rawi in tih. 11 In taksa le thá zûr hnungah, In thi tawm ruoiin inrûm in ta, 12 " Thununna ngài thei lo a, Zilna ka lo hnawl el kha aw! 13 Mi zirtirtuhai thu zawm lo a, An zirtirna ka ngàithlàk naw leiin, 14 Vàntlâng pungkhawmhai hmaah, Ka se let dèr an ta hih" la tîng in tih. 15 I tuibêla tui ngei chu tlàn rawh, I tuikula tui tharlâm ngei chu. 16 I tuikhur chu kotthlêrah luong suokin, Tuol zawlah a luong dar ding maw? 17 I tuikhur chu nangma tlân ding chauh ni sien, Mi dang leh intawm naw ro. 18 I tuikhur chu malsawmin um sien, I vânglai nu-thâia chun hlim rawh. 19 Zukpui sen anga ditum, Zuk latuoi anga nal chun, A tângah inbei tlaitir rop sien che, A hmangainan hîp tâng zing che raw se. 20 Ieng leiin am nang ka naupa, Uirenu zùnah intângin, Lawithlèmnu tàngah i'n bei ding a na? 21 Mihriem khawsak dàn po po hi, LALPA chun a hmu fai vong a, A lampuihai a enthlithlai hlak. 22 Mi rilohai chu an suolnan a awk a, An suolna hruolin a vêt tàng hlak. 23 In thununna tlasamin thîng a ta, An invèt bilingna chun fen hmang a tih. Fîmkhur ngàina dang

6

1 Thu intiemkamI tuolbawm aia tuor intiem a, Hmêlhriet lo leiba rulpêk dinga, Dakhama i lo insiem a ni chun, 2 I bau ngeiin i lo inhril awk a, I thu suoka i lo inkhit a ni chun, 3 I tuolbawm kutah i awk hrein, I hung intàl suok theina dingin, Ka naupa, hieng hin thaw rawh:Fe la, a kuomah inphàhnuoi la, I thû i sùt phalpèk hràm dingin, I tuolbawm chu thlût ngat ngat rawh. 4 I mit insîm hrim hrim naw la, I mit vun insîntir naw rawh. 5 Sapêltu hmaa sakhi a tlân suok ang le, Vate vètu laka vate a vuong suok angin, Nang khom intâl suok ngei ngei rawh. 6 Nang thabo, phaivàng kuomah fe la, An um dànhai ngàituo la, var rawh. 7 Lal le hotu an nei naw a, Rorêltu khom an nei bok nawh. 8 Nipuiah fâk ding an zong khawm a, Busîk hunah bu an sèk khawm hlak. 9 Mi thabo, ieng chen am i zâl ding?I zâl chu ieng tik a'm i tho ding? 10 'La hang zâl met ka tih, La hang inhnâr met ka tih, Kut hmasuiin, hadam takin, La'n zam met ka tih' i ti sûng khan, 11 Pasietna chun rûkru angin, Hung nang thut a ti che a, Tlâksamna khomin râl angin, Hung nangchîng thut a ti che. 12 Mi hmangna bo le khawlo chun, Thu vuongva a'n virpui a, 13 A mitin mi a siei khum a, A kèin mi a zàizir a. A kut chalin a khîk kuol a. 14 A lungril a lûtinle a, Suol thaw ding ringot a phan a, Innghirnghona a chok suok hlak. 15 Sietnain hung nang thut a ta, Siem that ruol lo sietnain, Thawk le khatah nang rup a tih. 16 Thil paruk LALPAN a theida a, Thil pasari a ten èm êm bok: 17 Mit chapohai, khêl hril hmang hai, Poi tawk lo mi that chîng hai, 18 Suol thaw ding phierrûk chîng hai, Suol thaw dinga ngal hrât hai, 19 Hrepuitu der, khel hril hè hai, Unau kâra innghirnghona tutu hai. 20 Ka naupa, i pa thupêkhai zawm la, I nu zirtirna che nghatsan naw rawh. 21 I lungrilah vong kumkhuo la, I rîngah zem tlat hlak rawh. 22 I kalchawinaah thuoi a ti che a, I in chàngin vêng a ti che a, I har pha leh inbiekpui a ti che. 23 Hieng thupêkhai hi khawnvar a na, Hi zirtirna hi var a nih. Inthunun dinga inzilna hi, Hringna lampui a nih. 24 Nuhmei khawlohai lakah leNu suol kam thlum lakah vèng a ti che. 25 A pangti mawina inhnar naw la, A mitin kuoi thlu naw raw se che. 26 Beiin nawchizor a'n chawk thei a, Uirenu ruok chun i hringna a pêl a nih. 27 Zakuo kàng loin meiling, Tuin am a pom thei a? 28 Kè kàng loin meiling chungah, Mi a lawn thei hlak am a ni? 29 Mi nuhmeihai suolpuitu chu, Chuong ang char chu a ni a, Hrem loin suok ngai naw nih. 30 Tâm leia thil inrutu chun, Endong a hlaw ngai naw a, 31 Man suok a ni phâ ruok chu, A lêt sariin rul a tih, A nei po hù khom lo ni sien. 32 Mi nuhmei uirepuitu chu, Hrietna tlasam mi a na, A nun a suksiet a nih. 33 Hliem le hming siet tuor a ta, Dam sûngin muolpho a ta; 34 Thîknan a pasal lung sukling a ta, Phuba a làk pha leh zà ngai naw nih. 35 Suma intlâk nuom naw ni a, Ieng zât pêk khomin lungawi naw nih.

7

1 Ka naupa, ka thuhai hi vong tlat la, Ka thupêkhai hi khawl khawm rawh. 2 Ka thupêkhai zawm la, hring i tih. I mit naulêng ang topin, Ka zirtirna hi hum tlat rawh. 3 I kutpâra hai zem tlat la, I lungril phêkah ziek rawh. 4 Varna chu, "Ka farnu i nih" ti la, Hrietthiemna chu laibungah nei rawh. 5 Uirenu lakah hum a ti che a, Lawithlêmnu lakah vêng a ti che. 6 Ka tukver zawngdaikal awngahTuol tieng saw ka hei thlìr a, 7 Mi mawl ruol lai tlangvâl pakhat, Lungvar tlasam hi ka hmu a. 8 Chu nu chèngna kotthlêr chu hrawin, A in tieng chu a pan a; 9 Unau hmêl hai lai hi a na, Thimin a hung nang mêk a. 10 Nawchizor thuoma inchei, Lungril vervêk tak put mi, Nuhmeiin a'n tuokpui a. 11 Nu zakmaw huoisâr a na, Inah a'n khum ngai naw a, 12 Kotthlêr le tuolzawla dâm, Kil tinah mi a'n chàn hlak. 13 Tlangvâl chu kuoin a fawp a, Hmai intìmna hrim nei loin, Tlangnêl takin a kuomah, 14 "Voisun inthawina ka'n hlân a, Ka thu tiem khom ka hlen tah. 15 Chuleiin, nang hmu dingin, Ka hung a, ka zong che a, Ka hmu ta che a ni hi! 16 Aigupta patzâia khawng, Khumpha mawi tak ka pha a, 17 Beraw, aloi, thingzungthak, Rimtuiin khum ka chûl a; 18 Hung rawh, zîng khaw var chenin, Hmangaina tuitling dawnin, Hmangaina nun chèn ei tih. 19 Ka pasal inah a um naw a, Ram hla taka inzin a nih. 20 Tangka ip sip a chawi a, Thla lir hma chu hung naw nih" a ta. 21 A kam thlumin a lêm hne a, A kam nâlin a zawl thlûk a. 22 Chuongchun a zui ta nghal a:That dinga bawngchal an kei angin, Sakhiin châng a sir chim a, 23 Thalin a lung a dawt tlang a, Vaten a thipui ding hre dêr loaChâng a baw ang el hi a nih. 24 Tu hin ngai ro, ka nauhai, Ka thu suok hi bengkhon ro. 25 Nuhmei tieng chun ngha naw unla, A lampui tieng invâk lût naw ro. 26 Mi tam tak a suksiet tah a, Sukhlum khom a hau ta hle. 27 A in chu Seol panna lam a na, Chu chun thìna pindan a sun.

8

1 Varnan tlâng a'n sam naw maw? Hrietna a khêk suok naw maw? 2 Lam sîr kho tlânga hai le Lam thuoma hai a ngîr a, 3 Khawpui kotsuo bula hai, A lûtna kotpuia hai chun, Inring takin a khêk suok a: 4 "Aw nangni mihriemhai hi, Ka ko khêk cheu a ni hi; In hriet dinga ka hril a nih. 5 Mi mawlhai, fîmkhur inchûk unla, Mi invêthaiin, hrietthiemna nei ro. 6 Ngai ro, thil tha hril ding cheu ka nei, Thu dik hril dingin bau ka phong. 7 Ka bauin thu dik a hril a, Ka hmùrin rîtlona a tirdak. 8 Ka bau suok thu a'n dik a, Thu kawi letling hrim a um nawh. 9 A hre thiemtu ta dingin, Thu indik a ni vong a, Hrietna neitu ta dingin, Soisel boa fie a nih. 10 Tangka nêkin ka zirtirna thlang la, Rangkachak ditum tak nêk khomin, Hrietna chu thlang lem hlak rawh. 11 Lunghlu nêkin varna a hlu lem a, Duthusam ieng khomin a tluk nawh. 12 "Kei, varna hin rem ka hriet a, Hrietna le fîmkhur thiemna ka kol. 13 LALPA ti dàn chu suol theida a nih. Uongthuong, chapo, nun suol, Tong chaltlaihai ka theidâ vong. 14 Remruot le rorêl ka thiem a, Hrietna le thilthawtheina ka nei. 15 Keima leiin lalhan ro an rêl a, Rorêltuhan dàn indik an siem. 16 Keima leiin rênghaiin ro an rêl a, Hnuoia rorêltu milûn po po khomin. 17 Mi ngàinatu chu ka ngàina a, Mi zongtu chun an mi hmu hlak. 18 Hausakna le inzaumna neitu ka na, Hlawtlingna le hmûingîlna tlo chu; 19 Ka rà suok in dong ding chu, Rangkachak hlîr nêkin a tha lem a, Tangkaruo tha tak nêkin a hlu lem. 20 Felna lampui chu ka hraw a, Rorêlna indik lamtluong ngei chu. 21 Mi ngàinatu chu hausaknan ka vûr a, A robawm ka sung sip hnûr hlak. 22 "LALPAN a mi siem hmasa tak a, A thilsiemhai hmaa siem ka nih. 23 Chatuona inthoka indin ka nih, Leilung insieng hmaa inthok ta khan. 24 Tuifinriet um hmain ka pieng a, Tui hnàrhai an pût hma daiin, 25 Tlânghai an ngîr suok hma dai le, Muolhai indin an ni hma dai tah khan; 26 Leilung pieng hma, ramhai pieng hma, Pilvuthai pieng hma dai khan; 27 Vàn a rem khawm lai ka um ta a, Tui inthûk tak huoltu ramri dingaKawlkil a khangpêk lai khom khan; 28 Vàn sângah sûm a zâr lai leLi mong thut a rem nghet lai khan; 29 A ruot chin bàk chîm lo ding a, Tuipui ramri ding a khangpêk lai leHnuoi innghatna a siem lai khan. 30 Chuong lai chun themthiem angin, A bulah ka um zing hlak a, A bulah ka chêng hlak leiin, Ni tinin hlimin ka sip hlak; 31 A khawvel siem ka hlimpui a, Hringmihai hi a nih ka lawm. 32 "Ka nauhai, tuhin ka thu ngai ro, Ka thu zawmtu chu an hamtha. 33 Ka zirtirna hi ngàithla un la, Var pha unla, ngàithà naw ro. 34 Ka tuol kotah mi nghâk zing a, Ka kotkhâr bulah chêng zing a, Ka thu ngàithlatu chu an hamtha. 35 Mi hmutu chun hringna an nei a, LALPA ditsak an hlaw ngei bok. 36 Mi hmu theltuhai ruok chun, Anni le anni an insuksiet a na, Keima mi theidatu phot chun, Thìna an ngàizawng a nih. "

