1

1 Rorêltuhaiin ro an rêl laiin a ramah tàm a tla a. Judai ram Bethlehema inthokin mi pakhat chu a nuhmei le a naupa pahnihai thuoiin Moab ramah iemani chen um dingin a fe a. 2 Pasal hming chu Elimelek a na, a nuhmei hming chu Naomi a na, a naupa pahnihai chu Mahlon le Kilion an na, Judai ram Bethlehema Efrat mi an nih. Moab rama chun an fe a, chu taka chun an um ta zing a. 3 Naomi pasal Elimelek chu a thi a, a naupa pahnihai le chauh an um ta a. 4 A naupahai chun Moab mi nuhmeiin an nei a, pakhat hming chu Orpa a na, pakhat hming chu Ruthi a nih. Chu taka chun kum sawm vel an um hman a. 5 Chun, Mahlon le Kilion khom chu an thi ve ve a, Naomi chu pasal bo le nau bo a hung ni ta a. 6 LALPAN a mihai hung kanin fâk ding a pêk nawk tah ti Moab rama inthoka a lo hriet chun, Naomi le a mohai chu in tienga kîr nawk dingin an insiem a. 7 A mo pahnihai leh an umna chu suoksanin Judai ram panin an suok a. 8 A nakie deu chun Naomi'n a mo pahnihai kuomah, "In nuhai in tieng ve ve panin kîr nawk ta ro. Ka chunga le in pasal thi tahai chunga lunginsietna in inlangtir ang bok khan LALPA khomin in chungah ngilnei takin thaw ve raw se. 9 LALPA chun hadam taka in khawsakna ding pasal dang pe cheu raw se" a ta. Chuongchun, inthena dingin an infawp ngawi ngawi a, inring takin an tap a. 10 An pahni chun, "Fe nawng kan tih, i kìrna ding i chipuihai kuoma chun hung ve lem kan tih" an ta. 11 Naomi ruok chun, "Ka naunuhai, kîr lem el ro. Ieng leiin am in mi zui ding a na? In pasal ding nau dang ka la pai thei ding am a ni? 12 Ka naunuhai, kìr el lem ro, pasal dang nei dingin ka upa taluo tah. Ka ta dinga beiseium khom lo ni ta hrim sien, voizân hin pasal neiin nau khom lo nei ni ta lang, 13 an puitling chenin pasal nei loin in nghâk el ding maw? Ni lo e, ka naunuhai, chu chu ni thei naw nih. LALPA kut ka chunga tla hi nangni chan nèkin a kha lem a nih" a ta. 14 Chuongchun an tap nawk rak a. Orpa chun a tarpi chu inthena dingin a fawp a, Ruthi ruok chun a kuo tlat a. 15 Naomi chun, "Ngai ta, i mo chanpui chu a chihai kuom tieng le a pathienhai kuom tieng a kîr nawk a, nang khom ama ruolin kîr nawk el rawh" a ta. 16 Ruthi ruok chun, "Nangma the ding che le nang zui loa kîr ding chun mi ti ta lul naw raw khai. I fena taphotah hung ka ta, i riekna taphotah riek ka ta, i chihai chu ka chihai nîng an ta, i Pathien chu ka Pathien nîng a tih. 17 I thinaa chun thing ka ta, chu taka chun an mi phum ve el ding a nih. Nang le kei hi thina chauh naw thil dangin a mi the ding chun, ieng anga nasa khomin LALPAN a law law mi law el raw se" a ta. 18 Ruthi chun zui a tum tlat ti Naomi'n a hriet phing leh a ti zui ta naw a. 19 Chuongchun, an pahni chun Bethlehem an tlung chenin an fe pei a. Bethlehem an tlung chun anni leiin a khawnawtin an phul a, nuhmeihai chun, "Hi hi Naomi kha a ni naw maw?" an ti sup sup a. 20 Ama chun, "Naomi mi ti ta naw ro, Mara mi ti ta lem ro, LALPA chun ka hringnun hi kha takin a siem ta si a. 21 Sûng kimin ka fe suok a, kut ruokin LALPAN a mi hung thuoi kîr a. LALPA chun a mi sukrinum a, Iengkimthawthei chun ka chungah vangduoina a'n tlâktir a, ieng leiin am Naomi in mi la ti zing ding?" a ta. 22 Chuong ang chun Naomi chu Moab rama inthokin a mo Ruthi, Moab mi le chun barli an sìk tan laiin Bethlehemah a hung tlung tah a nih.

