1

1 Pathien siehlaw kei Paula hi, sakhaw mi ni dinga thutak hrietna tieng Pathien mi thlanghai ringnaa keihruoitu dinga Isu Krista tirko le 2 khêl hril ngai lo Pathienin leilung insieng hmaa a lo tiem tah, chatuon hringna beiseina thu chu hriltu dinga ruot ka ni a, 3 ei Sandamtu Pathien thupêka Chanchin Tha puong darna sin a mi'n koltir angin, amain tha a ti hun takah a thu chu a hung suklang tah a nih. 4 Ringna ka'n tlângpuia ka naupa indik tak Tita, chibai ka bûk che. Pä Pathien le ei Sandamtu Krista Isua inthoka lunginsietna le inremna chu i kuomah um raw se. 5 Thil ei sukfel hman bàk sukfel dingin Kret thlierkârah ka màksan che a, thurawn ka pek ang che khan khaw tinah an upa dinghai ruotpèk rawh. 6 Upa chu dem kai lo, nuhmei pakhat nei a ni ding a na, a nauhai khom ringtu, nuomchènna tienga soisèl kai lo le mi lulul lo an ni ding a nih. 7 Kohran hotu chu Pathien sin enkoltu a ni leiin, dem kai lo mi ni sien, mani thu du, lung inrom, uoiin hè mi, kutthlâk hmang le indik lo taka hlawkna zong mi a ni ding a ni nawh. 8 Chuong nêk hmanin upa chu mi lawm thiem le tiktlai, thil tha dit mi, insûm thei, mi ngîl, mi thienghlim le mani inthunun thei mi ni raw se. 9 Kan thu zirtir ringum tak hi kan inchûktir ang chara nghet taka cheltu a ni bok ding a nih; chuongchun thuring indik inchûktir thei a ta, a kaltuhai khom sêl dong thei bok a tih. 10 Hel hmang, nuoma inpawt mei mei le mi hlêm chîng an um teu kha, chuonghai chu sertanhai laia mi an ni deu tak. 11 An bâu khàrpêk ding a nih; a sûng sùngin an chok buoi a, indik lo taka sum hmu inbeiseiin zirtir naw ding ding an zirtir a. 12 Kret mi ngei, anni zawlnei pakhatin, "Kret thlierkàr mihai hi mi khêlhlip, ramsa anga kol le thabo virkawng ruol an nih" a lo ti hi thu indik a nih. 13 Chuleiin, ringna hrisel tak an nei theina dingin na takin zil tawl la, 14 Judahai pipu thusim khûkpui mei mei hlaktu le thutak hnawltuhai thu chu awi ta naw raw hai se. 15 Mi thienghlim ta ding chun iengkim hi a thienghlim a, mi porche le ringna nei nawhai ta ding ruok chun ieng khom hi a thienghlim khur a um nawh- an lungril le an sie le tha hrietna chenin a porchè a nih. 16 Pathien hretuah an inngai a, sienkhom an thilthawhaiah an hnawl bok si a. Anni rawi hi mi lulul le hnâmum tak an ni a, thil tha ieng khom thaw dingin hmang tlâk an ni nawh.