9

1 Varna chun in a bawl a, Lung ser ban pasari a phun a, 2 A lawmnan ran a that a, Dawn ding uoiin a buotsai a, Ruoi chu a pei fel diem tah. 3 A rongbawltu nunghâkhai chu, Khaw sûnga chun infetirin, Tuolpârah tlâng a'n samtir a: 4 "Mi mawlhai, hi tieng hung ro, 5 Ka ruoi buotsai hung kîl unla, Ka uoiin siem hi hung dawn ro. 6 In mawlnahai hnungson unla, Hring le damin um inla, Hrietthiemna lam chu hraw ro. 7 "Tu khom hmusittu ziltu chun, Khîksawna a tuok lêt hlak a, Tu khom mi rilo kawktu chun, Kawk lêt hrep a tuok ngei hlak. 8 Hmusittu chu kawk naw rawh, Theidà phàna'n hmang a ti che; Mi var i zilhau ruok chun, Ngàinat phànan hmang a ti che. 9 Mi var i zirtir a ni chun, Var zuol phànan hmang a ta, Mi indik i zirtir khomin, Hriet tam phànan hmang a tih. 10 "LALPA ti chu varna tobul a na, Mi Thienghlim hriet chu hrietthiemna a nih. 11 Chu chun sukdamsawt a ti che a, I dam sûng kum suksei a tih. 12 Chu varna chu i nei chun, I varna chu hlawkpui i ta, Hmusittu i ni ruok chun, I hmusit man tuor ngei i tih. 13 Nuhmei Invêt rìhàu a na, A mawlin hriet muol a nei nawh. 14 A kota inthung biel a chîng, Tuol pâra inthung a chîng bok. 15 Lama invâk taphothai chu, Ko khêkin a lo zawr hlak. 16 Ningkhong hre lohai kuomah, " Mi mawlhai, hi hin hung ro. 17 A rûka tui dawn a thlum bîk a, A rûka bei fâk a'n hnik bîk bok"Tiin a lo hûi tawl hlak a. 18 Sienkhom a pantuhai chu, Seol khurpuia tla ta sa, Mithi ruol um khawm an nih, Ti an hriet tawl dèr si nawh.

10

1 Nau varin a pâ a suklawm a, Nau invêtin a nû a sukbeidong. 2 Indik loa hmu hausakna chun, Hlutna ieng khom a nei nawh; Indik taka thilthaw ruok chun, Thi ding khom a san suok hlak. 3 Mi felhai phingtâm ding chu, LALPAN a phal ngai naw a, Mi rilohai duthusam khom, A hlawtling a phal bok nawh. 4 Mi thabo chu rethei a ta, Mi taima chu hausàng a tih. 5 Nau var chun nipui hunah, Fâk ding a sêk khawm hlak a, Busîk huna zàl hlak ruok chu, Nau inzapuium a nih. 6 Mi indik lu chunga chun, Malsawmna vûrin a um hlak a, Mi rilo bau suok ruok chu, Nunrawngna thuin a sip. 7 Mi indik hriet zui zing chu, Malsawmna a ni hlak a, Mi rilo hming ve ruok chu, A thu hmon vong hlak a nih. 8 Lungrila varna neitu chun, Thupêkhai a zawm hlak a, Mi invêt bau tam ruok chu, Sietna leh an intuok hlak. 9 Mi fel kalchawi a nghet a, Lam suol hrawtuhai ruok chu, Man suokin an um ngei hlak. 10 Mi mit rak hin lung a khei, Tlang taka kawktu ruok chun, Inremna a siem lem hlak. 11 Mi indik bau suok hai chu, Hringna tuikhur an inchang a, Mi rilo bau suok ruok chu, Nunrawngna thuin a sip. 12 Intheidàna hrim hrim chun, Innghirnghona a hring a, Hmangaina chun tlàk nawna, Iengkim a hmu khûm lem hlak. 13 Lungril mit varna neihai chun, Thu var an sâk suok hlak a; Hrietthiemna nei lo ruongzâng chu, Vuokna hmol le inmat a nih. 14 Mi varin hrietna an khawl khawm a, Invêt chun sietna ding an hril hlak. 15 Mi neinunghai kulpui chu, An hausakna a ni hlak a; Mi retheihai sietpui ruok chu, An pasietna a ni hlak. 16 Mi fel hlaw suok chu hringna a na, Mi suol hlaw suok chu hremna a nih. 17 Inthununna poisatu chun, Hringna lampui a hraw a, A ngài thei nawtu ruok chun, A pêt hmangsan lem a nih. 18 Theidàna iptu chun hmûr khêlhlip a nei a, Hrilsietna thè dartu chu mi invêt a nih. 19 Ei tong rawn taluo pha chun, Khêl khom a thang sa tèi hlak; Mi var chun tong a'n sûm hlak. 20 Mi indikhai bau suok chu, Tangkaruo tha inhlîr ang a na, Mi rilohai lungril ruok chun, Hlutna ieng khom a nei nawh. 21 Mi indik bau suok thu chun, Mi tam tak a chawm tlai hlak a, Mi invêt chu varna tlasamin a thi. 22 LALPA malsawmnan mi a sukhausa a, Harsatna a thang sâ ve ngai nawh. 23 Mi invêt chun suol thaw inhoi a ta, Mi var ruok chun varna a hlimpui. 24 Mi rilo chun a ti tak intuokpui a ta, Mi fel chun a duthusam hmûng a tih. 25 Thlipui a hung hràng pha chun, Mi rilohai an nuoi bo hlak a, Mi indikhai chu an nghet tlat hlak. 26 Thilthaw dinga mi thabo tir chu, Uoiin thûrin hâ a suktim ang le, Meikhu'n mit a sukthîp ang a nih. 27 LALPA ti chu dam sawtna a na, Mi suol damsûng ruok chu a tawi hlak. 28 Mi fel tuok ding chu hlimna a na, Mi rilohai hmabàk chu boralna a nih. 29 LALPA lampuia kalchawi hi, Mi fel ta di'n himna kulpui a na, Thil tha naw thawtuhai ruok chun, Sietna chauh an hmasuon hlak. 30 Mi fel chu ngîr nghet tlat an ta, Mi suol chun ram hi hluo zing naw nih. 31 Mi fel bau chun varna a phù suok a, Lei khêlhlip ruok chu ât tan nîng a tih. 32 Mi fel bauin pom tlâk thu a hril a, Mi suol bàu chun thu letling a hril hlak.

11

1 Bùkna indik lo hi LALPA theida zawng a na, Bùk lung indik hmang hi a lawmzawng a nih. 2 Chapona chu muolphonan a zui a, Inngàitlawmna chu varnan a zui hlak. 3 Mi indikhai chu an ringumna'n a thuoi a, Mi depdehai chu an vervêknan a awk hlak. 4 Lungsenna nia dingin, Hausak ieng khomin thû a phur nawh, Sienkhom indikna ruok chun, Thìnaa inthokin a san suok hlak. 5 Mi indikhai chu an indiknain, An lampui a suktluong hlak a, Sienkhom mi rilohai ruok chu, An rîtlonain a bûk thlûk hlak. 6 Mi ngîlhai chu an indikna'n a san him a, Mi depdehai chu châkna suolah an inawk hlak. 7 Mi rilo chu a thi ruolin, A beiseina khom a boral nghal a, Thaw thei dinga a hisaphai khom, Iengmà lo an hung inchang hlak. 8 Mi fel chu buoina laka humin a um a, Mi rilo chungah buoina chu a tla hlak. 9 Pathien ngàisak lo mi chun a bauin, A tuolbawmhai a suksiet hlak a; Mi fel ruok chun hrietna hmangin, Sietna chu a pumpel hlak. 10 Mi felhai an hmûingìl pha, A khaw nawtin an hlim hlak a; Mi rilohai an thi pha leh, Lawmna ri a so vêl hlak. 11 Mi indik malsawmna dong chun, A khaw pumpui a chawimawi a, Mi rilo bâu suok ruok chun, A khaw nawtin a dêng siet hlak. 12 Tuolbawmhai deusawtu chun, Varna a tlasam a nih, Hrietthiemna neitu ruok chun, A bâu a vèng tha lem hlak. 13 Bau tamin thurûk a ip thei naw a, Mi ringum ruok chun a vong tlat hlak. 14 Inthuoina tha um nawnaah, Ram le hnam a tlu se hlak a, Remruot thiem an tamnaa chu, Hnèna an chang ngei ngei hlak. 15 Mi dakhama insietu chun tuor a ta, Inthier fihlîmtu ruok chu him a tih. 16 Nuhmei felin inzà a phur a, Nu lepchie chu inzapui a um. Mi zomthaw chu a hung pasie a, Mi hrât chu a hung hausa hlak. a 17 Mi ngilneiin a ngilneina a sor a, Mi tawrotin ama buoina a siem hlak. 18 Mi rilo chun hlaw indik lo a lak a, Felna tùtu chun lukhawng a dong hlak. 19 Felna chel tlattu chu hring a ta, Suolna hnot tlattu chu thing a tih. 20 LALPAN lungril kawi a theida a, Soisel boa khawsahai ruok chu a lawm. 21 Mi rilo chun hrem pumpel naw top a ta, Mi fel ruok chu san suokin um a tih. 22 Fîmkhur nachang hre lo nu hmel tha chu, Vok hnâra rangkachak kuol inbuntir ang a nih. 23 Mi fel ditzawng chu thil thain a tawp a, Mi rilo beisei chu lungsennain a tawp. 24 Phal taka pèk chu a tam lem hmùna a na, Mamaw bâk kompui chu tlâkranna a nih. 25 Mi tiktlài chu hmuingil a ta, Tuia chawmtu chu tuia chawm ve nîng a tih. 26 Hlawkna hnot leia bu inrotu chu, Mihaiin tongsie inphur an ta, A pe suok nuomtu ruok chu, Malsawmna vùrin um a tih. 27 Thil tha zongtu chun ditsakna a dong a, Thil suol zongtu chun thil suol a tong hlak. 28 Hausaknaa innghattu chu tlùng a ta, Mi fel chu hna hring angin inthang no a tih. 29 Sûngkuo chokbuoitu chun thli chauh sîk a ta, Mi invêt chu mi var siehlawah thang a tih. 30 Felna ra chu hringna a na, Nunrawng chu thina a nih. b 31 Mi felin hnuoiah lawmman a dong chun, Pathien hre lo le mi rilo lem chun, Hremna a va hang tuor chieng awm de!

