Johana 1

Hringna thu

1 A phut taka Thu a om, Thu kha Pathian kuang a oma, Thu kha Pathian a ni. 2 Ama kha a phut rengata Pathian kuang a om. 3 Ama hmanga itinrêng siam a nia; thil siam rêng rêng ama isiam loi ite om mah. 4 Amaa hringna a oma, kha hringna kha mihriamhai vârna a ni. 5 Vâr kha inthima a zuang vâra, inthimin kha kha inhre mah. 6 Pathianin mi inkhat a zuang tîra, ar hming chu Johana a ni. 7 Ama kha vâr thu inhriattir hranga zuang a ni, mi murdi’n a thu inhriattir kha an iamna hrangin. 8 Ama kha chu vâr ni ma, vâr thu kha inhriattir hranga zuang a ni ual. 9 Kha vâr kha vâr dik tak, rammuala zuanga mi tin zuang invârtu chu a ni. 10 Rammuala a oma, ama hmanga rammual kha siam a nia, rammualin ama kha len hre ma. 11 Ama ram ngeia a zuanga, aniachu ama mihaiin lei lôm mahai. 12 Mi senkhatin chu an lei lôma, ama iamtu murdihai chu an kuang Pathian nâihai ni theina hrang a pêka. 13 Kha mihai kha thisena irzir ni mahai, pasal nuamlama irzir khom ni mahai, Pathian ata irzir an ni. 14 Khan, Thu chu mihriam a zuang changa, ei laia a zuang om tâka. A roiinpuizia ei hmu, Pa nâi khât neisun roiinpuina chu, lungkham le thu takin a sip. 15 Johana’n a thurchi a hrila, “Ki hnunga zuang hrang chu ‘keima nêkin a roiinpui ual’ ki iti kha, hi mi hi a ni, ki om mâna om tâk a nia,” tiin a khêka. 16 A lungkhamna irkip ei dong seng, lungkham chunga hril thei ban lungkham nôkna. 17 Dân kha Mosia hmanga pêk a nia, lungkhamna le thutak chu Jisua Krista zâra zuang tung a ni. 18 Tukhomin Pathian hmu ngai mahai; Pa Nâipa nei sun, a rôpsuama om khan, a thurchi an hriattir ta a ni.

Baptistu Johana thu inhriattir

19 Jerusalem khuaa Judahaiin, “Tu mo ni ini?” tia irdon hrangin Ochaihai le Levia irchihai an tîrhai lai khan, Johana’n hi thu hi a hong inhriattir a ni. 20 Khan Johana’n ip loiin, “Kei chu Krista chu ni ma ung,” tiin fel takin an puang ta. 21 Khante, “Tu mo ni ini? Elija mo ni ini?” tiin an irdona. Ama’n a sâm nôka, “Ni ma ung,” a tia; “Deipu kha mo ni ini?” an tia. “Ni ma ung,” tiin a sâm nôka. 22 Anni’n, “A ni tîrtuhai kin sâm theina hrangin tu mo ni ini, nin hril ta, ni thurchi imo insîr hrang ni inei?” an tia. 23 Johana’n, deipu Isaia chong hmangin a sâm: “Keima hi ramchâra ‘Rengpa lampui siam roi tia khêktu kha ki ni,’ ” a tia. 24 Kha palai, Farisaihai hong itîrhai khan Johana an irdon nôka. 25 Anni’n, “Krista mani, Elija mani, deipu mani lua ni ni no’n teh, ithoa mo mi ni ibaptis ngai?” tiin an irdon nôka. 26 Johana’n, a sâma, “Keiin chu tuiin ki baptisa, khannisian nin laia mi inkhat, nin inhriat loi a ingîr a ni. 27 Ama kha ki hnunga a honga, a kekok hrui sût inruk lua ni ma ung,” a tia. 28 Khahai kha Bethani khua, Jordan vadung râl, Johana a baptisna ngai hmun an iti a ni.

Pathian Belrate chu

29 A tûka chu Johana’n Jisua khan ama a hong ipan kha a hmua; “En u ta, Pathian Belrate, rammual sual pêl hrangtu so,” a tia. 30 So mi so a ni, “Ki hnunga hong hrangtu chu, keima nêka roiinpui ual, ki om mâna om tâk, ki ititu chu. 31 Ama kha inhre ma unga; khannisianlân, Israelhaiin ama an inhriat theina hrangin kei hi tuia baptis-in ki ihong a ni,” a tia. 32 Hi hi Johana’n thu an hriattir dân chu a ni, “Irtha kha vasu angin irvân ata a zuang suaka, a chunga chuang ki hmua. 33 Khan khomin, keima’n chu lan hre ma ung, nikhomsian, tuia mi baptis hranga ni tîrtu, Pathian khan Irtha kha irvân rengata zuang chumin vasu anga zuangin, tukhôk chunga chum mani hmu ni ti, kha kha Irtha Irthianga mi ni ibaptis hrangpu kha a ni, ti a ni lei inhril tâka,” a tia. 34 Johana’n, “Kha kha ki hmu tâka, hi mi hi Pathian Nâipa a nih ti nangni kin hriattir a ni,” tiin.

Irchutir masa takhai

35 A tûk nôka chu Johana kha a irchutirhai inhni leh an ngîra. 36 Jisua chai vêl kha an thîra, “En u ta, Pathian Belrate so,” a tia. 37 A irchutir inhnihaiin a insîr kha an inhriatin chu Jisua kha an zui tâka. 38 Jisua kha a hong irheia, ama an hong izui kha a hmua, an kuang, “Imo nin izong?” a tia. Anni’n, “Rabbi, (Kha kha irchutirtu tihna a ni) khôn mo ni iom?” an tia. 39 “Hong unglân hmu nin ti” a tia. Khanchu a kuang an fe tâka, a omna kha an va hmua, kha nia khan a kuang an om tâka. Khohloi dâr minli vêl a ni. 40 Johana thu’nsîr inhriata Jisua zuitu inhnihai laia inkhat kha Andria, Simon Petera urêng a nia. 41 Ama khan a masa taka a urêng Simona a va hmua, “Mesia, (Kha kha Krista tihna a ni) kin hmu ta,” a va tia. 42 Khan, Jisua kuang a hong hruaia. Jisua’n ama a lei ena, “Johana nâipa, Simona ni ni, Kifa nang ti ta an ti”. (Kifa chu Petera ti le hmunkhat, a omzia chu lungpui tihna a ni.)

Jisua’n Filipa le Nathanaela a koi thu

43 A tûka chu Jisua’n Galili rama fe a tuma, Filipa a hmua, a kuang, “Ni zui roh,” a tia. 44 (Filipa kha Andria le Petera omna khua, Bethsaida khuaa mi a ni.) 45 Filipa’n Nathanaela chu a hmua, a kuang “A thurchi Dân lekhabua Mosia’n a’rziak, deipuhai khomin an irziak kha ama kin hmu ta, Nazaret Jisua, Josefa nâipa kha,” a tia. 46 Nathanaela’n, “Nazaret khuaa thil sa a isuak thei ma ni?” a tia. Filipa’n, “Hongin lân en roh,” a tia. 47 Jisua’n Nathanaela hong a hmu’n chu a thurchi a lei insîra, “En u ta, Israel mi dik tak, mi huang tumna rêng rêng nei loi so,” a tia. 48 Nathanaela’n, “Itin mo ni ni inhriat,” a tia. Jisua’n, “Filipa’n nang a koi mâna theipui kung bula ni om lai khan nang ki ihmu tâk kêng,” a tia. 49 Nathanaela’n, “Rabbi, Pathian Nâipa ni ni. Israelhai rêng inlaltak ni ni kêng,” tiin a sâma. 50 Jisua’n, “Theipui kung bula nang ki hmu kêng ni kuang ki ti sikin ni ni iam mo? Hi nêka thil roiinpui ual hi la hmu ni ti,” a tia. 51 Khan, a kuang, “Thudik tak nang kin hril, irvân irhonga vântirtônhai Mihriam Nâipa chunga a chum le a kâi la hmu nin ti,” a tia.

Johana 2

Kana khuaa irneina

1 Sûn thum nî’n chu Galili ram Kana khuaa irneina a oma, kha khan Jisua nu a om saa. 2 Jisua le irchutirhai khom irneinaa khan an fiala. 3 Uain ruk ta mahaia, Jisua nu khan a kuang, “Uain an irsam tâk kêng,” a tia. 4 Jisua’n a sâma, “Nupang ithoa mo ni hong irrol? ki zoro a la itung loi kêng,” a tia. 5 A nu khan sinthotuhai kuang, “Nin kuang nangni a ihril lam ang takin tho zôi zel roi,” a tia. 6 Judahai irsûkinfâi dân angin, lung tuibêl kiruk oma, litar irzakhat keng theina chit a ni, kha lung tuibêlhai kha an doa. 7 Jisua’n an kuang, “Tui bêlhai hin tui sung roi,” a tia. A rêngin an sung insiphaia. 8 Khanchu an kuang, “Thâl unglân, hruaithea hruaitu kuang fepui roi,” a tia. Khanchu an fepui tâka. 9 Khaang khan tui kha an hong chôia, uain a hong chang tâka, hruaithea hruaitu khan tui uain chang kha a’rtema, uain kha kho taka mani inhre maka; (khannisianlân tui thâltuhai khan chu an inhriata,) moineitu kha a koia, 10 a kuang, “Mi tinin uain sa an sem masaa, tamtak an in zoiin a saloi ual an sem ngaia, nang chu atûn ten uain sa ni la inei hi te,” a tia. 11 Jisua’n hi sinirkhêl a itho phutna hi Galili rama Kana khuaa a thoa, a roiinpuizia an langtira, a irchutirhai khan ama an iam tâka. 12 Kha zoi hnunga chu, Jisua kha a nu le a urênghai le a irchutirhai le Kapernaum khuaa an zu fea, kha khan nikhua tômte vai an châm.

Tempil irthiangtir

13 Judahai Ferkân Kût zoro a hong tung vâng vâng tâka, Jisua kha Jerusalema a hong fea. 14 Tempila khan sehrât, belra, phervalihai an izuar kha a hmuhaia, sum thûltuhai an maichâm kôla toi a hmu saa. 15 Zêmna hruihrual ang hi a siama, an bêlrahai, sehrâthai, sa dang murdi leh khan an hnot suakhai zita; sum thûltuhai maichâmhai kha a naminrîla, an poisahai kha an thekpai pehaia. 16 Khanchu phervali zuartuhai kuang khan, “Hi hi la suak roi, Ka Pa in hi bazar hmunin siam no roi,” a tia. 17 A irchutirhai khan, “Ni in hranga ki sathnem irngaina khan mi fa zoi a ti,” tih Pathian lekha thu kha an inhriat suak nôk tâka. 18 Judahai khan an hong irkôka, “Hi thilthotheina ni nei ti entîrna hrangin i irsinsiana sinirkhêl mo ni ni inentir hrang?” an tia. 19 Jisua’n, “Hi Tempil hi set unglân, sûn thum sûngin indingtir nôk ki ti,” a tia. 20 Judahai khan, “Sûn thum sûngin ni indingtir nôk hrang mo? Hi Tempil sinna hranga hin kum sômminli kiruk a inang kêng,” an tia. 21 Khannisianlân, Jisua’n tempil a iti hi ama takpum a ni. 22 Khasikin thina irthokin a thoinôkin chu, a irchutirhaiin hi thu hi a lei insîr zoi tâk ti an inhriat suaka, Pathian Lekha Thu le Jisua thu insîr tâkhai kha an iam tâka.

Jisua’n mihriam nitnazia an hriat

23 Ferkân Kût Jerusalema a om laia Jisua’n irsinsiana sinirkhêl a ithohai kha an hmua, mi tamtakin ama kha an iam tâka. 24 Khannisianlân, Jisua’n anni kha iamhai maka, mi murdi an hriat infelhai tak tak sikin. 25 Mi thurchi tûte’n inhril ngai mahai, an milung sûnga om murdi kha a inhriat zit a ni.

Johana 3

Jisua le Nikodema

1 Mi inkhat ar hming Nikodema a oma, Judahai hruaitu, Farisai pâla mi a ni. 2 Zân khat chu Jisua kuang a honga, a kuang, “Rabbi, Pathian itîr irchutirtu ni nih ti kin hriat, Pathian an chunga a om no’n chu tukhomin ni irsinsiana sinirkhêl tho ang hi tho thei no nihai,” a tia. 3 Jisua’n a sâma, “Thudik tak nang ki hril, mi tukhom a suakinthar no’n chu Pathian Ram hmu thei no ni,” a tia. 4 Nikodema khan, “Mi a tar hnungin itin mo a isuakinthar nôk thei hrang? A nu sûnga lûtin lak suak nôk thei ta no nia?” a tia. 5 Jisua’n, “Thudik nang hril ki ti, mi tukhom tuia le irthaa an suak no’n chu Pathian Rama lût thei no ni. 6 Taksaa irzir ka chu taksa mi a nia, irthaa irzir ka chu irthaa mi a ni. 7 Ni isuak nôk hrang kêng ki iti hi ar khêl ti no roh. 8 Phâivua khoa khom a nuam nuamna a tho ngai; ar hâi nin hriat, khannisianlân, kho tianga hong mani tih le kho tiang mo a ife nôk hrang ti chu inhre mak che. Tukhom Irthaa suak ka chu khaang kha a ni,” a tia. 9 Nikodema’n, “Kha kha itin mo a ini thei hrang?” a tia. 10 Jisua’n a kuang, “Israelhai irchutirtu ni nia, kha kha ni inhriat loi mo? 11 Thudik nang hril ki ti, kin inhriat kha kin insîra, kin ihmu kha kin inhriattir ngai, tûte’n kin thu inhriattir pom nuam mak chêi. 12 Rammual thil ki insîr lua iam mak chêia, irvân thil len vâng te nangni hril inlân itin mo nin iiam thei hrang? 13 Tukhom irvâna kâi ngai maka, Mihriam Nâipa, irvân ata zuang chumtu vai ti no chu,” a tia. 14 Mosia’n ramchâra mirûl a inkhâi ang khan Mihriam Nâipa hi inkhâiin a iom hrang a ni. 15 Tukhom a iam murdi chu ama sika kumtuang hringna an nei theina hrangin. 16 Pathianin rammual lung a thung tak taka, khanchu, a Nâipa khât neisun a pêka, ama iam tâk ka chu irhmang loia kumtuang hringna an neina hrangin. 17 Pathian khan rammual thiamloi inchang hrangin a Nâipa rammuala tîr maka, ama sika rammual saninhringa an om theina hrangin a itîr kêng a ni. 18 Tukhom Pathian Nâipa iam ka chu atûn ata thiamloiin om mahaia, tukhom Nâipa iamloi chu atûn ata thiamloiin an iom tâk a ni. Pathian Nâipa khât kha an iam no sikin. 19 Thiamno an chang dân kha hiang hin a ni; vâr kha rammuala a zuanga, khannisianlân, mihaiin vâr nêkin chu inthim kha an nuam ual, thil sual an tho sikin. 20 Thil sual tho murdi’n vâr an khôkmâk ngaia, vâra hong mahai, an sinthohai an lang nona hrangin. 21 Sin dik thohai murdi’n vâra an hong ngai, an sinthohai kha Pathian thu zôma tho an nih ti an langna hrangin.

Jisua le Baptistu Johana

22 Kha zoi hnunga chu Jisua le a irchutirhai kha Judai rama an fea. Kha khan Jisua an kuang a om maia, a baptis-hai ngaia. 23 Johana khomin Salem kôla Ainon hmuna a baptis thiaia. Kha hmuna khan tui a tam sikin, mipuihai a kuang an fea, a lei baptis-hai ngaia. 24 Kha zoro lai khan Johana kha intângna ina la khum mahai. 25 Johana irchutir senkhathai le Juda inkhat irsûkinfâi thua an lei irsêl tâka. 26 Khanchu, Johana kuang an fea, “Irchutirtu, Jordan râl nisua tianga ni kuanga om, thurchi ni insîr ngai kha ni lan hriat mo? Khapa khan mi a baptisa, mipuiin an pan sup sup ngai,” an tia. 27 Johana’n a sâma, “Pathianin a pêk no’n chu tukhomin ite dong thei mahai. 28 ‘Kei chu Krista ni ma unga, a mân tianga fe hranga tîr ki ni’ ki iti kha nangni ngei ki thu inhretuhai nin ni. 29 Moi pasal chu moineitu kha a ni, moi neitu rual, a thu hong uksak maitu khan moineitu irhai an hriatin a lôm ngai, khaang khan kei khom ki lôm ar kip tâk a ni. 30 Ama chu roiinpui tîr tîr hrang a nia. Kei chu chîn tîr tîr hrang ki ni,” a tia.

Irvân ata zuang chum

31 Chung tiang ata zuang chumtu kha chu mi tin tin nêka an chung tak a ni; irnênga suak chu irnênga mi a nia, irnêng thil an sîr ngai; irvân ata zuang chu mi murdi nêka inchung tak a ni. 32 Thil a ihmu le a inhriathai kha an sîra, khannisianlân, tukhomin a thu inhriattir kha pom mahai. 33 Tukhom a thu inhriattir pom chu mi dik a nih ti pom indet a ni. 34 Pathian itîr khan Pathian thu an sîr ngai, Pathianin ama Irtha irkip a pêk sikin. 35 Pa’n Nâipa lung a thunga, a kuta itinrêng a sia ta. 36 Tukhom Nâipa iam chu kumtuang hringna an nei ta; Nâipa thu zôm loi chu hringna nei no nihaia, an chunga Pathian ningmur kha a om mai a tia.