2

1 Naomi chun a pasal sûnghai, Elimelek thlaa mi, pa neinung tak el laichin pakhat a nei a, a hming chu Boaza a nih. 2 Chun, Moab mi Ruthi chun Naomi kuomah, "Loah fèng ka ta, mi lo lunginsiettu tuhai bu lâk hmai va zong ka tih" a ta. Naomi chun, " Fe ta la, ka naunu" a ta. 3 Chuongchun a fe a, Elimelek thlaa mi Boaza loa ngei chun a va fe fûk hlauh el a, bu sîktuhai lâk hmai chu an hnunga chun a rût khawm a. 4 Chu lai tak chun Bethlehema inthokin Boaza chu a hung tlung a, "LALPA chu in kuomah um raw se" tiin bu sîktuhai chu a chibai a. Anni chun, "LALPAN mal sawm che raw se" tiin an bûk lèt a. 5 Boaza chun sinthawhai inrawitu kuoma chun, "Hi nu hi khaw lai nunghâk am a na?" a ta. 6 Ama chun, "Moab mi Naomi le hung an nih. 7 'In bu lâk hmai mi'n khawmtir ro. Buphal an lâk khawm zona hmun hmunah hung dap pei ka tih' a ta, a fe a, deihlimah sawt naw te a chawl met ti lo chu zîng tienga inthok khan tu chen hin ngûk takin a thaw ngar ngar a nih" a ta. 8 Boaza chun Ruthi kuomah, "Ka naunu, ngai ta, mi dang loa chu bu hnung zongin fe naw la, hi loa inthok hin inson naw la, ka siehlaw nunghâkhai hnung hi zui zing rawh. 9 An bu sîk hi en zing la, nunghâkhai hnunga hin sui pei la, tlangvàlhai hin ieng khom law lo ding chein thu ka pêk hieu an tah. I dang a châr pha leh tui bela tlangvàlhai tui chawi sa hi i dawn hlak ding a nih" a ta. 10 Ruthi chu a kûn a, hnuoi sikin a bokkhup a, a kuomah, "Kei hi hnam dang mi ni bok si, nangin mi ngaiven nuom a, i mit tlunga i mi sie el hi ieng tizie am a na?" a ta. 11 Boaza chun, "I pasal thia inthoka i pi chunga i thilthaw po pohai le i nu le pa le i piengna ram mâksana kha hmaa i mi hriet ngai lohai kuoma chêng dinga i hung dàn thu po po miin an mi hril a. 12 LALPAN i thilthaw po po chu rul sien la che, a thla hnuoi i hung bèl, LALPA, Israelhai Pathien chun i that man chu pe teu raw se che" a ta. 13 Ruthi chun, "Pu, i ditsak hlaw zinga um ka nuom. I siehlaw laia pakhat tluk khom hi ka ni naw lai zingin, i siehlaw hi ngilnei taka bein i sukthlamuong si a" a ta. 14 Sunbu fâk huna chun Baoza'n a kuomah, "Hung la, bei hung fa la, uoiin thûra hin inchie ve rawh" a ta. Bu sîktuhai le an ot tlâng lai chun beipèr a pêk a, a khop tawk a fâk hnung khom chun fâk seng lo a la um ta rop a. 15 Bu hnung zong dinga a tho hnung chun Boaza chun a mihai kuomah, "Buphal inkhawmtuhai laia a'n khawm ve khomin hal naw ro 16 Chun, buphal têla mihai khom pot suokin mâksanpêk unla, inkhawm pei sien, hal naw ro" tiin thu a pêk a. 17 Chuongchun, loa bu lâk hmai chu zân tieng chenin a zong a, a lâk khawmhai chu a vuok a, kilogram sawm lai a tling a. 18 Bu chu in tieng a phur a, a tarpi chun a bu zong khawm chu a lo hmu a, chun suna a bei fâk bâng chu a phor a, a pêk a. 19 A tarpi chun, "Voisun khan tuhai lo am bu hnung i zong a? A lo ngaisaktu che chu malsawmin um raw se" a ta. Ama chun a lo fèna chu a hril a, "Voisuna ka fèna lo neitupa hming chu Boaza a nih" a ta. 20 Naomi chun a monu kuomah, "LALPA, la dam lai le thi ta hai chunga a lunginsietna chuoi loa inlangtirtu chun ama chu mal sawm raw se" a ta. Naomi bok chun, "Chu mi chu kan sûngkuo inhnaipui, kan laibung bul a nih" a ta. 21 Moab mi Ruthi chun, "A lo ni ngei chu tie! 'Ka buhai an sìk zo hma khat ka sinthawtuhai lai hin thang ve zing rawh' a mi ti nghe nghe a nih" a ta. 22 Naomi chun a monu Ruthi kuomah, "Ka naunu, lo danga chu an lo tawk pal el thei che leiin, a siehlaw nunghâkhai lai chun um la, i ta dingin thang a tih" a ta. 23 Chuongchun, barli le huit an sìk zo chenin Boaza siehlaw nunghâkhai lai chauh chun bu hnung zongin a fe hlak a, a tarpi kuoma chun a um a.