12

1 Thununna ngàinatu chun hrietna a ngàina a, Zilhauna theidatu ruok chu mi intlaw a nih. 2 Mi tha chun LALPA ditsak a hlaw a, Suol phiertu chu thiem naw a'n changtir hlak. 3 Rîtlonain mi a siem nghet ngai naw a, Mi fel ruok chu sukhning ruol a ni nawh. 4 Nu tha chu a pasal lallukhum a na, Nu inzapuium chu a rù ngè ang a nih. 5 Mi felhai thil rèl chu a'n dik hlak a, Mi rilohai thurawn pêk chu a khêlhlip. 6 Mi suol bauin that ding mi a'n chân a, Mi indik kam suok chun a san suok hlak. 7 Mi rilohai chu pei hmangin an um dai a, Mi fel sûngkuo ruok chu an ngîr nghet hlak. 8 Mi var chun inpâk a hlaw a, Lungril kawi chun endong a hlaw. 9 Insukliena fâk ding nei si lo nèk chun, Hriet hlaw loa siehlaw nei si ni a tha lem. 10 Mi fel chun a ranhai chen a lunginsiet a, Mi rilo zangàina ruok chu a nunrawng hlak. 11 Mani lo enkoltu chun bu le bâl hau a ta, Suongtuona hnottu chun varna a tlasam a nih. 12 Mi rilo chun mi suol thil rok a'n hnar a, Mi fel ruok chun zung a kei nghet hlak. 13 Mi suol chu a kam tlêuah a tlu a, Mi fel chun buoina a pumpel hlak. 14 Bau thiemin a bau suok ra tha a sîk a, A kut sawl man khom a hmu ngei hlak. 15 Mi invêt chun indikin a'n ngai tlat a, Mi var chun thurawn a ngàichang hlak. 16 Mi invêtin lungsen a suklang nghal a, Mi var chun theida naw sak sak a thaw hlak. 17 Mi ringum chun thudik a hril hlak a, Hrepuitu der chun thukhêl a hril hlak. 18 Tong tlahol chun kawlhnâm angin a sun a, Mi var bau suok ruok chun lung a thawi dam. 19 Thu tak hrilna bau chun kumtluong a dai a, Lei khêlhlip chun mit khap kâr chauh a daih. 20 Suol phantu lungrilah hlêmna thu a um a, Remna zongtuhai lungrilah hlimna a um. 21 Sietnan mi felhai a tlâk buok ngai naw a, Mi suolhai chun buoina an tuok rop hlak. 22 Hmùr khêlhlip chu LALPAN a theida a, Mi indikhai ruok chu a ngàina hlak. 23 Mi fîmkhur chun a hrietzie a thup a, Mi invêt chun a'n vètzie a puong suok hlak. 24 Mi taima chun rorêlna chel a ta, Mi thabo chu suoka sorin um a tih. 25 Lungkham nei hin a mi sukngui a, Thu tha ruok chun a mi sukhlim. 26 Mi fel chu a ruolhai keidingtu a na, Mi rilo chun a thuoi suol lem hlak. 27 Mi thaboin sa raw ding a kâp ngai naw a, Mi taima ruok chun thil hlû a khawm teu hlak. 28 Felna lampuia chun hringna a um a, Chu lampuia chun thìna a um nawh.

13

1 Nau var chun a pa thununna a poisa a, Hmusittu chun zilhauna a ngai thei nawh. 2 Mi thahan bau that man thil tha an tlàn a, Mi suol ruok chun rawng taka chêt a châk. 3 Bâu vêng thatu chun a nun a vêng tha a, Mi hmùr tam chun sietna a tuok hlak. 4 Mi thabo chu a vir em em a, Sienkhom fâk ding a nei si nawh; Mi taima ruok chu a tlai zing. 5 Mi indik chun thu khêl a theida a, Mi suol chun muolphona le inzakna a'n tlun. 6 Felna chun mi ringumhai lampui a vèng a, Rîtlona chun mi suol a suot thlâk hlak. 7 Hausaa inngai, ieng khom nei lo an um a, Retheia inngai, hausa hlê si an um bok. 8 Mi hausa chu a sumin a'n tlan suok thei a, Mi rethei chun inlâupui ding a nei ve nawh. 9 Mi fel chu mei angin a êng a, Mi rilo chu khawnvar sukmit ang a nih. 10 Chapona chun inhalna a chok suok a, Thurawn lâk hi thil varthlàk a nih. 11 Hmùna indik loa hausa thut chu, A riral nawk tiel tiel hlak a, Harsa taka thaw suoktu ruok chu, Damten a pung tiel tiel hlak. 12 Beisei tlung inhnûk hin lung a sukna a, Duthusàm tlung ruok chu hringna thing a nih. 13 Zirtirna hnawltu chun tuor a ta, Thupêk zawmtu chun lawmman hmung a tih. 14 Mi var zirtirna chu hringna tuikhur a na, Thìna châng pumpelna a nih. 15 Hrietthiemna tha nei chu ditsak hlawna a na, Mi depdê lampui ruok chu a kholkham. 16 Mi fimkhur chun hrietna hmangin thil a thaw a, Mi invêt ruok chun a'n vêtzie a phor lang hlak. 17 Thangko rilo chun buoina a chok suok a, Palai ringum chun damna thu a'n tlun hlak. 18 Thununna ngaithàtu chu retheiin muolpho a ta, A poisatu chu chawimawiin um a tih. 19 Duthusàm hmu hin lungril a sukhlim a, Sienkhom, invêtin suol nghatsan an theida. 20 Mi var pawltu chu a hung var ve a, Mi invêt le inpawl chu sietna a nih. 21 Vângduoinan mi suol a hnot zui a, Mi fel lawmman ruok chu hnienghnàrna a nih. 22 Mi tha chun a tûhai ro ding chen a mâksan a, Mi suol hausakna chu mi fel ta dinga khawl a lo nih. 23 Mi rethei loah bu a suok teu a ni thei, Sienkhom rorêlna indik naw leiin a chân vong thei. 24 Hmol hmang nawtu chun a nau a theida a na, Nau hmangaitu ruok chun a thunun ngei hlak. 25 Mi felhai chun dutawka fâk ding an nei a, Mi rilo phîng ruok chu a tâm hlak.

14

1 Nuhmei var chun sûngkuo a tungding a, Nu invêt chun a kut ngeiin a thiek hlak. 2 Indik taka kalchawitu chun LALPA a ti a, Rîtlona lampui hrawtu ruok chun a hmusit hlak. 3 Mi invêt chun vuok tuorna ding a hril suok a, Mi var ruok chun a himna ding a hril lem hlak. 4 Bawngchal um nawnaa chun bu in a ruok a, Bawngchal thain bu sîk ding a thaw suok teu hlak. 5 Hrepuitu ringum chun khêl a hril ngai naw a, Hrepuitu der ruok chun khêl a phuokfawm hlak. 6 Hmusittu chun varna a zong a, a hmu naw a, Lungril mit varna neitu ta din hmu a olsam hle si. 7 Mi invêt lakah inthier fihlim rawh, A hmûra inthokin varna thu dong naw ti nih. 8 Mi varhai chun an fèna ding lam an hriet a, Mi invêthai invêt chil ruok chu mani inhlèm a nih. 9 Mi invêthan suol nghatsantuhai an hmusit a, Mi varhai ruok chun an lawmpui lem hlak. 10 Mani chauhin ei lungngaina ei hriet a, Ei lawmna khom mi dangin an mi'n tawmpui thei nawh. 11 Mi rilo sûngkuo chu suksietin um a ta, Mi indik sûngkuo ruok chu hmuingil a tih. 12 Mihriemin lam indik nia a ngai a um a, Sienkhom thìna lampui a lo ni zing thei. 13 Innui lai khomin lung a na thei a, Hlimna khom lungngainan a tawp thei. 14 Mi suol chun a suol man intêl a ta, Mi tha chun a thaw that man hmung a tih. 15 Mi mawl chun mi hril taphot a awi hlak a, Mi var chun a kal pên tin a bì chieng hlak. 16 Mi var chu a fîmkhur a, suol a hnawl a, Mi invêt chu a'n sukhuoi a, a che rok rok hlak. 17 Lung inrom chun thil invêtthlâk a thaw hlak a, Dawhaa thil phantu chun theidà a hlaw hlak. 18 Mi mawlhai chu invêtnan an inthuom a, Mi var chun hrietna tonlairang an ton hlak. 19 Mi suolhai chu mi tha hmaah kûn an ta, Mi rilohai chu mi fel kot bulah kûn an tih. 20 Pasiehai chu tuolbawmhai khomin an hnawl a, Mi hausahai ruok chun ruol an hau êm êm. 21 Tuolbawmhai hmusittu chu mi suol a na, Retheihai somdawltu chu mi hamtha a nih. 22 Thil suol rottu chun thil suol a thaw a, Thil tha zongtu chun mi ring le lainat a hlaw. 23 Thokrimna chun hlawkna an tlun a, Hril ringota tlâk tum chu tlâkranna a nih. 24 Mi var chu hausaknaa vurin a um a, Mi invêt chun invêtna chauh a hli hlak. 25 Hrepuitu indik chun mi a san suok a, Hrepuitu der ruok chun mi a hlêm hlak. 26 LALPA titu chun kulpui nghet a nei a, A nauhaiin inhumhimnan an hmang hlak. 27 LALPA ti chu hringna tuikhur a na, Thìna chânga inthoka himna a nih. 28 Mipui hau hi lal ropuina a na, Khuo le tui nei lo lal chu a se dêr hlak. 29 Lung infuol chun hrietthiemna ril a nei a, Lung inrom chun a'n vètzie a phor lang hlak. 30 Lungril hadam chu taksa sukhriseltu a na, Thîkthu siet chu ru sukhmontu a nih. 31 Retheihai neksawrtu chun anni Siemtu a hmusit a, An chunga ngilneitu chun anni Siemtu a chawimawi. 32 Mi rilo chu a suolna'n a bûk thlûk a, Mi fel chu thi chenin a ringumnan a hum hlak. 33 Hrietthiemna nei mi chun lungvar a nei a, Mi invêt ruok chun thuvar a hriet thei nawh. 34 Indiknain hnam a chawi sâng a, Suol chu hnam tin sukmuolphotu a nih. 35 Siehlaw var chungah lal a lawm a, A sukmuolphotu chungah a lungsen hlak.

15

1 Donna innèm chun lungsen a thawi dam a, Invìn ruok chun lungsen a chok tho. 2 Mi var bâu chun varna thu a hril hlak a, Mi invêt lei chun thu invêt a per suok hlak. 3 LALPA mit chu hmun tinah a fu a, Mi rilo le mi tha khom a enthlàk zing. 4 Bâu innem chu hringna thing a na, Lei lûtinlè chun lungril a sukngui. 5 Mi invêt chun nu le pa keithuoina a ngàinêp a, Mi var ruok chun an zirtirna chu a poisa hlak. 6 Mi fel inah rosum tam tak a um a, Mi rilo sum lam chun buoina a'n tlun hlak. 7 Mi var hmûr chun hrietna a thè dar hlak a, Mi invêt chun thaw vèna lungril a nei nawh. 8 Mi rilo inthawina chu LALPAN a tirdak a, Mi tha tongtaina chu a lawmzawng a nih. 9 Mi rilo lampui chu LALPAN a tirdak a, Felna lampui hrawtu chu a ngàina hlak. 10 Lam indik pêtsantu chu na taka thunun a ni hlak a, Zilhauna theidatu chu a bohmang hlak. 11 Seol le Abadon hre tlangtu LALPA chun, Mihriem lungril lem chu a hriet chieng awm de aw! 12 Hmusittu chun zilhauna a ngai thei naw a, Mi varhai khom a biekrawn ngai nawh. 13 Lungril hlimin hmêl hlim a siem a, Lungril nain thlarau a sukngùi. 14 Sungril mit varna neitu chun hrietna a zong a, Mi invêt ruok chun khêl ringot buin a ring hlak. 15 Rethei nun chu a rimsikthlâk a, Lungril hlim ruok chun ruoi a thê zing a nih. 16 Hausa hnûra buoina nei nêk chun, Tlawmte neia LALPA ti a tha lem. 17 Intheida puma bawng tuoi thau sâ fâk nêkin, Inhmangai taka thlài hna ring a tha lem. 18 Mi lungromin inhalna a chok suok a, Mi lunguoiin inhalna a sukrè hlak. 19 Mi thabo lampui chu hlingin a bawm a, Mi indik lampui ruok chu a tluong zâl. 20 Nau var chun a pâ a suklawm a, Nau invêt ruok chun a nû a hmusit hlak. 21 Hrietna tlasam chun a'n vêtna a hlimpui a, Hrietna neitu ruok chun lam ngîl a hraw hlak. 22 Remruot lawk loa thil thaw chu a tlol nuom a, Rem hrie an tam ruok chun a hlawtling hlak. 23 Donna indik pêk hi tu khomin an lawm a, A hun taka dong hi a va hang lawmum de! 24 Mi var chun Seol a zuk fin nawna dingin, Chung tieng a pan tung ngat ngat hlak. 25 LALPAN mi chapo in chu a nam thlûk a, Hmeithai chêngna ramri ruok chu a humpêk. 26 Mi rilo ngàituona chu LALPAN a tirdak a, Mi thienghlimhai ngàituona chun a suklawm. 27 Hlêpnaa hnukrawl chu sûngkuo buoina a na, Thamna theida ruok chu sûngkuo hringna a nih. 28 Mi fel chun thu don dàn ding a bûktuo a, Mi invêt ruok chun thu tha lo a sâk suok hlak. 29 LALPA chu mi rilo hnaiah a um ngai naw a, Mi fel tongtaina ruok chu a ngàithlâk hlak. 30 Hmêl hlimin mi a suklawm a, Thu lawmumin rù le châng a sukhrisel. 31 Nun siem tha thei zilna ngàithlatu chu, Mi varhai lai chêng vêng a tih. 32 Inthununna ngàithâtu chun ama a'n ngàinêp a, Zilna poisatu chun hrietthiemna a chang hlak. 33 LALPA ti chu var inchûkna a na, Inngaitlawm chu chawimawi hlawna a nih.