Johana 4

Jisua le Samari nupang

1 Johana nêkin Jisua’n irchutir tam ual a siam le a baptis-hai nôk tih Farisaihaiin an inhriat tih Jisua’n an hriatin chu, 2 (A dik takin, Jisua’n chu tûte baptis maka, a irchutirhaiin mi an ibaptis ngai a ni.) 3 Khanchu Judai ram a suaksana, Galili rama a kîr nôk tâka. 4 Samari ram kha hro hrang a nanga. 5 Samari khua inkhat, Sukar an iti kha a va tunga, kha kha Jakoba’n a nâipa Josefa ram a ipêk kôla om a ni. 6 Jakoba tuikuang khom khatak khan a oma. Sûn lai tak a hong ni’n Jisua kha a sân a sôl sikin tuikuang kôla khan a toi chota. 7 Samari nupang inkhat tui chôi hrangin a honga. Jisua khan, “In hrang ni pe roh,” a lei ti pea. 8 A irchutirhai kha fâk rua ircho hrangin khuaa an fe tâk a ni. 9 Nupang khan, “Nang Juda mi ni nia, keima Samari nupang ki nia, ithoa mo in hrang ni ni inghi?” a tia. (Judahaiin Samari mihai kha itea irhmang irhlômpui ngai mahai). 10 Jisua’n a sâma, “Pathian thilpêk le ni kuang, ‘In hrang ni pe roh,’ tihtu hi inhre’n lân chu, a kuang ni inghi lem hrang a ni, ama’n chu tui hring nang a ipêk hrang a ni,” a tia. 11 Nupangnu khan, “Ka pu, kaisuana hrang ite lak nei mak chea, tuikuang a inthûk tia le te, kho taka mo tui hring ni inei? 12 Kin pu Jakoba nêkin ni iroiinpui ual ma ni? Ama khan hi tuikuang hi a ni pêka, ama le a nâihai le a sâ vâihai khomin hitaka hin an in ngai,” a tia. 13 Jisua’n, “Tukhom hi tui in murdi chu an tui lan hrâl nôk a ta; 14 Tukhom an kuanga ki ipêk hrang tui in ka chu an tui inhrâl nôk ta no ni. An kuang ki ipêk hrang chu an phîng sûnga tuihnâr hong chang a ta, kumtuang dênin kang ta no ni,” a tia. 15 Nupang khan, “Ka pu kha tui kha ni pe ro, ki tui an hrâl ta nona hrangin le hi ten tena tui chôi ki zuang ta nona hrangin,” a tia. 16 Jisua’n, “Ni pasal va koiin lân, hong kîr nôk ro,” a tia. 17 Nupangnu’n, “Pasal mo ki neia,” tiin a sâma. Jisua’n, pasal nei ma ung ni iti hi, ni ti indik; 18 pasal ringa ni nei tâka, atûna ni inei khom hi ni pasal tak ni ual maka, “Ni iti kha a dik,” a tia. 19 Nupang khan, “Ka pu, deipu ni nih ti kin hriat ta. 20 Kin irchibulhaiin chu hi tânga hin Pathian an biak ngaia, nangni’n chu, ‘Mihaiin Jerusalema ngêt Pathian an ibiak hrang a ni’ nin ti ngaia,” a tia. 21 Jisua’n, “Nupangnu, ni iam roh, hi tânga kher no khom, Jerusalema kher no khom Pa chubai nin mûkna hrang zoro tung a ti. 22 Nangni Samarihaiin chu nin inhriat loi chubai nin mûka, keini Judahaiin chu kin inhriat kêng chubai kin imûk ngai; saninhringna chu Judahai kuang ata hong suak a nia. 23 Khannisianlân, a zoro la tung a ti, atûn khom a tung thiai ta, Pathian chubai mûktu tak takhaiin irtha le thutakin Pa chubai mûk an ti, khaang mi kha Pa’n ama chubai mûktu hrangin a izong a ni. 24 Pathian chu Irtha a nia, ama chubai mûktuhaiin Irtha le thu takin chubai an imûk hrang a ni,” a tia. 25 Nupangnu’n, “Mesia, Krista an iti kha, zuang hrang a nih ti kin hriat. A zuang tika chu itinrêng ni la hril a ti,” a tia. 26 Jisua’n a sâma, “Keima, nang a chongpuitu hi Ama kha ki ni,” a tia. 27 Kha lai taka khan irchutirhai kha an hong tung nôka, nupangnu a ichongpui kha an hong hmu’n chu, a sân ar khêl an tia. Khannisianlân, tukhomin, “Imo ni izong? Ithoa mo nupangnu kha ni ichongpui?” khom ti mahai. 28 Nupangnu’n a tuibêl a mâksana, kho sûng tiang a kîr nôka, kho sûnga mihai kuang khan, 29 “Mi inkhat ki itho tinrêng ni hril zit theitu a oma, hong unglân en u ta, Krista mo ni thei ni?” a tia. 30 Khanchu, kho sûng ata kha an suaka, Jisua kuang an fea. 31 Kha kâra khan irchutirhaiin “Irchutirtu, fa roh,” tiin an ngêna. 32 Ama khan, “Nin inhriatloi bu nêk hrang ki nei,” a tia. 33 Irchutirhaiin, “Tu mo khatin bu an hong ipêk ma ni?” tiin an irti irhlôma. 34 Jisua’n an kuang, “A ni tîrtu nuamlam sin le a sintho zoi hi ki bu a ni. 35 Nangni’n bu âtna hrangin ‘Tha minli a la om,’ nin iti ngai mo ni ma? Thîr unglân, loihai hi en u ta, buhai chu ât thei zôi zel hrangin a hmin ta tih nangni ki hril. 36 Bu âttu chu a hlo a hmu ngaia, kumtuang hringna dêna om hrangin a ra a bûm ngai, a phuntu le a âttu an lôm irrual theina hrangin. 37 ‘Mi inkhatin a tûa, mi dangin a ât ngai,’ ti hi a dik a ni. 38 Nin sin sôl loina ra ât hrangin nangni ki itîr hi, mi dangin an sina, an isinna ra kha nin i-ât a ni,” a tia. 39 Nupangin, “Ki sintho tinrêng a ni hril thei zit,” a ti sika khan, kha khuaa Samari mi tamtakin Jisua an iam tâka. 40 Samari mihai kha Jisua kuang an hong tungin chu, an kuang la châm hrangin an ngêna, kha khuaa khan sûn hni a châm tâka. 41 A thu an inhriatin chu mi dang tamtak khomin an iam tâka. 42 Khan, nupang kuang khan, “Atûn chu ni thu’nsîr sika iam ni ta ma unga, kei ni ngêtin a thu’nsîr kin inhriata, hi mi hi rammual saninhringtu a ni ngêt ti kin inhriat ta,” an tia.

Jisua’n milian nâipa an damtir

43 Sûn hni hnunga chu khatak ata Galili rama a fe tâka. 44 Jisua ngêtin, “Deipu kha ama ram tiang chôiirsângin om ngai mah,” a lei ti ngaia. 45 Galili ram a va tungin chu, Galili mihai khan a sân an lei lôma; Jerusalema Ferkân Kûta an fe laia a sintho tinrêng an hmu sikin. 46 Jisua Galili rama Kana khuaa tui uain an changtirna kha a va tung nôka. Khan, Kapernaum-ah sorkâr mi liantak inkhat nâipa damloi a oma. 47 Khapa khan Jisua, Judai ram ata Galili rama a hong tih an hriatin chu a kuang a hong fea, a nâipa thi vâng vâng indam hrangin Kapernaum-ah fe hrangin a fiala. 48 Jisua’n a kuang, “Thilirkhêl le sinirkhêl tho nin hmu no’n chu iam viat no chin ni,” a tia. 49 Khapa khan, “Ka pu, ki nâipa kha a thi mân hong hrâm roh,” a tia. 50 Jisua’n, “Fe ta roh; ni nâipa kha a dam ta,” a tia. Ama khan Jisua thu’nsîr kha a iama, a fe tâka. 51 A kîr nôk laiin, a siahlohaiin an lei dona, “Ni nâipa kha a dam tâk,” an lei tia. 52 A nâipa lei dam zoro kha ar donhaia. Anni khan, “Mizân sûn dârkhata khan an khur a boi pe ta,” an tia. 53 Khanchu, a pa khan Jisua’n a kuanga, “Ni nâipa a dam tâk,” a ti lai tak kha a nih ti an hriat tâka. Kha hnung chu, ama le a in mihai, an rêngin an iam zit tâka. 54 Kha kha Jisua Judai ram ata Galili rama a fe hnunga sinirkhêl a itho voihnina a ni.

Johana 5

Dîla damloi indam

1 Kha zoi hnung chu Judahai kût inkhat a oma, Jisua khom Jerusalema a hong fe saa. 2 Jerusalema khan Belra mikot kôla dîl inkhat, Hebrai chonga Bethzatha an iti kha a oma; khataka khan bokrop ringa a oma, 3 Kha khan damloi tamtak, mitchohai, ke’nbâihai, zenginthihai an oma. 4 Rengpa itîr vântîrtônin tui a zun chânga. Tui a châng zoi le dîla irchôm masa tak kha i ang natna khom ni sian, an dam ngai sikin tui châng nghâkin an iom a ni. 5 Mi inkhat, kum sômthum kiriat damloi khom a oma. 6 Jisua’n khataka a zâl kha a hmua, zoro sôt tak damloiin a om tah ti an hriata, a kuang, “Dam mo ni nuam?” a tia. 7 Damno khan, “Ka pu, tui a châng zoi leh dîla ni siatu hrang tukhom nei ma unga, lût ki tum sûngin mi dangin an ni khêl ngai a ni,” a tia. 8 Jisua’n, “Thoiin lân, ni puantha lan lân ke’n fe ta roh,” a tia. 9 Kha pa kha irningloiin a hong dam zôi zela; a puantha kha a lâka, ke’n a fe tâka. kha nikhua kha Sabat nî a ni. 10 Judahaiin a damtu kuanga khan, “Sabat nî a ini kêng; ei Dânin ni puantha ni ichôi irthiang mah,” an ti pea. 11 Ama khan a sâma, “A nin damtirpu khan, ‘Ni puantha lan lân, ke’n fe ta roh,’ a ni ti khate,” a tia. 12 Anni’n, “Ni puantha lan lân, ke’n fe roh, titu kha tu ma ni?” an tia. 13 A hong damtu khan tu mo a ini lak inhre maka, kha khan mipui tamtak an oma, Jisua laka chu a fe pat tâka. 14 Kha zoi hnunga chu Jisua’n Tempila a hmua, a kuang, “Hi, ni hong idam tâk hi; sual nôk ta no roh, khano’nchu, ni chunga thil saloi ual hong tungna ti,” a tia. 15 Kha pa khan ama indamtirtu kha Jisua a nih ti Judahai kha a va hril tâka. 16 Khasika khan Judahaiin Jisua kha deng an intheitir irphut tâka, Sabat ni’n mi an damtir ti sikin. 17 Jisua’n an kuang, “Atûn ten Ka Pa’n sin a tho maia, kei khomin ama angin ki isin a ni,” a tia. 18 Khasika khan Judahaiin ama kha that an tum nôk uala, Sabat nî a insiat vai ni loiin, Pathian kha “Ka Pa a ni,” a tia Pathian angin ar bê sikin.

Jisua irchamneina

19 Jisua’n a sâmhaia, “Thudik tak nangni ki ihril hi, Nâipa’n ama thu’n ite tho thei mah; Pa sintho a ihmu ti no chu; Pa sintho ang kha Nâipa khomin a itho ngai a ni. 20 Pa’n Nâipa lung a thunga, a sintho tinrêng an entira. Hi nêka thil roiinpui ual hi lan entir a ti, ar khêl nin tihna hrangin. 21 Pa’n mithihai a kaithoia, a inhring ang dênin Nâipa khomin a inuam murdi chu an hringtir ngai. 22 Pa’n tu chungthu khom rêl pe ngai mah, Nâipa kuang roirêlna kha a inhlan zit a ni, 23 mi murdi’n Pa an imahrip angin Nâipa khom mahrip an ti. Tukhom Nâipa mahrip loi chu ama tîrtu Pa khom an imahrip loi a ni. 24 “Thudik nangni ki hril, tukhom ki thu inhriata, a ni tîrtu iam chu kumtuang hringna a nei ta, thiamno changin om ta no nia, thina ata hringnaa a ilût tâk a ni. 25 Thudik nangni ki hril, a zoro tung a ti, atûn khom a tung thiai ta; kha tika chu mithihaiin Pathian Nâipa hnukirhai inhriat an ta, an hriathai kha hring an ti. 26 Pa chu hringna hnâr a ini angin Nâipa khom kha hringna hnâr nina a ipêk a ni. 27 Mihriam Nâipa a ni sikin roirêl theina a ipêk sa a ni. 28 “Kha kha ar khêl ti no roi, thâna mithi murdi’n a hnukirhai an inhriat zoro la tung a ti, 29 Khan, thân ata hong suak an ta, sin sa thotuhai chu hringna neiin hong thoi nôk an ta, sual thotuhai chu thiamloi chang hrangin thoi nôk an ti.

Jisua inhriatpuituhai

30 “Ki bingin ite tho thei ma ung; Pathianin a ni ihril ang takin roi ki rêla, ki roirêl khom a dik, keima nuamlam tho tum loiin a ni tîrtu nuamlam vai tho ki tum ual sikin. 31 Mâni thurchi inhriattir ni inlân, ki thu inhriattir kha dikloi a ni. 32 Khannisianlân, mi dang ki thu inhriattirtu a om, ki thu a inhriattir kha a dik ti khom kin hriat. 33 Johana kuang mi nin tîra, ama’n thutak a lei inhriattir a ni. 34 Thu ki inhriattir hi mihriama irthoka ni maka; khannisianlân, saninhringa nin om theina hrangin hi thu hi ki ihril a ni. 35 Johana chu meiser chok tak le vâr tak ang a nia, a vâra raifân taka hong om chot khom nin nuama. 36 Khannisianlân, Johana thu inhriatpuina nêka inhriatpuitu poimo ual ki nei, Pa’n sintho hranga a ni ipêkhai, atûna ki ithohai hin Pa’n keima a ni tîr ngei a nih ti an hriattir. 37 Pa ni tîrtu ngei khom khan ki thu an hriat ta a ni. Nangni’n itiklai khom a hnukirhai inhre ngai mak chêi, a hmêl khom hmu ngai mak chêi. 38 A thu khom nin milunga vong chian mak chêia, a itîrtu hi nin iam no sikin. 39 Pathian Lekha Thu ngûk takin nin irchu ngai, a sûnga kumtuang hringna a om ti nin iam sikin. Kha Pathian Thubuhai khan ki thu inhriattirtu chu an ni. 40 Khannisianlân, hringna nei hrangin ki kuang hong nuam mak chêia. 41 “Mihriam inpâk zong ma ung. 42 Nangni kin hriat, nin milunga Pathian lungthungna zel nei mak chêi. 43 Ka Pa irchamin ki zuanga, khannisianlân ni lei lôm mak chêi; mâni irchamin tu mo khat zuang sianlân lei lôm nin ti. 44 Pathian rengata inpâkna dong tum loiin irpâkirhlôm nin nuama, itin mo nin iiam thei hrang? 45 Ka Pa kuang nangni hnôl ki ti sôn no roi. Nangni a hnôltu hrang chu Mosia a ni, nin iiam kha. 46 Mosia kha nin lei iam ni sian chu kei khom ni iam nin ta, ki thurchi kêng a irziak. 47 A thu irziak kha nin iam zel no’n chu ki thu’nsîr hi itin mo nin iiam thei hrang?” a tia.

Johana 6

Mi sângringa a vâina thu

1 Kha zoi hnung chu Jisua kha Galili dîl, (Tiberi dîl an iti) râla a kâi tâka. 2 Damloihai chunga sinirkhêl a ithohai an hmu sikin mipui tamtakin an zuia. 3 Jisua chu tânga a kâia, a irchutirhai leh an toia. 4 Judahai Ferkân Kût kha anai tâka. 5 Jisua kha a hong irheia, mipui tamtakin ama an hong pan kha a hmua, Filipa kuang, “Hihai fâk khop hrang bai khôn mo ei irchôk hrang?” a tia. 6 (Kha kha Filipa fiana hranga a ihril a ni; a itho hrang kha chu a binga a lei inhriat chian a ni.) 7 Filipa’n a sâma, “Mi tinin tômte tea an dong chit hrang khom a duli irzahni man baiin khom ruk no nihai,” a tia. 8 A irchutirhai laia inkhat, Andria, Simon Petera urêngpa khan, 9 “Hitaka hin pasalte inkhat barli bai ringa le nga inhni nei a om; khannisianlân, hiang dôra mipui hrangin chu ite ni no ni?” a tia. 10 Jisua’n, “Mipuihai hi intoitir roi,” a tia. Kha hmuna khan hloisûl tamtak a oma. Mipuihai kha an toia, sângringa an ni. 11 Jisua’n bai kha a lâka, Pathian kuang lômthu an sîra, khataka toihai kha a semhaia; khaang dênin nga khom an ruk dôrin a semhaia. 12 An khopin chu a irchutirhai kuang, “Ite inchêk loi hrangin, a zôk kha se sabak roi,” a tia. 13 Khanchu an lâk khôma, barli bai tang ringa fâktuhai kuanga sem ban kha khamphulu sômhleihni an hrût insipa. 14 Mipuihaiin sinirkhêl a itho kha an hmu’n chu, “Hi mi hi deipu, rammuala zuang hrangtu kha a ni ngêt kêng!” an tia. 15 Khan Jisua’n nakhrâta chelin rênga siam an tum tih an hriatin; tânga a bingin a fe nôk tâka.

Tui chunga a fe

16 Khohloi a hong ni’n chu a irchutirhai kha dîla an zu fea, 17 Irkuanga an chuanga, Kapernaum tiang panin dîl kha irkân hrang an nia. Zân a hong inthim tâka, Jisua lak an kuang la hong tung maka. 18 Phâivua a sân a tho sikin tui a hong irsôna. 19 Kilometar ringa mani, kiruk mani vêl irkuang an vai zoia chu, Jisua’n tui chunga a fea irkuang a hong nâi kha an hmu’n chu; an chia. 20 Khannisianlân, ama khan an kuang, “Keima kêng ki ini, chi no roi,” a tia. 21 Kha hnung chu irkuanga khan an inchuangtira, irkuang khan an ipanna muang kha a tung zôi zel tâka.