2

1 Nang ruok chun thuring indik chu inchûktir pei rawh. 2 Putarhai chu insûm thei, inzàum, inthunun thei, ringna indik chel, hmangaina nei mi le mi dawthei ni dingin infùi rawh. 3 Chuong ang bokin pitarhai khom an chêt danah mi inzàum ni ding dàm, mi hrilsiet chîng lo ding dàm, uoiin hè mi ni lo ding dàm le thil tha inchûktir chîng ding dàmin infui rawh. 4 Pitarhai chun nupui tebophai chu an pasalhai le an nauhai hmangai dàm, 5 insûm thei dâm, invong thienghlim dàm, insûng khawsaka inhmang rim dàm, ngilnei dàm le mani pasal thu awi dàm inchûktir hai sien; chuongchun Pathien thu hi hrilsietin a um naw ding a nih. 6 Chuong ang bokin tlangvàlhai khom mani inthunun dingin infùi tawl rawh. 7 Thil iengkimah an enton dingin thil tha thaw sukhmù la, i zirtirnaah i ringumzie le titakzie inentir rawh. 8 Tongkam mawi, soisel bo hmang hlak la, chuongchun a khingtuhai che chun demna ding che hre nawng an ta, inzak letling lem hiel an tih. 9 Bawihai chu kong iengkimah an puhai thu hnuoiah intuklût a, an lawmzawnga um tum a, don lèt ve lo ding dàm le 10 an thil inrupêk loa kong iengkimah ring tlâka um lem ding dàmin inchûktir la, chuongchun mi sandamtu ei Pathien zirtirna hi a hlutzie iengkimah an suklang ding a nih. 11 Mi po po sandama an um theina dingin Pathien lunginsietna a hung inlang tah a. 12 Chu chun Pathien ngaisak nawna le khawvel tieng thil ngainatna bânsan a, tu lai huna hin mani invong fel a, indik taka khawsa a, Pathien ngaisaka um dingin a mi'n chùktir a. 13 Ei beisei, Pathien le Sandamtu Isu Krista ropui taka a hung inlang ni ding chu ei nghàk a nih. 14 Ama ngei chu ei ta dingin a'n pêk a, bawsietna tinrêng laka inthokin a mi'n tlan suok a, ama mi ni dingin a mi sukthienghlim a, thil tha thaw chàkna a mi'n neitir bok a nih. 15 Hieng thuhai hi puong la, infui tawl la, thu nei takin zil rawh. Tu khomin ngainêp naw raw hai se che.

3

1 Mihai chu rorêltuhai le thuneituhai thu awi ding le thil tha tinrêng thaw inpei zing dingin hril non rawh. 2 Tu poi khom hril lo a, mi leh inrema an hmakhuo ngâi ding le mi po po lakah inngaitlawmna indik tak inentir dingin zirtir rawh. 3 Kha hma khan eini khom invêt tak, lûlul tak, thuoi hmanga um, châkna le nuomchènna tinrêng bawia intâng ei ni a, mi thîka an sietna zong hlak, theidaum tak le intheida tuo chîng mi ei ni hlak. 4 Amiruokchu, ei sandamtu Pathien ngilneizie le a mi hmangaizie a hung inlang khan, 5 einin thil ei thaw that lei ni loin, a lunginsietna lei chauhin a mi sandam tah a, siem tharna tuiah mi phûmin Thlarau Thienghlimin a mi'n cher thar a. 6 A mi sandamtu Isu Krista zàrah ei chunga hin siemtharna thlarau chu tiktlâi takin a hung buok ta teuh a, 7 chuongchun, chatuon hringna beiseitu le rohluotua mi siem dingin a lunginsietna leiin thiem a mi'n changtir tah a nih. 8 Hi thu hi a'n dik a nih. Pathien ring tahai chun thil tha thaw nuomna lungril an put pei theina dingin hieng thu hi hril uor dingin ka dit che. Chu chu thil tha tawp a ni a, tu ta ding khomin a tangkai. 9 Insêlna invêtthlàk hai, thlatuhai tobul sui rak dàm, Dàn thua insêl luoi luoi dâm nghatsan rawh; tangkaina a nei naw a, tu khomin an sawtpui bok nawh. 10 Inthe darna suksuoktu chu voi khat zil la, a sim naw leh zil nawk la, chu hnunga ruok chu ngaisak zui nuom ta naw rawh; 11 chuong ang mi chu mi suol tak le lungril kawi tak put mi a nih ti hre rawh; ama le ama thiem naw inchangtirtu a ni si a. 12 Artema amanih le Tukik amanih i kuomah ka hung tir charin Nikapoli khuoah hung nghâl tum rawh, chu taka chun thlasik sûng po um ka tum a nih. 13 Ukîl Zena le Appolo hai kha an inzinna lampuiah ieng khom an tlàksam nawna dingin i theitawpin lo thangpui rawh. 14 Ei mihai kha thil tha thawin inhmang hlak raw hai se, hmang loa um mei mei loin, an ni tin mamaw inphuhrûk raw hai se. 15 Ka kuoma um po po hin chibai an bùk chêu. Ringnaa ei ruolhai kha chibai ka bûk. In rênga kuomah lunginsietna um raw se.