16

1 Mihriem lungrilin thil a riruong a, Sukpuitlingtu ruok chu LALPA a nih. 2 Mihriem chun a lampui indikin a hriet hlak a, Sienkhom, lungril inkhìtu chu LALPA a nih. 3 I thilthaw iengkim chu LALPA inkoltir la, I thil tumhai chu hung hlawtling a tih. 4 LALPAN iengkim hi san neia a siem a na, Mi rilohai khom hi sietna nia ding an nih. 5 Lungril chapohai chu LALPAN a tirdak a, Hremna pumpel naw top an tih ti hre chieng rawh. 6 Hmangaina le ringumnain bawsietna a tlêng fai a, LALPA tina leiin miin suol a pumpel hlak. 7 A um dâna LALPA suklawmtu chun, A hmêlmahai khom inrem takin a umpui thei. 8 Fel lo taka sum tam tak nei nêk chun, Fel taka tlawmte nei a tha lem. 9 Mihriemin a lampui ding a duong hlak a, A kalchawi thuoitu ruok chu LALPA a nih. 10 Chung tieng thu anga ro rêl hlaktu lal chun, A kam suokin ro rêl suol ngai naw nih. 11 Bùkna le inkhìna indik chu LALPA ta a na, Ip rikna po po khom ama siem vong a nih. 12 Thil suol thaw hi lalhan an tirdak a, Indikna lei chauhin an lalna a nghet a nih. 13 Lalhan thu indik hril hi an lawm a, Thu dik hril mi chu an hlutsak hlak. 14 Lal lungsen chu thìna zuolko a na, Mi var chun a lo thlêm lungawi thei. 15 Lal hmêl a hlim chu nun a sukhoi a, A ditsakna chu thâl sûm tui pai ang a nih. 16 Varna hi rangkachak nêkin a tha lem a, Hrietna hi tangkaruo nêkin a hlu lem. 17 Mi indik lampui chu suol leh an inpaw naw a, Fimkhur taka kalchawitu chun a nun a hum hlak. 18 Chapona chu sietnain a zui a, Lungril indùna chu tlûknain a zui. 19 Mi chapo le râl lâk sum insem nêk chun, Inngaitlawm taka pasiehai laia khawsak a tha lem. 20 Zirtirna thu poisatu chu a hmûingìl hlak a, LALPA-a innghattu chu a hamtha hlak. 21 Lungvar nei chu sûngril mit varna nei mi an na, Tongkam thlum chun mi hnè theina a sukpung. 22 Varna nei hi hringna tui hnâr a na, Invêtna hi mi invêthai hremna a nih. 23 Mi var lungril chun a bâu chàng a thuoi a, A thu hril khom a awium bîk hlak. 24 Tongkam thlum chu a thlâra khuoizu ang a na, Lungril a sukhlim a, rù le châng a sukhrisel. 25 Mihriem ngaia lampui indik nia inlang, A tawpah thìna intlun lem hlak si a um. 26 Sinthawtu chu a phing khopna dingin a'n rim a, A phingtâmna chun sin a'n thawtir a nih. 27 Mi rilo chun suol thaw ding a phier hlak a, A kam suok chu meichok inhlap ang a nih. 28 Mi kawi chun innghirnghona a chok suok a, A kawi zawnga thu kher mi chun ruol bul khom a sukthè hlak. 29 Tharum thaw mi chun tuolbawmhai a sukhmu a, Lampui tha loah a thuoi tawl hlak. 30 Mi mitsîr chîng chun thil suol a phan hlak a, Hner pet chîng chun suol tieng a awn hlak. 31 Lu tuok hi ropuina lallukhum ang a na, Fel taka kalchawihai dong hlak chu a nih. 32 Mi râlhrâng nêkin mi zaidawthei ni a tha lem a, Khawpui latu nêkin lungsen kei dei thei mi ni a tha lem. 33 Mal chungah thum ei vawr hlak a, Thu tawpna ruok chu LALPA a'n thok vong a nih.

17

1 Sûngkuo inhal puma ruoipui thè nêkinInngei taka bu thing ring a tha lem. 2 Muolpho taka khawsatu nau chungah, Siehlaw var chun ro rêl a ta, Unau laia mi angin pâ ro chang vèng a tih. 3 Tangkaruo le rangkachak chu thukah, Meia an raw thienghlim hlak angin, LALPAN mihriem lungril a fie hlak. 4 Mi rilo chun hmûr khêlhlip a ngàithlak a, Mi khêlhlip chun hrilsietna thu a bengkhon hlak. 5 Pasiehai hmusittu chun anni Siemtu a hmusit a, Mi sietna diriemtu chun hremna pumpel top naw nih. 6 Tû le tèhai hi upahai lallukhum an na, Nauhai ropuina chu an nu le pahai an nih. 7 Thu hril thiem le mi invêt an inhmè naw a, Rorêltu bâu le khêl an inhmè naw nawkzuol. 8 Thamna hi a petu chun dawi angin a ngai a, A lekna tieng tieng hlawtlingin a ngai hlak. 9 Mi khingtu ngaidam hi ngainat hlawna a na, Bàu suktam ruok chu ruol sukthèna a nih. 10 Mi invêt voi za vuok nêkin, Lungvar nei voi khat zil a hlawk lem. 11 Mi suol chun hel dàn ngot a zong a, A kuomah thuneitu nunrawng tir an tih. 12 Invêtin thil invèt a thaw lai tong nèkin, A te lâkpêk savom le intuok a tha lem. 13 Suola thatna thungrultu insûng chu, Thil tha loin chèng chil a tih. 14 Inhal hi tuiting inthè ang a na, A buoi zuol hmain inhal ma rawh. 15 Mi suol thiem inchangtir a, Mi tha thiem naw inchangtir hi, LALPAN a tirdak ve ve a nih. 16 Mi invêt kuta sum um chu iem a tangkaina?Lungril boin varna a'n chawk thei ding maw? 17 Ruol chun ieng lai khom a mi hmangai zing a, Laibunghai chu mangang huna dinga pieng an nih. 18 Mi leibat mawphurtua insiem a, Tuolbawm ta dinga dakhama thang chu, Thil invètthlâk tak a nih. 19 Inhal chîng mi chun suol a ngàina a, Kotkhâr insâng bawltu chun sietna a fiel a nih. c 20 Lungril kawi chu a hmuingil ngai naw a, Lei khêlhlip chu buoinaah a tlu lût hlak. 21 Nau invêt chu lungngàina intluntu a na, A chungah a pâin lawmna hrim a nei nawh. 22 Lungril hlim hi damdawi tha tak a na, Lungril ngui chun rù le châng a suktawl. 23 Mi rilo chun arûkin thamna a lâk a, Indik takin ro a rèl thei nawh. 24 Lungvar nei chun varna a hnot zing a, Mi invêt chun kil le kapah mit a'n lên hlak. 25 Nau invêt chun a pâ a sukbeidong a, A hringtu a nû lung a sukrim hlak. 26 Poi tawk lo mi lei inchawitir a'n dik naw a, An ringum leia milien hrem a'n dik bok nawh. 27 Hrietna nei mi chu a tong fîmkhur a, Hrietthiemna nei mi chu a dei dap hlak. 28 Mi invêt khom a to chun var a hlaw a, A lei a vêng lem chun mi vara ngài a ni hlak.

18

1 Mal tla mi chun mani hma chauh a siel a, Thurawn tha khom a tai vong hlak. 2 Mi invêt chun hrietna a ngaina naw a, A ngaidân khûkpui chauh a hlimpui hlak. 3 Rîtlona chu muolphonan a zui hlak a, Muolphona khom inzaknain a zui hlak. 4 Mihriem bâu suok chu li inthûk ang a na, Varna tuikhur chu tui luong hok hok ang a nih. 5 Mi rilo chunga hlei nei a tha naw ang bokin, Poi tawk lo thiem naw inchangtir a tha nawh. 6 Mi invêt hmûr chun inhalna a chok dok a, A bâu suok chun vuok a'n tuortir hlak. 7 Mi invêt chun a bâu a sietpui a, A hmûr chu a ta dinga châng a nih. 8 Inrêl hi bu inhnik tak ang a na, A dolin ei dol thlàk zot zot hlak. 9 Sinthawa inthlàdà mi chu, Suksetu leh unau bul an nih. 10 LALPA hming chu kulbing nghet a na, Mi fel chu a tlân lût a, a him hlak. 11 Mi neinunghai kulpui chu an hausakna a na, Lung bang insâng tak angin an inngai hlak 12 Lungril chapo chu sietna leh an intlon a, Inngaitlawm chu chawimawinan a som hlak. 13 Ngàithlâk hmaa mi don chu, Thil invêtthlàk le muolphona a nih. 14 Nat khom mi'n tuortir theitu chu lungril a na, Lungril hliem chu tuin am tuor thei tâng a ta? 15 Lungvar nei chun hrietna a khawl khawm a, Mi var nâ chun hrietna a zong hlak. 16 Thilpêk chun a petu hma a sukkawpèk a, Milien khom olsam taka paw theina a nih. 17 Mi dang hunga an hung khing lêt hma chun, Thiem thu hril hmasatu chu indikin a'n lang hlak. 18 Thum vawrin inkhingna a rem a, Inkhing bur bur khom a kei thè hlak. 19 Unau suknuor chu kul nghet nêkin hnè an tak lem a, Inhal chu thîr tluona kul kotkhâr kalh ang a nih. 20 I bau suok dungzuiin khop i ta, I hmûr suok rà zirin tlai i tih. 21 Lei hin damna le thì theina a pâi a, I hmang dàn angin a ra sîk i tih. 22 Nuhmeia nei ding zong hmutu chu thil tha hmu a na, LALPA ditsakna a dong hlak. 23 Mi rethei chun rienginko takin thu a hril a, Mi hausa ruok chun chaltlai takin a lo vîn hlak. 24 Ruol tha dai sawt lo um hai sien khom, Unau nêka inhnaipui lem ruol an um hlak.