Mipuihaiin Jisua an zong

22 A tûka, dîl râla mipui la omhai khan irkuang inkhat vai no chu irkuang dang om mah ti an hmua, Jisua kha a irchutirhai kuang irkuanga chuang sa maka, a irchutirhai kha an bing vaiin an fe tih an hriata. 23 Rengpa’n lômthu an sîr zoia bai an fâkna kôla Tiberi khua ata irkuang dang honghai kha an hong tung tâka. 24 Mipuihaiin Jisua le a irchutirhai chu, kha hmuna khan om ta mahai tih an hmu’n chu, irkuanghaia khan an chuanga Jisua zongin Kapernaum-ah an fe tâka.

Jisua, hringna bai

25 Mipuihaiin Jisua kha dîl râl dang tiang an va hmu’n chu, “Irchutirtu, itik kâra hi hin ni hong itung mo?” an tia. 26 Jisua’n a sâmhaia, “Thudik tak nangni ki hril, sinirkhêl nin hmu sika ni zong ni mak chêia, bai nin fâk khop sika ni zong nin ni hi te. 27 Bai a hek nôk thei irzûlin irvâk irvâk no unglân, kumtuang dêna om mai hrang hringna bu, Mihriam Nâipa’n nangni a ipêk hrang kha zong ual roi, Pathian, Pa khan ama a’rsinsia tâk sikin,” a tia. 28 Khanchu anni’n, “Pathian sin kin tho theina hrangin imo kin itho hrang?” an tia. 29 Jisua’n, “Pathian sin nin itho hrang chu hi hi a ni, a mi tîr hi iam roi,” a tia. 30 Anni khan, “Kin hmua kin iam theina hrangin i sinirkhêl mo ni itho hrang? Imo ni itho hrang? 31 Kin irchibulhaiin ramchâra mana kha an fâka, Pathian lekha thu’n irvân ata anni kha fâk rua a pêk a iti ang khan,” an tia. 32 Jisua’n, “Thudik tak nangni ki hril, irvân ata bai Mosia’n nangni pe maka; Ka Pa’n kêng irvân ata bai diktak kha, nangni a ipêk a ni. 33 Pathian bai pêk kha irvân ata zuang chuma rammual kuanga hringna pêkpu hi a ni,” a ti a. 34 Anni’n, “Rengpa, kha bai kha ni pe mai roh,” an tia. 35 Jisua’n, “Kei hi hringna bai chu ki ni; ki kuanga hong ka chu an phîngchâm no ni, tukhom a ni iam chu an tuiinhrâl ta no ni. 36 Nangni’n nin ni hmu hnung khomin ni la iam mak chêi tih nangni ki hril. 37 Pa’n ki kuanga a ni ipêk murdi chu ki kuang hong an ta, ki kuanga hong tâk ka chu inhnot suak no ning. Tukhom Pa hmu ngai mahai, Pa kuang ata zuang suak ni loi chu. 38 Mâni nuamlam tho hrang ni loiin a ni tîrtu nuamlam tho hrangin irvân ata zuang chum ki ni. 39 A ni tîrtu chu hi hi a ni; ama’n a ni ipêk murdi tukhom irhmangtir loia zoro hnungkhôna chu la kaithoihai nôk ki ti, iti hi. 40 Ka Pa nuamlam chu hi hi a ni; Nâipa hmua ama iam murdi’n kumtuang hringna an neia, anni kha zoro hnungkhôna chu kaithoihai ki ti,” a tia. 41 “Irvân ata bai zuang chum kha ki ni” a ti sikin, Judahai kha a chunga an chiar tâka. 42 “Hi pa hi Josefa nâipa, Jisua, a ini loi ma ni? A nu le pa khom ei inhriat khate. Itin mo ‘Irvân ata zuang chum ki ni,’ a iti tâk hi?” an tia. 43 Jisua’n a sâmhaia, “Chiar ta no roi. 44 Pa, a ni tîrtu’n a hong hruai no’n chu tukhom ki kuang hong thei no nihai; keima’n zoro hnungkhôna chu kaithoi ki ti. 45 Deipuhaiin, ‘Mi murdi Pathianin irchutir a ti,’ tiin an irziak. Mi tin, Pa thu inhriata, a kuang ata irchu chu ki kuang an hong ngai. 46 Tûte’n Pa an hmu tâk ki iti ni mah; Pa kuang ata zuangpu vaiin kêng Pa chu a ihmu. 47 Thudik tak nangni ki hril, tukhom a iamtu chu kumtuang hringna a nei ta. 48 Keima hi hringna bai ki ni. 49 Nin irchibulhaiin ramchâra mana an fâka, khannisian an thia. 50 Irvân ata bai zuang chum hi chu a fâk murdi’n thi no nihai. 51 Keima hi irvân ata bai hring zuang chum kha ki ni. Hi bai hi tukhomin an fâkin chu kumkhua’n hring mai an ti. Bai ki ipêk hrang chu ki taksa hi a ni, rammual hringna hranga ki ipêk kha a ni,” a tia. 52 Khanchu, Judahai kha a sate’n an irsêl tâka. “Itin mo hi pa hin a taksa fa hrangin a ni ipêk thei hrang?” an tia. 53 Jisua’n, “Thudik tak nangni ki hril; Mihriam Nâipa taksa nin fâk noa, a thisen nin in no’n chu nin bingin hringna nei mak chêi. 54 Tukhom ki taksa fâka, ki thisen intu chu kumtuang hringna a nei ta, keiin zoro hnungkhôna ama kha kaithoi ki ti. 55 Ki taksa hi bu tak a nia, ki thisen hi in rua tak a ni. 56 Tukhom ki taksa fâka, ki thisen in chu keimaa a om maia, kei khom amaa ki iom a ni. 57 Pa, hring khan a ni tîra, Pa sika khan kei khom ki hringa, khaang dênin tukhom a ni fâk chu keima sikin hring an ti. 58 Hi hi irvân ata bai zuang chum chu a ni, nin irchibulhaiin bai an fâka, an ithi nôk ang kha ni mah. Hi bai fâktu hi chu kumtuangin hring mai a ti,” a tia. 59 Hi thu hi Jisua’n Kapernaum Sinagoka ar chutir laiin a insîr a ni.

Kumtuang hringna thu

60 A irchutirhai laia tamtakin an inhriatin chu “Hi hi thu ngar tak a ni, tu’n mo an inhriat thei hrang?” an tia. 61 Kha thua khan a irchutirhai an chiar tih Jisua’n a lungrîlin an hriata, an kuang, “Hi thu hin nin milung a ini loi mo? 62 Mihriam Nâipa hi tiana a omna ngai tiang a kîr nin hmu tikin, itin mo nin itho hrang? 63 Hringna pêktu chu Irtha a ni; taksa kha kâmnang ma. Nin kuanga thu ki insîrhai hi Irtha le hringna a ni. 64 Kha tena khom khan senkhatin la iam nuam mak chêi,” a tia. Jisua’n a phut ata tuhai mo iam nuamloi hrang le tu mo ama incheltirtu hrang an hriat chian tâka. 65 Khasikin kêng nin kuang, “Pa’n fe theina nangni a pêk no’n chu tûte ki kuang hong thei mahai, ki iti kha,” a tia. 66 Kha tika chu a zuituhai laia tamtakin an mâksana, a kuang fe ta mahai. 67 Jisua’n sômhleihnihai kuang khan, “Nangni khom fe sa nin inuam ma ni?” a tia. 68 Simon Petera’n a sâma, “Rengpa, tu kuang mo kin ife hrang? kumtuang hringna thu ni nei khate, 69 Pathian mi irthiang kha ni nih ti kin iama, inhriat khom kin inhriat,” a tia. 70 Jisua’n a sâmhaia, “Nangni sômhleihnihai hi keima inthang mo ni mak chêi? Khan khoma nin laia inkhat chu Diabola a ni!” a tia. 71 Simon Iskariota nâipa Juda thu kha a insîr a ni, sômhleihnihai laia mi a ni nâkin ama incheltirtu hrang a ni.

Johana 7

Jisua le a urênghai

1 Kha zoi chu Jisua’n Galili ram ar fanga, Judahaiin that an tum sikin Judai ram irfang nuam maka. 2 Judahai kairêng kût kha anai tâka. 3 Jisua urênghaiin chu a kuang, “Hi hmun hi suaksanin lân, Judai rama fe ro, ni irchutirhaiin ni sintho hi an hmu theina hrangin. 4 Tukhomin irhming inthang nuam sikin inrûkin sintho ngai mahai. Hi sin hi ni tho lele’n chu rammual hmua hin inlang ro,” an tia. 5 A urênghai khom khan iam mahaia. 6 Jisua’n an kuang, “Ki zoro la tung ma, nangni zoro chu itiklai khomin a tung mai. 7 Rammualin nangni khôkmâk thei maka, kei chu a ni khôkmâk, an sin thohai sa mah ti kin hriattir ngai sikin. 8 Kûta hong fe roi. Kei chu atûn chu la hong fe no ning; ki zoro a la tung no sikin,” a tia. 9 Khaang khan an sîra, Galili rama a la om maia.

Jisua kairêng kûta

10 A urênghaiin kût hmang hranga an kâi zoi hnung chu ama khom inrûkin a hong fe saa. 11 Judahaiin kût hmuna khan ama kha an zonga, “Khôn mo a iom?” an tia. 12 Mipui khan a chungchâng an insîr sup supa. Senkhatin, “Mihriam sa a ni,” an tia, senkhatin, “Ni mah, mipui a hruai insual kêng,” an tia. 13 Judahai an chi sikin, thangphuangin chu tukhomin a chungchâng insîr mahai. 14 Kût an hmang lai takin Jisua kha tempila a kâia, ar chutirhaia. 15 Judahai khan, “Hi mi hi irchu loiin itin mo lekha a ithei?” an tia, a sân ar khêl an tia. 16 Jisua’n anni kha a sâmhaia, “Ki thu irchutir hi keima irchutirna ni maka, a ni tîrtu irchutirna a ni. 17 Tukhom Pathian nuamlam tho nuam chu, ki thu irchutir hi Pathian kuang ata mo, keima iphuachôp moh ti inhria an ti. 18 Tukhom mâni iphuachôpa thu insîrtu chu mâni roiinpuina a izong a ni. Khannisian a tîrtu roiinpuina zongtu chu iam a oma, amaa dik loina rêng rêng om mah. 19 Mosia’n Dân kha nangni a ipêk loi ma ni? khannisianlân, nin laia tukhomin Dân chu zôm mak chêi. Ithoa mo ni that nin itum?” a tia. 20 Mipui khan an sâma, “Ramilhli ichel ni ni hi te; tu mo nang that nang tum?” an tia. 21 Jisua’n anni kha a sâma, “Thil inkhat ki thoa, nin rêngin ar khêl nin ti. 22 Mosia’n sertan thu nangni a pêk sikin (Mosia insuaktir ni mah, nin irchibulhai insuaktir kêng). Khasikin, Sabat nî khomin ser nin tan ngai. 23 Mosia Dân porinchetir loina hrangin Sabat nî khoma ser nin tan ngaiin te, ithoa mo Sabat ni’n mi kin damtir sikin, ki chunga nin ning nin inmurtir bîk? 24 Pên tianga inlang dân ngot enin ngaitua no unglân, a ni dân dik takin ngaitua ual roi,” a tia.

Hi mi hi Krista ma ni?

25 Jerusalema mi senkhathaiin chu, “Hi mi hi that an itum kha ni ma mo? 26 En u ta, thangphuangin thu an sîra, tukhomin sêl mahai. Kûthai hin ama hi Krista chu ni ngeiin an inhriat ta tihna mo a ini hrang? 27 Hi pa hi kho tianga mi mo a ini lak ei inhriata; Krista chu a zuang tika chu kho taka mi mo a ini tukhomin inhre no nihai,” an tia. 28 Jisua’n khaanga Tempila ar chutir lai khan hnukirhai inring takin, “Keima nin nin hriata, kho taka mi mo ki ini khom nin inhriat. Khannisianlân, mâni thua zuang ni ma ung. A ni tîrpu chu mi diktak a ni, ama chu inhre mak chêi. 29 keima’n chu kin hriat, a ni tîra, a kuang ata zuang ki ni sikin,” a tia. 30 Khanchu chel an tuma, khannisianlân, a zoro a la hong tung no sikin tûte’n tôn thei mahai. 31 Mipui laia tamtakin an iama, “Krista a zuang tika hi pa itho nêka tam ual sinirkhêl a zuang itho hrang ma ni?” an tia.

Jisua chel hrangin enkoltuhai tîr an ni

32 Farisaihaiin chu a chungchâng mipuiin inrûka an insîr sup sup kha an inhriata, Ochai inlalhai le Farisaihai khan Jisua chel hrangin enkoltuhai an tîr tâka. 33 Khanchu, Jisua’n, “Zoro sôtnote nin kuanga la om ki ta, kha zoiin a ni tîrtu kuang fe ki ti. 34 Nangni’n ni zong nin ta, ni hmu no chin ni, ki omna hranga fe thei no chin ni,” a tia. 35 Juda thuneituhai khan, “Khôn mo a fea, ei ihmu ta loi hrang? Ei mihai Grik khopuia fea, Grikhai irchutir a itum ma ni? 36 Nangni’n ni zong nin ta ni hmu no chin ni, ki fena hranga khom hong thei no chin ni, a itihai hi i tihna ma ni?” tiin an irti irhlôma.

Tui hring dunghai

37 Kût hnungkhôn taka, nikhua roiinpui taka khan Jisua a ngîra, hnukirhai inring takin a khêka, “Tukhom tuiinhrâl ka chu ki kuang hong sianlân, in ri se. 38 Pathian lekha thu’n a insîr angin, tukhom keima ni iam chu a milung ata tui hring dunghai zuang suak a ti” a tia. 39 Kha kha Irtha, ama iamtuhaiin an la idong hrang kha a insîrna a ni; Jisua kha roiinpuia a la om no sikin Irtha kha pêk a la ini loi a ni.

Mipui laia irsenna

40 Mipui laia senkhatin kha thuhai kha an inhriatin chu, “Hi pa hi deipu chu a ni ngêt,” an tia. 41 Mi dangin, “Krista chu a ni,” an tia. Senkhatin chu, “Krista chu Galili ram ata a izuang hrang mo? 42 ‘Krista chu Davida irchi, Davida omna Bethlehem khuaa zuang suak hrang a ni’ Pathian lekha thu’n a iti mo ni ma?” an tia. 43 Khanchu, ama sikin mipui laia irsenna a hong om ta. 44 An laia senkhatin ama chel an tuma, khannisianlân, tûte’n tôn mahai.

Juda hruaituhai iam loina

45 Enkoltu sipai chu Ochai inlalhai le Farisaihai kuang khan an kîr nôka, anni khan, “Ithoa mo nin hong ihruai loi?” an tia. 46 Enkolpu sipaihai khan an sâma, “Hi pa thu’nsîr ang hin tûte’n thu lan sîr ngai mahai,” an tia. 47 Farisaihai khan an sâma, “Nangni khom nangni a lei ihuang ma ni? 48 Hruaituhai le Farisaihai laia inkhat luan ama iam mahai ti nin inhriat loi mo? 49 Hi mipui, Mosia Dân inhre loihai hi Pathianin khua a isâlhai kêng,” an tia. 50 Farisaihai laia, mi inkhat Nikodema, matona Jisua leh irhmu hranga fepu kha a om saa. Ama khan an kuang, 51 “Ei dânin chu mi tukhom a chongbâi suak ei inhriat mân le a sintho ei hmu suak mân chu thiamno inchangtir thei mak me,” a tia. 52 Anni’n an sâma, “Nang khom Galili mi ni ini loi mo? Pathian lekha thu ngûk takin tepin lân, Galili ram ata deipu suak ngai mahai tih inhria ni ti,” an tia. 53 Khan, mi tin mâni in senga an fe tâka.

Johana 8

Nupang uire lai an chel

1 Khanchu, mi tin mâni in chita an fe tâka, khannisian Jisua chu Oliv tânga a fe tâka. 2 A tûk zînga chu Tempila a lût nôka. Mipui murdi a kuang an honga; a toia, annihai kha ar chutirhai tâka. 3 Dân irchutirtuhai le Farisaihai khan, nupangnu a uire lai taka chel an hong hruaia, a laia an inngîrtira. 4 Jisua kuang, “Irchutirtu, hi nupangnu hi a uire lai taka kin ichel a nia, 5 Ei Dân, Mosia ni ipêka chu hiang nupangnu hi lunga dêng that hrang tih a nia. Nangin teh itin mo ni ti?” an tia. 6 Kha kha ama fiana hrangin an iti a ni, demna an hmu theina hrangin. Jisua kha a kûna, a kut chalin irnênga a’rziaka. 7 Khaanga ngîr pumin an irdon kher kher sikin, a thoia, an kuang, “Nin laia sual neiloi takin lungin dêng masa ri se,” a tia. 8 Khanchu a kûn nôka, a kutin irnênga a’rziak nôk tâka. 9 Kha kha an inhriatin chu inkhat khatin ulian taka irphutin an suak zit tâka, nupangnu a omna ngaia om leh vai khan an om tâka. 10 Jisua kha a hong tanga, a kuang, “Nupangnu, khôn mo an om zoi tâk? Thiamno nang inchangtir tûte om mahai mo?” a tia. 11 Ama khan, “Rengpa, om mahai,” a tia. Jisua’n a kuang, “Keima khomin thiamno nang inchangtir no ning; fe’n lân, atûn ata chu sual nôk ta no roh,” a tia.