3

1 Ni khat chu a tarpi Naomi chun Ruthi kuomah, "Ka naunu, i ta dinga tha khawsakna ding zongpêk che hi ka thaw ding a ni naw am a ni? 2 Kan laibungpa Boaza, a siehlawhai laia sin i va thawna kha a um an naw maw? Ngai ta, zâna hin a hrizawlah barli a zâp fai ding a nih. 3 Insil fai la, rimtui innàl la, i thuom tha tak hâk la, hrizawla chun zu fe la, faa a dawn zo hma chun i um a nih ti inhriettir naw rawh. 4 A zâl pha leh a zàlna hmun chu inchik la, a ke tienga puon chu hawk la, a ke bula chun zâl la, i thaw ding chu lo hril a ti che" a ta. 5 Ruthi chun, "I ti ang tak chun thawng ka tih" a ta. 6 Chuongchun, hrizawla chun a fe a, a tarpi hril ang charin iengkim a thaw a. 7 Faa a dawn zo chun Boaza chu a hlim hle a, bu vùm sira chun a zâl ta a. Ruthi chun damten a va pan a, a ke tienga puon chu a hawk a, a zâl ve ta a. 8 Zân thangah Boaza chu thil iengin amanih a chok har a. A hang inher chun a ke bulah nuhmei a lo zâl zing el a. 9 Ama chun "Tu'm i na?" a ta. Nuhmei chun, "I siehlaw Ruthi ka nih. Mi'n tlantu ding laichin bul i ni leiin i siehlaw hi i puon mi'n zawnpui ve rawh" a ta. 10 Ama chun, "Ka naunu, LALPAN mal sawm che raw se. Mi rethei amanih hausa amanih tlangvàl i zui naw leia a hmaa i mi suklawmna nèk daiin voizàna ngilneina i hung inlangtir hin a mi suklawm a nih. 11 Chuleiin, ka naunu, ti naw rawh, i hni po po chu thawpêk ka ti che. Hi khuoa mi po po hin nu inzaum tak i nih ti an hriet. 12 Amiruokchu, i laichin hnai ni lang khom, keima nêka laichin hnai lem intlantu ding che a um a, zînga hin a'n tlan nuom che leh a tha nîng a ta, intlan a ti che a. 13 A'n tlan nuom naw che a ni ruok chun, LALPA hring zing hmingin thu ka tiem che a, keiin intlan ngei ngei ka ti che. Zîng tieng chenin hi taka hin zâl rawh" a ta. 14 Chuongchun, a ke bula chun zîng tieng chen a zâl a, sienkhom tu khomin an hriet thei hmain a tho a, "Hrizawla hin nuhmei a hung ti tu khomin hre naw raw hai se" a ta. 15 Boaza chun, "I silpuon kha hlîp la, hung daw rawh" a ta, barli kilogram sawmhni ding lai a sungpèk a, a'n phurtir a, khuo tieng chun a kîr ta a. 16 In a tlung chun a tarpiin, "Ka naunu, iem i zu chang a?" a lo ta. Ama chun a chunga thil a lo thaw dàn po po chu a hril a. 17 "Hi, kilogram sawmhni ding lai barli a mi pêk a, 'I tarpi kuomah kut ruokin i kîr ding a ni nawh' a mi ti a nih" a ta. 18 A tarpi chun, "Ka naunu, ieng tin am thil a hung um ding i hriet hma chun nghâk ringot el rawh; voisun hin chu thil chu a sukfel hma chun chu pa chu a to mei mei teu awm si nawh" a ta.