19

1 Mi invêt le mi khêlhlip ni nêkin, Mi rethei, dem kai loa kal chawitu ni a tha lem. 2 Hrietna nei si loa phûr hlut a tha nawh, Pawng inhmawa kalchawi chu a'n suithlûk hlak. 3 Mihriemin a'n vêtna a sietpui pha, Pathien chungah a lungsen hlak. 4 Hausakna hi ruol hauna a na, Retheina chun ruol a sukthè. 5 Hrepuitu der chun hrem tuor ngei a ta, Khêl hril chîng khomin pumpel bok naw nih. 6 Mi tiktlâihaiin tlontu an hau a, Mi thilphalhan ruol an hau hlak. 7 Mi rethei chu a sûnghai hmana an nghok chun, A ruolhai lem chun an va hnawl nasa awm de!Anni chu ko lom lom hlak sien khom, A bul hnaia hrim an um nuom nawh. 8 Varna nei chu mani inditsakna a na, Hrietthiemna nei chu hmuingilna a nih. 9 Hrepuitu der chun hrem pumpel top naw nih, Khêl hril hmang chu bohmang a tih. 10 Khawsak insàng le mi invêt an inhmè naw a, Milien chunga siehlaw inlal an inhmè naw zuol. 11 Mi var chu a lungsen mei mei nuom naw a, A poi an tawk a haider thei chu a ropuina a nih. 12 Lal lungsen chu keipui inrûm ang a na, A ditsakna chu hlobet chunga daidaw tla ang a nih. 13 Nau invêt chu a pa tlâkranna a na, Nuhmei hrangsie chu ruo nichîng do ang a nih. 14 In le lo hi nu le paa inthoka ei rochung a na, Nuhmei var ruok chu LALPA mi pêk a nih. 15 Mi thabo chu a in chur chur a, Mi zomthaw chun phingtâm tuor a tih. 16 Thupêk zawmtu chun nun a vong tha a, A ngaithâtu ruok chu bohmang a tih. 17 Tu khom retheihai lunginsiettu chu, LALPA kuoma thil inpûktirtu ang a na, A thil thaw thathai chu la rul vong a tih. 18 Beiseium a la ni laiin i nau chu thunun rawh, Chuong naw chun a thì i remti tina a nih. 19 Lung inrom chun a nunsiet man hmung a ta, San la khom i san nawk pei ngai a tih. 20 Thurawn ngàithla la, thupêk zawm la, A tawpah mi var la hung nîng i tih. 21 Mihriem lungrilin thaw tum hau sien khom, LALPA remruot chauh a dingchang hlak. 22 Mihriema thlâkhlàum chu a ringumna a na, Mi khêlhlip nêkin mi rethei ni a tha lem. 23 LALPA ti chu hringna a ni takzet a, A tîtu chu lungawi takin an um a, Thil tha loin tlâkbuok naw nih. 24 Mi thabo chun buthlêng a pur a, Bu beng dingin kut a hlàng pei si nawh. 25 Mi hmusit chîng hlak i vuok chun, Chu mimawl chun fîmkhur inchûk a ta; Hrietthiemna nei mi i zil ruok chun, A hrietna hung pung a tih. 26 Pâhai rok a, nûhai hnot suoktu nau chun, Inzakna le muolphona a'n tlun hlak. 27 Ka naupa, zirtirna i dong pei theina dingin, Hrietna lampui pèt hmangsan naw rawh. 28 Hrepuitu porchè chun rorêlna a palzût a, Mi rilo chun suolna a dol thlâk zung zung. 29 Nuisawtuhai chu thiem naw chang sà an na, Mi invêthai chu ruongzàngah vuong an tih.

20

1 Uoiin hi nuizatbûra mi siemtu a na, Zu hrât chu insuol khêkna siemtu a na, Zu dawi vèta um chu a varthlâk nawh. 2 Lal lungsen chu keipui inhûk ang a na, A suklungsentu chun hringna a chân hlak. 3 Innghirnghona laka fihlim hi inzaum nina a na, Mi invêthai ruok chu an inrol phêt hlak. 4 Mi thabo chun a hunah hnuoi a'n let pei naw a, Busîk hunah sîk ding a hmu ngai bok nawh. 5 Lungrila mihriem tumhai chu li angin a'n thûk a, Sienkhom mi var chun a man suok vong thei. 6 Mi tam tak ringumin an insâl hlak a, Mi ring tlâk tak tak chu tuin am hmu zo a ta? 7 Indiknaa kalchawi hlak mi fel chu, A hnung zuitu a thlàhai an hamtha. 8 Ro rêl dinga lal a'n thung pha chun, A mitin thil tha naw po po a sêp fai hlak. 9 "Ka lungril ka vong thienghlim a, Suol lakah ka fâi" tu am ti thei? 10 Bùkna indik lo le inkhìna indik lo chu, Pathienin a theida ve ve a nih. 11 Naupang khom a changchavoiah, Mi thâ le indik a nizie a'n lang vong. 12 Hriet theina nâ le hmu theina mit hai hi, LALPA siem vong a nih. 13 Imu i thlâkhla chun rethei i ta, I har zing chun fâk seng lo nei i tih. 14 Inchawtuin, "A tha nawh, a tha nawh" a ta, A fe pha a thil inchawk chu a suong vieu si hlak. 15 Rangkachak dâm, lunghlu rubi dâm a tam, Hrietna thu hrilna hmûr ruok chu lunghlu vàng a nih. 16 Hnam dang ta dinga dakhama insietu silfên chu la la, Nuhmei tha lo ta ding a ni lem chun a silfen chu dakhamah sie rawh. 17 Thil fâk rûk chu inhnik hle khom ni sien, A tawpah bâua lung thîl hnaw sip ang a nih. 18 Mi berawnin thil ruohmang hlak la, Var taka râl rêl hmasa zetin bei hlak rawh. 19 Mi bâu tam chun thurûk a ip thei naw a, Chuleiin, mi bâu tam chu pawl naw rawh. 20 Tu khom nû le pâ tongsie inphurtu chu, Thim sa lai tak a khawnvar sukmitin um a tih. 21 Olsam taka rosum hau thut mihai chu, A tawp tieng hmûingìl naw ni hai. 22 "Ka poi i tawk, thungrul ka ti che"Ti ngai hrim hrim naw ro, LALPA nghâk unla, hung san suok a ti cheu. 23 Bùkna indik lo hi LALPAN a theida a, Inkhìna indik lo chu a tha bok nawh. 24 Ei kalchawi tin hi LALPA ruot a na, Tuin am a lampui ding hre thei a ta? 25 Thu intiem thuta a hnunga ngaituo chauh hi, Mani le mani insukkolawkna a ni hlak. 26 Lal var chun mi rilohai a zâp lêng a, Tawlailirin a chîl tawl hlak. 27 Mihriem lungril elvartu chu LALPA a na, A sûngril inthûk tak chenin a èn suok hlak. 28 Hmangaina le ringumnain lal a vong him a, A lalthungpha chu hmangainaa suknghet a nih. 29 Tlangvàlhai ropuina chu an hrâtna hi a na, Upahai mawina chu an lu intuok hi a nih. 30 Hliem khopa invuokin thil tha lo a sukfai a, Vuokna chun sûngril chen khom a tlêng fai hlak.

21

1 Lal lungril chu LALPA kuta tui hnàr ang a na, A nuomna tieng tieng an luongtir hlak. 2 Miin a lampui tin indikin a hriet hlak a, LALPA ruok chun lungril a bûk hlak. 3 Thil fel tak le indik taka thaw hi, Inthawina nêkin LALPAN a pom lem. 4 Mit meng insâng le lungril chapo hi, Mi riloin hmathead a hmang a na, Chu chu thil suol a nih. 5 Mi taima thiltum a hlawtling hlè hlak a, Hmawsaruma thawtu chu a tlaran hlak. 6 Khêla hausak chu tui hu inzâm ang a na, A zongtu chun thìna a zong a nih. 7 Mi suolhan thil dik thaw an nuom naw leiin, An nunrawngna chun phît hmang tawl a tih. 8 Thiem naw changtu lampui chu a kikawi a, Poi tawk lo lampui ruok chu a tha ngîl hlak. 9 Nuhmei inhal hmang le in lien hluo nêkin, In chung sîp kila um a tha lem. 10 Mi rilo chun suol thaw a châk dop dop a, A tuolbawmhai lakah zàngaina a'n langtir ngai nawh. 11 Hmusittu ei hrem chun mi mawlhai an var pha a, Mi var ei zirtir chun a hriet sap phâ teuh hlak. 12 Mi Dik chun mi suol sûngkuo a'n chik a, An chungah sietna a'n tlungtir hlak. 13 Mi retheihai khêk ri ngaithàtu chu, A khêk ve pha leh ngaithà ni vêng a tih. 14 A rûka thilpêkin lungsen a thawi dam thei a, Nasa taka lungsen khom tham lungawi thei a nih. 15 Ro a fel pha mi indikhai an lawm a, Thil suol thawtuhai ruok chu an chi-ai hlak. 16 Hrietthiemna lampui pêtsantu chu, Mithi ruol lai khawsa vêng a tih. 17 Nuomtawl ngot thlâkthlatu chu rethei a ta, Zu le sa ngainatu chu hausa ngai bok naw nih. 18 Mi suol chu mi fel intlanna'n hmang an ta, Mi ringum lohai chu mi indikhai intlanna'n. 19 Nuhmei hrângsie le inhal hmang le chèng nêkin, Thlalêra um a tha lem. 20 Mi var chêngnaah rosum le hriek a um zing a, Mi invêt ruok chun a chèn ral vong pei hlak. 21 Felna le hmangaina hnottuhai chun, Hringna, felna le chawimawina an dong hlak. 22 Mi var chun mi hrâthai khawpui a rùn a, An ringsan tak kulpui chu a sukchim hlak. 23 Tu khom a bâu le lei vêng thatu chun, Siet theina lakah a nun a vèng him a nih. 24 Mi chapo hming chu 'Hmusittu' a na, Chin lêm nei loa uongin thil a thaw hlak. 25 Mi thabo chun ieng khom a thaw pei naw leiin, Ruol inhnar rêng rèngin a thi hmang hlak. 26 Mi rilo inhnarna chu a pung ni tin hlak a, Mi fel ruok chun inro nei loin a sem hlak. 27 Mi rilo inthawina chu LALPAN a tirdak a, Suol thaw tumna lungril puta a hung chawi lem chu, A va hang tirdak nasa zuol awm ngei de! 28 Hrepuitu der chu bohmang a ta, A thu awituhai khom kumkhuon bohmang an tih. 29 Mi rilo chu a meng inrum a, Mi indik ruok chun a lam hraw a ngaituo hlak. 30 Varna, hrietthiemna le remruot iengkim, LALPA kalzawng chu a hlawtling ngai nawh. 31 Sakor chu indo nia dinga buotsai a na, Hnèna ruok chu LALPA ta a nih.