Jisua rammual vâr

12 Jisua’n Farisaihai kuang thu an sîr nôka, “Keima hi rammual êl invârpu ki ni. Tukhom a ni zuitu chu inthima lêng viat no nihaia, hringna vâr nei ual an ti,” a tia. 13 Farisaihaiin a kuang, “Mâni thurchi kêng ni insîr, ni thu insîr hi dik mah,” an tia. 14 Jisua’n, “Mâni thu inhriattir ki ni khomin ki thu inhriattir chu a dik a ni, ki zuang suakna le ki fena hrang kin hriata, nangni’n chu ki zuang suakna le ki fena hrang inhre mak chêi. 15 Nangni’n chu taksa dânin nin ni hrilsiat ngaia, keima’n chu tûte hrilsiat ngai ma ung. 16 Ki lei hrilsiat khom lei ni sianlân, ki hrilsiatna chu dik a ti; ki bing vaia om ni ma unga, Pa ni tîrtu ki kuang a om sikin. 17 Nin Dân lekhabua khom, ‘Hriatpuitu mi inhni chong chu a dik,’ ti irziak a ni. 18 Kei hi mâni thu inhriattirtu ki nia, Pa ni tîrpu chu ki thu nin hriatpui sa a ni,” a tia. 19 Anni’n chu, “Kho hi mo ni Pa,” an tia. Jisua’n, “Nangni’n nin hre mak chêi, Ka Pa khom inhre mak chêi. Keima nin hre unglân chu Ka Pa khom inhria nin ti,” a tia. 20 Kha thu kha Tempil tholôm bôm siana hmuna ar chutir laia a insîr a ni. Tukhomin chel mahai, a zoro a la tung no sikin.

Ki fena hranga fe thei mak chêi

21 Jisua’n an kuang, “Hin om ta no ning, nangni’n ni zong nin ti, khannisianlân nin sualnaa khan thi nin ti. Ki fena hranga hong thei no chin ni,” a ti nôka. 22 Judahaiin, “A irthat hrang ma ni? Ki fena hranga khan hong thei no chin ni a iti hi?” an tia. 23 Jisua’n an kuang, “Nangni chu hnuai tiang ata hong suak nin ni; kei chu chung tianga zuang suak ki ni; hi rammual ata hong suak nin nia; Kei chu hi rammual ata hong suak ni ma ung. 24 Khasika khan kêng, ‘Nin sualnaa khan thi ni nin ti’ nangni ki iti,” a tia. 25 Anni’n, “Tu mo ni ini?” an tia. Jisua’n, “A phut ata nin kuang ki insîr tâk mo ni ma? 26 Nin chungchânga insîr hrang le rêl hrang tamtak ki nei; i khom nisian, a ni tîrtu chu mi diktak a ni, a kuang ata ki inhriat vai rammual kuang kin sîr ngai,” a tia. 27 An kuang Pa thu a insîr a nih ti inhre mahai. 28 Jisua’n an kuang, “Mihriam Nâipa hi nin inkhâi tika keima ki ni tih le, keima irchamin i khom tho ma ung Pa’n a ni ihril ang vai kin sîr ngai tih lan hria nin ti. 29 A ni tîrpu chu ki kuang a oma, ki bing vaia om hrangin ni rotsan ngai ma, a nuamlam vai ki tho ngai sikin,” a tia. 30 Kha thu kha an sîr laiin mi tamtakin ama kha an iam tâka.

Thutakin nangni’n zalêntir a ti

31 Jisua’n ama iamtu Judahai kuang khan, “Ki thutaka nin om maiin chu ki irchutir tak takhai ni nin ti; 32 Thutak inhria nin ta, thutak khan nangni inzalêntir a ti,” a tia. 33 Anni’n an sâma, “Abrahama irchihai ei nia, tu suaka khom om ngai ma ung, nangni inzalêntir a ti, itina ni iti ma ni?” an tia. 34 Jisua’n a sâmhaia, “Thudik tak nangni ki hril, thilsual tho murdi chu suak an ni. 35 Suak chu kumkhua’n in sûngkua mi ni mai mah, nâipa chu kumkhua’n a om mai. 36 Khasikin, Nâipa’n nangni an zalêntirin chu zalên tak tak ta nin ti. 37 Abrahama irchihai nin nih ti kin hriat, khannisianlân, ni that nin tuma, ki thu hin nangnia hmun a nei no sikin. 38 Keima’n Pa kuanga ki ihmu kin sîra, nangni khom nin Pa kuang ata nin inhriat kha nin insîr ngai,” a tia.

Nin pa Diabola

39 Anni’n, “Kin pa chu Abrahama a ni,” tiin an sâma. Jisua’n, “Abrahama nâihai nin ni’n chu, Abrahama itho ang kha tho nin ti. 40 Atûna ni that nin itum hi, thutak Pa kuang ata ki inhriat, nangni hriltu hi Abrahama’n khaang khan tho ngai ma. 41 Nin pa itho ang nin itho hi,” a tia. Anni’n chu, “Zâi nâi ni ma unga, Pa inkhat kin nei, Pathian chu,” an tia. 42 Jisua’n an kuang, “Pathian kha nin Pa a ni lele’n chu, lung ni thung nin ti, Pathian kuang ata zuang ki ni. Keima irchama zuang ni ma unga, a ni tîrtu irchama zuang kêng ki ini. 43 Ki thu’nsîr hi itina mo nin inhriat thei loi? Ki thu nin dong indik no sika a ni. 44 Nin pa Diabola ata suak nin nia, nin pa lungdo sin nin inuam a ni. Ama kha a phut ata mi that ngai a ni, thu dik tiang khom chang ngai ma, dikna zel a nei no sikin. Milak a tho’n ama insua a ni ngai. Milak pa a ni sikin; milakhai tinrêng pa khom a ni sa. 45 Keima’n thutak kin sîr sikin nin ni iiamloi a ni. 46 Nin laia tu mo sualna insîr thei? Thutak kin sîra, ithoa mo nin ni iiam loi? 47 Pathian ata suak khan Pathian thu a’rngaitua ngaia; nangni’n chu ki thu irngaitua mak chêi, Pathian ata suak nin ni no sikin,” a tia.

Jisua le Abrahama

48 Judahai khan an sâma, “Samari mi ni nia, ramilhli ichel a ni kin iti kha, kin iti indik mo ni ma?” an tia. 49 Jisua’n, “Ramilhli ichel ni ma unga, Ka pa ki ichôiindôm kêng, nangni lakin ki thang nin insiaa. 50 Keima roiinpuina hrang zong ni ma ung, a zongtu le a ngaituatu chu inkhat a om. 51 Thudik nangni ki hril, tukhom ki thu zômpu chu thi viat no ni,” a tia. 52 Judahaiin a kuang, “Atûn chu ramilhli ichel ni nih ti kin inhriat infel ta; Abrahama a thi tâka, deipuhai khom an thi tâka, nang lakin, ‘Tukhom ki thu zôm chu kumkhua’n thina irtem no ni,’ ni tia. 53 Kin irchibul Abrahama nêkin ni iroiinpui ual ma ni? Ama khom a thi tâka, deipuhai khom an thi tâka, a tukhôkin mo ni irbe?” an tia. 54 Jisua’n, “Mâni irchôiindôm inlân, ki satna kha ite ni no ni. Kin Pathian nin iti Ka Pa chu, a ni chôiindômtu chu a ni. 55 Ama chu inhre mak chêi, keima’n chu kin hriat; Ama kha inhre ma ung ki ti’n chu, nangni ang dêna milak ni ki ti; khannisianlân, ama kin hriata a thu khom ki zôm ngai. 56 Nin Pa Abrahama’n ki izuang a hmu hranga khan a râi a fân oka, khaang khan a hmu ngeia, a lôm tak tak,” a tia. 57 Judahai khan a kuang, “Kum sômringa lua la ni mak che dua, Abrahama ni hmu moa?” an tia. 58 Jisua’n an kuang, “Thudik kêng nangni ki ihril. Abrahama suak mân khom ki om,” tiin a sâma. 59 Khan ama dêngna hrang lung an lâka, khannisian Jisua kha ar bîka, Tempil ata a suak tâka.

Johana 9

A suak ata mitcho mit invârna

1 Khan, Jisua chu a fe malamin mi inkhat mitcho saia suak a hmua. 2 A irchutirhai khan, “Rabbi, mitcho saia a isuak hi tu’n mo thil a tho’n sual, hi mi hin mo a nu le a pa’n mo?” an tia. 3 Jisua’n a sâma, “Hi pa hin tho’nsual mah, a nu le pa khomin tho’nsual ual mahai, amaa Pathian sintho an lang theina hranga a ni. 4 Sûn a ni lai hin a ni tîrtu sin hi ei itho hrang a ni. Zân ni hrang a ni ta tûte’n sin thei ta no nihai. 5 Rammuala ki om sûng hin rammual vâr ki ni,” a tia. 6 Kha kha an sîr zoiin irnêng an chila, kha khan pilpok a siama, a mita a pola, 7 “Siloam dîla va’rsu roh,” a tia. Siloam chu “Tîr” tihna a ni. Khanchu a va fea, a va’rsûka, mit vârin a hong kîr nôk tâka. 8 A tualbômhai le matona a kutdo lei hmu ngaihai khan, “Hi pa hi kutdoa toi ngai kha mo ni ma?” an tia. 9 Senkhatin, “A ni khate,” an tia. Mi dangin, “Ni mah, ar angpui kêng,” an tia. Kha pa khan, “Kha mi kha ki ni,” a tia. 10 Anni’n, “Itin mo ni mit a ivâr tâk lam?” an tia. 11 Ama khan, “Mi inkhat, Jisua an iti khan pilpok a siama, ki mita a pola, ‘Siloam dîla fe’n lân, va’rsûk roh,’ a ni tia. Khanchu, ki va’rsûka, ki hong ihmu thei zel tâk a ni,” a tia. 12 Anni khan, “Khôn mo a iom?” an tia. “Inhre ma ung,” tiin a sâmhaia.

Farisaihaiin mitcho a hong idam dân an irdonna

13 Khanchu, mitcho lei ni ngai kha Farisaihai kuang an hruaia, 14 Jisua’n pilpok a siama, a mit a invârtir pe nî kha Sabat nikhua a nia. 15 Farisaihai khan a hong ihmu thei tâk lam kha an irdon nôka. Ama khan, “Ki mita pilpok a pola, ki’rsûka ki ihmu thei tâk a ni,” a tia. 16 Farisaihai laia mi senkhatin, “Hi pa hi Pathian ata zuang suak ni ma, Sabat a ser no sikin,” an tia. Senkhatin chu, “Mi sualin itin mo hiang sinirkhêl a itho thei hrang?” an tia. An laia irsenna a hong om tâka. 17 Mitcho kuang khan, “Ama kha i ang mi’n mo ni ibe, ni mit nang an vârtir pea?” an tia. Ama khan, “Deipu a ni,” a tia. 18 Khannisian, Juda ulianhai khan kha mi kha mitcho saia suak a nia, atûn chu mit vârna a hmu a nih ti iam thei mahai sikin, a nu le pahai an koia, an kuang, 19 “Hi pa hi nin nâipa, mitcho saia suak nin iti kha ma ni? Itina a hong ihmu thei tâk mo?” tiin an irdonhaia. 20 A nu le pa khan an sâma, “Hi pa hi kin nâipa a nia, mitcho saia suak a ni. 21 Itina a ihong hmu thei tâk mani chu inhre ma ung, a mit invârtir petu khom inhre ma ung; irdon roi, puihling a ni tâka, a chungchâng thu insîr ri se,” an tia. 22 A nu le pahai khan Judahai an chi sika khaanga an iti a ni; Judahaiin chu, “Ama kha Krista a nih,” ti a pom murdi chu Sinagok ata inhnot suak hrangin an le’rsiam diam tâka. 23 Khasikin kêng a nu le pa’n, “Puihling a ni khate, ama irdon roi,” an itihna a ni. 24 Khan, mitcho lei ni ngaitu kha a voi hnina an koi nôka, a kuang, “Pathian makunga thudik hril hrangin inkungna nei ro! Nang indampu kha mi sual a nih ti kin inhriat,” an tia. 25 Ama khan a sâmhaia, “Mi sual a ni le ni loi inhre ma ung, thil inkhat kin hriat, mitcho ki lei ni ngaia, atûn chu ki hmu thei ta,” a tia. 26 Anni khan, “Itin mo nang a ti? Ni mit itin mo a invârtir?” an tia. 27 Ama khan, “Nangni ki hril tâka, irngai nuam mak chêi; ithoa mo nin inhriat nuam nôk tâk? Nangni khom a irchutirhai nin ini nuam mo?” a tia. 28 Anni khan an ngo tâka, “Nang hi, kha pa irchutir kha ni nia, keini chu Mosia irchutirhai kin ini kêng. 29 Pathianin Mosia a chongpui tih kin inhriat, hi mi hi chu kho taka mi mani inhre viat ma ung,” an tia. 30 Kha pa khan a sâma, “Khatak kha ar khêlna chu, kho taka mi mani inhre mak chêia, ki mit a invârtir hi! 31 Pathianin mi sual chong irngai nuam mah ti ei inhriat; khannisianlân, Pathian ngaisaka, a nuamlam thotuhai chong chu ar ngaitua ngai. 32 Rammual irsiang ata mitcho saia suak mit invârtir ngai tukhomin inhre mahai. 33 Hi pa hi Pathian ata zuang suak a ni no’nte ite tho thei no ni,” a tia. 34 Anni khan an sâm nôka, “Sual pumpuia suak mo ni mak che, ni’rchutir ni itum?” an tia. Khanchu an inhnot suak tâka.

Irtha tianga mitcho

35 An inhnot suak tih Jisua’n a lei inhriatin, a va zong suaka, a kuang, “Mihriam Nâipa hi ni iam mo?” tiin ar dona. 36 Kha pa khan a sâma, “Ka pu, tu mo a ini ni hril roh, ki iam theina hrangin,” a tia. 37 Jisua’n, “Ni hmu chian tâka, nang a chongpui maipu hi a ni hi te,” a tia. 38 “Rengpa, ki iam” tiin khûksadelin chubai a mûk tâka. 39 Jisua’n, “Roirêl hrangin hi rammuala zuang ki ni, mitchohaiin an hong hmu theia, mit vârhaiin mitcho an hong ni theina hrangin,” a tia. 40 A kôla Farisai omhai khan kha kha an inhriatin a kuang, “Keini khom mitcho mo kin ini?” an tia. 41 Jisua’n an kuang, “Mitcho nin ni’n chu, sual nei no chin ni; khannisian, ‘Kin hmu thei hi te’ nin ti sikin, nin sual kha a iom chian a ni,” a tia.

Johana 10

Belrapu chongirkhek

1 Jisua’n, “Thudik tak nangni ki hril, tukhom belra mikota lût loia, hmun dang tianga luia lût chu inru ngai le hrâtlâksong a ni. 2 Mikota lût chu belrapu a ni. 3 Inkhâr enkoltu’n ama kha mikot an hong pe ngaia, belrahai khomin ar hâi an inhriat, a belrahai kha an irhming sengin a koia a hruai suak ngai. 4 A ta murdi an suaktir zoiin chu an maton a hruaia, belrahai khan ama an zui ngai, a hnukirhai an inhriat sikin. 5 Mi dang chu zui no nihaia, intânsan an ti, mi danghai hnukirhai chu an inhriat no sikin,” a tia. 6 Kha chongirkhek thu kha Jisua’n an kuang an sîra, khannisianlân, a thu’nsîr omzia kha inhre mahai.

Jisua belra enkoltu sa

7 Khanchu, Jisua’n an kuang thu an sîr nôka, “Thudik tak nangni ki hril, keima hi belrahai ta hrangin mikot ki ni. 8 Ki matona hong murdi chu inru ngai le nakhrâtsonghai an ni; khannisian belrahai khomin an thu irngaitua mahai. 9 Keima hi mikot chu ki ni. Tukhom keimaa lût chu inzôkin om a ta, lûtin suak a ta, fâk hrang hmu sa ti. 10 Inru chu inru hrang le mi that hrang le insiat hrang vaiin kêng a ihong ngai, kei chu hringna nin neina hranga, tamtak nin neina hranga zuang ki ni. 11 Kei hi belra enkoltu sa ki ni; belra enkoltu sa’n a belrahai hrangin a hringna a pêk ngai. 12 Irhlo mi, belrapu tak ni loia, belra neipu ni no chu inê hong a hmu’n chu belrahai an tânsan ngai, inê khan belrahai kha a sea, an thekindarh chit ngai. 13 Irhlo mi a nia, belrahai a uksak no sikin a intânsan pat ngai a ni. 14 Kei chu belra enkoltu sa ki ni, ki ta chu kin hriat, ki ta khomin an nin hriat. 15 Pa’n a nin hriata kei khomin Pa ki inhriat ang hin; belrahai ta hrangin ki hringna ki pêk. 16 Hi belra kula mi ni loi hi belra dang ki nei; anni khom ki la hong ihruaihai hrang a ni, ki hnukirhai khom inhria an ti, khanchu pâl khatin om an ta, a enkoltu inkhat leh. 17 “Hi sika hin Pa’n lung a ni ithung a ni, la nôk hranga ki hringna ki pêk hrang sikin. 18 Tukhomin ki hringna hi ni lâk pe thei no ni. Keima irchamin ki ipêk hrang a ni. A pêk thei ki ni; la nôk thei khom ki ni. Hi thupêk tho hrang hin Ka Pa’n a ni ibe a ni,” a tia. 19 Kha thu sika khan Judahai laia irsêlna a hong om nôka. 20 An laia mi tamtakin, “Ramilhli ichel an vêt kêng! ithoa mo a chong nin irngai?” an tia. 21 Senkhatin, “Ramilhli ichelin chu hiang hin chong thei no ni! Itin mo ramilhli’n mitcho mit a invârtir pe thei hrang?” an tia.