4

1 Chuongchun, Boaza chu kul kotkhàra chun a hang fe a, chu taka chun a thung a, a laichin bul, a chungchang thu a hril kha a hung a, Boaza chun, "E khai, unaupa, hi taka hin hung la, la hung inthung vak rawh" a ta. Chuongchun a hung a, a hung inthung a. 2 Boaza chun a khaw upa mi sawm a hung thuoihai kuoma chun, "Hi taka hin inthung ei tiu khai" a ta, a ti ang chun an inthung a. 3 Chun, a laichin hnai, an sûngkuo ro intlantu ding kuoma chun, "Naomi kha Moab rama inthokin a hung kîr nawk a, ei unaupa Elimelek ram kha zor a tum a. 4 Chuleiin, hi taka inthunghai le upahai mithmua ngei hin ram chu inchaw rawh. I'n tlan nuom chun intlan la, i'n tlan nuom naw chun ka hrietah mi hril rawh. Nang naw chu tu khom intlantu ding awm an um naw a, kei hi i dota intlantu ding chu ka nih ti inhriettir che tûlin ka hriet" a ta. Ama chun, "Intlan ka tih" a ta. 5 Boaza chun, "Naomi-a inthoka ram i'n chawk nia inthokin pasal chân tah, Moab mi Ruthi laka mithi hming re loa a ro hluotu ding an um pei theina dingin ama chu i'n tlan sa bok ding a nih" a ta. 6 A laichin bul chun, "Keima ta ding chun intlan thei naw ning, ka'n tlan chun keima ro hluotu ding tieng sukkhawhlo rawi ka tih. Intlantu ka nina ai chu nangin chang el rawh, kei chun intlan thei naw ning" a ta. 7 In le lo le ro an inchawk le intlan chànga neitu nina hming inthleng felna dinga tiena inthoka Israelhai thaw dàn chu, a zortuin pheikhok a hlîp a, a changtu kutah a pêk a, chu chu an thil inchawk le inthleng an namnghet dàn a nih. 8 Chuong ang chun a laichin bul chun Boaza kuomah, "Nangman i ta dingin intlan el lem rawh" a ta, a pheikhok chu a hlip a, a pêk a. 9 Boaza chun upahai le mipui po po hmaah, "Voisun hin in rêngin Elimelek thil nei po po le Kilion le Mahlon thil nei po po Naomi kuta inthoka ka'n chawk a nih ti a mi hrepuituhai in nih. 10 Chu chauh chu ni loin, mithi chu a hming re loa rohluotu siempêk ding le mithi chu a unauhai lai le a umna hmun kul kotkhàra a hming a bo nawna dingin, Moab nuhmei Ruthi, Mahlon nuhmei chu ka nuhmei dingin ka'n chawk bok a, chu chu voisun hin nangni hi mi hrepuitu in nih" a ta. 11 Chun, kul kotkhàra mipui po po le upahai chun, "Hrepuitu kan nih. Rachel le Lea, Israel sûngkuo indintu pahnihai ang bok khan i ina nuhmei hung lût chu LALPAN siem ve sien la, Ephrat-a hin ngîrhmun neiin, Bethlehema hin hmingthang takin hung um raw se. 12 LALPAN hi nunghâk laka chi thla a la'n dinpêk ding che lei hin i sûngkuo chu Tamar-in Juda laka a hring Perez ang kha hung ni raw se" an ta. 13 Chuongchun, Boaza chun Ruthi chu a thuoi a, a nuhmei a hung ni ta a, LALPAN nau a'n paitir a, nau pasal a nei a. 14 Nuhmeihai chun Noami kuomah, "Voisun ni chena laichin hnai sansuoktu tlasam loa inumtirtu che LALPA chu inpâkin um sien la, Israelhai lai hin i tupa chu a hming hung inthang raw se. 15 Ama chu i hringna tungdingtu ding le i tar tienga chawmtu che hung ni bok raw se. I mo, nangma hmangaitu che, nau pasal pasari nèka i ta dinga hlu lem chun, ama chu a hringpêk ta si che a" an ta. 16 Naomi chun naute chu a lâk a, a mal chungah a pom a, a enkol a. 17 An tuolbawm nuhmeihai chun, "Naomi'n nau pasal a nei" an ta, a hmingah Obed an sak a. Ama chu Davida pa Jessai thlatu a nih. 18 Perez sûngkuo inthla sawng dân chu: Perez-in Hezron a hring a; 19 Hezron chun Rama a hring a; Rama chun Aminadab a hring a; 20 Aminadab chun Nason a hring a; Nason chun Salmon a hring a; 21 Salmon chun Boaza a hring a; Boaza chun Obed a hring a, 22 Obed chun Jesai a hring a; Jesai chu Davida pa a nih.