22

1 Hming tha hi sum tam tak nèkin a ditum lem, Mi ngaihlut ni khom tangka le rangkachak nèkin. 2 Rethei le hausain nina an intawm chu, LALPA kutsuok vong an nina hi a nih. 3 Remhre mi chun titna a hmu pha a'n bi a, Mi mawl chun a tawn a, a tuor pha hlak. 4 Inngaitlawm le Pathien ti man chuHausakna, chawimawina le hringna a nih. 5 Mi rilo lampui chu hling le chângin a sip a, Nun vong him nuomtu chun a hnai ngai nawh. 6 Naupang chu lampui indik inchûktir la, A upat hnung khomin pêtsan ngai naw nih. 7 Mi hausahan pasiehai chungah thu an nei a, Thil pûktu chu inpûktirtu siehlaw a nih. 8 Hleineina tùtû chun buoina a sîk hlak a, Mi chunga lungsenna hmol a lek chu suktliekin um a tih. 9 Mi tiktlai chu malsawmin um a tih, Mi retheihai chu bu a pêk hlak leiin. 10 Hmusittu hnot suok la, innghirnghona bo a ta, Inhal le inbiek sisawhai khom rèng a tih. 11 Lungril thienghlim ngainatu leHawihawm taka mi biengbiek thiem chu, Lalin ruolah nei a tih. 12 Hrietna nei mi chu LALPAN a hum tlat a, Mi khêlhliphai thu ruok chu a pei thlâk hlak. 13 Mi thabo chun, "Tuolah sakeibaknei a um!Ka suok chun mi sè hlum a tih" dâm a ti hlak. 14 Nu leplêr bâu chu tlâkpûm inthûk tak ang a na, LALPA lungsenna phurtuhai chu tla lùt an tih. 15 Naupang lungrila invêtna bu khuor chu, Thununna hmola hnot hmang thei a nih. 16 Hausak nuom leia pasiehai nêksawr leThilpêka mi hausa tlon chu tlâkranna a nih. 17 I nâ dawin, ka thuhai hi ngaithla la, I lungrilin ka hrilhai chu vong rawh; 18 I lungrilah vong a, i hmùrah i sie zing chun, Thil lawmum tak nîng a tih. 19 LALPA ringa amaah i'n nghat theina dingin, Voisun hin i kuoma ngei ka hril a nih. 20 Thurawn le hrietna thuvar sawmthum, Ka ziek suokpêk diem che a nih, Chu chun remruot thiem dàn a chuong. 21 Chu taka chun thu dik ring tlâk hrieng i ta, Thu dik hmu suok dinga an tir phâ che, A donna indik tak hre thei i tih. 22 Mi pasiehai rok naw rawh, an rethei si a, Rorêlnaah hrilpuitu nei lohai pal zût naw rawh. 23 LALPAN an thu hung hrilpui a ta, Anni roktuhai chu rok vèng a tih. 24 Mi nunsie ruolah siem naw la, Lungsen hmang inkoppui naw rawh, 25 A nungchang la pal i ta, Intâng song hlauh rawi i tih. 26 Mi leibat rul dingin intiemkam naw la, Dàkhamah insie ngai bok naw rawh; 27 A thungna ding i nei si naw chun, I zàlkhum chen làkpêk an ti che. 28 Tiena tlânga in pi le puhai lo phun, Ramri lung chu son ngai naw rawh. 29 Mani sin thiem mi i hmu am?Ama chu lal kuomah sin thawng a ta, Mi naranin sor phâk naw ni hai.

23

1 Rorêltu leh thlaithlèng i kîl chângin, I hmaa um kha en fîmkhur la, 2 Tâm taluoa i beng tuom tuom chun, I hnuk le chemte i chuktuo ang nîng a tih. 3 Indawhâna ruoi el a ni thei ti hre zingin, A'n hnikna ngot chu hnot naw rawh. 4 Hausak tum leiin insuk-kulcho naw la, Insùm dan chintawk hre dingin var rawh. 5 Hausakna chu i hmu vuoi a, a bo nawk dai a, Mupui thla put ve ang elin vàn tiengA vuong hmang nawk thut hlak a nih. 6 Mi tiksie inah bu fa ngai naw la, Thil inhnik a neihai chu inhnar naw rawh; 7 A sêng zàt ding ngot sût mi a na, e "Fain dawn teuh rawh" ti sien khom, A lungrilin a ngài poimaw naw che. 8 I fàk tah tlawmte khom inluok suokin, Inpâk thlawn pal hlauh rawi i tih. 9 Mi invêt chu ieng khom hril naw rawh, I thu varhai chu iengah ngai naw nih. 10 Pipu ramri lungphun son naw la, Fahràhai ram nêk ngai bok naw rawh, 11 Anni Humtu chu a hrât a, Anni chu tan a ta, khing a ti che. 12 A zirtirnaah i lungril innghat la, Hrietna thu tieng i nâ daw rawh. 13 Naupang thununah intîm naw rawh, Hmola i vuok leiin thi naw nih. 14 Hmol hmangin hrem la, Seola inthokin a thlarau san suok i tih. 15 Ka naupa, i lungril a var chun, Ka lungril lawm takzet a tih. 16 I bâuin thu indik a hril chun, Ka thlarau lawm takzet a tih. 17 I lungrilin mi suolhai inhnar naw la, LALPA tîna tieng thahnem ngai pei lem rawh. 18 Chuongchun, hma tieng beisei ding nei i ta, I beiseina chu thlawn ngai hrim hrim naw nih. 19 Ka naupa, ngaithla la, var rawh, Lampui indikah i lungril sie tlat rawh. 20 Uoiin hè mi chu inkoppui naw la, Sa hè mihai lai inzêl bok naw rawh; 21 Inrui hmang le hnukrawlhai chu rethei an ta, Inrui muchukhai chun zakaw tiek hâk an tih. 22 A hringtu che i pâ thu zawm hlak la, I nû a hung tar pha hmusit naw rawh. 23 Thu dik inchaw la, zor ta naw rawh; Varna, inkeithuoina le hrietthiemna hai inchaw rawh. 24 Nau fel neitu chu nasa takin a hlim a, Nau var neitu chu a nau chungah a lawm hlak. 25 I chungah i nû le pâ lawm hai sien, A hringtu che chu hlim raw se. 26 Ka naupa, i lungril mi pe la, Ka lampui chauh bi ngar ngar rawh. 27 Nawchizor chu tlâkkhur inthûk tak ang a na, Nuhmei suol chu tuikul inchêp tak ang a nih; 28 Suomhmang angin mi an inchàn a, Pasal ruol lai bawsietna an sukpung. 29 Tu am chungpik, tu am lungngai, Tu am buoina nei, tu am thubuoi nei, Tu am tûl loa hliem tuor hlak, Tu am mit meng sen rûm hlak chu? 30 Sawt tak tak uoiin inthung chila, Uoiin chokpol dawn hlakhai chu an nih. 31 Noa uoiin sen phul sar sar el, An lem khiet khiet lai dâm chu, A en khom en ngai naw rawh. 32 A tawpah rûl angin mi a chuk a, Rûlngân tûr angin mi a fang hlak. 33 I mitin thil mak tak tak hmung i ta, Thil inzom lo tak tak ngaituong i ta, 34 Tuipui insok chunga zâl ang leLong ngul lêra inthên inthên, Long inrui ang el nîng i tih. 35 "An mi loka chu a na nawh, An mi vuoka chu ka hriet si nawh!Ieng tik am kei hi tho harin, Dawn ding ka hmu thei ding chu aw?" ting i tih.

24

1 Mi rilohai inhnar naw la, Anni lai thang ve châk bok naw rawh; 2 Inpawngnêkna ding ngot an dap a, Poi tawk dàn ding ngot an hril hlak. 3 Varna hmanga sûngkuo chu indin a na, Inhrietthiem tonnaa suknghet a nih. 4 In sûng chu ro hlu le mawi tinrênga, Hrietna hmanga sung sip a nih. 5 Pasaltha var chun mi hrât khawkhêng nêkin, Nasa takin thil a thaw thei lem a, Hrietna hi awmkhau nêkin a tha lem. 6 Râl do dingin râl rêl thiem a ngai a, Remhre hauhai chun hmèlma an hnè hlak. 7 Kul kota mipui pungkhawmnaaThupui vai phâk lo mi invêthai ta dingin, Varna hi ban phâk ruol a ni nawh. 8 Thil tha lo thaw ding phier hlaktu chu, Mihaiin mi khel siet hmangah an ngai. 9 Thil tha lo phier hi suol a na, Hmusittu chun mi hnâm a kai. 10 Buoi mangang huna i châu tlep el chun, Hràtna i nei tlawm hlê a nih. 11 Indik lo taka thi dinga an thuoihai chu san lo a, That dinga an fen dawr dawrhai chu ensan a, 12 "Kan lo hriet ve rêng rêng lem ie!"Tia inhril tlip in tum tâl dâm a ni chun, Lungril bûktu'n a hmu naw ding cheu maw?In thlarau vêngtu chun a hriet kim vong a, Mi tin an thil thaw angin a rul ding a nih. 13 Ka naupa, khuoizu dawn rawh, a tha si a, A thlâra inthoka far ngei chu inhnik i ti kha. 14 Varna hi i hringnun khuoizu a nih ti hre la, I man fûk chun hma tieng beisei ding nei i ta, I beiseina chu thlawn ngai hrim hrim naw nih. 15 Suomhmang angin mi fel in inchân naw la, A chêngna in chu rok ngai naw rawh, 16 Mi fel chu voi sari tlu sienkhom, A hung tho nawk pei hlak a, Mi rilohai ruok chu sietnain a chim nel hlak. 17 I hmêlma a tlùkin diriem naw la, A'n sui chângin i lungril lawm naw raw se. 18 LALPAN hmuin dit nawng a ta, A chunga a lungsenna rè hlau rawi a tih. 19 Thil suol thawtuhai leiin insukhnûr nuom naw la, Mi rilohai chu inhnar ngai bok naw rawh 20 Mi suol chun beisei ding hrim a nei naw a, Mi rilo khawnvar chu sukmit vak nîng a tih. 21 Ka naupa, LALPA le lal chu ti la, Anni laka helhai chu inkoppui naw rawh; 22 An chungah sietna intlungtir thut an tih, Sietna intlun theitu an ni ve ve si a. 23 Mi var chun hienghai khom hi a hril:Rorêlnaa thlei bik nei hi a tha nawh. 24 Mi rilo kuomah, "Poi i tawk nawh" titu chu, Miin tongsie inphur an ta, Hnam tinin tirdak an tih. 25 Thiem naw inchangtirtu ruok chu lawm an ta, Malsawmna tam tak vûrin um bok a tih. 26 Donna indik tak pêk chu, Hmûra infawp ang a nih. 27 Puo tienga i sin chu thaw zo la, I lohma iengkim rêl fel diem la, Chu zoah i in ding indin rawh. 28 A san boin i tuolbawmhai thubuoiah, A kal zawngin hrepuituah thang ngai naw la, Khêl hrilnan i hmûr hmang naw rawh. 29 "Amân ka chunga a thaw ang charin, Hang thungrul vèng ka tih" ti ngai naw rawh. 30 Mi thabo lo ka hraw tlang a, Rem hre lo grèp huon ka sir bok a, 31 Hmun tin hlingin a bawm sip a, A hnuoi thûlin a tuom phui vong a, A dâi lung bang a chim thla vong. 32 Ka thil hmu ka ngaituo neu neu chun, Inchûk ding thil ka hmu suok a: 33 'La hang zâl met ka tih, La hang inhnâr met ka tih, Kut hmasuiin, hadam takin, La'n zam met ka tih' i ti sûng khan, 34 Pasietna chun rûkru angin, Hung nang thut a ti che a, Tlâksamna khomin râl angin, Hung nangching thut a ti che.