Judahaiin Jisua an hnôl

22 Khan, phalbi zoro a nia, Jerusalema irpumpêkna kût an hmang lai a ni. 23 Jisua chu Tempila Solomona bokropa a hong irlôi a va’rlôia. 24 Judahai a kôla an hong pungkhôma, a kuang, “I dôr ten mo milung ôkincha’n ni ni isia hrang? Krista ni ni’n chu, fel takin nin hril roh,” an tia. 25 Jisua’n a sâma, “Nangni ki hril tâk khate, iam mak chêia, Ka Pa irhminga sin ki ithohai hin ki thurchi nangni a inhriattir a ni. 26 Khannisianlân, iam mak chêi, ki belra laia mi nin ni no sikin. 27 Ki belrahaiin ki hnukirhai an inhriata, kei khomin anni kha kin hriat ngaia, an ni zui ngai; 28 an kuang kumtuang hringna ki pêka, kumkhua’n thi no nihai, tukhomin ki kut ata ni lapai pe no nihai. 29 Anni ni pêktu Ka Pa chu itinrêng nêka roiinpui ual a ni; Ka Pa kuta om chu tûte’n sutpai thei mahai. 30 Keima le Pa chu pumkhat kin ni,” a tia. 31 Judahaiin chu ama dêngna hrang lung an hrût nôka. 32 Jisua’n an kuang, “Pa’n sin hranga a ni ipêk, sin sa tamtak nin mit hmua ki sina, ki sinthohai laia a i tak sika mo lunga ni dêng nin itum?” a tia. 33 Judahaiin an sâma, “Sin sa ni sin sika lungin nang dêng hrang ni ma unga, Pathian ni hrilinsiat le nang mihriam mai mai Pathiana nir bê sikin a ni,” an tia. 34 Jisua’n a sâma, “Nin Dân lekhabua, ‘Pathianhai nin nih,’ ti irziak mo ni ma?. 35 Ei inhriat angin ei Pathian Thubu’n a iti ka chu kumkhua’n a idik ngai a ni, Pathianin a chong a intungnahai khom kha pathianhai a iti a ni. 36 Keima len vâng chu Pa’n a nin thanga, rammuala a ni izuang tîr a ni. Itin mo Pathian Nâipa ki ni, ki ti sika hin Pathian ni hril insiat, nin ni iti? 37 Ka Pa’n sin hranga a ni inuam ki sin no’n chu ni iam no roi; 38 Khannisianlân, ki isin a ni’n chu, keima nin ni iam no khomin, ki sinthohai lua hi iam roi ba; Pa chu keimaa a om ti le kei khom Paa ki om tih nin inhriat infel theina hrangin,” a tia. 39 Kha hnung chu Jisua kha chel an tum nôka, khannisian an kut ata a suak tâka. 40 Jordan râla, Johana’n matona mi a baptisna ngai hmun tiang khan a fea, kha hmuna khan a om mai tâka. 41 Mi tamtak a kuang an honga, “Johana’n sinirkhêl ite tho mah, khannisianlân, Johana’n hi pa chungchâng thu a insîr murdi chu a hong idik kêng,” an tia. 42 Khanchu mi tamtakin ama an iam tâka.

Johana 11

Lazara thi thu

1 Mi inkhat ar hming Lazara, Bethani khuaa om kha dam maka. Bethani khua kha Mari le a zuarpuinu Marthi omna khua a ni. 2 (Hi Mari hi Rengpa sahriak mirimhoi poltu, a ke sahriak innôta, a sam leh a ke hui penu kha a ni, a dam no Lazara hi a nuchapa a ni.) 3 Khanchu, a farnuhaiin, “Rengpa, ni lungthung kha dam ma,” tiin mi an van hriltira. 4 Jisua’n a len hriatin chu, “Hi natna hi thina hrang ni maka, Pathian roiinpuina hranga a ni. Hi sika hin Pathian Nâipa hi roiinpuiin a iom hrang a ni,” a tia. 5 Jisua’n Marthi le a zuarpuinu le Lazara kha lung a thunga, 6 Khannisianlân, dam mah ti an hriat hnungin a omna khuaa khan sûn hni a la oma. 7 Kha zoi hnung chu a irchutirhai kuang, “Judai rama fe nôk ta ei ti,” a tia. 8 A irchutirhaiin “Irchutirtu, Judahaiin lunga nang dêng an tum chak kha; khan khomin fe nôk ni itum mo?” an tia. 9 Jisua’n a sâma, “Sûna dârkar sômhleihni a iom loi ma ni? Khasikin mi tukhom sûn khovâra a lêngin chu a ke sir châi ngai ma, hi rammual vâr hi a hmu sikin. 10 Zâna a lêngin chu a ke sir a châi ngai, amaa khan vâr a om no sikin,” a tia. 11 Kha thu kha an sîr zoiin an kuang, “Ei rualpa Lazara kha a ina, khannisian ama kaithoi hrangin ki ife hrang a ni,” a tia. 12 A irchutirhai khan a kuang, “Rengpa, a in a ni’n te, hong dam nôk ta ti,” an tia. 13 Jisua’n a thi thu a insîrna a ni, khannisianlân anni’n chu a’rngam sûnga a in thu a insîr an sôna. 14 Khasikin, Jisua’n fel takin an sîra, “Lazara a thi tâk, 15 khannisian nangni sikin khataka ki iom no chu ki lôm, nin iam theina hrangin; i khom nisian, a kuang va fe ei ti,” a tia. 16 Thoma, (Phîra) an iti chu a irchutir chanpuihai kuang, “Tho Irchutirtu kuanga ei rêngin fe ei ta, a thinaa va thi sa hrangin fe ei ti,” a tia.

Jisua thoinôkna le hringna

17 Jisua a hong tungin chu Lazara kha sûn minli thâna a lei om ta tih an hriata. 18 Bethani kha Jerusalem kôla om a ni, kilometar thum dôra hla a ni. 19 Judahai laia tamtak, an nuchapa thi chungchâng thua Marthi le Mari lungngam saka toipui hrangin an honga. 20 Marthi chu Jisua tung hrang a nih ti an hriatin chu a va dona, Mari’n chu in a lei nghâka. 21 Marthi’n Jisua kuang, “Rengpa, hitaka ni iom ni sian chu, ki nuchapa thi no ni! 22 Atûn khom Pathian kuang ni izong murdi Pathianin nang pe a ti, ti kin hriat,” a tia. 23 Jisua’n, “Ni nuchapa thoi nôk a ti,” a tia. 24 Marthi’n, “Zoro hnungkhôna chu thoinôkna nia chu thoinôk a ti, ti chu kin hriat,” a tia. 25 Jisua’n, “Kei hi thoinôkna le hringna ki ni, tukhom a ni iam ka chu thi khom sianlân, hring mai a ti; 26 tukhom hring maia ni iam chu, kumkhua’n thi no ni; kha kha ni iam mo?” a tia. 27 Ama khan a kuang, “Ki iam, Rengpa, Krista, Pathian Nâipa rammuala zuang hrangpu kha ni nih ti ki iam,” a tia.

Jisua a chap

28 Kha kha an sîr zoiin a fea, a zuarpuinu Mari chu inrûkin a va koia, “Irchutirtu hi hin a om, nang a koi,” a tia. 29 Khan, kha thu kha an hriat zoi le chu a thoi lika, a kuang a fe tâka. 30 Jisua kha kho sûnga la lût loiin, Marthi’n a va donna hmuna khan a la om maia. 31 Judahai, in sûnga lungngam saka toihai khan, Mari thoi lika, a suak kha an hmu’n, thâna chap hranga a ife mani an tia, an zuia. 32 Mari’n Jisua omna a va tunga, a va hmu’n chu a ke bula an boka, “Rengpa hi hin omin lân chu, ki nuchapa thi no ni,” a tia. 33 Jisua’n Mari chap le a hong zuitu Judahai chap kha a hmu’n, a sân a’rpei a tema, a’rhniaka, 34 “Khôn mo nin inzâl,” a tia. Anni khan, “Rengpa, hongin lân, en roh,” an tia. 35 Jisua a chap ta. 36 Judahai khan “En u ta, Lazara hi lung a thung bâka!” an tia. 37 An laia senkhatin chu, “Mitchopa kha mit vârna a ipêk mo ni ma? Lazara khom hi thi loiin a isia thei loi ma ni?” an lei tia.

Lazara kaithoia a om thu

38 Jisua kha irhniak pumin thân kha a tung tâka. Thân kha pûk a nia, lung leh khâr a ni. 39 Jisua’n, “Lung hi khâipai roi,” a tia. A thitu farnu Marthi’n a kuang, “Rengpa, atûn hin chu a mirim se ta ti, a thina sûn minli a ni ta,” a tia. 40 Jisua’n a kuang, “Ni iamin chu Pathian roiinpuizia hmu ni ti, nang ti ma ung mo?” a tia. 41 Khanchu lung kha an khâipai tâka, Jisua kha a tanga, “Ka Pa, ki thu nir ngaitua sikin lômthu kin sîr. 42 Ki thu nir ngaitua ngai ti khom kin hriat; khannisianlân, hitaka mi pungkhômhai sika hin hi thu hi ki insîr a ni, nangin keima ni ni tîr ti an iam theina hrangin,” a tia. 43 Kha kha an sîr zoiin chu hnukirhai inring takin a khêka, “Lazar, hong suak roh,” a tia. 44 Mithi kha a kut a ke thân puana tuam pumin a hong suaka, a hmâi khom irhuina puana tuam a nia. Jisua’n an kuang, “Sût unglân, infetir roi,” a tia.

Jisua that hrang lam an ngaitua

45 Mari ina hong Judahai laia tamtakin Jisua sintho kha an hmua, an iam tâka. 46 Senkhat chu Farisaihai kuang an fea, Jisua sinthohai kha an va hrila. 47 Khanchu, Ochai inlalhai le Farisaihai khan Sanhedrin-ah an koia, “Hi pa hin sinirkhêl tamtak a thoa, itin mo ei itho ta hrang? 48 Hiang hin ei insua rak maiin chu mi murdi’n iamna an ta, Rom mihai hong an ta, ei hmun irthiang le ei nam ni hong insiat pai pêna an ti,” an tia. 49 An laia inkhat, ar hming Kaiafa, kha kuma Ochai inlaltak khan, an kuang, “Inhre mak chêi; 50 Mipui irthûla mi inkhat a thia, nam pumpui irhmang chit loi chu nin ta hrangin a sa ual ti nin inhriat loi a ni,” a tia. 51 Kha kha ama lungrîl puak suaka a insîr ni mah; kha kuma khan Ochai inlaltak a nia, an nam irthûla Jisua thi hrang a lei insîr a ni. 52 An nam irthûl vai khom ni loiin Pathian nâi rammuala indarhai pâl khata a hruaikhôm nôkna hrang khom a insîr a ni. 53 Khatak ata chu ama that lam an ngaitua tâka. 54 Khasikin Jisua kha inlangin Judahai laia lêng ta maka, kha rengata chu ramchâr kôla khua inkhat ar hming Efraima an itia khan a fea, kha khan a irchutirhai leh an om tâka. 55 Judahai Ferkân Kût a hong nâi tâka, thingtâng ata mi tamtak chu Ferkân Kût mân irthâr hrangin Jerusalema an fea. 56 Jisua kha an zonga, Tempila an irbûm laiin an chonga, “Itin mo nin ngaitua? Kûtnaa hong no ni mo?” an irti irhlôma. 57 Ochai inlalhai le Farisaihaiin ama an chel theina hrangin tukhomin a omna an inhriatin chu irchamneituhai an inhriattir hrang a nih ti thu an pêka.

Johana 12

Jisua Bethani-a sahriak mirimhoi pol thu

1 Ferkân Kût hrang sûn ruk a la omin, Jisua’n mithi lai ata a ikaithoi Lazara omna Bethani khua kha a hong tunga. 2 Khatak khan a ta hrangin zânbu an sinsiama, Marthi’n khalâi othai kha a donhaia, Lazara khom khalâi othai laia chang sa a ni. 3 Khan, Mari’n, litar chimrip vêl, Spiknard hriak mirimhoi tak le man hlutak a hong chôia, Jisua ke an nôta, a samin a ke a hui pea; khanchu, kha hriak mirim khan in pumpui kha a sip zit tâka. 4 A irchutirhai laia inkhat Juda Iskariota ama incheltir hrangtu khan, 5 “Ithoa mo hi sahriak mirimhoi hi a duli irzathuma zuarin inrianghai pêk a ini loi?” a tia. 6 Inrianghai a ngaisak sika kha chong kha a iti ni mah, inru a nia, sum kok a dôna, a sûnga om kha a lâk ngai sika a ni. 7 Jisua’n, “Ite ti no roi, phûmin ki om nia hrangin hrê ri se. 8 Inrianghai chu nin kuang om mai hrang an ni, kei chu nin kuang om mai no ning,” a tia.

Lazara that an tum thu

9 Juda mi tamtakin Bethani khuaa Jisua a om ti an inhriat tâka, Jisua vai hmu nuama hong ni mahaia, mithi lai ata a ikaithoi Lazara khom hmu an inuam sa a ni. 10 Ochai inlalhai khan Lazara khom kha that an tum tâka, 11 ama sika Juda tamtakhaiin an rotsanhaia, Jisua an iam tâk sikin.

Jisua roiinpui taka Jerusalem a lûtna thu

12 A tûk zînga chu Ferkân Kûta hong mi tamtakin chu Jisua kha Jerusalema hong lût hrang a nih ti an inhriatin, 13 tûm ônhai an chôia, a nghâk hrangin an suaka. “Hosana! Rengpa irhminga hong chu inpâkin om ri se! Israel rêng chu inpâkin om ri se!” tiin an khêk mur mura. 14 Jisua’n sakuartung a hmua, a chunga a chuanga, 15 “Chi no ro, Zion nâinu, En ta, ni Rêng chu a hong e, sakuartung te chunga chuangin,” ti irziak ang khan. 16 Kha kha a irchutirhaiin a phuta khan chu inhre thei mahaia, khannisianlân, Jisua chôiindôma a om zoi tena chu, a chungchâng, khaanga irziak a ni, a chunga kha thil kha lei itho a ni an inhriat thei ta. 17 Lazara, thân ata a koi suaka, mithi lai ata a kaithoi laia a kuanga mipui omhai khan kha thu kha an inhriatirhai thiai tâka. 18 Sinirkhêl a tho tih an inhriat sikin, mipuihaiin ama an va inghâk a ni. 19 Farisaihai khan, “Ite nin ilo thei loi a ni hi te, en u ta, rammualin ama an izui tâk hi,” an irtia.

Grik mi senkhatin Jisua an zong

20 Kût hmang laia Pathian biak hranga hong fehai laia Grik tuhai manni an oma. 21 Khahai kha Galili rama Bethsaida kho mi Filipa kuang an fea, “Ka pu, Jisua hmu kin nuam,” tiin an ngêna. 22 Filipa khan Andria a hong hrila, Andria le Filipa khan Jisua an va hrila. 23 Jisua’n a sâma, “Mihriam Nâipa chôiindôma a om zoro a hong tung ta. 24 Thudik nangni ki hril; bu’rmal irnênga a tâka a thi no’n chu, ar mal dênin a om chiana, a thiin chu ra tamtak an sua ngai. 25 Tukhom mâni hringna inpâm murdi’n chu inchân a ta; tukhom hi rammuala hin a hringna an pâm no’n chu kumtuang hringna nei mai a ti. 26 Tukhom ki sintho nuam murdi’n chu ni zui ngêt ri se, ki sin thotu chu ki omnaa a om sa theina hrangin. Tukhomin ki sin tho chu ka Pa’n chôiindôm a ti,” a tia.

Mihriam Nâipa inkhâiin a om hrang thu

27 “Atûn hin ki lungrîl a na tak taka, imo ki iti hrang tâk? ‘Ka Pa, hi zoro ata hi ni saninhring roh’ ki iti hrang ma ni? Ti no ning, hi dûk tuang hrang piala zuang kêng ki ini,” a tia. 28 “Ka Pa, nir hming chôiindôm roh,” a tia. Khanchu, irvân ata hnukirhai a zuang suaka, “Ki chôiindôm ta, la chôiindôm nôk mai ki ti,” a tia. 29 Khataka mipui ngîr sahai khan hnukirhai kha an inhriatin, “Khonri kêng,” an tia; senkhatin “Vântîrtônin a ichongpui,” an tia. 30 Jisua’n a sâma, “Kha hnukirhai kha ki ta hranga zuang suak ni mah, nin ta hranga a ni ual. 31 Atûn hin rammual chungchâng ngaitua lai a ni, atûn hin rammual roirêltu hi pai suak ni a ti. 32 Keima irnêng ata inkhâia ki omin chu, mi murdi keima tiang kaihruaihai zit ki ti,” a tia. 33 Kha thu kha i ang taka a ithi hrang mani tih inhriatirna hrangin a insîr a ni. 34 Mipuiin chu an sâma, “Krista chu kumkhua’n om mai a ti, ti Dân lekhabu ata kin inhriat, nangin ‘Mihriam Nâipa inkhâiin om a ti,’ itina ni iti ma ni? Mihriam Nâipa kha tu mo a ini?” an tia. 35 Jisua’n an kuang, “Vâr hi sôtnote nin laia la om a ti. Vâr nin nei sûng hin chai roi, inthimin nangni a de nona hrangin, tukhom inthima lêng chu a fena inhre ngai ma. 36 Vâr nin nei sûng hin vâr hi iam roi, vâr nâihai nin ni theina hrangin,” a tia. Kha thu kha Jisua’n an sîr zoiin, a fe pat tâka, an hmu nona hrangin ar bîka.

Judahai iamnozia

37 Khaanga sinirkhêl tamtak kha an mit hmua tho khom sianlân iam mahai. 38 Deipu Isaia’n: “Rengpa, kin thu’nsîr tu’n mo iam? Rengpa sinthotheina kha tu kuang mo an lang?” a iti kha a hong tung theina hrangin. 39 Hi sika hin an iiam thei loi a ni, Isaia khan: 40 “Pathianin an mit an chotir pehaia, An milung an ngartir sa, An mitin an hmu nona hrang le an milungin an inhriat thei nona hrangin. Khanchu, hong kîr nôk an ta, Anni kha ki lei indamhai itinin,” a iti ang khan. 41 Isaia’n kha thu kha a roiinpuizia a hmu sikin a thurchi a insîr a ni. 42 Khan khomin hruaituhai laia mi tamtakin Jisua kha an iam tâka; khannisian, Farisaihai sikin insîr inlang ngam mahai, khano’nchu, Sinagok ata inhnot suak an ini hrang a ni. 43 Pathian roiinpuina nêkin mihriam kuanga roiinpuina an inuam ual a ni.

Jisua thu, roirêlna

44 Jisua a khêk suaka, “Tukhom ni iam chu keima ni iam ni mahaia, a ni tîrtu iam an ni. 45 Tukhom a ni hmu chu a ni tîrtu hmu a ni. 46 Rammuala hin vâr angin ki izuang a ni, tukhom a ni iam murdi’n chu inthima an om nona hrangin. 47 Tukhomin ki thu inhriatin zôm no sianlân, ama kha keiin thiamno inchangtir ma ung; rammual thiamno inchangtir hranga zuang ni ma ung, rammual saninhring hranga zuang ki ni. 48 Tukhom ni hnôla ki thu pom nuam loi chu a chungthu rêl pe hrang inkhat a nei. Ki thu’nsîr ngei kha, zoro hnungkhôna chu a chungthu rêl petu la ni a ti. 49 Keima phuachôpin insîr ma unga, Pa, a ni tîrpu ngei khan, ki insîr hrang le ki iti hrang kha ircham a ni ipêk a ni. 50 A thupêk chu kumtuang hringna a nih ti kin hriat. Khasikin, Pa’n hril hranga a ni iti ang takin ki ihril a ni,” a tia.

Johana 13

Irchutirhai ke a’rsûk

1 Ferkân Kût hrang a hong ni tâka, Jisua’n hi rammual suaksana Pa kuang a fe zoro a tung ta ti an hriata; Ama mi, rammuala om a lungthunghai chu a mong dênin lung a thunga. 2 Khan, zânbu an nêk laiin, Diabola khan Simon nâipa Juda Iskariota kha Jisua incheltir hrangin ngaituana a lei inneitir tâka. 3 Jisua’n, Pa’n itinrêng a kuta a sia tih le Pathian ata zuang suak a nih ti le, Pathian kuang fe nôk hrang a ni an hriata. 4 Khasikin, zânbu khalâi ot lai kha a thoia, a songkol irfual a kheka, irhuina puan a lâka, a boma. 5 Khan tâbora tui a sunga, irchutirhai ke a’rsûk tâka, irhuina puan khan a hui thiaia. 6 Simon Petera kha a hong phâkin chu, Petera’n, “Rengpa nangma’n ki ke ni irsûk hrang mo?” a tia. 7 Jisua’n a sâma, “Ki sintho hi atûn hin inhre mak che, khannisianlân, nakana lan hria ni ti,” a tia. 8 Petera’n a kuang, “Ki ke irsu viat no chi ni,” a tia. Jisua’n a sâma, “Ni ke ki’rsûk no’n chu ki irchutir ni thei no chi ni,” a tia. 9 Simon Petera khan a kuang, “Rengpa, khano’nchu, ki ke vai irsu loiin, ki kut le ki lu khom,” a tia. 10 Jisua’n a kuang, “Tui irsil tâk chu a ke vai no chu irsûk nang mah, a pumin a fâi kêng. Nangni chu nin fâi, nin rêngin chu ni mah,” a tia. 11 Ama incheltirtu hrang kha an hriata, khasikin, “Nin rêngin chu fâi mak chêi,” a iti a ni. 12 An ke a’rsûk zoiin chu, a songkol sia kha an nghâka, a toi nôk tâka, an kuang, “Nin chunga ki sintho hi a omzia nin inhriat mo? 13 Nangni’n, Irchutirtu le Rengpa nin ni ti ngai, nin ti indik, ki ni ngeia. 14 Kei Rengpa le irchutirtu luan nin ke ki’rsûkin te, nangni khomin nin ke nin irsûk irhlôm hrang a ni. 15 Nin chunga ki itho anga nangni khomin nin thôna hrangin, nangni ki irhmutir a ni. 16 Thudik tak nangni kin hril, suak chu a pu nêkin roiinpui ma, tirtôn khom a tîrtu nêkin roiinpui ual mah. 17 Kha kha nin inhriata, nin zômin chu lôm nin ti. 18 Nin rênga thu insîr ma ung; ki inthanghai chu keima’n kin hriat, khannisian: ‘Ki bai fâktu’n a kuttum a nir hmua,’ ti Pathian lekha thu kha a zuang tung theina hrangin. 19 “Kha kha a zuang tung mân atûn hin nangni ki lei inhril a ni; a zuang tung tika, Ama kha ki ni ngei nin iam theina hrangin. 20 Thudik nangni ki hril, ki mi tîr lei lôm chu keima ni lôm a ni, keima ni lômtu chu a ni tîrtu lôm a ni,” a tia.

Incheltira a om hrang thu Jisua’n a lei insîr

21 Jisua’n kha thu kha an sîr zoiin a sân a milung dûk a tonga. “Thudik tak nang ki hril, nin laia mi inkhatin nin cheltir a ti,” a tia. 22 Tu tak mo a iti inhre loiin irchutirhai kha an ir-enchuk tâka. 23 A irchutirhai laia inkhat, Jisua’n lung a ithung kha, Jisua kôla a toia. 24 A tu tak mo a iti irdon hrangin kut veivâkin Simon Petera’n ama kha a chongpuia. 25 Khan kha mi khan Jisua a va nâiin, “Rengpa a tu tak hi mo?” a tia. 26 Jisua’n a sâma, “Bai hlek kin chia ki ipêktu tak chu a ni,” a tia. Khan bai hlek kha an chia, a lâk suaka, Iskariota Simona nâipa Juda kha a pêka. 27 Juda’n bai hlek kha a lâk zoiin chu, a sûnga Setana a lût tâka. Jisua’n a kuang “Ni itho hrang kha tho lat ta roh,” a tia. 28 Khataka toihai laia tukhomin kha kha i sika a kuanga a insîr mo inhre mahai. 29 Irchutir senkhathaiin chu Juda sum hmarsa a dôn sikin, Jisua’n, kût hranga thil ei innanghai var cho roh; a iti mani, a ninole, inrianghai i i pehai roh, a iti pe mani an sôna. 30 Juda khan bai hlek kha a lâka, a suak zôi zel tâka; kha zoro kha, zân a ni.

Thupêk thar

31 Khan, Juda kha a suak zoiin chu Jisua’n, “Atûn chu Mihriam Nâipa chôiindômin a om ta, Amaa Pathian khom chôiindômin a om ta. 32 Amaa Pathian chôiindôma a om khan, Pathianin ama khom a makunga chôiindôm a ta, chôiindôm zôi zel a ti. 33 Nâihaio, sôtnote nin kuang ki la oma, nangni’n ni zong nin ta, ki fena hranga hong thei no chin ni, Judahai kuang ni ihril ang khan atûn nangni kuang khom ki hril a ni. 34 “Thupêk thar nangni ki pêk; lungirthung irhlôm roi; keiin lung nangni ki ithung ang hin nangni khom lungirthung roi. 35 Lung nin irthung irhlômin chu mi murdihaiin ki irchutirhai nin ni ti, khataka khan inhria an ti,” a tia.

Jisua’n, Petera iphil hrang thu a lei insîr

36 Simon Petera’n a kuang, “Rengpa, khôn mo ni ife hrang?” a tia. Jisua’n a sâma, “Atûn chu ki fena hranga ni zui thei no chin ni, nakana ni la zui nin ti,” a tia. 37 Petera’n, “Rengpa, itho sikin mo atûn hin nang ki izui thei loi hrang? Nangma hrangin chu thi khom ki’rhuam kêng,” a tia. 38 Jisua’n a sâma, “Ki hrangin thi nir huam mo? Thudik tak nang ki hril, nangin voithum ni ni phil mâka chu âr khuang no ni,” a tia.

Johana 14

Jisua, Pa kuanga fena lampui

1 Jisua’n, “Nin milung dûk intong no ri se, Pathian nin iam kei khom ni iam sa roi. 2 Ka Pa ina omna tamtak a oma, om no sianlân chu, nin ta hranga hmun siama ki fe hrang thu nangni ki ihril hrang ma ni? 3 Nin ta hranga hmun siamin ki fe’n chu zuang kîr nôk ki ta, ki kuang nangni hruai ki ti, ki omnaa nin om sa theina hrangin. 4 Ki fena hrang lam khom nin inhriat,” a tia. 5 Thoma’n a kuang, “Rengpa, ni fena hrang inhre ma ung, itin mo a lam kin inhriat thei hrang?” a tia. 6 Jisua’n a sâma, “Keima hi lampui le thutak le hringna ki ni, keimaa fe no chu tukhom Pa kuang tung ngai mahai. 7 Keima hi nin hre unglân chu ka Pa khom inhria nin ta, atûn chu ama nin inhriat tâk, ama nin hmu sa tâk,” a tia. 8 Filipa’n a kuang, “Rengpa, Pa kha nir hmutirin lân, kin ta hrangin sa ti,” a tia. 9 Jisua’n, “Filipa, hi dôr hi nin kuang ki om tâka chu, nin ni la inhriat loi ma ni? Keima ni hmu chu Pa hmu a ni. Itina mo ‘Pa chu nir hmutir roh’ ni iti? 10 Keima Paa ki om le Pa keimaa a om ti nin iiam loi ma ni? Nin kuanga thu ki insîrhai hi keima phuachôpin ki insîr ni mah. Pa keimaa a om maiin chu, a sin a itho a ni ual. 11 Keima Paa ki oma, Pa keimaa a om ki iti hi iam roi; a ninole, ki sintho sika lua hin ni iam roi. 12 Thudik tak nangni ki hril, tukhom ni iam chu thil ki itho ang hi tho sa ti; hi nêka roiinpui ual khom hi la tho a ti, Pa kuang ki fe hrang sikin. 13 Ki’rhmingin i khom nin izong ka chu tho thiai ki ti; Pa kha Nâipa sika chôiindôm a ni theina hrangin. 14 Nangni’n ki’rhmingin i khom nin izong ka chu tho thiai ki ti.

Irtha Irthiang inkung kha

15 “Nangni’n lung nin ni thungin chu, ki thupêkhai zôm nin ti. 16 Khan, keima’n Pa zong ki ta, Irtharngamtu dang nangni pe a ti, kumkhuaa nin kuanga om hrangin. 17 Irtha dik tak chu, rammualin nei thei maka, ama an hmu thei no sik le ama an inhriat no sikin. Nangni’n chu ama nin inhriat, nin kuang a om maia, nangnia a om mai sikin. 18 Fara’n nangni masan no ning, nin kuang zuang nôk ki ti. 19 Zoro sôtnote hnunga rammualin ni hmu ta no nihai, nangni’n chu ni hmu nin ti, keima ki hring sikin nangni khom la hring nin ti. 20 Kha tika chu keima Paa ki oma, nangni keimaa nin om le, keima nangnia ki om ti lan hria nin ti. 21 Tukhom ki thupêkhai poma zômpu chu lung ni thungpu a ni, lung ni thungpu chu ka Pa’n lungthung a ta, kei khomin lungthung ki ti, a kuang inlâr sa ki ti,” a tia. 22 Juda, (Iskariota ni loi) khan a kuang, “Rengpa, kin kuang inlâr ni ta, rammual kuang nin lâr loi hrang mo?” a tia. 23 Jisua’n a sâma, “Mi’n lung an ni thungin chu ki thu khom zôm a ta, ka Pa’n ama kha lungthung a ta, a kuang zuang kin ta, a kuang om mai kin ti. 24 Lung ni thung loitu chu ki thu zôm maka, thu nin inhriat hi keima thu ni maka, Pa a ni tîrtu thu a ni ual. 25 Nin kuang ki la om sûng hin nangni ki ihril a ni; 26 Irtharngamtu, Irtha Irthiang, ki’rhminga Pa’n a zuang itîr hrang khan itinrêng nangni irchutir a ti, nin kuang ki insîr murdi nangni inhriat suaktir nôk a ti. 27 Irtharngamna nangni ki mâk pe, keima irtharngamna kêng nangni ki ipêk; rammualin a ipêk ang ni loiin nangni ki ipêk a ni. Nin milung dûk tong no ri se, chi khom chi no ri se. 28 “Nangni masan hrang ki nia, nin kuang zuang kîr nôk ki ti,” ki iti kha nin inhriat ta. Lung nin ni thungin chu Pa kuanga ki ife hrang hi lôm nin ti; Pa kha keima nêkin a roiinpui ual sikin. 29 Kha kha a zuang tung tika nin iam theina hrangin, atûn a zuang tung mân nangni ki ihril a ni. 30 Zoro sôt ualin chu nin kuang thu insîr intam ta no ning, hi rammual roirêlpu hi a hong hrang sikin, ama’n ki chunga irchamnei mah, 31 khannisian, keiin Pa lung ki thung le, Pa’n thu a ni ipêk angin ki tho ngai tih rammualin an hriatna hrang a ni. Thoi unglân, hitak ata hi suak ta ei ti.

Johana 15

Jisua, Grep râng diktak

1 “Kei hi Grep râng diktak ki ni, ka Pa ar huan enkoltu a ni. 2 Ki irzompui ôn raloi murdi chu a pai ngaia, a ra murdi chu a’rthial infâi ngaia, a ra tam ualna hrangin. 3 Nin kuanga ki thu’nsîr murdi sika khan nin irthiang ving ta. 4 Keimaa om mai unglân, kei khom nangnia om mai ki ti. Ôn kha grep rânga a om mai no’n chu a ira thei loi ang dênin, nangni khom keimaa nin om mai no’n chu ra thei no chin ni. 5 “Kei hi grep râng ki ni, nangni a ônhai nin ni. Tukhom keimaa a om maia, kei khom amaa ki om maina chu tamtakin a ra ngai; keima boiin ite tho thei mak chêi. 6 Tukhom keimaa om loi chu ôn anga pai suakin an om ngai, ôn ipai kha a châra, an irkhôma, meia an paia, a kâng irhmang ngai. 7 Keimaa nin om maia, ki thu nangnia a om maiin chu nin inuam murdi zong unglân, hmu thiai nin ti. 8 Tamtak nin ra hin, ka Pa chu chôiindômin a om ngaia, khanchu ki irchutirhai ni nin ti. 9 Pa’n lung a ni thung sikin kei khomin lung nangni ki ithung a ni; ki lungthungin om roi. 10 Ki thupêkhai nin zômin chu, ki lungthungin om mai nin ti, keiin ka Pa thupêkhai ki zôma, a lungthunga ki iom ang hin. 11 “Ki lômna hi nangnia a om mai theina hrang le nin lômna ar kip theina hrangin hi thu hi nin kuang ki insîr a ni. 12 Hi hi ki thupêk chu a ni; lung nangni ki ithung ang takin nangni khom lung irthung irhlôm roi. 13 Mi’n a rual hranga a hringna a ipêk bana lungthungna inthûk ual tûte’n nei mahai. 14 Thu nangni ki ipêk hi nin zômin chu ki rualhai nih nin ti. 15 Suak nangni ti ta no ninga; suakin chu a pu sintho inhre maka; rualhai nangni ti ta ki ti; ka Pa kuang ata thil ki inhriat murdi nangni kin hriatir tâk sikin. 16 Nangni’n nin thang mak chêi, keima’n nangni kin thang, va ra hrang le nin raa om mai hrangin nangni kin kung a ni; ki’rhminga Pa kuanga nin izong murdi nangni a pêk theina hrangin. 17 Khasikin hi thu hi nangni ki ipêk a ni, lung irthung irhlôm roi.

Rammualin a hmumâkna

18 “Rammualin nangni a hmumâkin chu, keima a ni lei hmumâk ta ti inhre mai roi. 19 Rammuala mi ni unglân chu, rammualin ama ta angin lung nangni a ithung hrang a ni. Khannisianlân, rammual ata nangni ki inthang suak nin nia, rammual mi nin ni ta no sikin rammualin nangni a ihnôl a ni. 20 Suak a pu nêkin roiinpui mah ti thu nin kuang ki insîr kha inhre mai roi. Anni’n deng an ni inthei ang khan nangni khom deng nangni lan theitir an ti; ki thu an zômin chu nin thu khom zôm an ti. 21 Khannisianlân, hi thil murdi hi ki’rhming sika nin chunga tho an ti, a ni tîrtu an inhriat no sikin. 22 Keima zuangin an kuang thu insîr no inlân chu sual nei no nihaia, atûn chu an sual hnônna hrang nei ta mahai. 23 Tukhom ni hnôl chu ka Pa khom an ihnôl a ni. 24 Mi dang tûte la tho ngai loi thilhai an laia tho no inlân chu sual nei no nihai; atûn chu ki sinthohai an hmua, kei le Pa chu an ni ihnôl tâk a ni. 25 I khom nisianlân, an Dân lekhabua, ‘Anni’n a bi om loiin an ni hnôl’ ti irziak kha a hong tungna hranga an itho a ni. 26 “Irtharngamtu, Pa kuang ata nin kuang ki zuang itîr hrang kha, Pa rengata suak Irtha diktak kha a zuang tung tika ama’n ki thurchi nangni inhriattir a ti. 27 Nangni khom ki thu inhrepuhai nin ni, a phut ata ki kuang nin om sikin.