25

1 Hienghai khom hi Solomon thuvar dang, Judai ram lal Hezekia mihaiin, An ziek thlâk sawng chu a nih: 2 Pathien ropuina chu a thil thup a na, Lalhai ropuina chu a thil thup zong suok a nih. 3 Vàn insângzie le hnuoi inthûkzie ang bokin, Lalhai lungril khom sui suok ruol a ni nawh. 4 Tangkaruo êk po i pei hmang chun, A sertuin thil tha hung ser suok a tih; 5 Lal bula inthokin mi rilo po son hmang la, A lalna chu felnaa suknghetin um a tih. 6 Lal hmaah invor làr tum naw la, Milienhai lai thung inchu bok naw rawh; 7 Milienhai hmaa insukhmaimawk nêkin, Thungna tha lema thung dinga fiel ni a tha lem. 8 I mit ngeia i thil hmuhai khom, Rorêltu kuomah intlun inhmaw naw rawh; A tawpah i tuolbawmin sukmuolpho sien che, Ieng am i law hrim ding a na? 9 I tuolbawm leh thubuoi in nei a ni khomin, Hmai intonin in thu chu hrilpui la, Mi dang thurûk hril suok ngai naw rawh; 10 A lo hretuin sukmuolpho hlau a ti che a, I hming siet rè ta ngai naw nih. 11 Thû a ni dàn ding ang taka hril suok hi, Tangkaruoa rangkachak mûm phùm ang a nih. 12 Mi var zilhauna chu a ngàithlatu ta dingin, Rangkachak nabe le kutsebi nêkin a hlu lem. 13 Palai ringum chu a tirtu ta dingin, Bu sîk huna vûr dei ang a na, A puhai lungril a sukhar song song hlak. 14 Thilpêk pe dinga intiem sia pe lo chu, Sûm tui pai lo thliin a lên ang chauh a nih. 15 Dawtheinain rorêltu lungril a hnè thei a, Tong innemin rù khom a dèng tliek thei. 16 Khuoizu i hmu chun a huntawk char fa rawh, I fâk rawn taluo chun inluok rawi i tih. 17 An khât tawk chauin i tuolbawmhai sir rawh, I leng inzing taluo chun nghok an ti che. 18 Mani tuolbawmhai indik lo taka hèk chu, Hmol le kawlhnàm le thal inzum tak ang a nih. 19 Buoi nikhuoa mi ringum lo ringsana hmang chu, Ha nâ le ke rù inpelsol nei ang a nih. 20 Mi lungngai laia hla sakkhum chu, Dei laia silfên lakpêk ang le, Hliemna bea changal bur ang a nih. 21 I hmêlma a phing a tâm chun bu pe la, A dang a châr chun dawn ding pe rawh. 22 I pêk chun a luah meiling i sie khawl nîng a ta, LALPAN lawmman pêng a ti che. 23 Hmar thliin ruo a hung thuoi hlak angin, Mi dem hmang leili chun lungsen hmêl a kei pung. 24 Nuhmei hrângsie le in lien tak hluo nêkin, In chung sîp kila um a tha lem. 25 Ram hla taka inthoka chanchin lawmum hriet chu, Châu dangchârin tui dei a'n khiet ang hi a nih. 26 Mi rilo hmaa mi fel tlawm chu, Tuikhur suksiet le tuihnar sukporchè ang a nih. 27 Khuoizu dawn rawn taluo a tha naw ang bokinChawimawi hlaw tum taluo hi a tha nawh. 28 Mani inthunun thei lo mi chuKhaw kul bang chim ang a nih.

26

1 Nipui laia vûr tlâk le busik huna raw sûr chu, Thil inhmè lo a ni ang bokin, Mi invêt le chawimawina hi thil inhmè lo a nih. 2 Chongzong vuong kuol le peleu inlêng angin, A san boa tongsie inphur chu a'n leng kuol hlak. 3 Vuokna hruol chu sakor ta ding a na, Thîrbar chu sabengtung ta ding a na, Hmoltum chu mi invêt ruongzànga ding a nih. 4 Zawna invêt tak tak i don pei chun, A zawna indontu anga invêt ni vêng i tih 5 Invêt chu a'n vêt dàn ang chauhin don rawh, Chuong naw chun varah inngai hlauh rawi a tih. 6 Mi invêt zuolkoa tirtu chu, Mani ke tan bong a, Nunrawngna tui dawntu ang a nih. 7 Thuvar hi mi invêt baua ding chun, Ke zeng thên ang mei mei a nih. 8 Chawimawina mi invêt inkhumtir chu, Saihlia saihlûm khit de ang a nih. 9 Thuvar hi mi invêt bâua ding chun, Zurui kuta hling lût ang a nih. 10 Mi invêt le mi lênglak sor hlaktu chu, A hmû hmù kâp hliem hlak thal kâptu ang a nih. 11 A luoka bok kîr nawk hlak ui angin, Invêt chun thil invêt a thaw non rop hlak. 12 Var si loa vara inngai nêkin, Mi invêt chun beisei ding a la nei lem. 13 Thabo chun, "Lampuiah keipui a um, Kotthlêrah keipui a'n vâk" a ti hlak. 14 Kotkhâr chu kopzaa inthlung a ni angin, Mi thabo khom a khum leh an inmat hlak. 15 Mi thabo chun buthlêng a pur a, Bu beng dingin kut a hlàng pei si nawh. 16 Fîmkhur taka thu hril hlak mi pasari nêkin, Mi invêt chun var lem daiah a'n ngai. 17 Lam laka mi buoinaa inroltu chu, Ui tuol leng lai naa lo mantu ang a nih. 18 Mi invêt, thingthu hringa mi nor a, Thi theina thala mi kâptu chu, 19 Mani tuolbawmhai hlêm a, "Ka fiemthu a nih" titu ang char a nih. 20 Thingthu bo chun mei a rêm ang hin, Inlawt tuo a um nawnaah inhal a rè hlak. 21 Meihol a tam leh mei a'n ling tha a, Thing a tam leh mei a chok tha ang bokin, Inhal hmang tamnaah buoina a pung hlak. 22 Inlawt indem hi bu inhnik tak ang a na, Mihriemin ei dol lût zung zung el hlak. 23 Hmûr thiem, lungril suol put si chu, Dâr tuia pil bêl zût tlêt ang a nih. 24 Mi vervêkin theidàna a pài ruk chu, Tongkam thain a thup thiem hlak. 25 Thu hril thiem hlè sien khom awi naw rawh, A lungrilah tirdakum pasari a pâi si a. 26 A theidàna chu hlêmna thuin thup sien khom, A rîtlona chu tlâng hrieta phor lang ni tho a tih. 27 Tlâkkhur chotu chu ama khur choa chun tlâng a ta, Lung inhlumtu chu a chungah hung inhlum lêt a tih. 28 Lei khêlhlip chun a'n hliemhai chu a theida a, Inpâk derna hmûr chun sietna a'n tlun hlak.

27

1 Zînga ding thil uongpui naw rawh, Zîngin iem a her suok ding i hriet si nawh. 2 Mani bâua mani inpâk loin, Mi dangin inpâk lem raw hai se che, Nangma hmûra inthok ni loin, Hmêl hriet lo hmûra inthok ngeiin. 3 Lung hi a rik a, phaiphin hi a khìn a, Mi invêt chona chu an pahni nêkin a rik lem. 4 Lungsenna hi a rawng a, Lungsen intûr lem chu a phul buon buon a, Sienkhom thîkna chu tuin am tuor zo a ta? 5 A rûka inhmangai nêk chun, Tlang taka inzil hi a hlu lem. 6 Ruol mi ben chu thatna ding a na, Hmêlma fawp luom chu a der a nih. 7 Khop lai chun khuoizu khom ei hnâm a, Tâm chun thil khá khom a'n hnik vong. 8 In le lo ngaisak loa dauràp chu, A bu op lum hman lo vate ang a nih. 9 Hriek le rimtuiin lungril a suklawm angin, Lungril taka suok ruol tha thurawn pêk chun, Lungril a sukhlim hlak. f 10 I ruol le i pâ ruolhai nghatsan naw la, Sietna i tuokin i unau kher pan naw rawh. Ràla unauhai nêkin tuolbawmhai an tangkai lem. 11 Ka naupa, var la, ka lungril suklawm rawh, Mi hrilsetuhai chu ka don lêt theina dingin. 12 Remhre mi chun titna a hmu pha a'n bi a, Mi mawl chun a tawn a, a tuor pha hlak. 13 Hriet lo mi ta dinga dakhama insietu silfên chu la la, Nu tha lo lakah a ni lem chun a silfên chu dakhamah sie rawh. 14 Zîng inhma taka mi kei tho a, Inring vuola mi chibai chìng chu, Tongsie inphur ang charin ngai an tih. 15 Nuhmei inhal hmang chu ruo nichîng ang a nih; 16 Khap dei tum chu thli dang tum ang leKuta sahriek fùn dè tum ang a nih. 17 Thîrin thîr bok a sukngei thei angin, Mihriemin mi dang a tât ngei hlak. 18 Theichang kung enkoltu chun a rà fâng a ta, A pu enkoltu chun chawimawi hlawng a tih. 19 Tuiah hmêl thla a'n lang angin, Mihriem lungrilah a nìna a'n lang. 20 Thina le Sietnan khop tik an nei naw angin, Mihriem mit khomin khop tik a nei nawh. 21 Suongtuina bêl chu tangkaruoa ding a na, Rawtuina pûm chu rangkachaka ding a na, Mihriem fiena chu inpâk a hlawnaah a nih. 22 Mi invêt chu bu rawtna lunga rawtin, Sumah fahrelin suk hrep khom ni la, An vètna chu sukkhè thei chuong naw ti nih. 23 I beramhai ngîrhmun hre chieng la, I ran ruol fîmkhur takin enkol rawh. 24 Hausaknain kumkhuo a dai naw a, Lalna khomin thang tam a dai nawh. 25 Hlo an àt a, der thar a hung insuo a, Tlânga inthokin ran bu an làk khawm hlak. 26 I beram hmulhai chu sil i ta, Kêl manin ram inchawng i ta, 27 I sûngkuo chawmna dinginKêl nenetui tam tak sawr i ta, I siehlaw nunghâkhaiin tlàn bok an tih.

28

1 Mi suol chu tu hnot loin a tlânsie a, Mi fel chu sakeibaknei angin a huoi. 2 Ram sûngah helna a suok pha, Rorêltu an inthlàk zûr zut hlak a; Lal var le hrietna hau mi ruok chun, Buoina um loin ram a enkol hlak. 3 Pasiehai nêksawr mi rorêltu chu, Bù phà setu ruopui vânawn ang a nih. 4 Dàn bawsetuhan mi rilohai an inpàk a, Dàn zawmtuhai ruok chun an dodàl hlak. 5 Mi suolhan rorêlna dik an hriet thiem naw a, LALPA zongtuhai chun iengkim an hriet thiem. 6 Nun khawkher hrawtu mi hausa ni nêkin, Soisel boa kalchawitu mi rethei ni a tha lem. 7 Dàn zawmtu nau chu lungvar nei mi a na, Mi hnukrawlhai pawltu chu a pâ sukzaktu a nih. 8 Sum pung la teua insukhausatu chun, Mi rethei lâinatuhai ta dingin a khawl khawm a nih. 9 Tu khom dàn bengkhon nawtu chu, An tongtainahai chen khom a tirdakum. 10 Lampui tha loa mi indikhai thuoitu chu, Ama tlâkkhur choa ngei chun tlâng a ta, Soisel boa khawsatu ruok chunThil tha dongin rochung a tih. 11 Mi hausa chun var a'n ti hle khom a ni thei a, Lungvar nei mi rethei chun a hmu tlang vong si. 12 Mi fel a hlawtling chun hlimna nasa tak a um a, Mi rilo a dingchang pha mi an inbi hmang hlak. 13 Mani suolna iptu chu hmuingil naw ni a, Inpuonga simtu chun zàngàina hmung a tih. 14 LALPA ti roptu chu a hamtha, Mi lulul ruok chu a vangduoi hlak. 15 Rorêltu suol chu mi retheihai ta dingin, Keipui inrum le savom mi hnot ang a nih. 16 Hrietthiemna tlasam lal chun, Rawng takin mi a nêksawr hlak; Hlêprûkna theidatu lal ruok chu, A dam sung nihai sukseiin um a tih. 17 Tuolthattu chu tuoltlân sien khom, Tu khomin hum naw hai sien la, A thi chenin tlân se zing raw se. 18 Soisel boa kalchawitu chu him a ta, Nun khawkher hrawtu ruok chu tlu thut a tih. 19 Mani lo inlettu chun bu hau a ta, Duthusam ringot hnottu chu pasieng a tih. 20 Mi ringum chun malsawmna dong rawn a ta, Hausak thut tumtu chu hrem loin suok naw nih. 21 Thlei bîk nei hi a tha nawh-Bei hlek chunga khom thaw suol thei a nih. 22 Mi tiksie chun hausak vat a châk a, Pasietnan a nghâk zing ti a hriet si nawh. 23 Mi ziltu chun mi inpâk dertu nêkinA tawpah mi ngàinat hlaw lem a tih. 24 Mani nû le pâhai rok a, "Ieng khom a suolna a um nawh" titu chu, Suomhmang ruol tha a nih. 25 Mi duâm chun innghirnghona a chok suok a, LALPA-a innghattu ruok chu hmûingìl a tih. 26 Mani lungrila innghattu chu mi invêt a na, Varnaa kalchawitu ruok chu a him hlak. 27 Pasiehai somdawltu chu tlasam ngai naw ni a, Mit insîmsantu ruok chun tongsie phur teu a tih. 28 Mi rilo an dingchang pha mihai an inbi a, Mi rilo an ram pha leh mi fel an pung hlak.