Johana 16

1 “Nin iamna nin mâk nona hrangin hi hi nangni ki insîr pe a ni. 2 Sinagok haia nangni kêlsua an ta; nangni that tumtuhaiin Pathian sin an itho anga an bê zoro la hong tung a ti. 3 Khaang thil kha mipuiin nin chunga la tho an ti, Pa le kei an nin hriat no sikin. 4 A zoro a zuang tung tika nangni ki lei hril tâk tih nin inhriat maina hrangin, hi thu hi nin kuang ki insîr a ni.

Irtha Irthiang sintho

“Hi thu hi a phut ata nangni ki la ihril loi a ni, nin kuang ki la om sikin. 5 Atûn chu a ni tîrtu kuang fe hrang ki nia, khan khomin nin laia tukhomin ki fena hrang nirdon mak chêi. 6 Hi thu hi nin kuang kin sîr sikin nin milung kha chardongna’n a sip tâka. 7 “Khannisianlân, thudik tak nangni ki hril, ki ife hi nin ta hrangin a sa ual, ki fe no’n chu Irtharngamtu kha nin kuang zuang no nia, ki fe’n chu nin kuang zuang tîr ki ti. 8 Ama kha a zuang tungin chu, sualna tiang mani, dikna thua mani, roirêlna thua mani, an lei irngai insual tih rammual inhriatir a ti. 9 Sualna lama thiamno chang an ti, keima an ni iam no sikin; 10 Thudika khom thiamno an ichang a ni, Pa kuang ki fe hrang sik le nin ni hmu ta no hrang sikin; 11 roirêlna lama khom thiamno an ichang a ni, hi rammual roirêltu khom thiamno changin a om tâk sikin. 12 “Nin kuang thu insîr hrang tamtak ki la nei, khannisian, atûn chu nangni hrangin inhriat lantak hrai a ti. 13 Irtha dik tak a zuang tung tika chu thutak murdia nangni hruai inlût a ti. Ama phuachôpin thu insîr no ni; thu a idong kha insîr a ta, thil la hong tung hrang khom nangni hril a ti. 14 Ama’n kei ni chôiindôm a ta, ki chong tihai kha lâkin nangni a hril hrang sikin. 15 Pa’n thil a inei murdi ki ta a ni; khasika khan kêng, ‘Irtha’n ki taa om lâkin, nangni hril a ti,’ ki iti a ni.

Chardongna le lômna

16 “Sôtnotea nangni’n ni hmu ta no chin nia, sôtnotea ni hmu nôk nin ti,” a tia. 17 A irchutirhai senkhatin, “Ei kuanga thu’nsîr kha imo a itihna? Sôtnotea ni hmu ta no chin nia, sôtnotea dên ni hmu nôk nin ti, a iti hi, ‘Pa kuang ki fe hrang sikin’ a iti hi? an irtia. 18 Khanchu, ‘Sôtnote’ a iti hi imo a itihna? Imo a insîr tum inhre mak me,” an tia. 19 Jisua’n thu an irdon nuam tih an hriata, an kuang, “Sôtnotea ni hmu ta no chin ni, sôtnotea dên ni hmu nôk nin ti, ki iti kha nin irdon irhlôm mo? 20 Thudik tak nangni ki hril, nangni’n nin mit irthi tâkin chap nin ta, khannisianlân, nin chardong kha lômna la chang a ti. 21 Nupangin nâihâ a tuang laiin chu a sân a char a dong ngaia, a zoro a tung tâk sikin; khannisianlân, nâi a neiin chu a chardong kha inhre ta mah, rammuala mihriam zuang suak kha a lôm sikin. 22 Khaang khan nangni khom atûn hin nin char a donga, khannisianlân, nangni hmu nôk ki ti, nin lungrîl lôm a ti, nin lômna kha tûte’n nangni lâkpai pe no nihai. 23 Kha nikhuaa khan nangni’n ite nir don ta no chin ni. Thudik tak nangni ki hril, Pa kuang i khom nin zongin chu ki’rhmingin nangni pe a ti. 24 Atûn ten ki’rhmingin ite la zong mak chêi; zong roi, khanchu hmu nin ti, nin lôm ar kip theina hrangin” a tia.

Rammual inhnêtu

25 “Kha kha chongirkhekin nin kuang kin sîr ngai a nia; nin kuang chongirkhekin insîr ta loiin fel taka Pa thu nangni ki hril zoro la hong tung a ti. 26 Kha nikhua khan chu nangni’n ki’rhmingin zong nin ta; keima’n nin ta hrangin Pa kuang zong ki ti, ki itihna ni mah. 27 Pa ngei khan lung nangni a thunga, nangni’n kei lung nin ni thunga, Pa rengata zuang ki nih ti nin iam sikin. 28 Pa kuang ata ki zuang suaka, rammuala zuang ki ni, rammual suaksan nôk ki ti, Pa kuang ki ife nôk hrang a ni,” a tia. 29 A irchutirhai khan, “Atûn chu fel takin thu nin sîr tâka, chongirkhekin insîr ta mak che. 30 Nangma’n itinrêng nin hriat, tûte’n nang an irdon khom nang ta mah, atûn chu kin inhriat ta. Hi sika hin Pathian kuang ata zuang ni nih ti kin iam tâk,” an tia. 31 Jisua’n a sâma, “Atûn chu nin iam ta mo? 32 Irngai roi, mâni in chita irthekindarin ki bingin nin ni mâk zoro la tung a ti, a tung thiai ta; khannisian, ki bingin om ma ung, Pa kha ki kuang a om. 33 Keimaa irtharngamna nin hmûna hrangin nin kuang hi thu hi ki insîr a ni; rammuala hin intak nin tuang ngai; khannisian hâi takin om roi! Keiin rammual kin hnê ta,” a tia.

Johana 17

Jisua chongchaina

1 Kha thu kha Jisua’n an sîra, irvân tiang a tanga, “Ka Pa, a zoro a tung ta; ni Nâipa chôiiindôm roh, Nâipa khomin nang a chôiindômna hrangin; 2 Mi murdi chunga irchamneina a kuang ni pêk tâk sikin, Ama khomin ni ipêk murdihai kuang kumtuang hringna a pêk theina hrangin. 3 Hi hi kumtuang hringna chu a ni, nang Pathian tak vai le ni itîr Jisua Krista inhriat hi. 4 Thil tho hrang ni ni ipêk kha ki tho zoia irnênga hin nang ki chôiindôm ta. 5 Ka Pa! rammual om mâna ni kuanga roiinpuina ki inei kha, atûn nangma makunga ngei ni chôiindôm roh. 6 “Rammual ata mi ni ipêkhai kuang nir hming kin langtir ta; ni ta an nia; anni kha ni ni pêka; ni thu khom an zôm ta. 7 Atûn chu thil ni ni ipêk murdi nangmaa suak a nih ti an inhriat ta. 8 Nangin thu ni ni ipêkhai kha an kuang ki pêka, an hong poma; ni kuang ata zuang ki ni ngêt ti an inhriat tâka; nangin keima ni ni tîr ti khom an iam ta. 9 “Keiin an ta hranga ki ingên pe hi, rammual ta hranga ngên pe ni ma ung, nangin ni ni ipêkhai ta hrang a ni, ni ta an ni sikin. 10 Ki ta murdi chu ni ta a ni, ni ta khom ki ta a ni, annia chôiindômin ki om ta. 11 Kei rammuala om ta no ning, anni hi chu rammuala la om an ta; kei chu ni kuang hong kîr hrang ki ni ta. Ka Pa Irthiang! nangin ni ni ipêkhai hi nir hmingin hrunghai roh, Keima le nangma pumkhat ei ini angin, anni khom pumkhat an ni theina hrangin. 12 “An kuang ki om sûng chu nangin keima ni ni ipêkhai hi nir hmingin ki hrung ngai; anni kha ki donsuia, an laia inkhat lua irhmang loia, irhmang nâipa ti no chu, Lekha thu a hong tung irkipna hrangin. 13 Atûn ni kuang hong kîr hrang ki ni ta, hi thil hi rammuala ki insîr a ni; ki lômna annia an nei irkipna hrangin. 14 Ni thu an kuang ki pêk tâka, rammualin anni kha an hmu mâkhaia, keima rammuala mi ki ini loi ang dênin rammuala mi an ni no sikin. 15 “Anni chu rammual ata la suak hrangin nang ngên ma ung, mi sual ata hrung hrangin nang ki ngên a ni. 16 Rammuala mi ni mahai, keima rammuala mi ki ini loi ang hin. 17 Anni chu thutakin irthiangtir roh, ni thu chu thutak a ni. 18 Rammuala ni ni itîr ang hin anni khom rammuala ki itîr a ni. 19 Anni sikin ki irthiang infâi a ni, anni khom thutaka an irthiang theina hrangin. 20 “Hihai ta hrang vai ngên pe ni ma ung, an thu insîr sika keima ni la iam hranghai ta hrang khoma ngên sa ki ni. 21 An rêngin inpumkhat an ni theina hrangin nang ki ngên a ni. Ka Pa nang keimaa ni oma, kei nangmaa ki iom ang hin, anni khom einia an omna hrangin, nangin kei ni ni tîr ti rammualin an iam theina hrangin. 22 Nangin roiinpuina ni ni ipêk kha kei khomin ki pêkhai ta, pumkhat an ni theina hrangin pumkhat ei ni ang dênin. 23 Keima annia, nang keimaa omin, an inpumkhat tak takna hrangin; khanchu ni ni itîr a nih ti rammualin inhriat an ta, lung ni ni thung angin anni khom lung ni thung tih rammualin inhriat an ti. 24 Ka Pa, nangin mi, ni ni ipêkhai hi ki kuanga om hrangin ki nuam, nangin lung ni ni thung sika rammual irsiang mâna ni ipêk ki roiinpuina kha an hmûna hrangin; 25 Ka Pa Fel tak! Rammualin nang inhre mahaia, keiin chu nang kin hriat; hihai khom hin nangin kei ni ni tîr ti an inhriat. 26 An kuang ni’rhming kin hriattira, inhriattir mai ki ti; nangin kei lung ni ni thungna ngei kha annia a oma, keima annia ki om theina hrangin,” a tia.

Johana 18

Jisua an ichel thu

1 Jisua’n kha thu kha an sîr zoiin, a irchutirhai leh an suaka, Kidron dung an irkâna, khataka khan irhuan a oma, a sûnga khan a irchutirhai leh an lûta. 2 An cheltirtu Juda khom, kha hmun kha an hriata, kha khan Jisua leh a irchutirhai an irhmukhôm ngai sikin. 3 Khan, Juda khan sipai pâlkhat le Ochai inlalhai le Farisaihai itîr Tempil enkoltuhai, kha khan a hong hruaihaia; meiser hai, chokser hai, hriamhrei hai an hong chôia. 4 Jisua’n a chunga thil hong tung hrang murdi kha an hriat zita, a va suaka an kuang, “Tu mo nin izong?” a tia. 5 “Nazaret Jisua,” tiin an lei sâma, Jisua’n, “Kei hi ki ni,” a tia. An cheltirtu Juda khom kha an laia a ngîra. 6 Khanchu, “Keima hi ki ni,” an kuang a ti zoi le, hnung tiang an irtôla, irnênga an inrîla. 7 “Tu mo nin izong?” tiin anni kha ar donhai nôka, “Nazaret Jisua,” an tia. 8 Jisua’n, “Keima hi ki nih ti nangni ki hril ta khate, keima nin ni izong a ni’n chu, a danghai hi infetirhai roi,” a tia. 9 A thu’nsîr, “O Pa, Nangin kei ni ni ipêkhai kha, inkhat lua irhmangtir ma ung,” a iti kha a hong tung theina hrangin. 10 Simon Petera chu a khandai vong a phôia, Ochai inlaltak suak mikuar chang tianga a sât thâk pea. Kha suak irhming kha Malka a ni. 11 Jisua’n Petera kuang khan, “Khandai kha a koka thun roh, Pa’n a ni ipêk tuangna khilât hi ki i-in loi hrang ma ni?” a tia.

Jisua Anna makunga a ngîr

12 Khan, sipai pâl le an hruaitu le Judahai Tempil enkoltu, irchun khômhai khan Jisua kha an chela, an khita, 13 Anna kuang an hruai masaa, Kaiafa tarpupa a ni sikin. Kaiafa chu, kha kuma khan Ochai inlaltak a ni. 14 Kaiafa khan, “Mipui thi irthûla mi inkhat thi a sa ual,” tia Judahai tipuitu chu a ni.

Petera’n Jisua a phil

15 Simon Petera le irchutir dang inkhatin Jisua kha an zuia, kha irchutir kha Ochai inlaltak hmêlhriat a ni, Ochai inlaltak tual laia khan Jisua a lûtpui saa. 16 Petera chu mikot pên tiang a ngîra; irchutir dang Ochai inlaltak hmêlhriat kha a va suaka, mikot enkoltu dôngmate kha a chongpuia, Petera kha a hruai inlûta. 17 Mikot enkoltu dôngmate khan Petera kuang, “Nang khom, hi pa irchutirhai laia mi ni ini loi ma ni?” a tia. Ama khan, “Ni ma ung,” a tia. 18 Siahlohai le enkoltu sipaihai khan an ngîra, a dâi hrai sikin meiholin mei an thoa, an uata; Petera khom ngîr pumin an laia mei lum kha a va uat saa.

Ochai inlaltakin Jisua chong ar don

19 Ochai inlaltak khan Jisua kha a irchutirhai thurchi le a thu irchutir chungchâng ar dona. 20 Jisua’n a sâma, “Thangphuangin mi tin kuang thu kin sîr ngai; Juda murdi fe irchunna Sinagok haia, Tempil haia, ki’rchutir mai ngaia, inrûkin ite insîr ngai ma ung. 21 Ithoa mo ni ni irdon? Ki thu’nsîr irngaituhai kuang imo ki insîr ngai irdonhai ro ba, imo ki insîr an inhriat,” a tia. 22 Kha kha an sîr zoiin chu enkoltu sipai ngîrhai laia inkhat khan Jisua hmâia an bêna, “Ithoa mo Ochai inlaltak kha, khaanga ni isâm?” a tia. 23 Jisua’n a sâma, “Ki ti insualna a om duaiin chu, imo ki ti insual, hi mihai hi inhril roh. Khannisian, ki tho indikna a omin chu, nin hril ro, khannisian ki tho’n dik a omin te ithoa mo ni ni inbên?” a tia. 24 Khanchu, Anna khan khit pumin Ochai inlaltak Kaiafa kuang a tîr tâka.

Petera’n Jisua a phil nôkna

25 Simon Petera khan ngîrin mei lum a la uata, “Nang khom hi irchutirhai laia mi ni mak che mo?” an tia. Khan Petera’n a phila, “Ni ma ung,” a tia. 26 Ochai inlaltak siahlohai laia inkhat, Petera’n a mikuar a isât thâk pe urêng khan, “Irhuana khan a kuang nang ki ihmu mo ni ma?” a tia. 27 Petera khan a phil nôka; khanchu âr a khuang zôi zel tâka.

Jisua Pilata makunga

28 Zîng taka Jisua chu Kaiafa in ata Ramoptu in Praitoriana an hong hruaia. Juda irchamneituhai chu, dân ang taka irthianga Ferkân Kût fâk an nuam sikin Ramoptu in Praitoriana lût mahai. 29 Khanchu, Pilata chu an kuang a va suaka, “Hi mi hi imo a tho’nsuala nin ibe,” a tia. 30 Anni khan, “Hi mi hin thilsual tho no sian chu ni kuang hong hruai no ni ung,” an tia. 31 Pilata’n, “Nangni’n hruai unglân, nin dân angin a chungthu rêl pe roi,” a tia. Khan, Judahaiin a kuang, “Keini’n chu mi that theina dân nei ma ung,” an tia. 32 A thi hrang thu Jisua’n a lei insîr a hong tung theina hrangin khahai kha a hong iom a ni. 33 Khanchu, Pilata chu Praitoriana a lût nôka, Jisua kha a koia, a kuang, “Judahai rêng mo ni nih?” a tia. 34 Jisua’n a sâma, “Kha kha nangma milung suaka ni iti mo, mi dangin ki chungchâng nang an ihril mo?” a tia. 35 Pilata’n a sâma, “Kei hi Juda mi mo ki ini? Ni chipuihai le Ochai inlalhaiin ki kuang nang an hong ihruai a ni hi; imo ni iti?” a tia. 36 Jisua’n a sâma, “Ki rêng Ram hi chu rammuala om ni ma, ki Ram chu hi rammuala om ni sianlân, Judahai kuta incheltira ki om nona hrangin ki hnung zuihaiin doihai an ta, ki rêng Ram chu hitaka hin ni mah,” a tia. 37 Pilata’n, “Khante, rêng mo ni ini?” a tia. Jisua’n a sâma, “Nangma’n rêng ni ni ti khate; kei chu thutak inhriattir hi ki isuakna san le rammuala ki izuangna san chu a ni; tukhom thutaka omhai chu ki’rhâi an irngai ngai,” a tia. 38 Pilata’n a kuang “Thutak chu imo a ini?” a tia.

Jisua thi hrangin an inkung

Kha kha an sîr zoiin chu Judahai kuang a va suak nôka, an kuang, “A chunga thiamno inchang hrangin ite a bi hmu ma unga. 39 Khannisian, nin dân angin Ferkân Kût zoro’n intângna ina om mi inkhat kin sua ngaia. Judahai rêng hi nangni insua pe inlân nin nuam mo?” a tia. 40 Khannisianlân, inring takin an khêka, “Hi pa hi chu ni no ri se, Barabba kha ni ri se,” an tia. (Barabba kha hrâtlâksong ngai mi a ni.)