29

1 Zil rop khoma rîng la sukkhong tlattu chu, Sukdam ruol loa suktliekpêk thut la nîng a tih 2 Mi felin lalna an chang phâ mipui an lawm a, Mi riloin ro an rèl phâ mipui an inrûm. 3 Varna dittu nau chun a pâ a sukhlim a, Nawchizor inkoppuitu chun a suktlaran hlak. 4 Rorêltu indik lal chun ram a suknghet a, Thamna ngàinatu ruok chun a suksiet hlak. 5 Tuolbawm inpâk der ching mi chun, A'n awkna ding lên châng a kam a nih. 6 Mi tha lo chu a suolnan a awk a, Mi fel ruok chun hlim takin hla a sak. 7 Mi fel chun retheihai chan a hriet thiempui a, Mi rilo ruok chun a hriet thiempui ve nawh. 8 Hmusittuhai chun khuo an chokbuoi a, Mi felhai ruok chun an thawi dam hlak. 9 Mi varin mi invêt a khing chun, Mi invêt êltam hràng ri chun, Tawp zâi rêng a rèl ngai nawh. 10 Thisen insuo mihan mi indik an theida a, Mi ngîlhai sukhlum dàn an zong hlak. 11 Mi invêt lungsen chu a'n hrawt hrep a, Mi var ruok chu a'n khap dei hlak. 12 Rorêltuin thukhêl a dondai chun, A thoktu po po mi rilo an inchang hlak. 13 Pasie le a nêksawrtu inthuhmunna chu, LALPAN hmu theina mit a pêk ve ve hi a nih. 14 Pasiehai chunga indik taka rorêltu chu, A lalna suknghet ni zing a tih. 15 Thununna hmol chun varna a'n tlun a, Thunun lo nau chun a nû a sukmuolpho hlak. 16 Mi rilo an inlal pha bawsietna khom a pung a, Mi felhai ruok chun an tlûksiet hun la hmung an tih. 17 I nau i thunun tha chun hadam i ta, I lungril suklawmtu nîng a tih. 18 Hmulawkna a um nawna hmuna chun, Mipui an inthlàdà hlak a, Dàn zawmtuhai ruok chu an hamtha hlak. 19 Siehlaw chu hril chaua thunun thei a ni nawh, Hre thiem khom ni sien, ûksak naw nih. 20 Nuompawnga tong puot puot mi nêkin, Mi invêtin beisei ding a la nei lem. 21 A chîn laia inthoka siehlaw duot suol chun, A tawpah ro chen hung inchù pei a tih. 22 Thinsie chun innghirnghona a chok suok a, Lunginrom chun suol a thaw rem rum hlak. 23 Mi chapo chu a chaponain a hnûk hnuoi a, Lungrila inngàitlawm chun chawimawi a hlaw hlak. 24 Rûkru inkoppuitu hmêlma chu ama a nih, Thudik hril dinga intiemkam siin a hril ngam nawh. 25 Mihriem tina chun châng angin mî a awk a, LALPA-a innghattu ruok chu a him hlak. 26 Mi tam takin lal ditsakna an zong a, Indik taka rorêltu chu LALPA a ni lem si. 27 Mi felin mi ringum lo a ten a, Mi riloin mi indik a ten bok.

30

1 Jakeh naupa Agur thu, Ithiel le Ukal kuoma thuvar a hrilhai chu:g 2 "Mi laia a mawl tak ka na, Mi hriet ang ka hriet phàk ve naw a, 3 Varna ka'n chûk naw a, Mi Thienghlim ka hriet bok nawh. 4 Tu am vànah lawna hung tum nawk?Tuin am kutpàrin thlî a fûn khawm thei?Tuin am puonin tui a fûn thei?Tuin am kawlkil tin a siem nghet?Tu am a hming le a naupa hming?A hrie in um chun mi hril ro. 5 "Pathien thu tin hi soisel boa indik a na, Ama bêltuhai ta dingin phaw a nih. 6 A thuhai chu belsa naw ro, Chuong naw chun zil a ti cheu a, Khêlhlip ni pal rawi i tih. 7 "Aw LALPA, thil pahni chauh ka ngên che, Ka thì hmain mi remtipek lul rawh. 8 Indik nawna le khêl po po lakah, Nangman mi vêng him la, Mi sukhausa naw la, Mi sukpase bok naw la, Ka ni khat tlâk char bu mi pe rawh; 9 Ka hausa taluo pal hlauh chun, 'LALPA chu tu am a na?' tiin, Inphatsan hlauh rawi ka ti che. Ka rethei chun rûk dâm inrûng ka ta, Ka Pathien hming sukhmêlhem rawi ka tih. 10 "A pû bulah siehlaw dem naw rawh, Tongsie inphur hlauh a ti che a, Thiem naw chang palh rawi i tih 11 "Thenkhat chu pâhai tongsie inphur, Nûhai malsawm lo dâm an um. 12 Mani tirdakumna sawp fai si loa, Thienghlim êm êma inngai an um bok. 13 Ieng lai khomin an meng chapo a, Mi tham naw êm êmin an meng inlir. 14 Hnuoia mi retheihai fâkna dingin, An hà kawlhnâm angin a ngei a, Mi pasiehai soi nawina dingin, An hapui chu chemte lu zum ang a nih. 15 'Mi pe rawh, mi pe rawh' tia khêk hlak, Invot chun nau nuhmei pahni a nei. 'Thil pathum, khop tik nei lo an um a, 'A hun tah' ti ngai lo thil pali an um bok: 16 Thlàn, sul ching, Tui khopkham dong lo hnuoi châr, 'A hun tah' ti ngai dèr lo mei. 17 "Nau, pâhai mit phielkhumtu, Nau, nû thu awi loa nuisantu chu, Phaia vaâkhaiin a mit la chuk dok an ta, Mulukolhan a ruong la tlàn an tih. 18 "Thil pathum mak ka ti tawp lo an um a, Thil pali ka hriet thei lo an um bok: 19 Boruoka muvânlai fêna hnûhma, Lungpuia rûl fêna hnûhma, Tuipuia long fêna hnûhma, Pasalin nuhmei a pawlna hnûhma. 20 "Hi hi a nih nuhmei uire um dàn chu:Mi a uirepui a, a'n sawp fai a, 'Suol ieng khom ka thaw nawh' a ti hlak. 21 "Thil pathum leiin hnuoi hi an hnìng a, Thil pali khawvel tuorhla a um: 22 Siehlaw lala inthung, Mi invêt bu le sa hauh, 23 Nu theidaum pasal nei, Siehlaw nunghâk, a pî hlàntu. 24 "Hnuoia hin thil pali chiktê tè, Sienkhom var deu el an um: 25 Phâivâng hi hrât naw tak an nia chu, Thâlah fâk ding an sêkkhawl hlak; 26 Sangawi hi hrat naw tak a nia chu, Lungpui kak kâr inin an hmang; 27 Khau hin lal an nei nawa chu, A honin an intlon hlak; 28 Cholru hi man el thei a nia chu, Lal inah a chêng tlat hlak si. 29 "Thil pathum, an nawh thil pali lem, An hang chêt vela inzà phur tak an um: 30 Sakeibaknei, ramsahai lal, Tû hmaa khom zâm ngai lo; 31 Arkhong lawn theu theu; A ruol laia kèlchal; Lal, a sipaihan an ngîr huol khup lai. 32 "Invêt taka nangma inchawisâng a, Thil suol thaw ding i lo phan a ni chun, I kutin i bàu hup hmak rawh. 33 Bawngnene inluma chok zing chun, A khal a hung suok hlak ang le, Hnâr her chun thisen a suok hlak angin, Lungsenna i cho phawk ngei chun, Insuolna chok dok a tih. "Lal Lemuel thuvarhai

31

1 Lal Lemuel thuvarhai, a nuin a zirtirhai chu: 2 "Aw ka naupa, aw ka rîla rà, Ka thu intiemkamna rà suok, 3 Lalhai suksetu nuhmei lakah, I hrâtna hmangthâi naw rawh. 4 Aw Lemuel, uoiin dawn hi, Lalhai thaw ding a ni naw a, Rorêltuhai khom zu hrât ngaiin, An dang a châr ding a ni nawh; 5 An dawn chun dàn theinghilin, Nêksawrhai piengvo lapêk rawi an tih. 6 Boral mèkhai chu zu hrât pe la, Mi lungngaihai chu uoiin pe rawh. 7 Dawn hai sien, an pasietna le, An rinum tuor theinghil raw hai se. 8 "Mani thu hril thei lohai chu hrilpêk la, Mi baivaihai chu san rawh. 9 Hrilpui la, thu inlai takin rêl la, Mi retheihai chanvo humpêk rawh. 10 Nuhmei tha le inzaum hi, Thil hmu harsa tak a na, Lunghlu sen nêk daiin a hlu lem. 11 A pasalin a ringzo a, Hlutna iengkim koltu a nih. 12 Ama chun a dam sûng po poin, Sietna nêkin thil tha a hung intlun a, 13 Beram hmul le pat a zong a, A kutin inhawk takin a khawng a. 14 Ram hla taka inthoka hung, Bu tol sumdawng long angin, Fâk ding a lâk khawm hlak a. 15 Khaw var hmain a tho a, A sûnghai zîng bû a pèk a, A siehlawnuhai thaw ding a rèl fel a. 16 Huon ding ngàituoin a'n chawk a, A thaw suokin grèp huon a siem a. 17 Thatho takin sinah a pu a, A bân thàhai a sukhràt a. 18 Hlawk ngei dingin sum a dawng a, Zànah a khawnvar a mit ngai nawh. 19 A kutin hmûi thlùr a chel a, A kut khingin pat a kher a. 20 Mi retheihai ta din a thilphal a, Mi baivaihai a somdawl hlak. 21 Vûr tlâk hunah a sûngkuohai, An lungkham ve ngai dêr nawh, An rêngin thuom lum an nei si. 22 Khumpha puon mawi a khawng a, Silfên to le puon sendukin a'n thuom a. 23 Kul kot bula pungkhawmhai lai, A pasal chu upahai lai a thung ve a, Mihai inzà a hlaw a. 24 Silfên man to siemin a zor a, A hrènpuon tà chu sumdawnghai a thon a. 25 Hràtna le inzaumna'n an thuom a, A hmâ tieng chu a ta din innuina a nih. 26 Var takin thu a hril a, A bâu suok chu ringumna thuchà a nih. 27 Insûng khawsak tha takin a enkai a, Thabona bu a fâk vè ngai nawh. 28 A nauhai chun a hmaah thoin, "Hamthanu" tiin an ko a, A pasal khomin chuong anga inpâkin, 29 "Thil hlû thaw nuhmei an tam vei leh, Nang ruok chun i khûm zo vong" tiin. 30 Ngainobeina hi thil hlun lo a na, Hmêlthatna khomin sawt a dai nawh; LALPA tìtu nuhmei chu inpâk tlâk a nih. 31 A thaw rà lukhawng dong sien la, Kul kotkhârah chawimawi hlaw raw se.