Johana 19

1 Khan, Pilata’n Jisua a hruaia, a vîka. 2 Sipaihaiin ilhling lukhum an siama, an inkhumtira, khanchu, songkol irfual senduk an innghâktir sa, 3 “Chubai, Judahai rêng!” an tia; an inbêna. 4 Pilata chu pên tiang a va suak nôka, an kuang, “En u ta, a chunga ite a sualna hmu ma ung tih nin inhriatna hrangin nin kuang ki hong ihruai suak hi,” a tia. 5 Khanchu, ilhling lukhum khumpumin songkol irfual senduk innghâkin Jisua kha a hong suaka. Pilata’n an kuang, “En u ta, hi mihriam hi,” a tia. 6 Ochai inlalhai le a nghâkhaiin an hmu’n chu, “Krosa hembe roh, Krosa hembe roh,” tiin an khêka. Pilata’n an kuang, “Nangni’n hruai unglân, Krosa hembe roi, keiin chu ite a chunga a sualna hmu ma ung,” a tia. 7 Judahaiin an sâma, “Dân kin neia, kha dân ang khan a ithi hrang a ni, Pathian Nâipa ar ti sikin,” an tia. 8 Pilata’n kha thu kha an hriatin chu a chi nôk uala. 9 Praitoriana a lût nôka, Jisua kuang, “Kho tianga mi mo ni ini?” a tia. Khannisianlân, Jisua’n sâm ma. 10 Pilata’n a kuang, “Ni ni isâm loi hrang mo? Nang insua thei ki ni, Krosa nang hembe thei ki ni, ti hi ni inhriat loi ma ni?” a tia. 11 Jisua’n a sâma, “Chung tiang ata pêk ni ni no’n chu, ki chunga irchamneina rêng nei no chi ni, khasikin, ni kuanga ni pêktu khan sual a pêl intam ual a ni,” a tia. 12 Khasikin Pilata’n ama insua hrang lam a zong tâka, khannisianlân, Judahai an khêka, “Hi pa hi nin sua’n chu Kaisara rual ni no chi ni,” an tia. 13 Pilata’n kha thu kha an hriatin chu Jisua kha a hruai suaka, “Lungirchuan” Hebrai chonga chu Gabbatha an iti roirêlna toihmuna khan a toia. 14 Ferkân Kût irtûng ni a nia, sûn lai tak a ni. Judahai kuang khan, “En u ta, nin rêng hi,” a tia. 15 Khahai kha an khêka, “Inboipai roh, inboipai roh, Krosa hembe roh,” an tia. Pilata’n, “Nin rêng hi Krosa ki ihembe hrang mo?” a tia. Ochai inlalhaiin an sâma, “Kaisara ni no chu rêng dang nei ma ung,” an tia. 16 Khanchu Pilata’n Jisua kha Krosa hembe hrangin a pêkhai tâka.

Jisua hembe thu

Khanchu, Jisua kha an hruai tâka, 17 Khan a kros kha irputin “Luru hmun” Hebrai chonga Golgotha an iti hmun dênin a fe tâka. 18 Khatak khan krosa an hembea, mi dang inhni, a sîr le a sîra an hembe saa, a laia Jisua. 19 Pilata’n inhriatirna a’rziaka, “Nazaret Jisua, Judahai rêng,” tiin kros rêla a târa. 20 Inhriatirna kha Juda tamtakin an tepa, Jisua an hembêna hmun kha khopui kôl a ni sikin Hebrai, Rom, Grik chongin irziak a ni. 21 Juda Ochai inlalhai khan Pilata kuang, “Judahai rêng tiin irziak no roh, Judahai rêng ki ni a ti, tiin irziak roh,” an tia. 22 Pilata’n a sâma, “Ki irziak chu ki’rziak zoi ta,” a tia. 23 Sipaihaiin Jisua krosa an hembe zoiin chu a silkaihai an lâk pea, sipai minliin an irsema, an sika phêk kha khatin an dong. A songkol irfual an lâk saa, kha kha insui loi songkol a nia, a ring ata a pumpuia phan a ni. 24 Anni khan, “Hi hi chu ir-ekthêr no roi, tu ta hrang tak mani inhriatna hrangin tasân ei ti,” an tia. “Ki silkaihai an irsema, Ki songkol hrangin tâ an sâna,” ti irziak kha a hong tung indik hranga a ni. Sipaihai khan kha kha an tho tâk a ni. 25 Jisua Kros kôla khan, a nu le a nu zuarpuinu Mari, Klopa dôngma le Magdala mi Mari hai an ngîra. 26 Jisua’n a nu le a kôla ngîr irchutir lung a ithungtu kha a hmu’n chu a nu kuang, “Ka nu, en ta, ni nâipa kha,” a tia. 27 Irchutir kuanga khom khan “En ta, ni nu kha,” a tia. Kha zoro ata chu a irchutir kha ama ina om hrangin kha nu kha a hruai tâka.

Jisua thi thu

28 Kha zoi hnung chu Jisua’n itinrêng a tung irkip ta ti an hriata; Pathian lekha thu a tung theina hrangin, “Ki tui an hrâl e,” a tia. 29 Khataka khan bêl, uain thûra sip, a oma; khanchu sponj, uain thûra an inchie kha, husop khianghrolin an târa, a hmûra an hong intungtira. 30 Jisua’n uain thûr kha a lei in zoiin chu, “A’rzoi ta,” a tia; khanchu a lu a kûna, a hrang a chat ta.

Jisua kânga an sun

31 Judahai irtûng ni a nia, ruakhai kha Sabat nia Krosa a om mai nona hrangin, kha Sabat kha nikho roiinpui a nia, Judahai khan mi hembehai ke inkhiakhaia, an ruakhai insum hrangin Pilata kuang an ngêna. 32 Khanchu, sipaihai an honga, Jisua pâla hembehai, a matonpu le a dang kehai an khiak pehaia. 33 Jisua kha an va pana, a thi tah ti an inhriata, khannisian a ke chu khiak pe mahai. 34 Sipai laia inkhat khan a kânga ufeiin a suna, thisen le tui a zuang luang suak tâka. 35 Mit ngeia hmutu insîr a ni, nangni khomin nin iamna hrangin. A thu inhriatir hi a dika, thu dik an sîr ti inhretu inkhat a om. 36 Pathian lekha thu’n “A ru inkhat lua inkhiak ni no ni,” ti a hong indikna hrangin ama kha a hong iom a ni. 37 Pathian lekha thu dangin, “An isunna kha la en an ti,” a ti saa.

Jisua phûma a om thu

38 Kha zoi hnung chu Arimathai khuaa om Josefa, Jisua irchutir, Judahai a chi sika irthuptu khan, Pilata kuang Jisua ruak la hrangin a ngêna. Pilata’n a lei phal pea. Khanchu, a ruak kha a va lâka. 39 Nikodema, zâna a kuanga hongtu kha mura le aloe irpolsai, her sômthum dôr chôiin a honga. 40 An inhni khan Jisua ruak kha an lâka, Judahai irphûm dân angin thil mirimhoihai leh khan puan irnêm silin an tuama. 41 Ama an hembêna hmuna khan irhuan a oma; irhuana khan thân thar, tûte lan zâlna ngai loi a oma. 42 Judahai irtûng ni a ni sikin le thân kha an kôl renga om a nia, Jisua kha an phûm ta.

Johana 20

Jisua thoinôk thu

1 Pathian ni zîng taka, thingchangvârroa chu Magdala mi Mari kha thâna khan a va fea, lung kha thân ata lâkpaiin a hmua. 2 Khanchu Simon Petera le irchutir dang Jisua’n lung a ithungtu kuang khan a van tâna, an kuang, “Thân ata Rengpa kha an lâk suaka, khôn mo an isia inhre ma ung,” a tia. 3 Khanchu, Petera le irchutir dang kha thân tiang panin an suak tâka. 4 An ruaiin an intân suama; irchutir dang kha Petera nêkin an tân hrât uala, thân kha a tung masa a ni. 5 Kûnin a vênga, puan irnêm sil omhai kha a hmua, a sûnga chu lût mah. 6 Simon Petera khom a hnunga a hong tung tâka, thân sûnga khan a lûta, puan irnêm sil omhai kha a hmua, 7 a lu khitna puan khom kha, puan irnêm sil kôla om loiin irzuata a binga omin a hmua. 8 Irchutir dang, thân tung masa khom kha a lût sa tâka, a hmua, a iam ta. 9 Mithi lai ata thoi nôk hrang a nih ti Pathian lekha thu kha lan hre thiam mahaia. 10 Khanchu, irchutirhai kha an in tiang an kîr nôk tâka.

Magdala mi Mari kuanga Jisua inlârna thu

11 Khan, Mari kha thân pên tiang chap puma ngîrin a kûna, thân sûng kha a vênga. 12 Vântîrtôn inhni, puan cheka irvo’n, Jisua an inzâlna lu thun tiang inkhat, ke thuan tiang inkhat toiin a hmuhaia. 13 Anni khan a kuang, “Nupang, ithoa mo ni ichap?” an tia. Ama khan an kuang, “Ki Rengpa an lâkpaia, an isiana inhre ma ung,” a tia. 14 Kha kha an sîr zoiin chu a hong irheia, Jisua ngîr kha a hmua, Jisua a nih ti inhre mah. 15 Jisua’n a kuang, “Nupang, ithoa mo ni ichap? Tu mo ni izong?” a tia. Ama khan irhuan enkoltu mani a sôna, a kuang, “Ka Pu, ama kha ni ilâkpai a ni’n chu, ni isiana nin hril ro ba; khanchu la ki ti,” a tia. 16 Jisua’n a kuang, “Mari,” a tia. Ama khan ama tiang a hong irheia, Hebrai chongin, “Rabboni,” a tia, (Kha kha “Irchutirtu” tihna a ni.) 17 Jisua’n a kuang, “Ni tôn no roh, Pa kuang khom la hong fe ma ung; khannisianlân, ki urênghai kuang va fe’n lân, an kuang, ‘Ka Pa, nin Pa, Ki Pathian, nin Pathian kuang kâi hrang ki ni’ a ti, ti roh,” a tia. 18 Mari, Magdala mi kha a fe tâka, irchutirhai kuang, “Rengpa kha ki hmu ta,” a va tia, a kuanga thu a insîr pe kha a hrilhaia.

Irchutirhai kuang Jisua an lârna thu

19 Pathianni khohloi a nia, Judahai an chi sikin irchutirhai omna mikothai kha an khâr tâka, Jisua a honga, an laia a hong ngîra, an kuang, “Nin chunga irtharngamna om ri se,” a tia. 20 Kha kha an sîr zoiin chu a kut le a kâng an entirhaia, Rengpa kha an hmu’n chu irchutirhai kha a sân an lôm tâka. 21 An kuang, “Nin chunga irtharngamna om ri se,” a ti nôka. “Pa’n keima a ni itîr ang dênin kei khomin nangni ki tîr a ni,” a tia. 22 Kha kha an sîr zoiin chu, “Irtha Irthiang nei roi, tiin an chunga a phûk a mût khumhaia. 23 Tu sual khom nin ingaidamhai ka chu ngaidam ni an ta, nin ingaidam loi chu ngaidam ni no nihai,” a tia.

Thoma kuanga Jisua inlârna

24 Sômhleihnihai laia inkhat, Thoma, (Phîra) an iti kha, Jisua hong laiin an laia om maka. 25 Irchutir danghai khan a kuang, “Rengpa kha kin hmu ta kêng,” an tia. Ama khan, “A kuta thîr hembêna sabê ki hmua, thîr hembêna sabêhaia ki kut leh ki tôna, a kâng kin them mâka chu iam no ning,” a tia. 26 Sûn riat hnunga a irchutirhai kha in sûnga an om irchun nôka, Thoma khom an laia a om saa, Mikothai kha an kala, khannisianlân Jisua a honga, an laia a hong ngîra, “Nin chunga irtharngamna om ri se,” a tia. 27 Khan, Thoma kuang khan, “Ni kut pârin hong inthemin lân, ki kuthai en ro; ni kutin hong inbanin lân, ki kâng hi tôn roh; iam loiin om no’n lân iam zôi zel roh,” a tia. 28 Thoma’n a sâma, “Ki Rengpa le ki Pathian,” a tia. 29 Jisua’n a kuang, “Ni ni hmu sika iam mo ni inih? Hmu loia iamhai chu an râlvân a sa,” a tia.

Hi lekhabu irziakna san

30 Jisua’n irchutirhai makunga khan sinirkhêl dang tamtak a thoa, kha kha hi lekhabua irziak ni mah. 31 Jisua kha Krista Pathian Nâipa a nih ti nin iam theina hrang le nin iam sika khan ama irhminga hringna nin nei theina hranga hihai hi irziak a ni.

Johana 21

Irchutir sarihai kuanga Jisua inlârna

1 Kha zoi hnung chu Jisua kha Tiberi dîla a irchutirhai kuang an lâr nôka, hiang hin an lâr a ni. 2 Simon Petera, Thoma (Phîra an iti,) Galili rama Kana khuaa om. Nathanaela, Zebedaia nâipahai inhni, a irchutir inhni danghai an om irchuna. 3 Simon Petera khan an kuang, “Nga chel fe hrang ki ni,” a tia. Anni khan, “Keini khom ni kuang zuang sa kin ti,” an tia. An fe suaka, irkuanga an chuang tâka; khannisian kha zâna khan chu ite man mahai. 4 Khua a hong vârin chu Jisua kha ivadung kôla chiaiphoia a ngîra; khannisianlân, irchutirhai khan Jisua a nih ti inhre mahai. 5 Jisua’n an kuang, “Nâihaio, ite nin iman loi mo?” a tia. Anni khan, “Man viat ma ung,” tiin an sâma. 6 Jisua’n an kuang, “Irkuang sîr chang tianga khan lên vôr unglân, man nin ti,” a tia. Khanchu an vôra, nga kha a tam ta hrai sikin kaisua thei ta mahai. 7 Irchutir, Jisua’n lung a ithung khan Petera kuang, “Rengpa a ni so te,” a tia. Simon Petera’n Rengpa a nih ti an hriatin chu puan a sila, (puan boia om a ni sikin) dîla khan ar chôm thâk tâka. 8 Irchutir danghai khan irkuang chîn le, lêna nga sip kaisua pumin an hong pana. Muang ata hla maka, metar irzakhat vêla om an ni. 9 Muanga an va suakin chu, meihola mei tho, a chunga nga le bai om kha an hmua. 10 Khan, Jisua’n, “Atûn hin nin nga man kha hong chôi u ta,” a tia. 11 Khanchu, Simon Petera kha irkuanga a va chuanga, lên kha nga lian tak tak sipin muanga a kai suaka, a rêngin irzakhat sômringa inthum a ni. Khaang dôr kha om khom sianlân, lên kha chet mah. 12 Jisua’n an kuanga, “Hong unglân fa ta roi,” a tia. Irchutirhai laia tukhomin, “Tu mo ni ini?” ti’n irdon ngam mahai. Rengpa a nih ti an inhriat infel sikin. 13 Jisua kha a fea, bai a lâka, an kuang a pêkhaia, nga khom khaang dênin a pêkhaia. 14 Kha kha Jisua mithi lai ata a thoinôk hnunga an lâr voithumna a ni.

Ki belrahai infa ro

15 Khan, an fâk zoiin chu Jisua’n Simon Petera kuang, “Simon, Johana nâipa, hihai nêkin nangin lung mo ni ni thung ual?” a tia. Ama khan, “O Rengpa, lung nang ki thung ti nin hriat,” a tia. Jisua’n a kuang, “Ki belra tehai infa roh,” a tia. 16 A voihninaa khom Jisua’n a kuang, “Simon, Johana nâipa, nangin lung mo ni ni thung?” a ti nôka. Ama khan, “O Rengpa, lung nang ki thung ti nin hriat,” a ti nôka. Jisua’n, “Ki belrahai enkol roh,” a tia. 17 A voithumna khan a kuang, “Simon, Johana nâipa, nangin lung ni ni thung mo?” a tia. Jisua’n a voithumna’n, “Nangin lung ni ni thung mo?” a ti pe nôk sikin, Petera irngai a siat tâka. “Rengpa itinrêng nin hriat, lung nang ki thung ti nin hriat,” a tia. Jisua’n a kuang, “Ki belrahai infa roh. 18 “Thudik tak nang ki hril, ni nâiinpang laiin nir siama, ni kong ni khita, ni nuamna tiang tiang ni chai ngaia, ni ulian tika chu ni kut phar ni ta, mi dangin ni kong nang khit pe an ta, ni nuam loina ti tiang nang hruai an ti,” a tia. 19 (Kha thu kha Jisua’n an sîr pena chu, Petera thi lam hrang le Pathian a la ichôiindôm hrang a nih ti irhmutir hrangin kha thu kha a insîr a ni.) Kha kha an sîr zoiin chu Jisua’n a kuang, “Ni zui roh,” a tia.

Jisua le irchutir dang

20 Khan, Petera kha a hong irheia, irchutir, Jisua’n lung a ithung, zânbu fâk laia Jisua tiang va kûna, “Rengpa, tu mo nang a chel hrang?” tia irdontu kha a hnunga a hmua. 21 Ama kha Petera’n a hmu’n chu Jisua kuang, “Rengpa, hi pa hin imo a itho hrang?” a tia. 22 Jisua’n a kuang, “Ki zuang nôk mâka hring mai hrangin nuam khom inlân, imo ni ilo hrang? Ni zui zôi zel roh,” a tia. 23 Khan, kha irchutir kha thi loi hrang angin urênghai laia thu an thang tâka. Khannisianlân, Jisua’n thi no nih ti a kuang a insîr ni mah. “Ki zuang nôk mâka hring mai hrangin nuam khomin lân, imo ni ilo hrang?” a itihna kêng a ni. 24 Kha irchutir kha hi thu inhretu le irziaktu hi a nia, a thu inhriatir hi a dik a nih ti ei inhriat. 25 Thil dang tamtak Jisua’n a itho a la oma, khahai kha irziak suak zit hrang ang ni sian, lekhabu irziak hrang chu rammuala khom hin inlengin iam ma ung.